ལེགས་འབུལ་དང་འཕྲིན་ཡིག་ཚིགས་བཅད་ཐོར་བུ་སྣ་ཚོགས།

ཐར་རྩེ་མཁན་ཆེན།

---

^{[མ་དཔེ་གཟིགས་ན་འདིར་གནོན།]}

༄༅། །ལེགས་འབུལ་དང་འཕྲིན་ཡིག་ཚིགས་བཅད་ཐོར་བུ་སྣ་ཚོགས་བཞུགས་སོ། །

---

^{[མ་དཔེ་གཟིགས་ན་འདིར་གནོན།]}

དཔལ་ཨེ་ཝཾ་ཆོས་ལྡན་དུ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་སྤྱན་སྔར་ཕུལ་བའོ། །
༄༅། །ལྷན་ཅིག་སྐྱེས་པའི་བདེ་བ་ཆེན་པོར་འཆི་མེད་གྲུབ་པའི་ཐིག་ལེ་ནི། །སྲིད་དང་ཞི་བའི་ཕ་རོལ་སོན་པ་བསམ་མི་ཁྱབ་པའི་ཡེ་ཤེས་ཅན། །འདི་ན་བྲལ་དང་སྨིན་པའི་ཡོན་ཏན་སྐལ་བ་བཟང་པོའི་ཚོགས་རྣམས་ཀྱི། །ལེགས་བྱས་དཔལ་དུ་མངོན་པར་སྣང་བ་འཇིག་རྟེན་གསུམ་ན་རྒྱལ་གྱུར་ཅིག ༡ །ཚངས་སོགས་ཆེ་དགུའི་ནོར་བུའི་ཅོད་

---

^{[མ་དཔེ་གཟིགས་ན་འདིར་གནོན།]}

པན་གྱིས། །ཡང་ཡང་མཆོད་པའི་དགེ་མཚན་རྨད་བྱུང་བས། །ཕན་བདེའི་སྣང་བ་མཐའ་དག་རྫོགས་མཛད་པའི། །ཞབས་པད་རྡུལ་དང་བྲལ་བའི་ཉེ་དྲུང་དུ། ༢ །རིང་ན་གནས་ཀྱང་མི་ཕྱེད་དད་པའི་ཡིད། །གང་གི་ཐུགས་རྗེའི་འཛུམ་འོད་ལ་ཆགས་པས། །རབ་གུས་པུཎྜ་རཱི་ཀའི་མཆུ་སྒྲོས་ལས། །ཞུ་གསོལ་སྦྲང་རྩིའི་བསུང་ཞིམ་ཅུང་ཟད་འཐུལ། ༣ །གཟོད་ནས་རྟག་པ་དམ་པའི་ཆུ་གཏེར་ནི། །གཞན་ཕན་སྙིང་རྗེའི་གར་དུ་ཟློས་པའི་དཔྱིད། །ཟླ་བ་ཟླ་ཤེལ་བདུད་རྩིའི་ངོ་མཚར་གྱིས། །མཚོན་མིན་ཞི་བསིལ་ཉམས་བརྒྱས་རབ་ཏུ་སྒེག ༤ །སློབ་དང་མི་སློབ་ལམ་གྱི་ཡོན་ཏན་ཀུན། །མཚན་བཟང་ཟ་མ་ཏོག་ཏུ་རྒྱས་བཏབ་པ། །བསོད་ནམས་བྱེ་བས་བསྐྲུན་པའི་གཟུགས་

---

^{[མ་དཔེ་གཟིགས་ན་འདིར་གནོན།]}

སྐུའི་དཔལ། །བསྟན་འཛིན་རྒྱ་མཚོའི་གཙུག་ན་ལྷམ་མེར་གསལ། ༥ །རྒྱལ་ཀུན་གསུང་གི་རྡོ་རྗེའི་དེ་ཁོ་ན། །ཡན་ལག་དྲུག་ཅུའི་རོལ་མོ་ལ་སྦྱར་བའི། །ཟབ་རྒྱས་ཆོས་ཚུལ་སྨྲ་བའི་དབྱངས་སྙན་པོ། །ལྟ ཐར་འདོད་རྣ་བའི་དགའ་སྟོན་གཅིག་ཏུ་གྱུར། ༦ །གང་ན་གཟུང་འཛིན་རྟོག་པའི་འཇུག་ལྡེང་ཀུན། །རྡུལ་བྲལ་འོད་གསལ་ཆེན་པོར་སིམ་གྱུར་པས། །མཁའ་ཁྱབ་མཁའ་ཡི་རྡོ་རྗེར་སྙོམས་འཇུག་བཞིན། །ཇི་སྙེད་མཁྱེན་དང་བརྩེ་བའི་རོལ་རྩེད་བཟུང་། ༧ །མཐའ་ཀླས་ཡོན་ཏན་དམ་པའི་གསེར་སྤྲིན་ལས། །གཞན་ཕྱིར་ཕན་བདེའི་གྲུ་ཆར་འབེབས་མཁས་ཕྱིར། །དོན་གཉིས་ནོར་བུའི་སྙེ་མ་ཡིད་འོང་བ། །ལུས་ཅན་ཀུན་གྱི་ངལ་འཚོའི་གནས་སུ་མཛེས། ༨ །གང་འདུལ་ཕྲིན་ལས་འཇུག་པའི་ཨུཏྤལ། །སྣ་ཚོགས་གདུལ་བྱའི་ཆུ་གཏེར་ལ་ཆགས་པས། །སྲིད་ཞིའི་དགེ་མཚན་གྲུབ་པའི་མཚར་སྡུག་གིས། །རྒྱལ་དང་རྒྱལ་སྲས་ཡོངས་ཀྱི་རྣམ་ཐར་བཟུང་། ༩ །དེ་སོགས་བསྔགས་འོས་ཕ་མཐའ་གཞལ་དཀའ་འཆི་མེད་ལམ་གྱི་རྗེས་སོང་བར། །ཕྱོགས་བཅུའི་རྣམ་འདྲེན་སློབ་མར་བཅས་པས་ལེགས་སོའི་རྒྱུད་མང་བརྡུང་བའི་སྒྲས། །ལྷ་དང་བཅས་པའི་འདྲེན་པར་གྱུར་པ་ཁྱོད་གཅིག་ཁོ་ན་ཉིད་དོ་ཞེས། །རྨད་བྱུང་སྤྲིང་ཡིག་སྙིང་གར་བཀོད་པས་ཕྱོགས་ཀྱི་ཁོར་ཡུག་དོག་པོར་བྱས། ༡༠ །འདི་ན་གནས་པའི་མེ་ཁྱེར་བདག །

---

^{[མ་དཔེ་གཟིགས་ན་འདིར་གནོན།]}

སྐྱེས་སྦྱངས་ལང་ཚོ་དམན་གྱུར་ཀྱང་། །ལྷག་བསམ་ཕྲག་པར་གང་གི་བཀའ། །ལྷུན་པོའི་ཁུར་ཡང་ཅི་དགར་བཟུང་། ༡༡ །དེ་ཚེ་ཐུགས་རྗེའི་སྤྲིན་དཀར་གྱིས། །གསོས་པའི་སྒོ་གསུམ་མྱུ་གུ་ནི། །ཉེར་འཚེའི་ཚ་གདུང་བྲལ་བཞིན་དུ། །ཐོས་བསམ་པདྨོ་འཛིན་ལ་རིངས། ༡༢ །སླར་ཡང་འཇིག་རྟེན་དགེ་བའི་ཕུལ། །གསང་གསུམ་རྡོ་རྗེའི་ཆོས་བདུན་དུ། །འཚོ་གཞེས་སྒྲུབ་པའི་ཤིས་བརྗོད་ཀྱི། །ཚིག་གི་མེ་ཏོག་ཅུང་ཟད་འཐོར། ༡༣ །ཨོཾ་སྭསྟི་ཛཱི་བཅུ། སྤྲོས་པའི་ཕ་མཐའ་ལས་བརྒལ་སྟོང་ཉིད་དང་། །འགྱུར་མེད་བདེ་བ་ཆེན་པོ་ཟུང་འཇུག་པའི། །རྣམ་ཀུན་མཆོག་ལྡན་རྡོ་རྗེ་སེམས་དཔའི་དངོས། །གདན་གསུམ་ཡོངས་རྫོགས་ངོ་བོར་འཚོ་གཞེས་གསོལ། ༡༤ །འགྲོ་འོང་སྲོག་རྩོལ་རྒྱུ་བ་ཇི་སྙེད་པ། །ཁ་སྦྱོར་དྷ་ཏིའི་ལམ་དུ་འཆིང་བ་ལས། །རྡོ་རྗེ་ནཱ་དའི་ཆོས་ཕུང་སྤྲོ་མཛད་པ། །འཕོ་མེད་རྟག་པ་དམ་པར་འཚོ་གཞེས་གསོལ། ༡༥ །ལྷན་སྐྱེས་འབར་འཛག་ཞུ་བདེས་དགྱེས་པའི་ཐུགས། །གཟུང་འཛིན་ཡུལ་དང་ལྷན་ཅིག་མི་གནས་པ། །གཟོད་ནས་འཆི་མེད་གྲུབ་པའི་དཔྱིད་ཆེན་པོར། །སྐྱེ་འགགས་མཚན་མ་བྲལ་བར་འཚོ་གཞེས་གསོལ། ༡༦ །མདོར་ན་བདག་སོགས་མོས་པའི་ཡིད་ཅན་ཀུན། །བྱང་ཆུབ་སྙིང་པོར་སྨིན་པ་དེ་སྲིད་དུ། །གསང་གསུམ་འཚོ་གཞེས་བརྟན་པའི་སྐྱབས་འོག་ཏུ། །བརྩེ་ཆེན་ཕྱག་རྒྱས་

---

^{[མ་དཔེ་གཟིགས་ན་འདིར་གནོན།]}

རྟག་ཏུ་དབུགས་དབྱུངས་ཤིག ༡༧ །དེ་སྐད་ཞུ་མཆིད་མལླི་ཀ །བརྗོད་པ་སྙན་པར་སྒྲོགས་བཞིན་དུ། །རབ་དྭངས་བློ་ཡི་པད་རྫོང་ནས། །ཁྱོད་ཞབས་ཆུ་གཏེར་བསྙེན་ཕྱིར་སོང་། ༡༨ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

ས་སྐྱའི་ཁྲི་ཆེན་བཀྲ་ཤིས་རིན་ཆེན།

---

^{[མ་དཔེ་གཟིགས་ན་འདིར་གནོན།]}

༈ དཔལ་ས་སྐྱར་འཇམ་མགོན་བཀྲ་ཤིས་རིན་ཆེན་མདུན་ཁྲི་ཕེབས་སྐབས་ཕུལ་བའི་ཞུ་ཡིག །བཱ་གཱི་ཤྭ་ར་སྱ་ཙ་ཛྷཱ་ན མཱ་ཡཛཱལསྱནིནྟིབེ། ཙྪརྗོབཱཀྲྀ་ཧི་སྟེ། ཤཱནྟ་བྷ་པོ་པ་ཛཱི་བེཀ སཱུཏྤནྣཁེརྙམཱུལཡོ༔ ངག་གི་དབང་ཕྱུག་ཡེ་ཤེས་ཀྱི། །སྒྱུ་འཕྲུལ་དྲྭ་བའི་ཟློས་གར་ནི། །སྲིད་ཞིའི་ཉེར་འཚོ་གཅིག་གྱུར་པའི། །ཞབས་སེན་ཤར་གྱི་ཐིག་ལེའི་དྲུང་། ༡ །གང་གི་ཐུགས་རྗེའི་དཔྱིད་དཔལ་ལ་ཆགས་པའི། །བློ་གྲོས་པུཎྜ་རཱི་ཀའི་འཛུམ་རླབས་ལས། །ཞུ་གསོལ་བདུད་རྩིའི་ཐིག་ཕྲེང་འཇོ་བ་ཡང་། །ཡེ་ཤེས་གཟིགས་པའི་འབབ་སྟེགས་མཛེས་ཕྱིར་རྒྱུ། ༢ །གཟོད་ནས་ཞི་བ་དམ་པའི་ནགས་ཀླུང་དུ། །རྣམ་གྲོལ་བདུད་རྩིའི་རྦ་རླབས་འཐུང་བ་ལས། །ཚུར་མཐོང་དག་པའི་སྒྱུ་འཕྲུལ་དཔག་ཡས་ཀྱིས། །སྲིད་པ་འདི་ན་རྗེས་བརྩེའི་འདུ་འགོད་བརྩམས། ༣ །གང་ན་གྲུབ་པའི་ས་འཛིན་ཉམས་དགའི་སྤོར། །མཚན་དཔེའི་ཉི་གཞོན་ཐོག་མར་ཤར་ཙམ་གྱིས། །འཛམ་གླིང་ཕན་བདེའི་སྣང་བས་མཛེས་སོ་ཞེས། །གྲགས་པ་ཕྱོགས་ཀྱི་བུ་མོའི་རྣ་བར་སྦྱིན། ༤ །དེ་ཚེ་རིགས་གཟུགས་མཁྱེན་པའི་རྫིང་བུ་རུ། །མཐའ་ཀླས་ཡོན་ཏན་

---

^{[མ་དཔེ་གཟིགས་ན་འདིར་གནོན།]}

འབུམ་གྱི་ཨུཏྤལ། །འཛུམ་བཅས་རོལ་པ་ཁོ་ནས་མཁས་དང་གྲུབ། །བྱེ་བ་སྙེད་ཀྱི་བརྟན་པ་གཅིག་ཅར་འཕྲོག ༥ །ཁྱད་པར་དེང་དུས་གསང་གསུམ་བེཟླུམ། །ལྷར་བཅས་རལ་པའི་ཆུ་གོས་རྩེར་བཀོད་པས། །དགེ་མཚན་འདོད་དགུའི་གྲུ་ཆར་འབེབས་མཛད་པའི། །བཀའ་དྲིན་བསམ་གྱིན་གུས་སྤྲོའི་ཐལ་མོ་སྦྱོར། ༦ །འདི་ན་ཀུན་ཏུ་རྨོངས་པའི་སྨིག་རྒྱུ་ཡིས། །ཆེས་ཆེར་ནོན་བདག་སོས་ཀའི་རྗེས་འགྲོ་ཡང་། །གང་གི་ཐུགས་རྗེའི་དཔྱིད་ཀྱིས་བསུས་པ་ལས། །ལང་ཚོའི་མེ་ཏོག་ཉམས་པར་མ་གྱུར་ཙམ། ༧ །སླར་ཡང་འགྱུར་མེད་རྟག་པའི་དངོས། །སྐྱེ་འགག་སྤྲོས་པ་ལས་འདས་ཀྱང་། །ཚུར་མཐོང་ངོར་ཡང་མི་ཕྱེད་པའི། །སྐལ་བཟང་སྒྲུབ་ཕྱིར་འདི་ལྟར་སྨོན། ༨ །བཱི་ཤྲཱི་ཤྲཱི་ཛཱི་བནྟུ། སྲས་བཅས་རྒྱལ་བ་ཀུན་གྱི་ཡེ་ཤེས་སྐུ། །ངག་ལ་དབང་བསྒྱུར་རྡོ་རྗེ་རྣོན་པོའི་གར། །ངོ་མཚར་མཚན་དཔེའི་ཕུང་པོར་ལྷུན་རྫོགས་པའི། །ཞབས་པད་བསྐལ་པ་རྒྱ་མཚོར་བརྟན་གྱུར་ཅིག ༩ །མི་ཤིགས་རྡོ་རྗེ་ནཱ་དའི་གསུང་དབྱངས་ནི། །ཐེག་ཆེན་བདུད་རྩིའི་དགའ་སྟོན་དང་འགྲོགས་ནས། །ཡན་ལག་དྲུག་ཅུའི་རྒྱུད་མང་བསྒྲེང་མཁས་པའི། །སྐལ་བཟང་སྲིད་འདིར་ནུབ་པ་མེད་གྱུར་ཅིག །བཀྲ་ཤིས་དགེ་མཚན་བྱེ་བའི་ཨུཏྤ་ལ། །མཁྱེན་གཉིས་ནོར་བུའི་རྦ་རླབས་དང་འགྲོགས་བཞིན། །རྣམ་ཀུན་མཆོག་ལྡན་དབྱིངས་ལས་

---

^{[མ་དཔེ་གཟིགས་ན་འདིར་གནོན།]}

འཕོ་མེད་པར། །འཚོ་གཞེས་སྣང་བས་ས་གསུམ་འབར་གྱུར་ཅིག ༡༡ །མདོར་ན་ཡོན་ཏན་རིན་ཆེན་འབུམ་ཕྲག་གིས། །མངོན་པར་གཏམས་པའི་ཕྲིན་ལས་ཆུ་གཏེར་ནི། །འཛམ་གླིང་ཡངས་པའི་ཁམས་འདིར་རྟག་འབབ་བཞིན། །བདག་ཀྱང་ཐུགས་རྗེའི་ཕྱག་གིས་དམ་དུ་ཟུངས། ༡༢ །དེ་སྐད་དད་དང་གུས་པའི་བློ་གྲོས་ཀྱི། །ཨུཏྤལ་གསར་པའི་ནགས་ཀླུང་ཉམས་དགའ་ནས། །ཞུ་གསོལ་ལང་ཚོས་རྒྱགས་པའི་ཀོ་ཀི་ལ། །བརྗོད་པ་སྙན་པའི་རོལ་མོ་འཁྲོལ་བཞིན་དེངས། ༡༣ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

ལྕང་སྐྱ་ཧུ་ཐོག་ཐུ།

---

^{[མ་དཔེ་གཟིགས་ན་འདིར་གནོན།]}

༈ མ་ཧཱ་ཙི་ནའི་རྒྱལ་ཁབ་ཏུ་ལྕང་སྐྱ་ཧུ་ཐོག་ཐུའི་ཞབས་པད་དུ་ཕུལ་བ། པཱུཛམྦྷཔྲམཧཱཛ་ཊབནཾ། ཙནྡྲིཕཏྟཁམཱུཧཤོབྷནེ༔ སྡེབ་སྦྱོར་དག་པའི་སྣང་བའོ།། མོཀཱསཱམྲྀཏསོཁྱདཱིཔཱདཱ ཏྲེལོཀྱེའུསདེབཛཱིཡཏྭཾ། མཆོད་འོས་ཆེ་དགུའི་རལ་པའི་སྨན་ལྗོངས་སུ། །ཞབས་སེན་ཟླ་རིས་བཀོད་པའི་དགེ་མཚན་གྱིས། །ཕན་བདེའི་བདུད་རྩི་ཐར་པའི་སྣང་སྟེར་བ། །ལྷར་བཅས་འཇིག་རྟེན་གསུམ་ན་རྒྱལ་གྱུར་ཅིག ༡ །ཇི་ལྟར་ཉི་མའི་རིགས་སུ་སྟོན་མཆོག་དང་། །དགེ་བའི་དཔལ་ལས་མགོན་ཁྱོད་སྣང་བའི་གཏམ། །ཐོས་པའི་རྣ་བ་ཙམ་ཡང་དོན་ལྡན་ཕྱིར། །མི་ཕྱེད་གུས་པ་མཆོག་གིས་མཆིད་འདི་གསོལ། ༢ །གཟོད་ནས་ཞི་བའི་ཆུ་གཏེར་ལ་ཆགས་ཀྱང་། །སྙིང་རྗེའི་འབིགས་བྱེད་རི་བོས་བསྲུབས་པ་ལས། །ཡིད་ཅན་རྒྱ་མཚོའི་གདུང་

---

^{[མ་དཔེ་གཟིགས་ན་འདིར་གནོན།]}

བ་སེལ་བའི་སླད། །སྔོན་མེད་དཔག་བསམ་དབང་པོ་ཁྱོད་གཅིག་འཁྲུངས། ༣ །དེ་ཚེ་རྒྱལ་ཀུན་ཕྲིན་ལས་བདུད་རྩིའི་བཅུད། །རྫོགས་པར་བཟུང་བའི་མཁྱེན་བརྩེའི་སྤྲིན་མཛེས་ལས། །དོན་གཉིས་ཡིད་བཞིན་གྲུ་ཆར་འབེབས་མཁས་པས། །བསྟན་འགྲོའི་འདོད་དགུ་རྫོགས་ལྡན་བཞིན་དུ་བྱས། ༤ །ཁྱད་པར་རིས་བྲལ་གྲུབ་མཐའི་གཟུགས་བརྙན་ཀུན། །དྲི་མེད་བློ་མཆོག་ནོར་བུའི་མེ་ལོང་ངོགས། །ཤར་བས་ཐུབ་བསྟན་ཉེ་འཁོན་མེད་སྦྱར་བའི། །བཀའ་དྲིན་ཚངས་པའི་བློས་ཀྱང་གཞལ་མི་ནུས། ༥ །མདོར་ན་ཉེས་པ་ཆ་བཅས་རྣམ་སྤངས་ཤིང་། །ཡོན་ཏན་མཐའ་དག་འབྱོར་པའི་ཞབས་སེན་ནི། །བསྟན་འདིར་སྟོན་པ་གཉིས་པའི་རྒྱལ་ཐབས་ལ། །འཚོ་གཞེས་བྱང་ཆུབ་སྤྱོད་པས་མཛེས་བཞིན་དུ། ༦ །ཤིན་ཏུ་བརྩེ་བས་དྲངས་པའི་ལེགས་གསུངས་ཀྱི། །བཀའ་གླེགས་བྱིན་རླབས་གཟི་འོད་འབར་བ་དང་། །གྱ་ནོམ་བདོག་པའི་སྐྱེས་བཅས་སྤྱི་བོ་རུ། །ཐོབ་པས་དད་སྤྲོའི་དགའ་སྟོན་ཉིན་བཞིན་འཕེལ། ༧ །འདི་ན་མགོན་པོ་གང་གི་ཡེ་ཤེས་ཀྱི། །གཟིགས་པ་ནོར་བུའི་རྔ་ཡབ་གསར་པ་ཡིས། །ཡང་ཡང་དབུགས་འབྱིན་ཐོབ་པའི་དགེ་སྦྱོང་ཡང་། །ཉེར་འཚེའི་ཚ་གདུང་སྐབས་ཙམ་བྲལ་དང་བཅས། ༨ །དབེན་ཞིང་ཉམས་དགའི་བསམ་གཏན་ཁང་བུ་རུ། །རྩ་གསུམ་རྒྱ་མཚོ་བསྙེན་ཅིང་སྒྲུབ་པ་ཡིས། །

---

^{[མ་དཔེ་གཟིགས་ན་འདིར་གནོན།]}

ཁྱོད་ཞབས་རྡོ་རྗེ་ལྟ་བུར་འཚོ་གཞེས་སླད། །གསོལ་འདེབས་མགྲིན་པའི་རྒྱུད་ཡང་བསྒྲེང་བཞིན་མཆིས། ༩ །སླར་ཡང་གང་དུ་སྣང་ཙམ་གྱིས། །སྲིད་ཞིའི་དགེ་མཚན་བྱེ་བའི་ཕུལ། །གསང་གསུམ་བསྐལ་བརྒྱར་བརྟན་པའི་ཚིག །སྨོན་འདུན་དགེ་བས་འདི་སྐད་གསོལ། ༡༠ །ཤི་བཱི་ཤྲཱི་བི་ཛ་ཡནྟུ། ཤིན་ཏུ་དག་པ་རྡོ་རྗེ་དྷ་ཏིའི་དབྱིངས། །གཟུང་འཛིན་རྩ་ཡི་མདུད་པ་ཞིག་གྱུར་པས། །མི་ཟད་མཚན་དཔེའི་ལང་ཚོ་འབར་བཞིན་དུ། །རྟག་པ་རྒྱུན་གྱི་འཁོར་ལོར་འཚོ་གཞེས་གསོལ། ༡༡ །ཐབས་ཤེས་ཉི་ཟླའི་རྒྱུ་བ་ཇི་སྙེད་ཀུན། །ནཱ་ད་སྒྲ་གཅན་འཇུག་པས་དབང་བྱས་ནས། །ཡན་ལག་དྲུག་ཅུའི་དབྱངས་སུ་འབབས་ཟློ པའི་དཔྱིད། །འགྲོ་འདིའི་རྣ་བར་རྟག་ཏུ་སྙན་གྱུར་ཅིག ༡༢ །ཞུ་བདེས་ཟོས་པའི་ཆར་ཡང་འཕོ་མེད་པ། །སྟོང་ཉིད་ཡུལ་དང་གཉིས་སུ་མི་ཕྱེད་པའི། །རྣམ་མང་ཏིང་འཛིན་སྒོ་བརྒྱར་རོལ་བཞིན་དུ། །འཆི་མེད་གྲུབ་པའི་དགེ་མཚན་སྟོན་པར་གསོལ། ༡༣ །བྲལ་དང་སྨིན་པའི་ཡོན་ཏན་མཐའ་ཀླས་པ། །ཕུན་ཚོགས་ནོར་བུའི་དོ་ཤལ་བྱེ་བ་ཡིས། །ལྷུག་པར་གཡོགས་པའི་ངོ་མཚར་རྨད་བྱུང་བའི། །རྣམ་ཐར་སྲིད་ཞིའི་ཁམས་ན་གསལ་གྱུར་ཅིག ༡༤ །ཕྲིན་ལས་རོལ་མོ་སྲས་བཅས་རྒྱལ་ཀུན་དང་། །འཇུག་པ་གཅིག་པའི་དགེ་མཚན་དར་བབས་པས། །ས་གསུམ་ཕན་བདེའི་དགའ་སྟོན་རྒྱས་པའི་སླད། །

---

^{[མ་དཔེ་གཟིགས་ན་འདིར་གནོན།]}

ཞབས་པད་རྡོ་རྗེའི་ཁམས་སུ་བརྟན་པར་གསོལ། ༡༥ །མདོར་ན་ཡོངས་རྫོགས་བསྟན་དང་འགྲོ་བ་ཡི། །ཅོད་པན་མཚུངས་བ་མེད་པའི་ཞབས་པདྨོ། །བསྐལ་པ་རྒྱ་མཚོར་འཚོ་གཞེས་ཆོས་སྟོན་པར། །རྩེ་གཅིག་སྨོན་པའི་འབྲས་བུ་མངོན་གྱུར་ནས། ༡༦ །ནམ་ཡང་ཐུགས་རྗེའི་ཕྱག་གིས་མི་བཏང་བའི། །ལེགས་གསུང་སྤྱི་བོར་སྩོལ་བའི་སྐལ་བཟང་གིས། །རྣམ་ཀུན་ཤིས་པའི་སྣང་བ་ནུབ་མེད་པ། །སྤྲིན་བྲལ་ཉིན་མོའི་དཔལ་བཞིན་རྒྱས་པར་གསོལ། ༡༧ །ཞེས་པའང་རྨོག་སྟོན་གསང་བདག་ཆེན་པོའི་དགོངས་བཞེད་བསྐང་བའི་ཆེད་དུ་བྲིས་པའོ། །

བྲག་སྒོམ་ཞབས་དྲུང་དཀོན་མཆོག་བསྟན་པ་རབ་རྒྱས།

---

^{[མ་དཔེ་གཟིགས་ན་འདིར་གནོན།]}

༈ རྗེ་བཙུན་བླ་མ་དཀོན་མཆོག་བསྟན་པ་རབ་རྒྱས་དཔལ་བཟང་པོའི་ཞལ་སྔ་ལ་ཕུལ་བའི་ཞུ་ཡིག །ཤྲཱི་བི་ཛ་ཡནྟུ། མཁྱེན་གསུམ་ཐོས་བསམ་རིན་ཆེན་གྲུ་བོ་ལ་འཆེལ་ནས། །ཉམས་ལེན་སྦྱོར་བཞིའི་ཆུ་གཏེར་ཆེན་པོ་བརྒལ་བའི་མཐར། །ཆོས་སྐུ་ཡིད་བཞིན་ནོར་བུའི་གླིང་དུ་ཉེར་རྩེན་པའི། །བཀའ་དྲིན་ཟླ་བྲལ་རྣམ་འདྲེན་མཆོག་གི་ཞབས་པདྨོར། ༡ །རིགས་ཀྱི་ས་བོན་མོས་པས་བརླན་བཅས་སེམས་བསྐྱེད་དང་། །བསྐྱོད་པའི་ཡལ་ག་སྐྱོན་མེད་འཇུག་དང་སྨིན་སྦྱོང་གི། །མེ་ཏོག་མཛེས་འབར་བྱང་ཆུབ་གཞན་དོན་འབྲས་ལྕི་བ། །སྔོན་མེད་དཔག་བསམ་ལྗོན་པ་མཆོག་དེར་འདི་སྐད་གསོལ། ༢ །རྟག་ཆད་རྣམ་སྤངས་དབུས་ལའང་གནས་པའི་སྒྲིབ་བྲལ་བས། །མཐའ་ཡི་རྟོག་།

---

^{[མ་དཔེ་གཟིགས་ན་འདིར་གནོན།]}

པ་རྣམ་པར་འབྱེད་པའི་ཡེ་ཤེས་ནི། །སྙིང་རྗེའི་འཛུམ་དཀར་གཡོ་བ་དང་འགྲོགས་རོལ་མོ་ཡིས། །སྲིད་འདིར་ཕན་པ་མཐའ་ཀླས་སྒྲུབ་མཛད་ཁྱོད་གཅིག་པུ། ༣ །ཁྱད་པར་བདག་རྒྱུད་རྨོངས་མུན་གྱིས་ཟུམ་ཨུཏྤལ། །ཆོས་ཅན་འཁོར་བའི་འདམ་རྫབ་སྟག་པོ་ལས་བསླངས་ནས། །ཆོས་ཉིད་མྱང་འདས་སྦྲང་རྩིའི་འབབ་སྟེགས་གཅིག་གྱུར་པའི། །དམ་ཆོས་སྣང་བ་ཅུང་ཟད་ཐོབ་འདིའང་ཁྱོད་ཀྱི་དྲིན། ༩ །དེ་སླད་། ཤིན་ཏུ་གུས་པ་ཡི། །ཡིད་ནི་ཟླ་ཤེལ་གསར་བ་ལ། །ཕྱོགས་པའི་ཀུ་མུ་དཱ་དཔལ་ལྟར། །བསམས་བཞིན་གུས་སྤྲོའི་འདབ་རྒྱ་གྲོལ། ༥ །སངས་རྒྱས་ཆོས་ཚོགས་ཀུན་གྱི་ངོ་བོ་གཅིག་གྱུར་པ། །སྒྲིབ་བྲལ་ཁམས་ལས་བྱང་ཆུབ་མཆོག་གི་ས་བརྙེས་ནས། །ཡོན་ཏན་ཕྲིན་ལས་ཕ་མཐའ་ཡས་པའི་བདག་ཉིད་ཅན། །རྡོ་རྗེའི་ཆོས་བདུན་ངོ་བོར་བསྐལ་བརྒྱར་འཚོ་གཞེས་གསོལ། ༦ །དེ་སྐད་མ་ཕམ་དགོངས་པའི་དོན་ལ་སྦྱར་བ་ཡི། །ཞུ་གསོལ་འདི་ཡི་རྟེན་ཅིང་འབྲེལ་འབྱུང་ཁོ་ན་ལ། །བརྟེན་ནས་རིང་མིན་རྡོ་རྗེའི་གདན་ལ་བྱམས་མགོན་བཞིན། །ཁྱོད་ཀྱིས་བདག་སོགས་དམ་ཆོས་བདུད་རྩིས་ཚིམ་མཛོད་ཀྱེ། ༈ །སརྦ་དཱ་ཐེ་ཡོ་བྷ་བ་ཏུ།། །།

དགའ་ལྡན་མཆོག་སྤྲུལ་ཡེ་ཤེས་ཐུབ་བསྟན་རྒྱ་མཚོ།

---

^{[མ་དཔེ་གཟིགས་ན་འདིར་གནོན།]}

༈ དགའ་ལྡན་མཆོག་སྤྲུལ་རིན་པོ་ཆེ་ཡེ་ཤེས་ཐུབ་བསྟན་རྒྱ་མཚོར་ཕུལ་བའི་འཕྲིན་ལན། ཛཱནཱནཾཔྲབིདཾཀྲབཱཏྟཱཏེ སཾཔུཎྞཾམུནིཤཱསནཾསྤྲུཊེ༔ ཤུདྡྷསྱཱདཱིབྷེ། མཱནསྱསརསཱིཏབིཀྐིབཱ།

---

^{[མ་དཔེ་གཟིགས་ན་འདིར་གནོན།]}

པཱདཔྱོབཀམལྕམཱུལཡོ༔ མཁྱེན་བརྩེའི་ཡེ་ཤེས་རྨད་བྱུང་བས། །ཡོངས་རྫོགས་ཐུབ་བསྟན་སྣང་མཛད་ཅིང་། །ཡིད་ཅན་རྒྱ་མཚོའི་གདུང་སེལ་བའི། །ཞབས་ཀྱི་པདྨོའི་ཉེ་དྲུང་དུ། ༡ །གང་དུ་སོན་པའི་ལེགས་བྱས་ཀྱིས། །དཔལ་དང་བདུད་རྩིའི་གཏེར་སྦྱིན་པས། །ཟླ་བ་ཁོ་ནར་རྣམ་བརྟག་བློས། །ཚིག་གི་ཀུ་མུཏ་འཛུམ་པར་གྱུར། ༢ །རིང་ནས་སྦྱངས་པའི་བློ་གྲོས་ནི། །ཤེས་བྱའི་ཡུལ་ལ་འཇུག་པ་ན། །འབད་པ་མེད་པར་ཀུན་མཁྱེན་གྱི། །རྒྱལ་ཐབས་རང་དབང་མཛད་ཅེས་གྲགས། ༣ །དེ་ཚེ་བསླབ་པའི་ཡལ་ག་ལ། །གྲོལ་བའི་འབྲས་བུས་རབ་དུད་པ། །སྔོན་མེད་དཔག་བསམ་རྐང་པས་འཐུང་། །ཉེ་བར་འཁོར་གྱི་རྣམ་ཐར་བཟུང་། ༤ །རང་གི་དྲི་ཡིས་འབིགས་བྱེད་ཀླུང་། །མཛེས་སྟེར་ས་མཆོག་ལྗོན་པ་སྟེ། །མ་འདྲིས་ཀུན་ལ་མཛའ་བཤེས་ཀྱིས། །དབུགས་འབྱིན་བགྱིད་པ་ཁྱོད་འདྲ་མེད། ༥ ། བདག་ལྟའི་འཛིན་སྟངས་བྲལ་བའི་བློ། །བདེ་བ་ཆེ་དང་མི་ཕྱེད་པའི། །ཟུང་འཇུག་ཡེ་ཤེས་སྲོག་གྲུབ་པས། །རྡོ་རྗེ་འཛིན་པའི་མཚན་སྙན་ལེན། ༦ །ལྷག་པར་འདི་ན་ཆེར་སྙེམས་རྣམས། །རིག་པའི་དེ་ཉིད་མ་མཐོང་བཞིན། །སྲེད་དང་སྡང་བའི་རྗེས་འབྲངས་ནས། །ཐུབ་བསྟན་ཉེ་འཁོན་གནས་ལ་སྦྱར། ༧ །ཁྱོད་ཀྱིས་གཙུག་ལག་ཇི་སྙེད་ཀུན། །སྒྲིབ་མེད་གཟིགས་དང་ཆབ་གཅིག་པར། །ཕྱོགས་ལྷུང་

---

^{[མ་དཔེ་གཟིགས་ན་འདིར་གནོན།]}

དབུ་མར་བསྙིལ་མཛད་པས། །སྐྱེས་བུ་དམ་པར་གཅིག་ཏུ་མཚོན། ༨ །དེ་སླད་འཚོ་གཞེས་བརྟན་པ་དང་། །ལེགས་གསུངས་ཅུང་ཟད་ཐོབ་པས་ཀྱང་། །བྲལ་བས་ཉེན་ལ་ཙནྡན་ཆུས། །ཕན་པ་བསྒྲུབས་པས་ཆར་མི་ཉེ། ༩ །འདི་ན་དགེ་སྦྱོང་གཟུགས་བརྙན་ཡང་། །ལང་ཚོའི་ཆུ་སྐྱེས་མ་རྙིང་བཞིན། །ནང་གི་མུན་སེལ་རིམ་གཉིས་ཀྱི། །ཉིན་མོའི་སྣང་བར་ཕྱོགས་བཞིན་མཆིས། ༡༠ །སླར་ཡང་འཇིག་རྟེན་དགེ་ལེགས་ཀྱི། །འབྱུང་གནས་དམ་ཆོས་རིན་ཆེན་དབྱིག །གཏན་པ་མེད་པར་སྦྱིན་མཁས་པ། །གདེངས་ཅན་བདག་པོ་ཁྱོད་ཉིད་ཕྱིར། ༡༡ །བསྐལ་པ་རྒྱ་མཚོར་ཞབས་བརྟན་པའི། །གྲགས་དཀར་ཟླ་ཟློ བས་ཡིད་སྲུབས་སྡེ། །པདྨོ་ལྟ་བུར་ཟུམ་པ་དང་། །ཕན་བདེའི་ཆུ་གཏེར་རྒྱས་པ་ནས། ༡༢ །བདག་ཀྱང་བྱང་ཆུབ་སྙིང་པོའི་བར། །ཐུགས་རྗེའི་ཕྱག་གིས་དབུགས་དབྱུང་བས། །དཔྱིད་ཀྱིས་བཟུང་བའི་ཨུཏྤལ་བཞིན། །སྲིད་ཞིའི་དགེ་མཚན་རྫོགས་མཛད་གསོལ། ༡༣ །སརྦ་དཱ་ཐེ་ཡོ་བྷ་བ་ཏུ།། །།

འཇམ་མགོན་ཀོང་སྤྲུལ་རིན་པོ་ཆེ།

---

^{[མ་དཔེ་གཟིགས་ན་འདིར་གནོན།]}

༈ ངེས་པར་ཐམས་ཅད་མཁྱེན་དངོས་ཀརྨ་བཱ་གཱི་ཤྭར་གུ་ཎ་སཱ་ག་རའི་ཞབས་པད་དུ་ཕུལ་བའི་ཞུ་ཡིག ། ཨཱཛཱིཡཾསམྦརཛཱནཾ། སརྦཀེཤཱཏིདྷརྨདྷཱ། ཚནྡོབཱཀཾ། སྤུཏིསཱཀྵཡུབཱཤཀྟི། པྲབྷསིངྒེཎཊེརྫཡེཏ། །ཤེས་བྱ་མ་ལུས་སྡོམ་པའི་ཡེ་ཤེས་ནི། །ཀུན་ཏུ་ཟག་པའི་ཆོས་ཁམས་ལས་འདས་ཀྱང་། །ཤིན་ཏུ་ཕྲ་བ་གཉུག་

---

^{[མ་དཔེ་གཟིགས་ན་འདིར་གནོན།]}

མའི་ལང་ཚོའི་སྟོབས། །རབ་འབར་གྲུབ་པའི་ཟློས་གར་རྒྱལ་གྱུར་ཅིག །གང་ཞིག་ཐོབ་ན་ཡོན་ཏན་གྱི། །དཔལ་དང་བདུད་རྩིའི་རླབས་གཡོ་བས། །གྲགས་པའི་ཆུ་གཏེར་འཕེལ་བགྱིད་པའི། །ཞབས་སེན་ཤར་གྱི་ཐིག་ལེའི་དྲུང་། ༡ །ཇི་ལྟར་ཟླ་བས་བརླན་པའི་ཀུ་མུད་དང་། །དཔྱིད་དཔལ་ཡོངས་སུ་དར་བའི་པདྨོ་བཞིན། །ཁྱོད་ཚུལ་བསྔག་ཕྱེད་དད་གདུང་ཉེ་བར་རྫོགས་པའི་མཆིད། ༢ །སྤྲོས་པར་གྱུར་ན་ངལ་བས་མ་བཟོད་ཀྱང་། །ཉུང་ངུའི་ངག་གིས་འགྲན་ལ་ཡིད་ཕམ་ནས། །འཚམས་པར་གསོལ་བའི་གཏམ་གྱི་མལླི་ཀས། །དོན་ལྡན་མགྲིན་པའི་རྒྱུད་མང་འདི་ལྟར་བསྒྲེངས། ༣ །གང་ཁྱོད་གཉིས་འཐུང་ཁྲོད་ན་ཐལ་ཀར་དང་། །དགའ་བའི་ཚལ་དུ་དཔལ་གྱི་དུམ་བུ་ལྟར། །བློ་གྲོས་ཡོངས་རྫོགས་མཁས་པའི་འདུན་ས་རུ། །སྐྱེ་བར་ཐོབ་པའི་སྤོབས་པ་གཟེངས་སུ་མཐོ། ༤ །དཀར་པོའི་ཕྱོགས་དང་མཚུངས་པའི་བཤེས་གཉེན་གྱི། །དཔལ་ལ་བསྟེན་པས་སྦྱོར་བྱུང་རྣམ་དཔྱོད་ཟླ། །ཉིན་བཞིན་འཕེལ་བའི་གྲགས་དཀར་སྣང་བ་དང་། །ལྷན་ཅིག་ཕྱི་ནང་རིག་པའི་ཆ་ཤས་གང་། ༥ །དེ་ཚེ་སྲིད་ཞིའི་ཉམས་འགྱུར་རྣམ་མང་གཟུགས། །བློ་མཆོག་ཤེལ་གྱི་བ་གམ་ལ་འཕོས་པས། །ལྷར་བཅས་ཡི་ག་འགུགས་པའི་གཟུགས་བརྙན་བརྒྱས། །ལས་སྣ་ཚོགས་པའི་ཕང་པར་དལ་

---

^{[མ་དཔེ་གཟིགས་ན་འདིར་གནོན།]}

གྱིས་འཛེགས། ༦ །རྣམ་གྱུར་གསོ་དང་གཅིག་ཤོས་རིང་གནས་པའི། །ཐབས་ཚུལ་ཡན་ལག་བརྒྱད་ལྡན་པདྨའི་ནགས། །འཆོལ་སྤྱོད་གདུང་བས་ཟུམ་ལ་ཉེར་ཕྱོགས་ཚེ། །གང་གི་མཁྱེན་རབ་དཔྱིད་ཀྱིས་སླར་ཡང་བཟུང་། ༧ །རང་བཞིན་ཁམས་ཀྱི་བདུད་རྩིའི་སྙིང་པོའི་སྤྲིན། །སྣ་ཚོགས་རྐྱེན་གྱི་སྦྱོར་བས་སྲུབ་མ་ཐག །མིང་དང་ཚིག་གི་རྣམ་འགྱུར་མཐའ་ཀླས་པའི། །གྲུ་ཆར་འབེབས་ལ་དཔལ་ལྡན་ཟླ་བ་ཨཱ དངོས། ༨ །ཤེས་བྱ་ཡུལ་གྱི་མཚན་ཉིད་གང་ཡིན་པར། །ཏེ་པོར་གྲུབ་པའི་བློ་ཡིས་རེག་པ་ལས། །ཕས་ཀྱི་རྒོལ་བས་ནམ་ཡང་མི་བརྫི་བའི། །ཚད་མ་སྨྲ་བ་ཀུན་མཁྱེན་རྗེས་སུ་འགྲོ། ༩ །ཐེག་པ་གསུམ་ལས་བརྩམས་པའི་གྲུབ་མཐའི་གཞུང་། །རྣམ་བཞིའི་རི་བོའི་སྤོ་ལ་གནས་བཅས་ཏེ། །ངེས་དོན་དབུ་མའི་ལམ་སྲོལ་འཆད་པའི་ཚེ། །མ་ཕམ་ཞབས་ཉིད་གངས་ཅན་འདིར་བྱོན་བཞིན། ༡༠ །ཁྱད་པར་བག་མེད་འགོགས་པའི་བརླན་ཆགས་པས། །ཉེས་སྤྱོད་རྡུལ་ལ་བཟའ་དང་ལྷན་ཅིག་པར། །ཚུལ་གནས་ཁྲིམས་ཀྱི་དགའ་ཚལ་དར་བབས་ཕྱིར། །བསིལ་ལྗོངས་ཨུ་པཱ་ལ་ཞེས་བསྔགས་པར་འོས། ༡༡ །བསམ་དང་སྦྱོར་བས་དྲངས་བའི་སྨོན་འཇུག་གི། །དམ་བཅའི་ཡི་གེ་སྙིང་ལ་བཀོད་པའི་མོད། །རྒྱལ་བའི་སྲས་ཀྱི་རྣམ་ཐར་རྒྱ་མཚོ་དང་། །བྲལ་སྨིན་ཡོན་ཏན་བྱེ་སྙེད་ངང་གིས་འཕེལ། ༡༢ །སྨིན་བྱེད་

---

^{[མ་དཔེ་གཟིགས་ན་འདིར་གནོན།]}

མཛེས་མའི་སོར་རྩེས་བསྣུན་པ་ལས། །རྟེན་དང་བརྟེན་པར་བཅས་པའི་བསྤྲུལ། །འཛུམ་དཀར་གཡོ་བའི་ལང་ཚོ་གསར་པ་ཡིས། །ནང་གི་ལམ་ནས་གྲུབ་པའི་རྒྱལ་སར་གཤེགས། ༡༣ །མཐའ་དྲུག་ཚུལ་བཞིའི་རྒྱས་བཏབ་རྡོ་རྗེའི་ཚིག །ཇི་བཞིན་འགྲེལ་ལ་གསང་བ་འཛིན་པའི་བདག །ཟག་བྲལ་མཁྱེན་པའི་དཔྱིད་དང་སྙོམས་འཇུག་པས། །གྲངས་མེད་རྒྱུད་སྡེ་རྒྱ་མཚོ་འཆད་ལ་དབང་། ༡༤ ། དཀར་ནག་དབྱངས་འཆར་བཅས་པའི་རྩིས་རིག་གི། །དཔྱད་པ་གཙང་བས་བཏབ་པའི་མ་ཀུ་རར། །ལྐོག་གྱུར་གཟུགས་བརྙན་བརྒྱ་ཕྲག་འཆར་བཟོད་ཕྱིར། །འགྲོ་འདིའི་དམིགས་བུ་ཁྱོད་ལས་གཞན་དུ་སུ། ༡༥ །ཁྱད་པར་ཅན་དང་ཐུན་མོང་རྒྱན་གྱི་གཞུང་། །འཆད་དམ་རྩོམ་པའི་བ་དན་བསྒྲེང་བོ་ན། །མཚོ་ལྡན་དགྱེས་ཏེ་མགྲིན་པར་ཞུགས་པ་ལས། །དཔལ་ལྡན་དཎྜིའི་བརྗོད་པ་དངོས་དེ་རྡོལ། ༡༦ །གཟོད་ནས་གྲུབ་དང་རྗེས་སུ་སྐྱེས་པ་ཡི། །དོན་དང་མིང་གི་རྣམ་གྲངས་ཇི་སྙེད་པ། །སྔོན་བྱུང་རྒྱུ་མཚན་བཅས་ཏེ་སྒྲུབ་པའི་ངག །སྨྲ་ལ་འཆི་བ་མེད་པའི་སེང་གེར་དྲན། ༡༧ །ལྕི་དང་ཡང་བའི་ཡི་གེའི་ཕྲེང་བ་ནི། །སྡེབ་ལེགས་སྦྱོར་བས་བཅིངས་པའི་མཁུར་ཚོས་སུ། །ངོ་མཚར་ཡོན་ཏན་དྲུག་གིས་སྒེག་པའི་ཕྱིར། །རིན་འབྱུང་ཞི་བའི་རྣམ་ཐར་བདག་གིར་བཟུང་། ༡༨ །དེ་ཕྱིར་སྲིད་འདིར་ཁྱོད་ཚུལ་དང་། །མཚུངས་

---

^{[མ་དཔེ་གཟིགས་ན་འདིར་གནོན།]}

པའི་རྣམ་དཔྱོད་ཅན་སྤངས་ན། །ལྷག་པ་ལྟ་ཡང་ག་ལ་ཞེས། །གཏམ་འདི་གཟུར་གནས་རྣ་བར་སྙན། ༡༩ །མདོར་ན་སྐྱེ་བའི་ཕ་རོལ་ཟད་ཀྱང་ཚུར་མཐོང་དག་པའི་སྒྱུ་འཕྲུལ་བཟུང་། །སྤྲོས་པ་དུ་མས་གཞར་ཡང་དབེན་མོད་སྣ་ཚོགས་བསམ་པའི་རྗེས་སུ་འཇུག །བློ་ལྡན་རྣམས་ལ་སྣང་བ་སྦྱིན་ཡང་ཡིད་སྲུབས་སྙིང་ལ་མུན་སྟེར་བའི། །བསམ་གྱིས་མི་ཁྱབ་མཁའ་འདྲའི་རྣམ་ཐར་བྱིས་བློས་བརྗོད་པས་ཇི་ལྟར་དྲངས། ༢༠ །དེ་སླད་གསང་གསུམ་འཚོ་གཞེས་བརྟན་པ་ཡི། །གཏམ་གྱི་སིམ་འོད་ཅུང་ཟད་བཏུང་བས་ཀྱང་། །བསམ་གཏན་གྲུབ་པའི་དགའ་བས་སྙེམས་གྱུར་པའི། །ངང་ཚུལ་འདི་ནི་ལྷན་སྐྱེས་ཉིད་དུ་བྱུང་། ༢༡ ། ཅི་ཕྱིར་ཕལ་ཆེར་དོན་ལ་སྒྲིབ་གྱུར་ཅིང་། །གཞན་འགས་ཤེས་ཀྱང་ཡལ་བར་དོར་བ་ཡི། །བློ་ངན་རྫབ་བཞིན་དཀྲིགས་པའི་གཞན་དབང་གིས། །ཡང་དག་བསྟན་པའི་མཆོད་སྡོང་མ་རུང་བྱས། ༢༢ །དེ་ཚེ་ལ་བསླབ་གཞིས་མཛེས་པའི་སྤྲིན་དཀར་ལས། །ལེགས་བྱས་བདུད་རྩིའི་གྲུ་ཆར་ཆེར་དབབ་པས། །རྣམ་མང་རིག་པའི་མཚར་སྡུག་མཐོར་བསྙེགས་པའི། །བྱེད་པོ་གདེངས་ཅན་གང་ལས་དམིགས་སུ་མེད། ༢༣། བློ་གྲོས་དྲི་མེད་ཟླ་བས་རེག་པའི་མཚོར། །འཆད་རྩོམ་ནོར་བུའི་ཐག་པ་ཆད་པའི་ཚེ། །དཔྱོད་ཤེས་ཚོང་པ་དགའ་བའི་སྤྲིང་ཡིག་གིས། །གངས་རིའི་ཁྲོད་ཀྱི་འཇམ་མགོན་གཉིས་པར་གྲུབ། ༢༤ །འདི་ན་

---

^{[མ་དཔེ་གཟིགས་ན་འདིར་གནོན།]}

གང་ཞབས་དཔྱིད་དཔལ་གྱིས། །བཟུང་བའི་ཀུན་རྨོངས་བྷུ་མ་རཿ ལང་ཚོའི་འདུ་བྱེད་མ་ཉམས་ཀྱང་། །སྙོམས་ལས་ཁོ་ནའི་གདུང་བས་མནར། ༢༥ །ཕྱི་ནང་རིག་པའི་མིང་ཙམ་ཡང་། །ལེགས་པར་རྟོགས་པ་མིན་མོད་ཀྱི། །གཞན་དབང་ལ་བརྟེན་ཉན་བཤད་ཀྱི། །གཟུགས་བརྙན་ཙམ་ཞིག་ཁུར་དུ་ཐོབ། ༢༦ །དེ་ལྟར་ན་ཡང་སྙིགས་མའི་མཐུས། །བཀབ་པའི་ངང་ཚུལ་ལ་སྐྱོ་ནས། །ཡིད་ནི་ཞི་བའི་བསྟི་གནས་སུ། །མཉམ་པར་བཞག་ལ་གཅིག་ཏུ་སྨོན། ༢༧ །སླར་ཡང་མཁས་པའི་གཙུག་ཏོར་རྩེར། །གྲུབ་པའི་ཞབས་སེན་བཀོད་པ་ཡིས། །ཕྱོགས་ལས་རྣམ་པར་རྒྱལ་བའི་དཔལ། །ཡུན་དུ་བརྟན་ཕྱིར་འདི་ལྟར་སྨོན། ༢༨ །བཱི་ཤྲཱི་ཤྲཱི་བི་ཛ་ཡནྟུ། ཀུན་ཏུ་འཕོ་བའི་བག་ཆགས་རྒྱུན་བཅས་པ། །གཉུག་མའི་ཕུང་ཁམས་སྐྱེ་མཆེད་གིས་ཟོས་པས། །ཡོངས་གྲུབ་རྟག་པ་དམ་པའི་རང་བཞིན་དུ། །འཆི་བ་མེད་པའི་བཅུད་ལེན་བརྙེས་གྱུར་ཅིག ༢༩ །ཀོ་ཊ་ཁྱུ་སོགས་འཇུག་ལྡང་དྷཱ་ཏིའི་དབྱིངས། །ཁ་སྦྱོར་རྡོ་རྗེའི་ཆོ་གས་བཅིངས་པ་ལས། །གཞོམ་མེད་ལུང་དང་རྟོགས་པའི་རོལ་མོ་ཅན། །མི་ཤིགས་ནཱ་དའི་དབྱངས་སུ་ལེན་པར་མཛོད། ༣༠ །སྒྲིབ་གསུམ་ཆར་བཅས་ཟོས་པའི་ཡེ་ཤེས་ནི། །སྲིད་དང་ཞི་བའི་ཕ་རོལ་ཕྱིན་གྱུར་པའི། །འོད་གསལ་ཤིན་ཏུ་ཕྲ་བའི་ཆོས་ཉིད་ཅན། །རྣམ་ཀུན་མཆོག་ལྡན་ཆེན་པོར་

---

^{[མ་དཔེ་གཟིགས་ན་འདིར་གནོན།]}

འཚོ་གཞེས་གསོལ། ༣༡ །གང་ཞིག་ཤར་རིའི་ཕྲག་པས་བསྟེན་བྱས་སྲིད་པའི་མིག་གཅིག་སྣང་བའི་མོད། །ཕུན་ཚོགས་དགའ་བའི་དགའ་ཚལ་སྟུག་པོ་རིང་ཡང་ཉེ་བས་བསྐྱང་བཞིན་དུ། །འཇམ་མགོན་ངུར་སྨྲིག་གར་དུ་ཟློས་པ་ཁྱོད་ཞབས་པདྨོ་བརླུང་བ་ཡིས། །བདག་ཀྱང་ཇི་སྲིད་བྱང་ཆུབ་བར་དུ་ཐུགས་རྗེའི་ཕྱག་རྒྱས་བསྡམས་ཤིག་ཀྱེ། ༣༢ །གཞན་ཡང་རྣམ་ཀུན་ལེགས་བཤད་ཀྱི། །བཀའ་གསང་སྤྲིན་གྱི་རྒྱུད་མང་ཡང་། །གུས་པའི་མདོངས་མཐའ་གསོ་བའི་སླད། །རྣ་བའི་བཅུད་དུ་བརྡུང་བར་མཛོད། ༣༣ །འདི་ན་ཕལ་ཆེར་སྒྲོ་བཏགས་ཁོ་ནས་བསྟོད་འོས་མིན་ལ་མངོན་བརྗོད་པའི། །རྗེས་སུ་ཡིག་ཕྱོགས་ལས་ཟློ བཟློག་སྟེ་དོན་དང་བཅས་པའི་རྣམ་ཐར་ལ། །ཅུང་ཟད་བསྔགས་པའི་ལེགས་བྱས་འདི་ཀོ་གཟུར་གནས་དགའ་བའི་འཁྲི་ཤིང་དང་། །གང་གི་མཁྱེན་པའི་སྤྱན་ཟུར་གཡོ་སླད་གྱི་ནས་འཚོ་བའི་མགྲིན་ལས་སྐྱེས། འི ༣༤ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

ཀཿཐོག་སི་ཏུ་ཆོས་ཀྱི་བློ་གྲོས།

---

^{[མ་དཔེ་གཟིགས་ན་འདིར་གནོན།]}

༈ མཆོག་སྤྲུལ་རིན་པོ་ཆེ་ཆོས་ཀྱི་བློ་གྲོས་པའི་ཞལ་སྔ་ལ་ཕུལ་བའི་ཞུ་ཡིག །བཅུ་སུས། ཤཱིཥསུཏརུཔརཱསིདྡྷཾ། ཚནྡོཛགཤིཤུསུཏེ། ཏྲིསསུརབནེཀཤྲཱིཛཡཏུནསམདྷརྨོདྷི། །མཁས་པས་བསྔགས་འོས་ཡོན་ཏན་མེ་ཏོག་གིས། །འཁྱུད་པའི་གྲུབ་པ་མཆོག་གི་ལྗོན་བཟང་ནི། །ལྷར་བཅས་འཇིག་རྟེན་གསུམ་གྱི་དཔྱིད་གཅིག་པུ། །མཚུངས་མེད་ཆོས་ཀྱི་བློ་གྲོས་༼འདིའི་ནང་རི་མོ་ཡོད༽

---

^{[མ་དཔེ་གཟིགས་ན་འདིར་གནོན།]}

རྒྱལ་གྱུར་ཅིག ༡ །འདི་ན་བསིལ་བའི་རེག་བྱ་མ་ཉམས་པ། །ཐང་ཆུ་དཀར་པོའི་འོད་ཀྱིས་རྒྱས་བཏབ་པའི། །སྨན་མཛད་ཐུགས་རྗེའི་ཟིལ་དངར་ཅུང་ཟད་ཙམ། །ཐོབ་པ་ཡིས་ཀྱང་གཞལ་དཀའི་གདུང་བ་འཕྲོག ༢ །འཛུམ་པའི་པདྨོ་དུད་པས་སཱ་ལའི་ཀླུང་། །མཛེས་སྟེར་འབྱུང་བའི་དུས་ཀྱི་ལྷན་སྐྱེས་ཏེ། །དམ་པའི་ངང་ཚུལ་རྟག་པར་འཆར་ལས་གཞན། །སྲིད་འདིར་སྣང་བ་སྦྱིན་མཁས་གཉིས་པ་མེད། ༣ །གང་ཕྱིར་དེ་ཡི་བརྗོད་པ་ཡི་གེའི་ཕྲེང་། །གཟུགས་སུ་གྱུར་ན་མཁའ་མཐའ་བརྟུལ་སྙམ་པའི། །མོས་གུས་དཔྱིད་ཀྱིས་རབ་བཟུང་བྷ་མ་རཿ །བསམ་གཏན་བདུད་རྩིས་འཚོ་བའི་མནལ་ལ་གཡུར། ༤ །ཤེས་བྱ་བདེན་པའི་ཕྱོགས་སུ་ཡིད་ཕྱོགས་ཀྱང་། །ཤེས་པ་རྫུན་གྱི་རི་མོ་མངོན་སུམ་པས། །མཐའ་གཉིས་དབུ་མར་བསྙིལ་བའི་གྲགས་དཀར་གྱི། །འབབ་སྟེགས་ཉམས་དགར་འཛེགས་སླད་གཅིག་ཏུ་འདུན། ༥ །སླར་ཡང་སྙིགས་མར་སྤྱོད་པའི་བསྟན་དང་འགྲོའི། །ངལ་བཅས་གདུང་བ་བཀྲུ་བའི་འཇུག་ངོགས་མཆོག །ཕན་བདེའི་འདོད་དགུ་སྦྱིན་ཁྱོད་བསྐལ་བརྒྱའི་བར། །ཏིཥྛན་ཞེས་ཤིས་བརྗོད་མེ་ཏོག་འཐོར། ༦ །ཞེས་འདི་སྒྲ་དབྱངས་རྒྱ་མཚོའི་དབང་ཕྱུག་མ། །ཉམས་བརྒྱད་གར་གྱིས་རོལ་པའི་ཟེག་མ་ཙམ། །སྙིང་དབུས་རྫིང་བུར་རྟག་པར་ངལ་འཚོ་བའི། །གཙུག་ལག་སྨྲ་བ་གཞོན་ནུའི་མགྲིན་ལས་སོ། ༧ །སརྦ་དཱ་ཐེ་ཡསིདྡྷནྟུ།། །།

མཆོག་སྤྲུལ་ཀརྨ་ངེས་དོན།

---

^{[མ་དཔེ་གཟིགས་ན་འདིར་གནོན།]}

༈ མཆོག་སྤྲུལ་རིན་པོ་ཆེ་ཀརྨ་ངེས་དོན་དཔལ་བཟང་པོའི་སྤྱན་སྔར་ཕུལ་བའི་མཆིད་ལན། གུཎཀུསུམཔུཥརཛྫི། ཡཤསམྲྀཏསཀཱནྟིསཱཏ། ཙྪན ཤིཤུསུཏེ། ཨསམཔཊུསུསིདྡྷཤཱིཏྲིལོབྷུབནབསདཱཛཱིཡཱཏཱ། ཡོན་ཏན་མེ་ཏོག་རྒྱས་པའི་ཆུ་གཏེར་ནི། །གྲགས་པའི་བདུད་རྩིར་བཅས་པས་མཛེས་གྱུར་པ། །མཚུངས་མེད་མཁས་ཤིང་ཤིན་ཏུ་གྲུབ་པའི་དཔྱིད། །འཇིག་རྟེན་གསུམ་ན་རྟག་ཏུ་རྒྱལ་གྱུར་ཅིག ༡ །གང་གི་བསྔགས་འོས་རྣམ་ཐར་རྨད་བྱུང་བ། །འབིགས་བྱེད་ནགས་ཀྱི་སིམ་པ་མངོན་སུམ་པས། །ཡིད་ལ་དགའ་བ་གཟུགས་ཅན་བཞིན་གྱུར་པས། །ངག་གི་རྒྱུད་མང་ཉིན་བཞིན་འཁྲོལ་ལ་བརྩོན། ༢ །ཟླ་གཞོན་བྱེ་བའི་འོད་ཀྱི་དགེ་མཚན་དང་། །མི་ཕྱེད་དམ་པའི་རིགས་ཀྱི་ཨུཏྤ་ལ། །ལྷ་དང་བཅས་པའི་ངལ་འཚོའི་དཔྱིད་གཅིག་པུར། །ཐོག་མ་ཉིད་ནས་ཡེ་ཤེས་གཟིགས་པས་བསྙད། ༣ ། གཤིས་ཀྱི་མཁྱེན་པ་སད་པའི་ལེགས་བྱས་དང་། །ངག་ཏུ་རིག་ལམ་དུ་མར་ཞབས་བཀོད་པས། །ཤེས་བྱ་ཀུན་ལ་འཇིགས་པ་མེད་པའི་བློས། །མཚོ་བྱུང་དགྱེས་པའི་སྙེམས་པ་ཅིར་ཡང་བཟུང་། ༤ །སྔོན་དུས་དཀར་པོའི་ས་བོན་བཤེས་པ་ལས། །དེང་ཚེ་འདྲིས་མིན་བརྩེ་བའི་འབབ་སྟེགས་ཀྱང་། །བསླབ་དང་གྲོལ་བའི་ཁྱད་པར་དབེན་བཞིན་དུ། །གྲགས་པའི་བསམ་གཏན་ཁོ་ནར་ཡིད་རབ་གཏོད། ༥ །

---

^{[མ་དཔེ་གཟིགས་ན་འདིར་གནོན།]}

སླད་ནས་ནང་གི་ཐུན་གསུམ་ཡེ་ཤེས་ཀྱི། །སྣང་བས་འགོགས་པའི་སྤྲིང་ཡིག་ཁུར་ལྕི་བ། །ལག་ན་རལ་གྲིའི་ངོ་བོར་བསྐལ་པ་བརྒྱར། །འཚོ་གཞེས་ཤིས་པའི་ཆོ་ག་བསྒྲུབ་བཞིན་དུ། ༦ །ལྷུན་པོའི་རྣ་རྒྱན་ཅན་གྱི་ཁོར་ཡུག་ན། །འཆད་རྩོད་རྩོམ་པའི་དབྱངས་བདུན་ཏམྦུ་ར། །མཁྱེན་དཔྱོད་སོར་མོས་བསྐུལ་བའི་ལེགས་བྱས་ཀྱིས། །རྨོངས་པའི་གདུང་བ་འཕྲོག་པའི་བཀའ་དྲིན་སྩོལ། ༧ །ཇི་ལྟར་པདྨོས་བརྒྱན་པའི་ནགས་ཀླུང་དུ། །ཆེད་དུ་བསྡུས་མིན་པུང་བའི་བུ་མོ་བཞིན། །གང་ཞབས་ཡོན་ཏན་བྱེ་བའི་གཞན་དབང་གིས། །བརྗོད་པ་འདི་ཡང་ཕྱོགས་དེར་དལ་གྱིས་དྲངས། ༨ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

མཚོ་ཕུར་རྡོར་འཛིན་བསོད་གྲགས།

---

^{[མ་དཔེ་གཟིགས་ན་འདིར་གནོན།]}

༈ མཁའ་སྤྱོད་དཔལ་གྱི་མཚོ་ཕུར་རྡོ་རྗེ་འཛིན་དབང་བསོད་ནམས་གྲགས་པའི་མདུན་ཕུལ་བའི་འཕྲིན་ལན། ཡསྭཱཧཱུཏབིམོཀམཁྱབེ བྷཱབཱནཾཀཡནཾསམཾཧཧེ སྡེབ་སྦྱོར་དག་པའི་སྣང་བའོ། །སཾདཱིཔསྱཧིཏཾསུཁཾཤུབྷྲཱུྃ ལཀྵཎཏྲིབིབིཛིཡཏྭཾ། གང་གི་རྣམ་ཐར་རྨད་བྱུང་ནོར་གྱི་བུས། །སྲིད་པའི་རྒུད་པ་མཐའ་དག་འཇིལ་བ་དང་། །ཕན་བདེའི་སྣང་བ་རྫོགས་པའི་དགེ་མཚན་ཅན། །འཇིག་རྟེན་གསུམ་ཚུན་རྣམ་པར་རྒྱལ་གྱུར་ཅིག ༡ །ཇི་ལྟར་ཉིན་མོར་བྱེད་པ་རིང་གནས་ཀྱང་། །པདྨོའི་ནགས་ཀླུང་མཛེས་པའི་དཔལ་སྟེར་བཞིན། །མངོན་སུམ་མིན་ཡང་དམ་པའི་ཡོན་ཏན་གྱིས། །ཡིད་འཕྲོག་གུས་པའི་ངག་

---

^{[མ་དཔེ་གཟིགས་ན་འདིར་གནོན།]}

གིས་འདི་སྐད་གསོལ། ༢ །གཟོད་ནས་ཞི་བ་དམ་པའི་མཆོག་བརྙེས་ཀྱང་། །བྱང་ཆུབ་སྤྱོད་པ་རྒྱ་མཚོའི་ངོ་མཚར་ཕུལ། །མཐའ་ཀླས་ཡིད་ཅན་རྗེས་སུ་སོང་གྱུར་པས། །རྒྱལ་བ་དགྱེས་པའི་ལམ་སྲོལ་གཅིག་sཏུ་བཟུང་། ༣ །རྡུལ་དང་ཤེས་བྱའི་ཡུལ་ལས་རིང་འདས་པ། །སྐྱེ་འགག་བྲལ་བའི་འཕོ་ཆེན་རྡོ་རྗེའི་སྐུ། །ཚུར་མཐོང་སྐལ་པར་འཚམས་པའི་སྒྱུ་འཕྲུལ་གྱིས། །དགེ་ལེགས་ཤིས་པ ༤ །དྷུ་ཏིར་དག་པའི་གཞོམ་མེད་ནཱ་དའི་སྒྲས། །ལུང་རྟོགས་ཆོས་ཕུང་གྲངས་མེད་འཆར་བཟོད་པའི། །གསུང་གི་གསང་བ་བསམ་གྱིས་མི་ཁྱབ་པས། །ཕན་དང་བདེ་བའི་ངལ་འཚོ་རྒྱས་པར་མཛད། ༥ །བདག་དང་ཕུང་པོ་རྣམ་རིག་ལས་འདས་པའི། །མཐའ་བྲལ་བདེན་པ་གཟིགས་པའི་ཡེ་ཤེས་ཐུགས། །མཁའ་ཁྱབ་མཁའ་ཡི་རྡོ་རྗེར་རོ་གཅིག་པའི། །བསམ་ཡས་ཏིང་འཛིན་སྒོ་བརྒྱར་སྙོམས་པར་འཇུག ༦ ། དེ་སོགས་མི་ཟད་ཡོན་ཏན་དཔག་བསམ་གྱི། །ཕྲིན་ལས་རྟག་པ་དམ་པའི་བདུད་རྩི་ཡིས། །ཀུན་ལ་འཆི་མེད་སྦྱིན་ཅེས་གྲགས་འབར་བས། །རབ་དྭངས་ཡིད་ཀྱི་པདྨོ་ཉིན་བཞིན་བྱེ། ༧ །ལྷག་པར་འདྲིས་མིན་བརྩེ་བའི་སྤྱན་དཀྱུས་ཀྱི། །གཟིགས་པ་གང་དུ་ལྷུང་བའི་ལེགས་གསུང་ནི། །རྣ་བའི་བཅུད་དུ་ཐོབ་པས་སྔར་མེད་པའི། །དད་སྤྲོའི་དགའ་བ་གཟུགས་ཅན་བཞིན་དུ་གྱུར། ༨ །འདི་ན་ལྷན་སྐྱེས་རྨོངས་

---

^{[མ་དཔེ་གཟིགས་ན་འདིར་གནོན།]}

དང་མ་རིག་པས། །དམ་ལ་བཞག་པའི་འདུ་ཤེས་གསུམ་པ་ཡང་། །རིན་ཆེན་གསུམ་གྱི་ཐུགས་རྗེའི་གྲིབ་བསིལ་དུ། །ཉེར་འཚོ་ཚ་གདུང་སྐབས་ཙམ་བྲལ་བཞིན་མཆིས། ༩ །བཱི་ཤྲཱི་ཤྲཱི་བི་ཛ་ཡནྟུ། སླར་ཡང་སྲིད་དང་ཞི་བའི་ལེགས་བྱས་ཀྱི། །རིན་ཆེན་རྡུལ་མང་བརྩེགས་པའི་བ་གམ་རྩེར། །ཞབས་པད་རྡོ་རྗེའི་ཆོས་བདུན་ངོ་བོ་རུ། །འཚོ་གཞེས་བསྐལ་པ་རྒྱ་མཚོར་འབར་གྱུར་ཅིག ༡༠ །གཉུག་མའི་ལུས་སེམས་ཤིན་ཏུ་སྦྱངས་པ་ལས། །ཕུང་ཁམས་སྐྱེ་མཆེད་འཕོ་བ་ཐིམ་གྱུར་པའི། །བརྟན་གཡོ་ཀུན་ལ་ཁྱབ་པའི་རྡོ་རྗེའི་སྐུ། །བདེ་ཆེན་དྲྭ་བ་སྡོམ་པར་ཞབས་བརྟན་གསོལ། ༡༡ །འཇུག་དང་ལྡང་བའི་ལས་རླུང་ཉི་ཟླའི་འགྲོས། །མི་ཕྱེད་དབུ་མའི་སྲོག་ཏུ་གྲུབ་པ་ལས། །རྣམ་པ་ཀུན་ལྡན་རྡོ་རྗེ་ནཱ་དའི་གསུང་། །ཆོས་ཕུང་རྒྱ་མཚོའི་དཔྱིད་དུ་འཆར་གྱུར་ཅིག ༡༢ །གཟོད་ནས་དག་པའི་སེམས་ཀྱི་དེ་ཉིད་ནི། །ལམ་བདེན་སྤྲོས་པ་སྤངས་པའི་ཕ་རོལ་ན། །ཤེས་དང་ཤེས་བྱ་རོ་གཅིག་འོད་གསལ་ཐུགས། །འཆི་མེད་རྟག་པ་དམ་པར་འཚོ་གཞེས་གསོལ། ༡༣ །མདོར་ན་ཡོན་ཏན་རྫོགས་ལྡན་སྤྲིན་ཆེན་ལས། །ཕྲིན་ལས་ནོར་བུའི་གྲུ་ཆར་འབེབས་མཁས་པ། །སྔོན་མེད་གདེངས་ཅན་བདག་པོ་ཁྱོད་ཉིད་ཕྱིར། །གསང་གསུམ་བསྟན་འགྲོའི་ཉེར་འཚོར་ཞབས་བརྟན་ཅིང་། ༡༤ །དེ་སྲིད་འདིར་ཡང་ཐུགས་རྗེའི་གཟིགས་པ་

---

^{[མ་དཔེ་གཟིགས་ན་འདིར་གནོན།]}

ཡི། །བདུད་རྩིའི་ཆུ་རྒྱུན་འགོགས་པ་མེད་སྤྲོ་བས། །ཕན་བདེའི་ཨུཏྤལ་རྒྱས་པའི་དགེ་མཚན་ནི། །བྱང་ཆུབ་སྙིང་པོར་སྨིན་པའི་བཀྲ་ཤིས་སྩོལ། ༡༥ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

