བྲག་སྒོམ་ཞབས་དྲུང་དཀོན་མཆོག་བསྟན་པ་རབ་རྒྱས།
༈ རྗེ་བཙུན་བླ་མ་དཀོན་མཆོག་བསྟན་པ་རབ་རྒྱས་དཔལ་བཟང་པོའི་ཞལ་སྔ་ལ་ཕུལ་བའི་ཞུ་ཡིག །ཤྲཱི་བི་ཛ་ཡནྟུ། མཁྱེན་གསུམ་ཐོས་བསམ་རིན་ཆེན་གྲུ་བོ་ལ་འཆེལ་ནས། །ཉམས་ལེན་སྦྱོར་བཞིའི་ཆུ་གཏེར་ཆེན་པོ་བརྒལ་བའི་མཐར། །ཆོས་སྐུ་ཡིད་བཞིན་ནོར་བུའི་གླིང་དུ་ཉེར་རྩེན་པའི། །བཀའ་དྲིན་ཟླ་བྲལ་རྣམ་འདྲེན་མཆོག་གི་ཞབས་པདྨོར། ༡ །རིགས་ཀྱི་ས་བོན་མོས་པས་བརླན་བཅས་སེམས་བསྐྱེད་དང་། །བསྐྱོད་པའི་ཡལ་ག་སྐྱོན་མེད་འཇུག་དང་སྨིན་སྦྱོང་གི། །མེ་ཏོག་མཛེས་འབར་བྱང་ཆུབ་གཞན་དོན་འབྲས་ལྕི་བ། །སྔོན་མེད་དཔག་བསམ་ལྗོན་པ་མཆོག་དེར་འདི་སྐད་གསོལ། ༢ །རྟག་ཆད་རྣམ་སྤངས་དབུས་ལའང་གནས་པའི་སྒྲིབ་བྲལ་བས། །མཐའ་ཡི་རྟོག་།
པ་རྣམ་པར་འབྱེད་པའི་ཡེ་ཤེས་ནི། །སྙིང་རྗེའི་འཛུམ་དཀར་གཡོ་བ་དང་འགྲོགས་རོལ་མོ་ཡིས། །སྲིད་འདིར་ཕན་པ་མཐའ་ཀླས་སྒྲུབ་མཛད་ཁྱོད་གཅིག་པུ། ༣ །ཁྱད་པར་བདག་རྒྱུད་རྨོངས་མུན་གྱིས་ཟུམ་ཨུཏྤལ། །ཆོས་ཅན་འཁོར་བའི་འདམ་རྫབ་སྟག་པོ་ལས་བསླངས་ནས། །ཆོས་ཉིད་མྱང་འདས་སྦྲང་རྩིའི་འབབ་སྟེགས་གཅིག་གྱུར་པའི། །དམ་ཆོས་སྣང་བ་ཅུང་ཟད་ཐོབ་འདིའང་ཁྱོད་ཀྱི་དྲིན། ༩ །དེ་སླད་། ཤིན་ཏུ་གུས་པ་ཡི། །ཡིད་ནི་ཟླ་ཤེལ་གསར་བ་ལ། །ཕྱོགས་པའི་ཀུ་མུ་དཱ་དཔལ་ལྟར། །བསམས་བཞིན་གུས་སྤྲོའི་འདབ་རྒྱ་གྲོལ། ༥ །སངས་རྒྱས་ཆོས་ཚོགས་ཀུན་གྱི་ངོ་བོ་གཅིག་གྱུར་པ། །སྒྲིབ་བྲལ་ཁམས་ལས་བྱང་ཆུབ་མཆོག་གི་ས་བརྙེས་ནས། །ཡོན་ཏན་ཕྲིན་ལས་ཕ་མཐའ་ཡས་པའི་བདག་ཉིད་ཅན། །རྡོ་རྗེའི་ཆོས་བདུན་ངོ་བོར་བསྐལ་བརྒྱར་འཚོ་གཞེས་གསོལ། ༦ །དེ་སྐད་མ་ཕམ་དགོངས་པའི་དོན་ལ་སྦྱར་བ་ཡི། །ཞུ་གསོལ་འདི་ཡི་རྟེན་ཅིང་འབྲེལ་འབྱུང་ཁོ་ན་ལ། །བརྟེན་ནས་རིང་མིན་རྡོ་རྗེའི་གདན་ལ་བྱམས་མགོན་བཞིན། །ཁྱོད་ཀྱིས་བདག་སོགས་དམ་ཆོས་བདུད་རྩིས་ཚིམ་མཛོད་ཀྱེ། ༈ །སརྦ་དཱ་ཐེ་ཡོ་བྷ་བ་ཏུ།། །།