ཚེ་ལ་དབང་བའི་ཕོ་ནད་ཚ་གྲང་གི་སྤྱི་འཇོམས་བདེ་བའི་མྱུ་གུ།
༈ ཚེ་ལ་དབང་བའི་ཕོ་ནད་ཚ་གྲང་གི་སྤྱི་འཇོམས་བདེ་བའི་མྱུ་གུ་བཞུགས་སོ། །ན་མོ་མ་ཧཱ་གུ་ཎ་ཡེ། མེ་དྲོད་གསུམ་གྱིས་མྱག་བཞུ་དྭངས་སྙིགས་འབྱེད་པར་མ་ནུས་པའམ། དུས་གདོན་ཟས་སྤྱོད་རྐྱེན་གྱིས་མེ་དྲོད་ཀྱི་ལས་ལོག་པར་བྱས་པ་ལ་སྡེ་བཞིའི་ཅོང་གི་རྩ་བ་ཕོ་ནད་མང་དུ་འབྱུང་ནའང་།། ཁྲག་མཁྲིས་ཚ་བར་གྱུར་པ་དང་། བད་རླུང་གྲང་བར་གྱུར་པ་གཉིས་སུ་འདུ་བ་ལས། དང་པོ་ནི། རྩ་འབུར་འདྲིལ། ཆུ་དམར་སེར། ན་ལུགས་ལྡང་དུབས། ཟས་སྤྱོད་དྲོད་ཀྱིས་བསྐྱེད་པ་ནི་ཚ་བ་ཡིན་པས། དེའི་སྤྱི་སྨན་ནི། ཨ་རུ་གསེར་མདོག་རྡོག་པོ་གཅིག །བྲག་ཞུན་དེ་དང་མཉམས་པ། དེ་གཉིས་ཀ་དང་མཉམ་པའི་སྟར་ཞུན། ཨུཏྤལ། ཁ་ཆེ། བ་ཤ་ཀ་སྐྱུ་རུ་ར། སེ་འབྲུ། སུག་སྨེལ། རུ་རྟ། མ་ནུ། འུ་སུ། རྒྱམ་ཚྭ། ཅོང་ཞི། ལྕགས་དྲེགས། སྦྲུལ་ཤ་རྣམས་ཐུན་བཟང་རེ་ཞིབ་པར་བཏགས་པའི་རིལ་བུ་སྲན་མ་ཙམ་གསུམ་གསུམ་ཆུ་སྐོལ་གྱིས་ཕུལ་ལ་གུང་གཉིས་སུ་བསྟེན་ན། ཁྲག་མཁྲིས་ཕོ་བར་ལྷུང་བ་དང་། སྨུག་པོའི་ཁྲག་སྐྲན་འདྲིལ་བ་སོགས་ཕོ་ནད་ཚ་བ་མཐའ་དག་སེལ། གཉིས་པ་ནི། རྩ་བྱིངས་རྒུད། ཆུ་སྔོ་དཀར། ན་ལུགས་སྦོ་འཁྲོག །ཟས་མི་
འཇུ་བ། ཟས་སྤྱོད་བརླན་གྲང་གིས་བསྐྱེད་པ་རྣམས་གྲང་བ་ཡིན་པས་དེའི་སྤྱི་སྨན་ནི། ཅོང་ཞི་སོལ་བའི་མེ་ལ་དཀར་པོར་མ་སོང་བར་དུ་བསྲེགས་པ་ཆང་དང་དར་བར་ངད་བསད་པས་གཞི་བྱ། དེ་སྟེང་ཨ་རུ་ར། བྱ་ཐལ། རྒྱམ་ཚྭ། སེ་འབྲུ། སུག་སྨེལ། པི་པི་ལིང་། བྱི་ཏང་ཀ ཚྭ་ལ། མ་ནུ། ཁ་ཆེ། སྟར་བུ། སྦྲུལ་ཤ་འདི་རྣམས་ཐུན་བཟང་རེ་འུ་སུའི་ཆུས་འདམ་འཐགས་ཡུན་རིང་དུ་བྱས་པའི་རིལ་བུ་སྲན་ཙམ་གསུམ་གསུམ་ཆུ་བསྐོལ་གྱིས་ཕུལ་ནས་ཞོག་སྔ་བསྟེན་ན། མ་ཞུ་མེ་ཉམས་ལྷེན་ལྕགས་དྲེགས་ག་མཁྲིས་དང་བསྡོངས་པ པ་བྲང་ཚ་ཆུ་སྐྱུར་སྐྱུགས་པ་སོགས་ཕོ་ནད་གྲང་བ་མཐའ་དག་སེལ། གོང་མ་རིལ་བུ་སྐྱུར་པོ་དང་། འོག་མ་རིལ་བུ་དཀར་པོ་ཞེས་བྱ་སྟེ། རྗེ་བཙུན་གཡུ་ཐོག་ཞབས་ཀྱི་ཐུགས་རྗེས་རང་བྱུང་བའོ། །གཅོང་ནད་ཐམས་ཅད་མ་ཞུས་བསྐྱེད་པ་དང་། །ཕན་གནོད་ཕལ་ཆེར་ཕོ་བར་རག་ལས་ཕྱིར། །མ་ཞུ་བཅོས་པས་གཅོང་ནད་ཞི་བྱེད་པ། །རིང་ནས་གོམས་པའི་འཚོ་ཐབས་མཁན་དེས་སོ།། །།