ཉེར་མཁོའི་ཆོས་སྤྱོད་མཛེས་རྒྱན་ནོར་བུའི་སྙིང་པོ།
༄༅། །ཨུ པ དྷུ ར སྱ དྷ རྨ ཙརྨ རུ ཙྩ ལཾ ཀཱ ར མ ཎེ༔ ག ཌྷ ནཱ མཱ སྟི།།
༄༅། །ཉེར་མཁོའི་ཆོས་སྤྱོད་མཛེས་རྒྱན་ནོར་བུའི་སྙིང་པོ་ཞེས་བྱ་བ་བཞུགས་སོ།
༄༅། །ཨོཾ་སྭསྟི་སིདྡྷཾ། བསླབ་གསུམ་སྣང་བས་སྲིད་ཞིའི་མུན། །སེལ་མཛད་ཡིད་བཞིན་རིན་ཆེན་མཆོག །འཕགས་བཞིའི་ཚོགས་ལ་གུས་བཏུད་ནས། །དེ་ཡི་སྤྱོད་ཚུལ་ཅུང་ཟད་འབྲི། །གང་ཞིག་སྡོམ་པ་གསུམ་དང་ལྡན་པའི་བྱང་ཆུབ་སེམས་དཔའ་སྔགས་ཀྱི་སྒོར་སྤྱོད་པ་སྤྱད་པ་རྣམས་ཀྱིས་རྡོ་རྗེ་ཐེག་པ་བླ་མེད་ཀྱི་རྣལ་འབྱོར་ཁྱད་པར་ཅན་ནམ། ཐུན་མོང་དུ་སེམས་ཅན་ཐམས་ཅད་ལ་སྙིང་རྗེ་ཆེན་པོས་གཉིད་ལས་ལྡང་། ཁམས་དང་འཕྲོད་ན་ཁྲུས་ཀྱི་རྣལ་འབྱོར་གྱིས་དག་པར་བྱ། དེ་ནས་སྟན་བདེ་བ་ལ་ལུས་དྲང་པོར་བསྲང་། དྲན་པ་མངོན་དུ་བཞག །ཉན་ཐོས་ཀྱི་ངེས་འབྱུང་། བྱང་
ཆུབ་སེམས་དཔའི་སྨོན་འཇུག །རྡོ་རྗེ་ཐེག་པའི་བསྐྱེད་རྫོགས་སམ། མཚན་བཅས་དང་མཚན་མེད་ཀྱི་རྣལ་འབྱོར་ཇི་ལྟར་རིགས་པ་ལ་བསླབ། ཁྱད་པར་སྐྱེས་བུ་གསུམ་གྱི་ལམ་རིམ་དང་། སྔགས་ཀྱི་སྐྱབས་འགྲོ། སེམས་བསྐྱེད། རྡོ་རྗེ་སེམས་དཔའི་སྒོམ་བཟླས། བླ་མའི་རྣལ་འབྱོར་མཎྜལ་དང་བཅས་པ་སོགས་རང་རང་གི་མན་ངག་ལས་འབྱུང་བ་ལྟར་ཉམས་སུ་བླང་། དེ་ནས་སྔ་དྲོའི་ཆར་གནས་ཁང་ཕྱགས་དར་བྱ། རྟེན་གྱི་དྲུང་དུ་ཅི་འབྱོར་བའི་མཆོད་པ་གཙང་ཞིང་བཀོད་པས་མཛེས་པར་བཤམས་ལ། ཡན་ལག་བདུན་པའམ། བཅུ་པའམ། ཉི་ཤུ་པ་སོགས་ཆོས་སྤྱོད་
རྣམས་ལས་རྒྱས་པར་འབྱུང་བ་ལྟར་བྱ། དེ་ལ་ཕྱི་མའི་སྡོམ་ནི། ས་༡གཞི་གནས་ཁང་༢མཆོད་པ་༣བརླབ། །ཚོགས་ཞིང་སྤྱན་དྲང་འབྱོན་ལེགས་༥བྱ། །ཁྲུས་༦གསོལ་སྐུ་༧ཕྱི་རྒྱན་འབྱུག་༩དབུལ། །ཕྱག་༡༠འཚལ་བསྟོད་༡༡མཆོད་༡༢སྡིག་པ་༡༣བཤགས། །སྐབས་༡༤ སེམས་༡༥ཡི་རང་༡༦ཆོས་༡༧འཁོར་བསྐལ། །བཞུགས་༡༨གསོལ་བསྔོ་བ་༡༩བཀྲ་ཤིས་༢༠ཏེ། །ཆོས་སྤྱོད་ཡན་ལག་ཉི་ཤུའོ། །ཞེས་པ་ལྟར་ཤིན་ཏུ་བསྡུས་པའི་ཚུལ་གྱིས་བྱེད་ན། སྐྱབས་གནས་དཀོན་མཆོག་གསུམ་གྱི་བདེན་པ་དང་། །རྒྱལ་བ་སྲས་བཅས་རྣམས་ཀྱི་བྱིན་རླབས་དང་། །ཚོགས་གཉིས་མངའ་ཐང་ཆོས་དབྱིངས་དག་སྟོབས་ཀྱིས། །སྣོད་བཅུད་བདེ་ཆེན་ཞིང་གི་བཀོད་པའི་དབུས། །ཡིད་འཕྲོག་ནོར་བུའི་གཞལ་མེད་ཁང་ཆེན་པོར། །རིན་ཆེན་སེང་ཁྲི་པད་ཟླའི་གདན་མཆོག་དང་། །དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་པའི། །མཆོད་སྤྲིན་རྒྱ་མཚོས་གང་ཞིང་སྤྱོད་གྱུར་ཅིག །སྤྲོ་ན་མཆོད་པའི་སྤྲིན་གྱི་གཟུངས་བརྗོད། དེ་ནས་འདུན་པ་རྩེ་གཅིག་པས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་པས་ཚོགས་ཞིང་སྤྱན་དྲངས། བཅོམ་ལྡན་འདིར་ནི་བྱོན་པ་ལེགས། །
བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིང་གནང་བར་མཛོད། ཅེས་འབྱོན་ལེགས་བྱ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། ཞེས་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། ཞེས་སྐུ་ཕྱི། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱི། ཞེས་རྒྱན་དང་། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་ཀུན་གྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་བར་བགྱི། ཞེས་བྱུག་པ་དབུལ། །བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། ཞེས་བརྗོད་པས་ཚོགས་ཀྱི་ཞིང་དུ་བརྟན་པར་བཞུགས་པར་བསམ། ཇི་སྙེད་སུ་དག་སོགས་ནས། བསྟོད་པར་བགྱི་ཞེས་པའི་བར་གྱིས་ཕྱག་འཚལ་ཞིང་བསྟོད། མེ་ཏོག་དམ་པ་སོགས་ཟློཀ་གསུམ་གྱིས་མཆོད་ཅིང་། སྤྲོ་ན་མཆོད་པའི་སྤྲིན་གྱི་གཟུངས་
དང་རོལ་མོ་བྱ། མཎྜལ་དབུལ། འདོད་ཆགས་ཞེ་སྡང་སོགས་བཤགས་པ་བྱ། དེ་ནས་བྱང་ཆུབ་སྙིང་པོར་མཆིས་ཀྱི་བར་སོགས་སམ། བསྡུ་ན་སངས་རྒྱས་ཆོས་ཚོགས་ལན་གསུམ་གྱིས་སྐྱབས་སེམས་བླང་། ཕྱོགས་བཅུའི་རྒྱལ་བ་ཀུན་དང་སོགས་ནས། ཕྱིར་བསྔོའོ་ཞེས་པའི་བར་གྱིས་རྗེས་སུ་ཡི་རང་སོགས་ཡན་ལག་བཞི་དང་། སྨོན་ལམ་རྒྱས་བསྡུས་ཇི་ལྟར་རིགས་པ་གདབ། དཀོན་མཆོག་གསུམ་གྱི་བཀྲ་ཤིས་ཀྱིས་མཐའ་བརྒྱན་པར་བྱའོ། །འདི་ལ་གདན་ཁྲི་བྱིན་རླབས་དང་། བཞུགས་སུ་གསོལ་བའི་ཡན་ལག་དང་། སྨོན་ལམ་གྱི་ཡན་ལག་སོ་སོར་བགྲངས་པས་ཡན་ལག་ཉི་ཤུ་རྩ་གསུམ་དུའང་འགྱུར་རོ། །དེ་ནས་བསིལ་གཏོར་བརྒྱ་རྩ་སོགས་མཆོད་སྦྱིན་གཏོར་མའི་རིམ་པ་དང་། གཞན་ཡང་གཙང་ཞིང་དག་པའི་མཆོད་གཏོར་བཤམས་ཏེ། རྒྱུད་སྡེ་ཆེན་པོ་བཞིའི་དབང་བསྐུར་བ་དང་། རྗེས་སུ་གནང་བ་དང་། རིག་པ་ལ གཏད་པ་སོགས་ཇི་ལྟར་ནོས་པའི་ལྷའི་རྣལ་འབྱོར་དང་། གཏོར་མའི་རིམ་པ་སོགས་ལ་བརྩོན་པར་བྱ། ཁྱད་པར་རྒྱུད་སྡེ་འོག་མ་གསུམ་གྱི་དང་པོ་བྱ་བའི་རྒྱུད་རིགས་ཀྱི་བདག་པོ་གསུམ་གྱི་མཆོད་གཏོར་ནི། གཏོར་མ་ཨ་མྲྀ་ཏས་བསང་། སྭ་བྷཱ་ཝས་སྦྱང་། ཨ་ཀཱ་རོས་བརླབ། དེ་ནས་ཚོགས་ཞིང་བསྒྲུབ་པ་ནི། བསང་སྦྱང་། སྟོང་པའི་ངང་ལས་ཡང་དག་པའི་སྨོན་ལམ་གྱི་སྟོབས་ཕུན་སུམ་ཚོགས་པས་བསྐྲུན་པའི་
ས་ཕྱོགས་ཐམས་ཅད་རིན་པོ་ཆེའི་ཞིང་ཁམས་གསེར་གྱི་བྱེ་མ་བརྡལ་བར་གྱུར། །ཨོ་ཙཱ་ལ་བི་ར་ཧཱུཾ་སྭཱ་ཧཱ། དེའི་སྟེང་དུ་འོ་མའི་རྒྱ་མཚོ་དྭངས་ཤིང་བསིལ་བ་པདྨ་རྒྱས་པས་ཁེབས་པར་གྱུར། ཨོཾ་བི་མ་ལ་དྷ་ཧཱ་ཧཱུྃ། དེའི་དབུས་སུ་རིན་པོ་ཆེའི་རི་རབ་ཀྱི་སྟེང་དུ་དེ་བཞིན་གཤེགས་པའི་ཏིང་ངེ་འཛིན་གྱི་རྣམ་འཕྲུལ་ནོར་བུའི་གཞལ་མེད་ཁང་ཡངས་ཤིང་རྒྱ་ཆེ་བའི་ལྟེ་བར་རིན་པོ་ཆེའི་ཁྲི་དང་། པད་ཟླའི་གདན་སུམ་བསྒྲིགས་སུ་གྲུབ་པར་གྱུར། ན་མསྶརྦ་ཏ་ཐཱ་ག་ཏ་བློ་བི་ཤྭ་སོགས་བརྗོད། འདུན་པ་རྩེ་གཅིག་པས། བཅོམ་ལྡན་འཕགས་པ་རིགས་གསུམ་མགོན། ཚུར་གཤེགས་འདིར་ནི་བཞུགས་སུ་གསོལ། བདག་གི་མཆོད་ཡོན་བཞེས་ནས་ཀྱང་། ཐུགས་རྗེས་ཐུགས་དཔག་མཛད་དུ་གསོལ། ཨོཾ་ཝཱ་གཱི་ཤྭ་རི་ལོ་ཀེ་ཤྭ་ར་བཛྲ་པཱ་ཎི་ཨེ་ཧེ་ཧི། ཨགྷཾ་པྲ་ཏཱིཙྪ་སྭཱ་ཧཱུ། རང་བཞིན་གྱི་གནས་ནས་དགྱེས་བཞིན་དུ་གཤེགས་ཏེ་མདུན་གྱི་ནམ་མཁར་རིན་པོ་ཆེའི་གཞལ་མེད་ཁང་གི་ཁྲི་ལ་བཞུགས་པ་ནི། དབུས་སུ་འཕགས་པ་འཇམ་པའི་དབྱངས་དམར་སེར་རལ་གྲི་དང་པུསྟི་འཛིན་ཅིང་། རལ་པའི་ཟུར་ཕུད་ལྔ་དང་ལྡན་པ། གཡས་སུ་འཕགས་པ་སྤྱན་རས་གཟིགས་དཀར་གསལ་མཆོག་སྦྱིན་དང་ཨུཏྤལ་བསྣམས་ཤིང་། རི་དྭགས་ཀྱི་པགས་པས་ནུ་མ་གཡོན་པ་བཀབ་པ། གཡོན་དུ་འཕགས་པ་ཕྱག་ན་རྡོ་རྗེ་མཐིང་ག་རྡོ་རྗེ་དང་དྲིལ་བུ་འཛིན་
ཅིང་། ཅུང་ཟད་ཁྲོས་པའི་ཉམས་ཅན། གསུམ་ཀའང་ཞི་ཞིང་འཛུམ་ལ་དར་དང་རིན་པོ་ཆེས་བརྒྱན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། སངས་རྒྱས་དང་བྱང་ཆུབ་སེམས་དཔའ་གསང་སྔགས་དང་རིག་སྔགས་དང་གཟུངས་སྔགས་ཀྱི་ལྷ་དཔག་ཏུ་མེད་པས་བསྐོར་བར་གྱུར། དེ་རྣམས་ཀྱི་སྐུ་ལ་དམིགས་ཏེ། གུས་པའི་ཚུལ་གྱིས་ཐལ་མོ་སྦྱར་ནས་ཐུགས་རྒྱུད་བསྐུལ་བའི་ཕྱིར། ཨོཾ་ཝཱ་གཱི་ཤྭ་རི་ཧཱུཾ། ཨོཾ་མ་ཎི་པདྨེ་ཧཱུྃ། ཨོཾ་བཛྲ་པཱ་ཎི་ཧཱུྃ། ཞེས་བཟླ། མཐར། ཨོཾ་ཏྲི་ཀུ་ལ་ནཱ་ཐ་ས་པ་རི་ཝཱ་ར་ཨགྷཾ་ནས། ཤབྡ་པྲ་ཏཱི་ཙྪ་སྭཱ་ཧཱས་མཆོད། དུས་གསུམ་སངས་རྒྱས་ཐམས་ཅད་ཀྱི། །མཁྱེན་བརྩེ་ནུས་པའི་ངོ་བོ་ཉིད། །བཅོམ་ལྡན་རིགས་གསུམ་མགོན་པོ་ལ། སྒོ་གསུམ་གུས་པས་ཕྱག་འཚལ་བསྟོད། ཅེས་བསྟོད། གཏོར་མ་གོང་གི་སྔགས་རྣམས་སྦྲེལ་བའི་མཐར་ས་པ་རི་ཝཱ་ར་ཨོཾ་ཨ་ཀཱ་རོ་བཏགས་པས་དབུལ། སླར་ཡང་མཆོད་ཅིང་བསྟོད་ལ། བཅོམ་ལྡན་འདས་རིགས་གསུམ་མགོན་པོས་བདག་དང་སེམས་ཅན་ཐམས་ཅད་ལ་མཁྱེན་བརྩེ་ནུས་པའི་དངོས་གྲུབ་མ་ལུས་པ་སྩལ་ཞིང་བརྟན་པར་མཛད་ན་པར་མཛད་དུ་གསོལ། ཞེས་གསོལ་གདབ། ཨོ་ཨཧཱུྃ་སྭཱ་ཧཱས་མཆོད་ཡོན་དབུལ། བདག་གིས་ནོངས་པ་བགྱིས་པ་ཐམས་ཅད་བཟོད་ཅིང་ཚངས་པར་མཛད་དུ་གསོལ། ཞེས་དང་། སྤྱན་དྲངས་པའི་སྔགས་ཀྱི་མཐར་གཙྪས་གཤེགས་སུ་
གསོལ། འདིས་ནི་ཤེས་རབ་ཕྱོགས་མེད་དུ་འཆར། སྙིང་རྗེ་རྩོལ་མེད་དུ་སྐྱེ། ནུས་པ་འབད་མེད་དུ་འབྱུང་། གནས་སྐབས་དང་མཐར་ཐུག་གི་དོན་གྲུབ་པ་སོགས་ཕན་ཡོན་དཔག་ཏུ་མེད་དོ། །གཉིས་པ་སྤྱོད་པའི་རྒྱུད་ཀྱི་གཙོ་བོ་རྣམ་སྣང་མངོན་བྱང་གི་མཆོད་གཏོར་ནི། ལག་གཉིས་ཐལ་མོ་ཁོང་སྟོང་དུ་སྦྱར། མཐེ་བོང་གཉིས་བསྒྲེངས་ལ། ན་མཿས་མནྟ་བུདྡྷ་ནཱཾ། ཨ་ས་མེ། ཏྲི་ས་མེ། ས་མ་ཡེ་སྭཱ་ཧཱ། ཞེས་དམ་ཚིག་གསུམ་གྱི་སྔགས་དང་ཕྱག་རྒྱས། མདུན་གྱི་ནམ་མཁར་ཆོས་ཉིད་རང་བཞིན་གྱི་དཀྱིལ་འཁོར་ཐམས་ཅད་ལ་ཁྱབ་པས་ཆོས་ཀྱི་དབྱིངས་ལས་སྐྱེས་པ་ནུབ་ཀྱི་སྒོ་རྟག་ཏུ་བྱེ་བའི་དབུས་སུ། ཨ་ལས་བཅོམ་ལྡན་འདས་རྣམ་པར་སྣང་མཛད་ཆེན་པོ་གསེར་གྱི་མདོག་ཅན། དབུ་ལ་ཐོར་ཚུགས་དང་དབུ་རྒྱན་ཅན། དར་གྱི་སྟོད་གཡོགས་དང་སྨད་གཡོགས་བསྣམས་པ། འོད་ཟེར་འབར་བས་འཁྲིགས་པ། ཕྱག་གཉིས་མཉམ་གཞག་གི་ཕྱག་རྒྱ་མཛད་པ། པདྨ་དཀར་པོ་དང་ཟླ་བའི་གདན་ལ་བཞུགས་པ། ཆོས་འབྱུང་། ནོར་བུ། ཡུམ་ནམ་མཁའི་སྤྱན་མ། སྤྱན་རས་གཟིགས། ཕྱག་ན་རྡོ་རྗེ། མི་གཡོ་བ། ཤཱཀྱ་ཐུབ་པ། གཙུག་ཏོར། གནས་གཙང་མའི་ལྷ། འཇིག་རྟེན་སྐྱོང་བ་རྣམས་དང་། རྡོ་རྗེ་དམ་པ་སྦྱིན་པ། སྒྲིབ་སེལ། ས་སྙིང་། མཁའ་སྙིང་། གདུལ་དཀའ། མངོན་ཕྱོགས། རང་རང་གི་རིགས་ཀྱི་
ལྷ་མོ་དང་། ཁྲོ་བོ་དང་། ཁྲོ་མོ་དང་། འཁོར་དང་། ཕོ་ཉ་ཚད་མེད་པས་བསྐོར་བ་མངོན་སུམ་དུ་གསལ་བར་གྱུར། ཐུགས་ཀར་ཨ་ལས་ཟླ་བ་ལ་རིག་པའི་རྒྱལ་པོ་ཚིག་ཡན་ལག་བཅུ་གཉིས་པ་བཀོད། དེ་ལ་སེམས་རྩེ་གཅིག་ཏུ་གཏད་དེ་མིག་ཟིམ་བུར་བྱས་ལ། ན་མཿས་མནྟ་བུདྡྷ་ནཱཾ། ཨ་ས་མནྟ་དྷམཱ་དྷཱ་ཏུ་ཀཱརཱ་ག་ཏི་ག་ཏཱ་ནཱན། སརྦ་ཐ་ཨོ་ཁཾ་ཨོཾ་ཨསཾ་ས་ཧཾ་ཧ་རཾ་ར་བཻ་བ་ཧི་ཧ་སྭཱ་ཧཱ། ཞེས་རིག་པའི་རྒྱལ་པོ་ཚིག་ཡན་ལག་བཅུ་གཉིས་པ་མྱུར་བ་དང་། བུལ་པ་སྤངས་ཏེ། ཆོས་ཐམས་ཅད་གདོད་མ་ནས་མ་བྱུང་མ་སྐྱེས་པའི་སྟོང་པ་ཉིད་ཡང་ཡང་དྲན་པར་བྱས་ལ་བཟླའོ། །དེ་ནས་མཆོད་རྫས། ན་མས་མནྟ་བཛཱ་ཎཱ་ཙཎྜ་མ་ཧཱ་རོ་ཥ་ཎ་སྤོ་ཊ་ཡ་ཧཱུྃ་ཊ་ཀ་ཧཾ། ཞེས་མི་གཡོ་བའི་སྔགས་ཀྱིས་བསང་། ཆོས་ཀྱི་དབྱིངས་ཀྱི་ཡི་གེ་རས་རྣམ་པར་དག་བར་བྱས། རང་རང་གི་སྔགས་ཀྱི་བྱིན་གྱིས་བརླབས་ནས་ཕུལ་ཏེ་ཐོག་མར་ཕྱག་འཚལ་བ་ནི། ཐལ་མོ་སྦྱར་ནས། ཕྱག་འཚལ་བྱང་ཆུབ་སེམས་ཁྱོད་ལ། །ཕྱག་འཚལ་བྱང་ཆུབ་འབྱུང་ཁྱོད་ལ། །སྤྱོད་གཟུགས་ཁྱོད་དང་ས་དང་ནི། །ཕ་རོལ་ཕྱིན་ལ་ཕྱག་འཚལ་ལོ། །ཕྱག་འཚལ་ཐོག་མར་བྱེད་ཁྱོད་ལ། །སྟོང་པ་ཉིད་ལ་འདུད་ཕྱག་འཚལ། ཞེས་ཕྱག་བྱའོ། །ན་མཿས་མནྟ་བུདྡྷཱ་ནཾ་བི་ཤུདྨ་གནྡྷོད་བྷ་ཝ་སྭཱ་ཧཱ། བྱུག་པའོ། །ན་མཿས་མནྟ་བུདྡྷ་ནཱི་མ་ཧཱ་མེ་ཏྲ་བྷུད་ག་ཏེ་སྭཱ་ཧཱ། མེ་ཏོག་གོ། །ན་མས་མནྟ་
བུདྡྷཱ་ནཾ་དྷརྨ་དྷཱ་ཏུ་ཨ་ནུ་ག་ཏ་སྭཱ་ཧཱ། བདུག་སྤོས་སོ། །ན་མཿས་མནྟ་བུདྡྷཱ་ནཾ་སརྦ་ཏ་ཐཱ་ག་ཏ་ཨ་པ་ར་ཛི་སྤ་ར་ཎ་ཨ་ཝ་བྷ་ས་ག་གནོད་ཏ་རེ་སྭཱ་ཧཱ། མར་མེའོ། །ན་མཿས་མནྟ་བུདྡྷཱ་ནཾ་ཏྲེ་ཡ་དྷཱི་ཀཱ་ནཱི་ཨ་ར་ར་པ་ར་ར་བི་ལ་དེ་བ་ལིཏ་དྷཱ་ཧིཾ་སྭཱ་ཧཱ། ལྷ་བཤོས་སོ། །ན་མས་མནྟ་བུདྡྷཱ་ནཱི་ག་ག་ན་ས་མ་ས་མ་སྭཱ་ཧཱ། མཆོད་ཡོན་ནོ། །ཐལ་མོ་ཁོང་སྟོང་དུ་སྦྱར་ལ་མཐེ་བོང་གཉིས་སོ་སོར་ཕྱེས་ཏེ། ལྷག་མ་སྙིམ་པ་ལྟར་བྱས་པ་ཡན་ལག་ཐམས་ཅད་འབྱུང་བའི་ཕྱག་རྒྱ་དང་། ན་མཿས་མནྟ་བུདྡྷ་ནཱཾ་ཨཾ་ཨ་སྭཱ་ཧཱ། ཕྱོགས་བཅུའི་སངས་རྒྱས་ཇི་སྙེད་པ་ཐམས་ཅད་ཀྱི་སྤྱན་སྔར་མཆོད་པའི་ཡན་ལག་དཔེ་མེད་པ་ཀུན་ཏུ་བཟང་པོའི་སྤྱོད་པ་ལས་བྱུང་བ་ལྟ་བུ་འབྱུང་བར་གྱུར་ཅིག །ན་མསརྦ་ཏ་ཐཱ་ག་ཏེ་བློ་བི་ཤྭ་མུ་ཁེ་བྷྱ༔ སརྦ་ཐཁཾ་ཨུངྒ་ཏེ་སྤ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་པས་མཆོད་ལ། བདག་གི་དགེ་བ་ཅི་མཆིས་པས་སེམས་ཅན་རྣམས་ཀྱི་ངན་སོང་གི་སྡུག་བསྔལ་ཐམས་ཅད་ཞི་བར་གྱུར་ཅིག །སྲིད་ཞིའི་ཕུན་སུམ་ཚོགས་པ་དག་ནི་འབྱོར་པར་གྱུར་ཅིག །ཅེས་སྨོན་ལམ་གདབ། སྔགས་ཀྱིས་སྤྲུལ་པའི་ལྷ་མི་དམིགས་པར་བཞག་གོ ། འདིས་ནི་བྱང་ཆུབ་སེམས་གཉིས་རྒྱུད་ལ་སྐྱེ་ཞིང་། ཏིང་ངེ་འཛིན་དང་གཟུངས་ཀྱི་སྒོ་མཐའ་ཡས་པ་འགྲུབ་པར་འགྱུར་རོ།། །།གསུམ་པ་རྣལ་འབྱོར་རྒྱུད་རྡོ་རྗེ་དབྱིངས་གཙོ་བོར་གྱུར་པའི་མཆོད་གཏོར་ཤིན་ཏུ་
བསྡུས་པ་ནི། རང་ཉིད་རྡོ་རྗེ་རྒྱུ་སེར་པོ་གཡས་འཁོར་ལོ་བསྐོར་ཞིང་། གཡོན་གདན་ལ་བརྟེན་པ། སེམས་དཔའི་སྐྱིལ་ཀྲུང་གིས་བཞུགས་པར་གྱུར། རྡོ་རྗེ་ཁུ་ཚུར་གཉིས་ཀྱི་མཛུབ་མོ་དང་མཐེའུ་ཆུང་མདུད་དེ་བཀན་ལ་སྙིང་གར་གཡས་སུ་བསྐོར་ཞིང་། ཨོཾ་བཛྲ་ཙཀྲ་ཧཱུྃ། མདུན་གྱི་ནམ་མཁར་རྡོ་རྗེ་དབྱིངས་ཀྱི་དཀྱིལ་འཁོར། འཇིག་རྟེན་གསུམ་རྒྱལ་གྱི་དཀྱིལ་འཁོར། འགྲོ་བ་འདུལ་བའི་དཀྱིལ་འཁོར། དོན་ཐམས་ཅད་གྲུབ་པའི་དཀྱིལ་འཁོར། རྡོ་རྗེ་རྩེ་མོ་རིགས་བསྡུས་པའི་དཀྱིལ་འཁོར། ཀུན་རིག །གཙུག་དགུ། ཚེ་དཔག་མེད། འཆི་འཇོམས། འཁོར་ལོས་སྒྱུར་བ། མེ་ལྟར་འབར་བ་ལ་སོགས་པ་ངན་སོང་སྦྱོང་བའི་རྒྱུད་ཀྱི་དཀྱིལ་འཁོར་བཅུ་གཉིས་རྣམས་སྤྲུལ། ཕྱག་རྒྱ་དེ་ཀར་བཞག་ལ་བལྟ་ཞིང་སྔགས་དེ་མང་དུ་བརྗོད་ན་དཀྱིལ་འཁོར་དེ་དག་ཏུ་ཞུགས་པར་འགྱུར་རོ། །བསྡམས་པ་ལས་གུང་མོ་གཉིས་ནང་དུ་བཅུག་ནས་མཐེ་བོང་མཐེའུ་ཆུང་བརྐྱངས་ཏེ་གཤིབས་པ་དང་པོའི་རྡོ་རྗེའི་ཕྱག་རྒྱས། ཨ་ནུ་རཱ་ག་ཡཱ་མི་ཧཱུྃ། དཔལ་མཆོག་རིགས་བསྡུས་པའི་དཀྱིལ་འཁོར་ཆེན་པོ་རྣམས་རྟེན་དང་བརྟེན་པར་བཅས་པ་མངོན་སུམ་དུ་སྤྲུལ། ཕྱག་རྒྱ་དེ་ཀར་བཞག་ལ་བལྟ་ཞིང་སྔགས་དེ་མང་དུ་བརྗོད་ན་དཀྱིལ་འཁོར་དེར་ཞུགས་པར་འགྱུར་རོ། །ཨོཾ་བཛྲ་སཏྭ་ཧཱུཾ། པད་ཟླ་ལ་རང་ཉིད་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་
བུ་འཛིན་པ། སེམས་དཔའི་སྐྱིལ་མོ་ཀྲུང་གིས་བཞུགས་པ། ཟླ་བའི་རྒྱབ་ཡོལ་ཅན། རྒྱན་ཐམས་ཅད་ཀྱིས་བརྒྱན་པར་གྱུར་ཏེ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲཎ་མེ་ན་བཛྲ་བྷནྡྷ་ནཾ་ཀ་རོ་མི། ཞེས་ཕྱག་བྱ། མཆོད་རྫས་ལ་རྡོ་རྗེ་གནོད་སྦྱིན་གྱི་ཕྱག་རྒྱས། ཨོཾ་བཛྲ་ཡཀྵ་ཧཱུཾ། རྡོ་རྗེ་མེའི་ཕྱག་རྒྱས། ཧཱུྃ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐཱ་བྷཉྫ་ར་ཎ་ཧཱུཾ་ཕཊ། སྭ་བྷཱ་ཝ་སོགས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་རྣམས་ཀྱི་ནང་དུ་ཨོཾ་ལས་བྱུང་བའི་མཆོད་པའི་ཚོགས་སུ་གྱུར། ཨོཾ་ཨཱཿཧཱུཾ། །ཨོཾ་བཛྲ་སྤ་ར་ཎ་ཁཾ་གིས་རྒྱ་ཆེན་པོར་བྱིན་གྱིས་བརླབས་ཏེ། ཨོཾ་སརྦ་ཏ་ཐཱ་ག་ཏ་བཛྲ་སཏཱ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ་གིས་མཆོད་ཡོན། ཨོ་པྲ་ཝཱ་ར་ས་ཏ་ཀཱ་རཾ་པྲ་ཏཱི་ཙྪ་སྭཱ་ཧཱ། ཞབས་བསིལ། དེ་བཞིན་དུ། པུཝེ། དྷུཔེ། ཨཱ་ལོ་ཀེ །གནྡྷེ། ཨ་ཀཱ་རོ། ཤརྡ། སངས་རྒྱས་སྲས་དང་བཅས་པ་རྣམས་བདག་ལ་དགོངས་སུ་གསོལ། བདག་གིས་ཁྱེད་ཀྱི་སྤྱན་སྔར་སྡིག་པ་ཐམས་ཅད་བཤགས་སོ། །འཕགས་པ་དང་སོ་སོ་སྐྱེ་བོའི་བསོད་ནམས་ཀུན་ལ་རྗེས་སུ་ཡི་རང་ངོ་། །ཆོས་ཀྱི་འཁོར་ལོ་བསྐོར་བར་བསྐུལ་ལོ། །མྱ་ངན་ལས་མི་འདའ་བར་གསོལ་བ་འདེབས་སོ། །རིན་ཆེན་རི་བོ་རྒྱ་མཚོའི་དཔལ། །རྒོད་སྒེག་དགའ་བ་རྩེ་འཇོའི་བདེ། །དཔག་བསམ་ཤིང་བཟང་བྱང་ཆུབ་སེམས། །སྦྱིན་དང་ཚུལ་ཁྲིམས་བཟོད་
བརྩོན་འགྲུས། །བསམ་གཏན་ཤེས་རབ་ཡེ་ཤེས་འཇུག །ལུས་ངག་སེམས་ནི་རབ་དྭངས་ཤིང་། །ཚད་མེད་རྣམ་ཐར་བཞི་བསྒོམས་ཏེ། །བདག་ཉིད་ཀྱང་ནི་དབུལ་བར་བགྱི། །དགེ་བ་བྱང་ཆུབ་གཞན་ཕན་བསྔོ། །རྡོ་རྗེའི་སྡོམ་པ་བླ་མེད་པ། བསླབ་པའི་གནས་ནི་བླང་བར་བགྱི། བདག་སོགས་སེམས་ཅན་རྣམས་ཀྱི་སྡིག་སྒྲིབ་ཐམས་ཅད་དག་པ་དང་། འཁོར་བ་དང་ངན་སོང་གི་སྡུག་བསྔལ་ལས་བསྒྲལ་ཏེ། སངས་རྒྱས་ཀྱི་གོ་འཕང་ཐོབ་པར་མཛད་དུ་གསོལ། ཞེས་གསོལ་བ་བཏབ་ལ་ཨོཾ་བཛྲ་མུ སེ་གོལ་བརྡབས་ཏེ། དཀྱིལ་འཁོར་རྣམས་རང་གི་སྙིང་གར་ཐིམ་པར་བསམ་མོ། །འདིས་ནི་སྔགས་ཀྱི་སྡོམ་པ་རྣམ་པར་དག་པ་དང་། དངོས་གྲུབ་སྣ་ཚོགས་འགྲུབ་པ་དང་། ཡང་དག་པའི་ཡེ་ཤེས་ལ་དབང་ཐོབ་པར་འགྱུར་རོ།། །།བཞི་པ་ལས་རྒྱས་པའི་ལྷའི་མཆོད་གཏོར་སྣ་ཚོགས་པ་ལ། སྡིག་སྒྲིབ་ཞི་བའི་ཕྱིར་རྡོ་རྗེ་མི་འཁྲུགས་པ་ལ་མཆོད་གཏོར་འབུལ་བ་ནི། བྱིན་རླབས་རིགས་གསུམ་གྱི་སྐབས་ལྟར་བྱ། མདུན་གྱི་ནམ་མཁར་པད་ཟླའི་གདན་ལ་ཧཱུྃ་སྔོན་པོ་ལས་བཅོམ་ལྡན་འདས་རྡོ་རྗེ་མི་འཁྲུགས་པ་སྔོན་པོ། །གཡས་ས་གནོན། གཡོན་མཉམ་གཞག་གི་སྟེང་ན་རྡོ་རྗེ་འགྲེང་བུར་འཛིན་པ། སྤྲུལ་སྐུའི་ཆ་བྱད་ཅན། སྤྱི་བོར་མི་བསྐྱོད་པས་མཚན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་ཐུགས་ཀར་ཟླ་བ་ལ་ཧཱུྃ་གི་མཐར་
སྔགས་ཀྱི་ཕྲེང་བ་དཀར་པོས་བསྐོར་བ་ལས་ཟླ་བ་ལྟར་དཀར་ཞིང་བསིལ་བའི་བདུད་རྩིའི་འོད་ཀྱིས་ཁམས་གསུམ་ཐམས་ཅད་སྣང་བར་བྱས། སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་སྦྱངས། ཚུར་འདུས་རང་ལ་ཐིམ་པས་སྡིག་སྒྲིབ་ཐམས་ཅད་དག་པར་བསམས་ལ། ན་མོ་རཏྣ་ཏྲ་ཡཱ་ཡ་སོགས་གཟུངས་ཅི་ནུས་བཟླས་མཐར། ཨོཾ་བཛྲ་ཨཀོ་ས་པ་རི་ཝཱ་ར་ཨགྷཾ་སོགས་ཀྱིས་མཆོད། གང་གི་ཐུགས་རྗེའི་འོད་ཟེར་གྱིས། །འགྲོ་ཀུན་སྒྲིབ་གཉིས་མུན་བསལ་ནས། །ཡང་དག་ཡེ་ཤེས་སྣང་མཛད་པ། །ཕྱག་འཚལ་རྡོ་རྗེ་མི་འཁྲུགས་ལའོ། །ཞེས་བསྟོད། སྔགས་མཐར་ཨ་ཀཱ་རོ་བཏགས་པས་གཏོར་མ་དབུལ། མགོན་པོ་མི་འཁྲུགས་པས་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་ཞི་བར་བྱིན་གྱིས་བརླབ་ཏུ་གསོལ། བཅོམ་ལྡན་འདས་རང་ལ་ཐིམ་པས་རྒྱུད་བྱིན་གྱིས་བརླབས་བར་བསམ་མོ། །འཇིགས་པ་ཞི་བའི་ཕྱིར་རྗེ་བཙུན་སྒྲོལ་མ་ལ་གཏོར་མ་འབུལ་བ་ནི། རང་ཉིད་ཁ་ལྷོ་རུ་ཕྱོགས་པའམ་ཕྱོགས་པར་མོས་པས། ལྷོ་ཕྱོགས་པོ་ཏ་ལ་ཀའི་རིའི་སུལ། རིན་པོ་ཆེའི་བྲག་སྐྱིབས་དང་། སེང་ལྡེང་ནགས་ཚལ་རབ་ཏུ་རྒྱས་པའི་དབུས་ན་འཕགས་མ་སྒྲོལ་མ་འཁོར་བཅས་དགྱེས་བཞིན་དུ་བཞུགས་པས་གཏོར་མ་གསོལ་བར་བསམས་ལ། ན་མཿསརྦ་བུདྡྷ་བོ་དྷི་སཏཱ་ནཱཾ། ཨ་པྲ་ཏི་ཧ་
ཏ་ཤ་ས་ནཱ་ནཱཾ། ཧེ་ཧེ་བྷ་ག་ཝ་ཏེ་མ་ཧཱ་ས་ཏྭ་སརྦ་བུདྡྷཨ་ཝ་ལོ་ཀི་ཏེ། མཱ་བི་ལམྦ་མཱ་བི་ལམྦ། ཨི་དཾ་བ་ལི་གྲཉྫཱ་པ་ཡ་གྲཉྫཱ་པ་ཡ། ཧཱུཾ་ཧཱུཾ། སརྦ་བི་པཉྩ་རེ་སྭཱ་ཧཱ། ཞེས་ལན་གསུམ་གྱིས་དབུལ། ཨོཾ་ཨཱརཱ་ཏཱ་རེ་ཨཧཱུྃ་སོགས་ཀྱིས་མཆོད། །ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །ལྷའི་སྐུ་ལ་དམིགས་ཏེ། ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། བརྒྱ་རྩ་སོགས་བཟླ། བཅོམ་ལྡན་འདས་མ་འཕགས་མ་སྒྲོལ་མས་བདག་དང་སེམས་ཅན་ཐམས་ཅད་ཀྱི་འཇིགས་པ་ཆེན་པོ་བརྒྱད་དང་བཅུ་དྲུག་ལ་སོགས་པ་ཞི་བ་དང་། འཁོར་བ་དང་ངན་སོང་། གི་སྡུག་བསྔལ་ལས་བསྒྲལ་ཏེ་བླ་ན་མེད་པའི་བྱང་ཆུབ་ལ་དབུགས་འབྱིན་པར་མཛད་དུ་གསོལ། ཞེས་གསོལ་བ་གདབ་བོ། །ནད་རིམས་ཞི་བའི་ཕྱིར་འཕགས་མ་རི་ཁྲོད་མ་ལ་མཆོད་གཏོར་འབུལ་བ་ནི། མདུན་གྱི་ནམ་མཁར་རི་ཁྲོད་མ་སེར་མོ་སྐུ་མདོག་ལྗང་སེར་ཞལ་གསུམ་ཕྱག་དྲུག་མ། ཞལ་གཡས་དཀར། གཡོན་དམར་བ། །ཕྱག་དྲུག་གིས་གཡས་གསུམ་རྡོ་རྗེ་དགྲ་སྟ་མདའ། གཡོན་གསུམ་ཞགས་པ་ཤིང་ལོ་གཞུ་བསྣམས་པ། དོན་ཡོད་གྲུབ་པའི་ཅོད་པན་ཅན། ཤིང་ལོ་གསར་པའི་སྟོད་གཡོགས་དང་སྟག་ལྤགས་ཀྱི་ཤམ་ཐབས་གྲོལ་བ། ཞབས་གཡས་པའི་མཐིལ་དང་། གཡོན་པའི་པུས་མོ་གདན་ལ་
བཙུགས་པ། ཅུང་ཟད་ཁྲོས་ཤིང་ལྟོ་བ་འཕྱང་བ་མིའུ་ཐུང་མའི་གཟུགས་ཅན་གྱི་གནས་གསུམ་དུ་ཨོ་ཨཱཧཱུཾ། ཐུགས་ཀའི་དབུས་སུ་པཾ། དེ་ལས་འོད་ཟེར་འཕྲོས་པས་ཡེ་ཤེས་པ་ཨོཾ་བཛྲ་ས་མཱ་ཛ༔ ཛཿཧཱུྃ་། བཾ་ཧོ༔ གཉིས་སུ་མེད་པར་ཐིམ། ཐུགས་ཀར་ཟླ་བ་ལ་བི་ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་བདག་གི་ནད་རིམས་གདོན་བགེགས་ཐམས་ཅད་སྦྱངས་པར་བསམས་ལ། ཨོ་པི་ཤ་ཙི་པཎ་ཤ་བ་རཱི་སརྦ་ཛཱ་ར་པྲ་ཤ་མ་ན་སྭཱ་ཧཱ། ཞེས་བཟླ། ཨོ་པཎ་ཤ་བ་རི་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཡེ་ཤེས་ཞི་བའི་ངང་ལ་བཞུགས་བཞིན་དུ། མིའུ་ཐུང་ཤ་ཟ་རོལ་པའི་ཚུལ་བསྟན་ཏེ། ཡུད་ཙམ་དྲན་པས་ཕན་བདེའི་འབྲས་རྩོལ་བ། རི་ཁྲོད་ལོ་མ་ཅན་ལ་ཕྱག་འཚལ་ལོ། །ཞེས་བསྟོད། སྔགས་ཀྱི་མཐར་ཨ་ཀཱ་རོ་བཏགས་པས་གཏོར་མ་དབུལ། སླར་ཡང་མཆོད་ཅིང་བསྟོད་པ། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ཀྱི་ནད་དང་རིམས་དང་བར་དུ་གཅོད་པ་ཐམས་ཅད་ཞི་ཞིང་མི་འབྱུང་བར་མཛད་དུ་གསོལ། མདུན་གྱི་ཡེ་ཤེས་པ་གཤེགས། དམ་ཚིག་པ་རང་ལ་ཐིམ་པར་བསམ། བྱད་ཕུར་རྦོད་གཏོང་ཞི་བའི་ཕྱིར་འཕགས་མ་གདུགས་དཀར་ཅན་ལ་མཆོད་གཏོར་འབུལ་བ་ནི། མདུན་གྱི་ནམ་མཁར་པདྨ་དང་ཉི་ཟླའི་སྟེང་དུ་ཧཱུཾ་ལས་གཙུག་ཏོར་གདུགས་དཀར་མོ་ཞལ་གཅིག་ཕྱག་བཞི།
དང་པོ་གཉིས་ཕྲེང་བ་དང་རྒྱལ་མཚན། འོག་མ་གཉིས་སྐྱབས་སྦྱིན་དང་མཉམ་གཞག ཞི་བའི་ཉམས་ཅན། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་འོད་ཟེར་སྣ་ཚོགས་འཕྲོ་བ། རྣམ་སྣང་གི་རྒྱས་བཏབ་པ། གཞན་ཡང་ཕྱག་གཉིས་མ། ཕྱག་དྲུག་མ། ཕྱག་བརྒྱད་མ། ཕྱག་བཅུ་མ། དབུ་སྟོང་། སྤྱན་བྱེ་བ་བརྒྱ་སྟོང་མངའ་བ། གཙུག་ཏོར་རྣམ་རྒྱལ། ངན་འགྲོ་ཐམས་ཅད་སྦྱོང་བ། གཙུག་ཏོར་དྲི་མེད། བདེ་གཤེགས་གཙུག་ཏོར་ལ་སོགས་པས་བསྐོར་བ། དེ་རྣམས་ཀྱི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ་ལས་འོད་ཟེར་འཕྲོས་པས་ཡེ་ཤེས་པ་ཨོཾ་བཛྲ་ས་མཱ་ཛ༔ ལག་གཡས་ཁུ་ཚུར་སྡིགས་མཛུབ་སྙིང་གར་བཞག །གཡོན་རྡོ་རྗེ་ཁུ་ཚུར་འཕྱར་བའི་ཕྱག་རྒྱ་བཅིངས་ཏེ། དེ་ནས་ཛ༔ཧཱུྃ་བཾ་ཧོ། །ཞེས་དབྱེར་མེད་དུ་བྱའོ། །སྙིང་པོ་ནི། ཨོཾ་སརྦ་ཏ་ཐཱ་ག་ཏ་ཨུཙྪིཥ་སི་ཏ་ཏ་པ་ཏྲེ་ཧཱུྃ་ཕཊ་སྭཱ་ཧཱ། ཞེས་ཅི་ནུས་བཟླས་ལ། མཆོད་གཏོར་སྙིང་པོས་བསང་། ཨོཾ་སྭ་བྷཱ་ཝ་སོགས་སྔར་བཞིན་ཏེ། སྙིང་པོའི་མཐར་ཨགྷཾ་སོགས། ཨ་ཀཱ་རོ་སོགས་ཀྱིས་གཏོར་མ་ཕུལ་ལ། །སྲིད་གསུམ་མགོན་པོ་ཤཱཀྱ་སེང་གེ་ཡི། །མཐོན་མཐིང་གཡས་སུ་འཁྱིལ་བའི་སྤྱི་གཙུག་ནས། །ཡ་མཚན་རྨད་བྱུང་གཙུག་ཏོར་གདུགས་ཀར་སྐུ། །ཁམས་གསུམ་འདྲེན་པ་ཁྱོད་ལ་ཕྱག་འཚལ་བསྟོད། ཅེས་བསྟོད་ལ། བཅོམ་ལྡན་འདས་མ་དེ་བཞིན་གཤེགས་
པའི་གཙུག་ཏོར་ནས་བྱུང་བའི་གདུགས་དཀར་མོ་ཅན། རྡོ་རྗེ་གཙུག་ཏོར་ཕྱིར་ཟློག་མ་ཆེན་མོ། །ཕྱག་སྟོང་མངའ་བ་ཆེན་མོ། །དབུ་སྟོང་མངའ་བ་ཆེན་མོ། །སྤྱན་བྱེ་བ་བརྒྱ་སྟོང་མངའ་བ་ཆེན་མོ། །མི་ཕྱེད་འབར་བའི་མཚན་རྟགས་ཅན། རྡོ་རྗེ་ཡངས་པ་ཆེན་མོ། །ས་གསུམ་གྱི་དཀྱིལ་འཁོར་ལ་མངའ་མཛད་པ་ཆེན་མོ་ཕྱག་རྒྱའི་ཚོགས་རྣམས་ཐམས་ཅད་ཀྱིས་ཀུན་ནས་བདག་འཇིགས་པ་ཆེན་པོ་ཐམས་ཅད་དང་། གདོན་ཐམས་ཅད་དང་། རིམས་ནད་ཐམས་ཅད་ལས་བསྲུང་དུ་གསོལ། ཕ་རོལ་པོས་བྱས་པའི་རིག་སྔགས་ཀྱི་གནོད་པ་ཐམས་ཅད་གཅོད་དུ་གསོལ། འཆིང་དུ་གསོལ། ཕུར་བུས་གདབ་ཏུ་གསོལ། སྡིག་སྒྲིབ་ཐམས་ཅད་དག་པ་དང་། མཐར་ཐུགས་སངས་རྒྱས་ཀྱི་གོ་འཕང་སྩལ་དུ་གསོལ། ཞེས་གསོལ་བ་གདབ་ཅིང་། བཅོམ་ལྡན་འདས་མ་གནས་ཁང་གི་བླར་སྲུང་བའི་ལས་མཛད་དེ་བཞུགས་པར་བསམ་མོ། །དགྲ་ཇག་ཆོམ་རྐུན་གྱི་འཇིགས་པ་ཞི་བའི་ཕྱིར་འཕགས་མ་འོད་ཟེར་ཅན་ལ་མཆོད་གཏོར་འབུལ་བ་ནི། མདུན་གྱི་ནམ་མཁར་མཆོད་རྟེན་གྱི་ཕུག་ཏུ་པད་ཟླ་ལ་མོ་སེར་པོ་ལས་འོད་ཟེར་ཅན་མ་སེར་མོ་སྤྱི་བོར་མཆོད་རྟེན་གྱིས་བརྒྱན་པ། ཞལ་གསུམ་གཡས་དཀར་བ། གཡོན་ཕག་ཞལ་ནག་པོ། །ཕྱག་དྲུག་གིས་གཡས་ན་མདའ་དང་རྡོ་རྗེ། གཡོན་ན་གཞུ། སྐུད་པ། མྱ་ངན་མེད་པའི་ཤིང་གི་ཡལ་ག་ལོ་མ་མེ་
ཏོག་ཅན་བསྣམས་པ། སྨད་གཡོགས་སྔོན་པོ་དང་སྟོད་གཡོགས་བཀྲ་བ་ཅན། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ཞབས་གཡས་བསྐུམས་གཡོན་བརྐྱངས་པས་ཕག་སེར་པོ་ལ་བཞུགས་ཤིང་། ཕག་སེར་པོའི་ཚོགས་ཀྱིས་བསྐོར་བ། དེ་ལ་འོད་ཟེར་ཅན་མ་དཀར་མོ། །མྱ་ངན་མེད་པའི་འོད་ཟེར་ཅན། རྟོག་པ་ལས་བྱུང་བ། རྡོ་རྗེ་དབྱིངས་ཕྱུག་མ། ཨོ་ཌི་ཡཱ་ན། བྱིན་རླབས་རིམ་པ། པི་ཙུ་མ་དམར་མོ་ཞལ་གསུམ་ཕྱག་བཅུ། ཁབ་སྐུད་ཅན་རྣམས་དང་། ཨརྐ་མ་སི་ལ་སོགས་པས་བསྐོར་བ། དེ་རྣམས་ཀྱི་སྤྱི་བོར་ཨོ། །མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་དབུས་སུ་ཟླ་བ་ལ་ཨོྃ། དེ་ལས་འོད་འཕྲོས། ལྷ་མོ་འོད་ཟེར་ཅན་གྱི་ལྷ་ཚོགས་འཁོར་དང་བཅས་པ་སྤྱན་དྲངས། བཛྲ་ས་མཱ་ཛཞེས་པས་ཡེ་ཤེས་པ་གདན་དྲངས་ཏེ། ཛཧཱུྃ་བཾ་ཧོ༔ ཞེས་པས་ཡེ་ཤེས་པ་གཞུག་ཅིང་། མཐེབ་ཆེན་བསྣོལ་བ་དང་། མཛུབ་མོའི་རྩེ་མོ་བཀུག་སྟེ་མཉམ་དུ་གཟུང་། གུང་མོ་གཤིབ། ལྷག་མ་རྡོ་རྗེའི་ཐལ་མོ་ལྟར་བྱས་པ། བཅོམ་ལྡན་འདས་མའི་དམ་ཚིག་གི་ཕྱག་རྒྱ་ལྟ་བའི་ཕྱོགས་སུ་དགོད་པའམ། སྙིང་ག །མཛོད་སྤུ། མགྲིན་པ། སྤྱི་བོར་བཞག་པས་བརྟན་པར་བྱས་ལ། ཡང་ཕྱག་རྒྱ་དེ་ཉིད་སྤྱི་བོར་བཞག་སྟེ། ཨོཾ་བྷུ་ཁཾ་ཨཾ། ཞེས་དབང་བསྐུར་བའི་སྔགས་ཀྱིས་སྤྱི་བོར་རྣམ་སྣང་གི་རྒྱས་གདབ། སྙིང་པོ་ནི། ཨོཾ་མཱ་རཱི་ཙེ་སྭཱ་ཧཱ་ཞེས་སམ།
