ཤོག་ལྷེབ་ ༡༠༡ ནས་ ༢༠༠ བར།
ཚོའི་གཏེར། །མ་ཉམས་རི་དྭགས་མིག་མའི་སོར་རྩེ་ཡིས། །བསྣུན་པའི་མོད་ནས་དད་གུས་ཨ་ཤོ་ཀ །ཞུ་མཆིད་མེ་ཏོག་གྲོལ་བའི་རྐྱེན་དུ་བྱས། །གང་ཚེ་རིག་གྲོལ་སྤྱོད་པའི་
ཆུ་སྐྱེས་ཀྱིས། །རྣམ་པར་འཁྲིལ་བའི་གཟུགས་སྐུའི་གོ་བི་དཱ། །སྨིན་གྲོལ་འབྲས་བཟང 
་དུད་དང་ཆབས་ཅིག་པར། །སྐལ་བཟང་ཀུན་དགའི་བདུད་རྩི་གསར་པ་སྟོབ། །ཁྱད་པར་ནང་གི་དེ་ཉིད་ཕྱག་རྒྱ་ཆེ། །མངོན་དུ་བརྙེས་ནས་གཞན་ལ་འདོམས་མཁས་པའི། །སྒྲུབ་བརྒྱུད་བསྟན་པ་སྤེལ་བའི་བྱེད་པོ་གང་། །འཚོ་གཞེས་བརྟན་པའི་བཀའ་དྲིན་འབྱམས་སུ་ཀླས། །འདི་ན་གྱི་ནའི་སྤྱོད་པས་འཚོ་བ་ཡི། །དམན་པ་བདག་ཀྱང་མཆོག་གསུམ་འདུས་པའི་ཞལ། །དཔལ་ལྡན་བླ་མའི་ཐུགས་རྗེ་ལ་བརྟེན་ནས། །ལང་ཚོའི་འདུ་བྱེད་མ་ཉམས་བདེ་བར་མཆིས། །སླད་མའི་ཆར་ཡང་འཆི་མེད་བདེ་བ་ཆེས། །མི་འགྱུར་རྟག་པ་དམ་པའི་ཕྱག་རྒྱ་ལ། །དགྱེས་པར་རོལ་པའི་ངོ་མཚར་རྨད་བྱུང་བ། །ཚུར་མཐོང་བྱིས་བློའི་ངོར་ཡང་མི་སྦེད་གསོལ། །ཞུ་མཆིད་སྙན་པར་སྨྲ་བའི་མཚར་སྡུག་གསར། །མ་ཉམས་རྫོགས་པའི་འཕྲིན་ཡིག་ཨུ་དུམྦར། །དད་གུས་མཛེས་མའི་ཐོད་པར་བཅིངས་བཞིན་དུ། །གང་ཞབས་སྤྱི་བོར་མཆོད་སླད་མངོན་པར་དེངས། །ཡང་ན། ངེས་དོན་བསྟན་པའི་ཟླ་ཤེལ་འདྲེན་བཟོད་པའི། །ཐུགས་བསྐྱེད་ཤིང་རྟའི་སྒྱུ་ཐབས་ཕུལ་བྱུང་ཞིང་། །
བསྔགས་འོས་ཡོན་ཏན་དུ་མའི་གཏེར་གྱུར་པ། །ཁྱབ་བདག་དཔལ་ལྡན་བླ་མའི་ཞབས་དྲུང་དུ། །རྟག་པར་གུས་པའི་ཡིད་ཀྱི་རོལ་མོ་ནི། །ཚིག་སྦྱོར་སོར་རྩེའི་འཕྲུལ་གྱིས་བསྐུལ་བ་ལས། །ཞུ་མཆིད་དབྱངས་བདུན་རྫོགས་པའི་མཆོད་སྤྲིན་གྱིས། །ཡེ་ཤེས་གཟིགས་པའི་འབབས་སྟེགས་སར་པ་བྱས། །ལུང་རྟོགས་ཆུ་བོ་རྣམ་བཞིའི་རོལ་རྩེད་ཀྱིས། །རྣམ་པར་བཏུད་པའི་གསང་གསུམ་སིནྡྷའི་བདག །ཕན་བདེའི་རིན་ཆེན་དུ་མའི་དོ་ཤལ་བཅས། །སྲིད་འདིར་བརྟན་པའི་གཏམ་གྱིས་ཀུན་དགར་གྱུར། །དེ་ཚེ་ཀུན་རྨོངས་མལ་དུ་མནལ་བ་ཡིས། །གྱི་ནའི་སྤྱོད་པས་འཚོ་བའི་བདག་ཅག་ཀྱང་། །མཆོག་གསུམ་བཀའ་དྲིན་རླུང་གཞོན་གྱིས་བསྐུལ་བའི། །ཅུང་ཟད་བདེ་བའི་ངལ་འཚོ་ཅིར་ཡང་ཐོབ། །སླད་ནས་སྒྲུབ་བརྒྱུད་བསྟན་པའི་བ་ཀུ་ལ། །མཁྱེན་དཔྱོད་མཛེས་མའི་ཁ་ཕྲུས་དབྱེ་བའི་སླད། །འཚོ་གཞེས་ལང་ཚོ་ཉམས་པར་མ་གྱུར་བཞིན། །འདིར་ཡང་རྗེས་སུ་བརྩེ་བའི་བཀའ་དྲིན་སྩོལ། །དེ་སྐད་ཞུ་མཆིད་མགྲིན་པའི་རྫ་རྔ་ཅན། །རྟེན་དངོས་གཤོག་དཀར་གཡོ་བས་མཛེས་པའི་གཟུགས། །གང་ཞབས་དོན་གཉིས་ཆུ་གཏེར་ཆེན་པོ་ལ། །གུས་པའི་ཡིད་ཀྱིས་རིངས་པར་བསྐྱོད་དེ་ཐལ། །ཡང་ན། བདེ་ཆེན་ཤེས་རབ་སྒྱུ་མའི་དབྱིངས། །སྙོམས་པར་ཞུགས་པའི་ཟློས་གར་ལས། །གདན་གསུམ་ཕྱག་རྒྱའི་སྐུར་བཞེངས་པ། །གྲུབ་པའི་
རིགས་མཆོག་གང་དེའི་དྲུང་། །གུས་པའི་ཆར་གྱིས་བྲན་པ་ལས། །ཁྱོད་ཡོན་ཉི་མར་རྗེས་ཆགས་བློ། །པདྨ་དཀར་པོ་བཞད་པའི་ཁོངས། །ཞུ་མཆིད་སྙན་པའི་དྲི་བསུང་འཐུལ། བྲལ་སྨིན་ཡོན་ཏན་ཨུཏྤ་ལ། །ངེས་དོན་འབྲས་བུས་ལྕི་བ་གང་། །སྒྲུབ་བརྒྱུད་བསྟན་འཛིན་དགའ་བའི་ཚལ། །མཛེས་པའི་རྒྱན་དུ་འབར་དེ་རྨད། །འདིར་ཡང་མཆོག་གསུམ་དབྱེར་མེད་པ། །དཔལ་ལྡན་བླ་མའི་བྱིན་རླབས་ཀྱི། །གདུགས་དཀར་གྲིབ་མར་ངལ་གསོས་པས། །ཉེར་འཚེའི་ཚ་གདུང་བྲལ་བར་མཆིས། །སླད་མར་འཆི་མེད་བདུད་རྩིའི་བཅུད། །ཐུགས་ཀྱི་ཐིག་ལེར་འདྲེས་པ་ལས། །ཇི་སྲིད་བསྐལ་པ་རྒྱ་མཚོའི་བར། །ཞབས་པད་རྟག་ཏུ་བརྟན་པར་གསོལ། །དེ་སྐད་ཞུ་བའི་མཆིད་ཚིག་ནི། །གཞན་གསོས་མགྲིན་པར་ཆགས་པའི་བློས། །རྟེན་གྱི་འདབ་གཤོག་ཟུང་བསྐྱོད་དེ། །དད་གསུམ་སྨན་ལྗོངས་མཆོག་ནས་དེངས། །རྫོགས་ཆེན་མཆོག་སྤྲུལ་རིན་པོ་ཆེ་དང་། ཀཿཐོག་གདན་ས་པ་སོགས་མདོ་ཁམས་ཕྱོགས་ཀྱི་རྙིང་མའི་བླ་སྤྲུལ་ཆེ་གྲས་ཞིག་ལ་འབུལ་ན། །རྣམ་པ་ཀུན་ལྡན་འོད་གསལ་རྡོ་རྗེའི་སྤྲིན། །སྐལ་བཟང་མོས་པའི་མཁའ་ལ་ཤར་ཙམ་གྱིས། །ཐེག་མཆོག་སྙིང་པོའི་དགའ་ཚལ་དར་མཛད་པ། །ཁྱབ་བདག་རྡོ་རྗེ་འཛིན་པ་ག་ལ་བར། །མོས་གུས་ཡིད་ཀྱི་ཆུ་བ་ལྡེམ་པའི་རྩེར། །ཞུ་མཆིད་མེ་ཏོག་གཞོན་ནུའི་དོགས་པ་ཡིས། །
རྣམ་པར་མཛེས་པའི་དོ་ཤལ་གསར་པ་ཡང་། །རྗེས་བརྩེའི་སྤྱན་ཟུར་གཡོ་བའི་མཆོད་སྤྲིན་ལགས། །གང་ཚེ་རྒྱལ་གསུང་ལམ་བདེན་མཐར་ཐུག་དབྱངས། །ནང་རྒྱུད་གསུམ་གྱི་རོལ་མོར་འཁྲོལ་བ་ལས། །སྔ་འགྱུར་ལོ་པཎ་དུ་མའི་ཐུགས་བསྐྱེད་ཀྱིས། །འཛིན་བཟོད་སྨིན་གྲོལ་རྒྱལ་ཐབས་ཁྱོད་ལ་མངའ། །ཁྱད་པར་གསང་གསུམ་དག་པའི་ཟླ་ཤེལ་ནི། །སྨོན་འཇུག་རི་དྭགས་མཚན་མ་དང་འགྲོགས་བཞིན། །གཞན་ཕན་ཐུགས་བསྐྱེད་འོད་དཀར་རིང་སྤྲོ་བས། །ལྷར་བཅས་ཀུན་ཏུ་དགའ་བའི་བདོག་པ་བྱིན། །འདི་ན་གྱི་ནའི་སྤྱོད་པས་འཚོ་བ་ཡང་། །འཁོར་དང་མྱ་ངན་འདས་པའི་ལེགས་ཚོགས་ཀྱི། །འབྱོར་པས་ཕོངས་ཀྱང་དམ་པ་ཁྱོད་ཁོ་ནའི། །བཀའ་དྲིན་ར་བར་འཁེལ་བས་ཉེར་འཚེ་བྲལ། །སླད་མར་ཟུང་འཇུག་གྲུབ་པའི་མདའ་གཅིག་གིས། །ཚུལ་མིན་འབོད་གྲོགས་མགོ་བོ་བྲེགས་ཏེ་སླར། །འཆི་མེད་སཱི་ཏཱའི་རྩེ་འཇོ་རོལ་བཞིན་དུ། །བདག་ཀྱང་ཐུགས་རྗེའི་ཕྱག་གིས་དམ་དུ་ཟུངས། །དེ་སྐད་སྙན་ཚིག་སཱ་ལའི་འཁྲི་ཤིང་ནི། །ཞུ་འདེགས་ཐང་ཆུ་དཀར་པོས་རྒྱས་བཏབ་ནས། །དད་གསུམ་དགེ་བའི་བསུང་ཞིམ་འཐུལ་དང་བཅས། །ཡེ་ཤེས་གཟིགས་པའི་སྤྱན་ལམ་མཛེས་ཕྱིར་ཕུལ། །ཡང་ན། ཤེས་རབ་མ་ཉམས་ཐབས་ཀྱི་བདག་ཉིད་ནི། །ཟུང་འཇུག་གྲུབ་པའི་གྲོང་དུ་རྣམ་རོལ་ཀྱང་། །འདི་ན་སྔ་འགྱུར་བསྟན་པའི་མིག་
གཅིག་པུ། །མཚུངས་བྲལ་རིག་འཛིན་བླ་མའི་ཞབས་པད་དུ། །ལྷག་མ་ཅན་གྱི་ཕྲག་གོང་འཐུག་པོ་ཡིས། །ས་འདི་རིར་བཅས་འདེགས་བཟོད་ངོ་མཚར་བཞིན། །ཁྱོད་ཀྱི་བྲལ་སྨིན་ཡོན་ཏན་མི་ཟད་ལྕིད། །ཞུ་མཆིད་སྙན་པར་སྨྲ་བས་རྗེས་མཚོན་བྱས། །སྡེ་སྣོད་བཞི་པོའི་ཆུ་གཏེར་ཆེན་པོ་རུ། །རྣམ་པར་རོལ་པའི་རིག་འཛིན་གདེངས་ཅན་དབང་། །སྐུ་བཞིའི་རྒྱལ་ཐབས་སྔོན་བརྙེས་ནོར་བུའི་ཏོག །དེ་ཉིད་ཁོ་ནས་སྲིད་འདིའི་མུན་པ་བསལ། །གང་གི་ཐུགས་རྗེའི་དགའ་ཚལ་སྟུག་པོ་ལ། །རྣམ་པར་དཀྱུ་བའི་གུས་འབངས་བདག་ཅག་ཀྱང་། །ཉེར་འཚེའི་ཉག་ཕྲན་སྦྱོར་བའི་གཡུལ་ངོ་རུ། །འཚོ་བའི་འདུ་བྱེད་མ་ཉམས་བཞིན་དུ་མཆིས། །སླད་མར་སྔ་འགྱུར་བསྟན་པའི་ས་མོས་ཚལ། །དྲི་མེད་ཕྱོགས་དུས་ཀུན་ཏུ་དར་རྒྱས་པ། །གྲུབ་མཆོག་ཟླ་གཞོན་ཁྱོད་ལ་རགས་ལས་ཕྱིར། །སྲིད་འདིར་ཞབས་བརྟན་མཛོད་ཅིག་ཁྱབ་བདག་རྗེ། །དེ་སྐད་ཞུ་མཆེད་ཨུཏྤལ་ཞགས་པ་ནི། །རབ་དྭངས་ཡིད་ཀྱི་ཆུ་མཚོར་བསྐྱེད་བསྲིངས་ནས། །གཟིགས་རྟེན་བུང་བ་གཡོ་བའི་འཕུར་ལྡིང་བཅས། །དད་སྤྲོའི་དགའ་བ་རྒྱས་པའི་ཚལ་ནས་ཕུལ། །ཡང་ན། གསང་མཆོག་འོད་གསལ་རྡོ་རྗེའི་ཐེག །ཟབ་དོན་ཀུན་གྱི་དེ་ཁོ་ན། །འཛིན་མཛད་གྲུབ་པ་རྒྱ་མཚོའི་ཏོག །དཔལ་ལྡན་བླ་མའི་ཞབས་པད་མོར། །རབ་གུས་ཡིད་ཀྱི་སྨིན་ལེགས་མས། །སྤྲོ་དགའི་
སོར་རྩེས་བསྣུན་པ་ལས། །ཞུ་མཆིད་མྱ་ངན་མེད་པ་ཡི། །མེ་ཏོག་གྲོལ་དེ་སུ་ཡིས་བཟློག །གང་གི་མཁྱེན་པའི་ཨཱ་དརཱར། །རིམ་དགུའི་ཐེག་པའི་གཟུགས་བརྙན་ཀུན། །མ་འདྲེས་འཆར་བའི་རི་མོར་བཅས། །བསྟན་འགྲོའི་རྒྱལ་མཚན་ཏོག་ཏུ་སྦ། །དེ་སླད་དེ་ཡི་བཀའ་དྲིན་གྱིས། །ཉེ་བར་འཚོ་བའི་གུས་འབངས་ཀྱང་། །གྱི་ནའི་སྤྱོད་པས་དུས་འདའ་བཞིན། །ཉེར་འཚེ་བྲལ་བའི་གོ་སྐབས་ཐོབ། །འབྱུང་འགྱུར་དུས་ཀྱང་འཆི་མེད་ཀྱི། །བདུད་རྩིས་རབ་ཏུ་དགྱེས་པ་ལས། །གསང་གསུམ་རྡོ་རྗེའི་ཆོས་བདུན་དང་། །མི་ཕྱེད་གཅིག་ཏུ་འཚོ་གཞེས་གསོལ། །ཞུ་མཆིད་སྙན་པར་སྨྲ་བ་ཡི། །ལང་ཚོའི་མཚར་སྡུག་མ་ཉམས་པ། །རྟེན་དངོས་རིན་ཆེན་དོ་ཤལ་བཅས། །དད་གསུམ་གོམ་སྟབས་བསྒྱུར་གིན་སོང་། །ཞེ་སྤྲུལ་དང་། དཔལ་སྤྲུལ་སོགས་རྙིང་མའི་བླ་སྤྲུལ་འབྲིང་གྲས་ཞིག་ལ་འབུལ་ན། །རྨད་བྱུང་ཚོགས་གཉིས་རོལ་མཚོས་བཏུད་བྱས་པའི། །དགེ་ལེགས་ཉི་གཞོན་དྲ་བའི་དོགས་པ་ཡིས། །གསང་བསྟན་ཨུཏྤལ་ནགས་ཀླུང་དར་མཛད་པ། །ཁྱབ་བདག་རིག་འཛིན་བླ་མ་ག་ལ་བར། །མང་དུ་ཐོས་དང་དེ་དོན་བསམ་པ་དང་། །མཉམ་པར་བཞག་པའི་ཡོན་ཏན་རབ་དབེན་ཀྱང་། །གུས་སྤྲོའི་ལང་ཚོ་རྒྱས་པའི་བཞིན་བཟང་མས། །ཞུ་མཆིད་སྙན་པར་སྨྲ་བའི་གླུ་རུ་བླངས། །གཟུང་འཛིན་འཁོར་བའི་རིམས་ནད་སྟུག་པོ་ཡིས། །ཉེ་བར་
གདུང་བའི་འགྲོ་བ་མཐའ་དག་ལ། །སྨིན་གྲོལ་བདུད་རྩིས་བརླན་པའི་ཆོ་ག་མཁན། །ཁྱེད་ནི་སྔོན་མེད་གྲུབ་པའི་རྣ་རྒྱན་འཛིན། །ཁྱད་པར་སྔ་འགྱུར་འོད་གསལ་རྡོ་རྗེའི་ཐེག །མཐའ་ཡས་དཔག་པར་དཀའ་བའི་རོལ་མཚོ་ཆེ། །བློ་མཆོག་ཧུབ་གཅིག་གིས་བཏུངས་གྲགས་དཀར་གྱིས། །དྲང་སྲོང་བུམ་པ་སྐྱེས་ཀྱི་སྙན་པ་འཕྲོགས། །འདི་ན་འདུ་ཤེས་གསུམ་གྱི་དམ་འོག་ཏུ། །ཉེ་བར་བཞག་པའི་གུས་འབངས་ཀུ་སཱ་ལི། །མཆོག་གསུམ་དབྱེར་མེད་བླ་མའི་བྱིན་རླབས་ཀྱིས། །ལང་ཚོའི་འདུ་བྱེད་མ་ཉམས་བདེ་བར་བདོག །སླད་མར་ཡེ་ཤེས་གཟིགས་པའི་སྒྱུ་ཐབས་ནི། །གཞན་ཕན་སྙིང་རྗེའི་དཔྱིད་དང་འདྲེས་པ་ལས། །བསྐལ་པ་རྒྱ་མཚོའི་སྲིད་དུ་ཞབས་བརྟན་བཞིན། །འཆད་རྩོད་རྩོམ་པའི་དྲིལ་ཆེན་བསྒྲགས་པར་མཛོད། །ཞུ་མཆིད་རབ་དྭངས་ཡིད་ཀྱི་ཉི་གཞོན་གྱིས། །རྣམ་པར་ཕྱེ་བའི་ཚིག་རྒྱན་ཆུ་སྐྱེས་གསར། །རྟེན་དངོས་མཚར་སྡུག་ཡོངས་སུ་རྫོགས་པ་གང་། །དད་དང་སྤྲོ་བའི་སྨན་ལྗོངས་མཆོག་ནས་ཕུལ། །ཡང་ན། ལུང་རྟོགས་རིན་ཆེན་དུ་མའི་དོ་ཤལ་གྱིས། །མངོན་པར་སྤྲས་པའི་ཡོན་ཏན་སིནྡྷའི་བདག །དཔྱོད་ལྡན་ཆུ་ཀླུང་ཀུན་གྱིས་བཏུད་གྱུར་པ། །རྣམ་འདྲེན་ཁྱབ་བདག་བླ་མའི་ཞབས་དྲུང་དུ། །གུས་པའི་ཀུན་ཁོངས་ནས་འཛུམ་པའི་མོད། །ཞུ་མཆིད་དྲི་བསུང་མངར་པོ་འཐུལ་བའི་ཚེ། །རྣམ་མཁྱེན་
ཡེ་ཤེས་གཟིགས་པའི་རོལ་མོ་ནི། །རཡིག་གཉིས་པའི་ཚུལ་གྱིས་གཡོས་པ་བཞིན། །གངས་རིའི་ཁྲོད་འདིར་སྡེ་སྣོད་བཞི་པའི་གཞུང་། །སྔ་འགྱུར་རྡོ་རྗེའི་ཐེག་ཏུ་ཡོངས་རྫོགས་པའི། །བསྟན་འཛིན་གྲུབ་པ་མཆོག་གི་མྱུ་ག་ཁྱོད། །འཚོ་གཞེས་བརྟན་པའི་བཀའ་དྲིན་གཅིག་ཏུ་རྨད། །འདི་ན་གུས་འབངས་གྱི་ནའི་སྤྱོད་ཚུལ་གྱིས། །རྣམ་པར་མྱོས་པའི་ཉི་ཚེའི་བློ་ཅན་ཀྱང་། །དད་གསུམ་འཁར་བ་ཁོ་ནར་བརྟེན་བཅས་པས། །སྲོག་གི་འདུ་བྱེད་གཡང་སར་མ་འཕྱན་ཙམ། །སླད་མར་གསང་བསྟན་ཨུཏྤལ་རོལ་པའི་མཚོ། །འཕེལ་ཞིང་རྒྱས་པའི་ངོ་མཚར་སྟོན་སླད་དུ། །གསང་གསུམ་སྤྲིན་གྱི་བ་གམ་རྟག་བརྟན་ཞིང་། །འདིར་ཡང་ཐུགས་རྗེའི་ཆར་ཆེན་དབབ་པར་གསོལ། །དེ་སྐད་སྙན་པར་སྨྲ་བའི་ཚིག་གི་ཕྲེང་། །ད་དིར་སྒྲོགས་པའི་ཞུ་མཆིད་བླ་མ་རཿ གཟིགས་རྟེན་གཤོག་རླབས་ཕྲ་མོ་གཡོ་དང་བཅས། །གང་ཞབས་ཕན་བདེའི་སྨན་ལྗོངས་དམ་པར་ཆས། །ཡང་ན། མཚོ་སྐྱེས་རྒྱལ་བ་གཉིས་པ་ཡི། །བསྟན་མཆོག་ཀུནའི་དགའ་ཚལ་ཆེ། །བྲལ་སྨིན་ཡོན་ཏན་ཟླ་ཤེལ་གྱིས། །དབྱེ་མཛད་ཁྱབ་བདག་བླ་མའི་དྲུང་། །རབ་ཏུ་གུས་པའི་གཞན་དབང་གིས། །ཡིད་ནི་སྤྲོ་དགའི་དཔལ་དང་བཅས། །ཞུ་མཆིད་སྙན་པར་སྨྲ་བའི་ཚིག །ཡི་གེའི་གཟུགས་སུ་རྣམ་པར་འཕོས། །བླ་ན་མེད་པའི་ཡེ་ཤེས་དང་། །ཐབས་མཁས་ཐུགས་རྗེའི་སྒྱུ་
ཐབས་ཀྱིས། །ཕན་བདེའི་མཆོག་སྟེར་དམ་པ་གང་། །འཚོ་གཞེས་སྤྱོད་ཡུལ་དགེ་ལགས་སམ། །འདིར་ཡང་སྲིད་དང་ཞི་བ་ཡི། །དཔལ་དང་འབྱོར་པས་མངོན་བཏངས་ཀྱང་། །དད་གསུམ་ཙིནྟ་མ་ཎི་ཡིས། །ཉེར་འཚེའི་དབུལ་བ་རིང་དུ་བསྐྲད། །སླད་ཆར་འཆི་མེད་རྡོ་རྗེའི་ཆོས། །གྲུབ་པའི་ཐིག་ལེར་རོལ་བཞིན་དུ། །སྔ་འགྱུར་འོད་གསལ་སྙིང་པོའི་ལམ། །ཕྱོགས་དུས་ཀུན་ཏུ་རྒྱས་པར་མཛོད། །དེ་སྐད་སྙན་ཚིག་མལླི་ཀ །ཞུ་འདེགས་གཤོག་དཀར་གཡོ་དང་བཅས། །མོས་པའི་མཁའ་ལས་བསྐྱོད་བཞིན་དུ། །གང་ཞབས་ཆུ་གཏེར་བསྙེན་ཕྱིར་སོང་། །ཞེས་པ་ལྟ་བུ་སྐབས་སུ་གང་འོས་སྦྱར་བར་བྱ་ཞིང་། །སྤྱིར་འདི་དག་སྔོན་དུ་ཀར་རྙིང་སྤྱིའི་སྐབས་སུ་འཐུས་མོད་ཀྱི། །དོན་གཉེར་ཅན་དག་ལ་དམིགས་ཀྱིས་མཁོ་བའི་དགོས་པ་དང་ལྡན་པའི་ཕྱིར་བྲིས་པ་ཡིན་པས་ཟློས་སྐྱོན་དུ་བཟུང་བར་མི་བྱའོ། །རིས་མེད་བསྟན་འགྲོའི་དཔུང་གཉེན་མཚུངས་ཟླ་དང་བྲལ་བའི་ས་དབང་ཆོས་རྒྱལ་བླ་མ་རིན་པོ་ཆེ་ལྟ་བུའི་ཞབས་པད་དུ་འབུལ་ན། རྨད་བྱུང་ཐུགས་བསྐྱེད་ཉི་ཟླའི་རྣ་ཆ་ཡིས། །ལེགས་པར་སྤུད་པའི་མཚན་བཟང་སུ་མེ་རུ། །མཐའ་ཀླས་བསྟན་འགྲོའི་གླིང་བཞིའི་ཐོར་ཏོའི་རྩེར། །མངོན་པར་མཛེས་པའི་ཞབས་ཀྱི་པདྨོ་རུ། །མོས་གུས་ལི་ཁྲིའི་ཚོན་རིས་གསར་པ་དང་། །འདྲེས་པའི་སྙན་ཚིག་གུར་གུམ་གཞོན་ནུའི་ཕྲེང་། །
ལྷག་བསམ་དར་གྱི་སྲད་བུར་ལེགས་སྦྲེལ་ཏེ། །གང་ཞབས་རི་མོར་བགྱི་བའི་གཡར་དམ་བླངས། །འཕགས་རྣམས་གཟོད་ནས་རྣམ་གྲོལ་ཞི་བའི་དབྱིངས། །མི་ཕྱེད་ཟླ་བའི་མ་མར་གནས་བཅས་ཀྱང་། །གཞན་ཕན་སྙིང་རྗེའི་དཔུང་གིས་བསྲུབས་པ་ལས། །བསླབ་གསུམ་ཆ་ཤས་རྫོགས་པའི་ཟླ་གཞོན་ཤར། །དེ་ཚེ་འཚོ་གཞེས་བརྟན་པའི་གྲགས་དཀར་དང་། །མི་ཕྱེད་ཡོན་ཏན་དུ་མའི་བསིལ་འོད་ཀྱིས། །རྒྱལ་བསྟན་ཡོངས་སུ་རྫོགས་པའི་ཀུ་མུད་ཚལ། །ཆེས་ཆེར་རྒྱས་པའི་ཚུལ་དེར་གུས་མིན་སུ། །འདི་ན་གང་གི་བཀའ་དྲིན་གདུགས་དཀར་པོའི། །གྲིབ་མ་སྣུམ་པོའི་རྭ་བར་ངལ་བསོས་པའི། །ཀུན་རྨོངས་གྱི་ནའི་སྤྱོད་པས་འཚོ་བ་ཡང་། །ལང་ཚོའི་འདུ་བྱེད་ཉམས་པར་མ་གྱུར་བཞིན། །སླད་མར་འཆི་མེད་རྟག་པའི་བདུད་རྩིའི་བཅུད། །རྡུལ་བྲལ་ཐུགས་ཀྱི་ཐིག་ལེར་རོ་གཅིག་པས། །ལྷར་བཅས་སྐལ་བཟང་བྱེ་ཡོ་བའི་གཙུག་ཏོར་རྩེར། །ཞབས་སེན་འཁོར་ལོའི་རེ་ཁཱ་ནུབ་མེད་མཛོད། །དེ་སྐད་རིང་ནས་གུས་པའི་ཡིད་ཀྱི་མཚོར། །རྣམ་པར་གསོས་པའི་ཞུ་མཆིད་ཨུཏྤ་ལ། །རྟེན་དངོས་ག་བུར་སར་པའི་དྲི་བསུང་བཅས། །ཡེ་ཤེས་གཟིགས་པའི་སྤྱན་ལམ་མཛེས་ཕྱིར་སོང་། །ཡང་ན། རྨད་བྱུང་བསོད་ནམས་དུ་མའི་མཚར་སྡུག་གིས། །རྣམ་པར་མཛེས་པའི་གསང་གསུམ་ཨུཏྤ་ལ། །ཡོན་ཏན་བསུང་ཞིམ་རྒྱ་མཚོའི་དཔལ་དང་
བཅས། །ལྷར་བཅས་སྐྱེ་དགུས་བཏུད་དེའི་ཞབས་པད་མོར། །གང་གི་བཀའ་དྲིན་དཔྱིད་དཔལ་ཁོ་ན་ཡིས། །ལང་ཚོ་བསྒྲུབས་པའི་གུས་འབངས་སྦྲང་རྩི་འཛིན། །མོས་གུས་འདབ་རྒྱ་གྲོལ་བའི་མཆུ་སྒྲོས་ལས། །ཞུ་མཆིད་སྙན་པའི་འབྲས་བཟང་གསར་པས་མཛེས། །ཚོགས་གསུམ་སྤྱོད་པ་རྒྱ་མཚོའི་མདའ་གཅིག་གིས། །ཕས་རྒོལ་འབོད་གྲོགས་མགོ་བོ་བྲེགས་ཏེ་སླར། །ལུགས་གཉིས་སི་ཏཱའི་རྩེ་དགར་རོལ་པ་གང་། །སྔོན་མེད་པ་ཡི་དགའ་བྱེད་གཉིས་པར་དྲན། །དེ་ཕྱིར་འཚོ་ཞིང་གཞེས་པའི་གཏམ་སྙན་དང་། །འགྲོགས་པའི་བཀའ་དྲིན་མ་ལ་ཡི་ཡ་ཀླུང་། །འདི་ན་གནས་པའི་སྙིང་ལ་རེག་པའི་མོད། །དད་དང་སྤྲོ་བའི་ངལ་བསོ་ཅིར་ཡང་ཐོབ། །འབྱུང་འགྱུར་དུས་སུ་ཡོངས་རྫོགས་བསྟན་དང་འགྲོར། །ཕན་བདེའི་འབྱོར་པ་སྦྱིན་མཛད་གོ་བི་དཱི། །སྲིད་འདིར་ཁྱོད་ལས་གཉིས་པ་མ་མཐོང་ཕྱིར། །ཡུན་དུ་ཞབས་བརྟན་མཛོད་ཅིག་ལྷ་ཡི་ལྷ། །དེ་སྐད་ཞུ་མཆིད་དཔྱིད་ཀྱི་ཀོ་ཀི་ལ། །སྙན་ཚིག་མགྲིན་པའི་རོལ་མོར་འཁྲོལ་བཞིན་དུ། །རྟེན་དངོས་གཤོག་རླབས་གསར་པ་ཟུང་བསྐྱོད་དེ། །གང་ཞབས་དོན་གཉིས་པདྨའི་ཚལ་དུ་ཆས། །ཡང་ན། ཐབས་མཁས་ཤེས་རབ་མ་ཉམས་པའི། །བྱང་ཆུབ་སྤྱོད་མཆོག་ལས་འཁྲུངས་ཕྱིར། །སྲིད་ཞིའི་ཐོར་ཚུགས་རྩེ་མོ་རུ། །ཞབས་ཀྱི་པདྨོ་བཀོད་དེའི་དྲུང་། །དྭངས་དྭངས་ཡིད་
ཀྱི་སྤྲིན་ལམ་ལས། །གུས་གུས་ཞུ་མཆིད་མེ་ཏོག་རྡུལ། །ཟིམ་ཟིམ་འབབས་པའི་དགའ་སྟོན་གྱིས། །ཡང་ཡང་རང་རྒྱུད་བརླན་འདིའོ། །གྲགས་དང་ཡོན་ཏན་འབྲས་བུ་ཡིས། །མ་ཉམས་བསུང་བའི་རྔ་ཡབ་ལྷཅན། །སྐལ་བཟང་རྣམ་སད་ཚོགས་གཉིས་ཀྱི། །ཉེར་འཚོར་གཅིག་ཏུ་བརྟན་ཆགས་པའི། །རྨད་བྱུང་བཀའ་དྲིན་གྲིབ་མ་ཡིས། །རིང་ན་གནས་ཀྱང་ཁྱབ་པ་བདག །སྤྲོ་དགའི་ལང་ཚོ་ངོམས་དང་བཅས། །ཉེར་འཚེའི་ཚ་གདུང་བྲལ་བར་མཆིས། །སླད་མར་བསྟན་དང་འགྲོ་བ་ཡི། །བདེ་སྐྱིད་ལོ་ཏོག་བསྐྲུན་པ་ནི། །ས་བདག་གདེངས་ཅན་ཁྱོད་གཅིག་ཕྱིར། །རྟག་ཏུ་ཞབས་པད་བརྟན་པར་མཛོད། །དེ་སྐད་ཞུ་མཆིད་གུར་གུམ་ཕྲེང་། །མོས་གུས་ནམ་མཁའི་མུ་ཁྱུད་ཀྱིས། །རྣམ་པར་ཕྱེ་བའི་མཚར་སྡུག་དང་། །རྟེན་དངོས་གེ་སར་བཅས་ཏེ་ཕུལ། །དེ་ལྟར་ཡོངས་སུ་གྲགས་པའི་ཡུལ་མཆོག་འབྲིང་འགའ་ཞིག་ལ་བྱེ་བྲག་སོ་སོར་འབུལ་ཚུལ་མཚོན་ཙམ་བསྟན་ནས། ད་ནི་སྤྱིར་བཏང་གི་དཔེར་བརྗོད་ཅི་རིགས་པ་འགོད་པ་ལ། །ཐོག་མར་ཀློག་པ་ཐོས་བསམ་གྱི་འཁོར་ལོ་ལ་བརྟེན་ནས་མདོ་སྔགས་ཀྱི་གཞུང་ལུགས་རབ་འབྱམས་སྨྲ་བའི་བཤེས་གཉེན་ཞིག་ལ་འབུལ་ན། གང་གི་མཁྱེན་དཔྱོད་དག་པའི་མ་ཀུ་རར། །རང་གཞན་གྲུབ་མཐའི་གཟུགས་བརྙན་ཡོངས་འཆར་བས། །དཔྱོད་ལྡན་ཀུན་གྱི་ཐོར་ཚུགས་ཀྱིས་དུད་པའི། །
རིག་པར་སྨྲ་བའི་དབང་ཕྱུག་མཆོག་གི་དྲུང་། །སྐྱེས་ཐོབ་སྦྱོར་བྱུང་བློ་གྲོས་ཉི་ཟླ་ཡིས། །གསོས་པ་མིན་ཀྱང་ཁྱོད་ཚུལ་རྨད་བྱུང་གཏམ། །སྨིན་ལེགས་མཛེས་མའི་འགྲམ་ཆང་གིས་ཕྱེ་བས། །ཞུ་མཆིད་བ་ཀུ་ལ་ཡི་འདབ་རྒྱ་གྲོལ། །སྔོན་སྨོན་རྣམ་པར་དཀར་བའི་ཟླ་འོད་ཀྱིས། །བློ་མཆོག་ཆུ་གཏེར་འཕེལ་བའི་ཟློས་གར་ལས། །གཞུང་མང་འཆད་རྩོད་རྩོམ་པའི་རིན་ཆེན་དབྱིག །མ་ལུས་ཕན་བདེའི་དཔྱིད་དུ་འཕེན་པར་མཛད། །དེ་ཚེ་ལུང་རྟོགས་ཆོས་ཀྱི་སྦྲང་རྩི་ཡིས། །རྣམ་པར་མྱོས་པའི་སྐལ་བཟང་བྷ་མ་རས། །ཞབས་སེན་ཨུཏྤལ་རོལ་མཚོར་བསྙེན་དང་བཅས། །འཚོ་གཞེས་བརྟན་པའི་བཀའ་དྲིན་རྨད་དུ་ཆེ། །འདི་ན་ཚུལ་མིན་དུག་གི་ཁམ་ཟས་ཀྱིས། །གྱི་ནར་འཚོ་བའི་གཙུག་ཕུད་ལྡན་པ་ཡང་། །ཆོས་བརྒྱད་གློག་གི་དགའ་མར་ཆགས་བཞིན་དུ། །ལང་ཚོའི་འདུ་བྱེད་ཉམས་པར་མ་གྱུར་ཙམ། །སླད་དུ་དྲི་མེད་རྒྱལ་བསྟན་གངྒཱའི་རྒྱུན། །དབང་རྣོན་ཆོས་རྗེས་འབྲང་བའི་དཀའ་ཐུབ་ཀྱིས། །ཀུན་མཁྱེན་ཚངས་པ་མཉེས་ནས་འབེབས་པའི་བདག །ཡུན་དུ་གསང་གསུམ་གཡོ་མེད་བརྟན་པར་མཛོད། །དེ་སྐད་ཞུ་མཆིད་རབ་དྭངས་ཐང་ཀའི་ངོས། །སྙན་ཚིག་ཚོན་ཆགས་བཀྲ་བའི་རྣ་རྒྱན་དུ། །རྟེན་དངོས་བླ་གོས་གསར་པ་གཡོ་དང་བཅས། །ཀུན་ཏུ་དགེ་བའི་ཚེས་ལ་རིངས་པར་ཕུལ། །ཡང་ན། དྲི་མེད་ལུང་དང་
