དཔལ་ལྡན་ལྷ་མོ་དམག་ཟོར་གྱི་རྒྱལ་མོ་འཁོར་དང་བཅས་པ་མཆོད་ཅིང་ཐུགས་དམ་སྐོང་བའི་རིམ་པ་དོན་གཉིས་ཕྲིན་ལས་མྱུར་འགྲུབ།
༄༅། །དཔལ་ལྡན་ལྷ་མོ་དམག་ཟོར་གྱི་རྒྱལ་མོ་འཁོར་དང་བཅས་པ་མཆོད་ཅིང་ཐུགས་དམ་སྐོང་བའི་རིམ་པ་དོན་གཉིས་ཕྲིན་ལས་མྱུར་འགྲུབ་ཅེས་བྱ་བ་བཞུགས་སོ།།
༄༅། །ན་མཿཤྲཱི་མཱི་གུ་ར་བེ། །རྒྱལ་ཀུན་ཡུམ་གཅིག་རྡོ་རྗེ་དབྱངས་ལྷ་མོ། །དྲག་མོའི་ཚུལ་གྱིས་གདུག་པ་འདུལ་མཛད་པའི། །དཔལ་ལྡན་དམག་ཟོར་རྒྱལ་མོར་གུས་བཏུད་ནས། །གང་དེའི་གསོལ་མཆོད་ཉུང་ངུའི་ངག་གིས་སྤེལ། །འདི་ལ་གསུམ། སྦྱོར་བ། དངོས་གཞི། རྗེས་སོ། དང་པོ་ནི། །གནས་དབེན་ཞིང་ཡིད་དང་མཐུན་པར། །སྒྲུབ་རྟེན་སྤྱན་གཟིགས་མཆོད་རྫས་ལ་སོགས་པ་མ་ཚང་བ་མེད་པར་འདུ་བྱས་ནས། །བདག་གི་རྣལ་འབྱོར་སྔོན་དུ་འགྲོ་བས། །ཐོག་མར་ནང་མཆོད་བྱིན་གྱིས་བརླབ་པ་ནི། ལས་སྔགས་ཀྱིས་བསངས། སྭ་བྷ་ཝས་སྦྱངས། གཟུངས་འཛིན་ཆོས་ཀུན་མི་དམིགས་སྟོང་པའི་ངང་། ཡཾ་དང་རཾ་ལས་རླུང་མེའི་
དཀྱིལ་འཁོར་དང་། །ཨ་ལས་ཐོད་པའི་སྒྱེད་པུ་གསུམ་གྱི་སྟེང་། །ཨ་ཡིག་ལས་བྱུང་ཡེ་ཤེས་ཀཱ་པཱ་ལར། །ཧཱུཾ་ཧཱུཾ་ཛྭ་ལཾ་ཧཱུྃ་ལས་ཤ་ལྔ་དང་། །རཾ་ལཾ་པཱ་ཏཱི་པཾ་ལས་བདུད་རྩི་ལྔ། །སོ་སོའི་མིང་ཡིག་ཐོག་མས་མཚན་པའི་མཁར། །ཨོཾ་ཨཱཿཧཱུྃ་གསུམ་བརྩེགས་མར་གནས་པ་ལ། །རང་ཉིད་ལྷར་གསལ་ཐུགས་ཀའི་ས་བོན་ལས། །འོད་འཕྲོས་རླུང་གཡོས་མེ་སྦར་རྫས་རྣམས་ཞུ། །འབྲུ་གསུམ་འཕྲོ་འདུས་མ་དག་ཉེས་སྐྱོན་སྦྱངས། །ཡེ་ཤེས་བདུད་རྩི་ནམ་མཁའ་མཉམ་པར་སྤེལ། །ཨོ་ཨཱཧཱུྃ། ལན་གསུམ། མཆོད་རྫས་རྣམས་བསང་སྦྱང་། །སྟོང་པའི་ངང་ལས་ཨཱ་ཡིག་ལས་བྱུང་བའི། །སྟོང་གསུམ་དང་མཉམ་བདེ་སྐྱོང་སྣོད་མཆོག་ཏུ། །ཧཱུྃཞུ་
མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་ཞལ་རོལ་མོ་སོགས། །ངོ་བོ་བདེ་སྟོང་སྒྱུ་མའི་རང་བཞིན་ལས། །རྣམ་པ་མཆོད་རྫས་ནམ་མཁའི་ཁམས་གང་བ། །བྱེད་ལས་དབང་པོ་དྲུག་གི་སྤྱོད་ཡུལ་དུ། །ཟག་མེད་བདེ་ཆེན་བསྐྱེད་པའི་རྫས་སུ་གྱུར། །ཨོཾ་ཨགྷཾ་ཨཱ་ཧཱུྃ་ནས། ཤབྡ་ཨཱཧཱུཾ། །ཨོ་རཱུ་པ། ཤརྡ། གནྡྷེ། རཱ་ས། སྤངྒེ་ཨཱཙྪཱཧཱུྃ། ཞེས་རོལ་མོ་དང་བཅས་པས་བྱིན་དབབ། དེ་ནས་ལེགས་པར་བཤམས་པའི་གཏོར་མ་ལ་དམིགས་ཏེ། བསང་སྦྱང་བྱིན་རླབས་ནང་མཆོད་ལྟར་རམ། བསྡུ་ན། སྟོང་པའི་ངང་ལས་རླུང་མེ་ཐོད་སྐྱེད་སྟེང་། །བྷནྡྷའི་སྣོད་དུ་ཤ་ལྔ་འདུད་རྩི་ལྔ། །འབྲུ་གསུམ་འོད་དུ་ཞུ་བ་ལས་བྱུང་བའི། །གཏོར་མ་འདོད་ཡོན་བདུད་རྩིའི་རྒྱ་མཚོར་གྱུར། །ཨོཾ་ཨཱཿ་ཧཱུཾ། ལན་གསུམ་གྱིས་བྱིན་གྱིས་བརླབ་པར་བྱའོ། །གཉིས་པ་དངོས་གཞི་ལ་ལས་རིམ་བཅུ་གཅིག་ལས། །ཐོག་མར་མདུན་དུ་ཆོས་སྐྱོང་འཁོར་བཅས་བསྐྱེད་པ་ནི། བློ་རཀྵ་སོགས་ལན་གསུམ་བཟླས་པའི་རྗེས་སུ། ལས་སྔགས་ཀྱིས་བསང་། སྭ་བྷཱ་བས་སྦྱང་། འཁོར་འདས་ཆོས་ཀུན་གཟོད་ནས་སྤྲོས་བྲལ་དབྱིངས། །ལྷན་ཅིག་སྐྱེས་པ་ཕྱག་རྒྱ་ཆེན་པོའི་གཤིས། །འོད་གསལ་རྡོ་རྗེ་ནམ་མཁའི་དབྱིངས་ལྟ་བུའི། །རྣམ་རོལ་འགགས་པ་མེད་པའི་རོལ་རྩལ་ལས། །རང་མདུན་
ཁྲག་མཚོ་རྦ་རླབས་འཁྲུགས་པའི་ཀློང་། །རླུང་ནག་འཚུབ་མའི་གུར་ཆེན་འཁྱིལ་པའི་དབུས། །རྫུ་འཕྲུལ་ཤུགས་ལྡན་དྲེའུ་རྐྱང་སེར་ལ། །སྲིན་པོའི་ཐོད་པའི་སྐྲ་དང་ལྤགས་པས་གཡོགས། །གདུག་པའི་སྦྲུལ་གྱིས་གོང་སྨོད་བྱས་པའི་སྟེང་། །བྱོལས་དཔལ་ལྡན་དམག་ཟོར་རྒྱལ་མོ་ནི། །སྐུ་མདོག་དུས་མཐའི་ཆར་སྤྲིན་འཁྲུགས་པའི་མདངས། །ཞལ་གཅིག་ཕྱག་གཉིས་སྲིན་མོ་ཁྲོས་པའི་ཚུལ། །ཕྱག་གཡས་རྡོ་རྗེའི་བེ་ཅོན་ནམ་མཁར་འཕྱར། །གཡོན་པས་ཐུན་དང་ཁྲག་གིས་བཀང་བ་ཡི། །ནལ་བུའི་ཐོད་པ་ཐུགས་ཀའི་ཐད་དུ་རོལ། །ཞལ་གདངས་མཆེ་གཙིགས་དབུགས་བྲལ་བམ་རོར་དགྱེས། །ཨ་ལ་ཧ་ལའི་གད་རྒྱངས་འབྲུག་བཞིན་སྒྲོགས། །སྤྱན་གསུམ་དམར་ཟླུམ་སྨར་སྨིན་གློགས་ལྟར་འཁྱུགས། །དབུ་སྐྲ་ཁམ་སེར་གྱེན་དུ་བརྗེས་པའི་རྩེར། །རིགས་ལྔའི་རང་བཞིན་ཐོད་སྐམ་རྣམ་ལྔ་དང་། །སྤྲིན་བྲལ་ཟླ་ཤེལ་གཞོན་ནུའི་ཅོད་པན་ལ། །མདངས་མཐའི་ཐུར་མ་བརྒྱ་པའི་གྲིབ་བསིལ་གཡོ། །སྙན་གཡས་གདོང་ལྔ་གཡོན་པར་ལྟོ་འགྲོས་བརྒྱན། །ཁྲག་འཛགས་མགོ་ཕྲེང་ལྔ་བཅུའི་དོ་ཤལ་འཕྱང་། །རཀྟའི་ཐིག་ལེ་ཞག་གི་ཟོ་རིས་དང་། །ཐལ་ཆེན་ཚོམ་བུ་སྐུའི་གནས་སུ་བཀོད། །ལྟེ་བར་ཉིན་མོར་བྱེད་པའི་དཀྱིལ་འཁོར་རྒྱས། །མིག་སྨན་མདངས་ཅན་དར་གྱི་ལྷབ་
