གཏེར་ཆེན་པོའི་བུམ་པ་བཟང་པོ་སྒྲུབ་ཚུལ་སྤྱི་ལ་འཇུག་པ་ཤིན་ཏུ་མདོར་བསྡུས་འདོད་རྒུའི་ཆར་འབེབས།
༄༅། །གཏེར་ཆེན་པོའི་བུམ་པ་བཟང་པོ་སྒྲུབ་ཚུལ་སྤྱི་ལ་འཇུག་པ་ཤིན་ཏུ་མདོར་བསྡུས་འདོད་རྒུའི་ཆར་འབེབས་ཞེས་བྱ་བ་བཞུགས་སོ།། །།
༄༅། །ཨོཾ་སྭ་སྟི། རྒྱུད་སྡེ་རྣམས་སུ་གཏེར་ཆེན་པོའི་བུམ་པ་སྒྲུབ་ཚུལ་དང་། གཞུག་པའི་ཚུལ་ཇི་སྙེད་ཅིག་གསུངས་ཤིང་། ནོར་ལྷ་རྣམས་ཀྱི་བྲིས་སྐུ་དང་གཟུངས་སྔགས་ཀྱང་རིན་པོ་ཆེ་དང་འབྲུ་སྨན་སོགས་དཔལ་ཅན་གྱི་རྫས་དང་བཅས་ཏེ་བང་མཛོད་དུ་སྦ་བར་རྟོགས་པ་དང་མན་ངག་ལས་གསུངས་པ་དག་ཕན་ཚུན་སྦྱར་ཏེ་ཛམྦྷ་ལ་རིགས་ལྔ་དང་། ལྷ་མོ་བརྟན་མ། ཀླུ་ཆེན་དགུ་སོགས་ཀྱི་གཏེར་བུམ་སྒྲུབ་པའི་ཚུལ་ཇི་སྙེད་པ་ཞིག་བླ་མ་རྣམས་ཀྱིས་ཕྱག་ལེན་དུ་མཛད་པ་དམིགས་བསལ་སོ་སོའི་གཞུང་ནས་འབྱུང་བ་ལྟར་བྱ། རང་གཞུང་བུམ་པ་སྒྲུབ་ཚུལ་ཟུར་དུ་མེད་པའི་སྤྱི་ཁྱབ་ལ། ནོར་བུམ་རིགས་རྣམས་ཆེ་ཆུང་བྲེ་གང་ཤོང་བ་ལས་མི་ཆུང་བའི་རིན་པོ་ཆེའམ་རྫའི་བུམ་པ་གཙང་མ་ལྷ་སོ་སོའི་སྐུ་མདོག་དང་མཐུན་པའམ། དཀར་པོའི་ཚོན་གྱིས་ལེགས་པར་བསྒྱུར་བ་ལ་རྒྱས་པར་ཁོར་ཡུག་ཏུ་བཀྲ་ཤིས་རྟགས་བརྒྱད་སོགས་བྲི། བསྡུ་ན་མདུན་རྟགས་སུ་ནོར་བུ་དང་ས་བོན་
ཙམ་བྲིས་པའི་ནང་དམིགས་བསལ་རང་རང་གི་གཞུང་ནས་འབྱུང་བ་ལྟར་དང་། སྤྱིར་བཏང་ཙམ་ལ་ཐིལ་དུ་ས་སྣ་ཆུ་སྣ་བྱིན་ཅན་བཀྲམ་པའི་སྟེང་། བྱ་རྒྱུད་ལུགས་ཀྱི་བུམ་རྫས་ཉེར་ལྔ་ཁྲོལ་བུའམ་རིལ་བུ། རིན་པོ་ཆེ་སྣ་ཚོགས། དུག་རིགས་མ་གཏོགས་པའི་སྨན་སྣ། འབྲུ་དཀར་རིགས་སྣ་ཚོགས། དར་ཟབ་དང་གོས་ཆེན། དཀར་གསུམ་མངར་གསུམ་སོགས་བཟའ་བཏུང་གི་ཕུད་གཙང་མ། རྟ་ཕྱུགས་ཀྱི་སྤུ་སྣ། བཀྲ་ཤིས་པའི་ཐབ་དང་ཁང་ས། ཞིང་ས་བཟང་པོའི་ས་སོགས་དཔལ་ཅན་གྱི་རྫས་དམ་ཚིག་མི་གཅིག་པས་མཚོན་སེལ་ཅན་གྱི་ལག་ནས་བྱུང་བ་མ་ཡིན་པས་ཕྱུར་བུར་བཀང་བའི་དབུས་སུ་རང་རང་གི་སྐུ་གཟུགས་དང་། སྔགས་བྱང་འདོད་གསོལ་དང་བཅས། སྲོག་འཁོར་རིགས་གང་ཡོད་རྣམས་ལག་ཚགས་དམ་པར་གཞུག །ཁ་འབྲུ་སྨན་བཟང་ཤིང་གི་ཕྱེ་མ་སོགས་ཀྱིས་དཀང་། རས་དཀར་པོས་བཅད། སྤྲོ་ན་འཁོར་ལོ་རྩིབས་བརྒྱད་དམ། རྡོ་རྗེ་རྒྱ་གྲམ་
སོགས་བྲི། ཚོན་སྐུད་ཀྱིས་མགུལ་པ་བཅིངས་ལ་རྒྱབ་ཕྱོགས་སུ་སྒྲུབ་པ་པོའམ་སྦྱིན་བདག་གི་རྟགས་ཀྱིས་རྒྱས་གདབ། ས་བདག་དང་། ཁྱད་པར་ཀླུ་བུམ་རིགས་རྣམས་སྦྱིན་མེད་པའི་བག་ཕྱེ་སོགས་ཀྱི་དམ་དང་བཅས་དཀར་རྩི་བྱུག །མདུན་རྟགས་ནཱཾ་བྲི། ནང་གི་ཐིལ་དུ་ས་སྣ་ཆུ་སྣ་གཙང་མ་དཀྲམ། གླ་རྩི་སོགས་ཀླུ་ལ་གནོད་པའི་དྲིས་མ་ཕོག་པའི་འབྲུ་སྣ་གཙང་མ་སྤང་སྤོས་ཀྱིས་བུངས་བསྐྱེད་པའི་ཀླུ་སྨན་སོགས་ཀྱིས་བཀང་བའི་དབུས་སུ་རང་རང་གི་སྐུ་དང་སྔགས་བྱང་སོགས་གང་རིགས་གཞུག །ཁ་རས་དཀར་གཙང་མས་བཅད་ཅིང་མགུལ་ཆིངས་བྱ། དེ་ནས་གཞི་གཙང་མའི་སྟེང་དུ་བཀོད་ལ། མཐར་རང་རང་གི་གཞུང་ལས་བཤད་པའི་གཏོར་མ་དང་མཆོད་པ་བཤམ། བདག་བསྐྱེད་ནོར་བུམ་རིགས་ཕལ་ཆེར་ལ་རང་རང་གི་བདག་བསྐྱེད་དམ་ཕྱག་རྡོར་དང་། བརྟན་མ་དང་ཀླུ་བུམ་ལ་ཀླུ་དབང་རྒྱལ་པོའམ། སེང་གེ་སྒྲ་སོགས་གང་འོས་བཟླས་པ་དང་བཅས་པ་བྱ། ལས་བུམ་རྒྱས་བསྡུས་གང་རིགས་ཀྱིས་བསྒྲུབ་པའམ། ཨ་མྲྀ་ཏས་བསང་། སྭ་བྷ་བས་སྦྱང་། འཁོར་གྱི་སྟེང་དུ་ཧཱུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་བ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་དབུས་སུ་ཟླ་བ་ལ་སྔགས་ཀྱི་ཕྲེང་བས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། །
སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེའི་བྱིན་རླབས་ནུས་མཐུ་ཐམས་ཅད་བསྡུས་ནས་སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཅེས་བརྗོད་ཅིང་། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཅེས་བཟླས་མཐར། སྔགས་ཕྲེང་གདན་དང་བཅས་པ་འོད་དུ་ཞུ་བ་ལས་བུམ་པའི་ཆུ་ནུས་པ་དང་ལྡན་པར་གྱུར། ཅེས་བརྗོད་ཅིང་བསམ། ཡང་ན་བསང་ཆུ། ཨ་མྲྀ་ཏའི་སྔགས་ཀྱིས་བརླབ། སྤྲོ་ན་སྦྱང་ཁྲུས་རྒྱས་པར་བྱ། དེ་ཙམ་མི་ནུས་ན། རང་གི་ཐུགས་ཀ་ནས་ཁྲོ་བོ་བདུད་རྩི་འཁྱིལ་པའི་ཚོགས་དཔག་ཏུ་མེད་པ་སྤྲོས་ཏེ་བགེགས་རྣམས་རྒྱང་རིང་དུ་བསྐྲད་པར་གྱུར་པའི་མོས་པས་ལས་སྔགས་དང་སུམྦྷ་བརྗོད་ཅིང་། གུ་གུལ་གྱིས་བདུག །ཡུངས་ཀར་གྱིས་བྲབ། ཇི་ལྟར་བལྟམས་པ་སོགས་སྔགས་དང་བཅས་པའི་ཁྲུས་གསོལ་མདོར་བསྡུས་དང་། དེ་དག་སྐུ་ལ་སོགས་སྐུ་ཕྱི་པ་རྣམས་བྱ་ཞིང་། བཀྲ་ཤིས་ཀྱི་ཚིགས་བཅད་དང་བཅས་མེ་ཏོག་འཐོར། དེ་ནས་མདུན་རྟེན། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུཾ་ཕཊ་ཀྱིས་བསང་། ཨོཾ་སྭ་བྷཱ་བ་ཤུདྡྷསརྦ་དྷརཿསྭ་བྷཱ་བ་ཤུདྡྷོཉཧཾ་གིས་སྦྱང་། སྟོང་པའི་ངང་ལས་བུམ་པའི་བུམ་པ་གཅིག་ལས་མེད་ན། གྲངས་དང་མཉམ་པའི་སྟོང་པའི་ངང་ལས་པཾ་ལས་པདྨ་དང་སོགས་སྦྲེལ་ཞིང་། འོག་གི་ཚིག་ཀྱང་ཡངས་ཤིང་རྒྱ་ཆེ་བའི་ནང་དུ། ཞེས་བསྒྱུར་རོ། །པོ་ལས་པདྨ་དང་། ཨ་ལས་ཟླ་བའི་
དཀྱིལ་འཁོར་གྱི་སྟེང་དུ་ཧཱུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། རིན་པོ་ཆེ་དང་འབྲུ་བཅུད་ཟས་ནོར་ཚོགས་ཀྱིས་ཡོངས་སུ་གང་བར་གྱུར། ཅེས་བརྗོད་ཅིང་བསམས་ལ། ཆོས་ཉིད་རྣམ་པར་དག་པའི་སྔགས་རྒྱས་སྤེལ་བ་ནི། ཐལ་མོ་ཁོང་སྟོང་དུ་སྙིང་གར་བཞག་ལ། ཨོཾ་སྭ་བྷཱ་བ་ཤུདྡྷསརྦ་དྷརྨཱསྭ་བྷཱ་བ་ཤུདྡྷོཉཧཾ། ཡོ་བྱད་མ་དག་པ་རྣམས་སྦྱངས་ཏེ་སྐྱོན་ཐམས་ཅད་དང་བྲལ་བར་གྱུར། ཅེས་བརྗོད་ཅིང་བསམ། ༧ དེ་བཞིན་དུ། ནམ་མཁའ་མཛོད་ཀྱི་སྔགས་རྒྱས་སྤེལ་བ་ནི། ཐལ་མོ་ཁོང་སྟོང་དུ་སྦྱར་བའི་ཚིགས་བར་པ་རྣམས་བཅགས་པ་དཔྲལ་བར་བཞག་ལ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷསརྦ་ཐཱ་ཁཾ་ཨུཏྤ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། མགྲོན་སོ་སོའི་མོས་པ་དང་མཐུན་པའི་ཡོ་བྱད་ཀྱིས་ནམ་མཁའི་ཁམས་ཁྱབ་པར་གྱུར། བདུད་རྩི་འཁྱིལ་བའི་སྔགས་རྒྱས་བསྒྱུར་བ་ནི། ཐལ་མོ་སྦྱར་བའི་ཁ་གྱེན་དུ་ཕྱེ་སྟེ་མཐེ་བོང་བསྣོལ་ལ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། རྫས་རྣམས་མགྲོན་སོ་སོའི་སྡུག་བསྔལ་མཐའ་དག་ཞི་བར་བྱེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། རྒྱ་ཆེན་ཤུགས་ལྡན་འོད་ཀྱི་སྔགས་རྒྱས་སྤྱོད་པར་དབང་བ་ནི། གཡས་ཁུ་ཚུར་བཅངས་པའི་མཛུབ་མོ་བསྒྲེངས། གཡོན་རྡོ་རྗེ་ཁུ་ཚུར་སྙིང་གར་བཞག་ལ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། འཕགས་པ་རྣམས་ཀྱི་སྤྱན་སྔར་མཆོད་པའི་སྤྲིན་མཐའ་ཡས་པ་དང་། སེམས་ཅན་རྣམས་ཀྱི་དབང་
པོ་ལྔའི་སྤྱོད་ཡུལ་དུ་འདོད་པའི་ལོངས་སྤྱོད་ཟད་མི་ཤེས་པ་འབྱུང་བར་གྱུར། ཡེ་ཤེས་སྐར་མདའི་སྔགས་རྒྱས་ཐོབ་པར་བྱ་བ་ནི། གཡས་ཁུ་ཚུར་བཅངས་བ་སྙིང་གར་བཞག །གཡོན་མཐེ་བོང་ལག་པའི་མཐིལ་དུ་བཞག་པའི་མཆོག་སྦྱིན་གྱི་ཕྱག་རྒྱ་བྱས་ལ། ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མསྶ་མནྟ་སྥ་ར་ཎ་རསྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲཱིཿ་ད་ཡ་ཛྭ་ལ་ནི་སྭཱ་ཧཱ། ལུས་ཞིང་རྡུལ་གྱི་གྲངས་དང་མཉམ་པས་འཕགས་པ་རྣམས་ལ་ཕུལ་བས་མཉེས་ཤིང་སེམས་ཅན་རྣམས་ཡོ་བྱད་རྒྱལ་ཕམ་དང་རྩོད་པ་མེད་པར་སོ་སོའི་མོས་པ་བཞིན་ཐོབ་པར་གྱུར། དབང་བསྒྱུར་འཁོར་ལོའམ། ལྷ་མགོན་སྤྱིའི་སྔགས་རྒྱས་དབང་དུ་བསྒྱུར་བ་ནི། སོར་མོ་ནང་དུ་བསྣོལ་བའི་རྡོ་རྗེ་བསྡམས། མཐེ་བོང་གཉིས་གཤིབས་སྟེ་བསྒྲེངས་ལ། ན་མསྶ་མནྟ་བུདྡྷཱ་ནཾ་གྲ་ཧེ་ཤཱ་རི་པྲ་པཉྩ་ཏི་མ་ཧཱ་ས་མ་ཡ་སྭཱ་ཧཱ། མགྲོན་ཐམས་ཅད་ཀྱང་དམ་ཚིག་གི་དབང་གིས་བདག་ལ་འགོ་ཞིང་ཕན་པ་དང་བདེ་བའི་ཕྲིན་ལས་འབའ་ཞིག་བསྒྲུབས་པར་གྱུར། ཕྱག་རྒྱ་རྣམས་ཕྱོགས་བཅུར་བསྐོར་ཞིང་སྔགས་རྣམས་ལན་གསུམ་ལ་སོགས་པ་བརྗོད། མགོན་དཀར་སོགས་ཀྱི་སྐབས་སུ་ཚིག་ལྷུག་མེད་པའི་སྔགས་རྐྱང་པ་བརྗོད་པར་གསུངས་པས་དེ་ལྟར་བྱ། གང་ལྟར་ཡང་བུམ་པའི་ནང་གི་འབྲུ་སྨན་རིན་པོ་ཆེ་སོགས་ལྷ་སོ་སོའི་ཐུགས་དང་མཐུན་པའི་ཡོ་བྱད་ཟད་མི་ཤེས་པའི་གཏེར་དང་། ལོངས་སྤྱོད་དང་། བདུད་རྩིའི་རྒྱ་མཚོ་ཆེན་པོར་བྱིན་གྱིས་བརླབས་ནས། བྲིས་སྐུ་དང་སྔགས་བྱང་སོགས་ལྷར་བསྐྱེད་པ་ནི། དེ་ལྟ་བུའི་བུམ་པ་
