འཇིག་རྟེན་དབང་ཕྱུག་སེང་གེ་སྒྲའི་གདམས་པ་ཟབ་མོའི་གསལ་བྱེད་གཞན་ཕན་བདུད་རྩིའི་ཟིལ་དངར།
༈ འཇིག་རྟེན་དབང་ཕྱུག་སེང་གེ་སྒྲའི་གདམས་པ་ཟབ་མོའི་གསལ་བྱེད་གཞན་ཕན་བདུད་རྩིའི་ཟིལ་དངར་ཅེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། ཐུགས་རྗེའི་བདུད་རྩིས་ཁམས་གསུམ་ཀུན། །དབུགས་འབྱིན་འཕགས་པའི་ཟླ་བ་ནི། །དད་པའི་ཡིད་མཚོར་རྟག་བསྙེན་ནས། །གདམས་ཟབ་ཟིལ་དངར་ཅུང་ཟད་ད་སྤེལ། །འཇིག་རྟེན་དབང་ཕྱུག་སེང་གེ་སྒྲའི་རྣལ་འབྱོར་ལ་བརྟེན་ནས་རང་གཞན་གྱི་དོན་གཉིས་བསྒྲུབ་པར་འདོད་པས་འདི་ལྟར་ཤེས་པར་བྱ་སྟེ། སྔོན་ཏུ་བསྙེན་པའི་ཆོ་ག་དང་། གཟུངས་སྒྲུབ་པའི་ཆོ་ག་དང་། གདོན་ལས་འགྲོལ་བའི་ཆོ་གའོ། །དང་པོ་ལ་གསུམ། །ལྷ་བསྒོམ་པ། སྔགས་བཟླ་བ། ཐུན་མཚམས་ཀྱི་བྱ་བའོ། །དང་པོ་ལ་གཉིས། སྔོན་འགྲོ་
ཚོགས་གཉིས་བསགས་པ་དང་། དངོས་གཞི་ལྷ་བསྒོམ་པའོ། །དང་པོ་ནི། གནས་དབེན་ཞིང་ཡིད་དང་མཐུན་པར་ཁྲུས་དང་གཙང་སྦྲ་ལ་གནས་པས། མདུན་ཏུ་བྲིས་སྐུ་ཡོད་ན་དགྲམ་པའི་སྤྱན་སྔར་མཆོད་གཏོར་བཤམ། སྐྱབས་འགྲོ་སེམས་བསྐྱེད་སྔོན་ཏུ་འགྲོ་བས་རང་སྐད་ཅིག་གིས་སེང་གེ་སྒྲར་གསལ་བའི་སྙིང་གའི་འོད་ཀྱིས་ཚོགས་ཞིང་སྤྱན་དྲང་། ཕྱག་འཚལ་ཞིང་མཆོད་པ་འབུལ་བ་དང་། །སྡིག་པ་བཤགས་པ་ལ་སོགས་པའི་ཡན་ལག་བདུན་པའི་རྗེས། ཨོ་བཛྲ་མུས་ཚོགས་ཞིང་མི་དམིགས་པར་གཤེགས་སུ་གསོལ། ཚད་མེད་པ་བཞིས་རྒྱུད་སྦྱོང་བ་དང་བཅས་པ་ནི་བསོད་ནམས་ཀྱི་ཚོགས་དང་། ཤུནྱ་ཏཱའི་སྔགས་དོན་དྲན་པས་འོད་གསལ་སྟོང་པ་ཉིད་ཀྱི་དབྱིངས་སུ་མཉམ་པར་འཇོག་པ་ནི་ཡེ་ཤེས་ཀྱི་ཚོགས་བསགས་པའོ། །གཉིས་པ་ནི། ཚོགས་གཉིས་ཀྱི་རང་འབྲས་ཆོས་དང་གཟུགས་ཀྱི་སྐུ་ཟུང་དུ་འཇུག་པའི་ཡི་དམ་གྱི་ལྷ་ཡན་ལག་བཞི་རྫོགས་སུ་བསྐྱེད་ཅིང་། གསལ་སྣང་ལ་རྩེ་གཅིག་ཏུ་སེམས་འཛིན་པས་ལྷའི་སྐུ་སྒྱུ་མ་ལྟ་བུ་གསལ་ཞིང་བརྟན་པར་མ་གྱུར་གྱི་བར་དེ་སྲིད་དུ་བསྒོམ་པའོ། །གཉིས་པ་སྔགས་བཟླ་བ་ནི། དེས་སྐྱོ་ན་ཐུགས་ཀར་སྔགས་ཕྲེང་བཀོད་དེ། ཇི་སྐད་བཤད་པའི་འོད་ཟེར་སྤྲོ་བསྡུའི་སྦྱོར་བ་དང་བཅས་ཏེ་སྙིང་པོ་དང་། གཟུངས་རིང་ཇི་ལྟར་རིགས་པ་
བཟླ། ཐུན་ལས་ལྡང་བར་འདོད་ན། བདག་བསྐྱེད་ཀྱི་ཡེ་ཤེས་པ་མདུན་མཁར་བྱོན་པ་ལ་མཆོད་ཅིང་བཟོད་པར་གསོལ། རང་བཞིན་གྱི་གནས་སུ་གཤེགས་ལ་གནས་གསུམ་བསྲུང་། བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ །མདོར་ན་འདི་ཡན་གྱི་ཉམས་ལེན་ནི། རྗེ་བཙུན་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་གསུང་རབ་ལྟར་ཉམས་སུ་བླངས་པས་དོན་གྲུབ་པ་ཉིད་དོ། །གསུམ་པ་ཐུན་མཚམས་ཀྱི་བྱ་བ་ལ་ལྔ། སྤྱོད་ལམ། གཏོར་མ། ཁ་ཟས། ཉལ་བ། ལྡང་བའོ། །དང་པོ་ནི། ཕྱག་དང་བསྐོར་བ་ལ་སོགས་པ་འགྲོ་འདུག་འགྲེང་འཆག་གི་སྤྱོད་ལམ་ཐམས་ཅད་རང་བཅོམ་ལྡན་འདས་སེང་གེ་སྒྲ་དམ་ཚིག་པའི་ང་རྒྱལ་གྱིས་བྱའོ། །གཉིས་པ་ནི། མཁྱེན་རབ་ཀྱི་དབང་ཕྱུག་དཔལ་ལྡན་དོན་གྲུབ་ཀྱི་བསྙེན་ཐབས་ལས་འབྱུང་བ་ལྟར་འདས་པའི་གཏོར་མ་དང་། འཇིག་རྟེན་པ་ལ་ཆ་གསུམ་གྱི་གཏོར་མ་སྤྱི་ལྟར་བཏང་བའམ། མི་ནུས་ན་འདས་གཏོར་གྱི་ལྷག་མ་ཨ་ཀཱ་རོ་ལན་གསུམ་གྱིས་བསྔོས་ལ། འཇིག་རྟེན་པ་ཡི་འབྱུང་པོ་རྣམས། །མཆོད་སྦྱིན་གཏོར་མ་འདི་བཞེས་ལ། །ཆོས་དོན་བདེན་པ་ལ་གནས་ཏེ། །ཞི་ཞིང་དགེ་བའི་ལས་རྣམས་མཛོད། །བདག་ཀྱང་བྱང་ཆུབ་མ་ཐོབ་པར། །བགེགས་དང་བར་ཆད་མེད་པ་དང་། །དམ་ཚིག་གནས་ལ་
