གངས་ཅན་གྱི་ཡུལ་དུ་བྱོན་པའི་ལོ་པཎ་རྣམས་ཀྱི་མཚན་ཐོ་རགས་རིམ་ཚིགས་བཅད་དུ་བསྡེབས་པ།
ཤོག་ལྷེབ་ ༡ ནས་ ༡༠༠ བར།
༄༅། །གངས་ཅན་གྱི་ཡུལ་དུ་བྱོན་པའི་ལོ་པཎ་རྣམས་ཀྱི་མཚན་ཐོ་རགས་རིམ་ཚིགས་བཅད་དུ་བསྡེབས་པ་མ་ཧཱ་པཎྜི་ཏ་ཤྲཱི་ལ་རཏྟའི་གསུང་བཞུགས་སོ། །
༄༅། །ཨོཾ་སྭསྟི། བོད་དུ་རྒྱལ་བའི་བསྟན་པ་སྔ་དར་དུས། །རྒྱ་བལ་ཁ་ཆེ་ནས་བྱོན་པཎྜིཏ། །ཀུ་ས་ར་དང་བྲམ་ཟེ་ཤང་ཀ་ར། །བལ་པོ་མཉྫཤྲཱི་དང་མཁན་ཆེན་ཞི་བ་འཚོ། །པདྨ་འབྱུང་གནས་སྔགས་འཆང་ཆོས་ཀྱི་གྲགས། །དྲི་མེད་བཤེས་གཉེན་དང་ནི་སངས་རྒྱས་གསང་། །བསམ་ཡས་རབ་གནས་མཁན་ཤཱནྟཾ་གནྡྷ་རྣམ་དག་སེང་གེ་དང་། །པདྨའི་ངང་ཚུལ་བྲམ་ཟེ་ཨཱ་ནན། །ཀཝ་མི་ཏྲ་ཛི་ན་མི་ཏྲ་དང་། །ལྷ་དབང་བྱང་ཆུབ་ཤཱི་ལེནྡྲ་བོ་དྷི། །དཱ་ན་ཤཱི་ལ་བོ་དྷི་མི་ཏྲ་དང་། །མུ་ནི་ཝརྨ་སརྦ་ཛྙཱ་དེ་བ། །བིད་ཀར་པྲ་བྷཱ་རིག་བྱེད་འོད་ཟེར་བྱ་བ་ལ་སོགས་དང་། །རྒྱ་ནག་སློབ་དཔོན་མ་ཧཱ་དེ་བ་ཆེ། །མ་ཧཱ་ཡཱ་ན་བྱ་བ་ལ་སོགས་བྱོན། །དེ་དེའི་སྙན་དུ་སྐད་གཉིས་སྨྲ་བའི་
དབང་། །ཀུན་གྱི་སྔོན་མ་ཐོན་མི་སམྦྷོ་ཊ། །དྷརྨ་ཀོཥྛ་དང་ནི་རྡོ་རྗེ་དཔལ། །བྲན་ཀ་ལུ་ལ་ཀོ་ཥ་ཡེ་ཤེས་གཉགས་གཞོན་ནུ་དང་། །ངན་ལམ་རྒྱལ་བ་མཆོག་དབྱངས་རྦ་ཡེ་ཤེས་དབང་། །སྦ་ཁྲི་གཞེར་སཾ་ཤི་ཏ་དང་སྦྲང་རྒྱུར་ལེགས་གཟིགས་མཚན། །སེང་གདོང་ལྷ་ལུང་གཟིགས་དང་རྦ་གསལ་སྣང་དང་། །སྣ་ནམ་རྡོ་རྗེ་བདུད་འཇོམས་ལྕེ་ཛྷཱ་ན་སིདྡྷིའི་མཚན། །མཆིམས་ཤཱཀྱ་པྲ་བྷ་ཛ་ཡ་བྲང་ཏི་རཀྟི་ཏ། །ཤུད་པུ་དཔལ་གྱི་སེང་གེ་མཉྫཤྲཱི་དཔལ། །ལྷ་དབང་སྲུང་དང་བྲན་ཀ་མུ་ཏི་ཀ །རྣམ་པར་སྣང་མཛད་སྲུང་དང་ཀླུ་དབང་སྲུངས། །རིན་ཆེན་མཆོག་དང་རིན་ཆེན་ལེགས་པར་གྲུབ། །དྷརྨ་ལོ་ཀ་དྲན་པ་ནམ་མཁའ་དང་། །རྣམ་པར་མི་རྟོག་ཤཱཀྱ་འོད་དང་རྩེ། །ཁྱི་
འབྲུག་དང་ནི་ཁམས་པ་ཉང་གོ་ཆ་ཛཱ། །དེ་བ་ཀོ་ཥ་རྒྱལ་མཉེན་ཞང་ཉ་བཟང་དང་། །འགོས་ལོ་ཆོས་འགྲུབ་སྟོང་གི་ཨཱ་ཙརྨ། །དྷརྨ་ཤཱི་ལ་ཅོག་རོ་ཀླུ་ཡི་རྒྱལ་མཚན་དང་། །དཔལ་བརྩེགས་སྲུང་དང་རཏྣ་རཀྟི་ཏ། །ཡེ་ཤེས་སྡེ་དང་ཛ་ཡ་རཀྵི་ཏ། །འཇམ་དཔལ་གོ་ཆ་རཏྣེནྡྲ་ཤཱི་ལ། །བཟང་སྐྱོང་ལྷ་ཡི་ཟ་བ་དཔལ་གྱི་ལྷུན། །དཔལ་གྱི་འབྱོར་པ་ཡེ་ཤེས་སྙིང་པོ་ཅན། །རྒྱལ་བ་ཤེས་རབ་ཤཱཀྱ་བཤེས་གཉེན་དང་། །དགེ་བ་དཔལ་དང་ལེགས་སྡེ་ནམ་མཁའི་སྙིང་། །ཡིག་མཁན་དགོན་གླིང་རྨ་དང་གཞོན་ནུ་སྲུང་། །ནམ་མཁའ་སྐྱོང་སྟེ་སྐད་གཉིས་སྨྲ་རྣམས་ཀྱིས། །དམ་པའི་ཆོས་མང་བོད་ཀྱི་སྐད་དུ་བསྒྱུར། །བསྟན་པ་ཕྱི་དར་དུས་ཀྱི་པཎྜིཏ། །བུདྡྷ་པཱ་ལ་དྷརྨ་པཱ་ལ་དང་། །པྲཛྙཱ་པཱ་ལ་དང་ནི་ལེགས་པར་བཤད། །ཤྲདྷཱ་ཀ་ར་ཝརྨ་པདྨ་སྲས། །མུཀྟི་མི་ཏྲ་སངས་རྒྱས་དཔལ་ཞི་བ། །ཤེས་རབ་གོ་ཆ་དཔལ་ལྡན་ཇོ་བོ་ཨ་ཏི་ཤ །དེའི་དབོན་དཱ་ན་ཤཱི་ལ་དྲན་པ་ཡེ་ཤེས་གྲགས། །ཕྲ་ལ་རིང་བ་སུ་ན་ཡ་ཤྲཱི་དང་། །ཁ་ཆེ་ཛྙཱ་ན་ཤྲཱི་དང་ཙཱནྡྲ་རཱ་ཧུ་ལ། །འབུམ་ཕྲག་གསུམ་པ་དྷི་ར་པཱ་ལ་ཨ་ཏུ་ལྱཱ་ད་ཤ །བློ་བཟང་གྲགས་པ་ཨ་མ་ར་ཙནྡ། །ཐིག་ལེ་བུམ་པ་གཞོན་ནུ་བུམ་པ་དང་། །གསེར་གྱི་གོ་ཆ་དམ་པ་རྒྱ་གར་བ། །ཛ་ཡཱ་ནནྡ་ག་ཡ་དྷ་རའི་ཞབས། །དོན་ཡོད་རྡོ་རྗེ་ཁ་ཆེ་ཟླ་བ་མགོན། །སྟོང་ཉིད་ཏིང་འཛིན་རྡོ་
རྗེ་ཡེ་རྡོར་བ། །ཤེས་རབ་གསང་བ་མ་ཧཱ་ཛ་ན་དང་། །སྟོབས་ཀྱི་ཟླ་བ་མནྡ་ཀ་ལཀྵ། །ཀརྨ་བཛྲ་དང་ནི་ཛ་མཱ་རི། །དཔའ་བོ་རྡོ་རྗེ་སྒྲ་གཅན་འཛིན་སྦས་པ། །རྣམ་སྣང་རྡོ་རྗེ་མཉྫུགྷོ་ཥ་དང་། །སཱུརྨ་ཀཱིཏི་པྲཛྙཱ་ཤྲཱི་ཛྙཱ་ན། །གངྒཱ་དྷ་ར་དང་ནི་ནོར་སྦས་དང་། །ཀུན་བཟང་དཔལ་དང་ནིཥ་ལངྐ་ལྷ། །འགྲོ་བཤེས་དགའ་དང་བུདྡྷ་ཤྲཱི་ཛྙཱ་ན། །ཤཱཀྱ་ཤྲཱི་རབ་འབྱོར་ཟླ་བ་བཟང་། །སུ་ག་ཏ་ཤྲཱི་དཱ་ན་ཤཱི་ལ་དང་། །ཛ་ཡ་དཏྟ་དང་ནི་སཾ་གྷ་ཤྲཱི། །བློ་བཟང་སྙིང་པོ་ཀཱ་ལ་ཙནྡྲ་དང་། །ཛི་ན་གུསྟ་མ་ཧཱ་བོ་དྷི་པས། །ཛམ་བྷ་ཤྲཱི་འཇིག་རྟེན་གསུམ་ཀུན་པ། །ལོངས་སྤྱོད་རྡོ་རྗེ་དང་ནི་རཏྭ་ཧཱུཾ། །བལ་པོ་མ་ཧཱ་སེ་ན་བཛྲ་ཀཱིརྟི་དང་། །ཀ་ཡ་ཤྲཱི་དང་བལ་པོ་གྲགས་པ་དཔལ། །ཀུ་མཱ་ར་དང་ཐམས་ཅད་མཁྱེན་པའི་དཔལ། །སཱ་དྷ་ཀཱིརྟི་བི་ན་ཡ་ཤྲཱི་དང་། །ཤི་ལ་ཤྲཱི་དང་གངྒཱ་ལ་ཤཱི་དང་། །བི་མ་ཤྲཱི་དརླཎ་ཨཱ་ཙརླ། །རྒྱལ་བའི་ལྷ་དང་ལཀྵི་ཀ་ར། །ཨཱ་ནནྡ་ཤྲཱི་རཱ་ཧུ་ལ་ཤྲཱི་དང་། །ཟང་གླིང་པ་དང་ཀཱིཏི་པཎྜི་ཏ། །ཤ་རི་སཱུ་ཏྲ་ནགས་ཀྱི་རིན་ཆེན་དང་། །བུདྡྷ་གུསྟ་ཞེས་བྱ་ལ་སོགས་སོ། །དུས་དེར་སྔ་ཕྱིར་བྱོན་པའི་ལོ་ཙཱ་བ། །ཆེན་པོ་ལྷ་ཡི་བླ་མ་ཡེ་ཤེས་འོད། །རིན་ཆེན་བཟང་པོ་གྲགས་འབྱོར་ཤེས་རབ་དང་། །འབྲོ་སེང་ཀར་ཤཱཀྱ་འོད་དང་ལྷ་ཞི་བ་འོད། །རྔོག་ལེགས་པའི་ཤེས་རབ་རྒྱ་བརྩོན་འགྲུས་སེང་གེ་
དང་། །ཚུལ་ཁྲིམས་རྒྱལ་བ་ཁུ་ཡི་དངོས་གྲུབ་འབར། །འབྲོམ་རྒྱལ་བའི་འབྱུང་གནས་ཤཱཀྱ་བློ་གྲོས་མཚན། །མར་ཐུང་ཆོས་ཀྱི་ཤེས་རབ་དད་པ་ཤེས་རབ་དང་། །རྨ་དགེ་བའི་བློ་གྲོས་ག་རོད་ཚུལ་ཁྲིམས་འབྱུང་གནས་མཚན། །ཁྱུང་པོ་ཆོས་ཀྱི་བརྩོན་འགྲུས་སྟག་ལོ་གཞོན་བརྩོན་པ། །འགར་བ་ཆོས་བཟང་ཤེའུ་རྡོ་རྗེ་ལྷ། །རབ་ཞི་བཤེས་གཉེན་རྔོག་བློ་ལྡན་ཤེས་རབ་ཅན། །པུ་ཧྲང་ལེགས་པའི་ཤེས་རབ་འཕགས་པ་ཤེས་རབ་དང་། །ཤཱཀྱ་ཡེ་ཤེས་འབྲོག་མི་དགའ་བའི་རྡོ་རྗེ་གཟུང་། །གྱི་ལྗང་དབུ་དཀར་ཆོས་ཀྱི་ཡོན་ཏན་དང་། །ཆོས་ཀྱི་རིན་ཆེན་མར་པ་ཆོས་ཀྱི་བློ་གྲོས་མཚན། །གཉན་ལོ་དར་མ་གྲགས་དང་འགོས་ལྷས་བཙས། །གྱི་ཇོ་ཟླ་བའི་འོད་ཟེར་ཀློག་སྐྱ་ཤེས་རབ་བརྩེགས། །མལ་གྱོ་བློ་གྲོས་གྲགས་དང་སེ་ཙ་བསོད་ནམས་རྒྱལ་མཚན་པ། །རོང་པ་ཆོས་བཟང་ཡོལ་ལྕགས་རྡོ་རྗེ་དབང་ཕྱུག་དང་། །མར་འོད་བྱང་ཆུབ་ཤེས་རབ་ཙ་མི་སངས་རྒྱས་གྲགས། །ཁེའུ་གད་འཁོར་ལོ་གྲགས་དང་སྤང་ཞོ་གསལ་བར་གྲགས། །དིང་རི་ཆོས་གྲགས་སྒྱུས་ཀྱི་སྨོན་ལམ་གྲགས། །པ་ཚབ་ཉི་གྲགས་བ་རི་རིན་ཆེན་གྲགས། །ཤེས་རབ་གྲགས་དང་རྭ་ཆེན་རྡོ་རྗེ་གྲགས། །ཀྲེ་བོ་ཤེར་དཔལ་བཀྲ་ཤིས་རྒྱལ་མཚན་པ། །བ་རེག་ཐོག་དགའ་རྨ་བན་ཆོས་འབར་དང་། །མཚུར་སྟོན་དབྱིག་གི་རྒྱལ་མཚན་མཚུར་དབང་
ངོ་། །དཔྱལ་ཀུན་དགའ་རྡོ་རྗེ་དང་ནི་དཔྱལ་ཀུན་དགའ་གྲགས། །མར་དོ་ཆོས་དབང་ཆོས་ཀྱི་སྙིང་པོ་དང་། །ཀམ་ཆོས་ཀྱི་ཡེ་ཤེས་ཕྱུགས་མཚམས་ལུང་རིག་རྒྱ་མཚོ་དང་། །ཚུལ་ཁྲིམས་ཡོན་ཏན་ཁེའུ་གད་ཡོན་དཔལ། །བསོད་ནམས་བཟང་པོ་སུམ་པ་དཔལ་མཆོག་གི །རྡོ་རྗེ་དང་ནི་ཉི་མ་རྡོ་རྗེ་དང་། །ཁུ་དགེ་བསྙེན་ནེ་ཙོ་ཀློག་སྐྱ་གཞོན་ནུ་འབར། །ལྷ་སྟོན་ཡེ་ཤེས་རྒྱལ་མཚན་བྱང་ཆུབ་བྱང་།གླན་ཆོས་ཀྱི་བློ་གྲོས་ཅེག་གྲུ་ཏིང་ངེ་འཛིན་བཟང་པོ། །ཤེས་རབ་ཡེ་ཤེས་རིག་པ་གཞོན་ནུ་དང་། །ཚུལ་ཁྲིམས་བརྩེགས་པ་དང་ནི་ལྷ་བཙུན་པ། །ལྷ་བཙལ་ག་ནི་རྭ་ཛ་རྔོག་སངས་རྒྱས་བསྐྱངས། །རྒྱལ་གྱི་ལོ་ཙཱ་རྡོ་རྗེ་སྦལ་རྒྱལ་པོ་དང་། །དེ་བ་རིན་ཆེན་ལྷ་ཆོས་ཀྱི་རིན་ཆེན་དང་། སྒྱུར་ཚུལ་ཁྲིམས་འོད་ཟེར་དགེ་སློང་བྱ་ཡི་གདོང་། །ད་བྱིན་ལོ་ཙཱ་དང་ནི་ཕུལ་བུ་འོད། །པ་ཚབ་ཚུལ་རྒྱལ་ཤེས་རབ་ལེགས་དང་ནག་ཚོ་དྷརྨ་གྲགས། །མར་པ་བློ་གྲོས་བཟང་པོ་སེ་ལོ་ཙཱ། །ཟླ་བ་གྲགས་པ་གཉལ་མི་ཡེ་ཤེས་ཆོས། །ཆོས་ཀྱི་བླ་མ་དགེ་སློང་ཤེས་རབ་བསྐྱངས། །ནག་ཚོ་ཤེར་རྒྱན་འ་ཞྭ་རྒྱ་གར་བརྩེགས། །གཉན་སྟོན་བསོད་ནམས་བ་རི་ཆོས་གྲགས་དང་། །ཨོང་པོ་ལོ་ཙཱ་གཞོན་ནུ་ཤེས་རབ་དང་། །འགར་པ་ཤེར་འབྱུང་འཇམ་དཔལ་གཞོན་ནུ་དང་། །ཤེས་རབ་འོད་ཟེར་དང་ནི་ལྕེ་དགའ་བ་
དཔལ། །ཡེ་ཤེས་འབྱུང་གནས་ཤཱཀྱ་བརྩོན་འགྲུས་པ། །རྭ་པ་ཆོས་རབ་ལོ་བཙུན་ཆུང་རྡོ་རྗེ་རྒྱལ་མཚན་དང་། །ཞྭ་མ་དགེ་བསྙེན་སེང་རྒྱལ་ལྕེ་བཀྲ་ཤིས། །ཆག་ལོ་དགྲ་བཅོམ་དཔྱལ་པ་ཆོས་ཀྱི་བཟང་། །གནུབས་བྱམས་པའི་དཔལ་དང་ས་སྐྱ་པཎྜི་ཏ། །ཆག་ཆོས་རྗེ་དཔལ་དང་ཤེས་རབ་འོད་དཔྱལ་དང་ཞང་། །གྲུབ་པ་དཔལ་དང་གློ་བོ་ཤེས་རབ་རིན་པོ་ཆེ། །ལྷོ་བྲག་འུ་རུ་དར་མ་སེང་གེ་མི་མཉམ་བཟང་། །ཤོང་སྟོན་རྡོ་རྗེ་རྒྱལ་མཚན་ཤོང་བློ་གྲོས་བརྟན། །ཨོ་ཌི་ཡཱ་ན་རིན་ཆེན་དཔལ་དང་ཁམས། །བློ་གྲོས་རྒྱལ་པོ་ལྡན་མ་ཚུལ་སེང་དང་། །ར་ས་གཞོན་བརྩོན་ཤུ་ཀེ་གྲགས་རྒྱལ་མཚན། །ཐར་ལོ་ཉི་མ་རྒྱལ་མཚན་དཔང་ལོ་བློ་གྲོས་བརྟན། །སྒྲ་ཚད་སྨྲ་བ་དབུས་པ་རིན་རྒྱལ་བློ་གསལ་དང་། །ལེགས་པའི་བློ་གྲོས་ཡར་ཀླུང་གྲགས་རྒྱལ་མཚན། །བུ་སྟོན་རིན་ཆེན་གྲུབ་དང་ཐུགས་སྲས་རིན་ཆེན་རྣམ་རྒྱལ་བ། །ཇོ་ནང་བློ་གྲོས་དཔལ་དང་ཀུན་སྤངས་གྲགས་པའི་མཚན། །ལོ་ཆེན་བྱང་ཆུབ་རྩེ་མོ་བོ་དོང་གྲགས་རྒྱལ་མཚན།་།སྣར་ཐང་སཾ་གྷ་ཤྲཱི་དང་སྐྱབས་མཆོག་དཔལ། །ཆོས་འཁོར་སྒང་པ་ཤེས་རབ་རིན་ཆེན་འགོས་ལོ་གཞོན་ནུ་དཔལ། །ཆག་ལོ་རིན་ཆེན་ཆོས་རྒྱལ་བསོད་ནམས་རྒྱ་མཚོ་དང་། །ཆོས་སྐྱོང་བཟང་པོ་ཏཱ་ར་ནཱ་ཐ་དང་། །ངག་དབང་ཕུན་ཚོགས་ལ་སོགས་སྐད་གཉིས་སྨྲ། །མང་པོས་བཀའ་
དང་བསྟན་བཅོས་འདི་སྙེད་ཅིག །བསྒྱུར་དང་བཤད་པས་གཏན་ལ་དབབ་པར་མཛད། །ཅེས་སོ། །སརྦ་དཱ་མངྒ་ལཾ།། ༈ །།སྔ་འགྱུར་རྡོ་རྗེ་ཐེག་པ་ལ་བཀའ་གཏེར་གཉིས་ལས། ཟབ་མོ་གཏེར་གྱི་འཁོར་ལོས་སྒྱུར་བ་དང་། དེ་དང་རྗེས་སུ་འབྲེལ་བའི་གཏེར་ཕྲན་དང་། དག་སྣང་གི་བཀའ་བབས་འཛིན་པའི་གང་ཟག་མཐའ་ཡས་པ་ཞིག་བྱོན་པ་ལས། དེང་སང་གི་བར་དུ་རྒྱུན་ཅི་རིགས་པ་བཞུགས་པ་ལ། བསྟན་པ་ཕྱི་དར་གྱི་ཐོག་མ་ལོ་ཆེན་རིན་བཟང་གི་དུས་ཙམ་ནས་བཟུང་རིམ་པར། འཆི་མེད་གྲུབ་པ་ཆེན་པོ་རྒྱ་བན་རྡོ་རྗེ་འོད་འབར། ལོ་སྟོན་རྡོ་རྗེ་དབང་ཕྱུག །སྟག་སྡེའི་གུ་རུ་ཧཱུཾ་འབར། ལྷ་བཙུན་བྱང་ཆུབ་འོད། གྲྭ་པ་མངོན་ཤེས་དབང་ཕྱུག་འབར། རྡོར་འབུམ་ཆོས་གྲགས། རྒྱ་ཞང་ཁྲོམ་རྡོ་རྗེ་འོད་འབར། དགེ་བཤེས་བྲང་ང་རྡོ་རྗེ་ཀུན་གྲགས། རྒྱ་ཕུར་བུ། འབྲོག་པ་སྣ་ནམ་ཐུབ་རྒྱལ། གཉལ་པ་ཉི་མ་ཤེས་རབ། སྤྱིལ་ལྷ་དགའ་རབ། པུ་རོང་ཞང་བཙུན་དར་མ་རིན་ཆེན། རོང་གི་ལྷ་རྗེ་གནུབས་ཆུང་རྣམས་དང་། ༼༡༽ དེ་ནས་མེ་ཡོས་ལོར་དུས་འཁོར་རྒྱུད་འགྲེལ་བོད་དུ་ཕེབས་ཤིང་རབ་བྱུང་གི་ཐོག་མར་བགྲང་བ་རྔོག་ལོ་ཆེན་པོ་དང་། རྗེ་བཙུན་མི་ལ་སོགས་དང་དུས་མཚུངས་པར། དབུ་རུ་ཞྭ་ལྷ་ཁང་གི་གནས་བརྟན་ལྡང་མ་ལྷུན་རྒྱལ། ལྕེ་བཙུན་སེང་
གེ་དབང་ཕྱུག །གུ་རུ་ཡེ་ཤེས་ཁྱུང་གྲགས། འདིས་རྒྱུད་ཀྱི་རྒྱལ་པོ་གསེར་གྱི་རུ་སྦལ་བཏོན། ༸ །འདིས་མཁའ་ཀློང་ཡངས་པ་དང་། བདེ་བ་འཁོར་ལོའི་རྒྱུད་བི་མ་དང་དྲན་པ་ཡེ་ཤེས་ཀྱིས་བསྒྱུར་བ་བཏོན། ༸ འབྲོམ་རིན་ཆེན་འབར། ར་ཤག་བསོད་ནམས་རྡོ་རྗེ། སྤུ་ས་སྟོན་པ་པདྨ་སྐྱབས། སར་བན་ཕྱོགས་མེད། ༼༢༽ རབ་བྱུང་གཉིས་པ་རྗེ་ཕག་གྲུ་དང་། དུས་མཁྱེན་སོགས་དང་དུས་མཚུངས་པར། གྲུབ་ཐོབ་དངོས་གྲུབ། གཡུ་རུ་སྟོན་ཤཱཀྲ །སྤུར་བུ་བྱ་མགོན། གཡས་བན་ཡ་བོན། མདོ་ཁམས་དབུ་མ་པ་བྱང་ཆུབ་བློ་གྲོས། གཏེར་ཁ་གོང་མ་མངའ་བདག་ཉང་ཉི་མ་འོད་ཟེར། མནར་མདའི་ལྕེ་སྒོམ་ནག་པོ་འདིས་དགོངས་བ་ཚིག་གསུམ་པའི་རྒྱུད་ལྕེ་བཙུན་གྱིས་སྦས་པ་བཏོན། །ཞང་སྟོན་བཀྲ་ཤིས་རྡོ་རྗེ། མདོ་ཁམས་པ་གྲུ་གུ་ཡང་དབང་། དབུས་པ་དུ་གུ་རིན་ཆེན་སེང་གེ སྙེ་མོ་གངས་རི་བ་སངས་རྒྱས་དབང་ཆེན། །ཉི་ཟླ་འོད་འབར་རྒྱ་མཚོ་ཀློང་གསལ་གྱི་རྒྱུད་དཔལ་བརྩེགས་ཀྱི་འགྱུར་ཉང་དང་སྙེ་མོ་ཞུ་ཡས་ཀྱིས་བཏོན་པ་འདི་དང་གཅིག་མིན་བརྟག །བྲང་ཏི་རྒྱལ་ཉེ་མཁར་བུ། ༼༣༽ རབ་བྱུང་གསུམ་པ་རྗེ་བཙུན་གྲགས་པ་སོགས་དང་དུས་མཚུངས་པར། གཡུ་ཐོག་ཡོན་ཏན་མགོན་པོ། གཏེར་སྟོན་གསུམ་ཚོགས་ཞེས་རྒྱང་པོ་གྲགས་པ་དབང་ཕྱུག །སུམ་པ་བྱང་ཆུབ་ཚུལ་ཁྲིམས། འབྲོམ་ཤེས་རབ་འབར། གྲུབ་ཐོབ་འདར་འཕྱར་བ། བལ་པོ་ཨ་ཧཱུཾ།
ཨ་ཇོ་དཔལ་པོ། འབྲོམ་ཤེས་རབ་འོད། གཉལ་བ་ཉི་མ་སེང་གེ། སྐྱེས་བུ་ཟངས་གླིང་དབང་ཕྱུག །ཁམས་སྟོན་ཁ་ལ་མེ་འབར། ༼༤༽ རབ་བྱུང་བཞི་པར་ཆོས་རྒྱལ་འཕགས་པ་རིན་པོ་ཆེ་སོགས་དང་དུས་མཚུངས་པར། གྲུབ་ཆེན་པཀི། གཏེར་ཁ་འོག་མ་གུ་རུ་ཆོས་ཀྱི་དབང་ཕྱུག །དེའི་གཏེར་སློབ་སྒོམ་ཆེན་འབྲུག་པ། སྲས་མཁར་མ། གཉན་སྟོན་ཛམྦྷ་ལ། རྫོང་ཆེན་ཚེ་དབང་། དར་ནག་བེར་ཆེན་ཡར་ཀླུང་པ་བརྩོན་སེང་རྣམས་དང་། ལྷ་རྗེ་ཀུན་སྤངས་ཟླ་འོད་དབང་ལག །བཅུད་ལེན་བརྒྱ་རྩ་བཏོན། གུ་རུ་ཇོ་རྩེ། ཤ་བརྒྱ་ཟན་བརྒྱ། ཚེ་བརྟན་རྒྱལ་མཚན། རྟ་མགྲིན་བརྒྱ་རྩ། རྒྱ་སྟོན་པདྨ་དབང་ཕྱུག གུར་མགོན། སྐལ་ལྡན འབྲུ་བཅུད་སྲུང་འཁོར། བྱིས་པ་གཏེར་སྟོན། ༼༥༽ རབ་བྱུང་ལྔ་པར་ཀུན་མཁྱེན་བུ་སྟོན་སོགས་དང་དུས་མཚུངས་པར། མང་ལམ་བཟང་པོ་གྲགས་པ། འཁོར་འབར། བྱང་གཏེར་རིག་འཛིན་རྒོད་ཀྱི་ལྡེམ་འཕྲུ་ཅན་དངོས་གྲུབ་རྒྱལ་མཚན། སྤྲུལ་སྐུ་བ་མཁལ་སྨུག་པོ། བར་ཆད་ལམ་སེལ། དུང་མཚོ་རས་པ། ལས་འབྲེལ་རྩལ། རྡོ་རྗེ་གླིང་པ། ཨོ་རྒྱན་གླིང་པ། རྟེན་འབྲེལ་ཡང་སྙིང་འདུས་པ། རྒྱལ་སྲས་ལེགས་པ། རིན་ཆེན་གླིང་པ། ནཱ་ག་རཀྵ། རང་བྱུང་རྡོ་རྗེ། དྲི་མེད་འོད་ཟེར། བལ་ཡུལ་གཏེར་སྟོན་བཛྲ་མ་ཏི། ཉི་ཟླ་སངས་རྒྱས། རྗེ་དོན་ལྡན་ཞབས། འཕགས་པ་
རིན་པོ་ཆེ། ༼༦༽ རབ་བྱུང་དྲུག་པ་ཀརྨ་པ་རོལ་པའི་རྡོ་རྗེ་དང་། རྗེ་ཙོང་ཁ་པ་སོགས་དང་དུས་མཉམ་པར། དྲི་མེད་ལྷུན་པོ། སངས་རྒྱས་གླིང་པ། ཀརྨ་གླིང་པ། བྱང་ཆུབ་གླིང་པ། འཇམ་དབྱངས་བླ་མ། གྲམ་པ་ཀུན་དགའ་བཟང་པོ། བོ་དོང་པཎ་ཆེན། ཐང་སྟོང་རྒྱལ་པོ། འཕན་ཡུལ་དཔལ་ལྡན་རྡོ་རྗེ། ཡང་བོན་རི་ཁྲོད་པ་སེང་གེ། ༼༧༽ རབ་བྱུང་བདུན་པ་ཀརྨ་པ་དེ་བཞིན་གཤེགས་པ་དང་། རྒྱལ་བ་དགེ་འདུན་གྲུབ་སོགས་དང་དུས་མཚུངས་པར། རཏྣ་གླིང་པ། དྲུང་དོན་ལྡན་ཞབས་ནས་བརྒྱུད་པའི་རྟ་ནག །ལྷོ་གཏེར་པདྨ་གླིང་པ། ཀུན་སྐྱོང་གླིང་པ། འབྲུག་པ་རྒྱལ་དབང་རྗེ། །རས་ཆེན་དཔལ་འབྱོར་བཟང་པོ། རྟོགས་ལྡན་ནམ་མཁའ་སངས་རྒྱས་མགོན་པོ། བསྟན་གཉིས་གླིང་པ། ཁམས་བརྒྱད་ཤོད་པ་མཆོག་ལྡན་རྡོ་རྗེ། ཆུ་ཕོ་རྟོགས་ལྡན་དགེ་འདུན་རྒྱལ་མཚན། འདི་སྔ་ཕྱི་སླར་དཔྱད། ལྕང་སྨན་དོན་གྲུབ་དར། ཁམ་པ་མེ་ཟོར། ༼༢༽ རབ་བྱུང་བརྒྱད་པ་རྒྱལ་བ་དགེ་འདུན་རྒྱ་མཚོ་སོགས་དང་དུས་མཚུངས་པར། མངའ་རིས་པཎ་ཆེན། ལེགས་ལྡན་རྗེ། ཞིག་པོ་གླིང་པ། རིན་ཆེན་ཕུན་ཚོགས། ཤེས་རབ་འོད་ཟེར། སྤ་གྲོ་པ་ཚེ་རིང་རྡོ་རྗེ། ཚར་ཆེན་མཁྱེན་བརྩེ། མི་བསྐྱོད་ཞབས། པདྨ་དཀར་པོ། ༼༩༽ རབ་བྱུང་དགུ་པ་རྒྱལ་བ་བསོད་ནམས་རྒྱ་མཚོ་སོགས་
དང་དུས་མཚུངས་པར། བྱང་བདག་བཀྲ་ཤིས་སྟོབས་རྒྱལ། འཇའ་ཚོན་ལས་འཕྲོ་གླིང་པ། འབྲི་གུང་ཆོས་གྲགས། ལྷ་བཙུན་ནམ་མཁའ་འཇིགས་མེད། ༡༠༽ རབ་བྱུང་བཅུ་པ་ཀརྨ་པ་ཆོས་དབྱིངས་རྡོ་རྗེ་སོགས་དང་དུས་མཚུངས་པར་རྒྱལ་བ་ལྔ་པ། གཏེར་བདག་གླིང་པ། བདུད་འདུལ་རྡོ་རྗེ། མི་འགྱུར་རྡོ་རྗེ། ཀརྨ་ཆགས་མེད། ཀློང་གསལ་སྙིང་པོ། མ་ཏི་རཏྣ། སྟག་ཤམ་རྡོ་རྗེ། རོལ་པའི་རྡོ་རྗེ། ཡོང་དགེ། གར་དབང་རྡོ་རྗེ། ཉི་ཟླ་ཀློང་གསལ། ༼༡༡༽ རབ་བྱུང་བཅུ་གཅིག་པ་རྒྱལ་བ་སྐལ་བཟང་རྒྱ་མཚོ་སོགས་དང་དུས་མཚུངས་པར། ཆོས་རྗེ་གླིང་པ། རྭ་སྟོན་སྟོབས་ལྡན་རྡོ་རྗེ། བསམ་གཏན་བསྟན་འཛིན། ངག་གི་བཛྲ། སྟག་ལུང་པ་བསྟན་འཛིན་སྲིད་ཞི་རྣམ་རྒྱལ། ཁྱུང་དྲག་རྡོ་རྗེ། བདེ་ཆེན་གླིང་པ། རིག་འཛིན་ཚེ་དབང་ནོར་བུ་རྣམས་བྱོན་ནོ། ༡༢༽ །། ༈ །།གྲུབ་མཐའ་ཐམས་ཅད་ཀྱི་ཁུངས་དང་འདོད་ཚུལ་སྟོན་པ་ལེགས་བཤད་ཤེལ་དཀར་མེ་ལོང་ལས། ས་བཅད་ལྔ་ཡི། དང་པོ་རྒྱ་གར་འཕགས་པའི་ཡུལ་དུ་བྱུང་ཚུལ། བོད་གངས་ཅན་དུ། མ་ཧཱ་ཙཱ་ནར། ཡུལ་གྲུ་འགའ་ཞིག །གྲུབ་དོན་བཤད་པས་མཇུག་བསྡུ་བ་ལྔ། དང་པོ་ལ། ཕྱི་པའི། ནང་པའི། དང་པོ་ལ། མུ་སྟེགས་པ་ཇི་ལྟར་བྱུང་བའི་ལོ་རྒྱུས། དེ་དག་གི་འདོད་
ཚུལ། དེ་བཤད་པའི་དགོས་པའོ། །གཉིས་པ་ལ། གྲུབ་མཐའ་སྨྲ་བ་བཞིའི་བྱུང་ཚུལ་དང་། དེ་རྣམས་ཀྱི་ལྟ་བའི་བཞེད་ཚུལ་ལོ། །གཉིས་པ་ལ། སྤྱིར་སངས་རྒྱས་བསྟན་པ་བྱུང་ཚུལ། བྱེ་བྲག་ཏུ་གྲུབ་མཐའ་མི་འདྲ་བ་བྱུང་ཚུལ། འཕྲོས་དོན་དུ་མདོ་སྔགས་རིག་གནས་བྱུང་ཚུལ། ཞར་བྱུང་བོན་ལུགས་བྱུང་ཚུལ་ལོ། །དང་པོ་ལ། སྔ་དར་དང་། ཕྱི་དར་གཉིས། གཉིས་པ་ལ་སློབ་དཔོན་དང་། ཡུལ་ལ་སོགས་པའི་སྒོ་ནས་གཙོ་བོར་བཞག་པ་གཉིས་ཏེ། གྲུབ་མཐའ་གཞན་གྱི་བྱུང་ཚུལ་དང་། དགེ་ལུགས་པའི་བྱུང་ཚུལ་ལོ། །དང་པོ་ལ། རྙིང་མ། བཀའ་གདམས། བཀའ་བརྒྱུད། ཞི་བྱེད། ས་སྐྱ། ཇོ་ནང་། ཉི་ཚེ་བ་འགའ་ཞིག་བྱུང་ཚུལ་ལོ། །དང་པོ་ལ་སྤྱིར་གསང་སྔགས་གསར་རྙིང་གི་དབྱེ་བ་ངོས་བཟུང་ཚུལ་དང་། བྱེ་བྲག་ཏུ་རྙིང་མའི་ལུགས་སྲོལ་བཤད་པའོ། །དང་པོ་མདོ་ཕྱོགས་ལ་མ་བྱུང་སྟེ། སྔགས་ཕྱོགས་ལས་སོ། །གཉིས་པ་ལ། བྱུང་ཚུལ། གྲུབ་མཐའ། དེ་ལ་དཔྱད་པ། ཕྱིས་བྱུང་འགའ་ཞིག་བརྗོད་པའོ། །དང་པོ་ལ། བཀའ་གཏེར་དག་སྣང་གསུམ། ཕྱི་མའི་སྐབས་མདོ་སྒྱུ་སེམས་གསུམ་སོགས་ཀ་དག་གདོད་མའི་ཀློང་དུ་ཐིམ་ནས་རིང་ཞིག་ལོན། ད་ལྟ་ལས་བྱང་གྱེར་བ། ཚོགས་འཁོར་མནན་སྲེག་འཕང་གསུམ་སོགས་གཟུགས་བརྙན་གཙོ་བོར་བྱེད་
ཅེས་བབ་ཅོལ་གྱི་གཏམ་དུ་བྲིས་སོ།། གཉིས་པ་ལ། ཇོ་བོའི་དྲིན་ལས་བཀའ་གདམས་ལུགས་སྲོལ་བྱུང་ཚུལ། དེར་བརྟེན་བསྟན་འཛིན་གཞན་བྱུང་ཚུལ། བབས་སོ་སྤྱིར་བཤད་པའོ། །དང་པོ་ལ། སྒྲ་བཤད་ནི། སྤྱན་སྔ་རིན་ཆེན་འཕེལ་གྱིས། རྒྱལ་བའི་བཀའ་ལ་ཡི་གེ་ན་གཅིག་ཀྱང་བཞག་ཏུ་མེད་པར་གདམས་ངག་ཏུ་གོ་བ་ལ་ཟེར་བ་ཡིན། ཅེས་པ་ལྟར། འབྲོམ་སྟོན་གྱིས། ངོ་མཚར་བཀའ་ནི་སྡེ་སྣོད་གསུམ་ཡིན་ཏེ། །གདམས་པ་སྐྱེས་བུ་གསུམ་གྱིས་མཛེས་པ་ཡི། །བཀའ་གདམས་རིན་ཆེན་གསེར་གྱི་ཕྲེང་བ་ལ། །འགྲོ་བ་གང་གིས་བགྲངས་ཀྱང་དོན་ཡོད་འགྱུར། །ཞེས་བཤད་པ་ལྟར། རྒྱལ་བའི་བཀའ་སྡེ་སྣོད་གསུམ་གྱི་དོན་མ་ལུས་པ། ཨ་ཏི་ཤའི་གདམས་པ་སྐྱེས་བུ་གསུམ་གྱི་ལམ་རིམ་དུ་བསྡུས་ནས་ཉམས་སུ་ལེན་པས་སོ། །དེ་ཡང་དཔལ་ལྡན་ཨ་ཏི་ཤས་བསྟན་པའི་དབུ་བརྙེས། སྟོན་པ་རིན་པོ་ཆེས་སྲོལ་ཕྱེ། སྐུ་མཆེད་གསུམ་གྱི་རིང་ལ་དར་ཞིང་རྒྱས། གླང་ཤར་བྱ་ཡུལ་བ་སོགས་ཀྱི་དུས་ཤིན་ཏུ་དར་ཞིང་རྒྱས་སོ། །གསུམ་པ་ལ། ཆོས་ཀྱི་རྣམ་གྲངས་དང་། གང་ཟག་གི་མཛད་སྤྱོད་གཉིས། དང་པོ་ལ་གཞུང་དང་། གདམས་ངག་གཉིས། དང་པོ་ལ། ལྟ་བ་དང་། སྤྱོད་པ་གཙོར་སྟོན། གཉིས་ཀ་ཟུང་འབྲེལ་དུ་སྟོན་པའོ། །དང་པོ་ནི། བདེན་
གཉིས་འཇུག་པ་དང་། དབུ་མའི་མན་ངག་སོགས་སོ། །གཉིས་པ་ནི། སྤྱོད་བསྡུས་སྒྲོན་མེ་དང་། སེམས་བསྐྱེད་ཀྱི་ཆོ་ག་སོགས་སོ། །གསུམ་པ་ནི། སྡེ་སྣོད་རྒྱུད་སྡེ་ཀུན་གྱི་ལུས་ཡོངས་སུ་རྫོགས་པ་ལམ་གྱི་སྒྲོན་མེའོ། །གཞན་ཡང་གཞུང་དྲུག་ཏུ་གྲགས་པ་རྣམས་ཀྱང་ངོ་། །ཆོས་ཆུང་བརྒྱ་རྩར་གྲགས་པ་ཡང་ངོ་། །གདམས་ངག་ལའང་གསུམ་ལས། ལྟ་བ་གཙོ་བོར་སྟོན་པ། ཇོ་བོ་ནས་སྤྱན་སྔ་བ་ལ་བརྒྱུད་པ་བདེན་བཞི། ཕུ་ཆུང་བ་ལས་བརྒྱུད་པ་རྟེན་འབྲེལ། རྣལ་འབྱོར་པ་ནས་བརྒྱུད་པ་བདེན་གཉིས་ཀྱི་ཁྲིད་རྣམས་ལས། དང་པོ་གཉིས་ནི་ཐུན་མོང་བའི་གང་ཟག་བདག་མེད་དང་། ཕྱི་མ་ཤིན་ཏུ་ཕྲ་བ་ཆོས་བདག་མེད་ལ་འཁྲིད་པའོ། །སྤྱོད་པ་གཙོར་གྱུར་བློ་སྦྱོང་གི་གདམས་པ་ནི། བདག་བས་གཞན་གཅེས་ཀྱི་བྱང་ཆུབ་སེམས་བསྐྱེད་པ་དང་འཕེལ་བའི་སྒོ་ནས་ས་ལམ་བགྲོད་པའི་ཚུལ་ཡིན་ལ། ཁུངས་ནི་ཐེག་ཆེན་གྱི་མདོ་སྡེ་སྤྱི་དང་། ཀླུ་སྒྲུབ་ཀྱི་རིན་ཕྲེང་། རྨི་ལམ་ཡིད་བཞིན་ནོར་བུའི་གཏམ། སེམས་ཅན་མགུ་བའི་ཚིགས་བཅད། ཞི་བ་ལྷའི་བསླབ་སྤྱོད་གཉིས་ལ་སོགས་པའི་མན་ངག་སྙིང་པོར་དྲིལ་བ་སྟེ། དེ་ཡང་དྷརྨ་རཀྵི་ཏའི་མཚོན་འཁོར། རྨ་བྱ་དུག་འཇོམས། བྱམས་པའི་སྨོན་ལམ་གྱི་རྡོ་རྗེའི་གླུ། གསེར་གླིང་པའི་བྱང་ཆུབ་སེམས་པའི་རིམ་པ་ལ་སོགས་ཏེ། དེ་ལས་
དོན་བདུན་མ་ཉེ་བར་བཀོད་པའི། གསེར་གླིང་པས་ཇོ་བོར་གསུངས། དེས་འབྲོམ་སྟོན་ལ་ལྐོག་ཆོས་སུ་མཛད། དེས་སྐུ་མཆེད་གསུམ་ལ་ལྐོག་ཆོས་སུ་མཛད། དེ་ནས་པོ་ཏོ་བས་གླང་ཤར་གཉིས་ལ་ལྐོག་ཆོས་སུ་གནང་། ཞང་ཤ་ར་་བས་བྱ་འཆད་ཀ་བ་ལ་ལྐོག་ཆོས་སུ་མཛད། དེས་གཙོ་བོར་རང་ཉམས་སུ་བླངས། རེ་རེ་གཉིས་གཉིས་ལ་འཆད། ཕན་ཆེ་བ་ཐོགས་པ་གཟིགས་ནས་འབྲི་ཕུར་འཚོགས་ཆོས་སུ་མཛད། སྔོན་འགྲོ་རྟེན་གྱི་ཆོས་སེམས་པ། དངོས་གཞི་བྱང་ཆུབ་ཀྱི་སེམས་སྦྱོང་བ། རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བ། ཚེ་གཅིག་གིས་ཉམས་ལེན་དྲིལ་ནས་བསྟན་པ། བློ་འབྱོངས་པའི་ཚད། བློ་སྦྱོང་གི་དམ་ཚིག །བློ་སྦྱོང་གི་བསླབ་བྱ་སྟེ་དོན་བདུན་དུ་མཛད་པ་དེ་ལྟར་གྲགས་ཤིང་ཤིན་ཏུ་ཁྱད་པར་འཕགས། སོ་སོ་བ་དེ་དག་ཀྱང་དོན་དུ་ལམ་རིམ་འདིར་འདུས། འདི་གཙོ་བོར་འབྲོམ་ལ་ལྐོག་ཁྲིད་དུ་མཛད། གཞན་ཡང་ནག་ཚོ་ལ་གནང་བ་ལག་སོར་བ་ལ་བརྒྱུད་པ་དང་། གསང་ཕུ་པར་གནང་བ་གྲོ་ལུང་པའི་བསྟན་རིམ་སོགས་མཛད། ཇོ་བོ་ཡབ་སྲས་ནས་དགེ་བཤེས་དགོན་པ་བ་དང་། སྣེའུ་ཟུར་པ་སོགས་ལ་བརྒྱུད་པ་དང་། འབྲོམ་ནས་སྤྱན་སྔ་བ་བྱ་ཡུལ་བ་སོགས་གདམས་ངག་པ་དང་། འབྲོམ་ནས། པོ་ཏོ་བ། དེ་ནས་ཤ་ར་བ་སོགས་ལ་བརྒྱུད་
པར་གཞུང་པ་ཞེས་པའི་ཐ་སྙད་མཛད། དོན་དུ་འདྲ་ཡང་གཞུང་བཤད་ཀྱི་སྤྲོས་པ་རྒྱ་ཆེར་བྱེད་མི་བྱེད་ཀྱི་ཁྱད་ཙམ་མོ། །བཀའ་གདམས་པ་རྣམས་ཀྱིས་མཛད་པའི་ལམ་རིམ་ལ་གྲགས་ཆེ་བ། དཔེ་བུམ་སྔོན་པོ་དང་། དཔེ་ཆོས་གཉིས། སྔ་མ་པོ་ཏོ་བའི་གསུང་སྒྲོས་དོལ་པོ་ཤེས་རབ་རྒྱ་མཚོས་བསྒྲིགས་ནས། ལྷ་འབྲི་སྒང་པས་འགྲེལ་པ་མཛད། ཕྱི་མ་ལ། གྲན་པས་བསྒྲིགས་པའི་བསྡུས་པ། བྲག་དཀར་བས་བསྒྲིགས་པ་རྒྱས་པ། ལྕེ་སྒོམ་པས་བསྒྲིགས་པ་གོ་བདེ་ཞིང་རྒྱས་བསྡུས་འབྲིང་ཙམ་མོ། །ཡང་གཞུང་གདམས་མན་ངག་གསུམ་དུ་དབྱེ་བའི་ཕྱི་མ་ནི། ཡེར་པ་ལྷ་རི་སྙིང་པོའི་མགུལ་དུ་ཕ་འབྲོམ་དང་། བུ་ཁུ་རྔོག་གཉིས་ལ་གནང་བའི་གསང་ཆོས་བཀའ་གདམས་གླེགས་བམ་སྟེ། རྔོག་ལེགས་ཤེས་མངའ་རིས་པ་ཤེས་རབ་རྒྱལ་མཚན་དང་། དེས་ཕུ་ཆུང་བ་ལ། དེ་ནས་འབྲོམ་ཀུ་མཱ་ར་མ་ཏིའི་བར་ཆིག་བརྒྱུད་དུ་བྱོན། དེ་ནས་བཀའ་བཀྲོལ་ནས། ལོ་ཆེན་ཐུགས་རྗེ་དཔལ་གྱིས་དགེ་འདུན་གྲུབ་ལ་བཤད་པ་ནས་རྒྱ་ཆེར་དར། ཉམས་ལེན་ནི་རྗེས་དྲན་ལྔ་སྟེ། སྐྱབས་གནས་བླ་མ་དྲན་པར་མཛོད། །ལུས་ནི་ལྷ་ཡི་རང་བཞིན་ཏེ། །ངག་ནི་བཟླས་བརྗོད་རྒྱུན་པར་མཛོད། །འགྲོ་བ་མ་ལུས་ཕ་མར་བསམ། །སེམས་ཀྱི་གནས་ལུགས་སྟོང་པར་དཔྱོད། །ལྔ་པོ་དེ་ཡི་སྐྱེ་བར་ནས། །
དགེ་རྩ་ཐམས་ཅད་དག་པར་མཛོད། །ཅེས་པའོ། །སྙིང་པོར་གྱུར་པ་ཐིག་ལེ་བཅུ་དྲུག་སྟེ། ཉམས་སུ་བླངས་པས་འདུལ་བ་ནས་རྡོ་རྗེ་ཐེག་པའི་བར་སྟན་ཐོག་གཅིག་ཏུ་ཉམས་སུ་ལེན་པར་མཁས་ཤིང་། ལྟ་བ་མཐོ་ལ་དཔྱོད་པ་ཞིབ་པ་ཞིག་འབྱུང་གསུངས། ལྷ་ནི་ཐུབ་པ། སྤྱན་གཟིགས། སྒྲོལ་མ། མི་གཡོ་བ་བཞི། ཆོས་སྡེ་སྣོད་གསུམ་སྟེ། དེ་ལ་བདུན་ལྡན་ནོ། །བཀའ་བརྒྱུད་པའི་གྲུབ་མཐའ་བྱུང་ཚུལ་ལ། སོ་སོའི་བྱུང་ཚུལ། ལྟ་སྒོམ་གྱི་རྣམ་གཞག །ཅུང་ཟད་དཔྱད་པའོ། །དང་པོ་ལ། བཀའ་བབས་ཀྱི་གདམས་པའི་བརྒྱུད་འཛིན་པས་ན་དེ་སྐད་བྱ། དབྱེ་ན་མར་པའི་བརྒྱུད་འཛིན་དང་། ཁྱུང་པོའི་བརྒྱུད་འཛིན་གཉིས། །ཏེ་ལོ་པ་ལ་བཀའ་བབས་བཞིའི་གདམས་པ་མངའ་བ་དང་། ཁྱུང་པོ་ལ་ཡེ་ཤེས་ཀྱི་མཁའ་འགྲོ་མ་གཉིས་ཀྱི་བཀའ་བབས་མངའ་བས་ན་དེ་སྐད་ལོ། ཕྱག་ཆེན་ལ་མདོ་སྔགས་གཉིས། དང་པོ་ནི། །ལྷན་ཅིག་སྐྱེས་སྦྱོར་ཏེ། ཞེན་ལོག་མོས་གུས་གཙོ་བོར་སྟོན་ཅིང་། དངོས་གཞི་ཞི་ལྷག་ངོ་སྤྲོད་དེ། རྗེས་སྣང་ཐོག་ཏུ་རྩལ་སྦྱོང་བ་དང་། སྔགས་སུ་གཉུག་སེམས་ཀྱི་ངོ་བོ་གཏན་ལ་ཕབ་ནས་མཉམ་པར་བཞག་པས་རླུང་དབུ་མར་ཞུགས་གནས་ཐིམ་གསུམ་དང་། དེས་གཏུམ་མོ་འབར་བ་དང་འཛག་པ་གཉུག་སེམས་བདེ་བའི་ངོ་བོར་སྐྱེ།
དེ་ཡུལ་སྟོང་ཉིད་དང་དབྱེར་མེད་དུ་གྱུར་པའི་བདེ་སྟོང་ཕྱག་རྒྱ་ཆེན་པོ་སྟེ། གྲུབ་པ་སྡེ་བདུན་སོགས་ཀྱི་བརྗོད་བྱའི་གཙོ་བོ་དང་། དེ་ཡང་ཚེ་སྔ་མའི་སྦྱངས་འཕྲོ་ཅན་ལ། དང་པོ་ཉིད་ནས་སེམས་ཀྱི་ངོ་བོར་མཉམ་པར་བཞག་པས་རླུང་དབུ་མར་ཞུགས་གནས་ཐིམ་གསུམ་སོགས་བྱུང་བ་ལ་གཅིག་ཅར་བ་དང་། སྔར་མ་སྦྱངས་པ་ལ་ལམ་ཐུན་མོང་བ་དང་། དབང་དང་། བསྐྱེད་རྫོགས་སོགས་སྔོན་དུ་འགྲོ་དགོས་པས། རིམ་གྱིས་པ་སྟེ་དབང་རྣོན་དང་། དེ་ལྟར་མི་ནུས་པར་ཕར་ཕྱིན་གྱི་ཕྱག་ཆེན་གྱིས་འཁྲིད་པར་དབང་རྟུལ་ལོ། །སྟག་ལུང་ངག་དབང་རྣམ་རྒྱལ་གྱི་ཆོས་འབྱུང་ངོ་མཚར་རྒྱ་མཚོ་ལས། །མདོར་ན་ཉན་ཐོས་ཀྱི་ངེས་འབྱུང་། ཐེག་ཆེན་གྱི་སེམས་བསྐྱེད། གསང་སྔགས་ཀྱི་དམ་ཚིག་རྣམས་གཞིར་བཞག་པའི་སྟེང་དུ། བཀའ་བརྒྱུད་ཀྱི་ཁྱད་ཆོས། མར་རྫོག་གི་རྒྱུད་བཤད། མི་ལའི་སྙིང་རུས་དང་གདམས་ངག །སྒམ་པོ་བའི་ངོ་བོའི་ག་དར། ཀརྨ་པའི་རླུང་སེམས་དབྱེར་མེད། ཞང་གི་ལམ་མཆོག་མཐར་ཐུག །འབར་རམ་པའི་བསྲེ་འཕོ་གསེང་ལམ། ཕག་གྲུའི་གསང་སྔགས། སྟག་ལུང་པའི་རྣམ་ཐར་སོ་དགུ། འབྲི་གུང་པའི་སྡོམ་གསུམ་གནད་གཅིག །གཙང་པ་རྒྱ་རས་པའི་རྟེན་འབྲེལ་དང་རོ་སྙོམས། ལོ་རྒོད་པའི་མོས་གུས་དང་ཞེན་ལོག་རྣམས་ནི་ཆ་མཐུན་ཁྱད་འཕགས་ཞེས་
རེ་རེ་ལའང་ཐམས་ཅད་ཚང་བ་ཡོད་མོད་དེ། གང་ལ་རྩལ་དུ་བཏོན་ནས་སློབ་མ་འཁྲིད་ཅིང་སྐྱོང་བར་མཛད་པའི་ཕྱིར་ཁྱད་པར་གྱི་འབྱེད་ཆོས་སུ་བཞག་ཏུ་རུང་ཞིང་། ཡོངས་སུ་རྫོགས་པ་ལའང་བཀའ་བརྒྱུད་རིན་པོ་ཆེའི་བསྟན་པ་ཞེས་འཇིག་རྟེན་རྣམས་སུ་སྙན་པར་གྲགས་སོ། །ཞེས་གསུངས་སོ། །བཞི་པ་ཞི་བྱེད་པ་ལ། དངོས་དང་། དེའི་ཡ་གྱལ་གཅོད་ལུགས་སོ། །སྒྲ་དོན། ཐུན་མོང་དུ་སྔ་མའི་ལས་དབང་གིས་ཚེ་འདིར་ལུས་དམན་པ། ནད། དབུལ་ཕོངས། མི་མིན་གྱིས་གཙེས་པ་སོགས་སྡུག་བསྔལ་ཐམས་ཅད་འཕྲལ་དུ་ཞི་བར་བྱས་ནས་རྣལ་འབྱོར་ལ་སྦྱོར་བཟོད་པར་བྱེད་པས་ན་དེ་སྐད་དུ་བྱ། །ཁྱད་པར་དུ། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས། ཞེས་པས་སྲིད་ཞིའི་སྡུག་བསྔལ་ཞི་བར་བྱེད་པའོ། །དབྱེ་ན། བརྒྱུད་པ་སྔ་ཕྱི་བར་གསུམ། དང་པོ་ནི་ཁ་ཆེ་ཛྙ་ན་གུ་ཧྱ་ནས། དཔང་ལོ་ཙཱ་བ་ལ་བརྒྱུད་པ་སྟེ། ཞི་བྱེད་སྒྲོན་མེའི་སྐོར་གསུམ་དང་། གཤིན་རྗེ་གཤེད་ལ་སོགས་པའི་སྒྲུབ་ཐབས་སོ། །བར་པ་རྨ་སོ་ཀཾ་གསུམ་ཕྲན་དང་བཅས་པ་སྟེ། སྔ་མ་ལ། ཚིག་བརྒྱུད་སེམས་བསྐྱེད་སྟོང་ཐུན་དང་ཁ་འཐོར་ཁར་ཕོག་སྣར་ཕོག་དང་མཐར་རྒྱས་རྣམས་སོ། །དོན་བརྒྱུད་ལག་ཁྲིད་བཅུ་དྲུག་གོ། །གཉིས་པ་ལ་ཚིག་བརྒྱུད་དང་། དོན་བརྒྱུད་
གཉིས། དང་པོ་ལ་ཡང་། དམ་པ་སྐྱེས་མཆོག་ཆེ་བ་ང་བཞི། འབྲིང་སོ་གཉིས། ཆུང་བ་བཅུ་བདུན་ཏེ། དེ་རེ་རེ་ལའང་ལོ་རྒྱུས་དང་། སློབ་མ་འཁྲིད་ལུགས་ཆ་ཚང་བ་རེ་ཡོད། བརྒྱུད་ཕྲན་ནི་དོན་སྐོར་ལྔ་པོ་སོགས་ཆོས་སྡེ་སོ་གཉིས་བཞུགས། དོན་བརྒྱུད་ལ། ཕྱོགས་སུ་ལྷུང་བ་རྣལ་འབྱོར་ཕོ་མོ་ང་བཞི། བླ་མ་སོ་གཉིས། དམ་པ་སོ་བདུན་རྣམས་ལ་དོན་བརྒྱུད་དེ་སྙེད་ཅིག་བཞུགས་པ་དང་། མ་ལྷུང་བ་ལ་གཞུང་སྦས་པ་མིག་འབྱེད་ཀྱི་སྐོར་ལ་གཅིག །དེའི་ཡན་ལག་དུས་དང་དུས་ཕྲན་ལ་གདམས་པ། ངོ་སྤྲོད་བརྒྱ་རྩ་དྲུག་པ། མ་འགག་རྣམ་དག །རྡོ་རྗེ་སེམས་དཔའི་གསེང་ལམ་སྟེ་ལྔ། མཁའ་འགྲོ་མའི་བརྡ་སྐོར་ལ། མཆོག་སྒྲུབ་པ་ལ་བརྡ་སྐོར། །ཐུན་མོང་སྒྲུབ་པ་ལ་ཡི་གེ་བཞི་པའི་སྐོར། གཉིས་ཀ་སྒྲུབ་པ་ལ་ཛག་ཏིའི་བརྡ་སྐོར། ཐུན་སྐོར་ཏེ་བཞིའོ། །དེ་རྣམས་ཀྱི་རྩ་བའི་སྙིང་པོ་ལྟ་བུར་གྱུར་པ་ནི་རྒྱུད་སྡེ་དང་ཆོས་སྐད་བསྟུན་པ་སྨྲ་བའི་སེང་གེའི་དོན་བརྒྱུད། མ་བསྟུན་པ་བརྒྱུད་པ་བཞི་པ་ཡོངས་སུ་མ་གྲགས་པའི་དོན་བརྒྱུད། མ་ཚང་མདོར་བསྡུས། རིག་པ་སྲང་འཇུག །སྙན་བརྒྱུད་བཞི་རྣམས་བཞུགས། །གསུམ་པ་ནི། དམ་པའི་གདམས་ངག་བཞིན་དུ་མངོན་རྟོགས་བརྒྱད་ཀ་བཤད། སྡུད་པའི་སྟེང་དུ་རྒྱས་འབྲིང་བསྡུས་གསུམ་སྦྱར་ནས་བཤད། སློབ་
མའང་ཡས་བརྒྱུད་དང་མས་བརྒྱུད་གཉིས་ལས། སྔ་མ་ཤེར་ཕྱིན་ཐུགས་བརྒྱུད་ལག་ལེན་སྙན་བརྒྱུད་ཅེས་པ་དང་། ཕྱི་མ་སྒོམ་ཐོག་ཏུ་སྐོར་བའི་གདམས་པའོ། །གྲྭ་པ་མངོན་ཤེས་ལ་མན་ངག་སྐུའི་སྒྲོན་མ་སོགས་སྒྲོན་མ་དགུ་སྐོར། ལྕེ་ཙནྡྲ་ཀཱིརྟི་ལས་མདོ་སྡུད་པ་དང་མཚན་བརྗོད་ཀྱི་གདམས་པ་སྦྱར་བ་མདོ་རྒྱུད་ཞལ་སྐོར་གྱི་གདམས་པ། ལྗང་བཀའ་གདམས་པ་ལ་ཤེར་ཕྱིན་ཡི་གེ་མེད་པའི་གདམས་ངག་གནང་། ཐོར་བུ་ལ། འབྲོ་སྒོམ་ལ་མཚན་བརྗོད་གསེར་ཐུར། གུ་སྒོམ་ལ་ལས་རྒྱའི་གདམས་པ། ཆུ་སྒོམ་པ་སྙིང་གཏམ་ལྷུག་པ། དམར་སྒོམ་ལ་ཆིག་ཆོད་གསུམ། གཉགས་ལོ་ལ་བདེ་མཆོག་དཔའ་བོ་གཅིག་པའི་གདམས་པ་རྣམས་དང་། ལྕེ་དཔལ་སྒྲོན་ལ་གྲུབ་ཐོབ་ཉམས་ཀྱི་ཆོས་སྡེ་བཅུ་དྲུག །ངོར་རྗེ་ལ་ལྷན་ཅིག་སྐྱེས་སྦྱོར། གནས་བརྟན་གྲགས་འབྱུང་ལ་ཤེར་སྙིང་གདམས་པ། ཤེས་རབ་རྒྱལ་མཚན་ལ་དུས་འཁོར་གདམས་པ། ཤངས་པ་དབུ་ལྡེབ་ལ་ཡི་གེ་བཞི་པ། རྒྱ་སྟོན་སྐྱི་བརྩེགས་ལ་དགྱེས་རྡོར། ཞང་སག་ཆུང་བ་ལ་ཕག་མོ་གསང་སྒྲུབ། བླ་མ་དགོན་དཀར་བ་ལ་ཕྱག་ན་རྡོ་རྗེ། སྐྱིད་ཤོད་འབན་གུང་རྒྱལ་ལ་བདེ་མཆོག་སྙན་བརྒྱུད། ལབ་སྒྲོན་ལ་གཅོད་ཀྱི་གདམས་པ་གནང་། བརྒྱུད་པ་ཕྱི་མ་རྣམས་ལ་ཕྱག་རྒྱ་ཆེན་པོ་དྲི་མེད་ཐིག་པ་ཕྱག་བཞེས་ཀྱི་
སྐོར་ཞེས་མཚན་གསོལ། དེ་ཡང་ཕྱག་རྒྱ་ཆེན་པོ་ནི་དམ་པ་མེ་ཏྲི་པའི་དངོས་སློབ་ཡིན་པས། དེ་ཉིད་བཅུ་པ་སོགས་དང་མཐུན། དྲི་མེད་ནི་དམ་པའི་གསུང་རབ་རྣམས་སོ། །ཕྱག་བཞེས་ནི་བསྟན་པ་གཞན་དང་ཅུང་མི་འདྲ་བའི་ཉམས་ལེན་གྱི་གནད་ཡོད་པས་སོ། །དེ་ཡང་སྤྱིར་ངོ་བོ་ཕ་རོལ་ཕྱིན་པ་གསང་སྔགས་དང་རྗེས་མཐུན་ཞེས་བྱ། དེ་ཕྱིར་ཨཱ་ལི་ཀཱ་ལིའི་བྱིན་རླབས་ཡོད་པ་སོགས་མི་འགལ་ཏེ་། ཤེར་མདོ་ནས་ཡི་གེ་བཞི་བཅུ་རྩ་གཉིས་ཀྱི་གཟུངས་ཀྱི་སྒོ་བཤད་པ་དང་འདྲ་བའི་ཕྱིར། ཆོས་སྐོར་ལ་ཐུན་མོང་དང་། ཐུན་མོང་མ་ཡིན་པ་གཉིས། དང་པོ་ནི། མདོ་རྒྱུད་ཕྱག་ལེན་དང་བཅས་པ། བཀའ་བབས་སྙན་བརྒྱུད་དང་བཅས་པ། དྲི་མེད་ཕྲ་ཏིག་དང་བཅས་པ། དར་ཚགས་བཤད་འབུམ་དང་བཅས་པའོ། །དང་པོ་ནི། སྤྱི་མདོ་ཆུ་ཀླུང་མངོན་པར་རོལ་པ། སྒོས་མདོ་ཤེར་སྙིང་། སྤྱི་རྒྱུད་སྡེ་སྣོད་གསལ་བྱེད། སྒོས་རྒྱུད་ཆུ་ཀླུང་ཆེན་པོའོ། །ཕྱག་ལེན་ནི་དབང་འཁོར་ཆེ་ཆུང་དང་། ལམ་རིམ་ཆེ་ཆུང་གསུམ། གཉིས་པ་ནི། བཀའ་བབས་བཞི། དེའི་ལམ་སློང་སྙན་བརྒྱུད་བཞི། གསུམ་པ་ནི། དྲི་མེད་ཕྲ་ཏིག་ནི་ཟུག་པ་རྩ་བའི་སྐོར་སོགས་དྲུག །ཕྲ་ཏིག་ནི་པ་ཚབ་ཀྱིས་ཀུན་དགའ་མ་བདེ་བའི་སྐོར་རྣམས་བྲིས་པའོ། །བཞི་པ་ནི། དར་ཚགས་ནི། ཞལ་གདམས་བདུད་རྩིའི་སྐོར་
སོགས་བརྒྱད་དེ། །པ་ཚབ་ཀྱིས་འཕྲལ་གཏམ་སྟེ་ནས་ཡི་གེར་བཏབ་པ། བཤད་འབུམ་ནི། ཏེ་ནེ། ཞིག་པོ། སྙེ་མདོ་བ་སོགས་ཀྱིས་མཛད་པ། ཐུན་མིན་ལ་རྒྱུད་སྟོང་ཐུན་དང་བཅས་པ། དབང་ལམ་ཁྲིད་དང་བཅས་པ། གསང་མཛོད་གསུམ། དཔེ་བུམ་བརྒྱད་དོ། །ཞི་བྱེད་པའི་སྙིང་པོར་གྱུར་པ་རྒྱས་འབྲིང་བསྡུས་གསུམ་གྱི་དོན་ཉམས་སུ་ལེན་པའི་མན་ངག་ཤེར་ཕྱིན་ལམ་རིམ་ཞེས་བཀའ་བབས་དྲུག་གི་གདམས་པའོ། །འདི་ལ་སྔོན་གྲུབ་ཐོབ་བསམ་གྱིས་མི་ཁྱབ། ཕྱིས་སྐྱེས་མཆོག་བསམ་གཏན་དཔལ་བས་བཏབ་པའི་ཡབ་ཆོས་སྡིངས་དང་། སྒོ་མོ་ཆོས་སྡིངས་གཉིས་གྲགས་ཆེའོ། །གཅོད་ཅེས་བྱ་བ་ནི། ཀུན་རྫོབ་བྱང་སེམས་ཀྱིས་ལས་དང་། དོན་དམ་བྱང་སེམས་ཀྱིས་ཉོན་མོངས་པ་གཅོད་ཅིང་། དེའི་ཞར་ལ་བདུད་བཞིའང་གཅོད་པའམ། རྒྱལ་སྲས་ཀྱི་ཉམས་ལེན་ཐབས་ཤེས་ཀྱི་ལམ་ལ་སྤྱོད་པས་དེ་སྐད་དུ་གྲགས། དེའང་ཤེར་ཕྱིན་སྔགས་དང་རྗེས་མཐུན་ཏེ། འདིའི་གདམས་པའི་ཁུངས་ཤེར་ཕྱོགས་སྤྱི་དང་། ཁྱད་པར་སྡུད་པ་སྟེ། རྒྱུ་ནི་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་མི་གཏོང་དང་། །ཇི་སྐད་སྨྲས་བཞིན་བྱེད་དང་བདེ་
གཤེགས་བྱིན་རླབས་ཅན། །ཞེས་སྟོང་པར་གནས་པ་སྟེ། དེ་བསྒོམ་པ། སེམས་ཅན་མི་གཏོང་བ་སྟེ་བྱམས་སྙིང་རྗེ་ཀུན་རྫོབ་བྱང་སེམས་བསྒོམ་པ། དེ་གཉིས་ཞི་གཅོད་ཀྱི་དངོས་གཞི་དང་། ཇི་སྐད་སྨྲས་བཞིན་བྱེད་པ་ལམ་གྱི་རྩ་བ་བཤེས་གཉེན་བསྟེན་པ། བདེ་གཤེགས་ཀྱི་བྱིན་གྱིས་བརླབས་པ་ནི་སྐྱབས་སེམས་ཡན་ལག་བདུན་པ་མཎྜལ་རྣམས་ཏེ་སྔོན་འགྲོའོ། །བདུད་བཞིས་ཐུབ་པར་དཀའ་བ་ནི་མཐར་ཐུག་གི་ཆོད་ཚད་དོ། །སྔགས་དང་རྗེས་སུ་མཐུན་པ་ནི། བརྟག་གཉིས་ལས། ཤིང་གཅིག་དང་ནི་དུར་ཁྲོད་དང་། །མ་མོའི་ཁྱིམ་དང་མཚན་མོ་དང་། །ཡང་ན་དབེན་པའི་བས་མཐའ་རུ། །བསྒོམ་པ་བཟང་པོ་བརྗོད་པར་བྱ། །ཞེས་དང་། ལུས་ཀྱི་སྦྱིན་པ་བྱིན་བྱས་ནས། །ཕྱི་ནས་སྤྱོད་པ་ཡང་དག་སྤྱད། །ཅེས་དང་། ངེས་པར་སྔོན་དུ་ལྷ་མིན་དང་། །བརྒྱ་བྱིན་ལྟ་བུ་འོང་ན་ཡང་། །དེ་ལ་འཇིགས་པར་མི་བྱ་སྟེ། །སེང་གེའི་གཟུགས་ཀྱིས་རྣམ་པར་རྒྱུ། །ཞེས་པས་གང་དུ་སྤྱོད་པའི་གནས། ཇི་ལྟར་གཅོད་པའི་ལམ། འབྲས་བུ་སློང་ཚར་འབྱུང་ཚུལ་སོགས་རྒྱས་པར་བཤད། དེ་ཡང་སྟོན་པ་ནས། འཇམ་དཔལ། ཨཱརླ་དེ་བ། དམ་པ། དེས་ཡར་ཀླུང་སྨ་ར་སེར་པོ་ལ་གནང་བ་ཕོ་གཅོད་དང་། སྐྱོ་སྟོན་བསོད་རྣམས་བླ་མ་ནས་མ་གཅིག་ལ་བརྒྱུད། དེས་གྲུབ་
ཐོབ་ཕོ་མོ་ཉེར་གཅིག་དང་། སྲས་མོ་གྲུབ་ཐོབ་བཅོ་བརྒྱད་སོགས་བྱོན་ཅིང་། སློབ་མ་མཆོག་བཞིར་གྲགས་པའི། ཁུ་སྒམ་ཆོས་སེང་ནས་རྒྱ་ཆེར་དར་བ་ནི་བཀའ་མ་དང་། བྱང་གཏེར་སོགས་ནས་བྱུང་བའི་གཏེར་མ། བློ་བཟང་གྲགས་པར་འཇམ་དབྱངས་ཀྱིས་གནང་བའི་སྐོར་དང་། རྒྱལ་ཐང་ལུགས། ཐང་སྟོང་སྙན་བརྒྱུད། ཟུར་མང་དྲུང་གཅོད། ཕྱར་རུ་ལུགས་སོགས་ཕལ་ཆེར་དག་སྣང་མ་སྟེ་བཀའ་གཏེར་དག་སྣང་གསུམ་ཀ་ཡོད་དོ། །ལྔ་པ་ས་སྐྱ་པ་ལ། སྤྱིར་བྱོན་ཚུལ། བྱེ་བྲག་ལམ་འབྲས་སོགས་བྱོན་ཚུལ། ལྟ་བ་རྣམ་པར་བཞག་པའོ། །ཞེས་སོ། །དེ་ལ་སྤྱིར་ལམ་འབྲས་སོགས་ལམ་སྐོར་དགུ་ཆ་ལག་དང་བཅས་པ། མཁའ་སྤྱོད་སྐོར་གསུམ། དམར་ཆེན་སྐོར་གསུམ། དམར་ཆུང་སྐོར་གསུམ། འཆི་མེད་རྡོ་རྗེ་ལྷ་མོ། ཛམ་དམར། འཇམ་ནག །སེང་གདོང་མ་སྟེ་བཅུ་གསུམ་དང་། དེ་སྟེང་སེང་གེ་སྒྲའི་ངག་སྲུང་འགྲོལ་བསྣན་པས་ཀླུ་པའི་གསེར་ཆོས་བཅུ་བཞི་པ་སོགས་མན་ངག་གི་སྐོར་དང་། སྤྱི་བཀའ་རྡོར་ཕྲེང་། སྒྲུབ་ཐབས་བརྒྱ་རྩ། རྒྱ་མཚོ། སྣར་ཐང་བརྒྱ་རྩ། ཟུར་བཀའ་གསང་འདུས་ལུགས་གསུམ། གཤིན་རྗེ་གཤེར་སྐོར་གསུམ། བདེ་མཆོག་ལུགས་གསུམ། བོང་ཞལ་ཅན། མཁའ་འགྲོ་རྒྱ་མཚོ། ཀྱེ་རྡོར་བཀའ་བབས་བཞི། །དུས་
འཁོར་སོགས་དང་། གུར་ཞལ་དུར་ཁྲོད་བདག་པོ་བེག་རྩེ་སོགས་བཀའ་སྲུང་གི་སྐོར་དང་། ཡང་ཕུར་དཀར་བདུད་སོགས་རྙིང་མའི་སྐོར་ཏེ་བསམ་གྱིས་མི་ཁྱབ་པ་བཞུགས། །དེང་སང་རང་ཕྱོགས་པ་འགའ་ཞིག་གིས། ལམ་འབྲས་ཐོས་བསམ་བགྱིས་པས་རྒྱུད་དོན་གོ་བར་མི་ཕན་པར་སྨྲ་བ་སྣང་སྟེ། ཚད་མ་བཞི་དང་སྙན་བརྒྱུད་བཞིའི་འཁྲིད་ཚུལ་རྣ་བར་མ་སོན་པའི་སྐྱོན་དུ་ཟད་དོ། །ལམ་ནི་འདི་ནས་བྱུང་བའི་ལམ་ཉམས་སུ་བླངས་པས་འདི་ནས་བྱུང་བའི་འབྲས་བུ་མི་བསླུ་བ་དང་བཅས་པའོ། །འདི་རྒྱ་གར་དུའང་སློབ་དཔོན་ཤདྨ་སོགས་ཀྱིས་ཁུངས་སུ་མཛད་དོ། །དྲུག་པ་ཇོ་ནང་པའི་གྲུབ་མཐའ་བྱུང་ཚུལ་ནི། ཇི་ལྟར་བྱུང་ཚུལ། ལྟ་བའི་འདོད་ཚུལ། དེ་ངན་པར་སྒྲུབ་པ་དང་བཞིས་བསྟན། ཁུངས་ནི། ཡུ་མོ་མི་བསྐྱོད་རྡོ་རྗེ་སྟེ། ཟླ་མགོན་དང་། དེའི་སློབ་མ་སྒྲོ་སྟོན་གནམ་ལ་བརྩེགས་ལས་དུས་འཁོར་གསན། སྐུ་སྒྱུ་ལུས་སུ་བསྒོམས་པས་གྲུབ་པ་བརྙེས། གཞན་སྟོང་ཐུགས་ལ་ཤར། གྱ་གཉིས་པར་གཤེགས། དེའི་སློབ་མའི་གཙོ་བོ་སྲས་དྷརྨེ་ཤྭ་ར། དེའི་བུ་ཆེན་ནམ་མཁའ་འོད་ཟེར། དེའི་སློབ་མ་སྲས་སེ་མོ་ཆེ་བ་ནམ་མཁའ་རྒྱལ་མཚན། དེ་ལ་འཇམ་གསར་བ་ཤེས་རབ་འོད་ཟེར། འདིའི་དུས་དུས་འཁོར་བཀའ་དོགས་ཀྱང་དེ་ནས་ཡངས། དེའི་སློབ་མ་ཀུན་
མཁྱེན་ཆོས་སྐུ་འོད་ཟེར། དེའི་སློབ་མ་ཀུན་སྤངས་ཐུགས་རྗེ་བརྩོན་འགྲུས། དེའི་སློབ་མ་བྱང་སེམས་རྒྱལ་བ་ཡེ་ཤེས། དེ་གཉིས་ཀའི་སློབ་མ་མཁས་བཙུན་ཡོན་ཏན་རྒྱ་མཚོ། དེའི་སློབ་མ་ཀུན་མཁྱེན་དོལ་བུ་པ། འདིས་དང་པོ་བླ་མ་སུམ་ཅུ་ལྷག་ཙམ་ལས་ཆོས་གསན། ཁྱད་པར་སྤྱི་སྟོན་འཇམ་དབྱངས་གྲགས་པ་རྒྱལ་མཚན་ལས་ཕར་ཚད་སོགས་ཞིབ་ཏུ་སྦྱངས། གྲྭ་སྐོར་མཛད་པས་གྲགས་པ་ཤིན་ཏུ་ཆེ་བར་བྱུང་། ཡན་ཆད་ས་སྐྱ་པ། དགུང་ལོ་སོ་གཅིག་པར་ཇོ་ནང་དུ་ཕེབས་ནས། ཡོན་ཏན་རྒྱ་མཚོ་ལས་དུས་འཁོར་གསན། སྲོག་རྩོལ་མཐར་ཕྱིན་པའི་རྟགས་བྱུང་། ཇོ་ནང་པའི་ཆོས་བརྒྱུད་དུ་གྲགས། གཞན་སྟོང་རྩལ་དུ་བཏོན། སློབ་མ་ལོ་ཙཱ་བ་བློ་གྲོས་དཔལ། ས་བཟང་མ་ཏི་པཎ་ཆེན་ཏེ་ཐུགས་སྲས་གཉིས། གཞན་ཕྱོགས་ལས་རྣམ་རྒྱལ་སོགས་མཐའ་ཡས། ཕྱོགས་རྒྱལ་གྱིས་འཁྲུལ་འཇོམས་ཆེ་ཆུང་དང་། དེའི་སློབ་མ་ཉ་དབོན་ཀུན་དགའ་དཔལ་གྱིས་གྲུབ་མཐའ་འོད་གསལ་རྒྱན་སོགས་བརྩམས། དེ་ལ་གནོད་བྱེད་བུ་སྟོན་གྱི་བདེ་གཤེགས་སྙིང་པོའི་མཛེས་རྒྱན་དང་། ཐུགས་སྲས་ལོ་ཙཱ་བའི་མཛེས་རྒྱན། བརྩོན་འགྲུས་དཔལ་གྱིས་བདེ་གཤེགས་སྙིང་པོ་གསལ་བྱེད། ཡར་འབྲོག་པ་རིན་ཆེན་ཏོག་གིས་མཉམ་མེད་དབང་པོའི་རྡོ་རྗེ། ཡེ་ཤེས་ཐོག་ཏོག །རྡོ་
རྗེ་ཐོག་ཆེན། རྡོ་རྗེའི་ཐོ་བ་སོགས་བརྩམས་ཡོད་དོ། །བདུན་པ་ཉི་ཚེ་བ་ནི། བོ་དོང་པ། བུ་སྟོན་ལུགས་ལྷོ་བྲག་ཕྱག་རྡོར་སྙན་བརྒྱུད་རྣམས་བྲིས། འུ་ལུགས་ལས་ཐུགས་སྲས་རིན་རྣམ་གྱི་སློབ་མ་ཤར་ཆེན་པ་དང་། གོང་གསུམ་པ་བདེ་ཆེན་དཔལ་བ། ཁྱུང་ལྷས་པ་སོགས་ས་དགེའི་ཕྱོགས་ལ་རྒྱ་ཆེར་དར། དུས་འཁོར་དང་རྡོར་དབྱིངས་ལ་སོགས་དཀྱིལ་འཁོར་བདུན་ཅུ་ལྷག་ཙམ་བཙུག །ཅེས་སྣང་། དགེ་ལྡན་པའི་ལུགས་བྱུང་ཚུལ་ལ། བསྟན་པའི་བདག་པོ་རྒྱལ་བ་ཙོང་ཁ་པ་འཇིག་རྟེན་དུ་བྱོན་ཚུལ། དེའི་རིང་ལུགས་དྲི་མ་མེད་པ་བསྟན་འཛིན་རྣམས་ཀྱིས་རྒྱས་པར་མཛད་ཚུལ། ལུགས་དེ་གཞན་ལས་ཁྱད་པར་འཕགས་ཚུལ། ཞར་བྱུང་ལོག་པར་འཁུ་བས་གླགས་མ་རྙེད་པའི་ཚུལ་ལོ། །དང་པོ་ལ། རང་ཉིད་ཡོན་ཏན་བརྙེས་ཚུལ། རྒྱུ་དེས་བསྟན་པ་ལ་བྱ་བ་མཛད་ཚུལ་ལོ། །དང་པོ་ལའང་གཞི་སྡོམ་པའི་ཚུལ་ཁྲིམས་བཞེས་ཚུལ། ལུང་དང་རྟོགས་པའི་ཡོན་ཏན་བརྙེས་ཚུལ་ལོ། །གཉིས་པ་ལ། མང་དུ་ཐོས་པ་ལུང་གི་ཡོན་ཏན་བརྙེས་ཚུལ། ཚུལ་བཞིན་བསྒྲུབས་པས་རྟོགས་པའི་ཡོན་ཏན་བརྙེས་ཚུལ་ལོ། །དང་པོ་ལ། ཐོས་པས་སྒྲོ་འདོགས་བཅད་པ་དང་། བསམ་པས་གདམས་པར་ཤར་ཚུལ་ལོ། །དང་པོ་ལ་མཚན་ཉིད་དང་། སྔགས་གཉིས། གཉིས་པ་ནི་འདུན་ལེགས་མ་
ནས་གསུངས་པ་ལྟར་རོ། །རྟོགས་པའི་ཡོན་ཏན་ནི། སོ་དྲུག་ནས་བྱ་བྲལ་དུ་ཕེབས། འགྲེལ་པ་བུདྡྷ་པཱ་ལི་ཏའི་རྩ་ཤེས་རབ་བྱེད་བརྒྱད་པའི། བརྟེན་ནས་འབྱུང་བ་མེད་པ་ཡི། །ཞེས་པའི་ཐད་གཟིགས་པས། སྟོང་ཉིད་གསར་དུ་རྟོགས་ཚུལ་མཛད། །གཉིས་པ་ལ། བསྟན་པའི་རྨང་བཙུགས་ཚུལ་དང་། མཁས་པའི་བྱ་བ་གསུམ་གྱིས་འཕེལ་རྒྱས་མཛད་ཚུལ་གཉིས། དང་པོ་ནི། འདུལ་མདོ་སྔགས་ཀྱི་འདུལ་བ་གཙོ་བོར་ཕྱག་ལེན་དུ་བཏབ་པའོ། །འཆད་པ་ནི། མོན་མཁར་བཀྲ་ཤིས་གདོང་དུ་ཉིན་རེ་ལ་གཞུང་ལུགས་བཅོ་ལྔ་རེ་གསུངས་པས་མཚོན་པ་དང་། རྩོད་པ་ནི། བཅུ་དགུ་པར་གསང་ཕུ་སོགས་སུ་ཕར་ཕྱིན་དང་། ཕྱིས་ས་སྐྱ་རྩེ་དོང་སོགས་དཀའ་ཆེན་བཞིའི་གྲྭ་སྐོར་མཛད་པས་གཟུར་གནས་ཀྱི་སྤོབས་པ་འཕྲོག །རྩོམ་པ་ནི་ར་སྒྲེངས་སུ་ལམ་རིམ། འོ་དེ་གུང་རྒྱལ་གྱི་ལྷ་ཞོལ་བྱམས་གླིང་དུ་སྔགས་རིམ་སོགས་ཇོ་བོ་ཡབ་སྲས་དང་། རྒྱ་གར་གྱི་པཎ་གྲུབ་དུ་མས་བྱིན་གྱིས་བརླབས་ཏེ་མཛད་པ་སོགས་མཐའ་ཡས། རྔོག་ལོ། མང་ཐོས། གཞུང་ལུགས་མང་ཐོས་བུ་སྟོན། ངལ་བ་མང་བརྟེན་ས་པཎ་དང་ཕྱི་གཙང་། ཡོན་ཏན་ཚོགས་ཀྱིས་མི་དམན་པ་མར་མི་སྒམ་པོ་པ་སོགས། ས་པཎ། བུ་སོགས། རིག་ལམ་ལ་ངལ་བ་མང་བརྟེན། ཕྱ་བ་སོགས། ཡོན་ཏན་མི་དམན་པ་དོལ་བུ་པ་སོགས་ཀྱིས་མ་
རྟོགས་པའི་དྲང་ངེས་འབྱེད་པའི་སྤོབས་པ་ཐོབ། སློབ་མ་ལ་བླ་མ་ཆོས་འབྲེལ་གསན་པ་བཞི། སྔ་ཚར་བཞི། འཁོར་དག་པ་རྣམ་བརྒྱད། འཇམ་དབྱངས། སྲས་ཀྱི་ཐུ་བོ་གཉིས་ཞེས། རྒྱལ་ཚབ། འདུལ་འཛིན་གཉིས། ཁྱད་པར་དུ་འཕགས་པའི་གསང་བདག་གསུམ། སྲས་གསུམ། ཕྲིན་ལས་ནམ་མཁའ་དང་མཉམ་པའི་བུ་ཆེན་བཞི། བཀྲ་ཤིས་དཔལ་ལྡན། གུང་རུ་རྒྱལ་མཚན་བཟང་པོ། ཤེར་སེང་། དགེ་འདུན་གྲུབ། དབུས་གཙང་བསྟན་པའི་སྒྲོན་མེ་བཅུ། གཞན་དོན་ལྷུན་གྱིས་གྲུབ་པའི་སེམས་དཔའ་བཅུ། མི་དབང་གཙུག་ན་མཛེས་པའི་ཏི་ཤྲཱི་གཉིས། བྱམས་ཆེན། ཆོས་རྗེ། རྒྱ་ཆེན་མང་དུ་ཐོས་པའི་དབོན་སྲས་གཉིས། སྦྱངས་པའི་ཡོན་ཏན་འཛིན་པའི་ལྕོགས་ཆེ་ཆུང་གཉིས། བསྟན་པ་ཕྱོགས་མཐར་སྤེལ་བའི་དར་ཆེན་ཤེར་བཟང་གཉིས། དྲུག་སོགས་མཐའ་ཡས་པ་ལས། གཙོ་བོར། རྟོགས་ལྡན་བ་རྒྱལ་ཚབ། མཁས་གྲུབ། འཇམ་དབྱངས་ཆོས་རྗེ། བྱམས་ཆེན་པ། ཤེར་སེང་། དགེ་འདུན་གྲུབ། ཤེར་བཟང་གཉིས་སོ། །འཇམ་དབྱངས་གཙང་པ་བདུན་བརྒྱུད་ལས། མཐུ་སྟོབས་དབང་ཕྱུག་ཞྭ་ལུ་ལེགས་པ་རྒྱལ་མཚན། རྗེ་བློ་གྲོས་ཆོས་སྐྱོང་། དུས་འཁོར་ལ་མཁས། སྙན་བརྒྱུད་ཀྱི་མངའ་བདག་བ་སོ་ཆོས་རྗེ། དྭགས་པོ་གྲ་ཚང་བཏབ། མཁན་བློ་གྲོས་བརྟན་པ། འདིས་བྱམས་ཆོས་ལྔའི་
འགྲེལ་པ་སོགས་བརྩམས། རྗེ་སྨོན་ལམ་དཔལ་བ། འདི་ཞབས་མ་ཟིན་ཀྱང་། མནལ་ལམ་དུ་ཆོས་གསན་པས་དངོས་སློབ་ཀྱི་གྲས་སུ་བགྲངས། བྱང་རྩེར་རྒྱལ་ཚབ་རིན་པོ་ཆེ་སོགས་དང་། ཤར་རྩེར་ཤར་པ་རིན་ཆེན་རྒྱལ་མཚན་སོགས་བྱོན། བྱང་རྩེར་ཉག་རོ་གྲྭ་ཚང་སོགས་གྱེས། འབྲས་སྤུངས་སུ་སྒོ་མང་། བློ་གསལ་གླིང་། བདེ་ཡང་། ཤག་སྒོར། ཐོས་བསམ་གླིང་། འདུལ་བ། སྔགས་པ་གྲྭ་ཚང་སྟེ་བདུན་བྱུང་། ཕྱིས་སྒོ་བློ་བདེ་སྔགས་བཞིར་འདྲིལ། དེའང་བློ་གསལ་གླིང་དུ་ཀུན་མཁྱེན་ལེགས་པ་ཆོས་འབྱོར་རམ་འཇམ་དབྱངས་དགའ་བློ། པཎ་ཆེན་ཆོས་འབྱུང་དང་བསྟན་རྩིས། བསོད་ནམས་གྲགས་པ། བདེ་ཡང་དུ་གྲྭ་ཆུང་ཡོན་ཏན་རྒྱ་མཚོ། ཤག་སྒོར་དུ་སྣར་ཐང་བ་རབ་མཆོག །ཐོས་བསམ་གླིང་དུ་ཉན་པོ་ཤཱཀྱ་རྒྱལ་མཚན། སྒོ་མང་དུ་གུ་རུ་ཆོས་འབྱུང་དང་། འཇམ་དབྱངས་བཞད་སོགས་པོད་ཆེན་ལྔ་བྱོན། སེ་རར་གྲྭ་ཚང་ལྔ་ཡོད་པ། ཕྱིས་བྱེས་སྨད་གཉིས། སྔ་མ་འཇམ་དབྱངས་ཆོས་རྗེའི་སློབ་མ་མུས་སྲད་བློ་གྲོས་རིན་ཆེན་དང་། ཕྱི་མ་ཀུན་མཁྱེན་བྱང་ཆུབ་འབུམ་གྱིས་འཆད་ཉན་མཛད་ནས་དར། འདི་དག་ཏུ་མཁས་པ་གུང་རུ་རྒྱལ་མཚན་བཟང་པོ། གཉལ་སྟོན་དཔལ་འབྱོར་ལྷུན་གྲུབ། རྗེ་བཙུན་ཆོས་ཀྱི་རྒྱལ་མཚན་སོགས་བྱོན། བཀྲ་ཤིས་ལྷུན་པོར་
ཤར་རྩེའི་འཆད་ཉན་པ་དང་པོ་ཤངས་སྟོན་དྲི་མེད་དང་། དྲུག་པ་བློ་གྲོས་རྒྱ་མཚོ། དཀྱིལ་ཁང་ནས། བརྒྱད་པ་བློ་གྲོས་རྒྱལ་མཚན་དང་། བཅུ་པ་མཁས་གྲུབ་བསྟན་དར་བ། ཐོས་བསམ་གླིང་ནས་དང་པོ་ཀུན་མཁྱེན་ཆོས་སྐྱོང་བཟང་པོ་དང་། བཞི་པ་ཁྱུང་ཕྲུགས་བྱམས་པ་བཀྲ་ཤིས། །ཕྱིས་སུ་སྔགས་གྲྭ་ཆོས་རྒྱན། བཙུགས་པའི་སྔགས་ཆེན་རྡོ་རྗེ་འཛིན་པ་དཀོན་མཆོག་རྒྱལ་མཚན་སོགས་བྱོན་ནས་ལེགས་བཤད་མང་དུ་བརྩམས། སྟོད་མངའ་རིས་སུ་ཤེས་རབ་བཟང་པོས་མང་ཡུལ་སྟག་མོའི་ཆོས་སྡེ་དང་། དེའི་དབོན་ཤེས་རབ་པས་ཁྲིག་པའི་ཆོས་སྡེ་བཏབ་པ་སོགས་དར་རྒྱས་ཆེ། བྱང་སེམས་ཤེར་བཟང་གིས་སེ་རར་ཟུར་ཆོས་མཛད། ཀུན་མཁྱེན་བྱང་འབུམ་པས་ལུང་བསྟན་ནས་ཆབ་མདོ་ཆོས་འཁོར་བྱམས་གླིང་བཏབ། ཀུ་ཙོར་རྟོགས་ལྡན་རྗེ་ཡི་དངོས་སློབ། གྱི་སྲས་འཕགས་པ་ལྷ་བཞུགས། དེའི་སློབ་མ་ཞི་བ་བཟང་པོ། ལྕགས་ར་སྤྲུལ་སྐུ་སོགས་སོ། །ཁམས་ཀྱི་སྒང་དྲུག །ཤོད་བཅུ། རོང་དགུ། རུ་གསུམ་དུ་གྲགས་པའི། ཨ་མདོའི་ཕྱོགས་སུ་དོན་རིན་པས་བཏབ་པའི་བྱ་ཁྱུང་བྲག །སྐུ་འབུམ་དུ་སྔར་དགེ་འདུན་མང་ཙམ་ཆགས་པ། བསོད་ནམས་རྒྱ་མཚོའི་ལུང་གིས་འདུལ་བ་ཆོས་རྗེ་འོད་ཟེར་རྒྱ་མཚོས་གཙང་དགོན་དུ་བསྒྱུར། མཚན་ཉིད། སྔགས་པ། ཕྱིས་སྨན་པ་གྲྭ་ཚང་
བཙུགས། ཡོན་ཏན་རྒྱ་མཚོས་རྒྱལ་བའི་སྲས་པོ་དོན་ཡོད་རྒྱ་མཚོར་བསྐུལ་ཏེ། དགོན་ལུང་བྱམས་པ་གླིང་། ལྕང་སྐྱ་རྡོ་རྗེ་འཆང་གོང་འོག་དང་། རྗེ་ཐུའུ་བཀྭན་པ། མི་དབང་ཆོས་ཀྱི་རྒྱ་མཚོ་སོགས་བྱོན། དགོན་ལུང་མཁན་པོ་བཅུ་པ་བླ་མ་བཙན་པོ་པ་དོན་གྲུབ་རྒྱ་མཚོས་གསེར་ཁོག་ཏུ་དགའ་ལྡན་དམ་ཆོས་གླིང་བཏབ་ཅིང་། ཕྱིས་སུ་སྨིན་གྲོལ་ནོ་མི་ཧན་རིམ་བྱོན་གྱིས་བདག་པོ་མཛད། རོང་པོ་བཀའ་བཅུ་གྲུབ་ཆེན་དཔལ་ལྡན་རྒྱ་མཚོས་རི་ཁྲོད་བཀྲ་ཤིས་འཁྱིལ་སོགས་བཏབ། གཡེར་གཤོང་སྔགས་རམ་པ་འཇམ་དབྱངས་བློ་གྲོས་ཀྱིས་གཡེར་གཤོང་གྲྭ་ཚང་བཙུགས། འཇམ་དབྱངས་བཞད་པས་མདོ་སྨད་རོང་རྒྱུད་དུ་ཆོས་སྡེ་བཀྲ་ཤིས་འཁྱིལ་བཏབ། མཁས་པ་ངག་བཀྲས་དང་། དེའི་སྐྱེ་སྤྲུལ་གྱིས་བསྐྱངས། ཐོས་བསམ་གླིང་། རྒྱུད་པ། དུས་འཁོར། སྨན་པ་སྟེ་གྲྭ་ཚང་བཞི་ཡོད། དེང་སང་མདོ་སྨད་ཙམ་ན་ཆེ། ཇོ་ནེའི་དཔོན་རྒྱུད་ཆོས་རྗེ་རིན་ཆེན་ལྷུན་པོས་ཇོ་ནེ་དགོན་བཏབ། ཕྱིས་གྲགས་པ་བཤད་སྒྲུབ་སོགས་བྱུང་། ཁྱད་པར་སྔགས་ཀྱི་བསྟན་པ་སྤེལ་བའི་གཙོ་བོ་རྗེ་ཤེས་རབ་སེང་གེ་ནས་རྒྱུད་ཆེན་དཀོན་མཆོག་ཡར་འཕེལ་གྱི་བར་བྱོན་པའི་སྲད་རྒྱུད་པ་སྟེ། དེ་ལ་འང་རིམ་ལྔ། བདེ་མཆོག་ལོ་དྲིལ། འཇིགས་བྱེད་རྣལ་འབྱོར་བཞི་རིམ། སྦྱོར་དྲུག །འཁོར་
ཆེན། ཆོས་དྲུག། །འཕོ་ཁྲིད་གསེར་གྱི་སྒོ་འབྱེད་རྣམས་འཆད། ཕྱིས་འཁོར་ཆེན་དང་འཕོ་ཁྲིད་བཞག་པས་སྲད་རྒྱུད་ལུགས་ཀྱི་ཁྲིད་ཆེན་དྲུག །སྨད་རྒྱུད་ལུགས་ཀྱི་བརྒྱད་ཅེས་གྲགས། གཞན་ཡང་ཡན་ལག་གི་ཁྲིད་གསུམ་སོགས་དང་། ལམ་རིམ་སོགས་རྒྱ་ཆེར་བྱུང་། དཀོན་མཆོག་ཡར་འཕེལ་ལ། ཕྱིས་འདའ་ཀར་འཇམ་དབྱངས་བཞད་པ། ལྕང་སྐྱ་རིན་པོ་ཆེ། ཐང་སག་པ་དངོས་གྲུབ་རྒྱ་མཚོ་རྣམས་ཀྱིས་གཏུགས་ནས་སོ་སོས་བསྐྱེད་རྫོགས་སོགས་གནང་། དེ་ནས་རིམ་པར་འཇམ་དབྱངས་བདེ་བའི་རྡོ་རྗེ། གུར་སྨོན་པ་དོན་ཡོད་མཁས་གྲུབ། ཁྲི་ཆེན་ངག་དབང་མཆོག་ལྡན། སྐལ་བཟང་རྒྱ་མཚོ། རོལ་པའི་རྡོ་རྗེ་སོགས་བྱོན་ཅིང་། དབེན་ས་བཀའ་བརྒྱུད་ནི། བ་སོ་ཆོས་རྗེའི་སློབ་མ། གྲུབ་ཆེན་ཆོས་ཀྱི་རྡོ་རྗེ་ཉང་སྟོད་ཇོ་མོ་ལྷ་རིའི་པདྨ་ཕུག །སྟོད་ལུང་པ་དཔལ་ལྡན་རྡོ་རྗེ་ཆེ་འཕེལ་ལའང་བཤད་མོད། གྲིབ་ཀྱི་རྒྱ་དྲམ་རྡོ་རྗེ་བརྩེགས། ཁམས་པ་ཡེ་ཤེས་རྡོ་རྗེས་འཕན་ཡུལ་འཇོག་པོའི་ཕུ་ཡི་དབེན་གནས་སུ་བཞུགས་ཀྱང་། འཆི་མེད་འཇའ་ལུས་རྡོ་རྗེའི་སྐུ་སྐལ་དམན་གྱིས་བལྟར་མི་སྣང་བར་བཤད། བར་པ་དེས་བསོད་ནམས་རྒྱ་མཚོར་ལུ་ཧི་པའི་དབང་དང་། ཚེ་དབང་ཕུལ། སྔ་མས་དབེན་ས་བློ་བཟང་དོན་གྲུབ་རྗེས་སུ་བཟུང་། དེས་སངས་རྒྱས་ཡེ་ཤེས། དེས་པཎ་ཆེན་
རིན་པོ་ཆེ། སྔ་མ་གཉིས་དང་། ཁྱད་པར་ཕྱི་མས་སྙན་བརྒྱུད་ཕལ་ཆེར་ཡི་གེར་མཛད། དེ་ལྟར་མཁས་གྲུབ་རྗེ་ནས་པཎ་ཆེན་བློ་བཟང་ཆོས་རྒྱན་བར་བྱོན་པ་ལ་དབེན་ས་སྙན་བརྒྱུད་དང་། །རྗེ་ཤེས་རབ་སེང་གེ་ནས་འཇམ་དབྱངས་བཞད་པའི་རྡོ་རྗེ་སོགས་ཀྱི་བར་བྱོན་པ་ལ་སྲད་རྒྱུད་དེ་བཀའ་སྲོལ་ཆེ་བ་གཉིས་ཕྱིས་ཆུ་བོ་གཅིག་ཏུ་འདྲེས་སོ། །དགའ་ལྡན་ཞེས་པ་གདན་སའི་མིང་གིས་བཏགས་པ་སྟེ། རྗེ་རིན་པོ་ཆེའི་སྐུ་ཚེའི་སྨད་ལ་ཆོས་རྗེ་དགའ་ལྡན་པའི་ལུགས་ཞེས་གྲགས་པ་བྱུང་། དེ་ཚིག་སྣ་བསྡུས་པས་དགའ་ལུགས་པ་ཞེས་མ་བདེ་བ། དགེ་ལུགས་པར་བྱས། བཀའ་གདམས་གསར་མ་ཞེས་པའི་དོན། ཕ་ཆོས་ལེའུ་ཉེར་དྲུག་པར། ཐ་མར་བསྟན་པའི་མེ་རོ་ནི། །གྲགས་པའི་མཚན་གྱིས་གསོ་བར་བྱེད། །ཅེས་བཤད། ཀླུ་མེས་ལ་བླ་ཆེན་དགོངས་པ་རབ་གསལ་གྱིས་དབུ་ཞྭ་སེར་པོ་གནང་བར་བརྟེན་སྔོན་གྱི་འདུལ་འཛིན་ཆེན་པོ་རྣམས་ཀྱིས་ཞྭ་སེར་མནབས་པས། རྗེས་ཀྱང་འདུལ་བསྟན་གསོ་ཕྱིར་ཞྭ་སེར་བཞེས་པས་ཞྭ་སེར་འཆང་བའི་རིང་ལུགས་པ་ཞེས་གྲགས་པ་བྱུང་། གཞན་དུ་བྲིས་པ་ནི་ནོར་རོ། །གསུམ་པ་རྒྱ་ནག་ཏུ་དར་ཚུལ་སྐབས། ཚིན་གྱི་རྒྱལ་སྲིད་ལ་ཤི་ཧུའང་བྱ་བའི་རྒྱལ་པོ་མངའ་ཐང་ཤིན་ཏུ་ཆེ་བ་ཞིག་བྱུང་བས། འདི་ཚེ་མཐའི་ཡུལ་གྲུ་
རྣམས་ཀྱིས་རྒྱ་ཡི་ཡུལ་གྲུར་རྒྱལ་སྲིད་ཀྱི་མིང་གིས་བཏགས་ཏེ། མ་ཧཱ་ཚིནྡ་ཞེས་འབོད་པ་ཟུར་ཆག་སྟེ། མ་ཧཱ་ཙི་ན་ཞེས་བྱུང་། བོད་ཀྱིས་གོས་སོགས་ལ་གྲས་ཏེ་རྒྱ་ནག་ཅེས་བཏགས། རང་སྐད་ལ། ཤེན་ཊེའུ་ཞེས་ལྷ་གླིང་དང་། ཤེའུ་ནཊེའུ་ཞེས་ལུས་འཕགས་གླིང་དུའང་འབོད་དོ། །དེ་ལ། སྐར་མ་ལྟ་བུ་ཤེའུ་དང་། ཟླ་བ་ལྟ་བུ་དོའུ་རི་དང་། ཉི་མ་ལྟ་བུ་ཇིང་གི་ལུགས་སྲོལ་བྱུང་ཚུལ་གསུམ་ལས། ལུགས་སྲོལ་དང་པོ་གཉིས་བྱུང་ཚུལ། ཉི་ཚེ་བ་འགའ་ཞིག་བྱུང་ཚུལ། ཆོས་ཀྱི་ལུགས་སྲོལ་བྱུང་ཚུལ་ལོ། །དང་པོ་ནི། ཤེའུ་ཞེས་པ་ཡི་གེའི་མིང་སྟེ། འོན་ཀྱང་དེའི་ཁོངས་སུ་རིག་གནས་སྣ་ཚོགས་དང་། འཇིག་རྟེན་གྱི་རྣམ་གཞག་རྣམས་ཀྱང་བསྡུས་ནས་འབྱུང་བས། དོན་འགྱུར་ལྟར་ན་བསླབ་ཚིགས་ཀྱི་གཞུང་ངམ། རིགས་བྱེད་ཀྱི་ལུགས་ཞེས་བྱ་སྟེ། དེ་ནི་རྒྱ་ནག་གི་རྒྱལ་པོ་ཐམས་ཅད་ཀྱི་ཐོག་མ་ཧྥུ་ཊི་ཞེས་པ་ནས་བྱུང་། གཉིས་པ་ནི་བོན་གྱི་གྲུབ་མཐའ་སྟེ། ལོའུ་ཀྱུན་ཞེས་པ་རྩ་བའི་སྟོན་པ་ཡིན་ལ། དེ་ལའང་ལྷ་མི་གཉིས་སྣང་ངོ་། །གཉིས་པ་ཉི་ཚེ་བ། མུ་སྟེགས་པ་ནི་གཏན་ནས་མ་བྱུང་། ཧེ་འུ་ཟི་དང་། ཐེ་ལན་ཞེས་པའི་གྲུབ་མཐའ་གཉིས་ཡོད་པ་ནི་རྒྱའི་ལུགས་དང་མ་འདྲེས་པར་ཡོད་དེ། དོན་དུ་ཀླ་ཀློའི་ལུགས་སྲོལ་དང་མཐུན་པར་སྣང་། གསུམ་པ་ནི། རྒྱ་གར་ནས་བྱུང་
ཚུལ། བོད་ནས་བྱུང་ཚུལ་ལོ། །དང་པོ་ནི། སངས་རྒྱས་པའི་ཕྲིན་ལས་ལས་སྟོན་པ་མཱ་ཙིས་ལུས་སྲོག་ལ་མི་ལྟ་བར་གཞན་ཕན་དང་དུ་བླང་དགོས་པ་སོགས་ཆ་འདྲ་བྱུང་སྣང་ཡང་། དངོས་ནི་འོད་སྲུང་གི་རིགས་ཀྱི་དགྲ་བཅོམ་པ་མ་ཏང་གི་དང་། པཎྜི་ཏ་བྷ་ར་ན་ཞེས་པ་གཉིས་ཀྱིས་ཕེབས་པ་ནས་བཟུང་སྟེ། རྒྱ་གར་གྱི་པཎ་གྲུབ་འགའ་ཞིག་ཕེབས་ཏེ་བསྙེན་རྫོགས་སོགས། དེར་ནས་བརྒྱུད་པ་བར་མ་ཆད་པ་ལྔ་སྟེ། འདུལ་བའི་བརྒྱུད་པ། གསང་སྔགས་ཀྱི་བརྒྱུད་པ། རྒྱ་ཆེན་སྤྱོད་བརྒྱུད། ཟབ་མོ་ལྟ་བརྒྱུད། སྙིང་པོ་དོན་གྱི་བརྒྱུད་པའོ། །ཧྭ་ཤང་པའི་སྡེ་ཆེན་པོ་ཆགས་སོ། །འོན་ཀྱང་གསང་སྔགས་བརྒྱུད་པ་ནི་དེང་སང་མི་སྣང་ངོ་། །དང་པོ་ནི། དགྲ་བཅོམ་པ་མ་ཏང་གི་དང་། ཕྱིས་རིག་འཛིན་ཀུ་མཱ་ར་ཤྲཱི་ལས་དར། གཉིས་པ་གནས་བརྟན་ཤྲཱི་མི་ཏྲ་དང་། ཁྱད་པར་སློབ་དཔོན་བཛྲ་བྷོ་རི་དང་། ཨ་མོ་གྷ་བཛྲ་གཉིས་ཀྱིས་རྒྱ་ཆེར་སྤེལ་ཀྱང་དེང་སང་རྒྱུན་ནུབ། གསུམ་པ་འཕགས་པ་ཐོགས་མེད་ནས་བརྒྱུད་པ་ལྔ་པ་དུལ་བ་བཟང་པོ་ལས་སློབ་དཔོན་ཐང་ཟན་ཙང་གིས་གསན་ཏེ་དར། བཞི་པ་ནི། མགོན་པོ་ཀླུ་སྒྲུབ་ནས་བརྒྱུད་པ་བཞི་པ་པྲཛྙཱ་རསྨི་ལས། རྒྱའི་སློབ་དཔོན་ཡེ་ཤེས་དཔལ་གྱིས་གསན་ཅིང་། ཊི་ཅེ་དཱ་ཤི་ཀ་སྟེ་སློབ་དཔོན་ཆེན་པོ་ཡེ་ཤེས་ལྡན་གྱིས་དར་ཞིང་རྒྱས་པར་
མཛད་པ་སོགས་ནས་དར། ལྔ་པ་ནི། ལང་གཤེགས་འགྲེལ་པ་ནས་བཤད་པ་ལྟར་ཏེ། དེ་ཡང་འོད་སྲུང་ནས་བཟུང་བརྒྱུད་པ་ཉེར་བརྒྱད་པ་སློབ་དཔོན་བྱང་ཆུབ་ཆོས་མཆོག་བར་ཆིག་བརྒྱུད་དུ་བྱོན། དེ་ནས་བརྒྱུད་པ་ལྔ་པ་ལུ་ཙུ་ཚན་ཤིའི་བར་ཆིག་བརྒྱུད་དང་། དེ་ནས་གདམས་པ་རྒྱ་ཆེར་བརྒྱུད་པ་ལྔར་གྱེས་ཀྱང་གཞན་རྣམས་ནུབ། ལིན་གྱི་དང་། དྷརྨ་ཞེས་པ་ཟུར་ཆག་པས། ཏཱ་ལོ་ཙུ་ཤི་ཞེས་ཀྱང་གྲགས། བོ་དྷི་དྷི་དྷརྨོཏྟ་ར། ཚོའུ་དུང་བརྒྱུད་པ་ཚོ་གཉིས་དེང་སང་ཡང་ཡོད། འདི་དག་ལ་ཙུང་མེན་ཞེས་ཟེར། དོན་བཀའ་བརྒྱུད་པ་དང་ཕྱོགས་མཚུངས་ཕྱག་རྒྱ་ཆེན་པོའི་བརྡའི་བརྒྱུད་པར་སྣང་། འོན་ཀྱང་བོད་དུ་མ་ཧཱ་ཡཱ་ནས་བཤད་པ་དང་། རྒྱ་ནག་གི་བཤད་པ་གཉིས་མི་མཐུན་པར་སྣང་ལ། ཕྱི་མས་ངེས་འབྱུང་བྱང་སེམས་ཀྱིས་མ་ཟིན་པའི་ལས་དགེ་སྡིག་གི་འབྲས་བུ་བདེ་སྡུག་སོ་སོར་འབྱིན་ཀྱང་། ཐར་པ་དང་ཐམས་ཅད་མཁྱེན་པའི་རྒྱུར་མི་འགྲོ་བར་ཁྱད་མེད་དེ། སྤྲིན་དཀར་ནག་གཉིས་ཀས་ཉི་མ་སྒྲིབ་པ་བཞིན་ནོ། །ཅི་ཡང་ཡིད་ལ་མི་བྱེད་པ་ནི་ཉམས་ལེན་གྱི་མཐར་ཐུག་པ་ཡིན་ཀྱང་གནས་ལུགས་མངོན་དུ་གྱུར་པའི་གང་ཟག་ལས་གཞན་གྱི་མ་ཡིན་པར་བཤད་པ་སོགས་སྣང་བས། ཧཱ་ཤང་གཅིག་གི་ཟེར་ལུགས་ཐམས་ཅད་ཉེས་པར་བསྒྲུབས་མི་རུང་། ཚིན་མིན་ཞེས་པ་
དང་། རུན་མིན་ཅེས་པ་ནི། གཅིག་ཅར་དང་། རིམ་གྱིས་འཇུག་པས་སློབ་མ་བཀྲི་ཚུལ་ཙམ་སྟེ་གྲུབ་མཐའ་སོ་སོ་བ་མ་ཡིན་ནོ། །དེ་ལྟར་སྔར་ལུགས་སྲོལ་ལྔ་ལས། ཐང་གི་རྒྱལ་རབས་ཀྱི་གུང་ཡོལ་གྱི་སྐབས་ཙམ་ནས། ལཡུའི་མེ་ན་ཅེས་པ་འདུལ་བ། ཀིའུ་ཡོའུ་མན་ཅེས་པ་བཤད་རྒྱུད། ཙུང་མི་ན་ཅེས་པ་སྒྲུབ་རྒྱུད་དེ་གསུམ་དུ་བསྡུས་ནས་ད་ལྟའི་བར་དུ་གྲགས་སོ། །གཉིས་པ་ནི། ཧོར་གྱི་རྒྱལ་རབས་ཡན་དུ་བྱོན་པ་མེད་ལ། དེ་ནས་ས་པཎ། འཕགས་པ། པཀི། རང་བྱུང་རྡོ་རྗེ། རོལ་པའི་རྡོ་རྗེ། གཡུང་སྟོན་རྡོ་རྗེ་དཔལ། དེ་བཞིན་གཤེགས་པ། བྱམས་ཆེན་དབུ་བརྙེས། རྗེ་སོགས་བྱོན་ནས་བསྟན་པ་དར་བར་མཛད། ཆེན་པོ་ཆིང་གི་དུས་ནས་བཟུང་དགེ་ལྡན་པའི་རིང་ལུགས་དར་ཞིང་རྒྱས། གོང་མ་གཡུང་ཊིང་ཆེན་པོའི་སྐུ་རིང་ནས་ཤིན་ཏུ་རྒྱས་པར་གྱུར་ཏོ། །ཧོར་ཡུལ་ཏེ་སོག་ཡུལ་དུ་ཆོས་དར་ཚུལ་ནི། སྟོབས་ཀྱི་འཁོར་ལོས་བསྒྱུར་བ། ཆིང་གི་སི་བོད་དུ་བྱོན་ནས། མངའ་རིས་སྐོར་གསུམ། རུ་བཞི། མདོ་ཁམས་སྒང་དྲུག་རྣམས་དབང་དུ་བསྡུས། ས་ཆེན་ཀུན་སྙིང་དང་ཡོན་མཆོད་དུ་འབྲེལ། རྟེན་གསུམ་འགའ་ཞིག་སྤྱན་དྲངས་ཏེ་མཆོད་པ་ལ་བརྟེན་ནས་དཀོན་མཆོག་ལ་དད་པར་བྱུང་ཞིང་བསྟན་པའི་དབུ་བརྙེས། འདི་སངས་རྒྱས་འདས་ནས་ལྕགས་འབྲུག་
ལྟར་ན༢༠༨༧། མེ་ཡོས་ལྟར་ན་༢༠༧༤ འདས། དེ་ནས་ས་པཎ་འཕགས་པ་དང་། ཀརྨ་པ་སོགས་ཕེབས་ཏེ་རིམ་པར་སྲོལ་བཏོད། ཕྱིས་ཐུ་མེད་པའི་ཨལ་ཐ་ཧན་གྱི་དུས་སུ་གོང་མ་བསོད་ནམས་རྒྱ་མཚོ་ཕེབས། དེ་ཉིད་ཀྱི་སྤྲུལ་སྐུ་སོག་ཡུལ་དུ་འཁྲུངས་པ་སོགས་ཀྱིས་དགེ་ལྡན་པའི་བསྟན་པ་ལ་དད་པར་གྱུར། ཆ་ཧར་ལེགས་ལྡན་ཧུ་ཐོག་ཐུས་བཀའ་འགྱུར་ཡོངས་སུ་རྫོགས་པ་སོག་སྐད་དུ་བསྒྱུར། ཧལ་ཧའི་ཡུལ་དུ་ཨ་སུ་ཐའི་རྒྱལ་པོའི་ཚ་བོ་ཐུ་ཤི་ཡེ་ཐུ་ཧན་གྱི་སྲས་སུ་འཇམ་དབྱངས་ཆོས་རྗེའི་སྤྲུལ་སྐུ་བློ་བཟང་བསྟན་རྒྱས་འཁྲུངས། རི་བོ་དགེ་རྒྱས་གླིང་གི་དགོན་པ་བཏབ་པ་དང་། པཎ་ཆེན་དང་། ལྔ་པའི་སློབ་མ་ཛ་ཡ་པཎྜི་ཏ་བློ་བཟང་ཕྲིན་ལས་དང་། ཨེར་ཏི་ནི་པཎྜི་ཏ་བློ་བཟང་བསྟན་འཛིན་གཉིས་ཀྱིས་ཀྱང་རྒྱ་ཆེར་སྤེལ། ཐོར་གྲོད་ཀྱི་ཡུལ་དུ་བྱང་སེམས་སྦྱོར་ལམ་པར་གྲགས་པ་སྒོ་མང་སློབ་དཔོན་དོན་གྲུབ་རྒྱ་མཚོས་སྲོལ་བཙུགས། ཨོས་རོད་དམ་ཨོས་ལང་ལ་ཚོ་བཞི་ལས། རྒྱལ་སྲིད་ཧོ་ཤོད་ཀྱིས་འཛིན་ཀྱང་ཨོ་རོ་སུའི་རིགས་ལས་སོན་པའི་བེ་ཤོག་ཐུ་ཧན་སྟོབས་རྒྱས་ཀྱིས་ཨོ་རོད་ཡོངས་ལ་དབང་བསྒྱུར། མདོ་སྔགས་ཀྱི་བཤད་གྲྭ་མང་དུ་བཙུགས་པ་སོགས་ནས་ཅུན་དཀར་གྱི་ཡུལ་དུ་བསྟན་པ་ཡུན་རིང་དུ་རྒྱས་པར་བྱུང་ཡང་། ཕྱིས་ནང་འཁྲུགས་ཀྱིས་ཉམས། ཨོ་རོད་ཚོ་
བཞིའི་ནང་ཚན། ཧོ་ཤོད་ཀྱི་དཔོན་པོ་ཧ་ནའི་སྲས་སུ་ཤྲི་ཧན་བསྟན་འཛིན་ཆོས་ཀྱི་རྒྱལ་པོ་སྟེ། དེ་ནས་བཟུང་བསྟན་པ་ལ་གུས་པས་མཆོད་པ་སྟེ། སོ་ལོན་དང་བར་གད་ཀྱི་སྡེ་འགའ་ཞིག་མ་གཏོགས་སོག་པོ་བྱིངས་ལ་མུ་སྟེགས་དང་ཀླ་ཀློ་སོགས་མེད་ཅིང་། སྔོན་གྱི་ས་དཀར་གཉིས་ཀྱང་མེད་ལ། སོག་བཙུན་དབུས་སུ་སློབ་གཉེར་བྱས་པ་དང་། དབུས་གཙང་གི་མཁས་གྲུབ་མང་པོ་ཕེབས་གནས་དགེ་འདུན་གྱི་སྡེ་དང་། བཤད་གྲྭས་གང་ཞིང་ཞྭ་སེར་ཅན་གྱི་རིང་ལུགས་ཀྱིས་ཁྱབ་པར་གྱུར་ཏོ། །ཞེས་གྲགས། རིགས་ལྡན་དྲག་པོ་པཎ་ཆེན། དམག་དཔོན་ཧ་ནུ་མནྠ་སྐལ་བཟང་རྒྱ་མཚོ། དམག་དཔོན་དྲག་པོ་ཡེ་ཤེས་བསྟན་སྒྲོན་སོགས་ཡིན་ཚུལ་ཡོད། རབ་བྱུང་བཅུ་གསུམ་པའི་ལྕགས་སྤྲེལ་ལོར་རིགས་ལྡན་བཅུ་དགུ་པ་རྣམ་གནོན་ཁྲིར་ཕེབས་ནས་ལོ་པ་༢༥ཡིན་པར་བཤད་པས། དེང་སང་སྟོབས་པོ་ཆེ་ཡིན་པར་གསལ་ལོ། ༈ །རྒྱལ་དབང་ལྔ་པ་ལ། ནུབ་ཕྱོགས་མཆོག་ཏུ་དགེ་བའི་ཞིང་གི་རྒྱལ་དབང་ས་སྟེང་གི་རྒྱལ་བསྟན་ཡོངས་ཀྱི་བདག་པོ་ཐམས་ཅད་མཁྱེན་པ་ཏ་ལའི་བླ་མ་བཛྲ་དྷ་ར། ཞེས་པའི་འཇའ་ས་དང་ཤེལ་ཐམ་ཕུལ། གོང་མ་གཡུང་ཊིང་གིས་ཕོ་བྲང་དུ་དགའ་ལྡན་སྲིད་ཆགས་གླིང་ཞེས་པའི་ཆོས་སྡེ་གསར་དུ་བཙུགས། མདོ་སྔགས་རིག་གནས་ཀྱི་གྲ་ཚང་ཁག་རྣམས་
ཡོད། ཞེའུ་ཧོའུ་ཞེས་པའི་ས་ཆར་ཡང་གཙུག་ལག་ཁང་དང་གྲྭ་ཚང་ཁག་མང་པོ་བཙུགས།། ༈ །།པཎ་ཆེན་བློ་བཟང་ཆོས་རྒྱན་གྱི་ཕྱག་ཆེན་གྱི་འགྲེལ་པར། ལྷན་ཅིག་དྭགས་པོ། སྐྱེས་སྦྱོར་ནི། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །རྣམ་རྟོག་ལྷན་ཅིག་སྐྱེས་པ་ཆོས་སྐུའི་རླབས། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །སྣང་སེམས་དབྱེར་མེད་ལྷན་ཅིག་སྐྱེས་པའོ། །ཞེས་པའི་དོན། མོས་གུས་དང་། ཞེན་ལོག་གཙོ་བོར་བྱས་པའི་ངོས་ནས་སྔོན་འགྲོ་སྦྱོར་བ་བཞི་ལྡན། དངོས་གཞི་ངོ་སྤྲོད་རྣམ་གཉིས། ཞི་ལྷག །རྗེས་ཉམས་མྱོང་སྣང་ཐོག་ཏུ་སྐྱོང་བ་གསུམ་གྱིས་འཆད། གའུ་མ་ནི་ཁྱུང་པོའི་བཀའ་སྲོལ་ཏེ། སྔོན་འགྲོ་རང་བབས་རྣམ་གསུམ། དངོས་གཞི་སྐྱོན་བཞི་རང་གྲོལ། འབྲས་བུ་སྐུ་གསུམ་རང་ཤར་གྱི་སྒོ་ན དངོས་གཞི་ལ་རྐུན་པོའི་ངོ་སྤྲོད་ཅེས་གསུངས་སོ། །ནི་གུ་ཆོས་དྲུག་ནི། གཏུམ་མོ་ལམ་གྱི་རྨང་རྡོ། སྒྱུ་ལུས་ཆགས་སྡང་རང་གྲོལ། རྨི་ལམ་ཉིང་འཁྲུལ་རང་སངས། འོད་གསལ་མ་རིག་མུན་སེལ། འཕོ་བ་མ་བསྒོམ་སངས་རྒྱས། བར་དོ་རྒྱལ་བ་ལོངས་སྐུ་ཞེས་པ་སྟེ། གྲྭ་འུ་མའི་གཙོ་བོ་ཡང་ཆོས་དྲུག་གི་འོད་གསལ་བསྒོམ་ཚུལ་ལོ། །ཆོས་རྗེ་རྒྱ་རས་པ་ནས་བརྒྱུད་པ་རྣམས་ཁྲིད་ཆེན། རོ་སྙོམས་སྐོར༦། རི་ཆོས་ཐུགས་ཉམས་སུ་ལེན་
ཅིང་། དེ་ཡང་བླ་མ་སྐུ་གསུམ་གྱི། བྱམས་སྙིང་རྗེའི། རྒྱུ་འབྲས་རྟེན་འབྲེལ་གྱི། ལྔ་ལྡན་བདུད་རྩི་ཐིགས་པའི། ལྷན་ཅིག་སྐྱེས་སྦྱོར་གྱི། ནཱ་རོ་ཆོས་དྲུག་གི། ཆོས་བརྒྱད་མགོ་སྙོམས་། གསང་སྤྱོད་བཟློག་བསྒོམ་གྱི་ཁྲིད་རྣམས་སོ། །རྣམ་རྟོག །ཉོན་མོངས། ན་ཚ། ལྷ་འདྲེ། སྡུག་བསྔལ། འཆི་བ་ལམ་ཁྱེར། རི་ཆོས་ལ་ཟབ་ཆོས་རྒྱན་བཞི་ཞེས། རི་ཆོས་ཡོན་ཏན་ཀུན་འབྱུང་། གསང་བ་དབང་གི་གྲུ་བོ་ཆེ། རྡོ་རྗེ་ལས་ཀྱི་སྦས་བཤད། བར་དོའི་ཁྲིད་དང་བཞི། སྐོར་གསུམ་ཞལ་གདམས་གྱི་རྒྱན་ཅེས། དམར་ཁྲིད་གེགས་སེལ་གྱི་རྒྱན། མགུར་འབུམ་དཀར་ཆག་གི་རྒྱན། སིལ་བུའི་སྡེ་ཚན་ཕྲན་ཚེགས་ཀྱི་རྒྱན་རྣམས་སོ། །ཡི་གེ་བཞི་པ་ནི། ཨ་མ་ན་སེའི་སྒྲ་ལས། དང་པོ་སེམས་ཀྱི་གཞི་རྩ་བཅད། །གཉིས་པ་སེམས་ཀྱི་བཞག་ཐབས་བསྟན། །གསུམ་པ་སེམས་ཀྱི་གོལ་ས་བཅད། །བཞི་པ་སེམས་ཀྱི་ལམ་ཁྱེར་བསྟན་པའོ། །རྫོགས་ཆེན་མན་ངག་ལྟ་བའི་ཕྲེང་བ་སོགས་སློབ་དཔོན་པདྨའི་ཐུགས་ཀྱི་བཅུད་ཕྱུང་བ་རྣམས་དང་ཞེས་སོགས་གསུངས། ༈ ། ཞང་རིན་པོ་ཆེས། ཀུན་གྱི་ས་བོན་རང་སེམས་གནས་ལུགས་ནི། །རྒྱལ་བ་སྲས་བཅས་ཀུན་གྱི་ཐུགས་དང་ནི། །ཡེ་ནས་ཁྱད་མེད་ཡེ་ཤེས་ཆོས་སྐུར་སྣང་། །བེམ་པོར་མ་ཡིན་རང་བཞིན་ངང་གིས་
གསལ། །དངོས་པོ་མ་གྲུབ་ཁ་དོག་ཚད་ཀྱིས་སྟོང་། །ཞེས་སོ། །གླིང་གིས། མ་བཅོས་སོ་མར་བཞག་ན་རྟོགས་པ་འཆར། །ཆུ་བོའི་རྒྱུན་བཞིན་བསྐྱངས་ན་ཡོངས་ཀྱང་འཆར། །དམིགས་གཏད་མཚན་མ་ཐམས་ཅད་ཡོངས་སྤངས་ལ། །རྟག་ཏུ་མཉམ་པར་ཞོག་ཅིག་རྣལ་འབྱོར་པ། །ཞེས་སོ། །ཞང་གིས། དེ་ལྟར་བཞག་པའི་ངང་ཉིད་ལས། །རྣམ་རྟོག་ཐོལ་གྱིས་བྱུང་གྱུར་ན། །དེ་ཉིད་འོད་གསལ་ཆོས་སྐུ་ལས། །གཞན་ཞིག་སྙམ་དུ་མ་སེམས་ཤིག །དེ་ཕྱིར་རྣམ་རྟོག་འཕྲོ་བ་དེ། །སྟོང་ཉིད་ལས་ནི་སྟོང་ཉིད་འཕྲོ། །ཆོས་སྐུ་ལས་ནི་ཆོས་སྐུ་འཕྲོ། །ཟུང་འཇུག་ལས་ནི་ཟུང་འཇུག་འཕྲོ། །ཞེས་གསུངས་སོ། ༈ །འཕགས་པ་ཡབ་སྲས་ཀྱི་བཞེད་པའི་ལྟ་བ་ཕྱག་རྒྱ་ཆེན་པོའི་གོ་དོན་མཐར་ཐུག་པ་ནི་བཏགས་ཡོད་མིང་རྐྱང་ཞེས་པ་འདི་ཡིན་ནོ། ༈ །འཕགས་པ་ཀླུ་སྒྲུབ་ཀྱིས་དངོས་བསྟན་སྟོང་ཉིད་ཀྱི་རིམ་པ་གཏན་ལ་འབེབས་པ། མདོ་ཀུན་བཏུས་དང་། རིགས་ཚོགས་དྲུག་མཛད། དེ་ལ་འགྲེལ་པ། ཇི་སྐད་དུ། རྒྱན་སྣང་ལས། འཕགས་པ་གསལ་བའི་བློ་མངའ་དེས་ནི་རྒྱལ་ལ་མངོན་སུམ་ཉིད་ཞུས་ནས། ཞེས་པའི་དོན་འཕགས་པ་གྲོལ་སྡེ་དེ་ཤེར་ཕྱིན་གྱི་མདོའི་དོན་ཐེ་ཚོམ་དང་སོམ་ཉི་སྤངས་པའི་ཐེག་ཆེན་འཕགས་པ་གྲོལ་སྡེ། གཉིས་པ་སློབ་དཔོན་སེང་བཟང་དེ་རྩོམ་པའི་
རྒྱུ་གསུམ་ཕུན་སུམ་ཚོགས་པ་སྟེ། མན་ངག་རྒྱུན་མ་ཆད་པ་དང་། བསྟན་བཅོས་ཀྱི་དོན་ལ་མཁས་པ་དང་། ཡི་དམ་གྱི་ལྷ་ལ་མངོན་སུམ་དུ་གནང་བ་ཐོབ་པ་སྟེ། དེ་ཡང་མཁན་པོ་རྣམ་སྣང་མཛད་ལ་རྗེ་བཙུན་གྱི་སྒྲུབ་ཐབས་ཞུས་ནས་བསྒྲུབས་པས། ཤར་ཕྱོགས་ཁ་སརླ་ཎིར་སྤྲིན་གསེབས་ནས་རྗེ་བཙུན་གྱིས་ཞལ་གཟིགས་པར་ཁྱེད་ཀྱི་བསྟན་བཅོས་དེ་ལ་འགྲེལ་པ་དུ་མ་ཞིག་སྣང་བས་གང་གི་རྗེས་སུ་འབྲང་ཞུས་པས། ཐམས་ཅད་ལེགས་པར་རྟོགས་ལ་དོན་འདྲིལ་བའི་འགྲེལ་པ་རྩོམས་ཤིག །ཅེས་གསུང་གི་གནང་བ་ཐོབ་པའི་ཕྱིར། བཤད་བྱ་རྩ་བའི་མདོ་རྒྱས་འབྲིང་བསྡུས་གསུམ་མདོ་སྡུད་པ་དང་བཞི། འཆད་བྱེད་མངོན་པར་རྟོགས་པ་རྒྱན་ནོ། །ཞེས་སོ། །དེ་ཡི་ཉན་ཐོས་ཞི་བ་སོགས་ཀྱི་དོན། གཞི་ཤེས་ཀྱི་ཡོན་ཏན་བརྗོད་པས། ཉེར་ཞིར་འཁྲིད་ཚུལ་འཆད་པ་ལ་རྐང་པ་དང་པོ་གསུངས། ལམ་ཤེས་ཀྱི་དོན་འཆད་ཚུལ་བརྗོད་པས་རིགས་ཅན་གསུམ་གྱི་དོན་བསྒྲུབ་ཚུལ་འཆད་པ་ལ་རྐང་པ་གཉིས་པ་གསུངས། རྣམ་མཁྱེན་གྱི་ཡོན་ཏན་བརྗོད་དེ་ཆོས་འཁོར་བསྐོར་ཚུལ་འཆད་པ་ལ་རྐང་པ་གསུམ་པ་གསུངས། འཕགས་བཞིའི་ཡུམ་བྱེད་ཚུལ་འཆད་པ་ལ་བཞི་པ་གསུངས་སོ། །དོན་ནི། རྗེ་བཙུན་གྱིས་རྩོམ་པའི་ཐོག་མར་མཁྱེན་གསུམ་ལ་བསྟོད་ཕྱག་མཛད་དེ། རྟེན་གྱི་གང་
ཟག་ཉན་ཐོས་དང་། རང་སངས་རྒྱས་སྡུག་ཀུན་ཉེ་བར་ཞི་བ་འཚོལ་བ་རྣམས་ཕུང་ཁམས་སྐྱེ་མཆེད་ཀུན་གང་ཟག་གི་བདག་མེད་པར་ཤེས་པ་ཉིད་ཀྱིས་འབྲས་བུ་ལྷག་མ་ཡོད་མེད་ཉེར་ཞིར་འཁྲིད་མཛད་གང་ཡིན་པ་དེ་ལ་འདུད་པའི་ཕྱིར་དང་། རྟེན་གྱི་གང་ཟག་འགྲོ་ལ་ཕན་པར་བྱེད་པའི་བྱང་སེམས་ལམ་ཤེས་ཉིད་ཀྱི་འབྲས་བུ་འཇིག་རྟེན་གསུམ་གྱི་དོན་སྒྲུབ་པར་མཛད་པ་གང་ཡིན་པ་དང་། ཐུབ་པ་ཡིན། སངས་རྒྱས་བཅོམ་ལྡན་འདས་རྣམས་ཐབས་གང་དང་ཡང་དག་པར་ལྡན་པས། བརྗོད་བྱ་རྣམ་པ་ཀུན་དང་ལྡན་པའི་རྗོད་བྱེད་སྡེ་སྣོད་སྣ་ཚོགས་པ་འདི་དག་གསུངས་བའི་བདག་རྐྱེན་རྣམ་མཁྱེན་ལ་འདུད་པའི་ཕྱིར། བཤད་བྱ་འཆད་བྱེད་མདོར་བསྟན་པ། འཆད་བྱེད་ཀྱི་རྐང་གྲངས་བཤད་པ་གཉིས། དང་པོ་ནི། ཤེས་རབ་ཕ་རོལ་ཕྱིན་པ་ནི། །ཞེས་པ་གཉིས་ལ་བསྟན་བཅོས་འདི་ཆོས་ཅན། ཁྱོད་ཀྱི་གཞུང་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱས་འབྲིང་བསྡུས་གསུམ་ནི་ཡང་དག་པ་སྟེ། ཕྱིན་ཅི་མ་ལོག་པར་བཤད་དེ་རྗོད་བྱེད་ལ་སྐབས་བརྒྱད་དང་། བརྗོད་བྱའི་དངོས་པོ་ལ་ཡང་བརྒྱད་དུ་ཕྱེ་བ་ཉིད་ཀྱིས་བཤད་པའི་ཕྱིར། འཆད་བྱེད་གཞུང་ཤེར་ཕྱིན་ལ་སྐབས་བརྒྱད་ཡོད་དེ། རབ་འབྱོར་གྱི་ལེའུས་རྣམ་མཁྱེན། མཐའ་གཉིས་རྣམ་དག་གི་ལེའུས་ལམ་ཤེས། སྤྱོད་པ་ཁྱད་པར་ཅན་གྱི་ལེའུས་
གཞི་ཤེས། དེ་བཞིན་ཉིད་ཀྱི་ལེའུས་རྣམ་རྫོགས་སྦྱོར་བ། བསླབ་པ་ཡོངས་སུ་དག་པའི་ལེའུས་རྩེ་སྦྱོར། བསླབ་པ་ལ་རིམ་གྱིས་འཇུག་པའི་ལེའུས་མཐར་གྱིས་སྦྱོར་བ། བསླབ་པ་ཡོངས་སུ་རྫོགས་པའི་ལེའུས་སྐད་ཅིག་སྦྱོར་བ། བསླབ་པའི་འབྲས་བུའི་ལེའུས་ཆོས་སྐུ་འཆད་པའི་ཕྱིར། གཉིས་པ་ལ་མཁྱེན་གསུམ། སྦྱོར་བཞི། ཆོས་སྐུ་གསུམ་ལས། དང་པོ་ནི། རྣམ་ཀུན་མཁྱེན་ཉིད་ལམ་ཤེས་ཉིད། །ཅེས་སོགས་གཉིས་ལ། མཁྱེན་གསུམ་སོ་སོའི་ངོ་བོ་ཡོད་དེ། སེམས་བསྐྱེད་སོགས་ཆོས་བཅུ་དང་། གཞི་གཉེན་རྣམ་པ་ཀུན་མཁྱེན་པའི་མཐར་ཕྱིན་པའི་ཡེ་ཤེས་ཉིད་རྣམ་མཁྱེན་གྱི་ངོ་བོ། ཐབས་ཤེས་ཁྱད་པར་ཅན་གྱིས་ཟིན་པའི་ཐེག་ཆེན་འཕགས་པའི་མངོན་རྟོགས་ལམ་ཤེས་ཀྱི་ངོ་བོ་དང་། ཐེག་དམན་གྱི་མཁྱེན་པའམ། ཐེག་དམན་གྱི་རྟོགས་རིགས་སུ་གནས་པས་རབ་ཏུ་ཕྱེ་བའི་འཕགས་རྒྱུད་ཀྱི་མཁྱེན་པ་དེ་ནས་ཐམས་ཅད་ཤེས་པ་ཉིད་ཀྱི་ངོ་བོར་འཇོག་པའི་ཕྱིར། རྣམ་མཁྱེན་གྱི་མཚན་ཉིད་དེ་ལྟར་འཇོག་པ་ནི། ཐོབ་བྱ་རྣམ་མཁྱེན་དེ་བསྟན་པ་ཉིད་ཀྱིས་ལམ་སྤྱིའི་གོ་ཡུལ་བློ་ལ་འཆར་བའི་ཆེད་དུ་ཡིན་ནོ། །རྣམ་མཁྱེན་ལ་དབྱེ་ན། ཇི་ལྟ་ཇི་སྙེད་དང་། ཤེས་བྱའི་རྣམ་པ་མ་ལུས་པ་མཁྱེན་པའི་རྣམ་མཁྱེན་དང་། རྒྱུ་འབྲས་གཙོ་བོའི་དོན་བཅུ་མངོན་སུམ་དུ་རྟོགས་པའི་རྣམ་
མཁྱེན་གཉིས། ས་མཚམས་སངས་རྒྱས་ཀྱི་ས་ཁོ་ནའོ། །ལམ་ཤེས་ཀྱི་དབྱེ་བ་ལ་རྟོགས་རིགས་ཀྱི་སྒོ་ནས་གསུམ་དང་། རྒྱུ་ལམ་ཤེས། འབྲས་བུ་ལམ་ཤེས། དམན་ལམ་སྔོན་དུ་སོང་མ་སོང་གི་དབྱེ་བ་དུ་མ་ཡོད། ས་མཚམས་ཐེག་ཆེན་འཕགས་པ་མཐའ་དག་ལའོ། །གཞི་ཤེས་ལ་འཕགས་པ་གསུམ་གྱི་དབྱེ་བས་གསུམ། མི་མཐུན་ཕྱོགས་དང་མཐུན་ཕྱོགས་ཀྱི་དབྱེ་བ་སོགས་ཡོད། ས་མཚམས་འཕགས་པ་ཐམས་ཅད་ལའོ། །གཉིས་པ་སྦྱོར་བཞི་འཆད་པ་ལ། རྣམ་ཀུན་སོགས་གསུངས། སོ་སོའི་ངོ་བོ་ཡོད་དེ། མཁྱེན་གསུམ་གྱི་རྣམ་པ་བསྡུས་ནས་སྒོམ་པར་བྱེད་པའི་ཤེས་རབ་ཀྱིས་ཟིན་པ་སེམས་པའི་མངོན་རྟོགས། རྣམ་ཀུན་མངོན་རྫོགས་རྟོགས་པའི་སྦྱོར་བའི་ངོ་བོ་དང་། སྟོང་ཉིད་དམིགས་པའི་སྒོམ་བྱུང་གི་ཤེས་རབ་ཀྱིས་ཟིན་པའི་སྒོ་ནས་མཁྱེན་གསུམ་བསྡུས་ཏེ་བསྒོམ་པ། ཐེག་ཆེན་ཚོགས་ལམ་ལས་རབ་ཏུ་གྱུར་པའི་རྣལ་འབྱོར་རྩེ་སྦྱོར་གྱི་ངོ་བོ་དང་། མཁྱེན་གསུམ་གྱི་རྣམ་པ་ལ་བརྟེན་པ་ཐོབ་ཕྱིར་དུ་མཁྱེན་གསུམ་གྱི་རྣམ་པ་རིམ་ཅན་དུ་བསྒོམས་པའི་ཤེས་རབ་ཀྱིས་ཟིན་པའི་སེམས་པའི་རྣལ་འབྱོར་མཐར་གྱིས་པའི་སྦྱོར་བའི་ངོ་བོ་དང་། རང་གི་ཉེར་ལེན་དུ་གྱུར་པའི་མཐར་གྱིས་སྦྱོར་བའི་སྟོབས་ལས་བྱུང་བའི་སེམས་པའི་རྣལ་འབྱོར་མཐར་ཐུག་སྐད་ཅིག་མ་གཅིག་གིས་
མངོན་པར་རྫོགས་པར་བྱང་ཆུབ་ཀྱི་སྦྱོར་བའི་ངོ་བོ་ཡིན་པའི་ཕྱིར། དབྱེ་ན་རྣམ་པ་བརྒྱ་བདུན་ཅུ་རྩ་གསུམ་བསྒོམས་པའི་སེམས་པའི་རྣལ་འབྱོར་བརྒྱ་དོན་གསུམ་ཡོད། གཉིས་པའི་ས་མཚམས། ཐེག་ཆེན་གྱི་སྦྱོར་ལམ་དྲོད་ནས་རྒྱུན་མཐའི་བར་དང་། རྒྱས་པར་དབྱེ་ན་བརྒྱ་དོན་གསུམ། བསྡུ་ན་བཞི་ཡོད། གསུམ་པའི་ས་མཚམས། ཐེག་ཆེན་ཚོགས་ལམ་ནས་རྒྱུན་མཐའི་སྔ་ལོགས་ན་དང་། དབྱེ་ན་བཅུ་གསུམ། བཞི་པའི་ས་མཚམས་རྒྱུན་མཐའ་ཁོ་ན་དང་། དབྱེ་ན་བཞི་ཡོད་དོ། །གསུམ་པ་ཆོས་སྐུ་འཆད་པ་ལ། ཆོས་སྐུ་དང་། ཞེས་པས། འབྲས་བུ་ཆོས་སྐུའི་ངོ་བོ་ཡོད་དེ། རང་ཐོབ་བྱེད་ཀྱི་ཐབས་སུ་གྱུར་པའི་མཁྱེན་གསུམ་གྱི་རྣམ་པ་བསྒོམ་སྟོབས་ཀྱིས་ཐོབ་པའི་ཡོན་ཏན་མཐར་ཐུག་པ་དེ་ཡིན་པའི་ཕྱིར། དབྱེ་ན་བཞི། ས་མཚམས་སངས་རྒྱས་ཀྱི་སའོ། །དེ་རྣམས་ཀྱི་གྲངས་བསྡུ་བ་ལ། དེ་རྣམ་བརྒྱད། ཅེས་གསུངས་སོ། ༈ །རྡོ་རྗེ་འཛིན་པ་གྲགས་རྒྱལ་གྱིས། ཚེ་འདི་ལ་སོགས་ཀྱིས། རྣམ་བཅད་ལ་བཟློག་ཕྱོགས་བཞི་དངོས་སུ་བསྟན་ནས། ཡོངས་གཅོད་ལ་བསྒྲུབ་ཕྱོགས་གཉེན་པོ་བཞི་ཤུགས་ཀྱིས་བསྟན་ཏོ། ༈ །འཕགས་པའི་སྐྱེ་བོ་རྣམས་ཀྱི་མཛད་པ་སོ་སོ་སྐྱེ་བོ་རྣམས་ཀྱི་ཡུལ་ལས་འདས་ཤིང་ཆོས་དང་། སྐྱེས་བུ་དམ་པ་ལ་བརྟེན་པའི་སྡིག་པ་
ཤིན་ཏུ་མི་བཟད་པས་ཕྱོགས་འཛིན་གྱི་སྡང་ཞུགས་དོར་ནས་དག་སྣང་ནོར་བུའི་འོད་ཀྱིས་ཁྱབ་པར་མཛད་དུ་གསོལ་ཞེས་ཆོས་ཀྱི་རྒྱལ་མཚན་གསོལ་བ་འདེབས་སོ། །ཞེས་སྣང་། ༈ །སྒྱུ་ལུས་འོད་གསལ་གཉིས་འདུས་པ། འཕོ་བ་གྲོང་འཇུག་གཉིས་གདན་བཞི་དང་ཁ་སྦྱོར། གཏུམ་མོ་དགྱེས་རྡོར་ལ་བརྟེན་ནོ། ༈ །གྲུབ་ཐོབ་མི་ཏྲ་ཛོ་ཀིའི་གདམས་པ་སྙིང་པོ་དོན་གསུམ་ལ། ཚེ་འདིའི་ཉམས་ལེན་བསྐྱེད་རྫོགས། འཆི་བའི་ཉམས་ལེན་འཕོ་བ། བར་དོའི་ཉམས་ལེན་ཏེ་གསུམ་དུ་བསྡུས་སོ། །ནམ་མཁའ་སྒོ་འབྱེད་ཀྱི་དབང་ལ། དབུས་སུ་མ་དཀར་པོ། གཅིག སངས་རྒྱས་རིགས། ཕྱོགས་བཞིར་རིགས་བཞི། མདུན་ནས་གཡས་སྐོར། ལུས་ལ་རུས་རྒྱན། ངག་ལ་ཌཱ་མ་རུ། ཡིད་གཏད་མེད་རྐང་གླིང་། ངག་ལ་གསུང་སྐད་ཕཊ་ཀྱིས་དབང་བསྐུར། བཟླས་ལུང་བྱ། ནམ་མཁའ་རྣམ་པར་ལྟ་བའི་ཏིང་འཛིན་སེམས་ལ་ཆོས་ཉིད་དོན་གྱི་དབང་བསྐུར་བ་ནི། སློབ་མའི་རྩ་གསུམ་འཁོར་ལོ་བཞི་གསལ་གདབ། རྐང་འོག་གི་རྣམ་ཤེས་ཐིག་ལེ་དཀར་པོ། སྤྱི་བོའི་སྟེང་མཁར་ཡུམ་ཆེན་མོ་དམིགས། རིགས་ཀྱི་བུ་ཡར་ཤོག་ཅེས་གསུངས་པས། ཌ་མ་རུ་དཀྲོལ། དཔོན་སློབ་གཉིས་ཀས་ཕཊ་ཅེས་བརྗོད་ལ་འཁོར་ལོ་བཞི་རིམ་པར་སྤར། མཐར་ནམ་མཁའ་དང་འདྲེས་ཏེ་རང་སེམས་
བདེན་སྟོང་ནམ་མཁའ་དང་རོ་གཅིག་པར་བསམས་ལ་མཉམ་པར་བཞག །དེ་ལས་ལངས་པའི་ཚེ་གཏོར་མ་མགོར་བཞག་ལ་བཀའ་བསྒོ་བྱའོ། ༈ །སྟག་ལོའི་རྩོད་པར། གང་དག་དཔལ་ལྡན་ཟླ་བའི་རྗེས་འབྲངས་ནས། །མ་དག་འཁྲུལ་པའི་སྣང་བ་ཚད་གྲུབ་ཏུ། །རིགས་པ་དུ་མས་དཔྱད་ནས་ཁས་ལེན་པ། །འདི་ལ་འགལ་བའི་ཁུར་ཆེན་འདི་ལྟར་ཡོད། ༡ །འཕགས་མཆོག་ཀླུ་སྒྲུབ་ཟླ་བའི་རྗེས་འབྲངས་ནས། །གཞི་ཡི་བདེན་གཉིས་ལམ་མཆོག་ཐབས་ཤེས་ཟུང་། །འབྲས་བུ་སྐུ་གཉིས་མེད་ཅེས་ཁས་ལེན་པ། །འདི་ལ་འགལ་པའི་ཁུར་ཆེན་བརྒྱ་ཕྲག་འབབས། ༈ །ཡུལ་ཀུན་བརྫུན་དང་ཡུལ་ཅན་བསླུ་མེད་འགལ། ༡ །རྗེ་བཙུན་བླ་མ་བཞེད་པ་མ་ཡིན་པའི། །ཡུལ་ཅན་བསླུ་མེད་འདོད་ཅེས་སྨྲ་བ་ཡང་། །ལོག་རྟོག་སེར་བུས་བརྫུན་པའི་སྐྲུན་འཕྱར་ཏེ། །འབྲས་མེད་རང་གི་དེ་ཉིད་སྟོན་པར་ཟད། ༈ །ཡུལ་དེར་འཁྲུལ་དང་དེ་ལ་ཚད་མ་འགལ། ༢ །སོ་སྐྱེའི་དབང་ཤེས་འཁྲུལ་དང་གཡོ་མེད་ཀྱིས། །དབང་ཤེས་གཟུགས་སོགས་རྣམ་པར་འཇོག་པ་ཡིས། །ཚད་མར་གསུངས་ལ་འགལ་ཁུར་ཡོད་ཅེས་པ། །འཇུག་པར་གནོད་པ་མེད་པའི་དབང་པོ་ཡིས། །གཟུང་འཛིན་འཇིག་རྟེན་གྱིས་རྟོགས་གསུངས་པ་དང་། །ཚིག་དོན་གསལ་བར་ཚད་མ་གཞལ་བྱ་གཉིས། །སྤྱི་
ཕན་ཚུན་བལྟོས་ནས་འཇོག་པར་གསུངས་བའི་ཕྱིར། །འཇིགས་བྲལ་ཟླ་བའི་ཞབས་ལའང་ཁུར་བོར་ཅིག ༈ །རྗེས་དཔག་ཡོད་དང་སྒྲུབ་ངག་མེད་པ་འགལ། ༣ །ཐལ་འགྱུར་ལུགས་ལ་རྗེས་དཔག་སྒྲུབ་ངག་དག །ཡོད་མེད་འགལ་བར་སྨྲ་ན་རང་ཉིད་ཀྱིས། །མ་ངེས་སྐྱོན་ཡིན་ཟླ་བས་ཚིག་གསལ་དུ། །སྒྲུབ་ངག་ཡན་ལག་ལྔ་ལྡན་གསུངས་ཕྱིར་རོ། ༈ །མཐུན་སྣང་མེད་དང་ཆོས་ཅན་ཚད་གྲུབ་འགལ། ༤ །མཐུན་སྣང་མེད་དང་ཆོས་ཅན་ཚད་གྲུབ་གཉིས། །མི་ཤེས་འགལ་སེམས་མཁས་ལ་འགལ་མིན་ཏེ། །གཟུགས་སོགས་རང་བཞིན་ཡོད་མེད་རྩོད་པའི་ཚེ། །ཆོས་ཅན་མཐུན་སྣང་མེད་ཅེས་ཟླ་བས་གསུངས། །རྟེན་འབྲེལ་རྟགས་ཀྱིས་མྱུ་གུ་བདེན་མེད་དུ། །བསྒྲུབས་པའི་ཚུལ་གསུངས་ཚད་མས་གྲུབ་པ་ནི། །ཀླུ་སྒྲུབ་ཟླ་བའི་ཞབས་ཀྱི་རྗེས་འབྲངས་པའི། །ལུང་རིགས་སྨྲ་བའི་མཁས་རྣམས་བཞེད་པ་ཡིན། །ཅེས་སོ། ༈ །ཕྱི་དོན་ཚད་གྲུབ་རྡུལ་ཕྲན་ཆ་བཅས་འགལ། ༡ །ཕྱི་དོན་རྡུལ་ཕྲན་ཆ་བཅས་འགལ་ཅེས་པ། །མྱོས་ཆུས་རང་དབང་འཕྲོགས་འདྲའི་གཏམ་ཡིན་ཏེ། །དབུ་མ་འཇུག་པར་སེམས་ཙམ་འགོག་པའི་སྐབས། །ཕྱི་དོན་ལན་གཅིག་མིན་པར་གསུངས་ཕྱིར་དང་། ཆོས་རྣམས་ཆ་དང་བཅས་པས་ཁྱབ་པའི་ཕྱིར། །བྱེ་མདོ་བཞིན་དུ་ཕྱི་དོན་འདོད་མཚུངས་
པས། །དེ་ཉིད་རྩོམ་རྒྱུ་རྡུལ་ཕྲན་ཆ་མེད་ཀྱང་། །དེ་དག་བཞིན་དུ་ངེས་པར་འདོད་དགོས་ན། །བདེན་པ་གཉིས་ཀྱང་འདོད་པར་མཚུངས་པའི་ཕྱིར། །བདེན་པ་གཉིས་ཀྱང་དེ་ལྟར་འདོད་པར་གྱིས། །ཞེས་སོ། ༈ །རིགས་དྲུག་ཚད་མ་གདོས་བཅས་ཚད་གྲུབ་འགལ། །རིགས་དྲུག་བཅུད་དང་རི་གླིང་གདོས་བཅས་སྣོད། །ཚད་མ་ཚད་གྲུབ་བཞེད་མོད་ཡང་དང་ཡང་། །འགལ་ཅེས་གཞན་ངོར་གྲངས་ཙམ་འདྲེན་པ་ཡིས། །རྨོངས་པ་མགུ་བྱེད་མཁས་པའི་བཞད་གད་གནས། །རྣམ་པ་སྣ་ཚོགས་ལས་ཀྱིས་བསྐྱེད་པ་ཡི། །འགྲོ་རྣམས་སོ་སོའི་རྒྱུད་ཀྱི་ཚད་མ་དང་། །དེ་དག་ཡུལ་ཀུན་ཐམས་ཅད་མཁྱེན་པ་ཡིས། །ཇི་བཞིན་གཟིགས་ཕྱིར་བསམ་མི་ཁྱབ་ཅེས་གསུངས། ༈ །སྐྲ་ཤད་མེད་དང་ཀླུང་རྣག་ཡོད་པ་འགལ། - ༈ །རྫས་གྲུབ་མེད་དང་དངོས་པོ་ཡོད་པ་འགལ། །གཞན་སྐྱེ་མེད་དང་ས་སྨྱུག་རྫས་གཞན་འགལ། ༈ །བདེན་རྫུན་མེད་དང་ཡང་ལོག་ཡོད་པ་འགལ། ༈ །ཡན་ལག་ལ་དཔྱད་བུམ་པ་མི་རྙེད་དང་། །སྐད་ཅིག་ལ་དཔྱད་ཞིག་པ་རྙེད་པ་འགལ། ༈ །རང་རྒྱུད་སྨྲ་བས་རང་བཞིན་སྨྲས་པ་དང་། །རང་བཞིན་མེད་བློ་དེ་ངོར་གྲུབ་པ་འགལ། ༈ །ཉོན་མོངས་ཅན་མིན་མ་རིག་ཡོད་པ་དང་། །ཤེས་པར་གྱུར་པའི་ཤེས་སྒྲིབ་མེད་པ་འགལ། ༈ །གཞུང་
གཞན་ནས་ཀྱང་ཀུན་གཞི་རང་རིག་སོགས། །འགོག་ན་དེ་དག་རང་ལུགས་མི་འདོད་དང་། །སྡེ་བདུན་ནས་གསུངས་ཚད་མ་མི་འདོད་ཀྱང་། །རང་ལུགས་ཚད་མའི་རྣམ་གཞག་ཤེས་པ་འགལ། ༈ །མི་རྟག་སོགས་རྟོགས་རྣལ་འབྱོར་མངོན་སུམ་དང་། །དེ་ཡིས་སྦྱོར་ལམ་རྟོགས་པར་མི་སློབ་འགལ། ༈ །གཞན་སེམས་ཤེས་པ་ཡིད་མངོན་ཤེས་པ་དང་། །བདེན་བཞི་ཤེས་པ་རྣལ་འབྱོར་མངོན་སུམ་འགལ། ༈ །ཀུན་མཁྱེན་ཡེ་ཤེས་ཆོས་ཀུན་འཇལ་བ་དང་། །ཤེས་བྱ་ཕྱེད་ལ་ཚད་མ་མིན་པ་འགལ། ༈ །རྫས་ཡོད་བདག་སྨྲ་གནས་མ་བུར་ངེས་དང་། །རྣམ་ཤེས་བདག་སྨྲའི་དབུ་སེམས་ཡོད་པར་འགལ། །ཅེས་སོ། ༈ །རྗེ་བླ་མ་འཕགས་པ་ཡབ་སྲས་ཀྱི་དགོངས་པ་ལྟར། གཟུགས་ནས་རྣམ་མཁྱེན་བར་གྱི་ཆོས་ཐམས་ཅད། དོན་དམ་པར་རང་གི་ངོ་བོས་གྲུབ་པ་རྡུལ་ཙམ་ཡང་མེད་ཅིང་། ཀུན་རྫོབ་སྒྱུ་མ་རྨི་ལམ་ཆུ་ཟླ་ལྟ་བུར་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་གཟིགས་ཤིང་། གཟིགས་པ་ལྟར་ཡོད་པར་ཞལ་གྱིས་བཞེས་སོ། ༈ །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་རྗེ་བཙུན་འཇམ་དཔལ་དབྱངས་ཀྱི་བྱིན་རླབས་ཀྱི་ཆར་མྱུར་དུ་འབེབས་བྱེད་བསྟོད་སྤྲིན་གྱི་སྒྲ་དབྱངས། །མཐའ་བྲལ་ལྟ་བས་ཆོས་ཀུན་སྟོང་པར་གཟིགས། །ཡང་དག་རིག་
པས་རྒོལ་ངན་དྲེགས་པ་འཇོམས། །དམིགས་མེད་ཐུགས་རྗེས་འགྲོ་ལ་བུ་ལྟར་བརྩེ། །འཕགས་མཆོག་ཀླུ་སྒྲུབ་ཡབ་སྲས་ལ་ཕྱག་འཚལ། །རྣམ་བཀྲའི་གཟུགས་ལ་མིག་གིས་ལྟ་བ་བཞིན། །རྣམ་མང་རྒྱལ་པའི་གསུང་རབ་ཇི་སྙེད་ལ། །རྣམ་དག་མཁྱེན་པ་ཐོགས་པ་མེད་འཇུག་པ། །ཐོགས་མེད་སྐུ་མཆེད་ཞབས་ལ་ཕྱག་འཚལ་ལོ། །གནས་གསུམ་གཞལ་བྱའི་དེ་ཉིད་མ་ལུས་པ། །ཚད་མ་གསུམ་གྱིས་གཏན་ལ་ཕབ་པའི་དོན། །སྒྲུབ་དང་སུན་འབྱིན་ངག་གིས་འདོམས་མཛད་པ། །རིག་པའི་དབང་ཕྱུག་གཉིས་ལ་ཕྱག་འཚལ་ལོ། །ཚུལ་ཁྲིམས་རྒྱ་མཚོའི་དབུས་ན་གནས་བཅས་ཤིང་། །འབུམ་ཕྲག་འདུལ་བའི་གཞུང་གི་གདེངས་ཀས་བརྗིད། །རྣམ་གྲོལ་ཐར་པའི་ནོར་བུས་གཙུག་ན་མཛེས། །མཆོག་གཉིས་ཀླུ་ཡི་དབང་པོ་ལ་ཕྱག་འཚལ། །ཅེས་པ་འདི་ནི་རིགས་རུས་ཕུན་སུམ་མཚོགས་པའི་མངའ་བདག་གྲགས་པ་རྒྱལ་མཚན་པས་བསྐུལ་བའི་དོན་དུ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་སྦྱར་བའོ། །ས་སྟེང་འགྲན་ཟླ་བྲལ་བ་ཆོས་ཀྱི་རྗེ། །ཤེས་བྱ་ཀུན་ལ་ཐོགས་མེད་འཇམ་པའི་དབྱངས། །གནས་ལྔ་མངོན་དུ་གྱུར་པའི་པཎྜི་ཏ། །གངས་ཅན་འགྲོ་བའི་སྐྱབས་གཅིག་ས་སྐྱ་པ། །ཞེས་སོགས་དང་། །འཇམ་མགོན་བློ་བཟང་གྲགས་པའི་ཞལ་ནས། ཁྱད་པར་དུ་
རྒྱལ་བ་སྲས་དང་བཅས་པའི་དགོངས་པའི་གནད་འདྲིལ་པའི་མན་ངག་འཕགས་པ་ལག་ན་རྡོ་རྗེའི་གསང་ཚིག །ཞུས་ལན་སྨན་མཆོག་བདུད་རྩིའི་ཕྲེང་བ་གསང་བདག་གི་ཞལ་སྔ་ནས་ཇི་ལྟར་གནང་བ་བཞིན་ལྷག་ཆད་ནོར་གསུམ་དང་བྲལ་བ་ཡི་གེར་བཀོད་པ་གནང་བ་འཕྲོད་པ་ན། གསང་བདག་གསུང་གི་བདུད་རྩི་ཡིས། །ཡིད་ཀྱི་རེ་བ་རྫོགས་པར་བྱས། །ཉོན་མོངས་ནད་ལས་རྒྱལ་བར་འགྱུར། །ལྕང་ལོ་ཅན་དུ་ཕྱིན་པ་སྙམ། །ཞེས་སོགས་ཆེད་དུ་བརྗོད། ༈ །དལ་འབྱོར་རྙེད་དཀའ། རྙེད་ན་དོན་ཆེ་བ། དེའང་མྱུར་དུ་འཇིག་པའི་ཚུལ་ཆེས་ཆེར་བསམ་པ་ནི། །དང་པོ་སྒྲུབ་པའི་སྐུལ་མ། བར་དུ་སྒྲུབ་པ་མི་ཉམས་པའི་རྒྱུ། ཐ་མ་སྒྲུབ་པ་མཐར་ཕྱིན་པར་བྱེད་པ་ཡིན་པས་གནད་ཤིན་ཏུ་ཆེ་བ་ཡིན། ཅེས་སོ། ༈ །རྟེན་འབྱུང་རྒྱུ་འབྲས་མི་བསླུ་བའི་ངེས་པ་རྙེད་པས་ཆད་ལྟ་འགོག་ཅིང་། མཚན་མར་འཛིན་པའི་དམིགས་གཏད་རྡུལ་ཙམ་ཡང་མ་གྲུབ་པའི་རང་བཞིན་མེད་པའི་སྟོང་ཉིད་ལ་ངེས་པ་རྙེད་པས་རྟག་མཐའ་ལས་གྲོལ་བའི་ཕྱིར་རོ། །དེས་ན་ངོ་བོ་ཉིད་ཀྱིས་སྟོང་བཞིན་དུ་རྒྱུ་འབྲས་མི་བསླུ་བའི་ངེས་པ་རྙེད་པའི་ལྟ་བ་ནི་རྟག་ཆད་གཉིས་ཀའི་གོལ་ས་ཆོད་པ་ཡིན་པས་རྨད་དུ་བྱུང་བའི་གོ་བ་ཡིན་ནོ། །ཐོག་མར་ལྟ་བ་བཙལ་བའི་དགོས་པའང་ངེས་པའི་དོན་བསྒོམ་པའི་དོན་དུ་ཡིན་ལ།
དེ་ཡང་བདག་འཛིན་ལྡོག་པའི་ཆེད་ཡིན་པས་བསྒོམ་པའི་དུས་སུ་ཡང་བདག་ཏུ་འཛིན་པ་གཉིས་ཀྱི་ཡུལ་ལ་སོ་སོར་རྟོག་པའི་ཤེས་རབ་ཀྱིས་ལེགས་པར་དཔྱད་པས་བདག་གཉིས་ཀྱི་མཚན་མ་ཅིར་ཡང་མ་གྲུབ་པའི་ངེས་པ་རྙེད་པའི་ཚེ་ལྟ་ཐོག་དེར་བཞག་ནས་ངེས་པའི་རྒྱུན་སྐྱོང་དགོས་ཀྱི་ལྟ་བའི་ངེས་པ་དོར་བའི་ཞི་གནས་ཙམ་བསྐྱངས་ཀྱང་འཁོར་བའི་རྩ་བ་བདག་འཛིན་ལ་ཅི་ཡང་མི་གནོད་དོ། །དོན་གྱི་དབང་གིས་འདི་གཟིགས་ནས། རིག་པའི་དབང་ཕྱུག་གིས། འདི་ཡུལ་སུན་དབྱུང་མེད་པར་ནི། །དེ་སྤང་བར་ནི་ནུས་མ་ཡིན། །ཅེས་དང་། འཕགས་པ་ལྷས་ཀྱང་། ཡུལ་ལ་བདག་མེད་མཐོང་བ་ན། །སྲིད་པའི་ས་བོན་འགག་པར་འགྱུར། །ཞེས་གསུངས་ལ། ཏིང་ངེ་འཛིན་རྒྱལ་པོ་ལས་ཀྱང་། གལ་ཏེ་ཆོས་ལ་བདག་མེད་སོ་སོར་རྟོགས། །སོ་སོར་དེ་རྟོགས་གལ་ཏེ་བསྒོམས་པ་ནི། །འབྲས་བུ་མྱང་འདས་ཐོབ་པའི་རྒྱུ་དེ་ཡིན། རྒྱུ་གཞན་གང་ཡིན་དེར་ནི་ཞི་མི་འགྱུར། །ཞེས་རྗེས་སུ་འགྲོ་ལྡོག་གཉིས་ཀ་ངེས་པའི་སྒོ་ནས་བདག་མེད་པའི་དོན་ལ་སོ་སོར་རྟོག་པའི་ཤེས་རབ་ཐར་པའི་སྒོ་དམ་པར་གསུངས་སོ། །གནས་ལུགས་སྒྲ་དང་རྟོགས་པའི་ཡུལ་མིན་པར་གསུངས་པ། དཔེར་ན་བུ་རམ་གྱི་རོ་འདི་འདྲ་ཞིག་ཡོད་ཅེས་བཤད་ཀྱང་ལྕེས་མྱོང་བ་ཇི་བཞིན་པར་ཚིག་ལ་བརྟེན་ནས་
གོ་མི་ནུས་པ་བཞིན་དུ་འཕགས་པའི་མཉམ་གཞག་གིས་ཐུགས་སུ་ཆུད་པ་ཇི་བཞིན་པ་སྟོང་ཉིད་སྟོན་པའི་ཚིག་གིས་མཚོན་མི་ནུས་པ་ལ་བཞེད་མཆི་པས་དེ་ལྟར་ན་ལེགས་སོ། །འོན་ཀྱང་སྒྲ་རྟོག་གི་ཡུལ་གཏན་མི་རུང་བ་བྱར་མི་རུང་སྟེ། གཞན་དུ་ཚོགས་སྦྱོར་བའི་དེ་ཁོ་ན་ཉིད་དོན་སྤྱིའི་སྒོ་ནས་རྟོགས་པར་གསུངས་པ་མི་འཐད་པར་འགྱུར་ཞིང་། གོ་བར་མི་ནུས་པའི་དོན་ལ་འདིའི་དོན་ཡིན་ཅེས་རྟོག་ལྡན་སློབ་མ་ལ་འཆད་པར་ཡང་མི་རིགས་ཏེ། ཅི་ཙམ་བཤད་ཀྱང་གོ་མི་ནུས་པའི་ཕྱིར་རོ། །ཞེས་གསུངས་སོ།། ༈ །།པཎ་ཆེན་བློ་བཟང་ཆོས་རྒྱན་གྱི་རྣམ་ཐར་ནོར་བུའི་ཕྲེང་བ་ལས། འགལ་བྱེད་ཀྱི་ལོ་དེ་ཁའི་ནང་དུ་དགོས་པའི་དབང་གིས་གསང་བའི་སློབ་དཔོན་ཞིག་ལ། རྙིང་ལུགས། གཤེད་དམར། ཚེ་བདག །བཀའ་བརྒྱད་གསང་བ་ཡོངས་རྫོགས་དང་། བདེ་འདུས་ཀྱི་དབང་ལུང་སོགས་རྙིང་མའི་ཆོས་སྐོར་མང་པོ་ཞུས། ཞེས་སྣང་ངོ་། ༈ །བོད་འདྲེ་སྲིན་གདུལ་དཀའ་འདུལ་མཛད་པའི། །དཔལ་མཐུ་སྟོབས་དབང་ཕྱུག་པདྨ་འབྱུང་། །མགོན་ཁྱོད་ཀྱི་ཡེ་ཤེས་སྒྱུ་མའི་འཕྲུལ། །ཐུགས་བརྩེ་བས་གཟིགས་ཤིག་ཨ་ཏི་ཤ །ཞེས་དང་། ༈ །དུས་དེར་བསྙེན་རྫོགས་སྒྲུབ་མི་བརྒྱ་ཕྲག་ཏུ་ཉེར་བར་བྱུང་བས། དུ་མ་མཁན་པོ་གཅིག་པ་གསུམ་པ་མན་ཆད་གཅིག་གིས་གཅིག་བསྙེན་
པར་རྫོགས་པར་བྱར་རུང་ངོ་། །ཞེས་མདོ་རྩ་ལས་གསུངས་པ་བཞིན། ཁང་པ་ལྷོ་བྱང་གཉིས་སུ་དཀྱིལ་འཁོར་པ་སོ་སོར་བཅད་པའི་མཚམས་སུ་འདུག་སྟེ། དུ་མ་མཁན་པོ་གཅིག་པའི་ཚོགས་བསྙེན་པར་རྫོགས་པ་སྒྲུབ་དགོས་པ་འགའ་ཞིག་བྱུང་། ཞེས་སོ། ༈ །གསང་སྔགས་རྙིང་མའི་གདམས་པ་བདུད་རྩིའི་ཆུས། །སྐལ་བཟང་བྱས་པ་གྲུབ་བའི་ཡ་མཚན་གྱིས། །སྣང་སྲིད་ཟིལ་གནོན་དམ་ཅན་བྲན་དུ་ཁོལ། །རྣལ་འབྱོར་དབང་ཕྱུག་ཞབས་ལ་གསོལ་བ་འདེབས། ༈ །ཞིང་མཆོག་བདེ་བ་ཅན་གྱི་འདྲེན་པ་མཆོག །སྣང་བ་མཐའ་ཡས་ཡེ་ཤེས་ཟློས་གར་ལས། །མཚོ་ལས་སྐྱེས་པའི་རྡོ་རྗེའི་སྤྲུལ་པའི་སྐུ། །བསྟན་པའི་ཉི་མ་མཆོག་ལ་གསོལ་བ་འདེབས། །དེ་ཉིད་ཐུགས་རྗེ་ཆེན་པོའི་རྣམ་རོལ་ནི། །བློ་བཟང་ཆོས་ཀྱི་རྒྱལ་མཚན་འཛིན་པའི་དཔལ། །ཞེས་གསུངས། ༈ །དབེན་ས་བཀའ་བརྒྱུད་ཅེས་གྲགས་པ་ནི། ཐུན་མོང་གི་བརྒྱུད་པ་ཟབ་མོ་ལྟ་བ། རྒྱ་ཆེན་སྤྱོད་པ། ཉམས་ལེན་བྱིན་རླབས་ཀྱི་བརྒྱུད་པ་གསུམ་ལྡན་དཔལ་ལྡན་ཨ་ཏི་ཤ་ནས་རིམ་པར་བརྒྱུད་པའི་ཚུལ་སྤྱི་དང་། ཐུན་མོང་མ་ཡིན་པ་ནི། དེ་དག་གི་སྙིང་པོའི་ཉེ་བརྒྱུད་ནི་རྗེ་བཙུན་འཇམ་དབྱངསནས་བླ་མ་དབུ་མ་པ་དང་། དེས་རྗེ་བླ་མ་ལ་གནང་། ཐུན་མོང་མ་ཡིན་པ་རྗེ་བཙུན་འཇམ་པའི་
དབྱངས་ཀྱིས་རྗེ་རིན་པོ་ཆེ་ལ་མངོན་སུམ་དུ་གནང་། དེ་དག་ལས་རགས་རིམ་ཞིག་མཁས་གྲུབ་དགེ་ལེགས་དཔལ་བཟང་ལ་གནང་། ཡོངས་སུ་རྫོགས་པ་སྤྲུལ་པའི་གླེགས་བམ་དང་བཅས་པ། ཙོང་ཁའི་ཡུལ་དུ་འཁྲུངས་པ་འཁོར་དག་པ་རྣམ་བརྒྱད་ཀྱི་ནང་ཚན་རྟོགས་ལྡན་འཇམ་དཔལ་རྒྱ་མཚོ་ཞེས་འཇམ་དཔལ་གྱིས་རྗེས་སུ་བཟུང་ཞིང་། རྗེས་ཀྱང་ཞལ་གཟིགས་ཚད་མར་མཛད་པ་དེ་ལ་གནང་། དེ་གཉིས་ཀས་ལུང་དང་རྟོགས་པའི་ཡོན་ཏན་བསམ་གྱིས་མི་ཁྱབ་པ་མཁས་གྲུབ་རྗེའི་གཅུང་པོ་བ་སོ་ཆོས་ཀྱི་རྒྱལ་མཚན་ལ་གནང་། དེས་ཀྱང་སྣོད་ལྡན་གསུམ་མ་གཏོགས་པ་གཞན་སུ་ལའང་མ་གནང་ཞིང་། བཀའ་རྒྱ་དམ་པར་མཛད། གསུམ་པོའི་ནང་ཚན་གྲུབ་ཆེན་དྷརྨ་བཛྲ་ནི། ཤར་ཕྱོགས་ཙོང་ཁ་པ་དང་ཁད་ཉེ་བ་ན། ཀུན་དགའ་རྒྱལ་པོ་དང་དཔལ་འཛོམ་ཞེས་བྱ་བའི་སྲས་སུ་རྟ་ནག་རྡོ་རྗེ་གདན་དུ་འཁྲུངས། དགུང་ལོ་བཅུ་གཅིག་པར་དགེ་ལྡན་དུ་ཕེབས། བ་སོ་ཆོས་རྗེ་ལོ་ལྔའི་བར་བསྟེན་ནས་དབང་གདམས་སྤྱི་དང་སྙན་བརྒྱུད་ཞལ་ཤེས་དང་བཅས་པ་གནང་། སླར་དབུ་ཕར་སོགས་ལ་སྦྱངས་པ་མཛད་ཅིང་རྟེན་དགེ་སློང་དུ་བསྒྲུབས་ནས་གངས་ཁྲོད་རི་སུལ་ངེས་མེད་དུ་སྒྲུབ་པའི་རྒྱལ་མཚན་བཙུགས། ཆོས་ཀྱི་རྒྱལ་པོ་ཙོང་ཁ་པས་ཞལ་གཟིགས། སྙན་བརྒྱུད་ཀྱི་གདམས་པ་གནང་། །
མཐར་ཟུང་འཇུག་རྡོ་རྗེ་འཆང་གི་གོ་འཕང་བརྙེས་ནས་སྐུ་ཚེའི་རིག་འཛིན་ཐོབ་པས་ནམ་མཁའ་ཇི་སྲིད་བར་དུ་དབེན་གནས་པདྨ་ཅན་དུ་བཞུགས་ཞེས་རྣམ་ཐར་ལས་འབྱུང་ངོ་། །དེའི་སློབ་མ་ནི་རྒྱལ་བ་བློ་བཟང་དོན་གྲུབ་སྟེ། དེའང་གཡས་རུ་གཙང་འགྲམ་དགེ་རྒྱས་བྱེ་མ་གླིང་གི་གཙུག་ལག་ཁང་གི་འདབས་རོལ་ཏུ་མདངས་ཀྱི་རྒྱུད་ལས་སྔ་འགྱུར་གྱི་གྲུབ་རིགས། བཀའ་བརྒྱུད་ཀྱི་རས་ཆེན་དཔལ་འབྱོར་བཟང་པོ་སོགས་ཀྱི་རྒྱུད་ལས་འཁྲུངས། ཆོས་འཁོར་དབུས་ལྡིང་གི་དགོན་པར་རབ་ཏུ་བྱུང་། ཡོངས་འཛིན་དུ་མ་བསྙེན། ཁྱད་པར་རྗེ་བཙུན་སྐྱབས་མཆོག་པ་དང་། གྲུབ་ཆེན་ཆོས་རྡོར་བ་གཉིས་བཀའ་དྲིན་ཆེ་བའི་བླ་མར་མཛད། ཕྱི་མ་ལས་དགུང་ལོ་བཅུ་བདུན་པར་མཇལ་ཞིང་། འགར་མོ་ཆོས་རྫོང་དུ་ཐུན་མོང་མ་ཡིན་པའི་སྙན་བརྒྱུད་ཐམས་ཅད་གསན། ཆོས་བརྒྱད་ཀྱི་སྤྲོས་པ་བཅད་དེ་ཟབ་ལམ་སྙིང་པོའི་རྣལ་འབྱོར་ལ་གཅིག་ཏུ་གཞོལ་བས་ཏིང་ངེ་འཛིན་གྱི་ཕ་མཐར་སོན། མཁས་དང་གྲུབ་པའི་ཕ་རོལ་དུ་གཤེགས་ཏེ། ཉིད་ཀྱིས། འཇམ་པའི་དབྱངས་ཀྱི་སྲས་ཀྱི་ཐུ་བོ་མཆོག །བློ་བཟང་གྲགས་པ་ཞེས་པའི་བླ་མ་དེའི། །གསུང་གི་སྙིང་པོའི་སྙན་བརྒྱུད་འཛིན་པ་ནི། །དེང་སང་དུས་ན་ཁོ་བོ་ཙམ་དུ་བས། །ཞེས་སོགས་གསུངས། ཕྱིས་དགེ་འདུན་རྒྱ་མཚོར་བསྙེན་
རྫོགས་བཞེས། བཀྲས་ལྷུན་ཀུན་མཁྱེན་ལེགས་དོན་པའང་ཐུགས་ཡིད་གཅིག་འདྲེས་སུ་གྱུར། མཐར་གཟུགས་སྐུ་ཐིམ་པའི་ཚེའང་རྟགས་མཚན་ཁྱད་བར་ཅན་བྱུང་། དེའི་སློབ་མ་ནི་མཁས་གྲུབ་སངས་རྒྱས་ཡེ་ཤེས་ཏེ། གཡག་སྡེ་པཎ་ཆེན་སོགས་དམ་པ་དུ་མའི་རྒྱུད་ལས་ཡབ་རྣལ་འབྱོར་དབང་ཕྱག་བླ་མ་རིན་ཆེན་དང་། ཡུམ་ཆོས་བསྟན་ཅེས་བྱ་བའི་སྲས་སུ་འཁྲུངས། ཡོངས་ཀྱི་དགེ་བའི་བཤེས་གཉེན་ཡོན་ཏན་བཟང་པོ་ལས་རབ་ཏུ་བྱུང་། བཅོ་ལྔ་པར་བཀྲ་ཤིས་ལྷུན་པོར་ཕེབས་ནས་མཚན་ཉིད་ལ་ཞུགས། སླར་རྟ་ནག་དགེ་འདུན་བློ་བཟང་སོགས་ལ་དབུ་ཚད་གཉིས་གསན། ཕར་ཕྱིན་འདུལ་མཛོད་སོགས་མཐར་ཕྱིན་པར་སྦྱངས་ནས་དཔལ་འཁོར་བདེ་ཆེན་དུ་གྲྭ་སྐོར་མཛད། དགེ་ལྡན་དུ་རྒྱུད་ལ་སྦྱངས། མཐར་དབེན་དགོན་དུ་བློ་བཟང་དོན་གྲུབ་ལས་སྙན་བརྒྱུད་ཀྱི་གདམས་པ་མཐའ་དག་གསན་ཅིང་ཉམས་ལེན་ལ་གཞོལ། དེ་ཉིད་ལའང་བསྙེན་པར་རྫོགས། ཕྱིས་མཁས་དང་གྲུབ་པའི་འུར་ལངས་ནས་དབུས་གཙང་ནས་བུ་སློབ་ཀྱང་མང་དུ་འདུས། རེ་བདུན་པར་ངོ་མཚར་བའི་ལྟས་དང་བཅས་ཏེ་མྱ་ངན་ལས་འདས། དེའི་སློབ་མའི་གཙོ་བོ་ནི། དབེན་ས་བློ་བཟང་དོན་གྲུབ་ཀྱི་སྐུ་སྐྱེ་པཎ་ཆེན་བློ་བཟང་ཆོས་རྒྱན་ཏེ། འདི་ནི་སྦའི་རིགས་ལས་གཙང་རོང་མཚམས་ལྷན་གྱི་
