དཔལ་སམྦུ་ཊའི་རྒྱུད་ལས་གསུངས་པའི་ཤེར་ཕྱིན་དཀར་མོའི་འཁོར་ལོའི་མན་ངག་ཤེས་རབ་སྣང་བ།
༈ དཔལ་སམྦུ་ཊའི་རྒྱུད་ལས་གསུངས་པའི་ཤེར་ཕྱིན་དཀར་མོའི་འཁོར་ལོའི་མན་ངག་ཤེས་རབ་སྣང་བ་ཞེས་བྱ་བ་བཞུགས་སོ། །ཨོཾ་སྭ་སྟི། འཕགས་བཞིའི་སྐྱེད་དང་རོལ་པའི་ཡུམ། །བླ་མ་ཤེས་རབ་ལྷ་མོ་ལ། །།བཏུད་ནས་རིག་པའི་འཁོར་ལོ་ནི། །བློ་གྲོས་སྣང་བ་རྒྱས་ཕྱིར་དབྱེ། །འདི་ལ་གསུམ། རྩ་བའི་ཁུངས་དགོད་པ། མན་ངག་ལག་ཏུ་བླང་ཚུལ། དེའི་ཕན་ཡོན་བསྟན་པའོ། །དང་པོ་ནི། དཔལ་ཀྱཻ་རྡོ་རྗེའི་ཆ་མཐུན་གྱི་རྒྱུ་སུམྦུ་ཊའི་བརྟག་པ་གཉིས་པའི་རབ་བྱེད་བཞི་པ་ལས། འཁོར་ལོ་འདབ་མ་བརྒྱད་པ་འདི། །ཁ་དོག་དཀར་པོ་ཤིན་ཏུ་མཛེས། །མཉམ་ཉིད་གཟུགས་སུ་བསམས་ནས་ནི། །ཁམས་གསུམ་གྱི་ནི་རང་བཞིན་གྱིས། །སྔར་གསུངས་མཚན་ཉིད་ཡང་དག་ལྡན། །གོང་དུ་གསུངས་པས་བསྒྲུབ་པར་བྱ། །ཤེས་རབ་འབར་བའི་ལས་རྣམས་ནི། །འདི་ཡི་འཁོར་ལོ་བསྒོམ་པར་བྱ། །ཨོཾ་པྲཛྙེ་མ་ཧཱ་པྲ་ཛྙེ་ཧཱུྃ་སྭཱ་ཧཱ། དངོས་པོའི་ངོ་བོས་བསྒོམ་པར་བྱ། །འོད་ཟེར་འབར་བ་དུ་མ་ཡི། །ཟླ་བའི་དཀྱིལ་འཁོར་དབུས་གནས་པར། །ཤེས་རབ་བདག་ཉིད་རྣམ་པར་སྤྲུལ། །ཕྱག་གཉིས་སེམས་དཔའི་སྐྱིལ་མོ་ཀྲུང་། །རྒྱན་རྣམས་ཀུན་གྱིས་རྣམ་པར་བརྒྱན། །ཁ་དོག་དཀར་པོ་འོད་གསལ་མ། །ཤེས་རབ་བདག་ཉིད་གཟུང་བར་བྱ། །འདི་ཡི་ས་བོན་བཟླས་ནས་ནི། །ཤེས་རབ་འདབ་
མ་རབ་ཏུ་འཕེལ། །དཔེ་གཅིག་ཏུ་ལྟ་བུར་ཞེས་པའང་ཡོད། །གུད་པའམ་བློ་ནི་དམན་པ་ཡི། །ཤེས་རབ་འཕེལ་བའི་རྣལ་འབྱོར་རོ། །ཞེས་པ་སྟེ། འཁོར་ལོ་དང་། སྔགས་དང་། ཏིང་ངེ་འཛིན་དང་། དེའི་ལྷཕན་ཡོན་བསྟན་པ་རྣམས་རིམ་པར་འཁོར་ལོ་སོགས་དང་། ཨོཾ་པྲཛྷེ་སོགས་དང་། དངོས་པོའི་སོགས་དང་། འདིའི་ས་བོན་སོགས་ཀྱིས་བསྟན་པའི་ཚུལ་སློབ་དཔོན་རིན་པོ་ཆེ་དཔལ་ལྡན་རྩེ་མོའི་ཞབས་ཀྱིས་ཀྱང་། ཤེས་རབ་འཕེལ་བའི་ཕ་རོལ་ཏུ་ཕྱིན་མའི་སྒྲུབ་ཐབས་ལ་བཞི་ལས། དང་པོ་འཁོར་ལོའི་བྱ་བ་ནི་འཁོར་ལོ་ཞེས་ཤློ་ཀ་གཉིས་ཏེ། སྒྲོལ་མའི་སྐབས་སུ་བསྟན་པ་བཞིན་ནོ། །ཨོཾ་ཞེས་བྱ་བ་ལ་སོགས་པ་ནི་སྔགས་བསྟན་པའོ། །དངོས་པོའི་ངོ་བོས་བསྒོམ་པར་བྱ། ཞེས་བྱ་བ་ལ་སོགས་པས་ནི་བདག་གི་རྣལ་འབྱོར་སྟོན་ཏེ། སྔར་བརྗོད་པའི་ཚུལ་གྱིས་ཚོགས་གཉིས་དང་། སྲུང་བའི་འཁོར་ལོ་བྱས་ལ་པདྨ་དང་ཟླ་བའི་དཀྱིལ་འཁོར་གྱི་དབུས་སུ་པྲ་ལས་སམ་དེ་ལས་པདྨ་ལ་སྟེ། སྙིང་པོའམ་ཆོ་ག་གསུམ་ལས་བསྐྱེད་པར་བྱའོ། །འདི་ལའང་སྨོས་པའི་བྱེ་བྲག་གིས་ཡན་ལག་རྫོགས་པར་བྱ་སྟེ། དབུ་རྒྱན་ལ་ནི་སྣང་བ་མཐའ་ཡས་སོ། །དེ་ནས་ཐུགས་ཀར་སྔགས་ཀྱི་ཕྲེང་བ་བཀོད་དེ་བཟླ་བར་བྱ་ཞེས་བྱ་བའི་དོན་ཏོ། །འདིའང་འབུམ་ཕྲག་བཅུ་ལས་བརྒྱད་འགྱུར་ནི་གྲངས་ཀྱི་
བསྙེན་པའོ། །དེ་ལྟར་བསྒོམས་ན་འདིས་ལས་ཅི་འགྲུབ་པ་དེ་བསྟན་པའི་ཕྱིར་ཤེས་རབ་འདབ་མ་ཞེས་བྱ་བ་ལ་སོགས་པ་སྟེ། འདིས་ཤེས་རབ་འཕེལ་བ་ཁོ་ན་འགྲུབ་བོ། །ཞེས་གསུངས་སོ། །གཉིས་པ་ལ་བདུན། རྣལ་འབྱོར་གང་གིས་འབྲི་བ། ཐབས་ཇི་ལྟ་བུས་བྲི་བ། གཞི་གང་ལ་བྲི་བ། སྣག་ཚ་དང་སྨྱུ་གུ་གང་གིས་འབྲི་བ། རྣམ་པ་ཇི་ལྟ་བུར་བྲི་བ། བྲིས་ནས་ཇི་ལྟར་བསྒྲུབ་པ། བསྒྲུབས་ཟིན་ནས་ཇི་ལྟར་བྱ་བའོ། །དང་པོ་ནི། རྣལ་འབྱོར་པ་དབང་དང་རྗེས་སུ་གནང་བ་ཐོབ་ཅིང་དམ་ཚིག་དང་ལྡན་པ། བསྙེན་སོགས་དག་པར་བྱས་པས། འདི་ཉིད་ལས་གསུངས་པའི་མངོན་རྟོགས་སྒྲུབ་ཐབས་བརྒྱ་རྩ་ནས་འབྱུང་བ་ལྟར་རམ། གུར་གྱི་རྒྱུད་དང་ཆ་མཐུན་པར་གསུངས་པས་དེ་ཉིད་ལས་གསུངས་པའི་ཤེར་ཕྱིན་དཀར་མོའི་བསྒོམ་བཟླས་ཇི་སྐད་བཤད་པ་བཞིན་བསྒྲུབས་པས་བདག་ཉིད་ནུས་ལྡན་དུ་བྱའོ། །གཉིས་པ་ནི། འདི་ཉིད་ཤེས་རབ་འཕེལ་བར་བྱེད་པ་རྒྱས་པའི་ལས་ཡིན་པས། རྒྱལ་ཕུར་འགྲུབ་སྦྱོར་སོགས་རྣམ་པར་དགེ་བའི་ཉིན་ཉི་ཤར་གྱི་དུས་སུ་རྒྱས་པའི་བསམ་པས་རྒྱན་གོས་སེར་པོ་དང་བཅས་ཏེ་ཁ་བྱང་དུ་ཕྱོགས་ལ་བྲིའོ། །གསུམ་པ་ནི། །གཞུང་དུ་དམིགས་བསལ་མ་གསུངས་པས་གྲོ་གའམ་རས་སམ་ཤོག་བུ་དཀར་པོ་དྲི་མ་དང་བུག་བརྡོལ་སོགས་ཀྱི་