ལྷུབས་དང་། །མི་ལྤགས་གཡང་གཞི་རེ་སྡེའི་སྟོད་གཡོག་ཤིང་། །དྲེགས་ལྡན་ཤརྟུལ་ཡི་ཤམས་ཐབས་ལ། །ལྟོ་འགྲོའི་དབང་པོ་ཟུང་གི་སྐ་རགས་བཅིངས། །སྒ་ཡི་སྔ་ཤར་ནད་ཀྱི་རྐྱལ་པ་དང་། །བཙན་གྱི་བྱང་དམར་ཤྭ་རྡེལ་དཀར་ནག་འཕྱང་། །ཕྱི་ཤར་མཚོན་གྱི་གྲུ་གུ་སྔོ་དམར་བཏགས། །བདུད་ཀྱི་ཁྲོམ་ཤིང་ནག་པོ་སྐེད་ལ་གཟེར། །འཁོར་དུ་དུས་བཞིའི་ལྷ་མོ་རྣམ་པ་བཞི། །མ་བདུད་གཤིན་རྗེ་སྲིན་པོ་ཞིང་སྐྱོང་དང་། །ལྷ་ཀླུ་གནོད་སྦྱིན་དྲི་ཟ་གྲུབ་བུམ་སོགས། །སྣང་སྲིད་དྲེགས་པའི་དམག་དཔུང་བསམ་མི་ཁྱབ། །ཀུན་ཀྱང་ཕྱག་གཡས་མཚོན་ཆ་སྣ་ཚོགས་དང་། །གཡོན་པས་ཐོད་པ་ཁྲག་གིས་བཀང་བ་རོལ། །གཙོ་དང་འཁོར་བཅས་རབ་འཇིགས་ཁྲོས་པའི་ཚུལ། །དྲན་པ་ཙམ་གྱིས་དགྲ་དང་བགེགས་ཀྱི་དཔུང་། །དོན་སྙིང་ལྐོག་མར་འབྱིན་པའི་ཁྱད་པར་ཅན། །འགག་མེད་སྒྱུ་མའི་ཏིང་འཛིན་པིར་རྩེ་ཡིས། །ལེགས་བྲིས་དབང་གཞུ་གསར་པའི་སྤུན་ཟླའི་གཟུགས། །སྣང་སྟོང་ཟུང འཇུག་ཆེན་པོར་གསལ་བར་གྱུར། །དེ་ལྟར་དུ་གསལ་བའི་གཙོ་འཁོར་ཐམས་ཅད་ཀྱི་མིག་ཏུ་ཀྵ། རྣ་བར་ཚིགས། སྣར་ཁཾ། ལྕེར་རཾ། དཔྲལ་བར་ཀཾ །ལྟེ་བར་པཾ། སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གིས་མཚན་པ། རང་ཡི་དམ་དུ་གསལ་བའི་ཐུགས་ཀའི་ས་བོན་ལས་འོད་ཟེར་
འཕྲོས་པས་བྱང་ཤར་མུ་ལེ་དིང་གི་རྒྱ་མཚོ་ཆེན་པོ་ནས་དཔལ་ལྡན་ལྷ་མོ་དམག་ཟོར་གྱི་རྒྱལ་མོ་འཁོར་དང་བཅས་པ་བཛྲ་ས་མཱ་ཛ༔ གཉིས་པ་སྤྱན་འདྲེན་པ་ནི། །ཁྱད་པར་གྱི་སྤོས་སྦྱོར་བསྲེག་ཅིང་། རོལ་མོ་དབྱངས་དང་བཅས་པས། བྷྱོ། རབ་འབྱམས་རྒྱལ་བ་ཀུན་གྱི་ཕྲིན་ལས་ལ། །དམག་ཟོར་རྒྱལ་མོ་ཞེས་བྱ་མཚན་གསོལ་བ། །རྩེ་གཅིག་མོས་པའི་དབང་གིས་སྤྱན་འདྲེན་ན། །ཐོགས་པ་མེད་པ་མྱུར་དུ་གཤེགས་སུ་གསོལ། །བདེ་ཆེན་ཐིག་ལེ་གཅིག་ལས་མ་གཡོས་ཀྱང་། །སྲིད་ཞི་ཀུན་ཏུ་ཁྱབ་པའི་གཟུགས་སྟོན་ཤིང་། །ཞི་ཆགས་ཁྲོ་བའི་ཉམས་འགྱུར་མཐའ་ཀླས་པའི། །དཔལ་ལྡན་དམག་ཟོར་རྒྱལ་མོ་གཤེགས་སུ་གསོལ། །སྔོན་ཚེ་སྲས་བཅས་རྒྱལ་བའི་སྤྱན་སྔ་རུ། །སངས་རྒྱས་བསྟན་པ་གཉེན་པོ་སྲུང་བ་དང་། །འགྲོ་ལ་ཕན་བདེ་སྒྲུབ་པར་དམ་བཅས་པའི། །ཞལ་བཞེས་ཐ་ཚིག་མ་གཡེལ་ད་ཚུར་བྱོན། །བྱང་ཤར་མུ་ལེ་དིང་གི་ཕོ་བྲང་ནས། །དྲག་ཤུལ་རྡོ་རྗེ་སྲིན་མོའི་སྣང་ཚུལ་ཅན། །སྲིད་གསུམ་དྲེགས་པའི་དམག་དཔུང་རྒྱ་མཚོ་དང་། །མ་མོ་མཁའ་འགྲོའི་འཁོར་བཅས་གཤེགས་སུ་གསོལ། །དོན་དམ་སྤྲོས་པ་བྲལ་བའི་ཡེ་ཤེས་ལ། །གཤེགས་དང་བཞུགས་པའི་མཚན་མ་ལས་འདས་ཀྱང་། །ཀུན་རྫོབ་སྒྱུ་མ་ལྟ་བུའི་རྣམ་རོལ་པས། །འགགས་མེད་
ཐུགས་རྗེའི་དབང་གིས་གནས་འདིར་གཤེགས། བྷྱོ༔ རཀྵ་སོགས་ཀྱི་རྗེས་སུ། ཨེ་ཨ་ར་ལི་ཧཱུཾ་ཧཱུཾ་ཛ་ཛ༔ གསུམ་པ་བཞུགས་སུ་གསོལ་བ་ནི། བྷྱོ༔ ནག་མོ་གདུག་ཅན་དྲེགས་པ་ཅན། །ཀུན་ཏུ་ཁྱབ་པའི་གཟུགས་སྟོན་མ། །ནག་མོ་གཙོ་མོ་དྲེའུ་རྟ་བཅིབས། །འདིར་བྱོན་དྲེའུ་རྟའི་གདན་ལ་བཞུགས། །བྷྱོརཀྵ་སོགས་ཀྱི་རྗེས་སུ། །ཛ༔ཧཱུྃ་བཾ་ཧོ། །ས་མ་ཡ་ཏིཥྛནྟུ། །བཞི་པ་ཕྱག་བྱ་བ་ནི། །བྷྱོ༔ ཟ་བྱེད་ནག་མོ་མཆེ་བ་ཅན། །དགོད་བྱེད་ཧ་ཧ་ནག་པོ་སྟེ། །གསོད་ལ་དགའ་བ་བྱེད་པ་མོར། །བདག་ནི་བརྡ་ཡིས་ཕྱག་བགྱིད་དོ། །སྦྱོརཀྵ་སོགས་ཀྱི་རྗེས་སུ། ཨ་ཏི་པུ་ཧོ། པྲ་ཏིཙྪ་ཧོ༔ ལྔ་པ་དབང་བསྐུར་བ་ནི། སླར་ཡང་རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས། དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས། ཁྱེད་རྣམས་ཀྱི་འདི་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་རེ་ཐོགས་ཏེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཨཱ་ཧཱུཾ། ཞེས་གསུངས་ཤིང་དབང་བསྐུར་བས་སྐུ་གང་། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་དཔལ་རྡོ་རྗེ་འཇིགས་བྱེད་ཡུམ་དང་བཅས་པས་དབུར་བརྒྱན་པར་བསམ། དྲུག་པ་མཆོད་པ་འབུལ་བ་ལ། །