ནང་ཚན་དྲུག་བརྒྱ་ཞེས་པར་ཡབ་འཚོ་བྱེད་ཀུན་དགའ་འོད་ཟེར་དང་། ཡུམ་མཚོ་རྒྱལ་ཞེས་བྱ་བའི་སྲས་སུ་འཁྲུངས། ཆུང་ངུ་ནས་ངོ་མཚར་བའི་ལྟས་བསམ་གྱིས་མི་ཁྱབ། དགུང་ལོ་ལྔ་ནས་བཟུང་མཁས་གྲུབ་སངས་རྒྱས་ཡེ་ཤེས་ལས་དབང་ལུང་མན་ངག་རྒྱ་མཚོ་ལྟ་བུ་གསན་བཞེས་གྲུབ་ནས་བཀྲས་ལྷུན་དུ་ཕེབས། གཞན་ཡང་ཡོངས་འཛིན་དུ་མ་ལས་ཆོས་མང་དུ་གསན། གསང་འདུས་དང་དུས་འཁོར་གྱི་རྒྱུད་བཤད་སོགས་དང་། མདོ་ཕྱོགས་ཀྱི་པོད་ཆེན་རྣམས་ལ་གསན་བསམ་མཐར་ཕྱིན་པར་མཛད། བར་སྐབས་སུ་ཡི་དམ་གྱི་ལྷ་དཔག་ཏུ་མེད་པའི་བསྙེན་སྒྲུབ་མཛད་པས་གྲུབ་པའི་ཕ་རོལ་ཏུ་སོན་ཅིང་གངས་ཅན་ཆོས་འཕེལ་གྱི་མཁན་པོ་མཛད། ཕྱིས་བཀྲ་ཤིས་ལྷུན་པོའི་མཁན་པོ་མཛད། སེར་འབྲས་གཉིས་ཀའི་ཞལ་བདག་ཀྱང་གནང་། དགུང་ལོ་བརྒྱ་ཕྲག་ཐལ་བར་བཞུགས་ཤིང་། གཞན་ཡང་ཡོངས་འཛིན་དུ་མ་ལས་ཆོས་མང་དུ་གསན། གསང་འདུས་དང་དུས་འཁོར་གྱི་རྒྱུད་བཤད་སོགས་ཕྲིན་ལས་དང་འགྲོ་དོན་ནམ་མཁའ་མཉམ་པར་བྱུང་ཞིང་། ཕྱིས་ཀྱི་དགེ་ལྡན་པའི་བསྟན་འཛིན་ཆེ་བ་ཞིག་གོ ༈ །ཡང་པཎ་ཆེན་དགེ་འདུན་གྲུབ་པ་ནི། གཙང་རུ་ལག་གི་ས་ཡི་ཆར། །དཔལ་ལྡན་ས་སྐྱའི་ཉེ་འདབས་སྲད་ཀྱི་ལུང་ལག་གུར་མིའི་རུ་བར་ལྕགས་ལུག་ལོ་ལ་ཡབ་
མགོན་པོ་རྡོ་རྗེ་དང་། ཡུམ་ཇོ་མོ་ནམ་མཁའ་སྐྱིད་ཀྱི་སྲས་སུ་སྐུ་འཁྲུངས། རབ་བྱུང་བདུན་པའི་ལྕགས་ལུག་ལ། མཚན་པདྨ་རྡོ་རྗེར་བཏགས། འཁྲུངས་པའི་ནུབ་རུ་བ་ལ་དགྲ་ཇག་བྱུང་ནས་རིམ་པར་འཁྱར་ནས་མཐར་ལོ་བདུན་པར་སྣར་ཐང་དུ་སླེབས། དེའི་མཁན་རབས་བཅུ་བཞི་པ་སྟོན་པ་སྨན་པའི་རྒྱལ་པོའི་སྤྲུལ་པ་གྲུབ་པ་ཤེས་རབ་ལས་དགེ་བསྙེན་གྱི་སྡོམ་པ་བཞེས། རྒྱ་བོད་ཀྱི་ཡིག་རིགས་ཐམས་ཅད་ལ་ཤིན་ཏུ་མཁས། དགུང་ལོ་བཅོ་ལྔ་པ་ལ་རབ་བྱུང་དང་། ཉི་ཤུ་པ་ལ་བསྙེན་པར་རྫོགས། དེ་ནས་བཟུང་སྟེ་ཡོངས་འཛིན་དྲུག་ཅུ་ཙམ་བསྟེན། ཁྱད་པར་སྣར་ཐང་གཉེར་འཛིན་ཆེན་པོ་ལས་བཀའ་གདམས་ཀྱི་སྐོར་ཕལ་ཆེར་དང་། ལོ་ཙཱ་བ་སཾ་གྷ་ཤྲཱི་ལས་སྙན་ངག་དང་མངོན་བརྗོད། ཕྱིས་སྒྲ་པ་ཐུགས་རྗེ་དཔལ་ལས་ཀ་ལཱ་པ་དང་། སྡེབ་སྦྱོར་རིན་འབྱུང་། ཨེ་ཝཾ་དུ་ཆོས་མཆོག་གི་སློབ་མ་འཇམ་དབྱངས་རིན་རྒྱལ་བ་ལས་སྐར་རྩིས་སོགས་གསན། སྣར་ཐང་དང་། རྗེ་རིན་པོ་ཆེ། གསང་ཕུལ་སོགས་སུ་ཚད་མ་ལ་ཤིན་ཏུ་མཁས་པར་གྱུར་ཅིང་། མདོར་ན་དབུས་ཕྱོགས་སུ་ལོ་བཅུ་གཉིས་ཙམ་བཞུགས། སླར་གཙང་དུ་ཕེབས། སྤྱིར་དབུས་ཕྱོགས་སུ་དགེ་ལྡན་དང་། གསང་ཕུ་སོགས་དང་། གཙང་དུ་སྣར་ཐང་། ཞྭ་ལུ། གནས་རྙིང་། བོ་དོང་སོགས་གནས་ངེས་མེད་དུ་ཀ་པོད་བཞི་
གཙོ་བོར་གྱུར་པའི་འཆད་ཉན་རྒྱུན་ཆད་མེད་པར་གནང་བས་སློབ་ཚོགས་བསམ་གྱིས་མི་ཁྱབ། དགུང་ལོ་ལྔ་བཅུ་པར་བྱང་ཆེན་དུ་སྐུ་མཚམས་ཡུན་རིང་དུ་བཅད་པས་ལྷག་པའི་ལྷས་རྗེས་སུ་བཟུང་། ང་བདུན་པ་མེ་ཡོས་ལ་བཀྲ་ཤིས་ལྷུན་པོ་དཔལ་གྱི་སྡེ་ཆེན་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་བཏབ་ཅིང་། བྱམས་ཆེན་སྐུ་གསུང་ཐུགས་རྟེན་བསམ་གྱིས་མི་ཁྱབ་པ་བཞེངས། དཀོན་མཆོག་མཆོད་པ་དང་། དགེ་འདུན་ལ་བསྙེན་བཀུར། གཞུང་ལུགས་ཀྱི་འཆད་ཉན་སོགས་སྐུ་མཆེད་གསུམ་གྱི་རྣམ་ཐར་ལྷུར་བླངས། ཕུ་ཆུ་བས་དཀོན་མཆོག་མཆོད་པ་ལ་ནན་ཏན་མཛད། སྤྱན་སྔ་བས་སྐུ་གསུང་ཐུགས་རྟེན་གཙོ་བོར་མཛད། པོ་ཏོ་བས་འཆད་ཉན་དང་དགེ་འདུན་གྱི་ཞབས་ཏོག་ལ་བརྩོན། འདི་གསུམ་འབྲོམ་གྱི་སློབ་མ། གྱ་བཞི་པ་ཤིང་རྟ་ཧོར་ཟླ་༡༢པའི་ཚེས་བརྒྱད་ལ་མྱ་ངན་ལས་འདས་སོ། །དགུན་ཟླ་འབྲིང་བོའི་ཚེས་བརྒྱད་ཅེས་སྣང་། བསྟན་བཅོས་རྩོམ་པའི་རྒྱུ་གསུམ་ཀ་ཚང་བས། འདུལ་བའི་གླེང་འབུམ། མདོ་ཊཱི་ཀ །ཚད་མའི་ཊི་ཀ །རྩ་འཇུག་གི་ཊཱི་ཀ་སོགས་མང་དུ་མཛད། ལེགས་བཤད་པོ་ཏི་བདུན་ཙམ་ཡོད། རྗེ་ཤེས་རབ་སེང་གེ་དང་། རྗེ་བླ་མ་གཉིས་བཀའ་དྲིན་ཆེ་བའི་བླ་མ་གཅིག་ཏུ་མཛད་དོ། །དགུང་ལོ་གྱ་བཞི་པར་ཆུ་སྒོ་ཕྱོགས་སུ་ཕེབས་པའི་ཚེ་གྲིབ་ཀྱིས་སྐུ་སྐེད་བསྙུན་པས་ཕྱག་མཁར་བསྣམས་ཤིང་ན་
བཟའ་གཞན་གྱིས་ཁུར་དགོས་པ་བྱུང་། ༈ །བདེ་བ་ཅན་དུ་སྐྱེ་བ་ལ་དེ་བཞིན་གཤེགས་པ་འོད་དཔག་ཏུ་མེད་པའི་མཚན་བརྗོད་པ་ལས། སྨན་གྱི་བླ་མའི་མཐུ་ཆེ་བར་མདོ་ལས་གསུངས་ཞེས་གསུངས་སོ། ༈ །དེ་བཞིན་གཤེགས་པ་ཤཱཀྱ་ཐུབ་པ་བྱང་ཤར་མཚམས་མེ་ཏོག་བཀྲམ་པ་ཞེས་བྱ་བའི་འཇིག་རྟེན་ཁམས་སུ་བཞུགས། མགོན་པོ་ཞལ་བཞི་པ་ཐུན་མོང་མ་ཡིན་པའི་ཆོས་སྐྱོང་དུ་མཛད། རྟ་ནག་སྒྲོལ་མ་བའི་བླ་མ་འཇམ་དབྱངས་བསམ་འགྲུབ་རྡོ་རྗེ་བྱ་བ་ལ་རྟ་མགྲིན་ལྕགས་རལ་ཅན་གྱི་རྗེས་གནང་དང་། རྡོ་རྗེ་ཕུར་པའི་བཀའ་གསན་ཏེ་རྟ་མགྲིན་གྱི་བསྙེན་སྒྲུབ་ཀྱང་མཛད། ཅེས་སོ། །མནལ་ལམ་དུ། ཆོས་ཀྱི་མཐར་ཐུགས་སེམས་བསྐྱེད་ཡིན། །ལྟ་བའི་མཐར་ཐུག་སྟོང་ཉིད་ཡིན། །རྒྱུད་ཀྱི་མཐར་ཐུག་གསང་འདུས་ཡིན། །ཅེས་དང་། ཡེ་ཤེས་རྩེ་མོ་ལ། ངེད་ཁོང་རྣམས་ལ་མ་ཎི་བཀའ་འབུམ་ཞིག་འཆད་ཀྱིན་ཡོད། ཚེ་འདིར་གཞན་ལས་ལུང་ཐོབ་པ་སོགས་མེད་དེ། ཁྱེད་རང་ཡང་ཉོན་ཅིག་གསུངས་ནས་ཉན་ཏེ། དེ་ལྟ་བུའི་གསུང་དེ་ཡང་གནད་ཤིན་ཏུ་ཆེ་བར་ཡོད་དོ། །ཞེས་དང་། གཅིག་གིས་བཀའ་གདམས་གླེགས་བམ་ལ་འདི་ཆོས་མིན་ཟེར་བ་འདུག་པས་ཇི་ལྟར་ལགས་ཞེས་ཞུས་པས། ཆོས་ཡིན་མིན་ཆ་མེད། སེམས་ལ་ཕན་པོ་ཡོད་གསུངས། ཡེ་ཤེས་རྩེ་མོས་ཞུས་
པར། རྗེ་རིན་པོ་ཆེ་ནི། ཕྱི་མ་ལ་སྔར་བདེ་བ་ཅན་དུ་འབྱོན་བཞེད་ཡོད་པ་ལ། ཕྱིས་དགའ་ལྡན་དུ་འབྱོན་བཞེད་ཡོད་པ་ཡིན་ཅེས་མི་ཀུན་གླེང་བར་འདུག་ལགས་ཞུས་པས། རྗེའི་ཞལ་ནས། ཁོ་བོ་ལ་དེ་ལྟ་བུའི་འདོད་པ་ཕུར་ཚུགས་པ་མེད། རྗེ་བཙུན་གྱི་སྐུ་བཞེངས་པ་འདི་ཡང་སེམས་ཅན་ཐམས་ཅད་རྗེ་བཙུན་གྱི་འཁོར་དུ་སྐྱེས་ཏེ་ཐེག་ཆེན་ཆོས་ལ་ལོངས་སྤྱོད་པའི་རྟེན་འབྲེལ་དུ་བསམས་ཏེ་བྱས་ཤིང་། བདེ་བ་ཅན་སོགས་སུ་གདུལ་བྱ་ཡང་དག་པ་འབའ་ཞིག་ཡོད། དེ་བས་མ་དག་པའི་གདུལ་བྱ་རྣམས་འདུལ་བའི་ཕྱིར་དུ་རེ་ཞིག་མ་དག་པའི་ཞིང་འདི་ཀར་སྡོད་འདོད་པ་ཡིན། ཅེས་གསུངས། ༈ །རྗེ་རང་གི་གསུང་ལས། སྤྱིར་རྗེ་བཙུན་མ་སྒྲོལ་མ་དཀར་མོ་འདི་ལ་བརྟེན་ནས་གཙོ་བོར་ཚེ་བསྒྲུབས་ན་ཞར་ལ་ཤེས་རབ་འཕེལ་ཞིང་། གཙོ་བོར་ཤེས་རབ་བསྒྲུབས་ན་ཞར་ལ་གཅིག་ཤོས་འཕེལ་བར་གསུངས། ཞེས་སོ། །དེ་ཡང་བྱང་ཆེན་དུ་གཙོ་བོར་ཚེའི་སྒྲུབ་པ་ཟླ་དགུ་བཞུགས་པའི་ཚེ་ཞར་ལ་ཤེས་རབ་འཕེལ་ནས་བསྟོད་ཚོགས་རྣམས་མཛད་ཅེས་སོ། ༈ །མ་ཎི་ཞེས་པ་ནི་ནོར་བུ་ཡིན་ལ། ཕྱག་གཡས་ཀྱི་ནོར་བུ་ཆུ་ཤེལ་གྱི་ཕྲེང་བའོ། །པདྨ་ནི་ཕྱག་གཡོན་པའི་པདྨའོ། །མེ་ནི་འབོད་པའི་ཚིག་སྟེ། དེ་ཡང་ཕྱག་མཚན་དེ་གཉིས་འཛིན་པའི་ལྷ་སྔར་བསྒོམས་པ་དེ་ཉིད་
ལམ་ལམ་དྲན་པར་བྱེད་པའོ། །ཨོཾ་དང་ཧཱུྃ་ནི་སྤྱི་དང་མཐུན་ནོ། ༈ །ཏཱའི་སི་ཏུ་རྣམ་རྒྱལ་གྲགས་པའི་དྲིས་ལན་ལས་སྦྱངས་པའི་ཡོན་ཏན་༡༣རྒྱས་པར་བཤད་པ། མ་བྱིན་ལེན་གྱི་བསླབ་པ་དང་པོར་འཆལ་བའི་ཚེ། ཀ་ཀ་ནི་དང་། མ་ཤ་ཀ་དང་། ཀན་པ་ཎ་རྣམས་རིམ་པ་བཞིན་དུ་མགྲོན་བུ་ཉི་ཤུ་དང་། བརྒྱད་ཅུ་དང་། མགྲོན་བུ་སྟོང་དང་དྲུག་བརྒྱའི་རིན་ཐང་གི་མིང་ཡིན་ཏེ། ཞེས་དང་། མ་ཤ་ཀ་དང་། པ་ན་མིང་གི་རྣམ་གྲངས། ཀརླུ་པ་ཎ་དང་། ན་ན་ཀ་མིང་གི་རྣམ་གྲངས་སོ། །བམ་པོ་ལྔ་བཅུ་པར། ཀ་ཀ་ནི་བཞི་ལ་མ་ཀ་ཀ་གཅིག་གོ །མ་ཤ་ཀ་ཉི་ཤུ་ལ་ཀརྨ་པ་ཆ་གཅིག་གོ །ཀ་ཀ་ནི་གཅིག་ནི་མགྲོན་བུ་ལྟ་བུའི་རིན་ཐང་གི་མིང་ཡིན་ནོ། །མ་ཤ་ཀ་གཅིག་ནི་མགྲོན་བུ་བརྒྱད་ཅུའི་རིན་ཐང་གི་མིང་ཡིན་ནོ། །ཀན་པ་ཎ་གཅིག་ནི་མགྲོན་བུ་སྟོང་དྲུག་བརྒྱའི་རིན་ཐང་གི་མིང་ཡིན་ནོ། །ཀན་པ་ཎིའི་བཞི་ཆ་ནི་མ་ཤ་ཀ་ལྔའི་རིན་ཐང་སྟེ་མགྲོན་བུ་བཞི་བརྒྱའི་རིན་ཐང་གི་མིང་ཡིན་ནོ། །ཞེས་དང་། ཀན་པ་ཎིའི་ངོ་བོ་ནི། གཞུང་འགྲེལ་ལས། དངུལ་ལས་བྱས་པ། གཟུགས་སུ་དོད་པ། འཚོང་དུ་རུང་བ་སྟེ་རྒྱལ་པོ་རྨ་བྱ་ཞེས་བྱ་བའི་དུས་བྱུང་བར་བཤད་དོ། །འདུལ་བར་རྣམ་གསུམ་དག་པའི་ཤ་གནང་ནས། མདོ་གཞན་དུ་བཀག་པ་ལྟར་སྣང་བ་ལ་རྗེས་བཅས་སུ་འདོད་པ་མི་
འཐད་དེ། ཉན་ཐོས་རང་ལུགས་ལ་གནང་བ་དང་། བྱང་སེམས་ལ་བྱམས་པ་ཆེན་པོའི་ཆད་པར་འགྱུར་བས་བཀག་པར་མདོ་མྱང་འདས་སོགས་ལས་གསལ་ལོ། །དབུ་མ་རྩ་ཤེའི་འགྲེལ་པ་ག་ལས་འཇིགས་མེད་རང་འགྲེལ་མ་ཡིན་ཏེ། དཔལ་ལྡན་ཟླ་བའི་ཚིགས་གསལ་སོགས་དང་བཤད་སྲོལ་མི་མཐུན་ཅིང་། དེར་ལུང་ཡང་མ་དྲངས་པས་སོ། ༈ །དཔལ་ལྡན་ཀླུ་སྒྲུབ་ཀྱི་བསྟན་བཅོས་ལ་ཐ་སྙད་གཙོ་བོར་གྲུབ་པ་དོན་དམ་གཙོ་བོར་སྟོན་པ་གཉིས། སྔ་མ་ལ་ལུང་དང་། རིགས་པས་གཏན་ལ་འབེབས་པ་གཉིས། ཕྱི་མ་ལ་དྲུག་གི རིན་ཕྲེང་འདིར་བགྲང་རིགས་ཏེ། བདག་མེད་པའི་དོན་རིག་པས་གཏན་ལ་འབེབས་པའི་ཕྱིར་དང་། ཐ་སྙད་གྲུབ་པ་བགྲང་མི་རིགས་ཏེ་དོན་དམ་གཏན་ལ་འབེབས་བྱེད་མ་ཡིན་པའི་ཕྱིར་རོ། ༈ །སྤྱོད་འཇུག་ལས། ཁོང་ཁྲོས་བསྐལ་པ་སྟོང་གི་དགེ་རྩ་བཅད་པ་དང་། འཇུག་པར་བརྒྱར་གསུངས་པ་ནི་སྔ་མ་ནི་སོ་སྐྱེས་བྱང་སེམས་ལ་ཁྲོས་པ་དང་། ཕྱི་མ་ནི་སོ་སྐྱེའི་བྱང་སེམས་སྟོབས་ཆེན་གྱིས་སྟོབས་ཆུང་ལ་ཁྲོས་ན་དགེ་བའི་རྩ་བའི་ནུས་པ་འབྱིན་པས་གཏན་མེད་དུ་འགྲོ་བའི་དོན་ཡིན། འཇིག་རྟེན་ཆགས་པའི་དུས་རླུང་དཀྱིལ་སྟེང་ཆུའི་རྒྱུན་མཐའ་ཡས་པ་འབབ་པར་གསུངས་པ་ཕྱི་རོལ་ཏུ་མི་འབོ་བ་ནི། སློབ་དཔོན་འཕགས་པས། རླུང་དེ་ཡང་
རྣམ་པ་གཉིས་ཏེ་འོག་གཞི་ལ་གནས་པ་དང་གློ་ན་གནས་པའོ། །དེས་ཆུ་དེ་དག་ཐུར་དུ་ཡང་མི་འཛག་ལ་ཐད་ཀར་ཡང་མི་འབོ་འོ། །ཞེས་བཤད། ཡང་གསུང་ལས། བསྔོ་བས་ཟིན་པའི་དགེ་རྩ་ཡང་ཁོང་ཁྲོས་འཇོམས་པར་བསྟན། དངོས་གནས་ལ་གཟུགས་མེད་ཁམས་ལ་གནས་གཞན་པ་ཞིག་ལོགས་ན་མེད་དེ། གཟུགས་མེད་ཀྱི་སྙོམས་འཇུག་ཐོབ་ལ་མ་ཉམས་པ་ཤི་འཕོས་པ་དེ་ཉིད་ཀྱི་མིང་བཞིའི་ཕུང་པོ་གྲུབ་སྟེ་གནས་པའི་ཕྱིར་རོ། །དེ་ནས་གོ་རིམ་ལྟ་བུར་གསུངས་པ་ནི་ཕྱི་ནང་སྦྱོར་བའི་ཁྱད་ཙམ་མོ། ༈ །བསྐལ་པ་ཆེན་པོའི་མི་ལོའི་གྲངས་ནི། མཛོད་ལྟར་ན། རབ་ཏུ་ཚ་བའི་ཚེ་ཚད་བར་བསྐལ་ཕྱེད་དང་། མནར་མེད་ཀྱི་ཚེ་ཚད་བར་བསྐལ་གཅིག་ཏུ་བཤད་ལ། དེ་བརྒྱད་ཅུ་ལ་བསྐལ་ཆེན་ཞེས་བགྲང་། དེས་ན་བར་བསྐལ་ལ་མི་ལོ། དཀྲིགས་ཆེན་པོ་ནས་གསུམ། དཀྲིགས་གསུམ། གཏམས་ཆེན་པོ་དགུ། གཏམས༧། རབ་བཀྲམ་ཆེན་པོ་བདུན། ཁྲག་ཁྲིག་ཆེན་༦པོ། ཁྲག་ཁྲིག་གཉིས། ཐེར་འབུམ་ཆེན་པོ་བཞི། བསྐལ་ཆེན་ལ་མི་འཁྲུགས་ཆེན་པོ་གཉིས། མི་འཁྲུགས༧། དཀྲིགས་ཆེན་པོ་གཅིག །དཀྲིགས་བརྒྱད། གཏམས་ཆེན་པོ་གཅིག །གཏམས་དྲུག །རབ་བཀྲམ་ཆེན་༤པོ། རབ་བཀྲམ༩། ཁྲག་ཁྲིག་ཆེན་༩པོ། ཁྲག་ཁྲིག་གཉིས་རྣམས་ཡོད་
དོ། །རྒྱ་ཆེ་རོལ་པར། བྱེ་བ་ཕྲག་བརྒྱ་ཐེར་འབུམ་དང་། །དེ་བཞིན་གོང་དུ་ཕྲག་བརྒྱ་རེས་བསྒྱུར་བས། ཁྲག་ཁྲིག །གཏམས་པ། དཀྲིགས་པ། མི་འཁྲུགས། ཁྱད་ཕྱིན། བང་སྟེང་། མང་འཛིན། གླང་པོའི་སྟོབས། དོགས་འཐོབ། རྣམ་པར་བཞག་པ་གདགས་པ། རྒྱུ་རིག །ལག་སྦྱིན། རྒྱུ་དབང་། རྫོགས་ཐོབ། བགྲངས་རྟོགས། སྒྲིབ་པ། སྟོབས་ཕྲག །ཀུན་སྟོབས་ཕྲག །རྣམ་པར་བརྡ་ཤེས་ལྡན། བརྡ་ཤེས་ཀུན། རྣམ་འབྱུང་། དེའི་མཚན་ཉིད་དོ། །འདི་ལྟར་དེའི་མཚན་ཉིད་ཅེས་བྱ་བའི་རྩིས་ཀྱིས་ནི་རིའི་རྒྱལ་པོ་རི་རབ་བརྩི་བའི་གཞིར་བྱས་ཀྱང་ཆོད་པར་རུང་ངོ་། །དེའི་གོང་ན་རྒྱལ་མཚན་གྱི་རྩེ་མོའི་ནོར་བུ་ཞེས་བྱ་བའི་གྲངས་ཡོད་དེ། གྲངས་དེས་ནི་གངྒཱའི་ཀླུང་གི་བྱེ་མ་སྙེད་བརྩི་བའི་གཞིར་བྱས་ཀྱང་ཆོད་པར་རུང་ངོ་། །ཞེས་གསུངས། འདིའི་གངྒཱ་ནི་ཆུ་བོ་བཞིའི་ཡ་གྱལ་མ་ཡིན་ཏེ། ཆུ་ཀླུང་ཆེན་པོ་རྒྱ་མཚོ་ཡིན་ལ། དེའི་བྱེ་མ་ནི་ཆུ་དེའི་རྡུལ་དེ་རེ་རེ་ནས་བགྲངས་པ་ལ་གྲངས་ཇི་ཙམ་ཡོད་པ་ནི། གངྒཱའི་ཀླུང་གི་བྱེ་མ་སྙེད་ཅེས་བྱའོ། །མྱང་འདས་ལས། ཆུ་ཀླུང་ཞེས་བྱ་བ་ནི་རྒྱ་མཚོ་ལ་བྱ་སྟེ། ཆུ་ཀླུང་ཐམས་ཅད་ཀྱི་ནང་ན་རྒྱ་མཚོ་འབའ་ཞིག་ཆུ་ཀླུང་ཡིན་པས་ན། རྒྱ་མཚོ་ནི་ཆུ་ཀླུང་ཞེས་བྱ་བའི་གྲངས་སུ་གཏོགས་སོ། །ཞེས་བཤད་དོ། །
སངས་རྒྱས་ཀྱི་སྐུའི་ཡོན་ཏན་མཚན། ༣༢ དཔེ་བྱད་བརྒྱད་ཅུ། གསུང་དབྱངས་ཡན་ལག་དྲུག་ཅུ་བཞི། ཐུགས་ལ་ཟག་མེད་ཀྱི་ཡོན་ཏན་སྡེ་༢༠ཚན་ཏེ། དེ་ཡང་ནང་གསེས་སུ་ཕྱེ་ན། ༡༤ ཕྲིན་ལས་ལ་འགྲོ་བ་རྣམས་མངོན་མཐོ་དང་། ངེས་ལེགས་ཀྱི་རྒྱུ་ལམ་དང་། དེའི་ངོ་བོ་འབྲས་བུ་ལ་འགོད་པ་སྟེ་ནང་གསེས་སུ་སྡེ་ཚན་ཉེར་བདུན་སོགས་ཡོད་ལ། ཕྱི་མ་འདི་ནི་རྒྱན་དུ་གསལ་ལོ། ༈ །རྗེ་བླ་མས་ཕྱག་ཆེན་སྐོར་ཕག་མོ་གྲུ་པའི་བྱང་ཆུབ་གྲགས་པ་ལས་གསན་ནས་ཉམས་རྟོགས་འཁྲུངས་ཚུལ་སོགས་རྟོགས་ལྡན་འཇམ་དཔལ་རྒྱ་མཚོའི་རྣམ་ཐར་ཟུར་འདེབས་ལས་བཤད། ༈ །རྗེ་དགེ་འདུན་རྒྱ་མཚོ་ནི། གཙང་རྟ་ནག་ཏུ་གསང་སྔགས་གསར་རྙིང་རིས་མེད་པའི་བསྟན་པའི་བདག་པོ་རྡོ་རྗེ་འཆང་ཀུན་དགའ་རྒྱལ་མཚན་དང་མ་གཅིག་ཀུན་དགའ་དཔལ་མོའི་སྲས་སུ་འཁྲུངས། རབ་བྱུང་བརྒྱད་པའི་ཤིང་ལུག་ལོ་འཁྲུངས། བཅུ་གཅིག་པར་བཀྲ་ཤིས་ལྷུན་པོར་ཕེབས། པཎ་ཆེན་ལུང་རིག་རྒྱ་མཚོ་ལས་རབ་ཏུ་བྱུང་། མཚན་དགེ་འདུན་རྒྱ་མཚོའི་དཔལ་ཞེས་གསོལ། བཅུ་དགུ་པར་འབྲས་སྤུངས་སུ་ཕེབས། ཤིང་ཡོས་ལོར་འབྲས་སྤུངས་མཁན་རིན་པོ་ཆེ་གནས་རྙིང་ལས་བསྙེན་པར་རྫོགས། འཇམ་དབྱངས་དགའ་བའི་བཤེས་གཉེན་ལས་མདོ་སྔགས་ཀྱི་གདམས་པ་ཡོངས་སུ་
རྫོགས་པར་གསན། གཞན་ཡང་མཁས་གྲུབ་ནོར་བཟང་རྒྱ་མཚོ་སོགས་མང་དུ་བསྟེན། འཆད་རྩོད་རྩོམ་གསུམ་གྱིས་བསྟན་པའི་རྒྱལ་མཚན་བླ་ན་བསྒྲེངས། དགུང་ལོ་གཉིས་གསུམ་ནས་ཕ་བློ་བཟང་གྲགས་པ་ཞེས་རྡོལ་གཏམ་དང་། གསུང་རྩོམ་ཚིགས་བཅད་ཐོགས་མེད་དུ་གསུངས། བཀའ་རྩོམ་ཀྱང་མཚན་བརྗོད། དྲང་ངེས་རྣམ་འབྱེད། དབུ་མའི་ལྟ་ཁྲིད་བསྟོད་ཚོགས་སོགས་པུ་སྟི་ལྔ་ཙམ་ཡོད་ཅིང་། རྒྱ་གར་གྱི་ཆུ་བོ་གངྒཱ་ཚུན་ཆད་སྙན་ངག་ལ་མཁས་པར་གྲགས། ས་སྦྲུལ་ལ་ཆོས་འཁོར་རྒྱལ་མེ་ཏོག་ཐང་གི་ཆོས་གྲྭ་བཏབ། སེར་འབྲས་དང་བཀྲས་ལྷུན་གྱི་མཁན་པོ་མཛད། དགུང་ལོ་རེ་བརྒྱད་པར་གཤེགས། ༈ །པཎ་ཆེན་བློ་བཟང་ཆོས་རྒྱན་ལ་བ་སོ་སྤྲུལ་སྐུས་ཞུས་པའི་གསང་རྣམ་ལས། ཁོ་བོ་ཅག་པདྨ་སཾ་བྷ་ཝར་སྤྲུལ་ནས། བོད་ཡུལ་ལྷ་སྲིན་སྡེ་བརྒྱད་ཐམས་ཅད་དམ་ལ་བཏགས། འགྲོ་བའི་དོན་དུ་གཏེར་ཁ་བྱེ་བ་ཕྲག་བརྒྱ་སྦས། མ་འོངས་དུས་ན་གཏེར་སྟོན་དཔག་མེད་འབྱུང་། །ཕྱོགས་མཐའ་མེད་པར་གཏེར་ཆོས་དཔག་མེད་དར་ཞིང་རྒྱས། །ཞེས་དང་། ༈ །པཎ་ཆེན་རིན་པོ་ཆེའི་སྐྱེས་རབས་ནི། འཕགས་ཡུལ་དུ་འདྲི་ཞིང་ལན་ལྡོན་པའི་མཆོག་འཕགས་པ་རབ་འབྱོར། རིགས་ལྡན་འཇམ་དཔལ་གྲགས་པ། རང་རྒྱུད་པའི་ཤིང་རྟའི་སྲོལ་འབྱེད་སློབ་དཔོན་
ལེགས་ལྡན་འབྱེད། སློབ་དཔོན་ཨ་བྷ་ཡཱ་ཀ་ར་གུཔྟ། རྟ་ནག་འགོས་ལོ་ཙཱ་བ་ཁུག་པ་ལྷས་བཙས། རྗེ་ས་པཎ། རྣལ་འབྱོར་གྱི་དབང་ཕྱུག་གཡུང་སྟོན་རི་ཁྲོད་པ། མཁས་གྲུབ་ཐམས་ཅད་མཁྱེན་པ་དགེ་ལེགས་དཔལ་བཟང་། དེ་རྗེས་ཆོས་རྗེ་བསོད་ནམས། ཕྱོགས་གླང་ནི་ལྷ་ཁུད་དུ་སྐུ་འཁྲུངས། ཇོ་གདན་བསོད་ནམས་རིན་ཆེན་ལས་རབ་ཏུ་བྱུང་། པཎ་ཆེན་ཆོས་ཀྱི་རྒྱལ་མཚན་ལ་སོགས་དམ་པ་མང་དུ་བསྟེན་ཏེ་མཁས་པའི་དབང་པོར་གྱུར། དོན་གཉེར་ཅན་དུ་མ་ལ་ལེགས་བཤད་སྤེལ། རྫུ་འཕྲུལ་གྱིས་ནམ་མཁའ་བྱོན་ནས་ཞབས་ཀྱིས་བཅགས་པའི་སར་དབུས་སྡིངས་ཀྱི་དགོན་པ་བཏབ། །བསྟན་པ་ལ་དགོངས་ནས་དགོན་སྡེ་ཞིག་འཛུགས་པར་བཞེད་ཀྱང་། ཕྱི་ནང་གི་བར་ཆད་ཀྱི་རྐྱེན་ཅུང་ཟད་ལ་བརྟེན་ནས་བཞེད་པ་བཞིན་དུ་མ་གྲུབ་པས། ཞབས་འབྲིང་པ་སྡེ་སྣོད་འཛིན་པ་བཅུ་དྲུག་ཙམ་བཀྲ་ཤིས་ལྷུན་པོ་དང་། དགེ་འཕེལ་སོགས་སུ་འགྱེད་པར་མཛད་ནས་ཐུགས་དམ་ལ་གཞོལ། ལེགས་བཤད་གསུང་རྩོམ་ཡང་པུསྟི་གཉིས་ཙམ་ཡོད་པར་སྣང་ངོ་། །དེ་ནས་བློ་བཟང་དོན་གྲུབ། །པཎ་ཆེན་བློ་བཟང་ཆོས་རྒྱན། བློ་བཟང་ཡེ་ཤེས། དཔལ་ལྡན་ཡེ་ཤེས། བློ་བཟང་དཔལ་ལྡན་རྣམས་སོ། ༈ །པཎ་ཆེན་ཆོས་རྒྱན་ནི། ལྷན་དུ་གྲུ་རྒྱལ་བའི་ཞལ་ངོར་སྐུ་འཁྲུངས་མ་ཐག་ཨཱ་ལིའི་སྒྲ་
སྒྲོགས་པ་དང་། ཞལ་འཛུམ་པ་དང་། སྤྱན་རིང་པོར་གཟིགས་པ་བྱུང་། བཅུ་བཞི་པར་མཁས་གྲུབ་སངས་རྒྱས་ཡེ་ཤེས་ལས་རབ་ཏུ་བྱུང་། མཚན་བློ་བཟང་ཆོས་ཀྱི་རྒྱལ་མཚན་དུ་གསོལ། བཀྲ་ཤིས་ལྷུན་པོར་ཕེབས་ཏེ་མདོ་ཕྱོགས་ལ་སྦྱངས་པས་མཁས་པ་ཆེན་པོར་གྱུར། ཉི་ཤུ་པར་པཎ་ཆེན་དམ་ཆོས་ཡར་འཕེལ་ལས་བསྙེན་པར་རྫོགས། ཉེར་བདུན་པར་གངས་ཅན་ཆོས་འཕེལ་གྱི་མཁན་པོར་ཕེབས། ཆོས་འཁོར་རྒྱ་ཆེར་བསྐོར། སུམ་ཅུ་པར་བཀྲས་ལྷུན་ཁྲིར་ཕེབས། ལོ་དྲུག་ཅུ་རེ་གསུམ་གྱི་བར་དུ་དབུས་གཙང་མངའ་རིས་མདོ་སྟོད་སྨད་ལྷོ་མོན་རྒྱ་ནག་ཁལ་ཁ་ཨོའི་རོད་ཀྱི་བླ་དཔོན་ཆེ་དགུ་མཐའ་དག་ལ་ཆོས་འཁོར་རྒྱ་ཆེར་བསྐོར། ཐམས་ཅད་མཁྱེན་པ་ཡོན་ཏན་རྒྱ་མཚོ་དང་། བློ་བཟང་རྒྱ་མཚོ་གཉིས་ཀའི་མཁན་པོ་མཛད། ཆོས་མང་དུ་ཕུལ། འཁོར་ལོ་གསུམ་གྱི་མཛད་བཟང་མཐའ་ཡས། གོ་གསུམ་པ་ཆུ་སྟག་ཧོར་ཟླ་༣པའི་ཚེས་༡ལ་དགའ་ལྡན་དུ་གཤེགས་སོ། །ལོང་མེད་ཐུགས་ལ་འཁྲུངས་པའི་པོ་ཏོ་བ། །བདག་པས་གཞན་གཅེས་བསྒོམས་པའི་སྤྱན་སྔ་བ། །སྒྲུབ་པ་སྙིང་པོར་མཛད་པའི་ཕུ་ཆུང་པ། །རྒྱལ་སྲས་སྐུ་མཆེད་གསུམ་ལ་གསོལ་བ་འདེབས། །ཞེས་འབྲོམ་སྟོན་སློབ་མ་བཀའ་གདམས་གཞུང་པ། གདམས་ངག་པ། མན་ངག་པ་ཞེས་གྲགས་པའི་
མཚན་གཞི་གསུམ་ལས། དང་པོས་ཆིག་ལབ་རིང་མོ་དང་། དཔེ་ཆོས་རྩ་བ་སོགས་གསུངས། །དེའི་སློབ་མ་ཕོ་བྲང་སྡིངས་པས་པོ་ཏོ་བའི་གསུང་ལས་དཔེ་ཆོས་དང་པོར་བསྡེབས། ཡང་པོ་ཏོ་བའི་སློབ་མ་དགེ་བཤེས་བྲག་དཀར་བས་དཔེ་ཆོས་ཤིན་ཏུ་རྒྱས་པར་བསྡེབས། དེའི་སློབ་མ་འཕན་ཡུལ་གྲགས་པ་བྱང་ཆུབ་ལ་ལྕེ་སྒོམ་ཤེས་རབ་རྡོ་རྗེས་དཔེ་ཆོས་འབྲིང་པོ་གཅིག་བསྡེབས་པ་རིན་སྤུངས་སུ་གྲགས། པོ་ཏོ་བའི་སློབ་མ་དགེ་བཤེས་དོལ་པ་ཤེས་རབ་རྒྱ་མཚོས་དཔེ་བུམ་སྔོན་པོའི་རྩ་བ་མཛད། དེའི་སློབ་མ་ལྷ་འབྲི་སྒང་པས་འགྲེལ་པ་མཛད། དགེ་བཤེས་སྟོན་པའི་སློབ་མ་ཁམས་པ་ལུང་པ་ཤཱཀྱ་ཡོན་ཏན་གྱིས་བློ་སྦྱངས་ཐུན་བརྒྱད་མ་མཛད། ལྕེ་སྒོམ་དང་། རྣལ་འབྱོར་པ། དགོན་པ་བ་གསུམ་གྱི་སློབ་མ་ཁ་རག་སྒོམ་ཆུང་པས་རྫོགས་ཆེན་དང་བཀའ་གདམས་ཀྱི་གདམས་ངག་གཅིག་དྲིལ་ཞལ་གདམས་ཨང་ཡིག་བདུན་ཅུ་པ་མཛད། སྣར་ཐང་པ་གྲེ་སྟོན་བདུད་རྩི་གྲགས་ཀྱིས་ལམ་མཆོག་གི་རྩ་བ་ཚིགས་སུ་བཅད་པ་མཛད། དེའི་སློབ་མ་མཆིམས་ཆེན་ནམ་མཁའ་གྲགས་ཀྱིས་དེའི་འགྲེལ་པ་ཁྲིད་ཡིག་ལམ་མཆོག་རིན་པོ་ཆེ་ཞེས་པ་མཛད། འདི་རྣམས་བཀའ་གདམས་གོང་མའི་གསུང་སྒོས་དེང་སང་ལུང་ཡོད་རིགས་རྣམས་སོ། ༈ །ཐམས་ཅད་མཁྱེན་པ་བསོད་ནམས་རྒྱ་མཚོ་ནི། པཎ་
ཆེན་དགེ་འདུན་རྒྱ་མཚོ་གཤེགས་མ་ཐག་བར་དོར་ཡེ་ཤེས་ཀྱི་སྐུས་དགའ་ལྡན། མཁའ་སྤྱོད། བདེ་བ་ཅན་སོགས་དག་པའི་ཞིང་མཐའ་ཀླས་སུ་གཤེགས་མཐར། ཟངས་མདོག་དཔལ་རིར་ཕེབས་པ་ན། དེར་དུས་གསུམ་ཀུན་མཁྱེན་པདྨ་འབྱུང་གནས་ཉིད་གཡས་སུ་ཇོ་བོ། གཡོན་དུ་ས་པཎ། མདུན་དུ་རྗེ་བླ་མ་བཞུགས་པ་རྣམས་མཇལ། སློབ་དཔོན་ཆེན་པོས་གསུང་གིས་བསྐུལ་ནས་སླར་འདོད་ཁམས་དབང་མོས་ཞབས་འབྲིང་པ་མཛད་དེ་བོད་ཡུལ་དུ་ཕེབས་ནས། སྐྱིད་ཤོད་སྟོད་ལུང་མདའ་རྩེ་དགའ་ཁང་གསར་གོང་ཞེས་བྱ་བར། ལོ་ཙཱ་བ་རྨ་རིན་ཆེན་མཆོག་གི་གདུང་ལས། ཡབ་སྡེ་པ་རྣམ་རྒྱལ་གྲགས་པ་དང་། ཡུམ་སྡེ་སྲིད་ཕག་མོ་གྲུ་པའི་དཀོན་གཉེར་དཔོན་སྔགས་རྙིང་མའི་རིག་སྔགས་འཆང་བའི་དབང་ཕྱུག་ཀུན་བཟང་རྩེ་བའི་སྲས་མོ་དཔལ་འཛོམ་བུ་ཁྲིད་ཀྱི་སྲས་སུ་རབ་བྱུང་དགུ་པའི་ཆུ་ཡོས་ལ་ངོ་མཚར་བའི་ལྟས་དང་བཅས་ཏེ་བལྟམས། རིང་པོར་མ་ལོན་པར་ཙོང་ཁ་པ་མཁྱེན་ཅེས་གསུངས་པ་དང་། ཡི་དམ་ཆོས་སྐྱོང་གི་ཞལ་གཟིགས་པ་སོགས་ངོ་མཚར་བ་བྱུང་། མེ་རྟ་ལོར་དཔལ་ལྡན་འབྲས་སྤུངས་སུ་གདན་དྲངས། དཔོན་སློབ་རིན་པོ་ཆེ་བསོད་ནམས་གྲགས་པ་ལས་དགེ་བསྙེན་གྱི་སྡོམ་པ་བཞེས། མཚན་བསོད་ནམས་རྒྱ་མཚོ་དཔལ་བཟང་པོ་བསྟན་པའི་ཉི་མ་
ཕྱོགས་ཐམས་ཅད་ལས་རྣམ་པར་རྒྱལ་བ་ཞེས་གསོལ། ས་བྱ་ལོར་མཁན་པོ་སྔ་མ་ལས་དགེ་ཚུལ་བཞེས་ཤིང་དབང་ལུང་མན་ངག་གི་རིགས་མང་དུ་གསན། དྲག་པོའི་ལས་སྦྱོར་ཀྱང་མཛད། ཤིང་བྱི་ལོར་དགའ་ལྡན་ཁྲི་ཟུར་དགེ་ལེགས་དཔལ་བཟང་ལས་བསྙེན་པར་རྫོགས། ལྷ་ས་བར་ཁང་ནས་མངའ་བདག་གི་གཏེར་ཞབས་ཤོག་དྲིལ་ལྔ་གཏེར་ནས་བཞེས། ས་འབྲུག་ལོར་ཕན་བདེ་ལེགས་བཤད་གླིང་པ་འཛུགས་པར་གནང་། མེ་བྱར་བྱང་ཕྱོགས་སུ་ཆིབས་བསྐྱོད་ནས་ཨལ་ཐན་ཆོས་ཀྱི་རྒྱལ་པོའི་དབུ་བླར་གྱུར་ཅིང་། དགོན་སྡེ་དུ་མའང་བཏབ། ཏཱ་ལའི་བླ་མ་བཛྲ་དྷ་ར་ཞེས་ཁྱབ་བདག་རྡོ་རྗེ་འཆང་གི་ལས་ཀ་ཕུལ། སོག་པོ་རྣམས་མི་ཤི་བ་ན་ཤ་ཁྲག་གི་མཆོད་སྦྱིན་བྱེད་པའི་སྲོལ་ངན་བསྣུབས་པ་སོགས་བསྟན་འགྲོའི་དོན་རྒྱ་ཆེར་མཛད། མཐར་དགུང་ལོ་ཞེ་དྲུག་པར་གཤེགས། ལམ་རིམ་གྱི་ཁྲིད་གསེར་ཞུན་སོགས་པུསྟི་གཅིག་ཙམ་ཡོད་ཅིང་ཐུགས་དམ་ཉམས་བཞེས་མགོན་པོ་ཞལ་དང་། རྙིང་ལུགས་ཤས་ཆེ་བར་གནང་། ༈ །བཞི་པ་ཡོན་ཏན་རྒྱ་མཚོ་ནི། ཆེན་པོ་ཧོར་གྱི་ཡུལ་དུ་ཇིང་གིར་གནམ་གྱི་རྒྱལ་པོའི་རིགས་ལས། ཡབ་སེ་ཆེན་ཆོས་ཁུར་དང་། ཡུམ་བྷ་ཧང་ཛུལ་གཉིས་ཀྱི་སྲས་སུ་ས་གླང་ཧོར་ཟླ་དང་པོའི་ཚེས་གཅིག་ལ་ངོ་མཚར་བའི་ལྟས་དང་བཅས་ཏེ་བལྟམས། སྔོན་
གནས་རྗེས་དྲན་གྱི་གསུང་སོགས་སྩལ། ཆུ་ཡོས་ལ་དབུས་ཕྱོགས་སུ་ཆིབས་ཁ་བསྒྱུར། དགའ་ལྡན་ཁྲི་ཟུར་སངས་རྒྱས་རིན་ཆེན་ལས་དགེ་ཚུལ་བཞེས། དྲག་པོ་མངོན་སྤྱོད་ལས་མང་དུ་མཛད་ཅིང་། མཐའ་དམག་བཟློག །ཨོ་རྒྱན་པདྨ་ཡིན་བྱས་ན་ཁ་ཆེས། པད་འདྲ་པད་འདྲ་ཙམ་ཡིན་བྱས་ན་ཆོག་པ་ཡོད་ཅེས་གསུངས། མཚན་མཐུ་སྟོབས་རྒྱ་མཚོར་བསྒྱུར། ཉེར་དྲུག་པར་པཎ་ཆེན་བློ་བཟང་ཆོས་རྒྱན་ལས་བསྙེན་པར་རྫོགས། གསན་བསམ་རགས་རིམ་མཛད། འོན་ཀྱང་ཉེར་བརྒྱད་པ་མེ་འབྲུག་ལོར་གཤེགས་པས་ཐོས་བསམ་རྒྱ་ཆེར་གནང་རྒྱུ་མ་བྱུང་། སྐུ་གདུང་ཞུགས་ལ་ཕུལ་བས་ཐུགས་ལྗགས་སྤྱན་གསུམ་དང་རིང་བསྲེལ་མང་དུ་བྱོན། ༈ །ལྔ་པ་བློ་བཟང་རྒྱ་མཚོ་ནི། ཡར་ལུང་འཕྱོང་རྒྱས་སུ་ཟ་ཧོར་གྱི་རིགས་ལས། ཡབ་མི་དབང་བདུད་འདུལ་རབ་བརྟན་དང་། ཡུམ་ཡར་འབྲོག་ཁྲི་དབོན་གྱི་སྲས་མོ་ཀུན་དགའ་ལྷ་མཛེས་ཀྱི་སྲས་སུ་མེ་སྦྲུལ་ལོར་འཁྲུངས། སྦྲུལ་ལོའི་མཇུག་ཏུ་སྣ་ནམ་རྡོ་རྗེ་བདུད་འཇོམས་ཀྱི་རྣམ་འཕྲུལ་བྱང་པ་རིག་འཛིན་ཆེན་པོར་ཚེ་སྒྲུབ་ལྕགས་སྡོང་མ་སོགས་གསན། ཇོ་བོ་ཆེན་པོ་དང་རྒྱལ་བ་ཙོང་ཁ་པ་ཞལ་གཟིགས། ཆུ་ཁྱི་ལོར་འབྲས་སྤུངས་སུ་གདན་དྲངས། པཎ་ཆེན་བློ་བཟང་ཆོས་རྒྱན་ལས་གཙུག་ཕུད་བཞེས། མཚན་བློ་བཟང་རྒྱ་
མཚོར་གསོལ། སློབ་དཔོན་རིན་པོ་ཆེས་རྔོག་ལོའི་སྤྲུལ་པར་ལུང་བསྟན་པ་གླིང་སྨད་པ་དཀོན་མཆོག་ཆོས་འཕེལ་བསྟེན་ནས་བསྡུས་ཚད་ནས་བཟུང་། པོད་ཆེན་རྣམས་ལ་ཐུགས་གཉེར་མཛད་པས་ཚེགས་མེད་དུ་མཁྱེན། པཎ་ཆེན་རིན་པོ་ཆེ་ལས་དབང་ལུང་མན་ངག་མང་དུ་གསན། སྨོན་འགྲོ་པཎྜི་ཏ་ཡབ་སྲས་ལས་སྙན་ངག་དང་། སྒྲ། སྡེབ་སྦྱོར་སོགས། མངོན་བརྗོད་སོགས་དང་། ཟླུམ་པོ་ནས་དང་། ཟུར་ཆེན་ལས་སྐར་ནག་དབྱངས་འཆར་རྩིས་སོགས་གསན་པས་བཅུ་ཕྲག་རིག་པའི་མ་ཧཱ་པཎྜི་ཏ་ཆེན་པོར་གྱུར། དགུང་ལོ་ཉེར་གཉིས་པར་པཎ་ཆེན་རིན་པོ་ཆེར་བླ་ཆེན་གྱི་སྡོམ་རྒྱུན་ལས་བསྙེན་པར་རྫོགས། མཚན་ངག་གི་དབང་ཕྱུག་ཅེས་གསར་དུ་བསྣན། བར་སྐབས་སུ་དྲག་པོ་མངོན་སྤྱོད་ཀྱི་ལས་མཛད་པས་རྟགས་ཀྱང་མངོན་དུ་གྱུར། དགུང་ལོ་ཉེར་ལྔ་པར་གུ་ཤྲཱི་བསྟན་འཛིན་ཆོས་རྒྱལ་གྱིས་བོད་ཁྲི་སྐོར་བཅུ་གསུམ་མཆོད་གཞིས་སུ་ཕུལ། དམར་པོ་རི་ལ་ཕོ་བྲང་ཆེན་པོ་པོ་ཏ་ལ་བཞེངས། འཇམ་དབྱངས་གོང་མ་ཆེན་པོས་ཡུན་རིང་ནས་གསོལ་བ་བཏབ་པ་བཞིན་ཕེབས་ཏེ། རྡོ་རྗེ་འཆང་ཆེན་པོའི་མཚན་དང་ལས་ཀ་ཕུལ། ཕ་བོང་ཁ་པ་ཨེ་པ་འཁོན་སྟོན་དཔལ་འབྱོར་ལྷུན་གྲུབ། ཁྱབ་བདག་བཀའ་འགྱུར་བ། ཞུ་ལུ་རི་སྦུག་དབུ་མཛད་བསོད་ནམས་མཆོག་གྲུབ། ཟུར་ཆེན་
ཆོས་དབྱིངས་རང་གྲོལ། སྨན་ལུང་པ་བློ་མཆོག་རྡོ་རྗེ། ཆོས་རྒྱལ་གཏེར་བདག་གླིང་པ་སོགས་ལས་གསར་རྙིང་གི་ཆོས་ཚུལ་རྒྱ་མཚོ་ལྟ་བུ་བཞེས། དབུས་གཙང་ཁམས་སོག་གི་ཡུལ་དུ་ཆོས་སྡེ་གསར་བཞེངས་གྲངས་ཀྱིས་མི་ལོངས། རབ་བྱུང་བསྙེན་རྫོགས་ཀྱི་དགེ་སློང་ནི་ས་ཆེན་པོའི་རྡུལ་ཙམ་དང་། ཀ་པོད་བཞིའི་འགྲེལ་པས་མཚོན་གསུང་འབུམ་ཕྱི་ནང་པོད་ཆེན་སུམ་ཅུ་ཐལ་བ་སོགས་དང་། རྡོ་རྗེ་ཕྲེང་བ་སོགས་དང་རྒྱུད་སྡེ་བཞིའི་དབང་ལུང་འཆད་སྤེལ་གནང་བ་སོགས་རྒྱ་གར་གྱི་ཆུ་བོ་གངྒཱ་ནས་ཤར་ཕྱོགས་ཏོང་ཀུའི་ཡུལ་ཚུན་ཆད་ཀྱི་བླ་ཆེན་དང་མི་ཆེན་ཕལ་མོ་ཆེ་ཞལ་སློབ་ཏུ་མ་གྱུར་པ་མེད་པ་ལྟ་བུར་སྣང་། གསར་ཕྱོགས་ལ་འཇམ་དབྱངས་མཁྱེན་བརྩེ་དང་། རྙིང་ལུགས་ལ་བྱང་པ་བཀྲས་སྟོབས་ཀྱི་ལུགས་ཁོ་ནར་ཐུགས་གཙིས་སུ་མཛད། འཁོར་ལོ་གསུམ་གྱི་ཕྱག་རྗེས་ཕྱི་ནང་གསང་གསུམ་གྱི་མཛད་པ་དང་རྣམ་ཐར་བསམ་གྱིས་མི་ཁྱབ། དགུང་ལོ་༦༦ཧོར་ཟླ་གཉིས་པའི་ཚེས་༢༥ལ་གཤེགས། གསེར་གདུང་ཆེན་མོ་དང་། ཚོགས་མཆོད་ཆེན་པོ་སོགས་དགོངས་རྫོགས་རྒྱ་ཆེར་བསྒྲུབས་སོ།། །།༅། །འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པས་པུ་སྟི་བརྒྱའི་ཚིག་དང་དོན་བཅས་ཐུགས་ལ་བཟུང་ནས་འཆད་པའི་རྐང་གྲངས་ལ། ཤེར་ཕྱིན་སྟོང་ཕྲག་ཉི་ཤུ་ལྔ་པ༡།
འཕགས་པ་བརྒྱད་སྟོང་པ ༢། མདོ་སྡུད་པ ༣། རྡོ་རྗེ་གཅོད་པ། ཤེར་སྙིང་། མདོ་སྡེ༦། དགོངས་པ་ངེས་འགྲེལ༧། སཱ་ལུ་ལྗང་པའི་མདོར། རྟེན་འབྲེལ་གྱི་མདོ༩། བཟང་སྤྱོད་༡༠། སོ་སོར་ཐར་པའི་མདོ་༡༡། ས་བཅུ་པའི་མདོ ༡༢། ཆེད་དུ་བརྗོད་པའི་ཚོམས༡༣། བྱམས་ཆོས་སྡེ་ལྔ༡༨། མདོ་ཀུན་བཏུས༡༩། རིག་ཚོགས་དྲུག ༢༥། །བཤེས་སྤྲིངས ༢༦། ཆོས་དབྱིངས་བསྟོད་པ༢༧། འཇིག་རྟེན་ལས་འདས་པར་བསྟོད་པ༢༨། ཤེས་རབ་བརྒྱ་པ ༢༩། སྐྱེ་བོ་གསོ་ཐིགས༣༠། མདོར་བྱས༣༡། མདོ་བསྲེ ༣༢། དབུ་མ་བཞི་བརྒྱ་༣༣པ། ཡེ་ཤེས་སྙིང་པོ་ཀུན་ལས་བཏུས་པ༣༤ ། དབུ་མ་འཁྲུལ་འཇོམས༣༥། ལག་ཚད་མ ༣༦། ཆ་ཤས་ཡན་ལག་གི་རབ་བྱེད༣༧། སྐྱེས་རབས་སོ་བཞི་པ ༣༨། སྨོན་ལམ་བདུན་ཅུ་པ ༣༩། བླ་མ་ལྔ་བཅུ་པ༤༠། རྣམ་གཞག་རིམ་པ༤༡། དབུ་མ་སྙིང་པོ༤༢། རྟོག་གེ་འབར་བ༤ ༣། རྡོ་རྗེ་སེམས་དཔའི་སྒྲུབ་ཐབས ༤། རྩ་ཤེའི་འགྲེལ་པ་ཚིག་གསལ༤༥། དབུ་མ་འཇུག་པ༤༦། དེའི་རང་འགྲེལ༤ ༧། སྤྱོད་འཇུག༤༨ །བསླབ་བཏུས༤༩། དབུ་མའི་དེ་ཁོ་ན་ཉིད་ལ་འཇུག་པ(༠། བདེན་གཉིས་རྣམ་འབྱེད ༥༡། དབུ་མ་རྒྱན(༢། སྡོམ་པ་ཉི་ཤུ་པ། ༣། འགྲེལ་པ་དོན་གསལ།༤། དབུ་མ་སྣང་བ།༥། སྒོམ་རིམ་དང་
པོ༥༦། བར་པ༥༧། ཐ་མ༥༨། ལམ་སྒྲོན།༩། སྤྱོད་བསྡུས་སྒྲོན་མེ༦༠། བདེན་གཉིས་འཇུག་པ༦༡། དབུ་མའི་མན་ངག༦༢། །ཁྱད་པར་འཕགས་བསྟོད༦༣། ལྷ་ལས་ཕུལ་བྱུང་གི་བསྟོད་པ༦༤། ཐེག་ཆེན་ཀུན་བཏུས༦།། མངོན་པ་ཀུན་བཏུས༦༦། བྱང་ས༧༧། ཚུལ་ཁྲིམས་ཀྱི་ལེའུ པར། མངོན་པ་མཛོད ༦༩། ཕུང་པོ་ལྔའི་རབ་བྱེད ༧༠། རྣམ་བཤད་རིག་པ༧༡། ལམ་སྒྲུབ་པའི་རབ་བྱེད ༧༢། ཉི་ཤུ་པ༧༣། སུམ་ཅུ་པ༧༤ ། རྟེན་འབྲེལ་སྙིང་པོའི་མདོ་འགྲེལ༧༥། ཚོགས་ཀྱི་གཏམ༧༦། ཡོན་ཏན་བདུན་བརྗོད་པའི་གཏམ༧༧། སློབ་སྤྲིང་༧༨། ཡོན་ཏན་མཐའ་ཡས་༧༩པར་བསྟོད་པ། བརྒྱད་སྟོང་དོན་བསྡུས༨༠། ཚད་མ་ཀུན་བཏུས༨༡། དམིགས་བརྟག་རྩ་འགྲེལ༨༢། རིགས་པ་ལ་འཇུག་པའི་སྒོར་༨༣། རྣམ་འགྲེལ༨ང་། རྣམ་ངེས་༨༥། རིགས་ཐིགས༨༦། གཏན་ཚིགས་ཐིགས་པ ༨༧། འབྲེལ་བ་བརྟག་པརར། རྒྱུད་གཞན་གྲུབ་པར༩། རྩོད་རིག༩༠། །ཕྱི་དོན་གྲུབ་པ༩༡། རིགས་པ་ལ་སྦྱོར་བ༩༢། སྐད་ཅིག་མ་གྲུབ་པ༩༣། གཞན་སེལ་བརྟག་པ༩༤། ཤེར་ཕྱིན་མན་ངག༩༥ །ནང་གི་ཁྱབ་པ༩༦། འདུལ་བ་མདོ་རྩ༩༧། ཀརྨ་ཤ་ཏཾ༩༨། སུམ་བརྒྱ་པ༩༩། ཀཱ་རི་ཀཱ་༡༠༠རྣམས་སོ།། ༈ །།བཱི་མཱི་གུ་རུ་པཱཏྟཱ་ཏི། འདིར་ཐམས་
ཅད་མཁྱེན་པ་པུཎྜ་རཱི་ཀའི་ལབྡྷ་ཝརྞྞ་ལས། མདོ་མང་གི་སྐོར། རྔོག་ལོ་ཆེན་པོའི་སློབ་མ་གྲོ་ལུང་པ་བློ་གྲོས་འབྱུང་གནས་ཀྱིས། སྟེང་པ་ལོ་ཙཱ་བའི། ག་རོ་ཏ་ལོ་ཙཱ་བ་ཚུལ་ཁྲིམས་འབྱུང་གནས་རྒྱ་གར་དུ་བརྫངས་པས། པུཎྱེ་ཤྲཱི་མི་ཏྲ་ལ་མདོ་ལུང་བཞུགས་པར་ཐོས་ནས་དེར་ཞུས། ཡང་ཁ་ཆེ་པཎ་ཆེན་ནས་དཔྱལ་ཆོས་བཟང་བརྒྱུད་ནས་མདོ་ཤབ་སྟོད་གཡུ་དགའ་ལྡན་དུ་རོང་པ་ཤེས་རབ་སེང་གེ་ལ་ཤབ་པ་བག་སྟོན་གཞོན་ནུ་ཚུལ་ཁྲིམས་ཀྱིས་ཞུས། པདྨོ་ཅན་པ་དང་མཁན་པོ་གཞོན་ཡེས་ཀྱི་བར་དང་། དེ་དང་རོང་པ་ཤེར་སེང་གི་བར་དུ་ལུང་ལ་ཧོར་སྟོང་ཡོད་ཟེར་བ་གསན་ནས། ལུང་རྒྱུན་དག་པར་བྱ་བའི་ཕྱིར། ས་སྐྱ་ཡང་དགོན་པ་ཞང་ཀུན་དགའ་འོད་ཟེར་ལ་པཎ་ཆེན་ནས་གསན་པའི་ལུང་རྒྱུན་དག་པོ་ཡོད་ཟེར་ནས་གསན། འདི་ལ་པཎ་ཆེན་གྱིས་སུ་ལ་གསན་དང་། པཎ་ཆེན་ལ་དཔྱལ་ཆོས་བཟང་གིས་ཁྲོ་ཕུར་གསན་པའི་དུས་སུ། ལྷོ་པ་ཐམས་ཅད་མཁྱེན་པས་ཀྱང་གསན་ཟེར། ཏིག་པ་མི་འདུག་པ་དང་། ཆོས་ཀྱི་རྒྱལ་པོ་འཕགས་པའི་ལུང་གིས་མདོ་མང་གི་ལུང་རྒྱུན་དག་པ་ཞིག་འཚོལ་གསུངས་ནས་བཙལ་བས། ཤངས་ན་མངའ་བདག་ཉང་རལ་ནས་བརྒྱུད་བའི་ལུང་ཡོད་ཟེར་ནས་གསན་དུ་བྱོན་པས། ཕྱིས་སྟེང་ལོ་བརྒྱུད་པ་རྩད་ཆོད། དེ་ཡང་གསན་པས་ལུང་འདི་ལ་བག་
སྟོན་གཞོན་ནུ་ཚུལ་ཁྲིམས་དྲིན་ཆེའོ། །མ་བརྟགས་ཉམས་དགར་རྟེན་ཅིང་འབྲེལ་བར་འབྱུང་། །དཔྱད་ན་དམིགས་པ་མེད་པར་ཉེར་ཞི་བའི། །དུས་གསུམ་རྒྱལ་བའི་ཡུམ་ལ༔ ཡང་། པཎྜི་ཏ་སྨྲི་ཏིས་བསྒྱུར་བ་མན་ལ་གསར་མ་ཞེས་དང་། ལོ་ཆེན་རིན་ཆེན་བཟང་པོས་བསྒྱུར་བ་མན་ལ་གསར་མའོ་ཞེས་ཟེར་མཁན་གཉིས་ལས། པཎ་ལོ་གཉིས་ཀྱང་ལོ་ཆེན་སྔ་བས་ན། དེར་མཚམས་འཛིན་པ་འཐད། དེ་ཡང་གསང་སྔགས་བསྒྱུར་ཚད་དེ་ལྟར་བཞག་པ་ནི་མིན་ཏེ། བསྟན་པ་སྔ་དར་གྱི་སྐབས་བསམ་ཡས་སུ་དེ་ཉིད་འདུས་པ་དང་། རྣམ་སྣང་མངོན་བྱང་དང་། བསམ་གཏན་ཕྱི་མ་སོགས་དར། དེ་དག་རྙིང་མར་སུ་ཡང་མི་འདོད་པས་སོ། །འོ་ན་གང་གིས་བཞག་ཅེ་ན། དེ་དུས་བཀའ་བླ་མེད་ཀྱི་བཀའ་སྒྲ་ཇི་བཞིན་དུ་སྤྱད་དོགས་བསྒྱུར་བར་མ་གནང་ལ། སློབ་དཔོན་པདྨ་སོགས་ཀྱིས་པཎྜི་ཏ་མཛད། བཻ་རོ་ཙ་ན་སོགས་སྐལ་ལྡན་རྣམས་ཀྱིས་གསང་སྟེ་བསྒྱུར་བར་དོན་ལ་རྙིང་མ། ལོ་ཆེན་མན་གྱིས་བླ་མེད་འགྱུར་བར་དོན་ལ་གསར་མ་ཞེས་བྱའོ། །དེ་དུས་ཏན་སྡེ་བཅོ་བརྒྱད་སོགས་བསྒྱུར་བའི་ཐོག་མར་གསང་འདུས། ཟླ་གསང་ཐིག་ལེ། སངས་རྒྱས་མཉམ་སྦྱོར་གསུམ་བསྒྱུར་བ་ཇི་ལྟར་དྲངས་སྙམ་ན། རྒྱུད་དེ་དག་གཏན་ལ་འབེབས་ལུགས་ཀྱི་ཁྱད་པར་གསར་རྙིང་གི་
འགྲོས་གཉིས་རེ་ཡོད། ཅེས་སོ། ༈ །རྩ་ཤེའི་འགྲེལ་པ་ག་ལས་འཇིགས་མེད་ཅེས་པ་ཀླུ་སྒྲུབ་ཕྱི་མའི་ཡིན་ཏེ། རྒྱུ་མཚན་ཟླ་གྲགས་ཀྱི་ཚིག་གསལ་དུ་ལུང་མ་དྲངས་པས་སོ། །ཞེས་གསུངས། །གཤིན་རྗེ་གཤེད་ཀྱི་གྲུབ་ཐོབ་རྟ་མཆོག་འཛིན་པ་ཞེས་བྱ་བ་ཨོ་རྒྱན་དུ་བྱོན། ཊཱ་ཀི་མ་རྣམས་ལ་སྡིགས་མཛུབ་གཏད་པས་བརྒྱལ། བརྒྱལ་སངས་ཙ་ན། མིང་པོ་ཅི་འདོད་པ་ཁྱེར་ཅིག་ཟེར་ནས་གནང་བ་བྱིན། དེས་རྩ་བའི་རྒྱུད་སྒྱུ་འཕྲུལ་དྲྭ་བ་ཁྲི་དྲུག་སྟོང་པ། བཤད་པའི་རྒྱུད་ཆོ་ག་འདུས་པ། རྒྱུད་ཕྱི་མ་མཚན་བརྗོད། གཤིན་རྗེ་ལེའུ་བཅོ་བརྒྱད་པ་བཞི་དྲངས་ཏེ་འདི་འཇམ་དཔལ་བཤེས་གཉེན་ནོ། །དེས་འཇམ་དཔལ་གྱི་དཀྱིལ་འཁོར་དབང་བསྐུར་པའི་མཚན་སྒེག་པའི་རྡོ་རྗེ། མུ་སྟེགས་བཏུལ་བའི་མཚན་སྣ་ཚོགས་གཟུགས། གཞན་བྱང་ཆུབ་མཆོག་གི་སྐལ་བ་དང་ལྡན་པ། འཁྲུངས་པ་ལས་ནོར་བུ་གླིང་པ་ཞེས་མཚན་བཞི་དང་ལྡན་པ་དེ་ལ་གནང་། ཞེས་བཤད་དོ། ༈ །རྩ་རྒྱུད་བརྟག་གཉིས་ལ་ལེའུ་ལྔ་ཡན་ཆད་ལོ་ཙཱ་བས་འགྲེལ་པ་མཛད། དེ་མན་ཆད་རྔོག་སྟོན་ཆེན་པོས་གསུང་རྒྱུན་བསྣན་ནས་མཛད་པའི་རིན་ཆེན་རྒྱན་འདྲའོ། །གུར་ལོ་ཙཱ་བ་ཆེན་པོས་སྲོག་ཤིང་། མདོ་སྡེའི་འགྲེལ་ཆེན་དང་། སླར་དེ་ལས་བསྡུས་པ་སོགས་མཛད། སམྦུ་ཊར་རྔོག་ཞེ་སྡང་རྡོ་རྗེས་འགྲེལ་པ་
དོན་གསལ་སྒྲོན་མ་དང་། གཞུང་གསལ་སྒྲོན་མ་གཉིས་མཛད། གུར་བརྟག་སཾ་གསུམ། གདན་བཞི། མ་ཧཱ་མཱ་ཡཱ། གསང་འདུས། སངས་རྒྱས་ཐོད་པ་བདུན ༈ སར་ཧ་ཆེ་འབྲིང་ཆུང་གསུམ་སྟེ། ལི་ཙཱ་བ་ཆེན་པོའི་སྐྱེ་བ་བྱང་སེམས་བློ་གྲོས་རིན་ཆེན་ནམ། བྲམ་ཟེར་ཆེན་པོ་སྒྲ་གཅན་འཛིན་བཟང་པོ་ཞེས་སློབ་དཔོན་ཀླུ་སྒྲུབ་ཀྱི་སློབ་དཔོན་དང་། བར་པ་སློབ་དཔོན་ཀླུ་སྒྲུབ་ཀྱི་སློབ་མ་ཤ་བ་རི་དབང་ཕྱུག་དང་། ཐ་མ་མེ་ཏྲི་པའི་དངོས་སློབ་ར་མ་ཕ་ལར་གྲགས་པ་དེའོ། ༈ །རང་ལུགས་ལ་དུས་འཁོར་གྱི་རྫོགས་རིམ་རྒྱས་པ་ཨོ་རྒྱན་བསྙེན་སྒྲུབ། འབྲིང་པོ་པཎ་ཆེན་ལུགས་ཀྱི་བསྙེན་སྒྲུབ་གསར་མ་ཞེས་དཔེ་མེད་འཚོས་མཛད་པ། བསྡུས་པ་པཎ་ཆེན་ནགས་རིན་ལ་ཤ་བ་རིས་གནང་བའི་ལྕེ་རྩེ་རྐན་སྦྱར་རྣམས་སོ། ༈ །དཔལ་འབྲུག་པའི་སྒྲུབ་ཐབས་སྐོར་ལྔ་ཞེས་པ་བདེ་མཆོག་དངོས་གྲུབ་སྐོར་ཞེས་པ་ནཱ་རོ་ནས་མར་པར་བརྒྱུད་པ། ཕག་མོ་བྱིན་རླབས་ཀྱི་སྐོར་ཞེས་པ་ཞལ་གཉིས་མ་མེ་ཏྲི་ནས་མར་པ་དང་། ཏི་ཕུ་པ་ནས་རས་ཆུང་ལ་བརྒྱུད་པ། གཏུམ་པོ་ནུས་མཐུའི་སྐོར་ཞེས་གསང་བ་མངོན་བསྟན་གྱི་རྒྱུད་ལ་བརྟེན་ནས་རས་ཆུང་པས་བླ་མ་ཝ་ལ་ཙཎྜ་ལ་ཞུས་པ། ལྷན་སྐྱེས་ཀུ་སཱ་ལིའི་སྐོར་ཞེས་པ་རྡོ་རྗེ་གདན་པ་ཆུང་བ་དང་ཙ་མི་སངས་རྒྱས་གྲགས་ལས་དཔལ་གྲྭ་ལོ་ཙཱ་བ་ཀུ་
མཱ་ར་ཤྲཱིས་གསན་པ་རྣམས་སོ། ༈ །ཡང་བྱ་རོག་བསྟན་སྲུང་མའི་སྐོར་གྱི་བརྒྱུད་པའང་སྔར་དང་འདྲ། ༈ །དཔལ་འབྲུག་པའི་ཉམས་ལེན་འཕྲལ་དགོས་ཀྱི་སྐོར་རྡོ་རྗེ་སེམས་དཔའི་ཉེས་ལྟུང་འཁྲུད་པའི་ཆོ་ག་རྒྱལ་པོ་ཛལས་བརྒྱུད་པ་མར་པའི་འགྱུར། ཀཾ་ཀ་ནིའི་ཆོ་ག་ངན་སོང་རྒྱུན་གཅོད་པ་ཆོས་རྒྱལ་ཛལས་བརྒྱུད་པ། འཁོར་ལོ་སྡོམ་པའི་རྩ་རྒྱུད་འབུམ་པ་དང་། བཤད་རྒྱུད་འོད་ཟེར་དྲྭ་བ་ལ་བརྟེན་པའི་ཚེ་སྒྲུབ་གྲུབ་པའི་རྒྱལ་མོ་ལས་བརྒྱུད་པ་ཚེ་དཔག་ཏུ་མེད་པའི་ཆོ་ག་འཆི་མེད་ཚེ་སྒྲུབ་པའི་ཆོས། ཐུགས་རྗེ་ཆེན་པོས་རྒྱུད་བྱིན་གྱིས་བརླབས་པའི་ཆོས་དགེ་སློང་མ་དཔལ་མོ་ལས་བརྒྱུད་པ་བཞིའོ། ༈ །དཔལ་འབྲུག་པའི་གདམས་པ་ཕྱག་རྒྱ་ཆེན་པོ་སྐོར་གསུམ་ཞེས་པ། བཤད་པ་ཚིག །གདམས་ངག་ཉམས་ལེན། རྟོགས་པ་བྱིན་རླབས་ཀྱི་སྐོར་རོ། །དང་པོ་ནི། གྲུབ་པ་སྡེ་བདུན། སྙིང་པོ་སྐོར་དྲུག །ཡིད་ལ་མི་བྱེད་པའི་ཆོས་སྐོར་ཉེར་ལྔ་རྗེས་འབྲངས་དང་བཅས་པའོ། །དང་པོ་ནི། དཔལ་གསང་བ་གྲུབ་པ་ཨོ་རྒྱན་གྱི་སློབ་དཔོན་པདྨ་བཛྲ་གྱིས་མཛད་པ། ༡ ཐབས་དང་ཤེས་རབ་གཏན་ལ་དབབ་པ་གྲུབ་པ། སློབ་དཔོན་ཡན་ལག་མེད་པའི་རྡོ་རྗེའམ་པཎྜི་ཏ་བདུད་རྩི་དགའ་བའི་འབྱུང་གནས་ཞེས་པས་མཛད་པ། ༢ དེའི་དོན་བསྡུས་ལྷམ་མཁན་གྱི་རིགས་ལས་གྲུབ་པ་
བརྙེས་པ་ཙ་མ་རཱི་པས་མཛད་པ། ཡེ་ཤེས་གྲུབ་པ་ཨིནྡྲ་བྷུ་ཏི་འབྲིང་པོས་མཛད་པ། ༣ གཉིས་མེད་གྲུབ་པ་ལྕམ་ལེགས་སྨིན་ཀཱ་རས་མཛད་པ། ༤ ལྷན་ཅིག་སྐྱེས་གྲུབ་གཉིས་ཀྱི་སྔ་མ་ཌོམྦྷི་ཧེ་རུ་ཀ་དང་། ཕྱི་མ་ཨིནྡྲ་བྷཱུ་ཏི་ཆུང་བ་རབ་ཏུ་བྱུང་ནས་མཚན་ལྭ་བ་པར་གྲགས་པས་མཛད་པ། དེའི་འགྲེལ་པ་དགེ་སློང་མ་དཔལ་མོས་མཛད་པ། འདི་གཉིས་མཚན་མཐུན་པས་གཅིག་ཏུ་མཛད་། ༥ དངོས་པོ་གསལ་བའི་དེ་ཁོ་ན་ཉིད་གྲུབ་པ་རང་བྱུང་གི་རྣལ་འབྱོར་མ་ཙི་ཏོས་མཛད་པ། དེ་ཁོ་ན་ཉིད་གྲུབ་པ་ར་ལི་པས་མཛད་པ་གཉིས་མཚན་མཐུན་པས་གཅིག་ཏུ་བགྲངས། ༦ སིདྡྷི་ཀཱས་གྲུབ་དཱ་རི་ཀས་མཛད་པ་རྣམས་སོ། །གཉིས་པ་ནི། བྲམ་ཟེ་ས་ར་ཧ་ཆེན་པོའི་དོ་ཧ་མཛོད། རྩེ་མོ་དོ་ཧ། བདག་བྱིན་རླབས། སློབ་དཔོན་ཀླུ་སྒྲུབ་ཀྱི་ཕྱག་རྒྱ་བཞི་པ། ཨཱརླ་དེ་བའི་སེམས་ཀྱི་སྒྲིབ་སྦྱོང་། ཏོག་ཙེ་པའི་བསམ་གྱིས་མི་ཁྱབ་པ་རྣམས་ཡིན་ལ། རྒྱལ་པོ་དོ་ཧ། བཙུན་མོ་དོ་ཧ། མཛོད་ཆུང་བ། ཀ་ཀའི་དོ་ཧ་རྣམས་དང་པོའི་རྗེས་འབྲངས། བྱང་ཆུབ་སེམས་འགྲེལ། སེམས་ཀྱི་རྡོ་རྗེའི་བསྟོད་པ་སོགས་བཞི་པའི་རྗེས་འབྲངས་སོ། །དོ་ཧའི་འགྲེལ་པ་གྲུབ་ཐོབ་གླིང་གིས་མཛད་པ་དང་། ཕྱིས་ཡིད་བཟང་རྩེ་པས་དོ་ཧ་སྦྱོར་དྲུག་ཏུ་བཀྲལ་ལོ། །གསུམ་པ་ནི། ཐུན་མོང་གྲུབ་
མཐའ་རིན་པོ་ཆེའི་ཕྲེང་བ། དེའི་དོན་སྔགས་དང་སྦྱར་བ་དོ་ཧ་ཏི། རྩོད་སྤོང་བདག་མེད་གསལ་བ། ཐབས་ཁྱད་དུ་གསོད་པ་བཟློག་ཕྱིར་ལྟ་བ་ངན་སེལ། ལྟ་བ་ངན་སེལ་གྱི་དྲན་པ། ལས་དང་པོའི་བྱ་བ་མདོར་བསྡུས་པ། སྔགས་ལམ་དབང་དང་འབྲེལ་བར་བསྟན་པ་དབང་ངེས་བསྟན། དགོས་པ་མདོར་བསྡུས་པ། དབང་གི་བྱ་བ་མདོར་བསྡུས་པ། དབང་རྣམ་དག །རྒྱས་གདབ་ཀྱི་དོན་ཕྱག་རྒྱ་ལྔ་པ། དགའ་གཅུགས་ལྔ་པ། མི་ཕྱེད་པ་ལྔ་པ། ཟུང་འཇུག་གི་དེ་ཉིད་ལྟ་བ་ཤན་འབྱེད་པ་དབུ་མ་དྲུག་པ། ལྷན་སྐྱེས་དྲུག་པ། ལྟ་བདེ་དང་ལྡན་པའི་ཟུང་འཇུག་བཤད་པ། ཐེག་ཆེན་ཉི་ཤུ་པ། །དེ་ཉིད་ཉི་ཤུ་པ། རབ་ཏུ་མི་གནས་པ་སྟོན་པ་བདེ་ཆེན་གསལ་བ་དང་། ཟུང་འཇུག་དངོས་བསྟན། ལྟ་བའི་གོ་རིམ་དཔེ་དང་སྦྱར་བ། རྨི་ལམ་ངེས་བསྟན། སྒྱུ་མ་ངེས་བསྟན། ཟབ་དོན་བསྡུ་བ་དེ་ཉིད་བཅུ་པ་དང་། དེ་ཉིད་རབ་ཏུ་བསྟན་པ། ཟབ་མོ་ཁྱད་པར་ཕྲ་མོ་སྟོན་པ་ལ་རབ་ཏུ་མི་གནས་པ་གསལ་བར་སྟོན་པ། མ་རྟོགས་པ་རྟོགས་པར་བྱེད་པ། ཚིགས་བཅད་ཕྱེད་པ་རྩ་འགྲེལ་རྣམས་མཻ་ཏྲི་པས་མཛད་པ། དེ་ཉིད་བཅུ་པ་ལ་ལྷན་སྐྱེས་རྡོ་རྗེས་འགྲེལ་པ་མཛད་པ་དང་། ཁོང་རང་གིས་སྦྱར་བའི་གཞུང་གནས་པ་བསྡུས་པ་གསུམ་ནི་རྗེས་འབྲང་ངོ་། །དེ་དག་ཀྱང་མངའ་བདག་མཻ་ཏྲི་པ་ལས་
བརྒྱུད་ནས་མར་པས་མི་ལར་གནང་བའོ། །ཕྱིས་བུ་སྟོན་རིན་པོ་ཆེ་ནས་བརྒྱུད་པར་སྣང་། གཉིས་པ་གཅིག་ཅར་བའི་ལམ་གཙོ་བོར་སྟོན་པ་ཐོག་བབས་ཞེས་ཕག་མོ་ཞལ་གཉིས་བརྡ་དབང་སོགས་ཀྱི་སྐོར། ཐོད་རྒལ་ལམ་གཙོ་བོར་སྟོན་པ་བསམ་གཏན་ཐུན་འཇོག །རིམ་སྐྱེས་པའི་ལམ་གཙོ་བོར་སྟོན་པ་རྟོགས་བརྗོད་གསེར་ཕྲེང་སྟེ་བརྒྱུད་པ་ནི་སྔ་མ་བཞིན་ནོ། །རྟོགས་པ་བྱིན་རླབས་ཀྱི་སྐོར་ནི། ལྷན་ཅིག་སྐྱེས་སྦྱོར་རྩ་འགྲེལ་ཏེ། འདིའི་རྩ་བ། བསྲེ་འཕོ་གཞུང་གི་སེམས་དངོས་པོའི་གནས་ལུགས་བསྟན་པ་ཁོ་ན་ཡིན། དེ་ལས་འཕྲོས་ནས་ཏིལླི་པས་ཚིགས་བཅད་གཅིག་མ་འདི་དང་། ནཱ་རོ་པས་གཉུག་མ་ཆིག་ཆོད་དུ་ཁྲིད་པ་ཞེས་བཤད་དེ་གཅིག་ཅར་བའི་ལམ། རྗེ་ཟླ་འོད་གཞོན་ནུས་ཚིགས་བཅད་རྐང་པ་གསུམ་པ་འདི་ཐོད་རྒལ། ཕག་གྲུ་དང་། ཆོས་རྗེས་ཚིགས་བཅད་གཉིས་རིམ་སྐྱེས་པའི་ལམ་སྟེ། ལྷན་ཅིག་སྐྱེས་སྦྱོར་སྔ་ཕྱི་བར་གསུམ་གྱི་ཐ་སྙད་མཛད། དེ་དོན་བསྒོམ་རིམ་བསྡུས་འབྲིང་རྒྱས་པས་བསྟན་པ་སྟེ་གཞི་གཏན་ལ་དབབ་པའི་སྐོར་རོ། །དེ་ལས་འཕྲོས་པ་ཕག་གྲུའི་ཞུས་ལེན་རྣལ་འབྱོར་བཞི་ནས་བརྩམས་ཏེ། ཆོས་རྗེ་དཔོན་སློབ་རྗེས་འབྲངས་དང་བཅས་པས་མཛད་པ་རྣམས་ཉམས་མྱོང་གི་སྤུ་རིས་འབྱེད་པའི་སྐོར། རྗེ་ཟླ་འོད་གཞོན་ནུས། བདག་གི་བླ་
མའི་བར་གྱི་ངོ་སྤྲོད་ཀྱི་ཡི་གེ་ཐམས་ཅད་ལ་རྗེས་ལམ་ཁྱེར་གྱི་སྐོར་ཞེས་རྣམ་པ་གསུམ་གྱིས་བསྡུས་སོ། །མདོ་རྒྱུད་ཐམས་ཅད་ཀྱི་མན་ངག་ཆེན་པོ། བཀའ་བརྒྱུད་རིན་པོ་ཆེའི་གཞུང་ལམ། རྗེ་བཙུན་ནཱ་རོ་པའི་ཆོས་དྲུག་གམ་ཁྱད་ཆོས་བསྲེ་འཕོ་གནད་ཀྱི་མཚམས་སྦྱོར་ཞེས་རྗེ་ནཱ་རོ་པའི་ཁྱད་ཆོས་རྒྱུད་ཐམས་ཅད་ཀྱི་རྡོ་རྗེའི་ཚིག་ལྟ་བའི་མིག་ལྟ་བུའི་གླེགས་བམ་ཡི་གེ་རགས་པ༤༠། ཕྲ་མོ་ཞེ་བརྒྱད་དེ། རྩ་བ་བསྣན་པས་༨༩ཏེ། དེ་ཐམས་ཅད་ཀྱི་རྩ་བ་ནི་བཀའ་ཡང་དག་པའི་ཚད་མའོ། །པུཎྜ་རཱི་ཀ་ཉིད་ཀྱིས་འགྲེལ་ཆེན་རྡོ་རྗེ་འཆང་གི་དགོངས་གསལ། ཁྲིད་ཡིག་རྡོ་རྗེ་ཐེག་པར་བགྲོད་པའི་ཤིང་རྟ་སོགས་མཛད་དོ། ༈ །དཔལ་འབྲུག་པའི་ཟབ་ཆོས་རོ་སྙོམས་ཀྱི་སྐོར་ནི། བརྟག་གཉིས་ལས། བཟློག་པའི་བསྒོམ་པ་འདི་དག་ནི། །སངས་རྒྱས་མུ་སྟེགས་ཀྱིས་མི་ཤེས། །ཞེས་གསུངས་པ་ལྟར་དཀོར་རྒྱས་འགྲེལ་ཀུ་མུ་ཏ། མཛོད་ཆེན་པོ་གསུམ་སྟེ། དེ་ཡང་གཏེར་མཛོད་བཀའ་རྒྱ་ཅན། ཡང་མཛོད་ཐུགས་ཀྱི་མེ་ལོང་། གསང་མཛོད་སྦས་པ་མིག་འབྱེད་གསུམ། དང་པོ་ལ་ཁྲིམས། ཁྲིད། ཞལ་གདམས་གསུམ། ༈ །དཔལ་འབྲུག་པའི་ཟབ་ཆོས་ལས་རྟེན་འབྲེལ་ཁོ་བོ་ལུགས་ཞེས་པ། འགྲོ་མགོན་དེ་ཉིད་གླིང་རས་དྲུང་ན་བཞུགས་དུས། དེས་རྟེན་འབྲེལ་གྱི་ཆོས་སྐད་ཐོར་རེ་གསུངས་པས་
རཏྣ་འདི་ཅི་མཛད། རྟེན་འབྲེལ་བྱ་བ་རྟོག་ཆོས་ཡིན་མོད་སྙམ་པ་བྱུང་། དེས་ཇི་ལྟ་བའི་རྟོགས་པ་ཤར་ནས་ཇི་སྙེད་པའི་མཁྱེན་པའི་རྩལ་ཁ་རྒྱས་པ་ལ་ཅུང་ཟད་རེ་གནོད། འོད་ཀྱང་ཕྱིས་བརྟག་གཉིས་ལས་གསུངས་པའི་ཡུལ་གྱི་ནང་ནས་ཙཱ་རི་ཏྲ། འཁོར་ལོ་སྡོམ་པ་ལས། བོད་ཡུལ་ལ་ཧི་མ་ལ་ཡ་ཞེས་བཤད་པའི་གནས་ཆེན་དེ་ཡི་སྒོ་དབྱེ་བའི་དུས་སྟོད་ཀྱི་རི་བོ་རྡོ་རྗེ་ཕག་མོ་ལྟ་བུ། སྡོང་པོ་དེའི་ཁ་ཊཾ་ག་ལྟ་བུའི་འོག་ཏུ་ཟླ་བ་གསུམ་སྐྱིལ་ཀྲུང་གཅིག་གིས་ཡང་དག་འཇོག་ལ། མཉམ་པར་བཞག་པའི་ནང་ཐ་མའི་ཐོ་རངས་རྫོགས་པའི་སངས་རྒྱས་རབས་བདུན་རྟེན་ཅིང་འབྲེལ་བར་འབྱུང་བའི་ཆོས་འཁོར་བསྐོར་ཏེ་མཐར་སྙིང་པོ་བསྡུ་བའི་ཚིགས་སུ་བཅད་པ་བཀའ་སྩལ་ཏེ་མི་སྣང་བར་གྱུར་ལ། དེ་ནས་ཇི་སྙེད་པའི་རྩལ་ཕྱོགས་མེད་དུ་རྒྱས། གང་གིས་འདུལ་བ་དེ་ལ་དེ་བསྟན་པའི་སློབ་མའི་ཚོགས་ཀྱིས། དུས་འཁོར་འགྲེལ་ཆེན་ལས། ཆོས་ཐམས་ཅད་ཀྱི་སྔོན་དུ་འགྲོ་བ་ནི་ཡེ་དྷརྨའོ། །ཞེས་དང་། ཀླུས། གང་གིས་སྟོང་དང་སོགས་གསུངས་པའི་དོན་འདི་ཁ་ཚིག་ཙམ་དུ་མ་ལུས་པར་ཉམས་སུ་ལོན་པ་བྱུང་། འདི་ལ་ཆོས་རྗེ་འབྲུག་པའི་རྩལ་ཆོས་སུ་གྲགས་པས་རྗེ་ཉིད་ཀྱིས་ཀྱང་རྟེན་འབྲེལ་ཁོ་བོ་ལུགས་ཞེས་གསུངས། འདི་ལ་རྟེན་འབྲེལ་གྱི་སྙིང་པོ་རྣམ་པར་བཤད་པ་ཞེས་
བྱ་བའི་མདོ་སོགས་དང་། ཕྱིས་སུ་རྣམ་བཤད་ཞིབ་མོ་རྣམ་འཐག་དང་། ཁྲིད་ཡིག་ཆོས་ཐམས་ཅད་ཀྱི་སྙིང་པོ་ལེན་པ་ཞེས་བྱ་བ་མཛད། ༈ །དཔལ་འབྲུག་པའི་ཟབ་ཆོས་བླ་མ་སྒྲུབ་པའི་སྐོར་ལ། བླ་མ་ལྔ་བཅུ་པ་དང་། དེ་ལ་གླིང་ཊིཀ །ཏིལླི་པའི་ཚར་གསུམ་ཁུག་པ་སོགས་སོ། །བདེ་མཆོག་མཁའ་འགྲོའི་སྙན་བརྒྱུད་ནི། སྙན་བརྒྱུད་རྡོ་རྗེ་རྣལ་འབྱོར་མ་ཞེས་དཔལ་འཁོར་ལོ་སྡོམ་པ་རྩ་རྒྱུད་ཀྱི་སྦས་དོན་མངོན་རྟོགས་ཀྱི་རིམ་པ་སྟེ། དེ་ཡང་རྡོ་རྗེ་འཆང་ལ་ཕག་མོས་གསོལ་བ་བཏབ་ནས་དཔལ་ལྡན་འབྲས་སྤུངས་སུ་ལེགས་པར་བསྟན། བསྡུ་བ་མཛད་ཕྱིས་ཨོ་ཌི་བི་ཤྭ་དྷརྨ་གལྗོར་རྒྱ་རིམ་བདུན་གྱི་ཚུལ་གྱིས་བཏབ་པ་རྒྱལ་བ་དགོངས་བརྒྱུད། དེ་ལས་ཕྱུང་སྟེ་བཅོམ་ལྡན་འདས་དེ་ཉིད་ཀྱིས་སློབ་དཔོན་ཏིལླི་པ་ལ་གནང་བ་བྱིན་རླབས་མཁའ་འགྲོའི་བརྒྱུད་པའམ། གཏད་རྒྱ་དང་བཅས་པས་ལུང་བསྟན་གཏད་རྒྱའི་བརྒྱུད་པ། སློབ་དཔོན་དེས་ཇོ་བོ་ནཱ་རོས་དཀའ་ཆེན་བཅུ་གཉིས་སྤྱད་པའི་མཐར་སྐད་ཅིག་གིས་རྟོགས་པར་བསྟན་པ། ཇོ་བོ་དེ་དེ་དུས་སློབ་དཔོན་མཐོང་ལམ་པའི་ཚུལ་བཟུང་བ་ཡིན་པས་ན། རིག་འཛིན་བརྡ་བརྒྱུད། ནཱ་རོ་ཏ་པས་ཀྱང་བླ་མའི་ལུང་ལྟར་མར་པ་དང་། དེས་ཀྱང་ལུང་བཞིན་མི་ལར་གདམས་པ་མན་ལ་གང་ཟག་སྙན་ཁུང་བརྒྱུད་པར་བཞག་པས་བརྒྱུད་པ་བཞི་
ལྡན་དུ་སོང་། རྗེ་བཙུན་གྱིས་རས་ཆུང་སོགས་ལ་གནང་ནས་དར་རོ། །འཁོར་ལོ་སྡོམ་པའི་རྫོགས་རིམ་མི་ཏྲི་ལུགས་ནི། རྗེ་བཙུན་མེ་ཏྲི་པ་ཞེས་པཎྜི་ཏ་འབར་བའི་གཙོ་བོའི་སྐྱེ་བ། ཕྱི་ནང་གི་གཞུང་ལུགས་ཀུན་ལ་བྱང་བ། ཡི་དམ་གྱི་ལྷས་དེ་ཁོ་ན་ཉིད་འཚོལ་བར་ལུང་བསྟན་པ་བཞིན་དཔལ་གྱི་རིར་བྱོན། ཤ་བ་རི་དབང་ཕྱུག་བཙུན་མོ་དང་བཅས་པས་རྗེས་སུ་བཟུང་། ཡང་དག་པའི་ལམ་མ་སྦས་པར་བསྟན་པ་ནི་དཔལ་འཁོར་ལོ་སྡོམ་པའི་རྫོགས་རིམ། རྡོ་རྗེ་རྣལ་འབྱོར་མའི་གསུང་ངག་རྗེ་རས་ཆུང་པས་བོད་དུ་སྤྱན་དྲངས་པའི་རིན་ཆེན་ལྔ་པ་ཞེས་པའི་གདམས་ངག་གོ །དཔལ་འབྲུག་པའི་ཟབ་ཆོས་ལས་ཏི་ཕུའི་བཞི་ཆོས་སམ། རྡོ་རྗེ་ལུས་ཀྱི་སྦས་བཤད་སྐོར། པཎྜི་ཏ་ག་ཡ་དྷ་རའི་སྲས་ཏི་ཕུ་པས་ཇོ་བོ་ནཱ་རོ་དང་མེ་ཏྲ་ལས་གསན་པ། དངོས་པོར་གནས་པའི་ཚུལ་གཏན་ལ་དབབ་པ་རྡོ་རྗེ་ལུས་ཀྱི་སྦས་བཤད་དམ་གདམས་ངག་བཞི་བཞིས་བསྟན་པ་ཏི་ཕུའི་བཞི་ཆོས། ༈ །སྨད་འབྲུག་སའི་དྲེག་པ་ལྟ་བུའི་བསྟན་པའི་བདག་པོ་ཆོས་ཀྱི་རྒྱལ་པོ་ལོ་རས་པས། སྐྱོར་མོ་ལུང་གི་སྤལ་ཏི་དགྲ་བཅོམ་པར་རབ་ཏུ་བྱུང་སྟེ་མཚན་དབང་ཕྱུག་ཏུ་གསོལ། ཕྱིས་ཆོས་རྗེའི་དྲུང་དུ་གདམས་ངག་རྫོགས་པར་གསན། གནམ་མཚོ་ཕྱུག་མོའི་དོ་རིར་སྒྲུབ་པ་མཛད་པས་དངོས་གྲུབ་མཆོག་ཏུ་
བརྙེས། ཕྲིན་ལས་བསམ་གྱིས་མི་ཁྱབ། འཁོར་དགེ་སློང་རང་ཡང་སྟོང་ཕྲག་ཙམ་འདུ་བས་སའི་དྲེག་པ་ལྟ་བུར་གྲགས། ཕྱིས་ལྷོ་བྲག་སེང་གེ་རིར་བཞུགས། དེས་ཆོས་རྗེའི་ཚོགས་ཆོས་ཐུན་ལྔར་གསུངས་པ་ལྟར་ཕྱག་བཞེས་སུ་བཀྲལ་ནས། ཐུན་ལྔའི་ཆ་ལག་རྒྱས་པ། ཕྱག་རྒྱ་ཆེན་པོ་འཆི་ཐུབ། གཏུམ་མོ་རས་ཐུབ། གསང་སྤྱོད་རི་ཐུབ། ནད་གདོན་འཁྲུགས་ཐུབ། གཉེན་པོ་རྐྱེན་ཐུབ་ཀྱི་ཁྲིད་རྣམས་མཛད་དོ། ༈ །སྟོད་འབྲུག་གནམ་གྱི་སྐར་མ་ལྟ་བུར་གྲགས་པའི་བྱ་བ་ཆོས་རྗེ་རྒོད་ཚང་པ་ལྷོ་ལ་ཡག་དོལ་བུ་ཆུང་གི་རྩར་འཁྲུངས། ཆོས་རྗེ་དང་སངས་རྒྱས་དབོན་ལས་གདམས་ངག་རྫོགས་པར་གསན། བྱང་ཆུབ་ཀྱི་སྤྱོད་པ་རླབས་པོ་ཆེ་ལ་དབང་བསྒྱུར། ཕྱིས་ལ་སྟོད་རྒྱལ་གྱི་ཤྲཱི་རི་ལས་མི་འབབས་པའི་དམ་བཅའ་མཛད། སློབ་མའང་རྟོགས་པ་རང་མཉམ་རྒྱལ་བ་ཡང་དགོན་པ། བརྟུལ་ཞུགས་རང་མཉམ་ཨོ་རྒྱན་པ། མོས་གུས་རང་མཉམ་ཟང་ཟང་ནེ་རིང་པ། ཞེ་གཅོད་རང་མཉམ་སྤྱིས་དཀར་བ་སོགས་དངོས་ཀྱི་སློབ་མ་གྲུབ་ཐོབ་སྐར་ཚོགས་ཙམ་བྱུང་། དེས་ཆོས་རྗེའི་མིང་ཐོ་ཙམ་ལ་བརྟེན་ནས་སྙན་བརྒྱུད་ཀྱི་གདམས་ངག་དེའི་འགྲོས་སུ་བསྟན་པས་ཁྲིད་ཆེན་བརྒྱད་ཅེས་གྲགས་ཏེ། ལམ་ཟབ་མོས་གུས་ཀྱི་ཁྲིད། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་ཁྲིད། ཐབས་ལམ་
ཁྱད་པར་ཅན་གྱི་ཁྲིད། གསང་སྤྱོད་བཟློག་སྒོམ་གྱི་ཁྲིད། སྟེང་སྒོ་ཆོས་དྲུག །འོག་སྒོ་ཆོས་དྲུག །འཁྲུལ་འཁོར་དང་བཅས་པ། དག་སྣང་ཞིང་སྦྱོང་གི་ཁྲིད། ཆོས་བརྒྱད་མགོ་སྙོམས་ཀྱི་ཁྲིད། བྱམས་སྙིང་རྗེའི་ཁྲིད། རྒྱུ་འབྲས་རྟེན་འབྲེལ་གྱི་ཁྲིད་རྣམས་སོ། །དཔལ་འབྲུག་པའི་ཟབ་ཆོས་དགེ་སྦྱོར་བདུན་གྱི་སྐོར་ཞེས་ཆོས་རྗེས་ཤངས་པའི་སློབ་མ་གཉིས་ལ་གནང་ངོ་། ༈ །རི་ཆོས་སྐོར་གསུམ་ནི། རྒྱལ་བ་ཡང་དགོན་པས་མཛད་པ་སྟེ། དེ་ཡང་། སྒྲུབ་པ་ཉམས་ལེན་གྱི་ཆོས་ཐམས་ཅད་ཚང་བར་སྟོན་པ་དགོས་འདོད་ཀུན་འབྱུང་གི་སྐོར། རྡོ་རྗེ་ལུས་ཀྱི་གནས་ལུགས་གསལ་བར་སྟོན་པ་སྦས་བཤད་ཀྱི་སྐོར། འཆི་བ་ལམ་དུ་བྱེད་པ་བར་དོ་འཕྲང་སྒྲོལ་གྱི་སྐོར་དང་གསུམ་སྟེ། དང་པོ་ལ་རྩ་བ་ལུས་ལྟ་བུའི་ཆོས། གྱེས་པ་ཡན་ལག་ལྟ་བུའི་ཆོས༩། ཟབ་དོན་སྙིང་ལྟ་བུའི་ཆོས༠། གཅེས་པ་སྲོག་རྩ་ལྟ་བུའི་ཆོས༦། དམར་ཁྲིད་དབང་པོའི་སྒོ་ལྔ་ལྟ་བུའི་ཆོས་ལྔ་རྣམས་སོ། །གཉིས་པ་ནི། རྩ་རླུང་ཐིག་ལེའི་གནས་ལུགས་གསལ་བར་སྟོན་པ་སྦས་བཤད་ཀྱི་གཞུང་། དེའི་བཀའ་འགྲེལ་ཟབ་མོ། ཞལ་ཤེས་སྟོན་པ་ཞལ་གདམས་བཀའ་རྒྱ་མ་རྩ་ཁོག་དང་བཅས་པ་རྣམས་སོ། །འཕྲང་དྲུག་གདམས་པ་དྲུག་གིས་སྒྲོལ་བ་བར་དོ་འཕྲང་སྒྲོལ་གྱི་སྐོར་ལ། དེའི་གཞུང་། དེའི་བཀའ་
གནད་འཆད་པ་སྦས་གནད་ཀྱི་གཏེར་མཛོད། གསང་བའི་བརྡ་སྐད་འགྲོལ་བ། ཡིད་ཆེས་ངེས་ཤེས་སྐྱེ་བ་ལོ་རྒྱུས། ལག་ལེན་ཁྲིད་ཡིག་བཅས་སོ། ༈ །གོ་ལུང་པ་རཏྣ་རང་མཉམ་བཞི་ལས་བརྟུལ་ཞུགས་རང་མཉམ། ཤྲཱི་སྒྲ་ཚད་མདོ་སྔགས་ཀྱི་སྦྱངས་པ་མཐར་ཕྱིན་ནས་རྒྱལ་བ་རྒོད་ཚང་པའི་སྤྱན་སྔར་ལོ་གསུམ་བཞུགས། ཆོས་ཉིད་ཀྱི་བདེན་པ་མངོན་སུམ་དུ་གཟིགས་པས་བརྟུལ་ཞུགས་ཀྱི་སྤྱོད་པ་མཐར་ཕྱིན་པར་བྱ་བའི་ཕྱིར། ཛ་ལནྡ་ར་སོགས་གནས་ཆེན་མང་པོར་བྱོན། ལྷག་པར་ཨོ་ཌི་ཡ་ན་ཞེས་གྲགས་པ་རྡོ་རྗེ་ཐེག་པའི་གན་མཛོད་ཆེན་པོར་བཞུགས་པ། སྤྲུལ་པའི་ཞིང་ཡེ་ཤེས་ཀྱི་མཁའ་འགྲོ་མ་རྣམས་ཀྱི་གླིང་ཆེན་པོ་དེར་དཔལ་ཡེ་ཤེས་པའི་ཞབས་འབྲིང་པ་དང་བཅས་བྱོན། ཡུལ་དེའི་དབུས་དྷ་མ་ཐཱ་ལ་ཞེས་བྱ་བའི་ཕྱོགས་བཞིར་རིགས་བཞིའི་མཁའ་འགྲོ་ཛོ་ཀི་ནཱིའི་ཚུལ་མཛད་མ་བཞིས་བྱིན་གྱིས་བརླབས། ལྷག་པར་རང་བྱུང་གི་གཡུང་དྲུང་དམར་པོས་སྨིན་མཚམས་མཛེས་པའི་བུ་མོ་ཞིག་གིས་ལུང་བསྟན་ཀ་པོ་ཀ་ཞེས་པའི་དྲུང་དུ་ས་མནྟ་བྷྱ་ཀ་ཞེས་སྨད་འཚོང་མའི་ཚུལ་འཛིན་པ་ཞིག་དང་མཇལ་གྲོགས་ཀྱི་སྣང་བར་ཐུག་པ་རེ་སྦྱིན་ལ་འཐུང་བའི་མོད། ས་གཡོ་བ་དང་འོད་དང་སྒྲ་བསམ་གྱིས་མི་ཁྱབ་པར་ཤར། གཞན་དེའི་རེག་བྱ་མཆོག་གི་རོལ་མོས་རྡོ་རྗེའི་ལུས་ཀྱི་རྩ་ཡི་མདུད་པ་ཕལ་
ཤོག་ལྷེབ་ ༡༠༡ ནས་ ༢༠༠ བར།
ཆེར་ཞིག་པའི་མོད་ལ། ཡུལ་དེ་འཁོར་ལོ་སྡོམ་པ་རིགས་ཐམས་ཅད་པའི་དཀྱིལ་འཁོར་དུ་ཤར། དབུས་ཀྱི་རྡོ་རྗེ་བཙུན་མོས་གདམས་ངག་འདི་སྩལ་ཏེ་སྐལ་པ་དང་ལྡན་བ་ལ་རྡོ་རྗེ་སེམས་དཔའི་གསེང་ལམ་སྟོན་པའི་ས་མཁན་ཆེན་པོར་གྱུར། ཏིང་ངེ་འཛིན་ལས་སད་པ་ན་སྔར་གྱི་བུ་མོ་དེ་ཉིད་དུ་སྣང་བས། སླར་ལམ་བསྡུས་པ་འདི་བསྟན་ནས། ལུང་བསྟན་དང་བཅས་སྔར་གྱི་མཁའ་འགྲོ་མ་སྡེ་བཞི་སེང་གེའི་གདོང་པ་ཅན་དང་ལྷ་ཡིས་ཀྱང་གདམས་པ་སྣ་རེ་བསྟན་པ་མི་བརྗེད་པའི་གཟུངས་ཀྱིས་བཟུང་བས་ཐམས་ཅད་ཀྱིས་མཚན་གྲུབ་ཐོབ་ཨོ་རྒྱན་པ་ཞེས་གསོལ། ཡུན་རྐྱང་པ་ན་སྐྱི་རོང་དུ་བྱོན། ཤར་གངས་སུ་གཡའ་བཟང་པ་སྣུབ་འདུལ་བ་འཛིན་པའི་དབོན་རིན་པོ་ཆེ་མཁར་ཆུ་བར་གྲགས་པ་དེ་བྱོན། གསོལ་བ་བཏབ་པས་མཁའ་འགྲོའི་བཀའ་རྒྱ་ཐེམས། ལུང་བསྟན་གྱི་སློབ་མར་དགོངས་ཏེ། གཞུང་ཡི་གེར་བཀོད། ཁོང་ནས་ཀྱང་དམིགས་རྐང་རེ་ལ་གསེར་ཞོ་དོའི་མེ་ཏོག་ཕུལ་ཏེ་ཞུས། ཁོང་རང་གི་བརྗེད་ཐོ་བསྡུས་པ་ཞིག་མཛད། སླར་མ་འདས་བར་དུ་སྦུ་ཊ་བ་མཁས་བཙུན་བསོད་ནམས་འོད་ཟེར། ཟུར་ཕུག་པ་རིན་ཆེན་དཔལ། རྒྱལ་བ་རང་བྱུང་བ། སྙེ་མདོ་ཐམས་ཅད་མཁྱེན་པ་སྐུ་མཆེད། ཆག་ལོ་དབོན་པོ་སོགས་མང་། སློབ་ཚོགས་བསམ་གྱིས་མི་ཁྱབ་པ་ལ་གནང་བས་ཟིན་བྲིས་མ། རྡོ་རྗེའི་ཚིག་རྐང་
ལ་འགྲེལ་པ་རྗེ་གྲུབ་ཐོབ་ཆེན་པོ་ཉིད་ལ་ཉིད་ཀྱི་གཅེན་ཞང་གཞོན་ནུ་དཔལ་གྱིས་དྲིས་པ་ལ་ལན་འདེབས་སུ་མཛད་པ་ཁོང་གིས་ཡི་གེར་བཏབ་པ་དང་། མཁས་བཙུན་བསོད་ནམས་འོད་ཟེར་པས་མཛད་བའི་ཊིཀ་ཆེན་དང་། མཁས་པ་ཤོང་སྟོན་དང་། སྙེ་མདོ་ཀུན་དགའ་དོན་གྲུབ་ཀྱིས་མཛད་པ་བཞི་ལ་འགྲེལ་ཆེན་བཞི་ཟེར། གཞན་མང་པོ་ཞིག་ཡོད་ཀྱང་བཀའ་ལུང་མི་སྣང་། ཟླ་སེང་པས་མཛད་པ་མན་ངག་གླེགས་བམ་དུ་འཐུས། མན་ངག་གི་གླེགས་བམ་ལ་དངོས་ཀྱི་སློབ་མ་རྣམས་ཀྱི་ནང་ནས་ཟླ་སེང་པ་ཁྲིད་གཉེར་ལ་རྒྱུན་རིང་། ཁོང་གིས་མཆེད་པོ་རྣམས་ཀྱི་ཟིན་བྲིས་ཀྱང་གཟིགས། དག་བསྡུར་རྗེ་ཨོ་རྒྱན་པ་ཉིད་ཀྱིས་མཛད་པས་ཁྲིད་ལུགས་འདི་ལ་སྙིང་པོར་བྱེད་དོ། །དེ་ཡང་འདི་དག་བུ་སྟོན་རིན་པོ་ཆེ་དང་། བླ་མ་དམ་པ་སོགས་ཆེན་པོ་རྣམས་ཀྱིས་ཀྱང་གསན་ནོ། ༈ །བླ་མེད་ཀྱི་རྒྱུད་སྡེ་སྤྱིའི་རྫོགས་རིམ་བསྙེན་སྒྲུབ་གསར་པ་ནི། ཨ་ནུ་ས་མ་རཀྴི་ཏ་སྟེ་དཔེ་མེད་འཚོ་ཞེས་པ་ཕྱི་ནང་རིག་པ་ལ་གོམས་པའི་ཐུགས་ཅན་དཔལ་ཁ་སརཱ་ཎིའི་དྲུང་དུ་ལོ་བཅུ་གཉིས་སུ་བཞུགས། དམིགས་པ་དང་རྟོག་བ་མེད་པའི་དེ་ཁོ་ན་ཉིད་ཀྱི་མན་ངག་བསྒོམས་པས་རྟོགས་པའི་ཁྱད་པར་ཅི་ཡང་མ་ཐོན་ནས་ཡིད་ཞུམ་པ་ན། རྡོ་རྗེ་རྣལ་འབྱོར་མས་བི་ཀྲ་མ་བུ་རིར་སོང་ཞིག །དེར་ཁྱོད་ལ་
རྟོགས་པ་འབྱུང་བར་འགྱུར་རོ་ཞེས་པའི་བཀའ་སྤྱི་བོར་བཞག་ནས་པཎྜི་ཏ་ཆེན་པོ་ལེགས་པའི་བུ་དཔལ་འཛིན་དང་ལྷན་ཅིག་བི་ཀྲ་མ་པཱུ་རིར་བྱོན་ཏེ། དུས་མཆོད་ཞིག་གི་ཚེ་ཐུགས་དམ་གྱི་རིམ་པར་ཞུགས་པས། ནམ་ཕྱེད་ན་བཅོམ་ལྡན་འདས་ཨ་བ་དྷ་ཏིའི་ཆ་བྱད་ཅན་བྱོན་ནས། བུ་དེ་ཁོ་ན་ཉིད་ནི་འདི་ཡིན་ནོ་ཞེས་མངོན་སུམ་དུ་གདམས་པ་སྩལ། དེ་ཐོབ་མ་ཐག་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་དེ་ནི་མི་སྣང་བར་གྱུར་ནསཾ། མཚན་མོ་འདས་པའི་ཏིང་ངེ་འཛིན་དེ་ལས་བཞེངས་ཏེ་དཔལ་འཛིན་ལ་སོགས་པའི་དོན་དུ་སྦྱོར་བ་ཡན་ལག་དྲུག་པའི་མན་ངག་མཛད། དེ་ལ་ཉི་མ་དཔལ་ཡེ་ཤེས་ཀྱིས་འགྲེལ་པ་ཡོན་ཏན་འགེངས་པ་ཞེས་མཛད་པ་གཉིས་དང་། །བོད་དུ་པཎ་ཆེན་ནགས་རིན་གྱིས་རྒྱལ་སྲས་མི་ཕམ་དགའ་བའམ། མཚན་གཞན་བྱམས་གླིང་པ་བསོད་ནམས་རྣམ་རྒྱལ། དཔལ་ཡིད་བཟང་རོལ་པའམ་མཚན་དངོས་འགོས་ལོ་གཉིས་པ་གཞོན་ནུ་དཔལ། འབྲུག་པ་རྒྱལ་དབང་རྗེ། ཁྲུས་ཁང་ལོ་ཙཱ་བ་བསོད་ནམས་རྒྱ་མཚོ་སོགས་ལ་གནང་ནས་སོ་སོས་ཁྲིད་ཡིག་རྒྱས་པར་མཛད་དོ། ༈ །ཡང་སཏྟ་རྒྱ་གར་ཤར་ཕྱོགས་ཀྱི། གརའི་མཁས་པ་ཆེན་པོ་ཤྲཱི་བ་ན་རཏྟའམ། མཚན་གཞན་མི་བསྐྱོད་རྡོ་རྗེ་ཞེས་པ་རྒྱལ་རིགས་སུ་འཁྲུངས། རྒྱལ་སྲིད་དང་དུ་མ་བཞེས་
པར་བླ་མ་ཆེན་པོ་སངས་རྒྱས་བསྐྱངས་ལ་རབ་ཏུ་བྱུང་། རིག་གནས་ལྔ་ལ་མཁས་པར་སྦྱངས། རྣལ་འབྱོར་གྱི་དོན་དུ་སིངྒ་ལཱི་དང་། རྒྱ་གར་ལྷོ་ཕྱོགས་དཔལ་འབྲས་སྤུངས་ཀྱི་མཆོད་རྟེན་དང་། །དཔལ་གྱི་རི་སོགས་གཟིགས། དེར་ཤ་བ་རི་དབང་ཕྱུག་ཞལ་གཟིགས། ཁྱོད་བྱང་ཕྱོགས་ཀྱི་རྒྱུད་དུ་སོང་ཞིག་དང་འདོད་པའི་དོན་འགྲུབ་པར་འགྱུར་རོ། །ཞེས་ཐོས་ནས་བལ་ཡུལ་དུ་བྱོན། འཕགས་པ་ཤིང་ཀུན་ཏུ་ཤ་བ་རི་དབང་ཕྱུག་གིས་གདམས་པ་འདི་སྩལ། འདོད་པའི་དོན་ཆེན་པོ་གྲུབ་པར་གྱུར་པ་ཡིན། ༈ །འབའ་ར་བ་རྒྱལ་མཚན་དཔལ་བཟང་ཞེས་སྟོད་འབྲུག་པའི་ཕྲིན་ལས་ཀྱི་བ་དན་འཛིན་པ་དེས་མཛད་པའི་ཁྱད་ཆོས་འདོད་ཆགས་དྲག་པོ་ལམ་དུ་བྱེད་པའི་ཆོས་བདེ་ཆེན་སྐོར་གསུམ་ཞེས་སྐུ་གསུང་ཐུགས་རྡོ་རྗེའི་ཉམས་ལེན་དང་ངོ་སྤྲོད་སོགས་སོ། ༈ །ངམ་རྫོང་པ་ཆེན་པོའི་སྙན་བརྒྱུད་ཞེས་དབང་དང་འབྲེལ་པའི་གདམས་པའི་སྐོར་ལ་ཕལ་ཆེར་མར་པ་མགོ་ལེགས་ནས། ངམ་རྫོང་སྟོན་པའོ། ༈ །སེམས་ཁྲིད་ཡིད་བཞིན་ནོར་བུ་དུང་མཚོ་རས་པའི་གཏེར་མ། ༈ །བླ་མ་ཞང་གི་ཟབ་ཆོས་སྐོར། དེ་ཡང་གཡུ་བྲག་པ་འགྲོ་བའི་མགོན་པོ་ཞེས་པ། བླ་མ་མང་པོའི་གདམས་པས་ཐུགས་ཀྱིས་མཛོད་གང་ཡང་ཆོས་ཐམས་ཅད་ཀྱི་གནས་ལུགས་མ་གཟིགས་ནས། རྗེ་སྒམ་པོ་པ་ཚུལ་
ཁྲིམས་སྙིང་པོ་ལ་རྗེས་སུ་འཛིན་པར་གསོལ་བ་བཏབ་པས། ཕྱག་རྒྱ་ཆེན་པོའི་རྟོགས་པ་ཤར་བ་ལ། ཆོས་སྐུ་ཡེ་ཤེས་ཀྱི་མཁའ་འགྲོ་མ་ལ་སོགས་པས་དངོས་སུ་གདམས་པ། ཞང་གི་བཀའ་རྒྱར་གྲགས་པའི་ཆོས་ལ། ཞང་རིན་པོ་ཆེའི་གསང་བའི་རྣམ་ཐར་སོགས་སོ། ༈ །དཔལ་སྟག་ལུང་ཐང་པའི་ཆོས་དྲུག་ཡིད་བཞིན་ནོར་བུ་ཐང་པ་སྔ་ཕྱིའི་བཀའ་འབུམ། སྟག་ལུང་ཕྱི་མས་བསྒྲིགས་པའི་ཆོས་སྐྱོང་གི་གསེར་པོད་སོགས་སོ། །འབྲི་གུང་པའི་ཟབ་ཆོས་དགོངས་གཅིག་སྐོར་ལ། རིན་ཆེན་དཔལ་གྱི་བཞེད་པ་དེ་དབོན་ཤེས་རབ་འབྱུང་གནས་ཀྱིས་ཟིན་བྲིས་སུ་བཏབ་པའི་རྡོ་རྗེའི་གསུང་། དགོངས་པ་གཅིག་པའི་ཆོས་སྡེ་ལ། ཁུ་དབོན་གཉིས་ཀྱི་རྣམ་ཐར། དགོངས་གཅིག་ཁོག་དབུབ། གསུང་བཞི་བཅུ་པ། འགྲེལ་པ་ལ་རྡོར་ཤེམ་དང་རིན་བྱང་མ་གཉིས་ལས། དང་པོ་ནི། ལྟ་སྒོམ་སྤྱོད་པའི་ཚོམས། འདུལ་བ་སོ་ཐར་གྱི་ཚོམས། བྱང་སེམས་བསླབ་བྱའི་ཚོམས། གསང་སྔགས་རིག་འཛིན་གྱི་ཚོམས། ཆོས་ཀྱི་འཁོར་ལོའི་ཚོམས། རྟེན་འབྲེལ་གནད་བསྡུས་ཀྱི་ཚོམས། སངས་རྒྱས་ཀྱི་སའི་ཚོམས། གཏམ་རྒྱུད། དགོངས་གཅིག་གིས་དཔྱད་བཅས་སོ། ༈ །རྡོ་རྗེ་ཐེག་རྩེར་མཚུངས་ཀྱང་བོད་ཡུལ་པས། །གསང་ཆེན་རྙིང་མ་ཞེས་བྱར་རིས་བཅད་པའི། །རྒྱུད་སྡེའི་
ཕུལ་འདི་ཐོས་བཟོད་སྐལ་བཟང་སྙམ། །བདག་ནི་རང་གི་བསོད་ནམས་བསྔགས་པར་བགྱིས། །ཞེས་སོ། ༈ །རྡོ་རྗེ་བཙུན་མོས་བྱིན་པའི་ཤེ་མོང་གིས། །རྡོ་རྗེ་ཐེག་པ་ཀུན་ལ་དབང་བསྒྱུར་པའི། །རྡོ་རྗེ་སློབ་དཔོན་དམ་པ་ཨ་བྷ་ཡ། །རྡོ་རྗེ་འཛིན་དབུས་བསྔགས་འོས་དེ་ལ་འདུད། །སློབ་དཔོན་ཨ་བྷ་ཡཱ་ཀ་ར་གུསྟ་ཞེས་པ་ཆོས་ཐམས་ཅད་ལ་སྟོན་པ་གཉིས་པ་ལྟ་བུ་དེ་སྔོན་གྱི་རབས་སུ་རྡོ་རྗེ་ཡན་ལག་མ་བསྙེན་པས་སྐུ་ཚེ་འདིར་རྡོ་རྗེ་རྣལ་འབྱོར་མ་དེ་མིའི་བུ་མོ་ལྟར་བརྫུས་ནས་སྔོན་བྲམ་ཟེའི་དུས་དང་ཕྱིས་ལན་གཉིས་བྱུང་བས་འདོད་པ་དོན་དུ་གཉེར་བ་ན། བྲམ་ཟེ་དང་དགེ་སློང་གི་བསླབ་པས་བསྡམས་པའི་དབང་གིས་ཕྱིར་བཟློག་པར་མཛད། ཕྱིས་སོ་སོམ་རི་པ་ལ་སོགས་པའི་བླ་མ་ཆེན་པོ་རྣམས་ཀྱིས་དེ་ནི་མ་ལེགས། དེ་རྡོ་རྗེ་བཙུན་མོ་མཆོག་གི་དངོས་གྲུབ་སྦྱིན་པའི་སླད་དུ་འོང་ཞེས་གསུངས་པས་འགྱོད་དོ། །རྗེ་བཙུན་མར་པ་ལས་རྗེ་བཙུག་སྟེ་གསོལ་བ་མང་དུ་བཏབ་པས་མནལ་ལམ་དུ་བྱོན། ཚེ་འདིར་ང་དང་ལྷན་ཅིག་སྤྱོད་པའི་མཐུ་མེད་ཀྱིས། །རྒྱུད་སྡེ་ཟབ་མོའི་འགྲེལ་པ་དང་། དཀྱིལ་འཁོར་གྱི་ཆོ་ག་མང་དུ་བརྩམས། མྱུར་དུ་སྐལ་བ་ཅན་དུ་འགྱུར་རོ། །ཞེས་ལུང་བསྟན་པས་མན་ངག་གི་སྙེ་མ་ལ་སོགས་པའི་རྒྱུད་འགྲེལ་དང་། ཕྲེང་བ་སྐོར་གསུམ་ལ་སོགས་མང་པོ་
ཞིག་མཛད་དོ། །དང་པོ་ཆག་ཆོས་རྗེ་དཔལ་གྱིས་པཎྜི་ཏ་ཆེན་པོ་བནྡྲ་ལ་གསན། དཀྱིལ་འཁོར་༢༨ཁོ་ནའི་དབང་བསྐུར་བས་དམིགས་གསལ་དུ་ཡོད་པ་དང་། ཁ་བསྐང་དགོས་པར་གསུངས་པ་ཐམས་ཅད་ཐོབ་པར་བཞེས། ཡར་ལུང་གྲགས་པ་རྒྱལ་མཚན་གྱིས་པཎྜི་ཏ་བི་བྷ་མི་ཤྲཱི་ལས་གསན་ནས་དཀྱིལའཁོར་་༤༢དབྱེ། ཕྱིས་ནགས་རིན་གྱིས་སྣེའུ་གདོངས་རྩེར་འགོས་སོགས་མཁས་གྲུབ་མང་པོར་གནང་། དེ་དག་བླ་མེད་འབའ་ཞིག་གི་དབང་བསྐུར་བ་ནི་ཕྲེང་བ་མཁན་པོ་རང་གི་བཞེད་པ་ཡིན་ལ། ཁ་ཆེའི་པཎྜི་ཏ་ཆེན་པོས་བོད་དུ་ལན་གཉིས་དེ་བཞིན་བསྐུར་ལ། བོད་རྣམས་རྒྱུད་སྡེ་སོ་སོར་ལ་ཕྱེ་བ་མོས་པས། དེ་ལྟར་མ་བསྐུར་ན་མི་ཐོབ་འདྲའོ་དགོངས་ཏེ། ཕྱི་མ་སོ་སོར་ཕྱེ་བར་མཛད་དོ། །དེ་ནས་རྗེས་འཇུག་རྣམས་ཀྱིས་ཀྱང་དེ་གཉིས་ཅི་རིགས་སུ་མཛད་དོ། །ཞེ་གཉིས་ཀྱི་བདུད་རྩི་རིགས་གསུམ་བསྣན་པའི་ཞེ་ལྔ་མ་ནགས་ཀྱིས་བཞེད་ལ་འབའ་ཞིག་དརླན་གྱི་ཐུགས་དམ། གཟའ་ཡུམ། ནོར་རྒྱུན་མ། རྣམ་རྒྱལ་བསྣན་པའི་ཞེ་ལྔར་བྱེད་ཀྱང་དེ་ནི་ཁ་འཕང་ཙམ་ཡང་མི་འབྱུང་བས་མི་འཐད་དོ། །དེ་དག་རྒྱུད་སྡེ་སོ་སོར་འབྱེད་ན་དབང་གི་བབས་ཡེ་ཤེས་ཐིག་ལེའི་ལུང་གི་རྗེས་སུ་འབྲང་བར་བྱ་ལ། བླ་མེད་ཀྱི་དབང་དུ་ན་གཞུང་གི་དངོས་བསྟན་དུ་ཟད་དོ། །
༈ །བཅོམ་ལྡན་སྙིང་རྗེའི་གཏེར་ཆེན་སྤྱན་རས་གཟིགས། །འཕགས་པའི་ཡུལ་དུ་དཔལ་ལྡན་ནཱ་རོ་པ། །ཁ་བ་ཅན་འདིར་འགྲོ་མགོན་འབྲུག་པ་ཞེས། །སྤྲུལ་པས་བསྟན་པ་འཛིན་དེར་ཕྱག་འཚལ་ལོ། །རཏ་གླིང་པད་གླིང་གཏེར་ལུང་དུ། ནཱ་རོ་པཎ་ཆེན་སྒྱུ་མའི་གར་བསྒྱུར་པ། །གཙང་པ་རྒྱ་རས་འབྲུག་དང་ར་ལུང་བྱོན། ཞེས་དང་། གཞན་ཡང་ཐུགས་རྗེ་ཆེན་པོ་དང་ཨོ་རྒྱན། དྭགས་པོ་སོགས་ཀྱི་སྤྲུལ་པའོ། ༈ །གྲུབ་ཐོབ་ཆེན་པོ་གླིང་སྤྲུལ་ར་མ་དཀར་མོས་ལུང་བསྟན་པས་ར་ལུང་དུ་གྲགས་སོ། །དེར་ཆོས་རྗེ་རིན་པོ་ཆེའི་སྐུ་འབགས་ཁམས་གསུམ་ཟིལ་གནོན་དང་། ཆོས་རྗེའི་གསེར་འབུམ་ཛམ་བུ་གླིང་གི་རྒྱན་སོགས་མང་། །ནང་རྟེན་ཁྱད་འཕགས་རིགས་བསམ་གྱིས་མི་ཁྱབ་བོ། །ཁྲི་རལ་གྱི་དུས་སུ་རྒྱ་འཇམ་དཔལ་གསང་བ་ཞེས་གྲགས་པས་ཉང་སྟོད་དུ་དཔལ་སྐྱེགས་ཀྱི་གནས་བཏབ། དེང་སང་གནས་རྙིང་དུ་གྲགས། ཙ་རི་ཏྲ་ཞེས་པ། རྒྱལ་དབང་རྗེས། མཁའ་སྤྱོད་དབང་པོ་ཞེས་བཤད། སེམས་དཔའ་རང་བྱུང་རྡོ་རྗེས། ཙ་རི་ཞེས་པ་བཞི་ཡིན་ཏེ། ཏྲ་ཡ་སྐྱོབས་པར་བརྗོད་པར་བྱ། །ཁམས་ནི་རྣམ་པ་བཞི་པོ་ལ། །བདེ་བ་ཆེན་པོས་སྐྱོབས་པའི་ཕྱིར། །ཞེས་མར་པས། ཙ་རི་ཏྲ་ནི་ལྷོ་ཕྱོགས་ཐག་ཉེ་བ་འདི་ན། རྡོ་རྗེ་ཕག་མོ་ཤ་དང་ཆང་གིས་མཆོད་པའི་གནས་
ཞེས་བྱ་བ་ཡོད་དེ། ཞེས་གྲོ་བོ་ལུང་ནས་གསུངས། གནས་སྒོ་འབྱེད་པ་པོ་ནི། བསྟན་པ་སྔ་དར་གྱི་དུས་སུ་སློབ་དཔོན་ཆེན་པོ་ཟིལ་ཆེན་གསང་བའི་ཕུག་ཏུ་ལོ་བདུན། ཟླ་བ་བདུན། ཞག་བདུན་གྱི་བར་དུ་སྒྲུབ་པ་མཛད། དེ་ལས་ཅུང་ཕྱི་བར་སློབ་དཔོན་བི་མ་ལ་ཕེབས། ཕོ་བྲང་ཁར་བཞུགས། བར་དུ་ཤར་ཕྱོགས་ལཱ་བ་པ་ཞེས་ཇོ་བོ་ཨ་ཏི་ཤའི་བླ་མ་དེ་ཕེབས་ནས་མཁའ་སྤྱོད་དུ་གཤེགས། ཇོ་བོས་གསང་ཕུའི་ལ་སྒང་ནས་འཁོར་ལོ་སྡོམ་པའི་ཕོ་བྲང་དུ་གཟིགས་ནས་བསྔགས་པ་མཛད། དེ་རྗེས་སྒམ་པོ་ཟླ་འོད་གཞོན་ནུས་ལུང་བསྟན་པ་བཞིན་སྐྱེས་བུ་ཡེ་ཤེས་རྡོ་རྗེ་དཔོན་སློབ་བཅུ་གཅིག་གིས་ལན་གསུམ་དུ་ཕེབས་མཐར་ཕོ་བྲང་གཡུ་མཚོ་གཟིགས་ནས་ནང་སྤྲུལ་པའི་ལྷ་ཚོགས་ཞལ་མངོན་སུམ་མཇལ། དེ་རྗེས་མི་ཐོག་གཅིག་ན་སྐྱོབས་པ་འཇིག་རྟེན་གསུམ་མགོན་གྱིས་རི་བོ་ཤཱནྟིའི་རྩེ་ནས་རྩ་རིའི་ཕྱི་ནང་གསང་བའི་གནས་ཚུལ་རྣམས་མངོན་སུམ་དུ་གཟིགས་ནས། གཉོས་ཆེན་པོ་རྒྱལ་བ་ལྷ་ནང་པ་སོགས་སློབ་མའི་མཆོག་གསུམ་བརྫངས། དེ་དང་དུས་མཚུངས་སུ་འགྲོ་མགོན་གཙང་པ་རྒྱ་རས་ཇོ་མོ་ཁ་རག་ན་བཞུགས་པའི་དུས་མཁའ་འགྲོ་མ་སེང་གེའི་གདོང་པ་ཅན་གྱིས་ལན་གསུམ་དུ་བསྐུལ། མཐར་གྲུབ་ཐོབ་གླིང་གིས་ཀྱང་དག་པའི་སྣང་བར་བསྐུལ་ཏེ་ཕེབས་ནས་
ཕོ་བྲང་དུ་གཤེགས། ནང་སྤྲུལ་པའི་ལྷ་ཚོགས་ཞལ་གཟིགས། གཉོས་འགར་ཆོས་གསུམ་ལན་གསུམ་དུ་ཕེབས་པའི་ཕྱི་མ་ལ་སྤྲུལ་པའི་ལྷ་ཚོགས་ཞལ་མཇལ་ལོ། ༈ །གནས་དེར་མི་ཏྲའི་ལམ་ཡིག་ལས། ཙཱ་རི་ལུང་ཆུང་དུ་ཀླུ་བདུད་ནག་པོ་ཞེས་རྩ་ཁྱད་པར་ཅན་ཅིག་ཡོད་པར་གསུངས་སོ། །ཡང་། གནས་འདིར་ཅི་ལའང་སོམ་ཉི་བྱར་མི་རུང་སྟེ། ཙོང་ཁ་པ་ཆེན་པོ་གནས་སྐོར་ལ་བྱོན་དུས་རབ་ཏུ་བྱུང་བ་ཆང་འཐུང་དུ་མི་རུང་དགོངས་ནས་མ་གསོལ་བས་ཞབས་ལ་སྨྱུགས་ཚལ་ཟུག །གཤེགས་ལ་ཁད་ཐུག །གཞན་ཅི་བྱས་ཀྱང་མ་ཕན། གནས་ཆེན་དུ་ཆང་ལ་རྟོག་པ་བྱས་པས་ལེན་འདྲ་དགོངས་ཏེ་དམ་རྫས་གསོལ་བས་དྭངས་སོ། །ཞེས་ཉིད་ཀྱི་རྣམ་ཐར་དུ་འབྱུང་བ་བཞིན་ནོ། ༈ །མིག་དེ་ཝཱི་ཀོ་ཊ་ཞེས་གཡས་པ་དང་སྦྱར་པ་དེ་ནི་རྒྱ་གར་ཤར་ཕྱོགས་པཱ་ཊ་ལི་པུ་ཏྲ་ཞེས་ཆོས་རྒྱལ་མྱ་ངན་མེད་པའི་ཡུལ་དེ་ལ་ཡོད། གཡོན་དང་སྦྱར་བ་ནི་ལྷོ་བྲག་མཁར་ཆུ་སྟེ། འདི་ལ་ཕྱི་སྐུའི་འཁོར་ལོ་སྤྲུལ་སྐུ་ཟ་བྱེད་ཀྱི་མཁའ་འགྲོ་འདུ་བའི་གནས་བཞི་ཡོད་དེ། ཤར་མོན་ཁ་ནེ་རིང་བདུད་རྩི་སྨན་གྱི་ལྗོངས་ན་དཀར་མོ་སྐུ་ཡི་མཁའ་འགྲོ་མ་རྣམས་ཀྱིས་དྲག་ཏུ་ཉལ། ལྷོ་སྦས་ཡུལ་མཁན་པ་ལྗོངས་རྩི་བཅུད་འབྲས་བུའི་ཚལ། སེར་མོ་རྒྱས་པའི་མཁའ་འགྲོ་ལས་བྱེད་མ། ནུབ་ན་སྒྲུབ་མཚོ་པདྨ་
གླིང་། གཡུ་མཚོ་སློབ་དཔོན་ཆེན་པོའི་འགུགས་བྱེད་ཀྱི་ཕྱག་རྒྱས་སྤྲས་པ། དམར་མོ་དབང་གི་མཁའ་འགྲོ་མ་གནས་པ། བྱང་ན་སྨྲ་བོ་ཅོག་སྒྲོལ་བྱེད་གནམ་ལྕགས་འབར་བའི་རྡོ་རྗེ་ས་ལ་རྒྱུགས་པ་ལྟ་བུ། ལྗང་མོ་ལས་བྱེད་ཀྱི་མཁའ་འགྲོ་མ་རྣམས་ཉུལ་བ། དེའི་ནང་དུ་གསུང་གི་འཁོར་ལོ་ལོངས་སྐུ་འཇིག་རྟེན་གྱི་ཌཱ་ཀི་མ་རྣམས་གནས་པའི་ཞིང་། ཤར་ཕྱོགས་སུ་འོད་གསལ་ལྗོངས། ལྷོ་ཕྱོགས་སུ་དཔལ་གྱི་སེང་གེའི་རི་བོ། ནུབ་ཕྱོགས་སུ་ཚེ་ལམ་དཔལ་གྱི་རི་བོ། བྱང་ཕྱོགས་སུ་དཔལ་མཁོ་མཐིང་གི་ལྷ་ཁང་སྟེ་ཞི་རྒྱས་དབང་དྲག་གི་ལས་རབ་འབྱམས་འགྲུབ་པའི་གནས། དེའི་ནང་དུ་ཆོས་སྐུ་ཡེ་ཤེས་ཀྱི་མཁའ་འགྲོའི་གནས་ལྕགས་ཕུར་ཅན་རྡོ་རྗེ་བཙུན་མོའི་བྷ་ག །སྔོན་གྱི་དུས་སློབ་དཔོན་པདྨ། གནུབས་ནམ་མཁའི་སྙིང་པོ། སྦ་ཡེ་ཤེས་དབང་པོ། རྗེ་བཙུན་རས་ཆུང་ཞབས། ལྷག་པར་ཆོས་ཀྱི་རྒྱལ་པོ་གཙང་པ་རྒྱ་རས་ཕྱག་རྒྱ་ཆེན་པོ་མཆོག་གི་དངོས་གྲུབ་མཛད་པའི་གནས། འདི་ཡི་ནང་དུ་མཆོད་རྟེན་མགོ་ལྔ་པ་བོད་ཁམས་མཐའ་དམག་བཟློག་པའི་རྟེན་འབྲེལ་དུ་གུ་རུ་ཆོས་དབང་གིས་བཞེངས་པ་ལྷ་མོ་མཁར་དཀྱིལ་འཁོར་བདག་པོའི་ཐབས་བདེ་བ་ཆེན་པོའི་རྡོ་རྗེ། དཔལ་གྱི་ཕུག་རིང་ཡང་དག་ཧེ་རུ་ཀའི་བྱིན་གྱིས་བརླབས་པའི་གནས། དུར་ཁྲོད་ལ་ཁ་དཔའ་བོ་དང་ཊཱ་
ཀིའི་ཚོགས་ཀྱི་འདུ་བར་ལོངས་སྤྱོད་པའི་ཞིང་། གཞན་ཡང་དཔལ་ཧེ་ཕུག་དང་། རྡོ་རྗེ་ཕུག །ཡིད་སྨོན་ཕུག །དཀྱིལ་འཁོར་ཕུག་སོགས་ངོ་མཚར་གྱི་བཀོད་པ་བགྲང་ལས་འདས། ཞིང་སྐྱོང་མ་དཔལ་རྡོ་རྗེ་སྣ་ཡོན་མ་དང་། ཞིང་སྐྱོང་འཇམ་དཔལ་ནཱ་ག་རཀཱའམ། མཚན་གཞན་སྨྱོན་ཁའི་བཙན་གྱིས་སྐྱོང་བ་སྟེ། ཀྵེ་ཏྲ་པཱ་ལ་ལུས་ཆེ་བ། ཞེས་དང་། དེ་བཱི་ཀོ་ཏྲར་སྣ་མོ་ཆེ། ༈ ལུས་མེད་མཁའ་འགྲོའི་ཆོས་སྡེའི་རྣམ་བཤད་ལས། མཚོན་བྱ་འབྲས་བུ་དང་། མཚོན་བྱེད་ལམ་གྱི་རྡོ་རྗེ་རྣལ་འབྱོར་མ་གཉིས། དང་པོ་ནི། ཆོས་ཐམས་ཅད་ཀྱི་འབྱུང་གནས་སོ། །གཉིས་པ་སྨིན་གྲོལ་ལམ་གྱི་རྒྱ་མདུད་བཤིག་པ། དམ་ཚིག་རང་སེམས་མེ་ལོང་ལྟ་བ། རིམ་གཉིས་མཉམ་པར་བཞག་པ། དང་པོ་ལ། དཔོན་སློབ་ཀྱི་འབྲེལ་པ། དབང་བཞི་བརྡས་མཚོན་པ། དེ་ལ་རྩོད་པ་སྤངས་པའོ། །གསུམ་པ་ལ། བསྐྱེད་པ་དང་། རྫོགས་པའོ། །དང་པོ་ལ། གཞན་གྱི་དེ་ཉིད་ཉེ་བར་བསྒྲུབ་པ། བདག་གི་དེ་ཉིད་ཉེ་བར་བསྒྲུབ་པ། རྣལ་འབྱོར་ཆེན་པོའི་དེ་ཉིད་ཉེ་བར་བསྒྲུབ་པའོ། །གཉིས་པ་ལ། གཞན་གྱི་དེ་ཉིད་ཆོས་སྐུ། བདག་གི་དེ་ཉིད་ལོངས་སྤྱོད་རྫོགས་སྐུ། རྣལ་འབྱོར་གྱི་དེ་ཉིད་སྤྲུལ་སྐུས་ལམ་དུ་བཤད་པ་གསུམ་ལས། དང་པོ་ལ། རྩ་རླུང་དྲྭ་མིག་འཁོར་ལོས་དྲོད་བསྐྱེད།
བདེ་ཆེན་གསུང་གི་རིན་ཆེན་གྱིས་རྩེ་མོར་བགྲོད། རང་གྲོལ་ཕྱག་རྒྱ་ཆེན་པོས་བཟོད་པ་སྒྲུབ། སྤྱོད་པ་ཆུ་ལ་རལ་གྲིས་ཆོས་མཆོག་ཐོབ་པ་བཞིའོ། །གཉིས་པ་ལམ་གྱི་དྲོད་ཚད་བསྟན་པ་དང་། རིག་པ་ཡེ་ཤེས་སྒྲོན་མེ་བལྟམས་འཇུག་པ་གཉིས་སོ། །གསུམ་པ་ནི། དམ་རྫས་རྟོགས་པའི་ཉི་མ་འདེ་བ་དང་། རོ་སྙོམས་ཕྱི་ཡི་མེ་ལོང་བལྟ་བ་གཉིས་སོ། །དེ་ཡང་གཉལ་ཡངས་པ་ཅན་ཞེས་བྱ་བའི་གྲོང་ཁྱེར་ཆེན་པོའི་དབུས་སུ་དཔལ་གྱི་རི་བོའི་ངོགས་རྡོ་རྗེ་གདན་གྱི་གཙུག་ལག་ཁང་དུ་སླེབས་པའི་ཚེ། མཚན་ཐུན་ཐ་མ་རྫོགས། སྐྱ་རེངས་འཆར་ཀ་ཙམ་ལ་གཉིད་ཐུམ་དུ་སོང་བའི་རྨི་ལམ་དུ་སྲིན་ཡུལ་རྔ་ཡབ་ཀྱི་གླིང་ནས་སློབ་དཔོན་ཆེན་པོ་པདྨ་འབྱུང་གནས་ཀྱིས་བརྫངས་པའི་ཕོ་ཉ་བ་སྲིན་པོ་གདོང་གཅིག་པ་མདོག་སྨུག་ནག་རའི་གཡང་གཞིས་སྨད་དཀྲིས་ཤིང་། མི་མགོ་ཡ་མགལ་གཅིག་ཐོད་དུ་བཅིངས་པ་གཉིས་བྱུང་ནས་སློབ་དཔོན་ཆེན་པོའི་བཀའ་ལས། ཁྱེད་ལ་ད་ལོ་དམ་སྲི་སྤུན་དགུའི་བར་ཆད་ཆེ་བར་འདུག་པས། གདམས་པ་འདི་ཉམས་སུ་ལོངས། ཕྱིས་ཀྱང་དེ་བཞིན་དུ་བྱས་ན་བར་ཆད་ལས་རྒྱལ་བར་འགྱུར་རོ། །ཞེས་བཀའ་སྩལ་ཏེ་ལོག་གོ་སྙམ་སེམས་པའི་མོད་དེ་ཁར་རང་གི་མདུན་གྱི་ནམ་མཁར། སྣམ་ལོགས་གཡོན་དུ་ཉེ་བའི་ཐད་ན་རིག་འཛིན་ཆེན་པོ་དྲག་པོ་
རྩལ་སྟོད་ཁྲོ་རྒྱལ། སྨད་ཕུར་པའི་དབྱིབས་ཅན་འཆད་པར་འགྱུར་བ་ཇི་ལྟ་བ། སྐུའི་རྒྱན་དང་སྔགས་ཕྱག་རྒྱ་མི་སྒྲིབ་ཅིང་དྲག་པོའི་སྔགས་སྒྲ་དང་བཅས་པ་མཐོང་བའི་མོད་ལ་ཟིལ་གྱིས་བརྒྱལ་བ་སྙམ་བྱེད་པ་ཞིག་བྱུང་སྟེ་མཐར་ཡལ་ལོ། །ཞེས་སོགས་བླ་མ་དྲག་པོ་ཀཱི་ལ་ཡའི་མན་ངག་ཏུ་གསུངས་སོ། ༈ །རྒྱུད་བཞིའི་དཀར་འགྲེལ་ལས། གཞན་དག་ན་རེ། འདི་ནི་གཡུ་ཐོག་པས་མཛད་དེ། གླེང་གཞི་ལ་སོགས་པ་རབ་བཏགས་སོ། །ཞེས་ཟེར་ལ། ལུགས་འཛིན་ཕལ་ཆེར་རྒྱུད་ཡང་དག་པར་འདོད་ཅིང་གྲྭ་པ་མངོན་ཤེས་ཀྱི་གཏེར་ནས་ཕྱུང་ཞེས་གྲགས་ཤིང་། རྙིང་མའི་རྒྱུད་འབུམ་ལས་ཀྱང་བྱུང་བས། དེའི་དབང་དུ་བྱས་ནས་བཤད་ལ། སྨན་གྱི་གྲོང་ཁྱེར་འདི་ཡང་བེཟླུརྒྱའི་འོད་ཀྱི་རྣམ་པར་སྣང་བྱེད་ཅེས་པ་སྨན་བླའི་ཞིང་དེ་ན་དང་། འདི་འཆད་པ་ཡང་གཞུང་ཉིད་ལས་སྨན་རྒྱལ་དུ་གསུངས་ཤིང་། འོ་སྐོལ་གྱི་སྟོན་པས་འཚོ་བྱེད་གཞོན་ནུ་གསོས། རི་བོ་སྤོས་ངད་ལྡན་དུ་ཁྲིད་ནས་དེའི་ཁེངས་པ་བཅོམ་ནས་སླར་ཟློས་བུར་གསུངས་པ་སྟེ། དཔེར་ན་བྱམས་པའི་སྨོན་ལམ་ལྟ་བུའོ། །འོ་ན་མཇུག་དོན་ལས། རྒྱ་གར་ལ་སོགས་པའི་སྨན་གྱི་བསྟན་བཅོས་ཐམས་ཅད་འདིར་འདུས་པར་བཤད་པ་དང་འགལ་ལོ་ཞེ་ན། དེ་ནི་མ་འོངས་ལུང་སྟོན་པ་སྟེ། དཔེར་ན་དུས་ཀྱི་འཁོར་ལོ་ལས། བོད་
དུ་བོད་ཀྱི་སྐད་ཀྱིས། ཞེས་གསུངས་ཀྱང་། དུས་འཁོར་གསུངས་པའི་དུས་བོད་ཆགས་པར་མི་འདོད་པ་བཞིན་ནོ། །ཞེས་སོ། ༈ །མཁའ་འགྲོ་མནྡཱ་ར་བ་ནི། ཁྱུང་པོས་མཇལ་བའི་ཚེ་ནི་གུ་མ། གཉན་ལོས་མཇལ་བའི་ཚེ་རི་སུལ་གྱི་རྣལ་འབྱོར་མ། རྗེ་མར་པས་མཇལ་ཚེ་མི་རུས་ཀྱི་རྒྱན་ཅན་ནམ། ཆུ་ཤིང་གི་སྙེ་མ་ཅན། རས་ཆུང་པས་མཇལ་བའི་ཚེ་གྲུབ་པའི་རྒྱལ་མོར་གྲགས་ཤིང་མཚན་དངོས་ཀྱང་དེའོ། །ཚེ་དཔག་མེད་ཀྱིས་བྱིན་གྱིས་བརླབས་ནས་རྣམ་སྨིན་གྱི་ལུས་མ་བསྡུས་པར་སྐལ་ལྡན་གྱི་ཚེ་བསྲིངས་ཞེས་རྗེས་སུ་གནང་བས་ད་ལྟ་ཡང་བཞུགས་པར་གྲགས་སོ། །ན་མོ་ཨ་མི་ཏོ་ཧོ། ཞེས་པ་རྒྱ་ནག་གི་ཡི་གེ༦། ༈ །ཕྱག་ཆེན་བསམ་གྱིས་མི་ཁྱབ་པར་བཤད་པའི། རྟ་མཆོག་ཛི་ནའི་ཞལ་ལྔ་ནི་འཇམ་དཔལ་བཤེས་གཉེན་དང་། གུཌྷཾ་ར་ཞེས་པ་ནི་བྱིའུ་གསོད་སྟེ་ཤྲཱི་སེངྷར་གྲགས་སོ། ༈ །དེ་བས་སྔོན་གྱི་ལྡེབ། ༣༨ སྔ་འགྱུར་སྐབས་མ་ཚང་། དེ་ཡང་ཀློང་སྡེ་རྡོ་རྗེ་ཟམ་པའི་ལོ་རྒྱུས་སྐབས་འཇོངས་ཆུང་བའི་རྣམ་ཐར་ནས། དེ་ནས་ཐག་རིང་ནས་ཞུ་བ་ཡང་མང་དུ་བྱུང་ཞིང་མང་དུ་འཕེལ། ཇོ་བོ་མཁར་ངེས་སུ་སྦལ་བུ་དོར་ལ་སྤྱན་དྲངས་ནས་གདམས་ངག་གསུངས་པས། ཉི་མ་སྔ་དྲོ་དང་པོ་ལ་འཇིགས་ནས། མྱང་དྷརྨ་སིདྷ་དང་། སློབ་དཔོན་གསེར་གཞུང་པ་དང་།
ཞེས་པའི་བར་མ་ཚང་། པཎྜི་ཏ་ནགས་ཀྱི་རིན་ཆེན་གྱི་ཞལ་ནས། སྐྱེ་བོ་མུ་སྟེགས་བ་རྣམས་རབ་ཏུ་སད་ཅིང་འདུལ་དོན་དུ། །ཡོངས་རྫོགས་ཟླ་བའི་ཞལ་ནི་རྣམ་པར་སྒེག་པའི་དཔྲལ་བ་ཡི། །གནས་ལས་ལྷ་སྲས་དབང་ཕྱུག་ཆེན་པོ་ངེས་འབྱུང་བས། །ལྷ་ཡི་ཤིན་ཏུ་ལྷ་དང་ཆེན་པོའི་མི་ཡི་དབང་ཕྱུག་ཁྱོད། །ཅེས་དང་། འདི་ན་དཔལ་མོར་རིམ་གྲོ་བསྙེན་བཀུར་སྦྱོར་བ་པོ་རྣམས་ནི། །གདུལ་དང་ངེས་པར་སད་ཕྱིར་བཅོམ་ལྡན་དབྱངས་ཅན་མ་འདི་དག་རྒྱལ་བའི་སྲས་པོ་ཁྱོད་ཀྱི་མཆེ་བའི་རྩེ་ལས་རབ་བྱུང་བས། །མངོན་འདོད་ཤེས་རབ་འབྲས་བུ་སྟེར་བ་དེ་ལ་བདག་ཕྱག་འཚལ། །ཞེས་བཤད་པ་འཇིག་རྟེན་དབང་ཕྱུག་གི་བསྟོད་པ་རིན་པོ་ཆེའི་ཕྲེང་བ་ལས་སོ། ༈ །རྡོ་རྗེ་ཐེག་པའི་ལམ་སྐོར་དགུར་གྲགས་པ་ལས། གྲུབ་ཆེན་བི་རཱུ་པའི་བཞེད་སྲོལ་ལམ་འབྲས་བུ་དང་བཅས་པ་ནི། ནག་པོ་པ། ཌ་མ་རུ་པ། ཨ་ཝ་དྷུ་ཏི་པ། ག་ཡ་དྷ་རའི་བར་བརྒྱུད་ནས། དེ་ཉིད་བོད་དུ་ལན་གསུམ་ཕེབས་པའི་དང་པོ་འབྲོག་མི། བར་པ་འགོས། ཐ་མ་གྱི་ཇོ་ཟླ་འོད་རྣམས་ལ་གནང་བའི་ལུགས་སྲོལ་ལས། བར་པ་ལ་ཀྱེ་རྡོར་རྒྱུད་རྐྱང་གི་སྨིན་གྲོལ་ལས་ལམ་འབྲས་མ་གནང་བས་གྲུབ་ཆེན་དེས་དངོས་སུ་གནང་བ་གཉིས་སོ། །འབྲོག་མི་ལ་གཞུང་ཚང་བ༧། མན་ངག་ཚང་བ་། གྲུབ་པ་ཐོབ་པའི་སློབ་མ་
གསུམ་ལས། གཉིས་པ་ནི། འབྲོམ་དེ་བ་སྟོན་ཆུང་ཙནྡྲ་བརྟི་ཞེས་གྲགས་པ་དང་། ལྷ་བཙུན་ཀ་ལི། སེ་མཁར་ཆུ་བ་གསུམ་ལས། དང་པོ་ལའང་འགའ་ཞིག་འཕེལ། ཕྱི་མ་ལ་ལམ་འབྲས་རབ་ཏུ་ཐོབ་པ་ཞང་སྟོན་སྐུ་མཆེད། འབྲིང་དུ་ཐོབ་བ་ཞྭ་མ་ལྕམ་སྲིང་། མཐའ་མ་སེ་སྒོམ་བྱང་ཡེ་རྣམས་སོ། །ཀྱེ་རྡོར་བཀའ་བབས་བཞི་ནི། མན་ངག་ལུགས། ཌོམྦི་ལུགས། མཚོ་སྐྱེས་ལུགས་། ནག་པོ་ལུགས་རྣམས་སོ། །དེ་ནས་ལམ་འབྲས་ཞང་ལུགས་སུ་གྲགས་པ་ནི། ཞང་དགོན་པ་བ། ཞྭ་མ་དཀོན་མཆོག །སློབ་དཔོན་ཉང་སྟོན། མཁན་པོ་སྨོན་མཁར་བའི་བར་དུ་བརྒྱུད་ཅིང་ཅུང་ཟད་འཕེལ། ལམ་འབྲས་ཞྭ་མ་ལུགས་ལ་སྔར་བྱོན་པ་མོ་རྒྱུད་ཕོ་རྒྱུད་གཉིས། ཕྱིས་བྱུང་བ་བསྲེས་པའི་ལུགས་དང་གསུམ་མོ། །དང་པོ་ནི། གྲུབ་པའི་དབང་མོ་མ་གཅིག་ཞྭ་མ་དང་། དེས་ཉང་སྒོམ་ཆེན་མོ། དེས་བླ་མ་སྨོན་མཁར་བ། དེས་གཉོས་ཆོས་ཀྱི་གཟི་བརྗིད། དེས་བླ་མ་ཀོ་བྲག་པ་སོགས་ལས་བརྒྱུད་དེ་དར་རྒྱས་སུ་གྱུར། བླ་མ་ཀོ་བྲག་པའི་ལུགས་ནི། ཀོ་བྲག་པ་བསོད་ནམས་རྒྱལ་མཚན་གྱིས་མཁན་པོ་སྨོན་མཁར་བ་ལ་ཞྭ་མ་མོ་བརྒྱུད་དང་། ཞང་དགོན་པ་བར་ཞྭ་མ་དཀོན་མཆོག་གིས་ཞུས་པ་ལམ་འབྲས་ཞང་ལུགས་སུ་གྲགས་པ་རྣམས་ཞུས་ནས་བསྒོམས་པས་དྲོད་
རྟགས་སྐྱེས། ལྷག་པར་གེགས་སེལ་ལ་མཁས་པར་བྱུང་། དེ་ལ་ལྷ་ལུང་པ་མཁའ་འགྲོ། རྒྱ་གར་ཡེ་ཤེས། གཉོས་རྡོ་རྗེ་སེང་གེ་གསུམ་གྱིས་ཞུས་ནས་འཕེལ། གཉིས་པ་ཞྭ་མ་ཕོ་ལུགས་སུ་གྲགས་པ་ལ། ལམ་འབྲས་སྤང་རྗེ་ལུགས་ནི། སེ་སྟོན་ལ་ཞྭ་མའི་མིང་པོ་རྗེ་ཁུང་བུ་ཞྭ་མ་ཆོས་ཀྱི་རྒྱལ་པོ། དེས་སེ་སྒོམ་བྲག་སྐྱབས་དང་། ཞྭ་མ་ཙིནྡྲ་གཉིས། དེ་གཉིས་ཀ་ལ་སྤང་རྗེ་ཉི་མ་གྲགས་དང་རྗེ་མར་ཇོ་བ་གཉིས་ཀྱིས་ཞུས་སོ། །སྔ་མར་ཟངས་ཕུག་པ་སོགས་ཀྱིས་ཞུས་ནས་དར། ལམ་འབྲས་མང་ལམ་ལུགས་ནི། ཞྭ་མ་ཙིནྡྲི་ལས། མང་ལམ་ཇོ་སྟན་སེང་གེ་བཟང་བོའམ། བྱང་ཆུབ་བཟང་པོའམ། རྣལ་འབྱོར་པ་ཀྱེ་ཡི་རྡོ་རྗེར་གྲགས་པའི་བཤེས་གཉེན་དེས་ཞུས་ཤིང་བསྒོམས་པས་གྲུབ་པ་བརྙེས་ནས་ཡིག་ཆ་ཡང་མང་དུ་མཛད་དོ། །གསུམ་པ་བསྲེས་པའི་ལུགས་ལ། ལམ་འབྲས་བཀའ་རྒྱ་མའམ་ཆ་གན་ལུགས་ནི། ས་པཎ་གྱི་སློབ་མ་ཀུན་མཁྱེན་པུ་ཧྲང་པ་སངས་རྒྱས་གྲགས་ལས་ས་ལུགས་དང་། མ་གཅིག་ཞྭ་མ་ནས། ཞང་རས། མང་ལམ། ཞིག་པོ། ཉང་རས། མ་གཅིག་གི་དེ་ལས་ཞྭ་མ་ལུགས་གཉིས་ཀ་བླ་མ་ཆ་གན་པ་དབང་ཕྱུག་རྒྱལ་མཚན་གྱིས་ཞུས་ཤིང་བསྒོམས་པས་ཉམས་རྟོགས་འཁྲུངས་ནས་ཡིག་ཆ་རྒྱ་ཆེར་མཛད། དེ་ལ་མཉམ་མེད་གྲགས་པ་རྒྱལ་མཚན་སོགས་
ཀྱིས་ཞུས་ནས་དར་རོ། །ཇོ་ནང་ལུགས་ནི། ཀུན་སྤངས་ཀུན་ཏུ་བཟང་པོ་དཔལ་མི་བསྐྱོད་རྡོ་རྗེར་གྲགས་པས་ཁ་ཆར་བ་རིན་ཆེན་འོད་ལ་ཞྭ་ལུགས་ཕོ་རྒྱུད་མོ་རྒྱུད་གཉིས་ཀ་གསན་ནས་ཉམས་བཞེས་གནང་། སེ་སྟོན་གྱིས་རྣམ་འཕྲུལ་མཐོང་བ་ལ་བསྟེན། ཞྭ་ལུགས། འབྲོམ་ལུགས། ས་ལུགས་གསུམ་བསྲེས་ནས་རྡོ་རྗེའི་ཚིག་རྐང་རྩ་འགྲེལ་མཛད། དེ་ལ་བྲག་ཁ་གྲགས་པ་སེང་གེ་སོགས་ཀྱིས་ཞུས་ཏེ་དར། དབང་རྒྱལ་ལུགས་ནི། ཇོ་ནང་ཀུན་སྤངས་ཆེན་པོའི་སློབ་མ་ལ་སྟོད་གཉོས་དབང་རྒྱལ་དུ་གྲགས་པ་དེས་ཞྭ་ལུགས་ཀྱི་ལམ་འབྲས་གསན་ནས་སྦྱོར་དྲུག་བསྲེས་ནས་ལམ་འབྲས་སྔ་མ་སུ་དང་ཡང་མི་མཐུན་པའི་རྟོག་བཟོ་ཆེན་པོ་བྱས་སོ། །ལམ་འབྲས་ལྕེ་སྒོམ་ལུགས་ནི། ས་ཆེན་གྱི་སློབ་མ་དཔལ་ཏལ་ཕུག་པ་དང་། ཡང་ས་ཆེན་ཉིང་སློབ་སློབ་དཔོན་ཇོ་བོ་ལ་ལྕེ་སྒོམ་རིན་པོ་ཆེས་ཞུས། བསྒོམས་པས་ཉམས་མྱོང་བསམ་གྱིས་མི་ཁྱབ་པ་ཤར། ལམ་འབྲིང་པོའི་ཡིག་ཆ་ཞིག་མཛད་པ་ཡང་ཕལ་ཆེར་ས་ལུགས་དང་མཐུན། དེས་སྤྲུལ་སྐུ་བརྩོན་འགྲུས་ལ་གནང་ནས་ཅུང་ཟད་འཕེལ། ལམ་འབྲས་ཕག་གྲུ་ལུགས་ནི། ཕག་མོ་གྲུ་པས་ས་ཆེན་ལོ་༡༢བསྟེན། མན་ངག་ཐོབ་པས་གཞུང་བཤད་དཔེ་མཛོད་མ་ཞེས་གྲགས་པ་མཛད་དོ། །གྱི་ཇོ་ལུགས༡། འབྲོམ་ལུགས༢།
ཞང་སྟོན་ལུགས༣། ཞམ་ལུགས་༤ ཀོ་བྲག་ལུགས༥། སྤང་རྗེ་ལུགས༦། མང་ལམ་ལུགས༧། ཆ་གན་ལུགས༨། ཇོ་ནང་ལུགས༩། དབང་རྒྱལ་ལུགས༡༠། ལྕེ་སྒོམ་ལུགས༡༡། ས་ལུགས༡༢། །མཁར་ཆུ་ལུགས༡༣། གཉོས་ལུགས༡༤། །ཉང་ལུགས༡༥། འགོས་ལོས་འགྱུར་བའི་རྡོ་རྗེའི་ཚིག་རྐང་དང་དབང་གི་རབ་དབྱེ་འདུག་པས་འགོས་ལུགས༡༦། ཕྱི་མ་ཕེབས་པའི་ཚེ་གཉོས་ལོ་ཙཱ་བ་ཡོན་ཏན་གྲགས་པ་ལ་ཡང་གསུངས་པར་ངེས་པས་གཉོས་ལུགས༡༧། གཞན་ཡང་གྲགས་པ་དང་། ས་པཎ་གཉིས་ཀའི་སློབ་མ་ནགས་ཕུག་༡༨པ་འཇམ་དབྱངས་ཤེས་རབ་འོད་ཟེར་ལས་འཕེལ་བ་དང་། གྲགས་པཎ་གཉིས་ཀའི་སློབ་མ་ཤར་བ་ཤེར་འབྱུང་གིས་གཞུང་བཤད་ཆེན་མོ་མཛད༡༩། ཡང་ཆོས་རྗེའི་སློབ་མ་ཚོགས་སྒོམ་པ་ཀུན་དགའ་དཔལ་ལས་གཉགས་སྙིང་པོ་རྒྱལ་མཚན། དེ་ལས་བར་སྟོན་དང་། རྒྱ་རྒན་ཐུགས་རྗེ་བསོད་ནམས་༢༠གཉིས་ཀྱིས་ཞུས་ཤིང་གཉིས་ཀས་ཡིག་ཆ་མཛད། ཡང་ཆོས་རྗེའི་སློབ་མ་དམར་སྟོན་ཆོས་ཀྱི་རྒྱལ་པོས་ལམ་འབྲས་གཞུང་བཤད་དམར་མ་སོགས་མཛད་པ་མཐའ་ཡས་སོ། །ཕྱིས་སུ་ངོར་རྫོང་ཚར་གསུམ་ལས་རྒྱ་ཆེར་འཕེལ་བ་ལགས། ༈ །གསང་འདུས་ཀླུ་སྒྲུབ་ལུགས་ལ། འགོས་ཀྱིས་པཎ་གྲུབ་མང་པོ་ལས་གསན། དེ་ལ་
སློབ་མ་ཀ་བ་ཚུགས་པ་བཞི། གདུང་ཐེག་པ་བརྒྱད་སོགས་ལས་ཚོགས་ཕྲིན་ལས་ལ་མཁས་པ་ཕྱམ་དང་དྲལ་མ་གཤིབས་པ་ལྟ་བུ་བསམ་གྱིས་མི་ཁྱབ་པ་ལས་དམར་སྟོན་སེང་རྒྱལ་དང་རྔོག་ཡེ་ཤེས་སེང་གེ་སོགས་ལ་བརྒྱུད་པས་རྔོག་ལུགས་ཞེས་གྲགས། མར་པ་ལོ་ཙཱས་ནཱ་རོ་པ་དང་། ནུབ་ཀུ་རུ་ཀྵེ་ཏྲར་ཡེ་ཤེས་སྙིང་པོ་ལ་གསན་པའི་སྔ་མར་གྲུབ་ཐོབ་ཀུ་སཱ་ལི་དང་། ཕྱི་མར་མཁས་པ་པཎྜི་ཏའི་བརྒྱུད་པར་འདོད། ཇོ་བོས་རོང་པ་འགར་དགེ་ལ་གནང་བ་ཇོ་ལུགས་སམ་རོང་ལུགས། ནི་སྐ་ལངྐ་དེ་བ་ལ་ཆག་ལོ་ཙཱ་བས་ཞུས་པ་ཆག་ལུགས། ཡང་རེ་བེ་བ་ལ་ཡང་ཞུས། ཤཱཀྲ་ཤྲཱི་ལས་ས་པཎ་གྱིས་ཞུས་པ་ས་ལུགས། དེ་ལ་དཔྱལ་ལོ་ཙཱ་བ་ཆོས་ཀྱི་བཟང་པོས་ཞུས་པ་དཔྱལ་ལུགས་ཏེ། སྔ་མ་ལྔ་དབང་བཤད་གཉིས་ཀ་དང་། ཕྱི་མ་དབང་རྒྱུད་དོ། །ཡེ་ཤེས་ཞབས་ལུགས་ནི། པདྨ་ཀ་ར་ལས་ལོ་ཆེན་རིན་བཟང་གིས་གསན་པ་དང་། བ་ལིཾ་ཨཱ་ཙརླ་ལས་གཉོས་ལོ་ཙཱ་བ་རྡོ་རྗེ་བླ་མས་གསན་པ་གཉོས་ལུགས་དང་། པུཎྱ་ཤྲཱི་ལས་རྭ་རྡོར་གྲགས་ཀྱིས་གསན་པ་རྭ་ལུགས་སོ། །བདེ་མཆོག་ལཱུ་ཧི་པ། ཕམ་མཐིང་པ་སྐུ་མཆེད་ནས་ཀློག་སྐྱ་ཤེས་རབ་བརྩེགས། དེས་མལ་ལོ། ས་ཆེན་སོགས་བརྒྱུད་པ་ས་ལུགས། བལ་པོ་བྷ་དན་པ་ལས་མར་པ་དངོས་ལ་བརྒྱུད་པ་མར་ལུགས། ཇོ་བོ་ཤཱནྟི་པ་
ནས་རོང་པ་འགར་དགེར་བརྒྱུད་པ་རོང་ལུགས་སམ་ཇོ་ལུགས། ཤཱཀ་ཤྲཱི་ནས། བི་བྷུ་ཏི་ཙནྡྲ་ནས་བརྒྱུད་པར་པཎ་ཆེན་ལུགས། ཀ་ཎ་ཤྲཱི། ཕམ་མཐིང་པ། བྷ་དན་གསུམ་ཀར་པུ་ཧྲང་ལོ་ཆུང་གྲགས་a མཆོག་གིས་གསན་པར་དབང་བཤད་གཉིས་ཀ་ཡོད། གཞན་ཡང་པུ་ཧྲང་པའི་བརྒྱུད་འཛིན་ལས་གྱེས་པ་དམར་ལུགས་དང་། པཎ་ཆེན་ཀྵི་ཏི་གནྡྷ་ནས་དཔྱལ་ཆོས་བཟང་ལ་བརྒྱུད་པ་དཔྱལ་ལུགས་ཏེ། བཤད་པ་ལ་མལ་གྱོ་དང་། པུ་ཧྲང་ལུགས་གཙོ་ཆེ། ཡང་སྦལ་ཡང་སྣང་ལུགས་ནི། ཇོ་བོ་རྗེ་ལ་ལོ་ཆེན་དང་། ནག་ཚོས་གསན་པའི་རྒྱུན་ལས་སྒོམ་པ་མང་སྒོམ་ལ་སྦལ་ཡང་སྣང་གིས་གསན་ནོ། །ནག་པོ་པའི་དབང་རྒྱུད་ནི་མལ་གྱོ་ལས་བརྒྱུད། དྲིལ་བུ་པ་ཀློག་སྐྱ་ནས་མལ་གྱོ་དང་། ཁ་ཆེ་པཎ་ཆེན་ནས། སྤྱི་བོ་ལྷས་པ་སེང་གེ་དཔལ་ལ་བརྒྱུད་པ་ས་ལུགས་དང་། ཁ་ཆེ་ལུགས་གཉིས་དང་། དྲིལ་བུ་པའི་ལྷ་བཅུ་གསུམ་མ་ནི། སུ་མ་ཏི་ཀཱི་རྟི་ནས་མར་པ་དོ་པ་ལ་བརྒྱུད་པའོ། །ལོ་པའི་མངོན་རྟོགས་རྩ་འགྲེལ། ཕྱི་རོལ་མཆོད་པ། ལག་མཆོད། གཏོར་ཆོག་ལྔ་ལ་ལུ་ཧི་པའི་སྨད་ལྔར་གྲགས། དང་པོ་རང་ཉིད་དང་། ཕྱི་མ་༤པྲཛྙཱ་རཀྵི་ཏས་མཛད། སྒྲུབ་དཀྱིལ་སྦྱིན་སྲེག་སྟེ་བསྐྱེད་རིམ་དང་། དབྱིད་ཐིག །གསང་བའི་དེ་ཉིད་གསལ་བ། ཨོ་ལ་པ་ཏི་སྟེ་རྫོགས་རིམ་སྟོན་པའི་
ནག་པོ་གཞུང་དྲུག །སྒྲུབ་ཐབས། དབང་གི་བྱ་བའི་རིམ་པ། རིམ་ལྔ་སྟེ་དྲིལ་བུ་སྐོར་གསུམ་ཞེས་གྲགས། མངོན་པ་ཀུན་བཏུས་བཤད་པ་སྔ་འགྱུར་གྱི་སྐབས་དཱ་ན། ཛི་ན་གཉིས་ལ་ཅོག་ཞང་། སྐབས་གསན་ནས་རིམ་པར་བརྒྱུད་པ་ལ། ཕྱིས་ལི་སྟོན་ཆོས་གྲགས་ལ་བྲང་ཏི་དར་མ་སྙིང་པོས་གསན་ནས་འཆད་ཉན་རྩལ་དུ་བཏོན། རྣལ་འབྱོར་རྒྱུད་འཇམ་དཔལ་གསང་ལྡན། འཇམ་དབྱངས་ནས་འཇམ་བཤེས། དེས་སྒེག་པའི་རྡོ་རྗེ་ནས་རིམ་པར་བོད་དུ་སྨྲ་ཏིས་ཤཱནྟིང་གབྷ་ལས་དར་བར་མཛད། ཆད་སྡེ་ངག་གི་དབང་ཕྱུག །ཁམ་པ་ཤེས་རབ་རྡོ་རྗེ། ཡང་ན་ཤིནྟཾ་གནྡྷ་ནས། ཉི་མའི་དངོས་གྲུབ། སྐྱི་བྱེ་མ་ལུང་པ། དེ་གཉིས་ཀ་ལས། ཤེར་རྡོར་གྱིས་གསན། དེ་ལ་རྔོག་ཆོས་སྐུ་རྡོ་རྗེ་ནས་རྔོག་པའི་ཕྱོགས་ལ་བཀའ་བབས་པར་བཤད་སྣང་ངོ་། ༈ །བསྟན་བཅོས་ཉེར་སྦས་སོགས་ཀྱིས་བྱེ་བྲག་བཤད་པའི་ནང་ཚན་འདུལ་བ་བྱེ་བྲག་བཤད་པ། དྲི་མེད་བཤེས་གཉེན་དང་ཁྱད་པར་བཤེས་གཉེན་སོགས་ཀྱིས་སོ་ཐར་གྱི་མདོ་བཀྲལ། དགེ་ལེགས་བཤེས་གཉེན་གྱིས་ལུང་མ་མོ་དང་། དུལ་ལྷས་རྣམ་འབྱེད། དགེ་བའི་བཤེས་གཉེན་གྱིས་ལུང་ཞུ་བ། ཚུལ་ཁྲིམས་བཤེས་གཉེན་གྱིས་ཕྲན་ཚེགས། ཕྱིས་དབྱིག་གཉེན་སློབ་མ་འདུལ་བ་རང་ལས་མཁས་པ་ཡོན་ཏན་འོད་ཀྱིས་མདོ་རྩ་དང་། རང་
འགྲེལ། ཆོས་བཤེས་ཀྱིས་རྒྱ་ཆེར་འགྲེལ་སོགས་མཛད། བོད་དུ་བཤད་རྒྱུན་ནི་བསྟན་པའི་གཏད་རབས་བདུན་གྱི་རྗེས། ཕྱིར་མི་འོང་བློས་མི་འབེབས། ཡོན་ཏན་འོད། ཤཱཀྱ་འོད་ཆོས་བཤེས་གཉིས། དེས་སེང་གེའི་གདོང་ཅན། དེས་དཱ་ན་ཛི་ན་གཉིས་ལ་སྐ་ཅོག་ཞང་གསུམ་གྱིས་གསན་ནས་དར། སྡོམ་རྒྱུན་ནི་འཕགས་པ་ཤཱ་རིའི་བུ་ནས་བརྒྱུད་བོ་དྷི་སཏྲ་ལས་བོད་དུ་དར་ཞིང་། བཤད་རྒྱུན་སྟོད་འདུལ་སྨད་འདུལ་གཉིས་ཀ་གཟུས་ནས་ཆུ་བོ་གཅིག་འདྲེས་སུ་གྱུར་པས་གཟུས་ལ་བུ་བཞིར་གྲགས་པ་སོགས་བྱུང་། ཁ་ཆེ་པཎ་ཆེན་གྱིས་ཀྱང་ས་པཎ་ལ་མདོ་རྩ་དང་། ཁྲོ་ཕུར་མེ་ཏོག་ཕྲེང་རྒྱུད་གསུངས་ནས། དེའི་རྒྱུན་ལས་ཕྱིས་སུ་བུ་སྟོན་རིན་པོ་ཆེ་དང་། ཀུན་མཁྱེན་རོང་སྟོན་སོགས་ལ་ལུགས་གསུམ་ཀ་བཀའ་བབས་པར་གྱུར། ༈ །མར་པས་ནཱ་རོ་པ་སྟེ་རྩོད་མེད་ཞབས་ལ་གཙོ་བོར་དགྱེས་རྡོར། དེས་ལུང་བསྟན་ཏེ་ནུབ་ཀུ་རུ་ཀྵེ་ཏྲར་ཡེ་ཤེས་སྙིང་པོར་གསང་འདུས། ཀུ་ཀུ་རི་པ་ལ་མ་ཧཱ་མཱ་ཡ། མེ་ཏྲི་པ་ལ་ཕྱག་ཆེན། རུས་པའི་རྒྱན་ཅན་མ་ལ་གདན་བཞི་སོགས་གསན། ཕྱིས་རྔོག་སྟོན་ཆོས་སྐུ་རྡོ་རྗེས་དེ་རྣམས་གསན། དེ་ཡང་དགྱེས་རྡོར་ལྷ་དགུ། བདག་མེད་ལྷ་མོ་བཅོ་ལྔ། གདན་བཞི་ཡབ་བཀའ་ལྷ་མང་། ཡུམ་བཀའ་ཡེ་ཤེས་དབང་ཕྱུག །མ་ཧཱ་མཱ་ཡཱ་ལྷ་ལྔ། གུར་རིགས་
བསྡུས་མཁའ་འགྲོ་ལྔ་སྟེ་མར་པ་ལས་བྱུང་བ་དྲུག་དང་། གནམ་བྱེ་མ་ལུང་པ་དང་ཁམ་པ་ཤེར་རྡོར་ལས་མཚན་བརྗོད་རྣལ་འབྱོར་རྒྱུད་ལྟར་བཀྲལ་བའི་བཤད་པ་དང་། འཇམ་དཔལ་གསང་ལྡན་གྱི་སྐོར་གསན་ཏེ་རྔོག་དཀྱིལ་བདུན་དུ་གྲགས་སོ། ༈ །ངོར་ལུགས་དཀྱིལ་འཁོར༧། ཀྱེ་གུར་སཾ་གསུམ། ལུ་ནག །གསང་འཇམ་རྣམས་སོ། །དགེ་ལྡན་པས་གསང་བདེ་འཇིགས་གསུམ་རྩལ་| བཏོན་བྱས། ཀར་ཕྱོགས་ཁ་ཅིག་བདེ་ཀྱེ་དུས་གསུམ་ལ་ནན་ཏན་མཛད། ནག་རྒྱལ་ཕག་གསུམ་ཞེས་པའང་སྣང་སྟེ་ཀཾ་ཚང་ལུགས་སོ། །བདེ་མཆོག་མཁའ་འགྲོ་རྒྱ་མཚོ་དང་། རྡོ་རྗེ་མཁའ་འགྲོ་དང་། སྡོམ་འབྱུང་དང་། བོང་ཞལ་ཅན་དང་། སྟོད་འགྲེལ་ལུགས་སོགས་མང་ངོ་། །རྙིང་ལུགས་བཀའ་མ། མདོ་སྒྱུ་སེམས་གསུམ། ལོ་དྲིལ་ནག་གསུམ། གཏེར་མ་བླ་རྫོགས་ཞི་དྲག་གཉིས་ཐུགས་གསུམ། ཞི་དྲག་གཉིས། བཀའ་རྣམ་གསུམ་དགོངས་སྔ་ཕྱི་བར་གསུམ་ཕུར་གསུམ་བཀའ་གཏེར་གཉིས་རྣམས་དར་སོ་ཆེ། བཀའ་འདུས། དགོངས་འདུས། རིག་འཛིན་ཡོངས་འདུས་སམ་གྲོལ་ཐིག་[ |གསུམ་ལ་དགོངས་འདུས་སྔ་ཕྱི་བར་གསུམ། བདེར་འདུས། གསང་རྫོགས། རང་ཤར་གསུམ་ལ་བཀའ་བརྒྱད་རྣམ་གསུམ། ཕུར་པ་ཇོ་ལུགས། འཁོན་ལུགས། ངོར་ལུགས་སོགས་བཀའ་མ་
དང་། ཆོས་དབང་། སངས་གླིང་། རཏྣ་གླིང་པ་སོགས་གཏེར་མ་སྔ་ཕྱི་མང་། ༈ །དུས་འཁོར་རྒྱུད་འདི་བོད་དུ་གྱི་དུས་ཞབས་པ་ཤྲཱི་བྷ་དྲ་དང་། ཞང་རྒྱ་གར་བརྩེགས། ཇོ་ཟླ་འོད་ཀྱིས་འགྱུར། དེ་ནས་བཟུང་མར་འོད་བྱང་ཆུབ་ཤེས་རབ། རྨ་དགེ་བའི་བློ་གྲོས། བློ་གྲོས་སྙིང་པོ། བསོད་ནམས་ཡེ་ཤེས། འབྲོམ། འགོས། གཉན་དར་གྲགས། ལྡི་རི་ཆོས་གྲགས། རོང་གླིང་ལོ་ཙཱ། སྟེང་པ། རྭ་ཆོས་རབ། ཆག །ཤོང་ལོ། དབང་ལོ་རྣམ་གཉིས་འགྱུར་སོགས་ཉི་ཤུ་རྩ་ལྔ་ཙམ་བྱུང་། མན་ངག་གི་བཀའ་ནི། དུས་འཁོར་ཞབས་ཆུང་བ་ལས་ཁ་ཆེ་ཟླ་མགོན་གྱིས་གསན། དེ་ཉིད་པད་དཀར་གྱིས་ལུང་བསྟན་ནས་བོད་དུ་བྱོན། དེས་སྒོམ་པ་དཀོན་མཆོག་སྲུངས། དེས་སྒྲོ་སྟོན་གྲུབ་ཆེན་ཡུ་མོ་བ། མཁས་པ་ཀྲེ་བོ་མགོན་པོ། ལྡུམ་ར་སྒང་པ། སྙེ་མདོ་ཐམས་ཅད་མཁྱེན་པ། སྙེ་མདོ་བསོད་ནམས་དཔལ་དང་། ཀུན་དགའ་དོན་གྲུབ། དེས་རང་བྱུང་པ་སྟེ་ཀར་ལུགས། ཡང་ཡུ་མོ་ནས། གྲུབ་ཐོབ་སེ་མོ་ཆེ། འཇམ་གསར། ཀུན་མཁྱེན་ཆོས་སྐུ་འོད་ཟེར། འཕགས་བོད། བུ་རིན་པོ་ཆེ་སྟེ་ཕུ་ལུགས། ཀུན་མཁྱེན་ཆོས་འོད་ནས། ཀུན་སྤངས་ཐུགས་རྗེ་བརྩོན་འགྲུས། བྱང་སེམས་རྒྱལ་བ་ཡེ་ཤེས། ཡོན་ཏན་རྒྱ་མཚོ། ཀུན་མཁྱེན་དོལ་བུ་པ་སྟེ་ཇོ་ནང་ལུགས་སམ། བཤད་པ་འབྲོམ་
འགྱུར་ལ་མཛད་པས་འབྲོམ་ལུགས། གྱི་ཇོ་ཟླ་བའི་འོད་ཟེར་གྱི་གསུང་ཁྲམ་པདྨ་འོད་ཟེར་གྱིས་བྲིས་པ་གྱི་ཇོ་ལུགས། རྩྭ་མི་ལོ་ཙཱ་ནས། གྲྭ་ལོ། ཞང་རིན་པོ་ཆེ་སོགས་ཚལ་ལུགས། ཙ་མི། གྲྭ་ལོ། ས་ཆེན་སོགས་ས་ལུགས། སེ་ལོ་ཙཱ། གཉོས་འོད་མ། བཀྲ་ཤིས་རིན་ཆེན། དེ་གཉིས་ལ་དུས་འཁོར་བ་སངས་རྒྱས་རྡོ་རྗེ། དེས་ཨོ་རྒྱན་པ། དེ་ལ་ལྷ་ཆེན་ཚུལ་ཁྲིམས་རྡོ་རྗེ། དེ་ལ་རྗེ་རང་བྱུང་པས་གསན་པ་སོགས་ཙ་མི་ལུགས། ཤེའུ་ལོ་ཙཱ། རྒྱ་ཐམས་ཅད་མཁྱེན་པ། སྙེ་མདོ་བ་ཡབ་སྲས་ཏེ་སྙེ་མདོ་ལུགས། ས་མནྟ་ཧཱུཾ། རྭ་ཆོས་རབ། དྲེ་བོ་མགོན་པོ་སོགས་དང་། ཀུན་སྤངས་ཐུགས་རྗེ་བརྩོན་འགྲུས་ཀྱིས་ཇོ་ནང་བཏབ། བྱང་སེམས་རྒྱལ་ཡེ་སོགས་ཀུན་སྤངས་བུ་བཞིར་གྲགས་པ་བྱུང་བ་དང་། ཕྱིས་དོལ་བུ་པ་ལ་སློབ་མ་ཀུན་སྤངས་ཆོས་གྲགས། ཕྱོགས་རྒྱལ་བ། ཉ་དབོན་པ། མ་ཏི་རྣམ་གཉིས་སོགས་བྱོན་ནས་སློབ་མ་མཁས་ཤིང་སྦྱོར་བ་ཡན་ལག་དྲུག་གི་རྣལ་འབྱོར་ལྷུར་ལེན་པ་མང་པོས་དབུས་གཙང་ཁམས་གསུམ་གྱི་རི་སུལ་ཐམས་ཅད་བཀང་། དེ་ནས་བརྒྱུད་དེ་བུ་ལ་བཀའ་བབས་པ་རྭ་ལུགས། རཏྣ་རཀཱི་ཏ་དང་། རི་བེནྡྲ་སོགས་ལ་ཆག་ལོ། དེས་གོ་ལུང་པ་མདོ་སྡེ་དཔལ། ཨོ་རྒྱན་པ་སོགས་ཆག་ལུགས། པཎ་ཆེན་ཤཱཀྱ་ཤྲཱི། དཔྱལ་ལོ་སོགས་པཎ་ཆེན་ལུགས་སམ་དཔྱལ་ལོ་ལུགས། ཤ་བ་རིས་བི་བྷུ་ཏི་ཙནྡྲ་དང་། ཕྱིས་ནགས་རིན་ལ་གསུངས་པ་