གནས་མཛོད་ལ། །བྱང་ཆུབ་ཐོབ་པའི་གྲོགས་ཀྱང་མཛོད། ཅེས་པའི་མཐར་བཟོད་པར་གསོལ་ལ་གཤེགས་སུ་གསོལ་བས་ཀྱང་རུང་ངོ་། །གསུམ་པ་ནི། ཁ་ཟས་ཀྱི་དུས་སུ་ཁ་ཟས་བདུད་རྩིར་བསམས་ལ་ལྷ་མཆོད་པའི་བསམ་པས་ལོངས་སྤྱད་དོ། །བཞི་པ་དང་ལྔ་པ། ནུབ་མོ་ཉལ་བའི་ཚེ་སྟོང་པའི་ངང་ལ་ཉལ། ནངས་པར་སྟོང་པའི་ངང་ནས་ལྷའི་སྐུར་ལངས་ལ། ཁྲུས་དང་གཙང་སྦྲ་སྔོན་ཏུ་འགྲོ་བས་སྔར་བཞིན་ཉམས་སུ་བླང་བར་བྱའོ། །དེ་ལྟ་བུའི་ཚུལ་གྱིས་ཐུན་གསུམ་མམ་བཞིའི་རིམ་པས་བསྙེན་པ་འབུམ་ཕྲག་བཞིའམ། ཡི་གེའི་གྲངས་ཀྱི་འབུམ་ལས་བཞི་འགྱུར་རམ་བརྒྱད་འགྱུར་དུ་བཟླས་པས་ལས་རྣམས་འགྲུབ་པར་ནུས་པར་གསུངས་པས་འབུམ་ཕྲག་སོ་དྲུག་གམ། བདུན་ཅུ་རྩ་གཉིས་སམ། སྤྱིར་བཏང་འབུམ་ཕྲག་དགུ་ཁ་སྐོང་དང་བཅས་པ་བཟླ་ཞིང་། བྱང་ཆུབ་སྒྲུབ་པ་ལ་ཚད་མེད་དོ། །དེ་ནས་གཉིས་པ་གཟུངས་སྒྲུབ་བྱ་བར་འདོད་ན། གནས་ཁང་གཙང་ལ་ཉམས་དགའ་བར་རྗེ་བཙུན་སེང་གེ་སྒྲ་ལ་སོགས་པའི་དཀོན་མཆོག་གི་རྟེན་བཞུགས་པའི་སྤྱན་སྔ་ལ་སོགས་པར། བ་བྱུང་ལྔ་དང་། དྲི་བཟང་པོས་མཎྜལ་ཁྲུ་གང་བར་བྱུགས་པ་ལ་མེ་ཏོག་གི་ཚོམ་བུ་དྲུག་དགོད། དེའི་མདུན་དུ་བ་བྱུང་དང་། དྲི་བཟང་གིས་དཀྱུས་སུ་ཁྲུ་དོ། །ཞེང་ཁྲུ་གང་གི་མཎྜལ་བྱས་ལ། གཡས་
སུ་མེ་ཏོག་དཀར་པོ་དང་། གཏོར་མ་དང་། བ་སེར་སྐྱའི་ལྕི་བ་ས་ལ་མ་ལྷུངས་པ་རས་ཀྱི་ཚགས་མས་བཙགས་པ་དྲི་ཞིམ་པོ་དང་སྦྱར་ལ་བཞག །གཡོན་ཏུ་ཆུ་གཉིས་སྔོན་ཏུ་འགྲོ་བའི་མཆོད་པ་ལྔ་བཤམ། རང་ཉིད་ཁྲུས་བྱས་གོས་གཙང་མ་གྱོན། སྟན་བདེ་བ་ལ་འདུག་ལ། མཆོད་པ་བྱིན་རླབས་སྔོན་དུ་འགྲོ་བས་བདག་བསྐྱེད་བཟླས་པ་དང་བཅས་པ་གྲུབ་རྗེས། ཡེ་ཤེས་པ་གཤེགས། །རང་དམ་ཚིག་པའི་ང་རྒྱལ་གྱིས་ཚོམ་བུ་ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་པྃ་ལས་པདྨ་དམར་པོ་སོགས་ནས། སྟབས་ཀྱིས་བཞུགས་པ་ཞེས་པའི་བར་བདག་བསྐྱེད་ལྟར་ལ་རང་ཉིད་ཅེས་པའི་ཚིག་དོར། དེའི་སྟེང་དུ་ཨོཾ་ལས་རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་པ་བྱང་ཆུབ་མཆོག་གི་ཕྱག་རྒྱ་ཅན། འདབ་མ་བརྒྱད་ཀྱི་ཤར་དུ་ཧཱུ་ལས་མི་བསྐྱོད་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་གཡས་ས་གནོན། གཡོན་མཉམ་གཞག་གི་ཕྱག་རྒྱ་ཅན། ལྷོར་ཏྲཱྃ་ལས་རིན་ཆེན་འབྱུང་ལྡན་སྐུ་མདོག་སེར་པོ་ཞལ་གཅིག་ཕྱག་གཉིས་པ་གཡས་མཆོག་སྦྱིན། །གཡོན་ཏིང་ངེ་འཛིན་གྱི་ཕྱག་རྒྱ་ཅན། ནུབ་ཏུ་ཧྲཱིཿལས་འོད་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་པ་ཏིང་ངེ་འཛིན་གྱི་ཕྱག་རྒྱ་ཅན། བྱང་དུ་ཨ་ལས་དོན་ཡོད་གྲུབ་པ་སྐུ་མདོག་ལྗང་
གུ་ཞལ་གཅིག་ཕྱག་གཉིས་པ་གཡས་སྐྱབས་སྦྱིན། གཡོན་ཏིང་ངེ་འཛིན་གྱི་ཕྱག་རྒྱ་ཅན། ཐམས་ཅད་ཀྱང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་། དར་གྱི་ན་བཟའ་ཅན། སེམས་དཔའི་སྐྱིལ་མོ་ཀྲུང་གིས་བཞུགས་པའོ། །དེ་ཐམས་ཅད་ཀྱི་དཔྲལ་བར་སོགས་ནས། ཧཱུྃ་སྔོན་པོ། རང་གི་ཐུགས་ཀའི་ཧྲཱིཿལས་འོད་ཟེར་འཕྲོས་པས། རང་བཞིན་གྱི་གནས་ནས་རྗེ་བཙུན་སེང་གེ་སྒྲ་དང་། རིགས་ལྔ་ལ་སངས་རྒྱས་དང་སོགས་ནས། ཆུ་ལྷག་མ་ཡར་ལུད་པ་ལས་གཙོ་བོ་ལ་འོད་དཔག་མེད་དང་། རིགས་ལྔ་ལ་རིགས་སོ་སོས་དབུར་བརྒྱན་ཅེས་སྦྱར་བ་དང་། བདག་ལ་ཞེས་པའི་ཚབ་ཏུ་འདི་ལ་ཞེས་བསྒྱུར་བ་མ་གཏོགས་བདག་བསྐྱེད་ལྟར་བྱ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བར་བསམས་ལ། མཆོད་བསྟོད་གསོལ་བ་གདབ། དེ་ནས་མེ་ཏོག་དཀར་པོ་ནས་བླངས་ཏེ། ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུྃ་ཕཊ། ཅེས་པས་མེ་ཏོག་ལན་རེ་ལ་སྔགས་ལན་རེ་བཟླས་ཏེ། རང་གི་གཡོན་ནས་ཚར་དུ་དངར་བར་བཤམས་པའི་མཎྜལ་བརྒྱད་ཀྱི་སར་མེ་ཏོག་གི་ཚོམ་བུ་རེ་རེ་བཞག་ལ་བྱིན་གྱིས་བརླབ། ཐུན་གཉིས་པ་མན་ཆད་ལ་ལྕི་བ་ཡོད་ན་མེ་ཏོག་གིས་བྱིན་གྱིས་བརླབ། ལྕི་བ་མེད་ན་མེ་ཏོག་གིས་བྱིན་གྱིས་བརླབ་མི་དགོས་གསུངས་སོ། །དེ་ནས་ལྕི་བ་བླངས་ཏེ། ན་