རིགས་པའི་རིན་ཆེན་གྲུས། །ལམ་བདེན་རྒྱ་མཚོའི་ཕ་མཐར་ལེགས་བརྒལ་བས། །གཞུང་མང་འབྱོར་པས་མཐོ་བའི་དེད་དཔོན་མཆོག །དཔྱོད་ལྡན་ཀུན་དགའི་མེ་ཏོག་སྦྱིན་དེའི་དྲུང་། །གུས་དང་རྟག་ཏུ་སྦྱོར་བའི་བརྩོན་པ་ཡིས། །ཐོས་བསམ་སྒོམ་པའི་འཇུག་པ་རབ་ཕྲ་ཡང་། །ལྷག་པའི་ལེགས་སྤྱད་སེམས་ནི་རྣམ་དཀར་བས། །དྭང་བས་ཞུ་མཆིད་ཚིག་གི་ཕྲེང་བ་སྤེལ། །དེང་དུས་ཐམས་ཅད་གཟིགས་པས་ཆོས་ཀྱི་སྒོ། །གདུལ་བྱའི་བློ་དང་འཚམས་པར་བཀྲལ་བ་ཀུན། །བདག་གིར་བགྱིད་པའི་རྣམ་དཔྱོད་རྨད་བྱུང་ཁྱོད། །འཚོ་གཞེས་བརྟན་པས་ཡིད་ལ་ངལ་གསོ་བྱིན། །འདི་ན་སྲིད་པའི་བདེ་འབྱོར་གཡོ་འཕྲུལ་པོས། །རྣམ་པར་བསླུས་པའི་ཀུན་རྨོངས་ངོས་ཅག་ཀྱང་། །འདུ་ཤེས་གསུམ་གྱི་མལ་དུ་མནལ་བཞིན་དུ། །ཉེ་བར་འཚེ་བའི་ཚོགས་ནི་བྲལ་བར་མཆིས། །སླད་མར་རིག་གྲོལ་སྤོབས་པའི་རྣམ་དཔྱོད་ཀྱིས། །རྒྱལ་གསུང་ལུང་དང་རྟོགས་པའི་སེང་གེའི་སྒྲ། །ཕྱོགས་བཅུར་སྒྲོགས་ལ་བསྙེལ་བ་མེད་བཞིན་དུ། །གཞོམ་བྲལ་རྡོ་རྗེའི་ལང་ཚོ་རྟག་བརྟན་གསོལ། །དེ་སྐད་ཞུ་མཆིད་རཱ་ཛ་ཧཾ་ས་ནི། །རྟེན་དངོས་རྐང་གདུབ་སིལ་སིལ་སྒྲ་དང་བཅས། །གུས་པའི་ཡིད་ཀྱི་མཚོ་གླིང་ནས་ཐོན་ཏེ། །ཁྱོད་ཞབས་ངོ་མཚར་ཆུ་གཏེར་བསྙེན་ཕྱིར་སོང་། །ཡང་ན། སྡེ་སྣོད་རྒྱ་མཚོའི་ལང་ཚོ་ཡིས། །རྣམ་པར་སྒེག་པའི་མཚར་སྡུག་གིས། །
དཔྱོད་ལྡན་ཡི་ག་འགུགས་མཛད་པ། །སྨྲ་བའི་ཉི་མ་གང་དྲུང་དུ། །རབ་དྭངས་བློ་གྲོས་ཨུཏྲ་ལས། །རབ་སྙན་ཚིག་གི་བསུང་ཞིམ་རྒྱུན། །རབ་ཏུ་འཐུལ་བའི་འཕྲིན་ཡིག་འདིར། །རབ་ཡངས་མཁྱེན་པས་གཟིགས་སུ་གསོལ། །གང་ཚེ་བསླབ་གསུམ་རིན་ཆེན་དང་། །ལེགས་འགྲོགས་ཡང་དག་སྤོབས་པའི་རྒྱུན། །གྲགས་པ་ས་འཛིན་རྣ་བ་ཡིས། །མཛེས་པས་ཀུན་དགའི་དཔྱིད་དུ་བྱས། །དེ་སླད་འདི་ན་གནས་པ་ཡི། །ཀུན་རྨོངས་འདུ་ཤེས་གསུམ་པ་ཡང་། །ལྷག་བསམ་མགྲིན་པ་འཐོར་འདེགས་བཞིན། །དད་སྤྲོའི་མེ་ཏོག་འཐོར་ལ་རིངས། །སླད་མར་མཁྱེན་དཔྱོད་གོམ་སྟབས་ཀྱིས། །ཀུན་མཁྱེན་གྲོང་དུ་འཛེགས་པ་དང་། །ལུང་རྟོགས་ཆོས་ཀྱི་རྒྱལ་སྲིད་ལ། །མངའ་དབང་འབྱོར་བའི་དཔལ་གྱུར་ཅིག །དེ་སྐད་ཞུ་མཆིད་ཀུ་མུད་དང་། །གཟིགས་རྟེན་ཟེའུ་འབྲུའི་རྒྱན་དང་བཅས། །ཁྱོད་ཞབས་སྤོབས་པའི་ཟླ་རིས་གསར། །བསྙེན་ཕྱིར་རིང་ནས་འཛུམ་བཞིན་ཕུལ། །སྡོམ་བརྩོན་འདུལ་བ་འཛིན་པ་བྱ་བ་ལས་ཀྱི་འཁོར་ལོ་ལ་སྙིང་སྟོབས་ཀྱི་འཇུག་པ་གཡོ་བ་མེད་པ་ཞིག་ལ་འབུལ་ན། །བསླབ་གསུམ་གསེར་གྱི་དྲྭ་བས་གདོང་གཡོགས་ཤིང་། །ལེགས་སྤྱད་ས་ལ་བརླིངས་པའི་གོམས་ཚུགས་ཅན། །རྒྱལ་བསྟན་རིན་ཆེན་ཁུར་མང་འདེགས་བཟོད་པ། །སྔོན་མེད་གཉིས་འཐུང་དབང་པོའི་ཞབས་སྟེགས་སུ། །ཁྱོད་ཀྱི་ཡོན་
ཏན་ཚུལ་མིན་སྤྲིན་བྲལ་བའི། །ནམ་མཁའི་རྣ་རྒྱན་ཅན་གྱིས་འཇུག་པ་ཡིས། །ཕྱོགས་ཀུན་དཀར་བར་བྱས་ལ་རིངས་གྱུར་ནས། །ཞུ་མཆིད་ས་ཡི་གདུ་བུ་བཞད་ལ་རིགས། །གང་གི་རྣམ་འདྲེན་སྟོབས་བཅུའི་མངའ་བདག་གི །བསྟན་པའང་དེར་འཛིན་ཁོ་ནར་རགས་ལས་ཕྱིར། །བྱ་བ་ལས་ཀྱི་འཁོར་ལོའི་ཚོང་ཟོང་གིས། །རིན་ཐང་མེད་པའི་དམ་ཆོས་ནོར་མཆོག་བསྒྲུབས། །དེ་མཐུས་སྡེ་སྣོད་འཛིན་པའི་ཙན་ན། །གྲགས་སྙན་ག་བུར་རྡུལ་དང་ལྷན་ཅིག་པར། །ཆུ་གཏེར་བཞི་ཡི་སྐ་རགས་འཆིང་བའི་ཁོངས། །དཔྱོད་ལྡན་དགའ་བའི་རྒྱན་དུ་བྱིན་དེར་སྤྲོ། །ཐོས་བསམ་གྲུ་ཆར་གཤིམས་པོས་མ་སྨིན་ཞིང་། །དོན་སྒོམ་ནམ་མཁའི་ཐིག་ལེས་རེག་མིན་ཀྱང་། །དད་གུས་དཔྱིད་ཀྱི་མ་མས་གསོས་པ་བདག །འཚོ་བའི་མྱུ་གུ་གཞོན་ནུ་མ་ཉམས་བདེ། །སླད་ཆར་བསོད་ནམས་བྱེ་བའི་སྒྱུ་ཐབས་ཀྱིས། །བགྱི་བ་དོན་ལྡན་ལས་ལ་འགྲུས་བཞིན་དུ། །བསྟན་འཛིན་བཤད་སྒྲུབ་བཅས་པ་འཕེལ་བའི་སླད། །ཞབས་སེན་རྟག་ཏུ་གཡོ་བ་མེད་པར་མཛོད། །ཚིག་དོན་རྒྱན་གྱི་དོ་ཤལ་ཐུང་གྱུར་ཀྱང་། །ལྷག་བསམ་ལང་ཚོ་དར་བའི་གཞོན་ནུ་མས། །བརྗོད་པ་གསལ་བའི་གླུ་དབྱངས་ལེན་དང་བཅས། །རྟེན་དངོས་བླ་གོས་གཡོ་བཞིན་རིངས་པར་སོང་། །ཡང་ན། སྲིད་དང་ཞི་བའི་དགེ་ལེགས་མཐའ་དག་གིས། །ལེགས་པར་བཏུད་པའི་རྣམ་འདྲེན་སྟོབས་
བཅུ་པའི། །བསྟན་ལ་བྱ་བ་བགྱིད་ལ་མི་ངལ་བའི། །རིག་གྲོལ་ཡོན་ཏན་དཔལ་གྱིས་ཕྱུག་དེའི་དྲུང་། གུས་པའི་ཞུ་མཆིད་པུཎྜ་རཱིཀའི་འཛུམ། །རྣམ་པར་བྱེ་བའི་དོགས་པ་གསར་པ་ཡང་། །ལྷག་བསམ་དཔྱིད་ཀྱི་དཔལ་མོས་བསྐྱེད་བསྲིངས་པས། །སྙན་ཚིག་ཟླ་ཞུན་ཚོན་གྱིས་རྣམ་པར་སྤུད། །གང་གི་ཆོས་སྤྱོད་རྣམ་བཅུས་མཚོན་པ་ཡི། །གནག་མིན་ལས་ཀྱི་བགྱི་བ་མི་ལྷོད་པས། །རྒྱལ་སྲས་མཆོག་གི་ངང་ཚུལ་ལྷུར་ལེན་བཞིན། །འཚོ་གཞེས་བརྟན་ལ་ཡིད་འོང་སྤྲོ་བས་བརླན། །འདི་ན་ཐོག་མེད་དུས་ནས་ཉེར་གོམས་པའི། །ལས་ཉོན་སྒྲིབ་པའི་སྣུམ་བག་སྟུག་པོ་ཡིས། །རང་བྱུང་དགེ་བའི་ཚོན་རིས་རྨ་དབབ་ཀྱང་། །སྲོག་གི་འདུ་བྱེད་འགགས་པར་མ་གྱུར་ཙམ། །སླད་མར་བསོད་ནམས་ཚོགས་ཀྱི་ས་འཛིན་རྩེར། །གསང་གསུམ་ཟླ་ཤེལ་འཆར་ནུབ་སྤངས་པ་ཡིས། །སྐལ་བཟང་ཀུན་གསར་པའི་ནགས་ཀླུངས་སུ། །རྗེས་བརྩེའི་འོད་དཀར་རིང་དུ་སྤྲོ་བར་མཛོད། །དེ་སྐད་ཞུ་བའི་མཆིད་ཚིག་ཡུལ་འཁོར་འཛིན། །རྟེན་དངོས་རབ་དཀར་གཤོག་ཟུང་གཡོ་དང་བཅས། །སྙན་ཚིག་རྐང་གདུབ་འཁྲོལ་བའི་རོལ་མོ་ཡིས། །ཁྱོད་ཞབས་རི་མོར་བགྱི་སླད་དགེ་བར་དེངས། །ཡང་ན། ཕུན་ཚོགས་དུ་མའི་འབྱུང་གནས་མཆོག །རྒྱལ་བསྟན་རིན་ཆེན་སྤེལ་བའི་ཕྱིར། །བགྱི་བ་དོན་ལྡན་བརྩོན་པ་ལ། །གཅིག་ཏུ་མཛའ་
དེའི་ཞབས་དྲུང་དུ། །དྭངས་པའི་ཡིད་ཀྱི་འཁྲི་ཤིང་ལས། །དད་གུས་མེ་ཏོག་གསར་པ་ཡི། །ཁྱོད་ཡོན་ཉི་མར་རྗེས་ཆགས་བློས། །ཞུ་མཆིད་འདབ་བརྒྱ་ཅིར་ཡང་གྲོལ། །གཏོང་ལ་སྤྲོ་སོགས་རྣམ་དཀར་གྱི། །བྱ་བ་ནན་ཏན་འཇུག་པ་ལ། །གཡེལ་མེད་བརྟུན་པའི་དམ་པ་གང་། །འཚོ་གཞེས་སྙོམས་པར་བཞུགས་ལ་རངས། །འདི་ན་བསོད་ནམས་མ་ཡིན་པའི། །ལས་ལ་ཤས་ཆེར་གོམས་པའི་མཐུས། །ཀུན་རྨོངས་དྲྭ་བར་ཚུད་བདག་ཀྱང་། །ལང་ཚོའི་འདུ་བྱེད་མ་ཉམས་ཙམ། །སླད་མར་བློ་དང་རིག་པ་ཡི། །གྲིབ་བསིལ་མ་ཉམས་ལེགས་སྤྱད་ལ། །རབ་གོམས་འབྲས་བཟང་ཉེར་དུད་པའི། །ལྗོན་པ་རྩ་བ་བརྟན་པར་མཛོད། །ཞུ་མཆིད་ཚིག་དོན་ཕུན་ཚོགས་རྒྱན། །བྲལ་ཡང་ལྷག་བསམ་དྲོད་གཤེར་གྱིས། །ལེགས་པར་སྨིན་པའི་མྱུ་གུ་གསར། །རྟེན་གྱི་ཆུ་སྐྱེས་འཛུམ་བཞིན་ཕུལ། །འདིར་སྣང་གི་ཆོས་ཀུན་བདེན་མེད་སྒྱུ་མ་ལྟ་བུར་གཟིགས་ནས་རིམ་གཉིས་ཟབ་མོའི་ཏིང་འཛིན་ལ་རྩེ་གཅིག་ཏུ་མཉམ་པར་བཞག་པའི་སྤོང་བ་བསམ་གཏན་གྱི་འཁོར་ལོ་འཛིན་པ་ཞིག་ལ་འབུལ་ན། ཚོགས་གསུམ་ས་བོན་མ་ཉམས་མྱུ་གུ་ནི། །ངེས་པར་འབྱུང་བའི་བརླན་གྱིས་གཤེར་བ་ལས། །ཐར་པ་ཉིན་མོའི་ཕྱོགས་སུ་མིག་གཏོད་པའི། །རྩེ་གཅིག་གྲུབ་པའི་མེ་ཏོག་འཛིན་དེའི་དྲུང་། །ངོ་མཚར་ཉིད་དོ་སྣང་བའི་མུ་ཁྱུད་ཀྱིས། །ཨུཏྤལ་དམར་པོའི་
འདབ་རྒྱ་བྱེ་བ་སྟེ། །གང་གི་རྣམ་ཐར་རྨད་བྱུང་ཐོས་མ་ཐག །བདག་ཡིད་དད་པའི་ཞུ་མཆིད་འབུལ་ལ་རིངས། །འདིར་སྣང་འཁོར་བའི་ཆོས་རྣམས་མ་ལུས་ཀུན། །བདེན་མེད་སྒྱུ་མའི་རོལ་མོར་ངེས་རྟོགས་ཏེ། །བག་ཡངས་གནས་སུ་ཟབ་མོའི་ཏིང་འཛིན་ངོས། །རྣམ་པར་འཚོ་ཁྱོད་སྔོན་མེད་གྲུབ་པའི་དཔྱིད། །ཁྱད་པར་བསླབ་གསུམ་བསིལ་བའི་རེག་བྱ་དང་། རབ་འགྲོགས་གསང་གསུམ་ཟླ་ཤེལ་གསར་པ་ནི། །མི་མཐུན་རཱ་ཧུའི་འཚེ་བ་རྒྱང་བསྲིངས་ནས། །ཡོན་ཏན་ཆ་ཤས་རྫོགས་ལ་སྙིང་ནས་རངས། །འདི་ན་རྒྱལ་གསུང་ལུང་དང་རྟོགས་པའི་དབྱངས། །མང་དུ་ཐོས་དང་ཚུལ་བཞིན་བསམ་པ་དང་། །རྩེ་གཅིག་བསྒོམ་པའི་བརྟུལ་ཞུགས་ཉམས་དམས་ཀྱང་། །དད་གསུམ་སྣང་བ་རྒྱས་བཞིན་ངལ་འཚོ་ཐོབ། །སླད་མར་སྐུ་གསུང་ཐུགས་ཀྱི་རོལ་མོ་ནི། །ལྷ་སྔགས་ཡེ་ཤེས་འཁོར་ལོར་འབྱམས་ཀླས་བཞིན། །འཆི་མེད་བདེ་ཆེན་གྲུབ་པའི་གཟི་འབར་བས། །མི་ཕྱེད་རྟག་པའི་རྡོ་རྗེར་བརྟན་པར་བཞུགས། །ཞུ་མཆིད་སྙན་པར་སྨྲ་བའི་ལང་ཚོ་མ། །གཟིགས་རྟེན་ཨུཏྤལ་རྣ་རྒྱན་གཡོ་དང་བཅས། །དད་གུས་གོམ་སྟབས་ལྷོད་པོར་བསྒྱུར་བཞིན་དུ། །ཁྱོད་ཞབས་སྤྱི་བོར་བསྙེན་སླད་དགེ་བར་སོང་། །ཡང་ན། རྣམ་དག་ཚུལ་ཁྲིམས་མ་ཉམས་ཙནྡ་ནར། །རྩེ་གཅིག་ཏིང་འཛིན་བསིལ་བའི་རེག་བྱ་དང་། །ཆོས་རབ་རྣམ་འབྱེད་
གེ་སར་མཛེས་འཛིན་པས། །སྔོན་མེད་གྲུབ་པའི་དགའ་ཚལ་དར་དེའི་དྲུང་། །གུས་དང་རྟག་ཏུ་སྦྱོར་བའི་བརྟེན་པ་ཡིས། །ཁྱོད་ཚུལ་བསོད་ནམས་མགྲོན་དུ་ཐོབ་ལས་སླར། །རྗེས་སུ་ཡི་རང་ཆུ་སྐྱེས་བྱེ་བ་ལས། །བསྔགས་བརྗོད་གཏམ་གྱི་དྲི་བསུང་ཅུང་ཟད་འཐུལ། །སྲིད་ལས་ངེས་པར་འབྱུང་བའི་ནགས་ཚལ་དུ། །གཞན་ཕན་སྙིང་རྗེའི་སྣ་ཞགས་རིང་བརྐྱངས་ནས། །རྩེ་གཅིག་སྒྲུབ་པའི་ཁུར་ཆེན་འདེགས་བཟོད་པ། །སྔོན་མེད་གཉིས་འཐུང་དབང་པོ་དེ་སུ་ཞིག །འདིར་གནས་ཆོས་བརྒྱད་གློག་གི་ཐག་པ་ཡིས། །ཀུན་རྨོངས་འདུ་ཤེས་དཀྲིས་པའི་མདོངས་མཐའ་མ། །ཚུལ་མིན་སྒྲོ་གཤོགས་ཟླུམ་པོའི་གར་བསྒྱུར་བཞིན། །དད་གསུམ་པདྨའི་ཚལ་དུ་ངལ་འཚོ་ཐོབ། །སླད་མའི་ཆར་ཡང་ངེས་དོན་རྟོགས་པའི་བསྟན། །སྲིད་རྩེར་འགོངས་པའི་ཕྲིན་ལས་སྤེལ་ཕྱིར་དུ། །གསང་གསུམ་འཆི་མེད་རྡོ་རྗེའི་དྲྭ་བ་ཡིས། །རྣམ་པར་བསྡམས་པའི་ཐབས་ཚུལ་བསྐྲུན་པར་མཛོད། །དེ་སྐད་གླིང་པར་འོས་པའི་གཏམ་གྱི་དབྱངས། །དབྱངས་ཅན་ངག་གི་རྒྱུད་ལས་འཕོས་སྙམ་གང་། །གང་བློ་ཐར་པའི་སིམ་པས་ཡིད་མྱོས་བདག ། བདག་གཞན་གཏན་བདེར་འཁྲིད་དེའི་མདུན་སར་ཆས། །ཡང་ན། ངེས་དོན་སྒྲུབ་པའི་ཀེ་ལ་ཤར། །གནས་བཅས་སྲིད་པའི་གཉིས་འཐུང་ཚོགས། །རྣམ་པར་འཇོམས་པའི་གྲགས་དཀར་ཅན། །མི་ཡི་སེང་
གེའི་ཞབས་སེན་དུ། །གང་གི་རྣམ་ཐར་དྲི་མེད་དཔྱིད། །ཤར་གྱི་ཐིག་ལེའི་འཁྲི་ཤིང་གིས། །འཁྱུད་ལས་བདག་བློའི་ཨུཏྤལ་དཀར། །དྭང་བའི་འཛུམ་བཅས་དགོད་པར་གྱུར། །ངེས་པར་འབྱུང་བས་ཡིད་བསྐུལ་ཏེ། །རྩེ་གཅིག་སྤོང་བའི་བརྟུལ་ཞུགས་ལ། །གོ་ཆར་བགྱི་ཁྱོད་འཚོ་གཞེས་བཞིན། །རིམ་གཉིས་ལང་ཚོ་གསལ་དེར་རངས། །འདི་ན་རྨོངས་དང་མ་རིག་པའི། །ཚ་བས་ཉེན་པ་བདག་ཅག་ཀྱང་། །སྐྱབས་གསུམ་སྤྲིན་དཀར་ལ་བརྟེན་ནས། །སྐབས་ཙམ་བདེ་བའི་ངལ་འཚོ་ཐོབ། །སླད་མར་ཡོན་ཏན་རིན་པོ་ཆེའི། །རྟེན་དང་ས་གཞིར་གྱུར་པ་གང་། །གསང་གསུམ་འཕྲོད་གཞེས་མི་དམན་པས། །འདིར་ཡང་ཐུགས་རྗེས་སྐྱོང་བར་མཛོད། །ཞུ་མཆིད་པུཎྜ་རཱི་ཀའི་འཛུམ། །སྙན་ཚིག་ཟླ་བའི་ཚོན་རིས་དང་། །རྟེན་དངོས་ཟེ་འབྲུ་མ་ཉམས་བཅས། །གུས་པའི་ཐལ་མོས་མངོན་པར་གཏོར། །མཁས་བཙུན་བཟང་པོའི་ཡོན་ཏན་ལྡན་པའི་བླ་སྤྲུལ་ཕལ་པ་ཞིག་ལ་འབུལ་ན། །བསླབ་གསུམ་ ཆུ་གཏེར་ཆེ་ལས་རབ་འཕོས་ཤིང་། །མཛད་བཟང ་ག་བུར་རྡུལ་གྱི་དོགས་པ་ཅན། །བསྟན་འགྲོའི་ཕན་བདེའི་ཀུན་དབྱེ་མཛད་པ། །ཁྱབ་བདག་བླ་མ་ཤར་གྱི་ཐིག་ལེའི་དྲུང་། །དྭངས་བའི་ཡིད་ཀྱི་ཆུ་བས་བསྲུང་བ་ཡི། །དད་གུས་དཔལ་གོས་འདབ་རྒྱ་གྲོལ་བའི་ཚེ། །ཞུ་མཆིད་སྦྲང་རྩིའི་ཐིག་པ་འཇོ་བ་ཡང་། །ཐུགས་བརྩེའི་བུང་བ་
གཡོ་བའི་འབབ་སྟེགས་ལགས། །བསྐལ་མང་ཚོགས་གསུམ་ས་བོན་མ་ཉམས་གཟུགས། །གཞན་ཕན་བརླན་གྱིས་སྨིན་པའི་འཁྲི་ཤིང་གསར། །མཁས་བཙུན་བཟང་པོའི་མེ་ཏོག་དགོད་པ་ཁྱོད། །འཚོ་གཞེས་བརྟན་པས་སྤྲོ་དགའི་བདོག་པ་བྱིན། །།འདིར་གནས་གྱི་ནའི་སྤྱོད་པས་དུས་འདའ་ཞིང་། །རིགས་གཟུགས་འབྱོར་བའི་ཡོན་ཏན་སྤངས་འདག་ཀྱང་། །མཆོག་གསུམ་སྐྱབས་ཀྱི་སྙིང་པོར་ཡིད་ཆེས་པས། །ཉེར་འཚེའི་འདུ་བྱེད་སྐབས་ཙམ་བྲལ་བཞིན་མཆིས། །འབྱུང་འགྱུར་དུས་ཀྱང་བསྔགས་པར་འོས་པ་ཡི། །རྣམ་ཐར་མ་ཉམས་བདག་གིར་མཛད་བཞིན་དུ། །ཞབས་སེན་ཕན་བདེའི་སྣང་བ་རབ་འབར་བས། འགྲོ་འདིའི་རྒུད་པའི་མུན་པ་སོལ་ཞིག་ཀྱེ། །དེ་སྐད་སྤྲོ་བར་འོས་པའི་མཆིད་ཚིག་ནི། །ལྷག་བསམ་དཔྱིད་ཀྱི་ཕོ་ཉར་རྣམ་འཁྲུལ་ཏེ། །ཞུ་འདེགས་འདབ་གཤོགས་ཟློས་གར་གཡོ་དང་བཅས། །ཞབས་སེན་ཀིངྐུ་ཤ་ཡི་ཚལ་དུ་དེངས། །ཡང་ན། དྲི་བྲལ་ཐུགས་བསྐྱེད་རིན་ཆེན་གྲུ་བོ་ནི། །མཚན་ བཟང་ཆུ ་གཏེར་ཆེ་ལ་ཆགས་པའི་མོད། །འབྲལ་ཡུན་དོན་གཉིས་འབྱོར་པ་སྦྱིན་ནོ་ཞེས། །མོས་ལྡན་ཀུན་ཏུ་དགའ་བའི་དཔལ་དུ་བྱས། །དད་གུས་མཚར་སྡུག་རྫོགས་པའི་བཞིན་ བཟང་མས། །ཐལ་མོའི་ཆུ ་སྐྱེས་སྙིང་ཁར་ཟུམ་དང་བཅས། །ཞུ་མཆིད་སྙན་ངག་མགྲིན་པའི་སིལ་སྙན་གྱིས། །དཔྱོད་ལྡན་ཡི་ག་འགུགས་པའི་
དཔལ་དུ་བྱས། །མཁས་ཚུལ་ཟླ་ཞུན་ཚོན་གྱིས་བྱུགས་པ་ཡི། །རིག་གྲོལ་ལང་ཚོ་རྒྱས་པའི་སྟེང་འཐུང་དཀར། །རྣམ་བཏགས་ཙམ་གྱིས་བསྔགས་མིན་དོན་ལྡན་གྱི། །དམ་པ་གང་ཁྱོད་འཚོ་གཞེས་དགེ་དེ་རྨད། །འདི་ན་ཆུ་མེད་ཁྲོན་པ་ཇི་བཞིན་དུ། །ཆོས་ཀྱི་ཚུལ་ཙམ་འཛིན་པའི་དམན་བདག་ཀྱང་། །རྣམ་པར་དཀར་བའི་སྙིང་པོས་དབེན་བཞིན་དུ། །ཚེ་ཡི་འདུ་བྱེད་ཉམས་པར་མ་གྱུར་ཙམ། །སླད་མར་བསོད་ནམས་བྱེ་བའི་གྲིབ་བསིལ་གྱིས། །བསྟན་འགྲོའི་ལེགས་བྲིས་སྐྱོང་ལ་མི་ངལ་བའི། །ཕུན་ཚོགས་གསང་བ་གསུམ་གྱི་མནྡཱ་ར། །འཆི་མེད་གྲུབ་པའི་འབྲས་བཟང་བདེ་བར་མཛོད། །ཞུ་མཆེད་ཨུཏྤལ་དམར་པོའི་ཐིག་ལེ་ནི། །ཚིག་རྒྱན་འཇོ་སྒེག་སར་པ་ངོམས་བཞིན་དུ། །གཟིགས་རྟེན་གེ་སར་རྣ་རྒྱན་མཛེས་དང་བཅས། །གང་ཞབས་མཆོད་པའི་སྤྲིན་དུ་རྣམ་པར་སྤྲོས། །ཡང་ན། ཚུལ་གནས་ཐོས་བསམ་སྒོམ་པའི་རོས། །ལེགས་པར་སྨིན་པའི་རང་གཟུགས་ནི། །བསྔགས་འོས་གེ་སར་མཛེས་འཛིན་པ། །ཕན་བདེའི་མེ་ཏོག་མཆོག་གི་དྲུང་། །སྤྲིན་སྔོན་གཡོ་བའི་གད་མོ་ཡིས། །འདུ་ཤེས་བརླན་པའི་རྨ་བྱ་བཞིན། །གང་གི་ཡོན་ཏན་རྨད་བྱུང་ལ། །རྗེས་སུ་ཆགས་པའི་མཆིད་འདི་ཕུལ། །བསླབ་གསུམ་ཐུན་མཚམས་སྤྲིན་པ་ཡི། །དོགས་པས་བཀྲ་བའི་མཚན་དཔེ་ནི། །གདུལ་བྱ་རྒྱ་མཚོའི་གཙུག་ཏོར་རྩེར། །
རོལ་པའི་དཔལ་དེར་མི་ཕྱེད་སྤྲོ། །འདི་ན་ཆོས་བརྒྱད་དྲྭ་བ་ཡིས། །དབང་མེད་བསྡོམས་པའི་དམན་བདག་ཀྱང་། །དཔལ་ལྡན་བླ་མའི་ཐུགས་རྗེ་ལ། །འཆེལ་བས་སྐབས་ཙམ་ཉེར་འཚེ་བྲལ། །སླད་མར་བསྔགས་འོས་རྣམ་པར་ཐར། །ནོར་བུའི་ཆུ་གཏེར་གཡོ་བ་ཡིས། །གསང་གསུམ་རོལ་མཚོར་ལེགས་བཏུད་བཞིན། །འཚོ་གཞེས་བརྟན་པའི་བཀའ་དྲིན་སྩོལ། །ཞུ་འདེགས་ཕྲ་མོའི་འདབ་གཤོག་ཟུང་། །བསྐྱོད་བཞིན་སྙན་པར་སྨྲ་བའི་གླུ། །ད་དིར་སྒྲོགས་པའི་བླ་མ་རཿ གུས་པའི་འཕུར་ལྡིང་ངོམས་བཞིན་སོང་། །ཡང་དེ་དག་ལས་རང་གིས་ཆོས་འབྲེལ་ཞུས་པའི་བླ་མ་ཞིག་ལ་ཕུལ་ན། ཟུང་འཇུག་བདེ་བ་ཆེན་པོའི་རྣམ་རོལ་ལས། །མི་ཕྱེད་གྲུབ་པ་མཆོག་གི་ཟློས་གར་ནི། །ཚུར་མཐོང་སྐལ་བཟང་མོས་ངོར་ཤར་ཙམ་གྱིས། །གཏན་བདེའི་གོ་འཕང་སྦྱིན་དེའི་ཞབས་སྟེགས་སུ། །གང་གི་ཐུགས་རྗེའི་ཉི་གཞོན་ཐིགས་པ་ཡིས། །ལེགས་པར་གསོས་པའི་གུས་འབངས་ཆུ་སྐྱེས་གསར། །མོས་གུས་འདབ་རྒྱ་གྲོལ་བའི་མཚར་སྡུག་ལས། །ཞུ་མཆིད་སྙན་པའི་དྲི་བསུང་མངར་པོ་འཐུལ། །གཟོད་ནས་ཞི་བའི་ནགས་སུ་ཉེར་རོལ་ཀྱང་། །སྙིང་རྗེས་གཟུགས་སྐུར་བཞེངས་པའི་བཀའ་དྲིན་གྱིས། །བདག་སོགས་གདུལ་བྱའི་རྣ་བར་ལུང་རྟོགས་ཆར། །འབེབས་ཁྱེད་སྔོན་མེད་གདེངས་ཅན་བདག་པོར་ངེས། །དེ་སླད་འཚོ་གཞེས་གཟི་བྱིན་
སྟོང་འབར་བའི། །གཏམ་སྙན་མཱ་ལ་ཡ་ཡི་དྲི་བསུང་གིས། །རེག་པའི་མོད་ནས་སྤྲོ་དགའི་ངལ་བསོ་མཆོག །བསམ་གཏན་གྲུབ་པའི་རོ་ལ་ལོངས་སུ་སྤྱད། །འདི་ན་ཚུལ་མིན་རྨོངས་དང་མ་རིག་པའི། །ཤ་ཚུགས་རྒྱས་པའི་ཐིག་ལེའི་དྲྭ་བ་ཅན། །དད་གསུམ་སྣ་ཞགས་རིང་པོར་བརྐྱང་བཞིན་དུ། །འདུ་འཛིའི་ནགས་ཚལ་སྟུག་པོར་བདེ་བར་མཆིས། །འབྱུང་འགྱུར་ཆར་ཡང་བྲལ་སྨིན་མིག་སྨན་གྱིས། །རྣམ་པར་སྦྱངས་པའི་མཁྱེན་པའི་སྤྱན་རས་ཀྱིས། །བདག་སོགས་གདུལ་བྱ་རྒྱ་མཚོར་རིང་གཟིགས་ནས། །ཞབས་སེན་སྣང་བའི་རི་མོ་ནུབ་མེད་མཛོད། །དེ་སྐད་ཞུ་མཆིད་སྤྲིན་གྱི་སྒེག་པ་མོ། །ཚིག་སྙན་སྒྲོ་གཤོག་ཝཾ ཟླུམ་པོའི་གར་བསྒྱུར་ཞིང་། །རྟེན་དངོས་ངོ་མཚར་ཚོན་ཆགས་བཀྲ་དང་བཅས། ཁྱོད་ཞབས་པདྨའི་ཚལ་དུ་མྱུར་བར་ཆས། །ཞེས་པ་ལྟ་བུ་སྦྱོར་ཤེས་པར་བྱའོ། །འཁོར་ལོ་གསུམ་གྱི་ཕྱག་བཞེས་རྨ་མེད་པའི་དགེ་འདུན་འདུས་པའི་སྡེ་ཞིག་ལ་འབུལ་ན། བཤད་སྒྲུབ་ཆུ་ཀླུང་གྲངས་མེད་འདུས་པའི་མཚོར། །རིག་གྲོལ་ཟླ་ཞུན་གསར་པའི་ཚོན་རིས་ཀྱིས། །རྣམ་པར་བཀྲ་བའི་བཤེས་གཉེན་མལླི་ཀ །གྲངས་མེད་མཁྱེན་པའི་ཟློས་གར་རྩེན་པ་དེར། །དཀོན་མཆོག་གསུམ་པར་མི་ཕྱེད་དད་པའི་ཡིད། །ཅིར་ཡང་ངོམས་པའི་གུས་འབངས་གྱི་ན་བས། །སྙན་ཚིག་མེ་ཏོག་གསར་བའི་དཱ་མ་ནི། །རྐང་པར་བཅད་པའི་མཆིད་
ཕྲེང་འདི་འབུལ་ལོ། །གང་ཚེ་སྟོབས་བཅུ་མངའ་བའི་བདག་ཉིད་དེའི། །བསྟན་དང་སྟོན་པ་ཉིས་གྱུར་སྡེ་སྣོད་མཆོག །གཙོ་བོར་ལྷུར་ལེན་འཁོར་ལོ་རྣམ་གསུམ་གྱི། །བགྱི་བ་ལྷོད་པ་མིན་པའི་བརྟུལ་ཞུགས་ཅན། །བརྟན་མཁས་དགེ་འདུན་འདུས་པའི་ཁྱུ་མཆོག་རྣམས། །ཕན་ཚུན་ཐུགས་ནང་དག་པའི་ཟླ་འོད་ཀྱིས། །ཆོས་སྤྱོད་རྣམ་བཅུའི་ཆུ་གཏེར་འཕྱུར་བ་དེར། །ཡིད་ཀྱི་མགྲིན་རིང་དྭང་བའི་ཅ་ཅོ་སྒྲོགས། །ཨཱ འདི་ན་རྣམ་གཡེང་རླུང་གི་རྗེས་འགྲོ་བའི། །ཀུན་རྨོངས་སྦྲང་རྩིའི་འཚོ་བ་འཛིན་བདག་ཀྱང་། །མཆོག་གསུམ་ཐུགས་རྗེའི་དཔྱིད་དཔལ་གཞོན་ནུ་ཡིས། །ཉེར་འཚེའི་གཡུལ་ལས་བསྲུངས་པའི་གོ་ཆར་གྱུར། །སླད་མར་མཁས་གྲུབ་བྱེ་བའི་བསྟི་གནས་མཆོག །དགེ་འདུན་འདུས་པའི་འཇོ་སྒེག་མ་ཉམས་པར། །ལུང་རྟོགས་སྒྲ་དབྱངས་སྲིད་རྩེར་འགོངས་པ་ཡིས། །ལྷར་བཅས་དགའ་བའི་དགའ་སྟོན་སྦྱིན་པར་མཛོད། །དེ་སྐད་ཞུ་བའི་མཆིད་ཚིག་ཀོ་ཀི་ལཱ། །རྟེན་གྱི་འདབ་ཟུང་རྣམ་པར་གཡོ་དང་བཅས། །བརྗོད་པ་སྙན་པའི་གླུ་དབྱངས་སྒྲོགས་བཞིན་དུ། །དད་གསུམ་སྨན་ལྗོངས་ཉམས་དགའི་དཀྱིལ་ནས་ཕུལ། །ཞེས་པ་ལྟ་བུའི་མཚོན་སྐབས་དང་བསྟུན་ནས་སྦྱར་བའོ། །དེ་ལྟར་ཡུལ་དམ་པར་གཏོགས་པའི་མཆོག་འབྲིང་ཕལ་བའི་རིགས་དམིགས་བསལ་དང་སྤྱིར་བཏང་རྣམས་ལ་ཕྲིན་ཡིག་འབུལ་ཚུལ་རགས་རིམ་ཞིག་བསྟན་ཟིན་
ནས། ད་ནི་དེ་དག་གི་སྐབས་ལས་འཕྲོས་པའི་དོན་ཅུང་ཟད་འབྲི་ན། །བཀའ་ཐ་མ་ཕྱིར་འཕེབས་ལྟ་བུའི་འབྱོར་ལན་གྱི་ཚེ། །གོང་རྒྱན་དང་འབེབས་ཞུས་སོགས་དཀྱུས་ལྟར་ལ། །རང་གི་གནས་ཚུལ་མ་གླེང་བའི་གོང་དུ། །ལྷག་པར་ཐུགས་རྗེའི་ཆུ་གཏེར་བསྲུབས་པ་ལས། །རབ་འཁྲུངས་བཀའ་མཆིད་ཉིན་མོའི་དཔྱིད་དཔལ་ནི། །ཐུན་མཚམས་སྤྲིན་གྱི་ཕྱག་རྒྱས་བཏབ་འདི་ཐེལ་དམར་གྱི་དབང་དུ་བྱས་ཀྱི། བཞིན་དུ། །མོས་གུས་ཤར་རིའི་ཕྲག་པར་ལྷུང་བའི་མོད། །དད་དམ་ཨུཏྤལ་དར་བའི་ཆུན་པོ་ལ། །སྐལ་བཟང་ཤིས་པ་བསྒྲུབས་པའི་ཆོ་ག་ཡིས། །བྱིན་རླབས་བདུད་རྩིས་དགེ་མཚན་དར་བབས་པས། །བསམ་གཞན་དུ་མི་འགྱུར་རྟགས་ཀྱི་སྣང་བ་འབར་བཞིན་དུ། ཞེས་པ་ལྟ་བུར་བསྒྱུར་ཤེས་པར་བྱའོ། གཏན་གྲུབ་པའི་དགའ་སྟོན་བརྒྱ་ཕྲག་བྱིན། །ཞེས་སམ། ཁྱད་པར་བཀའ་མཆིད་ཤར་གྱི་ཐིག་ལེའི་ངོས། །ཕྱག་རྒྱའི་འཁོར་ལོ་རི་དྭགས་གཞོན་ནུ་ཡིས། །རབ་འཁྱུད་དངོས་པོའི་རྟེན་དམིགས་བསལ་ཡོད་ན་མཆན་འབྲི་བས་འཐུས། བདོག་པ་གྱ་ནོམ་པའི། །སིམ་འོད་འབུམ་དུ་འཛགས་བཞིན་སྤྱི་བོར་སོན། །ཞེས་སམ། ཐུགས་བརྩེའི་ཆར་གྱིས་རྩྭ བྲན་པའི་དགེ་མཚན་ལས། །བསྐྱེད་བསྲིངས་བཀའ་གསང་པདྨའི་ཆུན་པོ་ནི། །མི་འགྱུར་ཕྱག་རྒྱའི་རེ་ཁཱ་དང་བཅས་ཏེ། །གུས་སྤྲོའི་དགའ་སྟོན་མཆོག་ཏུ་སྤྱི་བོར་ཐོབ། །ཞེས་སམ། དཔྱིད་དུས་མྱོས་པའི་ཁུ་
བྱུག་གདངས་སྙན་གྱིས། །མཚོན་མིན་དབྱངས་བདུན་རྫོགས་པའི་ལེགས་གསུང་དང་། །རབ་འགྲོགས་རྡོ་རྗེའི་སྔགས་ཀྱི་མདུད་འདིའང་དམ་མདུད་ལྟ་བུ་ཡོད་པའི་དབང་དུ་བྱས་ཀྱི། པ་བཅས། །ཐོབ་པའི་མོད་ནས་རབ་དགའི་དཔལ་གྱིས་མྱོས། །ཞེས་སམ། རྨད་བྱུང་ཐུགས་རྗེའི་དགེ་མཚན་འཛུམ་དམུལ་བས། །རིང་དུ་བསྐྱང་བའི་སྐལ་བཟང་ཉེར་མཚོན་ཕྱིར། །བཀའ་མཆིད་དངོས་པོའི་སྐྱེས་ཀྱིས་ལྕི་དང་བཅས། གཞན་དུ། རབ་འགྲོགས་ལྷ་རྫས་གོས་ཀྱི་ཕུར་མ་བཅས། ཞེས་པ་ལྟ་བུར་བསྒྱུར། །ཉམས་མེད་གུས་པའི་སྤྱི་ཏོར་རྩེ་མོར་སོན། །ཞེས་སམ། བརྗོད་བྱ་མངོན་པར་མཐོ་དང་ངེས་ལེགས་གཏམ། །རྗོད་བྱེད་རྒྱན་གསུམ་ལམ་ནས་དྲངས་པ་ཡི། །བཀའ་མཆིད་ཕྱག་རྒྱའི་ལང་ཚོ་མ་ཉམས་པ། །སོན་པས་སྙིང་ལ་དད་སྤྲོའི་དགའ་སྟོན་བྱིན། །ཞེས་སམ། རྨད་བྱུང་བརྩེ་ཆེན་དཔལ་གྱི་དུམ་བུ་ལས། །ཉེ་བར་འཕོས་པའི་བཀའ་མཆིད་བསུང་ཞིམ་རྒྱུན། །སྐྱེས་བཟང་ལྷོ་ཕྱོགས་རླུང་གིས་ཉེར་བཏེགས་ཏེ། །འདི་ན་གུས་པའི་ངལ་འཚོའི་ཆེད་དུ་ཐོབ། །ཞེས་སམ། འཇམ་མགོན་ངག་གིས་ཕྱེ་བའི་བཀའ་གསང་དང་། །རབ་འགྲོགས་མྱོང་འདིའང་དམ་རྫས་ལྟ་བུ་ཡོད་པ་ལ་སྦྱར་གྱི། གཞན་དུ་རབ་འགྲོགས་དངོས་པོའི་གནང་སྐྱེས་གྱ་ནོམ་བཅས། །ཞེས་པ་སོགས་སུ་བསྒྱུར། གྲོལ་བདུད་རྩིའི་བདོག་པ་བཅས། །མི་འགྱུར་རྟགས་ཀྱི་ལང་ཚོས་སྨྲས་བཞིན་དུ། །སྤྱི་བོར་སོན་པས་དད་གསུམ་དགའ་སྟོན་
འཕེལ། །ཞེས་སམ། གང་ཚེ་ཐུགས་རྗེའི་འཇུག་པ་དམ་པ་ཡིས། དངོས་ཀྱང་འདོར་མིན་གསུང་མཆིད་ཀུ་མུ་དཱ། །དངོས་པོའི་བདོག་པའི་སྐྱེས་ཀྱི་འབྲས་བཟང་བཅས། །ཐོབ་པས་དོན་གཉིས་གྲུབ་། པའི་ངལ་བསོ་བྱིན། །ཞེས་སམ། ཁྱད་པར་ཚངས་སྲས་རྒྱུད་མངས་ལས་བླངས་པའི། །ལེགས་གསུང་སྤྲིན་གྱི་བ་གམ་བཞད་པ་དང་། །རྟེན་དངོས་གྲུ་ཆར་གཤིམས་པོ་དང་བཅས་པ། །གུས་འབངས་མདོངས་མཐའ་དགའ་བའི་དཔྱིད་དུ་ཐོབ། །ཞེས་སམ། ཁྱད་པར་འདི་གཏན་གདུང་སེལ་བའི། །བཀའ་མཆིད་ཟླ་ཚེས་སར་བ་ཡང་། །དངོས་པོའི་སྐྱེས་ཀྱི་སིམས་འོད་བཅས། །གུས་ལྡན་བདེ་འབྱུང་རལ་རྩེར་སོན། །ཞེས་སམ། ཕུན་ཚོགས་གསུང་གསང་མན་ར། །མྱོང་གྲོལ་བདུད་རྩིའི་དོགས་པར་བཅས། །ཉམས་མེད་སྤྱི་བོར་འཆིངས་པའི་མོད། །སྐལ་པ་བཟང་པོའི་དགའ་སྟོན་ཐོབ། །ཞེས་སམ། རྨད་བྱུང་གསུང་མཆིད་ཨུཏྤ་ལ། །རྡོ་རྗེའི་སྔགས་ཀྱི་མདུད་པ་ཡི། །ལོ་འདབ་ཅིར་ཡང་གྲོལ་དང་བཅས། །གུས་སྤྲོའི་ཐོར་ཚུགས་རྩེ་མོར་བྱིན། །ཞེས་སམ། ཡ་མཚན་ཉིད་དོ་སིམ་འོད་ཀྱིས། །བསྣུན་པའི་ཀུ་མུ་དཱ་བཞིན་དུ། །བཀའ་གསང་རྟགས་ཀྱི་ཕྱག་རྒྱ་ཡིས། །རབ་མཛེས་གུས་པའི་དཔྱིད་དུ་ཐོབ། །ཞེས་སམ། དད་དང་སྤྲོ་བའི་མགྲིན་སྔོན་གང་། །ཐུགས་རྗེའི་སྤྲིན་གྱིས་མི་བཏང་ཕྱིར། །གསུང་མཆིད་རོལ་མོ་དཀྲོལ་བ་ལས། །
རབ་དགའི་གར་གྱིས་ཡིད་རབ་བྲེལ། །ཞེས་པ་ལྟ་བུས་མཚོན་ཏེ་སྐབས་དང་སྦྱར་ནས་རྣམ་དཔྱོད་ཀྱི་འཇུག་པ་རྒྱ་ཆེར་སྤྲོ་བར་བྱ་ཞིང་། །དེ་མཚམས་ནས་རང་གི་གནས་ཚུལ་སོགས་དཀྱུས་ལྟར་འདྲི་བར་བྱའོ། །གཞན་ཡང་མཇལ་ཕྱག་དང་། །དབང་ཆོས་ཞུ་བ་སོགས་ཀྱི་ལེགས་འབུལ་སྟོབ་པའི་ཚེ། །གོང་རྒྱན་དང་། འབེབས་ཞུ་དག་ཡུལ་གང་ཡིན་པ་དེ་དང་དེའི་དམིགས་བསལ་སྔར་སྨོས་པ་རྣམས་ལས་བླངས་པས་འཐུས་མོད། །འོན་ཀྱང་འདིར་ཡང་སྤྱིར་བཏང་དུ་ཅུང་ཟད་དཔེར་བརྗོད་ན། ཨོཾ་སྭ་སྟི་བི་ཛ་ཡནྟུ། གྲངས་མེད་གོང་ནས་ཆོས་དབྱིངས་སྙིང་པོར་གཟུང་འཛིན་མཚན་མ་སིམ་གྱུར་ཀྱང་། །ཚུར་མཐོང་དག་པའི་རྩེ་དགའ་བཟུང་ལ་སྙིང་རྗེའི་ལང་ཚོ་དར་བབས་པས། དྲན་པ་ཙམ་གྱིས་རྨོངས་པའི་འཇིགས་འཕྲོག་སྲིད་ཞིའི་དེ་ཉིད་གཅིག་གྱུར་པའི། །ཞབས་སྟེགས་ལྷ་བརྒྱའི་ཐོད་ཀོས་མངོན་བསྟེན་ནོར་བུའི་བ་གམ་གཡོ་བའི་དྲུང་། །ཞེས་སམ། བསྐལ་བཟང་རྣམ་འདྲེན་བཞི་པའི་ཞལ་སྒོ་ལས། །ལེགས་གསུང་སྡེ་སྣོད་བྱེ་བའི་རྒྱལ་ཐབས་ལ། །དབང་བསྒྱུར་ལྷར་བཅས་གཙུག་ན་མངོན་མཐོ་བའི། །ཞབས་པད་གདོང་ལྔས་བཏེག་པ་ག་ལ་བར། །ཞེས་སམ། །གང་ཞིག་མཁྱེན་བརྩེའི་འོད་རྡུལ་ཕྲ་མོས་ཀྱང་། །སྒྲིབ་གསུམ་ཤེ་མུན་བཅིལ་དང་ཆབ་གཅིག་པར། །ཕན་བདེའི་སྣང་བ་བརྒྱ་ཕྲག་སྦྱིན་མཛད་པའི། །མཚུངས་བྲལ་
དཔལ་ལྡན་བླ་མའི་ཞབས་པད་མོར། །ཞེས་སམ། །དཔལ་ལྡན་སྟོབས་བཅུ་མངའ་བའི་བསྟན་པ་ལ། །སྟོན་པ་གཉིས་པར་སྣང་བའི་ཕྲིན་ལས་ཀྱིས། །འགྲོ་ཀུན་དམ་པའི་ལམ་དུ་དབུགས་དབྱུང་བའི། །ཞབས་སྟེགས་ཕྱོགས་ལས་རྣམ་པར་རྒྱལ་བའི་དྲུང་། །ཞེས་སམ། སྲས་བཅས་རྣམ་འདྲེན་ཐམས་ཅད་ཀྱི། །ཡེ་ཤེས་ཕུང་པོ་གཅིག་བསྡུས་པ། །མ་འདྲིས་འགྲོ་བའི་འཛའ་བཤེས་མཆོག །སྲིད་ན་མངོན་མཐོའི་ཞབས་པད་མོར། །ཞེས་པ་ལྟ་བུ་གང་རིགས་ཀྱི་འབེབས་འོག་ནས། །མཛེས་པར་བྱས་སོ་སྦྲང་རྩིས་མངོན་གཏམ་སྐྱེད་མོའི་ཚལ་དུ་བུང་བ་དང་། །པདྨ་དཀར་པོའི་མུ་ཁྱུད་རབ་གཡོ་དྭང་བའི་རོལ་མཚོར་ངང་མོ་བཞིན། །དག་པའི་མིག་སྨན་སར་པས་ལེགས་སྦྱངས་ཡེ་ཤེས་གཟིགས་པའི་མདུན་ས་རུ། །དད་གུས་ཁོ་ནའི་གཞན་དབང་ལས་སྐྱེས་དོན་ལྡན་གཏམ་གྱི་སྦྱོར་བས་སོ། །ཞེས་སམ། མཐའ་མེད་འཁོར་བའི་འདམ་རྫབ་ཀྱིས་བསྲུང་བའི། །ཀུན་རྨོངས་ཆུ་བ་གསར་པའི་ཕང་པ་ནས། །ཐལ་མོའི་མེ་ཏོག་ཟུམ་དང་ཆབ་གཅིག་པར། །ཞུ་གསོལ་ཚིག་གི་བརྗོད་པ་འདི་ལྟར་འབུལ། །ཞེས་སམ། གསལ་གསལ་རྨད་བྱུང་ཐུགས་རྗེའི་ཟླ་གཞོན་གྱིས། །ཡང་ཡང་རེག་པས་དད་གསུམ་ཀུ་མུ་དཱ། །དུང་དུང་སྙིང་དབུས་གྲོལ་བའི་འཛུམ་དཀར་གྱིས། །སྙན་སྙན་གཏམ་གྱི་གེ་སར་འདི་སྐད་བསུ། །ཞེས་སམ། སེན་
མོའི་མེ་ཏོག་དམར་བའི་དོགས་པ་ཡིས། །ཉེ་བར་སྒེག་པའི་ཐལ་སྦྱར་འཁྲི་ཤིང་ནི། །ལན་བརྒྱར་འདུད་པའི་ངང་ཚུལ་སྔོན་འགྲོ་བས། །དད་བརྒྱའི་མགྲིན་པ་བཏེག་སྟེ་མཆིད་འདི་གསོལ། །ཞེས་སམ། །དལ་རྟེན་ལྗོན་བཟང་ལྡེམས་པ་ལས། །ཐལ་མོའི་ཨུཏྤལ་ཟུམ་དང་བཅས། །ཞུ་གསོལ་རྐང་པ་དྲུག་པའི་གླུས། །ཡེ་ཤེས་གཟིགས་པའི་སྒོ་འཕར་དབྱེ། །ཞེས་པ་ལྟ་བུའི་གཤམ་དུ། །བསྔགས་བརྗོད་སོགས་དཀྱུས་ནས་འབྱུང་བ་ལྟར་རམ། །ཅུང་ཟད་རྒྱས་པར་སྤྲོ་བའི་དབང་དུ་བྱས་ན། །དཔག་ཡས་ཡོན་ཏན་གཏིང་མཐའ་གཞལ་བཀའ་ཤིན་ཏུ་རྡུལ་བྲལ་ཆུ་གཏེར་ཆེ། །གཞན་ཕན་ནོར་རྒྱས་ཐགས་པས་ལེགས་སྦྲེལ་ཡིད་ཅན་བསོད་ནམས་མནྡཱ་རས། །ཉེ་བར་བསྲུབས་པའི་ངལ་བ་བསྟེན་ལས་ལེགས་སྤྱད་དུམ་བུ་རབ་རྫོགས་པར། །མཁྱེན་རྩེ་བདུད་རྩིའི་དོ་ཤལ་གྱིས་མཛེས་ངོ་མཚར་ཟླ་གཞོན་ཁྱོད་གཅིག་ཤར། །དེ་ཚེ་རབ་འབྱམས་རྒྱ་མཚོའི་རྡུལ་སྙེད་འགྲོ་ཀུན་མོས་པའི་རྣ་ལུང་དུ། །རྨད་བྱུང་ཞི་བསིལ་མཚར་སྡུག་ཡོངས་རྫོགས་མིང་ཚིག་ཡི་གེའི་ཨུཏྤ་ལ། །ཉེ་བར་བཏབ་པའི་ངང་ཚུལ་འདི་ཀོ་རྒྱལ་ཀུན་གསུང་གི་རྡོ་རྗེའི་དཔྱིད། །མགྲིན་པར་རྩེན་པའི་ངོ་མཚར་ཉིད་ལས་དངོས་པོ་གཞན་གྱིས་ཇི་ལྟར་བསྐྲུན། །གང་ཐུགས་རྡུལ་དང་ཤེས་བྱ་ལས་འདས་བསམ་བརྗོད་སྤྲོས་པའི་ཕ་མཐའ་ལ། །དུས་གསུམ་ཀུན་ཏུ་གཞར་ཡང་མི་
གནས་མཁའ་ཁྱབ་མཁའ་ཡི་རྡོ་རྗེའི་དངོས། །ཟག་བྲལ་བདེ་ཆེན་ཕྱག་རྒྱ་ལ་སྦྱོར་རྣམ་པ་ཐམས་ཅད་མཆོག་ལྡན་ཞལ། །རྒྱལ་ཀུན་ཐུགས་ཀྱི་ཐིག་ལེར་ཡོངས་གྲུབ་དེ་སླད་ཀུན་དུ་འཆང་ཞེས་བརྗོད། །བྲལ་སྨིན་བྱེ་བའི་ས་བོན་ལས་ཐོན་མཁྱེན་པའི་མེ་ཏོག་ཅི་ཡང་འབར། །རྗེས་བརྩེའི་ཡལ་ག་ཕྱོགས་བརྒྱར་གཡོབས་ཤིང་ཕན་བདེའི་གྲིབ་མ་སྣུམ་པོ་རུ། །ལུས་ཅན་སྲིད་ཞིའི་ཚ་གདུང་བསལ་ཏེ་བྱང་ཆུབ་སྙིང་པོའི་དབྱིག་གི་ཆར། །འབེབས་མཛད་མི་ཟད་ཡོན་ཏན་ཕུང་པོ་ཡོངས་འདུའི་ས་བརྟོལ་ཉིད་དུ་འཁྲུལ། །ཇི་ལྟར་འཆར་ཀའི་དམར་བས་ཉེར་དྲངས་འབྲས་ལྡན་དུས་ཀྱི་ཟླ་གཞོན་ལས། །རབ་ལྷག་ཐུགས་རྗེའི་སིམ་འོད་གཡོ་བས་སྙིགས་སྤྱོད་གདུང་བ་བཅིལ་ནས་སླར། །དོན་གཉིས་སྣང་བ་བླ་མེད་སྦྱིན་ལ་འདྲེན་པ་ཀུན་གྱི་ཕྲིན་ལས་ཁུར། །འབད་དང་རྩོལ་བའི་ངལ་བས་དུབ་མིན་ལྷན་སྐྱེས་ཉིད་དུ་བདག་གིར་བཟུང་། །ཞེས་སམ། །གང་ཁྱོད་གཟོད་ནས་ཤིན་ཏུ་རྣམ་དག་པའི། །ཡེ་ཤེས་ཆེན་པོའི་ཕ་རོལ་ཕྱིན་མོད་ཀྱང་། །ཚད་མེད་སྙིང་རྗེའི་གཞན་དབང་ལ་འཆེལ་བས། །བསམ་བཞིན་སྤྲུལ་པའི་རྣམ་རོལ་ཅིར་ཡང་བཟུང་། །ཁྱད་པར་འདུལ་བར་དཀའ་བའི་ཡུལ་དུས་འདིར། །ཡོངས་རྫོགས་བསྟན་དང་འགྲོ་ལ་སྨན་མཛད་པའི། །བསྔགས་འོས་ཚངས་པའི་བློས་ཀྱང་གཞལ་དཀའ་ཕྱིར། །སྲིད་རྩེའི་སྙོམས་འཇུག་ངང་དུ་གཉིད་ལ་
གཡུར། །བག་མེད་རྡུལ་ལ་ཟ་བའི་འཇུག་པ་ཅན། །ཡང་དག་བླངས་པའི་ཁྲིམས་ཀྱི་ཆུ་གཙང་གིས། །བཤེས་ལས་རྣམ་གྲོལ་མེ་ཏོག་དགོད་པ་ཡང་། །ཡོན་ཏན་ཀུན་གྱི་བསྟི་གནས་གཅིག་ཏུ་གྱུར། །གཏིང་མཐའ་བྲལ་བ་གང་དེ་ཆུ་ཡི་གཏེར། །མ་ཡིན་སྨོན་འཇུག་སེམས་ཀྱིས་བརླན་པའི་ཐུགས། །འགྲོ་ཀུན་ཕན་བདེའི་སྦྱར་གང་ནོར་བུའི་དཔལ། །མིན་ནོ་ཁྱོད་ཀྱི་བྱང་ཆུབ་སྤྱོད་མཆོག་ལགས། །ངེས་གསང་སྨིན་གྲོལ་མཛེས་མའི་འགྲམ་ཆང་གིས། །བརླན་ལས་དམ་ཚིག་སྡོམ་པའི་བ་ཀུ་ལ། །སྒོ་གསུམ་བྱེད་པ་བཅིངས་པའི་མཚར་སྡུག་བཅས། །རྫོགས་པས་དབང་རྣོན་རྒྱ་མཚོའི་དཔྱིད་དུ་མཛེས། །ཞེས་སམ། གང་ཚེ་སྙིང་རྗེས་ཤིན་ཏུ་མཉེན་བྱས་པའི། །འཇུག་པས་སེམས་ཅན་ཡལ་བར་མི་འདོར་བཞིན། །ཐུགས་ནི་ཆོས་ཀྱི་དབྱིངས་སུ་སྙོམས་ཞུགས་པས། །སྲིད་དང་ཞི་བའི་ཐིག་ལེ་གཅིག་ཏུ་གྱུར། །བསོད་ནམས་མཐའ་ཡས་རྫོགས་པའི་མཚན་དཔེའི་བྱིན། །འགྲོ་འདིའི་མོས་ངོར་ཤར་བའི་དེ་མ་ཐག །བསྡུས་པ་མེད་པར་བསྔགས་འོས་རྣམ་ཐར་གྱིས། །ཕྱུར་བུར་གཏམས་པའི་བརྗོད་པ་ཕ་མཐའ་ཡས། །གསུང་གཅིག་ཉིད་ལས་ཐ་དད་མོས་པ་བཞིན། །ཆོས་ཕུང་བྱེ་བའི་མཐས་ཀྱང་མཚོན་མིན་པ། །སྤྲོ་ལ་ཁྱོད་དང་རྣམ་འདྲེན་ཟས་གཙང་སྲས། །དབུས་མཐའི་ཡུལ་གྱི་ཁྱད་པར་ཙམ་དུ་བས། །ཇི་སྙེད་ཤེས་བྱའི་ཡན་ལག་ཡོད་
དོ་ཅོག །ཟག་བྲལ་མཁྱེན་པའི་དཔལ་གྱིས་ཉེར་བཟུང་བཞིན། །ཡུད་རེར་ཏིང་འཛིན་བྱེ་བའི་འཇུག་ལྡང་གིས། །མཐའ་ཀླས་ཡིད་ཅན་ཐར་པའི་གྲོང་དུ་དཀྲི། །རྨད་བྱུང་རྒྱུ་ལས་ཐོབ་པའི་ཡོན་ཏན་འབྲས། །ལུས་ཅན་ཕན་བདེའི་དཔྱིད་དུ་སྨིན་པ་ལས། །མཐའ་གཉིས་དབུལ་བ་འདོར་བའི་ཕྲིན་ལས་ཅན། །སྔོན་མེད་ལེགས་བྲིས་ལྗོན་པ་དེ་སུ་ཞིག །ཞེས་སམ། ཇི་ལྟར་འགྲོ་ཁམས་རིན་ཆེན་དག་པའི་གཞིར། །ཚད་མེད་སྙིང་རྗེའི་གཟུགས་བརྒྱ་འཕོས་པ་ཡིས། །བསོད་ནམས་ཕྱེ་བའི་ཕུང་པོ་འདུ་མཛད་པས། །གང་གི་རྣམ་ཐར་དཔག་དཀའི་ཕ་མཐར་དྲངས། །ཁྱད་པར་བསིལ་ལྡན་རི་བོའི་སྨན་ལྗོངས་སུ། ཡེ་ཤེས་ལུས་ཅན་དེ་བཞིན་གཤེགས་པའི་གཟུགས། །སློབ་པའི་སར་གནས་གཞོན་ནུའི་རོལ་རྩེད་ཀྱིས། །མཐའ་ཀླས་ཐེག་པའི་རྒྱལ་རྔ་དུས་གཅིག་བརྡུངས། །དེ་ཚེ་རང་གཉིད་བསླབ་པའི་ཤུལ་ལམ་ལ། །འགོད་མཛད་འདི་ནི་ལུས་མེད་ཐུལ་ལོ་ཞེས། །ལྷར་བཅས་བསྔགས་པའི་མེ་ཏོག་གཡོ་བའི་འོད། །ཞབས་མཐིལ་པདྨོ་གསར་པའི་ཟོལ་གྱིས་འོང་། །ལ་ལར་འཇམ་དང་གཞན་དུ་འབར་བ་སོགས། །གཅིག་པུ་ཉིད་ལས་སྨན་མཛད་དུ་མའི་གར། །ཡ་མཚན་འདི་འདྲ་རྫོགས་པའི་སངས་རྒྱས་ལས། །འཕགས་དང་སོ་སྐྱེ་གཞན་གྱིས་བསྐྲུན་དུ་མེད། །མདོར་ན་ཐུགས་ཀྱི་ཏིང་འཛིན་མི་འཁྲུགས་པར། །རྗེས་ཐོབ་སྒྱུ་
མའི་སྒོ་བརྒྱ་དབྱེ་བ་ཡིས། །གཞན་ཕྱིར་ཕན་པ་འབའ་ཞིག་ལྷུར་ལེན་པས། །ས་སྟེང་སྟོན་པ་གཉིས་པའི་རྒྱལ་སར་འཛེགས། །ཞེས་སམ། གང་ཞིག་རྨད་བྱུང་ཡོན་ཏན་གྱི། །བདུད་རྩིའི་ཁུར་གྱིས་རབ་ལྕི་བའི། །རིན་ཆེན་འབྱུང་གནས་ཆེན་པོ་ལས། །སྙིང་རྗེའི་རྦ་རླབས་འགོགས་པ་མེད། །ལྷག་པར་དེང་དུས་ལྷར་བཅས་ཀྱི། །སྐྱེ་དགུའི་གདུང་སེལ་ཞི་བའི་བཅུད། །གཏན་པ་མེད་པར་འཇོ་བ་གང་། །སྔོན་མེད་ཙིནྟ་མ་ཎི་དངོས། །མཁྱེན་པའི་གཏིང་མཐའ་གཞལ་དཀའ་བར། །བྱམས་བརྩེའི་འོད་སྣང་རིང་སྤྲོ་བའི། །བསིལ་ཟེར་ཅན་ཁྱོད་ཤར་བའི་མོད། །ཐུབ་བསྟན་ཆུ་ཀླུང་ཕྱོགས་བརྒྱར་འཕེལ། །དེ་ཚེ་ཡིད་ཅན་རྡུལ་སྙེད་ཀྱི། །བདེ་སྐྱིད་ངང་མོ་བོས་པ་ལས། །རྫོགས་ལྡན་གསར་པའི་འཇོ་སྒེག་ཀྱང་། །དལ་གྱི་རྒོད་པའི་ངོ་མཚར་ཐོབ། །འདི་ན་ཀུན་གསལ་ཡངས་པའི་ཁྱོན། །ཕ་རོལ་ཟད་པ་མི་མངོན་བཞིན། །༔ གང་གི་བསྔགས་འོས་རྣམ་ཐར་ཀྱང་། །བྱིས་བློའི་བརྗོད་པས་ཇི་ལྟར་དྲངས། །ཞེས་པ་ལྟ་བུ་སྤྱིར་བཏང་ནས། །དེ་མཚམས་ནས་དམིགས་བསལ་སོ་སོའི་ཁྱད་པར་རྣམས་སྦྱར་བར་བྱ་སྟེ། །ཐོག་མར་བཤུལ་ལམ་རིང་པོ་ལྟ་བུ་ནས་བསྙེགས་ཏེ་ཞལ་གྱི་པདྨོ་དངས་བས་མཇལ་བའི་ལེགས་འབུལ་སྟོབ་པའི་ཚེ། །ཁྱད་པར་བསྐལ་མང་ཚོགས་ཟུང་གིས་བསྐྲུན་མགོན་པོ་ཁྱོད་ཀྱི་མཚན་དཔེའི་བྱིན། །གང་དུ་སྣང་བས་
གཏན་བདེའི་དཔལ་སྟེར་དེང་འདིར་སྐལ་བཟང་བདག་ཅག་གིས། །རིང་ནས་བརྣག་པའི་ལེགས་བྱས་ཁོ་ནས་འདྲེན་བྱེད་བདུད་རྩིར་ཐོབ་མ་ཐག །དང་པོའི་ས་ཡི་ཏིང་འཛིན་ལས་ལྷག་དད་སྤྲོའི་དགའ་སྟོན་ཅིར་ཡང་འཕེལ། །དེ་སླད་ལྷག་བསམ་གདེངས་ཅན་གྱིས་བསྐུལ་ཡིད་སྤྲུལ་མཆོད་པའི་སྤྲིན་ཕུང་ལས། །དངོས་འབྱོར་གྲུ་ཆར་ཕྲ་མོ་གཡོ་བས་ཡེ་ཤེས་གཟིགས་པས་བརླན་བྱས་ཏེ། །སླར་ཡང་སྲིད་པ་མཐར་བྱས་བར་དུ་དགེ་ལེགས་རིན་ཆེན་རྟག་འཇོ་བའི། །ཞབས་ཀྱི་རྡུལ་ཕྲན་བསྙེན་བཀུར་བགྱི་སླད་གཅིག་ཏུ་བརྟུན་པའི་གཡར་དམ་ལེན། །ཞེས་སམ། ཁྱད་པར་རིང་ནས་བསོད་ནམས་བརྒྱ་ཕྲག་གིས། །མགྲོན་དུ་བོས་པའི་ཁྱོད་སྐུའི་གསང་བ་གསུམ། །མངོན་སུམ་འདྲེན་བྱེད་བདུད་རྩིར་ཐོབ་པ་ཡིས། །རྨད་བྱུང་བསྐལ་པ་བཟང་པོའི་དགེ་མཚན་བྱིན། །དེ་སླད་དད་སྤྲོའི་དགའ་བ་རྒྱས་གྱུར་པའི། །ལྷག་བསམ་གསེར་གྱི་སྙེ་མ་དུད་པ་ལས། །དངོས་འབྱོར་མཆོད་སྤྲིན་ཉུང་ངུའི་དགྱེས་སྟོན་གྱིས། །ཡེ་ཤེས་གཟིགས་པའི་གཡར་ལམ་མཛེས་པར་བྱ། །ཞེས་སམ། ལྷག་པར་དགོས་འབྱུང་ནོར་བུའི་གན་མཛོད་ཀྱིས། །བསྐྲུན་མིན་མཐོང་བ་ཙམ་གྱིས་གྲུབ་གཉིས་གཏེར། །སྦྱིན་མཛད་ཁྱོད་ཞབས་སྤྱི་བོར་བསྙེན་པ་ཡི། །གུས་སྤྲོ་ནམ་མཁའི་མཐའ་ལས་རིང་དུ་བརྒལ། །དེ་ལྟ་ནའང་ཡང་སྲིད་རྣམ་ཀུན་དུ། །གཏོགས་ལ་སྤྲོ་བ་
ཕྲ་བས་ཟང་ཟིང་གི །འབྱོར་པ་དབུལ་ཡང་ལྷག་བསམ་དཔྱིད་དཔལ་ལས། །དངོས་འབྱོར་མེ་ཏོག་ཕྲ་མོའི་དགའ་སྟོན་སྟོབ། །ཞེས་སམ། ཁྱད་པར་ཐོབ་པ་ཙམ་ནས་འདི་གཏན་གྱི། །ཕོངས་པ་ཀུན་བཅོམ་བདུད་རྩིའི་དཔལ་སྦྱིན་པ། །མགོན་པོ་གང་གི་མཚན་དཔེའི་དཀྱིལ་འཁོར་མཆོག །མངོ་ན་པོ་གང་གི་མཚན་དཔེའི་དཀྱིལ་འཁོར་མཆོག །མངོན་སུམ་མཇལ་བའི་དགའ་བས་ཡིད་རབ་མྱོས། །དེ་ཚེ་འབྲུག་སྒྲ་ངལ་གྱིས་རྒོད་པ་ཡིས། །སྙིང་ལ་རངས་པ་ཐོབ་པའི་མདོངས་མཐའ་ལྟར། །གུས་སྤྲོའི་ཟློས་གར་ཅིར་ཡང་བསྒྱུར་བཞིན་དུ། །དངོས་འབྱོར་མཆོད་སྤྲིན་ཕྲ་མོས་བསྙེན་བསྐུར་བགྱི། །ཞེས་སམ། ལྷག་པར་རྒྱལ་ཀུན་ཡེ་ཤེས་བྱིན། །འདུས་པའི་ཁྱོད་ཞལ་ཟླ་བ་ཟློ གསར། །མངོན་སུམ་མཐོང་བའི་མོད་ཉིད་ནས། །མཆོག་ཏུ་དད་སྤྲོའི་ཀུན་བཞད། །དེ་ཡིས་འདི་གཏན་དོན་གཉིས་ཀྱི། །ཕུན་ཚོགས་ཡོངས་སུ་གྲུབ་པ་ཡི། །རྨད་བྱུང་དགའ་སྟོན་མཚོན་སླད་དུ། །དངོས་པོའི་མཆོད་སྤྲིན་ཅུང་ཟད་བསྟར། །ཞེས་སམ། གང་ཚེ་ཞབས་རྡུལ་ཕྲ་མོས་ཀྱང་། །བཏབ་པས་གྲུབ་པའི་དཔལ་སྦྱིན་ན། །ཁྱོད་ཞལ་པདྨོ་དངོས་མཇལ་བར། །གུས་སྤྲོའི་ཆུ་གཏེར་མི་ཁོལ་སུ། །དེ་ཕྱིར་དེ་ཡི་བཀའ་དྲིན་མཐའ། །དངོས་པོའི་ཟོང་གིས་འཇལ་མིན་མོད། །འོན་ཀྱང་ཕྱོགས་རེའི་བསོད་ནམས་དཔལ། །བསགས་སླད་མཆོད་སྤྲིན་ཕྲ་མོ་སྟོབ། །ཞེས་སམ། ཡ་མཚན་ཉིད་དོ་ཟླ་ཐིག་གིས། །སར་