སྐྱོན་མེད་པ་ཆེ་ཆུང་ཇི་ལྟར་འཚམས་པ་ལ་བྲིའོ། །བཞི་པ་ནི། གཞུང་དུ་དམིགས་ཀྱིས་མ་གསལ་ཡང་། རྒྱས་པའི་ལས་ལ་བསྔགས་པའི་དྲི་བཟང་པོའི་ཆུ་དང་བཅས་པའི་མཚལ་གྱིས་སྣག་ཚ་དང་། །འབྲས་བུ་དང་བཅས་པའི་ཤིང་གི་སྨྱུ་གུས་བྲི་བར་བྱའོ། །ལྔ་པ་ནི། འཁོར་ལོ་ལྟེ་བ་དང་བཅས་པའི་མུ་ཁྱུད་རིམ་པ་གཉིས་ཀྱི་དབུས་སུ་པཾ། དེའི་མདུན་ནས་བརྩམས་ཏེ་གཡས་སྐོར་གྱིས། ཨོཾ་འཆང་ཚུབ་པོ་མིང་འདི་ཞེས་བྱ་བའི་ཤེས་རབ་རྒྱས་པར་མཛོད་ཅིག་ཧཱ་ཞེས་པའམ། ཨོཾ་དྷ་ར་ཀ་སྱ་པྲཛྙཱ་པུཥྚིཾ་ཀུ་རུ་ཧཱ། མུ་ཁྱུད་དང་པོ་ལ་འདབ་མ་བརྒྱད་དུ་བྱས་པའི་པྲ་གྱི་མདུན་ཤར་ནས་བརྩམས་ཏེ་གཡས་སྐོར་དུ། པྲ། ཛྷེ། མ། ཧཱ། པྲ། ཛྙེ། ཧཱུྃ། སྭཱ། །ཞེས་པའི་ཡིག་འབྲུ་རེ་དགོད། །གཉིས་པ་ལ། ཨཱ་ལི་བཅུ་དྲུག་གཡོན་སྐོར་དུ་དགོད། དེའི་ཕྱི་རོལ་དུ་ནོར་འཛིན་པ་ཏྲ་འོད་ཟེར་འཕྲོ་བས་བསྐོར་ནའང་རུང་ངོ་། །སྔག་གི་འབྲི་ཚུལ་གོང་ལྟར་བྱེད་པ་ཕྱག་ལེན་གྱི་ཟིན་བྲིས་ལས་འབྱུང་ཞིང་། བུ་སྟོན་རིན་པོ་ཆེས་ཡི་གེ་གཡོན་སྐོར་དུ་འབྲི་བར་གདན་བཞི་རྩ་འགྲེལ་དུ་བཤད་དོ་ཞེས་གསུངས་པ་ལྟར་ན་སྤེལ་ཚིག་དང་འདབ་མའི་སྔགས་ཀྱང་དབུ་ཕྱིར་བསྟན་གཡོན་སྐོར་དུ་དགོད་པར་བྱའོ། །མུ་ཁྱུད་གཉིས་པར་བུ་སྟོན་རིན་པོ་ཆེས་དབྱངས་ཡིག་ཁོ་ན་དགོད་པར་གསུངས་པ་ལྟར་བྲིས་ཀྱི། གཞན་དུ་དབྱངས་གསལ་གཉིས་ཀ་
དགོད་པར་གསུངས་པ་ལྟར་ན་མུ་ཁྱུད་གཉིས་བྱས་པའི་ནང་མ་ལ་དབྱངས་གཡོན་སྐོར་དང་། ཕྱི་མར་གསལ་བྱེད་གཡས་སྐོར་དུ་བྱའོ། །དྲུག་པ་ནི། དེ་ལྟར་ལེགས་པར་བྲིས་ནས་དྲི་བཟང་པོས་བྱུགས་པའི་འཁོར་ལོ་སྟེགས་བུའི་དབུས་སུ་མེ་ཏོག་སིལ་མ་བཀྲམ་པའི་ཁར་ཞལ་རང་ལ་བསྟན་ཏེ་བཞག་པའི་མདུན་དུ་གཏོར་མ་