རྣམས་ཀྱི་སྟོད་ཀྱི་ཆར་དབུས་སུ་པཾ་ལས་པདྨ་དང་། ཞེས་སོགས་རང་རང་གི་མངོན་རྟོགས་ལྟར་དམ་ཚིག་པ་བསྐྱེད། གནས་གསུམ་བྱིན་གྱིས་བརླབ། ཡེ་ཤེས་པ་གཞུག །དབང་བསྐུར་རྒྱས་གདབ་རྒྱས་བསྡུས་གང་རིགས་དང་། མཆོད་པ་བསང་སྦྱང་། སྟོང་པའི་ངང་ལས་ༀ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱ་ཏྱཾ། པུཎྜེ། དྷུ་པེ། ཨཱ་ལོ་ཀེ། གནྡྷེ། ནེ་བིད། ཤབྡ་ཨཱཿཧཱུྃ་གི་བར་སྦྱར་བས་བརླབ། མཚན་སྔགས་ཀྱི་མཐར། ས་པ་རི་ཝཱ་ར་ཨརྒྱུ་པྲ་ཏིཙྪ་སྭཱ་ཧཱ་ནས། ཤབྡའི་བར་སྦྱར་བས་མཆོད། རང་གཞུང་གི་བསྟོད་པ་རྒྱས་བསྡུས་གང་རིགས་ཀྱིས་བསྟོད། ཐུགས་རྒྱུད་བསྐུལ་བར་དམིགས་ཏེ་བཟླས་པ་གཙོ་བོར་བྱ། འདིའི་སྐབས་བུམ་པ་ལ་གཟུངས་ཐག་བཏགས་ཏེ་བཟུང་ཡང་ལེགས། བཟླས་དམིགས་སོ་སོའི་གཞུང་ནས་འབྱུང་བ་ལྟར་དང་སྤྱིར་བཏང་ནོར་བུམ་ལ། རང་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་དབུལ་ཕོངས་ཀྱི་སྡུག་བསྔལ་དང་བྲལ་བར་བྱས། སྣོད་བཅུད་སྲིད་ཞིའི་དགེ་མཚན་
ལེགས་ཚོགས་དཔལ་ཡོན་དྭང་བཅུད་མ་ལུས་པ་བསྡུས་ཏེ་མདུན་གྱི་རྟེན་རྫས་རྣམས་ལ་ཐིམ་པས་འདོད་རྒུ་ཐམས་ཅད་ཡིད་བཞིན་དུ་འབྱུང་བའི་གཏེར་ཆེན་པོའི་བུམ་པ་བཟང་པོར་གྱུར་པར་བསམས་ལ་བཟླས་པ་བྱ། བརྟན་མ་ལ། རང་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། དཔག་ཚད་བརྒྱད་ཁྲི་ཚུན་ཆད་ཀྱི་སྣོད་བཅུད་ཀྱི་རྒུད་པ་ཐམས་ཅད་བསལ། དཔལ་དང་གཟི་བྱིན་བསྐྱེད། བཅུད་དང་དྭང་མ་ཐམས་ཅད་བསྡུས་ཏེ་མདུན་གྱི་རྟེན་རྫས་རྣམས་ལ་ཐིམ་པས་ས་བཅུད་དང་དགེ་མཚན་ཐམས་ཅད་འཕེལ་བའི་ནུས་པ་དང་ལྡན་པར་གྱུར་པའི་མོས་པས་བཟླ། གླུ་བུམ་སྐབས། རང་གི་ཐུགས་ཀ་ནས་འོད་ཟེར་བདུད་རྩིའི་རང་བཞིན་ཅན་འཕྲོས། མདུན་བསྐྱེད་འཁོར་དང་བཅས་པ་ལ་ཕོག་པས་ཟག་པ་མེད་པའི་བདེ་བ་ཁྱད་པར་ཅན་བསྐྱེད། དེའི་ཐུགས་ཀ་ནས་འོད་ཟེར་འཕྲོས། བརྟན་གཡོའི་དྭང་བཅུད་མ་ལུས་པ་བསྡུས་ནས་མདུན་གྱི་རྟེན་རྫས་རྣམས་ལ་ཐིམ་པས་སྣོད་བཅུད་ཀྱི་དཔལ་འབྱོར་ཕུན་སུམ་ཚོགས་པ་ཐམས་ཅད་སྐྱེད་པའི་ནུས་པ་དང་ལྡན་པར་གྱུར་པའི་མོས་པས་བཟླའོ། །ཐུན་མཐར་མཆོད་བསྟོད་རང་རང་གི་གཞུང་ལྟར་དང་། འདོད་གསོལ་སོ་སོའི་གཞུང་ལྟར་རམ། ནོར་བུམ་ལ། མགོན་པོ་ཛམྦྷ་ལས་བདག་དང་སེམས་ཅན་ཐམས་ཅད་ལ་ལོག་
པའི་འཚོ་བ་མ་ཡིན་པའི་ཆོས་དང་མཐུན་པའི་འབྱོར་བ་ཕུན་སུམ་ཚོགས་པ་སྩལ་དུ་གསོལ། །ཞེས་པ་ལྟ་བུ་དང་། བརྟན་མ་ལ། སའི་ལྷ་མོས་བདག་དང་སྦྱིན་པའི་བདག་པོ་ལ་ལོངས་སྤྱོད་ཕུན་སུམ་ཚོགས་པ་ཐམས་ཅད་སྩལ་ཞིང་། ཡུལ་ཕྱོགས་འདིར་བཀྲ་ཤིས་པ་དང་། བདེ་ལེགས་དཔལ་འབྱོར་གྱི་དངོས་གྲུབ་རྒྱུན་མི་ཆད་པར་འབྱུང་བར་མཛད་དུ་གསོལ། ཞེས་དང་། ཀླུ་ལ། ཀླུའི་རྒྱལ་པོ་འཁོར་དང་བཅས་པས་བདག་དང་སྦྱིན་པའི་བདག་པོ་ལ་སོགས་གོང་ལྟར་བྱ། གཏོར་མ་རང་རང་གི་གཞུང་ལྟར་རམ། སྤྱི་ཁྱབ་ལ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་ཞུ་བ་ལས་བྱུང་བའི་གཏོར་མ་ལྷའི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་གིས་བརླབ། མཚན་སྔགས་སམ་སྙིང་པོའི་མཐར། ཨ་ཀཱ་རོ་བཏགས་པས་དབུལ། མཆོད་བསྟོད་འདོད་གསོལ་བྱ། ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་འབྲེལ་སྙིང་པོ་བཟླས་པའི་མེ་ཏོག་ཐལ་མོ་སྦྱར་བའི་བར་དུ་ཐོགས་ཏེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་
ངན་ལས་མི་འདའ་བར་བརྟན་པར་བཞུགས་སུ་གསོལ། ཁྱད་པར་དུ་གཏེར་ཆེན་པོའི་བུམ་པ་བཟང་པོ་འདི་རྣམས་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་རྣམས་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། །བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ལ་ལོག་པའི་འཚོ་བ་མ་ཡིན་པའི་ཆོས་དང་མཐུན་པའི་འབྱོར་བ་ཕུན་སུམ་ཚོགས་པ་སྩལ་དུ་གསོལ། །ཞེས་སམ། བརྟན་པར་བཞུགས་ནས་ཀྱང་བདག་དང་སྦྱིན་པའི་བདག་པོ་ལ་ལོངས་སྤྱོད་ཕུན་སུམ་ཚོགས་པ་ཐམས་ཅད་སྩལ་ཞིང་། ཡུལ་ཕྱོགས་འདིར་བཀྲ་ཤིས་པ་དང་། བདེ་ལེགས་དཔལ་འབྱོར་གྱི་དངོས་གྲུབ་རྒྱུན་མི་ཆད་པར་འབྱུང་བར་མཛད་དུ་གསོལ། ཞེས་དང་། ༀ་སུ་པྲ་ཏིཥྛ་བཛྲ་ཡ་སྭཱ་ཧཱ། མང་ཏུ་བརྗོད་ཅིང་མེ་ཏོག་འཐོར། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུཾ་སྔོན་པོ། དགེ་བ་འདི་ཡིས་མྱུར་དུ་བདག །སོགས་བདག་བསྐྱེད་ཀྱི་དགེ་བསྔོ་དང་། ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ལྷ་ཡང་དུས་སུ་ཆར་འབེབས་ཤིང་། །ལོ་ཏོག་ཕུན་སུམ་ཚོགས་པར་ཤོག །རྒྱལ་པོ་ཆོས་བཞིན་བྱེད་པ་དང་། །
འཇིག་རྟེན་དག་ཀྱང་དར་བར་ཤོག །འབད་དང་རྩོལ་བས་མ་གོས་པ། །ཡིད་བཞིན་ནོར་བུ་དཔག་བསམ་བཞིན། །སེམས་ཅན་རེ་བ་སྐོང་མཛད་པ། །བསམ་པ་འགྲུབ་པའི་བཀྲ་ཤིས་ཤོག །ཅེས་སོགས་བསྔོ་སྨོན་ཤིས་བརྗོད་ཁྱད་པར་བ་དང་། གཞན་ཡང་། ཆེ་བའི་ཆེ་མཆོག་སྟོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་རླབས་ཀྱིས། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་ཡིན །དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་རླབས་ཀྱིས། །ཉོན་མོངས་སྡུག་བསྔལ་གདུང་བའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །དགེ་འདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་རླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམ་པར་འཕེལ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་རླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ནས། །བདེ་ལེགས་བསམ་པ་ཡིད་བཞིན་འགྲུབ་པ་དང་། །ཚེ་རིང་ནད་མེད་བདེ་སྐྱིད་ལྡན་པར་ཤོག །ཅེས་དང་། གནས་འདིར་ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པ། །
དཀོན་མཆོག་གསུམ་གྱི་བཀྲ་ཤིས་ཤོག །ཅེས་སོགས་མདོ་རྒྱུད་ནས་འབྱུང་བའི་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད་པས་དགེ་ལེགས་སུ་བྱ། དེ་ལྟ་བུར་ཐུན་དུ་བཅད་ལ་ལེགས་པར་བསྒྲུབས་པའི་རྗེས། ནོར་ལྷའི་རིགས་ཀྱི་བུམ་གཏེར་མཛོད་དང་། ཁྱིམ་ཕུགས། ཕྱུགས་ལྷས་ཀྱི་གོང་། བརྟན་མའི་བུམ་པ་ཡུལ་གྱི་དབུས། མཁར་གྱི་རྩེ། ཞིང་ས་བཟང་པོའི་དཀྱིལ། ཀླུ་བུམ་ཀླུ་གནས་ངེས་པའི་མཚོ་དང་། ཆུ་མིག །རྫིང་བུ་སོགས་ཀྱི་མགོའམ། མདུན་སོགས་ཀྱིས་མཚོན་ཏེ་གང་དུ་སྦ་བའི་སར་ལག་ཚགས་དམ་པར་བྱས་ལ་གཞུག །འཇུག་པའི་སྐབས་སུའང་ཆོ་ག་ཚར་རེ་བསྐྱར་ན་ལེགས། མ་གྲུབ་ན་བརྟན་བཞུགས་དང་བསྔོ་སྨོན་བཀྲ་ཤིས་རྒྱས་པར་བརྗོད། །དེ་ལྟར་བགྱིས་པས་སྣོད་བཅུད་ཀྱི་རྒུད་པ་ཞི་ཞིང་། དཔལ་འབྱོར་ལེགས་ཚོགས་ཐམས་ཅད་རྒྱས་པར་འགྱུར་བས་མཚོན་ཕན་ཡོན་བསམ་གྱིས་མི་ཁྱབ་པ་ནི་སོ་སོའི་གཞུང་ལས་ཤེས་པར་བྱའོ། །ཞེས་པའང་ཉེར་མཁོའི་ཆེད་དུ་མཉྫུགྷོ་ཥས་ལྷག་པའི་བསམ་པས་བྲིས་པ་སྲིད་ཞིའི་དགེ་མཚན་དུས་རྟག་ཏུ་རྒྱས་པར་གྱུར་ཅིག། །།སརྦ་དཱ་མངྒ་ལཾ་བྷ་བ་ཏུ།། །།
ཤོག་སྟོང་