མོ་རཏྣ་ཏྲ་ཡཱ་ཡ། ན་མ་ཨཱར་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨཱ་ཀ་ཊེ། བི་ཀ་ཊེ། ནི་ཀ་ཊེ། ཀཊཾ་ཀ་ཊེ། ཀ་རོ་ཊེ། ཀ་རོ་ཊེ། བིདྱེ་སྭཱ་ཧཱ། ཞེས་བཟླས་ཏེ་རང་གི་གཡོན་ནས་ཚར་དུ་དངར་བའི་མཎྜལ་བརྒྱད་པ་ཞིང་། མཎྜལ་རེ་རེ་ལ་གཟུངས་ལན་བཅུ་གསུམ་བཅུ་གསུམ་བཟླས་ཤིང་མེ་ཏོག་བསལ་ལ་ལན་གསུམ་བྱུག །མེ་ཏོག་གི་ཚོམ་བུ་རེ་དགོད། ལྕི་བ་ལྷག་མ་ལག་པ་ལ་གོས་པ་ལ་མཆིལ་མས་སྔགས་ཤིང་ནད་པ་ལ་བྱུགས་ན་ནད་ཐམས་ཅད་ཉེ་བར་ཞི་བར་འགྱུར་རོ། །ནད་པ་མེད་ན་སྣོད་གཙང་མར་བླུགས་ནས་བཟུང་སྟེ་སྡུག་བསྔལ་ཅན་གཞན་ལ་སྦྱིན་ཏེ། དེ་ལྟར་ན་མེ་ཏོག་དང་ལྕི་བ་ལྷག་མ་ལ་གཅེས་སྤྲས་སུ་བྱའོ། །དེ་ནས་མཆོད་པ་དབུལ། གཏོར་མ་གཏང་། ཡེ་ཤེས་པ་གཤེགས་སུ་གསོལ། གནས་གསུམ་བསྲུང་། དགེ་བ་བྱང་ཆུབ་ཏུ་བསྔོ། ཤིས་བརྗོད་རྒྱས་པར་བྱས་ལ། མཎྜལར་རས་དཀར་པོས་གཡོགས་ལ་བཞག་གོ། །དེ་ལྟ་བུ་ཉི་མ་བདུན་ནམ། བཅུ་གསུམ་མམ། ཉེར་གཅིག་གིས་འགྲུབ་བར་གསུངས་སོ། །དེ་ལྟར་བསྙེན་པ་དང་། གཟུངས་སྒྲུབ་སྔོན་ཏུ་སོང་ནས། གསུམ་པ་གདོན་འགྲོལ་གྱི་ལས་སྦྱོར་ལ་གསུམ། སྔོན་ཏུ་འགྲོ་བའི་ཆོ་ག །དངོས་གཞི་གདོན་འགྲོལ་བྱ་བ། །
མཇུག་ཕྱིར་མི་ལྡོག་པའི་ཕྱིར་འཁོར་ལོ་གདགས་པའོ། །དང་པོ་ལ་གསུམ། རྨི་ལམ་བརྟག་པ། དུག་ངོས་བཟུང་ཞིང་གཞོམ་པ། ཀླུ་དང་རྒྱལ་པོ་དབྱེ་བའོ། །དང་པོ་ནི། གནས་ཁང་གཙང་མར་སེང་གེ་སྒྲའི་རྟེན་བྲིས་འབུར་གང་ཡང་རུང་བའི་སྤྱན་སྔར་བ་བྱུང་གིས་བྱུགས་པའི་མཎྜལ་ལ་མེ་ཏོག་གི་ཚོམ་བུ་དྲུག་དགོད། དེའི་མདུན་དུ་མཆོད་གཏོར་བཤམ། རང་གི་མདུན་དུ་བུམ་པ་བཅུད་ལྡན་སྤྱི་ལྟར་བཅའ། དེ་ནས་རང་ཉིད་ཁྲུས་བྱས་སྤོས་ཀྱིས་བདུག །གོས་གཙང་མ་གྱོན་ལ། སྟན་བདེ་བ་ལ་འདུག་སྟེ་བདག་བསྐྱེད་སྔོན་དུ་འགྲོ་བས། མདུན་གྱི་ཚོམ་བུ་བསངས་སྦྱངས་ནས་མཆོད་བསྟོད་ཡན་གཟུངས་སྒྲུབ་ལྟར་བྱས་ལ་ཐུགས་རྒྱུད་བསྐུལ་བའི་ཕྱིར་བཟླས་བ་ཅུང་ཟད་བྱ། བུམ་པ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་ཤིང་། ནང་ཆུ་དང་བཅུད་སྣ་ཚོགས་ཀྱིས་གང་བའི་དབུས་སུ་པྃ་ལས་པདྨ་དམར་པོ་སོགས་མདུན་བསྐྱེད་ལྟར་གསལ་བཏབ་ལ། མཆོད་ཅིང་བསྟོད། །བཅོམ་ལྡན་འདས་བདག་གི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པ་དང་། ཇི་ལྟར་བསམ་པའི་དོན་ཐམས་ཅད་རྨི་ལམ་དུ་མཐོང་བར་བྱིན་གྱིས་བརླབ་ཏུ་གསོལ། །ཞེས་པ་ལྟ་བུས་འདོད་པའི་
དོན་ལ་གསོལ་བ་བཏབ། གཟུངས་ཐག་ནས་བཟུང་སྟེ་རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ཏེ་སོང་། བུམ་ནང་གི་ལྷའི་ཐུགས་རྒྱུད་བསྐུལ། ཐུགས་ཀ་ནས་ཡེ་ཤེས་ཀྱི་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ། སེང་གེ་སྒྲའི་སྙིང་པོ་བརྒྱ་བརྒྱད་དང་། ཨོཾ་མུ་ཙི་ལི་སྭཱ་ཧཱ། མོ་ཧ་ནི་སྭཱ་ཧཱ། དནྟི་ལི་སྭཱ་ཧཱ། ཞེས་བརྒྱ་རྩ་བརྒྱད་བཟླས། སླར་ཡང་མདུན་བུམ་ཐུན་མོང་དུ་མཆོད་བསྟོད། གཏོར་མ་ཕུལ། གསོལ་བ་གདབ། བུམ་ནང་གི་ཡེ་ཤེས་པ་ལ་ནོངས་པ་བཟོད་པར་གསོལ་ནས་གཤེགས། དམ་ཚིག་པ་འོད་དུ་ཞུ་བ་ལས་བུམ་པའི་ཆུ་ནུས་པ་བ༎ དང་ལྡན་པར་བསམས་ལ་དེས་རང་གི་གདོང་ལ་སོགས་པ་དག་པར་བཀྲུས་ཏེ། ལྷའི་ང་རྒྱལ་དང་ལྡན་པས། མདུན་བསྐྱེད་ཀྱི་འཕགས་པ་གཙོ་འཁོར་རྣམས་མངོན་སུམ་དུ་གསལ་བའི་སྤྱན་སྔར། །འཇིགས་པ་དང་བག་ཚ་བ་མེད་པར་གློ་གཡས་པ་འོག་ཏུ་ཕབས་ནས་ཅང་མི་སྨྲ་བར་སེང་གེའི་ཉལ་སྟབས་ཀྱིས་ཉལ། ཡིད་ཀྱིས་རང་ངམ་གཞན་གྱི་ནད་ལ་སོགས་པ་གང་རྟོགས་པར་འདོད་པའི་དངོས་པོ་དེ་ཉིད་སྔོན་གྱི་ལས་སམ་འཕྲལ་གྱི་རྐྱེན་གང་ལས་བྱུང་། འབྱུང་བའི་སྟོབས་སམ། མི་མ་ཡིན་གྱི་གནོད་པ་ལས་གྱུར། ཅི་བྱས་ན་ཕན། རིང་དུ་འགོར་རམ་མྱུར་དུ་འཚོ་ཞེས་པས་མཚོན་ཏེ་ཇི་ལྟར་
རྟོགས་པར་འདོད་པའི་དོན་འདི་རྣམས་འཕགས་པས་བདག་ལ་ལུང་བསྟན་དུ་གསོལ་སྙམ་པ་རྩེ་གཅིག་ཏུ་ཡིད་ལ་བྱས་ཏེ་གཉིད་ཀྱིས་ལོག་ན་ཇི་ལྟར་བསམ་པའི་དོན་ཐམས་ཅད་རྨི་ལམ་དུ་མཐོང་བར་འགྱུར་རོ། །གལ་ཏེ་མ་མཐོང་ན་ལན་ཇི་ལྟར་རིགས་པ་བསྐྱར། གང་ལྟར་ཡང་ནངས་པར་ལྡང་པའི་ཚེ་མདུན་གྱི་ལྷ་ལ་མཆོད་ཅིང་བསྟོད། ནོངས་པ་བཤགས། ཡེ་ཤེས་པ་གཤེགས། དམ་ཚིག་པ་རང་ལ་བསྡུ། གནས་བསྲུང་། བསྔོ་སྨོན་ཤིས་བརྗོད་བྱ། བསྐུར་དགོས་ན་སླར་ཡང་ཆོ་ག་སྔ་མ་བཞིན་དུ་བྱའོ། །འདི་ནི་ནད་གདོན་ངོས་བཟུང་བ་ཙམ་དུ་མ་ཟད། འདོད་པའི་དོན་གང་བརྟག་པ་ལའང་སྦྱར་དུ་རུང་ཞིང་། ཁྱད་པར་བླ་མ་བ་རི་པའི་ཞལ་ནས། ཡི་དམ་གྱི་ལྷ་ལ་ཐུགས་རྗེ་ཆེ་ཆུང་མེད་ཀྱང་། རང་གི་ལས་འཕྲོ་ཡོད་མེད་ཀྱིས། སྔོན་ནས་བསྒྲུབས་པའི་ལས་འཕྲོ་མེད་པའི་ཡི་དམ་ལོ་གཅིག་ཏུ་སྒྲུབ་པ་བས། ལས་འཕྲོ་ཡོད་པ་ཞག་གཅིག་སྒྲུབ་པས་འགྲུབ་སླ། གལ་ཏེ་ལས་འཕྲོ་མེད་པའི་ཡི་དམ་བསྒྲུབས་པས་འགྲུབ་དཀའ་བ་བྱུང་ན། ལྷ་དང་གདམས་ངག་ལ་ཡིད་མི་ཆེས་པ་དང་ལོག་ལྟ་སྐྱེ། དེས་ཡི་དམ་གཞན་གང་བསྒྲུབས་ཀྱང་འགྲུབ་མི་སྲིད་པས། དེས་ན་ཡི་དམ་སྒྲུབ་པའི་ཐོག་མར་འདི་ལྟ་བུའི་གདམས་ངག་གི་སྒོ་ནས་ལས་འཕྲོ་ཡོད་མེད་བརྟགས་ལ་བྱ་བ་གལ་ཤིན་ཏུ་ཆེ་
ཞེས་གསུངས་སོ། །གཉིས་པ་དུག་ངོས་བཟུང་ལ་གཞོམ་པ་ནི། ཀླུ་ཆེན་བརྒྱད་པོ་རིགས་བཞི་འབྱུང་བཞིའི་དུག་ལ་དབང་བྱེད་པ་ཡིན་ཏེ། ནོར་རྒྱས་དང་དུང་སྐྱོང་གཉིས་ནི་རྒྱལ་རིགས་ཡིན་པས་ལྕི་ཞིང་འཐིབས་པ་སའི་དུག་ལ་དབང་། དགའ་བོ་རིགས་ལྡན་གཉིས་ནི་བྲམ་ཟེའི་རིགས་ཡིན་པས་ཡང་ཞིང་བསིལ་བ་ཆུའི་དུག་ལ་དབང་། པདྨ་དང་འཇོག་པོ་གཉིས་ནི་རྗེ་རིགས་ཡིན་ཏེ་ཚ་ཞིང་སྲེག་པ་མེའི་དུག་ལ་དབང་། པདྨ་ཆེན་པོ་དང་སྟོབས་ཀྱི་རྒྱུ་གཉིས་ནི་དམངས་རིགས་ཡིན་ཏེ་ཡང་ཞིང་གཡོ་བ་རླུང་གི་དུག་ལ་དབང་། དེས་ན་དུག་གསལ་བར་ངོས་ཟིན་ན། དེ་དང་དེའི་གཉེན་པོར་སྔགས་བཟླས་ཏེ། ས་དུག་གིས་ཟིན་ན་མེའི་སྔགས་བཟླས་པ་ནི། བདག་བསྐྱེད་དཀྱུས་ལྟར་ལ། རང་སེང་གེ་སྒྲར་གསལ་བའི་ཏྲི་ཤུ་ལ་ལ་སྦྲུལ་དམར་པོ་གཉིས་ཁ་སྤྲོད་དུ་བསམ། སེང་གེ་སྒྲའི་སྙིང་པོ་དང་། ཨོཾ་པདྨ་ཡ། ཏཀྵ་ཀཱ་ཡ་ནཱ་ག་རཱ་ཛ་ཕུཿཧཱུྃ་ཕཊ་སྭཱ་ཧཱ། ཞེས་བཟླས། དེ་བཞིན་དུ་ཆུ་དུག་གིས་ཟིན་པ་ལ། ཏྲི་ཤུ་ལ་ལ་སྦྲུལ་སྔོན་པོ་ཁ་སྤྲོད་དང་། སྔགས་ཀྱི་ཐོག་མཐའ་འདྲ་བར་བྱས་ལ། མ་ཧཱ་པདྨ་ཡ་ཀརྐོ་ཊཱ་ཡ། མེ་དུག་ལ་སྦྲུལ་དཀར་པོ་གཉིས་ཁ་སྤྲོད་དང་། ཨ་ནནྟཱ་ཡ་ཀུ་ལི་ཀཱ་ཡ། རླུང་དུག་ལ་སྦྲུལ་སེར་པོ་ཁ་སྤྲོད་དང་། བཱ་སུ་ཀཱ་ཡ་ཤི་ཁ་བཱ་ལཱ་ཡ། ཅེས་སོ་སོར་བཟླས། དུག་
ངོས་མ་ཟིན་ན། དེ་རྣམས་ཀུན་ཀྱང་འཇོམས་བྱེད་པ། །གཙོ་བོར་གྱུར་བ་ཆུ་ལྷ་སྟེ། །འབྱུང་བ་ནམ་མཁའི་རང་བཞིན་ཅན། །དེ་བས་འདི་ཉིད་འབད་དེ་བཟླས། །ཞེས་གསུངས་པས་ཏྲི་ཤུ་ལ་ལ་སྦྲུལ་ དཀར་པོ་དམིགས་ཏེ། བཅོམ་ལྡན་འདས་ཀྱི་སྙིང་པོའི་མཐར། ཨོཾ་ཕུཿབ་རུ་ཎཱ་ཡ་ནཱ་ག་རཱ་ཛ་ཕུཿཧཱུྃ་ཕཊ་སྭཱ་ཧཱ། ཞེས་འབུམ་ཕྲག་བཞི་བཟླས་པས། དུག་གསལ་བར་ངོས་ཟིན་པར་འགྱུར་རོ། །སྐབས་སུ་སངས་རྒྱས་ལ་མཆོད་པ་འབུལ། ཀླུའི་རྒྱལ་པོ་དང་ཕྱོགས་སྐྱོང་ལ་གཏོར་མ་གཏང་། ནད་སོས་ནས་སྲུང་འཁོར་གདགས་སོ། །དེས་མ་སོས་ཤིང་སྙིང་མི་དགའ་ན་ཀླུ་དང་རྒྱལ་པོ་དང་བསྡོངས་ཤིང་མ་ཁྲོལ་བའི་སྐྱོན་ཡིན་པས། །གསུམ་པ་དེ་གཉིས་དབྱེ་བ་ནི། བག་ཟན་ནམ། ནས་ཟན་ལ། ཀླུ་ཕལ་བའི་གཟུགས་སྣ་ཚོགས་བྱ། མི་ལྤགས་སམ་ཤོག་བུ་ལ་རྒྱལ་པོའི་གཟུགས་བརྙན་རིད་ཅིང་སྐྲ་འཛིངས་པ་བྲི། དེའི་སྙིང་ཁར་བཅོམ་ལྡན་འདས་དང་ཆུ་བདག་གི་སྙིང་པོའི་མཐར་གནོད་བྱེད་འབྱུང་པོ་མཱ་ར་ཡ་ཕཊ། ཅེས་པ་བྲི། འབྱུང་པོའི་བླ་ཤིང་གླང་མ་མགོ་རྩམ་ལོག་པར་བྱས་ལ། རྩ་བའི་ངོས་ལ་མི་ཚིལ་དུམ་བུ་གཅིག་བསྐུས། རྩེ་མོ་བཀས་པའི་བར་དུ་རྒྱལ་པོའི་གཟུགས་བརྙན་མགོ་མཐུར་དུ་བསྟན་པ་གཟུགས་སོ། །དེ་ནས་མཁན་པ་དམར་པོའི་ཁུ་བ་དང་། སྲོ་ལོ་དམར་པོ་དང་།
