རྩ་གསུམ་ཆོས་སྲུང་རྒྱ་མཚོའི་སྐོང་བཤགས་དང་གཏོར་བསྔོ་བཅས་ཉེ་བར་བསྡུས་པ་དངོས་གྲུབ་མཆོག་སྦྱིན།
རྩ་གསུམ་ཆོས་སྲུང་རྒྱ་མཚོའི་སྐོང་བཤགས་དང་གཏོར་བསྔོ་བཅས་ཉེ་བར་བསྡུས་པ་དངོས་གྲུབ་མཆོག་སྦྱིན་ཞེས་བྱ་བ་བཞུགས་སོ། །ན་མོ་གུ་རུ་བྷྱ༔ འདིར་རྩ་གསུམ་ཆོས་སྲུང་རྒྱ་མཚོའི་ཚོགས་ལ་ཐུགས་དམ་བསྐང་ཞིང་ཉམས་ཆག་བཤགས་པ་དང་། །གཏོར་མ་འབུལ་བའི་རིམ་པ་བཅས་མདོར་བསྡུས་ཏེ་ཉམས་སུ་ལེན་པར་འདོད་པས། མཆོད་པའི་ཡོ་བྱད་ཅི་འབྱོར་པ་བཤམས་ཤིང་། ཨོཾ་ཤྲཱི་བཛྲ་ཧེ་རུ་ཀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ། བདག་ཉིད་དཔལ་ཆེན་ཐུགས་ནས་རཾ་ཡཾ་ཁཾ། །འཕྲོས་པས་མཆོད་རྫས་ཉེས་སྐྱོན་བསྲེགས་གཏོར་བཀྲུས། །དམ་ཚིག་ཡེ་ཤེས་དབྱེར་མེད་བདུད་རྩིའི་སྤྲིན། །མི་ཟད་ནམ་མཁའ་མཛོད་ཀྱི་འཁོར་ལོར་གྱུར། །རཾ་ཡཾ་ཁཾ། ཨོཾ་ཨཱཿཧཱུཾ། ལན་གསུམ། ཧཱུྃ་ཧྲཱི༔ ངོ་བོ་འོད་གསལ་ཆོས་སྐུའི་ཡེ་ཤེས་ལས། །རང་བཞིན་མ་འགགས་ཤར་བའི་རྩ་གསུམ་ལྷ། །ཐུགས་རྗེ་གང་འདུལ་སྤྲུལ་སྐུའི་རྣམ་རོལ་གྱིས། །བྱིན་རླབས་དངོས་གྲུབ་སྩོལ་ཕྱིར་སྐུར་བཞེངས་ཤིག །ཧཱུྃ་བྷྱོ༔ གཞི་དབྱིངས་གདོད་ནས་རྣམ་གྲོལ་ཨེ་ཀ་ཛ༔ གཞི་སྣང་ཡེ་ཤེས་སྙིང་པོ་མ་ནིང་ནག །ཟུང་འཇུག་དབྱིངས་རིག་དབྱེར་མེད་ཐིག་ལེ་རྩལ། །རླུང་སེམས་དབུ་མར་ཐིམ་པའི་རཱ་ཧུ་ལ། །ཚོགས་བརྒྱད་རང་གྲོལ་དུར་ཁྲོད་ལྷ་མོ་དང་། །བདེ་སྟོང་སྒྱུ་འཕྲུལ་ཚེ་རིང་མཆེད་ལྔ་སོགས། །ཡེ་ཤེས་ལས་གྲུབ་ཆོས་སྲུང་རྒྱ་མཚོའི་ཚོགས། །རང་བཞིན་གནས་ནས་སྤྱན་འདྲེན་འདིར་
