སྒྲོལ་དཀར་ཡིད་བཞིན་འཁོར་ལོའི་ལས་ཚོགས་ཉེར་མཁོ།
༈ སྒྲོལ་དཀར་ཡིད་བཞིན་འཁོར་ལོའི་ལས་ཚོགས་ཉེར་མཁོ་བཞུགས་སོ། །ཨོཾ་སྭ་སྟི། འདིར་རྗེ་བཙུན་སྒྲོལ་མ་དཀར་མོའི་རྣལ་འབྱོར་ལ་བརྩོན་པས་རང་གཞན་ལ་ཕན་གདགས་པའི་སླད་ལས་ཚོགས་ཉེར་མཁོ་བྱ་ཚུལ་ལ་གསུམ། བཅུད་ལེན་གྱི་ཚེ་རྫས། རིག་པའི་འཁོར་ལོ། ཁྲུས་ཀྱི་ཆོ་གའོ། །དང་པོ་ལ་གཉིས། སྦྱར་ཞིང་བསྒྲུབ་པ་དང་། ཇི་ལྟར་བསྟེན་ཚུལ་ལོ། །དང་པོ་ནི། སློབ་དཔོན་ཆེན་པོ་ངག་གི་དབང་ཕྱུག་གྲགས་པས་
མཛད་པའི་འཆི་བདག་བསླུ་བའི་རྟོགས་པ་ལས་བཅུད་ལེན་གྱི་རྣམ་གྲངས་མང་དུ་གསུང་པའི་ནང་ནས་སྦྱར་སླ་བ་ལ། འབྲས་བུ་གསུམ་ནི་སྤྱིར་བསྡུས་པའམ། སོ་སོར་བྷིངྒ་རཱ་ཛར་བཅས། །རྣལ་འབྱོར་པ་ཡི་རྟག་སྤྱད་ན། །ཕན་ཞིང་བདུད་རྩིར་འགྱུར་བ་སྟེ། །གཉེར་མ་སྐྲ་དཀར་རྣམས་དང་བྲལ། །རྡོ་རྗེའི་ལུས་ནི་གཟུངས་བཟང་ལྡན། །བསྐལ་པ་ཡི་ནི་གྲངས་སྙེད་དུ། །འཆི་བ་ངེས་པར་བཟློག་པ་ཡིན། །ཞེས་གསུངས་པ་ལྟར་འབྲས་བུ་གསུམ་ཀའམ། སོ་སོ་དང་བྷོདྨ་རཱ་ཛ་སྟེ་བུང་བའི་རྒྱལ་པོའམ་སྐྲ་ཚོས་སུ་གྲགས་པ་མོན་ཡུལ་ཕན་ཆད་དུ་སྐྱེ་ཞིང་ཕལ་སྐད་དུ་བྷོང་གར་འབོད་པ་སྐྲ་དཀར་པོ་ནག་པོར་བསྒྱུར་བའི་རྫས་ཁྱད་པར་ཅན་ཏེ། དེ་མ་རྙེད་ན་ཚབ་རུང་ར་མ་ཤག་གིས་བྱ་བར་གསུངས་པས། དེས་ན་ལག་ཏུ་ལེན་པའི་ཚེ་ཨ་རུ་གསེར་མདོག་ཞོ་བཅོ་ལྔ་ལ་མཚོན་ན། བ་རུ་ར་སྲང་གང་། སྐྱུ་རུ་ར་ཞོ་ལྔ། སྟོན་དུས་སུ་བསྐོས་པའི་ར་མོ་ཤག་གི་རྩ་བ་ཆུ་གྲང་གི་ཡང་ཡང་བཤལ། བྱུང་ན་ཁཎྜལེགས་པར་བསྡུས་པ་སྲང་གང་རྣམས་ནི་རྩ་བའི་སྨན་ཡིན་ལ། གཞན་ཡང་དཔལ་ལྡན་རྒྱུད་ནས་གསུངས་པའི་རྩི་བཞི། དྭངས་མ་ལྔ། སྤྱིར་བཏང་བཟང་པོ་དྲུག་བཅས་ཁ་ཚར་གྱི་ཚུལ་དུ་གདབ་སྟེ། དེ་ལ་དྭངས་མ་ལྔ་ནི། བྲག་ཞུན་སླད་མེད། ཅོང་ཞི་མཛོ་འོར་འདམ་བཏགས་སོ་མི་སེགས་པར་བྱས་པ། བུ་རམ། སྦྲང་རྩི། མར་དཀར་རོ། རྩི་བཞི་ནི། ཤུག་པའི་འབྲས་བུ། བ་ལུའི་མེ་ཏོག །མཚེ་ཤུག །འཁན་པ་དཀར་པོའོ། །བཟང་པོ་དྲུག་ནི། ཛཱ་ཏི། ཅུ་གང་། གུར་གུམ། ལི་ཤི། སུག་སྨེལ། ཀ་ཀོ་ལའོ། །དེ་རྣམས་ནད་ཁམས་དང་བསྟུན་པའི་གཏོང་ལུགས་བྱ་བའམ། སྤྱིར་བཏང་ཙམ་དུ་གཞན་རྣམས་ཞོ་གསུམ་རེ། བུ་རམ་སྦྲང་མར་དཀར་རྣམས་རོ་འགྱུར་བ་
ཙམ་སྟེ། དེ་ལྟ་བུའི་སྨན་རྣམས་ཞིབ་བཏགས་དར་ཚག་ལ་དྲངས་བ། བར་སྦྲང་ཀ་རས་མགོ་བསྡུས་ཏེ་རིལ་བུ་སྲན་འཕོས་ཙམ་དྲིལ་བ་རིལ་ཆགས་འཐེམ་པར་བྱ། སྐམ་པ་དང་དཀར་དང་ཀ་ར་འམ་ཟར་མའི་ཁུ་བ་སྦྱར་བ་རྩི་དཀར་པོ་གསོལ། དེ་ནི་བཅུད་ལེན་གཙོ་བོར་བྱས་ཏེ་སྦྱར་བའི་ཚུལ་ཡིན་ལ། ཚེ་རྫས་དཀྱུས་མ་ལ་གོང་གི་སྨན་སྣ་རྣམས་ཇི་ཙམ་འབྱོར་པ་ལ། འབྲས་སམ་ནས་དཀར་གྱི་རྩམ་པས་བུངས་བསྐྱེད་དེ་སྦྱར་ནའང་རུང་ངོ་། །གང་ལྟར་ཡང་རང་གི་མདུན་དུ་སྟེགས་བུའི་ཁར་བུམ་པའི་ནང་དུ་བླུག །མདུན་དུ་གཏོར་མ་དང་། མཆོད་པ་བཤམ། མཚམས་དམ་པར་བཅད། བདག་བསྐྱེད་སྔོན་དུ་འགྲོ་བས་བུམ་པ་བསྒྲུབ་པའི་ཚུལ་ལྟར་རིལ་བུའི་སྟེང་དུ་སྒྲོལ་དཀར་བསྐྱེད་བསྟིམ་མཆོད་བསྟོད་བཅས་བྱས་ལ། བུམ་པའི་ལྷའི་ཐུགས་ཀར་ཟླ་བའི་རང་བཞིན་གྱི་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཧཱུྃ། དེའི་མདུན་ནས་བརྩམས་ཏེ་གཡས་བསྐོར་དུ་མ་མ་ཨ་ཡུར་པུཎྱ་ཛྙཱ་ན་པུཊྚི་ཀུ་རུ་ཞེས་པས་བསྐོར་བའི་མདུན་དུ་ཨོ། རྒྱབ་ཏུ་ཧཱ། རྩིབས་བརྒྱད་ལ་ཏཱ། རེ། ཏུཏ། ཏཱ། རེ། ཏུ། རེ། སྦྲ་ཞེས་པའི་ཡིག་འབྲུ་རེ་ཡོད་པ། རང་གི་ཐུགས་ཀ་ནས་སྔགས་ཀྱི་ཕྲེང་བ་བྱུང་། གཟུངས་ཐག་ལ་འཁྲིལ་ཏེ་བུམ་པའི་ནང་དུ་སོང་བས་ཐུགས་བརྒྱུད་བསྐུལ། ཐུགས་ཀའི་འཁོར་ལོ་དང་སྐུའི་ཆ་ཐམས་ཅད་ལས་འཆི་མེད་བདུད་རྩིའི་རྒྱུན་བབས་པ་རིལ་བུ་ལ་ཐིམ་པས། ཚེ་དང་ཡེ་ཤེས་ཀྱི་དངོས་གྲུབ་སྟེར་བའི་འཆི་མེད་བདུད་རྩིའི་བཅུད་ལེན་མཆོག་ཏུ་གྱུར་པར་