༄༅། །ས་སྙིང་དང་བརྟན་མ་སྦྲགས་སྒྲུབ་ཀྱི་བུམ་གཏེར་སྒྲུབ་ཚུལ་ཤིན་ཏུ་བསྡུས་པ་ཕན་བདེའི་ཡང་སྙིང་ཞེས་བྱ་བ་བཞུགས་སོ།། །།
༄༅། །ཨོཾ་སྭསྟི་སིདྡྷཾ། །བྱང་ཆུབ་སེམས་ཀྱི་ནོར་བུ་ཡིས། །ཕན་བདེའི་འདོད་རྒུ་སྩོལ་མཛད་པའི། བླ་མ་མཆོག་དང་ལྷག་པའི་ལྷར། །བཏུད་ནས་གཏེར་བུམ་སྒྲུབ་ཐབས་བཤད། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། བུམ་པ་ཡུལ་གྱི་བྲེ་གང་ཤོང་བ་ལས་མི་ཆུང་བའི་ནང་། དབུས་སུ་སྲོག་ཤིང་བརྟན་པར་བཙུགས་པ་ལ་གཟུངས་ཀྱི་ཤོག་དྲིལ་དཀྲི་ཞིང་ན་བཟའ་གསོལ།, སྒྲུབ་ཆེན་བྱས་པའི་སྒྲུབ་གཏོར། །མ་ཎི་རིལ་བུ། བྱ་རྒྱུད་ལུགས་ཀྱི་བུམ་རྫས་ཉེར་ལྔ། སྙིང་ཞོ་ཤ་མཁལ་མ་ཞོ་ཤ་སོགས་ཞོ་ཤའི་རིགས་དང་། དུག་རིགས་མ་འདྲེས་པའི་སྨན་སྣ། གནས་རྟེན་བྱིན་ཅན་དང་ས་དཔལ་ཅན་གྱི་ས་སྣ་ཆུ་སྣ། ལྕགས་དང་ར་གན་མུ་ཟི་ལ་སོགས་མ་འདྲེས་པའི་རིན་པོ་ཆེའི་རིགས། འབྲུ་ནག་མ་གཏོགས་པའི་འབྲུ་སྣ། ཤིང་ཏོག། ཤ་ཆང་མ་གཏོགས་པའི་དཀར་མངར་དང་ཁུར་བ་སོགས་ཟས་སྣ་གཙང་མ། ཤུག་པ་སོགས་བཟང་ཤིང་གི་ཕྱེ་མ་
དང་བཅས་པས་ཕྱུར་བུར་བཀང་། ཁ་འཇིམ་པས་བཅད་ཅིང་རས་དཀར་པོ་ལ་རིགས་ལྔའི་ཕྱག་མཚན་བྲིས་པས་གཡོགས། མགྲིན་པ་དམ་པར་བཅིང་། གཟུངས་གཞུག་ཤོག་དྲིལ་ལ་བྲི་རྒྱུ། གཞུང་གི་བཟླས་སྔགས་རྣམས་དང་། ནཱ་ག་ཕུཏ་ལ་མ་ཐ་སྙན་ལ་ཐ། མི་འཛད་ཡུན་གྱི་གཏེར་མཛོད་ཅིག །ཅེས་དང་། དབྱངས་གསལ་རྟེན་སྙིང་། འབད་དང་སྩོལ་བས་མ་གོས་པ། ཞེས་སོགས་བཀྲ་ཤིས་དང་། སུ་པྲ་ཏིཥྛས་མཐའ་བརྒྱན་པ་བྲིའོ། །ས་སྙིང་དང་ནོར་རྒྱུན་མ་སྦྲགས་སྒྲུབ་ཀྱི་སྙིང་གཏེར་དང་ནོར་བུམ་གཞི་མཐུན་དུ་བྱེད་ན། བཅས་ཀྱི་སྐབས། གཟུངས་གཞུག་ལ་ནོར་རྒྱུན་མའི་སྙིང་པོ་དང་། སྤྲོ་ན་གཟུངས་རིང་ཡང་བྲི། ཤ་ཆང་སྒོག་བཙོང་གླ་རྩི་སོགས་མ་འདྲེས་པའི་གཡང་རྫས་ཀྱི་རིགས་ཐུམ་བོར་བྱས་པའང་གཞུག །ངག་འདོན་སྐབས་ནོར་རྒྱུན་མ་བསྐྱེད་ཆོག་སོགས་མཆན་གསལ་ལྟར་སྦྱར་བས་ལེགས་པར་གྲུབ་བོ། །གང་ལྟར་ཡང་བཅའ་གྲུབ་ནས་
གཞི་གཙང་མའི་དབུས་སུ་འབྲུ་དཀར་ཅུང་ཟད་བཀྲམ་པར་བུམ་པ་བཞག དེའི་མདུན་དུ་གཏོར་མ་ལྕོག་ཟླུམ་དཀར་པོ་དང་། མཆོད་པ་བཤམ། སློབ་དཔོན་གྱི་མདུན་དུ་རྡོར་དྲིལ། འཐོར་ནས། གྲོགས་གཞན་ཡོད་ན་རྔ་རོལ་དུང་དཀར་སོགས་བཤམ། གཉིས་པ་ནི། བདག་བསྐྱེད་ཐུགས་རྗེ་ཆེན་པོའི་སྒོམ་བཟླས་རྒྱས་བསྡུས་གང་རིགས་རྗེས། སྤྲོ་ན་བུམ་པ་རྣམས་ལ་སྦྱོང་ཁྲུས་ཚུལ་བཞིན་བྱ། གང་ལྟར་ཡང་བུམ་པ། ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་འབྱུང་བ་རིམ་བརྩེགས་སྟེང་། །ཧཱུཾ་ལས་རིན་ཆེན་སྣ་ཚོགས་ལས་གྲུབ་པའི། །ཕྱི་ནི་བུམ་པ་ནང་ནི་གཞལ་ཡས་ཁང་། །ཤིན་ཏུ་ཉམས་དགའ་ལོངས་སྤྱོད་དུ་མས་གང་། །དེ་དབུས་སྣ་ཚོགས་པདྨ་ཟླ་བའི་སྟེང་། །ཀྵ་ལས་སེམས་དཔའི་ས་ཡི་སྙིང་པོ་དཀར། །མྱུ་གུ་དྲིལ་བུ་འཛིན་ཅིང་ཕྱེད་སྐྱིལ་བཞུགས། །ནོར་རྒྱུན་མ་དང་སྦྲགས་སྒྲུབ་སྐབས། མདུན་དུ་འཕགས་མ་ནོར་རྒྱུན་ལྷ་མོ་སེར། །ཕྱག་གཉིས་མཆོག་སྦྱིན་རིན་ཆེན་འབྲས་སྙེ་བསྣམས། །ཞེས་སྦྱར། དེ་མདུན་ས་ཡི་ལྷ་མོ་གསེར་གྱི་མདོག །ནོར་བུ་བུམ་འཛིན་སྐུ་སྟོད་ས་ནས་ཐོན། །རྒྱབ་ཏུ་ས་བདག་དབང་ཆེན་སྐུ་མདོག་སེར། །ཞལ་གཅིག་ར་བ་བཞི་ཡི་གདེངས་ཀ་ཅན་། །ཕྱག་བཞི་ཐལ་སྦྱར་ལྗོན་ཤིང་རི་རབ་འཛིན། །སྐུ་སྨད་སྦྲུལ་འཁྱིལ་རུ་སྦལ་སྟེང་དུ་བཞུགས། །གཡས་གཡོན་ལྷ་ཀླུ་གཞི་བདག་ཕོ་མོ་དང་། །སྒོ་བཞིར་སྲུང་བཞི་ཕྱི་ནང་བར་མཚམས་སུ། །
བཀྲ་ཤིས་རྫས་རྟགས་རྒྱལ་སྲིད་འདོད་ཡོན་ཚོགས། །ལྷ་ཀླུ་མི་ཡི་ལོངས་སྤྱོད་ཟད་མི་ཤེས། །རྒྱ་ཆེ་རྒྱུན་མི་འཆད་པའི་གཏེར་དུ་གྱུར། །ན་མ་སཱརྦ་ཏ་ཐཱ་ག་ཏེ་བྷྱོ་བི་ཤྭ་སོགས་དང་། ཨོཾ་བཛྲ་སྥ་ར་ཎ་ཁཾ། །གཙོ་འཁོར་རྣམས་ཀྱི་གནས་གསུམ་འབྲུ་གསུམ་དང་། །ས་བོན་འོད་ཀྱིས་འཁོར་བཅས་སྤྱན་དྲངས་གྱུར། ཅེས་གསལ་བཏབ་ལ། སྤྱན་འདྲེན་པ་ནི། ཧོ༔ གསོན་ཅིག་དགོངས་ཤིག་མངོན་ཤེས་ཅན་། །ཡེ་ཤེས་སྤྱན་དང་ལྡན་པ་པོ། །བྱང་ཆུབ་སེམས་དཔའ་སེམས་དཔའ་ཆེ། །ས་ཡི་སྙིང་པོ་དགོངས་སུ་གསོལ། །ནོར་བུམ་དང་སྦྲགས་སྒྲུབ་སྐབས། འདོད་རྒུའི་དངོས་གྲུབ་ཆར་འབེབས་པའི། །ནོར་རྒྱུན་ལྷ་མོ་དགོངས་སུ་གསོལ། །ཞེས་སྦྱར། བྱང་ཆུབ་སེམས་མ་རྫུ་འཕྲུལ་ཅན། །ལྷ་མོ་བརྟན་མ་དགོངས་སུ་གསོལ། །ལས་ལས་གྲུབ་པའི་སྟོབས་པོ་ཆེ། །ས་བདག་དབང་ཆེན་དགོངས་སུ་གསོལ། །ལྷ་འདྲེ་ཡིད་ཀྱི་མངོན་ཤེས་ཅན། །ཡུལ་ཕྱོགས་འདི་ལ་གནས་པ་ཡི། །ཀླུ་དང་ས་བདག་དགོངས་སུ་གསོལ། །དེ་རིང་བདག་དང་ཡོན་བདག་གི། །འགལ་རྐྱེན་བར་ཆད་ཞི་བ་དང་། །མཐུན་རྐྱེན་ལེགས་ཚོགས་རྒྱས་པའི་ཕྱིར། །གཏེར་བདག་ཁྱེད་རྣམས་སྤྱན་འདྲེན་ན། །ཐུགས་རྗེའི་དབང་གིས་གཤེགས་སུ་གསོལ། །རིན་ཆེན་སྣ་ཚོགས་གཏེར་བུམ་ལ། །སྐུ་ཡི་རྟེན་དང་གནས་མཛོད་ཅིག །
ཡུལ་ཕྱོགས་འདི་རུ་དུས་རྟག་ཏུ། །ལོ་ལེགས་འབྲུ་དང་རྩྭ་རྣམས་འཕེལ། །ས་བཅུད་དཔལ་གཡང་རྒྱས་པ་དང་། །བདག་ཅག་དཔོན་སློབ་ཡོན་མཆོད་ཀྱཻ། །ཁ་འཛིན་རྒྱབ་བརྟེན་སྟོང་གྲོགས་མཛོད། །བདེ་སྐྱིད་ལྡན་པའི་དངོས་གྲུབ་སྩོལ། ཨོཾ་ཀིཾ་ཧི་རཱ་ཛ། ནོར་བུམ་དང་སྦྲགས་སྒྲུབ་སྐབས། བ་སུ་དྷ་རཱི། ཞེས་སྦྱར། སྲི་ཤྲཱི་དེ་བཱི་སརྦ་བྷུ་མི་པ་ཏི་ས་པཱ་རི་ཝཱ་ར་ཨེ་ཧེ་ཧི། བཛྲ་ས་མཱ་ཛཿ ཛཿཧཱུྃ་བཾ་ཧོ ཏིཥྛ་ལྷན། ས་མ་ཡ་ཧཱུཾ། ས་མ་ཡ་ཧོ༔ ཞེས་སྤྱན་དྲངས་ཤིང་བསྟིམ། ཕྱག་འཚལ་བ་ནི། སེམས་དཔའ་ས་ཡི་སྙིང་པོ་དང་། །ས་ཡི་ནོར་བུམ་དང་སྦྲགས་སྒྲུབ་སྐབས། ནོར་རྒྱུན་ཞེས་བསྒྱུར། ལྷ་མོ་བརྟན་མ་ཆེ། ས་བདག་ཀླུ་གཉན་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་པ་ནི། ཁྱེད་རྣམས་མཆོད་པའི་དམ་རྫས་ནི། །དངོས་སུ་ཅི་འབྱོར་གཙང་མར་བཤམས། །ཡིད་ཀྱིས་དཔག་ཏུ་མེད་པར་སྤྲུལ། །ཧ་ཧོ་ཧཱུྃཡིས་བྱིན་བརླབས་པ། །ཟག་མེད་བདེ་བ་སྐྱེད་པའི་རྫས། །ཐུགས་ལ་བཞེད་དགུར་འཆར་བ་ཡི། །མཆོད་གཏོར་ལོངས་སྤྱོད་འདི་བཞེས་ལ། །འདོད་རྒུའི་དཔལ་འབྱོར་རྒྱས་པ་དང་། །ས་བཅུད་འཕེལ་བའི་དངོས་གྲུབ་སྩོལ། །ཨོཾ་ཀྱི་ཧི་རཱ་ཛ། ནོར་བུམ་དང་སྦྲགས་སྒྲུབ་སྐབས། བ་སུ་དྷ་རི་ཞེས་སྦྱར། སྲི་ཤྲཱི་དེ་ཝཱི་སརྦ་བྷ་མི་པ་ཏི་ས་པ་རི་ཝཱ་ར་ཨབྷཾ་ནས། ཤཔྟ་སརྦ་པཱུ་ཛ་ཨཱཿཧཱུྃ། ཨོཾ་ཀྵི་ཧི་
རཱ་ཛ། ནོར་བུམ་དང་སྦྲགས་སྒྲུབ་སྐབས། བ་སུ་དྷ་རི་ཞེས་སྦྱར། དྲི་བྷཾ་དེ་བཱི་སརྦ་བྷུ་མི་པ་ཏི་ས་པ་རི་ཝཱ་ར་ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བསྟོད་པ་ནི། གྲངས་མེད་གོང་ནས་སངས་རྒྱས་ཀྱང་། །འགྲོ་བའི་དོན་ཏུ་སེམས་དཔའི་ཚུལ། །སེམས་དཔའི་ས་ཡི་སྙིང་པོ་ལ། །ཕྱག་འཚལ་མཆོད་བསྟོད་སྐྱབས་སུ་མཆི། །ནོར་བུམ་དང་སྦྲགས་སྒྲུབ་སྐབས། གང་གི་མཚན་ཙམ་དྲན་པས་ཀྱང་། །འཛད་མེད་དབྱིག་གི་ཆར་འབེབས་པ། །འཕགས་པ་ནོར་རྒྱུན་ལྷ་མོ་ལ། །ཕྱག་འཚལ་མཆོད་བསྟོད་སྐྱབས་སུ་མཆི། །ཞེས་སྦྱར། ས་བརྒྱད་ལ་གནས་སེམས་མ་ཆེ། །སྟོང་གསུམ་འཇིག་རྟེན་ས་ཡི་བདག །ས་ཡི་ལྷ་མོ་བརྟན་མ་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱཻ། །ལུས་བཏུད་པ་ཡིས་རྣམ་ཀུན་ཏུ། །མཆོད་ཅིང་བསྟོད་དེ་ཕྱག་ཀྱང་འཚལ། །བདག་ཅག་ཡོན་མཆོད་འཁོར་བཅས་ཀྱཻ། །ནད་གདོན་གནོད་པ་ཞི་བ་དང་། །ས་བཅུད་དཔལ་གཡང་རྒྱས་པར་མཛོད། །འདོད་རྒུའི་དངོས་གྲུབ་སྩལ་དུ་གསོལ། །བཤགས་པ་ནི། འཁོར་འདས་མགྲོན་རྣམས་ཐམས་ཅད་ལ། །ཚེ་རབས་སྔོན་ནས་ད་ལྟའི་བར། །མི་དགེ་མི་རུང་ལས་བགྱིས་པ། །དེ་དག་ཐམས་ཅད་མཐོལ་ལོ་བཤགས། །ཡི་གེ་བརྒྱ་པ་བརྗོད། བཟླས་པ་ནི། བུམ་ལྷའི་