སྐྱེས་གསར་པའི་འཛུམ་ཕྲེང་སྟེ། །ཁྱོད་ཞལ་མཇལ་བའི་དགའ་སྟོན་གྱིས། །བདག་ཅག་དད་སྤྲོའི་སྣང་བ་རྒྱས། །དེ་ལྟའི་ཚད་མེད་བཀའ་དྲིན་གང་། །རྗེས་སུ་དྲན་པའི་ལྷག་བསམ་གྱིས། །མཐའ་ཀླས་ཡིད་སྤྲུལ་མཎྜལ་བཅས། །དངོས་འབྱོར་མཆོད་སྤྲིན་ཅུང་ཟད་སྟོབ། །ཞེས་པ་ལྟ་བུ་སྐབས་སུ་གང་བབས་སྦྱར་བའི་མཐར། །དེ་ལྟར་དགེ་ལེགས་ཀྱི་ཚིགས་སུ་བཅད་པ་མེ་ཏོག་མནྡཱ་རའི་ཆར་ཕང་ཕང་དུ་གཡོ་བ་རྣམ་པར་བཀྲམ་པས་ལམ་ཡངས་པར་བྱས་ནས། དེང་གི་ཆར་ཡང་། ལན་གཅིག་མ་ཡིན་པར་རིང་མོ་ཞིག་ནས་ཡིད་ལ་འདུན་པའི་གུས་ལྡན་པ་ཁོ་བོ་ཅག་གིས་ལྷ་དང་བཅས་པའི་འགྲོ་བ་ཡོངས་འདིའང་གོས་ཤིན་ཏུ་མཐོ་བ་དག་ལ་སྟེ། ཀྱི་སྐྱོབ་པ་མཚུངས་ཟླ་མ་མཆིས་པ་གང་གི་ཞལ་གྱི་པདྨོ་མངོན་སུམ་མཇལ་ཞིང་། གསུང་གི་བདུད་རྩིས་རྣམ་པར་གྲོལ་བའི་སྐལ་བ་སྦོམ་པོར་གྱུར་པའི་དགའ་སྟོན་གྱིས་ལེགས་འབུལ་ཅུང་ཟད་སྟོབ་པར། ཐོག་མར་བཀྲ་ཤིས་གཞན་ལྟོས་བཅས་འགྲོ་བ་ཡོངས་ཀྱི། ལྟ་བུ་གང་མཚམས་སུ་བསྒྱུར་རོ། །པའི་ལྷ་གོས་རབ་དཀར་གངས་རིའི་མདོག་ཅན་སྲིད་དུ་རིང་བ། སྐུ་རྟེན་དུ་རྒྱལ་བ་ཚེ་མཐའ་ཡས་པའི་མཚན་དཔེའི་ཞལ་སྐྱིན་གསེར་ཟངས་ལས་གྲུབ་པ། གསུང་རྟེན་དུ་སངས་རྒྱས་ཐམས་ཅད་ཀྱི་གསུང་རྡོ་རྗེ་རྣམ་པ་ཐམས་ཅད་པའི་ཡེ་ཤེས་སྒྲ་རིག་རང་མཚན་དུ་ཤར་བ་ཚེ་མདོ་གསེར་བྲིས། ཐུགས་རྟེན་དུ་
བཀའ་གདམས་མཆོད་རྟེན་རྙིང་མ་པད་སྤུངས། །བར་འདིར་འབུལ་ཚན་ཇི་ལྟར་རིགས་པ་རྣམས་སྨོས་པའི་མཐར། མཐའ་རྟེན་རས་དཀར་ཡུགས་བཅས་རྣམ་༡༠༣གྲངས་འབུལ་ལམ་ཞུས་པ་ཡེ་ཤེས་གཟིགས་པའི་སྤྱན་རས་ཀྱིས་བཙའ་བར་གསོལ་བ་འདེབས་པ་དང་། སླར་ཡང་སྨྲས་པ། ཞེས་པའི་འཕྲོ་ནས་དཀྱུས་ཀྱི་བརྟན་བཞུགས་བྲིས་པའི་གཤམ་དུ། དེ་ལྟར་ལེགས་བྱས་འདིས་མཚོན་དུས་གསུམ་གྱི། །རྣམ་པར་དཀར་བའི་དགེ་ཚོགས་ཇི་སྙེད་པ། །ཆོས་དབྱིངས་རྒྱ་མཚོའི་འཇིང་དུ་བསྔོས་པའི་མཐུས། །འགྲོ་ཀུན་སྲིད་ཞིའི་མཐའ་ལས་སྒྲོལ་བར་ཤོག །གང་ཞིག་མཚན་གྱི་སྤྲིང་ཡིག་ཐོས་འཛིན་གྱི། །བདུད་རྩིར་བཏུང་བ་ཙམ་ནས་ཕན་བདེའི་དཔལ། །སྦྱིན་མཛད་མཆོག་གསུམ་འདུས་ཞལ་མགོན་ཁྱོད་ཀྱིས། །ལྷར་བཅས་བཀྲ་ཤིས་སྣང་བ་སྦྱིན་པར་མཛོད། །སརྦ་དཱ་ཀ་ལྱཱ་ཎཾ་བྷ་བཅུ། ཞེས་པ་ལྟ་བུ་དང་། །ཡང་སྐབས་ཇི་ལྟར་རིགས་པར་དབང་ཆོས་སོགས་ཀྱི་བཀའ་དྲིན་ཞུས་པའི་ལེགས་འབུལ་གྱི་ཚེ། གོང་རྒྱན་དང་། འབེབས་ཞུས་སོགས་དཀྱུས་ལྟར་ལ། ཁྱད་པར་ཚད་མེད་ཐུགས་རྗེའི་འཇུག་པ་ཡིས། །རིང་ནས་བསྐྱངས་པའི་སྐལ་བཟང་བདག་ཅག་ལ། །ཞི་བསིལ་གདམས་པའི་བདུད་རྩི་སྦྱིན་མཛད་པའི། །བཀའ་དྲིན་བྱང་ཆུབ་བར་དུ་གཞལ་ནུས་མིན། །དེ་ལྟ་ནའང་རེ་ཞིག་དད་སྤྲོ་ཡིས། །རྣམ་པར་བསྐུལ་བའི་ལྷག་
བློའི་ས་འཛིན་ལས། །ཡིད་སྤྲུལ་མཎྜལ་རྒྱ་ཆེར་སྔོན་འགྲོ་བས། །དངོས་འབྱོར་མེ་ཏོག་ཟེགས་མས་བསྙེན་བཀུར་བགྱི། །ཞེས་སམ། །ལྷག་པར་རྒྱལ་ཀུན་གསུང་གི་རྡོ་རྗེ་གང་། །མཆུ་སྒྲོས་དམར་བའི་ཚོན་ཆགས་ལ་བརྟེན་ནས། །ངེས་གསང་གདམས་པའི་བདུད་རྩི་སྩལ་བ་ཡིས། །དབང་རྣོན་གྲུབ་པའི་རྒྱལ་སར་ཡུད་ལ་བཞག །དེ་ཕྱིར་ཚད་མེད་ཐུགས་རྗེའི་ཟླ་ཤེལ་ལས། །དད་དམ་ཆུ་གཏེར་འཕེལ་ཀ དང་ཆབ་གཅིག་པར། །དངོས་འབྱོར་མཎྜལ་ཕྲ་མོའི་འདུ་འགོད་ཀྱིས། །ཕྱོགས་རེའི་བཀའ་དྲིན་གཞལ་ལ་མངོན་པར་ཕྱོགས། །ཞེས་སམ། གང་ཚེ་གཞན་ལ་ཕན་པར་དགོངས་པ་ཡི། །ཟབ་རྒྱས་གདམས་༣ པའི་བདུད་རྩིའི་བགོ་སྐལ་གྱིས། །སྐལ་བཟང་བློ་གྲོས་བུམ་པ་འགེངས་བྱས་པའི། །བཀའ་དྲིན་བརྗོད་ན་ཚངས་པའི་བློ་ཡང་ངལ། །དེ་སླད་བྱང་ཆུབ་བར་དུ་དམན་པ་བདག །མགོན་པོ་ཁྱེད་ཀྱིས་འབངས་སུ་དམ་བཅས་ནས། །གནས་སྐབས་ཕྱོགས་རེའི་བསོད་ནམས་བསགས་པའི་སླད། །དངོས་པོའི་མཆོད་སྤྲིན་ཅུང་ཟད་སྟོབ་ལ་བྲེལ། །ཞེས་སམ། ཁྱད་པར་བདག་སོགས་སྐལ་བཟང་འགྲོར། །སྨིན་གྲོལ་ལམ་མཆོག་མངོན་བསྟན་ནས། །སྐུ་བཞིའི་ས་བོན་བཏབ་པ་ཡིས། །བཀའ་དྲིན་ཕ་མཐའ་གཞལ་དུ་ཅི། །འོན་ཀྱང་ལྷག་བསམ་རྒྱ་མཚོ་ལས། །ཉེ་བར་བླངས་པའི་དངོས་འབྱོར་གྱི། །མཎྜལ་ཟེགས་མ་ཕྲ་
མོ་ཡིས། །ཅུང་ཟད་བསྙེན་བསྐུར་བགྱི་ལ་ཕྱོགས། །ཞེས་སམ། གང་ཞིག་རྒྱལ་བ་ཐམས་ཅད་ཀྱི། །ཡེ་ཤེས་ཕུང་པོ་ཁྱོད་ཞབས་ནས། །ཟབ་གསང་བདུད་རྩི་སྩལ་བ་ལ། །གུས་སྤྲོའི་མེ་ཏོག་སྙིང་ནས་འཛུམ། །དེ་སླད་བྱང་ཆུབ་སྙིང་པོའི་བར། །གང་གི་དགྱེས་པ་བསྒྲུབས་པ་དང་། །རེ་ཞིག་ཕྱོགས་རེའི་བཀའ་དྲིན་མཐའ། །གཞལ་སླད་མཆོད་སོགས་པ་གང་འོས་ཀྱི་མཐར། །དེ་ལྟར་སྐབས་སུ་བབས་པའི་ཚིགས་སུ་བཅད་པ་ཀ་མ་ལའི་ཕང་ཕུང་ལྟར་ཆར་དུ་བསྙིལ་བ་སྔོན་དུ་འགྲོ་བར་བྱས་ནས། ཇི་ལྟར་གསོལ་བ་བཏབ་པའི་སྙིང་པོ་ནི། རིགས་དང་དཀྱིལ་འཁོར་ཐམས་ཅད་ཀྱི་བདག་ཉིད། ལུང་རྟོགས་བསྟན་པ་རྒྱ་མཚོའི་སྣང་བྱེད། སྐལ་བཟང་འགྲོ་བ་ཡོངས་ཀྱི་སྐྱབས་གཅིག །དྲན་པས་སྲིད་དང་ཞི་བའི་འཇིགས་པ་མཐའ་དག་ཡོངས་སུ་འཕྲོག་པར་མཛད་པའི་རྗེ་བཙུན་རྡོ་རྗེ་འཆང་ཆེན་པོ་འདིར་ཡང་སྤྲོ་ན་བླ་མའི་མཚན་བྱང་སྦྱར། གང་གི་ཞལ་སྔ་ནས། གུས་ལྡན་པ་ཁོ་བོ་ཅག་གིས་འདིར་ཡང་རང་གི་མིང་སྨོས་པའམ་དཀྱུས་ལྟར་ཡང་རུང་ངོ་། །ཇི་ལྟར་གསོལ་བ་བཏབ་པ་ལྟར་ཚད་མེད་པའི་ཡེ་ཤེས་ཀྱི་གཟིགས་པས་རྗེས་སུ་དགོངས་ཏེ་སྨིན་གྲོལ་འདིར་བཀའ་ཆོས་གང་ཡིན་གྱི་དམིགས་གསལ་འཛུད། གྱི་གདམས་པ་ཟབ་མོ་སྩལ་བའི་བཀའ་དྲིན་གྱི་ཕ་མཐའ་ནི་སྟོང་གསུམ་ཛམྦུ་ན་དས་བཀང་ཡང་ཅུང་ཟད་ཞིག་གཞལ་དུའང་ལྷག་ལ།
དེ་ལྟ་ནའང་རེ་ཞིག་དངོས་སུ་འབྱོར་བའི་བདོག་པ་ཕྲ་མོ་འདིས་མཚོན། ཡིད་སྤྲུལ་གྱི་མཆོད་སྤྲིན་འཕགས་པ་ཀུན་ཏུ་བཟང་པོའི་རྣམ་པར་ཐར་པ་དང་རྗེས་སུ་མཐུན་པར་སྤྲུལ་ཏེ་བྱང་ཆུབ་སྙིང་པོའི་བར་དུ་བསྙེན་བཀུར་བགྱི་བའི་དམ་བཅའ་བདག་གིར་བྱ་བའི་སླད་དུ། ཐོག་མར་བཀྲ་ཤིས་པའི་ལྷ་རྫས་ཀྱི་ཝས་དཀར་པོ་སྲིད་དུ་རིང་བ། སོགས་བར་འདིར་འབུལ་བའི་རྣམ་གྲངས་བཀོད་ནས། མཐར་བཅས་རྣམ་གྲངས་༡༨ ༣འབུལ་ལམ་ཞུས་པ་སྐྱབས་འོག་པ་ཁོ་བོ་ཅག་གི་བསོད་ནམས་ཀྱི་ཚོགས་ཡོངས་སུ་རྫོགས་པའི་ཕྱིར་ཡེ་ཤེས་གཟིགས་པའི་སྤྱན་རས་ཀྱིས་བཙའ་བར་གསོལ་བ་འདེབས་པ་ལགས། སླར་སྨྲས་པས། །འདིར་བརྟན་བཞུགས་སོ་སོའི་དཀྱུས་སུ་བྲིས་པ་ལྟར་གང་འོས་བཀོད་པའི་གཤམ། དེ་ལྟར་འདིས་མཚོན་ལེགས་བྱས་ཆུ་ཀླུང་འབུམ། །ཐམས་ཅད་མཁྱེན་པའི་ཆུ་གཏེར་ལ་ཞུགས་པས། །འགྲོ་ཀུན་སྒྲིབ་གཉིས་དྲི་མ་ཡོངས་སྦྱངས་ཏེ། །བྱང་ཆུབ་སྙིང་པོའི་འབྱོར་པས་རྩེན་པར་ཤོག །ཁྱད་པར་རྒྱལ་ཀུན་འདུས་ཞལ་མགོན་ཁྱོད་ཀྱི། །ཐུགས་རྗེའི་ཕྱག་གིས་རྟག་ཏུ་བཟུང་བ་དང་། །ལེགས་གསུང་བདུད་རྩིའི་སྐལ་བ་སྦོམ་གྱུར་པའི། །རྣམ་གྲོལ་ཤིས་པའི་ལང་ཚོ་འབར་གྱུར་ཅིག །སརྦ་དཱ་ཤེ་ཡོ་བྷ་བནྟུ། ཞེས་པ་ལྟ་བུ་སྐབས་དང་འབྲེལ་པར་སྦྱར་རོ། །བྱེ་བྲག་ཏུ་རྒྱལ་དབང་ཀརྨ་པས་དབུ་ཞྭ་མཐོང་གྲོལ་ཆེན་
མོ་བཞེས་པའི་དུས་ལེགས་འབུལ་སྟོབ་པའི་ཚེ། གོང་གཤམ་གྱི་བརྗོད་བྱ་སྤྱི་དང་བྱེ་བྲག་སྐབས་དང་འབྲེལ་བར་བླངས་པའི་མཐར། ཁྱད་པར་མཐོང་བ་ཙམ་གྱིས་ལས་ཉོན་མུན། །འཇིལ་ལ་ཟླ་ཤེལ་གསར་པས་མཚོན་མིན་པའི། །ཨིནྡྲ་ནཱི་ལའི་ཅོད་པན་གཡོ་བ་གང་། །རྒྱལ་ཀུན་བསྔགས་པའི་རོལ་མོ་ཁྱོད་ལ་བྱིན། །དེ་ཚེ་འཇིག་རྟེན་དབང་ཕྱུག་འདྲེན་པ་ནི། །མི་བསྐྱོད་རིགས་ཀྱི་ཕྱག་རྒྱས་བཏབ་བཞིན་དུ། །གངས་ཅན་རི་བོའི་ཁོངས་སུ་སྣང་བའི་མོད། །ལྷར་བཅས་ཕན་བདེའི་དཔལ་གྱིས་དུད་པར་མཛད། །མཐོང་ཐོས་དྲན་རེག་ཡིད་ཅན་རྡུལ་སྙེད་ཀྱི། །སྒོ་གསུམ་བྱེད་པ་ཨེ་ཝཾ་མཱ་ཡཱའི་དབྱིངས། །སྨིན་ཅིང་སྦྱོང་བའི་ཐབས་མཁས་ལ་འཆེལ་བའི། །ཕྲིན་ལས་འདི་འདྲ་སྲིད་ན་དབེན་ལགས་གྲང་། །དེ་ཕྱིར་ཚད་མེད་ཐུགས་རྗེའི་བཀའ་དྲིན་མཐའ། །བྱང་ཆུབ་སྙིང་པོའི་བར་དུ་གཞལ་དཀའ་ཡང་། །གནས་སྐབས་ཕྱོགས་རེའི་བསོད་ནམས་བསགས་པའི་སླད། །དངོས་འབྱོར་མཆོད་སྤྲིན་ཟེགས་མས་བསྙེན་བཀུར་བགྱི། །ཞེས་སྐབས་སུ་བབས་པའི་ཚིགས་སུ་བཅད་པ་ཉུང་ངུས་མདུན་བསུས་ཏེ། དེང་གི་ཆར་ཡང་ལྷ་དང་བཅས་པའི་འགྲོ་བ་ཐམས་ཅད་ཀྱི་མ་འདྲིས་པའི་མཛའ་བཤེས་ཆེན་པོ་འཇིག་རྟེན་གསུམ་གྱི་འདྲེན་པ་འཕགས་མཆོག་མིག་མི་འཛུམ་པ་རིག་གྲོལ་ངུར་སྨྲིག་གི་ཟློས་གར་ལ་རྩེན་པའི་དཔལ་དུས་གསུམ་མཁྱེན་པ་རྫོགས་
པའི་སངས་རྒྱས་ཀརྨ་ཀགང་ཉིད་འཕགས་སྐྱེའི་འདུས་པ་རྒྱ་མཚོའི་དབུས་སུ་མི་འཇིགས་པ་ཆོས་ཀྱི་ཁྲི་འཕང་མཐོན་པོར་མཚན་དཔེའི་གཟི་བྱིན་ལྷམ་མེར་བཞུགས་པ་ནས། །རང་རྟགས་ཀྱི་ཅོད་པན་རིགས་བདག་མི་བསྐྱོད་རྒྱལ་བའི་ངོ་བོ་གྲོལ་བ་བཞི་ལྡན་གྱི་བདག་ཉིད་ཆེན་པོ་དབུ་ལ་བཅིངས་ནས་བརྡ་ཐབས་ཀྱི་ཆོས་སྒོ་བྱེ་བ་སྟོན་ཅིང་མཐོང་ཐོས་དྲན་རེག་གི་འགྲོ་བ་ཐམས་ཅད་གནས་སྐབས་མངོན་མཐོ་དང་། མཐར་གྱིས་ངེས་པར་ལེགས་པའི་གོ་འཕང་ལ་བཀྲི་ནས་འབྲེལ་ཚད་དོན་ལྡན་དུ་མཛད་པའི་བཀའ་དྲིན་གྱི་ཕ་མཐའ་ནི་བློ་ཡི་ར་བ་ལས་ཆེས་བརྒལ་བའི་ཕྱིར། དངོས་པོའི་ཟོང་གིས་གཞལ་བའི་ཡུལ་མ་ཡིན་ཀྱང་། རེ་ཞིག་རང་གཞན་གྱི་རྒྱུད་ཀྱིས་བསྡུས་པའི་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་ནམ་མཁའ་མཛོད་ཀྱི་མཆོད་སྤྲིན་ཆེན་པོར་དད་བློས་སྤྲུལ་ཏེ་འབུལ་བའི་མཎྜལ་མཚོན་བྱེད་དུ། ཐོག་མར་བཀྲ་ཤིས་པའི་ལྷ་གོས་ཟླ་བ་ཞུན་མའི་མདོག་ཅན་དཀྱུས་སུ་རིང་བ་སོགས་གྲངས་ལྡན་ཡེ་ཤེས་གཟིགས་པའི་སྤྱན་ཟུར་གཡོ་བའི་རྟེན་ཙམ་དུ་འབུལ་ལམ་ཞུ་བ་དང་། སླར་ཡང་གསོལ་བ་འདེབས་པ། ཞེས་སོགས་དཀྱུས་ཀྱི་ཞབས་བརྟན་བསྔོ་སྨོན་སོགས་ཇི་ལྟར་འོས་པར་སྦྱར་བར་བྱའོ། །ཡང་ཡུལ་གང་ཡང་རུང་བར་དམིགས་བསལ་ཆོས་འབྲེལ་ལམ་ཉེས་སེལ་ལྟ་བུར་ཚེ་དབང་ཙམ་ཞུས་པའི་སྐབས་ཡིན་ན།
ཁྱད་པར་རྡུལ་བྲལ་རྣམ་ཀུན་མཆོག་ལྡན་ལས། །ཟུང་འཇུག་འཆི་མེད་མགོན་པོའི་སྐུར་བཞེངས་ཏེ། །མཐའ་ཀླས་ཏིང་འཛིན་བྱེ་བའི་འཇུག་ལྡངས་ཀྱིས། །སྲིད་ཞིའི་ཚེ་བཅུད་མ་ལུས་ཡོངས་བསྡུས་ཏེ། །སྐལ་བཟང་ཨུཏྤལ་སར་པའི་དགའ་སྟོན་དུ། །སྨིན་གྲོལ་གྲུབ་པའི་བདུད་རྩིས་དགེ་བྱས་ཚེ། །རིང་འཚོའི་སྲོག་གི་ཀ་བ་ཚུགས་པ་དང་། །ལྷན་ཅིག་དངོས་པོའི་མཆོད་སྤྲིན་ཅུང་ཟད་སྟོབ། །ཞེས་པ་ལྟ་བུ་དང་། ༈ །གཤིན་པོ་རྗེས་འཛིན་གྱི་ཆོ་ག་ལྟ་བུའི་ཚེ། ལྷག་པར་གཞན་ལ་ཕན་དགོངས་ཆུ་ཡི་གཏེར། །བསྲུབས་སྐྱེས་ངན་འདིར་མི་འཁྲུགས་པ་ལྟ་བུའི་ཚེ། མི་འཁྲུགས་མགོན་པོའི་ཏིང་འཛིན་གྱིས། །ཞེས་སམ། རྡོར་སེམས་ལྟ་བུ་ལ། མི་བསྐྱོད་མགོན་པོའི་ཏིང་འཛིན་གྱིས། ཞེས་སམ། ཞི་ཁྲོ་ལྟ་བུ་ལ། སྒྱུ་འཕྲུལ་དྲྭ་བའི་ཏིང་འཛིན་གྱིས། ཞེས་སམ། གདན་གསུམ་ཞི་ཁྲོའི་ཏིང་འཛིན་གྱིས། ཞེས་པ་ལྟ་བུའི་སྐབས་སུ་བབས་པའི་འབྱིན་འཇུག་བྱའོ། །སོང་སྦྱོང་བའི་ཏིང་འཛིན་གྱིས། །ཟླ་ཤེལ་བསིལ་བའི་རེག་བྱ་མ་སྨད་པས། །དམིགས་ཡུལ་ཐར་པའི་ངལ་འཚོར་ཡུད་ལ་སྦྱར། །དེ་ཚེ་ཚད་མེད་བཀའ་དྲིན་དྲན་པ་ཡི། །ཡིད་སྤྲུལ་མཎྜལ་རྒྱ་ཆེར་སྔོན་འགྲོ་བས། །དངོས་འབྱོར་མཆོད་སྤྲིན་ཉུང་ངུའི་བདོག་པ་ཡིས། །ཞབས་སེན་རི་མོར་བགྱི་བའི་བརྟུལ་ཞུགས་ལེན། །ཞེས་སོགས་རྒྱ་ཆེར་འཕྲུལ་ཤེས་པར་བྱའོ། །རྟེན་གསུམ་དང་གཙུག་ལག་ཁང་ལྟ་བུ་རབ་གནས་གྲུབ་པའི་ལེགས་འབུལ་གྱི་ཚེ། །གོང་
རྒྱན་འབེབས་ཞུས་སོགས་སྐབས་སུ་བབས་པ་སྦྱོར་བའི་མཐར། །ཁྱད་པར་གཞན་ཕྱིར་དམིགས་པའི་བསོད་ནམས་ཀྱིས། །ཉེ་བར་བསྐྲུན་པའི་རྟེན་གྱི་ཕུང་པོ་གང་། །རྡུལ་ཕྲན་རེར་ཡང་རབ་འབྱམས་ཞིང་ཁམས་ཀྱི། །རྟེན་དང་བརྟེན་པའི་དངོས་པོ་གསར་དུ་བསྐྲུན། །དམ་ཚིག་སྣང་ཆར་ཡེ་ཤེས་སེམས་དཔའི་བྱིན། །མངོན་སུམ་འཕོས་གང་ལྷག་པར་གནས་པ་ཡི། །མེ་ཏོག་འཐོར་བས་བརྟན་པའི་དགེ་མཚན་ལས། །དོན་གཉིས་རྫོགས་ལྡན་གསར་པའི་སྣང་བ་ཤར། །དེ་ཚེ་ལྷར་བཅས་ཀུན་གྱི་མཆོད་སྡོང་དུ། །ཉེ་བར་འོས་པའི་རིན་ཐང་ལ་སྦྱར་བའི། །ངོ་མཚར་བཀའ་དྲིན་དྲན་པའི་དད་གསུམ་བློས། །དངོས་འབྱོར་མཎྜལ་ཕྲ་མོའི་དགའ་སྟོན་སྟོབ། །དེ་ལྟར་མཚོ་བྱུང་མའི་རྒྱུད་མངས་ལས་འཕོས་པའི་བརྗོད་པ་ཉུང་ངུའི་མདུན་བདར་ཏེ། །སྐབས་སུ་བབས་པའི་གླེང་བ་ནི། །གང་ལ་ལྷག་པར་གནས་པའི་བྱ་བའི་རྟེན་གྱི་དངོས་པོ་གུས་ལྡན་པ་ཁོ་བོ་ཅག་གིས་ཡིད་ཅན་ཐམས་ཅད་བྱང་ཆུབ་སྙིང་པོ་ལ་འགོད་པའི་བསམ་སྦྱོར་འབའ་ཞིག་གིས་ཀུན་ནས་བསླངས་ཏེ། །སྒྱུ་མའི་ནོར་རྫས་ཅུང་ཟད་གཅིག་མཆིས་པ་རྣམས་སྤྱི ལས་སྙིང་པོ་བླང་བའི་ཕྱིར། བཟོ་གནས་ཀྱི་རིག་པར་རྣམ་དཔྱོད་མཆོག་ཏུ་ཡངས་པ་དག་ལ་དྭང་བས་ཆེད་དུ་བསྐུལ་ཏེ། བསྐལ་བཟང་འདིར་སྐུ་གསུང་ཐུགས་རྟེན་དམིགས་བསལ་གང་ཡིན་ཁ་བསྒྱུར་བྱ། རྣམ་འདྲེན་བཞི་པའི་
མཚན་དཔེའི་ཞལ་སྐྱིན་གསེར་སྦྱངས་ཞུན་མ་ལས་གྲུབ་པ་རྒྱུད་སྡེ་རིན་པོ་ཆེ་ནས་ཉེ་བར་བཤད་པའི་ཕྱག་ཚད་རྣམས་ལེགས་པར་ཚང་བ་སོགས་ངོ་མཚར་མིག་གི་བདུད་རྩིར་བསྐྲུན་པ་དང་ཆབ་གཅིག་གང་གིས་རབ་ཏུ་གནས་པའི་སློབ་དཔོན། ཕྱི་ལྟར་ན་ཡང་དག་པར་བླངས་པའི་ཁྲིམས་ཀྱིས་རྒྱུད་ཉེ་བར་བསྡམས་ཤིང་བརྟན་མཁས་ཀྱི་ཡོན་ཏན་མཐའ་དག་གིས་མཛེས་པའི་བྱང་ཆུབ་སེམས་དཔའི་དགེ་སློང་ཆེན་པོ། ནང་ལྟར་ན་ཕྱི་ནང་གི་དེ་ཉིད་བཅུ་ལ་སོགས་པ་རྡོ་རྗེ་འཛིན་པའི་ལས་རབ་འབྱམས་གང་ལའང་ཐོགས་པ་མེད་པ་དཔལ་གསང་བའི་བདག་པོ་ལྟ་བུ། གསང་བ་ལྟར་ན་གདན་གསུམ་ཚང་བའི་དཀྱིལ་འཁོར་གྱི་ཟློ འཁོར་ལོའི་གཙོ་བོར་བཞུགས་པའི་ཀུན་མཁྱེན་ཡེ་ཤེས་ཕུང་པོའི་བདག་ཉིད་ཅན་རྗེ་བཙུན་བླ་མ་དམ་པ་གང་གི་ཞལ་སྔ་ནས་ཀྱི་དབུས་རིག་གྲོལ་གྱི་ཡོན་ཏན་བརྒྱད་དང་ལྡན་པའི་འཕགས་ཚོགས་འདུས་པ་རྒྱ་མཚོས། འདི་ལྟར་ཀྲི་ཡཱ་ས་མུཙྪ་དང་། རབ་གནས་ཀྱི་རྒྱུད་སོགས་ལས་བཤད་པའི་ལོ་ཟླ་ཞག་དུས་གཟའ་སྐར་གྱི་འཕྲོད་སྦྱོར་སོགས་ཕུན་སུམ་ཚོགས་པའི་དུས་སུ། རིན་ཆེན་འབར་བ་ལས། གནས་ནི་ཡིད་འོང་འདུ་འཛི་སོགས། །སྐྱོན་མེད་རྣམ་མཛེས་བླ་གབ་ཅན། །ཞེས་སོགས་ཀྱི་ཁྱད་ཆོས་དང་མཚན་ཉིད་ལེགས་པར་ཚང་བར། དཀྱིལ་འཁོར་དང་། སྦྱིན་སྲེག་དང་། རབ་ཏུ་གནས་པ་རྣམས་དང་འབྲེལ་བའི་
དགོས་པའི་ཡོ་བྱད་མ་ཚང་བ་མེད་པར་བསགས་ཏེ། ཚུལ་ཇི་ལྟར་ན། དཔལ་དམ་པ་དང་པོའི་སངས་རྒྱས་ལས། རང་ལུས་ཡེ་ཤེས་རྣམ་པར་དག་ལ་རྡོ་རྗེ་གསུམ་དང་སྔགས་དང་བཅས་པའི་ཕུང་པོ་ཁམས་ལ་སོགས་པ་ཀུན། །ལྷ་རྣམས་ཀྱི་ནི་རང་གི་སྙིང་གའི་པདྨར་ས་བོན་རང་རང་རིམ་པས་འགོད་པར་བྱ། །ས་བོན་བཀོད་ནས་རབ་ཏུ་གནས་པར་འགྱུར་ཏེ་མི་ཡི་བདག་པོ་མཆོད་རྟེན་སྐུ་གཟུགས་སོགས་ལའང་། །ཞེས་སོགས་ཀྱིས་མཚོན་རྒྱུད་སྡེ་རིན་པོ་ཆེ་རྣམས་ནས་ལན་གཅིག་མ་ཡིན་པར་བསྟན་པ་བཞིན། འཕགས་བོད་ཀྱི་པཎ་གྲུབ་ཚད་ལྡན་རྣམས་ཀྱིས་བཀྲལ་ཞིང་ཐུགས་ཉམས་སུ་བསྟར་བའི་རྗེས་སུ་འབྲངས་ཏེ་སྦྱོར་དངོས་རྗེས་གསུམ་གྱི་ཆོ་གའི་ཡན་ལག་ཕྲ་མོ་ཚུན་ཆད་ཉམས་པ་མེད་པའི་སྒོ་ནས་རབ་ཏུ་གནས་ཤིང་མངའ་གསོལ་པའི་བྱ་བས་ལེགས་བྲིས་ཀྱི་དབང་པོ་དང་། མི་ཡི་བདག་པོ་དང་། གདེངས་ཅན་གྱི་དབང་པོ་རྣམས་དང་བཅས་པའི་འཇིག་རྟེན་གསུམ་གྱི་སྐྱེ་འགྲོ་མ་ལུས་པས་མཆོད་པའི་འོས་སུ་མཛད་པའི་ཚེ་ན། ཇི་སྐད་དུ་དཔལ་དུས་ཀྱི་འཁོར་ལོ་ལས། ཅོད་པན་དར་དཔྱངས་དག་དང་དོ་ཤལ་གདུ་ཙྩ བུ་དང་ནི་དེ་བཞིན་སྐ་རགས་རྣ་ཆ་ལ་སོགས་པ། །སློབ་དཔོན་ལ་ནི་རབ་ཏུ་སྦྱིན་བྱར་འགྱུར་ཏེ་མི་ཡི་བདག་པོ་ཡོན་ཡང་བདག་ཉིད་ནུས་པས་སོ། །ཞེས་དང་། རབ་རྒྱུད་ལས། གླང་པོ་རྟ་དང་ཤིང་རྟ་ནོར། །
ཡོན་གྱི་དམ་པ་དབུལ་བར་བྱ། །དེ་ནས་དེ་ལ་ནན་ཏན་གྱིས། །ལོངས་སྤྱོད་གཡོ་བ་དབུལ་བར་བྱ། །གལ་ཏེ་ལྷ་ཉིད་དགྱེས་འདོད་ན། །གུས་པས་བླ་མ་མཉེས་བྱ་ཞིང་། །དེ་ལྟར་རྣམ་པ་ཐམས་ཅད་དུ། །བླ་མ་ཡང་དག་མཉེས་པར་བྱ། །ཞེས་སོགས་མཐའ་ཡས་པར་བསྟན་པ་ལ་རྗེས་སུ་དཔག་སྟེ། དངོས་འབྱོར་གྱི་བདོག་པ་ཕྲ་མོ་འདིས་མཚོན་དུས་གསུམ་གྱི་ལུས་ལོངས་སྤྱོད་དགེ་རྩ་དང་བཅས་པ་འཕགས་པ་ཀུན་ཏུ་བཟང་པོའི་མཆོད་སྤྲིན་རྒྱ་མཚོར་དད་པས་སྤྲུལ་ཏེ་འབུལ་བའི་མཎྜལ་མཚོན་བྱེད་དུ་ཞེས་སོགས་ནས་འདིར་འབུལ་ཚན་རྣམས་བྲིས་མཐར། ཞབས་བརྟན་བསྔོ་སྨོན་ཤིས་བརྗོད་སོགས་ཇི་ལྟར་རིགས་པས་སྦྱར་བར་བྱའོ། །ཁྲི་འདོན་མངའ་གསོལ་ལྟ་བུའི་ལེགས་འབུལ་གྱི་ཚེ། གོང་རྒྱན་དང་འབེབས་ཞུས་སོགས་སྔ་མ་རྣམས་ལས་བླངས་པའམ། ཡང་ན། ཤྲཱི་བི་ཛ་ཡནྟ། དགེ་མཚན་བྱེ་བ་ཕྲག་བརྒྱས་མངོན་གཏམས་ཡོན་ཏན་ཡིད་བཞིན་འབྱུང་གནས་ཆེ། །དྲན་པ་ཙམ་གྱིས་རྨོངས་པའི་འཇིགས་འཕྲོག་ཞི་བསིལ་བདུད་རྩི་སྦྱིན་པ་ལ། །གྲགས་པའི་རྔ་ཡབ་ཐ་གྲུར་གཡོ་བར་ཡིད་ཅན་རྒྱ་མཚོའི་དཔལ་གྱུར་པའི། །ཞབས་སེན་སྲིད་ཞིའི་ཐོད་ཀོས་བཏུད་བྱས་ནོར་བུའི་བ་གམ་གཡོ་བའི་དྲུང་། །ཞེས་སམ། ཤྲཱི་སྭསྟི་སིདྡྷནྟུ། ཚངས་སོགས་ཆེ་དགུའི་འདར་ལྡན་ཐོར་ཚུགས་ཀྱིས། །ཞབས་སེན་ནོར་བུའི་མེ་ལོང་ཕྱིས་པའི་