ཐོག་མར་ཕྱི་མཆོད་འབུལ་བ་ནི། བྷྱོ༔ དངོས་བཤམས་ཡིད་ཀྱིས་སྤྲུལ་པ་ལས་བྱུང་བའི། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོ་སོགས། །སྲིད་དང་ཞི་བའི་ཁམས་ཀུན་ཡོངས་ཁྱབ་འདིས། །རྣམ་མང་མཆོད་སྤྲིན་ནམ་མཁའ་མཛོད་ཀྱི་གཏེར། །དམག་ཟོར་རྒྱལ་མོ་འཁོར་དང་བཅས་ལ་འབུལ། །བཞེས་ནས་ཞི་རྒྱས་དབང་དང་དྲག་པོ་ཡི། །གང་འདུལ་ཕྲིན་ལས་ལྷུན་གྱིས་གྲུབ་པར་མཛོད། །ཨོཾ་ཀཱ་ལི་དེ་བཱི་ས་པ་རི་ཝཱ་ར་ཨགྷཾ་པྲ་ཏིཙྪ་ཧཱུྃ་སྭཱ་ཧཱ། ནས། ཤཔྟའི་བར་གྱིས་མཆོད། ནང་མཆོད་འབུལ་བ་ནི། ཕྲ་མོ་སྦོམ་པོ་ལས་བྱུང་བའི། །བདུད་རྩིས་བྲན་པའི་ཛ་གད་འདི། །དམག་ཟོར་རྒྱལ་མོ་ལ་འབུལ་གྱི། །བསྟན་པ་བསྲུང་ཕྱིར་བཞེས་སུ་གསོལ། ཨོ་ཀཱ་ལི་དེ་བཱི་ས་པ་རི་ཝཱ་ར་མ་ཧཱ་པཉྩ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། རཀྟ་འབུལ་བ་ནི། ཆུ་དང་མ་འདྲེས་དྭངས་མའི་ཁྲག །དྭངས་མ་ཡི་ནི་ཁྲག་ཆེན་པོ། །དམག་ཟོར་རྒྱལ་མོ་ལ་འབུལ་གྱི། །བསྟན་པ་བསྲུང་ཕྱིར་བཞེས་སུ་གསོལ། །ཨོཾ་ཀཱ་ལི་དེ་བཱི་ས་པ་རི་ཝཱ་ར་མ་ཧཱ་རཀྟ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། གཏོར་མ་འབུལ་བ་ནི། ཤ་ཁྲག་བདུད་རྩི་ལྔ་སྦྱར་བ། །འབྲུ་སྣ་ལྔ་སྦྱར་གཏོར་མ་འདི། །དམག་ཟོར་རྒྱལ་མོ་ལ་འབུལ་གྱི། །བསྟན་པ་བསྲུང་ཕྱིར་བཞེས་སུ་གསོལ། །
ཞེས་པའི་རྗེས་སུ། ལྷ་མོ་འཁོར་དང་བཅས་པའི་ལྗགས་ཧཱུྃ་ལས་སྐྱེས་པའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་གྱིས་གཏོར་མའི་བཅུད་དྲངས་ཏེ་གསོལ་བར་གྱུར་པ་བསམས་ལ། རྡོ་རྗེ་ཐལ་མོ་ཁ་གྱེན་དུ་ཕྱེ་བའི་ཕྱག་རྒྱ་དང་བཅས། ཨོཾ་ཀཱ་ལི་དེ་བཱི་ས་པ་རི་ཝཱ་ར་སརྦ་བིགྷཱན་ཤ་ཏཱ་ན་མཱ་རཱ་ཡ་ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་བདུན་ནམ་ཉེར་གཅིག་གིས་ཕུལ་བའི་མཐར། ཨོཾ་ཀཱ་ལི་དེ་བཱི་ཡ། ས་པ་རི་ཝཱ་ར་ཨབྷཾ་སོགས་ཀྱི་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་འབུལ། བྷྱོ༔ རྣམ་ཀུན་མཆོག་ལྡན་རྡོ་རྗེ་བཙུན་མོའི་དབྱིངས། །དྲག་ཤུལ་སྲིན་མོ་ཁྲོས་པའི་སྐུར་བཞེངས་ནས། །སངས་རྒྱས་བསྟན་པ་གཉེན་པོ་བསྲུང་མཛད་པའི། །དཔལ་ལྡན་དམག་ཟོར་རྒྱལ་མོར་བདག་བསྟོད་དོ། །འཇིགས་རུངས་སྐུ་ནི་གར་དགུའི་ཉམས་ཀྱིས་སྒེགས། །བདེ་ཆེན་གསུངས་ནི་དྲག་སྔགས་རྡོ་རྗེའི་དབྱངས། །སྤྲོས་བྲལ་ཐུགས་ནི་རྨད་བྱུང་མཁྱེན་དང་བརྩེའི། །ཡོན་ཏན་ཕ་མཐའ་ཡས་པ་ཁྱེད་ལ་བསྟོད། །རྨད་བྱུང་ཞི་རྒྱས་དབང་དང་དྲག་པོ་ཡི། །རྣམ་འཕྲུལ་འགགས་པ་མེད་པའི་རོལ་རྩེད་ཀྱིས། །རྩེ་གཅིག་སྒྲུབ་པའི་རྣལ་འབྱོར་བདག་ཅག་ལ། །དངོས་གྲུབ་ཡིད་བཞིན་སྩོལ་མཛད་ཁྱོད་ལ་བསྟོད། །དོན་དམ་སྤྲོས་བྲལ་ངང་ལས་མ་གཡོས་ཀྱང་། །ཀུན་རྫོབ་སྣ་ཚོགས་གཟུགས་ཀྱི་སྐུར་
སྟོན་པ། །བདུད་དང་མ་མོ་ལྷ་ཀླུ་གནོད་སྦྱིན་སོགས། །གཙོ་འཁོར་སྤྲུལ་པ་བཅས་པ་ཕྱག་འཚལ་བསྟོད། །དཔལ་ལྡན་དམག་ཟོར་རྒྱལ་མོ་འཁོར་བཅས་ཀྱིས། །རྒྱ་ཆེན་མཆོད་སྦྱིན་གཏོར་མ་འདི་བཞེས་ལ། །བཤད་སྒྲུབ་བསྟན་པ་ཕྱོགས་བཅུར་ཤར་བ་དང་། །འགྲོ་བའི་བདེ་སྐྱིད་རྫོགས་ལྡན་དུས་བཞིན་སྤེལ། ཁྱད་པར་རྣལ་འབྱོར་བདག་ཅག་འཁོར་བཅས་ཀྱི། །དམ་ཆོས་བསྒྲུབ་པའི་འགལ་རྐྱེན་ཀུན་ཞི་ཞིང་། །མཐུན་རྐྱེན་ཚེ་བསོད་དཔལ་འབྱོར་ལེགས་ཚོགས་རྣམས། །ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད། ཁམས་གསུམ་འགྲོ་བ་མཐའ་དག་དབང་དུ་བསྡུས། །གནོད་བྱེད་དགྲ་བགེགས་འབྱུང་པོ་རྡུལ་དུ་རློག །མདོར་ན་ཡིད་ལ་སྨོན་པའི་དོན་རྣམས་ཀུན། །འབད་མེད་མྱུར་བ་ཉིད་དུ་འགྲུབ་པར་མཛོད། ཞེས་བསྟོད་ཅིང་འདོད་པའི་དོན་ལ་གསོལ་བ་གདབ། བདུན་པ་བཟླ་པ་བྱ་བ་ནི། རང་ཡི་དམ་དུ་གསལ་བའི་ཐུགས་ཀའི་ས་བོན་ལས་འོད་ཟེར་འཕྲོས། །ལྷ་མོའི་ཐུགས་ཀའི་བྷྱོལ་ཕོག་པས་ཐུགས་རྒྱུད་རང་དབང་མེད་པར་བསྐུལ་ནས་ཅི་འདོད་པའི་ལས་རབ་འབྱམས་ཐམས་ཅད་ཐོགས་མེད་དུ་སྒྲུབ་པར་གྱུར་པར་བསམས་ལ། བྷྱོརཀྵ་བྷྱོ༔ རཀྵ་བྷྱོ་བྷྱོ༔ རཀྵ་ཐུན་བྷྱོ༔ ཁ་ལ་རཀ་ཆེན་མོ༔ རཀྐོ་ཨ་བྱ་ཏ་བྱ་ཐུན་བྷྱོ༔ རུ་ལུ་རུ་ལུ་ཧཱུྃ་བྷྱོ་ཧཱུཾ། ཞེས་ཅི་ནུས་
བཟླས་མཐར། ཡི་གེ་བརྒྱ་པས་ལྷག་ཆད་བསྐང་། ཨོ་ཀཱ་ལི་དེ་བཱི་ས་པཱ་རི་ཝཱ་ར་ཨརྒྱུ་སོགས་ཀྱིས་མཆོད། སྐུ་གསུམ་ལྷུན་གྲུབ་ཐུགས་རྗེ་མཐར་ཕྱིན་ཡང་། །སྲིད་གསུམ་གདུག་པ་འདུལ་ཕྱིར་ཁྲོས་པའི་སྐུ། །དུས་གསུམ་རྒྱལ་བའི་བསྟན་སྲུང་ཆེན་མོ་ལ། །སྒོ་གསུམ་གུས་པ་ཆེན་པོས་ཕྱག་འཚལ་བསྟོད། །ཅེས་པས་བསྟོད། གཏོར་བསྔོ་རྐྱང་པ་ལ་ནོངས་བཤགས་ནས་བཟུང་། ཤིས་བརྗོད་ཀྱི་༧ བར་རྗེས་ཆོག་ནས་འབྱུང་བ་ལྟར་བྱའོ། །བརྒྱད་པ་ཐུགས་དམ་བསྐང་ཞིང་བཤགས་པའི་རིམ་པ་ལ། བསྐང་རྫས་རྣམས་བསང་སྦྱང་། སྟོང་པའི་ངང་ལས་གནས་ཁང་གྷོལས་དུར་ཁྲོད་དྲག་པོའི་གཞལ་ཡས་ཁང་ཡངས་ཤིང་རྒྱ་ཆེ་བའི་ནང་དུ། མཆོད་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་དཔལ་ལྡན་ལྷ་མོ་འཁོར་དང་བཅས་པ་མཉེས་པར་བྱེད་པའི་དམ་རྫས་སྤྱན་གཟིགས་མཆོད་པའི་བྱེ་བྲག་བསམ་གྱིས་མི་ཁྱབ་པ་ནམ་མཁའ་མཛོད་ཀྱི་འཁོར་ལོའི་སྤྲིན་ཆེན་པོར་གྱུར། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨ་བརྟ་ཡ། ཨཱ་བརྟ་ཡ་ཧོ༔ བཛྲ་སྤ་ར་ཎ་ཁཾ། ཞེས་པས་བྱིན་གྱིས་བརླབ་དེ་ནས་བསྐང་བ་དངོས་ལ་འཇུག་པ་ནི། རོལ་མོ་དབྱངས་དང་བཅས་པས། བྷྱོ༔ འཁོར་འདས་ཆོས་ཀུན་བཟོད་ནས་རྣམ་དག་ཀྱང་། །འོད་གསལ་ལྷན་གཅིག་སྐྱེས་
པའི་རྣམ་རོལ་ལས། །སྲིད་ཞིའི་ཁམས་ཀུན་ཁྱབ་པའི་མཆོད་སྤྲིན་གྱིས། །དཔལ་ལྡན་ལྷ་མོ་འཁོར་བཅས་མཉེས་གྱུར་གཅིག །རབ་དམར་ཁྲག་གི་མཆོད་ཡོན་རྒྱ་མཚོར་འཁྱིལ། །མཛེས་སྡུག་དབང་པོའི་མེ་ཏོག་ཕང་ཕུང་གཡོ། ཚིལ་ཆེན་བདུག་པའི་བསུངས་ཞིམ་སྤྲིན་ལྟར་གཏིབས། །ཞུན་ཆེན་སྣང་གསལ་ཉིན་མོའི་དཔལ་ལ་འཁུ། །དམ་ཉམས་རཀྟའི་དྲི་ཆབ་རྦ་རླབས་འཁྲུགས། །རོ་ལྡན་ཤ་རུས་ཞལ་ཟས་སྟོང་ཁམས་ཁྱབ། །སྙན་བརྗིད་རོལ་མོའི་བྱེ་བྲག་རྣམ་མང་སོགས། །ཕྱི་མཆོད་འདོད་ཡོན་རྒྱ་མཚོའི་སྤྲིན་ཕུང་གིས། །དཔལ་ལྡན་དམག་ཟོར་རྒྱལ་མོའི་ཐུགས་དམ་བསྐང་། །འཁོར་ཚོགས་སྤྲུལ་པར་བཅས་པའི་ཐུགས་དམ་བསྐང་། །ཐུགས་དམ་བསྐང་ཤིང་ཉམས་ཆགས་མཐོལ་བཤགས་ན། །ཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། །རྫུ་འཕྲུལ་ཤུགས་ལྡན་རྟ་མཆོག་རླུང་ལྟར་འཕྱོ། །ཆར་སྤྲིན་གཟུགས་འཆང་གཡག་རོག་སྟོང་གསུམ་ཁྱབ། །དཀར་མིན་ལུག་གི་ཁྱུ་ཚོགས་ལྷུན་སྟུགས་ཤིང་། །མིག་སྨན་མདངས་ཅན་འདབ་ཆགས་ཀླད་ན་ལྡིང་། །ལྕེ་སྤྱང་ཁྱི་ནག་དགྲ་བགེགས་སྲོག་ལ་རྔམས། །སྲ་བརྟན་གོ་ཁྲབ་རྣོ་དཔལ་རྡོ་རྗེའི་མཚོན། །མི་སྡུག་རྒྱན་སྤྲས་དྲེའུ་རྐྱང་སེར་དང་། །རྡོ་རྗེའི་བེ་ཅོན་ཐུན་ཁྲག་ཀཱ་པ་ལ། །མི་ལྤགས་གཡང་
གཞི་རེ་ལྡེའི་སྟོད་གཡོགས་སོགས། །རབ་འཇིགས་སྐུ་ཡི་རྒྱན་ཆ་སྣ་ཚོགས་དང་། །ནད་ཀྱི་རྐྱལ་པ་མཚོན་གྱི་གྲུ་གུ་སོགས། །བསྟན་པ་སྲུང་བའི་མཚོན་ཆ་རྣམ་མང་པོས། །དཔལ་ལྡན་དམག་ཟོར་རྒྱལ༴ །འཁོར་ཚོགས༴ །ཐུགས་དམ །ཕྲིན་ལས༴ །འཆི་མེད་གྲུབ་པའི་བཅུད་ལེན་ཨ་མྲྀ་ཏ། །དམར་སེར་ལྦུ་ཕྲེང་འཁྲིགས་པའི་རཀྟའི་རྒྱུན། །ཤ་ལྔ་བདུད་རྩི་རིགས་ལྔ་ཡེ་ཤེས་ལྔ། །བྱིན་གྱིས་བརླབས་པའི་གཏོར་ཚོགས་རྒྱ་མཚོ་དང་། །ཉི་ཟླ་རི་རབ་གླིང་བཞི་གླིང་ཕྲན་བརྒྱད། །ནོར་བུའི་བང་མཛོད་འདོད་འབྱུང་དཔག་བསམ་ཚལ། །རིན་ཆེན་བདུན་དང་ཉེ་བའི་རིན་ཆེན་བདུན། །བཀྲ་ཤིས་རྫས་རྟགས་བརྒྱད་དང་འདོད་ཡོན་ལྔ། །ཚད་ལྡན་རྒྱུ་དང་བཟོ་བོས་འདུ་བྱས་ཤིང་། །ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །སྐུ་གསུང་ཐུགས་དང་ཕྱི་ནང་གསང་བའི་རྟེན། །འཇིགས་རུངས་དུར་ཁྲོད་རོལ་པའི་ཕོ་བྲང་སོགས། །སྲིད་དང་ཞི་བའི་ཁམས་ན་གནས་པ་ཡི། །རབ་འབྱམས་མཆོད་པའི་སྤྲིན་ཕུང་རྒྱ་མཚོ་ཀུན། །དངོས་སུ་བཤམས་དང་ཡིད་ཀྱིས་རྣམ་སྤྲུལ་ཏེ། །ས་དང་བར་སྣང་ནམ་མཁའི་ཁྱོན་གང་བས། །དཔལ་ལྡན་དམག་ཟོར །འཁོར༴ །ཐུགས་དམ= །ཕྲིན་ལས༴ །སྣོད་བཅུད་ཡེ་ཤེས་ལྷ་མོའི་སྐུར་བསྒོམས་ཤིང་། །སྒྲར་གྲགས་རྡོ་རྗེའི་སྔགས་ཀྱི་རོལ་