གཤེགས་ཤིག །ཨོཾ་ཨཱཿཧཱུྃ་གུ་རུ་དེ་ཝ་ཌཱ་ཀི་ནཱི་སརྦ་དྷརྨ་པཱ་ལ་བཛྲ་ས་མ་ཡ་ཛ་ཛ༔ ལྷུན་གྲུབ་དུར་ཁྲོད་རོལ་པའི་གནས་འདིར་བཞུགས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །གཟུང་འཛིན་རྟོག་ཚོགས་དབྱིངས་སུ་ཐིམ་པ་ལས། །གང་ཤར་བདེ་སྟོང་རོལ་མོར་འཆར་བའི་དཔྱིད། །སྣོད་བཅུད་རྣམ་དག་རྡོ་རྗེའི་གྲོང་ཁྱེར་དུ། །ཕྱི་ནང་གསང་བའི་མཆོད་རྫས་སྤྲིན་ལྟར་གཏིབས། །སྨན་རག་ཕུད་ཀྱི་བཏུང་བ་མཚོ་ལྟར་བསྐྱིལ། །ཟག་མེད་བདུད་རྩིའི་གཏོར་མ་རི་ལྟར་སྤུངས། །མཐུན་རྫས་སྤྱན་གཟིགས་སྐར་ལྟར་བཀྲ་བ་འདིས། །རིག་འཛིན་རྩ་བརྒྱུད་བླ་མའི་ཐུགས་དམ་བསྐང་། །ཡི་དམ་ཞི་ཁྲོའི་ལྷ་ཚོགས༴ གནས་གསུམ་དཔའ་བོ་མཁའ་འགྲོའི༴ སྔགས་སྲུང་ཨེ་ཀ་ཛ་ཊིའི༴ དཔལ་མགོན་མ་ནིང་ནག་པོའི༴ སྐྱེས་མཆོག་བཛྲ་སཱདྷུའི༴ དྲང་སྲོང་ཁྱབ་འཇུག་ཆེན་པོའི༴ ནོར་སྐྱོང་དུར་ཁྲོད་བདག་མོའི༴ བཀྲ་ཤིས་ཚེ་རིང་མཆེད་ལྔའི༴ དཔལ་མགོན་བདུན་ཅུ་དྲེགས་པ་སྡེ་བརྒྱད་སོགས། །རྡོ་རྗེའི་ཆོས་སྲུང་ཡོངས་ཀྱི་ཐུགས་དམ་བསྐང་། །ཐུགས་དམ་བསྐང་ཞིང་ཉམས་ཆག་མཐོལ་བཤགས་ན། །མི་སྒྲིབ་ཚངས་པའི་དངོས་གྲུབ་སྩལ་ནས་ཀྱང་། །ཞི་རྒྱས་དབང་དང་མངོན་སྤྱོད་ལ་སོགས་པའི། །མཆོག་ཐུན་ཕྲིན་ལས་ཡིད་བཞིན་འགྲུབ་པར་མཛོད། །ཨོཾ་ཨཱཿཧཱུྃ་
གུ་རུ་དེ་བ་ཌཱ་ཀ་ཌཱ་ཀི་ནཱི་ཤྲཱི་བཛྲ་དྷརྨ་པཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་མམ་བདུན་གྱི་ས་རྩ་གསུམ་ཆོས་སྲུང་སྤྱིར་འབུལ། སྤྲོ་ན་བྱེ་བྲག་སོ་སོར། མ་མ་ཏྲཀ་རཀཱ་ཨེ་ཀ་ཙ་ཊཱི་ཨི་དཾ་། །བ་ལིཾ་ཏ་པཱུ་ཛ་ཧོ༔ཁ་རཾ་ཁཱ་ཧི། ༀ་མ་ཧཱ་ཀཱ་ལ་ཤཱ་ས་ན་ཏྲི་ལིང་གིང་ཀ་ར་ཨི་དཾ་བ་ལིཾ་ཏ་པཱུ་ཛ་ཧོ༔ཁ་རཾ་ཁཱ་ཧི། དྲི་བཛྲ་སཱ་དྷུ་ས་མ་ཡ་ཨི་དཾ་བ་ལིཾ་ཏ་པཱུ་ཛ་ཧོ༔ཁ་རཾ་ཁཱ་ཧི། ཧྲི་ཤག་