དང་། མཆོད་པ་བཤམ། བདག་གི་རྣལ་འབྱོར་སྔོན་དུ་འགྲོ་བས་འཁོར་ལོས་སྦྱོང་ཁྲུས་རྒྱས་བསྡུས་གང་རིགས་བྱ། བསང་སྦྱངས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་གདན་ལ་སྔགས་ཀྱི་ཡིག་འབྲུ་རྣམས་པཾ་ལས་པདྨ་དཀར་པོ་པུཾ་གྱིས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་དཀར་མོ་ཞལ་གཅིག་མ། ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་པའི་མཐེབ་མཛུབ་བར་དུ་མེ་ཏོག་པདྨའི་སྡོང་བུ་འཛིན་པ། འདབ་མ་སྙན་གཡས་གཡོན་གྱི་ཐད་ཀར་ཁ་བྱེ་བའི་ཟེའུ་འབྲུར་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟིས་མཚན་པ། ཞི་ཞིང་འཛུམ་ལ་རྒྱས་པའི་ཉམས་ཅན། དར་དང་རིན་པོ་ཆེས་བརྒྱན་པ། ཞབས་གཉིས་སེམས་མའི་སྐྱིལ་མོ་ཀྲུང་གིས་བཞུགས་པ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། དེ་ལས་འོད་ཟེར་འཕྲོས་པས་ཕྱོགས་བཅུའི་དེ་བཞིན་
གཤེགས་པ་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་མའི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས་ཨོཾ་བཛྲཱི་བྷ་ཝ་ཨབྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་སྣང་བ་མཐའ་ཡས་ཀྱིས་དབུར་བརྒྱན་པར་བསམ། སྒྲུབ་ཐབས་བརྒྱ་རྩ་དང་། བུ་སྟོན་རིན་པོ་ཆེས་འགྲེལ་ཆེན་ལས་རིགས་བདག་མི་བསྐྱོད་པར་གསུངས་ནའང་འདིར་དཔལ་ལྡན་རྩེ་མོའི་ཞབས་ཀྱི་བཞེད་པ་ལྟར་བཀོད་པའོ། །དེ་ནས་མཆོད་བསྟོད་མདོར་བསྡུས་དང་། སྤྱན་མའི་ཕྱག་རྒྱའམ་རྡོ་རྗེ་རྩེ་ལྔ་པའི་ཕྱག་རྒྱས་མིག་ཐུར་རམ་མ་འབྱོར་ན་རྡོ་རྗེ་བཟུང་ལ། ཀུན་མཁྱེན་ཡེ་ཤེས་སྤྱན་ལྡན་སྐྱོན་བྲལ་ཡང་། །གུས་པས་འཕགས་པའི་སྤྱན་ནི་དབྱེ་བགྱིས་པས། །ནམ་མཁའི་མཐས་གཏུགས་གྱུར་པའི་སེམས་ཅན་རྣམས། །སངས་རྒྱས་ཡེ་ཤེས་སྤྱན་ནི་ཐོབ་པར་ཤོག །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱ་ཧཱ། ཡེ་ཤེས་ཀྱི་སྤྱན་རྣམ་པར་དག་པ་དང་ལྡན་ཞིང་། སེམས་ཅན་གྱི་དོན་ལ་