མོར་འཁྲོལ། །རྩ་རླུང་ཐིག་ལེའི་འཕྲོ་འདུ་མ་ལུས་ཀུན། །འོད་གསལ་དབུ་མའི་གྲོང་དུ་ཕྱག་བྱས་པས། །གཟོད་ནས་སྤྲོས་བྲལ་བདེ་སྟོང་ཕྱག་རྒྱ་ཆེ། ཁྱོད་ཀྱི་རང་བཞིན་ཉིད་དུ་ངེས་རྟོགས་ཤིང་། །མཆོད་བྱ་མཆོད་བྱེད་བྲལ་བར་མཉམ་བཞག་པའི། །བླ་མེད་མཆོག་གི་མཆོད་པ་དམ་པ་འདིས། །དཔལ་ལྡན༴ །འཁོར་ཚོགས༴ །ཐུགས་དམ༴ །ཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། བྱེ་བྲག་ཏུ་ཆས་དབུལ་བ་ནི། བྷྱོ༔ བསྟན་སྲུང་གཙོ་མོ་མ་གཅིག་རེ་བ་ཏཱིར། །འཁོར་འདས་ཆེ་བཙན་དྲེགས་པ་ཐམས་ཅད་ཀྱིས། །དགོས་པའི་ཡོ་བྱད་སྣ་ཚོགས་ཕུལ་ནས་ཀྱང་། །སངས་རྒྱས་བསྟན་པ་སྲུང་བར་མངའ་གསོལ་བཞིན། །རྣལ་འབྱོར་བདག་ཀྱང་རྩེ་གཅིག་གུས་པའི་བློས། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ། །དགོས་པའི་ཡོ་བྱད་སྣ་ཚོགས་འབུལ་ལགས་ན། །དགྱེས་པ་ཆེན་པོའི་ཐུགས་ཀྱིས་བཞེས་ནས་ཀྱང་། །བདག་ཅག་འཁོར་བཅས་དེང་ནས་བྱང་ཆུབ་བར། །ཉིན་མཚན་དུས་དྲུག་སྲུང་ཞིང་སྐྱོང་བ་དང་། །དགོས་པའི་ཡོ་བྱད་གང་དང་ཅི་བྱུང་ཡང་། །དེ་ཀུན་ལྷ་མོ་ཁྱོད་ཀྱིས་སྩོལ་བར་མཛོད། །བསྟན་པ་བཤིགས་པའི་དགྲ་དང་བགེགས་ཀྱི་དཔུང་། །བར་ཆད་བྱེད་པའི་ཡིད་སྲུབ་སྡེར་བཅས་ཀུན། །དུས་མཐའི་ཞུགས་ཀྱི་རྩྭ་སྦུར་བསྲེག་པ་།
བཞིན། །སྐད་ཅིག་ཉིད་ལ་ཐལ་བའི་རྡུལ་དུ་རློག །ཆོས་དབྱིངས་ཞི་བའི་ངང་ལས་མ་གཡོས་ཀྱང་། །སྤྲུལ་པའི་རྣམ་འགྱུར་ཆ་ལུགས་སྣ་ཚོགས་ཀྱིས། །གང་འདུལ་ཕྲིན་ལས་ལྷུན་གྱིས་གྲུབ་པ་དང་། །བསྟན་འགྲོའི་ཕན་བདེ་སྤེལ་བའི་ཕྲིན་ལས་མཛོད། དེ་ནས་བཤགས་བྱ་བ་ནི། སྐབས་འདིར་བཤགས་བཟླས་བྱེད་པར་སྤྲོ་ན། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་ཀྱི་ཐུགས་བརྒྱུད་བསྐུལ། དེ་དག་གི་སྐུ་གསུང་ཐུགས་ཀྱི་གནས་ནས་རྡོ་རྗེ་གསུམ་གྱི་ལྷ་ཚོགས་དཔག་ཏུ་མེད་པ་སྤྱན་དྲངས། དེ་རྣམས་ཀྱི་གནས་གསུམ་ནས་ཡི་གེ་བརྒྱ་པ་དཀར་དམར་མཐིང་གསུམ་བདུད་རྩིའི་རྒྱུན་དང་བཅས་པ་བསམ་གྱིས་མི་ཁྱབ་པ་བྱུང་། རང་དང་ལྷ་མོའི་གནས་གསུམ་དུ་ཐིམ་པས། རང་གི་དམ་ཚིག་ཉམས་ཆགས་དང་། ལྷ་མོའི་སྐུ་གསུངས་ཐུགས་ལ་གྲིབ་ཕོག་པ་ཐམས་ཅད་བྱང་ཞིང་དག་པར་བསམས་ལ། ཡི་གེ་བརྒྱ་པ་ཉེར་གཅིག་བཟླ། དེ་ནས་བཤགས་པ་དངོས་ནི། བྷྱོ༔ རྡོ་རྗེ་འཆང་དང་པཎ་ཆེན་དམར་པོ་སོགས། །རྩ་བ་བརྒྱུད་པའི་བླ་མ་མཆོག་རྣམས་དང་། །བསྟན་སྲུང་ཆེན་མོ་དམག་ཟོར་རེ་བ་ཏཱི། །འཁོར་བཅས་བདག་ལ་གསན་ཅིང་དགོངས་སུ་གསོལ། །བདག་ཅག་མི་ཤེས་བག་མེད་མ་གུས་དང་། །ཉོན་
མོངས་དྲག་པོའི་གཞན་དབང་ལ་བརྟེན་ནས། །རྩ་བ་ཡན་ལག་དམ་ཚིག་ཉམས་ཆགས་ཀུན། །སྙིང་ནས་འགྱོད་པས་བཤགས་ཤིང་བསྡམ་པར་བགྱི། །སྣོད་བཅུད་ཡེ་ཤེས་ལྷ་མོའི་རོལ་པ་ལ། །གཉིས་འཛིན་དབང་གིས་གཞན་དུ་བཟུང་བ་དང་། །བསྐྱེད་རིམ་མ་གསལ་ཆོ་ག་ལྷག་ཆད་སོགས། །སྐུ་ཡི་དམ་ཚིག་ཉམས་པ་མཐོལ་ལོ་བཤགས། །རླུང་སྔགས་བདེ་ཆེན་ནཱ་དའི་རང་བཞིན་ལ། །ཐ་མལ་འཁྲུལ་པའི་མཚན་མས་བཅིངས་པ་དང་། །བཟླས་བརྗོད་མ་དག་བསྙེན་སྒྲུབ་གཡེལ་ལ་སོགས། །གསུང་གི་དམ་ཚིག་ཉམས་པ༴ །ཆོས་སྐུ་ཡེ་ནས་སྤྲོས་དང་བྲལ་བ་ལ། །རྟག་ཆད་བློ་ཡིས་ལོག་པར་བལྟས་པ་དང་། །གནས་ལུགས་མ་བསྒོམ་ཟབ་མོའི་དོན་ལ་གཡེལ། །ཐུགས་ཀྱི༴ །དྲན་པ་ཙམ་གྱིས་ཡིད་བཞིན་འདོད་དགུའི་ཆར། །འབེབས་མཛད་བསྟན་སྲུང་གཙོ་མོ་ཁྱོད་ཉིད་ལས། །འཇིག་རྟེན་དྲེགས་པའི་སྐྱབས་གཞན་ཚོལ་ལ་སོགས། །ཡོན་ཏན༴ །སྐུ་གསུང་ཐུགས་དང་ཕྱི་ནང་གསང་བའི་རྟེན། །མཆོད་དང་སྐོང་བའི་ཆོ་ག་མ་རྫོགས་བཞིན། །ཞི་རྒྱས་དབང་དྲག་ལས་ལ་སྦྱར་བ་སོགས། །ཕྲིན་ལས༴ །མདོར་ན་བཅས་དང་རང་བཞིན་ལས་ཉམས་པའི། །ནོངས་པ་གང་མཆིས་སྙིང་ནས་མཐོལ་བཤགས་ན། །བརྩེ་བ་ཆེན་པོའི་ཐུགས་ཀྱིས་ཉེར་དགོངས་ཏེ། །སྒྲིབ་
མེད་ཚངས་པའི་དངོས་གྲུབ་སྩལ་དུ་གསོལ། ཡི་གེ་བརྒྱ་པ་བརྗོད། དགུ་པ་བསྟོད་པ་བྱ་བ་ནི། བྷྱོ༔ རྒྱལ་ཀུན་སོ་སོར་རྟོག་པའི་ཡེ་ཤེས་བྱིན། །གཅིག་བསྡུས་འཇམ་དཔལ་གཞོན་ནུའི་ཤེས་རབ་ཡུམ། །རྡོ་རྗེ་དབྱངས་ཅན་ཁྲོ་མོའི་སྐུར་བཞེངས་ནས། །གདུག་པ་མ་ལུས་འདུལ་མཛད་ཁྱོད་ལ་བསྟོད། །དྲན་པས་བདུད་སྡེའི་དཔུང་ཚོགས་འཆིངས་མཛད་པའི། །ཧེ་རུ་ཀ༔དཔལ་དུས་དགྲའི་དབང་པོའི་ལྕམ། །བསྟན་སྲུང་རྒྱ་མཚོའི་གཙོ་མོར་ཡོངས་ཤར་བའི། །དཔལ་ལྡན་དམག་ཟོར་རྒྱལ་མོ་ཁྱོད་ལ་བསྟོད། །གང་སྐུ་རྣམ་ཀུན་མཆོག་ལྡན་ཡེ་ཤེས་ལས། །དུས་མཐའི་ཆར་སྤྲིན་འཁྲུགས་པའི་ལང་ཚོ་ཅན། །དྲན་པ་ཙམ་གྱིས་དགྲ་དང་བགེགས་ཀྱི་དཔུང་། །དོན་སྙིང་ལྐོག་མར་འབྱིན་མཛད་ཁྱོད་ལ་བསྟོད། །གསུང་གསང་བརྗོད་བྲལ་ནཱ་དའི་སྒྲ་དབྱངས་ནི། །དྲག་སྔགས་རྡོ་རྗེའི་མེ་ཆར་འབེབས་མཁས་པས། །ཡིད་སྲུབ་རི་བོའི་རྐང་པ་འཆིང་མཛད་ཅིང་། །ཐུབ་བསྟན་ལེགས་དྲིས་སྐྱོང་མཛད་ཁྱོད་ལ་བསྟོད། །གང་ཐུགས་སྤྲོས་པའི་ཚོགས་ལས་རྣམ་གྲོལ་ཡང་། །བདེ་ཆེན་སྙིང་རྗེའི་གཟི་བརྒྱ་འབར་བའི་དཔྱིད། །སྣ་ཚོགས་མོས་པའི་རྗེས་སུ་མངོན་སྣང་བས། །གྲུབ་གཉིས་ལྷུག་པར་སྟེར་མཁས་ཁྱོད་ལ་བསྟོད། །ཡོན་ཏན་ཡིད་བཞིན་ནོར་བུའི་ཆུ་གཏེར་ལ། །གང་གིས་རེག་པ་