སོགས་མཐའ་ཡས་སོ། །གསང་འདུས་མར་འགོས་གཉོས་གསུམ། འཇིགས་བྱེད་རྭ་སྐྱོ་ཞང་གསུམ། བདེ་མཆོག་མར་དོ་མལ་ཇོ་ལོ་ཆུང་གསུམ། ཀྱེ་རྡོར་མར་འབྲོག་འགོས་གསུམ། དུས་འཁོར་རྭ་འབྲོམ་ཙ་གསུམ་ལས་བྱུང་ཞེས་བཤད་པའང་ཡོད། ༈ །མངོན་རྟོགས་རྒྱན་ལ་སློབ་དཔོན་ཐོགས་མེད༡། དབྱིག་གཉེན༢། འཕགས་པ་རྣམ་གྲོལ་སྡེ༣། བཙུན་པ་གྲོལ་༤ སྡེ་བཞིས་རང་རང་གི་བློ་གྲོས་དང་འཚམས་པའི་འགྲེལ་པ་རེ་བྱས། དེ་རྗེས་སློབ་དཔོན་སེང་གེ་བཟང་པོས་(རྒྱ་ཆེར་བཀྲལ། དེ་ཉིད་ཆོས་བཤེས། ཤེར་འབྱུང་བློ་གྲོས། གསེར་གླིང་པ་རྣམས་ཀྱིས་བསྐྱངས། དེ་ལ་ཟུར་ཟ་བར་བཞེད་ནས་སྙིགས་དུས་ཀྱི་ཐམས་ཅད་མཁྱེན་པ་རིན་འབྱུང་ཞི་བས་༦འགྲེལ་པ་སོགས་རྒྱ་ཆེར་མཛད། ཐོགས་མེད་ཀྱི་མན་ངག་གི་རྒྱུན་ལ་བརྟེན་ཀྱང་། དེཊཾ་སེ་ནཱ་དང་། དི་གི་རྡ་སྟིས་སྒོ་གསུམ་རྣམ་གྲངས་བཅུ་གཅིག་དང་། གཙོ་བོའི་དོན་གྱིས་༣༢བཀྲལ་ཚུལ་གཞན་མཛད་དོ། ༈ །བཀའ་གདམས་པ་ནི། ཇོ་བོའི་སློབ་མ་ཁུ་རྔོག་འབྲོམ་གསུམ། འབྲོམ་སྟོན་གྱི་སློབ་མ་རིགས་གསུམ་རྣམ་འཕྲུལ། པུ་ཏོ་བ་རིན་ཆེན་གསལ། སྤྱན་སྔ་ཚུལ་ཁྲིམས་འབར། ཕུ་ཆང་བ་གཞོན་ནུ་རྒྱལ་མཚན་གསུམ། དང་པོ་ནི། གཞུང་པར་གྲགས་ཤིང་སློབ་མ་ཤར་བ་ཡོན་ཏན་གྲགས་དང་། གླང་ཐང་པ་
གཉིས། རྡོ་རྗེ་སེང་གེ། རོག་དམར་ཞུང་བ། དོལ་པ་ཤེས་རབ་རྒྱ་མཚོ། འབན་སྒོམ་གུང་རྒྱལ་ཚུལ་ཁྲིམས་རྒྱལ་བ་སོགས་མང་དུ་བྱོན། བར་པ་ལ་གདམས་ངག་པ་དང་། ཕྱི་མ་ལ་མན་ངག་པ་ཞེས་གྲགས་པ་དང་། ཡང་ཇོ་བོའི་སློབ་མ་གུང་ཐང་པ་ནག་ཚོ་ལོ་ཙཱ་སོགས་དངོས་སློབ་བརྒྱད་དང་། ཉིང་སློབ་གཉིས་ཏེ་བཅུ་བསྟེན་པ་རོང་པ་ཕྱག་སོར་བ་སྟེ། འདི་ལ་གསོར་དགོན་པར་བཞུགས། བརྒྱུད་པ་དང་བཅས་པ་ལ་བཀའ་གདམས་འོག་མའམ་ནག་ཚོའི་བཀའ་བརྒྱུད་ཅེས་གྲགས། འདི་ལ་རོང་པའི་བུ་བཞིར་གྲགས་པ་སོགས་བྱུང་། དེ་ལྟར་ན་བཀའ་གདམས་གཞུང་པ། མན་ངག་པ། གདམས་ངག་པ། ནག་ཚོའི་བཀའ་བརྒྱུད་དེ་བཞི་ནི་རྩ་བ་ལྟ་བུ་ཡིན་ནོ། ༈ །བཀའ་བརྒྱུད་པ་ནི། དྭགས་པོ་ལྷ་རྗེའི་སློབ་མ་ཁམས་པ་མི་གསུམ་གྱི་ནང་ཚན་ཁམས་པ་དབུ་སེ་ལས་ཀརྨ་ཀཾ་ཚང་གི་བརྒྱུད་པ་དང་། ཕག་གྲུ་ལས་ཕག་གྲུ་བཀའ་བརྒྱུད་དང་། དྭགས་པོ་སྒོམ་ཚུལ་གྱི་སློབ་མ་ཞང་ལས་ཚལ་པ་བཀའ་བརྒྱུད་དང་། ཕག་གྲུའི་སློབ་མ་གླིང་རས་ལས་འབྲུག་པ་དང་། ཀྱུར་རིན་ཆེན་དཔལ་དང་། ཉེ་གནས་བཀྲ་ཤིས་དཔལ་གཉིས་ལས་འབྲི་སྟག་བཀའ་བརྒྱུད་དང་། རྒྱལ་ཚབ་རིན་ཆེན་མགོན་པོ་དང་། དེའི་དབོན་པོ་ཀུན་ལྡན་གཙང་པ་རས་ཆུང་གཉིས་ཀྱི་ཕྱི་མའི་དབོན་རྒྱུད་ཁྲོ་ཕུ་
ལོ་ཙཱ་བ་གནུབས་བྱམས་པའི་དཔལ་སོགས་ཁྲོ་ཕུ་བཀའ་བརྒྱུད་སྐོར་བྱོན། ༈ །ཤར་ཆེན་ཡེ་ཤེས་རྒྱལ་མཚན་གྱི་སློབ་མ་ས་བཟང་པ་ཀུན་དགའ་བཟང་པོ་ནི། བོད་ཆོས་རྒྱལ་སྐུ་ཞང་གི་རིགས་ཅོག་རོའི་གདུང་ལས་འཁྲུངས། གསན་བསམ་རྒྱ་མཚོའི་ཕ་རོལ་སོན། ༤༥པར་གཤེགས། ཐེག་ཆེན་ཆོས་ཀྱི་རྒྱལ་པོའི་སློབ་མ་བླ་བྲང་རྫོང་ཆུང་གི་རྗེས་འབྲང་ཀུན་དགའ་རྒྱལ་མཚན་ནི། ཞང་ཡེ་ཤེས་༧སྡེའི་རིགས་ལས་ཆུ་བྱི་ལོར་འཁྲུངས། སློབ་མ་དཔལ་ལྡན་ཆོས་སྐྱོང་། གཞོན་ནུ་རྒྱལ་མཆོག་སོགས་སོ། །གཡག་ཕྲུག་པ་ནི། རྩེ་ཐང་གི་ཆེན་པོ་བྱང་ཆུབ་རིན་ཆེན་པའི་སྲས་སུ་འཁྲུངས། ས་སྐྱ་རྩེ་ཐང་སོགས་སུ་མཚན་ཉིད་དང་། གོན་འགྱོ་ཡེ་ཤེས་དཔལ་ལས་གསུང་ངག་སོགས་གསན། རྗེས་འབྲངས་གོང་དཀར་དང་མུས་སྲད་པ་སོགས་སོ། །བུ་དོལ་གྱི་སློབ་མ་ཉ་བརྩོན་གཉིས་ཞེས་གྲགས་པའི་༧ མཁས་པའི་དབང་ཕྱུག་བརྩོན་འགྲུས་དཔལ་ལ་གཙོ་བོར་བསྟེན། སློབ་མའི་གཙོ་བོ་རོང་སྟོན་དང་། གཞོན་ནུ་རྒྱལ་མཆོག་སོགས་བྱུང་། རེད་མདའ་བ་ནི་ས་སྐྱ་དང་ཉེ་བར་འགར་གྱི་རིགས་ལས་འཁྲུངས། མ་ཏི་པཎ་ཆེན་སོགས་གཙོ་བོར་བསྟེན། དབུ་མ་ཐལ་འགྱུར་བའི་སྲོལ་ལྷག་པར་བཏོད། སློབ་མའང་གཞུང་ལུགས་རབ་འབྱམས་སྨྲ་བའི་བཤེས་གཉེན་བདུན་སོགས་བྱུང་། ནཱ་ལེནྡྲ་རོང་
རྔོག་ཕྱ་སྟོན་གྱི་སློབ་མ་བྱམས་ཆེན་སངས་རྒྱས་སྐྱེད་ཚལ། འཕེལ་དང་། གསེར་མདོག་ཤཱཀྱ་མཆོག་ལྡན། སངས་རྒྱས་འཕེལ་གྱི་སློབ་མ་གོར་མ་རྟ་ནག་པ་རྣམས་ཀྱིས་ཆོས་གྲྭ་སོ་སོར་བཏབ་ཅིང་མཚན་ཉིད་ལ་ཕན་པར་བྱུང་། ༈ ལམ་འབྲས་ལུགས་སྲོལ་བཅོ་བརྒྱད་ནི། བླ་ཆེན་འབྲོག་མི་དང་གྱི་ཇོ་ལས་༡བརྒྱུད་པ་གཉིས། སྔ་མ་ལས་འབྲོག་མའི་སྲས་ཨིནྡྲ་དང་རྡོ་རྗེ་ལས་བརྒྱུད་པའི་ལམ་|འབྲས༢། ཐུགས་ཀྱི་སྲས་འབྲོམ་དེ་བའི་ལམ་འབྲས༣། སེ་མཁར་ཆུང་བ་ནས་འཕེལ་བ་རབ་འབྲིང་ཐ་གསུམ་དུ་ཡོད་པའི། འབྲིང་དུ་ཐོབ་པ་ཞྭ་མ་ནས་འཕེལ་བ་ལས། ཕོ་རྒྱུད་མོ་རྒྱུད་བསྲེས་བརྒྱུད་དང་གསུམ། ཕོ་རྒྱུད་ལའང་། རྗེ་ཁུམ་བུ་པ་ཆོས་རྒྱལ་ནས་སེ་སྒོམ་གྲགས་རྒྱལ། རྗེ་མལ་ཇོ་བ་སོགས་ལས་འཕེལ་བའི་སློབ་བརྒྱུད་༤དང་། སྲས་ཞྭ་མ་ཙནྡྲི་ནས་སྦང་རྗེ་ཉི་མ་གྲགས་ལས་འཕེལ་བའི་སྲས་རྒྱུད་དེ་(གཉིས། མོ་རྒྱུད་ལའང་། ཞྭ་མའི་སློབ་མ་ཉ་༦སྒོམ། སྨོན་དཀར་བ་སྟོན་གཡུང་༧། དབོན་པོ་ཤེར་༥ཚུལ་གསུམ་ལས་འཕེལ་བའི་ལུགས་གསུམ། བསྲེས་རྒྱུད་ལས། ཞྭ་མ་ཕོ་མོ་བསྲེས་པ་དུམ་བུ་ཀོ་བྲག་པའི་ལུགས༩། ཞྭ་མ་ཕོ་མོ་གཉིས་དང་ས་ལུགས་གསུམ་བསྲེས་པ་ཆ་གན་ལུགས༡༠། འབྲོག་མི་ལུགས་དང་གྱི་ཇོ་ལུགས་བསྲེས་པ་ཇོ་ནང་ཀུན་སྤངས་༡༡ལུགས། །
ལམ་འབྲས་སྦྱོར་དྲུག་རྫོགས་ཆེན་གསུམ་བསྲེས་པ་ལ་སྟོད་དབང་རྒྱལ་གྱི་ལུགས༡༢། རབ་ཏུ་ཐོབ་པ་ཞང་གི་བརྒྱུད་པར། ས་ལུགས་ལ་སྔ་བུ་ཕག་གྲུ་ལུགས་དང་༡༣། ལྕེ་སྒོམ་ལུགས༡༤། ཕྱི་བུ་ལ་ཉེ་བརྒྱུད་དང་༡༥། རིང་བརྒྱུད་༡༦གཉིས། འབྲོག་མིའི་ཇོ་སྲས་གཉིས། ཞང་སྟོན་མཆེད་གཉིས་ཏེ་བཞིའི་གསུང་གཅེས་པ་བསྡུས་པ་མང་ལམ་ཞིག་པོའི་ལུགས༡༧། སེ་སྟོན་ལས་ཐ་མར་ཐོབ་པ་བྱང་ཆུབ་ཡེ་ཤེས་ཀྱིས་ཞིང་ཕུག་པ་ལ་གདམས་པའི་ལུགས་༡༨སོ། ༈ །ཆོས་འབྱུང་བསྟན་པ་རྒྱ་མཚོར་འཇུག་པའི་གྲུ་ཆེན་གྱིས་བཅད་ལ། བསོད་ནམས་བསྐྱེད་པའི་ཆེད་དུ་བསྟན་པ་ལ་བྱ་བ་བསྒྲུབ་པའི་ཚུལ། ཡིད་ཆེས་བསྐྱེད་པའི་ཆེད་དུ་བསྟན་པ་ཇི་ལྟར་བྱུང་བའི་ཚུལ། བརྩོན་འགྲུས་བསྐྱེད་པའི་ཆེད་དུ་བསྟན་པའི་གནས་ཚད་བཤད་པའོ། །དང་པོ་ལ། བཤད་སྒྲུབ་ཀྱི་ཕན་ཡོན་བསྟན་པ། བསྒྲུབ་བྱའི་ཆོས་ངོས་བཟུང་བ། བཤད་པ་ཇི་ལྟར་བྱ་བའི་ཚུལ་༤༥དངོས་སོ། ༈ །གཉིས་པ་ལ་སྟོན་པ་སངས་རྒྱས་བྱོན་ཚུལ། བསྟན་པ་དམ་ཆོས་དར་ཚུལ། དེ་ཉིད་བོད་དུ་བྱུང་༢༡༡ཚུལ་ལོ། ༈ ༈གསུམ་པ་ལ་བསྟན་པ་གནས་པའི་གཞི། བསྐལ་པའི་རྣམ་གཞག །བསྟན་པའི་གནས་ཚད་དངོས། བརྩོན་འགྲུས་བསྐྱེད་དགོས་པའི་རྒྱུ་མཚན་༣༤ ༨ནོ། །འདིའི་བསྟན་པ་ཕྱི་དར་གྱི་རྣམ་
གཞག་ལ། སྨད་ནས་ཇི་ལྟར་དར་བའི་ཚུལ་གྱིས་དགེ་ཚུལ་ཆུ་གཏོར་མར་གྲགས་པའི་ལོ་རྒྱུས་ཡན་ཆད་དཀོན་མཆོག་ལྷུན་གྲུབ་དང་། ལྷག་མ་སངས་རྒྱས་ཕུན་ཚོགས་ཀྱིས་ཁ་བསྐངས་བའོ། །པ་ཚབ་ནི། འཕན་ཡུལ་དུ་འཁྲུངས། ཁ་ཆེར་བྱོན། ལོ་༢༣སྦྱངས་པ་མཛད། སླར་དབུས་སུ་ཕེབས། ཤར་བས་ཀྱང་གྲོགས་མཛད་དེ་ཐལ་འགྱུར་བའི་སྲོལ་བཏོད། འབྲོག་མི་རིན་བཟང་| ལས་༣༣ཀྱིས་གཞོན། ཆུ་སྦྲུལ་ལ་མང་མཁར་དུ་འཁྲུངས། སྐུ་ཚེའི་སྟོད་ལ་བཤད་པ་དང་། སྨད་ལ་སྒྲུབ་པ་གཙོ་བོར་མཛད། དགུང་ལོ་༥༨པར་གཤེགས། གྱི་ཇོས་དུས་འཁོར། ཐོད་པ། རྡོ་རྗེ་བདུད་རྩི། བདེ་མཆོག་སོགས། བསྒྱུར། འགོས་ཁུག་པ་རྒྱལ་དུ་ལན་༣བྱོན། གྲུབ་༧༢ཐོབ། མཁའ་འགྲོ་མའི་བླ་མ་གཉིས་བསྟེན་ནོ། ༈ །དབང་བརྒྱ་ནི། ཟབ་པ་གཉིས་སུ་མེད་པ། ཀྱེ་རྡོར་བཀའ་བབས་བཞི་ལ་དབང་༧། བདག་མེད་མ། ཀྱེ་རྡོར་དྲག་པོ་གདན་༡༧ཅན། བདག་མེད་༢༣ལྷ་མོ། ཀྱེ་རྡོར་མཚོན་ཆ་༡ ༣ཅན། གུར། སཾ་བུ་ཊ། རྔོག་པའི་ཀྱེ་རྡོར། བདག་མེད། གུར། རྡོ་རྗེ་སྒྲོལ་མ། ཀུ་རུ་ཀུལླེ་ལྷ་ལྔ་སྟེ་དབང་ཀ་བཅོ་བརྒྱད། རྒྱ་ཆེ་བ་གཉིས་སུ་མེད་པ། དུས་འཁོར་སྐུ་གསུང་ཐུགས་ཡོངས་རྫོགས། དུས་འཁོར་ནས་གསུངས་པའི་ཕའི་རྒྱུད་འཁོར་ལོ་སྒྱུར་བ་དྲུག་པ།
གསང་འདུས་ལྷ་དགུ། ལྷ་བཅུ་གསུམ། ལྷ་བཅུ་དགུ། ལྷ་ཉེར་ལྔ། ལྷ་སོ་ལྔ། ལྷ་སོ་གཉིས། ལྷ་སོ་བཞི། མ་རྒྱུད་འཁོར་ལོ་སྡོམ་ཆེན། སྡོམ་ཆུང་། རིགས་ལྡན་ཁྱབ་འཇུག་སྦས་པའི་ལུགས་ཀྱི་ཕག་༡༣མོ་མ། སྒྱུ་འཕྲུལ་དྲྭ་༤༣བ་མ། ཞེ་ལྔ་མ། ཞེ་དགུ་མ་སྟེ་དུས་འཁོར་དབང་བཅུ་གསུམ། ཕ་རྒྱུད་གསང་འདུས་ལུགས་གསུམ། འཇིགས་བྱེད་ཞང་ལུགས་ཞེ་དགུ་མ། སྐྱོ་ལུགས་བཅུ་བདུན་མ། ས་ལུགས་དང་། རྭ་ལུགས་རོ་ལངས་བརྒྱད་བསྐོར། བཅུ་གསུམ་མ། ཤངས་ལུགས་ལྷ་བཅུ་གསུམ་མ། གཉོས་ལུགས་ལྷ་དགུ། ༡༣དགྲ་གདོང་༢༡གཉིས་རྭ་ལུགས། གཤེད་དམར་ལྷ་ལྔ། བཅུ་གསུམ་མ་སྟེ་བཅུ་བཞི་མ་རྒྱུད། ནག་པོ། ལཱུ་ཧི་པ། དྲིལ་བུ་ལུས་དཀྱིལ། དྲིལ་ཆུང་ལྷ་ལྔ། ལ་བ་བཅུ་གསུམ་མ། མེ་ཏྲི་བཅུ་གསུམ་མ། དེའི་ཡུམ་ཀ་ཕག་མོ་བཅུ་གསུམ་མ། རྡོ་རྗེ་མཁའ་འགྲོ། མཁའ་འགྲོ་རྒྱ་མཚོ། ཐོད་པ་ཉེར་ལྔ་དང་ཉེར་དགུ་མ། མ་ཧཱ་མཱ་ཡཱ། གདན་བཞི་ཡབ་རྣལ་འབྱོར་ནམ་མཁའ། ཡུམ་ཡེ་ཤེས་མཁའ་འགྲོ་ལྷ་བཅུ་གསུམ། བདེ་མཆོག་སྙན་བརྒྱུད་ཡབ་ཀ་ལྷ༦༢། ཡུམ་ཀ་ལྷ་མོ་བཅོ་ལྔ། བདེ་མཆོག་འཁྲུལ་སྤོང་ལྷ༦༠། དེའི་ཡུམ་ཀ་༣༧ཕག་མོ་མ། མངོན་འབྱུང་ཡབ་ཀ །ཡུམ་ཀ །བདེ་མཆོག་སེར་༢མོ། ཡུམ་ཀ་༣༧ཕག་སེར། སྡོམ་འབྱུང་
༡༣མ། བོང་ཞལ་ཅན། བདེ་མཆོག་འཁོར་ལོས་སྒྱུར་དྲུག །བདེ་མཆོག་འཇམ་དཔལ་རྡོ་རྗེ་ལྷ༣༧། དེའི་ལུས་དཀྱིལ། བདེ་མཆོག་ནམ་མཁའ་དང་མཉམ་པ་ལྷ་ལྔ་སྟེ་མ་རྒྱུད་སྐོར༢༡། མི་གཡོ་བླ་མེད༩། སྒྲོལ་མ༡༧། སྒྲོལ་༣༨མ་ལུས་དཀྱིལ། འཁོར་ཆེན༢༨། ཕྱག་རྡོར་གཏུམ་པོ་ལྷ༢༠། རྡོ་རྗེ་ཕུར་པ། ཡང་དག་མེ་དགུ། སྤྱན་རས་གཟིགས་འགྲོ་འདུལ། ཚེ་དཔག་མེད་གྲུབ་རྒྱལ་ལྷ་མང་༣༤ ལྷ། ལྷ་བཅུ་གསུམ་མ། ལྷ་ལྔ། ཐིག་ལེ་བཅུ་དྲུག་སྟེ་ཟུར་བཀའ༡༢། རྡོར་དབྱིངས་དཔལ་ལྡན་བླ་མའི་ལུགས། ཀུན་རིག་ས་ལུགས། འཆི་བདག་འཇོམས་པ། འཇམ་དཔལ་གསང་ལྡན་ཏེ་བཞི། བྱ་སྤྱོད་སྐོར་ལ། སྤྱན་རས་གཟིགས་བཅུ་གཅིག་ཞལ། རྣམ་འཇོམས་མཐིང་༡༩ནག །གྲྭ་ལྔ། གདུགས་དཀར་ལྷ་མང་། ཚེ་དཔག་མེད་ཛེ་ཏཱ་རིའི་ལུགས། མི་འཁྲུགས་པ། ཨ་ར་པ་ཙ་ལྷ།། འོད་ཟེར་ཅན་མ་ལྷ། གཟའ་ཡུམ། ཐུབ་པ་དམ་ཚིག་གསུམ་བཀོད། མངོན་བྱང་། རིགས་གསུམ་༡༢སྤྱི་སྟེ། དྲིལ་བས་བརྒྱའོ། །གྲོལ་མཆོག་མགོན་བརྒྱ་ནི། གུར་པ་རི། ག་ཡ་དྷ་ར། ཤཱཀྱ་ཤྲཱིའི་ལྕམ་དྲལ། ལྷ་བརྒྱད། ལྷ་ལྔ། བཅུ་གཉིས་མ། བཅུ་བདུན་མ། ཡུམ་ཅན་མ། ཕུར་བུ་ཕྱི་ནང་གསང་བ། རུ་མཚོན། ཞལ་རྩ་མགོན། བསྙེན་སྒྲུབ་ལས་སྦྱོར། བྲམ་
ཟེའི་རིག་གཏད་གདོང་བརྙན་ཅན། སྔོ། སེར། དམར། ལྗང་། དཀར་པོ། བྲམ་ནག་བཤན་པ་དྲུག་བསྐོར། ཕྱག་བཞི་པ་དཔལ་རྐྱང་། གཙོ་འཁོར་གསུམ་པ། ལྷ་ལྔ། ལྷ་དགུ། ལྷ་བཅུ་གཉིས། དཀར། དམར། བུམ་དབང་༡༡། དབང་བཞི་རྫོགས་པ། དར་དམར་མ། སེང་གདོང་མ། སེང་ཞལ་འབར་མ། ཕྱག་དྲུག་པ་བར་ཆད་ཀུན་སེལ། བླ་མགོན་དབྱེར་མེད། གནད་དབབ་མཆིན་ཁ། གྲིབ་སེལ་སྔོ། དཀར། སེར། དམར། ལྗང་། རྒྱན་ཆེན། རྒྱན་ཆུང་། ཕྱག་སྟོང་སྤྱན་སྟོང་། ལྷ་མོ། འཁོར་བཞི། རྣམ་སྲས་དཀར། སེར། དམར། ལྗང་། ནག །གར་མཁན་མཆོག །མདུང་དམར་ཅན། གསང་སྒྲུབ། ཞང་བློན་ཕྱི་ནང་གསང་གསུམ། མི་ཏྲའི་གནོད་སྦྱིན༢། ཚོགས་བདག་དཀར་དམར། ཛཾ་བྷ་ལ་དཀར་དམར། སྲུང་མ༦༠། དཀར་པོ་༨༠། སྒྲོལ་མ༡༢། བརྟན་མ༡༢། ཕུར་སྲུང་༡༢། དཀར་བདུད། ལེགས་ལྡན་མཆེད་གསུམ། གྲི་གུག་ལྷ་ལྔ། མགོན་པོ་བཞི་སྦྲགས། ཞལ་དམར་ཅན། བེར་ནག་ཅན། མ་ནིང་། ཨ་གྷོ་ར། སྟག་ཞོན། ཏྲག་ཤད། ཁྱི་ཞལ་ཅན། འབྲང་ཞལ་མ། བེག་གདོང་། གྱིང་ལྔ། གཟའ་གདོང་། བཙན་བཀྲ། ལས་གཤིན། དུར་བདག །སྙན་བརྒྱུད་མགོན་པོ། རང་བྱུང་རྒྱལ་མོ། །
དུད་སོལ་མ། དམག་ཟོར་མ། ཙནྡྲི་ཀ །དཔལ་ལྷ། དཔལ་ལྡན་མ། ཚེ་རིང་མ། རྒྱལ་ཐང་། ཝ་རུ་ཎ། མཆོག་སྦྱིན། སྔགས་བདག །ཨ་པ་ར་ཙིཏྟཾ། ཧ་རི་སིདྡྷཾ། ཛཾ་སེར་ནག ། བེང་དམར། ལྷ་མོ་ནམ་མཁའི་གོས་ཅན་རྣམས་སོ།། ༈ །།ཐུགས་སྒྲུབ་ཡིད་བཞིན་ནོར་བུ་བསམ་པ་ལྷུན་གྲུབ་མའི་བཀའ་བབས་ཚུལ་གྱི་ལོ་རྒྱུས་མདོ་ཙམ་ནི། ཐོག་མར་རང་ལོ་བཅོ་ལྔ་པ་ཤིང་ཕོ་རྟའི་ལོའི་སྟོན་འབྲིང་ཁྲུམས་ཟླའི་ཚེས་བཅུའི་ཐོ་རེངས་ཁར་རྨི་ལམ་དུ་བྲག་དམར་མགྲིན་བཟང་ཡིན་རྒྱུའི་ལྷ་ཁང་ཞིག་གི་སྟེང་ངོས་སུ་སླེབས་པ་ན། བུད་མེད་དམར་མོ་དར་དང་རིན་པོ་ཆེའི་རྒྱན་ཅན་ལྷ་༧མོའི་ཆ་བྱད་ཀྱིས་མཛེས་པ་ཞིག་གི་ལག་གཡས་ན་མེ་ཏོག་དམར་པོ་ཁ་མ་བྱེ་བ་ཞིག་ཐོགས་འདུག་པ་རང་གི་ལག་ཏུ་བྱིན་མ་ཐག་ཁ་བྱེ་བའི་ནང་ནས་གླེགས་བམ་དམར་པོ་ཆུང་ངུ་ཞིག་བྱུང་བ་ཞལ་ཕྱེ་ནས་ཀློག་པར་བརྩམས་པ་ན་བརྡ་ཡིག་ཁོ་ནར་སོང་ནས་ཀློག་མ་ཤེས་པ། སླར་ཕྱག་གཡོན་ན་ཀ་པཱ་ལ་བདུད་རྩིས་གང་བ་ཞིག་བདག་ལ་གཏད་པ་འཐུང་བའི་མོད་ཤེས་པ་སྤྱི་བུན་པ་བཞིན་དུ་སོང་། བརྡ་ཡིག་ཐམས་ཅད་ཀྱང་ཐོགས་མེད་དུ་ཀློག་ཤེས་པས་གུ་རུའི་ཐུགས་སྒྲུབ་བདེ་གཤེགས་འདུས་པ་ཕྱི་ནང་གསང་བ་ཡང་གསང་དང་བཅས་པའི་སྐོར་ཚོ་ཤིན་ཏུ་མང་བ་ཞིག་འདུག་པ་སྤྲོ་བ་ཚད་ལས་འདས་པ་
སྐྱེས་པའི་མོད། བུད་མེད་དེས་ལུང་བསྟན་གྱི་རྣམ་པ་མང་ཞིག་ཟེར་ནའང་། མ་འོངས་གཙུག་ལག་འདི་ཡི་འགྲམ༔ ཡིད་བཞིན་རིན་ཆེན་དངོས་སུ་འབྱུང་༔ ཞེས་སོགས་ཚིག་རྣམས་འགའ་རེ་མ་གཏོགས་བརྗོད། དེ་ནས་གླེགས་བམ་དེ་ཉིད་འོད་དམར་པོ་ཞུ་ནས་རང་ལ་ཐིམ་པས་ཚིག་དོན་ཐམས་ཅད་བཀྲ་ལམ་མེར་གསལ་བ་སྙམ་བྱེད་པའི་ངང་ནས་གཉིད་སད། དེ་མ་ཐག་ཕྱི་སྒྲུབ་ཀྱི་ལས་བྱང་རྒྱས་པ་ཞིག་བྲིས་པ་ཐུགས་སྒྲུབ་བར་ཆད་ཀུན་སེལ་དང་དབྱིབས་མཚུངས་པ་ལ། སྒྲུབ་སྡེ་བརྒྱད་ཀྱང་ཚང་བ་ཞིག་དང་། ནང་སྒྲུབ་ཀྱི་རྒྱུན་ཁྱེར་ཙམ་བྲིས་པ་ནི་ད་ལྟའི་བསམ་པ་ལྷུན་གྲུབ་མ་འདི་ཇི་ལྟ་བ་གཙོ་རྐྱང་གི་རྣམ་པ་ལ། གུ་རུ་བཅུ་གསུམ་ལུས་དཀྱིལ་ལ་བཀོད་པ་ཞིག་སྣང་ནའང་། དེ་དག་སྤེལ་བར་སྐབས་སུ་མ་བབས་པས་རང་ཉིད་ཀྱིས་ཅུང་ཟད་ཉམས་སུ་བླངས་ཤིང་། ཕྱིས་དཔེ་ཡང་གཏེར་དུ་བསྡམས། གསང་སྒྲུབ་ནི་ཐུགས་རྗེ་ཆེན་པོ་ཞི་དྲག་དང་། ཡང་གསང་ཕག་མོའི་སྐོར་སོགས་སྣང་ནའང་ཡིད་ངོར་གསལ་བ་ལས་ཡི་གེར་མ་བྲིས། དེ་ནས་རང་ལོ་སོ་གཅིག་པ་ལྕགས་ཕོ་ཁྱིའི་ལོའི་སྨོན་ཟླ་བའི་དཀར་ཕྱོགས་ཀྱི་ཚེས་བཅུར་ལྕགས་ཟམ་ཆུ་བོ་རིའི་བླ་བྲང་ནས་ཀྱང་ཡོན་སྦྱར་ཞིང་། རང་ཉིད་ཀྱིས་ཀྱང་ཁྲ་འབྲུག་ནས་ལུང་བསྟན་གྱི་རྣམ་པ་རྙེད་པ་བཞིན་བོད་ཁམས་བདེ་ཐབས་སུ་
དམིགས་པས། གུ་རུའི་སྒྲུབ་གནས་ནམ་མཁའ་ལྡིང་དུ་ཚོགས་ཀྱི་མཆོད་པ་བརྒྱ་ཕྲག་ཐལ་བ་དང་། གནས་གྱི་དབུ་རྩེར་ཕྱིན་ཏེ་བསང་དང་། གསེར་སྐྱེམས་དང་། ལྷ་སྲིན་དམ་བསྒྲགས་སོགས་བགྱིས་པའི་ཚེ། ཇོ་མོ་ཁ་རག་གི་ཕྱོགས་ནས་གཙོ་བོར་མཆོད་པའི་འཇའ་སྤྲིན་ཡ་མཚན་པ་ནམ་མཁའ་ཁེངས་ཤིང་གསལ་སྣང་ལའང་གུ་རུ་བདེ་བ་ཆེན་པོ་གཙོ་འཁོར་གྲངས་མེད་པ་ནམ་མཁའི་ཁམས་གང་སྟེ་སྤྲུལ་པའི་སྒྱུ་འཕྲུལ་མཐའ་ཡས་པས་བོད་ཁམས་དབུགས་འབྱིན་སྩོལ་བའི་ཉམས་དང་། ལོ་བསྐོར་གཅིག་གི་བར་དུ་བོད་ཡུལ་དབུས་སུ་མཐའ་དམག་གི་འཇིགས་པ་མི་འབྱུང་བའི་མཚན་མ་ཁྱད་པར་ཅན་ཐོབ། དེའི་ཕྱི་ལོ་ལྕགས་མོ་ཕག་གི་སྣོན་ཟླའི་ཚེས་བཅུར་རྒྱངས་ཡོན་པོ་ལུང་གི་གུ་རུའི་སྒྲུབ་ཕུག་ཏུ་སླེབ། ཚོགས་ཀྱི་མཆོད་པ་རྒྱ་ཆེར་བགྱིས་ཤིང་དེ་ནུབ་ཕུག་པ་ནང་དུ་གནས་པའི་ཚེ། སྒྲུབ་ཕུག་གི་སྒོ་གོང་དེར་འོད་འཁྱིལ་ལེ་འདུག་པ་གཏེར་མཚན་དུ་ངེས་ཤིང་འདུན་པ་གཏད་པས། གུ་རུའི་སྐུ་ཚབ། བསམ་པ་ལྷུན་གྲུབ་མའི་སྒྲུབ་ཐབས་མན་ངག་དང་བཅས་པ་སོགས་བཞུགས་པར་མཐོང་ཞིང་། ཆོས་ཀྱི་རྣམ་གྲངས་དང་མངོན་རྟོགས་སོགས་ཡིད་ངོར་ཤིན་ཏུ་གསལ་བ་ཞིག་བྱུང་། སླར་རང་ལོ་སོ་དགུ་པ་ས་ཕོ་རྟའི་ལོའི་ནག་པ་ཟླ་བའི་ཚེས་བཅུར་སྒྲུབ་ཐབས་ཡོན་ཏན་གཏེར་
མཛོད་ཀྱི་ཚོགས་མཆོད་བགྱིས་པའི་ཐོ་རངས་ནམ་མཁའ་ནས་ཐོད་ཕྲེང་རྩལ་གྱི་ཛཔྲ་དབྱངས་ཞིག་གྲགས་པའི་རྐྱེན་གྱིས་གཉིད་ཧར་རེ་སད་པ་དང་། ལུས་རྡུལ་ཞུམ་མེ་བའི་ངང་མི་གནས་འོད་ཟེར་གྱི་སྤུ་གུ་རྩ་བ་ཕྲ་ལ་ཁ་གཡེལ་བ་ཞིག་ལྷོ་རྒྱུད་ཀྱི་གནས་འདི་ཡིན་ངོ་མི་འཚལ་བ། ཆུ་བོ་ཆེན་པོ་འབབ་ཅིང་། བྲག་རི་སུལ་མང་ཞིག་གི་རྩ་འདབས་སུ་ཟུག་པས། དེ་ན་གུ་རུ་རིན་པོ་ཆེའི་སྐུ་ཚབ་ཁྲུ་གང་བའི་ཚད་བདེ་བ་ཆེན་པོའི་རྣམ་པ་མངོན་རྟོགས་ཇི་ལྟ་བ་དང་། ཆོས་སྐོར་རྣམས་ཤོག་སེར་གླེགས་བམ་ཆེན་པོ་ཞིག་གི་རྣམ་པར་མངོན་སུམ་ལྟ་བུར་མཐོང་ཞིང་། རྟོག་པ་བཅུག་པ་ན་སྐུ་དང་ཤོག་སེར་སོགས་ད་ལྟའི་ཚད་ཇི་ལྟ་བུ་དང་། དེའི་ནང་དུ་གང་བཞུགས་པའང་ཡིད་ངོར་ལམ་ལམ་གསལ་བ་ཞིག་བྱུང་བས་རྐྱེན་བྱས། རྣམ་པ་ཀུན་ཏུ་དེ་ཁོ་ན་དྲན་ཅིང་། དེའི་རྒྱུ་མཚན་ཞིབ་པར་གཏེར་ཆེན་རིན་པོ་ཆེའི་མདུན་སྔ་ཕྱིར་སྙན་འབུལ་དང་། གུ་རུ་བདེ་བ་ཆེན་པོའི་སྐུ་ཐོག་མར་ཙཀླུ་ཞིག་ལ་བྱས། དེ་ཞལ་ཐང་དུ་བཤུས། སླད་ནས་ལོ་དེའི་སྨིན་དྲུག་ཟླ་བའི་ཡར་ཚེས་ལ་ད་ལྟ་པདྨ་ཤེལ་ཕུག་ཏུ་བཞུགས་པའི་གསེར་ཟངས་ཀྱི་སྐུ་རང་གི་ལུས་ཚད་དང་མཉམ་པ་འདིའང་བཞེངས་པ་ཡིན་ལ། གཏེར་ཆེན་རིན་པོ་ཆེར་རྒྱུ་མཚན་ཕུལ་བ་དེ་ཁོ་ན་ཁ་བྱང་གི་ཚུལ་དུ་གྱུར་ནས། རྗེ་ཉིད་ལའང་གསལ་སྣང་ལུང་བསྟན་
ཁྱད་པར་ཅན་གྱིས་མཚམས་སྦྱར་ཏེ། ས་རྟ་སྨིན་དྲུག་ཟླ་བའི་ཚེས་བཅུ་ལ་ཙི་རྐེའི་ཆུ་བོ་འདུས་པའི་ནོར་བུ་སྤུན་གསུམ་བྲག་ནས་ཚེགས་མེད་པར་དངོས་གྲུབ་ཏུ་བཞེས་ཤིང་། མགོ་ཟླའི་ཡར་ཚེས་ནས་བརྩམས་ཏེ་བདག་ཅག་དཔོན་སློབ་རྣམས་ཀྱིས་གཏེར་སྒྲུབ་ཀྱི་རྣམ་པ་ཞག་བདུན་དུ་བགྱིས། དེའང་ཐོག་མར་ཤོག་བུ་ལ་བརྡ་ཡིག་སོགས་ཅིའང་མི་འདུག་པ། བདུད་རྩི་ལྔའི་རིལ་བུའི་ཆུ་ལ་སྦང་ཞིང་དཀྱིལ་འཁོར་གྱི་དབུས་སུ་བཞག་སྟེ་བསྒྲུབས་པས། ཞག་ལྔ་ན་བརྡ་ཡིག་གྲོང་ཁྱེར་བདུན་བཀྲ་ལམ་གྱིས་ཤར་བའི་ངོ་མཚར་དང་བཅས། ཟླ་བ་དེའི་ཚེས་བཅུར་ལས་བྱང་ནས་བརྩམས་ཏེ་གཏེར་སྟོན་རིན་པོ་ཆེས་གསུང་རིམ་བཞིན་དུ་ཡི་གེར་བྱས། ཇི་ལྟར་གསུངས་པ་དང་རྗེས་སུ་མཐུན་པར་བདག་ངེས་པ་ཅན་ཤར་བས་གཅིག་ལ་གཅིག་ཡིད་ཆེས་པས་འཁྲུལ་པ་བྲལ་བར་གཏན་ལ་ཕེབས། དབང་ལུང་མན་ངག་རྣམས་ཀྱང་ཆིག་རྫོགས་སུ་བསྩལ། ཕྱི་ལོ་དོན་གྲུབ་ཅེས་པ་ས་མོ་ལུག་གི་ལོའི་དབོ་ཟླའི་དཀར་ཕྱོགས་ནས་དབུ་བརྩམས་སྒྲུབ་ཁང་བླ་བྲང་ཕན་བདེ་ཀུན་ཁྱབ་གླིང་དུ། ཞབས་དྲུང་རིན་པོ་ཆེ་འཇམ་དབྱངས་ནམ་མཁའ་རྒྱལ་མཚན་དཔལ་བཟང་པོ་སོགས་བདག་ཅག་འདུས་པ་རྣམས་ཀྱིས་ཐུགས་སྒྲུབ་རྣམ་གཉིས་ཟུང་འབྲེལ་གྱི་ཚོམ་བུ་ཚོགས་སྒྲུབ་ཞག་བཅུའི་བར་དུ་སྒྲུབ་
པའི་ཚེའང་། རྨི་ལམ་གྱི་སྣང་ཆར། གཞལ་མེད་ཁང་རྒྱ་ཁྱོན་བཀོད་པ་བསམ་གྱིས་མི་ཁྱབ་པའི་དབུས་སུ། ཐུགས་སྒྲུབ་གཉིས་ཀྱི་ལྷ་ཚོགས་རྣམས་མངོན་སུམ་བཞིན་དུ་བཞུགས་པའི་གཙོ་བོའི་ཞལ་ནས་གདམས་ངག་དང་། རྗེས་སུ་བསྟན་པ་གསུང་བ་སྙམ་བྱེད་པ་སོགས་དང་། གསོལ་འདེབས་ཚུལ་བཞིའི་སྒོ་ནས་འཆད་པའི་མན་ངག་དང་། གཏེར་སྲུང་སོ་སོས་ཀྱང་ཕྲིན་ལས་བསྒྲུབ་པའི་ཉམས་སོགས་བྱིན་གྱིས་བརླབས་པའི་མཚན་མ་མང་དུ་བྱུང་ཞིང་། དེ་ལྟར་རང་ལོ་བཅོ་ལྔ་པ་ནས་བརྩམས་སྔ་ཕྱིར་ཤར་བའི་གསལ་སྣང་ཐམས་ཅད་ལ། ལྷའི་ངོ་བོ་གཅིག་པ་ཙམ་ལས། སྐུའི་རྣམ་འགྱུར་ཟླདང་། སྒྲུབ་པའི་ཐབས་དང་། སྔགས་ཀྱི་བྱེ་བྲག་ཕལ་ཆེར་ཐ་དད་པ་ལ། གཙོ་བོ་ནི་གཅིག་པ་ཁོ་ན་ཤར་ཞིང་། ས་རྟ་ལོར་ཤར་བའི་གསལ་སྣང་དང་། ཕྱིས་གཏེར་ཆེན་རིན་པོ་ཆེས་ཤོག་སེར་འབེབས་པའི་སྐབས་གསལ་སྣང་བྱུང་བ་ཐམས་ཅད་ནི་ཚིག་སྣ་རིང་ཐུང་དང་རྒྱས་བསྡུས་ཅུང་ཟད་ལས་གཅིག་པ་ཁོ་ནར་སྣང་། དེ་ལ་སྤྱིར་གོ་སྟོད་འོད་འབར་བྲག་གི་གཏེར་བྱོན་ལུང་བྱང་སྙིང་གི་མེ་ལོང་ལས། དེ་ནས་ཡང་དག་བཤད་བྱ་བ༔ བྱང་རྒྱུད་ཕྱོགས་ཀྱི་དམག་དཔུང་ཞིག བོད་ཡུལ་དབུས་འདིར་སླེབས་པ་ན༔ བོད་ཁམས་བསྟན་པ་ཉམས་ལ་ཐུག དེ་ཚེ་པདྨའི་ཐུགས་བསྐྱེད་མཐུས༔ ཟ་
ཧོར་རྒྱལ་པོའི་གདུང་མཐར་རུ༔ ཡབ་གཅིག་ཁྲི་སྲོང་སྤྲུལ་པ་འབྱུང་༔ པཎ་གྲུབ་ཁ་ཡར་འགའ་ཚོགས་ཏེ ད་ལྟའི་བསྒྱུར་བཤད་ཆོས་རྣམས་ཀུན༔ དེ་དུས་ཅུང་ཟད་འཆད་ཉན་བྱེད༔ དེ་ནས་ཕལ་ཆེར་ནུབ་ཉེའི་དུས༔ བི་མ་མི་ཏྲས་བྱིན་བརླབས་པ༔ ཁྲི་སྲོང་སྤྲུལ་པ་དགེ་སྦྱོང་ཚུལ༔ ལྕགས་ཁམས་འབྲུག་གི་ལོ་པ་ནི༔ སྐྱེས་བུ་བློ་རྩལ་ལྡན་པ་འབྱུང་༔ སྙིང་པོའི་བསྟན་པ་གསལ་བར་བྱེད༔ བོད་ཁམས་བདེ་ཐབས་སྣ་ཚོགས་སྤེལ༔ ཁྱད་པར་བདག་གིས་དངོས་ཉམས་དང་༔ རྨི་ལམ་ཚུལ་དུ་བྱིན་བརླབས་པས༔ འཇམ་དཔལ་སྤྲུལ་པའི་རྒྱལ་པོ་ཉིད༔ གྲུབ་པ་མཆོག་གི་ཚུལ་བཟུང་སྟེ༔ མཐར་ཐུག་ནོར་བུ་སྐོར་ལྔ་སོགས༔ ཟབ་མོའི་གཏེར་སྒོ་འགའ་ཞིག་འབྱེད༔ ཡང་ན་བཀའ་རྙིང་བསྟན་པ་སྐྱོང་༔ འབྲེལ་ཚད་སྨིན་གྲོལ་ལམ་ལ་བཀོད༔ མདོ་སྔགས་སྤྱི་དང་སྙིང་པོའི་སྲོལ༔ གྲུབ་པ་བརྙེས་པའི་རིང་ལུགས་རྣམསཿ དབུས་གཙང་མདོ་སྨད་ཀུན་ཏུ་དརཿ ཅེས་སོགས་དང་། བྱེ་བྲག་བླ་མའི་ཐུགས་སྒྲུབ་ཡིད་བཞིན་ནོར་བུའི་ལོ་རྒྱུས་ཤེལ་གྱི་ཕྲེང་བ་ལས། བཀའ་བསྡུ་འཆད་ཉན་བསྒོམ་སྒྲུབ་ཀྱིས༔ དབུས་གཙང་མདོ་སྨད་ཀུན་ཏུ་དར༔ འདི་ནས་འཕྲོ་ལུས།། །།༅། །བྱང་ཆུབ་སེམས་དཔའི་རྟོགས་པ་བརྗོད་པ་དཔག་བསམ་གྱི་འཁྲི་ཤིང་ལས། གང་ཐུགས་དྲི་བྲལ་ཤེལ་ལ་
ཆགས་ཚོན་འཛིན་པ་མིན་པ་ཉིད། །ཡིད་ནི་སྙིང་རྗེས་བརླན་པ་གང་གི་སྐྱོན་རྣམས་མ་ལུས་བསྐམས། །གང་གིས་ཁྲོ་བ་མེད་ལ་རང་གིས་འཁོར་བའི་དགྲ་མངོན་བཅོམ། །ཀུན་མཁྱེན་དེ་ཡིས་ཁྱེད་ལ་དགེ་ལེགས་གཡོ་བ་མེད་གྱུར་ཅིག །དམ་པའི་གྲིབ་བསིལ་དང་ལྡན་བརྟན་པའི་ཆོས་ཀྱི་རྩ་བས་བསྐོར་ཞིང་བསོད་ནམས་ར་བར་གནས། །བློ་དང་རིག་པ་སྙིང་རྗེ་ལ་སོགས་ཆུ་ཡིས་རྣམ་མཛེས་རྒྱས་པའི་ཡལ་ག་ཅན། །ཆོག་ཤེས་དྲི་མེད་ཡལ་འདབ་གྲགས་སྙན་མེ་ཏོག་རྟག་ཏུ་དམ་པའི་འབྲས་བུ་ནི། །བསམ་ཀུན་ཡོངས་སུ་རྫོགས་པར་མཛད་པ་དཔལ་ལྡན་མཆོག་གི་ལྗོན་པ་རྣམ་པར་རྒྱལ་གྱུར་ཅིག ༈ །གང་གིས་ལེགས་པའི་ཡིད་ཅན་རྣམས་ཀྱི་ཡིད་ནི་ཀུན་དགའ་མཉན་ལྡན་རིག་པར་བྱེད། །གང་གི་མཐུ་ཡིས་གདུག་རྣམས་ཀྱི་ཡང་ཡོངས་སུ་འདྲིས་པའི་མུན་པ་ཞི་བར་བྱེད། །གང་གི་བསོད་ནམས་གྲངས་མེད་གྲངས་ཀྱི་ཚིག་གི་ཆད་ཀྱི་ཡུལ་དུ་མི་འགྱུར་བ། །འགྲོ་བ་ཐུལ་བའི་མགོན་པོ་རབ་རྒྱས་མཐུ་ལྡན་དེ་ཉིད་གཅིག་པུ་འབྱུང་བ་ཡིན། ༈ །གང་གིས་མཆོད་འོས་མཆོད་པར་བསྒྲུབ་ལ་མེ་ཏོག་ལ་སོགས་ཏེ། །སེམས་མེད་རྣམས་ཀྱང་འོས་པའི་སེམས་དང་ལྡན་པ་ཉིད་དུ་འགྱུར། །རྒྱལ་ལ་གུས་པའི་ཁྱད་པར་བསྟེན་པ་རྣམས་ལ་བསྔགས་འོས་ཤིང་། །དད་པ་རབ་རྒྱས་བདུད་རྩིའི་རྒྱུན་
ཐིགས་དེ་དག་རྒྱལ་གྱུར་ཅིག ། །བདེ་བ་དྲི་མེད་ཆུ་གང་ཞི་བ་ཡི། །ཁ་བའི་རླབས་ལྡན་རྒྱལ་བ་བསྟེན་པ་དག །ཐོབ་ནས་འཁོར་བའི་མྱ་ངམ་ཐང་ལ་ནི། །ཡོངས་འཁྱམས་སྲིད་པའི་གདུང་བ་གཏོང་བར་བྱེད། ༈ །རྒྱ་ཆེ་སྡིག་པའི་མུན་པ་འཇུག་པ་དག་ནི་རབ་སྤངས་ནས། །འཕྲལ་ལ་སྙིང་རྗེའི་འོད་ཟེར་སྣང་བ་རབ་ཏུ་རྒྱས་པ་ཡིས། །སྐྱོན་སེལ་ཅི་ཡང་ཡོངས་སུ་གདུང་བ་དག་ཀྱང་འཕྲོག་བྱེད་པ། །སངས་རྒྱས་འོད་སྟོང་ལྡན་པས་དམ་པའི་ལམ་ནི་སྟོན་པར་བྱེད། ༈ །གཟའ་ཡི་བདག་པོའི་སྣང་བས་རྗེས་བཟུང་བས། །མུན་པའི་ཚོགས་ཀྱིས་རྣམ་པར་ཟུམ་གྱུར་པའི། །འདམ་སྐྱེས་ཆུ་དང་བཅས་པ་རྣམས་དག་ཀྱང་། །མཁས་པའི་ཅོད་པན་དུ་འོས་ཉིད་དུ་འགྱུར། ༈ །ལུས་ཅན་ལུས་དང་དེ་བཞིན་ཡིད་ཀྱི་ནི། །སྲིད་པའི་རང་བཞིན་གནད་ཆེན་འཕྲོག་བྱེད་པ། །འཇིག་རྟེན་ཀུན་གྱི་འཇིག་རྟེན་ཕ་རོལ་གཉེན། །སངས་རྒྱས་བཅོམ་ལྡན་བདུད་རྩིའི་གཏེར་ཉིད་དོ། ༈ །དམན་པའི་སྦྱིན་པས་སྐྱེ་བོ་དམན་པ་རྣམས་ཀྱི་གདུང་བ་སེལ། །ཚུལ་ཁྲིམས་ཀྱིས་ནི་སྐྱེ་བོ་དམ་པའི་ཡིད་དག་[ཚིམ་པར་བྱེད། །ཤེས་རབ་སྟོབས་ཀྱིས་ཀྱང་ནི་དབེན་པ་དང་བྲལ་གཏི་མུག་འཕྲོག །བརྩོན་འགྲུས་ཀྱིས་ནི་འཇིགས་སུ་རུང་བའི་འཇིགས་པ་ཟློག་པར་བྱེད། ༈ །དོ་ཤལ་རབ་གསལ་གོས་མཆོག་
ཅོད་པན་དང་། །གདུགས་དང་རྔ་ཡབ་དཀར་པོ་འཛུམ་པའི་དཔལ། །མཆོག་གི་ལོངས་སྤྱོད་སྐལ་བཟང་དགའ་སྟོན་གྱིས། །བདག་ཉིད་ཆེན་པོའི་ལེགས་བྱས་གསལ་བར་བྱེད། ༈ །ལེགས་པའི་ལམ་ལ་ཡིད་ལ་རེ་བ་རབ་རྒྱས་གྲུབ་གྱུར་ཅིག །དམ་པའི་ལེགས་བྱས་དྲི་མེད་འཇུག་ངོགས་གཙང་མ་བསྔགས་པར་འོས། །འཇིགས་རུང་འཁོར་བའི་ཆུ་སྲིན་འབྱུང་གནས་དག་གི་ཟམ་སྟེགས་གྱུར། །དམ་པའི་གྲོགས་ཉིད་དགེ་བ་སྤྲོ་བའི་རང་བཞིན་ཕོ་ཉ་ཡིན། ༈ །གང་གི་བསམ་པ་བླ་མེད་བྱང་ཆུབ་འདོད། །བདུད་རྩིའི་ཕོ་ཉ་དང་པོ་ཟླ་ཚེས་བཞིན། །བསོད་ནམས་ཀྱིས་ནི་གསར་དུ་འཇུག་བྱེད་པ། །སྙིང་སྟོབས་རྒྱ་མཚོ་སུ་ཞིག་དེར་ཕྱག་འོས། ༈ །བསོད་ནམས་རབ་འབར་བསམ་པ་དྲི་མེད་རྣམས། །ཡོན་ཏན་ལ་ཆགས་ནམ་ཡང་ནོར་མ་ཡིན། །རྣལ་འབྱོར་ལ་སྤྱོད་ལོངས་སྤྱོད་དག་ལ་མིན་། །རྡུལ་གྱི་ཆགས་བྲལ་ལ་དགའ་འདོད་ལ་མིན། ༈ །མེ་ཏོག་དུས་སུ་རབ་ཞུགས་ཤིང་། །ལང་ཚོ་ཅན་གྱི་བརྟན་འཕྲོག་ཚེ། །སྙེ་མ་དང་འགྲོགས་བུང་པ་ནི། །ཡང་དག་རྒྱུ་བ་སུ་ཡིས་ཟློག ༈ །ཆོས་ཀྱི་རྒྱལ་པོའི་ཕོ་བྲང་ནི། །བསོད་ནམས་ཁང་པ་བསྔགས་འོས་ཤིང་། །བདེན་དང་བརྟུལ་ཞུགས་སྦྱིན་པ་དང་། །བརྩེ་བའི་རང་བཞིན་གྱིས་རྟག་བསྟེན། །གཟི་བརྗིད་ལ་བརྟེན་ལྷ་རྣམས་
ཀྱིས། །གང་གི་གྲགས་པ་མངོན་མཆོད་པ། །རབ་གསལ་ཞེས་བྱའི་ས་བདག་དེ། །དེར་ནི་ས་ཡི་ཐིག་ལེར་གྱུར། །ཅེས་སོ། ༈ །བདུད་རྩིའི་ཆུ་གཏེར་མ་བསྲུབས་ཤིང་། །ནོར་རྒྱས་ཐང་ཡང་མ་བཅད་ལ། །རི་བོ་བསྒྲིལ་བ་མེད་པར་ནི། །གླང་པོ་མཆོག་འདི་སུ་ཡིས་བསྐྲུན། ༈ །གང་འདིར་བཅད་བརྡར་བསྲེགས་པས་ཀྱང་། །གཞན་གྱི་དོན་ལ་བསླུ་མེད་པ། །འགྲོ་འདིར་བསོད་ནམས་ཙནྡན་གྱི། །རྐང་འཐུང་དེ་དག་རྒྱལ་གྱུར་ཅིག ༈ །ཇི་སྲིད་ཚ་ཟེར་གྱིས་གདུང་དང་། །ཇི་སྲིད་རླུང་ནི་སྐྱེད་བྱེད་པ། །དེ་སྲིད་གང་གི་བཀའ་དང་ནི། །གྲགས་པ་རབ་ཏུ་གཞོམ་མེད་གྱུར། ། ༈ །མི་དམན་ཀུན་ཏུ་དགའ་བའི་གཉེན། །ཧ་རི་ཙནྡན་བཞིན་དུ་བསིལ། །ལྷོ་ཡི་ཕྱོགས་ཀྱི་རླུང་གིས་བཞིན། །དམ་པ་རྣམས་ཀྱི་གདུང་བ་འཕྲོག ༈ །གང་འདི་རྒྱ་མཚོར་ནོར་བུར་སྟེར། །རིང་ནས་རྣ་བའི་བདུད་རྩི་སྟེ། །སློང་བ་ཡང་དག་འོངས་རྣམས་ཀྱིས། །དེར་ནི་བཏུང་བའང་གཞན་ལས་སོ། ༈ །རབ་རིབ་ཅན་ལ་སྣང་བ་ཕོངས་པའི་དུག་ལ་ནོར་བུ་ལྷུང་ལ་འཆེལ་བའི་ལག་པ་སྟེ། །སློང་ལ་དཔག་བསམ་ལྗོན་པ་འགྲོ་ལ་རྒྱལ་བའི་ཤིང་རྟ་ལམ་གཞན་དག་གི་ལམ་གྱི་བརྒྱགས། །སྡུག་བསྔལ་ནད་ལ་སྨན་ཆེན་དང་ནི་སྲིད་པའི་འཇིགས་པ་ཀུན་འཁྲུགས་བསམ་པ་དབུགས་འབྱིན་པ། །
གདུང་བ་དག་ལ་བརྟེན་པའི་མཛའ་བཤེས་ཆོས་ནི་དམ་པ་རྣམས་ཀྱི་གཉེན། ༈ །དེ་ནས་དེ་ཡི་རིན་ཆེན་བདུན། །དེ་ཚེ་བྱུང་གྱུར་འཁོར་ལོ་རྟ། །ནོར་བུ་གླང་པོ་བུད་མེད་དང་། །ཁྱིམ་བདག་དམག་དཔོན་སྔོན་འགྲོ་བའོ། །ཞེས་སོ། །དམ་པའི་མཛོད་ན་གནས་པའི་དཔལ། །རྟག་ཏུ་འདི་ཡིས་རབ་སྟེར་ཞེས། །གང་ཞིག་མཐོང་ན་པདྨོ་ཅན། །ཟུམ་པར་རབ་ཏུ་ཕྱོགས་པ་བཞིན། ༈ །གསལ་བའི་དོན་སྟེར་ཡིད་བཞིན་ནོར། །དཔག་བསམ་ལྗོན་པ་ལ་སོགས་ཡོད། །རྙེད་དཀའི་དོན་ནི་རབ་སྟེར་མཆོག །ཁྱོད་ལྟ་བུ་ནི་ཤིན་ཏུ་ཉུང་། ༈ །འདར་ལྡན་འཁྲི་ཤིང་རབ་སྨྲས་པ། །བུང་བ་མྱོས་ཚོགས་སྒྲ་དང་ནི། །ཡལ་འདབ་རབ་ཏུ་གཡོ་བ་ཡི། །ལག་པ་དག་གིས་བཟློག་པ་བཞིན། ༈ །ཡང་ན་བརྣག་པ་རྒྱ་ཆེ་བའི། །སློང་བ་སུ་ཡིས་ཡོངས་རྫོགས་ཏེ། །ཨ་གསྩ་ཡི་ཁྱོར་ཆུ་ཡིས། །ཧུབ་ཏུ་རྒྱ་མཚོ་ཆེན་པོ་སོང་། ༈ །བདུད་རྩི་ལ་ནི་སུ་ཞིག་སྡང་། །ཙནྡན་ལ་ནི་སུ་མི་སྲེད། །ཟླ་བ་ལ་ནི་སུ་གུས་དམན། །དམ་པ་རྣམས་ལ་སུ་མི་འདོད། ༈ །དགེ་བའི་སྨོན་ལམ་དག་པའི་གཟི་བརྗིད་དང་། །དབེན་པའི་དྲི་མེད་སྣང་བའི་རྟོགས་བྱེད་ལྡན། །གང་ཞིག་ཡོངས་སུ་བསྒྲགས་པ་ཙམ་ཉིད་ན། །སྲིད་པའི་རྨོངས་འཕྲོག་དེ་ཉིད་བསྔགས་པར་འོས། ༈ །ཀུན་ལ་ཉི་མའི་འོད་ཟེར་སྙོམས།
ཆུ་འཛིན་དག་གིས་ཆར་པ་སྙོམས། །སེམས་ཅན་ཀུན་ལ་ཐུགས་བརྩེ་བ། །བཅོམ་ལྡན་འདས་ཀྱི་གཟིགས་པ་སྙོམས། ༈ །དེར་ནི་སྙིང་རྗེའི་དཔག་བསམ་ཤིང་། །སྙིང་སྟོབས་མེ་ཏོག་འབྲས་བུ་ཆེ། །རབ་ཏུ་ཞི་བའི་བདུད་རྩི་ཡིས། །ཡང་དག་དྲན་པ་དེ་ཡིས་མཐོང་། ༈ །བསོད་ནམས་དྲི་བཟང་རྒྱས་གྱུར་ཅིང་། །སྙིང་རྗེའི་གེ་སར་འཁྲིགས་གྱུར་པ། །བཅོམ་ལྡན་ཞལ་གྱི་པདྨོ་ལས། །གསུང་གི་སྦྲང་རྩི་མཆོག་གཅིག་ཐོབ། ༈ །སྐྱེས་བུ་རྣམས་ཀྱི་དཔྲལ་བ་ཡངས་པའི་རྡོ་ཡི་གླེགས་བུ་ལ། །བདེ་མེད་ལས་ཀྱིས་སྤྲུལ་པ་གསལ་བའི་རྟགས་ཅན་གཟོད་དག་གིས། །སྐྱེ་དང་འཆི་བ་རབ་སྤོས་ཡི་གེ་དག་ཏུ་བཀོད་གྱུར་པ། །འདི་དག་རྣམས་ནི་ལག་པས་ཡོངས་སུ་ཕྱིས་པས་བསྐྱོད་པ་མིན། །ཅེས་སོ། ༈ །གང་གི་སྲང་གི་ཚད་ཀྱིས་ནི། །ལྷན་པོའི་དེ་ཉིད་གྲངས་རིག་པ། །དེས་ཀྱང་བདེར་གཤེགས་ཡོན་ཏན་གྱི། །དམ་པའི་ལྕི་བ་ཉིད་མི་རྟོགས། ༈ །དེར་ནི་དྲི་མེད་གསལ་ཞིང་མཛེས། །ཆ་ཤས་ཀྱིས་ནི་ཡོངས་སུ་རྫོགས། །མི་དམན་ཀུན་དགའ་རྒྱས་གྱུར་པ། །སུ་ཡི་ཟླ་བ་བཞིན་མ་གྱུར། ༈ །འཁོར་བར་ནོར་ནི་སྒྲུབ་པ་ལ། །བག་ཆགས་གོམས་ལས་ལུས་ཅན་རྣམས། །རྨོངས་པས་འདིར་ནི་གསེར་གྱི་རི། །ཐོབ་ཀྱང་ཡོངས་སུ་ཚིམ་པ་མེད། ༈ །གྲགས་པ་འགྲོ་
གསུམ་གངྒཱ་དང་། །མཐུ་ཡིས་རྣམ་པར་བརྒྱན་པའི་དཔལ། །འདི་དེ་བསོད་ནམས་འཁྲི་ཤིང་གི། །མེ་ཏོག་རབ་འཐོན་དང་པོ་ཡིན། ༈ །སྐལ་ལྡན་རྣམས་ལ་མི་ཤེས་པ་ནི་ལེགས་པའི་རང་བཞིན་ལས་བྱུང་དགེ་ཉིད་གྱུར། །རྨོངས་པ་རྣམས་ལ་དགེ་བ་མི་ཕན་ཉིད་འགྱུར་འདི་ནི་རིམ་པ་འདི་ཡིས་མཚོན། །མཚན་བྱེད་སྨག་རུམ་མུན་པ་སྨན་གྱི་ནགས་ལ་མཆོག་ཏུ་མཛེས་པ་རབ་ཏུ་སྟེར། །གང་ཡང་ཉི་མའི་གཟི་བྱིན་ནུབ་འདི་རིགས་ཀྱི་མིག་ནི་ཀུན་ཏུ་ཉམས་པར་བྱེད། ༈ །ཚེ་ཡི་རྒྱན་ནི་ཡོན་ཏན་ཏེ། །ཡོན་ཏན་རྒྱན་ནི་དབེན་པའོ། །འདི་ཡི་རྒྱན་ནི་རབ་ཞི་སྟེ། །རབ་ཞིའི་རྒྱན་ནི་ཆགས་བྲལ་ལོ། ༈ །ཨ་མྲ་འཁྲི་ཤིང་གཞུ་ལ་གདའ། །བཀོད་པ་ཨ་མྲའི་མཚོན་དང་ལྡན། །རྒྱལ་གྱུར་ཅིག་ཅེས་བདག་དྲེགས་ལ། །སློང་མོ་བ་བཞིན་ཁུ་བྱུག་སྒྲོགས། ༈ །གླང་པོ་རི་བོའི་སྟེང་དེ་ན། །ལན་བུ་གཡོ་བའི་བུང་བ་ཅན། །རྒྱལ་པོ་དཔྱིད་དང་འགྲོགས་པ་ཡི། །གསར་པ་ཕྲེང་ཅན་མ་དེ་མཛེས། ༈ །འཁོར་བའི་ནགས་ནང་རྣམ་པར་ཡངས་པ་འདིར། །རང་བཞིན་གྱིས་གཡོ་དུས་ཀྱི་བུང་བ་དག །རང་དགར་འབབས་པས་འགྲོ་སྲོག་མེ་ཏོག་གི། །གེ་སར་ཚོགས་ལ་ཁམ་ཟས་བྱེད་པ་ཉིད། །ལོངས་སྤྱོད་རྦ་རླབས་དག་དང་མཚུངས་ཤིང་རི་དྭགས་འཇིགས་པའི་མིག་ལྟར་གཡོ། །དལ་འབྱོར་
སྐད་ཅིག་མཚོན་བྱ་སྐྱེ་བའི་ཆུ་གཏེར་རྣམ་པར་གསལ་བའི་གློག །ལུས་ཀྱི་པདྨ་ལང་ཚོ་གསར་པའི་ཉི་འོད་གཞོན་ནུ་དམར་པོ་གཡོ། །སྲོག་གི་ཐིགས་པ་སྲིད་པའི་མྱ་ངམ་ཐང་ལ་མྱུར་དུ་འཇིག་པར་འགྱུར། ༈ །དམ་པའི་བདུད་རྩིས་བརླན་པའི་ཞལ་དང་རི་བོང་ཅན་ཟེར་དག །སྡུག་བསྔལ་ཞི་བྱེད་བདེ་བ་ཕུན་སུམ་ཚོགས་པ་སྦྱིན་པར་བྱེད། །སྐྱེ་བོ་རྣམས་ནི་ཡང་དག་འཚོ་བྱེད་རབ་རིབ་འཕྲོག་པར་བྱེད། །དམ་པའི་ཡིད་ཀྱི་མཚོ་ནི་རྣམ་པར་རྒྱས་ཤིང་དགོད་པར་བྱེད། ༈ །དམ་པའི་སེམས་ལ་གནས་པའི་དམ་པ་རྣམས་ཀྱིས་ཡོངས་འདྲིས་བདུད་རྩི་དག་པས་ཀྱང་། །ཤིན་ཏུ་མཉེས་གཤིན་ཚིག་ནི་སྔ་མ་བས་ཀྱང་མཉན་འོས་སྟོན་ཟླའི་འོད་ཆགས་པས། །སྤྱོད་པའི་ཀུན་དགའི་ཚོགས་སྟེར་གཞན་པ་ཅི་ཞིག་ཡིད་ནི་མེ་ཏོག་པས་ཀྱང་འཇམ། །སྐྱེ་བོ་ལེགས་པའི་ཧ་རི་ཙནྡན་པས་ཀྱང་ཡོངས་གདུང་མཆོག་ཏུ་ཟློག་པར་བྱེད། ༈ །དེ་ཡིས་དཔུང་རྒྱན་ཅོད་པན་གྱི། །འོད་ཀྱི་ཡལ་འདབ་རྒྱས་གྱུར་པ། །སྤྲིན་གྱི་ཕྲེང་བ་བརྒྱ་བྱིན་གྱི། །གཞུ་ཡིས་ཁྱབ་པ་བཞིན་དུ་མཐོང་། ༈ །གང་ཞིག་སྙིང་སྟོབས་ལྡན་པའི་སྙིང་སྟོབས་ཀྱི། །ཁྱད་པར་སེམས་ཅན་ཐམས་ཅད་བདེ་བའི་རྒྱུ། །ལུས་ནི་ཞིག་ཀྱང་ཁྲོ་བའི་མེ་རྣམས་ལ། །མཆོག་ཏུ་ཞི་བར་འགྱུར་དེ་རྒྱལ་གྱུར་ཅིག ༈ །ཞེས་པ་བདེར་
གཤེགས་ཞལ་གྱི་པདྨ་ལས་འཁྲུངས་པ། །ཡིད་འོང་སྦྲང་རྩིའི་གཟུགས་བརྙེན་རབ་ཏུ་དང་བའི་གསུང་། །བུང་བའི་ཚོགས་བཞིན་དགེ་སློང་རྣམས་ཀྱིས་རབ་འཐུངས་ནས། །རབ་ཏུ་དགའ་བ་རྒྱས་པ་ཅི་ཡང་བྱུང་བར་གྱུར། ༈ །འཇིག་རྟེན་དག་ན་མཚོན་བྱེད་པས། །སྐྱེ་བོ་མཆོག་དང་དམན་པར་མཚོན། །ཉི་མས་ཐམས་ཅད་རབ་གསལ་ཞིང་། །སྨག་རུམ་མུན་པས་ཀུན་འཆིང་བྱེད། ༈ །གང་ཞིག་གཞན་གྱི་བུད་མེད་ལ། །ལུས་ཀྱིས་ཡོངས་འཁྱུད་བདག་གིར་བྱེད། །དེ་ནི་དམྱལ་བའི་མེ་ལྕེ་ལ། །ཕྱེ་མ་ལེབ་བཞིན་སླར་འཁྱུད་ཐོབ། ༈ །སྦྱིན་པའི་གྲོགས་སུ་སྐད་ཅིག་ཏུ་གྱུར་པ། །དེ་དག་སྦྱིན་བདག་འབྲས་བུ་མཚུངས་པར་ཐོབ། །གཞན་ལ་ཕན་པར་བརྩོན་པས་ཞུགས་རྣམས་ཀྱི། །གྲོགས་སུ་བསོད་ནམས་ལས་མེད་མི་འབྱུང་ངོ་། ༈ །གྲགས་སྙན་ལྡན་པ་དེ་ཡི་ནི། །སྦྱིན་ཁང་ཀུན་ཏུ་གྲགས་པའི་ཚེ། །དཔག་བསམ་ཤིང་ལ་སྐྱེས་བུ་རྣམས། །གུས་པ་མཆོག་ཏུ་ཆུང་བར་གྱུར། ༈ །འགྲོ་བའི་ཉོན་མོངས་དུག་གི་སྐྱོན། །འཕྲོག་ཅིང་སྙིང་རྗེ་རྒྱས་པ་ཡི། །བདུད་རྩིས་ཡང་དག་རྫོགས་པའི་ཐུགས། །གང་པོ་ཁྱོད་ལ་ཕྱག་འཚལ་ལོ། ༈ །ཆོག་ཤེས་འབྱོར་པ་ཐོབ་གྱུར་པས། །སྐལ་བ་བཟང་པོ་མཆོག་ཏུ་མཛེས། །ཡིད་ནི་ཆགས་བྲལ་གྱིས་བརྒྱན་པ། །སེམས་ཅན་དག་པའི་མཚན་
ཉིད་ཡིན། ༈ །གང་ན་ཉི་མས་མུན་སྟེར་ཟླ་བ་ནི། །མེ་ཡི་ཆར་པ་འབེབས་བྱེད་བདུད་རྩི་ལས། །རབ་ཁྲོས་ནག་པོ་བརྩེགས་པ་སྐྱེས་གྱུར་ཀྱང་། །སྨན་མཛད་ཁྱོད་ལས་གཞན་ལ་འཚེ་མི་འབྱུང་། ༈ །སྙིང་སྟོབས་ཀྱིས་ནི་ཉི་མའི་འོད་ཟེར་མུན་པ་བཞིན་དུ་གསལ། །ཆོས་དག་གིས་ནི་རིན་ཆེན་ཚོགས་རྣམས་མཁའ་ལས་འབབ་པར་འགྱུར། །བརྟན་པ་ཡིས་ནི་རྒུད་པ་ཐམས་ཅད་རབ་ཏུ་ཞི་བར་འགྲོ། །སྦྱིན་པ་ཡིས་ནི་ཕྱོགས་རྣམས་ལོངས་སྤྱོད་སྐལ་བ་བཟང་པོར་འགྱུར། ༈ །གཞན་ལ་ཕན་པ་འཇེབས་པའི་མཐུ་དང་ནི། །ཀུན་གྱི་ཉེར་འཚོ་འབྱོར་པ་ཆེན་པོ་སྟེ། །འབྲས་བུ་ཆེར་འོས་འདི་དག་དགེ་རྣམས་ཀྱི། །བསོད་ནམས་མྱུ་གུའི་འབྲས་བུ་དང་པོ་ཡིན། ༈ །སངས་རྒྱས་གཟི་བརྗིད་རྣམ་པར་དག །སྙིང་རྗེ་བདུད་རྩིའི་རྒྱ་མཚོ་སྟེ། །སེམས་ཅན་ཀུན་གྱི་གཉེན་གཅིག་པུ། །རྟག་ཏུ་སད་ལ་ཕྱག་འཚལ་ལོ། ༈ །གྲྭ་གཉིས་དམར་བ་ཁྱོད་ཀྱི་སྤྱན། །པདྨོའི་འོད་ལྡན་གདྨ་བཞིན། །དྲི་མ་འཁྲུད་བཟོད་དག་བྱེད་པ། །འདི་ཡིས་བདག་ལ་རེག་པར་མཛོད། ༈ །རང་དོན་ལ་འཇུག་ཆགས་པ་དང་བྲལ་ཞིང་། །གཞན་ལ་ཕན་པར་རྟག་ཏུ་བརྩོན་རྣམས་ཀྱིས། །གྲུབ་པ་ཉོན་མོངས་རྣམས་ལ་མི་འཇིགས་ཤིང་། །གདུང་དང་གེགས་བྲལ་གཟིར་བྱེད་མིན་པར་འགྱུར། ༈ །དེ་གདོང་ཆུ་
སྐྱེས་དག་གིས་ཕྲལ་ལ་བཅོམ་པས་མཚན་མོའི་ཡིད་འོང་ཉམས་པ་བསྟེན། །དེ་ཡི་སྨིན་མའི་རྣམ་འཕྲུལ་དག་ལ་ངོ་ཚ་ཡིད་སྲུབས་གཞུ་ནི་གུག་པར་གྱུར། །ཡིད་འོང་ཡལ་འདབ་མདངས་འཕྲོག་དེ་ཡི་མཆུ་སྒྲོས་དམར་བ་དག་གིས་གཟིར་གྱུར་ཏེ། །ཆགས་བྲལ་ཉིད་ཐོབ་བིལྤ་དག་ནི་ནགས་ཀྱི་ས་ལ་ཡང་དག་བརྟེན་ནམ་སྙམ། ༈ །མཐའ་དག་འཇིག་རྟེན་སྣང་བ་སྤྲོ་སླད་ཉི་མ་འོད་ཟེར་འགྱེད། །བདུད་རྩིའི་ཆར་མཆོག་དབབ་སླད་ཟླ་བ་རྫོགས་པ་ཉིད་དུ་འགྲོ། །སེམས་ཅན་བསྒྲལ་བའི་སླད་དུ་དགེ་བའི་ཟམ་སྟེགས་ཆེན་པོ་ནི། །ཁ་ཅིག་འགྲོ་བ་འདི་སྙེད་བསྔགས་པར་འོས་པའི་སྐྱེ་བ་འཛིན། །ཤཱཀྱའི་གྲོང་ཁྱེར་དག་ཏུ་སྔོན། །རྒྱལ་པོ་དཔལ་ལྡན་ཟས་གཙང་བྱུང་། །གྲགས་པ་རི་བོང་ཅན་བསྐྱེད་པ། །བདུད་རྩིའི་ཆུ་གཏེར་གཞན་པ་བཞིན། ༈ །འཇིག་རྟེན་དགའ་བྱེད་བྱང་ཆུབ་སེམས། །དེ་ཡི་ལྷུམས་སུ་བཟུང་བ་ནི། །འོ་མཚོའི་རླབས་ཀྱི་ཟླ་བ་བཞིན། །དཀར་བའི་འོད་དང་ལྡན་པར་གྱུར། །བུ་རམ་ཤིང་སྐྱེས་རྒྱལ་པོའི་རྒྱུད། །དེར་ནི་ལྷུམས་ན་གནས་པ་དེར། །གཏེར་དང་ལྡན་པའི་ས་གཞི་བཞིན། །དགེ་བའི་མཚན་ཉིད་ཀྱིས་མཚོན་གྱུར། ༈ །མཁའ་ཡི་ཆུ་རྒྱུན་གྱིས་བཀྲུས་པ། །དེ་ཡི་གྲགས་པ་དཀར་བའི་གདུགས། །སྙིང་སྟོབས་འཛུམ་པའི་རྔ་ཡབ་བཅས། །དེར་ནི་ལྷ་
རྣམས་དག་གིས་བཟུང་། ༈ །བྱང་ཆུབ་འོ་མའི་རྒྱ་མཚོ་ཆེ། །སྙིང་སྟོབས་དག་པ་འདི་ཡི་ནི། །གསུང་གི་བདུད་རྩི་མཁས་པ་དག །སྐལ་ལྡན་རྣམས་ཀྱི་ཉེར་འཚོར་གྱུར། ༈ །མཛེས་པའི་སྤྱོད་ཚུལ་དང་ལྡན་ཡོན་ཏན་སྡུད་པར་འོས་གྱུར་ཅིང་། །རིན་ཆེན་འོད་ཟེར་རྣམ་དག་དམ་པའི་སྣང་བ་རྒྱས་པར་བྱེད། །ནད་མེད་མུ་ཏིག་རང་བཞིན་འགྲོ་བའི་རྒྱན་ནི་སྐྱེད་བྱེད་པ། །གང་ཞིག་དགེ་བས་རྗེས་འབྲེལ་མིང་ཆེན་རིགས་དེ་འགའ་ཞིག་ཡིན། ༈ །མི་བདག་གཟུགས་ཅན་སྙིང་པོས་ཨུ་དྭ་ཡ་ན་ལ་སྤྲིངས་པ། །བདེ་བར་གཤེགས་པའི་ཞབས་པད་བཀོད་པས་བསོད་ནམས་ཉེ་གྱུར་པ། །སྐབས་གསུམ་གྲོང་གི་ཁྱད་པར་རྒྱ་ཆེ་མ་ག་དྷ་ཡུལ་ནས། །དགེ་བ་བྱས་པའི་གཟུགས་ཅན་ས་ཡི་བདག་པོ་གཟུགས་ཅན་སྙིང་། །ཆོས་ཀྱི་གཉེན་གྱིས་ས་གཞིའི་ཐིག་ལེ་ཁྱོད་ལ་རབ་སྨྲས་པ། །རི་བོང་མཚན་མའི་འོད་ལྡན་བཅོམ་ལྡན་སྐུ་གཟུགས་ཆགས་སྡང་དུག་ནི་ཉམས་པར་བྱེད། །སྲེད་པ་ཡང་དག་ཞི་བྱེད་སྲིད་པའི་རྨོངས་ཆེན་ནད་ཀྱི་ཕན་དང་སྨན་པ་དང་། །རབ་དྭངས་མངར་བའི་བསོད་ནམས་བཅུད་ལེན་ཁྱོད་ཀྱི་མིག་གི་སྣོད་དུ་རབ་བླུགས་པ། །འདི་ནི་ཁྱོད་ལ་རབ་སྤྲིངས་སྐལ་ལྡན་མགྲིན་པའི་བར་དུ་རབ་ཏུ་འདོད་པས་འཐུང་། །དམ་པའི་ལམ་ལ་རྣམ་པར་སྦྱོར་ཞིང་ཡོན་ཏན་ཚོགས་རྣམས་འཛིན་
པར་རྟག་ཏུ་སློབ། །བྱ་བ་ངན་ལས་རྣམ་པར་བཟློག་ཅིང་བརྟན་པའི་བདེ་བ་འཐོབ་ལ་མཆོག་ཏུ་བསྐུལ། །རྒྱུན་ཆད་མེད་པ་ཉིད་དུ་བདག་ཉིད་ཀུན་གྱི་ཟོལ་མེད་ཕན་པ་སྐྱེད་བྱེད་པ། །དམ་པའི་དགེ་བའི་གྲོགས་ཀྱི་ཡིད་འོང་ཕན་པ་འདི་ལས་མཆོག་ནི་ཅི་ཞིག་བྱ། །ཞེས་སོ། ༈ །གང་ཞིག་ནགས་སོང་ཤིང་ཤུན་ལྡན་གྱུར་ཀྱང་། །སློང་རྣམས་རྒྱུན་དུ་དོན་རྒྱས་ཉིད་དུ་བྱེད། །སྤྱོད་ཚུལ་མཛེས་ལྡན་དེ་དང་ཙནྡན་གྱི། །ངང་ཚུལ་དག་ནི་སུ་ཡིས་བསམ་མི་བྱ། ༈ །བསོད་ནམས་མི་དམན་ས་ཡི་དབང་། །སློང་བ་ཀུན་གྱི་དཔག་བསམ་ཤིང་། །ཕོངས་པའི་གདུང་བ་མཆོག་ཏུ་འཕྲོག །སྙིང་སྟོབས་འོ་མའི་རྒྱ་མཚོ་ཐོབ། ༈ །ལེགས་བཤད་རྣམས་དང་མཐུན་རྣམས་དང་། །དོག་པ་རྣམས་ཀྱང་རྒྱས་པ་ནི། །གསར་པ་ཁོ་ན་ཡིད་འཕྲོག་སྟེ། །བུད་མེད་རྣམས་ཀྱི་ལང་ཚོ་བཞིན། ༈ །ཁྱོད་ནི་ཡོན་ཏན་ལྡན་པའི་གྲོགས། །སྒྱུ་རྩལ་པདྨོ་ལྡན་པས་མཛེས། །ཤར་ཚེ་སྐྱེ་བོ་མཐའ་དག་ནི། །སྣང་བཅས་ལེགས་པའི་ལམ་དུ་འགྲོ། ༈ །ས་སྐྱོང་མཁས་ན་རིག་པའི་རྩེ་དགས་སྤྲོ་ལ་མཆོག་ཏུ་རེག་པར་འགྱུར། །དཔའ་ནག་ཡུལ་གྱི་རོལ་པ་དང་འགྲོགས་བརྟུལ་ཞུགས་བརྟུལ་ཞུགས་འཛིན་པར་འགྱུར། །བླུན་ན་རྨོངས་ཤིང་གཡོ་ན་རྣམ་པར་གཡོ་ལ་གདུག་ན་མ་རུངས་སྤྱོད། །གང་གང་ས་བདག་བྱེད་
པ་དེ་དེ་མཐའ་དག་སྐྱེ་བོ་བྱེད་པར་འགྱུར། །མེ་ཏོག་འབྱུང་གནས་ལེགས་པ་ཡི། །མེ་ཏོག་རྒྱས་བྱེད་ཉམས་དང་ལྡན། །ས་བདག་རང་ཉིད་མཁས་པ་ནི། །སྐྱེ་རྒུའི་བསོད་ནམས་ཉིད་ཀྱིས་འབྱུང་། ༈ །རྒྱ་ཆེར་གྲགས་པ་བསྟེན་པའི་བསྔགས་འོས་རི་བོང་ཅན་ལྟར་མཛེས། །གཙུག་གི་ནོར་བུ་གཞན་གྱི་དོན་ལ་སྐྱོ་བ་མེད་པའི་དུང་། །གང་གི་སྲོག་ནི་སོང་བར་གྱུར་ཀྱང་ལེགས་པའི་སྒྲ་ཡི་གནས། །བཀྲ་ཤིས་གཏེར་གྱིས་འཇིག་རྟེན་དག་ནི་དགེ་བ་རྒྱས་པར་བྱེད། ༈ །གང་དག་མཐོང་བས་ཞེ་སྡང་དུག་གི་ནི། །ཚ་བ་རབ་ཏུ་ཞི་བ་ཉིད་གྱུར་ཅིང་། །བདུད་རྩིའི་རོ་བསིལ་སྐྱེ་བོ་དམ་པ་ཡི། །ཟླ་བ་དེ་དག་སུ་ཡིས་ཕྱག་འོས་མིན། ༈ །ཕྱོགས་ཀྱི་མཛེས་པའི་རྣ་རྒྱན་དང་། །མཚུངས་པར་ཡོན་ཏན་དམ་པ་བཀོད། །གང་ཞིག་གྲགས་པའི་མཆོད་རྟེན་གྱིས། །འགྲོ་མཛེས་དེ་དག་རྒྱལ་གྱུར་ཅིག ༈ །རྒུད་པའི་གདུང་བ་ཞི་བྱེད་གཟིགས་པ་རབ་ཏུ་དར་བའི་རོ་དག་གིས། །སྐྱེས་བུ་རྣམས་ནི་ནད་དང་བྲལ་མཛད་སྲིད་པས་ཟིལ་མནན་འཁྲུགས་པའི་སྨན་པ་གང་། །ངེས་པར་དགེ་བ་མཐའ་ཡས་བསྐྱེད་པའི་ནོར་འཛིན་གྲུབ་པའི་བདུད་རྩི་ནི། །རྫོགས་པའི་སྙིང་རྗེ་ནང་དུ་འཛིན་པ་དེ་དག་མི་སྨད་ཕྱག་བྱར་འོས། ༈ །གཞན་གྱི་ཡོངས་གདུང་མཐོང་གྱུར་ན། །འཕྲལ་ལ་འཕོས་ཏེ་དམ་
པ་ཡི། །མེ་ལོང་རྣམས་ནི་གདུང་འགྱུར་ཏེ། །ཉི་མ་མེ་ཤེལ་རང་བཞིན་བཞིན། ༈ །སྨན་པ་སྐྱོན་མེད་བདེ་ལེགས་བཀའ་དྲིན་དང་། །ཆོས་ཀྱི་མན་ངག་དམ་པའི་སྨན་དག་ཀྱང་། །འཁོར་བ་རིང་པོའི་རིམས་ཀྱིས་བསྐམས་རྣམས་ཀྱི། །དཔུང་གཉེན་ཞི་བའི་བཅུད་ལེན་དེ་དག་ཡིན། ༈ །ཤིན་ཏུ་རབ་གསལ་གྲགས་པའི་ཚོན་རིས་ཡོན་ཏན་རིན་ཆེན་རྒྱན། །མ་ཉམས་སྦྱིན་པའི་མེ་ཏོག་དང་ལྡན་བདེན་པའི་བྱུག་པ་བྱས། །གང་གི་དཔལ་ནི་ཚུལ་ཁྲིམས་གཙང་མའི་དུ་གུ་ལས་མཛེས་པ། །དེ་ཉིད་གཅིག་བུ་ལེགས་བྱས་ལ་འོས་འཁོར་ལོས་བསྒྱུར་བ་ཡིན། ༈ །སྦྱིན་ལས་ཕྱིར་ཕྱོགས་རྣམས་ལ་ནོར་གྱིས་ཅི། །སྡང་བས་དབང་བྱས་རྣམས་ལ་ཐོས་པས་ཅི། །ཡོན་ཏན་མཆོག་སྤངས་རྣམས་ལ་གཟུགས་ཀྱིས་ཅི། །ཚུལ་ཁྲིམས་བཏང་བ་རྣམས་ལ་རིགས་ཀྱིས་ཅི། ༈ །གང་གི་གྲགས་པ་བདུད་རྩི་ཡི། །རྦ་རླབས་ཀྱིས་ནི་ཕྱོགས་ཀུན་ཁེངས། །ཡོན་ཏན་རིན་ཆེན་ཆུ་གཏེར་ཆེ། །དཔལ་ལྡན་རྒྱལ་པོའི་སྲས་པོ་ཡོད། ༈ །གདེངས་ཅན་གནས་ན་རྙེད་པར་དཀའ། །མི་ཡི་ཡུལ་ན་གཏམ་ཉིད་ཅི། ། མཛེས་སྡུག་རྒྱ་འདི་མཐོ་རིས་སུའང་། །གསར་དུ་མངོན་པར་འཁྲུངས་སམ་སྙམ། ༈ །གང་གི་ཚིག་གི་རྒྱ་ཆེ་མཚུངས་པ་ཡང་། །ཅི་ཡང་ཡོད་མིན་ཕུལ་དུ་བྱུང་བའི་སྒྲ། །ནམ་ཡང་ཙུ་ཏའི་ནགས་སུ་
བདག་གིས་ནི། །ཐོས་པ་ཁུ་བྱུག་གི་མིན་བུང་བའི་མིན། ༈ །སྙིང་སྟོབས་ཀྱིས་འཛུམ་རོ་ལྡན་སྙིང་རྗེ་ཟླ་བའི་འོད་ཀྱིས་རེ་བ་སྐོང་། །མཛེས་ཤིང་མཐའ་དག་མུན་པ་ཞི་སླད་དཀར་པོའི་ཕྱོགས་ལ་རྣམ་པར་གནས། །རྟག་ཏུ་ཀུན་དགའ་རྣམ་འགྱུར་མེད་ཅིང་མཆོག་གི་བདུད་རྩི་རྣམ་པར་སྤྲོ། །གདུང་བ་རབ་ཞིའི་གྲོགས་པོ་སངས་རྒྱས་ཟླ་ཉིའི་གཟུགས་ལ་ཕྱག་འཚལ་ལོ། །གང་ཞིག་རྟག་ཏུ་ཡུལ་གྱི་སྐྱོན་ལས་ཕྱི་རོལ་ཕྱོགས་གྱུར་ཅིང་། །རབ་མང་ཕ་རོལ་ཕྱིན་ལ་བརྟེན་པའི་སེམས་ནི་དབང་གྱུར་པ། །གཞན་དག་ཕན་ལ་མཆོག་ཏུ་མངོན་ཞེན་རྟེན་ཅིང་ཀུན་རྟོག་གི། །དཔག་བསམ་ལྗོན་པ་དེ་དག་བདག་ལ་དགེ་བ་སྟེར་གྱུར་ཅིག ༈ །མ་རིག་པ་ཡི་རྩ་བ་ཅན། །འཁོར་བའི་ལྗོན་པ་རྣམ་བཀྲ་ཀུན། །ཤིས་དང་བརྗོད་དང་གཞོམ་པར་ནི། །ཀུན་མཁྱེན་ལས་གཞན་སུ་ཡིས་ནུས། །ལེགས་རྨོས་ཞིང་ལ་རབ་ཉུང་གང་བཏབ་དང་། །བྱས་ཤེས་དག་ལ་ཕན་པ་གང་བྱས་དང་། །ཡོན་ཏན་དག་གིས་མཐོ་ལ་གང་བྱིན་པ། །དེ་ནི་ལོ་མ་སྟོང་ཕྲག་འབེལ་བར་འགྱུར། ༈ །བདུད་རྩི་རོ་ཡི་ཆར་བཞིན་མི་འདོད་སེལ། །འདོད་པ་དམ་པའི་གཟིགས་པ་གང་ལྷུང་བས། །ལྷུང་བ་རྣམས་ཀྱང་བསོད་ནམས་ཀྱིས་མཐོ་བའི། །བསྔགས་པར་འོས་པར་མཛད་པ་རྒྱལ་གྱུར་ཅིག ༈ །ཟླ་བའི་ཀུན་
དགའ་ཉི་མའི་རབ་གསལ་དང་། །མེ་ཡི་ཚ་བ་རླུང་གི་མགྱོགས་པ་དང་། །སྙིང་རྗེ་ལ་དགའ་སྐྱེ་བོ་ཆེ་རྣམས་ཀྱི། །གཞན་ལ་ཕན་པ་ལྷན་སྐྱེས་རང་བཞིན་ཡིན། ༈ །སྟོན་པའི་ཐུགས་རྗེ་བདུད་རྩིའི་ཆུ་gབོ་ནི། །མ་ལུས་བདེ་དང་དགེ་བའི་ཕོ་ཉ་སྟེ། །སྲིད་པའི་མྱ་ངམ་གདུང་བསིལ་གྲིབ་མ་དང་། །མ་བཞིན་སྐྱེད་པར་བྱེད་པ་རྒྱལ་གྱུར་ཅིག ༈ །དགེ་བའི་པདྨོ་ཅན་ནི་རྩ་བ་བཙུགས་ནས་རབ་བསྐྱེད་༧ དང་པོའི་རྒྱུ། །སྣ་ཚོགས་ཕུན་ཚོགས་འཁྲི་ཤིང་གསར་པ་གསང་བའི་རབ་སྐྱེད་སྐྱེད་ཚལ་པ། །སྲེད་པའི་གདུང་བ་རབ་ཏུ་ཞི་བྱེད་ཁ་བའི་འཛུམ་ལྡན་གངྒཱའི་རྒྱུན། །དམ་པའི་ལམ་མཆོག་གསལ་བར་བྱེད་མཁས་སྣང་བ་དག་ནི་བསོད་ནམས་ཉིད། ༈ །ཐོས་པའི་སྐྱོག་གིས་བཏུང་བྱའི་བདུད་རྩི་སྙན་པ་དག་གི་རྒྱུན། །དྲི་བཟང་ཁང་པ་བཞིན་གྱི་པདྨོའི་གནས་སུ་སྒྲོགས་བྱེད་པ། །བུང་བའི་ན་ཆུང་དང་མཚུངས་ཡབ་ཀྱི་སྐད་ལ་བཏུད་ནས་ནི། །སྙན་ངག་རྒྱ་ཆེའི་ཁྱད་པར་ལྷག་མ་བདག་གིས་རྫོགས་པར་བྱ། ༈ །གང་གི་དཔག་བསམ་ཤིང་ལས་འཁྲུངས། །རྟག་ཏུ་གསར་པ་གསར་པའི་དཔལ། ། གྲགས་པའི་མེ་ཏོག་བསོད་ནམས་ཀྱི། །དྲི་བཟང་རྒྱས་པ་རྣམ་པར་མཛེས། ༈ །དཔྱིད་ཀྱི་དཔལ་མོ་དག་གི་རྣ་བའི་རྒྱན། །རི་བོའི་ངོས་ལ་མྱ་ངན་མེད་པ་མཛེས། །གྲོང་ཁྱེར་མ་ཡི་རྐང་པས་བསྣུན་
པ་ལས། །ཡལ་འདབ་གསར་པ་དག་ལ་ཚོན་འཕོས་བཞིན། ༈ །ཟླ་བའི་རྩེ་དགར་མངོན་ཕྱོགས་པའི། །ཀུ་མུད་ལྡན་པ་མཐོང་གྱུར་ནས། །ཁྲོ་བས་ཞུམ་བཞིན་པདྨ་ཅན། །གཟི་བྱིན་ཉམས་བཞིན་ཟུམ་པར་གྱུར། ༈ །ཀྱེ་མ་ནམ་མཁའི་སྐྱེད་མོའི་ཚལ། །རྒྱུ་སྐར་མེ་ཏོག་འཛུམ་ལྡན་པ། །རི་བོང་ཅན་འགྲོགས་དགའ་བ་ཡི། །མཚན་མོ་ཡིས་ནི་གཏོང་མི་བྱེད། ༈ །འདི་ནི་ནུ་མ་རབ་མཛེས་པ། །དོ་ཤལ་ཁུར་གྱིས་རབ་ཏུ་བསྒྲིབས། །མཛེས་སྡུག་སྒྲིབ་པར་བྱེད་པ་ཡི། །ཤིན་ཏུ་མང་བའི་རྒྱན་གྱིས་ཅི། ༈ །གྲོགས་མོའི་ལག་པས་བསྐྱོད་པའི་རྔ་ཡབ་རྩེས། །རྣ་བའི་ཨུཏྤལ་ཡལ་འདབ་ལྷུང་གྱུར་པ། །འགྲམ་པར་རེག་པས་སྐད་ཅིག་དེ་རབ་མཛེས། །རྟག་ཡོན་ཟླ་བས་བརྒྱན་པའི་མཚན་མོ་བཞིན། ༈ །དེ་ནས་ཤར་གྱི་རི་རྩེར་རི་བོང་ཅན། །འོད་ཟེར་ཕྲེང་བ་ཤེལ་གྱི་དྲྭ་བས་བསྡམས། །བ་གམ་ཆེར་འཛེགས་དགའ་སྟོན་ཆེན་པོ་ལ། །གྲུབ་པའི་བུ་མོའི་གར་ལ་བལྟ་བ་བཞིན། ༈ །དེ་ནས་ཉམས་དགའ་དགའ་སྟོན་ཆེན་པོ་དང་། །ཕྲེང་བ་དོ་ཤལ་རབ་འབར་དབུ་བ་གཡོ། །གྲུབ་པའི་ན་ཆུང་འཇིག་རྟེན་རྣམ་པར་མཛེས། །ཟླ་ཤར་བདུད་རྩིའི་རྒྱ་མཚོ་འཕྱུར་བ་བཞིན། ༈ །དམ་པའི་སྙིང་སྟོབས་ཆུ་གཏེར་ཁྱོད་ཀྱི་ལུས། །འགྲོ་བའི་མིག་དང་སྲོག་གྱུར་བསྐལ་པར་
ནི། །འཇིག་ཀྱང་མི་འཇིག་མངོན་སུམ་རྟེན་བྱེད་ཀྱི། །བདུད་རྩི་ཉེ་འདི་ལེགས་པར་ལྡན་གྱུར་ཅིག ༈ །དེ་ནས་བྱང་ཆུབ་སེམས་དཔའི་སྤྱི་བོར་ལྷ་ཡི་བདག་པོ་ཡིས། །ལག་པའི་པདྨ་མཛེས་པས་རབ་གཏེར་མེ་ཏོག་རྒྱས་པའི་ཆར། །བུང་བའི་ཚོགས་ཀྱིས་སྒྲ་ཡི་ཡོན་ཏན་བསྟོད་བྱས་སྒྲ་དབྱངས་བཞིན། །འཆི་མེད་དགའ་བའི་ཚོགས་ཀྱིས་ཕྱོགས་ནི་ཡོངས་སུ་གང་བ་བབས། ༈ །སྐབས་དེར་ཙནྡན་འཁྲི་ཤིང་རླུང་གཞོན་གྱིས། །བསྐྱོད་པའི་ཤུགས་རིང་གླལ་བ་བསྟེན་རྣམས་ལ། །འདོད་པའི་གྲོགས་པོར་གྱུར་པ་དཔྱིད་ཀྱི་དུས། །མངོན་པར་འདོད་པའི་སྐྱོད་ཚུལ་རབ་ཏུ་བརྟན། ༈ །དེར་ནི་གློ་བུར་འདར་ཞིང་གཡོ་ལྡན་སྒྲ་དག་སྒྲོག་པར་བྱེད་པའི་འོག་པག་ལ། །འཇིགས་པས་རབ་ཏུ་བྱིན་པའི་བཞིན་ཡང་གོས་དག་བྱིན་ནས་ལྐུགས་པར་བྱས། །ངོ་ཚས་མི་སྨྲ་དང་ལྡན་བཞིན་དུད་དེ་ཡི་རྣ་བའི་ཨུཏྤལ་ལྷུང་བ་ལ། །འཁོར་ཞིང་རྒྱུ་བའི་བུང་བ་རྣམས་ཀྱི་སྒྲ་ཡིས་བདག་ལ་ལེགས་པར་འོངས་སམ་བྱས། ༈ །འདོད་པའི་ཀུ་མུད་ཚལ་གྱི་ཟླ་བའི་རི་མོ་སུ་ཞིག་དེ། །མིག་གི་པདྨོ་རྣམ་པར་རྒྱས་པའི་རྒྱུར་ནི་བདག་གིས་མཐོང་། །གང་གི་མཛེས་པའི་རྣམ་འཕྲུལ་བདུད་རྩིའི་ཆུ་བོ་འཐུངས་པ་ཡིས། །ཚ་བའི་དུག་ཏུ་གསལ་བྱེད་རྨོངས་པ་རྟག་ཏུ་རྒྱས་པར་གྱུར། ༈ །ཕ་མ་དག་ལ་ཕྱག་འཚལ་དེ་
དག་ཞབས་ཀྱི་པདྨོར་གཙུག་གི་ནོར་བུས་ཆགས། །དེ་དག་དགའ་བའི་མཆི་མ་ཟགས་པས་དབུ་མར་དགའ་སྟོན་ལེགས་པར་བསྒྲུབས། །སྙིང་སྟོབས་ཆུ་གཏེར་བསོད་ནམས་ཚོགས་ནི་ཡོངས་རྫོགས་སྤྲིན་གྱི་བཞོན་པས་སྐད་ཅིག་ལ། །གསལ་བར་འཁོར་ལོས་བསྒྱུར་བའི་དཔལ་གྱི་མཚན་མོ་རིན་ཆེན་རྣམས་ནི་ཡང་དག་ཐོབ། ༈ །བསམ་པ་དྲི་མ་མེད་པ་རྣམས་ནི་མཆོག་ཏུ་ཚིམ་བྱེད་ཅིང་། ། མཛེས་ཤིང་རབ་དང་སྐལ་བཟང་ལེགས་སྤྱད་དག་དང་རབ་ཏུ་ཀུན། །དེ་བཞིན་གཤེགས་པ་བཅོམ་ལྡན་འདས་ཀྱི་སྐུ་དང་སྙན་ངག་དག །རྣམ་པར་རྒྱས་པ་འདི་ནི་འགྲོ་རྣམས་དགའ་བའི་སླད་གྱུར་ཅིག ༈ ༈བྱང་ཆུབ་སེམས་དཔའི་གནས་སྐབས་སུ། །གང་ཞིག་ས་བདག་རབ་གསལ་གྱིས། །གླང་ཆེན་མཐོང་ནས་ཞི་བ་ཐོབ། །དེ་བཞིན་གཤེགས་དེས་ཁྱོད་ལ་སྲུངས། ༈ །ཀུན་ལས་མཐོ་ཞིང་བདེར་གཤེགས་ཡོན་ཏན་དག་དང་ལྡན། །བཟང་ཞིང་རབ་མང་བརྩོན་འགྲུས་སྟོབས་དང་བཟོད་པ་ཅན། །མི་དགེའི་རྩ་བ་སྲིད་པའི་ལྗོན་པ་རབ་འཇོམས་པ། །རྒྱགས་པ་ཟློག་མཛད་བཅོམ་ལྡན་དེ་ལ་ཕྱག་འཚལ་ལོ། །འཇིག་རྟེན་དུ་ནི་ཇི་སྲིད་སྒྲོལ་མ་སྙིང་རྗེ་དར་བབས་ཀྱིས་གཟིགས་ཤིང་། གྲུབ་སླད་གུས་ལྡན་དགེ་བ་རྣམས་ལ་མ་ཚང་མེད་པའི་འབྲས་བུ་སྒྲུབ། །ཇི་སྲིད་འཇིག་རྟེན་མགོན་པོ་དྲི་མེད་
དགེ་བའི་བསམ་གཏན་བློ་ལྡན་པ། དེ་སྲིད་མཁས་པའི་ཞལ་གྱི་དགའ་བསྐྱེད་སངས་རྒྱས་གཏམ་འདི་གནས་གྱུར་ཅིག །ཇི་སྲིད་སངས་རྒྱས་སྲིད་པ་མཐའ་དག་བསྒྲལ་ནས་རབ་ཏུ་རྒྱས་གྱུར་ཅིང་། །ཇི་སྲིད་ཆོས་ནི་ལེགས་བྱས་ལམ་དག་རབ་གསལ་རིན་ཆེན་སྒྲོན་མར་གྱུར། །ཇི་སྲིད་དགེ་འདུན་ཆགས་སྡང་ཡིད་ལ་དགེ་བའི་ཚོགས་སྦྱིན་དེ་སྲིད་དུ། །དཔག་བསམ་འཁྲི་ཤིང་གསར་པ་རྒྱལ་བའི་ཡོན་ཏན་གཏམ་འདི་གནས་གྱུར་ཅིག །ཇི་སྲིད་ས་གཞི་རབ་མང་ས་འཛིན་ལས་འབབ་གཡོ་བའི་ཆུ་ཡི་ཕྲེང་ལྡན་ལྷག་མ་ཡི། །མགོ་ལ་གདེངས་ཀ་རིན་ཆེན་འོད་ཟེར་རྒྱས་པ་རྨ་བྱའི་གདུགས་ཀྱི་རྗེས་སུ་སྤྱོད། །ཇི་སྲིད་ས་གཞི་པདྨ་དག་ལ་ལྷུན་པོའི་ཟེའུ་འབྲུའི་རྣམ་པའི་མཛེས་པ་འཛིན་བྱེད་པ། །དེ་སྲིད་སྟོན་པའི་གཏམ་འདི་འགྲོ་བའི་རྣ་རྒྱན་དག་ཏུ་རབ་ཏུ་གནས་པ་བསྟེན་གྱུར་ཅིག །ཨེ་ཏི་ཀྱེ་མེནྡྲ་བྱཱ་སོ་མེནྡ་བི་ར་ཙི་ཏཱ་ཡཾ། ཨཱ་བ་ཏ་ན་ཀལྤ་ལ་ཏཱ་ནཱ་མཱ་ཏ།། ༈ །།རྩ་རྒྱུད་ལས། དེ་ཚེ་ཆུ་བོ་རབ་དགའ་བ། །བཟང་པོ་གསེར་ལྡན་འགྲམ་དག་ཏུ། །ལྷ་རྣམས་ཀྱི་ནི་ཚོགས་ལ་སོགས། །འདུས་པ་དག་ནི་འབྱུང་བར་འགྱུར། །ཞེས་སོགས། ཡང་། ཡི་གེ་ད་དང་ལ་དང་པོར། །སྡོམ་བརྩོན་གང་ཞིག་རབ་གསུངས་དང་། །ཡི་གེ་ར་དང་བ་དང་པོར། །དགེ་སློང་གང་ཞིག་རབ་འབྱུང་གསུངས། །སྟོན་
པའི་བསྟན་པ་གསལ་བྱེད་པ། །འབྱུང་བར་འགྱུར་བ་ཐེ་ཚོམ་མེད། ༈ །དེ་ནས་ཡི་གེ་པ་དང་ཀ །དང་པོ་དག་ཏུ་བརྗོད་པ་དང་། ཞེས་དང་། ཡི་གེ་ན་ཞེས་སྡོམ་བརྩོན་བསྒྲགས། །ཞེས་དང་། དེ་ལས་གཞན་པ་ཡི་གེ་ར། །དང་པོར་ཡི་གེ་བ་གྲགས་དང་། །སྟོན་པའི་གཟུགས་བརྙན་ཡིད་འོང་བྱེད། །བློ་ལྡན་དང་པོར་ཡི་གེ་མ། །ཞེས་དང་། དེ་བཞིན་འཇིག་རྟེན་སྦྱིན་གནས་འགྱུར། །སྲིད་པ་གསུམ་གྱི་མཐར་ཡང་བྱེད། །སྔགས་དང་རྒྱུད་ལ་མངོན་བརྩོན་པས། །གྲགས་པ་འཛིན་པར་ཤེས་པར་བྱ། །ཞེས་དང་། སྔགས་དང་རྒྱུད་ལ་མངོན་བརྩོན་པ། །རྒྱལ་པོའི་ལུགས་ལ་ཉེ་བར་གནས། །དེ་ཚེ་མི་བཟད་དུས་དག་ཏུ། །འཇིག་རྟེན་ཀུན་ལ་འབྱུང་བར་འགྱུར། །ཞེས་དང་། ཡི་གེ་ཨ་མིང་བདག་ཉིད་ཆེ། །སྟོན་པའི་བསྟན་པ་གཅེས་འཛིན་བྱེད། །བློ་ལྡན་ཡོན་ཏན་ཀུན་གྱིས་བཀུར། །ཞེས་དང་། གཙོ་བོ་མྱ་ངན་མེད་པ་ཡི། །དེ་འོག་རྒྱལ་པོ་བྱུང་བ་ནི། །མྱ་ངན་བྲལ་ཞེས་རྣམ་པར་གྲགས། །འཇིག་རྟེན་ཆོས་ཀྱིས་སྤྱོད་པར་ལྡན། ༈ །འཇམ་དཔལ་རྩ་རྒྱུད་ལས། ཀོ་སའི་རྒྱལ་པོ་གསལ་རྒྱལ་དང་། །གཟུགས་ཅན་སྙིང་པོ་དེ་བཞིན་གཞན། །རྒྱལ་རིགས་གཙོ་བོ་འཆར་བ་དང་། །དམག་བརྒྱ་པ་ནི་ཡང་དག་འབྱུང་། །ལག་བཟང་གཞུ་བཟང་ཞེས་བྱ་
དང་། ཞེས་སོགས་ནས། འདི་དག་རྒྱལ་པོའི་རིགས་སུ་གསུངས། །ས་སྲུང་སྟོན་པ་མཆོད་བྱེད་པའོ། །ཤཱཀྱ་སེང་གེ་མི་ཡི་མཆོག །སངས་རྒྱས་མངོན་དུ་ལྟ་བར་འགྱུར། །དེ་ཡང་དེ་ནས་ཆོས་ཐོས་ནས། །ཡུན་རིང་ཕུན་སུམ་ཚོགས་པ་འཐོབ། །ངེས་པར་བྱང་ཆུབ་འདོད་ནས་ཀྱང་། །ཞི་ནས་ཞི་བ་འཐོབ་པར་འགྱུར། །ཞེས་དང་། མ་སྐྱེས་ཞེས་བྱའི་རྒྱལ་པོ་དེས། །ངེས་པར་བྱང་ཆུབ་གཞོལ་བར་གྱུར། །ཅེས་དང་། དེ་ཚེ་མི་ཟད་ཆེན་པོ་ཡི། །གྲོང་ཁྱེར་མེ་ཏོག་ཅན་དུ་ནི། །མྱ་ངན་མེད་ཅེས་བྱ་བ་ཡི། །རྒྱལ་པོ་ས་ནི་སྐྱོང་བྱེད་པ། །ཞེས་སོགས་ནས། དེ་ནི་ཡིད་གཞུངས་རིམ་གྱིས་སུ། ། རྙེད་པར་དཀའ་བའི་བྱང་ཆུབ་ཐོབ། །འཇམ་དཔལ་རྩ་བའི་རྒྱུད་ལས། དེ་བཞིན་གཤེགས་པའི་བསྟན་འདི་ལ། །རྣམ་པ་སྣ་ཚོགས་བྱ་བ་བྱེད། །བྱང་གི་ཕྱོགས་ལ་བརྟེན་ནས་ནི། །དེ་ཡི་ཚེ་ན་འབྱུང་བར་འགྱུར། །ལྷ་ལྡན་ཡུལ་ཞེས་བྱ་བ་ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །ལི་ཙྪ་བི་རྣམས་རིགས་སུ་འབྱུང་། །ཞེས་སོ། །ཡང་། རྒྱ་ཡུལ་ཀུན་ལ་བརྟེན་པ་ཡི། །རྒྱལ་པོ་དབྱིག་གི་སྙིང་ཞེས་བྱ། །སྡེ་ཆེན་སྟོབས་ཀྱང་ཆེ་བ་དང་། །བློན་པོ་རྒྱ་ཆེ་ཉིད་དང་ནི། །སྐྱེ་བོའི་རྩ་ལག་རབ་ཏུ་མང་། །ཀླ་ཀློས་བཏུད་དང་རྣམ་པར་རྒྱལ། །སྟོན་པའི་བསྟན་པ་དེ་གཙོར་
བྱེད། །ཅེས་དང་། བྱང་ཆུབ་སེམས་དཔའ་དཔའ་བོ་ཆེ། །འཇམ་པའི་དབྱངས་ནི་འོད་ཆེན་པོ། །མངོན་སུམ་དེ་ཡི་ཡུལ་དག་ན། །བྱིས་པའི་གཟུགས་ཀྱིས་བཞུགས་པ་ཡིན། །ཅེས་དང་། །གཞོན་ནུས་ཡོངས་སུ་བཤད་པ་ཡི། །རིག་པ་འདི་ནི་དེ་ཡུལ་དུ། །དེ་ནི་མྱུར་དུ་འགྲུབ་འགྱུར་གྱི། །རིག་པ་གཞན་ནི་ནམ་ཡང་མིན། །ཅེས་དང་། ཁ་བ་ཅན་གྱི་ནང་དག་ཏུ། །སཱ་ལའི་ནགས་ནི་ཡང་དག་འབྱུང་། །ཞེས་དང་། བརྒྱ་ཡིས་གྲངས་ཀྱིས་བགྲང་བ་ཡི། །དེ་དག་བཅུ་ལ་སྟོང་ཕྲག་གཅིག །སྟོང་ཕྲག་བཅུ་ལ་ཁྲི་ཡིན་ཏེ། །ཁྲི་བཅུ་ལ་ནི་འབུམ་ཕྲག་གཅིག །འབུམ་ཕྲག་བཅུ་ལ་ས་ཡ་སྟེ། །ས་ཡ་བཅུ་ནི་བྱེ་བ་ཡིན། །བྱེ་བ་བཅུ་ལ་དུང་ཕྱུར་ཏེ། །དུང་ཕྱུར་བཅུ་ནི་ཐེར་འབུམ་ཡིན། །ཅེས་སོགས་གསུངས་སོ། །སྟོན་པའི་གསུང་རབས་སྟེང་དུ། །དུས་མཐར་འཇིག་རྟེན་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བ་ཐེ་ཚོམ་མེད། །ཅེས་སོགས་རྒྱས་པར་ལུང་བསྟན་ཏོ།། ༈ །།ན་མསྶརྦ་ཛྙཱ་ཡ། གནས་ཕུན་སུམ་ཚོགས་པ་ནི། །འདི་ལྟར་བསྟན་རྩིས་ལ་མདོ་རྒྱུད་ནས་གསུང་ཚུལ་ཐ་དད་པའི་དབང་གིས། མཁས་པ་རྣམས་བཞེད་སྲོལ་མི་མཐུན་པ་མང་ན་ཡང་། དཾཥཱ་ས་ནའི་འབུམ་ཊི་ཀ་དང་། དབྱིག་གཉེན་ཞབས་ཀྱི་གནོད་འཇོམས། སློབ་
དཔོན་འཇམ་དཔལ་གྲགས་པ་སོགས་ཀྱི་བཞེད་པ་བཞིན། མཁས་པ་ཕལ་ཆེར་ལྔ་སྟོང་དུ་འཐད་པར་བཞེད་ལ། དེ་བཞིན་སངས་རྒྱས་ཀྱི་འཁྲུངས་རྩིས་ཀྱང་མི་མཐུན་པ་མང་ཡང་། རྗེ་བཙུན་ས་སྐྱ་པའི་དགོངས་པ་ནི། ལུགས་ཀྱི་བསྟན་བཅོས་ཞེས་བྱ་བ་ལ། གཡུལ་བརྟན་འོག་ཏུ་ཉིས་སྟོང་དང་། །དགའ་བྱེད་འོག་ཏུ་བརྒྱད་བརྒྱ་ན། །ཞེས་སོགས་བཤད་པ་བཞིན། རྩོད་དུས་ཀྱི་རྒྱལ་པོ་སྐྱབས་སེང་མཆེད་ལྔའི་གཅེན་གཡུལ་བརྟན་ནས་བརྩམས་ལོ་ཉིས་སྟོང་ཉེ་བ་ན་སྟོན་པ་ས་ཕོ་འབྲུག་ལ་སྐུ་བལྟམས། བརྒྱད་ཅུ་པ་མེ་ཕག་ལ་གཤེགས། དེ་ནས་བརྒྱ་དང་སོ་བདུན་ན་དགའ་བྱེད་འབྱུང་ཞེས་རྟོག་གེ་འབར་བར་བཤད་པས། སློབ་དཔོན་བསོད་ནམས་རྩེ་མོ་དང་། ཆོས་རྗེ་ས་པཎྜི་ཏས་འདི་ལ་བརྟེན་ནས་བསྟན་རྩིས་བརྩམས་པར་བཞེད་ཅིང་། དེས་ན་ལྔ་བརྒྱ་ཕྲག་བཅུ་ལས། དང་པོར་དགྲ་བཅོམ། གཉིས་པར་ཕྱིར་འོང་། གསུམ་པར་རྒྱུན་ཞུགས་ཏེ་ཡེ་ཤེས་ཁོང་ཆུད་ཀྱི་ལེའུ་གསུམ། དེ་ནས་ལྔ་བརྒྱ་ཕྲག་གསུམ་ལ་རིམ་བཞིན། ཤེས་རབ། །ཏིང་འཛིན། ཚུལ་ཁྲིམས་བསླབ་པ་གཙོར་སྟོན་གསུམ་ལ་སྒྲུབ་པའི་དུས་ཀྱི་ལེའུ་ཟེར། དེ་ནས་ལྔ་བརྒྱ་ཕྲག་གསུམ་ལ། མངོན་པ། མདོ་སྡེ། འདུལ་བ་རྣམས་སྟོན་པ་མང་དུ་འབྱུང་བས་ན་ལུང་གི་ལེའུ་གསུམ། བཅུ་པ་ལྔ་བརྒྱ་ཕྲག་ཐ་མ་ལ་
རབ་བྱུང་རྟགས་ཙམ་མ་གཏོགས་ལྟ་སྤྱོད་རྣལ་མ་མེད་པས་རྟགས་ཙམ་འཛིན་པའི་ལེའུར་བཞེད་པ་ལས། མངོན་པའི་དུས་ཀྱི་ལྔ་བརྒྱ་ཕྲག་གཅིག་གི་སྟེང་ནས་ཉིས་བརྒྱ་དང་ལྔ་ཐལ། དྲུག་ཏུ་སླེབ་པ་རབ་བྱུང་གསུམ་པའི་ནང་གི་བག་མེད་ཅེས་པ་ཆུ་གླང་ལོའི་ཁྲུམས་ཟླའི་ཡར་ཚེས་ལ། ཁ་བ་ཅན་གྱི་སའི་དུམ་བུ་གསུམ་པའི་བར་པ། རུ་ལག་གི་སའི་ཆ། གཙང་སྟོད་གྲམ་ཕ་ཡུལ་གྱི་ཁྱད་པར་དགེ་བ་བརྒྱད་དམ་བཅུ་ཚང་བ། བླ་མ་མཉམ་མེད་པས། རྡོ་རྗེའི་རང་བཞིན་རྡོ་རྗེའི་གདན་ལ་བྱང་གི་འདབ་ཆགས་ས་ཡི་སྙིང་པོ་དཔག་ཚད་བཅུ་ཕྲག་བཅུ་བགྲོད་པ། །ཞེས་དང་། ཡང་དེ་ཉིད་ཀྱིས། ཤར་རི་འགྲོ་ལྡན་སྤྱི་གཙུག་ལྟར་མཐོ་ལྷོ་ན་རྟ་མཆོག་རྒྱུག་ལྟའི་ཆུ། །ནུབ་རི་མཚན་མ་རྨ་བྱའི་མདོངས་ལྡན་བྱང་རི་ལྷུན་པོ་འདབ་བཟང་རི། །རི་དྭགས་རྒྱལ་པོ་བཞད་པའི་གདོང་པ་དབུས་ཀྱི་ས་འཛིན་དཔལ་ཀུན་འཛིན། །དེ་ཕྱིར་རྒྱལ་བའི་གདན་ས་མཆོག་འདི་བྱང་ཆུབ་སྙིང་པོ་མ་ལགས་གྲང་། །ཞེས་ཤར་རི་བྲག་ཆུང་གླང་པོའི་གཙུག་ལྟར་མཐོ་བ། ལྷོར་གྲུབ་ཆུ་རྟ་མཆོག་རིན་ཆེན་ལྟར་རྒྱུག་པ། ནུབ་ཆུ་མིག་རྫིང་ཁ་རྨ་བྱའི་མདོངས་དང་ལྡན་པ། བྱང་དཔོན་པོ་རི་མཁའ་ལྡིང་གི་གཤོག་པ་ལྟར་བརྒྱངས་པ། དབུས་ཀྱིས་དཀར་ལོགས་འདི་རི་དྭགས་ཀྱི་རྒྱལ་པོ་སེང་གེ་མངོན་པར་འགྱིང་
བ་དང་འདྲ་བ། ཉི་མ་འཆར་སྔ་ཞིང་ནུབ་བུལ་བ། ལྷོ་ཕྱོགས་ཀྱི་རི་རིན་ཆེན་ཕུང་པོ་བརྡལ་བ་ལྟ་བུ། ཇོ་མོ་སྟག་འཚེར་གདུགས་ཀྱི་དབྱིབས་སོགས་ལོགས་བཀྲ་ཤིས་རྟགས་བརྒྱད། གནམ་འཁོར་ལོ་རྩིབས་བརྒྱད། ས་པདྨ་འདབ་བརྒྱད་དགེ་མཚན་ཐམས་ཅད་མངོན་པར་ཚང་བ་དཔལ་ས་སྐྱའི་ཆོས་གྲྭ་ཆེན་པོ་ཞེས་གྲགས་པའི་སྤྲིང་ཡིག་སྲིད་པ་གསུམ་ན་གསལ་བ་དེ་ཉིད་དུ། སྟོན་པ་ཕུན་སུམ་ཚོགས་པ་གདུང་རབ་རིན་པོ་ཆེ་ཇི་ལྟར་བྱོན་པའི་ཚུལ་ནི། ཡུལ་མཐོ་ཞིང་གཙང་བ་མངའ་རིས་ཀྱི་སྟོད་དམ། བྱང་གི་ཤེལ་ཚྭ་རྒྱལ་མོའི་གང་འགྲམ་དུ་འོད་གསལ་གནམ་ལྷ་མཆེད་གསུམ་བྱོན། གཅུང་པོ་གཡུ་སེར་སྲས་བཞི་བྱོན་པ་ཡབ་བཅས་ལྷ་ཡུལ་དུ་བྱོན། བར་པ་གཡུ་རིང་དང་དམུ་བཟའ་ལྡེམ་བུ་ལས། སྲས་མ་སངས་སྤུན་བདུན་བྱོན་པའི་གཅེན་དྲུག་ཡབ་བཅས་པའང་ལྷ་ཡུལ་དུ་གཤེགས། བདུན་པ་མ་སངས་སྤྱི་རྗེ་དང་ཐོག་ལྕམ་འུར་མོའི་སྲས་དཔའ་བོ་སྟག །དེ་དང་ཀླུ་ལྕམ་དྲ་མའི་སྲས་སྟག་པོ་འོད་ཅན་ཏེ། འདི་རྣམས་བར་སྣང་ལ་བཞུགས་པར་བཞེད། དེ་དང་མོན་བཟའ་འཚོ་མོ་རྒྱལ་གྱི་སྲས་གཡའ་སྤང་སྐྱེས་རྣམས་ནི་ལྷའི་གདུང་རབས་སོ། །དེས་སྲིན་པོ་ཁྲག་མིག་མ་བསད། དེའི་ཆུང་མ་གཡའ་འབྲུག་སི་ལི་མ་འཕྲོག་སྟེ་ཁབ་ཏུ་བཞེས་པས། ལྷ་དང་སྲིན་པོ་འཐབ་པའི་བར་དུ་སྐྱེས་པས་
འཁོན་བར་སྐྱེས། དེ་དང་བཙན་བཟའ་ལྕམ་བུ་སྒྲོན་གྱི་སྲས་དཀོན་པ་རྗེ་གུང་སྟག་གམ་ཆེའམ་འཁོན་དཔལ་པོ་ཆེ། དེ་དང་རླངས་བཟའ་ནེའུ་ཆུང་མའི་སྲས་གཅེན་ཀླུ་དབང་སྲུང་དང་། །གཅུང་རྡོ་རྗེ་རིན་ཆེན། ཕྱི་མའི་ལྕམ་འགྲོ་མགོན་གཡང་ལོན་སྐྱིད་ལ། སྲས་བདུན་བྱོན་པའི། ཆེ་བ་མང་ཡུལ། དེ་འོག་གུང་ཐང་། དེ་འོག་སྲིད། དེ་འོག་གཉལ་ལོ་རོ། དེ་འོག་མྱང་ཤ་བ་རྣམས་ལ་སྐུ་བརྒྱུད་འཕེལ་ཡང་ངོས་འཛིན་དང་བྲལ་ཞིང་སྐུ་བརྒྱུད་མ་འཁྲིགས་སྡེ་གསུམ་དུ་གྲགས། དྲུག་པ་ཤེས་རབ་ཡོན་ཏན་གཡའ་ལུང་དུ་བཞུགས། སྲས་གཉིས་ཀྱི་ཆུང་བ་ཁ་བ་སོ་སྟག་ཏུ་བྱོན་པས། ལ་སྟོད་བྱང་གི་འཁོན་ཚོ་རྣམས་འཕེལ་བར་བཤད། ཆེ་བ་ཡོན་ཏན་འབྱུང་བ་ལ་སྲས་གསུམ་བྱོན་པའི་སྲས་ཚུལ་ཁྲིམས་རྒྱལ་པོ་སྟེ། དེ་ལ་ཡང་སྲས་གསུམ་བྱོན་པའི་བར་པ་བརྡལ་བའི་ཚང་ཚིང་དུ་བྱོན། ཐོག་མཐའ་གཉིས་གཡའ་ལུང་དུ་བཞུགས་པའི་ཆེ་བ་གཙུག་ཏོར་ཤེས་རབ་ལ་སྲས་བདུན་གཅུང་དང་བཅས་པ་ལ་འཁོན་ཚོ་བརྒྱད་དུ་གྲགས་པའི་ལྔ་པ་དགེ་སྐྱབས་ཤབ་ཏུ་བྱོན་པའི་སྲས་གཉིས་ཀྱི་གཅུང་ལས་ཤབ་སྟོད་ཀྱི་འཁོན་ཚོ་གྱེས། གཅེན་པོ་དགེ་མཐོང་སྲས་བལ་པོ། དེ་སྲས་ཤཱཀྱ་བློ་གྲོས། དེ་སྲས་ཤེས་རབ་ཚུལ་ཁྲིམས་དང་། དཀོན་མཆོག་རྒྱལ་པོ་གཉིས་ལས། ཤེས་རབ་ཚུལ་ཁྲིམས་
གཉིས་གསང་སྔགས་སྔ་འགྱུར་གྱི་བདག་པོ་གྲུབ་པའི་སར་བཞུགས་པ་ཤ་སྟག་བྱོན། ཀླུ་དབང་སྲུང་སྐུ་མཆེད་ནི་མཁན་སློབ་གཉིས་ཀྱི་སློབ་མ་ཡིན། གཞན་རྣམས་མ་ངེས། འཁོན་དཀོན་མཆོག་རྒྱལ་པོ་ཤིང་ཁྱིར་འཁྲུངས། ཡབ་དང་། གཅེན་འབྲོག་མི། འཁྱིན་ལོ་ཙཱ་བ། སེ་སྟོན། འགོས་ལོ། པཎྜི་ཏ་ཤེས་རབ་གསང་བ། རྨ་ལོ་ཙཱ། མལ་ལོ། བ་རི། གནམ་ཁའུ་པ་སྐུ་མཆེད། འཁོན་སྐྱི་ཆུ་བ། སྐྱུ་ར་ཨ་སེང་སོགས་ལས་གསན་པ་རྒྱ་ཆེར་མཛད། བཞི་བཅུ་པ་ཆུ་གླང་ལོར་ས་སྐྱ་བཏབ། ང་དགུ་པ་ཆུ་སྤྲེལ་ལོར་ཡུམ་གུ་གུར་ཞང་མོར་ས་ཆེན་འཁྲུངས། རེ་དགུ་པ་ཆུ་རྟར་གཤེགས། དེ་སྲས་ས་ཆེན་ཀུན་དགའ་སྙིང་པོས། འཇམ་དབྱངས། སྒྲོལ་མ། མི་གཡོ་བ། བིར་ཝ་པ། ནག་པོ་པ། །ག་ཡ་དྷ་ར། ནགས་ཁྲོད་པ། ཀོ་ཏྲ་ལི། ཡབ། བ་རི་བ། བྲང་ཏི་དར་མ་སྙིང་པོ། ཁྱུང་རིན་ཆེན་གྲགས། དཔལ་མེ་དིག་པ། མེས་ལྷང་འཚེར། ཁའུ་པ། སྐྱི་ཆུ་བ། མལ་ལོ། པུ་ཧྲང་ལོ་ཆུང་། སྐྱུ་ར་ཨ་སྐྱབས། པདྨ་དྭི ཛྷཱ་ན་བཛྲ། བྷ་དྲ་རཱ་ཧུ་ལ། དགེ་བཤེས་རྔོག །དཔལ་རྒྭ་ལོ་སོགས་ལས་གསན་པ་རྒྱ་ཆེར་མཛད། ཞལ་སློབ་ཀྱང་། མཆོག་ཐོབ་གསུམ། བཟོད་ཐོབ་བདུན། གཞོན་ནུའི་སར་གནས་པ་གཅིག། གཞན་ཡང་དཔལ་ཆེན་ཧྥ་ལོ། ཟླ་རྒྱལ། ཕག་
གྲུ། རྟ་ནག་ཕག་སྟོན། རྒྱལ་ཚྭ་ཏལ་ཕུག་པ། དབྱར་སྟོན་སྡུམ་པ། གཤེན་རྡོར་སེང་། གཤེན་དགོན་དཀར་བ། ཞང་སྟོན་སུམ་ཐོག་པ་དང་། སྤྱི་དམར་བ། བྲག་དམར་གཞུ། སྐྱུ་ར་ཨ་སེང་། ནེ་ཙོ་སྦལ་སྟོན། ལྷོ་བྲག་དཀར་སྟོན། འཛང་སྟོན་འཛའ་ནེ། བསོད་ནམས་རྡོ་རྗེ། གཉགས་སྟོན་དབང་རྒྱལ། རྒྱ་སྒོམ་ཚུལ་ཁྲིམས་བྲག། མི་ཉག་པྲཛྙཱ་ཛྭ་ལ། ཁམ་པ་སྒ་སེང་། འ་འུ་མ་སོགས་བསམ་གྱིས་མི་ཁྱབ། རེ་བདུན་པ་ས་སྟག་ལ་གཤེགས། དེ་ལ་བཙུན་མོ་དང་ཚ་རོང་དང་ཇོ་ལྕམ་ཕུར་མོར་སྲས་ཀུན་དགའ་འབར། གཉིས་པ་ཚ་རོང་འོད། སྒྲོན་མའི་སྲས་བསོད་ནམས་རྩེ་མོ། གྲགས་པ་རྒྱལ་མཚན། དཔལ་ཆེན་འོད་པོ་སྟེ་གསུམ་བྱོན། དེ་ཡང་དཔལ་ཆེན་འོད་པོ་ཡབ་ང་དགུ་པ་ལྕགས་རྟ་ལ་འཁྲུངས། ལྕམ་གར་བུ་ཉི་ཁྲི་ལ་ས་པཎ་དང་། ཟངས་ཚ་བསོད་ནམས་རྒྱལ་མཚན་གཉིས་བྱོན། ང་བཞི་པ་ཆུ་ཕག་ལ་གཤེགས། ཕྱི་མ་ཡབ་སོ་ལྔ་བཞེས་པ་ཆུ་འབྲུག་ལ་འཁྲུངས། ང་དྲུག་ས་ཕག་ལ་གཤེགས། །དེ་ལ་བཙུན་མོ་ལྔ་ཡོད་པའི་དང་པོ་ཚ་སྣ་ཀུན་སྐྱིད། རྒྱལ་པོའི་སྲས་སུ་འཕགས་པ་རིན་པོ་ཆེ་དང་། འགྲོ་མགོན་ཕྱག་ན་པདྨོ་གཉིས་འཁྲུངས། ཕྱི་མའི་བཙུན་མོར་མགལ། ཆོས་འབུལ། ཞྭ་ལུ་མཁའ་འགྲོ་འབུམ་གསུམ་ལས་ཕྱི་མའི་སྲས་དྷརྨ་ཕ་ལ། དེའི་
ལྕམ་དཔལ་སྟག་གཉིས་ཀྱི་ཕྱི་མར་རཏྣ་བྷ་དྲ་བལྟམས། ཟངས་ཚའི་བཙུན་མོ་གཉིས་པ་ཆུ་མདོ་མར། །རིན་ཆེན་རྒྱལ་མཚན་ལྕམ་བཅས་བྱུང་། གསུམ་པ་གུང་ཐང་ལྷ་གཅིག་མཛེས་མ་བསོད་ནམས་འབུམ་དང་། ཉི་འབུམ་ཞེས་ལྕམ་གཉིས་དང་། བཞི་པར་གཡའ་ལུང་ཧོར་ལྕམ་ལའང་སྲས་མོ་གཅིག །ལྔ་པ་མཛེས་མའི་ཉེ་གནས་རྡོ་རྗེ་གདན་ལ། ཡབ་ང་ལྔ་ས་ཁྱིར་ཡེ་ཤེས་འབྱུང་གནས་འཁྲུངས། སོ་བདུན་ཤིང་ཁྱིར་གཤེགས། དེ་ལ་བཙུན་མོ་ལྷས་འབུམ་མའི་སྲས་སུ། ཡབ་ཀྱིས་ཉེར་ལྔ་བཞེས་པ་ཆུ་ཁྱི་ལ་བདག་ཉིད་ཆེན་པོ་བཟང་པོ་དཔལ་བལྟམས། རེ་གསུམ་ཤིང་བྱིར་གཤེགས། དེ་ལས་སྨན་རྩེ་མ་དང་། ལུང་ཞུད་བཙུན་མོ་དྲུག་སྟེ་བདུན་གྱི། དང་པོ་སྨན་རྩེའི་སྲས་ཆུང་ངུ་ནས་གཤེགས། ༈ །ལུང་ཕུད་དང་པོ་རྒྱལ་པོའི་ལྕམ་མུ་དགོན་གྱི་སྲས་སུ་བསོད་ནམས་བཟང་པོ་ལྕམ་སྲིང་གཉིས། བསོད་ནམས་བཟང་པོའི་བཙུན་མོ་བུདྡྷ་གན་གྱི་སྲས་སུ་རཏྣ་བྷ་དྲ་བཅས། ༈ །ལུང་ཕུད་གཉིས་པ་མང་མཁར་སོག་སྦེ་ངང་མོར། ཏི་ཤྲཱི་ཀུན་དགའ་བློ་གྲོས་བྱོན་པ་སྟེ་སྤྱི་ལ་དབང་བསྒྱུར་བའི་གདུང་རབས་སྲས་སུ་གྲགས་པ་རྣམས་སོ། ༈ །དེ་ལས་གྱེས་པ་གཞི་ཐོག་བླ་བྲང་གི་གདུང་རབས་ནི། ལུང་ཕུད་གསུམ་པ་གླང་མཚོན་སྤེ་མ་ནམ་མཁའ་རྒྱལ་མོར། ཡབ་ཞེ་བཞི་
པ་ཤིང་སྦྲུལ་ལོར་མཁས་བཙུན་ནམ་མཁའ་ལེགས་པ་འཁྲུངས། སོ་དགུ་པ་ཆུ་ལུག་ལ་གཤེགས། ཡབ་དང་ཆོས་རྗེ་ནོར་བཟང་དཔལ་སོགས་བསྟེན་ཅིང་། ཞལ་སློབ་བླ་མ་དམ་པ་སོགས་སོ། །ནམ་མཁའ་བཤེས་གཉེན་དང་ནམ་མཁའ་རྒྱལ་མཚན་གཉིས་ནི་དེའི་གཅུང་ངོ་། །མཁས་བཙུན་ཆེན་པོའི་བཙུན་མོ་ངམ་རིང་ཁང་གསར་མ་དགེ་འདུན་འབུམ་ལ། ཡབ་སོ་ལྔ་ས་ཡོས་ལོར་ཀུན་དགའ་རིན་ཆེན་འཁྲུངས། རེ་གཅིག་པ་ས་ཡོས་ལ་གཤེགས། དེའི་དབུ་བླ་ནི། ཆོས་རྗེ་བླ་མ། མཉམ་མེད་གྲགས་རྒྱལ། ཞང་སྟོན་དབང་ཕྱུག་རྒྱལ། མགོན་རྒྱལ། འཇམ་སྔོན། གུང་རུ་སོགས་བསྟེན་ཅིང་ཞལ་སློབ་ཀྱང་མང་རབ་བྱུང་འདྲ། བཙུན་མོ་གཉིས་ཀྱི་དང་པོ་ཉི་ཐོག་ནམ་སར་བློ་གྲོས་རྒྱལ་མཚན་འཁྲུངས། དེའི་བཙུན་མོ་ས་སྐྱ་རྒྱལ་མོ་སྐྱིད་ལ་ཀུན་དགའ་དབང་ཕྱུག་བལྟམས། བཙུན་མོ་གཉིས་པ་མཉམ་མེད་དབོན་མོ་མ་གཅིག་དགེ་མ་ལ། གྲགས་པ་བློ་གྲོས། ཀུན་དགའ་བློ་གྲོས། གཞན་ཡང་ལྕམ་གཅིག་བཅས་འཁྲུངས། གྲགས་བློའི་བཙུན་མོ་བྲག་དཀར་མར་བློ་གྲོས་དབང་རྒྱུ་ཕྱུག་འཁྲུངས་པ་རྣམས་ནི་གཞི་ཐོག་བླ་བྲང་བའི་གདུང་རབ་བོ། ༈ །དེ་ནས་བླ་བྲང་རིན་ཆེན་སྒང་བའི་གདུང་རབས་ནི། ལུང་ཕུད་དྲུག་པ་ཞྭ་ལུ་གཞོན་འབུམ་གྱི་སྲས་སུ་ཀུན་དགའ་ཉི་མ། དོན་ཡོད་
རྒྱལ་མཚན། བསོད་ནམས་རྒྱལ་མཚན་ཏེ་སྐུ་མཆེད་གསུམ་ལས། དོན་ཡོད་རྒྱལ་མཚན་ཡབ་ཉེར་དགུ་པ་ལྕགས་ཁྱིར་འཁྲུངས། སོ་ལྔ་ཤིང་སྤྲེལ་ལ་གཤེགས། དེས་ཡབ་དང་བསོད་ནམས་གྲགས་པ། དཔལ་ལྡན་སེང་གེ། གྲགས་པ་སེང་གེ། དཔང་ལོ་ཙཱ་བ། བསོད་ནམས་དཔལ། རྒྱལ་སྲས་ཐོགས་མེད། ཆོས་དཔལ་བཟང་སོགས་བསྟེན་ནས་ཚོགས་ཆོས་གསུངས། ཞལ་སློབ་ཀྱང་ཤིན་ཏུ་མང་། དེའི་བཙུན་མོ་ཞྭ་ལུ་མ་ཡོན་ཏན་དཔལ་འབུམ་གྱི་སྲས་སུ་ཉི་མ་རྒྱལ་མཚན་དང་། ཟླ་བ་རྒྱལ་མཚན་གཉིས་བལྟམས་པའི་ཕྱི་མ་ལ། བླ་ཆེན་ཀུན་དགའ་རྒྱལ་མཚན་ཞེས་གྲགས་པ་དེ་ཡབ་སོ་ལྔ་ཤིང་སྤྲེལ་ལ་འཁྲུངས། ས་ཁྱི་དོན་ལྔར་གཤེགས། དེའི་བླ་མ་ནི། བླ་མ་དམ་པ། མཉམ་མེད་གྲགས་རྒྱལ་སོགས་བསྟེན། ཞལ་སློབ་ཀྱང་ས་བཟང་འཕགས་པ། ཐེག་ཆེན་ཀུན་དགའ་བཀྲ་ཤིས་སོགས་སོ། །བཙུན་མོ་ཞྭ་ལུ་མ་ནམ་མཁའ་རྒྱལ་མོར། ཡབ་ང་ལྔ་པ་ས་སྟག་ལོར་འཇམ་དབྱངས་ནམ་མཁའ་རྒྱལ་མཚན་འཁྲུངས། དོན་ལྔ་ཆུ་འབྲུག་ལ་གཤེགས། དེས་ཡབ་དང་། ཐེག་ཆེན་རྗེ་བསོད་ནམས་རྒྱལ་མཆོག །རྡོ་རྗེ་རྒྱལ་མཚན་སོགས་ལ་བསྟེན། དེའི་གཅུང་བདག་ཆེན་ཞྭ་ལུ་བ་བསོད་ནམས་རྒྱལ་མཚན་ལྕམ་མོ་གཉིས་དང་བཅས་པར་སྲས་ལྕམ་སྲིང་བཞིར་གྲགས། ནམ་མཁའ་
རྒྱལ་མཚན་བཙུན་མོ་ཁྲོ་མདའ་མ་དཔལ་འབྱུང་རྒྱལ་མོར་སྲས་མོ་བཞི། སྲས་གཉིས་ཀྱི་ཆེ་བ་རྒྱ་གར་ཤེས་རབ་རྒྱལ་མཚན་དང་། ཆུང་བ་རྡོ་རྗེ་འཆང་བློ་གྲོས་རྒྱལ་མཚན་ནོ། ༈ །བདག་ཆེན་ཞྭ་ལུ་བའི་བཙུན་མོ་ཡུམ་མ་གཅིག་ཀུན་དགའ་འབུམ་ལ་གྲགས་པ་རྒྱལ་མཚན་འཁྲུངས་ཏེ། དེ་རྣམས་ནི་བླ་བྲང་རིན་ཆེན་སྒང་པའི་གདུང་རབས་སུ་གྲགས་པའོ། ༈ །དེ་ནས་ལྷ་ཁང་བླ་བྲང་པའི་ལ་གདུང་རབས་ནི། ལུང་ཕུད་བཙུན་མོ་བཞི་པ་ཤ་གཟུགས་མ་ཀུན་དགའ་ནམ་མཁའི་རྒྱལ་མཚན་ཞེས་བྱ་བའི་སྲས་སུ་ངག་དབང་ཀུན་དགའ་ལེགས་པའི་འབྱུང་གནས་དང་། ཀུན་དགའ་རྒྱལ་མཚན་གཉིས་འཁྲུངས་པའི། ཕྱི་མ་ཡབ་ཞེ་དགུ་པ་ལྕགས་ཁྱིར་འཁྲུངས། ཞེ་དགུ་ས་ཁྱིར་གཤེགས། དེ་ལ་བཙུན་མོ་གཉིས་ཀྱི། དང་པོ་ཁ་ཕྱར། ཡབ་ཉེར་གསུམ་ཆུ་སྤྲེལ་ལ་ཆོས་ཀྱི་རྒྱལ་མཚན་འཁྲུངས། ཉེར་བརྒྱད་ས་ཕག་ལ་གཤེགས། བཙུན་མོ་གཉིས་པར་ལུང་བསོད་ནམས་དཔལ་མོའི་སྲས་སུ་གཅུང་པོ་བློ་བཟང་རྒྱལ་བ་འཁྲུངས། ཆོས་ཀྱི་རྒྱལ་མཚན་གྱི་བཙུན་མོ་དང་པོ་ཆུ་མདོ་རྒྱལ་མོ་མཚོར་ཐེག་ཆེན་ཆོས་ཀྱི་རྒྱལ་པོ་དང་། གཉིས་པ་ཉང་སྟོད་སྲས་སྐྱབས་ལ་དྷརྨ་དྷ་ཛ་དང་། རྡོ་རྗེ་རིན་ཆེན་གཉིས་བལྟམས། གསུམ་པ་ལྷོ་པ་དཔལ་ལྡན་འབུམ་ལ་བསོད་ནམས་བཀྲ་ཤིས་ཡབ་ཉེར་
གཅིག་ཆུ་འབྲུག་ལོར་འཁྲུངས། ང་དྲུག་མེ་ཕག་ལ་གཤེགས། དེའི་དབུ་བླ་ནི། གཞི་ཐོག་པ་ཀུན་རིན། མ་ཏི་པཎ་ཆེན། ཆོས་རྗེ་བླ་མ་སོགས་བསྟེན། ཞལ་སློབ་ཀྱང་མང་དུ་བྱུང་། དེའི་བཙུན་མོ་བྱང་མོ་མ་གཅིག་ནམ་པར། ཡབ་གཤེགས་པའི་ས་ཕོ་བྱི་ལོར་བདེ་ལེགས་བཀྲ་ཤིས་བལྟམས། དེའི་དགུང་གྲངས་དབུ་བླ་ཞལ་སློབ་སོགས་མི་གསལ། དེའི་བཙུན་མོ་བྱང་བདག་སྲས་མོར། བསོད་ནམས་རྒྱལ་མཚན། ཤཱཀྱ་སེང་གེ། དོན་གྲུབ་རྒྱལ་མཚན། བསམ་འགྲུབ་རྒྱལ་མཚན་ཏེ་སྲས་བཞི་བྱོན། ཤཱཀྲ་སེང་བཙུན་མོ་དང་པོ། བོ་གཅུང་དཔོན་མོན། ཀུན་བཀྲས། ཀུན་རྒྱལ། ཀུན་སྙིང་། སྟེ་གསུམ། གཉིས་པ་མ་གཅིག་ཡུམ་བར་རིན་ཆེན་རྒྱལ་མཚན་ཞེས་སྐུ་མཆེད་མཚན་འདྲ་བ་རྣམ་གཉིས་འཁྲུངས། ཀུན་དགའ་རྒྱལ་མཚན་བཙུན་མོ་གླིང་ཁ་དཔོན་དཀར་མོར་ཆོས་ཀྱི་རྒྱལ་མཚན་དང་། ཀུན་དགའ་ལེགས་པ་འཁྲུངས་པ་རྣམས་ནི་ལྷ་ཁང་བླ་བྲང་པའི་གདུང་རབས་སོ། ༈ །དེ་ནས་དུས་མཆོད་བླ་བྲང་ཞེས་ད་ལྟའི་རྩ་བའི་གདུང་རབས་ནི། ལུང་ཕུད་ལྔ་པ་རེ་མདའ་མ་ཉི་མ་རིན་ཆེན་གྱི་སྲས་སུ་ཉི་མ་ལྕམ་གཅིག །ཀུན་དགའ་ལེགས་འབྱུང་དང་གསུམ་འཁྲུངས་པའི། ཕྱི་མ་ཡབ་ཞེ་བདུན་ས་སྤྲེལ་ལ་བལྟམས། ཉེར་དགུ་མེ་བྱིར་གཤེགས། དེའི་བཙུན་མོ་དང་པོ་གུང་ཐང་ཀུན་
སྐྱོང་མར་ལྕམ་གཅིག་འཁྲུངས། གཉིས་པ་ངམ་རིང་དགེ་འདུན་འབུམ་གྱི་སྲས་བསོད་ནམས་བློ་གྲོས་དང་། སྐུ་འབྲིང་ནི་ཆུང་ངུར་གཤེགས། གྲགས་པ་རྒྱལ་མཚན་ཏེ་རྣམ་པ་གསུམ་གྱི་ཕྱི་མ་ཡབ་གཤེགས་པའི་མེ་བྱིར་འཁྲུངས། ཞེ་གཉིས་ས་སྦྲུལ་ལ་གཤེགས། དེས་ཆོས་རྗེ། གཅེན་བྲག་ཕུག་པ། མཉམ་མེད་པ་སོགས་བསྟེན་ནས་ཞལ་སློབ་མི་གསལ་བ། དེའི་བཙུན་མོ་དང་པོ་ལྷ་རིན་མར་ཀུན་དགའ་ལེགས་པའི་བློ་གྲོས་དང་། རྣམ་སྲས་རྒྱལ་མཚན་མཆེད་གཉིས་བྱོན། གཉིས་པ་སྟག་ཚང་སྲས་འདྲེན་མར་འཇམ་དབྱངས་ཆོས་རྒྱལ་བལྟམས་པ་ལས། རྣམ་སྲས་རྒྱལ་མཚན་ཡབ་ཉེར་ལྔ་པ་ལྕགས་ཁྱིར་འཁྲུངས། ཞེ་དགུ་ས་བྱིར་གཤེགས། བླ་མ་དམ་པ་དང་། བསོད་ནམས་བློ་གྲོས་སོགས་བསྟེན། དེའི་བཙུན་མོ་དང་པོ་རྟ་ནག་གྲུ་གུར་དབང་ཀུན་དགའ་ལེགས་པའི་བློ་གྲོས་དང་། གཉིས་པ་ཡན་འབྲོག་བསོད་ནམས་འབུམ་དང་། ཡབ་བཞི་བཅུའི་ཚེ་ནམ་མཁའ་ལེགས་པ་འཁྲུངས། ཞེ་དྲུག་ཤིང་བྱིར་གཤེགས། དེས་འབྲོམ་སྟོན་སེང་གེ་བསྟེན། ཞལ་སློབ་ཀྱང་མང་དུ་ཡོད་སྙམ། སྐུ་མཆེད་དུ་གཏོགས་པའི་ལྕམ་ལྔའང་འཁྲུངས། བཙུན་མོ་དང་པོ་ཡར་འབྲོག་དཔལ་ཆེན་ལ་ལྕམ་གཉིས་དང་། གཉིས་པ་མི་ཉག་བཙུན་མ་སྐྱིད་ལ་ནམ་མཁའ་རྒྱལ་མཚན་ཡབ་སོ་བདུན་ཤིང་
ཡོས་ལོར་འཁྲུངས། ཉེར་དགུ་ཆུ་ལུག་ལོར་གཤེགས། དེའི་བླ་སློབ་མི་གསལ་ཞིང་། ལྕམ་ལྔའང་འཁྲུངས། བཙུན་མོ་དང་པོ་ཤངས་མཐོང་སྨོན་པར་ལྕམ་གཅིག །གཞོན་པར་སློབ་དཔོན་རིན་ཆེན་རྒྱལ་བ་འཁྲུངས། གསུམ་པ་རྣམ་གླིང་དཔལ་འབྱོར་བཟང་མོར་ཡབ་ཉེར་བཞི་པ་ས་སྟག་ལ་ནམ་མཁའ་བཀྲ་ཤིས་འཁྲུངས། ཞེ་དྲུག་ཆུ་ཕག་ལ་གཤེགས། དེས་སྟག་ཚང་ལོ་ཙཱ། མི་ཉག་གྲགས་རྡོར་སོགས་བསྟེན་ཅིང་ཞལ་སློབ་ཀྱང་མང་དུ་བྱོན། བཙུན་མོ་དམའ་ཟེ་ཧོར་མོ་ཚེ་བརྟན་གྱི་སྲས་སུ་ས་ལོ་ཀུན་དགའ་བསོད་ནམས། ངག་གི་དབང་ཕྱུག །འཇམ་དཔལ་གྲགས་པ། སངས་རྒྱས་ཚེ་བརྟན་ཏེ་སྐུ་མཆེད་བཞི་བྱོན། ཕྱི་མ་ཡབ་སོ་ལྔ་ཆུ་བྱིར་བལྟམས། ལྔ་བཅུ་ལྕགས་གླང་ལ་གཤེགས། དེས་མུས་ཆེན་སངས་རྒྱས་རིན་ཆེན། ས་ལོ་འཇམ་པའི་རྡོ་རྗེ་སོགས་བརྟེན་ཅིང་ཞལ་སློབ་ཀྱང་མང་དུ་བྱོན་སྙམ། ཡར་འབྲོག་བུ་འདྲེན་སྐྱིད་ཁབ་ཏུ་བཞེས། སྲས་སྐུ་མཆེད་གཉིས་བྱོན་པའི་དང་པོ་ནས་ཕྱིས་བྱོན་རྩེ་དོང་བླ་བྲང་པའི་གདུང་རབས་རྣམས་མཆེད་པ་སྟེ། དེ་ཡང་བདག་ཆེན་ཀུན་དགའ་བསམ་འགྲུབ་ཡབ་ཉེར་བཞི་ཤིང་ཕག་ལོར་འཁྲུངས། ང་བརྒྱད་ཆུ་སྤྲེལ་ལ་གཤེགས། ས་ལོ། དཀོན་ལྷུན། ཀུན་དགའ་ལེགས་གྲུབ། སྨིན་གླིང་ལོ་ཆེན་སོགས་བསྟེན། ཞལ་སློབ་ཀྱང་མང་ངོ་། །
བཙུན་མོ་བདེ་སྐྱིད་གླིང་པ་མ་གཅིག་ལ། ཡབ་སོ་ལྔ་ས་བྱར་ཀུན་དགའ་བདེ་ལེགས་བལྟམས་ཤིང་། བཞི་བཅུ་ས་བྱིར་གཤེགས། དེས་ཀུན་དགའ་ལེགས་གྲུབ། ཀུན་དགའ་རྒྱལ་མཚན། ཡབ་དཀོན་མཆོག་དཔལ་ལྡན། ཐར་པཎ། བྱམས་པ་རབ་བརྟན་སོགས་བསྟེན། ཞལ་སློབ་ཀྱང་མང་། བཙུན་མོ་རྟ་ནག་བྱ་བཟང་དཔལ་བུ་ཁྲིད་ལ། རྩེ་དོང་ཁྲི་ཆེན་བསོད་ནམས་ལྷུན་གྲུབ། ཚེ་དབང་ཧོར་སོགས་བསོད་ནམས་རྒྱལ་མཚན། འཇིག་རྟེན་རྒྱ་ཧོར་རྣམ་གསུམ་ལས། ཕྱི་མ་ཡབ་སུམ་ཅུ་ས་སྟག་ལ་བལྟམས། ཞེ་བརྒྱད་ཤིང་གླང་གཤེགས། གཅེན་བགྲེས་པ། ཐར་པཎ། བྱམས་པ་རབ་བརྟན། ཆོས་འོད་ཟེར་སོགས་བསྟེན། ཞལ་སློབ་ཁ་ཤས་བྱུང་། བཙུན་མོ་སྟག་ལུང་མ་ནོར་འཛོམས་བུ་ཁྲིད་ལ། བསོད་ནམས་བློ་གྲོས། བྱམས་པ་བསོད་ནམས་ལྷུན་གྲུབ། ངག་དབང་བསོད་ནམས་ལྷུན་གྲུབ་གསུམ་བྱོན་པའི་ཕྱི་མ་ཡབ་སོ་དྲུག་ཆུ་གླང་ལོར་འཁྲུངས། རེ་བཞི་མེ་འབྲུག་ལ་གཤེགས། དེས་གཅེན་དང་། ཨ་མེས་ཞབས་སོགས་བསྟེན། ཞལ་སློབ་ཀྱང་འགའ་ཞིག་བྱུང་། བཙུན་མོ་ཡོལ་གདོང་མ་ནོར་བུ་ཁྲིད་ལ། བསྟན་འཛིན་དབང་། བསོད་ནམས་འཕགས་པ། བསོད་ནམས་དབང་རྒྱལ་གསུམ་ལས། ཕྱི་མ་ཡབ་སོ་དྲུག་པ་ཤིང་བྱར་བལྟམས། རེ་དྲུག་
ལྕགས་སྟག་ལ་གཤེགས། དེས་གཅེན་བགྲེས་པ། ངག་དབང་བསྟན་རྡོར་སོགས་བསྟེན། ཞལ་སློབ་ཀྱང་འགའ་ཞིག་བྱུང་། བཙུན་མོ་སྟག་ལུང་མ་བཀྲ་ཤིས་ཚེ་རིང་ལ། ཀུན་དགའ་ཚེ་དབང་རིག་འཛིན་དང་། ངག་དབང་ནོར་བུ་རྒྱན་པ་གཉིས། ཡང་ཕལ་མོ་ཞིག་ལས་སྲས་གཅིག་སྟེ་གསུམ་བྱོན་པའི་ནོར་བུ་རྒྱལ་མཚན་གྱི་བཙུན་མོར་བྱ་སྒོམ་ཚེ་རིང་བུ་ཁྲིད་བཞེས་མོད། ཡབ་སྲས་དེ་རྣམས་ཀྱི་ཚརིང་གདན་ས་འཐོར་ནས་ཡུན་རིང་སོང་བས། ཕྱིས་ངག་དབང་ཀུན་དགའ་བློ་གྲོས་ཀྱིས་དགུང་ལོ་བཅོ་ལྔ་བཞེས་པའི་ཚེ་སླར་ཕྱག་ཏུ་འབྱོར་ཏེ། ཕྱིས་བྱོན་རྩེ་གདོང་བླ་བྲང་གི་གདུང་རབས་སུ་གྲགས་པ་རྣམས་སོ། ༈ །གོང་གི་ཀུན་དགའ་བསམ་འགྲུབ་ཀྱི་གཅུང་སྔགས་འཆང་ཀུན་དགའ་རིན་ཆེན་ཡབ་ཉེར་དྲུག་པ་མེ་གླང་ལོར་འཁྲུངས། རེ་བརྒྱད་ཤིང་སྤྲེལ་ལ་གཤེགས། ས་ལོ་དཀོན་ལྷུན། འཕགས་ཆེན་བཀྲ་ཤིས་དཔལ་ལྡན། སྤྱན་སྔ་ངག་དབང་ཆོས་གྲགས། རྗེ་བཙུན་སངས་རྒྱས་སེང་གེ། མཁན་ཆེན་ལེགས་པའི་བློ་གྲོས་བརྟེན་ནས་ཞལ་སློབ་དང་མཛད་པ་རྒྱ་ཆེ། བཙུན་མོ་གསུམ་གྱི་དང་པོ་ཤར་གླིང་མར་སྲས་མོ་གཉིས། གཉིས་པ་གདོང་དགའ་མར་བགྲེས་པ་བསོད་ནམས་ལེགས་འཛོམ་ལས། འཇམ་དབྱངས་བསོད་ནམས་དབང་པོ་དང་སྲས་མོ་གསུམ། གསུམ་པ་གཞོན་པ་བཀྲ་
ཤིས་དཔལ་གྱི་བུ་ཁྲིད་ལས། ཡབ་ཞེ་བདུན་པར་སྔགས་འཆང་གྲགས་པ་བློ་གྲོས་འཁྲུངས། ང་ལྔ་མེ་སྦྲུལ་ལ་གཤེགས། དེས་ཡབ་དང་། གཅེན། སྤྱན་སྔ་དཀོན་མཆོག་རྒྱལ་པོ། ཐར་པཎ་སོགས་བསྟེན། ཞལ་སློབ་ཀྱང་མང་། བྱང་བདག་ལྷ་སྲས་བསོད་ནམས་རྒྱལ་པོར། སྲས་དྲུག་བྱོན་པའི་དང་པོ་གཉིས་དང་། བཞི་པ་ཆུང་ངུ་ནས་གཤེགས། གསུམ་པ་སྒར་ཆེན་མཐུ་སྟོབས་དབང་ཕྱུག །ལྔ་པ་སྔགས་འཆང་ཀུན་དགའ་དབང་རྒྱལ་དང་། དྲུག་པ་འཇམ་མགོན་ཨ་མེས་ཞབས་ཀུན་དགའ་བསོད་ནམས་ཡབ་སོ་ལྔ་མེ་བྱ་ལོར་བལྟམས། ས་ཕག་རེ་དྲུག་ལ་གཤེགས། ཁུ་བོ་མཆེད། ཁྲི་ཆེན་བསོད་ནམས་ལྷུན་གྲུབ། གཅེན་པོ་གཉིས། གཅིག་ཆོས་མུས་ཆེན་སངས་རྒྱས་རྒྱལ་མཚན། ཐར་པཎ། མོ་པ་སྤྱན་སྔ་ཀུན་དགའ་དོན་གྲུབ། ནགས་དགོན་སྦྱིན་པ་གྲགས། འབུམ་ཆེན་ཀུན་དགའ་དཔལ། རྡོ་རྗེ་འཆང་དབང་རབ། མཁན་ཆེན་ངག་ཆོས་ལ་སོགས་བསྟེན། ཞལ་སློབ་མཐའ་ཀླས། སྐུ་མཆེད་གསུམ་ལ་སྡེ་སྲིད་ལྷན་རྩེ་མའི་ཉེ་གནས། ཚ་ཤོད་མཐོང་སྨན་བུ་སྲིང་མ་བཀྲ་ཤིས་དཔལ་གྱི་བུ་བསྐྱེད་ཅེས་བྱ་བ་ཁབ་ཏུ་བཞེས་པར་ལྕམ་གཅིག་དང་། གདུང་གཅིག་ཕེབས་པ་ཆུང་ངུ་ནས་གཤེགས། དེ་ནས་ཀོ་ཅག་འགྲོ་མགོན་འཇིགས་བྲལ་གྱི་སྲས་མོ་ཨཽ་ཌྱིན་
སྐྱབས་མ་བཞེས་པར། ཡབ་ཞེ་གཉིས་པ་ས་སྟག་ལ་འཇམ་དབྱངས་བསོད་ནམས་དབང་ཕྱུག་བལྟམས། ཞེ་བརྒྱད་ཤིང་གླང་ལ་གཤེགས། དེས་ཡབ། ངག་དབང་རྣམ་རྒྱལ། རིན་ཆེན་བསོད་ནམས་མཆོག་གྲུབ། ཀ་སྤེ་བ་བསྟན་པ་རབ་རྒྱས། བྱང་བདག་བསོད་ནམས་གྲགས་པ། ལ་རུ་བ་ངག་དབང་དཔལ་བཟང་སོགས་བསྟེན་ནས་ཉིད་ཀྱི་རིགས་སྲས་སོགས་ཞལ་སློབ་ཀྱང་མང་དུ་བསྐྲུན། མགོན་དེའི་བཙུན་མོར་བདག་ཆེན་ཤར་པ་པད་དཀར་བུ་ཁྲིད་བཞེས་པར་ཡབ་བཅུ་དགུ་མེ་སྤྲེལ་ལོར་ངག་དབང་ཀུན་དགའ་བཀྲ་ཤིས་འཁྲུངས། ང་དྲུག་ཤིང་ཡོས་ལ་གཤེགས། དེས་འཇམ་མགོན་ཨ་མེས་ཞབས། ཡབ་རྗེ། ངག་དབང་རྣམ་རྒྱལ། བསྟན་པ་རབ་རྒྱས། ལྷུན་གྲུབ་དཔལ་ལྡན། བཟང་པོ་རྒྱལ་མཚན། སངས་རྒྱས་ཕུན་ཚོགས། སྨིན་གླིང་ལོ་ཆེན། ཛ་ལུང་པ། བཅོ་བརྒྱད་ཆེན་མོ་སོགས་བསྟེན། ཞལ་སློབ་ཀྱང་མང་། དེའི་གཅུང་གཞོན་ནུ་ནས་གཤེགས། བཙུན་མོ་དང་པོ་སྣེའུ་གདོང་མ་བཀྲ་ཤིས་དབང་མོར་སྲས་མི་མངའ། ཕྱིས་བཅོ་བརྒྱད་པའི་སྲས་མོ་བསྟན་|འཛིན་བསོད་ནམས་བཟང་མོར་གདུང་གཉིས་བལྟམས་ཀྱང་ཆུང་ངུ་ནས་གཤེགས། དེས་ཡབ་རྗེ་བསོད་ནམས་རིན་ཆེན་ཡབ་ལྔ་བཅུ་བཞེས་པ་ཤིང་བྱིར་འཁྲུངས། སོ་བདུན་པ་ལྕགས་བྱར་གཤེགས།
དེས་ཡབ་རྗེ། བསྟན་འཛིན་ཕུན་ཚོགས། བཅོ་བརྒྱད་པ་མཁྱེན་བརྩེ་རབ་བརྟན། བྱམས་པ་ལྷ་དབང་རིག་འཛིན། མཆོད་དཔོན་དཀོན་མཆོག་བློ་གྲོས། སྤྲོ་ལུང་བ་མང་ཐོས་བསོད་ནམས་ཆོས་འཕེལ། གོང་དཀར་བློ་གྲོས་དབང་ཕྱུག །ངོར་ཆེན་བསོད་ནམས་བཟང་པོ། ཐར་རྩེ་རྡོ་རྗེ་འཆང་། ཐུབ་བསྟན་ཚུལ་ཁྲིམས་བཟང་པོ། ལྷ་ཁང་མཁན་པོ་དབང་ཕྱུག་ཕུན་ཚོགས། ཛ་ལུང་པ་ཕྲིན་ལས་རྡོ་རྗེ་སོགས་བསྟེན། ཞལ་སློབ་ཀྱང་མང་། ཐར་རྩེ་རྗེ། གནས་གསར་རྗེ། བྲག་རྩ་རྗེ། ཀུན་བློ་སྐུ་མཆེད་སོགས་བསྟན་འཛིན་མང་དུ་བསྐྲུན། དེ་ལ་བཙུན་མོ་དང་པོ་བཞད་ཆོས་མའི་སྲས་གཉིས་ཆུང་ངུ་ནས་གཤེགས། ཕྱི་མ་འགྲོ་མགོན་མ་བསོད་ནམས་དཔལ་གྱི་དབང་མོ་དེ་ཉིད་ནི་ལང་གྲོ་དཀོན་མཆོག་འབྱུང་གནས་ཀྱི་རྒྱུད་ཀོ་ཅག་སྔགས་པ་འགྲོ་མགོན་པའི་སྲས་མོ་སྟེ། དེ་ལ་སྲས་མོ་བཞི་དང་རྒྱུད་གསུམ་སྟེ་བདུན་བྱོན་པ་ལས། དྲུག་པའི་བཙུན་མོར་སྒེར་མ་བཀྲ་ཤིས་དབྱངས་ཅན་ལས་ད་ལྟའི་རྗེ་བཙུན་གྲུང་འདི་ཉིད་དང་། གསུམ་པ་ནི་ས་ཆེན་ཀུན་དགའ་བློ་གྲོས་ཡབ་ཉེར་ལྔ་ས་བྱར་འཁྲུངས། ང་ལྔ་ཆུ་ཡོས་ལ་གཤེགས། དེའི་བཙུན་མོ་དང་པོ་རུ་ཐོག་ཚེས་ལུང་རྒྱལ་མོའི་སྲས་མོ་ཕུན་ཚོགས་ཚེ་རིང་མར་ལྕམ་གཅིག་དང་། གཉིས་པ་སྐལ་བཟང་བདེ་སྐྱིད་བུ་ཁྲིད་ལས།
ཡབ་སོ་ལྔ་པ་ཆུ་ལུག་ལོར་དབང་སྡུད་སྙིང་པོ་དང་། སོ་བརྒྱད་མེ་ཁྱི་ལོར་ཀུན་དགའ་ཕན་བདེ་རྒྱ་མཚོ་སྐུ་མཆེད་གཉིས་འཁྲུངས་སོ། །སརྦ་མངྒ་ལཾ།། ༈ །།སྤྱིར་ལོ་མགོ་འཛིན་ཚུལ་ལ། དུས་འཁོར་དང་གསེར་འོད་སོགས་ནས་ཡར་ངོ་སྔོན་འགྲོའི་ནག་ཟླ་ལུག་ཁྱིམ་དང་། མཆིམས་སོགས་འདུལ་འཛིན་སྔོན་མ་རྣམས་ཁྲུམས་ཟླའི་ཚེས་བཅུ་དྲུག་ནས་དང་། ཤཱཀྱ་ཤྲཱི་སོགས་འདུལ་འཛིན། ཁ་ཅིག་ཐ་སྐར་ཟླ་བའི་ཚེས་བཅུ་དྲུག་ནས་དང་། འདུལ་འཛིན་ཕྱི་མ་རྣམས་སྨིན་ཟླའི་ཚེས་བཅུ་དྲུག་དང་། ཁྱུང་དང་ཕུག་ལུགས་སོགས་ནག་རྩིས་པ་དང་། འཇིག་རྟེན་པ་ཡོངས་གྲགས་མགོ་ཟླའི་ཚེས་གཅིག་ནས་དང་། བོད་རྒྱལ་པོའི་རྗེས་འབྲངས་རྣམས། རྡོ་རྗེ་མཁའ་འགྲོའི་རྒྱུད་ལས། དགུན་ཟླ་འབྲིང་པོ་ནས་བརྩམས་ནས། །ཉི་མ་བྱང་དུ་བགྲོད་པའི་དུས། །ཟླ་བ་རྣམ་པ་བཅུ་གཉིས་ནི། །རིམ་ནི་རིམ་པ་བཞིན་དུ་བཞག །ཅེས་གསུངས་པ་དང་བསྟུན་དགུན་ཟླ་འབྲིང་པོ་རྒྱལ་ཟླ་དང་། ནག་རྩིས་པ་ཁ་ཅིག་ཀྱང་དེ་བཞིན། ཧོར་ལུགས་དང་ནག་རྩིས་པ་ཁ་ཅིག་གསོ་དཔྱད་པ་རྣམས་རྟ་ཟླ་ནས་དང་། མདོ་ལུགས་པ་ཁ་ཅིག་དབོ་ཟླ་ནས་ལོ་མགོ་འཛིན་པ་སོགས་རྣམ་གྲངས་མང་ཡང་། རང་ལུགས་བོད་རྒྱལ་པོའི་རྗེས་སུ་འབྲངས་ཏེ་རྒྱལ་ཟླ་ནས་འཛིན་པ་ལགས།། །།༅། །འཇམ་དཔལ་རྩ་
རྒྱུད་ཀྱི་ལེའུ་ཐ་མ་ལས་འཕགས་ཡུལ་དང་། བོད་དང་། རྒྱ་ནག་སོགས་ཀྱི་རྒྱལ་པོ་ཤིན་ཏུ་མང་བ་ལུང་བསྟན། དེ་དག་གི་བར་བར་དུ་ཀླུ་སྒྲུབ། ཐོགས་མེད། དཔའ་བོ། ཆོས་གྲགས་པ། ཀུན་སྙིང་སོགས་ལུང་བསྟན་པར་སྣང་ངོ་།། ༈ །།རྗེ་བཙུན་གྲགས་པའི་སློབ་མ་གྲགས་པའི་མཐའ་ཅན་བཞི་ནི། གསལ་བ་དབང་ཕྱུག་གྲགས། ནུབ་པ་རིག་འཛིན་གྲགས། དཀར་ཤཱཀྱ་གྲགས། བནྡེ་གཤིན་རྗེ་གྲགས་རྣམས་སོ། །ཆོས་དྲུག་ལུགས་གསུམ་ནི། མེས་ཚོན་པོ། རྨོག་ལྕོག་པ། གཙང་གཞེར་ནས་བརྒྱུད་པ་གསུམ་མོ། ༈ །གྲོལ་མཆོག་ནི། གློ་བོ་མ་ཐང་དུ་གཉགས་སྟོན་ཤཱཀྱ་མུ་ནེའི་རིགས་ལས་འཁྲུངས། དགུང་ལོ་གསུམ་པར་དྲུང་ཆོས་རྗེར་སྐྱབས་སྡོམ་དང་། ཕྱི་ལོ་དགེ་བསྙེན་བཞེས། སྐབས་དེར་མདོ་སྡེ་དང་སྐྱེས་རབས་ཀློག་པས་ཕལ་ཆེར་ཐུགས་སུ་ཆུད། བདུན་པར་དྲུང་ཆོས་རྗེར་གཤེད་དམར་ལྷ་ལྔའི་དབང་གསན། གསང་མཚན་ཞེ་སྡང་རྣམ་པར་དག་པའི་རྡོ་རྗེར་གསོལ། ཞེན་པ་བཞི་བྲལ་གྱི་ཉམས་ཁྲིད་གསན་པས་ཉམས་རྟོགས་ཁྱད་པར་ཅན་འཁྲུངས། གཞུང་ཆེན་རྣམས་ཐུགས་ལ་བཟུང་། བཅུ་པར་དྲུང་ལས་དགེ་ཚུལ་བཞེས། དབང་ལུང་མང་དུ་གསན། དེ་ནས་གསེར་མདོག་ཅན་དུ་ཕེབས། དྲུང་རིན་པོ་ཆེ་ཨ་མོ་གྷ་སིདྡྷཱ་ར་མཚན་ཉིད་
དང་། ཡོངས་འཛིན་དུ་མར་སྔགས་ཕྱོགས་རྒྱ་ཆེར་གསན་པས་མཁས་གྲུབ་ཆེན་པོར་གྱུར། ངོར་ཨེ་ཝཾ་དུ་བསྙེན་པར་རྫོགས། དབང་བརྒྱ། ཁྲིད་བརྒྱ། མགོན་བརྒྱ་སོགས་དམ་པའི་ཆོས་རྒྱ་མཚོ་ལྟ་བུ་འཆད་ཉན་མཛད། མི་ཆེན་ཐམས་ཅད་ཀྱིས་བླ་མར་བཀུར་བས་ཕྲིན་ལས་ཆེ། རྒྱས་པར་རྗེ་ཉིད་ཀྱིས་མཛད་པའི་རྣམ་ཐར་སྐལ་བཟང་དད་པའི་ཤིང་རྟ་འདྲེན་བྱེད་དུ་གསལ། དེ་སྐྱེ་བ་ཕྱི་མར། རྒྱ་གར་ག་ཡ་ཞེས་པའི་གྲོང་ཁྱེར་དུ་དགའ་བྱེད་ས་སྐྱོང་དང་། དེའི་ཕྱི་མ་ཐམས་ཅད་མཁྱེན་པ་ཏ་ར་ནཱ་ཐ་སྟེ། རྗེ་འདི་ཡུལ་དབུས་འབྲང་ཞེས་བྱ་བའི་གྲོང་དུ་ཆོས་འཁོར་སྙིང་པོ་ཞེས་བྱ་བར་ཤིང་ཕག་ལོར་འཁྲུངས། རྗེ་ཉིད་ཀྱི་མེས་པོ་དང་། སྟག་ལུང་རིན་པོ་ཆེ། རྡོ་རིང་དབོན་པོ་ཀུན་དགའ་རྒྱལ་མཚན། བྲག་སྟོད་པ་ལྷ་དབང་གྲགས་པ། ཇོ་ནང་པ་སྤྲུལ་སྐུ་བྱམས་པའི་མཚན་ཅན་སོགས་མཁས་གྲུབ་ཀྱི་བླ་མ་མང་དུ་བསྟེན། དམ་པའི་ཆོས་རྒྱ་མཚོ་ལྟ་བུ་གསན། རྒྱ་གར་གྱི་པཎྜི་ཏ་འགའ་དང་། ཁྱད་པར་གྲུབ་ཆེན་སངས་རྒྱས་སྦས་པ་སོགས་ལས་ཀྱང་ཟབ་ཆོས་བཞེས་ཤིང་ལོ་ཙཱ་ཡང་མཛད། མེ་ཡོས་ལོར་རྟག་བརྟན་ཕུན་ཚོགས་གླིང་བཏབ། ལེགས་བཤད་མཆོག་ཏུ་ཆེ་བའི་བཀའ་འབུམ་པོད་བཅུ་དྲུག་ཙམ་སྤར་ལ་བཞུགས། རྒྱས་པར་རྗེ་རང་གིས་མཛད་པའི་རྣམ་ཐར་དུ་གསལ། དེའི་སྐུ་སྐྱེ་ནི་
ཁལ་ཁ་རྗེ་བཙུན་དམ་པ་བློ་བཟང་བསྟན་པའི་རྒྱལ་མཚན་ནོ།། ༈ །།མཆོག་ཟུང་གི་རྗེས་སུ་འབྲངས་ནས། ཀོ་ཀི་ཡི་ཀ་གཉིད་སད་དེ་བདས་ཀྱང་རྫུ་འཕྲུལ་གྱིས་ལམ་འགགས་ཏེ་མ་ཟིན། །དེར་སྟོན་པས་རྟེན་འབྲེལ་ལུགས་འབྱུང་ལུགས་ལྡོག་བཤད་པས་རྒྱུན་ཞུགས་དགྲ་བཅོམ་པའི་བར་དུ་བསྟོད། རྒྱལ་བྱེད་ཀྱི་ཚལ་དུ་དབྱེན་འདུམས་ཀྱི་མཆོད་རྟེན་ཡང་བརྩིགས་སོ། ༈ །མྱ་ངན་ལས་འདས་ཀར་དགེ་སློང་རྣམས་ལ་འདུ་ཤེས་བཅུ་པའི་མདོ་གསུང་གི་ཐ་མར་བསྟན། ༈ །འཇམ་དཔལ་རྩ་རྒྱུད་ལས། དེ་འོག་རྭ་ལ་དེ་འོག་བསྒྲེངས། །ཞེས་སོ། ༈ །རྒྱལ་མེ་ཏོག་ཐང་ནི་འོལ་དྭགས་མཚམས་སུ་རྗེ་དགེ་འདུན་རྒྱ་མཚོས་བཏབ། ༈ །སློབ་དཔོན་མཚན་བརྒྱད་ཀྱི་རྣམ་༢༡༢ཐར་མཚམས་ཉུང་བསྡུས་ཤིག་ཡོད། ༈ །ལྡེབ་ལ་༢༠༤རྙིང་མའི་བསྟན་བཅོས་ཡོད་ཚུལ་མང་དུ་སྣང་། ༈ །དགོངས་པ་ཡང་ཟབ་ལས། ཀྲོ་ཏ་ལོ་ཀོཏྟ་ར་ཞེས༔ ཁྲོ་བོ་འཇིག་རྟེན་འདས་པར་འགྱུར༔ ནོར་བུའི་བང་མཛོད་ལས། ང་ཡི་གསུང་གི་གདུལ་བྱ་ཡིསཿ བོད་ལ་བདེ་སྐྱིད་འབྱུང་འདོད་ན༔ ཡར་ངོའི་ཚེས་བཅུ་ནམ་ཤར་ཚེ༔ ཨོ་རྒྱན་པདྨའི་སྤྲུལ་པ་འབྱུང་༔ ཞེས་དང་། རཏྣ་གླིང་པའི་གཏེར་བྱོན་ཡང་སྙིང་འདུས་པའི་བསྐུལ་བྱང་ལས། ང་ཉིད་སྲིན་ཡུལ་འགྲོ་བའི་ཚེ༔ བོད་ཀྱི་རྒྱལ་པོའི་སྔགས་སློབ་
ལ༔ འབྱུང་ངོ་ཅོག་གི་ཚེས་བཅུ་ལ༔ ང་ཉིད་འབྱོན་པའི་དབུ་བསྙུངས་བཞེས༔ པདྨ་འབྱུང་གནས་གཞན་མི་བསླཐེ་ཚོམ་སྤོངས་ཤིག་རྗེས་འཇུག་རྣམས༔ ལས་སུ་རུང་བའི་བློ་ཡོད་ན༔ འདི་ལྟར་ང་ཡི་ཚེས་བཅུ་ལཿ བརྩོན་ཅིང་གསོལ་བ་འདེབས་པའི་བུ༔ འཁོར་བར་ལྷུང་ན་ངས་ཤེས་ཀྱི༔ བློ་སྙིང་བྲང་གསུམ་ང་ལ་གཏོད༔ ཅེས་སོ། །དེ་ཡང་སྟག་ཟླ་ཕྱག་རྒྱ་ཆེན་པོ་དང་ལྷུན་གྲུབ། སྦྲུལ་ཟླར་ཚེ། སྤྲེལ་ལ་ལྷུན་གྲུབ། ཕག་ལ་རྣམ་སྨིན་རིག་འཛིན་ཐོབ། ཡོས་ལ་ཞི། རྟ་ལ་རྒྱས། བྱར་དབང་། བྱི་བར་དྲག་པོ་འགྲུབ། འབྲུག་གིས་ལུས་ཀྱི་ནད་གདོན་ཞི། ལུག་གིས་ཚེ་བསོད་བུ་ནོར་འཕེལ། ཁྱིར་གང་འདོད་འགྲུབ། གླང་ལ་མི་མཐུན་ཕྱོགས་དང་དགྲ་བགེགས་ཞི་བར་གསུངས། དེ་ཡང་བདེ་མཆོག་རྩ་རྒྱུད་ལས༢༧། དེ་ལྟར་རྟག་ཏུ་མཆོད་བྱས་ནས། །གུས་པའི་ཡིད་ཀྱིས་གཏོར་མ་བྱིན། །རང་འདོད་ལས་ལ་རྣལ་འབྱོར་པས། །ཆོ་ག་ཇི་བཞིན་སྦྱིན་བར་བྱ། །མར་གྱི་ངོ་ཡི་ཚེས་བཅུ་དང་། །ཟླ་བ་ཡར་ངོ་གང་རུང་ལ། །ཞེས་དང་། ཡང་ཐོག་མར་མཁའ་འགྲོ་རྒྱ་མཚོ་སོགས་ཀྱི་ལོ་མགོ་དང་སྦྱར་ཏེ་རྒྱལ་ཟླ་ངོས་བཟུང་དགོས་པར། ཀུན་སྤྱོད་ལས། དགུན་ཟླ་འབྲིང་པོ་ལ་སོགས་ཀྱི། །བཅུ་པ་ལ་ནི་གུས་པས་མཆོད། །ཅེས་དང་། སྤྱིར་གཏོར་ཚོགས་གསོག་པར་འདོད་ན་