ཨོཾ་མཱ་རཱི་ཙེ་ཚྭ་སྭཱ་ཧཱ། ཨོཾ་མཱ་རཱི་ཙེ་ཨཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་ཅི་ནུས་བཟླས་ལ། བར་དུ་གཅོད་པའི་བགེགས་དང་། མཆོད་གཏོར་ལ་དམིགས་ནས། གཡས་ཁྲོ་མོའི་ཁུ་ཚུར་གཏོད་དེ། ཨོཾ་མཱ་རཱི་ཙེ་ཧཱུྃ་སརྦ་བིགྷཱན་ནུ་ད་སར་ཡ་ཧཱུྃ་ཕཊ་ཀྱིས་བགེགས་བསང་། སྭ་བྷཱ་ཝ་སོགས་ཀྱིས་སྦྱངས་ཤིང་བྱིན་གྱིས་བརླབས། གཏོར་མ་ཧཱུྃ་ཞེས་བརྗོད་པས་བྱིན་གྱིས་བརླབས་ལ། ཨོཾ་མཱ་རཱི་ཙེ་ཨགྷཾ་པྲ་ཏཱི་ཙྪསྭཱ་ཧཱ། དེ་བཞིན་དུ་འདོན་པ་བསྒྱུར་ལ་པུངྒེ་ལ་སོགས་དང་། གཏོར་མ། ཨོཾ་ཁ་ཁ་ཁཱ་ཧི་ཁཱ་ཧི། གྲོ༔་གྲིཉྩ། གྲིཉྩནྟ་སརྦ་བོ་དྷི་ཀ་པ་ལི་མ་མ་ཤཱནྟཾ་ཀུརྦནྟ་སྭཱ་ཧཱ། ཞེས་ཕུལ་ལ། གང་ཁྱོད་མིང་ཙམ་འཛིན་དང་དྲན་པ་ཡིས། །མི་མཐུན་ཕྱོགས་རྣམས་མ་ལུས་སེལ་འགྱུར་ཞིང་། །འཇིག་རྟེན་འཇིག་རྟེན་འདས་པའི་དཔལ་སྟེར་བ། །འཕགས་མ་འོད་ཟེར་ཅན་ལ་ཕྱག་འཚལ་བསྟོད། ཅེས་བསྟོད། བདག་སོགས་སེམས་ཅན་རྣམས་ཀྱི་སྡིག་སྒྲིབ་ཐམས་ཅད་དག་པ་དང་། ཕྲ་མེན་མའི་རིག་སྔགས་ཀྱི་གནོད་པ་ལ་སོགས་པ་འཇིགས་པ་ཐམས་ཅད་ལས་སྐྱོབ་བ་དང་། སངས་རྒྱས་ཐོབ་པར་མཛད་དུ་གསོལ། ཞེས་གསོལ་བ་གདབ་བོ། །ཚེ་དང་བསོད་ནམས་རྒྱས་པའི་ཕྱིར་གཙུག་ཏོར་རྣམ་པར་རྒྱལ་མ་ལ་མཆོད་གཏོར་འབུལ་བ་ནི། མདུན་གྱི་ནམ་མཁར་རྣམ་པར་རྒྱལ་མའི་མཆོད་རྟེན་གྱི་བུམ་པ་ཡངས་ཤིང་རྒྱ་ཆེ་བའི་ནང་དུ་པད་ཟླའི་གདན་ལ་བློ་ལས་
གཙུག་ཏོར་རྣམ་རྒྱལ་དཀར་སེར་སྔོ་བའི་ཞལ་གསུམ་ཕྱག་བརྒྱད་ཀྱི་གཡས་པ་རྣམས་ན་སྣ་ཚོགས་རྡོ་རྗེ། པད་དཀར་ལ་གནས་པའི་འོད་དཔག་མེད། མདའ། མཆོག་སྦྱིན། གཡོན་པ་རྣམས་ན་ཞགས་པ། ཊྛ གཞུ། སྐྱབས་སྦྱིན། བདུད་རྩིའི་བུམ་པ་འཛིན་པ། ཞལ་རེ་རེ་བཞིན་སྤྱན་གསུམ་མ། ཞི་འཛུམ་སྒེག་པའི་ཉམས་ཅན། དར་དང་རིན་པོ་ཆེས་བརྒྱན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་གནས་གསུམ་དུ་ཨོཾ་ཨཱཧཱུཾ། ཐུགས་ཀའི་དབུས་སུ་ཟླ་བ་ལ་ཧཱུཾ་དཀར་པོ། །དཔྲལ་བར་ཏཱཾ་སེར་པོ། །ལྟེ་བར་ཧྲིདམར་པོ། བརླ་གཉིས་ལ་ཨོཾ་ཨཱལྗང་གུ། རྣམ་པར་སྣང་མཛད་ཀྱི་དབུ་རྒྱན་ཅན། ཐུགས་ཀའི་འོད་ཀྱིས་ཡེ་ཤེས་པ་སྤྱན་དྲངས། ཛཧཱུྃ་བཾ་ཧོ༔ གཉིས་སུ་མེད་པར་གྱུར། ཐུགས་ཀའི་ས་བོན་གྱི་མཐར་སྔགས་ཕྲེང་གིས་བསྐོར་པའི་འོད་ཀྱིས་ཚེ་དང་བསོད་ནམས་ཡེ་ཤེས་ཀྱི་དངོས་གྲུབ་སྩལ་བར་གྱུར། ཨོཾ་ཧཱུཾ་སྭཱ་ཧཱ། ཨོཾ་ཨ་མྲྀ་ཏ་ཨཱ་ཡུརྡ་དེ་སྭཱ་ཧཱ། ཞེས་བཟླ། ཨོཾ་ཨུཏྟཱི་ཥ་བི་ཛ་ཡཱ་ཨརྒྷཾ་སོགས་ཀྱིས་མཆོད། འཆི་བ་མེད་པའི་ཚེ་སྦྱིན་མ། འདོད་རྒུའི་བསོད་ནམས་རྒྱས་མཛད་མ། །ཡེ་ཤེས་མཆོག་གི་དཔལ་སྟེར་མ། །གཙུག་ཏོར་རྣམ་རྒྱལ་མ་ལ་འདུད། ཅེས་བསྟོད། སྔགས་ཀྱི་མཐར་ཨ་ཀཱ་རོ་བཏགས་པས་གཏོར་མ་དབུལ་ཞིང་། མཆོད་ཅིང་བསྟོད་ལ། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ཀྱི་ཚེ་དང་
བསོད་ནམས་དང་། ཡེ་ཤེས་ཐམས་ཅད་རྒྱས་པར་མཛད་དུ་གསོལ། ལྷ་རང་ལ་བསྟིམ་མོ། ༈ །དཔལ་དང་འབྱོར་པ་རྒྱས་པའི་ཕྱིར་འཕགས་པ་ཛམྦྷ་ལ་དང་ལྷ་མོ་ནོར་རྒྱུན་མ་ལ་མཆོད་གཏོར་འབུལ་བ་ནི། སྟོང་པའི་ངང་ལས་མདུན་དུ་རིན་པོ་ཆེ་སྣ་ཚོགས་པ་གཅལ་དུ་བཀྲམ་ཞིང་ནོར་བུའི་གཏེར་ཁ་ཆེན་པོ་བྱེ་བའི་དབུས་སུ་སྣ་ཚོགས་པདྨ་འདབ་མ་བརྒྱད་པ། ལྟེ་བ་དང་འདབ་མ་རྣམས་ལ་ཛོ་དགུ་དང་། པོ་དགུ་ཡོངས་སུ་གྱུར་པ་ལས། དབུས་སུ་འཕགས་པ་ཛམྦྷ་ལ་སེར་པོ་ནོར་རྒྱུན་མས་འཁྱུད་པ། ཤར་སོགས་ཕྱོགས་བཞིར་ནོར་བུ་བཟང་པོ་དང་ཟླ་ཤེལ་མ། གང་པ་བཟང་པོ་དང་སྦྱིན་མ། ནོར་སྦྱིན་དང་སྦྱིན་བཟང་མ། རྣམ་ཐོས་སྲས་དང་འཕགས་མ། ཤར་ལྷོ་ནས་བརྩམས་ཏེ་མཚམས་བཞིར་ཀེ་ལི་མཱ་ལི་དང་རབ་བཟང་མ། འཇམ་པོ་འཁྱིལ་པ་དང་རབ་སྦས་མ། ཞལ་གྱི་དབང་པོ་དང་ལྷའི་བུད་མེད། སྤྱོད་པའི་དབང་པོ་དང་དབྱངས་ཅན་མ། ཐམས་ཅད་ཀྱང་གསེར་མདོག་དར་དང་རིན་པོ་ཆེའི་རྒྱན་གྱིས་བརྒྱན་པ། ཡབ་རྣམས་རོལ་པའི་སྟབས་ཅན། གཡས་མཆོག་སྦྱིན་གྱི་མཐིལ་ན་བཱི་ཛ་པཱུ་ར་ཀ་དང་གཡོན་གཏེར་གྱི་ནེའུ་ལེ་འཛིན་པ། ཡུམ་རྣམས་གཡས་མཆོག་སྦྱིན་དང་། གཡོན་འབྲས་ཀྱི་སྙེ་མ་བསྣམས་པའི་གནས་གསུམ་དུ་ཨོཾ་ཨཱཧཱུཾ། ཡེ་ཤེས་པ་དབང་ལྷ་དང་བཅས་པ་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ ཡེ་ཤེས་
པ་ཐིམ། དབང་ལྷས་དབང་བསྐུར། གཙོ་འཁོར་ཐམས་ཅད་ལ་རིན་ཆེན་འབྱུང་ལྡན་གྱིས་དབུར་བརྒྱན། ཨོ་ཨཱརྱ་ཛམྦྷ་ལ་བ་སུ་དྷ་རི་ཎཱི་ས་པ་རི་ཝཱ་ར་ཨབྷྲཱུྃ་སོགས་ཀྱིས་མཆོད། །མགོན་པོ་ནམ་མཁའི་མཛོད་འཆང་ཞིང་། །དཔལ་མོ་དབྱིག་གི་ཆར་འབེབས་མ། །གནོད་སྦྱིན་བྱེ་བའི་ཚོགས་བཅས་ལ། །མཆོད་ཅིང་བསྟོད་དོ་དངོས་གྲུབ་སྩོལ། རང་ལྷག་པའི་ལྷར་གསལ་བའི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དཔལ་འབྱོར་ལོངས་སྤྱོད་ནམ་མཁའི་མཛོད་ཀྱི་དངོས་གྲུབ་སྩོལ་བར་གྱུར། ཨོཾ་ཛམྦྷ་ལ་ཛ་ལེནྡྲ་ཡ་སྭཱ་ཧཱ། ཨོཾ་བཱ་སུ་དྷ་རི་ཎཱི་སྭཱ་ཧཱ། ཞེས་ཅི་ནུས་བཟླ། འཁོར་སྔགས་བཟླ་ན་གཞན་དུ་ཤེས། སྔགས་ཀྱི་མཐར་ས་པ་རི་ཝཱ་ར་ཨོཾ་ཨ་ཀཱ་རོ་སོགས་བཏགས་པས་གཏོར་མ་དབུལ། མཆོད་ཅིང་བསྟོད། འཕགས་པ་ཛམྦྷ་ལ་དང་། ལྷ་མོ་ནོར་རྒྱུན་མས་བདག་དང་སེམས་ཅན་ཐམས་ཅད་བ ལ་ཆོས་དང་མཐུན་པའི་འབྱོར་པ་ཟད་མི་ཤེས་པ་སྩལ་དུ་གསོལ། ཡི་གེ་བརྒྱ་པ་བཟླ། སུ་པྲ་ཏིཥྛས་གནས་ཁང་དང་བང་མཛོད་སོགས་ལ་བརྟན་པར་བཞུགས་སུ་གསོལ་ལོ། ༈ །ཁམས་གསུམ་དབང་དུ་བྱེད་པར་འདོད་ན་ལྷ་མོ་རིགས་བྱེད་མ་ལ་མཆོད་གཏོར་འབུལ་བ་ནི། སྟོང་པའི་ངང་ལས་མདུན་དུ་རིགས་བྱེད་ཀྱི་རི་བོའི་ཕུག་ཏུ་པདྨ་དམར་པོ་འདབ་མ་བརྒྱད་པའི་ལྟེ་བར་ཟླ་བ་ལ་ཧཱིདམར་པོ་ལས་འཕགས་མ་
ཁམས་གསུམ་གྱི་དབང་ཕྱུག་མ་རྒྱ་སྐྱེགས་ཀྱི་མེ་ཏོག་གསར་བའི་མདངས་ཅན། ཞལ་གཅིག་ཕྱག་བཞིའི་དང་པོ་གཉིས་ཨུཏྤལ་དམར་པོའི་མདའ་གཞུ་དང་། ལྷག་མ་གཉིས་མི་འཇིགས་པ་སྦྱིན་པའི་ཕྱག་རྒྱ་དང་ཨུཏྤལ་དམར་པོ་བསྣམས་པ། ཁྲོ་ཞིང་ཆགས་ལ་སྒེག་པའི་ཉམས་ཅན། རིན་པོ་ཆེའི་རྒྱན་དང་དར་དམར་པོའི་ན་བཟའ་ཅན། འོད་ཟེར་དམར་པོ་འཕྲོ་བ། འོད་དཔག་ཏུ་མེད་པའི་ཅོད་པན་ཅན། ཞབས་གཡོན་བརྐྱངས་པའི་གར་སྟབས་ཀྱིས་སྒྲ་གཅན་གྱི་མགོ་བོ་ལ་གནས་པའི་འདོད་ལྷའི་ཆུང་མ་མནན་པ། གནས་གསུམ་དུ་ཨོཾ་ཨཱཧཱུཾ། ཐུགས་ཀའི་དབུས་སུ་ཟླ་བ་ལ་ཧཱུྃ༔ དེ་ལས་འོད་ཟེར་འཕྲོས་པས་ཡེ་ཤེས་པ་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་ལས་ཉི་མ་འཆར་ཀའི་འོད་ཀྱིས་ཁམས་གསུམ་དབང་དུ་མཛད་པར་གྱུར། ཨོཾ་ཀུ་རུ་ཀུ་ལླེ་ཧཱུྃསྭཱ་ཧཱ། ཅི་ནུས་བཟླ། མཐར་ཨོཾ་ཨཱརྱ་ཀུ་རུ་ཀུ་ལླེ་ས་པ་རི་ཝཱ་ར་ཨགྷཾ་སོགས་ཀྱིས་མཆོད། །རིགས་བྱེད་རི་བོའི་ཕུག་ཏུ་གནས། །རབ་འབྱམས་དབང་གི་ཕྲིན་ལས་མཛད། །དངོས་གྲུབ་མཐའ་ཡས་སྩོལ་བའི་གཏེར། །བཅོམ་ལྡན་འདས་མར་ཕྱག་འཚལ་འདུད། །གཏོར་མ་སྔགས་མཐར་ཨ་ཀཱ་རོ་བཏགས་པས་དབུལ། བདག་དང་སེམས་ཅན་ཐམས་ཅད་ལ་རབ་འབྱམས་དབང་གི་དངོས་གྲུབ་མ་ལུས་པ་སྩལ་དུ་གསོལ། མདུན་བསྐྱེད་
དགྱེས་བཞིན་པས་འོད་དུ་ཞུ། རང་གི་སྨིན་མཚམས་སུ་ཐིམ་པས་ཁམས་གསུམ་གྱི་དབང་ཕྱུག་ཆེན་པོར་གྱུར་པར་བསམ་མོ། ༈ །བདུད་དང་དགྲ་བགེགས་ཚར་གཅོད་པའི་ཕྱིར་འཕགས་མ་རལ་གཅིག་མ་ལ་གཏོར་མ་འབུལ་བ་ནི། སྟོང་པའི་ངང་ལས་མདུན་དུ་པད་ཉིའི་གདན་ལ་ཊཾ་ལས་ལྷ་མོ་ཁྲོས་མ་རལ་གཅིག་མ་ནག་མོ་གྲི་གུག་དང་ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། སྤྱན་གསུམ་མ། ཁྲོས་བའི་ཉམས་ཅན། དར་དང་རིན་པོ་ཆེ་དང་མེ་ཏོག་གི་ཕྲེང་བ་དང་སྦྲུལ་གྱིས་བརྒྱན་པ། ཐོད་སྐམ་གྱི་དབུ་རྒྱན་ཅན། ལྟོ་བ་འཕྱང་ཞིང་སྟག་གི་པགས་པའི་ཤམ་ཐབས་གསོལ་བ། མི་བསྐྱོད་པའི་ཅོད་པན་ཅན། བདུད་བཞིའི་སྟེང་ན་གཡོན་བརྐྱང་པའི་ཕྱེད་སྐྱིལ་གྱིས་བཞུགས་ཤིང་། ཡེ་ཤེས་ཀྱི་མེ་ཕུང་འབར་བའི་གནས་གསུམ་ཨོཾ་ཨཱཧཱུཾ། ཐུགས་ཀར་ཉི་མ་ལ་ཊཾ། དེ་ལས་འོད་ཟེར་འཕྲོས་པས་ཡེ་ཤེས་པ་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ གཉིས་སུ་མེད་པར་གྱུར། ཐུགས་ཀར་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་མེ་དང་མཚོན་ཆ་ལྟ་བུ་འཕྲོས་པས་བདུད་དང་དགྲ་བགེགས་ཐམས་ཅད་ཚར་བཅད་པར་བསམས་ལ། ཧཱུཾ་ཏྲི་ཧཱུྃ་ཕཊ། ཅེས་བཟླ། ཨོ་ཨེ་ཀ་ཛ་ཊི་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། །ཆར་སྤྲིན་འཁྲུགས་པ་ལྟ་བུའི་སྐུ། །གྲི་གུག་ཐོད་པའི་ཕྱག་རྒྱས་བརྗིད། །ས་གསུམ་གདུག་པ་འདུལ་མཛད་
པའི། །ཁྲོ་གཉེར་ཅན་མཛད་མ་ལ་འདུད། ཅེས་བསྟོད། སྔགས་མཐར་ཨ་ཀཱ་རོ་བཏགས་པས་གཏོར་མ་དབུལ། འཕགས་མ་རལ་གཅིག་མས་བདུད་དང་དགྲ་བགེགས་ཐམས་ཅད་ཚར་གཅོད་པའི་དྲག་པོའི་ལས་ཀྱི་དངོས་གྲུབ་མ་ལུས་པ་སྩལ་དུ་གསོལ། ཡེ་ཤེས་པ་གཤེགས། དམ་ཚིག་པ་རང་ལ་ཐིམ་པས་གཟི་བརྗིད་ཕུན་སུམ་ཚོགས་པར་བསམ་མོ། །འདི་ཡན་གྱི་མཆོད་པ་བྱིན་རླབས་དམིགས་བསལ་ཟླ མེད་པ་རྣམས་ལ་རིགས་གསུམ་ལྟར་བྱ་ཞིང་། མཇུག་ཏུ་ཡི་གེ་བརྒྱ་པས་ནོངས་པ་བཤགས། དམིགས་བསལ་རྣམས་མ་གཏོགས་མཐར་ཡེ་ཤེས་པ་གཤེགས། དམ་ཚིག་པ་རང་ལ་བསྡུའོ། །དེ་རྣམས་ཀྱང་རང་རང་གང་མོས་དང་། སྐབས་སུ་གང་བབ་པ་ཉམས་སུ་བླང་བ་ལས་མཐར་ཆགས་སུ་བྱ་མི་དགོས་སོ། ༈ །དེ་ནས་ཕྱོགས་སྐྱོང་། རྒྱལ་ཆེན། འབྱུང་པོ། གཞི་བདག །བགེགས་ཀྱི་གཏོར་མ་རྣམས་རྒྱུད་སྡེ་འོག་མའི་ཆོ་གའི་ཡན་ལག་ལས་འབྱུང་བ་ལྟར་རྒྱས་བསྡུས་གང་རུང་བྱ། ཤིན་ཏུ་བསྡུ་ན་བསང་སྦྱང་། ཨ་ཀཱ་རོས་བརླབས་ལ། དང་པོ་ནི། ཨོཾ་ད་ཤ་དིཀྲ་ལོ་ཀ་པཱ་ལ་ས་པ་རི་ཝཱ་ར་ཨེ་ཧེ་ཧིས་མགྲོན་དགུག ། པདྨ་ཀ་མ་ལཱ་ཡ་ཧཱུཾ་གྱིས་གདན་དབུལ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་གྲི༔་དཾ་ཨནྡྷཾ་སོགས་ནས་ཤབྟ་པྲ་ཏཱི་ཙྪ་སྭཱ་ཧཱས་མཆོད། ཨོཾ་ད་ཤ་དིཀྲ་ལོ་ཀ་པཱ་ལ་ས་པ་རི་ཝཱ་ར་གྲིཉྩ་དཾ་ན་མ་སྶརྦ་ཏ་ཐཱ་ག་ཏེ་བྷོ་བི་
ཤྭ་མུ་ཁེ་བྷྱསོགས་ལན་གསུམ་གྱིས་གཏོར་མ་དབུལ། འཇིག་རྟེན་སྐྱོང་བ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་སོགས་སྤྱི་ལྟར་བརྗོད་པས་ཕྲིན་ལས་གསོལ་བར་བྱའོ། །དེས་མཚོན་ཏེ། གཉིས་པ་ནི། ཨོ་ཙ་ཏུརྨ་ཧཱ་རཱ་ཛ་སེ་ན་ས་པ་རི་ཝཱ་ར་ཨེ་ཧེ་ཧི། པདྨ་ཀ་མ་ལཱ་ཡ་ཧཱུཾ། སྔགས་མཐར་གྲི་ལྕེ་དཾ་ཨརྒྷཾ་སོགས་དང་། གྲིཉྩ་དཾ་ན་མ་སྶརྦ་སོགས་བཏགས་པས་མཆོད་གཏོར་དབུལ། མཐུ་ཆེན་རྒྱལ་པོ་སྡེ་བཞི་རྣམས། མཆོད་སྦྱིན་གཏོར་མ་སོགས་བརྗོད། གསུམ་པ་ནི། ཨོཾ་སརྦ་ལོ་ཀ་ཀཱ་ར་ས་པ་རི་ཝཱ་ར་ཨེ་ཧེ་ཧི། པདྨ་ཀ་མ་ལཱ་ཡ་ཧཱུཾ། སྔགས་མཐར་ཨནྡྷཾ་སོགས་དང་། ན་མསྶརྦ་སོགས་བཏགས་པས་མཆོད་གཏོར་དབུལ། །འཇིག་རྟེན་པ་ཡི་འབྱུང་པོ་རྣམས། །མཆོད་སྦྱིན་གཏོར་མ་འདི་བསྣོམས་ལ། །ཆོས་དོན་བདེན་པ་ལ་གནས་ནས། །ཞི་ཞིང་དུལ་བའི་སེམས་སུ་མཛོད། །བདག་ཅག་བྱང་ཆུབ་མ་ཐོབ་བར། །གེགས་མེད་བར་ཆད་མེད་པ་དང་། །དམ་ཚིག་གནས་ལ་གནས་མཛོད་ལ། །བྱང་ཆུབ་ཐོབ་པའི་གྲོགས་ཀྱང་མཛོད། །བཞི་པ་ནི། ཨོཾ་བྷུ་མི་པ་ཏི་ས་པ་རི་ཝཱ་ར་ཨཱ་ཀརྨ་ཡ་ཛ༔ སྔགས་མཐར་ཨནྡྷཾ་སོགས་དང་། ན་མསྶརྦ་བཏགས་པས་མཆོད་གཏོར་སྦྱིན། །གཞི་བདག་གནས་བདག་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་སོགས་བརྗོད། ལྔ་པ་ནི། རང་
ཉིད་རིགས་ཀྱི་ཁྲོ་བོའི་ང་རྒྱལ་དང་བཅས། །བླ་མ་མཆོག་གསུམ་བདེན་པ་དང་། །གསང་སྔགས་རིག་སྔགས་བྱིན་རླབས་ཀྱིས། །བགེགས་ཀྱི་རིགས་རྣམས་གང་ཡིན་ཀུན། །སྐད་ཅིག་གནས་འདིར་མཆིས་གྱུར་ཅིག །ཊཱཀྐི་ཧཱུྃ་ཛ༔ ཨོཾ་གུང་ཀ་རི་གུང་ཀ་རི་སྭཱ་ཧཱ། ཨོ་པི་ཙི་པི་ཙི་སྭཱ་ཧཱ། ཨོཾ་གུང་གུང་སྭཱ་ཧཱ་སརྦ་བིགྷཱན་གྲིཉྩེ་དཾ་ཨགྷཾ་སོགས་དང་། སྔགས་དེ་མཐར་སརྦ་བིགྷཱན་ན་མསྶརྦ་སོགས་བཏགས་པས་མཆོད་གཏོར་བསྔོ། །གང་ཞིག་མཚན་མོར་རྒྱུ་བ་ཡི། །འབྱུང་པོ་རྣམས་དང་ཤ་ཟ་དང་། །སྲིན་པོ་ཤ་རྗེན་ཟ་བ་དང་། །སེམས་ཅན་རྣམ་པ་སྣ་ཚོགས་པ། །ལྗོན་ཤིང་གེལ་པ་སོགས་གནས་པ། །དེ་དང་དེ་ལ་གཏོར་མ་ནི། །བཟའ་བ་ཤ་ཆང་ལ་ཕུག་བཅས། །འབྲས་ཆན་འབྲས་བུ་མང་པོ་ཡི། །མཆོད་སྦྱིན་འདི་ཡིས་མགུ་བྱོས་ལ། །གནོད་པའི་བསམ་པ་ཞི་བ་དང་། །བདག་ཅག་རྣམས་ལ་ཕན་པའི་ཡིད། །དེ་རིང་ཕྱིན་ཆད་བསྐྱེད་པར་གྱིས། ཞེས་བསྒོ། ཐུན་མོང་དུ། ཡེ་དྷརྨཱ་སོགས་དང་། སྡིག་པ་ཅི་ཡང་མི་བྱ་སོགས་ཆོས་སྦྱིན་བྱ། གཙྪགཙྪ་སྭ་བྷཱ་ཝ་ནཱི་ཞེས་རང་རང་གི་གནས་སུ་གཤེགས། ནག་ཕྱོགས་པ་སྡོད་སྲིད་པས་ཨ་མྲྀ་ཏ་སོགས་དྲག་སྔགས་ཀྱིས་མཚམས་གཅོད། ཤིས་པ་བརྗོད་པས་མཐའ་བརྒྱན་པར་བྱའོ། ༈ །དེ་ནས་ཟས་ཀྱི་རྣལ་འབྱོར་ལ་འཇུག་པའི་སྔ་ལོགས་སུ། དལ་འབྱོར་གྱི་ལུས་ཐོབ་ཅིང་།
ཆོས་དང་མཐུན་པའི་འཚོ་བའི་ཡོ་བྱད་རྙེད་པའང་དཀོན་མཆོག་གི་ཐུགས་རྗེ་ལས་བྱུང་བར་ངེས་པས་རྗེས་སུ་དྲན་པའི་མདོ་གདོན་ཅིང་དོན་ཡིད་ལ་བྱ། དེ་ནས་བཟའ་བའི་ཚེ། ལོག་པའི་འཚོ་བ་རྣམ་པར་སྤངས་ཏེ་ཆོས་དང་མཐུན་པའི་འཚོ་བ་ཇི་ལྟར་རྙེད་པ་དེ་ལ་ཆ་བཞིར་བགོས་ལ། ཆ་གཅིག་ནི་གྲོགས་ཚངས་པ་མཚུངས་པར་སྤྱོད་པ་རྣམས་ལ་སྤྱིར་བཞག །གཉིས་པ་ནི། བཀྲེས་པ་དང་། ལོང་བ། ནད་པ་ལ་སོགས་པ་སྡུག་བསྔལ་བ་རྣམས་ཀྱི་ཕྱིར་བཞག །གསུམ་པ་ནི། སེམས་ཅན་ལོག་པར་ལྟུང་བ་རྣམས་ལ་སྦྱིན། ཆ་བཞི་པ་རང་བཟའ་བའི་ཕུད་སྣོད་གཙང་མར་བཤམས་ལ། ཨོཾ་ཨཱཧཱུྃ་ལན་གསུམ་བརྗོད་པས་བདུད་རྩིར་བྱིན་གྱིས་བརླབས་ལ། ཨོཾ་གུ་རུ་བཛྲ་ནེ་ཝི་དྱེ་ཨཱཧཱུྃ་གིས་བླ་མ། ༀ་དེ་ཝ་མཎཱ་ལ་ས་པ་རི་ཝཱ་རེ་བྷུབཛྲ་ནེ་ཝི་དྱེ་ཨཱཿཧཱུྃ་གིས་ཡི་དམ་དང་། ཨོཾ་སརྦ་བུདྡྷ་བོ་དྷི་ས་ཏྭ་ཧཱུཾ་བཛྲ་ནེ་ཝི་དྱ་ཨཱཏྟཱཧཱུྃ་ཞེས་པས་སངས་རྒྱས་དང་བྱང་ཆུབ་སེམས་དཔའ། སོ་སོའི་གཏོར་སྔགས་སྤྱི་ཙམ་དུ། ཨོཾ་ཤྲཱི་བཛྲ་དྷརྨ་པཱ་ལ་ས་མུ་དྲ་ས་པ་རི་ཝཱ་རེ་བཛྲ་ནེ་ཝི་དྱ་ཨཱ༔ཧཱུྃ་གིས་ཆོས་སྐྱོང་། ཨོ་ཨཱརྨ་ཛམྦྷ་ལ་བཱ་སུ་དེ་ཝ་ས་པ་རི་ཝཱ་རེ་བྷྱབཛྲ་ནེ་ཝཾ་དུ་ཨཱཧཱུྃ་གིས་ནོར་ལྷ་རྣམས་ལ་དབུལ། སྣོད་གཞན་ཞིག་ཏུ་གཏོར་མ་གཅིག་བཞག་ལ། ཨོཾ་ཨཱཧཱུྃ་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ་ཨཱ་དྱ་ནུཏྤནྣ་ཏྭ་ཏྲ་ཨོ་ཨཱཧཱུྃ་ཕཊ་སྭཱ་ཧཱ་ཞེས་པས་འབྱུང་པོ་ཐམས་ཅད་ལ་སྦྱིན།
དེ་ནས་ཆ་གསུམ་པ་ལ་ཆང་བུ་གཅིག་ཕུད་ལ་དབང་བའི་འབྱུང་པོ་རྣམས་ལ་སྦྱིན་ཏེ། ཨོཾ་ཨ་གྲ་པིཎྜ་ཨཱ་ཤི་སྭཱ་ཧཱ། གཏོར་མ་ཆང་བུ་གཅིག །ཨོཾ་དུ་ཏི་ཀཱི་ཨ་གྲ་སཾ་པྲ་ཏཱི་ཙྪ་སྭཱ་ཧཱ། ཨོཾ་ཨཱ༔ཧཱུྃ་ཞེས་པས་ཕོ་ཉ་མོ་རྣམས་ལ་ཕུལ་ཏེ། བཟའ་བའི་མཐའ་ཇི་སྲིད་བར་ས་ལ་བཞག་གོ། །འཕྲོག་མའི་གཏོར་མ་རྒྱས་པ་ནི། གཏོར་མ་ཆང་བུ་གསུམ་དང་ཤ་དང་ཆང་ལ་སོགས་པའང་སྣོད་གཅིག་ཏུ་བཞག་སྟེ་འཕྲོག་མ་ལ་སྦྱིན་པ་ནི། ཁ་ཟས་ཀྱི་སྔོན་འདི་ཉིད་དུ་འམ་དུས་གཞན་དག་ཏུའང་རུང་བས་ཁྱིམ་མམ་ལྷ་ཁང་ངམ། མཆོད་རྟེན་ལ་སོགས་པ་གང་ཡང་རུང་བར་བྱ་སྟེ། ཨོཾ་ཨཱཿཧཱུྃ་གིས་བྱིན་གྱིས་བརླབས་ལ། མདུན་དུ་ཧ་ལས་གནོད་སྦྱིན་མ་འཕྲོག་མ་གདོང་གཅིག་པ། ཁ་གདངས་མཆེ་བ་གཙིགས་པ་འཇིགས་སུ་རུང་བ། ལྕེ་འདྲིལ་བ། ལག་པ་གཡོན་པས་མགོ་བོ་འཛིན་ཅིང་། གཡས་པ་ངོ་མཚར་གྱི་ཕྱག་རྒྱ་ཅན། རོ་སྨད་ཀྱི་ཆ་མིའི་པགས་པས་གཡོགས་པ། གར་གྱི་འགྱིང་ཚུལ་བྱས་ཤིང་། སྣ་ཚོགས་པའི་མདོག་ཅན་དང་། ཡཱ་ལས་དེའི་བདག་པོ་རྡོ་རྗེ་གནོད་སྦྱིན་གཅེར་བུ་སྐྲ་བཤིགས་པ་ཆ་ལུགས་འཕྲོག་མ་ལྟ་བུ་དང་། ཁེ་ལས་དེའི་བུ་རྣམ་ཐོས་སྲས་དཀར་པོ་མཆེ་བ་ཅུང་ཟད་གཙིགས་པའི་གདོང་གཅིག་པ། སེང་གེ་ལ་ཞོན་པ། ལག་པ་གཉིས་ཀྱི་གཡོན་ན་སེང་གེའི་རྒྱལ་མཚན་དང་། པདྨའི་གཏེར་གྱིས་སྒེག་པ་དང་བཅས་པ། གཡས་ན་
རྔ་ཡབ་དཀར་པོ་གཡབ་ཅིང་། རིན་པོ་ཆེའི་གཏེར་ཐོགས་པའོ། །ཨུཏྤ་ལའི་ཕྱག་རྒྱས། ཨོ་ཨེ་བྱེ་བྱེ་ཡ། ཧ་རི་ཏེ། པཉྩ་ཤ་ཏ་པུ་ཏྲ་ས་པ་རི་ཝཱ་རེ་བཛྲ་ཡཀྵ་སྲི་ཡ་ཨསྨིཾ་སནྟི་ཧི་ཏེ་བྷ་བ་སྭཱ་ཧཱ། ཞེས་པས་བོས་ལ། ཨོ་ཧ་རི་ཏེ་མ་ཧཱ་ཡཀྵ་ཎཱི་ཡེ། ཧ་ར་ཧ་ར། སརྦ་པ་པོ་ཀཱི་སརྦ་ཡཀྵ་ཎི་པྲ་བེ་ཤ །པཉྩ་ཤ་ཏ་པུ་ཏྲ་ས་པ་རི་ཝཱ་ར། ཨི་མཾ་བ་ལིཾ། གྲིཉྩ་གྲིཉྩ་ཧཱུྃ་ཕཊ་སྭཱ་ཧཱ། ཨོཾ་བཛྲ་ཡཀྵ་རུ་དྲ་མ་ཏྲ་སྭཱ་ཧཱ། ཨོཾ་བཻ་ཤྲ་བ་ཎཱ་ཡ་སྭཱ་ཧཱ། དེ་ཙམ་མི་ནུས་ན། ཨོཾ་ཧ་རི་ཏེ་མ་ཧཱ་བཛྲ་ཡཀྵི་ཎཱི་ཧ་ར་ཧ་ར་སརྦ་པ་པཱ་ནི་མི་ཀྵ་སྭཱ་ཧཱ། གང་རུང་བརྗོད་ནས། ཆུའི་སྣོད་དུ་བཅུག་སྟེ་དབེན་པར་དོར་བར་བྱའོ། །ཨོཾ་པྲ་ཡཾ་ཀ་ར་སྭཱ་ཧཱ་ཞེས་ཆང་བུ་གཅིག་སྦྱིན་ནོ། །དེ་ནས་བདག་ཉིད་བཟའ་བ་ལ་ཆགས་པ་དང་། བརྐམ་པ་དང་། ཞེན་པ་མེད་པར་བཟའ་སྟེ། ལུས་གནས་པར་འགྱུར་བ་དང་། འཚོ་བར་བྱ་བའི་ཕྱིར་དང་། མི་གཙང་བའི་རྫས་རྣམས་ཀྱིས་གང་བའི་ལུས་སྙིང་པོ་མེད་པ་མཐར་འཇིག་པ་འདིས་སངས་རྒྱས་ཀྱི་ཆོས་ཀྱི་སྐུའི་སྙིང་པོ་དེ་བཙལ་བར་བྱའོ། །ལུས་འདི་ལ་སྲིན་བུའི་རིགས་བརྒྱད་ཁྲི་ཡོད་པ་དག་འདིའི་མཐུས་བདེ་བར་གནས་པར་གྱུར་ཅིག །ད་ལྟ་ནི་འདི་དག་ཟང་ཟིང་གིས་བསྡུ་བར་བྱ་ཞིང་། བྱང་ཆུབ་ཐོབ་ནས་ནི་ཆོས་ཀྱིས་བསྡུ་བར་བྱའོ་ཞེས་སེམས་བསྐྱེད་ལ། རྡོ་རྗེ་ཐེག་པ་བླ་མེད་ཀྱི་རྣལ་འབྱོར་པས་ནང་གི་སྦྱིན་སྲེག་གི་ཚུལ་དུ་རོལ་པ་ནི། རང་
ལུས་ལྷག་པའི་ལྷར་གསལ་བའི། །ལྟེ་བར་གཏུམ་མོ་འབར་བ་ཡི། །མེ་ལྕེ་སྙིང་གར་སླེབ་པའི་དབུས། །བླ་མ་ཡི་དམ་ལྷ་ཚོགས་དང་། །ལྟེ་དབུས་མཁའ་འགྲོ་ཆོས་སྐྱོང་ཚོགས། །གཞན་ཡང་ཕུང་ཁམས་སྐྱེ་མཆེད་ཀུན། །གདན་གསུམ་ཚང་བའི་དཀྱིལ་འཁོར་པ། ཏིལ་གྱི་གོང་བུ་ལྟ་བུར་བཞུགས། །ལག་གཉིས་རྡོ་རྗེའི་དགང་བླུགས་ཀྱིས། །བཟའ་བཅའ་བཏུང་བའི་བསྲེག་རྫས་ཚོགས། །ཞལ་གྱི་ཐབ་ཏུ་ཕུལ་བ་ཡིས། །ལྷ་རྣམས་མཉེས་ཤིང་ཚིམ་ནས་ཀྱང་། །མཆོག་ཐུན་དངོས་གྲུབ་སྩལ་བར་གྱུར། ཅེས་གསལ་བཏབ་ལ། ཨོཾ་ཨཱཧཱུྃ་ཞེས་བརྗོད་ཅིང་རོལ། དེ་ལྟ་བུ་མི་ཤེས་པའམ་མི་ནུས་ན། བདག་ཉིད་འཇིག་རྟེན་དབང་ཕྱུག་གི་སྐུར་གསལ་བས། ཨོཾ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབས་ཏེ་བདུད་རྩིར་བསམས་ལ་བཟའོ། །གཞན་ཡང་ན་མསརྦ་བུདྡྷ་བོ་དྷི་སཏྭཱ་ནཱཾ། ཨོཾ་བ་ལིཾ་ཏ་ཏེ་ཛོ་བ་ལིཾ་ནི་སྭཱ་ཧཱ། ཞེས་ལན་བརྒྱད་བསྔགས་ཏེ། ཐོག་མར་མཐེ་བོང་དང་སྲིན་ལག་གིས་བླངས་ནས་ཟོས་ན་དུག་ལ་སོགས་པའི་ཉེས་པ་ཞི་བར་བཤད་དོ། །དེ་ནས་ཁམ་རེ་རེ་ཞིང་ལྷ་ལ་བདུད་རྩིའི་མཆོད་པ་ཕུལ་བར་བསམས་ཏེ། ཨོ་དི་བྱ་ཨན་ས་མ་དྷི་དྷུ་ན་པྲ་ཎ་ཡེ་སྭཱ་ཧཱ། ཞེས་བརྗོད་ཅིང་ཁ་བཀང་བ་དང་། སྒྲ་དང་བཅས་པ་དང་། ཁ་གདངས་པ་དང་། བུལ་བ་དང་། མྱུར་བར་མི་ཟ་ཞིང་། བཟའ་བ་ཉུང་ན་དགེ་བའི་བྱ་བ་ལ་
སྦྱོར་མི་ནུས། མང་དྲགས་ན་གཉིད་ཆེ་བར་འགྱུར་བའི་ཕྱིར་རན་པར་བཟའོ། །དེ་ལ་ལྟོ་བའི་ཆ་གཉིས་ཟས་ཀྱིས་དགང་། ཆ་གཅིག་སྐོམ་གྱིས་དགང་། རླུང་ལ་སོགས་པའི་གནས་སུ་ཆ་གཅིག་སྟོང་པར་བཞག་གོ །ཁ་ཟས་མང་བ་རྙེད་ན་ནི་ཕྱོགས་འདིར་ཟས་ཀྱིས་ཕོངས་པ་སུ་ཞིག་ཡོད་ཅེས་ཕྱོགས་བཞིར་བརྟགས་ལ་བཀྲེས་པས་ཉེན་པ་དག་ལ་བགོ་བཤའ་བྱའོ།་།ཉུང་བ་ལས་མ་རྙེད་ན་ནི་འདི་སྙམ་དུ་ཁ་ཟས་ཉུང་བས་ནི་ལུས་སེམས་ཡང་བ་དང་། གཉིད་ཆུང་བ་དང་། སྤོང་བ་བཟོད་པ་དང་། གཤང་ལྕི་ཉུང་བ་དང་། དད་པས་བྱིན་པ་ཉུང་བས་སྒྲིབ་པ་ཆུང་བར་འགྱུར་རོ། །ཞེས་བསམ་མོ། །ཟས་ཀྱི་ལྷག་མ་ཆ་གཅིག །ཨོཾ་ཨུཙྪིཥྚ་པིཎྜ་ཨ་ཤི་བྷུསྭཱ་ཧཱ་ཞེས་ལྷག་མ་ཟ་བའི་འབྱུང་པོ་རྣམས་ལ་སྦྱིན། ཟས་བྱིན་པའི་འབྱུང་པོ་འཕྲོག་མ་དང་ཡི་དྭགས་རྣམས་ཚིམ་ནས་རང་རང་གི་གནས་སུ་སོང་བར་བལྟའོ། །ལྷག་མ་ཆ་གཅིག་རྡོ་ལེབ་ལ་སོགས་པའི་སྟེང་དུ་དོར་ལ། གཅན་གཟན་དང་བྱའི་ཚོགས་གང་ལ་ལ་ཟས་འདོད་པ་ལ་བྱིན་ནས་ལེན་པ་དེ་དག་བྱིན་པའི་སྦྱིན་པ་འདི་ལ་ཟོ་ཞིག་ཅེས་སེམས་བསྐྱེད་དོ། །དེ་ལྟ་བུའང་ཤིན་ཏུ་བསྡུ་ན། ཟས་ཀྱི་ཕུད་ལས་སྣོད་གཙང་མར་ལྷ་བཤོས་ལྔ་བྱས་ལ། དང་པོ། ཨོཾ་གུ་རུ་བཛྲ་ནེ་ཝི་དྱ་ཨཱཧཱུྃ་གིས་བླ་མ། གཉིས་པ། ཨོ་དེ་ཝ་བཛྲ་ནེ་ཝི་དྱ་ཨཱཿཧཱུྃ་གིས་ཡི་དམ། གསུམ་པ། ཨོ་ཏྲི་རཏྣ་བཛྲ་ནེ་ཝི་དྱ་ཨཱཿཧཱུྃ་གིས་
དཀོན་མཆོག་ཨྠྀི། བཞི་པ། ཨོ་དྷརྨ་པཱ་ལ་བཛྲ་ནེ་ཝིདྱ་ཨཱ༔ཧཱུྃ་གིས་ཆོས་སྐྱོང་། ལྔ་པ། ཨོཾ་བ་སུ་དེ་ཝ་བཛྲ་ནེ་ཝི་དྱ་ཨཱ༔ཧཱུྃ་གིས་ནོར་ལྷ་རྣམས་ལ་དབུལ། ཆང་བུ་གསུམ་བྱས་ལ་དང་པོ། །ཨོ་ཧ་རི་ཏེ་སྭཱ་ཧཱས་འཕྲོག་མ། གཉིས་པ། ཨོ་ཧ་རི་ཏེ་བཛྲ་ཡཀྵི་ཎི་སྭཱ་ཧཱས་དེའི་བུ་ལྔ་བརྒྱ། གསུམ་པ། ཨོཾ་ཨ་གྲ་པིཎཱ་ཨ་ཤི་སྭཱ་ཧཱས་ཕུད་ལ་དབང་བའི་འབྱུང་པོ་ལ་སྦྱིན། དེ་ནས་ནང་གི་སྦྱིན་སྲེག་རྒྱས་བསྡུས་གང་ཕྱིན རུང་གི་ཚུལ་དུ་ཚིམ་པར་རོལ་མཐར། ཨོཾ་ཨུཙྪིཥྚ་བ་ལིཾ་ཏ་བྷཀྵ་སི་སྭཱ་ཧཱས་ལྷག་མའི་ཆང་བུ་སྦྱིན་ནོ། །དེ་ནས་ཁ་བཀྲུས་ཏེ་མདོ་ཟབ་མོ་བཏོན་པའི་རྗེས། ན་མོ་བྷ་ག་ཝ་ཏེ། སུ་མེ་རུ་ཀཝ་རཱ་ཛ་ཡ། ཏ་ཐཱ་ག་ཏཱ་ཡ། ཨདྷ་ཏེ་སམྱཀཾ་བུདྡྷཱ་ཡ། ཏདྱ་ཐཱ། ཨོཾ་ཀཝེ་ཀཝེ། མ་ཧཱ་ཀལྤ་ཀཝེ་པ་རི་ཤོ་དྷ་ནི་སྭཱ་ཧཱ། ཞེས་སམ། ན་མས་མནྟ་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨདྷ་ཏེ་སམྱཀཾ་བུདྡྷཱ་ཡ། ན་མོ་མཉྫཤཱི་ཡེ། ཀུ་མཱ་ར་བྷུ་ཏཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོཾ་ནི་ར་ལམྨེ་ནི་ར་བ་སེ། ཛ་ཡེ་ཛ་ཡ་ལ་བྷེ་མ་ཧཱ་མ་ཏེ་དཀྱེ་དཀྵི་ཎཾ་མེ་པ་རི་ཤོ་དྷ་ཡ་སྭཱ་ཧཱ། ཞེས་མང་དུ་བརྗོད་དེ། གང་གཟུངས་འདི་ལན་གཅིག་རྗོད་པར་བྱེད་པ་དེའི་རི་རབ་ཙམ་གྱི་བསོད་སྙོམས་ཀྱང་ཡོངས་སུ་སྦྱོང་བར་འགྱུར་རོ། །ཞེས་གསུངས་སོ། །བྱང་ཆུབ་སེམས་དཔའ་ཁྱིམ་པ་ཡིན་ན། འཇིག་རྟེན་གྱི་ཁམས་མ་ལུས་པ་ན་གནས་
པའི་འགྲོ་བ་གསུམ་པོ་བདེ་བར་གྱུར་ཅིག །ཅེས་བརྗོད། རབ་ཏུ་བྱུང་བས་ནི། སྦྱིན་པའི་ཚིགས་བཅད་བརྗོད་དེ། །རྒྱལ་པོ་སྦྱིན་བདག་ཉིད་དང་གང་། །སེམས་ཅན་ཕུང་པོ་གཞན་རྣམས་ཀྱང་། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་དང་ལྡན་གྱུར་ཅིག །སྦྱིན་པས་འབྱུང་པོ་དབང་དུ་འགྱུར། །སྦྱིན་པས་འཁོན་རྣམས་ཉམས་པར་འགྱུར། །སྦྱིན་པས་ཕ་རོལ་གཉེན་དུ་འགྱུར། །དེ་ཕྱིར་སྦྱིན་པ་གཙོ་བོར་བརྗོད། །སྦྱིན་པ་འཇིག་རྟེན་རྒྱན་ཡིན་ཏེ། །སྦྱིན་པས་ངན་འགྲོ་ཟློག་པར་བྱེད། །སྦྱིན་པ་མཐོ་རིས་ཐེམ་སྐས་ཏེ། །སྦྱིན་པ་ཞི་བྱེད་དགེ་བའོ། །བྱང་ཆུབ་སེམས་དཔའི་ལོངས་སྤྱོད་རྣམས། །མི་ཟད་ནམ་མཁའ་ལྟ་བུ་གང་། །ལོངས་སྤྱོད་དེ་ནི་ཐོབ་བྱའི་ཕྱིར། །སྦྱིན་པ་དེ་ནི་ཡང་དག་སྤེལ། ཞེས་པ་ལ་སོགས་པ་སྦྱིན་པའི་ཚིགས་བཅད་བཏོན་ལ། སྨོན་ལམ་འདི་གདབ་པར་བྱ་སྟེ། གང་གིས་ཡབ་སྲས་མཇལ་བའི་མདོ་ལས། བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག །གང་གིས་བདག་ལ་སྐོམ་བླུད་པ་དེ་དག་དང་། གང་གིས་བདག་ལ་རིམ་གྲོ་བྱས་པ་དང་། བཀུར་སྟི་བྱས་པ་དང་། བསྟི་སྟང་བྱས་པ་དང་། མཆོད་པ་བྱས་པ་དེ་དག་ཐམས་ཅད་ཀྱང་ཉེ་བར་ཞི་བའི་བདེ་བ་ཐོབ་པར་གྱུར་ཅིག །གང་དག་བདག་ལ་གཤེ་བར་བྱེད་པ་དང་། མི་བདེ་བར་བྱེད་པ་དང་། བརྡེག་པ་དང་། མཚོན་
གྱིས་འདེབས་པ་དང་། རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས་ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཅིག །ཅེས་དང་། གང་གིས་སྒྱུ་མ་མཁན་བཟང་པོ་ལུང་བསྟན་པར། སྦྱིན་པ་གང་ལ་སྦྱིན། །སྦྱིན་པ་ཇི་ལྟར་མི་རྟོག་པ། །སྦྱིན་པ་མཉམ་པ་དེ་ཉིད་ཀྱིས། །སྦྱིན་བདག་རྣམས་ལ་ཡོངས་རྫོགས་ཤོག །ཅེས་བརྗོད་དོ། ༈ །གལ་ཏེ་འཁོར་ལོ་བདེ་མཆོག་གི་རྣལ་འབྱོར་པ་ཡིན་ན། ཁ་ཟས་བཟའ་བཏུང་དང་འབྲེལ་བར་ལག་པའི་མཆོད་པ་བྱ་བར་སྤྲོ་ན་གཉིས། རྒྱས་པ་དང་། བསྡུས་པའོ། །དང་པོ་ནི། བཟའ་བཏུང་རྣམས་མདུན་དུ་བདར་ལ་རང་གི་ལག་པ་གཡོན་པའི་མཐིལ་དུ་ཧ་དམར་པོ་ལས་བྱུང་བའི་པདྨ་དམར་པོ་འདབ་མ་བརྒྱད་པ་ཧ་དམར་པོས་མཚན་པ་སྣང་བ་མཐའ་ཡས་ཀྱི་རང་བཞིན་དུ་བསམས་ཏེ་སྟེང་ནས་ཐུར་དུ་ཁ་སྦུབས་པས་དགབ། ལག་པ་གཡས་པའི་མཐིལ་དུ་ཧོ་དཀར་པོ་ལས་བྱུང་བའི་འཁོར་ལོ་དཀར་པོ་རྩིབས་བརྒྱད་པ་ཧོ་དཀར་པོས་མཚན་པ་རྣམ་པར་སྣང་མཛད་ཀྱི་རང་བཞིན་དུ་བསམས་པ་ཁ་འོག་ནས་གྱེན་དུ་བསྟན་པའི་ཁ་ཟས་དངོས་སུ་འཇོག་པའམ་བཞག་པར་མོས། བཟའ་བཏུང་གང་ཡིན་ཐོད་པ་ཕྱི་དཀར་ལ་ནང་དམར་བའི་ནང་ཤ་ལྔ་བདུད་རྩི་ལྔས་གང་བར་བསྒོམས་ཏེ། དེའི་སྟེང་དུ་དབུས་
སུ་ཧྲུསྔོན་པོ་མི་བསྐྱོད་པའི་རང་བཞིན་ཅན་འཁོད་པར་དམིགས་ལ། ཡི་གེ་གསུམ་པོའི་རང་མདོག་གི་འོད་ཟེར་གྱིས་ཁ་དོག་དྲི་ནུས་ཀྱི་སྐྱོན་སྦྱངས་པར་བསམས་ཏེ། ཧ་ཧོ་ཧཱུྃཞེས་བརྗོད། ཧཱིའི་གཡས་སུ་སྐུ་རྡོ་རྗེའི་ངོ་བོ་ཨོཾ་དཀར་པོ། །གཡོན་དུ་གསུང་རྡོ་རྗེའི་ངོ་བོ་ཨཱདམར་པོ། །མདུན་དུ་ཐུགས་རྡོ་རྗེའི་ངོ་བོ་ཧཱུྃ་སྔོན་པོ་གསུམ་ལྷམ་མེར་འཁོད་པ་ལས་འོད་ཟེར་ཕྱོགས་བཅུར་འཕྲོས། དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་བསྡུས་ཏེ་འབྲུ་གསུམ་སོ་སོར་ཐིམ། དེ་བདུད་རྩིར་ཐིམ་པས་དམ་ཚིག་པའི་བདུད་རྩི་ཡེ་ཤེས་ཀྱི་བདུད་རྩིས་ནུས་ལྡན་དུ་བྱས་པར་བསམས་ལ། ཁ་དོག་དྲི་རོ་ནུས་པའི་སྐྱོན་ཐམས་ཅད་སྦྱངས་ནས་བདུད་རྩི་ལྔའི་ངོ་བོར་གྱུར་ཅེས་བརྗོད་ལ། ཨོཾ་ཨཱཧུཾ་ཞེས་ལན་གསུམ་གྱི་བྱིན་གྱིས་བརླབ། དེ་ནས་ཁ་ཟས་བདུད་རྩིར་བྱིན་གྱིས་བརླབས་པ་དེས་ལག་གཡས་པའི་མཐེ་བོང་ལ་ཐིག་ལེ་བཏབ་སྟེ། རྡོ་རྗེ་སེམས་དཔའི་ངོ་བོ་ཨོཾ་ཧ་དཀར་པོ། །རིམ་པ་བཞིན་དུ་མཛུབ་མོ། །གུང་མོ། །སྲིན་ལག །མཐེའུ་ཆུང་། རྒྱབ་ཀྱི་སེན་མོ་ལྔ་སྤྱི་བསྡོམས་རྣམས་ལ་ཐིག་ལེ་བཏབ་སྟེ། རྣམ་སྣང་གི་ངོ་བོ་ན་མ་ཧི་སེར་པོ། །པདྨ་གར་དབང་གི་ངོ་བོ་སྭཱ་ཧཱ་ཧུ་དམར་པོ། །དཔལ་ཧེ་རུ་ཀའི་ངོ་བོ་བོ་ཥཊ་ཧེ་ནག་པོ། །རྡོ་རྗེ་ཉི་མའི་ངོ་བོ་ཧཱུཾ་ཧཱུཾ་ཧོ་དམར་སེར། རྟ་མཆོག་གི་ངོ་བོ་ཕྲཊ་ཧཾ་ལྗང་གུ་རྣམས་ཀྱིས་མཚན་
བར་གྱུར། ཅེས་བརྗོད་པས་སོར་མོ་ཐམས་ཅད་ཡི་གེའི་མདོག་གི་འོད་ཟེར་གྱིས་གསལ་བར་བསམ། དེ་ནས་གཡོན་པའི་ལག་མཐིལ་དུ་ཡི་གེའི་མདོག་དང་མཚུངས་པའི་པདྨ་འདབ་མ་ལྔ་པ་ཞིག་བསམས་ལ། དང་པོ་ལག་མཐིལ་གྱི་དབུས། དེ་ནས་མདུན་གྱི་འདབ་མ་ནས་བཟུང་གཡོན་སྐོར་དུ་ཐིག་ལེ་རེ་བཀོད་དེ། རྡོ་རྗེ་ཕག་མོའི་ངོ་བོ་ཨོཾ་བཾ་དམར་པོ། །གཤིན་རྗེ་མོའི་ངོ་བོ་ཧཾ་ཡོ་སྔོན་པོ། །རྨོངས་བྱེད་མའི་ངོ་བོ་ཧྲི་མོ་དཀར་པོ། །སྐྱོད་བྱེད་མའི་ངོ་བོ་ཧཱུཾ་ཧཱུཾ་སེར་པོ། སྐྲག་བྱེད་མའི་ངོ་བོ་ཧཱུྃ་ཧཱུྃ་ལྗང་གུ། ཙཎྜི་ཀའི་ངོ་བོ་ཕཊ་ཕཊ་དུད་ཀས་མཚན་པར་གྱུར། ཅེས་བརྗོད་ཅིང་ཐམས་ཅད་ཀྱང་འོད་ཟེར་འབར་བ་ལྷ་དེ་དང་དེ་དངོས་སུ་གྱུར་པར་བསམ། ལག་པའི་ཤ་རུས་སོགས་ས་ཁམས་ལ་བརྟན་པ་ཐམས་ཅད་སྤྱན་མའི་ངོ་བོ། །ཁྲག་ཆུ་སེར་སོགས་ཆུ་ཁམས་ཐམས་ཅད་མཱ་མ་ཀཱིའི་ངོ་བོ། །དྲོད་སོགས་མེ་ལ ཁམས་ཐམས་ཅད་གོས་དཀར་མོའི་ངོ་བོ། །རླུང་སོགས་སྒྲོལ་མའི་ངོ་བོ། །རྩའི་སྦུབས་སྟོང་སོགས་ནམ་མཁའི་ཁམས་ཐམས་ཅད་རྡོ་རྗེ་ཕག་མོའི་ངོ་བོར་མོས་ཤིང་། ལག་པའི་རྒྱབ་ཀྱི་བོལ་གོང་ཐམས་ཅད་དཔལ་ཧེ་རུ་ཀའི་ངོ་བོའི་ལྷ་ཚོགས་སོགས་ཚོགས་ཞིང་གཞན་རྣམས་ཀྱང་མེ་ལོང་གི་ནང་དུ་གཟུགས་བརྙན་ཤར་བ་བཞིན་དུ་བཞུགས་པར་བསམས་ལ། གོང་གི་ཡི་གེ་ལྷར་མོས་པ་རྣམས་མཆོད་པས་གཞན་
ཐམས་ཅད་ཀྱང་ཚིམ་པར་བསམས་ལ། སླར་ཡང་བདུད་རྩི་ནས་བླངས་ཏེ་མཐེབ་སྲིན་གྱིས་འཐོར་ཞིང་། ཨོཾ་ཧ་ཨོ་ཨཱཧཱུཾ། ན་མ་ཧི་ཨོ་ཨཱཧཱུྃ། སྭ་ཧཱ་ཧུ་ཨོ་ཨཱཧཱུཾ། བོ་ཥཊ་ཧེ་ཨོ་ཨཱཧཱུཾ། ཧཱུཾ་ཧཱུཾ་ཧོ་ཨོ་ཨཱཧཱུྃ། ཧོ་ཨོ་ཨཱཧཱུཾ། ཨོཾ་བཻ་ཨོ་ཨཱཧཱུཾ། ཧཾ་ཡོ་ཨོ་ཨཱཧཱུཾ། ཧྲི་མོ་ཨོ་ཨཱཧཱུཾ། ཧཱུྃ་ཧཱུྃ་ཨོཾ་ཨཱཧཱུཾ། ཧཱུྃ་ཧཱུྃ་ཨོཾ་ཨཱཧཱུཾ། ཕཊ་ཕྲཊ་ཨོ་ཨཱཧཱུཾ། ཞེས་ལན་གསུམ་བདུན་ཅི་རིགས་ཀྱིས་མཆོད། དེ་ཡང་ཇ་ཆང་འོ་ཞོ་སོགས་བཏུང་བ་རྣམས་ནི་དངོས་སུ་འཐོར་བ་ཡིན་ལ། བཟའ་བ་རྣམས་ནས་བླངས་པའི་མོས་པས་མཆོད། མཐར་ལག་པའི་ལྷ་ཚོགས་ལ་དཔལ་ཧེ་རུ་ཀ་ཡབ་ཡུམ་གྱིས་བདག་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ་ཞེས་གསོལ་བ་དྲག་ཏུ་གདབ། དངོས་གྲུབ་ཞུ་བའི་སླད་དུ་ལག་པ་སྤྱི་བོར་གཞག་ཅིང་ལྷ་ཚོགས་རྣམས་ལག་པའི་གནས་སོ་སོ་དང་། རང་ལ་ཐིམ་པར་བསམ། ལག་པར་འགོས་པའི་ཁ་ཟས་ཁཾ ནས་བཟའ་བཏུང་ལ་བསྲེས་ཏེ་སླར་ཡང་ཕུད་ཀྱིས་ལྷ་ཚོགས་མཆོད་ཅིང་། རང་གིས་མྱང་བར་བྱ་དགོས་ཏེ་ཧེ་རུ་ཀའི་རྒྱུད་ལེའུ་སོ་གཅིག་པ་ལས། །ལག་པ་གཡོན་གྱིས་བརྡ་རྣམས་ཏེ། །སྒྲུབ་པ་པོ་ཡི་ལག་གཡོན་གྱིས། །འདི་ནི་དཔའ་བོའི་གནས་ཡིན་ཏེ། །བརྡ་རྣམས་ལ་ནི་རབ་འཇུག་པའི། །ཁམས་གསུམ་རྒྱུ་དང་མི་རྒྱུ་བའི། །འགྲོ་ཀུན་གཡོན་ནས་འབྱུང་བ་ཡིན། །རྡོ་རྗེ་སེམས་དཔའ་སྦོམ་པོར་གནས།
ཞེས་པ་ནས་གསང་བ་འདི་ནི་མི་བཤད་ཅིང་། རབ་ཏུ་འབད་དེ་སྦ་བར་བྱ། ཞེས་པའི་བར་གྱིས་རྒྱས་པར་བསྟན་པའི་ཕྱིར་རོ། །གཉིས་པ་བསྡུས་པ་ནི། གྲུབ་ཆེན་ཛ་ཡ་སེ་ན་སོགས་ཀྱིས་གསུངས་པ་ལྟར་ཉམས་སུ་བླང་སྟེ། མདུན་དུ་བཀོད་པའི་ཁ་ཟས་བདུད་རྩིར་བརླབས་པ་དེ་ནས་སྔར་བཞིན་བླངས་ཏེ། དང་པོ་ལག་པ་གཡོན་པའི་མཐིལ་དུ་ཐིག་ལེ་བཏབ་སྟེ། རྡོ་རྗེ་ཕག་མོའི་ངོ་བོ་ཨོ་བི་དམར་པོ་ཞེས་༧ བརྗོད། རིམ་བཞིན་མཐེའུ་ཆུང་། སྲིན་ལག །གུང་མོ། མཛུབ་མོ། །མཐེ་བོང་རྣམས་ལ་བཀོད་དེ། གཤིན་རྗེ་མའི་ངོ་བོ་ཧ་ཡཾ་སྔོན་པོ། །རྨོངས་བྱེད་མའི་ངོ་བོ་ཧྲི་མོ་དཀར་པོ། །སྐྱོད་བྱེད་མའི་ངོ་བོ་ཧཱུཾ་ཧཱུཾ་སེར་པོ། །སྐྲག་བྱེད་མའི་ངོ་བོ་ཧཱུྃ་ཧཱུྃ་ལྗང་གུ། ཙཎྜི་ཀའི་ངོ་བོ་ཕྲཊ་ཕཊ་དུད་ཀ་རྣམས་ཀྱིས་མཚན་པར་གྱུར། ཅེས་བརྗོད་ཅིང་བསམས་ལ། སླར་བདུད་རྩི་ནས་རེ་རེར་འཐོར་བ་དང་བཅས། ཨོཾ་བཻ་ཨོཾ་ཨཱཿཧཱུྃ་ནས། ཕཊ་ཕཊ་ཨོ་ཨཱ༔ཧཱུྃ་གི་བར་གྱིས་མཆོད་ལ། བཅོམ་ལྡན་འདས་མའི་ལྷ་ཚོགས་རྣམས་ཀྱིས་སོགས་གསོལ་བ་གདབ། དངོས་གྲུབ་བླང་མཐར་ལྷ་ཚོགས་རྣམས་གནས་སོ་སོར་ཐིམ་པར་བསམ་པ་སོགས་གོང་ལྟར་བྱ། སླར་ཡང་ཕུད་ཀྱིས་མཆོད་ཅིང་། དེ་ནས་རང་གིས་ཚིམ་པར་རོལ། རྒྱས་བསྡུས་གང་ཡིན་ཀྱང་རང་གིས་རོལ་བའི་ཚེ་ཟག་མེད་ཀྱི་བདེ་བས་ཕུང་ཁམས་སྐྱེ་མཆེད་ཀྱི་ལྷ་རྣམས་དགྱེས་པ་བསྐྱེད་
པར་བསམས་ལ་ཚིམ་པར་རོལ་ཞིང་། ལྷག་མ། ཕེ། ཨོ་ཨུ་ཙིཏྟ་བ་ལི་ཏ་བྷཀྵ་སི་སྭཱ་ཧཱས་ལྷག་མ་ལ་དབང་བ་རྣམས་ལ་བྱིན་ལ་བདག་མེད་པའི་ལྟ་བ་དྲན་པར་བྱས་ཏེ་ངལ་བསོ། །དེ་ལས་ལྡང་བ་ན། ཧེ་རུ་ཀ་དཔལ་རྣལ་འབྱོར་མའི། །འཁོར་ལོ་རྒྱལ་བ་རྒྱ་མཚོའི་ཚོགས། །བདེ་བ་མཆོག་གིས་རབ་དགྱེས་པ། །འགྲོ་ཀུན་བདེ་བ་ཆེ་ཐོབ་ཤོག །ཅེས་བསྔོ་བ་དང་། གནས་འདིར་ཉིན་མོ་བདེ་ལེགས་སོགས་ཤིས་པ་བརྗོད་པའང་བྱའོ། །ཟས་ཀྱི་རྣལ་འབྱོར་འདི་དག་ཚུལ་བཞིན་དུ་བགྱིས་པས་ཡོན་བྱང་བ་དང་། སྡིག་སྒྲིབ་དང་ཉམས་ཆག་འདག་པ་དང་། ཚོགས་རྒྱ་ཆེན་པོ་རྫོགས་པ་དང་། ཚེ་དང་ལུས་ཀྱི་བཅུད་ལེན་དུ་འགྱུར་བ་དང་། བཟའ་བཏུང་ལོངས་སྤྱོད་འཕེལ་བ་སོགས་གནས་སྐབས་དང་། མཐར་ཐུག་དཔལ་ཧེ་རུ་ཀའི་དཀྱིལ་འཁོར་དུ་སྨིན་པ་སོགས་ཕན་ཡོན་དཔག་ཏུ་མེད་དོ། ༈ །དེ་ནས་ཐུན་མཚམས་རྣམས་སུ། ཚོ ལུས་ངག་ཡིད་གསུམ་གྱི་སྒོ་ནས་དགེ་བ་བཅུའམ། ཕར་ཕྱིན་དྲུག་གམ། བསྡུ་དངོས་བཞིའམ། མགོན་པོ་བྱམས་པས། ཡི་གེ་འབྲི་མཆོད་སྦྱིན་པ་དང་། ཉན་དང་ཀློག་དང་ལེན་པ་དང་། འཆད་དང་ཁ་ཏོན་བྱེད་པ་དང་། དེ་སེམས་པ་དང་དོན་བསྒོམ་པ། སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་གཞལ་དུ་མེད། ཅེས་ཆོས་སྤྱོད་བཅུ་དང་། སྤྱན་རས་གཟིགས་ཀྱི་ཞལ་ནས། རྟེན་གསུམ་བཞེངས་
དང་སྲོག་འདོན་ཟམ་པ་འཛུགས། མཆོད་སྦྱིན་ཁྲུས་དང་བསྐོར་བ་ཚུལ་ཁྲིམས་རྣམས། འགྲོ་བའི་དོན་དུ་བརྩོན་པ་ང་ཡི་སྲས། ལུས་དེ་བོར་ནས་བདེ་བ་ཅན་དུ་འགྲོ། །ཞེས་ཁྱད་པར་གྱི་ཆོས་སྤྱོད་བཅུ་དང་། འདུལ་བ་ལུང་ལས། ཀུན་དགའ་ར་བ་གཙུག་ལག་ཁང་། །མལ་སྟན་འཚོ་བ་ནར་མ་དང་། །གློ་བུར་ནད་པར་ནད་གཡོག་དང་། །ཡུལ་ངན་ཚེ་ན་སྦྱིན་པ་སྟེ། །རྫས་ལས་བྱུང་བའི་བསོད་ནམས་བདུན། ཅེས་སོགས་གསུངས་པ་རྣམས་སྐབས་སུ་གང་བབ་པ་དག་ཅི་ནུས་སུ་སྤྱད་ཅིང་། ཁྱད་པར་སློབ་དཔོན་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། སྒོམ་པ་ལ་ནི་རབ་ཏུ་སྦྱར། ཅེས་གཙོ་བོར་བྱ་བ་དང་། རྡོ་རྗེ་ཐེག་པ་ལ་ལྷག་པར་གནས་པ་རྣམས་ཀྱིས་ནི། རྡུལ་ཚོན་ནམ། རས་བྲིས་སམ། མཎྜལ་གྱི་ཚོམ་བུ་ཙམ་ལ་བརྟེན་པའི་ལྷག་པའི་ལྷ་མཉེས་པར་བྱ་བའི་སྒྲུབ་མཆོད་དང་། དབང་བླང་བ་དང་། ཚོགས་འཁོར་དང་། སྦྱིན་སྲེག་སོགས་སྒོ་དུ་མ་ནས་འབད་པར་བྱ་བ་ཡིན་ལ། དེ་ཐམས་ཅད་ཀྱང་སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་བསྔོ་བ་དང་སྨོན་ལམ་གྱི་རྩིས་ཟིན་པར་བྱའོ། ༈ །འདིར་ཉེར་མཁོའི་བྱ་བ་ཅུང་ཟད་བརྗོད་ན། ཕྱག་བསྐོར་བཀའ་བཀླག་སཱཙྪ་གདབ། མཆོད་སྦྱིན་བསག་སྦྱོང་སྤེལ་བའོ། །ཞེས་དགུ་ལས། དང་པོ་ཕྱག་འཚལ་བ་ནི། བདེ་བར་གཤེགས་
པའི་རིང་བསྲེལ་གྱི་སྙིང་པོ་ཅན་གྱི་རྟེན་སོགས་ཀྱི་སྤྱན་སྔར་ཡན་ལག་མ་ལྔ་ས་ལ་གཏུགས་པའི་བརྐྱང་ཕྱག་འཚལ་བ་དང་སྦྲགས། རང་གཞན་སེམས་ཅན་ཐམས་ཅད་ཀྱིས་ལུས་ཞིང་གི་རྡུལ་སྙེད་དུ་སྤྲུལ་ཏེ་འདུད་པར་བསམས་ལ། ན་མོ་མཉྫ་ཤྲཱི་ཡེ། ན་མསྶ་ཤྲཱི་ཡེ། ན་མཨུཏྟ་མ་ཤྲཱི་ཡེ། ཞེས་བརྗོད་ཅིང་ཕྱག་འཚལ་བས་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་དང་བསྙེན་བཀུར་བྱས་པར་འགྱུར་རོ། ༈ །གཉིས་པ་བསྐོར་བ་བྱ་བ་ནི། དེ་ལྟ་བུའི་རྟེན་ལ་སྤྱོད་ལམ་མཛེས་པས་དལ་བྲེལ་སྙོམས་པར་བསྐོར་ཞིང་། དེ་བཞིན་གཤེགས་པ་རིན་ཆེན་རྒྱལ་མཚན་ལ་ཕྱག་འཚལ་ལོ། །ཨོཾ་ན་མོ་བྷ་ག་ཝ་ཏེ། རཏྣ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨདྷ་ཏེ་སམྱ་ཀཾ་བུདྡྷཱ་ཡ། ཏདྱ་ཐཱ། ཨོཾ་རཏྟེ་རནྡྷེ་མ་ཧཱ་རཏྟེ། རཏྣ་བི་ཛཱ་ཡ་སྭཱ་ཧཱ། ཞེས་བཟླས་ནས་བསྐོར་བ་གཅིག་བྱས་པས་བྱེ་བར་འགྱུར་རོ། །འདི་བཟླས་ནས་ཕྱག་བྱས་ནའང་ཕྱག་བྱེ་བར་གསུངས་སོ། །བསྐོར་བའི་ཚེ་རྟེན་གྱི་གྲིབ་མ་དང་། གཞན་ཡང་མཆོད་རྫས་དམན་པ་སོགས་འགོམ་དགོས་ན། ཨོཾ་བཛྲ་བེ་ག་ཀྲ་མ་ཧོ༔ ཞེས་བརྗོད་ཅིང་ནམ་མཁའ་ལ་བཏེག་སྟེ་འོག་ནས་འགྲོ་བར་བསམས་ན་ཉེས་པ་མི་འབྱུང་ངོ་། ༈ །གསུམ་པ་བཀའ་བཀླག་པ་ནི། རྒྱུད་ལས། ལངས་ནས་བཅོམ་ལྡན་འདས་ཀྱི་ཡུམ། ཤེས་རབ་ཕ་རོལ་ཕྱིན་པ་བཀླག །ཅེས་གསུངས་པ་ལྟར། སྙིང་རྗེའི་ཡིད་
ཀྱིས་མི་སྣང་བའི་སེམས་ཅན་རྣམས་ལ་ཆོས་འཆད་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་པར་བྱའོ། །གཞན་ཡང་གླེགས་བམ་བཀླག་པར་འདོད་པས་དང་པོའི་སངས་རྒྱས་ཀྱི་རྒྱུད་ལས་གསུངས་པ། དྲིའི་མཎྜལ་ཟླུམ་པོ་ལ་དབུས་སུ་རི་རབ། ཕྱོགས་མཚམས་སུ་གླིང་བཞི་དང་ཉེ་བའི་གླིང་རྣམས། ཨོཾ་ཧཾ་མ་ཧཱ་མེ་ར་ཝེ་ན་མལ་སོགས་པའི་སྔགས་ཀྱིས་བཀོད་དེ་མཆོད་པས་བསྐོར་ལ། མཎྜལ་དེའི་སྟེང་དུ་གླེགས་བམ་བཞག་ལ། ཆོས་ལ་གུས་པས་བཀླག་གོ །དེ་ལྟ་བུ་མ་གྲུབ་ཀྱང་། གླེགས་བམ་བཀླག་པ་དང་། བྱང་ཆུབ་སེམས་དཔའི་ཆོས་ཁ་ཏོན་དུ་བྱེད་པས། རང་གི་ལྷའི་རྣལ་འབྱོར་གྱིས་སམ། ཡང་ན། རང་ཉིད་པད་ཟླ་ལ་རྡོ་རྗེ་ཆོས་དཀར་དམར། པདྨ་དཀར་པོའི་སྡོང་བུ་བསྣམས་པའི་འདབ་མ་ཁ་འབྱེད་པར་མཛད་པ། སེམས་དཔའི་སྐྱིལ་ཀྲུང་གིས་བཞུགས་པ། ལྐོག་མར་པདྨ་འདབ་བརྒྱད་ཀྱི་ལྕེའི་འདབ་མར་རྡོ་རྗེ་དཀར་པོ་རྩེ་ལྔ་པའོ། །ཞེས་བསམས་ལ། ཚུལ་ཁྲིམས་མ་ག་ངྷ་བཟང་མོའི་རྟོགས་བརྗོད་ལས། རྣམ་དག་ཤེས་རབ་ཤིན་ཏུ་གྲོལ། །དད་ལྡན་སྙིང་པོ་ཉན་ཐོས་ཆེ་རྣམས་ཀྱིས། །མགོན་མེད་གྱུར་པ་དག་ལ་རྗེས་བཟུང་བའི། །དོན་མཛད་ཐུགས་རྗེས་གཤེགས་པར་མཛད་དུ་གསོལ། ཞེས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མདུན་གྱི་ནམ་མཁར་བྱོན་པར་དམིགས།
དེའང་མཚན་ཡང་དག་པར་བརྗོད་པའམ། འཇིག་རྟེན་དབང་ཕྱུག་གི་གཟུངས་ལ་སོགས་པ་བཀླག་ན། འཇམ་དཔལ་དང་འཇིག་རྟེན་དབང་ཕྱུག་ལ་སོགས་པ་མདུན་གྱི་ནམ་མཁར་བལྟའོ། །དེ་ནས་དེ་དག་དང་སངས་རྒྱས་ཐམས་ཅད་ཀྱི་ཆོས་ཀྱི་སྐུའི་བདག་ཉིད་ཀྱི་དམ་པའི་ཆོས་ལ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །ཞེས་སོགས་ཡན་ལག་བདུན་དབུལ། སེམས་ཅན་ཐམས་ཅད་ལ་བྱམས་པའི་སེམས་བསྒོམ་པ་སྔོན་དུ་འགྲོ་ཞིང་། སངས་རྒྱས་དང་ཆོས་ཀྱི་ཡོན་ཏན་ཕུན་སུམ་ཚོགས་པ་དྲན་པས། བཅོམ་ལྡན་འདས་ཀྱིས་གསུངས་པའི་ཆོས་ཚིག་གཅིག་གི་དོན་གང་ཡིན་པ་དེ་ནི་ཆོས་ཐམས་ཅད་ཀྱི་ཡང་ཡིན་ནོ། །འོན་ཀྱང་བདག་ནི་རང་གི་ལས་ཀྱི་ཉེས་པས་ཤེས་རབ་ཆུང་ཞིང་བློ་ཞན་ཏེ། དེ་ལྟ་ཡིན་དུ་ཟིན་ཀྱང་། གང་བཅོམ་ལྡན་འདས་ཀྱི་གསུངས་རབ་ཏུ་བཟུང་ནས་དེང་བདག་གིས་ཁ་ཏོན་བྱས་ཏེ། ཆོས་ག ཀྱི་སྒྲ་སེམས་ཅན་གང་གི་རྣ་ལམ་དུ་གྲགས་པ་དེ། དེ་བཞིན་གཤེགས་པའི་སྤོབས་པ་ཐོབ་པར་གྱུར་ཅིག །ཅེས་ལན་གསུམ་བརྗོད་པར་བྱའོ། །དེ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་ལ་སོགས་པ་ཇི་ཙམ་འདོད་པར་བཀླག་གོ །མཎྜལ་ཡོད་ན། ཨོ་བཛྲ་མཎྜལ་མུ མཎྜལ་ཕྱིས་ནས་ལྷ་རྣམས་རང་ལ་གཞུག་ཅིང་། བསྔོ་བ་དང་སྨོན་ལམ་ཇི་ལྟར་རིགས་པ་བྱ། བསྡུ་ན། སྲིད་པ་ཐམས་ཅད་དུ་ཡང་འཁོར་
བ་ན་སོགས་བློཀ་གཅིག་བརྗོད་དོ། ༈ །ཡང་སྡུད་པ་སོགས་ཤེར་མདོ་གདོན་པའི་ཚེ། སྐྱབས་སེམས་སྔོན་དུ་འགྲོ་བས། དབང་པོ་རབ་ཀྱིས་ཆོས་ཐམས་ཅད་སྐྱེ་མེད་སྤྲོས་པ་དང་བྲལ་བ་བརྗོད་དུ་མེད་པར་ཤེས་པར་བྱས་ཏེ། དེའི་ངང་ལས་མ་གཡོས་པར་གདོན། འབྲིང་གིས་དེ་ལྟ་བུའི་གནས་ལུགས་སྔོན་དུ་དྲན་པར་བྱས་ཏེ། རྨི་ལམ་དང་སྒྱུ་མ་ལྟ་བུའི་ངང་ནས་གདོན། ཐ་མས་དེ་གཉིས་སྔོན་དུ་དྲན་པར་བྱས་ཏེ། ཚིག་གི་སྒྲ་ལ་སེམས་མ་ཡེངས་པར་བྱས་ལ་གདོན། བཏོན་ཟིན་པ་ན་དགེ་བའི་རྩ་བ་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། ༈ ཁྱད་པར་སྔགས་ཀྱི་ཚུལ་དང་རྗེས་སུ་འབྲེལ་བར་ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་ན། སྐྱབ་སེམས་རྗེས། སྟོང་པའི་ངང་ལས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་རྣམ་པར་མི་རྟོག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཨ་དཀར་པོ། །པྲ་སེར་པོ། །ར་དམར་པོ་རྣམས་ཡོངས་སུ་གྱུར་པ་ལས་བདག་ཉིད་འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་ཞལ་གཅིག་ཕྱག་བཞི་མ། ཕྱག་དང་པོ་གཉིས་ཀྱིས་ཏིང་ངེ་འཛིན་གྱི་ཕྱག་རྒྱ། ལྷག་མ་གཉིས་རྡོ་རྗེ་དང་པུསྟི་བསྣམས་པ། དར་དང་རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་བ་སྤུའི་ཁུང་བུ་རྣམས་ལས་འོད་ཟེར་འཕྲོས་པ་ལས་སྐྱེ་བ་མེད་པ་དང་ལྡན་
པའི་སངས་རྒྱས་ཀྱི་སྐུ་རྣམས་དང་། དེ་དག་ལས་ཀྱང་འོད་འཕྲོས་པས་བྱང་ཆུབ་སེམས་དཔའི་སྐུ་རྣམས་དང་། དེ་དག་གི་འོད་ཟེར་ལས་རིག་པའི་རྒྱལ་པོ་རྣམས་འཇིག་རྟེན་པའི་ལྷ་མ་ལུས་པས་བསྐོར་བའོ། །རང་གི་སྤྱི་བོར་ཨ་དཀར་པོ། །སྙིང་གར་པྲ་སེར་པོ། གདན་ལ་ར་དམར་པོ་རྣམས་བསྒོམས་ཏེ། ལག་གཉིས་ཁུ་ཚུར་མཛུབ་མོའི་རྩེ་མོའི་ཚིགས་གསུམ་པ་འཁྱོག་ཅིང་། གུང་མོ་བརྒྱད་པ་སོ་སོར་སྤྱི་བོར་བཟུང་ལ། ཨོཾ་པྲཛྙཱ་པྲཛྷེ་མ་ཧཱ་པྲཛྙཱ་སརྦ་ཛྙཱ་སྭཱ་ཧཱ། བྱིན་གྱིས་རློབས་པའི་སྔགས་རྒྱའོ། །དེ་དང་འདྲ་བ་ལས་མཐེའུ་ཆུང་རྩེ་མོར་བྱས་ཏེ། མཐེ་བོང་གཉིས་བསྐྱོད་པས། ཨེ་ཀྱེ་ཧི་བྷ་ག་ཝ་ཏི་སརྦ་བུདྡྷ་ཛ་ནཱ་ནི། སྭ་ས་མ་ཡ་མནྟ་མ་ནུ་སྨ་ར། མ་མ་ཨ་ནུ་ཀམྦྷ་ཡ་སྭཱ་ཧཱ། སྤྱན་འདྲེན་པའི་སྔགས་རྒྱའོ། །ལག་གཉིས་ཁུ་ཚུར་བྱས་ནས་སོར་མོ་རྣམས་ཀྱི་རྩེ་མོ་བཏུད་དེ་ཅུང་ཟད་སྟེང་དུ་བྱས་པས། ཨོ་པྲཛྙཱ་པྲཛྷེ་མ་ཧཱ་པྲཛྙཱ་ཤུ་ཏི་སྤྱི་ཏི་བི་ཛཱ་ཡ་སྭཱ་ཧཱ། རྩ་བའི་སྔགས་དང་ཕྱག་རྒྱའོ། །ན་མོ་བྷ་ག་ཝ་ཏེ་ཨཱརྱ་པྲཛྙཱ་པཱ་ར་མི་ཏཱ་ཡེ། ཏདྱ་ཐཱ། ཨོཾ་པྲཛྙཱ་པྲཛྷེ། མ་ཧཱ་པྲཛྷེ། པྲ་ཛྙཱ་ཨཱ་ལོ་ཀ་ཨ་བ་བྷ་སེ། པྲ་ཛྙཱ་ཀ་རི་ཨ་ཛྷཱ་ན་བིརཱུ་མ་ཎི། སིདྡྷི་སུ་སིདྡྷི། མ་མ་སརྦ་ས་ཏྭཱ་ནཾ་ཙ་ས་དྲ་ཏཱི་རཱ་བི་ཀུ་རུ། བྷ་ག་ཝ་ཏཱི་སརྦ་ཨཾ་ག་སུནྡ་རི། བྷལྟ་བཏྤ་ལེ། པྲ་པཱ་རི་ར་ཧ་ཏེ། ས་མ་ཤཱ་ས་ཀ་རི། ཏིཥྛ་ཏིཥྛ། ཙ་ལ་ཙ་ལ། ཀམྤ་ཀམྤ། པཱ་ར་པཱ་ར། གརྫ་གརྫ་། ཨཱ་གཙྪ་ཨཱ་
གཙྪ། མ་བི་ལམྤ་སྭཱ་ཧཱ། སྔགས་རྣམས་ལན་བདུན་བརྗོད་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བཀླག་པར་བྱའོ། །དེ་ལྟར་བྱས་པས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བཟུང་བ་དང་། བཤད་པ་དང་། བྲིས་པ་དང་། བསམ་པར་འགྱུར། དེ་ལྟར་སྤྱོད་པའི་ས་ཕྱོགས་ནི་མཆོད་རྟེན་དང་ཕྱག་བྱ་བའི་འོས་སུ་འགྱུར་རོ། །ཞེས་བཤད་པ་ཡིན་ནོ། །རྗེས་བསྔོ་སྨོན་གྱི་རྒྱས་གདབ། ༈ །ཡང་རྒྱུད་སྡེ་ཟབ་མོ་བཀླག་པའི་ཚེ། རྒྱས་པར་རྒྱུད་རང་རང་གི་གླེང་གཞི་ལས་འབྱུང་བ་ལྟར་གསལ་གདབ་ཅིང་བཀླག་པར་བྱ་བ་ཡིན་ལ། བསྡུ་ན་དཀོན་མཆོག་གསུམ་དང་ཡི་དམ་གྱི་ལྷ་ལ་སྐྱབས་སུ་འགྲོ་བ་དང་། རྡོ་རྗེ་འཆང་གི་བཀའ་དྲི་མ་མེད་པ་ལ་ཡིད་ཆེས་པར་བགྱིས་ནས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་རྒྱུད་བཀླག་ཅིང་ཁ་ཏོན་དུ་བྱའོ་སྙམ་པའི་སེམས་བསྐྱེད་ཁྱད་པར་ཅན་བཅོས་མ་མ་ཡིན་པ་དང་ལྡན་པའི་སྒོ་ནས་རྣལ་འབྱོར་པ་རབ་ཀྱིས་རང་ཉིད་རྒྱུད་ཀྱི་སྟོན་པའམ། དཀྱིལ་འཁོར་གྱི་གཙོ་བོ་གང་ཡིན་པའི་རྣལ་འབྱོར་ལ་གནས་པའི་ངང་ནས། རིགས་ཀྱི་འཁོར་ཚོགས་ནམ་མཁའི་ཁམས་ཐམས་ཅད་ཡོངས་སུ་གང་བའི་དབུས་སུ་རྒྱུད་ཀྱི་སྒྲ་བསྒྲགས་པ་ཙམ་གྱིས་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་དགྱེས་པ་བསྐྱེད། ཁམས་གསུམ་གྱི་སེམས་ཅན་ཐམས་ཅད་ཀྱང་
སྡིག་སྒྲིབ་བག་ཆགས་དང་བཅས་པ་སྦྱངས་ཏེ་ལྷག་པའི་ལྷའི་ངོ་བོར་སངས་རྒྱས། ཁྱད་པར་འབྱུང་པོ་གདུག་པ་ཅན་ལ་སོགས་པ་གདུལ་བར་དཀའ་བ་ཐམས་ཅད་གདུག་རྩུབ་ཀྱི་བསམ་པ་ཞི་སྟེ་ཡང་དག་པའི་ལམ་ལ་འཁོད། འཇིག་རྟེན་གྱི་ཁམས་ཀྱི་ནད་ཡམས་འཁྲུག་རྩོད་སད་སེར་ལ་སོགས་པའི་མི་འདོད་པ་ཐམས་ཅད་རྒྱུད་ཆད། འཁོར་འདས་ཀྱི་ལེགས་ཚོགས་ཐམས་ཅད་རྒྱས་པར་བསམ། རང་ལུས་ཧེ་རུ་ཀའི་རང་བཞིན་གྱིས་ནམ་མཁའི་ཁམས་ཐམས་ཅད་ཁྱབ་པའི་རྡུལ་ཕྲ་རབ་རེའི་ཁོངས་སུ་མཁའ་ཁྱབ་ཀྱི་འཁོར་ལོ་དང་མཉམ་པའི་ལྷག་པའི་ལྷའི་དཀྱིལ་འཁོར་བསམ་ལས་འདས་པ་དང་། དེ་རེ་རེའི་རྡུལ་ཕྲ་རབ་རེ་རེའི་ཁོངས་སུ་ཡང་དེ་འདྲ་བ་སོགས་ཆོས་ཀྱི་དབྱིངས་མཐས་གཏུགས་པ་མེད་པར་སྤྲུལ་ཏེ། དེ་ཐམས་ཅད་ཀྱིས་རྒྱུད་ཀྱི་ཚིག་འབྲུག་སྟོང་དུས་གཅིག་ཏུ་ལངས་པ་བཞིན་དུ་འུར་དིར་གྱིས་གསུང་བ་དང་། སྣོད་བཅུད་ཀྱི་སྣང་ཆ་ཐམས་ཅད་ལས་རྒྱུད་ཚིག་ཆོས་ཉིད་ཀྱི་རང་སྒྲར་ལྷང་ལྷང་སྒྲོགས་པར་མོས་པ་དང་། རང་ལུས་རེ་རེ་ལ་མགོ་བོ་མཁའ་ཁྱབ་ཀྱི་རྡུལ་གྱི་གྲངས་དང་མཉམ་པ། མགོ་རེ་ལ་ཁ་དེ་འདྲ་བ། ཁ་རེ་ལ་ལྕེ་དེ་འདྲ་བར། ལྕེ་རེ་རེ་ལས་རྣམ་པ་ཐམས་ཅད་པའི་སྒྲ་དབྱངས་ཀྱི་འགྱུར་བ་བསམ་གྱིས་མི་ཁྱབ་པ་བྱུང་སྟེ་རྒྱུད་བསྒྲགས་པར་བསམ་པའི་མན་ངག་ཁྱད་པར་ཅན་དང་ལྡན་པའི་སྒོ་ནས་བཀླག་པས་ཇི་ལྟར་
བསམ་པ་དེ་སྙེད་ཀྱི་གྲངས་དང་མཚུངས་པའི་ཕན་ཡོན་འབྱུང་ཞིང་། རྣལ་འབྱོར་པ་འབྲིང་གིས་དེ་ཙམ་བློས་མ་ཆུད་ཀྱང་སྣོད་བཅུད་ཐམས་ཅད་ལྷག་པའི་ལྷའི་དཀྱིལ་འཁོར་དུ་གསལ་བའི་ངང་ནས་ཉན་པ་པོའི་འཁོར་བྱང་ཆུབ་སེམས་དཔའ་དང་། རིག་པ་འཛིན་པ་དང་། དཔའ་བོ་མཁའ་འགྲོ་དམ་ཅན་རྒྱ་མཚོ་བསམ་གྱིས་མི་ཁྱབ་པ་མངོན་སུམ་དུ་བཞུགས་པར་མོས་ཏེ་བཀླག་པ་དང་། ཐ་མས་རྣམ་པ་གསལ་མ་ཐེབས་ཀྱང་རང་ལྷག་པའི་ལྷའི་ངོ་བོར་མོས་པ་ཙམ་མམ། རྒྱུད་ཀྱི་གླེགས་བམ་འོད་ཟེར་འབར་བའི་རང་བཞིན་ཡི་གེ་རྣམས་གྱེན་འགྲེང་ལས་བཞི་གང་འདོད་ཀྱི་ཁ་དོག་གི་རྣམ་པ་རང་སྒྲ་སྒྲོགས་བཞིན་པ་སྐྱབས་གསུམ་ཀུན་འདུས་ཀྱི་ངོ་བོར་མོས་ལ་ཡིད་ཁྱེད་ཤེས་ཀྱི་མོས་གུས་དྲག་པོའི་སྒོ་ནས་སྒྲོགས་པ་དང་། དེ་ཙམ་བློས་མ་ཆུན་ནའང་སེམས་བསྐྱེད་དང་མོས་གུས་ཁྱད་པར་ཅན་དང་ལྡན་པའི་སྒོ་ནས་གསལ་དག་སྙན་པར་བཀླག་ཅིང་། རྗེས་སུ་བསྔོ་བ་དང་སྨོན་ལམ་རྣམ་པར་དག་པའི་རྒྱས་གདབ་པར་བྱའོ། ༈ །བཞི་པ་སཱཙྪ་གདབ་པ་ནི། དཔུང་བཟང་གིས་ཞུས་པ་ལས། བདེ་གཤེགས་མཆོད་རྟེན་རྟེན་འབྲེལ་སྙིང་པོ་ཅན། སྡིག་པ་སྦྱང་ཕྱིར་རྟག་ཏུ་གདབ་པར་བྱ། ཞེས་གསུངས་པའི་ཕྱིར་རོ། །གང་དག་དཀྱིལ་འཁོར་ཆེན་པོ་བཀོད་པའི་རྗེས་སུ་འབྲངས་ནས་སཙྪ་གདབ་པ་ལ་སོགས་པའི་ཆོ་ག་གཞུང་རྣམ་དག་རྣམས་
ལས་བྱུང་བ་ལྟར་བྱ་བར་འདོད་ན་དེ་ནི་འདི་ཡིན་ཏེ། གཙང་ཞིང་དྲི་ཞིམ་པོའི་ས་དང་ཆུ་ལས་བྱུང་བའི་འཇིམ་པ་ལ་མངོན་པར་ཕྱོགས་ཏེ། ཨོ་ཨཱབིགྷནྟ་ཀྲྀཏྲ་ཧཱུཾ་ཕཊ་ཀྱིས་བསང་། སྭ་བྷ་ཝས་སྦྱང་། སྟོང་པར་གྱུར། སྟོང་པའི་ངང་ལས་པཾ་ལས་པདྨ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་བྱུང་བའི་འཇིམ་པ་རྣམས། ཨོཾ་རཏྣ་ཨཱཧཱུཾ། རིན་པོ་ཆེའི་ཕུང་པོ་ཆེན་པོར་གྱུར། རང་གི་ཐུགས་ཀའི་ཧཱུྃ་ལས་འོད་འཕྲོས་པས་དེ་བཞིན་གཤེགས་པ་རྣམ་པར་སྣང་མཛད། འོད་ཀྱི་རྒྱལ་པོའི་ཐུགས་ཀར་ཕོག །ཐུགས་རྒྱུད་བསྐུལ། སྨིན་མཚམས་ཀྱི་མཛོད་སྤུ་ནས་འོད་ཟེར་འཕྲོས། འཇིམ་པ་ལ་ཕོག་པས་འཇིམ་པ་དེ་བཞིན་གཤེགས་པའི་ཡེ་ཤེས་ལྔའི་རང་བཞིན་དུ་གྱུར། ལག་པ་གཉིས་ཀྱི་མཐེའུ་ཆུང་གིས་མཐེ་བོང་མནན་ནས་སོར་མོ་གཞན་གསུམ་བརྐྱངས་པས་འཇིམ་པ་ལ་རེག་ལ། ཨོཾ་ན་མོ་བྷ་ག་ཝ་ཏེ་བེ་རོ་ཙ་ན་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨདྷ་ཏེ་ས་མྱཀཾ་བུདྡྷཱ་ཡ། ཏདྱ་ཐཱ། ཨོཾ་སུམྦྷེ་སུམྦྷེ། ས་མེ་ས་མ་ཡེ། ཤཱནྟེ་དནྟེ། ཨ་ས་མཱ་རོ་བེ། ཨ་ན་ལནྡྷེ། ཏ་རམྦྷེ། ཡ་ཤོ་ཝ་ཏི། མ་ཧཱ་ཏེ་ཛོ། ནི་རཱ་ཀཱ་ལེ་ནི་ར་ཝ་ཎེ། སརྦ་བུདྡྷ་ཨ་དྷིཥྛན་ཨ་དྷི་ཊྛི་ཏེ་སྭཱ་ཧཱ། ཞེས་ཉི་ཤུ་རྩ་གཅིག་བརྗོད་པས་འཇིམ་པ་དེའི་རྡུལ་ཕྲ་རབ་ཇི་སྙེད་པ་དེ་སྙེད་ཀྱི་མཆོད་རྟེན་བྱས་པར་འགྱུར་རོ། །གཞན་ཡང་ཕན་ཡོན་མང་ངོ་། །འཇིམ་པ་དེ་བཞིན་གཤེགས་པའི་
ཐུགས་གཉིས་སུ་མེད་པའི་ཡེ་ཤེས་ཀྱི་རང་བཞིན་དུ་གྱུར། ན་མསྶ་མནྟ་བུདྡྷ་ནཱཾ། ཨོཾ་བཛྲ་ཨཱ་ཡུ་ཥེ་སྭཱ་ཧཱ་ཞེས་འཇིམ་པ་བཅད་དེ་གཟུངས་དང་། རིན་པོ་ཆེ་དང་། འབྲུ་དང་། སྨན་དང་། དྲི་དང་། །བྱིན་རླབས་ཀྱི་རྫས་རྣམས་སྙིང་པོར་གཞུག་ཅིང་། ཨོཾ་བཛྲ་ཨུདྡྷ་ཝཱ་ཡ་སྭཱ་ཧཱ། འབི་འབི་བྱ་བའི་སྔགས་སོ། ཨོ་ཨ་པྲ་ཏིཥྛ་ཏ་བཛྲ་ཡ་སྭཱ་ཧཱ་ཞེས་པས་བཞག་སྟེ། བྱང་ཆུབ་ཀྱི་སེམས་ཀྱིས་ཡོངས་སུ་བསྒོས་པར་བསམས་ལ། ཨོཾ་ཨ་ར་ཛེ་བི་ར་ཛེ་སྭཱ་ཧཱ་ཞེས་འབྲུ་མར་གྱིས་བྱུགས་ནས། ཨོཾ་བཛྲ་དྷ་ཏུ་གནྡྷེ་སྭཱ་ཧཱ་ཞེས་འབི་འབི་བླངས་ལ། ཐབས་དང་ཤེས་རབ་དབྱེར་མེད་དུ་གྱུར་པར་མོས་ཏེ། ཨོཾ་དྷརྨ་དྷཱ་ཏུ་གནྡྷེ་སྭཱ་ཧཱ་ཞེས་རྒྱར་བཙུད་ནས། ཐོ་བས་བརྡུང་ཞིང་ཨོ་བཛྲ་མུངྒ་ར་ཨཱ་ཀོཊྚ་ཡ་ཧཱུྃ་ཕཊ་སྭཱ་ཧཱ། ཆོས་རྣམས་ཐམས་ཅད་རྒྱུ་ལས་བྱུང་། དེ་རྒྱུ་དེ་བཞིན་གཤེགས་པས་གསུངས། རྒྱུ་ལ་འགོག་པ་གང་ཡིན་པ། དགེ་སྦྱོང་ཆེན་པོས་འདི་སྐད་གསུངས། ཞེས་བརྗོད་དེ་འདིས་ཀྱང་རབ་གནས་སུ་འགྱུར་རོ། །རྒྱུ་དང་འབྲས་བུའི་ཚོགས་ཐམས་ཅད་ཡོངས་སུ་རྫོགས་པར་བསམས་ལ། ཨོཾ་དྷརྨཱ་ར་ཏེ་སྭཱ་ཧཱ་ཞེས་རྒྱ་ནས་ཕྱུངས་ཏེ་ཆོས་ཀྱི་སྐུའི་བདག་ཉིད་དུ་མོས་པས། ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ་ཞེས་བཞུགས་སུ་གསོལ། ཨོཾ་སརྦ་ཏ་ཐཱ་ག་ཏ་མ་ཎི་ཤ་ཏ་དཱིདྡྷེ་ཛྭ་ལ་ཛྭ་ལ་དྷམཱ་དྷཱ་ཏུ་གནྡྷེ་སྭཱ་ཧཱ་ཞེས་རབ་ཏུ་གནས། ཨོཾ་ཨ་ཀཱ་ཤཱ་དྷཱ་ཏུ་གནྡྷེ་སྭཱ་ཧཱ་ཞེས་པས་
བཟོད་པར་གསོལ་ཏེ་ཐམས་ཅད་ལ་དེ་བཞིན་དུ་བྱའོ། །མཆོད་རྟེན་གདབ་པའི་ཆོ་གའོ། ༈ །དེ་ནས་རང་ཡི་དམ་གྱི་ལྷར་གསལ་བས། ཨོཾ་ཨཱབིགྷནྟ་ཀྲིཏ་ཧཱུྃ་ཕཊ་ཅེས་བགེགས་སྦྱང་། །འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩལ་དུ་གསོལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུཾ་ཞེས་ཁྲུས་གསོལ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །ཨོཾ་ཧཱུྃ་ཧཱུྃ་ཧཱུྃཨཱཋཀཱ་ཡ་བི་ཤོདྷ་ནེ་སྭཱ་ཧཱ་ཞེས་སྐུ་ཕྱིས་ལ། ཨོཾ་སྭ་བྷཱ་ཝ་སོགས། །སྟོང་པ་ཉིད་དུ་གྱུར། སྟོང་པའི་ངང་ལས་སེང་གེས་བཏེག་པའི་རིན་པོ་ཆེའི་ཁྲི་ཡངས་ཤིང་རྒྱ་ཆེ་བ་དེའི་སྟེང་དུ་པཾ་ལས་པདྨ་ཨ་ལས་ཟླ་བའི་སྟེང་དུ་ཨོཾ་ལས་མཆོད་རྟེན་རྣམས་བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་པོ་བྱང་ཆུབ་མཆོག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་ཞེས་ལྷར་བསྐྱེད་ལ། ཐུགས་ཀའི་ཧཱུྃ་ལས་འོད་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྣམ་པར་སྣང་མཛད་ཀྱི་རང་བཞིན་དུ་སྤྱན་དྲངས། རྡོ་རྗེ་བསྡུ་བའི་ཕྱག་རྒྱས་བཛྲ་ས་མཱ་ཛ༔ མ་ལུས་སེམས་ཅན་ཀུན་གྱི་མགོན་གྱུར་ཅིང་། ཞེས་