ཡུངས་ཀར་དང་། གླ་རྩི་ལ་སོགས་པ་ཀླུ་དང་མི་མཐུན་པའི་རྫས་རྣམས་བསགས་ལ། མར་ངོའི་ཉི་མ་དང་པོ་ནས་བཟུང་ནས། ཉི་མ་གཅིག་གམ་གསུམ་མམ། ལྔའམ། བདུན་ཏུ་ཐུན་གསུམ་མམ་བཞིར་རང་སེང་གེ་སྒྲ་ནག་པོའི་རྣལ་འབྱོར་ལ་གནས་པས་ཀླུ་དང་འབྱུང་པོའི་དགུག་གཞུག་དྲག་ཏུ་བྱ། ཞེས་འབྱུང་པས། བདག་བསྐྱེད་དཀྱུས་ལྟར་ལ། མི་འདྲ་བའི་ཁྱད་པར། ཨཿལས་ སེང་གེ་སྔོན་པོ་ཞེས་དང་། ཧྲཱིཿནག་པོ་དང་། སེང་གེ་སྒྲ་སྐུ་མདོག་ནག་པོ་ཞེས་བསྒྱུར་བ་མ་གཏོགས་འདྲ། བཟླས་པ་ཅི་ནུས་མཐར། མདུན་གྱི་རྟེན་རྒྱལ་པོ་དངོས་སུ་བསམས་ལ། ལྕགས་ཀྱུའི་ཕྱག་རྒྱ་བཅིངས་ཏེ། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། འཇིག་རྟེན་དབང་ཕྱུག་སེང་གེ་སྒྲའི་བདེན་པ་དང་། ཀླུའི་རྒྱལ་པོ་འཁོར་དང་བཅས་པའི་བདེན་པ་དང་། བདེན་པ་ཆེན་པོའི་བྱིན་རླབས་དང་། བདག་ཅག་གི་བསམ་པ་རྣམ་པར་དག་པའི་བདེན་པ་དང་། བདེན་པ་དེའི་མཐུས། སྦྱིན་པའི་བདག་པོ་ལ་གནོད་ཅིང་ཤ་གཉེར་བའི་རྒྱལ་པོ་གདུག་པ་ཅན་དང་ཀླུ་དང་ས་བདག་ཕལ་པའི་རིགས་འཁོར་དང་བཅས་པ་ཐམས་ཅད་དམིགས་པའི་
རྟེན་འདི་ལ་མཆིས་པར་གྱུར་ཅིག །ཅེས་དང་། ཨོཾ་ཨཱཿཧཱུྃ་སོགས་སེང་གེ་སྒྲ་དང་། ཨོཾ་ཕུཿབ་རུ་ཎ་སོགས་ཆུ་བདག་གི་སྙིང་པོའི་མཐར། གནོད་བྱེད་འབྱུང་པོ་ཨཱ་ཀརྵཱ་ཡ་ཛཿ ཞེས་དགུག་ཅིང་ཛཿཧཱུཾ་བྃ་ཧོཿས་བསྟིམ། སེང་གེ་སྒྲ་དང་ཆུ་བདག་གི་སྙིང་པོ་གཉིས་ཀྱི་མཐར། ཨོ་ནཱ་མ་ནཱ་ག་ནན། ནཱ་ག་ནི་ནན། ནཱ་ག་ཀུ་མཱ་ར་ནན། ནཱ་ག་ཀུ་མཱ་ར་ནི་ནན། རཱ་ཛ་དུཥྛན་བེ་དེ་ཤ་ཡ་བི་དེ་ཤ་ཡ་ཞེས་བཟླས་ཏེ། ཐུན་རྫས་ཀྱིས་ཀླུའི་གཟུགས་བརྙན་ལ་བསྐོར་ཞིང་རྒྱལ་པོའི་གཟུགས་བརྙན་ལ་བྲབ། གཞན་ཡང་སྙིང་པོ་གཉིས་ཀྱི་མཐར། རྡོ་རྗེ་ནག་པོ་ཆེན་པོ་ལ་སོགས་པའི་དྲག་སྔགས་བཟླས་ཏེ་བཏབ་ལ་རྒྱལ་པོའི་གཟུགས་བརྙན་ལ་བྲབ། ཐུན་ཐ་མར་ཕུར་བུ་ཡེ་ཤེས་ཀྱི་མེ་འབར་བར་བསམས་ལ། སྙིང་པོ་གཉིས་དང་ནག་པོ་ཆེན་པོའི་དྲག་སྔགས་བཟླས་པས་རྒྱལ་པོའི་གཟུགས་བརྙན་ལ་བཏབ་ཅིང་ལིང་རོ་དུམ་བུར་གཏུབས་ལ་མཆོད་རྟེན་གྱི་འོག་གམ། ལམ་གྱི་བཞི་མདོར་མནན། ཀླུའི་རྟེན་ནི་ཀླུ་གནས་པའི་སར་བསྐྱལ། བདག་གི་ཡེ་ཤེས་པ་གཤེགས་གསོལ་ནས་བསྔོ་སྨོན་བཀྲ་ཤིས་ཀྱི་བར་བྱའོ། །གཞན་ཡང་རྒྱལ་པོའི་གཟུགས་བརྙན་ལ་བརྟེན་ཏེ་དྲག་པོའི་སྦྱིན་སྲེག་གིས་ཚར་བཅད་པ་ནི། རོ་བསྲེག་པའི་རྡོའི་སྒྱེད་པུ་གཟུགས། ཚེར་མ་ཅན་གྱི་ཤིང་བརྩིག །དེའི་སྟེང་དུ་སླ་ང་བཞག །
གཡས་སུ་གཏོར་མ། གཡོན་ཏུ་མཆོད་པ། མདུན་དུ་སྔར་གྱི་ལིངྒ་དང་། ཁྲག་དང་། དུག་དང་། སྐེ་ཚེ་དང་། ཡུངས་ཀར་དང་། ཡུངས་མར་དང་། ལན་ཚྭ་དང་། གུ་གུལ་ལ་སོགས་པ་གདུག་པ་ཅན་གྱི་རྫས་བཤམ། སྲོད་ཀྱི་དུས་སུ་སེང་གེ་སྒྲ་ནག་པོའི་རྣལ་འབྱོར་ལ་གནས་པས་བཟླས་པ་དྲག་ཏུ་བྱ། ནམ་ཕྱེད་ན། མཆོད་པ་བྱིན་གྱིས་བརླབ་པ་སྔོན་དུ་འགྲོ་བས། རང་གི་སྙིང་གའི་ཧྲཱིཿལས་སྤྲུལ་པ་དཔག་ཏུ་མེད་པ་སྤྲོས་སྟེ། ལ་ལས་ལྕགས་ཀྱུས་སྙིང་ཕུག །ལ་ལས་ཞགས་པས་མགྲིན་པ་བཅིངས། ལ་ལས་ཐོ་བས་རྒྱབ་ནས་རྡེག་ཅིང་། རང་དབང་མེད་པར་དགུག་པར་བསམས་ལ། བདེན་སྟོབས་གོང་ལྟར་བརྗོད་པའི་མཐར། སྦྱིན་པའི་བདག་པོ་ལ་གནོད་ཅིང་འཚེ་བའི་རྒྱལ་པོ་གདུག་པ་ཅན་ཐམས་ཅད་དམིགས་པའི་རྟེན་འདི་ལ་མཆིས་པར་གྱུར་ཅིག །ཅེས་དང་། །སེང་གེ་སྒྲ་དང་ཆུ་བདག་གི་སྙིང་པོའི་མཐར། གནོད་བྱེད་འབྱུང་པོ་ཨཱ་ཀརྵཱ་ཡ་ཛཿ ཞེས་བརྗོད་ཅིང་ལྕགས་ཀྱུ་ལ་སོགས་པའི་ཕྱག་རྒྱ་བཅས་ལ་ལིངྒ་ལ་དགུག་གཞུག་བྱ། སྙིང་པོ་གཉིས་ཀྱི་མཐར། རྭ་ཛ་དུཥྚཱ་ཎྀ་མཱ་ར་ཡ་ཕཊ། ཅེས་བཟླས་ཤིང་མཚོན་རྣོན་པོས་ལིངྒ་གཏུབས་ལ་ཐུན་རྫས་དང་བསྲེའོ། །དེ་ནས་སླ་ངའི་ནང་དུ་མེ་སྦར་ལ་བསང་སྦྱང་། སྟོང་པའི་ངང་ལས་ཡེ་ཤེས་ཀྱི་མེ་རབ་ཏུ་འབར་ཞིང་
འཁྲུགས་པའི་དབུས་སུ། པདྨ་དམར་པོ་འདབ་མ་བརྒྱད་པ་དང་། སེང་གེ་སྔོན་པོའི་སྟེང་དུ་ཟླ་བའི་དཀྱིལ་འཁོར། དེའི་དབུས་སུ་སྐད་ཅིག་གིས་རྗེ་བཙུན་སེང་གེ་སྒྲ་སྐུ་མདོག་ནག་པོ་ཞལ་གཅིག་ཕྱག་གཉིས། སོགས་ནས། རོལ་པའི་སྟབས་ཀྱིས་བཞུགས་པ། གཡས་སུ་པད་ཟླའི་གདན་ལ་ཆུ་བདག་བ་རུ་ཎ་ནག་པོ་སྟོད་མིའི་རྣམ་པ་ཅན་ཐལ་མོ་སྦྱར་བ། སྦྲུལ་མགོའི་གདེངས་ཀ་བདུན་དང་ལྡན་པའི་སྤྱི་བོར་ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོས་བརྒྱན་པ། དར་དང་རིན་པོ་ཆེས་སྤྲས་པ། སྨད་སྦྲུལ་མཇུག་འཁྱིལ་བ། གཡོན་དུ་པད་ཉིའི་གདན་ལ་རྡོ་རྗེ་ནག་པོ་ཆེན་པོ་སྐུ་མདོག་ལྕོམཐིང་ནག་ཆེར་འབར་བ། ཞལ་གཅིག་ཕྱག་གཉིས་པ། གཡས་གྲི་གུག་དང་། གཡོན་ཐོད་པ་ཁྲག་གིས་གང་བ་ཐུགས་ཀར་སྟེང་འོག་ཏུ་འཛིན་པ། ཕྱག་གཉིས་ཆར་གྱི་དབུས་ན་རྣམ་འཕྲུལ་གྱི་གཎྜི་བསྣམས་པ། སྤྱན་གསུམ་དང་ལྡན་པ། ཞལ་མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫིས་པ། མི་མགོ་སྐམ་པོ་ལྔའི་དབུ་རྒྱན་དང་རློན་པ་ཁྲག་འཛག་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང་སྦྲུལ་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། དར་སྣ་ཚོགས་ཀྱི་ཅོད་པན་དང་ལྷབ་ལྷུབ་ཀྱིས་བཀླུབས་པ། མིའུ་ཐུང་གེལ་པའི་འདུག་སྟངས་ཀྱིས་རོའི་སྟེང་ན་བཞུགས་པ།
དེའི་གཡས་ན་བྱ་ནག །གཡོན་ན་ཁྱི་ནག །རྒྱབ་ན་ཅེ་སྤྱང་། མདུན་ན་མི་ནག །སྟེང་ན་ནམ་མཁའ་ལྡིང་གི་སྤྲུལ་པའི་ཕོ་ཉ་འཕྲོ་བ། མི་བསྐྱོད་པའི་ཅོད་པན་ཅན། ཡེ་ཤེས་ཀྱི་མེ་འབར་བའི་དབུས་ན་དམ་ཚིག་དང་ཡེ་ཤེས་དབྱེར་མེད་དུ་བཞུགས་པར་བསམས་ལ། ཨོཾ་བྷཊྚཱ་ར་ཀ་སིཾཧ་ནཱ་ད་ས་པ་རི་ཝཱ་ར་ཨརྒྷཾ་སོགས་ནས། ཤཔྟའི་བར་གྱིས་མཆོད། བརྩེ་བས་ཐུགས་རྗེའི་དབང་ཕྱུག་ཉིད་ཀྱི་སྐུ། །དྲང་སྲོང་ཆེན་པོའི་ཚུལ་དུ་བཞུགས་ནས་ཀྱང་། །འགྲོ་བའི་གདུང་བ་ཐམས་ཅད་སེལ་མཛད་པའི། །བཅོམ་ལྡན་སེང་གེ་སྒྲ་ལ་ཕྱག་འཚལ་ལོ། །གདེངས་ཀ་ནོར་བུ་འབར་བའི་འོད་ཀྱིས་ནི། །ས་འོག་མུན་པའི་ཚོགས་རྣམས་འཇོམས་མཛད་པ། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་ཕྱག་འཚལ་ལོ། །གང་གི་འཕྲུལ་དང་མངོན་པར་ཤེས་པའི་དཔལ། །ཉེ་བར་དགོངས་ནས་ཐུབ་པའི་བཀའ་བཞིན་དུ། །བསྟན་པ་རིན་ཆེན་བང་མཛོད་ལེགས་སྐྱོང་བའི། །རྡོ་རྗེ་ནག་པོ་ཆེ་ལ་ཕྱག་འཚལ་ལོ། །ཞེས་བསྟོད། འཇིག་རྟེན་དབང་ཕྱུག་སེང་གེ་སྒྲ་འཁོར་དང་བཅས་པས་གདུག་པ་ཅན་ཚར་བཅད་པར་མཛད་དུ་གསོལ། །ཞེས་འདོད་དོན་ལ་གསོལ་བ་བཏབ་པས་ཐམས་ཅད་ཞལ་གཡས་སུ་གདངས་པར་བསམས་ལ་སེང་གེ་སྒྲའི་སྙིང་པོ་དང་། ཆུ་
བདག་གི་སྔགས་དང་། ནག་པོ་ཆེན་པོའི་གཟུངས་ཤཱ་ས་ནའི་ཤམ་དུ་རཱ་ཛ་དུཥྚཱ་ན་མཱ་ར་ཡ་ཕཊ། ཅེས་མང་དུ་བཟླས་ཤིང་ལིངྒ་སྲེག་སྔགས་དེ་ཉིད་ཀྱིས་ཐུན་རྫས་རྣམས་ཀྱང་བསྲེག །དེ་བཞིན་དུ་ལིངྒ་དང་ཐུན་རྫས་རྣམས་སྤེལ་ཞིང་བསྲེགས་ལ་རྒྱལ་པོའི་ཤ་ཁྲག་རུས་པ་བདུད་རྩིར་བསམས་ཏེ་ཕུལ་བས་ལྷག་མ་མ་ལུས་པར་གསོལ་བར་བསམ་ཞིང་བསྲེག་རྫ་ས་རྣམས་མ་ཟད་ཀྱི་བར་དུ་བསྲེག །མཐར་གོང་བཞིན་མཆོད་ཅིང་བསྟོད་ལ། གཏོར་མ་ཨོཾ་ཨཱཿཧཱུྃ་གིས་བྱིན་གྱིས་བརླབ། ཨོཾ་བྷཊྚཱ་ར་ཀ་སིཾ་ཧ་ནཱ་ད་ས་པ་རི་ཝཱ་ར་ཨོཾ་ཨ་ཀཱ་རོ་སོགས་བཏགས་པ་ལན་གསུམ་གྱིས་ཕུལ། མཆོད་བསྟོད་དང་། །འཇིག་རྟེན་དབང་ཕྱུག་འཁོར་བཅས་རྣམས་དང་། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་ཕྲིན་ལས་བཅོལ། ཡི་གེ་བརྒྱ་པའི་མཐར། མ་འབྱོར་པ་དང་སོགས་ཀྱིས་ནོངས་པ་བཟོད་པར་ གསོལ། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱི་མཐར། ཨོཾ་བཛྲ་མུས་དམ་ཡེ་དབྱེར་མེད་ཀྱི་ཡེ་ཤེས་པ་གཤེགས། ཛཿཧཱུྃ་བྃ་ཧོཿས་དམ་ཚིག་པ་རང་ལ་བསྟིམ། བདག་གི་ཡེ་ཤེས་པ་མདུན་གྱི་ནམ་མཁར་བྱོན་པར་བསམས་ལ་མཆོད་བསྟོད་སོགས་ནས་གཤེགས་གསོལ་བར་སྒྲུབ་ཐབས་ལྟར་བྱ། གནས་གསུམ་ཡི་གེ་གསུམ་གྱིས་བསྲུང་། དེ་ནས་རང་སྐད་ཅིག་གིས་སེང་གེ་སྒྲ་སྐུ་
