རིག་པ་སྨྲ་བ་མངྒ་ལ།
༈ མཁས་བཙུན་རིགས་པར་སྨྲ་བ་མངྒ་ལའི་མདུན་དུ་ཕུལ་བའི་མཆིད་ལན། སུཀྲྀཏཤུབྷཏརོལླཀྵེ ཀུསུམནབཡཤཤྲཱིཉྩ། དྷུཛགགི་ཤུསུཏེ། གུཎསམསུབྷགིཔུཎཾ ཤམིཏབྷབདིཤོཛིཡཱཏ། ལེགས་བྱས་རྐང་པས་འཐུང་བའི་དགེ་མཚན་ནི། །གྲགས་པའི་མེ་ཏོག་གསར་བས་འཁྱུད་པ་ན། །ཡོན་ཏན་མཐའ་དག་རྫོགས་པའི་སྐལ་བཟང་ཅན། །སྲིད་དང་ཞི་བའི་ཕྱོགས་ལས་རྒྱལ་གྱུར་ཅིག ༡ ། རིང་ནས་དགའ་བ་རྒྱས་པའི་ཡིད་ཀྱི་མཚོར། །བློ་གྲོས་འདབ་མ་ཅུང་ཟད་དར་བའི་མོད། །སླར་ལ་གང་ཚུལ་རྟོགས་པའི་སྣང་བ་ཡིས། །ཉམས་ལྡན་ཚིག་གི་པདྨོ་འཛུམ་པར་གྱུར། ༢ །ཡིད་འཕྲོག་ཟེག་མ་
རྒྱས་པའི་བདུད་རྩིའི་ཟེར། །རབ་སྦྱིན་ནམ་མཁའི་ཕ་མཐར་གཤེགས་པ་བཞིན། །བྱང་ཆུབ་སྙིང་པོའི་འཇུག་པ་གཟུགས་ཅན་དུ། །རྒྱུ་བའི་ངལ་འཚོ་སྲིད་ན་གཉིས་པ་མེད། ༣ །སྙིགས་མའི་དྲི་མ་རབ་བཀྲུས་བསོད་ནམས་ཀྱི། །འབབ་སྟེགས་མཆོག་ཏུ་མཐོ་བའི་ནོར་བུའི་རྫོང་། །གང་ན་བསྙེན་པ་ཙམ་གྱིས་འཇིག་རྟེན་གསུམ། །དབུགས་འབྱིན་ཟླ་ཤེལ་གཞོན་ནུས་ཆར་མི་ཉེ། ༤ །རིགས་དང་སྦྱོར་བས་སད་པའི་བློ་གྲོས་མཐུས། །ཤེས་བྱ་རྫོགས་པར་བཟུང་བའི་ངོ་མཚར་གྱིས། །འཇམ་དཔལ་གཞོན་ནུ་ཉིད་ཅེས་སྒྲ་དབྱངས་ལྷ། །ལེགས་བཤད་ཉམས་བརྒྱའི་ཟོལ་གྱིས་མགྲིན་པར་ལྷག ༥ །བསླབ་གཞིའི་སཱ་ལ་ཆེན་པོའི་ནགས་ཀྱི་ཚལ། །གཞན་ཕན་དྲི་ཡིས་རབ་སྒེག་དཔྱིད་ཀྱི་དུས། །ཆགས་བྲལ་ཉམས་པའི་མཐར་སྐྱེས་ཡེ་ཤེས་ཀྱི། །འབྲས་བུའི་ཁུར་གྱིས་དུད་པ་ཁྱོད་ཁོ་ན། ༦ །མདོར་ན་བསྔགས་འོས་སྤྱོད་པའི་རྒྱུད་མང་པོ། །ཐོས་པའི་རྣ་བ་རིན་ཆེན་དོ་ཤལ་གྱིས། །མཛེས་པར་འཁྱུད་པའི་ངང་ཚུལ་གཅིག་པུས་འདིར། །ཀུན་དགའི་ལང་ཚོ་ལྷན་སྐྱེས་བཞིན་དུ་དགོད། ༧ །ལྷག་པར་ཚངས་པའི་སྲས་མོའི་ནོར་བུའི་རྒྱུད། །ཉམས་བརྒྱད་གར་གྱིས་རོལ་པ་གཟུགས་ཅན་དུ། །མངོན་སུམ་འཕོས་པའི་སྙན་ཚིག་རྨད་བྱུང་བས། །དང་པོའི་ས་ཡི་དགའ་བས་ཡིད་རབ་བརླན། ༨ །གང་ན་དབེན་པའི་ཁང་བུའི་
ནང་། །བསླབ་སྲོལ་རི་མོར་བྲིས་པ་ཡི། །མར་མེའི་རྗེས་སུ་སོན་བདག་ཀྱང་། །ལང་ཚོའི་འདུ་བྱེད་མ་ཉམས་བཞིན། ༩ །ཇི་ལྟར་སྦྱིན་པས་དབུལ་པོ་དང་། །ཡིད་བཞིན་རླབས་ཀྱིས་དོན་མཐུན་བཞིན། །མཁས་རྣམས་ཡོན་ཏན་ལྡན་ཁོ་ནར། །དགྱེས་པའི་སྤྱན་ཟུར་གཡོ་བའི་སླད། ༡༠ །ནོར་རྒྱས་ངལ་བའི་དཀའ་ཐུབ་ཁུང་། །བསྟེན་མིན་གང་ཚུལ་ཉིན་མོར་བྱེད། །འཆར་བ་ཙམ་གྱིས་སྔོན་མེད་པའི། །དད་སྤྲོའི་སྟེང་འཐུང་མཆོག་ཏུ་གྲོལ། ༡༡ །སླར་ཡང་ལེགས་མཛད་ནོར་བུའི་རྔ་ཡབ་ནི། །བཟུང་བ་མེད་པར་ཕྱོགས་ཀྱི་མཐར་འགྲོ་བས། །འཇིག་རྟེན་དགེ་ལེགས་བྱེད་པའི་ངོ་མཚར་ཕུལ། །སྲིད་པ་གསུམ་ན་རྟག་ཏུ་གསལ་བ་དང་། ༡༢ །འདིར་ཡང་རྗེས་བརྩེའི་འཇུག་པའི་སྣང་བ་ཡིས། །ཡང་ཡང་དབུགས་འབྱིན་མཛད་དང་ཆབ་གཅིག་པར། །ལེགས་གསུང་བདུད་རྩིའི་དོ་ཤལ་ཡིད་འོང་བས། །ཕན་བདེའི་པདྨོ་རྟག་ཏུ་རྒྱས་མཛོད་ཀྱེ། ༡༣ །སརྦ་དཱ་ཤུ་བྷྲཱུྃ་བྷཱུ་ཡཱ་ཏ།། །།