རེག་དུག་སོགས་ཀྱི་བཅོས་ཐབས།
༈ ཨོཾ་སྭ་སྟི། བསྲེ་ཤིང་དུག་ལས་གྱུར་བའི་རེག་དུག་ལ། །བཅོས་ཐབས་ཁྱད་པར་གྱུར་པའི་སྦྱོར་སྡེ་ནི། དངུལ་ཆུ་༡་
༠༠ རྒྱ་མཚུར་བ་༤༠ མཚལ་བ་༦༠ ཟེ་ཚྭབ་༧༠ བཅས་དེ་རྣམས་ཞིབ་པར་བཏགས་ནས་ལྕགས་སྣོད་དུ་བླུགས། དཀར་ཡོལ་སྦུབས། བྱེ་མས་བར་མཚམས་བསྡམས་ནས་སྐམ་ལུགས་ལག་ལེན་ཉམས་མེད་མཐོང་དགོས། རྒྱ་བཅོས་ཀྱི་དཔེ་ཆར་ཁ་དཀར། བར་ལྗང་། གཏིང་གི་དམར་པོ་འོང་རྒྱུའི་དཀར་པོ་བྱུགས་སྨན། དམར་པོ་ཁོང་སྨན། ལྗང་གུ་སོ་ལ་བྱུགས་རྒྱུ་ཟེར་བ་གབ་སྦས་སྣ་ཡཚོགས་རེད། སོ་ལ་བྱུགས་ན་མི་ན་པའང་ན་འོང་། སྲེག་ལུགས་གཟེར་སྤོས་རེང་བུ་གསུམ་སོགས་ཡུན་ཟེར་ཡང་། སྐམ་ཐག་ཆོད་ནས་རྡོ་ཡིས་མནན། དཔལ་འབར་གྱི་མེས་ཁོལ་སྒྲ་མ་ཡལ་བར་ངང་བསྲིང་། དེ་རྣམས་གཟེར་སྤོས་ལྔ་ལ་ཚད་བཞག །སྤོས་རེང་དང་པོར་དཔལ་འབར་ལས་ཆུང་བ། གཉིས་པ་དེ་དང་འདྲ། གསུམ་པ་མེ་རང་། བཞི་པ་དེ་དང་འདྲ། ལྔ་པ་མེ་ཆུང་བ། གྲང་ཐག་༧ཆོད་པ་དང་ངང་རིང་གིས་འདག་པ་བཀོག་ནས་ལེགས་པའི་ཚད་ནི་ཁ་དམར། བར་ལྗང་། གཏིང་དཀར་པའོ། །ཁ་དམར་བར་ལྗང་ཡན་ཆི་བ་ཁ་ཇ་ལ་བཙོས་པས་རིལ་བུ་བྲ་རིལ་ཙམ་དྲིལ། དཀར་པོ་བྱུགས་སྨན་བྱེད། ཁ་ཡི་མེ་ཏོག་ལ་དངུལ་ཆུ་ཕྲན་བུ་མ་ཚིག་ཀྱང་སྐྱོན་ཆེ། སྨན་གཞོང་དུ་ཆི་བ་ཁ་དང་མཉམ་བཏགས་བྱས་པས་འདྲེས་འགྲོ་བས་མི་ལེགས། གཏིང་གི་དཀར་པོའི་དཀྱིལ་དུ་དངུལ་
ཆུ་མ་ཚིག་པ་ཁ་སྔར་ལྟར་རྒྱབ། སྐམ་ཐག་ཆོད་ནས་གཟེར་སྤོས་གསུམ་གྱི་རིང་བསྲེག་བསྐྱར་བྱེད། དེ་རྗེས་གོང་དང་འདྲ། དངོས་གཞི་སྨན་བཏང་ལུགས་ཟས་ཞོག་སྔ་བྱས་ལ་སྲོད་ལ་རིལ་བུ་གསུམ་རེ་ཇ་ཐང་གར་སླ་སྙོམས་པ་བྱ་སྒང་དོ་ཙམ་ལོང་ལོང་ཁོལ་བས་བཏང་། དེ་མིན་ཆུ་བཀོལ་གྱིས་ཀྱང་རུང་། འཇུ་ཚོད་ལ་སྐྱུགས་གྲབས་བྱེད་ན་སྐྱུག་ནོན་གང་ཐུབ་བྱེད། འགྲིམ་ན་ཕན་ཆེ། །འགྲིམ་གྲབས་ཀྱིས་རྒྱུ་མ་གཟེར་ཆེ་ན་ཆང་ཧུབ་དོ་གསུམ་འཐུང་ན་གཟེར་ཆག་འགྲོ། བཤལ་འོང་། མ་གཟེར་ན་ཆང་མི་བཏང་། སྨན་བཏང་ནས་ཞག་གཅིག་ནས་མཚན་མོ་སོ་ཤིང་འཛུག །ཞོག་དང་ཉིན་མོ་སོགས་ཇ་ཐང་། གོ་ཡུ། ཁྱི་ཝར་བཀོལ་གྲང་གིས་མཁུར་བཀང་འཆང་། དེས་ཁ་ལ་རྨ་མི་འོང་། སོ་རྩ་བརྟན། དེ་བྱས་ཀྱང་རྙིལ་སྐྲངས་ཆེ་ན། གསེར་མདོག །ཁྱི་ཝར། སྟར་བུ་རྣམས་ཕོན་ཆེ་བ། བིག་པན་ཨ་རུ་རའི་བཞི་ཆ། གླ་རྩི་དྲི་ཐོན་བཅས་ཀྱི་རྒྱུན་ཁྱེར་མཁུར་བཀང་བྱེད། ཁ་ནང་རྨ་བྱུང་ན་ལྡོང་རོས་ཀྱིས་བིག་པན་མདོག་འགྱུར་བར་བསྲེས་ལ་སྐམ་འདེབས་བྱེད། ན་ཚས་མ་བཏུབ་ན་ཆུ་ཡི་མཁུར་བཀང་བྱེད། གཏིང་དཀར་དང་ཁྱི་ཝར། གོ་ཡུ། ཤ་རུ་ནུས་བསྲེགས་སོ་སོར་ཆ་གཉིས། ཐིག་པན་ཆ་གཅིག །གླ་རྩི་དྲི་ཐོན་བཅས་རློན་བྱུག་སྐམ་འདེབ་གང་བྱེད་རིག་པས་
དཔྱད། ཉི་མར་ནན་གྱི་སྐམ་ན་ཕན་ཆེ། དེ་མིན་ཡང་བྱུག་ཆོག །ཟས་སྤྱོད་རྗེས་ལུག་ཤ་འཛེམ་རྒྱུ་མ་མཛད་ཀྱང་ཞག་བདུན་ཚྭ་དང་ལུག་ཤ་མ་འདྲེས་པའི་འབྲི་གཡག་གི་ཤ་ཟ་གང་ཐུབ། ནད་གཞི་གཞན་ལ་མ་གནོད་ན་ར་ཤས་ཀྱང་ཕན། ཇའང་སྨན་གཏའ་བྱས་པས་འཛེམ་མི་དགོས། སྨན་གཏང་ནས་ཞག་གཉིས་གསུམ་སོང་ན། ཟུངས་ངན་ན་ཞག་གཉིས་སྨན་ངལ་གསོ། དེ་ནས་ཟུངས་བསྟུན་གཏོང་། གསར་པ་ལ་ཐུན་ལྔ། གསུམ། ཕལ་ཆེར་བདུན་ལས་བཏང་མ་མྱོང་། ནད་རོ་རྙིང་པ་སྨན་ངལ་གསོ་ཐུན་གྲངས་མི་འདུག་པས་ཟུངས་ལ་བལྟ་ཤིང་གཏོང་། ཞག་བཅུ་གཉིས་ནས་ཚྭ་ཕྱེད་ཚྭ། ཉེར་གཅིག་ནས་ལུག་ཤ་མ་གཏོགས་འཛེམ་མི་དགོས་པ་ཁྱད་ཆོས། ཟུངས་ངན་དང་དོང་ག་མི་བདེ་པའི་རིགས་ལ་ཆང་བག་ཡོད་བཏང་ཆོག །ལུས་རབ་ལོ་གཅིག་གམ་ཟླ་བ་དགུ་བསྲུང་དགོས་ཀྱང་། ནད་གྲོལ་ནས་ཟླ་བ་གཉིས་གསུམ་ལས་འཛེམ་མི་དགོས། ཆུ་རྩ། ཡུང་བ། གུར་གུམ། དོམ་མཁྲིས། ཚྭ་ལ་བཏུལ་མ། ཤིང་མངར། ལུག་མུར། སྟོད་ཇ། ནི་ལ་ཐོ་ཋ། གླ་རྩི། སྟག་ཤ །དུང་ཐལ། འབྲུག་རུས། གོ་ཡུ། སྙིང་ཞོ་བསྲེག་ཐལ། རྒྱ་མཚལ་མེར་བསྲེགས་ཐལ། ར་ཁྲག་བཅས།། །།