ངོགས། །རྨད་བྱུང་དགེ་མཚན་བརྒྱ་ཕྲག་སྣང་བའི་དཔྱིད། །ཕྱོགས་ལས་རྣམ་པར་རྒྱལ་བའི་ཉེ་དྲུང་དུ། །ཞེས་སམ། ཤྲཱི་ཛཱི་བནྟུ། །དཔལ་ལྡན་རྒྱལ་བ་སྲས་བཅས་ཐུགས་རྗེའི་གར། །ཡེ་ཤེས་ཕུང་། པོར་མངོན་པར་སྣང་བའི་གཟུགས། །ལྷར་བཅས་ཀུན་གྱི་གཙུག་གིས་ཉེར་བསྟེན་པའི། །ཞབས་སྟེགས་པདྨོ་སར་པའི་ཉེ་དྲུང་དུ། །ཞེས་སམ། ཨོཾ་སྭསྟི་ཀུནྡནྟུ། །གཟོད་ནས་རྟག་པ་དམ་པའི་ཆོས་ཉིད་ལ། །ཤིན་ཏུ་བརྩེ་བའི་ཕྱག་གིས་ཉེར་འཁྱུད་ཀྱང་། །སྙིང་རྗེའི་སྒྱུ་འཕྲུལ་རོལ་མོ་མི་འགོག་པའི། །ཞབས་པད་གདོང་ལྔས་བསྟེན་པ་ག་ལ་བར། །ཞེས་སམ། སཱསྟི་བི་ཛ་ཡནྟུ། རྡུལ་བྲལ་ཆོས་དབྱིངས་ཆུ་གཏེར་ཆེ། །སྙིང་རྗེའི་ས་བརྟོལ་གྱིས་བསྲུབས་པས། །མཚན་དཔེའི་ཟླ་ཤེལ་དར་བབས་པའི། །ཞབས་སྟེགས་ལྷ་བརྒྱའི་ཅོད་པན་དྲུང་། །ཞེས་པ་ལྟ་བུའི་འབེབས་འོག་ནས། །འདི་ན་ཚངས་དབང་གཙུག་གི་རིན་ཆེན་རྣམ་པར་བཞུ་བའི་དོགས་པ་ཅན། །སྤྲིན་སྔོན་ཆུན་པོའི་གོམ་སྟབས་མཐོང་ཚེ་མདོངས་མཐའ་དགའ་བའི་ཟློས་གར་ལྟར། །བསྐལ་མང་བསོད་ནམས་ཟོང་གིས་ཉེར་ཐོབ་ཁྱོད་ཞབས་ལེགས་བྱས་དོ་ཀེར་རྩེར། །མངོན་པར་དབང་བསྐུར་ཤིས་པ་བསྒྲུབས་ཚེ་དད་སྤྲོའི་བརྗོད་པ་འདི་སྐད་དབྱེ། །ཞེས་སམ། རྡུལ་སྙེད་ལུས་ཀྱི་ཆུ་བ་ལྡེམས་པའི་ཕང་། །སོར་བཅུའི་མེ་ཏོག་སྤྱི་བོར་ཟླུམ་དང་བཅས། །རྣམ་གསུམ་དད་པའི་
སྦྲང་རྩིའི་བརྟུལ་ཞུགས་ཅན། །གང་དེའི་མགྲིན་པའི་རྫ་རྔ་འདི་སྐད་འཁྲོལ། །ཞེས་སམ། བསྔགས་འོས་ཡོན་ཏན་ཡི་གེའི་དོ་ཤལ་གྱིས། །ཕྱོགས་ཀྱི་བུ་མོའི་འགྲམ་པར་རྒྱན་མཐོང་བས། །མི་ཕྱེད་དད་གུས་མགྲིན་པ་མཐོར་བཏེགས་ནས། །དགེ་ལེགས་ཤིས་པའི་བརྗོད་པ་འདི་སྐད་གླེངས། །ཞེས་སམ། མི་ཕྱེད་གུས་པའི་ཟླ་ཟེར་གྱིས་རེག་པས། །ངག་ཚིག་ཀུ་མུད་དགོད་པའི་འཛུམ་དཀར་ལས། །ཞུ་གསོལ་སྤྱི སྦྲང་རྩིའི་དོགས་པ་གཡོ་དང་བཅས། །ཡེ་ཤེས་གཟིགས་པའི་འབབས་སྟེགས་མཛེས་པར་བྱ། །ཞེས་སམ། ཇི་ལྟར་ཉིན་མོའི་ཐིགས་པ་ཡིས། །ཉེ་བར་ཕྱེ་བའི་པདྨོ་བཞིན། །དད་གསུམ་མཆུ་སྒྲོས་གཡོ་བ་ལས། །ཞུ་གསོལ་གུས་པའི་རྒྱུད་མངས་འཁྲོལ། །ཞེས་སོགས་གང་འོས་ཀྱི་མཐར། །ལོག་རྟོག་ར་རིས་གཞར་ཡང་རིང་བཏང་སྐལ་བཟང་དད་པའི་མེ་ལོང་དུ། །རྨད་བྱུང་དམ་པའི་ཡོན་ཏན་གཟུགས་བརྙན་འགོག་པ་མེད་པ་རྒྱུ་བ་ཡིས། །གྲགས་སྙན་འབིགས་བྱེད་རླུང་གི་རྩེ་དགས་ལྷར་བཅས་སྲིད་པའི་ཁམས་འདི་ཡང་། །དགེ་མཚན་སྣང་བ་བརྒྱ་ཕྲག་འབར་བཞིན་ཕན་བདེའི་སིམ་པ་ཅིར་ཡང་ཐོབ། །དེ་ཚེ་མཚན་བཟང་མིག་གི་བདུད་རྩི་ངོ་མཚར་སྣང་བ་ལྷམ་མེ་བས། །བྲལ་སྨིན་ལམ་བདེན་རྒྱལ་རྔ་བརྡུངས་ནས་འགྲོ་རྣམས་ཐར་པའི་སར་བཀོད་ཅིང་། །ཡེ་ཤེས་ཕུང་པོ་གཞལ་དུ་མེད་པ་གཏིང་མཐའ་བྲལ་བར་སྙོམས་
འཇུག་པའི། །རྣམ་ཐར་མཐའ་ཀླས་ཚངས་པའི་བློས་ཀྱང་རྫོགས་པར་འདྲེན་པའི་གོ་སྐབས་ཅི། །ཁྱད་པར་སྲིད་ཞིའི་ཐོར་ཚུགས་ཀྱིས་དུད་ཆོས་ཀྱི་རྒྱལ་ཐབས་ཆེན་པོ་ལ། །ཞབས་མཐིལ་འཁོར་ལོའི་རེ་ཁཱ་བཀོད་ཚེ་སྲས་བཅས་འདྲེན་པ་ཐམས་ཅད་ཀྱང་། །བསྔགས་པའི་མེ་ཏོག་ཆལ་ཆིལ་བསྙིལ་བས་ཕྱོགས་ཀྱི་ཁོར་ཡུག་དཀྲིགས་གྱུར་ན། །ལེགས་བྲིས་བཅས་པའི་ཡིད་ཅན་སུ་ཞིག་གུས་པའི་ཐལ་མོ་སྦྱོར་མི་ཀླུ་བྱེད། །དེ་སླད་བྱང་ཆུབ་སྙིང་པོའི་བར་དུ་ཐུགས་རྗེའི་བརླན་གྱིས་མི་བཏང་ཕྱིར། །མི་ཕྱེད་དད་གསུམ་ག་བུར་རྡུལ་གྱིས་ཡིད་རབ་མྱོས་པའི་ཀུ་མུད་དཱས། །ཡིད་སྤྲུལ་མཎྜལ་རྒྱ་ཆེར་བཀོད་པས་ཡེ་ཤེས་གཟིགས་པ་མཛེས་བྱས་ཏེ། །དངོས་འབྱོར་མཆོད་སྤྲིན་སྦྲང་རྩིའི་ཐིག་པ་ཅུང་ཟད་གཡོ་བས་བསྙེན་བཀུར་བགྱི། །ཞེས་སམ། མགོན་ཁྱོད་གཟོད་ནས་གྲུབ་པའི་རྒྱལ་ཐབས་ཆེར། །རྣམ་གྲོལ་སྐུ་བཞིའི་རིན་ཆེན་སྔོན་བརྙེས་ཀྱང་། །ཡིད་ཅན་སྲིད་པའི་ཆུ་གཏེར་ལས་གདོན་ཕྱིར། །རྨད་བྱུང་ཐུགས་རྗེའི་སྒྱུ་འཕྲུལ་ཅིར་ཡང་སྟོན། །ཁྱད་པར་དེང་འདིར་མཚན་ བཟང་ཆུ ་ཤེལ་དབང་། །མོས་ལྡན་ཡིད་མཁར་ཤར་བའི་དེ་མ་ཐག །ཡོན་ཏན་བདུད་རྩིའི་དོ་ཤལ་བརྒྱ་ཕྲག་གི །སྣང་བ་དམ་པས་འཇིག་རྟེན་མཛེས་པར་བྱས། །དེ་ཚེ་ཞབས་སེན་བནྡྷ་ཛཱི་བ་ཀ །རྣམ་གྲོལ་ཆོས་ཀྱི་ཁྲི་ལ་མངའ་གསོལ་བར། །དད་སྤྲོའི་དགའ་སྟོན་ཉུང་ངུའི་མེ། །
ཏོག་གིས། །སྐལ་པ་བཟང་པོའི་ཤིས་པ་དེང་འདིར་བསྒྲུབས། །ཞེས་སམ། གང་ཁྱོད་ཚོགས་ཟུང་བརྒྱ་བྱིན་སོར་རྩེ་ཡིས། །རྣམ་པར་བྲིས་པའི་མཚན་བཟང་རི་དྭགས་ཀྱིས། །ཉེར་འཁྱུད་བྱིན་རླབས་བདུད་རྩིའི་འོད་སྣང་ཅན། །སྐལ་བཟང་མོས་པའི་རི་དབང་རྩེ་མོར་འཛེགས། །ཁྱད་པར་རིགས་ལས་ཐོབ་པའི་བསྔགས་འོས་ཀྱིས། །རྣམ་ཐར་རི་མོ་བསུབ་ཏུ་མེད་པ་གང་། །དད་གསུམ་བཞིན་གྱི་སྣོད་དུ་འཆར་བའི་མོད། །སྔོན་མེད་ངོ་མཚར་ལྟད་མོར་རིང་ཞིག་གཡེངས། །དེ་ཚེ་ལེགས་བྲིས་གདེངས་ཅན་བདག་པོ་སོགས། །ཆེ་དགུའི་རལ་ཁུར་སྣུམ་པོས་བརླངས་བྱས་པའི། །ཆོས་ཀྱི་རྒྱལ་ཐབས་ཆེན་པོར་དབང་བསྐུར་བས། །དགེ་ལེགས་ཤིས་པའི་མཆོད་སྤྲིན་ཅུང་ཟད་སྟོབ། །ཞེས་སམ། འདི་ན་བྱང་ཆུབ་སྙིང་པོའི་བདུད་རྩིའི་བཅུད། །བླ་མེད་ཐར་པའི་སྲོག་ཏུ་སོང་བ་ལས། །རྡོ་རྗེའི་རྣལ་འབྱོར་ཡོངས་སུ་གྲུབ་པའི་དཔྱིད། །གཞན་ལ་ཕན་པའི་གར་དུ་ཟློས་པ་གང་། །ཇི་ལྟར་འདམ་ལས་སྐྱེས་པའི་པདྨོ་ཡང་། །དག་པའི་ཁ་དོག་བརྒྱ་ཕྲག་འཆང་བ་ལྟར། །སྲིད་པར་རྗེས་སུ་ཆགས་པའི་སྒྱུ་ཐབས་ཀྱིས། །བྲལ་སྨིན་ཡོན་ཏན་མཐའ་དག་བདག་གིར་མཛད། །དེ་ཚེ་སྲས་དང་བཅས་པའི་རྒྱལ་ཀུན་གྱིས། །རྨད་བྱུང་ཆོས་ཀྱི་ཁྲི་ལ་མངའ་གསོལ་བའི། །དགེ་མཚན་ཤིས་པའི་སྣང་བ་འབྱམས་ཀླས་པར། །དད་སྤྲོའི་མཆོད་སྤྲིན་ཕྲ་
མོའི་དགའ་སྟོན་སྟོབ། །ཞེས་སམ། མགོན་ཁྱོད་གཟོད་ནས་རྣམ་གྲོལ་བའི། །ཡེ་ཤེས་ཕ་རོལ་ཕྱིན་བརྙེས་ཀྱང་། །ཐབས་མཁས་མཛད་པའི་གཞན་དབང་གིས། །ངོ་མཚར་ཟློས་གར་ཅིར་ཡང་སྟོན། །ཁྱད་པར་དེང་འདིར་མོས་ལྡན་གྱིས། །ཡིད་ལ་བདུད་རྩིའི་དཔལ་སྟེར་བའི། །མཚན་དཔེའི་དཀྱིལ་འཁོར་སྣང་བ་དང་། །མཉམ་དུ་བསྔགས་འོས་ཆ་ཤས་རྫོགས། །དེ་སླད་སྲིད་ན་མངོན་མཐོ་བའི། །ཀ ཆོས་ཀྱི་རྒྱལ་ཐབས་ལ་འཛེགས་ཚེ། །ཤིས་པའི་སྒོ་འཕར་དབྱེ་བའི་ཕྱིར། །དད་སྤྲོའི་མཎྜལ་སྟོབ་ལ་ཕྱོགས། །ཞེས་པ་ལྟ་བུས་མཚོན་ཇི་ལྟར་རིགས་པ་སྔོན་དུ་འགྲོ་བས། དེ་ལྟར་ཚངས་པའི་སྲས་མོའི་རྒྱུད་མངས་ལ་ཅུང་ཟད་རེག་པའི་བརྗོད་པ་ཉུང་ངུས་མདུན་བསུས་ཏེ། །སྐབས་སུ་བབས་པའི་གླེང་པར་བྱ་བ་ནི། །འདི་ལྟར་ལྷ་དང་བཅས་པའི་འགྲོ་བ་ཀུན་གྱི། རྟེན་དང་། གླིང་དང་། དཔུང་གཉེན་གཅིག་པུར་གྱུར་པའི་སྐྱོབ་པ་ཁྱོད་ནི། །ཐོག་མ་མ་མཆིས་པའི་དུས་ནས་ཟད་པ་དང་མི་སྐྱེ་ཤེས་པའི་ཡེ་ཤེས་ཀྱི་བདུད་རྩིས་ཐུགས་ཀྱི་དཔལ་བེའུ་ཡོངས་སུ་གཏམས་ཏེ། བྱང་ཆུབ་སྙིང་པོའི་གོ་འཕང་ཕུན་སུམ་ཚོགས་པ་བརྙེས་སུ་ཟིན་ཀྱང་། སྨོན་ལམ་དང་སྙིང་རྗེའི་འཕེན་པ་ཁོ་ནས་ཡང་སྲིད་ཀུན་ཏུ་ཐབས་མཁས་ཀྱི་སྤྱོད་པ་མཐའ་ཀླས་པས་ཡིད་ཅན་ཐམས་ཅད་མངོན་མཐོ་དང་ངེས་ལེགས་ཀྱི་ལམ་ལ་དཀྲི་བར་མཛད་པ་ལས།
དེང་གི་ཆར་དགེ་ཞིང་ཤིས་པའི་ལེགས་བྱས་ཀྱི་སྒོ་འཕར་བརྒྱ་ཕྲག་ཏུ་དབྱེ་བའི་སྐབས་འདིར། རྗེ་བཙུན་བླ་མ་དམ་པ་རིམ་པར་བྱོན་པ་རྣམས་ཀྱིས་བྱིན་གྱིས་བརླབས་པའི་ཆོས་ཀྱི་ཁྲི་མི་འཇིགས་བཞི་དང་ལྡན་པའི་འཕྲོག་བྱེད་ཀྱི་དབང་པོ་དྲེགས་པས་བསྒྱིངས་པའི་དོ་ཀེར་གྱི་རྩེ་ལ་ཞབས་སེན་གྱི་པདྨོ་བཀོད་པས་ཡིད་སྲུབས་ཀྱི་དཔུང་ཚོགས་སྡེ་དང་བཅས་པའི་ཕྱོགས་ལས་རྣམ་པར་རྒྱལ་བའི་གདན་སྲིད་རྩེར་བསྒྲེངས་བ་དང་ཆབ་ཅིག །ཕྱོགས་བཅུ་དུས་བཞིའི་རྣམ་འདྲེན་སྲས་དང་བཅས་པ་རྣམས་ཀྱི་ལེགས་སོའི་བསྔགས་བརྗོད་མེ་ཏོག་མནྡ་རའི་དོ་ཤལ་དུ་གཡོ་བས་དབུགས་དབྱུང་ཤིང་། མངའ་གསོལ་ཏེ། གང་ཞིག་ལེགས་བྲིས་ཀྱི་དབང་པོ་དང་། །གདེངས་ཅན་གྱི་བདག་པོ་དང་། ནོར་འཛིན་ཡངས་པའི་ཁྱོན་ལ་སྟོབས་ཀྱི་འཁོར་ལོས་སྒྱུར་བ་རྣམས་ཀྱིས་མཚོན་མཆོག་དམན་བར་མའི་ཡིད་ཅན་རྒྱ་མཚོའི་རྡུལ་རྙེད་ཀྱི་བསླུ་བ་མེད་པའི་སྐྱབས་སུ་ངེས་པ་རྙེད་པས་ཡིད་དྲངས་ཏེ། ཞབས་སེན་གྱི་ནོར་བུ་སྤྱི་བོར་བསྙེན་ནས་གནས་སྐབས་དང་མཐར་ཐུག་གི་ཕན་བདེའི་དགའ་སྟོན་གཏན་པ་མེད་པར་ལོངས་སུ་སྤྱད་པའི་བཀའ་དྲིན་དང་ངོ་མཚར་ནི་སོ་སོ་སྐྱེ་བོའི་བློ་ཡི་ར་བ་ལས་རིང་དུ་བརྒལ་བའི་ཕྱིར་སྟོང་གསུམ་བཻཌཱུརླས་བསྐངས་ཀྱང་གཞལ་བར་ལྟ་ག་ལ། །དེ་ལྟ་ནའང་དངོས་པོའི་བདོག་པ་ཅུང་ཟད་འདིས་མཚོན་རང་གཞན་གྱི་རྒྱུད་ན་དུས་
གསུམ་དུ་བསགས་པའི་ལུས་ལོངས་སྤྱོད་དགེ་བའི་རྩ་བ་དང་བཅས་པ་འཕགས་པ་ཀུན་ཏུ་བཟང་པོའི་མཆོད་སྤྲིན་དུ་དད་པས་སྤྲུལ་ཏེ་འབུལ་བའི་མཎྜལ་མཚོན་བྱེད་དུ། ཐོག་མར་དྲི་མ་མེད་པའི་སྙིང་རྗེ་ཆེན་པོའི་འཇུག་པས་གཞན་ལ་ཕན་པར་དགོངས་པའི་ཐུགས་བསྐྱེད་ཡལ་བར་མི་འདོར་བའི་རྟེན་འབྱུང་དུ་ལྷ་རྫས་ཀྱི་ཝསྡུ་ཟླ་བ་ཞུན་མའི་མདོག་ཅན་དཀྱུས་སུ་རིང་བ། གང་སྐུ་མཚན་དཔེའི་ཕུང་པོ་ཞིང་ཁམས་འདི་ཁོ་ན་ལས་གཡོ་བ་མེད་པར་བསྐལ་པ་རྒྱ་མཚོར་བརྟན་པར་བཞུགས་པའི་དགེ་མཚན་དུ་རྒྱལ་བ་ཚེ་མཐའ་ཡས་པའི་སྐུ་བརྙན་འཆི་མེད་མཆོག་སྦྱིན། གང་གསུང་མི་ཤིགས་ནཱ་དའི་སྒྲ་དབྱངས་ཀྱིས་ཟབ་པ་དང་རྒྱ་ཆེ་བའི་ཞི་བསིལ་གྱི་བདུད་རྩི་རྒྱུན་ཆད་མེད་པ་སྩོལ་བའི་རྟེན་འབྱུང་དུ་མདོ་སྡེ་བསྐལ་པ་བཟང་པོའི་པུསྟ་ཀཿ གང་ཐུགས་རྡུལ་དང་ཤེས་བྱའི་ཡུལ་ལས་འདས་པའི་ཡེ་ཤེས་ཆེན་པོའི་ཐིག་ལེར་རྒྱུ་དང་མི་རྒྱུའི་དངོས་པོ་ཐམས་ཅད་གཅིག་ཏུ་བསྡམས་པའི་བརྡར་བཀའ་གདམས་མཆོད་རྟེན་པད་སྤུངས་རྙིང་མ། ཞེས་པ་ལ་སོགས་པའི་འབུལ་ཚན་རྣམས་རིམ་པར་བཀོད་པའི་མཐར། སླར་ཡང་ཛམ་བུའི་ལྗོན་པས་ཉེ་བར་མཚན་པའི་ལྗོངས་འདིར་ཕྲིན་ལས་ཀྱི་འཇུག་པ་དཀར་འཇམ་ཡུག་གཅིག་ཏུ་བརྡལ་བའི་རྟེན་འབྱུང་དུ་མཐའ་རྟེན་རས་དཀར་ཡུག་བཅས་རྣམ་གྲངས་བརྒྱ་ཕྲག་གསུམ་ལ་ཉག་མ་གསུམ་གྱི་ལྷག་པ་
འབུལ་ལམ་ཞུས་པས་བརྩེ་ཆེན་ཡེ་ཤེས་ཀྱི་གཟིགས་པས་རྗེས་སུ་དགོངས་ཏེ་ཉེ་བར་བཞེས་པ་དང་། གུས་ལྡན་པ་ཁོ་བོ་ཅག་གིས་མཚོན་མཐའ་ཀླས་པའི་འགྲོ་བ་ཀུན་གྱི་ཆེད་དུ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ངེས་པ་ལྔ་ལྡན་གྱི་རང་བཞིན་ཆེན་པོར་འཚོ་ཞིང་གཞེས་ལ་ཆོས་ཀྱང་སྟོན་པ་ནས། བྱང་ཆུབ་སྙིང་པོའི་བར་དུ་ཐུགས་རྗེའི་ཕྱག་གིས་མི་འདོར་བ་གསོལ་བ་འདེབས་པ་ལགས། ཞེས་པ་ལྟ་བུ་རྒྱས་བསྡུས་སྐབས་དང་སྦྱར་ཏེ་བཀོད་པའི་མཐར། སྔར་སྨོས་པའི་རྟེན་བཞུགས་གང་འོས་སམ། ཡང་ན། སླར་ཡང་སྨྲས་པ། གཟུང་འཛིན་རྩ་ཡི་མདུད་པ་ཇི་སྙེད་རྡོ་རྗེ་དྷཱུ་ཏིར་བསྡམས་པའི་སྐུ། །ཟླ་ཉིའི་རྒྱུ་བ་སྒྲ་གཅན་གྱིས་ཟོས་བྱེད་རྩོལ་བརྗོད་པ་བྲལ་བའི་གསུང་། ཤེས་དང་ཤེས་བྱ་རོ་གཅིག་ཉིད་གྱུར་འོད་གསལ་རྣམ་ཀུན་མཆོག་ལྡན་ཐུགས། །མི་ཟད་རྒྱན་གྱི་འཁོར་ལོའི་རོལ་མོ་བསྐལ་པ་རྒྱ་མཚོར་འབར་གྱུར་ཅིག །ཚད་མེད་སྙིང་རྗེའི་ཐུར་མ་བརྒྱས་བཏེགས་བྱིན་རླབས་གདུགས་དཀར་གཡོ་བའི་གྲིབ། །བདག་སོགས་སྲིད་པའི་ཚ་གདུང་གིས་ཉེན་བྱང་ཆུབ་བར་དུ་དབུགས་དབྱུང་བས། །ཕན་བདེའི་ངལ་བསོ་ཅིར་ཡང་ཐོབ་ལས་བསྐལ་བཟང་ཨུཏྤལ་དར་བབས་པའི། །རྨད་བྱུང་མཚར་སྡུག་ཆོ་ག་རྫོགས་པས་ཡིད་སྲུབས་དཔུང་བཅས་འཆིང་བར་མཛོད། །གང་ཞིག་སྐྱབས་སུ་ཐོབ་པ་ཙམ་ནས་གནས་སྐབས་མཐར་ཐུག་
བསམ་པའི་དངོས། །ཡིད་བཞིན་འཇོ་བའི་དགའ་སྟོན་སྦྱིན་ལ་ནོར་བུའི་རེག་བྱས་མཚོན་མིན་པའི། །མཆོག་གསུམ་རྒྱ་མཚོ་འདུས་པའི་ཞལ་སྐྱིན་མགོན་པོ་ཁྱོད་ཀྱི་ཐུགས་རྗེ་ཡི། །ཕུན་ཚོགས་བཀྲ་ཤིས་སྣང་བ་གསར་པས་སྲིད་ཞིའི་ཁམས་ཀུན་མཛེས་གྱུར་ཅིག །ཛ་ཡ་ཛ་ཡ་སུ་ཛ་ཡ་སརྦ་ཤེ་ཡོ་བྷ་བན། །ཞེས་སམ། གང་ཞིག་སྲིད་དང་ཞི་བའི་ཡོན་ཏན་གྱིས། །ཡོངས་སུ་གཏམས་པའི་གསང་བ་མི་ཟད་པ། །མགོན་ཁྱོད་འཆི་མེད་གྲུབ་པའི་ཁྲི་འཕང་དུ། །རྟག་པ་རྒྱུན་གྱི་འཁོར་ལོར་འཚོ་གཞེས་ཤིང་། །བདག་སོགས་མོས་པའི་ཡིད་ཅན་རྡུལ་སྙེད་ཀུན། །རྣམ་གྲོལ་ཐར་པའི་གོ་འཕང་ལ་བཀོད་པའི། །ཞི་བསིལ་བདུད་རྩིའི་གྲུ་ཆར་དབབ་པ་དང་། །ལྷན་ཅིག་བྱང་ཆུབ་བར་དུ་རྗེས་སུ་ཟུངས། །གང་ཞིག་བསྟེན་ན་འཕྲལ་ཡུན་དགེ་ལེགས་ཀྱི། །འདོད་དགུ་གཅིག་ཆར་འཇོ་བའི་མ་ཎི་ཀཿ མཆོག་གསུམ་བཀྲ་ཤིས་ཉིན་མོའི་སྣང་བ་ཡིས། །བྲན་ལས་དོན་གཉིས་པདྨོར་ཛུམ་གྱུར་ཅིག །སརྦ་དཱ་སུ་ཤེ་ཡོ་དཱི་པཾ་བྷ་བནྟུ། ཞེས་སམ། ཡེ་ཤེས་མེ་དཔུང་འབར་བའི་མདའ་གཅིག་གིས། །ཚུལ་མིན་ཡིད་སྲུབས་སྡེར་བཅས་བསྲེགས་ནས་སླར། །འགྲོ་འདིའི་བསོད་ནམས་མཆོད་སྡོང་དམ་པ་རུ། །ཞབས་སེན་ནོར་བུའི་བ་གམ་རྟག་བརྟན་ཅིང་། །འདི་ན་གུས་པའི་སྐལ་བཟང་པད་དཀར་གྱིས། །ཉེ་བར་མཚན་པའི་ཡིད་ཅན་མཐའ་དག་ཀྱང་། །
ཐུགས་རྗེའི་དཔྱིད་དཔལ་དར་བས་བསྲུང་བ་ལ། །དོན་གཉིས་མཚར་སྡུག་རྫོགས་པའི་བཀའ་དྲིན་སྩོལ། གང་ཞིག་མཚན་ཙམ་ཐོས་པའི་ཟླ་བས་ཀྱང་། །དགེ་མཚན་སྣང་བ་སྟེར་ལ་མི་ངལ་བའི། །མཆོག་གསུམ་བཀྲ་ཤིས་གྲུབ་པའི་ཆོ་ག་ཡིས། །ལྷར་བཅས་དགའ་བའི་དགའ་སྟོན་རྒྱས་གྱུར་ཅིག །སརྦ་དཱ་ལཀཱི་ཀ་ལྱཱ་ཎཾ་ཤུ་བྷ་ལཀྵ་པ་རི་བནྡྷ་ཀུརླནྟུ། ཞེས་སམ། བགྲངས་ཡས་བསྐལ་པར་གོམས་པའི་བྱང་ཆུབ་སེམས། །གཞན་ཕྱིར་བརྩོན་པ་རྨད་བྱུང་གིས་བསྐྲུན་པའི། །གསང་གསུམ་རྟག་པ་རྒྱུན་གྱི་འཁོར་ལོ་རུ། །མི་ཤིགས་རྡོ་རྗེའི་ཆོས་སུ་ཞབས་བརྟན་ཅིང་། །རྨད་བྱུང་ཐུགས་རྗེའི་འོད་རིས་སར་པ་ཡིས། །རྨོངས་པར་གྱུར་པ་རྣམས་ལ་མིག་བྱིན་ནས། །གང་འདུལ་ཐར་པའི་ལམ་མཆོག་སྟོན་པ་ཡི། །དེད་དཔོན་མཚུངས་མེད་དེ་ནི་ཁྱོད་ཀྱིས་མཛོད། །འདི་ན་གུས་པའི་ཡིད་མཁར་འཕོས་ཙམ་གྱིས། །ངེས་ལེགས་གོ་འཕང་རྩེ་མོར་འགོད་མཛད་པའི། །སྐྱབས་གསུམ་བཀྲ་ཤིས་དཔག་བསམ་དབང་པོ་ཡིས། །ལྷར་བཅས་དགེ་མཚན་བསིལ་བ་སྦྱིན་གྱུར་ཅིག །སརྦ་དཱ་དི་གི་ཀཱ་ལ་སུ་ཤུ་བྷ་སྱ་དཱི་པཾ་རོ་ཙནྟུ། ཞེས་སམ། རྒྱལ་བ་ཀུན་དངོས་མགོན་ཁྱོད་ནི། །དམ་ཆོས་མཐའ་ཀླས་ཡོངས་ཀྱི་སྣོད། །དེ་སླད་འཕགས་ཚོགས་རྒྱ་མཚོ་ཡི། །སྤྱི་ཏོར་རྩེ་མོར་ཞབས་བརྟན་ཤིང་། །རྨད་བྱུང་ཐུགས་རྗེའི་རིན་ཆེན་དབྱིག །ཕྱོགས་ལྷུང་
ཁྲལ་བར་སྦྱིན་པ་ཡིས། །སྲིད་གསུམ་ཕན་བདེའི་དགའ་སྟོན་ལ། །ངོམས་མེད་ལོངས་སུ་སྤྱོད་པར་མཛོད། །གང་ལ་བརྟེན་ནས་མི་བསླུ་བའི། །མཆོག་གསུམ་བཀྲ་ཤིས་གདུགས་དཀར་པོའི། །དགེ་མཚན་གྲིབ་མ་སྣུམ་པོ་རུ། །ལྷར་བཅས་དགའ་སྟོན་འཕེལ་གྱུར་ཅིག །སརྦ་དཱ་མང་ག་ལཾ་བྷ་ཡཏྲ། །ཞེས་པ་ལྟ་བུ་སྐབས་དང་བསྟུན་སྟེ་ཇི་ལྟར་འོས་པ་དག་སྦྱར་བར་བྱའོ། ༈ །ཡང་དེ་དག་གི་སྐབས་སུ་མཎྜལ་གྱི་རྣམ་བཤད་ལྟ་བུ་སྦྱར་བར་སྤྲོ་ན། བརྗོད་བྱ་རྒྱས་པ་ནི་གཞན་དུ་ཤེས་པར་བྱ་བ་ལས་ཡི་གེའི་ངལ་བས་སྤྲོ་བར་མ་ནུས་ཤིང་ཤིན་ཏུ་ཉུང་ངུ་ཙམ་ཞིག་བརྗོད་པའི་དབང་དུ་བྱས་ན། གོང་གི་བཤད་པ་ལས། འཕགས་པ་ཀུན་ཏུ་བཟང་པོའི་མཆོད་སྤྲིན་དུ་དད་པས་སྤྲུལ་ཏེ། ཞེས་པའི་མཚམས་འབུལ་བ་ལ། ཐོག་མར་སྐབས་སུ་བབས་པ་ཞིང་ཁམས་ཀྱི་མཆོད་སྤྲིན་མཎྜལ་དབུལ་ཚུལ་ལས་འཕྲོས་པའི་བརྗོད་པ་ཉུང་ངུ་ཞིག་སྙན་དུ་གསོལ་ན་རྣམ་པ་ལྔ་སྟེ། དང་པོ་གང་ལས་བརྩམས་ཏེ་བྱུང་བའི་ཚུལ་གྱི་གླེང་གཞི་ནི། མདོ་སྡེ་བསྐལ་པ་བཟང་པོ་ལས། །བདེར་གཤེགས་སྐྱེས་དབང་འཁོར་ལོས་སྒྱུར་བའི་ཚེ། །དེ་ཚུ་བཞིན་གཤེགས་པ་ཀུན་ཏུ་འོད་དེ་ལ། །གླིང་བཞི་དག་ནི་དབུལ་བར་བྱས་ནས་ཀྱང་། །དང་པོར་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་དང་། འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་
པོ་ལས། །རྒྱལ་པོ་ལེགས་པར་བྱུང་བ་ཛམ་གླིང་དུ། །རིན་ཆེན་ཆར་པ་འབེབས་པ་དེ་མཐོང་ནས། །གླིང་བཞི་རིན་ཆེན་གང་བར་བྱས་ནས་ཀྱང་། །རིན་ཆེན་གཙུག་ཏོར་ཅན་གྱི་བསྟན་ལ་ཕུལ། །ཞེས་དང་། །དཔལ་གསང་བ་འདུས་པའི་རྩ་བའི་རྒྱུད་ལས། །ཞིང་འདི་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀངས་ཏེ། །བསོད་ནམས་འདོད་པས་བསོད་ནམས་ཕྱིར། །ཉིན་རེ་ཤེས་རབ་ཅན་གྱིས་དབུལ། །ཞེས་པ་ལ་སོགས་པས་མཚོན་མདོ་རྒྱུད་བསྟན་བཅོས་ཐམས་ཅད་ལས་ལན་གཅིག་མ་ཡིན་པར་བསྟན་ཅིང་། དེ་ཡང་སྲས་དང་བཅས་པའི་ཕྱོགས་བཅུ་དུས་བཞིའི་རྣམ་འདྲེན་ཐམས་ཅད་གང་གིས་གཤེགས་པའི་ལམ་ལྔར་གྲགས་པ་ལས། འདིར་ཐོས་བསམ་དང་བསོད་ནམས་ཀྱི་ཚོགས་ལ་རྒྱ་ཆེར་སྤྱོད་པས་ཚོགས་ལམ་གྱི་རྣམ་གྲངས་སུ་འདུ་བ་གང་ཞིག་སློབ་པའི་སས་བསྡུས་པའོ།། །།གཉིས་པ་སྒྲ་དོན་། འབྲེལ་པ་ནི། རྒྱུ་ཕ་རོལ་ཏུ་ཕྱིན་པའི་ཐེག་པ་དང་སྦྱར་ན། མཎྜལ་ཞེས་པ་མ་ཌི་རྒྱན་བྱེད་པའི་བྱིངས་དོན་ལས་དྲངས་ཏེ་གཞི་དུས་སུ་ཀུན་རྫོབ་ཀྱི་བདེན་པའི་སྣང་ཚུལ་ལ་གནས་སྐབས་སུ་མི་བསླུ་བའི་ངེས་པ་རྙེད་པས། ལམ་དུས་རྒྱུ་བསོད་ནམས་ཀྱི་ཚོགས་མཐའ་ཀླས་པ་ལ་འབད་པའི་སྟོབས་ཀྱིས། འབྲས་བུའི་དུས་ན་གཞན་དོན་དུ་སྨོན་ལམ་རྟེན་འབྲེལ་གྱི་མཐུ་འགོག་པ་མེད་པས་མཚན་དང་དཔེ་བྱད་ཀྱིས་བརྒྱན་
པའི་གཟུགས་སྐུ་རྣམ་པ་གཉིས་ཐོབ་པའི་ཉེར་ལེན་དུ་གྱུར་པའི་ཕྱིར་འབྲས་མིང་རྒྱུ་ལ་བཏགས་པ་སྟེ། དེ་སྐད་དུའང་། སློབ་དཔོན་ནཱ་ག་རྫུ་ནས། སངས་རྒྱས་རྣམས་ཀྱི་གཟུགས་ཀྱི་སྐུ། །བསོད་ནམས་ཚོགས་ལས་སྐྱེས་པ་སྟེ། །ཞེས་སམ། ཁྱད་པར་འབྲས་བུ་གསང་སྔགས་རྡོ་རྗེ་ཐེག་པ་ལྟར་ན་ཡེ་ཤེས་ཐིག་ལེ་ལས། མ་ནི་ཡིག་འབྲུ་འདབ་མར་བརྗོད། །ཎ་ནི་ཡིག་འབྲུ་ལྟེ་བར་དྲན། །ཌ་ནི་ཡིག་འབྲུ་གེ་སར་ཏེ། །ལ་ནི་ཡིག་འབྲུ་དེ་དེར་བལྟ། ཞེས་པ་ལྟར། ཕྱི་ལྟར་དུ་ཆུ་སྐྱེས་ཀྱི་གེ་སར། ནང་ལྟར་ན་རྡོ་རྗེ་བཙུན་མོའི་མཁའ་དབྱིངས། གསང་བ་ལྟར་ན་ཡུལ་སྟོང་པ་ཉིད་ལ་ཡུལ་ཅན་བདེ་བ་ཆེན་པོའི་ཡེ་ཤེས་ཀྱིས་རོལ་པས་གཟུང་འཛིན་གྱི་འཆིང་བ་མཚུངས་པར་ལྡན་པའི་ས་བོན་དང་བཅས་པ་བཙན་ཐབས་སུ་གྲོལ་ཏེ། ས་བཅུ་ལམ་ལྔའི་ཡོན་ཏན་ཐམས་ཅད་གཅིག་ཅར་དུ་སྨིན་པས་འབྲས་བུ་ཟུང་འཇུག་རྣམ་ཀུན་མཆོག་ལྡན་གྱི་གོ་འཕང་ལ་སྦྱོར་བར་བྱེད་པའི་ཕྱིར་དེ་སྐད་དུ་བརྗོད་ལ། གཞན་ཡང་ཐུན་མོང་དུ། བླ་མ་དང་། ཡི་དམ་གྱི་ལྷ་སོགས་ཞིང་ཁྱད་པར་ཅན་གྱི་མདུན་དུ་རང་གཞན་བསོད་ནམས་ཀྱི་ཚོགས་རྫོགས་པའི་སླད་དུ། དངོས་ཡིད་ཀྱི་མཆོད་སྤྲིན་མཐའ་ཀླས་པ་ཞིག་འབུལ་དུ་ཡོད་པ་ལས། ཐམས་ཅད་ཀྱི་རབ་དང་། མཆོག་དང་། ཕུལ་ཉིད་ཀྱི་ཕྱིར་རྒྱན་ལྟ་བུར་གྱུར་པ་ནི་མཎྜལ་སྟེ། དཀྱིལ་འཁོར་ཞེས་
