ཐུགས་སྒྲུབ་ལས་བྱང་བསྡུས་པ་ཕྲིན་ལས་སྙིང་པོའི་རྣལ་འབྱོར་ལ་བརྟེན་ནས་བསྙེན་པ་ལས་རུང་ཟླ་གཅིག་ཞག་ལྔ་ཙམ་མཛད་པའི་ཟིན་ཐོ།
༈ །ཐུགས་སྒྲུབ་ལས་བྱང་བསྡུས་པ་ཕྲིན་ལས་སྙིང་པོའི་རྣལ་འབྱོར་ལ་བརྟེན་ནས་བསྙེན་པ་ལས་རུང་ཟླ་གཅིག་ཞག་ལྔ་ཙམ་མཛད་པའི་ཟིན་ཐོ་དགེ། །སྭ་སྟི། །ཐུགས་སྒྲུབ་བསྙེན་པ་ཟླ་བ་གཅིག་ལྷག་ཙམ་བཏང་ན། རང་གི་མདུན་དུ་སློབ་དཔོན་རིན་པོ་ཆེའི་སྐུ་བྲིས་འབུར་གང་རིགས་དང་། དེའི་མདུན་དུ་གཏོར་མ་རིན་ཆེན་འབར་བ། གཡས་སུ་སྨན། གཡོན་དུ་རཀྟ། མདུན་དུ་ཉེར་སྤྱོད་སྨན་ཕུད་ཀྱི་གཡས་སུ། བཀའ་སྲུང་ཚེ་རིང་མའི་གཏོར་མ། དབུས་སུ་བུམ་པའི་སྟེང་དཀར་གཏོར་འདབ་བཞི། བུམ་པའི་ཕྱོགས་བཞིར་བཤེས་བུ་རེ། བར་མཚམས་རིལ་བུས་བསྐོར་བ་དཀར་བྱུགས་ཅན། རཀྟའི་གཡོན་དུ་ གཏེར་སྲུང 
་ཁྱུང་བཙུན་མའི་གཏོར་མ། དམར་གཏོར་ཟུར་གསུམ་རྒྱན་ལྡན་མཐེབ་ཀྱུས་བསྐོར་བ་
བཤམས། དེ་ནས་ཕྱི་ཐུན་གྱི་མགོར་སྔོན་འགྲོའི་ངག་འདོན་བྱང་ཆུབ་མཆོག་གི་ས་བོན་ལྟར་བླ་མའི་རྣལ་འབྱོར་ཡན་གྲུབ་ནས། ལས་བྱང་ཆེ་བའི་སྐྱབས་སེམས་བགེགས་བསྐྲད་པར། བགེགས་གཏོར་ཕྱིར་དོར་བ་དང་མཉམ་དུ་ཐོ་འཛུག །ནང་དུ་ལོག་ལ་སྲུང་འཁོར་བསྒོམ་པ་ནས་བཟུང་སྔོན་འགྲོ་ཆོས་བདུན་ཚང་བར་བྱ། དངོས་གཞི་ལས་བྱང་རྒྱས་བསྡུས་གང་རིགས་བསྟོད་པའི་བར་དང་། །དེ་ནས་ཛཔ་ཁང་ཕྱེས་ལ་བཟླས་པ་ཅི་རིགས། ལས་བྱང་རྒྱས་པ་ལྟར་ན་བསྟོད་པ་སོགས་ཛཔྲ་ཁང་བསྡུ་བ་གཞུང་ལྟར་དང་། བསྡུས་པ་ལྟར་ན་མཆོད་བསྟོད་མདོར་བསྡུས་དང་། བར་ཆད་ལམ་སེལ་ཟླ ཚར་གཅིག །ཡིག་བརྒྱ་ལན་གསུམ་མཐར། ཛཧཱུྃ་བཾ་ཧོས་མདུན་བསྐྱེད་རང་ལ་བསྟིམས་ནས། ཧཱུྃ་གསུམ་གྱིས་བསྡུ། ཕཊ་གསུམ་གྱིས་ལྡང་། བསྔོ་སྨོན་ཤིས་བརྗོད་བཅས་བྱ། དེ་ནས་སླར་སྲོད་ཐུན་ལ་སྐྱབས་སེམས་དང་མཆོད་པ་བྱིན་རླབས་ལས་བྱང་ཆུང་བ་ལྟར་དང་། ལས་བྱང་ཆུང་བའི་གཞུང་བསྲང་ལ་གོང་ལྟར་ལ། ཧཱུྃ་གསུམ་གྱིས་བསྡུས་པའི་ངང་དུ་ཉལ་བའི་རྣལ་འབྱོར་བྱ། སང་ཐོ་རངས་དེའི་ངང་ནས་ལྷར་ལྡང་ཞིང་སྔོན་འགྲོ་ལ་འཇུག་ཏེ། དེ་ཡང་སྐྱབས་འགྲོ་ཉིན་གཅིག་གི་ཞར་ལ་ཐུན་མཇུག་སེམས་བསྐྱེད་ཡན་ལག་བདུན་པའང་ཚར་ཆ་ཤས་གསོག །དེ་ནས་རྡོར་སེམས་བསྒོམ་