བཤེས་གཉེན་མ་ཏི་ཤྭ་ར།

---

^{[མ་དཔེ་གཟིགས་ན་འདིར་གནོན།]}

༈ རིག་པར་སྨྲ་བའི་བཤེས་གཉེན་ཆེན་པོ་མ་ཏི་ཤྭ་རའི་མཆིད་ལན། །དིཤཱིཀཎྜིཀརཏྣ༔ སམེཥཱཧསྱསཱརྦཀེ ཙྪརྗོབཱཏྟཾཧིཏེ། སུཀྲིཏོམཎིནཱལོཀེ ཤོབྷཱདཱཏེབིཛཱིཡཏུ། ཕྱོགས་ཀྱི་རྣ་རྒྱན་རིན་ཆེན་དང་། །མཚུངས་པར་བཀོད་པའི་དོན་མཐུན་གྱིས། །ལེགས་བྱས་ནོར་བུས་འཇིག་རྟེན་ན། །མཛེས་པ་སྦྱིན་ཁྱོད་རྒྱལ་གྱུར་ཅིག ༡ །ཙཱུ་ཏའི་བསུང་ཞིམ་ཡང་དག་རྒྱས་པའི་ཕུལ། །བུང་བ་མྱོས་པའི་དགའ་སྟེར་དཔྱིད་ཀྱི་དུས། །དང་པོར་འོངས་པ་ཡིས་ཀྱང་མི་མཚོན་པའི། །དམ་པའི་ངང་ཚུལ་གཅིག་ཏུ་དྲན་ནས་སླར། ༢ །དཔྱད་པས་གཙང་བར་བྱས་པའི་བློ་གྲོས་ཀྱི། །མཚར་སྡུག་མྱ་ངན་མེད་པའི་མེ་ཏོག་ནི། །ཚངས་པའི་བུ་མོའི་བཀྲ་ཤིས་ཞབས་ཀྱི་རྡུལ། །རེག་པས་ཚིག་གི་སྙེ་མ་ཅུང་ཟད་རྒྱས། ༣ །གང་ཞིག་བསྲུབས་པའི་ཚེ་ན་གདེངས་ཅན་གནས། །རང་གི་འབྲས་བུ་འབྱིན་པས་དཔག་བསམ་ཀྱང་། །འདར་བཅས་ཁྱོད་ནི་སྙིང་རྗེས་འཁོར་མཚོ་འདིར། །གཞན་ཕྱིར་སྤྲོ་བས་ཞུགས་ལའང་ཞུམ་པ་མེད། ༤ །དེ་ཚེ་རིགས་ཀྱིས་དགེ་བའི་ལྡུམ་ར་ན། །དྲི་མེད་རྣམ་འབྱེད་བློ་ཡི་མྱུ་གུའི་རྩེར། །བསྔགས་འོས་མེ་ཏོག་དང་པོར་འཐོན་ཙམ་གྱིས། །

---

^{[མ་དཔེ་གཟིགས་ན་འདིར་གནོན།]}

མཁས་དང་འཕགས་པའི་ཟུར་མིག་མི་ཕྱེད་ལྷུང་། ༥ །རིང་ནས་དག་པའི་ཡིད་ཀྱི་རྡོ་བ་ལ། །སྙིང་སྟོབས་གཟོང་གིས་བརྐོས་པའི་བྱང་ཆུབ་ཀྱི། །སྤྱོད་མཆོག་གཟུགས་སུ་འཆར་དེ་གཞན་རྐྱེན་གྱིས། །མི་འཕྲོག་ཆོས་ཀྱི་མདུན་སར་ལྷག་པར་དགྱེས། ༦ །གྲགས་པ་ནོར་བུའི་རྔ་ཡབ་ལྷར་བཅས་ཀྱིས། །གཟུང་བས་སྤྲིན་དཀར་དུམ་བུར་འཁྲུལ་བསྐྱེད་པ། །ཕྱོགས་ཀྱིས་མ་བསླད་རབ་མཐོང་མིག་ཅན་རྣམས། །སིམ་པ་སྟེར་ལ་ག་བུར་རྐང་འཐུང་བཞིན། ༧ །ཤིན་ཏུ་ཞི་བའི་བསླབ་པས་ཡོན་ཏན་གྱི། །འབབ་སྟེགས་ཉམས་དགའ་ཐོག་མར་འདུ་བྱེད་པས། །འོ་མའི་རྒྱ་མཚོར་དྭངས་པའི་ཟླ་བ་ཡི། །རི་མོ་བཞིན་དུ་སྣང་བ་ལྷན་ཅིག་སྐྱེས། ༨ །མི་མཉམ་མཉམ་པ་མེད་པའི་བྱང་ཆུབ་སེམས། །སྙིང་སྟོབས་གྲུབ་པས་བཟུང་བའི་བརྟུལ་ཞུགས་ཀྱིས། །ཀུནྡའི་གཉེན་གྱིས་ཀུ་མུད་ལྡན་པའི་གཞི། །རབ་དཀར་མཚར་སྡུག་རྫོགས་པས་ཆར་མི་ཉེ། ༩ །སྨིན་དང་གྲོལ་བའི་འདོད་དགུ་མི་ཟད་པ། །རང་གཞན་རྣམ་གྲོལ་སླད་དུ་འཆང་བའི་མཛོད། །རི་བོང་མཚན་མས་རླབས་བཅས་འཕེལ་འགྱུར་བའི། །བདུད་རྩིའི་ཆུ་གཏེར་གཉིས་པ་རྩྭ ས་འདིར་སྣང་། ༡༠ །གཙུག་ལག་བྱེ་བའི་གནས་ཀུན་མངོན་སུམ་དུ། །འདུན་སར་བཀོད་པ་སྨྲ་བའི་དབང་པོ་གང་། །ཆ་ཤས་མཐའ་དག་གང་བའི་ཟླ་ཤེལ་གྱིས། །སྟོན་ཀའི་མཁའ་བཞིན་འཇིག་རྟེན་གསུམ་

---

^{[མ་དཔེ་གཟིགས་ན་འདིར་གནོན།]}

ན་མཛེས། ༡༡ །ཁྱད་པར་ཐུབ་པས་བསྟེན་པའི་ནགས་ཀླུང་དུ། །བསམ་གཏན་ཟིལ་དངར་བཞིན་དུ་འཐུང་བཟོད་པས། །སྲས་བཅས་རྣམ་འདྲེན་དགྱེས་པའི་དགེ་མཚན་དང་། །ཐར་མཆོག་སྲོག་གི་མདུད་པ་མི་ཕྱེད་གྱུར། ༡༢ །དེ་སླད་སེམས་ཅན་བསྒྲལ་ཕྱིར་ཚུགས་པ་ཡི། །དགེ་བའི་ཟམ་སྟེགས་ཆེན་པོ་འདིའོ་ཞེས། །ཡུན་རིང་མྱ་ངམ་ཐང་དུ་དུབ་པའི་འགྲོ། །མཐའ་དག་དགའ་བའི་འཛུམ་དཀར་ཉིན་བཞིན་དགོད། ༡༣ །མདོར་ན་དམ་པའི་ལེགས་སྤྱོད་ཇི་ལྟ་བར། །བརྗོད་ལ་ཡིད་ཀྱི་རོལ་མཚོའི་མཛེས་མ་ཡང་། །ནོར་བུའི་རྒྱུད་མང་གྲོགས་སུ་བསྟེན་སྙམ་པའི། །གཏམ་གྱི་གུར་གུམ་ཡི་གེ་རྟག་ཏུ་འབྲི། ༡༤ ། རིག་པའི་དྲི་བཟང་རབ་རྒྱས་བརྩེ་ཆེན་གྱི། །གེ་སར་འཁྲིགས་པ་ཁྱོད་ཞལ་པདྨོ་ལས། །གསུང་གི་སྦྲང་རྩིའི་ཐིག་པ་ཕྲ་མོ་ཙམ། །ཐོབ་པ་དེ་ཡང་སྐལ་བཟང་རྣ་བའི་བཅུད། ༡༥ །འབིགས་བྱེད་ནགས་ཀྱི་ས་མཆོག་རྐང་པས་འཐུང་། །རླུང་བཞོན་དལ་བུས་བསྐྱོད་ཅིང་གླལ་བ་ཡི། །ངལ་གསོ་བསྟེན་པ་ཡིས་ཀྱང་མི་མཚོན་པའི། །ཡིད་ལ་སིམ་པ་སྟེར་བའི་དཔྱིད་དུ་གྱུར། ༡༦ །འོན་ཏེ་མཁས་པས་མཆོག་ཏུ་བསྔགས་པ་དང་། །གྲུབ་པའི་སྐྱེས་བུའི་སྤྲུལ་པར་སྒྲོ་བཏགས་པའི། །ཚིག་སྦྱོར་ནོར་བུའི་དོ་ཤལ་བདག་ལྟ་བུར། །རྨི་ལམ་དུ་ཡང་འཚམས་པའི་གོ་སྐབས་ཅི། ༡༧ །འདི་ན་ཤེས་དང་ཤེས་བྱར་གཟིགས་

---

^{[མ་དཔེ་གཟིགས་ན་འདིར་གནོན།]}

པའི་སྤྱན། །སྒྲིབ་མེད་འཇམ་མགོན་བླ་མའི་བཀའ་དྲིན་གྱིས། །བཟུང་བས་བསམ་གཏན་ཁང་བུར་ངལ་འཚོ་བའི། །དགེ་སྦྱོང་གཞོན་ནུའི་གཟུགས་བརྙན་འཆང་བ་ཡང་། ༡༨ །བསླབ་དང་གྲོལ་དང་སྨྲ་བའི་དགེ་མཚན་གྱིས། །ཁྱད་པར་བྱས་པ་ཅུང་ཟད་མ་མཆིས་བཞིན། །འདུ་གསུམ་ཁོ་ནའི་མལ་དུ་བདེ་གནས་པའང་། །ཆོས་བརྒྱད་དབང་པོའི་གཞུ་ཡི་རྗེས་སུ་སོན། ༡༩ །ཇི་ལྟར་འཆད་དང་སྤེལ་བ་ཡི། །ཕྲིན་ལས་འཆང་བར་འོས་སོ་ཞེས། །ཐོབ་དཀའི་གཏམ་གྱིས་རྣ་ལུང་ནི། །རིན་ཐང་ཆེན་པོ་ཉིད་གྱུར་ཀྱང་། ༢༠ །དེང་དུས་བསྟན་དང་མངའ་ཐང་གཉིས། །གཅིག་ཏུ་ཕྱི་མར་གཙོར་འཛིན་ཅིང་། །རྣམ་དཔྱོད་ལྡན་པའང་ཆེས་ཆེར་དཀོན། །ཕྱོགས་ལྷུང་དུག་གིས་ཀུན་ཏུ་ཁྱབ། ༢༡ །ལྷག་པར་རང་བློ་མ་སྦྱངས་དང་། །མི་མཁས་སྨྲ་བར་མི་འོས་པས། །ནམ་ཡང་ཕན་པའི་སྐབས་བྲལ་ནའང་། །ལྷག་བསམ་ཙམ་ཞིག་སྙིང་པོར་བཟུང་། ༢༢ །འབྱུང་འགྱུར་དུས་ཀྱང་གྲུབ་པའི་བདུད་རྩིས་དགེ་བྱས་པའི། །ཡོན་ཏན་མཚུངས་མེད་ས་ཧཱ་ཀཱ་རའི་མེ་ཏོག་གསར། །འདི་ན་བློ་ལྡན་བྱེ་བ་སྙེད་ཀྱི་ངལ་འཚོ་གང་། །ཏིཥྛན་ཞེས་ཤིས་བརྗོད་མེ་ཏོག་རྟག་ཏུ་འཐོར། ༢༣ །དེ་སྲིད་ཉིན་མོར་བྱེད་པ་ཡིས། །པདྨོ་འཛུམ་པའི་སྐབས་སྟེར་བཞིན། །རིང་ཡང་ཉེ་བའི་ལེགས་གསུང་གི །ཟིལ་དངར་ལྷུག་པར་སྦྱིན་མཛད་གསོལ།

---

^{[མ་དཔེ་གཟིགས་ན་འདིར་གནོན།]}

༢༤ །ཨེ་མ་འཕགས་དང་མཁས་རྣམས་ཀྱི། །ཟུར་མིག་ཕྱོགས་དེར་མི་ཕྱེད་པ། །སྨྲ་དབང་ནོར་བུའི་རྫིང་བུ་ནི། །སླར་ཡང་དྲན་པས་བསྔགས་པར་འོས། ༢༥ །སརྦ་དཱ་ཀྲེ་ཡོ་བྷ་བ་ཏུ།། །།

ཀརྨ་ངག་དབང་ཡོན་ཏན་རྒྱ་མཚོ།

---

^{[མ་དཔེ་གཟིགས་ན་འདིར་གནོན།]}

༈ མ་ཧཱ་པཎྜི་ཏ་ཀརྨ་ངག་དབང་ཡོན་ཏན་རྒྱ་མཚོའི་སྤྱན་སྔར་ཕུལ་བའི་ཞུ་ཡིག །ཤྲཱི་བཱི་ཤྲཱི་བི་ཛ་ཡནྟུ། །ངག་གི་དབང་ཕྱུག་སྲིད་ལ་རྗེས་ཆགས་པའི། །ཡོན་ཏན་བློ་དང་ལྷན་ཅིག་མི་གནས་པས། །རྒྱ་མཚོའི་ཐ་གྲུར་ཁྱབ་པའི་གྲགས་དཀར་གྱིས། །འཇིག་རྟེན་གསུམ་ན་ཀུན་ནས་མཛེས་པ་དེར། ༡ །ཉམས་བརྒྱད་བདུད་རྩིས་དག་པའི་རྦ་རླབས་ཅན། །རྣམ་དཔྱོད་འབིགས་བྱེད་རི་བོས་བསྲུབས་པ་ལས། །ཚིག་གི་ཟླ་རིས་རྫོ གསར་པ་འདི་ཙམ་ཡང་། །མཁས་ཁྱོད་དགྱེས་པའི་ཡར་ངོའི་ཕང་པར་འཛེགས། ༢ །གང་ན་དཔལ་གྱི་དུམ་བུའི་ལྕགས་ཕྲན་གསར། །དྲི་དང་ལྷན་ཅིག་སྐྱེས་པའི་སྐབས་མཐོང་བཞིན། །དམ་པའི་མྱུ་གུ་དང་པོར་བཟུང་བ་ནས། །བསྔགས་འོས་གཏམ་གྱི་ཡལ་ག་ཉིན་བཞིན་འཕེལ། ༣ །ཚུལ་གནས་ནོར་བུའི་ས་འཛིན་ཉམས་དགའ་བར། །ཐོས་བསམ་རི་མོ་བརྒྱ་ཕྲག་འབར་བའི་མོད། །འཇམ་མགོན་གཉིས་པའི་ངོ་མཚར་འདིའོ་ཞེས། །གཟུར་གནས་དགའ་བའི་མངལ་ཁུར་རིང་དུ་བཟུང་། ༤ །སླར་ཡང་ཤིན་ཏུ་ཞི་བའི་ནགས་ཀླུང་དུ། །སྤོང་པའི་བརྟུལ་ཞུགས་ཁོ་ནས་མཛེས་པ་དེར། །སྲས་བཅས་རྒྱལ་བ་དགྱེས་

---

^{[མ་དཔེ་གཟིགས་ན་འདིར་གནོན།]}

པའི་འཛུམ་དཀར་གྱིས། །ཤིས་བརྗོད་ཚིག་གི་མེ་ཏོག་གཅིག་ཏུ་འཐོར། ༥ །མཆོག་ཏུ་ཟབ་དང་དེ་ལས་གཅིག་ཤོས་ཀྱི། །ལམ་མང་འཆད་པའི་ངལ་འཚོས་རྣ་བ་ལ། །རིན་ཆེན་རིན་ཐང་མེད་པར་སྒྲུབ་པའི་ཚུལ། །དཔྱིད་ཀྱི་ཕོ་ཉ་གསར་པས་མཚོན་མ་གྱུར། ༦ །མངོན་སུམ་རྗེས་སུ་དཔག་པའི་ནོར་བུའི་ཆུས། །ཚུལ་མིན་སྨྲ་བའི་འདམ་རྫབ་ཡོངས་སྦྱངས་ཏེ། །གཞུང་ལུགས་ཇི་བཞིན་འཆར་བའི་ངོ་མཚར་ཕུལ། །རིག་པའི་དབང་ཕྱུག་ཉིད་དང་མཚུངས་ཞེས་སྨྲེངས། ༧ །སྒྲ་དོན་དཔྱད་པས་གཙང་བའི་ལེགས་བཤད་རེར། །ཚིག་གི་བདུད་རྩི་འབུམ་ཕྲག་འཛག་པ་ཡིས། །བློ་ལྡན་བློ་ཡི་པདྨོ་རྒྱས་པ་དང་། །བཤད་སྒྲུབ་ལང་ཚོ་ཅིར་ཡང་དར་བར་བྱས། ༨ །མདོར་ན་མཁས་དང་གྲུབ་པའི་ཡོན་ཏན་དབྱིག །རྫོགས་པར་མངའ་བའི་སྔོན་མེད་གདེངས་ཅན་གང་། །འགྲོ་མང་མ་རིག་འཐིབ་བུས་གཡུར་བ་ལ། །སིམ་པ་སྟེར་པའི་བྱེད་པོ་གཅིག་ཏུ་གྱུར། ༩ །དེ་སླད་ཆོས་ཀྱི་འབྱོར་པས་མངོན་མཐོ་པའི། །འཚོ་གཞེས་རྡོ་རྗེའི་སྙིང་པོར་བརླུང་བ་དང་། །ཕྲིན་ལས་སྣང་བ་དཀར་པོའི་ཆ་ཤས་རེས། །འདིར་ཡང་ཀུན་དགའི་ཆུ་གཏེར་གསར་དུ་དགོད། ༡༠ །ལེགས་བྱས་དཔུང་པས་ཐོབ་བའི་གདུགས་དཀར་པོས། །ཡིད་ཅན་ངལ་འཚོར་བགྱིད་ལ་འདུན་པ་ཡང་། །རིག་པའི་ཚུལ་ལ་མཛའ་བ་མི་ལྷོད་པས། །གཏན་དུ་བདེ་བའི་སྣང་

---

^{[མ་དཔེ་གཟིགས་ན་འདིར་གནོན།]}

བར་ཆགས་བཞིན་མཆིས། ༡༡ །སླད་མའི་ཆར་ཡང་། །འབྲུག་སྒྲ་དལ་གྱིས་དགོད་པས་མདོངས་མཐའ་དང་། །འབྱོར་བས་དོན་མཐུན་ཚོགས་རྣམས་དགའ་བ་བསྐྱེད། །དམ་པའི་ཚུལ་ལ་རིང་ནས་བཤེས་པ་དག །ཡོན་ཏན་ཁོ་ནས་བསྔགས་པའི་དཔལ་སྟེར་ཕྱིར། ༡༢ །ངག་གི་དབང་ཕྱུག་གྲུབ་པས་སྲིད་པ་ན། །མཚུངས་མེད་སྨྲ་བའི་ཉི་མ་གཅིག་པུ་ཁྱོད། །ཟུང་འཇུག་བདུད་རྩིས་བཏུང་བས་བསྐལ་བརྒྱའི་བར། །རྟག་པ་དམ་པའི་གོ་འཕང་བརྙེས་ནས་ཀྱང་། ༡༣ །ཡིད་སྲུབས་སྡེར་བཅས་ཁེངས་པ་བསྙིལ་བ་ཡི། །ལྷར་བཅས་འཇིག་རྟེན་དགའ་བའི་དབྱངས་སྙན་པོས། །སྲིད་ཞིའི་འཇུག་པ་མཐའ་དག་བརྟུལ་བྱས་ནས། །བྱང་ཆུབ་དམ་པའི་ལམ་བཟང་སྣང་བར་མཛོད། ༡༤ །ལྷག་པར་འདི་ན་ཀུན་ཏུ་རྨོངས་པ་དང་། །ཡིད་གཉིས་མུན་པའི་དྲྭ་བ་རིང་བཅད་ཕྱིར། །ཞི་བསིལ་ལེགས་གསུང་སྣང་བ་དཀར་པོ་ཡིས། །རྣམ་པ་ཀུན་ཏུ་ཤིས་པ་སྒྲུབ་མཛད་གསོལ། ༡༥ །དྭང་བའི་བློ་གྲོས་ཡིད་ཀྱི་དུས་སྟོན་ལ། །དམ་པའི་རྣམ་ཐར་ས་བོན་ཆགས་པ་ལས། །ཚིག་གི་མེ་ཏོག་ཕྲ་མོའི་བསྙེན་བཀུར་འདིས། །མཁྱེན་གཉིས་འབབ་སྟེགས་ཅིར་ཡང་མཛེས་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། །ཞེས་པའང་ས་སྐྱོང་སེ་ནཱ་ཤུ་བྷའི་ལྷ་སྲས་རིན་པོ་ཆེ་མཆོག་གིས་བཀའ་གནང་ལྟར་བྲིས་པའོ།། །།

སྡེ་དགེ་ས་སྤྱོད།

---

^{[མ་དཔེ་གཟིགས་ན་འདིར་གནོན།]}

༈ ས་སྐྱོང་ལྷ་སྲས་རིན་པོ་ཆེའི་ཞབས་པད་དུ་ཕུལ་བའི་མཆིད་ལན། ཤྲཱི་བི་ཛ་ཡནྟུ། འཇིག་རྟེན་གསུམ་ན་དགེ་བའི་གཏམ་གྱི་རྔ། །དཔྱིད་ཀྱི་དུས་སྟོན་ཇི་བཞིན་དར་བབས་པས། །ལེགས་བྱས་སྣང་བ་ནུབ་པ་མེད་པའི་ཕུལ། །འཆི་མེད་གྲུབ་པའི་ལྷ་དེས་ཁྱོད་ལ་སྲུངས། ༡ །བསོད་ནམས་རྒྱ་མཚོའི་འདུ་འགོད་གཡོ་བ་ལས། །བསྔགས་འོས་ཟླ་རིས་དང་པོར་ཤར་ཙམ་གྱིས། །ཁོར་ཡུག་ཤིས་དགུའི་ཆུ་གཏེར་རྒྱས་མཛད་པའི། །སྔོན་མེད་ས་ཡི་ཚངས་པ་རྒྱལ་གྱུར་ཅིག ༢ །གང་ཚུལ་ཤིན་ཏུ་རྨད་བྱུང་རྣམ་པར་ཐར། །སྙིང་ལ་རི་མོ་བཞིན་དུ་བྲིས་གྱུར་པས། །ཉམས་ལྡན་ཚིག་གི་མེ་ཏོག་དར་བབས་པའི། །དོགས་པ་ཅུང་ཟད་འཐོར་བའི་བསྟི་སྟངས་འབུལ། ༣ །ཇི་ལྟར་དག་པའི་རིན་ཆེན་བཻཌཱུརྱ། །འདི་ན་དབུལ་བ་མཐར་བྱེད་གཞན་ཡིན་ཏེ། །རྩོལ་མི་མངའ་ཡང་ཆོས་དང་སྲིད་ཀྱི་དཔལ། །འཇོ་མཁས་ཁྱོད་འདྲ་སྲིད་པ་གསུམ་ན་དབེན། ༤ །དང་པོར་རིགས་ཀྱི་ནོར་བུའི་ས་འཛིན་ལ། །ཕྱི་ནས་སྙིང་རྗེ་ཆེན་པོའི་བརླན་ཆགས་ཏེ། །ཤེས་བྱ་མཐའ་དག་གཟིགས་པའི་དཔག་བསམ་ནི། །དམ་པའི་ཡོན་ཏན་རྒྱ་མཚོའི་པདྨོ་འཛུམ། ༥ །དེ་སླད་ཅི་འདི་རིག་བྱེད་འབྱིན་པའི་བདག །ས་ལ་རྒྱུ་བ་ཉིད་ཅེས་འཁྲུལ་པའི་ཡིད། །བདག་ཅག་སྔོན་བསགས་ལེགས་བྱས་ཅོད་པན་གྱིས། །ཐོབ་པ་ཁོ་ནས་འཆད་པའི་གནས་སྐབས་ཐོབ། ༦ །ཡོན་ཏན་མཆོག་ལ་གུས་པའི་

---

^{[མ་དཔེ་གཟིགས་ན་འདིར་གནོན།]}

བརྟུལ་ཞུགས་དང་། །བར་མའི་ཡིད་ཅན་སྙོམས་པས་རྗེས་སུ་སྐྱོངས། །དམན་ལ་བྱམས་པའི་ཕྱག་གིས་དབུགས་དབྱུང་བས། །སྲོང་བཙན་ཞབས་ཉིད་སླར་ཡང་བྱོན་པ་བཞིན། ༧ །དེ་སླད་འཚོ་གཞེས་བརྟན་པའི་བདུད་རྩི་ཡིས། །རྣ་བའི་ཨུཏྤལ་ཀུན་དགར་བྱས་པའི་མོད། །མ་འདྲིས་བརྩེ་བའི་སྤྱན་ཟུར་འདིར་ལྷུང་བས། །རྫོགས་ལྡན་དང་པོའི་དགའ་སྟོན་གསར་དུ་བྱིན། ༨ །ལྷག་པར་ཚངས་སྲས་དགྱེས་པའི་ཏམྦུར། །མཁྱེན་རབ་སོར་མོས་བརྡུང་བའི་སྙན་འགྱུར་གྱིས། །ཡིད་ལ་བསམ་གཏན་བདུད་རྩིས་འདུ་འགོད་ལས། །ངོ་མཚར་ཨུཏྤལ་འདབ་བརྒྱ་མཆོག་ཏུ་གྲོལ། ༩ །འདི་ན་རྡུལ་མུན་སྙིང་སྟོབས་ཀུན་དཀྲིས་དང་། །མཚུངས་པར་སྤྱོད་ལྡན་འདུ་ཤེས་གསུམ་པ་ཡང་། །རྨོངས་དང་མ་རིག་རྒྱས་པའི་གཞན་དབང་གིས། །སྙོམས་ལས་ཁོ་ནའི་མལ་དུ་ངལ་འཚོ་ཐོབ། ༡༠ །སླར་ཡང་འགྱུར་བཅས་སྲིད་པའི་ཆོས་ཇི་སྙེད། །འཕོ་མེད་དབུ་མའི་སྲོག་ཏུ་སོང་བ་ལས། །ཡིད་སྲུབས་རེ་བ་བཅད་པའི་རྒྱལ་ཐབས་ལ། །ཤིས་པ་ཕྱོགས་ཀྱི་བུ་མོས་སྒྲོགས་བཞིན་དུ། ༡༡ །ཁེངས་ལྡན་བྱེ་བའི་འདར་བཅས་ཐོར་ཚུག་གིས། །ཡང་ཡང་ཕྱིས་པའི་མངོན་མཐོའི་ཟུར་ཕུད་ཀྱང་། །ཞབས་སེན་ཐུན་མཚམས་ལང་ཚོས་ཟིལ་མནན་པའི། །ཕུན་ཚོགས་བསྐལ་པ་རྒྱ་མཚོར་འབར་གྱུར་ཅིག ༡༢ །ཙནྡན་རྐང་པས་འཐུང་བའི་ནགས་ཀླུང་གིས། །

---

^{[མ་དཔེ་གཟིགས་ན་འདིར་གནོན།]}

ལྗོན་ཤིང་ཕལ་ཡང་རིན་ཐང་བྱེད་པ་ལྟར། །གང་གསུང་ལེགས་བཤད་བདུད་རྩིས་ཡིད་མྱོས་པའི། །མི་ཕྱེད་དགའ་བ་རྒྱས་པའི་མགྲིན་ལས་སྐྱེས། ༡༣ །སརྦ་དཱ་ཤུ་བྷྲཱུྃ་སིདྡྷི་ར་སྟུ།། །།

མཆོག་སྤྲུལ་བསྟན་འཛིན་སྙན་གྲགས།

---

^{[མ་དཔེ་གཟིགས་ན་འདིར་གནོན།]}

༈ མཆོག་སྤྲུལ་ཐམས་ཅད་མཁྱེན་གཟིགས་ངག་དབང་བསྟན་འཛིན་སྙན་གྲགས་དཔལ་བཟང་པོར་ཕུལ་བའི་ཞུ་ཡིག །གང་ཞིག་མཚན་གྱི་ཨུཏྤལ་རྣ་བ་ལ། །རེག་པས་སྲིད་ཞིའི་གདུང་བ་རིང་བཅད་པ། །རྣམ་འདྲེན་ཡོངས་ཀྱི་ཡེ་ཤེས་འདུས་པའི་ཞལ། །འཆི་མེད་གྲུབ་པའི་རྒྱལ་རྔ་བརྡུང་གྱུར་ཅིག ༡ །ཨེ་མ་ཡིད་ཀྱི་ནོར་བུའི་མེ་ལོང་ནི། །དད་པའི་སྦྱོར་བས་ཡང་ཡང་གསལ་བྱས་པར། །ཁྱོད་ཞབས་དྲན་པའི་གཟུགས་མང་འདུ་བགྱིས་ཏེ། །མོས་གུས་བདུད་རྩིའི་ཚིག་གི་པདྨོ་དགོད། ༢ །རྣམ་བཅས་རྣམ་མེད་དབུ་མའི་དམིགས་པ་དང་། །མཛའ་བ་མ་ཡིན་རྣམ་པ་ཀུན་ལྡན་གྱི། །འོད་གསལ་དྭངས་པའི་ཆུ་གཏེར་ཉམས་དགའ་བར། །ཟུང་འཇུག་ཟླ་བའི་ལང་ཚོ་མཆོག་ཏུ་སྣང་། ༣ །དེ་ཚེ་ཚུ་རོལ་མཐོང་བའི་བློ་གྲོས་དང་། །སྙོམས་པར་འཇུག་པའི་སྒྱུ་འཕྲུལ་དྲྭ་བ་ཡང་། །རྟག་པ་དམ་པའི་ཚུལ་དང་ཕྲིན་ལས་ཀྱི། །སྤྱོད་ཡུལ་ས་གསུམ་ཕ་མཐར་སོང་བའི་ཚུལ། ༤ །མངོན་སུམ་ཟིལ་དངར་བཅས་པའི་ཆར་སྤྲིན་གྱིས། །ཟབ་མོའི་སྒྲ་དབྱངས་བསྒྲགས་པས་མདོངས་མཐའ་ཅན། །གཉིས་པ་གཞན་ཞིག་དད་གསུམ་ཟློས་གར་དང་། །

---

^{[མ་དཔེ་གཟིགས་ན་འདིར་གནོན།]}

རབ་དཀའི་མངལ་ཁུར་བཟུང་བས་ལྕི་བར་གྱུར། ༥ །འདི་ན་འཕགས་དང་མཁས་པའི་ཞལ་གྱི་ལུང་། །རྣམ་མང་ནོར་བུའི་དོ་ཤལ་བསྟན་བཞིན་དུ། །ཁྱོད་ཞབས་རིན་ཆེན་སྤྲེལ་བའི་གདུགས་དཀར་པོས། །ཉེར་འཚེའི་གདུང་བར་དབུགས་འབྱིན་ཆེན་པོ་ཐོབ། ༦ །སླད་ནས་ཉིན་མོར་བྱེད་དང་ཟླ་བའི་རྒྱུན། །དྷ་ཏིའི་ཕྱག་རྒྱར་བཅིངས་པའི་འཇོ་སྒེག་གིས། །ཚེ་མཐའ་ཡས་པའི་རྣམ་ཐར་བཟུང་བཞིན་དུ། །བདག་ཀྱང་བྱང་ཆུབ་བར་དུ་སྐྱོངས་ཤིག་ཀྱེ། ༧ །སརྦ་ཤུ་བྷྲཱུྃ་སིདྡྷནཱ།། །།

གུ་ཎའི་མཚན་ཅན།

---

^{[མ་དཔེ་གཟིགས་ན་འདིར་གནོན།]}

༈ ཁྱབ་བདག་འཇམ་པའི་དབྱངས་གུ་ཎའི་མཚན་ཅན་གྱི་ཞབས་པད་དུ་ཕུལ་བའི་ཞུ་ཡིག །ངག་གི་དབང་ཕྱུག་སྨྲ་བའི་ཟླ་བ་ཡི། །ཡོན་ཏན་གཟུགས་ཅན་བཞིན་དུ་འདིར་སྣང་བས། །བློ་གྲོས་མཐའ་ཡས་ཞེས་བྱར་མཚན་གསོལ་བའི། །དཀྱིལ་འཁོར་རྒྱ་མཚོའི་ཁྱབ་བདག་ག་ལ་བར། ༡ །མཐོ་རིས་དགའ་བའི་ཚལ་དུ་དཔག་བསམ་དང་། །ས་འདིར་ཁྱོད་ལྟ་བཞིན་དུ་མ་མཆིས་པས། །ཀུན་མཁྱེན་གཉིས་པར་ངེས་པའི་མོས་གུས་ཀྱི། །པདྨོ་ཉིན་རེ་བཞིན་ཡང་ལྷག་པར་བྱེ། ༢ །དེ་སླད་འཚོ་གཞེས་ནོར་བུའི་སྙིང་པོ་ནི། །འཕགས་རྣམས་དགྱེས་པའི་འཛུམ་དཀར་གཡོ་བ་ན། །བསྟན་པའི་ཉིན་བྱེད་སླར་ཡང་འཆར་སྙམ་པས། །དད་སྤྲོའི་དགའ་བ་མངོན་སུམ་ཉིད་དུ་གྱུར། ༣ །འདི་ན་གནའ་བོའི་མཁས་དང་གྲུབ་པའི་སྲོལ། །དྲི་མེད་འཛིན་བཟོད་

---

^{[མ་དཔེ་གཟིགས་ན་འདིར་གནོན།]}

ཡོངས་འཛིན་དུ་མ་ཡི། །བྱིན་རླབས་ཟིལ་དངར་བཏུང་བའི་ཆུ་སྐྱེས་ཀྱང་། །ཁྱོད་ཞབས་ཉིན་མོའི་ཕྱོགས་སུ་མིག་རབ་གཏོད། ༤ །སླད་ནས་ནང་གི་ལམ་ནས་འཆི་མེད་ཀྱི། །གོ་འཕང་རྟག་པ་དམ་པ་བརྙེས་བཞིན་དུ། །འདིར་ཡང་བྱང་ཆུབ་སྙིང་པོར་མཆིས་ཀྱི་བར། །ཡེ་ཤེས་གཟིགས་པའི་འབབ་སྟེགས་ཉིད་དུ་མཛོད། །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

སཾ་གྷ་སཱ་ག་ར།

---

^{[མ་དཔེ་གཟིགས་ན་འདིར་གནོན།]}

༈ བླ་མ་དམ་པ་སཾ་གྷ་སཱ་ག་རར་ཕུལ་བའི་མཆིད་ལན། ཨོཾ་སྭསྟི་ཀུཆནྟ། །མཛེས་སྐུའི་སྣང་བརྙན་ཡིད་ལ་དྲན་པའི་མོད། །དུས་མིན་འཆི་བའི་རྒུད་པ་དྲུང་འབྱིན་ཞིང་། །ཚེ་དང་ཡེ་ཤེས་མཆོག་གི་དཔལ་སྟེར་བ། །བཅོམ་ལྡན་འཆི་མེད་མགོན་པོས་ཁྱེད་ལ་སྲུངས། ༡ །གུས་པའི་ཡིད་ནི་དཔྱིད་ཀྱི་ནགས་ཀླུང་ན། །ངལ་འཚོའི་པདྨོ་བཞིན་དུ་རྒྱས་གྱུར་ཏེ། །ཚིག་གི་སྦྲང་རྩི་དོན་གྱི་ཟིལ་དངར་ཅན། །མཁྱེན་བརྩེའི་གཟིགས་པའི་འབབ་སྟེགས་མཛེས་ཕྱིར་རྒྱུ། ༢ ། ཟླ་བ་ཙནྡན་ཆུ་དང་ག་བུར་གྱིས། །མི་མཚོན་ཞི་བསིལ་དམ་པ་མངོན་བརྙེས་བཞིན། །གཞན་ཕྱིར་མཐུན་པར་འཇུག་པའི་སྒྱུ་འཕྲུལ་གྱིས། །དེང་འདིར་བསྟན་པའི་ཉི་མ་གཅིག་ཏུ་གྱུར། ༣ །དེ་ཚེ་བསླབ་གྲོལ་རིག་པའི་ལང་ཚོ་དང་། །གྲགས་སྙན་ནོར་བུའི་རྣ་རྒྱན་ཟུང་མཛེས་པའི། །འཚོ་གཞེས་དགེ་བའི་ངག་གིས་རྣ་བ་ལ། །སྔོན་མེད་བདུད་རྩིའི་དཔལ་ནི་ཅིར་ཡང་བྱིན། ༤ །ལྷག་པར་ཟབ་རྒྱས་གདམས་

---

^{[མ་དཔེ་གཟིགས་ན་འདིར་གནོན།]}

པའི་མཛོད་འཆང་ཞིང་། །དེས་ཀྱང་སྐལ་བཟང་རྗེས་སུ་བཟུང་བ་དང་། །དེ་ཡིས་ངེས་གསང་བསྟན་པའི་བཤད་སྒྲུབ་ཀྱི། །རྒྱལ་རྔ་སྲིད་རྩེར་སྒྲོགས་འདི་ཁྱོད་ཀྱི་མཐུ། ༥ །འདི་ན་མ་སྦྱངས་མི་མཁས་གཞན་དབང་གིས། །ཡུན་རིང་ཁུར་བཞིན་ནོན་པའི་དངོས་ངན་ཀྱང་། །བླ་མའི་བྱིན་རླབས་ཁོ་ནས་དབུགས་དབྱུང་ཕྱིར། །འདུ་ཤེས་གསུམ་གྱི་མལ་དུ་བདེ་བར་མཆིས། ༦ །སླད་ནས་འཆི་མེད་གྲུབ་པའི་དགེ་མཚན་དང་། །ཕྲིན་ལས་འཇིག་རྟེན་གསུམ་ན་སྙོམས་འཇུག་བཞིན། །འདིར་ཡང་ལྷག་པར་དགྱེས་པའི་འཛུམ་དཀར་གྱིས། །རྟག་ཏུ་བསྐྱང་བའི་བཀའ་དྲིན་སྔར་བཞིན་སྩོལ། ༧ །དེ་བ་ས་པ་ཊ་ཀཾ་མཉྫགྷོ་ཥཱཏ།། །།

རིག་པ་སྨྲ་བ་མངྒ་ལ།

---

^{[མ་དཔེ་གཟིགས་ན་འདིར་གནོན།]}

༈ མཁས་བཙུན་རིགས་པར་སྨྲ་བ་མངྒ་ལའི་མདུན་དུ་ཕུལ་བའི་མཆིད་ལན། སུཀྲྀཏཤུབྷཏརོལླཀྵེ ཀུསུམནབཡཤཤྲཱིཉྩ། དྷུཛགགི་ཤུསུཏེ། གུཎསམསུབྷགིཔུཎཾ ཤམིཏབྷབདིཤོཛིཡཱཏ། ལེགས་བྱས་རྐང་པས་འཐུང་བའི་དགེ་མཚན་ནི། །གྲགས་པའི་མེ་ཏོག་གསར་བས་འཁྱུད་པ་ན། །ཡོན་ཏན་མཐའ་དག་རྫོགས་པའི་སྐལ་བཟང་ཅན། །སྲིད་དང་ཞི་བའི་ཕྱོགས་ལས་རྒྱལ་གྱུར་ཅིག ༡ ། རིང་ནས་དགའ་བ་རྒྱས་པའི་ཡིད་ཀྱི་མཚོར། །བློ་གྲོས་འདབ་མ་ཅུང་ཟད་དར་བའི་མོད། །སླར་ལ་གང་ཚུལ་རྟོགས་པའི་སྣང་བ་ཡིས། །ཉམས་ལྡན་ཚིག་གི་པདྨོ་འཛུམ་པར་གྱུར། ༢ །ཡིད་འཕྲོག་ཟེག་མ་

---

^{[མ་དཔེ་གཟིགས་ན་འདིར་གནོན།]}

རྒྱས་པའི་བདུད་རྩིའི་ཟེར། །རབ་སྦྱིན་ནམ་མཁའི་ཕ་མཐར་གཤེགས་པ་བཞིན། །བྱང་ཆུབ་སྙིང་པོའི་འཇུག་པ་གཟུགས་ཅན་དུ། །རྒྱུ་བའི་ངལ་འཚོ་སྲིད་ན་གཉིས་པ་མེད། ༣ །སྙིགས་མའི་དྲི་མ་རབ་བཀྲུས་བསོད་ནམས་ཀྱི། །འབབ་སྟེགས་མཆོག་ཏུ་མཐོ་བའི་ནོར་བུའི་རྫོང་། །གང་ན་བསྙེན་པ་ཙམ་གྱིས་འཇིག་རྟེན་གསུམ། །དབུགས་འབྱིན་ཟླ་ཤེལ་གཞོན་ནུས་ཆར་མི་ཉེ། ༤ །རིགས་དང་སྦྱོར་བས་སད་པའི་བློ་གྲོས་མཐུས། །ཤེས་བྱ་རྫོགས་པར་བཟུང་བའི་ངོ་མཚར་གྱིས། །འཇམ་དཔལ་གཞོན་ནུ་ཉིད་ཅེས་སྒྲ་དབྱངས་ལྷ། །ལེགས་བཤད་ཉམས་བརྒྱའི་ཟོལ་གྱིས་མགྲིན་པར་ལྷག ༥ །བསླབ་གཞིའི་སཱ་ལ་ཆེན་པོའི་ནགས་ཀྱི་ཚལ། །གཞན་ཕན་དྲི་ཡིས་རབ་སྒེག་དཔྱིད་ཀྱི་དུས། །ཆགས་བྲལ་ཉམས་པའི་མཐར་སྐྱེས་ཡེ་ཤེས་ཀྱི། །འབྲས་བུའི་ཁུར་གྱིས་དུད་པ་ཁྱོད་ཁོ་ན། ༦ །མདོར་ན་བསྔགས་འོས་སྤྱོད་པའི་རྒྱུད་མང་པོ། །ཐོས་པའི་རྣ་བ་རིན་ཆེན་དོ་ཤལ་གྱིས། །མཛེས་པར་འཁྱུད་པའི་ངང་ཚུལ་གཅིག་པུས་འདིར། །ཀུན་དགའི་ལང་ཚོ་ལྷན་སྐྱེས་བཞིན་དུ་དགོད། ༧ །ལྷག་པར་ཚངས་པའི་སྲས་མོའི་ནོར་བུའི་རྒྱུད། །ཉམས་བརྒྱད་གར་གྱིས་རོལ་པ་གཟུགས་ཅན་དུ། །མངོན་སུམ་འཕོས་པའི་སྙན་ཚིག་རྨད་བྱུང་བས། །དང་པོའི་ས་ཡི་དགའ་བས་ཡིད་རབ་བརླན། ༨ །གང་ན་དབེན་པའི་ཁང་བུའི་

---

^{[མ་དཔེ་གཟིགས་ན་འདིར་གནོན།]}

ནང་། །བསླབ་སྲོལ་རི་མོར་བྲིས་པ་ཡི། །མར་མེའི་རྗེས་སུ་སོན་བདག་ཀྱང་། །ལང་ཚོའི་འདུ་བྱེད་མ་ཉམས་བཞིན། ༩ །ཇི་ལྟར་སྦྱིན་པས་དབུལ་པོ་དང་། །ཡིད་བཞིན་རླབས་ཀྱིས་དོན་མཐུན་བཞིན། །མཁས་རྣམས་ཡོན་ཏན་ལྡན་ཁོ་ནར། །དགྱེས་པའི་སྤྱན་ཟུར་གཡོ་བའི་སླད། ༡༠ །ནོར་རྒྱས་ངལ་བའི་དཀའ་ཐུབ་ཁུང་། །བསྟེན་མིན་གང་ཚུལ་ཉིན་མོར་བྱེད། །འཆར་བ་ཙམ་གྱིས་སྔོན་མེད་པའི། །དད་སྤྲོའི་སྟེང་འཐུང་མཆོག་ཏུ་གྲོལ། ༡༡ །སླར་ཡང་ལེགས་མཛད་ནོར་བུའི་རྔ་ཡབ་ནི། །བཟུང་བ་མེད་པར་ཕྱོགས་ཀྱི་མཐར་འགྲོ་བས། །འཇིག་རྟེན་དགེ་ལེགས་བྱེད་པའི་ངོ་མཚར་ཕུལ། །སྲིད་པ་གསུམ་ན་རྟག་ཏུ་གསལ་བ་དང་། ༡༢ །འདིར་ཡང་རྗེས་བརྩེའི་འཇུག་པའི་སྣང་བ་ཡིས། །ཡང་ཡང་དབུགས་འབྱིན་མཛད་དང་ཆབ་གཅིག་པར། །ལེགས་གསུང་བདུད་རྩིའི་དོ་ཤལ་ཡིད་འོང་བས། །ཕན་བདེའི་པདྨོ་རྟག་ཏུ་རྒྱས་མཛོད་ཀྱེ། ༡༣ །སརྦ་དཱ་ཤུ་བྷྲཱུྃ་བྷཱུ་ཡཱ་ཏ།། །།

བཛྲ་པྲ་ཏིཥྛ།

---

^{[མ་དཔེ་གཟིགས་ན་འདིར་གནོན།]}

༈ རིག་པར་སྨྲ་བ་བཛྲ་པྲ་ཏིཥྛ་ལ་ཕུལ་བའི་ཡི་གེ། ཨམོསགུཙྪསིཙཱལཾཀ་སུཀྲྀཏདིཤིསུཏཱཀཎེ། སྡེབ་སྦྱོར་ལག་འགྲོའི་ཁྱེའུའོ། །ཨདྷིརུཙིརཡཤཉཔུལླེ་སཱིབྷུབནསུམུདསྟསྨིཾ། སྲིད་ན་མཚུངས་མེད་དམ་པའི་ཡོན་ཏན་གྱི། །ལེགས་བྱས་ཕྱོགས་ཀྱི་བུ་མོའི་རྣ་ལུང་དུ། །ལྷག་པར་མཛེས་པའི་གྲགས་སྙན་མེ་ཏོག་གིས། །འཇིག་རྟེན་གསུམ་ན་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

རབ་དགའ་བསྐྱེད་པ་དེར། ༡ །ཙནྡན་མངོན་སུམ་མིན་ཀྱང་འཇམ་པོའི་རླུང་། །འབིགས་བྱེད་ཕྱོགས་ནས་འབབས་པས་དེར་ཤེས་བཞིན། །རེ་ཞིག་དུས་ཀྱིས་རྒྱས་བཏབ་འཕེལ་བའི་གཏམ། །སྤྲིང་ཡིག་ཨུཏྤལ་དོག་པ་རྒྱས་འདིས་མཚོན། ༢ །གང་དུ་འཕགས་དང་མཁས་པའི་དོན་མཐུན་གྱིས། །ཡང་ཡང་བསྔགས་པ་བསྒྲུབ་འོས་སྨྲ་བའི་དབང་། །ཁྱོད་གཅིག་ཁོ་ནའི་རྣམ་འབྱེད་ཟེར་གྱིས་འདིར། །རྩོད་པའི་མུན་སྟུག་བསྙིལ་ཚེ་ཉིན་བཞིན་ཐོས། ༣ །དེ་སླད་མེ་སྦྱིན་ལས་སྐྱེས་སྣང་བ་ཡིས། །པུཎྜ་རཱི་ཀའི་སྐྱེད་ཚལ་དར་བབས་ལྟར། །གཏམ་ཙམ་གྱིས་ཀྱང་སྔོན་མེད་དགའ་སྟེར་བ། །དམ་པའི་རྣམ་ཐར་འདྲ་བ་སྲིད་ན་གང་། ༤ །འདིར་གནས་ཤེས་དང་ཤེས་བྱར་མཐའ་གཉིས་ཀྱིས། །རེག་མིན་འཇམ་མགོན་བླ་མའི་བཀའ་དྲིན་གྱིས། །རྟག་པར་དབུགས་འབྱིན་མཛད་པའི་དམན་བདག་ཀྱང་། །བསམ་གཏན་པདྨའི་རྫིང་བུར་དལ་གྱིས་རྩེན། ༥ །སླར་ཡང་བསོད་ནམས་བྱེ་བའི་ཕུང་པོའི་ལྗོན། །ཡུན་འཚོ་རྣམ་དཀར་འབྲས་བུས་དུད་དང་བཅས། །ཡིད་ཀྱི་གདུང་སེལ་ལེགས་གསུང་ཟིལ་དངར་གྱིས། །རབ་དྭང་ལང་ཚོའི་མཛེས་པ་སྦྱིན་མཛོད་ཀྱེ། ༦ །དེ་སྐད་ཉམས་བརྒྱད་བདུད་རྩིས་བཟུང་བའི་ཟླ། །དཔྱོད་ཤེས་བདེ་འབྱུང་གཙུག་ན་ངལ་འཚོ་བ། །དོན་བཅས་ཚིག་སྙན་སྣང་བའི་ཟོལ་གྱིས་དེང་། །བློ་ལྡན་འཆི་བ་མེད་པའི་མདུན་སར་ཆས། ༧ །སརྦ་དཱ་མངྒ་ལཾ།། །།

མཁས་བཙུན་དམ་པ་བླ་མ་པདྨ།

---

^{[མ་དཔེ་གཟིགས་ན་འདིར་གནོན།]}

༈ མཁས་བཙུན་བླ་མ་དམ་པ་པདྨའི་མཚན་ཅན་ལ་ཕུལ་བའི་མཆིད་ལན། ལེགས་བྱས་སྣང་བ་མཆོག་གིས་འཇིག་རྟེན་ན། །རྒུད་པའི་མུན་པ་སེལ་བའི་བདུད་རྩིའི་འོད། །ཟླ་ཤེལ་གཉིས་པ་མ་འཚལ་འཕགས་རྣམས་དང་། །མཁས་ཀུན་གཅིག་ཏུ་བསྔགས་པའི་མདུན་ས་དེར། ༡ །དང་པོའི་དུས་སུ་སོན་པའི་གཞན་གསོས་ཀྱིས། །ཡང་ཡང་ཤིས་པ་བསྒྲུབས་པས་མཚོན་མིན་པའི། །འཕྲིན་ཡིག་ཚངས་པའི་སྲས་མོའི་རྒྱུད་མང་དབྱངས། །ཐོས་པའི་རྣ་ལུང་རིན་ཐང་ཆེན་པོར་བྱས། ༢ །གང་ན་གྲངས་མེད་བསྐལ་པར་ལེགས་སྤྱད་ཀྱིས། །འདུ་འགོད་ཕྲག་བརྒྱས་བསྐྲུན་པའི་ཀོ་སྐུ་བྷ། །འཚོ་གཞེས་གཟི་བྱིན་འབར་བས་སྲིད་དང་ཞིའི། །གདུང་བ་མཐའ་དག་བསྙིལ་བའི་འཛུམ་དཀར་གཡོ། ༣ །བསླབ་དང་གྲོལ་བའི་རྐང་སྟེགས་མཐོར་འཛེགས་ཤིང་། །རིམ་གཉིས་བ་དན་དཀར་པོ་བསྒྲེང་བའི་མོད། །སྣང་གསུམ་འཕོ་བའི་ཕྱོགས་ལས་རྣམ་རྒྱལ་བའི། །ཟུང་འཇུག་གོ་འཕང་བརྙེས་པའི་གཏམ་དེ་སྙན། ༤ །འདི་ན་ཡེ་ཤེས་མེ་ལོང་འཆང་བ་དང་། །གཉིས་མིན་བླ་མའི་ཐུགས་རྗེ་ནོར་བུའི་གདུགས། །ལྷར་བཅས་བླ་ན་འཁོར་བའི་གྲིབ་བསིལ་དུ། །མང་ཐོས་ཟིལ་དངར་བཏུང་བའི་སྐལ་བཟང་ཐོབ། ༥ །སླད་མའི་དུས་ཀྱང་ཉིན་མོར་བྱེད་པ་དང་། །ཟླ་བའི་བགྲོད་

---

^{[མ་དཔེ་གཟིགས་ན་འདིར་གནོན།]}

པ་གཞར་ཡང་མི་གཡོ་བས། །ཕྲ་རབ་རྡུལ་ལས་རིང་འདས་མཚན་དཔེ་དང་། །གཉིས་སུ་མེད་པར་རྟག་པའི་མཆོག་བརྙེས་བཞིན། །གདུང་བའི་རིག་པ་འཇིལ་ལ་ག་བུར་དང་། །འདོད་སྟེར་དཔག་བསམ་གཞན་གྱིས་བསྐྲུན་མིན་པའི། །མཁྱེན་བརྩེའི་འཇུག་པ་གཟུགས་ཅན་བཞིན་སྣང་བའི། །དབུགས་འབྱིན་ཆེན་པོའི་དགའ་སྟོན་སྔར་བཞིན་སྩོལ། ༨ །ཤུབྷྲཱུྃ།། །།

ཆབ་ཤོག མཚན་འབུལ། ལེགས་འབུལ་སོགས།

---

^{[མ་དཔེ་གཟིགས་ན་འདིར་གནོན།]}

༈ སཾགྷཱན་གུལོ༔ མཚོག བཛཱཙཱརླབིབྷུཔྤཤཱིལནེ༔ ཙྪནཤུདྡྷདཱིབྷོ། ཤྲིབཱརིཔཊུསིདྡྷཙཱསམེ ལྕེལོཀྱེའུསུསཱདདཱིཔྱཧཱུྃ། མཐའ་ཀླས་རིགས་དང་དཀྱིལ་འཁོར་ཐམས་ཅད་ཀྱི། །ཁྱབ་བདག་རྡོ་རྗེའི་སློབ་དཔོན་མཆོག་གི་ཚུལ། །མཚུངས་མེད་མཁས་ཤིང་ཤིན་ཏུ་གྲུབ་པའི་དཔྱིད། །འཇིག་རྟེན་གསུམ་ན་རྟག་ཏུ་སྣང་གྱུར་ཅིག །ཅེས་དགེ་ལེགས་སུ་བྱ་བའི་ཚིག་གི་པུཎྜ་རཱི་ཀ་ཅུང་ཟད་འཐོར་བས་ཡེ་ཤེས་གཟིགས་པ་དམ་པའི་འབབ་སྟེགས་མཛེས་པར་བྱས་ནས། གང་གི་ཚེ་ཐོག་མ་མ་མཆིས་པའི་དུས་ནས་སྤངས་པ་དང་རྟོགས་པའི་ཡོན་ཏན་མཐའ་དག་ལ་མངའ་དབང་བསྒྱུར་བའི་རིགས་ཐམས་ཅད་ཀྱི་ཁྱབ་བྱེད་རྡོ་རྗེ་སྙེམས་མའི་བདག་པོའི་ངོ་བོར་ཡོངས་སུ་གྲུབ་པ་ལས་གཞན་དུ་སྐྱེ་བ་དང་འཕོ་བའི་སྣང་ཚུལ་གྱི་སྤྲོས་པ་གཞར་ཡང་མ་དམིགས་བཞིན་དུ། འོག་མིན་ཆེན་པོའི་ཞིང་དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

རིགས་སུ་སྤྲོ་བ་དང་བསྡུ་བའི་སྒྱུ་འཕྲུལ་དྲྭ་བའི་མིག་འཕྲུལ་ཅིར་ཡང་སྟོན་ཅིང་། དེ་ལས་ཀྱང་མཐའ་ཀླས་པའི་ཡིད་ཅན་བྱེ་བ་སྙེད་ཀྱི་ཁམས་དང་། དབང་པོ་དང་། བག་ལ་ཉལ་གྱི་རིམ་པའི་ཆུ་གཏེར་དང་རྗེས་སུ་མཐུན་པར། ཚངས་པ་དང་། ཁྱབ་འཇུག་དང་། དྲག་པོ་དང་། ཆགས་བྲལ་གྱི་རྣམ་པ་ཅན་དང་། རིག་མའི་སྐྱེས་བུའི་འདོད་ཡོན་ལ་ལོངས་སྤྱོད་པ་སོགས་མཚན་དང་པ་བསམ་གྱིས་མི་ཁྱབ་པ་དུས་གཅིག་ཅར་དུ་སྟོན་པར་མཛད་པ་ལས། དེང་འདིར་རི་ཁ་བ་ཅན་གྱི་ལྗོངས་སུ་ཡོངས་རྫོགས་བསྟན་པའི་ངེས་གསང་འགྲེལ་པ་ལ་འཇམ་དཔལ་གཞོན་ནུར་གྱུར་པའི་བློ་གྲོས་དང་རྣམ་དབྱེར་མི་ཕྱེད་པའི་རྗེ་བཙུན་ས་སྐྱ་པ་ཡབ་སྲས་ཀྱི་བསྟན་པའི་སྣང་བྱེད། རྒྱལ་བ་རྡོ་རྗེ་འཆང་ཀུན་དགའ་བཟང་པོའི་ཆོས་ཀྱི་ཁྲི་ལ་འཁོར་ལོས་བསྒྱུར་བའི་རྡོ་རྗེའི་སློབ་དཔོན་ཆེན་པོ། རིས་སུ་མ་ཆད་པའི་བསྟན་འགྲོ་ཡོངས་ལ་ཕན་བདེའི་འདོད་དགུ་གཅིག་ཅར་དུ་འཇོ་བའི་བདག་ཉིད། བྱེ་བྲག་ཏུ་ཁོ་བོ་ཅག་ལ་བཀའ་དྲིན་སྲིད་ན་མཚུངས་པ་མ་མཆིས་པའི་མཁན་ཆེན་བླ་མ་ཐམས་ཅད་མཁྱེན་ཅིང་གཟིགས་པ་ཆེན་པོ་གང་ཉིད་ནས་གུས་ཕྲན་པར་སྐྱེ་བ་དང་ཚེ་རབས་ཀྱི་ཕྲེང་བར་ཐུགས་རྗེ་ཆེན་པོས་ཁྱབ་པར་མ་ཟད། ད་ལན་ཡང་བཅོམ་ལྡན་འདས་ཐམས་ཅད་རིག་པའི་ཕྱག་རྒྱ་བཞིས་འབྲེལ་ཚད་ཡིད་ཅན་རྒྱ་མཚོ་སྐུ་བཞིའི་ངོ་བོར་སྨིན་ཅིང་

---

^{[མ་དཔེ་གཟིགས་ན་འདིར་གནོན།]}

སྦྱངས་པའི་བཀའ་དྲིན་གསོ་བ་མཚོན། ལྷག་པར་ཡོངས་རྫོགས་བསྟན་པའི་མངའ་བདག་ཆེན་པོར་འཇིགས་མེད་སེང་གེས་མཚན་པའི་ཆོས་ཀྱི་ཁྲི་འཕང་མཐོན་པོར། སྐུ་ལྷམ་མེ། གསུང་ལྷང་ངེ་། ཐུགས་ལྷན་ནེར་ཇི་སྲིད་བསྐལ་པ་རྒྱ་མཚོར་འཚོ་ཞིང་གཞེས་ལ་ཆོས་ཀྱང་སྟོན་པར་དངོས་པོ་ཀུན་གྱིས་བཏུད་དེ་གསོལ་བ་འདེབས་པའི་སླད་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་ཀུན་ཏུ་བཟང་པོའི་༧ མཆོད་སྤྲིན་ལྟ་བུར་བློས་སྤྲུལ་ཏེ་ཕུལ་བའི་མཎྜལ་རྟེན་མཚོན་བྱེད་ཙམ་དུ། བཀྲ་ཤིས་པའི་ལྷ་གོས་རབ་དཀར་སོགས།། ༈ །། ཨམཱརིཉྩེསཾམུཉྩིབཊིཤ རམཱརསིདྡྷམྱསུཔདྨདཱནེ༔ ཨིནྡྲབཛེ། ཨམཱརནཱཐམྱསུབེདརཱནེ ཝཱརམཱརནཏུསྱསུལལཀྐདེཧི། འཆི་མེད་བདུད་རྩིའི་སྣང་བས་འཇིག་རྟེན་ན། །འཆི་མེད་གྲུབ་པའི་པདྨོ་མཛེས་སྟེར་བ། །འཆི་མེད་མགོན་པོའི་ཡེ་ཤེས་གཟིགས་པ་ཡིས། །འཆི་མེད་རྟག་པའི་དགེ་མཚན་སྦྱིན་གྱུར་ཅིག ༡ །ཨེ་མ་གཟོད་ནས་ཞི་བའི་ནགས་ཀླུང་དུ། །སྙོམས་འཇུག་ཟིལ་དངར་བཏུང་བའི་མནྡཱ་ར། །བྱང་ཆུབ་སྙིང་པོར་འཁྲུངས་པའི་གྲགས་དཀར་གྱིས། །སྲིད་ན་ཕན་བདེའི་དཔལ་གྱིས་ལྕི་བར་མཛད། །དེ་ཚེ་རྡོ་རྗེའི་རིགས་ཀྱི་སཱ་ལའི་ཤིང་། །གསར་དུ་དུད་པ་ལས་འོངས་རྒྱལ་བའི་སྲས། །དང་པོར་སྣང་བ་ཙམ་གྱིས་རྒུད་པའི་མུན། །མཐའ་དག་ཉིན་བཞིན་འཕྲོག་པའི་ངོ་མཚར་སྟོན། །མཁས་པའི་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

ཚོགས་རབ་བྱེ་བས་ཕྱག་བྱས་ཤིང་། །ནང་གི་རྣལ་འབྱོར་གྲུབ་པ་ཇི་སྙེད་ཀྱིས། །རྩོད་དུས་ཀུན་མཁྱེན་གཉིས་པར་བསྔགས་པའི་དབྱངས། །འཇིག་རྟེན་གསུམ་གྱི་ཕ་རོལ་ཉིད་དུ་སྒྲོགས། །དེ་སླད་གང་ཚུལ་ཕྲ་མོ་དྭང་པའི་ཡིད། །ནོར་བུའི་མེ་ལོང་ངོགས་སུ་འཆར་བའི་མོད། །དད་པས་བརླན་པའི་སེམས་ཀྱི་ཨུཏྤ་ལ། །སྤྲོ་དགའི་ཚོན་རིས་བརྒྱ་ཕྲག་སླར་ཡང་འཛིན། །སླད་མའི་ཆར་ཡང་། །ཨེ་མ་འཕགས་དང་མཁས་པའི་ཚོགས་རྣམས་ཀྱི། །གཙུག་ཏོར་ནོར་བུའི་ཁང་བུར་ངལ་གསོ་བའི། །ཞབས་སེན་ཉི་མ་ཕན་བདེའི་འོད་དུ་འབར། །སྲིད་དང་ཞི་བའི་སྙིང་པོར་འཚོ་གཞེས་ཤིང་། །བདག་ཀྱང་བྱང་ཆུབ་བར་དུ་ཡང་དང་ཡང་། །ཐུགས་རྗེའི་དཔག་བསམ་སར་པའི་གྲིབ་བསིལ་དུ། །མངོན་པར་དབུགས་འབྱིན་ཐོབ་པའི་དགེ་མཚན་གྱིས། །དོན་གཉིས་འདོད་དགུ་ཡིད་བཞིན་འཇོ་བར་མཛོད། །བཀྲ་ཤིས་རྟག་པ་དམ་པའི་སྣང་བ་ནི། །ས་གསུམ་སྙན་པར་གྲགས་པའི་བདུད་རྩིར་བཅས། །ཕུན་ཚོགས་ཀུན་དགའི་ཟླ་བ་གསར་པ་ཡིས། །ལྷར་བཅས་ཤིས་པའི་དུས་སྟོན་རྒྱས་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །ཨཱནནྟཱཀུལམཎྜལ། མཐིབིབྷབེལཊཱ། ཙྪནུབཱཀྐི། ཏྲེལོཀྱིསོཁྱཔཱུརླགྲ། ཛཱིབཆུབཛྲཔཏྤནྣཾ།། མཐའ་ཀླས་རིགས་དང་དཀྱིལ་འཁོར་ཐམས་ཅད་ཀྱི། །ཁྱབ་བདག་འཇམ་པའི་དཔལ་གྱི་རྣམ་རོལ་ཅན། །འཇིག་རྟེན་གསུམ་གྱི་ཕན་

---

^{[མ་དཔེ་གཟིགས་ན་འདིར་གནོན།]}

བདེའི་ཉི་མ་མཆོག །ཞབས་པད་རྡོ་རྗེའི་ཁམས་སུ་འཚོ་གཞེས་གསོལ། །ཞེས་སོགས་ཤིས་པར་བྱ་བའི་ཚིག་གི་མདུན་བསུས་ཏེ། སོགས། སླད་མའི་ཆར་ཡང་། སྲས་བཅས་རྒྱལ་བའི་ཡེ་ཤེས་སྐུ་ཅན་འཇམ་མགོན་བླ་མ་ཡབ་སྲས་རྣམས། །ཞབས་པད་སྲིད་མཐའི་བར་དུ་བརྟན་ཅིང་ཐུགས་རྗེའི་ཕྲིན་ལས་རྨད་བྱུང་བས། །ཡོངས་རྫོགས་བསྟན་དང་འགྲོ་བའི་དགེ་མཚན་རྫོགས་ལྡན་གསར་བའི་དུས་སྟོན་དང་། །ཕུན་ཚོགས་ཤིས་པའི་སྣང་བ་གསར་བས་འཇིག་རྟེན་གསུམ་ན་མཛེས་གྱུར་ཅིག། ༈ །། ཡིཙྪདིཡྻཔཉྩ ། ཀཱིཔདྨཔནཔྲཝནྟནེ༔ ཙྪནཤུདྡྷསྱཱདཱིསྟེ། ཏྲེལོཀྱེགཧིཏཾསུཁསྦིཏཱ། པུརྦཤཱསནསཱུརླ་ཛཱིཡཏྭཾ། གང་དུ་འཆར་བས་སྲིད་དང་ཞི་བ་ཡི། །ཕུན་ཚོགས་པདྨོའི་ནགས་ཀླུང་དར་བབས་པས། །འཇིག་རྟེན་གསུམ་གྱི་ཕན་བདེའི་གཞི་གཅིག་པུ། །སྔོན་མེད་བསྟན་པའི་ཉི་མ་རྒྱལ་གྱུར་ཅིག །ཅེས་དགེ་ལེགས་སུ་བྱ་བའི་ཚིག་གི་མདུན་བདར་ཏེ། སོགས། སླད་མའི་ཆར་ཡང་། །མཐའ་ཀླས་བསྟན་དང་འགྲོ་བའི་གཞི་གཅིག་པུ། །མཆོག་ཁྱོད་གསང་གསུམ་བསྐལ་བརྒྱར་འཚོ་གཞེས་ཤིང་། །ཕྲིན་ལས་སྣང་བ་དམ་པས་འཇིག་རྟེན་ན། །ཕན་བདེའི་ངལ་འཚོ་རྟག་ཏུ་རྒྱས་གྱུར་ཅིག །སརྦ་དཱ་ཤྲཱི་ཡོ་བྷ་བ་ཏུ།། ༈ །། སཛིཡཔུཎྜིག སིདྡྷིམཱིའིཏནི།ཏི། ཛཱིནཱབྷཝཾ། ལཨཱཡུསུདྡྷེནཾ བྷཱུཏྟ༧རུབོརཔོ། སྲས་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

བཅས་རྒྱལ་བ་ཐམས་ཅད་ཀྱི། །འཆི་མེད་གྲུབ་པའི་བདུད་རྩི་ཡིས། །ཕུན་ཚོགས་ཚེ་དང་ཡེ་ཤེས་ཀྱི། །པདྨོ་མཆོག་ཏུ་རྒྱས་པར་མཛོད། །སླར་ཡང་། མཚུངས་མེད་རྡོ་རྗེ་འཛིན་པ་མཆོག །འཚོ་གཞེས་བསྐལ་བརྒྱར་བརྟན་པ་དང་། །བྱམས་བརྩེའི་འཇུག་པས་བྱང་ཆུབ་པར། །ཕན་བདེའི་ཨུཏྤལ་རྒྱས་མཛད་གསོལ། །ཤུ་བྷྲཱུྃ།། ༈ །། པུཎྜིཝུམནོ་ཝིདྡྷགི་གནུབྷེ། ཙྪནྟབསྒྲ། བཝཛཱཨཱཡཀིརཱི རྗེ ས ། བསོད་ནམས་རྒྱ་མཚོར་ཡེ་ཤེས་ནོར་བུའི་གྲུས། གཞན་ཕྱིར་བྱང་ཆུབ་སྙིང་པོའི་མཐར་སོན་པ། །ཐམས་ཅད་མཁྱེན་ཅེས་གྲགས་པའི་གཟི་འབར་བས། །རྟག་པ་དམ་པའི་སྣང་བ་སྦྱིན་གྱུར་ཅིག ༡ །ཤིན་ཏུ་ཞི་བའི་ནགས་ཀྱི་སྨན་ལྗོངས་གྲུབ་རིགས་འཆི་མེད་འདུན་ས་ན། །འཇིག་རྟེན་ཕན་མཛད་བདུད་རྩིའི་ཟེར་ལྡན་ཟླ་བ་ནོར་བུའི་ཕུང་པོ་དངོས། །ལེགས་བྱས་དཔག་ཡས་ཤེས་རབ་དྲི་མེད་སྙིང་རྗེའི་གཞན་དབང་ལ་ཆགས་པ། །གང་དུ་སྣང་བའི་དགེ་མཚན་ཁོ་ནས་ཐུབ་བསྟན་ལང་ཚོའི་འཛུམ་དཀར་དགོད། ༢ །ཨེ་མ་དེ་ལྟའི་ཡོན་ཏན་རྗེས་དྲན་ཡང་ཡང་གོམས་པའི་ཐང་ཀ་ན། །གནང་སྐྱེས་མཐོ་བའི་ལེགས་གསུང་ཟིལ་དངར་ལན་གཅིག་མིན་པར་དྲན་པའི་མོད། །ཆུ་དང་བཅས་པའི་ཆར་སྤྲིན་མཐོན་ཀས་རྨ་བྱ་མགུ་བ་བསྐྱེད་པ་བཞིན། །གུས་སྤྲོའི་པུཎྜ་རཱི་ཀའི་དགའ་ཚལ་ཉིན་བཞིན་དར་བའི་མཛེས་པ་བཟུང་། ༣ ། ༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

འདི་ན་རྨོངས་དང་མ་རིག་པ། །མཚུངས་པར་ལྡན་པའི་གཞན་དབང་གིས། །ཡུན་རིང་གདུང་བའི་དངོས་ངན་ཀྱང་། །འཚོ་བའི་འདུ་བྱེད་མ་ཉམས་ཙམ། ༤ །སླད་མའི་དུས་ན་སྡུག་བསྔལ་རླབས་ལྡན་སྲིད་མཚོ་སྒྲོལ་བའི་གདོས་པོ་ཆེ། །བཤད་དང་སྒྲུབ་པའི་བ་དན་བསྒྲེང་མཁས་བསྟན་འཛིན་དེད་དཔོན་བྱེ་བའི་མཆོག །བསྐལ་བརྒྱར་འཚོ་གཞེས་གྲུབ་པའི་སྤྲིང་ཡིག་ཁོར་ཡུག་རི་བོའི་འགྲམ་བཀོད་བཞིན། །འདིར་ཡང་ཡེ་ཤེས་གཟིགས་པའི་སྣང་བས་བྱང་ཆུབ་བར་དུ་དགེ་མཛད་གསོལ། ༥ །སརྦ་སུ་ཤུ་བྷྲཱུྃ་བྷ་ཡེཏྲ།། ༈ །།བསོད་ནམས་ཆུ་གཏེར་ལས་སྐྱེས་ཤིང་། །དབང་ཕྱུག་དམ་པའི་འབྲས་འབར་བ། །འཇམ་དབྱངས་མཁྱེན་པའི་དཔག་བསམ་གྱིས། །གཞན་ཕན་འདོད་དགུ་ཁྱོད་ལ་སྩོལ། ༡ །གང་ན་ལེགས་བྱས་རྣམ་མང་པོས། །བྱེད་པོས་བསྐྲུན་པའི་འཚོ་ཁམས་ནི། །རྣམ་པར་དཀར་བའི་སྤྱོད་ཚུལ་དང་། །ལྷན་ཅིག་དགེ་བར་མཆིས་སམ་སྙམ། ༢ །དེ་སླད་སྤྲོ་བའི་ཡིད་དབང་ནི། །པདྨོ་ལྟ་བུར་རྒྱས་པ་ཡི། །དགེ་སློང་རྣལ་འབྱོར་སྤྱོད་པ་ཡང་། །མཆོག་གསུམ་ཐུགས་རྗེས་བདེ་བར་མཆིས། ༣ །སླད་མའི་ཆར་ཡང་བསྔགས་འོས་ཀྱི། །བདུད་རྩིའི་དོ་ཤལ་འཛིན་བཟོད་པ། །དལ་རྟེན་ཨུཏྤལ་གཞོན་ནུ་ནི། །ཉེར་འཚེའི་གདུང་བ་དང་བྲལ་ཞིང་། ༤ །ལྷག་པར་རིག་པའི་གཞུང་ལུགས་ལ། །ཐོས་བསམ་བརྩོན་འགྲུས་

---

^{[མ་དཔེ་གཟིགས་ན་འདིར་གནོན།]}

མི་དམན་པས། །རང་གཞན་དོན་གཉིས་འགྲུབ་པ་ཡི། །དགེ་མཚན་རྟག་ཏུ་རྫོགས་པར་སྨོན། ༥ །སརྦ་དཱ་ཤུ་བྷྲཱུྃ།། ༈ །།ཚེ་བསོད་དཔལ་འབྱོར་དབང་བཅུའི་ཡོན་ཏན་སོགས། །དོན་གཉིས་ལྷུན་གྱིས་གྲུབ་པའི་དཔལ་སྟེར་བ། འཇམ་དབྱངས་སྨྲ་བའི་ཉི་མའི་ཡེ་ཤེས་ཀྱིས། །ཁྱེད་ལ་དགེ་ལེགས་རྟག་ཏུ་སྦྱིན་གྱུར་ཅིག ༡ །ཨེ་མ་རྣམ་དཀར་དཔྱིད་ཀྱི་རླབས་འཐུང་བའི། །ལང་ཚོ་པདྨོ་ཉེར་འཚེ་བྲལ་བ་ནས། །འཕྲིན་ཡིག་སྦྲང་རྩིའི་ཐིགས་པ་འདིར་ལྷུང་བས། །ཡིད་ཀྱི་བུང་བ་རབ་དགའི་དཔལ་ལ་སྦྱར། ༢ །འདི་ན་མཁས་དང་གྲུབ་པའི་ཡོངས་འཛིན་ནི། །རྣམ་མང་ནོར་བུའི་གདུགས་དཀར་ལ་འཆེལ་བས། །ཉེར་འཚེའི་གདུང་བ་མཐའ་དག་རྒྱང་བསྲིངས་ནས། །བཤད་དང་སྒྲུབ་པའི་དུས་སྟོན་སྤྱོད་བཞིན་མཆིས། ༣ །སླད་མའི་ཆར་ཡང་འཁོར་བའི་ཆུ་གཏེར་གྱི། །ཕ་རོལ་སོན་བྱེད་དལ་རྟེན་རིན་ཆེན་གྲུ། །ཡུན་དུ་བརྟན་པའི་ཐབས་ཚུལ་མི་གཡེལ་ངོས། །གཙུག་ལག་གཞུང་བརྒྱའི་འབྱོར་པས་མངོན་མཐོར་མཛོད། ༈ །དེ་སྐད་ཀུན་མཁྱེན་གཉིས་པ་ཨེ་ཝཾ་པའི། །བྱིན་རླབས་ཟིལ་དངར་སྣང་བའི་དགའ་ཚལ་ནས། །འཇམ་དབྱངས་བླ་མ་མཁྱེན་བརྩེའི་འཇུག་པ་ཡིས། །རྟག་པར་འཚོ་བ་གང་དེས་མགྲིན་ལས་སྐྱེས། ༥ །སརྦ་དཱ་མངྒ་ལཾ།། ༈ །།ཡོན་ཏན་མཐའ་ཀླས་རིན་ཆེན་གྱིས། །ས་གསུམ་དབུལ་བའི་གདུང་འཕྲོག་