སོགས་ཀྱིས་སྤྱན་དྲངས། ཨོཾ་བཛྲ་ཨགྷཾ་པྲ་ཏཱིཙྪ་སྭཱ་ཧཱ། ཨོཾ་བཛྲ་པུབྦེ་ཨཱཧཱུྃ་སྭཱ་ཧཱ། དེ་བཞིན་དུ། དྷུ་པེ། ཨཱ་ལོ་ཀེ །གནྡྷེ། ནེ་ཝིཏྟཾ། ཤརྡ་ཨཱཧཱུྃ་སྭཱ་ཧཱ། ཞེས་མཆོད་དེ། རྡོ་རྗེ་ལྕགས་ཀྱུ་ལ་སོགས་པའི་ཕྱག་རྒྱས། ཛཧཱུྃ་བཾ་ཧོ༔ དམ་ཚིག་པ་ལ་དགུག་གཞུག་བཅིངས་ནས་གཉིས་སུ་མེད་པར་གྱུར། ཐུགས་ཀའི་ས་བོན་ལས་འོད་ཟེར་འཕྲོས་བས། ཕྱོགས་བཅུའི་ཞིང་ཁམས་རྣམས་ན་བཞུགས་པའི་སངས་རྒྱས་ཡབ་ཡུམ་དང་། སེམས་དཔའ་ཡབ་ཡུམ་དང་། ཁྲོ་བོའི་རྒྱལ་པོ་ཡབ་ཡུམ་འཁོར་དང་བཅས་པ་མདུན་གྱི་ནམ་མཁར་སྤྱན་དྲངས་ཤིང་གསལ་བར་གྱུར། བཛྲ་ས་མཱ་ཛ༔ ཨརྒྷཾ་ལ་སོགས་པས་མཆོད་དེ། འདི་རྣམས་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཁྲོ་བོ་རྣམས་ཀྱིས་བགེགས་བསྐྲད། དེ་བཞིན་གཤེགས་པ་རྣམས་ཀྱིས་དབང་བསྐུར་བར་དགོངས། བྱང་ཆུབ་སེམས་དཔའ་རྣམས་ཀྱིས་ཤིས་པ་བརྗོད། སེམས་མ་རྣམས་ཀྱིས་མཆོད་པའི་ཚོགས་སྦྱོར་བཞིན་པས། དེ་བཞིན་གཤེགས་པའི་ཡུམ་རྣམས་ཀྱིས་ཡེ་ཤེས་ལྔའི་རང་བཞིན་བདུད་རྩིའི་ཆུ་རྒྱུན་གྱིས་གང་བའི་བུམ་པ་དང་། རིན་པོ་ཆེའི་ཅོད་པན་དང་། རྡོ་རྗེ་དྲིལ་བུ་དང་། མིང་གི་དབང་ལ་སོགས་པ་རྫོགས་པར་བསྐུར་བར་གྱུར། དབང་བསྐུར་བུམ་པ། རྡོ་རྗེ་ཆེན་པོ་ནི། ཁམས་གསུམ་པོ་ཡིས་ཕྱག་བྱས་པ། སངས་རྒྱས་ཀུན་གྱི་གསང་
གསུམ་གྱི། །གནས་ལས་བྱུང་བ་སྦྱིན་པར་བྱ། ཨོཾ་ཨཱབཛྲ་ཨུ་ད་ཀ་ཨ་བྷི་ཥིཉྩ་ཧཱུཾ་སུ་ར་ཏ་ཧཱུྃ་ཨ་ཧཾ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། དབུ་རྒྱན། ཨོཾ་ཧཱུཾ་ཏྲཾ་ཧཱི ཨོ་བཛྲ་མུ་ཀུ་ཊ་ཨ་བྷི་ཥིཉྩ་སུ་ར་ཏ་ཙཱ་ཨ་ཧཾ། ཨོཾ་བཛྲ་རྡོ་རྗེ། ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཨོཾ་བཛྲ་དྲིལ་བུ། ཨ་དྷི་པ་ཏི་སྭ་ཨ་བྷི་ཥིཉྩ་མི་ཏིཥྛ་བཛྲ་ས་མ་ཡ་ཧཱུཾ། ཨོཾ་མིང་བཛྲ་སཏྭ་ཙཱ་ཨབྷི་ཥིཉྩམི་བཛྲ་ནཱ་མ་ཨ་བྷི་ཥེ་ཀ་ཏ་ཀྱེ་དཔལ་རྣམ་པར་སྣང་མཛད་དོ། །ཞེས་དབང་བསྐུར། དྲི་མ་དག །ཆུ་ལྷག་མ་ཡར་ལུད་པ་ལས་རྣམ་པར་སྣང་མཛད་སྤྲུལ་སྐུའི་ཆ་ལུགས་ཅན་གྱིས་དབུར་བརྒྱན་པར་གྱུར། ཀུན་མཁྱེན་ཡེ་ཤེས་སྤྱན་ལྡན་སྐྱོན་བྲལ་ཡང་། །གུས་པས་འཕགས་པའི་སྤྱན་ནི་དབྱེ་བགྱིས་པས། །ནམ་མཁའི་མཐར་ཐུག་གྱུར་པའི་ལུས་ཅན་གྱིས། །སངས་རྒྱས་ཡེ་ཤེས་སྤྱན་ནི་ཐོབ་པར་ཤོག །ཨོཾ་ཙཀ་ཙཀྵ་ས་མན་ཙཀཱ་བི་ཤོ་དྷ་ནི་སྭཱ་ཧཱ་ཞེས་སྤྱན་དབྱེ། བསྐྱེད་པའི་ལྷ་ཡོངས་སུ་གྱུར་པ་ལས་ཆོས་སྐུའི་མཆོད་རྟེན་མཚན་ཉིད་ཐམས་ཅད་རྫོགས་པར་གྱུར། ཅེས་ཞལ་བསྒྱུར། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་གྱི་ཁམས་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དེ་སྲིད་དུ་མྱ་ངན་ལས་མི་འདའ་བར་བཞུགས་སུ་གསོལ། ཞེས་དང་། ཁྱད་པར་དུ་ཡང་མཆོད་རྟེན་འདི་དག་ལ་འབྱུང་བ་ཆེན་པོ་བཞིའི་གནོད་པས་མ་ཞིག་
གི་བར་དེ་སྲིད་དུ་ཡེ་ཤེས་པ་རྣམས་བརྟན་པར་བཞུགས་ནས་བདག་དང་སེམས་ཅན་ཐམས་ཅད་ཀྱི་མགོན་དང་སྐྱབས་དང་དཔུང་གཉེན་དམ་པ་མཛད་དུ་གསོལ། མེ་ཏོག་འཐོར་ཞིང་། །ཆོས་དབྱིངས་ལྷུན་གྱིས་གྲུབ་པ་ལ། །དབྱེར་མེད་འཁོར་འདས་ཡོངས་སུ་རྫོགས། །དུས་གསུམ་སངས་རྒྱས་སྐྱེད་པའི་ཡུམ། །ཆོས་སྐུ་མཆོག་གི་བཀྲ་ཤིས་ཤོག །ཨོཾ་ཨཱཧཱུྃ་ཧཱིདྡྷཾ་ཁཾ་བཛྲ་བྷ་ཝ་དྲི་ཌྷ་ཏིཥྛ་བྷཱུ་ཁཾ་སྭཱ་ཧཱ། ཨོཾ་ཡེ་དྷརྨཱ་སོགས་བརྗོད། དེ་ནས་མཆོད་པ་འབུལ་བ་ནི། །དམ་ཆོས་དཀོན་མཆོག་ཐམས་ཅད་དང་། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར། །རྒྱུན་མི་འཆད་པར་འབབ་པར་ཤོག །སོ་སོའི་ཕྱག་རྒྱས། ཨོཾ་སརྦ་ཏ་ཐཱ་ག་ཏ་བཛྲ་ཨགྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པུཀྐེ་སོགས་ཀྱིས་མཆོད། །བྱང་ཆུབ་ཤིང་མཆོག་ཆོས་འཁོར་གདུགས་ཀྱི་རྒྱན། །ཅོད་པན་ཆུ་སྲིན་རྒྱལ་མཚན་ཕྲེང་བ་དང་། །རིན་ཆེན་རྒྱན་མཆོག་ཕུལ་བས་འགྲོ་ཀུན་གྱི། །བསོད་ནམས་ཡེ་ཤེས་ཚོགས་གཉིས་ཡོངས་རྫོགས་ཤོག །ཨོཾ་པུཎྱེ་ཛྙཱ་ན་ཨཱཧཱུྃ་སྭཱ་ཧཱ། ཞེས་མཆོད་རྟེན་ལ་འོས་པའི་རྒྱན་ཕུལ་ནས། །གསེར་གྱི་ས་གཞི་ཁོར་ཡུག་བཅས། །རིན་ཆེན་ལྷུན་པོ་གླིང་བཞིས་བསྐོར། །མཛེས་ལྡན་དང་བཅས་རྣམ་དག་ཞིང་། །རྟག་ཏུ་གུས་པས་དབུལ་བར་གྱི། ཨོཾ་སརྦ་ཏ་ཐཱ་ག་ཏ་མཎྜལ་པཱུ་ཛ་མེ་གྷ་ས་མུ་དྲ་སྤར་ཎ་ས་མ་ཡེ་ཨཱཿཧཱུཾ། ཞེས་རི་རབ་
གླིང་བཞི་ཁོར་ཡུག་དང་བཅས་པ་དབུལ། །སྲིད་གསུམ་མཚུངས་མེད་ཐུགས་རྗེའི་བདག །ཐུབ་དབང་མཆོད་རྟེན་བརྒྱད་པ་དང་། །ཕྱོགས་བཅུའི་འཇིག་རྟེན་གཞན་དག་ན་འང་། །བཞུགས་པའི་ཆོས་སྐུ་ཀུན་ལ་འདུད། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་མཚམས་རྣམས་སུ་ཡང་། །སྐུར་བཅས་སྐུ་ནི་མེད་པ་ཡི། །མཆོད་རྟེན་རྣམས་ལ་ཕྱག་འཚལ་ལོ། །ཞེས་བསྟོད་དེ། དམ་པའི་ཆོས་སྐྱོང་བའི་སྲུང་མ་རྣམས་ཀྱིས་རྟེན་འདི་དག་གི་སྦྱིན་པའི་བདག་པོ་མཛོད་ལ། འདི་རྣམས་ཇི་སྲིད་གནས་གྱི་བར་དུ་སྲུང་བའི་ཕྲིན་ལས་མཛོད། ཅེས་སྦྱིན་བདག་དང་། ཆོས་སྐྱོང་བསྒོ་བ་ལྷན་དུ་བྱས་ནས་གནོད་པ་མེད་པའི་ཕྱོགས་སུ་འོ་མི་བརྒྱལ་བར་བཞུགས་སུ་གསོལ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། ཅེས་སོགས་བསྔོ་བ་སྨོན་ལམ་བཀྲ་ཤིས་རྒྱ་ཆེར་བྱའོ། །དེའི་ཕན་ཡོན་ཡང་དེ་བྱེད་པ་པོ་མཐོ་རིས་སམ། ས་ཡི་སྟེང་དུ་མཆོད་རྟེན་ནམ། འབི་འབི་རྣམས་ཀྱི་རྡུལ་ཕྲ་རབ་ཡོད་པ་ཇི་སྙེད་པ་དེ་སྙེད་ཀྱི་རྒྱལ་སྲིད་ཀྱི་ཕུན་ཚོགས་མ་ལུས་པ་རྣམས་དང་། གཟུགས་དང་། གཟུགས་མེད་པའི་ཏིང་ངེ་འཛིན་གྱི་བདེ་བ་ཐམས་ཅད་སྤྱད་ནས། མཐར་སྐྱེ་རྒས་རྒུད་པ་དང་བྲལ་བ་སངས་རྒྱས་ཉིད་དུ་འགྱུར་ཏེ། གསལ་རྒྱལ་གྱིས་ཞུས་པར་ཡང་། ཐུབ་པའི་དབང་པོའི་མཆོད་རྟེན་བྱས་པ་ཡིས། །མྱ་ངན་རྣམས་བསལ་ལུས་
ཀུན་རྒྱས་པ་དང་། །གཙོ་བོར་གྱུར་པ་རིན་ཆེན་མཛོད་མང་དང་། །ས་སྟེང་དགྲ་ཡི་ཚོགས་ལས་རྒྱལ་བར་འགྱུར། །ཞེས་སོགས་རྒྱ་ཆེར་གསུངས་སོ། ༈ །ལྔ་པ་མཆོད་པ་ནི། སྤྱིར་གོང་འོག་ཏུ་སྨོས་པའི་མཆོད་གཏོར་སོགས་ཀྱང་ཡིན་མོད། གཞན་ཡང་བླ་མ་དང་། ལྷག་པའི་ལྷ་མཆོད་པའི་ཆོ་ག་ཇི་ལྟར་རིགས་པ་ཉམས་སུ་བླང་། བྱེ་བྲག་གྲུབ་ཆེན་མི་ཏྲ་ཛོ་ཀིའི་གདམས་ངག་ལས་བྱུང་བའི་བསམ་གྱིས་མི་ཁྱབ་པའི་མཆོད་བའི་ཆོ་ག་ནི། གཙང་མའི་གནས་སུ་རྟེན་གསུམ་ཅི་རིགས་པའི་སྤྱན་སྔར་མེ་ཏོག་ལ་སོགས་པའི་མཆོད་པ་བཀོད་པས་མཛེས་པར་དགྲམ། སྐྱབས་སེམས་བྱ། རང་སྐད་ཅིག་གིས་འཕགས་པ་སྤྱན་རས་གཟིགས་རྒྱལ་མཚན་རྩེ་མོ་གསེར་མདོག་ཞལ་གཅིག་ཕྱག་གཉིས་པ། གཡས་མཆོག་སྦྱིན་ལས་མཆོད་པའི་ཆར་ཆེན་པོ་འབེབས་ཤིང་། གཡོན་པདྨོ་རྒྱས་པ་འཆང་བ། མཆོད་སྤྲིན་རྒྱ་མཚོའི་དབུས་ན་བཞུགས་ཤིང་ཡོ་བྱད་ནམ་མཁའི་མཛོད་ལ་མངའ་བརྙེས་པ་འཁོར་ལོས་སྒྱུར་བའི་རྒྱལ་པོའི་ངང་ཚུལ་ཅན་དུ་གསལ་བར་གྱུར། ཨོཾ་བཛྲ་པུབྦེ་ཨཱཎཱཧཱུྃ། དེ་བཞིན། དྷཱ་པེ་ནས་ཤཔྟའི་བར་དང་། མཎྜལ་སྦྱར་བས་བྱིན་རླབས་ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། བླ་མ་དཀྱིལ་འཁོར་ལྷ་ཚོགས་སོགས། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་
འཚལ་ལོ། །ཞེས་ཕྱག་འཚལ་བ་སྔོན་དུ་འགྲོ་བས། རང་གི་ཐུགས་ཀའི་ཧཱི༔ལས་མཆོད་པའི་ལྷ་མོ་ཁ་དོག་སྣ་ཚོགས་པ་བསམ་གྱིས་མི་ཁྱབ་པ་རེ་རེ་ལས་ཀྱང་དཔག་ཏུ་མེད་པའི་སྤྲིན་འཕྲོ་བ་སྤྲོས་ནས་བསྙེན་ཟླ བཀུར་བར་བསམས་ལ། རང་བཞིན་སྟོང་པ་ཉིད་ཅན་གྱི། །སྣ་ཚོགས་མེ་ཏོག་བསམ་མི་ཁྱབ། །རྒྱལ་མཚན་རྩེ་མོའི་རིག་པ་ཡིས། །སྤྲུལ་ནས་འཕགས་ཚོགས་མཆོད་པར་བྱ། ཨོཾ་ན་མོ་བྷ་ག་ཝ་ཏེ་མ་ཧཱ་ཀཱ་རུ་ཎི་ཀ་པུཔྤེ་པཱུ་ཛ་མེ་གྷ་ས་མུ་དྲ་རན་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨདྷ་ཏེ་སམྱཀཾ་བུདྡྷ་ཡ། ཏདྱ་ཐཱ། ཨོཾ་པུལླེ། སུ་པུལླེ། པུཊྚེ། པུལླ་ཨུཏྟཱ་བེ་པུལླ་ཨ་བ་ཀཱི་ར་ཎེ་སྭཱ་ཧཱ། ཞེས་པའི་རིག་པ་འདི་ལན་གསུམ་དུ་བརྗོད་ཅིང་དབུལ། དེ་བཞིན་དུ་མེ་ཏོག་གི་གནས་སུ་བདུག་སྤོས་དང་། པུ་དང་པུངྒེའི་གནས་སུ་དྷ་པ་དང་དྷཱ་པེ་སོགས་སྦྱར་བས་མཚོན། ཉེར་སྤྱོད་ལྔ་དང་། རོལ་མོ། མཎྜལ་བཅས་དབུལ། ཐོག་མ་མེད་ནས་ད་ལྟའི་བར། ཞེས་སོགས་སྡིག་པ་བཤགས་པས་མཚོན་ཡན་ལག་ལྷག་མ་རྣམས་ཀྱང་བྱས་ཏེ། བདག་དང་སེམས་ཅན་ཐམས་ཅད་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་ཏེ་མྱུར་དུ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་རྗེས་ཚོགས་ཞིང་རྣམས་མི་དམིགས་པར་བལྟས་ལ་དེ་ཁོ་ན་ཉིད་རྗེས་སུ་དྲན་པས་
དགེ་བའི་རྩ་བ་སངས་རྒྱས་ཀྱི་སར་བསྔོའོ། །ཕན་ཡོན་ནི། མི་ཕྱེད་གུས་པ་མང་ལྡན་པས། །གཟུངས་འདི་ལན་གསུམ་ཆོ་ག་འདིས། །ཉིན་རེ་དུས་གསུམ་མཆོད་བྱེད་ན། །བྱེ་བ་བསམ་མི་ཁྱབ་མཆོད་འགྱུར། ཞེས་སོ། །མཆོད་པ་དངོས་སུ་བཤམ་པ་མ་བྱུང་ཡང་། རི་བོ་ལྷུན་སྡུག །སྤྱོད་ཡུལ་གྱི་གྲོང་། ཁང་བཟང་མཛེས་པ། འབབ་ཆུ་དང་། རྫིང་བུ་སོགས་དྭངས་ཤིང་བསིལ་བ། སྐྱེད་མོས་ཚལ་དང་། ནགས་ཚལ་དང་། སྨན་ལྗོངས་དང་། མེ་ཏོག་གི་ལྡུམ་ར་སོགས་ཡིད་དུ་འོང་བའི་དངོས་པོ་གང་མཐོང་བ་ལ་དམིགས་ཏེ་དེ་ཉིད་རྒྱུར་བྱས་པ་ལས་བྱུང་བའི་མཆོད་པའི་སྤྲིན་བློས་སྤྲུལ་ཏེ་གོང་ལྟར་ཕུལ་བས་ཀྱང་རུང་ཞིང་། རྟེན་གསུམ་གྱི་སྤྱན་སྔར་མེ་ཏོག་དང་། སྤོས་དང་། མར་མེ་སོགས་དབུལ་བའི་སྐབས་སུའང་གོང་གི་སྔགས་ལན་གསུམ་ཁོ་ན་བཟླས་ཏེ་ཕུལ་བས་ཀྱང་མེ་ཏོག་གཅིག་ཕུལ་ན་མེ་ཏོག་བྱེ་བ་བསམ་གྱིས་མི་ཁྱབ་པ་ཕུལ་བའི་ཕན་ཡོན་ཐོབ་པར་འགྱུར་རོ། ༈ །དྲུག་པ་སྦྱིན་པ་ནི། བློ་གྲོས་ཀྱིས་ནུས་ན་ཆོས་ཀྱི་སྦྱིན་པ་བྱ་བའི་ཚུལ་འོག་ཏུ་གསལ། ནད་པ་ལ་སྨན་དང་། དགྲ་ཡིས་འཇིགས་པ་ལ་སྐྱེལ་མ་དང་། དུད་འགྲོ་སོགས་གསོད་པར་བརྩམས་པའི་སྲོག་བསླུ་བ་དང་། གདོན་བགེགས་ཀྱིས་ཉེན་པ་ལ་སྲུང་འཁོར་བྱ་བ་སོགས་མི་འཇིགས་པའི་སྦྱིན་པ་དང་། དབུལ་ཕོངས་ལ་ཟས་སྐོམ་སོགས་ཟང་ཟིང་གི་
སྦྱིན་པ་ཅི་ནུས་སུ་བརྩོན་པར་བྱའོ། །བྱེ་བྲག་ཏུ་མདོ་རྒྱུད་རྣམས་ལས་སྲོག་ཆགས་ལ་ཁ་ཟས་སྟེར་བའི་ཚུལ་མང་དུ་གསུངས་པ་ལས། འདིར་རྣལ་འབྱོར་བླ་མེད་ཀྱི་དབང་དུ་བྱས་ཏེ་མགྲོན་རིགས་ལྔའི་གཏོར་མ་སྦྱིན་ཚུལ་ཁྱད་པར་ཅན་ལ། བྱ་ལ་ཟས་སྟེར་བ་ནི། སྐྱབས་སེམས་སྔོན་དུ་འགྲོ་བས། རང་ཉིད་ལྭ་གདོང་མའི་ང་རྒྱལ་གྱིས། བྱ་རྣམས་ཧཱུཾ་ལས་ཁཱ་གདོང་མ་དྲག་མོ་ཞལ་གཅིག་ཕྱག་བཞི། ཐོད་པ། ཁ་ཊཾ། གྲི་གུག །མགོ་བོ་བསྣམས་པ། སྤྱན་གསུམ་སྨིན་མ་ཁམ་ཞིང་། རོལ་པས་བཞུགས་པ་རྣམས་སུ་གྱུར་པར་བསམས་ལ། འབར་བའི་ཕྱག་རྒྱས། དཔལ་ལྡན་ཐུགས་ཀྱི་འཁོར་ལོ་ནས། །མཁའ་སྤྱོད་མ་ཡི་ཚོགས་ཇི་སྙེད། །འོལ་བ་བྱ་རོག་གཟུགས་ཉིད་དུ། །དེ་དག་ཐམས་ཅད་འདིར་གཤེགས་ཤིག །ཨོཾ་ན་མཎྜཤྲཱི་བཛྲ་ཌཱ་ཀཱ་ཡ། ཨོཾ་བཛྲ་ཀཱ་ཀཱ་སྱེ་ཧཱུྃ་ཧཱུྃ་ཕཊ། ཅེས་སྤྱན་དྲངས་ལ། བཟའ་བ་རྣམས། ཨོཾ་ཨཱཧཱུཾ། ཧ་ཧོ་ཧྲིས་བྱིན་གྱིས་བརླབས་ཏེ། མེ་ཏོག་ལ་སོགས་པ་ཡང་བྱིན་ལ། ཨོཾ་བཛྲ་ཌཱ་ཀི་སྐྱེ་ཁེ་ཙ་རི་རཱུ་པ་ཀཱ་ཀཱ་སྱེ་ཙི་ལ་ལ་ཀ་རུ་པ་ཨི་མཾ་བ་ལིཾ་གྲིཉྩནྟུ། ས་མ་ཡ་རཀྵནྟུ། ཡ་ཐེཥཊ། སརྦ་སིདྡྷི་པྲ་ཡཙྪནྟུ་ཧུཾ་ཧཱུྃ་ཕཊ་སྭཱ་ཧཱ། ཞེས་པས་སྦྱིན། དཔལ་ལྡན་རྡོ་རྗེ་མཁའ་འགྲོ་མ། མཁའ་འགྲོ་མ་ཡི་འཁོར་ལོས་སྒྱུར། ཡེ་ཤེས་ལྔ་དང་སྐུ་གསུམ་བརྙེས། འགྲོ་བ་སྐྱོབ་ལ་ཕྱག་འཚལ་ལོ། །ཞེས་བསྟོད། ལྷ་མོ་ཚད་མ་དམ་ཚིག་
ཚད་མ་དང་། དེས་ཆོས་གསུངས་ཀྱང་ཚད་མའི་མཆོག་ཡིན་པས། བདེན་པ་དེ་དག་གིས་ནི་ལྷ་མོ་རྣམས། བདག་ཅག་རྗེས་སུ་འཛིན་པའི་རྒྱུར་གྱུར་ཅིག །ཅེས་སྨོན་ལམ་གདབ། མུཞེས་ཅི་བདེར་གཏོང་ངོ་། །མཁའ་ལ་སྤྱོད་པའི་གཟུགས་ཅན་བྱའི་གཏོར་མའི་རིམ་པའོ། །ཁྱི་ལ་ཟས་སྟེར་བ་ནི། བདག་ཉིད་ཁྱི་གདོད་མའི་ཏིང་ངེ་འཛིན་གྱིས། ཁྱི་རྣམས་ཧཱུཾ་ལས་ཁྱི་གདོང་མ་དྲག་མོ་སོགས་སྔ་མ་ལྟར་ལ། འབར་བའི་ཕྱག་རྒྱས་ཨོ་ཨཱཎཡནྟ་ཌཱ་ཀིཙྩེ་ཤཱ་ན་ཀྲ་མ་ཧོ། ཨ་གྲྭ་བྷི་མ་ཝ་སུ་ཥ་ཨི་མཾ་བ་ལིཾ་བྷུ་ལྗཛི་གྲུ་པི་བ་གྲི་ཧི་ཏ་ཨཱསྨ་ཀཾ་པུཏྟིཾ་ཀུ་རུ་ས་མ་ཡ་མ་ནུ་སྨ་ར་ཡ་ཧཱུྃ་ཕཊ་སྭཱ་ཧཱ། ཞེས་སྤྱན་དྲངས་བཟའ་བ་སྔ་མ་བཞིན་དུ་བྱིན་གྱིས་བརླབས་ནས་མེ་ཏོག་སོགས་དང་། ཨོཾ་ཤྲཱི་ནཱ་སྱེ་དྷུ་ཙ་རི་ཡེ། ཨི་མཾ་བ་ལིཾ། ཧཱུྃ་ཧྥུ་གྲི་ཧྥུ་ཧཱུྃ་ཧཱུྃ་ཕཊ། ཅེས་པས་སྦྱིན། བསྟོད་ཅིང་སྨོན་ལམ་གདབ། མུཞེས་གཏོང་ངོ་། །ས་ལ་སྤྱོད་པའི་གཟུགས་ཅན་ཁྱིའི་གཏོར་མའི་ཆོ་གའོ། །འདི་གཉིས་ཟས་ཀྱི་སྔོན་དུ་བྱ་བར་གསུངས་སོ། །ཉ་ལ་ཟས་སྦྱིན་པ་ནི། རང་ཉིད་གོ་ལས་གོ་རཱི་ནག་མོ། །སྤྱན་གསུམ། གྲི་གུག །རོ་ཧི་ཏའི་ཉ་བསྣམས་ཤིང་། ཉ་གསོལ་བ། ཉའི་གདན་དང་རྒྱབ་ཡོལ་ཅན་ནོ། །ཞེས་བསམས་ལ། ཉ་རྣམས་ཁ་ལས་ཁྱབ་འཇུག་གི་གཟུགས་སུ་གྱུར། ༀ་ཨེ་ཧེ་ཧི། མ་ཧཱ་བ་ལ་བཱིརླ་བ་ར་ཀྲ་མ་ཧཱ་ཡོ་ཛ་ན་ས་ཧ་སྲ་པྲ་མ་བ་སུ་ཤ་བ་ཏི་ལི་ཏི་མི་གི་
ལི་པྲ་བྷི་པྲ་བྷི་ཏ་ཡོ་མ་ཧཱ་མཱི་ན་ཨདྷི་པྲ་ཏི་ཡ་ཨ་ཏྲ་སནྟི་ཧི་ཏོ་བྷ་ཝནྟུ། མ་མ་ཨ་བྷི་པྲ་ཏ་ར་སིདྡྷི་མ་བསྟ་རནྟ་སྭཱ་ཧཱ། ཞེས་པས་བོས་ལ། ཆང་མ་གཏོགས་པའི་ཟས་སྔར་བཞིན་བྱིན་གྱི་བརླབས་ལ། མེ་ཏོག་ཀྵ སོགས་དང་། ཨོཾ་ཨ་ཨཱ། ཨི་ཨཱི། ཨུ་ཨཱུ། རྀ་རཱི། ལི་ལཱི། ཨེ་ཨེ། ཨོ་ཨཽ། ཨཾ་ཨ༔ སྭཱ་ཧཱ། ཞེས་པས་སྦྱིན། ལག་པས་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་རྣམས་ཀློག་པ་དང་། །བཙུན་མོའི་ཁུ་བ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བར་ཤོག །ཅེས་སྨོན་ལམ་གདབ། མུཞེས་གཏོང་ངོ་། །ས་འོག་ན་གནས་པའི་ཉའི་གཏོར་མའི་རིམ་པའོ། །བ་ལང་ལ་ཟས་སྦྱིན་པ་ནི། རང་ཉིད་སྒྲོལ་མ་དཀར་མོ་བགྲང་ཕྲེང་དང་། རྩེ་གསུམ་བསྣམས་པ། ཁྱུ་མཆོག་བཅིབས་པའོ། །མདུན་དུ་ཁྱུ་མཆོག་ཧཱུྃ་ལས་རྡོ་རྗེ་སེམས་དཔའ། བ་རྣམས་ཕྱོགས་སུ་མཁའ་འགྲོ་མ། དྲག་མོ་རོ་ལངས་མ། གཏུམ་མོ། །འི མཚམས་སུ་སེང་གེ་མོ། སྟག་མོ། ཅེ་སྤྱང་མོ། འུག་པ་མོ་རྣམས་ཀྱི་རང་བཞིན་ནོ། །བཟའ་བཏུང་རྣམས། ཨོཾ་ཨ་ཨཱ་ནས། །ཨོཾ་ཨཱསཱ་ཧཱ། ཨ་ཀཱ་རོ་མུ་ཁཾ་སརྦ་དྷརྨཱ་ཎཱི་ཨཱ་དྱ་ནུ་ཏྲ་ན་ན་ཏྭ་ཏ་ཨོཾ་ཨཱཧཱུྃ་ཕཊ་སྭཱ་ཧཱ། ཞེས་པས་བྱིན་གྱི་བརླབས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་པས་ཟར་གཞུག །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། གང་གི་ལམ་གྱིས་གྲོལ་འགྱུར་པ། དེ་
ཡིས་སངས་རྒྱས་མྱུར་ཐོབ་ཤོག །ཅེས་སྨོན་ལམ་གདབ། མུཞེས་པས་གཏོང་ངོ་། །ཐང་ལ་སྤྱོད་པ་བ་གླང་གི་གཏོར་མའི་ཆོ་གའོ། །གྲོག་མོ་ལ་ཟས་སྟེར་བ་ནི། རང་ཉིད་བཅོམ་ལྡན་འདས་འོད་དཔག་ཏུ་མེད་པ་སྤྲུལ་སྐུའི་རྣམ་པ་ཅན་དུ་གྱུར། མདུན་གྱི་གྲོག་མོ་རྣམས་འཕགས་པ་འཇིག་རྟེན་དབང་ཕྱུག་སྐུ་མདོག་དམར་པོ་གཡས་མཆོག་སྦྱིན་དང་། གཡོན་གསེར་གྱི་པདྨ་འཆང་བ། རལ་པའི་ཐོར་ཚུགས་ཅན། དར་དང་རིན་པོ་ཆེས་བརྒྱན་པ་གྲངས་མེད་པའི་སྐུར་གྱུར་པ་ལ། བཟའ་བ་ཨོཾ་ཨཱཿཧཱུྃ་གིས་བདུད་རྩིར་གྱུར་པ་ཕུལ་བས་ཟག་པ་མེད་པའི་བདེ་བ་ཆེན་པོས་རྒྱུད་ཡོངས་སུ་གང་བར་བསམས་ལ། ཨོ་ཨཱརྱ་ལོ་ཀེ་ཤྭ་ར་ཨི་མཾ་བ་ལིཾ་གྲིབྟ་ཁ་ཁ་ཁཱ་ཧི་ཁཱ་ཧི་ཞེས་དབུལ། །གཞོན་ནུའི་ཚུལ་འཆང་མཛེས་པའི་སྐུ། །པདྨ་གསར་པས་ཕྱག་བརྒྱན་པ། །སྙིང་རྗེའི་གཏེར་ཆེན་འཇིག་རྟེན་དབང་། །མགོན་པོ་མཆོག་ལ་བདག་འདུད་དོ། །ཞེས་དང་། །བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །ཅེས་སྨོན་ལམ་གདབ་ཅིང་། མུཞེས་པས་རང་གནས་སུ་སོང་བར་བལྟའོ། །ཀླུང་ན་སྤྱོད་པ་གྲོག་མོའི་གཏོར་མའོ། །དེ་བཞིན་དུ་སྲོག་ཆགས་ཀྱི་རིགས་གང་དང་གང་ལ་ཟས་སྦྱིན་པ་ནའང་རང་ཉིད་ལྷག་པའི་ལྷར་གསལ་བའི་ཐུགས་ཀའི་ས་
བོན་གྱི་འོད་ཀྱིས་རེག་པས་དེ་དག་སྐད་ཅིག་གིས་འཇིག་རྟེན་དབང་ཕྱུག་ལ་སོགས་པའི་ལྷ་གང་ཡང་རུང་བའི་སྐུར་བསྒོམས་ཏེ། བཟའ་བ་རྣམས་ཨོཾ་ཨཱཿཧཱུྃ་གིས་ཡེ་ཤེས་ཀྱི་བདུད་རྩིར་བྱིན་གྱི་བརླབས་ལ་ཕུལ་བས་ཟག་པ་མེད་པའི་བདེ་བ་མཆོག་གིས་ཚིམ་པར་བསམས་ལ་སྦྱིན་ཞིང་། མཐར་བསྔོ་བ་ཡང་བྱའོ། །གཞན་ཡང་མཆིལ་མ་དོར་བ་ན། ཨོཾ་ཨཱགླེ་ཟླ་ན་ཨཱ་ཧ་རེ་སྭཱ་ཧཱ། ཟས་སུ་མཆིལ་མ་ཟབ་རྣམས་ཀྱིས་ཐོབ་པར་གྱུར་ཅིག །ཅེས་བརྗོད་ཅིང་སེ་གོལ་བརྡབ་བོ། །དེ་བཞིན་དུ་ལུད་པ་ལ། ཨོཾ་ཨཱཋཁྲེར་ཨཱ་ཧ་རེ་སྭཱ་ཧཱ། ལུད་པ་ཟ་བ་རྣམས་ཀྱིས་ཐོབ་པར་གྱུར་ཅིག །སྣབས་ལ་ཨོཾ་ཨཱཤྲཱི་གྷ་ནི་ཀཱ་ཨ་ཧ་རེ་སྭཱ་ཧཱ། ལུས་ཀྱི་དྲི་མ་སྤྱི་ལ། ཨོཾ་ཨཱཋམ་ལ་ཨཱ་ཧ་རེ་བྷུསྭཱ་ཧཱ། དྲི་ཆེན་ལ། ཨོཾ་ཨཱབིཥྛ་ཨཱ་ཧ་རེ་སྭཱ་ཧཱ། དྲི་ཆུ་ལ། ༀ་ཨཱམུ་ཏྲ་ཨཱ་ཧ་རེ་སྭཱ་ཧཱ། དེ་རྣམས་དེ་དག་ཟ་བ་རྣམས་ཀྱིས་ཐོབ་པར་གྱུར་ཅིག །ཅེས་བརྗོད་ལ་སེ་གོལ་བརྡབ་བོ། །དེ་རྣམས་དེ་ལྟར་བྱིན་པའི་བསོད་ནམས་ཅི་བསག་པ་ཡང་། སེམས་ཅན་ཐམས་ཅད་ཀྱི་དོན་དུ་བྱང་ཆུབ་ཏུ་བསྔོ་བར་བྱ་སྟེ། ཟག་པ་རྒྱུན་གྱི་གཏོར་མ་ཞེས་ཕན་ཡོན་ཆེན་པོ་ཐོབ་པར་གསུངས་སོ། ༈ །བདུན་པ་ཚོགས་བསག་པ་ནི། སྤྱིར་ཚོགས་བསག་པའི་སྒོ་མཐའ་ཡས་པར་གསུངས་ཤིང་། གོང་འོག་གི་མཆོད་སྦྱིན་དང་གཏོར་མའི་ཆོ་ག་སོགས་ཕལ་ཆེར་ཀྱང་ཚོགས་གསོག་གི་ཆོ་ག་ཁོ་
ན་ཡིན་ལ། ཁྱད་པར་མདོ་རྒྱུད་གཉིས་ཀ་ནས་བསྟན་ཅིང་། དམ་པ་རྣམས་ཀྱིས་ཐུགས་དམ་དུ་མཛད་པའི་ཚོགས་གསོག་གི་མཆོག་མཎྜལ་འབུལ་བའི་ཆོ་ག་ལ། རྒྱས་པར་མདུན་དུ་སྟེགས་བུའི་ཁར་སྒྲུབ་པའི་མཎྜལ་རང་གི་ཡི་དམ་གཙོ་བོར་གྱུར་པའི་ཚོགས་ཞིང་དམ་ཚིག་པ་བསྐྱེད། གནས་གསུམ་བརླབ། ཡེ་ཤེས་པ་གཞུག །དབང་བསྐུར་ཞིང་རིགས་བདག་གི་རྒྱས་གདབ་མཆོད་བསྟོད་ཅི་རིགས་བྱ། དེ་ནས་མཎྜལ་རྒྱས་པར་འབུལ་ཞིང་གྲངས་གསོག །མཐར་འདོད་དོན་གསོལ། ནོངས་པ་བཤགས། ཡེ་ཤེས་པ་རྟེན་ཡོད་ན་བརྟན་བཞུགས་དང་། མེད་ན་གཤེགས། དམ་ཚིག་པ་རང་ལ་བསྡུ། བསྔོ་སྨོན་བཀྲ་ཤིས་བྱའོ། །འབྲིང་དུ་ཚོགས་ཞིང་སྐྱབས་ཡུལ་ལྟར་གསལ་བཏབ་ལ། མཎྜལ་ཚོམ་བུ་བདུན་མ། ཉེར་གསུམ་མ། སོ་བདུན་མ་སོགས་རྒྱས་པར་དབུལ། བསྡུ་ན་ཚོགས་ཞིང་མཁའ་ཁྱབ་ཏུ་བཞུགས་པའི་སྤྱན་སྔར། ཇོ་བོ་རྗེས་ཟླ་བ་སྒྲོན་མེའི་མདོའི་དོན་ཚིགས་བཅད་དུ་བསྡེབས་པར་གྲགས་པ། །ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཨོཾ་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་རེ་བྷྱརཏྣ་མཎྜལ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཨཱཿཧཱུྃ། ཞེས་སམ། རྒྱུད་སྡེ་ལས་བྱུང་བར་
གྲགས་ཤིང་བླ་མ་གོང་མའི་གསུང་རྒྱུན་གྱིས་བརྒྱན་པ། བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་ཚོགས་བཅས། །རིན་ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པ། །བློ་ཡིས་བླངས་ནས་བླ་མ་ཡི་དམ་དཀོན་མཆོག་རྣམས་ལ་འབུལ། །ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ། །ཨི་དཾ་གུ་རུ་རཏྣ་མཎྜལ་ཀཾ་ནིརྱ་ཏ་ཡཱ་མི། ཞེས་སྔགས་དང་བཅས་པས་དབུལ་བར་བྱའོ། ༈ །བརྒྱད་པ་སྡིག་པ་དང་ལྟུང་བ་སྦྱོང་བ་ནི། སྤྱིར་སྡིག་ལྟུང་སྦྱོང་བའི་སྒོ་མཐའ་ཡས་པ་ལས། འདིར་སྡོམ་པ་གསུམ་གྱི་དབང་དུ་བྱས་ན། ཐོག་མར་སོ་སོར་ཐར་པའི་དགེ་བ་གསོ་ཞིང་སྡིག་པ་སྦྱོང་བའི་ཆོ་ག་ནི། དགེ་ཚུལ་དང་དགེ་སློང་གི་དགེ་འདུན་ཚོགས་པའི་ཚེ་ཡར་ངོ་མར་ངོའི་གསོ་སྦྱོང་ཇི་སྐད་བཤད་པ་བཞིན་བསྒྲུབ། རྐྱེན་དབང་གིས་མ་གྲུབ་ན་ལམ་ལྟ་བུར་ཡིད་ཀྱིས་བྱིན་རླབས་བྱ། རི་ཁྲོད་སོགས་སུ་རང་གཅིག་པུའི་ཚེ་གསོ་སྦྱོང་ནི་མེད་དུ་མི་རུང་བའི་སྦྱོར་བ་མ་ཡིན་ཀྱང་། ཚོགས་རྒྱ་ཆེན་པོ་གསོག་པ་སོགས་དགོས་པ་ཁྱད་པར་ཅན་ཡོད་པས། ཡར་ངོ་དང་མར་ངོའི་གསོ་སྦྱོང་གི་དུས་ལ་བབ་པ་ན། སྟོན་པའི་སྣང་བརྙན་གཙོ་བོར་གྱུར་པའི་སྤྱན་སྔར་མཆོད་པའི་བྱེ་བྲག་དང་། ཉེ་ལོགས་སུ་དཀར་གཏོར་བཅས་བཤམ། དེ་ནས་རྒྱུན་ཆགས་གསུམ་པ་དང་། གཏོར་མ་གཏོང་བ་ལ་འཇུག་པར་བྱ་
སྟེ། སྣམ་སྦྱར་ཡོད་ན་གྱོན་ཅིང་ཐོག་མར་ཕྱག་འཚལ་བའི་རྒྱུད་ནི། དངོས་སུ་ཡན་ལག་མ་ལྔ་ས་ལ་གཏུགས་པའི་ཕྱག་དང་བཅས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་མཉམ་མེད་ཤཱཀྱའི་རྒྱལ་པོའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་གཏུགས་ཏེ་གུས་པས་ཕྱག་འཚལ་ལོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷང་ངེ་བ། །མགོན་པོ་མཆོག་གྱུར་ཁྱོད་ལ་ཕྱག་འཚལ་ལོ། །མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཅན་ཁྱོད་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་
བྲལ་བའི་རྒྱུ། །དགེ་བས་ངན་སོང་ལས་གྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། དགེ་འདུན་ལ་ཡང་ཕྱག་འཚལ་ལོ། །ཞེས་ཕྱག་འཚལ། གཉིས་པ་མདོ་འདོན་པའི་རྒྱུད་ནི། ཐལ་མོ་བསྣོལ་ལ་ཙོག་པུར་འདུག་སྟེ། སྨྲ་བསམ་བརྗོད་མེད་སོགས་དང་། འདི་སྐད་བདག་གིས་ཐོས་པ་སོགས་ཤེས་རབ་སྙིང་པོའི་མདོ་རྫོགས་པར་བཏོན་པའི་མཐར། །སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་བལྟ། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོ་འདི་སྐད་གསུང་། །སྡིག་པ་ཅི་ཡང་མི་བྱ་སྟེ། །དགེ་བ་ཕུན་༤ སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། ཞེས་བརྗོད། གསུམ་པ་ཡོངས་སུ་བསྔོ་བའི་རྒྱུད་ནི། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་
གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །ཀླུ་རྒྱལ་དགའ་བོ་ཉེ་དགའ་བོ། །གཞན་ཡང་གྲོང་ཁྱེར་གནས་པ་རྣམས། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་བ་ཐོབ་པར་ཤོག །ཅེས་སྨོན་ལམ་གདབ། དེ་ནས་གཙུག་ལག་ཁང་ངམ་གནས་དེར་གཉུག་མར་གནས་པའི་ལྷ་ལ་གཏོར་མ་གཏོང་བ་ནི། ཆབ་བྲན་ལ། རང་རང་གི་སྤྱོད་ཡུལ་དུ་གྱུར་པའི་གཏོར་སྣོད་ཀྱི་ནང་དུ་གཟུགས་སྒྲ་དྲི་རོ་རེག་བྱའི་སྐྱེ་མཆེད་ཀྱི་ངོ་བོར་གྱུར་པའི་བཟའ་བཏུང་འདོད་པའི་ཡོན་ཏན་དུ་མས་གང་བར་གྱུར། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ་ཨཱདྱ་ནུཏྤནྣ་ཏྭ་ཏ་ཨོཾ་ཨཱཧཱུྃ་ཕཊ་སྭཱ་ཧཱ། ཞེས་ལན་གསུམ་གྱིས་བྱིན་གྱིས་བརླབས་ནས། གཉུག་མར་གནས་པའི་ལྷ་མོ་འཕྲོག་མ་ལ་སོགས་པ་གནས་དང་གཞིའི་བདག་པོ་དང་། གཞན་ཡང་ནགས་ཚལ་དང་། རི་བོ་དང་། ཆུ་ཀླུང་དང་། ངམ་གྲོག་ལ་སོགས་པར་འཁོད་པའི་འབྱུང་པོ་གཏོར་མ་ཟ་བར་འདོད་པ་རྣམས་ཀྱི་ཞལ་དུ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ཕུལ་ནས། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། ཅེས་ཕྲིན་ལས་གསོལ་ལོ། །འདི་རྣམས་ནི་རྒྱུན་དུ་ཞོགས་པར་ཆགས་མེད་ཀྱིས་ཉམས་སུ་བླངས་ཀྱང་ཤིན་ཏུ་ལེགས། དེ་ལྟར་
རྒྱུན་ཆགས་གསུམ་དང་གཏོར་མ་བསྔོ་བ་སྔོན་དུ་བཏང་ནས། གསོ་སྦྱོང་བྱིན་རླབས་དངོས་ནི། ལྷ་རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་ཡང་གསོ་སྦྱོང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཀྱིས་ཡོངས་སུ་དག་གོ་ཞེས་བདག་མཆི་ན་བདག་ཡོངས་སུ་དག་པར་ལྷ་རྣམས་ཀྱིས་གཟུང་དུ་གསོལ། བདག་དགེ་སློང་མིང་འདི་ཞེས་བགྱི་བ་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར། དེང་གསོ་སྦྱོང་བྱིན་གྱིས་བརླབ་བོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་དང་ཟླ ལྷན་ཅིག་གསོ་སྦྱོང་རྒྱ་ཆེར་ཉམས་སུ་མྱང་བར་བྱ་ཞིང་སོ་སོར་ཐར་པའི་མདོ་གདོན་པ་ཡང་གདོན་པར་བགྱིའོ། །ཞེས་ལན་གསུམ་བརྗོད་ཅིང་ཡིད་ལ་བསམ་མོ། །ཡང་དགེ་སློང་གཉིས་དང་གསུམ་ཡོད་ན་ཕན་ཚུན་གཅིག་གི་མདུན་དུ་གཅིག་འདུག་སྟེ། བཙུན་པ་དགོངས་སུ་གསོལ། ཞེས་དང་། མཐར་བཙུན་པས་གཟུང་དུ་གསོལ་ཞེས་བརྗེ་ཞིང་ཐབས་ལེགས་བྱ། དེ་ཙམ་ཡང་མ་གྲུབ་ན། གསོ་སྦྱོང་གི་དུས་ལ་བབ་པ་དང་། ཆོས་རྣམས་ཐམས་ཅད་རྒྱུ་ལས་བྱུང་། ཞེས་སོགས་སྔོན་དུ་བཏང་སྟེ། ཐུབ་པའི་སྔོན་གྱི་གསོ་སྦྱོང་། སྡིག་པ་ཅི་ཡང་མི་བྱ་སྟེ། ཞེས་སོགས་དང་། ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་
ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ཞེས་པ་ཙམ་གདོན། ཡང་འགའ་ཞིག་གིས་སངས་རྒྱས་རབ་བདུན་གྱི་གསོ་སྦྱོང་གི་ཚིགས་སུ་བཅད་པ་རྫོགས་པར་གདོན་པར་གསུངས་པ་ནི་འདི་ཡིན་ཏེ། །བཟོད་པ་དཀའ་ཐུབ་དམ་པ་བཟོད་པ་ནི། །མྱ་ངན་འདས་པ་མཆོག་ཅེས་སངས་རྒྱས་གསུང་། །རབ་ཏུ་འབྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །མིག་ལྡན་འགྲོ་བ་ཡོད་པ་ཡིས། །ཉམ་ང་བ་དག་ཇི་བཞིན་དུ། །མཁས་པས་འཚོ་བའི་འཇིག་རྟེན་འདིར། སྡིག་པ་དག་ནི་ཡོངས་སུ་སྤང་། །སྐར་པ་མི་གདབ་གནོད་མི་བྱ། །སོ་སོར་ཐར་པའང་བསྡམ་པར་བྱ། །ཟས་ཀྱི་ཚོད་ཀྱང་རིག་པར་བྱ། །བས་མཐའི་གནས་སུ་གནས་པར་བྱ། །ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཇི་ལྟར་བུང་བ་མེ་ཏོག་ལས། །ཁ་དོག་དྲི་ལ་མི་གནོད་པར། །ཁུ་བ་གཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །བདག་གིས་རིགས་དང་མི་རིགས་ལ། །བརྟག་པར་བྱ་སྟེ་གཞན་རྣམས་ཀྱི། །མི་མཐུན་པ་དང་གཞན་དག་གི། །བྱས་དང་མ་བྱས་རྣམས་ལ་མིན། །ལྷག་པའི་སེམས་ལ་བག་བྱ་སྟེ། །ཐུབ་པའི་ཐུབ་གཞི་རྣམས་ལ་བསླབ། །ཉེར་ཞི་
རྟག་ཏུ་དྲན་ལྡན་པའི། །སྐྱོབ་པ་མྱ་ངན་མེད་པ་ཡིན། །སྦྱིན་པས་བསོད་ནམས་རབ་ཏུ་འཕེལ། །ལེགས་བསྡམས་དགྲ་སོགས་མི་འགྱུར་རོ། །དགེ་དང་ལྡན་པས་སྡིག་པ་སྤང་། །ཉོན་མོངས་ཟད་པས་མྱ་ངན་ཟླ འདའ། །སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པའང་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ལ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་དག་རབ་སྦྱངས་ན། དྲང་སྲོང་གསུངས་པའི་ལམ་ནི་ཐོབ་པར་འགྱུར། ཞེས་བརྗོད་ཅིང་དོན་དྲན་པར་བྱས་ལ་མཐར་བསྔོ་སྨོན་བཀྲ་ཤིས་ཀྱང་བྱའོ་གསུངས་སོ། །གཉིས་པ་བྱང་ཆུབ་སེམས་དཔའི་ལྟུང་བའི་ལྷག་མ་བཤགས་ཤིང་སྦྱོང་བ་ནི། སྤྱོད་འཇུག་ལས། །ཉིན་དང་མཚན་མོ་ལན་གསུམ་དུ། །ཕུང་པོ་གསུམ་པ་གདོན་བྱ་ཞིང་། །རྒྱལ་དང་བྱང་ཆུབ་སེམས་བརྟན་པས། །ལྟུང་པའི་ལྷག་མ་དེས་ཞི་བྱ། ཞེས་པས་ཉིན་ལན་གསུམ་མཚན་ལན་གསུམ་དུ་ཕུང་པོ་གསུམ་པའི་མདོ་གདོན་ཅིང་ཕྱག་འཚལ་བར་བྱ་སྟེ། དེའང་སྤྲོ་ན་སངས་རྒྱས་སོ་
ལྔའི་སྐུ་བྲིས་འབུར་གང་རིགས་ཀྱི་སྤྱན་སྔར་མེ་ཏོག་ལ་སོགས་པའི་མཆོད་པ་ཅི་འབྱོར་བཤམ། སྐྱབས་སེམས་ཇི་ལྟར་རིགས་པ་དང་། ས་གཞི་བྱིན་རླབས་སོགས་གོང་དུ་བཤད་པ་ལྟར་བྱ་འདུན་པ་རྩེ་གཅིག་པས། བཅོམ་ལྡན་འདས་ཤཱཀྱའི་དབང་པོ་ལ་སོགས་པ་རྫོགས་པའི་སངས་རྒྱས་སུམ་ཅུ་རྩ་ལྔ་འཁོར་དང་བཅས་པ་རྣམས། བདག་སོགས་སྙིགས་མ་ལྔ་བདོ་བའི་དུས་ཀྱི་སེམས་ཅན་སྡུག་བསྔལ་སྣ་ཚོགས་ཀྱིས་གཟིར་བ་རྣམས་ཀྱི་ལྟུང་བ་རྣམ་པར་སྦྱང་བའི་སླད་དུ་སྤྱན་འདྲེན་ཞིང་མཆིས་ན། དེང་དུས་ལ་བབ་ཀྱིས་དགོངས་པར་མཛད་དུ་གསོལ། ཞེས་གསོལ་པས། སོ་སོའི་ཞིང་ཁམས་ནས་སྐད་ཅིག་གིས་བྱོན་ཏེ་མདུན་གྱི་ནམ་མཁར་རིན་པོ་ཆེའི་པདྨོ་རྣམ་པར་རྒྱས་པའི་སྙིང་པོར་ཟླ་བའི་གདན་ལ་བཞུགས་པ་ནི། སངས་རྒྱས་དཀར་པོ་བདུན་ཆོས་འཆད། སྔོན་པོ་བདུན་ས་གནོན་མཉམ་གཞག །སེར་པོ་བདུན་མཆོག་སྦྱིན་མཉམ་གཞག །དམར་པོ་བདུན་མཉམ་གཞག །ལྗང་གུ་བདུན་སྐྱབས་སྦྱིན་མཉམ་གཞག་གི་ཕྱག་རྒྱ་ཅན། ཐམས་ཅད་ཀྱང་སྐུ་མཚན་དང་དཔེ་བྱད་ཀྱིས་མཛེས་པ། གསུང་དབྱངས་ཡན་ལག་དྲུག་ཅུ་དང་ལྡན་པ། ཐུགས་ཏིང་ངེ་འཛིན་མུ་མཐའ་མེད་པ་ལ་འཇུག་ཅིང་ལྡང་བ། ན་བཟའ་ཆོས་གོས་རྣམ་གསུམ་གསོལ་ཞིང་ཞབས་རྡོ་རྗེའི་སྐྱིལ་མོ་ཀྲུང་གིས་སྐུ་ལས་སྐྱེས་པའི་འོད་ཀྱི་ཕུང་པོའི་ཀློང་ན་བཞུགས་པ་གྱུར་
པར་བསམ། སྤྲོ་ན་འབྱོན་ལེགས་སོགས་ཡན་ལག་ལྷག་མ་རྣམས་བྱ། དེ་ནས་ལངས་ཏེ་ཕྱག་འཚལ་བཞིན་དུ། བདག་སོགས་སེམས་ཅན་ཐམས་ཅད་དུས་རྟག་པར་བླ་མ་ལ་སྐྱབས་སུ་མཆིའོ་སོགས་ཕུང་པོ་གསུམ་པ་ཚར་གསུམ་ལ་ཉུང་མཐའ་བྱས་ལ་གདོན། དེའང་བཤགས་པ་ལ་སྟོབས་བཞི་ཚང་དགོས་པས། སངས་རྒྱས་སོ་ལྔ་ནི་རྟེན་གྱི་སྟོབས། སྡིག་པ་བཤགས་པ་ནི་རྣམ་པར་སུན་འབྱིན་པའི་སྟོབས། སླན་ཆད་ཀྱང་གཅོད་ཅིང་བསྡམ་པར་བགྱི་ལགས་སོ་ཞེས་པ་གཉེན་པོ་ཀུན་ཏུ་སྤྱོད་པ་དང་། སོར་ཆུད་པའི་སྟོབས་སོ། །ཕུང་པོ་གསུམ་ཡང་། བཤགས་པ་ནི་བཤགས་པའི་ཕུང་པོ། ཕྱག་འཚལ་བ་དང་། དགེ་བའི་རྩ་བ་སྒྲུབ་པ་དང་། ཡི་རང་དང་། བསྐུལ་བ་དང་། གསོལ་བ་གདབ་པ་རྣམས་ནི་བསོད་ནམས་ཀྱི་ཕུང་པོ། །བསྔོ་བ་རྣམས་ནི་བསྔོ་བའི་ཕུང་པོ་ཞེས་གསུངས་སོ། །མཐར་བསྔོ་སྨོན་གྱི་རྒྱས་གདབ། གལ་ཏེ་དེ་ལྟ་བུའི་ཆོ་ག་རྒྱས་པར་མ་གྲུབ་ཀྱང་། ཚོགས་ཞིང་གོང་ལྟར་གསལ་བཏབ་པའི་སྤྱན་སྔར་ཕྱག་འཚལ་ཞིང་ཕུང་པོ་གསུམ་པའི་མདོ་ཁོ་ན་བཏོན་པས་ཀྱང་རུང་ངོ་། །གསུམ་པ་སྔགས་ཀྱི་དམ་ཚིག་ཉམས་ཆག་སྦྱོང་བའི་ཐབས་མཐའ་ཡས་པ་ལས། ཡོངས་སུ་གྲགས་པ་ནི་རྡོ་རྗེ་སེམས་དཔའ་དང་། དམ་ཚིག་རྡོ་རྗེའི་སྒོམ་བཟླས་གཉིས་ཀྱི། དང་པོ་ནི། རང་རང་གི་སྒྲུབ་ཐབས་དང་ཁྲིད་ཀྱི་སྔོན་འགྲོ་སོགས་
ལས་འབྱུང་བ་ལྟར་བྱ། གཉིས་པ་ནི་སྐྱབས་སེམས་སྔོན་དུ་འགྲོ་བས། །རང་གཞན་སེམས་ཅན་ཐམས་ཅད་ཀྱི། །སྤྱི་བོར་པད་ཟླའི་གདན་གྱི་སྟེང་། །ཁཾ་ལས་རལ་གྲི་ཁཾ་གིས་མཚན། །ཡོངས་གྱུར་། དམ་ཚིག་རྡོ་རྗེ་ལྗང་། །རལ་གྲི་དྲིལ་འཛིན་ཡུམ་ལ་འཁྱུད། །ཁྲོ་འཛུམ་སྤྱན་གསུམ་གཟི་བརྗིད་འབར། དར་དང་རིན་ཆེན་རུས་པས་བརྒྱན། །དོན་གྲུབ་རིགས་ཀྱི་ཅོད་པན་ཅན། །རྡོ་རྗེ་པདྨའི་སྐྱིལ་ཀྲུང་གིས། །ཟླ་བའི་རྒྱབ་ཡོལ་ལ་བརྟེན་བཞུགས། །གནས་གསུམ་ཨོཾ་ཨཱཧཱུྃ་ཡིག་དང་། །ཐུགས་ཀར་རལ་གྲི་ཁཾ་གིས་མཚན། །དེ་ལས་འོད་འཕྲོས་ཡེ་ཤེས་པ། ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོས་དབྱེར་མེད་ཐིམ། །བཅོམ་ལྡན་དམ་ཚིག་རྡོ་རྗེ་ཡིས། །བདག་དང་མཐའ་ཡས་སེམས་ཅན་གྱི། །སྡིག་སྒྲིབ་ཉེས་ལྟུང་དྲི་མའི་ཚོགས། །ཐམས་ཅད་བྱང་ཞིང་དག་མཛད་གསོལ། །ཐུགས་ཀའི་ཁཾ་ལས་བདུད་རྩི་བབས། །ཡབ་ཡུམ་སྐུ་གང་སྦྱོར་མཚམས་བརྒྱུད། །བདག་གི་ཚངས་པའི་སྒོ་ནས་ཞུགས། །ལུས་གང་ནད་གདོན་སྡིག་སྒྲིབ་བྱང་། ཞེས་བརྗོད་ཅིང་དམིགས་ལ། ཨོཾ་ཨཱཎཁཾ་སྭཱ་ཧཱ། ཅི་ནུས་བཟླས་པའི་མཐར། །བཅོམ་ལྡན་དམ་ཚིག་རྡོ་རྗེ་ཡིས། །བདག་ཅག་དམ་ཚིག་ཉེས་ལྟུང་ཀུན། །བྱང་ཞིང་དམ་ཚིག་ཉམས་ཆག་རྣམས། །དག་ཅིང་དམ་ཚིག་གཙང་བར་མཛོད། །ལྷ་ཉིད་འོད་ཞུ་རང་ལ་ཐིམ། །བྱིན་རླབས་དབང་དང་དངོས་གྲུབ་
ཐོབ། །དགེ་བ་འདི་ཡིས་མྱུར་དུ་བདག །དམ་ཚིག་རྡོ་རྗེ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་བསྔོ་སྨོན་བྱའོ། །གཞན་ཡང་ཐུན་མོང་དུ་སྡིག་ལྟུང་སྦྱོང་བ་ལ་མཆོག་ཏུ་བསྔགས་པ་ཟ་བྱེད་རྡོ་རྗེ་མཁའ་འགྲོའི་སྦྱིན་སྲེག་ཤིན་ཏུ་བསྡུས་པ་ནི་མེ་ཐབ་དངོས་སམ་མ་འབྱོར་ན་སོལ་མེས་ཀྱང་རུང་ཞིང་། དེའི་མདུན་དུ་ཏིལ་ཇི་ལྟར་རིགས་པ་བཅས་འདུ་བྱ། སྐྱབས་སེམས་སྔོན་དུ་འགྲོ་བས། སྭ་བྷཱ་ཝ་སོགས། སྟོང་པའི་ངང་ལས་ཞི་བའི་ཐབ། །མཚན་རྫོགས་མེ་ཕུང་འབར་བའི་དབུས། །པད་ཉིའི་སྟེང་དུ་ཧཱུཾ་སྔོན་པོ། །ཡོངས་གྱུར་རྡོ་རྗེ་མཁའ་འགྲོ་མཐིང་། །ཕྱག་གཉིས་མཐེའུ་ཆུང་འཁྱུད་པའི་རྒྱས། །རྡོ་རྗེ་དྲིལ་བུ་ཐུགས་ཀར་བསྣོལ། །སྤྱན་གསུམ་ཞལ་གདངས་མཆེ་བ་གཙིགས། །ཐོད་སྐམ་ལྔ་ཡིས་དབུ་ལ་བརྒྱན། །རློན་པ་ལྔ་བཅུའི་དོ་ཤལ་དང་། །སྟག་གི་པགས་པའི་ཤམ་ཐབས་འཕྱང་། །ཞབས་གཉིས་གཡོན་བརྐྱང་སྟབས་ཀྱིས་འགྱིང་། །མི་བསྐྱོད་རིགས་ཀྱི་ཅོད་པན་ཅན། །དམ་ཚིག་ཡེ་ཤེས་དབྱེར་མེད་གྱུར། །རང་གི་རྐང་མཐིལ་ཡཾ་ལས་རླུང་། །ལྟེ་བར་གཏུམ་མོའི་ཡེ་ཤེས་མེ། །སྙིང་གའི་སྡིག་པའི་ས་བོན་པོ། །དེ་ལ་ཚེ་རབས་སྡིག་ལྟུང་འདུས། །རླུང་གིས་མེ་བསྐྱོད་སྙིང་གའི་པཾ། །སྡིག་པའི་རྣམ་པས་སྣ་ནས་ཐོན། །ཏིལ་ལ་ཐིམ་པས་ཁྲོ་བོའི་ཞལ། །ཕུལ་བས་སྡིག་ལྟུང་ཀུན་
སྦྱངས་གྱུར། ཅེས་གསལ་བཏབ་ལ། ཨོཾ་བཛྲ་ཊཱ་ཀ་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་བྷསྨིཾ་ཀུ་རུ་སྭཱ་ཧཱ། ཞེས་ཏིལ་རྫོགས་པའི་བར་དུ་ཕུལ་མཐར། །བཅོམ་ལྡན་རྡོ་རྗེ་མཁའ་འགྲོ་ཡིས། །བདག་དང་མཐའ་ཡས་སེམས་ཅན་གྱི། །སྡིག་སྒྲིབ་ཉེས་ལྟུང་ཚོགས་རྣམས་ཀུན། །ཡོངས་སུ་བྱང་ཞིང་དག་མཛད་གསོལ། ཞེས་གསོལ་ཞིང་སྣ་བུག་གཡོན་ནས་རླུང་ནང་དུ་རྔུབས་པ་དང་ལྷན་ཅིག་ཁྲོ་བོ་རང་ལ་ཐིམ་པར་བསམས་ལ་བསྔོ་སྨོན་བྱ། ཐལ་བ་གཙང་སར་དོར་རོ། ༈ །ཡང་སྡོམ་པ་གསུམ་གྱི་ཕྱིར་བཅོས་བྱ་བའི་ཚུལ་ལ། ཐོག་མར་སོ་ཐར་གྱི་ཕམ་པ་འཆབ་བཅས་ཐེག་དམན་རང་རྐང་གི་དབང་དུ་བྱས་ན་སླར་བླང་བ་དང་འཆོས་སུ་མེད། སྐད་ཅིག་ཙམ་ཡང་བཅབ་པ་མེད་ན་ཆད་ལས་ཀྱི་བསླབ་པ་སྦྱིན་ཏེ་སྤྱོད་པའི་སྒོ་ནས་ཕྱིར་འཆོས། ལྷག་མ་འཆབ་བཅས་ཞག་མ་ལོན་པ་ལ་བསྒོ་བ་ལས་གྱུར་པ་ཡིན་ན་མཚམས་ནང་གི་དགེ་སློང་ཐམས་ཅད་དང་། མིན་ན་གཅིག་གི་མདུན་དུ་མཐོལ་ལ། དངོས་གཞིའི་དག་བྱེད་མགུ་བ་ནོད་ནས་དབྱུང་། ཞག་ལོན་ན་ཇི་ཙམ་ལོན་པའི་གྲངས་དང་མཉམ་པའི་སྤོ་བ་སྔོན་དུ་འགྲོ་བས་མགུ་བ་དང་། དབྱུང་བས་ཕྱིར་འཆོས། ཕམ་པར་གཏོགས་པའི་སྦོམ་པོ་ལྕི་ཡང་གི་རིམ་པས་དགེ་སློང་དྲུག་གམ་ལྔ་དང་། ལྷག་མར་གཏོགས་པ་བཞིའམ་གཅིག་གི་དྲུང་དུ་བཤགས། སྤང་ལྟུང་ལ། གང་ལས་བྱུང་
བའི་རྫས་དེ་སྤངས་ལ་གཟོད་བཤགས་པ་བྱ། སོར་བཤགས་ནི་མཚམས་ཀྱི་ཕྱི་རོལ་དུ་སོང་ནས་སྨྲེ་སྔགས་དང་བཅས་པའི་སྒོ་ནས་བཤགས། གཞན་བཤགས་པར་འོས་པ་ཐམས་ཅད་དགེ་སློང་ལྟུང་བ་དེ་མ་བྱུང་བ་ཞིག་གི་མདུན་དུ་རང་མིང་གིས་བཤགས། བསྡམ་པར་འོས་པ་རྣམས་ཡིད་ཀྱིས་བསྡམ་པར་གསུངས་པ་སོགས་རྒྱ་ཆེར་སོ་ཐར་གྱི་འདུལ་བའི་གཞུང་ལས་ཤེས། འདིར་དེང་སང་གི་ཕྱག་ལེན་ལྟར་དགེ་འདུན་ཚོགས་པ་གནས་ཁང་གཅིག་ཏུ་འདུས་ནས་ཕན་ཚུན་བརྗོད་རེས་ཀྱིས་ཐམས་ཅད་དགེ་འདུན་ལ་བཤགས་ན། གཡས་གྲལ་དུ་དགེ་སློང་རྒན་པ་རྣམས་འདིང་ཆོས་སྣམ་སྦྱར་བཅས་ཙོག་ཕུར་འདུག ། གཡོན་གྲལ་དུ་དགེ་སློང་གཞོན་པ་རྣམས་འདིང་ཆོས་བཅས་འཁོད། ཕྱག་གསུམ་དབུལ། གཟན་ཕྲག་ཁྱེར། འགྲེང་འདུད་བཅས། བསྟན་པ་རིན་པོ་ཆེའི་གསལ་བྱེད་དམ་པར་གྱུར་པ་བཙུན་པ་འདུལ་བ་འཛིན་པ་ཆེན་པོ་ལྟུང་བ་ཕྱིར་བཅོས་ཀྱི་ཆོ་ག་ལ་ཐུགས་གཏད་པར་ཞུ། རྒན་པོའི་གྲལ་མགོ་མས། ཆོས་བཞིན་འདུལ་བ་བཞིན་གནང་བར་ཞུ། གཞོན་པ་རྣམས་ཙོག་བུར་འདུད་རྒྱས། །དགེ་འདུན་བཙུན་པ་རྣམས་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་བྱིས་པ་ཉིད་དང་། མི་ཤེས་པ་ཉིད་དང་། མ་གུས་པ་དང་། བག་མ་མཆིས་པ་དང་། ཉོན་མོངས་པ་མང་བའི་དབང་གིས་ཕམ་ལྷག་གི་སྦོམ་
པོ་ལྕི་ཡང་གཉིས་དང་། ལྟུང་བྱེད་འབའ་ཞིག་པ་དང་། སོ་སོར་བཤགས་པར་བྱ་བ་དང་། ཉེས་བྱས་ཀྱི་སྡེ་ཚན་རྣམས་ལས་ཁ་ན་མ་ཐོ་བ་གང་དང་གང་བྱུང་བ་དེ་དང་དེ་དག་པའི་མཐའ་ཚུན་ནས་བཟུང་སྟེ། དགེ་འདུན་བཙུན་པ་རྣམས་ཀྱི་མདུན་དུ་མཐོལ་ལོ་འཆགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ་བཟླས། རྒན་པས། ཉེས་ལྟུང་དེ་དག་ལ་ཉེས་ལྟུང་དེ་དག་ཏུ་གཟིགས་ལགས་སམ། ཞེས་དྲི། གཞོན་པས། མཐོང་ལགས། རྒན་པས། ཕྱིན་ཆད་ལེགས་པར་བསྡམ་ལགས་སམ། གཞོན་པས། བསྡམ་ལགས། རྒན་པས། ཐབས་ཡིན་ནོ། །གཞོན་པས། ལེགས་སོ། །ཡང་གཞོན་པས་ཕྱག་གསུམ་འགྲེང་འདུད་བཅས། གཟན་ཕྲག་ཁྱེར། བསྟན་པ་རིན་པོ་ཆེའི་གསལ་བྱེད་དམ་པར་གྱུར་པ་བཙུན་པ་འདུལ་བ་འཛིན་པ་ཆེན་པོ་ལྟུང་བ་ཕྱིར་བཅོས་ཀྱི་ཆོ་ག་ལ་ཐུགས་གཏད་པ་བཀའ་དྲིན་ཆེ་ལགས། རྒན་པས། ཆོས་བཞིན་འདུལ་བ་བཞིན་མཛད་པ་རྗེས་སུ་ཡི་རངས། ཞེས་བརྗོད་པར་བྱའོ། །དེ་ནི་ལྟུང་བ་ཕྱིར་བཅོས་པའི་ཆོ་གའོ། །ཡང་ཕམ་པར་གཏོགས་པའི་སྦོམ་པོ་དང་། ལྷག་མ་མན་ཆད་ཀྱི་ལྟུང་བ་ཆད་ལས་དགོས་པ་སྔོན་དུ་མ་གྲུབ་པ་དང་བཤགས་ཕུལ་མེད་པ་དང་། ལྟུང་ཕྱིར་རྩོད་པ་སོགས་ཀྱི་རྐྱེན་
དབང་གིས་གསོ་སྦྱོང་སོགས་ཀྱི་ལས་ལ་འདུ་བའི་དུས་དེར་བཤགས་པ་མ་ནུས་པ་རྣམས་བྱིན་གྱིས་བརླབ་པ་ནི། གསོ་སྦྱོང་གི་སྐབས་ལ་མཚོན་ན། གཞོན་པས་ཕྱག་གསུམ་སོགས་སྔར་ལྟར་ལ། བསྟན་པ་རིན་པོ་ཆེའི་གསལ་བྱེད་དམ་པར་གྱུར་པ་བཙུན་པ་འདུལ་བ་འཛིན་པ་ཆེན་པོ་ལྟུང་བ་བྱིན་རླབས་ཀྱི་ཆོ་ག་ལ་ཐུགས་གཏད་པར་ཞུ། རྒན་པས། ཆོས་བཞིན་འདུལ་བ་བཞིན་གནང་བར་ཞུ། གཞོན་པ་རྣམས་སྤྱི ཙོག་པུར་འདུད་རྒྱས། དགེ་འདུན་བཙུན་པ་རྣམས་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ། བྱིས་པ་ཉིད་དང་། མི་ཤེས་པ་ཉིད་དང་། མ་གུས་པ་དང་། བག་མ་མཆིས་པ་དང་། ཉོན་མོངས་པ་མང་བའི་དབང་གིས། དགེ་འདུན་ལྷག་མའི་ཆོས་བཅུ་གསུམ་དང་། སྤང་ལྟུང་སུམ་ཅུ་ལས་གང་ཡང་རུང་བ་བྱུང་བ་དག །དགེ་འདུན་བཙུན་པ་རྣམས་ཀྱི་མདུན་དུ་བྱིན་གྱིས་བརླབ་བོ། །དེང་ལྟུང་བ་དེ་བྱིན་གྱིས་བརླབས་ཏེ་དགེ་འདུན་གྱིས་གསོ་སྦྱོང་མཛད་ལ། སླད་ཀྱི་ལྟུང་བ་དེ་ཆོས་བཞིན་དུ་སླར་བགྱིའོ། །ལན་གསུམ། རྒན་པས། ཐབས་ཡིན་ནོ། །གཞོན་པས། ལེགས་སོ། །གཞོན་པས་ཕྱག་གསུམ་སྔར་ལྟར། བསྟན་པ་རིན་པོ་ཆེའི་གསལ་བྱེད་དམ་པར་གྱུར་པ་བཙུན་པ་འདུལ་བ་འཛིན་པ་ཆེན་པོ་ལྟུང་བ་བྱིན་རླབས་ཀྱི་ཆོ་ག་ལ་ཐུགས་གཏད་པ་བཀའ་དྲིན་ཆེ་ལགས། རྒན་པས། ཆོས་བཞིན་
འདུལ་བ་བཞིན་མཛད་པ་རྗེས་སུ་ཡི་རངས། དེ་ནས་གཞོན་པ་རྣམས་ཙོག་པུས་བཞུགས། རྒན་པ་རྣམས་ནས་ཚུལ་ཕྱག་གསུམ་རེ་མཛད་པ་ལས་གཞན་སྔར་ལྟར་ཕྱིར་བཅོས་དང་བྱིན་རླབས་བྱ། བསྙེན་རྫོགས་ལྟ་བུའི་བྱིན་རླབས་ཀྱི་སྐབས། གསོ་སྦྱོང་མཛད་ལ་ཞེས་པའི་མལ་དུ། བསྙེན་པར་རྫོགས་པའི་ཕྲིན་ལས་མཛད་ལ། ཞེས་སྦྱར་བ་ལས་གཞན་འདྲའོ། །དགེ་ཚུལ་གྱི་ལྟུང་བ་བཤགས་པ་ནི། དགེ་སློང་ཞིག་གི་མདུན་དུ་ཕྱག་བྱས། སྙན་གསན་དབབ། ཙོག་པུར་འཁོད་དེ། ཚེ་དང་ལྡན་པ་དགོངས་སུ་གསོལ། བདག་དགེ་ཚུལ་མིང་འདི་ཞེས་བགྱི་བ་བྱིས་པ་ཉིད་དང་སོགས་ནས། ཉོན་མོངས་པ་མང་བའི་དབང་གིས་ཉེས་བྱས་གང་དང་གང་བྱུང་བ་དེ་དག་པའི་མཐའ་ཚུན་ཆད་ནས་བཟུང་སྟེ། ཚེ་དང་ལྡན་པའི་མདུན་དུ་མཐོལ་ལོ་སོགས་ལན་གསུམ་དང་། ཐབས་ལེགས་སོགས་འདྲ། འདི་ནི་ཡུལ་དགེ་སློང་སྤྱིར་བཏང་གི་དབང་དུ་བྱས་པ་ཡིན་ལ། དམིགས་བསལ་མཁན་པོའམ། སློབ་དཔོན་ནམ། གནས་བརྟན་སོགས་ཉེ་ཚིག་གིས་བརྗོད་པ་དང་། ཚོགས་སུ་བཤགས་ན། དགེ་འདུན་བཙུན་པ་རྣམས་ཞེས་སོགས་སྦྱར་བར་བྱའོ། ༈ །གཉིས་པ་བྱང་སེམས་ཀྱི་བསླབ་པ་དང་འགལ་བའི་ཕྱིར་བཅོས་ནི། ཀླུ་སྒྲུབ་ཀྱི་ལུགས་ལྟར་ན། རྩ་བའི་ལྟུང་བ་བྱུང་ནས་ཉིན་ཞག་ལས་མ་འདས་ན་བྱང་ཆུབ་སེམས་གཉིས་དང་
མ་བྲལ་བའི་སྒོ་ནས་འཆགས། འདས་ན་བཤགས་སྡོམ་སྔོན་དུ་འགྲོ་བས་སློབ་དཔོན་ནམ་རྟེན་གྱི་དྲུང་དུ་སྡོམ་པ་སླར་བླང་། གཞན་ཡང་ནག་པོ་པས། དབང་རབ་སྟོང་ཉིད་ཀྱི་བཤགས་པ། དབང་འབྲིང་རིག་སྔགས་སྤྱིའི་ལྷ་འཕགས་པ་ནམ་མཁའི་སྙིང་པོ་ལ་བཤགས་པ། ཐ་མ་གང་ཟག་ལ་སྟོབས་བཞི་ཚང་བས་བཤགས་པར་གསུངས་པའི། དང་པོ་ནི། ཆོས་ཐམས་ཅད་སྒྱུ་མ་ལྟ་བུའི་ངང་ཡིད་ཀྱིས་བཤགས་སྡོམ་སྔོན་དུ་འགྲོ་བས། ལྟུང་བ་རང་བཞིན་མ་གྲུབ་པར་ཤེས་པའི་དོན་ལ་བློ་བཞག་པ་ཡིན་ལ། གཉིས་པ་འཕགས་པ་ནམ་མཁའི་སྙིང་པོའི་མདུན་དུ་བཤགས་པར་འདོད་ན། ཆོ་ག་རྒྱས་པ་གཞན་དུ་ཤེས། བསྡུ་ན་ལྟུང་བ་བྱུང་བ་ནས་བཟུང་ཁྲུས་དང་གཙང་སྦྲ་བྱ། བྲིས་སྐུའི་མདུན་དུ་ཅི་འབྱོར་པའི་མཆོད་པ་བཤམ། དྲི་ཞིམ་པའི་བདུག་སྤོས་རྒྱུན་མི་འཆད་པར་འཐུལ། སྐྱབས་སེམས། ས་གཞི་བྱིན་རླབས་སོགས་དང་། སྤྱན་འདྲེན་ནས་བཞུགས་གསོལ་གྱི་བར་ཆོས་སྤྱོད་སྤྱི་ལྟར་རྒྱས་བསྡུས་གང་རུང་བྱ། རྟེན་དང་དབྱེར་མེད་པར་སངས་རྒྱས་སྲས་བཅས་ཀྱིས་བསྐོར་ཏེ་བཞུགས་པར་བསམས་ལ་ལངས་ཏེ་ཕྱག་འཚལ་བཞིན་དུ། ཇི་སྙེད་སུ་དག་སོགས་དང་། མགོན་པོ་ཐུགས་རྗེ་ཆེ་ལྡན་པ་སོགས་ཤློ་ཀ་གསུམ་གྱིས་དཀོན་མཆོག་སྤྱི་དང་། ཁྱད་པར། བྱང་ཆུབ་སེམས་དཔའ་ཆེན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་ནམ་མཁའི་
སྙིང་པོ་ལ་ཕྱག་འཚལ་ལོ། །འཕགས་པས་བདག་ལ་ཞལ་བསྟན་ཏེ་སྡིག་པ་དག་པར་མཛད་དུ་གསོལ། ཞེས་བརྗོད་ཅིང་ཕྱག་བརྒྱ་རྩ་འཚལ། མོས་གུས་དྲག་ཏུ་བྱ། དེ་ནས་མཆོད་པ་སོགས་ཡན་ལག་ལྷག་མ་རྣམས་སྤྱི་ལྟར་ལ། བཤགས་པའི་སྐབས། གསེར་འོད་དམ་པ་དང་། སྤྱོད་འཇུག་སོགས་ལས་འབྱུང་བའི་བཤགས་པ་རྒྱས་པར་བྱ། སླར་ཡང་གོང་བཞིན་ཕྱག་འཚལ་བ་བརྒྱ་རྩ་ལ་སོགས་པའི་མཐར་གཟུངས་སྔགས་བཟླ་བར་འདོད་ན། ཏདྱ་ཐཱ། སུ་པྲི་ཤ། སུ་མྲ་ཤ །ཀཱ་རུ་ཎི་ཀ །ཙ་ར་ཙ་ར། བི་ཙ་ར། སཾ་ཙ་ར། ཀཱ་རུ་ཎི་ཀ །མུ་ར་མུ་ར། བེ་ག་དྷ་རི་མ་ཙ་མ། བྷུ་ཛ་པཱ་ད་ཀ་རུ་ཎི་ཀ ། ཙིནྟ་མ་ཎི་པཱུ་ར་ཡ་ཀ་རུ་ཎི་ཀ །སརྦ་ཤ་མེ་སྠཱ་པཱ་ཡ། ཨ་ཛྷཱ་དྷ་རི། སྤུ་གུང་སྤུ་གུང་། རུ་ཏི་བི་བི་ཀ་གུང་། དྲིའི་བི་བེ་ཀ་གུང་། པཱུ་ར་ཡ་ཀ་རུ་ཎི་ཀ །པཱུ་ར་ཡནྟུ་མ་མ་ཨཱ་ཤ་ཡ། སརྦ་པན་ཙ་ཨ་ཤོ་ཀ་ག་ཏི་སྭཱ་ཧཱ། ཞེས་དང་། དགོངས་ཤིག་ཐུགས་རྗེ་ཆེན་པོ་དང་ལྡན་པ་ཞེས་སོགས་ནམ་མཁའི་སྙིང་པོའི་མདོ་ལས་བྱུང་བས་འདོད་དོན་གསོལ། དེ་ཙམ་མི་ནུས་ན། མགོན་པོ་ཐུགས་རྗེ་ཆེན་པོ་དང་ལྡན་པས་བདག་ལ་ཞལ་བསྟན་ཅིང་། སྡིག་པ་དང་ལྟུང་བ་ཐམས་ཅད་བྱང་ཞིང་དག་པ་དང་། ས་དང་ལམ་གྱི་ཡོན་ཏན་ཐམས་ཅད་བདེ་བླག་ཏུ་བགྲོད་དེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་
རྫོགས་པར་འཚང་རྒྱ་བར་མཛད་དུ་གསོལ། ཞེས་གསོལ་བ་གདབ། ལྷག་པ་དང་ནི་ཆད་པ་དང་། །ཆོ་གའི་ཡན་ལག་ཉམས་པ་སོགས། །བདག་གིས་བརྗེད་ངེས་ཅི་མཆིས་པ། །དེ་ཡང་བཟོད་པར་མཛད་དུ་གསོལ། །ཞེས་ནོངས་པ་བཤགས་པ་དང་། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། ཞེས་པས་བྲིས་སྐུ་ལ་བརྟན་བཞུགས་བྱ། བསྔོ་སྨོན་དང་བཀྲ་ཤིས་བརྗོད། དེ་ལྟ་བུ་ཐུན་བཞི་དང་། ཁྱད་པར་ཐོར་ཐུན་ལ་རྩེ་གཅིག་ཏུ་བརྩོན་པས་དངོས་སམ་རྨི་ལམ་དུ་ཞལ་བསྟན་ཅིང་ལྟུང་བ་འཆག་ཏུ་འཇུག་པར་གསུངས་ལ། དེས་མ་གྲུབ་ན་ལྷའི་བུ་སྐྱ་རེངས་ལ་འཕྲིན་དུ་གསོལ་བ་ནི། ཐོར་ཐུན་གྱི་གཤམ་དུ། སྔ་ན་སྐྱ་རེངས་དང་པོ་དང་། ཕྱི་ན་ཐ་མ་ཤར་བའི་ཚེ་ཁང་སྟེང་ལ་སོགས་བླ་གབ་མེད་པའི་སར་ཕྱིན་ལ་སྤོས་འཐུལ། ཕྱོགས་བཅུར་ཕྱག་འཚལ་ཞིང་གསོལ་བ་གདབ། མཐར་ཁ་ཤར་དུ་ཕྱོགས་པས་པུས་བཙུགས་ཐལ་མོ་སྦྱར་ཏེ། སྐྱ་རེངས་སྐྱ་རེངས་ཐུགས་རྗེ་ཆེན་པོ་ཅན། སྐལ་བ་ཆེན་པོ་ཅན་ཁྱོད་ཛམྦུའི་གླིང་དུ་ཤར་མ་ཐག་ཏུ། བདག་ལ་ཐུགས་རྗེས་དགབ་པར་མཛོད་ཅིག །བྱང་ཆུབ་སེམས་དཔའ་ནམ་མཁའི་སྙིང་པོ་ཐུགས་རྗེ་ཅན་ལ་བདག་གི་ཚིག་གིས་སྤྲོ་ན་ཏེ། བདག་གི་རྨི་ལམ་དུ་ཡང་དེ་སྟོན་པར་
འགྱུར་ཞིང་། གང་གི་ཐབས་དེས་ལྟུང་བ་བཤགས་པར་འགྱུར་བ་དང་། འཕགས་པའི་ཐེག་པ་ཆེན་པོ་ལ་ཐབས་དད་ཡེ་ཤེས་ཀྱི་མིག་ཆེན་པོ་ཐོབ་པར་མཛོད་ཅིག །ཅེས་བརྗོད་ནས་མལ་བདེ་བར་གཉིད་ཀྱིས་ལོག་པས་རབ་ཞག་གཅིག་གམ་གསུམ། འབྲིང་བདུན། ཐ་མའང་ཉེར་གཅིག་གིས་རྨི་ལམ་དུ་སྐལ་བ་དང་འཚམས་པར་སྐུ་དངོས་སམ། བླ་མའམ། ཕ་མ་ལ་སོགས་པའི་གཟུགས་སུ་བསྟན་ནས་ཏུ་འཇུག་པར་འགྱུར་ཞིང་། ཇི་སྐད་གསུངས་པ་བཞིན་ལག་ཏུ་བླངས་པས་ལྟུང་བ་ཐམས་ཅད་དག་སྟེ་ལམ་གྱི་ཡོན་ཏན་འཕེལ་བར་འགྱུར་རོ། །གསུམ་པ་གང་ཟག་ལ་བཤགས་པའི་ཚུལ་ནི། ཡུལ་བྱང་ཆུབ་སེམས་དཔའི་སྡོམ་པ་དང་ལྡན་པ་ཇི་ལྟར་རིགས་པའི་སྤྱན་སྔར་ཕྱག་འཚལ་ཞིང་བཏུད་དེ། གང་ཟག་གཅིག་ཡིན་ན། རྒྱལ་སྲས་བྱང་ཆུབ་སེམས་དཔའ་ཆེན་པོའམ། མང་དུ་ཡོད་ན། བྱང་ཆུབ་སེམས་དཔའི་དགེ་འདུན་པ་རྣམས་ལྟུང་བ་ཕྱིར་བཅོས་ཀྱི་ཆོ་ག་ལ་ཐུགས་གཏད་པར་ཞུ། ཞེས་བརྗོད། ཡུལ་གྱིས། ཆོས་བཞིན་འདུལ་བ་བཞིན་གནང་བར་ཞུ། ཞེས་ལན་གདབ། དེ་ནས་འཆག་པ་པོས་ཕྱག་འཚལ་ཞིང་པུས་མོ་བཙུགས་ནས་ཐལ་མོ་སྦྱར་ཏེ། རྒྱལ་སྲས་བྱང་ཆུབ་སེམས་དཔའ་ཆེན་པོའམ། བྱང་ཆུབ་སེམས་དཔའི་དགེ་འདུན་པ་རྣམས་དགོངས་སུ་གསོལ། བདག་བྱང་ཆུབ་སེམས་དཔའ་མིང་
འདི་ཞེས་བགྱི་བ་བྱིས་པ་ཉིད་དང་། མི་ཤེས་པ་དང་། མ་གུས་པ་དང་། བག་མ་མཆིས་པ་དང་། ཉོན་མོངས་པ་མང་བའི་དབང་གིས་བྱང་ཆུབ་སེམས་དཔའི་ཚུལ་ཁྲིམས་ཀྱི་བསླབ་པའི་གཞི་ལས་རྩ་བ་དང་ཡན་ལག་གི་ལྟུང་བ་གང་དང་གང་བྱུང་བ་དེ་རྒྱལ་སྲས་བྱང་ཆུབ་སེམས་དཔའ་ཆེན་པོའམ། བྱང་ཆུབ་སེམས་དཔའི་དགེ་འདུན་པ་རྣམས་ཀྱི་མདུན་དུ་མཐོལ་ཞིང་འཆགས་སོ། །མཐོལ་ཞིང་འཆགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ། ཡུལ་གྱིས། ཉེས་ལྟུང་དེ་དག་ལ་ཉེས་ལྟུང་དེ་དག་ཏུ་གཟིགས་ལགས་སམ། རྟེན་གྱིས། མཐོང་ལགས། ཡུལ་གྱིས། ཕྱིན་ཆད་ལེགས་པར་བསྡམ་མམ། རྟེན་གྱིས། བསྡམ་ལགས། ཡང་ཡུལ་གྱིས། ཐབས་ཡིན་ནོ། །རྟེན་གྱིས་ལེགས་སོ་ཞེས་དང་། རྒྱལ་སྲས་བྱང་ཆུབ་སེམས་དཔའ་ཆེན་པོའམ། བྱང་ཆུབ་སེམས་དཔའི་དགེ་འདུན་པ་རྣམས་ལྟུང་བ་ཕྱིར་བཅོས་ཀྱི་ཆོ་ག་ལ་ཐུགས་གཏད་པ་བཀའ་དྲིན་ཆེ་ལགས། ཡུལ་གྱིས་ཆོས་བཞིན་འདུལ་བ་བཞིན་མཛད་པ་རྗེས་སུ་ཡི་རངས། ཞེས་བརྗོད་ཅིང་བསྔོ་སྨོན་སོགས་བྱ། ཡང་ཕན་ཚུན་གཉིས་ཀས་བཤགས་པ་བྱེད་ན། རྒན་གཞོན་གྱི་གྲལ་སོ་སོར་བྱས་ཏེ། ཇི་ལྟར་བྱ་བའི་ཕྱག་ལེན་སོ་ཐར་གྱི་སྐབས་དང་འདྲའོ། ༈ །གསུམ་པ་སྔགས་སྡོམ་ཕྱིར་བཅོས་ནི།
ཡན་ལག་ཚང་བའི་རྩ་ལྟུང་སོགས་ཉེས་པ་ཆེན་པོ་རྣམས་ནི། བླ་མ་ལས་དབང་བླངས་ཏེ་འཆོས་དགོས་ལ། ཡན་ལག་མ་ཚང་བའི་ལྟུང་བ་གང་ཟག་མང་པོ་ཚོགས་པས་ལྷན་ཅིག་ཏུ་འཆོས་པའི་ཚུལ་ནི། རབ་ཚོགས་འཁོར་རམ། མ་གྲུབ་ཀྱང་བདེ་ཀྱེ་སོགས་བླ་མེད་ཀྱི་དཀྱིལ་འཁོར་གང་ཡང་རུང་བའི་སྒྲུབ་མཆོད་དམ། མཁའ་སྤྱོད་མའི་ཚེས་བཅུའི་སྐབས་ལྟ་བུར། ལྷག་གཏོར་གྱི་མགོར་རམ། རྗེས་ཆོག་གི་གོང་དུ། གཡས་གྲལ་ལ་དབང་གིས་རྒན་པ་རྣམས་རྒན་རིམ་གྱིས་འཁོད་པ་ལ། གཡོན་གྲལ་གཞོན་པ་རྣམས་ཀྱང་ནང་གསེས་ཀྱི་རྒན་གྲལ་བྱས་ཏེ་ཕྱག་གསུམ་འཚལ། ཐུན་མོང་དུ་མཎྜལ་ཚོམ་བུ་བདུན་མ་དགོད་ཅིང་མ་ཚང་བ་མེད་པ་འདི་ཉིད་རིག་པ་འཛིན་པའི་དགེ་འདུན་པ་རྣམས་ལྟུང་བ་ཕྱིར་བཅོས་ཀྱི་ཆོ་ག་ལ་ཐུགས་གཏད་པར་ཞུ་བའི་ཡོན་དུ་དབུལ་བར་བགྱིའོ་སོགས་ཀྱིས་དབུལ། ཡང་ཕྱག་གསུམ་འཚལ། པུས་བཙུགས་ཐལ་སྦྱར་གྱིས། རིག་པ་འཛིན་པའི་དགེ་འདུན་པ་རྣམས་དགོངས་སུ་གསོལ། །བདག་རིག་པ་འཛིན་པ་མིང་འདི་ཞེས་བགྱི་བ་བྱིས་པ་ཉིད་དང་། མི་ཤེས་པ་དང་། མ་གུས་པ་དང་། བག་མ་མཆིས་པ་དང་། ཉོན་མོངས་པ་མང་བའི་དབང་གིས་ཡན་ལག་མ་ཚང་བའི་རྩ་བའི་ལྟུང་བ་དང་། ཡན་ལག་གི་ལྟུང་བ་ལས་གང་དང་གང་བྱུང་པ་དེ་རིག་པ་འཛིན་པའི་དགེ་འདུན་པ་རྣམས་ཀྱི་མདུན་དུ་མཐོལ་
ཞིང་འཆགས་སོ། །མཐོལ་ཞིང་འཆགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ། རྒན་པའི་གྲལ་མགོ་མས། ཉེས་ལྟུང་དེ་དག་ལ་ཉེས་ལྟུང་དེ་དག་ཏུ་གཟིགས་ལགས་སམ། གཞོན་པ་རྣམས་ཀྱིས། མཐོང་ལགས། ཡང་ཕྱིན་ཆད་ལེགས་པར་བསྡམ་ལགས་སམ་ཞེས་དྲིས་པ་ལ། བསྡམ་ལགས་ཞེས་དང་། ཡང་ཡུལ་གྱིས་ཐབས་ཡིན་ནོ་ཞེས་བརྗོད་པས། ལེགས་སོ་ཞེས་ལན་བྱའོ། །ཡང་གཞོན་པ་རྣམས་གྲལ་ལ་བཞུགས་པ་ལ་རྒན་པ་རྣམས་བཞེངས་ཏེ། ཕྱག་དབབ་གསུམ་དང་མཎྜལ། པུས་བཙུགས་གྱི་སྒོ་ནས་ཕྱིར་བཅོས་སྔར་བཞིན་བྱ་སྟེ། གཞོན་པའི་གྲལ་མགོ་མ་དེས་ལན་རྣམས་བྱའོ། །དེ་ནས་ཆོ་ག་གང་ཡིན་གྱི་རྗེས་ཆོག་དཀྱུས་ལྟར་བྱ། འདིའང་ཆོ་ག་དང་འབྲེལ་ན་ལེགས་པའི་ཡན་ལག་ཡིན་གྱི། མ་འབྲེལ་བར་དུས་ནམ་དུའང་བྱར་རུང་བ་ཉིད་དོ། །སྡོམ་པ་གསུམ་ཀའི་ཐུན་མོང་གི་ཕྱིར་བཅོས་སྤྱི་བཤགས་ནི། ཨུ་ཧུ་ལགས། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། དགེ་འདུན་བཙུན་པ་རྣམས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བས་ཚེ་རབས་འཁོར་བ་ཐོག་མ་མ་མཆིས་པ་ནས་ད་ལྟ་ལ་ཐུག་གི་བར་དུ་ཉོན་མོངས་པ་འདོད་ཆགས་དང་།
ཞེ་སྡང་དང་། གཏི་མུག་གི་དབང་གིས་ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བ་བཅུ་བགྱིས་པ་དང་། མཚམས་མ་མཆིས་པ་ལྔ་བགྱིས་པ་དང་། དེ་དང་ཉེ་བ་ལྔ་བགྱིས་པ་དང་། སོ་སོར་ཐར་པའི་སྡོམ་པ་དང་འགལ་བ་དང་། བྱང་ཆུབ་སེམས་དཔའི་བསླབ་པ་དང་འགལ་བ་དང་། གསང་སྔགས་ཀྱི་དམ་ཚིག་དང་འགལ་བ་དང་། ཕ་དང་མ་ལ་མ་གུས་པ་དང་། མཁན་པོ་དང་སློབ་དཔོན་ལ་མ་གུས་པ་དང་། གྲོགས་ཚངས་པ་མཚུངས་པར་སྤྱོད་པ་རྣམས་ལ་མ་གུས་པ་དང་། དཀོན་མཆོག་གསུམ་ལ་གནོད་པའི་ལས་བགྱིས་པ་དང་། དམ་པའི་ཆོས་སྤངས་པ་དང་། འཕགས་པའི་དགེ་འདུན་ལ་སྐུར་པ་བཏབ་པ་དང་། སེམས་ཅན་ལ་གནོད་པའི་ལས་བགྱིས་པ་ལ་སོགས་པ་སྡིག་པ་མི་དགེ་བའི་ཚོགས་བདག་གིས་བགྱིས་པ་དང་། བགྱིད་དུ་སྩལ་བ་དང་། གཞན་གྱིས་བགྱིས་པ་ལ་རྗེས་སུ་ཡི་རང་བ་ལ་སོགས་པ་མདོར་ན་མཐོ་རིས་དང་ཐར་པའི་གེགས་སུ་གྱུར་ཅིང་འཁོར་བ་དང་ངན་སོང་གི་རྒྱུར་གྱུར་པའི་ཉེས་ལྟུང་གི་ཚོགས་ཅི་མཆིས་པ་ཐམས་ཅད་བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དགེ་འདུན་བཙུན་པ་རྣམས་ཀྱི་སྤྱན་སྔར་མཐོལ་ལོ་མི་འཆབ་བོ། འཆགས་སོ། །ཕྱིན་ཆད་བསྡམ་པར་བགྱི་ལགས་སོ། །མཐོལ་ཞིང་བཤགས་ན་
བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ་བརྗོད་ལ། སློབ་དཔོན་སོགས་ཀྱིས་ཉེས་པ་ལ་ཉེས་པར་གཟིགས་ལགས་སམ། མཐོང་ལགས། ཕྱིན་ཆད་ལེགས་པར་བསྡམ་མམ། བསྡམ་ལགས། ཐབས་ཡིན་ནོ། །ལེགས་སོ། །ཞེས་བརྗོད་དོ། །དེ་ལྟ་བུའི་ཕྱིར་བཅོས་གསུམ་ཀའང་བཤགས་ཡུལ་གང་ཟག་དངོས་མེད་ན། རྟེན་གྱི་དྲུང་སོགས་སུ་འཁོད་དེ། སངས་རྒྱས་དང་བྱང་ཆུབ་སེམས་དཔའ་ཀུན་ཏུ་ཐོགས་མེད་ཀྱི་གཟིགས་པ་དང་ལྡན་པ་རྣམས་མངོན་སུམ་བཞིན་དུ་བཞུགས་པའི་སྤྱན་སྔར་ཕྱག་འཚལ་བ་སྔོན་དུ་འགྲོ་བས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་སོགས་བཤགས་ཚིག་བརྗོད་ཅིང་། མཐོང་སྡོམ་དང་ཐབས་ལེགས་སོགས་ཀྱང་དེ་དང་དེ་ལྟར་བགྱིས་པར་བསམས་ལ་དངོས་སུ་རང་གིས་བརྗོད། གང་ལྟར་ཡང་བཤགས་པ་ཐམས་ཅད་ལ་སྟོབས་བཞི་ཚང་བ་དང་། ལྟུང་བ་དམིགས་ཀྱིས་བསལ་བ་ཡོད་ན་སོ་སོའི་མིང་ནས་སྨོས་ཏེ་བཤགས་པ་བྱ་བའང་གལ་ཤིན་ཏུ་ཆེའོ། །མདོར་ན་བྱ་བའི་རྒྱུད་ལེགས་པར་གྲུབ་པ་ལས། ཉིན་པར་བག་མེད་བྱས་པ་དག །མཚན་མོ་སོ་སོར་བཤགས་པར་བྱ། ནུབ་མོར་བྱས་པ་ནངས་པར་བཤགས། ལེགས་པར་བྱས་
ལ་མངོན་དགའ་བྱ། ཞེས་སོགས་རྒྱུད་སྡེ་དང་མདོ་སྡེ་རྣམས་ལས་རྒྱ་ཆེར་གསུངས་པ་བཞིན། སྤྱིར་རང་བཞིན་གྱི་ཁ་ན་མ་ཐོ་བ་དང་། བྱེ་བྲག་ཏུ་སྡོམ་པ་གསུམ་དང་འགལ་བའི་བཅས་པའི་ལྟུང་བ་གང་ཡང་བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམ། བྱིན་གྱིས་བརླབ་པར་འོས་པ་རྣམས་བྱིན་གྱིས་བརླབས་ཏེ་ཉེས་ལྟུང་དང་ཞག་གཅིག་ཀྱང་མི་འགྲོགས་པ་མཉམ་མེད་ཇོ་བོ་ཆེན་པོ་དཱི་པཾ་ཀ་རའི་རྣམ་ཐར་ལ་བསླབ་པར་བྱའོ། །དགུ་པ་དགེ་བའི་རྩ་བ་གོང་དུ་སྤེལ་བའི་ཐབས་མང་དུ་གསུངས་པ་ལས། འདིར་ཅུང་ཟད་བརྗོད་ན། ཡུལ་དུས་རྟེན་དང་གསང་སྔགས་དང་། སེམས་བསྐྱེད་ཡི་རང་བསྔོ་བའོ། །ཞེས་བདུན་ལས། དང་པོ་ཡུལ་ཁྱད་པར་ཅན་ལ་བརྟེན་པ་ནི། མཆོད་པའི་ཡུལ་གྱི་གཙོ་བོ་བླ་མ་རྡོ་རྗེ་སློབ་དཔོན་དང་། དམ་པའི་ཆོས་དང་ཆོས་སྨྲ་བ་དང་། རྟེན་གསུམ་བྱིན་རླབས་ཅན་སོགས་ཀྱི་སྤྱན་སྔར་མཆོད་ཅིང་བསྙེན་བཀུར་བ་དང་། ཕན་འདོགས་ཀྱི་ཞིང་ཕ་མ་དང་། ནད་པ་དང་། དབུལ་ཞིང་ཉམ་ཐག་པ་སོགས་ལ་སྦྱིན་པ་བྱིན་པས་བསོད་ནམས་ཀྱི་ཚོགས་ལྷག་པར་འཕེལ་བར་གསུངས་ཏེ། མཛོད་ལས། འཕགས་པ་མིན་ཡང་ཕ་མ་དང་། ནད་པ་དང་ནི་ཆོས་སྨྲ་དང་། སྐྱེ་མཐའི་བྱང་ཆུབ་སེམས་དཔའ་ལ། ཡོན་ནི་གཞལ་དུ་མེད་པ་ཡིན། ཞེས་སོ། །གཉིས་པ་དུས་ནི་
ལོ་གཅིག་ལ་མཚོན་ན། ཧོར་ཟླ་དང་པོའི་ཚེས་གཅིག་ནས་བཅོ་ལྔའི་བར་བདག་ཅག་གི་སྟོན་པས་ཆོ་འཕྲུལ་ཆེན་པོ་བསྟན་པ་དང་། བཞི་པའི་ཚེས་བདུན་ལ་སྐུ་བལྟམས་པ་དང་། བཅོ་ལྔ་ལ་མྱ་ངན་ལས་འདས་ཤིང་མངོན་པར་བྱང་ཆུབ་པ་དང་། དྲུག་པའི་ཚེས་བཞི་ལ་ཆོས་འཁོར་བསྐོར་བ་དང་། དགུ་པའི་ཉེར་གཉིས་ལ་ལྷ་ལས་བབས་པ། གཞན་དགུ་པའི་བཅོ་ལྔ་ལ་ལྷ་བབས་དང་ཆོ་འཕྲུལ་ཆུང་བར་བཞེད་པ་སོགས་དང་། ཟླ་བ་གཅིག་ལ་མཚོན་ན་སྤྱིར་བཏང་ཉ་སྟོང་བརྒྱད་གསུམ་དང་། ཁྱད་པར་བདེ་མཆོག་ལས། ཚེས་བཅུ་ལ་ནི་དེ་རབ་མཆོད། ཅེས་པས་ཡར་ངོ་དང་། མར་ངོའི་ཚེས་བཅུ་གཉིས་དང་། ཀྱེ་རྡོར་ལས། ཡི་དྭགས་ཟླ་ཕྱེད་བཅུ་བཞི་དང་། དེ་བཞིན་དུ་ནི་བརྒྱད་པ་ཉིད། ཅེས་ཡར་ངོའི་ཚེས་བརྒྱད་དང་བཅུ་བཞི། མར་ངོའི་ཉེར་གསུམ་དང་། ཉེར་དགུ་སྟེ་དུས་བཞི་དང་། མཁའ་འགྲོ་རྒྱ་མཚོ་ལས། ཚེས་བརྒྱད་དང་ནི་ཁྱད་པར་དུ། བཅོ་ལྔ་དང་ནི་ཚེས་བཅུ་བཞིར། གྲུབ་འདོད་རྣལ་འབྱོར་རྣམས་ཀྱིས་ནི། འབད་པས་གཏོར་མ་སྦྱིན་པར་བྱ། ཞེས་དུས་གསུམ་ལ་ཡར་ངོ་དང་མར་ངོའི་དབྱེ་བས་དྲུག་སྟེ་དེ་རྣམས་དང་། གཞན་ཡང་རང་རང་གི་བླ་མ་གོང་མ་ཁྱད་པར་ཅན་རྣམས་སྐུ་བལྟམས་པ་དང་། ཞི་བར་གཤེགས་པ་སོགས་ཀྱི་དུས་ཆེན་རྣམས་ལ་དགེ་བའི་རྩ་བ་བསྒྲུབས་པ་མཐའ་དག་འབུམ་དུ་འགྱུར་བར་
གསུངས་ཤིང་། བྱེ་བྲག་ཏུ་རྒྱུད་ལས་གསུངས་པའི་དུས་དེ་རྣམས་སུ་ཕྱི་ནང་གི་མཁའ་འགྲོ་རྣམས་ཚོགས་དང་གཏོར་མས་མཉེས་པར་བྱ་བ་ལ་མཆོག་ཏུ་བསྔགས་པ་ཡིན་ནོ། །དེ་བཞིན་དུ་ཉི་མ་གཟས་བཟུང་བའི་དུས་སུ་བྱེ་བ་འབུམ་དང་། ཟླ་བ་གཟས་བཟུང་བའི་དུས་སུ་བྱེ་བ་བདུན་འགྱུར་དུ་གསུངས་པ་སོགས་ཏེ། མདོར་ན་སྤྱི་རྒྱུད་ལས། ཉི་ཟླ་གཟའ་ཡིས་ཟིན་པ་དང་། ཡ་མཚན་ཆེ་ལྟས་བྱུང་བ་དང་། ཆོ་འཕྲུལ་གྱི་ནི་ཟླ་བ་ལ། མཁས་པས་དཀྱིལ་འཁོར་འབྲི་བར་བྱ། ཞེས་པས་མཚོན་རྒྱུད་སྡེ་རྣམས་ལས་དུས་ཀྱི་འགྱུར་བ་ལ་བསྔགས་པའི་ཚུལ་མང་དུ་གསུངས་པའི་ཕྱིར། དུས་ཆེན་རྣམས་སུ་དགེ་བའི་བྱ་བ་ལ་ལྷག་པར་བརྩོན་པར་བྱའོ། །གསུམ་པ་རྟེན་ནི། ཇི་སྐད་དུ་དཔལ་དུས་ཀྱི་འཁོར་ལོ་ལས། གསུམ་ལས་དགེ་སློང་མཆོག་ཡིན་འབྲིང་། དགེ་ཚུལ་ཞེས་ནི་བྱ་བ་སྟེ། ཁྱིམ་ལ་གནས་པ་ཐ་མའོ། །ཞེས་གསུངས་པ་ལྟར། ཁྱིམ་པ་ལས་དགེ་ཚུལ་དང་། དེ་ལས་དགེ་སློང་ཁྱད་ཞུགས་པ་ལྟར། དེ་ལས་ཀྱང་བྱང་ཆུབ་སེམས་དཔའ་དང་། རིག་པ་འཛིན་པའི་སྡོམ་པ་དང་ལྡན་པ་རྣམས་ཀྱིས་བྱས་པའི་དགེ་བའི་རྩ་བ་ཆེས་ཁྱད་པར་དུ་འགྱུར་བས་ན། སྡོམ་པ་གསུམ་ལྡན་གྱི་དགེ་སློང་རྡོ་རྗེ་འཛིན་པས་རང་གི་ལྷག་པའི་ལྷའི་རྣལ་འབྱོར་དང་ལྡན་པའི་སྒོ་ནས་དགེ་བའི་རྩ་བ་ལ་འབད་པ་ནི་ཆེས་མཆོག་ཏུ་གྱུར་པ་ཡིན་ལ། ཁྱིམ་
པ་ཡིན་ཀྱང་དགེ་བའི་བྱ་བ་རླབས་པོ་ཆེ་ལ་འཇུག་པ་ན་བསྙེན་གནས་ཡན་ལག་བརྒྱད་པ་བླངས་ཏེ་དགེ་བ་ལ་སྤྱད་ན་ཕན་ཡོན་ལྷག་པར་ཆེ་བས་མཚོན་ཏེ་ཤེས་པར་བྱའོ། །བཞི་པ་རིག་པའི་སྔགས་ཀྱིས་དགེ་བའི་རྩ་བ་སྤེལ་བ་ལ། གཟུངས་སྔགས་རྣམས་ལས་མང་དུ་འབྱུང་ཞིང་། ངག་བྱིན་རླབས་དང་། ཕྲེང་བ་བྱིན་རླབས་སོགས་ཀྱང་འོག་ནས་འབྱུང་བ་ལྟར་ལ། ཁྱད་པར་དགེ་བའི་བྱ་བ་ལ་འཇུག་པའི་སྔོན་དུ། ཨོཾ་སྨ་ར་སྨ་ར་བི་མ་ན་ས་ར་མ་ཧཱ་ཛམྦྷ་ཧཱུྃ། ཞེས་པའི་སྔགས་འདི་བརྗོད་པས་འབུམ་འགྱུར་རམ། བྱེ་བ་བྲག་བརྒྱའི་འགྱུར་དུ་གསུངས་སོ། །ལྔ་པ་སེམས་བསྐྱེད་པས་དགེ་བའི་རྩ་བ་སྤེལ་བ་ནི། དགེ་བ་གང་བྱེད་ཀྱང་མཁའ་ཁྱབ་སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པ་རྫོགས་པའི་བྱང་ཆུབ་ལ་དམིགས་ཏེ་བགྱིས་ན་ཕན་ཡོན་གྱི་འགྱུར་བ་ལྷག་པར་ཆེ་བའི་ཚུལ་སློབ་དཔོན་ཀླུས། སེམས་ཅན་ཁམས་ནི་མཐའ་མེད་པར། ཕན་འདོད་དེ་ནི་དེ་འདྲའོ། །ཞེས་དང་། སྤྱོད་འཇུག་ལས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་འབྱིན་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པ་མི་ཟད་འཕེལ་བར་འགྱུར། །ཞེས་སོགས་རྒྱ་ཆེར་གསུངས་སོ། །དྲུག་པ་རྗེས་སུ་ཡི་རང་པས་དགེ་རྩ་སྤེལ་བ་ནི། གཞན་འཕགས་པ་དང་། སོ་སོ་སྐྱེ་བོའི་ཁོངས་སུ་
གཏོགས་པ་མཐའ་དག་གིས་དུས་གསུམ་དུ་བསགས་ཤིང་བསག་པར་འགྱུར་བའི་དགེ་བ་ཐམས་ཅད་ལ་དགའ་ཞིང་སྙིང་ཐག་པ་ནས་རྗེས་སུ་ཡི་རང་བ་བགྱིས་ན། དེ་དག་གི་བསོད་ནམས་མཉམ་དུ་ཐོབ་པར་གསུངས་པས་མཚོན་ཕན་ཡོན་མཐའ་ཡས་ཏེ། སྡུད་པ་ལས། སྟོང་གསུམ་རི་རབ་སྲང་ལ་གཞལ་བས་ཚད་གཟུང་སླ། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཅེས་གསུངས་པས་མཚོན་ནོ། །བདུན་པ་ཡོངས་སུ་བསྔོ་བ་ནི། དགེ་བའི་རྩ་བ་སྤེལ་བའི་ཐབས་མཆོག་ཏུ་གྱུར་པ་སྟེ། སྤྱིར་དགེ་བའི་རྩ་བ་གང་དང་གང་བྱས་པའི་རྗེས་དང་། ཉིན་ཞག་ཕྲུག་གཅིག་ལ་མཚོན་ན། ནུབ་མོ་ཉལ་བའི་ཚེ་དེ་རིང་བསགས་པའི་དགེ་བའི་རྩ་བ་ཉིད་དམིགས་པའི་གཙོ་བོར་བྱས་ཏེ། དེས་མཚོན་རང་གཞན་གྱིས་དུས་གསུམ་དུ་བསགས་པའི་དགེ་རྩ་ཐམས་ཅད་བྱང་ཆུབ་ཆེན་པོའི་རྒྱུར་ཡོངས་སུ་བསྔོ་བས་མཚམས་སྦྱར་ནས། བཟང་པོ་སྤྱོད་པ་ལ་སོགས་པའི་བསྔོ་སྨོན་རྒྱས་བསྡུས་ཇི་ལྟར་རིགས་པ་བྱ་སྟེ། བློ་གྲོས་རྒྱ་མཚོས་ཞུས་པའི་མདོའི་དོན་ཚིགས་བཅད་དུ་བསྡེབས་པར། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་བསྐམས་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོའི་དགེ་བ་གང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་སོགས་གསུངས་པ་ལྟར། དགེ་རྩ་འཛད་པའི་རྒྱུ་ཁོང་ཁྲོ་ལ་སོགས་པས་ནམ་དུའང་
མི་འཛད་ཅིང་། བྱང་ཆུབ་སེམས་ཀྱི་བསྔོ་བའི་རྩིས་ཟིན་པས་གོང་ནས་གོང་དུ་འཕེལ་ཞིང་རྒྱས་པར་འགྱུར་བ་ཉིད་དོ། །དེ་ལ་བསྔོ་སྨོན་གྱི་གཞུང་རྒྱས་པ་ནི་ཕལ་པོ་ཆེའི་རྡོ་རྗེ་རྒྱལ་མཚན་གྱི་ལེའུ་དང་། ཡོངས་སུ་བསྔོ་བའི་གཟུངས་སོགས་ཡིན་ལ། དེང་སང་ཐམས་ཅད་ལ་གྲགས་པའི་བཟང་པོ་སྤྱོད་པ། བྱམས་པའི་སྨོན་ལམ། བདེ་བ་ཅན་གྱི་སྨོན་ལམ། ཕར་ཕྱིན་བཅུ་གཅིག་གི་སྨོན་ལམ། སྤྱོད་འཇུག་གི་བསྔོ་བའི་ལེའུ་རྣམས་ལ་སྨོན་ལམ་རྣམ་ལྔ་ཞེས་མཚན་དུ་གསོལ་བ་དང་། གཞན་ཡང་འཕགས་པ་ཀླུ་སྒྲུབ་ཀྱི་རིན་ཆེན་ཕྲེང་བ་ལས་བྱུང་བའི་སྨོན་ལམ་ཉི་ཤུ་པ། སློབ་དཔོན་དཔའ་བོའི་སྨོན་ལམ་བདུན་ཅུ་པ་སོགས་འཕགས་བོད་ཀྱི་བླ་མ་གོང་མ་རྣམས་ཀྱི་གསུང་བྱིན་རླབས་ཅན་རྣམས་ཇི་ལྟར་རིགས་པ་གདབ་ཅིང་། དགེ་སྦྱོང་ཐམས་ཅད་ཀྱི་མཇུག་ཏུ། བཅོམ་ལྡན་འདས་བསྔོ་བ་དང་སྨོན་ལམ་ཐམས་ཅད་ཡོངས་སུ་འགྲུབ་པའི་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་པར་སྣང་མཛད་འོད་ཀྱི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ཀུན་ཏུ་བཟང་པོ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ཏདྱ་ཐཱ། པཉྩནྡྲི་ཡ་ཨ་བ་བོ་དྷ་ན་སྭཱ་ཧཱ། ཞེས་དང་། ན་མསྶརྦ་ཏ་ཐཱ་ག་ཏ་ཧྲི་ད་ཡ་ཨ་ནུ་ག་ཏེ་ༀ་ཀུ་རུཾ་གི་ནི་
སྭཱ་ཧཱ། ཞེས་བརྗོད་པས་སྔ་མས་སྨོན་ལམ་གང་བཏབ་པ་ཐམས་ཅད་མྱུར་དུ་འགྲུབ་པར་གསུངས་པ་དང་། ཕྱི་མས་དགེ་བ་གང་བྱས་འབུམ་འགྱུར་དུ་འཕེལ་བར་གསུངས་པས་མཚོན་རྒྱ་ཆེར་ཤེས་པར་བྱའོ། ༈ །གཞན་ཡང་གང་དག་སྔགས་བཟླས་པ་གཙོ་བོར་བྱེད་པ་རྣམས་ཀྱིས་ཐོག་མར་ངག་བྱིན་རླབས་དང་། བར་དུ་ཕྲེང་བ་བྱིན་རླབས་དང་། མཇུག་ཏུ་བཟླས་པ་ལྷག་པའི་ལྷ་ལ་འབུལ་བ་རྣམས་ཚུལ་བཞིན་དུ་བསྒྲུབ་པར་བྱ་སྟེ། དེ་ལ་དང་པོ་ངག་བྱིན་གྱིས་བརླབ་པ་ནི། ཐོ་རངས་གཞན་དང་ངག་མ་འདྲེས་པའི་གོང་ལུས་གནད་བཅོས། རླུང་རོ་བསལ་ལ་ཅུང་ཟད་ངལ་བསོ། དེ་ནས་སྐྱབས་སེམས་སྔོན་དུ་འགྲོ་བས། རང་གི་ལྕེའི་སྟེང་དུ་ཨ་ལས་ཟླ་བ་ལ་ཨ་དཀར་པོ་འོད་ཟེར་འབར་བས་མཚན་པའི་མཐར་མདུན་ནས་བརྩམས་ཏེ་གཡས་སྐོར་གྱིས་ཨོཾ་ཨ་ཨཱནས། ཨོཾ་ཨརྣམས་དཀར་པོ། དེའི་ཕྱི་རོལ་ཏུ་གཡོན་སྐོར་གྱིས་ཀ་ཁ་ག་གྷ་ང་ནས། ཧ་ཀྵ་སྭཱ་ཧཱ་རྣམས་དམར་པོ། དེའི་ཕྱི་རོལ་ཏུ། ཨོཾ་ཡེ་དྷརྨཱ་ནས་ཤྲ་མ་ཎ་སྭཱ་ཧཱ། ཞེས་པའི་སྔགས་ཕྲེང་ཁ་དོག་དམར་པོ་གཡས་སྐོར་གྱིས་ལངས་ཐབས་སུ་འཁོད་པ། དེ་ལས་འོད་ཟེར་འཕྲོས། རྒྱལ་བ་སྲས་དང་བཅས་པའི་བྱིན་རླབས་ཐམས་ཅད་ལྷ་སྔགས་དབྱངས་གསལ་རྟེན་སྙིང་གི་རྣམ་པས་སྤྱན་དྲངས་ནས་ཐིམ། ཡང་འོད་ཟེར་འཕྲོས་པས་ལྷ་དང་དྲང་སྲོང་གྲུབ་པ་རིག་འཛིན་བདེན་
ཚིག་ལ་དབང་བ་རྣམས་ཀྱི་ངག་གི་ནུས་མཐུ་གཟི་བརྗིད་ཐམས་ཅད་དབྱངས་གསལ་རྟེན་སྙིང་གི་རྣམ་པ་དང་། གཞན་ཡང་འཁོར་འདས་ཀྱི་ངག་གི་དཔལ་ཡོན་ཐམས་ཅད་བཀྲ་ཤིས་རྟགས་བརྒྱད་ཀྱི་རྣམ་པར་བཀུག་སྟེ་ཐིམ་པས་ལྕེ་སྟེང་གི་སྔགས་ཕྲེང་གཟི་བརྗིད་མཆོག་ཏུ་འབར་བར་གྱུར་པར་བསམས་ལ། གོང་གི་བཀོད་པའི་སྔགས་རྣམས་སྦྲེལ་བ་གསུམ། བདུན་ཉེར་གཅིག་སོགས་བཟླ། མཐར་ཨ་ལས་འོད་ཟེར་འཕྲོས་པས་སྔགས་ཕྲེང་གདན་དང་བཅས་པ་ཨ་ལ་ཐིམ། དེའང་བདུད་རྩིར་གྱུར་ནས་ལྕེ་ལ་ཐིམ་པས་གསུང་རྡོ་རྗེའི་ནུས་བྱིན་དང་ལྡན་པར་བསམས་ལ་བསྔོ་སྨོན་བྱའོ། །དེ་ལྟར་བགྱིས་པས་བཟླས་བརྗོད་གང་བྱས་བྱེ་བར་འགྱུར་བ་དང་། སྨྲས་ཚད་སྔགས་སུ་འགྱུར་བ་དང་། ངག་གི་མནན་གཏད་སོགས་ཞི་བ་དང་། སྔགས་ནུས་ལ་གནོད་པའི་ཟས་དང་སྤྱོད་ལམ་གྱིས་སྔགས་ཀྱི་ནུས་པ་མི་འཕྲོག་པ་སོགས་ཕན་སི ཡོན་དཔག་ཏུ་མེད་པར་གསུངས་ཏེ། གྲུབ་ཆེན་ཁྱུང་པོའི་མགུར་བརྒྱད་དང་། རྭ་ལོ་ཙཱ་བའི་གདམས་ངག་ཆོས་བརྒྱད་དུ་གྲགས་པའི་དགོངས་པ་མཐུན་པར་འབྱུང་ངོ་། །གཉིས་པ། སྤྱིར་བྱིན་གྱིས་བརླབ་བྱའི་ཡུལ་ཕྲེང་བ་ལ། བྱ་རྒྱུད་ལེགས་གྲུབ་སོགས་ཀྱིས་མཚོན་རྒྱུད་སྡེ་རྣམས་ལས་རིགས་དང་ལས་ཀྱི་བྱེ་བྲག་རྒྱས་པར་གསུངས་པ་ལྟར་འབྱོར་ན་ལེགས་ཤིང་། རིགས་དང་ལས་ཐམས་ཅད་ལ་བསྔགས་པ་ནི་བོ་དྷི་
ཙི་ཉིད་ཡིན་ལ་འགྱུར་ཁྱད་ཀྱང་ལྷག་པར་ཆེ་བའི་ཚུལ། རྩེ་མོ་ལས། ལྕགས་ཀྱིས་བཟླས་པ་ཉིས་འགྱུར་ཏེ། །ཟངས་ཀྱིས་ཡང་ནི་བཞི་འགྱུར་རོ། །རུ་རཀྵ་ཡིས་བྱེ་བ་གཉིས། །མུ་ཏིག་གིས་ནི་བརྒྱ་འགྱུར་རོ། །དབང་པོས་སྟོང་འགྱུར་རྣལ་འབྱོར་ཏེ། །དངུལ་གྱིས་འབུམ་དུ་འགྱུར་པ་ཡིན། །པདྨས་བྱེ་བ་བརྒྱ་འགྱུར་རོ། །བོ་དྷི་ཙིས་ནི་གྲངས་མེད་དོ། །ཞེས་སོ། །གང་ལྟར་ཡང་མཚན་ཉིད་དང་ལྡན་པའི་ཕྲེང་བ་བྱིན་རླབས་བྱ་བའི་ཚུལ་བདེ་ཀྱེ་གཉིས་ཀྱི་དགོངས་པ་ལྟར་ན། ཐོག་མར་བྱིན་རླབས་བྱ་བའི་སྐབས། ཕྲེང་བ་དྲི་ཞིམ་པོའི་ཆུས་བཀྲུས། སྤོས་ཀྱིས་བདུགས་ལ་མེ་ཏོག་གི་སྣོད་དུ་བཞག །བདག་ཉིད་ལྷའི་རྣལ་འབྱོར་ལ་གནས་པས། རང་གི་ལག་པ་གཡོན་པའི་སོར་མོ་རྣམས་པདྨ་འདབ་མ་ལྔ་པ། ལག་པའི་མཐིལ་དུ་ཟླ་བའི་དཀྱིལ་འཁོར་གྱི་སྟེང་དུ་ཨ་ཨཱནས། ཨོཾ་ཨ༔ གཡོན་སྐོར་དུ་གནས་པའི་ལྟེ་བ་ལ་ཨ། ལག་པ་གཡས་པའི་སོར་མོ་རྡོ་རྗེ་རྩེ་ལྔ་པ། ལག་པའི་མཐིལ་དུ་ཉི་མའི་དཀྱིལ་འཁོར་གྱི་སྟེང་དུ་ཀ་ཁ་ག་གྷ་ང་ནས། ཧ་ཀྵགཡས་སྐོར་དུ་གནས་པའི་ལྟེ་བ་ལ་ཧཱུཾ། དེ་ནས་པད་ཀོར་སྔོན་དུ་འགྲོ་བས་> ཕྲང་བ་བླངས་ལ། བསང་སྦྱང་། སྟོང་པའི་ངང་ལས་བདུད་རྩིའི་ཡི་གེ་སོ་དཀར་པོ་ལས་འོད་ཟེར་འཕྲོས། ལག་པ་གཉིས་རྡོ་རྗེ་ཐལ་མོ་སྦྱར་བའི་བར་དུ་ཕྲེང་བ་བཟུང་ལ། ཐལ་མོ་ཕན་ཚུན་བསྲུབ་པའི་ཚུལ་ཕྲེང་བ་བླངས་ལ། བསང་སྦྱང་། སྟོང་པའི་ངང་ལས་བདུད་རྩིའི་ཡི་གེ་ཧཱུྃ་དཀར་པོ་ལས་འོད་ཟེར་འཕྲོས། ལག་པ་གཉིས་རྡོ་རྗེ་ཐལ་མོ་སྦྱར་བའི་བར་དུ་ཕྲེང་བ་བཟུང་ལ། ཐལ་མོ་ཕན་ཚུན་བསྲུབ་པའི་ཚུལ་
བྱ་ཞིང་། རྡོ་རྗེ་དང་པདྨ་སྙོམས་པར་ཞུགས། བྱང་ཆུབ་ཀྱི་སེམས་སུཾ་ལ་ཁྱབ། དེས་ཨཱ་ལི་དང་ཀཱ་ལི་ལ་ཁྱབ། དེ་ཕྲེང་བ་དང་གཉིས་སུ་མེད་པར་གྱུར། ཨོཾ་པ་དེ་པ་དེ་མ་ཧཱ་ཛྷཱ་ནཾ་སརྦ་བུདྡྷ་མ་ཡཾ་བྷ་ཝི་ཏེ་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨ་ཁཾ་སྭཱ་ཧཱ། ཞེས་བརྒྱ་རྩ་བཟླས་པས་བྱིན་གྱིས་བརླབ་ཅིང་། རྟེན་འབྲེལ་སྙིང་པོས་བརྟན་པར་བྱ། རྒྱུན་དུ་བཟླས་པའི་སྐབས་སུ་བབ་པ་ན་གོང་གི་བྱིན་རླབས་ཀྱི་དམིགས་པ་དང་བཅས་སྔགས་ལན་གསུམ་བཟླ། དེ་ནས་ལག་པ་གཡོན་པའི་མཛུབ་མོའི་སྟེང་ནས་བགྲང་ཞིང་མཐེ་བོང་རྡོ་རྗེ་ལྕགས་ཀྱུས་ལྷ་རྣམས་ཀྱི་ཐུགས་རྒྱུད་བསྐུལ་བར་བསམས་ལ་བཟླས་བརྗོད་ལ་འཇུག་པར་བྱའོ། །གཞན་ཡང་ཕྲེང་བ་རབ་གནས་བསྡུས་པ་ནི། ཕྲེང་བ་གསུང་རྡོ་རྗེ་འོད་དཔག་ཏུ་མེད་པའི་སྐུར་གྱུར། རང་འདྲའི་ཡེ་ཤེས་པ་བཛྲ་ས་མཱ་ཛ༔ ཛ་ཧཱུཾ་བཾ་ཧོ༔ གཉིས་སུ་མེད་པར་ཐིམ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ཞེས་སོགས་བརྗོད་ཅིང་བུམ་ཆུ་གཏོར། ཨོཾ་བཛྲ་པུབྦེ་ཨཱཧཱུྃ་སྭཱ་ཧཱ་སོགས་ཀྱིས་མཆོད། བདེ་མཆོག་ལ། ཨོཾ་སྭཱ་ཧཱ་ཧུ་ཧཱུཾ་ཧཱུཾ་ཕཊ། དང་གསང་འདུས་ལ། ཨོཾ་ཨཱཨཱ་རོ་ལིཀྲ་ཧཱུྃ་ཧཱུྃ་ཞེས་བརྒྱ་རྩ་བརྒྱད་བཟླས་པས་བྱིན་གྱིས་བརླབ། དེ་འོད་དུ་ཞུ་བ་ལས་ཕྲེང་བའི་རྣམ་པར་བསམ་ཞིང་ཡི་གེ་བརྒྱ་པས་བརྟན་པར་བྱའོ། །དེ་དག་གང་གི་ཚེ་ནའང་། ནོར་བུ་རྒྱས་པའི་གཞལ་མེད་ཁང་གི་གཟུངས་ལས། ཨོ་རུ་ཙི་ར་མ་ཎི་པྲ་ཝརྡྷ་
ན་སྭཱ་ཧཱ། སྔགས་འདིས་ལན་བདུན་བགྲང་ཕྲེང་བ་ལ་བཏབ་སྟེ་བཟླས་བརྗོད་བྱས་ན་དེ་བཞིན་གཤེགས་པ་ཐམས་ཅད་ཀྱིས་གསུངས་པའི་གསང་སྔགས་དེ་དག་ཐམས་ཅད་བཟླས་པར་འགྱུར་ཞིང་བྱེ་བ་ཕྲག་ཁྲིག་བརྒྱ་སྟོང་དུ་མར་ཡང་བཟླས་པར་འགྱུར་རོ། །ཞེས་གསུངས། གཞན་ཡང་། ཨོ་ཀི་རི་ཀི་རི་ནུ་ཧྲི་ནི་ཡེ་སྭཱ་ཧཱ་ཞེས་དང་། ཨོ་ཨ་ཙིནྟེ་ཛྲ་ལཱ་ཡ་སྭཱ་ཧཱ་ཞེས་པ་དག་ཀྱང་བཟླས་པས་བྱེ་བ་ཕྲག་བརྒྱའི་གྲངས་སུ་འགྱུར་བར་གསུངས་པས་ན་དེ་གསུམ་ཀའམ། གང་ཡང་རུང་བ་བཟླས་ཏེ་ཕྲེང་བ་ལ་བཏབ་ནས་སྔགས་བཟླ་བར་བྱའོ། །རྒྱུད་སྡེ་འོག་མ་བྱ་བའི་རྒྱུད་སོགས་ལས་རིགས་གསུམ་སོ་སོའི་སྔགས་ཀྱིས་བྱིན་གྱིས་བརླབ་པར་གསུངས་པའམ། ཐུན་མོང་དུ་གོང་གི་ནོར་བུ་རྒྱས་པའི་སྔགས་ཀྱིས་བརླབས་ཀྱང་རུང་ངོ་། །གསུམ་པ་ནི། བྱ་རྒྱུད་སོགས་མདུན་དུ་ལྷ་བསྐྱེད་པ་གཙོ་བོར་བཏོན་པའི་སྔགས་བཟླས་པའི་མཇུག་ཏུ། སྲིན་ལག་སོ་སོའི་རྒྱབ་ཏུ་གུང་མོ་སྦྱར། དེ་གཉིས་གཡས་པའི་རྒྱབ་གཡོན་པའི་མདུན་དུ་སྦྱར་ཏེ་བསྣོལ། གཡས་གཡོན་གྱི་མཛུབ་མོས་སོ་སོའི་གུང་སྲིན་ལ་འཁྱུད། མཐེ་བོང་གཉིས་མཛུབ་མོའི་ཚིགས་དབུས་མ་ལ་བཞག །མཐེའུ་ཆུང་གཉིས་གཤིབས་ཏེ་བསྒྲེང་བ་བུམ་པའི་ཕྱག་རྒྱ་བཅས་ལ་བདག་གི་བཟླས་བརྗོད་བགྱིས་པའི་དགེ་བའི་རྩ་བ་འདི་དངོས་གྲུབ་འདི་དམིགས་བསལ་མེད་ན། ཞེས། མཆོག་དང་ཐུན་
མོང་གི་དངོས་གྲུབ་ཀྱི་དོན་དུ་ཞེས་སྦྱར། མཆན། བྱ་བའི་དོན་དུ་བཅོམ་ལྡན་འདས་ལ་དབུལ་ལོ། །འཕགས་པ་ཁྱེད་ཀྱིས་བདག་ལ་དངོས་གྲུབ་འདི་ཞེས་བྱ་བ་སྩལ་དུ་གསོལ། ཞེས་ཕུལ་བས། གནང་བ་བྱིན་པར་བསམས་ཏེ། འདིས་ནི་སྔགས་ཀྱི་ནུས་པ་མི་ཉམས་པ་དང་། དངོས་གྲུབ་མྱུར་དུ་ཐོབ་པའི་དགོས་པ་ཁྱད་པར་ཅན་ཡོད་དོ། །གཞན་ཡང་བཟླས་པའི་མཇུག་ཏུ། ཨོཾ་ཨ་ཨཱ་ནས་ཧ་ཀྵ་སྭཱ་ཧཱ། གྲུབ་པར་གྱུར་ཅིག་ཅེས་བཏགས་ནས་བཟླས་པས་སྔགས་མྱུར་དུ་འགྲུབ་པ་དང་། སྔགས་ཀྱི་མ་དག་པ་དང་། ལྷག་ཆད་སོགས་ཁ་བསྐང་བར་འགྱུར་རོ། ༈ །ཡང་དམ་ཆོས་སྡུག་བསྔལ་ཞི་བྱེད་ཀྱི་ཕྱག་རྒྱ་ཆེན་པོ་བརྡའི་རྒྱུད་ལས། མཆོག་ཏུ་གྱུར་པ་ཡི་གེའི་སྒྱུ་རྩལ་བཞི། །འདི་ནི་མཁའ་འགྲོའི་སྙིང་ཚིག་སྨྲས་པ་ཡིན། །སྲོད་དང་ཐོ་རངས་འཁོར་ལོའི་གྲིབ་མཚམས་སུ། །ཐབས་དང་ཤེས་རབ་ཡི་གེ་གསུམ་གསུམ་བསྒྲགས། །འདིས་ནི་ངག་ཏུ་ཅི་སྨྲས་སྔགས་སུ་འགྱུར། །ཐོགས་མེད་ནུས་པས་དོན་ཀུན་སྒྲུབ་བྱེད་ཡིན། །ཞེས་སོགས་རྒྱ་ཆེར་གསུངས་ཏེ། དེའི་དོན་ལ་བཞི། ངག་ནས་བྲེ་མོའི་གཏམ་སྨྲས་པས་གསང་སྔགས་ཀྱི་བསྙེན་སྒྲུབ་ཐེམ་པའི་མན་ངག །ལུས་ཐ་མལ་དུ་བསྡད་པས་རྒྱུད་ལ་ཚོགས་གཉིས་མཉམ་རྫོགས་སུ་འགྲོ་བའི་མན་ངག །ཉོན་མོངས་པ་ཅན་གྱི་ཡིད་ཏིང་འཛིན་རྩལ་རྫོགས་སུ་འགྲོ་བའི་མན་ངག །སྟེང་འོག་གི་སྒོ་
ལ་མ་བརྟེན་པར་རྩ་རླུང་ལས་སུ་རུང་བའི་མན་ངག་གོ །དེ་ལ་དང་པོ་ནི། ནངས་པར་བྱ་རོག་མ་གྲག་པའི་དུས་སུ་ཨཱ་ལི་ཚར་གསུམ་དང་། དགོངས་མོ་བྱེའུའི་སྐད་ཆད་ནས་མི་ཕྱུགས་ཉལ་བའི་དུས་སུ་ཀཱ་ལི་ཚར་གསུམ་སྟེ། སོ་སོར་མི་ཚིག་དང་བྱ་བ་གཞན་གྱིས་བར་མ་ཆད་པར་བཏོན་པས་ཉིན་ཞག་གཅིག་ལ་ཅི་དང་ཅི་སྨྲས་པ་ཐམས་ཅད་སྔགས་སུ་འགྱུར་རོ། །གཉིས་པ་ནི། ནམ་གཉིད་སད་པའི་ཚེ་ཀཱ་ལི་ཚར་གསུམ་བརྗོད་ནས་ཕྱི་རོལ་གྱི་སྣང་བ་ཐམས་ཅད་རང་གི་སེམས་ཀྱི་རོལ་པ་དང་། ཨཱ་ལི་ཚར་གསུམ་བརྗོད་ནས་དེ་ཡང་སྐྱེ་མེད་སྒྱུ་མ་ལྟ་བུར་ཤེས་པར་བྱ། གཉིད་ལོག་ཁར་ཀཱ་ལི་ཚར་གསུམ་བརྗོད་ནས་རྟོག་ཚོགས་ཐམས་ཅད་སེམས་ཀྱི་རོལ་པ་དང་། ཨཱ་ལི་ཚར་གསུམ་བརྗོད་ནས། དེ་ཡང་སྐྱེ་མེད་ནམ་མཁའ་ལྟ་བུར་ཤེས་པར་བྱས་པས་གཟུང་འཛིན་གྱི་འཁྲུལ་པ་མ་སྤངས་པར་དག་ནས། མྱུར་དུ་བླ་ན་མེད་པའི་ཡེ་ཤེས་སྐྱེ་བར་འགྱུར་རོ། །གསུམ་པ་ནི། ཤེས་པ་ཡུལ་དང་འཕྲད་ནས་ཉོན་མོངས་པའི་རྟོག་པ་ཇི་ལྟར་ཤར་ཡང་། མ་སྤངས་པར་ཡེ་ཤེས་སུ་འཆར་བར་བྱེད་པ་སྟེ། འདོད་ཆགས་ལྟ་བུ་ལ་མཚོན་ན། རྟོག་པ་ཤར་མ་ཐག་ནས་དེ་ཉིད་ལ་བལྟ་ཞིང་དེའི་རང་བཞིན་ངོས་བཟུང་ལ། ཨོ་པ་ཕ་བ་བྷ་མ། ཨ་ཨཱ། ཨི་ཨཱི། ཨུ་ཨཱུ། ཨེ་ཨེ། ཨོ་ཨཽ། ཨཾ་ཨ༔ ཉེར་གཅིག་བརྗོད་པས་འདོད་ཆགས་སོ་སོར་རྟོག་པའི་
ཡེ་ཤེས་སུ་འཆར་རོ། །དེ་བཞིན་དུ་ཞེ་སྡང་ལ། ཨོ་ཊ་ཋ་ཌ་ཌྷ་ཎ། ཨ་ཨཱ་སོགས་དང་། ཕྲག་དོག་ལ། ཨོ་ཙ་ཚ་ཛ་ཛྷ་ཉ་སོགས། ང་རྒྱལ་ལ། ཨོ་ཀ་ཁ་ག་གྷ་ང་སོགས། གཏི་མུག་ལ། ཨོ་ཏ་ཐ་ད་དྷ་ན་སོགས་སྔགས་ཀྱི་ཁྱད་པར་དང་བཅས་ཏེ་ཉམས་སུ་བླངས་པས། ཉོན་མོངས་པ་དེ་དང་དེ་དག་ཐམས་ཅད་སེམས་ཀྱི་ཆོས་ཉིད་དུ་ཐིམ་ནས། ཉམས་མེ་ལོང་། བྱ་གྲུབ། མཉམ་ཉིད། ཆོས་དབྱིངས་ཡེ་ཤེས་རྣམས་སུ་འཆར་བར་འགྱུར་རོ། །བཞི་པ་ནི། རྩ་འཁོར་བཞིར་དབང་བཞིའི་ངོ་བོ་བླ་མའི་སྐུ་གསུང་ཐུགས་ཡེ་ཤེས་རྡོ་རྗེ་གསལ་འདེབས་པ་ལ། སྤྱི་བོའི་འདབ་མར་རང་བྱུང་གྲུབ་པའི་གསལ་བྱེད་སོ་གཉིས། མགྲིན་པར་དབྱངས་ཡི་གེ་བཅུ་དྲུག །སྙིང་གར་ཨ་ཀ་ཙ་ཊ་ཏ་པ་ཡ་ཤ་བརྒྱད། ལྟེ་བར་གསལ་བྱེད་སོ་གཉིས་གཡས་སྐོར་དང་། གཡོན་སྐོར་ཏེ་རྩ་འདབ་ཀྱི་གྲངས་དང་མཉམ་པར་གསལ་བཏབ་ནས། སྤྱི་བོ་ནས་ལྟེ་བའི་བར་གྱི་འདབ་མའི་སྔགས་རྣམས་ལན་གསུམ་གསུམ་བརྗོད་པས་གསལ་གདབ། ཐུན་བསྡུ་བ་ན། ལྟེ་བ་ནས་སྤྱི་བོའི་བར་གྱི་རྩ་འདབ་ཀྱི་ཡི་གེ་རྣམས་ཚར་གསུམ་གསུམ་བརྗོད་པས་ཡིག་འབྲུ་བྱང་ཆུབ་སེམས་སུ་ཞུ་ནས་རྩ་ཨ་བ་དྷ་ཏཱིར་ཐིམ་པས། རང་བཞིན་སྤྲོས་བྲལ་སྟོང་པར་རྗེན་རྗེན་གྱི་ངང་ནས་སོང་བར་བསམ་མོ། །དེ་ལྟར་ཐུན་མགོར་ཐབས་དང་། ཐུན་གཤམ་དུ་ཤེས་རབ་ཀྱི་ཉམས་ལེན་ཟུང་
འབྲེལ་དུ་བསྐྱངས་པས་ཁམས་རང་བཞིན་གྱིས་ཞུ་སྟེ། ཟག་མེད་ཀྱི་བདེ་བས་རྩ་རླུང་གི་ནུས་པ་ལས་སུ་རུང་བར་འགྱུར་ཏེ། འདི་ནི་ཉམས་ལེན་ཀུན་ལ་གཅེས་པའི་གདམས་པ་ཁྱད་པར་ཅན་ཡིན་ལ། དེས་མཚོན་ཏེ་ཨཱ་ལི་ཀཱ་ལིའི་གདམས་ངག་གི་རྟེན་འབྲེལ་གཞན་རྣམས་ཀྱང་རྒྱ་ཆེར་ཤེས་པར་བྱའོ། ༈ །གྲུབ་ཆེན་ཌོ་ལླི་པའི་ལུགས་ཀྱི་ཡི་དམ་ལྷ་མང་དུ་ཡོད་ན་གཅིག་ཏུ་བསྡུ་བའི་མན་ངག་ནི། དཔལ་སམྦུ་ཊི་ལས། །ལྷ་རྣམས་ཐམས་ཅད་ཞི་བའམ། །ཡང་ན་ཁྲོ་བོར་བསྒོམ་པར་བྱ། །སངས་རྒྱས་གར་མཁན་བསམ་མི་ཁྱབ། །མན་ངག་བརྗོད་པར་ག་ལ་ནུས། །ཐམས་ཅད་སེམས་ཀྱི་རྣམ་འཕྲུལ་ལོ། །སྟོང་པ་རྡོ་རྗེ་ཅན་གཅིག་ནི། །རིགས་ནི་རྣམ་པ་ལྔ་རུ་བཤད། །ཅེས་གསུངས་པའི་དགོངས་པ་སྟེ། དེ་ལ་ཐོག་མར་རང་གི་རྩ་བའི་ཡི་དམ་དེའི་མངོན་རྟོགས་དང་བཟླས་པ་རྒྱས་པར་ཚར་བ་དང་། དེའི་ཐུགས་ཀ་ནས་འོད་ཟེར་འཕྲོས་པས་ཡི་དམ་གཞན་དེ་ཡེ་ཤེས་པའི་ཚུལ་དུ་སྤྱན་དྲངས་ནས་བསྟིམས་པས། ཆུ་ལ་འོ་མ་བླུགས་པ་བཞིན་ལྷ་དེར་གྱུར་པར་བསམ། དེའི་བཟླས་པ་བྱ། དེ་བཞིན་དུ་ཡི་དམ་ཡོད་ཚད་ལ་བྱའོ། །ཞེས་གསུངས་པ་ལྟར་ཡིད་ཀྱིས་གསལ་བཏབ་པའམ། ངག་ཏུ་བརྗོད་ན། རང་གི་སྙིང་ག་ནས་འོད་ཟེར་འཕྲོས་པས་ཡི་དམ་ལྷ་འདི་ཞེས་བྱ་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛས་སྤྱན་དྲངས། ཛཧཱུཾ་བཾ་
ཧོས་གཉིས་སུ་མེད་པར་ཐིམ་པས་རང་སྐད་ཅིག་གིས་ཡི་དམ་འདི་ཞེས་བྱ་བའི་སྐུར་གྱུར། ཅེས་བརྗོད་ཅིང་བསམས་ལ་དེའི་སྔགས་བརྒྱ་རྩ་ལ་སོགས་པ་བཟླ། གཞན་ལའང་དེས་འགྲེའོ། །ཚར་བ་དང་བུམ་པ་གཅིག་ནས་ནོར་བུ་མང་པོ་གདོན་པ་བཞིན། སླར་ཡང་རང་ཉིད་རྩ་བའི་ཡི་དམ་གྱི་སྐུར་གསལ་བ་ལ་བསྟིམས་པའི་ལྷ་ཐམས་ཅད་མདུན་གྱི་ནམ་མཁར་བྱོན་པར་གྱུར་པར་བསམས་ལ། ཨོཾ་བཛྲ་པུབྦེ་ཨཱཧཱུྃ་ཞེས་པ་ལ་སོགས་པས་མཆོད། ཡི་གེ་བརྒྱ་པས་ནོངས་པ་བཤགས། བཛྲ་མུས་གཤེགས། མངོན་རྟོགས་རྩ་བ་གང་བསྒོམས་པའི་རྗེས་ཀྱི་རིམ་པ་རྣམས་བྱའོ། ༈ །གཞན་ཡང་རང་གིས་དབང་དང་རྗེས་སུ་གནང་བ་ཐོབ་པའི་མཆོག་སྒྲུབ་པ་དང་། ལས་རྒྱས་པའི་ལྷག་པའི་ལྷའི་སྒོམ་བཟླས་ལ་རྩེ་གཅིག་ཏུ་བརྩོན་པ་ནི་དངོས་གྲུབ་གཉིས་ཀྱི་ཉེ་རྒྱུ་ཁྱད་པར་ཅན་ཡིན་པས་ཅི་ནུས་སུ་བསྒྲུབ་པར་བྱ་ལ། འདིར་ཉེར་མཁོའི་སྒོམ་བཟླས་འགའ་ཞིག་བརྗོད་ན། ནད་གདོན་སྡིག་སྒྲིབ་ཞི་བའི་ཕྱིར་བཅོམ་ལྡན་འདས་སྨན་གྱི་བླ་བསྒོམ་པར་འདོད་ན། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། ཞེས་སྐྱབས་སེམས་ཅི་ནུས་དང་། སྤྲོ་ན་ཚད་མེད་བཞི་བསྒོམ། སྟོང་པའི་ངང་ལས་སྐད་ཅིག་གིས། །རང་གི་སྤྱི་བོར་པད་
