སཾ་གྷ་སཱ་ག་ར།
༈ བླ་མ་དམ་པ་སཾ་གྷ་སཱ་ག་རར་ཕུལ་བའི་མཆིད་ལན། ཨོཾ་སྭསྟི་ཀུཆནྟ། །མཛེས་སྐུའི་སྣང་བརྙན་ཡིད་ལ་དྲན་པའི་མོད། །དུས་མིན་འཆི་བའི་རྒུད་པ་དྲུང་འབྱིན་ཞིང་། །ཚེ་དང་ཡེ་ཤེས་མཆོག་གི་དཔལ་སྟེར་བ། །བཅོམ་ལྡན་འཆི་མེད་མགོན་པོས་ཁྱེད་ལ་སྲུངས། ༡ །གུས་པའི་ཡིད་ནི་དཔྱིད་ཀྱི་ནགས་ཀླུང་ན། །ངལ་འཚོའི་པདྨོ་བཞིན་དུ་རྒྱས་གྱུར་ཏེ། །ཚིག་གི་སྦྲང་རྩི་དོན་གྱི་ཟིལ་དངར་ཅན། །མཁྱེན་བརྩེའི་གཟིགས་པའི་འབབ་སྟེགས་མཛེས་ཕྱིར་རྒྱུ། ༢ ། ཟླ་བ་ཙནྡན་ཆུ་དང་ག་བུར་གྱིས། །མི་མཚོན་ཞི་བསིལ་དམ་པ་མངོན་བརྙེས་བཞིན། །གཞན་ཕྱིར་མཐུན་པར་འཇུག་པའི་སྒྱུ་འཕྲུལ་གྱིས། །དེང་འདིར་བསྟན་པའི་ཉི་མ་གཅིག་ཏུ་གྱུར། ༣ །དེ་ཚེ་བསླབ་གྲོལ་རིག་པའི་ལང་ཚོ་དང་། །གྲགས་སྙན་ནོར་བུའི་རྣ་རྒྱན་ཟུང་མཛེས་པའི། །འཚོ་གཞེས་དགེ་བའི་ངག་གིས་རྣ་བ་ལ། །སྔོན་མེད་བདུད་རྩིའི་དཔལ་ནི་ཅིར་ཡང་བྱིན། ༤ །ལྷག་པར་ཟབ་རྒྱས་གདམས་
པའི་མཛོད་འཆང་ཞིང་། །དེས་ཀྱང་སྐལ་བཟང་རྗེས་སུ་བཟུང་བ་དང་། །དེ་ཡིས་ངེས་གསང་བསྟན་པའི་བཤད་སྒྲུབ་ཀྱི། །རྒྱལ་རྔ་སྲིད་རྩེར་སྒྲོགས་འདི་ཁྱོད་ཀྱི་མཐུ། ༥ །འདི་ན་མ་སྦྱངས་མི་མཁས་གཞན་དབང་གིས། །ཡུན་རིང་ཁུར་བཞིན་ནོན་པའི་དངོས་ངན་ཀྱང་། །བླ་མའི་བྱིན་རླབས་ཁོ་ནས་དབུགས་དབྱུང་ཕྱིར། །འདུ་ཤེས་གསུམ་གྱི་མལ་དུ་བདེ་བར་མཆིས། ༦ །སླད་ནས་འཆི་མེད་གྲུབ་པའི་དགེ་མཚན་དང་། །ཕྲིན་ལས་འཇིག་རྟེན་གསུམ་ན་སྙོམས་འཇུག་བཞིན། །འདིར་ཡང་ལྷག་པར་དགྱེས་པའི་འཛུམ་དཀར་གྱིས། །རྟག་ཏུ་བསྐྱང་བའི་བཀའ་དྲིན་སྔར་བཞིན་སྩོལ། ༧ །དེ་བ་ས་པ་ཊ་ཀཾ་མཉྫགྷོ་ཥཱཏ།། །།