ཙམ་ནས་ཕན་དང་བདེའི། །རྨད་བྱུང་འདོད་དགུའི་དཔལ་གྱིས་མངོན་མཐོ་བས། །ལྷར་བཅས་ཀུན་དགའི་དཔྱིད་གྱུར་ཁྱོད་ལ་བསྟོད། །ཕྲིན་ལས་སྲས་བཅས་རྒྱལ་བ་ཐམས་ཅད་ཀྱིས། །སྲིད་ཞིའི་ཅོད་པན་གཅིག་ཏུ་དབང་བསྐུར་བས། །བསྟན་པ་བསྲུང་དང་འགྲོ་ལ་ཕན་གདགས་པའི། །རྣམ་འཕྲུལ་ཕ་མཐའ་ཡས་པ་ཁྱོད་ལ་བསྟོད། །ཡིད་འོང་ཟླ་ཤེལ་གཞོན་ནུའི་མཚན་དཔེ་ལས། །ཕུན་ཚོགས་བདུད་རྩིའི་ཟེགས་མ་སྤྲོ་བ་ཡིས། །བརྒྱད་གཉིས་འཇིགས་པའི་ཚ་གདུང་ཀུན་བཅིལ་ནས། །དགེ་མཚན་སྣང་བ་དར་མཛད་ཁྱོད་ལ་བསྟོད། །དམར་སེར་ཉིན་མོར་བྱེད་པ་ལང་ཚོའི་དཔྱིད། །སྐལ་བཟང་གང་གི་ཡིད་མཁར་ཤར་ཙམ་ནས། །ཚེ་བསོད་དཔལ་འབྱོར་ལུང་རྟོགས་ཤེས་རབ་སོགས། །དོན་གཉིས་ཨུཏྤལ་རྒྱས་མཛད་ཁྱོད་ལ་བསྟོད། །ཐུན་མཚམས་སྤྲིན་གྱི་འཛུམ་ཞལ་གཡོ་བའི་འོད། །ཕུན་ཚོགས་པདྨའི་རྫིང་བུར་རྣམ་འཕྲུལ་པས། ཁམས་གསུམ་སྐྱེ་དགུའི་སྟོབས་འབྱོར་བྷུ་མ་ར། །གཅིག་ཆར་དབང་དུ་སྡུད་མཛད་ཁྱོད་ལ་བསྟོད། །ཆར་སྤྲིན་འཁྲིགས་པའི་སྣང་བརྙན་འབར་བ་ལས། །དྲག་ཤུལ་རྡོ་རྗེའི་མེ་བོ་ཆེ་སྤྲོས་པས། །དགྲ་བགེགས་འབྱུང་པོའི་བུད་ཤིང་མ་ལུས་ཀུན། །སྐད་ཅིག་ཉིད་ལ་བསྲེགས་མཛད་ཁྱོད་ལ་བསྟོད། ཁྱོད་ཐུགས་ཡེ་ཤེས་ཆེན་པོའི་
རྣམ་རོལ་ལས། །བསྟན་པ་སྲུང་ཕྱིར་འཇིག་རྟེན་དྲེགས་པའི་ཚུལ། །བདུད་དང་མ་མོ་གཤིན་རྗེ་གནོད་སྦྱིན་སོགས། །རབ་འཇིགས་འཁོར་ཚོགས་རྒྱ་མཚོར་སྣང་ལ་བསྟོད། །སྔོན་གྱི་ཤུལ་མཚོན་ཆུ་སྲིན་གདོང་ཅན་དང་། །སླད་ཀྱི་རྗེས་འབྲང་འཕྲོག་བྱེད་དྲེད་ཀྱི་གདོང་། །དམ་ཉམས་སྲོག་ལ་རྔམས་པའི་ཕོ་ཉ་མོ། །བཀའ་བཞིན་སྒྲུབ་མཛད་གཉིས་ལ་ཕྱག་འཚལ་བསྟོད། །མདོར་ན་ཉིན་མོར་བྱེད་དང་འོད་ཟེར་བཞིན། །གཙོ་དང་འཁོར་གྱི་རྣམ་པ་ཅིར་སྣང་ཡང་། །གང་ཤར་བདེ་ཆེན་སྒྱུ་མའི་རྣམ་རོལ་ཏུ། །གཉིས་མེད་གུས་པའི་ཚུལ་གྱིས་བསྟོད་པར་བགྱི། ཅེས་པས་བསྟོད། སྐབས་འདིར་མངའ་གསོལ་བྱ་བར་འདོད་ན་ཕྲིན་ལས་མཆོག་སྦྱིན་ལྟར་བྱའོ། །བཅུ་པ་ཕྲིན་ལས་བཅོལ་བ་ནི། བྷཱུ བསྟན་སྲུང་ཆེན་མོ་མ་གཅིག་རེ་མ་ཏཱི། །འཁོར་བཅས་མཆོད་བསྟོད་ཐུགས་དམ་སྐོངས་ལགས་ལྷན། །དགྱེས་པ་ཆེན་པོའི་སྤྱན་གྱིས་ལེགས་གཟིགས་ནས། །རྣལ་འབྱོར་བདག་གི་བཅོལ་པའི་ཕྲིན་ལས་མཛོད། །ཟུང་འཇུག་རྡོ་རྗེ་འཆང་དབང་ནས་བཟུང་སྟེ། །རིགས་ཀུན་ཁྱབ་བདག་དཔལ་ལྡན་བླ་མའི་བར། །རིམ་པར་བྱོན་པའི་རྩ་བརྒྱུད་བླ་མ་ཡིས། །བཀའ་བསྒོས་དམ་བཞག་མ་གཡེལ་དུས་འདིར་དགོངས། །སྲིད་ཞིའི་ཕན་བདེ་མ་ལུས་འབྱུང་བའི་གཞི། །སངས་རྒྱས་བསྟན་པ་དར་ཤིང་
རྒྱས་པ་དང་། །དེར་འཛིན་ལུང་རྟོགས་དཔལ་གྱིས་མངོན་མཐོ་རྣམས། །ཞབས་པད་སྲིད་མཐའི་བར་དུ་བརྟན་པར་མཛོད། །སྣོད་བཅུད་འཇིག་རྟེན་ཕུན་ཚོགས་གོང་དུ་འཕེལ། །ནད་གདོན་དམག་འཁྲུག་མུ་གེའི་གནོད་པ་ཞི། །བདེ་སྐྱིད་དགེ་བཅུའི་དུས་སྟོན་དར་བབས་པས། །རྫོགས་ལྡན་དང་པོའི་དཔལ་ལ་འགྲན་པར་མཛོད། །རྣལ་འབྱོར་བདག་ཅག་འཁོར་དང་བཅས་པ་ཀུན། །འདི་ནས་བྱང་ཆུབ་བར་དུ་བསྐྱང་བ་དང་། །ཡིད་ལ་རེ་བའི་དོན་རྣམས་ཐམས་ཅད་ཀུན། །འབད་མེད་ལག་རྩེར་སྦྱིན་པའི་ཕྲིན་ལས་མཛོད། །ལྷ་ཁྱོད་ཐུགས་རྗེའི་རོལ་པ་ལས་བྱུང་བའི། །ཞི་བསིལ་བདུད་རྩིའི་རྦ་རླབས་འབུམ་གཡོ་བས། །བརྒྱད་གཉིས་འཇིགས་པའི་ཚ་གདུངས་མཐའ་ཡས་ཀུན། །ལྷག་མེད་མྱུར་དུ་འཇིལ་བའི་ཕྲིན་ལས་མཛོད། །ཡོན་ཏན་དཔག་བསམ་རྒྱས་པའི་ཡལ་འདབ་ལས། །ཚེ་དཔལ་འབྱོར་པའི་འདོད་དགུའི་ཆར་འབེས་པས། །བསྔགས་འོས་སྤྲིངས་ཡིག་ཕྱོགས་མཐར་སྤྲོ་བ་ཡིས། །དགེ་ལེགས་སྣང་བས་སྲིད་མཐར་ཁྱབ་པར་མཛོད། །རྗེས་ཆགས་དབང་གི་མཆིལ་བ་རྣོན་པོ་ཡིས། ཁམས་གསུམ་དྲེགས་ལྡན་བྱེ་བའི་ཚོགས་རྣམས་ཀྱིས། །ཡིད་ཀྱི་བརྟན་པ་གཅིག་ཅར་འཕྲོག་ནས་ཀྱང་། །འདར་བཅས་ཐོར་ཚུགས་གཡོ་བས་བཏུད་པར་མཛོད། །ཞི་བའི་