---

^{[མ་དཔེ་གཟིགས་ན་འདིར་གནོན།]}

ཅིང་། །ཕུན་ཚོགས་ཕན་བདེའི་དཔལ་སྦྱིན་པ། །དཀོན་མཆོག་གསུམ་གྱིས་ཁྱོད་ལ་སྲུངས། ༡ །མཐོ་རིས་ན་ནི་དཔག་བསམ་དང་། །ས་འདིར་ཆོས་མཐུན་དལ་འབྱོར་རྟེན། །འདོད་དགུ་འཇོ་བར་མཚུངས་མོད་ཀྱང་། །ཐར་ལམ་སྣང་བས་ཁྱད་པར་བྱས། ༢ །དེ་སླད་ཆོས་སྤྱོད་རྣམ་པ་བཅུའི། །སྙིང་པོས་བཟུང་བའི་འཚོ་ཁམས་ནི། །བསམ་གཏན་མལ་དུ་བདེ་སྙམ་པས། །སྤྲོ་དགའི་མེ་ཏོག་འཛུམ་པར་གྱུར། ༣ །འདི་ན་རིས་མེད་མཁས་གྲུབ་ཀྱི། །ཡོངས་འཛིན་དུ་མའི་བྱིན་རླབས་མཐུས། །སྒོ་གསུམ་བདེ་ཞིང་བཤད་སྒྲུབ་ཀྱི། །བདུད་རྩིས་རྟག་ཏུ་འཚོ་བཞིན་མཆིས། ༤ །སླད་ནས་རིང་པོར་འཚོ་བ་དང་། །འཕགས་པ་དགྱེས་པའི་ཚུལ་ཁྲིམས་དང་། །ཆོས་རབ་རྣམ་འབྱེད་ཤེས་རབ་སྟེ། །གསུམ་པོ་ལྷན་ཅིག་འཕེལ་བར་སྨོན། ༥ །སརྦ་ཤྲཱི་བྷ་ཡཱ་ཏ།། ༈ །།ཡོན་ཏན་མཐའ་ཀླས་བདུད་རྩིའི་སྣང་བ་དང་། །ཐུགས་རྗེའི་འཇུག་པས་ས་གསུམ་དགེ་མཛད་པ། །ཚེ་མཐའ་ཡས་པའི་ཡེ་ཤེས་གཟིགས་པ་ཡིས། །ཕུན་ཚོགས་ཤིས་དགུའི་དངོས་ཀུན་ཁྱེད་ལ་སྩོལ། །འཆི་མེད་ཚལ་དུ་དཔག་བསམ་རྐང་འཐུང་དང་། །ས་འདིར་འདོད་པ་འཇོ་བའི་རིན་ཆེན་བཞིན། །བསྔགས་འོས་གཏམ་གྱི་འབྱུང་གནས་གཅིག་གྱུར་པ། །མཛེས་སྐུའི་དཀྱིལ་འཁོར་ཉེར་འཚེ་བྲལ་བ་ནས། །འདི་ན་དགྱེས་བརྩེའི་གཟིགས་པ་ཡོལ་མེད་པའི། །

---

^{[མ་དཔེ་གཟིགས་ན་འདིར་གནོན།]}

གསུང་གི་ཟིལ་དངར་ལྷུག་པར་སྩལ་བ་དང་། །སོ་རུ་ས་མ་ཐུར་སྲང་བཅུ་ཕྲག་བཅས། །ཐོབ་པས་སྤྲོ་དགའི་པདྨོ་ཅིར་ཡང་འཛུམ། །གང་ན་རིས་མེད་མཁས་གྲུབ་དུ་མ་ཡིས། །བྱིན་རླབས་ས་མཐར་རྒྱུ་བའི་སློང་མོ་པ། །མཁན་ཆེན་བླ་མའི་ཐུགས་རྗེའི་གདུགས་དཀར་པོས། །ཉེར་འཚེའི་གདུང་བར་དབུགས་འབྱིན་སྩལ་བཞིན་མཆིས། །སླད་མའི་ཆར་ཡང་མངོན་མཐོ་ངེས་ལེགས་ཀྱི། །ཡོན་ཏན་ནོར་བུའི་དོ་ཤལ་འཛིན་བཟོད་པ། །ཕུན་ཚོགས་རིང་འཚོའི་ཆུ་གཏེར་རྒྱས་པ་དང་། །འདིར་ཡང་དགྱེས་པའི་འཛུམ་དཀར་ལྷུག་པར་སྟོན། །སརྦ་དཱ་ཤུ་བྷ་མ་སྟུ།། ༈ །།བྲལ་དང་སྨིན་པའི་ཡོན་ཏན་གྱི། །བདུད་རྩིའི་དོ་ཤལ་འཛིན་བཟོད་པ། །འཕགས་རྣམས་ཡེ་ཤེས་གཟིགས་པ་ཡིས། །ཁྱེད་ལ་འཆི་མེད་སྦྱིན་གྱུར་ཅིག ༡ །གང་དུ་སྣང་བས་སིམ་སྟེར་བའི། །ཟླ་བ་ནོར་བུ་གཞན་ཡིན་ཏེ། །ཕན་བདེའི་སྙིང་པོས་རབ་མཛེས་པའི། །བསྔགས་འོས་ཚུལ་དེར་འགྲན་ནུས་སུ། ༢ །དེ་བས་འཚོ་གཞེས་དགེ་བ་དང་། །རྣམ་དཀར་སྤྱོད་ཚུལ་རྒྱས་པ་དང་། །འཕྲིན་ཡིག་རྟེན་བཅས་འདིར་སོན་པས། །ཡིད་ནི་རབ་དགའི་དཔལ་ལ་སྦྱར། ༣ ། འདི་ན་ཁྱབ་བདག་རྡོ་རྗེ་འཆང་། །མཁན་ཆེན་བླ་མའི་ཐུགས་རྗེའི་མཐུས། །འཚོ་ཁམས་བདེ་ཞིང་བཤད་སྒྲུབ་ཀྱི། །གཟུགས་བརྙན་ཙམ་ལ་སྤྱོད་བཞིན་མཆིས། ༤ །སླད་ནས་དོན་གཉིས་འདོད་དགུའི་ཆར། །

---

^{[མ་དཔེ་གཟིགས་ན་འདིར་གནོན།]}

འབེབས་མཛད་མཛེས་སྐུའི་དཔག་བསམ་ནི། །ཡུན་འཚོའི་དགེ་མཚན་སྣང་བ་དང་། །འདིར་ཡང་རྗེས་བརྩེས་རྟག་ཏུ་སྐྱོངས། །ས་དཱ་སུ་ཤྲཱི་ཡནྟུ།། །།

ཁྱབ་བདག་རྡོ་རྗེ་འཆང་རིན་ཆེན་བློ་གསལ་བསྟན་སྐྱོང་དཔལ་བཟང་པོ་ཞབས་པད་བརྟན་པར་གསོལ་བ་འདེབས་པའི་གཏམ་འཆི་མེད་བདུད་རྩིའི་སྣང་བ།

---

^{[མ་དཔེ་གཟིགས་ན་འདིར་གནོན།]}

༈ ཁྱབ་བདག་རྡོ་རྗེ་འཆང་རིན་ཆེན་བློ་གསལ་བསྟན་སྐྱོང་དཔལ་བཟང་པོ་ཞབས་པད་བརྟན་པར་གསོལ་བ་འདེབས་པའི་གཏམ་འཆི་མེད་བདུད་རྩིའི་སྣང་བ་ཞེས་བྱ་བ། ཨོཾ་སྭསྟི་སིདྡྷཾ། འཆི་མེད་སོ་སོར་རྟོགས་པའི་ཡེ་ཤེས་མཚན་དཔེའི་སྐུར་སྣང་ཚེ་མཐའ་༧ ཡས། །འཆི་མེད་འོད་གསལ་གཉུག་མའི་རང་གཟུགས་རྒྱལ་ཀུན་སྐྱེད་ཡུམ་རྣམ་རྒྱལ་མ། །འཆི་མེད་ཚེ་དང་བློ་གྲོས་མཆོག་སྩོལ་རྗེ་བཙུན་ཡིད་བཞིན་འཁོར་ལོ་སོགས། །འཆི་མེད་གྲུབ་པའི་སྲས་བཅས་རྒྱལ་བས་དེང་འདིར་ཤིས་པའི་མེ་ཏོག་སྩོལ། །ཅེས་དགེ་ལེགས་སུ་བྱ་བའི་ཚིག་གིས་མདུན་བསུས་ཏེ། དེང་གི་ཆར་ཡང་གནས་ཕུན་སུམ་ཚོགས་པ་འཛམ་གླིང་ལས་ཀྱི་ས་པའི་བྱེ་བྲག་བྱང་ཕྱོགས་ཁ་བ་ཅན་གྱི་ཡུལ་ལྗོངས་ལས། གཡས་རུ་གཙང་གི་ནོར་འཛིན་གྱི་ཐིག་ལེ་མཁས་དང་གྲུབ་པའི་སྐྱེས་བུ་དུ་མས་བྱིན་གྱིས་བརླབས་པའི་བར་འདིར་དམིགས་བསལ་གྱི་མཚན་འཛུགས། ཆོས་གྲྭ་ཆེན་པོ་འདི་ཉིད་དུ། སྟོན་པ་ཕུན་སུམ་ཚོགས་ཚུ པ། རིགས་དང་དཀྱིལ་འཁོར་ཀུན་གྱི་ཁྱབ་བདག །ཡོངས་རྫོགས་བསྟན་པ་རྒྱ་མཚོའི་ཉི་མ། ཁམས་གསུམ་འགྲོ་བ་ཡོངས་ཀྱི་སྐྱབས་གཅིག་མཚན་བརྗོད་པར་དཀའ་བ། དོན་གྱི་སླད་དུ་མཚན་ནས་སྨོས་ཏེ་

---

^{[མ་དཔེ་གཟིགས་ན་འདིར་གནོན།]}

རྡོ་རྗེ་འཆང་རིན་ཆེན་བློ་གསལ་བསྟན་སྐྱོང་དཔལ་བཟང་པོའི་ཞལ་སྔ་ནས་ཀྱིས། འཁོར་ཕུན་སུམ་ཚོགས་པ་རིག་པ་དང་གྲོལ་བའི་ཡོན་ཏན་རྨད་དུ་བྱུང་བའི་འཕགས་སྐྱེས་འདུས་པ་རྒྱ་མཚོའི་ཚོགས་ལ། ཆོས་ཕུན་སུམ་ཚོགས་པ་གཉིས་སུ་མེད་པའི་རྒྱུད་ཀྱི་རྒྱལ་པོ་ཆེན་པོ་དཔལ་དུས་ཀྱི་འཁོར་ལོ་སོགས་དམིགས་བསལ་ཁ་བསྒྱུར་ཤེས་པར་བྱ། ཟབ་རྒྱས་གདམས་པའི་བདུད་རྩིས་སྐལ་བཟང་ཡིད་ཀྱི་པདྨོ་ཅིར་ཡང་རྒྱས་པར་མཛད་པའི་དུས་ཕུན་སུམ་ཚོགས་པའི་སྐབས་འདིར་ངོས་ཅག་འདུས་པ་ཀུན་གྱིས་སྒོ་གསུམ་གུས་པ་ཆེན་པོས་རྩེ་གཅིག་ཏུ་གསོལ་བ་འདེབས་རྒྱུའི་སྙིང་པོར། མགོན་པོ་གང་ཉིད་ཐོག་མ་མ་མཆིས་པའི་དུས་ནས་གནས་སྐབས་བཞིའི་བག་ཆགས་ཐམས་ཅད་ཨེ་ཝཾ་མཱ་ཡའི་ཕྱག་རྒྱར་བསྡོམས་པའི་དཔལ་དམ་པ་དང་པོའི་སངས་རྒྱས་ཀྱི་གོ་འཕང་མངོན་སུམ་དུ་བརྙེས་སུ་ཟིན་ནའང་། མཐའ་ཀླས་པའི་ཡིད་ཅན་རྒྱ་མཚོ་སྨིན་གྲོལ་ལ་འགོད་པའི་སླད་དུ། སྲས་བཅས་རྒྱལ་བ་ཡོངས་ཀྱི་སྙིང་རྗེ་ཆེན་པོའི་ཡེ་ཤེས་གཅིག་ཏུ་བསྡུས་པའི་རང་གཟུགས། འཕགས་མཆོག་ཕྱག་ན་པདྨོ་སོགས་སློབ་པ་དང་། མི་སློབ་པ་དང་། སོ་སོ་སྐྱེ་བོའི་དགེ་བའི་བཤེས་གཉེན་གྱིས་མཚོན་སྒྱུ་འཕྲུལ་དྲྭ་བ་ཆེན་པོའི་རྣམ་རོལ་མཁའ་ཁྱབ་ཏུ་འཆར་བ་ལས། དེང་འདིར་སུམ་ལྡན་རྡོ་རྗེ་འཛིན་པ་མཆོག་གི་སྐུར་བཞེངས་པའི་མཚན་དཔེའི་དཀྱིལ་འཁོར་རྡོ་རྗེ་ནོར་བུའི་སྙིང་པོ་

---

^{[མ་དཔེ་གཟིགས་ན་འདིར་གནོན།]}

ལྟར་འཚོ་ཞིང་གཞེས་པ་དང་། ཟབ་རྒྱས་ཆོས་ཀྱི་འཁོར་ལོ་མཐའ་ཀླས་པར་བསྐོར་བའི་བཀའ་དྲིན་ནི་བྱང་ཆུབ་སྙིང་པོའི་བར་དུ་གཞལ་བར་དཀའ་བ་ཐོབ་ཅིང་། འབྱུང་འགྱུར་གྱི་ཆར་ཡང་། ཇི་སྐད་དུ། ཕན་བདེ་འབྱུང་བའི་གནས་གཅིག་པུ། །བསྟན་པ་ཡུན་རིང་གནས་པ་དང་། །བསྟན་པ་འཛིན་པའི་སྐྱེས་བུ་རྣམས། །སྐུ་ཚེའི་རྒྱལ་མཚན་བརྟན་གྱུར་ཅིག །ཅེས་གསུངས་པ་ལྟར་སྤྱིར་ལྷ་དང་བཅས་པའི་༧ འགྲོ་བའི་བདེ་སྐྱིད་ནི་སངས་རྒྱས་ཀྱི་བསྟན་པ་ལ་རགས་ལས་ཤིང་། བསྟན་པ་རིན་པོ་ཆེ་ཡུན་རིང་དུ་གནས་པ་ནི་བསྟན་འཛིན་གྱི་སྐྱེས་བུ་ཁོ་ནར་རགས་ལས་པར་མ་ཟད། བྱེ་བྲག་ཏུ་རྩོད་པའི་དུས་ཀྱི་ཐམས་ཅད་མཁྱེན་ཅིང་གཟིགས་པ་ཆེན་པོ་འཛམ་གླིང་བྱང་ཕྱོགས་ཀྱི་ཐུབ་དབང་གཉིས་པ་བུ་སྟོན་ལོ་ཙཱ་བ་རིན་ཆེན་གྲུབ་ཅེས་མཚན་གྱི་སྙན་པས་འཇིག་རྟེན་གསུམ་གྱི་བླ་ན་མངོན་པར་མཐོ་བ་གང་གི་བཤད་སྒྲུབ་ཀྱི་བསྟན་པ་དྲི་མ་མེད་པ་དར་ཞིང་རྒྱས་ལ་ཡུན་རིང་དུ་གནས་པ་ནི་སྐྱབས་མཆོག་འཁོར་ལོའི་མགོན་པོ་གང་ཉིད་ཀྱི་ཞབས་པད་རིན་པོ་ཆེ་བརྟན་པ་ཁོ་ནའི་བཀའ་དྲིན་ལས་གཞན་དུ་མ་མཆིས་ཤིང་། དེ་ཡང་ཇི་སྐད་དུ། རྒྱུད་བླ་མ་ལས། འཕགས་པས་རྒ་དང་ན་བ་དང་། །འཆི་བའི་སྡུག་བསྔལ་རྩད་ནས་སྤངས། །ཞེས་གསུངས་པ་ལྟར། དོན་དམ་པར་མི་སློབ་པའི་གོ་འཕང་མངོན་སུམ་དུ་བརྙེས་པའི་ཕྱིར་སྐྱེ་འགགས་

---

^{[མ་དཔེ་གཟིགས་ན་འདིར་གནོན།]}

ཀྱི་སྤྲོས་པ་གཞར་ཡང་མ་དམིགས་ཀྱང་། ཀུན་རྫོབ་ཚུ་རོལ་མཐོང་བའི་བྱིས་པ་སོ་སོའི་སྐྱེ་བོ་རྣམས་ཀྱི་ངོར་ཡང་འཕོ་འགྱུར་གྱི་སྣང་ཚུལ་མི་བཞེས་པར། ཕྱག་རྒྱའི་དེ་ཁོ་ན་ཉིད་དང་། ནཱ་དའི་དེ་ཁོ་ན་ཉིད་དང་། འོད་གསལ་གྱི་དེ་ཁོ་ན་ཉིད་ཀྱི་ངང་དུ་ཀུན་ཏུ་འཕོ་བའི་མཚན་མ་མཐའ་དག་ཉེ་བར་ཞི་བའི་འཆི་མེད་རྟག་པ་དམ་པའི་ཡེ་ཤེས་ཀྱི་སྐུ་དང་དབྱེར་མེད་པར་ཇི་སྲིད་བྱམས་བསྟན་མ་ཤར་གྱི་བར་དུ་འཚོ་ཞིང་གཞེས་ལ་ཆོས་ཀྱང་སྟོན་པར་དངོས་པོ་ཀུན་གྱིས་བཏུད་དེ་གསོལ་བ་འདེབས་པའི་སླད། བདག་གཞན་ཡིད་ཅན་རྒྱ་མཚོས་སྒོ་གསུམ་གྱིས་བསགས་ཤིང་། དུས་གསུམ་དང་འབྲེལ་བའི་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་རྒྱུར་བྱས་པ་ལས་བྱུང་བའི་རི་རབ་གླིང་བཞི་ཉི་ཟླ་ཟུང་གཅིག་ལྷ་དང་མིའི་ལོངས་སྤྱོད་ཕུན་སུམ་ཚོགས་པ་ཀུན་ཏུ་བཟང་པོའི་མཆོད་སྤྲིན་ལྟར་བློས་བླངས་ཏེ་ཕུལ་བ་དང་ཆབ་གཅིག །ལྷག་བསམ་དག་པའི་ཆུ་གཏེར་ལས་སྐྱེས་པའི་དངོས་འབྱོར་གྱི་མེ་ཏོག་ཕྲ་མོ་འདི་དག་ཀྱང་འབུལ་ལམ་ཞུ་བ་ལགས་ན་བརྩེ་ཆེན་ཡེ་ཤེས་ཀྱི་གཟིགས་པ་དམ་པས་ཡུད་ཙམ་བདག་གིར་མཛད་ནས། ཞབས་པད་རིན་པོ་ཆེ་འཇིགས་མེད་སེང་གེའི་ཁྲི་འཕང་མཐོན་པོར་བསྐལ་པ་རྒྱ་མཚོར་བརྟན་ཅིང་། ཟབ་རྒྱས་གདམས་པའི་ཆོས་ཆར་ལྷུག་པར་འབེབས་པའི་སྐལ་པ་བཟང་པོའི་བཀའ་དྲིན་གྱིས་དུས་རྟག་ཏུ་རྗེས་སུ་བཟུང་བར་

---

^{[མ་དཔེ་གཟིགས་ན་འདིར་གནོན།]}

ཞལ་གྱིས་བཞེས་པར་གསོལ་བ་ལན་བརྒྱར་འདེབས་པ་ལགས་ན་ཅི་གནང་། ཞེས་མཚམས་སྦྱར་ནས་མཎྜལ་འབུལ་བ་སོགས་ལ་འཇུག་གོ། །རིགས་དང་དཀྱིལ་འཁོར་རྒྱ་མཚོའི་ཁྱབ་བདག་ཆེ། འཚོ་གཞེས་གསོལ་འདེབས་ཉུང་ངུ་འདི་སྦྱར་བའི། །ལེགས་བྱས་དེས་ཀྱང་དཔལ་ལྡན་བླ་མ་མཆོག །བསྐལ་པ་རྒྱ་མཚོར་ཞབས་པད་བརྟན་གྱུར་ཅིག །ཅེས་པའང་དཔལ་དུས་ཀྱི་འཁོར་ལོའི་རྒྱུད་སྡེ་ལ་མཁྱེན་རབ་ཀྱི་སྣང་བ་རྒྱས་པ་བླ་ཆེན་བློ་གསལ་མི་ཕམ་ནས་བཀྲ་ཤིས་པའི་ལྷ་རྫས་དང་བཅས་ཏེ་བསྐུལ་བའི་ངོར། རྗེ་བཙུན་རྡོ་རྗེ་འཆང་བློ་གསལ་ཞབས་ཀྱི་ཞབས་རྡུལ་སྤྱི་བོས་ལེན་པའི་རྒྱལ་ཁམས་ཀྱི་ད་རི་དྭ་མཁྱེན་བརྩེའི་དབང་པོས་དཔལ་ཞྭ་ལུ་རི་ཕུག་གི་ཆོས་གྲྭར་འཕྲལ་དུ་བྲིས་པ་དགེ། །།

ཤྲཱི་ན་ལེནྡྲའི་མཆོག་སྤྲུལ་རིན་པོ་ཆེ་བྱམས་པ་ངག་དབང་བསྟན་འཛིན་སྙན་གྲགས་དཔལ་བཟང་པོར་བརྡ་སྤྲོད་ཀུན་བཤད་ཀྱི་མཚན་འབུལ་ཞབས་བརྟན་དང་འབྲེལ་བ་པུཎྜ་རཱི་ཀའི་ཆུན་འཕྱང་།

---

^{[མ་དཔེ་གཟིགས་ན་འདིར་གནོན།]}

༈ ཤྲཱི་ན་ལེནྡྲའི་མཆོག་སྤྲུལ་རིན་པོ་ཆེ་བྱམས་པ་ངག་དབང་བསྟན་འཛིན་སྙན་གྲགས་དཔལ་བཟང་པོར་བརྡ་སྤྲོད་ཀུན་བཤད་ཀྱི་མཚན་འབུལ་ཞབས་བརྟན་དང་འབྲེལ་བ་པུཎྜ་རཱི་ཀའི་ཆུན་འཕྱང་ཞེས་བྱ་བ། མཉྫགྷོཥཀྲྀབྱསཱརླབྷཱབཱི པཎྜིཏཱཀྲིཧེསྶམིཏྲཀཱཡེ༔ ཙྪནྟམཡཱརསཱརིཎིཔྲསྟར། པཱནྡྷབྷསརསཱཏཱིཏུཏྟེནྟི རོཙིཏཱཏྟིལོཀདཱིཔཀེབྷི། འཇམ་དབྱངས་སྙིང་རྗེའི་ཉི་མ་སྲིད་པ་ན། །མཁས་ཀུན་དགའ་བའི་བཤེས་གཉེན་མཆོག་གི་སྐུར། །ཡོངས་ཤར་མཚོ་བྱུང་དགྱེས་པའི་བློ་གྲོས་ཀྱི། །སྣང་བས་འཇིག་རྟེན་གསུམ་ན་མཛེས་གྱུར་ཅིག ༡ །

---

^{[མ་དཔེ་གཟིགས་ན་འདིར་གནོན།]}

རིག་དང་བརྩེ་བའི་ཆུ་གཏེར་ཡིད་འོང་བ། །ལེགས་བྱས་བྱེ་བས་བསྲུབས་པའི་སྙིང་པོའི་ཕུལ། །མཚན་བཟང་ཟླ་བ་བདུད་རྩིའི་སྙེམས་འཆང་བའི། །ཞབས་པད་རྡོ་རྗེའི་ཁམས་སུ་འཚོ་གཞེས་གསོལ། ༢ ། ཕྱི་ནང་གཙུག་ལག་རྒྱ་མཚོར་མི་ཕྱེད་པའི། །ཡན་ལག་དྲུག་ཅུའི་དབྱངས་ཀྱིས་ཡིད་ཅན་ཀུན། །ཕན་དང་བདེ་བའི་ངལ་འཚོ་ལ་སྦྱར་བའི། །གྲགས་སྙན་སྲིད་ཞིའི་ཁམས་ཀུན་ཁྱབ་གྱུར་ཅིག ༣ །སྤྲོས་པའི་འདུ་འགོད་ཞི་བའི་ཆོས་ཉིད་ཅན། །ཤེས་དང་ཤེས་བྱ་རོ་གཅིག་ཡེ་ཤེས་ཀྱི། །གཟིགས་པས་གངས་ཀྱི་རི་བོའི་སྨན་ལྗོངས་འདིར། །ལྷག་པར་དགྱེས་པའི་ངང་ཚུལ་སྟོན་མཛད་གསོལ། ༤ །བྲལ་སྨིན་ཡོན་ཏན་རྫོགས་ལྡན་སྤྲིན་ཆེན་ལས། །ཕྲིན་ལས་རྟག་པ་དམ་པའི་ནོར་བུའི་ཆར། །གདུལ་བྱའི་བསམ་པ་ཇི་བཞིན་འབེབས་མཁས་པས། །དོན་གཉིས་དགའ་སྟོན་མཆོག་ཏུ་རྒྱས་གྱུར་ཅིག ༥ །ཁྱད་པར་ཡོངས་རྫོགས་ཐུབ་བསྟན་རིན་པོ་ཆེ། །བཤད་དང་སྒྲུབ་པའི་དཔལ་གྱིས་མཛེས་སྟེར་བའི། །བྱེད་པོ་ཁྱོད་ལས་གཞན་དུ་མ་དམིགས་ཕྱིར། །འཆད་རྩོད་རྩོམ་པའི་རྒྱལ་རྔ་སྲིད་རྩེར་བརྡུངས། ༦ །མདོར་ན་འཆི་མེད་གྲུབ་པའི་དགེ་མཚན་དང་། །ལྷན་ཅིག་བྱང་ཆུབ་སྤྱོད་པའི་མཐར་སོན་པས། །རྩོད་དུས་ཀུན་མཁྱེན་གཉིས་པའི་ངོ་མཚར་གྱི། །བཀྲ་ཤིས་སྣང་བ་རྟག་ཏུ་འབར་གྱུར་ཅིག ༧ །ཅེས་ཡོངས་རྫོགས་བསྟན་པའི་

---

^{[མ་དཔེ་གཟིགས་ན་འདིར་གནོན།]}

ཉི་མ་མཆོག་སྤྲུལ་རིན་པོ་ཆེ་ཤེས་བྱ་ཀུན་གཟིགས་བྱམས་པ་ངག་དབང་བསྟན་འཛིན་སྙན་གྲགས་དཔལ་བཟང་པོའི་ཞལ་སྔ་ནས་ཀྱིས་བརྡ་སྤྲོད་པའི་བསྟན་བཅོས་ཡན་ལག་དང་བཅས་པའི་གསན་བཞེས་གྲུབ་པར་འཇམ་དབྱངས་དགའ་བའི་བཤེས་གཉེན་མཚོ་བྱུང་དགྱེས་པའི་བློ་གྲོས་ཞེས་མཚན་འབུལ་ཞབས་བརྟན་དང་འབྲེལ་བ་འདིའང་། ཟེ་ཆེན་མ་ཧཱ་པཎྜི་ཏ་འཇམ་དབྱངས་དགྱེས་པའི་བློ་གྲོས་དང་། ངེས་པར་ཐམས་ཅད་མཁྱེན་དངོས་གུ་ཎ་སཱ་ག་རའི་བཀའ་དྲིན་ལས་རིག་ལམ་འདིའི་མིང་རྐྱང་ཙམ་ཐོས་པ་ཚངས་སྲས་དགྱེས་པའི་བློ་ལྡན་གདོང་དྲུག་དགའ་བའི་ལང་ཚོའམ། གཙུག་ལག་སྨྲ་བའི་ཉི་མ་ཞེས་ཀྱང་བགྱི་བའི་རྒྱལ་ཁམས་ཀྱི་ད་རི་དྭས་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོར་གསོལ་བ་བཏབ་པ་སིདྡྷི་རསྟུ།། །།

ཆབ་ཤོག་དང་ལེགས་འབུལ་གྱི་ཡི་གེ་སྐོར་རགས་བསྡུས།

---

^{[མ་དཔེ་གཟིགས་ན་འདིར་གནོན།]}

༈ ཆབ་ཤོག་དང་ལེགས་འབུལ་གྱི་ཡི་གེ་སྐོར་རགས་བསྡུས་བཞུགས་སོ།། ༈ །།༅། །ཨཱདེནུཏྟཱརབཱིཉལབྷཱུ བྷཱུཏཾཀཱརུཎྜཔཱསཱདྷབེ། སྡེབ་སྦྱོར་མཉམ་པའི་བྲྀཏྟ་ལས་ཡི་གེ་བཅུ་པ་ཕྲེང་ལྡན་གྱི་བྱེ་བྲག་དག་པའི་སྣང་བ་ཞེས་བྱ་བའི་པྲ་སཱུ་རས་མཛེས་པའོ། །བྷབབྷབསམཾཔྲབྲི ཨུཏཡོ ཛཱིཡཱཏྨསམཤཱསནཾརབི །གཟོད་ནས་ཤིན་ཏུ་ཞི་བའི་མཆོག་བརྙེས་ཀྱང་། །རྨད་བྱུང་སྙིང་རྗེའི་རོལ་མོ་དང་འགྲོགས་པས། །སྲིད་ན་སྲིད་པ་བཞིན་དུ་འཇུག་བརྩོན་པའི། །མཚུངས་མེད་བསྟན་པའི་ཉི་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

མ་རྒྱལ་གྱུར་ཅིག །ཅེས་དགེ་ལེགས་སུ་བྱ་བའི་ཚིག་གི་ཨུཏྤལ་སྔོན་དུ་གཏོར་བས་ལམ་ཡངས་པར་བྱས་ཏེ། གང་གི་ཚེ་གཟོད་མ་ནས་རྒྱལ་བ་སྲས་དང་བཅས་པས་ཇི་ལྟར་གཟིགས་པའི་སྤངས་རྟོགས་ཀྱི་ཡོན་ཏན་མཐའ་ཡས་པ་བདག་གིར་མཛད་ནས་བྱང་ཆུབ་ཆེན་པོའི་གོ་འཕང་མངོན་དུ་བརྙེས་སུ་ཟིན་ཀྱང་། སྨོན་ལམ་དང་སྙིང་རྗེའི་འཕེན་པས་ཚུར་མཐོང་གི་འགྲོ་བ་རྣམས་སྒྲོལ་བའི་སླད་དུ་མཆོག་གི་སྤྲུལ་པའི་སྐུའི་རྣམ་རོལ་ཏུ་ཤར་བའི་མཚུངས་མེད་བསྟན་པའི་ཉིན་བྱེད་ཆེན་པོ་བླ་ན་གསལ་ཞིང་། བསྟན་འཛིན་གྱི་སྐྱེས་བུ་འདུས་པ་རྒྱ་མཚོ་དང་བཅས་པ་བཤད་སྒྲུབ་ཀྱི་འདུ་བ་ལྷག་པར་འཕེལ་བའི་དུས་ཕུན་སུམ་ཚོགས་པའི་སྐབས་འདིར། སྐྱེས་སྦྱངས་ཀྱི་ཡོན་ཏན་དམན་ཡང་ལྷག་བསམ་པུཎྜ་རཱི་ཀའི་འཁྲི་ཤིང་ལྟར་གཅིག་ཏུ་དཀར་བའི་དགེ་སྦྱོང་རྒན་པོ་བྲང་ཏི་མཁས་པའི་རིགས་སྐྱེས་ཨེ་ཝཾ་ཐར་རྩེ་མཁན་མིང་པའང་། གནའ་ནས་ད་བར་དུ་ལུགས་གཉིས་ཀྱི་འབྲེལ་ཟབ་མཆོག་ཏུ་ཆེ་བར་མ་ཟད། ད་ལམ་ཡང་སྔོན་སྨོན་གྱི་རྟེན་འབྱུང་དུས་སུ་སྨིན་པའི་དགེ་ལེགས་ཀྱི་དུས་སྟོན་ཅིར་ཡང་ཐོབ་པ་ལ་གུས་སྤྲོའི་ལེགས་སྐྱེས་ཀྱི་མཆོད་སྤྲིན་འཕགས་པ་ཀུན་ཏུ་བཟང་པོའི་རྣམ་ཐར་ལ་དྲན་པ་ཉེ་བར་བཞག་པའི་མཚོན་བྱེད་དངོས་བཤམས་ཀྱི་མཎྜལ་ཟེག་མ་ཙམ་བསྟར་བར། ཐོག་མར་བཀྲ་ཤིས་པའི་ལྷ་གོས་རབ་དཀར་སྲིད་དུ་རིང་བ་སོགས།

---

^{[མ་དཔེ་གཟིགས་ན་འདིར་གནོན།]}

བཅས་འབུལ་ལམ་ཞུ་ན་དགྱེས་པ་ཆེན་པོས་བདག་གིར་མཛད་པ་དང་། སླད་མའི་ཆར་ཡང་། ངེས་གསང་བསྟན་པའི་ཉི་མ་མཆེད་ཞལ་རྣམ་པ་འབྱུང་འགྱུར་གྱི་རྒྱལ་བ་ལ་རྒྱལ་བས་སྲིད་ཞིའི་མཐའ་གཉིས་ལས་རྒྱལ་བའི་རྒྱལ་རྔ་བརྡུང་གི་བར་དུ་ཞབས་པད་རྡོ་རྗེའི་ཆོས་བདུན་གྱི་རང་བཞིན་དུ་བརྟན་ཅིང་། བཤད་སྒྲུབ་ཀྱི་བསྟན་པ་ཉིན་མོ་ལྟར་མཛད་པ་ནས། ཕན་ཚུན་མཉེན་ཞིང་གཤིན་པའི་ཐུགས་བརྩེའི་འཇུག་པའང་རྒྱུན་མི་འཆད་པར་རྩེ་གཅིག་པའི་ཡིད་ཀྱིས་གསོལ་བ་ལགས་ན་ཅི་གནང་། སརྦ་དཱ་ཀ་ལྱཱ་ཎཾ་བྷ་བ་ཏུ།། །།

རྫོགས་ཆེན་མཆོག་སྤྲུལ་རིན་པོ་ཆེར་དགོན་གནས་གསར་བཞེངས་སྐབས་ཞལ་འདེབས་ཕུལ་བའི་ཡི་གེ་ཕན་བདེའི་ཟླ་སྣང་།

---

^{[མ་དཔེ་གཟིགས་ན་འདིར་གནོན།]}

༈ རྫོགས་ཆེན་མཆོག་སྤྲུལ་རིན་པོ་ཆེར་དགོན་གནས་གསར་བཞེངས་སྐབས་ཞལ་འདེབས་ཕུལ་བའི་ཡི་གེ་ཕན་བདེའི་ཟླ་སྣང་ཞེས་བྱ་བ་བཞུགས་སོ། །༄༅། །ནོདཨུབྷཱཛཱཡོགསྣེ། ཉཱརཱབྷོགཙལོརུབཛ྄བྷཱ། དག་པའི་སྣང་བའོ། །ནིངྒཱཀཱཡབརཱཏལཱལིཏཱ ཛཱིཡཱཏཤཱསནསཱུརླནོསམཾ། །ཀ་དག་འོད་གསལ་གཉུག་མའི་ཡེ་ཤེས་ལས། །ལྷུན་གྲུབ་འཕོ་ཆེན་རྡོ་རྗེའི་སྣང་བ་ནི། །དེང་འདིར་མཆོག་གི་སྤྲུལ་སྐུའི་རྣམ་རོལ་ཅན། །མཚུངས་མེད་བསྟན་པའི་ཉི་མ་རྒྱལ་གྱུར་ཅིག །ཅེས་ཚིག་སྦྱོར་གྱི་ཨུཏྤལ་སྔོན་དུ་གཏོར་ནས། དེང་གི་ཆར་ཡང་། སྔ་འགྱུར་འོད་གསལ་རྡོ་རྗེ་སྙིང་པོའི་བཤད་སྒྲུབ་ཀྱི་ཆུ་གཏེར་ཆེན་པོ་འོག་མིན་ཨོ་རྒྱན་བསམ་གཏན་ཆོས་གླིང་ཞེས་གྲགས་པ་ཕྱོགས་མཐར་དཀར་བ་ཉིད། བར་སྐབས་སུ་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

སྙིགས་མའི་དུས་ཀྱི་གཞན་དབང་གིས་ཉམས་ཆག་ཆེ་བར་གྱུར་ནའང་། སླར་ཡང་མཆོག་སྤྲུལ་བསྟན་པའི་ཉི་མ་གང་གི་ཐུགས་བསྐྱེད་དང་ཕྲིན་ལས་རྨད་དུ་བྱུང་བས་གསར་བཞེངས་ཉམས་གསོས་སྐོར་འགྲན་ཟླ་དང་བྲལ་བར་གྲུབ་པ་ལ་མངོན་དུ་ཕྱོགས་པའི་སྐབས་འདིར། རིས་མེད་པའི་བསྟན་པ་ལ་དག་པའི་སྣང་བ་པུཎྜ་རཱི་ཀའི་འཁྲི་ཤིང་ལྟར་གཅིག་ཏུ་དཀར་བའི་བྲང་ཏི་མཁས་པའི་རིགས་སྐྱེས་དགེ་སྦྱོང་རྒན་པོ་ཨེ་ཝཾ་ཐར་རྩེ་མཁན་མིང་པའང་། དད་སྤྲོའི་ཆུ་གཏེར་སྙིང་དབུས་ནས་གཡོ་བས་ཡན་ལག་བཞི་པའི་བསོད་ནམས་ཀྱི་བུང་བ་བདག་གིར་བགྱི་བའི་མཚོན་བྱེད། ཞལ་འདེབས་དངོས་པོའི་མེ་ཏོག་ཟེག་མ་ཙམ་བསྟར་བར། བཀྲ་ཤིས་པའི་ལྷ་གོས་རབ་དཀར་སོགས། སླད་མའི་ཆར་ཡང་། བསྟན་འཛིན་མཆོག་ཁྱོད་བསྐལ་བརྒྱར་ཞབས་བརྟན་མཐུས། །བསྟན་པའི་སྙིང་པོ་འོད་གསལ་རྫོགས་པ་ཆེའི། །བསྟན་པ་སྲིད་མཐའི་བར་དུ་གོང་འཕེལ་ཞིང་། །བསྟན་འགྲོར་ཕན་བདེའི་སྣང་བ་འབར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

ལྷ་འབྲང་བླ་མ་རིན་འཛིན་དཔལ་ལྡན་ཆོས་རྒྱལ་གྱི་སྤྲུལ་སྐུ་རིན་པོ་ཆེར་ཁྲི་སྟོན་ཕུལ་བའི་ཡི་གེ་ལེགས་བྱས་དཔྱིད་ཀྱི་སྙེ་མ།

---

^{[མ་དཔེ་གཟིགས་ན་འདིར་གནོན།]}

༈ ལྷ་འབྲང་བླ་མ་རིན་འཛིན་དཔལ་ལྡན་ཆོས་རྒྱལ་གྱི་སྤྲུལ་སྐུ་རིན་པོ་ཆེར་ཁྲི་སྟོན་ཕུལ་བའི་ཡི་གེ་ལེགས་བྱས་དཔྱིད་ཀྱི་སྙེ་མའོ། །༄༅། །ཛམཱིསཱཛཱཡོནདུསློཎྞནཱཡིཀ ཙྪརྗོབཱཎཱཾནཱསསྱཔྲསཱརོ། ཀཛིཙྪཨཱརེཝཱཧྥདྡྷིནྡཛཱསཱིཉྩདིཉྩིབ། སྲས་བཅས་རྒྱལ་བ་ཀུན་གྱི་ཡེ་ཤེས་ནི། །ཟུང་འཇུག་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

འཆི་མེད་གྲུབ་པའི་སྐུར་བཞེངས་པ། །ཚེ་དཔག་མེད་མགོན་ཐུགས་རྗེའི་སྣང་བ་ཡིས། །ཁྱེད་ལ་རྟག་ཏུ་ཤིས་པ་སྦྱིན་གྱུར་ཅིག །ཅེས་དགེ་ལེགས་སུ་བྱ་བའི་ཚིག་སྦྱོར་གྱི་མེ་ཏོག་སྔོན་དུ་གཏོར་ནས། དེང་གི་ཆར་ཡང་། མཁས་གྲུབ་རྒྱ་མཚོའི་ཅོད་པན་རིག་འཛིན་དཔལ་ལྡན་ཆོས་རྒྱལ་གྱི་ཡེ་ཤེས་སྒྱུ་འཕྲུལ་དྲྭ་བའི་རོལ་གར་རྣམ་འདྲེན་མཆོག་སྤྲུལ་རིན་པོ་ཆེ་གང་ཉིད། རྗེ་བཙུན་བླ་མ་རིམ་པར་བྱོན་པ་རྣམས་ཀྱི་ཆོས་ཀྱི་འཁོར་ལོས་བསྒྱུར་བའི་ཁྲི་འཕང་མཐོན་པོར་ཞབས་པད་བཀོད་དེ། བསྟན་པའི་སྦྱིན་བདག་ཆེན་པོས་ཐོག་དྲངས། མཆོག་དམན་བར་མའི་དད་སྤྲོའི་ཡིད་ཅན་མཐའ་ཀླས་པས་སྤྱི་དགོས་བསྟན་འགྲོའི་དཔལ་མགོན་དམ་པར་མངའ་གསོལ་བའི་ཚེ་ན། ཁོ་བོ་ཅག་བྲང་ཏི་མཁས་པའི་རིགས་སྐྱེས་ཨེ་ཝཾ་ཐར་རྩེ་པའང་། བླ་མ་གོང་མ་དེ་ཉིད་ཀྱི་དུས་ནས་མཆོད་ཡོན་ཆོས་དམ་གྱི་འབྲེལ་ཟབ་ཐུན་མིན་དུ་གྱུར་པ་ལ་བརྟེན། ལྷག་པའི་བསམ་པ་ཟླ་བ་ཚེས་པ་ལྟ་བུས་ཀུན་ནས་བསླང་སྟེ། རྒྱལ་བའི་སྲས་ཀྱི་མྱུ་གུ་གསར་པ་གང་ཉིད་བསྐལ་པ་རྒྱ་མཚོར་འཚོ་ཞིང་གཞེས་ལ་ཆོས་ཀྱང་སྟོན་པས་རྣམ་མང་བསྟན་འགྲོའི་སྨན་ཡོན་ཆེན་པོར་འགྱུར་བའི་མངའ་གསོལ་གཟེངས་བསྟོད་ཀྱི་ཤིས་པ་བརྗོད་པའི་མེ་ཏོག་མན་རའི་ཕང་ཕུང་ཆར་དུ་བསྙིལ་བའི་རྟེན་འབྱུང་མཚོན་བྱེད་ས་བཅད་སྟོང་མིན་ཙམ་དུ། བཀྲ་ཤིས་པའི་ལྷ་གོས་རབ་

---

^{[མ་དཔེ་གཟིགས་ན་འདིར་གནོན།]}

དཀར་སོགས། བཅས་འབུལ་ལམ་ཞུས་ཡོད་པས་དགྱེས་པའི་སྤྱན་རས་ཀྱིས་བཙའ་བ་དང་། སླད་མའི་ཆར་ཡང་། གང་ལ་བརྟེན་ནས་ནམ་ཡང་མི་བསླུ་བའི། །དཀོན་མཆོག་གསུམ་ཞེས་གྲགས་པའི་ཟླ་ཤེལ་གྱིས། །དགེ་མཚན་བདུད་རྩིའི་འོད་རླབས་སྤྲོ་བ་ཡིས། །བཀྲ་ཤིས་སྣང་བ་རྟག་ཏུ་རྒྱས་གྱུར་ཅིག །སརྦ་ཧྥེ་ཡོ་བྷ་བ་ཏུ།། །།

སེ་ནཱ་ཤུ་བྷའི་གཉེན་སྟོན་སྐབས་མཁན་ཆེན་རྡོ་རྗེ་འཆང་ནས་ལེགས་འབུལ་གནང་བའི་ཡི་གེ་དཔྱིད་ཀྱི་སྣང་བ།

---

^{[མ་དཔེ་གཟིགས་ན་འདིར་གནོན།]}

༈ མེ་རྟ་ལོར་སེ་ནཱ་ཤུ་བྷའི་གཉེན་སྟོན་སྐབས་མཁན་ཆེན་རྡོ་རྗེ་འཆང་ནས་ལེགས་འབུལ་གནང་བའི་ཡི་གེ་དཔྱིད་ཀྱི་སྣང་བའོ། །ཨིནམྦྷསུཝིཏྟཾ ལཀྵིཤཱནྟབྷབྷབདཱཔཏུཾ། ཤུདྡྷསྱཱདཱིཔཱནཱམཔྲསཱརེ། ཏྲེརཏྟཾརུཙིཀཱནྟིནཱམཔ བུམངྒལསུཔུཉྫབཱརཱདཱ། གང་མཚན་ཐོས་པའི་ལེགས་བྱས་རྨད་བྱུང་གིས། །སྲིད་ཞིའི་ཕུན་ཚོགས་མཐའ་དག་སྦྱིན་མཁས་པ། །རིན་ཆེན་གསུམ་ཞེས་གྲགས་པའི་སྣང་བ་ཡིས། །རྣམ་ཀུན་ཤིས་པའི་མེ་ཏོག་ཆར་དུ་བསྙིལ། ༡ །འཆི་མེད་གྲུབ་པའི་དཔྱིད་ཀྱིས་འཇིག་རྟེན་ན། །ངལ་འཚོའི་སྤྲིང་ཡིག་གསར་པས་མཛེས་གྱུར་པ། །ཚེ་དཔག་མེད་མགོན་ཐུགས་རྗེའི་ཟླ་རིས་ཀྱིས། །མི་བདག་འཁོར་བཅས་འཚོ་གཞེས་བསྐལ་བརྒྱར་བསྲིངས། ༢ །རབ་དམར་དབང་གི་མཆིལ་པ་རྣོན་པོ་དང་། །འགྲོགས་པའི་ཡེ་ཤེས་སྣང་བ་སྤྲོས་ཙམ་གྱིས། །ཁམས་གསུམ་སྡུད་མཛད་རིག་བྱེད་དགའ་བ་ཡིས། །བརྟན་གཡོའི་ཕུན་ཚོགས་ཇི་སྙེད་བདག་གིར་མཛོད། ༣ །གང་འདུལ་སྒྱུ་འཕྲུལ་དྲྭ་བའི་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

རྣམ་རོལ་གར། །རྡོ་རྗེའི་ཆོས་སྲུང་རྒྱ་མཚོའི་ཕྲིན་ལས་ཀྱིས། །ཉེ་བར་འཚེ་བའི་ཚོགས་རྣམས་མཐར་བྱས་ནས། །བཞེད་དགུའི་དོན་ཀུན་འབད་པ་མེད་པར་སྒྲུབས། ༤ །བསོད་ནམས་སྤྲིན་གྱི་འཛུམ་དཀར་གཡོ་བ་ལས། །དགོས་འདོད་ནོར་བུའི་གྲུ་ཆར་འབེབས་མཁས་པ། །གནོད་གནས་དབང་པོའི་འབྱོར་པའི་དཔག་བསམ་གྱིས། །རྫོགས་ལྡན་དང་པོའི་དགའ་སྟོན་གསར་དུ་དཀྲིགས། ༥ ། ཞེས་ཤིས་པར་བྱ་བའི་ཚིག་གི་མེ་ཏོག་ཅུང་ཟད་སྔོན་དུ་གཏོར་ནས། དེང་གི་ཆར་ཡང་དུས་ཕུན་སུམ་ཚོགས་པའི་སྐབས་འདིར། ཡོངས་རྫོགས་བསྟན་པ་རྒྱ་མཚོའི་སྦྱིན་བདག །རིས་བྲལ་འགྲོ་བ་ཀུན་གྱི་གཉེན་གཅིག །བསོད་ནམས་སྟོབས་ཀྱི་འཁོར་ལོས་བསྒྱུར་བ་མི་བདག་སའི་ཚངས་པ་ཆེན་པོ་གང་གི་ཞལ་སྔ་ནས། འགྲོ་བའི་བདེ་སྐྱིད་ནི་སངས་རྒྱས་ཀྱི་བསྟན་པ་རིན་པོ་ཆེར་རགས་ལས་ཤིང་། དེ་ཡང་ཆོས་ལྡན་༧ གྱི་རྒྱལ་པོའི་བདག་རྐྱེན་ལ་བལྟོས་པས་ན། དེ་ཉིད་མི་ཉམས་ཤིང་ཡུན་དུ་བརྟན་པ་ནི་སྤྲུལ་པའི་གདུང་རབས་ཟམ་མ་ཆད་བར་ཕེབས་པ་ཁོ་ན་ལས་གཞན་དུ་མ་དམིགས་པའི་ཕྱིར། ལྷག་པའི་ཐུགས་བསྐྱེད་རྣམ་པར་དག་པས་མདུན་བདར་ཏེ། རྒྱལ་སྲིད་དཔག་བསམ་གྱི་ལྗོན་པའི་རྩ་བ་གཡོ་མེད་དུ་བརླིང་པའི་སླད་རིགས་གཟུགས་འབྱོར་པའི་ཡོན་ཏན་འབུམ་གྱིས་མངོན་པར་མཐོ་བའི་བཙུན་མོ་རིན་པོ་ཆེ་གང་ཉིད།

---

^{[མ་དཔེ་གཟིགས་ན་འདིར་གནོན།]}

སྡེ་བཞི་དང་རྒྱལ་ཐབས་ཀྱི་ཡན་ལག་བདུན་གྱིས་སྒེག་པའི་དཔལ་གྱི་འབྱོར་པ་ཆེས་རྨད་དུ་བྱུང་བའི་སྒོ་ནས་ཁབ་ཏུ་བཞེས་པར། ཁོ་བོ་ཅག་བྲང་ཏིའི་རིགས་སྐྱེས་ཨེ་ཝཾ་ཐར་རྩེ་མཁན་མིང་པའང་གནའ་ནས་ད་བར་མཆོད་ཡོན་ཆོས་དམ་གྱི་འབྲེལ་ཟབ་ཐུན་མིན་དུ་གྱུར་པས་དགའ་བ་དང་སྤྲོ་བ་ཕན་ཚུན་འགྲན་བཞིན་དུ་འཕེལ་བ་དང་ཆབ་གཅིག །རྣམ་པ་ཀུན་ཏུ་དགེ་ལེགས་ཤིས་པའི་རྟེན་འབྱུང་གི་སྒོ་འཕར་བརྒྱ་ཕྲག་ཏུ་དབྱེ་བའི་ལེགས་གསོལ་དངོས་འབུལ་གྱི་བདོག་འབྱོར་ཟེག་མ་ཙམ་བསྟར་བར། ཐོག་མར་བཀྲ་ཤིས་པའི་ལྷ་གོས་རབ་དཀར་གངས་རིའི་མདོག་ཅན་སྲིད་དུ་རིང་བོ་སོགས། མཐའ་རྟེན་རས་དཀར་ཡུག་བློ བཅས་རྣམ་གྲངས་བཅུ་ཕྲག་གསུམ་ལ་ཉག་མ་བདུན་གྱིས་ལྷག་པ་འབུལ་ལམ་ཞུ་ན་དགྱེས་པའི་སྤྱན་རས་ཀྱིས་ཡུད་ཙམ་རོལ་པ་དང་། འབྱུང་འགྱུར་གྱི་ཆར་ཡང་། སྡེ་བཞི་དགེ་བཅུའི་རྒྱལ་ཐབས་རྨད་བྱུང་གི། །ཆོས་སྲིད་རིགས་བརྒྱུད་འབྱོར་པའི་རྫོགས་ལྡན་སྤྲིན། །ལྷག་པར་འཕེལ་བའི་དགེ་མཚན་གཏམ་གྱི་རྔ། །སྲིད་པ་གསུམ་ན་ཀུན་ཏུ་སྙནུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

སེ་ནཱ་ཤུ་བྷར་ལེགས་སྐྱེས་ཕུལ་བའི་ཡི་གེ་བདུད་རྩིའི་སྙེ་མ།

---

^{[མ་དཔེ་གཟིགས་ན་འདིར་གནོན།]}

༈ མཛེས་བྱེད་ལོར་སེ་ནཱ་ཤུ་བྷར་ལེགས་སྐྱེས་ཕུལ་བའི་ཡི་གེ་བདུད་རྩིའི་སྙེ་མའོ། །ཏུསྶ བྷིཊྛིཔིབྷོ ཤེཡོཉམུ་ཏིསིདྡྷཾབཀོ༽ ཙྪནྡབཱཀྲྀནཱམ། རྣཕྱི་ལཀྱིས། པཱདཔེཔཾཨཱམིཡོ༔ སྡེ་བཞིའི་ཆུ་གཏེར་ལས་བྱུང་ཞིང་། །དགེ་ལེགས་བདུད་རྩིའི་རང་ ༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

བཞིན་ཅན། །མི་བདག་ཤར་གྱི་ཐིག་ལེ་ཡི། །ཞབས་ཀྱི་པདྨོའི་ཉེ་དྲུང་དུ། ༡ །མཆོག་གསུམ་ཐུགས་རྗེའི་ཉིན་བྱེད་ཀྱིས། །ཉེ་བར་སྐྱོང་བའི་ད་རི་དྲ། །ཨུཏྤལ་གཞོན་ནུའི་མགྲིན་པ་ནས། །ཞུ་གསོལ་རྒྱུད་མང་འདི་ལྟར་བསྒྲེངས། ༢ །གང་ཁྱོད་བསོད་ནམས་བྱེ་སྙེད་ཀྱིས། །རིང་མི་ཉིད་ནས་བསྒྲུབས་པ་ལས། །མཐའ་ཀླས་བསྟན་འགྲོའི་ཉེར་འཚོ་རུ། །མཚན་དཔེའི་གཟི་བྱིན་ལྷམ་མེར་གསལ། ༣ །དེ་ཚེ་རིགས་གཟུགས་ཤེས་རབ་དང་། །ཆོས་སྲིད་འབྱོར་པ་རྨད་བྱུང་གིས། །ཤིས་པར་བྱས་པའི་གཏམ་གྱི་རྔས། །ས་གསུམ་ཁྱབ་དང་ལྷན་ཅིག་པར། ༤ །དེང་དུས་ཞལ་གྱི་དཀྱིལ་འཁོར་མཆོག །མངོན་སུམ་མཇལ་བའི་བཀའ་དྲིན་ནི། །ཚངས་པའི་བློས་ཀྱང་གཞལ་དཀའི་ཕྱིར། །གུས་སྤྲོའི་ལེགས་སྐྱེས་ཅུང་ཟད་སྟོབས། ༥ །ཞེས་ཚིག་གི་མེ་ཏོག་ཕྲ་མོ་ཙམ་སྔོན་དུ་འཐོར་བས་ལམ་ཡངས་པར་བྱས་ནས། དེང་གི་ཆར་ཡང་། གཟོད་མ་ནས་རྣམ་པར་གྲོལ་བའི་ཡེ་ཤེས་བརྙེས་སུ་ཟིན་ཀྱང་། སྨོན་ལམ་དང་སྙིང་རྗེའི་འཕེན་པས་གདན་གསུམ་ཚང་བའི་དཀྱིལ་འཁོར་དུ་ཤར་བ་མཁན་ཆེན་རྡོ་རྗེ་འཆང་ཆེན་པོའི་མཚན་དཔེའི་ཉིན་བྱེད་བླ་ན་གསལ་ཞིང་། བོད་དང་བོད་ཆེན་པོའི་ལྗོངས་ཀྱི་རིས་སུ་མ་ཆད་པའི་བསྟན་འགྲོ་ཡོངས་ཀྱི་རྟེན་དང་། གླིང་དང་། དཔུང་གཉེན་གཅིག་པུར་གྱུར་པ་མི་བདག་སའི་ཚངས་པ་ཆེན་པོ་གང་གི་

---

^{[མ་དཔེ་གཟིགས་ན་འདིར་གནོན།]}

ཞབས་ཀྱི་པདྨོ་ཆེ་དགུའི་རལ་བའི་རྩེ་མོར་འཚོ་ཞིང་གཞེས་ལ་ལུགས་གཉིས་ཀྱི་ཕྲིན་ལས་མཁའ་མཐའ་མཉམ་པར་བརྡལ་བའི་སྐབས་འདིར་གསེར་ཞལ་རིན་པོ་ཆེ་མངོན་སུམ་དུ་མཇལ་ཞིང་། གསུང་གི་བདུད་རྩིས་སྐལ་བཟང་ཐོབ་པའི་ཐོག་མའི་མཇལ་ཕྱག་ལ་རིངས་པར་མཚོན་པ་བཀྲ་ཤིས་པའི་ལྷ་གོས་རབ་དཀར་སོགས། སླར་སྨྲས་པ། རྒྱལ་ཀུན་སོ་སོར་རྟོག་པའི་ཡེ་ཤེས་གཅིག་བསྡུས་སྒྱུ་འཕྲུལ་དྲྭ་བའི་གར། །འོད་མཚན་སྟོང་འབར་ཐུགས་རྗེའི་བདུད་རྩིས་ཁྱེད་ལ་རྟག་ཏུ་དགེ་བྱས་པས། །གསང་གསུམ་རྡོ་རྗེའི་ཆོས་བདུན་ངོ་བོར་བསྐལ་པ་རྒྱ་མཚོར་འཚོ་གཞེས་ཤིང་། །ཆབ་སྲིད་མངའ་ཐང་ཆེས་ཆེར་དར་བའི་དགེ་མཚན་སྣང་བ་འབར་གྱུར་ཅིག ༡ །དེ་མཐུས་བསྟན་པའི་བཤད་སྒྲུབ་དང་། །འགྲོ་བའི་བདེ་སྐྱིད་དར་བབས་ཤིང་། །རྫོགས་ལྡན་གཞོན་ནུའི་དུས་སྟོན་ལ། །ཉམས་མེད་ལོངས་སུ་སྤྱོད་པར་ཤོག ༢ ། གང་ན་སྐྱབས་སུ་བསྙེན་ཙམ་ནས། །སྲིད་ཞིའི་དཔལ་ཀུན་སྦྱིན་མཁས་པ། །མཆོག་གསུམ་ཐུགས་རྗེའི་གདུགས་དཀར་པོས། །ཕན་བདེའི་ངལ་འཚོ་རྒྱས་གྱུར་ཅིག ༣ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

མཁན་ཆེན་རྡོ་རྗེ་འཆང་ཆེན་པོར་ལེགས་འབུལ་གྱི་ཡི་གེ་བདུད་རྩིའི་སྣང་བ།

---

^{[མ་དཔེ་གཟིགས་ན་འདིར་གནོན།]}

༈ མཁན་ཆེན་རྡོ་རྗེ་འཆང་ཆེན་པོར་ལེགས་འབུལ་གྱི་ཡི་གེ་བདུད་རྩིའི་སྣང་བའོ། །ཨཱཙྪཱཐཱནྟི་ནོསཱིf བིསཝཚོ་བའི་ཀོ། ཙྪརྗོབཱཀྵེ། སཱརཱིཧཱིསཞིསཱུདྡྷིག པདྨོའི་རྩུབཛིéཏ། སྲིད་དང་ཞི་བའི་མཐའ་ལ་མི་གནས་པའི། །༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

རྣམ་པ་ཐམས་ཅད་མཁྱེན་པའི་ཡེ་ཤེས་ནི། །དེང་འདིར་ཡོངས་རྫོགས་བསྟན་པའི་ཉི་མ་མཆོག །ཁྱབ་བདག་རྡོ་རྗེ་འཆང་དངོས་ཞབས་པདྨོར། །གུས་པ་ཆེན་པོས་ཕྱག་དང་བཅས་ཏེ་གསོལ་བ། དེང་གི་ཆར་ཡང་། སྲས་བཅས་རྒྱལ་བ་ཡོངས་ཀྱི་རྣམ་རོལ། ཡོངས་རྫོགས་བསྟན་པ་རྒྱ་མཚོའི་མངའ་བདག །འགྲོ་བ་ལྷ་དང་བཅས་པའི་སྐྱབས་གཅིག །མཁན་ཆེན་རྡོ་རྗེ་འཆང་ཆེན་པོ་གང་ཉིད་སྟོན་འཁོར་རྣམས་པ་སྐྱབས་འོག་པ་ཁོ་བོ་ཅག་གིས་ཇི་ལྟར་གསོལ་བ་བཏབ་པ་བཞིན། དྲིན་ལྡན་གྱི་ཕ་མས་ཐོག་དྲངས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་ཆེད་དུ། བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་ག་ཟབ་མོའི་སྒོ་ནས། གནས་སྐབས་ཕན་པ་དང་མཐར་ཐུག་བདེ་བའི་གོ་འཕང་ལ་སྦྱོར་བར་མཛད་པའི་བཀའ་དྲིན་ལ་བསམ་ན་སྟོང་གསུམ་ནོར་བུས་བཀང་ཡང་གཞལ་བྱ་མ་ཡིན་མོད། འོན་ཀྱང་དངོས་རྫས་ཀྱི་ཡོ་བྱད་དབུལ་བས་མཎྜལ་མཚོན་བྱེད་མདུན་སྟོང་མིན་ཙམ་དུ་ལྷ་གོས་སོགས།། །།

ཞབས་དྲུང་རིན་པོ་ཆེར་ལེགས་འབུལ་གྱི་ཡི་གེ

---

^{[མ་དཔེ་གཟིགས་ན་འདིར་གནོན།]}

༈ ཞབས་དྲུང་རིན་པོ་ཆེར་ལེགས་འབུལ་གྱི་ཡི་གེ རྨནྟིསུ་གཏནས་ལོ་དེ་སྤྱོདཱིཙྪན ཕྱི་མོ་མཉམ་པའི་སྡེབ་སྦྱོར་ལས་ཛཱཏིའི་འཕགས་མ་ཞེས་བྱ་བའི་པྲསཱརས་མཛེས་པར་བྱས་པའོ། །བསྒྲིབྷགྷོས། ཝཱཝིཊྛཙཱཡཱ བྱམས་པའི་བདུད་རྩིས་འགྲོ་ཀུན་ ༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

ལ། །ཕན་བདེའི་དགའ་སྟོན་མཆོག་སྦྱིན་པ། །འཇམ་དཔལ་དབྱངས་དངོས་ས་གསུམ་ན། །གྲུགས་པའི་རྒྱལ་མཚན་རྒྱལ་གྱུར་ཅིག །ཞེས་དགེ་ལེགས་སུ་བྱ་བའི་ཚིག་གི་མེ་ཏོག་སྔོན་དུ་གཏོར་ནས། གུས་པ་ཆེན་པོའི་ཕྱག་དང་བཅས་ཏེ་ཞུ་བ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག །སྐུ་བཞི་ཡེ་ཤེས་ལྔའི་ངོ་བོ། ལྷར་བཅས་བསྟན་འགྲོ་ཡོངས་ཀྱི་དཔལ་མགོན། སྐྱབས་གཅིག་བཀའ་དྲིན་མཉམ་མེད་རྣམ་འདྲེན་རྡོ་རྗེ་འཆང་ཆེན་པོ་གང་ཉིད། སྐྱབས་འོག་ཐ་ཤལ་པ་ཁོ་བོ་ཅག་གིས་གཉུག་མར་བསྟི་བའི་ཁང་བུར་ཞབས་ཀྱི་པདྨོ་བཀོད་ནས། བཅོམ་ལྡན་འདས་འཆི་མེད་མགོན་པོའི་དཀྱིལ་འཁོར་དུ་དབང་བསྐུར་བས་མཚོན་འབྲེལ་ཚད་དོན་ལྡན་གྱི་མཛད་པ་མཁའ་ཁྱབ་ཏུ་སྤྲོས་པའི་བཀའ་དྲིན་ནི་བྱང་ཆུབ་སྙིང་པོའི་བར་དུ་གཞལ་བྱས་དབེན་ནའང་། རེ་ཞིག་ཡིད་སྤྲུལ་གྱི་མཎྜལ་རྒྱ་ཆེར་བཀོད་པའི་མཚོན་བྱེད་དངོས་བཤམས་མདུན་སྟོང་མིན་ཙམ་དུ། བཀྲ་ཤིས་པའི་ལྷ་གོས་སོགས།

འཇམ་མགོན་བླ་མ་རིན་པོ་ཆེར་ལེགས་འབུལ་གྱི་ཡི་གེ་བདུད་རྩིའི་མེ་ཏོག

---

^{[མ་དཔེ་གཟིགས་ན་འདིར་གནོན།]}

༈ འཇམ་མགོན་བླ་མ་རིན་པོ་ཆེར་ལེགས་འབུལ་གྱི་ཡི་གེ་བདུད་རྩིའི་མེ་ཏོག་གོ། །ཨེཀྐ་སི་ནཱམཾ ཀཛིནཙི་ཙྪཛི ཤི ཛཱ་ཏི་འཕགས་མའི་དབྱངས་ཀྱི་སྡེབ་སྦྱོར་རོ། །ཤཱནྟཙབཔོརནྟ་བྷོཥྛ ཚཧཱུྃཙ སཾཞིའཕོ་ཛཱིཉྩནྟུ། འགྱུར་མེད་གྲུབ་པའི་ཡེ་ཤེས་གཅིག་པུ་ནི། །བྱང་ཆུབ་སྙིང་པོར་འཁྲུངས་པའི་མཐུ་སྟོབས་ཀྱིས། །སྲིད་དང་ཞི་བའི་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

མཐའ་ལས་རྣམ་གྲོལ་བ། །ཡོངས་རྫོགས་བསྟན་པའི་ཉི་མ་རྒྱལ་གྱུར་ཅིག །ཅེས་ཚིག་སྦྱོར་གྱི་མེ་ཏོག་སྔོན་དུ་གཏོར་ནས། དེང་གི་ཆར་ཡང་། རིགས་དང་དཀྱིལ་འཁོར་ཀུན་གྱི་ཁྱབ་བདག་མཆོག་སྤྲུལ་རྡོ་རྗེ་འཆང་ཆེན་པོ་གང་ཉིད་ནས། སྐྱབས་འོག་ཐ་ཤལ་པ་ཁོ་བོ་ཅག་ལ་དུས་རྟག་ཏུ་ཐུགས་རྗེའི་གཟིགས་སྐྱོང་བླ་ན་མེད་པར་མ་ཟད། ད་ལན་ཡང་ཞབས་ཀྱི་པདྨོ་ལ་ཕྱག་གིས་འདུད་པའི་སྐལ་བཟང་རྙེད་ཅིང་། གསུང་གི་བདུད་རྩིས་སྨིན་གྲོལ་དུ་མཛད་པའི་བཀའ་དྲིན་ནི་བྱང་ཆུབ་སྙིང་པོའི་བར་དུ་གཞལ་བར་དཀའ་ན། ཟང་ཟིང་གི་བདོག་པ་ཕྲ་མོས་ལྟ་ག་ལ། དེ་ལྟར་ནའང་རེ་ཞིག་ཡིད་སྤྲུལ་གྱི་མཎྜལ་རྒྱ་ཆེར་སྤྲུལ་ཏེ་ཕུལ་བའི་མཚོན་བྱེད་དུ་དངོས་བཤམས་ཟེག་མ་ཙམ་བསྟར་བར། བཀྲ་ཤིས་པའི་ལྷ་གོས་རབ་དཀར་སྲིད་དུ་རིང་བ་སོགས། སླད་མའི་ཆར་ཡང་། སྐུ་གསུང་ཐུགས་རྡོ་རྗེའི་ཆོས་བདུན་གྱི་ངོ་བོར་འཚོ་ཞིང་གཞེས་ལ་ཆོས་ཀྱང་སྟོན་པ་ནས། རིང་མིན་ཞལ་གྱི་དཀྱིལ་འཁོར་མངོན་སུམ་དུ་མཇལ་ཞིང་གསུང་གི་བདུད་རྩི་ལྷུག་པར་སྩོལ་བ་དང་། འདི་ནས་བྱང་ཆུབ་བར་དུ་ཡེ་ཤེས་གཟིགས་པ་དམ་པས་མི་འདོར་བར་རྩེ་གཅིག་པའི་ཡིད་ཀྱིས་གསོལ་བ་འདེབས་པ་ལགས་ན་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཀལྱཱ་ཎཾ་བྷ་བ་ཏུ།། །།

དཔལ་ལྡན་བླ་མ་དམ་པ་ཤཱི་མཱ་ན་མཚན་ཅན་ལ་ལེགས་འབུལ་སྟོབ་པའི་ཡི་གེ་བདུད་རྩིའི་མྱུ་གུ།

---

^{[མ་དཔེ་གཟིགས་ན་འདིར་གནོན།]}

༈ དཔལ་ལྡན་བླ་མ་དམ་པ་ཤཱི་མཱ་ན་མཚན་ཅན་ལ་ལེགས་འབུལ་སྟོབ་པའི་ཡི་གེ་བདུད་རྩིའི་མྱུ་གུའོ། །རྫྙཱ་ནཱཏྟཱཏུབིདཾཀྲཔཱནཊེ༔ ཙྪརྗོཤུདྡྷདིསྟེ། ཀརྨསོཁྱསུཀལྤབཱརདཱ ཛཱིབནུཏྲསུགབྱབཛྲཏཱ། དཔལ་ལྡན་སྲས་བཅས་རྒྱལ་བ་ཐམས་ཅད་ཀྱི། །མཁྱེན་བརྩེའི་ཡེ་ཤེས་རྨད་དུ་བྱུང་བའི་གར། །ཕྲིན་ལས་སྐལ་བཟང་ཕན་བདེའི་མཆོག་སྦྱིན་པའི། །གསང་གསུམ་རྡོ་རྗེའི་ངོ་བོར་འཚོ་གཞེས་གསོལ། །གུས་པའི་ཐལ་མོ་ཆུ་སྐྱེས་གཞོན་ནུའི་སྤུན་ཟླ་ཅན་སྙིང་གར་དུད་དེ་གསོལ་པ། འཁོར་འདས་མི་ཕྱེད་འོད་གསལ་མཆོག་བདེའི་སྤྲིན། ཟུང་འཇུག་དགྱེས་པའི་རྡོ་རྗེར་ཡོངས་ཤར་བས། །ཐ་མལ་དངོས་ཀུན་ལྷ་དང་ཡེ་ཤེས་སུ། །རྣམ་རོལ་གྲུབ་པའི་སྙེམས་པ་ཅིར་ཡང་བཟུང་། །དེ་ཚེ་གཞིར་གནས་དཀྱིལ་འཁོར་པདྨའི་ཚལ། །སྨིན་བྱེད་བདུད་རྩིས་བརླན་པའི་དགེ་མཚན་གྱིས། །སྐུ་བཞིའི་མཚར་སྡུག་མཆོག་ཏུ་རྒྱས་མཛད་པའི། །བཀའ་དྲིན་བྱང་ཆུབ་བར་དུ་གཞལ་དཀའི་གནས། །དེ་ལྟར་ནའང་རེ་ཞིག་དངོས་འབྱོར་གྱི་མཎྜལ་མདུན་སྟོང་མིན་ཙམ་དུ། བཀྲ་ཤིས་པའི་ལྷ་གོས་སོགས། སླར་ཡང་། ཉེས་པར་སྤྱོད་པ་ཆ་བཅས་རྣམ་གྲོལ་ཤིན་ཏུ་སྦྱངས་པའི་ཏིང་འཛིན་དང་། །བྱང་ཆུབ་སེམས་གཉིས་གཞར་ཡང་གཏོང་མིན་ཨེ་ཝཱི་མཱ་ཡཱའི་རྒྱལ་ཐབས་ལ། །དཔལ་ལྡན་རྡོ་རྗེ་འཛིན་པའི་ངལ་འཚོས་བསྟན་འཛིན་བྱེ་བའི་ཅོད་པན་རྩེར། །འཚོ་གཞེས་རྟག་པ་དམ་པའི་ཕྲིན་ལས་སྲས་བཅས་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

རྒྱལ་བས་བསྒྲུབ་བཞིན་དུ། །ཞབས་ཀྱི་པདྨོར་བསྙེན་པའི་དམན་བདག་ཀྱང་། །ཟླ་མེད་ཞི་བསིལ་ཆོས་ཕུང་བྱེ་སྙེད་ཀྱིས། །བྱང་ཆུབ་སྙིང་པོའི་ལང་ཚོ་རྒྱས་མཛད་པའི། །དགེ་མཚན་འཇིག་རྟེན་གསུམ་ན་འབར་གྱུར་ཅིག །སརྦ་དཱ་མངྒ་ལཾ།། །།