བསམ་ལ་སྔགས་བཟླ། ཐུན་བསྡུ་བ་ན་དབྱངས་གསལ་རྟེན་སྙིང་དང་། མཆོད་བསྟོད་བྱ། བཅོམ་ལྡན་འདས་མ་ཡིད་བཞིན་འཁོར་ལོ་ཡིས། །བདག་དང་མཐའ་ཡས་སེམས་ཅན་ཐམས་ཅད་ཀྱི། །དུས་མིན་འཆི་བའི་འཇིགས་པ་ཞི་བ་དང་། །ཚེ་དང་ཡེ་ཤེས་དངོས་གྲུབ་སྩལ་དུ་གསོལ། །ཞེས་འདོད་པའི་དོན་ལ་གསོལ་བ་གདབ། ནོངས་པ་བཤགས། བདག་བསྐྱེད་ཀྱི་མཇུག་གི་བྱ་བ་རྣམས་དཀྱུས་ལྟར་བྱ། དེ་ལྟ་བུའི་རིམ་པས་ཐུན་བཞི་སོགས་སུ་བཅད་ལ། རྟགས་མཚན་དགེ་བ་མ་བྱུང་གི་བར་རམ། ཞག་བདུན་སོགས་སུ་ཐུན་སྔ་མ་རྣམས་ལ་མདུན་བསྐྱེད་སྔར་ཡོད་གསལ་གདབ་ཀྱི་ཚུལ་དུ་བསྒྲུབ། གྲོལ་རྒྱུའི་ཐུན་རྗེས་མ་བསྡུ་བ་ན། ནོངས་བཤགས་རྗེས། བུམ་ལྷ་འོད་དུ་ཞུ་བ་བཅུད་ལེན་གྱི་རིལ་བུ་ལ་ཐིམ་པས་མཐོང་ཐོས་དྲན་རེག་ཐམས་ཅད་ལ་ཚེ་དང་ཡེ་ཤེས་ཀྱི་དངོས་གྲུབ་ཐོགས་པ་མེད་པར་སྟེར་བའི་སྨན་གྱི་རིལ་བུ་འོད་འབར་བའི་རྣམ་པར་གྱུར། ཅེས་དང་བརྟན་བཞུགས་བྱ། ཡེ་དྷ་རྨ་བརྗོད་ཅིང་མེ་ཏོག་གི་ཆར་དབབ། སྨོན་ལམ་དང་བཀྲ་ཤིས་རྒྱས་པར་བྱའོ། །དེ་ཙམ་མི་ནུས་ན་བདག་བསྐྱེད་སྔོན་དུ་འགྲོ་བས། རིལ་བུའི་སྟེང་དུ་ཟླ་བ་ལ་ཧཱུཾ་ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། འཁོར་འདས་ཀྱི་དྭངས་བཅུད་མ་ལུས་པ་བསྡུས་ནས་སྔགས་ཕྲེང་ས་བོན་དང་བཅས་པ་ལ་ཐིམ། དེ་ལས་འཆི་མེད་བདུད་རྩིའི་རྒྱུན་སོགས་གོང་ལྟར་བརྗོད་ལ་སྔགས་བཟླ་ཐུན་
བསྡུ་བ་ན། སྔགས་ཕྲེང་གདན་དང་བཅས་པ་རིལ་བུ་ལ་ཐིམ་པས་སོགས་གོང་ལྟར་མཐར་ཡེ་དྷརྨའི་སྔགས་ཀྱིས་བརྟན་པར་བྱ་ཞིང་། སྨོན་ལམ་དང་བཀྲ་ཤིས་བརྗོད་པས་ཀྱང་རུང་སྟེ། རྒྱ་གཞུང་ཁུངས་མ་ལུས་གྲུབ་པའི་རྫས་བྱིན་གྱིས་བརླབས་ཚུལ་འདི་ལྟར་མང་དུ་འབྱུང་བ་ལས། །གཉིས་པ་བསྟེན་ཚུལ་ནི། དེ་ལྟར་ལེགས་པར་བསྒྲུབས་པའི་རིལ་བུ་རླུང་མི་འཆོར་བའི་སྣོད་བཟང་པོར་བཅང་། བཅུད་ལེན་གཙོ་བོར་བྱེད་ན་ཡར་ངོའི་ཚེས་གཅིག་ལྟ་བུ་གཟའ་སྐར་བཟང་པོའི་སྔ་དྲོ་ནས་བརྩམས་དགོས་པའི་ཁ་ཟས་སྤངས་ལ་རིལ་བུ་བདུན་སོགས་ཆུ་བསྐོལ་གྱིས་ཕུལ་གཏང་། སྒོམ་བཟླས་དང་རླུང་སྦྱོར་སོགས་ལ་འབད་པས་གོང་དུ་གསུངས་པའི་ཕན་ཡོན་རྣམས་འབྱུང་བར་འགྱུར་ལ། དེ་ཙམ་མ་གྲུབ་ཀྱང་། ཐོ་རེངས་རླུང་རིགས་དྭངས་པའི་སྐབས་སུ་རིལ་བུ་རེ་རེ་སོགས་ཚེ་བསྙེན་བཟླ་བཞིན་དམ་རྫས་ཀྱི་ཚུལ་དུ་མྱང་པས་ཀྱང་ཚེ་གེགས་ཞི་བ་དང་། རིང་འཚོའི་དངོས་གྲུབ་ཐོབ་པ་སོགས་ཕན་ཡོན་དཔག་ཏུ་མེད་པ་ཡོད་དོ། །གཉིས་པ་འཁོར་ལོ་བྲིས་ཚུལ་ནི། རྒྱ་ཤོག་ལྟ་བུའི་གཞི་ལ་མཚལ་ལམ་རྒྱ་སྣག་གི་ཆོས་འཁོར་རྩིབས་བརྒྱད་མུ་ཁྱུད་ལྔ་དང་ལྡན་པའི་ལྟེ་བར་ཧཱུྃ། དེའི་མདུན་ནས་གཡས་བསྐོར་གྱིས་རང་གིས་འཆང་ན། མ་མ་ཨཱ་ཡུར་པུཎྱེ་ཛྙཱ་ན་པུཎྞཾ་ཀུ་རུ་ཞེས་པའམ། གཞན་ལ་སྟེར་ན་སྒྲུབ་བྱའི་མིང་སྤེལ། སྤྱིར་བཏང་དུ་མ་མའི་མལ་དུ་དྷ་ར་ཀ་སྱ། འཆང་བ་པོའི། ཞེས་བྲིས་ཀྱང་རུང་། དེའི་མདུན་དུ་ཨོ། རྒྱབ་ཏུ་ཧྭ། རྩིབས་བརྒྱད་ལ་ཏཱ་རེ་སོགས་ཡིག་འབྲུ་བརྒྱད། མུ་ཁྱུད་དང་པོ་ལ་ཨ་ལི་གཡོན་བསྐོར། གཉིས་པར་ཀཱ་ལི་གཡས་བསྐོར། གསུམ་པར་ཡེ་དྷརྨ་གཡས་བསྐོར། བཞི་པར་རྡོ་རྗེའི་ཕྲེང་བ། ལྔ་པར་འོད་ཟེར་པ་ཏྲ་རྩེ་མོ་གཡས་
སུ་ཕྱོགས་པ་བྲི། ཚེ་རྫས་དང་དྲི་བཟང་གིས་བྱུག །མདུན་དུ་སྟེགས་བུའི་ཁར་བཞག །གཏོར་མ་དང་མཆོད་པ་བཤམ། བདག་བསྐྱེད་སྔོན་དུ་འགྲོ་བས། འཁོར་ལོ་མདུན་བསྐྱེད་ལྟར་གསལ་གདབ། དེའང་མུ་ཁྱུད་རྣམས་ཡོངས་སུ་གྱུར་པ་ལས་ནོར་བུ་ཆུ་ཤེལ་གྱི་གཞལ་མེད་ཁང་དང་། སྔགས་ཀྱི་ཡིག་འབྲུ་རྣམས་ཡོངས་སུ་གྱུར་པ་ལས་སྒྲོལ་མ་དཀར་མོ་བསྐྱེད་པའི་མདུན་དུ། མིང་སྤེལ་ཡོངས་སུ་གྱུར་པ་ལས་བསྒྲུབ་བྱ་དངོས་ཀྱི་རྣམ་པ་གུས་པའི་ཚུལ་དུ་འཁོད་པར་གསལ་བཏབ་ཅིང་མཆོད་བསྟོད་བཟླས་པ་བཅས་བྱ། མཐར་འཁོར་ལོ་བཀོད་པའི་དབྱངས་གསལ་རྟེན་སྙིང་མང་དུ་བཟླ། མཆོད་བསྟོད་དང་འདོད་དོན་གསོལ། ནོངས་པ་བཤགས། བསྐྱེད་པའི་གཞལ་ཡས་ཁང་ཡོངས་སུ་གྱུར་པ་ལས་འཁོར་ལོའི་མུ་ཁྱུད་དང་། ལྷ་མོ་ཡོངས་སུ་གྱུར་པ་ལས་སྔགས་ཀྱི་ཡིག་འབྲུ་འོད