ཟླའི་སྟེང་། །བླ་མ་སྨན་པའི་རྒྱལ་པོ་མཐིང་། །ཕྱག་གཡས་མཆོག་སྦྱིན་ཨ་རུ་ར། །གཡོན་པས་མཉམ་གཞག་ལྷུང་བཟེད་ནི། །བདུད་རྩི་སྨན་གྱིས་བཀང་བ་བསྣམས། །མཚན་དཔེའི་གཟི་བྱིན་འོད་དུ་འབར། །ཆོས་གོས་གསུམ་གསོལ་སྐྱིལ་ཀྲུང་བཞུགས། སྐྱབས་ཀུན་འདུས་པའི་ངོ་བོར་གྱུར། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བེཌཱུརྨ་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ། སྐྱབས་སུ་མཆིའོ། །བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་བྱང་ཞིང་དག་པ་དང་། མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། ཞེས་ལན་བདུན་བཟླ། དེ་ནས་གཟུངས་རིང་ཐུང་གང་རུང་ངམ། ཏདྱ་ཐཱ། ཨོཾ་བྷེ་ཥ་ཛེ་གྷོ་ཥ་ཛུ་མ་ཧཱ་བྷེ་ཥ་ཛོ་རཱ་ཛ་ས་མུཏྤ་ཏེ་སྭཱ་ཧཱ། ཞེས་བརྒྱ་རྩ་སོགས་ཅི་ནུས་མཐར། བཅོམ་ལྡན་འོད་ཞུ་རང་ལ་ཐིམ། །ནད་གདོན་སྡིག་སྒྲིབ་ཀུན་བྱང་གྱུར། །དགེ་བ་འདི་ཡིས་སོགས་བསྔོ་སྨོན་བྱའོ།། ༈ །།ཚེ་དང་བསོད་ནམས་རྒྱས་པར་འདོད་པས་ཚེ་དཔག་མེད་སྤྲུལ་སྐུའི་སྒོམ་བཟླས་ཉམས་སུ་ལེན་པར་འདོད་ན། ཐོ་རངས་ཀྱི་དུས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་བཏང་ནས། རང་གི་མདུན་གྱི་ནམ་མཁའ་རུ། །པདྨ་དམར་པོ་འདབ་སྟོང་པའི། །ལྟེ་བར་ཟླ་སྟེང་ཚེ་དཔག་མེད། །
དམར་གསལ་གཞོན་ཚུལ་འཛུམ་ཞིང་ཞི། །ཕྱག་གཉིས་ཐལ་སྦྱར་བེ་ཌཱུརྱའི། །ལྷུང་བཟེད་བདུད་རྩིས་གང་བ་བསྣམས། །ཞབས་ཟུང་མཉམ་པའི་སྟབས་ཀྱིས་བཞེངས། །དབུ་སྐྲ་མཐོན་མཐིང་སྤྱི་བོར་བཅིངས། །ལྷག་མ་ལན་བུས་སྐུ་རྒྱབ་ཁེབས། །སྣ་ཚོགས་དར་གྱི་ཤམ་ཐབས་དང་། །དར་དམར་སྟོད་གཡོགས་ལྷབ་ལྷུབ་བརྒྱན། །རྩ་བརྒྱུད་བླ་མ་སངས་རྒྱས་དང་། །བྱང་སེམས་འཕགས་ཚོགས་རྒྱ་མཚོར་བཅས། །མངོན་སུམ་བཞིན་དུ་བཞུགས་པར་གྱུར། །ཅེས་བསྒོམས་ལ། ཨོཾ་སརྦ་ཏ་ཐཱ་ག་ཏ་ཨཱརྱ་ཨ་པ་རི་མི་ཏ་ཨཱ་ཡུཛྙཱ་ན་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། འཇིག་རྟེན་འདྲེན་པའི་སོགས་ཀྱིས་བསྟོད། ཨོཾ་བཛྲ་ཨཱ་ཡུ་ཥ། ས་ར་ཧེ། ཤཱ་ར་རེ། ཀ་ར་རེ་ཧཱུཾ། གསུམ་གྱིས་གསོལ་བ་གདབ། དེ་ནས་རླུང་རོ་བསལ་ལ་སྣ་བུག་གཡོན་ནས་རླུང་ཕྱིར་ཅུང་ཟད་བུས་པའི་ཚེ། རང་གི་སྣ་རྩེ་ནས་རླུང་སྔོ་བུན་གྱིས་སོང་། ཕྱག་གི་ལྷུང་བཟེད་ནང་དུ་ཞུགས་པས་བདུད་རྩིའི་རྒྱུན་རླུང་དེ་ལ་འཁྲིལ་པའི་ཚུལ་གྱིས་སྐྱ་ནར་གྱིས་བབས། རང་གི་ཁས་རྡུབས་པའི་ཚུལ་བྱས་པས་ཁ་ནས་ཞུགས། ལུས་ཀྱི་ནང་གང་། ནད་གདོན་སྡིག་སྒྲིབ་ཐམས་ཅད་དག །འཆི་མེད་ཚེའི་དངོས་གྲུབ་ཐོབ་པར་བསམས་ལ་རླུང་བུམ་ཅན་གཟུང་། དེ་ལྟ་བུས་ལྔའམ། བཅུའམ། བཅོ་ལྔ་སོགས་ནས་བརྒྱའི་བར་ཅི་ནུས་བྱ། རྗེས་ལ་དམིགས་པ་གོང་བཞིན་དང་།
ཨོ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། ཞེས་བརྒྱ་སྟོང་ཅི་འགྲུབ་བཟླས་རྗེས་མཆོད་བསྟོད་བྱ། མཐར་ནི་མདུན་གྱི་བཅོམ་ལྡན་འདས། །འོད་དུ་ཞུ་ནས་རང་ལ་ཐིམ། །རང་ཉིད་ཚེ་དཔག་མེད་པའི་སྐུའི། །། ཐུགས་ཀར་ཟླ་སྟེང་ཧཱུྃཡིག་མཐར། སྔགས་ཕྲེང་འཁོར་བའི་འོད་ཟེར་གྱིས། །ལུས་གང་འཆི་མེད་གྲུབ་པར་འགྱུར། །ཅེས་བརྗོད་ཅིང་བསམས་ལ་ཚེ་གཟུངས་ཅི་ནུས་བཟླས་མཐར་བསྔོ་སྨོན་བྱའོ། །འདིའི་སྒོ་ནས་ཚེ་སྒྲུབ་ཞག་བདུན་མ་བྱེད་ན། ཆོ་འཕྲུལ་ཟླ་བ་ལྟ་བུའི་ཚེས་གཅིག་ནས་ཁྲུས་དང་གཙང་སྦྲ་བཅས་མཚམས་དམ་པར་བཅད། གྲུབ་ན་གསོ་སྦྱོང་བླང་། སྔ་དྲོའི་ཐུན་གཉིས་ལ་གོང་བཞིན་བསྒོམ་བཟླས་དང་། ཕྱི་ཐུན་དང་། སྲོད་ཐུན་ལ་ཤེར་སྙིང་སོགས་ཟློག་པ་དང་སྲུང་འཁོར་ལ་འབད། ཉལ་བའི་ཚེ་ནུབ་ཕྱོགས་བདེ་བ་ཅན་ལ་སྔས་གཏད་དེ་སེང་གེའི་ཉལ་སྟབས་ཀྱིས་ཉལ། རྣམ་རྟོག་གཞན་གྱིས་བར་མ་ཆོད་པར་གཉིད་ལོག་པས་རྨི་ལམ་དུ་དགེ་བའི་མཚན་མ་མཐོང་བར་འགྱུར་བ་ཡིན་ལ། ཞག་བདུན་ཁོ་ནས་མ་བྱུང་ན། སླར་ཡང་ཞག་བདུན་སོགས་བསྐྱར་བས་ངེས་པར་འགྲུབ་པ་ཡིན་ནོ།། ༈ །།ཡང་ལུས་༧ སྲུང་བའི་རིག་པ་སྒྲ་མི་སྙན་གྱི་ཚེ་གཟུངས་ལ་བརྟེན་ནས་རྡོ་རྗེའི་སྲོག་འགྲུབ་པར་འདོད་པས། སྔ་དྲོའི་ཚེ་སྐྱབས་འགྲོ་སེམས་བསྐྱེད་བྱས་ལ། སྭ་བྷཱ་ཝ་སོགས། སྟོང་པའི་ངང་ལས་སྐད་ཅིག་གིས། །པཾ་ལས་
པད་དཀར་འདབ་བཞིའི་སྟེང་། །གསེར་གྱི་རྡོ་རྗེ་རྩེ་ལྔ་པའི། །ལྟེ་བར་རང་ཉིད་ཚེ་དཔག་མེད། །དམར་པོ་མཉམ་གཞག་ཚེ་བུམ་འཛིན། །དར་དང་རིན་ཆེན་རྒྱན་ལྡན་པའི། །ལུས་དབུས་དྲང་པོར་སྲོག་པ་རྩ། །སྔོན་པོ་ལྕགས་ཀྱི་སྲོག་ཤིང་ཚུལ། །རྡོ་རྗེ་རྩེ་ལྔའི་རྣམ་པར་གསལ། །དེ་ཡི་ལྟེ་བར་རང་སེམས་ཧཱུཾ། །མཐིང་ནག་སྔགས་ཀྱི་ཕྲེང་བས་བསྐོར། །རྩེ་གཅིག་ཡིད་གཏད་བཟླས་པ་ཡིས། །རྡོ་རྗེའི་སྲོག་རྩ་གྲུབ་པར་གྱུར། །ཅེས་པ་སྒོམས་ལ། ན་མོ་བུདྡྷཱ་ཡ། ན་མོ་དྷརྨཱ་ཡ། ན་མསངྒཱ་ཡ། ཏདྱ་ཐཱ། ཨིཊྚེ། བཊེ། ནཊེ། ཀུ་ནཊེ། ཊཀྐེ། ཋཀེ། ཋ་རཀྵ། ཨུ་རུ་མ་ཏེ། རུ་རུ་མ་ཏི། ཏུ་རུ་ཧིལླི་མིལླི། སརྦ་རྣོ་དུ་པ་དག། ནམྨ་སཔྤ། སམྨ་སཾ་མུ་ཛྷཱ་ནཱི། སིཙྪནྟུ་མེ་མནྡྲ་པཱ་ད་སྭཱ་ཧཱ། ཞེས་བརྒྱ་རྩ་ཅི་རིགས་པ་མི་ཚིག་གིས་བར་མ་ཆོད་པར་བཟླས་མཐར། རིག་སྔགས་བཟླས་པའི་བསོད་ནམས་གང་། །བྱང་ཆུབ་སྙིང་པོར་ཡོངས་སུ་བསྔོ། །བདག་གཞན་འགྲོ་བ་མ་ལུས་ཀུན། །འཆི་མེད་རྡོ་རྗེའི་སྲོག་འགྲུབ་ཤོག །ཅེས་བསྔོ་སྨོན་བྱའོ།། ༈ །།གཟུངས་དང་སྤོབས་པ་སོགས་ཕུན་སུམ་ཚོགས་པའི་ཤེས་རབ་རྒྱས་པར་བྱ་བའི་སླད་དུ་བློ་འཕེལ་གྱི་གཟུངས་སྒྲུབ་ཉམས་སུ་བླང་བར་འདོད་པས་སྐྱབས་སེམས་སྔོན་དུ་འགྲོ་བས། སྭ་བྷཱ་ཝ་སོགས། སྟོང་པའི་ངང་ལས་སྐད་ཅིག་གིས། །པདྨ་ཉི་ཟླའི་གདན་གྱི་སྟེང་། །རང་ཉིད་འཇམ་
དཔལ་གུར་གུམ་མདངས། ཕྱག་གཡས་ཤེས་རབ་རལ་གྲི་འཕྱར། །གཡོན་པས་ཐུགས་ཀར་གླེགས་བམ་འཛིན། །དར་དང་རིན་ཆེན་རྒྱན་ལྡན་པ། །རྡོ་རྗེའི་སྐྱིལ་མོ་ཀྲུང་གིས་བཞུགས། །སྙིང་ཉིད་པདྨ་འདབ་ཟླུམ་དབུས། །ཨ་ལས་ཟླ་བའི་དཀྱིལ་འཁོར་སྟེང་། །ཧཱུཾ་མཐར་སྔགས་ཀྱི་ཕྲེང་བས་བསྐོར། །བཟླས་པས་འོད་འཕྲོས་པདྨ་བྱེ། །མ་རིག་མུན་པ་ཡོངས་སུ་བསལ། །དེ་ལས་འོད་ཟེར་རབ་འཕྲོས་པས། །འགྲོ་ཀུན་མ་རིག་མུན་བསལ་ནས། །ཡེ་ཤེས་སྣང་བ་བསྐྱེད་པར་གྱུར། །ཅེས་བསྒོམས་ལ། ན་མོ་མཉྫ་ཤྲི་ཡེ། ཀུ་མཱ་ར་བྷུ་ཏཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ར་ཛེ། བི་ར་ཛེ། ཤུདྡྷེ། བི་ཤུདྡྷེ། ཤོ་དྷ་ནི། བི་ཤོ་དྷ་ནི། ཨ་མ་ལེ། བི་མ་ལེ། ནིརྨ་ལེ། ཛ་ཡ་བ་ཏི། རུ་རུ་ཙ་ལེ་ཧཱུཾ་ཕ྄ཊ་ཕ྄ཊ་ཕ྄ཊ་སྭཱ་ཧཱ། ཅི་ནུས་བཟླ པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེ་ཡིས་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །ཅེས་བསྔོ་སྨོན་བྱ་སྟེ། སློབ་དཔོན་ཛེ་ཏཱ་རིའི་གདམས་པ་སྙིང་གི་པདྨ་ཁ་འབྱེད་པའི་གདམས་པའོ།། ༈ །།གཟུངས་སྔགས་ཟབ་མོའི་རིགས་བཟླ་བར་འདོད་པས། ཐོག་མར་དེ་བཞིན་གཤེགས་པའི་ཡི་གེ་བརྒྱ་པ་ལ་བརྟེན་ནས་སྡིག་པ་སྦྱོང་བའི་ཆོ་ག་རྒྱས་པར་གཞན་དུ་ཤེས། རྒྱུན་
གྱི་རྣལ་འབྱོར་ལ། སྐྱབས་སེམས་སྔོན་དུ་འགྲོ་བས། མདུན་གྱི་ནམ་མཁར་བཅོམ་ལྡན་འདས་ཐུབ་པ་ཆེན་པོ་ལ་སོགས་པ་སངས་རྒྱས་དང་བྱང་ཆུབ་སེམས་དཔའི་ཚོགས་མངོན་སུམ་བཞིན་དུ་བཞུགས་པ་ལ། གཟུངས་བཟླས་པས་ཐུགས་དམ་གྱི་རྒྱུད་བསྐུལ་ཏེ། གཙུག་ཏོར་དང་སྨིན་མཚམས་ནས་འོད་ཟེར་དཔག་ཏུ་མེད་པ་འཕྲོས། སངས་རྒྱས་ཀྱི་ཞིང་ཐམས་ཅད་སྣང་བར་བྱས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སླར་འདུས་རང་ལ་ཐིམ་པས་སྡིག་སྒྲིབ་ཐམས་ཅད་དག་ཅིང་རྒྱུད་བྱིན་གྱིས་བརླབས་པར་བསམས་ལ། ན་མ་སྦེ་ཡ་དྷཱི་ཀཱ་ནཱཾ། སརྦ་ཏ་ཐཱ་ག་ཏཱ་ནཱཾ། སརྦ་ཏྲ་ཨ་པྲ་ཏི་ཧ་ཏཱ་པཱ་སྟི། དྷརྨ་ཏཱ་བ་ལི་ནཱི། ཨོཾ་ཨོཾ་ཨོཾ་ས་མ་ས་མ་ས་མནྟ་ཏོ་ཨནནྟ་བཱསྟི་ཤཱ་ས་ནི་ཧ་ར་ཧ་ར། སྨ་ར་སྨ་ར་ཎེ། བི་ག་ཏ་རཱ་ག །བུདྡྷ་དྷརྨ་ཏེ། ས་ར་ས་ར། ས་མ་བ་ལ། ཧ་ས་ཧ་ས། ཏྲ་ཡ་ཏྲ་ཡ། ག་ག་ན་མ་ཧཱ་བ་ར་ཎཱ་ལ་ཀྵ་ཎི་ཛཱ་ལ་ཛྭ་ལ་ན་སཱ་ག་རེ་སྭཱ་ཧཱ། ཞེས་བརྒྱ་སྟོང་ཅི་འགྲུབ་བཟླས་མཐར་དགེ་བ་བསྔོ། གྲུབ་ན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་ལ་བསྐོར་བ་བྱ་བཞིན་དུ་བཟླའོ། །དེ་ལྟར་བཟླས་པས་ལས་ཀྱི་སྒྲིབ་པ་ཐམས་ཅད་ཞི་བ་དང་། སྡིག་པ་དང་ལྟུང་བ་ཐམས་ཅད་བྱང་བ་དང་། དམ་ཚིག་དང་སྡོམ་པ་རྣམ་པར་དག་པར་འགྱུར་བ་སོགས་ཕན་ཡོན་མཐའ་ཡས་སོ།། ༈ །།ཚེ་བསོད་རྒྱས་པའི་ཕྱིར་གཙུག་
ཏོར་རྣམ་པར་རྒྱལ་མའི་གཟུངས་བཟླ་བར་འདོད་པས། སྐྱབས་སེམས་བྱ། རང་ཉིད་ཐ་མལ་གསལ་བའི་གནས་སོ་སོར། །ཟླ་དཀྱིལ་སྟེང་དུ་སྤྱི་བོར་ཨོཾ་དཀར་པོ། །མགྲིན་པར་ཨཱདམར་སྙིང་གར་ཧཱུྃ་ནག་པོ། །དཔྲལ་བར་ཏཱཾ་སེར་ལྟེ་བར་ཧྲིདམར་དང་། །བརླ་གཉིས་ཨཾ་ཨ༔ལྗང་གུས་མཚན་པར་གྱུར། །ཨོཾ་ཨཱཧཱུྃ་ཏྲཾ་ཧྲིༀ་ཨརཀྵ་རཀྵ་ཏུ་ནཱཾ། ལན་གསུམ། མདུན་དུ་རྣམ་པར་རྒྱལ་མའི་མཆོད་རྟེན་ནི། །མཚན་ཉིད་ཡོངས་སུ་རྫོགས་པའི་བུམ་ནང་དུ། །གཙུག་ཏོར་རྣམ་པར་རྒྱལ་མ་ལྷ་དགུ་ལ། །སངས་རྒྱས་བྱང་སེམས་ཀུན་གྱིས་བསྐོར་བར་གྱུར། །ཅེས་དམིགས་ལ། ཐལ་མོ་སྦྱར་བའི་མཛུབ་མོ་གཉིས་མཐེ་བོང་གི་རྩེར་སྦྱར་བ་ལེགས་སྦྱིན་གྱི་ཕྱག་རྒྱ་བཅས་གཟུངས་རིང་ཚར་གཅིག་བཟླ། དེ་ནས་ཕྱག་རྒྱ་བཀྲོལ་ཏེ། ཨོཾ་ན་མོ་ཞེས་པའི་ཚེ་ཐལ་མོ་སྦྱར་བས་འདུད་ཚུལ་དང་བཅས་ཉེར་གཅིག་སོགས་ཅི་ནུས་བཟླ། གཟུངས་རིང་མ་ནུས་ན་སྙིང་པོ་སོགས་བཟླས་ཀྱང་རུང་། དེའི་ཚེ་དམིགས་པ་རབ་རང་ལུས་ཀྱི་ཡི་གེ་དང་། བདག་མེད་པའི་དོན་དང་། མདུན་གྱི་ལྷ་དང་། སྔགས་ཀྱི་སྒྲ་རྣམས་ལ་ཡིད་གཏད། འབྲིང་ཡི་གེ་དང་། ཐ་མ་སྒྲ་ལ་དམིགས། སྤྲོ་ན་མཇུག་ཏུ་བསྟོད་གསོལ་སོགས་གང་ནུས་བྱ་ཞིང་དགེ་བ་བསྔོའོ།། ༈ །།ཕ་རོལ་ཏུ་ཕྱིན་པ་དྲུག་གིས་རྒྱུད་ཡོངས་སུ་གང་བར་འདོད་པས་གཙུག་ཏོར་དྲི་མེད་ཀྱི་གཟུངས་བཟླ་
ན། སྐྱབས་སེམས་དང་། མདུན་གྱི་ནམ་མཁར་གཞུ་གང་ཙམ་དུ་ཕྱོགས་དུས་ཀྱི་སངས་རྒྱས་ཐམས་ཅད་མངོན་སུམ་དུ་བཞུགས་པར་གྱུར་པའི་སྤྱན་སྔར། དགའ་ཞིང་གུས་པ་དང་རངས་པའི་ཚུལ་གྱིས་གཟུངས་རིང་ཐུང་གང་རུང་གསལ་དག་སྙན་པའི་ཚུལ་གྱིས་བཟླའོ། །དེ་ལ་གཟུངས་རིང་ནི་གཞན་དུ་ཤེས་ལ། གཟུངས་ཐུང་ནི། ཨོཾ་ན་མ་སྦེ་ཡ་དྷཱི་ཀཱ་ནཱཾ། སརྦ་ཏ་ཐཱ་ག་ཏ་ཧྲི་ད་ཡ། གནྡྷེ་ཛྭ་ལ་ཛྭ་ལ། དྷརྨ་དྷཱ་ཏུ་གནྡྷེ། སཾ་བྷ་ར། མ་མ་ཨཱ་ཡུསཾ་ཤོདྷ་ཡ། མ་མ་སརྦ་པཱ་པཾ། སརྦ་ཏ་ཐཱ་ག་ཏ་ས་མནྟ་ཨུཏྟཱི་ཥ་བི་མ་ལེ་ཤུདྡྷེ། ཧཱུཾ་ཧཱུཾ་ཧཱུཾ་ཧཱུཾ། ཨོཾ་བཾ་སཾ་ཛཾ་སྭཱ་ཧཱ། ཞེས་པའོ། །དེ་ནས་མཐར། དགེ་བ་འདི་ཡིས་སྐྱེ་བོ་ཀུན་སོགས་བསྔོ་སྨོན་གང་ཤེས་བྱ།། ༈ །།ལོངས་སྤྱོད་ཁྱད་པར་འཕགས་པའི་བདེ་བ་མི་ཟད་པ་ཐོབ་པ་སོགས་ཀྱི་ཆེད་དུ་འོད་ཟེར་དྲི་མེད་ཀྱི་གཟུངས་བཟླ་བར་འདོད་ན། སྐྱབས་སེམས་དང་། མདུན་གྱི་ནམ་མཁར་སངས་རྒྱས་བྱང་སེམས་རྣམས། །མངོན་སུམ་བཞུགས་པའི་གཙུག་ཏོར་ནོར་བུའི་འོད། །ཞིང་ཀུན་ཁྱབ་ཅིང་འཕགས་རྣམས་ཐུགས་རྒྱུད་བསྐུལ། །སླར་འདུས་ཐིམ་པས་རྒྱལ་ཀུན་དགྱེས་གྱུར་ཏེ། །ཀ་ལ་པིངྐའི་དབྱངས་ལྟར་རབ་སྙན་པས། །གཟུངས་སྔགས་གསུངས་པའི་རྗེས་སུ་བདག་ཉིད་ཀྱིས། །བཟླས་པས་སྒྲིབ་དག་བྱིན་གྱིས་བརླབས་པར་གྱུར། །ཅེས་བསམས་ལ། ན་མསཏྟཾ་ནཱཾ། སམྱཀཾ་བུདྡྷ་ཀོ་ཊི་ནཾ། པ་རི་ཤུདྡྷེ་
མ་ན་སི། ཨ་སྒྱུ་རྩི་ཏ། པྲ་ཏིཊྛི་ཏཱ་ནཱ་ན། ན་མོ་བྷ་ག་ཝ་ཏེ། ཨ་མྲྀ་ཏ་ཨཱ་ཡུ་ཥ་སྱ། ཏ་ཐཱ་ག་ཏ་སྱ། ཨོཾ་སརྦ་ཏ་ཐཱ་ག་ཏ་ཤུདྡྷེ། ཨཱ་ཡུར་བི་ཤོ་དྷ་ནེ། སཾ་ཧ་ར་སཾ་ཧ་ར། སརྦ་ཏ་ཐཱ་ག་བཱིརླ་བ་ལེ་ན་པྲ་ཏི་སཾ་ཧ་ར། ཨཱ་ཡུསཱ་ར་སཱ་ར། སརྦ་ཏ་ཐཱ་ག་ཏ་ས་ཏཱ་ས་མ་ཡ། བོ་དྷི་བོ་དྷི། བུདྡྷ་བུ་དྨ། བོ་དྷ་ཡ་བོ་དྷ་ཡ། མ་མ་སརྦ་པཱ་པཾ་ཨཱ་ཝ་ར་ཎ་བི་ཤུདྡྷེ། བི་ག་ཏ་མ་ལེ། ཚ་ར་སུ་བུདྡྷེ་བུདྡྷེ། ཧུ་རུ་ཧུ་རུ་སྭཱ་ཧཱ། ཞེས་པ་རྩ་བའི་སྔགས་དང་། ཨོཾ་སརྦ་ཏ་ཐཱ་ག་ཏ་མཱ་ལ་བི་ཤོ་དྷ་ནི། རུ་དྷ་བ་ལེ། པྲ་ཏི་སཾ་སྐུ་ར། ཏ་ཐཱ་ག་ཏ་དྷ་ཏུ་དྷ་རེ། དྷ་ར་དྷ་ར། སན་ར་སན་ར། སརྦ་ཏ་ཐཱ་ག་ཏ་ཨ་དྷིཥྛ་ན་ཨ་དྷི་ཊྛི་ཏེ་སྭཱ་ཧཱ། ཞེས་པ་སྙིང་པོའི་སྔགས་ཏེ་ཅི་ནུས་བཟླས་མཐར། བསྔོ་སྨོན་བྱའོ། ༈ །བར་དུ་གཅོད་པ་དང་འཇིགས་པ་ཐམས་ཅད་བསྲུང་བར་འདོད་པས་རྗེ་བཙུན་སྒྲོལ་མའི་བསྟོད་སྒྲུབ་ཉམས་སུ་བླང་ཚུལ་མདོར་བསྡུས་པ་ནི། སྲོད་དང་ཐོ་རངས་སོགས་ཀྱི་དུས་སུ་སྐྱབས་སེམས་སྔོན་དུ་འགྲོ་བས། མདུན་མཁར་ཡིད་འཕྲོག་མཆོད་སྤྲིན་དབུས། །རྩ་བའི་བླ་མ་རྗེ་བཙུན་མ། །ལྗང་གསལ་ཕྱག་གཡས་མཆོག་སྦྱིན་དང་། །གཡོན་པས་སྐྱབས་སྦྱིན་ཨུཏྤལ་བསྣམས། །ཞི་འཛུམ་དར་དང་རིན་ཆེན་བརྒྱན། །འོད་དཔག་མེད་པའི་ཅོད་པན་ཅན། །གཡས་བརྐྱང་རོལ་པས་པད་ཟླར་བཞུགས། །མཐའ་སྐོར་སྒྲོལ་མ་ཉེར་གཅིག་དང་། །སྐྱབས་།
གནས་རྒྱ་མཚོའི་ཚོགས་ཀྱིས་བསྐོར། །བདག་དང་མཐའ་ཡས་སེམས་ཅན་ལ། །དགྱེས་པའི་ཚུལ་གྱིས་བཞུགས་པར་གྱུར། །ཅེས་གསལ་བཏབ་ལ་དངོས་སམ་ཡིད་ཀྱིས་ཡན་ལག་བདུན་པ་དབུལ། ཚོགས་ཞིང་རྣམས་ཀྱི་ཐུགས་ཀ་ནས། །འོད་འཕྲོས་རང་གི་གནས་གསུམ་ཐིམ། །སྒོ་གསུམ་སྡིག་སྒྲིབ་བག་ཆགས་སྦྱངས། །སྐུ་གསུང་ཐུགས་སུ་བྱིན་རླབས་གྱུར། །ཅེས་དམིགས་ལ་དད་མོས་ཤུགས་དྲག་པོས་ཕྱག་འཚལ་ཉེར་གཅིག་གསུམ་མམ། བདུན་ནམ། ཉེར་གཅིག་སོགས་གདོན། མདུན་གྱི་འཕགས་མ་དང་རང་ཐ་མི་དད་པ་སྟོང་པ་རྟེན་འབྱུང་དབྱེར་མེད་པའི་དོན་ལ་བློ་བཞག །དེ་ནས་ཕན་ཡོན་དང་། གཏང་རག་གི་ཚུལ་དུ་ཡན་ལག་བདུན་པ་དང་། སྔགས་བཟླ་བ་དང་། འདོད་དོན་གསོལ་གདབ་སོགས་ཇི་ལྟར་རིགས་པ་བྱ། མཐར་ནི་མདུན་གྱི་ཚོགས་ཞིང་རྣམས། །འོད་ཞུ་དབུས་ཀྱི་འཕགས་མར་ཐིམ། །དེ་ཉིད་རང་ཐིམ་རང་ལུས་ཀྱང་། །འོད་གསལ་སྟོང་པའི་དབྱིངས་སུ་ཐིམ། །ཞེས་བརྗོད་ཅིང་བསམས་ལ་མཉམ་པར་བཞག །དེ་ལས་ལྡང་བ་ན། བདག་གི་དགེ་བའི་རྩ་བ་འདི་ཡིས་ནི། །འགྲོ་ལ་ཕན་ཕྱིར་སངས་རྒྱས་མྱུར་ཐོབ་ཤོག །སེམས་ཅན་སྡུག་བསྔལ་རྒྱ་མཚོར་བྱིང་བ་རྣམས། །མྱུར་དུ་བྱང་ཆུབ་མཆོག་ལ་འགོད་གྱུར་ཅིག །ཅེས་བསྔོ་སྨོན་བྱའོ། །གཞན་ཡང་ཕྱག་རྒྱའི་མདོ་ལྔ་སོགས་ཟབ་མོའི་མདོ་དང་
གཟུངས་སྔགས་བྱིན་རླབས་ཅན་ཅི་ནུས་སུ་བཀླག། ༈ །ཐུན་མཚམས་སྤྱོད་ལམ་གྱི་གནས་སྐབས་ཐམས་ཅད་དུ་དྲན་དང་ཤེས་བཞིན་ལྡན་པས་དངོས་གཞིའི་ཉམས་ལེན་གང་ལ་གནད་དུ་བསྣུན་པའི་ཉམས་མྱོང་གི་རྩི་དང་མ་བྲལ་བར་དགེ་བའི་བྱ་བ་ལ་གནད་དུ་བསྣུན། ཁྱད་པར་མདོ་སྡེ་རྒྱན་ལས། རྒྱལ་སྲས་སྤྱོད་ཚེ་ཇི་ལྟ་ཇི་ལྟ་བུར། །དབང་པོའི་སྤྱོད་ཡུལ་སྣ་ཚོགས་འཇུག་གྱུར་པ། །དེ་ལྟ་དེ་ལྟ་རིགས་ཤིང་མཐུན་ཚིག་གིས། །སེམས་ཅན་ཕན་ཕྱིར་དེ་མངོན་འདུ་བྱེད་དོ། །ཞེས་གསུངས་པ་ལྟར། སྤྱོད་ཡུལ་ཡོངས་སུ་དག་པའི་མདོ་ལས་འབྱུང་བའི་ལམ་ཁྱེར་རྒྱལ་སྲས་ལམ་བཟང་ལས། བྱང་ཆུབ་སེམས་དཔའ་ཁྱིམ་གྱི་ནང་དུ་འདུག་པའི་ཚེ། ཐར་པ་ཆེན་པོའི་གྲོང་ཁྱེར་ཐོབ་པར་གྱུར་ཅིག །ཅེས་སེམས་བསྐྱེད་དོ། །དེ་བཞིན་དུ་སྦྱར་ཏེ། ཉལ་བའི་ཚེ་སངས་རྒྱས་ཀྱི་ཆོས་ཀྱི་སྐུ་ཐོབ་པར་གྱུར་ཅིག །རྨི་ལམ་བྱུང་ན་ཆོས་ཐམས་ཅད་རྨི་ལམ་ལྟ་བུར་རྟོགས་པར་གྱུར་ཅིག །གཉིད་སད་པའི་ཚེ་མ་རིག་པ་ལས་སད་པར། ལྡང་བའི་ཚེ་སངས་རྒྱས་ཀྱི་གཟུགས་ཀྱི་སྐུ་ཐོབ་པར། གོས་གྱོན་པ་ན་ངོ་ཚ་དང་ཁྲེལ་ཡོད་ཀྱི་གོས་གྱོན་པར། སྐ་རགས་འཆིང་བའི་ཚེ་དགེ་བའི་རྩ་བ་དང་འབྲེལ་པར། སྟན་ལ་འདུག་པའི་ཚེ་བྱང་ཆུབ་ཀྱི་སྙིང་པོ་རྡོ་རྗེའི་གདན་ཐོབ་པར། རྒྱབ་བརྟེན་པའི་ཚེ་བྱང་ཆུབ་ཀྱི་ཤིང་ཐོབ་པར། །མེ་གཏོང་བའི་ཚེ་ཉོན་
མོངས་པའི་བུད་ཤིང་སྲེག་པར། འབར་བའི་ཚེ་ཡེ་ཤེས་ཀྱི་མེ་འབར་བར། གཡོས་ཟིན་པའི་ཚེ་ཡེ་ཤེས་ཀྱི་བདུད་རྩི་ཐོབ་པར། ཟས་ཟ་བའི་ཚེ་བསམ་གཏན་གྱི་ཟས་ཐོབ་པར། ཕྱི་རོལ་དུ་འགྲོ་བའི་ཚེ་འཁོར་བའི་གྲོང་ཁྱེར་ལས་ཐར་པར། སྐས་ལས་འབབ་པའི་ཚེ་སེམས་ཅན་གྱི་དོན་དུ་འཁོར་བར་འཇུག་པར། སྒོ་འབྱེད་པའི་ཚེ་ཐར་པའི་གྲོང་ཁྱེར་གྱི་སྒོ་འབྱེད་པར། སྒོ་གཅོད་པའི་ཚེ་ངན་སོང་གསུམ་གྱི་སྒོ་གཅོད་པར། ལམ་དུ་འཇུག་པའི་ཚེ་འཕགས་པའི་ལམ་དུ་འཇུག་པར། གྱེན་ལ་འགྲོ་བའི་ཚེ་སེམས་ཅན་ཐམས་ཅད་མཐོ་རིས་ཀྱི་བདེ་བ་ལ་འགོད་པར། ཐུར་ལ་འབབ་པའི་ཚེ་ངན་སོང་གསུམ་རྒྱུན་གཅོད་པར། །སེམས་ཅན་དང་ཕྲད་པའི་ཚེ་རྫོགས་པའི་སངས་རྒྱས་དང་མཇལ་བར། རྐང་པ་འཇོག་པའི་ཚེ་སེམས་ཅན་གྱི་དོན་ལ་རྟོན་པར། རྐང་པ་འདེགས་པའི་ཚེ་སེམས་ཅན་ཐམས་ཅད་འཁོར་བ་ལས་གདོན་པར། རྒྱན་འོ དང་ལྡན་པར་མཐོང་ན་མཚན་དང་དཔེ་བྱད་ཀྱི་རྒྱན་ཐོབ་པར། རྒྱན་མེད་པ་མཐོང་ན་སྦྱངས་པའི་ཡོན་ཏན་དང་ལྡན་པར། སྣོད་གང་བ་མཐོང་ན་ཡོན་ཏན་གྱིས་གང་བར། སྟོངས་པ་མཐོང་ན་སྐྱོན་གྱིས་སྟོངས་པར། སེམས་ཅན་དགའ་བ་མང་བ་མཐོང་ན་ཆོས་ལ་དགའ་བར། མི་དགའ་བ་མཐོང་ན་འདུས་བྱས་ཀྱི་དངོས་པོ་ཐམས་ཅད་ལ་མི་དགའ་བར། སེམས་ཅན་བདེ་བ་མཐོང་ན་སངས་རྒྱས་ཀྱི་བདེ་བའི་ཡོ་བྱད་
ཐོབ་པར། སེམས་ཅན་སྡུག་བསྔལ་བ་མཐོང་ན་སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱེད་པར། ནད་པ་མཐོང་ན་སེམས་ཅན་ཐམས་ཅད་ནད་ལས་གྲོལ་བར། སེམས་ཅན་ཡིད་དུ་འོང་བ་མཐོང་ན་སེམས་ཅན་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཡིད་དུ་འོང་བ་ཐོབ་པར། གཟུགས་མི་སྡུག་པར་མཐོང་ན་སེམས་ཅན་ཐམས་ཅད་མི་དགེ་བའི་བཤེས་གཉེན་ལ་མི་མོས་པར། དྲིན་དུ་གཟོ་བ་མཐོང་ན་སངས་རྒྱས་དང་བྱང་ཆུབ་སེམས་དཔལ་ལ་དྲིན་ལན་ལྡོན་པར། དྲིན་མི་གཟོ་བ་མཐོང་ན་ལྟ་བ་ལོག་པ་ལ་དྲིན་མི་གཟོ་བར། རབ་ཏུ་བྱུང་བ་མཐོང་ན་འཕགས་པའི་ཆོས་ལ་འཇུག་པར། ༈ །དཀའ་བ་སྤྱོད་པ་མཐོང་ན་དམ་པའི་ཆོས་ལ་དཀའ་བ་སྤྱོད་ནུས་པར། གོ་ཆ་གྱོན་པ་མཐོང་ན་དམ་པའི་ཆོས་ཚོལ་བ་ལ་གོ་ཆ་གྱོན་པར། གོ་ཆ་མ་གྱོན་པ་མཐོང་ན་མི་དགེ་བའི་ལས་ལ་གོ་ཆ་མི་གྱོན་པར། རྒོལ་བའི་སེམས་ཅན་མཐོང་ན་ཕས་ཀྱི་རྒོལ་བ་ཐམས་ཅད་ཚར་གཅོད་པར། སེམས་ཅན་བསྟོད་པ་མཐོང་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བསྟོད་པར། གྲོང་ཁྱེར་མཐོང་ན་ཐར་པའི་གྲོང་ཁྱེར་མཐོང་བར། ནགས་ཚལ་མཐོང་ན་ལྷ་དང་བཅས་པའི་བསྟི་གནས་སུ། ཆོས་སྟོན་པ་ན་སངས་རྒྱས་ཀྱི་ཆོས་ལ་སྤོབས་པ་ཟད་མི་ཤེས་པར། ཆུ་ལས་བརྒལ་བའི་ཚེ་འཁོར་བའི་རྒྱ་མཚོ་ལས་
བརྒལ་བར། ཁྲུས་བྱེད་པའི་ཚེ་ལུས་དང་སེམས་དྲི་མ་མེད་པར། ཚད་པ་ཚ་བའི་ཚེ་ཉོན་མོངས་པའི་གདུང་བ་བསིལ་བར། གྲང་བའི་ཚེ་མྱ་ངན་ལས་འདས་པའི་བསིལ་བ་ཐོབ་པར། ཆོས་ཀྱི་གཏམ་བྱེད་པའི་ཚེ་སངས་རྒྱས་ཀྱི་ཆོས་ཐམས་ཅད་ཐོབ་པར། སངས་རྒྱས་ཀྱི་སྐུ་མཐོང་བའི་ཚེ་སངས་རྒྱས་ཐམས་ཅད་ལྟ་བ་ལ་སྒྲིབ་པ་མེད་པའི་མིག་ཐོབ་པར། མཆོད་རྟེན་མཐོང་བའི་ཚེ་འགྲོ་བ་ཐམས་ཅད་ཀྱི་མཆོད་པའི་རྟེན་དུ། བལྟ་བའི་ཚེ་ལྷ་དང་བཅས་པའི་སེམས་ཅན་ཐམས་ཅད་ཀྱིས་བལྟ་བའི་འོས་སུ། ཕྱག་འཚལ་བའི་ཚེ་ལྷ་དང་བཅས་པའི་འཇིག་རྟེན་གྱིས་སྤྱི་གཙུག་བལྟར་མི་མཐོང་བ་ཐོབ་པར། སྐོར་བ་བྱེད་པའི་ཚེ་ཐམས་ཅད་མཁྱེན་པའི་དོན་དང་མཐུན་པ་ཐོབ་པར། སངས་རྒྱས་ཀྱི་ཡོན་ཏན་བརྗོད་པའི་ཚེ་ཡོན་ཏན་ཟད་མི་ཤེས་པའི་ཕ་རོལ་ཏུ་ཕྱིན་པར་གྱུར་ཅིག་ཅེས་སེམས་བསྐྱེད་དོ། །དེ་བཞིན་དུ་རུང་མཐུན་བརྩིས་ལ། ཚོང་བྱེད་པ་མཐོང་ན་འཕགས་པའི་ནོར་བདུན་ཐོབ་པར། ཞིང་ལ་ཆུ་ལུད་འགྲེམས་པའི་ཚེ་བྱང་ཆུབ་ཀྱི་སེམས་ཀྱི་ལོ་ཏོག་རྒྱས་པར། ས་བོན་འདེབས་པའི་དུས་སུ་སེམས་ཅན་ཐམས་ཅད་ལ་བྱང་ཆུབ་ཀྱི་སེམས་ཀྱི་ས་བོན་ཐེབས་པར། གླང་དོར་དུ་བསྡེབ་པའི་དུས་སུ་ཐབས་དང་ཤེས་རབ་ཟུང་དུ་འབྲེལ་བར་རྨོས་བྱེད་པའི་ཚེ་ཉོན་མོངས་པའི་ཐ་བ་རློག་པར། ཡུར་མ་འདོན་པའི་ཚེ་ཉོན་མོངས་པའི་ཡུར་མ་འདོན་པར།
བཙས་མ་བརྔ་བའི་དུས་སུ་ཡེ་ཤེས་ཀྱི་ལོ་ཏོག་སྡུད་པར། གཡུལ་བྱེད་པའི་དུས་སུ་སྒྲིབ་པ་བག་ཆགས་དང་བཅས་པ་འདོན་པར། ནས་འཁྲུ་བའི་ཚེ་རྫོགས་པའི་སངས་རྒྱས་ཀྱི་འབྲས་བུ་ཐོབ་པར། སྐས་ལ་འཛེག་པའི་ཚེ་ས་བཅུ་རིམ་གྱིས་མཐར་ཕྱིན་པར། ཁང་པར་སླེབ་པའི་དུས་སུ་རྫོགས་པའི་སངས་རྒྱས་ཀྱི་སར་ཕྱིན་པར་གྱུར་ཅིག །ཅེས་བྱ་བ་ལ་སོགས་པ་བྱ་བ་ཅི་བྱེད་པ་ཐམས་ཅད་དེ་དང་ཆ་མཐུན་པར་ཁ་བསྒྱུར་ཤེས་པར་བྱའོ། །འདི་དག་ནི་བློ་དམན་པ་རྣམས་ཀྱིས་གཟུང་སླ་བའི་ཕྱིར་བསྟན་པ་ཡིན་ནོ། །རྒྱས་པར་ནི་སྤྱོད་ཡུལ་ཡོངས་སུ་དག་པ་ཉིད་དུ་བལྟ་བར་བྱའོ། །འདི་ནི་བྱང་ཆུབ་སེམས་དཔའི་སེམས་ཀྱི་ལས་ཡིད་ལ་བྱེད་པའི་སྦྱོར་བ་ཞེས་པ་སྟེ། འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན། ཞེས་པའི་གདམས་ངག་ཡིན་ནོ། །ཞེས་གསུངས་སོ། །གཞན་ཡང་གཞུང་དེ་ཉིད་ལས། ཆོས་བཞིན་དུ་སྒྲུབ་པ་ལ་གཉིས་ཏེ། སྤྱིར་སྡེ་སྣོད་དང་མཐུན་པར་བྱ་བ་དང་། བྱེ་བྲག་ཏུ་འཕྲལ་གྱི་སྤྱོད་པ་ཇི་ལྟར་བསྒྲུབ་པའོ། །དང་པོ་ནི། སྤྱོད་པ་འདུལ་བ་དང་མཐུན། སྒོམ་པ་མདོ་སྡེ་དང་མཐུན། བཤད་པ་མངོན་པ་དང་མཐུན། གསང་སྔགས་རྒྱུད་སྡེ་དང་མཐུན་པ་ཅིག་དགོས། དེང་སང་བོད་འདི་ན་སྡེ་སྣོད་གསུམ་དང་མི་མཐུན། རྒྱུད་སྡེ་བཞི་དང་འགལ་བའི་ཆོས་པ་ངོ་མཚར་ཅན་དུ་བྱེད་པ་མང་པོ་
འདུག་སྟེ། ངས་ཅི་ཡིན་མ་ཤེས་སོ། །གཉིས་པ་བྱེ་བྲག་ཏུ་འཕྲལ་གྱི་སྤྱོད་པ་ཇི་ལྟར་བསྒྲུབ་པ་ནི། འདུག་པའི་ཚེ་དཀོན་མཆོག་གསུམ་ལ་བརྟེན་པར་བསམ། འགྲོ་བའི་ཚེ་སྤྱིར་དཀོན་མཆོག་གསུམ། ཁྱད་པར་དུ་གར་འགྲོ་བའི་ཕྱོགས་ཀྱི་དཀོན་མཆོག་གསུམ་ལ་སྐྱབས་འགྲོ་བྱེད་ཅིང་འགྲོ་སྟེ། དབུས་ན་སངས་རྒྱས་རྣམ་པར་སྣང་མཛད། ཤར་ཕྱོགས་ན་མི་འཁྲུགས་པ། ལྷོ་ཕྱོགས་ན་རིན་ཆེན་འབྱུང་ལྡན། ནུབ་ཕྱོགས་ན་སྣང་བ་མཐའ་ཡས། བྱང་ཕྱོགས་ན་དོན་ཡོད་གྲུབ་པ་བཞུགས་པ་རྣམས་ལ་གསོལ་བ་འདེབས་ཤིང་ཕྱིན་པས་གནས་སྐབས་ཀྱི་བར་ཆད་ཞི། བསམ་པ་འགྲུབ། མཐར་ཐུག་སངས་རྒྱས་རྣམས་དང་མཇལ་བ་འཐོབ་བོ། །ཞེས་སོགས་འབྱུང་ངོ་། ༈ །སྲོད་ཀྱི་དུས་སུ་བབ་པ་ན། ཀྱེ་རྡོ་རྗེ་བརྟག་པ་གཉིས་པའི་རྒྱུད་ལས། བགེགས་དང་ལོག་པར་འདྲེན་པ་ལས། །སེམས་ཅན་རྣམས་ཀྱི་སྲོག་བསྲུང་ཕྱིར། །རྡོ་རྗེ་འཛིན་པས་གཏོར་མ་བསྟན། །ཞེས་སོགས་རྒྱུད་སྡེ་རྣམས་ལས་རྒྱ་ཆེར་གསུངས་པ་ལྟར། བར་ཆད་སྲུང་བ་དང་། འགལ་རྐྱེན་ཞི་བ་དང་། དངོས་གྲུབ་དང་ཕྲིན་ལས་མྱུར་དུ་འགྲུབ་པའི་ཕྱིར་རྣལ་འབྱོར་བླ་མེད་ཀྱི་ལྷག་པའི་ལྷ་གང་ཡང་རུང་བའི་བདག་བསྐྱེད་དང་བཅས་ཡི་དམ་དང་ཆོས་སྲུང་གི་གཏོར་བསྔོ་སྐོང་བཤགས་སོགས་རྒྱས་བསྡུས་གང་རུང་རང་རང་གི་གཞུང་ལས་འབྱུང་བ་ལྟར་བྱ་བ་ཡིན་ལ། འདིར་
གྲུབ་ཆེན་མི་ཏྲ་ཛོ་ཀིའི་མན་ངག་ལས་བྱུང་བའི་བླ་མེད་ཀྱི་དཀྱིལ་འཁོར་གཙོ་བསྡུས་ལ་གཏོར་མ་འབུལ་བའི་ཚུལ་ཤིན་ཏུ་བསྡུས་པ་ནི། ཤ་ཆང་གི་དམ་རྫས་དང་བཅས་པའི་གཏོར་མ་ཆང་ཆུ་ནང་མཆོད་ཀྱིས་བྲན་ལ། ཨོཾ་ཨཱབིགྷཱནྟ་ཀྲྀཏ་ཧཱུྃ་ཕཊ་ཀྱིས་བསང་། ཤུནྱ་ཏཱས་སྦྱང་། སྟོང་པའི་ངང་ལས་རླུང་མེའི་སྟེང་དུ་ཀ་པཱ་ལ་པདྨ་ཨཱས་མཚན་པ་དང་བཅས་པའི་ནང་དུ་གོ་ཀུ་ད་ཧ་ན་ལས་ཤ་ལྔ་དང་། བི་ར་ཤུ་མ་མུ་ལས་བདུད་རྩི་ལྔ་རྣམས་ཨོཾ་ཡིག་གིས་མཚན་པ། དེའི་སྟེང་དུ་ཟླ་བ་ལ་ཧཱུཾ་ལས་རྡོ་རྗེ་ཧཱུྃ་གིས་མཚན་པའི་འོད་ཀྱིས་རླུང་གཡོས། མེ་སྦར། རྫས་རྣམས་བསྐོལ། རྡོ་རྗེ་ཧཱུྃ་དང་བཅས་པ་བབས་པས་མ་དག་པའི་དྲི་མ་སྦྱངས། པདྨ་ཨཱདང་བཅས་པའི་འོད་ཟེར་གྱིས་ཉི་མའི་མདོག་ཅན་གྱི་བདུད་རྩིའི་རང་བཞིན་དུ་རྟོགས་པར་བྱས། ཨོཾ་གྱི་འོད་ཟེར་གྱིས་ཕྱོགས་བཅུའི་སངས་རྒྱས་ཀུན་གྱི་ཡེ་ཤེས་ཀྱི་བདུད་རྩི་སྤྱན་དྲངས་ནས་བསྣན་པས་དཔག་ཏུ་མེད་པར་སྤེལ་ཞིང་སྦྱར་བར་གྱུར། ཨོཾ་ཨཱཧཱུྃ་མང་དུ་བརྗོད་པས་བརླབ། སྟོང་པའི་ངང་ལས་མདུན་གྱི་ནམ་མཁར་པོ་ལས་པདྨ་འདབ་མ་བརྒྱད་པའི་ལྟེ་བ་དང་འདབ་མ་རྣམས་ལ་ཉི་མའི་གདན་རེ་རེའི་སྟེང་དུ་དབུས་སུ་དཔལ་གསང་བ་འདུས་པ་མི་བསྐྱོད་རྡོ་རྗེ་མཐིང་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེ་འཁོར་ལོ་པདྨ། གཡོན་པ་རྣམས་ཀྱིས་དྲིལ་བུ་རིན་