དགོན་སར་ཆོས་རྗེ་མཆོག་སྤྲུལ་རིན་པོ་ཆེའི་འཕྲིན་ལན་བདུད་རྩིའི་དོ་ཤལ།

---

^{[མ་དཔེ་གཟིགས་ན་འདིར་གནོན།]}

༈ དགོན་སར་ཆོས་རྗེ་མཆོག་སྤྲུལ་རིན་པོ་ཆེའི་འཕྲིན་ལན་བདུད་རྩིའི་དོ་ཤལ་ཅེས་བྱ་བའོ། །ཕུཔཉྩཛོལཙྪིཥྛ པིཝིཡཱིཙྪརིཐོནཱཀི ཙྪརྗོབཱཏྟཾནཱམེ། །༥ཨཙུཧིཏྟོགྲོད ཕྱི་སྒྱུཙིནྡྲིཙྩམཱུལེ། སྤྲོས་པའི་ཆུ་གཏེར་ལས་བརྒལ་ཡང་། །སྙིང་རྗེའི་ཤིང་རྟ་ལ་ཆགས་པས། །གཞན་ཕན་བདུད་རྩིའི་མཆོག་སྦྱིན་པའི། །རྣམ་འདྲེན་ཤར་གྱི་ཐིག་ལེའི་དྲུང་། །སྤྲིན་བྲལ་ཉི་མ་གཞོན་ནུའི་རྡུལ་ཕྲེང་གིས། །ཡིད་འོང་ཨུཏྤལ་དམར་པོ་བྱེ་བ་བཞིན། །གང་གི་ཐུགས་རྗེས་བསྐུལ་བའི་གཞན་དབང་ལས། །དོན་ལྡན་སྙན་པར་སྨྲ་བའི་མཆིད་འདི་གསོལ། །གཟོད་མ་ཉིད་ནས་རྣམ་པར་གྲོལ་ཡང་ཐབས་མཁས་སྤྱོད་པའི་ཨུཏྤལ། །རྨད་བྱུང་ཡོན་ཏན་དུ་མའི་ཚོན་རིས་རྣམ་པར་གཡོ་བའི་དོག་པ་ནི། །ཡིད་ཅན་སྒེག་མོའི་རྣ་བར་དཔྱངས་པས་སྲིད་དང་ཞི་བའི་ཕ་མཐའ་ལས། །རིང་དུ་གྱུར་པའི་སྤྲིང་ཡིག་གསར་པས་ཕྱོགས་ཀྱི་ཁོར་ཡུག་དཀྲིགས་པར་བྱས། ༣ །དེ་ཚེ་ཕྱི་ནང་རིག་པའི་གཞུང་ལུགས་དང་། །བསླབ་གསུམ་དོན་ལ་མཛའ་བའི་བརྟུལ་ཞུགས་ཀྱིས། །འཇམ་མགོན་བླ་མའི་ཆོས་ཀྱི་རྒྱལ་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

ཐབས་ཆེར། །ལྷར་བཅས་བསྔགས་པའི་རོལ་མོས་ཤིས་པ་བསྒྲུབས། ༤ །ཟབ་མོ་དབུ་མའི་གཞུང་ལུགས་ཟླ་གཞོན་གྱིས། །ཁྱོད་མཁྱེན་ཀུ་མུཏ་འཛུམ་དཀར་གྲོལ་བའི་མོད། །རྒྱལ་བ་གཉིས་པ་དཔལ་ལྡན་ཀླུ་ཡི་ཞབས། །གངས་ཅན་རི་བོའི་ཁོངས་སུ་རྒྱུ་བ་བཞིན། ༥ །གསང་རྒྱུད་རྒྱ་མཚོའི་མཐར་ཐུག་འདུས་པ་ཡི། །སྨིན་གྲོལ་ལང་ཚོ་རྒྱགས་པའི་མེ་ནཱ་ཀར། །བློ་མཆོག་ཟུར་མིག་གཡོ་བས་འཁྱུད་བཞིན་དུ། །བརྟན་མཁས་ཡོན་ཏན་རྫོགས་འདི་རིགས་སམ་ཅི། ༦ །དེ་སོགས་བསྔགས་འོས་རྣམ་ཐར་བྱེ་བ་ཡིས། །མངོན་པར་མཛེས་པའི་གསང་བ་གསུམ་གྱི་དངོས། །འཚོ་གཞེས་ཆོ་ག་མ་ཉམས་གསལ་བ་ལ། །གཅིག་ཏུ་གུས་པ་བཞིན་རས་ཅིར་ཡང་ངོམ། ༧ །ཁྱད་པར་ངེས་དོན་མཛེས་མའི་འགྲམ་པ་ནས། །འཕོས་པའི་ལེགས་བཤད་བདུད་རྩིའི་ཁ་ཆང་གིས། །བདག་ཉིད་མཆོག་ཏུ་དྭངས་པའི་བ་ཀུ་ལ། །དད་གསུམ་འདའ་བརྒྱ་གྲོལ་བའི་མཚར་སྡུག་གཡོས། ༨ །འདི་ན་གྱི་ནའི་སྤྱོད་ཚུལ་སྟུག་པོ་ཡིས། །དམ་ལ་བཞག་པའི་འདུ་ཤེས་གསུམ་པ་ཡང་། །ཐོས་བསམ་རི་མོར་བྲིས་པའི་མར་མེ་དང་། །མཚུངས་བཞིན་ལང་ཚོ་ཉེ་ཞོའི་ཕྱོགས་ཀྱིས་བཏང་། ༩ །སླད་མའི་ཆར་ཡང་སྲིད་པའི་ཟག་པ་རྒྱུ་དང་བཅས་པའི་འཆིང་བ་ཀུན། །འོད་གསལ་བདེ་ཆེན་དྭངས་མའི་ཐིག་ལེར་འཕོ་འགྱུར་མེད་པར་རྒྱས་བཏབ་པས། །སྐུ་

---

^{[མ་དཔེ་གཟིགས་ན་འདིར་གནོན།]}

གསུམ་མི་ཕྱེད་གྲུབ་པའི་རྡོ་རྗེ་རྣམ་པ་ཀུན་གྱི་མཆོག་ལྡན་ཞལ། །འཆི་མེད་རྟག་པའི་གོ་འཕང་ཆེན་པོར་གཡོ་བ་མེད་པར་འཚོ་གཞེས་ཤིང་། ༡༠ །བདག་ཀྱང་འདི་ནས་གཏན་དུ་བདེ་བའི་ལམ། །མངོན་དུ་རྙེད་མིན་དེ་སྲིད་མགོན་ཁྱོད་ཀྱི། །དགེ་བའི་བཤེས་སུ་ཡང་དག་མཛད་ནས་ཀྱང་། །རྣམ་གྲོལ་ཆོས་ཀྱི་ཆར་ཆེན་འབེབས་པ་དང་། ༡༡ །རིང་དུ་གནས་ནའང་ལེགས་པར་བཤད་པའི་གཏམ། །འཆད་མེད་སྩོལ་བའི་བཀའ་དྲིན་མི་འགོག་པས། །ཉི་མས་པདྨོར་ཇི་བཞིན་ཕན་བདེའི་དབྱིག །སྦྱིན་པའི་བྱེད་པོ་ཉིད་དུ་མཛོད་ཅེས་སྨྲེངས། ༡༢ །དེ་སྐད་ཞུ་བའི་མཆིད་ཚིག་མདོངས་མཐའ་མོ། །རྟེན་དངོས་གློག་གི་དོ་ཤལ་གཡོ་བ་དང་། །གུས་སྤྲོའི་སྒྲོ་གཤོག་ཟླུམ་པོའི་གར་བསྒྱུར་བཞིན། །ཁྱོད་ཞབས་དག་པའི་ཚལ་དུ་རྩེན་ལ་དེངས། ༡༣ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

དཔལ་ལྡན་བླ་མ་དམ་པ་དྷརྨ་ཏཱ་ར་ཕུལ་པའི་འཕྲིན་ལན་བདུད་རྩིའི་ལྗོན་པ།

---

^{[མ་དཔེ་གཟིགས་ན་འདིར་གནོན།]}

༈ དཔལ་ལྡན་བླ་མ་དམ་པ་དྷརྨ་ཏཱ་ར་ཕུལ་པའི་འཕྲིན་ལན་བདུད་རྩིའི་ལྗོན་པའོ། །ཚྭབྷཱཧཱམཱིཏྟཾཤྲཱིཙྪསུ གྱིཙྪཐུམཧྥདཱིཔེ སྡེབ་སྦྱོར་ཁ་སྒོ་ཞེས་བྱ་བའི་པྲསཱརའོ། །ཉིཏོཨུཀཱནྟི ནཱ ཙི ཚཙཱན་མཱི། རང་བཞིན་དག་པའི་བདུད་རྩི་དང་། །ཡོན་ཏན་མཐའ་ཀླས་སྣང་བ་ཆེས། །ཕན་བདེའི་ཆུ་གཏེར་རྒྱས་མཛད་པ། །རྣམ་འདྲེན་ཟླ་བ་གསར་པའི་དྲུང་། ༡ །རབ་དྭངས་བློ་མཆོག་ནོར་བུའི་སྙེ་མ་ལས། །ཚོགས་གསུམ་འདོད་པ་འཇོ་བའི་དགའ་སྟོན་གྱིས། །༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

གཟུར་གནས་སྙིང་ལ་མི་ཟད་བདུད་རྩིའི་སྤྲིན། །སྤྲོ་མཁས་དྲི་མེད་ཚིག་གི་འཕྲིན་རྟེན་སོན། ༢ །དེ་ཚེ་ཤིན་ཏུ་དགའ་བས་མྱོས་པའི་ཚུལ། །དབྱར་གྱི་རྔ་གསང་ཐོས་པའི་མདོངས་མཐའ་བཞིན། །གུས་སྤྲོའི་སྙན་པའི་མེ་ཏོག་འཐོར་བ་ཡང་། །ཡིད་འོང་ཟློས་གར་བསྒྱུར་བའི་དཔལ་ལ་འགྲན། ༣ །གང་ན་གནང་བཀག་ཁྲིམས་ཀྱི་ཟླ་ཐིག་གིས། །རབ་བརླན་བྱང་ཆུབ་སྤྱོད་པའི་ཀུ་མུ་དཱ། །གསང་ཆེན་རིམ་གཉིས་འབྲས་བཟང་གཡུར་ཟ་བའི། །སྔོན་མེད་གྲུབ་པའི་མྱུ་གུ་ཁྱོད་གཅིག་མཐོང་། ༤ །ཕྱི་ནང་རིག་ལམ་དུ་མའི་བ་ཀུ་ལ། །རྣམ་དཔྱོད་མཛེས་མའི་འགྲམ་ཆང་མངར་པོ་ཡིས། །བྲན་པས་མཆོག་ཏུ་དགོད་པའི་འཛུམ་དཀར་གྱིས། །མཁས་ཀུན་ཡི་ག་དབང་མེད་འགུགས་ལ་བྲེལ། ༥ །དེ་སོགས་བསྔགས་འོས་གསང་གསུམ་ཨུཏྤ་ལ། །སྐལ་བཟང་ཟུར་ཕུད་རྩེ་མོར་སྒེག་པའི་གཏམ། །རིང་ནས་རྣ་བའི་དཔྱིད་དུ་ཐོས་པའི་མོད། །དང་པོའི་ས་ཡི་དགའ་བ་གློ་བུར་ལངས། ༦ །འདི་ན་རང་རྒྱུད་སོས་ཀའི་ཐང་ཀ་ལ། །ཆོས་བརྒྱད་སྨིག་རྒྱུའི་ཆུ་གཏེར་རབ་གཡོ་ཡང་། །རིས་མེད་བསྟན་ལ་གུས་པའི་དྲོད་གཤེར་གྱིས། །ལང་ཚོའི་ས་བོན་མ་ཉམས་བརྟན་བཞིན་མཆིས། ༧ །མཚམས་ཞུས། སླད་མའི་ཆར་ཡང་སྐྱེ་དང་འགག་པའི་མཐའ། །གཟོད་ནས་རྣམ་གྲོལ་བདེ་ཆེན་རྡོ་རྗེའི་དབྱིངས། །མི་ཕྱེད་འདྲེས་པའི་ངལ་འཚོ་ལ་

---

^{[མ་དཔེ་གཟིགས་ན་འདིར་གནོན།]}

སྦྱར་བས། །འཆི་མེད་གྲུབ་པའི་མཚར་སྡུག་རྫོགས་པ་དང་། ༨ །འདི་ནའང་གནས་སྐབས་མཐར་ཐུག་ཕན་བདེའི་ལམ། །ལེགས་བཤད་དཔྱིད་ཀྱི་ཕོ་ཉའི་རོལ་མོ་ཡིས། །དོན་གཉིས་དབྱར་གྱི་དགའ་མ་བསུ་བ་དང་། །རྟག་ཏུ་ཐུགས་རྗེས་སྤྱན་ཟུར་གཡོ་བར་མཛོད། ༩ །གང་ལ་དེ་སྐད་སྤྲིང་བའང་གུས་སྤྲོའི་ཡིད། །རབ་དྭངས་ཆུ་གཏེར་ཆེ་ལས་ཉེར་འཁྲུངས་པའི། །ཚིག་རྒྱན་རིན་ཆེན་དོ་ཤལ་གསར་བ་སྟེ། །བྱང་ཆུབ་བར་དུ་མཛའ་བའི་རྒྱན་དུ་རོལ། །སརྦ་དཱ་ཀ་ལ་ཤོ་བྷ་ཝནྟུ།། །།

དགེ་སློང་སྡེ་སྣོད་འཛིན་པ་ངག་དབང་སྙན་གྲགས་ཀྱི་འཕྲིན་ལན་བདུད་རྩིའི་འཁྲི་ཤིང་།

---

^{[མ་དཔེ་གཟིགས་ན་འདིར་གནོན།]}

༈ དགེ་སློང་སྡེ་སྣོད་འཛིན་པ་ངག་དབང་སྙན་གྲགས་ཀྱི་འཕྲིན་ལན་བདུད་རྩིའི་འཁྲི་ཤིང་ངོ་། །ཨཱབཱདཱིཤཱརིཏྟཾརཱ། ཞུཎྷིརནྟིཡུཝཱིབཏྟི། ཙྪནྟཱབཱཀྲྀནཱམསྱཔྲསྟཱརེ། ཤུཀྐིཡཾཤིསྶརཱནུགཱ སཔཱདིརཝིརཱི། ངག་གི་དབང་ཕྱུག་དཔལ་ལྡན་བླ་མ་ཡིས། །རྗེས་བཟུང་བློ་གྲོས་ལང་ཚོ་དར་བབས་པས། །སྙན་པའི་གྲགས་དཀར་རྒྱ་མཚོའི་མཐར་འགྲོ་བ། །མཚུངས་མེད་སྨྲ་བའི་ཉི་མ་རྒྱལ་གྱུར་ཅིག ༡ །ཟླ་ཤེལ་ཞུ་བའི་བཅུད་ཀྱིས་རེག་པ་ལས། །ཡིད་འོང་ཀུ་མུ་དཱ་དཔལ་བྱེ་བ་བཞིན། །ཁྱོད་ཀྱི་ལེགས་གསུང་སྙན་པའི་འཕྲིན་ཡིག་གིས། །བསྐུལ་ལས་ཞུ་མཆིད་རྒྱུད་མང་ཅུང་ཟད་བསྒྲེངས། ༢ །གང་ན་ཚོགས་གསུམ་ནོར་བུའི་ཆུ་གཏེར་ཆེ། །བསྲུབས་སྐྱེས་ངོ་མཚར་གཟུགས་སྐུའི་ཀཏྤར་དབང་། །ཤར་བའི་མོད་ནས་དམ་པའི་ཡོན་ཏན་གྱིས། །ཁོར་ཡུག་ཀུན་དགར་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

བྱས་པའི་གཏམ་དེ་སྙན། ༣ །དེ་ཚེ་ཚུལ་གནས་ཁྲིམས་ཀྱི་ཟིལ་དངར་གྱིས། །བཤེས་པས་མང་ཐོས་སྐྱེད་ཚལ་དར་བབས་ཤིང་། །ཇི་བཞིན་བསམ་དང་སྒོམ་པའི་འབྲས་བཟང་གིས། །དུད་པས་ཕན་བདེའི་ངལ་འཚོ་གཅིག་ཏུ་གྱུར། ༤ །ཕྱི་ནང་རིག་གཞུང་རྒྱ་མཚོར་མཛའ་བའི་སྤྱན། །འཇམ་དཔལ་མཁྱེན་པའི་སྣང་བ་བྱིན་གྱུར་ཕྱིར། །གཟུར་གནས་ཡི་ག་འགུགས་པའི་རྣམ་ཐར་ལ། །མཁས་ཀུན་བསྔགས་པའི་མེ་ཏོག་ཆལ་ཆིལ་འཐོར། ༥ །ཁྱད་པར་རིང་ན་གནས་པའི་འདམ་སྐྱེས་བདག །མ་འདྲེས་བརྩེ་བའི་ཉིན་མོའི་ཐིག་ལེ་ལས། །ལེགས་འོང་སྤྲིང་ཡིག་རྡུལ་དམར་འཛག་པ་ཡིས། །ཀུན་དགའི་འཛུམ་དཀར་གསར་པ་ཁོང་ནས་དགོད། ༦ །འདི་ན་ཤིན་ཏུ་རྨོངས་པའི་དམ་འོག་ཏུ། །ཆུད་པའི་འདུ་ཤེས་གསུམ་གྱི་ཁོལ་པོ་ཡང་། །སྐྱབས་མཆོག་བླ་མའི་ཐུགས་རྗེའི་བྱིན་རླབས་ལ། །བརྟེན་ནས་འཚོ་བའི་འདུ་བྱེད་མ་ཉམས་ཙམ། ༧ །སླད་མའི་ཆར་ཡང་དོན་ལྡན་གསང་བ་གསུམ། །ཡུན་དུ་འཚོ་ཞིང་གཞེས་དང་ཆབ་གཅིག་པར། །འཆད་རྩོད་རྩོམ་པའི་རྒྱལ་རྔ་བརྡུངས་པའི་སྒྲས། །ས་གསུམ་མ་རིག་གཉིད་ལས་སློང་མཛོད་ཀྱེ། །སརྦ་དཱ་ཤེ་ཡོ་བྷ་བ་ཏུ།། །།

བློ་གསལ་མཉྫགྷོ་ཥའི་འཕྲིན་ལན་བདུད་རྩིའི་ཐིག་པ།

---

^{[མ་དཔེ་གཟིགས་ན་འདིར་གནོན།]}

༈ བློ་གསལ་མཉྫགྷོ་ཥའི་འཕྲིན་ལན་བདུད་རྩིའི་ཐིག་པའོ། །ན་མཤཱི་མཱི་གུ་ར་བེ། ཡིད་ལ་འཇམ་དབྱངས་བྱིན་ཞུགས་ཤིང་། །ངག་གིས་འཚོ་བྱུང་རབ་

---

^{[མ་དཔེ་གཟིགས་ན་འདིར་གནོན།]}

དགྱེས་པའི། །ནོར་བུའི་རྒྱུད་མང་བསྒྲེངས་མཁས་པས། །འཕྲིན་ཡིག་རྟེན་དང་བཅས་པ་སོན། ༡ །ཇི་ལྟར་ཟླ་བ་འཇིག་རྟེན་ན། །བདུད་རྩིའི་རང་བཞིན་ཉིད་དུ་སྒྲོགས། །དེ་བཞིན་གང་གི་བློ་གྲོས་ཀྱང་། །ལེགས་པར་བཤད་པའི་རང་བཞིན་ཉིད། ༢ །ཉིན་མོར་བྱེད་པས་འབྱེད་མིན་པའི། །བདག་ཡིད་པདྨོ་གསར་པའི་ཁ། །ཁྱོད་ཀྱི་ཡོན་ཏན་གྱིས་ཕྱེས་པས། །དམ་ཆོས་དགའ་སྟོན་ཕན་ཚུན་ཆགས། ༣ །འདི་ན་ལྕགས་ཀྱུས་བཏང་བ་ཡི། །ལག་ལྡན་མྱོས་པ་ཇི་ལྟ་བར། །སེམས་ནི་ཞི་ལ་མི་གནས་ཀྱང་། །ལང་ཚོའི་འདུ་བྱེད་བདེ་བར་མཆིས། ༤ །སླར་ལ་འཚོ་ཁམས་ལྗོན་བཟང་དང་། །བྱང་ཆུབ་སྤྱོད་པའི་ཨུཏྤ་ལ། །མཉམ་དུ་རྒྱས་པའི་དགེ་མཚན་གྱིས། །ཕན་བདེའི་འབྲས་བུ་འཛིན་གྱུར་ཅིག །སརྦ་དཱ་ཤུབྷིབྷུཡེཏཱ།། །།

མཆོག་སྤྲུལ་རིན་པོ་ཆེ་ཆོས་ཀྱི་བློ་གྲོས་མདུན་ཕུལ་བ།

---

^{[མ་དཔེ་གཟིགས་ན་འདིར་གནོན།]}

༈ མཆོག་སྤྲུལ་རིན་པོ་ཆེ་ཆོས་ཀྱི་བློ་གྲོས་མདུན་ཕུལ་བའོ། །རྡོ་རྗེ་འཆང་དངོས་བསྟན་པའི་ཉིན་བྱེད་ཆེན་པོའི་ཞབས་སྟེགས་ཀྱི་ཆུ་སྐྱེས་ག་ལ་བར། གང་ན་དྲང་སྲོང་ཀློག་པས་མི་ངལ་བའི་ནགས་ཀླུངས་སུ་དཀྱུ་བའི་ནེ་ཙོ་རིག་བྱེད་མཁན་གཞོན་ནུ་ཞིག་གིས་གདོང་མཆོག་ཏུ་དུད་པས་འདི་སྐད་དུ། རྡུལ་མུན་སྙིང་སྟོབས་ཀྱི་ཕ་རོལ་ཏུ་ནི་སོན། ཤེས་བྱ་ཐམས་ཅད་ལ་ཆགས་པ་དང་ཐོགས་པའི་ནེམ་ནུར་དང་ནི་བྲལ། ཡང་སྲིད་སླར་མི་ལེན་པའི་རྣམ་གྲོལ་གྱི་བཟོད་པ་ནི་ཐོབ་མོད་ཀྱི། སྨོན་ལམ་དང་སྙིང་རྗེའི་

---

^{[མ་དཔེ་གཟིགས་ན་འདིར་གནོན།]}

འཕེན་པ་ཁོ་ནས་ཚུ་རོལ་མཐོང་བ་རྣམས་དང་སྤྱོད་ཡུལ་མཉམ་པར་སྣང་བའི་མཚན་དཔེའི་དཀྱིལ་འཁོར་འཚོ་ཞིང་གཞེས་ལ་ཆོས་ཀྱང་སྟོན་པ་ནི་ངོ་མཚར་ལས་ཀྱང་ངོ་མཚར་བྱེ་བ་ཕྲག་བརྒྱའི་སྙིང་པོས་ལྕི་བའི་བཀའ་དྲིན་གྱི་ཕུལ་དམ་པ་ཚངས་པའི་བློ་གྲོས་ཀྱིས་བགྲངས་ནའང་སླ་བའི་སྐབས་ཅི་ཞིག །བཀའ་སློབ་སེར་གོས་འཛིན་པའང་ཅང་ཤེས་བཟང་པོའི་གཞན་དབང་གིས་བཤུལ་ལམ་དུ་བསྐྱོད་པ་ཡངས་ཤིང་ཟོ་མདོག་བདེ་བ་ནས་རང་གནས་བསམ་གཏན་གྱི་ཁང་བུར་ཡིབས་པའི་ཟོལ་གྱིས་བག་ཕེབས་པར་མཆིས་ལགས། །འབྱུང་འགྱུར་གྱི་ཆར་ཡང་། འཆིང་བའི་མདུད་པ་རབ་ཏུ་གྲོལ། །ཀོ་ཊ་ཀ་སོགས་འགྲོ་ལྡོག་བྲལ། །ཆར་ཡང་སྲོག་གི་ཟུངས་སོང་བའི། །གསང་གསུམ་བསྐལ་བརྒྱར་ཏིཥྛནྟུ། །དེ་སྲིད་དུ་རྡུལ་དང་བྲལ་བའི་ཡེ་ཤེས་ཀྱི་སྤྱན་རས་ཀྱང་ཕྱོགས་འདིར་སྔ་མཁོ་བཞིན་གཟིགས་པའི་གོ་སྐབས་དབྱེ་བར་གསོལ་ན་ཅི་གནང་། བཀྲ་ཤིས་པའི་ལྷ་རྫས་ལ་རྟགས་ཀྱིས་སྤྲས་ཏེ་མཆོག་ཏུ་དགེ་བའི་ཚེས་ལ་ན་བ་ཀ་ཊི་མངྒ་ལ་དེ་བ་གྲྭཏཱ། བནྡ་ནཾ་ས་མདྲི་ཏམ།། །།

མཆོག་སྤྲུལ་རྡོ་རྗེ་འཆང་ཆོས་དབྱིངས་རྡོ་རྗེར་ཕུལ་བའི་ཞུ་ལན།

---

^{[མ་དཔེ་གཟིགས་ན་འདིར་གནོན།]}

༈ མཆོག་སྤྲུལ་རྡོ་རྗེ་འཆང་ཆོས་དབྱིངས་རྡོ་རྗེར་ཕུལ་བའི་ཞུ་ལན་ནོ། །གསང་བའི་བདག་པོ་ཚུར་མཐོང་ངོར། །རྡོ་རྗེའི་སློབ་དཔོན་མཆོག་གི་ཚུལ། །བཀའ་དྲིན་མཉམ་མེད་རྗེ་བླ་མའི། །ཞབས་ཀྱི་པདྨོའི་ཉེ་དྲུང་དུ། །དགེ་སློང་གཞོན་ནུས་གསོལ་པ། བརྒྱ་

---

^{[མ་དཔེ་གཟིགས་ན་འདིར་གནོན།]}

བྱིན་ཐོགས་པའི་ནོར་བུ་ལྟར། །མཚན་དཔེ་རྙོགས་པའི་དྲི་བྲལ་ཞིང་། །ཕྲིན་ལས་ཕ་མཐའ་ཡས་པ་ནི། །འཆི་མེད་ལམ་གྱི་སྤུན་ཟླར་སོང་། །དེ་ཚེ་ཤིན་ཏུ་རྗེས་བརྩེ་བའི། །གཟིགས་པ་དུས་ལས་ཡོལ་མིན་པས། །སྔ་ཕྱིར་བྱིན་རླབས་གཟི་འབར་བའི། །བཀའ་གླེགས་སྐྱེས་བཅས་སྤྱི་བོར་སོན། ༣ །དད་པའི་གཙུག་ཏུ་བཀོད་བྱས་ཤིང་། །དྭང་བའི་མིག་གིས་མཇལ་བ་ན། །སྙིང་ལ་གུས་སྤྲོའི་པདྨོ་ནི། །དབྱར་ཀ་ལྟ་བུར་རྒྱས་པར་གྱུར། ༤ །བསམ་གཏན་ལས་ཀྱང་མ་གཡོས་བཞིན། །རྣམ་དཀར་སྒོ་འཕར་བརྒྱ་དབྱེ་བ། །ཁྱོད་ཀྱི་ལེགས་མཛད་སངས་རྒྱས་ལས། །དཔེ་ཟླས་དབེན་ནོ་རབ་བཏགས་མིན། ༥། ༈ འདི་ན་སེར་གོས་འཛིན་པ་ཡང་། །གཙོ་བོར་གཞན་དབང་ལ་འཆེལ་ནས། །དགྱེས་པ་རྡོ་རྗེའི་བསྙེན་སྒྲུབ་ཚུལ། །དགུན་དུས་འཕྱི་བའི་བརྟུལ་ཞུགས་བཟུང་། ༦ །འོན་ཀྱང་དབང་གི་བྱིན་རླབས་ནི། །ཟླ་བའི་ཟེར་གྱིས་གསོས་པ་ལས། །ལང་ཚོའི་ཀུ་མུད་མ་ཉམས་བཞིན། །གསོལ་འདེབས་དྲི་བསུང་འཐུལ་བཞིན་མཆིས། ༧ །སླར་ཡང་། ཏིཥྛན་ཞེས་གང་ལན། །སྐྱེ་བའི་ཚུལ་རོལ་ཟད་གྱུར་བས། །འཕོ་བའི་མཚན་མ་རིང་བཅད་པའི། །རྡོ་རྗེ་འཆང་དངོས་དེ་ལའོ། ༨ །ཇི་ལྟར་ཉིད་དང་པདྨ་དཀར། །ཟླ་བ་དང་ནི་ཆུ་གཏེར་བཞིན། །བྱང་ཆུབ་བར་དུ་མགོན་ཁྱོད་ཀྱིས། །བདག་ཀྱང་རྗེས་སུ་སྐྱོངས་མཛོད་ཀྱེ། །སརྦ་དཱ་མངྒ་ལམ།། །།

ཧོ་ཐོག་ཐུ་དྷརྨ་མ་ཏིའི་ཞབས་པད་དུ་ཕུལ་བའི་འཕྲིན་ལན།

---

^{[མ་དཔེ་གཟིགས་ན་འདིར་གནོན།]}

༈ ཧོ་ཐོག་ཐུ་དྷརྨ་མ་ཏིའི་ཞབས་པད་དུ་ཕུལ་བའི་འཕྲིན་ལན་ནོ། །མཁས་པའི་ཅོད་པན་གྲུབ་པའི་ཉི་མ་རྣམ་འདྲེན་རྡོ་རྗེ་འཆང་མངོན་སུམ་པའི་ཞབས་པད་ཉེ་དྲུང་དུ། རྒྱལ་ཁམས་ཀྱི་སྤྲང་པོ་འདུ་ཤེས་གསུམ་པའི་མོས་གུས་ཀྱི་ངག །གང་ན་ཀུན་ཏུ་རྟོག་པ་ཡི། །འཕོ་བ་འགགས་པའི་སྒྱུ་འཕྲུལ་ནི། །རྡོ་རྗེ་སྙེམས་མའི་བདག་པོ་ཉིད། །ངུར་སྨྲིག་ཟོལ་གྱིས་གཞན་ཕྱིར་འོང་། །དེ་ཚེ་ཕྲིན་ལས་མཐའ་ཡས་པ། །མཁའ་དང་སྙོམས་པར་འཇུག་བཞིན་དུ། །བྱིན་རླབས་གཟི་འབར་བདུད་རྩིའི་དཔྱིད། །གླེགས་བམ་ཕྲེང་བཅས་ཉམས་མེད་སོན། །རྣམ་ཀུན་བརྩེ་ཆེན་ཐུགས་རྗེ་ཡིས། །གཞར་ཡང་གཏོང་མིན་འདམ་སྐྱེས་ཀྱང་། །དད་པའི་ལང་ཚོ་མ་རྙིང་བཞིན། །འདུ་ཤེས་གསུམ་གྱི་མནལ་ལ་གཡུར། །མཚམས་ཞུས། ཛི་ཝནྟ་ཞེས་ཤིས་བརྗོད་ཀྱི། །མེ་ཏོག་ཉིན་བཞིན་འཐོར་བ་ཡང་། །རང་ཉིད་མོས་པས་གཙོར་བྱས་ཀྱི། །རྒྱལ་ལ་སྐྱེ་འགག་ཕ་མཐའ་གང་། །བདེན་པ་དེ་ཡིས་འཇིག་རྟེན་ན། །ཁྱོད་ཀྱི་ཕྲིན་ལས་ནུབ་མེད་ཅིང་། །བདག་ཀྱང་བྱང་ཆུབ་སྙིང་པོའི་བར། །སྔར་བཞིན་ཡེ་ཤེས་གཟིགས་པས་སྐྱོངས། །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

གསང་བདག་ཧོ་ཐོག་ཐུའི་འཕྲིན་ལན།

---

^{[མ་དཔེ་གཟིགས་ན་འདིར་གནོན།]}

༈ གསང་བདག་ཧོ་ཐོག་ཐུའི་འཕྲིན་ལན་ནོ། །འཇིགས་བྲལ་བདེ་བ་ཆེན་པོ་དང་། །ཆོས་དབྱིངས་སྟོང་པ་ཟུང་འཇུག་པའི། །རྡོ་རྗེ་འཛིན་པ་ངུར་སྨྲིག་ཟོལ། །ཕྱག་འཚལ་ཡེ་

---

^{[མ་དཔེ་གཟིགས་ན་འདིར་གནོན།]}

ཤེས་སྐུ་ཅན་ལའོ། །གུས་པས་གསོལ་བ། གསང་བའི་བདག་པོའི་གཟུགས་ཀྱི་སྐུ། །ཕྱག་ན་པདྨའི་རིག་སྔགས་གསུང་། །ཡེ་ཤེས་རབ་ཏུ་འབར་བའི་ཐུགས། །སྲིད་ཞིའི་བླ་ན་མཛེས་པ་ནས། །རྣམ་པར་དཀར་བའི་ཕྲིན་ལས་ནི། །ཟབ་མོ་སངས་རྒྱས་སྤྱོད་ཡུལ་བར། །རྟག་ཅིང་ཁྱབ་དང་ལྷུན་གྲུབ་པར། །གུས་པའི་བློ་མིག་ཉིན་བཞིན་གྲོལ། །ལྷག་པར་འདི་ནས་བྱང་ཆུབ་བར། །གཞལ་དཀའི་བཀའ་དྲིན་རྗེས་བསྐྱངས་ཤིང་། །ཉེ་བའི་བཀའ་གླེགས་ལེ་ཚན་གསུམ། །རིམ་བཞིན་སྤྱི་བོར་སོན་པ་ན། །ཉི་མས་ཀུན་ལ་སྙོམས་མོད་ཀྱང་། །པདྨོ་ལྷག་པར་ཁ་ཕྱེ་བཞིན། །འཇིག་རྟེན་གསུམ་གྱི་མགོན་པོ་གང་། །བདག་ཉིད་ཁོ་ནར་གཟིགས་པར་ངེས། །དེ་སླད་དད་དང་སྤྲོ་བ་ཡི། །དངོས་པོ་གཟུགས་ཅན་ཉིད་གྱུར་ན། །འཆི་མེད་ལམ་གྱི་ཕ་མཐའ་ལས། །རིང་དུ་འགོངས་པའི་ངོ་མཚར་ཐོབ། །རྡོ་རྗེ་འཛིན་པ་དཔལ་ལྡན་ཞབས། །ཐུགས་བསམ་དག་པའི་ཆུ་སྐྱེས་ཚལ། །སླར་ཡང་གསུང་གི་བདུད་རྩི་དེས། །རེག་པས་ཉིན་མཚན་ཀུན་ཏུ་དགོད། །མཚམས་ཞུས། བརྟན་པར་གྱུར་ཅིག་བསྐལ་པ་བརྒྱར། །གྲུབ་པའི་མེ་སྤྱི ཏོག་ཁྱོད་ཅིག་ཅེས། །གསོལ་འདེབས་མགྲིན་པའི་ཏམྦུ་ར། །བསྒྲེང་ལ་ངལ་བའི་སྐབས་མི་དབྱེ། །དེ་སྲིད་དུ་ཡེ་ཤེས་གཟིགས་པ་དམ་པས་གཞར་ཡང་མི་འདོར་བར་ཅི་གནང་། ཞུ་མཚོན་བཅས་གུས་པས་ཕུལ། །

གསང་བདག་དགྱེས་པའི་འབངས་རཏྣ་སྤུ་རིས་ལ་སྤྲིངས་པ།

---

^{[མ་དཔེ་གཟིགས་ན་འདིར་གནོན།]}

༅། །གསང་བདག་དགྱེས་པའི་འབངས་རཏྣ་སྤུ་རིས་ལ་སྤྲིངས་པའོ། །སུ་བྷེ་ཡནྟུ། ཉི་མས་པདྨ་གཞོན་ནུ་ཁ་ཕྱེ་ཞིང་། །པདྨའང་ཉིན་མོར་བྱེད་ལ་ཕྱོགས་པ་ལྟར། །ཕན་ཚུན་ཆོས་ཀྱི་བརྩེ་བས་རྗེས་དགོངས་ནས། །ལྷ་རྫས་ཤིང་བཅུད་ཟུང་བཅས་སྩལ་བ་སོན། །དེ་ཚེ་དབྱར་གྱི་འབྲུག་སྒྲ་དལ་བུ་ཡིས། །རྨ་བྱ་མྱོས་པའི་ཟློས་གར་རྩེ་བ་ལྟར། །སྔར་ནས་དགའ་བའི་ས་བོན་མ་ཉམས་པ། །སླར་ཡང་གཟུགས་ཅན་བཞིན་དུ་གསལ་བར་གྱུར། །འབྱུང་འགྱུར་གསང་བའི་བདག་པོ་མངོན་སུམ་པའི། །ཞལ་མཐོང་ཙམ་གྱིས་ཐར་པ་ཐོབ་ངེས་ན། །སྐུ་ཡི་རིམ་གྲོ་བགྱིས་པའི་བསོད་ནམས་མཐའ། །ཚངས་དང་ཕུར་བུའི་བློས་ཀྱང་གཞལ་དུ་ཅི། །དེ་སླད་སྔར་བཞིན་ཐུགས་ཀྱི་བཞེད་པ་དང་། །གསུང་གི་བསྒོ་བ་རྩེ་གཅིག་ལྷུར་ལེན་བཞིན། །བསྔགས་འོས་འཚོ་ཁམས་མ་ཉམས་དར་བ་ནས། །འདིར་ཡང་དགྱེས་པའི་འཛུམ་དཀར་ལྷུག་པར་སྟོན། །གང་ཤར་མང་དུ་གསོལ་བ་ལ། །རྟེན་གྱི་དངོས་པོ་རབ་ཕྲ་ཡང་། །ལྷག་བསམ་དཀར་པའི་ལྷ་རྫས་དང་། །རྣམ་བཀྲའི་རེག་བྱ་ཟུང་བཅས་དགེ། །སརྦ་དཱ་མངྒ་ལཾ།། །།

ངོར་ཨེ་ཝཾ་པའི་དཔོན་སློབ་རྡོ་རྗེ་འཛིན་པ་ངག་དབང་ལེགས་གྲུབ་དཔལ་བཟང་པོར་བརྡ་སྤྲོད་ཀུན་བཤད་ཀྱི་མཚན་འབུལ་ཞབས་བརྟན་སྨོན་ཚིག་དང་བཅས་པ་འཆི་མེད་བདུད་རྩིའི་སྒྲ་དབྱངས།

---

^{[མ་དཔེ་གཟིགས་ན་འདིར་གནོན།]}

༈ ངོར་ཨེ་ཝཾ་པའི་དཔོན་སློབ་རྡོ་རྗེ་འཛིན་པ་ངག་དབང་ལེགས་གྲུབ་དཔལ་བཟང་པོར་བརྡ་སྤྲོད་ཀུན་བཤད་ཀྱི་མཚན་འབུལ་ཞབས་བརྟན་སྨོན་ཚིག་དང་བཅས་པ་འཆི་མེད་བདུད་རྩིའི་སྒྲ་དབྱངས་ཞེས་བྱ་བ་བཞུགས་

---

^{[མ་དཔེ་གཟིགས་ན་འདིར་གནོན།]}

སོ། །སྡེབ་སྦྱོར་མཉམ་པའི་བྲྀཏྟཱ་ཡི་གེ་བཅུ་གཅིག་པ་གསུམ་བརྟན་ལ་སྤྱིར་རྣམ་གྲངས། ༢༠༤༨ མཆིས་པ་ལས། བྱེ་བྲག་ཨུདྷིཥྛ། ༢༥༨ ཀྱི་མཚམས་ནས་ཟིན་པ་ཨུ་པེན་བཛྲ་ཞེས་བྱ་བའི་པྲསྣ་རས་མཛེས་པར་བྱས་པ་ཛ་ཡནྟུ། །སུསཱིཙྪསིཙྩཕྱིསཾནྟཾ སཱིའི༽ རྣམཛེསྦོམུཉྩིབིདཾབདོདཱ། ཨམཱརནཱཐསུཀརུཎྱཙནྡྲི རམཱརནིཧཱུྃཏྠཔདེཧིཏུདྡྷཾ། འཆི་མེད་གྲུབ་པའི་བདུད་རྩིའི་བཅུད་ལེན་གྱིས། །འཆི་མེད་ཚེ་དང་ཡེ་ཤེས་མཆོག་སྦྱིན་པ། །འཆི་མེད་མགོན་པོའི་ཐུགས་རྗེའི་ཟླ་ཤེལ་གྱིས། །འཆི་མེད་རྟག་པའི་དགའ་སྟོན་ཁྱེད་ལ་སྩོལ། ༡ །ཚàརྒྱའjདིཔོརཉྙོ ཙེབ་དྲིལཝིཏ། ༈ ཕྱི་མོ་མཉམ་པ་ཛཱ་ཏིའི་སྡེབ་སྦྱོར་ལས་འཕགས་མའི་དབྱངས་ཞེས་བྱ་བའི་ཕྲ་སྣ་རའོ། །ནཱཾནནུསྶ པཱདཱིཙིཏྟིཡབ་ཤ་བོཛཡ ཤུ རྙིབ་འཇམ་དབྱངས་སྨྲ་བའི་ཉི་མའི་བྱིན་རླབས་ཀྱིས། །བློ་གྲོས་ཨུཏྤལ་མཆོག་ཏུ་རྒྱས་པ་ལས། །ཚངས་སྲས་དགྱེས་པའི་ལང་ཚོ་དར་བབས་པ། །སྲིད་ཞིའི་ཕྱོགས་ལས་རྣམ་པར་རྒྱལ་གྱུར་ཅིག ༢ །སྒྲིབ་གསུམ་ཆ་དང་བཅས་ལས་རྣམ་གྲོལ་བ། །ཤིན་ཏུ་ཞི་བ་དམ་པའི་ཡེ་ཤེས་ནི། །རྨད་བྱུང་གཟུགས་སྐུའི་སྣང་བ་རབ་འབར་བའི། །ཞབས་པད་བསྐལ་པ་རྒྱ་མཚོར་སྐུ འཚོ་གཞེས་གསོལ། ༣ །ལུང་དང་རིག་པས་དག་པའི་མཁྱེན་དཔྱོད་ཀྱིས། །ཟབ་རྒྱས་ཆོས་ཕུང་རྒྱ་མཚོར་དབང་བསྒྱུར་ནས། །འཆད་རྩོད་རྩོམ་ལ་འཇིགས་པ་མེད་པའི་དབྱངས། །སྲིད་པ་གསུམ་ན་ཀུན་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

ཏུ་སྙན་གྱུར་ཅིག ༤ །ཤེས་དང་ཤེས་བྱ་གཉིས་སུ་མི་ཕྱེད་པའི། །ཡེ་ཤེས་གཟིགས་པ་དམ་པས་སྐྱེ་འགག་དང་། །མཚན་མའི་སྤྲོས་པ་མཐའ་དག་བརྟུལ་བྱས་ཏེ། །འཆི་མེད་རྟག་པའི་བདེན་པ་མངོན་གྱུར་མཛོད། ༥ །བྲལ་སྨིན་ཡོན་ཏན་ནོར་བུའི་ཟ་མ་ཏོག །སྲས་བཅས་རྒྱལ་བ་དགྱེས་པའི་དགེ་མཚན་ཅན། །ཕན་བདེའི་འདོད་དགུ་ལྷུག་པར་འབེབས་པའི་དཔྱིད། །ངེས་པར་ཞིང་ཁམས་འདི་ལས་ཡོལ་མེད་ཤོག ༦ །མདོར་ན་བསླབ་དང་གྲོལ་བའི་བརྟུལ་ཞུགས་ཀྱིས། །མཁས་གྲུབ་རྒྱ་མཚོའི་གཙུག་ཏུ་ངལ་འཚོ་བའི། །ཕྲིན་ལས་སྣང་བ་དམ་པས་འཇིག་རྟེན་ན། །ཀུན་དགའི་དགའ་སྟོན་རྟག་ཏུ་སྦྱིན་གྱུར་ཅིག ༧ །ཅེས་རྗེ་བཙུན་བླ་མ་དམ་པ་སུམ་ལྡན་རྡོ་རྗེ་འཛིན་པ་ཆེན་པོ་ངག་དབང་ལེགས་གྲུབ་སྙན་བརྒྱུད་བསྟན་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱིས། སྒྲ་སྙན་སྡེབ་སྦྱོར་སོགས་ཐ་སྙད་རིག་པའི་གནས་ལ་གསན་བསམ་མཐར་ཕྱིན་པར་གྲུབ་ནས་ལེགས་བཤད་ཀྱི་དགའ་སྟོན་ཁྱད་པར་ཅན་སྩོལ་བའི་སྐབས། འཇམ་དབྱངས་སྨྲ་བའི་ཉི་མ་ཚངས་སྲས་དགྱེས་པའི་ལང་ཚོ་ཞེས་མཚན་འབུལ་ཞབས་བརྟན་སྨོན་ཚིག་དང་འབྲེལ་བ་འདིའང་། ཟེ་ཆེན་མ་ཧཱ་པཎྜི་ཏ་འཇམ་དབྱངས་དགྱེས་པའི་བློ་གྲོས་དང་། ངེས་པར་ཐམས་ཅད་མཁྱེན་པ་གུ་ཎ་སཱ་ག་རའི་བཀའ་དྲིན་ལས་བརྡ་སྤྲོད་རིག་པའི་མིང་རྐྱང་ཙམ་ཞིག་ཐོས་པ་

---

^{[མ་དཔེ་གཟིགས་ན་འདིར་གནོན།]}

ཤཱཀྱའི་དགེ་སློང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོའམ། ཚངས་སྲས་དགྱེས་པའི་བློ་ལྡན་གདོང་དྲུག་དགའ་བའི་ལང་ཚོ་ཞེས་ཀྱང་བགྱི་བས་ཆེད་དུ་བརྗོད་པ་སརྦ་དཱ་ཀ་ལྱཱ་ཎཾ་བྷ་བ་ཏུ།། །།

མཆོག་སྤྲུལ་རིན་པོ་ཆེ་ངེས་དོན་དཔལ་བཟང་པོའི་ཞབས་པད་དུ་ཕུལ་པའི་འཕྲིན་ལན་བདུད་རྩིའི་ཐིག་པ།

---

^{[མ་དཔེ་གཟིགས་ན་འདིར་གནོན།]}

༈ མཆོག་སྤྲུལ་རིན་པོ་ཆེ་ངེས་དོན་དཔལ་བཟང་པོའི་ཞབས་པད་དུ་ཕུལ་པའི་འཕྲིན་ལན་བདུད་རྩིའི་ཐིག་པའོ། །མཐོང་དང་མ་མཐོང་ཡོན་ཏན་གྱི། །ནོར་བུའི་ཆུ་གཏེར་མི་ཟད་པས། །འཇིག་རྟེན་གསུམ་གྱི་གདུང་སེལ་བའི། །ཞབས་ཀྱི་པདྨོའི་ཉེ་དྲུང་དུ། །རྒྱུའོ་ཁོར་ཡུག་རི་བོའི་ཁོངས། །ཟླ་ཤེལ་བདུད་རྩིའི་སྣང་བས་ཏེ། །བདག་གི་གུས་མཆིད་འབབ་སྟེགས་སུ། །གང་གི་རྗེས་བརྩེའི་འཛུམ་དཀར་གཡོ། །དེ་སླད་ཚིག་སྙན་དོན་བཟང་གི། །མཚར་སྡུག་ཆ་ཙམ་མ་མཆིས་བཞིན། །དད་སྤྲོའི་དཔྱིད་ཀྱིས་བཟུང་བ་ལས། །ཞུ་གསོལ་ལོ་འདབ་དུད་པར་གྱུར། །གཟོད་ནས་དག་པའི་བྱང་ཆུབ་སེམས། །རྒྱུ་འབྲས་གཉིས་སུ་མི་ཕྱེད་པས། །རྡོ་རྗེ་འཛིན་པའི་ཡེ་ཤེས་ཀྱང་། །ངུར་སྨྲིག་ཟོལ་གྱིས་རྒྱུ་བ་ན། །རིག་པའི་ལང་ཚོ་རྒྱས་པ་དང་། །བརྩེ་བའི་ཟུར་མིག་གཡོ་བ་དང་། །དེས་ཀྱང་བསྟན་འགྲོར་སྨན་པ་སྟེ། །སྐུ གསུམ་པོ་འདི་ནི་མཉམ་དུ་བྱུང་། །ལྷག་པར་བདག་ལ་མ་འདྲིས་བཞིན། །བཀའ་དྲིན་ཆེན་པོས་ཁྱབ་པའི་ཕུལ། །ཉིན་མོར་བྱེད་པས་པདྨའི་རྫིང་། །སྐྱོང་བའི་ཚུལ་གྱིས་མཚོན་ནུས་ཅི། །ཤིན་ཏུ་ཉེ་བའི་དུས་

---

^{[མ་དཔེ་གཟིགས་ན་འདིར་གནོན།]}

སུ་ཡང་། །དྲི་མེད་གསུང་གི་ཅོད་པན་ནི། །རྟེན་གྱི་སྤ་བ་སྤྱི་བོའི་གཙུག །སོན་པའི་མོད་ནས་རབ་དགའ་བའི། །དངོས་པོ་གཟུགས་ཅན་ཉིད་གྱུར་ན། །འཆི་མེད་ལམ་གྱི་ཕ་མཐའ་ཡས། །རིང་དུ་འགོངས་པའི་ངོ་མཚར་གྱི། །ངལ་འཚོའི་དུས་སྟོན་མཆོག་ཏུ་དར། །འདི་ན་རྨོངས་དང་མ་རིག་པའི། །དམ་ལ་བཞག་པའི་དགེ་སྦྱོང་ཟོལ། །ཁྱད་པར་འགའ་ཡང་མེད་བཞིན་དུ། །བསམ་གཏན་ཁང་བུར་བདེ་བར་མཆིས། །མཚམས་ཞུས། བརྟན་པར་གྱུར་ཅིག་གཟོད་མ་ནས། །འཕོ་བའི་ཚུ་རོལ་རིང་བཅད་ཕྱིར། །འཆི་མེད་གྲུབ་པའི་མཐར་སོན་པ། །བྱིས་བློའི་ངོར་ཡང་མི་སྦེད་བཞིན། །རྣམ་དཀར་ཕྲིན་ལས་རྒྱས་པ་དང་། །འདིར་ཡང་རྗེས་སུ་བརྩེ་བ་ཡི། །ནོར་བུའི་རྔ་ཡབ་གཡོབས་པ་ཡིས། །ཡང་ཡང་དབུགས་འབྱིན་སྔར་བཞིན་སྩོལ། །ཅེས་དཀྱུས་གཅིག་ཏུ་གང་ཤར་གྱི་རྟོག་པ་ལྷུག་པར་བྲིས་ཏེ་ཞུ་མཚོན་དང་བཅས་རྒྱལ་ཟླའི་དཀར་ཕྱོགས་ཀྱི་དགའ་བ་དང་པོ་ལ་གུས་པས་ཕུལ་བའི་ཞུ་ཡིག་གོ། །།

བློ་གསལ་ཨཱ་ཡུ་རིནྡྲ་སིདྡྷཉྫའི་འཕྲིན་ལན་བདུད་རྩིའི་ཟེགས་མ།

---

^{[མ་དཔེ་གཟིགས་ན་འདིར་གནོན།]}

༈ བློ་གསལ་ཨཱ་ཡུ་རིནྡྲ་སིདྡྷཉྫའི་འཕྲིན་ལན་བདུད་རྩིའི་ཟེགས་མའོ། །ཨཱཡུརྡེདཱིཙྪཏིཤུདྡྷེལབིཧཱུཾ ཨཱཛཱནི ཙྪརྗོབཱཀྲྀཧིཏནཱམཔྲསཱརེ། ཚེ་ཡི་རིག་བྱེད་བདུད་རྩིའི་བློ་གྲོས་ཀྱི། །པདྨོ་རྣམ་པར་རྒྱས་པའི་དབང་ཕྱུག་གིས། །རང་གཞན་དོན་གཉིས་ལང་ཚོ་དར་བབས་པས། །ཕན་བདེའི་དགའ་སྟོང་མཆོག་ཏུ་གྲུབ་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

གྱུར་ཅིག ༡ །གང་ན་བསོད་ནམས་ཆུ་གཏེར་བསྲུབས་པའི་ཕུལ། །དལ་རྟེན་དཔག་བསམ་ཉེར་འཚེ་བྲལ་དང་བཅས། །རྣམ་དཔྱོད་གེ་སར་དགོད་པའི་འཛུམ་ཕྲེང་ལས། །ཚིག་རྒྱན་རྣ་བའི་ཨུཏྤལ་དུས་འདིར་སོན། ༢ །དེ་ཚེ་ནགས་སུ་རྒྱས་པའི་དཔལ་གྱི་དུམ། །ལྷན་སྐྱེས་བསིལ་བའི་ཉམས་བརྒྱས་སྒེག་པ་ཡིས། །མཚོན་མིན་ཡིད་ལ་དགའ་བ་མི་ཟད་པ། །གཟུགས་ཅན་བཞིན་དུ་རྒྱུ་བའི་ངལ་འཚོ་ཐོབ། ༣ །འདི་ན་གནས་པའི་དགེ་སྦྱོང་ཚུལ་འཛིན་ཡང་། །མཆོག་གསུམ་ཐུགས་རྗེའི་ནོར་བུའི་རྔ་ཡབ་ཀྱིས། །ཡང་ཡང་དབུགས་འབྱིན་མཛད་པས་དགེ་བྱས་བཞིན། །འདུ་ཤེས་གསུམ་གྱི་མལ་དུ་མནལ་ལ་གཡུར། ༤ །སླར་ཡང་སྲིད་ཞིའི་ཕུན་ཚོགས་འབྱུང་བའི་རྟེན། །ཡུན་དུ་འཚོ་བའི་ཐབས་ཚུལ་བསྒྲུབ་དང་བཅས། །ཕྱི་ནང་རིག་གཞུང་རྒྱ་མཚོའི་སྣང་བ་ཡིས། །ཐར་པ་དམ་པའི་ལམ་བཟང་བསྙེན་པར་མཛོད། ༥ །ཞེས་པའི་འདེགས་མཚོན་ལྷའི་རེག་བྱ་བཅས་ཤཱཀྱའི་དགེ་སློང་སྡེ་སྣོད་འཛིན་པ་འཇམ་དབྱངས་མཁྱེན་བརྩེའི་དབང་པོས་བསྲིངས་པ་སརྦ་དཱ་ཤུ་བྷ་བྷཱ་ཡེཏཱ།། །།

རྒྱལ་དབང་ཕྱག་ན་པདྨོ་མཁས་གྲུབ་རྒྱ་མཚོའི་མདུན་ཐར་རྩེ་མཁན་རིན་པོ་ཆེ་རྡོ་རྗེ་འཆང་རྣལ་འབྱོར་འཇམ་དཔལ་བཟང་པོ་ནས་ལེགས་འབུལ་ཕུལ་བའི་སྐབས་ཀྱི་ཡི་གེ་སྙན་པའི་ངང་མོ།

---

^{[མ་དཔེ་གཟིགས་ན་འདིར་གནོན།]}

༈ ས་སྤྲེལ་ལོར་རྒྱལ་དབང་ཕྱག་ན་པདྨོ་མཁས་གྲུབ་རྒྱ་མཚོའི་མདུན་ཐར་རྩེ་མཁན་རིན་པོ་ཆེ་རྡོ་རྗེ་འཆང་རྣལ་འབྱོར་འཇམ་དཔལ་བཟང་པོ་ནས་ལེགས་འབུལ་ཕུལ་བའི་སྐབས་ཀྱི་ཡི་གེ་སྙན་པའི་ངང་མོ་ཞེས་བྱ་བ་བཞུགས། །༅། །ཡེཥཱད། །

---

^{[མ་དཔེ་གཟིགས་ན་འདིར་གནོན།]}

ཡྻཀྲྀཔཱཙཤུནྱཏཱཉྩ བྷེདཛཱནསུམཱཡམེགྷཡོ༔ དག་པའི་སྣང་བའོ། །སུཤེཡོམཎིཔྲཋདཱཔé ཏྲེལོཀྱེཥསདཱབིཛཱིཡཏྭཾ། །གང་དུ་སྟོང་དང་སྙིང་རྗེ་དབྱེར་མེད་པའི། །ཟུང་འཇུག་ཡེ་ཤེས་སྒྱུ་འཕྲུལ་དྲྭ་བའི་སྤྲིན། །དགེ་ལེགས་ནོར་བུའི་གྲུ་ཆར་འབེབས་མཁས་པ། །འཇིག་རྟེན་གསུམ་ན་རྟག་ཏུ་རྒྱལ་གྱུར་ཅིག ༡ །གུས་པ་ཆེན་པོའི་ལྷ་ཕྱག་གྲངས་མེད་པ་བཙལ་ཏེ་ཞུ་གསོལ། སྨན་མཛད་གྲུ་འཛིན་རི་བོའི་དགའ་ཚལ་ན། །དགྱེས་བཞིན་རོལ་པའི་འཕགས་མཆོག་མིག་མི་འཛུམ། །སྙིང་རྗེའི་དགའ་བ་རྒྱས་པའི་སྤྱན་རས་ཀྱིས། །གངས་ཅན་རི་བོའི་ལྗོངས་འདིར་རྟག་ཏུ་གཟིགས། ༢ །དེ་ཚེ་ཡེ་ཤེས་དམ་པའི་སྙེ་མ་ནི། །བསིལ་ལྡན་བསོད་ནམས་ས་གཞིར་བསྐྱེད་བསྲིངས་པས། །མཐའ་ཀླས་སྲས་བཅས་རྒྱལ་བས་ཕྱག་བྱས་པའི། །ཡོན་ཏན་ལྗོན་པ་མཆོག་གཅིག་འཁྲུངས་པའི་མོད། ༣ །ཡིད་ཅན་རྫོགས་ལྡན་དུས་སྟོན་ཚུགས་པ་དང་། །ཐུབ་བསྟན་བཤད་སྒྲུབ་ལང་ཚོ་དར་བ་དང་། །དེས་ཀྱང་མི་མཐུན་རྒུད་པ་ཀུན་བསྲུང་བའི། །དགེ་མཚན་གསུམ་པོ་འདི་ནི་ལྷན་ཅིག་དར། ༤ །རིགས་དང་བརྩེ་སོགས་འཕགས་བཞིའི་ངོ་མཚར་གཏམ། །མ་ཚང་མེད་པར་གཟོད་ནས་བརྙེས་བཞིན་དུ། །ཐབས་ལ་མཁས་པའི་རྣམ་ཐར་དཔག་ཡས་ཀྱིས། །ལྷར་བཅས་འཇིག་རྟེན་བསྔགས་པའི་དབྱངས་ཀྱིས་བཀང་། ༥ །མཚན་གྱི་ནོར་བུའི་

---

^{[མ་དཔེ་གཟིགས་ན་འདིར་གནོན།]}

རྔ་ཡབ་ཆ་རེས་ཀྱང་། །འདི་གཏན་ཕོངས་པའི་གདུང་བ་ཀུན་སེལ་ན། །གང་དུ་བསྙེན་པ་ཙམ་ནས་བྱང་ཆུབ་ཀྱི། །གོ་འཕང་དམ་པའང་སྩོལ་ལ་སོམ་ཉི་ཅི། ༦ །དེ་བས་ཚད་བཟུང་བྲལ་བའི་ཡོན་ཏན་ལ། །མཆོག་ཏུ་དད་པའི་པདྨོ་འཛུམ་པ་དང་། །ཐལ་མོའི་ཨུཏྤལ་ཟུམ་པའི་བསྟི་སྟང་གིས། །ཞབས་མཐིལ་འཁོར་ལོའི་རེ་ཁཱར་གུས་ཕྱག་འཚལ། ༧ །དངོས་འབྱོར་མེ་ཏོག་ཕྲ་མོས་མདུན་བདར་ཏེ། །ཀུན་ཏུ་བཟང་པོའི་སྨོན་ལམ་ལས་བྱུང་བའི། །བདག་པོས་བཟུང་དང་མ་བཟུང་མཆོད་སྤྲིན་གྱིས། །སྲིད་པ་མཐར་བྱས་བར་དུ་བསྙེན་བཀུར་བགྱི། ༨ །རང་བཞིན་ཉིད་དང་བཅས་པའི་སྡིག་ལྟུང་གིས། །སེམས་ཀྱི་ཡིད་བཞིན་རྙོག་མར་བྱས་པ་ཀུན། །སྟོབས་བཞིའི་སྦྱོང་བ་མཁས་པའི་བརྟུལ་ཞུགས་ཀྱིས། །བྲལ་སྨིན་ཡོན་ཏན་གཟུགས་བརྒྱ་སླར་ལ་རྔམས། ༩ །འཕགས་དང་སོ་སྐྱེའི་རྣམ་ཐར་ཇི་སྙེད་དང་། །ཁྱད་པར་མགོན་ཁྱོད་ཕྲིན་ལས་བདུད་རྩིའི་འོད། །དྭང་བའི་ཡིད་མཁར་སིམ་པའི་དེ་མ་ཐག །ཡི་རངས་པུཎྜ་རཱི་ཀའི་འཛུམ་རླབས་དགོད། ༡༠ །འགོགས་བདེན་ཞི་བ་དམ་པའི་ནཱ་དའི་སྒྲ། །ཆོས་ཕུང་རྒྱ་མཚོའི་དཔྱིད་དུ་འབབས་པ་ཡིས། །འགྲོ་མང་མ་རིག་གཉིད་ལ་གཡུར་བ་རྣམས། །ཐར་པ་དམ་པའི་ངལ་འཚོར་དབུགས་འབྱིན་མཛོད། ༡༡ །མདོར་ན་སྲིད་དང་ཞི་བའི་ཕུན་ཚོགས་ཀུན། །གང་ལས་འབྱུང་བའི་

---

^{[མ་དཔེ་གཟིགས་ན་འདིར་གནོན།]}

མཚན་དཔེའི་དཔག་བསམ་དབང་། །ངེས་པར་ཞིང་ཁམས་འདི་ལས་ཡོལ་མེད་བཞིན། །ཕན་བདེའི་འདོད་དགུ་ལྷུག་པར་སྦྱིན་མཛད་གསོལ། ༡༢ །དེ་ལྟར་བསགས་དང་དུས་གསུམ་དགེ་བའི་རྒྱུན། །བྱང་ཆུབ་སྙིང་པོའི་རྒྱ་མཚོར་རོ་གཅིག་པས། །རྣམ་པ་ཐམས་ཅད་མཁྱེན་པའི་ཡེ་ཤེས་པ། །དབང་འབྱོར་དོན་གཉིས་ཡིད་བཞིན་འགྲུབ་གྱུར་ཅིག ༡༣ །ཅེས་ཡན་ལག་བདུན་གྱི་ཚིགས་སུ་བཅད་པའི་མེ་ཏོག་ཅུང་ཟད་འཐོར་བས་ལམ་ཡངས་པར་བྱས་ཏེ། དེང་འདིར་འགྲོ་བ་ལྷ་དང་བཅས་པའི་མ་འདྲིས་པའི་མཛའ་བཤེས་ཆེན་པོ། རིས་སུ་མ་ཆད་པའི་ཐུབ་བསྟན་རྒྱ་མཚོ་གསལ་བར་བྱེད་པའི་ཉི་མ། ཁམས་གསུམ་གྱི་གཙོ་བོས་ཕྱག་བྱས་པའི་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་གང་གི་ཐུགས་རྗེའི་གདུགས་དཀར་སྲིད་ཞིའི་བླ་ན་མཐོ་བའི་གྲིབ་བསིལ་དུ་དབུགས་འབྱིན་ཐོབ་པའི་གུས་པ་ངོར་ཨེ་ཝཾ་ཐར་རྩེ་མཁན་མིང་པའང་། རང་རིགས་བླ་མ་གོང་མའི་དུས་ནས་སྐྱབས་མགོན་ཆེན་པོ་སྐུ་ཕྲེང་རིམ་བྱོན་གྱིས་ཐུགས་རྗེས་གཟིགས་བསྐྱངས་ལེགས་པར་མ་ཟད། གུས་ཕྲན་པ་མདོ་ཁམས་སྡེ་དགེའི་བླ་མཆོད་དུ་བགྲོད་སྐབས་མར་ལན་ཀྱང་ཞབས་པད་རིན་པོ་ཆེ་ཕྱག་གིས་བཏུད་ཅིང་བྱིན་རླབས་ཚད་མེད་པས་རྗེས་སུ་བཟུང་བའི་བཀའ་དྲིན་གྱིས་ཁམས་སུ་སྡོད་རིང་དང་། ལམ་བར་ཀུན་ཏུ་ཉེར་འཚེས་མ་གོས་པར། ད་ལན་

---

^{[མ་དཔེ་གཟིགས་ན་འདིར་གནོན།]}

མཐོང་བས་དོན་ལྡན་མཚན་དཔེའི་མཛེས་སྐུ་མངོན་སུམ་པར་མཇལ་ཞིང་། ཚད་མེད་པའི་ཐུགས་རྗེ་ཆེན་པོས་ལྷག་པར་ཁྱབ་པའི་བཀའ་དྲིན་ལ་བསམ་ན་སྟོང་གསུམ་ནོར་བུས་བཀང་ཡང་གཞལ་བྱ་མ་ཡིན་མོད། འོན་ཀྱང་ཡོ་བྱད་ཀྱི་ལག་སྣེ་ཕྲ་བས། ཡིད་སྤྲུལ་གྱི་མཎྜལ་རྒྱ་ཆེར་སྤྲུལ་ཏེ་ཕུལ་བའི་མཚོན་བྱེད་དུ་དངོས་བཤམས་ཟེག་མ་ཙམ་བསྟར་བར། ཐོག་མར་བཀྲ་ཤིས་པའི་ལྷ་གོས་རབ་དཀར་སོགས། མཐའ་རྟེན་རས་དཀར་ཡུག་བཅས་གུས་པ་ཆེན་པོས་འབུལ་ལམ་ཞུ་ན་དགྱེས་པའི་སྤྱན་རས་ཀྱིས་ཡུད་ཙམ་རོལ་པ་དང་། སླད་མའི་ཆར་ཡང་སྨོན་པའི་གནས་ཚིགས་སུ་བཅད་དེ་གསོལ་བ། དྲན་པའི་མདུན་སར་བཀོད་པའི་དེ་མ་ཐག །ཕུན་ཚོགས་འཆི་མེད་བདུད་རྩིའི་མཆོག་སྦྱིན་པ། །བཅོམ་ལྡན་ཚེ་མཐའ་ཡས་པའི་རྣམ་རོལ་ཏུ། །མཚན་དཔེའི་མཛེས་སྐུ་རྟག་བར་འཚོ་གཞེས་གསོལ། ༡ །གསུང་གི་གསང་བ་རྣམ་པ་ཀུན་ལྡན་པ། །ཡན་ལག་དྲུག་ཅུའི་རྒྱུད་མང་དང་འགྲོགས་པས། །ཟབ་རྒྱས་གདམས་པའི་དབྱངས་ཀྱི་རིགས་ཅན་གསུམ། །དོན་གཉིས་ངལ་འཚོར་མཛོད་ཅིག་མཁྱེན་པའི་གཏེར། ༢ །ཤེས་དང་ཤེས་བྱ་རོ་གཅིག་འོད་གསལ་ཐུགས། །གཟུང་འཛིན་སྤྲོས་པའི་མཚན་མ་ལས་འདས་བཞིན། །བརྟན་གཡོ་ཀུན་ལ་སྙོམས་འཇུག་སྒྱུ་མའི་འཕུལ། །མཁའ་ཁྱབ་མཁའ་ཡི་རྡོ་རྗེར་བརྟན་གྱུར་ཅིག ༣ །

---

^{[མ་དཔེ་གཟིགས་ན་འདིར་གནོན།]}

བྲལ་སྨིན་ཡོན་ཏན་བྱེ་བ་ཕྲག་བརྒྱ་དང་། །ཕྲིན་ལས་རྟག་པ་དམ་པའི་དགེ་མཚན་གྱིས། །ལྷར་བཅས་འཇིག་རྟེན་ཀུན་དགའི་དཔལ་སྟེར་བའི། །གསང་གསུམ་བསྐལ་པ་རྒྱ་མཚོར་ཞབས་བརྟན་གསོལ། ༤ །སྐྱབས་འོག་རྣམས་ཀྱང་འདི་ནས་བྱང་ཆུབ་བར། །ཡེ་ཤེས་གཟིགས་པའི་ཕྱག་གིས་རྗེས་བཟུང་ནས། །གནས་སྐབས་མཐར་ཐུག་ཕན་བདེའི་དགེ་མཚན་དང་། །རྣམ་ཀུན་ཤིས་པའི་སྣང་བ་འབར་གྱུར་ཅིག ༥ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ལེགས་འབུལ་གྱི་ཡི་གེ་སྙན་པའི་རྒྱུད་མང་།

---

^{[མ་དཔེ་གཟིགས་ན་འདིར་གནོན།]}

༈ སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ལེགས་འབུལ་གྱི་ཡི་གེ་སྙན་པའི་རྒྱུད་མང་ཞེས་བྱ་བ། ལུསེསཱགརཱིཏི༔ ཛྷནཀལྤམཉྫརཱིཙསཱཧེ །བཱརདཧིཏཾསུཁཏྲིལོཀེ། པཱདཔདྨཀཝམདྡྷིཛིབྷཱུཏྲ། །བསོད་ནམས་དམ་པའི་ཆུ་གཏེར་རྨད་བྱུང་བ། །ཡེ་ཤེས་དཔག་བསམ་སྙེ་མ་དང་འགྲོགས་པས། །འཇིག་རྟེན་གསུམ་ན་ཕན་བདེའི་མཆོག་སྦྱིན་པའི། །ཞབས་པད་བསྐལ་པ་རྒྱ་མཚོར་འཚོ་གཞེས་གསོལ། ༡ །མི་ཕྱེད་གུས་པའི་ཕྱག་དང་བཅས་ཏེ་གསོལ་བ། ཨེ་མ་འོད་གསལ་རྣམ་པ་ཀུན་ལྡན་ལས། །ཟུང་འཇུག་རྡོ་རྗེའི་སྣང་བརྙན་སྲིད་པ་ན། །རྒྱལ་བའི་མྱུ་གུ་གཞོན་ནུའི་ངང་ཚུལ་གྱིས། །ཡིད་ཅན་ཕན་བདེ་སྒྲུབ་པའི་སླད་དུ་འཆར། ༢ །དེ་ཚེ་རིག་དང་བརྩེ་སོགས་བསྔགས་འོས་ཀྱི། །ཡོན་ཏན་མཐའ་དག་རྫོགས་པའི་ག་བུར་འཛིན། །གྲགས་སྙན་བདུད་རྩིའི་རླབས་ཀྱིས་འཁྱུད་པའི་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

མོད། །ཁོར་ཡུག་རི་བོའི་ལྗོངས་ཀུན་དཀར་པོར་གྱུར། ༣ །མཁས་པའི་ཚོགས་རབ་བྱེ་བས་ཕྱག་བྱས་ཤིང་། །གྲུབ་པའི་ཁྱུ་མཆོག་རྣམས་ཀྱི་བསྟེན་བཞིན་དུ། །སྲས་བཅས་རྒྱལ་བ་དགྱེས་པའི་ཤིས་བརྗོད་ཀྱིས། །ཁམས་གསུམ་ཆོས་ཀྱི་རྒྱལ་པོར་མངའ་དབང་བསྐུར། ༤ །ལྷག་པར་རྒྱལ་མཆོག་ཕྱག་ན་པདྨོ་ཡི། །ཆོས་སྲིད་ཕྲིན་ལས་གདུགས་དཀར་སྲིད་པའི་རྩེར། །བསྒྲེངས་པས་ཡོངས་རྫོགས་བསྟན་དང་འགྲོ་བ་ལ། །ཀུན་དགའི་ངལ་འཚོ་གསར་པ་ཅིར་ཡང་བྱིན། ༥ །དེ་ལྟའི་རྟོགས་པ་བརྗོད་པའི་ཟིལ་དངར་ནི། །ཡང་ཡང་དད་གསུམ་པདྨོས་བཏུང་བ་ལས། །མི་ཕྱེད་གུས་སྤྲོའི་མཚར་སྡུག་རྫོགས་པའི་མོད། །གསོལ་འདེབས་སྦྲང་རྩིའི་བསུང་ཞིམ་འཐུལ་དང་བཅས། ༦ །རྡུལ་སྙེད་ལུས་ཀྱི་འཁྲི་ཤིང་རབ་གཡོ་བར། །ཐལ་མོའི་མེ་ཏོག་ཟུམ་པའི་འཇོ་སྒེག་གིས། །ནོར་བུའི་རྡུལ་མང་བརྩེགས་པའི་ཞབས་བསྟེན་ལ། །སྒོ་གསུམ་གུས་པའི་དད་ཕྱག་ཉིན་བཞིན་སྟོབ། ༧ །དངོས་འབྱོར་བདོག་པ་ཉུང་ངུས་ཐོག་དྲངས་ཏེ། །སྲིད་ཞིའི་ཁམས་ཀུན་རྒྱས་པར་འགེངས་བཟོད་པའི། །ཀུན་བཟང་མཆོད་སྤྲིན་རྒྱ་མཚོའི་སྣང་བ་ཡིས། །ཡེ་ཤེས་གཟིགས་པའི་གཡར་ལམ་མཛེས་པར་བྱ། ༨།སྡིག་དང་ལྟུང་བའི་ཚོན་རིས་རྣམ་མང་པོས། །སེམས་ཀྱི་ཟླ་ཤེས་ཁ་དོག་བསྒྱུར་བའི་དྲི། །སྟོབས་བཞིའི་གངྒའི་རྒྱུན་གྱིས་དག་བྱས་པས། །

---

^{[མ་དཔེ་གཟིགས་ན་འདིར་གནོན།]}

འཕགས་རྣམས་དགྱེས་པའི་སྤྱན་ཟུར་ཕྱོགས་དེར་ལྷུང་། ༩ །འཇིག་རྟེན་འཇིག་རྟེན་འདས་པའི་ལེགས་སྤྱད་ཀྱི། །བསོད་ནམས་ཡེ་ཤེས་དམ་པའི་ཉིན་མོར་བྱེད། །ལན་གཅིག་དྲན་པའི་འདུན་སར་འཆར་བ་ན། །རྗེས་སུ་ཡི་རང་ཨུཏྤལ་འཛུམ་རྒྱ་གྲོལ། ༡༠ །རྒྱལ་ཀུན་གསུང་གི་རྡོ་རྗེ་མགྲིན་པའི་མཚོར། །རྟག་པར་རྩེན་པའི་སྨྲ་དབང་ཟླ་གཞོན་གྱིས། །ཐེག་གསུམ་བདུད་རྩིའི་ཆར་གྱིས་ཡིད་ཅན་རྣམས། །ཐར་པ་དམ་པའི་ལང་ཚོ་བསྐྱེད་བསྲིངས་མཛོད། ༡༡ །གང་དུ་མཚན་གྱི་སྤྲིང་ཡིག་གསལ་ཙམ་ནས། །ཐུབ་བསྟན་བཤད་སྒྲུབ་སྣང་བ་དར་བབས་པ། །སྲིད་ན་མཚུངས་ཟླས་དབེན་པའི་སྐྱབས་ཀྱི་མཆོག ། གསང་གསུམ་རྡོ་རྗེའི་ངོ་བོར་བརྟན་གྱུར་ཅིག ༡༢ །དེ་ལྟར་བསོད་ནམས་ཕུང་པོ་འདུ་བགྱིས་ཀུན། །འཇམ་དཔལ་གཞོན་ནུའི་མཁྱེན་པའི་ཡོངས་བསྔོ་དང་། །མི་ཕྱེད་སྨོན་པའི་འབྲས་བུས་འཇིག་རྟེན་ན། །དོན་གཉིས་དགའ་སྟོན་རྟག་ཏུ་རྒྱས་པར་ཤོག ༡༣ །ཅེས་ཚིགས་སུ་བཅད་པའི་མེ་ཏོག་ཉུང་ངུས་མདུན་བདར་ཏེ་སོགས། སླར་ཡང་གསོལ་བ། ཕུན་ཚོགས་བསོད་ནམས་བྱེ་བའི་གཟི་འབར་ཞིང་། །མཚན་དཔེའི་ཉམས་བརྒྱས་རོལ་པའི་རྡོ་རྗེའི་སྐུ། །ངེས་པར་གངས་ཅན་རི་བོའི་སྐྱབས་གཅིག་པུར། །འཚོ་གཞེས་རྟག་པའི་དགེ་མཚན་བརྙེས་གྱུར་ཅིག ༡ །རིག་པའི་ལམ་དང་མཛའ་བ་མི་ཕྱེད་ཅིང་། །ཟབ་མོའི་དོན་

---

^{[མ་དཔེ་གཟིགས་ན་འདིར་གནོན།]}

ལ་འཇིགས་མེད་སེང་གེའི་སྒྲ། །ཆོས་ཕུང་རྒྱ་མཚོའི་གདང་དུ་འཆར་བའི་གསུང་། །སྐལ་བཟང་རྣ་བར་རྟག་ཏུ་སྒྲོགས་མཛད་གསོལ། ༢ །གང་དུ་ཆོས་དང་སྲིད་ཀྱི་གཙུག་ལག་གི། །ཉམས་འགྱུར་མཐའ་དག་གཅིག་ཅར་འཆང་བཟོད་པ། །ཡེ་ཤེས་ནོར་བུའི་མེ་ལོང་དྭངས་པའི་ཐུགས། །ཕྱོགས་འདིར་ལྷག་པར་དགྱེས་པའི་ངང་ཚུལ་སྟོན། ༣ །མདོར་ན་བསམ་གྱིས་མི་ཁྱབ་ཡོན་ཏན་དང་། །ཕྲིན་ལས་ས་གསུམ་འགྲོ་བའི་གདུང་སེལ་དུ། །ནམ་ཡང་ནུབ་པ་མེད་པའི་ངོ་མཚར་གྱིས། །རྫོགས་ལྡན་དུས་སྟོན་འབྱོར་པས་རབ་མཛེས་ཤིང་། ༤ །བདག་ཅག་རྣམས་ཀྱང་བྱང་ཆུབ་སྙིང་པོའི་བར། །མཁྱེན་བརྩེའི་གདུགས་དཀར་གྲིབ་མར་ངལ་འཚོ་ལས། །འདི་དང་གཏན་དུ་བདེ་བའི་ཕུན་ཚོགས་ཀྱི། །བཀྲ་ཤིས་རྟག་པ་དམ་པ་ཉིད་གྱུར་ཅིག །སརྦ་དཱ་ཤེ་ཡོ་བྷ་བ་ཏུ།། །།

ངོར་ཐར་རྩེ་བླ་བྲང་དུ་ལེགས་འབུལ་གྱི་ཡི་གེ་སྙན་པའི་ཏམྦུ་ར།

---

^{[མ་དཔེ་གཟིགས་ན་འདིར་གནོན།]}

༈ ངོར་ཐར་རྩེ་བླ་བྲང་དུ་ལེགས་འབུལ་གྱི་ཡི་གེ་སྙན་པའི་ཏམྦུ་ར་ཞེས་བྱ་བ། སཱིནཱཛིན་པའི་བོནུ་པི སཱཀཱལདཱིགར་ྱབྷཱུཏགེ །ཤཱནྟཾབྷཱབཀགནྟབོདྷནཱ། མཱརཾསཱདབྷབེཏྟིགུཧུཀཾ། ཤིན་ཏུ་དག་པ་གཟོད་མའི་ཡེ་ཤེས་ནི། །སྒྲིབ་གཉིས་ཆ་དང་བཅས་པ་སྤང་གྱུར་བས། །སྲིད་དང་ཞི་བའི་སྙིང་པོར་བྱང་ཆུབ་པའི། །གསང་གསུམ་འཆི་མེད་རྟག་པ་ཉིད་གྱུར་ཅིག ༡ །གང་དུ་སྣང་བས་ཀུན་དགའི་དཔལ་སྟེར་བ། །བདུད་རྩིའི་འབྱུང་གནས་ཟླ་བ་གཞན་ཡིན་ཏེ། །རྣམ་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

པ་ཀུན་ཏུ་ཕན་བདེའི་ཟིལ་དངར་གྱིས། །ཉེར་འཚོ་བྱང་ཆུབ་སེམས་འདྲ་གཉིས་པ་མེད། ༢ །དེ་སླད་དཔྱིད་ཀྱིས་བཟུང་བའི་དགའ་ཚལ་ནི། །ཉིན་རེ་བཞིན་ཡང་འཕེལ་བའི་སྐབས་མཐོང་ལྟར། །དེ་བཞིན་ཐབས་དང་དེ་ལས་བྱུང་བ་ཡི། །ཚོགས་ཟུང་བྱེ་བའི་འདུ་འགོད་འཆར་བ་ན། ༣ །སྒྲིབ་པའི་ཚང་ཚིང་མ་ལུས་བསྲེགས་བྱས་ཏེ། །རིག་དང་བརྩེ་བ་རྒྱ་མཚོའི་མཐར་སོན་པས། །སྲས་བཅས་རྒྱལ་བའི་རྣམ་པར་ཐར་པ་དང་། །མི་ཕྱེད་གྲུབ་པའི་དགེ་མཚན་བརྙེས་བཞིན་དུ། ༤ །མཁའ་ཁྱབ་སྐུ་དང་ཡེ་ཤེས་སྒྱུ་མའི་འཕྲུལ། །དམ་པའི་རིགས་ཀྱི་ས་བོན་དང་འགྲོགས་ནས། །འཕགས་དང་མཁས་མང་བྱེ་བས་ཕྱག་བྱས་པའི། །མཚན་དཔེའི་སྣང་བརྙན་སྲིད་ཞིའི་བླ་ན་གསལ། ༥ །དེ་ཚེ་ཐུབ་བསྟན་བཤད་དང་སྒྲུབ་པ་ཡི། །སྣང་བ་དམ་པས་འཇིག་རྟེན་མཛེས་པའི་ཕུལ། །ཡིད་ཅན་དོན་གཉིས་ངལ་འཚོའི་སླད་རྒྱུ་བའི། །ཡོན་ཏན་གཟུགས་ཅན་བཞིན་དུ་འདི་ན་སྣང་། ༦ །མདོར་ན་བསྔགས་འོས་ཕ་མཐའ་ཡས་པའི་གཏམ། །ལན་གཅིག་དད་པའི་ཡི་གར་སིམ་པ་ལས། །རྡུལ་སྙེད་ལུས་ཀྱི་འཁྲི་ཤིང་དུད་དང་བཅས། །ཐལ་མོའི་ཨུཏྤལ་ཟུམ་པའི་དད་ཕྱག་སྟོབ། ༧ །དངོས་འབྱོར་བདོག་པ་ཕྲ་མོས་ཐོག་དྲངས་ཏེ། །བདག་པོས་བཟུང་དང་ཡོངས་སུ་མ་བཟུང་བའི། །རྣམ་མང་མཆོད་པའི་སྤྲིན་གྱི་ཆར་ཆེན་པོས། །ཡེ་ཤེས་གཟིགས་

---

^{[མ་དཔེ་གཟིགས་ན་འདིར་གནོན།]}

པའི་མདུན་སར་མཛེས་པ་དབྱེ། ༨ །མུན་པར་འཕྱན་ལ་སྣང་བ་དམ་པ་བཞིན། །སྒྲིབ་གཉིས་གཞན་དབང་གྱུར་པའི་སྡིག་ལྟུང་ཀུན། །སྟོབས་བཞིའི་ནོར་བུའི་རྔ་ཡབ་འཛུམ་པ་ལས། །ཚངས་པའི་འབྲས་བུས་འབྱོར་པའི་ངལ་འཚོ་བཟུང་། ༩ །མཐོང་དང་མ་མཐོང་ལེགས་སྤྱད་ཇི་སྙེད་པ། །ཟླ་ཤེལ་བདུད་རྩིའི་ཕུང་པོར་འབབས་པའི་དཔྱིད། །དྭང་བའི་ཡིད་མཁར་འཆར་ལ་ཡི་རང་བའི། །ཀུ་མུད་གསར་པའི་དགའ་ཚལ་ཉིན་བཞིན་གྲོལ། ༡༠ །ཤིན་ཏུ་ཟབ་གསང་རྡོ་རྗེ་ནཱ་དའི་དབྱངས། །ལམ་བདེན་བེཟླུར་རྒྱུད་མང་ལ་སྦྱར་བས། །རིགས་ཅན་གསུམ་གྱི་མཐའ་གཉིས་དབུ་མའི་དབྱིངས། །སྤྲོས་པ་བརྟུལ་བའི་གོ་སྐབས་རྟག་ཏུ་སྟོན། ༡༡ །གང་དུ་གཟོད་ནས་ཞི་བའི་མཆོག་བརྙེས་ན། །འཇུག་དང་ལྡང་སོགས་སྣང་ཚུལ་ལས་འདས་ཀྱང་། །བྱིས་བློའི་ངོར་ཡང་སྐྱེ་འགགས་མ་དམིགས་པའི། །འཚོ་གཞེས་དགེ་མཚན་ནུབ་པ་མེད་པར་མཛོད། ༡༢ །དེ་ལྟར་བསགས་དང་དུས་གསུམ་ལེགས་སྤྱད་ཀུན། །འཇམ་དཔལ་གཞོན་ནུའི་མཁྱེན་པའི་ཡོངས་བསྔོ་དང་། །འཇུག་པ་གཅིག་པའི་འདུན་པས་མཚམས་སྦྱར་བས། །བྱང་ཆུབ་སྙིང་པོའི་ཕ་མཐར་སོན་གྱུར་ཅིག ༡༣ །སླད་མའི་ཆར་ཡང་མངོན་པར་འདོད་པའི་དངོས་པོ་ཚིགས་སུ་བཅད་དེ་གསོལ་པ། ཨོཾ་སྭསྟི་ཀུནྡནྟུ། རྣམ་པ་ཀུན་ལྡན་ཡེ་ཤེས་གཅིག་པུ་ཡིས། །གཞན་

---

^{[མ་དཔེ་གཟིགས་ན་འདིར་གནོན།]}

དབང་མཚན་མའི་ཆོས་ཁམས་དབང་བྱས་པས། །སྣ་ཚོགས་གཟུགས་ཅན་འཆང་བའི་རྫུ་འཕྲུལ་ཅན། །འཆི་མེད་རྡོ་རྗེའི་སྐུ་རུ་འཚོ་གཞེས་གསོལ། ༡ །སྲིད་པའི་འཕོ་བ་མཐའ་དག་དྷ་ཏིའི་དབྱིངས། །བདག་བྱིན་བརླབས་པའི་ཆོ་གས་ཐིམ་གྱུར་པ། །རྡོ་རྗེ་མི་ཤིགས་ནཱ་དའི་དབྱངས་སྙན་པོས། །སྡེ་སྣོད་རྒྱ་མཚོའི་ཆར་ཆེན་འབེབས་པར་མཛོད། ༢ །གཟུང་དང་འཛིན་པའི་སྣང་ཚུལ་ཇི་སྙེད་པ། །འཁོར་འདས་དབྱེར་མི་ཕྱེད་པའི་ཡེ་ཤེས་དང་། །མི་ཕྱེད་མཁའ་ཁྱབ་མཁའ་ཡི་རྡོ་རྗེའི་དབྱིངས། །རྟག་པ་དམ་པའི་དགེ་མཚན་རྫོགས་གྱུར་ཅིག ༣ །མདོར་ན་ཡོན་ཏན་དཔག་བསམ་ལྗོན་བཟང་ནི། །ཕྲིན་ལས་འདོད་དགུར་འཇོ་བའི་གྲགས་དཀར་བཅས། །སྲིད་ན་ནུབ་པ་མེད་པའི་ངོ་མཚར་གཏམ། །ཁོར་ཡུག་རི་བོའི་ཁོངས་སུ་སྙན་པ་དང་། ༤ །མཐའ་ཀླས་བསྟན་དང་འགྲོ་ལ་ཕན་བདེའི་རྒྱུན། །རྫོགས་ལྡན་སྤྲིན་གྱི་འཛུམ་དཀར་ལས་འོངས་པའི། །དགེ་ལེགས་ནོར་བུའི་གྲུ་ཆར་རབ་གཡོ་བས། །ས་གསུམ་བཀྲ་ཤིས་སྣང་བ་འབར་གྱུར་ཅིག ༥ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།ཞེས་པའི་ལེགས་འབུལ་གྱི་ཡི་གེ་ལེ་ཚན་འདི་རྣམས་ཀྱང་ཕུར་བུ་ཞེས་པ་ས་སྤྲེལ་ལོར་མཁན་ཆེན་རྡོ་རྗེ་འཆང་མཉྫ་ཤྲཱི་བྷ་དྲ་ཡུལ་དབུས་འགྱུར་འཆང་དུ་ཆིབས་བསྐྱོད་གནང་སྐབས་བཀའ་ཡི་ཅོད་པན་སྤྱི་བོར་བཅིངས་པ་ལ་བརྟེན་ནས་རིག་པར་སྨྲ་བ་མཉྫགྷོ་ཥའི་བློ་མཚོ་ལས་ཕྱུང་བའོ།། །།

མཁན་ཆེན་ཐམས་ཅད་མཁྱེན་པ་རྡོ་རྗེ་འཆང་བྱམས་པ་ཀུན་དགའི་མཚན་ཅན་སྟོན་འཁོར་ལ་ཞབས་བརྟན་ལེགས་འབུལ་གྱི་ཡི་གེ་འཆི་མེད་གྲུབ་པའི་བདེན་ཚིག

---

^{[མ་དཔེ་གཟིགས་ན་འདིར་གནོན།]}

༈ མཁན་ཆེན་ཐམས་ཅད་མཁྱེན་པ་རྡོ་རྗེ་འཆང་བྱམས་པ་ཀུན་དགའི་མཚན་ཅན་སྟོན་འཁོར་ལ་ཞབས་བརྟན་ལེགས་འབུལ་གྱི་ཡི་གེ་འཆི་མེད་གྲུབ་པའི་བདེན་ཚིག་ཅེས་བྱ་བ། གཙུཎྜིབསཾམེདྨོའི་སྒོ༽ སཾཔུཎྞསྱསུལཀྐཎཾཔྲབྷཱ། ཙྪནྡཤུདྡྷདཱིབྷེ། ཏྲེལོཀྱེཥཱཧིཏཾསུཁཾཔྲདཱ། པཏྠདྨསརཀལྤཛིབྱཏྭཾ། །བཀྲ་ཤིས་སྲིད་དང་ཞི་བའི་ལེགས་བྱས་ཀྱིས། །དགེ་མཚན་མཐའ་དག་རྫོགས་པའི་སྣང་བ་ཡིས། །འཇིག་རྟེན་གསུམ་ན་ཕན་བདེའི་མཆོག་སྦྱིན་པའི། །ཞབས་པད་བསྐལ་པ་རྒྱ་མཚོར་འཚོ་གཞེས་གསོལ། ༡ །གཟོད་ནས་འོད་གསལ་གཉུག་མ་རྡོ་རྗེའི་སེམས། །གློ་བུར་འཁྲུལ་པའི་མཚན་མ་ལས་འདས་བཞིན། །ཟུང་འཇུག་སྒྱུ་འཕྲུལ་དྲྭ་བའི་རྣམ་རོལ་ཅན། །ལོངས་སྤྱོད་ཡོངས་རྫོགས་འཁོར་ལོར་འཚོ་གཞེས་གསོལ། ༢ །བརྟན་གཡོ་ཀུན་ལ་ཁྱབ་པའི་ཡེ་ཤེས་སྐུ། །ཤེས་རབ་དབྱིངས་ཀྱི་ཕྱག་རྒྱ་ལ་སྦྱར་བས། །མཆོག་ཏུ་མི་འགྱུར་གྲུབ་པའི་སྣང་བརྙན་ནི། །ཁ་སྦྱོར་རྡོ་རྗེའི་གཟུགས་སུ་འཚོ་གཞེས་གསོལ། ༣ །སྲོག་རྩོལ་བརྗོད་པ་འགགས་པའི་དེ་མ་ཐག །མི་ཤིགས་ཚངས་པའི་སྒྲ་དབྱངས་སྲིད་པ་ན། །ལམ་བདེན་རྒྱ་མཚོའི་གདངས་སུ་འབབས་པའི་དཔྱིད། །བདེ་ཆེན་ནཱ་དའི་གསུང་དུ་འཚོ་གཞེས་གསོལ། ༤ །ཤེས་དང་ཤེས་བྱ་རོ་གཅིག་ཉིད་གྱུར་པའི། །གཟུང་འཛིན་སྤྲོས་པ་བརྟུལ་བའི་སེམས་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

ཀྱི་དབྱིངས། །ཡེ་ཤེས་མཆོག་གི་སྣང་བ་དང་འགྲོགས་པ། །རང་བཞིན་མེད་པའི་ཐུགས་སུ་འཚོ་གཞེས་གསོལ། ༥ །གང་དུ་སྐྱེ་བའི་འཇུག་ལྡང་མ་མཆིས་ཀྱང་། །རིག་དང་བརྩེ་བའི་དབང་གིས་སྲིད་པ་འདིར། །བྲལ་སྨིན་ཡོན་ཏན་རྒྱ་མཚོར་འཆར་བའི་ཕུལ། །སྙིང་རྗེས་ཡོངས་གང་ཆེན་པོར་འཚོ་གཞེས་གསོལ། ༦ །མཐའ་གཉིས་དབུ་མར་བསྙལ་བའི་ཕ་རོལ་ན། །བྱང་ཆུབ་མཆོག་གི་འབྱོར་པ་མི་ཟད་པས། །རྟག་ཅིང་ཁྱབ་དང་ལྷུན་གྱིས་གྲུབ་པ་ཡི། །ཕྲིན་ལས་རྒྱུན་མི་འཆད་པར་འཚོ་གཞེས་གསོལ། ༧ །མདོར་ན་མཁའ་ཁྱབ་སྐུ་དང་ཡེ་ཤེས་ཀྱི། །དགེ་མཚན་འགོག་པ་མེད་པར་འཚོ་གཞེས་བཞིན། །ཐུགས་རྗེའི་སྣང་བ་དམ་པས་ས་གསུམ་ན། །ཤིས་པའི་པདྨོ་རྟག་ཏུ་རྒྱས་གྱུར་ཅིག ༨ །ཅེས་པའང་འཇམ་དབྱངས་མཁྱེན་བརྩེའི་དབང་པོ་རང་ཉིད་ཀྱིས་མཁན་ཆེན་རྡོ་རྗེ་འཆང་ཁུ་དབོན་ལ་ཞབས་བརྟན་ལེགས་འབུལ་ཕུལ་བའི་མགོ་བརྗོད་དུ་བྲིས་པ་དགེ། །།

འཇམ་མགོན་ས་སྐྱའི་གདུང་སྲས་རིན་པོ་ཆེ་མཆེད་ཞལ་ཆོས་ཁྲིར་མངའ་གསོལ་བའི་ལེགས་འབུལ་གྱི་ཤིས་བརྗོད་མེ་ཏོག་དཀར་པོའི་དོ་ཤལ།

---

^{[མ་དཔེ་གཟིགས་ན་འདིར་གནོན།]}

༈ འཇམ་མགོན་ས་སྐྱའི་གདུང་སྲས་རིན་པོ་ཆེ་མཆེད་ཞལ་ཆོས་ཁྲིར་མངའ་གསོལ་བའི་ལེགས་འབུལ་གྱི་ཤིས་བརྗོད་མེ་ཏོག་དཀར་པོའི་དོ་ཤལ་ཅེས་བྱ་བ་བཞུགས་སོ། ༈ །སྡེབ་སྦྱོར་མཉམ་པའི་བྲིཏྟ་ཡི་གེ་བཅོ་བརྒྱད་པ་བསྟན་འཛིན་གྱི་བྱེ་བྲག ༣༣༡༥༧ གྱི་མཚམས་ནས་ཟིན་པ་མེ་ཏོག་གཡོ་བའི་འཁྲི་ཤིང་ཞེས་བྱ་བའི་པྲསཱརའོ། ཨཀཱཡརིག་ཆཛལཛྷིནྡྷོ་ལིཀྲྀནུཔོསྤྱི་བོདྲུགམཱནཾབྷབནསརསོདྷརྨཙསཱིཏབཱཀྱེ། ༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

གཉྫིརཤཱནྟཾསུབིདlཔུལཾཙིཏྟབིཀྵཤབྷཱཁཾ མངྒལྱཤཱསྟིསཔརམསྲྀདུཤྲཱིཀུམཱརེཎཀུམཱཏུ། །ཤིས་པར་བརྗོད་པའི་སྒོ་དང་པོ་སྟོན་པ་དང་འཇམ་དཔལ་གྱི་གསང་གསུམ་ལ་བསྔགས་པའོ། །རྨད་བྱུང་ཚོགས་གཉིས་ཆུ་གཏེར་ལས་འོང་མཚན་དཔེའི་སྐུ། །ལུང་དང་རྟོགས་པའི་ཆོས་ཕུང་རྒྱ་མཚོ་སྤྲོ་བའི་གསུང་། །ཟབ་ཞི་སྤྲོས་བྲལ་ཡེ་ཤེས་ཆེན་པོའི་ཐུགས་མངའ་བའི། །སྟོན་མཆོག་འཇམ་དཔལ་གཞོན་ནུར་བཅས་པས་ཤིས་པར་མཛོད། ༡ །བཀྲ་ཤིས་སྲིད་དང་ཞི་བའི་དགེ་མཚན་བདུད་རྩིའི་ཕུང་པོ་དལ་འབབས་པའི། །བཀྲ་ཤིས་མཚན་གྱི་སྟེང་འཐུང་དཀར་པོ་ཆེས་ཆེར་རྒྱས་པའི་མཚར་སྡུག་ཅན། །བཀྲ་ཤིས་སྣང་བ་དམ་པའི་དཔལ་སྟེར་ཟས་གཙང་སྲས་དང་འཇམ་མགོན་གྱི། །བཀྲ་ཤིས་གཟུགས་སྐུའི་ཟླ་བ་གསར་པས་ཕན་བདེའི་ངལ་འཚོ་སྦྱིན་གྱུར་ཅིག ༢ །ངོ་མཚར་ཐོག་མཐའ་བར་གསུམ་དགེ་བའི་ཞི་བསིལ་ཆོས་ཕུང་རྒྱ་མཚོའི་ཚུལ། །ངོ་མཚར་དབྱངས་ཀྱི་ཡན་ལག་དྲུག་ཅུའི་ནོར་བུའི་རྒྱུད་མང་ལ་ཆགས་པས། །ངོ་མཚར་ལྷར་བཅས་འཇིག་རྟེན་གསུམ་ན་ཀུན་དགའི་མཆོག་སྦྱིན་ཉི་མའི་གཉེན། །ངོ་མཚར་རྒྱལ་སྲས་ཐུ་བོར་བཅས་པས་འགྲོ་བའི་དམ་པའི་ལམ་དུ་སྲུངས། ༣ །རྣམ་པར་བཅས་པའི་འཇུག་ལྡང་མ་ལུས་ཞི་བའི་དབྱིངས་སུ་སིམ་གྱུར་པའི། །རྣམ་པ་ཀུན་གྱི་མཆོག་དང་ལྡན་པའི་ཡེ་ཤེས་སྒྱུ་འཕྲུལ་དྲ་བའི་གར། །རྣམ་འདྲེན་རྨད་བྱུང་ཤཱཀྱའི་

---

^{[མ་དཔེ་གཟིགས་ན་འདིར་གནོན།]}

ཏོག་དང་རྡོ་རྗེ་རྣོན་པོའི་ཐུགས་རྗེ་ཡིས། །རྣམ་ཀུན་ཕུན་སུམ་ཚོགས་པའི་གཞི་གྱུར་དགེ་ལེགས་མེ་ཏོག་ཆར་དུ་བསྙིལ། ༤ །རྨཙྩམཱརསིདྡྷཀུལསྱསུབྲྀཀྵབེསྡེབ་སྦྱོར་ཡི་གེ་བཅུ་པ་ཕྲེང་ལྡན་མའི་བྱེ་བྲག་དག་པའི་སྣང་བའོ། །སཱནྡྷནཾཤུབྷཔུལླབརྙནཱ པུརྦབྷུཤྩཙིམནྡརེཤྭརཿ ཤིས་བརྗོད་ཀྱི་སྒོ་གཉིས་པ་ས་སྐྱའི་གདུང་རབས་སྤྱི་དང་། འཇམ་མགོན་ས་པཎ་ལ་ཁྱད་པར་དུ་བསྔགས་པ། འཇམ་དཔལ་མཁྱེན་པའི་སྣང་བ་གསར་པ་ནི། །འཆི་མེད་གྲུབ་པའི་རིགས་ཀྱི་ལྗོན་བཟང་དང་། །འགྲོགས་པའི་དགེ་མཚན་མེ་ཏོག་དར་བབས་པ། །སྔོན་མེད་དཔག་བསམ་དབང་པོ་ས་སྐྱ་པ། ༡ །གང་དེའི་ཕྲིན་ལས་ནོར་བུའི་ཆུ་གཏེར་སྲིད་པའི་རྩེ་མོར་རབ་གཡོ་བར། །གང་གིས་རེག་པའི་དེ་མ་ཐག་ནས་ཕན་བདེའི་འདོད་དགུ་སྦྱིན་ནོ་ཞེས། །གང་དག་ས་གསུམ་འགྲོ་བའི་རྣ་ལུང་ཡང་ཡང་མཛེས་བྱས་ངོ་མཚར་ཅན། །གང་ཞིག་འཁོན་གདུང་བརྒྱུད་པར་བཅས་ལ་གུས་པས་བསྔགས་པར་མི་བགྱིད་སུ། ༢ །ཁྱད་པར་བཟོ་གསོ་པདྨོ་དགོད་པར་སྒྲ་དང་ཚད་མའི་བདུད་རྩི་ཡིས། །རབ་ཏུ་ལྕི་བའི་སྙིང་པོ་ཡིད་འོང་སྡེ་སྣོད་རྒྱུད་སྡེའི་འབྲས་བུས་གཏམས། །ཚིག་རྒྱན་སྡེབ་སྦྱོར་མངོན་བརྗོད་ཟློས་གར་སྐར་རྩིས་རིག་པའི་གྲིབ་བསིལ་གྱིས། །རྒྱལ་བ་དགྱེས་པའི་ལམ་བཟང་གསལ་མཛད་འཇམ་དཔལ་མགོན་དངོས་པཎྜི་ཏ། ༣ །མཁས་པས་མཁས་པའི་ལེགས་བཤད་གཏམ་གྱིས་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

དཔྱོད་ལྡན་བྱེ་བའི་བརྟན་པ་འཕྲོག །གྲུབ་པས་གྲུབ་པའི་ངོ་མཚར་མཐའ་ཀླས་སྐལ་བཟང་ཀུན་དགའི་རྒྱལ་མཚན་འཛིན། །ཡོན་ཏན་ཡོན་ཏན་དུ་མའི་གཞི་གྱུར་ཕྱོགས་ལས་རྣམ་རྒྱལ་དཔལ་བཟང་པོའི། །ཤིས་པས་ཤིས་པའི་བདུད་རྩིའི་བརླན་གྱིས་ཕན་བདེའི་ཨུཏྤལ་དབྱེ་མཛོད་ཀྱེ། ༤ །མཉྫནཱཐབྷམིཤུཀླཔཊ དྷརྨཙཀྲཡོབསནྟབནྟི སྡེབ་སྦྱོར་རྨ་བྱའི་འགྲོས་སོ། །མཎྜམཱསནཾམནོམདཱིདཾཤཱནབྷབཡོཤུབྷསྤུཊབཱ། ཤིས་བརྗོད་སྒོ་གསུམ་པ་མཚན་གསུམ་དང་ལྡན་པའི་ཆོས་ཁྲི་རིན་པོ་ཆེ་དང་དམ་པའི་ཚུལ་དགུ་སྦྱར་བ། འཇམ་མགོན་ས་སྐྱ་པཎྜི་ཏའི། །ཆོས་ཀྱི་འཁོར་ལོས་བསྒྱུར་བའི་དཔྱིད། །ནོར་བུའི་ཁྲི་འཕང་མཐོན་པོ་འདིར། །སྲིད་ཞིའི་དགེ་མཚན་ཅིར་ཡང་དར། ༡ །རབ་འབྱམས་གཞུང་ལུགས་མང་དུ་ཐོས་དང་དེ་དོན་བསམ་པའི་འོད་རིས་ཅན། །རབ་འབྱམས་སྒོམ་སྤངས་གནས་ལུགས་མངོན་གྱུར་འཁོན་གདུང་ཉིན་མོར་བྱེད་པའི་ཕྲེང་། །རབ་འབྱམས་ལྷར་བཅས་སྐྱེ་རྒུའི་དབུས་ན་ཆོས་ཀྱི་ཁྲི་འདིར་ཞབས་བཀོད་པས། །རབ་འབྱམས་མཁས་པའི་རྒྱུ་སྐར་ཚོགས་ཀུན་ཟིལ་གྱིས་གནོན་པའི་གྲགས་པས་མཛེས། ༢ །སྙན་སྙན་ལེགས་བཤད་འཆད་པའི་འཁོར་ལོས་སྐལ་བཟང་རྣ་བར་བདུད་རྩིར་བྱེད། །གསལ་གསལ་འགལ་འབྲེལ་རྩོད་པའི་འཁོར་ལོས་ཕས་རྒོལ་སྙིང་ལ་གདུང་བ་སྦྱིན། །མཁས་མཁས་སྡེབ་ལེགས་རྩོམ་པའི་འཁོར་ལོས་རྒྱལ་

---

^{[མ་དཔེ་གཟིགས་ན་འདིར་གནོན།]}

བསྟན་ཡུན་རིང་རྒྱས་མཛད་པའི། །མང་མང་དམ་པའི་བགྱི་བ་གསུམ་ལྡན་དགེ་མཚན་རྒྱུན་མི་འཆད་པར་སྒྲོགས། ༣ །ཕུལ་བྱུང་མཁྱེན་པའི་ཡེ་ཤེས་སྒྲིབ་མེད་ཟླ་བ་ནོར་བུའི་ཐང་ཡངས་པར། །ཕུལ་བྱུང་ཟབ་མོ་སྟོང་པ་ཉིད་དང་བརྩེ་བའི་སྙིང་རྗེ་ཆེ་ལྡན་པའི། །ཕུལ་བྱུང་མཐུ་སྟོབས་ནུས་པའི་མངའ་བདག་མཚན་མཆོག་གསུམ་ལྡན་གདུང་རབས་ཀྱིས། །ཕུལ་བྱུང་དགེ་མཚན་ཕྲག་བརྒྱས་མཛེས་བྱས་རྡོ་རྗེའི་གདན་འདིར་དགེ་ལེགས་སྩོལ། ༤ །ཅེས་རབ་ཡིད་མཛེས་བྱེད་ལོར་འཇམ་མགོན་ས་སྐྱ་པའི་གདུང་སྲས་རིན་པོ་ཆེ་མཆེད་ཞལ་ཆོས་ཁྲི་ཆེན་མོར་མངའ་གསོལ་བའི་ལེགས་འབུལ་གྱི་སྔོན་འགྲོའི་ཤིས་བརྗོད་མེ་ཏོག་དཀར་པོའི་དོ་ཤལ་ཅེས་བྱ་བ་འདིའང་། བདག་ཆེན་འཇམ་པའི་དབྱངས་ངག་དབང་ཀུན་དགའ་བཀྲ་ཤིས་ཀྱི་ཞལ་སྔ་ནས་ཚུལ་འདི་ལྟ་བུ་ཞིག་སྦྱོར་ཞིག་ཅེས་ཟིན་ཐོ་དང་བཅས་བཀའ་སྩལ་བ་ལྟར། རྒྱལ་ཁམས་ཉུལ་བའི་ད་རི་དྲྭ་མཁྱེན་བརྩེའི་མིང་གིས་དཔལ་ས་སྐྱའི་ཆོས་གྲྭ་ཆེན་པོའི་ཕུན་ཚོགས་ཞབས་བརྟན་ལྷ་ཁང་དུ་བྲིས་པ་སརྦ་པྲ་ཛབྷུསྶཐེཡནྟུ།། །།

ས་སྐྱོང་སྡེ་ན་ཤུ་བྷ་ནས་འཇིག་རྟེན་དབང་ཕྱུག་ཀརྨ་ཀར་ལེགས་འབུལ་སྟོབ་པའི་ཡི་གེ་བདུད་རྩིའི་རྒྱུད་མང་།

---

^{[མ་དཔེ་གཟིགས་ན་འདིར་གནོན།]}

༈ ས་སྐྱོང་སྡེ་ན་ཤུ་བྷ་ནས་འཇིག་རྟེན་དབང་ཕྱུག་ཀརྨ་ཀར་ལེགས་འབུལ་སྟོབ་པའི་ཡི་གེ་བདུད་རྩིའི་རྒྱུད་མང་ངོ་། །ཤྲཱི་བི་ཛ་ཡནྟུ། སྲས་བཅས་རྣམ་འདྲེན་ཡོངས་ཀྱིས་རབ་བསྔགས་ནོར་བུའི་མེ་ལོང་ཕྱིས་པའི་ངོགས། །མཐའ་ཀླས་ཡོན་ཏན་དུ་མས་ཉེར་བཟུང་མཚན་

---

^{[མ་དཔེ་གཟིགས་ན་འདིར་གནོན།]}

གྱི་རི་མོ་སྣང་བའི་དཔྱིད། །གང་གིས་ཐོབ་ན་ཐམས་ཅད་མཁྱེན་པའི་གོ་འཕང་དམ་པར་ལེགས་སྦྱོར་བའི། །རིགས་དང་དཀྱིལ་འཁོར་ཀུན་གྱི་ཅོད་པན་རྒྱལ་བ་མཆོག་གི་ཞབས་པདྨོར། ༡ །ཁྱོད་ཚུལ་གསང་གསུམ་ངོ་མཚར་རྨད་བྱུང་སྤྲིན་གྱི་བུ་མོའི་ཏམྦུ་ར། །ཤིན་ཏུ་གུས་པའི་གཟུ་བོའི་བློ་ཅན་མདོངས་མཐའི་རྣ་བར་ལྷུར་ཙམ་ནས། །ཕྱིར་ཞིང་མི་ཕྱེད་དད་གསུམ་རྒྱས་པའི་ཟློས་གར་ཉིན་བཞིན་བསྒྱུར་བ་ཡིས། །ལྷ་དང་བཅས་པའི་ཡིད་ཅན་ཀུན་ཀྱང་བརྟན་པ་བསྙིལ་བའི་བྱེད་པོར་གྱུར། ༢ །གཟོད་ནས་སྤྲོས་པའི་མཐའ་ལས་རྣམ་གྲོལ་ཕྱག་ན་པདྨོའི་ཡེ་ཤེས་ནི། །སེམས་ཅན་ཁམས་དང་མཐུན་པར་འཇུག་པའི་སྒྱུ་འཕྲུལ་དྲྭ་བའི་ཚུལ་སྟོན་ཕྱིར། །ཚུར་མཐོང་བྱིས་བློའི་དགའ་བ་བསྒྲུབ་ལ་ངུར་སྨྲིག་གསར་པའི་ལང་ཚོ་ཅན། །གངས་ཅན་རི་བོའི་བསོད་ནམས་མགྲོན་དུ་ཉིན་ཕྱེད་འཆར་ཀའི་ཟོལ་གྱིས་འོངས། ༣ །དེ་ཚེ་རབ་ཞིའི་ཆུ་གཏེར་འཕྱུར་བའི་རླབས། །ཡིད་འཕྲོག་སྙིང་རྗེའི་ཟླ་བ་གསར་པ་ཅན། །མཚན་དཔེའི་དུམ་བུ་རྫོགས་པའི་མཚར་སྡུག་གིས། །ཕུན་ཚོགས་ཕན་བདེའི་ཀུ་མུད་མཆོག་ཏུ་རྒྱས། ༤ །བཅུ་ཚུ ཕྲག་དྲུག་གི་སྤྲིང་ཡིག་ནཱ་དའི་དབྱངས། །མི་ཕྱེད་ལུང་དང་རྟོགས་པའི་ཉམས་འགྱུར་རྒྱུན། །ཡིད་ཅན་གང་གིས་ཐོས་པའི་དེ་འདྲོག་ཏུ། །ཞི་བསིལ་བདེ་བའི་དཔལ་ནི་ལག་རྩེར་སྦྱིན། ༥ །གཅིག་དང་དུ་མ་

---

^{[མ་དཔེ་གཟིགས་ན་འདིར་གནོན།]}

ལས་འདས་ཡེ་ཤེས་ནི། །སྤྲོས་པའི་ཕ་མཐར་གཞར་ཡང་མི་གནས་ཀྱང་། །གཟུངས་དང་སྤོབས་པ་ཏིང་འཛིན་བྱེ་བའི་སྒོ། །འབྱེད་ལ་སྲས་བཅས་རྒྱལ་དང་རྗེས་སུ་མཚུངས། ༦ །མི་ཟད་ཡོན་ཏན་ཕུང་པོའི་མཆིལ་པ་ཡིས། །གང་ལ་ཐེབས་པ་ཙམ་ནས་དོན་གཉིས་ཀྱི། །དགའ་སྟོན་ལྷུག་པར་སྦྱིན་ལ་གདེངས་ཅན་དབང་། །གཙུག་ན་མངོན་མཐོའི་ནོར་བུས་མཚོན་མ་ཡིན། ༧ །ཐབས་མཁས་ཕྲིན་ལས་མཛེས་མའི་འགྲམ་ཆང་གིས། །གདུལ་དཀའི་འགྲོ་ཁམས་བ་ཀུ་ལ་ཡི་ཤིང་། །བྲན་པའི་མོད་ནས་ཐར་དང་རྣམ་མཁྱེན་གྱི། །མེ་ཏོག་གཅིག་ཅར་གྲོལ་བའི་གྲགས་སྙན་མཐོ། ༨ །མཚན་བཟང་ཟ་མ་ཏོག་ཏུ་རྒྱས་བཏབ་པའི། །བྲལ་སྨིན་རིན་ཆེན་རྡུལ་མང་གཡོ་བའི་ལྕིད། །མ་བཟོད་འོད་སྲུང་བྱིན་གྱི་བུ་མོ་ཡང་། །རྣམ་པ་དྲུག་ཏུ་འདར་བའི་ཚུལ་སྟོན་བཞིན། ༩ །ཁྱད་པར་འདི་ན་སྐྱེ་བར་གོམས་པའི་སྐལ་བ་བཟང་པོའི་པད་མཚོ་རུ། །གང་གི་ཞབས་སེན་ཉི་གཞོན་འཆར་ཀའི་རྡུལ་ཕྲེང་དམར་པོས་བཏབ་པའི་ཚེ། །འདི་དང་གཏན་གྱི་བདེ་བ་མཐར་སོན་ཕུན་ཚོགས་མཚར་སྡུག་རྫོགས་པ་ལ། །ཡིད་སྲུབས་དཔུང་བཅས་ངོ་ཚའི་མཐར་གྱུར་ལུས་མེད་ཟོལ་གྱིས་ཡིབས་པ་བཞིན། ༡༠ །སླར་ལ་མཉན་པར་འོས་པའི་ལེགས་གསུང་དང་། །ལྷན་ཅིག་དངོས་པོའི་བདོག་པ་གྱ་ནོམ་བཅས། །རྫོགས་ལྡན་གསར་པའི་དགའ་སྟོན་སྒྲུབ་པ་ཡི། །

---

^{[མ་དཔེ་གཟིགས་ན་འདིར་གནོན།]}

སྲིད་ཞིའི་དགེ་མཚན་སྣང་བ་འབྱམས་སུ་ཀླས། ༡༡ །དེ་ཚེ་མཆོག་ཏུ་དྭངས་པའི་ཆུ་གཏེར་ལས། །ཚོགས་གཉིས་ཉི་ཟླའི་སྣང་བ་སྤྲོས་པའི་མོད། །རང་གཞན་བསོད་ནམས་འདུ་འགོད་གསར་རྩོམ་པའི། །གྲགས་དཀར་རི་བོའི་ཁོངས་སུ་རྒྱུ་བ་ན། །མཐའ་ཀླས་ཡིད་ཅན་རྒྱ་མཚོའི་ཚོགས་རྣམས་ཀྱང་། །འཇིག་རྟེན་གསུམ་གྱི་མགོན་པོ་ཀརྨ་ཀའི། །གསང་གསུམ་ཡེ་ཤེས་ཕུང་པོ་བསྙེན་ཙམ་ནས། །རྣམ་གྲོལ་ཐར་པའི་ངལ་འཚོ་ཅིར་ཡང་རྒྱས། ༡༢ །མདོར་ན་འཇུག་དང་ལྡང་བའི་མཚན་མ་ཟབ་ཞི་སྤྲོས་བྲལ་དབྱིངས་སིམ་བཞིན། །བརྩེ་ཆེན་ཡེ་ཤེས་གཟིགས་པའི་ཕྲིན་ལས་ཕྱོགས་འདི་ཁོ་ནར་རྗེས་དགོངས་པར། །བཀའ་དྲིན་ཕ་མཐས་མཚོན་ནུས་མིན་ཀྱང་ཤིས་པའི་ཚིག་གིས་མདུན་བདར་ནས། །དངོས་འབྱོར་མཆོད་སྤྲིན་ཅུང་ཟད་སྟོབས་འདིར་ཐུགས་རྗེའི་སྤྱན་གྱིས་བཙའ་བར་གསོལ། ༡༣ །སླར་སྨྲས་པ། བྱང་ཆུབ་སྤྱོད་པའི་རིན་ཆེན་འབྱུང་གནས་གཏིང་མེད་སྡིག་བྲལ་མི་ཟད་པ། །བསྲུབས་སྐྱེས་དཔལ་དང་བདུད་རྩིའི་གཏེར་གྱུར་ཟླ་བ་གསར་པའི་རེ་ཁཱ་ནི། །བློ་ལྡན་རྣམས་ཀྱིས་བསྙེན་པར་འོས་ཞེས་གྲགས་དཀར་སྲིད་ན་མཚུངས་མེད་པར། །སྒོ་གསུམ་གུས་པའི་བློ་དང་ལྷན་ཅིག་ཐལ་མོའི་ཆུ་སྐྱེས་སྙིང་གར་ཟུམ། །གང་ཞིག་བླ་ན་ཡོད་དང་མེད་པའི་མཆོད་པའི་སྤྲིན་ཕུང་འབྱམས་ཀླས་པ། །ཕ་མཐའ་བཟུང་ལ་ནམ་

---

^{[མ་དཔེ་གཟིགས་ན་འདིར་གནོན།]}

ཡང་མཛའ་མིན་འཆི་མེད་ལམ་གྱི་སྤུན་ཟླ་ཅན། །ཀུན་ཏུ་བཟང་པོའི་རྣམ་ཐར་ལས་བྱུང་རྒྱས་པར་དཀྲིགས་པའི་ངོ་མཚར་གྱིས། །ཡེ་ཤེས་གཟིགས་པའི་འབབ་སྟེགས་དམ་པ་དུས་གསུམ་ཀུན་ཏུ་མཛེས་པར་བགྱི། ༢ །ཡང་སྲིད་མང་པོར་གོམས་པ་བརྟས་པའི་སྡིག་ལྟུང་མིག་སྨན་ཚོན་རིས་ཀྱིས། །བསོད་ནམས་ལམ་དང་མྱ་ངན་འདས་པའི་ལང་ཚོའི་མཛེས་པ་རྨ་དབབས་པས། །འཕགས་རྣམས་དགྱེས་པའི་གོ་སྐབས་བྲལ་བའང་སྟོབས་བཞིའི་གངྒའི་རྒྱུན་བཟང་པོས། །སོ་སོར་སྦྱངས་ཤིང་སླར་ལ་སྡོམ་པས་ཞི་བའི་མཚར་སྡུག་ཅིར་ཡང་འབར། ༣ །ཚད་མར་གྱུར་པས་འགྲོ་ལ་ཕན་བཞེད་སྟོན་པ་བདེ་བར་གཤེགས་།。 པ་ཡི། །གསུང་གི་རྗེས་སུ་བསླབ་ལ་བརྩོན་པའི་འཕགས་དང་སོ་སྐྱེའི་ཚོགས་རྣམས་དང་། །དུས་གསུམ་རྣམ་འདྲེན་ཡོངས་ཀྱི་ཕྲིན་ལས་གཅིག་ཏུ་བསྡུས་པ་ཀརྨ་ཀའི། །རྣམ་པར་ཐར་པ་དྲན་པའི་མོད་ནས་རྗེས་སུ་ཡི་རང་དགའ་བས་བརླན། ༤ །ཐོག་མཐའ་བར་གསུམ་རྣམ་པར་དགེ་བའི་ལམ་བདེན་སྤྲིན་གྱི་རྔ་གསང་ནི། །སྤྲོས་པའི་མཚན་མ་ཉེ་བར་ཞི་བ་འགོག་བདེན་བདུད་རྩིའི་སྙིང་པོ་ཅན། །འགྲོ་རྣམས་མ་རིག་གཉིད་ལས་སློང་ཕྱིར་ཕྱོགས་བཅུའི་འཇིག་རྟེན་ཁམས་ཀུན་ཏུ། །ཕྱག་ན་པདྨོ་དགྱེས་པའི་ཞལ་ལས་རྟག་པ་རྒྱུན་དུ་སྒྲོག་མཛད་གསོལ། ༥ །ཀུན་བརྟགས་འཁྲུལ་པའི་རྒྱུ་བ་ཇི་སྙེད་འོད་གསལ་དབུ་མའི་

---

^{[མ་དཔེ་གཟིགས་ན་འདིར་གནོན།]}

དབྱིངས་སུ་སིམ། །གཞན་དབང་སྐུ་དང་ཡེ་ཤེས་ཕྲིན་ལས་པྲ་ཕབ་བརྒྱད་ཀྱི་སྣང་བརྙན་ཅན། །ཡོངས་གྲུབ་གཙང་རྟག་བདེ་བའི་བདག་ཉིད་འགྱུར་བ་མེད་པའི་དེ་ཁོ་ནར། །འཚོ་ཞིང་གཞེས་པའི་དགེ་མཚན་སྣང་བ་བསྐལ་པ་རྒྱ་མཚོར་འབར་གྱུར་ཅིག ༦ །དེ་ལྟའི་དགེ་ཚོགས་སྐལ་ལྡན་ཤིང་རྟ་མཚན་འཛིན་དྲི་མས་དབེན་བཞིན་དུ། །ཐར་པ་དམ་པའི་ཤུལ་ལམ་ལ་ཞུགས་བྱང་ཆེན་རྒྱ་མཚོར་རོ་གཅིག་པས། །གནས་སྐབས་མཐར་ཐུག་བསམ་པའི་དོན་ཀུན་ཡིད་བཞིན་ཉིད་དུ་འཇོ་བ་དང་། །བསྟན་འགྲོར་ཤིས་པའི་སྣང་བ་གསར་པས་འཇིག་རྟེན་གསུམ་ན་ཁྱབ་གྱུར་ཅིག ༧ །སརྦ་དཱ་ཀ་ལྱཱ་ཎཾ་བྷ་བ་ཏུ།། །།ཞེས་པའང་བྷུ་མི་པཱ་ལ་སེ་ནཱ་ཤུ་བྷའི་རྒྱལ་ཐབས་ཀྱི་ཡི་གེ་པ་གཅེན་པྲཛྙཱ་སིང་ཧས་བསྐུལ་ངོར་ཚངས་སྲས་དགྱེས་པའི་བློ་ལྡན་གྱིས་དཔལ་སྤུངས་ཐུབ་བསྟན་ཆོས་འཁོར་གླིང་དུ་བྲིས་པ་དགེ། །།

ས་སྐྱོང་སེ་ནཱ་ཤུ་བྷ་ནས་སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ཁྲི་ཕེབས་ཀྱི་ལེགས་འབུལ་སྟོབ་པའི་ཡི་གེ་མེ་ཏོག་ཆུན་པོ།

---

^{[མ་དཔེ་གཟིགས་ན་འདིར་གནོན།]}

༅། །ས་སྐྱོང་སེ་ནཱ་ཤུ་བྷ་ནས་སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ཁྲི་ཕེབས་ཀྱི་ལེགས་འབུལ་སྟོབ་པའི་ཡི་གེ་མེ་ཏོག་ཆུན་པོ་ཞེས་བྱ་བ། པུཎཛཱནབིམུཀྟབཱིཛཀཾ བོདྷིགཉྙཛལཀྐཎཾཤུབྷེ༔ སྡེབ་སྦྱོར་མཉམ་པའི་བྲིཏྟའི་བྱེ་བྲག་དག་པའི་སྣང་བའོ། །ཤཱན བྷབནཙུཊབིཐམཾ སིཤཱསརླགཏཾརབིརྫཡེཏ། །རྣམ་གྲོལ་བསོད་ནམས་ཡེ་ཤེས་ས་བོན་ནི། །བྱང་ཆུབ་སྙིང་པོར་འཁྲུངས་པའི་དགེ་མཚན་གྱིས། །སྲིད་དང་ཞི་བའི་གཙུག་ན་ངལ་འཚོ་བ། །ཡོངས་རྫོགས་

---

^{[མ་དཔེ་གཟིགས་ན་འདིར་གནོན།]}

བསྟན་འགྲོའི་ཉི་མ་རྒྱལ་གྱུར་ཅིག ༡ །ཚངས་སོགས་ཆེ་དགུའི་འདར་ལྡན་ཐོར་ཚུགས་ཀྱིས། །ཡང་ཡང་ཕྱིས་པའི་ནོར་བུའི་བ་གམ་གྱིས། །མངོན་པར་མཐོ་བའི་ཆོས་ཀྱི་རྒྱལ་ཐབས་ཆེ། །ངོ་མཚར་བྱེ་བས་མཛེས་པའི་ཉེ་དྲུང་དུ། ༢ །དཔག་བསམ་རྐང་བས་འཐུང་བས་དགའ་ཚལ་བཞིན། །ཡིད་ཅན་ཀུན་དགའི་འཇུག་ངོགས་གཅིག་གྱུར་པ། །ཁྱོད་ཞབས་དག་པའི་རིན་ཆེན་བེ་ཌཱུརླར། །སྲས་བཅས་རྒྱལ་བས་ཤིས་པའི་མེ་ཏོག་འཐོར། ༣ །དེ་སླད་ལྷས་སྐྱོང་རིགས་ཀྱི་ལྕུག་ཕྲན་ཡང་། །དད་གསུམ་ངང་ཚུལ་རྒྱས་པའི་བརྟུལ་ཞུགས་ཀྱིས། །ཐལ་མོའི་ཆུ་སྐྱེས་སྤྱི་བོར་ཟུམ་དང་བཅས། །བསྔགས་བརྗོད་གཏམ་གྱི་རྒྱུད་མང་ཅུང་ཟད་བསྒྲེངས། ༤ །གང་ཚེ་བསོད་ནམས་རྒྱ་མཚོའི་རོལ་སྒེག་ནི། །ཡེ་ཤེས་འབིགས་བྱེད་རི་བོས་བསྲུབས་པ་ལས། །མཚན་དཔེའི་ཟླ་རིས་བྱས་པའི་དགེ་མཚན་གྱིས། །ས་གསུམ་བཀྲ་ཤིས་གསར་བའི་སྣང་བས་ཁྱབ། །བཅུ་ཕྲག་དྲུག་གི་སྤྲིང་ཡིག་དང་འགྲོགས་བཞིན། །ཆོས་ཕུང་གྲངས་མེད་འཆད་དང་སྒྲུབ་པ་ལ། །འཇམ་མགོན་གཉིས་པའི་ངོ་མཚར་འདིའོ་ཞེས། །བློ་ལྡན་བློ་ཡི་སྙེམས་པ་གཅིག་ཅར་འཕྲོག ༦ །གཟུང་འཛིན་འཁྲུལ་པ་དག་པའི་འོད་གསལ་དབྱིངས། །འཇུག་དང་ལྡང་བ་བྲལ་བ་སྙོམས་འཇུག་བཞིན། །ཇི་ལྟ་ཇི་སྙེད་གཟིགས་པའི་ཡེ་ཤེས་ནི། །སྲས་བཅས་རྒྱལ་བ་ཀུན་དང་

---

^{[མ་དཔེ་གཟིགས་ན་འདིར་གནོན།]}

མཉམ་པ་ཉིད། ༧ །ཁྱད་པར་འཕགས་མཆོག་ཕྱག་ན་པདྨོ་ཡི། །ཡོངས་རྫོགས་ཕྲིན་ལས་རྒྱ་མཚོར་དབང་བསྒྱུར་བས། །དེང་ནས་བཟུང་སྟེ་ཁོར་ལུག་རི་བོའི་ཁོངས། །རྫོགས་ལྡན་དུས་ཀྱི་དགའ་སྟོན་གསར་དུ་ཚུགས། །དེ་སོགས་བསྔགས་འོས་ཡོན་ཏན་མི་ཟད་པ། །སྤྲིན་བྲལ་ཉིན་མོར་བྱེད་པ་རྣམ་བརྟག་བློས། །ཐལ་མོའི་ཀུ་མུཏ་སྙིང་གར་ཟུམ་དང་བཅས། །སྒོ་གསུམ་གུས་པའི་དད་ཕྱག་ཉིན་བཞིན་སྟོབས། ༩ །ལྷག་བསམ་དག་པའི་ས་གཞིར་ལེགས་འཁྲུངས་པའི། །དངོས་འབྱོར་མེ་ཏོག་ཕྲ་མོ་འདིས་མཚོན་ཏེ། །ཡིད་སྤྲུལ་མཆོད་པའི་སྤྲིན་ཕུང་མཐའ་ཀླས་པས། །བྱང་ཆུབ་བར་དུ་བསྙེན་བཀུར་བགྱིད་ལ་ཕྱོགས། ༡༠ །གདུང་སེལ་གངྒཱའི་རྒྱུན་གྱི་ཞབས་བསིལ་དང་། །དབང་པོའི་མཚོན་གྱིས་བརྡར་བྱས་འཛད་མིན་པའི། །སྡིག་དང་ལྟུང་བ་ལས་བྱུང་སྒྲིབ་པའི་དྲི། །སྟོབས་བཞིའི་བདུད་རྩིའི་ཐིག་པས་ཡུད་ལ་སྦྱོངས། ༡༡ །མགོན་པོ་ཁྱོད་ཀྱི་བྱང་ཆུབ་སྤྱོད་པས་མཚོན། །འཕགས་དང་སོ་སྐྱེའི་ལེགས་བྱས་ཕུང་པོ་ལ། །ཡི་རང་ཨུཏྤལ་འཛུམ་སྒྲོས་གྲོལ་བ་ཡིས། །རྣམ་དཀར་འབྲས་བུ་ལྷན་ཅིག་དབང་དུ་བགྱི། ཨུ ༡༢ །རིགས་ཅན་གསུམ་གྱི་འགྲོ་བ་མཐའ་ཀླས་པ། །རྨོངས་དང་མ་རིག་འཐིབ་བུས་ནོན་པ་ལ། །ཐར་པ་དམ་པའི་ལམ་བཟང་སྣང་བྱེད་པའི། །ཞི་བསིལ་བདུད་རྩིའི་སྒོ་བརྒྱ་འབྱེད་པར་གསོལ། ༡༣ །

---

^{[མ་དཔེ་གཟིགས་ན་འདིར་གནོན།]}

ལྷར་བཅས་ཡིད་ཅན་སྤྱི་དང་ཁྱད་པར་དུ། །འཛམ་བུའི་ལྗོན་པས་མཚན་པའི་སྨན་ལྗོངས་འདིར། །ཕན་བདེའི་བྱེད་པོ་གཅིག་གྱུར་ཐམས་ཅད་མཁྱེན། །ཞབས་པད་སྲིད་མཐའི་བར་དུ་བརྟན་པར་མཛོད། ༡༤ །དེ་ལྟར་བསགས་པའི་དགེ་ཚོགས་ལམ་གསུམ་རྒྱུན། །བྱང་ཆུབ་སྙིང་པོའི་རྒྱ་མཚོར་རོ་གཅིག་པས། །འཇིག་རྟེན་འཇིག་རྟེན་འདས་པའི་དགེ་ལེགས་ཀྱི། །བཀྲ་ཤིས་སྣང་བས་རྟག་ཏུ་ཁྱབ་གྱུར་ཅིག ༡༥ །སླར་ཡང་སྲིད་དང་ཞི་བ་ཡི། །དགེ་མཚན་རིན་ཆེན་བྱེ་བའི་ཕུལ། །ཁྱོད་ཞབས་བསྐལ་བརྒྱར་འཚོ་གཞེས་སླད། །ངག་གི་རྒྱུད་མང་འདི་སྐད་བསྒྲེངས། །བཱི་ཤྲཱི་ཤྲཱི་བི་ཛ་ཡནྟུ། གང་གིས་བསྙེན་པ་ཙམ་ནས་ཕན་བདེའི་མཆོག །སྦྱིན་ལ་ཙིནྟ་མ་ཎིས་མཚོན་མིན་པ། །བསོད་ནམས་བརྒྱ་ལས་གྲུབ་པའི་མཚན་དཔེའི་བྱིན། །རྟག་པ་རྒྱུན་གྱི་འཁོར་ལོ་ཞབས་བརྟན་གསོལ། ༡ །རྒྱལ་ཀུན་སོ་སོར་རྟོག་པའི་ཡེ་ཤེས་དང་། །འཇུག་པ་གཅིག་པའི་དབྱངས་ཀྱིས་དགེ་བྱས་པའི། །ཆོས་ཕུང་རྒྱ་མཚོའི་ངོ་མཚར་སྤྲོ་བཞིན་དུ། །ངེས་པར་ཞིང་ཁམས་འདི་ལས་ཡོལ་མེད་ཤོག ༢ །ཟད་དང་མི་སྐྱེ་ཤེས་པའི་ཡེ་ཤེས་ནི། །འགྱུར་བཅས་སྲིད་པའི་ཁམས་ལས་རྣམ་གྲོལ་ཕྱིར། །ཤིན་ཏུ་ཞི་བ་དམ་པའི་རྒྱལ་ཐབས་ལ། །འཆི་མེད་གྲུབ་པའི་རྣམ་ཐར་བཟུང་གྱུར་ཅིག ༣ །ཡོན་ཏན་མཐའ་ཀླས་བདུད་རྩིའི་དོ་ཤལ་དང་། །ཕྲིན་ལས་

---

^{[མ་དཔེ་གཟིགས་ན་འདིར་གནོན།]}

སྣང་བ་དཀར་པོས་ས་གསུམ་ན། །དོན་གཉིས་ངལ་འཚོ་མཆོག་ཏུ་རྒྱས་བཞིན་དུ། །འདིར་ཡང་ཡེ་ཤེས་གཟིགས་པས་ཁྱབ་པར་གསོལ། ༤ །མདོར་ན་སྐྱབས་ཀུན་འདུས་པའི་ཞལ་སྐྱིན་མགོན་པོ་ཁྱོད་ཀྱི་ཐུགས་རྗེ་ཡིས། །གནས་སྐབས་མཐར་ཐུག་སྨོན་པའི་དོན་ཀུན་ཡིད་བཞིན་འགྲུབ་པའི་དགེ་མཚན་གྱིས། །བསྟན་དང་འགྲོ་བའི་རྒུད་པ་ཀུན་ཞི་ཕུན་ཚོགས་འབྱོར་པས་མངོན་མཐོ་བའི། །བཀྲ་ཤིས་སྣང་བ་དམ་པའི་དཔལ་གྱིས་འཇིག་རྟེན་ཁམས་ཀུན་མཛེས་གྱུར་ཅིག །ཛ་ཡ་ཛ་ཡ་སུ་ཛ་ཡ། །ཞེས་པའང་ས་སྐྱོང་ཆོས་རྒྱལ་ཆེན་པོ་ནས་ཆབ་ཤོག་གི་ལམ་ནས་བསྐུལ་བ་ལྟར་རིགས་པར་སྨྲ་བ་ཚངས་སྲས་དགྱེས་པའི་བློ་ལྡན་གྱིས་བྲིས་ཏེ་ཕུལ་བ་དགེ། །།

དཔལ་ཀཿཐོག་རྡོ་རྗེ་གདན་གྱི་ཆོས་གྲྭ་ཆེན་པོར་རྒྱལ་དབང་པདྨ་འོད་འབར་གྱི་སྒྲུབ་ཆེན་སྐབས་སི་ཏུ་རིན་པོ་ཆེར་ལེགས་འབུལ་གྱི་ཐོ་ཡིག་བདུད་རྩིའི་སྒྲ་དབྱངས།

---

^{[མ་དཔེ་གཟིགས་ན་འདིར་གནོན།]}

༈ དཔལ་ཀཿཐོག་རྡོ་རྗེ་གདན་གྱི་ཆོས་གྲྭ་ཆེན་པོར་རྒྱལ་དབང་པདྨ་འོད་འབར་གྱི་སྒྲུབ་ཆེན་སྐབས་སི་ཏུ་རིན་པོ་ཆེར་ལེགས་འབུལ་གྱི་ཐོ་ཡིག་བདུད་རྩིའི་སྒྲ་དབྱངས་ཞེས་བྱ་བ། ཨཀྟརསདཱསཧིནྡྷནཱདྷཱཏབརཾབིལྕཌནིནྣཱཀཱཡཡེ༔ ཛཱ་ཏི་འཕགས་མའི་དབྱངས་སོ། །སཾཔུཎཤཱསནཱཙྪེརྨཧཱརབིབནཱཡབཛ྄དྷརཏཱཛཡནྟུ། །འགྱུར་མེད་རྟག་པ་དམ་པའི་ཡེ་ཤེས་ནི། །རྨད་བྱུང་སྤྲུལ་པ་མཆོག་གི་རྣམ་རོལ་ཅན། །ཡོངས་རྫོགས་བསྟན་པ་རྒྱ་མཚོའི་སྣང་བྱེད་ཆེ། །རྣམ་འདྲེན་རྡོ་རྗེ་འཆང་དངོས་རྒྱལ་གྱུར་ཅིག ༡ །རིགས་ཀྱི་རང་བཞིན་བྲལ་དང་སྨིན་པ་ཡི། །ཡོན་ཏན་མཆོག་གིས་ལྕི་བའི་

---

^{[མ་དཔེ་གཟིགས་ན་འདིར་གནོན།]}

འཛུམ་དཀར་གྱིས། །དྭངས་པའི་བློ་གྲོས་པདྨོ་ཁ་ཕྱེས་པས། །བསྔགས་བརྗོད་མགྲིན་པའི་རྒྱུད་མང་ཅུང་ཟད་བརྡུངས། ༢ །གང་ཚེ་བསོད་ནམས་བྱེ་བའི་འདུ་འགོད་དང་། །ཡེ་ཤེས་གཟིགས་པ་དྲི་མེད་ཟུང་འཇུག་པའི། །རང་གཟུགས་མཚན་དཔེའི་ཉི་མ་སྲིད་པ་འདིར། །ཤར་བ་ཙམ་གྱིས་དགེ་ལེགས་སྣང་བ་རྒྱས། ༣ །དེ་ཚེ་ལུང་གི་ཨུཏྤལ་དར་བབས་རྩེར། །རྟོགས་པའི་སྦྲང་རྩི་འཇོ་བས་ཡིད་ཅན་ཀུན། །ཐར་པ་དམ་པའི་ངལ་འཚོ་ལ་སྦྱར་བས། །རྒྱལ་ཀུན་གསུང་གི་རྡོ་རྗེའི་རྣམ་ཐར་རྫོགས། ༤ །ཕྲ་རབ་རྡུལ་གྱི་ཆོས་ཉིད་ལས་འདས་པ། །ཟད་དང་མི་སྐྱེ་ཤེས་པའི་ཡེ་ཤེས་དབྱིངས། །པྲ་ཕབ་བརྒྱད་དང་མཚུངས་པའི་ཕྱག་རྒྱ་ཆེར། །མཁྱེན་པ་གཉིས་ཀྱི་མཚར་སྡུག་ཅིར་ཡང་འབར། ༥ །བསླབ་དང་གྲོལ་བའི་པདྨའི་ནགས་ཀླུང་ནི། །ཏིང་འཛིན་བདུད་རྩིའི་བརླན་གྱིས་བསྐྱེད་བསྲིངས་པས། །མངོན་དང་ལྐོག་དང་ཤིན་ཏུ་ལྐོག་གྱུར་གྱི། །ཤེས་རབ་འབྲས་བུས་དུད་པ་བདག་གིར་མཛད། ༦ །ཀློག་སྤངས་བྱ་བ་ལས་ཀྱི་བརྟུལ་ཞུགས་ཀྱིས། །རྒྱལ་བསྟན་སྤྱི་དང་སྔ་འགྱུར་རྡོ་རྗེའི་ཐེག །ཉིན་ལ་ཉིན་མོ་བཞིན་དུ་གསལ་མཛད་པའི། །བྱེད་པོ་ཁྱོད་ལས་གཞན་དུ་དམིགས་སུ་མེད། ༧ །མདོར་ན་མངོན་སུམ་ཉིད་དང་རྗེས་དཔག་བློས། །བསྔགས་འོས་ཚངས་པའི་བློས་ཀྱང་གཞལ་དཀའ་བར། །སྒོ་གསུམ་ཤིན་ཏུ་གུས་པའི་དད་

---

^{[མ་དཔེ་གཟིགས་ན་འདིར་གནོན།]}

ཕྱག་གིས། །ཞབས་མཐིལ་འཁོར་ལོའི་རེ་ཁཱར་རྟག་ཏུ་བསྙེན། ༨ །དངོས་དང་ཡིད་ཀྱི་འདུ་བྱས་མཆོད་སྤྲིན་ནི། །ཀུན་བཟང་རྣམ་པར་འཕྲུལ་པས་མདུན་བདར་ཏེ། །བྱང་ཆུབ་སེམས་གཉིས་བཟུང་བའི་གཡར་དམ་གྱིས། །རྒྱལ་བ་དགྱེས་པའི་ལམ་སྲོལ་གཅིག་ཏུ་དབྱེ། ༩ །ཟླ་ཤེལ་བདུད་རྩི་བྱེ་བའི་འཛུམ་འོད་དང་། །རིན་ཆེན་སྣང་བས་འཕྲོག་མིན་སྡིག་ལྟུང་སྒོ། །མུན་ལས་མུན་པར་གྱུར་གང་སྟོབས་བཞི་ཡི། །ཉིན་མོར་བྱེད་པའི་གཟི་ཡིས་ཡུད་ལ་སྦྱར། ༡༠ །གང་གི་ཚོགས་གསུམ་ཡོན་ཏན་བྱེ་སྙེད་དང་། །འཕགས་དང་སོ་སྐྱེའི་ལེགས་སྤྱད་འཛའ་ན་མོར། །ཡི་རང་ཟུར་མིག་འཕེན་པའི་དེ་མ་ཐག ། བསོད་ནམས་ཕུང་པོའི་བརྟན་པ་བདག་གིར་བགྱིད། ༡༡ །ཇི་ལྟར་ཚ་བས་གདུང་ལ་ག་བུར་དང་། །སྣང་མིན་ལམ་དུ་འཕྱན་ལ་སྒྲོན་མེ་བཞིན། །རིགས་ཅན་གསུམ་གྱི་དབུལ་བ་བསལ་བའི་སླད། །རིན་ཆེན་རིན་ཐང་མེད་པའི་མཆོག་སྦྱིན་མཛོད། ༡༢ །ལྷག་པར་ཕན་བདེའི་སྨན་ལྗོངས་ཉམས་དགའ་བ། །མཛེས་སྟེར་བཤད་སྒྲུབ་ཆར་ཆེན་འབེབས་མཁས་པ། །སྔོན་མེད་གདེངས་ཅན་དབང་པོ་ཁྱོད་ཉིད་ཕྱིར། །བསྐལ་པ་རྒྱ་མཚོར་འཚོ་གཞེས་འབར་གྱུར་ཅིག ༡༣ །དེ་ལྟར་བསགས་ལས་བྱུང་བའི་རྣམ་དཀར་དང་། །དུས་གསུམ་ལེགས་བྱས་ཕུང་པོ་ཇི་སྙེད་ཀུན། །དམིགས་པའི་འཛིན་སྟངས་དབུ་མར་བསྙིལ་བ་ཡིས། །

---

^{[མ་དཔེ་གཟིགས་ན་འདིར་གནོན།]}

བྱང་ཆུབ་སྙིང་པོའི་རྒྱ་མཚོར་འཇུག་པར་བགྱི། ༡༤ །དགེ་ལེགས་དཔལ་གྱི་དུམ་བུས་འཇིག་རྟེན་གྱི། །རྨོངས་པའི་རབ་རིབ་མཐའ་དག་འཕྲོག་བྱས་ཏེ། །མཁྱེན་གཉིས་ལང་ཚོ་རྒྱས་པས་ས་གསུམ་ན། །བཀྲ་ཤིས་སྣང་བས་རྟག་ཏུ་མཛེས་གྱུར་ཅིག ༡༥ །སླར་ཡང་འཇིག་རྟེན་དགེ་བའི་ཕུལ། །དཀར་པོའི་ཕྱོགས་ཀྱི་ཟླ་ཤེལ་བཞིན། །གང་ཞབས་བསྐལ་བརྒྱར་འཚོ་གཞེས་སླད། །ཤིས་པའི་མེ་ཏོག་འདི་སྐད་ཡཱའཐོར། །བཱི་ཤྲཱི་ཤྲཱི་བི་ཛ་ཡནྟུ། རྒྱུ་དང་འབྲས་བུ་གཉིས་སུ་མི་ཕྱེད་པའི། །ཚོགས་གསུམ་བྱེ་བས་བསྐྲུན་པའི་མཚན་དཔེའི་སྐུ། །ཁྱབ་ཅིང་རྟག་པ་དམ་པའི་བདག་ཉིད་དུ། །འཆི་མེད་གྲུབ་པའི་དགེ་མཚན་འབར་གྱུར་ཅིག ༡ །ཡེ་ཤེས་རྒྱ་མཚོ་ལས་བྱུང་དམ་པའི་ཆོས། །འདོད་འབྱུང་ནོར་བུའི་རེག་བྱས་ལྷ་དང་མིའི། །ཕོངས་པ་གཅིག་ཅར་འཕྲོག་པའི་གྲགས་སྙན་གྱིས། །ཡིད་སྲུབས་སྡེར་བཅས་ཁེངས་པ་བསྙིལ་བར་མཛོད། ༢ །སྣང་གསུམ་འཕོ་བའི་བག་ཆགས་རྒྱུན་བཅས་པ། །ཨེ་ཝཱ་མཱ་ཡཱའི་ཕྱག་རྒྱར་བསྡམས་པ་ལས། །མཁའ་ཁྱབ་མཁའ་ལྟར་རབ་ཞི་གཉུག་མའི་ངང་། །སྐྱེ་འགགས་མཚན་མའི་སྤྲོས་པ་སིམ་གྱུར་ཅིག ༣ །མདོར་ན་ཡོངས་རྫོགས་བསྟན་འགྲོའི་ཉི་མ་མཆོག །བསྐལ་པ་རྒྱ་མཚོར་འཚོ་ཞིང་གཞེས་པ་ནས། །འཇིག་རྟེན་གསུམ་ན་གྲགས་པའི་སྣང་བ་ཡིས། །ཐར་བདེའི་པདྨོ་ཅི་ཡང་རྒྱས་པར་

---

^{[མ་དཔེ་གཟིགས་ན་འདིར་གནོན།]}

ཤོག ༤ །གང་ཞིག་མཚོན་གྱི་ཡི་གེས་རེག་པས་འདི་གཏན་ཕོངས་པ་སེལ་བ་ལ། དཔག་བསམ་རྐང་པས་འཐུང་བས་མཚོན་མིན་མཆོག་གསུམ་འདུས་ཞལ་བླ་མ་ཡི། །ཕུན་ཚོགས་བཀྲ་ཤིས་སྣང་བ་གསར་པས་རྒྱུ་དང་མི་རྒྱུའི་དངོས་པོ་ཀུན། །རྫོགས་ལྡན་གཞོན་ནུའི་དཔལ་གྱིས་འབྱོར་པའི་དགེ་མཚན་དུས་སྟོན་འབར་གྱུར་ཅིག །ཅེས་པའང་གསང་བདག་གྲུབ་པའི་དཔྱིད་རྨོག་སྟོན་རྡོ་རྗེ་འཆང་ཆེན་པོའི་བཀའི་ཅོད་པན་སྤྱི་བོར་བཅིངས་པ་ལས་རིག་པར་སྨྲ་བའི་ཆུ་སྐྱེས་གཞོན་ནུའི་བློ་གྲོས་ཀྱི་འདབ་མ་ལས་ཕྱུང་བའོ།། །།