མདོག་དཀར་པོར་འགྱུར། བསྔོ་སྨོན་ཤིས་བརྗོད་བྱ། ཐལ་སོ་ལ་སོགས་རང་ཡུལ་དུ་མི་ལྡོག་པའི་འབབ་ཆུ་དྲག་པོར་བསྐྱལ་ལ་ལས་ཀྱི་རྗེས་མི་མངོན་པར་བྱ་ཞིང་དགའ་སྟོན་ལ་ལོངས་སྤྱོད་དོ། །གཉིས་པ་དངོས་གཞི་གདོན་འགྲོལ་བའི་ཆོ་ག་ལའང་གསུམ། སྦྱོར་བ། དངོས་གཞི། རྗེས་སོ། །དེ་ལ་སློབ་དཔོན་རིན་པོ་ཆེའི་བསྡུས་དོན་ལས་ཆོ་ག་རྣམ་པ་བཅུ་དྲུག་གིས་བསྡུས་པར་གསུངས་པ་ལྟར་རམ། ལག་ཏུ་བླང་པའི་ཚེ། སྦྱོར་བ་དཀྱིལ་༡འཁོར་རྟེན་༢དང་ནི། །བུམ་༣པ་མཆོད་གཏོར་བཤམ་པ་ལྔ། །དངོས་གཞི་བདག་༦བསྐྱེད་༧ལྷ་ཀླུ་རགདོན། །བསྒྲུབ་༡༠བྱར་ཇི་ལྟར་བྱ་བ་ལྔ། །རྗེས་སུ་མཆོད་༡༡བཤགས་༡༢གཤེགས་སུ་༡༣གསོལ། །བདག་སྲུང་༡༤ དགེ་༡༥བ་བསྔོ་སོགས་ལྔ། །ཞེས་སོ་སོར་དོན་ཚན་ལྔ་ལྔས་བསྟན་པ་ལྟར་ཡིན་ཀྱང་། །འདིར་ཡི་གེ་ཉུང་ངུས་མི་མཚོན་པས། ཐར་རྩེ་པཎྜིཏ་ཆེན་པོ་ནམ་མཁའ་དཔལ་བཟང་གིས་མཛད་པའི་གདོན་འགྲོལ་གྱི་ཆོ་ག་རིན་ཆེན་ཕྲེང་མཛེས་དང་། དེ་ཉིད་ངག་འདོན་བཀླག་པས་གྲུབ་པར་འཇམ་པའི་དབྱངས་ངག་དབང་ལེགས་གྲུབ་ཀྱིས་བསྡེབས་པའི་གསུང་རབ་ཀྱི་དགོངས་དོན་ལྟར་བླ་མ་བརྒྱུད་པའི་ཕྱག་བཞེས་ཀྱིས་བརྒྱན་ཏེ་ཤེས་པར་བྱ་དགོས་སོ། །གསུམ་པ་མི་ལྡོག་པའི་ཕྱིར་འཁོར་ལོ་གདགས་པ་ནི། །
གནས་གཙང་མར་ཟླ་བ་ཡར་ངོའི་དུས་ཚེས་ཤིས་པའི་སྔ་དྲོའི་ཆར། དང་པོ་འབྲི་བ་ནི། རང་ལྷའི་ང་རྒྱལ་དང་ལྡན་པས་རས་སམ་ཤོག་བུ་ལ། སྐྱེས་པ་སྲུང་ན་དེ་ཉིད་ཀྱི་སྲིན་ལག་གི་ཁྲག་དང་གི་ཝཾ། །བུད་མེད་སྲུང་ན་དེ་ཉིད་ཀྱི་སྲིན་ལག་གི་ཁྲག་དང་རྒྱ་སྐྱེགས་ཀྱིས་འཁོར་ལོ་རྩིབས་བརྒྱད་པ་ལྟེ་བ་མུ་ཁྱུད་གཉིས་དང་བཅས་པའི་དབུས་སུ་ཧྲཱིཿ དེའི་མཐར། ཆེ་གེ་མོའི་ནད་དང་གདོན་ལ་སོགས་པ་མི་མཐུན་པའི་ཕྱོགས་ཐམས་ཅད་ཤཱིནྟིཾ་ཀུ་རུ་སྭཱ་ཧཱ། ཚེ་བསོད་དཔལ་འབྱོར་ལ་སོགས་པ་མཐུན་རྐྱེན་ཐམས་ཅད་པུཥྟིཾ་ཀུ་རུ་སྭཱ་ཧཱ། ནད་གདོན་སོགས་ཉེ་བར་འཚེ་བ་ཐམས་ཅད་ལས་རཀྵཾ་ཀུ་རུ་སྭཱ་ཧཱ། །རྩིབས་བརྒྱད་ལ་ཤར་ནས་རིམ་པ་བཞིན། ཨོཾ། ཨཱཿ སི། ཧ། ནཱ། ད། ཧཱུྃ། ཕཊ་ཅེས་པའི་ཡིག་འབྲུ་རེ་རེས་མཚན་པ། མུ་ཁྱུད་ནང་མ་ལ་གཟུངས་རིང་། ཕྱི་མ་ལ་ཨཱ་ལི་གཡས་སྐོར་དང་། གཡོན་དུ་བསྐོར་འདི་ལ་སློབ་དཔོན་རིན་པོ་ཆེའི་ཡིག་ཆར་འབྲི་བའི་སྐབས་མུ་ཁྱུད་ནང་མ་ལ་དབྱངས་གསལ་དང་། ཕྱི་མ་ལ་གཟུངས་སྔགས་འབྲི་བར་གསུངས། རབ་གནས་ཀྱི་སྐབས་དང་། དཀར་དང་དམར་གྱི་ཡིག་ཆ་སོགས་ལ་གོང་དུ་སྨོས་པ་ལྟར་སྣང་ངོ་། །བ་བྲི། རབ་གནས་ནི། བྲིས་ཟིན་པ་དང་འཁོར་ལོ་སྟེགས་ཀྱི་དབུས་སུ་བཞག །མཆོད་པ་དང་གཏོར་མ་གསུམ་བཤམ། བདག་བསྐྱེད་བཟླས་པ་བཅས་གྲུབ་རྗེས་འཁོར་ལོ་བསང་སྦྱང་། །
སྟོང་པའི་ངང་ལས་འཁོར་ལོ་རྩིབས་བརྒྱད་པ་སོགས་ནས། གཡོན་དུ་བསྐོར་བ་ཞེས་པའི་བར་གོང་བཞིན་བརྗོད་པས་གསལ་བཏབ། རང་གི་སྙིང་གའི་ཧྲཱིཿདང་འཁོར་ལོའི་ཡི་གེའི་ཚོགས་ལས་འོད་ཟེར་འཕྲོས་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་འཁོར་ལོ་ཨོཾ་བཛྲ་ས་མཱ་ཛས་སྤྱན་དྲང་། ཛཿཧཱུྃ་བྃ་ཧོཿས་བསྟིམ། ཨོཾ་བཛྲ་པུཥྤེ་སོགས་ཀྱིས་མཆོད། །གཏོར་མ་གཅིག་ཕྱོགས་སྐྱོང་ལ་ཆ་གསུམ་ལྟར་ཕུལ་ལ་སྲུང་བའི་ཕྲིན་ལས་བཅོལ། རང་གི་སྙིང་གའི་ས་བོན་དང་འཁོར་ལོའི་ཡི་གེའི་ཚོགས་ལས་འོད་ཟེར་འཕྲོས། བསྲུང་བྱའི་རྣམ་པར་ཤེས་པ་འོད་ཀྱི་རྣམ་པར་བཀུག་སྟེ་སྙིང་པོ་དང་གཟུངས་སྔགས་ལ་ཐིམ། སླར་ཡང་དེའི་ལུས་རང་འདྲ་བ་དཔག་ཏུ་མེད་པ་བཀུག་སྟེ་ཨཱ་ལི་དང་ཀཱ་ལི་ལ་ཐིམ། ལྷ་སྔགས་དང་དབྱེར་མེད་པར་བྱིན་གྱིས་བརླབས་པས་སྒོ་གསུམ་སྐུ་གསུང་ཐུགས་ཀྱི་རང་བཞིན་དུ་གྱུར་པར་བསམས་ལ། པུཥྤེ་སོགས་ཀྱིས་མཆོད། གཏོར་མ་གཅིག་འབྱུང་པོ་ལ་ཆ་གསུམ་ལྟར་བྱིན་ནས་བར་ཆད་མ་བྱེད་ཅིག་ཅེས་བསྒོ། དེ་ནས་འཁོར་ལོ་ལག་གཡས་སུ་བཟུང་བའམ་བཟུང་བར་མོས་ཏེ་མཆོག་སྦྱིན་གྱི་ཕྱག་རྒྱས་རེག་པའི་ཚུལ་དང་བཅས། སྙིང་པོ། གཟུངས་རིང་། ཨཱ་ལི་ཀཱ་ལི། ན་མོ་རཏྣ་ཏྲ་ཡཱ་ཡ། ཨོཾ་ཡེདྷ་རྨ་སོགས་དང་། ཨོཾ་སི་ཧ་
ནཱ་ད་ས་མ་ཡ། མ་ནུ་པཱ་ལ་སོགས་སེང་གེ་སྒྲའི་ཡི་གེ་བརྒྱ་པ་རྣམས་སོ་སོའི་མཐར་སྤེལ་ཚིག་སྦྱར་བ་དང་བཅས་པ་བརྒྱ་རྩ་བརྒྱད་རེ་བཟླས་པས་བྱིན་རླབས་ཀྱི་རྒྱུན་བརྟན་པར་བྱའོ། །གདགས་པ་ནི། དེ་ནས་འཁོར་ལོ་ཚུལ་བཞིན་དུ་བལྟབ། ཚོན་སྐུད་ཀྱིས་དཀྲི། ཟངས་ལ་སོགས་པའི་སྣོད་དུ་བཅུག་ལ། བསྒྲུབ་བྱ་མདུན་དུ་འཁོད་པར་གཏོར་མ་གཅིག་བགེགས་ལ་བྱིན་ནས་སྦྱོང་བ་གསུམ་སྤྱི་ལྟར་བྱས་པས་གདོན་བགེགས་ཐམས་ཅད་རྒྱང་རིང་དུ་བསྐྲད་ལ་མཚམས་བཅད། དེ་ནས་སྙིང་པོ་དང་གཟུངས་སྔགས་བཟླ་བཞིན་པས་མགུལ་ལམ་དཔུང་པ་གཡོན་པར་གདགས། ཡི་གེ་བརྒྱ་པ་ལན་གསུམ་གྱིས་བརྟན་པར་བྱ་ཞིང་ཤིས་པ་བརྗོད། ཕྱིས་འཇིགས་པ་དང་ཡ་ང་བ་སོགས་བྱུང་ན་བསྒྲུབ་བྱ་རང་གི་ལག་པས་འཁོར་ལོ་ལ་འཇུས། མགོན་སྐྱབས་ཞུ་བར་དམིགས་ཏེ་སྔགས་རྣམས་སྔར་བཞིན་དུ་བཟླ། གལ་ཏེ་གདོན་འགྲོལ་དང་འབྲེལ་བར་སྲུང་འཁོར་གདགས་ན། སྲུང་བ་ཟིན་པའི་རྗེས་འཁོར་ལོ་གདགས་ལ་ཤིས་བརྗོད་སོགས་དཀྱུས་ལྟར་བྱའོ། །དེ་ལྟར་གདགས་པའི་ཕན་ཡོན་ཀྱང་རྒྱ་གཞུང་ལས། ཚེ་རིང་བསོད་ནམས་ཆེ་བ་དང་། །སྡིག་པ་ཐམས་ཅད་བྱང་བ་དང་། །བགེགས་ཀྱི་ཚོགས་རྣམས་ཀུན་སྐྱོབ་ཅིང་། །དོན་རྣམས་ཐམས་ཅད་འགྲུབ་པར་འགྱུར། །ཞེས་གསུངས་སོ། །
དེའང་སྤྱིར་སེང་གེ་སྒྲའི་བསྙེན་པ་ཐེམས་པ་ཙམ་གྱིས། ཚེ་རབས་སུ་བསགས་པའི་ལས་ཀྱི་སྒྲིབ་པ་ཐམས་ཅད་བྱང་བ་དང་། ནད་རྙིང་པ་ཞི་ཞིང་གསར་པ་མི་འབྱུང་བ་དང་། ལུས་ཀྱི་མདངས་དང་སྟོབས་རྒྱས་པ་དང་། དབང་པོ་གསལ་བ་དང་། འདོད་དགུའི་དཔལ་གྱིས་འབྱོར་པ་སོགས་ཕན་ཡོན་དཔག་ཏུ་མེད་པར་གསུངས་ཤིང་། བྱེ་བྲག་ཏུ་ཀླུ་གདོན་གྱིས་ཟིན་པ་ལ་འབུམ་ཕྲག་བཞི་སོགས་བསྙེན་པས་ནད་གདོན་ལས་གྲོལ་བར་འགྱུར་ལ། དེས་མ་གྲོལ་ན་གཟུངས་སྒྲུབ་དང་། །བསྙེན་པའི་མཐར་ཆུ་བདག་གི་སྙིང་པོ་བཏགས་པའི་ལས་སྦྱོར་གྱི་བསྙེན་པ་དང་། དུག་སོ་སོར་ངོས་ཟིན་ན་སོ་སོའི་གཉེན་པོའི་སྔགས་དང་སྦྲེལ་བའི་བསྙེན་པ་དང་། ཀླུ་དང་རྒྱལ་པོ་དབྱེ་བ་རྣམས་རིམ་བཞིན་ཏུ་བྱ་སྟེ། དེ་ཐམས་ཅད་ཀྱི་མཇུག་ཏུ་གདོན་འགྲོལ་གྱི་ཆོ་ག་དང་། སྲུང་བའི་འཁོར་ལོ་གདགས་པས་ཕན་བདེའི་དངོས་པོ་འཕྲལ་དུ་སྟེར་བ་ནི་ངེས་པའོ། །འཇིག་རྟེན་དབང་ཕྱུག་སེང་གེ་སྒྲའི། །རིག་སྔགས་བདུད་རྩིའི་སྤྲིན་ཆེན་ལས། །བྱིན་རླབས་ཟིལ་དངར་རྟག་འབབ་པས། །ས་གསུམ་ཉེར་འཚོའི་སླད་གྱུར་ཅིག །ཅེས་པའང་སྙིགས་མའི་དུས་ཀྱི་གཞན་དབང་དུ་གྱུར་པས་གདམས་ངག་ཉི་ཚེ་བ་ལ་བློ་གཏོད་ཅིང་། གདུག་པའི་འབྱུང་པོ་སྐྱབས་སུ་བསྙེན་པ་ལས། འདི་ལྟ་བུའི་ཚད་
ལྡན་གྱི་གཞུང་ལ་བློ་གྲོས་འཇུག་པའི་བསོད་ནམས་ཅན་དཀོན་པའི་དངོས་པོར་གྱུར་ཡང་། རང་ཉིད་ཁོ་ནའི་མོས་པའི་དབང་དུ་བྱས་ཏེ། བྱ་བྲལ་སྤོང་བ་པ་འཇམ་དབྱངས་མཁྱེན་བརྩེས་སློབ་དཔོན་རིན་པོ་ཆེ་བསོད་ནམས་རྩེ་མོའི་གསུང་རབ་དང་། དཀར་སྟོན་ཤཱཀྱ་གྲགས། དམར་ཆོས་ཀྱི་རྒྱལ་པོ། ཀུན་མཁྱེན་རཏྣ་ཤྲཱི་སོགས་ཀྱི་གཞུང་གསལ་བྱེད་དང་བཅས་པ་ལས་ཉེར་མཁོའི་ཟིན་བྲིས་ཁྱུགས་ཙམ་སྤེལ་བ་དགེ་ལེགས་མཆོག་ཏུ་གྱུར་ཅིག། །།