ཡར་ངོ་དང་། སྡིག་པ་ཞི་བར་འདོད་ན་མར་ངོའི་བཅུ་སོགས་སུ་མཆོད་པ་འབད་པར་བཤད། ༈ །རྒྱལ་དབང་ལྔ་པ་རིན་པོ་ཆེའི་རྣམ་ཐར་དུ་ཀུ་ལའི་གོས་བཟང་༣༦༤། ཀ་པ་འབྲི་གུང་སྒམ་པ་ཤཱཀ་རིན་གྱིས། གདན་ས་དཔལ་གྱི་ཕག་གྲུ་དེ། །ཆུ་མིག་བརྒྱ་རྩའི་མགོ་བོ་ཡིན། །ཅེས་དྲངས། རི་བོ་བདེ་ཆེན་ཧོར་རྡོ་རྗེ་ཚེ་བརྟན་སྐྱིད་པ་དཔལ་བཟང་པོས་བཏབ་པར་གྲགས། དེའི་བསྟན་འགྱུར་གྱི་ཁྲོད་དུ་ཞྭ་ལུས་བསྒྱུར་བའི་མཛོད་འགྲེལ་གནམ་ལྕགས་ཐོག་གཟེར་ཀྱང་ཡོད། ༈ །ཐོག་མར་ཚིག་བཀྲ་ལེགས་ཁྱད་ཀྱིས། གང་ཟག་ཡིན་ན་ལྷ་མ་ཡིན་པ་བུད་ཟེར་ན། སྟོན་པ་ཤཱཀྱ་ཐུབ་པ་ཆོས་ཅན་སོགས་སོ། ༈ །རྭ་བསྒྲེངས་ནང་རྟེན་གྲས། ཇོ་བོ་འཇམ་རྡོར། གདུང་རྟེན་དངུལ་གདུགས་མ། དབུ་ཡོན་མ་ཆེ་ཆུང་སོགས་སོ། །འབྲོམ་སྟོན་ཆོས་ཁྲི། ༈ །པཎ་ཆེན་བསོད་ནམས་གྲགས་པའི་རྒྱུད་སྡེ་སྤྱི་རྣམ། ༈ །འབྲས་སྤུངས་སུ། ཕ་ཝང་ཁ་པའི་སྙན་བརྒྱུད་ལྟ་བ་སྤྱི་ཁྱབ། སྐྱབས་འགྲོའི་རྣམ་བཤད། བདེ་སྨོན་ཁྲི་ཀ་སོགས། དཔང་ལོའི་ཚོགས་གསུམ་གསལ་བ། ༈ །རྩེ་དང་ལྔ་མཆོད་པར་གསེར་གླིང་པའི་ཐུགས་དམ་རྟེན་ཐུབ་པ་གསེར་གླིང་མ་སོགས། ༈ །བསམ་གཏན་གླིང་ནི་བླ་མ་དམ་པ་བསོད་ནམས་རྒྱལ་མཚན་དང་། ཡར་ཀླུང་པ་སེང་གེ་རྒྱལ་མཚན་ཁུ་དབོན་
གྱིས་བྱིན་གྱིས་བརླབས་པའི་གནས་ཁྱད་པར་འཕགས་པ་ཡིན། སྙེ་ཐང་དུ་ཤཱཀྱ་ཤྲཱིའི་ཐུགས་དམ་རྟེན་སྒྲོལ་མ་རྫ་སྐུ། བཀྲ་ཤིས་རྡོ་ཁམ། ༈ །རྒྱ་ནག་ཏུ་ཕེབས་སྐབས་རྒྱལ་པོ་དགུང་ལོ་༡༧པའང་ཟིལ་ཤིན་ཏུ་ཆེ་བར་སྣང་གསུངས། རིན་སྤུངས་དང་ཉ་བར་ཆོས་ལུང་ཚོགས་པར་ནང་རྟེན། རྣམ་སྲས་ལྗང་ཡུལ་མ་གཏེར་བྱོན་འཁྲུལ་མེད། ཤཱ་རིའི་བུའི་ཚེམས། རྫ་སྐུ་གཉིས། ཀླུ་སྒྲུབ་ཀྱི་ཕྱག་བཟོ་ཤིང་ཤ་པ་ལའི་སྤྱན་རས་གཟིགས། པཎ་ཆེན་གྱི་སྣམ་སྦྱར། ཇོ་བོའི་རྒྱ་དཔེ་སོགས་མང་པོ་ཡོད། ཐར་པ་ལ་ནཱ་རོའི་ཐུགས་དམ་རྟེན་ཀྱེ་རྡོར་བྲིས་ཐང་། ཁ་ཆེ་པཎ་ཆེན་དང་དཔྱལ་ལོའི་ལྷུང་བཟེད། པཎ་ཆེན་མཁར་གསིལ། དུང་རང་སྐད་མ་རྒྱ་དཔེ་སོགས་ཡོད། ༈ །ཞྭ་ལུ་རི་སྦུག་ཏུ་བིརླ་པའི་བུམ་པར་བུ་སྟོན་གྱིས་རྒྱུད་སྡེ་བཞིའི་དབང་གི་ཆུ་བོ་རྣམས་གཅིག་ཏུ་བསྡུས་པའི་རྒྱུན་ཉམས་མེད། བུའི་བྲོ་གཞུ། རྡོར་དྲིལ། རྒྱ་དཔེ། བསིལ་བྱེད་སོགས་ཡོད། ༈ །སྒམ་པོ་སྤྲུལ་སྐུ་བློ་བཟང་ཕྲིན་ལས་རྣམ་རྒྱལ་ངེས་དོན་གྲུབ་པའི་ཤིང་རྟ་གཏེར་རྫུན་ཡིན་ཚུལ་ཞིབ་པར་འདུག ༈ །སྐྱིད་གྲོང་གི་ཇོ་བོ་འཕགས་པ་ཝ་ཏི་བལ་བོད་ཀྱི་བདེ་གཟར་ལ་བརྟེན་ནས་དབུས་ཕྱོགས་སུ་ཕེབས་རྩེར་བཞུགས། དེ་དང་དུས་མཚུངས་སུ་སྨིན་གཏེར་གཙུག་ཕུད་བཞེས་ཚུལ་འདུག ༈ །གཟིམས་
འབྲས་སྤུངས་ཁང་གོང་སྤྲུལ་སྐུ་འདའ་ཀར་ཐུགས་འཁྲུལ་ཚུལ་འདུག །ལྡེབ་༢༥༩གཏེར་སྟོན་བདུད་འདུལ་རྡོ་རྗེ་ཟོག་པོ་གཏེར་རྫུན་མཁན་དུ་ངེས་ཤེས་གཏིང་ནས་འདྲོང་ཚུལ་གྱི་རྒྱུ་མཚན་གཏེར་ཆོས་སྤྲུལ་སྐུ་སྙིང་ཐིག་ཏུ་དགེ་ལུགས་སྨད་ཅིང་། ཚེ་ཡང་ཕུར་གསུམ་དུ་བསྔགས་བརྗོད་སོགས་ནང་འགལ་དུ་མ་འདུག་ཚུལ་གསུངས། ༈ །བྱམས་པ་ཆོས་འཁོར་མ་ཆོས་རྒྱལ་ཀྲི་ཀའི་མཆོད་རྟེན་ཡིན་ཚུལ། ༈ །གྲ་ནང་རྒྱལ་གླིང་ཚོགས། མཁར་ཆུ་དུར་ཁྲོད་ལ་ཁ། ༈ །མདོ་སྡུད་བྱམས་ཆོས་བཞི་སྐད་གཉིས་ཤན་སྦྱར། གསོ་དཔྱད་གཅེས་བསྡུས་རིན་ཆེན་ཕྲེང་བ། མཁྱེན་བརྩེ་ལོ་ཙཱ་བའི་སྡེ་ཚན་བདུན་པ། ༈ །ཁྲི་སྲོང་ལྡེ་བཙན་དུས། རབ་བྱུང་ངུར་སྨྲིག་དབུ་ཟླུམ་དང་། །སྔགས་པ་གོས་དཀར་ལྕང་ལོ་ཅན། །ཅེས་གསུངས། ༈ །མཆིམས་ཕུ་དགེའུ་ཕུག་ཏུ་འདྲ་སྐུ་གདན་དྲངས་ཚེ་ངོ་མཚར་ཁྱད་འཕགས་བྱུང་ཚུལ་སྣང་། ༈ །བདུད་འདུལ་བ་བསམ་ཡས་ཆོས་སྐྱོང་གིས་བསྐུལ་ནས་ལན་གསུམ་དུ་གདན་དྲངས་ཀྱང་མ་འདྲོངས་པའི་ཚུལ་སྣང་། ༈ །རྒྱུད་འབུམ་ལུང་རྒྱུན་ངོར་ལུགས་[ཁུངས་བཙུན་པར་གསུངས། ༈ །ཁ་པར། འཕན་༢༨༠གདའ་དཔལ་ལྡན་རྩེ་དང་། རྩེ་དྭང་བསམ་གཏན་གླིང་གཉིས་སྲུང་མ་རང་བཞིན་འདུ་བའི་གནས་ཀྱི་མཆོག་ཏུ་བསྔགས། ༈ །རྡོར་བྲག་པད་
ཕྲིན་ལ་བསམ་གཏན་གླིང་པའི་ཨ་ཏི། ཉང་གི་རྣམ་ཐར་ཟངས་གླིང་མ། གཏེར་ཁ་འོག་མའི་མཛད་པ་བཅུ་གཅིག་སོགས་ཕུལ་རབ་སྣང་། ༈ །ཚེས་བཅུ་བཞི་ལ་འབྲུག་པའི་སློབ་དཔོན་བླ་མ་ལ་སྔོན་པ། ཁམས་སྡེ་དགེའི་བླ་མ་དཔོན་ཕུན་ཚོགས་གཉིས་འཇིག་རྟེན་ཕ་རོལ་གྱི་ལྟད་མོར་སོང་བ་ལ་གཏོང་རག་གཏོང་ཚུལ་སོགས་སྣང་། ༈ །དཔལ་ལྡན་ཤ་བ་རི་དབང་ཕྱུག །དྲང་སྲོང་རིག་པའི་བློ་གྲོས། གྲུབ་ཐོབ་བཱ་ལི་པ་གསུམ་དངུལ་ཆུའི་འཇའ་ལུས་འགྲུབ་ནས་ད་ལྟའང་བྲི་པར་པ་ཏར་ཡོད། བོད་དུ་གྲུབ་ཆེན་ཨོ་ཌི་པས་འགྱུར། ༈ ༼ཁ༽ འབྲས་སྤུངས་སུ་སྒྲོལ་ཆེན་བསམ་འགྲུབ་རྡོ་རྗེའི་གསུང་རྒྱུན་སྔགས་འཆང་ནམ་མཁའ་རིན་ཆེན་གྱིས་བྲིས་པའི་གསང་སྙིང་འགྲེལ་པ། ཁོག་ཕུབ་སྒྲོལ་ཆེན་ཉིད་ཀྱིས་མཛད་པ། སྨན་ལུང་པ་མི་བསྐྱོད་རྡོ་རྗེས་མཛད་པའི་འགྲེལ་པ། སྤྱི་དོན། ཆོས་ཚོམས་བསྡུས་དོན་སོགས་མ་མཉེས་ཚུལ། ༈ །གསང་འདུས་ལས་བྱང་རྩ་གསུམ་དགྱེས་པའི་རོལ་གར། རྒྱལ་སྲས་བསྟན་པའི་ཉི་མའི་ངོར་སོ་ཐར་སྡོམ་རྒྱུན་གསོལ་འདེབས་བརྩམས། ༈ །གཡུང་ཊི་ཀ་པར་མཉེས་༩༩ཚུལ་སྣང་། ༈ །གཙང་ཆུང་ཆོས་གྲགས་བཟང་སྤྱོད་ཊཱི་ཀ་སྤར་ཡོད། འབྲུམ་པས་བསྙུན་ཚེ་མཚན་མོ་ཚད་འཁྲུལ་བྱུང་རབ་འདུག ༈ །སྟག་ལུང་སངས་རྒྱས་དབོན་གྱིས། རྒྱ་
བོ་གདོང་ནས་གཏེར་བཞེས་ཚུལ་ཡོད། ༈ །ཨའི་བསྙེན་ཚད་མ་སོང་ན་སློབ་བཤད་མི་བཤད་ཚུལ་འདུག ༈ །ཕུར་པ་ལྷ་ཁྲལ་ས་ལོའི་ཀྱེ་རྡོར་གྱི་འབྱིན་འཇུག་བྱས་པ་ཁུངས་མེད་ཚུལ། ༈ །སྟོང་འཁོར་ཞབས་དྲུང་ཡོན་ཏན་རྒྱ་མཚོ་སེ་རར་ཐུགས་གཉེར་མཛད་སྐབས་གྲྭ་པ་ཁ་བརྒྱག་ཞིག་གིས། བདག་མེད་ཡིན་ན་ཡོད་པས་ཁྱབ་པའི་སྐུ། །དེ་ལ་སྐྱོན་ནི་གཏོང་མཁན་མེད་པའི་ཟླགསུང་། །བཏང་ན་གར་འགྲོ་འདིར་འགྲོ་མེད་པའི་ཐུགས། །ཁ་བཏགས་རྒྱ་མཚོའི་མགོན་ལ་གསོལ་བ་འདེབས། །རིན་ཆེན་རིལ་བུ་རིགས་སྔ་ཕྱི་གསུམ་ཙམ་སྦྱོར་ཚུལ་འདུག ༈ །རིམ་གྲོ་གང་བ ལའང་མི་བསླུ་བའི་འབྲས་བུ་འབྱུང་བ་གཞིར་བཅས་ཀྱང་ཚེ་རབས་སྔོན་མ་མང་པོར་གཞན་གྱི་ཡན་ལག་བཅད་པས་མཚོན་ལས་ཚབ་པོ་ཆེ་བསགས་ཚད་ནས་སྨན་བླ་བཟང་སྤྱོད་སོགས་སྡིག་བཤགས་ཀྱི་རིགས་རྣམས་འཕྲོད་ངོ་ཆེ་བ་ཞིག་སྣང་། གངས་དཀར་ཆོས་སྡེར་ཡང་དག་གི་སྒྲུབ་མཆོད་འཛུགས་སྐབས། དཔལ་ལྡན་བླ་མའི་ཕུར་པའི་མངོན་དཀྱིལ་རྙིང་མ་བཀའ་མའི་དགོངས་དོན་འཁྲུལ་མེད་ལ་སོགས་གཤིས་ལྷ་ཁ་སྤོས་ཀྱང་བཏུབ་ཙམ་ཡོད་མོད། བདག་པོ་ཀུན་རིན་པས་མཛད་པ་ཞིག་སྣང་བ་ནི་འཁྲུལ་པས། གསར་དུ་ཕྲིན་ལས་རྒྱུད་དོན་སྣང་བ་དང་། དཀྱིལ་ཆོག་ཧཱུྃ་མཛད་ཞལ་ལུང་གཉིས་
མཛད་ཚུལ་སྣང་། ༈ །སྟག་ཚང་ལོ་ཙཱ་བའི་སྨན་བླའི་མདོ་ཆོག་རྒྱང་ངོས་ཀྱི་བསྔགས་བརྗོད་གནང་འདུག །ལམ་གྱི་གཙོ་བོ་རྣམ་གསུམ་གྱི་འགྲེལ་པ་ལུང་རིག་གཏེར་མཛོད་ཅེས་ཁྱད་འཕགས་ཤིག་མཛད་ཚུལ་འདུག ༈ །ཛ་བྷིར་གྱི་གཏུམ་མོ་ཉམས་སུ་བཞེས་པའི་བསྔགས་བརྗོད་མང་། །བདག་པོ་ཀུན་རིན་པས་ཚར་ཆེན་བཀྲོངས་རྩིས་ཀྱི་དམག་དྲངས་པའི་སེལ་ད་དུང་ཡོད་ཚུལ་འདུག ༈ ༈དོལ་ཆུ་མིག་དཀར་མོར་སྨོན་ལམ་ལོག་པའི་དམ་སྲི་མཐུ་རྩལ་ཅན་ཞིག་བྱུང་༢༥༧བ་ལ་གསར་རྙིང་འདྲེ་ཐོགས་པའི་སྔགས་འཆང་མང་པོས་དུས་གཅིག་ཏུ་བསྲེག་ཚུལ་ཞིབ་པར་ཡོད། མངའ་རིས་ཟླ་བ་རྒྱལ་མཚན་གྱིས་ཐུགས་རྗེ་ཆེན་པོ་རྩ་གསུམ་སྙིང་ཏིག་སོགས་བསྐུར་བར། དུས་གང་གིས་མི་རྣམས་གཡོ་སྒྱུ་ཆེ་བས་ཚིག་གི་སྦྱོར་སྡེ་ཙམ་ལ་ཡིད་བརྟན་མི་འདུག་གཤིས་གཏེར་སྐུ་འགངས་ཅན་རྣམས་ཀྱི་དྲུང་དུ་བརྟག་པ་ཕུལ་བ་ལེགས་ཕྱོགས་བབས་པས་ཁོང་རང་ལ་འཕྲོད་ལན་དང་གླང་བུ་མཁར་དུ་མི་ཆེད་གཉེར་གཏོང་བའི་འགྲོ་དོན་ཕྲིན་ལས་ཆུ་འབབས་སུ་སྐྱོངས་འཇུག་པའི་བསླབ་སྟོན་བྱས། ༈ །༢༤༦ག་པར། ཚད་མ་ལར་སྟོད་ལུགས་ཀྱི་ཊི་ཀྲ་ས་བཅད་ཐར་ལམ་གསལ་བྱེད་དང་། འབྲུ་བསྣོན་གྲྭ་ཊིཀ །དབུ་ཕར་གཉིས་ཀྱི་དོགས་གཅོད་རྣམ་བཤད་དགོངས་པ་རབ་གསལ་དང་
སྙིང་པོ་རྒྱན། མཛོད་ཀྱི་དོགས་གཅོད་གཞུང་བརྒྱ་པ་དངོས་གྲུབ་དཔལ་འབར་གྱི་ཡིག་ཆ། འདུལ་བ་ལུང་རིག་གཏེར་མཛོད། སྔོན་རྒྱ་ནག་རྒྱལ་པོས་ཡོང་འདུས་ཐང་ཀ་ཞིག་བྲིས། དེ་ལ་རྒྱས་བཏབ་ནས་འདིའི་རྒྱ་སུས་བཤིགས་པའི་དུས་རྒྱལ་ས་འཆོར་བས་མ་བཤིག་ཅེས་པའི་ཁ་ཆེམས་བཞག་པར་བརྟེན་མི་རབས་བདུན་ཙམ་གྱི་བར་བཤིགས་མཁན་མ་བྱུང་ཡང་ཁྲུང་ཅི་རྒྱལ་པོས་བཤིགས་པས་ཐང་ཀར་མན་ཇུའི་མི་ལ་རྒྱ་ནག་གི་ཟས་འབྲེལ་ཅིང་འདུད་པའི་ཚུལ་འདུག་པ་དེ་འདྲའི་རྟེན་འབྲེལ་གྱིས་རྒྱལ་སའང་ཤོར་ཚུལ་སོགས་གླེངས། ༈ །རྗེ་བཙུན་བཀའ་འགྱུར་བའི་རྣམ་ཐར་དད་པའི་རླབས་ཕྲེང་ཚིག་དོན་གཉིས་ཀ་ལེགས་པོ་ཡོད་ཚུལ་གསུངས། ༈ །གཙང་སྟོད་དར་མགོན་གྱི་བརྒྱུད་པ་དགེ་སློང་ཞབས་ཕན་ལྷུན་གྲུབ་ཟེར་བ་གསོ་རིག་གི་སྦྱངས་སྟོབས་དང་ཐོས་རྒྱ་ཆེ་བ་ཞིག་བྱུང་བར་བསྟན་རྒྱུན་ལ་བསམས་ནས་དཔོན་ཚང་བྱང་ངོས་སྨན་རྒྱལ་ཚེ་དབང་དང་དཔོན་ཚང་དཀྱིས་སྤ་བ། ཆོས་རྗེ་ན་བཟའ་གླིང་པ། དྲུང་མཚོ་ལྷག་བསམ། དར་མོ་སྨན་རམ་པ། སློབ་མ་དང་སྤྱབཅས་པ་སུམ་ཅུ་སྐོར་ལ་ཡན་ལག་བརྒྱད་པའི་སྙིང་པོ་བསྡུས་པ། ཟིན་ཏིག་གཅེས་བཏུས། གསེར་བྲེ། བྱང་པ་རིགས་ལྡན་རྣམ་རྒྱལ་གྲགས་བཟང་གིས་མཛད་པའི་བཤད་རྒྱུད་འགྲེལ་ཆེན་སོགས་
ལུང་དང་མན་ངག་མང་དུ་སྤེལ་བཅུག །ཅེས་དང་། ཚེ་བདག་གི་གཅེས་པའི་འཁོར་ལོ་བཅུ་གསུམ་ཆབ་གཅིག་ཏུ་བརྩེགས་པས་འབྲི་གུང་ཆོས་གྲགས་པའི་ཕྱག་ལེན། ༈ །པཎ་ཆེན་ཤཱཀ་མཆོག་པའི་ཚད་མ་རྣམ་འགྲེལ་ཊཱི་ཀ་ཀུན་བཟང་ཆོས་ཀྱི་རོལ་མཚོ། ༈ །བསྟན་པ་ཕྱི་དར་ལ་ཤྲཱི་བྷུ་མི་ཨཱརླ། གནམ་བསྐོས་ཀྱི་སྡེ་སྲིད་ཕག་མོ་གྲུ་པ་གུའི་གུང་། བྱང་པ་རིགས་ལྡན་ཏཱ་དབེན་གུ་ཧཱུཾ། ཁྲོམ་གེ་སར་གྱི་མག་པ་རྒྱལ་མཁར་རྩེ་པ། སྒེར་རིགས་རིན་ཆེན་སྤུངས་པ། སྡེ་སྲིད་གཙང་པ་སོགས་ཀྱི་དུས་རིན་ཆེན་རྒྱན་ཆའི་སྲོལ་དོད་ཚུལ་འདུག ༈ །མཐའ་བཞིའི་རྒྱལ་པོ་ལ་ནི། ཤར་ན་རྒྱ་ནག་དང་ཁྲི་ཟློསྟན་། ལྷོ་ན་རྒྱ་གར་དང་ཁ་ཆེ། ནུབ་སྟག་སྡེ་དང་གཟིག་ཕན། བྱང་ཁྲོམ་དང་གེ་སར་ཞེས་པའོ། །མདོར་ན་སྟོད་ཛཱ་ཏིའི་དྲི་བསུང་འཐུལ་བ་ནས། སྨད་ཟ་འོག་ཐགས་སུ་འཐགས་པའི་ཡུལ་གྲུ་ཡན་aཆད་། འཛིན་ཆེ་ཆུང་དགུ། ལག་ཡང་སུམ་བརྒྱ་རེ་གཉིས། གསེར་མདོང་། དངུལ་མདོང་། གནས་བརྟན་ཕྱག་མཆོད་ལ་མཆོད་པ་སྣ་༢༢བདུན། གཏོར་ཟླུམ། ཉན་ཐོས་དཀར་གསུམ་མངར་གསུམ་གྱི་མཆོད་པ་བཅས། དཔལ་རི་སྤྲུལ་སྐུ་ངག་དབང་པདྨ་སྣང་རྩེ་ཕྱོགས་ལ་དད་པ་གོ་ལོག་པའི་ཚུལ་སྣང་། འདུལ་བའི་ལས་ཆོག་མཐའ་གཅོད་བཅས་པ་འཁྲུལ་སྤོང་རྣམ་རྒྱལ་གསེར་མདོག །ཞྭ་
ལུ་པ་ཡེ་ཤེས་རྒྱལ་མཚན་གྱི་བྱམས་སྨོན་འགྲེལ་པ་ཚོགས་གཉིས་ཆུ་རྒྱུན། ཁམས་༡༧༡རྫོགས་ཆེན་པདྨ་རིག་འཛིན་དང་སྙིང་ཐིག་སྐོར་ལ་ཞིབ་ཆའི་རྒྱུ་མཚན་མང་དག་དང་པོར་འདུག ༈ །རིག་འཛིན་རྒོད་ལྡེམ་ཟངས་མཛོད་ནས་བཞེས་པའི་མངའ་བསྐྱེད་ནོར་བུའི་བང་མཛོད་ལས། བོད་ལ་བདེ་སྐྱིད་འབྱུང་འདོད་ན༔ ཡར་ངོའི་ཚེས་བཅུའི་ནམ་ཤར་ཚེ༔ ཨོ་རྒྱན་པདྨའི་སྤྲུལ་པ་འབྱུང་༔ དེ་དུས་ང་ལ་མོས་པ་ཡི༔ རབ་ཀྱིས་བསྐྱེད་རྫོགས་གནས་ལུགས་ལྟོས༔ ཕྱི་ནང་གསང་བའི་སྒྲུབ་པ་ཚུགས༔ སེམས་བསྐྱེད་བསམ་པ་བཟང་པོ་ཡིས༔ འགྲོ་དྲུག་ཐུགས་རྗེས་འདྲེན་པ་ཡི༔ ལས་དང་སྨོན་ལམ་རྒྱ་ཆེར་ཐོབ༔ འབྲིང་གི་ལུས་ངག་ཡིད་གསུམ་གྱིས༔ སྒྲིབ་སྦྱོང་ལས་ལ་བརྩོན་པར་གྱིས༔ ཞེས་སོ། ༈ །གངས་ཅན་གྱི་ལྗོངས་ཀྱི་བླ་དཔོན་རྣམས་ཀྱི་ཐོབ་ཆེ་ཆུང་གི་ཡི་གེ་ཚིག་དོན་རབ་གསལ་དང་། གདན་ཡིག་ཞིབ་མོ་རྣམ་དག་རབ་གསལ་མེ་ལོང་ཞེས་བྱ་བ་བྲིས་པར་སྣང་། འདིའི་ས་བོན་ཙམ་ལྡེབ་༡༣༩ཕྱི་ནས། ༡༤༢ཕྱི་བར་ཡོད། ༈ །རྒྱ་ནག་རྒྱལ་པོའི་ཁབ་ཏུ་ཕེབས་སྐབས། འདི་ལྟར། ཕོ་བྲང་ཆེན་པོ་འདིའི་འོག་ཏུ་ཝུའུ་ཀྱང་བཅུ་གསུམ། ཞང་ཆེན་རེ་རེའི་མཁར་མོ་ཆེའི་མི་དཔོན་ཀུན་མིན་རེ་རེ། ཀུན་མིན་རེ་རེའི་འོག་ཏུ་ཐིའི་ཏུའུ་བཅུ་གསུམ། ཐིའི་ཏུའུ་རེ་རེའི་འོག་ཏུ་
ཙོང་ཡ་བཅུ་གསུམ། ཏུའུ་ཡི་བཅུ་གསུམ། བང་ཡི་བཅུ་གསུམ། ཐོང་ཡེ་བཅུ་གསུམ་ཡོད་ཅིང་། མཁལ་མོ་ཆེ་རེ་ལ་དམག་མིའི་གྲངས་ཏིལ་རྒྱ་ནག་གི་བྲེ་བོ་ཆེ་ལྔའི་གྲངས་ཡོད་པའི་རྒྱལ་ཁབ་ཆེན་པོ་ལྕགས་རི་དཀར་པོ་སེར་པོ་གྲོ་བོ་སྟེ་རིམ་པ་གསུམ་གྱིས་བསྐོར་བའི་ལྕགས་རི་ཕྱི་མའི་ཤར་ལྷོ་ནུབ་བྱང་མཐར་དག་ལ་ཚ་ཁ་རེ་འགྲོ་དགོས་པའི་ཁོར་ཡུག་ཤིན་ཏུ་ཡངས་པ། ནང་ཐམས་ཅད་ཁྱིམ་གྱིས་ཡོངས་སུ་གཏམས་པ། ཕོ་བྲང་ནང་མའི་ཕྱི་རོལ་དུ་རྒྱལ་སྲིད་སྣ་བདུན་དང་ཁྲིམས་ཀྱི་རུ་མཚོན། གདུགས་དང་བ་དན་སྣ་ཚོགས་བསྒྲེང་བ། སྙན་བརྗིད་ཀྱི་རོལ་མོ་མང་པོ་སྒྲ་འཁྲོལ་བ། རྔམས་འཇིགས་ཡིད་དུ་འོང་བ་རྣམ་ཐོས་སྲས་ཀྱི་ཁང་བཟང་ལྟ་བུ། ཞེས་གསུངས་སོ།། ༈ །།རྒྱལ་དབང་ལྔ་པ་རིན་པོ་ཆེའི་རྣམ་ཐར་ཁ་པར༡༤༠། སྔོན་ཆད་གདན་༡༤༣ཡིག་སོགས་པར་བཀབ་མི་སྣང་བས་མཐོ་དམན་ངེས་མེད་བྱུང་ཚེ་བསྙད་འདོགས་རེ་འཁང་གི་རྒྱུ་དང་ཤེས་ལྡན་འགས་ཁྲེལ་གནས་སུ་མི་བྱེད་པའི་ངེས་པ་མི་འདུག་གཤིས་འདི་གའི་ཁྲི་ལ་ཆ་ལྔ་བྱས་པའི་ཆ་བཞིའི་རྩིས་གདན་ས་གོང་འོག་གཉིས། དེའང་རྩེ་གདོང་གི་ཞལ་ངོ་ཆོས་ཀྱི་རྒྱལ་པོ་འཕགས་པའི་བཞུགས་ཁྲི་པདྨོ་ཅན་དུ་ཁྲི་འདོན་མ་མཛད་པའི་རིགས་ལ་གདན་ས་གོང་ལས་ཅུང་དམའ་བ། ཆ་ཕྱེད་བཞི་པ་སྣེའུ་གདོང་རྩེ། སྟག་
ཤོག་ལྷེབ་ ༢༠༡ ནས་ ༣༠༠ བར།
ལུང་ལྷ་སྡེ། ཞྭ་དམར་ནག །ཆ་གསུམ་པ་དགའ་ལྡན་ཁྲི་རིན་པོ་ཆེ། བཀྲ་ཤིས་ལྷུན་པོ། འབྲུག་པ། སྒམ་པོ། མཚུར་ཕུ་དྲུང་པ། འཕགས་པ་ལྷ་རྣམས་ཀྱི་སྤྲུལ་སྐུ། སྒམ་པོའི་གདུང་བརྒྱུད་སྤྱན་སྔར་བཏོན་པ། ཁམས་རི་བོ་ཆེའི་ཆོས་རྗེ། འབྲི་གུང་གི་གདུང་བརྒྱུད་ཡོད་སྐབས་སྟག་ལུང་པ་དང་འདྲ་ཡང་ད་ཆ་འདི་གྲས། དེ་ལས་ཅུང་ཟད་དམའ་བ། སྡེ་པ། ཆ་གཉིས་པ་རྡོ་རྗེ་བྲག །བོ་དོང་སྦྱོར་ར་ཆེ་བ། འབྲོག་བསམ་སྡིངས། གཟིམ་ཁང་གོང་། བར་ཁམས་རྟ་ཚག །དེ་མོ་བ། ལྕགས་ཟམ་པ། ཁལ་ཁའི་འཇམ་དབྱངས། བྱམས་པ། རྒྱལ་ཁང་རྩེ། སྟོང་འཁོར་བ་རྣམས་ཀྱི་སྤྲུལ་སྐུ། གནས་རྙིང་ཁྲི་པ་བསླབ་གཙང་ཡིན་མིན་ལ་མ་བལྟོས་པ་དང་། གེ་རེ་ལྷ་པ་བསླབ་གཙང་རྣམས། སྙེ་འབོལ་ཆེ་བ། ཞྭ་ལུ་དང་ཚོགས་སྡེ་བཞིའི་མཁན་པོ། གསང་ཕུ་ཆོས་རྗེ་རྣམ་གཉིས། ལྷོ་བྲག་དྷི་ཚ། དཔའ་བོ། ཉག་རེ་བྲག་ཡབ། སི་ཏུ་བཞིའི་སྤྲུལ་སྐུ། ཏྲེ་བོ་ཧོར་ཚང་ཆོས་རྗེ་རྣམས། སྲབ་ལྔ་བརྩེགས་པ། དགའ་རྩེ་ཤར། དབུར་སྟོད་སེམས་དཔའ། རྒྱལ་སྲས་ཤེར་འཕེལ། ཀ་ལུགས་ཏྲེ་ཧོ། ལྷོ་གསུང་སྤྲུལ། ཐུགས་སྲས་ཟླ་བ། རས་ཆུང་ཕུག །བར་ཁམས་ངག་དབང་། སྦྱོར་ར་འགྲོ་མགོན། ལྷ་རྩེ་གྲུབ་དབང་རྣམས་ཀྱི་སྤྲུལ་སྐུ། ནཱ་ལེནྡྲ་བཅོ་བརྒྱད་པ། །
བཀྲ་ཤིས་རྩེའི་དབོན། སྟོད་རི་བོ་ཆེ་པ་དང་སྒེར་པའི་མི་ངོའི་རིགས་ཀྱི་ཆོས་རྗེ། ཁམས་རྒྱ་སྟོན་པ། རྒྱལ་ལེགས་བཤད་གླིང་། སྤྱན་སྔར་མ་བཏོན་པའི་སྒམ་པོའི་གདུང་བརྒྱུད། གེ་རེ་ལྷ་པའི་གདུང་བརྒྱུད། ངམ་རིང་། མངའ་རིས་ཁྲི་རྩེ། བཟང་ལྡན། སྒྱི་ཆུ། ཆོས་འཁོར་ལྷུན་པོ། འདར་གྲང་མོ་ཆེ། ལྷུན་རྩེ། གངས་ཅན་ཆོས་འཕེལ། སྣར་ཐང་། ངོར། གསེར་མདོག་ཅན། དཔལ་འཁོར་བདེ་ཆེན། ཐུབ་བསྟན་རྣམ་རྒྱལ། ཐུབ་བསྟན་ཡངས་པ་ཅན། ཤངས་རི་བོ་དགེ་འཕེལ། སྐྱེད་ཚལ་གོང་། གྲ་བྱམས་གླིང་། གྲ་ཐང་། རི་བོ་བདེ་ཆེན། རྩེ་དང་ལྔ་མཆོད་པ། སྤྱན་གཡས་པ། གཉལ་སྡེ་དྲུག །ཐར་པ། འཕགས་སྡེ་བཞི། རྫིང་ཕྱི། སྐུ་རབ་དགའ་ལྡན་རབ་བརྟན། རྭ་སྒྲེང་། སྐྱོར་མོ་ལུང་། གསང་སྔགས་མཁར་རྣམས་ཀྱི་མཁན་པོ། བྱ་ཡུལ། མལ་དྲེ། མཆད་ཀ །བདེ་ཆེན་ཡངས་པ་ཅན་གསུམ་གྱི་སྤྱན་སྔ། ཆོས་རྒྱལ་གཏེར་བདག་གླིང་པ། བསམ་ཡས་དཀར་པོ་བ། ཡང་འུག །རྟ་ནག་སྒྲོལ་མ་བ། སྨྲ་བོ་ཅོག་པ། གནས་གཞི་བ་སོགས་སྔགས་བརྒྱུད་ཆེ་ཁག་རྣམས། སྲབ་སུམ་བརྩེགས་པ་གྲ་ལྕོག་གྲ་པ། ཨེ་བྲག་སྣ་པ། ལ་སྟོད་སེ་བརྒྱ་འཁར་པ། གོང་དཀར་དཀོན་གཉེར་དཔོན། ཆོས་རྗེ་བཀྲ་བཟང་པ། རྩེས་དང་ཆེན་པོ་བྱང་མ་
བ། སྙེ་མདོ་བ་སོགས་བཀའ་གཏེར་གྱི་ཆོས་བརྒྱུད་ཟིན་ངེས། སེར་འབྲས་དགེ་གསུམ། ཆོས་འཁོར་རྒྱལ། བཀྲ་ཤིས་ལྷུན་པོའི་སློབ་དཔོན་པ་རྣམས། རྒྱས་སྐབས་སུམ་སྟན་སྙེ་འབོལ་དང་། བཅས་བདེར་ས་སྟན་གོས་སྟན། ཁ་གང་མ་ཁ་གདན་ལྟ་བུར་སྣ་དཀར་རྩེ། ལྷ་བྱ། སྐྱི་ཤོད། སྟག་ལུང་པ་སོགས། གདན་ས་གོང་འོག་གི་བཙུན་མོར་ཁ་གང་མ་བཞི་བརྩེགས། སྣེའུ་གདོང་རྩེའི་བདག་མོར་སུམ་བརྩེགས་ཁ་གདན། ས་སྟན་སྟེང་གོས་སྟན་ཡུག་པ། ལྷོ་འབོག་གདོང་། ཐོན་པ། གཟིམ་ཤག་ལྷོ་པ། སྡེ་དཔོན་ཆེ་ཁའི་དཔོན་སའི་རིགས་དང་། ནང་སོ་རྣམ་པ་དཀྱུས་མ་ལས་དྲག་ཙམ་ལ་གུང་སྟན་རིགས་གསུམ། ནང་སོ་རྣམ་པ་དཀྱུས་མ། ཀྲེ་ནག་སོགས་འབྲོག་རིགས་ཀྱི་དཔོན། ཞང་སྟོན། དར་སྡིངས། རི་ཞིང་གྲུ་ཚང་བའི་མི་ངོའི་རིགས་སོགས་ལ་མགོ་སྟན་རིགས་གསུམ། མཇུག་བསྒྲིགས་རིགས་གསུམ། སྟན་གདན་རིགས་གསུམ་རྣམས་གང་འོས། རྒྱ་སྔོ་དམར་པོ་གསུམ་གྱི་གྲུམ་གདན་འཇགས་གདན་སྟེང་གསང་ཕུའི་ཆེན་པོ། དཔལ་རི་སྤྲུལ་སྐུ། །རྫོགས་ཆེན་སྤྲུལ་སྐུ། གོང་ར་ངེས་གསང་གླིང་གི་བླ་མ། གྲ་དར་སྡིངས་པ། བླ་ཆེན་རྣམས་ཀྱི་ཕྱག་མཛོད། གོང་གསལ་འཇགས་མེ་གསུམ་གྱི་སྟེང་དབུས་གཙང་ས་དགེ། བཀའ་བརྒྱུད་པའི་དགོན་
གྲ་གཙང་བའི་སློབ་དཔོན། བལ་པོའི་རྒྱལ་ཁབ། རྒྱ་གར་ར་གོ་ཤིང་། འཛུམ་ལང་། མངའ་རིས་སོགས་ཕྱོགས་མཐའི་རྒྱལ་ཁག་གི་མི་སྣ་རྣམས་ལ་དམར་གྲུམ་ཡན། ཉིང་ཚོས། ལྗང་གུ་ནག་པོ་གསུམ་གྱི་སྟེང་བཙན་བཙུན། བྱ་བྲལ་གྱི་བླ་མའི་རིགས་ལ་སྤྱང་གདན་གང་འོས་སྟེང་། དྲུང་འཁོར། ལྡིང་དཔོན། ཆོས་སྡེ་ཁག་གི་གཉེར་ལས་འཛིན་སོགས། སྲབ་ལྔ་བརྩེགས་སྟེང་། རྒྱ་ནག་གོང་མའི་མི་སྣ་རྒན་གཞོན། གོང་གི་ཐམ་ཁ་འཛིན་པའི་ནང་ཕྱོགས་ཀྱི་ནང་སོ་རྣམས་ཁྲི་མཐོ་དམན་ཇི་ལྟར་འཚམས་པའི་སྟེང་ཁལ་ཁའི་རྒྱལ་པོ། དེ་ལས་ཅུང་དམའ་བར་བསྟན་འཛིན་ད་ལིའི་རྒྱལ་པོ། ཨ་རོད་སེ་ཆེན་རྒྱལ་པོ་སོགས་རྒྱལ་སར་མངའ་གསོལ་བའི་རིགས། ས་སྟན་གོས་འཇའ་ཉིས་བརྩེགས་སྟེང་ཁབ་ཁ་ཨོ་རོད་ཀྱི་དཔོན་པོ། གོས་འཇའ་གཅིག་གིས་དམའ་བར་དཔོན་ཆུང་དང་དཔོན་མོའི་རིགས། གྲུམ་རྩེ་མི་བཟང་མི་སྣ་དྲག་པར་འདིང་བ་སྤྱིར་བཏང་དང་དམིགས་བསལ། ལོ་གསར་སོགས་བཞུགས་གྲལ་ཆེན་མོའི་དུས་ཁྲིའི་ཉེ་སྐོར་དུ་གྲོང་སྨད་ཨ་བར་ལས་སྟན་གོས་འཇའ་ཁ་བ་ཀུག་མ་ཁ་སྟན་ཅོག་རྩེ། གཟིམ་དཔོན་མཆོད་དཔོན་སོགས་ལས་ཚན་ཆེ་ཁ་རྣམས་ལ་གྲུམ་སྟན། འཇག་མགོ། རྒྱུད་སྟོད་སྨད་སེར་འབྲས་ཀྱི་སློབ་དཔོན་ལྟ་བུར་སུམ་སྟན་སྙེ་འབོལ་ཆུང་བ་བྱེད་སྐབས་གདན་
བཟོས་གོང་མ་རྣམས་ཀྱང་དེ་གའི་འགྲོས་ཀྱིས་འཕར་འགྲོ་ཞིང་། གྲུམ་འཇག་ཐོབ་པར་སྲབ་སུམ་བརྩེགས་གང་རུང་མི་བབས་བསྟུན་པ། སྐྱི་ཤོད་སོགས་དཔོན་ཆེ་ཁ་རྣམས་རྒྱུན་དུ་སོག་པོའི་ཐའི་ཇི་ཚོ་དང་ལྷན་དུ་འཚོག་སྐབས་སོག་པོ་ཆེ་བས་མཉམ་པ་ལས་མི་ཡོང་ཡང་། རིན་ཆེན་རྒྱན་སྤྲོད་ཀྱི་དམིགས་བསལ་ལ་སུམ་སྟན་སྙེ་འབོལ་ཆེ་བ། འབོག་པ་གསོགས། གོང་པ་འོག་མཚོར་སུམ་སྟན་སྙེ་འབོལ་ཆུང་བས་མཚོན། ཡུལ་དུས་གནས་སྐབས་ཀྱི་བསྒྱུར་ལུགས་བླ་བྲེས་ལྕོག །འབྲས་ཤེལ། ཨུཏྤལ། དང་ཆུང་མ་སོགས་ཧོར་དཀར། ཀརྨ་གན་དཀར། རབ་དཀར་གྱིས་མཚོན་བྱེ་བྲག་རྣམས་དཔལ་ཕག་མོ་གྲུ་པའི་ལུགས་སྲོལ་ཁུངས་མར་གཞི་བྱས་པའི་ཞིབ་མོ་རྣམ་འཐག་རབ་གསལ་མེ་ལོང་ཞེས་བྱ་བ་བྲིས། ཞེས་སྣང་ངོ་། །ཤུ་བྷཾ།། ༈ །།རྩེ་ལེ་ཁག་གསུམ་ཞེས་གྲགས་པའི་རྩེ་ལེ་གོང་མ་ལའང་གསར་རྙིང་གཉིས་ལས། རྙིང་པ་ནི་ཀུན་མཁྱེན་ཆོས་སྐུ་འོད་ཟེར་གྱིས་བཏབ། ཕྱིས་སེར་ཁྱིམ་དུ་གྱུར་པ། ༡གསར་མ་མཆིམས་ཤཱཀྱ་པྲ་བྷ་ཝ་ཞེས་སློབ་དཔོན་ཆེན་པོ་སྤྱན་འདྲེན་པའི་ཕོ་ཉ། སླད་ནས་སློབ་དཔོན་ལས་རྡོ་རྗེ་ཕུར་པའི་ཆོས་སྐོར་གསན་ཅིང་ཉམས་སུ་བཞེས་པས་གྲུབ་པ་ཐོབ་པ་དེ་དང་། གྲ་སྒོམ་ཤེས་རབ་བཟང་པོ། མདོ་ཁམས་གཏེར་སྟོན་ཤེས་རབ་མེ་འབར་སོགས་ཀྱི་
སྐྱེ་བརྒྱུད། གུ་རུ་ཆོས་དབང་གི་སྤྲུལ་པར་ཡང་གྲགས་པ། སྐུ་རབ་པའི་ཞལ་ངོ་རིག་འཛིན་བསོད་ནམས་རྣམ་རྒྱལ་གྱིས་རྩེ་ལེ་གསར་མའི་གྲ་ཚང་བཙུགས། ཨོ་རྒྱན་གྱི་གསེར་སྐུ་རྒྱབ་མཐོ་ཉེར་བརྒྱད་ཡོད་པ་སོགས་བཞེངས། མཆོག་ལྡན་མགོན་པོ། དོལ་ལས་འཕྲོ་གླིང་པ། རྫོགས་ཆེན་པ་བསོད་ནམས་རིན་ཆེན། རྒྱལ་སྲས་ཟླ་བ་གྲགས་པ་སོགས་ལས་གསན་བསམ་རྒྱ་ཆེར་མཛད། དེ་ལ་སྲས་དཔལ་ཨོ་རྒྱན་བསྟན་འཛིན། ཀརྨ་མཐུ་སྟོབས་རྣམ་རྒྱལ། དཀར་ཆེན་ཀུན་དགའ་བསྟན་འཛིན། ཆོས་རྗེ་ནཱ་ལེནྡྲ་པ་རྣམས་བྱུང་། ཨོ་རྒྱན་བསྟན་འཛིན་གྱིས་གདན་ས་བསྐྱངས། སོ་བརྒྱད་པར་གཤེགས། འདིས་སླར་ཡང་གྲ་ཚང་གསར་མ་ཞིག་བཙུགས་ནའང་། གཤེགས་རྗེས་རྙིང་པ་དང་མ་མཐུན་ནས་བཟང་ཕུད་རྣམ་པས་ལོགས་སུ་ཕྱེ་བ་ལས། གྲྭ་ཚང་དེའི་དབུ་མཛད་ཕྱིས་བླ་མར་བསྐོས་པ་བེ་རོའི་རྣམ་འཕྲུལ་མཚུངས་མེད་བསྟན་འཛིན་རྡོ་རྗེ་དགུང་ལོ་སོ་གཅིག་པའི་སྟེང་ཐང་འབྲོག་འོད་གསལ་རྩེའི་དགོན་གཞིས་ཕྱག་ཏུ་རུང་བར་རྩེ་ལེ་འོག་མའི་གྲྭ་ཚང་གསར་དུ་བཙུགས་པ་སྟེ། དེའང་ཐང་༢འབྲོག་གཞི་ཀའི་བླ་བྲང་གི་རྨངས་དགུང་ལོ་སོ་གསུམ་པར་གསར་དུ་བཏིང་ནས་རིམ་པར་བཞེངས། ཀརྨ་མཐུ་སྟོབས་རྣམ་རྒྱལ་ཡང་རྩེ་ལེ་གོང་འོག་གཉིས་སུ་རེས་མོས་ཀྱིས་བཞུགས་ཤིང་དགུང་
ལོ་ཞེ་བརྒྱད་པར་རྩེ་ལེ་འོག་མའི་གྲྭ་ཚང་དུ་ཞིང་གཤེགས། བསྟན་རྡོར་བ་དགུང་ལོ་ཞེ་ལྔ་པར་གཙང་པོ་མགོ་དགུའི་སྒྲུབ་སྡེ་བཙུགས། དགུང་ལོ་ཞེ་བདུན་པར་ལང་པོ་བདེ་ཆེན་༣༽དགོན་གྱི་གྲ་ཚང་བཙུགས། བདེ་ཆེན་དགོན་འདི་གཡུ་སྒྲའི་རྣམ་འཕྲུལ་བསམ་གཏན་བདེ་ཆེན་གླིང་པས་བཏབ། མིང་པདྨ་ཆོས་གླིང་དུ་བཏགས་ཀྱང་། མི་དམངས་རྣམས་ཀྱིས་བདེ་ཆེན་གླིང་པའི་དགོན་པ་ཡིན་པས་བདེ་ཆེན་དགོན་དུ་རང་ཤུགས་ཀྱིས་འདོགས་པ་བྱུང་། ཕྱིས་སེར་ཁྱིམ་དུ་གྱུར་པ་བསྟན་རྡོར་བས་གཙང་དགོན་དུ་བསྒྱུར་ཞིང་། རྩེ་ལེ་གོང་འོག་ལྟར་གྱི་གྲྭ་ཚང་གསར་དུ་བཙུགས་པ་ཡིན། ཨོ་རྒྱན་བསྟན་འཛིན་པའི་སྤྲུལ་སྐུ་དྭགས་པོ་འབྲུ་མདར་ནང་སོ་རྒྱལ་པོའི་སྲས་སུ་འཁྲུངས་པའང་བསྟན་རྡོར་པས་གདན་དྲངས། ཀརྨ་པ་དབང་ཕྱུག་རྡོ་རྗེ་བསྙེན་པར་རྫོགས་པའི་མཚན་ཨོ་རྒྱན་བསྟན་འཛིན་ཕྲིན་ལས་རྒྱ་མཚོར་གྲགས། ཐང་འབྲོག་གྲ་ཚང་དུ་མངའ་གསོལ། མཐུ་སྟོབས་པའི་སྐུ་སྐྱེ་འབྲུག་པད་དཀར་གྱི་གཉེར་པ་ཞིག་གི་སྲས་སུ་རྒྱ་གར་ཡུལ་གྱི་ཆར་འཁྲུངས་པའང་སྤྱན་དྲངས། ཀརྨ་རིག་འཛིན་མཆོག་གྲུབ་རྣམ་རྒྱལ་དུ་གྲགས། དེ་ལྟར་བསྟན་འཛིན་རྡོ་རྗེས་བསྟན་པ་ལ་བྱ་བ་རྒྱ་ཆེར་མཛད་ནས་དགུང་ལོ་དོན་གསུམ་པར་མཚོ་རྫོང་ནོར་བུ་རིའི་རྩེར་སྐུ་གཤེགས་སོ། །གྲྭ་ཚང་དུ་ཕྲིན་ལས་རྒྱ་མཚོ་
བཞུགས། དེ་གཤེགས་རྗེས་མཐུ་སྟོབས་པའི་སྤྲུལ་སྐུ་མཆོག་གྲུབ་པ་མངའ་གསོལ་ཡང་ཉེར་དགུ་པར་རྩེ་ལེ་གོང་མར་གཤེགས། བསྟན་རྡོར་པའི་སྤྲུལ་སྐུ་དུལ་གྱི་གྲོང་ན་འཁྲུངས་པ་མཁས་མཆོག་པདྨ་ལེགས་གྲུབ་བམ། སྣ་ཚོགས་རང་གྲོལ་ཞེས་གྲགས་པ་དེའོ། །གོང་གི་མཐུ་སྟོབས་པའི་སྐུ་སྐྱེ་མཆོག་གྲུབ་པའི་སྤྲུལ་སྐུ་ནི་རྩེ་ལེ་གོང་མས་གདན་དྲངས། ཕྲིན་ལས་རྒྱ་མཚོའི་སྐུ་སྐྱེ་ལོང་པོ་རྩལ་སྟེ་གྲུབ་ཆེན་བཀྲ་ཤིས་ཚེ་བརྟན་གྱི་སྲས་སུ་འཁྲུངས་པ་རྩེ་ལེ་འོག་མར་གདན་དྲངས་ནའང་། ཕྲིན་ལས་ཁྱིམ་པར་གྱུར་ཏེ་བསྟན་ལ་ཕན་པ་མ་བྱུང་། སྣ་ཚོགས་རང་གྲོལ་གྱིས་གདན་ས་དགུང་ལོ་སོ་ལྔ་བར་བསྐྱངས། དེ་ནས་བྱ་བཏང་མཛད་དེ་རྒོད་ཚང་ཕུག་ཏུ་བཞུགས་པའོ། ༈ །སྣ་ཚོགས་རང་གྲོལ་རྣམ་ཐར་དུ། གངས་རར་བཞུགས་སྐབས་གནུབས་ཞུ་ལུང་གི་ཆུ་བྱང་གི་ཕུར། ཐ་ཤོད་བྲག་དཀར་ཞེས་པ་སྔོན་པཎ་ཆེན་བི་མ་ལས་རྫོགས་ཆེན་གསང་བ་སྙིང་ཏིག་གཏེར་དུ་སྦས་ཤིང་། ལྕེ་བཙུན་སེང་དབང་འོད་སྐུར་གཤེགས་པའི་སྒྲུབ་གནས་དེ་ཉིད་མཇལ་བར་ཕེབས་ནས་ཞག་གཅིག་བཞུགས། ཞེས་སྣང་། །༅། །གཏེར་སྟོན་སངས་རྒྱས་བླ་མ་ལ་སྟོད་མཚོ་བར་དུ་འཁྲུངས། ཡེ་ཤེས་འོད་དང་དུས་མཉམ། གློ་བོ་དགེ་དཀར་གྱི་གཙུག་ལག་ནས་བླ་རྫོགས་ཐུགས་གསུམ་ཐང་པར། ཁོག་ཕྲད་
དྲག་སོགས་ནས་རྟ་མགྲིན་དྲེགས་པ་ཟིལ་གནོན་རྒྱ་གཏམ། ཁ་བསྒྱུར་སོགས་མང་དུ་ཐོན་པར་གྲགས། ༼༡༽ །རྒྱ་ལོ་ཙཱ་མར་པ་དང་དུས་མཉམ། རུས་རྒྱ། མཚན་རྡོ་རྗེ་བཟང་པོ། འཕྲལ་སྐད་ཤེས་པའི་ལོ་ཙཱ། བལ་བོད་མཚམས་པུརྞ་རྫ་རི་ནས་ཟབ་གཏེར་མང་པོ་ལམ་རིམ། ཆུང་དཔྱད་སོགས་གསོ་རིག་གི་སྐོར་མང་དུ་དྲངས། སངས་རྒྱས་བླ་མའི་སྐྱེ་བ་དེ་མ་ཐག་པར་གསལ། ༢༽ །སྣ་ནམ་པས་གླང་ཐང་སྒྲོལ་མ་སོགས་ནས་སྨན་དཔྱད་རྩིས་སོགས་གཏེར་ཁ་མང་། འབྲོག་བསྣན་མ་ཐུབ་རྒྱལ་དང་གཅིག་ཏུ་འདོད་པའང་ཡོད། ༼༣༽ །ཞང་ཕྲོམ་རོང་གི་དུམ་པ་ཆུ་ཚག་ཁར་འཁྲུངས། རུས་རྒྱ། མཚན་རྡོ་རྗེ་འོད་འབར། ཕུང་པོ་རི་བོ་ཆེ་སོགས་གཏེར་གནས་དྲུག་ནས་གནུབས་ཀྱི་དྲག་སྔགས་མང་པོ་གཙོར་གྱུར་གཞན་ཡང་སེམས་ཕྱོགས་འཇམ་དཔལ་རྫོགས་ཆེན་ཡེ་ཤེས་གསང་རྫོགས། མཚན་བརྗོད་ཀྱི་འགྲེལ་པ་སོགས་གཞུང་དང་མན་ངག་གསོ་དཔྱད་སོགས་གཏེར་ཀ་མཐའ་ཡས། ༼༤༽ །སུརླ་སི་ཧའམ་ཉི་མ་སེང་གེ་གཉལ་ཞིག་ཉའི་སེང་ལ་བཞེད་པའང་ཡོད་མོད་། མང་ཡུལ་དུ་འཁྲུངས། པདྨ་སུང་བཙན་གྱི་སྐྱེ་མཐའ་ཡིན། བྱམས་པ་སྤྲིན་ནས་ཐུགས་རྗེ་ཆེན་པོའི་སྐོར་སོགས་བཞེས་རྒྱུའང་བཞེས་མ་གྲུབ། སྤྱིར་བླ་རྫོགས་ཐུགས་གསུམ་གྱི་སྐོར་མང་།
འདི་རྒྱ་ལོ་ཙཱའི་སྐྱེ་བར་ཐང་ཡིག་ཏུ་གསལ། ༼༥༽ །གཡུ་རུ་སྟོན་ཤཱག་གིས་བྱང་པྲ་དུན་རྩེ་ནས་རླུང་འཁོར་དམར་ནག་དང་ཟློག་པ་དྲེགས་པ་ཉི་ཤུ་སོགས་དྲག་སྔགས་མང་དུ་བཏོན། ཐང་ཡིག་ཏུ། བྱང་གཏེར་གཏེར་ཕྲན་འགའ་ཞིག་སྦས་པ་འདི། ཞེས་པའང་དེའོ། །བེ་རོའི་སྐྱེ་མཐར་བྱེད། ༼༦༽ །བོན་པོ་བྲག་ཚལ་གཙང་དུ་འཁྲུངས། རུས་བོན་པོ། བུམ་ཐང་རྩིས་ལུང་ཞེས་དུས་གསུམ་སངས་རྒྱས་བཞུགས་པའི་ལྷ་ཁང་ལ་མོན་པ་རྣམས་དཀོན་མཆོག་གསུམ་གྱི་ལྷ་ཁང་དུ་འབོད་པ་དེ་ནས། རྫོགས་ཆེན་གུ་རུ་བཞིའི་ལོ་རྒྱུས། ཤྲཱི་སེང་ཧའི་དམར་ཁྲིད། གཞན་ཡང་ཕུར་པའི་སྐོར། །ཤངས་ཀྱི་སྐྱེ་ཀ་ཐར་ཤིང་བྲག་ནས་རཱ་ཧུ་ལ་ཤི་ས་བསྟན་པ་རུ་སྦལ་ནག་པོའི་སེར་སྲུང་བཅས་ཆོག་སོགས་བཏོན། འདིའང་བེ་རོའི་སྐྱེ་མཐར་གྲགས། ༼༧༽ །སྙེ་མོ་ཞུ་ཡས་གནོད་སྦྱིན་འབར་ནི། གཙང་སྙེ་མོར་འཁྲུངས། རོང་བོར་འདམ་གྱི་སྙིང་དྲུང་ཤེལ་མ་བྲག་ནས་རྫོགས་ཆེན་སྤྱི་ཏི་སོགས་གདན་དྲངས། བཻ་རོའི་སྐྱེ་བ་ཡིན། བླ་མ་དམ་པའི་སྐུ་ཚེའི་སྨད་དུ་བྱུང་བར་བྲིས་འདུག་ཀྱང་། མངའ་བདག་ཉང་དང་དུས་མཉམ་པར་གསལ་ལོ། ༼༢༽ །གྲུབ་ཐོབ་དངོས་གྲུབ་ནི་གཙང་དུ་འཁྲུངས། མི་ཡུལ་དུ་ལོ་སུམ་བརྒྱ་བཞུགས། སྐུ་ཚེའི་སྨད་ལ་གཙང་གི་རི་བོ་ཆེ་ནས་རྟ་མགྲིན་ཁྲོ་འདུས་སོགས་
དང་། ལྷ་སའི་གཙང་ཁང་བྱང་གི་རྟ་མགྲིན་ཞབས་འོག་ནས་མ་ཎི་བཀའ་འབུམ་སྐོར་ཕལ་ཆེར་བཞེས། མངའ་བདག་ཉང་གིའང་བླ་མ་ཡིན། ༼༩༽ །གཙུག་ལག་དཔལ་དགེ་འདི་བལ་པོའི་སློབ་དཔོན་གཙུག་ལག་དཔལ་དགེ་དང་གཅིག་པར་བཞེད་པ་ཡོད་མོད། སློབ་དཔོན་དེ་ཡི་སྐྱེ་མཐར་གསལ། འཁྲུངས་ཡུལ་གློ་བོའི་མཐའ་བལ་པོ་དང་ཉེ་བར་འཁྲུངས། བལ་ཡུལ་ཨེ་ཡི་གཙུག་ལག་གི་ཕ་བོང་རུ་སྦལ་ནག་པོ་ནས་དྲག་སྔགས་ཐེམ་ཡིག་བདུན་པ་སོགས་སྤྱན་དྲངས། ལྷ་བླ་མ་དང་དུས་མཉམ། ༼༡༠༽ །སྐུ་ཚ་སྟོན་བ་ནི་འཁྲུངས་ཡུལ་ལྷོ་བྲག །རུས་ཞུ་ཚ། མཚན་ཟླ་འོད་འབར་རམ། སྨན་པ་པདྨ་སྐྱབས་ཞེས་གྲགས། སྤ་གྲོ་གཅལ་གྱི་བྲག་སྡིག་རུ་འདྲ་བ་ནས་གཏེར་སྒྲོམ་བཞི་ལས་ཆོས་བོན་སྨན་རྩིས་ཀྱི་སྐོར་རྒྱ་ཆེར་བཞེས། འོན་ཀྱང་ཀུན་སྤངས་པའི་ཚུལ་གྱིས་ལྷག་དཔྱད་མཛད་པས་ཆོས་ཀྱི་ཕྲིན་ལས་ཆུང་། བོན་གྱི་རྫུ་འཕྲུལ་དྲྭ་བ་དང་། ཕུར་ནག་སོགས་དར་རྒྱས་སུ་གྱུར། རྒྱལ་སྲས་ལྷ་རྗེའི་སྐྱེ་མཐར་གསལ། ༼༡༡༽ །ཨ་ཡ་བོན་པོ་ལྷ་འབུམ་ལོ་རྒྱུས་སྔ་མར་ལྷོའི་ཕྱོགས་སུ་འཁྲུངས། གཙང་གི་རུ་མཚམས་ནས་ཆོས་བོན་སྨན་རྩིས་རྒྱ་ཆེར་བཏོན། དྲན་པ་ནམ་མཁའི་སྤྲུལ་པར་གྲགས། འབྲོམ་སྟོན་དང་དུས་མཉམ་ཞེས་པ་རུང་མོད། བོན་ཕྱོགས་ཀྱི་ལོ་རྒྱུས་ལྟར་
ན། གཙང་རྟ་ནག་ཏུ་འཁྲུངས། གུ་རུ་སྣོན་རྩེ་ཟེར། དེས་བཏབ་པའི་ལྷ་ཁང་ད་དུང་ཡོད། དེ་དང་ཉེ་བའི་རྟ་ནག་དུང་ཕོར་བྲག་ནས་མ་རྒྱུད་ཐུགས་རྗེ་ཉི་མའི་བོན་སྐོར་སོགས་རྒྱ་ཆེར་སྤྱན་དྲངས། ། གྲོང་སྔར་འཁྲུལ་ཞིག་ཆེན་པོའི་རྣམ་པར་བཞུགས། སྔ་ཕྱིའང་ཆོས་དབང་རིན་པོ་ཆེ་དང་དུས་མཉམ་པར་གྲགས་པ་དེ་ཡིན། བེ་རོའི་སྐྱེ་མཐར་གསལ། ༼༡༢༽ །ཁྱུང་པོ་དཔལ་དགེ་ནི་གཙང་ལ་སྟོད་དུ་འཁྲུངས་ཞེས་སྣང་བ། མང་ཡུལ་གུང་ཐང་པ་ཡིན། རུས་ཁྱུང་པོ། མཚན་དཔལ་དགེ། མོན་བུམ་ཐང་ནས་བོན་ཟབ་མོ་སྡེ་དྲུག །ཧས་པོ་རི་ནས་ཀྱང་ཆོས་བོན་རྩི། སྨན་རྒྱ་ཆེན་བཏོན། དུས་རྟགས་ལ་དཔགས་ཏེ་ལྷ་བཙུན་བྱང་ཆུབ་འོད་ཀྱི་དུས་ཙམ་བྱུང་བར་བཞེད་མོད། ཉང་གི་དུས་ཙམ་ཡིན་འདྲའོ། ༡༣ །ཤ་མི་རྡོ་རྒྱལ་ནི། འཁྲུངས་ཡུལ་ཤངས་ཀྱི་སྟོད་ཤ་མི་པྲ་དུ་བྱ་བར་འཁྲུངས། མཚན་རྡོ་རྗེ་རྒྱལ་པོ། ཧས་པོ་རི་ནས་དགོངས་དོན་ཟབ་ཏིག་ཅེས་པའི་ཆོས་བཀའ་རྒྱ་ཆེར་བཏོན། འདི་མདོ་སྔགས་ཀྱི་བསྟན་པ་ཡོངས་སུ་རྫོགས་པའི་གཞུང་ལག་ལེན་དང་བཅས་པར་སྣང་། གཞན་ཡང་ཆོས་ནོར་གྱི་གཏེར་ཁ་མང་དུ་བྱུང་། ལོ་ཙཱ་བ་ཤ་མི་གོ་ཆའི་སྤྲུལ་པར་གསལ། རྟེན་སྔགས་བཙུན། མདོ་སྔགས་ལའང་མཁྱེན་པ་རྒྱས། དུས་ལྷ་བླ་མའི་སྐབས་ཙམ་གྱི་སྔ་ཐོག་ཏུ་བྱུང་བར་སྣང་། །
༡༤ །ལྡང་མ་ལྷུན་རྒྱལ། དབུ་རུ་སྟོད་འབྲི་གུང་དང་ཉེ་བའི་གཞོ་ཡི་ལུང་པར་འཁྲུངས། སྔགས་བཙུན་གྱི་རིགས་དང་རྟེན་ཡང་དེར་བཞུགས། ཞྭ་ལྷ་ཁང་གི་དཀོར་གཉེར་དཀྱུས་མའི་ཚུལ་བཟུང་། གནས་དེ་ནས་བི་མ་སྙིང་ཏིག་གི་རྒྱུད་དང་མན་ངག་རྒྱ་ཆེར་སྤྱན་དྲངས། ལྕེ་བཙུན་སེང་གེ་དབང་ཕྱུག་དང་། མནར་མདའི་ལྕེ་སྒོམ་ལ་གནང་བས་འོད་སྐུར་གཤེགས་ཤིང་རྒྱ་ཆེར་དར། བི་མ་ལའི་སྤྲུལ་པར་གྲགས། ༡༥ །གྲ་པ་མངོན་ཤེས་འཁྲུངས་ཡུལ་གྲ་ནང་པ། རུས་ཤུད་ཕུ། རབ་བྱུང་ཐོག་མའི་མེ་ཡོས་ལ་འཁྲུངས། དམ་པའི་ཆོས་མངོན་པ་ལ་མཁས་པས་མངོན་ཤེས། མཚན་དབང་ཕྱུག་འབར། རྟེན་དགེ་སློང་། གྲ་ཐང་སོགས་གཙུག་ལག་ཁང་དང་གནས་གཞི་མང་དུ་བཞེངས། བསམ་ཡས་དབུ་རྩེའི་སྒོ་གོང་ནས་གནོད་སྦྱིན་ཞང་བློན་དང་ཛ་དམར་སྐོར། ཀ་བ་བུམ་པ་ཅན་ནས་གསོ་རིག་རྒྱུད་བཞི་སྤྱན་དྲངས་པས་གངས་ཅན་པ་རྣམས་ཀྱི་ཕན་བདེའི་བཙས་ཆེན་པོར་གྱུར། ཤུད་པུ་དཔལ་གྱི་སེང་གེའི་སྐྱེ་བར་གྲགས། ༡༦ །ར་ཤག་གཏེར་སྟོན་ནི། ཡར་འབྲོག་གཉན་དུ་འཁྲུངས། མཚན་ཆོས་འབར་རམ། བསོད་ནམས་རྡོ་རྗེ། རྟེན་སྔགས་འཆང་ཆེན་པོ། རྙིང་མ་བཀའ་མའི་གཞུང་དང་མན་ངག་གདམས་ཆོས་གསོ་དཔྱད་སོགས་ལ་མཁས། རྗེ་མི་ལར་ཚེ་རིང་མའི་
སྒྲུབ་སྐོར་ཀྱང་འདིས་གནང་བར་གྲགས་པ་དོན་ལ་གནས། སྤ་གྲོ་དང་། མཆིམས་ཕུ། མཁོ་མཐིང་སོགས་ནས་མ་མོ་སྒང་ཤར་ཆེན་མོ། སྲིད་པའི་ཕེམས་སོགས་དང་། མདོས་ཆོག་གི་སྐོར་རྒྱ་ཆེར་བཞེས། མར་པ་དང་དུས་མཚུངས། སྲས་བརྒྱུད་ཀྱང་ཕྱི་མའི་བར་ཡོད། སྐུ་ཚེ་རིང་བར་བཞུགས་པར་གསལ། བཻ་རོའི་སྐྱེ་མཐའོ། ༼༡༧༽ །མངའ་བདག་ཉང་རིན་པོ་ཆེ་ནི། ལྷོ་བྲག་ཤར་༧ གཏམ་ཤུལ་འཇོད་པ་གསེར་དགོན་དུ་འཁྲུངས། གདུང་བྲམ་ཟེ་ཉང་། མཚན་ཉི་མ་འོད་ཟེར། མདོ་སྔགས་ཀྱི་གཞུང་དང་མན་ངག་ལ་གསན་བསམ་རྒྱ་ཆེར་མཛད། ཐུགས་རྗེ་ཆེན་པོ་ཞི་དྲག་ལས་གྲུབ་པ་ཐོབ། གཏམ་ཤུལ་སྲིན་མོ་སྦར་རྗེས་བྲག་ནས་ཐུགས་རྗེ་ཆེན་པོ་འགྲོ་འདུལ་སོགས་དང་། མཁོ་མཐིང་རྣམ་སྣང་སྐུ་རྒྱབ་ནས་མཆིམས་ཕུའི་གཏེར་གནས་འཕོས་པའི་བཀའ་བརྒྱད་བདེ་གཤེགས་༧ འདུས་པ་སོགས་རྒྱ་ཆེར་སྤྱན་དྲངས། ཡི་དམ་དང་མཁའ་འགྲོའི་བཀའ་བབས། ཕྲིན་ལས་མཐའ་ཡས། སྲས་སློབ་ཀྱི་བརྒྱུད་པ་འཕེལ། གཏེར་ཁ་གོང་མར་གྲགས། མངའ་བདག་ཁྲི་སྲོང་གི་སྐུའི་སྤྲུལ་པའོ། ༼༡༨༽ །དབོན་སྲས་ཁྱུང་ཐོག་ནི་གཏེར་འབྱུང་སྔ་མ་རྣམས་སུ་མི་གསལ། ཕྱིས་དབོན་སྲས་ཁྱུང་ཐོགས་སུ་ཁས་འཆེ་བ་གསུམ་ཙམ་བྱུང་བར་གྲགས། འགའ་ཞིག་གིས་རིག་འཛིན་རྒོད་
ལྡེམ་ལ་ངོས་བཟུང་། དོན་དུ་ལ་སྟོད་ཕྱོགས་སུ་བོན་རིགས་ལས་བྱུང་བའི་སྔགས་པ། མཚན་གཡུང་དྲུང་འབར། གྲམ་པ་རྒྱངས་སོགས་ནས་ཆོས་བོན་གྱི་གཏེར་ཁ་ཅི་རིགས་བཞེས་ཀྱང་། །གྲོང་སྔགས་དཀྱུས་མའི་ཚུལ་མཛད་པས་འགྲོ་དོན་ཆེར་མ་བྱུང་། ཇོ་བོའི་དུས་ཙམ་བྱོན། ༼༡༩༽ །ར་མོ་ཤེལ་སྨན་ནི། འཁྲུངས་ཡུལ་ཡར་ལུང་ལྷ་སྟོད་ར་མོ་སྨན་ཆུ་ཁར་གཉགས་ཀྱི་རིགས་ལས་བྱུང་། མཚན་ཡེ་ཤེས་བཟང་པོ། རྟེན་སྔགས་བཙུན་རལ་པ་ཅན། གཟིམས་ཁང་དུ་སྨན་སྒྲུབ་མཛད་པས། དེ་དང་ཉེ་བའི་བྲག་ལ་སྨན་ཤིང་སྡོང་པོ་འཁྲུངས་པ་དགུན་དུས་མེ་ཏོག་བཀྲ་བ་ཕྱི་ལོའི་བར་ཡོད། ཡར་ཀླུང་པདྨ་ཤེལ་གྱི་བྲག་སོགས་ནས་བླ་རྫོགས་ཐུགས་གསུམ་དང་། གསོ་རིག་སོགས་མང་དུ་སྤྱན་དྲངས། གྲུབ་པའི་རྫུ་འཕྲུལ་ཀྱང་མཐའ་ཡས་མོད། སྨན་སྔགས་དཀྱུས་མའི་ཚུལ་མཛད་པས་ཆོས་ཀྱི་འགྲོ་དོན་ཆེ་བར་མ་བྱུང་། ཆུ་བཅོས་དང་འབམ་བཅོས་སོགས་ད་ལྟའི་བར་དར། མངའ་བདག་ཉང་གི་དུས་ཙམ་བྱུང་། སྐུ་ཚེའང་རིང་དུ་བཞུགས། གཉགས་ལོ་ཆེན་པོའི་བྱིན་རླབས་ཀྱི་སྤྲུལ་པའོ། ༼༢༠༽ །གཏེར་ཁ་འོག་མ་གུ་རུ་ཆོས་ཀྱི་དབང་ཕྱུག་ནི། ལྷོ་བྲག་ནུབ་ལ་ཡག་ཏུ་འཁྲུངས། རུས་སྤང་རྗེ་བཙན་པོ། གཙུག་ལག་དང་མདོ་སྔགས་གཞུང་དང་ལག་ལེན་མང་དུ་
གསན་པས་སྟོན་པར་གྲགས། མཚན་ཆོས་ཀྱི་དབང་ཕྱུག །ལ་ཡག་གནམ་སྐས་ཅན་དང་། མཁར་ཆུ་ལྕགས་ཕུར་ཅན་སོགས་ནས་བླ་རྫོགས་ཐུགས་གསུམ་སྒྲུབ་སྡེ་བརྒྱད་སོགས་གཏེར་ཁ་བཅོ་བརྒྱད་ལ་དབང་བསྒྱུར། གྲུབ་པའི་གོ་འཕང་མཐོན་པོར་གཤེགས། བླ་མ་དང་ཐུགས་རྗེ་ཆེན་པོའི་བཀའ་བབས། ཕྲིན་ལས་མཐའ་ཡས། སྲས་སློབ་ཀྱི་བརྒྱུད་འཛིན་འཕེལ། མངའ་བདག་གསུང་གི་སྤྲུལ་པའོ། ༼༢༡༽ །གུ་རུ་ཇོ་ཙེ་ནི། སྐྱིད་ཤོད་སྨད་སྙེ་མདར་འཁྲུངས། རྟེན་གྲོང་སྔགས་དཀྱུས་མ། སྐྱིད་སྨད་འུ་ཤང་རྡོ་དང་ཉེ་བའི་ལྷ་རི་རྩེ་ལྔའམ་བོད་ཀྱི་རི་བོ་རྩེ་ལྔར་གྲགས་པའི་རྒྱབ་ལོགས་ནུབ་ཕྱོགས་ཟངས་ཡག་བྲག་ནས་ཟབ་གཏེར་པུསྟི་སུམ་ཅུ་ཙམ་དང་། སངས་རྒྱས་ཀྱི་རིང་བསྲེལ། ཨོ་རྒྱན་རིན་པོ་ཆེའི་ཕུར་ཆས་དང་། སྐུ་ཚབ་བརྒྱ་རྩ་བརྒྱད་སོགས་རྒྱ་ཆེར་སྤྱན་དྲངས། གཏེར་རྫས་ཕལ་ཆེར་གེ་རེ་ལྷ་པའི་རིན་ཆེན་དབང་གི་རྒྱལ་པོར་གཏད། ཆོས་ཀྱི་འགྲོ་དོན་ཆེ་བར་མ་བྱུང་། འཕགས་པ་རིན་པོ་ཆེའི་དུས་ཙམ་བྱོན་པར་གསལ། འདིའི་གཏེར་མ་ཕུར་ཆས་མང་ཞིག་སྟོད་ལུང་མདའ་དངོས་གྲུབ་ལྡིངས་སུ་ད་ལྟའང་ཡོད། ལྷ་སྲས་མུ་ཏིག་བཙན་པོའི་སྐྱེ་མཐའོ། ༼༢༢༽། ༈ །།བེ་རོའི་སྐྱེ་མཐའ་གཏེར་སྟོན་རོག་རྗེ་གླིང་པ་འགྲོ་འདུལ་རྩལ་ནི། རང་གཏེར་རྟ་ཕག་ཡིད་བཞིན་
ནོར་བུའི་ལོ་རྒྱུས་ལས། སྨོན་ལམ་ཐེབས་པའི་སྐྱེས་བུ་ནི༔ མདོ་སྨད་ཐེག་པ་དགུ་ཡི་གནས༔ གསེར་རི་ཁྲམ་ཤིང་ཤར་སྒོ་ན༔ རྟ་ལུག་སྤྲེལ་གྱི་ལོ་པ་ནི༔ ལག་མཐིལ་སྤྱན་མིག་སྟག་ཤམ་ཅན༔ པདྨའི་མིང་ཅན་བརྟུལ་ཞུགས་སྤྱོད༔ ཞེས་དང་། དུས་ཚོད་ཀྱང་། འདོན་དུས་བདུད་གྱི་རྒྱལ་པོ་ར་ཡི་མིང་༔ སྨོན་ལམ་ལོག་པའི་དམ་སྲི་ལྔ་ཡི་དཔུང་༔ བོད་ཁམས་ལྷགས་ནས་བསྟན་པ་ཐམས་ཅད་བཤིག བོད་ཁམས་སིལ་བུར་མི་རུང་སྣ་དགུ་འབྱུང་། ཞེས་གསུངས་པས་ལྗོངས་འགར་བོད་དུ་སླེབས་པའི་དུས་ཡིན་འདྲ། དེས་གནས་མཆོག་བག་འཛམ་སྒྲུབ་ཕུག་ནས་སྤྱན་དྲངས་པའི་ཐུགས་རྗེ་ཆེན་པོ་ཡིད་བཞིན་འགྲོ་འདུལ་ཞེས། འགྲོ་འདུལ་ཕྱག་བཞི་པ་ཡབ་ཡུམ། གཡས་གཡོན་དུ་སྒྲོལ་མ་དཀར་སྔོན། ཕྱོགས་བཞིར་རིགས་བཞི་སྒོ་བཞིར་མཁའ་འགྲོ་སྡེ་བཞི་བཅས་ཡོད་པའི་ལས་བྱང་། དབང་། ཁྲིད། གནས་ལུང་སོགས་ཆོས་ཚན་ཆུང་ངུ་མང་བ། རོང་དོང་ལུང་པ་ནག་པོའི་སྲིན་རྫོང་བྲག་དམར་དཀྱིལ་ནས་སྤྱན་དྲངས་པའི་རྟ་ཕག་ཡིད་བཞིན་འབར་བ་ཞེས། རྟ་མགྲིན་ཞལ་གསུམ་ཕྱག་དྲུག་ཡུམ་ཅན། ཕྱོགས་བཞིར་རིགས་བཞི། རྩིབས་བཅུར་ཁྲོ་བཅུ། སྒོ་སྐྱོང་ཕྲ་མེན་བཞི་བཅས་ཡོད་པའི་དབང་། ལས་བྱང་། རབ་གནས། སྨད་ལས་སོགས་ཚང་བར། ཚ་བ་
རྨ་བྱ་གདོང་ནས་སྤྱན་དྲངས་པའི་མགོན་པོ་ཚོགས་བདག་ཡིད་བཞིན་ནོར་བུའི་དབང་། ཕྲིན་ལས། སྨད་ལས་སོགས་ཆོས་ཚན་ཉུང་ངུ་བཅས་ཡིད་བཞིན་སྐོར་གསུམ་དུ་གྲགས་པའི་པུསྟི་ཆུང་ངུ་ཞིག་མཐོང་། ཆོས་བདག་གི་གཙོ་བོ་རྒྱལ་དབང་སྐལ་བཟང་། ཞྭ་དམར་ཆོས་ཀྱི་དོན་གྲུབ། ཀརྨ་པ་བྱང་ཆུབ་རྡོ་རྗེ་སོགས་ཡིན་ཚུལ་སྣང་ནའང་འགྲོ་དོན་ཇི་ལྟར་བྱུང་མ་ངེས་སོ། ༈ །སྟག་མོ་གཏེར་སྟོན་ན་སྲས་ཁྱུང་ཐོག་རུ་ལག་གི་ཕྱོགས་ཞིག་འཁྲུངས། རྒྱངས་ཀྱི་ཡོན་པོ་ལུང་ནས་རྫོགས་ཆེན་ཀུན་བཟང་སྙིང་ཏིག་ཞེས་ཐུགས་རྗེ་ཆེན་པོ་དང་འབྲེལ་བ། ལྷ་ལུམ་གསང་བའི་གཏེར་གནས་ནས་དབང་ཆེན་རྟ་མགྲིན། ཁྲོམས་ཟངས་བྱང་ངོས་ནས་བླ་མ་ཞི་དྲག། བསམ་ཡས་དབུ་རྩེ་ནས་རྣམ་སྲས་ཡོན་ཏན་འབྱུང་བ་སོགས་སྤྱན་དྲངས། གཏེར་ཆོས་ཉུང་དུ་དུམ་དུམ་ཞིག་པོད་གཅིག་མཐོང་། ཆོས་རྗེ་གླིང་པ་ལ་གཏེར་གྱི་བཀའ་བབས་ཡོད་ཚུལ་སོགས་ཞུས་པ་རྣམ་ཐར་དུ་གསལ་བ་དེའོ། །འདིའང་བེ་རོའི་སྐྱེ་མཐར་མཛད་སྣང་། སྤྱིར་པདྨ་བཀའ་ཐང་གི་ལུང་ཟིན་དེ་ནི་ཇོ་བོ་རྗེ་བོད་དུ་མ་བྱོན་གོང་། དབུས་གཙང་མི་བཅུས་བསྟན་པ་སྤེལ་སྐབས་གཡས་རུ་བྱང་གི་སྟོད་བོན་པོའི་བརྒྱུད་པ་ཞིག་ལ་འཁྲུངས། མཚན་བླ་དྭགས་དབོན་སྲས་ཞེས་པའང་དེའི་རྒྱུ་མཚན་དུ་སྣང་། རྩངས་ཡོན་པོ་ལུང་གི་གཙུག་
ལག་ཁང་སོགས་ནས་བན་བོན་གྱི་གཏེར་ཀ་མང་པོ་སྤྱན་དྲངས་ནའང་འགྲོ་དོན་རྒྱ་ཆེར་མ་བྱུང་བ་འདྲ། རྟེན་སྔགས་བཙུན། བེ་རོའི་སྐྱེ་མཐའ་ཆོས་བོན་འདྲེས་མར་སྤྱོད་པ་ཞིག་གོ། །ཡང་འགའ་ཞིག་གི་རིག་འཛིན་རྒོད་ལྡེམ་དབོན་སྲས་ཁྱུང་ཐོགས་སུ་ངོས་འཛིན་པ། སྤྱིར་འགལ་བ་མེད་ཀྱང་། དུས་རྟགས་དང་མི་འགྲིག་པར་སྣང་། གོང་དུ་སྨོས་པའི་སྟག་མོ་གཏེར་སྟོན་འདི་རྒྱལ་པོ་ལྷ་བཟང་གི་དུས་ཙམ་ཡིན་པས་ཕྲིན་ལས་ནི་ཆེར་མ་བྱུང་། འོན་ཀྱང་ཆོས་གླིང་པས་ཀྱང་ཆོས་གསན་མིན་མི་གསལ་ཡང་། གཏེར་སྟོན་ཡིན་རྒྱུར་མཛད་ཅིང་། རྭ་སྟོན་སོགས་ཀྱིས་ཚད་ལྡན་དུ་བཞེད་སྣང་ངོ་།། ༈ །།བོན་ཀུན་གྲོལ་བའི་བོན་གཏེར་བརྒྱ་རྩའི་གཏེར་འབྱུང་ཉི་མའི་དཀྱིལ་འཁོར་དུ་བཏགས་པ་དོན་གོང་ལྔའི་གསན་ཐོ་ལས་ལེབ་བཤུས་བྱས་པ་ཞིག་གདའ་བ་དེར། གཏེར་སྟོན་སངས་རྒྱས་བླ་མ་ནི། ལི་ཤུ། དྲན་པ་པད་འབྱུང་གསུམ་གྱི་སྨོན་ལམ་མཐའ་བཙན་ལྷོ་བལ་དུ་སངས་རྒྱས་སེམས་དཔའ་བཤེས་གཉེན་བླ་མའི་ཚུལ་དུ་བཟུང་བ་ཨ་ཙ་ར་དཀོན་མཆོག་གྲགས་པ། པད་ཀུ་རིན་ཆེན། ཉ་མོ་མགོན་པོ་གསུམ་ལ་ཨ་ཙ་ར་མི་གསུམ་དུ་གྲགས་པ་དེས་བསམ་ཡས་ནས་མདོ་མངོན་སྔགས་སེམས་ཀྱི་བོན་སྡེ་པུསྟི་སུམ་བརྒྱ་དང་བཞི་བཅུ་གདན་དྲངས། གློ་བོ་དགེ་དཀར་ནས་མདོ་
དང་། རྒྱུད་སྡེའི་སྒྲོམ་བུ་གཉིས། བསམ་ཡས་མཆོད་རྟེན་དམར་པོ་ནས་རིན་པོ་ཆེའི་སྒྲོམ་དྲུག་ལས་སྔགས་སྡེ་དང་། གསོ་སྦྱོང་སོགས་སྡེ་དྲུག་པུ་སྟེ་ལྔ་བཅུ་ཐམ་པ་སྤྱན་དྲངས་ཏེ་ཁམས་ཀྱི་དབུ་མཆོད་ཕུར་པ་འབར་ལ་གནང་ཚུལ་སྣང་། ༈ །ཁུ་ཚ་སྟོན་པ་ནི། བཀའ་ཐང་དུ་ཀུ་ཚ་སྟོན་པ། བོན་ལུགས། ཁུ་ཚ་ཟླ་འོད། ཆོས་ལུགས་གཡུ་ཐོག་ཡོན་ཏན་མགོན་པོ་སྟེ། དེས་ལྷོ་སྤ་གྲོ་གཅལ་གྱི་བྲག་ནས་གཏེར་སྒྲོམ་ཁྱད་པར་ཅན་བཞི་བཏོན་པའི། གཤང་ལས་བོན་རྒྱུ་དང་། འབྲས་བུ། ལྷུན་གྲུབ་ཀྱི་སྡེ་གསུམ། དྲིལ་བུ་ལས་གསོ་དཔྱད་བདུད་རྩིའི་བུམ་པ་དང་། གཡུ་ཐོག་སྙིང་ཏིག །བཙག་ཆ་ལས་སྨན་གྱི་རྒྱུད་བཞི། གབ་རྩེ་ལས་གཙུག་ལག་རྩིས་ཀྱི་སྐོར་རྣམས་བྱུང་། ༈ །གྲུབ་ཐོབ་དངོས་གྲུབ་ནི། བོན་ལུགས། ངོམ་རྟ་ར་ཀླུ་གོང་གི་སྐྱེ་བ་བཞེད་སྟོན་དངོས་གྲུབ་ཏུ་གྲགས། དེས་མཁོ་མཐིང་རྣམ་སྣང་ཀེའུ་ཚང་ནས་རྫོགས་ཆེན་བསྒྲགས་པ་སྐོར་གསུམ་དང་། སྒོ་སྲུང་རྟ་མགྲིན་ཐུགས་ཀ་ནས་རྫོགས་ཆེན་ཡང་རྩེ་ཀློང་ཆེན་སོགས་སྤྱན་དྲངས། ༈ །རིག་འཛིན་རྒོད་ལྡེམ་ནི། བོན་ལུགས་དབོན་སྲས་ཁྱུང་ཐོགས་སམ། དབྱིལ་སྟོན་ཧེ་རུ་ཀར་གྲགས། དེས་དབུས་སྙིང་མཛོད་སྨུག་པོ་ནས་བོན་རྫོགས་ཆེན་དང་། དྲན་པ་ཕྱི་ནང་གསང་གསུམ། གེ་ཁོད། སྟག་ལྷ་སོགས་མང་དུ་
སྤྱན་དྲངས། གྲོམ་པ་རྒྱངས་རྟ་མགྲིན་རྒྱབ་ཡོལ་ནས་ཕུར་པའི་སྐོར་སོགས་ཀྱིས་མཚོན་ཤིན་ཏུ་མང་བར་སྤྱན་དྲངས་ཏེ། འགྲོ་མགོན་བླ་མའི་རིན་པོ་ཆེ་དང་། སྦ་སྟོན་རྒྱལ་བ་ཤེས་རབ་གཉིས་ལ་གནང་སྐད། ༈ །ར་ཤག་ཆོས་འབར་རམ། བོན་ལུགས་ར་ཤག་འབུམ་རྗེའམ་གཡུང་དྲུང་འབར་གྱིས་ཉང་སྟོད་གཉན་གྱི་སེ་བོ་རི་ནས་བོན་སེམས་ཕྱོགས་དང་། མཆིམས་ཕུ་ནས་བསྟན་སྲུང་གི་བོན་སྐོར་མང་པོ་སྤྱན་དྲངས། སྲས་གཡུང་དྲུང་རྒྱལ་མཚན་སོགས་ལ་གནང་། ༈ །གཏེར་སྟོན་སུམ་ཚོགས་སམ། བོན་ལུགས་གཙང་གི་བནྡེ་གསུམ་གྱིས་ཡེར་པ་ཟླ་བ་ཕུག་ནས་བོན་ཉིད་གདལ་འབུམ་སོགས་མང་དུ་བཞེས་པ་སྟོད་ལུང་པ་ལུང་སྟོན་འོད་འབར་རམ་གཉགས་སྟོན་ལྷ་འབར་དུ་གྲགས་པ་ལ་གནང་བ་ནས་དར། ༈ །ཁུ་ཚ་ཟླ་འོད་ཀྱི་གཏེར་སློབ་འགར་སྟོན་ཁྲོ་རྒྱལ་འབུམ་གྱི་སྤ་གྲོ་སྐྱེར་ཆུ་ནས་རྫོགས་ཆེན་ལྟ་བ་ཀློང་བརྡལ་སོགས་སྤྱན་དྲངས། ༈ །གཉལ་པ་ཉི་མ་ཤེས་རབ་ལ། བོན་ལུགས་སྤྲུལ་སྐུ་གོ་ལྔ་འཕགས་པའམ། དབང་ལྡན་གཤེན་སྲས་ལྷ་རྗེར་གྲགས་པས། །ཁམས་ཀྱི་ཀེ་ཕུ་རག་ཕྲམ་བྲག་དཀར་ནས་རྣམ་རྒྱལ་རྒྱ་ནག་མའི་སྐོར་སོགས་སྤྱན་དྲངས། ༈ །གུ་རུ་ཇོ་རྩེའམ། ལི་ཤུའི་སྤྲུལ་པ་གུ་རུ་སྣོན་རྩེས་རྟ་ནག་དུང་བོར་བྲག་ནས་ཕ་རྒྱུད་སྡོང་པོ་དགུ་འདུས་
སོགས་མང་དུ་སྤྱན་དྲངས། ༈ །རྡོ་རྗེ་གླིང་པས་སྤ་གྲོ་སྟག་ཚང་ནས་རྫོགས་ཆེན་གསེར་ཐུར་དང་། ཚེ་དབང་བོད་ཡུལ་མ། དྲན་པ་ཡབ་སྲས་ཀྱི་སྐོར་སོགས་སྤྱན་དྲངས། ༈ །སྤྲུལ་སྐུ་བསྟན་གཉིས་གླིང་པས་ཚེ་སྤུངས་གཡུང་དྲུང་གི་ཤར་ནས་རྫོགས་ཆེན་གསེར་ཞུན་སྐོར་སོགས་སྤྱན་དྲངས་ཞེས་སྣང་ཞིང་། ཕྱིས་ཀྱི་བདུད་འདུལ། ཀློང་གསལ། རིག་འཛིན་ཆོས་རྗེ་གླིང་པ་སོགས་བོན་ལུགས་ཀྱི་གཏེར་སྟོན་འགའ་ལའང་བོན་གཏེར་ཅི་རིགས་ཡོད་སྣང་། བོན་སངས་གླིང་གི་ཚེ་སྒྲུབ་བེ་རོའི་གོང་ཁུགས་དང་། ཀུན་གྲོལ་གྱི་རྩ་རླུང་མཁའ་འགྲོ་གསང་མཛོད་སོགས་བོན་གཏེར་རྣམས་ལ་བོན་ཆོས་མང་པོ་དང་། སྤྱིར་ཡང་བོན་དུ་མིང་བཏགས་པ་ཙམ་ལས། དོན་ཆོས་སུ་མངོན་པའང་མང་མོད། མཐའ་གཅིག་ཏུ་འཐད་ལྡན་ཡིན་མིན་ནི་ཁ་ཚོན་སུས་ཀྱང་གཅོད་དཀའ་བར་གདའ་བས་རེ་ཞིག་དབུ་མའི་ལམ་དུ་བཞག་ན་ལེགས་པར་མངོན་ནོ།། ༈ །།སངས་རྒྱས་བླ་མའི་རྩ་༡གསུམ་འདི། གློ་བོ་དགེ་དཀར་སོགས་ནས་བླ་རྫོགས་ཐུགས་གསུམ་མདོ་དང་གཏོ་ཆོས་རྒྱ་ཆེར་སྤྱན་དྲངས། བསྟན་པ་ཕྱི་དར་གྱི་ཐོག་མར་བྱུང་། དེའི་སྐྱེ་བ་རྒྱ་༢ལོ་ཙའི་བླ་མ་བསྟན་གཉིས་སྐོར་གསུམ། དེའི་སྐྱེ་བ་ཉི་མ་སེང་གེའི་བླ་རྫོགས་ཐུགས་གསུམ་༣འདུས་པ། བཻ་རོའི་སྤྲུལ་པ་སྣ་༤ནམ་པའི་གླང་ཐང་སྒྲོལ་མའི་རྟེན་
འབྲེལ་སྙིང་པོ་འདུས་པ། ཞང་ཕྲོམ་ཚེ་༥བདག་སོགས། གཡུ་རུ་སྟོན་ཤཱཀ་༦ཅེས་བསྔགས་པ་ཤཱཀྱ་འོད་ཀྱི་སྐྱེ་མཐའི་གསང་བདག་རྡོ་རྗེ་མེ་འབར། བེ་རོའི་སྐྱེ་མཐའ་བོན་པོ་བྲག་༧ཚལ་གྱི་རྫོགས་ཆེན་གུ་རུ་བཞི། བཻ་རོའི་སྐྱེ་མཐའ་སྙེ་མོ་ཞུ་ཡས་གནོད་སྦྱིན་འབར་༨གྱི་སྐུ་སྤྱི་ཏི། གསུམ་ཉི་ཟླ་འབར་བ། གྲུབ་ཐོབ་དངོས་གྲུབ་འབར་གྱི་རྒྱལ་པོ་བཀའ་འབུམ་སོགས། གཙུག་ལག་༡༠དཔལ་དགེའི་དྲག་སྔགས་ཐེམ་ཡིག་བདུན་པ། སྐུ་༡༡ས་སྟོན་པའི་རྩ་གསུམ་སྤྱི་སྤུངས། བོན་པོ་ལྷ་འབུམ་གྱི་མ་རྒྱུད་བླ་མ་བདེ་ཆེན་ལམ་༡༢ཁྱེར། ཁྱུང་པོ་དཔལ་༡༣དགེའི་མོན་བུམ་ཐང་གི་རྫོགས་ཆེན་ཟབ་མོ་བཅུད་དྲིལ། ཤ་མི་རྡོར་རྒྱལ་༡༤གྱི་ཧས་པོ་རིའི་གཏེར་མ་དགོངས་དོན་ཟབ་ཏིག་སྙིང་པོ། ལྡང་༡༥མའི་བི་མ་སྙིང་ཐིག །གཙང་གི་རུ་མཚམས། གྲྭ་༡༦པའི་རྒྱུད་བཞི་སོགས། ར་༡༧ཤག་གི་སྒང་ཤར་སོགས། ཉང་གི་བཀའ་༡༨བརྒྱད་སོགས། དཔོན་༡༩གསས་ཁྱུང་ཐོགས་གཡུང་དྲུང་འབར་ལྷ་བཙུན་བྱང་ཆུབ་འོད་ཀྱི་དུས་སུ་ལ་སྟོད་དུ་བྱུང་། གྲམ་པ་རྒྱང་ནས་བཏོན་པའི་ཡཀཱ་ཀཱི་ལ་ཡ། ཡར་སྟོད་ར་མོ་ཤེལ་༢༠སྨན་ཡེ་ཤེས་བཟང་པོའི་རྡོ་རྗེ་བདུད་རྩི། ཆོས་ཀྱི་དབང་༢༡ཕྱུག་གི་གསང་རྫོགས་སོགས། སྐྱེ་སྨད་སྙེ་མདའ་བ་གུ་༢༣རུ་ཇོ་ཚེའི། ཟངས་ཡག་བྲག་ནས་
རྫོགས་ཆེན་པདྨ་སྙིང་ཏིག་སོགས། རྒྱ་པདྨ་མཆོག་དབྱངས་སྤྲུལ་པ། དབང་ཕྱུག་གིས་ཨེ་གངས་བར་ཕུག་མོ་ཆེ་ནས་བླ་མ་བདེ་མཆོག་དང་མགོན་༢༣པོ་སོགས། ཡར་༢༤འབྲོག་དོར་དེ་བན་རྒྱ་མཚོ། །འབྲོག་གུ་ཏིག་སྤ་མ་གོང་ནས་བླ་སྒྲུབ་དང་རྫོགས་ཆེན་ཐོན། རྡོར་གླིང་དང་དུས་མཉམ། ར་ཤི་སྟོན་༢༥པ་གཉལ་དུ་བྱུང་། ཆོས་བོན་སྨན་རྩིས་སོགས་དྲངས། གཏེར་གནས་རྡོ་སྟོད་གློ་བོ་དང་བོད་མཚམས། ཡར་འབྲོག་༢༦རྫ་རོང་ཧྲིའི་སྨན་པ་ཉི་འོད་གསལ། ལྷོ་དང་བོད་ཀྱི་བར་རྫ་རོང་དྷིའམ་རོང་དྷིའི་རྫ་ནས་རྫོགས་ཆེན་དང་གསོ་རིག །གྲ་སྒོམ་ཆོས་ཉིད་རྡོ་རྗེ། གཡོན་རུ་གྲ། བུ་ཚལ་གསེར་ཁང་ནས་རྒྱལ་པོ་ལས་རྒྱུད་དང་པེ་ཀར་ཨར་སྟོང་སོགས་དྲངས། དྲག་པོ་ཡེ་ཤེས་མེ་འབར་ཀྱང་ངོ་། །ཨོ་རྒྱན་གླིང་པ་ལས་ཅུང་སྔ་ཙམ། གཡག་ཕྱིར་སྔོན་མོ་བེ་རོའི་སྐྱེ་༢༨མཐའ། འོ་ཡུག་གཡག་ལྕེ་ནས་བེ་རོའི་ཆོས་བོན་སྐོར་མང་། སྒྲོལ་མ་འཇིགས་པ་ཀུན་སེལ་ཀྱང་ངོ་། །གྲུམ་༢༩དང་མཁར་ནག་གི་བློ་དང་གྲུམ་དང་སྤ་གྲོའི་སྤོལ་བདག་ནག་པོ་མཁར་བའི་ས་སྤ་གྲོ་སྐྱེར་ཆུའི་ལྷ་ཁང་ཁྱུང་རུམ་སྨུག་པོའི་མཆུ་ནས་ཤྲཱི་སིདྷའི་གཟའ་རྒོད་དྲག་སྔགས་བར་སྣང་ཧོམ་ཁུང་མ་དྲངས། གསང་བདག་དྲེགས་པ་ཟིལ་གནོན་ཀྱང་ངོ་། །ལྷ་༣༠བཙུན་སྔོན་མོའི་འུ་ཤང་རྡོ་ནས་ཞི་བྱེད་སྐོར་བདུན། པ་
ཚབ་ལོ་ཙཱ་བ་དུས་མཉམ། ཉི་མ་༣༡གྲགས་པས་གཤིན་རྗེ་ཟླ་གསང་དང་སྦྲེལ་ལྷག་སོགས། རིན་ཆེན་༣༢ཚུལ་རྡོར་གྱི་མཁའ་འགྲོ་སྙིང་ཏིག་སོགས། མཆོག་དབྱངས་སྤྲུལ་པ་ཚེ་བརྟན་རྒྱལ་མཚན་གྱིས་མོན་ཆུ་མོ་ཕུག་ནས་གུ་རུ་ཞི་དྲག་སོགས། རིན་ཆེན་གླིང་པ་སྔ་མ་རྒྱ་གར་མཁས་པ་པཎྜི་ཏ་ཤེས་རབ་འབྱུང་གནས་སྐྱེ་བ། ཀོ་རོ་བྲག་ནས་དམ་ཆོས་ཁྱད་པར་ལྔ་ལྡན་སོགས་ཉེར་ལྔ། རྒྱ་༧གར་ཕ་བོང་ནག་པོ་ནས་རྫོགས་ཆེན་ཆིག་ཆོད་ཀུན་གྲོལ་སོགས་བཞེས། ཨོ་རྒྱན་༣༥གླིང་པས་ཤེལ་བྲག་པདྨ་བརྩེགས་པ་ནས་བཀའ་འདུས་སོགས་བཞེས་སོ།། ༈ །།གནུབས་ཆེན་སངས་རྒྱས་ཡེ་ཤེས་ཀྱི་སྐྱེ་མཐའ་རྩ་གསུམ་གཏེར་བདག་གླིང་པའམ། གར་དབང་གནམ་ལྕགས་རྡོ་རྗེ་ཞེས་གྲགས་པ་ནི། ལྷོ་ཟླ་ནང་ཆེན་གྱི་སའི་ཆ་གནས་ཆེན་ཇོ་བོ་གཟེ་རྒྱལ་དང་། སྐུ་རྒྱལ་ཤེ་ནེ་སོགས་ཀྱི་འདབས་ནགས་རོང་ཞེས་པར་ཡབ་འབྲུ་ཆེན་རླངས་ཀྱི་རིགས་བཀྲ་ཤིས་དང་། ཡུམ་དགེ་ལེགས་མ་གཉིས་ཀྱི་སྲས་སུ་རབ་བྱུང་བཅུ་གཅིག་པའི་ནང་འཁྲུངས། ལོ་རྟ་གསལ་བར་མི་སྣང་། འཁྲུངས་རྟགས་དང་གཟིགས་སྣང་སོགས་ངོ་མཚར་ཆེ་བ་མང་དུ་བྱུང་། ཅུང་ཟད་ནར་སོན་པ་ན་ནང་ཆེན་དགེ་ལུགས་གྲྭ་ཚང་ཀ་མདའ་ཆོས་རྗེ་རྔོག་བློ་ལྡན་ཤེས་རབ་ཀྱི་སྤྲུལ་པར་གྲགས་པ་ཞིག་ལས་སྐྱབས་
གསུམ་འཛིན་པའི་སྡོམ་པ་བཞེས་མཚན་བཀྲ་ཤིས་ཕུན་ཚོགས་གསོལ། ནས་བླ་བྲང་དུ་ཆོས་སྒོར་ཞུགས། འདོན་ཆ་སོགས་ཅི་རིགས་ཐུགས་ལ་བཟུང་། སྐུ་ན་ཕྲ་མོའི་སྐབས་གཏེར་ཆེན་སྟག་ཤམ་པ་ནང་ཆེན་སྒར་དུ་བྱོན་པར་ཆོས་འབྲེལ་ཙམ་གསན། དེ་མ་གཏོགས་བླ་མ་གཞན་སུ་ལའང་ཆོས་བཀའ་འདྲ་གསན་ཚུལ་མི་སྣང་། ཀུན་སྤྱོད་ཤིན་ཏུ་འཚུབས་པས་གྲྭ་རིགས་རྣམས་དང་མཐུན་དཀར་ཙམ་བྱུང་། བར་སྐབས་བླ་བྲང་གི་གཏེ་དཔོན་འདྲའང་མཛད། ཆོས་རྗེ་བོད་དུ་འབུལ་སྐྱེལ་བྱོན་སྐབས་ཞབས་ཕྱིར་བཀྲ་ཤིས། འདི་སྐབས་པད་དཀར་འཛིན་པ་ཡེ་ཤེས་རྒྱ་མཚོ་དང་རྒྱལ་པོ་ལྷ་བཟང་མཆོད་ཡོན་དུས་ཡིན་འདྲ། ཐུགས་རབ་གསལ་བས་བླ་མས་རི་བོ་དགེ་ལྡན་དུ་མཚན་ཉིད་སྦྱང་བར་བསྐུལ་ནའང་། དུས་བབས་ཟབ་གཏེར་གྱི་ལུང་བསྟན་བྱུང་ནས་མ་བཞུགས་པར་ཁམས་སུ་བྱོན། སླར་འབྲི་གུང་དུ་བྱོན་ནས་དཀོན་མཆོག་ཕྲིན་ལས་བཟང་པོ་རྩ་བའི་བླ་མར་བསྟེན། གྲྭ་ཚང་དུ་ལོ་གསུམ་ཙམ་བཞུགས། བཀའ་ཆོས་ཅི་རིགས་དང་། ལྷག་པར་རླུང་ཛ་པཱིར་སྙན་བརྒྱུད་ཀྱི་སྐོར་ཞིབ་ནན་ཏུ་གསན་པས་ཉམས་རྟོགས་ཁོང་ནས་བརྡོལ། རྫུ་འཕྲུལ་དང་མངོན་ཤེས་རྩོལ་མེད་དུ་ཤར། ལུང་བསྟན་དུས་བབས་བཞིན་རིག་པ་བརྟུལ་ཞུགས་ཀྱི་སྤྱོད་པ་དང་། རླུང་སེམས་ལས་སུ་རུང་བའི་རྫུ་
འཕྲུལ་ལ་བརྟེན་ནས་གནས་ཆེན་མང་པོ་ཐོགས་མེད་དུ་ཉུལ་བས་ཁ་བྱང་ལུང་བསྟན་ལྟར། གཞོ་སྟོད་ཏི་སྒྲོ་མཁའ་འགྲོའི་ཚོགས་ཁང་ཆེན་མོ་ནས། བླ་མའི་ཐུགས་སྒྲུབ་བདེ་གཤེགས་ཀུན་འདུས་བསམ་པ་ལྷུན་གྲུབ་མའི་སྐོར་ཐོག་མར་བཞེས། མནལ་ལམ་གྱི་སྣང་ཆར་པདྨ་འོད་དུ་ཕེབས་པའི་གཟིགས་སྣང་འབྱམས་ཀླས་པ་བྱུང་། དེ་ནས་མོན་ཤ་འུག་སྟག་སྒོ། ཙཱ་རི་ཟིལ་ཆེན་ཕུག །ཀོང་གནས་སོགས་ནས་ཟབ་གཏེར་མང་དུ་བཞེས། འབྲི་གུང་པ་དཀོན་མཆོག་ཕྲིན་ལས་བཟང་པོ་དགོངས་པ་གཞན་དོན་དུ་གཏོད་པར་རིག་ནས་མྱུར་བར་བྱོན་ཀྱང་ལམ་བསྟབས་བདེ་མིན་གྱིས་ཅུང་ཟད་འགོར་བས་བླ་མ་ཞིང་གཤེགས་ནས་སྐུ་གདུང་ཞུགས་འབུལ་གྱི་སྐབས་ཙམ་ཕེབས། འདི་བོད་དུ་ལྗང་འགར་བྱུང་སྐབས་ཡིན་འདུག །དེ་ནས་ཁམས་སུ་བྱོན། ཙཱ་རི་གཉིས་པ་གཟེ་རྒྱལ་གྱི་གནས་སྒོ་ཕྱེ་བས་མཚོན་གནས་གཏེར་གྱི་སྒོའང་མང་དུ་ཕྱེས། ནང་ཆེན་རྒྱལ་པོ་སོགས་དང་མཆོད་ཡོན་འབྲེལ་ཞིང་དེ་ཕྱོགས་ཡས་མན་དུ་ཕྲིན་ལས་ཅུང་ཟད་རྒྱས། ཁྱད་པར་སྦས་གནས་སྤུ་བོ་ཕྱོགས་སུ་བྱོན་པས་ཀ་གནམ་སྡེ་པ་དང་མཆོད་ཡོན་ལེགས་པར་འབྲེལ་ཞིང་། སྤུ་བོ་ཡེ་གོང་ཁྲིམས་གཟིགས་རྔམས་ཆེན་སྒང་དུ་བདུད་འདུལ་སྔགས་པའི་གླིང་ཞེས་འདུས་སྡེ་ཆུང་ངུའང་བཏབ། འདིའི་ཤར་ཕྱོགས་རྟ་
མགྲིན་གནས་ཆེན་དགའ་བ་ལུང་། ལྷོར་གཤིན་རྗེའི་གནས་རྒྱ་ལ་སེང་གཏམས། ནུབ་ཏུ་མཁའ་འགྲོའི་གནས་བོང་རི། བྱང་དུ་བཀའ་བརྒྱད་གནས་རྨ་ཀུང་ལུང་སོགས་ཡོད་པར་གསུངས། རྔམས་ཆེན་རོང་ནས་བཀའ་བརྒྱད་གསང་བ་ཟིལ་གནོན་གྱི་གཏེར་ཁ་ཆེན་པོ་བཞེས་པས་མཚོན། དེ་ཕྱོགས་ཡས་མན་ནས་ཀྱང་ཟབ་གཏེར་མང་དུ་བྱུང་། ཕལ་ཆེར་གཏན་ལ་ཕབ་ནས་དབང་ལུང་ཁྲིད་གསུམ་འཆད་སྤེལ་སོགས་ཀྱང་མཛད། སླར་རང་གནས་སུ་བྱོན། འདི་ཡན་གྱི་རྣམ་ཐར་མེ་ཤེལ་གསལ་བའི་ཕྲེང་བ་ཞལ་གསུངས་ཚིགས་བཅད་མ་ལྡེབ་སུམ་བརྒྱ་ལྷག་ཙམ་ཡོད་རུང་། བར་སྐབས་ཀྱི་ཞལ་གཟིགས་ལུང་བསྟན་གསུང་མགུར་སོགས་ཧ་ཅང་མང་དྲགས་པས་རྣམ་ཐར་དངོས་གཞི་དེ་ཙམ་གསལ་པོ་ཞིག་མི་སྣང་། མཇུག་གི་ཁ་སྐོང་རྣམ་ཐར་འདྲ་ནི་མེད་སྐད། སྤུ་བོར་བྱོན་སྐབས་དྭགས་ལ་སྒམ་པོའི་ཞབས་དྲུང་བྱོན་ནས་ཆོས་བདག་ཏུ་མངའ་གསོལ་ཚུལ་སྣང་བ། བཟང་པོ་རྡོ་རྗེ་སྤྲུལ་སྐུའི་དུས་ཡིན་འདྲ། མཚན་གྱི་རྣམ་གྲངས་པདྨ་གཏེར་བདག་གླིང་པ། ཀརྨ་ལས་འབྲེལ་གླིང་པ། རིག་འཛིན་རྩ་གསུམ་གླིང་པ། གར་དབང་གནམ་ལྕགས་རྡོ་རྗེ། སྔགས་འཆང་ཧཱུྃ་ནག་དྲག་རྩལ། རིག་འཛིན་བདུད་འདུལ་རྡོ་རྗེ། གཏེར་ཆེན་པདྨ་སྨིན་གྲོལ་སོགས་སུ་གྲགས། མཆིམས་ཕུར་ཕེབས་སྐབས་
སྐྱིད་མོ་གྲོང་ནས་རིགས་ལྡན་ཞིག་ལས་རྒྱར་བཞེས་པའི་སྲས་རིག་འཛིན་ཐུགས་མཆོག་རྡོ་རྗེ་འཁྲུངས་སྐད། གཏེར་ཆོས་ཀྱི་རྣམ་གྲངས་རྗེ་ཉིད་སྤུ་བོར་བཞུགས་སྐབས་ཚིགས་སུ་བཅད་པ། དེ་སྐབས་རྒྱུད་སྡེ་དཔེར་འཁོད་ཀ་ཐོ་ནི། ཚེ་སྒྲུབ་རྣམ་བཞི་ཡང་ཕུར་དམར་ནག་དང་། །དྲག་པོ་རིགས་གསུམ་ཐུགས་རྗེ་ཆེན་པོ་དང་། །མཁའ་འགྲོ་སེང་གདོང་ཞིང་སྐྱོང་སྡེ་ཚན་གཉིས། །ཡེ་ཤེས་མགོན་པོ་སྡེ་ལྔ་ལ་སོགས་དང་། །དྲེགས་པ་འབུམ་ཏིག་དང་བཅས་མ་ལུས་ཀྱི། །སྔ་ཕྱིར་གདན་དྲངས་དགོས་རིམ་ཁོལ་ཕྱུང་ལ། །མེ་རྟ་ཡན་ཆད་ཤོག་སེར་བུ་དཔེ་ནི། །པོ་ཏིའི་སྡེ་ལ་བཅུ་བཞི་ལྷག་ཙམ་བྱུང་། །ཞེས་གསུངས་པ་ནི་རགས་རིམ་ཙམ་ཞིག་ཡིན་སྣང་བ་ལས་གཏེར་ཆོས་རྒྱ་ཆེར་བཞུགས་སྐད། དེང་སང་དབང་ལུང་གི་རྒྱུན་ཡོད་པ་བསམ་ཡས་མཆིམས་ཕུ་བྲག་དམར་ཀེའུ་ཚང་ནས་སྤྱན་དྲངས་པའི་བླ་མའི་ཐུགས་སྒྲུབ་བདེ་གཤེགས་ཀུན་འདུས་ཞེས་གསོལ་འདེབས་བསམ་པ་ལྷུན་གྲུབ་པའི་སྤྱི་སྒྲུབ་དང་། སྒོས་སྒྲུབ་སོ་སོའི་དབང་། བསྐྱེད་རྫོགས་ལས་ཚོགས་དང་བཅས་པ་པུསྟི་གཉིས། གཞོ་སྟོད་ཏི་སྒྲོ་ཚོགས་ཁང་ཆེན་མོ་ནས་སྤྱན་དྲངས་པ་གུ་རུ་དྲག་པོ་ཡང་ཟབ་པདྨ་ཁྲག་འཐུང་ཞེས་རྒྱུད་ལུང་མན་ངག་དང་འབྲེལ་པ་དབང་བཞིའི་ཟབ་ཁྲིད་ཁྱད་འཕགས་ལས་ཚོགས་མཐའ་རྒྱས་བཅས་
པུསྟི་གཉིས། སྤུ་བོ་ཁྲིམས་༢གཟིགས་རྔམས་ཆེན་རོང་པདྨའི་སྦས་ཚལ་ནས་སྤྱན་དྲངས་པའི་ཡི་དམ་བཀའ་བརྒྱད་ཆེན་མོ་གསང་བ་ཟིལ་གནོན་རྒྱུད་སྡེ་བཅུ་བཞི་སོགས་རྒྱུད་ལུང་མན་ངག་ཕྲིན་ལས་དང་བཅས་པ་ཤིན་ཏུ་རྒྱས་པར་བཞུགས་པའི་པུསྟི་བདུན། མོན་ཤ་འུག་༢སྟག་སྒོ་ནས་སྤྱན་དྲངས་པའི་ཡང་ཕུར་གྭའུ་དམར་ནག་ཤིན་ཏུ་ཟབ་པ་པུསྟི་གཅིག །ཙཱ་རི་ཟིལ་ཆེན་གསང་ཕུག་ནས་སྤྱན་དྲངས་པའི་ཚེ་སྒྲུབ་འཆི་བདག་ཟིལ་གནོན། ལྷོ་ཝ་ཞབས་བྲག་རི་ཚེ་བུམ་འདྲ་བ་ནས་སྤྱན་དྲངས་པའི་ཚེ་སྒྲུབ་རྡོ་རྗེའི་གོ་ཁྲབ། རྡོ་ཤལ་སྨད་ཇོ་བོ་སྒ་རྒྱལ་རིན་ཆེན་སྤུངས་པའི་མགུལ་ནས་སྤྱན་དྲངས་པའི་ཚེ་སྒྲུབ་པདྨ་གསང་ཐིག །ཇོ་ཤུལ་སྟོད་སྨད་མཚམས་མཁའ་འགྲོ་སྙིང་ཕུག་ནས་སྤྱན་དྲངས་པའི་ཚེ་སྒྲུབ་ལྕགས་ཀྱི་རྒྱ་མདུད་འཆི་བསླུ་སོགས་ལས་ཚོགས་མང་བར་བཞུགས་པ་བཅས་ཚེ་སྒྲུབ་སྐོར་བཞི་ལ་པུསྟི་གཅིག་ཙམ། སྦས་ཡུལ་བྲག་གད་པདྨ་ཤེལ་ཕུག་ནས་སྤྱན་དྲངས་པའི་ཐུགས་རྗེ་ཆེན་པོ་འཁོར་འདས་ཟིལ་གནོན་པུསྟི་གཅིག །སླུ་བོ་དར་སྣ་ཕ་ཝཾ་རྟ་མགོ་ནས་གདན་དྲངས་པའི་རྟ་མཆོག་རོལ་པ་ཉི་མའི་སྙིང་པོ། རྟ་མགྲིན་ཁྲོ་རྒྱལ་སྟོབས་འདུས། གསེར་གླིང་རི་ཆེའི་ནོར་བུའི་བང་མཛོད་ནས་གདན་དྲངས་པའི་རྡོར་སེམས་ཡེ་ཤེས་འོད་ཀྱི་དྲ་བའི་སྐོར། ལྷོ་ཟླ་ལྕི་རྒྱུད་སྨུག་པོ་ལྷ་རྩེ་ནས་གདན་
དྲངས་པའི་ཕྱག་རྡོར་དྲེགས་པ་ཟིལ་གནོན། དབང་ཆེན་གསང་བ་ཐ་ནག་གི་སེར་སྲུང་སྤུ་གྲི་དམར་པོ། འབྲོང་རྒྱལ་གནོད་སྦྱིན་གྱི་གསོལ་མཆོད། དུད་སོལ་ལྷ་མོའི་མཆོད་བསྟོད། སྦུ་བོ་འདུང་ཆུའི་རྒྱལ་བ་བྱམས་པའི་སྙན་ནས་གདན་དྲངས་པའི་དབང་དྲག་པདྨ་ཡང་གསང་། རྡོ་རྗེ་གྲོ་ལོད་ཀྱི་སྐོར་ལེ་ཚན་གསུམ་བཅས་འདི་རིགས་པུསྟི་གཅིག་ཙམ། ཁྲོམ་གཟིགས་རྔམས་ཆེན་རོང་ནས་སྤྱན་དྲངས་པའི་འཇམ་དཔལ་གཤིན་རྗེ་གཤེད་རྡོ་རྗེ་འཇིགས་བྱེད་དུག་རི་མེ་འབར་གྱི་སྐོར་པུ་སྟི་གཅིག །གཞོ་སྟོད་ཏི་སྒྲོ་བྲག་དཀར་མཁའ་འགྲོ་ཀེ་རི་གསང་མཛོད་ནས་གདན་དྲངས་པའི་གསང་བ་ཌཱ་ཀི་ཡིད་བཞིན་ནོར་མཆོག་གི་ལས་ཚོགས་དང་བཅས་པ་པུསྟི་གཅིག །ཇོ་བོ་གཟེ་རྒྱལ་གྱི་གངས་ཁྲོད་དམར་ནག་རཀྟའི་མཚོ་ནས་སྤྱན་དྲངས་པའི་མཁའ་འགྲོ་བདུད་འདུལ་མའི་སྐོར་པུསྟི་གཅིག་ཙམ། །དཔལ་ཙཱ་རི་ནས་སྤྱན་དྲངས་པའི་ཞིང་སྐྱོང་མགོན་པོའི་སྐོར་པུསྟི་ཕྱེད་ཙམ། མདོ་སྨད་ཆབ་མདོ་ལ་གོང་དགེ་བསྙེན་ཕོ་བྲང་ནས་གདན་དྲངས་པའི་བླ་མའི་ནོར་སྒྲུབ་པདྨ་རྒྱལ་པོའི་སྐོར་རྒྱས་པ་དང་། །གསེར་གླིང་ནོར་བུའི་བང་མཛོད་དམ། བྲག་ནག་བདུད་རྫོང་ནས་གདན་དྲངས་པའི་དུ་རུ་ཀ་སོགས་མཐའ་དམག་ཟློག་བྱེད་བླ་མ་དྲག་པོའི་ཆོས་སྐོར་ཆོག་སྒྲིག་མང་བ་དང་བཅས་འདི་རིགས་ལའང་པུསྟི་
རེ་རེ་ཙམ་ཡོད་པ་བཅས་ཁྱོན་དྲིལ་གཏེར་ཆོས་པུསྟི་སྟབས་བདེ་ཅན་བཅོ་བརྒྱད་ཙམ་ཡོད་སྣང་། ཤོག་སེར་འབེབས་མ་གྲུབ་པ་དང་། དཔེ་རྒྱུན་ཡོད་ཀྱང་དབང་ལུང་གི་རྒྱུན་མི་བཞུགས་པའང་མང་དུ་ཡོད་འདྲ།། ༈ །།ཆོས་དབང་རིན་པོ་ཆེའི་གཏེར་བྱོན་མཁའ་རིའི་ཞུས་ལན་ལས། གཏམ་ཤུལ་རྡོ་འཇོག་བྱ་བ་རུ༔ ཐུགས་རྗེ་ཆེན་པོ་འཇམ་དཔལ་གྱི༔ སྤྲུལ་པ་མྱང་རལ་བྱ་བ་འབྱུང་༔ དེ་སྲས་སྤྱན་རས་གཟིགས་ཁྲོ་བོ༔ སྤྲུལ་པ་ནམ་མཁའ་དཔལ་ཅེས་འབྱུང་༔ ཞེས་དང་། ལྡན་སྟོད་རྩང་ལུ་རྩོང་གྲོང་དུ༔ རྣལ་འབྱོར་དབང་ཕྱུག་རྡོ་རྗེའི་སྲས༔ རིན་ཆེན་དཔལ་ཅེས་བྱ་བ་འབྱུང་༔ དང་། གཞན་ཡང་འཕགས་པའི་སྤྲུལ་སྐུ་ནི༔ ནེའུ་རོང་ཞེས་བྱ་བ་རུ༔ ཆོས་ཀྱི་བཟང་པོ་བྱ་བ་འབྱུང་༔ དང་། འཕགས་པ་ནོར་བུ་འཛིན་སྤྲུལ་པ༔ རྒྱ་གཙང་པ་རྒྱ་རས། གྲོང་ཞེས་བྱའི་ལུང་གསུམ་མདོར༔ ལྟས་དང་བཅས་ཏེ་འབྱུང་བར་འགྱུར༔ དང་། དེ་ཡི་བུ་སློབ་སྟག་ལོ་པས༔ ང་ཡི་བརྒྱུད་ཀྱང་ཡོངས་སུ་འཛིན༔ དང་། འདི་ནས་ལོ་ནི་ལྔ་བརྒྱ་ན༔ བུམ་ཐང་སྟོད་དུ་དམ་ཆོས་དརཿ དང་། མ་དྲོས་བྱེ་མ་ཞེས་བྱ་སྟེ་གསེར་དང་༔ ཨ་ཀྲོ་དཀར་པོ་ཞེས་བྱ་སྟེ་དངུལ་དང་སྦྱར་བས་སྐུ་ཚབ་སོར་བཞི་བཞེངས༔ ཞེས་སྣང་། ༈ །བློན་པོ་བཀའ་ཐང་ལས་སྔགས་ཀྱི་བདག་པོ་སུམ་ཅུ་རྩ་གསུམ་ལུང་
བསྟན་པའི་སྐབས། ཤཱཀྱའི་ཞིང་ཁམས་དབུ་རུ་ལམ་ཞེས་པརཿ གསང་སྔགས་རྣལ་འབྱོར་བདེ་བ་ཞེས་པ་འབྱུང་༔ ཐེག་ཆེན་ཀློང་ཡངས་ནམ་མཁའི་རྣལ་འབྱོར་པ༔ སོགས་ནས། བདེ་གཤེགས་ཀུན་བཟང་རྒྱལ་བའི་མཆོག་ཅེས་འབྱུང་༔ དང་། ཤཱཀྱའི་ཞིང་ཁམས་མདོ་སྨད་ཅེས་པ་ནས༔ གསང་སྔགས་ངེས་དོན་སྤྱོད་པའི་རྣལ་འབྱོར་པ༔ སྔགས་བདག་སྒོམ་པ་ཞི་འོད་ཅེས་པ་འབྱུང་༔ སོགས་ནས། རྒྱལ་བ་བྱང་ཆུབ་ཡེ་ཤེས་བློ་གྲོས་འབྱུང་༔ དང་། བློན་པོ་བཀའ་ཡི་ཐང་ཡིག་ལས། ལྭ་བ་པའི་སྤྲུལ་པ་སྐ་བ་དཔལ་བརྩེགས་ས་བདུན་གྱི་བྱང་སེམས་སུ་གསུངས༔ ལོ་ཙཱ་ཡོན་ཏན་སྙིང་པོ་འདི༔ གངས་དཀར་སྙེ་མོ་རབ་སྔས་སུ༔ ཕ་མ་སྟག་སྤྲེལ་ཁྱུང་མགོའི་བུ༔ དགེ་བཤེས་ཁྱུང་པོ་ཛོ་ཀི་རྗེ༔ སོགས་ནས། ལོ་ནི་བརྒྱ་དང་ལྔ་བཅུ་བཞུགས༔ དེ་ནས་ཞིང་ཁམས་བདེ་ཆེན་འགྲོ༔ དང་། ལོ་ཙཱ་རྡོ་རྗེ་བདུད་འཇོམས་འདི༔ མ་འོངས་སྨན་ལུང་ཤཱཀ་གཞོན་ཞེས༔ གསང་སྔགས་བསྟན་པ་རྒྱས་བྱེད་འབྱུང་༔ དང་་། ཅོག་རོ་ཀླུ་ཡི་རྒྱལ་མཚན་ནི༔ མ་འོངས་དབུ་རུ་ཚ་བ་གྲུ༔ བརྩོན་འགྲུས་མཚན་ཅན་བྱང་ཆུབ་སེམས༔ འཁོར་ལོས་སྒྱུར་བའི་ཞང་རིགས་འབྱུང་༔ སོགས། འཇའ་ཚོན་སྙིང་པོའི་གཏེར་ལུང་ལས། གཞན་ཡང་བེ་རོའི་སྤྲུལ་པ་ས་པཎ་སོགས༔ འཇམ་
དབྱངས་སྤྲུལ་པ་བདུན་བརྒྱུད་བྱོན་པར་འགྱུར༔ ལམ་འབྲས་ཆོས་ཀྱིས་སྐྱེ་འགྲོའི་མུན་པ་སེལ༔ སྤྱན་རས་གཟིགས་སྤྲུལ་ཐོགས་མེད་ཅེས་བྱ་དང་༔ བཛྲ་པ་ཎིའི་སྤྲུལ་པ་ནམ་མཁའི་མིང་༔ རིགས་གསུམ་སྤྲུལ་པས་བོད་ཁམས་བདེ་ལ་བཀོད༔ ཅེས་སོ།། ༈ །།རབ་འབྱམས་པ་ཆོས་གྲགས་ཟུར་ཆུང་ཤེས་རབ་གྲགས་ཀྱི་རྣམ་འཕྲུལ་དང་། དེའི་སྐུ་སྐྱེ་བ་དེ་མ་ཐག་པའི་མཁན་ཆེན་ཨོ་ཌི་ཡཱ་ན་པདྨ་འགྱུར་མེད་རྒྱ་མཚོའི་རྣམ་འཕྲུལ་པདྨ་བསྟན་འཛིན། ༈ །ཡར་ཀླུང་རོག་པ་རྩར་བེ་རོའི་གཟིམ་ཕུག་ཡོད། ༈ །རིན་ཆེན་རྣམ་རྒྱལ་རྣམ་ཐར་སྐལ་བཟང་གདུང་སེལ་ལས། དགུང་ལོ་ང་དྲུག་པ་དཀར་པོ་ས་སྦྲུལ་ལོར་རང་གི་རིགས་སྲས་མཆེད་ལ། ཞི་བྱེད་སྔ་ཕྱི་བར་གསུམ་ཁྲིད་ཡིག་སོགས། ཡིག་ཆ་ཀུན་དང་སོགས་ལུང་སྩལ་ཚུལ་སྣང་། དགོངས་འདུས་ཁྲིད་ཆེན་ཞིག་གནང་ཚུལ་ཀྱང་སྣང་།། ༈ །།གྲུབ་ཆེན་ཐང་སྟོང་རྒྱལ་པོའི་རྣམ་ཐར་ལས། ཨོ་རྒྱན་དུས་གསུམ་མཁྱེན་པས་ཙཱ་རི་གསང་སྔགས་ཕོ་བྲང་དུ་ཟབ་ཆོས་མང་པོ་གཏེར་དུ་སྦས་པས། མངའ་བདག་གིས་ཟབ་མོའི་ཆོས་འདི་སྐྱེས་བུ་སུ་ཞིག་གིས་བཏོན་ནས་འགྲོ་དོན་བྱེད་ལགས། དེས་འགྲོ་ཕན་ཇི་ལྟར་ཐོགས། དེ་འཚང་རྒྱ་བའི་དུས་ནམ་ཞིག་ལགས་ཞུས་པས། ཨོ་རྒྱན་ཆེན་པོ་ཞལ་འཛུམ་མཛད་ནས་ལྔ་བརྒྱ་དུས་ཀྱི་ཐ་མ་ལ༔
འདི་ཉིད་འདོན་ཅིང་སྤྱོད་པ་ཡི༔ སྐྱེས་བུ་ལས་ཅན་སྤྲུལ་སྐུ་དེ༔ འགྲོ་བའི་དོན་བྱེད་སྤྲུལ་ཨོ་རྒྱན་རང་གི་ཐུགས་ཀྱི་པ་ཡིན༔ ༈ ཞི་བ་ཐུགས་རྗེ་ཆེན་པོ་དང་དྲག་པོ་ཁྲོ་བོ་དབང་ཆེན་གཉིས༔ དབྱེར་མེད་གཅིག་ཏུ་སྤྲུལ་པ་ལསཿ སྐུ་ཡི་ཆ་ལུགས་ཞི་མ་ཁྲོ༔ ༈ མདོག་སྨུག་དྲི་ཞིམ་སྨེ་བས་བརྒྱན༔ ངང་རྒྱུད་དལ་ཞིང་རིག་རྩལ་ཆེ༔ མ་ངེས་སྤྱོད་པ་སྣ་ཚོགས་སྐྱོང་༔ ༈ ཤཱཀྱའི་བཀའ་ལྔ་པ་ལས་བསྙེན་པར་རྫོགས། མཚན་བརྩོན་འགྲུས་བཟང་པོར་བཏགས། ཚུལ་འཛིན་གསང་སྔགས་སྤྱོད༔ ཌཱ་ཀི་མ་ལུས་དབང་དུ་སྡུད༔ རྒྱལ་བས་དབྱིངས་ནས་དབང་བསྐུར་ཞིང་༔ སྦས་པའི་ངང་ནས་འགྲོ་དོན་མཛད༔ ཟབ་དང་རྒྱ་ཆེའི་ཆོས་རྣམས་སྤྱོད༈ ནང་རྟགས་འཁྲུངས་དུས་ཡུམ་ལ་ངོ་མཚར་བའི། རྨི་ལམ་མཚན་ལྟས་འབྱུང་༔ ༈ བརྒྱ་ཕྲག་བཅུ་གཅིག་ཚེ་ཡི་ཚད༔ ཚེ་འཛིན་ལྷ་མོའི་བཅུད་བསྒྲུབ་ན༔ དེ་བས་རིང་བ་ཐུབ་པར་འགྱུར༔ ༈ ནམ་ཞིག་འདའ་ཚུལ་སྟོན་པའི་ཚེ༔ སྒྲ་དང་འོད་དུ་བཅས་ནས་སུ༔ དཔའ་བོ་ཌཱ་ཀིའི་ཚོགས་དང་བཅས༔ བདེ་བ་ཅན་དུ་བྱང་ཆུབ་ཐོབ༔ ཅེས་གསུངས་ཤིང་། རིག་འཛིན་རྒོད་ལྡེམ་སློབ་མ་ཀུན་སྤངས་དོན་ཡོད་རྒྱལ་མཚན་ལ་ཡུམ་གྱིས་སྐུ་ལུས་ཡོད་པའི་ཚེ་རྣལ་ལམ་ངོ་མཚར་བ་བྱུང་ཚུལ་རྣམས་ཞུས་པས། ངོ་མཚར་ཆེ། ཨོ་རྒྱན་ཆེན་པོས་ལུང་བསྟན་ནའང་། །འོ་བ་ཞེས་
བྱའི་ཤར་མདུན་དུ༔ བརྩོན་འགྲུས་ཞེས་བྱའི་མིང་ཅན་འབྱུང་༔ དེ་ནི་ང་ཡི་ཐུགས་སྤྲུལ་ཡིན༔ ཞེས་བྱ་བའང་ཡོད་པས་ཁྱེད་ཀྱི་ལུས་འདི་ལ་གཅེས་སྤྲས་གལ་ཆེའོ་གསུངས། བཀའ་ལྔ་པ་དཔལ་འབྱོར་ཤེས་རབ་ལས་བསྙེན་པར་རྫོགས། ཕྱག་ཆེན་ཆོས་དྲུག་སོགས་གསན། ཀུན་སྤང་དོན་ཡོད་རྒྱལ་མཚན་དང་། ལྷ་གདོང་པ་བསོད་ནམས་མཆོག་པ་ལས་རྒོད་ལྡེམ་པའི་གཏེར་ཆོས་སྐོར་དང་། ཁྱད་པར་ལྷ་གདོང་པ་ལས་ཕྱག་རྡོར་གོས་སྔོན་ཅན་དང་། རྣམ་སྲས་ཀྱི་སྐོར་གསན་པས་རྣམ་སྲས་རྟ་བདག་བརྒྱད་འཁོར་དང་བཅས་པས་མཐུན་རྐྱེན་ཐམས་ཅད་བསྒྲུབ་པར་ཞལ་གྱིས་བཞེས། རྒྱ་གར་རྡོ་རྗེ་གདན་དུ་བླ་མ་རཏྣ་སིདྡྷི་ལས་སྔགས་ཀྱི་ཟབ་གནད་དང་། དེའི་ཕྱག་རྒྱ་བྲམ་ཟེ་མོ་ཞིག་ལས་ཐབས་ལམ་ཁྱད་པར་ཅན། ནཱ་ལེནྡྲར་གྲུབ་ཐོབ་ཨ་དྷི་ཀ་ར་ཞེས་དགུང་ལོ་ཉིས་བརྒྱ་སུམ་བཅུ་བཞེས་པ་ལས་ཚེ་དཔག་མེད་ཀྱི་དབང་གསན་པའི་ཚེ་བླ་མའི་ཐུགས་ཀར་ཚེ་དཔག་མེད་རིགས་ལྔ། ཞབས་ཀྱི་མདོ་བཞི་ལ་ཕྲིན་ལས་ཀྱི་ལྷ་མོ་བཞི། གསང་བར་རྟ་མགྲིན་དཔའ་གཅིག་རྣམས་གཟིགས། རྒྱ་གར་ཟངས་གླིང་དུ་རྫུ་འཕྲུལ་གྱིས་ཕེབས། སྤྲུལ་པའི་མཆོད་རྟེན་བཀྲ་ཤིས་སྒོ་མང་གི་དྲུང་དུ་ཞག་ཉེར་གཅིག་བཞུགས་པས་དཔལ་ཤ་བ་རི་ལང་ཚོ་དར་ལ་བབས་པ། དབུ་སྐྲ་སིལ་བུ་མེ་ཏོག་གི་ཐོད་
བཅིངས་པ། རྨ་བྱའི་སྒྲོས་སྨད་གཡོགས་པ། རྨ་བྱའི་གདུགས་རང་འཁོར་བ། ཕྱག་གཉིས་ན་མདའ་གཞུ་ཐོགས་པའི་ནམ་མཁར་བདུད་རྩིའི་བུམ་པ་རྟེན་མེད་དུ་གནས་པ། གཡས་ན་རྣལ་འབྱོར་མ་གླིང་བུ་འབུད་པ། གཡོན་ན་རྣལ་འབྱོར་མ་ཤ་བའི་རོ་ཁུར་བ་བཅས་གཟིགས། གུས་པས་ཕྱག་འཚལ་ཞིང་ཡིད་ཀྱི་མཆོད་པ་ཕུལ་བས་སྐུའི་རྣམ་འགྱུར་དང་བརྡ་ཐབས་སྣ་ཚོགས་པས་ཟབ་རྒྱས་ཀྱི་གདམས་པ་མཐའ་ཡས་པ་བསྟན་ཅིང་བུམ་པས་དབང་བསྐུར་བས་ཡེ་ཤེས་མངོན་དུ་གྱུར། རྡོ་རྗེ་གདན་དང་ཉེ་བའི་གསང་བ་རྡོ་རྗེ་ཕུག་ཞེས་པར། སྔགས་རྙིང་མའི་གྲུབ་ཐོབ་སྐལ་ལྡན་རྡོ་རྗེ་གྲགས་པ་དང་དགུང་ལོ་སུམ་བརྒྱ་ཉི་ཤུ་བཞེས་པ་མཇལ། རྒྱལ་ཐབས་སྤྱི་བླུགས་ཀྱི་དབང་བསྐུར་ཞིང་ལུང་བསྟན་མངའ་གསོལ་མཛད། བྱང་སེམས་སྦྱིན་པ་བཟང་པོ་ལས་ནི་གུ་ཆོས་དྲུག་ཤངས་ཆོས་ཡོངས་རྫོགས་གསན། རི་ཁྲོད་དུ་མར་ཉམས་སུ་བཞེས། ཏིང་ངེ་འཛིན་རྣམ་པ་དུ་མ་ཐུགས་ལ་འཁྲུངས། སྙན་བརྒྱུད་ཟབ་མོ་འདི་གངས་རིའི་ཁྲོད་དུ་དར་བ་ཞིག་བྱུང་ན་དགོངས་པའི་སྐད་ཅིག་དེ་ལ་མདུན་གྱི་ནམ་མཁའ་ནས། བུ་རྣལ་འབྱོར་པ་ཞེས་འབོད་པའི་སྒྲ་ལྷང་གིས་བྱུང་། །སྤྱན་བར་སྣང་ལ་གཟིགས་པས་སྤྲིན་ཕུང་གི་དབུས་ན་ཡེ་ཤེས་ཀྱི་མཁའ་འགྲོ་ནི་གུ་མ་དངོས་སུ་བཞུགས་པ་ལ་ཞུ་བ་ཞུ་ལན་
དང་། བརྡའ་དང་བརྡ་ལན་དང་། ཚོགས་ཀྱི་འཁོར་ལོ་འདོད་པའི་ཡོན་ཏན་རྨད་དུ་བྱུང་བ་རྣམས་ལ་ལོངས་སྤྱད། རྡོ་རྗེའི་ཚིག་རྐང་སོ་སོ་དང་། དེ་དག་ལ་དངོས་ཤུགས་སྦས་གསུམ་གྱི་མན་ངག་གི་འཕྲུལ་ཕྱེ་སྟེ་ཡོངས་སུ་རྫོགས་པ་དང་། ཁྱད་པར་དཔེ་གཉིས་ཀྱི་སྒོ་ནས་སྟོན་པའི་འཕྱུགས་མེད་མཁའ་སྤྱོད་དཀར་དམར་གྱི་འཕོ་བ་སོགས་གནང་། གྲུབ་ཐོབ་ཆེན་པོ་རི་འོ་བ་ལྷ་རྩེའི་ནུབ་མགུལ་གྱི་རྫ་ཁྲོད་དུ་སྒྲུབ་པ་རྩེ་གཅིག་མཛད་སྐབས། འཕགས་བལ་བོད་ཀྱི་མཁས་གྲུབ་རྣམས་ལས་གདམས་པ་རྒྱ་མཚོ་ལྟ་བུ་གསན་ནའང་། སྐུ་དངོས་ལས་དོན་དུ་གཉེར་བའི་གདུལ་བྱ་དུས་དེར་མ་བྱུང་། མ་འོངས་པ་ན་གང་ཟག་ལས་ཅན་ལ་ཕན་པའི་ཆེད། གཡམ་པ་མང་པོ་ལ་ལྕགས་ཀྱི་ཁབ་སྦོམ་གཉིས་མ་ཟད་བར་དུ་བྲིས་ཏེ་གཏེར་དུ་སྦས། དགེ་བསྙེན་ཆེན་པོ་འོ་བ་ལྷ་རྩེ་གཏེར་བདག་ཏུ་བསྐོས་སོ། གཙང་རྒྱས་སྡེ་ཁར་གསང་སྤྱོད་ལ་བཞུགས་པས་ཡེ་ཤེས་ཀྱི་མཁའ་འགྲོ་སྡེ་ལྔས་མཚན་རེ་རེ་ཕུལ། དབེན་གནས་ཐར་པ་གླིང་དུ་བཞུགས་པའི་ཚེ་རྡོ་རྗེ་འཆང་ཆེན་པོ་འཁོར་དང་བཅས་པ་ལས་བླ་མའི་རྣལ་འབྱོར་སོགས་སྙིགས་མའི་སེམས་ཅན་འདུལ་བའི་ཆོས་ཚུལ་སྣ་ཚོགས་པ་གསན། རྫུ་འཕྲུལ་གྱིས་ཨོ་རྒྱན་མཁའ་འགྲོའི་གླིང་དུ་ཕེབས། མཁའ་འགྲོ་མ་མང་པོས་བསུས་ནས་ཟངས་མདོག་དཔལ་
གྱི་རི་བོའི་ཕོ་བྲང་ཆེན་པོར་ཨོ་རྒྱན་རིན་པོ་ཆེ་རྒྱལ་པོའི་ཆ་ལུགས་སུ་མཇལ། ཕྱག་འཚལ་ཞིང་ཡིད་སྤྲུལ་གྱི་མཆོད་པ་བསམ་གྱིས་མི་ཁྱབ་པ་ཕུལ་ནས་གསོལ་བ་བཏབ་པས། སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་དུ་སློབ་དཔོན་ཆེན་པོ་ཧེ་རུ་ཀའི་རྣམ་པར་བཞུགས་ནས་སྐུ་གསུང་ཐུགས་ཡེ་ཤེས་རྡོ་རྗེས་བྱིན་གྱིས་བརླབས་ནས་སོ་སོའི་ཞལ་གཟིགས། ཟངས་མདོག་དཔལ་གྱི་རི་བོའི་མཐའ་བསྐོར་མཚོ་ཆེན་པོའི་དབུས་ན་མེ་ཏོག་པདྨ་དམར་པོ་འདབ་མ་བརྒྱད་པའི་སྟེང་ན་ཨོ་རྒྱན་རབ་བྱུང་གི་ཆ་ལུགས་སུ་བཞུགས་པ་མཇའ་ཚོན་སྣ་ལྔས་བསྐོར་བ། གཡོན་ཕྱོགས་ན་པདྨ་དམར་པོ་འདབ་མ་སྟོང་དང་ལྡན་པའི་དབུས་ན་བསྐལ་བཟང་གི་སངས་རྒྱས་སྟོང་བཞུགས་པའི་ཡལ་ག་ལ་ཉེ་བའི་སྲས་བརྒྱད་བཞུགས་པ། གཡས་སུ་སྣ་ཚོགས་པདྨ་ཡལ་ག་ལྔ་པའི་དབུས་ན་རྡོ་རྗེ་ཕག་མོ། །གཞན་བཞི་ལ་རིགས་བཞིའི་མཁའ་འགྲོ་བཞུགས་པའི་མདུན་གྱི་ནམ་མཁར་སྟོན་པ་རྡོ་རྗེ་སེམས་དཔའ་བཞུགས་པ་ལ། ཨོ་རྒྱན་ཆེན་པོས་ཞུ་བ་པོ་མཛད་ནས་བླ་ན་མེད་པའི་ཡང་སྙིང་རྫོགས་པ་ཆེན་པོའི་ཆོས་ཚུལ་མ་ཚང་བ་མེད་པ་གསན་ནོ། །དེ་ནས་ཨོ་རྒྱན་རིན་པོ་ཆེས་བོད་ཡུལ་དུ་འགྲོ་དོན་ལ་བཀས་བསྐུལ་བ་ནི། མཁའ་འགྲོས་མཚན་གསོལ་རིག་འཛིན་ཐང་སྟོང་པ། །གཟུགས་སྐུ་མཁའ་ལྟར་དག་པ་ཆོས་
ཀྱི་སྐུ། །གྲགས་སྟོང་གཞོམ་དུ་མེད་པ་རྡོ་རྗེའི་གསུང་། །གཟུང་འཛིན་རྟོག་བྲལ་གདོད་ནས་འདུས་མ་བྱས། །དེ་དོན་མ་ལུས་ཁྱོད་ཀྱིས་ཁོང་དུ་ཆུད། །སྙིགས་མ་ལྔ་བདོའི་སེམས་ཅན་དོན་ཕྱིར་དུ། །ཧོར་དང་ཁ་བ་ཅན་གྱི་ས་མཚམས་སུ། །ང་ཡིས་བཞེངས་པའི་མེ་བཙའ་ཞིག་གསོས་གྱིས། །བོད་འབངས་ཕན་བདེ་ཡུན་དུ་གནས་པར་འགྱུར། །ས་འབྲུག་དབྱར་ཟླ་དང་པོའི་ཚེས་བཅུ་ལ། །ས་ཡི་མེ་བཙའ་བརྟན་བཞུགས་གྲུབ་དགོས་སོ། །འགྱངས་ན་ཆུ་ཤོར་ཟིན་པའི་རགས་དང་འདྲ། སྔས་ན་རི་དྭགས་མི་འགྲོ་རྒྱ་དང་འདྲ། །རིག་པ་འཛིན་པའི་སྐྱེས་བུ་ཕན་སེམས་ཅན། །སླར་ཡང་བོད་ཡུལ་ཁ་བ་ཅན་དུ་སོང་། །སྙིགས་མ་ལྔ་བདོ་བོད་ཀྱི་སེམས་ཅན་ལ། །གང་ལ་གང་འདུལ་སྤྲུལ་པས་འགྲོ་དོན་མཛོད། ཅེས་དང་། རིག་འཛིན་བོད་ཀྱི་སྐྱེས་བུ་ཁྱོད། །རྫུ་འཕྲུལ་སྟོབས་ཀྱིས་འདིར་འོངས་ཀྱང་། །ཆོས་སྐལ་གཏེར་ལྔ་བོད་ན་ཡོད། །ལུང་བསྟན་རྣམ་ཐར་བོད་དུ་བཞག །དུས་གསུམ་མཁྱེན་པ་པད་འབྱུང་ངའི། །ཐུགས་སྤྲུལ་ང་ནི་ལྕགས་ཟམ་ཚུགས། །རྟེན་འབྲེལ་འགྲོ་བ་འདུལ་བའི་ཕྱིར། །མྱུར་དུ་ཁ་བ་ཅན་དུ་ཞུད། ཅེས་གསུངས་པ་ལྟར་བོད་དུ་བྱོན་ནས་འགྲོ་དོན་བསམ་གྱིས་མི་ཁྱབ་པ་མཛད་དོ། ༈ གྲུབ་ཆེན་རིན་པོ་ཆེའི་རྡོ་རྗེའི་སྐུའི་རྣམ་འགྱུར་དྲུག་ནི། རྣམ་སྣང་གྲུབ་
པའི་དབང་ཕྱུག་ཞལ་དཀར་མདངས་ཆེ་ཞིང་སྣུམ་པ། དབུ་སྐྲ་སིལ་བུར་ཡོད་པ། སྤྱན་དཀྱུས་རིང་ལ་ཞི་བ་སྙིང་རྗེའི་ཚུལ་གྱིས་གཟིགས་པ། ཕྱག་མཉམ་བཞག་སྐྱབས་སྦྱིན་མཛད་པ། ༡ རིན་འབྱུང་གྲུབ་པའི་དབང་ཕྱུག་སྐུ་མདོག་གསེར་ལྟ་བུ། །དབུ་སྐྲ་སེར་ལ་འཇམ་པ། སྤྱན་གཉིས་ཐད་ཀར་གཟིགས་པ་ཤིན་ཏུ་དགེས་པའི་ཚུལ་ཅན། ཕྱག་གཡས་མཆོག་སྦྱིན་དང་གཡོན་ནོར་བུ་དགའ་འཁྱིལ་བསྣམས་པ། ༢ སྣང་མཐའ་གྲུབ་པའི་དབང་ཕྱུག་སྐུ་མདོག་དམར་པོ། དབུ་སྐྲ་དམར་ནག་ལི་བ། སྤྱན་རྩ་དམར་ཟླུམ་ཟུར་གཟིགས། ཕྱག་གཉིས་མཉམ་བཞག་གི་སྟེང་ན་བུམ་པ་འཛིན་པ། ༣ དོན་གྲུབ་འདི་ཀུན་འདུས་གྲུབ་པའི་དབང་ཕྱུག་ཏུ་བཤད་པའང་སྣང་གྲུབ་པའི་དབང་ཕྱུག་སྐུ་མདོག་སྨུག་ནག་ཁྲོ་བོའི་གཟུགས་ཅན་རལ་པ་དམར་ནག་ཐོར་ཅོག་བཅིང་བ། སྤྱན་གསུམ་གྲུ་གསུམ་གློག་ལྟར་འཁྱུགས་པ། ཕྱག་གཡས་རྡོ་རྗེ་གསོར་ཞིང་། གཡོན་སྡིག་འཛུབ་བསྒྲེང་བ། ༤ མི་བསྐྱོད་གྲུབ་པའི་དབང་ཕྱུག་ཨིནྡྲ་ནཱི་ལའི་མདོག་ཅན་དབུ་སྐྲ་དམར་ལྗང་སྤྱི་བོར་འཁྱིལ་བ། སྤྱན་རྡོ་རྗེའི་ལྟ་ལྟངས་ནམ་མཁར་གཟིགས་པ། ཕྱག་གཉིས་ནམ་མཁའ་མཛོད་ཀྱི་ཕྱག་རྒྱ་མཛད་པ། ༥ རྡོ་རྗེ་སེམས་དཔའ་གྲུབ་པའི་དབང་འདི་སྐུ་མདོག་དཀར་ལྗང་ཅན་དོན་གྲུབ་གྲུབ་པའི་དབང་ཕྱུག་ཏུ་བཤད་པའང་སྣང་ཕྱུག་སྐུ་
མདོག་དཀར་ཞིང་གཞོན་ཤ་རྒྱས་པ། དབུ་སྐྲ་ཁམ་སྔོན་ཐུར་དུ་འཕྱང་བ། ཕྱག་གཉིས་ཞི་དྲག་ཕྱེད་མའི་ཚུལ་ཅན་ཅུང་ཟད་ཁྲོ་བ། བཞད་ཞལ་ཤིན་ཏུ་མཛེས་པ་ཕྱག་གཉིས་རྡོ་རྗེ་དང་དྲིལ་བུ་འཛིན་པའོ། ༦ །སརྦ་མངྒ་ལཾ། གཞན་ཡང་གྲུབ་ཆེན་བིརླ་པ་ལས་གསུང་ངག་རིན་པོ་ཆེ་གསན་པ་དང་། བལ་པོ་མ་ཧཱ་བོ་དྷི་ལས་བདེ་མཆོག་གི་སྐོར་གསན། དེས་ལུང་བསྟན་ནས་རྒྱ་བལ་གྱི་མཚམས་ཀྱི་མཚམས་གཡའ་རི་སྒོ་ལྔར་མི་ཏྲའི་སློབ་མ་ཚེའི་རིག་འཛིན་བརྙེས་པ་དྷརྨ་རཏྣ་ལས་ཆོས་ཚུལ་མཐའ་ཡས་པ་གསན། དེར་ལོ་ལྔ་བཞུགས་ཞེས་འབྱུང་། ༈ ལུང་བསྟན་ལས། ལས་ཅན་ལྔ་བཅུ་རྩ་བརྒྱད་དེ༔ སྐྱེས་བུ་དེ་རྣམས་གང་འཕྲད་དང་༔ ཟབ་ཆོས་འདི་ཉིད་སུས་སྤྱོད་པ། བདེ་བ་ཅན་དུ་དངོས་སུ་འགྲོ༔ ལྔ་བརྒྱ་ཕྲག་གཅིག་ཕྱིར་མི་ལྡོག༔ ཆོས་ཀྱི་འབྲེལ་པ་ཁྲི་ཕྲག་བརྒྱ༔ འབུམ་ཕྲག་གཅིག་ལ་འབྲེལ་ཐོགས་ནས༔ བདེ་བ་ཅན་དུ་ངེས་པར་འགྲོ༔ ༈ སྤྲུལ་པའི་འཁོར་དང་སློབ་མའི་ཚོགས༔ འཇིག་རྟེན་སྤྱོད་པ་སྐྱོང་བ་ཡི༔ དོན་རྒྱུད་ཉམས་སུ་ལེན་པའི་བུ༔ མི་དཔོན་ཧོར་གྱི་ཆས་འཛིན་དགུ༔ ལས་ཅན་ལྔ་བཅུ་རྩ་བརྒྱད་དང་༔ སྦས་པའི་ཌཱ་ཀི་བཅུ་དྲུག་བཅས༔ དངོས་དང་དངོས་མེད་འགྲོ་དོན་འགྲུབ༔ གཞན་ཡང་ལས་དང་སྐལ་བར་ལྡན༔ དཔའ་བོ་ཌཱ་ཀིའི་སྤྲུལ་པ་རྣམས༔
རྒྱུན་མི་འཆད་པར་འཁོར་དུ་འདུ༔ ༈ སྒྲུབ་པའི་གནས་ནི་པོ་ཏཱ་ལ༔ བྱིན་རླབས་གནས་ནི་མཁར་ཆུའི་བྲག༔ ལུང་བསྟན་གནས་ནི་སྟག་སྒྲོའི་རོང་༔ འགྲོ་དོན་གནས་ནི་ཙ་རི་ཏྲ༔ གདུལ་བྱའི་གནས་ནི་མདོ་ཁམས་གླིང་༔ དངོས་གྲུབ་གནས་ནི་སུ་ཛ་ཏི༔ བདེ་བ་ཅན། དོན་གྱི་གནས་ནི་ཆོས་ཀྱི་དབྱིངས༔ རིག་པ་གཡོ་འགུལ་མེད་པར་བཞུགས༔ ཞེས་སོ། །གྲུབ་ཆེན་ཐང་སྟོང་རྒྱལ་པོ་དང་དུས་མཉམ་ཞིང་ཐུགས་བརྒྱུད་གཅིག་པ། ཐུགས་རྗེ་ཆེན་པོས་དངོས་སུ་བྱིན་གྱིས་བརླབས་པའི་རྟོགས་ལྡན་གྱི་རྒྱལ་པོ་བཞི་ཞེས་གྲགས་པ་ནི། མངའ་རིས་སྟོད་ཀྱི་རྟོགས་ལྡན་བེམ་ཐུལ་ཅན་ཚུལ་ཁྲིམས་བཟང་པོ། དབུས་གཙང་གི་རྟོགས་ལྡན་སླེ་ཐུལ་ཅན་ཐང་སྟོང་བརྩོན་འགྲུས་བསོད། མདོ་ཁམས་སྒང་གི་རྟོགས་ལྡན་ཕྱར་ཐུལ་ཅན། མདོ་ཁམས་སྨད་ཀྱི་རྟོགས་ལྡན་ཁྱི་ཐུལ་ཅན་རྡོ་རྗེ་བཟང་པོ་གསེར་རོང་དུ་བྱུང་བ་སྟེ། འདི་བཞི་ཀ་ལ་ཐུགས་རྗེ་ཆེན་པོའི་གདམས་ངག །ཉེ་བརྒྱུད་བཀའ་བབས་པའི་ནང་སྔ་མ་གཉིས་ཀྱི་རྒྱུན་ཡོད་པ་དང་། ཕྱི་མ་གཉིས་ཀྱི་གདམས་ངག་གཏན་ལ་ཕབས་རྒྱུ་བཅས་དགེ། ༈ རྒྱས་པའི་ལས་ཀྱི་ལྷ་སེར་མོ་སྐོར་བདུན་ལ། ཐོག་མར་ཚེ་རྒྱས་པ་རྣམ་རྒྱལ་མ་སེར་མོ༡། བསོད་ནམས་རྒྱས་པ་སྒྲོལ་མ་སེར་མོ༢། དཔལ་འབྱོར་རྒྱས་པར་བྱེད་པ་ལྷ་མོ་རོ་དྷི་མ་
སེར་མོ་༣། ནོར་དང་འབྲུ་རྒྱས་པ་ནོར་རྒྱུན་མ་སེར་མོ་། སྙན་གྲགས་རྒྱས་པ་རྣམ་སྲས་ཡུམ་དཔལ་འབར་མ་སེར་མོ།། ཤེས་རབ་རྒྱས་པ་ཤེར་ཕྱིན་སེར་མོ༦། ཡེ་ཤེས་རྒྱས་པ་ཕག་སེར་ཀརྨ་པཱ་དའོ༧༣ ༈ ན་མོ་གུ་རུ་ཀུན་མཁྱེན་ཡང་སྲིད་འཇིགས་མེད་ཡེ་ཤེས་རྡོ་རྗེ་དེ་ཉིད་དགུང་གྲངས་དྲུག་ཅུར་ཕེབས་པ་རབ་ཡིད་ས་ལུག་ལོར་ཀ་ཀེའུ་ཚང་ཡང་དབེན་མཁའ་འགྲོའི་རྫོང་ཆེན་དུ་བཞུགས་སྐབས། ཆོ་འཕྲུལ་ཟླ་བའི་ཚེས་བརྒྱད་ཀྱི་ཐོ་རངས་འོད་གསལ་དག་པའི་སྣང་བར། གྲུབ་པའི་དབང་ཕྱུག་ཆེན་པོ་འཇིགས་མེད་ཕྲིན་ལས་འོད་ཟེར་ཉིད་རྣལ་འབྱོར་གྱི་དབང་ཕྱུག་མི་ལ་རས་པའི་རྒྱན་ཆ་ལུགས་ཡོངས་སུ་རྫོགས་པར་བཞུགས་པའི་ཞལ་ནས། རྗེ་མི་བསྐྱོད་ངོ་བོ་རྡོ་རྗེ་འཆང་། །ཏེ་ལོ་ནཱ་རོ་པཎ་ཆེན་དང་། །མར་པ་ཆོས་ཀྱི་བློ་གྲོས་ཏེ། །བཀའ་བརྒྱུད་ཆུ་མགོ་གངས་ལ་ཐུག། །དམ་ཆོས་ཕྱག་རྒྱ་ཆེན་པོ་དེ། །མཐའ་འཁོབ་བོད་དུ་བསྒྱུར་བར་མཛད། །རྩེ་གཅིག་གུས་པས་གསོལ་བ་ཐོབ། །ཁྱོད་ལེགས་པར་གསོན་དང་རིགས་ཀྱི་བུ། །དབུ་ཕྱག་རྫོགས་ཆེན་ལྟ་བ་གསུམ། །གཞི་ལམ་འབྲས་བུའི་མཚན་ཉིད་དེ། །མཐའ་བཞི་སྤྲོས་དང་བྲལ་བ་ལ། །རགས་པ་ཕྱི་ཡི་དབུ་མར་བརྗོད། །དེ་སྐྱོན་དང་བྲལ་བའི་རིག་པ་རྣོ། །ཡེ་ཤེས་ཐིག་ལེའི་སྙིང་པོ་ཅན། །གཞི་རྒྱུད་བདེ་བར་
གཤེགས་པའི་ཁམས། །ཕྲ་བ་ནང་གི་དབུ་མ་ཡིས། །རྟོགས་པར་བྱེད་པའི་ཐབས་ལ་བརྟེན། །རྣལ་འབྱོར་བཞི་ཡི་ཉམས་ལེན་ལས། །བསྒོམ་མེད་འབྲས་བུ་མཐར་ཕྱིན་ཚེ། །སེམས་ཀྱི་སྟོང་གསལ་འཛིན་མེད་དོན། །ཕྱག་རྒྱ་ཆེན་པོའི་ལམ་བགྲོད་ཚུལ། །གང་ཟག་དབང་པོ་རབ་འབྲིང་སྟེ། །དུད་འགྲོ་ཉག་ཕྲན་མཁའ་ལྡིང་གིས། །མཐོང་བུལ་ཇི་བཞིན་འབྲས་བུར་རགས། །རང་བཞིན་རྫོགས་པ་ཆེན་པོ་ནི། །རིག་པ་ཅར་ཕོག་ངོ་འཕྲོད་ནས། །གཟུང་འཛིན་མདུད་པ་ཞིག་པའི་ཚེ། །སྐུ་དང་ཐིག་ལེ་ངོ་སྤྲོད་ཀྱིས། །རིག་དང་ལོངས་སྐུར་རྩལ་ཆེན་རྫོགས། །སྣང་བཞིའི་འོད་གསལ་མཐར་ཕྱིན་ཚེ། །ཆོས་ཅན་ཆོས་ཉིད་ཀློང་དུ་ཟད། །གཞོན་ནུ་བུམ་སྐུའི་དབྱིངས་སུ་གྲོལ། །སྟོང་གསལ་འདུས་མ་བྱས་པ་ལ། །དགེ་དང་སྡིག་པའི་མཚན་མ་བྲལ། །མཉམ་ཉིད་རིག་པའི་རྒྱལ་པོ་ལ། །སངས་རྒྱས་བཟང་པོས་ཕན་མ་བཏགས། །སེམས་ཅན་ངན་པས་གནོད་མ་བསྐྱལ། །ཆོས་དབྱིངས་བརྡལ་ཁྱབ་ཆེན་པོ་ལ། །ས་དང་ལམ་གྱི་རྩིས་གྲངས་ཞིག །མཉམ་ཉིད་ཆེན་པོར་ཡེ་སངས་རྒྱས། །ཕུང་ཁམས་ཡེ་ནས་ལྷའི་རང་བཞིན། །བསྙེན་ཅིང་སྒྲུབ་པ་ཐང་རེ་ཆད། །སྣོད་བཅུད་དག་པ་རབ་འབྱམས་ལ། །ཞིང་ཁམས་བྱ་བ་ལོགས་སུ་མེད། །རྫོགས་ཕྱག་དབུ་མ་ཆེན་པོ་
ཡང་། །རབ་འབྲིང་ཐ་མའི་བློར་འཚམས་པར། །ཆོས་ལོངས་སྤྲུལ་པ་སྐུ་ཡི་བཀའ། །དགོངས་པ་རྟེན་དང་ཚིག་ཏུ་ཤར། །གདུལ་བྱའི་དབང་པོའི་སྐལ་བ་རུ། །གོ་ལུང་མ་ངེས་སྣ་ཚོགས་པས། །ཆོས་སྒོ་བརྒྱད་ཁྲི་བཞི་སྟོང་བྱང་། །དོན་ལ་མ་རིག་ཉོན་མོངས་དང་། །གཟུང་འཛིན་གྲོལ་བ་ཁོ་ནར་དགོངས། །རྒྱ་དང་འབྲས་བུའི་ལམ་ཉིད་ཀྱང་། །དངས་ངེས་ལྡེམ་དགོངས་དུས་གཞལ་སོགས། །མཐའ་དྲུག་ཚུལ་བཞིས་སེམས་ཅན་གྱི། །ལོག་ལྟ་བསལ་ཞིང་དད་མོས་དང་། །ཡང་དག་ལམ་དུ་འཁྲིད་ཕྱིར་དགོངས། །ལྔ་ཕྲག་ཐ་མའི་དུས་འདི་རུ། །ཉོན་མོངས་རགས་ཤིང་སྡུག་བསྔལ་འཕེལ། །ཐབས་མཁས་སྤྱོད་པ་སྣ་ཚོགས་ཀྱིས། །ཁམས་དབང་མཐུན་པར་མ་བྱས་ན། །མཐའ་གཅིག་དག་གིས་མི་འདུལ་ཞིང་། །བློ་ཆུང་དག་གིས་རྗེས་མི་སླེབས། །དོན་འདི་རྟོགས་པར་མཛོད་ཅིག་ཨང་། །ཞེས་དང་། ལུང་བསྟན་མང་དུ་གནང་མཐར་སྐུ་ལས་སྤྲོས་པའི་འོད་ཟེར་གྱིས་རྟོག་སྒྲིབ་ཕྲ་བ་མ་ལུས་པ་སྦྱངས་ཏེ་བདེ་བ་ཆེན་པོའི་ཡེ་ཤེས་ཀྱི་བྱིན་རླབས་ཀྱིས་རྒྱུད་ཡོངས་སུ་སྨིན་པར་མཛད་དོ།། ༈ །།རིག་འཛིན་སྟག་ཤམ་རྡོ་རྗེའི་གཏེར་ལུང་ལས། ཡོན་ཏན་གདུལ་བྱ་སྨད་ཀྱི་ཕྱོགས་ནས་འབྱུང་༔ རྡོ་རྗེའི་མིང་ཅན་བརྟུལ་ཞུགས་སྟོབས་པོ་ཆེ༔ ཕྱག་རྫོགས་ཀློང་གྱུར་རྟ་མགྲིན་བཀའ་
བབས་དང་༔ བླ་མ་རྡོ་རྗེ་གྲོ་ལོད་ཞལ་མཇལ་བའི༔ སྐལ་ལྡན་སྐྱེས་བུ་དེ་ཡིས་གདུལ་བྱ་སྡུད༔ རྫུ་འཕྲུལ་སྤྲུལ་པའི་སྐལ་ལྡན་མང་འབྱུང་ནས༔ ཀཿཐོག་ཕྱོགས་སུ་སྟོན་པའི་དབང་དུ་འདུག བཤད་སྒྲུབ་བསྟན་པ་གཞལ་དུ་མེད་པ་འབྱུང་༔ ཞེས་སོགས་རྡོ་རྗེའི་ལུང་བསྟན་དུ་མས་དཔང་པོ་བྱས་པ་བཞིན་དཔལ་རྡོ་རྗེ་སེམས་དཔའི་ཡེ་ཤེས་གཟུགས་གཞན་དུ་བསྒྱུར་བ་གསང་བདག་རྡོ་རྗེ་ཆོས། སངས་རྒྱས་དངོས་ཀྱི་བླ་མ་རྒྱལ་ཆེན་ཨིནྡྲ་བྷཱུ་ཏི། སློབ་དཔོན་ཧཱུཾ་ཆེན་ཀ་ར། གནུབས་ནམ་མཁའི་སྙིང་པོ། ཟུར་ཆུང་ཤེས་རབ་གྲགས། དྭགས་སྒོམ་ཚུལ་ཁྲིམས་སྙིང་པོ། ཞིག་པོ་ཉི་མ་སེང་གེ། གྲུབ་ཐོབ་མ་ཎི་རིན་ཆེན། ཤངས་སྟོན་རྒྱལ་མཚན་འབུམ། འཁོན་སྟོན་བཟང་པོ་དཔལ། རི་ཁྲོད་པ་དར་མ་རྒྱལ་མཚན། མང་པོ་གཏེར་སྟོན་བྱང་ཆུབ་གླིང་པ་དཔལ་གྱི་རྒྱལ་མཚན། ཀ༔ཐོག་པ་ཚུལ་ཁྲིམས་འབུམ་པ། ཀོང་པོ་སངས་རྒྱས་གླིང་པའི་སྲས་བརྒྱུད་སངས་རྒྱས་བློ་གྲོས། སྟག་ལུང་པ་མཁས་གྲུབ་ངག་དབང་གྲགས་པ། ཕག་གྲུ་བདག་པོ་ཀུན་དགའ་ལེགས་པ། ཀུན་མཁྱེན་སངས་རྒྱས་འཕེལ། གོང་དཀར་རྡོ་རྗེ་གདན་པའི་སློབ་མ་རྒྱ་སྟོན་རིག་པའི་གློག་ཕྲེང་། འཁོན་རིགས་བདག་སྨྱོན་ཀུན་དགའ་ལེགས་པ། རཏྣའི་གདུང་བརྒྱུད་ཀུན་དགའ་བསྟན་འཛིན།
འཁྲུལ་ཞིག་ཆེན་པོ་དབང་དྲག་རྒྱ་མཚོ། སྟག་བླ་གྲུབ་དབང་པདྨ་ནོར་བུ་སྟེ། དེ་རྣམས་ནི་རྗེ་ཉིད་ཀྱིས་སྩལ་བའི་སྐྱེ་ཕྲེང་གསོལ་འདེབས་ཡིད་བཞིན་དབང་གི་ཕྲེང་བ་ལས་བྱུང་བ་དང་། གཞན་ཡང་ཀློང་གསལ་སྟག་ཤམ་སོགས་ཀྱི་གཏེར་ལུང་དང་། རྗེ་ཉིད་ཀྱི་དག་པའི་གཟིགས་སྣང་སོགས་དང་བསྟུན་ན། སྟོན་པའི་སྤྱན་སྔར་དགྲ་བཅོམ་པ་ལྷ་མིག་རྣམ་པར་དག་པ་མ་འགག་པ། རྒྱ་གར་དུ་གྲུབ་ཆེན་ནག་པོ་སྤྱོད་པ་ཆེན་པོ། ཁ་ཆེ་རིན་ཆེན་རྡོ་རྗེ། གྲུབ་ཆེན་ལ་ལི་ཏའི་གཟུངས་མ། རྒྱ་གར་ཤར་ཕྱོགས་ཀྱི་རྒྱལ་པོ། ལྷོ་ཕྱོགས་རྒྱ་མཚོའི་འགྲམ་དུ་ཚོང་དཔོན་གྱི་རིགས་ལས་གྱུར་པའི་རྣལ་འབྱོར་པ། བོད་ཡུལ་དུ་ཀཿཐོག་པ་བྱམས་པ་འབུམ་པ། ལྷ་རི་པ་ནམ་མཁའ་འོད། ཙཱ་རི་རས་པ་བྱང་ཆུབ་འབུམ། ལྷོ་བྲག་པ་སློབ་དཔོན་ཨེ་མ། མཁས་པ་གཙང་ནག་པ། སྟག་ལུང་པ་སངས་རྒྱས་དབོན། དབུས་པ་བློ་གསལ། ས་བཟང་མ་ཏི་པཎ་ཆེན། འབྲི་གུང་པ་རྡོ་རྗེ་རྒྱལ་པོ། ཀུན་མཁྱེན་བོ་དོང་པའི་སློབ་མ་ཤངས་པ་རས་ཆེན་བསོད་ནམས་མཆོག་གྱུར། ཀུན་སྐྱོད་གླིང་པའི་སྲས་དབང་ཆེན་ཉི་ཟླ་བཟང་པོ། རྗེ་བཙུན་ཏཱ་ར་ནཱ་ཐ། དེ་དང་ཐུགས་རྒྱུད་གཅིག་པའི་རྒྱལ་ཚབ་ཡེ་ཤེས་རྒྱ་མཚོ། ལྷོ་འབྲུག་པ་མཐུ་ཆེན་ངག་དབང་རྣམ་རྒྱལ་སོགས་ཐོར་བུར་གསུངས་པས་མཚོན་མཁས་ཤིང་གྲུབ་།
པའི་སྐྱེས་རབས་མེ་ཏོག་མནྡ་རའི་ཕྲེང་བ་ལྟར་ཚར་དུ་དངར་བའི་མཐར། ཕྱོགས་དེར་ཡོངས་སུ་གྲགས་པ་ལྟར་ན་སྐུ་སྐྱེད་པའི་ཡབ་ཆེན་པོ་རྡུའི་རིགས་ཞེས་འོད་གསལ་ལྷ་བབས་ཀྱི་བརྒྱུད་པ་འགར་སྟོང་བཙན་ཡུལ་བཟུང་དང་། སྒོམ་སྟོན་བསོད་ནམས་རིན་ཆེན་སོགས་ཀྱི་རིགས་ལས་སོན་པའི་གོ་ས་ཟེའུ་སངས་ལྡིང་གི་རིགས་ལས་ཇོ་བོ་སྐྱབས་སུ་གྲགས་པའི་ཁྱིམ་བཙུན་སྦས་པའི་རྣལ་འབྱོར་པ་ཞིག་དང་། ཡུམ་ཆེ་བཙན་འབྲུའི་རིགས་སུ་སོན་པ་སྤྲུལ་པའི་གཏེར་སྟོན་པདྨ་བདེ་ཆེན་གླིང་པའི་ལྕམ་སྲིང་རྡོ་རྗེ་མཚོ་ཞེས་རང་གྲོལ་གྱི་རྣལ་འབྱོར་མ་ཞིག་གི་སྲས་སུ་སྲིད་པ་ཉེ་བར་བཟུང་བའི་ཚུལ་བསྟན། དོན་གྱིས་ནི་གནས་ཆེན་རི་བོ་བཀྲ་བཟང་གི་ཞིང་སྐྱོང་ཆེན་པོ་རྡོ་རྗེ་བྲག་བཙན་ཡིན་པར་བཞེད། གང་ལྟར་ཡང་གནས་ཆེན་དེ་ཉིད་ཀྱི་ནུབ་བྱང་དཔལ་གྱི་རི་བོའི་མགུལ་དུང་དཀར་གཡས་སུ་འཁྱིལ་པས་མཚན་པའི་སའི་ཐིག་ལེར། སྐུའི་སྐྱེ་བ་སྔ་མ་གྲུབ་དབང་པདྨ་ནོར་བུ་སྐུ་བལྟམས་ནས་བགྲང་བྱ་ང་དགུ་འདས་པ། རྗེ་ཉིད་ཀྱི་སྐུ་ཞང་པདྨ་བདེ་ཆེན་གླིང་པ་སྐུ་བལྟམས་ནས་དགུང་གྲངས་སོ་ལྔ་བཞེས་པའི་རབ་བྱུང་བཅུ་གཉིས་པའི་ནང་ཚན་ས་ཕོ་སྟག་གི་ལོའི་དཔྱིད་འབྲིང་བོད་ཟླ་བའི་དུས་ཚེས་དགེ་བར་སྐུ་བལྟམས། ཞག་བདུན་ཙམ་སོང་བ་ན་གཏེར་ཆེན་རིན་པོ་ཆེ་ཕེབས་ནས་འཆི་མེད་
ཚེའི་དབང་གནང་། ཡེ་ཤེས་ཆེན་པོས་བྱིན་གྱིས་བརླབས། རྡོ་རྗེ་ཚེ་དབང་ནོར་བུ་ཞེས་པའི་མཚན་གྱི་ཅོད་པན་དཔྱང་། ཟླ་ངོ་གསུམ་ཙམ་ནས་ཚིག་གི་བརྡ་འཕྲོད་པ་དང་། བདུན་ནས་དྲི་བ་དང་ལན་འདེབས་པ་ལ་ཆགས་ཐོགས་མེད། མཁའ་འགྲོ་ཆོས་སྐྱོང་གིས་སྲུང་བའི་རྟགས་མཚན་གསལ། སྐུ་སྐྱེ་བ་སྔ་མའི་བག་ཆགས་ཐམས་ཅད་ཀྱང་རིམ་གྱིས་སད། ངེད་ནི་ནམ་མཁའི་སྙིང་པོ་ཡིན། །སྒྲུབ་གནས་ལྷོ་བྲག་མཁར་ཆུ་ཡིན། །ཅེས་དང་། བདག་གྲུབ་ཆེན་པདྨ་ནོར་བུའོ་ཞེས་འཇིགས་པ་མེད་པའི་སེང་གེའི་སྒྲ་ཐོལ་བྱུང་དུ་བསྒྲགས། གཏེར་ཆེན་རིན་པོ་ཆེས་ཀྱང་གནུབས་ནམ་མཁའི་སྙིང་པོ་དང་། གྲུབ་ཆེན་པདྨ་ནོར་བུ་དབྱེར་མེད་པའི་སྤྲུལ་པར་ངོས་བཟུང་ཞིང་། འགྲན་བྲལ་གྱི་སྐྱེས་བུ་ཆེན་པོ་རྩོད་མེད་གཅིག་ཏུ་ཡོང་བར་ལུང་བསྟན། སྐབས་དེ་རྣམས་སུ་སློབ་དཔོན་ཆེན་པོ་པདྨ་ཀ་རའི་ཞལ་ཡང་ཡང་མཇལ། སྐུ་ཚེ་སྔ་མའི་ཡོངས་འཛིན་མང་པོའི་མཚན་གསལ་བར་སྟོན། དབང་སྐུར་ཆོས་འཆད། ཏིང་འཛིན་སྒོམ་པ། ཟབ་གཏེར་འདོན་ཅིང་གནས་སྒོ་འབྱེད་པ་སོགས་ཕལ་པའི་སྤྱོད་ཡུལ་ལས་འདས་པའི་གཞོན་ནུ་རོལ་རྩེད་ཙམ་གྱིས་ཀྱང་དཔྱོད་ལྡན་རྣམས་ཡིད་རང་དབང་མེད་པར་འཕྲོག །གཞན་སེམས་མཁྱེན་པའི་མངོན་ཤེས་དང་། བདེ་གསལ་མི་རྟོག་པའི་ཉམས་མྱོང་རྩོལ་
མེད་དུ་ཤར་བ་སོགས་སྒོ་དུ་མ་ནས་དམ་པའི་སྐྱེས་བུའི་སྤྲུལ་པར་ཡོངས་སུ་གྲགས་ཀྱང་། སྐལ་བ་དམན་པ་འགའ་ཞིག་གི་ལོག་རྟོག་བསལ་བའི་ཕྱིར་གོང་མའི་དཔོན་རིས་སུ་གཏོགས་པ་བླ་མ་ཀུན་བཟང་ཞེས་པ་ཞིག་གིས་རིག་འཛིན་སྟག་ཤམ་རྡོ་རྗེ་དང་། གཏེར་ཆེན་རོལ་པའི་རྡོ་རྗེ་ཟུང་ལ་ལུང་བསྟན་ཞུས་པ་འཁྲུལ་མེད་ཀྱི་གཟེངས་བསྟོད་གནང་བས་ཐེ་ཚོམ་གྱི་མུན་པ་དབྱིངས་སུ་སངས། གང་ལྟར་ཡང་དགུང་ལོ་ལྔ་པར་ལྗགས་ཀློག་ཕུལ་བས་ཚེགས་མེད་དུ་མཁྱེན། དྲུག་པར་གཏེར་ཆེན་བླ་མ་ལས་ཟབ་གསང་རྫོགས་པ་ཆེན་པོའི་སྨིན་གྲོལ་གསན་པ་ནས་བཟུང་ཕལ་ཆེར་འབྲལ་མེད་དུ་བཞུགས། དགུང་ལོ་བདུན་པར་རྡོ་རྗེ་གྲོ་ལོད་ཀྱི་ལས་བྱང་བློར་བཟུང་ཞིང་ཡི་དམ་མཛད་པས་བསྐྱེད་རིམ་གསལ་བརྟན་གྱད་དུ་གྱུར། བརྒྱད་པར་སངས་གླིང་གཏེར་བྱོན་ཐུགས་རྗེ་ཆེན་པོའི་རྒྱབ་ཆོས་ཡང་གསང་འོད་དྲལ་གཟིགས་པས་གོ་བ་དཔྱིས་ཕྱིན་པར་འཁྲུངས་ཤིང་། གསང་སྔགས་སྤྱིའི་ལྟ་སྤྱོད་ལ་ངེས་པ་རྙེད། བཅུ་པར་མདོ་སྔགས་ལ་མཁྱེན་པ་རྒྱས་པས་དཔྱོད་ལྡན་གྱི་ཁེངས་པའི་སྤོབས་པ་ཟིལ་གྱིས་མནན། བཅུ་གཅིག་པར་གཏེར་ཆེན་བླ་མ་ལས་རང་གཏེར་མཁའ་འགྲོ་སྙིང་ཏིག་གི་སྨིན་གྲོལ་ཟབ་རྒྱས་སུ་གསན་པས་གནས་ལུགས་ལ་འཕྲིག་ཚུད། མནལ་ལམ་ནམ་འདོད་དུ་ཟིན།
དྲེགས་པ་ཅན་གྱིས་སྲོག་སྙིང་ཕུལ། བཅུ་གཉིས་པར་རིག་འཛིན་འགྱུར་མེད་རྡོ་རྗེའི་ཐུགས་སྲས་ཨོ་རྒྱན་རྣམ་གྲོལ་ལས་སྔ་འགྱུར་མདོ་སྒྱུ་སེམས་གསུམ་གྱི་སྨིན་གྲོལ་སོགས་རྒྱ་ཆེར་གསན། ཁྱད་པར་དགུང་གྲངས་བཅུ་གསུམ་བཞེས་སྐབས་གཏེར་ཆེན་བླ་མ་ལས་སྨར་ཚང་ལུགས་ཀྱི་ཕྱག་ཆེན་དང་། རང་གཏེར་རྫོགས་པ་ཆེན་པོའི་ཉམས་ཁྲིད་གནད་སྨིན་དུ་གསན་པས་རྟོགས་པའི་བོགས་ཐོན། ལོ་དེའི་མཇུག་ཏུ་འཇང་ཆུ་རི་བཀྲ་དགོན་དུ་སྤྱན་དྲངས་ནས་གྲུབ་ཆེན་མཆོག་གི་སྤྲུལ་པའི་སྐུར་མངའ་གསོལ། རྗེ་དབོན་བླ་མ་སྐལ་བཟང་ཨོ་རྒྱན་བསྟན་འཛིན་ནས་བརྩེ་བས་བསྐྱངས། བཅུ་བཞི་པར་ཀཿཐོག་རྒྱལ་སྲས་བསོད་ནམས་ལྡེ་བཙན་ཕྱོགས་དེར་ཕེབས། རྗེ་དབོན་བླ་མ་སྐལ་བཟང་ལས་བདུད་འདུལ་གཏེར་ཆོས་བཞུགས་སོ་འཚལ་དང་། རྩེ་ལེའི་བཀའ་འབུམ་སོགས་གསན། ཚུར་ཀློང་གསལ་རྩ་གསུམ་སྐོར་གྱི་དབང་ལུང་ཡོངས་རྫོགས་གནང་བ་སོགས་ལེགས་པར་གསན་ཅིང་། རྒྱལ་སྲས་མཆོག་ནས་ཕྱི་མཐའ་གཟིགས་པའི་ཐུགས་ལ་ཤིན་ཏུ་བཏགས། བར་ཁྲོད་ལྷ་ཁང་དུ་རིག་འཛིན་པདྨ་ཆོས་རྒྱལ་སྤྱན་དྲངས་ཤིང་བུམ་སྒྲུབ་བཙུགས་པའི་སྐབས་བླ་མ་སྐལ་བཟང་ནས་རྗེ་དེ་ཉིད་ཀྱི་གཏེར་གསར་ཤོག་སེར་ལས་ཕབ་གང་གྲུབ་གསན་པ་དང་མཉམ་དུ་གསན་བཞེས་དང་། ཟབ་
གསང་ཆོས་ཀྱི་བགྲོ་བས་དུས་འདའ་བར་མཛད། དགུང་གྲངས་བཅོ་ལྔ་པར་གཏེར་ཆེན་པདྨའི་ཞབས་ལས་ཕྱག་ཆེན་ཁྲིད་ཡང་བསྐྱར་དུ་གསན་པས་ཞི་གནས་ཀྱི་ཉམས་བརྟན་པོ་འཁྲུངས། སྐྱེ་བདུན་སྒྲུབ་ཆེན་གྱི་གྲལ་དུའང་ཕེབས། བཅུ་དྲུག་པར་སླར་ཡང་གཏེར་ཆེན་བླ་མ་ལས་རྫོགས་ཆེན་སེམས་སྦྱོང་སྐོར་དང་། ཐབས་ལམ་ཟབ་མོའི་ཉམས་ཁྲིད་སྨིན་པར་བཞེས། ཡེ་ཤེས་འཕོ་བའི་དབང་བསྐུར་བརྙེས། ཆུ་མོ་སྦྲུལ་ལོ་དེར་གཏེར་ཆེན་རིན་པོ་ཆེ་དགུང་གྲངས་ལྔ་བཅུ་རྩ་གཅིག་བཞེས་པའི་ཧོར་ཟླ་བཅུ་གཅིག་པའི་གནམ་སྟོང་ཐོ་རངས་དགོངས་པའི་ཆོས་དབྱིངས་སུ་ཐིམ་པའི་ཚེ་དགོངས་རྫོགས་ཀྱང་བསྙེལ་མེད་དུ་བསྒྲུབ། ཐོས་བསམ་སྒོམ་པའི་གོ་ཆ་བརྟན་པོ་མཛད། བཅུ་བདུན་པར་སྐུ་མཚམས་བཅད་རྒྱ་ཅི་རིགས་གནང་། བཅོ་བརྒྱད་ལ་གཙང་ཁྲོ་སོགས་ཀྱི་གནས་མཇལ་ལ་ཕེབས་ཤིང་རྟོགས་པའི་བོགས་དབྱུང་། གནམ་ཆོས་འགའ་ཞིག་བབ་ཀྱང་ཆེད་གཉེར་མ་མཛད། ཨོ་རྒྱན་རིན་པོ་ཆེས་འབྱུང་འགྱུར་ལུང་བསྟན། བཅུ་དགུར་གཏེར་ཆེན་བླ་མའི་སྒྲུབ་གནས་སེང་ཁྲོམ་རི་ངོགས་སུ་ཐུགས་དམ་ལ་བཞུགས་པས། ཟབ་གཏེར་གྱི་བཀའ་ཐོབ་ཡོང་བའི་ངེས་ཤེས་འཁྲུངས་ཀྱང་རྟེན་འབྲེལ་འགའ་ཞིག་གིས་རྫས་གཏེར་ཙམ་ལས་ཕྱག་ཏུ་མ་སོན། ཉི་ཤུ་པར་དཔལ་གྱི་རི་
