གང་ཤར་རྡོ་རྗེའི་གླུ་ཕྲེང་སྐལ་བཟང་རྣ་བའི་དགའ་སྟོན།
༄༅། །ཡ དུ ད ཡ བཛྲ ཧཱི ཏི མཱ ལ སུ བྷ ག ཀ ཎྞ ཡོ རུཏྠ བ ནཱ མ བི ཧ ར ཏི སྨ།།
༄༅། །གང་ཤར་རྡོ་རྗེའི་གླུ་ཕྲེང་སྐལ་བཟང་རྣ་བའི་དགའ་སྟོན་ཞེས་བྱ་བ་བཞུགས་སོ། །
༈ སྡེབ་སྦྱོར་རྐང་བཞི་མཉམ་པའི་བྲྀཏྟ་ཡི་གེ་བཅོ་བརྒྱད་པ་བསྟན་འཛིན་སྡེ་ཚན་པས༣༧༡༥༧གྱི་མཚམས་ནས་ཟིན་པ་མེ་ཏོག་གཡོ་བའི་འཁྲི་ཤིང་གི་པྲ་སྟ་རས་བཅིངས་པ་ཡོངས་སུ་དགེ་བར་གྱུར་ཅིག། །།
།སུ ཛྙཱ སྱཱ ཛྷ ནཾ ཀྲྀ ཡ ཀ ར བ ཧཱུྃ རྒ ཟླ པ དྷཱི ཙ བྷེ དཾ །
མཁས་པས་མཁས་པའི་བགྱི་བའི་ཟེར་གྱིས་གཞུང་མང་ཨུཏྤལ་ནགས་ཚལ་དབྱེ།
།སི དྡྷཻ སྶི དྡྷཱ ནཱཾ ཧི ཏ སུ ཁ ཀ ནཱི པྲ ཏྱ མ ནྟི ཏུ དཱུ ཏཻཿ
གྲུབ་པས་གྲུབ་པའི་བརྟུལ་ཞུགས་ཕོ་ཉས་ཕན་བདེའི་མཛེས་མ་མགྲོན་དུ་འབོད།
སྟུ ཏྱཾ སྟུ ནཱཾ ནི ཏི ས མ བི བྷཱུ ནཱཾ གུ རོ ཝཱ ད པ དྨཾ
བསྔགས་འོས་བསྔགས་པའི་ཚུལ་ལས་མི་འདའ་ཁྱབ་བདག་བླ་མའི་ཞབས་པདྨོ།།
།དྷི ལཾ དྷི མཱ ཉ ཀིརྙེད ཡ ཛ ལ དྷོ མ དྡྷ ཤུདྡྷེ བ སི ཏཱ།།
བློ་ལྡན་བློ་མིག་དག་པའི་སླད་དུ་སྙིང་དབུས་ཆུ་མཚོར་བསྟི་བྱས་ནས། །
༈ སྡེབ་སྦྱོར་མི་མཉམ་པའི་པྲཏཱ་ལས་ཁ་སྒོ་ཟློག་པ་ཙ་ན་ཞེས་བྱ་བའི་པྲ་སྣ་རས་མཛེས་པར་བརྒྱན་པ་དགེ། །།
།པུ ན སཱུ བྷཱ ག ཀ ཎྞཾ ཡོ
སླར་ཡང་སྐལ་བཟང་རྣ་བ་ལ།
ར མྲྀ ཏཱ ན ནྡ དཱ སཱ ། །
བདུད་རྩིའི་དགའ་སྟོན་སྒྲུབ་པའི་ཕྱིར།
གྲཱི ཝཱ པྲ སཱ ནྟ ཏ མྦུ རཾ
།རབ་སྙན་མགྲིན་པའི་ཏམྦུ་ར།
ཡ སྶྨཱར ན ཁ རཱ བེ དཾ
།གང་ཤར་སོར་མོས་བསྒྲེངས་འདིའོ།
།། ༈ །།རྩ་གསུམ་ལམ་ཁྱེར་རྡོ་རྗེའི་ཐོལ་གླུ་ཟབ་གསང་སྦས་པའི་སྣང་བ་ཉི་ཟླའི་སྤྲིན་གྱི་འཇོ་སྒེག་ཅེས་བྱ་བ། ཨེ་མ་ཧོ། གཞི་དབྱིངས་ཀ་དག་དོན་གྱི་འོག་མིན་ནང་གསལ་གདོད་མའི་ཞིང་ཁམས་སུ། །གཞི་སྣང་ལྷུན་གྲུབ་ཁ་སྦྱོར་བདུན་ལྡན་བདེ་སྟོང