སུའང་གྲགས་པའི་དཀྱིལ་ནི་དབུས་ཀྱི་ལྷུན་པོ་དང་། འཁོར་ནི་གླིང་བཞི་གླིང་ཕྲན་ལ་སོགས་པ་ཇི་སྙེད་པ་ལའང་བཤད་དུ་ཡོད་དོ།། །།གསུམ་པ་དག་པ་སྦྱོར་བ་ནི་སློབ་དཔོན་ཆེན་པོ་གཉིས་སུ་མེད་པའི་རྡོ་རྗེས། །བ་ལྕི་ཆུ་དང་བཅས་པ་སྦྱིན་པ་སྟེ། །ལེགས་པར་བྱུགས་པ་ཚུལ་ཁྲིམས་བཟོད་པ་ནི། །སྲོག་ཆགས་ཕྲ་མོ་སེལ་བར་བྱེད་པའོ། །བརྩོན་འགྲུས་བྱ་བ་དག་ལ་འཇུག་པ་སྟེ། །བསམ་གཏན་དུས་དེར་རྩེ་གཅིག་བྱེད་པའི་སེམས། །ཤེས་རབ་ཚོགས་སོགས་ལེགས་པར་འབར་བ་ཡིན། །ཞེས་བྱང་ཆུབ་སེམས་དཔའ་ལས་དང་པོ་པ་སེམས་ཐོག་མར་བསྐྱེད་པ་ནས་བཟུང་སྟེ་མཐར་གྱིས་བླ་ན་མེད་པའི་ཡེ་ཤེས་བརྙེས་ཀྱི་བར་དུ་ཇི་ལྟར་སྤྱོད་པར་བྱ་བའི་ངོ་བོ་ནི་ཕ་རོལ་ཏུ་ཕྱིན་པ་དྲུག་སྟེ། དེ་ཉིད་འདིར་དྲི་ཡི་ཐིག་ལེ་བྱུགས་པ་ནས་བཟུང་སྟེ་ཚོམ་བུའི་དཀྱིལ་འཁོར་ཡོངས་སུ་རྫོགས་པའི་བར་ལ་ལེགས་པར་ཚང་བ་ཉིད་དོ།། །།བཞི་པ་ཚུལ་ལམ་རྣམ་པ་ནི། མངོན་པ་མཛོད་ལས། གླིང་བཞི་དང་ནི་ཉི་ཟླ་ཟུང་། །རི་རབ་དང་ནི་འདོད་ལྷར་བཅས། །ཚངས་པའི་འཇིག་རྟེན་སྟོང་ལ་ནི། །སྟོང་གི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་སྟེ། །མཉམ་དུ་འཇིག་ཅིང་འབྱུང་བར་འགྱུར། །ཞེས་པ་ལྟར་གྱི་སྟོང་གསུམ་མི་མཇེད་བྱེ་བ་ཕྲག་བརྒྱ་ཡོངས་སུ་རྫོགས་པའི་ས་
གཞི་ཐམས་ཅད་ཙནྡན་དང་། ཨ་ག་རུ་དང་། ག་བུར་ལ་སོགས་པའི་དྲི་བཟང་པོའི་ཆུས་བྱུགས་ཏེ། ལྷའི་མེ་ཏོག་མན་ར་བ་དང་། པུཎྜ་རཱི་ཀ་དང་། ཨུཏྤལ་དང་། ཨུཏྤལ་ཆེན་པོ་ལ་སོགས་སིལ། མར་བཀྲམས་ཤིང་། ནོར་བུ་རིན་པོ་ཆེ་བཻཌཱུརྱ་དང་། ཨིནྡྲ་ནཱི་ལ་དང་། མརྒད་སོགས་ཀྱིས་མཛེས་པར་བྱས་པའི་གོ་མཚམས་རྣམས་སུ། འབྱོར་པ་དང་རིན་ཐང་གིས་ཁྱད་པར་དུ་བྱས་པའི་རིན་པོ་ཆེའི་རི་བོ། །དཔག་བསམ་གྱི་ལྗོན་ཤིང་། འདོད་པ་འཇོ་བའི་བ་མོ། མ་རྨོས་པའི་ལོ་ཏོག་གི་དགའ་ཚལ་ཏེ་བཞི། མངོན་པ་འབྱུང་བ་སོགས་ནས་བཤད་པའི་འཁོར་ལོས་སྒྱུར་བ་ཆེན་པོ་ལ་འོས་པའི་རིན་པོ་ཆེ་སྣ་བདུན། །གཏེར་ཆེན་པོས་ཡོངས་སུ་གང་བའི་བུམ་པ། སྒེག་སོགས་ཕྱི་ནང་གི་མཆོད་པའི་ལྷ་མོ་བརྒྱད། ཉི་མ་དང་ཟླ་བའི་སྣང་བྱེད། རིན་པོ་ཆེའི་གདུགས་དཀར་པོས་ནམ་མཁའ་ཁྱབ་པར་ཁེབས་པའི་བླ་བྲེ། ཕས་རྒོལ་གྱི་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་རྣམས་དང་། གཞན་ཡང་ལེགས་བྲིས་དང་། གདེངས་ཅན་དང་། མི་ཡི་འགྲོ་བ་དག་གིས་བདག་ཏུ་བཟུང་བ་དང་མ་བཟུང་བའི་དཔལ་དང་འབྱོར་པའི་ཕུང་པོ་ཕུན་སུམ་ཚོགས་པ་མ་ཚང་བ་མེད་པས་ཕྱུར་བུར་བཀང་ཞིང་དེ་ཡང་རྡུལ་ཕྲ་རབ་རེའི་ཁོངས་དེ་ལྟ་བུའི་མཎྜལ་རྡུལ་སྙེད་དུ་སྤྲོ་བས་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་རྣམ་པར་
ཐར་པ་དང་རྗེས་སུ་མཐུན་པ་ཉིད་བྱེད་པ་པོ་རང་གིས་བྱང་དྲངས་པའི་སེམས་ཅན་ཐམས་ཅད་མི་གནས་པའི་བྱང་ཆུབ་དམ་པ་བླ་ན་མེད་པའི་གོ་འཕང་ལ་འགོད་པའི་སླད་དུ་ཕྱོགས་བཅུ་དུས་བཞིའི་མཆོད་འོས་ཐམས་ཅད་གཅིག་ཏུ་འདུས་པའི་མངའ་བདག་རྗེ་བཙུན་བླ་མ་འདིར་འབུལ་ཡུལ་དམིགས་གསལ་གྱི་ཁ་བསྒྱུར་ཇི་ལྟར་འོས་པ་བྱ། དམ་པ་གང་གི་ཞབས་པད་དུ་ཕུལ་ནས། བརྩེ་ཆེན་སྙིང་རྗེའི་གཟིགས་པས་བདག་གིར་མཛད་པར་གསོལ་བ་འདེབས་པ་སྟེ། དེ་སྐད་དུའང་། རྒྱལ་བའི་སྲས་པོ་ཞི་བ་ལྷས། །བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་དོན་དགོངས་པའི་མགོན་ཁྱོད་ཀྱིས། །བདག་གི་དོན་སླད་ཉིད་ཀྱི་མཐུས་བཞེས་ཤིག །ཅེས་གསུངས་པ་ལྟ་བུའོ།། །།ལྔ་པ་ཕན་ཡོན་ནི། སློབ་དཔོན་དཔའ་བོས། །སངས་རྒྱས་ལ་ནི་གང་ཞིག་འདིར། །མཎྜལ་མེ་ཏོག་བཅས་བྱེད་ལ། །འགྲོ་བའི་བདག་པོ་ཚེ་རིང་ཞིང་། །སྣ་ཚོགས་ནད་ཀྱི་འཇིགས་གྲོལ་བ། །གང་ནི་དེ་ཡིས་སྐད་ཅིག་ཐོབ། །ཅེས་དང་། །སྣ་ཚོགས་བསོད་ནམས་ཀྱིས་བརྒྱན་པའི། །ས་གཞི་བྲིས་པ་འབུལ་བྱེད་པ། །ལྷ་ཡི་བདེ་བ་ཐམས་ཅད་དང་། །ལོངས་སྤྱོད་མཆོག་དང་ལྡན་འགྱུར་ཞིང་། །མིར་སྐྱེ་གསེར་ལས་ལྷག་པ་ཡི། ཁ་དོག་དང་ལྡན་མཛེས་པ་དང་། །པདྨའི་མདོག་ལྟར་ཡན་ལག་ཚང་། །
མིག་གི་དཀྱུས་རིང་མཛེས་པར་འགྱུར། །ཞེས་པ་ལ་སོགས་པའི་བརྗོད་བྱ་ཟད་མི་ཤེས་པ་དང་ལྡན་པ་དེ་ལ་ཡང་། གནས་སྐབས་ལག་ཏུ་ལེན་པའི་དབང་དུ། ཚོམ་བུ་ལྔ་པ། བདུན་པ། བཅོ་ལྔ་པ། སོ་བདུན་པ་སོགས་དབྱེ་བསྡུ་ཐ་དད་པ་འབྱུང་བ་ལས་འདིར་ཕྱོགས་ཕྱི་མ་ལྟར་འབུལ་ན། ཞེས་པའི་མཚམས་མཎྜལ་དངོས་དབུལ་ཞིང་། མཐར། དེ་ལྟར་ཡིད་སྤྲུལ་མཎྜལ་གྱི་མཆོད་སྤྲིན་འབུལ་བ་སྔོན་དུ་སོང་ནས། གཉིས་པ་དེ་ཉིད་མཚོན་བྱེད་དངོས་འབྱོར་གྱི་བདོག་པ་ཕྲ་མོ་རྣམས་ཡེ་ཤེས་གཟིགས་པ་དམ་པའི་སྤྱན་ལམ་དུ་བསྟར་བ་ལ། ཐོག་མར་དྲི་མ་མེད་པའི་སོགས་དཀྱུས་ལྟར་སྤྲོ་བར་བྱ་ཞིང་། གལ་ཏེ་དེ་ལས་ཅུང་ཟད་ཞིབ་ཏུ་བཤད་པར་འདོད་ན། གཞན་སྔར་ལྟར་ལ། །བཞི་པ་ཚུལ་ལམ་རྣམ་པ་ནི། ཞེས་པའི་མཚམས། ལྷུན་པོ་གླིང་བཞི་གླིང་ཕྲན་ལྕགས་རི་དང་བཅས་པའི་དབུས་སུ་འབྱོར་པའི་ཁྱད་པར་སྣ་ཚོགས་པས་ཡོངས་སུ་གཏམས་པ་སྟེ་དེ་ཡང་གང་ལ་བརྟེན་པའི་གཞི་རླུང་གིས་དཀྱིལ་འཁོར་སྔོན་པོ་རྔམས་སུ་དཔག་ཚད་ས་ཡ་གཅིག་དང་དྲུག་འབུམ། རྒྱུར་གྲངས་མེད་པ། དེའི་སྟེང་དུ་ཆུའི་དཀྱིལ་འཁོར་དཀར་པོ་དཔངས་སུ་དཔག་ཚད་འབུམ་ཕྲག་བརྒྱད། དེའི་སྟེང་དུ་དབང་ཆེན་གསེར་གྱི་ས་གཞི་སེར་པོ་རྔམས་སུ་དཔག་ཚད་སུམ་འབུམ་ཉི་ཁྲི་གཉིས་ཀའི་ཐད་ཀར་དཔག་ཚད་འབུམ་ཕྲག་བཅུ་གཉིས་དང་སུམ་
སྟོང་བཞི་བརྒྱ་ལྔ་བཅུ། ཁོར་ཡུག་ཏུ་ས་ཡ་གསུམ་དང་དྲུག་འབུམ་ཆིག་ཁྲི་སུམ་བརྒྱ་ཡོད་པའི་མཐར་ལྕགས་ཀྱི་རི་བོ་གྲུ་བཞི་པ་དཔངས་སུ་དཔག་ཚད་སུམ་བརྒྱ་བཅུ་གཉིས་རྒྱང་གྲགས་བཞི་དང་ལྡན་པས་ཡོངས་སུ་བསྐོར་བའི་དབུས་སུ། ས་འཛིན་རྣམས་ཀྱི་མཆོག་ཏུ་གྱུར་པ་ཤར་རིན་པོ་ཆེ་ཀཱན། ལྷོ་བཻཌཱུརྨ། ནུབ་པདྨ་རཱ་ག །བྱང་སུ་བཎྜ་ལས་གྲུབ་པ་འཕངས་སུ་དཔག་ཚད་ཆིག་འབུམ་དྲུག་ཁྲི་ལས་བརྒྱད་ཁྲི་མཚོར་ནུབ་ཅིང་། ལྷག་མ་སྟེང་དུ་འཕགས་པའི་ཕྱེད་མན་ལའང་བང་རིམ་བཞི་ཡོད་པའི་དང་པོར་གནོད་སྦྱིན་ལག་ན་གཞོང་ཐོགས། གཉིས་པར་ཕྲེང་ཐོགས། གསུམ་པར་སྟག་མྱོས། བཞི་པར་རྒྱལ་ཆེན་རིགས་པ་བཞིའི་ལྷ་རྣམས་རང་རང་གི་དཔུང་དང་བཅས་ཏེ་འཁོད་པའི་སྟེང་གི་གཞིར་སུམ་ཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་བལྟ་ན་སྡུག་ཅེས་ཀུན་ནས་གྲུ་བཞིར་སྣང་བའི་ངོས་རེར་དཔག་ཚད་ཉིས་སྟོང་ལྔ་བརྒྱ་རེ། ཁོར་ཡུག་ཏུ་ཁྲི་ཕྲག་གཅིག་ཡོད་ཅིང་། འབྱོར་པ་དང་ལོངས་སྤྱོད་ཀྱི་ཁྱད་པར་བསམ་གྱིས་མི་ཁྱབ་པའི་དབུས་སུ་ལེགས་བྲིས་ཀྱི་དབང་པོ་རང་གི་བསྟི་གནས་རྣམ་པར་རྒྱལ་བའི་ཁང་བཟང་ངོས་རེར་དཔག་ཚད་ཉིས་བརྒྱ་ལྔ་བཅུ་དང་། སྲིད་དུ་ལྟ་ན་སྡུག་ལས་དཔག་ཚད་ཕྱེད་ཀྱི་འཕགས་པ། ཕྱི་རོལ་གྱི་ཕྱོགས་བཞིར་ཚལ་ཆེན་པོ་བཞི། བྱང་ཤར་མཚམས་སུ་འདོད་དགུ་ཐམས་ཅད་འབྱུང་བའི་ལྗོན་ཤིང་ཡོངས་འདུ་ས་
བརྟོལ། །ལྷོ་ནུབ་ཏུ་སྦྱིན་སྐྱེས་ཀྱི་ཚོགས་འདུན་གྲོས་བྱེད་པའི་གནས་ཆོས་བཟང་ལྷའི་མདུན་ས་སོགས་ཏེ་བཀོད་པ་ཕུན་སུམ་ཚོགས་པས་བརྒྱན་པ། དེའི་སྟེང་དུ་དཔག་ཚད་བརྒྱད་ཁྲི་འདས་པའི་ནམ་མཁར་མས་ནས་རིམ་པར་འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་དེ་འདོད་ཁམས་ཀྱི་ལྷའི་གནས་རྣམས་དང་། དེ་ནས་ཀྱང་ཚངས་རིས་སོགས་བསམ་གཏན་བཞིའི་ལྷ་གནས་བཅུ་གཉིས་དང་། མི་ཆེ་བ་སོགས་གཙང་རིགས་ཀྱི་ལྷ་གནས་ལྔ་སྟེ་གཟུགས་ཁམས་གནས་རིགས་བཅུ་བདུན་པོ་རིམ་པ་བཞིན་དུ་གནས་པར་བཤད་ལ། གཞན་དུ་ཏིང་ངེ་འཛིན་གྱི་བྱེ་བྲག་གི་འཕེན་པ་ལས་བྱུང་བའི་ནམ་མཁའ་མཐའ་ཡས་སོགས་གཟུགས་མེད་སྐྱེ་མཆེད་མུ་བཞི་པོའི་གནས་ནི་གོང་འོག་དང་ཕན་ཚུན་མེད་དོ། །དེ་ལྟར་གྱི་ལྷུན་པོའི་ཕྱི་རོལ་ནས་གསེར་གྱི་རི་བདུན་དང་། རོལ་པའི་མཚོ་བདུན་གྱིས་རིམ་པར་བསྐོར་བ་དང་། མཐའི་ལྕགས་རིའི་མཚམས་སུ་བ་ཚ་ཅན་གྱི་མཚོ་ཞེངས་སུ་དཔག་ཚད་སུམ་འབུམ་དང་ཉི་ཁྲི་ཡོད་པའི་ནང་ཁོངས་སུ། ཤར་དུ་ལུས་འཕགས་གླིང་དབྱིབ་ཟླ་གམ་བཅད་ཁ་རི་རབ་ལ་བསྟན་པའི་ངོས་རིང་བ་དཔག་ཚད་ཉིས་སྟོང་དང་། འབུར་ངོས་ཐུང་བ་དཔག་ཚད་སུམ་བརྒྱ་ལྔ་བཅུ་པ། ལྷོར་ཛམ་བུ་གླིང་སོག་ཁའི་དབྱིབས་ཀྱི་ཞིང་ཆེ་བ་རི་རབ་ལ་བསྟན་པའི། ངོས་རིང་བ་གསུམ་ལ་དཔག་
ཚད་ཉིས་སྟོང་དང་། ཡུ་བའི་ཕྱོགས་ལ་དཔག་ཚད་ཕྱེད་དང་བཞི་ཡོད་པ། ནུབ་བ་གླང་སྤྱོད་དབྱིབས་ཟླུམ་པོ། ཐད་ཀར་དཔག་ཚད་ཉིས་སྟོང་ལྔ་བརྒྱ་ལ་ཁོར་ཡུག་ཏུ་དཔག་ཚད་བདུན་སྟོང་ལྔ་བརྒྱ་ཡོད་པ། བྱང་སྒྲ་མི་སྙན་དབྱིབས་གྲུ་བཞི་པའི་ངོས་རེར་དཔག་ཚད་སྟོང་ཕྲག་གཉིས་གཉིས་རེ་ཡོད་པ། དེ་དག་གི་གཡས་གཡོན་དུ་གླིང་ཕྲན་ཀྱང་། ལུས་འཕགས་པོའི་གཡས་སུ་ལུས་དང་། གཡོན་དུ་ལུས་འཕགས། ཛམྦུ་གླིང་གི་གཡས་སུ་རྔ་ཡབ་དང་། གཡོན་དུ་རྔ་ཡབ་གཞན། བ་གླང་སྤྱོད་ཀྱི་གཡས་སུ་གཡོ་ལྡན་དང་། གཡོན་དུ་ལམ་མཆོག་འགྲོ། སྒྲ་མི་སྙན་གྱི་གཡས་སུ་སྒྲ་མི་སྙན་དང་། གཡོན་དུ་སྒྲ་མི་སྙན་གྱི་ཟླ་སྟེ། དེ་དག་ཀྱང་དབྱིབས་སོ་སོའི་གླིང་ཆེན་རྣམས་དང་མཚུངས་ཤིང་། ཆེ་ཆུང་ནི་ཕྱེད་ཕྱེད་དུ་ཡོད་ལ། སོ་སོའི་བདེ་འབྱོར་གྱི་ཁྱད་པར་སྣ་ཚོགས་པ་ལོངས་སྤྱོད་པ་དང་བཅས་པའི་ངང་ཚུལ་ཅན་ཏེ། དེ་སྐད་དུའང་མངོན་པ་མཛོད་ལས། གླིང་བཞི་དང་ནི་ཉི་ཟླ་ཟུང་། །ཞེས་སོགས་དཀྱུས་བཞིན་ལ། མཛེས་པར་བྱས་པའི། ཞེས་པའི་མཚམས་སུ། ཤར་གླིང་གི་ནང་ནས་བརྩམས་ཏེ་རིན་པོ་ཆེ་སྣ་ཚོགས་ཕུང་པོར་སྤུངས་པའི་རི་བོ། ལྷོ་གླིང་གི་ནང་དུ་རི་རབ་རྩེ་མོའི་བྱང་ཤར་དུ་སྐྱེས་པའི་དཔག་བསམ་གྱི་ལྗོན་ཤིང་། ནུབ་གླིང་གི་ནང་དུ་བཟའ་བཏུང་འདོད་པ་འཇོ་བའི་བ། བྱང་གླིང་གི་ནང་དུ་སྐྱེས་བུའི་རྩོལ་བས་མ་རྨོས་མ་
བཏབ་པར་རང་བཞིན་དུ་འཁྲུངས་པའི་ལོ་ཏོག །དེ་ནས་ཀྱང་ཤར་ནས་ཕྱོགས་བཞིར་འཁོར་ལོ་ནས་བརྩམས་པ་དང་། ཤར་ལྷོ་ནས་མཚམས་བཞིར་གླང་པོ་ནས་བརྩམས་ཏེ་རྒྱལ་སྲིད་རིན་པོ་ཆེ་སྣ་བདུན། གཏེར་གྱི་བུམ་བཟང་དང་བཅས་པ་སྟེ། །དེ་ཡང་ཤར་དུ་འཁོར་ལོ་རིན་པོ་ཆེ་ནི། ལྷ་རྫས་ཀྱི་དྭངས་མའི་གསེར་བཟང་པོ་ལས་བྱས་ཤིང་དབྱིབས་དང་། ལྟེ་བ་ཟླུམ་ལ་རྩིབས་སྟོང་དང་ལྡན་པ། འཁོར་ཡུག་ཏུ་མུ་ཁྱུད་མཉམ་ཞིང་བཟང་བ། ཕས་ཀྱི་རྒོལ་བའི་ཕྱོགས་ཐམས་ཅད་ལས་རྣམ་པར་རྒྱལ་བའི་བྱེད་པ་དང་ལྡན་པའོ། །ལྷོར་ནོར་བུ་རིན་པོ་ཆེ་ནི། ལྷ་རྫས་ཀྱི་རང་བཞིན་བེཟླུརྒྱ་ལས་གྲུབ་ཅིང་དབྱིབས་ཟུར་བརྒྱད་པ། དེའི་འོད་ཀྱིས་དཔག་ཚད་ཙམ་དུ་ཁྱབ་ཅིང་། མུན་པའི་རབ་རིབ་ཐམས་ཅད་འཕྲོག་པས་མཚན་ཡང་ཉིན་མོ་ལྟར་གསལ་བའི་བྱེད་ལས་ཅན། ནུབ་ཏུ་བཙུན་མོ་རིན་པོ་ཆེ་ནི། གཟུགས་མཛེས་ཤིང་ལྟ་ན་སྡུག་པ། ངང་ཚུལ་རང་བཞིན་གྱིས་བཟང་བ། ལྤགས་པའི་མདོག་དཀར་ལ་དམར་བའི་མདངས་དང་ལྡན་པས་ལེགས་ཤིང་། རེག་བྱ་འཇམ་པ། ཁ་ནས་ཨུཏྤ་ལ་ཡི་བསུང་ཞིམ་འཐུལ་ཞིང་ཡིད་དུ་འོང་བ། ཚ་བས་ཉེན་པའི་ཚེ་བསིལ་བ་དང་། བསིལ་བས་ཉེན་པའི་ཚེ་ཚ་བ་སྟེ་འདོད་དགུའི་རེག་བྱ་དང་ལྡན་པའོ། །བྱང་དུ་བློན་པོ་རིན་པོ་ཆེ་ནི། རྒྱལ་པོས་གང་སེམས་དེ་ཉིད་ཤེས་ནས་མ་བསྒོས་
པར་ཡང་ལས་བྱེད་པ། ཤིན་ཏུ་ཕུན་སུམ་ཚོགས་ཀྱང་ཆོས་མིན་གྱི་ལས་སྤངས་པ། ཉོན་མོངས་པ་མེད་པ། གཞན་ལ་གནོད་པ་མེད་པ། སྐྱེ་བོ་ལ་མི་འཚེ་བ། ཆོས་ཀྱི་བྱ་བ་དང་ལྡན་ཅིང་མ་འོངས་པའི་བྱ་བ་ཤེས་པ་དང་ལྡན་པ། ཐམས་ཅད་ཡོངས་སུ་འབུལ་བ་སོགས་ཀྱི་ཁྱད་ཆོས་ཅན་ནོ། །ཤར་ལྷོར་གླང་པོ་རིན་པོ་ཆེ་ནི། ཡན་ལག་བདུན་པོ་ས་ལ་ལེགས་པར་གནས་ཤིང་། གངས་རིའི་ཕུང་པོ་འགྲོ་ཤེས་པ་ལྟ་བུ་སྟེ། གཡུལ་ལས་རྣམ་པར་རྒྱལ་བར་འདོད་པའི་རྒྱལ་པོ་ལ་འོས་པའི་ནོར་གྱི་མཆོག་གོ །ལྷོ་ནུབ་ཏུ་རྟ་མཆོག་རིན་པོ་ཆེ་ནི། ཐོ་རངས་ཀྱིས་མཚོན་ཏེ་ཡུན་ཐུང་ངུ་ཙམ་ལའང་ཕྱོགས་མ་ལུས་པ་བསྐོར་ནས་སླར་རང་ཁྱིམ་དུ་ལྡོག་པའི་སྟོབས་དང་ལྡན་ལ། རྨ་བྱའི་མགྲིན་པའི་སྤུ་སྡུག་ལྟར་ཁ་དོག་ཡིད་དུ་འོང་བས་བརྒྱན་པའོ། །ནུབ་བྱང་དུ་དམག་དཔོན་རིན་པོ་ཆེ་ནི། བདུད་དང་བདུད་ཀྱི་ཕྱོགས་སུ་གཏོགས་པའི་དཔུང་གང་དག་གཞན་གླགས་བལྟ་བའི་ཕྱིར་འགྲོ་བ་དང་། ལྡང་བ་དང་། འོང་བ་མ་ལུས་པ་འཇོམས་པར་བྱེད་པའི་མཐུ་སྟོབས་ཀྱི་དཔལ་དང་། འབྱོར་བའི་དཔུང་དང་། ཕ་རོལ་གནོན་པའི་སྙིང་སྟོབས་སོགས་ཁྱད་ཆོས་དུ་མས་འཕགས་པའོ། །བྱང་ཤར་དུ་གཏེར་ཆེན་པོའི་བུམ་པ་ནི། གང་གིས་རེག་པ་ཙམ་ནས་ཟས་དང་། གོས་དང་། མལ་ཆ་ལ་སོགས་པ་ནམ་མཁའ་མཛོད་ཀྱི་ལོངས་སྤྱོད་ལྟར་འཛད་མེད་དུ་འབྱུང་བའོ། །
དེ་ནས་ཀྱང་ཤར་ནས་བརྩམས་ཏེ་སྒེག་སོགས་བཞི་དང་། ཤར་ལྷོ་ནས་བརྩམས་ཏེ་མེ་ཏོག་མ་སོགས་བཞི་སྟེ། དེ་ཡང་ཤར་དུ་སྒེག་མོ་མ་ནི། མཛེས་སྡུག་གི་རྣམ་འགྱུར་ཕ་མཐའ་ཡས་པས་ཡིད་ཀྱི་ཆོམ་རྐུན་དུ་བྱེད་པ། ལྷོར་ཕྲེང་བ་མ་ནི་ནོར་བུ་རིན་པོ་ཆེ་སྣ་ཚོགས་པའི་དོ་ཤལ་འཛིན་པ། ནུབ་ཏུ་གླུ་མ་ནི། དབྱངས་ཀྱི་ཡན་ལག་བདུན་དང་ལྡན་པའི་གདངས་སྙན་པོ་རྣ་བའི་བཅུད་ལེན་དུ་སྟོབ་པ། བྱང་དུ་གར་མ་ནི། སྒེག་པ་དང་། ཞི་བ་ལ་སོགས་པའི་གར་གྱི་ཉམས་འགྱུར་མཐའ་ཀླས་པས་མཆོད་པ། ཤར་ལྷོར་མེ་ཏོག་མ་ནི། ཆུ་སྐྱེས་དང་། ཐང་སྐྱེས་དང་། གཞན་ཡང་ལྷ་རྫས་ཀྱིས་མེ་ཏོག་མནྡཱ་ར་བ་ལ་སོགས་པ་ཆར་དུ་བསྙིལ་བ། ལྷོ་ནུབ་ཏུ་བདུག་སྤོས་མ་ནི། ལྷན་ཅིག་སྐྱེས་པ་དང་། རྗེས་སུ་སྦྱང་བ་ལས་བྱུང་བའི་བསུང་ཞིམ་གྱི་སྤྲིན་ཕུང་འཐུལ་བ། ནུབ་བྱང་དུ་སྣང་གསལ་མ་ནི། རང་བྱུང་དང་། སྦྱང་བ་ལས་བྱུང་བའི་སྒྲོན་མེ་ས་ཕྱོགས་ཀྱི་ཁོར་ཡུག་ཐམས་ཅད་ཡོངས་སུ་སྣང་བར་བྱེད་པ། བྱང་ཤར་དུ་དྲི་ཆབ་མ་ནི། ཙནྡན་དང་། གསུར་དང་། གུར་གུམ་ལ་སོགས་པའི་དྲི་ཞིམ་པོའི་སྤོས་ཆུས་སྐུ་ལ་བྱུགས་པའོ། །དེ་ནས་ཤར་གླིང་གི་ནམ་མཁར་ལྷུན་པོའི་ཕྱེད་ཀྱི་ཐད་དུ་ཉི་མའི་དཀྱིལ་འཁོར་ཐད་ཀར་དཔག་ཚད་ལྔ་བཅུ་རྩ་གཅིག་པ། འོག་གཞི་མེ་ཤེལ་དང་། མཐའ་གསེར་གྱི་ར་བས་བསྐོར་བ། ནང་ན་ལྷའི་བུ་
ཉི་མ་འཁོར་དང་བཅས་པ་གྲོང་ཁྱེར་གྱི་བཀོད་པ་ཕུན་སུམ་ཚོགས་པ་དང་བཅས་པ། ལྷོ་གླིང་གི་ནམ་མཁར་སྔར་ལྟར་ཟླ་བའི་དཀྱིལ་འཁོར་འོག་གཞི་ཆུ་ཤེལ་དང་མཐའ་ཆུ་ཤེལ་གྱི་ར་བས་བསྐོར་བའི་ནང་དུ་ལྷའི་བུ་ཟླ་བ་འཁོར་དང་བཅས་པའི་གྲོང་ཁྱེར། ནུབ་གླིང་གི་ནང་དུ་གདུགས་དཀར་པོ་གསེར་གྱི་ཡུ་བ་ཅན་ཐུར་མ་བརྒྱ་དང་ལྡན་པ་སོགས་ཆེན་པོ་ལ་འོས་པའི་ཡོ་བྱད། བྱང་གླིང་གི་ནང་དུ་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་ནམ་བ་དན་དཀར་པོ་ཕས་རྒོལ་གྱི་མཚན་མ་ལས་རིང་དུ་བྱས་པའི་དགེ་མཚན་གྱི་མཚོན་བྱེད་དུ་བསྒྲེང་བ་རྣམས་དང་། གཞན་ཡང་ལེགས་བྲིས་དང་། གདེངས་ཅན་དང་། སོགས་དཀྱུས་ལྟར་འདྲེན་པར་བྱ་བ་ཉིད་དོ། །གཞན་ཡང་ཡུལ་ཕྱོགས་གཞན་དུ་ཕེབས་པའི་ཚེ་ལེགས་སྐྱེས་ལྟ་བུ་ལ། གོང་བརྗོད་དང་། འབེབས་ཞུས་སོགས་སྐབས་སུ་གང་བབས་ཀྱི་གཤམ་བུ། ཁྱད་པར་དེང་དུས་ཐུགས་བསྐྱེད་མནྡཱ་རས། །སྔོན་སྨོན་ཆུ་གཏེར་བསྲུབས་པའི་རི་བོང་ཅན། །དབུས་འགྱུར་ལྗོངས་སུ་བཏེག་ལ་ཉེ་འཚོའི་མུན། །ཡེ་ཤེས་སྣང་བས་བཅིལ་དང་ཆབ་གཅིག་པར། །བཞེད་དོན་སྟེང་འཐུང་དཀར་པོ་རྒྱས་པའི་རླབས། །ཕྱོགས་བྲལ་ཀུན་དགའི་རྣ་བར་བྱིན་པ་ཡིས། །ཚུལ་མིན་རིམས་ནད་བརྟན་པ་འཕྲོག དབུས་ནས་ཁམས་སུ་བཏེགས་སྐབས་ལྟ་བུ་ཡིན་ན། བོད་ཆེན་ལྗོངས་སུ་ཞེས་ཁ་སྒྱུར་བས་མཚོན་གཞན་ཡང་སྐབས་དང་
མཐུན་པར་སྦྱར། པ་དང་། །དགེ་མཚན་འཇོ་སྒེག་བརྒྱ་ཕྲག་བསྒྲུབས་པའི་མོད། །སླར་ཡང་འདི་ན་མོས་ལྡན་བདག་ཅག་གི །སྤྱི་ཏོར་རྩེ་མོར་ཞབས་སེན་ཨུཏྤ་ལ། །མི་རིང་བཀོད་པའི་གསོལ་འདེབས་ལེགས་སྐྱེས་སུ། །དངོས་རྫས་མེ་ཏོག་ཕྲ་མོའི་མཆོད་སྤྲིན་སྟོབ། །ཞེས་སྐབས་སུ་བབས་པའི་བརྗོད་པ་ཉུང་ངུས་མདུན་བསུས་ཏེ། ཐོག་མར་བཀྲ་ཤིས་ལྷ་གོས་དཀར་པོ་དཀྱུས་སུ་རིང་བ། སོགས་འབུལ་ཚན་རྣམས་བྲིས་མཐར་བརྟན་བཞུགས་དང་སྨོན་ལམ་སོགས་གང་འོས་སྦྱར་རོ། །ཡང་ཞིང་ཁམས་གཞན་དུ་དགོངས་པ་གཏད་པའི་མཆོད་འབུལ་ལྟ་བུའི་ཚེ། བསྐུར་ཡུལ་གདན་ཚབ་བམ། མཛོད་པ་སོགས་གང་ཡིན་ལ་དེར་བསྟུན་གྱི་མགོ་རྒྱན་དང་འབེབས་ཞུ་སོགས་སྐབས་ཐོབ་སྦྱོར་བའི་མཚམས། །ཁྱད་པར་དེར་དུས་སྐྱེ་འགྲོའི་བསོད་ནམས་ཀྱི། །མཆོད་སྡོང་གཅིག་གྱུར་རྗེ་བཙུན་འཇིག་རྟེན་མིག །རྡུལ་བྲལ་ཞི་བའི་དབྱིངས་སུ་གནལ་བའི་མོད། །ཡིད་ཅན་མུན་པའི་མལ་དུ་ངང་གིས་བཅིངས། །དེ་ཚེ་འདི་ན་གུས་ལྡན་དངོས་ངན་ཀྱང་། །བཟོད་དཀའི་ཟུག་རྔུའི་གདུང་བས་གཞུར་བ་ལས། །ཤུགས་རིང་དབུགས་ཆེན་འབྱིན་པ་སུ་ཞིག་ཅེས། །ཆེས་ཆེར་གཤུམ་པའི་སྨྲེ་སྔགས་རིང་དུ་བཏོན། །འོན་ཀྱང་རང་གི་ནོངས་པ་འབའ་ཞིག་གིས། །ཕྲིན་ལས་འཇུག་པའི་ཡུལ་དུ་མ་གྱུར་པར། །ད་ཀོ་མཐོང་ནས་མཐོལ་བའི་གཡར་དམ་
