ཟླ་ཤེལ་འཆི་མེད་བདུད་རྩི་རིལ་བུའི་སྦྱོར་བ་འཆི་མེད་བཅུད་ལེན།
༈ ཟླ་ཤེལ་འཆི་མེད་བདུད་རྩི་རིལ་བུའི་སྦྱོར་བ་འཆི་མེད་བཅུད་ལེན་བཞུགས་སོ། །ཨོཾ་ཨ་ཐཱ༈ རིགས་ཀུན་ཁྱབ་བདག་དཔལ་ལྡན་བླ་མ་དང་། །དབྱེར་མེད་སྨན་རྒྱལ་གུ་ཎའི་ཞབས་པདྨོ། །གཙུག་གཏོར་ནོར་བུའི་ཁང་བུར་ངལ་བསོས་པས། །སྔོན་མེད་བདུད་རྩིའི་སྨན་སྦྱོར་འདི་ལྟར་ཤར། །རྒྱལ་པོ་ཅོང་ཞི་དུལ་མ་ཆ་བཞི་ལ། །བཙུན་མོ་བྲག་ཞུན་སླད་མེད་ཆ་གཉིས་ཏེ། །བློན་པོ་ཨ་རུ་རུ་རྟ་ཧོང་ལེན་དང་། །ཨུཏྤལ་མ་ནུ་པྲི་ཡང་བ་ཤ་ཀ །ལྕགས་ཀྱི་ཕྱེ་མ་རྣམས་ནི་ཆ་རེ་རེ། །
འཁོར་འབངས་ཨ་གར་ཏིག་ཏ་པི་པི་ལིང་། །བཟང་དྲུག་བ་རུ་སླེ་ཏྲེས་དངུལ་ཆུ་དང་། །རྒྱམ་ཚྭ་མིང་ཅན་གླ་རྩི་གུ་གུལ་ནག །ད་ལིས་སྲད་ནག་ཉི་དགའ་ལི་ག་དུར། །དཔའ་བོ་དཀར་པོ་བྱེའུ་ལ་ཕུག་དང་། །ཆུ་སེར་སྨན་གསུམ་རྣམས་ནི་ཆ་ཕྱེད་རེ། །ཞིབ་བཏགས་སེ་འབྲུ་སྐྱུ་རུ་ཆ་གཉིས་དང་། །སྟར་ཞུན་ཆ་གཅིག་སྤྱི་བཞུར་དེ་ཡི་ཕྱེད། །ལེགས་པར་སྦྱར་བའི་ཁུ་བས་འདམ་བཏགས་བྱ། །ལག་ལེན་མན་ངག་གནད་དང་ལྡན་པ་ཡིས། །རིལ་བུ་སྲན་མ་འཕོས་པ་ཙམ་དུ་དྲིལ། །བྱིན་རླབས་ཤིས་པ་བརྗོད་ཅིང་པར་བུར་བཅངས། །ལྔ་བདུན་དགུ་སོགས་ནད་སྟོབས་སྦྱར་ལ་གཏོང་། །བཞི་བརྒྱ་རྩ་བཞིའི་ནད་རྣམས་མ་ལུས་པ། །འདི་ཡིས་མི་སེལ་བ་ནི་ག་ལ་ཡོད། །ཁྱད་པར་ཁྲག་མཁྲིས་བད་ཀན་སྨུག་པོ་དང་། །རྨུ་འོར་སྐྱ་སྦབས་དྲེགས་གྲུམ་ཚ་བ་རྙིངས། །རྩ་དཀར་ཆུ་སེར་དངོས་དང་སྦྱར་དུག་རྣམས། །སེལ་བྱེད་འཆི་མེད་བདུད་རྩི་མངོན་སུམ་མོ། །དེ་ལྟར་བརྩམས་ལས་བྱུང་བའི་དགེ་ཚོགས་ནི། །ཟླ་གཞོན་བྱེ་བའི་ཁེངས་པ་བསྙིལ་བ་དེས། །འགྲོ་ཀུན་རྒྱུ་འབྲས་ནད་ཀྱིས་གདུངས་བ་ལས། །རང་གྲོལ་སྨན་པའི་རྒྱལ་པོ་མངོན་གྱུར་ཤོག ༈ །ན་མོ་གུ་ར་བེ། གསོ་བ་རིག་པའི་ལག་ལེན་གྱི་སྐོར་ལས། རྡོ་སྨན་རིགས་གར་འགྲོ་སར་འཇུ་རྩི་དར་སྨན་
ཞེས། ཟེ་ཚྭ་དུག་འདོན་བྱས་པ་ཐུན་གཅིག །ཚྭ་ལ་ཆུ་བཅད་ཐུན་གཅིག་གཏོང་། སྔོ་སྨན་རྐྱང་པ་ལ་སྡེ་སྦྱོར་སྐབས་ལྟར་གྱི་ཁ་ཚར་བཏབ། ཟེ་ཚྭ་ལྕགས་སྐྱོགས་སུ་རྔོ་ནས་ཚག་སྒྲ་འོང་དུས་ཚུར་ལེན་ལ་དུག་འདོན། གོ་ཐལ་དང་རྒོད་ཐལ་ཞིབ་ཏུ་བྱས་ལ་སྐྱོགས་ནང་དུ་མེ་ལ་ཡུད་ཙམ་བརྔོས་ནས་སོ་སོར་གཏོང་ཆོག །གཟེ་མ་ལྕགས་སྐྱོགས་སུར་མགོ་ཚིག་ཙམ་བརྗོ། །