ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་གནས་ལུང་གྲངས་གསོག་སྐབས།
ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་གནས་ལུང་གྲངས་གསོག་སྐབས། སྤྲོ་ན། ཧོ སྐྱབས་གནས་ཀུན་འདུས་སོགས་གསོལ་གདབ་དང་། ཧཱུྃ། ཉོན་ཅིག་ཚེ་འདས་སོགས་ལན་སྦྱིན། གང་ལྟར་ཡང་ཁྲུས་བུམ་ཐོགས་ཏེ། ཧཱུྃ། འདི་ནི་དབྱིངས་རིག་དབྱེར་མེད་པ། །སྐུ་གསུམ་རོལ་རྩལ་ཆུ་རྒྱུན་གྱིས། །ཚེ་འདས་གཟུང་འཛིན་འཁྲུལ་སྣང་གི། །མ་དག་སྒྲིབ་ཚོགས་དག་གྱུར་ཅིག །ཨོཾ་མ་ཎི་པདྨེ་ཧཱུྃ། ཨོཾ་ཧཱུྃ་ཧཱུྃ་ཧྲཱི༔ བུདྡྷ་ཛྷཱ་ན་དྷ་རྨ་དྷ་ཏུ་ཨ༔ ཚེ་འདས་ཀྱིས་ཚེ་འཁོར་བ་ཐོག་མ་མེད་པ་ནས་དུས་གསུམ་ཀུན་ཏུ་ལུས་ངག་ཡིད་གསུམ་གྱི་སྒོ་ནས་བསགས་པའི་སྡིག་སྒྲིབ་ཐམས་ཅད་ཤུདྡྷེ་ཤུདྡྷ་ཡ་སྭཱ་ཧཱ། ཞེས་བཀྲུ། དུག་བྱ་བ་ནི། མ་རིག་རྩལ་སྣང་འོད་ལྔ་པོ། །བདག་གིར་བཟུང་བས་རབ་འཐས་པའི། །ཕྱི་ནང་འབྱུང་བ་ལྔ་ཕྲག་ཟུང་། །དུག་ལྔའི་སྐྱེད་བྱེད་བསྐྱེད་ཡུལ་གྱི། །ཕ་མ་ཇི་བཞིན་གྱུར་པའི་དུག །ལྷ་སྔགས་ཏིང་འཛིན་རོལ་རྩལ་གྱིས། །དུག་ཕྱུང་དུག་ལྔའི་སྒྲིབ་ཚོགས་ཀུན། །འབྱུང་བ་སོ་སོའི་དབྱིངས་སུ་དག །དུག་འཛིན་མཁའ་ལྟར་སྟོང་གྱུར་ཅིག །ཅེས་དང་། བཟླས་བྱེས་བྲབས་ལ། ཨོཾ་མ་ཎི་པདྨེ་ཧཱུཾ། ཚེ་འདས་ཀྱིས་འཁོར་བ་ཐོག་མ་མེད་པ་ནས་དུས་གསུམ་ཀུན་ཏུ་དུག་ལྔའི་ལས་བསགས་པ་ཐམས་ཅད་ཤཱནྟཾ་ཀུ་རུ་སྭཱ་ཧཱ། གཏོར་མ། ཨོཾ་ཨཱཧཱུྃ་གིས་བརླབས་ལ། ཧཱུྃ། འདོད་པའི་ཡོན་ཏན་ལྔ་ལྡན་པའི། །གཏོར་མ་མཁོ་
དགུ་ཕུན་ཚོགས་གཏེར། །ཚེ་འདས་ཉོན་དྲུག་ལས་བསགས་པའི། །ལན་ཆགས་ཤ་འཁོན་སྦྱང་ཕྱིར་བསྔོ། །ན་མསྶརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུཾ། ཞེས་བསྔོ། ཐུབ་དྲུག་གི་སྐུ་ཐོགས་ལ། །ཧཱུྃ། ཞེ་སྡང་རྣམ་དག་འགྲོ་འདུལ་སྤྲུལ་པའི་སྐུ་སོགས་རྒྱས་པར་སོ་སོར་བསྐུར། བསྡུ་ན། ཧཱུྃ། ཉོན་དྲུག་རྣམ་དག་འགྲོ་འདུལ་སྤྲུལ་པའི་སྐུ། །བཅོམ་ལྡན་ཐུབ་དྲུག་རང་རྟགས་ཕྱག་རྒྱ་འཛིན། །ཚེ་འདས་རིགས་ཀྱི་བུ་ལ་དབང་བསྐུར་བས། །རྒྱལ་བ་རིགས་དྲུག་གསང་གསུམ་དབང་ཐོབ་ཤོག །ཨོཾ་མུ་ནེ་ཡེ་སྭཱ་ཧཱ། ཨོཾ་མུ་ནེ་ཧཱུྃ་སྭཱ་ཧཱ། ཨོཾ་མུ་ནེ་ཀྵ་སྭཱ་ཧཱ། ཨོཾ་མུ་ནེ་ཧཱུྃ་སྭཱ་ཧཱ། ཨོཾ་མུ་ནེ་པུཾ་སྭཱ་ཧཱ། ཨོཾ་མུ་ནེ་ཧཱུྃ་ཧཱུྃ་སྭཱ་ཧཱ། ཨ་བྷི་ཥིཉྩམི། ཆོས་བཤད་པ་ནི། ཧཱུྃ། ཉོན་ཅིག་ཚེ་འདས་ལུས་བརྗེས་རིགས་ཀྱི་བུ། །སྒོ་ལྔའི་རྣམ་ཤེས་ཡུལ་ལྔའི་རྗེས་འབྲང་བས། །ཚོགས་དྲུག་ཡུལ་ལ་ཆགས་སྡང་བྱས་འབྲས་ཀྱིས། །རིགས་དྲུག་གནས་སྐྱེས་སྡུག་བསྔལ་རྣམ་གསུམ་ལ། །རྟག་ཏུ་སྤྱོད་པ་བཟོད་དཀའི་གནས་ཡིན་ཀྱང་། །རང་གྲིབ་མཐོང་ཚེ་དེ་ཉིད་དགྲར་བཟུང་བ། །ཇི་བཞིན་རྟོགས་པས་ངར་འཛིན་སྤོང་མཛོད་ལ། །ཕྱག་ན་པདྨོའི་གོ་སར་སླེབས་པར་མཛོད། །ཅེས་གདམས། ཚོགས་གསག་པའི་སླད། ན་མོ། མཆོག་གསུམ་རྩ་གསུམ་ངོ་བོ་ཉིད། །སྡུག་བསྔལ་རང་གྲོལ་ལྷ་ཚོགས་ལ། །ཕྱག་འཚལ་སྐྱབས་
མཆི་ཉེས་ཚོགས་བཤགས། །མཆོད་ཚོགས་ཀུན་འབུལ་ཆོས་འཁོར་བསྐོར། །དགེ་ལ་ཡི་རང་རྟག་བརྟན་བཞུགས། །བསོད་ནམས་འགྲོ་ལ་ཕན་ཕྱིར་བསྔོ། །ཞེས་རྒྱུད་སྦྱང་། ཡེ་ཤེས་པ་དབབ་པ་ནི། ཚེ་ལས་འདས་པ་སྐད་ཅིག་གིས། །འཕགས་པའི་སྐུར་གསལ་གནས་གསུམ་དུ། །ཡིག་འབྲུ་གསུམ་གྱིས་མཚན་པ་ལས། །འོད་འཕྲོས་ཡེ་ཤེས་ལྷ་ཡི་ཚོགས། །སྤྱན་དྲངས་བྱོན་ནས་ལྷར་གསལ་ཐིམ། །དབྱེར་མེད་དུ་མ་རོ་གཅིག་གྱུར། །ཨོཾ་མ་ཎི་པདྨེ་ཧཱུྃ་ཧྲཱིཿ ཨཱརྱ་ལོ་ཀེ་ཤྭ་ར་ཛྙཱ་ན་བཛྲ་ཨཱ་བེ་ཤ་ཡ་ཨ་ཨཱ༔ ཞེས་བརྗོད་ཅིང་། ཏིཥྛ་བཛྲས་བརྟན་པར་བྱ། དབང་བསྐུར་བ་ནི། བུམ་པ་ཐོགས་ལ། ཧཱུྃ། ཕྱི་ལྟར་བུམ་པ་སྣོད་བཅུད་ལྡན། །ནང་ལྟར་ཕྱག་ན་པདྨོ་ཡི། །ཐུགས་རྗེ་བདུད་རྩིའི་ཆུ་རྒྱུན་གྱིས། །ཚེ་འདས་ལུས་ལ་དབང་བསྐུར་བས། །སྤྲུལ་པའི་སྐུ་རུ་སྨིན་པར་ཤོག །སྔགས་མཐར། ཀཱ་ཡ་ཨ་བྷི་ཥིཉྩ་ཨོ། སྔགས་བྱང་ཐོགས་ལ། ཨཱཿ ཕྱི་ལྟར་ས་ཆུ་མེ་རླུང་སྒྲ། །ནང་ལྟར་འགྲོ་བ་རིགས་དྲུག་སྐད། །གསང་བ་རྒྱལ་ཀུན་གསུང་དབང་དོན། །ཡི་གེ་བདུན་པར་འདུས་པའི་དབང་། །ཚེ་འདས་ངག་ལ་དབང་བསྐུར་བས། །ལོངས་སྤྱོད་རྫོགས་སྐུར་སྨིན་པར་ཤོག །སྔགས་མཐར། ཝཱ་ཀ་ཨ་བྷི་ཥིཉྩ་ཨཱཿ ཧཱུྃ། མཚན་མ་རྫས་ཀྱི་རྡོ་རྗེ་འདི། །རྒྱལ་ཀུན་ཐུགས་ཀྱི་མཚོན་བྱེད་དེ། །ཚེ་འདས་སེམས་ལ་
དབང་བསྐུར་བས། །ཆོས་ཀྱི་སྐ་རུ་སྨིན་པར་ཤོག །སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ། ཞེས་བསྐུར། འདོད་ཡོན། ཨོཾ་ཨཱཿཧཱུྃ་གིས་བརླབས་པས། ཧཱུྃ། ཁ་ཟས་རོ་མཆོག་བརྒྱ་ལྡན་པའི། །བཟའ་བའི་ཟས་དང་བཏུང་བའི་སྐོམ། །མི་ཟད་གཏེར་དུ་བྱིན་བརླབས་ནས། །ཚེ་འདས་ཁྱོད་ལ་བསྔོས་པ་ཡིས། །དབང་པོ་དྲུག་དང་རབ་མཐུན་པའི། །སོ་སོའི་ལོངས་སྤྱོད་ཕུན་ཚོགས་གཏེར། །བསྔོས་པ་ཇི་བཞིན་ཐོབ་གྱུར་ནས། །འཕྲལ་དུ་དགའ་བདེའི་རོས་ཚིམ་ཞིང་། །མཐར་ཐུག་རྣམ་དག་སར་སྤྱོད་ཤོག །ཅེས་བསྔོའོ།། །།