ཆེན་རལ་གྲི་འཛིན་པ། རང་འདྲའི་ཡུམ་རེག་བྱ་རྡོ་རྗེ་མ་དང་མཉམ་པར་སྦྱོར་བ། གཉིས་ཀའང་དར་དང་རིན་པོ་ཆེའི་རྒྱན་གྱིས་བརྒྱན་ཅིང་། ཞབས་གཉིས་རྡོ་རྗེ་དང་། པདྨའི་སྐྱིལ་མོ་ཀྲུང་གིས་བཞུགས་པའི་ཤར་དུ་ཀྱེ་རྡོ་རྗེ། ལྷོར་དུས་ཀྱི་འཁོར་ལོ། ནུབ་ཏུ་བདེ་མཆོག །བྱང་དུ་མ་ཧཱ་མཱ་ཡཱ། ཤར་ལྷོར་གཤིན་རྗེ་གཤེད་དགྲ་ནག་པོ། ལྷོ་ནུབ་ཏུ་རྡོ་རྗེ་འཇིགས་མཛད། ནུབ་བྱང་དུ་སྤྱན་རས་གཟིགས་རྒྱལ་བ་རྒྱ་མཚོ། བྱང་ཤར་དུ་དཔལ་ཕྱག་ན་རྡོ་རྗེ་རྣམས་སྐད་ཅིག་གིས་གསལ་བའི་སྤྱི་བོར་ཨོཾ་དཀར་པོ། མགྲིན་པར་ཨཱདམར་པོ། ཐུགས་ཀར་ཧཱུཾ་སྔོན་པོ། དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་པ་ཨོཾ་བཛྲ་ས་མཱ་ཛ༔ ཛཧཱུྃ་བཾ་ཧོ༔ དམ་ཚིག་པ་དང་དབྱེར་མེད་དུ་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས། དེ་བཞིན་གཤེགས་པ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛ༔ དེ་བཞིན་གཤེགས་པ་རྣམས་ཀྱིས་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས་རིགས་ལྔ་ཡབ་ཡུམ་གྱིས་བྱང་ཆུབ་སེམས་ཀྱི་བདུད་རྩིས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་བླ་མ་དང་གཉིས་སུ་མེད་པའི་སོ་སོའི་རིགས་ཀྱི་བདག་པོས་དབུར་བརྒྱན་པར་གྱུར་པར་བསམ། དེ་ནས་ཐུགས་རྒྱུད་བསྐུལ་བར་དམིགས་ཏེ། ཨོ་ཨཱབཛྲ་དྷིཀ་ཧཱུཾ་ཧཱུཾ། ཨོ་དེ་ཝ་པི་ཙུ་བཛྲ་ཧཱུཾ་ཧཱུཾ་ཧཱུཾ་
ཕཊ་སྭཱ་ཧཱ། ༀ་ཤྲཱི་ཀ་ལ་ཙཀྲ་ཧཱུྃ་མྲྀ་ཕྲཊ་སྭཱ་ཧཱ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱ་ཀི་ནཱི་ཛཱ་ལ་སམྦྷ་རཾ་སྭཱ་ཧཱ། ཨོ་ཨཱཛཱཧཱིཧཱུཾ། ཨོ་ཧཱིཊྚཝིཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོ་ཧྲིཝིཀྲྀ་ཏ་ན་ན་ཧཱུཾ་ཕཊ། ཨོཾ་ཨཱཿཧཱུྃ་ཧི༔ ཨོཾ་མ་ཎི་པདྨེ་ཧཱུྃ། དྷ་མ་གྷ་ཡེ་ཧ་རི་ནི་ས་ར་ཙ་ཧཱིཡ་སྭཱ་ཧཱ། ཨོཾ་ནི་ལམྦ་ར་དྷ་ར་བཛྲ་པཱ་ཎི་ཧྲི་ད་ཡ་མ་ཧཱ་ཀྲོ་དྷ་ས་ཏྭ་ཧཱུྃ་ཕཊ། ཅེས་སོ་སོའི་སྙིང་པོ་ཅི་ནུས་བཟླས་མཐར་གཏོར་མ་འབུལ་བ་ནི། ལྷ་རྣམས་ཀྱི་ལྗགས་རྡོ་རྗེ་རྩེ་ལྔ་པ་ཨོཾ་གྱིས་མཚན་པའི་འོད་ཀྱིས་གཏོར་མ་དྲངས་ནས་གསོལ་བས་མཉེས་པར་གྱུར་པར་བསམས་ལ། ཨོཾ་ཨཱགུ་རུ་བཛྲ་དྷཱ་ར་ཧཱུྃ་ཧཱུྃ་དང་། གོང་གི་སྔགས་དེ་རྣམས་ཀྱི་མཐར་ཨོ་ཨཱཧཱུྃ་ཞེས་བཏགས་པས་བླ་མ་དང་ཡི་དམ་ལ་དབུལ། ཨོཾ་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨབྷྲཱུྃ་ནས། ཤབྡ་པྲ་ཏཱིཙྪ་ཨཱཿཧཱུྃ་གི་བར་གྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་དབུལ། །གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱངས་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །
ཞེས་བསྟོད། བཅོམ་ལྡན་འཁོར་དང་བཅས་པ་རྣམས། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་འདོད་དོན་གསོལ། དེ་ནས་རང་གི་ཆོས་སྐྱོང་སོ་སོར་དབུལ། སྤྱི་ཙམ་དུ། རང་གི་སྙིང་ག་ནས་འོད་ཟེར་འཕྲོས་པས་དཔལ་རྡོ་རྗེ་ནག་པོ་ཆེན་པོ་ལ་སོགས་པ་བསྟན་པ་སྲུང་བའི་དམ་ཅན་རྒྱ་མཚོའི་ཚོགས་ཐམས་ཅད་ཨོཾ་བཛྲ་ས་མཱ་ཛས་སྤྲིན་གཏིབས་པ་ལྟར་བྱོན་ནས་གཏོར་མ་གསོལ་བར་བསམས་ལ། ཨོཾ་ཤི་བཛྲ་དྷརྨ་པཱ་ལ་ས་པ་རི་ཝ་ར་ན་མ་སྶརྦ་ཏ་ཐཱ་ག་ཏེ་བྷོ་བི་ཤྭ་སོགས། ལན་གསུམ་གྱིས་གཏོར་མ་དང་། ཨོ་བཛྲ་ཨགྷཾ་སོགས་ཀྱིས་ཕྱི་མཆོད། ཨོཾ་ཨཱཿཧཱུྃ་གིས་ནང་མཆོད་རྣམས་དབུལ། རྫུ་འཕྲུལ་སྟོབས་དང་མངོན་པར་ཤེས་པའི་དཔལ། །ཉེ་བར་ཐོབ་ནས་ཐུབ་པའི་བཀའ་བཞིན་དུ། །བསྟན་པ་རིན་ཆེན་བང་མཛོད་ལེགས་སྐྱོང་བའི། །རྡོ་རྗེའི་ཆོས་སྲུང་རྣམས་ལ་ཕྱག་འཚལ་ལོ། །ཞེས་བསྟོད། དམ་ཅན་རྒྱ་མཚོའི་ཚོགས་རྣམས་ཀྱིས། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་ཕྲིན་ལས་གསོལ། ཐུན་མོང་དུ་ཕ་རྒྱུད་ཀྱི་ཕྱོགས་སྐྱོང་གཏོར་མ་ཤིན་ཏུ་བསྡུས་པ་ནི། གཏོར་སྣོད་ཀྱི་མཐར་ཕྱོགས་སྐྱོང་བཅུ་སྲིད་པ་གསུམ་གྱི་འབྱུང་པོའི་ཚོགས་དཔག་ཏུ་མེད་པས་བསྐོར་བ་འཁོད་པ་རྣམས་སྐད་ཅིག་གིས་འོད་གསལ་དུ་ཞུགས་པ་ལས་དཔལ་གསང་བ་འདུས་པའི་སྐུར་གྱུར། དེ་རྣམས་ཀྱི་ལྗགས་རྡོ་རྗེ་རྩེ་ལྔ་ཨོཾ་གྱིས་མཚན་པའི་
འོད་ཟེར་གྱིས་གཏོར་མ་དྲངས་ནས་གསོལ་བར་བསམས་ལ། ཨོཾ་ད་ཤ་དིཀ་ལོ་ཀ་པཱ་ལ་སརྦ་བྷཱུ་ཏ་ས་པ་རི་ཝཱ་རེ་བྷོ། བ་ལི་ཏཱ་པ་ཡཱ་མི་གྲི་ཧཱི་ཏཱ། སུ་ཁ་སོ་མ་ན་སྱ་ལ་བྷི་ནོ་བྷ་བནྟུ། སྠཱ་ནཾ་ཙ་ནི་རུ་པ་། །དྲ་པཾ་ཀུརྦནྟུ། སརྦ་བུདྡྷ་ཨ་དྷི་ཥྛ་ནེན། ཨོཾ་ཨཱ༔ཧཱུྃ་ཨི་དཾ་ཨ་མྲྀ་ཏ། པིཎྜ་བྷུཀྟ། མ་མ་ས་པ་རི་ཝཱ་ར་སྱ། ཤཱནྟཾ་ཀུཆནྟ་སྭསྟི་སྭཱ་ཧཱ། ཞེས་ལན་གསུམ་གྱིས་གཏོར་མ་དང་། ཨོ་བཛྲ་ཨབྷྲཱུྃ་སོགས་ཀྱིས་ཕྱི་མཆོད། ཨོཾ་ཨཱ༔ཧཱུྃ་གིས་ནང་མཆོད་རྣམས་དབུལ། འབྱུང་པོའི་བདག་པོ་འཁོར་བཅས་རྣམས། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་ཕྲིན་ལས་གསོལ། མ་རྒྱུད་ཀྱི་མཁའ་འགྲོ་སྤྱི་གཏོར་བསྡུས་པ་ནི། ཕོ། ཨོ་བཛྲ་ཨཱ་རལླི་ཧོ་ཛཧཱུྃ་བཾ་ཧོ༔ བཛྲ་ཌཱ་ཀི་ནྱས་མ་ཡ་་དྲི་ཤྱ་ཧོ༔ ཞེས་དང་། སྙིང་གའི་ཧཱུྃ་གི་འོད་ཟེར་གྱིས་ཛམྦུའི་གླིང་ན་གདོད་ནས་གྲུབ་པའི་དུར་ཁྲོད་བརྒྱད་མདུན་གྱི་ནམ་མཁར་བྱོན་པར་བསམས་ལ། ཨོ་ཁ་ཁ། ཁཱ་ཧི་ཁཱ་ཧི། སརྦ་ཡཀྵ། རཱཀྵ་ས། བྷ་ཏ། པྲ་ཏ། པི་ཤཱ་ཙ། ཨུན་ད། ཨ་ས་སྨ་ར། ཌཱ་ཀ །ཌཱ་ཀི་ནྱ་ད་ཡ། ཨི་མཾ་བ་ལི་གྲི་ཧྥནྟུ། ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡ་ཙྪནྟུ། ཡ་ཐེ་པཾ། ཡ་ཐེ་ཝཾ། བྷུཉྫ་ཐ། ཛི་གྷ་ཐ། བི་པ་ཐ། མཱ་ཏི་ཀྲ་མ་ཐ། མ་མ་སརྦ་ཀཱཏྟ་ཡཱ། སདུ་ཁཾ་བི་ཤུདྡྷེ་ཡེ། ས་ཧཱ་ཡི་ཀ་བྷ་ཝན། ཧཱུཾ་ཧཱུཾ་ཕཊ་ཕྲཊ་སྭཱ་ཧཱ། ཞེས་ལན་གསུམ་གྱིས་གཏོར་མ། ཨོཾ་བཛྲ་པུབྦེ་ཨཱཧཱུྃ་ནས། །
ཤབྡའི་བར་གྱིས་ཕྱི་མཆོད། ཨོཾ་ཨཱཿཧཱུྃ་གིས་ནང་མཆོད་རྣམས་དབུལ། གནས་གསུམ་དཔའ་བོ་མཁའ་འགྲོ་རྣམས། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་ཕྲིན་ལས་གསོལ། ཐམས་ཅད་ཐུན་མོང་དུ་ཡི་གེ་བརྒྱ་པས་ལྷག་ཆད་བསྐང་། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་ཡོད་ན་བརྟན་བཞུགས་དང་། མེད་ན་བཛྲ་མུ གཏོར་མགྲོན་གྱི་ཡེ་ཤེས་པ་རྣམས་རང་བཞིན་གྱི་གནས་སུ་གཤེགས། དམ་ཚིག་པ་རྣམས་རང་ལ་ཐིམ་པར་བསམ། བདག་བསྐྱེད་ལྟར་གནས་གསུམ་དང་སྐྱེ་མཆེད་བསྲུང་བ་སོགས་ཇི་ལྟར་རིགས་པ་དང་། སྤྱི་ཙམ་དུ། ཨོཾ་ཨཱཿཧཱུྃ་གིས་བདག་ཉིད་བསྲུངས་ལ། བསྔོ་སྨོན་ཤིས་བརྗོད་བྱའོ། ༈ །ནུབ་མོ་ཉལ་བའི་ཚེ། འཕགས་པ་ཀླུས། རིག་པའི་བདག་ཉིད་ཉིན་པར་ཐམས་ཅད་དང་། །མཚན་མོ་ནམ་གྱི་སྟོད་སྨད་བཟླས་ནས་ནི། །མནལ་ཚེའང་འབྲས་བུ་མེད་པར་མི་འགྱུར་པར། །དྲན་དང་ལྡན་པས་དེ་དག་བར་དུ་མནོལ། །ཞེས་གསུངས་པ་ལྟར་དྲན་ཤེས་དང་ལྡན་པས་ཁམས་གསོ་བར་བྱ་སྟེ། དེའང་ཐུན་མོང་དུ། ལུས་ཐམས་ཅད་བཏུད་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱ་ཞིང་གསོལ་བ་ཡང་ཡང་བཏབ་ནས་ཉལ་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་བྱིན་གྱིས་བརླབ་ཏུ་གསོལ། བླ་ན་མེད་པའི་དངོས་གྲུབ་དང་
མཆོག་བདག་ལ་སྩོལ་ཅིག །ཉེ་བར་འཚེ་བ་ཐམས་ཅད་ཀྱང་མེད་པར་མཛད་དུ་གསོལ་ཞེས་པ་དང་། རང་གི་འདོད་ལྷའི་རྣལ་འབྱོར་དང་ལྡན་པས། ན་མོ་བྷ་ག་ཝ་ཏེ་ཨཱརྨ་པྲ་ཛྙཱ་པཱ་ར་མི་ཏ་ཡེ། སརྦ་ཏ་ཐཱ་ག་ཏཱ་པཱ་རི་མི་ཏཱ་པཱུ་རི་ཏ་ཡེ། ཏདྱ་ཐཱ། ཨོཾ་སིདྡྷི་སིདྡྷི། བུདྡྷ་བུདྡྷ། བོ་དྷ་ཡ་བོ་དྷ་ཡ། ཙ་ལ་ཙ་ལ། ཏི་ཥྛ་ཏི་། ཧི་ཀཾ་པ་ཀཾ་པ། བཱ་ར་བཱ་ར། གཙྪགཙྪ། ཨཱ་གཙྪ་ཨཱ་གཙྪ་བྷ་ག་ཝ་ཏི་མ་བི་ལམྦ་སྭཱ་ཧཱ། གཟུངས་འདིས་ལག་པ་གཡས་པ་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ། དེའི་སྟེང་དུ་མགོ་བཞག་སྟེ་སེང་གེའི་ཉལ་སྟབས་ཀྱིས་ཉལ། སང་ནངས་པར་སྔ་བར་ལྡངས་ཏེ་དགེ་སྦྱོར་ལ་འཇུག་པར་བགྱིའོ་སྙམ་པ་དང་། རང་དང་སྣང་བ་ཐམས་ཅད་ཉི་མ་ཤར་བ་ལྟ་བུ་གསལ་ལམ་མེ་བའི་ངང་ནས་གཉིད་དུ་འགྲོ་བར་བྱས་ན། ནངས་པར་ལྡང་བ་ཡང་ཞིང་། ཁམས་དྭངས། དགེ་སྦྱོར་ལ་འཇུག་སྤྲོ་བར་འགྱུར་རོ། ༈ །ཁྱད་པར་འཕགས་པ་བཟང་པོ་སྤྱོད་པའི་སྨོན་ལམ་གྱི་དགོངས་པ། གྲུབ་ཆེན་ཛེ་ཏཱ་རིའི་མན་ངག་སྣང་བ་མཐའ་ཡས་ཀྱི་ཉལ་སྒོམ་ཉམས་སུ་ལེན་པར་འདོད་ན། སྐྱབས་སེམས་ཇི་ལྟར་རིགས་པ་དང་། །ས་ཕྱོགས་ཐམས་ཅད་བདེ་ཅན་ཞིང་། །བཀོད་པ་ཕུན་སུམ་ཚོགས་པའི་དབུས། །རང་ཉིད་འཕགས་པ་སྤྱན་རས་གཟིགས། །མདུན་དུ་པདྨ་ཟླ་བའི་སྟེང་། །སྣང་བ་མཐའ་ཡས་སྐུ་མདོག་དམར། །
མཉམ་གཞག་བདུད་རྩིའི་ལྷུང་བཟེད་བསྣམས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །དར་དང་རིན་ཆེན་རྒྱན་གྱིས་བརྒྱན། །དེ་མཐར་རྩ་བརྒྱུད་བླ་མ་དང་། །སངས་རྒྱས་བྱང་སེམས་ཚོགས་ཀྱིས་བསྐོར། །མངོན་སུམ་བཞིན་དུ་བཞུགས་པར་གྱུར། །ཅེས་གསལ་བཏབ་ལ། ཡིད་ཀྱིས་ཕྱག་གསུམ་བཙལ་ལ་བཟང་སྤྱོད་ལས་བྱུང་བ་སོགས་ཡན་ལག་བདུན་པ་རྒྱས་བསྡུས་གང་རིགས་ཚར་གསུམ་བྱ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བདག་སྡིག་པ་དང་སྒྲིབ་པ་ཐམས་ཅད་བྱང་ཞིང་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེས་ནས་མྱུར་དུ་བྱང་ཆུབ་ཏུ་ལུང་བསྟན་པ་ཐོབ་པར་མཛད་དུ་གསོལ། །ལན་གསུམ་གྱིས་གསོལ་བ་བཏབ་པས་སྡིག་སྒྲིབ་ཐམས་ཅད་དག་པའི་ངེས་ཤེས་བསྐྱེད། ལུས་ལོངས་སྤྱོད་ཉེ་དུ་སོགས་ལ་ཆགས་ཞེན་གཏོང་། ཤི་ནས་བདེ་བ་ཅན་དུ་འགྲོ་བའི་འདུན་པ་དང་སྤྲོ་བ་ཤུགས་དྲག་ཏུ་བསྐྱེད་ལ་འཆི་བས་མི་འཇིགས་པའི་གདེངས་བསྐྱེད། དེ་ནས་དབུགས་ཕྱིར་རྒྱུ་དང་ལྷན་ཅིག་ཏུ། རང་སེམས་རྒྱལ་བའི་ཐུགས་ཀར་ཐིམ། །ནང་དུ་འཇུག་པའི་དུས་ཀྱི་ཚེ། །རྒྱལ་བའི་ཐུགས་ནས་རང་གི་སེམས། །འོད་ཀྱི་རྣམ་པས་སྙིང་གར་ཐིམ། །རྒྱལ་བའི་ཐུགས་དང་རང་གི་
སེམས། །དབྱེར་མེད་རོ་གཅིག་ངང་དུ་བཞག །ཅེས་བརྗོད་པའམ་དོན་བསམས་ལ་དམིགས་པ་གསལ་ངེས་པ་ལན་གསུམ་སོགས་བྱ། མདུན་གྱི་ཚོགས་ཞིང་འོད་དུ་ཞུ། །སྣང་བ་མཐའ་ཡས་ཉིད་ལ་ཐིམ། །དེ་ཡང་རང་ཐིམ་བདག་ཉིད་ཀྱང་། །འོད་ཞུ་སྤྲོས་བྲལ་དབྱིངས་སུ་ཐིམ། ཞེས་བརྗོད་ཅིང་། སངས་རྒྱས་ཡི་དམ་རང་སེམས་གསུམ་དབྱེར་མེད་དུ་འདྲེས་པའི་ངང་ལ་བཞག །སླར་ཡང་རང་ཉིད་སྐད་ཅིག་གིས། སྣང་བ་མཐའ་ཡས་སྐུ་རུ་གྱུར། ཅེས་དང་། རྒྱས་པར་བཟང་སྤྱོད་སྨོན་ལམ་ཚང་བའམ། མི་ནུས་ན། རྒྱལ་བའི་དཀྱིལ་འཁོར་བཟང་ཞིང་སོགས་སྨོན་ལམ་བཏབ་ནས། བདེ་བ་ཅན་གྱི་ཞིང་ཁམས་ཡིད་ལ་བྱེད་པ་དང་མི་འབྲལ་བའི་ངང་ནས་གཉིད་ལོག་པར་བྱའོ། །དེ་ལྟར་མ་ཆག་པར་བསྒོམས་པའི་ཕན་ཡོན་ནི། དེ་ལ་ནད་དང་གདོན་མི་འབྱུང་། །འཆི་བའི་དུས་ན་སྡུག་བསྔལ་མེད། །བར་དོར་ཐུབ་པས་རྗེས་སུ་འཛིན། །ཕྱི་མའི་དུས་ན་ཐར་པ་ཐོབ། །ཅེས་གསུངས་སོ། ༈ །ཐུན་མོང་མ་ཡིན་པ་རྣལ་འབྱོར་བླ་མེད་ཀྱི་ལམ་ལ་བསླབ་པ་དག་གིས། ལྷར་སྣང་སྒྱུ་མ་ལྟ་བུའམ། རིལ་འཛིན་དང་རྗེས་གཞིག་གི་སྒོ་ནས་གཉིད་ཀྱི་འོད་གསལ་ལ་འཇུག་པའི་ཚུལ་སོགས་སོ་སོའི་གདམས་ངག་ལས་འབྱུང་བ་ལྟར་བྱའོ། །ཐོ་རང་ལྡང་བའི་དུས་ལ་བབ་པ་ན། ཐུན་མོང་དུ་ངེས་འབྱུང་ངམ། སྙིང་རྗེ་ཆེན་པོའམ།
སྒྱུ་མ་ལྟ་བུའི་ངང་ནས་ལྡང་། ཁྱད་པར་ཉལ་སྒོམ་ལ་བརྩོན་པ་ཡིན་ན་རང་དང་སྣང་བ་ཐམས་ཅད་བདེ་བ་ཅན་གྱི་ཞིང་ཁམས་རྟེན་དང་བརྟེན་པར་བཅས་པའི་བཀོད་པར་གསལ་བཞིན་པའི་ངང་ནས་ལྡང་། ཐུན་མོང་མ་ཡིན་པ་སྔགས་བླ་མེད་ཀྱི་རྣལ་འབྱོར་པས་རང་གི་གཞུང་ནས་གསུངས་པ་ལྟར་ཟུང་འཇུག་སྒྱུ་མ་ལྟ་བུའི་ལྷ་སྐུར་ལྡང་ཞིང་དགེ་སྦྱོར་ལ་འཇུག །རྨི་ལམ་དུ་སྡིག་པ་སྤྱོད་པ་མཐོང་ན་བཤགས་སྡོམ་གྱི་འདུན་པ་དང་། དགེ་བ་ལ་རྗེས་སུ་ཡི་རང་བ་ཙམ་བྱ། གལ་ཏེ་རྨི་ལམ་ངན་པས་ཡིད་འཁུ་འཕྲིག་ཏུ་གྱུར་ན་བདེན་མེད་དུ་ཤེས་པའི་རྒྱས་འདེབས་པའམ། ལུས་ཚུགས་མ་བཅོས་པར་རིག་སྔགས་ཀྱི་མཐུས། རྨི་ལམ་ངན་པའི་རྒྱུ་དང་འབྲས་བུའི་ཆོས་ཐམས་ཅད་བསྲེགས་པར་བསམས་ལ། ན་མསྶ་མནྟ་བུདྡྷ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཨོཾ་ཁ་ཁ། ཁཱ་ཧི་ཁཱ་ཧི། ཧཱུྃ་ཧཱུྃ་ཛྭ་ལ་ཛྭ་ལ། པྲ་ཛྭ་ལ་པྲ་ཛྭ་ལ། ཏིཥྛ་ཏིཥྛཏི་སརྦ་དུ་ནི་མིཏྟ་དུརསྭཔཱ་ཤཾནྟ་ཀུ་རུ་སྭཱ་ཧཱ། ཞེས་ཉེར་གཅིག་ཙམ་བཟླས་པས་ཞི་བར་བྱའོ། ༈ །བསམ་གཏན་གྱི་གྲོགས་སུ་འགྲོ་ན་ཁྲུས་བྱ་བ་ནི། ལངས་ཏེ་ཆུ་སྣོད་མདུན་དུ་བཞག །ཨོཾ་པྲ་ཀྲྀ་ཏི་པ་རི་ཤུདྡྷ་སརྦ་དྷརྨཱ་པྲ་ཀྲྀ་ཏི་པ་རི་ཤུདྡྷོཉཧཾ། ཞེས་བྱ་བའི་སྔགས་ཀྱིས་བདག་དང་ཆུ་བྱིན་གྱིས་བརླབས་ལ། བར་དུ་གཅོད་པ་ཐམས་ཅད་བསྲུང་བའི་ཕྱིར། ཨོཾ་ཨ་མྲྀ་ཏེ་ཧཱུྃ་ཕྲཊ། ཅེས་བྱ་བ་ཡང་ནས་ཡང་དུ་ཟློས་ཤིང་ཁྲུས་བྱས་ལ།
ཁྲུས་ཟིན་པ་དང་། ཨོ་སུ་སིདྡྷ་ཀ་ར་སྭཱ་ཧཱ། ཞེས་བྱ་བས་གཙུག་ཕུད་ཡོད་པ་རྣམས་ཀྱིས་གཙུག་ཕུད་འཆིང་བར་བྱའོ། །མགོ་རེག་ཡིན་ན་གཡོན་ནས་བསྐོར་ཞིང་སེ་གོལ་ལན་བདུན་གཏོགས་སོ། །དེ་ནས་རིག་སྔགས་འཆང་གིས་ཉི་མའི་ལོགས་སུ་ཁ་བལྟས་ལ། རྟག་ཏུ་ཆུ་ཁྱོ་རབ་གང་གཏོར་ནས་རྡོ་རྗེ་ཁྲོ་བོ་བདུད་རྩི་འཁྱིལ་བའི་སྔགས་ལན་བདུན་བརྗོད་དེ། བདག་ཆེ་གེ་མོ་ཞེས་བྱ་བས་རིག་སྔགས་ཆེ་གེ་མོ་བསྒྲུབ་ཀྱི། ཁྱོད་ཀྱི་ཡིད་དགའ་བར་གྱིས་ཤིག་ཅེས་བརྗོད་ན་བགེགས་དང་ལོག་འདྲེན་རྣམས་ཀྱིས་མི་ཚུགས་པར་གསུངས་སོ། །གཞན་ཡང་སྡིག་ལྟུང་སྦྱང་བའི་ཕྱིར་ཡི་གེ་བརྒྱ་པའི་སྔགས་བཟླས་པས་ཁྲུས་བྱ་བ་དང་། ཉིན་ཞག་གཅིག་གི་བར་ཆད་བསྲུང་བའི་ཕྱིར་མི་གཡོ་བའི་ཆུ་སྲུང་སོགས་ཀྱང་ཤེས་ཤིང་ནུས་ན་སྐབས་འདིར་བྱ། ཁྱད་པར་རྣལ་འབྱོར་བླ་མེད་ཀྱི་ལམ་ལ་སློབ་པས་ནི། དབང་ལྷ་སྤྱན་དྲངས་ཤིང་དབང་བསྐུར་བར་བསམས་པས་དངོས་སམ་ཡིད་ཀྱིས་ཁྲུས་ཀྱི་བྱ་བ་ཚུལ་བཞིན་དུ་བསྒྲུབ་པ་དང་། ནང་གི་ཁྲུས་བདུད་རྩི་རིལ་བུ་མྱང་བ་སོགས་བྱའོ། ༈ །དེ་ནས་སྔར་ཇི་སྐད་སྨོས་པ་བཞིན། སོ་ཐར་གྱི་ངེས་འབྱུང་། བྱང་ཆུབ་སེམས་དཔའི་སེམས་བསྐྱེད། གསང་སྔགས་བླ་མེད་ཀྱི་བླ་མའི་མོས་གུས་རྣམས་ཀྱིས་ཀུན་ནས་བསླངས་ཏེ། ཁས་བླངས་པའི་དམ་ཚིག་དང་སྡོམ་པ་རྣམ་པར་དག་པས་གཞི་གཟུང་། ཡན་། །
ལག་བདུན་པའི་ཆོ་ག་དང་འབྲེལ་པར་སྨོན་འཇུག་གི་སྡོམ་པ་བླང་། ཕྱི་དཀྱིལ་ལམ། ལུས་དཀྱིལ་ལ་བརྟེན་པའམ། བླ་མའི་རྣལ་འབྱོར་ཙམ་ལ་བརྟེན་ཀྱང་རུང་སྟེ་དབང་བཞི་བླངས་ཤིང་དབང་དོན་གྱི་ཡེ་ཤེས་བསྐྱང་། སྡེ་སྣོད་གསུམ་དང་རྒྱུད་སྡེ་བཞི་ཡན་ལག་དང་བཅས་པའི་ལུང་གི་ཆོས་རྣམས་ལ་ཐོས་པ་བྱ་ཞིང་། དེ་རྣམས་ཀྱི་དོན་རང་དང་སྤྱིའི་མཚན་ཉིད་བསམ་བྱུང་གི་རིག་པས་གཏན་ལ་དབབ། གཏན་ལ་ཕེབས་པའི་དོན་སྒོམ་པས་ཉམས་སུ་བླང་བའི་ཕྱིར་ཐུན་གྱི་དངོས་གཞིར་འཕགས་པའི་བདེན་པ་བཞིའམ། རྟེན་འབྲེལ་བཅུ་གཉིས་སམ། བྱང་ཆུབ་ཀྱི་སེམས་གཉིས་སམ། མཚན་བཅས་དང་མཚན་མེད་ཀྱི་རྣལ་འབྱོར་རམ། བསྐྱེད་རྫོགས་ཟབ་མོའི་དོན་ལ་མཉམ་པར་བཞག །ཐུན་མཚམས་རྣམས་སུ་ཇི་སྐད་བཤད་པའི་ཆོས་སྤྱོད་རྣམས་ཅི་ནུས་སུ་སྤྱད་པས་དལ་འབྱོར་གྱི་རྟེན་ལ་སྙིང་པོ་ལེན་བའི་ཐབས་ལ་རྩེ་གཅིག་ཏུ་བརྩོན་པར་བྱ། འབྱོར་པ་ཡོད་ཅིང་བསྒྲུབ་པར་ནུས་ན་བྱ་བ་ལས་ཀྱི་འཁོར་ལོ་སྐུ་གསུང་ཐུགས་ཀྱི་རྟེན་དང་། དགེ་འདུན་འདུ་བའི་ཀུན་དགའ་ར་བ་སོགས་བཞེངས་པ་དང་། བླ་མ་དང་དགེ་འདུན་ལ་བསྙེན་བཀུར་བ་སོགས་རང་གཞན་གྱི་རྒྱུད་ལ་ཚོགས་གཉིས་ཡོངས་སུ་སྤེལ་བའི་ཐབས་ལ་མཁས་པར་བྱའོ། ༈ །དེ་ལྟ་བུའི་སྒོ་ནས་རང་རྒྱུད་སྨིན་པས་གདུལ་བྱ་གཞན་རྗེས་སུ་འཛིན་པ་ལ། ཟང་ཟིང་གི་
སྦྱིན་པ་རྣམ་པར་དག་པས་གདུལ་བྱ་རྣམས་འཁོར་དུ་བསྡུ། དེ་ལ་ཆོས་ཀྱི་སྦྱིན་པ་སྙན་པར་སྨྲ་བས་ཡིད་དྲང་། དོན་སྤྱོད་པ་སྟེ་ཆོས་བཤད་པའི་དོན་ལྟར་ཐབས་ལ་མཁས་པས་ཉམས་ལེན་ལ་སྦྱར། རང་ཉིད་ཀྱང་ཇི་སྐད་བཤད་པའི་ཆོས་ཀྱི་དོན་དང་མཐུན་པར་སྤྱད་པས་གདུལ་བྱ་གཞན་ཡང་དེ་ལ་གཞུག་པ་སྟེ་བསྡུ་བའི་དངོས་པོ་བཞི་ལ་ཅི་ནུས་ཀྱིས་བརྩོན་པ་དང་། ཁྱད་པར་སྡོམ་བརྩོན་སྡེ་སྣོད་འཛིན་པ་དང་མཁས་པའི་བྱ་བ་ནི་གསུམ་སྟེ། འཆད་པ་དང་། རྩོད་པ་དང་། རྩོམ་པའོ། །དང་པོ་ནི། དམ་པའི་ཆོས་པདྨ་དཀར་པོ་ལས། གཙང་ཞིང་ཡིད་དུ་འོང་བའི་ས་ཕྱོགས་སུ། །ཡངས་པའི་སྟན་ནི་རབ་ཏུ་བཤམས་བཏིང་ནས། །སེམས་ཅན་ལྷག་པར་བརྩེ་གྱུར་འགྱུར་རྣམས་ལ། །ཆོས་ཀྱི་གཏམ་མང་སྣ་ཚོགས་ཉེ་བར་སྟོན། ཅེས་གསུངས་པ་ལྟར། གནས་གཙང་ཞིང་ཡིད་དང་མཐུན་པར་ཕྱག་དར་ལེགས་པར་བྱ། དཀོན་མཆོག་གི་རྟེན་ཡོད་ན་དགྲམ། ཅི་འབྱོར་པའི་མཆོད་པ་བཀོད་པས་འཕགས་པར་བཤམ། རང་ཉིད་ཇི་ལྟར་འོས་པའི་ཆོས་ཀྱི་ཁྲི་བཟང་པོར་སྒོ་གསུམ་བསྡམས་ཤིང་དུལ་བ་དང་ཞི་བས་འཁོད་དེ། ཏདྱ་ཐཱ། ཤ་མེ་ཤ་མེ་ཤ་མ་ཝ་ཏི། ཤ་མི་ཏ་ཤ་ཧཱུྃ། ཨངྒཱ་རེ། མངྒཱ་རེ། མཱ་ར་ཛི་ཏེ། ཀ་རོ་ཊེ། ཀེ་ཡུ་རེ། ཏེ་ཛོ་ཝ་ཏི། ཨོ་ལོ་ཡ་ནི། བི་ཤུདྡྷཱ་ནིརྨ་ལེ་སཱ་ལ་པ་ན་ཡེ། ཁུ་ཁུ་རེ། ཁ་ཁ་གྲ་སེ། གྲ་ས་ནེ།
ཨོ་མུ་ཁི། པ་རཾ་མུ་ཁེ། ཨ་མུ་ཁི། ཤ་མི་ཏཱ་ནི། སརྦ་གྲ་ཧ། བན་ནཱ་ནེ། ནེ་གྲི་ཧ་ཏཱ། སརྦ་སཱ་ར། པྲ་ཝཱ་དི་ན། བི་མུཀྟ་མཱ་ར་པཱ་ཤ སྦ་བི་ཏཱ། བུདྡྷཱ་མུ་དྲ། ཨ་ནུངྒ་ཏི་ཏཱ། སརྦ་མཱ་རེ། པུ་ཙ་རི་ཏ་པ་རི་ཤུདྡྷེ། བི་གཙྪནྟུ། སརྦ་མཱ་ར་ཀརྨ་ཎི། ཞེས་ཤུབ་བུའི་ཚུལ་དུ་ལན་བདུན་བཟླ་སྟེ། འདི་བརྗོད་པས་བདུད་ཀྱི་བར་ཆད་མི་འབྱུང་བ་བློ་གྲོས་རྒྱ་མཚོས་ཞུས་པའི་མདོ་ལས་གསུངས་སོ། །དེ་ནས་སློབ་མ་རྣམས་འདུས་པ་ན་བསླབ་གྲལ་གྱིས་འཁོད་དེ། ཆོས་འཆད་ཉན་ལ་བར་ཆད་བཟློག་པའི་ཕྱིར་ཤེར་སྙིང་བདུད་ཟློག་དང་བཅས་པའང་ཕྱག་ལེན་དུ་མཛད། ཡན་ལག་བདུན་དང་མཎྜལ་འབུལ་བས་མཚམས་སྦྱར་ཏེ། སློབ་དཔོན་གྱིས་ཟང་ཟིང་མེད་པའི་བྱམས་པ་དང་། འཁོར་བ་ལས་བསྒྲལ་འདོད་ཀྱི་སྙིང་རྗེ་ཆེན་པོས། གང་ཞིག་གསེར་མཆོག་རང་བཞིན་རི་རབ་མནྡཱ་རར་གནས་ལྷར་བཅས་གནོད་སྦྱིན་དང་། གདེངས་ཀ་ནོར་བུའི་འོད་ཀྱིས་ས་འོག་མུན་པ་སེལ་མཛད་ཀླུ་རྣམས་གང་ཡིན་དང་། གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། དེ་དག་ཐམས་ཅད་ཐར་པ་དམ་པའི་སྒོར་གྱུར་ཐུབ་པའི་གསུང་མཉན་ཕྱིར་ནི་འདིར་གཤེགས་ཤིག །ལྷ་དང་ལྷ་མིན་མིའམ་ཅི་ཡི་དབང་པོ་དང་། །བརྒྱ་བྱིན་ལ་སོགས་ཆོས་ཀྱི་ཕྱོགས་ལ་བྱ་བ་བྱས་པ་རྣམས། །སངས་རྒྱས་གསུང་རབ་རབ་ཏུ་
ཞི་ཞིང་བདེ་བའི་རྒྱུར་གྱུར་བ། འདི་དག་བཤད་ཀྱིས་དམ་པའི་ཆོས་མཉན་ཕྱིར་ནི་འདིར་གཤེགས་ཤིག །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག ། དེང་འདིར་སྟོན་པས་ཆོས་ཀྱི་ཆར་འབེབས་ཀྱི། །ཉན་པར་འདོད་པ་མཐའ་དག་འདིར་གཤེགས་ཤིག །ཅེས་པས་ལྷ་དང་། ཀླུ་དང་། གནོད་སྦྱིན་སོགས་དཀར་ཕྱོགས་ལ་མངོན་པར་དགའ་བ་རྣམས་འཁོར་དུ་བསྡུ་བ་དང་། འདི་ལྟར་རྒྱ་ཆེན་ཡོན་ཏན་རིན་ཆེན་གཏེར་གྱུར་པ། །དོན་ཆེན་བྱེད་པ་འདི་ལ་དད་ཅིང་གུས་པ་ཡིས། འདི་ལས་ལྷག་པའི་མཉན་བྱ་གཞན་དག་ཡོད་མིན་པས། །དབང་པོའི་རྟ་འདི་ལེགས་པར་ཐུལ་ལ་ཐུབ་པའི་གསུང་མཉན་གྱིས། །སྟོན་པའི་ཞལ་ནས་ལེགས་པར་གསུངས་པའི་སྐྱེ་བོ་མི་རྣམས་བཀྲ་ཤིས་ཀྱི། །འབྱུང་གནས་སེམས་ལ་ཞོག་ཅིག་གང་ཕྱིར་འདི་ནི་ལུས་ཅན་ཀུན་གྱི་རྣ་བའི་བདུད་རྩི་དང་། །ཉོན་མོངས་པ་ཡི་ནད་ཀུན་སེལ་བར་བྱེད་པ་ཡིན་པས་དེ་དོན་ཡང་དག་བསམ་པར་གྱིས། །རྒྱུ་འདི་རྣམས་ཀྱིས་སངས་རྒྱས་གསུང་དག་ལེགས་པར་རབ་ཏུ་མཉན་པར་བྱ་བར་རིགས། ཞེས་མཉན་པར་གདམས་པ་སྟེ་འདི་དག་ཡོངས་སུ་རྫོགས་པའམ་ཚིགས་བཅད་ཇི་ལྟར་རིགས་པ་བརྗོད། ལྷ་ཡི་སྐད་དང་ཀླུ་དང་གནོད་སྦྱིན་སྐད། ཅེས་སོགས་བརྗོད་པའམ་དོན་ཡིད་ལ་བསམས་ཏེ། ཐོག་མ་ཁོ་ནར་ངེས་
འབྱུང་དང་། བྱང་ཆུབ་སེམས་ཀྱི་གཏམ་གྱིས་ཀུན་སློང་འཆོས། ཆོས་ཉན་པའི་སྣོད་ཀྱི་སྐྱོན་གསུམ་དང་དྲི་མ་དྲུག་སྤངས་ཤིང་འདུ་ཤེས་བཞི་བསྟེན་པ་སོགས་ཀུན་སྤྱོད་གསལ་བཏབ་ལ། ལུང་བཀླག་པ་དང་། བཤད་པ་བྱ་བ་དང་། ཁྲིད་དབོག་པ་སོགས་ལ་འཇུག །བཤད་པ་དང་ཁྲིད་སོགས་ཀྱི་སྐབས་སློབ་མའི་སྣོད་དང་འཚམས་པར། ཤེས་རབ་ཆེ་བ་རྣམས་ལ་ཚིག་བརླིང་ཞིང་སྦྲེལ་ལེགས་པ་དང་། དོན་ཟབ་ཅིང་རྒྱ་ཆེ་བར་བཤད། བློ་དམན་པ་རྣམས་ལ་ཚིག་གཟུང་སླ་ཞིང་གོ་བདེ་བ་དང་། དོན་རྟོགས་སླ་ཞིང་རྣ་བར་སྙན་པར་བཤད། དེ་དག་གང་ཡིན་ཀྱང་མདོ་རྒྱུད་བསྟན་བཅོས་དང་མཐུན་པའི་ལུང་གིས་གཞི་བཟུང་། སྒྲ་ཚད་དངོས་སྟོབས་དང་མཐུན་པར་ལུང་དོན་རིག་པས་བསྒྲུབ། མདོ་རྒྱུད་བསྟན་བཅོས་དང་མི་འགལ་བའི་རྗེས་སུ་གདམས་པས་གཞུང་ཉམས་ལེན་དུ་འདྲིལ་བ་དང་། ཉམས་ལེན་གཞུང་དང་མི་འགལ་བར་མདོར་བསྟན། རྒྱས་བཤད། དོན་བསྡུའི་ཚུལ་གྱིས་ལེགས་པར་བཤད། ཁྱད་པར་གཞུང་བཤད་པའི་སྐབས་སུ་ཚིག་དོན་མཐའ་ཆོད་པ་དང་། ཁྲིད་ཀྱི་སྐབས་སུ་བསྒོམ་དོན་དམིགས་པ་གནད་དུ་འདྲིལ་བར་བཤད་དོ། །མཇུག་ཏུ་འཕགས་པ་ཐོགས་མེད་ཀྱི་གསུང་རབ་ལས་བྱུང་བ་ཆོས་བཤད་པའི་བསྔོ་བ། ཐེག་མཆོག་དམ་ཆོས་རིན་ཆེན་བཤད་འདི་ལས། །བདག་གིས་བསོད་ནམས་མཐའ་ཡས་གང་ཐོབ་པ། །
དེས་ནི་འགྲོ་ཀུན་ཐེག་མཆོག་དམ་པའི་ཆོས། །རིན་ཆེན་དྲི་མ་མེད་པའི་སྣོད་གྱུར་ཅིག །བདུད་ཀྱི་སྡེ་དང་མུ་སྟེགས་གཞུང་ཀུན་དང་། །ཆོས་ལྟར་བཅོས་པའི་མུན་སྤྲུལ་དུ་མ་དང་། །གཞན་ཡང་འགྲོ་བའི་ཉེ་བར་འཚེ་བ་རྣམས། །བདག་གི་སྟོབས་ཀྱིས་རྩད་ནས་འཇོམས་གྱུར་ཅིག །ཅེས་པ་ལ་སོགས་པས་མཚོན་ཏེ་བསྔོ་སྨོན་རྒྱས་པར་བྱའོ། ༈ །བྱེ་བྲག་ཏུ་རྡོ་རྗེ་ཐེག་པ་བླ་མེད་ཀྱི་རྒྱུད་སྡེ་རིན་པོ་ཆེའི་འཆད་ཉན་སྤྱི་དང་། ཟབ་ཁྲིད་སྟོན་པའི་དུས་སུ། སློབ་མ་རྣམས་འདུས་ནས་དཔོན་སློབ་ཐུན་མོང་དུ་རྒྱུད་སྦྱང་བའི་ཕྱིར་ཡི་གེ་བརྒྱ་བ་བཟླ་ཞིང་བཤགས་སྡོམ་བྱ་བ་དང་། བྱིན་རླབས་འཇུག་པའི་ཕྱིར་རྩ་བརྒྱུད་ཀྱི་བླ་མ་ལ་གསོལ་བ་གདབ་པ་དང་། ཤེས་ཤིང་ནུས་ན་སྲུང་བའི་འཁོར་ལོ་གསལ་གདབ་པ་དང་། སློབ་མ་རྣམས་ཀྱིས་མཎྜལ་དབུལ་ཞིང་། སློབ་དཔོན་གྱིས་བར་ཆད་ཞི་བའི་ཕྱིར་ཡི་དམ་དང་ཆོས་སྐྱོང་ལ་གཏོར་མ་འབུལ་བ་རྣམས་ཕྱག་ལེན་དུ་མཛད་ཅིང་། ས་ཕྱོགས་དང་གནས་ཁང་དག་པའི་ཞིང་དང་གཞལ་མེད་ཁང་། སློབ་དཔོན་དཀྱིལ་འཁོར་གྱི་གཙོ་བོ། སློབ་མ་རྣམས་འཁོར་གྱི་རྣམ་པར་གསལ་བཏབ་སྟེ། རྡོ་རྗེ་མི་ཤིགས་པའི་ཆོས་ཀྱི་སྒྲ་གདངས་རྒྱུན་མི་འཆད་པར་དུས་རྟག་ཏུ་འབྱུང་བ་སོགས། འོག་མིན་ཆེན་པོར་སྟོན་པ་རྡོ་རྗེ་འཆང་གིས་ཆོས་ཀྱི་འཁོར་ལོ་བསྐོར་བའི་རྣམ་པ་ལམ་དུ་བྱས་ནས་འཆད་ཉན་ལ་འཇུག །
མཐར་བསྔོ་སྨོན་སོགས་སྐབས་དང་མཐུན་པར་བྱའོ། ༈ །གཉིས་པ་ནི། བསྟན་པ་རྣམ་པར་དག་པའི་ཕྱིར་ཕྱིར་རྒོལ་དཔང་པོ་སོགས་མངོན་དུ་འདུས་པ་ན། གཞལ་བྱ་མངོན་སུམ། ལྐོག་གྱུར། ཤིན་ཏུ་ལྐོག་གྱུར་གསུམ་ལ། འཇལ་བྱེད་མངོན་སུམ། རྗེས་དཔག །ལུང་ཚད་མ་གསུམ་གྱིས་ལེགས་པར་གཞལ་ཏེ། དེའི་གྲུབ་འབྲས་རང་ཕྱོགས་སྒྲུབ་པ་དང་། གཞན་ཕྱོགས་སུན་འབྱིན་པ་དང་། རང་གིས་ཁས་བླངས་པའི་རྟགས་ཀྱི་ཚེར་མ་དབྱུང་བ་ལ་མཁས་པའི་རྩོད་པས་བསྟན་པ་ལ་བྱ་བ་སྒྲུབ་པ་ཉིད་དོ། ༈ །གསུམ་པ་ནི། གང་བརྩམ་པར་བྱ་བའི་གཞུང་དེ་བརྒྱུད་ལྡན་གྱི་བླ་མ་ལས་ཐོས་ཤིང་རང་ཉིད་ཀྱིས་ཚིག་དོན་གཉིས་ཀར་དཔྱིས་ཕྱིན་པའི་དཔྱད་པ་ཡོངས་སུ་རྫོགས་པ་ན། བསྟན་པ་ཡུན་རིང་དུ་གནས་པར་བྱ་བའི་ཕྱིར་ཤིས་བརྗོད་དང་ཕྱག་བྱ་བས་ཐོག་དྲངས། དགོས་དོན་གྱིས་སྤྲོ་བ་བསྐྱེད། བསྡུས་དོན་གྱིས་གཞི་གཟུང་། ཚིག་དོན་གྱིས་རྒྱས་པར་བཤད། སྔ་ཕྱིའི་འབྲེལ་གྱིས་མཚམས་སྦྱར། རྒོལ་བ་དངོས་སུ་ཡོད་པའམ། དགོས་པ་ཁོངས་ནས་བསུས་ཏེ་དཀའ་བའི་གནས་རྣམས་བརྒལ་ལན་གྱིས་ཀྱང་གཏན་ལ་དབབ། བསྔོ་སྨོན་ཤིས་བརྗོད་སྦྱར་བྱང་གིས་མཇུག་བསྡུ། སྒྲུབ་ཐབས་དང་མན་ངག་ལྟ་བུ་གཞུང་ཕྲ་མོ་ཞིག་ཡིན་ནའང་། མཆོད་བརྗོད་ཀྱིས་ཐོག་དྲངས། བཤད་བྱ་དངོས་ས་བཅད་དང་བཤད་པ་སྤེལ་
ཏེ་དོན་གོ་སླ་ཞིང་ལག་ཏུ་བླང་བདེ་བར་བྱ། མཇུག་བསྔོ་སྨོན་སྦྱར་བྱང་སོགས་ཇི་ལྟར་རིགས་པས་བརྒྱན་ཏེ་བརྩམ་པར་བྱའོ། །དེ་ལྟ་བུའི་ཚུལ་གྱིས་ལེགས་པར་བཤད་པའི་དགའ་སྟོན་ལ་བརྟེན། བཤད་སྒྲུབ་ཀྱི་བསྟན་པ་རིན་པོ་ཆེ་ཡུན་རིང་དུ་འཚོ་ཞིང་གཞེས་པའི་ཐབས་ཚུལ་ལྷུར་བླངས་པས། འཇིག་རྟེན་ན་ཕན་པ་དང་བདེ་བའི་དགེ་མཚན་དུས་རྟག་ཏུ་རྒྱས་པར་འགྱུར་བ་ཡིན་ནོ། །དེ་ལྟར་དུས་དང་རྒྱུན་གྱི་ཆོས་སྤྱོད་རྒྱས་འབྲིང་བསྡུས་པ་དང་། སྙིང་པོ་མདོར་བསྡུས་པའི་ཚུལ་ཇི་ལྟར་རིགས་པ་བར་མ་ཆད་དུ་ཉམས་སུ་བླངས་པས་ཐབས་བསོད་ནམས་ཀྱི་ཚོགས་རྒྱ་ཆེན་པོ་འཕེལ་ཞིང་། དེ་ལ་བརྟེན་ནས་ཐབས་བྱུང་ཡེ་ཤེས་ཀྱི་ཚོགས་རྫོགས་ཏེ་མྱུར་དུ་སྐུ་གཉིས་ཟུང་དུ་འཇུག་པའི་ཁམས་གསུམ་ཆོས་ཀྱི་རྒྱལ་པོའི་གོ་འཕང་ཆེན་པོ་ལ་དབང་བསྒྱུར་ཏེ་རང་གཞན་གྱི་དོན་གཉིས་ལྷུན་གྱིས་གྲུབ་པར་འགྱུར་རོ། །ཆོས་བཞིན་སྤྱོད་ཚུལ་མཛེས་པའི་རྒྱན། །ནོར་བུའི་སྙིང་པོ་ལ་བརྟེན་ནས། །འགྲོ་ཀུན་ཚོགས་གཉིས་འབྱོར་པ་དང་། །ཕན་བདེའི་དགའ་སྟོན་རྒྱས་གྱུར་ཅིག །ཅེས་ཚད་མར་གྱུར་པའི་མདོ་རྒྱུད་དང་འཕགས་བོད་ཀྱི་གཞུང་མང་པོ་ལས་ཉེར་མཁོ་ཅུང་ཟད་ཙམ་བཏུས་པ་འདིའང་། བྱ་བྲལ་མཉྫགྷོ་ཥས་བྲིས་པ་དགེ། །།