ཐབས་ཀྱིས་མ་ཐུལ་གདུག་པ་ཅན། །བསད་དང་དབྱེ་དང་བསྐྲད་རྨོངས་མནན་ལ་སོགས། །དྲག་ཤུལ་དུས་མཐའི་བྱིན་ཟ་འབར་བའི་ངོས། །མིང་གི་ལྷག་མར་བགྱིད་པའི་ཕྲིན་ལས་མཛོད། ཁྱད་པར་ངེས་འབྱུང་དྲག་པོས་རྒྱུད་བསྐུལ་ཏེ། །སྙིང་ནས་ཐར་པའི་ལམ་མཆོག་དོན་གཉེར་བར། །དངོས་དང་བརྒྱུད་ནས་འཚེ་བའི་བར་ཆད་ཀུན། །ཞི་ཞིང་སྲུང་བའི་ཕྲིན་ལས་མཛད་དུ་གསོལ། །མཚན་ཉིད་ཀུན་ལྡན་རྡོ་རྗེ་སློབ་དཔོན་གྱིས། །རྗེས་བཟུང་སྨིན་གྲོལ་ཟབ་མོའི་ལམ་བཟང་ལ། །ཐོས་བསམ་བསྒོམ་པའི་ཕ་རོལ་ཕྱིན་ནས་ཀྱང་། །དོན་གཉིས་ལྷུན་གྱིས་གྲུབ་པའི་ཕྲིན་ལས་མཛོད། །ཤིན་ཏུ་ཞི་བའི་ནགས་ཀྱི་སྨན་ལྗོངས་སུ། །རྩེ་གཅིག་བསམ་གཏན་བདུད་རྩིར་སྤྱོད་པ་ལ། །གེགས་བྱེད་ཉེར་འཚེའི་མུན་པ་རྒྱངས་བསྲིངས་ནས། །འཇའ་ལུས་རྡོ་རྗེའི་གོ་འཕང་མངོན་གྱུར་མཛོད། །གཞན་ཡང་ནད་གདོན་བགེགས་ཀྱི་དཔུང་ཚོགས་དང་། །བྱད་ཕུར་རྦོད་གཏོང་རྟགས་མཚན་ངན་པ་སོགས། །མི་མཐུན་མི་འདོད་ཉེ་བར་འཚེ་བའི་རིགས། །དེ་ཀུན་དགྲ་དང་བགེགས་ཀྱི་སྟེང་དུ་བཟློག །གཞིས་སུ་འདུག་ན་ལྟོས་བཅས་ལེགས་ཚོགས་དང་། །སྙན་གྲགས་དབང་ཐང་ཡར་ངོའི་ཟླ་བཞིན་སྤེལ། །བྱེས་སུ་འགྲོ་ན་ཁ་ཆར་དགྲ་རྐུན་སྲུང་། །དོན་དུ་གཉེར་བྱའི་ལས་རྣམས་མྱུར་དུ་
སྒྲུབ། །མདོར་ན་བདག་དང་མཐའ་ཡས་སེམས་ཅན་ཀུན། །གནས་སྐབས་མངོན་མཐོའི་དཔལ་འབྱོར་ལ་བརྟེན་ནས། །མཐར་ཐུག་རྣམ་པ་ཐམས་ཅད་མཁྱེན་པའི་གྲོང་། །ཕན་བདེའི་འདོད་དགུ་སྨིན་པའི་ཕྲིན་ལས་མཛོད། ཞེས་ཕྲིན་ལས་གསོལ་ཞིང་། དམིགས་གསལ་བཟློག་པའི་ཕྲིན་ལས་བཅོལ་བར་སྤྲོ་ནའང་གཞན་ནས་འབྱུང་བ་ལྟར་སྐབས་འདིར་བྱའོ། །བཅུ་གཅིག་པ་གཏོར་མ་སྐྱོང་བ་ནི། མཚན་མོ་ཡིན་ན་འབུལ་གཏོར་ལ་དཔལ་འབར་དང་། ཉིན་མོ་ཡིན་ན་སྤོས་ཀྱི་རེངས་བུ་བཙུགས། ཕུད་ཆང་སྨན་རཀ་བཅས་སྒྲུབ་ཁང་གི་ཡང་སྟེང་སོགས་ས་གཙང་སར་ཁྱེར་ལ། །གཏོར་མ་ནང་མཆོད་ལྟར་བྱིན་གྱིས་བརླབ། ཨོཾ་ཀཱ་ལི་དེ་བཱི་ས་པ་རི་ཝཱ་ར་སརྦ་བིགྷཱན་ཤ་ཧཱུྃ་མ་རཱ་ཡ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་མི་བདུན་གྱིས་ཕུལ་ལ། རོལ་མོ་དབྱངས་དང་བཅས་པས། སྦྱོ༔ ཆོས་དབྱིངས་དབང་ཕྱུག་མ་གཅིག་བདུད་ཀྱི་ཡུམ། །དྲག་མོ་ནམ་གྲུ་ཚིམ་བྱེད་མངའ་བདག་མོ། །སྲོག་བདག་མ་མོ་དཔལ་གྱི་རྡོ་རྗེའི་ལྕམ། །སྡེ་བརྒྱད་བདག་མོ་དཔལ་ལྡན་གཤིན་རྗེའི་ཡུམ། །ཁྱོད་ཀྱི་བཀའ་ཉན་བྲན་གཡོག་འཁོར་དང་བཅས། །མ་མོ་འབུམ་སྡེ་ནག་མོ་འབུམ་སྡེར་བཅས། །བདུད་དང་གཤིན་རྗེ་སྲིན་པོའི་ཚོགས་དང་བཅས། །དུར་ཁྲོད་བདག་པོ་ཞིང་
སྐྱོང་འཁོར་དང་བཅས། །སྣང་སྲིད་ལྷ་སྲིན་སྡེ་བརྒྱད་འཁོར་དང་བཅས། །བྱ་ཁྱི་ལྕེ་སྤྱང་ལ་སོགས་འཁོར་དང་བཅས། །དགྲ་བོའི་སྲོག་ལ་དབང་བྱེད་ཤན་པའི་ཚོགས། །འདིར་གཤེགས་རྒྱན་གྱི་གཏོར་མ་འདི་བཞེས་ཤིག །ཞེས་པའི་མཚམས་གཏོར་མ་བྱང་ཤར་གྱི་མཚམས་སུ་གཤེགས་ལ། །ཛམ་བུ་ཏི་བའི་ཞལ་ཟས་འདི་བཞེས་ཤིག །སྨན་རཀ་ཕུད་ཀྱི་མཆོད་པ༔ ཛ་གད་དཔའ་བོའི་སྨན་ཕུད་འདི་བཞེས༴ །གཙང་མ་ཕུད་ཀྱི་གསེར་སྐྱེམ་འདི་བཞེས་ཤིག །སྔར་བཅོལ་ལེགས་པའི་གཏོང་རག་གཉེན་པོ་འབུལ། །ད་བཅོལ་ལེགས་པའི་གསོལ་འདེབས་གཉན་པོར་བཞེས། །འཁོར་རྣམས་སྲུང་ཞིང་རྐྱེན་རྣམས་བཟློག་པ་དང་། །བདུད་དང་བར་དུ་གཅོད་པ་རྣམ་མང་པོ། །ཐམས་ཅད་ཐལ་བའི་རྡུལ་བཞིན་རློག་པ་དང་། །བསྟན་པ་རྒྱས་པའི་ལས་འདི་ཁྱོད་ཀྱིས་སྒྲུབས། །ཞེས་པའི་རྗེས་སུ། སྦྱོརཀྵ་སོགས་ལན་གསུམ་བཟླས་སོ། །གསུམ་པ་རྗེས་ཀྱི་ཆོ་ག་ལ་དྲུག་ལས། དང་པོ་གཏོང་རག་གི་མཆོད་བསྟོད་ནི། །ཨོཾ་ཀཱ་ལི་དེ་བཱི་ས་པ་རི་ཝཱ་ར་ཨརྒྱུ་སོགས་ཀྱིས་མཆོད། སྐུ་གསུམ་ལྷུན་གྲུབ་སོགས་ཀྱིས་བསྟོད། གཉིས་པ་ནོངས་པ་བཤགས་པ་ནི། ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། མ་རྙེད་ཡོངས་སུ་མ་ཤེས་དང་། སོགས་ཀྱི་ནོངས་པ་བཟོད་པར་གསོལ། །