ཐུགས་སྲོག་སྔགས་ཕྲེང་ལས། །འོད་འཕྲོས་བརྟན་གཡོའི་རྒུད་པ་ཞི། །ཚེ་བསོད་དཔལ་འབྱོར་ཡེ་ཤེས་རྒྱས། །དཔག་ཚད་བརྒྱད་ཁྲི་བཞི་སྟོང་གི། །ས་བཅུད་བསྡུས་ནས་བུམ་པར་ཐིམ། །དངོས་གྲུབ་ཀུན་གྱི་གཏེར་དུ་གྱུར། །ཅེས་བརྗོད་ཅིང་བསམས་ལ། ཨོཾ་ཀིཾ་ཧི་རཱ་ཛ། ནོར་བུམ་དང་། སྦྲགས་སྒྲུབ་སྐབས། བ་སུ་དྷ་རི་ཞེས་སྦྱར། དྲི་ཤྲཱི་དེ་པཱི་སྭཱ་ཧཱ། ཞེས་བསྙེན་པ་དང་། ཨོཾ་ཀིཾ་ཧི་རཱ་ཛ། ནོར་བུམ་དང་སྦྲགས་སྒྲུབ་སྐབས། བ་སུ་དྷ་རཱི་ཞེས་སྦྱར། དྲི་ཤྲཱི་དེ་པཱི་སརྦ་སིདྡྷི་སྭཱ་ཧཱ། ཞེས་སྒྲུབ་སྔགས་ཅི་ནུས་དང་། སྤྲོ་ན། ཨོཾ་སུམྦྷ་ནི་སུམྦྷ་ཧ་ར་ཙ་ར་མ་ཧཱ་པཱ་ཤ་མཱ་རུ་ཏ་ཨ་མོ་གྷ་བཛྲ་སནྟ་སྭཱ་ཧཱ། ཞེས་སའི་སྙིང་པོའི་གཟུངས་དང་། ནོར་བུམ་དང་སྦྲགས་སྒྲུབ་སྐབས། ཨོཾ་ཤྲཱི་བ་སུ་ནི་དྷ་ན་ཀྱི་ཏྲེ་སྭཱ་ཧཱ། ཞེས་དང་། ཨོཾ་བ་སུ་དྷ་རི་ཎི་སྭཱ་ཧཱ། ཞེས་རྒྱུད་སྡེ་གོང་འོག་ལས་འབྱུང་བའི་ནོར་རྒྱུན་མའི་སྙིང་པོ་དང་། ཏདྱ་ཐཱ། ཨོཾ་ཙི་རི་ཙི་རི། ཙུ་རུ་ཙུ་རུ། ཀུ་རུ་ཀུ་རུ། དོ་ཙུ་དོ་ཙུ། བ་ཧ་བ་ཧ་སྭཱ་ཧཱ། ཞེས་ལྷ་མོ་བརྟན་མའི་རིག་པ་དང་། ཨོཾ་ཨ་ཀ་ནི་ནི་ཀ་ནི་ཨ་བྷི་ལ་མཎྜལ་མ་ཡེ་སྭཱ་ཧཱ། ཞེས་ཉེས་སེལ་གྱི་སྔགས་རྣམས་ཀྱང་ཅི་རིགས་པ་བཟླས་མཐར། རྗེས་ཆོག་ནི། ཨོཾ་ཀྵི་ཧི་རཱ་ཛ། ནོར་བུམ་དང་སྦྲགས་སྒྲུབ་སྐབས། བ་སུ་དྷ་རི་ཞེས་སྦྱར། དྲི་ཤྲཱི་དེ་པཱི་སརྦ་བྷུ་མི་པ་ཏི་ས་པ་རི་ཝཱ་ར་ཨརྒྱུ་ནས། ཤབྡ་སརྦ་པཱུ་
ཛ་ཨཱཿཧཱུཾ། ཞེས་པས་མཆོད། ས་སྙིང་ནོར་བུམ་དང་སྦྲགས་སྒྲུབ་སྐབས། ནོར་རྒྱུན་ཞེས་བསྒྱུར་ལྷ་མོ་བརྟན་མ་དང་། །ས་བདག་ཚོགས་ལ་ཕྱག་འཚལ་བསྟོད། །མཆོད་གཏོར་ཆུང་དང་རྫས་མ་འཛོམས། །ཉེས་འགལ་གང་མཆིས་མཐོལ་ཞིང་བཤགས། །ས་སྙིང་ས་ཡི་ལྷ་མོ་གཉིས། །ནོར་བུམ་དང་སྦྲགས་སྒྲུབ་སྐབས། ས་སྙིང་ནོར་རྒྱུན་བརྟན་མ་རྣམས། །ཞེས་བསྒྱུར། བདག་དང་ཡོན་བདག་བུམ་གཏེར་ལ། །བརྟན་པར་བཞུགས་ལ་ས་བཅུད་སྤེལ། །འདོད་རྒུའི་ལོངས་སྤྱོད་དངོས་གྲུབ་སྩོལ། །ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་བརྟན་བཞུགས་བྱ། འབད་དང་རྩོལ་བས་མ་གོས་པའི། ཞེས་སོགས་བཀྲ་ཤིས་གང་རིགས་བརྗོད། ཚར་གྲངས་དགོས་ན་དེ་ལྟ་བུའི་སྒོ་ནས་གྲངས་གསོག མཐར་བརྟན་བཞུགས་གྲུབ་རྗེས། མཆོད་སྦྱིན་གནས་འདིར་སོགས་སམ། །འཇིག་རྟེན་པ་ཡི་ས་བདག་རྣམས། །རང་རང་སོ་སོའི་གནས་སུ་གཤེགས། །ལོ་ཀ་བྷུ་མི་པ་ཏི་སརྦ་གཙྪ་ཞེས་དང་། བཀྲ་ཤིས་རྒྱས་པར་བརྗོད་དོ། །གསུམ་པ་ནི། བསྒྲུབས་ཟིན་པའི་བུམ་པས་དཔལ་བཟང་པོར་རླན་གྱིས་མི་འཇིག་པའི་ཆས་དང་བཅས་ཏེ་སྦ། བརྟན་བཞུགས་ཤིས་བརྗོད་ཙམ་གྱིས་ཀྱང་རུང་མོད། ཅུང་ཟད་སྤྲོ་ན་གོང་གི་ཆོ་ག་ཚར་གཅིག་བསྐྱར་ལ། སརྦ་གཙྪའི་རྗེས། ཧཱུྃ། འབྱུང་བ་ལྔ་ནི་སངས་རྒྱས་དངོས། །ས་ཡི་ལྷ་མོ་མཁའ་ཕྱེས་ཤིག །སྐུ་གསུང་ཐུགས་ཡོན་ཕྲིན་ལས་ཀྱཻ། །སྒྲུབ་པ་
ལས་ཀྱི་གཏེར་སྦེད་དོ། །སྙིང་པོ་རིན་ཆེན་སྣ་ལྔ་འབྲུ། །སྨན་སྣ་དམ་རྫས་གཏོར་མ་ཡི། །ཡིད་བཞིན་གཏེར་མཆོག་འདི་སྦས་པས། །འདིར་འདུས་རྣལ་འབྱོར་བདག་ཅག་རྣམས། །བླ་མེད་བྱང་ཆུབ་མ་ཐོབ་བར། །སྐྱེ་རྒ་ན་འཆིའི་དུས་བྱུང་ཚེ། །གཏེར་མཆོག་འདི་ཡི་བྱིན་རླབས་ཀྱིས། །བདེ་ཐོག་ལོངས་སྤྱོད་ལྡན་པར་ཤོག །ཕྱག་རྒྱ་ལྔ་ཡི་རྒྱས་གདབ་བོ། །ཡོན་ཏན་མཐའ་རྒྱས་བཀྲ་ཤིས་ཤོག །ཨོཾ་བཛྲ་རཏྣ་པདྨ་ཀརྨ་སིདྡྷི་ཧཱུཾ་ཧཱུཾ། རྡོ་ལེབ་ལ་རིགས་ལྔའི་ཕྱག་མཚན་བྲིས་པས་བཀབ་ནས། ཧཱུཾ། རྡོ་རྗེ་འབར་བའི་རྒྱས་བཏབ་པས། །མི་ཤིག་མི་འགྱུར་རབ་ཏུ་བརྟན། །རིན་ཆེན་འབར་བའི་རྒྱས་བཏབ་པས། །ཚེ་དང་བསོད་ནམས་དཔལ་འབྱོར་རྒྱས། །པདྨ་འབར་བའི་རྒྱས་བཏབ་པས། །ཆགས་མེད་སྐྱོན་བྲལ་ཡོན་ཏན་ལྡན། །རལ་གྲི་འབར་བས་རྒྱས་བཏབ་པས། །བདུད་བཞིའི་བར་ཆད་རྩད་ནས་ཆོད། །འཁོར་ལོ་འབར་བས་རྒྱས་བཏབ་པས། །ཉོན་མོངས་འཁོར་བའི་སྡུག་བསྔལ་ཞི། །རྒྱས་ལྔ་བཏབ་པའི་བྱིན་རླབས་ཀྱིས། །སངས་རྒྱས་བསྟན་པ་དར་བ་དང་། །སེམས་ཅན་བདེ་སྐྱིད་ལྡན་པའི་ཕྱིར། །བསྟན་པའི་བཙས་སུ་འདི་གྱུར་ཅིག །གྲོགས་རྣམས་ཀྱིས་ས་རྡོས་འཐས་པར་བཅག རང་ཉིད་ཀྱིས་བཀྲ་ཤིས་གང་ཤེས་དང་། རྟེན་འབྲེལ་སྙིང་པོ་དང་། སུ་པྲ་ཏིཥྛསོགས་བརྗོད་ལ་མ་ཏོག་གི་ཆར་ཕབ། ལས་ཀྱི་རྗེས་མི་
མངོན་པར་བྱའོ། །གནོད་སྦྱིན་གཏེར་འཆང་མཆོག་རྣམས་ཀྱཻ། །འདོད་རྒུའི་བུམ་པ་བཟང་པོ་བཞིན། །གདམས་པའི་སྙིང་པོ་འདི་བརྗོད་དགེས། །ཕན་བདེའི་དཔལ་ཡོན་རྒྱས་གྱུར་ཅིག །ཅེས་པའང་མ་ཧཱ་ཙི་ནའི་གཞུང་གི་གཏོ་བཅོས་རྣམས་དང་བཀའ་གཏེར་སྤྱིའི་མན་ངག་ལ་བརྟེན་ནས་གྲུབ་བརྙེས་ཀརྨ་ཆགས་མེད་ཀྱིས་མཛད་པའི་གཞུང་ལས་མདོར་བསྡུས་སྙིང་པོར་དྲིལ་བའི་ལེའུ་ཚན་ནོ། །སརྦ་མངྒ་ལཾ་བྷ་བ་ཏུ།། །།གནོད་སྦྱིན་འཁོར་ལོའི་ཆོ་ག་ལ་བརྟེན་ནས་གཏེར་བུམ་སྒྲུབ་པའི་མན་ངག་འདོད་རྒུའི་བུམ་བཟང་ཞེས་བྱ་བ་བཞུགས་སོ།། །།ཨོཾ་སྭ་སྟི། གང་ཞིག་བསྙེན་པས་འདོད་རྒུའི་དཔལ། །ཡིད་བཞིན་སྦྱིན་མཛད་བླ་མ་ལྷར། །བཏུད་ནས་ཕུན་ཚོགས་གཏེར་ཆེན་པོའི། །བུམ་བཟང་སྒྲུབ་པའི་མན་ངག་འབྲི། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྒྲུབ་པ་པོ་རྡོར་ཕྲེང་ནང་གི་ནོར་རྒྱུན་མའི་དཀྱིལ་འཁོར་དུ་དབང་ཐོབ་པའམ། མ་ཐོབ་ཀྱང་རིགས་གསུམ་སྤྱིའམ། ཨ་ར་པ་ཙ་ན་ལྷ་ལྔའི་དཀྱིལ་འཁོར་དུ་དབང་ཐོབ་པ། འདི་ཉིད་ཀྱི་འཁོར་ལོ་ལ་བརྟེན་པའི་རྗེས་གནང་ངམ། སྒྲུབ་ཐབས་རྒྱ་མཚོ་ནས་འབྱུང་བའི་རྗེས་གནང་ལེགས་པར་ཐོབ་ཅིང་། དམ་ཚིག་དང་སྡོམ་པ་རྣམ་པར་དག་པས་སྔོན་དུ་བསྙེན་པ་རྒྱས་བསྡུས་གང་རིགས་དང་། འཁོར་
ལོ་སྒྲུབ་པ་སོགས་ཇི་སྐད་བཤད་པ་བཞིན་ཚགས་སུ་ཚུད་པར་བྱས་ནས་ལག་ལེན་དངོས་ནི། རིན་པོ་ཆེའི་མ་རྫའི་བུམ་པ་གས་ཆག་མེད་པའི་ནང་དུ་ཀེ་ཚེ་དང་བྲ་བོ་མ་གཏོགས་པའི་འབྲུ་སྣ་ཚོགས། ར་གན་ཞ་ཉེ་མཁར་བ་མ་གཏོགས་པའི་རིན་པོ་ཆེ་སྣ་ཚོགས། དུག་རིགས་དང་གླ་རྩི་མ་གཏོགས་པའི་སྨན་སྣ་ཚོགས། ཤ་ཆང་སྒོག་རིགས་མ་གཏོགས་པའི་ཟས་སྣ་ཚོགས། དར་སྣ། གོས་སྣ། སྣམ་རས་རྣམས་རྒྱལ་ཁབ་ཕྱུག་པོའི་ལག་ནས་ཕྱུང་བ་རབ། མིན་ཀྱང་བཀྲ་ཤིས་པའི་གང་ཟག་ལས་རྙེད་པ་དང་། གཞན་ཡང་གནས་དང་གང་ཟག་བྱིན་རླབས་ཅན་དང་། བསོད་ནམས་ཅན་དང་དཔལ་གཡང་ཅན་གྱི་ཁང་པ་ཞིང་ས་རྟ་ཕྱུགས་ཀྱི་སྤུ་སོགས་དགེ་བའི་རྫས་ཅི་འབྱོར་པ་བླུགས། ཁྱད་པར་རྗེ་བཙུན་རིན་པོ་ཆེས་འཁོར་ལོའི་མན་ངག་ལས། ཟ་མ་ཏོག་ཆེན་པོའི་ནང་དུ་བཞག་ལ། མར་དང་སྦྲང་རྩི་དང་ཤ་ཁ་རས་ནུབ་པར་བྱས་ཏེ། དུས་རྒྱུན་དུ་མེ་ཏོག་ལ་སོགས་པས་མཆོད་པ་བྱས་ན་དངོས་གྲུབ་ཐམས་ཅད་འགྲུབ་པར་འགྱུར་རོ། །ཞེས་གསུངས་པ་ལྟར་ཞུན་མར་དང་སྦྲང་རྩི་ཀ་ར་རྣམས་ཀྱིས་གཏམས། བུམ་པའི་སྟོད་ཀྱི་ཆར་འཁོར་ལོ་རབ་གནས་ཅན་སྟེང་འོག་དང་མདུན་རྒྱབ་མ་ནོར་བར་ན་བཟའ་སེར་པོ་དང་བཅས་ཏེ་གཞུག སླར་ཡང་འབྲུ་སྣ་དང་སྨན་སྣ་བསྲེས་པས་འཐས་པར་
དགང་། སྤྲོ་ན་སྐབས་རྣམས་སུ་བཀྲ་ཤིས་རྟགས་བརྒྱད། རྫས་བརྒྱད། རིན་ཆེན་སྣ་བདུན། འདོད་ཡོན་ཉེར་སྤྱོད་བཅས་བྲིས་པའམ་འཇིམ་པ་ལ་སྤར་བཏབ་པའང་གཞུག ཁ་སྤྲ་ཚིལ་ལམ་འཇིམ་པ་གཙང་མས་སྲུབ་མེད་པར་བཀག མགྲིན་པ་ཡན་ཆད་རས་གཙང་མས་དཀྲིས་ལ་མདུན་དུ་བཀྲ་ཤིས་རྟགས་བརྒྱད་དམ་ནོར་བུ་བྲི། དེ་ལྟ་བུའི་བུམ་པ་དུ་ཡོད་གཞི་གཙང་མར་པདྨ་འདབ་བརྒྱད་རེ་བྲིས་པའི་སྟེང་དུ་བཞག མཐར་མཆོད་པ་དང་གཏོར་མ་བཤམ། གཟུངས་ཐག་སེར་པོ་གདགས། གཉིས་པ་ནི། སྐྱབས་འགྲོ་ནས་བཟུང་བདག་བསྐྱེད་བཟླས་པ་དང་དཀྱིལ་འཁོར་བསྡུ་བའི་བར་སྔོན་ཏུ་འགྲོ་བས། བུམ་པ་བསང་སྦྱང་། སྟོང་པའི་ངང་ལས་བུམ་པའི་གྲངས་དང་མཉམ་པའི་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བའི་ནང་དུ་རིན་པོ་ཆེ་དང་། འབྲུ་བཅུད་དང་། ཟས་ནོར་ལོངས་སྤྱོད་ལྷ་མིའི་དཔལ་འབྱོར་ཕུན་སུམ་ཚོགས་པས་ཡོངས་སུ་གང་བར་གྱུར། ཅེས་དང་། རྒྱས་པར་སྤྲོ་ན་ཚིག་ལྷུག་རྣམས་མི་དགོས་པར་སྔགས་དྲུག་ཕྱག་དྲུག་ཙམ་སྤྱི་ལྟར་དང་། མི་ནུས་ན་ནམ་མཁའ་མཛོད་ཀྱི་ཕྱག་རྒྱ་དང་བཅས། ན་མཿསརྦ་ཏ་ཐཱ་ག་ཏེ་བྷྱོ་སོགས་ནས། ཨི་མཾ་ག་ག་ན་ཁཾ་སྭཱ་ཧཱ་ཞེས་ལན་གསུམ་གྱིས། ཡོ་
