རིན་ཆེན་རིལ་བུ་གཏོང་བའི་ཚུལ།
༈ རིན་ཆེན་རིལ་བུ་གཏོང་བའི་ཚུལ་ལ། སྦྱོར་དངོས་རྗེས་གསུམ་ལས། དང་པོ་ནི། གཟའ་སྐར་དུས་ཚེས་ཤིས་པའི་ཉིན། དབེན་ཞིང་ཉམས་དགའ་བའི་གནས་སུ། གཡུང་དྲུང་བྲིས་པའི་གདན་གྱི་སྟེང་དུ་གྲོ་འབོ་གང་དང་། དེ་སྟེང་རས་དཀར་གྱི་གཞི་གདན་ངོས་སུ་འབྲས་དཀར་པོས་སྣ་ཚོགས་རྡོ་རྗེ་དང་། ཕྱོགས་བཞིར་གཡུང་དྲུང་བཞི་བྲི། དར་སེར་པོས་དགབ། དེ་སྟེང་ལྷུང་བཟེད་འབྲུ་སྣ་ཚོགས་ཀྱིས་བཀང་བའི་ནང་ཨ་རུ་ར་བཞིའི་སྟེགས་ཀྱི་ཁར། ཤེལ་ལམ། དཀར་ཡོལ། གསེར་དངུལ་ལྟ་བུའི་ཡོལ་གོ་གཙང་མར་ཇ་བཟང་ཤོང་དཀར་གྱི་རྩེ་མོའི་ཁུ་བའི་དྭངས་མ་སུན་གཅིག་གི་ནང་རིལ་བུ་བཅུག ཁ་དར་དམར་པོས་བཅད། དེ་སྟེང་ཆོས་གོས་བཞི་བསྟབས་དང་། དེ་སྟེང་སྨན་རྒྱལ་གྱི་སྐུ་༢༤༨རྒྱུད་ད་ལ་སྨན་མདོ་བཞུགས། དར་སྔོན་པོའི་ལྡིང་གུར་ཕུབ། མཐའ་བསྐོར་སྨན་རག་གཏོར་ཚོགས་དང་། བཟང་དྲུག་སོགས་སྐོང་བའི་རྫས་དམིགས་བསལ་རྣམས་དང་། གཞན་ཡང་ཉེར་སྤྱོད་འདོད་ཡོན་གྱི་རིགས་གྱ་ནོམས་པ་མཐོང་བརྒྱུད་ལྟར་བཤམས། སྐབས་སུ་
རླུང་ཤས་ཆེ་ན་ཨ་གར་སྦྱོར་བ་དང་། གྲིབ་གདོན་རྩ་དཀར་ཤས་ཆེ་ན་བསམ་འཕེལ་རཏྣ་ཟབ། ༈ །བྱུག་བདུག་གི་རྫས་ངན་འགྲོ་རིགས་ལ། ཤུག་པ། རྡོ་དྲེག་དམར་པོ། མཁན་སྐྱ་བཅས་བསྲེས་ན་ལྷ་སྲུང་ལ་མི་ཕོག་པར་བཞེད་དོ། །གཞན་ཡང་དྲང་སྲོང་གི་ནད་ལ་ཐོག་མར་སྤོས་དཀར་གྱི་ཐང་བཏང་བས་བཙོན་དུ་འཛིན། དེ་རྗེས་བསམ་འཕེལ་ནོར་བུའི་སྟེང་ཙིཏྟ་གཉིས་དང་ཁྲག་བཅས་བསྣན་པ་བཏང་། ཀླུ་གདོན་ལ་ཕྱག་རྡོར་རིལ་བུ་ཚད་ལྡན་སྦྱར་བ་དེ་ཤིན་ཏུ་ཟབ་བོ། །འོན་ཀྱང་དེ་དག་གི་བཅོས་ཚུལ་སོགས་ནི་འོལ་སྤྱི་ཙམ་ཏེ་ཞིབ་པར་གཞན་དུ་ཤེས་པར་བྱ་བ་ལས་འདིར་སྨོས་པའི་སྐབས་སུ་མ་བབ་བོ། །དེ་ལྟར་ཟབ་མོའི་མན་ངག་ཨུཏྤ་ལ། སྔོན་བྱོན་མཁྱེན་སྤྱོད་ཉི་གཞོན་དཔྱིད་དཔལ་གྱིས། །རྣམ་པར་ཕྱེ་བ་གང་དེར་ལེགས་བཏུས་ཏེ། །དཔྱོད་ལྡན་སྙིང་གི་ཐིག་ལེར་སླར་ཡང་སྤེལ། །འོན་ཀྱང་བདག་འདྲ་གྲགས་པའི་ཡོན་ཏན་གྱིས། །རྣམ་པར་མ་བསྲུང་བློ་གྲོས་ན་ཚོད་བཟུང་། །ཆེས་ཆེར་ཕྲ་བས་འདི་ལྟར་སྨྲ་བྱེད་པར། །ཆུ་སྐྱེས་ཚོགས་ཀྱང་ཁྲེལ་བས་འཛུམ་པ་བཞིན། །དེ་ལྟ་ནའང་ལུང་རྟོགས་སྤྱན་ལྡན་གྱིས། །བཀའ་སྩལ་རྣ་བའི་རྒྱན་དུ་དཔྱངས་པ་ལས། །མ་བཟོད་སྨྲ་བ་གང་དེར་ཉེས་པའི་ཚོགས། །བཤགས་སོ་དགེ་བས་འགྲོ་ཀུན་སྨན་གྱུར་ཅིག །
བརྗོད་མེད་དོན་བཤགས་སྔོན་དུ་འགྲོ་བས་ཚོགས་ཀྱི་ཡོ་བྱད་བསང་སྦྱངས། ཚོགས་ཕུད་ཕུལ། བསྐང་བཤགས་བྱ། གཉིས་པ་ནི། བདུད་རྩི་ཐུན་མཚམས་འཆར་བ་དང་བསྟུན་སྟེ། རིན་ཆེན་རིལ་བུ་བཏེགས་ཏེ་ནད་པའི་སྔས་མགོར་ཕྱིན་ལ། དཔག་ཡས་བསོད་ནམས་སོགས་བརྒྱུད་འདེབས་གཏོང་། བཀའ་སྲུང་དྲེགས་བྱེད་ཚོགས་ལ་གསོལ་བ་འདེབས། ཞེས་པའི་མཚམས་སྨན་པའི་སྲིན་ལག་གིས་བཤིག་ཏེ། འཚོ་མཛད་སྨན་པའི་རྒྱལ་པོ་བཅོམ་ལྡན་འདས། སོགས་ནས་གཟུངས་སྔགས་ཚར་བདུན་བརྗོད་ཅིང་ཕུད་མཆོད། རང་གིས་ཀྱང་མྱང་། གསེར་གཟུངས་བཟླ་བཞིན་པས་བླུད་ནས་དབྱངས་གསལ་རྟེན་སྙིང་དང་། སྟོང་ཆེན་རབ་འབྱམས་ནས་གསུངས་པའི་བདེན་ཚིག་དང་ཤིས་པ་བརྗོད་ཅིང་མེ་ཏོག་འཐོར་སྟན་ལ་འདུག་སྟེ། བདག་ནི་སྐྱེ་བ་སོགས་དཀྱུས་བཞིན་དང་། ཚོགས་ཀྱི་དངོས་གྲུབ་བླངས་ཏེ་རང་གིས་ཀྱང་རོལ། ནད་པ་ལའང་རྟེན་འབྲེལ་ཙམ་སྦྱིན། དེ་ནས་ཆུ་བསྐོལ་ཚ་མོ་ཞིག་འཐུངས་སུ་གཞུག །གོས་ཤིན་ཏུ་དྲོ་བས་དབྱིབ་ཅིང་རྡུལ་འདོན་བྱ། ལྷག་མ་ནས་བཟུང་རྗེས་ཆོག་དཀྱུས་བཞིན་དུ་གཏོང་ངོ་། །གསུམ་པ་ནི། སང་ཉི་ཤར་དུས་དོམ་མཁྲིས་དང་། ཁ་ཆེ་ཐུན་གཅིག་མར་ཁུ་གསར་པ་བཙག་བཅད་ལ་བཏབ་སྟེ་གཏོང་ནས་རྩ་ཁ་བསྡམས། དེ་