གསུམ་པ་བརྟན་བཞུགས་ནི། རྟེན་ཡོད་པ་རྣམས་ལ། འདི་ནི་གཟུགས་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་བརྗོད་ཅིང་མེ་ཏོག་དོར། བཞི་པ་གཤེགས་གསོལ་ནི། ཨོ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། བཛྲ་མུ༔ རྟེན་ལས་བསྟིམ་པའི་ཡེ་ཤེས་པ་རྣམས་གཤེགས། དམ་ཚིག་པ་རྣམས་རང་ལ་ཐིམ། འཇིག་རྟེན་པ་རྣམས་ཀྱང་རང་རང་གི་གནས་སུ་གཤེགས་པར་བསམ། ལྔ་པ་དགེ་བ་བསྔོ་བ་ནི། དགེ་བ་འདི་ཡིས་བདག་སོགས་སེམས་ཅན་ཀུན། །གནས་སྐབས་རྣམ་བཞིའི་ཕྲིན་ལས་ལྷུན་གྲུབ་ཅིང་། །མཐར་ཐུག་རྣམ་ཀུན་མཆོག་ལྡན་ཡེ་ཤེས་ཀློང་། །རྡོ་རྗེ་བཙུན་མོའི་གོ་འཕང་མྱུར་ཐོབ་ཤོག །དྲུག་པ་ཤིས་པ་བརྗོད་པ་ནི། ཟུང་འཇུག་རིགས་ཀུན་ཁྱབ་བདག་རྡོ་རྗེ་འཆང་། །གྲུབ་པའི་དབང་ཕྱུག་རྒྱུ།པཎ་ཆེན་དམར་པོ་སོགས། །རྨད་བྱུང་བྱིན་རླབས་སྣང་བ་མཆོག་སྩོལ་བའི། །རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག །ལྷན་སྐྱེས་བདེ་ཆེན་ངང་ལས་མ་གཡོས་ཀྱང་། །གང་འདུལ་སྒྱུ་འཕྲུལ་དྲྭ་བའི་
རྣམ་རོལ་ནི། ཁ་སྦྱོར་ཡན་ལག་བདུན་གྱི་དཔལ་འབར་བ། །ཡི་དམ་ལྷ་ཚོགས་རྣམས་ཀྱི= །བཅུ་དྲུག་བདེ་བའི་ལང་ཚོ་དང་འགྲོགས་པའི། །མཆོག་ཐུན་ཕྲིན་ལས་གསར་པའི་དགའ་སྟོན་ཅན། །ཞིང་སྐྱེས་སྔགས་སྐྱེས་ལྷན་ཅིག་སྐྱེས་པ་ཡི། །གནས་གསུམ་མཁའ་འགྲོའི་ཚོགས་ཀྱི་བཀྲ་ཤིས་ཤོག །སྲས་བཅས་རྒྱལ་བའི་ཕྲིན་ལས་གཅིག་བསྡུས་པ། །བསྟན་སྲུང་ཀུན་གྱི་གཙོ་མོ་རེ་བ་ཏཱི། །རྣམ་མང་འཁོར་ཚོགས་སྤྲུལ་པར་བཅས་པ་ཡི། །ཆོས་སྲུང་དམ་ཅན་རྒྱ་མཚོའི་བཀྲ་ཤིས་ཤོག །གནས་སྐབས་བསམ་དོན་མ་ལུས་ཡིད་བཞིན་འགྲུབ། །མཐར་ཐུག་སྐུ་བཞིའི་གོ་འཕང་མངོན་གྱུར་ནས། །འཇིག་རྟེན་འཇིག་རྟེན་འདས་པའི་དགེ་ལེགས་ཀྱིས། །བཀྲ་ཤིས་སྣང་བས་སྲིད་མཐར་ཁྱབ་གྱུར་ཅིག །ཅེས་སོགས་ཤིས་བརྗོད་ཇི་ལྟར་རིགས་པས་མཐའ་བརྒྱན་པར་བྱའོ། །སྨྲས་པ། །ཚིག་སྙན་པུཎྜ་རཱི་ཀཱའི་འཛུམ་རླབས་ལས། །དོན་བཟང་སྦྲང་རྩིའི་བསུང་ཞིམ་འདི་ཐུལ་བས། །བསྐལ་བཟང་ར་ཡིག་གཉིས་པའི་ཚོགས་རྣམས་ཀུན། །ཕན་བདེའི་ངལ་འཚོ་མཆོག་ཏུ་རྒྱས་གྱུར་ཅིག །ཅེས་པའང་དོན་གཉེར་ཅན་གྱི་ནན་ཏན་ཆེན་པོས་བསྐུལ་བའི་བཞེད་པ་བསྐོང་ཕྱིར་དགེ་འདུན་རྒྱ་མཚོའི་གཞུང་གི་དགོངས་དོན་བཞིན་ཤཱཀྱའི་བཙུན་པ་འཇམ་དབྱངས་མཁྱེན་བརྩེའི་དབང་པོས་ཚིགས་བཅད་
དུ་བསྡེབ་པ་དགེ་ལེགས་སུ་གྱུར་ཅིག། ༈ །།དཔལ་ལྡན་དམག་ཟོར་རྒྱལ་མོའི་མངའ་གསོལ་ཕྲིན་ལས་མཆོག་སྦྱིན་ཅེས་བྱ་བ་བཞུགས་སོ།། བྷྱོ །ཆོས་ཀུན་རང་བཞིན་ཡེ་ཤེས་ལྷ་མོའི་དབྱིངས། །ཟབ་ཞི་སྤྲོས་བྲལ་འོད་གསལ་བདེ་བ་ཆེ། །བློ་བུར་འཁྲུལ་པའི་མཚན་མ་ལས་འདས་པའི། །སྐྱེ་མེད་ཆོས་ཀྱི་སྐུ་རུ་མངའ་གསོལ་ལོ། །དག་པའི་ཤེལ་ལ་ཚོན་གྱིས་ཁ་བསྒྱུར་བཞིན། ། ཟུང་འཇུག་སྒྱུ་འཕྲུལ་དྲྭ་བའི་རྣམ་རོལ་ལས། །བཞིན་ལག་མཚན་དཔེའི་སྣང་ཆར་ཡོངས་ཤར་བ། །བདེ་ཆེན་ལོངས་སྤྱོད་རྫོགས་སྐུར་མངའ་གསོལ་ལོ། །རྣམ་མང་གདུལ་བྱའི་མོས་པའི་ཆུ་གཏེར་དུ། །གང་འདུལ་སྤྲུལ་པའི་ཟླ་གཟུགས་འཆར་བའི་མོད། །བསྟན་འགྲོར་ཕན་བདེ་སྤེལ་བའི་ཕྲིན་ལས་ཅན། །སྣ་ཚོགས་སྤྲུལ་པའི་སྐུ་རུ་མངའ་གསོལ་ལོ། །དྲན་པ་ཙམ་གྱིས་བྱིན་རླབས་ཉིན་མོར་བྱེད། །ལྷན་སྐྱེས་ཡེ་ཤེས་སྣང་བ་དང་འགྲོགས་ནས། །བརྗོད་བྲལ་གནས་ལུགས་མངོན་སུམ་སྟོན་མཛད་པ། །རྩ་བརྒྱུད་བླ་མའི་ཚོགས་སུ་མངའ་གསོལ་ལོ། །གང་ཞབས་ཡིད་བཞིན་སྤྲིན་ཆེན་ལ་རེག་པས། །འཇིག་རྟེན་འཇིག་རྟེན་འདས་པའི་དངོས་གྲུབ་ཀྱི། །ནོར་བུའི་གྲུ་ཆར་ལྷུག་པར་འབེབས་མཁས་པ། །ཡི་དམ་ལྷ་ཚོགས་ངོ་བོར་མངའ་གསོལ་ལོ། །ཤེས་རབ་དབྱིངས་ཀྱི་ཐིག་ལེ་གཅིག་
པུ་ཉིད། །ཞིང་སྔགས་ལྷན་སྐྱེས་ཌཱ་ཀིའི་སྐུར་བཞེངས་ནས། །མཆོག་ཐུན་ཕྲིན་ལས་ཡིད་བཞིན་སྒྲུབ་མཛད་པའི། །གནས་གསུམ་ཌཱ་ཀིའི་གཙོ་མོར་མངའ་གསོལ་ལོ། །རྒྱལ་ཀུན་ཡུམ་གཅིག་དབྱངས་ཅན་ངག་གི་ལྷ། །དྲག་ཤུལ་གཟུགས་ཀྱིས་གདུག་པ་ཚར་གཅོད་ཅིང་། །འཁོར་འདས་ཕུན་ཚོགས་མ་ལུས་སྒྲུབ་མཛད་ཁྱོད། །བསྟན་སྲུང་ཡོངས་ཀྱི་གཙོ་མོར་མངའ་གསོལ་ལོ། །མདོར་ན་སྐྱབས་གནས་ཀུན་འདུས་བདག་ཉིད་དུ། །གུས་པའི་ཡིད་ཀྱི་མངའ་གསོལ་གཟེངས་བསྟོད་ན། །མ་གཡེལ་མ་གཡེལ་དཔལ་ལྡན་རེ་བ་ཏཱི། །འཁོར་འདས་མཐུ་རྩལ་མ་གཡེལ་དུས་འདིར་བསྐྱེད། །ཞི་རྒྱས་དབང་དང་མངོན་སྤྱོད་དྲག་པོ་ཡིས། །ཕྲིན་ལས་ཐོགས་པ་མེད་པའི་ཆོ་འཕྲུལ་གྱིས། །བདག་ཅག་ཡིད་ལ་སྨོན་པའི་དོན་རྣམས་ཀུན། །འབད་མེད་མྱུར་བ་ཉིད་དུ་འགྲུབ་པར་མཛོད། ཅེས་པའང་མཉྫ་གྷོ་ཥས་སོ། །སརྦ་དཱ་ཀ་ལྱཱ་ཎཾ་བྷ་བ་ཏུ།། དགེའོ། དགེའོ། དགེའོ། །