བྱད་ཐམས་ཅད་འདོད་པའི་ཡོན་ཏན་ལྔའི་རང་བཞིན་དགོས་འདོད་ཐམས་ཅད་འབྱུང་བ་ཟད་མི་ཤེས་པའི་གཏེར་དུ་གྱུར་པར་བསམ། དེ་ལྟ་བུའི་བུམ་པའི་སྟོད་ཀྱི་ཆར་པོ་ལས་པདྨ་འདབ་མ་བརྒྱད་པའི་ལྟེ་བ་དང་འདབ་མ་རྣམས་ལ་ཟླ་བའི་དཀྱིལ་འཁོར་རེ་རེ། དབུས་ཀྱི་གདན་གྱི་སྟེང་དུ་བོ་དང་འབྲས་ཀྱི་སྙེ་མ་ལས་ནོར་རྒྱུན་མར་གསལ་བའི་བརླ་གཡོན་པའི་སྟེང་དུ། ཛ་དང་བཱི་ཛ་པཱུ་ར་ཀ་ལས་ཛམྦྷ་ལ་དང་འཁོར་རྣམས་སྐད་ཅིག་གིས་ཤར་དུ་ཟླ་འོད་མ་དང་ནོར་བུ་བཟང་པོ། ལྷོར་སྤྱན་མ་དང་གང་བ་བཟང་པོ། ནུབ་ཏུ་རབ་སྦྱིན་མ་དང་ནོར་སྦྱིན། བྱང་དུ་འཕགས་མ་དང་རྣམ་ཐོས་སྲས། ཤར་ལྷོར་རབ་ཏུ་བཟང་མོ་དང་དོལ་པའི་ཕྲེང་བ། ལྷོ་ནུབ་ཏུ་སྦས་མ་དང་འཇམ་པོ་འཁྱིལ་བ། ནུབ་བྱང་དུ་མཛེས་མ་དང་གདོང་གི་དབང་པོ། བྱང་ཤར་དུ་དབྱངས་ཅན་མ་དང་སྤྱོད་པའི་དབང་པོ། ཐམས་ཅད་ཀྱང་སྐུ་མདོག་སེར་པོ་ཞལ་གཅིག་ཕྱག་གཉིས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དར་གྱི་ན་བཟའ་ཅན། མོ་རྣམས་ཀྱི་ཕྱག་གཡས་པས་ཤིང་ཐོག་པཱི་ཛ་པཱུ་ར་ཀ་དང་བཅས་པའི་མཆོག་སྦྱིན་གྱི་ཕྱག་རྒྱ་ཅན། གཡོན་པ་རྣམས་ཀྱིས་འབྲས་ཀྱི་སྙེ་མ་ཐུགས་ཀར་འཛིན་པ། བུད་མེད་སྒྱུ་མའི་ང་རྒྱལ་གྱིས་འགྱིངས་པ། རིན་པོ་ཆེ་འབར་བ་སྐྱུགས་པར་གྱུར་པའི་པདྨའི་གཏེར་ལ་སོགས་པའི་
སྟེང་དུ་སྐྱིལ་ཀྲུང་ཕྱེད་པས་བཞུགས་པའི་བརླ་གཡོན་པ་རྣམས་ཀྱི་སྟེང་དུ། ཕོ་རྣམས་རོལ་པའི་སྟབས་ཀྱིས་བཞུགས་པའི་ཕྱག་གཡས་པ་རྣམས་ཤིང་ཏོག་བཱི་ཛ་པཱུ་ར་ཀཱ་འཛིན་བྱས་མོ་རྣམས་ཀྱི་གཡོན་ནས་འགུལ་བར་འཁྱུད་པ། གཡོན་པ་རྣམས་ཀྱིས་ནེའུ་ལེ་འཛིན་པའོ། །ལྷ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་གའི་པཾ་ཡིག་ལས་འོད་ཟེར་འཕྲོས་པས། རང་བཞིན་གྱི་གནས་ནས་དཔལ་མོ་ནོར་རྒྱུན་མ་ལ་ནོར་ལྷའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་པ་ལ། ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། བཛྲ་པཧཱུྃ་པྲ་ཏིཙྪ་སྭཱ་ཧཱ། ཨོཾ་བཛྲ་པུཧྥེ་ཨཱཿཧཱུཾ་ནས་ཤབྡ་ཨཱཿཧཱུྃ་གི་བར་སྦྱར་བས་མཆོད། ཛཿཧཱུྃ་བཾ་ཧོས་མདུན་བསྐྱེད་ལ་གཉིས་སུ་མེད་པར་ཐིམ། སླར་ཡང་རང་གི་སྙིང་གའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་བཅས་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་ལ། ཨོཾ་སརྦ་ཏ་ཐཱ་ག་ཏ་པཉྩ་ཀུ་ལ་ས་པ་རི་ཝཱ་ར་སྦྱར་བའི་ཨརྒྱུ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་སོགས་ནས། ཤྲཱི་ཡེ་ཧཱུཾ་ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་
དག །ཆུའི་ལྷག་མ་ཡར་ལུད་པ་ལས་ཐམས་ཅད་ལ་རིན་ཆེན་འབྱུང་ལྡན་གྱིས་དབུར་བརྒྱན། མཆོད་པ་བསང་སྦྱང་བྱིན་གྱིས་བརླབས་ནས། ཐལ་མོ་སྦྱར་ཏེ། འཇིག་རྟེན་ཁམས་འདི་འམ་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །འཕགས་མ་འཁོར་དང་བཅས་ལ་འབུལ། །བཞེས་ནས་དཔལ་འབྱོར་རྒྱས་པར་མཛོད། །ཨོཾ་ཤྲཱི་བ་སུ་དྷ་རི་ཎཱི་མཎཱ་ལ་ས་པ་རི་ཝཱ་ར་བཛྲ་ཨརྒྷཾ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞེས་དང་། དེ་བཞིན་དུ། ཞབས་བསིལ་དང་། མེ་ཏོག་སོགས་ནས། རོལ་མོའི་བར་འདོན་པ་བསྒྱུར་ལ་དབུལ་ཞིང་། དྷརྨཱ་ར་ཎི་ཏ་སོགས་བརྗོད། སྤྲོ་ན། ཟླརྩིབས་སྟོང་ལྡན་པའི་གསེར་གྱི་འཁོར་ལོ་སོགས། །རྒྱ་ཆེན་བསོད་ནམས་དཔལ་ལས་ལེགས་གྲུབ་པ། །མི་ཡི་དབང་པོའི་རིན་ཆེན་སྣ་བདུན་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎཱ་ལ་ས་པ་རི་ཝཱ་ར་ས་ལྟ་རཏྣ་པཱུ་ཛི་ཏེ་ཧཱུཾ། །གཡུལ་ལས་རྒྱལ་བར་བྱེད་པའི་རལ་གྲི་སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །ས་བདག་ཉེ་བའི་རིན་ཆེན་སྣ་བདུན་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་ས་བྷ་ཨུ་པ་རཏྣ་པཱུ་ཛི་ཏེ་ཧཱུཾ། །ཡིད་འོང་གཟུགས་དང་རྣར་སྙན་སྒྲ་ལ་
སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །མཐོ་རིས་འགྲོ་བའི་འདོད་ཡོན་རྣམ་ལྔ་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་ས་ལྟ་ཨུ་པ་རཏྣ་པཱུ་ཛི་ཏེ་ཧཱུཾ། །ཡིད་འོང་གཟུགས་དང་རྣར་སྙན་སྒྲ་ལ་སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །མཐོ་རིས་འགྲོ་བའི་འདོད་ཡོན་རྣམ་ལྔ་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎཱ་ལ་ས་པ་རི་ཝཱ་ར་པཉྩ་ཀཱ་མ་གུ་ཎ་པཱུ་ཛི་ཏེ་ཧཱུཾ། ཐུབ་པས་བྱིན་བརླབས་མེ་ལོང་སོགས་དང་ནི། །སྐུ་ཡི་ཆ་ཤས་དབྱིབས་མཚོན་དཔལ་བེའུ་སོགས། །བཀྲ་ཤིས་སྒྲུབ་པའི་རྫས་དང་རྟགས་བརྒྱད་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་མངྒ་ལ་ཨཊྚ་དྲ་བྱ་ཙིཏྣ་པཱུ་ཛི་ཏེ་ཧཱུཾ་ཞེས་པའི་སྔགས་རྣམས་ལ་ནམ་མཁའ་མཛོད་ཀྱི་ཕྱག་རྒྱ་བྱ་ཞིང་མཆོད། རྡོ་རྗེ་དྲིལ་བུ་འཛིན་པས། ཕུན་ཚོགས་དགེ་ལེགས་ཀུན་འབྱུང་བཅོམ་ལྡན་མ། །དཔལ་དང་འབྱོར་པའི་དབང་ཕྱུག་ནོར་རྒྱུན་མ། །ཡིད་ལ་རེ་བའི་བཀྲ་ཤིས་སྩོལ་མཛད་མ། །བསམ་འཕེལ་དཀྱིལ་འཁོར་དབང་ཕྱུག་མ་ལ་འདུད། །གང་སྔོན་སྦྱིན་པ་རྒྱ་མཚོའི་དགེ་བསགས་པས། །ཚེ་དང་ནོར་དང་
མཐུ་ཡི་དཔལ་བརྙེས་ནས། །སྒྲུབ་པ་པོ་ལ་དབྱིག་གི་ཆར་འབེབས་པའི། །ནོར་སྦྱིན་ཡབ་ཡུམ་འཁོར་དང་བཅས་ལ་བསྟོད། །ཅེས་བསྟོད། གཏོར་མ་ཆུ་གཙང་མས་སྦྱང་། ༀ་ཨཱཿཧཱུྃ་ལན་གསུམ་གྱིས་བརླབ། སྔགས་རྣམས་ཀྱི་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་སརྦ་སིདྡྷི་མྨེཔྲ་ཡཙྪ་ཆུ་ཧཱུྃ་ཕཊ་ཅེས་ལན་གསུམ་སོགས་ཀྱིས་ཕུལ། ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་སོགས་ནས། ཤཔྟའི་བར་སྦྱར་བས་མཆོད། ཕུན་ཚོགས་དགེ་ལེགས་ཀུན་འབྱུང་སོགས་ཀྱིས་བསྟོད། བཅོམ་ལྡན་འདས་མ་འཁོར་དང་བཅས་པས་བདག་དང་སྦྱིན་པའི་བདག་པོས་གཙོར་བྱས་སེམས་ཅན་ཐམས་ཅད་ལ་འདོད་རྒུའི་འབྱོར་པའི་དངོས་གྲུབ་ཟད་མི་ཤེས་པ་སྩལ་དུ་གསོལ་ཞེས་འདོད་དོན་གསོལ། གཟུངས་ཐག་ནས་བཟུང་སྟེ། རང་གི་སྙིང་ག་ནས་འོད་ཟེར་སྔགས་ཕྲེང་གི་རྣམ་པ་ཅན་འཕྲོས་པས་ལྷ་རྣམས་ཀྱི་ཐུགས་རྒྱུད་བསྐུལ། དེ་རྣམས་ཀྱི་སྐུ་ལས་འོད་ཟེར་ཕོ་ཉ་ལྟ་བུ་བསམ་གྱིས་མི་ཁྱབ་པ་འཕྲོས། འཇིག་རྟེན་གྱི་ཁམས་ཐམས་ཅད་ཁྱབ། སངས་རྒྱས་བྱང་སེམས་ཉན་རང་འཕགས་པའི་ཚོགས་ཀྱི་བྱིན་རླབས་ནུས་མཐུ་ཐམས་ཅད་འོད་ཟེར་སེར་པོའི་རྣམ་པར་སྤྱན་དྲངས་ཤིང་། དེ་དང་དུས་མཉམ་དུ་སྲིད་པ་གསུམ་གྱི་དཔལ་འབྱོར་ལོངས་སྤྱོད་བཅུད་གཡང་དང་བཅས་པ་
ཐམས་ཅད་བཀྲག་མདོངས་གཟི་བརྗིད་ཅན་གྱི་རྣམ་པར་བཀུག་སྟེ། བུམ་པའི་ནང་གི་རྫས་རྣམས་ལ་གཉིས་སུ་མེད་པར་ཐིམ་པས་འདོད་རྒུའི་དཔལ་འབྱོར་ཟད་མི་ཤེས་པའི་གཏེར་གྱི་བུམ་པ་བཟང་པོར་གྱུར། བུམ་པའི་ནང་གི་དཔལ་འབྱོར་ཕུན་སུམ་ཚོགས་པ་རབ་ཏུ་འཕེལ་ཞིང་ཁ་ནས་ལྷུད་ཀྱིས་ལུད། ལྷ་རྣམས་ཀྱི་སྐུ་དང་ཕྱག་མཚན་རྣམས་ལས་ཀྱང་རིན་པོ་ཆེ་དང་འབྲས་སོགས་མཁོ་དགུ་ལོངས་སྤྱོད་ཀྱི་ཆར་ཆེན་པོ་ཆིལ་ཆིལ་བབས་པས་གནས་ཁང་དང་། གཙུག་ལག་ཁང་དང་། བང་མཛོད་ལ་སོགས་པ་མར་གྱིས་ཁེངས་པས་བདག་དང་སྦྱིན་བདག་གིས་མཚོན་པའི་སེམས་ཅན་ཐམས་ཅད་བསམ་པ་རྫོགས་པར་གྱུར་ཅེས་བརྗོད་ཅིང་བསམས་ལ། ཨོཾ་བ་སུ་དྷ་རི་ཎྱེ་སྭཱ་ཧཱ་ཞེས་གཙོ་བོར་བཟླ། ཐུན་མཚམས་རྣམས་སུ་འཁོར་རྣམས་ལ། ཨོཾ་ཙནྡྲ་ཀཱནྟེ་སྭཱ་ཧཱ། དེ་བཞིན་དུ། དཙཱ་ཡེ། སུ་ཨུད་ཏྲཱ་ཡེ། ཨཱརཱ་ཡེ། སུ་བྷ་དྭ་ཡེ། གུཔྟ་ཡེ། དེ་བྱེ། ས་ར་སྭཱ་ཏེ་སྭཱ་ཧཱ། ཞེས་པས་ཡུམ་རྣམས་དང་། ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ། དེ་བཞིན་དུ། མ་ཎི་བྷ་དྲྭ་ཡ། པུ་ཎ་བྷ་དྭ་ཡ། དྷ་ན་དཱ་ཡ། །བེ་ཤྲ་བ་ཎཱ་ཡ། ཀི་ལི་མཱ་ཡི་ནི། བི་ཙི་ཀུཎྜ་ལི་ནི། མུ་ཁེནྡྲ་ཡ། ཨོཾ་ཙ་རེནྡྲ་ཡ་སྭཱ་ཧཱ། ཞེས་པ་ཡབ་རྣམས་ཏེ་སོ་སོར་གཙོ་མོའི་བཅུ་ཆ་རེ་བཟླ། ཐུན་བསྡུ་བ་ན། མཆོད་པ་བསང་སྦྱང་བྱིན་གྱིས་