་ཆེན་པོར་སངས་རྒྱས་པའི། །ཟུང་འཇུག་སྒྱུ་འཕྲུལ་དྲྭ་བའི་ཟློས་གར་སྲིད་ཞིའི་མིག་འཕྲུལ་གཅིག་པུ་ཅན། །ཁྱབ་བདག་དང་པོའི་མགོན་པོ་མཆོག་དེའི་ཞབས་སེན་སྙིང་དབུས་པདྨོར་རོལ། །མོས་གུས་གཞལ་མེད་ཕོ་བྲང་ཉམས་དགའ་བར། །རིང་ནས་འཁྱུད་པའི་དྲིན་ཆེན་བླ་མའི་ཞལ། །ཡང་ཡང་དྲན་པས་རྟག་ཏུ་ཕྱག་བགྱིད་ན། །དངོས་གྲུབ་རྒྱ་མཚོའི་གནས་ལ་གེགས་མེད་མཛོད། །ཟབ་པའི་གསང་ལམ་རིག་འཛིན་སྡེ་སྣོད་ཆེ། །མཐའ་ཀླས་གཞལ་བར་དཀའ་བའི་དེ་ཉིད་དོན། །རྟོགས་པ་མིན་ཀྱང་དེང་འདིར་སྙིང་པོའི་མཆོག །སྔོན་སྨོན་དག་པའི་མཐུ་ལས་ཅུང་ཟད་དབྱེ། །བྱིན་རླབས་རྩ་བ་དྲིན་ཆེན་བླ་མ་སྟེ། །དངོས་གྲུབ་རྣམ་གཉིས་རྩ་བ་ཡི་དམ་ལྷ། །ཕྲིན་ལས་རྩ་བ་མཁའ་འགྲོ་ཆོས་སྐྱོང་སྟེ། །ཀུན་ཀྱང་རྡོ་རྗེ་ཕུང་པོར་གཟོད་ནས་རྫོགས། །དེ་ཉིད་ཡིན་ལ་ཡིན་བཞིན་གསལ་འདེབས་ཕྱིར། །སྤྱི་བོར་ཛ་ལན་དྷ་རའི་དཀྱིལ་འཁོར་དུ། །པད་དཀར་ཟླ་སྟེང་ཁྱབ་བདག་ཧེ་རུ་ཀ། །སྐུ་མདོག་དཀར་དམར་བདེ་སྟོང་སྙོམས་འཇུག་མདངས། །ཕྱག་གཉིས་ཐབས་ཤེས་རྡོ་རྗེ་དྲིལ་བུས་མཚན། །གཅེར་བུ་རུས་
པའི་ཕྱག་རྒྱ་དྲུག་གིས་སྒྲས། །དབྱིངས་ཕྱུག་སྔོན་མོ་ཡུམ་དང་འཁྲིལ་བར་བསྒོམ། །གུས་པས་གསོལ་བཏབ་ཁྱེད་ཤེས་དད་པས་བསྐུལ། །དབང་བཞི་བླངས་ཤིང་ཐུགས་ཡིད་གཉིས་མེད་བསྲེ། །མ་ཡེངས་གཉུག་མའི་ངང་དུ་ཅི་བདེར་བཞག །བྱིན་རླབས་སྙིང་པོར་རང་རིག་ཆོས་སྐུར་མཐོང་། །མཐར་ཐུག་དབྱིངས་རིག་དབྱེར་མེད་ངང་དུ་གྲོལ། །སྙིང་གར་དྷ་ཏིའི་དབུས་སུ་དྭངས་མ་ཧཱུྃ། །ཡོངས་གྱུར་ཡི་དམ་རྡོ་རྗེ་ཐོད་ཕྲེང་རྩལ། །སྐུ་མདོག་དམར་སྨུག་ཁྲོ་འཛུམ་ཆགས་པའི་ཉམས། །རྡོ་རྗེ་དྲིལ་འཛིན་མཚོ་རྒྱལ་དཀར་མོ་འཁྲིལ། །ཐུགས་ཀར་ཧཱུྃ་ཡིག་ལྔ་ལྡན་འོད་ཟེར་འཕྲོས། །སྣོད་བཅུད་ཀུན་ཁྱབ་ཕྱི་སྣོད་པདྨ་འོད། །ནང་བཅུད་འགྲོ་ཀུན་ཐོད་ཕྲེང་སྐུ་གསུང་ཐུགས། །སྣང་སྲིད་གཞིར་བཞེངས་སྒྱུ་མ་ཆུ་ཟླ་ལྟར། །ལམ་ཁྱེར་གཞོམ་མེད་ཧཱུྃ་གི་སྣང་གླུ་ལེན། །དངོས་གྲུབ་སྙིང་པོ་གང་ཤར་ལྷ་སྐུར་འཆར། །མཐར་ཐུག་རང་སྣང་ཟངས་མདོག་དཔལ་རིར་གྲོལ། །ལྟེ་བར་ཨ་ཤད་གཏུམ་མོའི་མེ་ཡི་ཀློང་། །ཡེ་ཤེས་ཌཱ་ཀི་སྡེ་ལྔ་ཁྲོ་ཆགས་སྒེག །དཀར་སེར་དམར་ལྗང་མཐིང་གའི་མེ་འོད་འཕྲོ། །རྡོ་རྗེ་རིན་ཆེན་པདྨ་རྒྱ་གྲམ་དང་། །འཁོར་ལོ་གཡས་ལ་གཡོན་པས་དྲིལ་བུ་འཛིན། །གར་སྟབས་ཁྱུག་ཁྱུག་ཡེ་ཤེས་མེ་ཡི་ཟེར། །དྷཱུ་ཏིའི་ལམ་བརྒྱུད་སྤྱི་བོའི་ཧཾ་ལ་རེག །བདེ་བ་ཆེར་གཡོས་དྭངས་མ་གནས་བཞིར་འཛག །
སླར་ཡང་དྲི་ཡི་བཞོན་པས་འཕོ་མེད་དུ། །ལུགས་ལྡོག་ཛ་ལན་དྷཱ་རར་བཅིངས་པ་ལས། །དབང་བཞི་ཐོབ་ཅིང་སྒྲིབ་བཞི་ཡོངས་སུ་སྦྱངས། །དགའ་བ་བཞི་སྐྱེས་སྐུ་བཞིའི་ས་བོན་ཐེབས། །ཁ་སྦྱོར་རླུང་བསྡམ་བུམ་པ་ཅན་གྱི་ངང་། །ཏིང་འཛིན་མ་ཡེངས་བརྒྱ་ཕྲག་གསུམ་ལ་སོགས། །འབར་འཛག་བདེ་དྲོད་འཁོར་ལོ་རབ་ཏུ་བསྐོར། །དེ་མཐར་སྣོད་བཅུད་མེ་དཔུང་གཅིག་ཏུ་འཁྱིལ། །མ་ཡེངས་འཛིན་བྲལ་ལྟེ་བའི་ཨ་ལ་བསྡུ། །ཕྲིན་ལས་སྙིང་པོ་བདེ་སྟོང་ཡེ་ཤེས་སྐྱེ། །མཐར་ཐུག་འཆི་མེད་འཇའ་ལུས་རྡོ་རྗེར་འགྱུར། །གསང་གནས་རྩ་འཁོར་མཐིང་ནག་གྲུ་གསུམ་ཀློང་། །ཨེ་ལས་སྔགས་ཀྱི་བདག་མོ་ཆར་སྤྲིན་མདོག ། མཐིང་ནག་རབ་ཁྲོས་སྤྱན་གཅིག་ཁྲག་ཏུ་ཁོལ། །ཚེམས་གཅིག་གཙིགས་ཤིང་ནུ་འབུར་གཅིག་གིས་མཛེས། །གཡས་པས་ཅེ་སྤྱང་གཡོན་པས་དགྲ་སྙིང་བསྣམས། །འོད་ཟེར་རབ་འཁྲུགས་དྲེགས་པ་ཀུན་གྱི་སྲོག །ཡོངས་འདུས་བློ་ཡིག་སྨུག་ནག་སྙིང་གར་བསྒོམ། །དམ་ཡེ་གཉིས་མེད་གདོད་ནས་ཡོངས་གྲུབ་ལ། །བདེ་སྟོང་བྱང་ཆུབ་སེམས་ཀྱིས་དབང་བསྐུར་ཞིང་། །ཐབས་ཤེས་ཁ་སྦྱོར་འབར་འཛག་མཆོད་པ་འབུལ། །རླུང་སེམས་དབུ་མར་བསྒྲལ་བའི་གཏོར་མ་སྦྱིན། །དབྱིངས་རིག་དབྱེར་མེད་ངང་ནས་གསལ་བཏབ་སྟེ། །རྗེས་ཐོབ་ཐུགས་སྲོག་ལ་བསྡུ་གཏུམ་མོར་བསྟིམ། །དེ་ལས་མེ་འབར་རྣམ་སྨིན་ཕུང་ཁམས་