རུ་རག་རཾ་ནཱ་ག་ཙིཏྟ་ཏྲཾ་མ་མ་ཡོ་ཟ་འགྲམ་ཧ་ཧེ་ཡོ་ག་ཤ་ལ་ཛཿཨི་དཾ་བ་ལིཾ་ཏ་པཱུ་ཛ་ཧོ༔ཁ་རཾ་ཁཱ་ཧི། ཧཱུཾ་ར་ལི་པྲ་མ་ཡ་ཨི་དཾ་བ་ལིཾ་ཏ་པཱུ་ཛ་ཧོ་ཁ་རཾ་ཁཱ་ཧི། བཾ་ཧ་རི་ནི་ས་བཛྲ་པྲ་མོ་ཧ་ཙིཏྟ་ཧཱུྃ་ཧཱུྃ་ཛཝཛཨི་དཾ་བ་ལིཾ་ཏ་པཱུ་ཛ་ཧོ༔ཁ་རཾ་ཁཱ་ཧི། ཨ་ཡ་མ་དུ་རུ་ཙ་ཤ་ན་གིངྐ་ར་ས་མ་ཡ་བ་ལིཾ་ཏ་བྷུཉྫཧོ༔ ཞེས་གསུམ་མམ་བདུན་གྱིས་དབུལ། ཧཱུྃ། དོན་དམ་སྤྲོས་བྲལ་ངང་ལས་མ་གཡོས་ཀྱང་། །ཀུན་རྫོབ་ཞི་ཆགས་ཁྲོ་བོའི་རྣམ་རོལ་ཅན། །རྩ་གསུམ་ཆོས་སྲུང་རྒྱ་མཚོ་འཁོར་བཅས་ལ། །ལུས་ངག་ཡིད་གསུམ་གུས་པས་ཕྱག་འཚལ་བསྟོད། །ཟག་མེད་བདུད་རྩིའི་མཆོད་གཏོར་འདི་བཞེས་ལ། །གནས་སྐབས་ནད་གདོན་འཇིགས་བརྒྱད་ཞི་བ་དང་། །ཚེ་བསོད་དཔལ་འབྱོར་དབང་བཅུའི་ཡེ་ཤེས་སྤོར། །ཁམས་གསུམ་རླུང་སེམས་སྣང་བ་དབང་དུ་སྡུས། །གཟུང་འཛིན་དགྲ་བགེགས་དབུ་མའི་ཀློང་དུ་སྒྲོལ། །འོད་གསལ་རྡོ་རྗེ་སྙིང་པོའི་བཤད་སྒྲུབ་
དང་། །བསྟན་འཛིན་སྐྱེས་བུའི་སྐུ་ཚེ་མཛད་ཕྲིན་སྤེལ། །འགྲོ་ཀུན་ཕན་དང་བདེ་བའི་དཔལ་ལ་སྦྱོར། །མཐར་ཐུག་ཀ་དག་རིག་སྟོང་རྗེན་པའི་གཤིས། །ལྷུན་གྲུབ་སྣང་བཞིའི་ཡེ་ཤེས་ལ་སྦྱོར་བས། །ཟུང་འཇུག་འཇའ་ལུས་རྡོ་རྗེའི་གྲོང་ཁྱེར་དུ། །ཁམས་གསུམ་འོད་སྐུར་གྲོལ་བའི་ཕྲིན་ལས་མཛོད། །ཅེས་བསྟོད་ཅིང་ཕྲིན་ལས་བཅོལ། ཡི་གེ་བརྒྱ་པས་ནོངས་པ་བཤགས། རྟེན་ཡོད་ན་བརྟན་བཞུགས་དང་། མེད་ན་བཛྲ་མུས་གཏོར་མགྲོན་རྣམས་གཤེགས། དགེ་བ་བསྔོ་ཞིང་སྨོན་ལམ་གདབ། ཤིས་པ་བརྗོད་པ་ཇི་ལྟར་རིགས་པས་མཐའ་བརྒྱན་པར་བྱའོ།། །།ཞེས་པའང་ཤཱཀྱའི་དགེ་སློང་རིག་པ་འཛིན་པ་རྡོ་རྗེ་ཐུགས་མཆོག་རྩལ་གྱིས་སྦྱར་བ་སརྦ་དཱ་མངྒ་ལཾ།། །།