བརླབས་ལ། ཨོཾ་ཤྲཱི་བ་སུ་དྷ་རི་ཎཱི་ས་པ་རི་ཝཱ་ར་ཨརྒྷཾ་པྲ་ཏཱི་ཙྪནས། ཤཔྟའི་བར་སྦྱར་བས་མཆོད། ཕུན་ཚོགས་དགེ་ལེགས་སོགས་ཀྱིས་བསྟོད། ཡིག་བརྒྱ་ལན་གསུམ། མ་འབྱོར་པ་དང་སོགས་:ཀྱིས་བཟོད་པར་གསོལ། དེ་ནས་མེ་ཏོག་སེར་པོ་ཐོགས་ལ། བཅོམ་ལྡན་འདས་མ་འཕགས་མ་ནོར་རྒྱུན་མའི་ལྷ་ཚོགས་འཁོར་དང་བཅས་པ་ཁྱེད་རྣམས་རྟེན་འདི་རྣམས་ལ་བརྟན་པར་བཞུགས་སུ་གསོལ། བརྟན་པར་བཞུགས་ནས་རྟེན་འདི་རྣམས་གང་དུ་བཞུགས་པའི་ཡུལ་ཕྱོགས་དང་གནས་ཁང་ཐམས་ཅད་ལོ་ཕྱུགས་ལེགས་ཤིང་། འབྲུ་བཅུད་དར་བ་དང་། སྲིད་ཞིའི་དཔལ་འབྱོར་ཕུན་སུམ་ཚོགས་པ་ཐམས་ཅད་རྒྱ་མཚོ་ཆེན་པོ་ལ་ཆུ་བོའི་རྒྱུན་བཞིན་དུ་འདུ་བར་མཛད་དུ་གསོལ་ཞེས་དང་། སུ་པྲ་ཏིཥྛ་དང་ཡེ་དྷརྨཱ་མང་དུ་བརྗོད་ཅིང་མེ་ཏོག་འཐོར་རོ། །དེ་ལྟ་བུའི་གསོལ་གདབ་བརྟན་བཞུགས་ལན་གསུམ་མམ་བདུན་ལ་སོགས་པ་གང་མང་བྱ། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱདམར་པོ། ཐུགས་ཀར་ཧཱུཾ་སྔོན་པོ་ཞེས་གནས་གསུམ་བསྲུང་། དགེ་བ་འདི་ཡིས་མྱུར་དུ་བདག །ནོར་རྒྱུན་དཔལ་མོ་འགྲུབ་གྱུར་ནས། སོགས་དང་། ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པ། །རང་དབང་དུ་ནི་སྤྱོད་
པར་ཤོག །ལྷ་ཡང་དུས་སུ་ཆར་འབེབས་ཤིང་། །ལོ་ཏོག་ཕུན་སུམ་ཚོགས་པར་ཤོག །རྒྱལ་པོ་ཆོས་བཞིན་བྱེད་པ་དང་། །འཇིག་རྟེན་དག་ཀྱང་དར་བར་ཤོག །འབད་དང་རྩོལ་བས་མ་གོས་པ། །ཡིད་བཞིན་ནོར་བུ་དཔག་བསམ་བཞིན། །སེམས་ཅན་རེ་བ་སྐོང་མཛད་པ། །བསམ་པ་འགྲུབ་པའི་བཀྲ་ཤིས་ཤོག །ཅེས་སོགས་བསྔོ་སྨོན་ཤིས་བརྗོད་ཁྱད་པར་བ་དང་། གཞན་ཡང་། ཆེ་བའི་ཆེ་མཆོག་སོགས་མདོ་རྒྱུད་ནས་འབྱུང་བའི་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད། དེ་ལྟ་བུ་ཐུན་དུ་བཅད་ནས་རང་ངམ་སྦྱིན་བདག་ལ་རྨི་ལྟས་དགེ་བ་ལྟ་བུའི་རྟགས་མ་བྱུང་གི་བར་རམ་ཞག་བདུན་སོགས་བསྒྲུབ་བོ། །གསུམ་པ་ནི་དེ་ལྟར་ལེགས་པར་བསྒྲུབས་པའི་མཐར་བང་མཛོད་གྱི་ཕུག ཕྱུགས་ལྷས་ཀྱི་གོང་ཞིང་ས་བཟང་པོའི་དཀྱིལ་སོགས་གང་དུ་འཇོག་པའི་སར་སྤྱན་དྲངས་ཏེ་སྒྲོམ་བུའི་ནང་དུ་པདྨ་འདབ་བརྒྱད་བྲིས་པའི་སྟེང་དུ་ཞལ་ཕྱི་སྒོ་དང་། ལུང་བའི་མདའ་སོགས་དང་མི་འཕྲོད་པར་བྱས་ཏེ་མཆོད་པའི་བྱེ་བྲག་དང་བཅས་ཏེ་བཞག བརྟན་བཞུགས་དང་ཤིས་བརྗོད་རྒྱས་པར་བྱ། དུས་དང་དུས་སུ་མེ་ཏོག་སོགས་ཉེར་སྤྱོད་དང་། ཟས་སྣའི་ཕུད་སོགས་ཀྱིས་མཆོད་ན་འདོད་རྒུའི་དངོས་གྲུབ་ངེས་པར་སྟེར་བར་འགྱུར་ལ། གལ་ཏེ་སྔགས་བསྒྲུབས་ནས་ཡུན་རིང་སོང་
བ་ཡིན་ན་བཞག་དུས་ཞལ་གསོ་བའི་དོན་དུ་སྔར་བཤད་པ་ལྟར་གྱི་ཆོ་ག་ཚར་གཅིག་བསྐྱར་ནའང་ལེགས་པར་འགྱུར་རོ། །ཚུལ་འདི་རྗེ་ཨེ་ཝཾ་པ་དཀོན་མཆོག་དཔལ་ལྡན་སོགས་ཀྱིས་གསང་འདུས་ཀྱི་ཕྱོགས་སུ་གཏོགས་པར་མཛད་པའང་། ཆོ་གའི་ཡན་ལག་རྣམས་བླ་མེད་ལྟར་བཀྲལ་བའི་དབང་དུ་བྱས་ན་འགལ་བ་མེད་མོད། འོན་ཀྱང་གཞིའི་རྒྱུད་འཇམ་དཔལ་དཔའ་བོ་གྲུབ་པ་ནི་རྒྱུད་སྡེ་འོག་མ་ཡིན་པས། ཆོ་ག་སྤྱི་ཁྱབ་ཙམ་ལའང་བརྟེན་དུ་རུང་བས། དེ་ལྟར་ན་མཆོད་པ་བསང་སྔགས་སོགས་ཨ་མྲྀ་ཏས་བྱ་བ་དང་། རོལ་མོ་བྱིན་གྱིས་བརླབས་པའི་སྔགས་དྷམ་ར་ཎི་བརྗོད་པ་ཙམ་ཁྱད་པར་རོ། །གང་ལྟར་ཡང་ཁྲུས་དང་གཙང་སྒྲ་སོགས་ཀུན་སྤྱོད་ནི་རྒྱུད་སྡེ་འོག་མ་ལྟར་བྱ་བ་གལ་ཆེའོ། །གནོད་སྦྱིན་འཁོར་ལོ་ལ་བརྟེན་ནས། །འདོད་རྒུའི་མཆོག་སྩོལ་གཏེར་ཆེན་པོའི། །བུམ་བཟང་སྒྲུབ་ཐབས་བགྱིས་པའི་དགེས། །སྲིད་ཞིའི་དགེ་མཚན་རྒྱས་གྱུར་ཅིག །ཅེས་པའང་འཇམ་མགོན་བླ་མ་ངག་གི་དབང་པོས་མཛད་པའི་ཡིག་ཆ་ལུང་རྒྱུན་མ་བཞུགས་པའི་སྟབས་ཀྱིས། གསུང་རབ་དེ་ཉིད་ཀྱི་དགོངས་དོན་ལྟར་བྱ་བྲལ་བ་མཉྫུགྷོ་ཥས་བཀླགས་ཆོག་ཏུ་དག་པར་བྲིས་པ་དགེ་ལེགས་མཆོག་ཏུ་གྱུར་ཅིག། ༈ །སྙིང་གཏེར་སྐབས། བདག་བསྐྱེད། ན་མོ། དཀོན་མཆོག་གསུམ་ནས། ཀུ་རུ་ཡེ་སྭཱ་ཧཱ།
བར་ལྷན་ཐབས་ལྟར། དེ་ནས་གསེར་སྐྱེམས་ལྷན་ཐབས་ལྟར་བཏང་། བུམ་པ། ཨ་མྲྀ་ཏས་བསང་། སྭ་བྷཱ་བས་སྦྱངས། སྟོང་པའི་ངང་ལས་འབྱུང་བ་རིམ་བརྩེགས་སྟེང་། ནས། བཛྲ་སྤུ་ར་ཁཾ། བར་གཞུང་ལྟར། སྔགས་དྲུག་ཕྱག་དྲུག་སྤྱི་ལྟར། གཙོ་བོ་གསུམ་གྱི་ནས། བདེ་སྐྱིད་ལྡན་པའི་དངོས་གྲུབ་སྩོལ། བར་གཞུང་ལྟར། མཆོད་བསྟོད་བཟླས་པ་འདོད་གསོལ་བར་ལྷན་ཐབས་ལྟར། འབྱུང་བ་ལྔ་ནི། ནས། ཀརྨ་སིདྡྷི་ཧཱུཾ། བར་གཞུང་ལྟར། །ཀྱི རིན་ཆེན་གསེར་གྱི་ནས། ལྡན་པར་མཛོད། བར་ལྷན་ཐབས། དེ་ནས། ཡི་གེ་བརྒྱ་པ་གསུམ། མ་འབྱོར་པ་དང་སོགས། འདིར་ནི་རྟེན་དང་སོགས་བརྟན་བཞུགས། སུ་པྲ་ཏིཥྛ་དང་། ཡེ་དྷརྨ་མང་དུ་བརྗོད་ཅིང་མེ་ཏོག་འཐོར། དེ་ནས་ཁ་གཅོད་རྒྱབ་ལ། ཧོ༔ རྡོ་རྗེ་འབར་བའི་སོགས་གཞུང་ལྟར། མཐར། བཀྲ་ཤིས་རྒྱས་པར་བརྗོད། རྟེན་སྙིང་བཟླས་ཤིང་མེ་ཏོག་འཐོར། བསྔོ་སྨོན་སོགས་བྱའོ། མངྒ་ལཾ། ༈ གཟུངས་བུམ་སྒྲུབ་ཚུལ་སྤྱིར་བཏང་ངག་འདོན་ཤིན་ཏུ་བསྡུས་པ་བཞུགས་སོ། །ཨོཾ་སྭ་སྟི། བྱབས་ཁྲུས་སོགས་ཀྱི་སྐབས་བུམ་པ་ཚུལ་བཞིན་ཏུ་སྒྲུབ་མ་ནུས་པའི་ཚེ། གཟུངས་བུམ་སྒྲུབ་ཚུལ་སྤྱིར་བཏང་གི་ངག་འདོན་ནི། སངས་རྒྱས་ཆོས་ཚོགས་སོགས་སྐྱབས་སེམས་ལན་གསུམ་དང་། སེམས་ཅན་ཅད་བདེ་བ་དང་སོགས་ཚད་མེད་བཞི་བསྒོམ། རང་ཉིད་སྐད་ཅིག་གིས་འདིར་སོ་སོའི་མཚན་བརྗོད་ཀྱང་ལེགས། ལྷག་པའི་ལྷའི་སྐུར་གྱུར་པར་བསམ་ལ་སྔགས་ཅི་ནུས་བཟླས་མཐར། བུམ་པ་བསངས་སྦྱངས། སྟོང་པའི་ངང་
ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་བ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་དབུས་སུ་ཟླ་བ་ཁྲོ་བོ་ཡིན་ན་ཉི་མ་ཞེས་བསྒྱུར་ལ་གཟུངས་སྔགས་ཀྱི་ཕྲེང་བས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེའི་བྱིན་རླབས་ནུས་མཐུ་ཐམས་ཅད་བསྡུས་ནས་སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་དཔག་ཏུ་མེད་པ་བབ་པས་བུམ་པ་གང་བར་གྱུར། ཅེས་བརྗོད་ཅིང་བསམ་ལ་བཟླ་བྱའི་སྔགས་ཅི་ནུས་བཟླས་མཐར། སྔགས་ཕྲེང་གདན་དང་བཅས་པ་འོད་དུ་ཞུ་བ་ལས་བྱུང་བའི་བུམ་པའི་ཆུ་ནུས་པ་དང་ལྡན་པར་གྱུར། ཅེས་དང་བསྔོ་སྨོན་ཤིས་བརྗོད་ཅི་རིགས་པ་བྱའོ། །ཞེས་པའང་རྒྱ་གཞུང་ཚད་ལྡན་གྱི་དགོངས་པ་ལྟར་མཉྫུ་གྷོ་ཥས་བྲིས་པས་དགེ། ༈ །ཤེ་ཡནྟུ། ཉེས་སེལ་གྱི་བུམ་གཏེར་ལ། དབུས་སུ་དུས་ཀྱི་འཁོར་ལོ་ལྷན་སྐྱེས་སྐུ་མདོག་སྔོན་པོ་རྡོར་དྲིལ་འཛིན་པ། ཞབས་གཡོན་དཀར་པོ་བསྐུམ་པ་དབང་ཕྱུག་དཀར་པོ་དང་། གཡས་དམར་པོ་བརྐྱངས་པས་འདོད་ལྷ་དམར་པོ་མནན་པའི་
དོར་སྟབས། །རལ་པའི་ཐོར་ཚུགས་དང་། ཡིད་བཞིན་གྱི་ནོར་བུ་དང་ཟླ་བ་ཕྱེད་པས་དབུ་ལ་རྒྱན་པ། །རྡོ་རྗེའི་རྒྱན་དང་སྟག་ཤམ་ཅན། ཡུམ་སེར་མོ་གྲི་ཐོད་འཛིན་པས་ཡབ་ལ་འཁྱུད་པ། ཡབ་ཡུམ་གཉིས་ཀ་ཁྲོ་ཆགས་ཀྱི་ཉམས་ཅན། སྤྱན་གསུམ་པ། མེ་རི་ཁ་དོག་སྣ་ལྔའི་དབུས་ན་བཞུགས་པ། གདན། རླུང་མེ་ཆུ་ས་རི་རབ་སྣ་ཚོགས་པདྨ་ཟླ་བ་ཉི་མ་དུས་མེ་རྣམས་བརྩེགས་པའི་སྟེང་དུ་དབང་ཕྱུག་དང་། བདུད་ཀྱི་སྟེང་འགྱིང་བའི་རྒྱབ་ཏུ། ཨོཾ་ཨཱཿཧཱུྃ་ཧོ་ཧཾ་ཀྵ། ཨོཙྪཱསཱ་ཧཱ། ཕྱི་ནང་གཞན་གསུམ་གྱི་གཟའ་དང་རྒྱུ་སྐར་ས་བདག་ལྷ་ཀླུ་རྫུ་འཕྲུལ་ཅན་གྱི་ཚོགས་རྣམས་ཀྱིས་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ་གནམ་ས་རི་བྲག་ཆུ་ཤིང་གི་ས་དཔྱད་ཉེས་པའི་རྒུད་པ་ཐམས་ཅད་ཞི་བ་དང་། །སའི་དཔལ་དང་། གཟི་བརྗིད་ཕུན་སུམ་ཚོགས་པར་འཕེལ་བས་བཀྲ་ཤིས་དང་བདེ་ལེགས་སུ་མཛད་དུ་གསོལ། ཨོཾ་ཨ་ནི་ཀ་ནི་ཨ་བྷི་ལ་མཎྜལ་མ་ཡེ་སྭཱ་ཧཱ། ཨོཾ་ཡེ་དྷརྨ་རྨ་ཧེ་ཏུ་པྲ་བྷ་བཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏྲ། ཏེ་ཥཉྩཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཱ་ཡ་སྭཱ་ཧཱ། འབྱུང་པོ་གང་དག་འདིར་ནི་ལྷག་གྱུར་ཏམ། །སའམ་འོན་ཏེ་བར་སྣང་འཁོད་ཀྱང་རུང་། སྐྱེ་རྒུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །སརྦ་དཱ་
ཤུབྷ་ལྕ་ཀ་ལྱཱ་ཎཾ་བྷ་བ་ཏུ། །ཞེས་བྲིས་པ་དང་། སཙྪ་རབ་གནས་ཅན་རྣམས་ལྷན་ཅིག་ཏུ་སྙིང་པོར་བཅུག གཞན་ཡང་མཐིལ་དུ་ས་སྣ་ཆུ་སྣ་དང་། དེ་སྟེང་བུམ་རྫས་ཉེར་ལྔ། རིན་པོ་ཆེ་དང་། འབྲུ་སྨན་སོགས་ཀྱིས་བཀང་། ཁ་གཅོད་སོགས་ལེགས་པར་བརྒྱབ་པའི་རྒྱབ་ཏུ་རྩི་ལྗང་གུ་དང་། མདུན་རྟགས་རྣམ་བཅུ་དབང་ལྡན་བྲིའོ། །མངྒ་ལཾ། ༈ བུམ་གཏེར་སྤྱིའི་ཟིན་བྲིས་ཡིད་བཞིན་ནོར་བུའི་གན་མཛོད་ཅེས་བྱ་བ་བཞུགས་སོ། ཨོཾ་སྭ་སྟི། བུམ་གཏེར་སྤྱིའི་ཡོ་བྱད་ཉེར་མཁོ་ལ། ཐོག་མར་གཟུངས་གཞུག་ནི། ནོར་བུམ་སྤྱི་ཁྱབ་ཏུ། ཨོཾ་ཨཱཙྪཱཧཱུྃ་མ་ཧཱ་གུ་རུ་རན་སམྦྷ་ཧཱུྃ། ཨོཾ་ཛམྦྷ་ལ་ཛ་ལེནྡྲ་ཡེ་ཨ་ཡུར་ཛྙཱ་ན་པུཎྱེ་སིདྡྷི་ཧཱུྃ། དྷ་ན་མེ་དྷི་སྭཱ་ཧཱ། །ཨོཾ་ཛ་བྷ་ལ་ཛ་ལེནྡྲ་ཡེ་སྭཱ་ཧཱ། ཨོཾ་ཁཾམ་བ་སུ་དྷ་རི་ཎཱི་སྭཱ་ཧཱ། །ཨོཾ་བེ་ཤྲ་མ་ཎ་ཡེ་སྭཱ་ཧཱ། །ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཱ་སརྦ་ཐཱ་ཁཾ་ཨུཏྟ་ཏེ་སྥ་ར་ཎ་ཧི་མཾ་ག་ག་ན་ཁཾ་ས་མ་ཡེ་སྭཱ་ཧཱ། ཏྲི་རཏྣ་དྷརྨ་པཱ་ལ་བ་སུ་དེ་བ་ས་རི་ཝཱ་རེ་བྷཾ་སྶརྦ་ཏུ་དིཀྵ་ཀ་ལ་སརྦ་ཡུར་པུ་སྐྱེ་བ་སུ་པུཊཾ་ཀུ་རུ་ཨོཾ། ཞེས་དང་། ལྷ་བུམ་ལ། ཨོཾ་ཀིཾ་ཧི་རཱ་ཛ་ཡེ་པྲ་བྷཾ་དེ་བཱི་སྭཱ་ཧཱ། བྷཾ་རཏྣ་སིདྡྷི་ཨོཾ་པྲི་ཤྲཱི་དེ་བཱི་ན་མ་སྶརྦ་ཏ་ཐཱ་སོགས་ནམ་མཁའ་མཛོད་ཀྱི་སྔགས་དང་། ན་མས་མན་ཙནྡ་བྷ་ཏ་རཱུ་པི་ནཱི་ཨོཾ་ཏཱ་རེ་སྭཱ་ཧཱ། ཨོཾ་ཨ་ཀ་ནི་ནི་ཀ་ནི་ཨ་བྱི་ལ་མཎྜ་ལེ་མ་ཡེ་སྭཱ་ཧཱ། །ཏ་ལ་མ་ཐ་སྙན་ལ་
ཐ། །མི་ཟད་ཡུན་གྱི་གཏེར་མཛོད་ཅིག །བྷུ་མི་པ་ཏི་ས་པ་རི་ཝཱ་རེ་བྷི་སྶརྦ་ཐེ་ཡོ་ཀུ་རུ། །ཞེས་དང་། ཀླུ་བུམ་དུ། ནཱ་ག་པུ། སྔགས་བརྩེགས་ནཱ་ག་རཱ་ཛ་ས་མ་ཡ་ཛ་ཛཨོཾ་ཨི་བྱ་ཨ་མྲ་ཏེ། སནྡྷ་ར་པ་ཡཾ་ཤ། མ་ཏི་མ་ཏི། པྲ་ཏི་པྲ་མ་ཏི། ཚ་པ་ས་མནྟ་མ་སྭཱ་ཧཱ། ནཱ་ག་རཱ་ས་པ་རི་ཝཱ་རེ་བྷི་སྶརྦ་ཐེ་ཡོ་ཀུནྡནྟ། །ཞེས་དང་། སྤྱིར་ཞེས་པའང་བརྡའ་རིས་དང་། ཞེས་སམ། ལཉྩའི་ཨེ་ཝཾ་དང་། སརྦ་དཱཀྵ་ཀ་ལེ་ཊུ་ཐེ་ཡོ་པུཏྟིཾ་ཀུ་རུ་ཨོཾ། ཞེས་བྲིས་ལ། ཤུག་པ་ཤར་རྟགས་མ་ནོར་ཞིང་རྩ་རྩེ་མ་ལོག་པས་སྲོག་ཤིང་བྱས་ཏེ། བུམ་རྫས་ཉེར་ལྔ་དང་། དྲི་བཟང་གིས་བྱུགས་ནས་དྲིལ་ལ་དབུས་སུ་འཇུག རྫས་ནི། ནོར་བུ་ལ། རིན་པོ་ཆེ། སྣ་ཚོགས། འབྲུ་སྣ་ཚོགས། དུག་རིགས་མ་འདྲེས་པའི་སྨན་དང་མེ་ཏོག་སྣ་ཚོགས། དར་སྣ་ཚོགས། རྒྱལ་པོའི་བང་མཛོད་ནས་བྱུང་བའི་ནོར་སྣ་ཚོགས་དང་། ཐབ་ཆེན་མེ་རྒྱུན་མི་ཆད་པའི་ས། ཕྱུགས་སླས་ཆེན་པོ་དང་། ཞིང་ས་བཟང་པོའི་ས་སྣ། ཚོང་དུས་ཆེན་པོའི་ས། རིགས་བཟང་ཚེ་བསོད། འབྱོར་ལྡན་གྱི་ལག་ནས་བྱུང་བའི་།ནོར་འབྲུ་སྣ་ཚོགས། འཕན་པོའི་ལག་ནས་བྱུང་བའི་དར་ཟབ། ཁྱད་པར་དུ་གསེར། སྤུག མེ་ཤེལ། ག་བུར་ཏེ་འབྱུང་བཞིའི་སྙིང་པོ་དང་། གཞན་ཡང་ཁ་ཟས་ཀྱི་རིགས་དང་ཤིང་ཏོག་སྣ་ཚོགས་
བཅས། ཐམས་ཅད་ཀྱང་དུག་རིགས་དང་ཤ་ཁྲག་མ་འདྲེས་པ་གཙང་ཞིང་དག་པར་བྱ། ལྷ་བུམ་ལ། སྒྲུབ་གཏོར་གྱི་ཆ་ཤས་དང་། ཞོ་ཤ་གསུམ། གནས་ཆེན་དང་ས་དཔལ་བཟང་པོའི་ས་རྡོ། །ཤིང་སྣ་རྣམས་དམིགས་བསལ་རྫས་ཡིན་ལ། གཞན་ནོར་བུམ་གྱི་སྐབས་སུ་བཤད་པའི་ཁྱད་པར་གྱི་རྫས་རྣམས་མ་གཏོགས་ཅི་འབྱོར་བྱ། ཀླུ་བུམ་ལ། ཀླུ་སྨན་ཚད་ལྡན་གཙོ་བོར་བསྐྱེད་ལ། །གཞན་ཡང་། རིན་པོ་ཆེ། སྨན། འབྲུ། ཤིང་ཏོག །དར་ཟབ་སྣ་ཚོགས། ཀླུ་རྒྱལ་ཕྱུག་པོ་གནས་པའི་མཚོ་རྡེལ་གནམ་མ་མཐོང་ཞིང་དྲོད་རླངས་མ་ཕོག་པས་མཚོན་རྒྱ་བོད་གནས་ཆེན་མང་པོའི་ཆུ་སྣ། །གཙང་ཆེན་གྱི་བྱེ་མ་རྣམས་དང་། ས་གནད་ཉམས་པ་གསོ་བ་ལ། གང་དམིགས་དེའི་ས་སྣ་རྡོ་སྣ་རྩྭ་ཤིང་ལྡུམ་འབྲས་སོགས་དང་། དེ་སྟེང་། རྡོ་རྒྱུས་དང་། མདུང་རྩེ། ཁབ་ལེན། སྦལ་རྒྱབ། རིན་པོ་ཆེ་སྣ་ལྔ། དཀྱིལ་འཁོར་གྱི་རྡུལ་ཚོན། གསུང་རབས་ཀྱི་བག་རྡུལ། སྨན་སྣ་སྤྱི་དང་། བཟང་དྲུག ཀླུ་སྨན་ཚད་ལྡན། རུས་སྦལ་ཁོག་པ། ཕག་རྒོད་མཆེ་བ། སྒང་ཐུར་རྨ་བྱའི་མདངས་ཏེ་སྒྲིབ་བྱེད་བཞི། ཐོག་ལྕགས། དར་སྣ་རྣམས་ཞིབ་པར་བཏགས་པ་ཉིད། ས་ཕྱོགས་དེའི་ཕྱོགས་བཞིའི་ཆུ་མིག་གི་ཆུས་སྦྲུས་ལ་རིལ་བུ་དྲིལ་ཏེ་གོང་གི་ལྷ་བུམ་གྱི་ནང་དུ་འཇུག རྣམ་བཅུ་
དབང་ལྡན། སྣང་བརྒྱད་སྙིང་པོ། སྤར་ཁ་བརྒྱད་ཀྱི་ཕྱག་རྒྱ་སོགས་ཀུན་ཐུབ་བསྡུས་པ་བྲིས་པའང་སྲོག་ཤིང་ལ་སྦྲགས། དེ་ལྟར་བུམ་པ་ཐམས་ཅད་ལ་སྤྱི་ཁྱབ་ཏུ་བུམ་རྫས་ཉེར་ལྔ་ཚད་ལྡན་ནི་མེད་དུ་མི་རུང་བ་ཡིན་ནོ། །དེ་ཡང་ཐོག་མར་བུམ་པའི་མཐིལ་དུ་རྒྱ་བོད་ཀྱི་གནས་ཆེན་ཁྱད་པར་ཅན་རྣམས་དང་། རི་རྒྱུད་མ་ཆད་ཅིང་ས་དཔལ་བཟང་པོ་ནས་བླངས་པའི་ས་རྡོ་ཆུ་ཤིང་། དཀྱིལ་འཁོར་ཆེན་པོའི་རྡུལ་ཚོན་གྱི་བྱེ་མ་རྣམས་བླུགས་ལ་སྲོག་ཤིང་བརྟན་པོར་བཙུག །དེ་སྟེང་སྤྱི་དང་བྱེ་བྲག་གི་རྫས་རྣམས་ལག་ཚག་ཤིན་ཏུ་དམ་པས་གཞུག །ཤིང་ལ་སོགས་པའི་ཁ་གཅོད་ཀྱི་ནང་དུ་པདྨ་འདབས་བཞིའི་དབུས་སུ་ཧཱུཾ། ཤར་དུ་ཏཱཾ་ལྷོར་ཨཾ་ནུབ་ཏུ་རྀ་བྱང་དུ་ཏཱཾ་ཕྱི་རོལ་ཏུ་ནོར་བུའམ་གཡུང་དྲུང་ངམ་དགའ་འཁྱིལ་བྲིས་ལ་བཀབས། བུམ་པའི་ཕྱི་ངོས་སམ། མ་བདེ་ན་ནང་དུ་གྲོ་གའམ་རྒྱ་ཤོག་ལ་བཀྲ་ཤིས་རྟགས་རྫས་རྒྱལ་སྲིད་སྣ་བདུན་སོགས་དགེ་ཞིང་ཤིས་པའི་མཚན་མ་ཅན་བྲིས་པའང་གཞུག །ནོར་བུམ་གྱི་ཕྱི་རོལ་མདུན་ངོས་སུ་ནོར་བུ་མེ་འབར། ལྷ་བུམ་ལ། ཀྟི་དང་། སཾ་གང་རུང་། ཀླུ་བུམ་ལ་ཕུཞེས་བྱ་རྣམས་བྲི་བ་མི་ནོར་བའི་མཚན་མ་སྟེ་ཕྱག་ལེན་ལ་ཡང་མཛད། དེ་ལྟར་མཐོང་རྒྱུད་ལྟར་འདུ་བྱས་པའི་བུམ་གཏེར་རྣམས་སྦྱངས་ཁྲུས་སྔོན་དུ་འགྲོ་བས་སོ་སོའི་གཞུང་ལྟར་
བསྒྲུབས་ཅིང་སྦ་བ་སོགས་བྱའོ། །ཞེས་པའང་བསྟན་འགྲོ་སྤྱི་ལ་སྨན་འདོད་ཀྱི་ལྷག་བསམ་པུཎྜ་རི་ཀའི་འཁྲི་ཤིང་ལྟར་གཅིག་ཏུ་དཀར་བའི་ཤཱཀྱའི་དགེ་སློང་མཉྫུགྷོ་ཥས་གསར་རྙིང་རྒྱུད་སྡེ་རྒྱ་མཚོའི་རིང་ལུགས་དང་མན་ངག་ཟབ་མོ་རྣམས་སྦྱར་ཏེ་ལག་ལེན་གྱི་ཆེད་ཁོ་ནར་བྲིས་པ་འདིས་ཀྱང་སྣོད་བཅུད་རྫོགས་ལྡན་གསར་པའི་དགའ་སྟོན་ལ་ལོངས་སུ་སྤྱོད་པའི་རྒྱུར་གྱུར་ཅིག ༈ །ཡང་ཕྱུག་ལྷས་སོགས་སུ་སྦས་པའི་ཚེ་ན། ནོར་བུམ་གྱི་གཟུངས་གཞུག་སྔར་སྨོས་པ་ལྟ་བུའི་འདོད་གསོལ་གྱི་གོང་དུ། ཨོཾ་བྷེ་ཏྲེ་བྷེ་ཏྲེ། མ་ཧཱ་བྷེ་ཏྲེ། མ་ཧཱ་བ་སུ་རེ་ཡེ་བྷ་ཏྲེ་སྭཱ་ཧཱ། ཨོཾ་མ་ཧཱ་བ་སུ་དྷ་ར། ནན་ཁ་བྷེ། རཀྵ་རཀྵ་སྭཱ་ཧཱ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། བཱ་སུ་པུཊྚི་ཀུ་རུ་ཡེ་སྭཱ་ཧཱ། །ཞེས་དང་། ཨོཾ་ཨརྱ་ཛ་བྷ་ལ་བཱ་སུ་རཏྣ་ཨོཾ་བྷཾ་ཨཱཿ ཧཱུཾ་ཧཱུཾ་ཧཱུཾ་མ་ཎི་དྷ་ར་ཨ་ཧཱུཾ་བྷཾ༔ བིདྱ་ཏན་པུཊྚི་ཀུ་རུ་ཡེ་སྭཱ་ཧཱ། །ཞེས་པ་འདི་གཉིས་ཀའམ་གང་རུང་དང་། ཨོཾ་པཎཱ་ཤ་བ་རི་ཡེ་ནོར་ཕྱུགས་ཀྱི་གོད་ཁ་ཐམས་ཅད་ཤིནྟཾ་ཀུ་རུ་སྭཱ་ཧཱ། སརྦ་བཱ་སུ་པུཊྚི་ཀུ་རུ་ཨོཾ། ཞེས་བྲིས་ལ་རྫས་ཀྱི་ཁྱད་པར་ནི་མུ་ཏིག་གམ་ཉ་ཕྱིས། ཤུ་དག་དཀར་པོ། མོན་ལུག་གླ་སྒང་བཅས་བཅུག སྤྲོ་ན་འཕགས་ཡུལ་གྱི་མན་ངག་ལས་བྱུང་བའི་འཁོར་ལོ་འང་འདུ་བྱ་ཞིང་ཞིང་གི་དཀྱིལ་དུ་སྦ་བའི་ཚེ་འབྲུ་འཕེལ་བའི་གཟུངས་དང་འདོད་གསོལ་བཅས་བྲིའོ། །