ས་སྐྱོང་ཆོས་རྒྱལ་ཆེན་པོ་སེ་ནཱ་ཤུ་བྷར་ལེགས་འབུལ་གྱི་ཡི་གེ་པུཎཱརཱི་ཀའི་དོ་ཤལ།

---

^{[མ་དཔེ་གཟིགས་ན་འདིར་གནོན།]}

༈ ས་སྐྱོང་ཆོས་རྒྱལ་ཆེན་པོ་སེ་ནཱ་ཤུ་བྷར་ལེགས་འབུལ་གྱི་ཡི་གེ་པུཎཱརཱི་ཀའི་དོ་ཤལ་ཅེས་བྱ་བ། ཀལྱཱཎཾནཱམཾསུངལནམྲྀཏཾཀཎྞཀིཤཱིཥབཱནེ ཀལྱཱཎཾཧིཏུཾསུཁབྲྀཡབནཾཔུཎཾབུཎཱརཱིཀཔྲབནྟཾ། མེ་ཏོག་གཡོ་བའི་འཁྲི་ཤིང་ཞེས་བྱ་བའི་ཕྲ་སྣ་རའོ། །ཀལྱཱཎཾཤཱཏྟིབྷབཡཤསིབྷཱàསུདཱནཊིརཏྟཱི ཀལཱཎཾ ཤེཡོབཔབརཡོཐཔུཏྠཾབྲྀཐཔྲཡཙྪ། བཀྲ་ཤིས་མཚན་གྱི་བདུད་རྩིའི་བཅུད་ལེན་ཐོས་འཛིན་དཔྱིད་དུ་བཏུང་ཙམ་གྱིས། བཀྲ་ཤིས་ཕན་བདེའི་པུཎྜ་རཱི་ཀའི་དགའ་ཚལ་རབ་ཏུ་རྒྱས་མཛད་ཅིང་། བཀྲ་ཤིས་སྲིད་དང་ཞི་བའི་དཔལ་སྟེར་དཀོན་ཅོག་གསུམ་ཞེས་གྲགས་འབར་བས། བཀྲ་ཤིས་ས་ཡི་ཚངས་པ་མཆོག་ལ་དགེ་ལེགས་མེ་ཏོག་ཆར་དུ་བསྙིལ། ༡ །ནོམྲྀཏུསིདྡྷབྷིཙརཱདྷཱབཱནཾ ནོམྲྀཏྟནིཏཱམྲྀཏནབྱཀཱནྟཾ། བློཀ་གཉིས་སྡེབ་སྦྱོར་དབང་པོ་རྡོ་རྗེའོ། །

---

^{[མ་དཔེ་གཟིགས་ན་འདིར་གནོན།]}

ནོམྲྀཏྟཱནཱཐེནྡྲཀརུཙྪཛཱིཔཾ ནོམྲྀཏུཙཛཱནསཏགྲདེཉི། །འཆི་མེད་གྲུབ་པའི་ཆུ་གཏེར་གཡོ་བ་ལས་བྱུང་བའི། །འཆི་མེད་རྟག་པའི་བདུད་རྩི་སར་པས་མཛེས་བྱས་པ། །འཆི་མེད་མགོན་པོའི་ཐུགས་རྗེའི་ཤར་གྱི་ཐིག་ལེ་ཡིས། །འཆི་མེད་ཚེ་དང་ཡེ་ཤེས་དམ་པའི་མཆོག་སྩོལ་ཅིག ༢ །ལཀྵིམཙཏུ ཙསུབྷཱུཏིསེནཱལཀིདཤིཤོབྷནདཱིཔཱཤུཀྐི༔ ལཀྵིཏཱིདྷམཱུབྲིཡབཱརཱདཱནཾ ལཀྵིམཎིརཱསནཙིཏཱམཱུལཾ། །ཕུན་ཚོགས་སྡེ་བཞིའི་དཔལ་གྱི་འབྱོར་པ་དང་། །ཕུན་ཚོགས་དགེ་བཅུའི་སྣང་བ་དཀར་པོ་ཡིས། །ཕུན་ཚོགས་ས་གསུམ་ཀུན་དགའི་མཆོག་སྦྱིན་པའི། །ཕུན་ཚོགས་ཞབས་སྟེགས་ནོར་བུས་བཀྲ་བའི་དྲུང་། ༣ །ཁྱོད་ཚུལ་ཤིན་ཏུ་བསྔགས་པར་འོས་པ་དཔྱིད་དཔལ་ཇི་བཞིན་དར་བབས་པས། །ཀུན་ཏུ་དགའ་བའི་ཡིད་ཀྱི་རྟོག་པ་པདྨོ་ལྟ་བུར་རྒྱས་པའི་རླབས། །རྨད་བྱུང་བསྔགས་པའི་སྦྲང་རྩིའི་ཐིག་པ་འགོགས་པ་མེད་པར་འཇོ་བ་ཡིས། །ས་སྤྱོད་སྤྱན་གྱི་འབབ་སྟེགས་གསར་པ་གཅིག་ཏུ་མཛེས་པའི་གོ་སྐབས་སྒྲུབས། ༤ །བསོད་ནམས་དཔག་ཡས་ཆུ་གཏེར་གཡོ་བ་སྙིང་རྗེའི་སྲུབས་ཐག་གིས་བསྐུལ་བས། །སྡེ་བཞིའི་འཆར་ཀའི་དམར་བས་ཉེར་དྲངས་དགེ་ལེགས་བདུད་རྩིའི་དོ་ཤལ་ཅན། །ཆོས་སྲིད་རྒྱལ་ཐབས་ཡན་ལག་བདུན་ལྡན་ཆེ་དགུའི་རལ་པའི་རི་དབང་སྤོར། །ཞབས་ཀྱི་རྡུལ་ཕྲེང་མཛེས་པ་འབར་བས་སྔོན་མེད་ཟླ་ཤེལ་གཞོན་ནུར་

---

^{[མ་དཔེ་གཟིགས་ན་འདིར་གནོན།]}

གྱུར། ༥ །དེ་ཚེ་རང་སྡེ་བྱམས་པས་སྐྱོང་ཡང་མི་སྲུན་སྙིང་ལ་གདུང་བ་སྟེར། །ལྷར་བཅས་ཀུན་དགའི་དཔལ་དུ་གྱུར་ཀྱང་ཡིད་སྲུབས་སྡེར་བཅས་བརྟན་པ་འཕྲོག །གྲགས་དང་ཤེས་རབ་འབྱོར་པ་འཕེལ་ཡང་ཚུལ་མིན་རྒུད་པ་རིང་བཅད་པའི། །རྣམ་ཐར་ཡི་གེ་ལི་ཁྲིའི་ཚོན་རིས་ཕྱོགས་ཀྱི་བུ་མོའི་མཁུར་ཚོས་བྱིན། ༦ །ཨེ་མ་ཤར་རིའི་ཕྲག་པས་བསྟེན་བྱས་ཉིན་མོར་བྱེད་པའི་གཟི་བྱིན་གྱིས། །ལུགས་གཉིས་ཨུཏྤལ་ནགས་ཀླུང་ཉམས་དགའ་གཅིག་ཏུ་དབྱེ་བའི་སྐབས་སྲིད་ན། །བསྐལ་མང་ཚོགས་ཟུང་བྱེད་པོས་ལེགས་བསྐྲུན་མཐོང་ན་མི་མཐུན་མེད་པ་ཡི། །ཁྱོད་ཞལ་དག་པའི་དཔེ་ཟླར་འོས་ཞེས་གཟུར་གནས་ངག་གི་གླིང་བུ་འཁྲོལ། ༧ །ཚུལ་དང་ཚུལ་མིན་རྣམ་པར་འབྱེད་མཁས་ཚངས་པའི་བློ་ཡི་སྤུན་ཟླ་ཅན། །སྐལ་བཟང་རྣ་བར་ཀུན་དགའི་སིམ་སྟེར་བདེ་འཐུང་རྦ་རླབས་གསར་པའི་རོ། །དྲེགས་ལྡན་ཡིད་ཀྱི་བརྟན་པ་འཇིལ་ལ་འཕྲོག་བྱེད་ངག་གིས་མཚོན་མིན་པའི། །གང་གསུངས་དབྱངས་བདུན་ཡོངས་སུ་རྫོགས་འདིས་སྙན་པ་གཞན་གྱི་ཁེངས་པ་ཟུམ། ༨ །དཔྱོད་ལྡན་ཕལ་གྱིས་རྟོགས་པར་དཀའ་བའི་ཨུ ཆོས་སྲིད་ཤེས་བྱའི་རི་མོ་འབུམ། །གཅིག་ཅར་འཆར་བའི་ནོར་བུའི་མེ་ལོང་ཁྱོད་ཐུགས་ཉིད་ལ་རྫོགས་གྱུར་པས། །འཇམ་དཔལ་དཔའ་བོའི་བྱིན་རླབས་འོད་རྡུལ་ཡང་ནས་ཡང་དུ་བཏབ་པ་ཡིས། །བློ་མཆོག་

---

^{[མ་དཔེ་གཟིགས་ན་འདིར་གནོན།]}

པུཎྜ་རཱི་ཀའི་འཁྲི་ཤིང་ཆེས་ཆེར་དར་བར་བྱས་པ་བཞིན། ༩ །བསོད་ནམས་བྱེ་བའི་གདེངས་ཅན་གྱིས་བཟུང་ཡོན་ཏན་ནོར་བུའི་སྤྲིན་ཆེན་ལས། །འདོད་དགུའི་གྲུ་ཆར་ལྷུག་པར་འབེབས་པས་བསྟན་དང་འགྲོ་ལ་ཕན་བདེའི་དཔལ། །ཅི་དགར་སྦྱིན་པའི་ངལ་འཚོ་སྟེར་སླད་རྒྱལ་སྲས་བྱང་ཆུབ་སེམས་དཔའ་ཞེས། །གྲགས་པའི་བ་དན་རྣམ་པར་དཀར་བས་འཛམ་གླིང་ཐ་གྲུར་ཡོངས་སུ་ཁྱབ། ༡༠ །སྙིགས་མར་སྤྱོད་པའི་དུས་ཀྱི་ཚ་གདུང་ལྷག་མ་མེད་པར་འཇིལ་བ་དང་། །རྫོགས་ལྡན་གཞོན་ནུའི་དཔྱིད་དཔལ་ཡིད་འོང་མགྲོན་དུ་འབོད་པའི་བྱེད་པོ་རུ། །གང་འདུལ་ཕྲིན་ལས་བདུད་རྩིའི་བརླན་གྱིས་ས་གསུམ་ཀུན་དགར་བྱས་པའི་ཕྱིར། །སྔོན་བྱོན་ཆོས་རྒྱལ་མེས་དབོན་ཚོགས་རྣམས་སླར་ཡང་ཕྱོགས་འདིར་འོངས་པ་བཞིན། ༡༡ །དེ་སོགས་བསྔགས་འོས་སྲིད་ན་མངོན་མཐོ་གང་གི་གསང་གསུམ་སུ་མེ་རུ། །དམ་པའི་ཡོན་ཏན་ཉི་ཟླའི་རྣ་ཆས་ལྷག་པར་མཛེས་དང་ཆབ་གཅིག་པར། །མིག་གི་བདུད་རྩིར་བཏུང་བ་ཙམ་ནས་དགེ་མཚན་དུས་སྟོན་རྒྱས་གྱུར་པའི། །བཀའ་དྲིན་ཕ་མཐས་མཚོན་ནུས་མིན་ཕྱིར་དངོས་པོས་གཞལ་བྱ་མ་ཡིན་ཡང་། ༡༢ །ལྷག་བསམ་དག་པའི་ཆུ་གཏེར་ལས། །བྱུང་བའི་ལེགས་སྐྱེས་མནྡར། །ཅུང་ཟད་ཙམ་གྱིས་བསྙེན་བཀུར་ན། །རྗེས་བརྩེའི་གཟིགས་པ་ལྷུར་མཛད་གསོལ། ༡༣ །སླར་ཡང་སྡེ་བཞིའི་

---

^{[མ་དཔེ་གཟིགས་ན་འདིར་གནོན།]}

དགེ་ལེགས་བྱེ་བ་ཡིས། །ཆོས་སྲིད་རྒྱལ་ཐབས་མཆོག་ལ་དབང་བསྐུར་བ། །ས་སྤྱོད་བཞེད་པའི་དོན་ཀུན་བདེ་བླག་ཏུ། །འགྲུབ་སླད་བདེན་ཚིག་མེ་ཏོག་འདི་སྐད་འཐོར། །བཱི་ཤྲཱི་ཤྲཱི་བི་ཛ་ཡནྟུ། གང་ཞིག་སྐྱབས་སུ་སོང་བ་ཙམ་ནས་ཐུགས་རྗེའི་གདུགས་དཀར་སྣུམ་པོའི་གྲིབ། །རྨད་བྱུང་དོན་གཉིས་ངལ་འཚོ་སྦྱིན་མཁས་བསླུ་བ་སྤངས་པའི་སྐྱབས་རྣམས་ཀུན། །དེང་འདིར་ས་ཡི་ཚངས་པ་ཆེན་པོ་མཆེད་ཞལ་བློན་འབངས་བཅས་པ་ཡི། །བཞེད་དོན་ཡིད་བཞིན་འདོད་པ་འཇོ་བའི་དགེ་མཚན་སྣང་བ་རྒྱས་ཕྱིར་སྤྱོན། ༡ །སྲས་བཅས་རྒྱལ་བའི་ཡེ་ཤེས་སྐུ་ཅན་དཔལ་ལྡན་བླ་མའི་བྱིན་རླབས་ནི། །ཉིན་མོར་བྱེད་པ་འཆར་ཀའི་གཟི་ལྟར་ཡིད་དུ་འོང་བའི་འཛུམ་འོད་ཀྱིས། །ས་བདག་ཐུགས་ཀྱི་པདྨོར་རེག་ལས་སྤངས་རྟོགས་ཡོན་ཏན་འདབ་མའི་རྒྱུ། །གཅིག་ཅར་འབྱེད་པའི་མཚར་སྡུག་རབ་གཡོ་མཆོག་དངོས་གྲུབ་པས་མཛེས་གྱུར་ཅིག ༢ །གང་ཞིག་མཚན་གྱི་སྤྲིང་ཡིག་གསར་པ་རྣ་ལུང་དཔྱངས་པའི་དེ་མ་ཐག །དུས་མིན་ཉི་བུའི་དཔུང་པ་ཡོངས་བཅིལ་རིང་འཚོའི་དཔལ་ཀུན་སྟེར་མཁས་པ། །ཚེ་དཔག་མེད་དང་རྣམ་པར་རྒྱལ་མ་ཡིད་བཞིན་འཁོར་ལོས་ཐུགས་རྗེས་གཟིགས། །འཆི་མེད་རྟག་པའི་བཅུད་ལེན་གྲུབ་པས་བསྐལ་པ་རྒྱ་མཚོར་འཚོ་གཞེས་ཤོག ༣ །རྣམ་ཀུན་མཆོག་ལྡན་ཡེ་ཤེས་ཉིད་ཕྱིར་སྒྱུ་འཕྲུལ་དྲྭ་བའི་སྤྲིན་

---

^{[མ་དཔེ་གཟིགས་ན་འདིར་གནོན།]}

བཀོད་པས། །ཤིན་ཏུ་ཞི་བ་ཆོས་སྐུའི་དབྱིངས་ལས་ཁ་སྦྱོར་ཡན་ལག་བདུན་གྱི་གར། །ཡི་དམ་ལྷ་ཚོགས་ཕྲིན་ལས་འཇུག་པ་ལེགས་བྲིས་ཟིལ་དངར་བཏུང་བ་ཡིས། །གྲུབ་གཉིས་བནྡྷ་ཛཱི་བའི་འཁྲི་ཤིང་ཀུན་ནས་ཀུན་ཏུ་རྒྱས་གྱུར་ཅིག ༤ །རྗེས་ཆགས་དབང་གི་མཆིལ་པ་རྣོན་པོས་ལན་གཅིག་ཙམ་ཞིག་རེག་པས་ཀྱང་། །ལྷར་བཅས་དྲེགས་ལྡན་ཡོངས་ཀྱི་ཐོར་ཚུགས་འཛིན་མའི་ཕངས་པར་བསྙིལ་མཁས་པའི། །རིག་བྱེད་དགའ་མའི་ཐུགས་རྗེའི་སྣང་བ་ཨུཏྤལ་ནགས་སུ་རྣམ་འཕྲུལ་པས། །སྡེ་བཞིའི་དགེ་ལེགས་བུང་བའི་ཚོགས་ཀུན་རང་དབང་ཉིད་དུ་འགུགས་པར་ཤོག ༥ །རྡོ་རྗེ་ཡེ་ཤེས་འབར་བའི་མེ་བུས་ཡིད་སྲུབས་བུད་ཤིང་ཀུན་བསྲེགས་ཀྱང་། །འདོད་དགུའི་གྲུ་ཆར་ལྷུག་པར་འབེབས་ལ་དཔག་བསམ་དབང་པོའི་རྗེས་འགྲོ་བ། །མཐུ་ལྡན་ཆོས་སྲུང་ནོར་ལྷའི་ཚོགས་ཀྱིས་རྣམ་བཞིའི་ཕྲིན་ལས་ཀུན་བསྒྲུབས་པས། །ཕྱོགས་ལས་རྣམ་པར་རྒྱལ་བའི་བ་དན་སྲིད་པའི་རྩེ་མོར་བསྒྲེངས་གྱུར་ཅིག ༦ །དེ་ལྟར་མི་བདག་མཆོག་གི་བཞེད་དོན་ཟླ་ཤེལ་གསར་པའི་འཛུམ་རླབས་ནི། །ཆེས་ཆེར་དར་བའི་མཚར་སྡུག་ལ་བརྟེན་རིས་མེད་བསྟན་པའི་སྟེང་འཐུང་དཀར། །བཤད་སྒྲུབ་ཟུང་གི་འདབ་རྒྱ་གྲོལ་བས་ཐུབ་བསྟན་དབྱར་གྱི་ལང་ཚོ་ཡིས། །ཡིད་སྲུབས་དཔུང་བཅས་མཛེས་པ་ཕམ་བྱས་རྒྱལ་བ་དགྱེས་པའི་དཔལ་ཐོབ་ཤོག ༧ །

---

^{[མ་དཔེ་གཟིགས་ན་འདིར་གནོན།]}

ཡངས་པའི་རྒྱལ་ཁམས་འདི་ཉིད་ཀྱིས་མཚོན་གངས་རིའི་ཕྲེང་བས་བསྐོར་བའི་ལྗོངས། །སྐྱེ་རྒུ་ཀུན་ཀྱང་བརྒྱད་གཉིས་འཇིགས་བྲལ་དགེ་བཅུའི་ལས་ལ་རྟག་སྤྱོད་མཐུས། །ཆར་ཆུ་དུས་བབས་འབྲུ་ནོར་དཔལ་འཕེལ་མཐོ་རིས་ཡོན་ཏན་བདུན་ལྡན་པའི། །ཆབ་སྲིད་རྫོགས་ལྡན་གཞོན་ནུའི་དགའ་སྟོན་ནུབ་མེད་སྲིད་མཐར་རྒྱས་གྱུར་ཅིག ༨ །མདོར་ན་ཡིད་མཁར་ཤར་བའི་མོད་ནས་ཚུལ་མིན་རྒུད་པ་རིང་བཅད་ཕྱིར། །བསླུ་བ་སྤངས་པའི་ཡི་གེས་རབ་བརྗིད་བླ་མ་མཆོག་གི་ཐུགས་རྗེའི་མཐུས། །གནས་སྐབས་མཐར་ཐུག་འདོད་པའི་དོན་ཀུན་འབད་མེད་ལྷུག་པར་འཇོ་བ་ཡི། །ཕུན་ཚོགས་བཀྲ་ཤིས་སྣང་བ་གསར་པས་སྲིད་ཞིའི་ཁམས་ཀུན་མཛེས་པར་ཤོག ༩ །ཛ་ཡ་ཛ་ཡ་སུ་ཛ་ཡ། །ཞེས་པའང་མཛེས་བྱེད་ལོར་མཁན་ཆེན་རྡོ་རྗེ་འཆང་རྣལ་འབྱོར་འཇམ་དཔལ་བཟང་པོའི་ཞལ་སྔ་ནས་བོད་ཆེན་པོའི་ལྗོངས་སུ་ཐོག་མར་ཕེབས་པའི་ཚེ། ཆོས་རྒྱལ་བྱང་ཆུབ་སེམས་ལ དཔའ་མཆོག་གི་ཞབས་པད་དུ་ལེགས་སྐྱེས་ཕུལ་བའི་བརྗོད་པ་འདི་ལྟ་བུ་ཞིག་སྦྱོར་བར་འོས་སོ་ཞེས་བཀའི་ཅོད་པན་གཙུག་ཏུ་བཀོད་ནས། རིག་པར་སྨྲ་བ་མཁྱེན་བརྩེའི་དབང་པོས་དབྱར་གྱི་སྨན་ལྗོངས་ཉམས་དགའ་བའི་བསྟི་གནས་སུ་བྲིས་པའོ།། ༈ །།བགྲང་ཡས་རིགས་དང་དཀྱིལ་འཁོར་ཐམས་ཅད་ཀྱི། །སྤྲོ་བསྡུའི་བྱེད་པོ་ངུར་སྨྲིག་འཛིན་པའི་ཚུལ། །མཁན་ཆེན་ཐམས་ཅད་མཁྱེན་པའི་ཞབས་པདྨོ། །འཇིགས་མེད་སེང་གེས་བཏེགས་པའི་ཉེ་དྲུང་དུ། །མི་ཕྱེད་གུས་པ་ཆེན་

---

^{[མ་དཔེ་གཟིགས་ན་འདིར་གནོན།]}

པོས་ཞུ་གསོལ་འདེབས། །གང་ཚེ་བསོད་ནམས་ཡེ་ཤེས་མཐར་ཕྱིན་པའི། །རྣམ་འཕྲུལ་ཞི་བ་མཆོག་གི་གཟུགས་ཀྱི་ཟླ། །གདུལ་བྱའི་ཁམས་དང་མཐུན་པར་འཆར་བའི་སྐུ། །ལྷ་དབང་གཙུག་གི་ནོར་བུ་ལྟར་དྭངས་ཤིང་། །རླབས་ཆེན་ཕན་དང་བདེ་བའི་ཕྲིན་ལས་འོད། །ཕྱོགས་དུས་ཀུན་ནས་རྒྱས་པར་འགེངས་བཞིན་ཏུ། །བོད་ཆེན་བསྟན་འགྲོའི་ཉེར་འཚོར་ཞབས་བཀོད་པའི། །ངོ་མཚར་བཀའ་དྲིན་ཚངས་པའི་བློ་ལས་བརྒལ། །འཕགས་རྣམས་དམན་ལ་བརྩེ་བ་ཆོས་ཉིད་ཕྱིར། །འདིར་ཡང་སྒྲིབ་བྲལ་ཡེ་ཤེས་གཟིགས་པ་ཡིས། །བཀའ་གླེགས་གནང་སྐྱེས་དང་བཅས་སྤྱི་བོ་རུ། །སོན་པས་གུས་སྤྲོའི་སྐལ་བཟང་མཆོག་ཏུ་ཐོབ། །འདིར་ཡང་སྐྱབས་རྣམས་ཐུགས་རྗེ་ཡི། །གདུགས་དཀར་གྲིབ་མར་ངལ་བསོས་བས། །ཉེར་འཚེའི་གདུང་བ་དང་བྲལ་ཞིང་། །གསོལ་འདེབས་རོལ་མོ་འཁྲོལ་བཞིན་མཆིས། །མཚམས་ཞུས། སླད་མའི་ཆར་ཡང་སྲིད་པའི་དབུགས་འབྱིན་ཞིང་། །ཞི་བ་ཕྱོགས་གཅིག་འགོག་པའི་མཐའ་བསལ་སླད། །ཟབ་རྒྱས་དམ་ཆོས་རྒྱལ་རྔ་བརྡུང་བཞིན་དུ། །བསྐལ་པ་རྒྱ་མཚོར་འཚོ་གཞེས་བརྟན་གྱུར་ཅིག ། དེ་སྲིད་ཀུན་དང་བྱང་ཆུབ་བར། །བརྟན་ཀྱང་ཐུགས་རྗེའི་ཕྱག་རིང་གིས། །རྣམ་པ་ཀུན་ཏུ་རྗེས་བཟུང་བས། །ཕན་བདེའི་དགའ་སྟོན་རྒྱས་མཛད་གསོལ། །ཞེས་པའི་ཞུ་གསོལ་ངང་མོ་དཀར། །རིམ་

---

^{[མ་དཔེ་གཟིགས་ན་འདིར་གནོན།]}

གཉིས་རྐང་གདུབ་འགྲོས་བཞིན་དུ། །ཁྱོད་ཞབས་པད་རྫིང་རྗེས་དྲན་བློས། །དབོ་ཟླའི་༢གྲལ་ཚེས་༡༨དགེ་བར་སོང་།། ༈ །།ཡེ་ཤེས་གཟིགས་པ་རབ་འབྱམས་ཀྱི། །དངོས་ཀུན་དེ་ཉིད་ཐུགས་ཆུད་ནས། །ཆོས་ཀྱི་རྒྱལ་མཚན་སྒྲེང་མཛད་པའི། །རྣམ་འདྲེན་མཆོག་གི་ཞབས་པདྨོར། །རྫིང་ན་གནས་པའི་ཀུ་མུ་དཱ། །ཟླ་ཟེར་བདུད་རྩིས་ཕྱེ་བ་བཞིན། །གང་ཚུལ་བསྔགས་འོས་རྣམ་ཐར་ལ། །ཡིད་རབ་ཕྱོགས་པས་འདི་སྐད་གསོལ། །གཟོད་ནས་བྱང་ཆུབ་སྙིང་པོ་རུ། །སྐུ་བཞིའི་གོ་འཕང་མངོན་མཛད་ཀྱང་། །ཐུན་མོང་འགྲོ་བ་སྒྲོལ་བའི་སླད། །སྤྲུལ་པའི་རྣམ་འཕྲུལ་ཅིར་ཡང་སྣང་། །སཱ་ལའི་ཤིང་ལྟར་མཐོ་བའི་རིགས། །མཚན་དཔེའི་མེ་ཏོག་རྒྱས་པ་ན། །འཕགས་དང་མཁས་པ་རབ་དགྱེས་པའི། །བསྔགས་འོས་མཚར་སྡུག་ཅིར་ཡང་དར། །བསླབ་གཞིས་ལེགས་པར་རྒྱུད་བསྡམས་ཏེ། །གསན་བསམ་སྒོམ་པའི་ཆ་རྫོགས་པས། །རྡོ་རྗེ་འཛིན་པའི་རྒྱལ་ཐབས་ཉིད། །མ་བྱིན་པར་ཡང་བདག་གིར་བླངས། །ཁྱད་པར་སྙིགས་དུས་འགྱུར་བ་ཡིས། །ཉམས་པར་བྱས་པའི་བསྟན་དང་འགྲོར། །ཕན་བདེའི་སྲོག་ཟུངས་སྩལ་བ་ཡི། །དགེ་མཚན་ནམ་མཁའི་མཐའ་ཡིས་མཚོན། །དེ་སླད་འཚོ་གཞེས་བརྟན་པ་ནས། །ཡེ་ཤེས་གཟིགས་པའི་སྤྱན་རས་ཀྱིས། །འདིར་ཡང་བཀའ་གླེགས་ནོར་བུའི་སྒྲོམ། །ཐོབ་པས་གུས་སྤྲོའི་པདྨོ་དགོད། །

---

^{[མ་དཔེ་གཟིགས་ན་འདིར་གནོན།]}

འདི་ན་སྐྱབས་རྣམས་ཐུགས་རྗེའི་སྤྲིན། །གུས་པའི་ཡིད་མཁར་དཀྲིགས་པ་ལས། །ཉེར་འཚེའི་གདུང་བས་མ་སྨད་བཞིན། །འདུ་ཤེས་གསུམ་གྱི་མལ་དུ་བདེ། །མཚམས་ཞུས། སླད་མའི་ཆར་ཡང་འཇིག་རྟེན་ན། །ཕན་བདེའི་དངོས་ཀུན་སྩོལ་བའི་ཕུལ། །གསང་གསུམ་བསྐལ་བརྒྱར་འཚོ་གཞེས་ཤིང་། །བདག་ཀྱང་རྣམ་ཀུན་རྗེས་བཟུང་གསོལ། །ཞེས་པའི་ཞུ་མཚོན་ལྷའི་རེག་བྱ། ཚེ་རྫས། རིན་གཉིས་སྲང་འཁོར་བཅས་ཟླ་ཚེས་ལ་ཕུལ།། །།

ཀཿཐོག་སི་ཏུ་རིན་པོ་ཆེ་སོགས་ཀྱི་མདུན།

---

^{[མ་དཔེ་གཟིགས་ན་འདིར་གནོན།]}

༈ ཀཿཐོག་སི་ཏུ་རིན་པོ་ཆེའི་མདུན། ཨོཾ་སྭསྟི་སིདྡྷཾ། རྟག་བརྟན་ཡོངས་གྲུབ་འགྱུར་མེད་ཚེ་མཐའ་ཡས། །བསྟན་པ་རྒྱ་མཚོའི་མགོན་དུ་ལེགས་བཞེངས་པ། །ཕྱོགས་ལས་རྣམ་པར་རྒྱལ་བའི་རྡོ་རྗེའི་སྐུ། །ངེས་པ་ལྔ་ལྡན་ཆེན་པོར་འཚོ་གཞེས་གསོལ། །ཨོ་རྒྱན་བླ་མའི་ཟབ་རྒྱས་བཀའ་བརྒྱུད་ཀྱི། །བསྟན་འཛིན་བྱེ་བའི་གཙུག་གི་ནོར་བུ་མཆོག །འཆད་རྩོད་རྩོམ་ལ་ཟླ་མེད་སྨྲ་བའི་གསུང་། །གདུལ་བྱའི་རྣ་བར་རྟག་ཏུ་སྙན་གྱུར་ཅིག །ཤེས་དང་ཤེས་བྱ་ཀུན་གྱི་དེ་ཁོ་ན། །མཁྱེན་པའི་ཡེ་ཤེས་ཆོས་ཀྱི་བློ་གྲོས་ཆེ། །སྲས་བཅས་རྒྱལ་བའི་ཐུགས་དང་རོ་གཅིག་པའི། །གཟིགས་པས་གངས་ཅན་འགྲོ་འདིར་ལྷག་པར་དགོངས། །ཡོན་ཏན་མི་ཟད་རྒྱན་གྱི་འཁོར་ལོའི་སྤྲིན། །མོས་ལྡན་ཡིད་མཁར་ཀུན་ཏུ་དཀྲིགས་པ་ལས། །ཕྲིན་ལས་འདོད་དགུར་འཇོ་བའི་ཕྲིན་ལས་ཀྱིས། །

---

^{[མ་དཔེ་གཟིགས་ན་འདིར་གནོན།]}

སྙིགས་དུས་རྒུད་པ་མཐའ་དག་འཇིལ་གྱུར་ཅིག །མདོར་ན་མཁས་པའི་ཚོགས་ཀྱིས་ཕྱག་བྱས་ཤིང་། །གྲུབ་རིགས་ཡོངས་ཀྱི་དཔལ་དུ་མངོན་མཐོ་བ། །བསྐལ་བརྒྱར་འཚོ་གཞེས་ཆོས་འཁོར་བསྐོར་བ་ཡི། །བཀྲ་ཤིས་སྣང་བས་ས་གསུམ་ཁྱབ་པར་ཤོག །ཅེས་གསོལ་བ་འདེབས་རྟེན་བཀྲ་ཤིས་པའི་ལྷ་རེག །འཆི་མེད་ཚེ་ལྷ་རྣམ་གསུམ་གྱི་བྲིས་སྐུ་སྒྲོས་ལེགས། དཔལ་ཀརྨ་ཀ་བཅུ་གསུམ་བདུད་ཚོགས་འདུལ་བའི་རྡོ་རྗེའི་གསུང་རབ་གླེགས་བམ་ཟུང་། རྗེ་བཙུན་ཡིད་བཞིན་འཁོར་ལོའི་རིག་པའི་ཙཀྲ། བཟང་སྤོས་དྲི་ཞིམ་བམ་པོ་གསུམ་བཅས་ས་འབྲུག་ཟླ་༥ཚེས༡༦དགེ་བར་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་གུས་པ་ཆེན་པོས་ཕུལ་བ་སིདྡྷི་རསྟུ།། །།ཨོཾ་སྭསྟི་སིདྡྷི་རསྟུ། སངས་རྒྱས་གཉིས་པ་པདྨ་སཾ་བྷ་ཝའི། །རིང་ལུགས་གཙོར་གྱུར་དམ་ཆོས་རབ་འབྱམས་ཀྱི། །འོད་ཟེར་སྣང་བས་འཇིག་རྟེན་དགེ་མཛད་པ། །འཇམ་དབྱངས་སྨྲ་བའི་ཉི་མ་འཚོ་གཞེས་གསོལ། །ཟབ་ཅིང་རྒྱ་ཆེའི་ལེགས་གསུང་བྱེ་སྙེད་ཀུན། །གདུལ་བྱའི་ཁམས་དབང་བསམ་པ་ཇི་བཞིན་ཏུ། །འཆད་རྩོད་རྩོམ་པའི་རྒྱལ་རྔ་རབ་བརྡུང་བས། །ཐུབ་བསྟན་དྲི་མེད་ཕྱོགས་བཅུར་རྒྱས་མཛད་གསོལ། །བདག་ཅག་རྣམས་ཀྱང་བྱང་ཆུབ་སྙིང་པོའི་བར། །ཡེ་ཤེས་གཟིགས་པས་རྟག་ཏུ་རྗེས་བཟུང་ནས། །སྲིད་དང་ཞི་བའི་ལེགས་བྱས་བདུད་རྩི་ཡིས། །

---

^{[མ་དཔེ་གཟིགས་ན་འདིར་གནོན།]}

ཤིས་པའི་པདྨོ་ལྷག་པར་རྒྱས་མཛོད་ཀྱེ། །ཞེས་ལྷག་བསམ་དག་པས་རྩེ་གཅིག་གསོལ་བ་འདེབས་མཚོན་བཀྲ་ཤིས་པའི་ལྷ་གོས་རབ་དཀར། སྐུ་གསུང་ཐུགས་རྡོ་རྗེའི་སྣང་བརྙན། རིན་པོ་ཆེའི་བུམ་བཟང་བཅུད་ཀྱིས་གང་བ། མདུན་ལྕོག །དམ་ཚིག་གི་ཕྲེང་བ་རྒྱན་ལྡན་བཅས་གུས་པས་ཕུལ་བ་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཤེ་ཡོ་བྷ་བ་ཏུ། ༈ །ཨོཾ་སྭསྟི་བི་ཛ་ཡནྟུ། ཕན་བདེའི་དགེ་མཚན་རྟག་པ་དམ་པའི་དཔྱིད། །ཚེ་མཐའ་ཡས་པའི་ཕྱག་གི་བུམ་བཟང་ནས། །འཆི་མེད་བདུད་རྩི་ཁྱོད་ལ་དབང་བསྐུར་བས། །ཐར་པའི་རྒྱལ་མཚན་བསྐལ་བརྒྱར་བརྟན་གྱུར་ཅིག །ཕྱོགས་ལས་རྣམ་པར་རྒྱལ་བའི་ཕན་བདེའི་དབྱིངས། །གཙུག་ཏོར་ཆེན་པོས་མིག་གི་མཆོག་སྦྱིན་པས། །ཀློག་དང་འཆད་པའི་སྨྲ་བ་བཟང་པོ་ཡིས། །རྟག་ཏུ་རིམ་དགུའི་ལེགས་ཚོགས་རྒྱས་གྱུར་ཅིག །ཡིད་བཞིན་འདོད་པ་འཇོ་བའི་འཁོར་ལོ་བྱིན། །ཕན་དང་བདེ་བའི་རྗེས་སོང་གང་ཐུགས་དང་། །དབྱེར་མེད་འདྲེས་པའི་སྐལ་པ་བཟང་པོ་ཡིས། །དོན་གཉིས་འགྲུབ་པའི་དགའ་སྟོན་འཕེལ་གྱུར་ཅིག །ཅེས་བཀྲ་ཤིས་པའི་ལྷ་རྫས་དང་། །འཆི་མེད་སྐུ་གསུང་ཐུགས་རྡོ་རྗེའི་སྣང་བརྙན། དཔལ་ལྡན་འཆི་མེད་ཚེ་རྫ་ས་བཅས་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཆེད་དུ་བརྗོད་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་

---

^{[མ་དཔེ་གཟིགས་ན་འདིར་གནོན།]}

སྲས་དང་བཅས་པས་བྱིན་གྱིས་བརླབ་ཏུ་གསོལ། ༈ །ཨོཾ་སྭསྟི་སིདྡྷཾ། ཐུབ་དབང་མི་ཡི་སེང་གེ་སྲས་བཅས་ཀྱིས། །ཡེ་ཤེས་གཟིགས་པའི་བྱིན་རླབས་མཚན་དཔེའི་ཕུལ། །གང་གིས་མཐོང་བས་ཐར་བདེའི་དོན་ལྡན་པའི། །ཕྲིན་ལས་འཇིག་རྟེན་གསུམ་ན་སྣང་གྱུར་ཅིག །ཅེས་པའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གསོལ་བ་བཏབ་པ་སིདྡྷི་རསྟུ། ༈ །བསོད་ནམས་རྒྱུ་ལས་འབྲས་བུའི་ཡེ་ཤེས་བརྙེས། །སྒྲིབ་པ་ཀུན་བསལ་རྟོགས་པའི་ཕུལ་ཕྱིན་ཀྱང་། །སྙིང་རྗེའི་ཕྱི་བཞིན་འགྲོ་བའི་སེམས་དཔའ་ཆེ། །རིག་འཛིན་སྤྲུལ་པའི་གར་མཁན་ག་ལ་བར། །གང་ཚེ་འདས་པའི་དུས་ན་སྔོན། །སྟོང་གསུམ་འཇིག་རྟེན་ཤར་གྱི་ཕྱོགས། །འོད་མ་རྒྱ་འབྱམས་ཞིང་ཁམས་སུ། །སྟོན་པ་ཤེས་རབ་རྒྱས་བྱེད་བྱུང་། །དེ་ནས་གཡུང་དྲུང་སེམས་དཔའ་ནི། །ཁྲི་དང་དྲུག་སྟོང་འདུས་པའི་ཕུལ། །རྒྱལ་སྲས་འ་ཞ་དོན་ལྡན་པ། །རིགས་མཆོག་ཡོངས་སུ་སད་པ་ཡོད། །དེར་ནི་གཤེན་རྒྱལ་མི་བོ་ཆེ། །རྫུ་འཕྲུལ་འོད་ཀྱི་རླབས་སྤྲོས་པས། །པདྨའི་དྲི་ལ་བུང་བ་བཞིན། །སྨོན་ལམ་མཐུ་ཡིས་མདུན་ལྷགས་ཚེ། །སྟོན་པས་སྔོན་དང་ཕྱི་མའི་མཐའ། །རྒྱས་པར་སྩལ་བས་དབུགས་དབྱུང་སྟེ། །གསང་བའི་དོན་རྣམས་མདོར་སྡུད་ཕྱིར། །མཚན་གྱི་ཡི་གེ་བརྗིད་པ་བྱིན། །སྤྲོ་བའི་རླན་གྱིས་བསྐྱེད་བསྲིངས་པའི། །བསམ་

---

^{[མ་དཔེ་གཟིགས་ན་འདིར་གནོན།]}

གཏན་སཱ་ལའི་ལྗོན་པ་ནི། །སེང་གེ་རྒྱབ་བསྣོལ་བྲག་ཕུག་ཏུ། །འཁྲུངས་པས་རབ་ཞིའི་འབྲས་བཟང་མངར། །མ་འོངས་གདུལ་དཀའི་ཞིང་འདི་རུ། །རྣམ་འདྲེན་དོན་ལ་འགྱུར་མེད་མཆོག །ལྷ་དང་མི་ཡི་མགོན་གཅིག་པུར། །ལུང་བསྟན་ནོར་བུའི་ཅོད་པན་འབར། །ཨེ་མ་དེ་ལྟའི་ངོ་མཚར་ཅན། །ཟག་མེད་ཞི་བ་འོད་ཀྱི་ལུས། །འདི་ན་ངུར་སྨྲིག་འཛིན་པའི་ཟོལ། །ཁྱོད་ལས་གཞན་དུ་མ་དམིགས་ཕྱིར། །སྐྱེ་བས་ཐོབ་པའི་སྤངས་རྟོགས་དང་། །སྦྱོར་བྱུང་བསྔགས་འོས་ཡོན་ཏན་དང་། །དེས་ཀྱང་གཞན་ཕན་ཕྲིན་ལས་ཏེ། །གསུམ་པོ་འདི་ནི་ལྷན་ཅིག་རྒྱས། །དེ་ཕྱིར་བརྩེ་བས་དྲངས་པའི་ཚིག །དབྱངས་ཅན་ངག་གི་ཏམྦུ་ར། །འདི་ན་ཐོབ་པའི་རབ་དགའི་ཡིད། །བསམ་གཏན་བདེ་ལ་རེག་སྙམ་བགྱིད། །འདི་ན་འབྱུང་བ་འདུས་པའི་ལུས། །རྣམ་འགྱུར་གདུང་བས་འཁྱུད་བྱས་ཀྱང་། །ཡིད་ནི་བྱང་ཆུབ་སྤྱོད་པ་དང་། །རྗེས་སུ་འདུས་པ་འབྲལ་མི་བཟོད། །མཚམས་ཞུས། །སླད་མའི་ཆར་ཡང་། ནོར་ནི་རྨོངས་པའི་ཁྱད་ཆོས་ཏེ། །ས་ཡི་དབང་ཕྱུག་ལས་ཀྱིས་འཕང་། །འཇིག་རྟེན་འདི་ན་དཀོན་པའི་ཕུལ། །དམ་པའི་སྐྱེས་བུ་འདྲ་བ་སུ། །དམ་པ་དམ་པར་བགྲང་བ་ལ། །ཡོན་ཏན་མཐའ་དག་རྫོགས་དགོས་ཕྱིར། །བསམ་ཡས་ཡོན་ཏན་ཀུན་གྱི་མཛོད། །ཁྱོད་ནི་ཨུ་དུམ་ཝཱ་ར་བཞིན། །དེ་ཕྱིར་ཡིད་ཅན་གདུང་སེལ་ཞིང་། །གཤེན་

---

^{[མ་དཔེ་གཟིགས་ན་འདིར་གནོན།]}

བསྟན་མཛེས་པའི་རྒྱན་གཅིག་པུར། །བསྐལ་པ་རྒྱ་མཚོར་ཛཱི་བནྟུའི། །ཤིས་བརྗོད་རོལ་མོ་རྟག་ཏུ་འཁྲོལ། །ཅེས་པའི་ཞུ་མཚོན་ཨུན་ཆེན་མདངས་ལྡན་ལྷ་ཡི་རེག་བྱ་བཅས་རྒྱལ་བའི་མྱུ་གུ་ཞི་བའི་བློ་གྲོས་ཀྱིས་སྨྲས་ཤིང་བྲིས་ཏེ་ཕུལ་བ་ཤུབྷྲཱུྃ།། ༈ །།ཨོཾ་སྭསྟི་སིདྡྷཾ། གང་གི་མཚན་གྱི་རྒྱལ་རྔ་བརྡུང་ཙམ་གྱིས། །སྲིད་དང་ཞི་བའི་རྒུད་པ་དྲུངས་ཕྱུངས་ནས། །འཆི་མེད་དངོས་གྲུབ་སྟེར་མཛད་ལྷག་པའི་ལྷས། །རྣམ་ཀུན་ཤིས་པའི་མེ་ཏོག་ཆར་དུ་བསྙིལ། །བསོད་ནམས་བྱེ་བའི་ཆུ་གཏེར་བསྲུབས་པའི་ཕུལ། །ལུགས་གཉིས་ཆ་ཤས་ཡོངས་སུ་གང་བའི་ཟླ། །ལྟོས་བཅས་གདུང་བ་སེལ་བའི་དཔྱིད་གཅིག་པུ། །བསྐལ་པ་རྒྱ་མཚོར་འཚོ་གཞེས་བརྟན་གྱུར་ཅིག །གྲགས་པའི་རྔ་ཡབ་ནོར་བུའི་ཡུ་བ་ཅན། །ཕྱོགས་དང་ཕྱོགས་བྲལ་རྣམས་སུ་འགྲོ་བ་ན། །ཕན་བདེའི་དངོས་ཀུན་ཆར་དུ་བསྙིལ་བཟོད་པའི། །རྒྱལ་བའི་མྱུ་གུའི་ལེགས་མཛད་རྒྱས་པར་ཤོག །ཆོས་དང་སྲིད་ཀྱི་གཞུང་ལུགས་མཐའ་དག་ལ། །སྒྲིབ་པ་མེད་པར་འདུས་ཏེ་རེག་པའི་སྤྱན། །འཇམ་དཔལ་གཞོན་ནུའི་རྗེས་སུ་འགྲོ་བ་ཡི། །ལྷར་བཅས་འཇིག་རྟེན་བསྔགས་འོས་ཉིད་གྱུར་ཅིག །ཤིན་ཏུ་བྱམས་པའི་བདུད་རྩིའི་རླན་ཆགས་པའི། །གདུང་སེལ་ཟླ་བ་གཞོན་ནུའི་འཛུམ་འོད་ཅན། །ཕྱག་ན་པདྨོའི་རྣམ་ཐར་མྱུར་མཛད་པས། །ས་གསུམ་ཀུན་ཏུ་དགའ་བའི་དཔལ་སྟེར་

---

^{[མ་དཔེ་གཟིགས་ན་འདིར་གནོན།]}

ཤོག །ཕས་རྒོལ་མི་སྲུན་རི་བོའི་རྒྱུན་ལུགས་ཀུན། །གཅོད་བྱེད་བརྒྱ་བྱིན་རྡོ་རྗེའི་ཤུགས་འཆང་བ། །གསང་བ་འཛིན་པའི་ནུས་པ་མ་སྨད་པས། །ཡིད་སྲུབས་དཔུང་བཅས་ཁེངས་པ་འཇོམས་གྱུར་ཅིག ། ཕྱོགས་དང་དུས་དང་གནས་སྐབས་ཐམས་ཅད་དུ། །མཚུངས་ཟླ་བྲལ་བ་རིག་འཛིན་རྒྱལ་པོའི་སྲས། །མེས་དབོན་གསུམ་གྱི་རྣམ་ཐར་དང་མཚུངས་པའི། །སྐལ་པ་བཟང་པོའི་དུས་སྟོན་དར་བབས་ཤོག ། ཅེས་ཤིས་པར་བརྗོད་པའི་བདེན་ཚིག་གི་མེ་ཏོག་མངོན་པར་འཐོར་བའི་མཚོན་བྱེད་དུ་དགེ་ལེགས་ཀྱི་རེ་ཁཱས་མངོན་པར་བཀྲ་བའི་ལྷ་རྫས་དང་། ཤྲཱི་ཧེ་རུ་ཀ་འཆི་མེད་རྟག་པའི་རྡོ་རྗེ་མངོན་རྫོགས་རྒྱལ་པོའི་དཀྱིལ་འཁོར་དུ་བསྒྲུབས་པའི་མྱང་གྲོལ་བདུད་རྩིའི་ཕུར་མ་བཅས་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་ཕུལ་བ་དགེ། ༈ །།ཨོཾ་ཤྲཱི་མ་ཧཱ་བྷ་མེ་ཤྭ་ར་ཀཱ་ཡ་ཛཱི་བ་ཏིཥྛནྟུ། ཚེ་མཐའ་ཡས་པའི་ཕྱག་གི་བདུད་རྩིའི་རྒྱུན། །གང་སྐུའི་གསོས་སུ་རྟག་པར་ཕབ་པ་ལས། །བསྐལ་བརྒྱར་མི་ཤིགས་སྲོག་གི་མདུད་པ་ནི། །རྡོ་རྗེའི་ཟུངས་སུ་མཛོད་ཅིག་འཆི་མེད་ལྷ། །ཡིད་བཞིན་འཁོར་ལོའི་སྒྲ་དབྱངས་བརྗོད་པའི་བྱིན། །གང་གསུང་ནོར་བུའི་རྒྱུད་མང་ལ་རེག་པས། །སྲིད་ཞིའི་སྙན་འགྱུར་རྫོགས་པའི་འཆི་མེད་དབྱངས། །ས་གསུམ་ཁྱབ་པར་མཛོད་ཅིག་འཕགས་མ་ཀྱེ། །གཙུག་ཏོར་ཆེན་མོའི་ཡེ་ཤེས་སྣང་བ་དང་། །

---

^{[མ་དཔེ་གཟིགས་ན་འདིར་གནོན།]}

གང་ཐུགས་རྣམ་པ་ཀུན་ཏུ་མི་ཕྱེད་པ། །མཁྱེན་གཉིས་ཡོན་ཏན་ཕྲིན་ལས་མཐའ་ཡས་པའི། །སྐལ་བཟང་མངོན་སུམ་སྩོལ་ཅིག་རྣམ་པར་རྒྱལ། །ཞེས་བདེན་ཚིག་ཏུ་གསོལ་བའི་རྟེན་འབྱུང་བཀྲ་ཤིས་པའི་ལྷ་རེག །ཡུན་རིང་དུ་བསྒྲུབས་པའི་རིག་པའི་འཁོར་ལོ། ཚེ་རྫས་ཟུང་བཅས་མཉྫགྷོ་ཥས་ཕུལ་བ་དོན་དང་ལྡན་པར་གྱུར་ཅིག། ༈ །ཨོཾ་སྭསྟི་བིཛ་ཡནྟ། དགེ་ལེགས་དཔྱིད་ཀྱི་དཔལ་མོས་ཡོངས་བཟུང་བ། །རིན་ཆེན་གསུམ་ཞེས་གྲགས་པའི་པདྨ་དཀར། །རྟག་ཏུ་ཁྱེད་ཀྱི་གཙུག་ན་མཛེས་འབར་བས། །ཕན་བདེའི་ངལ་འཚོ་ལྷག་པར་རྒྱས་གྱུར་ཅིག །ངེས་པར་འབྱུང་བའི་ཚུལ་ཁྲིམས་ཕུང་པོ་དང་། །བྱང་ཆུབ་སེམས་གཉིས་ལང་ཚོའི་གཟི་བརྗིད་ཀྱིས། །སྲིད་ན་ཆེར་རློམ་གཞན་དག་ཟིལ་མནན་པ། །ཕྱོགས་ལས་རྣམ་པར་རྒྱལ་བའི་ཞབས་སྟེགས་སུ། །གང་ཚུལ་རྒྱལ་སྲས་སྤྱོད་ལ་རིང་དད་པ། །ཉེ་བར་མཆིད་འོས་བདུད་རྩིའི་རླན་ཆགས་པས། །གུས་སྤྲོའི་ཨུཏྤལ་རྒྱས་པའི་འཛུམ་སྒྲོས་ལས། །ཞུ་མཆིད་སྦྲང་རྩིའི་དྲི་བསུང་ཅུང་ཟད་འཐུལ། །སྔོན་བསགས་བསོད་ནམས་དམ་པའི་རང་གཟུགས་ནི། །མཐོ་རིས་ཡོན་ཏན་བདུན་གྱིས་རབ་མཛེས་ཀྱང་། །དེ་ལ་ཁེལ་པའི་བརྟུལ་ཞུགས་རིང་བཏབ་ནས། །གཅིག་ཏུ་ཞི་བ་དམ་པར་མངོན་དུ་ཕྱོགས། །དེ་ཚེ་ཚུལ་གནས་ཁྲིམས་ཀྱིས་གཞི་བཟུང་སྟེ། །གསན་བསམ་སྒོམ་པའི་འབྱོར་པ་བརྒྱ་

---

^{[མ་དཔེ་གཟིགས་ན་འདིར་གནོན།]}

ཕྲག་བཅས། །འཕགས་དང་མཁས་པ་དགྱེས་པའི་རྣམ་ཐར་ཅན། །འཚོ་གཞེས་ནོར་བུའི་གཟི་འོད་འབར་བ་ནས། །བཀའ་མཆིད་དབྱངས་ཀྱི་རྒྱལ་མོའི་འགྱུར་ཁུགས་ཅན། །གནང་སྐྱེས་མནྡཱ་ར་ཡི་སྒེག་འཆང་བ། །ཡར་ཚེས་༡༤དགེ་བའི་སྔ་ཆར་འདིར་སོན་པས། །གུས་སྤྲོའི་བཀའ་དྲིན་གཟུགས་ཅན་བཞིན་དུ་གྱུར། །འདི་ན་འཁོད་པའི་དགེ་སྦྱོང་རྒན་པོ་ཡང་། །འདུ་ཕུང་རྣལ་དུ་གནས་པའི་སྐབས་བྲལ་མོད། །བསམ་གཏན་ཁང་བུར་རྣམ་དཀར་བཟླས་བརྗོད་ལ། །ཅི་ནུས་ཙམ་ཞིག་གཡར་དམ་སྙིང་པོར་བཟུང་། །མཚམས་ཞུས། སླད་མའི་ཆར་ཡང་། གང་སྐུ་བསོད་ནམས་བྱེ་བའི་ཕུང་པོ་ལ། །འཆི་མེད་པདྨ་ཀཱ་རས་བྱིན་བརླབས་པས། །ཕྱི་ནང་གསང་བའི་བར་ཆད་ཀུན་ཞི་ནས། །སྐུ་ཚེའི་རྒྱལ་མཚན་བསྐལ་བརྒྱར་བརྟན་གྱུར་ཅིག །ཁྱེད་གསུང་ལེགས་བཤད་བྱེ་བའི་འབྱུང་གནས་ཆེར། །འཇམ་དཔལ་གཞོན་ནུའི་མཁྱེན་པས་དགེ་མཛད་མཐུར། །ཟབ་དང་རྒྱ་ཆེའི་ཆོས་ཚུལ་མཐའ་ཡས་པས། །ཕན་བདེའི་དཔྱིད་དུ་རྟག་པར་འཇོ་གྱུར་ཅིག །གང་ཐུགས་རིང་ནས་དག་པའི་བེཟླུརྨ། །ལྷ་གཅིག་དཱི་པཾ་ཀ་རའི་ཡེ་ཤེས་དང་། །མི་ཕྱེད་བྱང་ཆུབ་སེམས་གཉིས་འདོད་དགུའི་ཆར། །ས་གསུམ་འགྲོ་བའི་གདུང་སེལ་ཉིད་གྱུར་ཅིག །འདིར་ཡང་རྣམ་ཀུན་དགྱེས་པས་བཟུང་བ་དང་། །ལེགས་གསུང་བདུད་རྩིའི་རྒྱུན་བཟང་སྩལ་བ་དང་། །

---

^{[མ་དཔེ་གཟིགས་ན་འདིར་གནོན།]}

ཕན་ཚུན་ཆོས་ཀྱི་དགའ་སྟོན་རྨད་བྱུང་བར། །སྲིད་དང་ཞི་བའི་བཀྲ་ཤིས་སྣང་བར་མཛོད། །ཅེས་པའི་ཞུ་གསོལ་ཀོ་ཀི་ལ། །རྟེན་གསུམ་བཀྲ་ཤིས་པའི་ལྷ་རེག །འཆི་མེད་སྐུ་གསུང་ཐུགས་རྡོ་རྗེའི་སྣང་བརྙན། སྐུ་ཚེའི་ཚེ་རྫས། མཆན། གཤོག་རླབས་གཡོ་དང་བཅས། །རབ་མྱོས་ཆོ་འཕྲུལ་ཟླ་བ་༡ཡི། །དཀར་ཕྱོགས་གྲལ་ཚེས་དགེ་བར་ཆས། །སརྦ་དཱ་སུ་ཐེ་ཡོ་བྷ་བ་ཏུ།། ༈ །།ཨོཾ་སྭསྟི་སིདྡྷཾ། གྲགས་པའི་མེ་ཏོག་ཡིད་འོང་བཀྲ་ཤིས་རྡུལ། །དཔལ་ཡོན་དམ་པས་ཡོངས་བཟུང་འཆི་མེད་ལྷས། །བྱིན་རླབས་རྒྱལ་རྔ་གསར་པ་བརྡུངས་ཙམ་གྱིས། །སྲིད་ཞིའི་དགེ་མཚན་མཐའ་དག་འཇོ་གྱུར་ཅིག །རྣམ་ཀུན་ལེགས་བྱས་བྱེ་བས་བསྐྱེད་བསྲིངས་པའི། །ཞབས་ཟུང་བཀྲ་ཤིས་འཁོར་ལོའི་མཚན་མ་ཅན། །ཡིད་སྲུབས་དཔུང་གིས་བརྫི་བ་མེད་པའི་ཕྱིར། །ཆེ་དགུས་ཐོད་ཀོས་བཏེག་པའི་ཉེ་དྲུང་དུ། །རིང་ནས་གུས་པའི་ས་ཧཱ་ཀ་རའི་ཚལ། །ཐུགས་བརྩེའི་རླན་གྱིས་སླར་ཡང་བསྐྱེད་བསྲིངས་པས། །དགེ་མཚན་འདབ་བརྒྱ་གྲོལ་བའི་མགྲིན་པ་ནས། །ཞུ་མཆིད་བེ་ཌཱུར་རྒྱུད་མང་ཅུང་ཟད་བརྡུངས། །གང་ཚེ་བསོད་ནམས་དམ་པའི་ཆུ་གཏེར་ལས། །ཚུ་གཟུགས་སྐུའི་ཟླ་རིས་ཐོག་མར་ཤར་ཙམ་ནས། །མི་མཐུན་ཉེས་བརྒྱའི་མུན་པ་གཞིལ་བ་དང་། །དགེ་ལེགས་ཆུ་གཏེར་རྒྱས་པའི་དཔྱིད་དུ་གྲུབ། །འཛམ་གླིང་བསྟན་འགྲོའི་གཙུག་གི་ནོར་བུ་མཆོག །གོང་མ་།

---

^{[མ་དཔེ་གཟིགས་ན་འདིར་གནོན།]}

མཆོད་ཡོན་ཕྲིན་ལས་གདུགས་དཀར་པོ། །སྙིང་སྟོབས་དཔུང་པས་བཟུང་བའི་དགེ་མཚན་གྱིས། །བསིལ་ལྗོངས་ཕན་བདེའི་ངལ་འཚོ་མཆོག་ཏུ་མཐོ། །ཁྱད་པར་མེ་ཏོག་མདའ་ཅན་མངོན་སུམ་པ། །སྡེ་དང་དཔུང་བཅས་ཡོངས་སུ་གཞོམ་པ་ཡིས། །ལྷ་རྒྱལ་སྲསྟི་ཀ་ཡི་དབྱངས་སྙན་པོས། །སྲིད་པའི་མཐར་ཡང་ནུབ་པ་མེད་པར་བྱས། །དེང་ཚེ་རི་གླིང་མཚོ་དང་བཅས་པ་ཡི། །ཕྱོགས་ལས་རྣམ་པར་རྒྱལ་དང་ཆབ་གཅིག་པར། །ཕུན་ཚོགས་དོན་ཀུན་གྲུབ་པའི་གཟི་བརྗིད་ཀྱིས། །སྙིགས་མའི་དུས་ཀྱང་རྫོགས་ལྡན་གཞོན་ནུར་ཤར། །མཚོ་སྐྱེས་རྡོ་རྗེའི་བྱིན་རླབས་རིག་འཛིན་རྗེའི། །ཟབ་ཆོས་མཁྱེན་པའི་སྤྱན་གྱིས་གཟིགས་པ་ན། །སྔོན་སྨོན་ལྷག་པར་སད་པའི་མོས་གུས་ཀྱི། །ཨུཏྤལ་སར་པའི་ནགས་ཀླུང་ཅིར་ཡང་དར། །དབང་རྟུལ་དྭངས་པའི་མཁར་བར་འཆེལ་བ་ཙམ། །མ་ཡིན་སྐྱེས་དང་སྦྱངས་པའི་ཤེས་རབ་ཀྱིས། །ཞིབ་མོར་དཔྱད་པ་འདི་འདྲའི་ཡ་མཚན་ལ། །བསམ་ན་ཚངས་པའི་བློ་ཡང་གཟུགས་བརྙན་ཙམ། །དེ་ཕྱིར་སྲིད་ན་མངོན་མཐོའི་བསྔགས་འོས་ཅན། །ཟླ་བྲལ་གང་ཉིད་འཚོ་གཞེས་བརྟན་པ་དང་། །ལྷན་ཅིག་བཀའ་གླེགས་ཞིབ་འཁོར་སྐྱེས་དང་བཅས། །འདུད་ལྡན་ཐལ་མོའི་རྫིང་བུར་སོན་པའི་མོད། །གུས་དང་སྤྲོ་བའི་རབ་དགའ་ཆེར་བརྟས་པས། །སྙིང་གི་ཆུ་གཏེར་བདུད་རྩིའི་རླབས་གཡོ་བ། །དང་པོའི་ས་ཡི་

---

^{[མ་དཔེ་གཟིགས་ན་འདིར་གནོན།]}

དགེ་མཚན་ཐོབ་པ་ལས། །གཞན་དུ་འབྱུང་བའི་གོ་སྐབས་ཇི་ལྟར་ཡོད། །འདི་ན་རྨོངས་དང་མ་རིག་མཐུས་ནོན་ཀྱང་། །བླ་མ་ལྷ་ཡི་ཐུགས་རྗེས་མ་བཏང་བས། །ཟག་ཕུང་ཉེ་ཞོའི་གདུང་བ་བྲལ་དང་བཅས། །བསྟན་འགྲོར་སྨན་པའི་བསམ་སྦྱོར་དཀར་བར་མཆིས། །མཚམས་ཞུས། སླར་ཡང་ཕན་བདེའི་འབྱུང་གནས་ཀྱི། །མཛེས་སྐུ་ཡུན་རིང་འཚོ་གཞེས་སླད། །རབ་དྭང་ཡིད་ཀྱི་རོལ་མཚོ་ལས། །ཤིས་པའི་མེ་ཏོག་ཅུང་ཟད་འཐོར། །བཱི་ཤྲཱི་ཤྲཱི་བི་ཛ་ཡནྟུ། དགེ་ལེགས་ཚོགས་གཉིས་བྱེ་བའི་རང་གཟུགས་ནི། །རྣམ་ཀུན་འཆི་མེད་གྲུབ་པའི་གཟི་འོད་ཀྱིས། །ས་གསུམ་འཇིག་རྟེན་ཀུན་ཏུ་རྒྱས་འགེངས་པའི། །ངོ་མཚར་ནམ་ཡང་ནུབ་པ་མེད་གྱུར་ཅིག །ཆོས་དང་སྲིད་ཀྱི་གཞུང་ལུགས་མཐའ་དག་ཀུན། །ཚངས་པའི་སྲས་མོའི་གླུ་རུ་འཇོ་བའི་ག པའི་སྐལ་བཟང་ལྷུར་ལེན་ཤོག །སྒྲིབ་མེད་མཁྱེན་པའི་བེ་ཌཱུར་མེ་ལོང་ངོགས། །ལུགས་གཉིས་རི་མོ་མཐའ་དག་ཡོངས་རྫོགས་པ། །ཆེ་དགུའི་ཡིད་ཀྱི་རྒྱལ་མཚན་ལ་བཀོད་པས། །སྡེ་བཞིའི་དུས་སྟོན་མཆོག་ཏུ་རྒྱས་གྱུར་ཅིག །བསྔགས་འོས་འཛད་པ་མེད་པའི་ཡོན་ཏན་གྱིས། །རྨད་བྱུང་ཕྲིན་ལས་ནོར་བུའི་རྔ་ཡབ་ནི། །བཟུང་བ་མེད་པར་ཕྱོགས་ཀྱི་མཐར་འགྲོ་བས། །ས་འདིར་རྫོགས་ལྡན་གསར་དུ་འཆར་བར་ཤོག །

---

^{[མ་དཔེ་གཟིགས་ན་འདིར་གནོན།]}

མདོར་ན་དཔལ་ལྡན་ས་ཡི་དབང་ཕྱུག་མཆོག །བསྐལ་བརྒྱར་འཚོ་གཞེས་ལེགས་མཛད་གོང་འཕེལ་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཀྱིས། །སྣང་བས་སྲིད་ཞིའི་ཁམས་ཀུན་ཁྱབ་གྱུར་ཅིག ། འདིར་ཡང་རྣམ་ཀུན་མཉེས་གཤིན་པའི། །ཐུགས་རྗེའི་ཕྱག་གིས་ཡོངས་བཟུང་བས། །ཡིད་ཀྱི་ཤིང་རྟ་མངོན་འདོད་ཀྱི། །འབྲས་བུས་མཆོག་ཏུ་འགེངས་མཛད་གསོལ། །དེ་སྐད་ལེགས་སྨོན་མེ་ཏོག་གི། ཆར་སྤྲིན་དཀར་པོ་གཡོ་བ་ལ། །གེགས་མེད་གྲུབ་པར་རྩ་གསུམ་གྱི། །བདེན་པའི་ཚིག་གིས་དགེ་གྱུར་ཅིག །ཅེས་མངོན་པར་དྭང་བའི་ཡིད་ཀྱིས་རྩེ་གཅིག་ཏུ་ཞུ་གསོལ་འདེབས་པའི་རྟེན་འབྱུང་གི་ལེགས་སྐྱེས་མཚོན་པ་ཙམ་དུ་བཀྲ་ཤིས་པའི་ལྷ་གོས་རབ་དཀར། རྒྱལ་བ་རྡོ་རྗེ་འཆང་གི་སྣང་བརྙན། བདག་ཅག་གི་དངོས་གྲུབ་ཏུ་ཐོབ་པའི་གསུང་རྡོ་རྗེ་པདྨ་སཾ་བྷཱ་ཝའི་ཞལ་ལུང་གི་གླེགས་བམ། མཉམ་མེད་ཇོ་བོ་ཆེན་པོའི་ཆོས་སྐུའི་རྟེན། རིན་ཆེན་དཀར་པོ་སྲང་འཁོར་ཟླ་བ་ཡར་ངོའི་གྲངས་ལྡན་གཙོས་བྱ་བཏང་ཆོས་རྗེ་འཇམ་དབྱངས་མཁྱེན་བརྩེའི་དབང་པོའམ། དུས་གསུམ་མཁྱེན་པ་ཨོ་རྒྱན་ཆེན་པོས་པདྨ་འོད་གསལ་མདོ་སྔགས་གླིང་པར་མིང་གི་དབང་བསྐུར་བས། གྲུབ་པའི་གནས་ཆེན་བཀྲ་ཤིས་ཟླ་གམ་དབང་ཕུག་གི་མདུན། །རི་རྒྱལ་གླང་ཆེན་འགྱིང་འདྲའི་མགུལ་ནས་རབ་བྱུང་བཅོ་ལྔ་པའི་ཐོག་མ་མེ་ཡོས་ནག་པ་ཟླ་

---

^{[མ་དཔེ་གཟིགས་ན་འདིར་གནོན།]}

བའི་ཚེས་༡༥བཟང་པོར་གུས་པས་ཕུལ་བ་ཇི་ལྟར་སྨོན་པའི་དོན་ཐམས་ཅད་དེ་དེ་བཞིན་དུ་འགྲུབ་པའི་དགེ་ལེགས་མཆོག་ཏུ་གྱུར་ཅིག། ༈ །།ཨོཾ་སྭསྟི་སིདྡྷཾ། ཡོན་ཏན་དཔག་ཏུ་མེད་པའི་ཞིང་ཁམས་ཀྱི། །འདྲེན་མཆོག་འཆི་མེད་མགོན་པོའི་ཡེ་ཤེས་སྤྱན། །ས་ཡི་དབང་ཕྱུག་ཁྱོད་ལ་གཡོས་པའི་མོད། །ཕུན་ཚོགས་ཚེ་ཡི་དགེ་མཚན་སྦྱིན་གྱུར་ཅིག །བསོད་ནམས་སྟོབས་ཀྱི་དཔུང་པའི་འཁྲི་ཤིང་གིས། །ལུགས་གཉིས་གདུགས་དཀར་བསྒྲེང་བའི་གྲིབ་བསིལ་དུ། །ཁོད་ཆེན་བསྟན་འགྲོ་མཐའ་དག་དབུགས་འབྱིན་པའི། །ཞབས་སྟེགས་ཕྱོགས་ལས་རྣམ་པར་རྒྱལ་བའི་དྲུང་། །གྲགས་པ་མ་ལ་ཡ་ཡི་འཁྲི་ཤིང་དང་། །ཡོན་ཏན་ག་བུར་ཐང་ཆུས་སྒེག་འཆང་བའི། །དམ་པའི་ངང་ཚུལ་སྙིང་ནས་དྲན་པའི་མོད། །ཡུད་གཅིག་བཏུད་དེ་ཞུ་འཕྲིན་འདི་སྐད་གསོལ། །བསྐལ་མང་བསོད་ནམས་ཆུ་གཏེར་བསྲུབས་པ་ལས། །ལེགས་པར་འཁྲུངས་པའི་མཚན་དཀྱིལ་ཟླ་རིས་ནི། །བསྟན་སྲིད་གླིང་བཞིའི་མཁའ་ལ་འཆར་བའི་མོད། །སྙིགས་མའི་རྒུད་མུན་མཐའ་དག་གཅིག་ཅར་བཅིལ། །ཕུན་ཚོགས་རིགས་གཟུགས་ལང་ཚོ་དར་བབ་ཅིང་། །འཇིག་རྟེན་གཞུང་ལུགས་རྒྱ་མཚོའི་ཕ་རོལ་སོན། །དམ་པའི་ཆོས་ཀྱི་འབྱོར་པས་མངོན་མཐོ་བ། །ཁྱོད་འདྲ་ས་སྟེང་འདི་ན་གཉིས་པ་དཀོན། །དེ་སླད་འཚོ་གཞེས་བརྟན་པའི་དགེ་མཚན་དང་། །རྗེས་བརྩེའི་སྤྱན་

---

^{[མ་དཔེ་གཟིགས་ན་འདིར་གནོན།]}

ཟུར་གཡོ་བའི་འོད་རླབས་དང་། །ལེགས་གསུང་རྟེན་དང་བཅས་པ་འདིར་སོན་པའི། །དགའ་སྟོན་གསུམ་པོས་བདག་ཡིད་རིང་དུ་སིམ། །འདི་ན་གནས་པའི་དགེ་སྦྱོང་ཡང་། །མཆོག་གསུམ་ཐུགས་རྗེས་འཚོ་བཞིན་དུ། །བསྟན་འགྲོར་སྨན་འདོད་བྱང་ཆུབ་སེམས། །སྙིང་ལ་རི་མོར་འབྲི་བཞིན་མཆིས། །མཚམས་ཞུས། ཤྲཱི་བི་ཛ་ཡནྟ། ཚེ་མཐའ་ཡས་པའི་ཕྱག་གི་བདུད་རྩིའི་ཀླུང་། །ཕུང་ཁམས་སྐྱེ་མཆེད་སྲོག་ཏུ་འདྲེས་པ་ལས། །མི་ཤིགས་གཟུགས་སྐུའི་ལྷུན་པོ་རབ་བརྟན་པའི། །སྐལ་བཟང་ནམ་ཡང་ནུབ་པ་མེད་གྱུར་ཅིག །ཡིད་བཞིན་འཁོར་ལོའི་དབང་ཕྱུག་རྗེ་བཙུན་མའི། །སྒྲ་དབྱངས་འགག་པ་མེད་པའི་ཡེ་ཤེས་བྱིན། །གང་གསུང་བེ་ཌཱུར་རྒྱུད་མང་ལ་ཆགས་པས། །འཇིག་རྟེན་ཀུན་ན་རྟག་ཏུ་སྙན་གྱུར་ཅིག །སྲིད་ཞིའི་ཕྱོགས་ལས་རྣམ་རྒྱལ་འཕགས་མ་དང་། །འོད་གསལ་དབྱིངས་ཀྱི་ཐིག་ལེ་དབྱེར་མེད་བཞིན། །མ་འགག་ཉམས་བརྒྱས་རོལ་པའི་མཁྱེན་བརྩེའི་ཐུགས། །བསིལ་ལྡན་བསོད་ནམས་དཔྱིད་དུ་བརྟན་གྱུར་ཅིག །བསྔགས་འོས་ཡོན་ཏན་མི་ཟད་ནོར་གྱི་བུ། །ཕྲིན་ལས་རྒྱལ་མཚན་རྩེ་མོར་གཟི་འབར་བས། །ཕན་བདེའི་གྲུ་ཆར་ལྷུག་པར་འབེབས་བཞིན་ཏུ། །ངེས་པར་ཞིང་ཁམས་འདི་ལས་ཡོལ་མེད་ཤོག །བདག་ཀྱང་རྣམ་ཀུན་རྗེས་བརྩེའི་གཟིགས་པ་ཡིས། །ཉི་དང་པདྨའི་ངང་ཚུལ་བཞིན་དུ་སྐྱོངས། །རིང་མིན་