བཀྲར་བསྙེན་མཚམས་དམ་པོར་མཛད་པས་ཡི་དམ་གྱི་ལྷས་རྗེས་སུ་བཟུང་། བར་ཆད་ཀྱི་གེགས་ལས་གྲོལ། ཡེ་ཤེས་ཀྱི་མཁའ་འགྲོ་མ་ལས་ཟབ་མོའི་སྙན་བརྒྱུད་འགའང་གསན། ཉེར་གཅིག་པར་སྟག་ཤམ་ནུས་ལྡན་པ་སོགས་ཀྱི་ཞལ་སློབ་སྦས་པའི་གྲུབ་དབང་སྐལ་བཟང་རིན་ཆེན་ལས་ཐབས་ལམ་གྱི་ཟབ་གནད་དང་། དྲག་སྔགས་ཀྱི་ཕྱག་བཞེས། གུར་དྲག་ཡེ་ཤེས་རབ་འབར་གྱི་དབང་ལུང་སོགས་སྨིན་རྒྱས་སུ་གསན། ཡེ་ཤེས་མཁའ་འགྲོ་མཚོ་རྒྱལ་མས་ཞལ་ཡང་ཡང་བསྟན་ཅིང་བྱིན་གྱིས་བརླབས། གསང་བ་མཆོག་གི་དབང་བསྐུར་སྩལ། ལོ་དེའི་འཇུག་ཉི་མ་ཕུག་ཏུ་ཨོ་རྒྱན་རྣམ་གྲོལ་ལས་དགོངས་འདུས་གསེར་ཆོས་ཀྱི་སྨིན་གྲོལ་རྫོགས་པར་གསན། སྣང་སེམས་དབྱེར་མེད་ཀྱི་དོན་མངོན་དུ་མཛད། ཉེར་གཉིས་པར་ཚོམ་ཆེན་དུ་ཟབ་ཁྲིད་ཐོག་མར་གསུངས། ཐབས་ལམ་ཟབ་མོའི་ཉམས་བཞེས་གཏན་ལ་ཕབ། ཤིང་དགུ་གངས་རར་ཉམས་རྟོགས་ཀྱི་བོགས་དབྱུང་། མངོན་སྤྱོད་ཀྱི་ལྟས་བསྟན། ལོ་མཇུག་ཏུ་སྟག་ཕུ་སེའུ་ལུང་གི་དབེན་པར་འདུས་པ་བརྒྱ་ཕྲག་ཙམ་ལ་ཟབ་ཁྲིད་| སྩལ་བས་ཐམས་ཅད་ལ་ངོ་སྤྲོད་ཐེབས་པ་སོགས་ཁྲིད་ལམ་ལེགས་པ་བྱུང་། འདི་ནས་བཟུང་ཟབ་ཁྲིད་མང་དུ་མཛད་པར་སྣང་། ཙི་རོང་ཏིང་རི་རུ་རྒྱལ་སྲས་པདྨ་དབང་རྒྱལ་ལ་ཟབ་ལམ་རྩ་རླུང་གི་ཁྲིད་
སྨིན་པར་སྩལ། ཉེར་གསུམ་པར་རྗེ་ཉིད་ཀྱི་ཕྱི་མོ་ཡེ་ཤེས་མཁའ་འགྲོ་ཆེན་མོ་དེའང་སྐུ་གཤེགས་པའི་ཚུལ་བསྟན་པས་དགོངས་རྫོགས་ལེགས་པར་བསྒྲུབས། ཌཱ་ཀི་མས་སྐུ་ཚེ་ལ་བར་ཆད་མེད་པའི་ལུང་བསྟན་སྩལ། ཉག་གཤིས་ཁ་དབེན་རྫོང་དུ་བཞུགས་སྐབས་དྲེགས་པ་རཱ་ཧུ་ལས་མི་བཟད་པའི་ཐོག་སེར་གྱི་ཆོ་འཕྲུལ་བསྟན་པས་ཡི་དམ་གྱི་གསལ་སྣང་དང་ལྟ་གདིངས་ཀྱི་ཟིལ་གྱིས་མནན། རིག་འཛིན་རོལ་པའི་རྡོ་རྗེ་མཇལ་བར་ཕེབས་བཞེད་གནང་ནའང་གཞན་རྐྱེན་གྱིས་བཤོལ་པས་ལྕགས་བྱི་ལོ་དེ་ཉིད་ཀྱི་ནག་ཟླའི་ཉེར་གསུམ་རིག་འཛིན་བླ་མ་ཞི་བར་གཤེགས་སྐབས་ཡེ་ཤེས་ཀྱི་སྐུས་རྗེས་སུ་བཟུང་བ་ཙམ་བྱུང་། གཏེར་ཆེན་དེ་ཉིད་དང་དངོས་སུ་མཇལ་ན་རྗེ་ཉིད་ལུས་མ་སྤངས་པར་མཁའ་སྤྱོད་དུ་གཤེགས་པའི་ལུང་བསྟན་ཡོད་པར་གྲགས། ལོ་དེའི་སྟོན་ཟུར་མང་རིག་འཛིན་གསུང་རབ་རྒྱ་མཚོའི་དྲུང་སྨར་ཁམས་དབེན་རྫོང་སྒར་དུ་ཕེབས། ཕྱག་ཆེན་སྙན་བརྒྱུད་ཀྱི་ཁྲིད། རྡོ་རྗེ་འཆང་གི་དབང་བསྐུར། རྫོགས་ཆེན་གསང་བ་ཡེ་ཤེས་ཀྱི་ཐོད་རྒལ་ངོ་སྤྲོད་སོགས་དང་། རོལ་རྡོར་གཅུང་ཨོ་རྒྱན་ལྷུན་གྲུབ་ལས་གཏེར་གསར་ཕྱག་རྡོར་དང་། སེང་གདོང་མའི་སྐོར་ཡོངས་རྫོགས་གསན། སྐབས་དེར་ཀུན་མཁྱེན་སི་ཏུ་རིན་པོ་ཆེའང་མཇལ་ཞིང་ཆོས་འབྲེལ་ཙམ་ནོས་ནས་ཕྱིར་
ཕེབས། ཉེར་བཞི་པར་ཅེམ་ཆེན་དགོན་དུ་བླ་མ་སྐལ་བཟང་དང་ཞལ་ལྷན་རྒྱས་མཛད། དབྱར་དུས་རྒྱལ་སྲས་ཆོས་སྐྱོང་དཔལ་ལྡན་སོགས་ལ་རྫོགས་པ་ཆེན་པོའི་སྨིན་ཁྲིད་བཏབ། ཀུན་མཁྱེན་ཀློང་ཆེན་པས་ཞལ་བསྟན་ཅིང་རྗེས་སུ་གནང་བ་སྩལ། སྔགས་སྲུང་མས་ཕྲིན་ལས་སྒྲུབ་པར་གཡར་དམ་བཞེས། ཐུགས་དམ་བོགས་ཤིན་ཏུ་ཆེ་བར་འཁྲུངས། ཉེར་ལྔ་པ་ཡང་དེ་སྐོར་དུ་བཞུགས་ཏེ་སྒྲུབ་ཆེན་དང་ཟབ་ཁྲིད་སོགས་ཕྲིན་ལས་བསྐྱངས། ཁྱད་པར་དྲག་པོ་མངོན་སྤྱོད་ཀྱི་ལས་ལ་རྟགས་ཐོན་པར་མཛད། ཉེར་དྲུག་ཆུ་ཡོས་ལོའི་ཆོ་འཕྲུལ་ཟླ་བར་ཀཿཐོག་ཏུ་ཕེབས། རྒྱལ་སྲས་རིན་པོ་ཆེ་མཇལ། སྟག་ཤམ་པའི་ཐུགས་སྒྲུབ་ཞི་བ་དང་། རྩ་གསུམ་སྙིང་པོ་དོན་སྦྱོར་གྱི་དབང་ལུང་སོགས་ཟབ་ཆོས་གསན། རྗེ་ཉིད་ཀཿཐོག་རྡོ་རྗེ་གདན་གྱི་སེང་ཁྲིར་མངའ་གསོལ་ཞིང་བསྟན་པ་འཛིན་སྐྱོང་སྤེལ་བར་གདམས་པ་ལ་བརྟེན། ཀཐོག་རིག་འཛིན་ཆེན་མོ་ཞེས་གངས་ཅན་གྱི་ལྗོངས་འདིར་རླུང་ལྟར་གྲགས་པའང་དོན་དེ་ལས་བྱུང་བར་གསལ། གང་ལྟར་ཡང་དམ་པ་རྣམ་གཉིས་ཐུགས་ཡིད་གཅིག་འདྲེས་སུ་མཛད་ནས་རྒྱལ་ཁམས་ཕྱོགས་མེད་ལ་ཕེབས་རྒྱུའི་སྙན་ཞུ་དང་བཅས་ཐུགས་འཕྲེང་བཞིན་དུ་ཕྱིར་ཕེབས། ས་ག་ཟླ་བའི་ཚེས་ལྔ་ལ་རྒྱལ་སྲས་རིན་པོ་ཆེ་ཡང་གློ་བུར་དུ་ཞིང་གཤེགས།
དབྱར་ཟླ་ར་བའི་ནང་གཏེར་ཆེན་པདྨ་བདེ་གླིང་གིས་སྐུ་གདུང་རྒྱལ་སྲས་པདྨ་དབང་རྒྱལ་དང་ལྷན་རྒྱས་ཀྱིས་ཞུགས་འབུལ་གནང་བས་རྟགས་མཚན་བསམ་གྱིས་མི་ཁྱབ་པ་གསལ། རྒྱལ་སྲས་བསྟན་འཕེལ་དགུང་ལོ་བདུན་བཞེས་པ་བླ་མའི་དམ་ཚིག་ལ་དགོངས་ནས་རྗེ་ཉིད་ཀྱིས་ཕྱོགས་དེར་གདན་དྲངས་ཤིང་མགོ་འདྲེན་བརྩེ་གཟིགས་རྒྱ་ཆེར་གནང་བར་གྲགས། ལོ་དེའི་སྟོན་ཀར་དབུས་སུ་འབྱོན་བཞེད་པས་བླ་མ་སྐལ་བཟང་གི་དྲུང་དུ་ཕྱི་ཕྱག་མཛད་པར་ཕེབས། དམ་བཅའི་ཡི་གེའང་བཀོད། བོད་ཡུལ་དུ་ཆིབས་ཁ་བསྒྱུར་བའི་ཐོག་མར་གོ་འཇོ་མཁོ་ཁྱིམ་དགོན་དུ་བྱོན། རྗེ་ཨོ་རྒྱན་རྣམ་གྲོལ་ལས་མཁའ་འགྲོ་སྙིང་ཏིག་གི་དབང་ལུང་ཁྲིད་སོགས་ཟབ་ཆོས་དུ་མ་གསན། རིམ་བཞིན་ཟུར་མང་བདུད་རྩི་དིལ་དུ་བྱོན། རིག་འཛིན་གསུང་རབ་རྒྱ་མཚོ་ལས་ཟུར་མང་སྙན་བརྒྱུད་ཀྱི་དབང་ལུང་ཁྲིད་གསུམ་སོགས་སྨིན་པར་གསན། ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། རྗེ་འདི་དང་པདྨ་བདེ་ཆེན་གླིང་པ་གཉིས་རྩ་བའི་བླ་མར་བཟུང་། ཕྱིས་ནས་ཞབས་དྲུང་ཏྲེ་ཧོ་དང་། ཇོ་ནང་ཀུན་བཟང་དབང་པོ་གཉིས་ཀྱང་བཀའ་དྲིན་ཆེ་བའི་བླ་མའི་མཆོག་ཏུ་བཀུར། གཏེར་དབོན་ཨོ་རྒྱན་ལྷུན་གྲུབ་ལས་ཀློང་གསལ་མ་གཏོགས་པ་རཏྣའི་སྐོར་ཚང་མའི་དབང་ལུང་སོགས་གསན། ཕར་རྫོགས་
ཆེན་མཁའ་འགྲོ་སྙིང་ཏིག་གི་དབང་ལུང་ཁྲིད་གསུམ་སྨིན་རྒྱས་སུ་སྩལ་བས་འགྲོ་དོན་ཕྲིན་ལས་ཀྱི་རྟེན་འབྲེལ་འགྲིགས། ཉེར་བདུན་པར་ཀེ་རོང་རྡོ་རྗེ་ཅོང་ཕུག་ཏུ་བྱོན། དེར་རོལ་རྡོར་ཡང་གཏེར་དྲག་པོ་བདེ་གཤེགས་འདུས་པའི་སྨིན་བྱེད་སོགས་ཕྱག་ཏུ་བབས། ཀརྨ་ལྷ་སྟེང་བརྒྱུད། རི་བོ་ཆེར་ཞབས་དྲུང་འཕགས་པ་ལས་སངས་རྒྱས་དབོན་གྱི་ཐུགས་སྒྲུབ་གསན། ཕར་ཡང་ཆོས་འབྲེལ་འགའ་ཙམ་ཕུལ། སྤར་གླང་མ་ལུང་ཞེས་སྟག་ཤམ་པའི་གཏེར་གནས་མཇལ་ཞིང་། རིམ་པར་བརྒྱུད་སྤུ་བོ་འདོངས་ཆུ་བྱམས་པའི་ལྷ་ཁང་མཇལ། སྤུ་སྟོད་བདུད་འདུལ་གདུང་སྐུ་མཆེད་ལས་བདུད་འདུལ་གཏེར་ཁ་ཡོངས་རྫོགས་ཀྱི་སྨིན་གྲོལ་གསན། དེ་སྐབས་སྤུ་བོ་ནང་འཁྲུགས་དང་ཆུ་བོ་རྒྱས་པས་ཀློ་ལམ་འགག་སྟབས། རྗེ་ཉིད་གཅིག་པུར་གནས་ཆེན་རྨ་ཀུང་ལུང་གི་བར་སྒོ་དམ་ཅན་ཕོ་བྲང་གི་ཉེ་འདབས་དམ་རྫོགས་ཞེས་བྱའི་བྲག་སྐྱིབས་སུ་བཞུགས་ནས་འཕགས་མཆོག་ཐུགས་རྗེ་ཆེན་པོའི་བསྙེན་སྒྲུབ་རྟགས་ཐོན་གནང་། དེ་ནས་སྦས་ཡུལ་བྲ་གད་ལྗོངས་སུ་པདྨ་ཤེལ་ཕུག་ཏུ་བཞུགས། སླར་སྨན་ཆུ་སྤྲུལ་སྐུས་ཞུས་ངོར་སྤུ་བོ་ཡེ་གང་དུ་ཕེབས། དད་འདུས་སྟོང་ཕྲག་ཙམ་ལ་བཀའ་བརྒྱད་ཀྱི་དབང་ཆེན་དང་ཐུགས་སྒྲུབ་ཀྱི་དབང་ཁྲིད་དང་། ཡུལ་སྡེ་སོ་སོར་ཡང་ཡང་ཕྲིན་ལས་བསྐྱངས་ནས་དགེ་
བསྐུལ་སྩལ། ཉེར་བརྒྱད་པར་སླར་བྲག་ལྗོངས་ནས་རྒྱངས་ཕུ་གངས་རར་ཕེབས། སྒྲུབ་པ་ལ་བཞུགས། དྲེགས་པ་ཅན་གྱི་ཆོ་འཕྲུལ་བརྟུལ་ཞུགས་ཀྱིས་སྤ་བཀོང་། ལོ་དེའི་དབྱར་ཐོག་རྟག་བརྟན་དེའུ་སོགས་ཀྱི་ལྷ་ཁང་རྟེན་དང་བརྟེན་པར་བཅས་པ་གསར་དུ་བཞེངས། ཆོས་ཀྱི་ཆར་ཕབ། སྟོན་བྲག་ལ་བརྒྱུད་ཕྱང་ཀོང་ཞེས་ཉང་པོ་གཞུང་ནས་འོལ་ཀ་སོགས་ལ་ལམ་མཛད། ཁྲ་འབྲུག་བསམ་ཡས་ལྷ་ས་སོགས་ལ་ཕྱག་མཆོད་གནང་ནས་མཚུར་ཕུར་ཕེབས། ཀརྨ་པ་བྱང་ཆུབ་རྡོ་རྗེ་དང་། ཞྭ་དམར་ཆོས་ཀྱི་དོན་གྲུབ་ལྷན་རྒྱས་སུ་མཇལ། ཞྭ་དམར་རིན་པོ་ཆེར་དགེ་བསྙེན་གྱི་སྡོམ་པ་བསྐྱར་། ཀརྨ་བསྟན་པ་མཐའ་རྒྱས་ཞེས་མཚན་གསོལ། སྙིང་པོ་མདོ་ལྔའི་ལུང་། ཆོས་དྲུག་གསེར་ཞུན་མ་དང་། ཕྱག་ཆེན་སྙིང་པོ་དོན་གསལ་གྱི་ཁྲིད་སོགས་གསན། ཕྱི་ནང་གི་རྟེན་འབྲེལ་ཐམས་ཅད་འགྲིགས་ཞེས་གསུངས། ཉེར་དགུ་པར་མེ་རྟ་ལོའི་ཟླ་བ་དང་པོར་ཡབ་སྲས་ལ་བརྟན་བཞུགས་ཕུལ། དཔལ་སྟག་སྣ་དགོན་དུ་ཕེབས། མ་ལ་སྤང་ཏྲེ་ཧོ་རིན་པོ་ཆེ་བྱང་ཆུབ་ཆོས་ཀྱི་དབང་པོ་མཇལ། ཞབས་བརྟན་དང་བཀྲ་ཤིས་རྫས་རྟགས་རྒྱལ་སྲིད་གསེར་སྲང་བཅུ་སོགས་ཕུལ། ཆོས་གླིང་རྫོང་ཆེན་དབང་ཁྲིད་ངོ་སྤྲོད་བཅས་གསན། ཐུགས་ཡིད་གཅིག་ཏུ་འདྲེས། དཔལ་རིག་པ་འཛིན་
པ་ཆེན་པོ་ཞེས་མཚན་གསོལ། ཞབས་བརྟན་དང་ལམ་ཡིག་བསྔགས་བརྗོད་ཤིན་ཏུ་ཆེ་བ་ཅན་གནང་བས་ཕྱོགས་ཐམས་ཅད་དུ་གྲགས་པའི་སྣང་ཆེན་བརྡལ། ཇོ་ནང་བཀའ་འབུམ་དང་སྦྱོར་དྲུག་གི་ཁྲིད་སོགས་གསན་པར་བཞེད་པ་ནག་ཙང་རུ་ལག་གི་བྱང་ཕྱོགས་གཡུ་རྩེ་འབྲས་སྤུངས་པ་ཆོས་རྗེ་ཀུན་བཟང་དབང་པོའི་དྲུང་དུ་བྱོན་ན་ལེགས་ཚུལ་དང་། སྐུ་རྫོང་སོགས་ཟབ་རྒྱས་བསྟར། རེ་ཞིག་ཤངས་ཟབ་བུ་ལུང་དུ་གནས་འབྲེལ་ལ་ཕེབས། རྩ་བ་གསུམ་གྱི་བསྙེན་སྒྲུབ་ཚད་དུ་བསྐྱལ། ཁམས་ནས་སྤྲུལ་སྐུ་བསོད་ནམས་ནོར་བུ་བྱོན་པར་བླ་མ་སྐལ་བཟང་གི་སྐུ་ཚེའི་ཚད་དང་ཡང་སྲིད་ཕྱི་མ་སོགས་དུས་གསུམ་སྒྲིབ་མེད་དུ་ལུང་བསྟན། འདུས་པ་རྣམས་ལ་སྙིང་ཏིག་གི་དབང་ལུང་ཁྲིད་གསུམ་དང་བླ་མ་དགོངས་འདུས་སོགས་ཆོས་ཆར་ཕབ། སླར་སྟག་སྣར་བྱོན་ནས་ཆོས་འབྲེལ་སོགས་གསན། དེ་ནས་བྱ་བཏང་དཀྱུས་མའི་ཚུལ་གྱིས་རིམ་པར་ཐེག་ཆེན་ཕུན་ཚོགས་གླིང་དང་། ཇོ་མོ་ནང་སོགས་མཇལ། གཡུ་རྩེ་འབྲས་སྤུངས་སུ་ཕེབས་ནས་ཞག་གསུམ་བཞུགས་ཀྱང་དེ་རེས་ཆོས་རྗེ་ཀུན་བཟང་དབང་པོ་མཇལ་མ་ཐུབ་པས་ལམ་བསྲངས་ནས་ལ་སྟོད་དིང་རི་དང་སྙེ་ནམ་སོགས་བརྒྱུད་བལ་ཡུལ་དུ་ཕེབས། གནས་གཟིགས་དང་ཐུགས་སྨོན་རྒྱ་ཆེར་སྩལ། སླར་དགུང་ལོ་སུམ་ཅུ་བར་
མང་ཡུལ་སྐྱིད་གྲོང་དུ་བྱོན། འཕགས་པ་ཝ་ཏི་མཇལ། རི་བོ་དཔལ་འབར་དུ་བསྙེན་སྒྲུབ་མཛད་པས་ཞིང་སྐྱོང་མ་མོས་ཚོགས་འཁོར་ཕུལ། སྐྱིང་གྲོང་འཇམ་དཔལ་གླིང་བླ་མར་གསར་རྙིང་གི་ཆོས་རྒྱུན་དཀོན་པ་ཅི་རིགས་གསན། ཕྱོགས་དེར་དབང་ལུང་ཁྲིད་ཆོས་ཀྱི་ཆར་ཕབ། མི་ལའི་རྫོང་དྲུག་དང་། གུང་ཐང་རྒྱལ་ཁབ་ཀྱི་རྟེན་མཇལ་སོགས་མཛད། ར་ལ་ཟ་འོག་ཕུག་ཏུ་རེ་ཞིག་བཞུགས། གསེར་བཟང་ཀུན་སྤངས་ཡོན་ཏན་རྒྱ་མཚོ་སོགས་ལ་གདམས་ཟབ་བཏབ། ནུབ་རིར་སྦས་པའི་རྣལ་འབྱོར་པ་འགའ་ཞིག་ལ་འབྲུག་ལུགས་ཕྱག་ཆེན་གྱི་ཁྲིད་སོགས་ཁྲིད་རྒྱུན་དཀོན་པ་ཅི་ལ་རིགས་གསན། དབང་ལུང་ཁྲིད་གསུམ་མང་དུ་སྩལ། དགུང་གྲངས་སོ་གཅིག་པར་མི་དབང་བསོད་ནམས་སྟོབས་རྒྱས་ཀྱི་ལུང་གིས་བསྐུལ་ནས་བལ་ཡུལ་མཆོད་རྟེན་བྱ་རུང་ཁ་ཤོར་ལ་རབ་གནས་སྩལ། ཡར་མར་གྱི་ཕེབས་ལམ་དུ་མི་དབང་གི་བཙུན་མོ་ལའང་དབང་བཀའ་གནང་། རི་བོ་དཔལ་འབར་བདུད་རྩི་ཕུག་ཏུ་བཞུགས་ནས་བསྟན་འགྲོའི་བདེ་ཐབས་སུ་མཁའ་འགྲོ་གཏོར་ཆེན། ཕུར་པའི་སྒྲུབ་ཟློག །གླིང་བཞི་སྤྱི་མདོས་སོགས་རྒྱས་པར་མཛད། བོ་དོང་པཎ་ཆེན་གྱི་བཞུགས་གནས་དཔལ་མོ་ཆོས་སྡིངས་སུ་ཕེབས། སྤང་རོང་རྗེ་དབོན་སོགས་ལ་སྨིན་གྲོལ་གྱི་གདམས་པ་སྩལ། ལ་
ཕྱི་ཆུ་བར་དུ་ཕེབས་པས་ཉམས་རྟོགས་ཀྱི་རྩལ་རྫོགས། དིང་རི་གླང་འཁོར་དུ་ལོ་པཎ་བླ་མར་ཆོས་དབང་རྫོགས་ཆེན་གྱི་ཁྲིད་ལུང་དང་། བྱང་གཏེར་བདེ་ཆེན་རྒྱ་མཚོའི་སྐོར་སོགས་གསན། ཕར་ཡང་| སྙིང་ཏིག་གི་ཁྲིད་ཀ་སྩལ། རྒྱལ་གྱི་ཤྲཱིའི་ཕྱོགས་བཞིར་གཏོར་ཚོགས་རྒྱས་པར་གནང་། གྲངས་སོ་རྫོང་ཕུ་སྤྲུལ་སྐུ་ཕྲིན་ལས་རབ་བརྟན་ལས། བོ་དོང་ལུགས་ཀྱི་འཇིགས་བྱེད་དགྱེས་རྡོར་གསང་འདུས་ལུགས་གཉིས། བདེ་མཆོག་མེ་ཏྲི་པ་དང་དམ་པའི་ལུགས། གསོ་རིག་གི་ཁྲིད་ཀ །ཁོང་པས་གྲུབ་ཆེན་རང་རིག་རས་པ་འཇམ་དཔལ་བཤེས་གཉེན་ལས་གསན་པའི་བར་འབྲུག་གི་ཆོས་སྐོར་ཆ་ཚང་སོགས་ཀྱང་གསན། ཕར་ཡང་བྱང་གཏེར་ཕུར་པའི་དབང་བཀའ་རྒྱས་པར་ཕུལ། སླར་ང་ལ་བརྒྱུད་ནས་གཡུ་རྩེ་འབྲས་སྤུངས་སུ་གྲུབ་ཆེན་ཀུན་བཟང་དབང་པོའི་སྤྱན་སྔར་ཟླ་བ་གསུམ་ལྷག་ཙམ་བཞུགས། གཞན་སྟོང་དབུ་མའི་ལྟ་ཁྲིད་དང་དཔལ་དུས་ཀྱི་འཁོར་ལོའི་སྨིན་གྲོལ་གྱིས་གཙོས་ཇོ་ནང་ཡབ་སྲས་ལས་བརྒྱུད་པའི་ཟབ་ཆོས་ཤིན་ཏུ་མང་བ་གསན། ཉམས་རྟོགས་རྒྱ་ཆེར་འཕེལ། གཞན་སྟོང་དབུ་མ་ཆེན་པོའི་བག་ཆགས་ཆེས་ཆེར་སད། དགུང་ལོ་སོ་གཉིས་པར་རུ་ལག་གྲམ་པ་རྒྱང་དུ་དུས་འཁོར་ལྗགས་བསྙེན་སྩལ་བ་གྲོལ་ནས་ཕྱོགས་དེར་ཆོས་ཆར་ཕབ། བསམ་གླིང་དུ་རིག་
འཛིན་པད་ཕྲིན་གྱི་ཐུགས་སྲས་ཁམ་ལུང་པ་རིག་འཛིན་དབང་རྒྱལ་གྱི་ཞབས་པད་བསྙེན། བི་མ་སྙིང་ཐིག་གི་དབང་ལུང་ཡོངས་རྫོགས། ཀརྨ་སྙིང་ཏིག །བྱང་གཏེར་སྐོར་ཅི་རིགས། མདོ་དབང་ཆེན་མོའི་གཏད་རྒྱ་སོགས་གསན། རྫོགས་ཆེན་གྱི་བསྟན་འཛིན་མཆོག་ཏུ་བསྔགས་པ་སྩལ། ཕར་གཞན་ལའང་དབང་ཁྲིད་མང་དུ་གནང་། མངའ་རིས་རྫོང་དཀར་བརྒྱུད་ནུབ་རི་སྒང་ཆེན་དུ་སྨན་སྒོམ་ཆོས་བཟང་ལ་འདོད་ཆོས་ཤིན་ཏུ་སྨར་བ་དང་། རྟ་ལར་གྲུབ་མཆོག་ཤཱཀྱ་སེང་གེ་ལས་རས་ཆུང་སྙན་བརྒྱུད་གསར་མའི་དབང་ལུང་ཁྲིད་བཅས་གསན། ཕྱོགས་ཐམས་ཅད་དུ་ཆོས་འབྲེལ་རྒྱ་ཆེར་སྩལ་ནས་གློ་བོ་ཕྱོགས་སུ་བྱོན། མུམྨ་ནེའི་གནས་ཆུ་མིག་བརྒྱ་རྩ་དང་། རྡོ་ཆུ་མེ་འབར་སོགས་སུ་གནས་འབྲེལ་མཛད། གློ་བོ་མངའ་བདག་པས་ཞབས་ནས་བཏེགས། དོལ་པོ་ཕྱོགས་སུ་ཕེབས། འདི་སྐོར་ཕྲིན་ལས་རྒྱས། ཛུམ་ལང་རྒྱལ་པོ་རྗེ་འབངས་ནས་ཀྱང་བསྙེན་བཀུར་བསྟབས། རྟ་གྲུར་གྲུབ་མཆོག་ཨོ་རྒྱན་བསྟན་འཛིན་དང་མཇལ། བྱང་གཏེར་ཉོན་མོངས་རང་གྲོལ་གྱི་དབང་ཁྲིད་ལུང་གསུམ། བདུད་འདུལ་བའི་རྫོགས་ཆེན་ཀུན་བཟང་འཇའ་སྐུའི་ཉམས་ཁྲིད། གར་དབང་ཟླ་བ་རྒྱལ་མཚན་གྱི་ཟབ་ཏིག་དང་། ཐུགས་རྗེ་ཆེན་པོ་རྩ་གསུམ་སྙིང་ཏིག་སོགས་ཤིན་ཏུ་སྨིན་པར་
གསན། ཕར་ཡང་པདྨ་བདེ་གླིང་གི་སྙིང་ཏིག་གི་དབང་ལུང་ཁྲིད་གསུམ་སྨིན་པར་མཛད་ནས་ཆོས་ཀྱི་བདག་པོར་དབུགས་དབྱུང་། རྟ་རབ་སྒང་དྲག་པོའི་གནས་ཆེན་འབུམ་པར་ལྗགས་བསྙེན་ཁ་གསོ་དང་། ཆོས་འཁོར་བསྐོར། དགུང་ལོ་སོ་གསུམ་པར་སླར་སྟག་སྣ་དགོན་དུ་ཕེབས། ཆོས་རྗེ་ཏྲེ་ཧོ་ཞི་བར་གཟིམས་པའི་གདུང་རྟེན་ལ་རབ་གནས་མཛད། སི་ཏུ་རིན་པོ་ཆེ་དབུས་སུ་ལན་ལྔར་ཕེབས་པའི་གསུམ་པའི་སྐབས་སྤྲེལ་ཟླའི་ཚེས་བཅུར་གནས་དེར་མཇལ་འཕྲད་མཛད། ཐོག་མའི་རྟེན་འབྱུང་དུ་ཇོ་ལུགས་སྒྲོལ་དཀར་གྱི་རྗེས་གནང་དང་ལུང་སོགས་ཕུལ། སྐུ་ཞབས་ལས་སྤྱན་རས་གཟིགས་དང་མགོན་པོའི་རྗེས་གནང་གསན། ཚེ་དབང་བརྒྱ་རྩ་སོགས་ཕུལ་ཞིང་ཟབ་བུ་ལུང་དུའང་མཇལ་འཕྲད་དང་། ཚོགས་འཁོར་ཞུ་རེས། མདོ་སྔགས་ཀྱི་ཆོས་ཚུལ་མང་པོའི་གསུང་འཕྲོས་མཛད་པས་འདི་ནས་བཟུང་ཐུགས་ཡིད་གཅིག་འདྲེས་སུ་གྱུར། འདི་ཡན་ཆོད་རྗེ་ཉིད་ཀྱི་རྣམ་ཐར་ལམ་ཡིག་སོགས་ཚིགས་བཅད་ཐོར་བུར་བཞུགས་པའི་དགོངས་དོན་འཁྲུལ་མེད་མདོར་བསྡུས་སུ་བཀོད་པ་ཡིན་[ལ། འདི་ཕྱིན་ཟིན་ཐོ་སོགས་མི་བཞུགས་པས་ཞིབ་པར་འབྲི་བ་རྡོ་མ་ཐོགས་ཀྱང་། སི་ཏུ་རིན་པོ་ཆེའི་རྣམ་ཐར་ཆེན་མོ་སོགས་དང་བསྟུན་ནས་ལམ་ཙམ་བཤད་ན། དགུང་གྲངས་སོ་གསུམ་པར་དེ་
ནས་བཟུང་སོ་བརྒྱད་པར་ལ་སྟོད་མན་ཀོང་པོ་ཡན་དབུས་གཙང་ལྷོ་བྱང་ཀུན་ཏུ་ཞབས་བསྐྱོད་ནས་ཐུགས་དམ་ཉམས་གཞེས། དབང་ལུང་ཁྲིད་སོགས་གསན་བསམ། གདུལ་བྱ་རྒྱ་མཚོར་ཆོས་ཀྱི་འཁོར་ལོ་མཐའ་ཡས་པ་བསྐོར་བ་སོགས་ཕྲིན་ལས་རྒྱ་ཆེར་བསྐྱངས། དགུང་གྲངས་སོ་དགུ་པ་མེ་འབྲུག་ལོར་མཚུར་ཕུར་ཕེབས། སི་ཏུ་རིན་པོ་ཆེ། དཔའ་བོ་གཙུག་ལག་དགའ་བ། ཏྲེ་ཧོའི་ཡང་སྲིད་སོགས་ལ་སྒྲུབ་ཐབས་རིན་འབྱུང་ནས་བཞེད་སྦྱར་གྱི་རྗེས་གནང་སོགས་མང་དུ་སྩལ། ལྷ་ས་བར་ཁང་དུ་ཕུར་བུ་ལྕོག་པ་ངག་དབང་བྱམས་པ་དང་ཆོས་ཀྱི་འབེལ་གཏམ་མཛད། འབྲུག་པ་བཀའ་བརྒྱུད་ཕྲིན་ལས་ཤིང་རྟར་སྒྲུབ་ཐབས་རིན་འབྱུང་སོགས་གནང་། ཀོང་པོ་བུ་ཆུ་ནས་སྒྲོལ་མ་དམར་མོའི་སྒྲུབ་ཐབས་ལུང་བྱང་དང་བཅས་པ་གཏེར་ནས་བཞེས་ཏེ་རྒྱལ་དབང་སྐལ་བཟང་རྒྱ་མཚོར་ཕུལ་བ་བར་ཆད་ཞི་བའི་རྟེན་འབྱུང་འགྲིགས། རྒྱལ་དབང་རིན་པོ་ཆེས་ཀྱང་གཟིགས་པ་ཆེ་བར་གནང་། དཔོན་པོ་ཕོ་ལྷ་བ་ཡབ་སྲས་ཀྱིས་ཏི་ཤྲིར་བཀུར། བཞི་བཅུ་པ་མེ་སྦྲུལ་ལོར་རྒྱལ་དབང་ཀརྨ་པ་བཅུ་གསུམ་བདུད་འདུལ་རྡོ་རྗེ་སེང་གེའི་ཁྲིར་མངའ་གསོལ་བ་ལ་བར་ཆད་ཞི་བའི་ཕྱིར་ཀོང་ཡུལ་དུ་བྱོན་ནས་བཞུགས་པས་རྟ་ལོར་ཀརྨ་པ་སེང་ཁྲིར་གེགས་མེད་དུ་འཁོད་གྲུབ་པ་བྱུང་བས་ཀརྨ་བཀའ་
བརྒྱུད་ཀྱི་བསྟན་པ་ལ་སྨན་ཡོན་ཆེན་པོར་གྱུར། འདི་ནས་བཟུང་དགུང་གྲངས་ཞེ་བརྒྱད་བཞེས་པ་ཤིང་མོ་གླང་གི་ལོའི་བར་གཙོ་ཆེར་ཀོང་ཡུལ་སྟོད་སྨད་དུ་བཞུགས། ཞྭ་དམར་གྱི་མཆོག་སྤྲུལ་རྣམ་གཉིས་ཀྱི་ཞབས་བརྟན་རྒྱ་ཆེར་གནང་། བྱར་ཡུལ་དང་། གཉན་ལོ་རོ་མན། སྤུ་བོ་ཡན་ཆད་དུ་ཡང་ཡང་ཕེབས་ནས་སྨིན་གྲོལ་གསན་བཞེས། བསྒོམ་སྒྲུབ། འཆད་སྤེལ་སོགས་གོང་འཕེལ་དུ་མཛད། ཉང་ཆོས། རྡོར་གླིང་། སངས་གླིང་། པད་གླིང་སོགས་གཏེར་རྙིང་རྒྱུན་དཀོན་རིགས་དང་། ལྷག་པར་ཀོང་པོ་བཙན་རི་གྲུབ་ཆེན་ཀུན་བཟང་རང་གྲོལ་ལས་བླ་མ་དགོངས་འདུས་ཀྱི་དབང་ལུང་ཁྲིད་གསུམ་ཤིན་ཏུ་ཞིབ་པར་གསན། གར་དབང་ལས་འཕྲོ་གླིང་པའི་གདུང་བརྒྱུད་ལྔ་པ་ལས་རྗེ་དེ་ཉིད་ཀྱི་ཆོས་སྐོར་ཡོངས་རྫོགས་གསན་པ་རྒྱ་ཆེར་མཛད་པའང་འདི་སྐབས་སྔ་ཕྱི་རྣམས་སུ་ངེས། སྤྱིར་རིག་འཛིན་གཏེར་བདག་གླིང་པ་ཡབ་སྲས་ཀྱི་རྗེས་ནས་རྙིང་མ་གཏེར་མའི་ཕྱོགས་ལ་རྗེ་འདི་ཁོ་ན་གསན་རྒྱ་ཆེ། དེར་མ་ཟད་ཞྭ་ལུ། གངས་དཀར་བོ་དོང་ཕྱོགས། ལྷག་པར་ཇོ་ནང་པ་སོགས་ལས་གསང་སྔགས་གསར་མའི་དབང་ཁྲིད་ལུང་གསུམ་ཁོ་ནའང་མཐའ་ཡས་པར་གསན་ཅིང་ཉམས་བཞེས་གནང་། ཀྱེ་རེ་ལོ་ཆེན་ངག་དབང་བཀྲ་ཤིས་རྣམ་རྒྱལ་ལས་སྒྲ་ཀ་ཙན་དབྱངས་གསུམ་ཀའི་
ཕྱག་ཁྲིད་གསན་པ་སོགས། བཟོ་གསོ་སྒྲ་ཚད་སྙན་ངག་སྡེབ་སྦྱོར་རྩིས་སྐར་ནག་དབྱངས་འཆར་སོགས་ཐ་སྙད། རིག་ལམ་རྒྱ་མཚོར་དཔྱད་བརྡར་དང་། ཐ་ན་ལོ་རྒྱུས་དེབ་ཐེར་ཡན་ཆོད་ཁུངས་བཙུན་ངེས་འདྲོངས་ཤིན་ཏུ་ཞིབ་པར་གནང་། དགུང་གྲངས་ཞེ་བརྒྱད་པ་ཤིང་གླང་ཟླ་བ་དྲུག་པའི་གནམ་སྟོང་ལ་ཀོང་པོ་བོང་རིང་རིག་འཛིན་འཇའ་ཚོན་སྙིང་པོའི་གཟིམས་སྤྱིལ་དུ་འཇམ་མགོན་སི་ཏུ་རིན་པོ་ཆེ་དབུས་ཕེབས་བཞི་པའི་སྐབས་ཐོག་མའི་མཇལ་འཕྲད་མཛད་པས་རྟེན་འབྱུང་གི་སྒོ་འཕར་བྱེ། སྦས་གནས་ལྗོན་པ་ལུང་གི་ཕུར་སྐུ་ཞབས་རྣམ་གཉིས་ཞལ་འཛོམ། ཇོ་ནང་ལུགས་ཀྱི་དུས་འཁོར། དགྱེས་རྡོར། འཇིགས་བྱེད། བདེ་མཆོག་སྟོད་འགྲེལ། སྒྲོལ་མ་རྣལ་འབྱོར་མ། རྡོ་རྗེ་གླིང་པའི་གུར་དྲག་སོགས་དབང་ཆེན། གཙུག་ཏོར་རྣམ་རྒྱལ་སོགས་རྗེས་གནང་། དུས་འཁོར་སྦྱོར་དྲུག་དང་། ཕྱག་ཆེན་གྭའུ་མ་སོགས་ཁྲིད་ཀ་མང་དུ་སྩལ། ཨོ་རྒྱན་གླིང་པའི་གཏེར་བྱོན་སྐུ་ཚབ་ཉེར་ལྔའི་གཉིས་པ། སྒྲོལ་མ་རྣལ་འབྱོར་མའི་སྐུ་དང་རྒྱུད་ཀྱི་དཔེ་ཇོ་ནང་རྗེ་བཙུན་རིན་པོ་ཆེའི་ཕྱག་བྲིས། གྲུབ་ཆེན་ཁྱུང་པོའི་ཐུགས་ཀྱི་རིང་བསྲེལ་དྲུག་ཅུ་རྩ་ལྔ་ལྷག་པ་སོགས། རྟེན་བྱིན་ཅན་མང་པོ་དང་། སྔ་ཕྱིར་རྒྱ་དཔེའི་རིགས་ཀྱང་མང་དུ་གནང་ནས་སྒྱུར་བར་བསྐུལ། སི་ཏུ་རིན་པོ་
ཆེ་ལས་བེར་ཅན་ཞལ་སྦྱོར་གྱི་དབང་སོགས་གསན། རྗེ་སི་ཏུས་ཀྱང་བཀའ་འགྱུར་རིན་པོ་ཆེ་སོགས་འབུལ་དཔངས་བསྟོད། འཕགས་ཡུལ་གྱི་ཤིང་རྟ་ཆེན་པོ་རྣམས་དང་མཁྱེན་རྟོགས མཉམ་པའི་བསྔགས་བརྗོད་ཤིན་ཏུ་ཆེ་ཞིང་རྩ་བའི་བླ་མ་གཅིག་པུར་མཛད། སི་ཏུ་དབུས་སུ་ཕེབས་རྗེས་དགུང་གྲངས་ཞེ་དགུ་པ་མེ་སྟག་དབོ་ཟླ་བའི་ནང་རྗེ་ཉིད་ཀྱང་ལྷ་སར་བྱོན། གཞུང་ས་རྩེ་ཤོད་དུ་ཞྭ་དམར་མཆོག་སྤྲུལ་སྐོར་གྱི་ཞུ་དོན་མཛད། མཚུར་ཕུར་ཕེབས་ནས་སི་ཏུ་རིན་པོ་ཆེ་སོགས་དང་ཞལ་རྒྱས། ཀརྨ་པར་ཚེ་དཔག་མེད་དཀར་པོའི་རྗེས་གནང་དང་ཞབས་བརྟན་སོགས་ཕུལ། སི་ཏུར་ཏཱ་རའི་ཡིག་ཆ་ལས་ལམ་རིམ་གྱི་ཁྲིད་སོགས་དབང་ལུང་མང་དུ་གནང་། ལྷ་སར་ལྷན་རྒྱས་སུ་ཕེབས། ཇོ་བོར་སྟོང་མཆོད་ཕུལ། རྗེ་ཉིད་ཀྱི་དགོངས་གཏེར་བསམ་པ་ལྷུན་གྲུབ་མའི་སྐོར་སི་ཏུ་རིན་པོ་ཆེར་ཐོག་མའི་མཇལ་ཁར་གནང་། ཞྭ་དམར་བཅུ་པའི་སྐུ་དོན་བརྟག་དྲིལ་འཕངས་ནས་གསེར་ཁྲིར་མངའ་གསོལ། དགུང་གྲངས་ལྔ་བཅུ་པ་རབ་བྱུང་བཅུ་གསུམ་པའི་ཐོག་མ་མེ་ཡོས་ཤར་བའི་ལོ་གསར་།མཛད་། སི་ཏུ་རིན་པོ་ཆེར་ཞབས་བརྟན་ཕུལ། མགོན་པོ་པར་བུའི་བཀའ་བབས་གཏད། དཔོན་པོ་ཝང་ལ་བདེ་གླིང་མཁའ་འགྲོ་སྙིང་ཏིག་གི་ཁྲིད་སོགས་སྩལ། ཤར་རི་མངའ་བདག་པར་དུས་
འཁོར་གྱི་དབང་དང་། སྟག་ལུང་ཤག་ཏུ་སི་ཏུ་དཔའ་བོ་བཅས་པར་བདག་པོ་ཆེན་པོའི་དབང་བསྐུར་ཕུལ། སི་ཏུ་རིན་པོ་ཆེ་ལེགས་སྦྱར་གྱི་གཞུང་ལ་འཕགས་ཡུལ་པཎ་ཆེན་རྣམས་དང་དབྱེར་མེད་པའི་མཁྱེན་རྟོགས་རྒྱས་ནའང་། ཁྲིད་རྒྱུན་ཙམ་ལ་དགོངས་ནས་རྗེ་འདི་ཉིད་ལས་ཀ་ཙཱ་ན་དབྱངས་གསུམ་གྱི་རི་མོའི་རྒྱུན་དཔྱིས་ཕྱིན་པར་གསན། རྗེ་ཉིད་ནས་ཀྱང་ཙཱནྡྲ་པའི་འགྲེལ་ཆེན་རྩོམ་པར་བསྐུལ་བས་བརྡ་སྤྲོད་སྨྲ་བ་རྣམས་ཀྱི་ལྟ་བའི་མིག་གཅིག་ཏུ་གྱུར། མཚུར་ཕུར་ཕེབས་ནས་ཞྭ་དམར་ནག་ལྷན་རྒྱས་ལ་ཚེ་དབང་སོགས་ཕུལ། དགུང་གྲངས་ང་གཅིག་པ་ས་འབྲུག་ལོར་སྟོད་ཕྱོགས་སུ་ལྷ། ཆིབས་བསྒྱུར། གཙང་ཚོང་དུས་འགུར་མོར་སི་ཏུ་རིན་པོ་ཆེ་དང་ཞལ་འཛོམ་པ་ནས་བཟུང་ཕལ་ཆེར་ལྷན་ཅིག་ལྟ་བུས་བལ་ཡུལ་དུ་ཕེབས། མཆོད་རྟེན་ཆེན་པོའི་མདུན་དུ་བི་མ་སྙིང་ཐིག་གི་ཁྲིད་སྩལ། གཞན་སྟོང་གི་ལྟ་ཁྲིད་དང་གྲུབ་མཐའ་འཛིན་དགོས་པར་གདམས། ཡེ་ཤེས་རྒྱ་མཚོའི་རེག་ཟིག་གི་སྟེང་ནས་ཞི་སྦས་ལུགས་ཀྱི་སྦྱོར་དྲུག་གི་ཁྲིད་གནང་། མཆོད་རྟེན་ཆེན་མོར་ཞིག་གསོ་རབ་གནས་མཛད། སྙིང་ཏིག་སྤྲོས་བཅས་ཀྱི་དབང་རྡུལ་ཚོན་ལ་བརྟེན་ནས་མཛད། བལ་པོའི་རྒྱལ་པོར་རྣམ་འཇོམས་ཀྱི་དབང་ཁྲུས་སྩལ། གཞན་ཡང་སི་ཏུར་མཁའ་འགྲོ་སྙིང་ཏིག་གི་བཀའ་གཏད་དང་ཚེ་
དབང་བརྒྱ་ལྷག་སོགས་སྩལ་ནས་སྨོན་ལམ་རྒྱ་ཆེར་གནང་སྟེ་སི་ཏུ་རིན་པོ་ཆེ་བོད་ཕྱོགས་སུ་སྔོན་དུ་ཆིབས་ཀ་བསྒྱུར། རྗེ་ཉིད་ཀྱང་རིམ་བཞིན་བོད་དུ་ཕེབས། སི་ཏུ་རིན་པོ་ཆེར་རྒྱང་རིང་པོ་ནས་བྱིན་འབེབས་གནང་བས་ཡེ་ཤེས་བ་བཅུག་པའི་གསལ་སྣང་མངོན་དུ་བརྙེས། མང་ཡུལ་སྐྱིད་གྲོང་དུ་བྱོན། དགུང་གྲངས་ང་གཉིས་པར། སྦས་པའི་རྣལ་འབྱོར་པ་ཞིག་ལས་སྒྱུ་འཕྲུལ་གསང་བ་སྙིང་པོའི་དབང་ལུང་མན་ངག་དང་བཅས་པ་གསན། ས་སྐྱོང་སྡེ་དགེར་ངེས་དོན་མདོ་སྡེའི་སྤར་གཞི་དང་། རིན་ཆེན་གཉིས་པ་སྲང་འཁོར་སུམ་བརྒྱ་སོགས་གནང་ནས་པུསྟི་དྲུག་གི་ཆོས་སྦྱིན་རྒྱ་ཆེར་སྤེལ། དེ་ནས་བཟུང་དགུང་གྲངས་ང་བཞི་པ་ལྕགས་ལུག་ལོའི་བར་ཕལ་ཆེར་ཕྱོགས་དེར་བཞུགས། དེ་ནས་ཤངས་ཟབ་བུར་ཕེབས། ཕུག་གཙུག་ཏུ་སྐུ་བརྙན་ཉམས་པར་ཞིག་གསོ་གནང་། རྟག་བརྟན་དུ་ཕེབས། རྣལ་འབྱོར་མ་རིགས་བརྒྱའི་མཆོད་ཆོག་བཙུགས་པ་སོགས་ད་ལྟའི་བར་གནས། སྤྱིར་ཡང་སྔ་ཕྱིར་ཇོ་ནང་ལུགས་ཀྱི་དབང་ལུང་ཁྲིད་གསུམ་མང་དུ་མཛད། རྗེ་ངག་དབང་རྣམ་རྒྱལ་སོགས་བུ་སློབ་མང་དུ་བྱུང་བའི་རྒྱུན་ད་ལྟའི་བར་ཅི་རིགས་སུ་སྣང་བས་ཀུན་མཁྱེན་ཡབ་སྲས་ཀྱི་བསྟན་པའི་མེ་རོ་གསོས། བལ་ཡུལ་དུ་ཡམ་བུ་རྒྱལ་པོར་མཆོད་རྟེན་གྱི་ཉམས་གསོའི་ཞལ་འདེབས་དང་། གོཪྵ་
རྒྱལ་པོར་སྲོག་ཤིང་འདྲེན་དགོས་པའི་བཀའ་ཐམ་གནང་བ་དེ་བཞིན་ཞུ་བའི་ཞུ་ཡིག་འབྱོར་བས་རིམ་པར་བལ་པོར་ཆིབས་བསྐྱོད། ལམ་བར་རྣམས་སུ་མཆོད་རྟེན་བཞེངས་པའི་ཆ་རྐྱེན་ཀྱང་བསྒྲུབ། གོན་རྒྱལ་པོའི་བསུ་བ་འབྱོར་ཞིང་མཇལ་འཕྲད་གནང་། ཡམ་བུ་རྒྱལ་པོ་དང་འཕགས་པ་ཤིང་ཀུན་གྱི་རྩེར་མཇལ་ཞིང་མཆོད་རྟེན་བཟོ་བའི་བཀའ་བཀོད་སྩལ། དགུང་གྲངས་ང་ལྔ་བཞེས་སྐབས་ལ་དྭགས་སྟོད་སྨད་ཀྱི་རྒྱལ་བློན་ནང་འཁྲུགས་ནས་སྟོད་ཧོར་གྱི་དམག་དྲངས་པས་འཁྲུགས་ལོང་མི་བཟད་པའི་གཞི་བཏིང་བ་ལ་རྒྱལ་དབང་སྐལ་བཟང་རྒྱ་མཚོས་རྗེ་ཉིད་བར་འདུམས་སུ་ཕེབས་དགོས་པའི་བཀའ་རྒྱ་ལན་གྲངས་སྩལ་བར་བརྟེན་ལ་དྭགས་སུ་ཕེབས་ནས་ལོ་ངོ་གཉིས་ཙམ་བཞུགས། ཟློས་གཞིའི་རྩ་བ་ཤོ་གམ་དོན་གཙང་ཆོད་གནང་བའི་ཁྲ་མ་མཐའ་བསྡོམས་བཅས་གྲུབ་པས་ཕྱོགས་དེའི་བསྟན་འགྲོར་སྨན་ཡོན་བླ་ན་མེད་པར་གྱུར། དགུང་གྲངས་ང་དྲུག་པར་སླར་ཡང་བལ་ཡུལ་དུ་ཕེབས། མཆོད་རྟེན་གྱི་ལས་གྲྭ་ཚུགས། གོཪྵ་རྒྱལ་པོས་ཅུང་ཟད་མ་གུས་པར་རྫུ་འཕྲུལ་གྱིས་བཏུལ། མཆོད་རྟེན་བརྩིགས་པའི་རྡོ་གཏེར་ཆེན་པོ་བཏོན། ལྷ་འདྲེ་རྣམས་ཀྱིས་ལས་བྱེད་པ་དང་། གསེར་མི་ཁུར་བཅོ་ལྔ་ཕུལ། ལོ་གཉིས་སུ་བཞུགས། མཆོད་རྟེན་ཆོས་འཁོར་མན་གྲུབ།
དགུང་གྲངས་ལྔ་བཅུ་རྩ་བརྒྱད་བཞེས་པ་ཤིང་ཕག་ལོར་མང་ཡུལ་སྐྱིད་གྲོང་དུ་ཕེབས། འབྲུག་པ་རིན་པོ་ཆེ་དང་ཞལ་འཛོམ་གནང་། དབང་བཀའ་དང་ཁྲིད་སོགས་རྒྱ་ཆེར་སྩལ། རྡོ་བ་ལ་ཞབས་ཟུང་གི་རྗེས་བཀོད། དངོས་གྲུབ་ཕུག་ཏུ་བཞུགས་སྐབས་འབྲུག་པའི་གཟིམ་གུར་སྟེང་རྡོ་ཆེན་པོ་ཁང་ཆུང་ཙམ་ཞིག་འདྲིལ་བྱུང་བ་ལ་སྡིགས་མཛུབ་གཏད་པའི་མོད་ཐད་ཀར་འདྲིལ་བ་སོགས་གྲུབ་པ་ཆེན་པོའི་ཆོ་འཕྲུལ་ཅིའང་བསྟན། ལོ་དེའི་སྟོན་འབྲིང་ཁྲུམས་ཟླའི་མགོ་ནས་བསྙུན་བབ་ལྕི་ཙམ་བྱུང་བའི་སྐབས། སླད་ནས་གང་ཅིའི་ཐད་ཐམས་ཅད་ཀྱི་བསླབ་སྟོན་ཞལ་ཆེམས་ཡི་གེར་གནང་སྟེ། ཁྱེད་རྣམས་ཀྱིས་ཅི་མཐོང་གིན་ཡོད། བདག་གི་སྣང་བ་འདི་ཐམས་ཅད་བདེ་བ་ཅན་གྱི་ཞིང་གི་བཀོད་པ་ཁོ་ནར་འཆར་གྱིན་འདུག་ཅེས་སོགས་དག་པའི་གཟིགས་སྣང་འབྱམས་ཀླས་པའི་ངང་དམར་ཕྱོགས་མཁའ་འགྲོ་འདུ་བའི་ཉིན་མོར་དཔལ་མངོན་པར་དགའ་བའི་ཞིང་དུ་གདོད་མའི་རྒྱལ་བ་རྡོ་རྗེ་སེམས་དཔའི་ཐུགས་ཀློང་དུ་རོ་གཅིག་པར་ཐིམ་པའི་ཚུལ་བསྟན་པར་གྱུར་ཏོ། །དེ་ནས་རྗེ་ཉིད་ཀྱི་ཞལ་བཀོད་ལྟར་མཆོད་དཔོན་བསྟན་འཛིན་རྡོ་རྗེ་སོགས་ཀྱིས་བལ་ཡུལ་མཆོད་རྟེན་ཞིག་གསོའང་ལེགས་པར་གྲུབ་པ་དང་། རྗེ་རིག་པ་འཛིན་པ་མཆོག་གིས་རྒྱལ་ཚབ་ཆེན་པོར་དབང་བསྐུར་བའི་ཐུགས་སྲས་ཀྱི་གཙོ་བོ་
དཔལ་བོ་སྤྲུལ་པའི་སྐུ་རྡོ་རྗེ་གཙུག་ལག་དགའ་བ་བྱོན་ནས་རབ་གནས་མཛད། རྗེ་རིག་འཛིན་ཆེན་མོའི་སྐུ་གདུང་མང་ཡུལ་རི་བོ་དཔལ་འབར་དུ་ཞུགས་སུ་སྦྱངས་ཤིང་སྤུར་ཐལ་རྣམས་རྡོ་བ་བཟང་པོས་བརྩིགས་པའི་བྱང་ཆུབ་མཆོད་རྟེན་རྒྱར་ཁྲུ་ལྔ། དཔངས་སུ་ཁྲུ་བཅུ་ཡོད་པའི་ནང་དུ་བཞུགས། བུམ་སྒོར་གུ་རུ་རྡོ་རྗེ་དྲག་རྩལ་ཡབ་ཡུམ་གྱི་རྡོ་སྐུ་བྱོན་ལེགས་ཚོན་རྫོགས་ཁྲུ་གང་བ་རྔ་ཡབ་གླིང་དུ་ཞལ་ཕྱོགས་ནས་བཞུགས་པ་དང་། ཁམས་ནས་སི་ཏུ་རིན་པོ་ཆེས་མཆོད་རྟེན་ཞལ་འདེབས་གསེར་སྲང་བཅོ་ལྔ་གནང་བ་སོགས་ཀྱིས་ཆོས་འཁོར་གདུགས་ཤོག་གསེར་ཟངས་སྒྲོས་ལེགས་དང་། ཕྱིའི་བཞུགས་ཁང་རྒྱ་ཕིབས་གཡམ་ཐོག་དང་བཅས་པ་དང་། རླུང་དྲིལ་མཆོད་རྫས་སོགས་ཆ་འགྲིགས། སྒོ་སྲུང་ཇོ་མོ་རྒྱ་གར་མའི་རྟེན། ཁོར་སའི་རྡོ་གཅལ་བཅས་བཀོད་ལེགས་སུ་བཞེངས་པས་མཚོན་དགོངས་པ་རྫོགས་པའི་མཆོད་སྦྱིན་རྒྱ་ཆེར་སྤེལ། རྗེ་འདི་ཉིད་ཀྱིས་སྐུ་ཚེ་རིལ་པོར་གསན་བསམ་སྒོམ་གསུམ་དང་འཆད་རྩོད་རྩོམ་གསུམ་གཙོ་བོར་གྱུར་པའི་བསྟན་འགྲོ་བདེ་ཐབས་ཕྲིན་ལས་མཁའ་ཁྱབ་ཏུ་བརྡལ། གསུང་རྩོམ་གླེགས་བམ་ཆེན་པོ་བཞི་དང་། ས་གཏེར་སྒྲོལ་མ་དམར་མོ། ཡང་གཏེར་རོལ་པའི་རྡོ་རྗེའི་དྲག་སྒྲུབ་ཀྱི་དབང་བཀའ། དགོངས་གཏེར་བསམ་པ་ལྷུན་གྲུབ་མའི་
སྐོར་སོགས་ཞལ་སློབ་རྣམས་ཀྱི་ཟིན་བྲིས་དང་བཅས་ཏེ་ད་ལྟའི་བར་དུའང་རྒྱུན་ཅི་རིགས་པར་བཞུགས། སློབ་མའི་གཙོ་བོ་ཞྭ་དམར་ནག་ཟུང་། ཁྱད་པར་ནང་ཐུགས་ཀྱི་སྲས་གཅིག་པུ་སི་ཏུ་འཇམ་པའི་དབྱངས་བསྟན་པའི་ཉིན་བྱེད། རྒྱལ་ཚབ་དཔའ་བོ་གཙུག་ལག་དགའ་བ། འབྲུག་ཐམས་ཅད་མཁྱེན་པ་ཀར་རྒྱུད་ཕྲིན་ལས་ཤིང་རྟ། ཞབས་དྲུང་ཏྲེ་ཧོ་དང་། ལྷོ་བྲག་ལྡི་ཚང་སྤྲུལ་སྐུ། འཇུག་པ་ཏྲིའུ་ལྷས་སྤྲུལ་སྐུ། ནཱ་ལེནྡྲའི་བཅོ་བརྒྱད་མཁན་པོ། གསེར་བཟང་སྤྲུལ་སྐུ་པདྨ་འགྱུར་མེད། གྲུབ་མཆོག་ཨོ་རྒྱན་བསྟན་འཛིན། སྤུ་བོ་སྨན་ཆུ་སྤྲུལ་སྐུ། ཟུར་མང་ཨོ་རྒྱན་ལྷུན་གྲུབ། བདེ་གླིང་གཏེར་སྲས་པདྨ་དབང་རྒྱལ་དང་། ཆོས་སྐྱོང་དཔལ་ལྡན། ལུང་རིག་སྨྲ་བ་ཨོ་རྒྱན་ཕྲིན་ལས་བསྟན་འཛིན། འཛམ་གླིང་བླ་མ་བློ་གྲོས་ཆོས་འཕེལ། འབའ་ར་བ་ཨོ་རྒྱན་ངག་དབང་ཡེ་ཤེས། རྟ་ནག་པ་པདྨ་ཀུན་གསལ། ཞབས་དྲུང་སྙིང་རི་བ་སོགས་རྩ་བའི་བརྒྱུད་འཛིན་ཤིན་ཏུ་མང་བ་དང་། གཞན་ཡང་རྡོར་སྨིན། ཀོང་པོ་བོང་རི། སྙི་ཕུ། རྩེ་ལེ་གོང་འོག་སོགས་རྙིང་མ་དང་། ཞྭ་ལུ། གོང་| དཀར། བོ་དོང་། ཇོ་ནང་པ་སོགས་ཟབ་ཆོས་གསན་པའི་བླ་མ་དགེ་བཤེས་བགྲང་ལས་འདས་པའི་རྒྱུན་ད་ལྟའི་བར་དུའང་ཅི་རིགས་པར་གསན་པས་མཚོན་གངས་ཅན་གྱི་ལྗོངས་ཙམ་ན་ཡོངས་སུ་
གྲགས་ཤིང་གྲུབ་པས་ཕྲིན་ལས་མཐའ་རྒྱས་སུ་གྱུར། རྗེ་ཉིད་དང་ཐོག་མཉམ་པའི་ཐུགས་རྒྱུད་གཅིག་པ་ཁམས་པ་ངག་དབང་ཀུན་དགའ་བསྟན་འཛིན་དང་། ཞང་ཞུང་གི་ཡུལ་མཐར་མོན་གྱི་ལིང་པ། མ་ཧཱ་ཙི་ནར་སྨད་འཚོང་མའི་གཟུགས་སོགས་སྤྲུལ་པའི་རྣམ་རོལ་ཅིར་ཡང་ཤར་བ་དང་། སྐུའི་སྐྱེ་བ་ཕྱི་མའང་མ་ཧཱ་ཙཱ་ནའི་རྒྱལ་པོར་གྱུར་ནས་འབྲེལ་ཚད་དོན་ལྡན་གྱི་ཕྲིན་ལས་རྒྱས་པ་དང་། ལྷོ་བྲག་ཕྱོགས་སུ་སྤྲུལ་པའི་གཏེར་སྟོན་ཆེན་པོར་སྐྱེ་བ་བཞེས་ཏེ་མཁར་ཆུ་ནས་སངས་རྒྱས་ཐམས་ཅད་ཀྱི་ཕྲིན་ལས་དགོངས་པ་འདུས་པ་ཞེས་རྡོ་རྗེ་ཕུར་པའི་ཆོས་སྐོར་ཆེ་བ་ཞིག་སོགས་སྤྱན་དྲངས་པར་གསུངས་པ་དང་། གཞན་ཡང་བདེ་བ་ཅན་དང་། མངོན་པར་དགའ་བ། འགྲོ་ལྡིང་རྣམས་སུ་སྐུའི་བཀོད་པ་སྟོན་པར་གསུངས་པས་མཆོག་གི་སྤྲུལ་པའི་རྣམ་རོལ་མཐའ་ཡས་པ་སྟོན་ཅིང་། མཐར་དཔལ་ཆེན་པོ་ཧེ་རུ་ཀ་ནམ་མཁའི་སྙིང་པོའི་ཐུགས་ཀློང་དུ་ཉི་མ་ལ་ཟེར་འདུ་བ་བཞིན་རོ་གཅིག་ཏུ་ཐིམ་པར་འཇིགས་པ་མེད་པའི་སེང་གེའི་སྒྲ་ཆེན་པོས་ཞལ་གྱིས་བཞེས་པ་ཡིན་ནོ། །རྣམ་ཐར་རྒྱས་པ་ནི་སྤྲུལ་པའི་སྐུ་བྱང་ཆུབ་ཆོས་ཀྱི་སེང་གེ་བློ་གྲོས་རྣམ་པར་སྣང་བས་རྗེ་ཉིད་ཀྱི་ཞལ་གསུང་ཐོར་བུར་བཞུགས་པ་སོགས་ཕྱོགས་གཅིག་ཏུ་བསྡེབས་པ། དཔལ་རིག་འཛིན་ཚེ་དབང་ནོར་བུའི་རྣམ་པར་ཐར་
པའི་གཏམ་འཛམ་གླིང་དགའ་བར་བྱེད་པའི་རྣ་རྒྱན་ཅེས་བྱ་༡༤༡བ་ལས་ཤེས་པར་བྱའོ། །སརྦ་དཱ་མངྒ་ལཾ།། ༈ །།གསེར་སྨད་ཤུག་སྒང་རིག་འཛིན་ཆེན་པོར་གྲགས་པ་ནི། རིག་འཛིན་ཀུན་བཟང་ཤེས་རབ་ཀྱི་ཐུགས་སྲས་བུ་ཆེན་བཞིའི་ཡ་གྱལ་རོང་སྟོན་ལྷུན་གྲུབ་རྒྱ་མཚོས་གདན་ས་ཤུག་སྒང་བླ་བྲང་བཏབ། དེའི་སྤྲུལ་སྐུ་བླ་མ་ཤཱཀྱ་རྒྱལ་མཚན། དེའི་སྤྲུལ་སྐུ་གནུབས་སངས་རྒྱས་ཡེ་ཤེས་ཀྱི་རྣམ་འཕྲུལ་དུ་ལུང་གིས་ཟིན་པའི་རིག་འཛིན་པདྨ་འདུས་པ་རྩལ་ཞེས་པ་སྙི་ཁོག་གཞུང་གི་སའི་ཆར་རབ་ཡིད་ལྕགས་རྟ་ལོར་འཁྲུངས། རིགས་སད་པའི་ཡོན་ཏན་རྨད་དུ་བྱུང་། དཔལ་ཡུལ་མཆོག་སྤྲུལ་རིན་པོ་ཆེ་ཀརྨ་འགྱུར་མེད་སོགས་ལས་ཟབ་རྒྱས་ཀྱི་གདམས་པ་གསན་ཅིང་ཐུགས་ཉམས་སུ་བཞེས། ཉམས་རྟོགས་ཀྱི་ཀློང་བརྡོལ། དག་པའི་སྣང་བ་མཐའ་ཡས་པ་ཤར། དངོས་དང་དག་སྣང་གི་ཟབ་གཏེར་འདོད་རྒུའི་གཏེར་མཛོད་ཅེས་ཡང་ཟབ་གུ་རུ་པདྨ་རྒྱལ་པོའི་བསྙེན་སྒྲུབ་ཕྲིན་ལས་རྒྱས་པ་པུསྟི་གཅིག་གིས་མཚོན་གཏེར་གཞུང་ཆོག་སྒྲིགས་བཀའ་འབུམ་བཅས་པུསྟི་བཅུ་དྲུག་ཡོད། འདིའི་ནང་ནས་པདྨ་རྒྱལ་པོའི་སྒྲུབ་ཆེན་ཚེས་བཅུ་དང་འབྲེལ་བ། ཐུགས་རྗེ་ཆེན་པོའི་སྒྲུབ་ཆེན་སོགས་གདན་ས་དེར་དར་རྒྱས་སུ་ཡོད་པས་མཚོན། དབང་ལུང་ཁྲིད་གསུམ་གྱི་བརྒྱུད་འཛིན་ཐུགས་སྲས་གཙོ་བོ་
གསུམ། འགྲོ་དོན་སྒོ་འབྱེད་ལྔ། དཀྱིལ་འཁོར་འཛིན་པ་བརྒྱད་སོགས་སུ་བགྲངས་པ་རྨད་དུ་བྱུང་བས་ད་ལྟའང་ཅུང་ཟད་དར་བས་ཕྱིས་ཀྱི་གཏེར་སྟོན་ཞིག་ལ་ཕྲིན་ལས་ཆེ་བར་མངོན། གང་ལྟར་ཡང་རྗེ་དེ་ཉིད་རྟེན་བསླབ་གཙང་། མཁས་གྲུབ་ཀྱི་རྣམ་ཐར་ཐམས་ཅད་ཀྱིས་བསྔགས་འོས་སྐུ་ཚེ་དང་སྒྲུབ་པ་མཉམ་པར་བྱུང་། མཐར་དགུང་གྲངས་རེ་གསུམ་པ་ཆུ་སྤྲེལ་ཧོར་ཟླ་ལྔ་པའི་ཚེས་གཅིག་ལ་ནམ་མཁའ་སུམ་སྤྲུགས་ཀྱི་སྦྱོར་བས་སྒྲ་འོད་ཟེར་གསུམ་སོགས་ངོ་མཚར་བའི་རྟགས་དང་བཅས་ཏེ་གཤེགས། རྗེས་གསེར་གདུང་སོགས། །རྟེན་བཞེངས་དགོངས་རྫོགས་རྒྱ་ཆེར་བསྒྲུབས། །དེའི་སྐྱེ་སྲིད་སྦ་ནག་ཕྱོགས་སུ་བྲག་དཀར་སྤྲེལ་རྫོང་དང་ཉེ་བའི་གསེར་ཐང་ཞེས་པར་ཆུ་བྱ་ལོར་འཁྲུངས་པ་པདྨ་མདོ་སྔགས་བྱང་ཆུབ་གླིང་པའམ་མི་འགྱུར་རྡོ་རྗེ་སྟེ། ལྕགས་འབྲུག་ལོར་རང་གནས་ཁྲིར་མངའ་གསོལ་བ་ད་ལྟ་བགྲང་བྱ་བཅོ་བརྒྱད་དུ་སོན་པ་སྟེ། འདི་ལའང་དག་སྣང་དགོངས་གཏེར་མང་དུ་འབེབས་རྒྱུ་ཡོད་པར་གྲགས་ཤིང་སྤྱིར་སྤྲུལ་པ་བཅུ་གསུམ་པར་འགྲོ་དོན་རྒྱས་པར་ལུང་བསྟན། །མ་འོངས་པ་ན་ནུབ་ཕྱོགས་པདྨའི་སྙིང་པོས་བརྒྱན་པའི་ཞིང་ཁམས་སུ་རྫོགས་པའི་སངས་རྒྱས་དགེ་བའི་སྟོབས་འཕེལ་ཞེས་བྱ་བར་འཚང་རྒྱ་བར་གསུངས་སོ། །རྣམ་ཐར་སྙིང་པོ་ཙམ་འདི་ནི་གསན་ཡིག་
མཐོང་བ་དོན་ལྡན་ཅེས་པ་ལས་བྱུང་བ་ལྟར་བཏུས་པ་ཡིན་ཅིང་། ཅུང་ཟད་རྒྱས་བ་རྗེ་རང་ཉིད་ཀྱི་རྣམ་ཐར་དང་། གཟིགས་སྣང་སྐོར་ཞལ་གསུང་མ་ཡོད་དོ།། ༈ །།རིག་འཛིན་ཆེན་པོ་ཞིག་པོ་གླིང་པའི་སྐྱེ་བརྒྱུད་རྣམ་ཐར་ཞལ་གསུང་མ་ལས། དེ་ནས་སངས་རྒྱས་ཀྱི་བསྟན་པ་ལྔ་བརྒྱ་བརྒྱད་པའི་དུས་གྲོང་ཁྱེར་ཆེན་པོ་རྡོ་འཇོག་ཅེས་བྱ་བའི་བྱང་ཕྱོགས་ཤཱཀྱའི་ཞིང་ཁམས་སྙན་མདའ་ཞེས་བྱ་བར་བདག་ཉིད་སྦས་པའི་བརྟུལ་ཞུགས་འཛིན་ཅིང་། གསང་སྔགས་ཀྱི་སྡོང་པོ་སྐྲའི་ལ་བ་ཅན་དྲེད་ཀྱི་གདོང་ཅན་རྒྱལ་མོ་སོ་ཚེ་ཞེས་བྱ་བའི་མ་མིང་གཞན་གུ་རུ་ཇོ་ཚེ་ཞེས་བྱ་བར་སྐྱེས་ཏེ། བྲག་དམར་ཟངས་ཡག་ཤར་ནས་རྫོགས་པ་ཆེན་པོ་སེམས་སྡེའི་དགོངས་པ་བསྡུས་པའི་ཟབ་དོན་སེམས་ཕྱོགས་དང་། སྨན་རྩིས། བསྟན་སྲུང་སྒྲུབ་ཐབས་ཟབ་མོ་རྒྱལ་པོ་གསལ་རྒྱལ་གྱི་རྟེན་སྐལ་སངས་རྒྱས་ཀྱི་འཕེལ་གདུང་། ཨོ་རྒྱན་རིན་པོ་ཆེའི་སྐུ་འདྲ་རིན་པོ་ཆེ་སྣ་ལྔ་ལས་བཞེངས་པ་ལ་སོགས་པ་ཟབ་གཏེར་མང་དུ་སྤྱན་དྲངས། ཡི་དམ་ལྷའི་ཞལ་མཐོང་། བཀའ་སྲུང་ཆོས་སྐྱོང་རྣམས་ལས་ལ་ཁོལ་ཞིང་རྫུ་འཕྲུལ་ཡ་མ་ཟུང་སྟོན་པ་བོད་ཡུལ་དྲེད་ཀྱི་གདོང་པ་ཅན་དུ་གྲགས་སོ། །དེ་ནས་བསམ་ཡས་ཀྱི་མཐིལ་དུ་ལྷ་རི་བཙད་པོའི་རི་ལ་ཐོས་བསམ་མདོ་སྔགས་མཐའ་དག་ལ་དབང་འབྱོར་ཞིང་། བྱང་ཆུབ་སེམས་
དང་ལྡན་པ་མིང་ལྷ་དབང་རྒྱ་མཚོ་བློ་གྲོས། ཨོ་རྒྱན་གྱིས་ལུང་བསྟན་གཏེར་སྟོན་ལྷ་བཙུན་བཟང་པོ་ཞེས་བྱ་བར་གྱུར་ཏོ། །དཔལ་བསམ་ཡས་དབུ་རྩེའི་བར་ཁང་། འོན་བྱ་ཕོ་ཟེར་བ་འོ་ཡུག་གོས་སྔོན་ལྷ་ཁང་ལ་སོགས་པ་ནས་བླ་མའི་སྒྲུབ་ཐབས། བསྟན་སྲུང་གི་སྒྲུབ་ཐབས་ལ་སོགས་ཟབ་གཏེར་མང་དུ་སྤྱན་དྲངས། བསམ་ཡས་མཐིལ་དུ་སྲིད་ཀྱི་དར་མཚོ་སྤེལ་བ། གཙུག་ལག་ཁང་ཉམས་པ་རྣམས་གསོས་ཤིང་བྱང་ཆུབ་ཆེན་པོའི་དྲུང་དུ་རྒྱུན་ཆད་མེད་པར་སྨོན་ལམ་འདེབས་པ་སོགས་བསྟན་པ་ལུགས་གཉིས་ཀྱི་སྒོ་ནས་འཕེལ་རྒྱས་སུ་མཛད་དོ། །ཞེས་གསུངས་སོ།། ༈ །།ཁྱུང་པོའི་ཕྱོགས་སུ་གྲུབ་ཆེན་ནག་པོ་ཐོགས་འཕེན་གྱི་གདན་ས་ནག་པོ་བ་དན་དགོན། ནེམ་ཚ་སྤང་ལྕིབས་དགོན་ཞེས་གཉིས་ཡོད། ཕྱི་མ་རྨ་ལ་བཞིའི་ས་ཆར་ཡོད་སྐད། སྔ་མ་འདིའི་ཆོས་ལུགས་སྔར་བྱ་སྟོན་བཀའ་བརྒྱུད་ཡིན། དེང་སང་ཡང་དེ་ཡི་ལུགས་ཀྱི་བདེ་མཆོག་དང་། ཕག་མོ་མགོན་པོ་སོགས་འདོན་སྐད་དང་། དབང་ལུང་ཡོད་སྐད་དང་། རྒྱ་སྟོན་ཆོས་བཟང་གི་བཀའ་འབུམ་ཡོད་བཞིན་ཞེས་པོད་ཤིན་ཏུ་ཆེ་བ་དཔེ་ཡོད། ལུང་འདྲ་ནི་ཁོང་ཚང་ལ་མེད། གཞུང་འོག་རྒྱ་སྟོན་དགོན་དུ་རྒྱ་སྟོན་སྤྲུལ་སྐུ་སོགས་ལ་ཡོད་དམ་ཟེར། ནག་པོ་ཐོགས་འཕེན་གྱི་བརྒྱུད་པ་སྔགས་པ་བླ་མ་རིམ་བྱོན་
ལས། ཕྱིས་བདུད་འཇོམས་རྡོ་རྗེའི་སྡེ་པར་ཁས་འཆེ་བའི་གཏེར་སྟོན་ཨོ་རྒྱན་ཀུན་གྲོལ་གླིང་པའམ། གར་དབང་ཡེ་ཤེས་རོལ་པ་ཐེག་མཆོག་རྡོ་རྗེ་ཞེས་སྐྱེས་ཐོབ་ཀྱི་ཤེས་རབ་ཆེ་བ་ཡོད་པ་ཞིག་བྱུང་བ། ས་གཏེར་བཀའ་རྫོགས་པ་ཆེན་པོ་རྩ་གསུམ་སྟོང་ཉིད་ཟིལ་གནོན་ཞེས་པའི་དབང་ལུང་ཁྲིད་གསུམ་པོད་ཆེན་གཅིག །གཞན་རྡོར་སེམས། ཕུར་པ། ཁྲོས་ནག་སོགས་པོད་དྲུག་ཙམ། ཆོས་བདག་གི་གཙོ་བོ་ཆབ་མདོ་ལྕགས་སྤྲུལ་ནས་མཛད། དར་ཆ་ཅུང་ཟད་བྱུང་། འོན་ཀྱང་གཏེར་སྟོན་དགུང་ལོ་སོ་བདུན་པར་གཤེགས་པས་ཆོས་བཀའ་ཐམས་ཅད་སྤེལ་བ་དང་ཕབ་མ་གྲུབ་སྐད། དེ་ལ་སྲས་གསུམ་གྱི་གཉིས་སྔགས་འཆང་གདུངས་བར་པ་ཞིག་རབ་བྱུང་ཡིན། གཏེར་སྟོན་གྱི་སྤྲུལ་སྐུ་རང་རིགས་སུ་བྱུང་བ་ལོ་དགུ་ཙམ་ལོན་པ་ཡོད་ཟེར་རོ། །ཆོས་བདག་ཆབ་མདོ་ལྕགས་སྤྲུལ་དང་། ཨ་མདོ་ནས་བྱུང་བའི་བླ་མ་ཞིག་ཡིན་ཟེར། གཏེར་སྟོན་སྐུ་ཚེ་ཐུང་བས་སློབ་ཚོགས་མང་པོ་མ་བྱུང་འདྲ། ལྕགས་སྤྲུལ་གྱིས་དགེ་དགོན་ཞིག་ཏུ་འདིའི་ཕུར་པའི་སྒྲུབ་ཆེན་བཙུགས་པ་སོགས་མཛད་པ་ཡིན། བ་དན་དགོན་ནང་དུའང་ཕུར་པའི་སྒྲུབ་ཆེན་ཞིག་ཡོད། རྩ་གསུམ་ཞི་ཁྲོའི་སྐོང་ཆོག་སོགས་ལ་བརྟེན་ནས་གཤིན་དོན་དང་། རིམ་གྲོར་ཕུར་པའི་སྒྲུབ་ཟློག་སོགས་བྱེད་མཁན་ཁ་ཤས་ཡོད། དེ་ཙམ་མ་
གཏོགས་རྩལ་དུ་བཏོན་པའི་ཉམས་ལེན་བྱེད་མཁན་དཀོན། འོན་ཀྱང་གཏེར་ཆེན་མཆོག་གླིང་པས་ཚད་མར་བཞེད་པ་ལ་བརྟེན། ཀར་གུང་ཕྱོགས་ཀྱིས་ཀྱང་ཁང་ན་མེད་པའི་ཕྱོགས་ཡིན་སྐད་དོ།། ༈ །།རིག་འཛིན་ཆེན་པོ་སྟག་ཤམ་རྡོ་རྗེ་ནི། ཡབ་གཅོད་པ་བཀྲ་ཤིས། ཡུམ་ལོ་སྐྱིད་མ། དེ་ལ་སྲས་གཉིས་ཡོད་པ། ཆེ་བ་གཏེར་ཆེན་རིན་པོ་ཆེ་ཤིང་ལུག་ལོ་ཡིན། དང་། ཆུང་བ་དབོན་ཨོ་| རྒྱན་ནོར་བུ་ཡིན། དེའི་སྲས་ཀུན་བཟང་ནམ་མཁའ་རྡོ་རྗེ་འདི་ཤིང་ཕག་ལོ་དེའི་སྲས་རྒྱལ་སྲས་ཀརྨ་འཆི་མེད་དང་། སྲས་མོ་པདྨ་འཚོ། དང་། མགོན་པོ་ཡེ་ཤེས་གཉིས་ཡོད། མགོན་པོ་ཡེ་ཤེས་ཀྱི་སྲས་ཀུན་བཟང་པདྨ་རྣམ་རྒྱལ་མེ་འབྲུག་ལོ་ཡིན། དགུང་གྲངས་བདུན་ཅུ་སྐོར་བཞུགས། དང་། དབོན་བསམ་གཏན་གཉིས་ཡོད། དབོན་སྲས་ལ་ཨོ་རྒྱན་རྟ་མཆོག་ཆོས་གྲགས་ཡིན། མེ་གླང་ལོ་པ། སྐུ་ཚེ་རིང་བར་བཞུགས། རྟེན་དགེ་སློང་། དེའི་སྲིང་མོའི་བུ་རྟ་མགྲིན་ལྷུན་པོ་ཡིན་པར་འདུག །རྟེན་དགེ་སློང་ཁྱད་འཕགས། དགུང་གྲངས་ལྔ་བཅུ་ང་སྟོད་བཞུགས། ༈ །གཏེར་ཆེན་མཆོག་སྤྲུལ་དང་པོ་ཀོང་ཡུལ་དགའ་ཆགས་སྡེ་པའི་སྲས་སུ་བལྟམས། མཚན་པདྨ་རབ་རྒྱས་རོལ་པ་རྩལ་གྲགས། ས་གླང་ལོ་པ། སྐུ་ཚེ་ཆེར་མ་བཞུགས། རབ་བྱུང་། དེས་སྤྲུལ་པདྨ་བསྟན་འཛིན་དབང་ཕྱུག་སྤར་སྟོད་རྒྱ་ར་ཚང་དུ་འཁྲུངས། དེས་སྤྲུལ་ཀུན་བཟང་པདྨ་དགྱེས་པའི་རྡོ་
རྗེ་ཆབ་མདོའི་རྟོག་ཚང་དུ་འཁྲུངས། ཤིང་ཡོས། དགུང་གྲངས་ཞེ་སྟོད་ཙམ། སྔགས་འཆང་གྲུབ་ཐོབ། དེས་སྤྲུལ་ད་ལྟའི་སྟག་ཤམ་པ་ཤིང་འབྲུག་ལོ་པ་སྤུ་བོ་ཕར་ལུང་གི་འདུང་ཡ་མཁན་པོ་ཚང་དུ་འཁྲུངས་པ་ལགས། དགོངས་གཏེར་དང་དག་སྣང་སྐོར་མང་། རྟ་མཆོག་ཆོས་གྲགས་སྤྲུལ་སྐུ། ཆུ་སྦྲུལ་ལོ་པ་རྟ་མཆོག་བསམ་གཏན་ངེས་གསང་བསྟན་པའི་ཉི་མ་ཡིན་ནོ། ༈ །ཨོ་རྒྱན་བུ་ཁྲིད་འདི་སྤུ་བོ་ས་ལྡེམ། བླ་མ་དགོངས་འདུས། སྤུ་བོ་བདུད་འདུལ་རྡོ་རྗེ། རིག་འཛིན་སྟག་ཤམ་རྡོ་རྗེ་བཅས་པའི་གཏེར་ལུང་དུ་མཚོ་རྒྱལ་དང་ཤེལ་དཀར་རྡོ་རྗེ་མཚོ་བཅས་ཀྱི་སྤྲུལ་པར་དགུང་གྲངས་བདུན་ཅུ་དོན་སྟོད། ལུང་བསྟན། དེའི་སྤྲུལ་སྐུ་དེ་ཉིད་ཀྱི་མིང་པོའི་བུ་མོ་བདེ་ཆེན་ཕྲིན་ལས་མཚོ་མོ་ཡིན། འདི་དགུང་ལོ་ལྔ་བཅུ་ནང་བཞུགས་འདྲ། སྤུ་བོ་རྒྱ་མཁར་རི་ཁྲོད་དུ་ཨེ་ཝཾ་མི་ཤིགས་རྡོ་རྗེའི་ཆོས་རྫོང་དུ་བཞུགས། དེ་ལ་ཆོས་གླིང་སྲས་ངོ་མཚར་ཅན་འཁྲུངས། ཟླ་བ་དྲག་ནས་གཤེགས། ༈ །གསུང་སྤྲུལ་བདུན་པ་མོན་དུ་འཁྲུངས། ད་ལྟ་བརྒྱད་པ་ཀུན་བཟང་བསྟན་པའི་ཉི་མ་མོན་དུ་པད་གླིང་གདུང་ལ་འཁྲུངས། དགུང་སྙིང་ཡོས། ༣༩ ། ༈ །།རྨོར་ཆེན་རྡོ་རྗེ་འཆང་ངག་དབང་ཀུན་དགའ་ལྷུན་གྲུབ་ནི། ཡབ་ཆོས་རྒྱལ་ཁྲི་སྲོང་ལྡེའུ་བཙན་གྱི་བླ་སྨན་མཁས་པ་མི་དགུ་ཞེས་ཡོངས་སུ་གྲགས་པའི་ནང་ནས། སྟོད་ན་ཆེར་ཆེ་འུག་པ་
བྲང་ཏི་གསུམ། ཞེས་པའི་ཡ་གྱལ་ཆེར་ཆེ་ཞིག་པོའི་རིགས་གསོ་རིག་ལ་ཆེས་མཁས་པ་ཞིག་དང་། ཡུམ་ལུམ་པ་དཔོན་ཆེན་གྱི་བརྒྱུད་པ་ཤེའུ་ལོ་ཙཱ་བའི་དབོན་བརྒྱུད་དེ། ཡབ་ཡུམ་དེ་གཉིས་ཀྱང་རང་བཞིན་བཟང་ཞིང་། རྣམ་དཀར་གྱི་ཕྱོགས་ལ་བརྩོན་པ་སོགས་བསྔགས་པར་འོས་པའི་ཡོན་ཏན་དང་ལྡན་པའི་སྲས་སུ་རྒྱལ་བ་ཞེས་པ་ཤིང་ཕོ་རྟའི་ལོའི་གྲོ་བཞིན་ཅན་གྱི་ཟླ་བའི་དམར་ཕྱོགས་ཀྱི་བཟང་པོ་གསུམ་པའི་ཉི་ཤར་ལ་སྤྲུལ་སྟོད་རབ་ཆོས་འཁོར་གླིང་གི་བླ་བྲང་དུ་མངལ་གྱི་པདྨོ་ལས་གྲོལ། ཆུང་ངུའི་དུས་ནས་མཁན་ཆེན་གཞོན་ནུ་བློ་གྲོས་ཀྱི་བག་ཆགས་གསལ་བར་སད། དགུང་ལོ་ལྔ་པར་ཕེབས་པ་ན་ཡབ་ཀྱིས་ཡི་གེའི་ཕྱི་མོ་བསླབ་པས་ཚེགས་མེད་པར་མཁྱེན། དེ་ལོར་འཇམ་མགོན་ས་སྐྱ་པ་ངག་དབང་ཀུན་དགའ་བསོད་ནམས་དབུས་སུ་ཕེབས་པ་དང་འགྲིགས་པས་ཐུབ་བསྟན་རབ་སྨད་དུ་འཛོམ་ཞིང་གཙུག་ཕུད་ཕུལ་བས། མཚན་ཀུན་དགའ་ལྷུན་གྲུབ་ཅེས་གསོལ་ཞིང་ཤིན་ཏུ་དགེས་པར་མཛད། གནས་དེ་ཉིད་དང་གོང་དཀར་རྡོ་རྗེ་གདན་བཅས་སུ་གྲུབ་རྒྱལ་ལུགས་ཀྱི་ཚེ་དབང་དང་། སྒྲུབ་ཐབས་བརྒྱ་རྩའི་རྗེས་གནང་ལུང་བཅས། རྡོ་རྗེ་ཕུར་པའི་སྟོད་ལས་ཀྱི་དབང་སོགས་བཀའ་ཆོས་མང་དུ་གསན། ར་བ་སྨད་མཁན་ཆེན་སངས་རྒྱས་བཟང་པོ་ལས་གྲུབ་རྒྱལ་ལུགས་
ཀྱི་ཚེ་དབང་གསན་ཅིང་། དེ་ཉིད་ཀྱིས་རྣམ་འགྲེལ་རིག་གཏེར་གྱི་དཔེ་གནང་ཞིང་གྲྭ་ཚང་དུ་ཞུགས་དགོས་པའི་བསླབ་སྟོན་ཀྱང་སྩལ། དེ་ནས་དགུང་ལོ་བདུན་གྱི་བར་དུ་ལྗགས་ཀློག་དང་། ཀྱེ་རྡོར་བརྟག་གཉིས། མན་ངག་རྣམ་བཤད་སོགས་ཐུགས་སུ་ཚུད། ལོ་དེར་ཀུན་མཁྱེན་རོང་སྟོན་ཆེན་པོ་དང་། རྗེ་གྲགས་འབྱོར་ཤེས་རབ་སོགས་ཀྱི་བྱིན་གྱིས་བརླབས་པའི་སྨོན་དགའ་རིན་ཆེན་བསམ་གཏན་གླིང་དུ་ཆོས་སྒོར་ཞུགས། དགུང་ལོ་བཅུ་གསུམ་པར་དགོན་སྡེ་དེ་ཉིད་ཀྱི་བྱ་ཆ་ཆོས་སྤྱོད་ནས་བཟུང་སྟེ། དཔལ་ཀྱེ་རྡོ་རྗེའི་ཀུན་ཏུ་དགོས་པའི་གཞུང་བདུན། རྣམ་འགྲེལ། རིག་གཏེར། སྡོམ་གསུམ་རྣམས་ཐུགས་ལ་བྱང་བར་བཟུང་ནས། སྟག་ཚང་ར་བ་སྨད་དུ་མཚན་ཉིད་ཀྱི་ཐུགས་སྦྱང་ལ་ཕེབས། མཁན་ཆེན་ཀུན་དགའ་གསང་སྔགས་དང་། ངག་དབང་དོན་གྲུབ་གཉིས་གཙོ་བོར་བརྟེན་ནས། བསྡུས་ར་དང་པོད་ཆེན་དྲུག་ཡོངས་སུ་རྫོགས་པ་གསན་ཅིང་། མཁྱེན་རབ་ཀྱི་ཀློང་བརྡོལ་བས་ཕུལ་དུ་བྱུང་བར་མཁྱེན། དགུང་ལོ་བཅོ་བརྒྱད་པར་བསྒྲིགས་བསྐུར་དང་། བཅུ་དགུར་གླིང་བསྲེ་དང་། ལོ་དེར་རྨོར་དུ་ཀུན་རིག་དཀྱིལ་འཁོར་ཡོངས་རྫོགས་བསྙེན་པ་ཟླ་བ་བདུན་དུ་མཛད། ཉི་ཤུར་བཀའ་བཅུའི་མཚན་བཏགས་གནང་། ཉེར་གཅིག་པར་ཙེ་ཐང་དུ་གྲྭ་སྐོར་དང་། ཉེར་
གཉིས་པར་གཙང་དུ་གྲྭ་སྐོར་ཕེབས་པའི་ཡར་ལན་ཁ་རག་ཤར་དུ་རྡོ་རྗེ་བྲག་རིག་འཛིན་པདྨ་ཕྲིན་ལས་དང་མཇལ་ཞིང་ཐུགས་དགྱེས་པའི་བཀའ་ལུང་སྩལ། འཇང་ཐུབ་བསྟན་དུ་མཁན་ཆེན་བཀྲ་ཤིས་ལྷུན་གྲུབ་ལས་ལམ་འབྲས་སློབ་བཤད་སྣང་གསུམ་རྫོགས་པ་དང་། ཀུན་རིག་གི་དབང་། སྦྱོང་རྒྱུད་ཀྱི་བཤད་བཀའ། ཀྱེ་རྡོར་གྱི་རྒྱུད་དབང་སོགས་གསུང་ཆོས་མང་དུ་གསན་རྗེས། གདན་ས་ཆེན་པོར་དགུན་ཆོས་ཀྱི་ཐོག་བསྟན་པའི་རྣམ་བཞག་པ་བཅུ་གསུམ་ཙམ་དང་ལྷན་ཅིག་ཏུ་གསུང་བཤད་དང་འབེལ་གཏམ་གྱི་བདུད་རྩི་ཐོགས་པ་མེད་པར་སྤྲོས་པས་དཔྱོད་ལྡན་རྣམས་ཀྱི་བློ་ཡི་པདྨོ་ཅིར་ཡང་བཞད་ཅིང་། རིག་པར་སྨྲ་བའི་ཁྱུ་མཆོག་ཏུ་བསྔགས། འཇམ་དབྱངས་གཟི་འོད་འབར་བའི་མདུན་དུ་བདག་ཆེན་ཀུན་དགའ་བཀྲ་ཤིས་ཀྱི་ཞལ་སྔ་ནས་འཇམ་དབྱངས་དམར་སེར་གྱི་རྗེས་གནང་གསན། དེ་ནས་ཚར་ཆེན་རིན་པོ་ཆེའི་གདན་ས་རླུ་གཤོང་དགེ་བའི་ཚལ་དང་། མུ་གུ་ལུང་སོགས་གནས་ཆེན་རྣམས་བརྒྱུད་ངམ་རིང་དུའང་རིགས་ལུང་གི་དགའ་སྟོན་སྩལ། ཚུལ་དེ་བཞིན་གྱིས་བྱང་ཕྱོགས་སྐྱ་བོ་ཁ་གདངས་དང་། སེ་མཁར་ཆུང་སོགས་གཙང་ཕྱོགས་ཀྱི་གནས་རྟེན་ཡོངས་གྲགས་ཐམས་ཅད་མཇལ་བ་དང་། ཐུབ་བསྟན་གོང་འོག །བཞད་གྲྭ་ཚང་ཆེན་མོ། གསེར་མདོག་ཅན།
སྐྱེད་ཚལ་སོགས་སུ་འབེལ་གཏམ་དང་རིགས་ལུང་ཅི་རིགས་པ་སྩལ། ཁྱད་པར་ངོར་ཨེ་ཝཾ་ཆོས་ལྡན་དུ་ཕེབས་ནས་ཚོགས་སུའང་ལན་ཁ་ཡར་ཞབས་བསྐྱོད་ཅིང་། མཁན་ཆེན་ལྷུན་གྲུབ་དཔལ་ལྡན་ལས་ཀྱེ་རྡོར་རྒྱུ་ལམ་གྱི་དབང་དང་། མཁའ་སྤྱོད་མའི་བྱིན་རླབས་སོགས་གསན། ཡོངས་དྲིལ་གཙང་དུ་ལོ་ཕྱེད་གཉིས་སུ་བཞུགས་ཤིང་གསན་བསམ་གོང་འཕེལ་དུ་གྱུར་ནས་རང་གནས་སུ་ཕེབས། མདོར་ན་གྲ་གཙང་དུ་ལོ་བཅུ་གསུམ་གྱི་བར་བཞུགས་ཀྱང་བསྒྲིགས་དང་གང་མཐུན་ལས་ཞོག་པ་གཅིག་གི་ཚོགས་གཅོག་པའམ། གྲ་པ་བགྲེས་པ་ལྟ་ཅི་ཆབ་དྲིལ་བ་ཚུན་ལ་འཁྲུགས་ལོང་བྱེད་ལྟ་ཅི་སྨོས། མིག་ལོག་ཙམ་ཡང་མཛད་མ་མྱོང་གསུངས། དགུང་ལོ་ཉི་ཤུ་རྩ་ལྔ་པར་ཐུབ་བསྟན་རྡོ་རྗེ་བྲག་ཏུ་རིག་འཛིན་ཆེན་པོ་ཀུན་གཟིགས་པདྨ་ཕྲིན་ལས་ཀྱི་སྤྱན་སྔར་དད་པའི་དགེ་འདུན་གྲངས་ཚང་གི་དབུས་སུ་བསྙེན་པར་རྫོགས་ཤིང་། མཚན་སྔ་མའི་སྟེང་དུ་ངག་དབང་ཞེས་འཇུག་པ་གནང་། དེ་ནས་བཟུང་སྟེ་བཅས་པའི་ལྟུང་བ་ཆེ་ཕྲས་མ་གོས་པའི་ཀུན་སྤྱོད་ཤིན་ཏུ་གཙང་། དགུང་ལོ་ཉི་ཤུ་རྩ་བདུན་པའི་ཟླ་བ་དགུ་པར་བསྙུན་ཚབ་ཤིན་ཏུ་ལྕི་བ་གྲོང་ཐག་ཆོད་པ་ཞིག་བྱུང་ཀྱང་། རིག་འཛིན་པདྨ་ཕྲིན་ལས་ཀྱི་བྱིན་རླབས་ཀྱི་སྣང་བས་བར་ཆད་ཀྱི་མུན་པ་མཐར་བསྐྲད་དེ་འཆི་མེད་གྲུབ་པའི་
ཨུཏྤལ་ཁ་བྱེ་བར་གྱུར་ཅིང་། རྟ་མགྲིན་གསང་སྒྲུབ་ཀྱི་བསྙེན་པ་ཟླ་བ་བདུན་དུ་མཛད། དེ་ནས་སྔོན་གྱི་སྨོན་ལམ་གྱི་འཕེན་བས་རྒྱུད་བསྐུལ་ཏེ་འདི་ནས་བཟུང་སྟེ་ལོ་ཚིག་སོགས་རྣམ་ཐར་ཞལ་གསུང་མར་དཔྱད་དཀའ་བར་གྱུར་བས་སླར་ཡང་མཁྱེན་རབ་བྱམས་པའི་རྣམ་ཐར་དང་བསྟུན་དགོས། དཔལ་ལྡན་ནཱ་ལེནྡར་རྡོ་རྗེ་འཆང་མཁྱེན་རབ་བྱམས་པ་ངག་དབང་ལྷུན་གྲུབ་ལས་གསུང་ངག་རིན་པོ་ཆེ་སློབ་བཤད་སོགས་དཔལ་ས་སྐྱ་པའི་སྙན་བརྒྱུད་མཐའ་དག་གསན་འདོད་ཀྱི་བཞེད་པ་མི་ཕྱེད་པའི་ངོས། ཞབས་ཕྱི་གཉིས་དང་བཅས་ཏེ་ཕེབས་ནས་སྙན་དུ་གསོལ་བས་དགྱེས་བཞིན་དུ་ཞལ་གྱིས་བཞེས་ཏེ། ཐོག་མར་ཚར་ལུགས་དཀར་པོ་ལྷ་གསུམ་གྱིས་སྒོ་འབྱེད་པ་ཡིན་གསུངས་ནས། རྗེ་བཙུན་སྒྲོལ་དཀར་ཡིད་བཞིན་འཁོར་ལོའི་རྗེས་གནང་ཐུན་མོང་མ་ཡིན་པ་མཆོད་བཤམས་སོགས་སྤྲོས་པ་དང་བཅས་ཏེ་རྒྱས་པར་སྩལ་ཞིང་། དེ་བཞིན་དུ་ཆག་ལུགས་ཚེ་དཔག་མེད་དཀར་པོ་དང་། དབྱངས་ཅན་མ་དཀར་མོ་རྣམས་ཀྱི་རྗེས་གནང་དང་། དེ་རྗེས་གཤེད་དམར་ལྷ་ལྔ་དང་། ཀྱེ་རྡོར་རྒྱུ་ལམ་གྱི་དབང་སོགས་གསན་ཅིང་། རྭ་སྒྲེང་ཚུན་གྱི་གནས་རྟེན་རྣམས་མཇལ་ནས་སྐོར་གཅིག་རང་གནས་སུ་ཕེབས། སྒྲོལ་དཀར། རྣམ་རྒྱལ། རྣམ་འཇོམས་རྣམས་ཀྱི་ལྗགས་བསྙེན་བྱ་རྒྱུད་རང་ལུགས་མཐུན་པའི་ཕྱག་བཞེས་
ཚད་ལྡན་མཛད། སླར་ལོ་དེའི་ཟླ་བ་དགུ་པར་ནཱ་ལེནྡྲར་ཕེབས། སྒྲུབ་ཐབས་བརྒྱ་རྒྱམ་གྲུབ་བརྒྱའི་རྗེས་གནང་སོགས་བཀའ་ཆོས་མང་དུ་གསན། དེའི་ཕྱི་ལོ་ཟླ་བ་དང་པོའི་ཡར་ཚེས་སུ་རྩེ་གདོང་ཞབས་དྲུང་སྐུ་མཆེད་དང་། རྗེ་ཉིད་སོགས་དཔོན་སློབ་བཅུ་གཅིག་ལ་གསུང་ངག་རིན་པོ་ཆེ་སློབ་བཤད། དབང་། བྱིན་རླབས། ཁྲིད། ལུངས་སོགས་ཡོངས་སུ་རྫོགས་པ་སྨིན་རྒྱས་སུ་ཟླ་བ་ཕྱེད་བཞིའི་བར་དུ་སྩལ་བ་གསན་ཅིང་། གསན་ལོ་ཙམ་དུ་མ་བཞག་པར་བསམ་པས་སྒྲོ་འདོགས་བཅད་བ་དང་། བསྒོམ་པས་ཉམས་སུ་བླངས་པས་དུས་དེ་ཉིད་ནས་སློབ་བཤད་ཟབ་མོའི་གནད་ལ་གཞན་དྲིང་མི་འཇོག་པའི་སྤོབས་པའི་གཏེར་ཆེན་པོ་གྲོལ་ཞིང་། བླ་མ་དང་ཆོས་ལ་མི་ཕྱེད་པའི་ཐུགས་དད་ཆེན་པོས་ལེགས་ཚོགས་ཀྱི་སྒོ་མཐའ་དག་འགྲིགས་པས་སྙིགས་དུས་ཀྱི་བསྟན་པའི་ཉི་མ་ཆེན་པོར་གྱུར༔ འདི་སྐབས་གོང་ས་ལྔ་པ་རིན་པོ་ཆེས་སློབ་བཤད་ལ་མི་བཅུ་གཅིག་ལས་མི་འགབ་ཅེས་བཀའ་ཕེབས་པར་བརྟེན། དེ་དུས་ཆེ་གཉན་གྱི་རིགས་མང་བས་གཞན་ཚུད་དཀའ་བ་ཙམ་དུ་གྱུར་ཀྱང་། རྗེ་ཉིད་ལ་རྗེ་བླ་མས་བསྟན་པ་གཏད་པར་དགོངས་ནས་དཀའ་བ་མེད་པར་ཆོས་གྲྭར་བཅུག་པར་གནང་བས་ངོ་མཚར་བའི་རྣམ་ཐར་རྨད་དུ་བྱུང་བའོ། །གཞན་ཡང་བར་གསེང་ཐམས་ཅད་དུ་གསང་
འདུས་ལུགས་གསུམ་དང་། བདེ་མཆོག་ལུགས་གསུམ་སོགས་དབང་ལུང་མན་ངག་མང་དུ་གསན། སྐོར་གཅིག་རང་དགོན་དུ་ཕེབས་ནས་རྣལ་འབྱོར་མའི་གཞི་བསྙེན་མཐར་ཕྱིན་པར་མཛད། དེའི་སྟོན་སོར་སླར་ཡང་ནཱ་ལེནྡྲར་ཕེབས་ནས་བཟུང་། སྔ་ཕྱིར་ལོ་བཅུ་གསུམ་གྱི་བར་དུ་ཕལ་ཆེར་འབྲལ་མེད་དུ་མཉེས་པ་གསུམ་གྱིས་བསྟེན་ནས། གསུང་ངག་རིན་པོ་ཆེ་ཚོགས་སློབ་བསྡོམས་པས་ཚར་བཅུ་གཉིས། རྡོ་རྗེ་ཕྲེང་བ་ཚར་བརྒྱད་ཀྱིས་གཙོས། གསེར་ཆོས་བཅུ་གསུམ་དང་། མགོན་པོ་ཆེ་ཆུང་སོགས་སྙན་བརྒྱུད་ཀྱི་སྐོར་དང་། རྒྱུད་སྡེ་བཞི་དང་འབྲེལ་བའི་དབང་ཁྲིད་མན་ངག་རྗེ་ཉིད་ཀྱིས་གསན་པ་མཐའ་དག་བུམ་པ་གང་བྱོའི་ཚུལ་དུ་གསན་ཅིང་། རང་ཉིད་ཀྱི་ཉམས་བཞེས་དང་། གཞན་དག་ལ་འཆད་སྤེལ་སོགས་གསན་པ་དོན་ལྡན་དུ་མཛད། དགུང་ལོ་ཉེར་དགུ་པ་ནས་ལོ་བདུན་དུ་དབོན་མཁྱེན་བརྩེ་རབ་བརྟན་ལ་སྐུ་ཡོན་སོགས་བསླབ་སྟོན་ཕུལ་ཞིང་བཅར་བཞུགས་ངོས་མགོན་པོ་སོགས་བསྙེན་པའང་མང་དུ་མཛད། གཞན་ཡང་དགུང་ལོ་སོ་བདུན་པ་ཡན་ཆད་དུ་འཇམ་མགོན་ས་སྐྱ་པ་བསོད་ནམས་དབང་ཕྱུག་ལས་ཇོ་ལུགས་སྒྲོལ་མ་ཉེར་གཅིག་དང་། མི་གཡོ་བ་དཀར་སྔོན་དང་། ཤེར་ཕྱིན་དཀར་སེར་སོགས་རྗེས་གནང་འགའ་ཞིག །ཀྱེ་རྡོར་རྒྱུ་ལམ་
དང་། ཡང་དག་གི་དབང་། འཇམ་མགོན་ཀུན་དགའ་བཀྲ་ཤིས་ལས་རྡོ་རྗེ་ཕུར་པའི་དབང་ཡོངས་རྫོགས། ཀྱེ་རྡོར་གཙོ་ཆེའི་ཆོས་སྣ་སོ་དགུ་དང་། དམར་པོ་སྐོར་གསུམ་དང་མུས་ཆེན་བཀའ་འབུམ་སོགས་ཀྱི་ལུང་། ཕག་མོ་སྐོར་གསུམ་དང་མཁའ་སྤྱོད་མའི་བྱིན་རླབས་སོགས། ཐུབ་བསྟན་མཁན་ཆེན་བཟང་པོ་རྒྱལ་མཚན་ལས་ཀུན་མཁྱེན་བསོད་ནམས་སེང་གེ་དང་། དཀོན་མཆོག་ལྷུན་གྲུབ་ཀྱི་བཀའ་འབུམ། འཇིགས་བྱེད་རྭ་ཚར་ཐུན་མོང་མ་ཡིན་པའི་དབང་ཁྲིད། ངག་དབང་བློ་གསལ་བསྟན་པ་རབ་རྒྱས་ལས་ནི་གུའི་སྐོར་དང་། ཚར་ཆེན་བཀའ་འབུམ་ཕལ་ཆེར། མཁན་ཆེན་དོན་གྲུབ་ལེགས་བཟང་ལས་སེམས་ཙམ་ལུགས་ཀྱི་སེམས་བསྐྱེད་དང་། རྣམ་སྲས་ལྔ་ཕྲག་གསུམ་གྱི་རྗེས་གནང་། རྩེ་གདོང་ཁྲི་ཆེན་བསོད་ནམས་བསྟན་འཛིན་ལས་འཆི་མེད་དཔལ་སྟེར་དང་ལྕགས་སྡོང་མའི་ཚེ་དབང་། གླིང་སྟོད་མཁན་ཆེན་དཀོན་མཆོག་དཔལ་འབྱོར་ལས་ཀྱེ་རྡོ་རྗེའི་དབང་དང་རྗེས་གནང་འགའ་ཞིག །ཆོས་འཁོར་གཉིས་ཀའི་མཁན་ཆེན་བློ་གྲོས་བརྟན་པའི་དྲུང་དུ་ཀྱེ་རྡོར་དབང་དང་། རྗེས་གནང་འགའ། གླིང་སྨད་ཞབས་དྲུང་ཕུན་ཚོགས་རྒྱལ་མཚན་སར་བཀའ་གདམས་ལྷ་བཞི་སོགས་རྗེས་གནང་རིགས་དང་ཀྱེ་རྡོར་རྒྱུ་དབང་། མཁན་ཆེན་ངག་དབང་དོན་གྲུབ་ལས་ཀུན་རིག་གི་
དབང་དང་། འབྱུང་འདུལ་དང་ལྷ་མོ་ནམ་མཁའི་གོས་ཅན་མའི་རྗེས་གནང་། དོལ་ཆོས་འཁོར་གནས་པ་སྨྲ་དབང་ཕྱོགས་ལས་རྣམ་རྒྱལ་ལས་མཚན་ཉིད་ཀྱི་པུསྟི་གྲགས་ཆེན་བཅོ་བརྒྱད་སོགས་ལུང་རྒྱུན་ཤིན་ཏུ་དཀོན་པའི་རིགས་དང་། ཚེ་དཔག་མེད་སྤྲུལ་སྐུའི་རྗེས་གནང་སོགས་རྒྱུན་དཀོན་པའི་རིགས། གོང་དཀར་དཔོན་སློབ་བསྟན་པ་རྒྱ་མཚོར་དུས་འཁོར་འགྲེལ་ཆེན་དང་། ཁྲོ་ཕུ་པའི་མན་ངག་བརྒྱ་རྩ་སོགས་ཀྱི་ལུང་། རིག་འཛིན་ནམ་མཁའ་གྲགས་པ་ལས་བླ་མ་ཞི་དྲག་དང་། མེ་རག་སློབ་དཔོན་པདྨ་ཕྲིན་ལས་སར་དཀོན་མཆོག་སྤྱི་འདུས་ཀྱི་ཁྲིད་སོགས་མང་དུ་གསན་པ་རྒྱ་མཚོའི་ཕ་རོལ་ཏུ་སོན། དགུང་ལོ་སོ་བརྒྱད་པར་རྨོར་དུ་དཔལ་དགེས་པ་རྡོ་རྗེའི་གཞི་བསྙེན་གནད་སྨིན་བཀའ་དྲིན་བསྐྱངས། དེ་གྲོལ་བསྟུན་དེ་གའི་གྲྭ་པ་རྣམས་ལ་དཔལ་དགེས་པ་རྡོ་རྗེའི་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བ་གནང་བ་བཀའ་ཆོས་སྩལ་བའི་ཐོག་མ་ཡིན་ཅིང་། ཕྱི་ལོའི་སྟོན་རྡོ་རྗེ་བྲག་ཏུ་རིག་འཛིན་པདྨ་ཕྲིན་ལས་ཀྱིས་ཆེད་དུ་སྤྱན་དྲངས་པ་བཞིན་ཚར་ལུགས་དཀར་པོ་ལྷ་གསུམ་གྱི་རྗེས་གནང་གིས་སྒོ་ཕྱེ་ནས་རྗེས་གནང་རིགས་ཤིན་ཏུ་མང་བར་ཕུལ་བ་དང་། དེ་ནས་གྲ་ཐང་དུ་མཁན་ཆེན་ངག་དབང་བསྟན་འཛིན་ཕུན་ཚོགས་ལ་དམར་པོ་སྐོར་གསུམ་གྱི་རྗེས་གནང་དགུ་
དང་། བེ་བུམ་གྱི་ལུང་། རྣམ་སྲས་རིགས་ཆེན་བཅོ་ལྔ་སོགས་སྩལ་ཞིག སླར་ཡང་རྡོར་བྲག་རིག་འཛིན་ཆེན་པོར་ལམ་འབྲས་སློབ་བཤད་སྩལ་བས་མཚོན་ཆོས་འཁོར་བར་མེད་དུ་བསྐོར། དགུང་ལོ་ཞེ་གཅིག་པར་འཇམ་མགོན་ས་སྐྱ་པའི་ལུང་གིས་བསྐུལ་ནས་སྨོན་དགའ་རིན་ཆེན་བསམ་གཏན་གླིང་གི་ཆོས་ཀྱི་ཁྲི་ལ་ཞབས་བཀོད། ལོ་དེར་ཡར་ཀླུང་དུ་དབོན་རིན་པོ་ཆེ་ཀུན་དགའ་བསྟན་པའི་རྒྱལ་མཚན་དཔོན་སློབ་ལ་ལམ་འབྲས་སློབ་བཤད་ཟབ་རྒྱས་སུ་གནང་ཞིང་། གཞན་ཡང་ཆོས་འཁོར་རྒྱ་ཆེར་བསྐོར། དགུང་ལོ་ཞེ་ལྔ་པར་རྨོར་དུ་གསང་ཕུ་མཆོད་ཁང་དཔོན་སློབ་སོགས་ལ་སློབ་བཤད་ཚར་གཅིག་སྩལ། དེ་ལོའི་ཟླ་བ་བཅུ་གཉིས་པར་གཞུང་ས་ཆེན་མོ་ནས་ཐུབ་བསྟན་ར་བ་སྨད་ཀྱི་མཁན་པོར་བཀོད་ཅིང་། གཙོ་བོར་ཐུགས་དམ་ཉམས་བཞེས་ཀྱི་རིམ་པ་ཆགས་མེད་དང་། མདོ་ཕྱོགས་ཀྱི་འཆད་ཉན་ལྷག་པར་འཕེལ་བའི་ངང་ཡར་ཀླུང་དབོན་རིན་པོ་ཆེ་དང་། ལྕགས་ཟམ་ཆུ་བོ་རིའི་མཆོག་སྤྲུལ་ངག་དབང་བློ་གསལ་ཉི་ཟླ་འོད་འབར་སོགས་ལ་སྔགས་ཀྱི་སྨིན་གྲོལ་བསམ་གྱིས་མི་ཁྱབ་པ་སྩལ། དགུང་ལོ་ང་ལྔ་པར་གསང་ཕུ་དབྱར་ཆོས་ཀྱི་བཏང་སྒོ་མཛད་ཅིང་། ང་དྲུག་པར་གདན་ས་བཞག་ནས་རྨོར་དུ་ཕེབས། ལྷོ་བྲག་ཤིང་མང་དགོན་གྱི་ཞལ་འཛིན་དང་། རིམ་པར་ཡར་ཀླུང་བཀྲ་
ཤིས་ཆོས་སྡེར་ཡོལ་པ་རྡོ་རྗེ་འཆང་གཞོན་ནུ་བློ་གྲོས་ཀྱི་ཆོས་ཀྱི་ཁྲིར་ཞབས་པད་བཀོད། དཔལ་བསམ་ཡས་སུ་གསུང་ངག་སློབ་བཤད་དང་། བཀྲ་ཤིས་ཆོས་སྡེར་སྙན་བརྒྱུད་བསྟན་པའི་བདག་པོ་གནས་གསར་དབོན་རིན་པོ་ཆེ་ངག་དབང་ཀུན་དགའ་ལེགས་པའི་འབྱུང་གནས། སྒེར་པ་རྗེ་དྲུང་རིན་པོ་ཆེ་བློ་གསལ་འཇམ་དབྱངས་ཕུན་ཚོགས་སོགས་ལ་རྡོ་རྗེ་ཕྲེང་བས་མཚོན་ཆོས་སྔ་ཕྱི་བཀའ་བསམ་གྱིས་མི་ཁྱབ་པ་དང་། ཆོས་རྒྱལ་གཏེར་བདག་གླིང་པས་ཀྱང་དཔྱལ་ཕག་སྐོར་གསུམ་གྱི་བྱིན་རླབས་སོགས་གསུང་གི་བདུད་རྩི་བཞེས། དེ་སྐབས་ཡལ་གྲོ་འཆད་ཀའི་འཛིན་བདག་ཀྱང་གནང་ནས་ལམ་འབྲས་སོགས་ཆོས་འཁོར་རྒྱ་ཆེར་བསྐོར། གནས་གསར་དབོན་རིན་པོ་ཆེ་བསྙེན་པར་རྫོགས། ཁྱད་པར་སྔ་ལོར་ཡར་ཀླུང་བཀྲ་ཤིས་ཆོས་སྡེར་ཚར་གཅིག་དང་། རྗེས་སོར་རེ་དགུ་པར་བསམ་ཡས་ཆོས་འཁོར་ཆེན་པོའི་བར་ཁང་གཡུ་ཞལ་འབར་བར་ཚར་གཅིག་ཏེ་ལམ་འབྲས་སློབ་བཤད་ཡོངས་སུ་རྫོགས་པ་ལན་གཉིས་གནང་པའི་ཕྱི་མར་དབང་སྟེགས་དཀྱིལ་འཁོར་རྡུལ་ཚོན་བཞེངས་པར་དབོན་རིན་པོ་ཆེ་བཞུགས་སུ་བཅུག་ཅིང་དོན་གྱི་བསྟན་པ་གཏད། དེས་མཚོན་སྔ་ཕྱིར་ལམ་འབྲས་ཚོགས་བཤད་ཚར་གཅིག་དང་། སློབ་བཤད་ཚར་དགུ། རྡོ་རྗེ་ཕྲེང་བ་ཚར་བདུན་
སོགས་འཆད་སྤེལ་བསམ་གྱིས་མི་ཁྱབ་པ་མཛད་པས། རྡོ་རྗེ་བྲག་རིག་འཛིན་ཆེན་པོ། ཆོས་རྒྱལ་གཏེར་བདག་གླིང་པ། དབོན་རིན་པོ་ཆེ་གོང་འོག་གཉིས། ངོར་ཁང་གསར་མཁན་ཆེན་དང་། མཁན་ཆེན་དཔལ་ཆོས། ཞུ་ཆེན་པཎྜི་ཏ། མདོ་ཁམས་པ་སངས་རྒྱས་རྒྱ་མཚོ། སྐྱོ་མདའ་བསོད་ནམས་དབང་ཕྱུག །ལྕགས་ཟམ་རིན་པོ་ཆེ། སྒེར་པ་རྗེས་དྲུང་ཁུ་དབོན། འཇམ་དབྱངས་བདེ་བའི་རྡོ་རྗེ། བཀའ་འགྱུར་བ་སངས་རྒྱས་རྒྱ་མཚོ་དང་། ངག་དབང་རབ་བརྟན་སོགས། གསང་ཕུ། ར་བ་སྨད། ཚོགས་སྡེ་བཞི་སོགས་ཀྱི་བླ་མ་སློབ་དཔོན་ཕལ་ཆེར། སེ་འབྲས་དགེ་གསུམ་གྱི་དགེ་བཤེས་དང་། གཞུང་གི་མི་ཆེན་རྣམས་སོགས་ཞལ་སློབ་དང་སྦྱིན་བདག་བསམ་གྱིས་མི་ཁྱབ་པ་བྱོན། གསན་ཡིག་པུསྟི་གཅིག་སོགས་གསུང་རྩོམ་འགའ་ཡང་མཛད། སྔ་ཕྱིར་འཛིན་བདག་གནང་བའི་དགོན་གནས་རྣམས་སུའང་ཉམས་པ་གསོ་བ་དང་། གསར་བཞེངས། དུས་མཆོད་འཛུགས་པ་སོགས་བྱ་བ་ལས་ཀྱི་འཁོར་ལོ་ཡང་རྒྱ་ཆེར་སྤེལ། བཀྲ་ཤིས་ཆོས་སྡེར་ཟླ་བ་བྱུང་ངོ་ཅོག་གི་གནམ་གང་ལ་མཁྱེན་རབ་རྗེའི་སྐུ་མཆོད་མང་ཇ་དང་བརྒྱ་མཆོད་སོགས་ཀྱི་ཐེབས་སྦྱར། ལྗང་འགར་བ་བོད་དུ་ལྷག་པའི་སྐབས་དང་པོར་འཛིན་འཆིང་གིས་མཚོན་ཞབས་འདྲེན་ཆེ་བར་ཞུས་ཀྱང་བླ་མ་མཆོག་གསུམ་
གྱི་ཐུགས་རྗེས་ཉེས་མེད་དུ་གྲོལ་བས་ས་བསྟན་སྤྱི་ལའང་ཕན་པ་ཆེན་པོའི་སྒོར་གྱུར། དེ་ལྟ་བུའི་བཤད་སྒྲུབ་ལས་གསུམ་གྱི་ཕྲིན་ལས་རླབས་པོ་ཆེའི་ངང་དགུང་ལོ་དོན་གསུམ་པར་འོན་ཆོས་སྡིང་གི་རི་ཁྲོད་དུ་གྲུབ་མཐའ་སྙོགས་ཏེ་གཟུགས་སྐུའི་བཀོད་པ་བསྡུ་བའི་ཚུལ་བསྟན། རྣམ་ཐར་རྒྱས་པ་རྗེ་ཉིད་ཀྱི་ཞལ་གསུང་མ་བློ་གསལ་སྒེག་མོའི་མེ་ལོང་དུ་གསལ། འོན་ཆོས་སྡིང་རྒོད་ཚང་གི་རི་ཁྲོད་དུ་ཟླ་བ་བཅུ་གཅིག་པའི་ཚེས་བཅུ་གཉིས་ཀྱི་ཐོ་རེངས་ལམ་དུས་རྒྱས་པ། གཅིག་མཐུད་གཉིས་མཐུད་དུ་མཛད་རྗེས་སྐུའི་ནང་ནས་འུར་སྒྲ་དང་བཅས་མཁའ་སྤྱོད་ཆེན་པོར་ཟང་ཐལ་དུ་གཤེགས། ཕྱག་མཛོད་བློ་ལྡན་ནས་གནས་གསར་རྡོ་རྗེ་འཆང་ཆེན་པོ་གདན་དྲངས་ཏེ་གཤེགས་རྗེས་ཀྱི་བྱ་བ་རྣམས་མཛད་ཅིང་། ཁྱད་པར་གནས་གསར་པ་ཆེན་པོ་ནས་གཙོ་བོར་རྗེ་ཉིད་ཀྱི་བཤད་སྒྲུབ་ལས་གསུམ་གྱི་ཕྲིན་ལས་འཕྲོ་བསྐྱང་བ། བྱེ་བྲག་ཏུ་ཆོས་སྡེ་རྨོར་དགོན་མ་ལག་གསུམ་དང་བཅས་པར་ཟླ་མཆོད་ཆགས་མེད། བསམ་ཡས་རབ་བྱུང་དུ་ཀྱེ་རྡོར། ཤེའུ་བསྲོང་དང་འཕགས་སྡེར་མཁའ་སྤྱོད་མའི་སྒྲུབ་མཆོད་འཛུགས་པ་སོགས་ཟབ་དགོངས་ཆོས་ཀྱི་དབྱིངས་རྫོགས་པའི་ཐབས་མཐའ་ཀླས་པར་མཛད་དོ།། ༈ །།རྨོར་ཆེན་རྣམ་ཐར་ཞལ་གསུང་མར། མཁས་གྲུབ་གུང་རུ་ཤེས་རབ་བཟང་པོ་
སོགས་མཁས་ཤིང་དངོས་གྲུབ་བརྙེས་པའི་བླ་མ་རིམ་པར་བྱོན་པའི་གཟིམ་ཆུང་ཀ་དྲུག་མར་རྗེ་བླ་མ་སེང་གེའི་ཁྲི་ལ་ཞལ་ནུབ་ཕྱོགས་སུ་གཟིགས་པའི་དབུ་ཐོག་ཏུ་གདུགས། གཡས་སུ་རྒྱལ་མཚན། གཡོན་དུ་བ་དན། སྐུ་མདུན་དུ་ཆུ་བཞི། སྔོན་འགྲོའི་ཉེར་སྤྱོད་སོགས་སློབ་བཤད་པའི་ཕྱག་ལེན་འཁྲུལ་མེད་ལྟར་བཀོད་མཛེས་སུ་བཤམས་པའི་མདུན་དུ་གཙོ་བོ་རྩེ་གདོང་སྐུ་མཆེད། འཕྲེང་པོ་བཞི་པ། གསང་ཕུ་མཆོད་ཁང་པ། སྲིད་གསུམ་སློབ་དཔོན་བསླབ་གསུམ་བསྟན་འཛིན། བཅོ་བརྒྱད་རང་གི་ཕྱག་མཛོད་སོགས་མདོར་ན་ཐ་ཆུང་བདག་གིས་མཐའ་བརྟེན་པ་བཅུ་གཅིག་ལ་རྣལ་འབྱོར་དབང་ཕྱུག་འཇིགས་བྲལ་དཔལ་ལྡན་ཆོས་སྐྱོང་གི་བཞེད་གཞུང་གསུང་ངག་རིན་པོ་ཆེ་སློབ་བཤད་ཟབ་མོ་ཚར་ཆེན་ཆོས་ཀྱི་རྒྱལ་པོས་སྲོལ་ལེགས་པར་བཏོད་པའི་སྣང་གསུམ་གྱི་སྐབས་འཇམ་དབྱངས་མཁྱེན་བརྩེས་མཛད་པའི་གསུང་ངག་བྱུང་ཚུལ་ལ་ངོར་ཆེན་མན་གྱི་རྣམ་ཐར་རྗེ་བླ་མའི་ཐུགས་ཐོག་ནས་གནང་བའི་ལྗགས་བཤད། ཞི་ལྷག་གི་ངོ་སྤྲོད་དམིགས་སུ་ཕུག་པའི་མེ་ཏོག་སྔོན་པོ་འགྱེད་པ་སོགས་ཕྱག་ལེན་ཕྲ་རགས་ཐམས་ཅད་སླ་ཆོས་སུམ་སོང་བ། བླ་མ་ལྔ་བཅུ་པའི་འགྲེལ་པ་ཚར་ཆེན་རྡོ་རྗེ་འཆང་ཆེན་པོས་མཛད་པའི་དངོས་གྲུབ་སྒོ་འབྱེད་ཀྱི་སྟེང་ནས་ས་གཞུང་སྤེལ་བའི་གཟབ་བཤད།
བདག་ཆེན་རིན་པོ་ཆེའི་ཡི་གེའི་སྟེང་ནས་བརྒྱུད་པའི་ཁྱད་པར་གཉིས་ལྡན་གྱི་སེམས་བསྐྱེད། དེ་ནུབ་སློབ་མ་རྗེས་འཛིན་སློབ་བཤད་པའི་ལུགས་ལྟར་གནང་བ་ནས། རྗེ་བླ་མ་ཁ་གསོའི་ལྗགས་བསྙེན་ལ་བཞུགས། འཕན་ཡུལ་གཉའ་གོང་ནང་སོས་མཆོད་འབྲུ་དང་སྣུམ་སོགས་མཐུན་རྐྱེན་སྦྱིན་བྱུང་བས་ཞག་བདུན་གྱི་བར་དེར་སྒྲུབ་པའི་མཎྜལ་ཚོམ་བུ་ལྔ་པ་བཤམས་པའི་མདུན་དུ་ཅི་འབྱོར་པའི་མཆོད་པ་ཕུལ་ནས། ཉིན་ལྟར་ཡང་མཎྜལ་ཚོམ་བུ་བདུན་མ་སྟོང་ཕྲག་རེ་དང་སོ་བདུན་མ་འོས་མཚམས། སྔ་དགོང་བརྒྱ་ཕྱག་རེ་དང་ཡིག་བརྒྱ་ལྔ་བརྒྱ་རེ་མ་ཆགས་པའི་ཁུལ་བྱས། དལ་བར་མ་བསྡད་པར་མིག་ལྟོས་ལ་ཕན་རེ་བྱས་ཁུལ་ཡིན། དེ་ནས་སྐུ་མཚམས་གྲོལ་འཕྲལ་བཅོ་བརྒྱད་བླ་བྲང་གི་དབང་ཁང་འཆི་མེད་ཕོ་བྲང་དུ་ཡབ་ཀྱི་རྡུལ་ཚོན་གྱི་དཀྱིལ་འཁོར་དུ་དག་བྱ་དག་བྱེད་ངོ་འཕྲོད་པ། ཁྱད་པར་སློབ་དཔོན་གྱི་དབང་སྟེགས་སྟེང་སློབ་མ་རེ་རེ་ནས་གནང་བ་སོགས་སློབ་བཤད་པའི་བཞེད་པ་འཁྲུལ་མེད་ཨཋའི་བཟླས་ལུང་བཅས་སྩལ། དེ་ཡང་རྗེ་བླ་མ་འདིས་དབང་གང་གནང་ཀྱང་གཅིག་གོ་གཅིག་ཅོད་དང་། འདི་ཚབ་འདིས་ཡོང་སོགས་གཏན་ནས་མི་གནང་བར་སོ་སོའི་ཕྱག་ལེན་ཕྲ་རགས་ཐུན་མོང་པ་མི་འགལ་ཞིང་། ཐུན་མོང་མ་ཡིན་པ་མ་འདྲེས་པའི་སྒོ་ནས་གསུང་
བཤད་མཐའ་ཆོད་པ་བཀའ་དྲིན་བསྐྱངས་པས་དབང་ཐོབ་ལོ་ཙམ་མ་ཡིན་པར་སོ་སོའི་གྲུབ་མཐའ་ལ་འདི་དང་འདིའོ་སྙམ་པའི་ངེས་པ་བརྟན་པོ་རྙེད་ཡོད་པས་དེང་སང་དབང་གི་རིགས་སྤྱི་དང་། ཁྱད་པར་སློབ་བཤད་ཟབ་མོའི་གནད་ལ་གཞན་དྲིང་མི་འཇོག་པའི་སྤོབས་པ་རྙེད་པ་འདི་གཅིག་པུའི་སྐུ་དྲིན་ཡང་གཞལ་བར་ནུས་པའི་ཚད་མ་མཆིས། འདི་སྐབས་ཀྱི་དཀྱིལ་འཁོར་མིག་དང་ཚོན་བཀྱེ་བ་སོགས་ཀྱི་ཞབས་ཕྱིར་ཡང་འབོད་པར་གནང་། རྗེ་བླ་མ་སྒྲུབ་མཆོད་གནང་བའི་སྐབས་ཞབས་ཕྱིར་ཡང་སྡོད་ཆོག་པར་བྱུང་བས་སྐལ་པ་མཆོག་ཏུ་བཟང་བའི་བགོ་སྐལ་ཐོབ་པར་གྱུར། དཀྱིལ་འཁོར་དེ་ཉིད་ཀྱི་སྟེང་ནས་ཚོགས་བཤད་ཀྱི་དབང་བཀའ་ཡང་གནང་བས་ཞག་ཉི་ཤུ་སྐོར་འགོར། སློབ་མ་ཁ་གྲངས་མ་འགྲིགས་པའི་སྐབས་ཐམས་ཅད་དུ་ཕྱིན་པས་རྒྱུ་དབང་ཚར་བརྒྱད་ཙམ་སོང་། དེ་ནས་སྔར་ལུགས་ལྟར་ཚོགས་སློབ་སོ་སོར་གནང་བའི་འཁོར་འདས་དབྱེར་མེད་ཀྱི་སྐབས་སུ་བཤད་ལུང་ཙམ་མ་ཡིན་པར་རིག་ཐོག་ཏུ་བརྡར་ཤ་ཆོད་པའི་སློབ་བཤད་ལུགས་ཀྱི་སེམས་འཚོལ་གཏོང་བ་སོགས་གནང་། བདག་ཆེན་རིན་པོ་ཆེས་མཛད་པའི་འཁྲུལ་སྤོང་རབ་གསལ་སྟེང་ནས་ས་གཞུང་སྤེལ་བའི་བཤད་པ་ཤིན་ཏུ་རྒྱས་པ་དང་། སྔགས་ལམ་ལ་འཇུག་པའི་སྔོན་དུ་ཡུམ་གྱི་རྡུལ་ཚོན་གྱི་དཀྱིལ་འཁོར་
དུ་དབང་བཞི་ཡོངས་སུ་རྫོགས་པ། དེ་ནས་བསྐྱེད་རིམ་ཕྱི་ནང་གི་འཁྲིད་ཤིན་ཏུ་སྨིན་པ། ཚར་ཆེན་རྡོ་རྗེ་འཆང་གིས་མཛད་པའི་རྣམ་བཤད་ཉི་མའི་འོད་ཟེར་སྟེང་ནས་སྒྲོ་འདོགས་གཅོད་པའི་གསུང་བཤད་ཤིན་ཏུ་རྒྱས་པ་ལྗགས་ཐོག་ནས་སྩལ། གསང་དབང་གི་ཁྲིད་ཀྱི་ཐོག་མར་སིནྡྷ་རའི་དཀྱིལ་འཁོར་ལ་བརྟེན་པའི་ཡུམ་ཀའི་བྱིན་རླབས་རྒྱས་པར་སྩལ་ནས། ཁྲིད་དངོས་གཞི་རྒྱལ་དབང་རྡོ་རྗེ་འཆང་ཆེན་པོས་མཛད་པ་ལ། ཐམས་ཅད་མཁྱེན་པ་ཀླུ་སྒྲུབ་རྒྱ་མཚོའི་ཁྲིད་ཡིག་ནས་ཁ་འགེངས་པ་གནང་བའི་དབང་གོང་མ་གསུམ་གྱི་ཁྲིད་གཏུམ་མོའི་དམིགས་རྐང་བཅོ་བརྒྱད། ཡན་ལག་ལྔ་སྦྱོང་། ལུས་སྦྱོང་ཉི་ཤུ་པ། ཕྲིན་ལས་སོ་གཉིས་སོགས་སོ་སོར་ཕྱག་ཁྲིད་མཛུབ་སྤྱོད། ཞར་བྱུང་བར་དོ། རྨི་ལམ། སྒྱུ་ལུས། འོད་གསལ། འདའ་ཀ་མ་དང་བཅས་པ་དབང་བཞི་སོ་སོའི་མཇུག་ཏུ་ཆ་ཚང་བའི་སློབ་བཤད་པའི་ལུགས་མ་འཁྲུལ་བ། ལུང་གི་རིམ་པ་སྣང་གསུམ་གྱི་སྐབས་བླ་མ་བརྒྱད་པའི་རྣམ་ཐར་ཆ་ཚང་། སྔགས་ལམ་ཚུགས་ནས་ལམ་འབྲས་གླེགས་བམ་པོད་སེར། ལས་དང་པོ་པའི་ཆོས་སྣ་བདུན་དང་བཅས་པ། པོད་དམར། པོད་ཁྲ། པོད་ནག །མངོན་རྟོགས་ལུས་དཀྱིལ་དཀྱིལ་ཆོག་བཅས་བྱ་བྲལ་མ། ཚར་ཆེན་རྡོ་རྗེ་འཆང་ཆེན་པོས་མཛད་པའི་ལྷན་ཐབས་སོགས་
སློབ་བཤད་ལ་དགོས་པ་ཆ་ཚང་། བླ་མའི་རྣལ་འབྱོར་ཐུན་མོང་དང་ཐུན་མོང་མ་ཡིན་པ། རྣལ་འབྱོར་དབང་ཕྱུག་གི་སྲུང་བ་ཐུན་མོང་དང་ཐུན་མོང་མ་ཡིན་པའི་བྱིན་རླབས། བླ་མ་རིན་འབྱུང་། ཚར་གསུམ་ཁུག་པ། བརྡ་དོན་གསལ་བ། བརྡ་ཚིག་བརྒྱུད། སྒྲུབ་པ་ལུང་སྦྱིན། གསང་བཅུའི་རྒྱས་གདབ། རྟེན་འབྲེལ་གྱི་བྱིན་རླབས། མགོན་རྐྱང་གི་རྗེས་གནང་གི་བར་ཆ་ལག་ཡོངས་སུ་རྫོགས་པ་ཟླ་བ་ཕྱེད་བཞིའི་བར་སྩལ། ཞེས་གསུངས། ཡང་། དེ་ཡང་རྗེ་བླ་མ་འདི་ཉིད་ཀྱི་ཞབས་དྲུང་དུ་ཡུན་དེ་ཙམ་སོང་ཀྱང་ཐུགས་ཅུང་ཟད་ཁྲོ་བའི་རྣམ་འགྱུར་ཙམ་ཡང་མི་དྲན། ཅེས་གསུངས། མཁར་གདོང་དུ་བཞུགས་སྐབས་གཤེད་དམར། འཇིགས་བྱེད། གུར་ཞལ་སོགས་ཀྱི་ལྗགས་བཟླས་ཁ་སྐོང་གི་སྦྱིན་སྲེག་བཅས་གནང་། སོ་དགུ་པར་ཐུབ་བསྟན་རྡོ་རྗེ་བྲག་ཏུ་ནག་ཟླའི་ཚེས་བཅུ་བཞི་ནས་དུས་འཁོར་དབང་ཆེན་གོང་དཀར་ལུགས་དང་། གཞན་ཡང་རྗེ་འདི་ལས་རྟ་མགྲིན་ཡང་གསང་སོགས་གསན།། ༈ །།རྫོགས་ཆེན་རིན་པོ་ཆེ་འགྱུར་མེད་ཐེག་མཆོག་བསྟན་འཛིན་གྱི་ཐུགས་སྲས་འགྱུར་མེད་བཀྲ་ཤིས་རྒྱ་མཚོ་ཞེས་གྲགས་པ་དེ་ནི། ཇིང་གིར་གནམ་གྱི་གདུང་ལས་ཨ་རིང་རྫོགས་ཆེན་བཅོ་བརྒྱད་ཀྱི་བདག་པོ་ཀུན་དགའ་རྡོ་རྗེ་ཞེས་བྱ་བའི་བུ་ཆུང་བ་ཁ་འབར་བས་འབར་ཆུང་ངུ་ཐོགས་པ་
ཤོག་ལྷེབ་ ༣༠༡ ནས་ ༤༠༠ བར།
དེའི་མི་བརྒྱུད་ལ་སྨན་བླ་མགོན་ཞེས་གསོ་དཔྱད་མཁས་པ་ཞིག་བྱུང་། དེའི་བུ་ལ་སོག་ཕྲུག་ཐར་པ་དང་། གསེར་རྣ་གཉིས་བྱུང་བའི་ཕྱི་མའི་བརྒྱུད་ལས། ཡབ་དཔོན་ཚང་གནམ་ལྷ་ཡག་དང་། ཡུམ་རྒ་བཟའ་བདེ་འཛོམ་གཉིས་ཀྱི་སྲས་སུ་རྨ་ཆུ་བརྒྱུད་དང་ཉེ་བའི་དར་གྱི་ལྕགས་ཕྲེང་བྱ་བར། རྒྱལ་བ་ཞེས་པ་ཤིང་ཕོ་རྟའི་ལོའི་རྒྱལ་ཟླ་བའི་ཚེས་བཅོ་ལྔར་འཁྲུངས། ལོ་འདིའི་ཟླ་བ་གཉིས་པའི་ཚེས་གསུམ་ལ་རིག་འཛིན་གཏེར་བདག་གླིང་པ་ཞིང་གཞན་དུ་གཤེགས་པ་དང་། རྫོགས་ཆེན་རིན་པོ་ཆེས་མཚན་པདྨ་འགྱུར་མེད་རྣམ་རོལ་དུ་བཏགས་པ་དང་། རྗེ་ཉིད་ཀྱི་མནལ་ལམ་སོགས་ལ་རྗེས་སུ་དཔག་པས་གཏེར་ཆེན་རིན་པོ་ཆེའི་སྐྱེ་ཕྲེང་དུ་གྲགས་པས། གྲུབ་པའི་དབང་ཕྱུག་འཇིགས་མེད་ཕྲིན་ལས་འོད་ཟེར་གྱིས་ཀྱང་དེ་ལྟར་དུ་སྐྱེ་ཕྲེང་གསོལ་འདེབས་མཛད་པ་སོགས་ཡོད། དགུང་ལོ་བརྒྱད་པ་ནས་བརྩམས་ཏེ་ཡི་གེའི་གྲར་ཞུགས་པ་ཚེགས་མེད་དུ་མཁྱེན་ཅིང་འཛིན་བློ་ཡངས་པས་འདོན་ཚོགས་མང་པོ་ཐུགས་སུ་ཆུད། བཅུ་དགུ་པར་ལེགས་དགོན་བླ་མ་ཀརྨ་ཡེ་ཤེས་ལ་གཙུག་ཕུད་ཕུལ། མཚན་འགྱུར་མེད་བཀྲ་ཤིས་རྒྱ་མཚོར་བཏགས་པ་ཕྱིས་དེ་ལྟར་དུ་གྲགས། དེའི་ཕྱི་ལོར་རྫོགས་ཆེན་དུ་བྱོན། འགྱུར་མེད་ཐེག་མཆོག་བསྟན་འཛིན་ལས་རྫོགས་ཆེན་མཁའ་འགྲོ་སྙིང་ཏིག་གི་
ཉམས་ཁྲིད་གསན། སྦྱང་རྩོལ་སྤྱི་དང་ཁྱད་པར་སེམས་ཀྱི་རྩ་གདར་ཞིབ་ཏུ་བཅད། ལོ་དེར་ལྷོ་ཁམ་པ་རིན་ཆེན་ངག་དབང་ཀུན་དགའ་བསྟན་འཛིན་རྫ་རྒྱུད་དུ་ཕེབས་པ་མཇལ་ཞིང་མི་ཕྱེད་པའི་དད་པ་ཐོབ། གྲོ་བཞིན་ཟླ་བའི་ཚེས་བཅོ་ལྔར་རབ་ཏུ་བྱུང་། མཚན་དགེ་ལེགས་ཚོགས་འཕེལ་བསྟན་པ་དར་རྒྱས་ཞེས་བཏགས། ཉེར་གཅིག་པར་རྐང་ཚ་བླ་མ་པདྨ་དར་རྒྱས་གདན་དྲངས་ནས། འདུས་པ་མདོ་དབང་ཆེན་མོ་གཏད་རྒྱ་བཅས་དང་། སྨིན་གླིང་གཏེར་གསར་ཡོངས་རྫོགས། ཞི་ཁྲོ་དགོངས་པ་རང་གྲོལ། མཁའ་འགྲོ་སྙིང་ཏིག་སོགས་གསན། ཕྱི་ལོའི་དབྱར་ཟླ་ཐ་ཆུང་ནང་བླ་མ་དབུས་སུ་ཕེབས་པ་དང་མཉམ་དུ་བྱོན། རྒྱལ་དབང་སྐལ་བཟང་རྒྱ་མཚོ་ལི་ཐང་ནས་སླར་བྱོན་པའི་དེ་མ་ཐག་པར་ལྷ་ལྡན་དུ་སླེབས་པས་རྒྱལ་དབང་རིན་པོ་ཆེ་མཇལ་ཕྱག་ལ་ཕེབས་པའི་བླ་ཆེན་མང་པོའང་མཇལ། བླ་སློབ་ཀྱི་ཐུགས་བཞེད་ལྟར་བླ་མ་མངའ་བདག་གྲགས་པས་ཞུ་ནན་མཛད་པའི་མཚམས་སྦྱོར་ལ་བརྟེན། རྒྱལ་སྲས་རིན་ཆེན་རྣམ་རྒྱལ་གྱི་ཞལ་སྔ་ནས་ཀྱང་བཀའ་འགྱུར་རིན་པོ་ཆེའི་ལུང་གསན་པར་ཞལ་གྱིས་བཞེས་པ་ལྟར་སྨིན་གྲོལ་གླིང་དུ་ཕེབས། ལོ་དེའི་ཧོར་ཟླ་བཅུ་གཉིས་པའི་ཚེས་བཞི་ནས་བཟུང་རྗེ་རིན་ཆེན་རྣམ་རྒྱལ་གཙོར་གྱུར་པའི་གཞི་བྱེས་ཀྱི་འདུས་པ་རགས་བསྡུས་ལ་འོག་
མིན་ཨོ་རྒྱན་སྨིན་གྲོལ་གླིང་གི་གཟིམས་ཆུང་ཀུན་བཟང་ཕོ་བྲང་དུ། གྲྭ་ཐང་མཁན་ཆེན་སྒེར་པ་རྗེ་དྲུང་ཀུན་དགའ་མཁྱེན་བརྩེ་ཕུན་ཚོགས་ནས་བཀའ་འགྱུར་རིན་པོ་ཆེའི་ལྗགས་ལུང་ཟླ་བ་ལྔའི་ཁོངས་སུ་རྫོགས་པར་སྩལ་བ་གསན། མཁན་ཆེན་ཉིད་ཀྱིས་རྗེ་རིན་ཆེན་རྣམ་རྒྱལ་ལས་དག་སྣང་རྒྱ་ཅན་གྱི་དབང་ལུང་རྫོགས་པར་གསན་པའང་ནོད། བར་སྐབས་སུ་དགེ་རྒན་མཁས་པ་ལས་སྙན་ངག་མེ་ལོང་། སྒྲ་དབྱངས་ཅན་མ་མཚམས་སྦྱོར་སོགས་རགས་རིམ། སྡེབ་སྦྱོར་རིན་འབྱུང་ལ་ཉ་ཝར་སོགས་གསན་སྦྱངས་མཛད། ལོ་ཆེན་སྐ་བ་དཔལ་བརྩེགས་ཀྱི་རྣམ་འཕྲུལ་སྨིན་གླིང་དོན་ཡོད་དཔལ་བཟང་ལས་བསྙེན་བར་རྫོགས་པའི་མཚན་འགྱུར་མེད་མཆོག་གྲུབ་དཔལ་འབར་དུ་གསོལ།། ༈ །།མདོ་ཁམས་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ་ལམ། འཇིགས་མེད་མཁྱེན་བརྩེའི་དབང་ཕྱུག་ཕྲིན་ལས་རྣམ་རྒྱལ་རྡོ་རྗེ་ནི། ཀུན་མཁྱེན་རིག་འཛིན་འཇིགས་མེད་གླིང་པའི་རྡོ་རྗེའི་གསུང་ལས། གནས་དང་འབྲེལ་ལ་གངས་ཀྱི་མཚམས། །ཤུལ་གསུམ་བགྲོད་ལ་བལྟ་རྟོགས་ཀྱིས། །ཨེ་ཀ་ཛ་ཊིའི་སྐོང་སྟོང་འབུངས། །ཞེས་དང་། ལྐོག་གྱུར་འདི་དོན་ལྐོག་ཏུ་མ་གྱུར་ཏེ། །རྡོ་རྗེ་གསུམ་སྤྲུལ་གཉིས་ནི་དབུས་མཐར་གབ། །འགྲོ་དོན་ཐུགས་བབས་དག་
ཆེན་ཐུགས་ཀྱི་སྤྲུལ། །གནས་དེའི་ནུབ་ཕྱོགས་གནས་དང་ཉེ་བའི་ཆར། །གངས་རིའི་མིང་མཚམས་གསེར་ལྡན་ཀླུང་ཆེན་འགྲམ། །ཆེ་བཙན་རིགས་བཙུན་གསུམ་ཤུལ་གཙང་མའི་བརྒྱུད། །བསོད་ནམས་ཕ་མ་ནོར་འཛིན་མིང་ཐོགས་པར། །ཡོད་ཅེས་ལུང་ཤེས་འདྲེས་པའི་ངང་ནས་གོ །ཞེས་ཤིན་ཏུ་གསལ་བར་ལུང་བསྟན་ཅིང་། སྐུ་གོང་མ་ངེས་དོན་བསྟན་འཛིན་བཟང་པོའི་ཞལ་ནས། ཁོ་བོ་ཡུན་རིང་དུ་འཚོ་དཀའང་། སྤྲུལ་པ་གསུམ་འབྱུང་བའི་གཉིས་མངའ་རིས་དང་དབུས་ཕྱོགས། གཅིག་འདི་ཕྱོགས་དང་མི་རིང་བའི་ས། ཤིང་སྡོང་ཆེན་པོ་ཡོད་པ་ཞིག་གི་རྩར་འཁྲུངས། དེས་བསྟན་པ་ལ་ཕན་པར་འོང་ཞེས་ཞབས་གྲས་ནང་མ་རྣམས་ལ་གསུང་འཕྲོས་སུ་སྩལ་བ་དང་། གཞན་ཡང་གྲུབ་དབང་ཆོས་ཀྱི་རྡོ་རྗེས་གཡུ་སྒྲ་སྙིང་པོའི་སྐྱེ་མཐའ་ཡིན་ཚུལ་དང་བཅས་ཀུན་མཁྱེན་རིན་པོ་ཆེའི་གསུང་དང་མཚུངས་པའི་གསང་ལུང་གསལ་པོ་དང་། ཕྱིས་སུ་ཆོས་གླིང་བཅུ་གསུམ་པ་སྤུ་བོ་གཏེར་ཆེན་འཆི་མེད་རྡོ་རྗེའམ་ཀུན་བཟང་འོད་ཟེར་གྱིས་བཻ་རོའི་སྤྲུལ་པར་ལུང་བསྟན་པ་དང་། ས་སྐྱ་པ་འགྲོ་མགོན་དབང་སྡུད་སྙིང་པོའི་གཟིགས་སྣང་དང་། གླིང་གཏེར་ཆེན་པདྨ་འགྲོ་འདུལ་རྩལ་གྱི་ལུང་བྱང་ལས་ཨོ་རྒྱན་ཉིད་ཀྱི་སྤྲུལ་པར་གསུངས་ཤིང་། ཟུར་མཁར་གཏེར་ཆེན་ཟླ་བའི་འོད་ཟེར་གྱི་གཏེར་
ལུང་ལས་རྡོ་རྗེ་བདུད་འཇོམས། ནགས་ཤོད་གཏེར་ཆེན་ཀློང་ཆེན་རོལ་པ་རྩལ་དང་། སྤྲུལ་པའི་གཏེར་འབྱིན་ཡོངས་ཀྱི་འཁོར་ལོས་སྒྱུར་བ་མཆོག་གྱུར་བདེ་ཆེན་གླིང་པའི་གཏེར་ལུང་ལས་བི་མ་ལ་མི་ཏྲ། དྭགས་གཏེར་བདེ་ཆེན་རྡོ་རྗེའི་གཏེར་ལུང་ལས་གནུབས་སངས་རྒྱས་ཡེ་ཤེས་ཀྱི་སྤྲུལ་པར་བསྔགས་པ་སོགས་དངོས་གཅིག་དུ་མའི་ཚུལ་དུ་རྣམ་པར་འཕྲུལ་པ་འཕགས་པའི་ས་ཆེན་པོ་ལ་བཞུགས་པ་རྣམས་ཀྱི་ཆོས་ཉིད་ལྟར་འགལ་བར་མི་འདུ་ལ། དེ་ལྟ་བུའི་རིག་འཛིན་རྒྱལ་བའི་སྤྱི་གཟུགས་དམ་པ་གང་ཉིད་སྐུ་འཁྲུངས་པའི་ཡུལ་ནི། གདན་ས་ཆེན་པོ་རུ་དམ་ཨོ་རྒྱན་བསམ་གཏན་ཆོས་གླིང་གི་ནུབ་ཕྱོགས་ཉིན་ཞག་གསུམ་ཙམ་གྱི་སའི་ཆ། སྔོན་གྱི་ཚེ་ལོ་ཆེན་ལྡན་མ་རྩེ་མང་དང་། པཎ་ཆེན་སྨྲི་ཏི་ཛྙཱ་ན། འབྲོམ་སྟོན་རྒྱལ་བའི་འབྱུང་གནས་སོགས་འཕགས་བོད་ཀྱི་སྐྱེས་བུ་དུ་མས་ཞབས་ཀྱིས་བཅགས་པའི་ལྡན་ཡུལ་ཞེས་ཡུལ་གྱི་དགེ་བཅུའི་དཔྱད་པ་ཡོངས་སུ་རྫོགས་པའི་ནོར་འཛིན་གྱི་ཐིག་ལེ། གཞིའི་བདག་པོ་གངས་མཆེད་བརྒྱད་ཀྱིས་སྐྱོང་བ་གངས་རི་ཞེས་པའི་སའི་མཚམས། གནས་ཆེན་སེང་གེ་གནམ་རྫོང་དང་མཐའ་འདུལ་གྱི་གཙུག་ལག་ཁང་གླང་བན་སྒྲོན་མེ་ལྟ་བུ་ཞེས་གྲགས་པའི་ཕྱོགས། རི་བོ་དགེ་ལྡན་པའི་རིང་ལུགས་འཛིན་པ་ཐུབ་བསྟན་ཆོས་འཁོར་གླིང་གི་ཉེ་
འགྲམ། གསེར་ལྡན་འབྲི་ཆུའི་ཀླུང་ཆེན་དལ་གྱིས་འབབ་པའི་གཡས་ཟུར། ར་ཁོ་དཔོན་ཚང་ཞེས་ཆེ་བཙན་གྱི་རིགས་བརྒྱུད་མ་ཉམས་ཤིང་། དམ་པའི་སྐྱེས་བུ་གསུམ་བརྒྱུད་མར་བྱོན་པའི་བསྟི་གནས། ལྕང་མའི་སྡོང་བོ་ཆེན་པོས་མནན་པའི་དཔལ་གྱི་ཁང་ཁྱིམ་དེ་ཉིད་དུ། ཡབ་བསོད་ནམས་རབ་བརྟན་དང་། ཡུམ་ནམ་མཁའ་འཛིན་དབང་མོའི་སྲས་སུ། རབ་བྱུང་བཅུ་གསུམ་པའི་ནང་ཚན་ཆུ་མོ་གླང་གི་ལོར་ཡབ་ཡུམ་ལ་མནལ་ལྟས་ངོ་མཚར་ཅན་དུ་མ་བཅས་བདེ་བར་སྐུ་བལྟམས། འཁྲུངས་ནས་རིང་པོར་མ་ལོན་པར་རྫོགས་ཆེན་རྫོགས་ཆེན་ཅེས་ཡང་ཡང་གསུངས། འབྱོག་རུ་ཚལ་ནས་རྔ་བོ་ཆེ་ཞིག་ཡོད་པ་བརྡུང་ཞིང་བཛྲ་གུ་རུའི་ཛཔ་སྒྲ་སྒྲོགས་པ་སོགས་ཀྱིས་མཚོན་དབང་བསྐུར་ཆོས་བཤད་དམ་པའི་བག་ཆགས་གསལ་བར་སད། དགུང་ལོ་ལྔ་པའི་སྐབས་རིག་འཛིན་ཆེན་པོ་དཔའ་བོ་ལས་རབ་རྩལ་ལྡན་ལོ་ཆུང་ནང་དུ་སྡེ་དགེའི་གཉེར་ཆེན་གཤེན་རབ་སྟག་རྒྱལ་གྱིས་གདན་དྲངས། ཚེ་སྒྲུབ་བདུད་བཞི་རྣམ་རྒྱལ་གྱི་སྒྲུབ་ཆེན་མཛད་སྐབས། རིག་འཛིན་བླ་མའི་ཞལ་ནས་ར་ཁོ་དཔོན་ཚང་གི་བུ་ཆུང་བ་དེ་འདིར་མ་བྱོན་ཀ་མེད་ཡོད་ཅེས་གསུང་ནན་གནང་། སྒྲུབ་དབང་རྒྱས་པ་སྐུ་རྐྱང་ལ་སྩལ། ཚེ་སྒྲུབ་ཀྱི་ཕྱག་དཔེ་ཞིག་ཀྱང་གནང་ནས་ལྗགས་ཀློག་ནམ་མཁྱེན་པ་ན་དཔེ་འདི་ཐུགས་
འཛིན་གྱིས་ཆད་མེད་མཛད་དགོས་ཚུལ་དང་། དབུ་བྱུག་སོགས་སྩལ་ནས་ཤིན་ཏུ་དགྱེས་པས་དོན་གྱི་ངོས་འཛིན་གསལ་བར་མཛད། དགུང་ལོ་བདུན་བཞེས་པ་ས་མོ་ལུག་ལོར་རྫོགས་ཆེན་གདན་ཚབ་རྒྱལ་རོང་སྐུ་ཆེན་ནམ་མཁའ་ཚེ་དབང་མཆོག་གྲུབ་དང་། ཆོས་རྒྱལ་ཆེན་པོ་སོགས་མཆོད་ཡོན་རྣམས་ཀྱིས་ཐུགས་རྩ་ཆེ་བར་མཛད་དེ། རྒྱལ་རོང་དབོན་སྤྲུལ་བསྟན་པའི་ཉི་མ། དཔོན་ཨོ་རྒྱན་བསམ་འགྲུབ། བླ་མ་རིག་འཛིན་བཟང་པོ་སོགས་དབུ་ཆེ་རགས་རིམ་དཔོན་སློབ་སུམ་ཅུ་སྐོར་ཡབ་གཞིས་སུ་བྱོན་པ་ན། སྤྲུལ་པའི་སྐུས་སྔོན་གནས་རྗེས་དྲན་དང་དགྱེས་པའི་རྣམ་འགྱུར་དུ་མ་མཛད་པས་ཡིད་ཆེས་ཀྱི་ངེས་ཤེས་ལྷག་པར་འཁྲུངས། ཡབ་ཡུམ་སོགས་སྐུ་རྒྱབ་པ་དང་ས་དབང་སྡེ་དགེའི་ཆིབས་ཁ་པ་སོགས་དཔོན་འཁོར་སུམ་ཅུ་སྐོར་དང་བཅས་པ་གསེར་ལྡན་གྱི་ཆུ་བོ་ལས་བརྒལ་ཏེ་རིམ་པར་དལ་འགྲོས་ཀྱིས་ཆུ་སྟོད་ཟླ་བའི་ཚེས་བཅུའི་སྔ་ཆར་ཆིབས་བསུ་རིང་ཐུང་དགོན་སྡེའི་སེར་ཕྲེང་གི་བཀོད་བཤམ་སོགས་ཕལ་པའི་བློའི་ར་བ་ལས་འདས་བའི་དཔལ་གྱི་འབྱོར་པ་ཕུན་སུམ་ཚོགས་པ་ལྔ་ལྡན་གྱི་ངོ་མཚར་འབྱམས་ཀླས་པས་གོང་མའི་གདན་ས་རུ་དམ་ཨོ་རྒྱན་བསམ་གཏན་ཆོས་གླིང་གི་གཙུག་ལག་ཁང་ཆེན་པོར་འཇིགས་མེད་སེང་གེའི་ཁྲི་ལ་ཞབས་པད་བཀོད་རྗེས། གཙང་
ཁང་ཐུབ་ཆེན་གྱི་སྤྱན་སྔར་མཁས་གྲུབ་ཆེན་པོ་ནམ་མཁའ་ཚེ་དབང་མཆོག་གྲུབ་ཀྱིས་གཙུག་ཕུད་བཞེས་ཏེ། མཚན་འཇིགས་མེད་མཁྱེན་བརྩེའི་དབང་ཕྱུག་གམ་རྣམ་རྒྱལ་རྡོ་རྗེ་ཞེས་གསོལ། སླར་གསེར་ཁྲིར་ཞབས་པད་བཀོད་པ་དང་ཆབ་གཅིག་ཚེ་སྒྲུབ་འཆི་མེད་ཡང་སྙིང་གི་བརྟན་བཞུགས་དང་འབྲེལ་བར་རྫོགས་ཆེན་གཞུང་གི་ཁྲི་འབུལ་དང་། ཆོས་རྒྱལ་ཆེན་པོས་ཤུག་ཙ་གཉེར་ཆེན་དངོས་གྲུབ་གཉིས་ཆེད་མངགས་ལྟར་ཁྲི་འབུལ་ཕུལ། རྒྱལ་རོང་དཔོན་བསམ་འགྲུབ་ནས་གསུང་བཤད་ཞོམ་ཐོག་ཆོད་པར་མཛད། ཕྱིར་ཉིན་ཟེ་ཆེན་རིག་འཛིན་དཔལ་འབྱོར་རྒྱ་མཚོ་དབུ་བཞུགས་ཀྱིས་ཚེ་ཆོག་དང་འབྲེལ་བར་ཞབས་བརྟན་ལེགས་འབུལ་རྒྱ་ཆེར་སྤྲོས་པ་དང་ཆབ་གཅིག །དབོན་སྤྲུལ་མཐུ་སྟོབས་རྣམ་རྒྱལ་དགུང་ལོ་བཅུ་གསུམ་དུ་སོན་པས་ཕུན་སུམ་ཚོགས་པ་ལྔ་ལྡན་གྱི་ལྗགས་བཤད་རྒྱ་ཆེར་སྤྲོས་ཤིང་། རྒྱལ་ཚབ་རིན་པོ་ཆེ་པདྨ་གསང་སྔགས་བསྟན་འཛིན་གྱིས་སྔ་འགྱུར་བསྟན་པའི་བབས་ལུགས་སོགས་ཀྱིས་བྱང་དྲངས་ཏེ་སྐབས་སུ་བབས་པའི་འབེལ་བའི་གཏམ་འབྱམས་ཀླས་པ་གནང་། །དེ་འབྲེལ་སྟག་སྒང་གདན་ས་ནས་དབོན་སྤྲུལ་ཨོ་རྒྱན་ཉི་མ་སོགས་རྫོགས་ཆེན་ཕྱོགས་གཏོགས་དང་། གཞན་ཡང་གྲུབ་མཐའ་རིས་མེད་འབྲེལ་ཅན། གླིང་རྒྱལ་པོ་སོགས་ལྷ་སྡེ་མི་སྡེ་ཀུན་གྱིས་ཁྲི་
འབུལ་དཔང་བསྟོད་དེ་ཕུལ། ཉིན་གསུམ་པར་སུ་ར་ཏོ་བཅུ་དྲུག་གིས་མཆོད་གར་སོགས་དགའ་སྟོན་མཐའ་རྒྱས་སུ་མཛད། ཡབ་ཚང་ལ་བསླུ་ཡོན་དངུལ་སྲང་ཉིས་བརྒྱས་གཙོས་རྣམ་གྲངས་སུམ་བརྒྱ་ལྷག་པ་དང་། སྟོན་ཆེན་ཀྱིས་གཙོས་ལྷ་སྡེ་མི་སྡེ་ཀུན་ལ་གསོལ་སྟོན་འབུལ་གནང་རིགས་རྒྱ་ཆེར་སྩལ། དེ་ནས་བཟུང་སྟེ་ཉེ་བར་གནས་པའི་སློབ་དཔོན་དབོན་པོ་ཆོས་གྲགས་བཟང་པོས་མཛད་དེ་བགྲང་བྱ་བཞིའི་བར་དུ་ཡི་གེའི་ཕྱི་མོ་ནས་བཟུང་བསླབ་སྦྱང་ནན་ཏན་དུ་མཛད་པས་མཁས་པར་མཁྱེན། དབང་ལུང་གསན་བཞེས་དང་བསྙེན་སྒྲུབ་སོགས་ཀྱང་ཅི་རིགས་མཛད། དགུང་ལོ་བཅུ་གཅིག་པར་སློབ་དཔོན་ཞི་བར་གཤེགས་པའི་ཚབ་མཁས་དབང་ཐུགས་རྗེ་བཀྲ་ཤིས་བརྐོས། འདི་ལོར་རྒྱལ་རོང་དུ་ཆིབས་བསྐྱོད་ནས་ཉི་སྤྲུལ་གསུམ་པ་རིན་པོ་ཆེ་མི་འགྱུར་ཕན་བདེ་རྒྱ་མཚོ་ལས་ལྷ་བཙུན་རྡོ་རྗེའི་རིག་འཛིན་སྲོག་སྒྲུབ། ལྔ་པའི་རྒྱ་ཅན། རིག་འཛིན་ཉི་མ་གྲགས་པའི་གཏེར་ཆོས་ཡོངས་རྫོགས། ཐུགས་མཆོག་རྡོ་རྗེའི་ནཱ་ག་རཀཱ། ཀུན་མཁྱེན་འཇིགས་མེད་གླིང་པའི་དགོངས་གཏེར་ཀློང་ཆེན་སྙིང་ཐིག་གི་སྐོར་སོགས་དབང་ལུང་བཀའ་རྫོགས་སུ་གསན། སོག་རུ་ཀུན་བཟང་ལས་ཕྱག་བྲིས་བསླབ། དགུང་ལོ་བཅུ་གཉིས་ལོ་གསར་ཚེས་བཅུའི་བུམ་སྒྲུབ་ཀྱི་ཚོགས་དབུར་ཕེབས་
པ་ནས་བཟུང་སྐུ་ཚེའི་རིང་བཅད་རྒྱ་སོགས་དམིགས་བསལ་རེ་གཉིས་སྐབས་མ་གཏོགས་པར་དུས་མཆོད་ཐམས་ཅད་ལ་བྱོན་ནས་བསྒྲིགས་ཀུན་སྤྱོད་ཕྱག་བཞེས་འཁྲུལ་མེད་ཡིད་ཆེས་ཁུངས་བཙུན་ངོ་མཚར་བྱིན་རླབས་ཀྱི་དཔལ་དུ་འབར་བས་བློ་ལྡན་ཐམས་ཅད་དད་པའི་པདྨོ་སླར་ཡང་རྒྱས། གདོད་མའི་མགོན་པོ་རྩ་བའི་ཡོངས་འཛིན་ནམ་མཁའ་ཚེ་དབང་མཆོག་གྲུབ་ལས་མཁའ་འགྲོའི་སྙིང་ཏིག །གསང་བ་སྙིང་ཏིག །རྡོར་སེམས་སྙིང་ཏིག་རྣམས་ཀྱི་ཉམས་ཁྲིད་གསན་ནས་སྔོན་འགྲོའི་ཐུགས་སྦྱང་མཛད་པས། དད་པ་དང་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་རྣམས་ལ་ཉམས་མྱོང་བཅོས་མིན་རང་ཤར་ཐུགས་ལ་འཁྲུངས་ཤིང་། ཁྱད་པར་གྱི་སྔོན་འགྲོ་འཁོར་འདས་རུ་ཤན་དབྱེ་བ་དང་། ལུས་ངག་ཡིད་གསུམ་སྦྱོང་བ་རྡོ་རུས་འཕྲོད་པ་སྔོན་དུ་འགྲོ་བས་སེམས་རིག་ཤན་དབྱེ་བས་རིག་པ་རྗེན་པར་ངོ་འཕྲོད་པར་དྲན་པ་བསྟེན་ཚུལ་སོགས་ཞལ་ཁྲིད་གནད་སྨིན་མཛད་པས་ཀུན་བཟང་གདོད་མའི་རྒྱལ་ཐབས་ལ་དབང་བསྒྱུར་ནས་མདོ་ཁམས་རྫོགས་ཆེན་པ་ཞེས་མཚན་དོན་དང་ལྡན་པར་མཛད། གཞན་ཡང་གོང་གསལ་སྙིང་ཏིག་གསུམ་གྱི་དབང་ལུང་ཡོངས་རྫོགས། ཉང་གཏེར་རྟ་ནག །མགོན་པོ་ཕྱག་བཞི་སོགས་ཉང་ཆོས་ཀྱི་ཟབ་གཏེར། རྒྱལ་སྲས་རྡོ་རྗེ་གླིང་པའི་རྫོགས་ཆེན་ལྟ་བ་ཀློང་
ཡངས། ཀར་གླིང་ཞི་ཁྲོ། ཞང་ཁྲོམ་གྱི་གཤིན་རྗེ་ཁྲོ་ཆུ། སངས་རྒྱས་གླིང་པའི་བླ་མ་དགོངས་འདུས། རཏྣའི་ཕུར་པ། རིག་འཛིན་ཆེན་པོ་ཉི་མ་གྲགས་པའི་ཟབ་གཏེར་ཕལ་ཆེར། རིག་འཛིན་དཔའ་བོ་ལས་རབ་ཀྱི་ཐུགས་གཏེར། གར་དབང་འཆི་མེད་གླིང་པའི་འཆི་མེད་ཐུགས་ཏིག །ཐེག་གླིང་དང་། གླིང་གཏེར་ཆེན་པདྨ་འགྲོ་འདུལ་རྩལ་གྱི་ཟབ་གཏེར་ཕལ་ཆེར་སོགས་ཆོས་བཀའ་དབང་ལུང་དཀོན་རིགས་རྒྱ་ཆེར་གསན། མཁན་ཆེན་རིག་འཛིན་བཟང་པོའི་མདུན་ནས་ཉང་གཏེར་བཀའ་བརྒྱད་དབང་ལུང་། དགེ་རྩེ་བླ་མ་བསོད་བསྟན་ལས་འདུས་མདོ་དང་། སྙིང་ཏིག་བཀའ་གཏེར་སྐོར། ཞེ་ཆེན་རབ་འབྱམས་དང་རྒྱལ་ཚབ་མཁན་སློབ་ལས་བཀའ་གཏེར་གྱི་དབང་ལུང་རྒྱ་ཆེར་གསན་བཞེས་དང་། ཤིང་བྱི་ནས་བཟུང་ལྕགས་རྟའི་བར་ལོ་བདུན་དུ་གདུལ་བྱ་གྲོང་ཆོག་སོགས་རྣམ་གཡེངས་རྒྱ་ཆེ་རིགས་ཀྱིས་མ་གོས་པར། ལོ་རེ་རེ་བཞིན་ཟླ་བ་དྲུག་ལས་མི་ཐུང་བར་བཅད་རྒྱ་གང་དམ་གྱིས་བླ་མ་གོང་མའི་ཐུགས་དམ་ལྷ་ཡི་གཙོས་བཀའ་གཏེར་གྱི་རྩ་གསུམ་རབ་འབྱམས་ཀྱི་བསྙེན་སྒྲུབ་ཤིན་ཏུ་གནད་སྨིན། བར་སྐབས་ཐམས་ཅད་དུ་ཕྱོགས་སོ་སོ་ནས་དགེ་བའི་བཤེས་གཉེན་རྡོ་རྗེ་འཛིན་པ་ཆེན་པོ་རྣམས་ཆེད་དུ་གདན་དྲངས་ནས་དབང་ལུང་སྨིན་ཁྲིད་རྒྱ་ཆེར་གསན་པ་ནི་
མཚན་ཙམ་ཡང་བརྗོད་པར་དཀའ་བས་མང་དུ་གསན་པའི་མཆོག་ཏུ་གྱུར་པ་སོགས་གསན་ཡིག་པོད་ཆེན་ལས་ཤེས། འདི་དག་གི་ཞབས་བསྐུལ་དང་དོ་དམ་རྗེ་བླ་མ་ནམ་མཁའ་ཚེ་དབང་མཆོག་གྲུབ་ནས་མཛད་ཅིང་བླ་མའི་བཀའ་བཞིན་མཐར་ཕྱིན་པར་མཛད། བྱ་བ་ལས་ཀྱི་འཁོར་ལོའང་རྗེ་བླ་མ་ནམ་མཁའ་དང་དབོན་སྤྲུལ་སྐུ་མཆེད་ནས་ཐུགས་གཉེར་མཛད་དེ་དགུང་གྲངས་བཅུ་གསུམ་པར་ཚེས་བཅུའི་མཆོད་པས་འཁོར་ལོ་གཉིས་མཉམ་རྫོགས་སུ་མཛད་ཅིང་། གར་རྒྱས་སྤྲོས་ཅན་བཙུགས། འདུ་ཁང་མ་གཏོགས་པའི་བླ་བྲང་ཉམས་གསོ་གསར་བསྐྲུན་ཡིད་ཅན་མིག་གི་བདུད་རྩིར་སྤེལ། །དགུང་གྲངས་བཅོ་ལྔ་པར་མཁས་གྲུབ་མཚུངས་མེད་དཔོན་གུར་བླ་མ་ངག་དབང་བློ་གྲོས་གདན་དྲངས་ནས་བཀའ་བརྒྱད་གསང་རྫོགས། ཚེ་བདག་ལྕགས་འདྲ་སྡིག །རྫོགས་ཆེན་སྙན་བརྒྱུད། པད་གླིང་བླ་མ་ནོར་བུ་རྒྱ་མཚོ། དྲི་མེད་ལྷུན་པོའི་དོན་ཏིག་སོགས་དབང་ལུང་རྒྱུན་དཀོན་ཤིན་ཏུ་མང་བར་གསན། ལོ་དེར་ཞེ་ཆེན་རབ་འབྱམས་གསུམ་པ་རིག་འཛིན་དཔལ་འབྱོར་རྒྱ་མཚོ་ལས་དགེ་ཚུལ་གྱི་སྡོམ་པ་བཞེས་ཤིང་། རིག་འཛིན་འགྱུར་མེད་ཀུན་བཟང་ཐེག་མཆོག་བསྟན་འཛིན་དཔལ་བཟང་པོར་གསོལ་ནས་སྟོན་མཆོག་ཤཱཀྱ་སེང་གེའི་རྒྱལ་ཚབ་ཏུ་མངའ་གསོལ། གུང་ཚིགས་དགོངས་བཅད་
སོགས་འདུལ་པའི་ཕྱག་བཞེས་སོར་བཞག་གནང་། མེ་ཡོས་ལོར་བྱང་འབྲོག་རྫ་ཆུ་རྒྱུད་དུ་གདུལ་བྱ་ལ་ཕེབས་པ་ནས་བཟུང་བསྙེན་བཀུན་རྒྱ་ཆེར་བྱུང་བ་དག་རྟེན་བཞེངས་སྒྲུབ་མཆོད་སོགས་ཀྱི་རྩ་བར་ཆུད་མི་ཟ་བར་མཛད། དགུང་གྲངས་ཉི་ཤུ་པ་ཆུ་བྱ་ལོར་སྔར་ནས་ཀྱང་དབང་ལུང་ཁྲིད་གསུམ་རྒྱ་ཆེར་གསན་པ་ལྟར་གྲུབ་པའི་དབང་ཕྱུག་ཆེན་པོ་འཇིགས་མེད་ཕྲིན་ལས་འོད་ཟེར་གྱི་སྤྱན་སྔར་ཆེད་ཀྱིས་ཕེབས་ནས། ཀློང་ཆེན་གོང་འོག་གི་བཀའ་གཏེར་བསྟན་བཅོས་སྐོར། བི་མ་སྙིང་ཏིག །སྙན་བརྒྱུད་རྡོ་རྗེ་ཟམ་པ་སོགས་ཀྱི་དབང་ལུང་ཁྲིད་གསུམ་རྒྱ་ཆེར་གསན་ཅིང་། ཁྱད་པར་རྫོགས་པ་ཆེན་པོ་སྙིང་ཏིག་གི་དགོངས་པ་ཐུན་མོང་མ་ཡིན་པ་བྱིན་རླབས་འཕོ་བའི་སྟོབས་ཀྱིས་མངོན་དུ་མཛད་པས། རྗེ་ནམ་མཁའ་དང་། གྲུབ་དབང་འདི་གཉིས་ཁྱད་མེད་ཀྱི་རྩ་བའི་བླ་མ་དམ་པར་མཛད། ཤིང་ཁྱི་དགུང་གྲངས་ཉེར་གཉིས་པར་ལྷ་ལྡན་སྤྲུལ་པའི་ཞིང་ཁམས་ཆེན་པོར་ཆིབས་བསྒྱུར་གནང་། རྩེ་ཤོད་ཆོས་འཁོར་རྣམ་གཉིས་རྡོར་སྨིན་སོགས་སུ་མཆོད་སྤྲིན་ཤིན་ཏུ་རྒྱས་པར་སྤྲོས། རྒྱལ་དབང་དགུ་པ་ངག་དབང་ལུང་རྟོགས་རྒྱ་མཚོ་ལྡན་ཆོས་འཁོར་དུ་འཁྲུངས་པར་ར་ཁོ་དང་སྐུ་རིགས་གཅིག་པའི་དཔོན་དུ་སོང་བས་ནང་བརྩེའི་གཟིགས་གསོལ་ཚད་མེད་པ་དང་བོད་སྐྱོང་རྒྱལ་ཚབ་དེ་མོ་རིན་པོ་
ཆེས་ཀྱང་མཐོང་བཀུར་ཚད་མེད་སྩལ། སྤྲུལ་པའི་གཏེར་ཆེན་ཀློང་ཆེན་རོལ་པ་རྩལ་གྱིས་རང་གཏེར་གཙོར་གྱུར་སྨིན་གྲོལ་གདམས་པ་སྩལ་ཞིང་ལྷག་པར་རྫོགས་པ་ཆེན་པོ་སྙིང་ཏིག་ཐུན་མོང་མ་ཡིན་པའི་ཁྱད་ཆོས་ཐོད་རྒལ་གྱི་ཉམས་ཁྲིད་སྩལ་བ་ཐུགས་ཉམས་སུ་བཞེས་པ་རིག་པ་ཚད་ཕེབས་ཀྱི་རྟགས་སྣང་མངོན་དུ་གྱུར། ཟུར་ཕུ་ལྷ་ལྡིང་གཏེར་ཆེན་ཟླ་བའི་འོད་ཟེར་ལས་རང་གཏེར་རིག་འཛིན་བདེ་འདུས་ཀྱི་སྨིན་གྲོལ་རྫོགས་པར་གསན་ཅིང་ཆོས་ཀྱི་བདག་པོར་དབུགས་དབྱུང་། དེ་མཚུངས་མཁར་རྡོ་གྲུབ་དབང་ཆོས་ཀྱི་རྡོ་རྗེར་ཡང་ཆོས་འབྲེལ་གསན་ཅིང་ཆོས་བདག་ཏུ་དབུགས་དབྱུང་། ཐུབ་བསྟན་རྡོ་རྗེ་བྲག་ཏུ་ཕེབས་སྐབས་རིག་འཛིན་ཀུན་བཟང་ཞིང་གཤེགས་པས་མི་བཞུགས་ཀྱང་། རྒྱལ་ཚབ་ལྕགས་ལའི་ཐུགས་སྲས་རིན་པོ་ཆེ་མཇལ་ཞིང་ཚེ་དབང་གསན། འབུལ་ནོད་རྒྱ་ཆེར་ཕུལ། སྨིན་གླིང་དུ་ཟླ་འཁོར་ལྷག་ཙམ་བཞུགས་ནས། ཁྲི་ཆེན་པདྨ་དབང་རྒྱལ་ལས་བཀའ་མའི་དབང་ལུང་རྒྱ་ཆེ་དང་། གཏེར་བདག་གླིང་པའི་ཟབ་གཏེར་གྱི་སྨིན་གྲོལ་རྫོགས་པ་རྒྱ་ཆེར་གསན་བཞེས་དང་། ཐུགས་ཡིད་གཅིག་འདྲེས་ཀྱིས་མཐོང་བཀུར་ཚད་མེད་པ་གནང་། འབུལ་ནོད་དང་འདུས་སྡེར་བསྙེན་བཀུར་སོགས་ཤིན་ཏུ་རྒྱས་པར་སྤྲོས། ལྕགས་ཟམ་མཆོག་སྤྲུལ་རིན་པོ་ཆེ་ལའང་བཀའ་འབྲེལ་
ཙམ་གསན། སླར་ལྷ་ལྡན་དུ་ཕེབས་བསྟུན་མཁན་ཆེན་ཞི་བ་འཚོའི་རྣམ་འཕྲུལ་རྒྱལ་ཚབ་དེ་མོ་ཧུ་ཐོག་ཐུ་བློ་བཟང་ཐུབ་བསྟན་རྒྱལ་མཚན་སོགས་དད་པའི་དགེ་འདུན་གྲངས་ཚང་ལས་བསྙེན་པར་རྫོགས་པའི་དགེ་སློང་གི་སྡོམ་པ་བཞེས་ནས་མཁན་ཆེན་དམ་པས་ཀྱང་མངའ་གསོལ་གཟེངས་བསྟོད་མཐོང་བཀུར་དཔེ་བྲལ་དུ་གནང་། སྨོན་ལམ་ཆེན་མོའི་ཚོགས་དབུར་རྒྱལ་དབང་དགུ་པ་ལུང་རྟོགས་རྒྱ་མཚོ་ཡབ་སྲས་ལྷན་རྒྱས་སྤྱན་དྲངས་པའི་སྤྱན་སྔར་མཆོད་སྤྲིན་ཤིན་ཏུ་རྒྱས་པར་སྤྲོས་ནས། མཎྜལ་རྒྱས་བཤད་རྗེ་ཉིད་ཀྱིས་མཛད་པས་ཐམས་ཅད་ཡིད་འཕྲོག །སྨོན་ལམ་ཆེན་མོའི་དགེ་འདུན་ལ་ཚོགས་འགྱེད་སོགས་ཁྱད་འཕགས་གནང་བས་གྲགས་པའི་རྔ་ཆེན་ཕྱོགས་ཀུན་ཁྱབ། དེ་ནས་རིམ་པར་ཁམས་སུ་ཆིབས་ཁ་བསྒྱུར་ནས་རང་གནས་སུ་གེགས་མེད་པར་ཕེབས་བསུའི་བཀོད་བཤམས་རྒྱ་ཆེན་དང་བཅས་ཕེབས་ནས་ལུགས་གཉིས་དགའ་སྟོན་ཕུན་སུམ་ཚོགས་པ་ཀུན་ཀྱང་རྗེས་སུ་ཡི་རངས། གླིང་གཏེར་ཆེན་པདྨ་འགྲོ་འདུལ་རྩལ་ཡང་ཕེབས་ནས་ཐུགས་ཡིད་གཅིག་འདྲེས་རྟེན་འབྲེལ་ལེགས་ཚོགས་རྒྱས། མེ་གླང་ལོར་སྡེ་དགེར་ལྕང་རའི་བུམ་སྒྲུབ་ཆེན་མོར་སྔར་སྲོལ་གདན་དྲངས་ཤིང་འགྲོ་ཕན་རྒྱ་ཆེར་སྤེལ། དེ་ནས་བཟུང་ལོ་གསུམ་རེ་ཙམ་གྱི་མཚམས་བུམ་སྒྲུབ་ལ་བསྟར་