གཟིགས་པ་འཇུག་པའི་མཐུ་ཕུན་སུམ་ཚོགས་པ་དང་ལྡན་པར་གྱུར་ཅིག །ཅེས་ལན་གསུམ་བརྗོད་པས་སྤྱན་དབྱེ། མཆོད་པ་བསང་སྦྱངས་བྱིན་རླབས་སྤྱི་ལྟར་དང་། མཚན་སྔགས་སྔོན་དུ་འགྲོ་བའི་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། བསྟོད་པ་རྒྱས་བསྡུས་གང་རུང་གིས་བསྟོད། བཅོམ་ལྡན་འདས་མས་བདག་དང་འཆང་བ་པོ་ལ་བློ་གྲོས་ཀྱི་མཐུ་ཕུན་སུམ་ཚོགས་པ་སྩལ་དུ་གསོལ། ཞེས་འདོད་དོན་གསོལ། མིང་སྤེལ་ཉིད་བསྒྲུབ་བྱའི་རྣམ་པ་ཇི་ལྟ་བ་གོས་རྒྱན་གཟབས་འབྱོར་ཕུན་སུམ་ཚོགས་པ་དང་བཅས་ཏེ་ཟླ་བའི་གདན་ལ་བཅོམ་ལྡན་འདས་མ་ལ་གུས་པའི་ཚུལ་གྱིས་གདོང་ཕྱོགས་ཏེ་འཁོད་པར་བསམས་ལ་ལྕགས་ཀྱུའི་ཕྱག་རྒྱ་དང་བཅས་ཏེ། ཨོཾ་བཛྲ་སཏྭ་ཧཱུྃ་ཛཿཞེས་ཡང་ཡང་བརྗོད་པས་བསྒྲུབ་བྱ་ཉིད་བཀུག་སྟེ་བསྟིམས་པས་དངོས་སུ་གྱུར་པར་བསམས་ལ། ཨོཾ་པྲ་ཛྙེ་མ་ཧཱ་པྲཛྙེ་ཧཱུྃ་དྷཱ་ར་ཀསྱ་པྲ་ཛྙ་པུཥྚིཾ་ཀུ་རུ་སྭཱ་ཧཱ། ཞེས་དང་དབྱངས་གསལ་རྟེན་སྙིང་བཅས་ཅི་ནུས་བཟླ། གཏོར་མ་བསང་སྦྱངས་བྱིན་རླབས་སྤྱི་ལྟར་དང་། མཚན་སྔགས་ལ་ཨ་ཀཱ་རོ་བཏགས་པ་ལན་གསུམ་གྱིས་ཕུལ། མཆོད་བསྟོད་འདོད་དོན་གསོལ་བས། མདུན་བསྐྱེད་ཀྱིས་ཀྱང་དེ་དེ་བཞིན་དུ་བགྱིའོ་ཞེས་དགྱེས་པ་ཆེན་པོས་ཞལ་གྱིས་བཞེས་ཏེ་འོད་དུ་ཞུ་བ་ལས་བྱུང་བའི་བྲིས་པའི་འཁོར་ལོའི་
རྣམ་པ་ཇི་ལྟ་བ་དང་། བསྒྲུབ་བྱའང་མིང་སྤེལ་གྱི་རྣམ་པར་གྱུར་ཅེས་བརྗོད་ཅིང་བསམ། རྟེན་འབྲེལ་སྙིང་པོ་བཟླས་པའི་མེ་ཏོག་ཐོགས་ཏེ། ཕྱོགས་བཅུ་ན་བཞུགས་པའི་སོགས་སྤྱི་ལྟར་ལ་བྱེ་བྲག་ཏུ་རིག་པའི་འཁོར་ལོ་འདི་ཉིད་ལ་བསྐྱེད་ཅིང་སྤྱན་དྲངས་པའི་བཅོམ་ལྡན་འདས་མ་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་འཆང་བ་པོས་ཐོག་དྲངས་མཐའ་ཡས་པའི་སེམས་ཅན་ཐམས་ཅད་ལ་བློ་གྲོས་ཀྱི་མཐུ་ཕུན་སུམ་ཚོགས་པ་སྩལ་དུ་གསོལ། ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ། ཞེས་མང་དུ་བརྗོད་ཅིང་མེ་ཏོག་འཐོར། བཀྲ་ཤིས་ཇི་ལྟར་རིགས་པ་བརྗོད་དོ། །བདུན་པ་ནི། རབ་གནས་གྲུབ་ནས་བདག་བསྐྱེད་ཀྱི་མཇུག་གི་བྱ་བ་བྱ་ཞིང་། འཁོར་ལོ་ལྟེ་བ་མ་ཉམས་པར་བལྟབ། ཚོན་སྐུད་ཀྱིས་དཀྲི་བའམ། གང་ལྟར་ཡང་ན་བཟའ་སེར་པོ་དང་བཅས་ཏེ་མཆོད་པའི་གྲལ་དུ་བཞག་ལ་ལྷ་དངོས་སུ་མོས་པས་མཆོད་བསྟོད་འདོད་དོན་གསོལ། ཡང་ན་སྤྱི་བོའམ་མགུལ་དུ་བཏགས་ལ་གསོལ་བ་གདབ་པར་བྱའོ། གསུམ་པ་ནི། རྒྱུད་ལས་བསྒོམ་བཟླས་ཀྱི་ཕན་ཡོན་ཇི་ལྟར་གསུངས་པ་བཞིན། རྨོངས་པའི་མུན་པ་ཞི་བ་དང་། ཤེས་རབ་འགྲིབ་པའི་གེགས་སེལ་བ་དང་། ཡང་དག་པའི་ཤེས་རབ་པདྨའི་འདབ་མ་
ལྟར་རབ་ཏུ་རྒྱས་པས། གུ་བ་སྟེ་ལྐུགས་པའམ་བློ་གྲོས་ཤིན་ཏུ་དམན་པ་ཡིན་ཀྱང་། རིག་པའི་སྔགས་ཀྱི་བྱིན་རླབས་ལ་བརྟེན་ནས་དྲི་མ་མེད་པའི་ཤེས་རབ་ཕུན་སུམ་ཚོགས་པ་རྒྱས་པར་འགྱུར་པ་ནི་ངེས་པའོ། །ཞར་བྱུང་ཚུལ་འདིའི་བསྒོམ་བཟླས་དང་བསྙེན་པ་བགྱིད་པར་འདོད་ན། སྒྲུབ་ཐབས་བརྒྱ་རྩ་ལས་བྱུང་བའི་རྗེས་སུ་གནང་བ་ལེགས་པར་ནོད་དེ། སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། ཨོཾ་སྭཱ་བྷཱ་ཝ་སོགས། སྟོང་པའི་ངང་ལས་པ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། རང་གི་སེམས་ཉིད་ཕྲོ་དཀར་པོ། དེ་ལས་འོད་ཟེར་འཕྲོས། །འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཡོངས་སུ་གྱུར་པ་ལས་བདག་ཉིད་འཕགས་མ་སོགས་ནས། ཆུའི་ལྷག་མ་ཡར་ལུད་པ་ལས་ཞེས་པའི་བར་གོང་ལྟར་ལས། འདི་ལ་ཞེས་པར་བདག་ལ་ཞེས་བསྒྱུར། མི་བསྐྱོད་པས་དབུར་བརྒྱན་ཞེས་བརྗོད། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་པཾ་ཡིག་དཀར་པོའི་མཐར་སྔགས་ཀྱིས་བསྐོར་བ་ལས་འོད་ཟེར་དཀར་པོ་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་བྱང་སེམས་རྣམས་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་དང་། ཁྱད་པར་མཁྱེན་པའི་ཡེ་ཤེས་ཐམས་ཅད་འོད་ཟེར་གྱི་རྣམ་པར་སྤྱན་
