སྨན་ནག་འཆི་མེད་བདུད་རྩིའི་འཁྲུལ་འཁོར།
༈ སྨན་ནག་འཆི་མེད་བདུད་རྩིའི་འཁྲུལ་འཁོར་ཞེས་བྱ་བ་བཞུགས་སོ། །ཨོཾ་ཨ་ཐཱ། སངས་རྒྱས་སྨན་གྱི་བླ་ལ་གུས་བཏུད་ནས། །སྨན་ནག་འཆི་མེད་བདུད་རྩིའི་འཁྲུལ་པ། འཁོར་བྲི། །ཀླུང་གི་ཕག་ནག་སྙིགས་མ་ཕུལ་གང་ལ། །གྲོགས་བཞི་སྲད་དཀར་ཧོང་ལེན་དེ་བ་ཤིང་སྔོན་སྤར་རེ་སོ་སོར་ནུས་ལྡན་བསྲེགས། །མེད་ཐབས་མེད་པའི་སྨན་ཆེན་ཆུ་རྩ་ཐེབ་ཙམ་གསང་སྨན་རྣམ་གཉིས་བསྣན། །དམར་ཟལ་བ་ཆུས་ཁྲུས་གསོལ་ཀ་རས་དྲངས། །རང་རང་འདུ་བའི་ཁ་འཛིན་དཔུང་དང་བཅས། །ཕས་རྒོལ་ནད་ཀྱི་སྟེང་དུ་སྤྱན་དྲངས་ན། །གང་ཡང་གཞོམ་པར་མི་འགྱུར་ཡོད་དམ་ཅི། །མིང་དོན་མཐུན་པ་འཆི་མེད་བདུད་རྩི་ཞེས། །རྐང་གཉིས་སྲོག་གི་ཆད་མཐུད་འདི་མེད་ན། །སྙིགས་དུས་རིམས་ནད་གཞོམ་པར་ག་ལ་ནུས། །བཞི་བརྒྱ་རྩ་བཞིའི་ནད་རིགས་རེ་རེ་ལ། །ཁ་བསྒྱུར་རེ་
རེ་བཤད་ཀྱང་མི་ལོངས་མོད། །དེ་ཕྱིར་རང་རིག་འཁྲུལ་འཁོར་འདི་ལྟར་མཛོད། །རིམས་ནད་སྤྱི་ལ་དེ་ཝ་ལྔ་ཐང་བསྡེབས། །རྒྱུ་མར་ཨིནུ་བཞི་དང་མཁྲིས་ཕྱེ་བདུན། །ཁྲག་མཁྲིས་ཤས་ཆེ་ཧོང་ལེན་བོང་ཏིག་ཏ། །འབྲུམ་པར་གཉན་སྨན་བཞི་དང་གསང་སྨན་གཅིག །ཆམ་པར་ཨ་རུ་འཛིན་པ་ཁྱི་ཧོང་བསྣན། །ཞྭ་ལོག་གླ་རྩི་གུ་གུལ་རྟ་བོན་ཐལ། །གག་པ་གསོད་སྡུད་འབྱུང་འདུལ་འཛིན་པ་བསྣན། །གཉན་ནད་སྤྱི་ལ་གླ་གུལ་འཛིམ་གསུམ་བསྣན། །ཁྱད་པར་ཕོ་བར་བབས་པའི་རིམས་རྣམས་ལ། །སྦྱོར་བ་འདི་ཉིད་བདུད་རྩི་ལྟ་བུ་སྟེ། །བྲག་ཞུན་བོང་དཀར་འཇིབ་རྩི་གསེར་མེ་ཏོག །བསྣན་ན་ཕོ་བར་ཁྲག་མཁྲིས་ལྷུང་བ་སེལ། །གཉན་སྲིན་ཡ་མ་བེ་ལོག་གླང་ཐབས་ལ། །ཕུར་ནག་ཁཎྜ་བསྣན་ན་མཆོག་ཏུ་ཕན། །བད་རླུང་ཤས་ཆེ་མ་ནུ་བཞི་ཐང་བསྡེབས། །གྲང་ཤས་ཆེ་ཞིང་ཕོ་བ་ངན་པ་ན། །སེ་འབྲུ་བཞི་ལྔ་བརྒྱད་དང་ཅུར་ནིས་བསྡེབས། །ཆུ་འགགས་ནད་ལ་ཆུ་སྨན་བསྣན་ཀྱང་ཤིས། །མདོར་ན་ཚ་གྲང་ནད་རིགས་བརྟགས་མི་དགོས། །གང་ལ་ཡང་ཐེངས་པས་ཆོག་བའི་མྱོང་གྲུབ་མ། །རྒྱུན་དུ་བྲག་ཞུན་བསྡེབས་པས་མ་ལུས་འཇོམས། །འདི་ནི་གཅིག་ཤེས་ཀུན་གྲོལ་གདམས་པ་སྟེ། །དྭགས་སྨན་ཆེན་པོའི་གསུང་གི་བདུད་རྩི་ཡིན། །དགེ་བས་འགྲོ་ཀུན་བྱང་ཆུབ་མྱུར་ཐོབ་ཤོག །