་འབར་བའི་རྣམ་པ་དང་བསྒྲུབ་བྱ་ཉིད་མིང་སྤེལ་གྱི་ཡི་གེར་གྱུར་པར་བསམས་ལ། འདིར་ནི་རྟེན་དང་སོགས་བརྟན་བཞུགས་ནན་ཏན་བྱ། དེ་ནས་བདག་བསྐྱེད་ཀྱི་མཇུག་གི་ཉེར་བསྡུ་བསྔོ་སྨོན་ཤིས་བརྗོད་སོགས་བྱས་ལ། འཁོར་ལོ་ལྟེ་བ་མ་ཉམས་པར་བལྟབ། ཚོན་སྐུད་སྣ་ལྔས་བཅིངས་ལ་ན་བཟའ་དཀར་པོ་དང་བཅས་མགུལ་དུ་བཏགས་པས་ཚེ་གེགས་སྲུང་བ་དང་། ཚེ་བསོད་རྒྱས་པའི་མཆོག་ཏུ་འགྱུར་རོ།། ༈ །།གསུམ་པ་ཁྲུས་ཀྱི་ཆོ་ག་ནི། བདག་བསྐྱེད་སྔོན་དུ་འགྲོ་བས་བུམ་པ་སྤྱི་ལྟར་བསྒྲུབ་བྱ་མདུན་དུ་འཁོད་པ་ལ་སྦྱོང་ཆས་བཤམ། འོ་ཁྱེད་རང་རྣམས་ཀྱི་འགལ་རྐྱེན་ནད་གདོན་སྡིག་སྒྲིབ་གྲིབ་དང་མི་གཙང་བ་ཐམས་ཅད་ཞི་བ་དང་། མཐུན་རྐྱེན་བཀྲ་ཤིས་པའི་ལེགས་ཚོགས་
མཐའ་དག་རྒྱས་པར་བྱ་བའི་སླད་དུ་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་ཁྲུས་ཀྱི་ཆོ་གས་རྗེས་སུ་འཛིན་པ་ལའང་བགེགས་ཞི་བའི་ཕྱིར་སྦྱོང་བ་བྱ་བ་དང་། བཀྲུ་བྱབས་སྲུང་གསུམ་བྱ་བ་དང་། བདེན་པའི་སྟོབས་བརྗོད་པ་དང་། ཤིས་པར་བྱ་བ་རྣམས་སུ་ཡོད་པ་ལས་ཐོག་མར་གདོན་བགེགས་ལ་གཏོར་མ་བྱིན་ནས་སྦྱོང་བ་བྱས་པའི་མོས་པ་མཛོད། གཏོར་མ་གསུམ་གཡས་སུ་བསྐོར་ཞིང་། ཨོཾ་སརྦ་བིགྷཱན་ན་མ་སརྦ་ཏ་ཐཱ་ག་ཏེ་བྷོ་བི་ཤྭ་མུ་སོགས་གསུམ་གྱིས་ཞི་བའི་སྦྱོང་བ། ཏིང་ལོ་ཆངས་བུ་གསུམ་གཡོན་དུ་བསྐོར་ཞིང་། སུམྦྷ་བརྗོད་པས་ཕྱེད་མའི་སྦྱོང་བ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༔ གསང་སྔགས་དང་རིག་སྔགས་ཀྱི་རྒྱལ་པོ་ཁྲོ་བོ་ཁྲོ་མོ་རྣམས་ཀྱི༴ ཁྱད་པར་དུ་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་བཀའ་བདེན་པ་དང་། བདེན་པ་ཆེན་པོའི་བྱིན་བརླབས་ཀྱིས་དེང་འདིར་བསྒྲུབ་བྱ་རྣམས་ལ་གནོད་ཅིང་འཚེ་བའི་གདོན་བགེགས་འབྱུང་པོའི་ཚོགས་ཐམས་ཅད་*གཏོར་མ་འདིས་ཚིམ་པར་བགྱིས་ལ། དཔག་ཚད་དང་རྒྱང་གྲགས་སུ་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བས་མགོ་བོ་ཚལ་བ་བརྒྱས་
འགས་པར་འགྱུར་རོ། །ཞེས་བརྗོད་ཅིང་གཏོར་མ་ཕྱིར་དོར། སུམྦྷ་བརྗོད་ཅིང་གུ་གུལ་བདུག །ཡུངས་ཀྱིས་བྲབ་པ་ནི་དྲག་པོའི་སྦྱོང་བའོ། །གཉིས་པ་བཀྲུ་བྱབས་སྲུང་གསུམ་ལ། ཐོག་མར་བཀྲུ་བའི་སླད་དུ་སློབ་དཔོན་སྒྲོལ་མ་དཀར་མོར་གསལ་བའི་ཕྱག་ན་བུམ་པ་ཡེ་ཤེས་བདུད་རྩིས་གང་བ་ཐོགས་ཏེ་ཁྱེད་རང་རྣམས་ལ་ཁྲུས་བགྱིས་པ་ལ་བརྟེན་ནས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ། དེས་བསྐྱེད་པའི་ནད་གདོན་གྲིབ་དང་མི་གཙང་བ་ཐམས་ཅད་བྱང་ཞིང་དག་པའི་མོས་པ་མཛོད། ཅེས་དང་། ཇི་ལྟར་བལྟམས་པ་སོགས་མཐར། ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། རྡོ་རྗེ་སློབ་མའམ་སྦྱིན་པའི་བདག་པོའི་སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ། སརྦ་བིགྷཱན་བྷུ༴ སརྦ་ར་གེ༔ སརྦ་དུཥྛ་ན༔ སརྦ་གྲ་ཧེ༔ སརྦ་ཛཱ་རེ༔ སརྦ་བྱཱ་དྷི སརྦ་ཨུ་པ་དྲ་བྱེ༔ སརྦ་ཨ་ཀཱ་ལ་མྲྀ་ཏྱཱ༔ སརྦ་དུསྶ་ཕི༴ སརྦ་དུརྨི་ཏི༴ སརྦ་ཙིཏྟ་ཀུ་ལེ་བྷྱ༔ ཤཱནྟཾ་ཀུ་རུ་སྭཱ་ཧཱ། ཞེས་བཀྲུ། སྤྲོ་ན། འདི་ནི་ཁྲུས་མཆོག་སོགས་དང་། འདི་ནི་སྦྱིན་པའི་སོགས་ཕ་རོལ་ཏུ་ཕྱིན་པ་དྲུག་གི་ཚིགས་བཅད་དང་སྤེལ། བྱབས་པའི་སླད་དུ། རྨ་བྱའི་མདོངས་ཀྱི་ཐིག་ལེའི་དབུས་སུ་ཟླ་བའི་གདན་ལ་ཏཱཾ་ཡིག་དཀར་པོའི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་བཀྲུས་པས་མ་དག་པའི་ནད་གདོན་ཉེར་འཚེའི་ལྷག་མ་ཐམས་ཅད་རྒྱ་མཚོ་ཆེན་པོར་ཕྱིར་
དོར་བའི་མོས་པ་མཛོད། ཅེས་དང་། སྔགས་གོང་བཞིན་ལ་ཤཱནྟཾ་ཀུ་རུ་ཞེས་པའི་མལ་དུ། ཨ་པ་ན་ཡ་ཞེས་བཏགས་པས་བྱབས། བསྲུང་བར་བྱ་བའི་སླད་དུ། སློབ་དཔོན་གྱིས་ཕྱག་གི་རྡོ་རྗེ་སྤྱི་བོ་ལ་སོགས་པའི་གནས་རྣམས་སུ་རྒྱ་གྲམ་དུ་རེག་པ་ལ་བརྟེན་ནས་དེ་ལས་དེ་འདྲ་བའི་རྡོ་རྗེའི་རིགས་ཅན་བསམ་གྱིས་མི་ཁྱབ་པ་བྱུང་སྟེ་ལུས་