---

^{[མ་དཔེ་གཟིགས་ན་འདིར་གནོན།]}

དངོས་ཞལ་མཇལ་བའི་དགེ་མཚན་གྱིས། །སྲིད་ཞིའི་ཕུན་ཚོགས་མཆོག་ཏུ་རྒྱས་གྱུར་ཅིག །ཅེས་པའི་ཞུ་མཚོན་ལྷའི་རེག་བྱ། འཆི་མེད་ཚེའི་རིལ་བུ་བཅས།། ༈ །།ཨོཾ་སྭསྟི་སིདྡྷཾ། ཕུན་ཚོགས་མཚན་གྱི་ཨུཏྤལ་ཆུན་པོ་ནི། །གང་གི་རྣ་ལུང་དཔྱངས་པའི་དེ་མ་ཐག །བརྒྱད་གཉིས་འཇིགས་པའི་གདུང་བ་ཀུན་བཅིལ་བའི། །ཡིད་བཞིན་འཁོར་ལོས་ཁྱེད་ལ་དགེ་ལེགས་མཛོད། །སྡེ་བཞིའི་དཔྱིད་ཀྱི་དཔལ་མོ་དར་བ་ན། །དགེ་བཅུའི་ཡལ་འདབ་རྫོགས་པའི་དཔག་བསམ་ལྗོན། །ཆོས་ཀྱི་རྒྱལ་པོའི་གྲགས་དཀར་རབ་འབར་བ། །ཕྱོགས་ལས་རྣམ་རྒྱལ་ཆེན་པོའི་ཞབས་སྟེགས་དྲུང་། །རིང་ནས་གུས་པའི་ཀྱི་ཡིད་ཀྱིས་མདུན་བདར་ཏེ། །སྙན་ཚིག་དབྱངས་ཅན་ངག་གིས་བསྐུལ་བ་ལས། །ཞུ་གསོལ་མགྲིན་པའི་རྒྱུད་མང་ཅུང་ཟད་ཅིག །རབ་དྭངས་སོར་མོས་བརྡུང་ལ་མངོན་པར་ཕྱོགས། །གང་ཚེ་བསོད་ནམས་དམ་པའི་ས་བོན་ནི། །རིགས་ཀྱི་ལྡུམ་རར་སྨིན་པའི་དེ་མ་ཐག །རྒྱལ་སྲས་གཞོན་ནུའི་མཚན་གྱི་པདྨ་དཀར། །སྐྱེ་རྒུའི་གཙུག་ན་མཛེས་པའི་སྐལ་བཟང་དར། །དབང་ཕྱུག་དམ་པ་རྒྱ་མཚོའི་རོལ་སྒེག་དང་། །སྤྱི སྐྱེ་བས་ཐོབ་པའི་མཁྱེན་རབ་དྲི་མེད་དང་། །སྦྱོར་བྱུང་བརྩོན་འགྲུས་ཟབ་མོའི་རིགས་སད་པས། །མཁས་རྣམས་དགྱེས་པའི་རྣམ་ཐར་ལྷུན་གྱིས་གྲུབ། །འཇིག་རྟེན་མེས་པོར་རློམས་པའི་བློ་གྲོས་ཀྱང་། །

---

^{[མ་དཔེ་གཟིགས་ན་འདིར་གནོན།]}

གང་བློའི་གྲྭ་ཟུར་གཅིག་ན་བདེར་བཟུང་སྟེ། །ལུགས་གཉིས་ཀུན་ལ་འཇུག་པའི་སྒྱུ་རྩལ་བརྒྱས། །སྲིད་ཞིའི་ཕུན་ཚོགས་མཐའ་དག་ངང་གིས་འདུ། །དཀོན་མཆོག་གསུམ་ལ་བླ་མར་མཛད་པ་ནི། །ས་ཆེན་ཊྛ ཆོས་བཞིན་སྐྱོང་བའི་ཁྱད་པར་ཕྱིན། །འདིར་ཡང་རྣམ་ཀུན་མཉེས་ཤིང་གཤིམ་པ་ཡི། །ཐུགས་རྗེས་ལྷག་པར་དགོངས་དང་ཆབ་གཅིག་ཏུ། །བཀའ་གླེགས་མཚོ་བྱུང་དགྱེས་པའི་ཏམྦུ་ར། །རྣ་བའི་བདུད་རྩིར་སོན་པའི་དེ་མ་ཐག །དཔྱིད་ཀྱིས་བཟུང་བའི་པུཎྜ་རཱི་ཀ་བཞིན། །གུས་སྤྲོའི་ལང་ཚོ་ཕ་མཐའ་མེད་པར་བརྟས། །གང་གི་བཀའ་དྲིན་ལ་བརྟེན་པའི། །དགེ་སྦྱོང་ལྟར་སྣང་རྒན་པོ་ཡང་། །འདུ་ཤེས་གསུམ་གྱི་གཞན་དབང་ལ། །འཆེལ་བཞིན་བག་ཕེབས་ཚུལ་དུ་མཆིས། །མཚམས་ཞུས། སླད་མའི་ཆར་ཡང་མཐོ་རིས་ལྷ་དབང་དང་། །ས་ཡི་སྟེང་ན་འཁོར་ལོས་སྒྱུར་རྒྱལ་བཞིན། །སྐྱེ་རྒུ་ཀུན་གྱི་ཕན་བདེའི་ཉེར་འཚོ་ཆེར། །བསྐལ་བརྒྱར་ཞབས་བརྟན་ལེགས་མཛད་རྒྱས་གྱུར་ཅིག །རྣམ་པ་ཀུན་ཏུ་བདག་ཅག་ཀྱང་། །དགྱེས་པའི་ཕྱག་གིས་ཡོངས་བཟུང་ཞིང་། །མཉན་འོས་བཀའ་མཆིད་གངྒཱའི་རྒྱུན། །འཆད་མེད་རྟག་ཏུ་སྤྲིང་བར་གསོལ། །རབ་དྭང་ཡིད་ཀྱི་ནགས་ཀླུང་ལས། །བྱུང་བའི་ཞུ་གསོལ་ཀོ་ཀི་ལ། །བཀྲ་ཤིས་དགེ་བའི་གླུ་ལེན་བཞིན། །མཆོག་གི་མདུན་སར་མངོན་པར་ཆས། །ཞེས་ས་འབྲུག་དབོ་ཟླ་༢པའི་

---

^{[མ་དཔེ་གཟིགས་ན་འདིར་གནོན།]}

གྲལ་ཚེས་༢༡དགེ་བར་གུས་པས་ཕུལ་བ་སརྦ་དཱ་སུ་ཤྲཱི་ཡོ་བྷ་བ་ཏུ།། ༈ །།ཨོཾ་སྭསྟི་སིདྡྷཾ། ཚེ་དཔག་མེད་པས་མངོན་པར་དབང་བསྐུར་ཞིང་། །རྣམ་པར་རྒྱལ་མས་ཡིད་སྲུབས་དཔུང་ཀུན་བཅོམ། །ཡིད་བཞིན་འཁོར་ལོའི་ཕྱག་གིས་དབུགས་དབྱུང་བས། །རྨད་བྱུང་ཤིས་པའི་དགེ་མཚན་རྒྱས་གྱུར་ཅིག །ལེགས་བྱས་ཆུ་གཏེར་བྱེ་བའི་སྙིང་པོ་ནི། །ཕུང་པོ་བསྔགས་འོས་བདུད་རྩིའི་དོ་ཤལ་ཅན། །བསོད་ནམས་དམ་པའི་ནོར་བུའི་གཟི་འབར་བ། །སྔོན་མེད་ཟླ་བ་གསར་པའི་ཉེ་དྲུང་དུ། །སྤྲིན་སྔོན་ཆུན་པོ་མཐིང་བའི་མདོངས་མཐའ་བཞིན། །མཆིད་འོས་ཟིལ་དངར་ཐོབ་པས་སྤྲོ་དགའི་ཡིད། །དབྱར་གྱི་པདྨོ་ལྟ་བུར་རྒྱས་པ་ནས། །ཞུ་མཆིད་སྦྲང་རྩིའི་དྲི་བསུང་ཅུང་ཟད་འཐུལ། །གང་གི་ལུགས་བརྒྱའི་འབྱོར་པ་མ་སྨད་པའི། །རྒྱལ་རིགས་སཱ་ལ་ཆེན་པོའི་ནགས་ཀླུང་དུ། །མཚུངས་མེད་མི་ཡི་ལྷ་གཅིག་འཁོར་བཅས་དང་། །མཐོ་རིས་ཡོན་ཏན་དུ་མའི་དུས་སྟོན་དར། །དབང་ཕྱུག་དམ་པའི་དཔལ་གྱི་རོལ་སྒེག་དང་། །དད་དང་ཤེས་རབ་བརྩེ་བའི་སྙིང་པོ་དང་། །ཀུན་ལ་ཕན་པར་མཛད་པའི་ཕྲིན་ལས་བཅས། །འཚོ་གཞེས་དགེ་བའི་སྐལ་བཟང་རྒྱས་པ་ནས། །འདིར་ཡང་ཐུགས་རྗེའི་གཟིགས་པ་མ་སྨད་པས། །མངོན་པར་དྭངས་པའི་གསུང་མཆིད་ཏམྦུ་ར། །རྣ་བའི་བཅུད་དུ་སོན་པའི་དགེ་མཚན་གྱིས། །གུས་སྤྲོའི་ཆུ་གཏེར་ཅིར་

---

^{[མ་དཔེ་གཟིགས་ན་འདིར་གནོན།]}

ཡང་འཕེལ་བར་གྱུར། །བླ་མ་ལྷར་བཅས་བྱིན་རླབས་ཀྱིས། །དབུགས་འབྱིན་ཐོབ་པའི་དགེ་སྦྱོང་ཡང་། །ཟག་ཕུང་ཉེར་འཚེ་དང་བྲལ་བཅས། །ཕན་བདེའི་བསམ་སྦྱོར་དཀར་བར་མཆིས། །མཚམས་ཞུས། ཤྲཱི་བི་ཛ་ཡནྟུ། འབྱུང་འགྱུར་དུས་ཀྱང་འཆི་མེད་གྲུབ་པའི་ལྷ། །རྣམ་གསུམ་གཅིག་བསྡུས་མཚོ་སྐྱེས་བླ་མ་ཡིས། །མི་ཡི་དབང་མོའི་སྐུ་ཚེ་ཡུན་དུ་བརྟན། །ལེགས་མཛད་ཕྱོགས་བཅུར་འཕེལ་བའི་བཀྲ་ཤིས་སྩོལ། །དེ་སྲིད་ཐུགས་རྗེའི་སྤྱན་རས་ཀྱིས། །འདིར་ཡང་སྔར་བཞིན་བཙའ་བ་ནས། །གསུང་མཆིད་བདུད་རྩིའི་ཆར་འབེབས་བཞིན། །རིང་མིན་དགྱེས་ཞལ་མཇལ་བར་སྨོན། །ཞེས་པའི་ཞུ་མཆིད་ཀོ་ཀི་ལ། །བརྗོད་པ་སྙན་པ་གླུ་ལེན་ཅིང་། །རྟེན་དངོས་གཤོག་རླབས་གཡོ་དང་བཅས། །གང་ཞབས་དགའ་བའི་ཚལ་དུ་སོང་། །ས་འབྲུག་དབོ་ཟླའི་གྲལ་ཚེས་དགེ་བར་གུས་པས་ཕུལ་བ་སརྦ་དཱ་ཤྲཱི་ཡོ་བྷ་བ་ཏུ།། ༈ །།ཨོ་་སྭསྟི། བསོད་ནམས་བྱེ་བའི་ཆུ་གཏེར་བསྲུབས་པའི་ཕུལ། །མཛེས་སྡུག་སྣང་བརྙན་ཐོག་མར་འཆར་བའི་མོད། །ཕུན་ཚོགས་ཤིས་དགུའི་ལང་ཚོ་དར་བབས་པའི། །ལྷ་སྲས་ཟླ་བ་གཞོན་ནུའི་ཞབས་སྟེགས་སུ། །པུཎྜ་རི་ཀའི་རྗེས་སུ་འགྲོ་བའི་ཡིད། །གསུང་མཆིད་བདུད་རྩིས་རེག་པའི་དེ་མ་ཐག །སླར་ཡང་གུས་པའི་འདབ་བརྒྱ་བྱེ་བཞིན་དུ། །ཞུ་གསོལ་སྦྲང་རྩིའི་བསུང་ཞིམ་ཅུང་ཟད་འབུལ། །གང་ནས་རིགས་ཀྱིས་

---

^{[མ་དཔེ་གཟིགས་ན་འདིར་གནོན།]}

ཆེ་བའི་སཱ་ལའི་ལྗོན། །ཡོན་ཏན་མེ་ཏོག་དུ་མའི་སྒེག་འཆང་ཞིང་། །བསྔགས་འོས་འབྲས་བཟང་ཀུན་གྱིས་དུད་པ་ནི། །རིས་བྲལ་བསྟན་འགྲོའི་ཉེར་འཚོ་གཅིག་ཏུ་གྱུར། །འདིར་ཡང་བླ་མ་མཆོག་གསུམ་ཐུགས་རྗེའི་དཔྱིད། །རྫོགས་ལྡན་དུས་ཀྱི་དགེ་བཞིན་ལ་རེག་པས། །ཉེར་འཚེའི་གདུང་བ་ཆེན་པོས་མ་ནོངས་བཞིན། །ལྷག་བསམ་དག་པའི་པདྨོ་ཅིར་ཡང་དགོད། །ཁྱད་པར་ཡི་གེའི་གཟུགས་མཚར་པོས། །བརྗོད་པ་སྙན་པའི་བཀའ་གླེགས་ནི། །སྤྱི་བོའི་པད་མཚོར་ཐོབ་པ་ལས། །གུས་སྤྲོའི་འདབ་བརྒྱ་ལྷག་པར་བྱེ། །མཚམས་ཞུས། སླད་མའི་ཆར་ཡང་འཇིག་རྟེན་ན། །དགེ་ལེགས་དཔལ་སྟེར་གསང་བ་གསུམ། །འཚོ་གཞེས་ཕྲིན་ལས་རྒྱས་པའི་དཔྱིད། །གསོལ་འདེབས་རྨད་བྱུང་འདི་ལྟར་བསྒྲེངས། །ཨོཾ་སྭསྟི་ཀུརྦཅུ། ལེགས་བྱས་བདུད་རྩིའི་བརླན་གྱིས་རབ་བསྒོས་པ། །མཚན་བཟང་འཆི་མེད་སྤྲིན་གྱི་ཕུང་པོ་ནི། །མི་མཐུན་དུས་ཀྱི་རླུང་གིས་གཡོ་མེད་པས། །ལྟོས་བཅས་སྐྱེ་རྒུའི་ཉེར་འཚོ་སྦྱིན་གྱུར་ཅིག །དབྱངས་ཅན་མགྲིན་པར་ཆགས་པའི་ལེགས་གསུང་ཕུལ། །སྙན་བརྗིད་དབྱར་རྔའི་རོལ་མོ་འཁྲོལ་བའི་མོད། །མཐའ་གཞིའི་དྲེགས་ལྡན་ཐམས་ཅད་ཟིལ་མནན་ནས། །སྐལ་བཟང་མདོངས་མཐའི་དགའ་སྟོན་རྒྱས་པར་ཤོག །ལུགས་གཉིས་རྒྱ་མཚོར་འཇུག་པའི་མཁྱེན་རབ་ཀྱིས། །དཔྱོད་ལྡན་ཡིད་ཀྱི་བརྟན་པ་

---

^{[མ་དཔེ་གཟིགས་ན་འདིར་གནོན།]}

འཕྲོག་བཞིན་ཏུ། །ཡོན་ཏན་ནོར་བུའི་དོ་ཤལ་འོད་འབར་ཞིང་། །ཕྲིན་ལས་འདོད་དགུའི་དགེ་མཚན་རྒྱས་གྱུར་ཅིག །དེ་སྲིད་ཀུན་ཏུ་འདི་ན་ཡང་། །ཐུགས་བརྩེའི་འཇུག་པས་རབ་བཟུང་སྟེ། །མཉན་འོས་བཀའ་ཟླ མཆིད་སྩོལ་བ་དང་། །ཕན་བདེའི་དུས་སྟོན་རྒྱས་པར་སྨོན། །ཅེས་པའི་ཞུ་མཚོན་ལྷའི་རེག་བྱ། འཆི་མེད་ཚེ་ལྷ་རྣམ་གསུམ་གྱི་སྣང་བརྙན། སྒྲུབ་ཐབས་ཀྱི་གླེགས་བུ། རིག་པའི་འཁོར་ལོ། དམ་རྫ་ས་ལེ་ཚན་བཅས་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེ་ས་ཟླ་༢ཚེས་༥དགེ་བར་གུས་ཕུལ།། ༈ །།ཨོཾ་སྭསྟི་སིདྡྷཾ། ཚེ་མཐའ་ཡས་པའི་ཕྱག་གིས་དབུགས་དབྱུང་ཞིང་། །ཡིད་བཞིན་འཁོར་ལོས་འཆི་མེད་ཟིལ་དངར་སྩོལ། །རྣམ་པར་རྒྱལ་མས་བར་ཆད་ཀུན་བསལ་ནས། །ཁྱེད་ལ་རྟག་ཏུ་དགེ་ལེགས་སྦྱིན་གྱུར་ཅིག །བསོད་ནམས་བྱེ་བའི་དཔལ་གྱིས་མངོན་མཐོ་ཞིང་། །ལུགས་གཉིས་ཀུན་ལ་རྣམ་དཔྱོད་མཆོག་ཏུ་གསལ། །བསྟན་པའི་གདུགས་དཀར་བསྒྲེང་བའི་སྙིང་སྟོབས་ཅན། །མཚུངས་མེད་དམ་པ་མཆོག་གི་མདུན་ས་དེར། །ཞུ་གསོལ། དེང་དུས་སྒྲུབ་བརྒྱུད་སྙིང་པོ་སྟག་ལུང་པའི། །བཤད་སྒྲུབ་ལས་གསུམ་འདུས་པའི་རི་བོའི་སུལ། །ཆོས་དང་སྲིད་ཀྱི་འབྱོར་པ་ཆེན་པོ་ཡི། །ནོར་བུའི་དོ་ཤལ་གསར་པས་མཛེས་པ་གང་། །མཐོ་རིས་ཡོན་ཏན་བདུན་གྱི་སྐྱེད་ཚལ་ན། །འཁོར་ལོ་བཞི་དང་ལྡན་པའི་དཔག་བསམ་དབང་། །

---

^{[མ་དཔེ་གཟིགས་ན་འདིར་གནོན།]}

ཉེར་འཚེའི་དུས་ཀྱི་རླུང་གིས་མི་གཡོ་བཞིན། །འདོད་དགུའི་གྲིབ་བསིལ་སྣུམ་པོར་འཆར་བ་ནས། །འདི་ན་དགྱེས་བརྩེའི་བཀའ་མཆིད་གླེགས་བུ་དང་། །རིན་ཆེན་གཉིས་པའི་སྐྱེས་བཅས་སོན་པ་ཡིས། །ཡིད་སྤྲོའི་བཀའ་དྲིན་ཐོབ་པའི་དགེ་སྦྱོང་ཡང་། །བླ་མ་མཆོག་གསུམ་ཐུགས་རྗེས་འཚོ་བཞིན་མཆིས། །མཚམས་ཞུས། །སླད་མའི་ཆར་ཡང་། རྒྱལ་ཀུན་ཡེ་ཤེས་སྒྱུ་འཕྲུལ་དྲྭ་བ་མཚོ་སྐྱེས་བླ་མ་གཏེར་ཆེན་རྗེའི། །བྱིན་རླབས་ཐུགས་རྗེས་མངོན་པར་དབུགས་དབྱུང་དམ་པ་མཆོག་གི་མཛེས་སྐུའི་ཁམས། །མི་ཤིགས་རྡོ་རྗེའི་ཁམས་སུ་བརྟན་ཅིང་ལེགས་མཛད་བདུད་རྩིའི་འོད་དཀར་པོས། །ལྟོས་བཅས་ཀུན་དགའི་ངལ་འཚོ་དར་བབས་འདིར་ཡང་རྗེས་སུ་བརྩེ་བར་མཛོད། །ཅེས་པའི་ཞུ་མཚོན་བཅས།། ༈ །།ཨོཾ་སྭསྟི། གཏེར་ཆེན་བླ་མའི་ཕྲིན་ལས་ཀྱི། །ཤིང་རྟ་ཤཱི་མཱི་ཛྙཱ་ནའི་མཚན། །འཚོ་གཞེས་ལེགས་མཛད་རྒྱས་པ་ནས། །འཕྲིན་ཡིག་རྟེན་བཅས་སོན་པས་སྤྲོ། །འདི་ན་དགེ་སྦྱོང་རྒན་པོ་ཡང་། །འདུ་བ་རྣལ་མར་མི་གནས་པས། །མཚམས་རྒྱའི་མིང་གིས་སྒྲོ་བཏགས་ཏེ། །འདུ་ཤེས་གསུམ་གྱི་མལ་དུ་འཁུམས། །སླད་མའི་ཆར་ཡང་སྲས་བཅས་ཀྱི། །རྒྱལ་བས་ཁྱེད་ལ་བྱིན་བརླབས་པས། །རིང་འཚོའི་དགེ་མཚན་རྒྱས་པ་དང་། །ཐུགས་བཞེད་ཆོས་བཞིན་འཕེལ་བར་སྨོན། །ཞེས་པའི་ཞུ་མཚོན་ལྷ་རེག །འཇམ་དཔལ་

---

^{[མ་དཔེ་གཟིགས་ན་འདིར་གནོན།]}

རྒྱུད་ཀྱི་གླེགས་བམ་དང་དམ་རྫས། ཤེས་རབ་ཀྱི་རལ་གྲིའི་མཚོན་བྱེད་བཅས་ཟླ་༡ཚེས་༡༨དགེ་བར་བྱ་བྲལ་བ་འཇམ་དབྱངས་མཁྱེན་བརྩེས་ཕུལ་བ་དགེ། ༈ །།ཨོཾ་སྭསྟི། རྟོགས་པའི་ཡེ་ཤེས་ལྷུན་གྲུབ་པ། །འཚོ་ཁམས་པདྨོ་རྒྱས་པ་དང་། །བསྔགས་འོས་འབྲས་བུས་དུད་པ་ནས། །གསུང་བྲིས་རྟེན་དང་བཅས་པ་ཡི། །ཟིལ་དངར་ཐོབ་པའི་དགེ་སྦྱོང་ཡང་། །རྣམ་པར་འགྱུར་བའི་གཞན་དབང་ལ། །བརྟེན་ནས་བསམ་གཏན་ཁང་བུ་རུ། །སྙོམས་ལས་ཁོ་ནའི་མལ་དུ་མནལ། །སླད་མའི་ཆར་ཡང་ཕུན་ཚོགས་རྟེན། །འཆི་མེད་རྟག་པའི་དཔལ་འབར་ཞིང་། །ཉམས་རྟོགས་ཡོན་ཏན་གོང་འཕེལ་ནས། །དོན་གཉིས་འགྲུབ་པའི་བཀྲ་ཤིས་ཤོག །ཅེས་པའི་ཞུ་མཚོན་ལྷ་རེག །འཆི་མེད་གྲུབ་པའི་གླེགས་བུ་དང་དམ་རྫས། སྔགས་མདུད་བཅས་ཟ་འོག་གི་ཚལ་བུས་ལྕིབས་ཏེ་ཟླ་ཚེས་ལ་ཕུལ།། ༈ །།ཨོཾ་སྭསྟི་སིདྡྷཾ། སྲས་བཅས་རྒྱལ་བས་བསྔགས་མཛད་པའི། །རིག་དང་བརྩེ་བ་རྨད་བྱུང་བ། །གཞན་དོན་སྤྲུལ་པའི་ཟློས་གར་ཅན། །རྡོ་རྗེ་འཛིན་དབང་མཆོག་གི་དྲུང་། །གུས་གསོལ། གཞི་རྒྱུད་རྟག་པ་དམ་པ་ལས། །ལམ་རྒྱུད་རིག་པ་འཛིན་པའི་ཚུལ། །འབྲས་རྒྱུད་ཕན་བདེའི་ཕྲིན་ལས་ཅན། །འཚོ་གཞེས་ལེགས་མཛད་རྒྱས་པ་ནས། །འཕྲིན་ཡིག་རྟེན་བཅས་འདིར་སོན་པས། །གུས་སྤྲོ་ཐོབ་ཅིང་དམན་བདག་ཀྱང་། །རྣམ་

---

^{[མ་དཔེ་གཟིགས་ན་འདིར་གནོན།]}

འགྱུར་གདུང་བའི་ཁུང་དང་བཅས། །འདུ་ཤེས་གསུམ་གྱི་མལ་དུ་འཁུམས། །མཚམས་ཞུས། སླད་མའི་ཆར་ཡང་། ཁྲག་འཐུང་དགའ་བའི་ཡེ་ཤེས་དཔྱིད། །བདེ་ཆེན་འབར་བའི་རྡོ་རྗེ་རྩལ། །འཆི་མེད་གྲུབ་པའི་ཕྲིན་ལས་བཅས། །འདིར་ཡང་རྗེས་སུ་བརྩེ་བར་མཛོད། །ཅེས་པའི་ཞུ་མཚོན་ལྷ་རེག །ལམ་གྱི་རིམ་པའི་གླེགས་བམ་ཨ་མྲྀ་ཏ་ཕྱེ་རིལ། རིན་པོ་ཆེའི་སོར་གདུབ་བཅས་ཟླ་ཚེས་ལ་ཕུལ།། ༈ །།ཨོཾ་སྭསྟི་s སིདྡྷཾ། དགེ་ལེགས་མཚན་གྱི་སྒེག་འཆང་བ། །འཚོ་ཁམས་དཔག་བསམ་དར་བབས་ཤིང་། །ལེགས་མཛད་ཡལ་འདབ་རྒྱས་པ་ནས། །བརྩེ་བས་ཁྱབ་པའི་གསུང་མཆིད་ནི། །རྟེན་དང་བཅས་པ་འདིར་སོན་༧ པས། །ཡིད་སྤྲོ་ཐོབ་པའི་དམན་བདག་ཀྱང་། །རྣམ་འགྱུར་མལ་དུ་མནལ་བཞིན་མཆིས། །སླད་མའི་ཆར་ཡང་བསྔགས་འོས་མཆོག །ཡུན་དུ་འཚོ་བའི་དཔལ་འབར་ཞིང་། །དམ་པའི་ཆོས་དང་མཐུན་པ་ཡི། །དགོངས་བཞེད་ལྷུན་གྱིས་གྲུབ་པར་སྨོན། །ཞེས་པའི་ཞུ་མཚོན་ལྷ་རེག །འཆི་མེད་ཚེའི་གཟུངས་དང་། དམ་རྫས། རས་ཀྱི་རྣལ་མའི་ཆུན་པོ་བཅས་ཟླ་༡ཚེས་༡༨དགེ་བར་ཕུལ།། ༈ །ཨོཾ་སྭསྟི་སིདྡྷཾ། བསླབ་གསུམ་རིན་ཆེན་བྱེ་བའི་དོ་ཤལ་དང་། །ཕྱོགས་ལས་རྣམ་པར་རྒྱལ་བའི་སྤོབས་པ་ཅན། །འཚོ་གཞེས་ཕན་བདེའི་ལེགས་མཛད་རྒྱས་པ་ནས། །འཕྲིན་ཡིག་རྟེན་དང་བཅས་པ་འདི་ན་སོན། །དེ་ཚེ་སྤྲོ་བའི་

---

^{[མ་དཔེ་གཟིགས་ན་འདིར་གནོན།]}

བདུད་རྩིས་རབ་དགའི་ཡིད། །དབྱར་གྱི་པདྨོ་ལྟ་བུར་རྒྱས་གྱུར་པའི། །དམན་པ་བདག་ཀྱང་རྣམ་འགྱུར་གཞན་དབང་གིས། །འདུ་གསུམ་མལ་དུ་མཚམས་རྒྱའི་མིང་གིས་བརྗིད། །སླད་མའི་ཆར་ཡང་གྲུབ་པའི་བདུད་རྩིའི་བཅུད། །དྷཱུ་ཏིའི་སྲོག་ཏུ་སོང་བས་བསྐལ་པ་བརྒྱར། །རྡོ་རྗེ་འཛིན་པའི་རྒྱན་དུ་འཚོ་གཞེས་བཞིན། །ཕྲིན་ལས་བསྟན་འགྲོའི་དཔལ་དུ་རྒྱས་པར་སྨོན། །ཞེས་རྩེ་གཅིག་པའི་ཡིད་ཀྱི་ཞ་མཚོན་། ལྷ་རེག །རྣམ་སྣང་ལོ་ཙཱ་བའི་སྤྲུལ་པའི་སྐུ་སྔ་ཕྱིས་ལེགས་པར་བསྒྲུབས་པའི་སྙིང་ཏིག་གི་གླེགས་བམ་མྱོང་གྲོལ་གྱི་དམ་རྫས་བཅས་རས་སྲབ་མོས་ལྕིབས་ཏེ་རབ་མྱོས་ཆོ་འཕྲུལ་ཟླ་བའི་ཤར་ཕྱོགས་ཀྱི་རྒྱལ་བ་དང་པོའི་ཚེས་དགེ་བར་བྱ་བྲལ་བ་འཇམ་དབྱངས་མཁྱེན་བརྩེས་གུས་ཕུལ་དགེ་ཞིང་བཀྲ་ཤིས།། ༈ །།རིན་ཆེན་ཚུལ་ཁྲིམས་བསླབ་པས་རྒྱུད་བསྡམས་ཤིང་། །དར་ཞིང་རྒྱས་ལ་འཆད་རྩོད་རྩོམ་པ་ཡིས། །དྲི་མེད་ཐུབ་བསྟན་ཕྱོགས་བརྒྱར་སྣང་མཛད་པས། །འཕྲིན་ཡིག་རྟེན་བཅས་སོན་པས་རབ་ཏུ་སྤྲོ། །འདི་ན་ཁམས་འདུས་སྦྲུལ་གྱིས་ཕུང་པོའི་ཚོགས། །ཟས་སུ་ཟ་བར་ཉེ་བའི་དགེ་སྦྱོང་གཟུགས། །འདུ་ཤེས་གསུམ་གྱི་མལ་དུ་མནལ་བ་ལ། །སུ་དང་མི་འཕྲད་སྐུ་མཚམས་དམ་མོ་ལོ། །སླད་མའི་ཆར་ཡང་བསླབ་གསུམ་རིན་ཆེན་གྱིས། །ཕན་བདེའི་དགེ་མཚན་དར་རྒྱས་རྫོགས་ལྡན་མགྲོན། །བསྟན་དང་འགྲོ་བའི་

---

^{[མ་དཔེ་གཟིགས་ན་འདིར་གནོན།]}

དཔལ་དུ་འགུགས་མཛད་གང་། །བསྐལ་བརྒྱར་འཚོ་གཞེས་ཕྲིན་ལས་མཁའ་ཁྱབ་སྨོན། །ཅེས་པའི་ཞུ་གསོལ་རྨད་དུ་བྱུང་བའི་སྐྱེས་ཀྱི་དམ་པ་ལེགས་པར་བཤད་པ་སྣ་ཚོགས་པའི་གླེགས་བུ་དང་། སྐུ་ཚེའི་རིལ་བུ་དར་གྱིས་ལྕིབས་ཏེ་ཟླ་ཚེས་དགེ་བར་བན་རྒན་མཉྫགྷོ་ཥས་གུས་ཕུལ་སུ་ཤེ་ཡསིདྡྷི་རསྟུ།། ༈ །།ན་མཤྲཱི་གུ་ར་བེ། སངས་རྒྱས་ཀུན་གྱི་ཡེ་ཤེས་སྐུ། །ཁྱབ་བདག་དཔལ་ལྡན་བླ་མ་ཡིས། །དོན་བརྒྱུད་དགོངས་པའི་བྱིན་རླབས་ཀྱིས། །ཁྱོད་ལ་རྟག་ཏུ་ཤིས་པར་མཛོད། །དམ་པས་བསྔགས་པའི་དབེན་གནས་སུ། །རྩེ་གཅིག་སྒྲུབ་ལ་གཞོལ་བ་གང་། །རྣམ་དཀར་སྤྱོད་ཚུལ་གོང་འཕེལ་བཞིན། །འཚོ་ཁམས་དགེ་བར་བཞུགས་ལགས་སམ། །འདི་ན་མཆིས་པའི་དགེ་སྦྱོང་གཟུགས། །མཆོག་གསུམ་ཐུགས་རྗེ་ལ་བརྟེན་ནས། །ཉེར་འཚེའི་སྦྱོར་བ་དང་བྲལ་བཞིན། །དམ་ཆོས་འཆད་ཉན་སྤེལ་བར་མཆིས། །སླར་ཡང་བསླབ་བྱའི་སྙིང་པོ་ནི། །ནམ་འཆི་ཆ་མེད་དྲན་པ་དང་། །སྲིད་ལས་ངེས་པར་འབྱུང་བའི་བློས། །བྱང་ཆུབ་སེམས་གཉིས་རྟག་ཏུ་བསྒོམ། །ཁྱབ་བདག་རིག་སྟོང་གཉུག་མའི་གཤིས། །བརྗོད་བྲལ་ངང་ལས་མ་གཡོས་བཞིན། །སྣང་གྲགས་རྟོག་ཚོགས་ལྷ་ཚོགས་དང་། །ཡེ་ཤེས་ཆེན་པོས་རོལ་པར་ཁྱེར། །དེ་ལྟར་རྟོགས་ན་བླ་མ་དང་། །ནམ་ཡང་འབྲལ་བར་མི་སྲིད་དོ། །ཐུགས་ཡིད་གཅིག་ཏུ་འདྲེས་

---

^{[མ་དཔེ་གཟིགས་ན་འདིར་གནོན།]}

པའི་ཚེ། །མཆོག་གི་དངོས་གྲུབ་ཐོབ་པར་ངེས། །མདོར་ན་ཆོས་བཞིན་སྤྱོད་པ་ལ། །འགལ་རྐྱེན་ནམ་ཡང་མི་འབྱུང་ཞིང་། །མཐུན་རྐྱེན་ཕུན་སུམ་ཚོགས་པ་ཡིས། །དོན་གཉིས་ལྷུན་གྱིས་འགྲུབ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

འཇམ་མགོན་རིན་པོ་ཆེའི་མདུན།

---

^{[མ་དཔེ་གཟིགས་ན་འདིར་གནོན།]}

༈ ལྷར་བཅས་བསྟན་འགྲོ་ཡོངས་ཀྱི་གཙུག་རྒྱན་འཇམ་མགོན་བླ་མ་རིན་པོ་ཆེའི་ཞབས་པད་དུ། གུས་གསོལ། སྐུ་བསོད་ནམས་ཆེན་པོའི་གཟི་བྱིན་ལྷམ་མེར་གསལ། །གསུང་ཆོས་སྒོ་མཐའ་ཡས་པ་ལྷང་ངེར་སྤྲོ། ཐུགས་ཤེས་དང་ཤེས་བྱ་མི་ཕྱེད་པའི་ཡོན་ཏན་དང་ཕྲིན་ལས་གཞལ་དུ་མེད་པ་ནས་བཀའ་གླེགས་ཞིབ་མོ་ནོར་བུའི་མུ་ཀུ་ཊ་སྐྱེས་བཟང་པོའི་འཕྱངས་འཕྲུལ་ཅན་སྤྱི་བོར་སོན་པས་གུས་སྤྲོ་ཕན་ཚུན་འགྲན་བཞིན་འཕེལ་བ་ནི་ཟླ་བའི་ཆ་ཤས་གངས་ལ་འཛེགས་པ་ཇི་ལྟ་བའོ། །འདི་ན་མགོན་པོ་གང་གི་ཐུགས་རྗེའི་སྐྱབས་སྦྱིན་གྱི་འོག་ཏུ་ངལ་འཚོ་བའི་དགེ་སྦྱོང་རྒན་པོའང་། འདུ་ཁམས་ཤིན་ཏུ་མི་བདེ་བ་རྒྱུན་ཆགས་པ་ལས་བདག་གིར་བགྱི་བའི་ཚུལ་དུ་ཁུར་བཟོད་པར་བྱས་ཏེ་བསམ་གཏན་གྱི་ཁང་བུར་ཉམ་ཆུང་སེམས་ཆུང་འཁོས་ཆུང་དུ་འཁུམས་པར་མཚམས་རྒྱའི་མིང་གིས་སྒྲོ་བཏགས་ཏེ་མཆིས། མཚམས་ཞུས། ཇི་ཕེབས་ཤར་ཕྱོགས་ཏི་ཕུ་ཚུན་ཞབས་སེན་བཀྲ་ཤིས་ཀྱི་རེ་ཁཱ་བཀོད་དེ། འབྲེལ་ཚད་དོན་ལྡན་གྱི་མཛད་པ་མཁའ་ཁྱབ་ཏུ་སྣང་བ་ནས་དེང་འཆི་མེད་གྲུབ་པས་བྱིན་གྱིས་བརླབས་

---

^{[མ་དཔེ་གཟིགས་ན་འདིར་གནོན།]}

པའི་ཆོས་གྲྭར་ས་སྤྱོད་དམ་པའི་ཐུགས་ཀྱི་བཞེད་སྐོང་ཡེ་ཤེས་མགོན་པོ་རྣམ་པར་རོལ་པའི་ཞིང་ཁམས་འདུ་མཛད་པའི་ཆོ་འཕྲུལ་ལ་ཞུགས་པ་སོགས་བཀའ་དྲིན་བསམ་ལས་འདས། ན་ནིང་བདེ་གཟིར་སྐབས་སེམས་ཅན་སྤྱིའི་ལས་ཤུགས་བཟློག་དཀའ་ཞིང་། ལྷག་པར་སྙིགས་མའི་དུས་ཀྱི་སྐྱེ་བོའི་བསམ་སྤྱོད་སྨྱོན་པའི་ཟློས་གར་ལ་མཛད་ཐབས་བྲལ་བ་གཞིར་བཅས། ཟླ་ལ་སོགས་དུས་འགྱུར་མི་བཟད་པ་དེ་བཞིན་ཀླ་ཀློའི་འཇུག་པས་བསྟན་པའི་ལྷག་ཞབས་སྡུད་པ་ལ་ཡིད་སྐྱོའང་བྱ་ཐབས་བྲལ། ཕན་མཛད་རེ་རེ་ཙམ་ཡོད་དུ་ཟིན་ཀྱང་ཡིད་སྲུབས་ཀྱི་ཕྲིན་ལས་པ་རྣམས་ཀྱི་གཞན་དབང་གིས་དུག་སྦྲུལ་གདུག་པ་ཅན་གླལ་པའི་ཉེ་ལོགས་ཀྱི་མར་མེ་བཞིན་དུ་གྱུར། དེ་ལྟ་མོད་ཀྱི་སྐྱེས་བུ་དམ་པའི་ཐུགས་བསྐྱེད་ནི་ཚད་མེད་པས་ཇོ་ཤཱཀ་རིན་པོ་ཆེ་རྣམ་གཉིས་སོགས་ཀྱི་སྤྱན་སྔར་རྒྱལ་བསྟན་ལྔ་ཕྲག་ཐ་མ་ཕྱིར་བསྲིང་བའི་སྨོན་གསོལ་གྱི་བཀའ་དྲིན་ཀྱང་ཅི་གནང་ཞེས་གསོལ་བ་འདེབས་པ་ལགས། །སླད་མའི་ཆར་ཡང་། ཉི་མ་བཞིན་དུ་མཚན་དཔེའི་གཟི་བརྗིད་བསྐལ་བརྒྱར་གསལ། །ཟླ་སྟེར་བདུད་རྩིའི་སྙེམས་པ་འཕྲོག་པའི་ཆོས་ཆར་འབེབས། །རྫོགས་ལྡན་སྤྲིན་ལྟར་ཕན་བདེའི་ཕྲིན་ལས་ཀུན་ཏུ་ཁྱབ། །དམན་པ་བདག་ཀྱང་བྱང་ཆུབ་བར་དུ་དབུགས་འབྱིན་མཛོད། །ཅེས་ཞུ་གསོལ་འདེབས་མཚོན་རྣམ་པར་དཀར་།

---

^{[མ་དཔེ་གཟིགས་ན་འདིར་གནོན།]}

བའི་ལྷ་རེག །རིན་ཆེན་དང་པོ་སྲུང་འཁོར་ལྔ་བཅས་ཟླ་༣ཚེས་༢༥དགེ་བར་བྱ་བྲལ་བ་འཇམ་དབྱངས་མཁྱེན་བརྩེས་དངོས་པོ་ཀུན་གྱིས་བཏུད་དེ་ཞུ་ཆུང་དགེ། །།

སྡེ་དགེ་རྒྱལ་པོའི་མདུན།

---

^{[མ་དཔེ་གཟིགས་ན་འདིར་གནོན།]}

༈ ཨོཾ་སྭསྟི། ལྷ་ཡི་གྲོང་ཁྱེར་མཛེས་པའི་གཉེན། །ལྷ་དབང་གཉིས་པ་ས་འདིར་སྣང་། །ལྷར་བཅས་དགའ་སྟེར་མི་རྣམས་ཀྱི། །ལྷ་གཅིག་དམ་པའི་ཞབས་པདྨོར། །གུས་གསོལ། མཛེས་སྐུ་ཟླ་བ་གཞོན་ནུ་བཞིན། །མཛད་བཟང་འོད་དཀར་ཕྲེང་བ་བཞིན། །བཀའ་གླེགས་བདུད་རྩིའི་དོ་ཤལ་བཞིན། །འདི་ན་སོན་པས་ངལ་འཚོར་གྱུར། །མཚམས་ཞུས། ཏིཥྛནྟ་ཞེས་འཆི་མེད་ཀྱི། །བདེན་ཚིག་མེ་ཏོག་དཀར་པོའི་ཆར། །སྲས་བཅས་རྒྱལ་བས་ཁྱེད་ལ་སྩལ། །དགེ་ལེགས་རྟག་ཏུ་རྒྱས་གྱུར་ཅིག །ཅེས་པའི་ཞུ་མཚོན་བཅས་གུས་པས་ཚེས་རབཟང་པོར་འཕྲལ་ཞུས་མངྒལཾ། །སྡེ་དགེ་རྒྱལ་པོ་ལའོ།། ༈ །།ཨོཾ་སྭསྟི། བཀྲ་ཤིས་གླུ་ལེན་མེ་ཏོག་ཆར། །ཕྱོགས་བཅུའི་རྒྱལ་བ་དགྱེས་བཞིན་དུ། །ཁྱེད་ལ་མངོན་པར་དབང་བསྐུར་བས། །སྡེ་བཞིའི་དགེ་མཚན་དམ་གྱུར་ཅིག །ཧ་རི་ཙནྡ་བསྐྱོད་པའི་རླུང་། །སྙིང་ལ་འབབས་པས་མཚོན་མིན་པའི། །བཀའ་གླེགས་སྤྱི་བོར་སོན་པ་ལས། །གདུང་སེལ་ཟླ་བའི་བདུད་རྩིར་གྱུར། །མཚམས་ཞུས། འདོད་དགུའི་ལེགས་བྲིས་དགའ་ཚལ་དུ། །ནོར་གྱིས་འབྱོར་པའི་དཔག་བསམ་དབང་། །ཆོས་དང་ཐར་པའི་བསིལ་གྲིབ་ཅན། །བསྐལ་པ་རྒྱ་མཚོར་ཏིཥྛནྟུ། །ས་དེ་བ་ཀཱཪྻཾ་ནནྡ་ནཾ།། །།

དཔལ་ཀཿཐོག་རྡོ་རྗེའི་གདན་གྱི་ཆོས་སྨྲ་བའི་ཟླ་བ་རྨོག་སྟོན་གསང་བདག་ཆེན་པོའི་རྣམ་འཕྲུལ་སེང་ཁྲིར་མངའ་གསོལ་སྐབས་ལེགས་འབུལ་གྱི་ཡི་གེ་གསང་འཛིན་བཞད་པའི་དབྱངས་སྙན་སོགས།

---

^{[མ་དཔེ་གཟིགས་ན་འདིར་གནོན།]}

༈ དཔལ་ཀཿཐོག་རྡོ་རྗེའི་གདན་གྱི་ཆོས་སྨྲ་བའི་ཟླ་བ་རྨོག་སྟོན་གསང་བདག་ཆེན་པོའི་རྣམ་འཕྲུལ་སེང་ཁྲིར་མངའ་གསོལ་སྐབས་ལེགས་འབུལ་གྱི་ཡི་གེ་གསང་འཛིན་བཞད་པའི་དབྱངས་སྙན་ཅེས་བྱ་བ། ༈ །སྡེབ་སྦྱོར་མཉམ་པའི་བྲིཏྟ་ཡི་གེ་བཅོ་བརྒྱད་པ་བསྟན་འཛིན་ལ་རྣམ་གྲངས་སྤྱིར། ༢༦༢༡༤༤ མཆིས་པ་ལས། བྱེ་བྲག་ཨུདྡིཥྚ། ༣༧༨༥༧ གྱི་མཚམས་ནས་ཟིན་པ་མེ་ཏོག་གཡོ་བའི་འཁྲི་ཤིང་ཞེས་བྱ་བའི་པྲསྣ་རས་མཛེས་པར་བྱས་པ་ཛ་ཡནྟུ། །བཛྲསྶཱཤཱསཱུསུབརཤུདྷིཏཾསཱནུཙཱརོགཎཱམྦྷེ༔ ནིཏྟནནྟཱནཾསམཡསུབཙིསནྡྷདྷརྨསྱམགྷཻཿ ནཱགནྡནིབརསུགགནཾབྱཱསྟིདམྱསྱཀ། སིདྡྷཱམཱརཱཎཱནབཤུབྷརུཙིལཀྵཎཱལོཀབྷཱཡཱཏ། །རྡོ་རྗེའི་གནས་སུ་མཆོག་གི་སྟོན་པས་དག་པའི་འཁོར་ཚོགས་རྒྱ་མཚོ་ལ། །རྟག་པ་རྒྱུན་གྱི་དུས་སུ་ལེགས་འདོམས་མཐའ་ཡས་ཆོས་ཀྱི་ཕུང་པོའི་སྤྲིན། །སྐལ་བཟང་གདུལ་བྱའི་མཁའ་ལ་ཁྱབ་མཛད་མཆོག་གི་སྤྲུལ་སྐུ་གདེངས་ཅན་དབང་། །འཆི་མེད་གྲུབ་པའི་དགེ་མཚན་གསར་བས་འཇིག་རྟེན་ཀུན་ཏུ་སྣང་གྱུར་ཅིག ༡ །རྡུལ་བྲལ་ཤེས་རབ་འོད་གསལ་དབྱིངས་ལས་ཐབས་མཆོག་སྒེག་མོའི་གླུས་བསྐུལ་ཏེ། །ཟུང་འཇུག་སྒྱུ་འཕྲུལ་དྲྭ་བའི་རོལ་མོས་མགོན་ཁྱོད་སྲིད་འདིར་བཞེངས་པ་ན། །རྒྱལ་བའི་མྱུ་གུ་དམ་པ་ཉིད་ཅེས་ཐོག་མ་ཉིད་ནས་བསྔགས་བརྗོད་གཏམ། །ཚངས་ཆེན་ཞིང་འདིའི་ཕ་མཐར་བརྒལ་ལ་སླར་ཡང་ཚིག་གི་པདྨོས་

---

^{[མ་དཔེ་གཟིགས་ན་འདིར་གནོན།]}

མཆོད། ༢ །གང་ཞིག་རྟོགས་བྱའི་ཆོས་ཅན་ཇི་སྙེད་སྐུ་དང་ཡེ་ཤེས་རང་སྣང་བས། །དོན་དམ་ཆོས་ཉིད་གཞན་དུ་མ་དམིགས་བདེན་གཉིས་དབྱེར་མེད་ཟབ་མོའི་དོན། །ཇི་བཞིན་ཐུགས་སུ་ཆུད་པའི་རང་གཟུགས་གསང་བདག་དཔའ་བོར་གྲགས་འབར་བ། །རྒྱལ་བའི་མྱུ་གུ་གཞོན་ནུའི་ཟོལ་གྱིས་འཕགས་བཞིའི་སྤྱོད་ཡུལ་ཀུན་ཏུ་འཇུག ༣ །མཐའ་གཉིས་སྤྲོས་པ་དབུ་མར་བསྙིལ་བའི་སྟོང་པ་ཆེན་པོའི་འཆི་མེད་ལམ། །སྙིང་རྗེ་སྒྱུ་མའི་འདུ་འགོད་བྱེ་བས་ཕྱག་རྒྱ་གཅིག་སྤྲོས་ཟླ་ཚེས་ནི། །ཚོགས་ཀྱི་སྤྱོད་པའི་ཡར་ངོར་འཛེགས་ལས་བརྟུལ་ཞུགས་གྲུབ་པའི་ཆ་རྫོགས་པ། །ས་བཅུའི་དབང་ཕྱུག་ཀུན་གྱི་དབུས་ན་ལྷུན་གྲུབ་རིག་འཛིན་གར་གྱིས་རོལ། ༤ །ཆོས་དབྱིངས་ལོངས་སྤྱོད་རྫོགས་པའི་སྣང་བརྙན་སྤྲུལ་པའི་གཟུགས་གཞན་འཆར་བའི་སྐུ། །དངོས་གཅིག་དུ་མའི་ཚུལ་དུ་ཤར་བ་ཡེ་ཤེས་ཆེན་པོའི་བྱིན་འཆང་ཞིང་། །རྟག་ཅིང་ཁྱབ་དང་ལྷུན་གྱིས་གྲུབ་པའི་མཛད་པ་ཕྲིན་ལས་མཐའ་ཡས་པས། །འཇིག་རྟེན་གསུམ་གྱི་འདྲེན་པར་བསྔགས་པའང་དོན་གྱི་སྙིང་པོས་རབ་ཏུ་ལྕི། ༥ །འོག་མིན་ཆེན་པོར་གདམས་ཤིང་གཏད་པའི་དགོངས་འགྲེལ་རྨད་བྱུང་རྡོ་རྗེའི་རྒྱུད། །རྣལ་འབྱོར་གསུམ་གྱི་སེང་གེའི་ང་རོས་ལོག་སྨྲ་རྣམས་ནི་མཐར་མཛད་པ། །རྒྱལ་བ་གཉིས་པའི་ཆོས་ཀྱི་ཁྲི་ལ་སྲས་བཅས་འདྲེན་པས་མངའ་གསོལ་བའི། །ཕུན་སུམ་

---

^{[མ་དཔེ་གཟིགས་ན་འདིར་གནོན།]}

ཚོགས་པའི་དགེ་མཚན་སྣང་བས་བསྟན་པའི་རྫོགས་ལྡན་གསར་དུ་དྲངས། ༦ །དེ་སླད་གང་གི་ངོ་མཚར་རྣམ་ཐར་སྤྲིན་སྔོན་ཆུན་པོ་གཡོ་བའི་དཔྱིད། །མོས་གུས་མདོངས་མཐའི་སྙིང་དུ་སྡུག་པས་དད་གསུམ་ཟློས་པའི་གར་བསྒྱུར་བཞིན། །ཕྱག་གི་ཕྲེང་བས་མདུན་ནས་བདར་ཏེ་དངོས་པོ་ངེས་པར་བསྟན་པ་ཡི། །བརྗོད་པ་ཉུང་ངུའི་ངག་གི་རྒྱུད་མང་གཟུར་གནས་མཆོད་པའི་སྤྲིན་དུ་སྤྲོ། ༧ །སླར་ཡང་གསོལ་པ། ཨོཾ་སྭསྟི་ཤྲཱི་བི་ཛ་ཡནྟུ། མཚན་པའི་གདུགས་དཀར་ས་གསུམ་བླ་ན་བརྗིད་པའི་སྐུ། །མཁྱེན་གཉིས་གསེར་ཉ་ངག་ཚིག་དབྱངས་སུ་ཟློས་པའི་གསུང་། །འདོད་དགུའི་མཆོག་སྩོལ་བུམ་པ་བཟང་པོའི་ཐུགས་མངའ་བའི། །གསང་གསུམ་ཡོན་ཏན་སླར་ཡང་དྲན་པས་ཕྱག་བགྱིའོ། ༡ །དངོས་ཡིད་མཆོད་སྤྲིན་པདྨ་དཀར་པོས་མདུན་བདར་ཏེ། །སྟོབས་བཞིའི་དུང་གིས་སྒྲིབ་གཉིས་རིམས་ནད་འཇིལ་དང་བཅས། །མགོན་ཁྱོད་ངོ་མཚར་འཕགས་རྣམས་དགྱེས་པའི་བདུད་རྩི་ལ། །རྗེས་སུ་ཡི་རངས་སྙིང་གི་དཔལ་བེ་ཅིར་ཡང་བྱེ། ༢ །བཀྲ་ཤིས་གང་ཞིག་འཚོ་གཞེས་རྒྱལ་མཚན་བསྐལ་པ་རྒྱ་མཚོར་བརྟན་པ་དང་། །ཆོས་ཀྱི་འཁོར་ལོ་རྟག་ཏུ་བསྐོར་བས་བསྟན་འགྲོའི་ཕན་བདེ་མཐའ་ཡས་པའི། །སྭསྟིའི་དབྱངས་སྙན་ཕྱོགས་བརྒྱར་བསྒྲགས་པས་ཡིད་སྲུབས་སྡེར་བཅས་སྤ་བཀོང་སྟེ། །སྲིད་ཞིའི་དགེ་ལེགས་

---

^{[མ་དཔེ་གཟིགས་ན་འདིར་གནོན།]}

རྫོགས་ལྡན་འབྱོར་པ་འཇིག་རྟེན་ཀུན་ཏུ་འཕེལ་གྱུར་ཅིག ༣ །སརྦ་དཱ་ཀ་ལྱཱ་ཎཾ་བྷ་བ་ཏུ།། །ཞེས་པའང་སི་ཏུ་མཆོག་སྤྲུལ་རིན་པོ་ཆེ་ཆོས་ཀྱི་བློ་གྲོས་པའི་ཐུགས་བཞེད་སྐོང་སླད་བྱ་བྲལ་བ་མཁྱེན་བརྩེའི་དབང་པོས་ལྷུན་གྲུབ་སྟེང་གི་ཆོས་གྲྭ་ནས་བྲིས་ཏེ་ཕུལ་བ་དགེ།། ༈ །།མི་འགྱུར་མཆོག་ཏུ་ཞི་བའི་ཡེ་ཤེས་དང་། །འཕོ་མེད་བདེ་བ་ཆེན་པོར་ཟུང་འཇུག་པའི། །རྩ་གསུམ་ཀུན་དངོས་མཚོ་སྐྱེས་བླ་མ་ཡིས། །ཕུན་%ཚོགས་ཚེ་དང་ཡེ་ཤེས་སྣང་བ་སྩོལ། ༡ །རྨད་བྱུང་ཚོགས་གཉིས་དམ་པའི་ཆུ་གཏེར་ནི། །ལེགས་བྱས་བྱེ་བས་བསྲུབས་པའི་སྙིང་པོའི་ཕུལ། །མཚན་བཟང་ཟླ་བ་བདུད་རྩིའི་དོ་ཤལ་ཅན། །རྣམ་ཀུན་འཆི་ཟླུ མེད་གྲུབ་པ་ཉིད་གྱུར་ཅིག ༢ །སྲས་བཅས་རྒྱལ་བས་ལེགས་པར་གསུངས་པ་ཡིས། །ལུང་གི་ཆོས་ཕུང་རྒྱ་མཚོའི་ཟིལ་དངར་གྱིས། །སྐལ་བཟང་ཡིད་ཀྱི་ཨུཏྤལ་ཁ་བྱེ་ནས། །ཕན་བདེའི་ལང་ཚོ་རྟག་ཏུ་རྒྱས་པར་མཛོད། ༣ །གང་དུ་སྤྲོས་པ་སྤངས་པའི་སྟོང་ཉིད་ལ། །དམིགས་མེད་སྙིང་རྗེ་ཆེན་པོ་སྐྱེས་པ་ཡིས། །མཁྱེན་བརྩེའི་གཟིགས་པས་བདག་སོགས་འདུས་པར་བཅས། །འདི་ནས་བྱང་ཆུབ་བར་དུ་རྗེས་སུ་ཟུངས། ༤ །ཡོན་ཏན་ནོར་བུའི་རྔ་ཡབ་ལྷར་བཅས་ན། །བཟུང་བ་མེད་པར་འཁོར་བའི་ཕྲིན་ལས་ཀྱི། །སྣང་བས་སྲིད་ཞིའི་མུན་པ་འཇིལ་བ་དང་། །བྱང་ཆུབ་མཆོག་གི་ངལ་འཚོ་རྒྱས་པར་མཛོད།

---

^{[མ་དཔེ་གཟིགས་ན་འདིར་གནོན།]}

བདག་ཀྱང་ཡང་སྲིད་ཀུན་ཏུ་བཤེས་ཁྱོད་ཀྱིས། །ཐེག་པ་ཆེན་པོའི་དགེ་བའི་བཤེས་མཛད་ཅིང་། །ཚུལ་གནས་ཐོས་བསམ་སྒོམ་པའི་ཡོན་ཏན་གྱིས། །རང་གཞན་དོན་གཉིས་ལྷུན་གྱིས་གྲུབ་གྱུར་ཅིག ༦ །མདོར་ན་འགྱུར་མེད་ཐུགས་རྗེའི་སྣང་བ་ཡིས། །ཕུན་ཚོགས་འཇིག་རྟེན་དགེ་བའི་ངོ་མཚར་ཅན། །མཆོག་གསུམ་བཀྲ་ཤིས་ཉིན་མོར་བྱེད་པ་ཡིས། །དགེ་ལེགས་ཤིས་པའི་པདྨོ་རྒྱས་གྱུར་ཅིག ༧ །ཅེས་ཤིས་པར་བྱ་བའི་ཚིག་གིས་མདུན་བསུས་ཏེ། དེང་གི་ཆར་ཡང་། རིག་གྲོལ་གྱི་ཡོན་ཏན་རྨད་དུ་བྱུང་བའི་སུམ་ལྡན་རྡོ་རྗེ་འཛིན་པ་ཆེན་པོ་གང་གི་ཞལ་སྔ་ནས་ཚད་མེད་པའི་ཐུགས་རྗེས་རྒྱལ་བའི་བཀའ་གངས་ཅན་གྱི་ལྗོངས་སུ་འགྱུར་རོ་ཅོག་གི་ལྗགས་ལུང་རིན་པོ་ཆེ་ཡོངས་སུ་རྫོགས་པར་གནང་བའི་བཀའ་དྲིན་ནི་ཇི་སྲིད་བྱང་ཆུབ་སྙིང་པོའི་བར་དུ་འཁོར་ཐབས་མ་མཆིས་ཀྱང་། ཕྱོགས་ཀྱི་རྒྱལ་ཁམས་ཉུལ་བའི་དཱ་རི་དྭ་ལ་ཡོ་བྱད་ཀྱི་དངོས་པོ་ཕྲ་བས་ཡིད་སྤྲུལ་གྱི་མཎྜལ་རྒྱ་ཆེར་སྤྲུལ་ཏེ་ཕུལ་བའི་མཚོན་བྱེད་དུ་དངོས་བཤམས་ཕྲ་མོ་ཙམ་བསྟར་བར། འབུལ་ལམ་ཞུ་ན་ཡེ་ཤེས་གཟིགས་པ་དམ་པས་ཡུད་ཙམ་བདག་གིར་མཛད་པ་དང་། སླད་མའི་ཆར། སྲིད་ན་བཀའ་དྲིན་མཚུངས་མེད་དགེ་བའི་བཤེས་གཉེན་ཆེན་པོ་གང་ཉིད་ཞབས་པད་བསྐལ་པ་རྒྱ་མཚོར་བརྟན་ཅིང་རྣམ་པར་དཀར་བའི་ཕྲིན་ལས་རྒྱས་པ་

---

^{[མ་དཔེ་གཟིགས་ན་འདིར་གནོན།]}

དང་། གུས་ཕྲན་པའང་བྱང་ཆུབ་བར་དུ་ཐུགས་རྗེ་བཀའ་དྲིན་གྱིས་མི་བཏང་བར་གསོལ་བ་འདེབས་ན་བདེན་ཚིག་སྨོན་ལམ་གྱི་མཚམས་སྦྱོར་གྱིས་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ།། །། ༈ ཙྪནྟེནྡྲབཛྲནཱམསྱཔྲསཱརེ། །སུ་ཀྲྀཡཱསཱཀོཊིབྷཝིཀག རླཁཱིཤཏཾཔུཎྱསུཏེཛརསྨི། བྷབེའུམོཀྵསུཁབྷཱུཏིདཱདེ པཱདབྲཡཱདརྣམཎེསྙུམཱུལཾ། །དགེ་ལེགས་བྱེ་བའི་སྙིང་པོ་གཅིག་གྱུར་པ། །ཕུན་ཚོགས་བསོད་ནམས་ཕྲག་བརྒྱའི་གཟི་འོད་ཅན། །སྲིད་ན་ཐར་བདེའི་འབྱོར་པ་སྦྱིན་མཛད་པའི། །ཞབས་སེན་ནོར་བུའི་མེ་ལོང་མཆོག་གི་དྲུང་། ༡ །མོས་གུས་གིའུ་ཝཾ་བཅུད་ཀྱིས་རབ་བརླན་པའི། །དད་ལྡན་གཉིས་འཐུང་དུལ་བའི་ངང་ཚུལ་གྱིས། །འཇམ་མགོན་མཁྱེན་པའི་དཔྱིད་དཔལ་ལ་ཆགས་པས། །ཞུ་གསོལ་ཚིག་གི་མེ་ཏོག་ཅུང་ཟད་འཐོར། ༢ །གཟོད་ནས་གཞན་དོན་ཁོ་ནའི་རྗེས་སོང་བའི། །ཐུགས་བསྐྱེད་ཞོ་ཡི་སྙིང་པོ་ལྟར་དཀར་བས། །འདུ་མི་མཛད་བཞིན་ལྷུན་གྱིས་གྲུབ་པ་ཡི། །འཕགས་བཞིའི་སྤྲུལ་པའི་སྒྱུ་འཕྲུལ་ཅིར་ཡང་སྟོན། ༣ །ལྷག་པར་གྲུབ་པའི་རིགས་ཀྱི་དགའ་ཚལ་དུ། །མཚན་དཔེའི་དཱུརྱའི་འཁྲི་ཤིང་བསྐྱེད་བསྲིངས་པས། །གང་དུ་བསྙེན་པའི་མོད་ནས་ཕན་དང་བདེའི། །འཆི་མེད་དགའ་སྟོན་སྦྱིན་པའི་ངོ་མཚར་དང་། ༤ །གསུང་གི་བདུད་རྩི་ཆ་ཤས་རེ་རེས་ཀྱང་། །སྲིད་ཞིའི་གྲུབ་པ་སྟེར་མཛད་བིལྕེའི་འབྲས། ༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

འཕགས་དང་མཁས་པ་ཀུན་གྱིས་ལྷན་ཅིག་ཏུ། །དཔལ་སྟུག་ཡོངས་ཀྱི་བཀའ་བཞིན་སྤྱི་བོས་ནོད། ༥ །ཁྱོད་ཐུགས་མཁྱེན་གཉིས་ཆུ་གཏེར་ལས་བྱུང་བའི། །ཡོན་ཏན་བསྔགས་པ་མཐའ་ཡས་གཡས་འཁྱིལ་དུང་། །སྙན་པ་ཕྱོགས་མཐར་འགྲོ་བའི་ཕྲིན་ལས་ཀྱིས། །སྲིད་ན་ཀུན་མཁྱེན་གཉིས་པའི་གྲགས་དཀར་ལེན། ༦ །དེ་ལྟའི་གསང་གསུམ་འཚོ་གཞེས་བརྟན་པ་ནས། །བྱིན་རླབས་ལི་ཁྲིའི་ཐིག་ལེ་མཛེས་འབར་བའི། །བཀའ་ཡི་སྤྲིང་ཡིག་སྤྱི་བོར་སོན་པའི་མོད། །དད་སྤྲོའི་དགའ་བ་གཟུགས་ཅན་བཞིན་དུ་གྱུར། ༧ །འདིར་ཡང་མགོན་པོ་གང་གི་ཐུགས་རྗེའི་མཐུ། །གྲུབ་པའི་ཉུངས་ཀར་སྙེ་མས་བསྲུང་བ་ལས། །ཉེར་འཚེའི་གདུང་བ་བྲལ་དང་ཆབ་གཅིག་པར། །གསོལ་འདེབས་མགྲིན་པའི་རྒྱུད་མངའ་ཁྲོལ་བཞིན་མཆིས། ༨ །མཚམས་ཞུས། སླད་མའི་དུས་ཀྱང་གྲགས་པའི་གདུགས་དཀར་པོ། །བཟུང་བ་མེད་པར་སྲིད་ཞིའི་བླར་བརྗིད་པས། །ཤེས་རབ་གསུམ་གྱི་མིག་ལྡན་གསེར་ཉའི་ཚོགས། །མོས་གུས་ཆུ་གཏེར་དྭངས་པར་དབུགས་འབྱིན་བཞིན། ༡ །བསོད་ནམས་བྱེ་བའི་མཚན་དཔེའི་བུམ་བཟང་གི། །ཞབས་སེན་པདྨ་དཀར་པོ་བཞད་པའི་འཛུམ། །འཚོ་གཞེས་བསྐལ་བརྒྱར་བརྟན་པའི་དུང་གི་སྒྲས། །རྒུད་པ་ཕོངས་པའི་རིམས་ནད་འཇིལ་དང་བཅས། ༢ །ཐུགས་རྗེའི་དཔལ་གྱི་བེའུར་དམན་

---

^{[མ་དཔེ་གཟིགས་ན་འདིར་གནོན།]}

བདག་ཀྱང་། །བརྩེ་ཆེན་ཡེ་ཤེས་གཟིགས་པས་བཅུག་པ་ལས། །མི་མཐུན་ཕྱོགས་ལས་རྒྱལ་བའི་རྒྱལ་མཚན་གྱིས། །ཕན་བདེའི་འཁོར་ལོས་སྒྱུར་བའི་བཀྲ་ཤིས་སྩོལ། ༣ །ཅེས་དགེ་ལེགས་ཤིས་པའི་ཚིག་གིས་གསོལ་བ་འདེབས་རྟེན་མཚོན་བྱེད་ཙམ་དུ་རྣམ་པར་དཀར་བའི་ལྷ་རེག །ཁྱད་པར་འཕགས་པའི་དམ་རྫས་བཀྲ་ཤིས་པའི་གྲངས་ལྡན། རིན་ཆེན་དཀར་པོ་སྲང་འཁོར་རྩེ་མོའི་གྲངས་བཅས་མདོ་ཁམས་སྡེ་དགེ་ལྷུན་གྲུབ་སྟེང་ནས་ལྕགས་སྤྲེལ་ཁྲུམས་ཟླའི་༨ཡར་ཚེས་༡༠དགེ་བར་སྐྱབས་འོག་ཐ་ཆུང་པ་ཐར་རྩེ་སྤྲུལ་མིང་འཇམ་དབྱངས་མཁྱེན་བརྩེའི་དབང་པོས་གུས་པ་ཆེན་པོའི་ཕྱག་དང་བཅས་ཏེ་ཕུལ་བའི་ཞུ་ཡིག། ༈ །། ཨཱདེབློབཤམསུདྷ དཱིདྷིཡཱབནབརྙཏེཛསཱི། ཙྪནྟུདྡྷདིཏྟནཱམསུཔྲསཱརེ། མཉྫབྷིཀམཧཱཛཡཱངྒཱཔཱདིཔདྨཧསོབམཱུལཡོ༔ གཟོད་ནས་ཤིན་ཏུ་ཞི་བའི་ཆོས་ཉིད་ནི། །མཁྱེན་གཉིས་ལང་ཚོ་རྒྱས་པའི་གཟི་འབར་བ། །འཇམ་པའི་དཔལ་དངོས་རྒྱལ་བའི་མྱུ་གུ་ཆེའི། །ཞབས་ཀྱི་པདྨོ་བཞད་པའི་ཉེ་དྲུང་དུ། །མི་ཕྱེད་གུས་པས་མདུན་བདར་ཏེ་ཞུ་གསོལ། གཟུང་འཛིན་སྤྲོས་པར་གཞར་ཡང་མི་གནས་འོད་གསལ་ནམ་མཁའི་རྡོ་རྗེའི་དབྱིངས། །ཟུང་འཇུག་དབང་པོའི་གཞུ་ལྟར་མངོན་སྣང་སྒྱུ་འཕྲུལ་དྲྭ་བ་ཆེན་པོའི་སྤྲིན། །སྲིད་པའི་ཁམས་སུ་གཅིག་ཏུ་རྗེས་ཆགས་མཚན་དཔེའི་ཟླ་རིས་ཤར་ཙམ་གྱིས། །༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

འཇིག་རྟེན་རྒུད་པའི་མུན་པ་ཀུན་བསལ་ཕན་བདེའི་སྣང་བ་འབྱམས་སུ་ཀླས། །སྐད་ཅིག་རེར་ཡང་རིག་དང་བརྩེ་བ་ཕྲིན་ལས་འཇུག་པ་མཐའ་ཡས་པའི། །ཀུན་མཁྱེན་གཉིས་པའི་མཛད་པ་ཁོ་ནས་ཕྱོགས་དང་ཆ་བཅས་རྒྱས་འགེངས་བཞིན། །འཚོ་གཞེས་བརྟན་པའི་གཏམ་གྱི་རྔ་སྒྲ་བྱེ་བ་ཕྲག་བརྒྱའི་དགེ་མཚན་གྱིས། །འདུ་ཤེས་གསུམ་ལ་སྙོམས་པར་འཇུག་པའང་དད་བློ་དགེ་བའི་ཕྱོགས་སུ་དྲངས། །ལྷག་པར་འཕགས་རྣམས་སྙིང་རྗེའི་གཟིགས་པ་དམན་ལ་བརྩེ་བ་ཆོས་ཉིད་ཕྱིར། །མ་འདྲིས་བཞིན་དུ་མཉེས་ཤིང་གཤིམ་པའི་ལེགས་གསུང་བདུད་རྩིའི་སྤྲིན་གྱི་ཆར། །འདི་ན་དུས་སུ་སྨིན་པ་ཁོ་ནས་རབ་གུས་ཨུཏྤལ་རྒྱས་གྱུར་ཏེ། །བསམ་གཏན་ཁང་བུའི་པད་མཚོ་ལ་བརྟེན་ཞབས་བརྟན་བསུང་ཞིམ་སྤྲོ་བཞིན་མཆིས། །མཚམས་ཞུས། སླད་མའི་དུས་ཀྱང་སྲིད་ཞིའི་མཐར་སོན་འགྲོ་རྣམས་སྒྲོལ་བའི་ཐུགས་རྗེའི་སྤྱན། །གངས་ཀྱི་རི་བོའི་སུལ་འདིར་རིང་གཟིགས་འཆི་མེད་གྲུབ་པའི་རྒྱལ་རྔ་ཆེས། །ཡིད་སྲུབས་དཔུང་བཅས་ཕྱོགས་ལས་རྣམ་རྒྱལ་ཕྲིན་ལས་མཁའ་མཐར་ཁྱབ་པ་དང་། །འདིར་ཡང་ཡེ་ཤེས་གཟིགས་པ་དམ་པས་བྱང་ཆུབ་བར་དུ་དགེ་མཛད་གསོལ། །ཅེས་རྩེ་གཅིག་གུས་པས་གསོལ་བ་འདེབས་མཚོན་བཀྲ་ཤིས་པའི་ལྷ་གོས་རབ་དཀར། །བཟང་ཇ་འཁོར་དྲུག་བཅས་དབྱུག་པ་ཟླ་བའི་གྲལ་ཚེས་མཆོག་ཏུ་དགེ་བར་སྡེ་

---

^{[མ་དཔེ་གཟིགས་ན་འདིར་གནོན།]}

དགེ་སྨན་ཤོད་རྫོང་གསར་དགོན་གྱི་བསམ་གཏན་ཁང་བུ་ནས། ཐར་རྩེ་སྤྲུལ་མིང་འཇམ་དབྱངས་མཁྱེན་བརྩེས་གུས་པ་ཆེན་པོས་ཕུལ་བའི་ཞུ་ཆུང་། །༅། །བྱམས་པའི་བདུད་རྩིས་ས་གསུམ་གདུང་སེལ་ཕྱིར། །ངག་དབང་འཇམ་དཔལ་གཞོན་ནུ་ངུར་སྨྲིག་ཟོལ། །བསྟན་འཛིན་བྱེ་བའི་ཁྱུ་མཆོག་མཁས་རྣམས་ཀྱིས། །སྙན་གྲུགས་ཕྱོགས་མཐར་སྒྲོགས་དེའི་ཞབས་པདྨོར། །གུས་པའི་ཡིད་ཀྱི་ཨུཏྤལ་དར་བབས་པར། །བཀའ་དྲིན་རྗེས་སུ་དྲན་པའི་ཉི་ཟེར་གྱིས། །དྲན་པས་དད་སྤྲོའི་འདབ་རྒྱ་དགོད་པའི་མོད། །ཞུ་གསོལ་བདུད་རྩིའི་བསུང་ཞིམ་ཅུང་ཟད་འཐུལ། །གཟོད་ནས་སྲས་བཅས་རྣམ་འདྲེན་ཇི་སྙེད་པའི། །ཡེ་ཤེས་ཆེན་པོའི་ངོ་བོར་མི་ཕྱེད་བཞིན། །སྲིད་ན་འཇིག་རྟེན་ཚུལ་དང་རྗེས་མཐུན་པར། །མཆོག་གི་སྤྲུལ་སྐུའི་ཟླ་ཤེལ་གཅིག་ཏུ་ཤར། །དེ་ཚེ་བསླབ་དང་གྲོལ་དང་ཕྲིན་ལས་ཕུལ། །ཀུན་མཁྱེན་གཉིས་པའི་ཆ་ཤས་ཡོངས་རྫོགས་བཞིན། །འཚོ་གཞེས་བརྟན་པའི་གཏམ་གྱི་སིམ་འོད་ཀྱིས། །གུས་སྤྲོའི་ཀུ་མུ་དད་པས་ཉིན་བཞིན་བྱེད། །འདི་ན་ཤིན་ཏུ་བྱིས་པའི་ཐ་ཤལ་ཡང་། །བླ་མའི་ཐུགས་རྗེས་ཉེར་འཚེའི་སྐབས་བྲལ་བཞིན། །བསམ་གཏན་ཁང་བུའི་མལ་དུ་གསོལ་འདེབས་ཀྱི། །བཟླས་བརྗོད་སྙིང་པོར་བགྱི་བའི་སྐལ་བཟང་ཐོབ། །མཚམས་ཞུས། སླད་མའི་ཆར་ཡང་མཁས་དང་གྲུབ་པ་དང་། །འཕགས་རྣམས་དགྱེས་པའི་ཆོས་ཀྱི་