བཟླས་མན་མ་ཆགས་ཙམ་བྱ་ཞིང་། ཐུན་བཞི་བྱུང་ན་ལེགས། རྡོར་སེམས་བསྒོམ་བཟླས་༢ཉིན་གཅིག །བླ་མའི་རྣལ་འབྱོར་འདི་ཕྱི་སྒྲུབ་ཡིན་པས་གལ་ཆེ་སྟབས་ཉིན་གསུམ་ལ། ཉིན་དང་པོ་ལ་མཎྜལ་༣གཙོ་བོར་བསག །གཉིས་པ་ལ་གསོལ་འདེབས་༤ དུས་གསུམ་སངས་རྒྱས་མ་དང་། བར་ཆད་ལམ་སེལ། གསུམ་པ་ལ་བསྙེན་པ་བཛྲ་གུ་རུ་གསོག་ཅིང་དབང་བླང་བའི་དམིགས་པ་གཙོ་བོར་བྱ། དེས་སྔོན་འགྲོ་ཉིན་ལྔ་གྲུབ་ནས་དངོས་གཞི་ལ་འཇུག །དེ་ཡང་སྔོན་འགྲོ་སྐབས་སུའང་ཐུན་སོ་སོའི་མཇུག་ཏུ་ལས་བྱང་འབྲིང་པོའི་ལྷ་བསྐྱེད་ནས་བཟུང་བསྔོ་སྨོན་ཤིས་བརྗོད་པར་མ་ཆགས་ཙམ་རེ་བྱ་ཞིང་། དངོས་གཞི་ལ་འཇུག་སྐབས་སྔ་ཐུན་གྱི་མགོར་སྔོན་འགྲོ་ཚར་རེ་ལས། ཐུན་གཞན་ལ་ལས་བྱང་བསྡུས་པའི་སྐྱབས་སེམས་ལན་གསུམ། བགེགས་བསྐྲད། གཏོར་མ་འདི་ལོངས་ལ། གནས་འདིར་མ་འདུག །ཅེས་བསྒྱུར་བ་དང་། མཆོད་པ་བྱིན་རླབས་ཡན་དཀྱུས་ལྟར། དེ་ནས་ལྷ་བསྐྱེད་ནས་བསྟོད་པའི་བར་དང་། བསྟོད་པའི་མཐར་ཛཔྲ་ཁང་ཕྱེས་ལ། ཐོག་མར་ཞག་༧ལ་ཨ་མཱ་ར་ཎི་གཙོ་བོར་བཟླ། དེ་ནས་ཞག་༧ལ་མ་ཎི་གཙོ་བོར་བཟླ། དེ་ནས་བསྙེན་པའི་གཙོ་བོ་བཛྲ་གུ་རུ་འདི་འབུམ་ཕྲག་བཞི་གྲུབ་ན་ཤིན་ཏུ་གལ་ཆེ་ཞིང་། ཞག་༡༠སྐོར་གྱིས་གྲུབ་འདྲ། །
འདི་རྣམས་ཀྱི་སྐབས་སུའང་བཟླས་པ་གཞན་རྣམས་ཕྲེང་སྐོར་རེ་ཙམ་མ་ཆགས་ཙམ་རེས་འཐུས། དེ་ནས་སྒྲུབ་པའི་མཚོན་བྱེད་དུ་ཐོད་ཕྲེང་རྩལ་ཞག་གསུམ་ཙམ་དང་། ལས་སྦྱོར་ཧ་རི་ནི་ས་བཏགས་པ་ཟླཉིན་གཅིག་ཙམ་བཟླ། ཐུན་ཐམས་ཅད་ཀྱི་མཇུག་ཏུ་སྔགས་ཀྱི་ལྷག་ཆད་ཁ་སྐོང་ཞིང་བྱིན་རླབས་འཕེལ་བའི་ཆེད་དུ་ཨཱ་ལི་ཀ་ལི་ཡེ་དྷརྨ་རྣམས་ཚར་གསུམ་རེ་བར་ཆད་ལམ་སེལ་ཚར་གཅིག །མཆོད་བསྟོད་དང་ཡིག་བརྒྱ་ཚར་གསུམ། ཛཔ་ཁང་བསྡུ་བ། ཧཱུྃ་གསུམ་གྱིས་བསྡུ་བ་དང་། ཕཊ་གསུམ་གྱིས་ལྡང་བ། བསྔོ་སྨོན་བཀྲ་ཤིས་བཅས་བྱ། ཁྱད་པར་གྱི་ཐུན་གྱི་བར་ཆད་ལམ་སེལ། རྗེས་སུ་ཟླ ལས་བྱང་བསྡུས་པ་ལྟར་ཚོགས་བྱིན་རླབས་ནས་བསྒྲལ་བསྟབས་ཡན་དང་། དེ་མཚམས་ཚེ་རིང་མའི་གསོལ་ཀ་བསྟོད་པ་ཡན། ཁ་རག་ཁྱུང་བཙུན་མའི་གསོལ་མཆོད་བཅས་ཀྱི་མཐར། བར་ཆད་ལམ་ལཾ་སེལ་དང་བསམ་པ་ལྷུན་གྲུབ་སོགས་ཨོ་རྒྱན་གསོལ་འདེབས་གང་འོས་རེ་འདོན། དེ་ནས་ལྷག་མ་འདོན་ནས་ལྷག་གཏོར་མཚམས་མ་གྲོལ་བར་ཕྱིར་བཏང་སྲོལ་མེད་པས་སྣོད་ཞིག་གི་ནང་དུ་གསོག །དེ་རྗེས་མཆོད་བསྟོད་ཡིག་བརྒྱ་ཛཔྲ་ཁང་བསྡུ་བ་སོགས་གང་ལྟར་བྱ། དུས་རྒྱུན་ལས་བྱང་བསྡུས་པས་ཆོག །ཡར་ངོ་མར་ངོའི་ཚེས་བཅུའི་སྐབས་ཕྱི་ཐུན་ལ་ལས་བྱང་རྒྱས་པ་ཚོགས་བཅས་དང་། ཚེ་
རིང་མའི་སྐོང་བ་འཁྲུགས་སྐོང་། བརྟན་མའི་གསོལ་ཀ་བཅས་འདོན་གྲུབ་ན་ལེགས། ཚེ་རིང་མའི་འཁྲུགས་སྐོང་ལ་ཐོད་པའི་ནང་དུ་བདུད་རྩི་སྨན་སྒྲུབ་ཆང་ཕུད་དང་སྦྱར་བ་བཤམས། བརྟན་མའི་གསོལ་ཀ་ལ་གསེར་སྐྱེམས་ཁོ་ན་བཤམས་པས་མཐུས། དེ་ནས་སྦྱིན་སྲེག་མ་གྲུབ་ན་སྔགས་ཀྱི་ལྷག་ཆད་ཁ་སྐོང་ལ་དམིགས་ཏེ་སང་མཚམས་གྲོལ་རྒྱུའི་དེ་རིང་ཐུན་བཞི་ཀའི་མཐར་ཡིག་བརྒྱ་སྟོང་རྩ་སོགས་གང་མང་གཙོ་བོར་བཏོན་ལ་འདོན། དོ་ནུབ་མཆོད་པ་གསར་པ་དང་ཚོགས་རྫས་གང་འབྱོར་རྒྱས་པར་བཤམས། སང་སྔ་བར་ལངས་ཏེ་ལས་བྱང་རྒྱས་བསྡུས་གང་རིགས་གཞུང་བསྲང་ནས་བཟླས་པ་གང་འགྲུབ་རྗེས་བར་ཆད་ལམ་སེལ་དང་། མཆོད་བསྟོད་ནོངས་བཤགས་བཅས་རྒྱས་པར་བྱས་ནས། ལས་བྱང་རྒྱས་པ་ལྟར་དངོས་གྲུབ་བླང་བའི་སྐབས་གཏོར་མ་སྐད་ཅིག་གིས་ལྷར་གསལ་བ་གནས་གསུམ་དུ་གཏུག་ཅིང་ཅུང་ཟད་རོལ། ཛཔྲ་ཁང་བསྡུ་བ་སོགས་བྱ། དེ་ལྟར་དངོས་གྲུབ་ལེན་པ་འདི་སྐྱ་རེངས་ཤར་དུས་མཛད་སྲོལ་ཡོད། དེ་ནས་སླར་ཡང་ལས་བྱང་རྒྱས་བསྡུས་གང་རིགས་གཞུང་བསྲང་ནས་གཏོང་རག་གི་ཚུལ་དུ་ཚོགས་བརྒྱ་སོགས་གང་འགྲུབ་བྱ། ཚོགས་བརྒྱ་བྱེད་ན་ལས་བྱང་རྒྱས་པ་ལྟར་ཚོགས་ཚར་གཅིག་ལྷག་མ་ཡན་སོང་ནས། བསྡུས་པ་ལྟར་གསོག །
མཐར་ལས་བྱང་རྒྱས་པ་ལྟར་ལྷག་མ་བཏང་ནས་སྔར་གསོག་པའི་ལྷག་མ་རྣམས་ཀྱང་བཏང་། དེ་ནས་བསྐུལ་བ་ཆད་ཐོ་སོགས་ནས་བཀྲ་ཤིས་བར་ལས་བྱང་རྒྱས་པ་ལྟར་བྱའོ། །དེ་ལྟར་ལས་རུང་གི་ བསྙེན་པ་འདི་ཙམ་གྱིས་འཐུས་ཤིང་ཟླ་བ་གཅིག་དང་ཞག་ལྔ་སྐོར་གྱིས་ཧ་ལམ་འགྲོ་བ་འདྲ་ལགས། །སརྦ་མངྒ་ལཾ།། །།དགེའོ། །དགེའོ། །དགེའོ།། །།