ས་སྙིང་གི་གཟུངས། ཨོཾ་སུམྦྷ་ནི་སུམྦྷ། ཧ་ར་ཙ་ར། མ་ཧཱ་པཱ་ཤ་མ་རུ་ཏཱ། ཨ་མོ་གྷ་བཛྲ་སཏཱ་སྭཱ་ཧཱ། །མཚན་བརྒྱ་ལས་སོ། །ཉེས་སེལ་ལ། དམིགས་བསལ་མ་གཏོགས་སྙིང་གཏེར་དང་། ནོར་བུམ་གྱི་རྫས་ཀུན་ཚང་བ། དབུས་སུ་ཡུལ་འཁོར་སྲུང་བའི་ཙཀྲ། དེ་མདུན་ཉེས་སེལ་གྱི་གཟུངས་ཤོག་དྲིལ། ༈ །སྤྱི་ཁྱབ་ལ། སྙིང་གཏེར་དང་། ནོར་བུམ་གྱི་རྫས་ཚང་མ། དབུས་སུ་མགོན་དཀར་གྱི་སྐུ། དེའི་རྒྱབ་ཏུ་ནོར་བུམ་གཟུངས། །གཡས་སུ་སྙིང་གཏེར། གཡོན་དུ་ཉེས་སེལ་མདུན་དུ་ཡུལ་སྲུང་དང་ནོར་རྒྱུན་ཙཀྲ། དེ་མདུན་གཡང་རྫས་དང་། སྙིང་གཏེར་རྫས་དར་ཐུམ་བཅས་བཞག ༈ །ས་བཅུད་སྤེལ་བའི་བུམ་གཏེར་ཆེན་མོའི་ཕྱག་ལེན་བཀྲ་ཤིས་འདོད་འཇོ་དགེ །ཨོཾ་སིདྡྷི་རསྟུ། །ས་བཅུད་གསོ་བའི་བཀྲ་ཤིས་གཏེར་གྱི་བུམ་པ་ལ། ཐོག་མར་ཟངས་སམ་རྫ་ལས་བྱས་པའི་བུམ་པ་བཟོ་ཁྱད་ཐོན་ན་ནོར་བུའི་དབྱིབས་སམ། ཡང་ན་དེང་སང་ཡོངས་གྲགས་ལྟར་ཡང་རུང་ཞིང་། ཆེ་ཆུང་ཡུལ་དེའི་བྲེ་བཅུ་ལ་སོགས་པ་ཤོང་བའི་མཐིལ་དུ། གནས་ཆེན་དང་། །བཀྲ་ཤིས་ས་དང་། དཔལ་ཅན་གྱི་ས་སྣ་ཆུ་སྣ། རིན་པོ་ཆེའི་ཕྱེ་མ། །དཀྱིལ་འཁོར་ཆེན་པོའི་རྡུལ་ཚོན། རྒྱས་པའི་སྦྱིན་སྲེག་གི་ཐལ་བ། རབ་གནས་ཀྱི་མེ་ཏོག་སོགས་དགྲམ་པའི་དབུས་སུ་སྲོག་
ཤིང་ཤུག་པ་ལྟ་བུ་ཤར་རྟགས་མ་ནོར་ཞིང་རྩ་རྩེ་མ་ལོག་པ་ལས་རི་རབ་ཀྱི་གཟུགས་སུ་བཟོས་པའི་རྩེར། ཧཱུཾ་དེ་འོག་གི་ཤར་ནས། ཨོཾ་ཏཱཾ་ཧྲཱིཿw རྣམས་གཡས་བསྐོར། སྐེད་པར་འོག་ནས་འབྱུང་བའི་གཟུངས་ཀྱི་ཤོག་དྲིལ། རྩེ་མོར་སངས་རྒྱས་ཀྱི་འཕེལ་གདུང་། བླ་མ་གོང་མའི་དབུ་སྐྲ། ན་བཟའ། གདུང་རུས་སོགས་དང་། བདུད་རྩི་རིལ་བུ་དང་ཕྱེ་མའི་རིགས་རྣམས་དར་ཐུམ་བྱས་ནས་གཞུག་དེ་འོག་ཀྱི་ངོས་སོགས་ཅི་རིགས་པར་བཏགས་གྲོལ་རྒྱུད་དྲུག་ཚང་བའམ། གསང་བ་སྤྱོད་པ་ས་བོན་གྱི་རྒྱུད་དམ། འཁོར་ལོའི་རིགས་བཅས་གང་འབྱོར་བཞག སྲོག་ཤིང་གི་རྩ་བར་འབྱུང་ལྔའི་ཡིག་འབྲུ། ཨེ་དང་དེའི་འོག་ཙམ་ནས། ལཾ་ཁཾ་རཾ་ཡཾ་རྣམས་ཕྱོགས་བཞིར་བྲིའོ། །དེ་ནས་ཁྱད་པར་གྱི་རྫས་འདུ་བྱ་བ་ནི། གནས་ཆེན་དུ་མའི་ས་སྣ། ཤིང་སྣ། ཆུ་མིག་བརྒྱ་རྩའི་ཆུ་སྣ། རྒྱ་མཚོའི་སྤུ་བ། རིན་པོ་ཆེ་ལྔ། ཁྱད་པར་གཡུ་དང་། མུ་ཏིག་མ་ཉམས་པ། -དཀར་གསུམ་མངར་གསུམ། ཕྱུགས་སླས་ཆེན་པོ་གསུམ་གྱི་ས། བཀྲ་ཤིས་པ་དང་དཔལ་ཅན་གྱི་ཁང་ཞིང་དགུ་ཡི་ས་སྣ། ཐབ་མེ་རྒྱུན་མ་ཆད་པའི་ས། གནས་ཆེན་བརྒྱད་ཀྱི་ཡོངས་རྫོང་། སྙིང་ས།: མཆིམ་ཕུ། མཁར་ཆུ། ཤེལ་བྲག། སེང་གེ་རྫོང་། ཡེར་པ། གཡའ་མ་ལུང་། ཆུ་བོའི་རི་ནམ་མཁའ་ལྡིང་ཕུག་རྣམས་སོ། །
གངས་ཆེན་བརྒྱད་འོད་དེ་གུང་རྒྱལ། ཀྱི་རྡོ། སྐུ་ལྷ་མཁའ་རི་གངས་ཏི་སེ། གཉན་ཐང་ལྷ་བཅས་ཕྱོགས་བཞི་དང་། ཡར་ལྷ་ཤམ་པོ། གནོད་སྦྱིན་གང་བཟང་། ཇོ་མོ་གངས་དཀར། ཏི་སྒྲོ་གངས་དཀར་ཏེ་མཚམས་བཞིའོ། །རི་ཆེན་བཞིའི་དམར་པོ་རི། ས་སྣ། ཧས་པོ་རི། གང་པོ་རི། ཆུ་བོ་རི། ཁྲི་ཤོར་རྒྱལ་མོ། མཚོ་ཆེན་བཞིའི་ཆུ་དང་བྱེ་མ། ཆོས་འཁོར་ཆེན་པོ་རྣམ་པ་གསུམ་ལྷ་ས། བསམ་ཡས། ཁྲ་འབྲུག གྱི་ས་སྣ་དང་། ཇོ་བོ་གསུམ་གྱི་ཕྱག་ནས་དང་ཁྲུས་ཆབ། ཀླུ་སྨན་སྣ་ཚོགས། ཙནྡན་ཡར་འབྲོག་གཡུ་མཚོ། མཚོ་མ་ཕམ། བྱང་གནམ་མཚོ་བཞིའོ། །དཀར། དམར། ཤུ་དག་དཀར་པོ། དབང་ལག་སྟེ་སྨན་ལྔས་མཚོན་པའི་ཀླུ་ལ་མི་གནོད་པའི་བཟང་སྨན་སྣ་ཚོགས། ནས་འབྲས། གྲོ། ཏིལ་དཀར། སྲན་དཀར་ཏེ་འབྲུ་ལྔས་གཙོས་པའི་འབྲུ་དཀར་སྣ་ཚོགས། ཛཱ་ཏི། ག་བུར། ལི་ཤི། སྤང་སྤོས། ཨར་སྐྱ་སྟེ་སྤོས་ལྔས་མཚོན་པའི་ཀླུ་ལ་མི་གནོད་པའི་དྲི་ཞིམ་སྣ་ཚོགས། དཀྱིལ་འཁོར་མང་པོའི་རྡུལ་ཚོན་བཅས། འདི་རྣམས་ཐམས་ཅད་འབྱོར་ན་ཁྲོལ་བུ་དང་། མ་འབྱོར་ན་ཞིབ་པར་བཏགས་ལ་བ་། དམར་མོ་དང་། ར་དཀར་མོའི་འོ་མས་རིལ་བུ་དྲིལ་བ་བརྒྱ་རྩ་བརྒྱད་སོགས་གང་འབྱོར་བླུགས། དར་སྣ་ལྔ་དང་། རྡོ་ཕ་བོང་ལོང་བུ་མཚལ་གྱིས་དབུས་སུ་ཏྲེ་བྲིས་པ་དང་། ཆུ་ཤེལ་གཡོན་དང་། མེ་ཤེལ་གཡས་
མ་ཉམས་པ། རྒྱ་ཞབས་སུ་བཅུག་ཁབ་དང་ཁྲབ་བྱང་རྣམས་བཅུག་གོ། གཟུངས་གཞུག་ལ། རིགས་ལྔ་སྤྱི་དྲིལ་གྱི་སྔགས་དང་། ཀུན་རིག། རྡོར་སེམས། མི་འཁྲུགས་པ། ཚེ་དཔག་མེད། སྨན་བླ་སྤྱི། རྣམས་རྩ་གསུམ་སྤྱིའི་སྙིང་པོ། རྣམ་འཇོམ། སྨེ་བརྩེགས། བཏགས་གྲོལ་རྒྱས་བསྡུས། སངས་རྒྱས་རྩེ་མོའི་གཟུངས། ས་སྙིང་། སྤྱན་མ། རྣམ་སྲས་ཀྱི་རིགས་དང་། ཛམྦྷ་ལའི་རིགས། །གནོད་སྦྱིན་ཕོ་དགུ་མོ་དགུ། ནོར་རྒྱུན་མ། དཔལ་ཆེན་མོ། ཀུན་འཁྱིལ་མཆེད་གསུམ། རྒྱལ་ཆེན་བཞི། རེ་མནྟ་རྣམས་ཀྱི་སྔགས། ཕྱུགས་དང་འབྲུ་སྤེལ་བའི་གཟུངས། བརྟན་མའི་རིག་པ་དང་ཚིགས་བཅད། བརྟན་མ་གཙོ་འཁོར་ཡོངས་དྲིལ་སྔགས། ཀླུ་ལ་བདེ་སྦྱིན་གཟུངས། ཀླུ་ཆེན་དགུའི་སྔགས། འབྱུང་བའི་ནུས་སྟོབས་བསྐྱེད་པའི་སྔགས། སྣང་བརྒྱད། ཉེས་སེལ། བཀྲ་ཤིས་བརྩེགས་པ་རྣམས་ཀྱི་མདོ་གཟུངས། དབྱངས་གསལ་རྟེན་སྙིང་འདོད་གསོལ་བཀྲ་ཤིས་བཅས་སོ། །ཕྱོགས་མཚམས་རྣམས་སུ་བཀྲ་ཤིས་པའི་རྫས་བརྒྱད། རྟགས་བརྒྱད། རྒྱལ་སྲིད་སྣ་བདུན། ཉེ་།བའི་རིན་ཆེན་བདུན། སྲུང་བཞི་སོགས་ཀྱི་རི་མོ་བྲིས་འབུར་གང་རིགས་བཀོད། གཞན་ཡང་དམིགས་ཀྱིས་གསལ་བའི་རིགས་ལ། རྣམ་བཅུ་དབང་ལྡན་གསེར་གྱིས་བྲིས་པ་དང་། གདུགས་དཀར་
འཁོར་ལོ། སོར་འབྲང་འཁོར་ལོ། གྲོང་ཁྱེར་སྒྲོལ་བའི་འཁོར་ལོ། བཏགས་གྲོལ་གྱི་རིགས། རྒྱུད་སྡེའི་གླེགས་བམ་རིགས། བསོད་ནམས་གླང་པོ་སྟོབས་བསྐྱེད། དགེ་འདུན་འདུ་འཁོར། ཨ་པ་ར་ཛཱི་ཏའི་རྩོད་རྒྱལ། ཐོག་སྲུང་ཆེན་མོ། བྱད་འགྲོལ་གྱི་འཁོར་ལོ་ཆེན་མོ། བྱད་ཁྲོལ་གྱི་བུམ་ཆུ་རིལ་བུ། གནོད་སྦྱིན་འཁོར་ལོ། གཡུལ་ལས་རྒྱལ་བའི་ཙཀྲ་ཆེན་མོ། སྲི་བཟློག་འཁོར་ལོ་འབར་བའི་ཙཀྲ། དུས་འཁོར་དང་། འབྱུང་རྩིས་པའི་ལུགས་ཀྱི་ཀུན་ཐུབ་འཁོར་ལོ་སོགས་མན་ངག་ཁྱད་པར་བ་ལས་བྱུང་བའི་རིགས་དང་། བླ་མ་གསང་འདུས་ཀྱི་ལས་ཚོགས། དོན་ཀུན་གྲུབ་པ། རྩོད་རྒྱལ། དགྲ་སྡང་ཞི་བ། གཟའ་སྐར་དང་ཕྱོགས་ངན་སྲུང་བ། ཚེ་སྤེལ། ནོར་འགུགས་པ་སོགས་དང་། དགོངས་འདུས་ལས་ཚོགས། སྡེ་བརྒྱད་སྲུང་བ། ལྟོག་འདྲེ་སྲུང་བ། སྲིས་རྐུན་སྲུང་བ། ལོ་ཏོག་ལ་འཚེ་བའི་སེམས་ཅན་སྲུང་བ། ཤྭ་འུད་སྲུང་བ། ཐོག་སྲུང་། གོད་འདྲེ་སྲུང་བ། ཕྱུགས་ཀྱི་དགྲ་རྐུན་གཅན་ཟན་སྲུང་བ། ནང་འཐབ་སྲུང་བ། དོན་གྲུབ་པ། ཚོང་རྒྱལ་བ། གཡུལ་ལས་རྒྱལ་བ། ནོར་འཕེལ་བ། བཟའ་བཏུང་འཕེལ་བ། མཛེས་མ་རྒྱན་འཁོར། བསྐྱེད་པ་བཞི་ལྡན། འབྱུང་བཞི་ཀུན་འདུས་སོགས་གང་ལ་གང་དགོས་པའི་ཙཀྲ་རིགས་ཁྱད་
པར་གྱི་རྫས་དང་སྤེལ་ཚིག་སོགས་སྦྱར་བ་བཅུག །དེ་བཞིན་དུ་རྫོགས་པ་ཆེན་པོའི་བསྟན་པའི་བཙས་གསུམ་གྱི་རི་མོ་དང་། མཆོད་རྟེན་སོགས་ལ་ཇི་སྐད་བཤད་པའི་གཟུངས་རྒྱས་པའམ། གཟུངས་ཆེན་སྡེ་ལྔ་ཙམ་གཞུག་ནའང་ཤིན་ཏུ་ལེགས་སོ། །བུམ་པའི་ཕྱིར་དཀར་རྩི་བྱུགས་པ་ལ་བཀྲ་ཤིས་པའི་དགེ་མཚན་ཅན་གྱི་རི་མོ་ཇི་སྙེད་པ་དང་། ཁྱད་པར་ཕྱོགས་བཞིར་སྲུང་བཞིའི་ཤར་ནས་བརྩམས་ཏེ་སྟག་ སྐྱ་བོ། གཟུགས་དང་། གཡུ་འབྲུག་སྔོན་པོ། བྱ་དམར་པོ། རུ་སྦལ་རྒྱ་བོ་རྣམས་སོ། །འོག་ཏུ་པདྨ་འདབ་བརྒྱད། ཁ་གཅོད་ལ་རིགས་ལྔའི་ཕྱག་མཚན་བཅས་བྲིའོ། །དེ་ལྟ་བུའི་བུམ་པའི་ནང་ཐམས་ཅད་སྤྱིར་འབྲུ་དཀར་སྣ་ཚོགས། སྨན་སྣ་ཚོགས། རིན་པོ་ཆེ་སྣ་ཚོགས། དར་སྣ། རས་སྣ་སོགས་ཀྱིས་ཕྱུར་བུར་བཀང་བའི་ཁར། བཟང་ཤིང་སྣ་ཚོགས་དང་། - མེ་ཏོག་དང་འབྲས་བུ་སྣ་ཚོགས་ཀྱིས་བཀང་ཏེ་མགྲིན་པའི་ནང་དུ་འཇིམ་པ་ལ་རིན་ཆེན་བསྲེས་པས་བཅད། དེ་སྟེང་ཁ་གཅོད་ཤིང་ལེབ་དང་། རས་དཀར་རྡོ་རྗེ་རྒྱ་གྲམ་གྱིས་མཚན་པས་གཡོགས། སྲད་བུ་སྣ་ལྔས་མགུལ་བཅིང་རྒྱ་གྲམ་དུ་བསྡམས་ཤིང་རྒྱས་གདབ་པ་སོགས་བྱ། འདི་ལྷ་ཀླུ་སྤྱི་ཁྱབ་གྱི་བུམ་པ་ཡིན། བསང་རྫས་དང་། ལས་བྱེད་དང་། སྒྲུབ་པ་པོ་རྣམས་གཙང་སྦྲ་ཤིན་ཏུ་ཆེ་བར་བྱའོ།། །།སརྦ་དཱ་ཀ་ལྱཱ་ཎཾ་བྷ་ཝ་ཏུ།། །།