---

^{[མ་དཔེ་གཟིགས་ན་འདིར་གནོན།]}

ནོར་བུའི་ཁྲིར། །གསང་གསུམ་འཆི་མེད་མགོན་པོར་ཞབས་བརྟན་ཅིང་། །ཕན་བདེའི་ལེགས་མཛད་སྲིད་མཐར་ཁྱབ་དང་བཅས། །ཇི་སྲིད་བྱང་ཆུབ་བར་དུ་དམན་བདག་ཀྱང་། །སྔར་བཞིན་ཡེ་ཤེས་གཟིགས་པས་རྗེས་བཟུང་ནས། །ཚུལ་གནས་ཐོས་བསམ་སྒོམ་པའི་སྦྱོར་བ་ཡིས། །དོན་གཉིས་དགེ་མཚན་རྒྱས་པའི་བཀའ་དྲིན་སྩོལ། །ཅེས་རྩེ་གཅིག་གུས་པས་གསོལ་བ་འདེབས་མཚོན་བཀྲ་ཤིས་པའི་ལྷ་རྫས། ལྗོན་འདབ་སུ་ཝརྞའི་ཐིག་ལེ་བརྒྱད་པ་སྦག་གཉིས་བཅས་སྐྱབས་འོག་ཐར་རྩེ་སྤྲུལ་མིང་པ་འཇམ་དབྱངས་མཁྱེན་བརྩེའི་དབང་པོས་གུས་པ་ཆེན་པོས་ཕུལ་བའི་ཞུ་ཆུང་།། ༈ །།རྫོགས་པའི་སངས་རྒྱས་འཇིག་རྟེན་སྨན་མཛད་ཐུགས་རྗེའི་གཟུགས། །ངག་གི་དབང་ཕྱུག་ངུར་སྨྲིག་འཛིན་པའི་རྣམ་རོལ་ཅན། །བསྟན་པའི་ཉི་མ་སྲས་བཅས་རྒྱལ་བས་རབ་བསྔགས་པ། །གང་དེའི་ཞབས་པད་སྲིད་ཞིའི་གཙུག་ན་མཐོ་བའི་དྲུང་། །མགོན་ཁྱོད་ཐུགས་རྗེས་ལྷག་པར་དགོངས་པའི་ཆོས་སྨྲ་ཚུལ། །བསམ་གཏན་བདུད་རྩིའི་བཏུང་བར་མངོན་དགའི་ཡིད་ཀྱི་ཚལ། །དད་སྤྲོའི་ཨུཏྤལ་འདབ་བརྒྱ་རྒྱས་པའི་ཁོང་གསེང་ནས། །གསོལ་འདེབས་བུང་བའི་གླུ་དབྱངས་ཅུང་ཟད་ལེན་ལ་ཕྱོགས། །གང་དུ་མཐའ་གཉིས་སྤྲོས་པ་བརྟུལ་བའི་ཕ་རོལ་ནས། །སྨོན་ལམ་སྙིང་རྗེའི་འཇུག་པ་གཞར་ཡང་མི་འགོག་ཕྱིར། །མཆོག་གི་སྤྲུལ་སྐུ་གདན་

---

^{[མ་དཔེ་གཟིགས་ན་འདིར་གནོན།]}

གསུམ་ཚང་བའི་རྣམ་རོལ་ཅན། །ལྷ་དང་བཅས་པའི་བསྟན་འགྲོའི་དཔལ་དུ་འཚོ་གཞེས་ཤིང་། །རྟག་ཅིང་ཁྱབ་དང་ལྷུན་གྱིས་གྲུབ་པའི་ཕྲིན་ལས་མཐའ། །ནོར་བུའི་བ་གམ་རྒྱས་པར་དཀྲིགས་པའི་སྤྲིན་ཆེན་། ལས། །འདིར་ཡང་ལེགས་གསུང་འདོད་པ་འཇོ་བའི་ཆར་རྒྱན་གྱིས། །དད་སྒོའི་དགའ་སྟོན་ཉིན་རེ་བཞིན་ཡང་གཅིག་ཏུ་འཕེལ། །རྨོངས་དང་མ་རིག་འཐིབ་བུས་ནོན་པའི་དམན་བདག་ཀྱང་། །གང་གི་བྱིན་རླབས་ཟིལ་དངར་བཞིན་དུ་བཏུང་བ་ལས། །ལང་ཚོའི་འདུ་བྱེད་ཉམས་པར་མ་གྱུར་གསོལ་འདེབས་ཀྱི། །བཟླས་བརྗོད་མགྲིན་པའི་རོལ་མོར་འཁྲོལ་བའི་སྐབས་སུ་མཆིས། །མཚམས་ཞུས། སླད་མའི་ཆར་ཡང་སྐྱེ་འགག་མཚན་མ་རིང་དབེན་པའི། །རྡོ་རྗེའི་གསང་གསུམ་བསྐལ་པ་རྒྱ་མཚོར་ཞབས་བརྟན་ཅིང་། །ཕན་བདེའི་མཛད་པ་ནམ་མཁའི་ཕ་མཐར་སྙོམས་འཇུག་བཞིན། །བདག་ཀྱང་བྱང་ཆུབ་སྙིང་པོའི་བར་དུ་རྗེས་སུ་ཟུངས། །དེ་སྐད་གསོལ་མཚོན་རབ་དཀར་གྱི། །ལྷ་རྫས་ལེགས་བཤད་གླེགས་བམ་དང་། །རིན་ཆེན་གཉིས་པ་སྲང་འཁོར་བཅས། བཀྲ་ཤིས་ཟླ་བའི་ཚེས་ལ་ཕུལ། །ཅེས་སྐྱབས་འོག་ཐ་ཆུང་པ་ངོར་ཐར་རྩེ་སྤྲུལ་མིང་འཇམ་དབྱངས་མཁྱེན་བརྩེའི་དབང་པོས་དངོས་པོ་ཀུན་གྱིས་བཏུད་དེ་གསོལ་བ་བཏབ་པ་སརྦ་དཱ་སུ་ཤེ་ཡོ་བྷ་བ་ཏུ།། ༈ །།བྱམས་དང་སྙིང་རྗེ་བྱང་ཆུབ་སྤྱོད་པ་མཐར་ཕྱིན་པས། །

---

^{[མ་དཔེ་གཟིགས་ན་འདིར་གནོན།]}

ཡིད་ཅན་ཀུན་ལ་ཕན་བདེའི་དགའ་སྟེར་སྣང་བའི་ཕུལ། །བསྟན་པའི་ཉི་མ་ཕྱོགས་ལས་རྣམ་རྒྱལ་དགེ་མཚན་ཅན། །གང་དེའི་ཞབས་པད་སྲིད་ན་མཐོ་བའི་ཉེ་དྲུང་དུ། ༡ །རིང་ནས་རབ་གུས་དཔྱིད་ཀྱིས་བཟུང་བའི་ཀུ་མུ་དཱ། །སླར་ལ་ཡེ་ཤེས་གཟིགས་པའི་དབྱངས་སྙན་ཟླ་ཟེར་གྱིས། །རེག་པས་དད་བརྒྱའི་འཛུམ་སྒྲོས་བྱེ་བའི་ཁོང་གསེང་ནས། །གསོལ་འདེབས་བརྗོད་པ་བུང་བ་གཞོན་ནུའི་རྒྱུད་མང་ལེན། ༢ །མགོན་ཁྱོད་གཟོད་ནས་སྟོབས་བཅུ་མངའ་བའི་མཆོག་བརྙེས་ཀྱང་། །སྨོན་ལམ་སྙིང་རྗེའི་གཞན་དབང་ཁོ་ནས་འཇིག་རྟེན་འདིར། །མཚན་དཔེའི་སྣང་བརྙན་ཐོག་མར་འཆར་བ་ནས་བརྩམས་ཏེ། །སྲས་བཅས་རྒྱལ་ཀུན་ཕྲིན་ལས་འཇུག་པ་དུས་གཅིག་བཟུང་། ༣ །ལྷག་པར་རྡོ་རྗེ་ཞེས་བྱར་བརྗོད་པ་དོན་ལྡན་པའི། །ལུང་རྟོགས་ཆོས་ཀྱིས་མངོན་མཐོའི་ཁྲི་ལ་དབང་བསྒྱུར་བར། །ཕྱོགས་བཅུའི་རྣམ་འདྲེན་ཡོངས་ཀྱིས་བསྔགས་པའི་ཏམྦུ་རས། །འཚོ་གཞེས་བརྟན་པའི་ཤིས་བརྗོད་མེ་ཏོག་ཉིན་བཞིན་འཐོར། ༤ །དེ་ཚེ་བསླབ་གྲོལ་ཡིད་བཞིན་མཚོ་ལས་ཉེར་བླངས་པའི། །ཕུལ་བྱུང་རིག་དང་བརྩེ་བ་ནོར་བུའི་སྤྲིན་ཆེན་ལས། །འཆད་རྩོད་རྩོམ་པའི་འདོད་དགུའི་གྲུ་ཆར་མཐའ་ཡས་པས། །ཡོངས་རྫོགས་བསྟན་པའི་རྫོགས་ལྡན་གསར་པ་སླར་ལ་འཆར། ༥ །ཨེ་མ་དེ་ལྟའི་གཏམ་ཙམ་ཐོས་པའི་རྣ་ལུང་ཀྱང་། །

---

^{[མ་དཔེ་གཟིགས་ན་འདིར་གནོན།]}

བསྐལ་མང་བསོད་ནམས་ཟོང་གིས་བསྒྲུབ་པའི་འོས་ཡིན་ན། །ཤིན་ཏུ་དམན་ལའང་ལྷག་པར་དགོངས་པའི་ལེགས་གསུང་གིས། །དབུགས་འབྱིན་ཐོབ་འདི་ཡང་སྲིད་ཀུན་ཏུ་རྙེད་པར་དཀའ། ༦ །དེ་སླད་མཚོ་བྱུང་ཡི་གེའི་གཟུགས་སུ་མངོན་སྤྲུལ་པར། །དད་གུས་སྤྲོ་བ་མཁའ་མཐས་མཚོན་མིན་འདུ་གསུམ་པའང་། །མགོན་ཁྱོད་བྱིན་རླབས་སྐྱབས་སྦྱིན་གྲིབ་མར་ངལ་འཚོ་བཞིན། །ཞབས་བརྟན་གསོལ་འདེབས་མགྲིན་པའི་རོལ་མོ་རྟག་ཏུ་འཁྲོལ། །མཚམས་ཞུས། འབྱུང་འགྱུར་ཆར་ཡང་། །གཟོད་ནས་འཆི་མེད་རྟག་པ་དམ་པའི་མཆོག་བརྙེས་ཕྱིར། །མཐའ་ཡས་འགྲོ་ཀུན་བྱང་ཆུབ་སྙིང་པོར་མཆིས་ཀྱི་བར། །འཚོ་གཞེས་ཕྲིན་ལས་བདུད་རྩིའི་སྣང་བས་འཇིག་རྟེན་ན། །དགེ་ལེགས་ཤིས་པའི་པདྨོ་རྟག་ཏུ་རྒྱས་མཛད་གསོལ། །དེ་སྲིད་དུ་སྐྱབས་འོག་པའང་ཡེ་ཤེས་གཟིགས་པ་དམ་པའི་འབབ་སྟེགས་སུ་སྔར་བཞིན་བཙའ་བར་དངོས་པོ་ཀུན་གྱིས་བཏུད་དེ་གསོལ་བ་ལན་བརྒྱ་སྟོང་ཕྲག་དུ་མར་འདེབས་མཚོན་རྟེན་འབྱུང་ཙམ་དུ་བཀྲ་ཤིས་པའི་ལྷ་གོས་རིན་གཉིས་སྲང་འཁོར་གསུམ། བཟང་ཇ་སྒམ་བཅས་ཆུ་སྟོད་ཟླ་བའི་གྲལ་ཚེས་དགེ་བར་བཀའ་འབངས་ཐ་ཆུང་བ་འཇམ་དབྱངས་མཁྱེན་བརྩེས་མི་ཕྱེད་གུས་པ་ཆེན་པོས་ཕུལ་བའི་ཞུ་ཆུང་།། ༈ །།རྡོ་རྗེའི་སློབ་དཔོན་རྣམ་འདྲེན་ཡོངས་ཀྱིས་རབ་བསྔགས་པ། །ཡེ་ཤེས་མཐའ་ཡས་

---

^{[མ་དཔེ་གཟིགས་ན་འདིར་གནོན།]}

སྙིང་རྗེ་བདུད་རྩིའི་སྣང་བ་ཅན། །བཟང་པོའི་ཕྲིན་ལས་ཆ་ཤས་ཡོངས་གང་ཟླ་བ་ནི། །འཇིག་རྟེན་གསུམ་གྱི་སྒྲོན་མེ་ཉིད་དུ་བརྟན་གྱུར་ཅིག །གང་གི་ཐུགས་རྗེས་རབ་བཟུང་བའི། །དད་སྤྲོའི་པདྨོ་རྒྱས་པ་ལས། །ཞུ་མཆིད་རྐང་པ་དྲུག་པའི་གླུ། །རྒྱུད་མང་བཞིན་དུ་ཅུང་ཟད་ལེན། །འཁོར་བའི་ཚུ་རོལ་མི་གནས་ཡང་། །མྱང་འདས་ཕ་མཐར་གཞོལ་བའི་སར། །ཐེག་མཆོག་དགེ་བའི་བཤེས་ཀྱི་ཚུལ། །ཉི་མ་བཞིན་དུ་ལྷམ་མེར་གསལ། །འཕགས་དང་མཁས་པས་བསྔགས་འོས་པའི། །ལེགས་མཛད་ཕ་མཐའ་ཡས་པ་ནས། །འདིར་ཡང་ལྷག་པར་བརྩེར་དགོངས་པའི། །གསུང་གི་བདུད་རྩི་སྔ་ཕྱིར་ཐོབ། །དེ་ཚེ་གུས་དང་རབ་དགའ་བའི། །ལང་ཚོ་རྒྱས་པའི་དམན་པ་ཡང་། །བསམ་གཏན་ཁང་བུར་བག་ཕེབས་བཞིན། །ཁ་ཏོན་ཚུལ་ལ་གེགས་མེད་མཆིས། །མཚམས་ཞུས། སླད་མའི་ཆར་ཡང་སྲིད་ན་སྨན་མཛད་གསང་བ་གསུམ། །འཆི་མེད་གྲུབ་པའི་རྒྱལ་རྔ་རྟག་ཏུ་བརྡུང་བའི་མོད། །བསྟན་འགྲོའི་ཕན་བདེ་རྫོགས་ལྡན་བཞིན་དུ་དར་བབས་ཤིང་། །འདིར་ཡང་ཡེ་ཤེས་གཟིགས་པ་དམ་པས་སྔར་བཞིན་སྐྱོངས། །དེ་སྐད་ཞུ་གསོལ་འདེབས་པའི་རྟེན། །མཚོན་བྱེད་རབ་དཀར་ལྷ་རྫས་དང་། །རིན་ཆེན་གཉིས་པ་སྲང་འཁོར་བཅས། །བཀྲ་ཤིས་ཟླ་བའི་ཚེས་ལ་ཕུལ། །ཅེས་ཕྲན་ཆུང་ཐར་རྩེ་སྤྲུལ་མིང་པ་འཇམ་དབྱངས་

---

^{[མ་དཔེ་གཟིགས་ན་འདིར་གནོན།]}

མཁྱེན་བརྩེའི་དབང་པོས་གུས་ཤིང་དྭང་བ་ཆེན་པོས་གསོལ་བ་བཏབ་པ་ལགས།། །།མི་འགྱུར་འཆི་མེད་གྲུབ་པའི་ཡེ་ཤེས་གཟུགས་ཅན་བཞིན། །སངས་རྒྱས་སྲས་བཅས་གདུང་འཚོབ་དམ་པར་འཁྲུངས་པ་ན། །ཟླ ཀུན་ནས་དགའ་བའི་ཕན་བདེའི་འབྱོར་པས་འཇིག་རྟེན་གསུམ། །དགེ་མཛད་རྡོ་རྗེ་འཆང་དབང་ཞབས་པདྨོར། །སྒོ་གསུམ་གུས་པ་ཆེན་པོས་མདུན་བདར་ཏེ་ཞུ་གསོལ། །གཟོད་ནས་རབ་ཞི་བདེ་བར་གཤེགས་པའི་སྙིང་པོའི་ཁམས། །ཐབས་གྲོལ་ལམ་གྱིས་ཟུང་འཇུག་འབྲས་བུར་སད་པ་ལས། །དག་པའི་སྒྱུ་འཕྲུལ་བྱེ་བ་ཕྲག་བརྒྱར་འཆར་ལས་དེང་། །མཚོ་སྐྱེས་བླ་མ་མངལ་གྱི་པདྨོར་བརྟེན་པ་སྙམ། །དེ་སླད་འཚོ་གཞེས་དཔག་བསམ་སར་པའི་ལྗོན་པ་ནི། །ཕྲིན་ལས་ཡལ་འདབ་ཕྱོགས་ཀྱི་བུ་མོའི་མཐར་རྒྱས་པས། །བསྟན་དང་འགྲོ་ལ་ཕན་བདེའི་འདོད་དགུ་མཆོག་སྦྱིན་པའི། །གྲགས་དཀར་ཟླ་བ་བདུད་རྩིར་བཅས་པའི་དཔལ་ལ་འཕྱ། །རྒྱུད་དེས་དད་སྤྲོའི་ཆུ་གཏེར་རྒྱས་པའི་དམན་བདག་ཀྱང་། །མགོན་ཁྱོད་ཐུགས་རྗེའི་སྐྱབས་སྦྱིན་གྲིབ་མར་ངལ་འཚོ་ཞིང་། །བསམ་གཏན་ཁང་བུར་ཞབས་པད་བརྟན་པའི་གསོལ་འདེབས་ལ། །རྩེ་གཅིག་འགྲུས་པས་སྐལ་བ་བཟང་པོའི་དགེ་མཚན་ཐོབ། །མཚམས་ཞུས། སླད་མའི་དུས་ཀྱང་འགྱུར་མེད་རྟག་པ་དམ་པའི་སྐུ། །སངས་རྒྱས་ཕྲིན་ལས་ཡོངས་སུ་རྫོགས་ཕྱིར་ཞབས་

---

^{[མ་དཔེ་གཟིགས་ན་འདིར་གནོན།]}

བརྟན་ཅིང་། །འགྲོ་ཀུན་དགའ་བའི་ལེགས་མཛད་སྲིད་ཞིར་ཁྱབ་པ་ནས། །འདིར་ཡང་ཡེ་ཤེས་གཟིགས་པ་དམ་པས་རྟག་ཏུ་སྐྱོངས། །ཞེས་ཞུ་གསོལ་འདེབས་མཚོན་བཀྲ་ཤིས་པའི་ལྷ་གོས་རབ་། དཀར། ལྗོན་འདབ་གསེར་ཐིག་བརྒྱད་པ་སྦག་གཉིས་བཅས་མདོ་ཁམས་སྡེ་དགེ་རྫོང་སར་དགོན་ནས་ངོར་ཐར་རྩེ་སྤྲུལ་མིང་པ་འཇམ་དབྱངས་མཁྱེན་བརྩེའི་དབང་པོས་གུས་པ་ཆེན་པོས་ཕུལ་བའི་ཞུ་ཆུང་།། ༈ །།འགྱུར་མེད་རྟག་པའི་ཡེ་ཤེས་ཀྱི། །ཕྲིན་ལས་སྲིད་འདིར་འཆར་བ་ན། །ཆོས་ཀྱི་སྒྲོན་མེས་འཇིག་རྟེན་གསུམ། །སྣང་མཛད་ཞབས་ཀྱི་པདྨོའི་དྲུང་། །གུས་པའི་བདུད་རྩིས་ཕྱེ་བ་ཡི། །ཡིད་ཀྱི་པདྨོ་གཞོན་ནུ་ལས། །ཞུ་གསོལ་མགྲིན་པའི་རྒྱུད་མང་པོར། །སྦྲང་རྩི་འཐུང་བའི་ཟོལ་གྱིས་འོང་། །ཤིན་ཏུ་ཞི་བ་ཆོས་ཀྱི་དབྱིངས། །སྤྲོས་པའི་འདུ་འགོད་མ་དམིགས་བཞིན། །ཁ་སྦྱོར་ལོངས་སྤྱོད་རྫོགས་པའི་སྤྲིན། །རྡོ་རྗེ་བཙུན་མོའི་ཚུལ་དུ་སྣང་། །དེ་ལས་སྒྱུ་འཕྲུལ་དྲྭ་བ་ཡི། །རྣམ་རོལ་ཅིར་ཡང་སྣང་བ་ལས། །འདི་ན་འཕགས་མ་ངུར་སྨྲིག་ཚུལ། །ས་གསུམ་སྐྱེ་རྒུའི་དཔལ་དུ་ཤར། །རྟག་ཏུ་དབྱིངས་རིག་ཟུང་འཇུག་པའི། །ཐིག་ལེ་ཆེན་པོར་མཉམ་གཞག་ཀྱང་། །ཐབས་དང་སྤྱོད་པ་མ་འགགས་པས། །བསྟན་འགྲོར་ཕན་བདེའི་ཆར་ཆེན་འབེབས། །ཨེ་མ་དེ་ཚུལ་བསམ་མི་ཁྱབ། །ཆ་ཤས་ཙམ་ཞིག་བསམ་པའི་མོད། །དད་དང་སྤྲོ་

---

^{[མ་དཔེ་གཟིགས་ན་འདིར་གནོན།]}

དང་རབ་གུས་པའི། །སེམས་བྱུང་གཟུགས་ཅན་བཞིན་དུ་གྱུར། །འདི་ན་མཆིས་པའི་དམན་པ་བདག །བསླབ་གྲོལ་ཁྱད་པར་དབེན་མོད་ཀྱི། །མགོན་ཁྱོད་ཐུགས་རྗེ་ལ་བརྟེན་ནས། །དབེན་གསུམ་མལ་དུ་བདེ་བར་མཆིས། །མཚམས་ཞུས། སླད་མའི་ཆར་ཡང་། གཟོད་ནས་མི་འགྱུར་འཆི་མེད་གཉུག་མའི་ཡེ་ཤེས་སྐུ། །ཚུ་རོལ་མཐོང་བའི་གདུལ་བྱར་མངོན་སུམ་སྣང་མཛད་ནས། །ཕྲིན་ལས་དཔག་ཡས་ཆོས་ཀྱི་སྒྲོན་མེའི་སྐལ་བཟང་བཅས། །བདག་ཀྱང་རྣམ་ཀུན་ཐུགས་རྗེའི་འབབ་སྟེགས་ཉིད་དུ་མཛོད། །ཅེས་རྩེ་གཅིག་གུས་པས་གསོལ་བ་འདེབས་མཚོན་བཀྲ་ཤིས་པའི་ལྷ་གོས། རིན་ཆེན་དང་པོ་སྲང་འཁོར་བཅས་མཁྱེན་བརྩེའི་དབང་པོས་ཕུལ་བ་དགེ། ༈ །། ཚཀཱརིཙྩམཉྙོཛལ བྷུཏརཱུཔསྱཀཱཡམཎིཀསཱུཏ། ཙྪརྗེཀདཤཀཾཏཱི:སྤྲསཱརེཎརུཙིཀརསུཤེཡནྟུ། ཤུཀླཚཏཱགྲདེབསསུཔཱུཛེ ཛཱིབཀཱདྷེཉྩཙིནྟབཤརཱཛེ། འགྱུར་མེད་ཆོས་དབྱིངས་ཆུ་གཏེར་ལས་སྐྱེས་པའི། །རྨད་དུ་བྱུང་བའི་གཟུགས་སྐུའི་མ་ཎི་ཀ །ལྷར་བཅས་གདུགས་དཀར་རྩེ་མོར་རབ་མཆོད་པ། །ཡིད་བཞིན་དབང་གི་རྒྱལ་པོ་འཚོ་གཞེས་གསོལ། ༡ ། ཤེས་བྱ་རྒྱ་མཚོར་འདུས་ཏེ་རེག་པའི་སྤྱན། །གསེར་ཉ་ལྟ་བུར་གསལ་བའི་མཚན་དཔེའི་སྐུ། །རིག་འཛིན་ཡོངས་ཀྱི་གཙུག་ན་མངོན་མཐོ་བ། །དབང་བཅུའི་བཅུད་ལེན་མཆོག་ཏུ་གྲུབ་གྱུར་ཅིག ༢ །ངོ་མཚར་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

བུམ་པ་བཟང་པོའི་དགེ་མཚན་ཅན། །དཔལ་གྱི་མགུར་ལས་ལེགས་གསུང་སེང་གེའི་རྒྱུད། །རིམ་དགུའི་ཐེག་པའི་དབྱངས་སུ་ཉེར་འབབས་པས། །འགྲོ་ཀུན་མ་རིག་གཉིད་ལས་བསླང་མཛད་གསོལ། ༣ །སྤྲོས་པའི་རྡུལ་དང་མི་མཛའ་འོད་གསལ་ཐུགས། །མཁྱེན་གཉིས་འདབ་བརྒྱ་རྒྱས་པའི་པདྨ་དཀར། །ངེས་པར་ཞིང་ཁམས་འདི་ལས་མི་གཡོ་བའི། །གཟིགས་པས་ལྷག་པར་དགོངས་ཤིག་སྙིང་རྗེའི་གཏེར། ༤ །སྲས་བཅས་རྒྱལ་བའི་རྣམ་པར་ཐར་པ་དང་། །མི་ཕྱེད་ཡོན་ཏན་མཐའ་ཡས་གཡས་འཁྱིལ་དུང་། །སྲིད་ཞིའི་ཁམས་ན་སྙན་པ་ཟླ་མེད་པས། །རྒུད་ཅིང་ཕོངས་པའི་རིམས་ནད་འཇིལ་བར་མཛོད། ༥ །རྣམ་བཞིའི་ཕྲིན་ལས་དཔལ་གྱི་བེའུ་ནི། །བཟུང་བ་མེད་པར་ཕྱོགས་ཀྱི་མཐར་འགྲོ་བས། །ཡིད་ཅན་ཀུན་གྱི་རེ་བ་སྐོང་མཛད་པས། །འཆི་མེད་གྲུབ་པའི་རྒྱལ་རྔ་རྟག་ཏུ་བརྡུངས། ༦ །མདོར་ན་སྔ་འགྱུར་རྡོ་རྗེའི་ཐེག་པ་ཡི། །བསྟན་པའི་རྒྱལ་མཚན་སྲིད་ན་སྒྲེང་མཛད་མཆོག །བསྐལ་བརྒྱར་ཞབས་བརྟན་ཆོས་འཁོར་བསྐོར་བ་དང་། །བདག་ཀྱང་བྱང་ཆུབ་བར་དུ་རྗེས་སུ་ཟུངས། ༧ ། སྤྱི་ཕན་བདེའི་ལེགས་མཛད་གསེར་གྱི་འཁོར་ལོ་ཡིས། །བསྐལ་བཟང་གླིང་བཞིའི་ཁྱོན་ལ་དབང་བསྒྱུར་བས། །སྙིགས་མའི་འགྱུར་བ་མཐའ་དག་ཕམ་མཛད་དེ། །རྫོགས་ལྡན་དང་པོའི་དགེ་མཚན་སྣང་གྱུར་ཅིག ༨།

---

^{[མ་དཔེ་གཟིགས་ན་འདིར་གནོན།]}

ཅེས་བརྗོད་བྱ་དང་རྗོད་བྱེད་གཉིས་ཀ་བཀྲ་ཤིས་པའི་དགེ་མཚན་ཕུན་སུམ་ཚོགས་པའི་རྒྱན་གྱིས་མཛེས་པར་སྤྲས་པའི་སྲ་སྟིའི་དབྱངས་སྙན་མངོན་པར་བསྒྲགས་ཏེ། མི་ཕྱེད་རྩེ་གཅིག་གུས་པས་གསོལ་བ་འདེབས་རྟེན་དགེ་ལེགས་ཀྱི་རེ་ཁཱས་བཀང་བའི་ལྷ་རྫས། སྐུ་གསུང་ཐུགས་རྡོ་རྗེའི་སྣང་བརྙན། བཅས་རབ་ཚེས་དཀར་པོའི་ལོ་སྔོན་ཟླ་བའི་དཀར་ཕྱོགས་ཀྱི་ཚེས་བཅུའི་དུས་དགེ་བ་བྱ་བྲལ་ཆོས་རྗེ་ཤཱཀྱའི་བཙུན་པ་འཇམ་དབྱངས་མཁྱེན་བརྩེའི་དབང་པོའམ། རིག་འཛིན་པདྨའི་བྱིན་རླབས་ཆ་ཙམ་དུ་ཐོབ་པ་པདྨ་འོད་གསལ་མདོ་སྔགས་གླིང་པའི་སྡེས་མདོ་ཁམས་སྡེ་དགེའི་མངའ་རིས་རྫོང་གསར་བཀྲ་ཤིས་ལྷ་རྩེའི་ཆོས་གྲྭ་ནས་བསམ་པ་དག་ཅིང་སྦྱོར་བ་གུས་པས་འབུལ་ལམ་ཞུས་པ་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །། པདྨོབིསཱུཊཔཉྩེའི༽ བྷརཱཎཱནིདྷིཙརླསཱགརཱི་ནྡཤུདྡྷསྱཱདཱིཙྪཏཱགཱཏྲིབྷབིསིཏཱཧིཏཾ བྱསིདྡྷཾབྷབཏཱམཱརཎེ༔ པདྨ་ལྟ་བུར་རྒྱས་པའི་ཡེ་ཤེས་དང་། །ཀུན་ཏུ་བཟང་པོའི་སྤྱོད་པ་རྒྱ་མཚོའི་གཏེར། །ས་གསུམ་འགྲོ་ལ་སྨན་མཛད་གདུགས་དཀར་པོ། །རྣམ་ཀུན་འཆི་མེད་གྲུབ་པ་ཉིད་གྱུར་ཅིག ༡ །ཤིན་ཏུ་ཞི་བ་ཆོས་སྐུའི་ཆུ་གཏེར་ལས། །སྙིང་བརྩེའི་གསེར་ཉ་གཡོ་བའི་ཟློས་གར་ནི། །གཞན་ཕན་མཁྱེན་བརྩེའི་རྣམ་པར་རོལ་པའི་སྐུ། །ངེས་པར་ཞིང་ཁམས་འདི་ལས་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

འཕོ་མེད་གསོལ། ༢ །བཀྲ་ཤིས་གཏེར་གྱི་བུམ་པའི་དགེ་མཚན་ཅན། །དཔལ་གྱི་མགུར་ལས་ཐེག་གསུམ་འདོད་རྒུའི་ཆར། །གཏན་པ་མེད་པར་འཇོ་བའི་ལེགས་བཤད་གསུང་། །ལྷར་བཅས་སྲིད་ན་རྟག་ཏུ་སྙན་གྱུར་ཅིག ༣ །སྒྲིབ་གསུམ་རྡུལ་དང་ནམ་ཡང་མི་མཛའ་བའི། །མཁྱེན་གཉིས་མཚར་སྡུག་རྫོགས་པའི་པདྨ་དཀར། །འགྲོ་ལ་རྗེས་ཆགས་ཐུགས་རྗེའི་འདབ་རྒྱས་པའི། །གཟིགས་པས་བདག་སོགས་གདུལ་བྱར་ལྷག་པར་དགོངས། ༤ །བྲལ་དང་རྣམ་པར་སྨིན་པ་མཐའ་ཡས་པའི། །ཡོན་ཏན་རྨད་བྱུང་བཀྲ་ཤིས་གཡས་འཁྱིལ་དུང་། །གངས་ཅན་རི་བོའི་སུལ་ན་མངོན་སྣང་བའི། །སྐལ་བཟང་ནམ་ཡང་ནུབ་པ་མེད་གྱུར་ཅིག ༥ །རྨད་བྱུང་ཐབས་ལ་མཁས་པའི་རི་མོ་ཅན། །ཕྲིན་ལས་དཔལ་གྱི་བེའུ་འོད་འབར་བ། །འཇིག་རྟེན་དབང་ཕྱུག་དགྱེས་པའི་ཞིང་ཁམས་འདིར། །བགྲང་ཡས་བསྐལ་པ་རྒྱ་མཚོར་འཇུག་པར་ཤོག ༦ །མདོར་ན་རྡོ་རྗེའི་གསང་གསུམ་རྒྱུན་གྱིས་རྟག །འཆད་རྩོད་རྩོམ་པའི་ལེགས་མཛད་སྲིད་མཐར་ཁྱབ། །བཤད་སྒྲུབ་བསྟན་པའི་རྒྱལ་མཚན་ཕྱོགས་བཅུར་བསྒྲེངས། །འགྲོ་ཀུན་བདེ་སྐྱིད་ལྷུན་གྱིས་གྲུབ་པར་ཤོག ༧ །བདག་ཀྱང་རྣམ་གྲོལ་འབྲས་བུར་མཆིས་ཀྱི་བར། །ཡེ་ཤེས་གཟིགས་པས་འབྲལ་མེད་རྗེས་བཟུང་ནས། །བྱང་ཆུབ་སེམས་གཉིས་གསེར་གྱི་འཁོར་ལོ་ཡིས། །

---

^{[མ་དཔེ་གཟིགས་ན་འདིར་གནོན།]}

ཕན་བདེའི་དཔལ་ལ་དབང་བསྒྱུར་བཀྲ་ཤིས་སྩོལ། ༨ །ཅེས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་ཨོ་རྒྱན་མཚོ་སྐྱེས་རྡོ་རྗེའི་རྒྱལ་ཚབ། ཡོངས་རྫོགས་བསྟན་དང་འགྲོ་བའི་སྐྱབས་དང་། མགོན་དང་། དཔུང་གཉེན་གཅིག་པུར་གྱུར་པ་རྗེ་བཙུན་མཆོག་གི་སྤྲུལ་པའི་སྐུ་རིན་པོ་ཆེ་གང་ཉིད་ཕྱོགས་འདིར་ཆིབས་ཀྱི་ཁ་ལོ་མངོན་པར་བསྒྱུར་ཞིང་། མཐོང་བའི་དོན་ཡོད་པའི་གསེར་ཞལ་རིན་པོ་ཆེ་མཇལ་བ་དང་། ལེགས་གསུང་བདུད་རྩིའི་དགའ་སྟོན་ལྷུག་པར་སྩལ་ཞིང་། དམིགས་མེད་ཐུགས་རྗེའི་འཇུག་པས་དགྱེས་བཞིན་དུ་རྗེས་སུ་བཟུང་བའི་སྐལ་བ་བཟང་པོའི་བཀའ་དྲིན་བསམ་གྱིས་མི་ཁྱབ་པར་ཐོབ་པའི་ལེགས་འབུལ་དང་། རྡོ་རྗེའི་གསང་གསུམ་ཕྲིན་ལས་དང་བཅས་པ་རྒྱུན་གྱིས་རྟག་ཅིང་། ཡུལ་དབུས་དག་པའི་ཞིང་ཁམས་ཆེན་པོར་ཞབས་པད་བསྐྱོད་པའི་ཐུགས་ཀྱི་བཞེད་དགུ་ལྷུན་གྱིས་གྲུབ་སྟེ། སླར་ཡང་རིང་མིན་ཕྱོགས་འདིའི་གདུལ་བྱའི་བསོད་ནམས་ཀྱི་མགྲོན་དུ་ཞབས་མཐིལ་བཀྲ་ཤིས་ཀྱི་འཁོར་ལོ་གེགས་མེད་དུ་བཀོད་པ་དང་ཆབ་གཅིག་ཕུན་སུམ་ཚོགས་པ་བྱེ་བ་སྙེད་ཀྱི་དུས་སྟོན་ལ་རྟག་ཏུ་ལོངས་སྤྱོད་ཆོག་པར་རྩེ་གཅིག་གུས་པས་གསོལ་བ་འདེབས་པའི་རྟེན་འབྱུང་གི་མཎྜལ་མཚོན་པར་བཀྲ་ཤིས་པའི་ལྷ་གོས་དཀར་པོ་སྲིད་དུ་རིང་བའི་མགུལ་དར། སྐུ་རྟེན་དུ་རྗེ་བཙུན་འཇམ་པའི་དབྱངས་ཀྱི་སྣང་བརྙན་བྱིན་ཅན།

---

^{[མ་དཔེ་གཟིགས་ན་འདིར་གནོན།]}

གསུང་རྟེན་དུ་འཇམ་དཔལ་སྒྱུ་འཕྲུལ་དྲྭ་བའི་རྒྱུད་ཀྱི་གླེགས་བམ། ཐུགས་རྟེན་དུ་བཀའ་གདམས་གདུང་རྟེན་རྙིང་མ། ཡོན་ཏན་ཡོངས་རྫོགས་འཕགས་མ་ཡིད་བཞིན་འཁོར་ལོའི་བཟླས་ཕྲེང་། ཕྲིན་ལས་སྙན་པར་གྲགས་པའི་རྟེན་འབྲེལ་དུ་ཕྱག་ཏིང་དངུལ་གྱི་ཉག་ཐག་ཅན། བཅས་བཀྲ་ཤིས་གྲུབ་པ་ཉེར་བདུན་གྱི་གྲངས་ལྡན་འདི་དག །མགོན་པོ་གང་གི་བཀའ་འབངས་ཀྱི་ཐ་ཆུང་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་བསམ་པ་དག་ཅིང་སྦྱོར་བ་གུས་པས་འབུལ་ལམ་ཞུས་པ་ལགས་ན་ཡེ་ཤེས་གཟིགས་པ་དམ་པས་ཡུད་ཙམ་བདག་གིར་བཞེས་ཏེ་ཇི་ལྟར་གསོལ་བ་བཏབ་པའི་དོན་ཐམས་ཅད་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།ཙསིབཙརདྭཡོམཧཱསུརཱཛུབནྟིཙྪནདཱཤབཎཀམཡཱརསཱརིཎཱིནཱམསྱཔྲསཱརཤུབྷྲཱུྃ། སུདཱིབུདྡྷཔཱརནིརྨཀཱཡཾཀལྤསཱགརེཥཛིབཏཾསཿ རིག་འཛིན་གྲུབ་པའི་གསེར་གྱི་འཁོར་ལོ་ཡིས། །ཟུང་འཇུག་རྒྱལ་ཐབས་ཆེ་ལ་དབང་བསྒྱུར་བ། །སངས་རྒྱས་གཉིས་པ་མཆོག་གི་སྤྲུལ་པའི་སྐུ། །བསྐལ་པ་རྒྱ་མཚོར་འཚོ་གཞེས་ཚུ་བརྟན་གྱུར་ཅིག ༡ །བསོད་ནམས་དཔག་ཡས་ཆུ་གཏེར་ལས་བྱུང་ཞིང་། །ཡེ་ཤེས་ཡོངས་རྫོགས་མཚན་དཔེའི་མཛེས་སྐུ་ཆེ། །སྲིད་ཞིའི་གཙུག་རྒྱན་ཡིད་བཞིན་ནོར་གྱི་བུ། །ངེས་པར་ཞིང་ཁམས་འདི་ལས་༼འདིའི་ནང་རི་མོ་ཡོད།༽

---

^{[མ་དཔེ་གཟིགས་ན་འདིར་གནོན།]}

འཕོ་མེད་གསོལ། ༢ །ཤེས་རབ་རྡོ་རྗེ་བཙུན་མོའི་སྒྲ་དབྱངས་ལྷ། །ཐབས་མཆོག་མགྲིན་པའི་པདྨོར་ངལ་བསོས་པས། །སྡེ་སྣོད་རྒྱུད་སྡེའི་ལེགས་གསུང་བདུད་རྩིའི་ཆར། །སྐལ་བཟང་གདུལ་བྱའི་དཔྱིད་དུ་འབེབས་པར་མཛོད། ༣ །རིག་དང་བརྩེ་བ་མི་ཕྱེད་སྙིང་སྟོབས་ཕུལ། །མཐའ་གཉིས་ཡུལ་གྱི་བསྙེངས་བྲལ་བློན་པོ་མཆོག །གང་གི་ཐུགས་རྗེའི་གཟིགས་པས་བསིལ་ལྡན་ལྗོངས། །བྱམས་བསྟན་མ་ཤར་བར་དུ་ལྷག་པར་སྐྱོངས། ༤ །བྲལ་དང་རྣམ་པར་སྨིན་པ་རྨད་བྱུང་བའི། །ཡོན་ཏན་ནོར་བུའི་དྲ་བས་རབ་བརྗིད་པ། །རྒྱལ་སྲས་སྤོས་ཀྱི་གླང་པོའི་ཁྱུ་མཆོག་ཆེས། །སྙིགས་མའི་དུས་ཀྱི་རྒུད་པ་འཇིལ་བར་མཛོད། ༥ །ཕྲིན་ལས་རླུང་གི་ཤུགས་ལྡན་ཅང་ཤེས་རྟ། །རྫུ་འཕྲུལ་རྐང་བཞིའི་ཏིང་འཛིན་གྲུབ་པའི་དཔལ། །ས་གསུམ་བསྟན་འགྲོའི་དཔྱིད་དུ་འཚོ་གཞེས་ཤིང་། །ཕན་བདེའི་དགེ་མཚན་མཐའ་དག་རྒྱས་པར་མཛོད། ༦ །མདོར་ན་བདུད་སྡེའི་གཡུལ་འཇོམས་དམག་དཔོན་བཞིན། །སྲས་བཅས་རྒྱལ་བའི་མཐུ་སྟོབས་ཡོངས་རྫོགས་པས། །ཡིད་སྲུབས་དཔུང་བཅས་རབ་ཏུ་ཕམ་མཛད་དེ། །ཐུབ་བསྟན་རྒྱལ་རྔ་སྲིད་པའི་རྩེ་མོར་བརྡུང་། ༧ །བདག་ཅག་རྣམས་ཀྱང་བྱང་ཆུབ་སྙིང་པོའི་བར། །ཡེ་ཤེས་གཟིགས་པ་དམ་པས་དབུགས་དབྱུང་མཐུས། །དོན་གཉིས་ལྷུན་གྱི་གྲུབ་པའི་དགེ་མཚན་ཆེའི། །བཀྲ་ཤིས་སྣང་བ་རྟག་ཏུ་

---

^{[མ་དཔེ་གཟིགས་ན་འདིར་གནོན།]}

རྒྱས་མཛད་གསོལ། ༨ །ཅེས་བརྗོད་བྱ་དང་རྗོད་བྱེད་གཉིས་ཀ་དགེ་ཞིང་ཤིས་པའི་རྟེན་འབྱུང་ལས་བརྩམས་ཏེ་ཚིགས་སུ་བཅད་པ་མངྒ་ལའི་གྲངས་ཀྱིས་རྩེ་གཅིག་ཏུ་གསོལ་བ་འདེབས་མཚོན་བཀྲ་ཤིས་པའི་ལྷ་གོས། སྐུ་གསུང་ཐུགས་རྡོ་རྗེའི་སྣང་བརྙན་བཅས་ཤཱཀྱའི་དགེ་སློང་མང་ཐོས་སྤོང་བ་པ་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་ནམ། རིག་འཛིན་པདྨའི་བྱིན་རླབས་ཆ་ཙམ་བཀའ་དྲིན་དུ་ཐོབ་པ་པདྨ་འོད་གསལ་མདོ་སྔགས་གླིང་པའི་སྡེས་མདོ་ཁམས་སྡེ་དགེའི་མངའ་རིས་རྫོང་སར་བཀྲ་ཤིས་ལྷ་རྩེའི་ཆོས་གྲྭ་ནས་གུས་པ་ཆེན་པོས་ཕྱག་དང་བཅས་ཏེ་ཕུལ་བ་དེ་དེ་བཞིན་༣། དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།མུནིཤཱསནམཎྜདར དྷཱཛབཱབྷབནེབྷོབྷསཿ ཙྪནོནབབཎྜཀདྲྀཏཏིནཱམསྱཔྲསྟརེ། བྷདྲཀརྨཁབིཥཎཱཀྵིམཱི བྷབཏུདྷཱརནིཛཱིབནྟ། །ཐུབ་པའི་བསྟན་པ་ནོར་བུའི་མེ་ལོང་ནི། །རྒྱལ་མཚན་ལྟ་བུར་སྲིད་ན་གསལ་མཛད་པ། །དཔལ་ལྡན་བཟང་པོའི་ཕྲིན་ལས་མཁའ་ཁྱབ་གང་། །ཀུན་ཏུ་འཆང་བའི་ངོ་བོར་འཚོ་གཞེས་གསོལ། ༡ །སྲིད་ཞིའི་གདུང་སེལ་གི་ཝཾ་མཆོག་གི་སྤྲིན། །རྒྱུན་མཐའི་འཆི་མེད་ལམ་དུ་དཀྲིགས་པ་ལས། །ངེས་པ་ལྔ་ལྡན་ལོངས་སྤྱོད་ཆེན་པོའི་གཞི། །རྡོ་རྗེ་སེམས་དཔའི་ངོ་བོར་འཚོ་གཞེས་གསོལ། ༢ །དྲི་མེད་ཞོ་ཡི་སྙིང་པོ་

---

^{[མ་དཔེ་གཟིགས་ན་འདིར་གནོན།]}

ལྟར་དཀར་བའི། །ཆོས་ཚུལ་བདུད་རྩིའི་རིགས་ཅན་རྣམ་གསུམ་གྱི། །ཐར་བདེའི་པདྨོ་རྟག་ཏུ་རྒྱས་མཛད་པ། །ཤཱཀྱ་སེང་གེའི་ངོ་བོར་འཚོ་གཞེས་གསོལ། ༣ །བཀྲ་ཤིས་དུརླའི་ལྗོན་ལྟར་ཡིད་འོང་བ། །ཟླ མཚན་དཔེའི་གཟུགས་སྐུ་གང་གིས་དྲན་པའི་མོད། །ཚེ་དང་ཡེ་ཤེས་སྐལ་བཟང་སྦྱིན་མཛད་པ། །དཔག་མེད་མགོན་པོའི་ངོ་བོར་འཚོ་གཞེས་གསོལ། ༤ །མགྲིན་པ་གཡས་འཁྱིལ་དུང་གི་མཚན་བཟང་ལས། །སྡེ་སྣོད་རྒྱུད་སྡེའི་དབྱངས་སྙན་སྒྲོགས་པའི་གསུང་། །སྲིད་པའི་རིམས་ནད་རྒྱུ་བ་ཕམ་བྱེད་པ། །རྣམ་པར་རྒྱལ་མའི་ངོ་བོར་འཚོ་གཞེས་གསོལ། ༥ །ཤེས་རབ་སྙིང་རྗེའི་གཞན་དབང་ལ་ཆགས་པས། །ཇི་ལྟ་ཇི་སྙེད་གཟིགས་པའི་ཡེ་ཤེས་ཐུགས། །གདུལ་བྱའི་དོན་ཀུན་གྲུབ་སྟེར་བིཝའི་འབྲས། །ཡིད་བཞིན་འཁོར་ལོའི་ངོ་བོར་འཚོ་གཞེས་གསོལ། ༦ །མདོར་ན་སྲས་བཅས་སྟོབས་བཅུ་མངའ་ཀུན་གྱི། །༧ ཡོན་ཏན་ཡོངས་རྫོགས་ལི་ཁྲིའི་ཐིག་ལེ་ཡིས། །བཤད་སྒྲུབ་ལས་ཀྱི་ཕུན་ཚོགས་དབང་མཛད་པ། །པདྨ་སཾ་བྷའི་ངོ་བོར་འཚོ་གཞེས་གསོལ། ༧ །དཔལ་ལྡན་བླ་མ་བསྐལ་བརྒྱར་ཞབས་བརྟན་ཅིང་། །འབྲེལ་ཚད་དོན་ལྡན་གྲུབ་པའི་ཡུངས་ཀར་གྱིས། །ཡིད་སྲུབས་དཔུང་བཅས་ཕྱོགས་ལས་རྣམ་རྒྱལ་བའི། །སྙན་པས་ས་གསུམ་ཀུན་ཏུ་ཁྱབ་གྱུར་ཅིག ༨ །ཅེས་མངོན་པར་འདོད་པའི་དོན་གྱི་མཆོག་གཅིག་

---

^{[མ་དཔེ་གཟིགས་ན་འདིར་གནོན།]}

པུར་མི་ཕྱེད་པའི་སྨོན་པས་མཚམས་སྦྱར་ཏེ། བརྗོད་བྱ་དང་རྗོད་བྱེད་གཉིས་ཀ་ཕུན་སུམ་ཚོགས་པའི་བཀྲ་ཤིས་ཀྱི་དབྱངས་སྙན་མངོན་པར་བསྒྲགས་པ་དང་བཅས། དངོས་པོ་ཀུན་གྱིས་བཏུད་ཅིང་གསོལ་བ་འདེབས་པའི་མཎྜལ་མཚོན་བྱེད་ཙམ་དུ་ལྷ་རེག་རབ་དཀར་ཟླ་ཞུན་གྱི་མདངས་ཅན་དགེ་ལེགས་ཀྱི་རེ་ཁཱས་བཀྲ་བའི་མགུལ་དར། སྐུ་གསུང་ཐུགས་རྡོ་རྗེའི་སྣང་བརྙན་ཁྱད་འཕགས། བཅས་རྣམ་གྲངས་བརྒྱ་ཕྲག་གཅིག་ལ་བཀྲ་ཤིས་པའི་གྲངས་ཀྱིས་ལྷག་པ་འདི་རྣམས་རྗེ་བཙུན་འཁོར་ལོའི་དབང་ཕྱུག་མཁས་བཙུན་བཟང་པོའི་ཁྱུ་མཆོག་ཆེན་པོ་གང་ཉིད་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་བརྒྱ་ཕྲག་ལྷག་པའི་གསུང་གི་བདུད་རྩིས་སྐལ་བ་བཟང་པོར་གྱུར་པའི་རིགས་སྐྱེས་པདྨ་སཾ་བྷ་བ་དགྱེས་པའི་འབངས་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོས་བསམ་པ་དག་ཅིང་སྦྱོར་བ་གུས་པས་འབུལ་ལམ་ཞུ་བ་ལགས་ན་ཡེ་ཤེས་གཟིགས་པའི་སྤྱན་རས་ཀྱིས་མེ་ཏོག་ཕྲ་མོ་མཆོད་རྫས་ཀྱི་དཔེ་ལྟར་ཡུད་ཙམ་བདག་གིར་བཞེས་ཏེ་ཇི་ལྟར་གསོལ་བ་བཏབ་པའི་དོན་ཐམས་ཅད་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།ལགས་རིན་པོ་ཆེར། བོད་ཁམས་བདེ་ཐབས་ཀྱི་བཀའ་འདྲིའི་ཐད། སྤྱིར་བཀའ་གཏེར་དག་སྣང་གི་ལུང་

---

^{[མ་དཔེ་གཟིགས་ན་འདིར་གནོན།]}

བསྟན་སྔ་མ་ཕལ་མོ་ཆེ་ནི་སྐབས་དེ་དང་དེར་དགོངས་པའི་དུས་ཚོད་ཐལ་སོང་བ་ཤས་ཆེ་ཞིང་། མ་འོངས་པར་དགོངས་པ་རེ་རེ་ཙམ་ཡོད་རུང་ཞིབ་མོའི་བརྡ་བཀྲོལ་མཁན་ཞིག་མ་བྱུང་ན་གོ་དཀའ། གཞན་དེང་དུས་ཕྱོགས་གང་དུའང་ལུང་བསྟན་མངོན་ཤེས་འཆད་མཁན་ཐན་ཐུན་ཡོད་སྲིད་ཀྱང་། དུས་ཚོད་ཀྱིས་མ་འཁྱོངས་པ་ལྟ་བུས་ཐོག་ཁེལ་ཡིད་བརྟན་ཅན་དཀོན། གུས་ཕྲན་རང་ནི་སོ་སྐྱེ་ཆེས་ཐ་ཤལ་དུ་གྱུར་པས་ལུང་བསྟན་མངོན་ཤེས་ལྟ་ཅི། ཡོལ་བ་ཕྱི་ནང་གི་ལྐོག་གྱུར་ཙམ་ཡང་མི་ཤེས་སྟབས་ཅི་ཞུ་ཆེར་མི་སྣང་རུང་། གཏེར་ཆེན་མཆོག་གྱུར་གླིང་པ་འདི་ཉིད་ཚད་མ་གསུམ་གྱིས་ལེགས་པར་གྲུབ་པའི་རྩོད་བྲལ་དུས་བབས་ཀྱི་གཏེར་སྟོན་འཁྲུལ་མེད་དུ་ངེས་པས་དྲངས་ཏེ། དེ་ལོ་སྔ་མ་རང་ནས་རྒན་མོ་བསམ་བཟང་གིས་ལུང་ཞུས་དེ་བཞིན། འཇམ་མགོན་ཀོང་སྤྲུལ་རྡོ་རྗེ་འཆང་བརྒྱུད་ནས་བཀའ་ཕེབས་པའི་སྐབས་འབུལ་ལམ་ཞུས་པ་དགོངས་འབྱོར་བྱུང་བ་ཤིན་ཏུ་བཀའ་དྲིན་ཆེ་ཞིང་། རེ་ཞིག་དེར་མ་འཐུས་པའི་གུང་དུ་སྙན་འབུལ་འོས་པ་ཆེར་མི་སྣང་བ་དང་། སླད་ནས་གཏེར་ཆེན་རང་ལ་བཀའ་འདྲི་གནང་འཐུས་ལས་མ་འདས་རུང་། སྤྱི་བབ་ལུང་བསྟན་སྔ་ཕྱིའི་དགོངས་དོན་ལྟར་ན། གཙོ་ཆེན་བོད་ཁམས་ཕན་བདེའི་འབྱུང་གནས་ཡིད་བཞིན་ནོར་བུ་ལྟ་བུ་ནི་སྐྱབས་མགོན་རྒྱལ་བ་ཡབ་སྲས་དང་། ཆོས་འཁོར་རྣམ་གསུམ་ཁོ་ནར་རག་

---

^{[མ་དཔེ་གཟིགས་ན་འདིར་གནོན།]}

ལས་པས། སྐྱབས་མགོན་ཆེན་མོའི་ཞབས་བརྟན་དུ་གནས་ཆེན་རྣམས་སུ་ཚེ་དཔག་མེད་པའི་སྐུ་དང་། འདྲ་ཞལ་བཞེངས་ཤིང་ཚེ་སྒྲུབ་ཟབ་མོའི་རྒྱུན་འཛུགས། རྫོང་གཞིས་ཐམས་ཅད་དུ་རི་རྒྱ་ཀླུང་རྒྱ་ལེགས་པར་བསྡམ། ལྷག་པར་སྲོག་བསླུ་གྲངས་མང་དཔུང་བསྐྱེད། ཆོས་འཁོར་རྣམ་གསུམ་དུ་ཉམས་གསོ་མཆོད་འབུལ་སོགས་དང་། ཆོས་འཁོར་གཞན་གྱི་རྩ་བའང་ཁྲ་འབྲུག་ཁོ་ན་གལ་ཆེ་བར་བསྔགས་པས་ཉམས་གསོ། མཆོད་འབུལ་སོགས་དང་། གཞན་ཡང་གངས་ཅན་པའི་མེ་བཙའ་དབུས་ཆོས་འཁོར་གསུམ། ཕྱོགས་སོ་སོའི་ཀོང་པོ་བུ་ཆུ། ལྷོ་བྲག་མཁར་ཆུ། རུ་ལག་གྲམ་པ་རྒྱང་། གཡས་རུ་གཙང་འགྲམ་རྣམས་སུ་ཉམས་པ་གསོ་བ། རབ་གནས་བསྐྱར་བ། མཆོད་པ་འབུལ་བ་དང་ཚོགས་སྐོང་། མཐའ་དམག་གནོན་པ། འགོང་པོ་ཨར་གཏད། ལས་བཞིའི་སྦྱིན་སྲེག །སྒྲུབ་ཆེན་སྨན་སྒྲུབ། གནས་ཆེན་བྱིན་འབེབས་བཀྲ་ཤིས་ཀྱི་མངའ་གསོལ་སོགས་བགྱིས་ན་བོད་ཁམས་མཐའ་དབུས་ཀུན་ཏུ་བདེ་བར་འབྱུང་ཞེས་ཨོ་རྒྱན་རིན་པོ་ཆེའི་ལུང་གིས་ཡང་ཡང་བསྔགས་པ་དབྱིངས་རིན་པོ་ཆེར་གསལ་བ་ལྟར་ལགས་ཤིང་། བྱེ་བྲག་ཀླ་ཀློའི་གྲུབ་མཐའ་འཛིན་པ་ཐན་ཀྲུ་རྒྱ་ལོའི་ཆོས་ལུགས་སྤེལ་བའི་ཉུལ་མ་སླེབས་པ་འདི་ཐད། སྤྱིར་དཔལ་དུས་ཀྱི་འཁོར་ལོ་བསྡུས་པའི་རྒྱུད་ལས། རིགས་ལྡན་རིགས་ཀྱི་དབུས་སུ་

---

^{[མ་དཔེ་གཟིགས་ན་འདིར་གནོན།]}

ལག་པས་བསྒྱུར་བའི་བུ་དང་ཚ་བོ་དག་ནི་འདས་གྱུར་པ། །དེ་ཡི་དུས་སུ་ངེས་པར་མཁའི་ཡུལ་དུ་ཀླ་ཀློའི་ཆོས་ནི་རབ་ཏུ་འཇུག་པ་དག་ཏུ་འགྱུར། །ཇི་སྙེད་ཀླ་ཀློའི་དབང་པོ་གདུག་པ་ཇི་སྙེད་ལྷ་ཡི་མཆོག་གིས་བཏུད་པའི་དྲག་པོའི་སྔགས་ལྡན་ཡང་། །དེ་ཡི་དུས་སུ་གཉིས་པོ་དག་ཀྱང་ས་ཡི་སྟེང་གི་གནས་སུ་འཁྲུགས་པ་དྲག་པོ་འབྱུང་བར་འགྱུར། །ཞེས་སོགས་ནས། ལོ་ནི་བརྒྱ་དང་བརྒྱ་ཕྲག་གཅིག་ཏུ་ངེས་པར་གནས་ཏེ་དེ་ནས་ཀླ་ཀློའི་ཆོས་ནི་ཉམས་པར་འགྱུར། །དེ་ནས་ལོ་ནི་སྟོང་ཕྲག་ཉི་ཤུ་ལག་པ་བརྒྱ་དང་བྲལ་བར་སངས་རྒྱས་ཆོས་ནི་རབ་ཏུ་འཇུག་པར་འགྱུར། །ཞེས་པའི་བར་གྱིས་ཞིབ་མོར་བཀའ་སྩལ་པ་ལྟར། ནམ་ཕུགས་ཀླ་ཀློའི་འཇུག་པས་འཕགས་ཡུལ་ནས་བརྩམས་ཤམྦྷ་ལའི་བར་དུ་བཀབ་པ་ནི་དུས་ཀྱི་མཚན་ཉིད་དུ་ལུང་བསྟན་པས་ཅིར་ཡང་བྱར་མེད་མོད། རེ་ཞིག་བསོད་ནམས་མ་ཡིན་པ་ཀླ་ཀློའི་གཉེན་པོ་བསོད་ནམས་ཀྱི་བྱ་བ་རླབས་པོ་ཆེ་བསྒྲུབས་ན་དེ་དང་དེའི་ཚོད་ཀྱི་ལོ་ཟླ་ཞག་དུས་ཕྱིར་འགྱངས་པའི་ངང་བསྲིང་རྒྱུ་ནི་ངེས་པར་ཡོད་ལ། ལར་དུས་འཁོར་གྱི་དགོངས་པ་ལྟར་བྱས་ན་ད་དུང་རེ་ཞིག་བོད་དུ་ཀླ་ཀློ་དངོས་འཇུག་པར་མི་འགྱུར་བས། རིང་མཐའ་དྲུག་ཅུ་སྐོར་གཅིག་ནས། ཐུང་མཐའ་ལོ་སྐོར་ཙམ་གྱི་བར་ཧ་ཅང་ངན་པ་རང་མི་འབྱུང་ངམ་སྙམ་པ་དང་། ཐན་ཀྲུ་རྐྱའོའི་ཆོས་ལོག་སྤེལ་མཁན་དེ་ལའང་དེ་སྔ་

---

^{[མ་དཔེ་གཟིགས་ན་འདིར་གནོན།]}

ལྟར་དམ་བསྒྲག་བཀའ་དྲིན་བསྐྱངས་ན་ཐུང་གིས་རྒྱ་ཆེ་མུ་མེད་རང་དེ་ཙམ་ཨེ་འོང་ན་སྙམ་ལགས་ཤིང་། གང་ལྟར་ས་མཚམས་འཛིན་པའི་དམ་བསྒྲག་དང་། བསོད་ནམས་ཀྱི་བྱ་བ་རླབས་པོ་ཆེའི་ཆེད་དུ་ཆོས་འཁོར་གསུམ་དུ་མཆོད་འབུལ། གྲྭ་ས་ཆེན་པོ་རྣམས་ཀྱི་དགེ་འདུན་ཐུགས་མཐུན་ཅིང་བཤད་སྒྲུབ་གོང་འཕེལ། ཀླ་ཀློ་དངོས་ཀྱི་གཉེན་པོར་ཆེ་བ་དཔལ་དུས་ཀྱི་འཁོར་ལོའི་སྒྲུབ་མཆོད་རྩེ་གྲུ་འཛིན་གྱི་ཕོ་བྲང་དང་། ཞྭ་ལུ། གངས་དཀར། བཀྲ་ཤིས་ཆོས་སྡེ་སོགས་སྔར་ཡོད་ཉམས་གསོ། སྔར་མེད་གསར་འཛུགས། ལྷག་དོན་དུས་ཕྱིས་རི་བོ་དགའ་ལྡན་གྱིས་བཀྲ་ཉམས་པ། བདག་ཚོ་བོད་དུ་ཚར་སྔ་རྟིང་གི་བར་ལའང་མངོན་དུ་གྱུར་པ་དུས་རྟགས་ཤིན་ཏུ་ཆེ་བས། གདན་ས་ཆེན་པོ་དེ་ཉིད་ཉམས་གསོ། ལྷག་པར་དགེ་སློང་རྡོ་རྗེ་འཛིན་པ་ཚད་ལྡན་འདུས་པས་རབ་གནས་བརྒྱ་རྩ་སོགས་གྲངས་མང་དང་། རྗེ་འཇམ་དཔལ་སྙིང་པོའི་མཆོད་སྡོང་རིན་པོ་ཆེར་མཆོད་པའི་སྤྲིན་རྒྱ་ཆེར་སྤེལ་ན་བསོད་ནམས་ཉི་མ་འབུམ་གྱི་སྣང་བས་ནག་ཕྱོགས་ཀླ་ཀློའི་མུན་པ་མིང་མེད་དུ་བཅོམ་སྟེ་བསྟན་འགྲོའི་བདེ་སྐྱིད་པདྨོའི་ནགས་ཀླུང་ཆེས་ཆེར་རྒྱས་པར་འགྱུར་བ་ནི་ངེས་པའོ་ཞེས་ཐལ་མོ་སྦྱར་ཏེ་གསོལ་བ་བཏབ་པ་དགེ་ཞིང་བཀྲ་ཤིས་པར་གྱུར་ཅིག། ༈ །།ཤུ་བྷ་སྱ་མི་ཏྲ་བནྡྷ་ཀརྨ་དྷརྨ་བནྟ་སྱ་པ་ཎོ་ས་མརཔི་ཏམ། ཤྲིབིཛཡནྟུ། ཀ་དག་གཞོན་ནུ་

---

^{[མ་དཔེ་གཟིགས་ན་འདིར་གནོན།]}

བུམ་སྐུའི་ཆུ་གཏེར་ལས། །ལྷུན་གྲུབ་འཇའ་ལུས་རྡོ་རྗེའི་རྣམ་རོལ་ཅན། །སངས་རྒྱས་གཉིས་པ་པདྨ་ཐོད་ཕྲེང་ཞེས། །འཆི་མེད་གྲུབ་པའི་ལྷ་དེས་ཁྱོད་ལ་སྲུངས། ༡ །ཇི་ལྟར་དག་པའི་ཡིད་འོང་བཻཌཱུརྨ། །རྙེད་པ་ཙམ་གྱིས་འདོད་དགུའི་ཆར་འབེབས་བཞིན། །ཚོགས་ཟུང་བྱེ་བས་བསྐྲུན་པའི་དལ་འབྱོར་རྟེན། །ཐོབ་པའི་མོད་ནས་ཕན་བདེའི་སྣང་བ་རྒྱས། ༢ །ཁྱད་པར་འཇིག་རྟེན་དབང་ཕྱུག་ཀརྨ་ཀས། །ཆོས་འདུལ་ཁྲིམས་ཀྱི་སྣོད་དུ་ལེགས་སྦྱར་གང་། །ངེས་འབྱུང་བློ་ཡི་འབྱོར་པས་མངོན་མཐོ་ཞེས། །ལྷར་བཅས་བསྔགས་པའི་མེ་ཏོག་གཅིག་ཏུ་འཐོར། ༣ །སྨོན་འཇུག་བྱང་ཆུབ་སེམས་ཀྱི་བསླབ་པ་ནི། །པུཎྜ་རཱིཀ་ལྟ་བུར་རྒྱས་པ་ལས། །གཞན་ཕན་སྦྲང་རྩིའི་ཐིགས་པ་འཇོ་བ་ཡང་། །དོན་གཉིས་བུང་བ་དགའ་བའི་དཔྱིད་དུ་གྱུར། ༤ །སྒོ་གསུམ་བྱེད་པ་ཨེ་ཝཾ་མཱ་ཡའི་དབྱིངས། །སྨིན་བྱེད་དབང་བཞིའི་བདུད་རྩིས་རྒྱུད་བརླན་པས། །བསྐྱེད་རྫོགས་ཟུང་འཇུག་དཔག་བསམ་གཞོན་ནུ་ཡིས། །མེད་སྣང་འཁོར་བའི་ཚ་གདུང་རང་སར་བཅིལ། ༥ །ཕུང་པོ་ལྔ་བྲལ་ཀ་དག་གཉུག་མའི་གཤིས། །ཅེར་གྲོལ་སྐད་ཅིག་རིག་པར་ངོ་འཕྲོད་ཅིང་། །འོད་གསལ་ལྷུན་གྲུབ་སྣང་བཞིའི་ཉེ་ལམ་ལ། །མོས་པ་བརྟན་ཁྱོད་མ་ཧཱ་སནྣིའི་རིགས། ༦ །དེ་སླད་དོན་ལྡན་འཚོ་བའི་ཟླ་རིས་ནི། །ཉེར་འཚེའི་ཆུ་འཛིན་གཡོ་བ་ལས་གྲོལ་ཞིང་། །ཆོས་

---

^{[མ་དཔེ་གཟིགས་ན་འདིར་གནོན།]}

བཞིན་སྤྱོད་པའི་སྣང་བ་རབ་འབར་བས། །འདིར་ཡང་སྤྲོ་དགའི་ཆུ་གཏེར་གཅིག་ཏུ་དགོད། ༧ །ལྷག་པར་ཤེས་བྱ་རབ་འབྱམས་ཀུན་གཟིགས་མ་ཕམ་གཉིས་པའི་དགེ་བའི་བཤེས། །སྙིང་པོའི་བསྟན་པའི་རྒྱལ་མཚན་བསྒྲེངས་མཛད་མཁས་གྲུབ་བྱེ་བའི་གཙུག་ཏོར་དེས། །དབེན་པའི་རི་ངོགས་ཤིན་ཏུ་ཞི་བར་ཆོས་དང་མཐུན་པས་འཚོ་རྣམས་ཀྱི། །ངེས་དོན་རྟོགས་པའི་རྒྱ་མཚོ་འཕེལ་བྱེད་སྔོན་མེད་ལེགས་བཤད་ཆུ་ཤེལ་དབང་། ༨ །ཉེ་བར་ཐོབ་པའི་སྐལ་བཟང་གིས། །དད་དང་སྤྲོ་བའི་ཀུ་མུ་དཱ། །ཅི་དགར་བྱེ་བའི་ངང་ཚུལ་ནི། །དཔྱིད་ཀྱི་དུས་སྟོན་སླར་འོང་བཞིན། ༩ །འདི་ན་སྐྱབས་ཀུན་འདུས་ཞལ་བླ་མ་རྗེའི། །བྱིན་རླབས་ཟིལ་དངར་ཁོ་ནས་འཚོ་བ་ཡང་། །ལང་ཚོའི་འདུ་བྱེད་ཉམས་པར་མ་གྱུར་བཞིན། །གྱི་ནའི་སྤྱོད་པས་རོལ་དང་ཆབ་གཅིག་པར། ༡༠ །རིས་མེད་མཁས་གྲུབ་རྒྱ་མཚོའི་ལམ་བཟང་ལ། །ཕྱོགས་སུ་ལྷུང་བའི་སྐལ་ངན་རིང་བཏང་ནས། །དག་སྣང་པདྨོ་ལྟ་བུར་རྒྱས་པ་ཡིས། །ཆོས་སྤངས་སྒྲིབ་པ་དེ་ཡང་ག་ཤེད་སོང་། ༡༡ །འོན་ཀྱང་ཟབ་དང་རྒྱ་ཆེའི་རོ་མྱོང་ཕྱིར། །གཞུང་ལུགས་ཆེ་ཕྲ་ཀློག་དང་སེམས་པ་ལ། །བྱིས་པའི་རྣམ་ཐར་ཙམ་དུ་འཛིན་དུས་འདིར། །ངལ་བ་ཕལ་ཆེར་དོན་མེད་ཁོ་ནར་ཟད། ༡༢ །ཅི་ཕྱིར་མཁས་རྣམས་ཉི་ཚེའི་ཚིག་ལ་རྩོད། །གྲུབ་པར་རློམས་རྣམས་བཟླས་བརྗོད་

---

^{[མ་དཔེ་གཟིགས་ན་འདིར་གནོན།]}

ཙམ་གྱིས་གཡེངས། །གཞུང་ལུགས་ཆེ་ལས་ཟ་ཆོག་ཁོ་ན་བྲིན། །དེ་ཡང་ཁུངས་མེད་འཆོལ་བར་སྤྱོད་འདི་མཚར། ༡༣ །སྐབས་སུ་གསོལ་བ། ནོར་བུའི་དཔལ་གྱིས་བསྐྲུན་མིན་ལེགས་གསུང་མཆོག ། ཟང་ཟིང་ཕྲན་བུས་གཞལ་བྱ་མ་ཡིན་ཀྱང་། །གནས་སྐབས་སྣག་ཤོག་བཟོ་བོའི་འདུ་བྱེད་ཀྱི། །རིན་ཐང་ཙམ་དུ་དམིགས་པའི་དངོས་པོ་ནི། ༡༤ །སྔ་སོར་རོ་ལྡན་བཏུང་བ་ཡི། །ལོ་འདབ་ཕོན་པོ་འདི་བསྲིངས་ཤིང་། །སླད་ནས་དེ་ཙམ་སྦྱིན་ནོ་ཞེས། །དམ་བཅའི་ཡི་གེ་བསྲུབ་མེད་འགོད། ༡༥ །སླར་སྨྲས་པ། རྩ་ཁམས་དབུ་མར་ཐིམ་པའི་མགྲིན་པ་ནས། །རྒྱུད་སྔགས་མི་ཤིགས་ནཱ་དའི་རོལ་མོ་ཅན། །རྟོག་ཚོགས་འོད་གསལ་དབྱིངས་སུ་ངལ་བསོ་བ། །འཇའ་ལུས་རྡོ་རྗེའི་རྣམ་ཐར་བཟུང་གྱུར་ཅིག ༡༦ །རབ་འབྱམས་ཤེས་བྱའི་གནས་ལ་བློ་མིག་གྲོལ། །གཞན་ཕན་བདུད་རྩིའི་སྤྲིན་དཀར་ཉིན་བཞིན་འཕེལ། །སྲིད་དང་ཞི་བའི་ཤིས་དགུའི་མེ་ཏོག་གིས། །དམ་པའི་ངང་ཚུལ་ཡུན་དུ་འབར་བར་ཤོག ༡༧ །དེ་སྲིད་འདིར་ཡང་བརྩེ་ཞིང་གཅུགས་པའི་ཡིད། །ཉིན་མོར་བྱེད་དང་ཨུཏྤལ་ཇི་བཞིན་དུ། །རྣམ་ཀུན་མཛའ་བ་མི་ཕྱེད་བློ་གྲོས་ཀྱིས། །བྱང་ཆུབ་སྙིང་པོའི་བར་དུ་འགྲོགས་པར་སྨོན། ༡༨ །ཅེས་གང་ཤར་ཉམས་མཚར་དུ་བཀོད་པའི་ཚིག་གི་མེ་ཏོག་དོན་གྱི་འབྲས་བུས་གཏམས་པ་ལས། འདྲེན་བྱེད་ཀྱི་རཡིག་

---

^{[མ་དཔེ་གཟིགས་ན་འདིར་གནོན།]}

གཉིས་པ་གཡོ་བའི་རྟེན་ཙམ་དུ་ཏཱ་རུ་མནྟུའི་ཕུར་མ་བམ་པོ་གཅིག་ལ་ཤཱཀྱའི་དགེ་སློང་རིག་པ་འཛིན་པ་འཇམ་དབྱངས་མཁྱེན་བརྩེའི་དབང་པོས་བསྲིངས་ཕྱག་རྒྱས་བཏབ་སྟེ་ཀཱནྟི་ཀཱ་ཡིས་ཉ་བའི་ཤར་ཕྱོགས་ཀྱི་དགའ་བ་གཉིས་པ་ལ་། །པ་སརྦ་དཱ་ཤྲཱི་ཡོ་བྷ་བ་ཏུ། །དགེའོ། །དགེའོ། །དགེའོ།། །།