དྲངས་ཏེ་རང་ལ་གཉིས་སུ་མེད་པར་ཐིམ་པས་མ་རིག་པའི་མུན་པ་བསལ། ཤེས་བྱ་ཐམས་ཅད་ལ་ཐོགས་པ་མེད་པའི་བློ་གྲོས་ཀྱི་མཐུ་ཕུན་སུམ་ཚོགས་པ་རྒྱས་པར་གྱུར་པའི་མོས་པས། ཨོཾ་པྲྃ་སྭཱ་ཧཱ། །ཞེས་དང་། ཨོཾ་པྲཛྙེ་མ་ཧཱ་པྲཛྙེ་ཧཱུྃ་སྭཱ་ཧཱ། ཞེས་དང་། ཨོཾ་པྲཛྙེ་པྲཛྙེ་མ་ཧཱ་པྲཛྙེ་ཧཱུྃ་སྭཱ་ཧཱ། ཞེས་པ་ཅི་ནུས་བཟླ། ཐུན་བསྡུ་བ་ན་འདོད་དོན་ལ་གསོལ་བ་གདབ། རང་གི་སྙིང་ག་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུ་སྔོན་པོ། དགེ་བ་འདི་ཡིས་མྱུར་དུ་བདག །ཤེས་རབ་ཕར་ཕྱིན་འགྲུབ་གྱུར་ནས་སོགས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །གཏོར་མ་འབུལ་ན། གཏོར་མགྲོན་མདུན་གྱི་ནམ་མཁར་ཡན་ལག་བཞི་རྫོགས་ཀྱིས་བསྐྱེད་པའམ། སྤྱན་དྲངས་ལ་གོང་ལྟར་དབུལ། བསྙེན་པ་བྱེད་ན་སྔགས་གཞན་གཉིས་ཅི་རིགས་པ་དང་། གཙོ་བོར་ཡི་གེ་བཅུ་པ་འབུམ་ཕྲག་བཅུའམ། བརྒྱད་ཅུ་བཟླས་པས་ལས་ཐམས་ཅད་འགྲུབ་པ་ཡིན་ནོ། །ཤེས་རབ་ཕ་རོལ་ཕྱིན་མ་ཡི། །རིག་པའི་འཁོར་ལོའི་སྣང་བ་ཆེས། །འགྲོ་ཀུན་རྨོངས་པའི་མུན་སེལ་ཞིང་། །བློ་མཆོག་པདྨོ་རྒྱས་གྱུར་ཅིག །ཅེས་པའང་རྒྱུད་ཀྱི་རྒྱལ་པོ་ཆེན་པོ་འཇམ་མགོན་ས་པཎ་གྱི་གསུང་མཚན་
བཅས་དང་། སློབ་དཔོན་རིན་པོ་ཆེ་བསོད་ནམས་རྩེ་མོས་མཛད་པའི་རྣམ་བཤད་གནད་ཀྱི་གསལ་བྱེད། ཀུན་མཁྱེན་བུ་སྟོན་རིན་པོ་ཆེའི་རྒྱ་ཆེར་བཤད་པ་སྙིང་པོའི་དེ་ཁོ་ན་ཉིད་གསལ་བ་རྣམས་དང་། ལོ་ཙཱ་བ་མ་ཎི་ག་ཤྲིའི་ཟིན་བྲིས་སོགས་ལ་བརྟེན་ནས་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་སརྦ་སཏྟཱ་ནཾ་པྲཛྙཱ་ལ་ཀྵྨཱིཾ་སྥུ་ཊཾ་བྷ་ཡཱ་ཏྲ།། །།