བཅས། །སྙིང་ནས་གསོལ་བ་གདབ་ལ་འགྲུས་བཞིན་དུ། །དངོས་འབྱོར་ཉུར་ངུའི་བདོག་པ་འདིས་མཚོན་པའི། །དུས་གསུམ་ལུས་དང་ལོངས་སྤྱོད་དགེ་ཚོགས་ཀུན། །ཡེ་ཤེས་གཟིགས་པའི་དགྱེས་པ་བསྐང་བའི་སླད། །བསམ་ཡས་མཆོད་པའི་སྤྲིན་དུ་སྤྲུལ་ཏེ་དབུལ། །ཞེས་གཅམ་བུ་མིན་པའི་བརྗོད་པ་ཉུང་ངུའི་མདུན་བསུས་ཏེ། དེང་གི་ཆར་ཡང་ལྷ་དང་བླ་སྤྲུལ་ཕལ་པའི་རིགས་ལ་ལྷ་དང་བཅས་པ་ནས། ཐམས་ཅད་ཀྱི་བར་མ་བྲིས་པས་འཐུས། བཅས་པའི་ཡིད་ཅན་ཐམས་ཅད་ཀྱི་སྐྱབས་གཅིག་མཚུངས་པ་མེད་པ་རྗེ་བཙུན་སྤྲུལ་པའི་སྐུ་དེ་ཉིད་གངས་བླ་སྤྲུལ་ཕལ་པ་ལ་སྤྱི་དགོས་བསྟན་འགྲོའི་བསོད་ནམས་ཀྱིས། ཞེས་བསྒྱུར། ཅན་བསྟན་འགྲོའི་བསོད་ནམས་ཀྱིས་མ་འཆུན་པར་རེ་ཞིག་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན་པ་དེ་བཞིན་ཉི་འོག་གི་འདི་ཡང་ཕལ་པ་ལ་ལྟོས་བཅས་ཐམས་ཅད་ཞེས་བསྒྱུར། འགྲོ་བ་མ་ལུས་ཤིང་ལུས་པ་མེད་པ་ཐམས་ཅད་དམིགས་བུ་དུས་གཅིག་ཏུ་སྟོར་བ་ལྟར་གྱུར་པར་མ་ཟད། བྱེ་བྲག་ཏུ་གུས་ལྡན་ཁོ་བོ་ཅག་ཀྱང་སྲོག་གི་རྒྱུ་བ་འགགས་པ་ལ་ཕྱོགས་པའི་སྡུག་བསྔལ་གྱི་ཚོར་བས་ནོན་པར་གྱུར་མོད། དེ་ལྟ་ནའང་ཟད་པ་དང་མི་སྐྱེ་ཤེས་པའི་ཡེ་ཤེས་མངོན་སུམ་དུ་བརྙེས་པའི་འགྲོ་བའི་བླ་མ་དོན་ཀུན་གྲུབ་པ་ལྟ་བུའང་རྟག་འཛིན་ཅན་རྣམས་ཀྱི་སྣང་ངོར་འཚོ་བའི་འདུ་བྱེད་བཤིགས་པར་མཛད་དེ། སེམས་ཅན་གྱི་ལས་ལ་སངས་རྒྱས་ཀྱིས་ཀྱང་
བཅོས་སུ་མེད་པར་བསྟན་པ་ལ་ཡིད་གཏད་པས་རང་གིས་རང་ལ་དབུགས་དབྱུང་བར་བགྱིས་ཏེ། ད་དགོས་དགོངས་རྫོགས་གསོལ་འདེབས་མཆོད་འབུལ་ལ་བརྩོན་པ་ཆེ་ཐང་དུ་བསྐྱེད་པ་ལས་འོས་མ་མཆིས་ཤིང་། དེ་ཡང་རྗེ་བཙུན་དམ་པ་དེ་ཉིད་ཀྱི་བཀའ་དྲིན་དང་ཐུགས་རྗེ་ལ་བསམས་ན་སྟོང་གསུམ་ནོར་བུས་བཀང་ཡང་ཕྱོགས་རེ་ཙམ་ཡང་གཞལ་བར་དཀའ་མོད། འོན་ཀྱང་རེ་ཞིག་རང་གི་འབྱོར་པ་དང་མཐུན་པར་ལྷག་བསམ་གྱིས་བླངས་བའི་བདོག་པ་ཉུང་ངུ་འདིས་ཐོག་དྲངས། སྲིད་པ་དང་ཞི་བའི་ཁམས་སུ་བླ་ན་ཡོད་མེད་ཀྱིས་བསྡུས་པའི་མཆོད་པའི་སྤྲིན་ཕུང་བསམ་ལས་འདས་པ་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་དང་མཐུན་པར་སྤྲུལ་ཏེ་བསྐལ་པའི་བར་དུ་དབུལ་བའི་མཎྜལ་མཚོན་བྱེད་དུ། ཐོག་མར་ལྷ་རྫས་ཀྱི་ཝནྟཾ་དཀྱུས་སུ་རིང་བ། སོགས་འབུལ་ཚན་རྣམས་བཀོད་མཐར། བཅས་རྣམ་གྲངས་འབུལ་ལམ་ཞུས་ཡོད་པ། བརྩེ་བ་ཆེན་པོས་དགོངས་ཏེ་བཞེས་པར་གསོལ་བ་འདེབས་པ་ལགས། དེ་ནས་འཕྲོས་རྣམས་གང་འོས་སྦྱར་བར་བྱའོ། །ཡང་རྟེན་བཞེངས་ཞལ་འདེབས་ལྟ་བུའི་ཚེ། གོང་གཤམ་བརྗོད་པ་དཀྱུས་སུ་འབྱུང་བ་གང་རིགས་ལས། ཁྱད་པར་གང་ཞིག་མཐོང་ཐོས་དྲན་རེག་གི །འགྲོ་རྒྱུད་ཞིང་ས་གཤིན་པོར་ཚོགས་གཉིས་ཀྱི། །ས་བོན་བཏབ་པ་མཁས་པའི་
འདུ་འགོད་ཀྱིས། །རྒྱལ་སྐུའི་སྣང་བརྙན་རྨད་བྱུང་བསྐྲུན་པ་ཡིས། །ལེགས་སྤྱད་གང་ལ་ཕྲག་པ་དོགས་གྱུར་པའི། །ཡིད་སྲུབ་སྡེར་བཅས་བརྟན་པ་ཉམས་པ་དང་། དམིགས་གསལ་གསུང་རྟེན་ལྟ་བུ་བཞེངས་པའི་ཚེ་རྒྱལ་གསུང་གླེགས་བམ་ཕྲེང་བ་བསྐྲུན་པ་ཡིས། ཞེས་སམ། གཙུག་ལག་གསར་བཞེངས་སོགས་ལ་འཕགས་ཚོགས་འདུས་པའི་བསྟིག་ནས་བསྐྲུན་པ་ཡིས། ཞེས་པ་ལྟ་བུ་ཁ་བསྒྱུར་ཤེས་པར་བྱའོ། །ལྷན་ཅིག་དོན་གཉིས་བདུད་རྩིའི་བགོ་བཤར་གྱིས། །བསྐལ་བཟང་ཀུན་དགའི་ལང་ཚོ་བྱིན་པའི་གཏམ། འདི་ན་རིང་ནས་བསོད་ནམས་ཟབ་མོ་ཡིས། །ཉེར་བསྐྲུན་རྣ་བའི་དཔྱིད་དུ་འཐུངས་པ་ལས། །ཡི་རངས་ཆུ་གཏེར་སྙིང་ནས་འཕྱུར་བ་དང་། །དངོས་རྫས་མེ་ཏོག་ཕྲ་མོའི་ལེགས་བྱས་སྟོབ། །ཞེས་སམ། གང་ཚེ་བསྐལ་མང་གཞན་ཕན་ལ་གོམས་པའི། །ཐུགས་བསྐྱེད་ས་བརྟོལ་དབང་པོའི་འགྲམ་པ་ནས། །དེང་དུས་ངོ་མཚར་མཆོད་སྡོང་བསྐྲུན་པ་ཡི། །པད་དཀར་བྱེ་བ་བཞད་པའི་གྲགས་སྙན་གཡོ། །དེ་ཚེ་འདི་ན་མཆིས་པའི་དངོས་ཅག་ཀྱང་། །རྗེས་སུ་རངས་པའི་འཛུམ་དཀར་གྲོལ་བ་དང་། །ཆབ་གཅིག་བདོག་འབྱོར་ཕྲ་མོའི་འབྲེལ་བ་ཡིས། །སྐལ་བ་ བཟང་པོ་བསོད་ནམས་བསྒྲུབ་ལ་ཕྱོགས། །ཞེས་སམ། ལྷག་པར་གཞན་ཕྱིར་བརྩེ་བའི་ཆུ ་གཏེར་ལས། །མཐོང་ཐོས་དྲན་རེག་ཐར་བའི་དཔལ་སྦྱིན་སླད། །ངོ་མཚར་རྟེན་གྱི་མཆོད་སྡོང་བསྐྲུན་པ་ལ། །འཇིག་རྟེན་
ལྷ་མིར་བཅས་པས་བསྔགས་ལ་བྲེལ། །དེ་སླད་འདི་ནའང་དངོས་པོའི་ཡོ་བྱད་ཀྱིས། །ཕྲ་ཡང་ལྷག་པའི་བསོད་ནམས་ལས་སྐྱེས་པའི། །མཆོད་སྤྲིན་ཟེགས་མ་ཙམ་གྱི་དགའ་སྟོན་གྱིས། །ཡན་ལག་བཞི་པའི་བསོད་ནམས་བསྐྲུན་ལ་རིངས། །ཞེས་སམ། ཁྱད་པར་དེང་དུས་སྒྱུ་མའི་ནོར་རྫས་ལ། །ཚོགས་གཉིས་སྙིང་པོའི་ལྗིད་ཀྱིས་སྤ་བའི་ཕྱིར། །ལྷར་བཅས་མཆོད་འོས་རྟེན་མཆོག་འདུ་མཛད་པའི། །གཏམ་ཙམ་ཐོབ་པ་ཡིས་ཀྱང་ཀུན་དགར་གྱུར། །དེ་སླད་ལེགས་པར་སྤྱད་ལ་ཡི་རངས་བའི། །བསོད་ནམས་ཕུང་པོ་དེ་ཡང་གཞལ་དཀའ་བར། །མི་བསླུ་ངེས་པའི་ལུང་གིས་ཡིད་དྲངས་ནས། །དངོས་པོའི་བདོག་འབྱོར་ཉུང་ངུའི་ལེགས་འབུལ་སྟོབ། །ཞེས་སམ། ཁྱད་པར་ལེགས་སྤྱད་ཚོང་ཟོང་གིས། །འགྲོ་ལ་དོན་གཉིས་གཏེར་སྦྱིན་པའི། །ཐབས་མཁས་རོལ་མོ་མི་འགོག་ཕྱིར། །ཟླ་མེད་མཆོད་སྡོང་བསྐྲུན་པར་མཛད། །དེ་ལྟའི་གཏམ་གྱི་འབིགས་བྱེད་རླུང་། །སྙིང་ལ་རེག་པས་བསིལ་བདག་ཀྱང་། །རྗེས་སུ་ཡི་རངས་བསོད་ནམས་སླད། །དངོས་འབྱོར་ཉུང་ངུའི་མཆོད་སྤྲིན་སྟོབ། །ཅེས་པ་ལྟ་བུའི་གཤམ་དུ། ཕྱི་ཞེས་སྐབས་སུ་བབས་པའི་བརྗོད་པ་ཉུང་ངུས་མདུན་བདར་ཏེ། དེང་གི་ཆར་ཡང་གཟོད་མ་ནས་གཞན་ལ་ཕན་པ་འབའ་ཞིག་ལ་གོམས་པའི་སྐྱོབ་པ་ཁྱོད་ནི་སེམས་ཅན་རྣམས་འདུལ་བའི་ཐབས་བླ་ན་མེད་པ་ལ་
མཁས་པའི་ཕྱིར། མཐོང་ཐོས་དྲན་རེག་གི་འབྲེལ་བའི་ཡིད་ཅན་རྒྱ་མཚོའི་རྡུལ་སྙེད་ཐམས་ཅད་རྣམ་མཁྱེན་གྱི་གོ་འཕང་ལ་ཕྱམས་གཅིག་ཏུ་འགོད་པའི་ཆེད་དུ། སྨོན་ལམ་དང་སྙིང་རྗེའི་འཕེན་པ་ཁྱད་པར་ཅན་གྱི་བྱེད་འདིར་དམིགས་བསལ་གསུང་རྟེན་ལྟ་བུ་ལ། ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་མཐིང་ཤོག་གི་ངོས་ལ་གསེར་སྦྱངས་ཀུན་མས་བསྐྲུན་པའི་ངོ་མཚར་གྱི་སྣང་བ་ཞེས་སམ། གཙུག་ལག་ཁང་ལྟ་བུ་ལ་འཕགས་ཚོགས་འདུས་པ་རྒྱ་མཚོ་བསྟི་བའི་གནྡྷོ་ལ་ཆེན་པོ་རྟེན་དང་བརྟེན་པར་བཅས་པ་གསར་དུ་བསྐྲུན་པའི་ངོ་མཚར་གྱི་སྣང་བ་སོགས་གང་འོས་སྦྱར། མཆན། པོ་ཁོ་ན་ལ་འཆེལ་བས་བསྐལ་བཟང་རྣམ་འདྲེན་བཞི་པའི་མཚན་དཔེའི་ཞལ་སྐྱིན་གསེར་སྦྱངས་ཞུན་མའི་ཕུང་པོ་ལས་གྲུབ་པའི་ངོ་མཚར་གྱི་སྣང་བ་བློ་ཡི་ར་བ་ལས་བརྒལ་བར་བསྐྲུན་པར་མཛད་པའི་ཚེ་ན། ལེགས་བྲིས་དང་བཅས་པའི་འགྲོ་བ་ཐམས་ཅད་ཀྱིས་མངོན་པར་བསྔགས་པའི་མེ་ཏོག་འཐོར་ཞིང་། ཕྱོགས་བཅུའི་རྣམ་འདྲེན་སྲས་དང་བཅས་པ་ཀུན་གྱིས་ཀྱང་དགྱེས་པའི་སྤྱན་ཟུར་ལྷུག་པར་གཡོ་བའི་མོད། ཛམ་བུའི་རྐང་འཐུང་གིས་ཉེ་བར་མཚོན་པའི་ཐ་གྲུ་ཀུན་ཏུ་ཕན་པ་དང་བདེ་བའི་རྫོགས་ལྡན་གྱིས་དུས་སྟོན་གསར་པ་གློ་བུར་དུ་འབོད་པའི་དགེ་ལེགས་ཀྱི་སྒོ་འཕར་བརྒྱ་ཕྲག་དབྱེ་བ་ལ། གུས་ལྡན་པ་ཁོ་བོ་ཅག་ཀྱང་སྙིང་ཐག་པ་ནས་རྗེས་སུ་ཡི་རངས་པའི་བསོད་ནམས་ཀྱི་མཐུ་རྒྱ་ཆེར་བསྐྱེད་པ་དང་ཆབ་ཅིག །རང་གཞན་འབྲེལ་ཐོགས་
ཀྱི་འགྲོ་བ་ཐམས་ཅད་བྱང་གྲོལ་གྱི་ལམ་ལ་འགོད་པའི་སླད། དུས་གསུམ་གྱི་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་མཁའ་ཁྱབ་ཀྱི་མཎྜལ་དུ་འབུལ་བའི་མཚོན་བྱེད་དངོས་འབྱོར་གྱི་བསྙེན་བཀུར་ཕྲ་མོ་བགྱིད་པར། ཐོག་མར་མ་ཧཱ་ཙི་ནའི་ཡུལ་གྲུ་ནས་བསྐྲུན་པའི་ལྷ་རྫས་ཀྱི་ཝས་ཡིད་དུ་རིང་བ་བཀྲ་ཤིས་རྟགས་ཀྱི་རྣ་ཆས་སྒེག་པ། སོགས་དང་། མཐར་འབུལ་ལམ་ཞུས་ཡོད་པ་བརྩེ་ཆེན་ཡེ་ཤེས་ངགཟིགས་པས་བདག་གིར་བཞེས་པར་གསོལ་བ་འདེབས་པ་ལགས། ཅེས་པའི་མཐར་དཀྱུས་ཀྱི་བརྗོད་པ་གང་རིགས་འདྲེན་པར་བྱའོ། །གཞན་ཡང་དེ་ལྟ་བུའི་ལེགས་འབུལ་སོགས་ཀྱི་སྐབས་སུ་གོང་གཤམ་༣ ཅི་རིགས་བར་ཡན་ལག་བདུན་པའི་ཚིགས་སུ་བཅད་པ་སྦྱོར་བར་སྤྲོ་ན་འདི་ལྟ་སྟེ། ཨོཾ་སྭསྟི་པྲ་ཛ་བྷྱ༔ གང་ཞིག་དམ་པའི་ཡོན་ཏན་རྨད་བྱུང་ཉི་གཞོན་གཡོ་བའི་ཐུར་མ་ཡིས། །དྭངས་བའི་བློ་གྲོས་ཨུཏྤལ་གསར་པའི་འདྲེན་བྱེད་རྣམ་པར་དབྱེ་བ་དང་། །ལྷན་ཅིག་ཐལ་མོའི་ཀུནྡའི་ཟུར་མིག་སྤྱི་ཏོར་རྩེ་མོར་ཟུམ་དང་བཅས། །ཞབས་མཐིལ་འཁོར་ལོའི་རེ་ཁ་མཆོག་ལ་རྟག་ཏུ་གུས་པས་དད་ཕྱག་སྟོབ། །སྲིད་པའི་ཁམས་འདིར་བདག་གིར་བཟུང་བའི་བླ་ན་ཡོད་པའི་མཆོད་སྤྲིན་དང་། །དེས་ཀྱང་མི་མཚོན་ཏིང་ངེ་འཛིན་གྱི་བཀོད་པ་ཕ་མཐའ་ཡས་པའི་དཔྱིད། །གྲོང་ཁྱེར་གསུམ་གྱི་དོགས་ལས་རིང་བརྒལ་ངོ་མཚར་བཀོད་
པའི་མཛེས་སྡུག་ལ། །དབང་པོས་སྤྱན་སྟོང་གསར་དུ་སྤྲུལ་ནས་གཅིག་ཏུ་བལྟ་བའི་སྐབས་བཙལ་བཞིན། །ལམ་གསུམ་འགྲོ་བའི་བསིལ་བས་བཀྲུས་ཀྱང་ཅུང་ཟད་དག་པའི་ནུས་དབེན་ལ། །ལེགས་བྲིས་བདག་པོའི་སུག་པར་འཆང་བའི་རྩེ་བརྒྱའི་མཚོན་གྱི་བརྡར་བས་མིན། །དཀར་མིན་ལས་དང་ཀུན་རྟོག་མཛའ་བས་སྒྲིབ་གཉིས་དྲི་མ་འཕེལ་བའི་རྒྱུན། །སྟོབས་བཞིའི་ཆོ་ག་མཐའ་དག་རྫོགས་པས་ལྷག་མ་མེད་པར་བཅད་ལ་དབང་། །སློབ་དང་མི་སློབ་གོ་འཕང་ལ་གནས་སོ་སྐྱེ་དང་ནི་འཕགས་ཚོགས་ཀྱིས། །ལེགས་སྤྱད་མཆོག་གི་གོ་ཆ་བརྟུན་པས་སེམས་ཅན་རྣམས་ལ་སྨན་བགྱིད་པར། །རྗེས་སུ་ཡི་རང་དྭང་བ་སྟེར་ནས་བསོད་ནམས་བྱེ་བའི་ཕུང་པོ་ཡང་། །ངང་གི་རྒྱུད་ལ་མ་བྱིན་བླངས་པས་གྲངས་མེད་ལེགས་བྱས་ཆ་ཤས་རྫོགས། །གང་གིས་གཟོད་ནས་མངོན་སུམ་ཉིད་བརྙེས་འགོག་བདེན་རྟག་པ་དམ་པའི་དབྱིངས། །ལམ་བདེན་མིང་ཚིག་སྤྲིན་དུ་འཕོས་ལས་དབྱངས་ཀྱི་ཡན་ལག་ཡོངས་རྫོགས་པའི། །རྨད་བྱུང་གཏོང་བ་དམ་པའི་རིན་ཆེན་འགྲོ་འདིའི་བསོད་ནམས་བགོ་སྐལ་དུ། །ལྷུག་པར་སྩལ་བའི་དགའ་སྟོན་དམ་པས་ཕན་བདེའི་སྣང་བ་རྒྱས་པར་མཛོད། །མི་སྲུན་དུག་ཅན་མཆེ་བ་ལྟར་གཟིངས་སྙིག་མའི་འགྱུར་བས་ཐུགས་དྲངས་ཏེ། །ཞི་བ་དམ་པའི་ནགས་སུ་གཟིམས་ལ་དགྱེས་པའི་གོ་སྐབས་དབྱེ་སྲིད་ན། །དམྱལ་མེའི་
དབུས་ཀྱང་པད་མཚོར་བཞིན་འཇུག་བྱང་ཆུབ་སེམས་དཔའི་ཐུགས་བསྐྱེད་གང་། །གྲགས་པའི་རི་མོ་ཙམ་དུ་ཟད་ཕྱིར་བསྐལ་པ་རྒྱ་མཚོར་ཞབས་བརྟན་གསོལ། །དེ་ལྟར་བསགས་ལས་བྱུང་བའི་དགེ་ཚོགས་ཛམྦུའི་རྐང་འཐུང་ལས་སྨིན་འབྲས། །ཆོས་དབྱིངས་མ་དྲོས་འཇིང་དུ་ལྷུང་དེས་བྱང་ཆུབ་དམ་པའི་གདྨ་སྐྱེས། །མཐའ་གཉིས་བརྒལ་བའི་ལང་ཚོ་དར་བས་འགྲོ་ཀུན་ཕན་བདེའི་དགའ་སྟོན་ལ། །ངོམ་པ་མེད་པར་ལོངས་སུ་སྤྱོད་པའི་དགེ་མཚན་བརྒྱ་ཕྲག་འབར་གྱུར་ཅིག །སརྦ་སུ་ཛ་ཡནྟུ། ཞེས་སམ། ཤྲཱི་བི་ཛ་ཡནྟུ། རྨད་བྱུང་ཡོན་ཏན་བྱེ་བའི་བསིལ་འོད་ཀྱིས། །ཐལ་མོའི་ཆུ་སྐྱེས་སྤྱི་བོར་ཟུམ་པ་དང་། །ཕྱོགས་རེས་བསྔགས་བརྗོད་མགྲིན་པའི་རྒྱུད་མངས་གང་། །འཁྲོལ་བས་ཤིན་ཏུ་གུས་པའི་དད་ཕྱག་སྟོབ། །དངོས་འབྱོར་བདོག་པ་ཕྲ་མོ་འདིས་མཚོན་ཏེ། །བདག་གཞན་དུས་གསུམ་དགེ་ཚོགས་ལོངས་སྤྱོད་དང་། །རི་གླིང་རྒྱ་མཚོར་བཅས་པའི་མཎྜལ་ཡང་། །དྭང་བའི་བློ་གྲོས་ཁོ་ནས་དབུལ་ལ་ཕྱོགས། གཟོད་ནས་བག་མེད་སེམས་ཀྱི་གཉིས་འཐུང་དབང་། །སྡིག་དང་ལྟུང་བའི་དྲེགས་པས་མྱོས་པ་གང་། །སྟོབས་བཞིའི་འདུལ་སྦྱོང་མཁས་པའི་བརྟུལ་ཞུགས་ཀྱིས། །སླད་ནས་དམ་པའི་ལམ་དུ་བདེ་བར་གཞུག །འཕགས་དང་སོ་སྐྱེའི་རྣམ་དཀར་ཟླ་ཤེལ་གསར། །གྲགས་སྙན་བདུད་རྩིར་བཅས་པའི་མཚར་སྡུག་
ལ། །ཕྲག་དོག་ཨུཏྤལ་དམར་པོ་མི་ཟུམ་པར། །ཡི་རངས་ཀུནྡའི་འཛུམ་དཀར་སྙིང་དབུས་གྲོལ། །གནས་བརྒྱད་དག་པའི་གསུང་གི་གསང་བ་ཡིས། །མཐའ་ཀླས་སྡེ་སྣོད་རྒྱལ་རྔ་བརྡུངས་པའི་སྒྲས། །ལུས་ཅན་མ་རིག་གཉིད་ལ་གཡུར་བ་རྣམས། །ཞི་བསིལ་ཐར་པའི་ལམ་དུ་སད་པར་མཛོད། །མཐའ་ཀླས་ཞིང་ཁམས་རྒྱ་མཚོའི་མོས་ངོ་རུ། །གཟུགས་སྐུའི་སྒྱུ་འཕྲུལ་གཅིག་ཅར་སྣང་བའི་ཕྱིར། །དེང་འདིར་བདག་ཅག་བསོད་ནམས་བགོ་སྐལ་དུ། །ཐོབ་ཁྱོད་བསྐལ་པ་རྒྱ་མཚོར་བརྟན་པར་བཞུགས། །དེ་ལྟར་བསགས་པའི་ལེགས་བྱས་རྡུལ་དམར་ཀུན། །བཏུང་བས་མྱོས་པའི་ཐུན་མཚམས་སྤྲིན་གྱི་གྲོང་། །འཁོར་གསུམ་དག་པའི་མཁའ་ལ་བསྔོས་པའི་མཐུས། །བྱང་ཆུབ་སྙིང་པོའི་སྣང་བ་འདྲེན་གྱུར་ཅིག །སརྦ་དཱ་ཀ་ལྱཱ་ཎཾ་བྷ་ཡཱཏ། ཞེས་སམ། ཤྲཱི་སུ་ཤེ་ཡོ་བྷ་བཅུ། །གང་ཞིག་གཟོད་ནས་ཞི་བའི་སྙིང་པོ་རུ། །གྲུབ་པའི་ལང་ཚོ་རྒྱས་པའི་ཡེ་ཤེས་ཀྱང་། །སྲིད་ན་སྲིད་པ་བཞིན་དུ་སྣང་བ་ལ། །ཕྱོགས་རེའི་ཡོན་ཏན་དྲན་པའི་དད་ཕྱག་སྟོབ། །གཏོང་ལ་སྤྲོ་བ་མིན་པའི་ཀུན་རྟོག་གིས། །མ་བཅིངས་དངོས་འབྱོར་ཕྲ་མོ་འདིས་མཚོན་ཏེ། །ལེགས་བྲིས་གདེངས་ཅན་བདག་པོའི་དཔལ་འབྱོར་སོགས། །མཐའ་ཀླས་མཆོད་པའི་སྤྲིན་ཏུ་རྣམ་པར་བཀོད། །དམ་དུ་འཆོས་དང་རང་བཞིན་ལས་ཉམས་པའི། །སྡིག་ལྟའི་མིག་སྨན་ཚོན་
གྱིས་བགོས་པ་ཡང་། །སྟོབས་བཞིའི་གྲུ་ཆར་གཡོ་བས་རྨད་བབ་སྟེ། །སླད་ནས་ཉེ་བར་བསྡམས་པའི་མཚར་སྡུག་བཟུང་། །མགོན་པོ་ཁྱོད་ཀྱི་བྱང་ཆུབ་སྤྱོད་མཆོག་དང་། །འཕགས་དང་སོ་སྐྱེས་རྣམ་དཀར་བསྐྲུན་པ་ལ། །སྙིང་ནས་རངས་པའི་འཛུམ་ཕྲེང་གྲོལ་བ་ཡིས། །ཟླ་མེད་བསོད་ནམས་བྱེ་བའི་འདུ་འགོད་བརྩམ། །མ་རིག་འཐིབ་བུའི་ནོན་པའི་འགྲོ་ཀུན་ལ། །རྣམ་གྲོལ་ཆོས་ཀྱི་བདུད་རྩིས་བྲན་པའི་མོད། །ལེགས་སྤྱོད་ཨུཏྤལ་རྒྱས་པའི་ཕང་པ་ནས། །རྣམ་གྲོལ་འབྲས་བུའི་ཁུར་གྱིས་དུད་མཛོད་ཀྱེ། །ཁྱད་པར་རིང་ནས་གཞན་ཕྱིར་དམིགས་པ་ཡི། །དམ་བཅའི་རི་མོ་བྲིས་དེ་རྗེས་དགོངས་ལ། འགྲོ་འདིའི་བསོད་ནམས་མཆོད་སྡོང་དམ་པ་རུ། །འཆི་མེད་གྲུབ་པའི་དགའ་བས་སྙེམས་པར་མཛོད། །དེ་ལྟར་བསགས་ལས་བྱུང་བའི་དགེ་ཚོགས་ཀུན། །རྡུལ་བྲལ་ཆོས་ཀྱི་དབྱིངས་སུ་བསྔོས་པ་ལས། །སྐུ་གསུམ་དེད་དཔོན་མཆོག་ཏུ་བདག་གྱུར་ཏེ། །ཡིད་ཅན་སྲིད་པའི་མཚོ་ལས་སྒྲོལ་བར་ཤོག །སརྦ་སུ་ཐེ་ཡོ་ཀུནྡནྟ། ཞེས་སམ། ཨོཾ་སྭསྟི་སིདྡྷཾ། །གང་ན་སྲས་བཅས་འདྲེན་པ་ཐམས་ཅད་ཀྱིས། །བསྔགས་ཨུ པའི་མེ་ཏོག་དཀར་པོས་དབུགས་དབྱུང་བའི། །ནོར་བུའི་རྐང་སྟེགས་བཀྲ་བའི་ཞབས་སེན་ལ། །ཡན་ལག་མཆོག་གིས་བཏུད་པའི་དད་ཕྱག་སྟོབས། །དངོས་འཛིན་མདུད་པ་དམ་པོས་མ་བཅིངས་པའི། །
བདོག་འབྱོར་ཉུང་ངུ་འདིས་མཚོན་སྲིད་ཞིའི་ཁམས། །རྒྱས་པར་འགེངས་པའི་རབ་འབྱམས་མཆོད་སྤྲིན་ནི། །ཡེ་ཤེས་གཟིགས་པ་དམ་པའི་མདུན་སར་བདར། །ཐོག་མ་མེད་ནས་འཁྲུལ་པའི་གཞན་དབང་གིས། །དམ་ལ་བཞག་པའི་སེམས་ཀྱི་གླང་པོ་ཡིས། །ལེགས་སྤྱོད་རྫིང་བུ་རྙོགས་པའི་སྡིག་ལྟུང་དྲི། །སྟོབས་བཞིའི་ཀེ་ཏ་ཀ་ཡི་དོགས་པས་སྦྱངས། །ཕྱོགས་བཅུ་དུས་བཞིའི་འཕགས་དང་སོ་སྐྱེ་ཡི། རྣམ་དཀར་རླབས་ཕྲེང་རྒྱས་པའི་ཆུ་གཏེར་ལ། །རྗེས་སུ་ཡི་རངས་ངང་མོའི་འགྲོས་མཛེས་ཀྱིས། །དོན་དུ་གཉེར་བའི་ཚུལ་ལ་གཅིག་ཏུ་འདུན། །སྨྲ་མཆོག་ངག་གི་རྒྱུད་མངས་ལས་འཕོས་པའི། །དབྱངས་བདུན་ཡན་ལག་རྫོགས་པའི་ཏམྦུ་རས། །ཡིད་ཅན་ཁམས་དབང་བསམ་པར་རྗེས་མཐུན་པའི། །ཆགས་བྲལ་ལམ་བདེན་དགའ་སྟོན་སྦྱིན་པར་མཛོད། །སྐད་ཅིག་རེར་ཡང་ཞིང་ཁམས་རྒྱ་མཚོ་ལ། །ཏིང་འཛིན་བྱེ་བས་སྙོམས་པར་འཇུག་མོད་ཀྱི། །དེང་འདིར་བདག་སོགས་མོས་པའི་གདུང་སེལ་དུ། །བསྐལ་བརྒྱར་ཆོས་ཀྱི་ཁྲི་ལ་གཡོ་མེད་གསོལ། །འདིས་མཚོན་དུས་གསུམ་དགེ་བའི་ཆུ་ཀླུངས་འབུམ། །བྱང་ཆེན་ཆུ་གཏེར་འཇིངས་སུ་ཞུགས་པ་ཡིས། །རྣམ་གྲོལ་རིན་ཆེན་རྡུལ་མང་འདྲེན་བཞིན་དུ། །ལྷར་བཅས་དགའ་བའི་དགའ་སྟོན་སྦྱིན་གྱུར་ཅིག །སརྦ་སུ་ཛ་ཡནྟུ། ཞེས་སམ། ཨོཾ་སྭསྟི། གང་གི་ཡོན་ཏན་ཕྱོགས་
རེའི་རྣམ་ཐར་ལ། །བསྔགས་པའི་རྒྱུད་མངས་བསྒྲེངས་བས་ཕྱག་འཚལ་ཞིང་། །གྲངས་མེད་དངོས་འབྱོར་ཡིད་སྤྲུལ་མཆོད་པའི་སྤྲིན། །མཐའ་ཀླས་ནམ་མཁའི་ཕ་མཐའ་ཁྱབ་པར་འབུལ། །སྒྲིབ་གཉིས་ཚ་གདུང་སྟུག་པོས་ནོན་པ་ཡང་། །སྟོབས་བཞིའི་ཟླ་ཤེལ་བསིལ་བས་ཡོངས་སྦྱངས་ནས། །འཕགས་དང་སོ་སྐྱེའི་ལེགས་མཛད་སིམས་འོད་ལ། །ཡི་རངས་ས་ཡི་གདུ་བུའི་འདབ་རྒྱ་གྲོལ། །མགོན་ཁྱོད་གང་གིས་ཞི་བ་བརྙེས་པའི་ལམ། །འགྲོ་འདིའི་དཔྱིད་དུ་རྟག་པར་སྒྲོགས་བསྐུལ་ཞིང་། །མཚན་དཔེའི་དཀྱིལ་འཁོར་གཅིག་གིས་བསྐལ་པའི་བར། །བཞུགས་པའི་ཆོ་ག་ཡོངས་སུ་གྲུབ་མཛད་གསོལ། །དེ་ལྟར་བསགས་པའི་རྣམ་དཀར་འབྲས་བུའི་དཔྱིད། །ཆོས་དབྱིངས་ཞིང་ས་དམ་པར་བཏབ་པ་ལས། །རྣམ་གྲོལ་སྐུ་བཞིའི་སྙེ་མ་གཡུར་ཟ་བས། །ཕན་བདེའི་འདོད་དགུ་ལྷུག་པར་འཇོ་གྱུར་ཅིག །སརྦ་སུ་སིདྡྷི་རསྟུ། ཞེས་སམ། སུ་ཤྲཱི་སརྦ་ཛ་ཡནྟུ། །གང་གི་མཁྱེན་བརྩེ་ནུས་པ་ཡི། །ཡོན་ཏན་ཕྱོགས་རེའི་རྣམ་ཐར་ལ། །བསྔགས་པའི་མགྲིན་པ་མཐོར་བཏེགས་ནས། །ཞབས་ཀྱི་པདྨོར་དད་ཕྱག་སྟོབ། །དངོས་འབྱོར་ས་བོན་ཉུང་ངུ་ལས། །བརྩམས་ཏེ་ཡིད་སྤྲུལ་མཎྜལ་ནི། །མཐའ་ཀླས་ཁྲེས་བའི་མཆོད་སྤྲིན་གྱིས། །སྲིད་མཐའི་བར་དུ་བསྙེན་བཀུར་སྟོབ། །ཡང་སྲིད་མང་པོར་རྣམ་ཀུན་ཏུ། །གོམས་པའི་སྡིག་
ལྟུང་རྒྱུར་བཅས་པ། །ཤིན་ཏུ་གནོང་པས་མཐོལ་བགྱིད་ཅིང་། །སླན་ཆད་བསྡམས་པའི་གཡར་དམ་ལེན། །སོ་སྐྱེ་དང་ནི་འཕགས་ཚོགས་ཀྱི། །ལེགས་བྱས་ཟླ་བའི་མ་མ་ལ། །ཡི་རངས་རྡུལ་གྱི་ཐིག་ལེ་ཡི། །འཛུམ་དཀར་གཡོ་བས་བྲན་པར་བགྱིད། །འདི་ན་རྨོངས་པའི་མུན་པ་ཡིས། །ལེགས་གསུངས་ཤུལ་ལམ་སྟོར་བ་ལས། །ཟབ་རྒྱས་ཆོས་ཀྱི་སྣང་བ་ཡིས། །ཐར་པའི་གྲོང་དུ་དཀྲི་མཛད་གསོལ། །ཁྱད་པར་ལུས་ཅན་བསོད་ནམས་ཀྱིས། ནོར་བུའི་རྐང་སྟེགས་བཀྲ་བ་དེར། །ཞབས་སེན་འཁོར་ལོ་བསྐལ་པ་བརྒྱར། །འཕོ་མེད་འཚོ་གཞེས་བརྟན་པར་མཛོད། །དེ་ལྟར་རྣམ་དཀར་ཆུ་ཡི་གཏེར། །ཡོངས་སུ་བསྔོ་བའི་མནྡཱ་རས། །བསྲུབས་ལས་རྣམ་གྲོལ་རི་བོང་འཛིན། །ཕན་བདེའི་དཔྱིད་དུ་རྫོགས་གྱུར་ཅིག །སརྦ་དཱ་སུ་ཤེ་ཡོ་དེ་ཧི། །ཞེས་སམ། ཤཱི་མཱི་གུ་རོ་ན་མཱ་མི། །གང་ཞིག་དམ་པའི་ཡོན་ཏན་ལ། །ཡིད་རབ་དྭངས་བའི་དད་ཕྱག་དང་། །དངོས་འབྱོར་ཡིད་སྤྲུལ་མཆོད་སྤྲིན་ནི། །ཡེ་ཤེས་གཟིགས་པའི་མདུན་སར་བདར། །བག་མེད་སྡིག་དང་ལྟུང་བའི་སྒོ། །སྟོབས་བཞིའི་ར་བས་བཅད་པ་དང་། །འཕགས་དང་སོ་སྐྱེའི་རྣམ་དཀར་ལ། །མི་ཕྱེད་དགའ་བས་རྗེས་ཡི་རངས། །འདི་ན་ལྷར་བཅས་སྐྱེ་དགུ་ཡི། །བསོད་ནམས་ཞིང་མཆོག་ཁྱོད་ཉིད་ཕྱིར། །ཞི་བསིལ་བདུད་རྩི་སྦྱིན་དང་བཅས། །བསྐལ་པ་རྒྱ་མཚོར་ཞབས་