ལ་རྡོ་རྗེའི་གོ་ཁྲབ་བཞུ་བླུགས་སུ་གྱུར་བས་ཕྱིན་ཆད་ནད་གདོན་ཉེར་འཚེ་གང་ཡགིས་ཀྱང་མ་ཚུགས་པར་སྲུང་བ་བྱས་པའི་མོས་པ་མཛོད། སྔགས་གོང་ལྟར་ལ་རཀྵ་རཀྟ་བཏགས་པ་སྤྱི་བོ། མདུན་རྒྱབ། དཔུང་མགོ་གཉིས། པུས་མོ་གཉིས་རྣམས་སུ་རྡོ་རྗེ་རྒྱ་གྲམ་དུ་རེག །གསུམ་པ་བདེན་པའི་སྟོབས་བརྗོད་པ་ནི། སླར་ཡང་སློབ་དཔོན་གྱིས་ཕྱག་གི་རྡོ་རྗེ་ཁྱེད་རང་རྣམས་ཀྱི་སྤྱི་བོར་བཞག་ཅིང་སྔགས་དང་བདེན་པའི་ཚིག་གིས་ཀྱང་བྱིན་གྱིས་བརླབས་པའི་མོས་པ་མཛོད། ཅེས་དང་། རྩ་སྔགས་ལན་གསུམ་སོགས་ཀྱི་མཐར། རྒྱལ་བ་སྲས་བཅས་བདེན་པའི་བྱིན་རླབས་དང་། །རྗེ་བཙུན་ཡིད་བཞིན་འཁོར་ལོའི་ནུས་མཐུ་དང་། །འགྲོ་བ་འདི་ནི་བདག་གིས་བསྲུངས་ཟིན་གྱི། །འདི་ལ་སུས་ཀྱང་གནོད་པར་མ་བྱེད་ཅིག །ཅེས་བརྗོད་ལ། བཞི་པ་ཤིས་པར་བྱ་བའི་སླད་དུ། ནམ་མཁའ་གང་བའི་དེ་བཞིན་གཤེགས་པ་རྣམས་དང་སློབ་དཔོན་ལྷན་ཅིག་པས་མེ་ཏོག་གི་ཆར་འབེབས་ཤིང་བཀྲ་ཤིས་པའི་ཚིགས་སུ་བཅད་
པས་ཀྱང་མངའ་གསོལ་བའི་མོས་པ་མཛོད། ཕུན་སུམ་ཚོགས་པ་མངའ་བའམ༴ ཆེ་བའི་ཆེ་མཆོག་ལྟ་བུ་མདོ་རྒྱུད་ལས་བཀྲ་ཤིས་ཀྱི་ཚིགས་སུ་བཅད་པ་ཅི་ཤེས་བརྗོད་ཅིང་མེ་ཏོག་འཐོར་བས་བདེ་ལེགས་སུ་བྱའོ། །རྗེས་གནང་དང་ཁྲུས་ཆོག་སྦྲེལ་ན། དེས་རྗེས་གནང་གི་དངོས་གཞི་གྲུབ་ནས། མཐའ་རྟེན་དུ་ཁྱེད་རང་རྣམས་ཀྱི་ཞེས་སོགས་གོང་ལྟར་སྦྱོང་བ་ནས་བཀྲ་ཤིས་ཀྱི་བར་བྱ་བ་ཡིན་ནོ། །དེ་རྣམས་ནི་ཉེར་མཁོའི་ལས་ཚོགས་མདོ་ཙམ་སྟེ། གཞན་ཡང་ཕན་བྱའི་ལས་ཇི་སྙེད་ཅིག་འབྱུང་བ་ཇོ་བོ་ལུགས་ཀྱི་ཡིག་རྙིང་གསལ་བྱེད་དང་བཅས་པ་ལས་ཤེས་པར་བྱའོ། །ཞེས་པའང་དོན་གཉེར་ཅན་དག་ལ་སྨན་པའི་བསམ་པས་རིག་འཛིན་གྱི་བཙུན་པ་མཉྫགྷོ་ཥས་བྲིས་པའི་དགེ་བས་བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན་ཅིང་། འགྲོ་ཀུན་ཕན་བདེའི་འདོད་རྒུ་ལ་དུས་རྟག་ཏུ་ལོངས་སྤྱོད་པའི་རྒྱུར་གྱུར་ཅིག། །།དགེའོ།།