ཆགས་སུ་ཕེབས་པས་མཚོན་ཆོས་རྒྱལ་ཆེན་པོས་དད་གུས་ཚད་མེད་པས་མཆོད་ཅིང་དབུའི་ཅོད་པན་གཅིག་པུར་གྱུར། དེ་ལྟ་བུའི་མཛད་པས་མཚོན་ལོ་བསྟར་རྫ་རྒྱུད་སོགས་ལ་རེས་མོས་ཀྱིས་འགྲོ་དོན་དང་། བར་སྐབས་ཐམས་ཅད་དུ་ཐུགས་དམ་གྱི་གཙོ་བོ་བཀའ་བརྒྱད་དྲག་པོ་དཔལ་ཆེན་འདུས་པ། རྗེ་དྲུང་རིན་པོ་ཆེའི་དགོངས་གཏེར་པདྨ་རྒྱལ་པོ། ཟུར་ཕུ་གཏེར་ཆེན་ཟླ་འོད་དང་། ཀློང་ཆེན་རོལ་པ་རྩལ་གྱི་གཏེར་གསར་རྣམས་ཀྱིས་གཙོས་བཀའ་གཏེར་ཚད་ལྡན་བླ་མ་ཡི་དམ་གྱི་བསྙེན་སྒྲུབ་དཔག་ཏུ་མེད་པ་མཛད། སྐུ་གེགས་འཚུབས་འགྱུར་རིགས་ཀྱང་དགོངས་པའི་རྩལ་དང་། ཞབས་བརྟན་རྒྱ་ཆེར་བསྒྲུབས་པས་ཅུང་ཟད་ཀྱང་མ་གོས་པ་སྐུ་ཚེ་ཕྲིན་ལས་མཐར་ཕྱིན་པ་སྙིགས་དུས་ཀྱི་བསྟན་འཛིན་ཆེན་པོ་ཞིག་ལ་འགྲན་ཟླ་དང་བྲལ་ཞིང་། སྐུ་ཚེ་རིལ་པོར་ཐུགས་ནམ་སྐབས་སུ་ཞུ་མཁན་སུ་ཡོད་ལ་སྔ་འགྱུར་བཀའ་གཏེར་གྱི་དབང་ལུང་ཁྲིད་གསུམ་རྒྱ་ཆེར་ཆད་མེད་དུ་གནང་བས་བསྟན་པའི་སྲོག་མཐུད། བྱ་བ་ལས་ཀྱི་འཁོར་ལོ་སྐུ་ན་ཕྲ་མོའི་སྐབས་སློབ་དཔོན་རིན་པོ་ཆེ། མཁན་ཆེན། ཆོས་རྒྱལ་བཅས་ཀྱི་སྣང་བརྙན་གསེར་ཟངས་ལས་ཐོག་ཚད་བཞེངས་པ་ནས་བཟུང་རྟེན་བཞེངས་དང་སྒྲུབ་ཁག་རྣམས་ཀྱི་ཞལ་ཐང་དང་ཡོ་བྱད་སོགས་བར་མ་ཆད་པར་བཞེངས་ཤིང་། ལྷག་པར་དགུང་
གྲངས་ལྔ་བཅུར་ཕེབས་པ་ཆུ་སྟག་དབྱུག་པ་ཟླ་བའི་ཚེས་དྲུག་གི་ནམ་ལངས་བསྟན་པའི་གེགས་ཆགས་སྟོབས་སུ་བདོ་བས་ཧོར་ཁོག་ནས་བརྩམས་ས་གཡོས་ཀྱི་འཇིགས་པ་ཆེན་པོས་དགོན་གནས་ཀྱང་རྨིས་མེད་དུ་གྱུར་བ། རྗེ་ཉིད་སྡེ་དགེའི་རྒྱལ་ཁབ་ཏུ་བཞུགས་སྐབས་ཇི་བཞིན་དུ་གཟིགས། སྔོན་ནས་ལུང་བསྟན་པ་མངོན་དུ་གྱུར་པས་ཐུགས་དབྱུང་སྟེ་བྱ་བཏང་སྤོང་བ་པའི་བརྟུལ་ཞུགས་ལ་ཐུགས་གཏད་སྐབས། སྡེ་དགེ་ཆོས་རྒྱལ་དམ་ཚིག་རྡོ་རྗེས་ཐུགས་གསོས་རྒྱ་ཆེར་སྤྲོ་བ་དང་། དེ་ལྟ་བུའི་དགོངས་པ་མི་བཞེས་པར་ཉམས་གསོ་གསར་བཞེངས་སྔར་ལྟར་སོར་ཆུད་མ་མཛད་ཀ་མེད་དང་། དེའི་ཞབས་འདེགས་གང་དགོས་རྩེ་གཅིག་ཏུ་བསྒྲུབ་པར་ཞལ་གྱིས་བཞེས་ཤིང་། བདག་པོ་ནས་ཀྱང་ཞལ་ཡོད་དོན་མེད་ལྟ་བུ་མ་ཡིན་པར་ལས་མགོ་བརྩམས་ནས་མཐར་མ་ཕྱིན་པར། སྐུ་ཚབ་དང་དམ་མཁྱེན་ཡངས་བར་ཤར་སྐལ་བཟང་རྣམ་རྒྱལ་རིང་བསྐོས་དང་། ཤིང་བཟོ་དང་། རུ་གར་སྡེ་ཤོག་རེས་མོས་དང་། ཤིང་ཆ་སོགས་དགོས་འདོད་ལྷུག་པར་སྩལ་ཞིང་གཙོ་ཆེར་རྗེ་ཉིད་ཀྱི་ཐུགས་བཞེད་ཕྲིན་ལས་རྨད་དུ་བྱུང་བ་དང་། གཞན་དགོན་སྡེ་དང་འབྱོར་ལྡན་རྣམས་ཀྱིས་ཞལ་འདེབས་ཀྱི་གཏོང་སྒོ་རྒྱ་ཆེས་མཚམས་སྦྱར། བསྟན་པ་རིན་པོ་ཆེ་གསར་དུ་འཆར་བའི་ཐུགས་བསྐྱེད་དང་
སྨོན་ལམ་གྱི་མཐུ་གྲུབ་པ་རྗེ་རྒྱལ་བའི་སྲས་པོ་ཀུན་མཁྱེན་གཞན་ཕན་མཐའ་ཡས་ཀྱིས་ཞིབ་གཟིགས་དང་། རྗེས་སུ་ལྷོ་རི་བླ་མ་འགྱུར་མེད་བསྟན་འཕེལ་གྱིས་ཞབས་འདེགས་འཕྲོ་མཐུད་བཅས་རྟེན་དང་བརྟེན་པར་བཅས་པའི་གཙུག་ལག་ཁང་ཆེན་བླ་བྲང་དང་བཅས་སྔར་ལས་ཆེས་ཆེར་ལྷག་པའི་བཞེངས་བཀོད་དང་། ཉམས་གསོ་འགྲན་བྲལ་དུ་བཀའ་དྲིན་བསྐྱངས་པས་མཚོན་བསམ་གྱིས་མི་ཁྱབ་པའི་ཕྲིན་ལས་རྒྱས། ལྷག་པར་ཀློག་པ་ཐོས་བསམ་གྱི་འཁོར་ལོ་ཀུན་མཁྱེན་བླ་མ་གཞན་ཕན་མཐའ་ཡས་དང་བཀའ་འགྲོས་ཏེ། དམ་པའི་ཆོས་འདུལ་བའི་ཕྱག་བཞེས་ཕྲ་ཞིབ་ཏུ་གཏན་ལ་ཕབ་ནས་གཞི་གསུམ་སོགས་ཀྱི་ཕྱག་བཞེས་མིང་ཙམ་དུ་མ་སོང་བའི་གཞན་འགྲན་བྲལ་བ་གསར་འཛུགས་དང་འབྲེལ་བར། ཀུན་མཁྱེན་པྲཛྙཱ་རསྨིའི་གསུང་རབ་མདོ་སྔགས་སྨོན་ལམ་དང་། སུམ་རྟགས་སོགས་རྒྱ་ཆེར་བཤད་པས་བློ་གྲོས་ཀྱི་སྒོ་བྱེ་ནས། ཆོས་ཀྱི་རྒྱལ་པོ་ཀློང་ཆེན་པ་གོང་འོག་གི་གསུང་རབ་རིན་པོ་ཆེའི་མཛོད། ཡོན་ཏན་རིན་པོ་ཆེའི་མཛོད། པཎ་ཆེན་པདྨ་དབང་རྒྱལ་གྱི་སྡོམ་གསུམ་སོགས་ཉེར་མཁོའི་གཞུང་སྙིང་པོར་དྲིལ་བ་དང་། དབུ་ཕར་འདུལ་མཛོད་ཀྱི་གཞུང་ཆེན། དཔལ་གསང་བ་སྙིང་པོ་སོགས་མདོ་སྔགས་ཀྱི་བཤད་ཉན་ཤིན་ཏུ་དར་ཞིང་། དེ་དག་གི་རྒྱུན་དཔལ་སྤྲུལ་འཇིགས་
མེད་ཆོས་ཀྱི་དབང་པོ་དང་། མཁན་ཆེན་པདྨ་བཛྲ་སོགས་ལ་གཉེར་དུ་སྩལ་ནས་མཁན་རབས་རྣམས་ཀྱིས་བཟུང་སྟེ་ད་ལྟའི་བར་ཤིན་ཏུ་དར་ཞིང་རྒྱས་པར་མཛད་པའི་ཕྲིན་ལས་འདི་ཁོ་ནའང་སྙིགས་དུས་བསྟན་པའི་ཉི་མ་གཅིག་པུར་བསྔགས་པའི་མེ་ཏོག་མཁས་དང་འཕགས་པའི་ཚོགས་ཀྱིས་ཉིན་བཞིན་དུ་འགྲེམ། དེ་ལྟ་བུའི་གསན་བསམ་སྒོམ་པ་གཙོ་གྱུར་འཁོར་ལོ་གསུམ་གྱི་མཛད་པ་མཐའ་ཡས་པའི། ཐོག་མར་ཟབ་ཆོས་རྒྱ་ཆེར་གསན་པའི་ཡོངས་འཛིན་གྱི་གཙོ་བོ་ནི། གོང་དུ་སྨོས་པ་ལྟར་མཁས་ཤིང་གྲུབ་པའི་དབང་ཕྱུག་ནམ་མཁའ་ཚེ་དབང་མཆོག་གྲུབ་དང་། ལྷ་སྲས་རྒྱལ་པོའི་རྣམ་འཕྲུལ་གྲུབ་པའི་དབང་ཕྱུག་ཆེན་པོ་འཇིགས་མེད་ཕྲིན་ལས་འོད་ཟེར་ཏེ་བཀའ་དྲིན་འགྲན་ཟླ་དང་བྲལ་བའི་རྩ་བའི་བླ་མ་རྣམ་པ་གཉིས་ཀྱིས་གཙོས། རྗེ་རྒྱལ་བའི་སྲས་པོ་ཀུན་མཁྱེན་བླ་མ་གཞན་ཕན་མཐའ་ཡས་ལས་བཀའ་བསྟན་ལུང་རྒྱུན་གང་ཡོད་དང་། གཞུང་བཤད་སོགས་དབང་ལུང་རྒྱ་ཆེར་གསན་པ་དང་། གྲུབ་དབང་དཔོན་སློབ་རིན་པོ་ཆེ་པདྨ་མདོ་སྔགས་བསྟན་འཛིན་ཞལ་མཇལ་ཞིང་བྱིན་གྱིས་བརླབས། བླ་མ་ཚེ་དབང་ལས་བཀའ་བརྒྱད་དབང་ཆེན། དགེ་རྩེ་བླ་མ་འཇིགས་མེད་ངོ་མཚར་ལས་འདུས་པ་མདོ་དབང་ཆེན་མོ། ཟེ་ཆེན་རྒྱལ་ཚབ་རིན་པོ་ཆེ་བསྟན་འཛིན་ཆོས་རྒྱལ་ལས་
བཀའ་གཏེར་གྱི་དབང་ལུང་། གོང་སྨོས་རབ་འབྱམས་གསུམ་པ་རིག་འཛིན་དཔལ་འབྱོར་རྒྱ་མཚོ་ལས་རབ་ཏུ་བྱུང་ཞིང་དབང་ཆོས་ཆེ་རིགས། གཞན་ཡང་ཉི་སྤྲུལ་གསུམ་པ་མི་འགྱུར་ཕན་བདེ་རྒྱ་མཚོ་། གླིང་གཏེར་ཆེན་པདྨ་འགྲོ་འདུལ་རྩལ། བདུད་འདུལ་གདུང་བརྒྱུད་རྒྱལ་སྲས་པདྨ་རྣམ་རྒྱལ། འཕགས་མཆོག་ཕྱག་ན་པདྨོ་འཇིགས་མེད་རྒྱ་བའི་མྱུ་གུ །འབར་ཆུང་བཀྲ་ཤིས་རྒྱ་མཚོའི་དབོན་བསྟན་འཛིན་ནོར་བུ། གྲུབ་མཆོག་འཇིགས་མེད་གོ་ཆའི་དབོན་མཁས་གྲུབ་ཕྲིན་ལས་དར་རྒྱས་སོགས་ལས་གསར་རྙིང་བཀའ་གཏེར་དག་སྣང་གི་སྨིན་གྲོལ་ལུང་བཅས་རྒྱ་མཚོ་ལྟ་བུ་གསན། གཞན་ཡང་ཀཿཐོག་ཞིང་སྐྱོང་མཆོག་སྤྲུལ་རིག་འཛིན་འཇིགས་མེད་མགོན་པོ། རྨོག་སྟོན་མཆོག་སྤྲུལ་འཇིགས་བྲལ་ཆོས་དབྱིངས་རྡོ་རྗེ། རྒྱལ་རོང་དབོན་སྤྲུལ་བསྟན་པའི་ཉི་མ་གོང་འོག །ནམ་སྤྲུལ་ཀུན་བཟང་ཐེག་མཆོག་རྡོ་རྗེ། ཟེ་ཆེན་རབ་འབྱམས་མི་མཇེད་ཞིང་གི་མགོན་པོ་དང་། རྒྱལ་ཚབ་ཨོ་རྒྱན་རང་བྱུང་རྡོ་རྗེ། གྲུབ་ཆེན་མཆོག་སྤྲུལ་སོགས་རང་ལུགས་དང་། གངས་ཅན་གྱི་མགོན་པོ་རྒྱལ་དབང་ལུང་རྟོགས་རྒྱ་མཚོ། དེ་མོ་ཧུ་ཐོག་ཐུ་ཡབ་སྲས། མདོ་ཁམས་ལྔ་པ་སྒྲུབ་བརྒྱུད་ཉི་མ། ངོར་ཐར་རྩེ་མཁན་ཆེན་བྱམས་པ་ནམ་མཁའ་འཆི་མེད་དང་། བྱམས་པ་ཀུན་དགའ་བསྟན་འཛིན།
རྣལ་འབྱོར་འཇམ་དཔལ་བཟང་པོ། ཕན་ཁང་མཁན་ཀུན་དགའ་བསྟན་པའི་བློ་གྲོས། ཞབས་དྲུང་ཁག །ནཱ་ལེནྡྲ་གཟིམས་འོག་མཆོག་སྤྲུལ་བྱམས་པ་བསྟན་འཛིན་སྙན་གྲགས་སོགས་ས་དགེའི་ཕྱོགས་དང་། ལྷ་འབྲང་རིག་འཛིན་དཔལ་ལྡན་ཆོས་རྒྱལ། ཁྱད་པར་ཀུན་མཁྱེན་འཇིགས་མེད་གླིང་པའི་རྣམ་འཕྲུལ་འཇིགས་མེད་ཡེ་ཤེས་རྡོ་རྗེ། མཁས་གྲུབ་འཇིགས་མེད་སྐལ་བཟང་། ཕྱིས་སུ་སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པའི་བར་རིས་མེད་པའི་བསྟན་འཛིན་གྱི་སྐྱེས་བུ་རྣམས་ལས་ཆོས་འབྲེལ་ཅི་རིགས་པ་གསན་པས་གསན་རྒྱ་ཤིན་ཏུ་ཆེ་བ་གསན་ཡིག་པོད་ཆེན་ལས་གསལ་བ་དང་། དེ་ལྟར་གསན་པ་རྣམས་ཀྱང་བཀའ་གཏེར་གལ་ཆེ་བ་རྣམས་ལན་མང་འཆད་སྤེལ་དང་། ཚར་རེ་མ་འཆད་པ་མེད་པ་ལྟ་བུས་སྐུ་ཚེ་རིལ་པོར་འཆད་ཉན་རླབས་པོ་ཆེ་གནང་བའི་གྲུབ་འབྲས་བརྒྱུད་འཛིན་ཞལ་སློབ་ནམ་མཁའི་སྐར་ཚོགས་ལྟར་ཚད་བཟུང་མེད་པར་འཕེལ་བ་སྟེ། རགས་རིམ་ཙམ་བརྗོད་ན། དཔོན་སློབ་རིན་པོ་ཆེ་གསུམ་པ་ནམ་མཁའ་ཆོས་ཀྱི་རྒྱ་མཚོ། བཞི་པ་འཇིགས་མེད་ཆོས་དབྱིངས་འོད་གསལ། ཤིང་རྟ་ཆེན་པོ་ཀུན་མཁྱེན་གཞན་ཕན་མཐའ་ཡས་འོད་ཟེར་ཏེ་རྒྱལ་ཚབ་ཆེན་པོའི་ས་བརྙེས་པ་གསུམ། ཉི་གྲགས་མཆོག་སྤྲུལ་བཞི་པ་དཀོན་མཆོག་འཇིགས་
མེད་རྒྱལ་མཚན། རབ་འབྱམས་བཞི་པ་མི་མཇེད་ཞིང་མགོན། རྒྱལ་ཚབ་མི་བསྐྱོད་མཁས་གྲུབ། རྗེ་དཔོན་གསུམ་པ་གར་དབང་ཐུགས་མཆོག་རྡོ་རྗེ། ནམ་སྤྲུལ་རིན་པོ་ཆེ་ཀུན་བཟང་ཐེག་མཆོག་རྡོ་རྗེ་སྟེ་བརྒྱུད་འཛིན་གདམས་པའི་གཏེར་འཛིན་ལྔ། མཁྱེན་སྤྲུལ་ཡེ་ཤེས་རྡོ་རྗེ། གླིང་གཏེར་ཆེན་པདྨ་འགྲོ་འདུལ། མཆོག་གྱུར་བདེ་ཆེན་གླིང་པ་སྟེ་སྤྲུལ་པའི་གཏེར་ཆེན་རྣམ་གསུམ། འཕགས་མཆོག་འཇིགས་མེད་རྒྱལ་བའི་མྱུ་གུ་ཞེས་འགྲོ་དོན་མཐའ་ཡས་པའི་སེམས་དཔའ་གཅིག །གྲུབ་ཆེན་མཆོག་སྤྲུལ་བསྟན་པའི་རྒྱལ་མཚན། རིག་རྩལ་ཐོགས་མེད་གླིང་པའི་རྣམ་སྤྲུལ་ཨོ་རྒྱན་འཇིགས་མེད་ཕྲིན་ལས་འགྲོ་འདུལ། མཆོག་སྤྲུལ་པདྨ་བདེ་ཆེན་ཏེ་མཁྱེན་བརྩེ་ནུས་ལྡན་གྱི་བརྒྱུད་འཛིན་གསུམ། མཁས་གྲུབ་འཇིགས་མེད་སྐལ་བཟང་དང་། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་སྟེ་མཁྱེན་རབ་ཟླ་མེད་པའི་མཁས་པ་གཉིས། མཁན་ཆེན་པདྨ་བཀྲ་ཤིས། པདྨ་དམ་ཆོས། པདྨ་འོད་ཟེར་དཔལ་བཟང་པོ་སོགས་རང་དགོན་གྱི་མཁན་རབས་མཁས་གྲུབ་བཅུ། དེའི་ནང་ནས་པདྨ་འོད་ཟེར་དང་། གླིང་སྤྲུལ་ཐུབ་བསྟན་རྒྱལ་མཚན་གཉིས་ནང་ཐུགས་ཀྱི་སྲས་ཟུང་སྟེ་བསྟན་པ་ལ་བྱ་བ་རྒྱ་ཆེར་མཛད་པ། ཀཿཐོག་ཞིང་སྐྱོང་དང་། རྨོག་གྲུབ་རིན་པོ་ཆེ་གོང་འོག་སྟེ་བཀའ་
གཏེར་གྱི་བསྟན་འཛིན་ཆེན་པོ་བཞི། རིགས་དཔོན་འཇིགས་མེད་སོགས་ཕྱག་བཞེས་ཕྲིན་སྒྲུབ་ཀྱི་རྒྱལ་ཚབ་དགུ །མཁས་སྤྲུལ་སྒྲུབ་བརྒྱུད་ཉི་མ་གོང་འོག་སྟེ་སྒྲུབ་བརྒྱུད་བསྟན་འཛིན་མཆོག་ཟུང་། ཟེ་ཆེན་མ་ཧཱ་པཎྜི་ཏ་དབོན་སྤྲུལ་མཐུ་སྟོབས་རྣམ་རྒྱལ་སོགས་བཤེས་གཉེན་ཆེན་པོ་བཅུ། སེང་གེ་བླ་མ་ཀུན་བཟང་བསྟན་དར་སོགས་མདོ་སྔགས་འཆད་པའི་བཀའ་བབས་ཉེར་བདུན། མང་ཟ་བླ་མ་དཔལ་གྱི་སེང་གེ་སོགས་སྒྲུབ་པའི་བསྟན་འཛིན་སྤོང་བ་པ་ཆེན་པོ་ཉེར་བདུན། མ་གཅིག་མཁའ་འགྲོས་བྱིན་བརླབས་གཅོད་པ་པདྨ་སོགས་གཅོད་ཡུལ་བཀའ་བབས་ལུང་ཟིན་བཞི། དགེ་རྒྱལ་གཅོད་པ་སོགས་བརྟུལ་ཞུགས་སྤྱོད་པའི་རྣལ་འབྱོར་དབང་ཕྱུག་བརྒྱད། རས་སྤྲུལ་འཁྲུལ་སྣང་རང་གྲོལ་སོགས་ཕྱོགས་མེད་འགྲོ་དོན་མཛད་པའི་རྣལ་འབྱོར་པ་ཆེན་པོ་དགུ། དཔལ་ནཱ་ལེནྡྲའི་གཟིམས་འོག་ཐམས་ཅད་མཁྱེན་པ་ངག་དབང་བསྟན་འཛིན་སྙན་གྲགས་དང་། འཇམ་དབྱངས་ཞེ་ཆེན་དབོན་སྤྲུལ་རིན་པོ་ཆེས་མཛད་པའི་རྗེ་འདིའི་རྣམ་ཐར་སྒྲ་དབྱངས་རྒྱ་མཚོ་ནས་བཏུས་མཛད་པར་འདུག་མཆན། མཁྱེན་བརྩེའི་དབང་པོ་གཉིས་ལ་དགོངས་པས་བྱིན་རླབས་ཐུགས་སྲས་ཟླ་མེད་ཉི་ཟླ་ཟུང་གཅིག་ཏུ་གྲགས། འཛམ་གླིང་ཆོས་ཀྱི་ཤིང་རྟ་ཀོང་སྤྲུལ་ཐམས་ཅད་མཁྱེན་པ་ཀརྨ་ངག་དབང་ཡོན་ཏན་རྒྱ་མཚོ། ཤིང་རྟ་ཆེན་པོ་ལི་
ཐང་མཁན་ཆེན་མཁས་མཆོག་བྱམས་པ་ཕུན་ཚོགས། མཁས་ཤིང་གྲུབ་པའི་དབང་ཕྱུག་གྱི་ལིང་སྤྲུལ་པའི་སྐུ་ཐུགས་མཆོག་སོགས་ཕྱོགས་ཀྱི་བསྟན་འཛིན་ཆེན་པོ་བཅུ། ཉི་གྲགས་དབོན་སྤྲུལ་དམ་པ་སོགས་སེམས་དཔའ་ཆེན་པོ་བཅུ། བདུད་འདུལ་གདུང་འཛིན་རྒྱལ་སྲས་སྙན་གྲགས་སོགས་གྲུབ་མཆོག་རྣམ་བཞི། ཁྲོ་ཟུར་གཏེར་སྟོན། ཟེ་ཆེན་རང་གྲོལ། རིག་འཛིན་ནོར་བུ། མ་ཧཱ་གཏེར་སྟོན། འོད་ལུས་པ་པདྨ་བདུད་འདུལ་ཏེ་ཟབ་གཏེར་བཀའ་བབས་ལྔ། གྲུབ་ཆེན་རྣམ་འཕྲུལ་དྲི་མེད་གྲགས་པ་དང་། ཀློང་ཆེན་རོལ་པ་རྩལ་གྱི་རྣམ་འཕྲུལ་ཏེ་སྙིང་པོའི་བསྟན་འཛིན་ཟུང་གཅིག །རྒྱལ་སྲས་གཞན་ཕན་སྤྲུལ་སྐུ། རབ་འབྱམས་ལྔ་པ། རྒྱལ་རོང་དབོན་སྤྲུལ་ལྔ་པ་སྟེ་འཁྲུལ་མེད་རྡོ་རྗེའི་ལུང་གིས་དབུགས་འབྱིན་ཐོབ་པའི་རྣམ་འདྲེན་གསུམ། རིག་འཛིན་ཉི་མ་གྲགས་པའི་ཡང་སྲིད་དྲུག་པ་ལྷ་རིགས་དམ་པ་དང་། གྲུབ་ཆེན་འཇིགས་མེད་ཕྲིན་ལས་འོད་ཟེར་གྱི་ཡང་སྲིད་གསུམ། ནོར་གླིང་མཆོག་སྤྲུལ། གླིང་གཏེར་ཆེན་གསུམ་པ་སྟེ་རྡོ་རྗེའི་ལུང་གིས་བསྟན་པའི་བསྟན་འཛིན་བཞི། རང་དགོན་འབྲུག་སྤྲུལ་རྣམ་གཉིས་དང་། ཀུན་བཟང་སྤྲུལ་པའི་སྐུ་སྟེ་རྒྱལ་བསྟན་འཛིན་སྤེལ་ལ་བསྔགས་པ་གསུམ། གྲུབ་མཆོག་སྟོབས་ལྡན་རྡོ་རྗེ་གོང་འོག །ནམ་མཁའ་རྒྱ་མཚོ་སྟེ་རེ་སྐོང་
རྡོ་རྗེ་འཛིན་པ་དྲག་སྔགས་ནུས་མཐུའི་བཀའ་བབས་གསུམ། རིག་འཛིན་ཉི་མ་གྲགས་པའི་སྤྲུལ་པའི་བྱེ་བྲག་ཏུ་བསྔགས་པ་ས་སྐྱོང་སྡེ་དགེའི་རྒྱལ་སྲས་བླ་མ། འཇུ་སྤྲུལ་པདྨ་བསྟན་འཛིན། ལེགས་དགོན་སྤྲུལ་པའི་སྐུ་སོགས་སྨིན་གྲོལ་ཕྱོགས་བརྒྱར་སྤེལ་བའི་སྤྲུལ་དབོན་ཆེན་པོ་ལྔ་བཅུ། དཔལ་ཡུལ་དབོན་སྤྲུལ། གཞི་ཆེན་སྤྲུལ་སྐུ། ཛར་ཀ་དཔོན་པོ་སོགས་ཕྱོགས་མཐའི་གསར་རྙིང་གི་བཤེས་གཉེན་ཆེན་པོ་བཅུ་དྲུག །གསེར་ཏོག་དཔོན་པོ་ཁུ་དབོན། སྟོང་དཔོན་རྡོར་ལྷུན། ཆོས་སྐོར་ཀློང་གསལ་སོགས་རང་དགོན་མ་ལག་དང་། ཕྱོགས་བྲལ་དུ་བཞུགས་པའི་བླ་མ་བསྟན་འགྲོའི་དགེ་ལེགས་སྤེལ་བ་རྣམ་ཐར་ཆེན་མོར་མཚན་གསོལ་བ་བརྒྱ་རྩ་ལྷག་པ་སོགས་བགྲངས་ཀྱིས་མི་ལང་པ། མདོར་ན་དུས་དེར་བོད་ཆེན་སྡེ་དགེའི་ཕྱོགས་གཙོར་གྱུར་མདོ་སྨད་ཀྱི་སྔ་འགྱུར་རིང་ལུགས་འཛིན་པ་དང་། གྲུབ་མཐའ་རིས་བྲལ་གྱི་སྐྱེས་ཆེན་མཆོག་ཕལ་རྣམས་ཀྱིས་རྗེ་འདིའི་ཞལ་མཇལ་ཆོས་འབྲེལ་མ་ནོས་པ་འགའ་ཡང་མེད་པ་ལྟ་བུར་གྱུར་པས་གྲོལ་བ་བཞི་ལྡན་གྱི་ཕྲིན་ལས་དགོན་ཡུལ་ཐམས་ཅད་ལ་བསམ་གྱིས་མི་ཁྱབ་པས་བརྗོད་པའི་ཡུལ་ལས་འདས་པ་དང་། བསྟན་པ་སྟོབས་ཀྱིས་འདེགས་པའི་སྦྱིན་བདག་ཀྱང་། དཔལ་མིའི་ཚངས་པ་སྡེ་དགེ་ཆོས་རྒྱལ་ཡབ་སྲས་དབོན་བཅས།
ལྕགས་ལ་མི་ཆེན་རྒྱལ་པོ། གླིང་རྒྱལ་པོ་ཡབ་སྲས་གཙོར་གྱུར་ཐུ་སི་ཁག་སོ་གཉིས། དེ་མ་འཕྱི་ཉེར་ལྔར་གྲགས་པ་ཕལ་ཆེར་དང་། གཞུངས་དགའ་ལྡན་ཕོ་བྲང་པའི་བཀའི་བློན་ཞབས་པད་ས་དབང་ཕུ་ལུང་པ་སོགས་མི་ཆེན་ཐམས་ཅད་ཀྱིས་ཀྱང་གུས་པས་བཏུད་ཅིང་མི་ཕྱེད་པའི་དད་པས་མཆོད་པ་སོགས་མདོར་ན་ལུགས་གཉིས་ཀྱི་སྒོ་ནས་ཕྱི་མའི་དུས་འདིར་རྗེ་འདི་ཁོ་ན་ཕྲིན་ལས་རླབས་ཆེ། དེ་ལྟ་བུའི་མཛད་ཕྲིན་བསམ་གྱིས་མི་ཁྱབ་པ་གོང་འཕེལ་དུ་གྱུར་ཏོ།། ༈ །།རྗེ་བཙུན་ས་སྐྱ་པ་ཆེན་པོ་ངག་དབང་ཀུན་དགའ་བློ་གྲོས་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་ནི། དུས་གསུམ་གྱི་དེ་བཞིན་གཤེགས་པ་མཐའ་དག་གི་སྙིང་རྗེའི་རང་གཟུགས་གཅིག་ཏུ་འདྲིལ་བ་བྱང་ཆུབ་སེམས་དཔའ་ཆེན་པོ་ལག་ན་པདྨའི་ཞབས་ཀྱི་ཡེ་ཤེས་སྒྱུ་འཕྲུལ་དྲྭ་བའི་ཟློས་གར་ལས། རྒྱ་གར་འཕགས་པའི་ཡུལ་དུ་མ་ཧཱ་པཎྜི་ཏ་དྲི་མེད་བཤེས་གཉེན་དང་། ཛེ་ཏཱ་རི་དགྲ་ལས་རྣམ་པར་རྒྱལ་བ། བོད་འདིར་བསྟན་པ་སྔ་དར་གྱི་དུས་སུ་མཐུ་སྟོབས་ནུས་པའི་དབང་ཕྱུག་ལྷ་ལུང་དཔལ་གྱི་རྡོ་རྗེ་དང་། ཕྱི་དར་གྱི་ཚེ་བླ་མ་དྷ་བྱང་ཆུབ་སེམས་དཔའ། ཁྱད་པར་དུ་ཡོངས་རྫོགས་བསྟན་པའི་མངའ་བདག་བརྩེ་ཆེན་ཀུན་དགའ་སྙིང་པོ། བདག་ཆེན་རྡོ་རྗེ་འཆང་བློ་གྲོས་རྒྱལ་མཚན། གྲུབ་པའི་དབང་ཕྱུག་ཐང་སྟོང་
རྒྱལ་པོ། རྗེ་བཙུན་གྲོ་ལུང་པ་ཆེན་པོ་མང་ཐོས་བསོད་ནམས་ཆོས་འཕེལ་སོགས་སྐྱེས་རབས་ཀྱི་ཕྲེང་བ་ཚར་དུ་དངར་བ་བཟུང་བའི་མཐར། ཁ་བ་ཅན་ཙམ་ན་རིགས་རུས་ཕུན་སུམ་ཚོགས་པ་ཀུན་གྱི་རྩེ་མོར་སོན་པ་འོད་གསལ་འཁོན་གྱི་གདུང་ལས། ཡབ་རྗེ་འཇམ་དབྱངས་བསོད་ནམས་རིན་ཆེན་དང་། ཡུམ་གྲུབ་པའི་དབང་ཕྱུག་ལང་གྲོ་ལོ་ཙཱ་བ་དཀོན་མཆོག་འབྱུང་གནས་ཀྱི་བརྒྱུད་ལས་སོན་པ། ཀོ་ཅག་སྔགས་པའམ་འགྲོ་མགོན་པར་གྲགས་པའི་སྲས་མོ་ཡེ་ཤེས་ཀྱི་མཁའ་འགྲོའི་མཚན་དང་ལྡན་པ་བསོད་ནམས་དཔལ་གྱི་དབང་མོའི་སྲས་སུ་རབ་བྱུང་བཅུ་གཉིས་པའི་ནང་ཚན་ཞི་བ་སྟེ་ས་བྱར་འབོད་པའི་དཔྱིད་ཐ་ནག་པ་ཟླ་བའི་ཡར་ཚེས་བཅུ་གཅིག་གི་ཉི་ཤར་ལ་ནམ་མཁའ་འཇའ་འོད་ཀྱིས་གང་བ་དང་། མེ་ཏོག་གི་ཆར་བསྙིལ་བ་སོགས་བཀྲ་ཤིས་པའི་དགེ་མཚན་བསམ་གྱིས་མི་ཁྱབ་པ་དང་བཅས་ཏེ་འཁྲུངས། དེ་མ་ཐག་ནས་ཐུགས་དྲན་གྱི་རྣམ་པ་གསལ་ཞིང་། ཡབ་རྗེ་མཆོག་ནས་མཚན་ངག་དབང་ཀུན་དགའ་བསོད་ནམས་གྲགས་པ་བློ་གྲོས་ཞེས་གསོལ་ཞིང་། འདུས་པ་འཕགས་ལུགས་ཀྱི་དཀྱིལ་འཁོར་དུ་ཐོག་མར་སྨིན་པར་མཛད། གསུང་དང་པོ་བྱེ་བའི་ཚེ་ཨ་ར་པ་ཙ་ན་དྷིཞེས་གསུངས་པ་སོགས་ངོ་མཚར་གྱི་མཛད་སྤྱོད་མཐའ་ཀླས། དགུང་ལོ་བདུན་པ་ལྗགས་ཀློག་
ཕུལ་བ་ཙམ་གྱིས་ཚེགས་མེད་པར་མཁྱེན་པ་ནས་བཟུང་རིམ་གྱིས་ཐོས་བསམ་གྱི་ཚུལ་འཇུག་པར་མཛད་དེ། ཡབ་རྗེ་མཆོག་ལས་ལམ་འབྲས་ཚོགས་བཤད་ཀྱིས་མཚོན་ཟབ་རྒྱས་ཀྱི་གདམས་པ་རྒྱ་མཚོ་ཆ་ལྟ་བུ་བཞེས། དགུང་གྲངས་བཅུ་གཉིས་པར་གསེར་ཁྲིར་རིན་པོ་ཆེ་མངའ་གསོལ་ཞིང་། དགུང་གྲངས་བཅུ་གསུམ་པའི་ཚེ་ཡབ་རྗེ་ཞི་བར་གཤེགས་པའི་དགོངས་རྫོགས་ཕོགས་མཛད། བཅུ་བཞི་པ་ཐར་རྩེ་རྡོ་རྗེ་འཆང་ནམ་མཁའ་བསམ་འགྲུབ་ལས་དགེ་བསྙེན་གྱི་སྡོམ་པ་བཞེས་ཏེ་ངག་གི་དབང་ཕྱུག་ཀུན་དགའ་བློ་གྲོས་བསྟན་པའི་རྒྱལ་མཚན་དཔལ་བཟང་པོ་ཞེས་མཚན་དུ་གསོལ། དེ་ནས་མི་རིང་བར་ལྷ་ཁང་མཁན་པོ་དབང་ཕྱུག་ཕུན་ཚོགས་པའི་དྲུང་དུ་རབ་ཏུ་བྱུང་བར་མཛད་དེ། སྔར་གྱི་མཚན་གྱི་སྟེང་དུ་སངས་རྒྱས་བསྣན་པས། དེ་ཕྱིན་ཆད་ངག་དབང་ཀུན་དགའ་བློ་གྲོས་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་ཞེས་དོན་ལྡན་གྱི་སྙན་པས་སྲིད་པའི་རྩེ་མོར་བརྒལ་བར་གྱུར་ཅིང་། ཐར་རྩེ་རྡོ་རྗེ་འཆང་ཆེན་པོ་ལས་ལུགས་གཉིས་ཀྱི་བཀའ་དྲིན་མཆོག་ཏུ་ནོས། དགུང་གྲངས་བཅོ་ལྔ་པར་དབུས་ཕེབས་སྐབས་ཡར་ཀ་པོ་རུ་ཀླུང་ཁྲ་འབྲུག་ཏུ་གནས་གསར་རྡོ་རྗེ་འཆང་ཐོག་མར་མཇལ་བའི་ཚེ་མི་ཕྱེད་པའི་ཐུགས་དད་འཁྲུངས། བཀའ་ཆོས་ཀྱི་སྒོ་དབྱེ་བའི་དང་པོར་སྒྲོལ་དཀར་ཡིད་
བཞིན་འཁོར་ལོ་ཐུན་མོང་མ་ཡིན་པའི་རྗེས་གནང་ཞིག་སྩལ་བས་གསང་ཆེན་སློབ་བཤད་ཀྱི་བསྟན་པའི་བདག་པོར་འགྱུར་བའི་རྟེན་འབྲེལ་ཁྱད་པར་ཅན་འགྲིགས། བཅུ་དྲུག་པར་གདན་ས་ཆེན་པོར་རྗེ་དེ་ཉིད་སྤྱན་དྲངས་ཏེ་ལམ་འབྲས་བུ་དང་བཅས་པ་གསང་ཆེན་སློབ་བཤད་ཀྱིས་མཚོན་པའི་སྔ་ཕྱིར་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་བདུད་རྩི་བགྲང་ཡས་ཤིག་བཞེས་པར་མཛད། གཞན་ཡང་རྗེ་ཉིད་ཀྱི་གསུང་ལས། ཡབ་རྗེ་རྡོ་རྗེ་འཆང་དང་ཐར་རྩེ་རྗེས། །གནས་གསར་རྗེ་དང་བྲག་རྩ་རྗེ་བཙུན་དྲུང་། །གཞི་དགོན་རབ་བརྟན་བཟང་དང་རྟ་ནག་མཁན། །ཚུལ་ཁྲིམས་བཟང་དང་ངོར་ཆེན་བསོད་ནམས་མཚན། །སངས་རྒྱས་ཡེ་ཤེས་དཔལ་ལྡན་ཆོས་སྐྱོང་ཞབས། །གོང་དཀར་བསོད་ནམས་བློ་གྲོས་རྣམ་མཁྱེན་གྲོལ། །ཆོས་དབང་རྒྱ་མཚོ་ཆུ་རི་བཀྲ་ཤིས་དོན། །ཀུན་དགའ་ཆོས་འཕེལ་རིན་ཆེན་བཟང་པོ་སྟེ། །གོང་དཀར་རྣམ་ལྔ་རིན་ཆེན་མི་འགྱུར་ཞབས། །འགྲོ་མགོན་མཐུ་དབང་དེ་སྲས་རིག་འཛིན་མཚན། །མཁན་ཆེན་དབང་ཕུན་མཁན་ཆེན་ཀུན་དགའ་ཟླ། །སེང་གེ་རྒྱལ་མཚན་ཤར་རི་མངའ་བདག་རྗེ། །རྒྱལ་དབང་སྐལ་བཟང་རྗེ་དང་མཆོག་སྤྲུལ་ཞབས། །དཔལ་ལྡན་ནོ་མི་ཧན་དང་འོན་རྒྱལ་སྲས། ཁྲི་ཆེན་རིན་ཆེན་རྣམ་རྒྱལ་སྲས་མཆོག་བཅས། །འབྲི་གུང་རྗེ་
དང་བསམ་སྡིང་ཡང་ཟབ་རྗེ། །ཀུན་དགའ་སངས་རྒྱས་ཞྭ་ལུ་ཡེ་ཤེས་གྲགས། །དངོས་གྲུབ་སྡིང་དང་ཀུན་དགའ་དོན་གསལ་སོགས། །གུས་པས་བསྟེན་ནས་རིས་མེད་ཆོས་རྒྱུད་ཞུས། །ཞེས་གསུངས་པ་ལྟར་ཡོངས་འཛིན་དམ་པ་དེ་དག་རྣམས་ལས་དམ་པའི་ཆོས་ཀྱི་བདུད་རྩི་བླངས་ཏེ་མང་དུ་ཐོས་པ་རྒྱ་མཚོའི་མཐར་སོན་པར་མཛད་པའི་ཚུལ་གསན་ཐོ་རིན་པོ་ཆེ་པོད་ཆེན་གཉིས་སུ་གསལ་བ་ལྟར་དང་། དེ་དག་གི་བསམ་པས་སྒྲོ་འདོགས་བཅད་པས་རང་གཞན་གྱི་གཞུང་ལུགས་མ་འདྲེས་པར་རྟོགས་ཏེ་ཀློག་པ་ཐོས་བསམ་གྱི་འཁོར་ལོ་དང་། དཔལ་ཀྱེ་རྡོ་རྗེའི་གཞི་ཡི་བསྙེན་༡༣པ་ལན་གསུམ་གྱིས་མཚོན་ལྷག་པའི་ལྷ་དང་ཆོས་སྲུང་རྒྱ་མཚོའི་བསྐྱེད་རྫོགས་ཀྱི་ཉམས་ལེན་མཚམས་སུ་བཅད་པ་དུ་མ་དང་། རྒྱུན་བར་ཀྱང་ཉིན་ཞག་ཕྲུག་རེར་ལྷག་པའི་ལྷ་མི་འདྲ་བ་སུམ་༢༧ཅུར་ཉེ་བའི་སྒོམ་བཟླས་སོགས་ཀྱིས་མཚོན་སྤོང་བ་བསམ་གཏན་གྱི་འཁོར་ལོ་དང་། ཐུབ་བསྟན་ལྷ་ཁང་ཆེན་མོ་ཞིག་གསོས་གསར་བཞེངས་ལྟ་བུ་དང་། མཆོད་སྡོང་འཛམ་གླིང་འོད་གསལ་གྱིས་མཚོན་སྐུ་གསུང་ཐུགས་རྟེན་གསར་བཞེངས་གྲངས་མང་། དབུས་ཕེབས་ལན་གསུམ་དང་། གདན་ས་ཆེན་པོར་སྔ་ཕྱི་དུ་མར་གསུང་ངག་ལམ་འབྲས་ཚོགས་བཤད་ཚར་ལྔ། སློབ་བཤད་ཚར་གཅིག་གིས་ཐོག་དྲངས་
གང་གསན་པ་ཐམས་ཅད་ལན་གྲངས་དུ་མར་ཆོས་ཀྱི་སྦྱིན་པ་རྒྱ་ཆེ་ལ་རྒྱུན་མི་འཆད་པར་སྩལ་བས་བསྟན་པའི་སྲོག་མཐུད་པ་ལྟ་བུའི་སྐུ་དྲིན་གཞལ་བར་དཀའ་བ་སོགས་བྱ་བ་ལས་ཀྱི་འཁོར་ལོ་དང་། གཞན་ཡང་ཆོས་ཉིད་ཇི་ལྟ་བའི་གནས་ལུགས་མངོན་དུ་གཟིགས་ཤིང་། ཆོས་ཅན་ཤེས་བྱའི་ཡུལ་ལ་མངོན་གྱུར་དང་ལྐོག་གྱུར་མཐའ་དག་རྗེན་པར་གཟིགས་པའི་མཁྱེན་པ། སེམས་ཅན་དབུལ་ཕོངས་སོགས་སྡུག་བསྔལ་བ་དག་གཟིགས་པ་ན། ང་ཁྲི་མཐོན་པོར་ཟས་གོས་གྱ་ནོམ་པ་ལ་ལོངས་སྤྱོད་པ་འདི་ལྟར་ན། ཁོང་སྙིང་རྗེ་གསུངས་ནས་ཟས་གོས་སོགས་ཀྱིས་ཚིམ་པར་མཛད་པ་དང་། ཁྲོམ་གྱི་འདུ་ཚོགས་ཆེན་པོ་གཟིགས་པ་ན་སྤྱན་ཆབ་ཤར་གྱིས་འབྱུང་བ་སོགས་བྱང་ཆུབ་ཀྱི་སེམས་བཅོས་མིན་རྒྱུད་ལ་འཁྲུངས་པའི་བརྩེ་བ། ཕྱི་ནང་གསང་བའི་ཆོས་སྲུང་ཐམས་ཅད་བྲན་དུ་ཁོལ་བས་བསྟན་དགྲར་གྱུར་པ་སོགས་ལའང་ཐུགས་དམིགས་གཏད་པ་ཙམ་གྱིས་ཚར་བཅད་པ་གྲུབ་པ་སོགས་ནུས་པའི་ཕུལ་དུ་ཕྱིན་ཅིང་། རྒྱུན་དུ་དག་པའི་འོད་གསལ་གྱི་གཟིགས་ངོར་བླ་མ་ཡི་དམ་མཁའ་འགྲོའི་གཟིགས་སྣང་རྒྱུན་མི་འཆད་ཅིང་། ཁྱད་པར་ཡབ་རྗེ་དམ་པ་དང་། གནས་གསར་རྡོ་རྗེ་འཆང་ཆེན་པོ་ནས་ཡེ་ཤེས་ཀྱི་སྐུས་ཡང་ཡང་དུ་རྗེས་སུ་བཟུང་ཞིང་ཆོས་སྟོན་པར་མཛད། གུར་
ཞལ་སོགས་ཆོས་སྲུང་རྒྱ་མཚོས་དངོས་ཉམས་མནལ་ལམ་དུ་ཞལ་བསྟན་ཅིང་ཕྲིན་ལས་སྒྲུབ་པར་ཁས་བླངས། ཁྱད་པར་དམ་ཅན་པུ་ཏྲ་ལྕམ་དྲལ་དང་། ཕུར་སྲུང་དཀར་བདུད་ལ་སོགས་པས་བྲན་བཞིན་དུ་བཀུར་ནས་སྐུ་མཚམས་སོགས་ཀྱི་ཚེ་མཆོད་མེ་སྦར་བ་དང་། བཞེངས་པར་བསྐུལ་བ་ཚུན་ཆད་མངོན་སུམ་དུ་མཛད་པར་གྲགས། གཞན་ཡང་གྲུབ་པའི་རྟགས་མཚན་བསམ་ལས་འདས་ཤིང་། ལྷག་པར་ཕྱིས་སུ་ལམ་འབྲས་སློབ་བཤད་གནང་བའི་ཚེ། འོད་གསལ་གྱི་ངང་ལ་ངོར་ཆེན་རྡོ་རྗེ་འཆང་གིས་ཞལ་གཟིགས་ཏེ་སློབ་མ་ཀ་བཞི་གདུང་བརྒྱད་སོགས་འབྱུང་བ་ལུང་བསྟན་པ་དང་། རྗེ་ཉིད་ཀྱི་གསུང་ལས་ཀྱང་། ཚར་ཆེན་ཡབ་སྲས་ད་ལྟའི་དཔོན་སློབ་འདིའི་ཁྲོད་ན་ཡོད། ཅེས་དང་། བདག་མེད་ལྷ་མོ་བཅོ་ལྔ་སྩལ་བའི་ཚེ་ནང་མཆོད་ལག་པས་རེག་མི་བཟོད་པ་ཙམ་དུ་ཁོལ་ཞིང་ལུད་པ་དང་། བིར་སྲུང་ཕྱི་མའི་ཚེ་ཉི་འཛིན་ཡོང་བར་བྱེད་གྲུབ་དགོངས་མཐུན་དུ་རི་མོས་གཏན་ལ་ཕེབས་ཀྱང་། རྗེ་ཉིད་ཀྱི་གྲུབ་མཚན་མངོན་དུ་འཇོག་བྱེད་ཀྱིས། དེ་རིང་ཉི་འཛིན་ཡོང་བར་ཐག་ཆོད་དེ་བཞིན་ལ། རྒན་བུ་རྣལ་འབྱོར་དབང་ཕྱུག་ཏུ་ལངས་རྒྱུ་ཡིན་པས་ཁྱེད་རང་ཀུན་ཉི་འཛིན་རྩིས་པའི་སྒོ་ཡིག་དང་བཅས་པ་ལ་ལྟད་མོ་ལྟོས་ཤིག་གསུངས་ནས་རོ་མའི་རླུང་དྷུ་ཏིར་ཞུགས་སུ་མ་སྟེར་
བས་ཉི་འཛིན་མི་མངོན་པའི་དབྱིངས་སུ་བྱིན་གྱིས་བརླབས་པ་སོགས་ས་ལམ་མཐོན་པོར་གཤེགས་པའི་རྟགས་མཚན་ངོ་མཚར་བ་མཐའ་ཀླས་པའང་བསྟན་པར་མཛད། དགུང་གྲངས་ཉེར་བརྒྱད་པ་ཡན་རྟེན་རབ་བྱུང་དུ་བཞུགས་ཀྱང་། ཉེར་དགུའི་ཚེ་གཅུང་རིན་པོ་ཆེ་མཐུ་སྟོབས་དབང་ཕྱུག་དགོངས་པ་ཆོས་དབྱིངས་སུ་ཐིམ་པས་གདུང་འཛིན་གྱི་གོ་སར་ཕེབས་པར་མཛད་ཅིང་། རིགས་སྲས་མཆེད་ཞལ་སོགས་ཀྱང་འཁྲུངས། དེ་ལྟ་བུའི་ཞལ་སློབ་སྤྱིར་བསམ་གྱིས་མི་ཁྱབ་ཀྱང་། གཙོ་བོར་ཐར་རྩེ་རྡོ་རྗེ་འཆང་དང་། གནས་གསར་རྗེ་སོགས་ཉིད་ཀྱི་དབུ་བླ་རྣམས་ཀྱིས་ཀྱང་བཀའ་ཆོས་ཀྱི་འབྲེལ་བ་ཅི་རིགས་པར་གསན་ཅིང་། ཁྱད་པར་གསན་གསར་མཆོག་སྤྲུལ་རིན་པོ་ཆེ་ནམ་མཁའ་ལེགས་པ་ལྷུན་གྲུབ། ཐར་རྩེ་རྡོ་རྗེ་འཆང་ནམ་མཁའ་འཆི་མེད། འཕན་ཡུལ་བཅོ་བརྒྱད་པ་སྐུ་མཆེད། གཟིམས་འོག་སྤྲུལ་པའི་སྐུ། ངོར་ཕན་བདེ་ཞབས་དྲུང་དཔལ་ལྡན་རིན་ཆེན་ཆོས་མཛད། སློབ་དཔོན་པ་ཀུན་དགའ་བཀྲ་ཤིས། གྲུབ་དབང་རིན་ཆེན་རྒྱལ་མཚན་སོགས་མཐའ་ཀླས་སོ། །མཐར་དགུང་གྲངས་ལྔ་བཅུ་རྩ་ལྔ་པ་ཆུ་ཡོས་སྤྲེལ་ཟླ་ཕྱི་མའི་ཡར་ངོའི་གྲལ་ཚེས་གཉིས་པའི་ཉི་དྲོས་ཙམ་ལ་གྲུབ་མཐའ་སྙོགས་ཏེ་མཁའ་སྤྱོད་རྡོ་རྗེ་བཙུན་མོའི་ཞིང་ཁམས་སུ་ནམ་མཁའ་གཡའ་དག་པའི་
ཁྲོད་དུ་འཇའ་དཀར་པོ་མེ་ཏོག་རྒྱས་པའི་དབྱིབས་ཅན་དང་། མེ་ཏོག་གི་ཆར་རྒྱུན་རིང་པོར་སིལ་སིལ་དུ་འབེབས་བཞིན་པར་དཔའ་བོ་ཌཱ་ཀིའི་ཚོགས་ཀྱིས་མདུན་བདར་ཏེ་གཤེགས་པར་གྱུར་ཏོ།། ༈ །།གནས་གསར་རྡོ་རྗེ་འཆང་ངག་དབང་ཀུན་དགའ་ལེགས་པའི་འབྱུང་གནས་ནི། ཆོས་སྐུ་བདེ་བ་ཆེན་པོའི་ངང་ལས་མ་གཡོས་བཞིན་དུ། གཟུགས་སྐུ་རྣམ་པ་གཉིས་ཀྱི་སྒྱུ་འཕྲུལ་ཅིར་ཡང་འཆར་བ་ལས། རྩོད་དུས་ཚེ་ལོ་བརྒྱ་པའི་དུས་འདིར་བདག་ཅག་གི་སྟོན་མཆོག་ཉི་མའི་གཉེན་དུ་གྱུར་ཏེ་མཛད་པ་བཅུ་གཉིས་ཀྱི་སྒོ་ནས་ཡིད་ཅན་མཐའ་ཀླས་པ་ལམ་དང་འབྲས་བུའི་གོ་འཕང་ལ་སྦྱར་བའི་མཐར། སླར་ཡང་ཚར་ཆེན་རྡོ་རྗེ་འཆང་གི་རྣམ་ཐར་དུ་གསལ་བ་ལྟར་ངོ་མཚར་སྐྱེ་བའི་ཕྲེང་བ་བཅུ་གསུམ་དང་། གཞན་ཡང་འཕགས་པའི་དགེ་བསྙེན་དྷརྨ་ཏཱ་ལ། གྲུབ་ཆེན་རྡོ་རྗེ་དྲིལ་བུ་པ། པཎ་ཆེན་གང་བ་སྤེལ། དཔལ་ཆོས་ཀྱི་གྲགས་པ། དགེ་སློང་ནམ་མཁའི་སྙིང་པོ། དཔལ་ལྡན་ཨ་ཏི་ཤ །ཁྱབ་བདག་བཀའ་འགྱུར་བ་མགོན་པོ་བསོད་ནམས་མཆོག་ལྡན་སོགས་དག་པའི་སྐྱེ་སྲིད་ཚད་མེད་པར་བཟུང་བའི་མཐར་ཤངས་རྒྱ་མཚོ་ལོ་ཚ་ཞེས་བྱ་བའི་ཡུལ་དུ། ཡབ་བཀའ་འགྱུར་བ་མགོན་པོ་བསོད་ནམས་མཆོག་ལྡན་གྱི་སྐུ་མཆེད་འ་ཞ་དོན་གྲུབ་དབང་པོའི་སྲས། གྲུབ་པའི་མཚན་མ་
བརྙེས་པའི་འ་ཞྭ་མཁྱེན་རབ་རྣམ་རྒྱལ་དང་། དེ་སྲས་ནམ་མཁའ་བསོད་ནམས་དབང་གི་རྒྱལ་པོའམ་ངག་དབང་བློ་གསལ་མཆོག་ལྡན་དང་། ཀུན་དགའ་བསྟན་པའི་རྒྱལ་མཚན། ནམ་མཁའ་དོན་གྲུབ་རྒྱལ་པོ་གསུམ་ལས། ཕྱི་མ་དང་ཡུམ་གླན་གྱི་རིགས་ལས་སོན་པ་ཁར་ཁ་འཕིར་བྱུང་གི་བརྒྱུད་པ་ཕུན་ཚོགས་སྒྲོལ་མའི་སྲས་སུ་རབ་བྱུང་ཉི་མའི་ནང་གསེས་ཉི་སྒྲོལ་བྱེད་དེ་ཤིང་ཕོ་སྤྲེའུའི་ལོ་སྨལ་པོ་ཟླ་བའི་དམར་ཕྱོགས་ཀྱི་ཚེས་བཅུར་ངོ་མཚར་བའི་ལྟས་དུ་མ་དང་བཅས་ཏེ་སྐུ་འཁྲུངས། སྐུ་ན་ཕྲ་མོའི་དུས་ནས་སཾ་སྐྲྀ་ཏའི་སྐད་གསུངས་པ་སོགས་བཟང་པོའི་བག་ཆགས་སད། དགུང་ལོ་དྲུག་པ་ས་གླང་ལོར་བཀྲ་ཤིས་ཆོས་སྡེར་སྤྱན་དྲངས། གནས་ཀྱི་སློབ་དཔོན་བསོད་ནམས་སྣང་བྱེད་དང་། བསོད་ནམས་རིན་ཆེན་གཉིས་ཀྱིས་ཡི་གེའི་ཕྱི་མོ་འབྲི་ཀློག་དང་། ཆོས་སྤྱོད་ཀྱི་རིམ་པ་སོགས་འབུལ་བར་མཛད་པས་བརྡ་བསྟན་པ་ཙམ་དང་ལན་རེ་གཟིགས་པ་ཙམ་གྱིས་མཁྱེན། དགུང་ལོ་བརྒྱད་པ་ལྕགས་ཡོས་དབོ་ཟླ་བའི་ནང་རྨོར་དགོན་དུ་ཁྱབ་བདག་རྡོ་རྗེ་འཆང་དང་ངག་དབང་ཀུན་དགའ་ལྷུན་གྲུབ་ཐོག་མར་མཇལ་ཞིང་། པོ་ཏཱ་ལར་པད་དཀར་འཛིན་པ་ངག་དབང་ཡེ་ཤེས་རྒྱ་མཚོའི་དྲུང་དུ་གཙུག་ཕུད་ཕུལ་བས་མཚན་ངག་དབང་སྦྱིན་པ་ཞེས་གསོལ། སླར་གསང་ཆེན་རྒྱུད་སྡེའི་
འབྱུང་གནས་བཀྲ་ཤིས་ཆོས་སྡེའི་བླ་བྲང་དུ་རྨོར་ཆེན་ཐམས་ཅད་མཁྱེན་པ་ལས་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་གསན་ཅིང་མཚན་ཀུན་དགའ་ལེགས་པའི་འབྱུང་གནས་ཞེས་སྩལ། ཚར་ལུགས་དཀར་པོའི་ལྷ་གསུམ་གྱི་རྗེས་གནང་གིས་ཆོས་ཀྱི་སྒོ་ཕྱེ་སྟེ། སྲུང་འཁོར་རྡོ་རྗེ་བྲག་རྫོང་མའི་ཉམས་ཁྲིད་སོགས་ཟབ་ཆོས་མང་དུ་གསན། དགུང་ལོ་དགུ་པར་སེམས་བསྐྱེད་ལུགས་གཉིས་དང་། རྡོ་རྗེ་ཕྲེང་བ་ཀྲི་ཡ་སཱ་མུཙྪའི་དབང་། གསུང་ངག་རིན་པོ་ཆེ་སློབ་བཤད་སོགས་ཟབ་ཆོས་རྒྱ་མཚོ་ལྟ་བུ་རིམ་པར་གསན་བཞེས་མཛད། རྡོ་རྗེ་བྲག་རིག་འཛིན་པདྨ་ཕྲིན་ལས་ལ་སྔོན་སྨོན་དུས་སུ་སད་པས་དད་གདུང་ཤིན་ཏུ་ཆེ་བ་འཁྲུངས་ཀྱང་དངོས་སུ་མཇལ་བའི་སྟབས་མ་འགྲིགས། དགུང་ལོ་བཅོ་ལྔ་པར་ཡར་ཀླུང་བཀྲ་ཤིས་ཆོས་སྡེར་རྡོ་རྗེ་འཆང་གཞོན་ནུ་བློ་གྲོས་པའི་ཆོས་ཀྱི་ཁྲི་ལ་མངའ་གསོལ། བཅུ་བདུན་པ་ལྕགས་བྱི་ལོར་རྨོར་དགོན་དུ་ཕེབས་ནས། ཁྱབ་བདག་བླ་མ་ལས་ཟབ་ཆོས་མང་དུ་གསན་ཅིང་། རྒྱལ་དབང་བདུན་པ་རིན་པོ་ཆེ་གསེར་ཁྲིར་ཕེབས་སྐབས། འོན་རྒྱལ་སྲས་རིན་པོ་ཆེ་འཇིགས་མེད་གྲགས་པས་མཐུན་རྐྱེན་སྦྱར་ཏེ་ཆིབས་བསུར་ཕེབས་ཤིང་། འཇམ་མགོན་ས་སྐྱ་པ་བསོད་ནམས་རིན་ཆེན་དབུས་སུ་ཆིབས་བསྒྱུར་བསྐྱང་བ་དང་ཞལ་འཛོམ་མཛད། དགུང་ལོ་བཅོ་བརྒྱད་
པར་ལྷ་ལྡན་དུ་རྒྱལ་དབང་ཐམས་ཅད་མཁྱེན་པའི་མདུན་ཞབས་བརྟན་ཕུལ་བར་ཕེབས་པ་དང་འབྲེལ་མཚུངས་སུ་རྨོར་ཆེན་རྡོ་རྗེ་འཆང་ལའང་ཞབས་པད་བརྟན་པའི་མཎྜལ་ཕུལ། ཟླ་བ་ལྔ་པ་ནས་བརྩམས་ཏེ་མདོ་སྔགས་གཞུང་བརྒྱ་སྨྲ་བའི་ཁྱབ་བདག་བཀའ་འགྱུར་བ་སངས་རྒྱས་རྒྱལ་མཚན་ལས་རྒྱལ་བའི་བཀའ་འགྱུར་རིན་པོ་ཆེའི་ལུང་གསལ་དག་སྙན་གསུམ་གྱི་སྒོ་ནས་ལེགས་པར་གསན། ཁྱད་པར་དགུང་ལོ་བཅུ་དགུར་ཕེབས་པ་དགེ་བྱེད་ཅེས་པ་ཆུ་ཕོ་སྟག་གི་ལོར་བསམ་ཡས་ཆོས་འཁོར་ཆེན་པོར་རྨོར་ཆེན་རྡོ་རྗེ་འཆང་ཆེན་པོ་ལས་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་དབང་། བྱིན་རླབས། ཁྲིད། ལུང་སོགས་སླར་ཡང་བསྐྱར་ནས་གསན་ཅིང་། རྒྱུ་དབང་སྐབས་རྡུལ་ཚོན་གྱི་དཀྱིལ་འཁོར་ལ་རྗེ་ཉིད་བཞུགས་སུ་གསོལ་ཏེ་བསྟན་པའི་བདག་པོར་དབང་བསྐུར་བ་བཞིན་སྙན་བརྒྱུད་ཀྱི་བསྟན་པ་ཕྱོགས་མཐར་ཁྱབ་པའི་རྟེན་འབྲེལ་གྱི་སྒོ་ཡངས་པོར་བྱེ། ནག་པ་ཟླ་བའི་ནང་མཁན་པོ་ཡོངས་རྫོགས་བསྟན་པའི་མངའ་བདག་རྨོར་ཆེན་ཐམས་ཅད་མཁྱེན་པ། ལས་ཀྱི་སློབ་དཔོན་བཀའ་འགྱུར་བ་སངས་རྒྱས་རྒྱ་མཚོ་སོགས་དད་པའི་དགེ་སློང་གྲངས་ཚང་གི་དབུས་སུ་ཚིགས་གསུམ་རིམ་ནོད་ཀྱིས་བསྙེན་པར་རྫོགས་པའི་དགེ་སློང་གི་དངོས་པོར་བསྒྲུབ་ཅིང་། སྔར་གྱི་
མཚན་གྱི་ཐོག་མར་ངག་དབང་དང་། མཐར་ཐེག་མཆོག་དབང་གི་རྒྱལ་པོ་ཞེས་གསོལ་བར་མཛད་དེ། འདུལ་བ་འཛིན་པ་ཐམས་ཅད་ཀྱི་གཙུག་གི་ནོར་བུས་ཞབས་བསྟེན་གྱི་པདྨོ་ལ་ཕྱག་བྱ་བར་འོས་པའི་དཔལ་ཡོན་ངང་གིས་འཕེལ། དེ་ནས་ཆོས་སྡེར་དཔལ་ཀྱེ་རྡོ་རྗེའི་གཞིའི་བསྙེན་པ་ཁ་སྐོང་གི་སྦྱིན་སྲེག་དང་བཅས་པ་མཛད་ཅིང་། མཁའ་འགྲོ་མས་རྨི་ལམ་བཟུང་བའི་གྲོགས་མཛད་པ་སོགས་རྟགས་མཚན་ཁྱད་པར་ཅན་བརྙེས། ཉེར་གཉིས་པ་ཤིང་སྦྲུལ་ལོར་གཙང་དུ་ཆིབས་ཁ་བསྒྱུར་ཏེ། དཔལ་ཞྭ་ལུ་གསེར་ཁང་དུ་བླ་ཆེན་རྡོ་རྗེ་འཆང་ཐུགས་རྗེ་བརྩོན་འགྲུས་ལས་དཔལ་དུས་ཀྱི་འཁོར་ལོའི་དབང་ལུང་མན་ངག་སོགས་གསན་ཅིང་། ངོར་ཨེ་ཝཾ་ཆོས་ལྡན་སོགས་བརྒྱུད། གངས་ཅན་བོད་ཀྱི་རྡོ་རྗེ་གདན་དཔལ་ས་སྐྱར་ཡབ་རྗེ་བསོད་ནམས་རིན་ཆེན་ལས་བཅོམ་ལྡན་འདས་རྡོ་རྗེ་གཞོན་ནུའི་བསྟོད་ལས་བྱང་ཆུབ་སྒྲུབ་པའི་དབང་དང་། ལམ་དབང་སོགས་གསན། འདི་སྐབས་ཡིན་ནམ་འཇམ་དབྱངས་ངག་གི་དབང་ཕྱུག་རྒྱལ་མཚན་རབ་བརྟན་དཔལ་བཟང་པོ་ཞེས་པའི་མཚན་འབུལ་དང་། བཀུར་བཟོས་ཆེ་བར་མཛད། རྟེན་དང་བརྟེན་པར་བཅས་པ་མཇལ་ཞིང་ཕྱག་མཆོད་སྨོན་ལམ་སོགས་མཛད་ནས། སྒྲོ་མོ་ལུང་དུ་གྲུབ་ཆེན་ཐང་སྟོང་པའི་རྣམ་འཕྲུལ་མང་ཐོས་བསོད་ནམས་ཆོས་འཕེལ་
གྱི་སྤྱན་སྔར་ཕེབས་ཤིང་། དཔལ་ལྡན་ཤངས་པ་བཀའ་བརྒྱུད་ཀྱི་ཟབ་ཆོས་མཐའ་དག་བུམ་པ་གང་བྱོའི་ཚུལ་དུ་གསན་པས་སྒྱུ་མ་ལྟ་བུའི་ཏིང་ངེ་འཛིན་ཁྱད་པར་ཅན་ཐུགས་རྒྱུད་ལ་འཁྲུངས། ཁྱབ་བདག་བཀའ་འགྱུར་བའི་རྣམ་འཕྲུལ་དུ་ཡེ་ཤེས་གཟིགས་པའི་ལུང་གིས་གསལ་བར་བསྟན། དེ་ནས་འདར་གཞུང་ནས་རིམ་གྱིས་བརྒྱུད་དེ། འདར་གྲང་མོ་ཆེར་ཕེབས་ཤིང་བྲག་རྩ་རྡོ་རྗེ་འཆང་བློ་གསལ་བསྟན་འཛིན་དང་ཞལ་འཛོམ་མཛད། རྨུ་གཤོང་། མུ་གུ་ལུང་། ཐུབ་བསྟན་དགེ་འཕེལ། ཆ་ལུང་རྡོ་རྗེའི་བྲག་སོགས་བརྒྱུད་ནས་སླར་ས་སྐྱར་ཕེབས་ཤིང་ཞབས་བརྟན་གདུགས་དཀར་གྱི་མདོས་ཆེན་སོགས་མཛད་ནས་རིམ་གྱིས་རང་དགོན་དུ་ཞབས་བསྐྱོད། ཉེར་གསུམ་པར་ཡར་ཀླུང་བཀྲ་ཤིས་ཆོས་སྡེར་རྡོ་རྗེ་ཕྲེང་བ་དང་། དུས་ཀྱི་འཁོར་ལོ་སོགས་དབང་བཀའ་ཆེན་པོ་རྣམས་སྩལ་ཞིང་། ཕྱག་དཔེ་ཚར་ལན་རེ་ཟུང་རེ་གཟིགས་པ་ཙམ་གྱིས་ཐོགས་མེད་དུ་མཁྱེན་པའི་སྤོབས་པའི་གཏེར་མཛོད་གྲོལ། སླར་ཡང་རྨོར་ཆེན་རིན་པོ་ཆེའི་ཞབས་པད་དུ་བསྙེན་ནས་གསུང་ངག་རིན་པོ་ཆེའི་བཀའ་ཐུན་མོང་མ་ཡིན་པ་སོགས་ཟླ་བ་དྲུག་ཏུ་གསན། དེ་དང་དུས་མཚུངས་ཙམ་ལ་མདོ་ཁམས་སྡེ་དགེ་ཆོས་རྒྱལ་ཆེན་པོ་བསྟན་པ་ཚེ་རིང་གིས་དཔལ་དུས་ཀྱི་འཁོར་ལོའི་སྒྲུབ་མཆོད་ཁྱད་པར་ཅན་
འཛུགས་བཞེད་ཀྱིས་གདན་འདྲེན་དང་། འདར་གྲོང་ཆེན་པོས་གདན་ས་འཛིན་པར་གསོལ་བ་བཏབ་པའང་ཞལ་གྱིས་བཞེས། སྤྲེལ་ལོར་དུས་ཀྱི་འགྱུར་བས་རྨོར་ཆེན་རྡོ་རྗེ་འཆང་འོན་ཆོས་སྡིང་རྒོད་ཚང་རི་ཁྲོད་དུ་ཕེབས་པའི་ཞབས་པད་དུ་བཅར། སླར་སྐུ་གཤེགས་པའི་རྗེས་ཀྱི་བྱ་བ་དང་། དགོངས་པ་རྫོགས་པའི་ཐབས་ཕུལ་དུ་ཕྱིན་པ་མཛད། དགུང་ལོ་ཉེར་དྲུག་པ་ས་བྱ་ལོར་བསམ་ཡས་སུ་རབ་བྱུང་གྲྭ་ཚང་ཤིན་ཏུ་མང་བར་རབ་བྱུང་གནང་། ཆོས་སྐྱོང་ཆེན་པོས་ཀྱང་བཀའ་བཞིན་བསྒྲུབ་པར་ཁས་བླངས། ཟླ་བ་དྲུག་པར་མི་དབང་ཆེན་པོས་ཞབས་འགྱུར་གྱི་མཐུན་རྐྱེན་དང་བཅས་མདོ་ཁམས་སྡེ་དགེར་ཆིབས་ཀྱི་ཁ་ལོ་བསྒྱུར་ཞིང་། ཕེབས་ལམ་རོང་ཕྱོགས་ནས་མཛད་དེ་ཏལ་དཀར་ལ་རྩེར་གྲུབ་དབང་སངས་རྒྱས་རྒྱ་མཚོ་དང་མཇལ་བའི་སྐབས་ཀྱང་གྲུབ་དབང་དམ་པས་ཁྱབ་བདག་བཀའ་འགྱུར་བའི་ཡང་སྲིད་དུ་ངེས་པ་རྙེད་པའི་གསུང་གིས་དབུགས་དབྱུང་། ལམ་བར་དུ་འཁོད་པའི་ལྷ་སྡེ་མི་སྡེ་རྣམས་ཀྱིས་ཀྱང་གུས་པས་མཆོད་དེ། རིམ་གྱིས་སྡེ་དགེ་ལྷུན་གྲུབ་སྟེང་གི་ཆོས་གྲྭར་ཕེབས་ཉེའི་ཚེ་མཁས་གྲུབ་ཁྱུང་པོ་རྣལ་འབྱོར་གྱི་ཡེ་ཤེས་ཀྱི་སྐུ་གཟུགས་གཞན་དུ་བསྒྱུར་བས་མངོན་སུམ་དུ་རྗེས་སུ་བཟུང་ཞིང་ཟུང་འཇུག་གི་རྟེན་འབྲེལ་བསྒྲིགས། ཆོས་རྒྱལ་ཆེན་པོ་དང་མཇལ་འཛོམ་
དང་ལེགས་ཚོགས་རྟེན་འབྲེལ་གྱི་སྒོ་འཕར་ཡངས་པོར་ཕྱེ། དཔལ་དུས་ཀྱི་འཁོར་ལོའི་སྒྲུབ་དཀྱིལ་ནག་འགྲོས་ལྗགས་བསྒྲིགས་བཀའ་དྲིན་བསྐྱང་ཞིང་། དགོན་དེའི་གྲྭ་པ་རྣམས་ལ་དཔེ་ཆ་བློ་འཛིན་བྱེད་དགོས་ཀྱི་བཀའ་ཁྱབ་གནང་བས་ཟླ་བ་གཉིས་ལྷག་ཙམ་ལ་བརྒྱུད་འདེབས་མངོན་དཀྱིལ་བཅས་ཆིག་ཤུར་ཕེར་བ་བདུན་ཅུ་རྩ་ལྷག་བྱུང་བ་རྣམས་ལ་གདངས་དང་གར་ཐིག་སོགས་ཕྱག་ལེན་རྣམས་བསླབས་ཤིང་། ལུགས་གཉིས་ཀའི་སྒོ་ནས་ཐབས་མཁས་ཀྱིས་བསྐྱངས་པ་དང་། དཔལ་དུས་ཀྱི་འཁོར་ལོ་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་དུ་རྒྱུད་སྨིན་པར་མཛད་དེ། ལྕགས་ཁྱི་ནག་པ་ཟླ་བའི་ཡར་ཚེས་ནས་བཟུང་སྟེ་དཔལ་དམ་པ་དང་པོའི་སངས་རྒྱས་ཀྱི་སྒྲུབ་མཆོད་ཀུན་མཁྱེན་བུ་སྟོན་རིན་པོ་ཆེའི་ཕྱག་བཞེས་ཇི་ལྟ་བ་བཞིན་འཛུགས་པར་མཛད། གཞན་ཡང་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་བསྐོར། ཟང་ཟིང་གི་དངོས་པོ་ཇི་སྙེད་བྱུང་བ་རྣམས་བཀྲ་ཤིས་ཆོས་སྡེར་དུས་ཇའི་ཐེབས་སུ་འབུལ་བར་མཛོད་པ་ཆེད་གཏད་དུ་གཏོང་། ཕག་ལོར་འགའ་ཐར་དུ་སྐྱབས་མགོན་བདུན་པ་རིན་པོ་ཆེ་སྐལ་བཟང་རྒྱ་མཚོ་མཇལ་བར་ཆེད་ཀྱིས་ཕེབས་ཤིང་། ཁྲི་ཆེན་ནོ་མི་ཧན་ལས་ཚེ་སྒྲུབ་འཆི་མེད་རྡོ་རྗེའི་སྲོག་ཤིང་གི་དབང་བཀའ་ཡང་གསན། བྱི་ལོར་སྡེ་དགེའི་རྒྱལ་ཁབ་ཏུ་
རྣམ་སྲས་ཀྱི་རྟེན་འཛུགས་དང་། དམར་པོ་སྐོར་གསུམ་གྱི་དབང་ལུང་སོགས་སྩལ་བས་བསྟན་པའི་སྦྱིན་བདག་ཆེན་པོ་ཉིད་ལ་འཇམ་དབྱངས་གོང་མ་ཆེན་པོས་ལུང་ལས་ཀྱིས་མངོན་པར་བསྔགས་པ་དང་གསོལ་རས་རྒྱ་ཆེར་གནང་བས་སླར་ཡང་ཡིད་ཆེས་ཀྱི་དད་པ་བརྟན་པོར་ཐོབ། གྲུབ་དབང་སངས་རྒྱས་རྒྱ་མཚོས་མཚམས་སྦྱར་ཏེ་ཕོ་བྲང་ཆེན་པོའི་ཤར་དུ་ཚར་ལུགས་པའི་མགོན་ཁང་རྟེན་དང་བརྟེན་པར་བཅས་པ་བཞེངས་ཤིང་ཕྱག་ལེན་ཁྱད་པར་འཕགས་པས་ཡེ་ཤེས་པ་མངོན་སུམ་དུ་བཞུགས་པའི་གྲགས་པས་ཁྱབ། སྔ་ཕྱིར་ཆོས་རྗེ་བཀྲ་ཤིས་བཟང་པོ་ལས། ཀྱེ་རྡོར་བཀའ་བབས་བཞི་དང་། མཁའ་འགྲོ་རྒྱ་མཚོ་སོགས། མཁན་ཆེན་བཀྲ་ཤིས་ལྷུན་གྲུབ་ལས་སྦྱོང་དཀྱིལ་བཅུ་གཉིས་ཀྱི་དབང་སོགས་གསན། ས་སྐྱོང་ཆེན་པོ་དཔོན་བློན་སོགས་ལ་རྡོ་རྗེ་ཕྲེང་བའི་དབང་བཀའ་རྒྱས་པར་སྩལ། ཕྱོགས་དེའི་མཛད་པ་རེ་ཞིག་རྫོགས་ནས་བྱང་ལམ་བརྒྱུད་དབུས་སུ་ཕེབས་པར། འཕན་ཡུལ་ནཱ་ལེནྡྲ་ཆོས་རྗེ་བཅོ་བརྒྱད་པ་དང་མཇལ་འཛོམ་ཡང་དག་པར་མཛད། ལྷ་ལྡན་དུ་ཇོ་ཤཱཀ་རྣམ་གཉིས་སོགས་ལ་མཆོད་འབུལ་དང་། མི་དབང་ཆེན་པོར་མཇལ་ཕྱག་གནང་བས་ཐུགས་དགེས་པའི་རྩེར་སོན། རིམ་གྱིས་ཡར་ཀླུང་བཀྲ་ཤིས་ཆོས་སྡེར་ཕེབས་ནས་དུས་ཇའི་སྦྱོར་འཇགས་དང་། ཡབ་
གཤེགས་པའི་དགོངས་རྫོགས་རྒྱ་ཆེར་གནང་། ཤིང་སྟག་ལོར་གྲུབ་དབང་སངས་རྒྱས་རྒྱ་མཚོ་དང་། བླ་མ་ཀུན་དགའ་རྒྱ་མཚོ་སོགས་ལ་རྒྱལ་བའི་བཀའ་འགྱུར་རིན་པོ་ཆེའི་ལུང་རྫོགས་པར་སྩལ་ཞིང་། ཆུ་སྟོད་ཟླ་བའི་ནང་གཙང་ཕྱོགས་སུ་ཆིབས་ཁ་བསྒྱུར། གྲོ་བཞིན་ཟླ་བའི་ཡར་ཚེས་བཅོ་ལྔ་ལ་འདར་སྟོད་ཆོས་འཁོར་ཡང་རྩེར་ཚར་རྡོ་རྗེ་འཆང་ཆེན་པོའི་ཆོས་ཀྱི་ཁྲི་ལ་ཞབས་པད་བཀོད་ཅིང་གཞུངས་དང་། ས་སྐྱ་སོགས་ཀྱིས་ཐོག་དྲངས་ཏེ་ལེགས་འབུལ་མཁན་རྒྱ་ཆེར་བྱུང་། དེ་ནས་ས་སྐྱར་ཕེབས་ནས་ཡབ་རྗེ་བསོད་ནམས་རིན་ཆེན་མཇལ་ཞིང་ཟང་ཟིང་གི་མཆོད་སྤྲིན་རྒྱ་ཆེར་སྤྲོས། སླར་འདར་དུ་ཕེབས་ནས་གསུང་ཆོས་ཅི་རིགས་པ་སྩལ། ཟླ་བ་དགུ་པར་ངོར་ཨེ་ཝཾ་སོགས་བརྒྱུད་དེ་སླར་དབུས་ཕྱོགས་སུ་ཕེབས། རི་བོ་ཆོས་གླིང་པ་དང་། བཀྲས་ཆོས་ཕན་ཚུན་རྩོད་པ་ཕྲན་བུ་བྱུང་བར་བརྟེན་བླ་གཞིས་གྲྭ་ཚང་ལ་སྦྱར་གནང་མཛད། སྡེ་དགེ་ནས་རྒྱལ་བའི་བཀའ་འགྱུར་རིན་པོ་ཆེ་བསླུ་མ་གནང་བའི་སྤར་ཕུད་ཕེབས་པས་གྲྭ་ཚང་དུ་སྦྱོར་འཇགས་མཛད། རྨོར་ཆེན་རིན་པོ་ཆེའི་ཐུགས་སྲས་འཕགས་སྡེ་མཁན་ཆེན་ངག་དབང་བློ་གསལ་བསྟན་འཛིན་ནས་མཚན་ཉིད་སྐོར་པུསྟི་གྲགས་ཆེན་བཅོ་བརྒྱད་སོགས་རྒྱ་གཞུང་གི་ལུང་རྒྱུན་གང་བཞུགས་སོགས་ལུང་དང་། དྲི་མེད་རྣམ་
གཉིས་ཀྱི་དབང་ལུང་། གཞན་ཡང་རྗེས་གནང་གི་རིགས་མང་བ། གནུབས་སྟོན་བློ་བཟང་དོན་གྲུབ་ལས་བྱང་གཏེར་ཐུགས་སྒྲུབ་དྲག་པོ་རྩལ་གྱི་ཆོས་སྐོར་ཕལ་ཆེར། སྤུ་བྲག་བླ་ཆེན་ལེགས་པ་དོན་གྲུབ་ལས་རྨོར་ཆེན་ལས་མ་གསན་པའི་འཇིགས་བྱེད་སྐོར་འགའ་ཞིག་དང་། བཀའ་འགྱུར་བ་རིན་ཆེན་དམ་ཆོས་ལས་འདུལ་བའི་ལས་ཆོག་རྣམ་རྒྱལ་གསེར་མདོག་སོགས་གོང་ས་ལྔ་པའི་གསུང་འགའ་ཞིག་དང་སྙན་ངག་གི་ཕྱག་ཁྲིད་སོགས་ཞུ་བར་མཛད། འབྲུག་ལོར་སླར་ཡང་སྡེ་དགེ་ནས་གདན་འདྲེན་ནན་བསྟུད་ཕེབས་པ་བཞིན་མདོ་ཁམས་སུ་ཆིབས་ཁ་བསྒྱུར་བའི་སྐབས། བསམ་ཡས་ཆོས་འཁོར་ཆེན་པོར་འོད་གསལ་གྱི་སྣང་བར་གྲུབ་ཆེན་ཐང་སྟོང་རྒྱལ་པོ་དང་ཡེ་ཤེས་ཀྱི་མཁའ་འགྲོ་ནི་གུ་མས་རྗེས་སུ་བཟུང་བའི་གཟིགས་སྣང་ངོ་མཚར་བའང་བྱུང་། རིམ་གྱིས་བྱང་ལམ་བརྒྱུད་ནས་ལྷུན་གྲུབ་སྟེང་ཕེབས་ཤིང་མཆོད་ཡོན་མཇལ་འཛོམ་ལེགས་ལམ་དང་། འཇིགས་བྱེད་རྭ་ལུགས་ལྷ་བཅུ་གསུམ་མའི་དབང་བཀའ་བརྒྱ་ཚར་འབུལ་བའི་མགོ་འཛུགས་པར་གནང་། སྦལ་ལོར་དབང་བརྒྱའི་འཕྲོས་སྐྱོང་བ་དང་ཙནྡན་དཀར་དམར་གྱི་བདེར་གཤེགས་མཆོད་རྟེན་བརྒྱད་ཐོག་སོ་ཕྱེད་གཉིས་ཙམ་པ་ཤིན་ཏུ་ཁྱད་འཕགས་བཞེངས་པར་དྲི་མེད་རྣམ་གཉིས་ཀྱི་དཀྱིལ་འཁོར་བཞེངས་པ་དང་
རབ་གནས་སོགས་མཛད། རྟ་ལོར་སྦྱིན་བདག་ཆེན་པོ་གཤེགས་པའི་རྗེས་ཀྱི་བྱ་བ་སྤྱི་དང་། ཁྱད་པར་འཇིགས་བྱེད་བཅུ་གསུམ པའི་སྒྲུབ་མཆོད་གསར་འཛུགས་སོགས་ཀྱིས་མཚོན་སྔ་ཕྱིར་ཆོས་ཀྱི་འཁོར་ལོ་རྒྱ་ཆེར་བསྐོར་བ་དང་། དངོས་པོའི་ཚོགས་བསགས་ཀྱང་བསམ་གྱིས་མི་ཁྱབ་པར་མཛད། ངོར་ཆོས་རྗེ་བསྟན་འཛིན་ཕུན་ཚོགས་ལས་རིགས་གསུམ་སྤྱི། གུར་སམ་མི་འཁྲུགས་པ་སོགས་ཀྱི་དབང་། ངོར་ཆེན་དང་དཀོན་མཆོག་ལྷུན་གྲུབ་ཀྱི་བཀའ་འབུམ་ཚང་མའི་ལུང་སོགས་གསན། བྱ་ལོ་ཟླ་བ་བདུན་པའི་ནང་དུ་དབུས་ཕྱོགས་སུ་ཕེབས། གོང་མ་མཆོད་ཡོན་མཇལ་བ་དང་། ཚོགས་གསོག་གི་བྱ་བ་རྒྱ་ཆེར་མཛད། བཀྲ་ཤིས་ཆོས་སྡེར་གླང་ནག་བླ་མ་ཀུན་དགའ་དཔལ་འབྱོར་སོགས་ལ་ལམ་འབྲས་བུ་དང་བཅས་པ་གསང་ཆེན་སློབ་བཤད་པའི་ལུགས་ཀྱི་དབང་ཁྲིད་མན་ངག་རྒྱས་པར་སྩལ་༼༡༽། ཆུ་ཁྱི་ཟླ་བ་ལྔ་པའི་ནང་བསམ་ཡས་ཆོས་འཁོར་ཆེན་པོའི་བར་ཁང་གཡུ་ཞལ་འབར་བར་བཅོ་བརྒྱད་ཆོས་རྗེ་ཡབ་སྲས། ཁ་རག་བོང་འབྲུག་ཆོས་རྗེ། ཉན་པོ་ཆོས་རྗེ་མཆེད། གླིད་སྨད་ཞབས་དྲུང་། གཞི་པ་དཔོན་སློབ། བཀྲས་ཆོས་པ་སོགས་ལ་གསུང་ངག་རིན་པོ་ཆེ་དང་༢༽། རྣལ་འབྱོར་མ་སོགས་ཆོས་འཁོར་རྒྱ་ཆེར་བསྐོར་རྗེས། སྙེ་ཐང་འཕགས་སྡེར་འཕགས་ཆེན་
དཔལ་ལྡན་གྲགས་པའི་ཆོས་ཀྱི་ཁྲི་ལ་ཞབས་བཀོད་ཅིང་། དེ་དང་ལྷ་ལྡན་དུ་གསུང་ཆོས་མང་དུ་སྩལ། སེ་རའི་གཏོར་སྒྲུབ་སློབ་དཔོན་རྟ་མགྲིན་གྱི་གྲུབ་ཐོབ་ཏུ་གྲགས་པ་ཞིག་ལས་རྟ་མཆོག་རོལ་པའི་ཆོས་སྐོར་འགའ་ཞིག་ཀྱང་གསན། ཆུ་ཕག་ཟླ་༡ཚེས་༡༠ནས་བཟུང་བཀྲས་ཆོས་སུ་སྤོ་བོ་ཡར་འབྲོག་དགོན་གྱི་སྤྲུལ་སྐུ་ལྷུན་གྲུབ་ཕུན་ཚོགས་དང་། འབྲས་གླིང་རབ་འབྱམས་པ། ཚར་གུར་རབ་འབྱམས་པ། རིག་འཛིན་སྐལ་བཟང་རྣམ་གྲོལ་སོགས་ལ་གསུང་ངག་རིན་པོ་ཆེའི་ཆོས་འཁོར་རྒྱ་ཆེར་བསྐོར། སྔོན་ས་སྐྱ་པ་འཇམ་མགོན་ཀུན་དགའ་བློ་གྲོས་དབུས་ཕེབས་ཀྱི་སྐབས་ཡར་ཀླུང་ཁྲ་འབྲུག་ཏུ་ཐོག་མར་མཇལ་བས། དཔོན་སློབ་ཕན་ཚུན་སྐུ་ཚེ་དུ་མར་བླ་སློབ་ཏུ་འབྲེལ་བའི་བག་ཆགས་སད་དེ་ཐུགས་དད་བཅོས་མིན་དུ་འཁྲུངས་ཤིང་ཡོངས་འཛིན་དུ་བཞེས་པས་སྙན་བརྒྱུད་ཀྱི་བསྟན་པ་ཕྱོགས་བརྒྱར་འཕེལ་བའི་རྟེན་འབྲེལ་གྱི་སྒོ་དང་པོར་བྱེ་སྟེ། དེ་རེས་ཆོས་འབྲེལ་གྱི་ཐོག་མར་སྒྲོལ་དཀར་ཡིད་བཞིན་འཁོར་ལོའི་རྗེས་གནང་གསུང་བཤད་ཤིན་ཏུ་རྒྱས་པ། ཀྱེ་རྡོར་རྒྱུ་དབང་མདོར་བསྡུས་བསྐུར་བའི་ཡུན་ཙམ་གྱི་ཚོད་ཞིག་སྩལ་བས་སྟོན་དང་བསྟན་པ་གཞན་ནས་མི་འཚོལ་བའི་ཐུགས་དད་ཁྱད་པར་ཅན་ཤར། ཤིང་བྱི་ལོར་རྨོར་དུ་གསུང་ངག་རིན་པོ་ཆེ་དང་། འཕགས་སྡེར་བཅོ་
བརྒྱད་པ་དང་། བོང་འབྲུག་ཆོས་རྗེ་སོགས་ལ་རྣལ་འབྱོར་མའི་ཟབ་ཁྲིད་ལུང་བཅས་ཀྱིས་མཚོན་འདོད་ཆོས་རྒྱ་ཆེར་སྩལ། མང་ཐོས་ཆོས་རྗེ་རིན་ཆེན་བཀྲ་ཤིས་ལས་ལྔ་པ་རིན་པོ་ཆེའི་གསུང་རབ་ཕལ་ཆེར་དང་། རྨོར་ཆེན་རྡོ་རྗེ་འཆང་གི་ཞལ་སློབ་གྲུབ་དབང་པ་རྒྱལ་མཚན་ལས་དཀོན་མཆོག་སྤྱི་འདུས་ཀྱི་དབང་ལུང་ཁྲིད་གསུམ་སོགས། ཞྭ་ལུ་པ་རིན་ཆེན་འཇམ་དཔལ་ལས་དུས་འཁོར་སྒྲུབ་ཐབས་རིན་ཆེན་སྙིང་པོ། གནུབས་སྟོན་བློ་བཟང་དོན་གྲུབ་ལས་བྱང་གཏེར་ལྕགས་སྡོང་མ་དང་། རྒྱ་ཅན་དྭང་མ་བཅུད་འདྲེན་གྱི་དབང་ལུང་ཁྲིད་གསུམ་སོགས་ཟབ་ཆོས་མང་དུ་གསན། ཟླ་བ་དགུ་པའི་ནང་གཙང་དུ་ཕེབས་པར། ཡར་ལམ་བཀྲ་ཤིས་ལྷུན་པོར་པཎ་ཆེན་ཐམས་ཅད་མཁྱེན་པ་མཇལ་ཕྱག་དང་། རིམ་གྱིས་འདར་གྲོང་ཆེན་དུ་ཕེབས། རྒྱལ་བའི་བཀའ་འགྱུར་རིན་པོ་ཆེ་ཚལ་པར་ཤིན་ཏུ་ལེགས་པ་སྦྱོར་འཇགས་སུ་སྩལ། ཟླ་བ་བཅུ་པའི་ཚེས་༢༣ལ་དཔལ་ས་སྐྱར་ཆིབས་བསུ་སོགས་བཀུར་བཟོས་ཁྱད་འཕགས་དང་བཅས་ཏེ་འཕྱག་ཕེབས། དམར་ཕྱོགས་མཁའ་འགྲོ་འདུ་བའི་དུས་ཁྱད་པར་ཅན་གྱི་ཉིན་མགོ་བརྩམས་ཏེ་དཔལ་ས་སྐྱ་པ་འཇམ་མགོན་ཀུན་དགའ་བློ་གྲོས་མཆེད་གཉིས་དང་། རྩེ་གདོང་སྤྲུལ་སྐུ་མཁྱེན་རབ་བསྟན་འཛིན་ལྷུན་གྲུབ་སོགས་ལ་གསུང་ངག་རིན་པོ་ཆེ་
སློབ་བཤད་ཀྱི་དབང་བྱིན་རླབས་ལུང་ཁྲིད་བཀའ་བཅས་དང་། ཞར་བྱུང་རྗེས་གནང་ཟུར་བཀའི་རིགས་སོགས་བསམ་གྱིས་མི་ཁྱབ་པ་རིམ་པར་སྩལ་བས་སྙན་བརྒྱུད་བསྟན་པའི་ཉི་མ་ཕྱོགས་བརྒྱར་འཆར་བའི་རྟེན་འབྲེལ་ངང་གིས་འགྲིགས། ཤིང་གླང་རྒྱལ་ཟླའི་ཚེས་བདུན་ནས་བཟུང་རྒྱལ་བའི་བཀའ་འགྱུར་རིན་པོ་ཆེའི་ལྗགས་ལུང་གཙོ་བོར་གྱུར་པའི་བཀའ་ལུང་བསམ་གྱིས་མི་ཁྱབ་པར་སྩལ་བའི། ལོ་དེའི་ཆུ་སྟོད་ཟླ་བ་ཕྱི་མའི་ཚེས་༥ལ་རེ་ཞིག་ཆོས་མཚམས་མཛད་ནས། གདན་ས་ཆེན་པོ་ནས་ཀྱང་ཆོས་ཡོན་གྱི་མཎྜལ་སོགས་བསྙེན་བཀུར་བསམ་གྱིས་མི་ཁྱབ་པ་མཛད། དེ་ནས་གྲོང་ཆེན་ཆོས་འཁོར་ཡང་རྩེར་ཕེབས་ནས་གྲོ་བཞིན་ཟླ་བའི་དཀར་ཕྱོགས་མཁའ་འགྲོ་འདུ་བའི་ཚེས་༡༤ནས་བཟུང་གསུང་ངག་རིན་པོ་ཆེའི་ཆོས་འཁོར་རྒྱ་ཆེར་བསྐོར། འདི་སྐབས་ཡོངས་འཛིན་ཆོས་གྲགས་བཟང་པོ་ལས་དུས་འཁོར་རིགས་ལྡན་ལུགས་ཀྱི་དབང་བཀའ་གསན། གཞན་ཡང་རྟེན་གསུམ་ཉམས་གསོ་གསར་བཞེངས་སོགས་བྱ་བ་ལས་ཀྱི་འཁོར་ལོ་ཀྱང་ཅི་རིགས་པར་མཛད། གྲུབ་ཆེན་ཐང་སྟོང་རྒྱལ་པོས་བྱིན་གྱིས་བརླབས་པའི་གཅུང་རི་བོ་ཆེར་གདན་འདྲེན་ལྟར་ཕེབས་ནས། རིག་འཛིན་བློ་བཟང་སྟོབས་ལྡན་སོགས་ལ་ཤངས་ཆོས་ཀྱི་སྨིན་གྲོལ་ཡོངས་རྫོགས་སོགས་བཀའ་ཆོས་བསམ་
གྱིས་མི་ཁྱབ་པ་སྩལ། རྗེ་གྲུབ་ཐོབ་ཆེན་པོས་བྱིན་གྱིས་བརླབས་པའི་ཐུགས་ཉམས་ཁྱད་པར་ཅན་འཁྲུངས། རི་བོ་ཆེའི་མཁན་ཆེན་དྲུང་ནས་དོན་ཏིག་འགྲོ་བ་ཀུན་གྲོལ་གྱི་དབང་ལུང་ཁྲིད་གསུམ། ཐང་སྟོང་པ་ནས་བརྒྱུད་པའི་བརྒྱད་སྟོང་པའི་བསྡུས་ལུང་། མཁའ་གྲིབ་གླུད། བླ་མའི་རྣལ་འབྱོར། སྤྱན་རས་གཟིགས་སེམས་དཔའ་བཞི་བརྩེགས་ཀྱི་མ་ཎི་བུམ་དབང་། རིལ་བུ་དཀར་དམར་གྱི་ཡིག་སྐོར་སོགས་ཀྱི་ལུང་། བྱང་གཏེར་ཐུགས་རྗེ་ཆེན་པོའི་དབང་ལུང་སོགས་གསན་ཅིང་། ཕར་ཡང་ནཱ་རོ་མཁའ་སྤྱོད་ཀྱི་བྱིན་རླབས་སོགས་སྩལ། མེ་སྟག་ལོར་གཏེར་བདག་གླིང་པའི་དངོས་སློབ་ཀུན་བཟང་ཀློང་གྲོལ་ལས་སྒྲུབ་ཐབས་འདོད་བུམ་གྱི་དབང་རྗེས་གནང་ལུང་བཅས་དང་། གཏེར་གསར་སྐོར་གྱི་དབང་ལུང་ཁྲིད་གསུམ་ཕལ་ཆེར་ཚང་བར་གསན། བཀྲ་བཟང་པ་བླ་ཆེན་ཀུན་བཟང་ཡེ་ཤེས་ལས་མཁའ་འགྲོ་སྙིང་ཏིག་གི་ཁྲིད་ཡིག་ནོར་བུ་ལུགས་བསྡེབས་པའི་ལུང་གསན། གྲོང་ཆེན་ཤིང་མང་གི་འདུ་ཁང་ཉམས་གསོ་སོགས་གནང་། ནག་ཟླའི་ནང་དཔལ་ས་སྐྱར་སླར་ཡང་ཕེབས་ཏེ། འཇིགས་བྱེད་རྭ་ལུགས་ཐུན་མོང་མ་ཡིན་པ་བཅུ་གསུམ་མའི་དབང་ལུང་ཁྲིད་གསུམ་ཆ་ཚང་སོགས་དབང་ཁྲིད་དང་། སྒྲུབ་ཐབས་རྒྱ་མཚོ་སོགས་རྗེས་གནང་དང་མཚན་ཉིད་སྐོར་པུསྟི་
གྲགས་ཆེ་བ་བཅོ་བརྒྱད་སོགས་ལུང་གི་སྐོར་དང་། གསེར་ཆོས་དང་མགོན་པོ་ཆེ་ཆུང་སོགས་སྙན་བརྒྱུད་ཀྱི་སྐོར་བསམ་གྱིས་མི་ཁྱབ་པ་རྗེ་ཉིད་ལ་མངའ་བ་ཕལ་ཆེར་བུམ་པ་གང་བྱོའི་ཚུལ་དུ་གནང་། ས་ཆེན་ཀུན་བློ་ལས་རྡོ་རྗེ་ཕུར་པའི་སྟོད་ལས་དང་། ཡང་དག་ལྷ་དགུ་སོགས་དབང་ལུང་མང་པོ། གཅུང་མཐུ་སྟོབས་དབང་ཕྱུག་ལས་འཇམ་དཔལ་དམར་སེར་གྱི་རྗེས་གནང་། རྗེ་བཙུན་ཀུན་དགའ་བསྟན་པའི་ཉི་མ་ལས་བསམ་གླིང་ཨ་ཏི་སོགས། ཀུན་དགའ་བསྟན་པའི་སྒྲོན་མེ་ལས་དྲག་དམར་མྱང་ལུགས་ཀྱི་དབང་། ཞི་དགོན་མཁན་ཆེན་བསོད་ནམས་དཔལ་བཟང་ལས་བདེ་མཆོག་དང་ཡོ་གའི་སྐོར་རྒྱུན་དཀོན་གྲས་དང་། གཟིམས་ཕུག་སྤྲུལ་སྐུ་བློ་བཟང་བསྟན་འཛིན་མགོན་པོ་ལས་ཏཱ་ར་ནཱ་ཐས་མཛད་པའི་ནི་གུའི་ཁྲིད་ཡིག་དང་། གྲུབ་དབོན་བསྟན་འཛིན་ཕུན་ཚོགས་ཀྱི་རྣམ་ཐར་ཞལ་གསུང་མ། མཁྱེན་བརྩེ་ཕུན་ཚོགས་ཀྱི་ཞལ་བསྐངས་དང་བཅས་པ། མཁན་ཆེན་ཀུན་དགའ་ཟླ་འོད་ལས་རྗེ་རང་ཉིད་ཀྱིས་མཛད་པའི་ཡབ་རྗེ་བསོད་ནམས་རིན་ཆེན་གྱི་རྣམ་ཐར། དྲུང་ཡིག་ཀུན་དགའ་སངས་རྒྱས་ལས་སྒྲ་མདོ་པཱ་ཎི་པའི་ཕྱག་ཁྲིད་སོགས་གསན། དེ་ནས་བཀྲ་ཤིས་ཆོས་སྡིང་ཞེས་པའི་བཙུན་དགོན་གསར་བསོད་ནམས་ཆོས་འཕེལ་གྱི་ཞལ་སློབ་བཙུན་མ་རྣམས་ཀྱི་རྟེན་གཞི། མའི་དགོན་པ་གསར་འདེབས་
མཛད་པར་འཕྱག་ཕེབས་ཤིང་གང་ཅིར་བཀའ་དྲིན་ཆེན་པོས་ཁྱབ་པར་མཛད་ཅིང་། དམག་ཟོར་མར་གཉེར་དུ་གཏད་པས་ཤིན་ཏུ་འགོ་བའི་མཚན་མའང་སྣང་། གྲོང་ཆེན་དུ་ཕེབས་ནས་གྲུབ་དབང་ཀུན་བཟང་ཀློང་གྲོལ་ལས་མཁའ་འགྲོ་སྙིང་ཏིག་གི་དབང་ལུང་སྨིན་ཁྲིད་དང་། གཡུ་ཐོག་སྙིང་ཏིག་གི་སྨིན་གྲོལ་སོགས་རྒྱ་ཆེར་གསན། མུས་ཆེན་ལས་གཅོད་ཐང་སྟོང་སྙན་བརྒྱུད་སྐོར་གསན། དེ་དག་གི་སྐབས་དུད་སོལ་མས་ཞལ་བསྟན་པ་དང་། མ་གཅིག་གིས་བྱིན་གྱིས་བརླབས་པའི་གཟིགས་སྣང་སོགས་བྱུང་། མེ་ཡོས་ཟླ་བ་གཉིས་པར་དབུས་ཕྱོགས་སུ་འཕྲལ་དུ་ཕེབས་ཤིང་། ཆོས་ཀྱི་ཕྲིན་ལས་སྤྱི་དང་། སོག་ཡུལ་ཧ་ལ་ཤན་གྱི་བླ་དཔོན་ཟུང་འབྲེལ་ཐོ་ཡོན་དར་རྒྱས་ལ་དབང་ལུང་མང་དུ་གནང་ཞིང་། ཕྱོགས་དེར་གདན་འདྲེན་ཞུས་ཀྱང་ཕེབས་པའི་ཞལ་བཞེས་མ་གནང་། དེ་ནས་ཡར་ཀླུང་དུ་ཕེབས་ནས་འབྲུག་ལོར་བཅད་རྒྱའི་ཐོག་བཅོ་བརྒྱད་གདུང་བརྒྱུད་རིན་པོ་ཆེ་དང་། བོང་འབྲུག་ཆོས་རྗེ་སོགས་ལ་ཟབ་རྒྱས་ཀྱི་ཆོས་འཁོར་བསམ་གྱིས་མི་ཁྱབ་པ་བསྐོར། བཅོ་བརྒྱད་གདུང་བརྒྱུད་རིན་པོ་ཆེ་འཇམ་དབྱངས་མཁྱེན་བརྩེའི་ཡང་སྲིད་ངོས་བཟུང་ཞིང་ཤིན་ཏུ་ཐུགས་མཉེས་པར་མཛད། ས་སྦྲུལ་ཕལ་ཆེར་བཅད་རྒྱ་དང་། རྨོར་དུ་ཕེབས་ཤིང་རྨོར་ཆེན་རིན་པོ་ཆེའི་ཟླ་མཆོད་
བཙུགས། ལྕགས་རྟ་ལོར་ཤེའུ་གྲོང་དུ་རྣལ་འབྱོར་མའི་བཀའ་ཆོས་སྩལ་ཞིང་རྨོར་ཆེན་རིན་པོ་ཆེའི་དགོངས་རྫོགས་རྣལ་འབྱོར་མའི་སྒྲུབ་མཆོད་སོགས་བཙུགས། ལྕགས་ལུག་ལོར་རྒྱལ་དབང་བདུན་པ་རིན་པོ་ཆེར་ཞབས་བརྟན་འབུལ་བ་དང་། ཕྱག་རྡོར་འཁོར་ཆེན་གྱི་བཀའ་དབང་གསན། བཅོ་བརྒྱད་པ། བོང་འབྲུག་པ། ཞི་བ་ལྷ་སོགས་ལ་གྲུབ་ཆོས་མང་བ་དང་། འཕན་ཡུལ་བཅོ་བརྒྱད་པས་གདན་དྲངས་པ་བཞིན་ཕེབས་ནས་སྒྲུབ་ཐབས་རྒྱ་མཚོའི་རྗེས་གནང་སོགས་སྩལ། ལོ་སྔ་ཕྱི་འདི་ལ་ཚོགས་གསོག་ཀྱང་རྒྱ་ཆེར་གནང་། དེ་ནས་ལྷ་ལྡན་དང་འོན་ཆོས་སྡིང་སོགས་བརྒྱུད་གདན་སར་ཕེབས། ཆུ་སྤྲེལ་ཆོ་འཕྲུལ་ཟླ་བར་གཙང་ཕྱོགས་སུ་ཆིབས་ཁ་བསྒྱུར་ནས་གནས་གཟིགས་དང་བསྟུན་རིམ་གྱིས་གྲོང་ཆེན་དུ་ཕེབས། ས་ག་ཟླ་བར་དཔལ་ས་སྐྱར་ཞབས་པད་བཀོད་དེ། འཇམ་མགོན་སྐུ་མཆེད་དང་། ཞི་དགོན་བསོད་ནམས་དཔལ་བཟང་དང་། སྐལ་བཟང་རྣམ་གྲོལ་སོགས་ལ་ངོར་ཆེན་བཀའ་འབུམ་པོད་བཞི་མ་སོགས་ལུང་དང་། གཤེད་དམར་སྤྲོས་མེད་དང་། ཤངས་ཆོས་ཡོངས་རྫོགས་སོགས་ཟབ་རྒྱས་ཀྱི་ཆོས་འཁོར་མཐའ་ཀླས་པ་བསྐོར། སླར་གྲང་ཆེན་དུ་ཕེབས་ནས་མུས་ཆེན་དང་། རྫོང་རམ། ངག་དབང་ཤེས་རབ་སོགས་ལ་ཆོས་དང་ཟང་ཟིང་གི་ལེགས་ཚོགས་རྒྱ་
ཆེར་སྤེལ། ཐ་སྐར་ཟླ་བར་ལ་སྟོད་དིང་རི་གླང་འཁོར་དུ་ཆེད་གཏད་ཀྱིས་ཕེབས་ནས། གླང་འཁོར་གདན་ས་པ་འཆི་མེད་ཀྱི་དངོས་གྲུབ་བརྙེས་པ་འཆི་མེད་གཞོན་ནུ་བློ་གྲོས་ཀྱི་སྤྱན་སྔར་ཞི་བྱེད་བརྒྱུད་པ་ཕྱི་མའི་སྐོར་གྱི་དབང་དང་ཁྲིད་སྐོར་ཚང་མ་དང་། རིག་པ་གཅེར་མཐོང་གི་ཉམས་ཁྲིད་གསན་ཅིང་། ལུང་སྐོར་ཆོས་མཛད་སྐལ་བཟང་རྣམ་གྲོལ་ནས་གསན་པར་བཞག་སྟེ་སླར་གསན་བཞེས་གནང་། རི་བོ་ཆེ་བརྒྱུད་གྲོང་ཆེན་དུ་ཕེབས། ཛ་ལུང་རྡོ་རྗེ་འཛིན་པ་ལས་རིག་འཛིན་སྲོག་སྒྲུབ་ཀྱི་དབང་ལུང་ཆ་ཚང་སོགས་གསན། གཞན་ཡང་འཁོར་ལོ་གསུམ་གྱི་མཛད་བཟང་གོང་འཕེལ་དུ་གནང་། ལོ་ཕྱི་མའི་ཆུ་སྟོད་ཟླ་བར་སླར་དཔལ་ས་སྐྱར་ཕེབས་ནས་ཐར་རྩེ་རྡོ་རྗེ་འཆང་དང་ཞལ་རྒྱས་སུ་མཛད་ཅིང་ཏྲཀཱད་ཀྱི་རྗེས་གནང་གསན། འཇམ་མགོན་སྐུ་མཆེད་སོགས་ལ་ངག་དབང་ཆོས་གྲགས་ཀྱི་ལམ་འབྲས་སྐོར་དང་། ངག་དབང་བསྟན་རྡོར་གྱི་ལམ་འབྲས། ཀུན་མཁྱེན་ཀློང་ཆེན་པའི་སེམས་ཉིད་ངལ་བསོ་རྩ་འགྲེལ་སོགས་ངལ་བསོ་སྐོར་གསུམ། ཁྱད་པར་མགོན་པོ་བེང་གི་སྐོར་ཡོངས་སུ་རྫོགས་པ་དང་། གཞན་ཡང་སྨིན་གླིང་གཏེར་གསར་ཕལ་ཆེར་དང་། སྒྲུབ་ཐབས་འདོད་བུམ་སོགས་རྒྱ་ཆེར་སྩལ་བ་སྟེ་འདི་ནི་ས་སྐྱར་ཕེབས་པའི་ཐ་མའོ། །དེ་ནས་གྲོང་ཆེན་བརྒྱུད་རིམ་
གྱིས་རྒྱལ་ཟླའི་ཚེས་བཅུ་བཞི་ནས་དབུས་སུ་ཆིབས་ཁ་བསྒྱུར། འཕགས་སྡེར་འདུ་ཁང་ཞིག་གསོའི་ཞལ་འདེབས་གནང་། ལྷ་ལྡན་དུ་རྒྱལ་དབང་རིན་པོ་ཆེར་མཇལ་ཕྱག་གནང་ཞིང་དགྱེས་པའི་བཀའ་ལུང་གིས་དབུགས་དབྱུང་། དེ་ནས་བཀྲས་ཆོས་སུ་ཕེབས། ཤིང་ཁྱི་ཟླ་བ་བཞི་པར་ནཱ་ལེནྡར་སྤྱན་དྲངས་པ་བཞིན་ཕེབས་ཏེ། བཅོ་བརྒྱད་བླ་བྲང་གི་ཞལ་ངོ་རྣམས་དང་། བོང་འབྲུག་རིན་པོ་ཆེ། སྐྱིད་ཚལ་ཆོས་རྗེ་སོགས་རིགས་པར་སྨྲ་བའི་བཤེས་གཉེན་མང་པོར་གསུང་ངག་༧༽རིན་པོ་ཆེའི་ཆོས་འཁོར་རྒྱས་པར་བསྐོར་ཏེ། གསུང་ངག་གནང་བའི་ཐ་མའོ། །སླར་ལྷ་ལྡན་བརྒྱུད་དེ་བཀྲས་ཆོས་སུ་ཕེབས་ནས་ཕལ་ཆེར་བཅད་རྒྱ་ཁོ་ནར་བཞུགས་མུར། མཁན་ཆེན་ངག་དབང་ཤེས་རབ་དང་། ཞི་བ་ལྷ་སྤྲུལ་པའི་སྐུ་སོགས་ལ་གསུང་ཆོས་ཅི་རིགས་པའང་སྩལ། ཤིང་ཕག་སྟོན་མཇུག་ས་སྐྱ་ནས་འཇམ་མགོན་སྐུ་མཆེད་དབུས་སུ་ཕེབས་པ་དང་བཀྲས་ཆོས་སུ་ཞལ་འཛོམ་གྱི་ཐོག་བསྙེན་བཀུར་སོགས་ངོ་མཚར་གྱི་མཛད་པ་གོང་འཕེལ་དུ་སྩལ། མེ་བྱི་ལོར་ལྷ་ལྡན་དུ་ཕེབས་ནས་གོང་ཞབས་རིན་པོ་ཆེར་ཞབས་བརྟན་ལེགས་འབུལ་དང་། ཚལ་ནས་རིག་འཛིན་ངག་དབང་པདྨ་དང་། དགེ་སློང་འགྱུར་མེད་ཆོས་འཕེལ་གཉིས་གདན་འདྲེན་མཛད་ནས་བླ་མ་ཞང་གི་ཟབ་རྒྱའི་སྐོར་གྱི་དབང་ལུང་ཆ་
ཚང་། དགེ་སློང་བློ་བཟང་བསོད་ནམས་ལས་ལྔ་པ་རིན་པོ་ཆེའི་བཀའ་འབུམ། བཀའ་ཆེན་ཐབས་མཁས་རྒྱ་མཚོ་ལས་རྗེའི་ལམ་རིམ་གཉིས། རིག་འཛིན་པདྨ་བདེ་ཆེན་ལས་མི་བསྐྱོད་དཀོན་མཆོག་ལྷུན་གྲུབ་མའི་རྣམ་ཐར་སོགས་གསན། ཟླ་བ་བཅུ་པའི་ཚེས་བཅུ་ལ་ཤེའུ་གྲོལ་གསང་སྔགས་གླིང་གི་ཆོས་ཁྲིར་ཞབས་བཀོད། མེ་གླང་ལོར་རྨོར་ཆེན་རིན་པོ་ཆེའི་གདན་ས་སྨོན་དགའ་རིན་ཆེན་བསམ་གཏན་གླིང་སེང་གེའི་ཁྲིར་མངའ་གསོལ། དེའི་ས་ག་ཟླ་བར་བདུད་རྩི་རིལ་བུ་བསྒྲུབ་གནང་དང་། སྣོན་ཟླར་རིག་འཛིན་ཚེ་དབང་བཀྲ་ཤིས་ལས་གཏེར་ཆེན་སངས་རྒྱས་གླིང་པའི་གཏེར་ཆོས་བླ་མ་དགོངས་པ་འདུས་པའི་དབང་ལུང་ཆ་ཚང་དང་། འཇའ་ཚོན་པའི་གཏེར་ཆོས་ཕལ་ཆེར་སོགས་གསན། སྟོན་མཇུག་ས་སྐྱ་ནས་གཅུང་རིན་པོ་ཆེ་དག་ཞིང་དུ་གཤེགས་སྐབས་འཇམ་མགོན་ཀུན་བློར་གདུང་སྤེལ་དགོས་ཚུལ་གྱི་གསོལ་འདེབས་མཛད་པས་གངས་ཅན་བསྟན་འགྲོའི་ལེགས་ཚོགས་ཀྱི་རྩ་བ་ཚུགས། ལྷ་ལྡན་དུ་ལྕང་སྐྱ་རིན་པོ་ཆེར་ཆོས་ཀྱི་འབེལ་གཏམ་མང་དུ་གནང་བས་ཐུགས་དགྱེས་པའི་པདྨོ་བྱེ། གཏེར་ཆེན་ཀུན་བཟང་བདེ་ཆེན་རྒྱལ་པོ་ལས་རྩ་གསུམ་བཀའ་འདུས་རྒྱུད་ཀྱི་ལུང་དང་། བཅོ་བརྒྱད་སྐུ་གཞོན་བསྙེན་པར་རྫོགས་ཤིང་མཚན་ངག་དབང་ཀུན་དགའ་མཁྱེན་
རབ་སངས་རྒྱས་བསྟན་པའི་རྒྱལ་མཚན་དུ་གསོལ། རིག་འཛིན་སྐལ་བཟང་རྣམ་གྲོལ་ལས། དག་སྣང་རྒྱ་ཅན་སྐོར། ཞི་བྱེད་ལུང་སོགས། གྲུབ་ཆེན་བློ་བཟང་གར་དབང་ལས་གཏེར་ཆེན་འཛམ་གླིང་རྡོ་རྗེ་ནས་བརྒྱུད་པའི་ཁྱབ་འཇུག་ཆེན་པོའི་སྐོར་སོགས་གསན། བཀའ་ཆོས་འཆད་སྤེལ་རྒྱུན་མི་འཆད་པར་གནང་། ས་སྟག་ལོར་ཤེའུ་གྲོང་དུ་ཕེབས་ཤིང་། ལྷ་ལྡན་དུ་རྒྱལ་ཚབ་རིན་པོ་ཆེར་རྐྱེན་སེལ་གྱི་དབང་བཀའ་དང་། མགོན་པོ་བྲག་རྫོང་མའི་རྗེས་ཁྲིད་སོགས་ཕུལ། ལྕང་སྐྱ་རིན་པོ་ཆེ་ཐོན་ཕྱག་ཕུལ་ཞིང་ཐུགས་དགྱེས་པའི་རྩེར་སོན། དགུན་ལོར་སྡེ་དགེ་དུས་འཁོར་བླ་མ་ཕྲིན་ལས་པ། བོང་འབྲུག་པ། ཞབས་འབྲིང་དགེ་སློང་ངག་དབང་འཇམ་དབྱངས་སོགས་ལ་དུས་འཁོར་གྱི་དབང་ལུང་རྒྱས་པར་སྩལ། ལྷ་ལྡན་དུ་རྒྱལ་ཚབ་རིན་པོ་ཆེར་བཀའ་ཆོས་འགའ་ཞིག་ཕུལ་ཅིང་། གཞན་ཡང་དོན་གཉེར་ཅན་ཅི་རིགས་པར་སྙིང་ཏིག་ཆེན་མོ་བཀའ་ཆོས་རྒྱ་ཆེར་སྩལ། མང་ར་མཁན་ཟུར་ལས་ཆོས་རྗེ་གླིང་པའི་ཕྱག་རྡོར་སེང་སྒྲོག་གི་རྗེས་གནང་སོགས་དང་། རྩོད་བྲལ་དུས་བབས་ཀྱི་གཏེར་ཆེན་ཐེག་ཆེན་གླིང་པ་གར་དབང་ལས་རབ་རྩལ་ལས་ཉིད་ཀྱི་གཏེར་ཆོས་ཕལ་ཆེར་གྱི་དབང་ལུང་གསན་པ་སོགས་དང་། ཕ་བོང་ཁ་མཁན་པོ་སོགས་ལ་རྣལ་འབྱོར་མའི་སྐོར་དང་། བོང་འབྲུག་
ཆོས་རྗེ་བསྙེན་པར་རྫོགས་ཤིང་མཚན་མཁྱེན་རབ་ངག་དབང་བློ་གསལ་ཕུན་ཚོགས་སུ་གནང་ངོ་། །མདོར་ན་བདག་ཉིད་ཆེན་པོ་འདི་ནི་རང་དོན་དུ་གསན་བསམ་སྒོམ་གསུམ་མཐར་སོན་ནས། གཞན་དོན་དུ་འཆད་རྩོད་རྩོམ་གསུམ་གྱིས་ཐུབ་བསྟན་ཉིན་མོར་མཛད་པའི་རྣམ་ཐར་འགྲན་ཟླ་དང་བྲལ་བ་སྟེ། དེ་ཡང་སྔར་སྨོས་པ་ལྟར་གཙོ་བོར་རྨོར་ཆེན་རྡོ་རྗེ་འཆང་ཀུན་དགའ་ལྷུན་གྲུབ་ཉིད་རྩ་བའི་བླ་མ་གཅིག་པུར་བཟུང་ནས། དེའི་ཐུགས་སྲས་འཕགས་སྡེ་མཁན་ཆེན་ངག་དབང་བློ་གསལ། བསམ་ཡས་བཀའ་འགྱུར་བ་སངས་རྒྱས་རྒྱལ་མཚན། གྲུབ་དབང་ཀུན་དགའ་ཚུལ་ཁྲིམས། ཁམ་སྟོན་སངས་རྒྱས་རྒྱ་མཚོ། འཁོར་ལོ་སྡོམ་པ། ཆོས་འཁོར་སློབ་དཔོན་ཀུན་དགའ་བསམ་གཏན། འཇིགས་བྱེད་གྲུབ་བརྙེས་བཀྲ་ཤིས་ཆོས་སྡེའི་སློབ་དཔོན་བསོད་ནམས་སྣང་བྱེད། གྲུབ་དབང་པདྨ་རྒྱལ་མཚན། རིག་འཛིན་སྐལ་བཟང་རྣམ་གྲོལ། རྟོགས་པའི་མངའ་བདག་པུ་ཏྲག་བླ་མ་ལེགས་པ་དོན་གྲུབ། རྟ་མགྲིན་གྲུབ་བརྙེས་སློབ་དཔོན་ངག་དབང་གྲགས་པ། མང་ར་མཁན་པོ་བློ་བཟང་དགེ་འདུན། མཁས་བཙུན་དམ་པ་གངས་ཅན་མཁན་པོ་ངག་དབང་རབ་བརྟན། འཕགས་སྡེ་བ་བསྟན་པ་རྒྱལ་མཚན། དགོན་གསར་སློབ་དཔོན་བསྟན་འཛིན་བཟང་པོ། འཚོ་བྱེད་ངག་
དབང་དོན་གྲུབ་སྟེ་རྨོར་ཆེན་རྡོ་རྗེ་འཆང་ཡབ་སྲས་བཅུ་དྲུག་དང་། གཞན་ཡང་ཡབ་རྗེ་བསོད་ནམས་རིན་ཆེན། རྗེ་བཙུན་མཁའ་སྤྱོད་དབང་མོ། གྲུབ་སྒྲོ་ལུང་པ་བསོད་ནམས་ཆོས་འཕེལ། བླ་ཆེན་དཀོན་མཆོག་རྒྱལ་པོ། གོང་དཀར་ཆོས་རྗེ་བློ་གྲོས་དབང་ཕྱུག །ངོར་ཆེན་བཀྲ་ཤིས་ལྷུན་གྲུབ། ཐར་རྩེ་ནམ་མཁའ་བསམ་འགྲུབ། འཇམ་མགོན་དཔལ་ལྡན་ཆོས་སྐྱོང་། ཆོས་རྗེ་བཀྲ་ཤིས་བཟང་པོ། བླ་མ་ནམ་མཁའ་དཔལ་བཟང་། བླ་མ་ཀུན་དགའ་བསྟན་འཛིན། ཆོས་རྗེ་བསྟན་འཛིན་ཕུན་ཚོགས། ས་སྐྱ་པ་ངག་དབང་ཀུན་དགའ་བློ་གྲོས་སྐུ་མཆེད། རྗེ་བཙུན་བསོད་ནམས་བསྟན་པའི་ཉི་མ། མཆོག་གསུམ་ཕྲིན་ལས་དབང་མོ། རབ་བྱུང་མཁན་པོ་བཟོད་པ་འོད་ཟེར། དཔོན་ཡིག་པ་ཀུན་དགའ་སངས་རྒྱས། ཞེ་དགོན་མཁན་ཆེན་བསོད་ནམས་དཔལ་བཟང་། གཟིམས་ཕུག་སྤྲུལ་སྐུ་བློ་བཟང་བསྟན་འཛིན་མགོན་པོ། གཟིམས་འོག་སྤྲུལ་སྐུ་སངས་རྒྱས་བསྟན་འཛིན། བོད་འབྲུག་ཆོས་རྗེ་བློ་གསལ་ཕུན་ཚོགས་ཏེ་དཔལ་ས་སྐྱ་པའི་བསྟན་འཛིན་ཆེན་པོ་ཉེར་གཉིས། རྒྱལ་དབང་བདུན་པ་རིན་པོ་ཆེ་སྐལ་བཟང་རྒྱ་མཚོ། ཁྲི་ཆེན་ངག་དབང་མཆོག་ལྡན། རྒྱལ་སྲས་སྤྲུལ་སྐུ་འཇིགས་མེད་གྲགས་པ། ཞི་བ་ལྷ་འཕགས་པ་དགེ་ལེགས་རྒྱལ་མཚན། འབྲས་སྤུངས་བཀའ་འགྱུར་བ་
རིན་ཆེན་དམ་ཆོས། བཀའ་འགྱུར་བ་ཐབས་མཁས་རྒྱ་མཚོ་སྟེ་དགའ་ལྡན་པའི་བསྟན་འཛིན་ཆེན་པོ་དྲུག །གྲུབ་དབང་ཀུན་བཟང་ཀློང་གྲོལ། ཐུགས་སྲས་སྤྲུལ་སྐུ་མཆོག་གྲུབ་དཔལ་འབར་། ཀཿཐོག་རིག་འཛིན་ཚེ་དབང་ནོར་བུ། དཔལ་ཡུལ་བ་པདྨ་ནོར་བུ། ཟུར་ཕྲིན་ལས་བློ་ལྡན། གླན་སྟོན་འོད་གསལ་རང་གྲོལ། གར་དབང་ལས་རབ་རྩལ། ཀུན་བཟང་བདེ་ཆེན་རྒྱལ་པོ། རིག་འཛིན་ཚེ་དབང་བཀྲ་ཤིས། གནུབས་སྟོན་བློ་བཟང་དོན་གྲུབ། སྔགས་འཆང་རིན་ཆེན་བཀྲ་ཤིས། རྡོར་འཛིན་བློ་བཟང་བསོད་ནམས། གྲུབ་དབང་པདྨ་བདེ་ཆེན། གྲུབ་དབང་རྣམ་སྲས་རྒྱལ་པོ་སྟེ་གསང་ཆེན་རྙིང་མའི་བསྟན་འཛིན་བཅུ་བཞི། མཚུར་ཕུའི་བླ་ཆེན་ཏྲེ་བོ་གོང་མ། སི་ཏུ་རིན་པོ་ཆེ་ཆོས་ཀྱི་འབྱུང་གནས། འབྲུག་པ་ཐམས་ཅད་མཁྱེན་པ་བཀའ་བརྒྱུད་ཕྲིན་ལས་ཤིང་རྟ། རི་བོ་ཆེའི་མཁན་ཆེན་བློ་བཟང་སྟོབས་ལྡན། གྲུབ་རིགས་ངག་དབང་ཡོངས་གྲགས། ལྕགས་ཟམ་པ་བློ་བཟང་དཔལ་གྲུབ། གླང་འཁོར་པ་འཆི་མེད་གཞོན་ནུ་བློ་གྲོས། གྲུབ་དབང་ངག་དབང་པདྨ། དགེ་སློང་འགྱུར་མེད་ཆོས་འཕེལ། ཞྭ་ལུ་བླ་ཆེན་ཐུགས་རྗེ་བརྩོན་འགྲུས་དང་། རིན་ཆེན་འཇམ་དཔལ་ཆོས་མཆོག །སྤོ་ར་དབུ་ཆེན་ཆོས་གྲགས་བཟང་པོ། གྲུབ་མཆོག་བློ་བཟང་གར་དབང་། སྡེ་
བཞི་འཚོ་བྱེད་ཆེན་པོ་སྟེ་གྲུབ་མཐའ་རིས་མེད་གསན་པའི་བླ་མ་བཅུ་བཞི་སྟེ་བསྡོམས་པས་བདུན་ཅུ་རྩ་གཉིས་དང་། གཞན་ཡང་ཕྱག་ཆེན་དང་རིག་གནས་སྐོར་གསན་སྦྱངས་དོགས་གཅོད་མཛད་པའི་ཡོངས་འཛིན་མང་པོ་སོགས་མཁས་གྲུབ་ཀྱི་བླ་མ་བསམ་གྱིས་མི་ཁྱབ་པ་བསྟེན་ཏེ། མདོ་སྔགས་གསར་རྙིང་རིག་གནས་དང་བཅས་པ་གངས་ཅན་གྱི་ལྗོངས་སུ་བཞུགས་པ་ཕལ་མོ་ཆེའི་དབང་ཁྲིད་མན་ངག་ལུང་སོགས་མང་དུ་གསན་པ་རྒྱ་མཚོའི་མཐར་སོན་ཅིང་། དེ་ཡང་གསན་ལོ་ཙམ་དུ་མ་བཞགས་པར། གཙོ་བོར་སོ་བྱང་སྔགས་གསུམ་གྱི་སྡོམ་པའི་སྲུང་མཚམས་ལས་ནམ་ཡང་མི་འདའ་བའི་ཚུལ་ཁྲིམས་ཀྱི་བསླབ་པའི་ཀུན་སྤྱོད་རྣམ་པར་དག་པས་གཞི་བཟུང་། གྲུབ་མཐའ་སོ་སོའི་ཚིག་གི་བཤད་ཚུལ། དོན་གྱི་དགོངས་པ། ཕྱག་ལེན་ཕྲ་མོ་ཚུན་ཆོད་ཀྱང་བསམ་བྱུང་གི་ངེས་པས་སྒྲོ་འདོགས་བཅད་པས་ཇི་བཞིན་དུ་མཁྱེན་ཅིང་གཟིགས་ཤིང་། ཟབ་ལམ་ཀུན་གཞིའི་རྣལ་འབྱོར་ལས་ནམ་ཡང་མི་གཡོ་བའི་རྒྱུན་དང་། དབེན་པའི་གནས་རྣམས་སུ་དུས་དང་དུས་སུ་དཔལ་དགེས་པ་རྡོ་རྗེ། རྡོ་རྗེ་རྣལ་འབྱོར་མ། རྡོ་རྗེ་འཇིགས་བྱེད། ཆོས་སྐྱོང་མ་ཧ་ཀ་ལ་སོགས་ཡི་དམ་ཆོས་སྲུང་རྒྱ་མཚོའི་བསྙེན་སྒྲུབ་དང་། བསྐྱེད་རྫོགས་ཟབ་མོའི་རྣལ་འབྱོར་ཚུལ་བཞིན་དུ་ཉམས་སུ་བཞེས་པས་ཉམས་
རྟོགས་ཀྱི་ཡོན་ཏན་བསམ་གྱིས་མི་ཁྱབ་པ་འཁྲུངས་ཤིང་། ཨོ་རྒྱན་ཆེན་པོ་དང་། མཁས་གྲུབ་ཁྱུང་པོ། གྲུབ་ཆེན་ཐང་སྟོང་པ་སོགས་ཀྱིས་དངོས་ཉམས་མནལ་ལམ་གྱི་ཚུལ་དུ་བྱིན་གྱིས་བརླབས་ཤིང་། བཅོམ་ལྡན་འདས་རྡོ་རྗེ་འཇིགས་བྱེད། སངས་རྒྱས་སྨན་གྱི་བླ་མ། འཕགས་མཆོག་སྤྱན་རས་གཟིགས་སོགས་མནལ་ལམ་གྱི་ཚུལ་དུ་ཞལ་གཟིགས། བཅོམ་ལྡན་འདས་འཁོར་ལོ་བདེ་མཆོག་ཛོ་ཀིའི་ཚུལ་གྱིས་རྗེས་སུ་བཟུང་བ་དང་། ཁྱད་པར་རྒྱལ་ཡུམ་རྡོ་རྗེ་རྣལ་འབྱོར་མས་དངོས་ཉམས་མནལ་ལམ་དུ་ཡང་ཡང་རྗེས་སུ་བཟུང་ཞིང་། རྡོ་རྗེའི་ཆོས་སྲུང་རྒྱ་མཚོ་བྲན་བཞིན་དུ་བཀའ་ཉན་པ་དང་། ལྐོག་གྱུར་གནས་དུ་མ་དང་། ཕ་རོལ་གྱི་སེམས་ཤེས་པ་དང་། ཞི་རྒྱས་དབང་དྲག་གི་ལས་རབ་འབྱམས་གང་ལའང་དགོངས་པ་གཏོད་པ་ཙམ་གྱིས་འགྲུབ་པས་མཚོན་ཐུན་མོང་གི་སྣང་ངོར་ཀྱང་འཕགས་ལམ་གྱི་གོ་འཕང་མཐོན་པོར་གཤེགས་པའི་ངོ་མཚར་གྱི་ཡོན་ཏན་རྒྱ་མཚོ་ལྟ་བུ་ལ་དབང་འབྱོར་པ་ལ་བརྟེན་ནས་གཞན་དོན་ཕྲིན་ལས་ཀྱི་རིམ་པ་དང་། འཆད་པའི་དབང་དུ་བྱས་ན། ཟང་ཟིང་དང་སྙན་གྲགས་ལ་སོགས་པའི་ཀུན་སློང་ཐམས་ཅད་རིང་དུ་དོར་ནས། གཅིག་ཏུ་བསྟན་པ་དང་སེམས་ཅན་ལ་ཕན་ན་སྐུ་སྲོག་ཀྱང་འདོར་བ་ལ་ཞུམ་པ་མེད་པའི་ལྷག་བསམ་ཁྱད་པར་
ཅན་གྱིས། མདོ་རྒྱུད་བསྟན་བཅོས་དང་སྨིན་གྲོལ་རྗེ་ཉིད་ཀྱིས་གསན་པ་ལས། ལམ་འབྲས་ཚར་བདུན་གྱིས་མཚོན་ཕལ་ཆེར་ལན་གྲངས་དུ་མ་དང་། ཐ་ནའང་ལན་རེར་མ་འཆད་པ་མེད་པ་ལྟ་བུ་དང་། དེ་ཐམས་ཅད་ཀྱང་སླ་བཅོས་དང་། རིགས་འགྲེ་དང་། མི་འོས་པའི་རུང་མཐུན་སྦྱར་བ་སོགས་རང་བཟོའི་དྲི་མ་ཕྲ་མོ་ཙམ་དང་ཡང་བྲལ་ཞིང་། ཕྱག་ལེན་ཕྲ་རགས་ཐམས་ཅད་རང་རང་གི་ལུགས་སྲོལ་མ་འདྲེས་པའི་སྒོ་ནས་ཚིག་དོན་མཐའ་ཆོད་པར་གནང་བས་དཔྱོད་ལྡན་ཐམས་ཅད་ཡིད་དབང་མེད་དུ་འཕྲོག་པར་མཛད། རྩོད་པའི་ཚུལ་ཡང་། སྤྱིར་སྐུ་ཚེ་དུ་མར་མཁས་པའི་སྐྱེ་བ་བརྒྱུད་མར་བཟུང་བ་དང་། ཁྱད་པར་འཕགས་ཡུལ་དུ་རྟོག་གེ་པ་ཐམས་ཅད་ཀྱི་གཙུག་གི་ནོར་བུ་དཔལ་ཆོས་ཀྱི་གྲགས་པར་སྐྱེ་བ་བཞེས་པའི་བག་ཆགས་ཀྱིས་སྐུ་ཚེ་འདིར་ཚད་མ་མ་བསླབ་པ་ཕུལ་དུ་ཕྱིན་པ་མཁྱེན་ཅིང་། གཞུང་ལུགས་དུ་མའི་འགལ་འབྲེལ་དཔྱོད་ལ་སྤོབས་པའི་གཏེར་མཛོད་གྲོལ་བར་གྱུར་ཀྱང་། སྐབས་སུ་བབས་པ་རེ་གཉིས་ཙམ་ལས་སྙིགས་མའི་དུས་ཀྱི་གཞན་དབང་གིས་ཆགས་སྡང་གི་རྒྱུར་འགྱུར་དོགས་དགག་སྒྲུབ་ཀྱི་སྤྲོས་པ་ཆེར་མི་མཛད། བརྩམས་པའི་དབང་དུ་བྱས་ན། ཐོས་བསམ་གྱི་རིམ་པ་མཐར་སོན་ཅིང་ལྷག་པའི་ལྷས་རྗེས་སུ་བཟུང་བ་སོགས་རྩོམ་པའི་རྒྱ་གསུམ་ཐམས་
ཅད་ཚང་མ་བསྟན་བཅོས་ཇི་ལྟ་བུ་ཞིག་རྩོམ་ཀྱང་ཐོགས་པ་མི་མངའ་མོད། བླ་མ་གོང་མ་རྡོ་རྗེ་འཆང་དང་ཞལ་མི་གཉིས་པ་དེ་རྣམས་ཀྱི་ལེགས་པར་བཤད་པའི་རྒྱུན་ལ་གནོད་དོགས་གསུང་རྩོམ་རྒྱུ་ཆེར་མ་མཛད་ཀྱང་། ཞུ་བ་པོ་སོ་སོའི་བློ་དང་མཐུན་པར་བཀའ་རྩོམ་ཕྲན་བུ་གནང་བ་ལ། དུས་འཁོར། བླ་མ་ཞི་ཁྲོའི་ཚེ་དབང་། གསོ་རིག་རྒྱུད་བཞི་རྣམས་ཀྱི་བརྒྱུད་འདེབས། གསུང་ངག་རིན་པོ་ཆེ། འཇིགས་བྱེད་དབང་བརྒྱུད་ལུགས་གསུམ། སྨིན་ཁྲིད་ཚེམ་བུ་ལུགས། ནཱ་རོ་མཁའ་སྤྱོད། གུར་ཞལ་རྣམས་ཀྱི་བརྒྱུད་འདེབས་ཀྱི་ཁ་སྐོང་། སྒྲོལ་མའི་གསོལ་འདེབས། རྨོར་ཆེན་མཆོག་སྤྲུལ་མྱུར་ཕེབས། ཡབ་རྗེ་བསོད་ནམས་རིན་ཆེན། བཅོ་བརྒྱད་པ་ཁྱབ་བདག་མཚན་ཅན། ངོར་ཆེན་བཀྲ་ཤིས་ལྷུན་གྲུབ། བསམ་ཡས་ས་ཕུག་པ་ཀུན་དགའ་ཚུལ་ཁྲིམས། ཁམ་ལ་སྟོན་པ་སངས་རྒྱས་རྒྱ་མཚོ། བླ་མ་ལྕགས་ཟམ་པ་རྣམས་ཀྱི་གསོལ་འདེབས། རྗེ་ཉིད་ཀྱི་འཁྲུངས་རབ་དང་རྣམ་ཐར་གསོལ་འདེབས། སྐུ་བསྟོད་བརྟན་བཞུགས་དང་བཅས་པ་སུམ་ཅུ་རྩ་གྲངས། གཞན་ཡང་རིང་འཚོའི་བདེན་ཚིག །འདོད་གསོལ། ཞལ་བྱང་སྣ་ཚོགས། ཡི་གེའི་མ་མོ་སྤེལ་བའི་གསུང་མགུར་གསུམ། སོ་འབྲང་བསྙེན་ཐབས། ཁྱུང་ཁྲ་ནག །སྒྲོལ་དཀར། སྨེ་བ་རྩེགས་དུད་ཁ།
བགེགས་མཐར་བྱེད། རྡོར་སེམས། དབྱངས་ཅན་དམར་མོ་རྣམས་ཀྱི་སྒྲུབ་ཐབས་ཚིགས་བཅད། རླུང་ཛ་བཱིར་དང་། ནམ་མཁའ་ཟས་སུ་ཟ་བའི་ཚེ་སྒྲུབ། རས་ཆེན་དཔལ་འབྱོར་བཟང་པོའི་གསེར་ཆོས་འཕོ་བ། རིགས་བྱེད་མའི་རང་བྱིན་རླབས་རྣམས་ཀྱི་གསལ་བྱེད་ཁྱད་པར་ཅན་རེ་རེ། དུས་འཁོར་སྒྲུབ་དཀྱིལ། སྦྱིན་སྲེག །དེའི་དཀྱིལ་འཁོར་གྱི་ཚོན་ཐོ། དྲི་མེད་ཚྭ་ཆོག་གི་ཐིག་རྩ། རྡོ་རྗེ་རྣལ་འབྱོར་མའི་སྒྲུབ་ཐབས་ཚིགས་བཅད་ལྷུག་གཉིས། དཀྱིལ་ཆོག་དང་སྦྱིན་སྲེག་ནག་འགྲོས། མཚམས་ཐོ་བསྐྱེད་ཆོག །ཆ་གསུམ་ནག་འགྲོས། རྫོགས་ཆེན་སྙིང་ཏིག་གི་ཟིན་བྲིས། ཞལ་བཞི་པའི་བསྟོད་པ། གཏོ་མདོས་ཟུང་འབྲེལ། སྔགས་དྲུག་ཕྱག་དྲུག་ཟིན་བྲིས། རྣམ་སྲས་གཏོར་བསྔོ། བསྟོད་བསྐུལ་འོག་མིན་བདེ་ཆེན་མའི་ཁ་སྐོང་། ཆོས་སྲུང་གཞི་བདག་འགའ་ཞིག་གི་གསོལ་མཆོད། གོང་ས་མཆོད་ཡོན་གྱི་ཞབས་བརྟན་འབུལ་སྐབས་ཞལ་བཞེས་ཞུ་བའི་ལེགས་བཤད་དང་། སྒྲ་མདོ་པཱ་ཎའི་བསྡུས་དོན་སོགས་བརྗོད་བྱའི་དོན་རྒྱ་ཆེ་ཞིང་། བརྗོད་བྱེད་ཀྱི་ཚིག་བརླིང་བ། མཁས་བླུན་ཀུན་གྱི་རྣ་བར་སྙན་པ་སོགས་སྡེབ་ལེགས་བརྩམས་པའི་ཕྲེང་བ་འགའ་ཞིག་བཞུགས་སོ། །དེ་ལྟར་འཆད་རྩོད་རྩོམ་གསུམ་གྱི་ཕྲིན་ལས་ནམས་མཁའ་དང་མཉམ་པའི་རང་འབྲས་གསུང་གི་
བདུད་རྩི་བཞེས་པའི་བསྟན་འཛིན་གྱི་སློབ་མ་འང་། དེ་མོ་རིན་པོ་ཆེ་ངག་དབང་འཇམ་དཔལ་བདེ་ལེགས་རྒྱ་མཚོ། ཐར་རྩེ་རྡོ་རྗེ་འཆང་ནམ་མཁའ་བསམ་འགྲུབ། འཇམ་མགོན་དཔལ་ལྡན་ཆོས་སྐྱོང་། འཇམ་དབྱངས་སངས་རྒྱས་ཡེ་ཤེས། དྲག་རྩ་རྡོ་རྗེ་འཆང་བློ་བསལ་བསྟན་འཕེལ། ཤར་ཆེན་མི་འགྱུར་རྒྱལ་མཚན། དཔལ་ས་སྐྱ་པ་འཇམ་མགོན་ཀུན་དགའ་བློ་གྲོས། གཅུང་མཐུ་སྟོབས་དབང་ཕྱུག །བཅོ་བརྒྱད་པ་དགའ་ཆེན་ཁྱབ་བདག་སྙིང་པོ་སོགས་ཞལ་ངོ་གསུམ། རི་བོ་ཆེ་པ་བློ་བཟང་སྟོབས་ལྡན་སྐུ་མཆེད། མདོ་ཁམས་པ་སངས་རྒྱས་རྒྱ་མཚོ་སོགས་མདོ་ཁམས་ཕྱོགས་ཀྱི་མཁས་གྲུབ་དུ་མ། བོང་འབྲུག་ཆོས་རྗེ་བློ་གསལ་ཕུན་ཚོགས་ཆོས་གྲྭ་ཆེན་པོ་ན་ལན་དྲའི་བླ་མ་སློབ་དཔོན་དུ་མ། རྩེ་གདོང་སྤྲུལ་སྐུ་བསྟན་འཛིན་ལྷུན་གྲུབ། གཟིམས་ཕུག་སྤྲུལ་སྐུ་བློ་བཟང་མགོན་པོ། མུས་ཞི་དགོན་མཁན་ཆེན་བསོད་ནམས་དཔལ་བཟང་། གྲོང་ཆེན་མཁན་པོ་ངག་དབང་ཤེས་རབ། རིག་འཛིན་བསྐལ་བཟང་རྣམ་གྲོལ། རྫོང་རི་རབ་འབྱམས་པ་བསྐལ་བཟང་བསྟན་འཛིན། གླིང་སྨད་ཞབས་དྲུང་ཕུན་ཚོགས་བཀྲ་ཤིས་སོགས་གསང་ཕུ་དང་སྐྱེད་ཚལ་གྱི་བླ་མ་སློབ་དཔོན་དུ་མ། རྡོ་རྗེ་འཛིན་པ་བསོད་ནམས་སྣང་བྱེད་དང་། བསོད་ནམས་རིན་ཆེན། ཀུན་དགའ་དཔལ་འབྱོར་
སོགས་ཆོས་སྡེའི་བླ་མ་སློབ་དཔོན་མཐའ་དག རབ་བྱུང་མཁན་པོ་བཟོད་པ་འོད་ཟེར། བཀའ་འགྱུར་བ་སངས་རྒྱས་རྒྱལ་མཚན། ས་ཕུག་གྲུབ་དབང་ཀུན་དགའ་ཚུལ་ཁྲིམས། དགེ་སློང་སངས་རྒྱས་རྒྱལ་མཚན། འབྲུག་པ་ཐམས་ཅད་མཁྱེན་པ། སི་ཏུ་མ་ཧཱ་པཎྜི་ཏ་ཆོས་ཀྱི་འབྱུང་གནས། རྒྱལ་སྲས་བློ་བཟང་འཇིགས་མེད། ཞི་བ་ལྷ་འཕགས་བ་དགེ་ལེགས་རྒྱལ་མཚན། རྫོག་གི་གདུང་འཛིན་ཉག་པོ་ཁུ་དབོན། ཟུར་སྤྲུལ་ཕྲིན་ལས་རྒྱ་མཚོ། པོ་བོ་སྤྲུལ་སྐུ་ལྷུན་གྲུབ་ཕུན་ཚོགས། གངས་ཅན་མཁན་ཆེན་ངག་དབང་རབ་བརྟན། རི་བོ་བདེ་ཆེན་གྱི་མཁན་པོ་བསྟན་འཛིན་རྒྱ་མཚོ། ཕ་བོང་ཁའི་མཁན་ཆེན་སྐལ་བཟང་མཆོག་གྲུབ། མང་ར་མཁན་ཆེན་བློ་བཟང་དཔལ་འབར། ཀོང་པོ་ཞོ་ཁ་བླ་མ་ཟླ་བ་བཟང་པོ། སློབ་དཔོན་ལྷུན་གྲུབ་རྒྱལ་པོ། ཉང་སྟོད་རྩེ་ཆེན་བླ་མ་བྱམས་པ་ཤེས་རབ་སྐྱེད་ཚལ་འོག་བླ་མ་སྐྱེད་གཤོང་ཆོས་རྗེ། འབྲས་གླིང་བླ་མ་མདོ་སྔགས་ཆོས་འཕེལ། བཀའ་ཆེན་ཐབས་མཁས་རྒྱ་མཚོ། ཞྭ་ལུ་དབུ་བྱེད་ཀུན་སྤངས་པ། སོག་ཡུལ་ཧ་ལ་ཤན་གྱི་བླ་དཔོན་ཟུང་འབྲེལ་ཐོ་ཡོན་དར་རྒྱས་སོགས་ཀྱིས་མཚོན་བསྟན་འཛིན་གྱི་སྐྱེ་བུ་མང་དུ་བསྐྲུན་ཅིང་། ས་སྐྱོང་སྡེ་དགེ་ཆོས་རྒྱལ་བསྟན་པ་ཚེ་རིང་ཡབ་སྲས་དང་། འདར་པ་ཡབ་སྲས། མདོ་མཁར་ཞབས་དྲུང་པཎྜི་ཏ་
ཚེ་རིང་དབང་རྒྱལ་སོགས་བསྟན་པའི་སྦྱིན་བདག་དུ་མའི་ཐུགས་ཀྱི་བཞེད་པ་ཆོས་མཐུན་དུ་བསྒྲུབས་པས་བསྟན་འགྲོའི་ཕན་བདེ་ལྷག་པར་སྤེལ། ཁྱད་པར་དུ་ནང་ཐུགས་ཀྱི་སྲས་གཅིག་པུ་དཔལ་ས་སྐྱ་པ་ངག་དབང་ཀུན་དགའ་བློ་གྲོས་ཀྱིས་རྗེ་ཉིད་ཀྱི་བཀའ་སྲོལ་ཉམས་མེད་དུ་བཟུང་ནས་འཆད་སྤེལ་རྒྱ་ཆེར་གནང་བས་ད་ལྟའི་བར་དུ་དཔལ་ས་སྐྱ་པའི་སྙན་བརྒྱུད་གཙོ་བོར་གྱུར་པའི་བསྟན་པའི་ཉི་མ་ཕྱོགས་བཅུར་འབར་བར་གྱུར་ཏོ། །དེ་ལྟར་རེ་ཞིག་ཞིང་འདིའི་མཛད་པ་རྫོགས་ནས་ཞིང་ཁམས་གཞན་གྱི་དོན་རྒྱ་ཆེ་བར་དགོངས་ནས། ལྕགས་འབྲུག་ལོར་ལྷ་ལྡན་སོགས་སུ་སྐུ་ཁམས་ལྷག་པར་དྭངས་ཤིང་ཆོས་འཆད་པ་ལ་སྔར་ལས་ཐུགས་སྤྲོ་བའི་ཚུལ་མཛད། བོང་འབྲུག་ཆོས་རྗེ་སོགས་ལ་བི་མ་སྙིང་ཏིག་གི་དབང་ལུང་སྩལ་སྐབས་འོད་གསལ་གྱི་སྣང་བར་འཇའ་ཚོན་སྣ་ལྔ་ཞིག་མདུན་དུ་ཟུག་པར་ཐུགས་གཏད་པའང་བདེ་སྟོང་གི་ངང་དུ་འབྱམས་པ་དང་། ཐུགས་རྗེ་ཆེན་པོ་རྒྱལ་པོ་ལུགས་ཀྱི་ཁྲིད་སྩལ་སྐབས་ཐུགས་རྗེ་ཆེན་པོ་ཞལ་བཅུ་གཅིག་པའི་ཡེ་ཤེས་ཀྱི་སྐུས་རྗེས་སུ་བཟུང་བ་སོགས་ངོ་མཚར་བའི་རྟགས་དང་ནང་གི་ཉམས་མྱོང་གོང་དུ་འཕེལ་བའི་ཚུལ་བསྟན། ཡུལ་ཁོང་ཕུར་ཞབས་པད་མི་བརྟན་པའི་མཚན་མའང་སྣ་ཚོགས་པ་བྱུང་ཞིང་། རྗེ་ཉིད་ནས་ཀྱང་འཆི་འཕོ་སྐྱེ་བ་གཟིགས་
པའི་ཕྱིར་གཤེགས་ཚུལ་གྱི་བཀའ་ཕེབས་ཀྱང་སྩལ། ཟླ་བ་དྲུག་པའི་ཚེས་བདུན་ནས་ཡར་ཀླུང་བཀྲས་ཆོས་སུ་བཞུགས་བཞིན་པའི་སྐབས་ཅུང་ཟད་བསྙེན་པའི་ཚུལ་བཞེས། ཚེས་བཅུའི་ཉིན་རིག་འཛིན་སྐལ་བཟང་རྣམ་གྲོལ་སོགས་ལ་ས་པཎ་གྱིས་མཛད་པའི་ལམ་སྦས་བཤད་ཀྱི་ཁྲིད་ཡིག་གི་ལྗགས་ལུང་གསུང་ཆོས་ཐམས་ཅད་ཀྱི་ཐ་མར་སྩལ། དགུང་ལོ་ང་བདུན་བཞེས་པ་ལྕགས་འབྲུག་ཆུ་སྟོད་ཟླ་བའི་ཚེས་བཅུ་དྲུག་ཉིན་ཞབས་ཕྱི་རྣམས་ལ་ལུགས་གཉིས་ཀྱི་བཀའ་སློབ་མཐར་ཕྱིན་པ་དང་། གཟུགས་སྐུའི་རྣམ་འཕྲུལ་འབྱོན་པའི་ཞལ་བཞེས་དང་བཅས། དེའི་སྲོད་འཁོར་སྔ་མ་ཙམ་ནས་བཞུགས་གདན་སྲབ་མོར་ཞབས་རྡོ་རྗེའི་སྐྱིལ་ཀྲུང་དུ་བཞུགས། སྐུ་དྲང་པོར་བསྲངས། ཕྱག་མཉམ་གཞག་གི་ངང་རྒྱལ་ཡུམ་རྡོ་རྗེ་བཙུན་མོའི་མྱུར་ལམ་ལ་བརྟེན་ནས་འོད་གསལ་ཆོས་སྐུའི་དབྱིངས་སུ་སྙོམས་པར་ཞུགས་ཤིང་། ཚེས་བཅུ་དགུའི་ཐོ་རངས་འུར་སྒྲ་ཤིན་ཏུ་ཆེ་བ་དང་བཅས་དྲི་བསུང་ཕུན་སུམ་ཚོགས་པས་གཟིམ་ཁང་ནང་ཁེངས་པ་སོགས་ངོ་མཚར་གྱི་ལྟས་དུ་མ་དང་བཅས་ཏེ་འོད་གསལ་ལས་ཟུང་འཇུག་གི་གཟུགས་སྐུ་མཁའ་སྤྱོད་ཆེན་པོར་ཟང་ཐལ་དུ་གཤེགས་པའི་བརྡར་ཤངས་བུག་གཡོན་ནས་རྡོ་རྗེ་ཟླ་བའི་ཉིང་ཁུ་དང་། ཉིན་མོར་བྱེད་པ་རོ་གཅིག་ཏུ་གྱུར་པ་མཐོ་གང་ཙམ་བབས་ཤིང་
དབུ་ཅུང་ཟད་དུད་ཉམས་དང་བཅས་པར་གྱུར། ཚེས་ཉེར་གཉིས་ལ་སྐུ་གདུང་ཞུགས་པ་བཞིན་པས་མེ་ཏོག་གི་ཆར་ཟིམ་བུར་བབས་ཤིང་འཇའ་སྤྲིན་ཁ་དོག་དང་དབྱིབས་རྣམ་པ་ཐམས་ཅད་པས་ནམ་མཁའི་ཁམས་གང་། ཉེར་ལྔ་ལ་གདུང་ཁང་ཞལ་ཕྱེ་བ་ན། གདུང་རུས་ལ་ཐཾ་ཡིག་ལི་ཁྲིའི་མདོག་ཅན་མང་པོ་དང་། ཧཱུྃ་ཡིག་དང་། དགའ་བ་འཁྱིལ་པ་དང་། རིང་བསྲེལ་ཕྲ་མོ་གྲངས་མེད་པ་སོགས་བྱོན་ནས་མ་དད་པ་རྣམས་དད་པ་དང་། དད་པ་རྣམས་སླར་ཡང་མོས་གུས་གོང་དུ་འཕེལ་བར་མཛད། གཙོ་བོར་བཀྲ་ཤིས་ཆོས་སྡེའི་ཕྱག་མཛོད་དང་གྲྭ་ཚང་གིས་མཚོན། གཞན་ཡང་དཔལ་ས་སྐྱ་པ་ཆེན་པོ་སོགས་ཀྱིས་ཟབ་དགོངས་ཆོས་ཀྱི་དབྱིངས་སུ་རྫོགས་པའི་ཐབས་ཕུལ་དུ་ཕྱིན་པ་དང་། གསེར་དངུལ་སྤེལ་མའི་གདུང་ཁང་བྱང་ཆེན་མཆོད་རྟེན་རྒྱབ་མཐོ་བཅུ་དྲུག་པ་རྒྱན་ཕུན་སུམ་ཚོགས་པ་དང་། སྐུ་རྟེན་གསེར་ཟངས་ཀྱི་འདྲ་སྐུ་དང་། རྡོ་རྗེ་ནག་པོ་ཆེན་པོའི་བླ་བརྒྱུད་སྨན་འདམ་བྱོན་གཙང་། གསུང་རྟེན་བསྟན་འགྱུར་རིན་པོ་ཆེ་སྡེ་དགེའི་སྤར་མ་ཤིན་ཏུ་སྒྲོས་གཙང་བཅས་བཞུགས་ཡུལ་གྱི་དྲི་གཙང་ཁང་དང་། མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་ཏེ་ད་ལྟའང་བཀྲ་ཤིས་ཆོས་སྡེར་བཞུགས་བཞིན་པ་འདི་ལྟར་ལགས་ཤིང་། རྣམ་པར་ཐར་པ་རྒྱས་པ་ནི་
དཔལ་ས་སྐྱ་པ་འཇམ་མགོན་ཀུན་དགའ་བློ་གྲོས་ཀྱིས་༡༦༤མཛད་པའི་ངོ་མཚར་རབ་འབྱམས་ཞེས་ལེགས་བཤད་ཕུལ་དུ་ཕྱིན་པ་དང་། རྗེ་ཉིད་ཀྱི་གསན་ཡིག་གླེགས་བམ་གཉིས་བཞུགས་པ་སོགས་ལས་རྟོགས་པར་བྱའོ།། ༈ །།གྲྭ་ཐང་མཁན་ཆེན་ཀུན་དགའ་མཁྱེན་བརྩེ་ཕུན་ཚོགས་ནི། དམ་པའི་སྐྱེས་བུ་དུ་མ་བརྒྱུད་མར་འབྱུང་བའི་གནས་དཔལ་གྲྭ་ཐང་གི་འདབ་འབྱོར་དུ་ཡབ་ཡི་གེའི་རིག་བྱེད་མཁས་པ་དམ་ཆོས་བསྟན་འཛིན་དང་། ཡུམ་བསོད་ནམས་སྒྲོལ་མའི་སྲས་སུ་ཤིང་མོ་ལུག་གི་ལོར་ངོ་མཚར་བའི་ལྟས་དང་བཅས་ཏེ་སྐུ་བལྟམས། ཆུང་ངུ་ནས་མཁྱེན་རབ་ཀྱི་སྒོ་ཡངས་ཤིང་། ཅུང་ཟད་ནར་སོན་པ་ན་ཡི་གེ་འབྲི་ཀློག །རྩིས་སྐར་ནག་སོགས་དང་། སྨིན་གླིང་དུ་སྙན་ངག །འབྲས་སྤུངས་བསམ་བློ་སྒྲ་རམ་པ་ལས་ཙཱནྡྲ་བྱཱ་ཀ་ར་ཎ་སོགས་ཐ་སྙད་རིག་ལམ་རྒྱ་མཚོར་མཁས་ཤིང་བྱང་ཆུབ་པ་དང་། དགུང་གྲངས་བཅུ་དགུ་པར་གྲྭ་ཐང་གི་སེང་གེའི་ཁྲིར་ཕེབས་ཤིང་། ཉི་ཤུ་པར་ལོ་ཆེན་དྷརྨ་ཤྲཱི་ལས་བསྙེན་པར་རྫོགས། གྲྭ་ཐང་མཁན་ཆེན་བསྟན་འཛིན་ཕུན་ཚོགས་དང་། དེའི་ཐུགས་སྲས་ངག་དབང་འཇམ་དཔལ་བསྟན་འཛིན་གཙོ་བོར་གྱུར་བའི་སྨིན་གྲོལ་གླིང་གཏེར་ཆེན་སྐུ་མཆེད་དབོན་བཅས་སོགས་ཡོངས་འཛིན་དུ་མ་ལས་ས་ཀ་ལུགས་གཙོ་བོར་གྱུར་པའི་གསན་བསམ་རྒྱ་ཆེར་མཛད་
ཅིང་། ཉམས་བཞེས་དང་འཆད་སྤེལ་གྱི་ཕྲིན་ལས་ཁ༽ལམ་འབྲས་ལྷག་པར་བསྐྱང་། ཁྱད་པར་དུ་སྨིན་གླིང་དུ་རྒྱལ་སྲས་རིན་ཆེན་རྣམ་རྒྱལ། རྡོ་རྗེ་བྲག་ཏུ་སྐལ་བཟང་ཀ༽པདྨ་དབང་ཕྱུག །དགའ་ལྡན་རབ་རྒྱས་ཀྱི་བླ་མ་དགེ་འདུན་བཅས་ལ་བཀའ་འགྱུར་རིན་པོ་ཆེ་ལྗགས་ལུང་ཚར་གསུམ་གནང་བས་བསྟན་པའི་སྒྲོན་མེ་རྒྱ་ཆེར་སྦར། ཞལ་སློབ་ཀྱང་སྨོས་མ་ཐག་པ་དང་། འོན་རྒྱལ་སྲས་རིན་པོ་ཆེ། ད་ལའི་ཧུ་གྲོག་ཐུ། གཟིམ་ཕུག་སྤྲུལ་སྐུ་ཆེ་ཆུང་། ཁམས་བླ་པདྨ་དར་རྒྱས། བླ་མ་དཀོན་མཆོག་ལྷུན་གྲུབ་སོགས་དབུས་གཙང་ཁམས་གསུམ་དུ་མང་བར་བྱོན་པ་བཅས་རྣམ་ཐར་རྒྱས་པ་སྐལ་བཟང་དད་པའི་རླབས་ཕྲེང་མུ་ཏིག་འཁྲི་ཤིང་ཞེས་དགའ་ལྡན་རབ་རྒྱས་པ་ངག་དབང་བློ་བཟང་དབང་ཕྱུག་གིས་མཛད་པ་ལས་ཤེས་སོ།། ༈ །།སྒེར་པ་རྗེ་དྲུང་རིན་པོ་ཆེ་གྲྭ་ཐང་མཁན་ཆེན་ངག་དབང་བསྟན་འཛིན་ཕུན་ཚོགས་ནི། ཡབ་ཟུར་ཚོ་ཞབས་དྲུང་བདེ་ཆེན་མགོན་པོ་དང་། ཡུམ་གྲུབ་ཆེན་ལྕགས་ཟམ་པའི་རིགས་དབོན་ཀུན་དགའ་སྒྲོལ་མའི་སྲས་སུ་ས་ཕོ་བྱི་བའི་ལོའི་ཧོར་ཟླ་བཅུ་པའི་ཚེས་བཅུ་གསུམ་ལ་འཁྲུངས། སྐུ་གཞོན་ནུ་ནས་དམ་པའི་རིགས་གསལ་བར་སད་ཅིང་། དགུང་ལོ་བཅུ་གསུམ་པར་ལྕགས་ཟམ་པ་བསྟན་འཛིན་རིན་པོ་ཆེ་ཀུན་དགའ་བསོད་ནམས་དབང་ཕྱུག་ལས་
དགེ་བསྙེན་དུ་བསྒྲུབས། ཕྱིས་གནས་བརྟན་འཇམ་དབྱངས་གྲགས་པ་ལས་བསྙེན་རྫོགས་བཞེས། རྒྱལ་མཆོག་ལྔ་པ་ཆེན་པོ། ཞྭ་ལུ་མཁན་ཆེན་བསོད་ནམས་ཆོས་གྲུབ། ས་སྐྱ་པ་བསོད་ནམས་དབང་ཕྱུག་ཡབ་སྲས། མཁྱེན་རབ་བྱམས་པ། གཏེར་ཆེན་འགྱུར་མེད་རྡོ་རྗེ། ཞབས་དྲུང་པདྨ་ཕྲིན་ལས། ལྕགས་ཟམ་པ་བསོད་ནམས་དབང་ཕྱུག་སོགས་ལས། དཔལ་ས་སྐྱ་པའི་གསུང་ངག་རིན་པོ་ཆེ་ལམ་འབྲས་དང་། གསེར་ཆོས་སྐོར་གཙོ་བོར་གྱུར་པའི་གསར་རྙིང་གི་གདམས་པ་རྒྱ་མཚོ་ལྟ་བུར་གསན་བཞེས་མཛད། ཁྱད་པར་བསམ་ཡས་བཀའ་འགྱུར་བ་ཆེན་པོ་ངག་དབང་རབ་བརྟན་ལས་རྒྱལ་བའི་བཀའ་འགྱུར་རིན་པོ་ཆེའི་ལུང་རྫོགས་པར་གསན། དུས་དང་རྒྱུན་གྱི་ཐུགས་དམ་ཉམས་བཞེས་རྨད་དུ་བྱུང་བ་དང་། དགུང་ལོ་ཞེ་བཞི་པར་གྲྭ་ཐང་བདག་པོར་ཕེབས་ནས་བཟུང་གསུང་ངག་།རིན་པོ་ཆེ་ཚར་གཉིས་དང་། གསེར་ཆོས་དང་མགོན་པོ་ཆེ་ཆུང་ལན་མང་པོས་མཚོན་འཆད་སྤེལ་དང་། གསུང་རྩོམ་ཀྱང་འགའ་ཞིག་མཛད། ཞལ་སློབ་ཀྱི་རིམ་པའང་ཞ་ལུ་མཁན་ཆེན། ས་སྐྱ་པ་ཀུན་དགའ་བཀྲ་ཤིས། ཆོས་རྒྱལ་གཏེར་བདག་གླིང་པ་སོགས་ཀྱིས་ཀྱང་བཀའ་འབྲེལ་ཇི་རིགས་པ་གསན་ལ། ས་སྐྱ་པ་བསོད་ནམས་རིན་ཆེན། སྐྱི་ཆུ་མཁན་ཆེན་ངག་དབང་འཇམ་དཔལ་བསྟན་འཛིན།
གྲྭ་ཐང་མཁན་ཆེན་ཀུན་དགའ་མཁྱེན་བརྩེ་ཕུན་ཚོགས་སོགས་རྩ་སློབ་ཀྱང་མང་བར་བྱོན། ལྷག་པར་གྲྭ་ཐང་དུ་རྒྱལ་བའི་བཀའ་འགྱུར་རིན་པོ་ཆེའི་ལུང་རྫོགས་པར་སྩལ་བས་ཀུན་དགའ་མཁྱེན་བརྩེ་ཕུན་ཚོགས་ཀྱིས་རྒྱུན་བསྐྱངས་པའི་བཀའ་དྲིན་གྱིས་དེང་སང་བར་དུ་ལུང་རྒྱུན་རྣམ་པར་དག་པ་འདི་བྱུང་ཞིང་། མདོར་ན་དགུང་གྲངས་དྲུག་ཅུ་རྩ་བདུན་པ་རྒྱལ་བ་ཞེས་པ་ཤིང་ཕོ་རྟའི་ལོའི་སྨིན་ཟླའི་ཚེས་བཞིར་ཞི་བ་ཆེན་པོར་ཐུགས་གཞོལ་བའི་བར་དེ་སྲིད་དུ་བསྟན་པ་སེམས་ཅན་གྱི་དོན་རྒྱ་ཆེར་མཛད་པའི་ཚུལ་རྣམས་རྗེ་རང་ཉིད་ཀྱི་རྣམ་ཐར་ཞལ་གསུང་མ་དང་། མཇུག་ཕྲན་བུ་ངག་དབང་མཁྱེན་བརྩེ་ཕུན་ཚོགས་ཀྱིས་ཁ་བསྐང་བ་ཡིད་འཕྲོག་དད་པའི་ཤིང་རྟ་ལས་ཤེས་པར་བྱའོ།། ༈ །།རྡོ་རྗེ་འཆང་མཁྱེན་རབ་བྱམས་པ་ངག་དབང་ལྷུན་གྲུབ་ནི། འོད་གསལ་གྱི་ལྷ་གེམ་རྩེ་རྒྱལ་པོའི་རིགས་ལས། བསྟན་པ་སྔ་དར་གྱི་དུས་སུ་ལོ་ཙཱ་བ་ལྕེ་ཛྷཱ་ན་སིདྡྷི་དང་། ལྕེ་ཁྱི་འབྲུག་སོགས་དང་། ཕྱི་དར་གྱི་དུས་སུ་དཔལ་ཞྭ་ལུ་གསེར་བསྐོང་གི་དགོན་སྡེ་འདེབས་པ་པོ་ལྕེ་བཙུན་ཤེས་རབ་འབྱུང་གནས་སོགས་མང་དུ་བྱོན་ཅིང་། འགྲོ་མགོན་འཕགས་པ་རིན་པོ་ཆེས་ཞྭ་ལུ་ཁྲི་སྐོར་གྱི་བདག་པོར་དབང་བསྐུར་བ་དང་། ས་སྐྱ་པ་དྷརྨ་ཕ་ལ་རཀྴི་ཏའི་སྐུ་ཞང་དུ་གྱུར་པས་ཞ་ལུ་སྐུ་ཞང་ཞེས་
གྲགས་ཤིང་། རྡོ་རྗེ་འཆང་མཁྱེན་རབ་ཆོས་རྗེ་སོགས་དམ་པ་དུ་མ་བྱོན་པའི་རིགས་ལས། ཡབ་གྲུབ་པའི་དབང་ཕྱུག་སྐུ་ཞང་འཇམ་དབྱངས་དབང་པོ་དང་། ཡུམ་ཁྲི་དཔོན་ཕོ་མདོ་བའི་བློན་རིགས་དཔོན་ཆེན་ཕྲེང་ལྷག་པའི་སྲས་མོ་གུ་རུ་སྒྲོལ་མ་གཉིས་ཀྱི་སྲས་སུ་ཆུ་བྱ་ཆོ་འཕྲུལ་ཟླ་བའི་དཀར་ཕྱོགས་ཀྱི་དགའ་བ་དང་པོའི་ནམ་ལངས། རྒྱལ་ཕུར་གྱི་འགྲུབ་སྦྱོར་བཟང་པོ་འཆར་བའི་ཚེ་ཨ་ཞེས་པའི་སྒྲ་དང་བཅས་ཏེ་འཁྲུངས་མ་ཐག་ཁུ་བོ་མཁྱེན་རབ་བསྟན་འཛིན་བཟང་པོས་བྱིན་གྱིས་བརླབས། རིམ་གྱིས་དབང་བསྐུར་བ་དང་། དགེ་བསྙེན་གྱི་སྡོམ་པ་སྩལ་ནས་མཚན་ངག་དབང་རྒྱལ་མཚན་དུ་བཏགས། དམ་པའི་རིགས་སད། དགུང་ལོ་བདུན་པར་དཔལ་ནཱ་ལེནྡྲར་ཕེབས། ཐུགས་གཉེར་གནང་བས་ཉིན་རེར་ཤོག་བུ་བཅུ་ལྷག་འཛིན་པ་སོགས་མཁྱེན་རབ་ཆེ། ཆོས་སྲུང་གི་རྣམ་འཕྲུལ་མང་དུ་གཟིགས། དགུང་ལོ་བརྒྱད་པར་གསུང་ངག་རིན་པོ་ཆེ་ཐོག་མར་གསན་པས་མཚོན་ཁུ་བོ་ལས་གསན་པ་རྒྱ་མཚོ་ལྟ་བུ་བཞེས། བར་མ་རབ་བྱུང་སྩལ་ཞིང་མཚན་མཁྱེན་རབ་ངག་དབང་ལྷུན་གྲུབ་ཏུ་གསོལ། ལྷག་པར་དགུང་ལོ་བཅུ་གཅིག་པར་ཡང་བསྐྱར་ལམ་འབྲས་གསན་པའི་རྒྱུ་དབང་སྐབས་བླ་མ་དགེས་པ་རྡོ་རྗེ་ཡབ་ཡུམ་དངོས་སུ་གཟིགས་ཤིང་། དེ་ནས་བཟུང་བླ་མ་འདི་སངས་རྒྱས་དངོས་
ཡིན་སྙམ་པ་ལས་ཁུ་བོ་དང་མི་ཕལ་པའི་སྣང་བ་སྐད་ཅིག་ཀྱང་མ་ཤར། ལམ་ཟབ་གནང་སྐབས་བླ་མ་ས་ཆེན་དུ་གཟིགས། སྤྱིར་ཡང་ཐུགས་ཉམས་དང་། ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་། དེ་དག་གི་བར་སྐབས་རྣམས་སུ་གཞུང་ཆེན་མོའི་གཟིགས་རྟོགས་དང་། བསྙེན་སྒྲུབ་ཟུང་འབྲེལ་དུ་བསྐྱངས་པས་ཐོས་བསམ་སྒོམ་གསུམ་ལྷན་གཅིག་ཏུ་རྫོགས། རིམ་གྱིས་བཀའ་ཆོས་ཀྱང་མང་དུ་གནང་། རྗེ་དབོན་རིན་པོ་ཆེ་ལས་ལམ་འབྲས་གནང་སྐབས་སྤྲུལ་པའི་དཀྱིལ་འཁོར་དངོས་སུ་གཟིགས། ཁུ་བོ་དང་། གཅེན་ངོ་མཚར་བའི་ལྟས་དང་བཅས་གཞན་དོན་དུ་གཤེགས་ནས་དགོངས་རྫོགས་རྒྱ་ཆེར་གནང་། དགུང་ལོ་ཉེར་གཅིག་པར་ཐམས་ཅད་མཁྱེན་པ་རོང་སྟོན་ཆེན་པོའི་ཆོས་ཀྱི་ཁྲི་ལ་ཞབས་བཀོད། ལོ་དེར་རྩེ་གདོང་མཁན་ཆེན་བྱམས་པ་བསོད་ནམས་ལྷུན་གྲུབ་དང་། ཐུབ་བསྟན་མཁན་པོ་ཆོས་དཀར་རྣམ་རྒྱལ་དཔོན་སློབ་སོགས་འདུས་པའི་སྤྱན་སྔར་བསྙེན་པར་རྫོགས་ཤིང་ཚུལ་ཁྲིམས་ཀྱི་ཕུང་པོ་ཡོངས་སུ་དག་པར་གྱུར། ས་སྐྱ་གོང་དུ་ཕེབས་ཤིང་། བདག་ཆེན་རིན་པོ་ཆེ་རྗེ་བཙུན་གྲགས་པའི་སྤྲུལ་པར་ཐུགས་ངེས་འདྲོངས། རྟ་ནག་ཏུ་ངག་དབང་བསྟན་པའི་རྡོ་རྗེ་ལས་རྒྱུ་ལམ་གྱི་དབང་སོགས་གསན་ཅིང་། ཁྱད་པར་སྒྲུབ་པ་ལུང་བྱིན་སྐབས། བླ་མ་ཉིད་སྐུ་འོད་
དང་གཟི་བརྗིད་ཤིན་ཏུ་ཆེ་བར་གཟིགས། སྐུ་ཚེའི་ཚད་དང་སློབ་མའི་གཙོ་བོ་སོགས་ལུང་བསྟན་པ་རྣམས་ཐོག་ཏུ་ཁེལ། ཤིང་སྟག་ལོར་ཞྭ་ལུ་མཁན་རིན་པོ་ཆེར་ལྷོ་མོས་གཞིས་ཀར་མགོན་པོ་ཆེ་ཆུང་སོགས་དང་། ཁྱད་པར་མེ་འབྲུག་ལོ་ནང་རྗེ་ཉིད། གནས་གསར་པ་ནམ་མཁའ་བསོད་ནམས་དབང་གི་རྒྱལ་པོ། སྒེར་པ་རྗེ་དྲུང་བསྟན་འཛིན་ཕུན་ཚོགས་སོགས་འདུས་པ་ཉི་ཤུ་སྐོར་གྱིས་སློབ་བཤད་གསན། སློབ་བཤད་གྲོལ་ནས་ཕྱག་དཔེ་རྣམས་ཉིད་ཆོས་ཀྱི་བདག་པོ་ཡིན་པས་བཤད་སྒྲུབ་འཕེལ་བར་མཛོད་ཅེས་གསུངས་ནས་གནང་བས་ལུང་བསྟན་གྱི་བདེན་པ་མངོན་དུ་གྱུར། གོང་ས་རིན་པོ་ཆེས་ཀྱང་རྣམ་པ་ཀུན་ཏུ་ཐུགས་རྗེས་ལྷག་པར་སྐྱོངས། ཐུགས་དམ་ཐུན་བཞིའི་རྣལ་འབྱོར་དང་། ལྟ་བ་འཁོར་འདས་དབྱེར་མེད་ཀྱི་ཉམས་ལེན་དང་མ་བྲལ་བའི་ངང་། འཁོར་ལོ་གསུམ་གྱི་མཛད་པ་སྤྱི་དང་། ཁྱད་པར་ཡོངས་འཛིན་དམ་པ་ཉི་ཤུ་རྩ་ལྔ་ལས་བཞེས་པའི་ཟབ་ཆོས་རྣམས་བར་མ་ཆད་པར་སྩལ་ཏེ། དེའང་ལམ་འབྲས་ཚར་ཉེར་ལྔ། མཁའ་སྤྱོད་༧སོགས་ཁྲིད་དང་། རྒྱུ་དབང་དྲུག་བརྒྱ་སྐོར། ལམ་དབང་ལྔ་བརྒྱ་སྐོར། ཕྲེང་བའི་དབང་བསྐུར་བ་ཚར་བཅུ་བདུན། མཁའ་སྤྱོད་བྱིན་རླབས་དྲུག་བརྒྱ་སྐོར། སྦྱོང་དཀྱིལ་ཚར་སུམ་བརྒྱ་སྐོར་སོགས་དབང་ཁྲིད་ལུང་གསུམ་བསམ་གྱིས་མི་
ཁྱབ་པ་སྩལ་བའི་གྲུབ་འབྲས་ཞལ་སློབ་ས་སྐྱ་པ་ཀུན་དགའ་བཀྲ་ཤིས། རྩེ་གདོང་འཇམ་དབྱངས་མཆེད། ཞྭ་ལུ་མཁན་ཆེན། དགའ་ལྡན་ཁྲི་པ་གཉིས། རྡོར་བྲག་པད་ཕྲིན། གཏེར་བདག་གླིང་པ། གནས་གསར་པ་ནམ་མཁའ་བསོད་ནམས། མཁྱེན་བརྩེ་རབ་བརྟན་སོགས་སྐྱེས་བུ་དུ་མ་དང་། གཞན་ཡང་མངའ་རིས་ཁམས་སོག་ཡན་ཐམས་ཅད་དུ་ཁྱབ་ཅིང་། ཁྱད་པར་རྨོར་ཆེན་གྱིས་ཆོས་བརྒྱུད་སྤེལ། ཐུགས་དམ་གྱི་ལྷ་བསམ་གྱིས་མི་ཁྱབ་པ་ཞལ་གཟིགས། རྣམ་སྲས་དང་རབ་བརྟན་མ་སོགས་བྲན་དུ་ཁོལ། དེ་ལྟ་བུའི་མཛད་པ་བསམ་གྱིས་མི་ཁྱབ་པའི་ངང་། དགུང་ལོ་དོན་གཅིག་པ་ཆུ་ལུག་སྣོན་ཟླ་བའི་དམར་ཕྱོགས་རྫོགས་པ་ལྔ་པའི་ཕྱི་མའི་ཐོ་རངས་སྐྱ་རིངས་འཆར་བ་ཙམ་གྱི་ཚེ་སྔ་སོར་ནས་ཕྱི་མཐའི་ཞལ་ཆེམས་ལྷུག་སྩོལ་དང་། ངོ་མཚར་བའི་གཟིགས་སྣང་དང་ཆོ་འཕྲུལ་བསམ་གྱིས་མི་ཁྱབ་པའི་ངང་། ནམ་མཁའ་ལས་མེ་ཏོག་སྣ་ལྔའི་ཆར་ཁ་བ་ལྟར་བབས་ཤིང་། འཇའ་དཀར་པོ་མདུང་ཚུགས་སུ་ཟུག་པ་དང་། ཁ་དོག་སྣ་ལྔ་པའི་འོད་ཀྱིས་བར་སྣང་ཐམས་ཅད་ཁྱབ་པ་དང་ལྷན་ཅིག་ཏུ། སྐུ་དྲང་པོ། ཞབས་སྐྱིལ་ཀྲུང་ཕྱེད་པ། ཕྱག་གཉིས་གཡས་བདུད་འདུལ་དང་། གཡོན་མཉམ་གཞག་གི་ཕྱག་རྒྱ་བཅས་ཏེ་མཁའ་སྤྱོད་ཆེན་པོར་གཤེགས་པའི་ཚེ། ཟླ་
བ་གཅིག་གི་བར་དུ་དེ་ལྟ་བུའི་ལྟས་རྒྱུན་མི་འཆད་པས་འགྲོ་བ་རྣམས་དད་པའི་ས་ལ་བཀོད་ཅིང་། རྗེས་ཀྱི་སྒྲུབ་དགོས་རྣམས་དབོན་མཁྱེན་བརྩེ་རབ་བརྟན་མཆེད་ནས་ལྷུན་གྱིས་གྲུབ་པར་མཛད། རྣམ་ཐར་རྒྱས་པ་དགུང་ལོ་རེ་དགུ་པ་ལྕགས་སྦྲུལ་ཧོར་ཟླ་དྲུག་པ་ཡན་རྗེ་ཉིད་ཀྱིས་མཛད་པའི་རྟོགས་ལྕེ་བཙུན་སེང་གེ་དབང་ཕྱུག་གི བརྗོད་ཤེལ་དཀར་༡༨༤ཕྲེང་བ་དང་། འཕྲོས་ཁ་༣༥སྐོང་རིགས་སྐལ་ལྡན་རྣ་བའི་བདུད་རྩི་ཞེས་དབོན་མཁྱེན་བརྩེའི་ཟིན་བྲིས་ལ་ལྕེ་རིགས་ས་མུ་དྲའི་མཚན་གྱིས་མཛད་པ་ལས་ཤེས་སོ། ༈ །བྱམས་པ་མགོན་པོ་འཕགས་པ་ཉེ་བར་འཁོར། །རྒྱལ་བ་མཆོག་དབྱངས་དམ་པ་རྒྱ་གར་ཞབས། །རོང་སྟོན་རྗེ་དང་ཁྱབ་བདག་རྡོ་རིང་མ། །མཁའ་སྤྱོད་བཙུན་མོས་མངོན་སུམ་རྗེས་བཟུང་བ། །སྔགས་འཆང་ཚར་ཆེན་ཡབ་སྲས་དངོས་སློབ། སངས་རྒྱས་རིན་ཆེན་རྣམ་འཕྲུལ་ནི། །ངག་གི་དབང་ཕྱུག་བྱམས་པ་ལྷུན་གྲུབ་སྟེ། །དེ་ཡི་ཟློས་གར་ས་སྐྱའི་རིགས་སུ་འཁྲུངས། །ཞེས་སོ།། ༈ །།མཁས་གྲུབ་གཙང་མ་ཤངས་སྟོན་ནི། ཁོང་སྐྱ་སྤང་ཁ་ཞེས་པར། མྱུ་རྭ་སྟོན་དཀོན་མཆོག་དཔལ་བཟང་དང་། ཡུམ་ཇེ་དགེ་ཞེས་པའི་སྲས་སུ་འཁྲུངས། ཆུང་ངུ་ནས་བྱིས་པའི་སྤྱོད་པ་ལས་འདས་པའི་བག་ཆགས་བཟང་པོ་གསལ་བར་སད། དགུང་ལོ་བརྒྱད་དགུ་ནས་འབྲི་ཀློག་བསླབ།
བཅུ་གསུམ་པ་ནས་བླ་མ་ཉི་ཐོག་པར་རབ་ཏུ་བྱུང་། སློབ་དཔོན་ལས་ཕར་ཕྱིན་དང་སྤྱོད་འཇུག་སོགས་གསན། གཞན་ཡང་བླ་མ་མང་པོ་ལས་མདོ་སྔགས་ཀྱི་གཞུང་མང་དུ་བཞེས། མཁས་པ་ཆེན་པོར་གྱུར། གྲུབ་པའི་ཉམས་མྱོང་ཀྱང་ཅི་རིགས་པར་སྐྱེས། ཁྱད་པར་ཡོལ་ཕུ་རི་གོང་དུ་སངས་རྒྱས་སྟོན་པའི་སྤྱན་སྔར་བྱོན་པ་ཙམ་གྱིས་ཞལ་མཐོང་མ་ཐག་མོས་གུས་ཐུན་མོང་མ་ཡིན་པ་སྐྱེས། ཉམས་མྱོང་རང་ཤར་དུ་བྱུང་། དཔལ་ཤངས་པའི་ཟབ་ཆོས་མཐའ་དག་གསན་ཅིང་། སྒྱུ་མ་དང་རྨི་ལམ་སོགས་ཀྱི་ཉམས་མྱོང་རྩོལ་མེད་དུ་སྐྱེས། བླ་མས་ཀྱང་ཚིག་བརྒྱུད་ཆོས་ཀྱི་བདུད་རྩི་ཐོག་མར་འཐུང་བའི་སྐལ་ལྡན། ལུང་བསྟན་འཁོར་གྱི་དང་པོ། མན་ངག་ཆིག་བརྒྱུད་གནང་བའི་བུ་ཆེན། འགྲན་ཟླ་བྲལ་བའི་ཐུགས་སྲས་ཀྱི་དམ་པར་མཛད་ཅིང་། རྟོགས་ལྡན་རྩོད་མེད་དུ་གྱུར་ནས་འདི་དང་ཕྱི་མར་འགྲོ་དོན་དཔག་ཏུ་མེད་པ་འབྱུང་ཞིང་། བཅུ་བཞིའི་ས་ཐོབ། སློབ་མ་བརྒྱུད་འཛིན་དང་བཅས་པ་དག་པ་མཁའ་སྤྱོད་དུ་འགྲོ་བར་ལུང་བསྟན། ཕྱིར་མི་ལྡོག་པའི་རྟགས་རྣམས་གསལ་བར་མང་ལ་ཞལ་མཐོང་བ་ཙམ་གྱིས་གདུལ་བྱ་རྣམས་དང་བ་འདྲེན་པས་ཤངས་སྟོན་གཙང་མ་ཞེས་གྲགས། མདོར་ན་བླ་མའི་བྱིན་རླབས་ཞུགས། སྒྱུ་ལུས་དང་འོད་གསལ་འབྱོངས། རྟོགས་པ་མངོན་དུ་གྱུར།
ཆོས་བརྒྱད་རང་སར་གྲོལ། ཡི་དམ་གྱི་ལྷ་མང་པོས་ཞལ་གཟིགས་ཏེ་ལུང་བསྟན་ཐོབ། མངོན་པར་ཤེས་པ་ཐོགས་པ་མེད་པར་མངའ་བར་གྱུར་ཀྱང་། ནང་གི་ཡོན་ཏན་གསང་བ་གནད་ཡིན་གསུངས་ནས་སྦས་པའི་ངང་ཚུལ་ལྷུར་བཞེས་པའི་ངང་ནས་གདུལ་བྱ་སྐལ་ལྡན་བསམ་གྱིས་མི་ཁྱབ་པ་སྨིན་གྲོལ་ལ་བཀོད། སྐུ་གཤེགས་ཙ་ན་བཞུགས་གདན་དང་། ན་བཟའ་ཕྲུགས་གཅིག་མ་གཏོགས། གསེར་སེབ་གང་ངམ། ཡོ་བྱད་བྲེ་གང་རི་བ་ཡང་མ་བཟུང་བ་སོགས་ངོ་མཚར་གྱི་རྣམ་ཐར་མཐའ་ཀླས། མཐར་དགུང་ལོ་བདུན་ཅུ་རྩ་དྲུག་པ་བྱ་ལོ་སྣོན་ཟླ་བའི་ཚེས་བཅོ་ལྔའི་སྔ་དྲོའི་ཆ་ལ། ཤར་ཕྱོགས་དག་པའི་ཞིང་ཁམས་སུ་འགྲོ་མགོན་སངས་རྒྱས་སྟོན་པའི་སྤྱན་སྔར་ངོ་མཚར་བའི་ལྟས་དཔག་ཏུ་མེད་པ་དང་བཅས་གཤེགས་ནས་བཅུ་བཞིའི་ས་ལ་མངོན་པར་བྱང་ཆུབ་པའི་ཡེ་ཤེས་བརྙེས་པར་གྱུར་ཏོ།། ༈ །།མུས་ཆེན་རྒྱལ་མཚན་དཔལ་བཟང་ནི། གྲུབ་ཐོབ་གཉགས་ཀྱི་རིགས་ལས། ཡབ་སློབ་དཔོན་རྡོ་རྗེ་སྙིང་པོ་དང་། ཡུམ་དཀོན་མཆོག་ཅེས་བྱ་བའི་སྲས་སུ་འཕགས་པ་སྤྱན་རས་གཟིགས་ཀྱི་རྣམ་པར་འཕྲུལ་པ་ཞིག་ལྷུམས་སུ་ཞུགས་པའི་ལྟས་ངོ་མཚར་བ་དང་བཅས་ཏེ་ཁྲོ་ཕུ་དགའ་ལྡན་གྱི་གནས་སུ་ས་གཡོ་བ་དང་། མེ་ཏོག་གི་ཆར་འབེབས་བཞིན་དུ་སྐུ་འཁྲུངས། ཁྲོ་ཕུ་སེམས་
དཔའ་ཆེན་པོས་དབང་བསྐུར་ཞིང་ལུང་བསྟན་ཁྱད་པར་ཅན་མཛད། གཞོན་ནུ་ཉིད་ནས་དམ་པའི་རྣམ་ཐར་མཐའ་ཡས། དགུང་ལོ་བཅོ་ལྔ་པར་དཔལ་ས་སྐྱར་འཇམ་དབྱངས་རིན་ཆེན་རྒྱལ་མཚན་གྱི་སྤྱན་སྔར་དགེ་བསྙེན་མཛད། ཕར་ཚད་འདུལ་མངོན་དབུ་མ་རྣམས་ལ་མཐར་ཕྱིན་པར་སྦྱངས་པས་མཁས་པའི་སྙན་པས་ཁྱབ། ཉེར་དྲུག་པར་ཆོས་རྗེ་རྒྱལ་མཚན་དཔལ་བཟང་པས་མཁན་པོ་དང་། རིན་པོ་ཆེ་བསོད་ནམས་གྲགས་པས་ལས་སློབ་མཛད་དེ་བསྙེན་པར་རྫོགས། མཁན་སློབ་དེ་གཉིས་དང་། རོང་པ་ཤེས་རབ་སེང་གེ་ཚོགས་སྒོམ་པ་དང་། ཉན་ཆེན་པ་ཡབ་སྲས། བླ་མ་ཡོན་ཏན་མཚན་ཅན། བྱང་སེམས་ཆུ་བཟང་བ། ཆོས་རྗེ་འཛིན་པ་སོགས་ལས་དུས་འཁོར། ལམ་འབྲས། བློ་སྦྱོང་། རྫོགས་ཆེན། གཅོད་ཡུལ་སོགས་མཐའ་ཡས་པ་གསན་ཅིང་ཐུགས་ཉམས་སུ་བཞེས་པས་མཁས་གྲུབ་ཆེན་པོར་གྱུར། བླ་མ་བདག་ཉིད་ཆེན་པོ་ཡབ་སྲས་ཀྱིས་ཀྱང་སྤྱི་བོར་མཆོད། ཕོ་བྲང་ཆེན་པོ་ཏའི་ཏུར་དུ་ཧོར་གྱི་རྒྱལ་པོ་ཨ་ཡུ་བ་རས་སྤྱན་དྲངས། འགྲོ་དོན་མཐའ་ཀླས་པ་མཛད་། སླར་བོད་དུ་ཕེབས་ནས་བྲིན་ཆུ་འབར་དུ་འཚོ་བ་དཀའ་ཐུབ་ལ་མཛད་ནས་བསྒོམས་པས་ཉམས་རྟོགས་བསམ་གྱིས་མི་ཁྱབ་པ་འཁྲུངས། སྐབས་ཤིག་མཁས་གྲུབ་ཤངས་སྟོན་ཆེན་པོའི་སྙན་པ་
གསན་ནས་སྤྱན་སྔར་བྱོན་པས། བླ་མ་ཉིད་ལ་ཡེ་ཤེས་མགོན་པོས། ཁྱོད་ཀྱི་སློབ་མ་ཆོས་བརྒྱུད་ཟིན་ངེས་ཤིག་འོང་བར་ཡོད་པས་གདམས་ངག་མ་ལུས་པ་སྟོན་ཅིག །ཅེས་ལུང་བསྟན་པ་བཞིན་གདམས་པ་རྫོགས་པར་དགྱེས་བཞིན་དུ་གནང་། བསྙེན་བཀུར་བསམ་གྱིས་མི་ཁྱབ་པ་དང་བཅས་ཏེ་གསན། རྨི་ལམ་སྤྲུལ་བསྒྱུར་འབྱོང་། འོད་གསལ་རྒྱུད་ལ་སྐྱེས། ཕྱག་རྒྱ་ཆེན་པོའི་ཡེ་ཤེས་མངོན་དུ་བརྙེས་ནས་སྒྲུབ་པ་ལ་སྙིང་པོར་གཞོལ་བའི་སྐབས། ཧོར་གྱི་རྒྱལ་པོ་གན་པ་ཆེན་པོས་ནན་བཏུད་ཀྱིས་སྤྱན་དྲངས་པ་བཞིན་ཕེབས་ནས། ཧོར་དང་། སོག་པོ། ཡུ་གུར། མེ་ཉག་སོགས་སྐྱེ་འགྲོ་མཐའ་ཡས་པའི་དོན་མཛད། སླར་བོད་དུ་ཕེབས་ནས་ཆོས་དང་ཟང་ཟིང་གི་དགའ་སྟོན་རྒྱ་ཆེར་སྤེལ། མུས་ཐ་གོང་དཔལ་གྱི་རི་ཁྲོད་སོགས་སུ་བཤད་སྒྲུབ་སྤེལ་མར་མཛད་པའི་མཐར་མེ་ཕག་ཧོར་ཟླ་བདུན་པའི་ཉི་ཤུ་དྲུག་ལ་ས་གཡོ་བ་དང་། སྒྲ་དང་། འོད་དང་། མེ་ཏོག་གི་ཆར་དང་བཅས་ཏེ་བདེ་བ་ཅན་གྱི་ཞིང་ཁམས་སུ་གཤེགས་པའི་ཚུལ་བསྟན་ཏོ། །རྣམ་ཐར་རྒྱས་པ་དགེ་བཤེས་སྨོན་ལམ་པས་མཛད་པ་ལས་ཤེས་སོ། ༈ །མཁས་གྲུབ་རྡོ་རྗེ་གཞོན་ནུ་ནི། ཆུང་ངུ་ནས་ངེས་འབྱུང་རྩོལ་མེད་དུ་ཤར། མདོ་སྔགས་ཀྱི་གཞུང་རབ་འབྱམས་ལ་སྦྱངས། ཁྱད་པར་མུས་ཆེན་རྒྱལ་མཚན་དཔལ་
བཟང་ལས་ཤངས་ཆོས་སྐོར་ཚང་མ་བཞེས་ནས་ཉམས་སུ་ལེན་པར་མཛད་པས་བཤུལ་རིང་གི་ལམ་མྱུར་དུ་བགྲོད་པ། ཤིན་ཏུ་གྲང་བའི་དུས་ཀྱང་སྐུ་ཟིལ་པ་ཕྲུམ་མེར་བཞུགས་པ། བདེ་སྟོང་གི་ཉམས་ལས་བྱུང་བའི་འཕར་གཡོ་སོགས་གཏུམ་མོ་དང་། སྤྲུལ་བསྒྱུར་སོགས་རྨི་ལམ་ཚེགས་མེད་དུ་འབྱོང་། སྤྱན་དང་མངོན་ཤེས་ཤར། འཆི་མེད་ཀྱི་རིག་འཛིན་གྲུབ་པས་སྐུ་ཚེ་རིང་པོར་བཞུགས་ཀྱང་བགྲེས་ཚུལ་སོགས་མི་མངའ། དུས་རྟག་ཏུ་སྒྲུབ་པ་ཁོ་ན་ལས་མི་གཡེལ་ཞིང་། མཁས་གྲུབ་ཀྱི་སྐྱེས་བུ་དུ་མས་ཞབས་པད་མཆོད། ཁྱད་པར་མུས་ཆེན་རྗེ་མྱ་ངན་ལས་འདའ་ཁར་ཤངས་ཆོས་གནང་བའི་ཆ་ལག་རྣམས་རྗེ་ཉིད་ལ་གནང་བར་བསྐུལ་ནས་གདམས་པའི་བདག་པོར་དབུགས་དབྱུང་བས་ལམ་སྲོལ་འདི་ལ་བཤད་སྒྲུབ་གཉིས་ཀྱི་སྒོ་ནས་གསལ་བར་མཛད་པ་ཡིན་ནོ། ༈ །མུས་ཆེན་ནམ་མཁའི་རྣལ་འབྱོར་ནི། ཡབ་བྲག་རམ་པའི་དགེ་བའི་བཤེས་གཉེན་བླ་མ་རྡོ་རྗེ་བསོད་ནམས་ཞེས་སྔགས་གསར་རྙིང་ཐམས་ཅད་ཀྱི་ཕ་རོལ་ཏུ་སོན་པ་དེ་ཉིད་དང་། ཡུམ་སྤྱན་རས་གཟིགས་ཀྱི་རྣལ་འབྱོར་མ་རྡོ་རྗེ་འབུམ་གྱི་སྲས་སུ་འཁྲུངས། གཞོན་ནུ་ནས་དད་པ་དང་། ཤེས་རབ། མངོན་པར་ཤེས་པ་སོགས་མངའ། གློ་ལུང་ཆོས་སྡེར་མཁན་པོ་ཤཱཀ་འཕེན་པ་ལས་རབ་ཏུ་བྱུང་། མཚན་ནམ་
མཁའ་རྒྱལ་མཚན་དུ་གསོལ། མདོ་སྔགས་ཀྱི་གཞུང་ལ་གསན་བསམ་རྒྱ་ཆེར་མཛད། ཁྱད་པར་མུས་ཆེན་རྒྱལ་མཚན་དཔལ་བཟང་ལས་ནི་གུའི་ཐབས་ལམ་གསན་ནས་ཟླ་བ་གཅིག་ཏུ་བསྒོམས་པས་བདེ་དྲོད་རྩོལ་མེད་དུ་ཤར། བཀའ་གཞན་རྣམས་ཅི་རིགས་པ་དང་། རྫོགས་པར་བླ་མ་རྡོ་རྗེ་གཞོན་ནུ་ལས་གསན། ཉི་ཤུ་པར་མཁན་པོ་སྔོན་གྱི་དེ་ཉིད་ལས་བསྙེན་པར་རྫོགས། གཞན་ཡང་བླ་མ་དམ་པ་དུ་མ་ལས་གདམས་པ་བསམ་གྱིས་མི་ཁྱབ་པ་བཞེས། ཆོས་གསན་པའི་དུས་མ་གཏོགས་རི་ཁྲོད་དབེན་པ་ཁོ་ནར་སྒྲུབ་པ་ལ་རྩེ་གཅིག་ཏུ་གཞོལ་བས་ངེས་འབྱུང་དང་། སྙིང་རྗེ་ཕྱོགས་མེད་དུ་ཤར། ཕྱག་རྒྱ་ཆེན་པོའི་རྟོགས་པ་བརྙེས། ཐུགས་རྗེ་ཆེན་པོ་སོགས་ཡི་དམ་གྱི་ལྷ་དུ་མས་རྗེས་སུ་བཟུང་། ཏིང་འཛིན་གྱི་སྒོ་དུ་མ་དང་། མངོན་པར་ཤེས་པ་རྒྱ་ཆེན་པོ་མངའ། ཆོས་སྲུང་བྲན་དུ་ཁོལ་བ་སོགས་ཡོན་ཏན་བསམ་གྱིས་མི་ཁྱབ་པ་ལ་དབང་འབྱོར་བས་གདུལ་བྱ་དཔག་ཏུ་མེད་པ་སྨིན་གྲོལ་ལ་བཀོད་ཅིང་། དེ་རྣམས་ཀྱི་ནང་ནས་བཀའ་ལྔ་པ་དཔལ་འབྱོར་ཤེས་རབ། རོང་སྟོན་ཤེས་བྱ་ཀུན་རིག །སེམས་དཔའ་གཞོན་ནུ་རྒྱལ་མཆོག །མུས་ཆེན་དཀོན་མཆོག་རྒྱལ་མཚན། གྲུབ་ཆེན་ཐང་སྟོང་རྒྱལ་པོ། མཁས་གྲུབ་དགེ་ལེགས་དཔལ་བཟང་སོགས་མཁས་ཤིང་བཙུན་ལ་གྲུབ་པའི་
ཉམས་མྱོང་དང་ལྡན་པ་དང་། ཕྲིན་ལས་མཐའ་ཀླས་པ་མང་དུ་བྱོན་ཏེ་རྒྱལ་བསྟན་སྤྱི་དང་། དཔལ་ཤངས་པ་བཀའ་བརྒྱུད་པའི་བསྟན་པ་རིན་པོ་ཆེ་ཉིན་མོར་མཛད་ནས། དགུང་ལོ་དགུ་བཅུ་རྩ་གསུམ་དུ་ཕེབས་པ། བྱི་ལོ་ཧོར་ཟླ་གཉིས་པའི་ཚེས་ཉེར་དྲུག་ལ་ཞི་བ་ཆེན་པོའི་དབྱིངས་སུ་ཐུགས་གཞོལ་བའི་ཚེ། འཇའ་དང་། འོད་དང་། སྙན་པའི་སྒྲ་དང་། དྲི་ཞིམ་པོ་འཐུལ་ཞིང་། མེ་ཏོག་གི་ཆར་ཆེན་པོ་འབེབས་པ་དང་བཅས་ཏེ། ལས་དག་པ་འགའ་ཞིག་གིས་ཨོ་ཌི་ཡཱ་ན་དང་། བདེ་བ་ཅན་སོགས་སུ་གཤེགས་པར་མཐོང་བ་དང་། སྐུ་གདུང་ཞུགས་སུ་ཕུལ་བས་སྐུ་དང་། རིང་བསྲེལ་གྲངས་ལས་འདས་པ་འཕེལ་བས་མཚོན་ངོ་མཚར་བསམ་གྱིས་མི་ཁྱབ་པས་རྗེས་འཇུག་རྣམས་དད་པའི་ས་ལ་འགོད་པར་མཛད་དོ། །འདིའི་རྣམ་ཐར་རྒྱས་པ་བཀའ་བཅུ་པ་རིན་ཆེན་དར་གྱིས་མཛད་པ་དང་། དགུང་ལོ་བརྒྱད་ཅུ་རྩ་བཞི་མན་གྱི་རྣམ་ཐར་ཁ་སྐོང་བཅས་ལས་ཤེས་པར་བྱའོ།། ༈ །།སྐད་གཉིས་སྨྲ་བའི་དབང་པོ་ལོ་ཆེན་འགྱུར་མེད་བདེ་ཆེན་ནི། གྲུབ་ཐོབ་ལྕགས་ཟམ་པ་ཆེན་པོའི་རིགས་སུ་ལྕགས་བྱི་སྨིན་དྲུག་ཟླ་བའི་ཡར་ཚེས་བཟང་པོར་ངོ་མཚར་བའི་ལྟས་དང་བཅས་ཏེ་སྐུ་བལྟམས། དེར་ཚེ་རབས་ཀྱི་ཕྲེང་བ་དུ་མར་བླ་སློབ་ཏུ་འབྲེལ་བའི་སྨན་སྡོང་ལོ་ཙཱ་བ་གྲུབ་པའི་དབང་
ཕྱུག་རཏྣ་བྷ་དྲས་མཚན་འགྱུར་མེད་བདེ་ཆེན་ཞེས་སྩལ་ཞིང་ལུང་བསྟན་གྱི་རྒྱུད་མང་སྦྲེང་། དགུང་ལོ་བཅུ་པར་རྡོ་རྗེའི་སློབ་དཔོན་ལྷུན་གྲུབ་དཔལ་ལྡན་ལས་གསང་བདག་གི་དབང་བསྐུར་བ་གསན་ཅིང་ལྗགས་བཟླས་མཛད། བཅུ་གསུམ་པ་ནས་བརྩམས་རྗེ་བཙུན་བསོད་ནམས་རྩེ་མོའི་ཞབས་པད་བསྙེན་ཅིང་དགེ་ཚུལ་དུ་བསྒྲུབ། ལམ་འབྲས་དང་། ནི་གུའི་ཟབ་ཁྲིད་དང་། དཔལ་ས་སྐྱ་པའི་གཞུང་དང་མན་ངག་རྒྱ་མཚོ་ལྟ་བུར་སྦྱངས། ཉི་ཤུ་པར་ལོ་ཆེན་རཏྣ་བྷ་དྲ་ལས་བསྙེན་པར་རྫོགས། སྦྱོར་དྲུག་གི་ཉམས་ཁྲིད་གསན། ལོ་བཞི་དང་ཟླ་བ་བརྒྱད་དུ་སྒྲུབ་པའི་རྒྱལ་མཚན་བརྟན་པོར་བཙུགས་པས་བྱིན་རླབས་ཀྱི་འཕོ་བ་ཐོབ་ཅིང་། དད་པ་དང་། ངེས་འབྱུང་། སྙིང་རྗེ་དང་། འོད་གསལ་གྱི་འཆར་སྒོ་འབྱམས་ཀླས་པ་ལ་དབང་འབྱོར། སླར་ཡང་ཡོངས་འཛིན་ཆོས་ཀྱི་བློ་གྲོས། ལོ་ཆེན་རཏྣ། བྷ་དྲ། འཇམ་མགོན་ཀུན་དགའ་གྲོལ་མཆོག །དུས་ཞབས་པ་ཆོས་དར་གྲགས་འཕེལ། ལོ་པ་སྤྱན་སྔ་ཆོས་ཀྱི་གྲགས་པ་སོགས་ལས། ཤངས་ཆོས། ལམ་འབྲས། དུས་འཁོར་རྣམས་གཙོ་བོར་གྱུར་པའི་ཟབ་རྒྱས་ཀྱི་གདམས་པ་རྒྱ་མཚོ་ལྟ་བུ་དང་། ལོ་ཆེན་བཤེས་གཉེན་རྣམ་རྒྱལ་དང་། སྐད་གཉིས་སྨྲ་བ་རབ་ཚེས་ཟླ་བ་ལས་སྒྲ་སྙན་སྡེབ་སྦྱོར་སོགས་ཐུན་མོང་རིག་ལམ་དུ་མར་གསན་
སྦྱངས་མཐར་ཕྱིན་པར་མཛད་པའི་གྲུབ་འབྲས་འཆད་པ་དང་། རྩོད་པ་དང་། རྩོམ་པའི་བདུད་རྩིས་སྐལ་བཟང་ཡིད་ཀྱི་པདྨོ་ཁ་ཕྱེ་བ་ལས། ཡོངས་རྫོགས་ཐུབ་བསྟན་ཨུཏྤ་ལའི་ནགས་ཀླུང་ཆེས་ཆེར་དར་བར་མཛད་ནས་རིགས་ལྡན་ཆོས་ཀྱི་མདུན་ས་ཆེན་པོར་གཤེགས་སོ། །༅། །འཇམ་མགོན་གྲུབ་པའི་དཔའ་བོ་ཀུན་དགའ་གྲོལ་མཆོག་ནི། རྒྱ་གར་འཕགས་པའི་ཡུལ་དུ་སློབ་དཔོན་ཀླུ་སྒྲུབ་ཀྱི་ཐུགས་སྲས་པཎྜི་ཏ་འབར་བའི་གཙོ་བོ། རྒྱལ་བས་ལུང་བསྟན་པའི་གྲུབ་ཆེན་ནག་པོ་སྤྱོད་པ། ཤྲཱི་གོམ་ནཱ་ཐའི་སློབ་མ་རྒྱལ་རིགས་ལས་གྲུབ་པ་བརྙེས་པ་རཱ་ཏ་ན་བྷ་ཧུ་ལ་རྣམས་དང་། གངས་ཅན་གྱི་ལྗོངས་འདིར་ལོ་ཙཱ་བ་ཆེན་པོ་ཀུན་གཟིགས་རོང་ཟོམ་པ་ཆོས་ཀྱི་བཟང་པོ། བཀའ་བརྒྱུད་ཡ་བཞི་ཟུང་བརྒྱད་དུ་གྲགས་པ་ལས། འགྲོ་མགོན་ཕག་མོ་གྲུ་པའི་སློབ་མ་འབའ་རོམ་པ་དར་མ་དབང་ཕྱུག །ཉང་སྟོད་དུ་སྦས་པའི་རྣལ་འབྱོར་ཨ་བ་དྷ་ཏི་པ་འོད་ཟེར་དཔལ་ཞེས་རྗེ་བཙུན་གྲགས་པས་ནག་པོ་སྤྱོད་པའི་རྣམ་འཕྲུལ་དུ་བསྔགས་པ། གཤིན་རྗེ་གཤེད་ཀྱི་རྣལ་འབྱོར་པ་ཆེན་པོ་ཞང་སྟོན་འབྲུག་སྒྲ་རྒྱལ་མཚན། འབྲི་གུང་འཇིག་རྟེན་མགོན་པོའི་སློབ་མ་གཉོས་རྒྱལ་བ་ལྷ་ནང་པ། ཀུན་མཁྱེན་ཆེན་པོ་སདྨ་བྷ་དྲ། རྗེ་རིན་པོ་ཆེའི་སློབ་མ་གཞུང་བརྒྱ་པ་འཇམ་དབྱངས་བཀྲ་ཤིས་དཔལ་
ལྡན། སླར་ཡང་འཕགས་པའི་ཡུལ་དུ་སིངྒ་ལའི་པཎྜི་ཏ་ཆེན་པོ་ཆོས་ཀྱི་ཉིན་བྱེད་རྣམས་སུ་བསམས་བཞིན་དུ་སྲིད་པ་ཉེ་བར་བཟུང་ནས་བསྟན་འགྲོའི་དོན་རླབས་པོ་ཆེ་མཛད་པའི་མཐར། མངའ་རིས་ཀྱི་སྨད་ཀྱི་ས་ཡི་ཆར། ཡབ་གཉན་སྟོན་ཤཱཀྱ་མུ་ནེའི་རིགས་བརྒྱུད་ཚེ་དབང་བཟང་པོ་དང་། ཡུམ་ཡེ་ཤེས་ཀྱི་མཁའ་འགྲོ་སྒྲོལ་འཛམ་ཞེས་པའི་སྲས་སུ་རབ་བྱུང་ཞེས་པ་མེ་མོ་ཡོས་ཀྱི་ལོའི་སྨིན་ཟླའི་དམར་ཕྱོགས་ཀྱི་ཚེས་བཅུར་སྐུ་འཁྲུངས། རྭ་སྟོན་ཡོན་ཏན་དཔལ་བཟང་གིས་མཚན་སྒྲོལ་མ་འབུམ་དུ་གསོལ། རྗེ་ཀུན་དགའ་མཆོག་ལྡན་ལས་དགེ་བསྙེན་གྱི་སྡོམ་པ་བཞེས་ཤིང་། མཚན་ཀུན་དགའ་གྲོལ་མཆོག་ཏུ་གསོལ། དེ་ཉིད་དང་། མཁན་ཆེན་བསོད་ནམས་ལྷུན་གྲུབ་སོགས་ལས་གསན་པ་བསམ་གྱིས་མི་ཁྱབ། །ནི་གུའི་ཟབ་ཁྲིད་ལན་བརྒྱ་ཕྲག་ལས་ལྷག་པ་དང་། ལམ་འབྲས་དང་སྦྱོར་དྲུག་གཙོར་གྱུར་འཆད་སྤེལ་གྱི་ཕྲིན་ལས། གྲུབ་པའི་ཉམས་མྱོང་། མཁས་པའི་རྣམ་དཔྱོད་བསམ་གྱིས་མི་ཁྱབ་པ། རྒྱས་པར་རྗེ་ཉིད་ཀྱིས་མཛད་པའི་སྐྱེས་རབས་སྔ་མ་ཐམས་ཅད་ཀྱི་རྟོགས་བརྗོད། རྗེ་ཉིད་ཀྱི་རྣམ་ཐར་སྐལ་བཟང་དད་པའི་ཤིང་རྟ་ཡན་ལག་མཛེས་རྒྱན་དང་བཅས་པ། འདས་བྱུང་གི་རྣམ་ཐར་གསེར་མདོག་པ་ཤཱཀྱ་བསྟན་འཛིན་གྱིས་མཛད་པ་རྣམས་སུ་ཆེས་གསལ་ལོ།།
༈ །།གྲུབ་ཆེན་ཀུན་དགའ་བློ་ལྡན་ནི། ཤར་རྒྱལ་མོ་རོང་དུ་འཁྲུངས། དབུས་གཙང་དུ་བྱོན་ནས། རྟེན་གསུམ་རྣམས་ལ་ཕྱག་བསྐོར་མཆོད་པ་སོགས་ཚོགས་བསགས་སྒྲིབ་སྦྱོང་མཐའ་ཡས་པ་མཛད། ཁྱད་པར་ངོར་ཨེ་ཝཾ་དུ་བསྟན་པ་རིན་པོ་ཆེའི་སྒོར་ཞུགས། སྡོམ་པ་གསུམ་གྱི་བདུད་རྩིས་ཐུགས་ཀྱི་བུམ་བཟང་གཏམས། ཐོས་བསམ་སྒོམ་གསུམ་སྤེལ་མར་མཛད། དཔལ་ས་སྐྱར་འཇམ་པའི་དབྱངས་ངག་དབང་ཀུན་དགའ་བློ་གྲོས་ཀྱི་ཞབས་པད་བསྟེན་ནས་ཟབ་དོན་གྱི་སྨིན་གྲོལ་མང་དུ་གསན་པའི་ཆོས་གྲྭར་འཇམ་མགོན་དེ་ཉིད་ཀྱིས་དགྱེས་པའི་སྤྱན་གྱིས་གཟིགས་ཤིང་། རྣལ་འབྱོར་རྒྱལ་མོ་རོང་པ་ཞེས་ཡང་ཡང་གསུངས་ཏེ། མ་འོངས་པ་ན་སྒྲུབ་པའི་རྒྱལ་མཚན་འཛིན་པར་ལུང་བསྟན། དེ་ནས་ཤར་ཆེན་ཡེ་ཤེས་དབང་ཕྱུག་མདོ་ཁམས་སྡེ་དགེར་ཆིབས་བསྐྱོད་སྐབས་མཆོད་དཔོན་གྱི་ཚུལ་དུ་ཕེབས། དེ་དག་གི་སྐབས་སུའང་རིམ་གཉིས་བཟླས་པ་དང་བཅས་པའི་རྣལ་འབྱོར་ལ་གཡེལ་མེད་དུ་བརྩོན་པར་མཛད་ཅིང་། སླར་ཤར་ཆེན་དབུས་གཙང་དུ་ཕེབས། རྗེ་ཉིད་རྩེ་གཅིག་སྒྲུབ་པ་ལ་བརྩོན་པའི་དགོངས་བཞེད་འཁྲུངས་པ་ན། དཔལ་ས་སྐྱ་པའི་ཕྲིན་ལས་ཀྱི་འཁོར་ལོས་སྒྱུར་བ་བླ་མ་ཆོས་ཀྱི་རྒྱལ་མཚན་པས་དབེན་གནས་གྲྭ་མ་སྒང་དུ་བཞུགས་པ་ལེགས་ཞེས་ལུང་བསྟན་པ་
ལྟར་སྒྲུབ་ཁང་གསར་དུ་བཞེངས། ཤ་ཆང་དང་ཤ་གོས་སོགས་སྡིག་པའི་ལས་དང་ལོག་འཚོའི་འབྱོར་པ་རྒྱངས་རིང་དུ་བསྲིངས་ནས། ཆོས་གོས་རྣམ་གསུམ་འབྲལ་མེད་དང་། གདན་གཅིག །རྡོར་དཀར་སོགས་ཕྱི་འདུལ་བའི་ཀུན་སྤྱོད་ཤིན་ཏུ་གཙང་། ནང་བྱང་ཆུབ་སེམས་གཉིས་དང་མི་འབྲལ། གསང་བ་དཔལ་དགྱེས་པ་རྡོ་རྗེའི་ལམ་བསྐྱེད་རྫོགས་ཀྱི་རྣལ་འབྱོར་ཐུན་བཞིར་བརྩོན་པ་དྲག་པོས་ཉམས་སུ་བཞེས་པས་རྒྱུད་སྡེ་ནས་བཤད་པའི་ཉམས་མྱོང་ཚད་མ་ཐུགས་རྒྱུད་ལ་འཁྲུངས་ཏེ་གྲུབ་པའི་གོ་འཕང་མཐོན་པོར་གཤེགས། དཀར་ཕྱོགས་སྐྱོང་བའི་གཞི་བདག་རྡོ་རྗེ་གཡུང་དྲུང་སོགས་མི་མ་ཡིན་རྣམས་ཀྱིས་ཕྱག་བྱས། འབྱུང་པོ་གདུག་པ་ཅན་ཕྱག་ནས་འཐོར་བ་ཙམ་གྱིས་རྒྱུན་ཆད། མངོན་པར་ཤེས་པ་རྒྱ་ཆེན་པོ་མངའ་བ་སོགས་ཡོན་ཏན་བསམ་གྱིས་མི་ཁྱབ། ས་སྐྱོང་སྡེ་དགེ་ཆོས་རྒྱལ་ཆེན་པོས་དབུའི་མཆོད་གནས་སུ་གདན་འདྲེན་ཞུས་ཀྱང་ཆོས་འབྲེལ་ཚེ་དབང་ཞིག་སྩལ་ནས་འཕྲལ་དུ་དབེན་རིར་བྱོན། བར་ཆད་ཀྱི་དབང་དུ་མ་སོང་ཞེས་བཀའ་སྩལ་བར་ཐོས་པས་མཚོན་འཇིག་རྟེན་ཆོས་བརྒྱད་ཀྱི་རྟོག་པས་མི་གཡེངས་དབང་བསྐུར་ཞུ་མཁན་རྣམས་ལའང་སྣོད་མ་བརྟག་པར་མི་གནང་། ལས་འབྲས་གཙོ་བོར་གྱུར་པའི་གདམས་ངག་གིས་དཀྲི་བར་མཛད་པས་ཇོ་བོ་བཀའ་གདམས་
པའི་རྣམ་ཐར་དང་རྗེས་སུ་མཐུན་ཅིང་མཐོང་ཐོས་ཐམས་ཅད་དོན་དང་ལྡན་པའི་ཕྲིན་ལས་མངའ། ཐར་རྩེ་རྡོ་རྗེ་འཆང་བྱམས་པ་ནམ་མཁའ་འཆི་མེད། ཤར་ཆེན་ཞབས་དྲུང་ངག་དབང་བསྟན་པའི་རྒྱལ་མཚན། རྡོ་རྗེ་འཛིན་པ་ངག་དབང་ཆོས་འབྱོར་སོགས་ཐོག་མཚུངས་པའི་མཁས་གྲུབ་ཐམས་ཅད་ཀྱིས་གུས་པས་བསྟེན། ཁྱད་པར་གྲུབ་མཆོག་ངག་དབང་རིན་ཆེན། མཚུངས་མེད་དཔལ་ལྡན་ཕྲིན་ལས། མཁས་དབང་བླ་མ་བསོད་ནམས་རྒྱལ་མཚན་གསུམ་ལ་གདམས་པ་རྫོགས་པར་གནང་བས་བསྟན་པའི་སྨན་ཡོན་ཆེན་པོར་གྱུར། མ་འོངས་པ་ན་དབེན་གནས་དེ་ཉིད་དུ་སྒྲུབ་སྡེ་ཁྱད་པར་འབྱུང་བའི་རྟེན་འབྲེལ་བསྒྲིགས། སྐུ་ཚེ་དང་སྒྲུབ་པ་མཐར་ཕྱིན་ནས་སྐུ་རླུང་ལྟ་བུས་ཅུང་ཟད་བསྙུན་ཚུལ་བཞེས་པ་ན། ཐུགས་སྲས་བླ་མ་དཔལ་ལྡན་ཕྲིན་ལས་ལ་གང་ཅིའི་ཞལ་ཆེམས་ལྷུག་པར་སྩལ་ནས་གླང་ལོ་སྣོན་ཟླ་བའི་དཀར་པོའི་ཕྱོགས་ཀྱི་ཚེས་བཅུ་བཞིའི་ཉི་མ་འཆར་ཀའི་ཚེ་སྐུ་དྲང་པོར་བསྲངས། ཕྱག་གཡས་ཆོས་འཆད་དང་གཡོན་མཉམ་གཞག་གི་ཕྱག་རྒྱ་མཛད་དེ་ཆོས་དབྱིངས་ཞི་བ་ཆེན་པོར་ཐུགས་གཞོལ་བའི་ཚུལ་བསྟན། འོད་གསལ་གྱི་ངང་དུ་ཞག་བདུན་བཞུགས་ཏེ། ཟུང་འཇུག་གི་སྐུ་འོག་མིན་ཆེན་པོར་གཤེགས་པའི་ཚེ་ཤངས་བུག་གཉིས་ནས་བྱང་སེམས་དཀར་དམར་གྱི་
རྒྱུན་བབས། དབུའི་གཙུག་ཏོར་གསལ་བར་འཕགས་པས་མཚོན་མཆོག་གི་དངོས་གྲུབ་བརྙེས་པའི་ལམ་རྟགས་རྣམས་མངོན་སུམ་དུ་སྣང་བར་མཛད། དེ་སྐབས་དབྱར་གྱི་ཚད་ཆེན་རྒྱས་པའི་དུས་ཡིན་ཀྱང་། ཞག་བདུན་དུ་སྦྲང་ཆར་ཟིལ་བུར་རྒྱུན་མ་ཆད་པ་བབས་པས་སྐྱེ་རྒུ་རྣམས་དགའ་བདེའི་དཔལ་ལ་བཀོད་ཅིང་། ས་གཡོ་བ་ལྟ་བུའི་སྒྲ་དང་། ཤར་ཕྱོགས་ཀྱི་ནམ་མཁའ་ནས་འཇའ་དཀར་པོ་མདུང་ཚུགས་སུ་ཟུག །ཞལ་ཆེམས་ལྟར་ཤར་ཆེན་ཞབས་དྲུང་རིན་པོ་ཆེས་བཅོམ་ལྡན་འདས་ཐམས་ཅད་རིག་པའི་སྒོ་ནས་སྐུ་གདུང་ཞུགས་འབུལ་གནང་བ་ན་མེ་ལྕེ་ཐམས་ཅད་དུམ་བུ་གཅིག་ཏུ་གྱུར་ཅིང་རིན་པོ་ཆེའི་དབྱིབས་སུ་འབར། དཀར་ཞིང་གསལ་བའི་དུ་བ་མཆོད་སྤྲིན་གྱི་ཚུལ་དུ་འཁོར། མེ་སྒྲ་གླིང་བུའི་གདངས་ལྟར་སྙན་པ་སོགས་ངོ་མཚར་བའི་ལྟས་དང་། སྤྱི་གཙུག་གི་ཐད་ཀྱི་སྐུ་རུས་ཐག་སྒྲ་དང་བཅས་ནམ་མཁར་འཕགས། གདུང་རུས་ཀུན་ལྟར་དཀར་བའི་ཁ་དོག་ཅན་འབའ་ཞིག་ཏུ་གྱུར། ཞག་བདུན་གྱི་བར་གདུང་ཁང་ལ་དྲི་ཞིམ་པོའི་ངད་ལྡང་བས་མཚོན་གདུལ་བྱ་ཐུན་མོང་བ་རྣམས་ཀྱིས་ཀྱང་མངོན་སུམ་དུ་གྱུར་པས་མ་དད་པ་དད་ཅིང་། དད་པ་རྣམས་སླར་ཡང་དད་གུས་ཆེས་ཆེར་རྒྱས་པས་བསྔགས་པའི་མེ་ཏོག་ཕྱོགས་བརྒྱར་འགྲེམ་ཞིང་། ཐུགས་ཀྱི་སྲས་རྣམས་ནས་བླ་མ་དམ་
པའི་མཛད་པ་ལྟར་ཚུལ་ཁྲིམས་རྣམ་པར་དག་པས་གཞི་བཟུང་། ལམ་ཟབ་མོ་རྩེ་གཅིག་ཏུ་ཉམས་སུ་བཞེས། བཤད་སྒྲུབ་སྤེལ་མར་མཛད་པས་ཕྲིན་ལས་ཀྱི་རྒྱུན་རྒྱས་པར་གྱུར་ཏོ། །རྗེ་འདིའི་རྣམ་ཐར་ཉུང་གསལ་མཁས་དབང་ཀུན་དགའ་དཔལ་ལྡན་གྱིས་མཛད་པ་དམ་པའི་གསུང་སྒྲོས་ཞེས་པ་ཞིག་ཡོད།། ༈ །།རྗེ་དེ་ཉིད་ཀྱི་ཐུགས་སྲས་གྲུབ་པའི་དབང་ཕྱུག་ངག་དབང་རིན་ཆེན་ནི། བོད་ཆེན་སྡེ་དགེའི་མངའ་འོག་བྱང་འབྲོག་གི་སའི་ཆ་ཡིད་ལྷུང་ཞེས་ཡུལ་གྱི་དགེ་མཚན་ཚང་བ་དེར། ཡབ་དཔའ་རྩལ་གེ་སར་ལ་འགྲན་བཟོད་ཅིང་། སྐུ་ལྷ་གེ་མཛོ་གཉན་པོའི་སྲས་སུ་གྲགས་པ་ལྷ་མི་དར་རྒྱས་དང་། ཡུམ་སོག་མོའི་སྲས་སུ་མེ་སྤྲེལ་དབྱར་ཟླ་དང་པོའི་ཚེས་གཅིག་ལ་སྐུ་འཁྲུངས། ཆུང་ངུ་ནས་ཆོས་ལ་མོས་པའི་བག་ཆགས་སད། དགུང་ལོ་བཅོ་ལྔ་པར་ཕྱོགས་དེའི་ངོར་ལུགས་ཀྱི་དགོན་སྡེ་ལྷ་རྒྱལ་སྲང་སྲིད་གསུམ་དགེ་ལེགས་ཡོངས་འདུས་སུ་ཕེབས། །མཚུངས་བྲལ་ཆོས་རྗེ་བླ་མ་རིན་པོ་ཆེའི་ཞབས་ཕྱིར་གཅར་བཞུགས་ངོས་བསླབ་གཉེར་ལ་བརྩོན་པར་མཛད། དགུང་ལོ་ཉེར་ལྔ་པར་དབུས་གཙང་དུ་ཕེབས། ངོར་ཨེ་ཝཾ་ཆོས་ལྡན་གྱི་ཆོས་གྲར་མཁས་གྲུབ་ཆེན་པོ་ངག་དབང་དམ་ཆོས་ལས་སྡོམ་པ་གསུམ་གྱི་བཀའ་དྲིན་གསན་པ་ནས་བཟུང་བསླབ་བྱ་ལ་གཅེས་སྤྲས་སུ་མཛད་
ཅིང་། དཔལ་ཀྱེ་རྡོ་རྗེའི་ལམ་དུས་ཀྱི་རྣལ་འབྱོར་ཆགས་མེད་ཀྱི་ཉམས་གཞེས་གནང་། གཞན་ཡང་ས་ངོར་གྱི་དམ་པ་རྣམས་ལས་ཆོས་འབྲེལ་ཅི་རིགས་པ་གསན། ཕྱིར་ཕེབས་འཕྲལ་དབེན་པའི་རི་ཁྲོད་དུ་ཟབ་མོའི་ཉམས་བཞེས་ལ་བརྩོན་པར་དགོངས་ནའང་། རེ་ཞིག་ཆོས་རྗེ་བླ་མའི་ཞབས་འགྱུར་དང་། དེ་རྗེས་ཡབ་ཀྱིས་སྐུ་དབང་བཙན་པོས་ལྷུན་གྲུབ་སྟེང་གི་ཆོས་གྲྭར་འབྱོན་དགོས་བྱུང་། སླར་མི་རིང་བར་དབེན་གནས་དྲྭ་མ་སྒང་དུ་གྲུབ་ཆེན་ཀུན་དགའ་བློ་ལྡན་པའི་ཞབས་པད་མཉེས་པ་གསུམ་གྱིས་བསྟེན། གསུང་ངག་རིན་པོ་ཆེ་ཚོགས་བཤད་ཀྱི་ཁྲིད་ཡིག་འཇམ་པའི་དབྱངས་དཀོན་མཆོག་ལྷུན་གྲུབ་ཀྱིས་མཛད་པའི་མཛེས་རྒྱན་རྣམ་གཉིས་ཐུགས་སུ་ཆུད་པ་དང་བསྟུན་ཞིབ་བཤད་ཀྱིས་མཚོན་སྨིན་གྲོལ་གྱི་གདམས་པ་མང་དུ་གསན། གཞན་ཡང་ཐར་རྩེ་རྡོ་རྗེ་འཆང་བྱམས་པ་ནམ་མཁའ་འཆི་མེད་དང་། མཐུ་སྟོབས་ཀྱི་དབང་ཕྱུག་ངག་དབང་ཆོས་འབྱོར་སོགས་ལས་ཀྱང་དབང་ཁྲིད་མན་ངག་ཅི་རིགས་པ་བཞེས། གཙོ་བོར་དབེན་གནས་དེ་ཉིད་དུ་ཐོག་མར་རེ་གུར་ལ་བརྟེན་ཅིང་། ཕྱིས་ཚེ་མདོའི་སྒྲུབ་ཁང་དུ་བཞུགས་ནས། ཤ་ཆང་ཤ་གོས་སོགས་སྡིག་ཟས་དང་ལོག་འཚོའི་ཚོགས་རིང་དུ་བསྲིངས། གཞི་འདུལ་བའི་ཀུན་སྤྱོད་ཤིན་ཏུ་དག་པ་ལ་གནས་ནས་དཔལ་ཀྱེ་རྡོ་རྗེ་གཙོ་བོར་
གྱུར་པའི་ལམ་ཟབ་མོའི་རྣལ་འབྱོར་ལ་བརྩོན་པ་དྲག་པོ་ལྷུར་བཞེས་པས་གེགས་སྐྱོན་རྣམས་གྲོལ། ཉམས་རྟོགས་ཀྱི་ཡོན་ཏན་སྒོ་དུ་མ་འཁྲུངས། ཞག་འགར་ཏིང་ངེ་འཛིན་གྱི་ངང་དུ་འབྱམས་པ་བྱུང་། དེ་སྐབས་ཤིག་རང་ཡུལ་དུ་ཕེབས་ནས་ལྷ་རྒྱལ་སྲང་གི་དགོན་སྡེར་ཆོས་རྗེ་རྒན་པོས་སྤྱན་དྲངས་ཤིང་གཙུག་གི་ནོར་བུར་བཀུར། རིགས་གསུམ་སྤྱི་དང་། གདུགས་དཀར་གྱི་དབང་། དཔལ་གུར་གྱི་མགོན་པོའི་དབང་རྗེས་ལུང་ཁྲིད་སོགས་ཟབ་ཆོས་ཀྱི་བདུད་རྩི་སྩལ། འདི་དུས་མཁས་དབང་བླ་མ་ཀུན་དགའ་དཔལ་ལྡན་ཀྱང་ཐོག་མར་རྗེས་སུ་བཟུང་ཞིང་། རྨི་ལམ་གྱི་རྟགས་མཚན་དགེ་བས་སླར་ཐུགས་ཀྱི་སྲས་སུ་འགྱུར་བའི་རྟེན་འབྲེལ་འགྲིགས། བཀའ་ཆོས་སྩལ་སྐབས་ཆོས་སྲུང་དགྱེས་པའི་མཚན་མར་དར་ལྕོག་གི་རྩེ་ནས་མེ་ལྕེ་འབར་བ་དང་། ཤོ་རོང་རྡོ་རྗེ་རྩེ་རྒྱལ་གྱི་བླ་མཚོ་ནས་ནོར་བུ་དབྱིག་ཏུ་གྲགས་པའི་རྡོ་གཏེར་དང་། ཡུལ་ལྷ་གེ་མཛོ་གཉེན་པོའི་མདུན་ནས་ཐུབ་དབང་གི་སྐུ་ཀླུ་འཇིམ་ལས་གྲུབ་པ་སོགས་རྫས་གཏེར་གྱི་རྣམ་པའང་ཕྱག་ཏུ་སོན། དེ་ནས་དཔལ་སའི་ཚངས་པ་སྡེ་དགེ་ཆོས་རྒྱལ་ཆེན་པོ་རིགས་ལྡན་ཚེ་དབང་རྡོ་རྗེས་དབུའི་མཆོད་གནས་སུ་བཞེས་ཤིང་། མཆོད་ཡོན་གཉིས་ཀ་དབུས་གཙང་དུ་ཆིབས་བསྐྱོད་གནང་། ཇོ་ཤཱཀ་རྣམ་གཉིས་ཀྱིས་གཙོས་པའི་
རྟེན་གསུམ་རྣམས་ལ་ཕྱག་མཆོད་བསྙེན་བཀུར་དཔག་མེད་མཛད། ཁྱད་པར་སྙན་བརྒྱུད་བསྟན་པའི་འབྱུང་གནས་ཡར་ཀླུང་བཀྲ་ཤིས་ཆོས་སྡེར་གནས་གསར་དབོན་རིན་པོ་ཆེའི་མཆོག་སྤྲུལ་ནམ་མཁའ་ལེགས་པ་ལྷུན་གྲུབ་དང་མཇལ། གསུང་ངག་རིན་པོ་ཆེ་སློབ་བཤད་ཀྱི་སྨིན་གྲོལ་ཆ་ལག་དང་བཅས་པ་རྫོགས་པར་གསན་པས་སྙན་བརྒྱུད་བཞིའི་རྟེན་འབྲེལ་རང་ཤུགས་ལ་འགྲིགས། རྗེ་དེ་ཉིད་ཀྱིས་གྲུབ་པའི་དབང་ཕྱུག་སྤྲོ་ལུང་པ་བསོད་ནམས་ཆོས་འཕེལ་གྱི་རྣམ་འཕྲུལ་དུ་ལུང་བསྟན་པས་མཚོན་ཏེ། དཔལ་ས་སྐྱ་པ་ཀུན་དགའ་སྙིང་པོ། བདག་ཆེན་རྡོ་རྗེ་འཆང་བློ་གྲོས་རྒྱལ་མཚན། གྲུབ་པའི་དབང་པོ་ཐང་སྟོང་རྒྱལ་པོ་སོགས་ཀྱི་སྤྲུལ་པར་གྲགས་པའི་ཡི་གེས་མཛེས། ངོར་ཨེ་ཝཾ་ཆོས་ལྡན་དུ་ཐར་རྩེ་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལས་ཀྱང་ཟབ་ཆོས་ཀྱི་བདུད་རྩི་ཇི་སྙེད་པ་དང་། དཔལ་ས་སྐྱར་གངས་ཅན་བསྟན་པའི་བདག་པོ་འཇམ་མགོན་ཀུན་དགའ་བཀྲ་ཤིས་མཆེད་ཞལ་རྣམས་ནས་ཀྱང་དགྱེས་པ་ཆེན་པོས་རྗེས་སུ་བཟུང་། དབང་ལུང་མན་ངག་ཅི་རིགས་པ་གསན། ལྷག་པར་ཁྱབ་བདག་རྡོ་རྗེ་བཙུན་མོའི་རྣམ་འཕྲུལ་རྗེ་བཙུན་རིན་པོ་ཆེ་མཁའ་སྤྱོད་དབང་མོ་འཆི་མེད་བསྟན་པའི་ཉི་མ་ལས་གྲུབ་ཆེན་ནཱ་རོ་ཏཱ་པའི་ཐུགས་བཅུད་རྗེ་བཙུན་རྡོ་རྗེ་རྣལ་འབྱོར་མའི་སྨིན་གྲོལ་
ཆ་ལག་དང་བཅས་པ་ཉམས་ཁྲིད་དུ་གསན། དེ་སྐབས་རྗེ་བཙུན་རིན་པོ་ཆེ་ཉིད་སྐུ་ན་སྨིན་པས་སྤྱན་ཅུང་ཟད་མི་གསལ་བའི་ཚུལ་སྟོན་ཀྱང་། རྗེ་འདི་ལ་བཀའ་ཆོས་སྩལ་བ་ནས་སྤྱན་ཇེ་གསལ་དུ་སོང་བས་སྣོད་ལྡན་གྱི་སློབ་མའི་མཆོག་ཏུ་བསྔགས་ཤིང་ཐུགས་ཡིད་གཅིག་འདྲེས་སུ་གྱུར། བྱིན་རླབས་གནང་བའི་ཚེ་ནང་མཆོད་ཀྱི་བདུད་རྩི་སྤུ་བ་དང་བཅས་ཁོལ་བའི་རྒྱུན་ལས་རྗེ་འདི་ཉིད་ཀྱིས་ཡང་ཡང་བཞེས་པས་བདེ་སྟོང་གི་ཏིང་ངེ་འཛིན་ཁྱད་པར་ཅན་ཐུགས་རྒྱུད་ལ་འཁྲུངས་པས་མཚོན་བླ་སློབ་གཉིས་ཀས་གྲུབ་པའི་རྟགས་མཚན་མངོན་སུམ་དུ་སྣང་བར་མཛད། སླར་ཡང་མཆོད་ཡོན་ཕེབས་ལམ་བདེ་བར་རྒྱལ་ཁབ་ཆེན་པོར་ཞབས་པད་བཀོད་ཅིང་དབུ་བླ་སྔར་རྒྱུན་ལྟར་གནང་། ལུགས་གཉིས་ཀྱི་མངའ་ཐང་ལྷག་པར་འཕེལ། ཐོག་མར་མཁན་ཆེན་རྡོ་རྗེ་འཆང་སངས་རྒྱས་ཕུན་ཚོགས་མྱ་ངན་ལས་འདས་པའི་སྐབས་གདུང་རུས་ཀྱི་སཱ་ཙྪ་རྣམས་ཕྱོགས་དེར་འཇོག་དགོས་པར་བཀས་གནང་ནས་མ་འོངས་པ་ན་སྒྲུབ་གྲྭ་འབྱུང་བར་དོན་གྱིས་ལུང་བསྟན། བར་དུ་གྲུབ་ཆེན་ཀུན་དགའ་བློ་ལྡན་གྱིས་སྒྲུབ་པའི་རྒྱལ་མཚན་བཟུང་ཞིང་སྣོད་ལྡན་གྱི་སློབ་མའང་ཅི་རིགས་པར་འདུས། མཐར་དམ་པ་འདི་ཉིད་ཀྱིས་མནལ་ལམ་གྱི་རྟགས་མཚན་དགེ་བ་ལ་བརྟེན་ནས་ས་དབང་ཆོས་རྒྱལ་ཆེན་
པོར་སྙན་བསྐུལ་ཞུས་པ་བཞིན་དགྱེས་པ་ཆེན་པོས་ཞལ་གྱིས་བཞེས་ཏེ། ལོ་གསུམ་གྱི་ཁོངས་སུ་དབེན་རི་གྲྭ་མ་སྒང་གི་སྒྲུབ་སྡེ་སློབ་བཤད་སྨིན་གྲོལ་རབ་འཕེལ་གླིང་གི་རྟེན་དང་བརྟེན་པར་བཅས་པ་གེགས་མེད་དུ་གྲུབ། ཕྱི་ཉན་ཐོས་འདུལ་བའི་ཀུན་སྤྱོད་ཤིན་ཏུ་དག་པ་ལྷུར་ལེན་ཅིང་། ནང་དུ་དཔལ་ཀྱེ་རྡོ་རྗེའི་རིམ་གཉིས་ཀྱི་རྣལ་འབྱོར་ལ་ཉམས་བཞེས་རྩེ་གཅིག་ཏུ་མཛད་པའི་སྤོང་བ་པ་ཉི་ཤུ་རྩ་བདུན་ལ་ཆོས་ཀྱི་རྒྱལ་པོས་འཚོ་བ་བླ་ནས་སྦྱར། རྗེ་འདིས་གསུང་ངག་རིན་པོ་ཆེ་སློབ་བཤད་གཙོ་བོར་གྱུར་པའི་སྨིན་གྲོལ་གདམས་ཟབ་ལྷུག་པར་སྩལ་ཏེ་ཟབ་དོན་སྙིང་པོའི་བསྟན་པ་ཉིན་མོ་ལྟར་མཛད། དེ་སྐབས་སྒྲུབ་གྲྭའི་མཆོད་ཐེབས་བསྟན་དགྲ་གཟུར་པས་བཅོམ་པ་ལ། དཔལ་རྡོ་རྗེ་ནག་པོ་ཆེན་པོ་ཞལ་བཞི་པའི་སྒོ་ནས་ལས་སྦྱོར་མཛད་པས་འཕྲལ་དུ་རྟགས་མཚན་ཐོན་ཅིང་། ས་དབང་ཆེན་པོས་ཀྱང་གཏང་རག་གི་ཚུལ་དུ་སྒྲུབ་དུས་ཀྱི་མགོན་པོའི་སྐུ་རིན་ཆེན་གཉིས་པ་ལས་གྲུབ་པའི་ངོ་མཚར་ཅན་བཞེངས་པར་གནང་། དེ་ནས་སྔར་རྗེ་བཙུན་རིན་པོ་ཆེ་འཆི་མེད་བསྟན་པའི་ཉི་མའི་སྤྱན་སྔར་དམ་བཅས་མཛད་པ་བཞིན་དབེན་རི་གྲྭ་མ་སྒང་དུ་བྱོན། སྔོན་ཆད་སུས་ཀྱང་མཐོང་ཐོས་སུ་མ་བྱུང་ཞིང་། ཕལ་གྱིས་ཤིན་ཏུ་བགྲོད་དཀའ་བའི་ཡང་དབེན། གངས་ཅན་བྲག་དཀར་དུ་གྲགས་པའི་
སྐེད་པར་ཐོགས་མེད་དུ་བྱོན་ནས་རྗེ་ཉིད་གཅིག་པུར་ཟླ་བ་བཅོ་ལྔའི་བར་རྡོ་རྗེ་རྣལ་འབྱོར་མའི་ལམ་ཟབ་མོ་ལ་རྩེ་གཅིག་ཏུ་གཞོལ་བས། དང་པོར་གནས་བདག་གི་ཆོ་འཕྲུལ་དང་སློང་ཚད་ཅི་རིགས་པ་བྱུང་ནའང་། བྱང་ཆུབ་སེམས་གཉིས་ཀྱི་ཐུགས་དམ་རྩལ་དུ་བཏོན་པས་ཆོ་འཕྲུལ་ཐམས་ཅད་རང་ཞིར་གྱུར་ཏེ་འབྱུང་པོ་རྣམས་བྲན་བཞིན་དུ་བཀའ་མཉན། ཉམས་རྟོགས་ཀྱི་ཡོན་ཏན་དབྱར་མཚོ་ལྟར་རྒྱས། གྲུབ་པའི་གྲགས་སྙན་ཆེས་ཆེར་གསལ། དམ་བཅའ་མཐར་ཕྱིན་ནས་སླར་ཡང་ཆོས་རྒྱལ་ཆེན་པོས་སྤྱན་དྲངས། ཐར་རྩེ་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལ་རྗེ་བཙུན་རྡོ་རྗེ་རྣལ་འབྱོར་མའི་སྨིན་གྲོལ་ཆ་ལག་དང་བཅས་པ་རྫོགས་པར་ཆིག་བརྒྱུད་དུ་ཕུལ་བས་ཟབ་དོན་གྱི་ཕྲིན་ལས་སྲིད་མཐར་རྒྱས་པའི་སྨན་ཡོན་དུ་གྱུར། དེས་མཚོན་སྣོད་ལྡན་རྣམས་ལ་སྨིན་གྲོལ་གྱི་གདམས་པ་དཔག་ཏུ་མེད་པས་རྗེས་སུ་བཟུང་། འདི་སྐབས་མགྲིན་པ་ཅུང་ཟད་བསྙེན་ཚུལ་བཞེས་པའི་མནལ་ལམ་དུ་སྐུ་གཅེར་བུ་རུས་རྒྱན་དང་བཅས་གྲུབ་པའི་བརྟུལ་ཞུགས་ལ་སྤྱོད་པའི་མཚན་མ་བྱུང་བ་ནི་སྐུ་ཚེ་ཕྱི་མར་སྔགས་ཀྱི་རྣལ་འབྱོར་པ་ཆེན་པོ་ཞིག་ཏུ་འཁྲུངས་ནས་ས་ལམ་གྱི་ལྷག་མ་ཐམས་ཅད་བགྲོད་ནས་མཆོག་གི་དངོས་གྲུབ་མཐར་ཕྱིན་པའི་བརྡར་མངོན། དེ་བཞིན་གནོད་སྦྱིན་བེག་རྩེ་
ཁྱི་དམར་གྱི་གཟུགས་སུ་སྤྲུལ་པ་ལ་ཆིབས་ནས་ནམ་མཁར་འཕུར་བ་སོགས་སྤྱན་ལྟས་ངོ་མཚར་ཅན་མང་དུ་བྱུང་ཚོད་སྣང་ནའང་ཡོན་ཏན་སྦས་པ་ལྟ་བུར་མཛད་པས་ཞིབ་པར་མ་འཚལ། སླར་ཡང་ཆོས་བརྒྱད་ཀྱི་འཆིང་བ་བཙན་ཐབས་སུ་བཅད་ནས་གངས་ཅན་བྲག་དཀར་གྱི་སྒྲུབ་ཕུག་ཏུ་གསང་བའི་ཚུལ་གྱིས་བྱོན། ལྷ་སྔགས་ཡེ་ཤེས་ཀྱི་འཁོར་ལོར་མཉམ་པར་བཞག །སྐུ་ལ་བསྙུན་གྱི་རྣམ་པ་བཞེས་པར་འཚོ་བྱེད་མཁས་པར་གྲགས་པས་ཞག་བདུན་ཙམ་ལས་མི་བཞུགས་པར་ཐག་བཅད་པ་ན། རྗེ་ཉིད་ཀྱི་སྤྱན་ལྟས་དང་བསྟུན་ད་ལན་སྐྱོན་མེད་ཅེས་བཀའ་སྩལ་རུང་། ཞབས་གྲས་སོགས་ནས་བློས་མ་བཟོད་པར་ཐར་རྩེ་མཁན་ཆེན་རྡོ་རྗེ་འཆང་གདན་འདྲེན་ཞུས་པའི་སྟབས་ཀྱིས་ཡང་དབེན་ནས་ཕྱིར་ཕེབས། རྗེ་རྡོ་རྗེ་འཆང་དང་ཞལ་འཛོམ་གནང་། རྐྱེན་སེལ་གཙོ་བོར་གྱུར་པའི་དབང་བཀའི་རིགས་གསན་བཞེས་མཛད་པས་སྔོན་ཆད་བྱད་གཏད་ཀྱི་མཚན་ལྟས་མང་དུ་བྱུང་བ་ཀུན་དེ་ནས་བཟུང་སྟེ་མིང་ཙམ་ཡང་མ་བྱུང་གསུངས། དེ་ཚེ་སྦྱིན་བདག་དད་པ་ཅན་གྱིས་བསྙུན་འདྲིའི་མཚམས་ཞུ་གནང་བར། ད་ལྟ་བདག་ལ་འཆི་ལྟས་སོགས་ཆེར་མ་བྱུང་། སླར་དོགས་ཆ་ཆེ་བར་བྱུང་ཚེ་གསུང་འཕྲོས་གནང་ཆོག་ཚུལ་བཀའ་ཕེབས་པ་ལྟར། རེ་ཞིག་གི་ཚེ་སྙིགས་མའི་དུས་ཀྱི་སྤྱོད་པ་ལའང་ཅུང་
ཤོག་ལྷེབ་ ༤༠༡ ནས་ ༥༠༤ བར།
ཟད་ཐུགས་སུན་པ་དང་། གཙོ་ཆེར་ཞིང་ཁམས་གཞན་དུ་འགྲོ་དོན་ཆེ་བར་དགོངས་ཏེ། དགུན་འབྲིང་མགོ་ཟླའི་དཀར་ཕྱོགས་ཀྱི་ཚེས་གསུམ་ལ། མ་འོངས་པ་ན་ཡར་ཀླུང་མཆོག་སྤྲུལ་རིན་པོ་ཆེ་འདིར་བྱོན་པའི་སྐལ་པ་ཡོད་པས་དེ་ལ་དངུལ་བུམ་བཟང་བ་ཆ་འདི་ཕུལ་ཞེས་ཕྱི་མཐའ་གཟིགས་པའི་ལུང་བསྟན་གྱི་རིགས་དང་། ས་དབང་ཆོས་རྒྱལ་ཆེན་པོར་དུང་དཀར་གཡས་འཁྱིལ་གྱིས་གཙོས་པའི་ཚན་གྲངས་ཤིག་ཕུལ་ནས་འོག་མིན་དག་པའི་ཞིང་དུ་མཇལ་ཞེས་བཀའི་སྤྲིང་ཡིག་གནང་བས་མཚོན། འཆི་འཕོ་དང་སྐྱེ་བ་མཁྱེན་པའི་སྟོབས་ལ་དབང་འབྱོར་བཞིན་པས། བླ་ཆེན་དང་སྦྱིན་བདག་རྣམས་ལའང་འབུལ་མཚོན། གནང་སྦྱིན། འདི་ཕྱིར་ཕན་པའི་བསླབ་བྱ་སོགས་ཤིན་ཏུ་ཞིབ་པར་སྩལ་ཏེ། །ཟླ་བ་དེའི་ཚེས་བདུན་གྱི་ཉི་ཤར་གྱི་དུས་ལ་བབས་པ་ན། ཐུགས་དམ་ཆགས་མེད་ཀྱི་རིམ་པ་རྣམས་སྔར་རྒྱུན་ལྟར་གྲུབ་པར་མཛད་ནས། བཞུགས་གདན་འདི་ཕར་སྤོས་ཤིག་ཅེས་བཀའ་གནང་བ་ལྟར་བསྒྲུབས་པ་ལ་ཞབས་སྐྱིལ་ཀྲུང་དུ་བཞུགས། སྐུ་དྲང་པོར་བསྲངས། དྲན་པ་མངོན་དུ་མཛད་དེ་མཁའ་ཁྱབ་ཀྱི་ཏིང་ངེ་འཛིན་ལ་སྙོམས་པར་ཞུགས། དེའི་ཚེ་ནང་དུ་བདེ་སྟོང་མཆོག་གི་ཏིང་ངེ་འཛིན་བརྙེས་པའི་བརྡར་ཚེས་བརྒྱད་ཀྱི་ཉིན་ཡང་སྐུ་གདུང་ཚ་དྲོད་དང་ལྡན་ཅིང་སྒྲུབ་ཁང་
ལ་འཇའ་དཀར་པོ་མདུང་ཚུགས་སུ་ཟུག །ཞག་གསུམ་བར་དུ་འཁྱག་རོམ་རྣམས་ཆུར་ཞུ། སྐུ་གདུང་ཇེ་ཆུང་ལ་སོང་བ་བཅས་སོ་སྐྱེ་ཀུན་གྱི་མཐུན་སྣང་དུ་ཆུབ་པས་མཚོན་རྟགས་དང་ཆོ་འཕྲུལ་མངོན་པར་འདུ་མཛད་དེ་ཞག་བདུན་གྱི་བར་འོད་གསལ་དུ་བཞུགས་རྗེས་མཁའ་སྤྱོད་རྡོ་རྗེ་བཙུན་མོའི་གྲོང་ཁྱེར་དུ་གཤེགས་པར་གྱུར་ཏེ། །དེ་ནས་ཐུགས་དམ་ལས་གྲོལ་བའི་རྟགས་གསལ་བར་བྱུང་ནས། རྡོ་རྗེ་འཛིན་དབང་དཔལ་ལྡན་ཕྲིན་ལས་དང་། སྒྲུབ་སྡེའི་སློབ་དཔོན་ངག་དབང་བཟང་པོས་སྐུ་གདུང་ཆས་ཞུགས་གནང་ཞིང་། བཅོམ་ལྡན་འདས་ཐམས་ཅད་རིག་པའི་སྒོ་ནས་ཞུགས་འབུལ་མཛད་པས་དབུ་ཐོད་རིལ་པོར་བྱོན་ནའང་ལས་བྱེད་རྣམས་རྒྱུས་མེད་པས་སླར་ཞུགས་སུ་སྦྱངས་པར་གྲགས་ལ། ཞག་བདུན་གྱི་མཚམས་སྤུར་ཁང་ཞལ་དབྱེ་བས་གདུང་རུས་ལ་རིང་བསྲེལ་གྱི་ཚོགས་དང་། ཤེལ་ལྟར་དྭངས་ཤིང་བེ་ཆ་ཆ་མཐོན་ཀའི་མདོག་ལྟར་སྔོ་བའི་གདུང་གི་ཆ་ཤས་ངོ་མཚར་བའང་བྱོན། ཞལ་སློབ་རྣམས་ནས་དཔལ་ཀྱེ་རྡོ་རྗེའི་སྒྲུབ་མཆོད་སོགས་ཐུགས་དགོངས་རྫོགས་པའི་ཐབས་ལྷུར་བཞེས་ཤིང་། ཁྱད་པར་ཆོས་རྒྱལ་ཆེན་པོས་གདུང་རྟེན་རིན་ཆེན་གཉིས་པ་ལས་གྲུབ་པའི་ཐོག་ཚད་དང་། སྒྲུབ་སྡེར་ལོ་བསྟར་དཔལ་ཀྱེ་རྡོ་རྗེའི་སྒྲུབ་མཆོད་ཉིན་བདུན། རབ་གནས་ཉིན་གསུམ་
བཅས་ཀྱི་ཆ་རྐྱེན་སྦྱར་བ་སོགས་མཆོད་སྤྲིན་རྒྱ་ཆེར་སྤྲོས་སོ། །གསུང་ལས་སྐྱེས་པའི་ཞལ་སློབ་ཀྱང་། ཐར་རྩེ་རྡོ་རྗེ་འཆང་བྱམས་པ་ཀུན་དགའ་བསྟན་འཛིན། ས་དབང་བླ་ཆེན་བྱམས་པ་ཀུན་དགའ་སངས་རྒྱས་བསྟན་པའི་རྒྱལ་མཚན། མཁས་དབང་ཀུན་དགའ་དོན་གྲུབ། རྣམ་འདྲེན་བླ་མ་དཔལ་ལྡན་ཕྲིན་ལས་དང་། དགེ་འདུན་རྒྱ་མཚོ། གྲྭ་སྒང་སློབ་དཔོན་ངག་དབང་བཟང་པོ་དང་། མཚུངས་བྲལ་ཆོས་ཀྱི་སྤྱན་མངའ་ཀུན་དགའ་དཔལ་ལྡན་སོགས་མཐའ་ཡས་པས་བཤད་སྒྲུབ་ལས་གསུམ་གྱིས་བླ་མ་དམ་པའི་ཕྲིན་ལས་རྒྱས་པར་མཛད་དོ།། ༈ །།མཚུངས་མེད་བསྟན་འཛིན་ལྷུན་གྲུབ་ནི། ཡབ་མཁན་ཆེན་དཔལ་ལྡན་ཆོས་སྐྱོང་པའི་མེས་པོ་ཛམ་ལྷ་དང་། ཡུམ་ཇ་དཔོན་ཟུར་ཁང་པའི་བུ་མོ་གནས་མོ་ཚེ་བརྟན་ཞེས་པའི་སྲས་སུ་འཁྲུངས། དམ་པའི་རིགས་གསལ་བར་སད་པས་སྐུ་གཞོན་ནུ་ནས་དཔལ་ཨེ་ཝཾ་ཆོས་ལྡན་གྱི་ཆོས་གྲྭར་དམ་པའི་ཆོས་ཀྱི་སྒོར་ཞུགས་ཏེ། ངེས་པ་དོན་གྱི་རྡོ་རྗེ་འཆང་ཆེན་པོ་མཁན་ཆེན་ལྷུན་གྲུབ་དཔལ་ལྡན་ལས་སྡོམ་པ་གསུམ་གྱི་བཀའ་དྲིན་ནོས། ། གཞན་ཡང་ཤར་ཆེན་ཡེ་ཤེས་བཟང་པོ། དཔལ་ས་སྐྱ་པ་ཀུན་དགའ་བཀྲ་ཤིས་ཡབ་སྲས། རྩེ་གདོང་ཞབས་དྲུང་རིན་པོ་ཆེ། འཇམ་མགོན་སངས་རྒྱས་ཕུན་ཚོགས། ཤར་ཆེན་སངས་རྒྱས་བསྟན་
འཛིན། ཤར་མི་ཉག་གི་སྟོན་པ་ཆེན་པོ་བྱམས་པ་ཚུལ་ཁྲིམས་དཔལ་བཟང་། འཇམ་དབྱངས་ཤེས་བྱ་བཟང་པོ། བྲང་ཏི་ཤེས་རབ་རྒྱ་མཚོ། སྡོམ་བརྩོན་ཕྲིན་ལས་རྒྱ་མཚོ། མུས་ཆེན་ཀུན་དགའ་རྒྱ་མཚོ། ཤར་ཆེན་བློ་གྲོས་གྲགས་པ། མཚུངས་མེད་བསོད་ནམས་དཔལ་ལྡན། བྱམས་པ་བསོད་ནམས་བཟང་པོ་སོགས་ཡོངས་འཛིན་དུ་མས་རིམ་བཞིན་བཀའ་དྲིན་གྱིས་རྗེས་སུ་བཟུང་བ་ལ་བརྟེན་ནས་ཐོས་བསམ་སྒོམ་གསུམ་མཐར་ཕྱིན་ཏེ། རྒྱུད་སྡེ་རྒྱ་མཚོའི་ཚོགས་རྣམས་ཀྱི་ཕ་རོལ་ཏུ་སོན་ནས། ཐོག་མར་ཤར་ཆེན་ཁུ་དབོན་དང་། འཇམ་མགོན་སངས་རྒྱས་ཕུན་ཚོགས་རྣམས་ཀྱི་གོ་རེ་ལེན་ཡུན་དུ་མཛད་ནས་དམ་པ་དེ་དག་གི་སྤྱན་རས་ཀྱི་འབྲས་བུ་ལྟར་འཚོ་བ་ཞིག་ཏུ་གྱུར་ཅིང་། དགུང་ལོ་སུམ་ཅུའི་སྐབས་སུ་ཤར་ཆེན་བློ་གྲོས་གྲགས་པའི་བཀའི་བདུད་རྩི་སྤྱི་བོར་ཕེབས་པ་ལ་བརྟེན་ནས། མདོ་ཁམས་སྟོད་ཀྱི་ཕུན་སུམ་ཚོགས་པའི་སའི་ཆ་སྒ་ལྡན་སྐྱུར་གསུམ་དུ་གྲགས་པའི་ནང་ནས་སྐྱུ་རའི་ཡུལ་དུ་གཏོགས་པ་དཔལ་ཐག་ལུང་དགོན་དུ་འབུལ་སྡུད་སར་ཕེབས་ཏེ། དྭའུ་བླ་དགོན་གྱིས་གཙོས་དད་ལྡན་རྣམས་ཀྱི་སྐྱབས་མགོན་དམ་པར་ལོ་བརྒྱད་ཙམ་བཞུགས། ཨེ་ཝཾ་དུ་འབུལ་སྐྱེལ་ལན་ལྔ་མཛད། སྒར་གཞིས་ཕུན་སུམ་ཚོགས་པ་གསར་དུ་བཙུགས་ཏེ། མཁན་ཆེན་བཀྲ་ཤིས་ལྷུན་གྲུབ་དེ་
ཉིད་དེ་སྐབས་གནམ་ཕུ་རྣམ་རྒྱལ་གླིང་དུ་དབོན་པོ་བསྟན་འཛིན་གྱི་ཟླ་མཚན་དུ་ཕེབས་ཡོད་འདུག་པར། དབོན་པོ་བསྟན་འཛིན་གྱིས་བསམ་པ་བཟང་པོ་ཞིག་གིས་མཐུན་འགྱུར་ཡང་དག་པ་ཞིག་མ་མཛད་པར། རེ་ཞིག་ཅུང་ཟད་ཐུགས་སུན་པ་ལྟ་བུར་གྱུར་སྐབས། རྗེ་འདི་ཉིད་ཀྱི་ཐུགས་དགོངས་ལ་དམ་པ་དེ་ཉིད་གཞན་དང་མི་འདྲ་བའི་སྐྱེས་ཆེན་ཞིག་འོང་བར་གཟིགས་ཏེ། སྐུ་མཆེད་སེར་སྐྱ་གཉིས་ཆར་ཐག་ལུང་སྨོན་སྐྱིད་སྒར་དུ་བྱོན་ན་ལེགས་ཚུལ་ཞུས་ནས་ལོ་གསུམ་མཉམ་དུ་བཞུགས་ཏེ་ཟབ་ཆོས་ཀྱི་རིམ་པ་རྣམས་ཕུལ་ནས་སྒར་གྱི་གདན་ཚབ་མཛད་པས་སྐུ་བསོད་ཆེ་ཞིང་མཁས་གྲུབ་དམ་པར་གྱུར་ནས་བསྟན་པའི་རྒྱལ་མཚན་དམ་པར་གྱུར། དེ་ནས་རྗེ་རང་ཉིད་ཀྱི་དབུས་སུ་ཕེབས་ནས་ཤར་ཆེན་ཆོས་ཀྱི་རྒྱལ་པོ་དང་བྱམས་པ་ཚུལ་ཁྲིམས་དཔལ་བཟང་ལ་སོགས་པས་ཆོས་ཀྱི་བདག་པོར་མངའ་གསོལ་ཏེ། ཨེ་ཝཾ་པའི་ཟུར་འཆད་པར་མཛད་དེ། ཐོག་མར་ཀླུ་སྡིངས་ཀྱི་མི་འཁྲུགས་ཁང་དུ་མཁའ་འགྲོ་མ་རྡོ་རྗེ་གུར་གྱི་དཀྱིལ་འཁོར་གྱི་དབང་ཚོགས་ཆེན་ལ་ཕུལ་བ་སོགས་མཛད། རིམ་གྱིས་ཨེ་ཝཾ་གཟིམས་ཁང་འོག་ཏུ་ལོ་གྲངས་ཁ་ཤས་བཞུགས། དཀྱིལ་འཁོར་རྒྱ་མཚོའི་བདག་ཉིད་ཆེན་པོར་གྱུར་ནས་སླར་ཡང་ཨེ་ཝཾ་ཕན་བདེ་ཁང་གསར་དུ་བཞུགས་གནས་མཛད་དེ།
བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་དང་། ཞར་བྱུང་དུ་སྒྲུབ་པའི་རྒྱལ་མཚན་བཙུགས་ནས་དག་པ་མཁའ་སྤྱོད་ཀྱི་ཞིང་དུ་ཕེབས་པ་གདོན་མི་ཟ་བ་ཡིན་ནོ། །ཆོས་ཀྱི་སྲས་སུ་གྱུར་པ་ཡང་། རྡོ་རྗེ་འཆང་བྱམས་པ་བསོད་ནམས་དཔལ་ལྡན། བྱམས་པ་བསོད་ནམས་བཟང་པོ། འཇམ་མགོན་བཀྲ་ཤིས་ལྷུན་གྲུབ། བྲང་ཏི་ནམ་མཁའ་བསམ་འགྲུབ། ཤར་པ་དཔལ་ལྡན་བཟང་པོ། མཁན་ཆེན་སངས་རྒྱས་དཔལ་བཟང་། རྡོ་རྗེ་སློབ་དཔོན་བློ་གྲོས་ཕུན་ཚོགས། སངས་རྒྱས་ཚུལ་ཁྲིམས། རྗེ་དྲུང་དཔལ་ལྡན་ལྷུན་གྲུབ། སྤང་ཤར་བླ་མ་ཁུ་དབོན། མཚུངས་མེད་ཀུན་དགའ་རྣམ་རྒྱལ། དཀོན་མཆོག་རྒྱལ་མཚན་རྣམས་ཀྱིས་གཙོས་སྟོད་མངའ་རིས་སྐོར་གསུམ། དབུས་གཙང་ཁམས་གསུམ། ལྷོ་མོན་སོགས་ཀྱི་བསྟན་འཛིན་གྱི་བླ་མ། དཔོན་པོ། སྤྲུལ་སྐུ། རྡོ་རྗེ་སློབ་དཔོན་རྣམས་དང་། ཁྱད་པར་སྐུའི་དབོན་མཁན་ཆེན་དཔལ་ལྡན་ཆོས་སྐྱོང་གིས་གཙོས་སྐལ་ལྡན་གྱི་བུ་སློབ་སྟོང་ཕྲག་བཅུར་ལོངས་པ་སོགས་མཆིས་ཤིང་། ཐུགས་དམ་གྱི་རིམ་པ་ལའང་སྔ་ཐུན་གྱི་རིགས་ལ་སྒྲོལ་དཀར་ཡིད་བཞིན་འཁོར་ལོའི་འོད་ཟེར་དྲུག་སྦྲགས། བིརླ་པའི་སྲུང་བ་ཕྱི་ནང་སྦྲགས་མ། ལམ་ཟབ་ཕྱི་ནང་སྦྲགས་མ། ནཱ་རོ་མཁའ་སྤྱོད་ལ་ཨོ་གསུམ་མ་སུམ་བརྒྱ་བས་མི་ཉུང་བ། ཀྱེ་རྡོར་མངོན་
རྟོགས་ལམ་དུས་སྦྲགས་མ་རླུང་སྦྱོར་དང་བཅས་པ། འཇམ་དཔལ་དཀར་པོ། འཕགས་པ་སྤྱན་རས་གཟིགས་མདོ་ཁམས་ཤར་ཕྱོགས་མ་དང་མ་ཎི་སྟོང་ཚར་རེ་ལས་མི་ཉུང་བ། རྡོ་རྗེ་བྲག་རྫོང་མ་ལ་ཡི་གེ་བདུན་མ་སྟོང་ཕྲག་རེ། གཏོར་མའི་རིམ་པ་ལ། དཀར་གཏོར་ཆ་བཞི། ཛམྦྷ་ལ་དཀར་པོ། སེར་པོ། ནག་པོ། དབྱུ་གུ་སྤུན་གསུམ། བརྒྱ་རྩའི་རིམ་པ། བྲུལ་གཏོར་ཆུ་སྦྱིན་བཅས་དང་། མཇུག་ཏུ་ཟ་བྱེད་མཁའ་འགྲོའི་སྦྱིན་སྲེག་བརྒྱ་ཚར་གསུམ། བར་སྐབས་ཀྱི་རིམ་པར་གྲགས་རྒྱལ་གྱི་བསྟོད་པ་ཆོས་རྣམས་མ་དང་། ཀུན་དགའ་བཟང་པོའི་བསྟོད་པ་མདོ་རྒྱུད་མ། བྱང་སེམས་ཟླ་བ་རྒྱལ་མཚན་གྱི་བསྟོད་པ་བཅས་ཤློ་ཀ་གསུམ་ལ་བརྒྱ་ཚར་རེ། ལྟུང་བཤགས་ནས་བཟུང་ཆོས་སྤྱོད་ཕྱི་ནང་ཚར་རེ། འཇམ་དཔལ་མཚན་བརྗོད་ཚར་གསུམ། སྨོན་ལམ་རྣམ་གསུམ་ཚར་གསུམ། རྣམ་རྒྱལ་གཟུངས་ཚར་བཅུ་གསུམ་རེ། རྣམ་འཇོམས་གཟུངས་ཚར་ལྔ་རེ། མཇུག་ཏུ་འགྲོ་ལ་བདེ་སྐྱིད་མ་བཅས་བཀྲ་ཤིས་ཀྱི་བར་དང་། གཟིམ་ཁང་ནང་དུ་ཞབས་བསྐོར་བརྒྱ་ཚར་རེ། དགོང་མོའི་སྐབས་སུ་ལམ་ཟབ་ཕྱི་ནང་། བིར་སྲུང་ཕྱི་ནང་། མཁའ་སྤྱོད་མ། ཀྱེ་རྡོར་ཕྱི་ནང་། སྔ་དགོང་གང་བདེ་ལ་རྡོ་རྗེ་འཇིགས་བྱེད་བསྐྱེད་རྫོགས་ཀྱི་ཉམས་ལེན་དང་། རྩ་སྔགས་ཕྲེང་སྐོར་
རེ། སྙིང་པོ་སྟོང་ཕྲག་རེ། ཉེ་སྙིང་ཕྲེང་སྐོར་རེ་མ་ཆག་པ། འབྱུང་འདུལ་སེང་གདོང་མ་སྔོན་མོ། གུ་རུ་དྲག་དམར་རྩ་སྔགས་སྟོང་ཚར་རེ། མགོན་པོ་བྲག་རྫོང་མ་ཕྱི་ནང་སྦྲགས་མ་དང་། ཡི་གེ་བདུན་མ་སྟོང་ཚར་རེ། ཤཱ་ས་ན་བརྒྱ་ཚར་རེ་མ་ཆགས་པ། གཏོར་བསྔོའི་རིམ་པར། ཀྱེ་རྡོར། འཇིགས་བྱེད། རྣལ་འབྱོར་མ། འབྱུང་འདུལ། གུར་ལྕམ་དྲལ། ཞལ་བཞི་པ། ཟངས་གྲི་ཅན། བྲན་བདུན། ལས་མགོན་མིང་སྲིང་། དུད་སོལ་ལྷ་མོ། དུར་ཁྲོད་བདག་པོ། མགོན་དཀར། སྟག་ཞོན། ཏྲཀྐད། ཕྱོགས་སྐྱོང་བཅུ། ལས་གཤིན། དམག་ཟོར་མ། མཁའ་འགྲོ་སྤྱི་གཏོར་བཅས་རྣམས་མ་ཆག་པ་ཉམས་སུ་ལེན་པ་དང་། དུས་རྒྱུན་ཐུགས་སྒམ་ཞིང་། བླ་མ་གོང་མའི་ཕྱག་ལེན་གྱི་རིམ་པ་གང་དགོས་པ་ཐམས་ཅད་ལ་ནོར་འཁྲུལ་མེད་པ་ཞིག་དང་། ཆོས་འཆད་པའི་བྱ་བ་གང་མཛད་པ་ཐམས་ཅད་སྦྱོར་དངོས་རྗེས་གསུམ་ཆ་ཚང་ཞིང་བརྗོད་པ་ཕུན་སུམ་ཚོགས་པས་སྐྱེས་བུ་དམ་པ་ཆོས་སྨྲ་བའི་ཁྱུ་མཆོག་གི་དཔེར་འོས་པ་ཞིག་ཡིན་ནོ། །དེ་ལྟར་སྐུ་ཚེ་དང་འཁོར་ལོ་གསུམ་གྱི་ལེགས་མཛད་མཐའ་ཕྱིན་ནས། སྐུ་དབོན་དམ་པ་དཔལ་ལྡན་ཆོས་སྐྱོང་དགུང་གྲངས་ཉེར་ལྔར་ཕེབས་པ་མེ་རྟ་ཟླ་བ་དང་པོའི་ནང་ཕྱི་མཐའ་གཟིགས་པའི་ལུང་བསྟན་དང་ཞལ་ཆེམས་ཤིན་ཏུ་ཞིབ་པར་
སྩལ་ནས་ཟླ་བ་གཉིས་པའི་ཚེས་བཅུ་བཞི་ལ་སྐུ་དྲང་པོར་བསྲངས། དྲན་པ་མངོན་དུ་མཛད། ཐུགས་གཞན་དུ་མི་གཡོ་བར་འོད་གསལ་མཁའ་ཁྱབ་ཀྱི་ཏིང་ངེ་འཛིན་ལ་སྙོམས་པར་ཞུགས་པ་ནས་བཟུང་ནམ་མཁའི་དབྱིངས་ཀུན་འཇའ་སྤྲིན་གྱིས་གང་། ལྷག་པར་ཚེས་བཅོ་བརྒྱད་ལ་འཇའ་སྤྲིན་གྱི་རྣམ་པ་མི་འདྲ་བ་དུ་མ་འཁྲིགས་པ་དང་ལྷན་ཅིག་ཏུ་འོད་གསལ་ལས་ཟུང་འཇུག་གི་སྐུར་བཞེངས་ཏེ་དག་པའི་ཞིང་དུ་གཤེགས་པ་ན། སྐུ་གཟུགས་འགྱིང་བའི་ཚུལ་གྱིས་ཡོ་ཞིང་། ཤངས་བུག་ནས་བྱང་སེམས་དཀར་དམར་གྱི་རྒྱུན་ཤར་གྱིས་བབས་པ་སོགས་རྣལ་འབྱོར་མཆོག་གི་ལམ་རྟགས་མངོན་དུ་མཛད། ཉེར་ལྔའི་ཉིན་ཁང་གསར་མཁན་ཆེན་བྱམས་པ་བསོད་ནམས་བཟང་པོས་སྐུ་གདུང་ཞུགས་ལ་ཕུལ་བས། འཇའ་དང་། འོད་དང་། མེ་ཏོག་གི་ཆར་བབས་པ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ཞིང་། སྐུ་དབོན་དམ་པའི་མནལ་ལམ་དུའང་དཔལ་ལྡན་དམག་ཟོར་རྒྱལ་མོས་རྗེ་བཙུན་དམ་པ་དག་པའི་ཞིང་ཁམས་སུ་ཕེབས་པའི་ཞབས་འབྲིང་མཛད་པར་གཟིགས། རྗེས་ཀྱི་དགོངས་རྫོགས་སོགས་དབོན་རིན་པོ་ཆེ་དཔལ་ལྡན་ཆོས་སྐྱོང་གིས་ཤིན་ཏུ་རྒྱས་པར་མཛད་དོ། ༅། །འཇམ་པའི་དབྱངས་ངག་དབང་ལེགས་གྲུབ་ནི། འབྲོག་གནས་མཆེད་ལྔའི་
ནང་ཚན་གནོད་སྦྱིན་གྱི་སྡེ་དཔོན་ཆེན་པོ་གསེར་སྤོང་གིས་ལེགས་པར་སྲུང་བའི་ཡུལ་གྲུ་སྒ་ལུང་རུ་བཞིར་གྲགས་པའི་ནང་ཚན་ལབ་མདའ་ཞེས་བྱ་བའི་གྲོང་ཁྱེར་དུ། སྔགས་ཀྱི་ལམ་ལ་གཞོལ་བའི་བརྒྱུད་པ་ཕྱིས་སུ་ལབ་མདའ་པའི་འཕྱིང་བང་དུ་གྱུར་པ་ཡ་རབས་དྲྭ་མའི་ངང་ཚུལ་ཅན་གྱི་ཁྱིམ་དུ་རབ་བྱུང་བཅུ་བཞི་པའི་ལྕགས་མོ་ལུག་གི་ལོར་འཁྲུངས། གཞོན་ནུའི་དུས་གདོང་སྤྲས་བསམ་གཏན་གླིང་གི་ཆོས་གྲྭར་ཞུགས། སྐྱེ་རྒུ་དོན་གྲུབ་གླིང་པའི་སྤྲུལ་སྐུ་ངག་དབང་བྱམས་པ་ཆོས་དར་མདུན་གཙུག་ཕུད་ཕུལ། མཚན་ངག་དབང་ལེགས་གྲུབ་ཏུ་གསོལ། སླར་ཐོབ་ཁུང་གི་དབང་གིས་ཐུབ་བསྟན་དགོན་དུ་བྱོན་ནས། དེ་དག་ཏུ་དཔལ་ཨེ་ཝཾ་པའི་ཆོས་སྤྱོད་ཆོ་གའི་རིམ་པ་རྣམས་བྱང་ཆུབ་པར་སྦྱངས། རྒྱལ་བའི་བཀའ་འགྱུར་རིན་པོ་ཆེ་ཀློག་པའི་མཆོད་གནས་ཀྱང་མཛད། དགུང་ལོ་བཅུ་དགུ་པ་ས་མོ་གླང་གི་ལོར་འོག་མིན་གཉིས་པ་ཤྲཱི་ཨེ་ཝཾ་ཆོས་ལྡན་དུ་ཕེབས། ལོ་དེར་མཁན་ཆེན་འཇམ་པའི་དབྱངས་དཔལ་ལྡན་དོན་གྲུབ་ལས་གསུང་ངག་རིན་པོ་ཆེ་གསན་ཅིང་། ཕྱི་ལོར་བསྙེན་པར་རྫོགས། རྟ་ནག་ཐུབ་བསྟན་རྣམ་རྒྱལ་དུ་མཚན་ཉིད་ཀྱང་ཐོག་གཅིག་སྦྱངས། ཁྱད་པར་དཔལ་ཨེ་ཝཾ་པའི་བསྒྲིགས་སྲོལ་ལྟར་རྒྱུད་བརྟག་གཉིས། ཚུལ་གསུམ། ལྗོན་ཤིང་། སྡོམ་གསུམ། སྣང་
རྒྱུད་གཉིས། ཀུན་ཏུ་དགོས་པའི་གཞུང་བདུན། མངོན་རྟོགས་རྒྱན་དང་། སྤྱོད་འཇུག་སྟེ་གཞུང་ཆེན་པོ་བཅོ་ལྔའི་ཚིག་དང་དོན་བཅས་ཐུགས་མཚོར་གཏམས་པས་གཞུང་བདུན་སྨྲ་བའི་མཚན་གྱི་ཅོད་པན་དབྱངས། དེ་དག་གི་སྐབས་སུ་ཉིན་རེར་ཤོག་བུ་དྲུག་རེ་ཙམ་ཆག་མེད་དུ་འཛིན་པ་གནང་བས་གོང་གི་གཞུང་དེ་རྣམས་ལོ་ཕྱེད་གཉིས་ཙམ་གྱིས་རྫོགས་པར་བཟུང་བ་ཡིན་ཅེས་གསུངས། བཟོ་དང་གསོ་བའི་རིག་པའང་ཅུང་ཟད་སྦྱངས་ཤིང་། ཁྱད་པར་སྐུ་གཟུགས་དང་མཆོད་རྟེན་གྱི་ཐིག་རྩ། དཀྱིལ་འཁོར་རབ་འབྱམས་ཀྱི་བྲིས་ཐིག །དབྱངས་གདངས། གར་རོལ་སོགས་ལ་མཁས་པའི་ཕུལ་དུ་སོན། དགུང་ལོ་སུམ་ཅུ་པ་ལྕགས་ཕོ་བྱི་བའི་ལོར་མཁན་ཆེན་ཐམས་ཅད་མཁྱེན་པས་བཀའ་སྩལ་ལྟར། བདག་གིས་སྒྲ་ཀ་ལཱ་པ། སྡེབ་སྦྱོར་རིན་འབྱུང་། སྙན་ངག་མེ་ལོང་རྣམས་ཕུལ་བ་དུས་ཐུང་ངུས་ཚེགས་མེད་པར་མཁྱེན། རྟ་ནག་མཁན་ཆེན་སེང་གེ་རབ་རྒྱས་ལས་ཕར་ཚད་ཀྱི་བཤད་པ་དང་། མཁན་ཆེན་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་གཙོ་བོར་གྱུར་པའི་ཡོངས་འཛིན་དམ་པ་ཇི་ལྟར་བསྟེན་པའི་ཚུལ་ནི། མཁན་ཆེན་དཔལ་ལྡན་དོན་གྲུབ། ཕན་ཁང་མཁན་རིན་པོ་ཆེ་བྱམས་པ་དཔལ་ལྡན་བཟང་པོ། ཁང་གསར་མཁན་ཆེན་ངག་དབང་བློ་གྲོས་
བསྟན་འཛིན། དཔལ་ས་སྐྱ་པ་འཇམ་མགོན་རྡོ་རྗེ་རིན་ཆེན། མདོ་ཁམས་པ་ངག་དབང་བཟང་པོ། ཞྭ་ལུ་རྡོ་རྗེ་འཆང་རིན་ཆེན་བློ་གསལ་བསྟན་སྐྱོང་། བྲག་སྒོམ་ཞབས་དྲུང་རིན་པོ་ཆེ་དཀོན་མཆོག་བསྟན་པ་རབ་རྒྱས། ཐར་རྩེ་ཞབས་དྲུང་རིན་པོ་ཆེ་འཇམ་དབྱངས་ནམ་མཁའ་རྒྱལ་མཚན། ལྷ་བཙུན་འཇམ་པའི་དབྱངས་དོན་གྲུབ་རྒྱལ་མཚན། འདར་གྲོང་ཆེན་སློབ་དཔོན་ངག་དབང་འཇམ་དབྱངས། རྟ་ནག་སྒྲོལ་ཕུག་རིན་པོ་ཆེ་རིག་འཛིན་འཇམ་དབྱངས་ཆོས་ཀྱི་རྒྱལ་མཚན། འདར་སྟོན་བློ་བཟང་བསྟན་པའི་ཉི་མ། དཔལ་ས་སྐྱ་པའི་ཡོངས་འཛིན་བློ་གྲོས་རྒྱ་མཚོ། ཅོར་ཨེ་ཝཾ་པའི་ཟུར་འཆང་ངག་དབང་བསྟན་པ། སྡོམ་བརྩོན་ཕྲིན་ལས་རབ་རྒྱས་སོགས་ཡོངས་འཛིན་དམ་པ་མཐའ་ཡས་པ་བསྟེན་ནས་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་བདུད་རྩི་རྒྱ་མཚོ་ལྟ་བུ་གསན། ཁོ་བོས་ཀྱང་དབང་ལུང་འགའ་ཞིག་མཎྜལ་དུ་ཕུལ། བྱ་རྒྱུད་རིགས་གསུམ་སྤྱི། ཚེ་དཔག་ལྷ་དགུ། གཉན་སྒྲོལ། སྒྲོལ་དཀར། རྣམ་འཇོམས། ཀུན་རིག །གསང་འདུས་འཇམ་རྡོར། འཇིགས་བྱེད་ལས་གཤིན་བཅས། བདེ་མཆོག་བོང་ཞལ་ཅན། ནཱ་རོ་མཁའ་སྤྱོད། དཔལ་ཀྱེ་རྡོ་རྗེ། མགོན་པོ་བྲག་རྫོང་མ། རྟ་མགྲིན་ཡང་གསང་སོགས་ཀྱི་བསྙེན་པ་སྦྱིན་སྲེག་བཅས་དང་། རྒྱུན་དུའང་དེ་དག་ཅི་
རིགས་པས་མཚོན་ཉམས་བཞེས་སུ་མཛད། ཆུ་ཕོ་སྟག་༣༢ལ་ཞྭ་ལུ་རྡོ་རྗེ་འཆང་སོགས་ལ་དབང་བཀའ་ཕུལ། དགུང་གྲངས་སོ་གསུམ་པ་ཆུ་མོ་ཡོས་ཀྱི་ལོར་དཔལ་ཨེ་ཝཾ་པའི་རྡོ་རྗེའི་སློབ་དཔོན་དུ་མངའ་གསོལ་ནས་ལོ་བཞི་ལྷག་ཙམ་བཞུགས་པའི་བར་གཙོ་བོར་བསྒྲིགས་ལམ་གོང་འཕེལ་དང་། བར་སྐབས་སུ་འདར་གྲོང་ཆེན་སློབ་དཔོན་ལས་བཀའ་འགྱུར་རིན་པོ་ཆེ་སོགས་གསན། སོ་བདུན་པ་མེ་མོ་ལུག་གི་ལོ་འཇུག་ནས་བཀའ་འགྱུར་རིན་པོ་ཆེའི་ཆོས་འཁོར་བསྐོར། བཞི་བཅུ་པ་ལྕགས་༤༥ཕོ་ཁྱི་ལོར་སྐྱེད་ཚལ་དུ་སློབ་བཤད་གསུངས་ཤིང་དབུས་སུ་ཕེབས། ཞེ་གསུམ་པ་ཆུ་མོ་གླང་གི་ལོར་ཁམས་སུ་བྱོན།། ༈ །།བདག་ཆེན་བློ་གྲོས་རྒྱལ་མཚན་རྣམ་ཐར་ཚར་ཆེན་པས་མཛད་པ་ཡིད་འཕྲོག་ཨུཏྤལ་དོ་ཤལ་༥༩ལས། སྔོན་དུས་འོད་གསལ་ལྷའི་རིགས་ཆེ་བ་གནམ་ལྷ་སྤྱི་རིང་། བར་པ་གཡུ་རིང་། ཆུང་བ་ཨུ་སེ་གནམ་ལྷ་མཆེད་གསུམ་དུ་གྲགས་པ་ཡུལ་མཐོ་ཞིང་ས་གཙང་བ་མངའ་རིས་སྟོད་ཀྱི་སའི་ཆའམ། བྱང་གི་རྒྱལ་མོ་ཤེལ་ཚའི་འགྲམ་དུ་བབས་པ་འདོད། གང་ལྟར་གཡུ་རིང་གིས་རྨུའི་བུ་མོ་དང་ལྷན་དུ་ཞུགས་པས་སྲས་མ་སངས་སྤུན་བདུན་བྱུང་བའི་ནང་ནས། ཆུང་བ་མ་སངས་རྗེས་མི་ཡུལ་དུ་བཞུགས་པའི་སྲས་ཐོག་ཚ་དཔལ་བོ་སྟག །དེ་སྲས་ཀླུ་ཚ་དཔའ་བོ་ཆེ། དེ་
སྲས་གཡའ་སྤང་སྐྱེས། དེ་སྲས་འཁོན་བར་སྐྱེས་ཡིན། འདི་མན་ལ་འཁོན་གྱི་གདུང་དུ་གྲགས། དེ་སྲས་འཁོན་དཔའ་བོ་ཆེ། འདིས་ཆོས་རྒྱལ་ཁྲི་སྲོང་ལྡེའུ་བཙན་གྱི་ནང་བློན་མཛད། དེ་ལ་སྲས་བཞི་བྱུང་བའི་གསུམ་པ་ནི། སད་མི་བདུན་གྱི་ནང་འཁོན་ཀླུ་དབང་སྲུང་བ་དང་། བཞི་པ་ཚེ་འཛིན་གྱི་སྲས་རྡོ་རྗེ་གཉིས་ཀྱི་སློབ་དཔོན་ཆེན་པོར་གཏུགས་ཏེ། སྔགས་རྙིང་མའི་ཆོས་ལ་མཁས་ཤིང་གྲུབ་པར་གྲགས། དེ་ནས་འཁོན་རོག་ཤེར་ཚུལ་ལ་ཐུག་གི་བར་དུ་གདུང་རབས་བཅུ་ཙམ་གྱི་རིང་ཡང་ཕུར་ལ་ཐུགས་དམ་གྱི་མཐིལ་མཛད། བྲག་ལ་ཕུར་པ་བཏབ། རྔ་ལ་ཞོན་ནས་ནམ་མཁར་འགྲོ་བ་སོགས་རྫུ་འཕྲུལ་སྣ་ཚོགས་སྟོན་ནུས། དཀར་བདུད་དང་བརྟན་མ་བཅུ་གཉིས་སོགས་བྲན་དུ་འཁོལ་བ་ཤ་སྟག་བྱུང་། ཤེས་རབ་ཚུལ་ཁྲིམས་ཀྱི་གཅུང་དཀོན་མཆོག་རྒྱལ་མཚན་པས་གསང་སྔགས་ཕྱི་འགྱུར་གྱི་བདག་པོར་གྱུར། འབྲོག་མི་སོགས་མཁས་གྲུབ་དུ་མ་བསྟེན། དགུང་ལོ་བཞི་བཅུ་པར་སངས་རྒྱས་ཀྱི་བསྟན་པ་ཕྲག་བཅུར་གནས་པའི་ཕྲག་བདུན་པ་མངོན་པའི་དུས་ཀྱི་ལྔ་བརྒྱ་ཕྲག་གི་སྟེང་ནས་ལོ་༢༠༧འདས་པ་ཆུ་མོ་གླང་གི་ལོར་ཁྲུམས་སྟོད་ཟླ་བའི་ཡར་ཚེས་ལ་བོད་ཀྱི་རྡོ་རྗེ་གདན་དཔལ་ས་སྐྱའི་གཙུག་ལག་ཁང་བཏབ། འདི་མན་འཁོན་ས་སྐྱའི་གདུང་བརྒྱུད་དུ་གྲགས། དེ་སྲས་གངས་ཅན་གྱི་རྡོ་རྗེ་
འཛིན་པ་ཀུན་གྱི་གཙུག་ནོར་ས་སྐྱ་པ་ཀུན་དགའ་སྙིང་པོ་སྟེ། འདི་ནས་ཇོ་བོ་རྗེས་ས་དཀར་པོའི་ལོ་གསལ་དྷིབདུན་དང་ཧཱུྃ་གཅིག་འདུག་པ་གཟིགས་ནས་དེར་འཇམ་དབྱངས་ཀྱི་སྤྲུལ་པ་བདུན་དང་། ཕྱག་རྡོར་གྱི་སྤྲུལ་པ་གཅིག་སྟེ་བརྒྱད་བྱོན་པར་ལུང་བསྟན་པ་རྣམས་རིམ་གྱིས་བྱོན། སློབ་དཔོན་ཆེན་པོས། ཀུན་དགའ་སྙིང་པོ་ས་སྐྱ་ལོ་ཙཱ་དང་༔ བསོད་ནམས་རྩེ་མོ་གྲགས་པ་རྒྱལ་མཚན་ཞེས༔ རིགས་གསུམ་མགོན་པོའི་སྤྲུལ་པ་གཙང་དུ་འབྱུང་༔ ཞེས་གསུངས། དེ་ལ་སྲས་བཞི་འཁྲུངས་པའི་ཆེ་བ་ཀུན་དགའ་འབར་རྒྱ་གར་རྡོ་རྗེ་གདན་དུ་སྐུ་གཤེགས། གཉིས་པ་བསོད་རྩེ། གསུམ་པ་གྲགས་རྒྱལ། བཞི་པ་དཔལ་ཆེན་འོད་པོར་གྲགས། དེ་ལ་སྲས་གཉིས་ཀྱི་ཆེ་བ་རྗེ་ས་པཎ། ཆུང་བ་སློབ་དཔོན་ཟངས་ཚ་བསོད་ནམས་རྒྱལ་མཚན། དེ་ལ་སྲས་ལྕམ་སྲིང་བརྒྱད་འཁྲུངས་པའི་ཆེ་བ་འགྲོ་མགོན་ཆོས་འཕགས། སྲས་གཉིས་པ་གསང་བདག་རྣམ་འཕྲུལ་འགྲོ་མགོན་ཕྱག་ན། དེ་ཡང་ཡུམ་མི་གཅིག་པའི་མཆེད་ཟླ་སློབ་དཔོན་རིན་ཆེན་རྒྱལ་མཚན་དང་། ཡེ་ཤེས་འབྱུང་གནས་གསུམ་བྱུང་། ཡེ་ཤེས་འབྱུང་གནས་སྲས་བདག་ཉིད་ཆེན་པོ་བཟང་པོ་དཔལ། འདི་རྒྱ་ནག་ཏུ་བྱོན་ནས་རྒྱལ་པོའི་ཉམས་སད་པའི་ཕྱིར་ཧམ་ཆུ་ཟེར་བར་ཡུན་རིང་དུ་བཞུགས་བཅུག །སོ་བདུན་པ་ས་ཁྱི་ལ་ས་
སྐྱར་ཕེབས། བཙུན་མོ་བདུན་ཁབ་ཏུ་བཞེས་ཤིང་སྲས་བཅོ་ལྔ་སྲས་མོ་གཉིས་ཏེ་བཅུ་བདུན་འབྱུང་། དགུང་༥༢ལོ་པར་རབ་བྱུང་མཛད། སྲས་ཐོག་མ་གཉིས་གཞོན་ནུ་ནས་གཤེགས། གསུམ་པ་བླ་ཆེན་ཀུན་དགའ་བློ་གྲོས་རྒྱལ་མཚན་དཔལ་བཟང་པོ་སྟེ། དགུང་༡༢ལོ་བར་གོང་མའི་ཏི་ཤྲཱི་མཛད། བླ་མ་བདག་ཉིད་ཆེན་པོར་སྐུ་གཤེགས་རྗེས་གཅུང་རྣམས་ལ་བླ་བྲང་ཁག་བཞིར་བགོས་ནས་གནང་། དེའང་མཁས་བཙུན་ནམ་མཁའ་ལེགས་པ་དང་། གུ་ཤྲཱི་ནམ་མཁའ་རྒྱལ་མཚན་མཆེད་ལ་ཤེལ་ཐམ་དང་བཞི་ཐོག་བླ་བྲང་གནང་། འདི་དག་གི་གདུང་བརྒྱུད་ལ་དང་པོ་གཞི་ཐོག་བླ་བྲང་ཟེར། དེ་ནས་ཆུ་མིག་བླ་བྲང་པ་ཟེར་ཏེ་བདག་ཆེན་བློ་གྲོས་དབང་ཕྱུག་ཡན་གྱིས་གདུང་བརྒྱུད་རྣམས་རྫོགས་ནས་དེང་སང་མི་བཞུགས། ཏི་ཤྲཱི་ཀུན་དགའ་ལེགས་པའི་འབྱུང་གནས་དང་། ཏི་ཤྲི་ཀུན་དགའ་རྒྱལ་མཚན་དཔལ་བཟང་ལ་གསེར་ཐམ་དང་། ལྷ་ཁང་བླ་བྲང་གནང་། འདིའི་བརྒྱུད་ལ་དང་པོ་ལྷ་ཁང་བླ་བྲང་པ་དང་། དེང་སང་ལ་སྟོད་གཅུང་དང་ཁམས་སུ་བཞུགས་པར་གྲགས། ཏཱ་དབེན་གུ་ཤྲཱི། དེའི་གཅུང་འཇམ་དབྱངས་དོན་ཡོད་རྒྱལ་མཚན། དེའི་གཅུང་ཐམས་ཅད་མཁྱེན་པ་བསོད་ནམས་རྒྱལ་མཚན་མཆེད་ལ་ཤེལ་ཐམ་དང་། རིན་ཆེན་སྒང་གི་བླ་བྲང་གནང་། འདི་ལ་སྔར་
རིན་ཆེན་སྒང་བླ་བྲང་པ་དང་། ཕྱིས་སུ་དགེ་སྡིངས་བླ་བྲང་པ་ཞེས་གྲགས། བདག་ཆེན་རྡོ་རྗེ་འཆང་བློ་གྲོས་རྒྱལ་མཚན་ཡན་གྱིས་གདུང་བརྒྱུད་རྫོགས་ནས་དེང་སང་ཆོས་བརྒྱུད་འཛིན་པ་ཤ་སྟག་ཡིན། སའི་ལེན་དབང་ཀུན་དགའ་ལེགས་པའི་རྒྱལ་མཚན་དཔལ་བཟང་པོ་ལ་དུས་མཆོད་བླ་བྲང་དང་གསེར་ཐམ་གནང་། འདི་པའི་སྒོས་ཀྱི་གདུང་བརྒྱུད་ལ་དང་པོ་དུས་མཆོད་བླ་བྲང་པ་དང་། དེང་སང་རྩེ་གདོང་བླ་བྲང་པར་གྲགས་ཤིང་ལུགས་གཉིས་ཀྱི་སྒོ་ནས་དར་ཞིང་རྒྱས་པར་བཞུགས། དེ་ལས་གཞན་པའི་སྲས་རྣམས་ཆུང་ངུ་ལ་གཤེགས། ལྕམ་མོ་རྣམས་ཀྱི་མཚན་མ་སྨོས་སོ། །དེ་ཡང་རིན་ཆེན་སྒང་པའི་བརྒྱུད་པ་ནི། བདག་ཉིད་ཆེན་པོ་དང་། ཞྭ་ལུ་སྐུ་ཞང་མགོན་པོ་དཔལ་གྱི་སྲས་མོ་མ་གཅིག་གཞོན་ནུ་འབུམ། དེ་ལ་སྲས་སྐུ་མཆེད་གསུམ་འཁྲུངས་པའི་ཆེ་བ་ཏཱ་དབེན་ཀུན་དགའ་ཉི་མ་གཞོན་ནུ་སྟེ་གོང་མའི་ཕོ་བྲང་དུ་གཤེགས། དེའི་གཅུང་འཇམ་དབྱངས་དོན་ཡོད། དེའི་གཅུང་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་ཡིན། འཇམ་དབྱངས་དོན་ཡོད་རྒྱལ་མཚན་གྱིས་རབ་བྱུང་མ་མཛད་པའི་གོང་མ་གཅིག་ཞྭ་ལུ་པ་ཡོན་ཏན་དཔལ་འབུམ་ཁབ་ཏུ་བཞེས་པས། སྲས་གཅེན་ཉི་མ་རྒྱལ་མཚན་ཆུང་ངུ་ནས་གཤེགས། གཅུང་ཟླ་བ་རྒྱལ་མཚན་གྱིས་བསྙེན་རྫོགས་མ་མཛད་
པའི་གོང་མ་གཅིག་ཞྭ་ལུ་པ་ནམ་མཁའ་རྒྱལ་པོ་ཞེས་པའི་སྲས་ལྕམ་སྲིང་བཞི་འཁྲུངས་པའི་ཆེ་བ་སློབ་དཔོན་པདྨའི་རྣམ་འཕྲུལ་བདག་ཆེན་འཇམ་དབྱངས་ཆེན་པོ་ནམ་མཁའ་རྒྱལ་མཚན་དཔལ་བཟང་པོ། དེའི་གཅུང་བདག་ཆེན་ཞྭ་ལུ་པ་མཐུ་སྟོབས་དབང་ཕྱུག་རྒྱལ་མཚན་དཔལ་བཟང་། ལྕམ་མོ་ཆེ་བ་ཕྱག་རྡོར་འབུམ། ཆུང་བ་དགེ་མའོ། །བདག་ཆེན་འཇམ་དབྱངས་ཆེན་པོས་ས་སྐྱའི་དཔོན་ཆེན་གྱི་བརྒྱུད་པ་ཁམ་མདའ་བ་མ་གཅིག་དཔལ་འབྱུང་རྒྱལ་པོ་ཞེས་པ་ཁབ་ཏུ་བཞེས་པས། སྲས་ལྕམ་སྲིང་དྲུག་བྱུང་བའི་གཅེན་རྒྱ་གར་པ་ཤེས་རབ་རྒྱལ་མཚན། གཅུང་བདག་ཆེན་ཆོས་ཀྱི་རྒྱལ་པོ་བློ་གྲོས་རྒྱལ་མཚན་ཡིན། སྲས་མོ་བཞིའི་ཆེ་བ་སློབ་དཔོན་མ་བསོད་ནམས་དཔལ་འཛོམ། གཉིས་པ་སློབ་དཔོན་མ་ནམ་མཁའ་འབུམ། གསུམ་པ་སློབ་དཔོན་མ་ནམ་མཁའ་བཟང་མོ། བཞི་པ་སློབ་དཔོན་མ་མཁའ་འགྲོ་འཛོམ་མོ། །ཁ་བ་རི་པའི་བསོད་ནམས་པདྨོའི་རྩེར། །སྐབས་གསུམ་བུང་བ་གཞོན་ནུའི་རོལ་རྩེད་ལས། །ཕན་བདེ་སྦྲང་རྩི་གསར་པའི་དུས་སྟོན་གྱིས། །ཐུབ་བསྟན་ལང་ཚོའི་འཛུམ་དཀར་འདི་ན་བཞད། །དཔའ་མཛངས་བློ་གྲོས་ཕུན་ཚོགས་དཔའ་བོ་ཞིག །འཇམ་དབྱངས་འཁོར་ལོས་སྒྱུར་བའི་ཞབས་འབྲིང་མཆོད། །དེ་ཡི་རིགས་ལས་ཁ་བའི་སྨན་ལྗོངས་སུ། །ངུར་སྨྲིག་འཛིན་
པའི་ཐོག་མ་ནཱ་གེནྡྲ། །འཇིག་རྟེན་མིག་གྱུར་འཁོན་སྟོན་མཆེད་བཅས་ཀྱིས། །འཛམ་གླིང་བརྟུལ་ཞུགས་གྲུབ་པའི་མཐར་སོན་པ། །ཨོ་རྒྱན་མཁན་པོའི་ཞབས་རྡུལ་གཙུག་གིས་བསྟེན། །གསང་ཆེན་བདུད་རྩིས་ཐུགས་ཀྱི་བུམ་བཟང་གཏམས། །རིགས་ཀྱི་ཐིག་ལེ་གྲུབ་དབང་བལ་པོའི་མཚན། །རིགས་སྔགས་གྲུབ་པའི་སྔགས་འཆང་འཁོན་རོག་སོགས། །ཁྲག་འཐུང་ཡང་ཕུར་ཁྲོས་པའི་ཞལ་མཐོང་ཞིང་། །སྲ་བརྟན་བྲག་ལ་འདམ་བཞིན་ཕུར་པ་འདེབས། །བས་མཐའི་གནས་སུ་མཁའ་ལ་བྱ་ལྟར་ལྡིང་། །དབྱིངས་ཕྱུག་མ་མོ་བདུད་ནག་ཐོད་ཕྲེང་དང་། །གསང་ཅན་སྐྱོང་བའི་བརྟན་མ་བཅུ་གཉིས་སོགས། །བཀའ་ཡི་སྤྲིང་ཡིག་རལ་པའི་རྒྱན་དུ་འཛིན། །དེ་ནས་རྗེ་བཙུན་དཀོན་མཆོག་རྒྱལ་པོ་ཞེས། །མཁས་དང་གྲུབ་པའི་འདབ་བཟང་དབང་པོ་དེས། །གསང་ཆེན་གསར་པའི་པདྨའི་ཆུ་གཏེར་རྙེད། །སྐལ་བཟང་ངང་པའི་བསྟི་གནས་དམ་པར་གྱུར། །གངས་ཅན་རི་བོའི་ཁོངས་འདི་མ་ག་དྷ། །ཆུ་ཤེལ་འཛིན་མའི་སྤོ་ལ་རྡོ་རྗེ་གདན། །བྱང་ཕྱོགས་འཛིན་མའི་དཔལ་དུ་འཕོས་འདྲ་བའི། །སྲས་བཅས་རྒྱལ་བའི་ཕོ་བྲང་གཙུག་ལག་ཁང་། །གང་དེར་རྗེ་བཙུན་འཇམ་བའི་རྡོ་རྗེ་ཉིད། །གོས་དཀར་ལྕང་ལོའི་ཟོལ་གྱིས་གསང་ཆེན་སྐྱོངས། །ལ་ལར་ངུར་སྨྲིག་འཛིན་པའི་གར་
གྱིས་རོལ། །ཐུབ་བསྟན་རྒྱལ་མཚན་སྲིད་རྩེར་འཛིན་པ་ལ། །ས་སྐྱ་པ་ཞེས་སྙན་པའི་རྔ་གསང་ནི། །ཁོར་ཡུག་རི་བོའི་ཁོངས་སུ་ལྷང་ངེ་བ། །ཡོངས་འདུ་དག་ལས་རྐང་འཐུང་གཉིས་པ་བཞིན། །ས་ཆེན་འདི་ན་འགྲན་ཟླས་དབེན་པར་གྱུར། །དེར་ནི་སྟོབས་ལྡན་རྒྱལ་པོ་སེ་ཆེན་གྱིས། །ཤིང་སྒོ་འཛིན་པའི་བོད་ཡུལ་ཆོལ་ག་གསུམ། །ཆོས་ཀྱི་རྒྱལ་པོར་ཕུལ་བས་བྱང་ཕྱོགས་ན། །གང་འདིའི་འབངས་སུ་མ་གྱུར་སུ་ཡོད་སྨོས། །འཕགས་མས་ལུང་བསྟན་མ་དྲོས་ཆུ་མཚོ་ལས། །མཁས་དང་གྲུབ་པའི་གདུང་གི་ཆུ་བོ་བཞི། །དགེ་མཚན་རིན་ཆེན་བྱེ་མ་འདེན་བཞིན་དུ། །སྐྱེ་རྒུ་རྒྱ་མཚོའི་དཔལ་དུ་དལ་གྱིས་འབབས། །དེ་ལས་ཆུ་སྐྱེས་ཚལ་ན་པད་དཀར་དང་། །རྒྱུ་སྐར་ཁྲོད་ན་རི་བོང་འཛིན་པ་ལྟར། །རབ་མཆོག་ཕུལ་བྱུང་རིན་ཆེན་སྒང་པ་ཞེས། །ཟླ་མེད་མཐུ་སྟོབས་ནུས་པའི་བདག་ཉིད་བྱུང་། །རྨད་བྱུང་རིགས་ཀྱི་ནོར་བུའི་ཅོད་པན་འདི། །དྲེགས་ལྡན་བྱེ་བས་རལ་པའི་རྒྱན་དུ་མཆོད། །མཁས་དང་གྲུབ་པ་ཡོངས་ཀྱི་སྤྱི་བོས་བཏུད། །སྐལ་བཟང་འགྲོ་བ་ཀུན་གྱི་ཕྱག་གི་གནས། །བ་ལང་ལྟ་བུའི་བླུན་པ་སྐལ་ངན་འགའ། །མ་གཏོགས་རྒྱ་མཚོའི་གོས་ཅན་ཁྱོན་འདི་ན། །གང་གི་རིགས་མཆོག་ཞལ་རྡུལ་གཙུག་རྒྱན་དུ། །འཛིན་པར་མི་བྱེད་ཤེས་ལྡན་སུ་ཞིག་ཡོད། །ཅེས་གསུངས།
ཡང་། པདྨའི་རྣམ་འཕྲུལ་འཇམ་དབྱངས་ཆེན་པོ་དང་། །མཚན་ལྡན་ཌཱ་ཀི་དཔལ་འཐུང་རྒྱལ་མོ་ཡི། །སྲས་སུ་འཁྲུངས་ནས་ངོ་མཚར་རོལ་རྩེད་མཛད། །གསང་ཆེན་སྙན་བརྒྱུད་ཐོབ་ལ་ཕྱག་འཚལ་ལོ། །ཞེས་གསུངས། དེ་ཡང་བདག་ཆེན་འདིས་རང་གི་ཡབ་ལས་མགོན་པོའི་སྐོར་དང་། མུས་ཆེན་སེམས་དཔའ་ཆེན་པོ་དཀོན་མཆོག་རྒྱལ་མཚན་ལ་གསུང་ངག་ལམ་འབྲས་སློབ་བཤད་སོགས་གསན་ནས་སྙན་བརྒྱུད་རྒྱ་མཚོའི་གཏེར་མཛོད་དུ་གྱུར། ས་ཆེན་གྱི་སྤྲུལ་པར་གྲགས། དགུང་ལོ་ང་གཉིས་པར་གཤེགས། སློབ་མ་ཡང་ཆོས་རྗེ་སངས་རྒྱས་དཔལ་སོགས་བཀའ་དྲིན་རྗེས་སུ་ནོས་པའི་དམ་པ་བཞི། ཀུན་མཁྱེན་གོ་ཤཱཀ་རྣམ་གཉིས་སོགས་འཛམ་གླིང་ཡོངས་སུ་གྲགས་པའི་མཁས་ཆེན་སོ་ལྔ། བདག་ཆེན་བསོད་ནམས་རྒྱལ་མཚན་སོགས་གངས་ཅན་ཆེན་པོར་གྲགས་པའི་སྐྱེས་བུ་གཉིས། རྡོ་རྗེ་འཆང་སྒོ་རུམ་པ་ཀུན་དགའ་ལེགས་པའི་བློ་གྲོས་སོགས་གསུང་གི་གསང་བ་འཛིན་པའི་དམ་པ་བརྒྱད། ཁྱད་པར་ཡོངས་རྫོགས་སྙན་བརྒྱུད་ཟབ་མོར་མངའ་བདག་རྗེ་བཙུན་རྡོ་རིང་པ་ཆེན་པོ་དང་། གཞན་ཡང་གསུང་ཆོས་ཀྱི་འབྲེལ་པ་ཙམ་ཐོབ་པ་ནི་ཤིན་ཏུ་མང་ངོ་། །དཔལ་ལྡན་བླ་མ་དམ་པ་ཀུན་སྤངས་ཆོས་ཀྱི་རྒྱལ་པོའི་རྣམ་ཐར་ངོ་མཚར་དད་པའི་སྤུ་ལང་གཡོ་བ་ཞེས་ཚར་ཆེན་
རིན་པོ་ཆེས་མཛད་པར། རྒྱལ་བ་རྒྱ་མཚོའི་རྨད་བྱུང་ངོ་མཚར་གཏམ། །སྲིད་མཐའི་བར་དུ་དབྱངས་སུ་བསྒྲགས་པ་བས། །འདི་ན་མཚན་ལྡན་རྡོ་རྗེ་སློབ་དཔོན་གྱི། །ཡོན་ཏན་རྟོགས་པ་བརྗོད་པའི་ཆ་ཤས་ཙམ། །བརྗོད་པའང་བསོད་ནམས་བླ་ན་མེད་དོ་ཞེས། །བསླུ་མེད་དམ་པའི་གཏམ་གྱིས་ཡིད་དྲངས་ནས། །གང་གི་ཡིད་ནི་ཚུལ་འདིར་ཞུགས་པར་གྱུར། །ཅེས་སོགས་གསུངས། དེ་ཡང་སྐུའི་སྐྱེ་བ་ནི། དང་པོའི་སངས་རྒྱས་འཁོར་བ་འཇིག །རྒྱ་གར་དུ་ལྭ་བ་པ། བོད་དུ་ཕག་གྲུར་གྱུར་པ་དབུས་སྨྱོན་ཧེ་རུ་ཀས་ལུང་བསྟན། རིག་འཛིན་པདྨ་གླིང་པས་བྲམ་ཟེ་མཆོག་སྲེད་ཀྱི་སྤྲུལ་པར་བསྒྲགས། འཁྲུངས་ཡུལ་ནི། བོད་ཆོས་རྒྱལ་གྱི་གདུང་གི་ནང་ཚན། འོད་སྲུང་གི་བརྒྱུད་པ་ལས་ཡབ་མགོན་པོ་རིན་ཆེན་ནམ། ཕྱིས་སུ་རབ་ཏུ་བྱུང་བའི་མཚན་ཀུན་དགའ་བསོད་ནམས་རྒྱལ་མཚན་དཔལ་བཟང་པོ་ཞེས་བསྐྱེད་རྫོགས་ཀྱི་ཉམས་ལེན་མཐར་སོན་པ་དང་། ཡུམ་སྣ་ནམ་རྡོ་རྗེ་བདུད་འཇོམས་ཀྱི་བརྒྱུད་པ་ས་སྐྱའི་དབོན་ཆེན་དཔལ་འབུམ་བཟང་པོའི་རིགས་ཡེ་ཤེས་མཁའ་འགྲོའི་རྟགས་ཅན་བྱང་སེམས་དབང་མཆོག་རྒྱལ་མོའི་སྲས་སུ་དཔལ་སྣར་ཐང་གི་ཉེ་འདབས། ངོར་ཨེ་ཝཾ་དང་ཉེ་བའི་ས་རྡོ་རིང་བསམ་འགྲུབ་སྨོན་མཁར་དུ་འཁྲུངས། ངོ་མཚར་གྱི་ལྟས་དུ་མ་བྱུང་། དགུང་ལོ་བཅུ་
དྲུག་ནས་གཞིས་ཀ་བསམ་འགྲུབ་རྩེར་ལྷ་སྲས་མུ་ཁྲི་བཙན་པོའི་རྣམ་འཕྲུལ་སྤྲུལ་པའི་རྒྱལ་པོ་རིན་སྤུངས་ནོར་བུ་བཟང་པོའི་ཕྱག་ཕྱིར་འབྱོར་ནས་མ་གཤེགས་པར་བཞུགས། ཆུང་ངུའི་དུས་ནས་ཞྭ་ལུ་པ་རྒྱལ་མཚན་དཔལ་བཟང་དང་། རྡོ་རྗེ་འཆང་ཀུན་དགའ་བཟང་པོས་རྗེས་སུ་བཟུང་། དགུང་ལོ་སུམ་ཅུ་ཡན་ལ་རྒྱལ་སྲིད་ཆོས་བཞིན་དུ་སྐྱོང་། རྟེན་སྐྱ་བོར་བཞུགས། སོ་གཅིག་པར་མནལ་ལམ་དུ་ངོར་ཆེན་པས་བསྐུལ་བ་ལྟར་གྲྭ་ཐང་ཆོས་རྗེ་ཤེས་རབ་ཟླ་བར་རབ་ཏུ་བྱུང་ཞིང་། དེ་ནས་བདག་ཆེན་རྡོ་རྗེ་འཆང་ལ་བསྙེན་རྫོགས་བཞེས་པ་ནས་བཟུང་མཉེས་པ་གསུམ་གྱི་བྱ་བས་བསྟེན་ནས་དཔལ་ལྡན་ས་སྐྱ་པའི་སྙན་བརྒྱུད་རྒྱ་མཚོའི་གན་མཛོད་དུ་གྱུར། འདི་དང་རྗེ་ངོར་ཆེན། ཞྭ་ལུ་པ་མཁྱེན་རབ་ཆོས་རྗེ་གསུམ་བཀའ་དྲིན་ཆེ་བའི་བླ་མར་མཛད། གཞན་ཡང་རིས་མེད་ཀྱི་ཡོངས་འཛིན་བདུན་ཅུ་རྩ་གཉིས་བསྟེན་ཏེ། ཟུང་གིས་ལྷག་པའི་ཡོངས་འཛིན་བཅུ་ཕྲག་བདུན། །ལྷག་པར་བཀའ་དྲིན་ཆེ་བའི་བླ་མ་གསུམ། །གཅིག་པུ་འགྲན་ཟླ་བྲལ་བའི་ས་སྐྱ་པ། །མཉེས་པ་གསུམ་གྱི་སྒོ་ནས་བསྟེན་པའི་མཐུས། །འཕགས་ཡུལ་མ་དྲོས་ཆུ་གཏེར་ལས་འོངས་པའི། །རྒྱུད་སྡེ་རྣམ་བཞིའི་ཆུ་ཀླུང་བྱེ་བ་བརྒྱ། །སྙན་བརྒྱུད་བདུད་རྩིའི་ཟེགས་མ་འཐོར་བཞིན་དུ། །ཁྱོད་ཐུགས་རྒྱ་མཚོའི་
ལྗོངས་སུ་དལ་གྱིས་ཞུགས། །ཞེས་འབྱུང་། རྙིང་མའི་ཕྱོགས་ཀྱང་ཉི་ཟླ་ལྟ་བུའི་མཁས་གྲུབ་ཀཿཐོག་པ་བླ་མ་ཡེ་ཤེས་འབུམ་པ། འཇའ་ལུས་རྡོ་རྗེའི་སྐུ་མངོན་དུ་མཛད་པ་རྨོག་སྟོན་ཆོས་ཀྱི་རྒྱལ་པོ་རྡོ་རྗེ་བཟང་པོ། ཨོ་རྒྱན་ཆེན་པོས་རྗེས་སུ་བཟུང་བ་རིག་འཛིན་ཀུན་དགའ་གྲགས་པ། རྗེ་གནམ་ལྡིང་པ། མཁའ་རེག་དབོན་དྲུག་པ། རྗེ་ཐང་སྟོང་པ། ག་ཟི་ཀུན་སྤངས་པ། རྗེ་བཙུན་མཚན་ལྡན་མ་སོགས་ལས་བཀའ་གཏེར་གྱི་ཆོས་དཔག་ཏུ་མེད་པ་གསན། ཚ་མོ་བྱང་ཆུབ་རྫོང་། གནམ་ཁའུ་བྲག་རྫོང་། བྱས་འགྱུར་རྡོ་རྗེའི་བྲག་རྫོང་སོགས་དབུས་གཙང་གི་རི་ཁྲོད་རྣམས་སུ་ཐོས་བསམ་གྱི་སྙིང་པོ་བསྒྲུབས་པ་ལ་འབད་པས་ལྷག་པའི་ལྷ་རབ་འབྱམས་ཀྱིས་ཞལ་གཟིགས། དམ་ཅན་བྲན་དུ་འཁོལ། མཐུ་སྟོབས་དང་ནུས་པའི་ཕ་མཐར་སོན། ཉམས་རྟོགས་ཀྱི་མཛོད་ཀློང་ཆེན་པོ་བརྡོལ་ཏེ། ཀུན་རྟོག་སྦྱངས་གཞིའི་སྣང་ཆ་ཇི་སྙེད་པ། །རང་རིག་སྐད་ཅིག་འཆར་སྒོར་ཐག་ཆོད་ནས། །དེ་ཉིད་རིམ་གཉིས་ཟབ་མོའི་ཏིང་འཛིན་དུ། །བསྒྱུར་ནས་དག་པའི་སྣང་བར་རྒྱས་བཏབ་སྟེ། ལམ་བྱེད་རྣམ་བཞིས་གནད་དུ་བསྣུན་པ་ལས། །གཞི་ལམ་འབྲས་གསུམ་དབྱེར་མེད་དོན་སྨྲ་བའི། །གསང་ཆེན་ཟབ་མོའི་བཅུད་ཀྱི་སྙིང་པོ་འདི། །ཁྱོད་ཉིད་ཁོ་ནས་བདག་གིར་མཛད་པ་སྙམ། །ཞེས་སོགས་
སྣང་། ཞལ་སློབ་ཀྱང་ས་སྐྱ་པ་ངག་དབང་གྲགས་པ་རྒྱལ་མཚན། གཉུག་ལ་པཎ་ཆེན་ངག་དབང་གྲགས་པ། ཀུན་མཁྱེན་དོལ་བུ་པའི་གདན་ས་པ་སྒོ་རུམ་པ་ཀུན་དགའ་ལེགས་པའི་བློ་གྲོས། སྤྱན་སྔ་ཤཱཀྱ་རྒྱལ་མཚན། གློ་བོ་པ་ཀུན་དགའ་གྲོལ་མཆོག་སོགས་ཤིན་ཏུ་མང་པོ་དང་། ཁྱད་པར་སྙན་བརྒྱུད་མཐའ་དག་གི་གཏེར་མཛོད་རྗེ་ཚར་པ་ཆོས་རྗེ་སོགས་མང་དུ་བྱོན། དགུང་ལོ་དོན་དྲུག་པ་ཤིང་སྤྲེལ་ལོ་སྨིན་༡ཟླའི་ཉ་ལ་ངོ་མཚར་བའི་ལྟས་དུ་མ་དང་བཅས་ཏེ་གཤེགས་སོ། །རྗེ་ཚར་ཆེན་གྱིས། འདི་ན་ཁུ་བྱུག་ཙ་ཀོ་ར་དང་སྦྲང་རྩི་བྱེད་པས་ཀུན་ནས་གང་བའི་པད་མཚོར་གཉིས་འཐུང་དགའ་བས་རྩེན། །ཙུ་ཏ་གསར་པའི་སྙེ་མ་རྒྱས་འགྲམ་ནི་ཙུ་ལ་ཡི་ལན་ཚར་ཁྲོད་ན་ཀ་དམ་མྱོས་པའི་གླུ་དབྱངས་སྒྲོག །ཛཱ་ཏིའི་མེ་ཏོག་ཕྲེང་བ་རྒོད་འཛུམ་རྩེ་ལ་རྐང་དྲུག་ལྡན་པ་ཉིན་བཞིན་རྒྱུ་བ་དེ་བཞིན་དུ། །དམ་པའི་བཀའ་དྲིན་བདུད་རྩིས་མྱོས་པས་ཁོ་བོའི་ཡིད་འདི་དབང་མེད་བསྐྱོད་ནས་རྟོགས་བརྗོད་གཏམ་འདི་གསལ་བར་བསྒྲགས། །ཞེས་དང་། ནོར་བུ་རྙེད་ནས་འཆིང་བུ་འདོར་བ་ལྟར། །ཐུན་མོང་ལམ་གཞན་དག་ཏུ་མི་གོལ་བར། །ལམ་གྱི་སྙིང་པོ་ཟབ་མོ་བླ་མའི་ལམ། །སྙིང་གི་དཀྱིལ་ནས་ཉམས་སུ་ལེན་པར་ཤོག །ཅེས་སོ། ༈ །རྗེ་ཚར་ཆེན་རྡོ་རྗེ་འཆང་བློ་གསལ་རྒྱ་
མཚོ་གྲགས་པ་རྒྱལ་མཚན་དཔལ་བཟང་པོའི་རྣམ་ཐར་སློབ་བཤད་བསྟན་པའི་ཉི་འོད་ཀུན་མཁྱེན་ལྔ་པ་རིན་པོ་ཆེས་མཛད་༡༢པར། ལུང་ལས། མཉན་ཡོད་གནས་དང་ཙམྤ་ཀ །ཝཱ་ར་ཎ་སི་ཡངས་པ་ཅན་། །རྒྱལ་པོའི་ཁབ་དང་དྲུག་པོ་ནི། །དེ་དག་གྲོང་ཁྱེར་ཆེན་པོར་གྲགས། །ཞེས་འཕགས་ཡུལ་དང་། གཞན་ཡང་ཤར་ཕྱོགས་ན་འཇམ་དཔལ་གྱི་ཞིང་རི་བོ་རྩེ་ལྔ། ལྷོ་ཕྱོགས་དཔལ་ལྡན་འབྲས་སྤུངས་ན་དུས་འཁོར་ཡེ་ཤེས་སེམས་དཔའི་དཀྱིལ་འཁོར་མ་བསྡུས་པ་དངོས་སུ་བཞུགས་པ་སྐུ་གསུང་ཐུགས་ཀྱི་དཀྱིལ་འཁོར་ཡོངས་རྫོགས། དེའི་ལྷོ་ཕྱོགས་རྒྱ་མཚོའི་འགྲམ་ན་རི་བོ་པོ་ཏ་ལ། ནུབ་ཕྱོགས་ན་ཨོ་རྒྱན་ཧེ་རུ་ཀའི་གཙུག་ལག་ཁང་། བྱང་ཕྱོགས་ན་ཆོས་རྒྱལ་རིགས་ལྡན་གྱི་བསྟི་གནས་ཤམྦྷ་ལ། དེར་མ་ཟད་རྒྱུད་སྡེ་ཆེན་པོ་རྣམས་ནས་འཛམ་གླིང་དབུས་མ་འདིར་རང་བྱུང་གི་གནས་༣༢ཡུལ་༢༤དུར་ཁྲོད་སོགས་ཡོད་པར་བཤད་དོ། །ཐམས་ཅད་མཁྱེན་པ་ཚར་བ་དེ། ཐོག་མར་འཕགས་པའི་ཡུལ་དུ་བི་རཱུ་པ། ཨོ་རྒྱན་དུ་རྡོ་རྗེ་རྣལ་འབྱོར་མས་རྗེས་སུ་བཟུང་བའི་སྦྲུ་བི་ར། རླུང་སེམས་དབང་ཐོབ་ཅིང་གནས་ལྔ་རིག་པའི་པཎྜི་ཏ་བོད་ཡུལ་དུའང་ཕེབས་པ་དྷརྨ་པཱ་ལ། ལྔ་རིག་པ་ཤིན་ཏུ་མཁས་ཤིང་གཉིས་སྤངས་ཀྱིས་བཟུང་བའི་པཎ་གྲུབ་གྷ་ཡ་དྷ་ར། སྣེ་མོར་མང་དུ་ཁྱུང་པོའི་
རིགས་ལས་ཡབ་སྟག་སྐྱེས་དང་། ཡུམ་བཀྲ་ཤིས་སྐྱིད་ཀྱི་སྲས་སུ་འཁྲུངས། ཆུང་དུས་ཡབ་ཆོས་བོད་ཀྱི་བོན་གྱི་འཆད་ཉན་མཛད། དེ་ནས་བླ་མ་འབྱུང་གནས་སེང་གེ་ལས་སེམས་ཀློང་མན་ངག་གི་སྐོར་རྣམས་གསན། དེ་ནས་རིན་ཆེན་གསེར་ཕྱེ་འཕངས་མེད་ཁྱེར། །གཅེས་པའི་སྲོག་ལ་མ་བལྟས་དཀའ་སྤྱད་ནས། །རྒྱ་དང་བལ་པོའི་ཡུལ་དུ་ལན་བདུན་ཕྱིན། །རྒྱ་གར་མཁས་པ་བརྒྱ་དང་ལྔ་བཅུ་བསྟེན། །ཁྱད་པར་མཁས་ཤིང་གྲུབ་ཐོབ་ལྔ་བཅུ་དང་། །རྩ་བའི་བླ་མ་ཁྱད་འཕགས་རྣམ་བཞི་བསྟེན། །ལོངས་སྐུ་དྲུག་པ་རྡོ་རྗེ་འཆང་ཆེན་ལ། །དངོས་སུ་ཆོས་གསན་ཡེ་ཤེས་མཁའ་འགྲོ་གཉིས། །མཉེས་པར་བྱས་ནས་མཐར་ཐུག་གདམས་ངག་ཞུས། །ཞེས་པ་ལྟར་དུར་ཁྲོད་སོ་ས་གླིང་དུ་ནཱ་རོའི་ལྕམ་ནི་གུ་མཇལ་ནས་ཆོས་དྲུག་གི་གདམས་པ་གསན། བླ་མ་ཡི་དམ་ལུང་བསྟན་པའི། །མཐར་ཐུག་གསུམ་གྱི་དུས་ལ་བབས། །ད་ནི་ཞིང་ཁམས་མཐར་ཐུག་པ། །བདེ་བ་ཅན་གྱི་ཞིང་དུ་འགྲོ། །ཞེས་གསུངས་ནས་འཕོ་བའི་རྣལ་འབྱོར་གྱིས་གཤེགས། གདུང་ལྷ་སྐུ་རིང་བསྲེལ་གྱི་ཕུང་པོར་སོང་། ༈ །ཁ་ཆེ་པཎ་ཆེན་ནི། རྒྱ་གར་གྱི་ནུབ་ཕྱོགས་ཁ་ཆེ་ཁྲི་རྟེན་དུ་ཡབ་ཚོང་དཔོན་སྲིད་བརྟན་དང་། ཡུམ་དགེ་བ་མ་གཉིས་ཀྱི་སྲས་སུ་མེ་ལུག་ལ་འཁྲུངས། རིག་པའི་གནས་བཅོ་བརྒྱད་ཀྱི་
ཕ་རོལ་སོན། མཁན་པོ་ཨཱ་ཀ་ར་གུསྟ་ལ་བསྙེན་པར་རྫོགས། སྡེ་སྣོད་གསུམ་དང་རྒྱུད་སྡེ་བཞིའི་གན་མཛོད་དུ་གྱུར། ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས་བོད་དུ་གདན་དྲངས། ལོ་གསུམ་བཞུགས། སྡོམ་བརྒྱུད་སྤེལ། རྗེ་བཙུན་གྲགས་རྒྱལ་ལ་དབང་གསན། ཉང་སྨད་རྒྱན་གོ་བ་གི་གཙུག་ལག་ཁང་དུ་ས་པཎ་བསྙེན་པར་རྫོགས། མ་བྱོན་སངས་རྒྱས་གསུམ་པ་རབ་གསལ་གྱི་སྤྲུལ་པར་གྲགས། ཤིང་བྱ་ལོ་དགུང་གྲངས་གོ་དགུ་པར་གཤེགས། ༈ ཆོས་རྗེ་སངས་རྒྱས་སྟོན་པའམ་བརྩོན་འགྲུས་སེང་གེ་ནི་ཤངས་པའི་རིན་ཆེན་བདུན་ལྡན་གྱི་ཐ་མ་འགྲོ་མགོན་སངས་རྒྱས་གཉན་སྟོན་གྱི་སློབ་མ་ཡིན། ཀུན་མཁྱེན་ཆོས་འོད་ནི་ཉང་སྟོད་གསེར་སྡིངས་སུ་ཡབ་གདུང་གསུམ་པ་ཀུན་མཁྱེན་གཞོན་ནུ་འོད་དང་། ཡུམ་བཙུན་ཤེས་རབ་རྒྱལ་མཚན་གྱི་སྲས་སུ་འཁྲུངས། ཁ་ཆེ་པཎ་ཆེན་གྱི་སྤྲུལ་པར་གྲགས། གསན་བསམ་རྒྱ་མཚོ་ལྟ་བུ་མཛད། གསེར་སྡིངས་ཀྱི་གདན་ས་མཛད། འོད་གསལ་ཁོར་ཡུག་ཏུ་འབྱོངས། དོན་དགུ་པར་གཤེགས། ཀུན་མཁྱེན་བུ་ནི། ཡུལ་ཉང་རོ་སྣ་བཞི་ཞེས་པར་སྔགས་རྙིང་མའི་གྲུབ་ཐོབ་རིམ་པར་བྱོན་པའི་གདུང་ལས་ཡབ་བྲག་སྟོན་རྒྱལ་མཚན་དཔལ་བཟང་དང་། ཡུམ་སློབ་དཔོན་བསོད་ནམས་འབུམ་གྱི་སྲས་སུ་ཤབ་སྨད་སྒོམ་གནས་དགོན་གསར་དུ་
ལྕགས་སྟག་ནག་ཟླའི་ཉ་ལ་འཁྲུངས། ཆུང་ངུ་ནས་འཇམ་དབྱངས་ཞལ་གཟིགས། རང་གི་མེས་བླ་མ་ཚུལ་ཁྲིམས་བཟང་པོ་ལ་རྙིང་མ་བཀའ་གཏེར་གསན། དགུང་ལོ་བཅོ་བརྒྱད་པར་སློབ་དཔོན་ཚད་མའི་སྐྱེས་བུ་ལས་རབ་ཏུ་བྱུང་ཞིང་མདོ་ཕྱོགས་ཐམས་ཅད་ལ་སྦྱངས། དགུང་ལོ་ཉེར་གསུམ་པ་ཚོར་འདུས་འབུར་མོར་མཁན་ཆེན་བསོད་ནམས་གྲགས་པ་ལས་བསྙེན་པར་རྫོགས། ཐར་ལོ་ལས་སྒྲ་སྙན་སོགས་དང་། གསང་སྔགས་འགའ་སོགས་ཡོངས་འཛིན་མང་པོ་ལས་གསན་པ་རྒྱ་ཆེ། ལྕགས་སྤྲེལ་ལོར་ཞྭ་ལུ་གསེར་བཀང་དུ་གདན་ས་མཛད་ཅིང་། རི་ཕུག་ཀྱང་བཏབ། བསྟན་བཅོས་པོ་ཏི་སུམ་ཅུ་ཉེ་བར་མཛད། ས་ག་ཟླ་བར་རྒྱུད་སྡེ་བཞིའི་དཀྱིལ་འཁོར་ཞེ་ལྔ་ཙམ་བཙུགས། བླ་ཆེན་བསོད་ནམས་བློ་གྲོས་དང་ཐུགས་སྲས་སེམས་དཔའ་ཆེན་པོ་སོགས་ཞལ་སློབ་གྲངས་སུ་ཡས་པ་བཞུགས། ཤིང་འབྲུག་ཟླ་བ་དྲུག་པའི་ཚེས་ཉེར་གཅིག་ལ་གཤེགས། ༈ །རྣལ་འབྱོར་དབང་ཕྱུག་ཡར་ཀླུང་པ་ནི་བླ་མ་པ་དམ་པའི་སློབ་མ་ཡིན་ཅིང་། དཔལ་ལྡན་ས་སྐྱ་པའི་སྙན་བརྒྱུད་ཐམས་ཅད་ཀྱི་གན་མཛོད་མཁས་གྲུབ་འགྲན་ཟླ་བྲལ་བ་ཞིག་གོ །ཕ་རྒོད་བསོད་ནམས་བཟང་པོ་ནི། ཤངས་པ་བཀའ་བརྒྱུད་ཀྱི་བསྟན་འཛིན་ཆེན་པོ་ཞིག་གོ །རྣལ་འབྱོར་དབང་མོ་ནི་སྟག་ཚང་ལོ་ཙཱ་
བའི་སློབ་མ། ཕྱི་ལྟར་ཚུལ་ཁྲིམས་ཕུང་པོ་རྣམ་པར་དག་ཅིང་། ནང་ལྟར་རྩ་རླུང་ཐིག་ལེའི་གནད་ལ་རང་བྱན་ཚུད་པས་ཡེ་ཤེས་ཌཱ་ཀིའི་ཚོགས་རྗེ་མཛད་པ་ཞིག་གོ །བོད་ཡུལ་དབུས་སུ་བྱས་པའི་ཤར་དུ་རྒྱ་ནག་དང་ཁྲི་བརྟན། ལྷོར་རྒྱ་གར་དང་ཁ་ཆེ། ནུབ་ཏུ་སྟག་སྡེ་དང་ཁྲམ་ཡན། བྱང་དུ་ཁྲོམ་དང་གེ་སར་ཡོད་ལ། བདེ་མཆོག་རྩ་རྒྱུད་ལས། བོད་ཀྱི་ཡུལ་དང་དེ་བཞིན་དུ། །མཱ་ལ་པ་དང་པཱུ་ལི་སོགས། །ཉི་ཤུ་རྩ་བཞིའི་གནས་ཡིན་ནོ། །ཞེས་པ་དང་། ཀྱེ་རྡོར་དུ་གནས་དང་ས་སྦྱོར་བའི་ས་བཅུ་གཉིས་པར་བཤད། ཞིང་ས་དང་ཁང་ས་གཉིས་ཏེ་སའི་དགེ། ཁང་རྡོ་དང་ཆུས་བསྐོར་གྱི་རྡོ་སྟེ་རྡོའི་དགེ །ཞིང་ཆུ་དང་འཐུང་ཆུ་སྟེ་ཆུའི་དགེ ཁང་ཤིང་དང་འབུད་ཤིང་སྟེ་ཤིང་གི་དགེ །གམ་འབྲོག་དང་རྒྱལ་འབྲོག་སྟེ་འབྲོག་གི་དགེ་བ་ཞེས་དགེ་བཅུ་ཚང་བའོ། །བཀའ་གདམས་གླེགས་བམ་ལས། ཆོས་དགེ་བ་བཅུ་ཡི་ཁྱད་འཕགས་པ། །གླིང་ཕུན་སུམ་ཚོགས་པ་འཛམ་བུའི་གླིང་། །སྒོས་ཉང་ཞབས་ས་ཡི་ལྟེ་བ་སྟེ། །ས་དེ་ཡི་ནང་ནས་ཁྱད་པར་འཕགས། །མཐོ་བཀྲ་ཤིས་གཏམས་པ་ལྷུན་པོའི་འདབས། །ནོར་པདྨ་རཱ་ག་ལྟ་བུར་འདུག །ཅེས་ལུང་བསྟན། ༈ །ཚར་པ་ཆོས་རྗེ་འཁྲུངས་ཡུལ་ནི། གྲུབ་ཆེན་གྷ་ཡ་དྷ་རས་ཆུ་ལ་མུ་གུ་ཞེས་པའི་སྒྲས་ཀུ་མུ་ཏ་སྟེ་རྣམ་པར་གྲོལ་བའི་དཔལ་
མཚོན་པར་བསྔགས་པའི་གནས་དང་འདབས་འབྱོར་བར་མ་སང་གི་རིགས་ལས་སོན་པའི་དཔོན་ཆེན་དགེ་བཤེས་རིན་བརྩོན་པའི་བརྒྱུད་པ་ལས། ཡབ་ཡི་དམ་གྱི་ལྷས་རྗེས་སུ་བཟུང་ཞིང་སྟག་ཞོན་བྲན་དུ་འཁོལ་བ་རིན་ཆེན་དཔལ་བཟང་དང་། ཡུམ་དགེ་བའི་ཆོས་ལ་དཀར་བ་དབེན་ཆུ་ཁ་བའི་སྲས་མོ་བཀྲ་ཤིས་ཞེས་པའི་སྲས་སུ་ཆུ་མོ་ཕག་ལོའི་དཔྱིད་འབྲིང་གི་ཚེས་བཅུར་ངོ་མཚར་བའི་ལྟས་དང་བཅས་པར་འཁྲུངས། ཡུམ་གྱི་མནལ་ལམ་དུ་ཨོ་རྒྱན་སྐུ་ཐུགས་ཀར་ཐིམ་པ་སོགས་བྱུང་བས་ཨོ་རྒྱན་ཆེན་པོའི་སྤྲུལ་པར་ངེས་ཏེ། རྒྱལ་དབང་གིས། གཙང་བྱེད་པདྨའི་སྦུབས་ནས་བྱོན་པའི་ཅོ། །འདྲི་བའི་རྫུན་མིན་བདེན་གཏམ་སྐྱ་རེངས་མས། །མངལ་སྐྱེས་ཉེར་དྲངས་ཚེ་དབང་རིག་འཛིན་ནི། །ཤར་བའི་འོད་སྟོང་འབར་ལ་སུ་ཡིས་བསྙོན། །ཞེས་སོ། །ཆུང་ངུའི་དུས་ནས་དག་སྣང་མཐའ་ཡས་བ་ཤར། དགུང་ལོ་དགུ་པར་ཆོས་ལུང་འཛིན་གྱི་གཙུག་ལག་ཁང་དུ་ཡོངས་འཛིན་བློ་གྲོས་རྒྱལ་མཚན་ལས་ཚངས་སྤྱོད་དགེ་བསྙེན་སྡོམ་པ་གསན་ནས་དཔལ་ལྡན་ཨ་ཏི་ཤས་ལུང་བསྟན་པའི་བཀྲ་ཤིས་ལྷུན་པོའི་ཆོས་གྲར་ཞུགས། འབྲོམ་སྟོན་སྤྲུལ་པ་རྒྱལ་བ་དགེ་འདུན་རྒྱ་མཚོའི་དྲུང་དུ་རབ་ཏུ་བྱུང་། མཚན་བློ་བཟང་རྒྱ་མཚོར་གསོལ། མདོ་ཕྱོགས་ལ་སློབ་གཉེར་ཕུལ་ཕྱིན་མཛད། རྗེ་
བཙུན་མས་དངོས་སུ་བསྐུལ་ནས་ཁའུ་བྲག་རྫོང་དུ་རྡོ་རིང་པའི་མདུན་དུ་ཕེབས་ནས། གཙོ་བོར་ཡབ་བདག་ཆེན་དང་། མུས་ཆེན་པ་གཉིས་ཅར་གྱིས་རྡོ་རྗེ་འཆང་བློ་གྲོས་རྒྱལ་མཚན་ལ་གནང་བའི་ལམ་འབྲས་སློབ་བཤད་སོགས་ཀྱིས་མཚོན་དཔལ་ས་སྐྱ་པ་ཆེན་པོའི་སྙན་བརྒྱུད་ཀྱི་སྐོར་ཐམས་ཅད་ཡོངས་སུ་རྫོགས་པ་དང་། གཞན་ཡང་རྗེ་ཉིད་ལ་མངའ་བའི་ཟབ་དོན་རྣམས་དགུང་ལོ་བཅུ་བདུན་ནས་ལོ་ངོ་བདུན་གྱི་བར་ལ་ཞབས་པད་བསྟེན་ཏེ་གསན། སྙན་བརྒྱུད་བཞིའི་སྤྲོས་པ་ཆོད། གཞན་ཡང་ཡོངས་འཛིན་དུ་མ་ལས་ཟབ་ཆོས་རྒྱ་མཚོ་ལྟ་བུ་གསན། མཐུ་སྟོབས་ཀྱི་དབང་ཕྱུག་དྲང་སྲོང་བཀའ་བཞི་པ་ལས་རྟ་མགྲིན་ཡང་གསང་སོགས་དང་། ཉང་གི་སྔགས་འཆང་ཆོས་སྐྱོང་བསོད་ནམས་བཀྲ་ཤིས་ལ་གཏེར་ཁ་ཉི་ཤུ་ཙམ་གྱི་དབང་ལུང་སོགས་གསན་རྒྱ་ཧ་ཅང་ཆེ། མདོར་ན་ཡོངས་འཛིན་དྲུག་ཅུ་རྩ་གསུམ་བསྟེན། ཨོ་རྒྱན་ཆེན་པོ་དང་། རྣལ་འབྱོར་མ་སོགས་ལྷག་པའི་ལྷ་རབ་འབྱམས་ཞལ་གཟིགས། ཁྱད་པར་རྡོ་རིང་པས་དུས་རྒྱུན་དུ་རྗེས་སུ་བཟུང་། ཉམས་རྟོགས་ཀྱི་མཛོད་བརྡོལ། ཆོས་སྐྱོང་བྲན་དུ་འཁོལ། ཞྭ་ལུ་པའི་གདན་ས་བཅུ་གསུམ་པར་ལོ་གསུམ་མཛད། དགུང་ལོ་སོ་གཅིག་པར་ཆོས་ལུང་ཚོགས་སུ་མཁན་ཆེན་གྲགས་པ་རྒྱལ་མཚན་དཔལ་བཟང་པོ་ལས་བསྙེན་པར་རྫོགས།
མཚན་སྔ་མའི་མཐར་དཔལ་བཟང་པོར་བཏགས། ཐུགས་སྲས་ཀྱི་གཙོ་བོ་རྗེ་མཁྱེན་བརྩེ་དང་། གཞན་ཡང་བྱ་རྒོད་གཤོང་གི་མཁན་ཆེན་ཀླུ་སྒྲུབ་པ། བོད་མཁར་བ་བྱམས་པ་དོན་གྲུབ། རྩེ་ཚོགས་མཁན་པོ་གཞོན་ནུ་བློ་གྲོས། བོ་དོང་མཁན་ཆེན་བསླབ་གསུམ་རྒྱལ་མཚན། ཆོས་འཁོར་ཡང་རྩེའི་མཁན་ཆེན་བསོད་ནམས་ཆོས་འཕེལ་སོགས་བསམ་གྱིས་མི་ཁྱབ་པ་བསྐྲུན་ནས་དགུང་ལོ་རེ་བཞི་མེ་སྟག་ལོར་ངོ་མཚར་བའི་ལྟས་དང་བཅས་ཏེ་གཤེགས་སོ། །སྐུ་གཤེགས་ནས་ཀྱང་དམ་པ་མང་པོར་ཡེ་ཤེས་ཀྱི་སྐུས་རྗེས་སུ་བཟུང་ངོ་། །ས་སྐྱའི་མི་འགྱུར་བའི་གཟེར་བཞི་ནི། ཤར་དུ་བྱ་འགྱུར་བ་རྡོ་རྗེའི་བྲག །ལྷོར་ཕུལ་བྱུང་བདུད་པོ་བྲག །ནུབ་ཏུ་ཆ་ལུང་རྡོ་རྗེའི་བྲག བྱང་དུ་ག་ར་ག་ཡའི་བྲག །ཅེས་སྣང་། ཡབ་རྗེ་རྡོ་རིང་པའི་སློབ་མ་རྗེ་བཙུན་རྡོ་རྗེ་འཆང་ཀུན་དགའ་ལེགས་པའི་བློ་གྲོས་རྒྱལ་མཚན་དཔལ་བཟང་པོའི་རྣམ་ཐར་ཡིད་བཞིན་ཆུ་གཏེར་བཞད་པ་ཞེས་མཁྱེན་བརྩེས་མཛད་༨༠པར། ས་སྐྱ་ཉེ་བའི་དཔའ་ལུང་ཞེས་པར་གཙང་རོང་གི་མེས་སྟོན་ཆེན་པོའི་བརྒྱུད་ལས་ཡབ་གྲུབ་ཐོབ་ཆེན་པོ་བློ་གྲོས་རྒྱ་མཚོ་དང་། ཡུམ་ཤྲཱི་ཡོན་ཏན་རྒྱ་མཚོའི་དབོན་མོ་ཧོར་མོ་དཔལ་ལ་ཞེས་པའི་སྲས་སུ་འཁྲུངས། བཅུ་པའི་དུས་བདག་ཆེན་བློ་གྲོས་རྒྱལ་མཚན་ལས་རབ་ཏུ་བྱུང་། དེ་ནས་
མདོ་སྔགས་ཀྱི་ཕྱོགས་ལ་སྦྱངས་པ་མཐར་ཕྱིན། དགུང་ལོ་བཅུ་བདུན་པར་བདག་ཆེན་རིན་པོ་ཆེ་ལས་ལམ་འབྲས་སོགས་ས་སྐྱ་པའི་ཆོས་ཕལ་ཆེར་གསན། སླར་རྗེ་བཙུན་རྡོ་རིང་པའི་དྲུང་ནས་སྙན་བརྒྱུད་ཀྱི་སྤྲོས་པ་ཞིབ་མོར་བཅད། དགུང་ལོ་ཉི་ཤུ་པར་ཡོངས་འཛིན་དཀོན་མཆོག་འཕེལ་བར་བསྙེན་རྫོགས་བཞེས། གཞན་ཡང་ཡོངས་འཛིན་བསམ་གྱིས་མི་ཁྱབ་པ་བསྟེན། སློབ་མ་ཡང་ཚར་པ། དབོན་ངག་དབང་བསྟན་རྡོར། རྗེ་མཁྱེན་བརྩེ་སོགས་མང་། དགུང་ལོ་རེ་བརྒྱད་པར་གཤེགས།། ༈ །།བླ་མ་རིན་པོ་ཆེ་མཁན་ཆེན་པའི་རྣམ་ཐར་ངོ་མཚར་སྙེ་མ་ཞེས་མཁྱེན་བརྩེ་རང་ཉིད་ཀྱིས་མཛད་པ་༡༡༥ལས། བོད་རྒྱལ་པོའི་དུས་ནས་ཡོད་པའི་འ་ཞྭ་ཞེས་སུ་གྲགས་པའི་གདུང་ལས་ཕྱིས་གནས་གསར་བར་གྲགས་པའི་བརྒྱུད་པ་ལས་ཡབ་གྲུབ་དབང་ཆེན་པོ་དང་། ཡུམ་འདར་ཆོས་རྫོང་པའི་སྲས་མོ་ཚེ་བརྟན་བུ་འདྲེན་གྱི་སྲས་སུ་བོ་དོང་ཨེའི་ཕྱོགས་སུ་འཁྲུངས། ལོ་བརྒྱད་ལོན་པ་ན་རྗེ་བཙུན་སྒོ་རུམ་པས་རྗེས་སུ་བཟུང་ཞིང་རབ་ཏུ་བྱུང་། དགུང་ལོ་ཉི་ཤུ་པར་བསྙེན་པར་རྫོགས། རྟ་ནག་ཏུ་ལོ་ལྔ་ལ་མཚན་ཉིད་ཕྱོགས་སུ་སྦྱངས། རྗེ་སྒོ་རུམ་པ། ཚར་པ་ཆོས་རྗེ། ཆོས་རྗེ་ནམ་མཁའ་དབང་ཕྱུག་སོགས་ལས་ཟབ་ཆོས་བསམ་གྱིས་མི་ཁྱབ་པ་གསན། ཁྱད་པར་རྡོ་རྗེ་འཆང་ཚར་པ་ཆོས་རྗེའི་བསྟན་
པའི་བདག་པོར་གྱུར། ཞྭ་ལུའི་མཁན་ཐོག་བཅུ་བཞི་པ་ཡང་མཛད། ཞལ་སློབ་ཀྱང་མཐའ་ཡས། གསར་མའི་ཕྱོགས་ལ་༡༡༦དབང་། བྱིན་རླབས་༩༤། རྗེས་གནང་༡༧༨། ཁྲིད་ལྷག་༡༢༡པ། རྙིང་མའི་ཕྱོགས་ལ་དབང་༡༧༡། རྗེས་གནང་༣༡། ཁྲིད་ཀ་༣༨ཙམ་ཞིག་གསན་ནོ། །དགུང་ལོ་ཞེ་ལྔ་པར་གཤེགས། ༈ །རྗེ་བླ་མ་རྡོ་རྗེ་འཆང་ཆེན་པོ་གཞོན་ནུ་བློ་གྲོས་ཀྱི་རྣམ་ཐར་ཐེག་མཆོག་ཆོས་ཀྱི་གཎྜིའི་སྒྲ་དབྱངས་ཞེས་པ་བློ་གྲོས་རྒྱལ་མཚན་༧༢པས་སྦྱར་བ་སྟེ། དེ་ཡང་རྗེ་འདི། ཇོ་བོ་རྗེའི་ཡོན་བདག་ཤཱཀྱ་མགོན་གྱི་རིགས་ལས། ཡབ་ནང་སོ་དཔོན་པོ་མཚོ་སྐྱེས་དང་། ཡུམ་ཨ་སྲས་ཨ་རྒྱལ་གྱི་སྲས་སུ་ཡོལ་ཕུ་རི་གོང་གསེར་སྡིངས་བྱ་བར་སྐུ་འཁྲུངས། རྗེ་ཀརྨ་༧ཕྲིན་ལས་ལས་དགེ་བསྙེན་མཛད། མཚན་གཞོན་ནུ་བློ་གྲོས་སུ་གསོལ། བཅུ་གསུམ་པར་རྩེ་ཚོགས་མཁན་ཆེན་ནམ་མཁའ་བཀྲ་ཤིས་ལས་རབ་ཏུ་བྱུང་། པཎ་ཆེན་ལྷ་དབང་བློ་གྲོས་པའི་གདན་ས་སྐྱེད་ཚལ་འོག་ཏུ་བཅུ་དྲུག་པར་ཕེབས་ནས་ཐུགས་གཉེར་མཛད་པས་རབ་འབྱམས་སྨྲ་བའི་དབང་ཕྱུག་ཏུ་གྱུར། དེ་སྐབས་ཤིག་བླ་མ་གསང་འདུས་ལེ་བརྒྱད་མ་ཐུགས་ལ་བཟུང་བས་མནལ་ལམ་དུ་སློབ་དཔོན་ཆེན་པོ་མཇལ། ཉི་ཤུ་པར་མཁན་པོ་ནམ་མཁའ་བཀྲ་ཤིས་ལས་བསྙེན་པར་རྫོགས་ཤིང་རིན་ཆེན་གླིང་གི་
གདན་ས་ལ་ཕེབས། རྡོ་རྗེ་འཆང་ཚར་པ་ཆོས་རྗེ་ལོ་གསུམ་ཙམ་བསྟེན་ནས་སྙན་བརྒྱུད་རྒྱ་མཚོའི་མངའ་བདག་ཏུ་གྱུར། གཞན་ཡང་མདོ་སྔགས་རྒྱ་མཚོའི་ཕ་མཐར་སོན། རྩེ་ཚོགས་ཀྱི་མཁན་པོའང་མཛད་ཅིང་སྣེའུ་གདོང་ཞབས་དྲུང་རིན་པོ་ཆེས་ཏི་ཤྲིར་བཀུར། ལྕགས་མོ་ཡོས་ལོའི་ས་ཟླའི་ཚེས་ཉེར་བདུན་ལ་བརྩམས་ནས། ཡང་ཤར་བརྒྱུད། གསེར་པའི་སའི་ཐིག་ལེར། སྔར་ཚར་ཆེན་པས་ལུང་བསྟན་པ་ལྟར་བཀྲ་ཤིས་ཆོས་སྡེ་རྡོ་རྗེའི་ཕོ་བྲང་ཆེན་པོ་རྟེན་དང་བརྟེན་པར་བཅས་པ་གསར་དུ་བཏབ། མཐར་ངོ་མཚར་བའི་ལྟས་དུ་མ་དང་བཅས་གདན་ས་དེ་ཉིད་དུ་གཤེགས་སོ།། ༈ །།མཁན་ཆེན་དཔལ་ལྡན་ཆོས་སྐྱོང་གི་རྣམ་ཐར་ལས། རྡོ་རྗེ་འཛིན་པ་བཀྲ་ཤིས་བཟང་པོའི་རྣམ་ཐར་ཐོར་བུར་གསུངས་པ་ནི། དམ་པ་དེ་ཉིད་ནི་གཞི་ཚུལ་ཁྲིམས་རྣམ་པར་དག་པ་ལ་གནས་པ་དང་། ཐེག་ཆེན་རྒྱལ་བའི་སྲས་པོའི་འཇུག་སྒོ་རིན་པོ་ཆེ་དེ་ཉིད་ཚེ་རབས་དུ་མར་སྦྱངས་པ་མཐར་ཕྱིན་པའི་སྟོབས་ཀྱིས། སྐུ་ཚེ་འདིར་ཡང་གཞན་ཕན་གྱི་ཐུགས་བསྐྱེད་ལ་གཅིག་ཏུ་གཞོལ་ཞིང་བཟོད་པ་ཐོབ་པ་དང་། རིག་འཛིན་སྔགས་ཀྱི་སྡོམ་པ་རྣམས་ཀྱང་ཚུལ་བཞིན་དུ་ལེགས་པར་ནོས་ཏེ། ཐོས་པ་དང་བསམ་པ་དང་སྒོམ་པ་ཕུལ་དུ་ཕྱིན་ཅིང་། རྒྱུད་སྡེ་རྒྱ་མཚོར་འཇུག་པའི་དེད་དཔོན་ཆེན་པོར་དབང་བསྒྱུར་
ནས། མིང་ཙམ་དང་བརྡ་ཙམ་དང་ཐ་སྙད་ཙམ་མ་ཡིན་པར་རྒྱུད་སྡེ་མཐའ་དག་གི་དབང་དང་བྱིན་རླབས་ཀྱི་རིམ་པ་རྗེས་གནང་ཁྲིད་ལུང་ཞལ་ཤེས་ཀྱི་གདམས་པ་རབ་ཏུ་གནས་པ་དང་། རྡོ་རྗེ་སློབ་དཔོན་གྱིས་བགྱི་བར་འོས་པའི་ཕྱག་ལེན་གྱི་རིམ་པ་ཆེ་ཕྲ་ཆུང་གསུམ་མཐའ་དག་སོགས་ཀྱིས་བསྟན་པ་རིན་པོ་ཆེ་སྤྱི་དང་། ཁྱད་པར་ཆོས་གྲྭ་ཆེན་པོ་ལྷུན་གྲུབ་སྟེང་གི་རྒྱན་དམ་པར་སྐུ་དྲིན་ཡུན་དུ་ཆེ་བ་ཞིག་ནི་ཡིན་པར། ངེས་པར་དོན་གྱིས་རྡོ་རྗེ་འཆང་དབང་དམ་པར་གོ་ཞིང་། བདག་ཅག་ནས་ཀྱང་སྦས་པའི་རྣལ་འབྱོར་དེ་ཉིད་ཀྱི་ཞལ་ལས་བཅོམ་ལྡན་འདས་འཁོར་ལོ་སྡོམ་པ་དཔལ་མཁའ་འགྲོ་རྒྱ་མཚོའི་དཀྱིལ་འཁོར་དུ་དབང་བསྐུར་བ་ངོར་ཆེན་རྡོ་རྗེ་འཆང་གི་གསུང་རབ་དྲི་མ་མེད་པའི་སྟེང་ནས་ལེགས་པར་ནོས་པས། རང་ཉིད་དང་ཡང་ཚེ་རབས་ཐོག་མ་མེད་པ་ནས་སྨོན་ལམ་གྱི་ལས་སྐལ་ཤིན་ཏུ་བཟང་བ་ཞིག་མཆིས། ཞེས་དང་། བླ་རྒན་ཉིད་ཀྱང་དགུང་ལོ་གྲངས་མང་བ་བཅས་ཞབས་འབམ་གྱིས་བསྙུན་ཡུན་རིང་བས། ངེད་ནས་ཀུན་རིག་དབང་དང་རྗེས་གནང་གཅིག་གཉིས་ཙམ་ཕུལ། ཟླ་བ་བདུན་པའི་ནང་གི་ཚེས་བཅུ་སྐོར་ཙམ་ནས་བསྙུང་གཞི་ཉོབ་ཤས་འདྲ་མོ་ཞིག་གིས་བདུན་ཅུ་དོན་བདུན་པ་ཚེས་ཉི་ཤུ་ལ་དག་པའི་ཞིང་དུ་གཤེགས། ཞག་གསུམ་གྱི་བར་འོད་གསལ་
ཆེན་པོའི་ངང་དུ་གནས། ཐུགས་དམ་གསལ་འདེབས་དང་སྐུ་གདུང་ཆས་ཞུགས་ཀྱི་ཞབས་ཕྱི་རྣམས་ཅི་ལྟར་དགོས་པ་ངེད་རང་ནས་བསྒྲུབས། གདུང་གི་མེ་མཆོད་བཤེས་གཉེན་དམ་པ་བླ་མ་ནམ་མཁའ་དཔལ་བཟང་གིས་ཕུལ་བར་མཛད། སྐུ་གདུང་ཆས་ཞུགས་དང་སྦྱིན་སྲེག་གི་སྐབས་ནམ་མཁའ་ཐམས་ཅད་འཇའ་འོད་ཀྱིས་ཁེངས་པ་དང་། ལྷག་པར་ནུབ་ཕྱོགས་ཀྱི་ནམ་མཁའི་ཕྱོགས་ཐམས་ཅད་འཇའ་སྤྲིན་རྨ་བྱའི་མགྲིན་པ་ལྟ་བུས་ཁྱབ་པ་སོགས་བྱུང་། གདུང་རུས་རྣམས་བྱིང་ལ་སཱཙྪ་བཏབ་ཆུ་བོ་ཆེན་མོར་གདན་དྲངས། ཉུང་ཤས་ལ་སྐུ་བརྙན་དང་སཱཙྪ་བཏབ་པ་བཅས་ལ་བྱང་ཆུབ་མཆོད་རྟེན་མདའ་ཚད་མ་ཞིག་བཞེངས་ཏེ་འཇམ་མགོན་སངས་རྒྱས་ཕུན་ཚོགས་ཀྱི་སྐུ་གདུང་བཞུགས་པའི་ལྷ་ཁང་དུ་བཞུགས་སུ་གསོལ། སྐུ་ཆས་རྣམས་ཇི་ལྟར་ཡོད་པ་ས་སྐྱོང་ཁྲི་ཆེན་བླ་མ་དང་། ངེད་ནས་ཞབས་འགྱུར་ཞུས་པས་བསོད་ནམས་ཀྱི་སྐལ་བ་ཤིན་ཏུ་ཆེ་བར་མཆིས། ཞེས་སོ། །ཡང་རྟོགས་བརྗོད་དེ་ཉིད་ལས། ལོ་དར་གྱིས་སྟོད་སྨད་གང་དུའང་བུམ་གཏེར་སུམ་བརྒྱ་ནས་བརྒྱ་ཕྲག་ལྷག་པའི་བར་བསྒྲུབས་ཏེ་སོ་སོར་ཕན་ཆ་བྱེད་པར། སྒྲུབ་ཚུལ་ཀྱང་མང་དུ་མཆིས་རུང་། འཕྲལ་ཕུག་ཐམས་ཅད་དུ་དགེ་ཕྱིར་སངས་རྒྱས་ཀླུ་དབང་རྒྱལ་པོ་གཙོ་བོར་བསྐྱེད། དགོན་སྡེ་ཡུལ་ཁམས་ཐམས་ཅད་
ལ་བསོད་ནམས་སྤེལ་ཕྱིར། དེའི་མགྲོན་དུ་ནོར་ལྷ་ཕོ་མོ། ལྷ་ཀླུ་གཞི་བདག་གིས་བསྐོར་བ་དང་། ས་བདག་ཀླུ་གཉན་དང་སྡེ་བརྒྱད་ཀྱི་ནད་ལས་གྲོལ་བའི་ཕྱིར། ཀླུ་དབང་རྒྱལ་པོའི་ལྷ་ཚོགས་ལ་སེང་གེ་སྒྲ་དང་ལྷ་ཀླུ་རྣམས་ཀྱིས་བསྐོར་བ་ཞིག་དང་། དེ་དག་དང་མཐུན་པའི་གསོལ་གདབ་དང་བདེན་སྟོབས་བརྗོད་པ་ཞིག་བྱས་པས་གང་དུ་ཡང་དགེ་མཚན་ཆེ་བར་བྱུང་འདུག །དམིགས་བསལ་དགོས་རིགས་རྣམས་དམ་པ་གོང་མའི་གསུང་རབ་དྲི་མ་མེད་པ་ལྟར་ལག་ལེན་གང་ཐེབས་བགྱིས། ཞེས་དང་། ལྷུན་གྲུབ་སྟེང་གི་ཕོ་བྲང་གསར་བཞེངས་ཀྱི་ཕྱོགས་མཚམས་སྟེང་འོག་དང་། བང་མཛོད་རྣམས་སུ་བརྟན་གཡོའི་སྣོད་བཅུད་ཀྱི་དགེ་ལེགས་ཐམས་ཅད་བཀུག་སྟེ། འདོད་རྒུའི་དཔལ་ཡོན་མཐའ་དག་འབྱུང་ཕྱིར་གཏེར་དུ་སྦ་བར་མཛད་རྒྱུའི་ནོར་བུམ་གྱི་སྐོར་ལ། དམར་པོ་སྐོར་གསུམ། ཛཾ་དམར། ཛཾ་སེར། ཛཾ་ནག །དཀར་པོ་འབྲུག་ཞོན་ལྷ་ལྔ། མགོན་དཀར་ཡིད་བཞིན་ནོར་བུ། ཀླུའི་དབང་ཕྱུག་རྒྱལ་པོ། རྗེ་བཙུན་སེང་གེ་སྒྲ། རྒྱལ་པོ་ཆེན་པོ་རྣམ་ཐོས་སྲས་ཀྱི་སྐོར་དང་། གཞན་ཡང་བཅོམ་ལྡན་འདས་མ་གཙུག་ཏོར་གདུགས་དཀར་མོ་དང་། འཇམ་དཔལ་གཤིན་རྗེ་གཤེད་ཀྱི་སྐོར། རྡོ་རྗེ་ནག་པོ་ཆེན་པོ་གུར་གྱི་མགོན་པོ་དང་། ཞིང་སྐྱོང་སྟོབས་འཕྲོག་དབང་
པོ། ནོར་སྐྱོང་དུར་ཁྲོད་ཀྱི་བདག་པོ། ཌཱ་ཀི་སེང་གེའི་གདོང་པ་ཅན་སོགས་ཀྱི་སྒོ་ནས་བསྟན་པའི་སྦྱིན་བདག་ཆེན་པོའི་རིགས་བརྒྱུད་དང་བཅས་པའི་སྐུ་ཚེ་ཆོས་སྲིད་དཔལ་འབྱོར་མངའ་ཐང་ལོངས་སྤྱོད་དང་མངའ་འབངས་སུ་གཏོགས་པའི་དགོན་སྡེ་ཡུལ་འབྲོག་གླིང་གསུམ་གྱི་མི་ནོར་རྫ་ས་གསུམ་རྟག་ཏུ་བསྲུང་ཞིང་མི་མཐུན་པའི་གཡུལ་ཐམས་ཅད་ལས་རྣམ་པར་རྒྱལ་བའི་ཕྱིར་དམ་པ་གོང་མའི་དགོངས་པ་ལྟར་ལག་ལེན་ཡང་དག་པའི་སྒོ་ནས་བསྒྲུབས་ཏེ་ཆོས་རྒྱལ་ཆེན་པོའི་དགོངས་བཞེད་ལྟར་སོ་སོར་བཞུགས་སུ་གསོལ། །ཞེས་འབྱུང་བ་བུམ་གཏེར་ལ་སྐུ་དང་། སྔགས་བྱང་། ཁྱད་པར་གྱི་རྫས་སོགས་སོ་སོར་བཅུག་ནས་སྤྱི་འགྲོའི་མངོན་རྟོགས་ཀྱིས་བསྒྲུབ་པར་མཛད་དམ་སྙམ། །མངྒ་ལཾ།། ༈ །།མི་འགྱུར་རྒྱལ་མཚན་རབ་བྱུང་བཅུ་གཉིས་པའི་མེ་བྱ་ལོར་འཁྲུངས། དགུང་ལོ་བརྒྱད་པ་ཤིང་འབྲུག་ལ་ངོར་དུ་བྱོན། སོ་གཅིག་མེ་ཡོས་ལ་ཁྲིར་ཕེབས། ལོ་ལྔ་བཞུགས། དེ་ནས་ཀླུ་སྡིང་དུ་ཟུར་བཞུགས་གནང་། ཞེ་བཞི་ལྕགས་འབྲུག་ལ་སྡེ་དགེར་ཕེབས། དཔལ་ཆོས་དབོན་རིན་ཆེན་མཆོག་གྲུབ་ཡར་བྱོན་པ་དང་ལམ་ནས་མཇལ། སྡེ་དགེ་ནས་ཁྲི་འབུལ་རྣམ་གྲངས། ༡༥༥༣ཙམ་ཕུལ། ཞེ་ལྔ་ལྕགས་སྦྲུལ་ལོར་དཔོན་རྒན་བསོད་ནམས་མགོན་པོ་འདས། འདི་ལོར་འཛིང་རྣམ་རྒྱལ་