བརྟན་མཛོད། །དེ་ལྟར་བསགས་ལས་བྱུང་བ་ཡི། །ཚོགས་ཟུང་བརླན་གྱིས་རབ་ཕྱེ་བའི། །ཡོངས་སུ་བསྔོ་བའི་མེ་ཏོག་གིས། །ཐར་པའི་འབྲས་བཟང་འཛིན་པར་ཤོག །སརྦ་དཱ་བི་མོཀྵ་ཀུ་སུ་མ་དེ་ཧི། ཞེས་པ་ལྟ་བུས་མཚོན་ཡུལ་དུས་གནས་སྐབས་དང་སྦྱར་ཏེ་རྒྱས་བསྡུས་སྐབས་དང་མཐུན་པར་བྱའོ། །ཡང་ཞབས་བརྟན་གྱི་ལེགས་འབུལ་ལྟ་བུའི་ཚེ་གསོལ་འདེབས་འདུན་སྨོན་གྱི་བརྗོད་པ་འདི་ལྟར་སྦྱར་སྟེ། །ཨོཾ་སྭསྟི་ཛཱི་བཅུ། ལེགས་གསུང་སྡེ་སྣོད་བྱེ་བའི་གདུགས་དཀར་པོ། །ཐུགས་བསྐྱེད་དཔུང་པས་འཆེལ་བའི་གྲིབ་བསིལ་ཆེར། །སྐལ་ བཟང་དབུགས་འབྱིན་མཛད་པའི་ཆོ་ག་མཁན། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༡ །ཤེས་བྱའི་ཆུ ་གཏེར་གཏིང་མཐའ་བྲལ་བའི་ཀློང་། །མཁྱེན་གཉིས་གསེར་ཉ་གཡོ་བའི་ཟློས་གར་གྱིས། །མཐའ་ཀླས་ཡིད་ཅན་ཕན་བདེའི་དཔལ་སྟེར་བའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༢ །མཚན་བཟང་བུམ་པ་བཟང་པོའི་དགེ་མཚན་ནི། །རྨད་བྱུང་བསླབས་གཞིའི་གོས་ཀྱིས་ཉེར་བཀླུབས་ཅིང་། །རྣམ་གྲོལ་ཐར་པའི་བདུད་རྩིས་མངོན་གཏམས་པའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༣ གཞན་ཕན་ཉིན་མོའི་འོད་རིས་ཀྱིས་ཕྱེ་བའི། །སྨོན་འཇུག་བྱང་ཆུབ་སེམས་ཀྱི་པདྨ་དཀར། །ཡིད་ཅན་ཀུན་དགའི་ཉེར་འཚོར་གྱུར་
པ་གང་། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༤ །གསང་རྒྱུད་ཡིད་བཞིན་མཚོ་ནས་བླངས་པ་ཡི། །སྨིན་གྲོལ་སྒྲ་དབྱངས་སྒྲོགས་པའི་གཡས་འཁྱིལ་དུང་། །སྒྲིབ་གཉིས་རིམས་ནད་རྒྱུ་བ་གཅོད་བྱེད་པའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༥ །བཟུང་འཛིན་སྤྲོས་པ་རྟུལ་བའི་ཡེ་ཤེས་ནི། །ཐུགས་ཀྱི་དཔལ་བེར་སིམ་པའི་དེ་མ་ཐག །སྐྱེ་དང་འཇིགས་པའི་ཕ་མཐའ་ལས་གྲོལ་བའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༦ །དེ་ལྟར་དུས་མིན་ཉི་བུའི་དཔུང་ཚོགས་ཀྱི། །ཕྱོགས་ལས་རྣམ་པར་རྒྱལ་བའི་རྒྱལ་མཚན་ནི། །སྲིད་རྩེར་བསྒྲེངས་པའི་གྲགས་དཀར་ཟླ་འོད་ཀྱིས། །སྐལ་བཟང་སྣང་བ་ནུབ་པ་མེད་པར་མཛོད། ༧ །མཁྱེན་གཉིས་གསེར་གྱི་འཁོར་ལོ་སྔོན་འགྲོ་བས། །ཐུབ་བསྟན་གླིང་བཞིའི་ལྗོངས་ཀུན་དབང་བསྒྱུར་ཏེ། །སྔོན་མེད་རྫོགས་ལྡན་གསར་པའི་དགེ་མཚན་གྱིས། །ལྷར་བཅས་དགའ་བའི་དགའ་སྟོན་སྦྱིན་གྱུར་ཅིག ༨ །ཞེས་ཕྱོགས་བཅུ་དུས་གསུམ་གྱི་དཔལ་ལྡན་སྟོབས་བཅུ་མངའ་བ་མཐའ་ཀླས་པ་ཀུན་གྱིས་བསྐལ་པ་རྒྱ་མཚོར་བསོད་ནམས་ཀྱི་ཕུང་པོ་ཡོངས་སུ་རྫོགས་པ་ལས་བྱུང་བའི་མཚན་དཔེའི་ཆ་ཤས་བཀྲ་ཤིས་པའི་རྟགས་ཀྱི་སྒྲ་ལས་ཉེ་བར་དྲངས་པའི་སྭ་སྟིའི་དབྱངས་སྙན་མཚོ་བྱུང་མའི་ཕྱག་གི་རྒྱུད་མངས་ལ་ཅུང་ཟད་རེག་པས་མདུན་
བསུས་ཏེ། དེང་གི་ཆར་ཡང་། གང་ན་མ་ལུས་ཤིང་ལུས་པ་མེད་པའི་རྣམ་པར་འདྲེན་པ་སྲས་དང་སློབ་མར་བཅས་པས་ཀྱང་སོར་མོའི་ཆུ་སྐྱེས་དམར་པོའི་ཞབས་མཐིལ་གྱི་འཁོར་ལོ་ལ་ཉིན་རེ་བཞིན་དུ་བཏུད་པའི་རིགས་ཐམས་ཅད་ཀྱི་བདག་ཉིད། དཀྱིལ་འཁོར་ཐམས་ཅད་ཀྱི་གཙོ་བོ། སྐྱབས་གནས་ཀུན་གྱི་ཐུགས་རྗེ་དང་བྱིན་རླབས་ཀྱི་ཕུང་པོ་གཅིག་ཏུ་བསྡུས་པའི་རང་གཟུགས་རྗེ་བཙུན་བླ་མ་དམ་པ་ཁྱོད་ནི། གཟོད་མ་ནས་ཟད་དང་མི་སྐྱེ་ཤེས་པའི་ཡེ་ཤེས་མངོན་སུམ་དུ་བརྙེས་སུ་ཟིན་ཀྱང་། གཞན་ལ་ཕན་པར་མཛད་པའི་དམ་བཅའི་རི་མོ་གཞར་ཡང་ནུབ་པ་མེད་པས་ཆེས་ཆེར་སྙིགས་མར་གྱུར་པའི་དུས་འདིར་སུམ་ལྡན་རྡོ་རྗེ་འཛིན་པ་ཆེན་པོའི་རྣམ་རོལ་དུ་བཞེངས་ཏེ། མཐའ་ཡས་པའི་འགྲོ་བ་ཀུན་ལ་ལམ་བདེན་གྱི་བདུད་རྩི་མངོན་སུམ་དུ་བསྟན་ནས་མངོན་མཐོ་དང་ངེས་ལེགས་ཀྱི་གོ་འཕང་ལ་སྦྱོར་པའི་བཀའ་དྲིན་ནི་བྱང་ཆུབ་སྙིང་པོའི་བར་དུ་གཞལ་བར་སླ་བ་མ་ཡིན་ལ། ད་དུང་ཡང་བདག་སོགས་ལྟོས་བཅས་ཡོངས་ཀྱི་སྐྱབས་དང་། མགོན་དང་། དཔུང་གཉེན་གཅིག་པུར་འབྱུང་འགྱུར་གྱི་རྒྱལ་བ་ཡིད་སྲུབས་ཀྱི་ཕྱོགས་ལས་རྣམ་པར་རྒྱལ་ཏེ་མཐའ་ཀླས་སྡེ་སྣོད་ཀྱི་རྒྱལ་རྔ་སྲིད་རྩེར་བརྡུང་བའི་བར་དུ་མི་ཤིགས་རྡོ་རྗེའི་ཁྲི་འཕངས་མཐོན་པོར་འཆི་མེད་མགོན་པོ་ཚེ་མཐའ་ཡས་པའི་རང་གཟུགས་སུ་འཚོ་ཞིང་གཞེས་ལ་ཆོས་
ཀྱང་སྟོན་པར་སྙིང་ཐག་པ་ནས་གསོལ་བ་འདེབས་པའི་རྟེན་དུ། རང་གཞན་གྱི་རྒྱུད་ཀྱིས་བསྡུས་པའི་བདོག་དགུ་སྤྱི་དང་ཁྱད་པར་རྣམ་པར་དཀར་བའི་ལེགས་བྱས་ཐམས་ཅད་ཕྱོགས་གཅིག་ཏུ་བསྡུས་ཏེ་འཕགས་པ་ཀུན་ཏུ་བཟང་པོའི་སྨོན་ལམ་ལས་བྱུང་བའི་མཆོད་སྤྲིན་དུ་བྱིན་གྱིས་རླབས་ནས་འབུལ་བ་དང་ཆབ་གཅིག །དེ་ཉིད་མཚོན་པའི་དངོས་པོའི་མཎྜལ་ཟེག་མར། ཐོག་མར་བཀྲ་ཤིས་པའི་རྟགས་ཀྱི་རྣ་ཆས་སྒེག་པའི་ལྷ་རྫས་ཀྱི་ཝ་ཧཱུཾ་དཀྱུས་སུ་རིང་བ་སོགས་ནས། མཐའ་རྟེན་སྟན་དཀར་རྡོ་རྗེ་དང་གཡུང་དྲུང་གི་མཚན་མས་བརྒྱན་པ་སྟེ་རྣམ་གྲངས་འབུལ་ལམ་ཞུས་པ་བརྩེ་ཆེན་ཡེ་ཤེས་ཀྱི་གཟིགས་པས་བདག་གིར་མཛད་དེ། རེ་བའི་ཤིང་རྟ་མངོན་འདོད་ཀྱི་བདོག་པས་ཕྱུར་བུར་བགེངས་པར་མཛད་དུ་གསོལ། །སརྦ་མ་ནོར་ཐཾ་པ་རི་པུཎྞཾ་ཀུཆནྟུ། ཞེས་སམ། ཤྲཱི་ཛི་བ་ཏིཥྛནྟུ། གདོད་ནས་ཡོངས་གྲུབ་འཆི་མེད་རྟག་པའི་སྐུར། །གཟུང་འཛིན་འཕོ་བའི་བག་ཆགས་ཀུན་བཅོམས་པས། ཁ་སྦྱོར་རྡོ་རྗེའི་ལང་ཚོར་འབར་བཞིན་དུ། །རྟག་པ་རྒྱུན་གྱི་འཁོར་ལོར་འཚོ་གཞེས་གསོལ། །གཞན་ཕྱིར་རྨད་བྱུང་གཏོང་བའི་རིན་ཆེན་ནི། །དམ་ཆོས་བདུད་རྩིའི་ཆོ་གས་དགེ་བྱས་པ། །སྐལ་བཟང་འགྲོ་བའི་དཔྱིད་དུ་སྩོལ་བཞིན་དུ། །ངེས་པར་ཞིང་ཁམས་འདི་ལས་གཡོ་མེད་མཛོད། །དཔག་མེད་འགོགས་པའི་བརླན་གྱིས་ཕྱེ་བ་ཡི། །རྣམ་གྲོལ་
ཚུལ་ཁྲིམས་ཕུང་པོའི་ཨུཏྤ་ལ། །ངོ་མཚར་དགེ་མཚན་ཕྲག་བརྒྱས་གཏམས་བཞིན་དུ། །འཆི་མེད་གྲུབ་པའི་ལང་ཚོ་འབར་གྱུར་ཅིག །མི་འཁྲུགས་བཟོད་པའི་གོ་ཆ་བརྟན་པོའི་ངོར། །ཡིད་སྲུབས་དཔུང་གིས་བཏེགས་པའི་མཚོན་རྣོན་ཀྱང་། །སྙིང་རྗེའི་མེ་ཏོག་གཞོན་ནུར་དཔྱངས་པ་ལས། །ཟླ་མེད་གྲགས་པའི་རྒྱལ་རྔ་སྙན་པར་ཤོག །བསྐལ་མང་གཞན་གྱི་དོན་ལ་བརྩོན་པ་ཡི། །ཚོགས་ཟུང་བྱེ་བས་སྐ བསྐྲུན་པའི་མཚན་དཔེའི་དཔྱིད། །ཆེ་དགུའི་རལ་པས་བཏེགས་པའི་ནོར་བུའི་ཁྲིར། །ཞབས་པད་སྲིད་མཐའི་བར་དུ་བརྟན་གྱུར་ཅིག །ཟབ་རྒྱས་གདམས་པའི་བདུད་རྩི་སིམ་པ་ལས། །ཤིན་ཏུ་ཞི་བ་དམ་པའི་ནགས་ཀླུངས་སུ། །འཇུག་དང་ལྡངས་བ་བྲལ་བའི་བསམ་གཏན་གྱིས། །སྐྱེ་འཇིག་མཚན་མའི་སྤྲོས་པ་རྟུལ་བར་མཛོད། །རྡུལ་བྲལ་སོ་སོར་རྟོག་པའི་ཤེས་རབ་ཀྱིས། །འགྱུར་བཅས་ཆོས་སུ་སྣང་བའི་ཁམས་ཇི་སྙེད། །འཆི་མེད་རྟག་པའི་བདེན་པར་གཟིགས་བཞིན་དུ། །བརྟན་པར་མཛོད་ཅིག་སྙིང་རྗེའི་ལུས་ཅན་ཀྱེ། །དེ་ལྟར་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་གང་གིས་གཤེགས་པའི་ཨུ ལམ་མཆོག་ཕ་རོལ་ཏུ་ཕྱིན་པ་དྲུག་གི་སྒྲ་ལས་དྲངས་པའི་དགེ་ལེགས་ཀྱི་དབྱངས་སྙན་ཅུང་ཟད་བརྗོད་པས་མདུན་བསུས་ཏེ། དེང་གི་ཆར་ཡང་། སོགས་སྔ་མ་བཞིན་ལ་བརྗོད་བྱེད་རྒྱས་བསྡུས་ཅི་རིགས་པར་
སྐྱར་རོ། ཡང་ན། ཨོཾ་སྭསྟི་ཏིཥྛནྟུ། ཆོས་དབྱིངས་ཤིན་ཏུ་རྟག་པ་དམ་པ་ལས། །རྣམ་པ་ཀུན་གྱི་མཆོག་ལྡན་རྡོ་རྗེའི་སྐུ། །སྣ་ཚོགས་མོས་པའི་རྗེས་མཐུན་སྒྱུ་འཕྲུལ་ཅན། །ལོངས་སྤྱོད་ཡོངས་རྫོགས་འཁོར་ལོར་འཚོ་གཞེས་གསོལ། །རྡུལ་བྲལ་འོད་གསལ་སྟོང་པའི་དགའ་མ་ལ། །མི་འགྱུར་བདེ་བའི་སྒྱུ་ཐབས་གྱིས་སྦྲེལ་བས། །ཟུང་འཇུག་ཐིག་ལེ་གཅིག་ལས་མི་འདའ་བས། ཁ་སྦྱོར་མཚན་དཔེའི་ལང་ཚོར་འཚོ་གཞེས་གསོལ། །ཀུན་ཏུ་འཕོ་བའི་འགྲོ་འོང་རྒྱུར་བཅས་པ། །འཕོ་མེད་དབུ་མའི་སྲོག་ཏུ་འབར་བ་ལས། །ཆར་ཡང་ཟག་པ་སྤངས་པའི་ནཱ་དའི་གསུངས། །བདེ་ཆེན་ཡེ་ཤེས་ཆེན་པོར་འཚོ་གཞེས་གསོལ། །གཤིས་ལ་སྐྱེ་བའི་སྡང་པ་བྲལ་གྱུར་ན། །དེ་ལ་འཇིག་པའི་ཕ་མཐའ་མ་དམིགས་ཕྱིར། །གཞར་ཡང་སྤྲོས་པ་ཀུན་ལས་རངས་པའི་ཐུགས། །རང་བཞིན་མེད་པའི་དབྱིངས་སུ་འཚོ་གཞེས་གསོལ། །གཟོད་ནས་མཚན་མའི་རྟོག་པ་སྤངས་གྱུར་ཀྱང་། །གཞན་ཕྱིར་དམིགས་པའི་དམ་བཅས་མི་འདོར་བས། །སྙིགས་མའི་འགྱུར་བས་གཟིངས་པའི་སྐྱེ་དགུ་ལ། །སྙིང་རྗེས་ཡོངས་སུ་གང་ཁྱོད་འཚོ་གཞེས་གསོལ། །རྒྱལ་བའི་ཐུགས་རྗེ་རྟག་པ་དམ་པ་ནི། །ནམ་ཡང་འཆར་དང་ནུབ་པ་ལས་གྲོལ་ཕྱིར། །ཚུར་མཐོང་གདུལ་བྱའི་ངོར་ཡང་མི་སྲེད་པར། །ཕྲིན་ལས་རྒྱུན་མི་འཆད་པར་འཚོ་གཞེས་གསོལ། །གང་ལ་རེག་ན་ཕན་
བདེའི་འབྱོར་པ་མཆོག །འབད་མེད་ལག་རྩེར་སྦྱིན་ལ་ནོར་གྱི་བུས། །མཚོན་མིན་གཏན་བདེའི་ངལ་བསོ་སྟེར་མཛད་པའི། །ཡོན་ཏན་འགོགས་པ་མེད་པར་འཚོ་གཞེས་གསོལ། །ཞེས་རྒྱལ་བ་རྣམས་ཀྱི་གང་ཞིག་བརྙེས་པའི་སྤངས་རྟོགས་ཀྱི་ཁྱད་པར་མཐར་ཐུག་པ་སྐུ་གསུམ་ཡན་ལག་བདུན་ལྡན་གྱི་སྒྲ་ལས་དྲངས་ཏེ་སྐུ་གསུངས་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་རྣམ་རོལ་དུ་འཚོ་ཞིང་གཞེས་པར་གསོལ་བ་འདེབས་པའི་ཚིགས་སུ་བཅད་པ་མེ་ཏོག་མནྡ་རའི་དོ་ཤལ་ལྟ་བུར་གཡོ་བས་ལམ་ཡངས་པར་བྱས་ཏེ། དེང་གི་ཆར་ཡང་སོགས་ཐོག་མ་བཞིན་དུ་སྦྱར་རོ། །དེ་ལྟར་འཕྲོས་དོན་གྱི་ཁྱད་པར་སྣ་ཚོགས་པ་འདི་རྣམས་འཕྲིན་ཡིག་འབུལ་ཚུལ་ཁོ་ན་ལ་མ་ལྟོས་ཀྱང་། དོན་གཉེར་ཅན་དག་ལ་ཉེ་བར་མཁོ་བའི་འོས་སུ་གྱུར་པའི་རིགས་ཐམས་ཅད་ཀྱི་དཔེར་བརྗོད་པ་ཉུང་བསྡུས་ཤིག་རྟོགས་སླ་བ་༧ཕྱོགས་གཅིག་ཏུ་བཀོད་པ་སྟེ། གཞན་ཡང་ཁྲི་འདོན་དང་ཞབས་བརྟན་གྱི་སྐབས་སོགས་སུ་སྦྱོར་བར་འོས་པའི་ཕུན་སུམ་ཚོགས་པ་རྣམ་ལྔ་དང་། བཀྲ་ཤིས་རྫས་རྟགས་རྒྱལ་སྲིད་བདུན་སོགས་ཀྱི་རྣམ་བཤད་ཉུང་བསྡུས་ཤིག་ཀྱང་སྤྲོ་བར་འོས་མོད་ཀྱི་ཁོ་བོ་ཅག་གིས་གཞན་དུ་བརྗོད་ཟིན་པའི་ཕྱིར་དེར་བལྟ་བའི་དབང་དུ་བྱས་ནས་འདིར་རེ་ཞིག་དེ་ཙམ་དུ་ཉེ་བར་བསྡུས་སོ། །ཡངས་པའི་རྒྱལ་ཁམས་ཐམས་ཅད་ཆོས་
བཞིན་དུ་སྐྱོང་བའི་རྒྱལ་པོ་ཆེན་པོ་ཞིག་ལ་འབུལ་ན། ཚངས་དབང་བདེ་འབྱུང་བདག་པོ་ལ་སོགས་པ། །བསོད་ནམས་བྱེ་བས་དྲེགས་པའི་སྤུན་ཟླ་རུ། །ངེས་ཀྱང་ཆོས་ཀྱི་འབྱོར་པས་མངོན་མཐོ་ཕྱིར། །མཚུངས་མེད་མི་ཡི་ལྷ་གཅིག་རྒྱལ་གྱུར་ཅིག །གང་ན་གྲགས་པ་དྲི་མེད་ཟླ་བའི་ཟེར། །བཏུང་བས་མྱོས་པའི་སར་སྐྱེས་སྟེང་འཐུང་དཀར། །དྭངས་པའི་མགྲིན་པ་མཐོན་པོར་བཏེགས་བཞིན་དུ། །ཞུ་མཆིད་སོ་ཡི་ཟེའུ་འབྲུ་སྟོན་ལ་ཕྱོགས། །འདི་ན་ཕུན་སུམ་ཚོགས་པའི་གཞིར་གྱུར་པ། །ལུང་དང་རྟོགས་པའི་བསྟན་པ་རིན་པོ་ཆེར། །ངེས་ཀྱང་དེའི་བྱེད་པོ་ས་སྤྱོད་ལ། །རགས་ལས་མཐོང་ནས་བྱང་ཆུབ་སེམས་དཔའི་ཚོགས། །བསམ་བཞིན་མི་ཡི་སྲིད་པར་འཁྲུངས་པ་ལ། །སོམ་ཉིའི་འཁྱོགས་ཐག་ཆད་པའི་དམ་པ་གང་། །འཚོ་གཞེས་བརྟན་པའི་སྤྲིངས་ཡིག་ཐོས་ཙམ་གྱིས། །དོན་གཉིས་གྲུབ་པའི་སྟེགས་ལ་ངལ་འཚོར་གྱུར། །འདི་ནའང་ཁྱོད་ཀྱི་བཀའ་དྲིན་རྨད་བྱུང་དཔྱིད། །ཕན་བདེའི་བསིལ་འོད་སྣུམ་པའི་རྭ་བ་རུ། །འདུ་ཤེས་གསུམ་གྱི་མལ་དུ་བདེར་གནས་བཞིན། །ཉེར་འཚེའི་གེགས་ཀྱི་འདུ་བྱེད་བྲལ་བར་མཆིས། །འབྱུང་འགྱུར་དུས་ཀྱང་མཚན་བཟང་ཨུཏྤལ་ལ། །ལྷར་བཅས་སྐྱེ་དགུའི་ཐོར་ཏོའི་རྩེ་མོ་རུ། །ནུབ་མེད་རྟག་པར་འཆར་བའི་གཟི་བྱིན་གྱིས། །རྫོགས་ལྡན་གསར་པའི་དགའ་སྟོན་སྤྲོ་བར་མཛོད། །
དེ་སྐད་ཞུ་མཆིད་ཏེ་པོར་བརྗོད་པ་ཡིས། །ངང་ཚུལ་དཔལ་གྱི་དུམ་བུའི་དྲི་བསུང་ནི། །གཟིགས་རྟེན་མ་ལ་ཡ་ཡི་རླུང་བཞོན་དང་། །འགྲོགས་ཏེ་ཁྱོད་ཞབས་བསྙེན་བཀུར་བགྱི་སླད་སྤྲོས། །ཡང་ན། གང་གིས་ཕས་རྒོལ་སྙིང་ལ་མྱ་ངན་མེས། །རྣམ་པར་གདུངས་མོད་ཆབ་འབངས་སྲོག་གི་ཟུང་། །བྱམས་བརྩེའི་བདུད་རྩིས་བརླན་པའི་གྲགས་དཀར་གྱིས། །ཕྱོགས་ཀྱི་ཁོར་ཡུག་ཀུན་ཏུ་ཁྱབ་དེའི་དྲུང་། །གང་ཚུལ་གཏོང་དང་སྙིང་སྟོབས་མ་ཞུམས་པའི། །རིན་ཆེན་རྡུལ་མང་འཛགས་པའི་མ་དྲོས་གཏེར། །མཐོང་བས་ཡིད་ལ་སིམ་པ་མི་ཟད་པ། །བྱིན་ནས་རྗེས་སུ་བསྔགས་པའི་མཆིད་འདི་གླེངས། །ས་འདི་རིར་བཅས་རྟེན་དང་བརྟེན་པ་ཀུན། །གང་གི་དཔུང་པས་བཟུང་ལ་ངོ་མཚར་ཅི། །བྱང་སེམས་མི་ཡི་མྱུ་གུར་བརྫུ་བའི་ཕྱིར། །རྣམ་གྲོལ་ཆོས་ཀྱི་འབྱོར་པས་མཐོ་མིན་ནམ། །དེ་ཕྱིར་འཚོ་གཞེས་བརྟན་པའི་གཏམ་སྙན་ལ། །རྗེས་སུ་དཔག་པས་སྤྲོ་དགའི་འདུ་བྱེད་ཀྱིས། །རྣམ་པར་སིམ་པའི་ཀུན་རྨོངས་བདག་ཅག་ཀྱང་། །ལང་ཚོའི་འདུ་བྱེད་ཉམས་པར་མ་གྱུར་བཞིན། །སླད་མར་བསོད་ནམས་དུ་མའི་ས་འཛིན་གྱིས། །ཨུ རྣམ་པར་བསྲུབས་པའི་གཟུགས་སྐུའི་གོ་བི་དཱ། །སྐྱེ་དགུར་ཕན་བདེའི་དགའ་སྟོན་སྩོལ་བའི་སླད། །ཡུན་རིང་བརྟན་པའི་ཐབས་ཚུལ་ལྷུར་བཞེས་གསོལ། །དེ་སྐད་ཞུ་མཆིད་སྨིན་ལེགས་སིནྡྷཱ་ར། །སྙན་ཚིག་
ལི་ཁྲིའི་ཐིག་ལེ་གཡོ་བ་དང་། །རྟེན་དངོས་འབྲས་བཟང་ཉམས་པ་མེད་དང་བཅས། །ཀུན་ཏུ་དགེ་བའི་ཆོས་ལ་རིངས་པར་ཕུལ། །ཡང་ན། ཚངས་དབང་ས་ལ་རྒྱུ་བའམ། །ས་བདག་གྲགས་པའི་བ་དན་གང་། །ཆོས་ཀྱི་འབྱོར་པས་རབ་འཕགས་ཕྱིར། །མི་ཡི་དབང་པོར་ངེས་དེའི་དྲུང་། །གང་གི་རིགས་གཟུགས་ལང་ཚོ་སོགས། ཡོན་ཏན་ཉམས་པ་མེད་པ་ཉིད། །རྣ་བའི་རྒྱན་དུ་བྱིན་པ་ཡིས། །ཡིད་རབ་སྤྲོ་བས་མཆིད་འདི་གསོལ། །འདི་ན་སྟོབས་དང་རྒྱལ་སྲིད་སོགས། །ཕྱོགས་རེས་དྲེགས་པ་མང་མོད་དེ། །ལུགས་གཉིས་ཕུན་སུམ་ཚོགས་པའི་གཏེར། །མཐའ་དག་རྫོགས་པ་ཁྱོད་ལས་སུ། །ཚུལ་དེའི་དཔལ་ལ་བསམ་པ་ཡིས། །སྤྲོ་དགའ་ལྐོག་ཏུ་མ་གྱུར་བར། །ཡང་ཡང་ངོམས་བཞིན་གནས་བདག་ཀྱང་། །འཚོ་བའི་འདུ་བྱེད་བདེ་བར་མཆིས། །སླད་ནས་ནོར་འཛིན་དགའ་མ་ནི། །ལྷུན་པོའི་རྣ་རྒྱན་དང་བཅས་པ། །གནས་པ་ཇི་སྲིད་བསོད་ནམས་ཀྱི། །མཚན་བཟང་ནུབ་པ་མེད་པར་མཛོད། །ཞུ་མཆིད་དྭངས་པའི་བློ་གྲོས་ཀྱི། །རྫིངས་བུར་ཡུན་རིངས་གསོས་པ་ལས། །སྙན་ཚིག་ཆུ་སྐྱེས་སར་པ་ཡང་། །གཟིགས་རྟེན་གེ་སར་བཅས་ཏེ་ཕུལ། ༈ །ཡང་རང་སྡེ་བྱམས་པས་སྐྱོངས་ཤིང་། །ས་བདག་ཆེན་པོའི་བཀའ་དྲིན་གདུགས་དཀར་གྱི་གྲིབ་མར་ངལ་འཚོ་བའི་རྒྱལ་ཕྲན་ཕལ་པ་ཞིག་ལ་འབུལ་ན། །ལེགས་སྤྱད་བསོད་
ནམས་འབྲས་བུ་སྨིན་པའི་དཔྱིད། །དཔལ་འབྱོར་ཨ་མྲ་གསར་པའི་དོགས་པ་ཅན། །རང་སྡེ་བྱམས་པའི་གྲིབ་མས་སྲུངས་མཁས་པ། །ལྗོན་བཟང་ས་ཡི་ཐིག་ལེ་འཛིན་དེའི་དྲུང་། །གང་ཚུལ་དགེ་བའི་གཏམ་སྙན་ཨུ་དུམྦར། །ཐོད་པར་དཀྲིས་པའི་རི་དྭགས་མིག་མ་ཡིས། །བདག་ཡིད་བརྟན་པ་ཕྲོགས་དང་ཆབ་གཅིག་པར། །ཞུ་མཆིད་ཚིག་གི་ཕྲེང་བ་དབྱངས་སུ་བསྟར། །ཚོགས་གཉིས་དྲོད་གཤེར་གྱིས་སྨིན་དལ་འབྱོར་གྱི། །ལྕུག་ཕྲན་མ་ཉམས་དར་བའི་ཕངས་པ་ནས། །སྡེ་བཞིའི་འབྲས་བཟང་གཡུར་དུ་ཟ་བ་གང་། །ལུགས་གཉིས་ཏེ་བོར་སྤྱོད་པར་རྗེས་སུ་རངས། །འདི་ན་སྲིད་དང་ཞི་བའི་ཡོན་ཏན་གྱིས། 。 ཁྱད་པར་བྱས་པ་འགའ་ཡང་མེད་མོད་ཀྱི། །མཆོག་གསུམ་བཀའ་དྲིན་དཔལ་ཀྱི་དུམ་བུ་ནི། །ཡིད་ལ་ཆགས་པས་ཉེར་འཚོའི་གདུང་བ་བྲལ། །སླད་མའི་ཆར་ཡང་རྣམ་དཀར་ཆུ་འཛིངས་ལས། །བླངས་པའི་སྒོ་གསུམ་ཙིནྟ་མ་ཎི་ཆེ། །ཕན་བདེའི་འདོད་དགུ་སྩོལ་དང་ལྷན་གཅིག་པར། །ལྟོས་བཅས་ཆབ་འབངས་དཔྱིད་དུ་བརྟན་པར་མཛོད། །དེ་སྐད་དྭངས་བའི་ཡིད་ཀྱི་དཔྱིད་དཔལ་ལས། ཉེ་བར་འཁྲུངས་པའི་ཚིག་རྒྱན་ཀུཎྜ་ཀ །ཞུ་འདེགས་ཟླ་ཞུན་གོས་བཟང་ཀླུབས་དང་བཅས། །ཡུལ་འཁོར་དཔུངས་པས་བསྲུང་པའི་མདུན་དེར་འཛུམས། །ཞེས་པ་ལྟ་བུས་མཚོན་ཡུལ་མཆོག་དམན་གྱི་བབས་དང་བསྟུན་ནས་སྦྱར་
ཤེས་པར་བྱའོ། །ལུགས་གཉིས་ཀྱི་དཔུངས་བས་ས་ཆེན་བདེ་བར་སྐྱོངས་པའི་ཆོས་རྒྱལ་ཆེན་པོའི་ཁྲིམས་ཀྱི་ཁ་ལོ་བསྒྱུར་བ་ལ་རྣམ་དཔྱོད་ཏེ་པོར་ཡངས་པའི་བཀའི་བློན་ཆེན་ཞིག་ལ་འབུལ་ན། རྨད་བྱུང་ས་ཡི་ཚངས་པ་ཆེན་པོ་ཡི། །ཆོས་སྲིད་ཐུར་མ་བརྒྱ་པའི་འཇོ་སྒེག་ཅན། །གཟུར་གནས་བློ་གྲོས་དཔུངས་པས་བཟུང་མཁས་ཕྱིར། །ལུགས་གཉིས་ཁྲིམས་ཀྱི་ཁ་ལོ་བསྒྱུར་དེའི་དྲུང་། །གང་གི་མཛད་བཟང་ཏེ་བོར་སྤྱོད་པ་ཡིས། །གྲགས་སྙན་བདུད་རྩིས་ར་བའི་སྤུན་ཟླ་ཅན། །རིང་ནས་རྣ་བས་འཐུང་བའི་སིམ་པ་ཡིས། །རབ་ཏུ་མྱོས་པས་སྤྲོ་དགའི་ཞུ་མཆིད་འབུལ། །བསོད་ནམས་གསེར་གྱི་དྲ་བས་གདོང་མཛེས་ཤིང་། །ཕྱོགས་ལྷུང་སྤངས་པའི་རྣམ་དཔྱོད་གཙུག་བུམ་མཐོ། ཁྲིམས་གཉིས་ནོར་བུའི་ཁུར་མང་འདེགས་བཟོད་གང་། །སྔོན་མེད་གཉིས་འཐུང་དབང་པོ་མཆོག་ཏུ་ངེས། །དེ་སླད་སྒོ་གསུམ་ཉེར་འཚེའི་དྲི་བྲལ་བའི། །གཏམ་བཟང་ག་བུར་ཐིག་པ་བཏུང་བ་ལས། །འདི་ན་གནས་པའི་འདུ་ཤེས་གསུམ་པ་ཡང་། །སྤྲོ་དགའི་ངལ་འཚོ་ཅིར་ཡང་ཐོབ་པར་གྱུར། །སླད་མར་དྲ་མའི་གཞུང་ལུགས་མ་ཉམས་པའི། །སྤྱོད་མཆོག་དཔག་བསམ་གཞོན་ནུའི་གྲིབ་བསིལ་དུ། །ཆབ་འབངས་བྱམས་པས་སྐྱོངས་དང་ལྷན་གཅིག་པར། །ཕྱོགས་ལས་རྣམ་པར་རྒྱལ་བའི་དཔལ་ཐོབ་མཛོད། །དེ་སྐད་ལྷག་བསམ་དཔྱིད་ལྡན་སྨིན་ལེགས་མའི། །