ནས་ཉིན་ཕྱེད་ཚུན་ལ་ཟས་མི་ཟ། དེ་ནས་དཀར་གསུམ་སོགས་བཀྲ་ཤིས་རིལ་བུ་བསྟན་དུས་ཟངས་ཐལ་མར་སྦྱར་བྱུགས་པ་དང་། རྩ་ཁ་བསྡམས་རྗེས་རླུང་གནོན་ཤ་ཆང་བསྟེན་སྲོལ་ཀྱང་སྣང་། པའི་ཁ་ཟས་ཀྱིས་མདུན་གསུས་ཏེ་བག་ཀྱིས་ཀློད། འོན་ཀྱང་ཁ་ཚ་རུལ་སུམ་དང་། ཉ་ཕག་སྒོ་ང་བྲ་བོ་འཕྱུར་བ་སྟར་བུ་ཆང་སྐྱུར་སོགས་དང་། ཁམ་བུ་ཀུ་ཤུ་སོགས་སྔོ་ངད། རྩིབ་མའི་བར་ཤ །སོག་པའི་ཁྲུམ་ཁྲུམ་སོགས་༧ སྤངས། སྤྱོད་ལམ་ཡང་དྲག་ཤུལ་གྱི་ལས་དང་། རྟ་རྒྱུག ཉིན་གཉིད། བུད་མེད། མགོ་འཇུག་ལྡོག་ཏེ་ཉལ་བ། ཆུ་ཆེན་བརྒལ་བ། རྐང་རྗེན་གྱིས་འགྲོ་བ། ཧ་ཀྱང་འཁྱག་པ་སོགས་དང་། ཝ་ཞབས་སྐས་ཞབས་བུད་མེད་དང་། ཁྱི་དང་། བྱི་ལས་འགོམས་པ། གྲིབ་དང་མི་གཙང་བའི་རིགས་དང་། བཤལ་སྐྱུགས་གཏར་ག་བཟི་སྨན་རྣམས་གཏན་དུ་སྤངས་བའམ། དེ་ལས་སྒོག་བཙོང་ཕག་ཤ་འཕྱུར་བ་དང་། ཝ་སྐས་ཁྱི་དང་བྱི་ལས་འགོམ་པ་དང་། མེ་ཆུ་བརྒལ་བ་རྣམས་ཟླ་གཅིག བཤལ་སྐྱུགས་གཏར་ག་ཟླ་བ་གསུམ་ཚུན་ཆད་སྤངས། དེ་ལས་གཞན་རབ་གཏན། འབྲིང་ལོ་གསུམ། ཐ་མ་ཡང་ལོ་གཅིག་བར་དུ་ངེས་པར་སྤངས་དགོས། དེ་ལྟར་བསྟེན་པས་ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་བཅུ། དུས་མ་ཡིན་པའི་འཆི་བ་བརྒྱད་ལ་སོགས་པ་ཐམས་ཅད་ཞི་
ཞིང་། ཚེ་བསོད་དཔལ་འབྱོར་ལུས་ཟུང་རྒྱས། མཐར་ཐུགས་མཁའ་སྤྱོད་ཀྱི་རིག་པ་འཛིན་པར་འགྱུར་པ་སོགས་ཕན་ཡོན་བསམ་གྱིས་མི་ཁྱབ་པ་རྒྱུད་དང་གྲུབ་པའི་སློབ་དཔོན་ཆེན་པོ་རྣམས་ཀྱིས་མཛད་པའི་གཞུང་དག་ལས་ཤེས་པར་བྱའོ། །ཞར་ལ་མཛེ་ཅན་དམེ་ཕོ་དམ་ཉམས་སོགས་ཀྱི་ལག་ཏུ་འགྲིམ་པ་དང་། ནམ་མཁའ་མཐོང་བ་དང་། ཁྱི་དང་བུད་མེད་བྱི་ལ་སོགས་ཀྱིས་རེག་པས་ཉམས་པ་རྣམས་གསོ་བའི་ཕྱག་ལེན་ནི། ཚེས་བཅོ་ལྔའི་དུས་སུ། ས་མ་རུབ་ཙམ་ནས་ཨ་རུ་སོགས་བཟང་སྨན་སྣ་ཚོགས་ཀྱིས་བཀང་བའི་རིན་པོ་ཆེའི་སྣོད་དུ་རིལ་བུ་ཉིད་དར་དམར་གྱིས་བསྟུམ་ལ་ཁ་། བཅད་དེ་བཞག །མཐའ་མཆོད་པས་བསྐོར། སྐྱབས་སེམས་སྔོན་དུ་འགྲོ་བས་གཞི་བདག་ལ་གཏོར་མ་དང་། བགེགས་གཏོར་བྱིན། གུ་གུལ་བདུག་ཅིང་། ཧཱུྃ་བཞིས་སྔགས་ལན་མང་དུ་བརྗོད་པའམ། ཡང་ན་སྦྱོང་བ་སྤྱི་ལྟར་བྱས་ནས་བགེགས་ནན་ཏན་དུ་ཕྲལ། དེ་ནས་སྲུང་འཁོར་བསྒོམས་ཤིང་ལས་གཞུང་བསྲངས། བཟླས་པ་ཇི་ལྟར་རིགས་པའི་རྗེས། ཟླ་བ་ཤར་བ་དང་བསྟུན་ཞལ་ཁེབ་བསལ་ནས་ཟླ་བ་མ་གཤེགས་ཀྱི་བར་སྔགས་གསེར་གཟུངས་ངག་བཅད་དེ་ཟླ་བ་གཤེགས་འཕྲལ་ཞལ་ཁེབ་རྒྱབ། མཆོད་བསྟོད་གསོལ་འདེབས་ཚོགས་འཁོར་སོགས་དཀྱུས་བཞིན་མཐའ་རྒྱས་སུ་
བྱས་ལ་བརྟན་བཞུགས་རབ་གནས་ནན་ཏན་དང་ཤིས་བརྗོད་རྒྱས་པར་བྱས་ནས་ནང་དུ་གདན་དྲངས་ལ་བཅའ་ག་ལེགས་པར་བྱས་ཤིང་མཆོད་གྲལ་དུ་བསྐུར་བསྟི་དང་བཅས་རེ་ཞིག་འཇོག་ཏེ་དེ་ནས་ཚགས་བྱའོ། །གོང་གི་སྨན་གཏོང་བའི་དུས་སུ་བདུད་རྩི་ཐུན་མཚམས་དང་འགྲིགས་ངེས་དང་། ཉམས་གསོའི་དུས་སུ་སྟོན་ཟླ་ལྟ་བུ་ཟླ་བ་སྤྲིན་དང་བྲལ་བ་ཤིན་ཏུ་གལ་ཆེའོ། །སྔར་གྱི་གསེར་གཟུངས་དེ་ཉེར་གཅིག་མ་ཆག་པས་དུག་སྲུངས། བརྒྱ་རྩ་བརྒྱད་ཀྱིས་གཞན་གསོ། མཐིང་ཤོག་ལ་ཚེགས་མེད་དབུ་ཅན་དུ་གསེར་གྱི་བྲིས་ཏེ་བཏགས་པས་སྦྱར་དང་གྱུར་དང་དངོས་ཀྱིས་དུག་ཀུན་སྲུང་ངོ་། །རིན་པོ་ཆེའི་རིལ་བུ་གཏོང་བ་དང་ཉམས་པ་གསོ་བའི་ལག་ལེན་སྤར་བཅངས་སུ་བསྟན་པ་ས་མབྟ་མི་ཐི། །