མགོན་ཁང་དུ་ཕེབས་སྐབས་སྡེ་དགེར་ལྷ་བརྒྱད་རྗེས་གནང་སོགས་མཛད། མགོན་པོའི་སྐུ་སྔར་ལས་གཟི་བརྗིད་ཆེ་ཞིང་སྣུམ་མདངས་ཆགས་པ་དང་། གནམ་དབྱིབས་འཇམ་པ་སོགས་དགེ་མཚན་ཆེ། ཞེ་བདུན་ཆུ་ལུག་ལོར་མགྲོན་གཉེར་ཀུན་དགའ་བསྟན་སྐྱོང་འབུལ་སྐྱེལ་མངགས་ཚུལ་རྣམ་ཐར། ༢༠༦ནས། ༢༠༩ བར་གསལ་བ་ལྟར། གསེར་རྡེལ་ཚད་བཅུ། དངུལ་རྡེལ་ཉི་ཤུ་ལྷག །གོས་ཡུག ༣༢ གླེགས་བམ། ༢༡ རྡོར་དྲིལ། ༢༡ རས་ཡུག ༣༣༥ ཇ་ཀོ་ཙེ། ༡༢༠ ཆུང་ཇུ། ༤༤༨ ཤན་ཇ ༨༨ གཞུང་མ། ༡༤༨ ༣ རྟ། ༤༣ དྲེལ། ༡༩ མཛོ། ༥༣ མཛོ་མོ། ༡༣ ཁལ། ༣༧ གཟི། ༡༦༦ སོགས་བསྐུར་ཚུལ་སྣང་། ཤིང་བྱ་ལོར་སྲས་ཆོས་སྐྱོང་མགོན་པོས་ང་འབོད་ལྕམ་བཞེས་རྒྱུ་དང་། བཀྲ་ཤིས་དབང་མོར་བློ་གྲོས་རྒྱ་མཚོ་སྐུ་བབས་རྒྱུ་མཛད། ང་གཅིག་མེ་ཕག་ལོར་ལྷ་རྒྱལ་དགོན་བཏབ། དེའི་དགུན་ཆོས་སྐྱོང་མགོན་པོ་འདས། ས་བྱི་ལོར་བཀྲ་ཤིས་དབང་མོར་ས་དབང་བཟང་པོ་འཁྲུངས། ལྕམ་འདས། ལྕགས་སྟག་ལོར་རིན་ཆེན་རིལ་བུ་བསྡུས། ཆུ་སྦྲུལ་དབྱར་སི་ཏུ། ཞུ་ཆེན། བཅུ་གཅིག་པར་བློ་གྲོས་རྒྱ་མཚོ་དབོན་སྟོད་དུ་འདས། ཤིང་ལུག་ས་དབང་བཟང་པོ་ཕོ་བྲང་དུ་ཕེབས། དྲུག་ཅུ་མེ་སྤྲེལ་ལོར་བོད་དུ་
བྱོན། དེའང་སྡེ་དགེ་ནས་ཟླ་༥ཚེས་༢༠ལ་བཏེགས། ཟླ་༦ཚེས་༣༠ལ་ལྷ་སར་ཕེབས། རེ་བཞི་ལྕགས་ཁྱི་ཟླ་༩ཚེས་༢༤ ལ་གཤེགས་སོ། །རྗེ་འདི་ཕུར་བུ་ལྕོགས་བྱམས་པས། རྒྱལ་སྲས་མཛེས་པའི་ཏོག །ཌོམ་བྷི་ཧེ་རུ་ཀ །ཧ་ཤང་མ་ཧཱ་ཡཱ་ན། དགེ་སློང་པུཎྞ། ཤུད་པུ་དཔལ་སེང་། ལྷོ་མོན་དུ་མཐུ་སྟོབས་རྡོ་རྗེར་སྐྱེ་བ་བཞེས་ཚུལ། རྒྱལ་བའི་མདུན་ན་རྒྱལ་སྲས་མཛེས་པའི་ཏོག །ཅེས་སོགས་གསོལ་འདེབས་མཛད། ཁམས་བྲག་དམར་བའི་རྙིང་མའི་བླ་མ་ཞིག་སྟག་ཤམ་གྱི་སྐྱེ་བ་དང་། སྡེ་དགེར་ཕེབས་དགོས་ཚུལ་སོགས་ལུང་བསྟན་སྐད། ༈ །མི་འགྱུར་རྒྱལ་མཚན་ཡར་ཕེབས་ལོར་ཁང་གསར་མཁན་ངག་དབང་ཆོས་སྐྱོང་བཟང་པོ་སྡེ་དགེར་གདན་དྲངས་ཏེ་ཕེབས། དེའང་རྗེ་འདི་རབ་བྱུང་བཅུ་གཉིས་པའི་ཆུ་ཡོས་ལ་འཁྲུངས། བདུན་པར་ངོར་དུ་ཕེབས། སྤྱིར་མ་འཁྲུངས་གོང་ནས་བྱམས་པ་བསོད་ནམས་བཟང་པོས་ཡབ་ལ། ཁྱོད་ཀྱི་ཁྱིམ་ཐབས་མར་བུ་ཞིག་བཙའ་འོང་ན། དེ་བསོད་ནམས་རྒྱ་མཚོའི་སྤྲུལ་སྐུ་ཡིན་ཅེས་ལུང་བསྟན། ཉི་ཤུ་ཆུ་ཁྱི་ལོར་ཁམས་མགོ་ཟིར་བྱོན། ཉེར་དྲུག་པ་འབྲུག་ལོར་ལྷུན་གྲུབ་སྟེང་དུ་དཔལ་ཆོས་མཆོད་ཡོན་མཇལ་བར་ཕེབས། དེ་ལོ་བོད་དུ་བྱོན། ཞེ་གསུམ་ཤིང་བྱ་ལོར་ཁྲིར་ཕེབས། ང་བཞི་མེ་སྤྲེལ་ལོར་མཁན་ས་བཅས་སྤྲད་ནས་སྡེ་དགེས་
གདན་དྲངས་པ་ལྟར་བྱོན། དགེ་རྒྱས་ལུང་སྨུག་ཏུ་དབོན་བློ་གྲོས་རྒྱ་མཚོ་དང་། རྩ་ཁོག་ཏུ་མི་འགྱུར་རྒྱལ་མཚན་ཡར་ཕེབས་པ་མཇལ། ཛམ་ཐོག་བརྒྱུད་དེ་དགེར་ཕེབས། རྣམ་གྲངས་སྟོང་དང་ལྔ་བརྒྱའི་ཁྲི་འབུལ་ཕུལ། ང་ལྔ་ས་བྱ་ལོར་སྡེ་དགེ་དང་དབྱར་གཟིགས་དཀྱུས་ལྟར་ཕེབས། རྣམ་རྒྱལ་མགོན་ཁང་དུ་སྐོང་གསོ་གནད་སྨིན་སོགས་གནང་། ང་དྲུག་ས་ཁྱི་ལོར་ཡང་དྲུག་འདུའི་དབུ་བློབཞུགས་དང་། དབྱར་སྒར་སོགས་དཀྱུས་ལྟར་གནང་། དཔལ་སྤུངས་སུ་སྤྲུལ་སྐུ་དམ་པར་ཚེ་དབང་དང་། རྣམ་འཇོམས་རྗེས་གནང་སོགས་ཕུལ། ལར་དཔལ་ཆོས། མི་འགྱུར་རྒྱལ་མཚན་སོགས་ལ་སི་ཏུ་གོང་མས་ཆོས་འབྲེལ་ཅི་རིགས་པ་གསན་སྣང་། ང་བདུན་པ་ཕག་ལོར་འབུལ་སྐྱེལ་ཇ། ༡༥༠༠ གསེར་དངུལ་རྡོ་ཚད། ༡༥ རྟ་དྲེལ། ༦༠ མཛོ་ཁལ། ༤༠༠ སྐོར་བསྐུར། འདི་ལོ་སྒ་སྟོད་དུ་ཕེབས་པ། སྨིན་ཟླའི་ཚེས་༡༧ལ་ཐུབ་བསྟན་དགོན་དུ་ངོ་མཚར་བའི་ལྟས་དང་བཅས་ཏེ་གཤེགས་སོ། །རྣམ་ཐར་སྡེ་དགེའི་དྲུང་ཡིག་ངག་དབང་ཆོས་གྲགས་ཀྱིས་བསྒྲིགས་པ་ཡོད།། ༈ །།མཁན་ཆེན་དཔལ་ལྡན་ཆོས་སྐྱོང་རྣམ་ཐར་རྟོགས་བརྗོད་སྣ་ཚོགས་ལྗོན་པ་སྟུག་པོའི་འཁྲི་ཤིང་། ཨེ། པ་ལས། སྐྱེ་རྒུ་དོན་གྲུབ་གླིང་བདག་ཆེན་རྒྱ་གར་པ་ཤེས་རབ་རྒྱལ་མཚན་གྱིས་བཏབ། ༈ །རྒྱམ་རྒྱལ་རྡོ་ཏི་
མཆེད་བརྒྱད་དང་པོ་འཕགས་ཡུལ། དེ་ནས་ཏི་སེ། དེ་ནས་མདོ་ཁམས་སུ་འཕོས། དཀར་ཕྱོགས་སྐྱོང་བ་སྟོབས་ཆེན་ཡིན། ཉིད་ཀྱི་མནལ་ལམ་དུའང་གཟིགས། མོན་པ་ཆེན་པོ་གཟུགས་མཛེས་པ་བཞི། མི་མཛེས་པ་བཞི། སྣམ་སྔོན་དང་། སྣམ་ལྗང་གྱོན་པར་སྣང་ཚུལ། ༈ །ཀེ་ཆུ་རྒྱུད་སྐྱོ་གེ་དགོན། ༈ །ལྡན་ས་དཀར་དགོན་འཇམ་དབྱངས་རིན་ཆེན་རྒྱལ་མཚན་དང་། ཀུན་དགའ་ལེགས་པ། མཐུ་སྟོབས་དབང་ཕྱུག་སོགས་ཀྱི་གདན་ས་ཡིན། ༈ །དྲན་ཐང་གྲུབ་ཐོབ་སྨི་ཏི་འདས་སྐབས། ཁོང་སྐུ་དངོས་བཞུགས་པའི་སྐབས་བསྟན་པ་ལ་ཕན་ཆེར་མ་བྱུང་བས་མྱ་ངན་ལས་འདས་པའི་གདུང་འདིས་སེམས་ཅན་གྱི་དོན་བྱེད་པར་ཤོག་ཅེས་གསུངས་ནས་སྨོན་ལམ་བཏབ་པའི་གདུང་རིལ་པོར་བཞུགས་པའི་མཆོད་རྟེན་གྱིས་གཙོས་རྟེན་གསུམ་བྱིན་ཅན་མང་། ༈ །འདམ་ཐོག་དགོན་སྔོན་ལྡན་མ་བཀའ་བཅུ་ཀུན་དགའ་བཟང་པོས་བཏབ། ཕྱིས་འཇམ་དབྱངས་རིན་ཆེན་རྒྱལ་མཚན་དང་མཐུ་སྟོབས་དབང་ཕྱུག་གི་གདན་སར་གྱུར། རྟེན་བྱིན་ཅན་མང་། ཁྱད་པར་གསེར་གདུང་གཉིས་དང་། གུར་མགོན་སྐུ་བྱིན་ལྡན་ཐོག་ཚད། མདུན་དུ་པུ་ཏྲ་བྷ་ཏྲ་ཡིན་ཟེར་བའི་ཕ་བོང་ཉམས་དོད་ལྔ་དྲུག་ཙམ་ཡོད། ༈ །འཛོམ་སྟག་བསམ་འགྲུབ་དགོན་དུ་སྨྲ་ཏིས་མདོ་སྨད་བསྟན་འགྲོའི་
བཙས་སུ་བཞེངས་པའི་མཆོད་རྟེན་ཐོག་སོ་ལྔ་ཡོད། ༈ །ས་སྐྱར་ལྷ་ཁང་བརྒྱ་དང་ཉི་ཤུ་ལ་སྤོས་མར་མེ་སྙན་དར་ཕུལ་ཚུལ། ༈ །སྐྱོ་མདའ་བསོད་ནམས་དབང་ཕྱུག་ལས་ཉི་སྦས་ལུགས་ཀྱི་སྒྲོལ་མ་ཉེར་གཅིག་གི་རྗེ་གནང་གསན། མ་ཎི་བཀའ་འབུམ་གསན་ཐོའི་མཇུག་ཏུ་དཀར་ཆག་བཀའ་ཁོལ་མ་དང་། ཡེར་པའི་དཀར་ཆག་ཀྱང་ལུང་གསན་ཚུལ་སྣང་། ༈ །ངོར་པའི་གདན་རབས་ཁ་སྐོང་མཛད་སྐབས། མཁན་སངས་ཕུག་རྣམ་ཐར་དུ་རྗེ་དེ་ཉིད་ཇོ་བོ་རྗེའི་སྤྲུལ་པ་ཡིན་སྙམ་པ་ཐུགས་ལ་ཡོད་པ་ལྟར། མནལ་ལམ་དུ་མཇལ་ཞིང་ཇོ་བོའི་རྣམ་ཐར་རེ་གཉིས་གསུངས་ཤིང་ཁྱོད་དང་ང་ཚེ་རབས་མང་པོར་འབྲེལ་ཆེ་ཚུལ་གསུངས་པ་དང་། བཀྲས་ལྷུན་རྣམ་ཐར་དུ་གླང་ཐང་པའི་སྤྱན་སྔར་མཁན་ཆེན་དེ་ཉིད་བཞུགས་པར་རྨིས་པས་གླང་ཐང་པའམ་དེའི་སློབ་མའི་མཆོག་གཅིག་ཡིན་ངེས་པར་བྱུང་། ནམ་མཁའ་བསམ་འགྲུབ་རྣམ་ཐར་སྐབས་མནལ་ལམ་དུ་མཁན་ཆེན་དེ་ཉིད་མཇལ་བར་ཤར་བའི་རྣམ་ཐར་ཞིག་བསྣམས་ཏེ་གྲྭ་སློབ་མང་པོར་གསུངས་པས་ཤར་བ་དངོས་ཡིན་སྙམ་པ་དང་། གྲྭ་པ་གཞན་ཞིག་གིས་དེ་ལྟར་ཡིན་ཅེས་ཟེར་ཚུལ་གསུངས། ༈ །ངོར་གྱི་གདན་ས་སྐབས་དབང་ཁང་གི་གཏོར་མ་ལས་སྤུ་ཁ་དོག་སྣ་ཚོགས་མུ་ཏིག་ལྟ་བུའི་ཟེའུ་འབྲུ་ཡོད་པ་སྐྱེས་ཤིང་། གཏོར་མའང་
སྲ་མཁྲེགས་ལྕགས་ལྟ་བུར་གྱུར། ཞལ་གྱི་བེ་བུམ་ལས་ལས་བཞིའི་རྟགས་ལ་དེ་འདྲ་འོང་གསུངས་པར་སྣང་། དེ་རྗེས་ཀྱང་འགའ་རེ་བྱུང་། བཟང་པོ་མ་གཏོགས་ངན་པ་ནི་མ་བྱུང་བ་ཅི་ཡིན་མ་ཤེས་ཚུལ་སྣང་། ༈ །འོ་ཡུག་གོས་སྔོན་ལྷ་ཁང་ཁྲི་སྲོང་སྐབས་བོད་ཁམས་བདེ་ཐབས་སུ་བཞེངས། དམ་ཅན་གྱི་ཞོན་པ་རྡོ་ལ་རང་བྱོན་དང་། སྐུ་སློབ་དཔོན་ཆེན་པོའི་ཕྱག་བཟོ། དེའི་གོང་གནོན་དུ་ཕྱག་རྡོར་གོས་སྔོན་ཅན། དེ་གཉིས་དབུ་དང་དཔྲལ་བ་ཐུག་མི་ཐུག་པའི་མཐོང་སྣང་སྣ་ཚོགས་འོང་སྐད། སྐུ་དེ་རྣམས་བཟོ་དབྱིབས་ལེགས་ཤིང་སྣུམ་བག་ཆེ་བ་སོགས་སྣང་། ༈ །སྒྲ་མཆོད་རྟེན་དཀར་པོ་སློབ་དཔོན་རིན་པོ་ཆེས་ཡང་འདུལ་གྱི་ས་གནད་དུ་བཞེངས། ༈ །ཁྲི་འདུ་སྐལ་བཟང་དགོན་ཐོག་མར་ཨ་གཉན་དམ་པས་བཞེངས། ཀོང་ཇོས་ཇོ་བོ་ཡིད་བཞིན་ནོར་བུ་བོད་ལ་གདན་དྲངས་པའི་སྐུ་ཚབ་ཏུ་བཞེངས་པའི་ཇོ་བོའི་སྐུ་ཚད་ངོ་མཚར་མཐོང་བ་དོན་ལྡན་འཕགས་པ་རིན་པོ་ཆེར་ཕུལ་བ་ཨ་གཉན་དམ་པར་གནང་བ་ཉིད་རྟེན་གཙོར་བཞུགས་པ་སོགས་རྟེན་གསུམ་ངོ་མཚར་རྒྱ་ཆེར་ཡོད། ༈ །དགོན་གསར་དགོན་དུ་དྲུང་ཆོས་རྗེའི་དབུ་ཐོད་ཡོད། འདི་དྭགས་པོ་ལྷ་རྗེའི་སྤྲུལ་པར་གྲགས། དགུང་ལོ་དོན་དྲུག་བཞུགས། རྣམ་ཐར་རྒྱས་པ་ཡོད། དབུ་ཐོད་དེ་ལ་བིརླ་པ་དང་། བཅུ་གཅིག་ཞལ་
སོགས་རང་བྱོན་བཞུགས་ཚུལ་མི་འགྱུར་རྒྱལ་མཚན་བཀའ་འབུམ་ལྡེབ། ༡༠༥ །མཚམས་སུ་འདིའི་དཀར་ཆག་ཡོད་དོ། ༈ །ལྡན་རག་ཅོ་དགོན་གྲུབ་ཐོབ་ནམ་མཁའ་ལེགས་པ་ཞེས་འཕགས་པས་ལུང་བསྟན་ཅིང་གསེར་དགོན་ཁྱད་པར་ཅན་སྩལ་བའི་དབོན་བརྒྱུད་ཀྱིས་བཟུང་། ༈ །ཆོས་འཁོར་དགོན་གྲུབ་ཐོབ་སྟག་སེས་བཏབ། རྗེ་བསོད་ནམས་རྒྱ་མཚོའི་རྟེན་གཏོར་སོགས་བཞུགས། གྲུབ་ཐོབ་སྟག་སེའི་དབུ་ཐོད་ལ་ཚེ་དཔག་ལྷ་དགུ་རང་བྱོན་ཡོད་པ་སོགས་བཞུགས། ༈ །སྒ་ལེན་སྟེང་གྲུབ་ཐོབ་སྟག་སེས་བཏབ་ཀྱང་ཟེར། ཨ་གཉན་དམ་པས་བཏབ་ཀྱང་ཟེར། ༈ །ལྷུན་གྲུབ་སྟེང་དུ་ཆོས་ཁྲིར་མངའ་གསོལ་སྐབས་སྐུ་རྟེན་གསུམ། གསུང་རྟེན་བསྟན་འགྱུར་རིན་པོ་ཆེ་གླེགས་བམ། ༢༡༥ གཙོས་རྣམ་གྲངས་ཆིག་སྟོང་ལྔ་བརྒྱ་སུམ་ཅུ་ཕུལ་ཚུལ་སོགས་སྣང་། ༈ །བླ་མ་སངས་རྒྱས་རྡོ་རྗེས་ཐོག་མར་ཡིག་དྲུག་སོགས་དགེ་བསྐུལ་བཟང་ཡང་། ཕྱིས་ཐལ་ཆེས་པས་རྟོགས་ལྡན་མ་བསྒོམ་པར་སངས་རྒྱས་པའི་སློབ་ཚོགས་མང་ཚུལ། ༈ །ལྷུན་གྲུབ་སྟེང་སྒྲུབ་མཆོད་དབུས་སུ་ཀྱེ་རྡོར་ལ་དགེ་འདུན་བརྒྱད་བརྒྱ་སྐོར་དང་། བྱང་དུ་སམ་ཏྲ། གསང་འདུས་ལུགས་གཉིས། ལྷོར་གུར། བདེ་མཆོག་ལུགས་གཉིས་བཅས་ལའང་དགེ་འདུན་སུམ་ཅུ་ནས་བཞི་བཅུའི་བར་
ཚོགས་ཚུལ། ༈ །ལོ་གསར་སྟོན་མོ་ཉིན་གཉིས་ལ་གཟབ་རྒྱས་གནང་ཚུལ། ༈ །སྒ་ཇོ་བོར་བུམ་གཏེར་ཕུལ་སྐབས་ཕྲིན་ལས་སྒྲུབ་པའི་མནལ་ལམ་ངོ་མཚར་ཅན་བྱུང་། ༈ །ཟེལ་དཀར་དགོན་དུ་ས་པཎ་གྱི་གདུང་རུས་ལས་གྲུབ་པའི་རྟེན་ངོ་མཚར་ཅན་ཡོད་སྐད། འདི་མི་འགྱུར་རྒྱལ་མཚན་རྣམ་ཐར་དུ་ས་པཎ་གདུང་རིང་བསྲེལ་བཅུ་གཅིག་ཞལ་མཐེ་བོང་ཙམ་ཤིན་ཏུ་ངོ་མཚར་ཅན་ལོ་རྒྱུས་དང་བཅས་བཞུགས་པར་གསུངས་པ་དེ་ཡིན་སྣང་། ༈ །གནམ་ལུང་རྣམ་རྒྱལ་གླིང་འཕགས་པའི་གདན་ས་ཡིན། གསེར་སྐུ་འགངས་ཆེ་བ་དང་། འཕགས་པའི་ཕྱར་དར་མགོན་པོ་སྟག་ཞོན་འཁོར་ངེས་པ་ཅན་ཡོད། བར་སྐབས་ཉམ་ཆག་ཆེ་བར་སྣང་། ༈ །བཀྲ་ཤིས་སྒང་སྔར་འཕགས་པའི་གདན་ས། ཕྱིས་འབྲི་གུང་པས་བདག །རྟེན་གཙོ་འཕགས་པས་རྒྱ་ནག་ནས་དྲངས་པའི་བཀའ་གདམས་གདུང་རྟེན་བཀྲ་ཤིས་འོད་འབར་ཞེས་མི་ཚད་ལྷག་མཇལ་བ་ཙམ་གྱིས་འཇའ་འོད་འཕྲོ་བཞིན་འགྲན་ཟླ་དང་བྲལ་བ་ཡོད། ༈ །དགོན་གསར་བསམ་འགྲུབ་དགོན་དུ་ཉིད་ནས་གུར་ལྷ་བརྒྱད་བཞེངས། ༈ །ཁམས་རྡོ་ར་སྟག་དགོན་འབྲི་གུང་པའི་གདན་ས། ལྷ་ཁང་སྒྲོས་ལེགས། ཐུབ་ཆེན་ཟངས་གསེར་ལས་གྲུབ་པ་ཐོག་ཚད་དང་། བདེ་མཆོག་ཐོག་ཚད་སོགས་རྟེན་གསུམ་རྒྱ་ཆེ། ༈ །སྨན་འཆང་
རི་ཁྲོད་མཐོ་དབེན་ཉམས་དགའ་བར་ཡོད། ༈ །རི་ཐུང་ཐུབ་བསྟན་དར་རྒྱས་གླིང་དུ་འཕགས་པའི་ཐུགས་དམ་རྟེན་པུ་ཊ་ནག་པོའི་ཞལ་འབག་བྱིན་ཅན་བཀའ་རྒྱ་མ་ཡོད། ༈ །འཛི་ཕུར་དུང་འབུད་བླ་མ་བསོད་ནམས་མཆོག་ལྡན་འདས་པས་སྒར་གཞིས་ཕུལ་ནས་བདག་གིར་མཛད་ཚུལ། ༈ །ལྡེབ་༡༧༨ནས། ༡༩༣ བར་དབོན་རིན་ཆེན་མཆོག་གྲུབ་གདོང་དབུས་གཙང་དུ་འབུལ་སྐྱེལ་རྒྱ་ཆེར་མཛད་ཚུལ། ༈ །ལྡེབ། ༢༠༠ ཕྱི་ནས། ༢༢༠ བར་རྡེ་ལོ་ལྷ་ཁང་ལྕང་ལོ་ཅན་གྱི་དཀར་ཆག་མཐོང་བ་དོན་ལྡན་ཅེས་ཡོད། འདི་ནང་ལྷུན་གྲུབ་སྟེང་སྤར་མའི་གཟུངས་གཞུག་དཀར་ཆག་ཞིབ་པར་སྣང་། ༈ །དཔོན་བསོད་ནམས་མགོན་པོའི་སྲས། རྒྱལ་བ་སྐལ་བཟང་རྒྱ་མཚོའི་ལྕམ་སྲིང་ཚེ་རིང་ལགས། དེའི་སྲས་ཆོས་སྐྱོང་མགོན་པོ། དེའི་ལྕམ་སྐལ་རྒྱ་མ། སྐུ་ཚ་མ་བཀྲ་ཤིས་དབང་མོ། སྲས་ཆང་རག་སོགས་བཞེས་ཆེས་པས་སྐུ་ཚེ་རིང་པོ་མ་བྱུང་། ལྕམ་བློ་གྲོས་རྒྱ་མཚོས་བདག་གིར་མཛད་དེ་སྲས་ས་དབང་བཟང་པོ་འཁྲུངས་པ་དང་གཤེགས། ༈ །དམད་ཤོད་དང་སྤོ་ལུ་སྐོར་ས་ཆ་ལེགས་ཚུལ། ༈ །ལྡེབ། ༢༤༢ ནས། ༢༤༧ བར་ཧོར་ཁོག་སྡེའི་མགོན་ཁང་ངམ་ཏྲེའི་མགོན་ཁང་གི་ལོ་རྒྱུས་དཀར་ཆག་ཧོར་ཆོས་རྗེ་ངག་དབང་ཕུན་ཚོགས་པས་མཛད་པ་ཞལ་བཤུས་
པ་བཅས་ཡོད། ༈ །ཡིད་ལྷུང་ཁྲོ་ཤུལ་ནང་ཞེས་སྐྱེ་འགྲོའི་སྲོག་གཅོད་པ་སྲིན་ཡུལ་ལྟ་བུ་དེར། མཆོད་རྟེན་ཞིག་བཞེངས་ན་དགེ་མཚན་ཆེའང་མ་གྲུབ་ཚུལ། ༈ །རྫོགས་ཆེན་སྤྲུལ་སྐུ་དང་། ཉིད་ནས་རྫ་ཆུ་ཁ་པ་ལ་བཅའ་བཀོད་གནང་ཚུལ། ༈ །ཉག་གཤིས་ཁྲི་ཚོ་དགོན་དང་ཝམ་པ་དགོན་བླ་ཆེན་འཕགས་པས་བཏབ། ༈ །སྤོ་ལུ་དགོན་རྒྱབ་བྲག་ལ་བིརླ་པའི་སྐུ་རང་བྱོན་ཡོད་པས་ཆང་ས་དར་ཆེ་སྐད། སྤྱིར་བསྒྲིགས་ལམ་བཟང་། སངས་རྒྱས་སེང་གེས་ལུང་བསྟན་ནས་དེའི་སློབ་མ་སྤོ་ལུ་ཤེས་རབ་རྒྱལ་མཚན་གྱིས་བཏབ། བླ་མ་བཟང་པོ་རིམ་པར་བྱོན། ཕྱིས་སུ་བླ་ཆེན་གཟི་སངས་རྒྱས་དཔལ་བཟང་གིས་ཀྱང་ཡང་ཡང་ཕེབས། དབང་ལུང་ཁྲིད་གསུམ་གནང་ཞིང་མགོ་འདྲེན་རྒྱ་ཆེར་མཛད་སྐད། ༈ །འདམ་ཐོག་ཤོག་དཔེ་ཝར་བྱང་ཆུབ་གླིང་པས་བཏབ། སངས་རྒྱས་སེང་གེའི་སློབ་མ་ཞིག་གིས་ཉམས་གསོ་མཛད། གྲྭ་སྟོབས་དང་ཆོ་ག་ལག་ལེན་ལེགས། དགོན་གྱི་རྒྱབ་རི་གནས་བདག་མོ་དང་། དགོན་ལྟག་ན་ཕ་བོང་ཛམྦྷ། ཉེ་ལོགས་ན་ཞོག་མཚོ་ཟེར་བ་ཆུང་ངུ་ཞིག་ཡོད་། ༈ །ལྡན་འདམ་ཐོག་དགོན་གྱི་འཇམ་དབྱངས་མཐུ་སྟོབས་དབང་ཕྱུག་སྐུ་འབུམ་ཆེན་མོའི་སྟེང་གསེར་ཟངས་ལས་གྲུབ་པའི་གཉྫིར་བཞེངས་ཚུལ། ༈ །ཁྲི་འདུར་དམ་པ་རིན་པོ་ཆེའི་སྒྲུབ་ཆུ་
ཡིན་པར་གྲགས་པའི་ཆུ་མིག་ཏུ་ཀླུ་གཏོར་ཕུལ་སྐབས་དགེ་མཚན་ཆེ། ༈ །དྲུང་ཆོས་རྗེའི་དབེན་རིར་མགོན་པོ་ཁྱད་པར་ཅན་བཞུགས། ༈ །སྐྱེ་རྒུ་དང་ཉེ་བ་གནས་སྒོ་ཁྱིམ་ཞེས་བྲག་དཀར་ཤིན་ཏུ་མཐོ་བའི་ངོས་སྒྲོལ་མ་དཀར་སྔོན་རང་བྱོན་ཡོད་པར་གྲགས། དེའི་སྒྲོལ་དཀར་ཡོད་པའི་བྲག་དེ་ཆད་པ། སྐུ་ཆེ་ཆུང་མཁྱུད་གང་ཙམ་འབུར་དོད་སྒྲོས་ལེགས་ཤིག་བྱུང་བ་མཚམས་པ་རིན་ཆེན་བཟང་པོའི་གྲུ་གཤག་ཏུ་གདན་དྲངས། དེ་འདས་དུས་ཉིད་ཀྱི་ལྷ་ཁང་གསར་བཞེངས་ཀྱི་ཐུབ་པའི་མདུན་བཞུགས་སུ་གསོལ་ཅེས་འབྱུང་། ༈ །ལྡེབ། ༣༡ ནས། ༢༡༨ བར་སྐྱེ་རྒུ་དགོན་དུ་ལྷ་ཁང་གསར་བཞེངས་ཀྱི་དཀར་ཆག་རགས་རིམ་ཙམ་ཡོད། ༈ །ལྡེབ་༣༢ ༣ ནས། ༣༢༦ བར་སྡེ་དགེའི་སྐུ་རིམ་དགོན་ཁག་རྣམས་སུ་བཀྲམ་ཚུལ་ཞིབ་མོ་ཞིག་སྣང་། ༈ །ལྕང་རེའི་སྟག་སེའི་སྐུའི་དབུ་ཞྭ་ཕུད་པ་བྱུང་ན་སྡེ་དགེའི་སྐུ་ངོ་ལ་ངན་ཚུལ་ཟེར་རྒྱུན་འདུག་པས་བདེན་ཆ་ཡོད་ཚུལ་སྣང་། ༈ །སྒ་སྟོད་སྟག་མགོའི་རིང་བསྲེལ་ཐུབ་པའི་དབང་པོའི་རིང་བསྲེལ་མ་སྐྱེས་དགྲའི་རྟེན་སྐལ་རྡོ་རྗེ་གདན་གྱི་གནྡྷོ་ལར་མར་མེ་མཛད་བཞུགས་པའི་མདུན་གྱི་ཀ་པ་ལ་སྦས་པ། རྟེན་དེའི་དགོང་གཉེར་པཎྜི་ཏ་ཤཱནྟི་ནག་པོས་བོད་དུ་དྲངས། ཆོས་སྐྱོང་གི་ལུང་བསྟན་ལྟར་སྟག་མགོར་བཞུགས ༣༦༧།
པཎྜི་ཏའང་གནས་དེར་ཐིམ་ནས་ད་ལྟའི་བར་སྲུང་མ་མཛད། དེ་ལ་རྗེ་བཙུན་གྲགས་པས་ཤེལ་གྱི་པར་བུ། ས་པཎ་གྱིས་གདུགས། འཕགས་པས་སྣམ་སྦྱར་དང་དངུལ་གྱི་པར་བུ་སོགས་ས་ཀར་གྱི་བླ་ཆེན་དུ་མས་མངའ་གསོལ་ཕུལ་བའི་ལོ་རྒྱུས་ཡོད། འདིའི་དཀར་ཆག་སྐལ་བཟང་དགའ་སྐྱེད་ཅེས་པ་ཞིག་མཛད་ཚུལ་སྣང་། ༈ །རྫོགས་ཆེན་དུ་གཏེར་སྟོན་ཡིན་སྐད་ཞིག་བྱུང་བ་ཚར་བཅད་ནས་སླར་སི་ཏུ་རིན་པོ་ཆེར་བསྙེན་རྫོགས་བསྒྲུབ་བཅུག་ཚུལ། ༈ ལྷོ་ཁོག་ནས་རྒྱལ་དབང་སྤྲུལ་སྐུ་ཟེར་བ་ཆོས་བརྒྱད་ཅན་ཞིག་གིས་རྒྱམ་རྡོ་ཏིར་ཙཱ་རི་ལྟ་བུའི་གནས་བསྐོར་གྱི་ལམ་བཏོད་ཚུལ་གླེང་མོ་འུར་སྒྲ་ཆེ་བ། དེ་ལྟར་གྲུབ་སླར་ཡུལ་དེ་སྟོང་ཞིང་མདོ་ཁམས་སུ་མི་རུང་བ་འོང་སྙམ་ནའང་སྒྲ་རང་ཡལ་དུ་སོང་སྐད་གདའ། ༈ །སི་ཏུ་རིན་པོ་ཆེ་ཞྭ་དམར་བཅུ་པ་ཁྲི་འདོན་ཕེབས་ཁ་དགོན་ཆེན་དུ་བྱོན་པར། བདེ་མཆོག་དཀར་པོའི་བྱིན་རླབས་ཤིག་ཕུལ་བས་རྟེན་འབྲེལ་ལེགས་ལམ་ཆེ་བར་གྱུར་ཅེས་གསུང་ནའང་། རྗེ་ཉིད་ཀྱིས་རྨོར་ཆེན། སངས་རྒྱས་བསྟན་པ། དཔལ་བཟང་། བསོད་ནམས་དབང་ཕྱུག་རྣམས་གང་རིགས་ཞིག་ལས་གསན་འདྲ་སྟེ་སྔ་མ་ཆོས་གསན་ཚུལ་སྐབས་མ་ཐེབས་འདུག་པ་སླར་དཔྱད། རྨོར་ཆེན་ལས་གསན་སྐབས་སོགས་རྗེས་གནང་གི་རིགས་དུ་མ་གསུངས་པའི་ཁོངས་སུ་
བསྡུས་པ་འདྲ་ཡིན་ནམ། ལྕགས་ཟམ་བསྟན་འཛིན་ཉི་ཟླ་འོད་འབར་ཀྱང་དེ་མཉམ་ཡོད་འདུག་པ་དེའི་གསན་ཐོ་ཡོད། ༈ །གླེགས་བམ་ཕྱི་མ། ཝཾ་རྟགས་ཅན་གྱི་ནང་རབ་བྱུང་བཅུ་གསུམ་པའི་ཆུ་མོ་བྱ་ལོ་ནས་བཟུང་གཤེགས་རྗེས་ཀྱི་བར་རྣམ་ཐར་ཤིན་ཏུ་རྒྱས་པ་ཡོད། དགུང་ལོ་ང་གསུམ་པ་ཤིང་ཁྱི་ལོར་ཟླ་༥ཚེས་༢༣ལ་བོད་དུ་ཕེབས་སྐབས་ལག་དོ། ༨༢༠ མཛོ་ཁལ། ༡༢༣༠ སྐོར། རྟ། ༢༠༠ྋལྷག །དྲེལ། ༡༠༥༠ སྐོར་གྱིས་མཚོན་སྒར་ཆེན་འཕགས་པ་རིན་པོ་ཆེ་རྒྱ་ནག་ནས་ཆིབས་བསྒྱུར་གནང་བ་ལྟ་བུ་ཞིག་ཡོད་སྐད་གདའ། ཟླ་༩ཚེས་༡༡ལ་ལྷ་གདན་དུ་རྒྱལ་བ་སྐལ་བཟང་རྒྱ་མཚོའི་མདུན་མཚོ་སྐར་ཆེན་སྒར་ནས་ལམ་ཡིག་ཞུ་བར་བཏང་ཚུལ་གྱི་ཡི་གེ། ༈ ཟླ་༩ཚེས་༢༤ལ་ནག་ཆུ་ཁ་སྤ་རུ་ཐང་དུ་ཕེབས། ཟླ་༡༠ཚེས་༡༠ལ་ལྷ་ལྡན་དུ་འབྱོར། ༈ །ལྡེབ། ༡༠༠ནས། ༢༢༥བར་གཏོང་སྒོ་འབྱམས་ཀླས་མཛད་ཚུལ་ཡོད། ལྡེབ། ༡༠༤ བར་སྟོང་མཆོད་ཀྱི་དཔྱད་ཁྲ་ཞིབ་པར་སྣང་། ༈ །གཉགས་ཨ་མོ་གྷས་བཏབ་པའི་མུས་གློ་ལུང་ཆོས་སྡེའི་མཚན་ལྡན་ནམ་མཁའི་རྣལ་འབྱོར་གྱི་སྐུ་བརྙན་མདུན་མར་མེའི་བརྟག་པ་གསལ་པོ་ཡོད་སྐད་སྣང་། ༈ །ཤིང་ཕག་ལོའི་དབྱར་དབུས་ཕྱོགས་དང་། དགུན་ལྷ་རྩེ་མན་མུས་ཕྱོགས་ཚུན་བྱོན་ཚུལ་ཞིབ་ཆ་སྣང་།
༈ ལྷ་རྩེའི་ག་ཡ་དྷ་རའི་སྒྲུབ་ཕུག་དེ་ཁྱད་མཚར་ཞིག་ཡོད་སྐད་གདའ། ༈ །མེ་བྱི་ལོར་ངོར་དུ་ཚོགས་ཁྲོ་གཉིས་བླུགས་པར་དངུལ་སྲང་དྲུག་བརྒྱ་སྐོར་གྱི་རྒྱུ་རྩ་སོང་། སྒོ་ཁང་གསར་བཟོ་མཛད། ༈ །འདི་ལོ་ཟླ་༢ཚེས་༣ལ་རྒྱལ་བ་སྐལ་བཟང་རྒྱ་མཚོ་ཞིང་གཤེགས། ༈ །མེ་གླང་ཟླ་༦ཚེས་༤ལ་ས་སྐྱ་པ་གཅུང་མཐུ་སྟོབས་དབང་ཕྱུག་ཞིང་གཤེགས། ༈ །ཟླ་བ་དགུ་པ་ནང་ས་སྐྱར་ཀུན་དགའ་བློ་གྲོས་མདུན་གདུང་སྤེལ་གྱི་སྙན་སྐུལ་ཞུས་པར་ཞལ་བཞེས་གནང་། ༈ །ས་སྟག་ཟླ་༤ ཚེས་༡༩ལ་སླར་ཡང་ངོར་ནས་ཁམས་སུ་ཕེབས། དེ་སྐབས་གཞུང་ནས་གཞིས་རྩེ་ཤངས་འུ་ཡུག་བརྒྱུད་ཡངས་ཅན་ནས་ནག་ཆུ་ཁ་བར་ཁལ་མ་བརྒྱ་ལྔ་བཅུ། རྟ་ལུལ་ལྔ། མེ་ཁག་བཞིའི་ཐབ་ཤིང་། རྟ་ཐབ་ཀྱི་གཡོག་བཞི། རྟ་དྲེལ་ངོ་ཡོད་ལ་བརྔ་མིན་ཁ་རྩྭ་བཀག་མེད། བཏང་མཚམས་ནས་གཟན་པ་བསྡུ་གཏོང་། ཀོ་གྲུའི་སྒྲོལ་འདོན་བཅས། གཞིས་རྩེགས་པ་རྣམས། རོང་གང་རུང་ནས་ལྷ་ས་ནས་རྫོང་སྐྱེལ་གྱི་ཁལ་མ་བརྒྱ། རྟ་འུལ་བདུན། ཞོན་པ་བརྒྱད། མེ་ཁག་དྲུག་གི་ཐབ་ཤིང་སོགས་གནང་། ༈ །ཤོང་ཐོ་དགོན་པས་ཁང་པ་སངས་རྡོར་གྱི་དགོན་གསར་ནང་དུ་མཉམ་ཚོགས་མི་དགོས་པའི་མགོ་འདྲེན་ཞུས་སྐད། ༈ ཟླ་༨ཚེས༡༣་ལ་སྡེ་དགེ་དགོན་ཆེན་དུ་ཕེབས། དགུན་ཚེ་དགོན་
ཆེན་དུ་བཞུགས། དགུང་ལོ་ང་བརྒྱད་པ་ས་ཡོས་ཟླ་༡ཚེས་༡༧ སྲོད་ཡོལ་གྱི་དུས་དགའ་ལྡན་བྱམས་པའི་མདུན་སར་གཤེགས་སོ། ༈ །ལྡེབ། ༢༥༤ནས། ༢༥༨བར་ཀུན་རིག་དང་འབྱུང་འདུལ་གྱི་བསྙེན་ཐབས་ཉུང་ཙམ་རེ་ཡོད། ༈ །ལྡེབ། ༣༧༩ནས། ༣༩༩བར་འདའ་ཀའི་ཞལ་ཆེམས་སྐོར་ཞིབ་པར་སྣང་། ༈ །ལྡེབ། ༤༥༥ནས། ང ༨༦ བར་མཆོད་རྟེན་གྱི་དཀར་ཆག་སྐོར་ཞིབ་པར་ཡོད་དོ། ༈ །དཔལ་ཆོས་ནི་ངོར་འདབས་སྤེལ་གྲོང་གི་ཇ་དཔོན་ཟུར་ཁང་པའི་ཁྱིམ་དུ། ཡབ་ཀུན་དགའ་རྡོ་རྗེ་དང་། ཡུམ་དཔོན་རུ་པ་དཔལ་བུ་ཁྲིད་ཀྱི་སྲས་སུ་ཆུ་རྟ་ལོར་འཁྲུངས། ལོ་གཉིས་གསུམ་དུས་བྱང་ཆུབ་གླིང་རས་ཆུང་སྤྲུལ་པའི་སྐུས་སྐྱེས་བུ་དམ་པར་ལུང་བསྟན། ས་སྐྱ་པ་ཀུན་དགའ་བཀྲ་ཤིས་ལས་ཚེ་དབང་ཐོབ། ལོ་བདུན་པར་ངོར་དུ་ཚུལ་ཁྲིམས་དཔལ་བཟང་ལས་རབ་ཏུ་བྱུང་། བཅོ་བརྒྱད་པ་ས་ཕག་ལོར་བྱམས་པ་བསོད་ནམས་བཟང་པོ་ལས་བསྙེན་པར་རྫོགས། བཅུ་དགུ་པ་ལྕགས་བྱི་ལོར་ཀུན་རིག་སོགས་བསྙེན་མཚམས་བཞུགས། ཉེར་གཉིས་པ་ཆུ་ཡོས་ལོར་ལྷ་སར་གནས་བསྐོར་བྱོན། རྨོར་ཆེན་ལས་ཆོས་མང་ཞིག་གསན། ཉེར་ལྔ་པ་མེ་རྟ་ལོར་ཁུ་བོ་བླ་མ་བསྟན་འཛིན་ལྷུན་གྲུབ་ཞིང་གཤེགས་པའི་དགོངས་རྫོགས་རྒྱ་ཆེར་བསྒྲུབས། ཉེར་བརྒྱད་པ་ས་བྱ་
ལོར་སྒ་སྟོད་སྐྱུ་རའི་ཡུལ་དུ་གཏོགས་པ་དྭའུ་དང་སྒྲའི་མཚམས་ཐར་སེ་སྨོན་སྐྱིད་སྐར་དུ་ཀླུ་སྡིང་པས་ཆོས་རྗེར་གཏོང་བ་ལྟར་འབུལ་སྡུད་རྒྱ་ཆེར་མཛད། སུམ་ཅུ་པ་ལྕགས་ཕག་ལོར་སྡེ་དགེ་དགོན་ཆེན་དུ་བྱོན། བཀྲ་ཤིས་ལྷུན་གྲུབ་དང་བསྟན་པ་ཚེ་རིང་མཆོད་ཡོན་མཇལ། སངས་རྒྱས་བསྟན་པ་ལས་རྡོར་ཕྲེང་སོགས་གསན། སོ་གཅིག་པ་ཆུ་བྱི་ལོར་གྲྭ་དཔོན་སེར་སྐྱ་འདྲེས་པ་བདུན་ཅུ་སྐོར་དང་བཅས་ཟླ་༨ཚེས་༢༥ལ་ངོར་དུ་ཕེབས། ཀླུ་སྡིང་གཙོར་གྱུར་ས་ངོར་དུ་འབུལ་བསྙེན་རྒྱ་ཆེར་མཛད་ཚུལ། ལྡེབ་༧༣མཚམས་སུ་ཡོད། སོ་གཉིས་པ་ཆུ་གླང་ཟླ་༨ཚེས་ལ་ཐར་རྩེ་ནམ་མཁའ་བསམ་འགྲུབ་ཀྱིས་མཁན་ས་དགོངས་པ་ཞུས་པའི་སྐབས་རྡོ་རྗེ་འཆང་གི་ཁྲི་ལ་ཕེབས། སོ་གསུམ་པ་ཤིང་སྟག་ཟླ་བ་དགུ་པར་ལྷ་སར་ཕེབས། རྒྱལ་བ་སྐལ་བཟང་རྒྱ་མཚོ་མཇལ། གསང་འདུས་རྩ་རྒྱུད་སོགས་ཀྱི་འབྲེལ་གསན། མི་དབང་མཇལ་བ་སོགས་མཛད། ལོ་འདི་ཕྱིའི་སྐབས་མཁན་སངས་རྒྱས་དཔལ་བཟང་དང་། སྐྱོ་མདའ་བསོད་ནམས་དབང་ཕྱུག་སོགས་ལས་བཀའ་ཆོས་མང་ཙམ་གསན། སོ་བཞི་པ་ཤིང་ཡོས་ལོར་རྒྱལ་བ་སྐལ་བཟང་རྒྱ་མཚོ་བཀྲ་ཤིས་ལྷུན་པོར་ཕེབས་པ་མཇལ། ས་སྐྱ་པ་བསོད་ནམས་རིན་ཆེན་ཀྱང་རྒྱལ་བ་མཇལ་བར་ཕེབས་པ་ཡར་ལམ་ངོར་དུ་གདན་དྲངས། སོ་ལྔ་པ་མེ་འབྲུག་
ལོར་སྡེ་དགེ་ནས་ཆོས་རྒྱལ་བསྟན་པ་ཚེ་རིང་གིས་ས་ངོར་དུ་འབུལ་འགྱེད་བསམ་ལས་འདས་པ་ཕུལ། སོ་དྲུག་པ་མེ་སྦྲུལ་ལོར་པཎ་ཆེན་བློ་བཟང་ཡེ་ཤེས་གཤེགས། སོ་བདུན་པ་ས་རྟ་ལོར་སྡེ་དགེ་བསྟན་པ་ཚེ་རིང་གཤེགས་ཤིང་། ཕུན་ཚོགས་བསྟན་པ་དབུས་སུ་ཕེབས། ལམ་འབྲས་སོགས་སྩལ། སོ་བརྒྱད་པ་ས་ལུག་ལོར་སྡེ་དགེར་མཁན་ཆེན་བཀྲ་ཤིས་ལྷུན་གྲུབ་ཞིང་གཤེགས་པའི་གདན་ཚབ་ཏུ་སྤྱན་དྲངས་པ་ལྟར་མཁན་སར་བྱམས་པ་བསོད་ནམས་བཟང་པོ་བསྐྱར་བཞུགས་གནང་། སོ་དགུ་པ་ལྕགས་སྤྲེལ་ཟླ་༥ཚེས་༧ལ་ངོར་ནས་ཆིབས་བཏེགས། སྒ་སྟོད་བརྒྱུད་ཟླ་༩ཚེས་༥ལ་ལྷུན་གྲུབ་སྟེང་དུ་ཕེབས། ཚེས་༨ལ་ཆོས་ཁྲིར་མངའ་གསོལ་ལོ། །ང་གསུམ་པ་ཤིང་ཁྱི་ལོར་བོད་དུ་ཕེབས། ང་བདུན་པ་ས་སྟག་ལོར་སླར་ཁམས་སུ་བྱོན། ང་བརྒྱད་པ་ས་ཡོས་ཟླ་༡ཚེས་༡༧ལ་དགའ་ལྡན་དུ་གཤེགས་སོ།། ༈ །།མི་འགྱུར་རྒྱལ་མཚན་རྣམ་ཐར་ལས། སོག་མོར་བཞུགས་སྐབས་ཡུལ་དེའི་དཔོན་སྡིག་ཅན་ཀུན་དགའ་སྐྱབས་ཞེས་པའི་ལུས་ངན་སྦལ་པའི་གཟུགས་ཅན་ཆུ་ཤིང་གི་ནང་དུ་ཡོད་པ་གནས་སྤར་ཚུལ་དང་། ས་ངན་གྱིས་ཀུ་སེ་དཔོན་ཨ་ལེན་བུ་ཁོ་བཟུང་བ་ལོ་རྒས་པ་སོགས་ཀྱིས་ཤི་ཐག་བཅད་ནས་བསྔོ་རྟེན་ཕུལ་བར། ཁོ་བར་དེ་ན་མི་འདུག་ཚུལ་ཕེབས་པ་ཕྱིས་ཚུར་སླེབས་
པ་དང་། སྒ་ལེན་སྟེང་གྲྭ་ཆུང་ཞིག་གཞི་བདག་གིས་བརླམས་པ་ཟླ་ཤས་བོར་བ་ཚུར་སླེབས་རྒྱུ་ཡོད་གསུངས་པ་ཕྱིས་འབྱོར་པ་སོགས་མངོན་ཤེས་རྒྱ་ཆེར་མངའ་བའི་ལོ་རྒྱུས་སྣང་། ༈ །བཀྲས་ལྷུན་རྣམ་ཐར་དུ་ཉ་ཤ་སུམ་མདོའི་ཕ་རིའི་བྲག་ཕུག་ཏུ་བིརྱ་པ་བཞུགས་པ་གཟིགས་ཚུལ། མི་འགྱུར་རྒྱལ་མཚན་རྣམ་ཐར་དུ། དྷརྨ་མདོའི་ཕ་རིའི་བྲག་ལ་སྡེ་དགེ་གྲུབ་ཐོབ་ཀྱིས་གནས་སྒོ་ཕྱེས་པའི་སེང་གེ་སྒྲའི་སྐུ་རང་བྱོན་བཞུགས་ཚུལ། ༈ །ཆོས་སྐྱོང་བཟང་པོའི་རྣམ་ཐར་དུ། མགོ་ཟི་དགོན་པའི་གནས་བདག་མགོན་པོ་ཞལ་ཡིན་ཚུལ་དང་། བླ་བྲང་དུ་སུ་བཞུགས་ལ་དཔལ་མགོན་ཞལ་ཤིན་ཏུ་འགོ་ཚུལ། དེའི་ཕ་རིའི་ནགས་ཚལ་དུ་འདོད་ཁམས་མ་བཞུགས་པས། དགོན་པ་དང་ནགས་ཚལ་ཐད་དྲང་ཡོད་ན་དར་རྒྱས་འབྱུང་རྒྱུ་ལ་རྟེན་འབྲེལ་ཅུང་ཟད་མ་འགྲིགས་པའི་ལོ་རྒྱུས་སོགས་སྣང་། ༈ །བཀྲ་ཤིས་ལྷུན་གྲུབ། མི་འགྱུར་རྒྱལ་མཚན། ནམ་མཁའ་འཆི་མེད་ཁུ་དབོན་གསུམ་བཅས་སྡེ་དགེར་ཕེབས། ཡེ་ན་བརྒྱུད་ཀོ་ཀོ་ནང་ནས་ཕེབས་སྣང་། དཔལ་ཆོས་སྒ་སྟོད་བརྒྱུད་ཟིལ་ཁོག་ནས་མར་ཕེབས། ཆོས་སྐྱོང་བཟང་པོ་ཝ་ར་དང་། རྔད་བརྒྱུད་ཛམ་ཐོག་ནས་ཡར་ཕེབས་སྣང་ངོ་།། ༈ །།བྲག་སྒོམ་ཞབས་དྲུང་རིན་པོ་ཆེ་དཀོན་མཆོག་བསྟན་པ་རབ་རྒྱས་རྒྱུན་དུ་ཁྲབ་ཁ་རི་ཁྲོད་ཅེས་པར་
བཞུགས། ཕྱིས་མཁར་དོ་དགོན་ཞེས་པ་བཏབ། གྲྭ་པ་བརྒྱ་ལྷག་འདུས། ཞོ་ལ་དགོན་པར་དུས་འཁོར་སྒྲུབ་མཆོད་སོགས་བཙུགས། རབ་བྱུང་བཅུ་བཞི་པ་རྫོགས་པའི་མེ་སྟག་ལ་གཤེགས་སྐད་ཞོལ་དགོན་གྲྭ་པ་དཀོན་མཆོག་རབ་རྒྱས་ནས་ཟེར། ཁོ་རང་ལྕགས་བྱི་ལོ་པ་ཡིན། ལོ་ཉེར་དྲུག་ཤིང་གླང་ལ་བོད་དུ་གྲ་ས་འབྲས་སྤུངས་ལ་སོང་། ད་ལྟ་སོ་གསུམ་ཡིན། དཔལ་མང་ཚང་དགུང་ལོ་དགུ་བཅུ་རྩ་གསུམ་ཙམ་ཐུབ་པ་འདྲ། སྤྱིར་དགུང་ལོ་ཤིང་སྤྲེལ་ཡིན། མཁན་ཆེན་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལས་ལོ་སྐོར་གཅིག་གིས་བགྲེས། དཔལ་མང་གྱ་བདུན་བཞེས་པའི་ལྕགས་ཁྱི་ལོར་རྗེ་བླ་མ་བསྟན་པ་རབ་རྒྱས་ནས་ཕྱག་བྲིས་སྩལ་བ་ངོར་དུ་འབྱོར། དཔལ་མང་དང་དཀོན་མཆོག་བསྟན་པ་རབ་རྒྱས་གཉིས་ཀའི་སྤྲུལ་སྐུ་བྱོན། ཕྱི་མ་དེང་སང་དགུང་ལོ་གསུམ་ཙམ་བཞེས་སྐད། རྗེ་བླ་མ་དགུང་སྙིང་ལྕགས་བྱ་ཡིན་སྙམ། དེ་ལྟར་ན་རེ་དྲུག་ལ་གཤེགས་འདྲ།། ༈ །།ཡོངས་ཀྱི་དགེ་བའི་བཤེས་གཉེན་བྱམས་པ་ཕུན་ཚོགས་དཔལ་བཟང་པོ་ནི། མདོ་སྨད་བུ་འབོར་སྒང་གི་སའི་ཆ་ཝག་ཤུལ་གཡོན་རུ་ཞེས་གྲགས་པའི་ནང་ཚན་ཧོར་ར་རྙིང་པར། ཚལ་པ་ཁྲི་དཔོན་གྱི་བརྒྱུད་ཁྲི་དཔོན་ཚང་ཞེས་གྲགས་པའི་རིགས་བརྒྱུད་རིམ་པར་བྱུང་བ་ལས། ཡབ་ཡ་རབ་དྲ་མའི་
ངང་ཚུལ་ཀུན་གྱིས་དཔེར་བཞག་འོས་པ་བསོད་ནམས་རྒྱལ་མཚན་དང་། ཡུམ་ཨ་འཚོ་ཞེས་དམ་པའི་ཆོས་ལ་དཀར་བ་ཞིག་གི་སྲས་སུ་རབ་བྱུང་བཅུ་བཞི་པའི་ཆུ་ཕོ་སྤྲེའུའི་ལོར་འཁྲུངས། དགུང་ལོ་བཅུ་གཅིག་པར་ལི་ཐང་མཁན་ཆེན་ཁྲི་རབས་སོ་གསུམ་པ་རྡོ་རིང་རིན་པོ་ཆེ་བློ་བཟང་བསྟན་པའི་རྒྱལ་མཚན་ལས་དགེ་ཚུལ་བཞེས། མཚན་བྱམས་པ་ཕུན་ཚོགས་སུ་གསོལ། ལི་ཐང་གཞི་པ་ཁང་ཚན་དུ་ཞུགས་ནས། དགོན་དེའི་འདོན་ཆོག་སྐོར་དང་། ཕྱག་ལེན་བྱང་ཆུབ་པ་དང་། རྒྱན་འཇུག་སོགས་ཐུགས་ལ་བྱང་བར་བཟུང་། བསྡུས་གྲ་མཐར་ཕྱིན་པར་མཛད། དུས་དེ་ཙམ་ནས་མཁས་པ་རྣམས་ཡིད་འཕྲོག་པའི་རྣམ་དཔྱོད་ཕུལ་དུ་བྱུང་བ་མངའ། དེ་སྐབས་སྔ་ཕྱིར་མོ་ལ་མཁན་རིན་པོ་ཆེས་བློ་གྲོས་འབྱུང་གནས་ལི་ཐང་གི་མཁན་སར་ཕེབས་པའི་ལུང་བསྟན་ཀྱང་གསལ་བར་གནང་། རྡོ་རིང་རིན་པོ་ཆེ། མོ་ལ་མཁན་ཆེན། རྟ་མགྲིན་གྱི་གྲུབ་ཐོབ་རྒྱལ་སྐོར་བསོད་ནམས་མཁས་མཆོག་སོགས་ལས་མདོ་སྔགས་ཀྱི་བཀའ་ཆོས་མང་དུ་གསན། དགུང་ལོ་ཉི་ཤུ་རྩ་གཉིས་པར་བོད་དུ་ཕེབས། འབྲས་སྤུངས་སྒོ་མང་དུ་ཞུགས། ཐོག་མར་ཕར་ཕྱིན་དོན་བདུན་གྱི་གཞུང་གསར་བཞེས་ནས་རིམ་པར་ཕར་ཕྱིན། དབུ་མ། མཛོད། རྣམ་འགྲེལ། འདུལ་བ་བཅས་ལ་ཚིག་དོན་གཉིས་
ཀར་བྱང་ཆུབ་པ་དང་། རྗེའི་ལམ་རིམ་ཆེན་མོ་སོགས་ཐུགས་ལ་བཟུང་། དེའང་ཐོག་མར་འཛིན་གྲྭ་གཞུང་གསར་པ། དེ་ནས་གཞུང་ཤོད། སྐབས་དང་པོ། ཕར་ཕྱིན་དོན་གང་ཆེའི་འཛིན་གྲྭ་བཅས་ལོ་བཞིའི་རིང་ཕར་ཕྱིན་དང་། དེ་ནས་དབུ་མ་གསར་རྙིང་ལ་ལོ་གཉིས། མཛོད་ལ་ལོ་གཅིག །བཀའ་རམ་འོག་ལོ་གཅིག་གི་ཚེ་རྣམ་འགྲེལ་དང་། འདུལ་བ་གཞི་བསྟོད་བཅས་ལ་ཐུགས་སྐྱོར་མཛད། དེ་ནས་བཀའ་རམ་གོང་མར་ལོ་གཅིག་བཞུགས་པའི་རིང་སྔར་གསན་སྦྱོང་མཛད་པ་རྣམས་ལ་ཐུགས་ཞིབ་དཔྱིས་ཕྱིན་པར་མཛད། དགུང་ལོ་སོ་གཉིས་པར་འབྲས་སྤུངས་ཚོགས་ཆེན་དུ་རྡོ་རམ་པའི་དམ་བཅའ་བཞེས་ནས་དཔལ་ལྡན་སྨད་རྒྱུད་པར་ཞུགས་ནས་ལོ་ངོ་གཉིས་བཞུགས་ཏེ། རྒྱུད་པ་མཁན་ཆེན་རྒྱ་མཚོ་བསྟན་དར་ལས་དཔལ་གསང་བ་འདུས་པའི་འགྲེལ་པ་བཞི་སྦྲགས་སོགས་སྔགས་ཀྱི་གཞུང་ལ་གཙོ་བོར་སྦྱངས། རྒྱུད་གཏད་པའི་འགྲེལ་དབང་སྐབས་ལན་གསུམ་བར་དུ་བསྐྱར་བ་སོགས་ཐུགས་ཀྱི་སྲས་སུ་དགོངས་པར་མཛད་པ་སོགས་གཟེངས་བསྟོད། དགུང་ལོ་ཉེར་གསུམ་པར་པཎ་ཆེན་ཐམས་ཅད་མཁྱེན་པ་ལས་བསྙེན་པར་རྫོགས། འཇིགས་བྱེད་དཔལ་བོ་གཅིག་པའི་དབང་ཆེན་སོགས་གསན་པས་མཚོན། ཁྲི་ཆེན་བྱང་ཆུབ་ཆོས་འཕེལ་ལས་འཇིགས་བྱེད་དབང་
ཆེན་གསན། བྱང་ཆུབ་ནོར་བུ་ཞེས་མཚན་བཏགས། རྩ་བའི་བླ་མ་ཁྲི་ཆེན་ངག་དབང་ཆོས་འཕེལ་ལས་རྡོ་རྗེ་ཕྲེང་བ་དང་། སྒྲུབ་ཐབས་རྒྱ་མཚོ་སོགས་ཀྱི་དབང་ཆེན་ཡོངས་རྫོགས་གསན་ཅིང་། ཁྱད་པར་ལེགས་བཤད་སྙིང་པོའི་བཤད་ལུང་རྒྱས་པར་གསན་པ་ལ་བརྟེན་ཟབ་མོ་དབུ་མའི་ལྟ་བ་ཁོང་དུ་ཆུད་པའི་ཚུལ་བསྟན། ཁྲི་ཆེན་འཇམ་དཔལ་ཚུལ་ཁྲིམས་ལས་ལམ་རིམ་འཇམ་དཔལ་ཞལ་ལུང་གི་ངེས་ཁྲིད་དང་། དཔལ་དུས་ཀྱི་འཁོར་ལོའི་དབང་ཆེན་ཟུར་བཀའ། ཁྲི་ཆེན་བློ་བཟང་ལྷུན་གྲུབ་ལས་ལམ་རིམ་ཆེན་མོའི་བཤད་ལུང་དང་། གཞུང་པ་རི་ཁྲོད་པ་དཀོན་མཆོག་དར་རྒྱས་ལས་ལམ་རིམ་ཆེན་མོ་ཚར་གཅིག་དང་། བདེ་ལམ། བྱམས་པའི་འཕོ་ཁྲིད་སོགས། གཙང་པ་མཁན་ཆེན་སྤྲུལ་པའི་སྐུ་ལས་འཇིགས་བྱེད་དཔའ་གཅིག་དབང་ཆེན་སོགས་དང་། གཞན་ཡང་དབང་རྗེས་གནང་མང་བར་གསན། ཀླུ་འབུམ་ལྷ་རམ་པ་ལས་རྒྱུད་བླ་མའི་རིགས་ཀྱི་སྐབས་གསན་པས་གསུང་རབ་ལ་གོ་བ་སོགས་ཐོན་པའི་ཚུལ་བསྟན། དགུང་ལོ་སོ་གསུམ་པར་ཕྱིར་ཕེབས་ནས་ལི་ཐང་ཚོགས་ཆེན་དུ། །དམ་བཅའ་མཛད། འཁོར་ལོ་བདེ་མཆོག་གི་གནས་སུ་གྲགས་པ་བསོད་ནམས་བཀོད་པའི་བྲག་དཀར་རི་ཁྲོད་དུ་བཞུགས་ནས་དམ་པའི་ཆོས་འདུལ་བའི་ཕྱག་བཞེས་ཁྱད་པར་ཅན་གཙོ་བོར་བཏོན་པའི་
བཤད་སྒྲུབ་སྤེལ་མར་མཛད། ཁྱད་པར་ཟབ་མོ་དབུ་མའི་ལྟ་བར་ཐུགས་ངེས་འཁྲུངས་པས་ཉམས་མགུར་ཁྱད་པར་ཅན་མཛད། བར་ཆད་ཀྱི་མཚན་མ་ཅུང་ཟད་གཟིགས་པར་སྒྲོལ་མ་འབུམ་ཐེར་བཅུ་གསུམ་དང་། མགོན་པོའི་གཏོར་སྒྲུབ་བརྒྱ་རྩ་བརྒྱད་སོགས་མཛད། དགུང་ལོ་སོ་བརྒྱད་པར་རི་ཁྲོད་དེར་འབྲུམ་ནད་མཆེད་པ་ལ་བརྟེན། རྡོར་གྱི་གཡག་རྭ་ཕུག་ཏུ་བཞུགས་རྗེ་རིན་པོ་ཆེའི་བླ་མའི་རྣལ་འབྱོར་རྒྱས་པ་ཐུགས་རྗེ་བསྐུལ་བའི་སྒྲ་དབྱངས་ཞེས་པའང་གསུང་རྩོམ་དུ་གནང་ནས་ཚོགས་ལ་འཛུགས་པར་ཡང་གནང་། དེ་ནས་ལོ་ཤས་ལི་ཐང་དགོན་ཆེན་རང་དུ་བཞུགས་ནས་ལམ་རིམ་ཆེ་ཆུང་བཤད་ལུང་། འཇིགས་བྱེད་དང་དུས་འཁོར་དབང་ཆེན་སོགས་དང་། ནག་ཟླར་དུས་འཁོར་གྱི་སྒྲུབ་མཆོད་གསར་འཛུགས་སོགས་བཤད་སྒྲུབ་སྤེལ་བར་མཛད། དགུང་ལོ་ཞེ་གཉིས་པའི་དགུན་ཀ་གླང་ལོའི་མཇུག་ཀཾ་པོ་གནས་ནང་དུ་ཕེབས་ནས་འཁོར་ལོ་བདེ་མཆོག་ལུགས་དེ་རྩེ་གཅིག་ཏུ་གནང་། དངོས་གྲུབ་ཁྱད་པར་ཅན་བརྙེས་པའི་ཚུལ་བསྟན་ཅིང་བསྟོད་ཆེན་ཁྱད་པར་ཅན་མཛད་ཀྱང་ཕྱིས་དཔེ་རྒྱུན་མི་སྣང་། དགུང་ལོ་ཞེ་གསུམ་པར་སླར་ལི་ཐང་དུ་ཕེབས། དེ་སྐབས་མཁན་པོའི་ཟློས་གཞི་ལྟ་བུ་བྱུང་བས། ཞེ་བཞི་པར་སྡེ་དགེའི་ཕྱོགས་སུ་ཕེབས།། ༈ །།ལོ་ཆེན་ཚེ་དབང་ཀུན་
ཁྱབ་ཀྱི་རྣམ་ཐར་ས་བོན་ཙམ་དུ་སྤེལ་བ་བཞུགས་སོ། །ཨོཾ་སྭ་སྟི། འཇམ་མགོན་སི་ཏུ་རིན་པོ་ཆེ་བསྟན་པའི་ཉིན་བྱེད་ཀྱི་སློབ་མ་ལོ་ཆེན་ཚེ་དབང་ཀུན་ཁྱབ་ནི། བོད་ཆེན་པོའི་སའི་ཆ་མདོ་ཁམས་ཟལ་མོ་སྒང་དང་། སྨར་ཁམས་ཀེ་རེ་སྒང་གི་བར་འོག་མིན་ཀརྨའི་དགོན་དང་ལམ་བར་ཕྱེད་ཀྱིས། འབེ་རྫ་ཉིད་དམ་ཐོག་སྒང་དུ། ཨ་ལྕགས་འབྲུ་ཡི་རུས་ལས། འབེ་སྤོ་རུ་བྱམས་ཆོས་པ པ་བསོད་ནམས་རྒྱལ་མཚན་གྱི་ཐུགས་སྲས། འཇམ་དབྱངས་གོང་མ་ཆེན་པོའི་ལུང་ལས་ཀྱིས་མངོན་པར་མཐོ་བ་དེ་སོགས་དམ་པའི་སྐྱེས་བུ་མང་དུ་བྱོན་པའི་ཕྱི་མ། འབེ་སྒྲོལ་མ་མགོན་དང་། ཆོས་བློན་ཐོན་མིའི་གདུང་རིགས་བསོད་ནམས་སྒྲོན་མའི་སྲས་སུ་ས་ཕོ་ཁྱིའི་ལོ་རྒྱལ་ཟླ་བར་འཁྲུངས། ཁམས་སྤྲུལ་ངག་དབང་ཀུན་དགའ་བསྟན་འཛིན་གྱིས་ཀརྨ་རྡོ་རྗེར་བཏགས། དགུང་ལོ་བདུན་པའི་དུས་ཟུར་མང་བྱ་བཏང་བསྟན་འཛིན་དབང་ཕྱུག་ལས་དགེ་བསྙེན་གྱི་སྡོམ་པ་གསན། མཚན་ཀརྨ་ཀུན་ཁྱབ་ཅེས་སྩལ། ཁམས་སྤྲུལ་རིན་པོ་ཆེ་ལས་དཀོན་མཆོག་སྤྱི་འདུས་ཀྱི་དབང་གསན། དགུང་ལོ་དགུ་པར་ཡོས་བཀྲ་ཤིས་ཟུར་མང་དགོན་དུ་རང་གི་མེས་པོ་མཁས་པའི་དབང་པོ་འབེ་འཇམ་དབྱངས་སམ་སངས་རྒྱས་རིན་ཆེན་པའི་དྲུང་དུ་བྱོན། ཀར་ལུགས་ཀྱི་སྒྲུབ་དཀྱིལ་རྣམས་ཐུགས་ལ་བཟུང་།
བཅུ་གཉིས་པར་མཁས་དབང་དེ་ཉིད་ལས་སྐར་རྩིས་དང་། བཅུ་གསུམ་པར་སྒྲ་ཀ་ལཱ་པ་དང་། སྡེབ་སྦྱོར་རིན་འབྱུང་། སྐུ་ཞང་རྗེ་སྟོད་ཚེ་དབང་གྲགས་པ་ལས་སྨིན་གླིང་ལོ་ཆེན་གྱི་སྤྱི་དོན་སྟེང་ནས་སྐར་རྩིས་ཀྱི་གོ་བ་དཔྱིས་ཕྱིན་པར་གསན། བཅོ་ལྔ་པར་ཟུར་མང་ཆེ་ཚང་སྤྲུལ་སྐུ་གྲགས་པ་ཁྲི་འདོན་གྱི་ཆེད་འཇམ་མགོན་ཆོས་ཀྱི་འབྱུང་གནས་ཕེབས་པ་ཐོག་མར་མཇལ། རྡོ་ནང་དུ་ཐུགས་རྗེ་གསང་འདུས་ཀྱི་སྒྲུབ་པ་ཟླ་བ་དྲུག་ཅུ་བཞུགས། སྔགས་འཆང་སྙིང་པོ་ལས་ཆགས་མེད་རིན་པོ་ཆེའི་གཏོ་ཚོགས་སྐོར། འཇམ་དབྱངས་ལས་དཀྱིལ་འཁོར་ཟི་ཐིག །ཟུར་མང་གཅོད་ཁྲིད། ཟུར་མཁར་ཀིང་ནག །གཤིན་རྗེ་ཁྲོ་ཆུ། མཉན་སྤྲུལ་ལས་རཏྣའི་ཐུགས་རྗེ་གསང་འདུས་དབང་ཆེན་སོགས་གསན། བར་སྐབས་སུ་གཏོ་ཆོག་ཀྱང་མང་དུ་མཛད། ཆགས་མེད་མཆོག་སྤྲུལ་ཕྲིན་ལས་དབང་འབྱུང་ལས་ཀྱང་དབང་ལུང་འགའ་རེ་གསན། དབོན་བླ་བདེ་མཆོག་སྐྱབས་ལས་ཕྱག་བཞི་པའི་མདོས་ཆེན་བརྒྱད་ཅུ་སོགས་ཀྱི་ཕྱག་ལེན་བསླབ། གཅོད་ཀྱི་བསྐྱེད་རིམ་དང་། རུ་པའི་ཟིན་བྲིས་སྟེང་ནས་ཀར་ལུགས་ཀུན་རིག་གི་ལྷ་ཁྲིད་སོགས་གསན། འཇམ་དབྱངས་ལས་སྙན་ངག་མེ་ལོང་། ཆགས་མེད་ནག་རྩིས། ཚེ་དབང་གྲགས་པ་ལས་དབྱངས་འཆར་རྒྱན་མེ་དང་། བེ་དཀར་ནག་རྩིས་
སྐོར། ཞྭ་ལུའི་སུམ་རྟགས་འགྲེལ་པ། ས་བདག་ཉེས་སེལ་གྱི་ལག་ལེན། སླར་ཡང་བླ་མ་འཇམ་དབྱངས་ལས་རྩ་རྒྱུད་རྡེལ་འགྲེལ་སོགས་སྨན་སྐོར་འགའ་རེ་དང་། བདེ་རྩེའི་སློབ་དཔོན་ཨ་སེང་ཆོས་གྲགས་ལས་ཀར་ལུགས་ཀུན་རིག་གི་ལྷ་ཁྲིད་དང་ཕྱག་རྒྱ་འཆིང་ཚུལ། བདེ་མཆོག་ལྷ་ལྔའི་གོ་ཁྲིད། ངོར་ལུགས་གཞལ་ཡས་ཁང་གི་བློས་བསླང་གི་གོ་ཁྲིད། བླ་མ་བདེ་མཆོག་སྐྱབས་ལས་ཟུར་མང་སྙན་བརྒྱུད་འཁོར་ལོ་ལྔ། ཟུར་མང་ལུགས་ཀྱི་སྐོང་པོད། ཕྱག་བཞི་པའི་མདོས་ཡིག་པད་སྨུག །རྩ་འཕྱང་། སྒ་འཕྱང་ཆེ་ཆུང་སོགས་གསན། ཟུར་མང་དྲུང་སྤྲུལ་རིན་པོ་ཆེས་བསྐུལ་ནས་མདོས་ཆེན་གྱི་ཟིན་བྲིས་ཀྱང་མཛད། དགུང་ལོ་བཅུ་དྲུག་པར་སི་ཏུ་འཇམ་མགོན་རིན་པོ་ཆེ་ལས་སྒྲུབ་ཐབས་རྒྱ་མཚོ། ཀར་ལུགས་བདེ་མཆོག །ཕག་མོ། ཀུན་རིག་རྣམས་གསན། ལྷ་ཐོག་བླ་མ་བསྟན་འཛིན་དབང་ཕྱུག་ལས་སྨིན་གླིང་བཀའ་བརྒྱུད་ལུང་དང་ཕྱག་ལེན་བསླབ། ཟུར་མང་ཁྲི་སྤྲུལ་བློ་བཟང་རྣམ་རྒྱལ་ལ་སྒྲ་ཀ་ལཱ་པའི་རི་མོ་སྩལ་ཞིང་། ཕུར་པའི་སྐར་རྩིས་འགའ་རེ་ཚུར་གསན། གར་དབང་སྤྲུལ་པའི་སྐུར་ཚེ་བདག་གི་ལུང་དང་དབང་བཀའ་ཁ་ཤས། བདེ་མཆོག་ཡབ་བཀའི་དབང་། སྔགས་འཆང་པད་དྲག་ལས་འཇིགས་བྱེད་མེའི་སྤུ་གྲི། རོལ་པའི་རྡོ་རྗེའི་ཕྱག་རྡོར་དབང་།
མཚོ་གཏེར་སྐོར་གྱི་ལུང་སོགས་གསན། ཁྲ་ལེབ་སྤྲུལ་པའི་སྐུར་ཀ་ལཱ་པའི་མིང་ལེ་ཡན་དང་། སྡེབ་སྦྱོར་རིན་འབྱུང་གི་ཕྱེད་ཙམ་བསླབ་པར་མཛད། ཁྲ་འགུའི་འདུས་སྡེར་ཀར་ལུགས་ཀུན་རིག་གི་ཕྱག་ལེན་སྩལ། འབྲུག་ཡོངས་འཛིན་རིན་པོ་ཆེར་ཕྱག་ཆེན་མགྱོགས་ཁྲིད་ཞིག་གསན། དེ་ནས་དཔལ་སྤུངས་སུ་ཕེབས། རྗེ་དབོན་ངེས་ལེགས་བསྟན་འཛིན་ལས་རྩིས་དང་། སྙན་ངག་གི་སྐོར་གྱི་དྲི་བ་དང་། རྔོག་ལུགས་དགྱེས་རྡོར་དབང་སོགས་གསན། སླར་ཡར་ཕེབས་ནས་ར་ཤུལ་དཔོན་ཚང་སྲས་ནམ་མཁའ་དབང་ཕྱུག་ལ་བེ་དཀར་སྟེང་ནས་གྲུབ་རྩིས་གཟའ་ལྔ་བཅས་དང་། དཔོན་ལྷ་རྒྱལ་ལ་སྙན་ངག་གི་བཤད་པ་གནང་། གར་དབང་པར་ཀུན་རིག་གི་ལྷ་ཁྲིད། དབོན་ཀརྨར་ས་བདག་ཉེས་སེལ་དང་། ཀིང་ཀང་དགྲ་མནན་གྱི་ལག་ལེན་སོགས་ཕུལ། དགུང་ལོ་ཉི་ཤུ་པར་སི་ཏུ་རིན་པོ་ཆེ་ལས་ཀ་ལཱ་པའི་སི་སོགས་དང་། འགྲེལ་པ་ཚིག་ཟླའི་རྟགས་བསྡུ་སོགས་གསན། ཉེར་གཅིག་པ་ས་རྟ་དབོ་ཟླའི་ནང་བསྙེན་པར་རྫོགས་ཤིང་། མཚན་ཀརྨ་ཚེ་དབང་ཀུན་ཁྱབ་ཅེས་སྩལ། ཞྭ་དམར་སྤྱན་སྔའི་ཡིག་སྟེང་ནས་རླུང་སེམས་གཉིས་མེད། གཉུག་ལ་པཎ་ཆེན་ཡིག་སྟེང་ནས་སྒྲོལ་དཀར་ཚེ་ཁྲིད། རིག་འཛིན་ཚེ་དབང་ནོར་བུའི་བདེ་ཆེན་ཞིང་སྐྱོང་གི་ཁྲིད་སོགས་གསན། སྙན་ངག་
གི་དོགས་དཔྱོད་སོགས་ཞུས། རྗེ་སྟོད་ཚེ་དབང་གྲགས་པ་ལ་རྟགས་བསྡུ་དང་། རྒྱ་རྩིས་གསར་མའི་སྐོར་སོགས་སྩལ། སི་ཏུ་རིན་པོ་ཆེར་རྒྱའི་ལིའུ་ཐུའི་སྐོར་དང་། གནས་བརྟན་བཅུ་དྲུག་སོགས་མཁོ་དབང་འགའ་རེ་དང་། དབོན་ཀརྨ་ངེས་ལེགས་བསྟན་འཛིན་ལས་མ་མགོན་འཁོར་ལྔའི་རྗེས་གནང་སོགས་གསན། འཇམ་མགོན་བླ་མའི་བཀའ་ཕེབས་བཞིན་རྒྱལ་རོང་ཚ་ཀོར་དུ་ཕེབས། ཕྱོགས་དེར་མཁྱེན་ནུས་ཀྱི་འཇུག་པས་ཕྲིན་ལས་ཀྱི་སྒོ་བྱེ་ཞིང་གཞན་ཕན་རྒྱས། ཡར་ལམ་རྡོ་སྨད་ཀ་ནང་དུ་སི་ཏུ་རིན་པོ་ཆེ་མཇལ། རྙེད་པ་ཐམས་ཅད་ཕུལ། མ་མགོན་འཁོར་ལྔ་དང་བཅས་པའི་རྗེས་གནང་དང་། རིན་འབྱུང་ལས་ཤཱཀྱ་རཀྵི་ཏའི་མན་ངག་གི་རྗེས་གནང་རྣམས་གསན། དཔལ་སྤུངས་སུ་ཕེབས་སྐབས་ཙཱནྡྲ་བར་སློབ་གཉེར་དགོས་ཚུལ་དང་། པཎྜི་ཏའི་མཚན་གྱི་ཅོད་པན་སྩལ། འཆི་མེད་མཛོད་དང་མེ་ལོང་གི་གསུང་བཤད་གསན་ཅིང་ཟིན་ཐོར་བཏབ། ཙནྡྲ་པའི་ས་རིས་གསན། དབོན་ཀརྨ་ལས་འཇམ་དཔལ་གསང་ལྡན་མ་གཏོགས་པའི་རྔོག་དཀྱིལ་དང་། གཤེད་དམར་ལྷ་ལྔ། རཏྣའི་བླ་མ་ཞི་དྲག །གཡུ་ཐོག་བླ་སྒྲུབ་སོགས་དང་། བསམ་འཕེལ་ལས་དཔའ་བོའི་སྒྲོལ་དཀར་གྱི་ཆོ་ག་འདོད་འཇོ་བུམ་བཟང་གི་དབང་སོགས་གསན། སི་ཏུ་རིན་པོ་ཆེས་ཛ་ཐོག་ཏུ་བུམ་སྒྲུབ་
མཛད་སྐབས། ལྷ་ཐོག་རྗེ་དྲུང་བསྟན་འཛིན་དབང་ཕྱུག་ལས་སྨིན་གླིང་པའི་བཀའ་བརྒྱད་སྒྲུབ་ཆེན་གྱི་ལག་ལེན། དབྱངས་རོལ། ཉུ་ལེའི་སྐྱོད་འཆམས་བཅས་བསླབ་ཅིང་ཕྱག་ལེན་པ་མཛད། གར་དབང་རིན་ཆེན་ལས་རཏ་གླིང་ཐུགས་སྒྲུབ་ཞི་དྲག །ཐུགས་རྗེ་ཆེན་པོ། ཚེ་སྒྲུབ་གསང་འདུས། རྟ་མགྲིན། ཕུར་པ་རྣམས་ཀྱི་དབང་ཆེན། མ་ནིང་སྲོག་དབང་། རོལ་རྡོར་ཕྱག་རྡོར་ཞི་དྲག་དང་། ཁྲོ་རོལ། དྲག་ཁྲོས་སོགས་ཀྱི་དབང་ལུང་གསན། གཞན་ཡང་སི་ཏུ་རིན་པོ་ཆེ་ལས་སྔ་ཕྱིར་ཙནྡྲ་པའི་གོ་ཁྲིད་ཚར་བཞི་ལྔ། འདོད་འཇོའི་གོ་ཁྲིད་ཚར་གསུམ། ཤིང་གི་སྡེ་ཚན་སོགས་ཀྱི་སྐབས་སུ་རྣམ་བཤད་བདུད་རྩི་ལས་བྱིངས་སྒྲུབ་ཕལ་ཆེར་གསན། ཀ་ལཱ་པའི་བྱིངས་མདོའི་འགྲེལ་པ་བསྒྱུར་བར་བསྐུལ་ཞིང་དཀའ་གནས་རྣམས་དང་། པཱ་ཎི་པའི་རིག་བྱེད་སྒྲ་སྒྲུབ། འགྲེལ་མཁས། སྡེབ་སྦྱོར་ཐོས་ཆུབ་འགྲེལ་པ། འབྲས་རྩིས་མྱུར་རྟོགས་དང་རིན་ཆེན་ཕྲེང་བ་སོགས་བསྒྱུར་བར་ཞུས་ཤིང་གསན། སྡེབ་སྦྱོར་དམར་སེར་ཅན་གྱི་འགྲེལ་པ་རྒྱལ་བའི་ལྷས་མཛད་པ་ཕལ་ཆེར་རྒྱ་དཔེའི་སྟེང་ནས་གསུང་བཤད་ཞུས་ཤིང་དཀའ་གནས་རྣམས་ཟིན་བྲིས་སུ་མཛད། གསར་འགྱུར་རྒྱ་ནག་ལུགས་ཀྱི་རྩ་དཔྱད་དང་། སྨན་ཁ་ཤས་སོགས་གསན་ཅིང་། གསོ་རིག་ལ་དོགས་གཅོད་
མཐར་ཕྱིན་པ་མཛད། རྣམ་སྲས་ཀྱི་དབང་། རིན་འབྱུང་ལས་རིག་གཏད་དུ་མ། དྭགས་པོའི་ཐར་རྒྱན་སོགས་ལུང་། རང་བྱུང་བའི་ནང་དོན། སྙིང་པོ་བསྟན་པ། རྣམ་ཤེས་ཡེ་ཤེས་འབྱེད་པ། དབུ་མ་རྒྱན། རྗེ་དགུ་པའི་འཇུག་ཊཱིཀ །མདོ་སྡེ་རྒྱན། པད་དཀར་སྡོམ་གསུམ། མངོན་པ་མཛོད་སོགས་ཀྱི་བཤད་པ། ཐལ་རང་དང་། གཞན་སྟོང་སོགས་ཀྱི་དབྱེ་བ་དང་སྙིང་པོའི་གནད། མར་ལུགས་འཇིགས་བྱེད་ལྷ་དགུ་དང་། ཇོ་ལུགས་རོ་ལངས་བརྒྱད་སྐོར་གྱི་དབང་། ཡེ་ཤེས་རྒྱ་མཚོའི་ཟིན་བྲིས་སྟེང་ནས་འཇིགས་བྱེད་སྙན་བརྒྱུད་ཁྲིད་རགས་རིམ། དུས་འཁོར་ཇོ་ལུགས་དང་བུ་ལུགས་ཀྱི་དབང་། སྦྱོར་དྲུག་གི་ཁྲིད། རྫོགས་ཆེན་སྙིང་ཏིག་གི་ཁྲིད། བདེ་མཆོག་སྟོད་འགྲེལ། དྲིལ་བུ་ལུས་དཀྱིལ། མ་ཧཱ་མཱ་ཡ། དགྱེས་རྡོར་མན་ངག་ལུགས། གྲྭ་ལོ་ལུགས་དང་། མི་བསྐྱོད་པའི་མགོན་པོ་ཕྱག་བཞིའི་དབང་། ཞི་སྦས་ལུགས་ཀྱི་ཕྱག་བཞི་པ་དང་། དཔྱལ་ལུགས་ཕག་མོ། ཇོ་ནང་ཁྲིད་བརྒྱའི་ཟབ་ཁྲིད་སོགས་གསན། གཏེར་སྲས་ཆོས་སྐྱོང་དཔལ་ལྡན་ལས་ཚེ་སྒྲུབ་རྡོ་རྗེ་རྒྱ་མདུད། རྟ་ཕྱག་ཁྱུང་གསུམ་གཅིག་དྲིལ། བཀའ་བརྒྱད་ཀྱི་དབང་། བཀའ་འདུས་དང་། ཀློང་གསལ་སྐོར་གྱི་ལུང་སོགས་གསན། ཡང་སི་ཏུ་རིན་པོ་ཆེས་ཚོགས་ཆེན་ལ་གནང་བའི་ཞར་དུ་དཔལ་
སྤུངས་སྤུར་མའི་འདོན་ཆོག་ཚང་མ། སྒར་བསང་། ཟུར་གཅོད་རྣམས་ཀྱི་ལུང་། ཕྱག་ཆེན་ཞི་ལྷག་ཡན་གྱི་ཁྲིད། ཕག་མོའི་སྐུ་གསལ་བཏབ་པ་ཡན་གྱི་ལྷ་ཁྲིད། རྒྱལ་བ་རྒྱ་མཚོ་ལྷ་དགུའི་ལྷ་ཁྲིད། ཟུར་ལུགས་གཅོད་ཚོགས་ཀྱི་བསྐྱེད་རིམ་ཁྲིད། ཆབ་གཏོར་བརྒྱ་རྩ། གྲུལ་གཏོར། འབྱུང་བཞི། ཇི་སེར་ནག་དཀར་གསུམ། ཆུ་སྦྱིན་དང་བཅས་པའི་གསུང་ཁྲིད་རྣམས་གསན། རྒྱ་ཡེ་ཤེས་རྡོ་རྗེའི་སྤྲུལ་པའི་སྐུ་འབྲུག་པ་ཕྲིན་ལས་ཤིང་རྟ་ལས་གསན་པའི་ཇོ་ནང་པའི་བདེ་མཆོག་འཇམ་རྡོར། མེ་ཏྲི་བཅུ་གསུམ་མ། གསང་འདུས་འཇམ་རྡོར། གངས་དཀར་ལས་བརྒྱུད་པའི་མཁའ་འགྲོ་རྒྱ་མཚོའི་དབང་། གྲུབ་ཐོབ་བརྒྱད་ཅུའི་རྗེས་གནང་། འབྲུག་ལུགས་བླ་མ་མཆོད་པའི་དབང་སོགས་གསན། ཁོང་ལ་སྒྲ་སྙན་གྱི་དོགས་གཅོད་མཛད། བྲག་ཤི་བླ་མ་ལས་པཎ་ཆེན་ཤཱཀྱ་ཤྲཱི་ལས་བརྒྱུད་པའི་རྡོར་ཕྲེང་གི་དབང་། ཕྲིན་ལས་པའི་རྡོར་ཕྲེང་དང་། རྡོ་རྗེ་ཉི་སྣང་གི་ལུང་། བྱ་བཏུས་ཀྱི་དགེ་ལེགས་སུ་བྱེད་པའི་དཀྱིལ་འཁོར་གསུམ་གྱི་དབང་། རྗེ་དབོན་ཀརྨ་ལས་ཆགས་མེད་ཆོག་བསྒྲིགས་སྦྱོང་དཀྱིལ་བཅུ་གཉིས་དབང་། ཉིད་ཀྱིས་མཛད་པའི་སྡོམ་གསུམ་གྱི་ལུང་སོགས་གསན། སླར་ཡང་རྒྱལ་རོང་དུ་ཇོ་ནང་བཀའ་འབུམ་གྱི་ལུང་སོགས་གསན་པར་སི་ཏུ་རིན་པོ་ཆེས་ཆེད་
མངགས་ལྟར་ཕེབས། ཀུན་བཟང་དབང་པོའི་དབོན་པོ་བླ་མ་ཀུན་དགའ་རྣམ་རྒྱལ་གྱི་དྲུང་དུ་ཇོ་ནང་སྒྲོལ་མགོན་གྱི་བཀའ་འབུམ་རྣམས་ཀྱི་ལུང་། སྒྲུབ་ཐབས་རིན་འབྱུང་ཕལ་མོ་ཆེ། རྒྱལ་ཐང་ལུགས་ཀྱི་གཅོད་ཁྲིད། བླ་མ་འཇམ་པའི་རྡོ་རྗེའི་དྲུང་དུ་དུས་འཁོར་གྱི་ཕྱག་ལེན། འཇིགས་མཛད་དྲུག་ཅུ་པ། མདེལ་ཐུང་བཞི་བཅས་ཀྱི་ཕྱག་ལེན། ལྷ་དབང་གྲགས་པ་དང་། ཡེ་ཤེས་རྒྱ་མཚོའི་རེག་ཟིག་གཉིས་ཀྱི་སྟེང་ནས་འཇིགས་མཛད་སྙན་བརྒྱུད་ཀྱི་ཁྲིད། སྒྲུབ་ཆེན་རྟ་ཁལ་མའི་ཕྱག་ཆེན་སོགས། རྒྱལ་སྲས་རིན་རྣམ་སློབ་མ་བླ་རྒན་འགྱུར་མེད་ཆོས་དབང་ལས་སྒྲུབ་ཐབས་འདོད་བུམ་ཕལ་ཆེར་དང་། གཤིན་རྗེ་དྲེགས་འཇོམས། ཡེ་ཤེས་རབ་འབར། རོང་པོ་ཀརྨ་རིག་འཛིན་ལས་ཕུར་པ་ཇོ་མོ་ལུགས་ཀྱི་དབང་སོགས་གསན། ཕུན་ཚོགས་རྫོང་དུ་རྣམ་རྒྱལ་སྟེང་གི་ཀར་དགོན་བཙུགས། བཙུན་ཁྲལ་བརྒྱ་བསྡུས་ནས་རབ་ཏུ་བྱུང་། བདེ་མཆོག་སོགས་ཉེར་མཁོའི་དབང་ལུང་སོགས་མཛད། ཡར་ཕེབས་ནས་ཁྲ་མགུར་རྡོ་རྗེ་གདན་བཞིའི་ཡབ་བཀའ་རྣལ་འབྱོར་ནམ་མཁའ་དང་། རྔོག་ལུགས་དགྱེས་རྡོར་ལྷ་དགུ། གཤེད་དམར་ལྷ་ལྔ་རྣམས་ཀྱི་དབང་བསྐུར་ཞིང་ཆོ་ག་བཙུགས། ཁྲ་ལེབ་སྤྲུལ་པའི་སྐུར་སྒྲུབ་ཐབས་རིན་འབྱུང་ཕལ་ཆེར། འཇིགས་བྱེད་རོ་ལངས་བརྒྱད་སྐོར་སོགས་
གནང་། སྐྱེ་རྒུ་སངས་རྒྱས་ཆོས་གྲགས་ལས་ཐེག་ཙེའི་རྗེས་གནང་གསན། དཔལ་སྤུངས་སུ་ཕེབས་ནས་སི་ཏུ་རིན་པོ་ཆེ་མཇལ། ཧྭ་ཤང་ཐར་མཆོག་ལས་གསན་ཏེ། རྒྱའི་འབྲས་རྩིས། ནག་རྩིས། ས་བདག་ཁྲམ། ཚེ་རྩིས། མཁས་པ་ཆེན་པོ་རོ་སྤུ་གསན་གསིན་གྱིས་བསྒྲིགས་པའི་ས་དཔྱད་སྐོར་རེའུ་མིག་བཅས་པུསྟི་ཀ་གཅིག་རྣམས་གསར་དུ་བསྒྱུར། ས་དམིགས་སྐོར་པུསྟི་གཅིག་གི་མཛུབ་ཁྲིད་ཀྱང་གསན། དེ་ནས་ཞྭ་དམར་བཅུ་པའི་ཡོངས་འཛིན་གྱི་ཚུལ་དུ་དབུས་སུ་བྱོན། ཡངས་པ་ཅན་གྱི་དཔེ་མཛོད་མཇལ། ཀརྨ་པ་བདུད་འདུལ་རྡོ་རྗེ་དང་། དཔའ་བོ་གཙུག་ལག་དགའ་བ་སོགས་མཇལ་ཞིང་ཆོས་འབྲེལ་གསན། ཞྭ་དམར་རིན་པོ་ཆེར་སྟག་ལོའི་གྲུབ་མཐའ་ཀུན་ཤེས་ཀྱི་ཕྱེད་ལྷག་ཙམ་མཛུབ་ཁྲིད་ཕུལ། གཙང་དུ་ཕེབས་པའི་ཞབས་ཕྱིར་བྱོན། པཎ་ཆེན་རིན་པོ་ཆེ་དང་། བླ་མ་བྱམས་པ་སོགས་མཇལ། ཞ་ལུ། གསེར་སྡིང་། ཇོ་ནང་སོགས་མཇལ་བར་ཕེབས། གཡུ་རྩེ་འབྲས་སྤངས་སུ་བླ་མ་བློ་བཟང་པ་ལས་ཇོ་ལུགས་ཀྱི་དབང་ལུང་འགའ་རེ་གསན་པར་བཞེད་ཀྱང་མཇལ་ཀ་མ་གྲུབ། ཇོ་ནང་དུ་རྟེན་གསུམ་སྤྱི་དང་། ཁྱད་པར་ཀུན་མཁྱེན་དོལ་པོ་པས་བཞེངས་པའི་ཆོས་རྒྱལ་རིགས་ལྡན་གྱི་ཐང་སྐུ་སོགས་མཇལ། རྗེ་རིག་འཛིན་ཆེན་པོ་དང་། བླ་མ་
ཀུན་ལེགས་ཀྱི་གསན་ཡིག་བོར་ཤོར་བ་དང་། ཇོ་ནང་སྒྲོལ་མགོན་ཞབས་ཀྱི་གསུང་འབུམ་སྤར་དུ་མ་འཁོད་པའང་ཁ་ཤས་རྙེད། མར་ལམ་སྟག་རྩེ་ཞབས་དྲུང་གི་ཕྱག་དཔེ་རིགས་མཇལ། ཡངས་པ་ཅན་བརྒྱུད་ཇོ་བོ་རིན་པོ་ཆེ་མཇལ་ཞིང་། གྲྭ་ནང་བཀྲ་ཤིས་གླིང་སྟོད་གྲོང་དུ་གྲགས་པ་ཀུན་མཁྱེན་ཀློང་ཆེན་པ་སྐུ་འཁྲུངས་ས་དེར་རྗེ་དཔའ་བོའི་ཞབས་ལ་བཏུད་དེ་དགྱེས་རྡོར་ཞི་སྦས་ལུགས། བདེ་མཆོག་ནག་པོ་པ། ནི་གུ་ལུགས་ཀྱི་བདེ་མཆོག་ལྷ་ལྔ། སྒྲོལ་མ་རྣལ་འབྱོར་མ། གཤེད་ནག །འཇིགས་བྱེད་རོ་ལངས་བརྒྱད་སྐོར་སོགས་ཀྱི་དབང་། ཡེ་ཤེས་རྒྱ་མཚོའི་རེག་ཟིག་གི་སྟེང་ནས་བདེ་མཆོག་རྒྱུད་བཤད། སྒྲོལ་མ་རྣལ་འབྱོར་མའི་ཁྲིད། ཡེ་ཤེས་རྒྱ་མཚོའི་ཟིན་བྲིས་སྟེང་ནས་བཀའ་བབས་བདུན་ལྡན་གྱི་ཁྲིད། བྱང་པའི་ལུགས་ཀྱི་བྱང་སྡོམ། ཏཱ་ར་ནཱ་ཐས་མཛད་པའི་ཨོ་ལ་པ་ཏིའི་འགྲེལ་པ། བདེ་མཆོག་སྟོད་འགྲེལ་གྱི་སྨད་ཆ། ཚིགས་བཅད་བཅུ་པའི་འགྲེལ་པའི་ལུང་རྣམས་གསན། ཁམས་སྤྲུལ་རིན་པོ་ཆེ་དང་ལྷན་ཅིག་ཡར་ཀླུང་ཕྱོགས་ཀྱི་གནས་གཟིགས་ལ་ཕེབས། རྗེ་དཔའ་བོ་ལ་ཟུར་ལུགས་གཅོད་ཁྲིད་སོགས་ཕུལ། འཇམ་མགོན་སི་ཏུ་རིན་པོ་ཆེས་བྱིན་གྱིས་བརླབས་པར་འདུག་ཅེས་བསྔགས་བརྗོད་རྒྱ་ཆེར་མཛད། འབྲུག་བདེ་ཆེན་ཆོས་འཁོར་དུ་ཕེབས། ཡོངས་
འཛིན་རིན་པོ་ཆེ་མཇལ། སྔ་ཕྱིར་ནགས་རིན་ནས་བརྒྱུད་པའི་རྡོ་རྗེ་ཕྲེང་བའི་དབང་། གསང་འདུས་མི་བསྐྱོད་པའི་དབང་། གཤེད་དམར་སྐུ་མཆོག་གྱད་ཆེན་གྱི་དབང་སོགས་གསན་ཅིང་། ཕན་ཚུན་ཐུགས་ཡིད་གཅིག་ཏུ་འདྲེས་ཤིང་བསྔགས་བརྗོད་ཆེ། ཡར་གྲུབ་མཐའ་བཞི་ལས་བརྩམས་ཏེ་གཞན་སྟོང་དབུ་མའི་བཤད་པ་རྒྱས་པ་དང་། ཙནྡྲ་པའི་དཀའ་གནས། ཁྲོ་ཆུ་དུག་སྡོང་གི་སྲོག་དབང་། དེའི་བསྙེན་སྒྲུབ་ཀྱི་གནད་འདོམས། ཀིང་ཀང་དུག་རི་དང་། སྲུང་ཟློག་གི་ཟིན་ཐོ། ཚེ་བདག་གི་ལུང་སོགས་ཕུལ། ཁམས་སྤྲུལ་རིན་པོ་ཆེ་ལས་དུས་འཁོར་སྡོམ་ཆེན་གྱི་དབང་། འབྲུག་ལུགས་བླ་མཆོད་དབང་སོགས་གསན། གངས་དཀར་རྣམ་གྲོང་པ་ཆོས་དབང་རྒྱ་མཚོ་ལས་བདེ་མཆོག །དྲིལ་བུ་ལྷ་ལྔ། འཇིགས་བྱེད་ཞེ་དགུ་མ། གདུགས་དཀར་བཅུ་བདུན་མ། གྲྭ་ལྔ་ལྷ་མང་། ས་ཕུར་སྟོད་ལས་རྣམས་དང་། ཀུན་དགའ་ཆོས་འཕེལ་ལས། བདེ་མཆོག་སངས་རྒྱས་མཉམ་སྦྱོར། གཤེད་དམར་བཅུ་གསུམ་མ། གདོང་དྲུག །གཟའ་ཡུམ་ལྷ་མང་། འཆི་མེད་རྔ་སྒྲ་རྣམས་ཀྱི་དབང་རྣམས་གསན། ཡངས་པ་ཅན་དུ་གཙང་པཎ་ཆེན་རིན་པོ་ཆེ་དཔལ་ལྡན་ཡེ་ཤེས་ཕེབས་པར་ཆོས་ཀྱི་འབེལ་གཏམ་གནང་། མཚུར་ཕུར་ཀརྨ་པ་བདུད་འདུལ་རྡོ་རྗེར་གྲུབ་མཐའ་བཞི་དང་གཞན་
སྟོང་དབུ་མའི་བཤད་པ། རྒྱ་རྩིས་གསར་འགྱུར་རགས་རིམ། ཕྱག་ཆེན་དང་ཆོས་དྲུག་གི་གནད་འདོམས་སོགས་ཕུལ་ཞིང་དགྱེས་པའི་རྩེར་སོན་པར་མཛད། དེ་ནས་ཁམས་སུ་ཕེབས། ལམ་བར་ཕ་བོང་གཡང་འཛོམས་སུ་སི་ཏུ་རིན་པོ་ཆེ་ཡར་ཕེབས་པ་དང་མཇལ། རྩི་གད་དམར་དུ་ཨ་གྲོ་བླ་རྒན་ཁུ་དབོན་རྣམས་ལ་སངས་རྒྱས་ཐོད་པའི་དབང་དང་འདོན་འགྲིགས་སྩལ། ཟུར་མང་དུ་གར་དབང་རིན་པོ་ཆེ་ལེགས་བཤད་སྒྲ་དབྱངས་འགྲེལ་པའི་སྟེང་ནས་སྙིང་པོ་བསྟན་པའི་བཤད་པ་སོགས་ཞུས། དགེ་ལྡན་ངེས་གླིང་གི་ཁྲི་སྤྲུལ་ལ་གྲུབ་མཐའ་བཞིའི་བཤད་པ་དང་། རྗེ་རིན་པོ་ཆེའི་ལྟ་བའི་སྐོར་གྱི་བཤད་པ་སོགས་གནང་། དགུང་ལོ་ཞེ་དྲུག་པར་དཔལ་སྤུངས་སུ་ཕེབས། རྗེ་དབོན་བསམ་གཏན་མཇལ། སྡེ་དགེ་ལྷུན་གྲུབ་སྟེང་དུ་ཞུ་ཆེན་རིན་པོ་ཆེ་ཚུལ་ཁྲིམས་རིན་ཆེན་ལས། བདེ་མཆོག་བོང་ཞལ་ཅན། གསང་འདུས་སྤྱན་རས་གཟིགས། རིགས་གསུམ་སྤྱིའི་དབང་རྣམས་གསན། འཆི་མེད་མཛོད་ཀྱི་རགས་བསྡུའི་བཤད་པ་ཕུལ། ཕུར་པ་བླ་མ་སངས་རྒྱས་བཟང་པོ་ལས་ས་ཕུར་སྟོད་ལས། སྨད་ལས་ཀྱི་དབང་གསན། ལོ་དེའི་སྔོན་འཇམ་མགོན་སི་ཏུ་རིན་པོ་ཆེ་ཕེབས་པ་དང་མཇལ། ལྕི་སྟོད་སྟོང་ནག་སྤྲུལ་སྐུར་སྒྲ་ཀ་ལཱ་པ་དང་། སྡེབ་སྦྱོར། གྲུབ་མཐའ་སོགས་བསླབ། ཚབ་
ཚ་དགོན་དུ་ཕེབས་ནས་སྤྲུལ་སྐུར་ཕག་མོ་དང་། ཀུན་རིག་གི་ལྷ་ཁྲིད། ཉེར་མཁོའི་དབང་ལུང་ཅི་རིགས་སྩལ། སྨིན་གླིང་ཐུགས་སྲས་དམར་ལོག་བླ་མ་སྐལ་བཟང་དང་། རྟ་མགྲིན་གྱི་མཆོད་དཔོན་འགྱུར་མེད་བློ་ལྡན་ལས། སྒྱུ་འཕྲུལ་ཞི་ཁྲོའི་དབང་། གསང་སྙིང་གི་རྒྱུད་བཤད། དོང་སྤྲུགས་པདྨ་བརྒྱ་ལྡན། བཀའ་བརྒྱད་རྣལ་འབྱོར་རྒྱུན་དབང་སོགས་གསན། ཟུར་མང་གཅོད་ཀྱི་དབང་ཁྲིད་མཛད། རྣམ་རྒྱལ་གླིང་གི་ཆོས་རྗེ་ལ་འདོད་བུམ་དབང་སྩལ། དཔལ་སྤུངས་སུ་ཕེབས་ནས་འཇང་གྲ་འགའ་ལ་དུས་འཁོར་གྱི་དབང་དང་། ལྕགས་མདུད་ནོར་བུ་སོགས་ལ་ཞི་ཕྲེང་དྲག་ཕྲེང་རྗེས་གནང་སོགས་དབང་ཆོས་མང་དུ་མཛད། ཡོངས་འཛིན་རིན་པོ་ཆེར་བདེ་མཆོག་རྒྱད་བཤད་དང་། ཏ་ར་ན་ཐའི་རིམ་ལྔའི་འགྲེལ་ཆེན་གྱི་ལུང་སོགས་ཕུལ། ཟུར་མང་གར་དབང་རིན་པོ་ཆེ་ཞིང་གཤེགས་པར་འཇམ་མགོན་སི་ཏུ་རིན་པོ་ཆེ་ཕེབས་པའི་འཁྲིས་སུ་ཆིབས་བསྐྱོད། ཁྲོམ་ཚོགས་ལ་འབེལ་གཏམ་སོགས་མཛད། ཁམས་སྤྲུལ་རིན་པོ་ཆེར་དབུ་མ་རྒྱན་གྱི་བཤད་པ་དང་། བདེ་མཆོག་ནག་པོ་པའི་ཕྱག་ལེན་སོགས་ཕུལ། གནས་མདོ་ཆོས་གྲུབ་སྤྲུལ་སྐུ། སྐྱོ་བྲག་སྤྲུལ་སྐུ་སོགས་ལ་དབང་ཆོས་སྩལ། རི་བོ་ཆེར་གདན་དྲངས་པ་བཞིན་ཕེབས། ཡང་དགོན་རྗེ་དྲུང་སྤྲུལ་སྐུར་ཀ་ལྔ་པའི་
ས་རིས་སྩལ། སྡེབ་སྦྱོར་དང་སྙན་ངག་ལེའུ་བར་པ་བཤད། དེས་བསྐུལ་ནས་ཀ་ལཱ་པའི་འགྲེལ་ཆེན་བརྩམས། རྗེ་དྲུང་ལས་དགྱེས་རྡོར་ཛྙཱ་ན་ལུགས་དང་། གསར་མ་སློབ་དཔོན་ལས་མགོན་པོ་བཀའ་རྒྱས་ཀྱི་དབང་། ཟུར་པ་བླ་མ་ལས་སྟག་ཤམ་ཡི་དམ་དགོངས་འདུས་སོགས་གསན། རི་བོ་ཆེའི་དཔེ་མཛད་གཟིགས། གནས་མདོ་དཔལ་རི་རྩེ་མཇལ། དགེ་ལྡན་ངེས་གླིང་གི་སྤྲུལ་སྐུ་གཉིས་ལ། སྒྲུབ་ཐབས་འདོད་བུམ། རྭ་ལུགས་འཇིགས་བྱེད་རོ་ལངས་བརྒྱད་སྐོར། སྐྱོ་ལུགས་ཞེས་དབུ་མ། གཤེད་དམར་ལྷ་ལྔ། བཅུ་གསུམ་མ་གདོང་དྲུག །བདེ་མཆོག་དྲིལ་བུ་ལྷ་ལྔ། འཇམ་པའི་རྡོ་རྗེ། དུས་འཁོར་བུ་ལུགས་རྣམས་ཀྱི་དབང་། གཡུ་ཐོག་སྙིང་ཏིག་གི་དབང་ལུང་། རྒྱུད་བཞིའི་ལུང་སོགས་གནང་། དེ་ནས་དཔལ་སྤུངས་སུ་ཕེབས། ཧཱ་ཤང་ཐར་མཆོག་ལས་རྒྱའི་ཚེ་རྩིས་དང་། གཟའ་བདུན་གྱི་ཡང་ཟབ་སོགས་འགའ་རེའི་འགྱུར་ཞུས། སླར་ཡབ་ཡུལ་དུ་རིབ་ཙམ་ཕེབས། ཟུར་མང་སོགས་བརྒྱུད་དེ་དཔལ་སྤུངས་སུ་ཕེབས། འཇམ་མགོན་སི་ཏུ་རིན་པོ་ཆེ་དང་། འབྲུག་ཡོངས་འཛིན་ཡབ་སྲས་མཇལ། འདི་ཡན་རྗེ་ཉིད་ཀྱི་གསུང་རྣམ་ཐར་རྟོགས་བརྗོད་རིན་ཆེན་ནོར་བུའི་ཕྲེང་བ་ལས་མདོ་ཙམ་བཏུས་པ་སྟེ། དེ་མན་ཆད་རྣམ་ཐར་གྱི་དཔེ་མ་རྙེད། གང་ལྟར་ཡང་ཀློག་པ་
ཐོས་བསམ་གྱི་འཁོར་ལོའི་དབང་དུ་བྱས་ན། འཇམ་མགོན་སི་ཏུ་རིན་པོ་ཆེར་མངའ་བའི་མདོ་སྔགས་རིག་གནས་དང་བཅས་པ་ཕལ་ཆེར་གསན་ཅིང་བྱང་ཆུབ་པར་མཛད། གཞན་ཡང་ཡོངས་འཛིན་དུ་མ་ལས་རྒྱུད་སྡེ་བཞིའི་དབང་བསྐུར་གྱིས་མཚོན་པའི་ཟབ་ཆོས་རྒྱ་མཚོ་ལྟ་བུ་གསན། སྤོང་བ་བསམ་གཏན་གྱི་འཁོར་ལོའི་དབང་དུ་བྱས་ཏེ། སྔ་ཕྱིར་འཇིགས་བྱེད། ཕུར་པ། གུར་དྲག །སྒྲོལ་དཀར་སོགས་གཙོ་བོར་གྱུར་པའི་ལྷག་པའི་ལྷ་དུ་མའི་བསྙེན་སྒྲུབ་དང་། རྫོགས་པའི་རིམ་པ་སྦྱོར་བ་ཡན་ལག་དྲུག་པ་ཉམས་བཞེས་གནད་དུ་སྨིན་པར་གནང་། ནུས་བྱིན་ཁྱད་པར་ཅན་མངའ་བས་སྔ་ཕྱིར་གྲུབ་པའི་འབྲས་བུའང་ཅི་རིགས་པ་མངོན་དུ་སྣང་བར་མཛད། བྱ་བ་ལས་ཀྱི་འཁོར་ལོའི་དབང་དུ་བྱས་ཏེ། རྒྱུད་སྡེ་མང་པོའི་བྲིས་ཐང་གི་དཀྱིལ་འཁོར་བཞེངས་པ་དང་། ཁྱད་པར་འཇམ་མགོན་སི་ཏུ་རིན་པོ་ཆེའི་དགོངས་རྫོགས་ཕྱི་རྟེན་ཆེན་པོ་གཉིས་བཞེངས་པའི་འགན་བཞེས་མཐར་ཕྱིན་པར་གནང་ཞིང་། གསུང་རྩོམ་འཕྲོ་ཅན་གྱི་རིགས་ཞལ་སྐོང་དང་། རྗེ་ཉིད་ཀྱི་ཕྱག་རྫས་ཁོ་ནའི་སྟེང་ནས་འཇམ་མགོན་བླ་མའི་གསུང་རབ་སྔར་སྤར་དུ་མ་འཁོད་པ་ཡོངས་སུ་རྫོགས་པར་བཀོད། གདན་ས་ཆེན་པོ་དཔལ་སྤུངས་སུ་གསེར་གྱི་རྒྱ་ཕིབས་ཆེ་ལེགས་བཞེངས། གཞན་ཡང་དཔལ་
སྤུངས་སུ་དུས་འཁོར་ཇོ་ལུགས་དང་། བདེ་མཆོག་སྟོད་འགྲེལ་གྱི་སྒྲུབ་མཆོད་གསར་དུ་བཙུགས་པས་མཚོན། དགོན་སྡེ་རྣམས་སུ་མར་རྔོག་གི་ལུགས་སྲོལ་གཙོ་བོར་གྱུར་པའི་རྒྱུད་སྡེ་ཆེན་པོའི་སྒྲུབ་མཆོད་མང་དུ་འཛུགས་པར་མཛད་པ་དང་། རིག་གནས་ཀྱི་བཤད་པ་དང་། རྒྱུད་སྡེ་མང་པོའི་དབང་ལུང་ཕྱག་བཞེས་སོགས་སྐུ་ཚེ་དེ་སྲིད་དུ་བར་མ་ཆད་པར་སྩལ་བ་ལ་བརྟེན་ནས། གསུང་ལས་སྐྱེས་པའི་སློབ་མའི་ཚོགས་ཀྱང་མང་དུ་འཕེལ། ཁྱད་པར་རྗེ་དབོན་མཆོག་གི་སྤྲུལ་པའི་སྐུ་ངེས་དོན་བསྟན་འཛིན་དང་། དབང་གི་རྡོ་རྗེ་སོགས་ལ། རྒྱུད་སྡེ་བཞིའི་དབང་བསྐུར་རབ་འབྱམས་དང་། ཇོ་ནང་རྗེ་བཙུན་ཏཱ་ར་ནཱ་ཐའི་བཀའ་འབུམ་ཡོངས་རྫོགས་ཀྱི་ལུང་སོགས་སྩལ་བས་ད་ལྟའི་བར་རྒྱུན་མ་ཆད་པར་བྱུང་བའི་བཀའ་དྲིན་ཁོ་ནའང་དཔྱོད་ལྡན་དག་གིས་བསམ་ན་བསྟན་འཛིན་གྱི་སྐྱེས་བུར་གྲགས་པ་གཞན་ལས་ཀྱང་ཆེས་ཁྱད་པར་དུ་འཕགས་པའི་རྣམ་པར་ཐར་པ་ཟླ་མེད་པར་གྲུབ་བོ། །ལོ་ཆེན་ཚེ་དབང་ཀུན་ཁྱབ་ཀྱི་རྣམ་ཐར་རྗེ་ཉིད་ཀྱི་ཞལ་གསུང་མ་ལས་ས་བོན་ཙམ་ཞིག་བཀོད་པ་དགེ་ལེགས་སུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།ཡོངས་འཛིན་འཇམ་པའི་དབྱངས་བྱམས་པ་ཀུན་དགའ་བཀྲ་ཤིས་ཀྱི་རྣམ་ཐར་མདོར་བསྡུས་པ་དད་པའི་ས་བོན་ཨུཏྤལ་རྒྱས་པའི་སྙེ་མ་ཞེས་བྱ་
བ་བཞུགས་སོ། །བྱམས་པ་ཆེན་པོའི་བདུད་རྩི་ཡིས། །ཀུན་དགའི་ཕན་བདེ་མཆོག་སྩོལ་བ། །བཀྲ་ཤིས་གྲགས་པའི་རྒྱལ་མཚན་ཅན། །ཁྱབ་བདག་བླ་མས་རྟག་ཏུ་སྐྱོངས།༡ །གང་དེའི་ངོ་མཚར་རྣམ་པར་ཐར། །འཁོར་ལོ་གསུམ་གྱི་མཛད་པའི་ཚུལ། །འཆི་མེད་ལམ་ལྟར་རྒྱ་ཆེ་བ། །བྱིས་བློའི་སྤྱོད་ཡུལ་མ་ཡིན་ཀྱང་། ༢ །དམ་པའི་གསུང་གིས་བསྐུལ་བའི་མོད། །མདོར་བསྡུས་ཚིག་གི་དཔྱིད་དཔལཾ་ལས། །དད་པའི་ས་བོན་སྤེལ་བའི་སླད། །ཨུཏྤལ་སྙེ་མ་འཁྲུངས་འདིའོ། ༣ །དེ་ལ་འདིར་འཛམ་གླིང་བསྟན་འགྲོའི་མངའ་བདག་དཔལ་ས་སྐྱ་པ་ཆེན་པོའི་ཡོངས་སུ་འཛིན་པ་འཇམ་པའི་དབྱངས་བྱམས་པ་ཀུན་དགའ་བཀྲ་ཤིས་ཀྱི་རྟོགས་པ་བརྗོད་པ་མདོར་བསྡུས་པའི་ཚུལ་གྱིས་འཆད་པ་ལ་དོན་གསུམ། སྐུ་སྐྱེ་བ་སྔ་མའི་རྣམ་ཐར་བསྡུས་ཏེ་སྨོས། སྐུ་ཚེ་འདི་ཉིད་ཀྱི་རྣམ་ཐར་ཅུང་ཟད་རྒྱས་པར་བཤད། སྨོན་ལམ་དང་ཤིས་བརྗོད་ཀྱིས་མཇུག་བསྡུ་བའོ། །དང་པོ་ནི། བྱམས་པའི་ཐུགས་མངའ་བྱང་ཆུབ་སེམས་གཉིས་འབྱོངས། རྣམ་ཀུན་དགའ་བཞིའི་ཡེ་ཤེས་མཐར་སོན་པས། །བཀྲ་ཤིས་གྲགས་པའི་རྒྱལ་མཚན་འཛིན་མཁས་པ། །རིགས་བརྒྱའི་ཁྱབ་བདག་ཆེན་པོར་གསོལ་བ་འདེབས། །ཞེས་སྨོས་ཏེ། དེ་ཡང་ངེས་པར་འབྱུང་བའི་ཡིད་ཀྱིས་བྱམས་པ་དང་སྙིང་རྗེའི་
ཐུགས་བསྐྱེད་ཕུན་སུམ་ཚོགས་པ་མངའ་བའི་ཉེར་ལེན་ལས། སྨོན་པ་དང་འཇུག་པས་རབ་ཏུ་ཕྱེ་བའི་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་འབྱོངས་ཤིང་། ཚུལ་དེས་དྲངས་པའི་སྦྱོར་བས་ཐབས་ཀྱིས་ཁྱད་པར་དུ་འཕགས་པའི་རྡོ་རྗེ་ཐེག་པའི་ལམ་ལ་ཞུགས་པ་ན། རྣམ་པ་ཀུན་ཏུ་ཅིར་སྣང་ཐམས་ཅད་ལྷ་དང་བདེ་ཆེན་དགའ་བ་བཞིའི་ཡེ་ཤེས་སུ་ཤར་བའི་རིམ་གཉིས་ཀྱི་རྣལ་འབྱོར་མཐར་སོན་པས། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སོགས་རིགས་བརྒྱ་ཕྲག་དུ་མའི་སྤྲོ་བ་དང་བསྡུ་བའི་ཁྱབ་བདག་ཆེན་པོ་རྡོ་རྗེ་སེམས་དཔའི་གོ་འཕང་བརྙེས་སུ་ཟིན་ནའང་། དམིགས་པ་མེད་པའི་སྙིང་རྗེ་དང་། སྨོན་ལམ་ཚད་མེད་པས་གདུལ་བྱའི་སྐལ་བ་དང་རྗེས་སུ་མཐུན་པར་གཟུགས་སྐུའི་སྒྱུ་འཕྲུལ་ཅིར་ཡང་འཆར་བ་ལས། མཐའ་ཡས་པའི་བསྟན་འགྲོའི་དོན་རླབས་པོ་ཆེ་ལ་དབང་འབྱོར་བར་མ་ཟད། གྲུབ་པའི་དབང་ཕྱུག་ཆེན་པོ་ཆོས་ཉིད་ཡེ་ཤེས་ཀྱི་ཞལ་སྔ་ནས་ཀྱང་། སྐུ་སྐྱེ་བ་སྔ་མ་ཞིག་ཏུ་དབུ་རྩེའི་དཀོན་གཉེར་དུ་སྐྱེ་བ་བཞེས་ཚུལ་གསུངས་པ་དང་། སྔོན་བྱུང་གི་ལོ་རྒྱུས་གཞན་ལས། འཇམ་དབྱངས་གཟི་འོད་འབར་བའི་སྣང་བརྙན་འདིས་དབུ་རྩེའི་དཀོར་གཉེར་ལས་དག་པ་ཞིག་མངོན་སུམ་རྗེས་སུ་བཟུང་ཚུལ་འབྱུང་བ་གཉིས་སྒྲ་
མཐུན་པས་རྗེ་བཙུན་བླ་མ་དམ་པ་ཉིད་ཡིན་པར་གདོན་མི་ཟ་བ་དང་། འོད་གསལ་གྱི་སྣང་བར་འཇམ་སྒེག་པར་གྱུར་པའི་མཚན་མ་གཟིགས་པ་སོགས་ཀྱིས་མཚོན་ངོ་མཚར་གྱི་སྐྱེས་རབས་བགྲང་ལས་འདས་པར་འཆར་བ་གང་ཞིག །ཕྱག་བྱ་བ་དང་། མཆོད་པར་བྱ་བ་དང་། གསོལ་བ་འདེབས་པའི་འོས་ཆེས་མཆོག་ཏུ་གྱུར་པ་སྟེ། བླ་མ་ལྔ་བཅུ་པ་ལས། དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་པས། །དུས་གསུམ་དུ་ནི་མོས་ཕྱག་འཚལ། །ཅེས་གསུངས་པའི་ཕྱིར་རོ། །གཉིས་པ་སྐུ་ཚེ་འདི་ཉིད་ཀྱི་རྣམ་ཐར་ཅུང་ཟད་རྒྱས་པར་བཤད་པ་ལ་གསུམ། ཐོག་མར་དགེ་བ་སྐུ་སྐྱེ་བ་བཞེས་པའི་ཚུལ། བར་དུ་དགེ་བ་རང་གཞན་གྱི་དོན་གཉིས་ལྷུན་གྱིས་གྲུབ་པའི་ཚུལ། ཐ་མར་དགེ་བ་ཡོངས་སུ་མྱ་ངན་ལས་འདས་ཀྱང་མཛད་པ་རྒྱུན་མི་འཆད་པའི་ཚུལ་ལོ། །དང་པོ་ནི། མགོན་ཁྱོད་བསམས་བཞིན་ཐུབ་བསྟན་འཛིན་པའི་སླད། །རྡོ་རྗེ་གདན་མཚུངས་དཔལ་ལྡན་ས་སྐྱ་ཡི། །བྱང་ཕྱོགས་གྲུབ་པའི་སྨན་ལྗོངས་ཉམས་དགའ་བར། །མཚན་དཔེའི་དཔག་བསམ་འཁྲུངས་ལ་གསོལ་བ་འདེབས། །ཞེས་སྨོས་ཏེ། དེའང་གོང་དུ་ཇི་སྐད་སྨོས་པ་བཞིན། ངེས་པའི་དོན་དུ་སངས་རྒྱས་ཐམས་ཅད་དང་
གཉིས་སུ་མེད་པའི་ཡེ་ཤེས་ཀྱི་རྒྱལ་ཐབས་ལས་མ་གཡོས་བཞིན། དྲང་དོན་འགྲོ་བ་རྣམས་སྒྲོལ་བའི་སླད་དུ། མདོ་སྡེ་རྒྱན་ལས། དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོའི་ཚལ་འགྲོ་ལྟར་རྟོགས་ཏེ། །ཞེས་གསུངས་པ་ལྟར། བསམས་བཞིན་དུ་ཐུབ་པའི་བསྟན་པ་རིན་པོ་ཆེ་སྤྱི་དང་། བྱེ་བྲག་དཔལ་ས་སྐྱ་པའི་རིང་ལུགས་དྲི་མ་མེད་པ་འཛིན་པའི་སླད་དུ་སྐུ་སྐྱེ་བ་བཞེས་པའི་ཡུལ་ནི། བྱང་ཆུབ་སྙིང་པོ་རྡོ་རྗེ་གདན་ནས་དཔག་ཚད་བརྒྱ་བགྲོད་པའི་གནས། བོད་ཡུལ་གཡས་རུ་གཙང་ལ་སྟོད་ཀྱི་སའི་ཆ། མཁས་པ་དང་གྲུབ་པའི་སྐྱེས་བུ་བསམ་གྱིས་མི་ཁྱབ་པས་བྱིན་གྱིས་བརླབས་པའི་རྡོ་རྗེའི་གྲོང་ཁྱེར། ངེས་པ་ལྔ་ལྡན་འོག་མིན་ཆེན་པོའི་ཞིང་ཁམས་དང་ཚུལ་མཚུངས་པ་དཔལ་ལྡན་ས་སྐྱའི་ཆོས་གྲྭ་ཆེན་པོའི་བྱང་ཕྱོགས། གར་བཀྲ་ཤིས་དར་རྒྱས་ཞེས་གྲགས་པའི་འདབས་འབྱོར། ལྷ་དང་དྲང་སྲོང་གྲུབ་པས་བསྟེན་པའི་སྨན་ལྗོངས་ཉམས་དགའ་བ། བལ་སྤེལ་ཁང་གསར་ཞེས་པའི་ཁྱིམ་དུ། རབ་བྱུང་བཅུ་གསུམ་པའི་ནང་གསེས་ཤིང་ཕོ་ཁྱིའི་ལོར་ཧ་ཅང་འབྱོར་པ་དང་། རྒུད་པའི་མཐའ་གཉིས་སུ་མ་ལྷུང་བར་ཆོས་སྒྲུབ་པ་ལ་འགལ་རྐྱེན་དང་བྲལ་བའི་པད་མའི་རིགས་སུ་མཚན་དཔེའི་དཔག་བསམ་ལྗོན་པ་འཁྲུངས་སོ་ཞེས་གྲགས་པའི་ཡི་གེས་མཛེས་པར་གྱུར་ཏོ། །གཉིས་པ་བར་
དུ་དགེ་བ་རང་གཞན་གྱི་དོན་གཉིས་ལྷུན་གྱིས་གྲུབ་པའི་ཚུལ་ལ་གསུམ། རང་དོན་ཚུལ་གནས་ཐོས་བསམ་སྒོམ་པའི་མཐར་སོན་པ་དང་། གཞན་དོན་འཆད་རྩོད་རྩོམ་པའི་ཕྲིན་ལས་ཀྱི་བསྟན་པ་རིན་པོ་ཆེ་ཉིན་མོ་ལྟར་མཛད་པ་དང་། གཉིས་ཀའི་དོན་དུ་མཁས་བཙུན་བཟང་གསུམ་གྱི་ཡོན་ཏན་རྒྱ་མཚོ་ལྟ་བུ་ལ་དབང་འབྱོར་བའི་ཚུལ་ལོ། །དང་པོ་ལའང་། དཔལ་མགོན་འཕགས་པ་དབྱིག་གཉེན་གྱིས། །ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཅེས་གསུངས་པ་ལྟར་རིམ་པར་ཕྱེ་ན། དང་པོ་གཞི་ཚུལ་ཁྲིམས་དག་པ་ལ་གནས་པའི་ཚུལ་ནི། གཞོན་ནུའི་དུས་ནས་ཐུབ་བསྟན་ལྷ་ཁང་ཆེར། །བརྟན་མཁས་ཡོན་ཏན་ཡོངས་རྫོགས་མངྒ་ལར། །སོ་ཐར་སྡོམ་པའི་བདུད་རྩི་བཞེས་པ་ལས། །ཚུལ་ཁྲིམས་པད་དཀར་བཞད་ལ་གསོལ་བ་འདེབས། །ཞེས་སྨོས་ཏེ། དེ་ལྟར་སྐུ་འཁྲུངས་ནས་རིམ་གྱིས་ནར་སོན་པ་ན། དད་པ་དང་། ངེས་འབྱུང་དང་། སྙིང་རྗེ་ཆེན་པོ་ལ་སོགས་པ་དམ་པའི་རིགས་ཀྱི་ཡོན་ཏན་རྣམས་གསལ་བར་སད་པའི་རྒྱུ་དང་། སྐྱེས་རབས་ཀྱི་ཕྲེང་བ་ཐམས་ཅད་དུ་འབྲལ་མེད་རིགས་ཀྱི་བདག་པོར་གྱུར་པ་འཇམ་མགོན་ཀུན་དགའ་བློ་གྲོས་ཀྱིས་གསུང་བསྐུལ་གནང་བའི་རྐྱེན་ལ་བརྟེན་ནས། ཆུང་ངུའི་དུས་ནས་དཔལ་ས་སྐྱའི་
ཐུབ་བསྟན་ལྷ་ཁང་ཆེན་མོའི་ཆོས་གྲར་ཞུགས་ཏེ། བརྟན་མཁས་ཕན་འདོགས་པའི་ཡན་ལག་ཐམས་ཅད་ཡོངས་སུ་རྫོགས་པའི་གནས་བརྟན་འདུལ་བ་འཛིན་པ་མཐའ་དག་གི་ཁྱུ་མཆོག །མཁན་རབས་ཉེར་ལྔ་པ་མེ་ཏྲི་དྷརྨ་མངྒ་ལ་སྟེ་བྱམས་པ་ཆོས་ཀྱི་བཀྲ་ཤིས་ཞེས་ཡོངས་སུ་གྲགས་པའི་སྤྱན་སྔར་སོ་སོར་ཐར་པའི་སྡོམ་པའི་བདུད་རྩི་དད་བརྩོན་གྱིས་གཞིར་བཞེས་པ་ལས། ཉམས་པ་དང་། བཅོམ་པ་དང་། ཕལ་པ་དང་། ལྟུང་བར་གྱུར་པའི་རྡུལ་དང་དྲི་མ་ཐམས་ཅད་ལས་འདས་པ། ཚུལ་གནས་ཁྲིམས་ཀྱི་པདྨ་དཀར་པོ་ཆེས་ཆེར་བཞད་པས་བསྔགས་འོས་ཀྱི་དྲི་བསུང་དངར་པོས་ཕྱོགས་ཐམས་ཅད་དུ་ཁྱབ་པར་གྱུར་ཏོ། །གཉིས་པ་ཐོས་པ་རྒྱ་མཚོའི་མཐར་སོན་པའི་ཚུལ་ནི། འཇམ་པའི་དབྱངས་དངོས་ཀུན་དགའ་བློ་གྲོས་དང་། །རྡོ་རྗེ་འཛིན་པ་རིན་ཆེན་རྒྱལ་མཚན་སོགས། །རིས་མེད་དམ་པ་དུ་མའི་ཞབས་བསྟེན་ནས། །ཐོས་པའི་ཕ་རོལ་སོན་ལ་གསོལ་བ་འདེབས། །ཞེས་སྨོས་ཏེ། དེའང་འགྲོ་བ་ལྷ་དང་བཅས་པའི་མ་འདྲིས་པའི་མཛའ་བཤེས། རིས་སུ་མ་ཆད་པའི་ཐུབ་བསྟན་རྒྱ་མཚོ་གསལ་བའི་ཉི་མ། སྲས་བཅས་རྣམ་འདྲེན་ཡོངས་ཀྱི་ཡེ་ཤེས་སྒྱུ་མའི་སྐུ་ཅན་རྗེ་བཙུན་འཇམ་པའི་དབྱངས་དངོས་ངག་དབང་ཀུན་དགའ་བློ་གྲོས་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་
དང་། རྗེ་དེ་ཉིད་ཀྱི་ཐུགས་སྲས། མཁས་ཤིང་དངོས་གྲུབ་བརྙེས་པའི་རྡོ་རྗེའི་སློབ་དཔོན་ཆེན་པོ་རིན་ཆེན་རྒྱལ་མཚན་དང་། མུས་ཆེན་ཆོས་ཉིད་ཡེ་ཤེས་སོགས་རིས་མེད་དམ་པ་དུ་མའི་ཞབས་ཀྱི་པདྨོར་མཉེས་པ་གསུམ་གྱིས་བསྟེན་ནས། མང་དུ་ཐོས་པའི་ཚུལ་མཐའ་དག་གི་ཕ་རོལ་ཏུ་སོན་པ་ཡིན་ཏེ། ཐོག་མར་ཐུབ་བསྟན་ལྷ་ཁང་ཆེན་མོར་མཁན་ཆེན་བྱམས་པ་ཆོས་ཀྱི་བཀྲ་ཤིས་སོགས་རིག་པ་སྨྲ་བའི་དབང་ཕྱུག་དུ་མ་ལས་ཚད་མ་རིག་པའི་སྒོ་འབྱེད་བསྡུས་གཞུང་བརྩི་བ་ནས་བརྩམས་ཏེ་རྒྱུ་མཚན་ཉིད་ཀྱི་ཐེག་པ་ལ་རིམ་གྱིས་ཞུགས་པ་ན། གཞན་གྱིས་འགྲན་པའི་ཟླ་ཐམས་ཅད་དང་བྲལ་བའི་སྤོབས་པ་བསམ་གྱིས་མི་ཁྱབ་པའི་གྲགས་དཀར་ཟླ་ཤེལ་གྱི་སྣང་བས་ཡོངས་སུ་ཁྱབ་ཅིང་། དཔལ་ས་སྐྱ་པའི་མཁས་པ་གཡག་གཞོན་རྣམ་གཉིས་ཀྱི་སྐབས། གདན་ས་ཆེན་པོ་དང་། བྱང་ཕྱོགས་ངམ་རིང་གི་ཆོས་སྡེ་སོགས་སུ་སྨྲ་བའི་ཁྱུ་མཆོག་རླབས་པོ་ཆེའི་གནས་ཐོབ་པ་རྣམས་ཀྱིས་བཤད་པའི་སྲོལ་གཏོད་པ། པུསྟི་གྲགས་ཆེན་བཅོ་བརྒྱད་ཅེས། ཚད་མ་མདོ། རྣམ་འགྲེལ། རྣམ་ངེས། འདུལ་བ་སོ་ཐར་གྱི་མདོ། མདོ་རྩ། མངོན་པ་ཀུན་བཏུས་དང་མཛོད། ཕར་ཕྱིན་བྱམས་ཆོས་སྡེ་ལྔ་དང་། སྤྱོད་འཇུག །དབུ་མ་རྩ་འཇུག་བཞི་གསུམ། མདོ་སྔགས་ཐམས་ཅད་ཀྱི་སྤྱི་
དོན་སྡོམ་པ་གསུམ་གྱི་རབ་ཏུ་དབྱེ་བ། གསུང་རབ་ཀུན་ལ་ལྟ་བའི་མིག་གཅིག་པུ་ཚད་མ་རིག་པའི་གཏེར་རྣམས་ཐུགས་ལ་བཟུང་བ་ཡིན་ཏེ། རྗེ་རང་ཉིད་ཀྱི་གསུང་ལས། ཐུབ་བསྟན་གྱི་མཁན་རབས་ཉེར་ལྔ་པར། །ཤཱཀ་ཐུབ་ཀྱི་བརྟུལ་ཞུགས་བཟུང་ནས་སུ། །བཅོ་བརྒྱད་ཀྱི་གཞུང་ལུགས་བློ་ནས་བཏོན། །བསྡུས་གྲྭ་དང་བཅས་ལ་དཔེ་བྲལ་བྱས། །ཞེས་སོ། །དེ་ལྟར་ཚད་མ་རིག་པ་སོགས་ལ་མཁྱེན་དཔྱོད་ཀྱི་པདྨོ་མཆོག་ཏུ་རྒྱས་པའི་སྐབས་ཤིག །མདོ་ཁམས་སྡེ་དགེའི་རྒྱལ་ཁབ་ནས། ཞུ་ཆེན་མ་ཧཱ་པཎྜི་ཏ་ཚུལ་ཁྲིམས་རིན་ཆེན་གྱི་ཞལ་སློབ། མཁས་པའི་དབང་པོ་ཞེ་ཆེན་དྲུང་ཡིག་བསྟན་འཛིན་རྒྱལ་མཚན་ཞེས་རིག་པ་སྨྲ་བའི་རྒྱན་གཅིག་པུ་དེ་ཉིད། འཇམ་མགོན་ཀུན་དགའ་བློ་གྲོས་ཀྱི་གསུང་གིས་བསྐུལ་བ་བཞིན་དཔལ་ས་སྐྱར་རིག་གནས་ཀྱི་ལེགས་བཤད་རྩོལ་བར་ཆེད་ཀྱིས་བྱོན་པའི་སྐབས། ས་ཆེན་འཇམ་པའི་དབྱངས་དེ་ཉིད་ཀྱིས་རྗེ་འདི་པ་རྣམ་དཔྱོད་ཀྱི་རྩལ་གཞན་དང་མ་འདྲ་བས་གནས་སྐབས་སུ་ཐུན་མོང་གི་རིག་ལམ་རྒྱ་མཚོའི་སློབ་དཔོན་དུ་འོས་པ་དང་། མཐར་ཐུག་རྗེ་ཉིད་ཀྱི་ཞབས་པད་དུ་འཁོད་ནས་ཟབ་རྒྱས་གདམས་པའི་བདུད་རྩི་མཐའ་དག་རྫོགས་པར་བཞེས་ཏེ། སླར་གདུང་བརྒྱུད་རིན་པོ་ཆེ་རྣམས་ལ་ལྷག་མེད་དུ་འབུལ་ཐུབ་པས་བསྟན་འགྲོའི་དོན་བསམ་གྱིས་
མི་ཁྱབ་པར་འབྱུང་བ་རྗེས་སུ་དགོངས་ཏེ་རིག་གནས་འཕེལ་རྒྱས་གླིང་དུ་མཁས་པའི་དབང་པོ་གང་དེར་སྦྱོར་གཏོད་མཛད་པ་ན། རྗེ་དེ་ཉིད་སྐྱེས་སྦྱངས་ཤེས་རབ་ཀྱི་མཐུ་ཕུན་སུམ་ཚོགས་པས། ལེགས་པར་སྦྱར་བའི་བརྡ་སྤྲོད་པའི་བསྟན་བཅོས་ཀ་ལཱ་པ་གཙོ་བོར་གྱུར་པའི་རྩ་བའི་མདོ་རྣམས་དང་། དེའི་ཡན་ལག་མིང་ལས་ཚིག་ཏུ་སྒྲུབ་པ་སི་སོགས་ཀྱི་རབ་ཏུ་བྱེད་པ་དང་། བྱིངས་ལས་ཚིག་ཏུ་སྒྲུབ་པ་ཏི་སོགས་ཀྱི་རབ་ཏུ་བྱེད་པ་དང་། བྱིངས་ལས་མིང་གི་བྱེ་བྲག་སྣ་ཚོགས་སྒྲུབ་པ་ཨ་ཎ་སོགས་ཀྱི་རབ་ཏུ་བྱེད་པ་དང་། པྲྀཏྟ་དང་། ཛཱ་ཏི། ངོ་མཚར་བའི་སྦྱོར་བས་རབ་ཏུ་དབྱེ་བའི་སྡེབ་སྦྱོར་གྱི་གཞུང་དང་། དོན་གཅིག་མིང་གི་རྣམ་གྲངས་དུ་མའི་སྒོ་ནས་བསྙད་པ་དང་། མིང་གཅིག་དོན་དུ་མ་ལས་འཇུག་པའི་མངོན་བརྗོད་ཀྱི་བསྟན་བཅོས་དང་། ལམ་རྣམ་པར་དབྱེ་བ་དང་། དོན་དང་། སྒྲ་དང་། གབ་ཚིག་གི་རྒྱན་དང་། དེ་དག་གི་སྐྱོན་སྤངས་ཚུལ་དང་བཅས་པ་རྗེས་སུ་སྟོན་པའི་ཚིག་རྒྱན་གྱི་གཞུང་དང་ཕྱི་དུས་ཀྱི་འཁོར་ལོའི་ངེས་གསང་རྒྱ་ཆེར་སྟོན་པ་སྐར་རྩིས་ཀྱི་གཞུང་དང་། དེའི་ཡན་ལག་ཏུ་གཏོགས་པ་བཅས་བསླབ་པར་བརྩམ་པ་ན། རིང་པོར་མ་ཐོགས་པར་གཞན་གྱིས་འགྲན་ཟླ་དང་བྲལ་བའི་མཁས་པ་ཆེན་པོའི་གོ་འཕང་བདེ་བླག་ཏུ་བརྙེས་ནས་ཡབ་རྗེ་ཀུན་
བློའང་ཤིན་ཏུ་དགྱེས་པའི་འཛུམ་ཞལ་ལྷུག་པར་སྟོན་པ་དང་། འཕེལ་རྒྱས་སློབ་དཔོན་གྱི་གོ་སར་དབང་བསྐུར་བ་ཡིན་ཏེ། རྗེ་ཉིད་ཀྱི་གསུང་ལས། དེ་མཚམས་ནས་སྒྲ་སྙན་སྡེབ་སྦྱོར་སོགས། །འཕེལ་རྒྱས་སུ་འོངས་ནས་བརྡར་ཤ་བཅད། །ཅེས་གསུངས། དེ་ནས་ཡབ་རྗེ་འཇམ་པའི་དབྱངས་ཆེན་པོས་ཟབ་རྒྱས་གདམས་པའི་མཛོད་གཏད་པར་དགོངས་ནས། གནས་སྐབས་སུ་གསོལ་དཔོན་གྱི་རྣམ་པར་བཞུགས་སུ་བཅུག །རྗེ་འདི་པས་ཀྱང་བདག་ཉིད་ཆེན་པོ་ལ་ཐེ་ཚོམ་དང་མཉམ་འགྲོགས་ཀྱིས་མི་རུ་བཟུང་བའི་ལོག་ལྟ་སྤངས་ཏེ། སངས་རྒྱས་དངོས་སུ་མཐོང་བའི་མོས་གུས་ཐུན་མོང་མ་ཡིན་པས་ཅི་གསུང་དང་ལེན་གྱིས་མཉེས་པར་བྱས་པས་འཕྲལ་དང་ཡུན་གྱི་རྟེན་འབྲེལ་གྱི་སྒོ་ཐམས་ཅད་འབད་མེད་ལྷུན་གྲུབ་ཏུ་འགྲིགས་ཏེ། སྤྱིར་དཔལ་ལྡན་ས་སྐྱ་པའི་ཟབ་ཆོས་མཐའ་དག་དང་། ཁྱད་པར་ཁྱབ་བདག་རྡོ་རྗེ་འཆང་ཆེན་པོ་ནས་མཆོག་གཟིགས་ཀྱི་བརྒྱུད་པ་བར་མ་ཆད་པར་བྱོན་པའི་རྒྱལ་གསུང་མདོ་སྔགས་ཀུན་སྙིང་པོ་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་སྨིན་གྲོལ་རྒྱབ་བརྟེན་དང་བཅས་པ། དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས་པ། གདམས་ངག་གི་སརྒ་མ་ལོག་པ། མོས་གུས་ཀྱི་བསམ་པ་ཚིམ་པར་ནུས་པ་སྟེ་ཚད་མ་བཞི་དང་སྙན་
བརྒྱུད་བཞིས་གདམས་པས་ཐུགས་བཅུད་ཡོངས་སུ་སྨིན་པར་མཛད་པ་ཡིན་ལ། དེ་བཞིན་དུ་རྡོ་རྗེ་འཛིན་པ་རིན་ཆེན་རྒྱལ་མཚན་ལས་ཀྱང་གསུང་ངག་རིན་པོ་ཆེ་ཚོགས་བཤད་དང་། མགོན་པོའི་སྐོར་སོགས་ཟབ་ཆོས་རྒྱ་མཚོ་ལྟ་བུ་དང་། རྗེ་བཙུན་རིན་པོ་ཆེ་འཆི་མེད་བསྟན་པའི་ཉི་མ་ལས་གསུང་ངག་རིན་པོ་ཆེ་སློབ་བཤད་ཀྱི་སྨིན་གྲོལ་ཆ་ལག་དང་བཅས་པ། མུས་ཆེན་གྲུབ་པའི་དབང་ཕྱུག་ཆོས་ཉིད་ཡེ་ཤེས་ལས་དཔལ་ལྡན་ཤངས་པ་བཀའ་བརྒྱུད་པའི་ཆོས་སྐོར་ཡོངས་རྫོགས། མཆོག་སྤྲུལ་མཁས་པའི་དབང་པོ་བྱམས་པ་ངག་དབང་བསྟན་འཛིན་ཕྲིན་ལས་ལས་རྒྱལ་པོ་ཆེན་པོ་རྣམ་ཐོས་སྲས་ཀྱི་སྐོར་སོགས་ཏེ། མདོར་ན་སོ་ཐར་གྱི་སྡོམ་པ། བྱང་སེམས་ཀྱི་སེམས་བསྐྱེད། གསང་སྔགས་རྒྱུད་སྡེ་བཞིའི་དབང་། བྱིན་རླབས། རྗེས་གནང་། རིག་གཏད། ཟབ་ཁྲིད། རྒྱབ་བརྟེན་ལུང་གི་སྐོར་སོགས་དུས་དེར་རྒྱུན་བཞུགས་པ་ཕལ་ཆེར་གསན་པ་ཡིན་ཏེ། རྒྱས་པར་རྗེ་ཉིད་ཀྱི་གསན་ཡིག་ཐོར་བུར་འཁོད་པས་མཚོན་ཏེ་ཤེས་པར་བྱའོ། །གསུམ་པ་བསམ་བྱུང་གི་རིགས་པས་སྒྲོ་འདོགས་བཅད་པའི་ཚུལ་ནི། ཕྱི་ནང་གཙུག་ལག་རྒྱ་མཚོའི་གནས་རྣམས་ལ། །འཁྲུལ་མེད་ཚད་མ་གསུམ་གྱིས་གཞལ་བ་ན། །འགལ་འབྲེལ་དཔྱོད་པའི་བློ་གྲོས་ཡོངས་རྫོགས་པས། །བསམ་
བྱུང་རྣམ་པར་དག་ལ་གསོལ་བ་འདེབས། །ཞེས་སྨོས་ཏེ། དེ་ཡང་སྔར་ཇི་སྐད་བཀོད་པ་བཞིན། ཕྱི་ཐུན་མོང་གི་རིག་གནས་སྒྲ་ཚད་སྙན་ངག་སྡེབ་སྦྱོར་མངོན་བརྗོད་སྐར་རྩིས་སོགས་དང་། ཁྱད་པར་ནང་རིག་པ་སྡེ་སྣོད་གསུམ་དང་རྒྱུད་སྡེ་བཞི་ཡན་ལག་བཅས་པའི་གཞུང་དེ་རྣམས་ཀྱི་ཚིག་གསན་པ་ཙམ་དུ་མ་ཟད། དོན་གྱི་གནས་མངོན་སུམ་དང་། ལྐོག་གྱུར་དང་། ཤིན་ཏུ་ལྐོག་གྱུར་གྱི་གཞལ་བྱ་རྣམས་ལ། འཇལ་བྱེད་མངོན་སུམ་དང་། རིགས་པ་དང་། ལུང་ཚད་མ་རྣམས་ཀྱིས་སོ་སོར་གཞལ་བས། འགལ་བ་དང་འབྲེལ་བའི་ཚུལ་དཔྱོད་པ་ལ་བློ་གྲོས་ཀྱི་མཐུ་ཡོངས་སུ་རྫོགས་ཏེ། བསམ་པ་ལས་བྱུང་བའི་ཤེས་རབ་རྣམ་པར་དག་པ་བརྙེས་པ་ནི་རྗེ་རང་ཉིད་ཀྱི་གསུང་རབ་རྣམས་མཇལ་བས་ཤེས་པར་འགྱུར་རོ། །བཞི་པ་མཐར་ཐུག་སྒོམ་པ་ལས་བྱུང་བའི་ཡེ་ཤེས་བརྙེས་པའི་ཚུལ་ནི། མཐར་ཐུག་གོ་འཕང་རྟོགས་པའི་ཡོན་ཏན་ལས། །བྱུང་ཞིང་དེ་ཡང་བསྒྲུབ་ལ་རགས་ལས་ཕྱིར། །མདོ་སྔགས་ཟབ་དོན་རྩེ་གཅིག་ཉམས་བཞེས་མཐུས། །སྒོམ་བྱུང་ཤེས་རབ་བརྙེས་ལ་གསོལ་བ་འདེབས། །ཞེས་སྨོས་ཏེ། དེ་ཡང་མཐར་ཐུག་མཆོག་གི་དངོས་གྲུབ་ནི་རྟོགས་བྱ་རྣམས་རིམ་གྱིས་མངོན་སུམ་དུ་བྱས་པའི་མཐུ་ལས་འབྱུང་ལ། རྟོགས་པ་དེ་རང་གི་མེད་ན་མི་འབྱུང་བའི་ཐབས་
མཐར་ཐུག་པའང་རྩེ་གཅིག་སྒྲུབ་པ་ལ་གཞོལ་བ་ཁོ་ན་ལ་རགས་ལས་པའི་ཕྱིར། ངེས་འབྱུང་དང་། བྱང་ཆུབ་ཀྱི་སེམས་དང་། ཟབ་མོ་སྤྲོས་བྲལ་གྱི་ལྟ་བ་རྣམས་སྣང་བ་གསུམ་གྱིས་གཏན་ལ་འབེབས་པ་ཕ་རོལ་ཏུ་ཕྱིན་པའི་གཞུང་དང་ཅིར་སྣང་ལྷར་ཤར་བའི་བསྐྱེད་རིམ་དང་། ལྷར་སྣང་བདེ་ཆེན་གྱི་ཡེ་ཤེས་སུ་འཆར་བའི་རྫོགས་པའི་རིམ་པ་སྟེ་སྔགས་ཀྱི་ལམ་ཟབ་མོ་དག་ལ་རྩེ་གཅིག་ཏུ་གཞོལ་བ་དང་། དེ་བཞིན་དུ། ཁྲོ་བོའི་རྒྱལ་པོ་འབྱུང་པོ་འདུལ་བྱེད། བཅོམ་ལྡན་འདས་དཔལ་དགེས་པ་རྡོ་རྗེ། སྒྲོལ་དཀར། འཇམ་དབྱངས་དཀར་པོ། འཇམ་དཔལ་ནག་པོ། ཀུ་རུ་ཀུལླེ། རྣལ་འབྱོར་མ། གུར་ཞལ་སོགས་ཡི་དམ་དང་ཆོས་སྐྱོང་དུ་མའི་གཞིའི་བསྙེན་པ་མཐར་ཕྱིན། དུས་རྒྱུན་དུའང་། དཔལ་དགེས་པ་རྡོ་རྗེ་དང་། རྡོ་རྗེ་རྣལ་འབྱོར་མ་གཙོ་བོར་གྱུར་པའི་ལྷག་པའི་ལྷའི་རྣལ་འབྱོར་ཡན་ལག་དང་བཅས་པ་ཐུགས་དམ་ཉམས་བཞེས་རྩེ་གཅིག་ཏུ་གནང་བས་སྒོམ་པ་ལས་བྱུང་བའི་ཤེས་རབ་ཀྱི་པདྨོ་ཅིར་ཡང་རྒྱས་པར་མ་ཟད། ཨའི་བསྙེན་ཆེན་སྐབས་འོད་གསལ་གྱི་སྣང་བར་ཚར་ཆེན་རྡོ་རྗེ་འཆང་ཆེན་པོ་དང་། དཔལ་ས་སྐྱ་པ་ཀུན་དགའ་བློ་གྲོས། མུས་ཆེན་གྲུབ་དབང་ཆོས་ཉིད་ཡེ་ཤེས་སོགས་བླ་མ་དམ་པ་རྣམས་ཀྱིས་རྗེས་སུ་བཟུང་བའི་ཚུལ་ཟིན་བྲིས་ཐོར་བུ་གནང་བ་
ལས་འབྱུང་ཞིང་། སྒྲོལ་དཀར་གྱི་བྲིས་ཐང་ཁྱད་པར་ཅན་ཞིག་བཞེངས་པར་མཛད་པ་དང་རྗེས་སུ་མཐུན་པར་རྗེ་ཉིད་ལ་གཟིགས་སྣང་བྱུང་བ་ཡིན་པར་རྟོགས་ཤེས་མཁས་པ་དག་གིས་གསུངས་པས་མཚོན་ཡི་དམ་ལྷས་རྗེས་སུ་བཟུང་བ་སོགས་གྲུབ་པའི་དགེ་མཚན་གྱི་འབྲས་བུ་གཡུར་དུ་ཟ་བས་གསོལ་བ་བཏབ་པ་ཙམ་གྱིས་འདོད་རྒུའི་ཆར་ཆེན་པོ་འབེབས་པ་གདོན་མི་ཟ་བ་ཉིད་དོ། །གཉིས་པ་གཞན་དོན་འཆད་རྩོད་རྩོམ་པའི་ཕྲིན་ལས་ལ་མངའ་བརྙེས་པའི་ཚུལ་ལ་གསུམ་ལས། དང་པོ་འཆད་པ་ཉི་མའི་འོད་ཀྱིས་བློ་ལྡན་གྱི་ཡིད་ཀྱི་པད་ཚལ་རྒྱས་པར་མཛད་པའི་ཚུལ་ནི། སྒྲ་སྙན་སྡེབ་སྦྱོར་ལ་སོགས་ཐུན་མོང་དང་། །ཕ་རོལ་ཕྱིན་དང་རྡོ་རྗེ་ཐེག་པ་ཡི། །གཞུང་ལུགས་རྒྱ་མཚོ་འཆད་ལ་ཐོགས་མེད་པས། །མཁས་རྣམས་དགྱེས་པ་བསྐྱེད་དེར་གསོལ་བ་འདེབས། །ཞེས་སྨོས་ཏེ། ལེགས་པར་སྦྱར་བ་སྒྲ་ཡི་བསྟན་བཅོས་ཡན་ལག་དང་བཅས་པ་དང་། སྙན་ངག་མེ་ལོང་ལ་སོགས་པ་ཚིག་རྒྱན་གྱི་བསྟན་བཅོས་དང་། སྡེབ་སྦྱོར་གྱི་བསྟན་བཅོས་དང་། སྐར་རྩིས་ཀྱི་བསྟན་བཅོས་སོགས་ཐུན་མོང་གི་རིག་གནས་འཆད་སྤེལ་དང་། སེམས་བསྐྱེད་སྲོལ་གཉིས་སོགས་ཕར་ཕྱིན་གྱི་ཟབ་དོན། རྒྱུད་སྡེ་བཞི་དང་རྗེས་སུ་འབྲེལ་བའི་རྡོ་རྗེ་ཐེག་པའི་སྨིན་གྲོལ་རབ་འབྱམས་ཀྱི་འཆད་སྤེལ་མཐའ་
ཀླས་པ་ཞིག་གནང་བ་སྟེ། དེ་ཡང་གསུང་ངག་ལམ་འབྲས་ཁོ་ནའི་དབང་དུ་བྱས་ནའང་ཚོགས་བཤད་ཚར་བདུན་དང་། སློབ་བཤད་ཚར་གཅིག་གིས་མཚོན་ལེགས་བཤད་ཀྱི་བདུད་རྩི་རྒྱས་པར་སྩལ་བས་གསུང་ལས་སྐྱེས་པའི་སློབ་མའང་མཁས་པའི་རྣམ་དཔྱོད་ལྡན་པ། གྲུབ་པའི་དགེ་མཚན་བརྙེས་པ། བསྟན་པའི་བྱ་བ་རླབས་པོ་ཆེ་ལ་དབང་འབྱོར་བ་མང་དུ་བྱོན་པ་ཡིན་ནོ། །གཉིས་པ་རྩོད་པ་རྡོ་རྗེའི་ཟེགས་མས་ཕས་རྒོལ་གྱི་བྲག་རི་བསྙིལ་བའི་ཚུལ་ནི། ཡིད་ཆེས་ལུང་གི་བ་དན་རབ་འཕྱར་ཞིང་། །དངོས་སྟོབས་རིག་པའི་མཚོན་རྣོན་ལྷུང་བ་ལས། །ཕས་རྒོལ་སྤོབས་པ་འཕྲོག་བྱེད་རྩོད་ངག་གི །འབྱོར་པས་མངོན་པར་མཐོ་ལ་གསོལ་བ་འདེབས། །ཞེས་སྨོས་ཏེ། རྣམ་པ་ཀུན་ཏུ་མི་བསླུ་བ་ཡིད་ཆེས་པའི་ལུང་དང་། ལུང་དོན་འཁྲུལ་མེད་དུ་འདྲེན་ནུས་པའི་དངོས་སྟོབས་ཀྱི་རིགས་པ་ཚད་མའི་སྐྱེ་བར་བཏོན་ཏེ་འཆད་རྩོམ་གང་ལ་ཞུགས་ཀྱང་། ཕས་རྒོལ་གྱི་སྤོབས་པ་མཐའ་དག་འཕྲོག་ཅིང་། རང་ལུགས་ཚད་མའི་གནས་སུ་བསྒྲུབ་ནུས་པར་མ་ཟད། གནས་སྐབས་སུའང་ཆོས་གྲྭ་ཆེན་པོ་ཆོས་འཁོར་ལྷུན་པོའི་དྲུང་རམ་པ་མཁས་པའི་དབང་པོ་སངས་རྒྱས་ཆོས་དར་སོགས་དང་དུས་རྒྱུན་དུ་འབྲེལ་བའི་གཏམ་གྱི་སྐབས་དབྱེ་བས་བློ་གྲོས་དང་ལྡན་པ་དག་གི་ཡིད་རང་དབང་མེད་
པར་འཕྲོག་ཅེས་གཏམ་དུ་གྲགས་སོ། །གསུམ་པ་རྩོམ་པ་རིན་པོ་ཆེའི་ཕྲེང་བས་ཐུབ་བསྟན་ཁང་བཟང་མཛེས་པར་བྱས་པའི་ཚུལ་ནི། འཇམ་དཔལ་གཞོན་ནུ་ཀུན་དགའི་མཚན་ཅན་གྱི། །རྟོགས་བརྗོད་རིན་ཆེན་ཕྲེང་བར་སྤེལ་བས་མཚོན། །ཡོན་ཏན་གསུམ་ལྡན་ལེགས་བཤད་རྩོམ་པ་ལ། །ངག་གི་དབང་ཕྱུག་བརྙེས་དེར་གསོལ་བ་འདེབས། །ཞེས་སྨོས་ཏེ། །དེ་ལ་ལེགས་བཤད་ཀྱི་ཕྲེང་བ་ཚར་དུ་དངར་བས་བློ་ལྡན་མགྲིན་པའི་མཛེས་རྒྱན་དུ་གྱུར་པའང་། འཇམ་དཔལ་གཞོན་ནུའི་ཡེ་ཤེས་ཀྱི་རྣམ་རོལ་ངག་གི་དབང་པོ་ཀུན་དགའ་བློ་གྲོས་ཀྱི་རྟོགས་བརྗོད་རིན་པོ་ཆེས་མཚོན་གསུང་རྩོམ་ལེགས་བཤད་ཕུལ་དུ་ཕྱིན་པ་ཇི་སྙེད་ཅིག་མཛད་པ་ཡིན་ཏེ། འདིར་མདོ་ཙམ་སྨོས་ན། རྗེ་རང་ཉིད་ཀྱི་ལྷག་པའི་ལྷ་སྒྲོལ་མ་དཀར་མོ། འཇམ་དབྱངས་དཀར་པོ། འཇམ་དཔལ་ནག་པོ། དཔལ་དགེས་པ་རྡོ་རྗེ། རྡོ་རྗེ་རྣལ་འབྱོར་མ། ཀུ་རུ་ཀུལླེ། འདོད་རྒྱལ། གུར་ཞལ་སོགས་ལྷག་པའི་ལྷ་རབ་འབྱམས་ཀྱི་བསྟོད་པ། རྣལ་འབྱོར་དབང་ཕྱུག་སོགས་རྩ་བརྒྱུད་བླ་མའི་སྐུ་བསྟོད། འཇམ་མགོན་ཀུན་དགའ་བློ་གྲོས་ཀྱི་རྟོགས་བརྗོད་རིན་པོ་ཆེ་པོད་ཆེན་གཅིག་དང་། དེའི་དོན་བསྡུ། གྲུབ་དབང་རིན་པོ་ཆེ་རྒྱལ་མཚན་རྣམ་ཐར་གསོལ་འདེབས། དེ་དང་མཐུན་པའི་རྣམ་ཐར་མདོར་བསྡུས།
དཔལ་ས་སྐྱ་པའི་གནས་རྟེན་ངོ་མཚར་བ་རྣམས་ཀྱི་བཤད་པ་སོགས་པོད་གསུམ་ཙམ་བཞུགས་ཤིང་། དེ་ཐམས་ཅད་ཀྱང་དོན་མེད་པ་ལ་སོགས་ཕྱི་རོལ་པའི་བསྟན་བཅོས་ངན་པའི་མཚན་ཉིད་དྲུག་དང་བྲལ་ཞིང་། ངོ་བོ་དོན་དང་ལྡན་པ། བྱེད་ལས་སྒྲུབ་པ་ལྷུར་ལེན་པ། འབྲས་བུ་སྡུག་བསྔལ་སྤོང་བ་སྟེ་ཡོན་ཏན་གསུམ་གྱིས་ཁྱད་པར་དུ་བྱས་པ་འབའ་ཞིག་གོ །གསུམ་པ་གཉིས་ཀའི་དོན་དུ་མཁས་བཙུན་བཟང་པོའི་ཡོན་ཏན་ལྷུན་གྱིས་གྲུབ་པའི་ཚུལ་ལ་གསུམ་སྟེ། དང་པོ་མཁས་པའི་རྣམ་དཔྱོད་ཟླ་མེད་པའི་ཚུལ་ནི། མདོར་ན་སྡེ་སྣོད་གསུམ་དང་རྒྱུད་སྡེ་བཞིའི། །ཚིག་དང་དོན་ལ་མཁྱེན་པའི་ཕུལ་ཕྱིན་པས། །རང་བཞིན་ཕན་བདེའི་གོ་འཕང་ལ་སྦྱོར་བའི། །མཚུངས་མེད་མཁས་པའི་དབང་པོར་གསོལ་བ་འདེབས། །ཞེས་སྨོས་ཏེ། མདོར་བསྡུ་ན་འདུལ་བ་མདོ་སྡེ་མངོན་པ་སྡེ་ཝ་སྣོད་རིན་པོ་ཆེ་རྣམ་པ་གསུམ་དང་། བྱ་སྤྱོད་རྣལ་འབྱོར་བླ་མེད་རྒྱུད་སྡེ་རིན་པོ་ཆེ་རྣམ་པ་བཞིའི་ཚིག་གི་གནས་ཐམས་ཅད་སྒྲ་དང་། དོན་གྱི་གནས་ཐམས་ཅད་ཚད་མ་རིག་པའི་ལམ་གྱིས་གསལ་བས་མཁྱེན་དཔྱོད་ཀྱི་མཐུ་ཕུལ་དུ་བྱུང་བས་རང་གཞན་ཕན་བདེའི་གོ་འཕང་ལ་སྦྱོར་ནུས་པའི་སྨྲ་བའི་དབང་ཕྱུག་ཆེན་པོའི་གོ་འཕང་བརྙེས་པས་མཁས་པ་རྣམས་ཀྱི་གཙུག་གི་ནོར་བུར་གྱུར་པའོ། །གཉིས་པ་
བཙུན་པའི་ངང་ཚུགས་གཞན་དང་དཔེ་ཟླ་བྲལ་བ་ནི། སོ་སོར་ཐར་དང་བྱང་སེམས་རིག་འཛིན་གྱི། །སྡོམ་པ་གསུམ་གྱི་བཅས་པའི་ར་བ་ལས། །ནམ་ཡང་མི་འདའ་བསླབ་ལ་རབ་གུས་པ། །བཙུན་པའི་ཁྱུ་མཆོག་ཆེན་པོར་གསོལ་བ་འདེབས། །ཞེས་སྨོས་ཏེ། སོ་སོར་ཐར་པའི་སྡོམ་པ་དང་། བྱང་ཆུབ་སེམས་དཔའི་སེམས་བསྐྱེད་དང་། གསང་སྔགས་སྤྱིའི་དམ་ཚིག་གི་ཁས་བླང་པ་རགས་པ་ལྟ་ཅི་སྨོས། ཕྲ་བ་ཙམ་ཡང་འདའ་བའི་སྐབས་མི་སྲིད་ཅིང་། ངོས་ལྐོག་གི་རྣམ་ཐར་བྱི་ལའི་ངང་ཚུལ་ཅན་མ་ཡིན་པར་རྣམ་པ་ཀུན་ཏུ་ཆོས་དང་མཐུན་ངེས་པའི་སྤྱོད་པ་དྲང་པོར་སྲོང་བ་རྒྱལ་བ་དགྱེས་པའི་ཚུལ་ཁྲིམས་ལ་གནས་པས་ན་བཙུན་པའི་མཆོག་ཏུ་གྱུར་པའོ། །གསུམ་པ་བཟང་པོའི་ཕྲིན་ལས་མཐའ་ཡས་པའི་ཚུལ་ནི། ཁྱད་པར་གངས་ཅན་བསྟན་པའི་མངའ་བདག་ཆེ། །དཔལ་ལྡན་ས་སྐྱའི་འཇམ་མགོན་མཆོག་རྣམས་ལ། །ཟབ་རྒྱས་གདམས་པ་རྒྱ་མཚོ་ཡོངས་བསྩལ་བས། །བཟང་པོའི་ཕྲིན་ལས་རྒྱས་ལ་གསོལ་བ་འདེབས། །ཞེས་སྨོས་ཏེ། ཁྱད་པར་གྲུབ་དབང་རིན་ཆེན་རྒྱལ་མཚན་གྱིས་ལུང་བསྟན་པ་བཞིན། བསྟན་པ་རིན་པོ་ཆེར་སྨན་པའི་འཆད་ཉན་བསམ་གྱིས་མི་ཁྱབ་ཅིང་། བྱེ་བྲག་ཏུ་གངས་ཅན་བསྟན་པའི་མངའ་བདག་འཇམ་མགོན་ས་སྐྱ་པ་ཁྲི་ཆེན་རྡོ་རྗེ་འཆང་མཆེད་ཞལ་
མཐའ་དག་ལ། རང་གི་རིགས་ལས་བྱུང་བའི་ཟབ་ཆོས་གཙོ་བོར་གྱུར་པའི་དམ་ཆོས་མཐའ་དག་ལྷག་མ་མེད་པར་ཕུལ་བས་དེང་ནས་སྲིད་མཐའི་བར་དུ་བསྟན་པ་རིན་པོ་ཆེའི་སྲོག་ཤིང་གཅིག་པུར་གྱུར་པ་ནི་ངོ་མཚར་གྱི་མཛད་བཟང་ཐམས་ཅད་ཀྱི་གཙོ་བོ་ཡིན་ཏེ། དེ་ཡང་རྗེ་བཙུན་ས་སྐྱ་པ་ཁྲི་ཆེན་རྡོ་རྗེ་འཆང་ངག་དབང་ཀུན་དགའ་བཀྲ་ཤིས། མཐུ་སྟོབས་ཀྱི་དབང་ཕྱུག་ངག་གི་དབང་པོ་ཀུན་དགའ་རིན་ཆེན། འཇམ་པའི་དབྱངས་བྱམས་པ་མགོན་པོ་དངོས་གྲུབ་དཔལ་འབར། ཀུན་མཁྱེན་རྡོ་རྗེ་གདན་པ་ཆེན་པོ་འཇམ་མགོན་ཀུན་དགའ་རྒྱལ་མཚན། རྗེ་བཙུན་རིན་པོ་ཆེ་བསྟན་པའི་སྒྲོན་མེ། སྐལ་བཟང་ཚུལ་ཁྲིམས་པདྨ་ཕྲིན་ལས། ཀླུ་སྡིང་ཞབས་དྲུང་རིན་པོ་ཆེ། ནཱ་ལེནྡྲ་གཟིམ་འོག་མཆོག་སྤྲུལ་བསྟན་འཛིན་ཕྲིན་ལས། ལྷ་ཁང་མཁན་རིན་པོ་ཆེ་རིན་ཆེན་ཆོས་འཕེལ། དགའ་ལྡན་པ་བསྟན་པའི་རྒྱལ་མཚན། བླ་མ་བྱམས་པ་བསྟན་འཛིན། མདོ་སྔགས་སྨྲ་བའི་ཉི་མ་དགའ་ལྡན་དཔོན་སློབ་བྱམས་པ་སྨོན་ལམ་གྲགས་པ། འདར་གྲོང་ཆེན་མཁན་པོ་ཀུན་དགའ་དཔལ་བཟང་སོགས་ཡོངས་སུ་གྲགས་པ་དང་། མ་གྲགས་པ་མཐའ་ཀླས་པས་སངས་རྒྱས་ཀྱི་བསྟན་པ་རིན་པོ་ཆེ་བཤད་སྒྲུབ་ལས་གསུམ་གྱི་སྒོ་ནས་རྒྱས་པར་མཛད་པ་ཡིན་ནོ། །སྤྱི་དོན་གསུམ་པ་ཐ་མར་དགེ་བ་
ཡོངས་སུ་མྱ་ངན་ལས་འདས་ཀྱང་མཛད་པ་རྒྱུན་མི་འཆད་པའི་ཚུལ་ནི། དེ་ལྟར་ཞིང་འདིར་མཛད་པ་རྫོགས་པའི་མཐར། །འོད་གསལ་ཆེན་པོའི་དབྱིངས་སུ་སྙོམས་ཞུགས་ཀྱང་། །སླར་ཡང་ཟུང་འཇུག་སྤྲུལ་པའི་རྣམ་རོལ་གྱི། །མཛད་པ་རྒྱུན་མི་འཆད་ལ་གསོལ་བ་འདེབས། །ཞེས་སྨོས་ཏེ། དེ་ལྟར་ཞིང་འདིར་ཐུབ་བསྟན་རིན་པོ་ཆེ་སྲིད་མཐར་གསལ་བའི་བྱ་བ་ཡོངས་སུ་རྫོགས་པ་ན། གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་བ་དང་། ཞིང་ཁམས་གཞན་གྱི་གདུལ་བྱ་རྒྱ་ཆེ་བར་དགོངས་ནས། མུས་ཆེན་གྲུབ་པའི་དབང་པོ་ཆོས་ཉིད་ཡེ་ཤེས་ཀྱི་ལུང་བསྟན་ཇི་ལྟ་བ་བཞིན་དགུང་གྲངས་དྲུག་ཅུ་རྩ་བཞིར་ཕེབས་པ་མེ་མོ་གླང་གི་ལོའི་ས་ག་ཟླ་བའི་ནང་དུ། མགུལ་ཆམ་ལྟ་བུའི་བསྙུན་རྐྱེན་ཕྲ་མོ་ཞིག་གིས་གཞན་དོན་དུ་གཤེགས་པ་ན། འོད་གསལ་ཆེན་པོར་ཞུགས་པའི་རྟགས་རྣམས་གསལ་བར་བསྟན་ཅིང་། ཐུགས་དམ་གསལ་འདེབས་རྒྱ་ཚོ་སློབ་དཔོན་རྡོ་རྗེ་འཛིན་པ་ཤེས་རབ་འོད་ཟེར་གྱིས་མཛད། འཇམ་མགོན་སྐུ་མཆེད་ནས་ཀྱང་མཆོད་སྤྲིན་རྒྱ་ཆེར་སྤྲོས། གོང་དུ་སྨོས་པའི་རྡོ་རྗེ་སློབ་དཔོན་དེ་ཉིད་ཀྱི་བླ་བྲང་རིན་ཆེན་སྒང་དུ་སྐུ་གདུང་ཞུགས་འབུལ་སོགས་དང་། ཕྱི་རྟེན་དངུལ་གྱི་གདུང་རྟེན་བུམ་སྒོར་རྗེ་ཉིད་ཀྱི་སྐུ་འདྲ་དང་བཅས་དེང་སང་མཆོད་སྡོང་འཛམ་གླིང་འོད་
གསལ་གྱི་མདུན་དུ་བཞུགས་པ་འདི་དང་། དུས་ཐང་སོགས་གཤེགས་རྗེས་ཀྱི་བྱ་བ་མཐར་ཕྱིན་པ་དང་། ཡབ་རྗེ་གདོད་མའི་མགོན་པོ་དཔལ་ལྡན་ཆོས་སྐྱོང་གི་དགོངས་རྫོགས་དང་ཆབ་གཅིག་ཏུ་ས་ག་ཟླ་བར་དཔལ་དགེས་པ་རྡོ་རྗེའི་སྒྲུབ་མཆོད་བཅས་རྣམ་དཀར་གྱི་རྒྱུན་དེང་སང་བར་དུ་གོང་འཕེལ་དུ་གནས་ཤིང་། སླར་ཡང་ཟུང་འཇུག་སྤྲུལ་པའི་ཟློས་གར་བྱང་ཤར་མཚམས་སུ་གསང་སྔགས་རྡོ་རྗེ་ཐེག་པའི་ལམ་ཟབ་མོ་གཙོ་བོར་སྤྱོད་པའི་རྣལ་འབྱོར་གྱི་དབང་ཕྱུག་ཞིག་ཏུ་སྐུའི་སྐྱེ་བ་བཞེས་ཏེ། རྟེན་དེ་ལ་མཆོག་གི་དངོས་གྲུབ་མངོན་དུ་མཛད་ཚུལ་གྲུབ་དབང་ཆོས་ཉིད་ཡེ་ཤེས་ཀྱིས་ལུང་བསྟན་པས་མཚོན། རྟག་པ་དང་། ཁྱབ་པ་དང་། ལྷུན་གྱིས་གྲུབ་པའི་ཕྲིན་ལས་རྒྱ་མཚོ་ལ་དབང་འབྱོར་བས་འགྲོ་ལ་ཕན་བདེ་སྩོལ་བའི་མཛད་པ་རྒྱུན་མི་འཆད་པ་འབྱུང་བ་ཉིད་དོ། །གསུམ་པ་སྨོན་ལམ་དང་ཤིས་བརྗོད་ཀྱི་ཕྲེང་བ་སྦྱར་བྱང་དང་བཅས་པས་མཇུག་བསྡུ་བ་ནི། རྩེ་གཅིག་གུས་པས་ཁྱོད་ཀྱི་རྣམ་པར་ཐར། །ཞེས་སོགས་སྨོས་ཏེ་གོ་སླ་བས་མ་སྤྲོས་སོ། །འདིར་སྨྲས་པ། གནས་ལྔ་རིག་པའི་པཎྜི་ཏ། །མཚུངས་མེད་རྡོ་རྗེ་སློབ་དཔོན་ཆེ། །བྱམས་པ་ཀུན་དགའ་བཀྲ་ཤིས་ཀྱི། །རྟོགས་བརྗོད་མཁའ་ལྟར་རྒྱ་ཆེ་ཡང་། །རང་གཞན་དད་པའི་ས་བོན་ལས། །ཕན་བདེའི་མྱུ་གུ་
འཕེལ་བའི་ཆེད། །ཚིག་སྦྱོར་ཡིད་འོང་ཨུཏྤལ། །རབ་ཏུ་རྒྱས་པའི་སྙེ་མ་འདི། །བརྩོན་པས་བསྒྲུབས་པའི་ལེགས་བྱས་ཀྱིས། །ཡིད་ཅན་རྒྱ་མཚོའི་རྡུལ་སྙེད་ཀུན། །བླ་མ་མཆོག་གིས་རྗེས་བཟུང་ནས། །བྱང་ཆུབ་སྙིང་པོར་རོ་གཅིག་ཤོག །ཅེས་དཔལ་ས་སྐྱ་པའི་ཡོངས་འཛིན་འཇམ་པའི་དབྱངས་བྱམས་པ་ཀུན་དགའ་བཀྲ་ཤིས་ཀྱི་རྣམ་ཐར་མདོར་བསྡུས་པ་དད་པའི་ས་བོན་ཨུཏྤལ་རབ་ཏུ་རྒྱས་པའི་སྙེ་མ་ཞེས་བྱ་བ་འདིའང་། རྗེ་དེ་ཉིད་གྱི་ཐུགས་སྲས་མདོ་སྔགས་རབ་འབྱམས་སྨྲ་བའི་སེང་གེ །དཔལ་ལྡན་བླ་མ་དམ་པ་བྱམས་པ་སྨོན་ལམ་གྲགས་པས་ལམ་འབྲས་བླ་མ་བརྒྱུད་པའི་རྣམ་ཐར་གྱི་ཁ་སྐོང་དུ་མདོར་བསྡུས་འདི་ལྟ་བུ་ཞིག་སྦྱོར་བར་འོས་སོ་ཞེས་ཟིན་ཐོའི་ས་བོན་དང་བཅས་ཏེ་སྩལ་བ་བཞིན། ཤར་མདོ་ཁམས་ཀྱི་བཙུན་པ་འཇམ་དབྱངས་མཁྱེན་བརྩེའི་དབང་པོས་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ས་སྐྱའི་བླ་བྲང་དུ་རབ་བྱུང་བཅུ་གཉིས་འགལ་བྱེད་ཅེས་པ་ལྕགས་མོ་ཕག་གི་ལོའི་སྣོན་ཟླའི་དཀར་ཕྱོགས་ཀྱི་རྫོགས་པ་གསུམ་པའི་དུས་ཚེས་དགེ་བའི་སྔ་དྲོའི་ཆ་ཁོ་ནར་གང་ཤར་ཡུད་ཙམ་ལ་བྲིས་པ་དགེ་ལེགས་མཆོག་ཏུ་རྒྱས་པའི་རྒྱུར་གྱུར་ཅིག། ༈ །།སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེའི་བྱུང་བ་བརྗོད་པའི་གཏམ། ལེགས་བཤད་བསྐལ་པ་བཟང་པོའི་
མགྲིན་རྒྱན་ཅེས་བྱ་བ་ལེའུ་བཀྲ་ཤིས་པའི་གྲངས་ལྡན་གྱི། དང་པོ་ཕྱི་སྣོད་འཇིག་རྟེན་ཆགས་ཚུལ་དང་། གཉིས་པ་ནང་བཅུད་སེམས་ཅན་འགྲེལ་ཚུལ་ཤེས་བྱ་རབ་གསལ་ལྟ་བུ་དང་བསྟུན་ནས་ཤེས་བྱའི་མཛོད་ཕུགས་ཀྱི་རྩ་ཚིག་དྲངས་ཤིང་དེ་ལྟར་སྦྱར། གསུམ་པ་སྟོན་པ་སངས་རྒྱས་བྱོན་ཚུལ་ཞང་ཞུང་མ་རྩ་ཚིག་ཏུ་བྱས་པའི་མཛད་པ་མདོ་ཚང་། བཞི་པ་བསྟན་པ་བོན་འཁོར་བསྐོར་ཚུལ། སྤྱིར་བོན་གྱི་འཁོར་ལོ་བསྐོར་ཚུལ། བྱེ་བྲག་སྒོ་བཞི་མཛོད་ལྔ་ཐེག་པ་བཞི་བཅུ་རྩ་ལྔ་སོགས་ཀྱི་དབྱེ་བསྡུ། ཁྱད་པར་ཐེག་དགུའི་རྣམ་གཞག་ལྷོ་གཏེར་ལྔར་རྩ་ཚིག་བཞག་པའི་འགྲེལ་བཤད། ལྔ་པ་བསྟན་འཛིན་དགེ་འདུན་བྱོན་ཚུལ་ལ་ཞང་ཞུང་ཕུག་པ། དྲུག་པ་བར་པ། བདུན་པ་སྒོ་བ་རྣམས་སུ་རིམ་པར་དར་ཚུལ། ཕྱི་མ་ལ་སྔ་དར། ཕྱི་དར་གཉིས། ཕྱི་དར་ལ་སྤྱིར་བཀའ་གཏེར་སྙན་གསུམ་བྱོན་ཚུལ། དེ་དག་གི་བརྒྱུད་འཛིན་གཡུང་དྲུང་བོན་གྱི་སྡེ་སྔར་དར་ཚུལ་གཉིས། འདི་རྣམས་དངོས་རྣམས་མ་ལྟ་བུའི་རྩ་ཚིག་དང་སྦྱར་ཞིང་། གཏེར་སྟོན་བརྒྱ་རྩར་ཀུན་འགྲེལ་གྱི་གསོལ་འདེབས་དེ་འདྲ་རྩ་ཚིག་ཏུ་བཀོད་ནའང་ལེགས། བརྒྱད་པ་ཞར་བྱུང་ལ། ཆོས་ཀྱི་ལོ་རྒྱུས་མདོ་ཙམ། རྒྱལ་རབས། ཆོས་འབྱུང་། རིགས་གནས་ཚུལ། བོན་ཆོས་ཀྱི་རྩོད་སྤངས། བསྟན་པ་གནས་པའི་ཚུལ་
དྲང་དོན་བསྟན་བཅོས་དང་ངེས་དོན། སྟོན་པ་མྱ་ངན་ཡོངས་མི་འདའ། །བོན་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །མྱ་ངན་འདས་དང་ནུབ་པར་སྟོན། །གཡུང་དྲུང་སྐུ་ནི་རྒྱུན་གྱིས་རྟག །འདུལ་ཐབས་བོན་སྒོ་ནུབ་མེད་འཕེལ། །ཞེས་པ་ལྟ་བུའི་ཤིས་པའི་ཚིག་གིས་མཐའ་བརྒྱན་ཏོ། །སརྦ་དཱ་ཀལྱཱ་ཎཾ་བྷ་བ་ཏུ།། །།