བསྲེག །གཉིས་ཆོས་ལས་འདས་བློ་བྲལ་ངང་དུ་བཞག །ནུས་མཐུའི་སྙིང་པོ་གཟུང་འཛིན་དགྲ་བགེགས་གསོད། །མཐར་ཐུག་དབྱེར་མེད་བྱང་ཆུབ་སེམས་སུ་གྲོལ། །འདི་ནི་བླ་མ་ཡི་དམ་མཁའ་འགྲོ་དང་། །ཆོས་སྐྱོང་ཀུན་གྱི་ཉམས་ལེན་སྦས་དོན་གནད། །སྐལ་བཟང་དབང་རྣོན་རྣམས་ཀྱི་ལམ་ཁྱེར་ཏེ། །ཐུན་མོང་མ་ཡིན་ཀུན་ལ་གསང་བར་བྱ། །གུབྱ།། ༈ །།ཁྱབ་བདག་དཔལ་ལྡན་བླ་མ་རྗེས་སུ་དྲན་པའི་རྡོ་རྗེའི་ཐོལ་གླུ་ངེས་འབྱུང་གི་ཕོ་ཉ་ཞེས་བྱ་བ། །ཨ་ཧོ། གདོད་ནས་སྤྲོས་པ་བྲལ་བའི་རང་བྱུང་གི་ཡེ་ཤེས། །བསལ་བཞག་བློ་ལས་འདས་པའི་འོད་གསལ་གྱི་སྦུབས་སུ། །བཅིངས་གྲོལ་ཆོས་ཀུན་ཟད་པའི་དཔལ་ལྡན་གྱི་བླ་མར། །ངང་བཞག་རང་གྲོལ་ངང་ནས་གུས་ཕྱག་ཞིག་འཚལ་ལོ། །ཟུང་འཇུག་བདེ་དང་སྟོང་པའི་ཐིག་ལེ་ཡི་གར་མཁན། །ཁ་སྦྱོར་མཚན་དཔེའི་ལང་ཚོ་མངོན་ཤར་གྱི་སྣང་ཆས། །མི་ཤིགས་ཧེ་རུ་ཀ་དངོས་དཔལ་ལྡན་གྱི་བླ་མར། །རླུང་སེམས་རྟོག་བྲལ་ངང་ནས་གུས་ཕྱག་ཞིག་འཚལ་ལོ། །སྲིད་གསུམ་ཟ་བྱེད་རྡོ་རྗེ་བཙུན་མོ་ཡི་མེ་ལྕེ། །ཨ་ཧཾ་ཟུང་འཇུག་འཁོར་ལྔའི་གྲོང་ཁྱེར་དུ་སྦྱར་བས། །འབར་འཛག་སྙོམས་འཇུག་སྤྲིན་སྤྲོ་དཔལ་ལྡན་གྱི་བླ་མར། །ཞུ་བདེ་ལྷན་སྐྱེས་ངང་ནས་གུས་ཕྱག་ཞིག་འཚལ་ལོ། །ཨ་ཧོ། སྙིགས་མའི་སྤྱོད་ཚུལ་ཡལ་གའི་རི་དྭགས་ཀྱི་ཟློས་གར། །སྣ་ཚོགས་ཟིན་མེད་གློག་གི་རྩེ་དགའ་
ལྟར་མཐོང་ནས། །རང་ཕུང་གཞན་མགོ་བསྐོར་བའི་བཅའ་བསྒྲིགས་ཀུན་བོར་བར། །ཁྱབ་བདག་དཔལ་ལྡན་བླ་མས་བྱིན་གྱིས་རང་རློབས་ཤིག །ཕན་སྨྲས་ལོག་པར་བལྟ་བའི་ཉེ་དུ་དང་འབྲེལ་འཁོར། ། གནོད་སྦྱོར་དགའ་བར་འགྱུར་བའི་ཅོལ་ཆུང་གི་སྐྱེས་བུ། །སྦྲུལ་གདུག་བསིལ་གཡབ་ལྟ་བུའི་གཉེན་བཤེས་ཀུན་སྤངས་པར། །ཁྱབ་བདག་དཔལ་ལྡན་བླ་མས་བྱིན་གྱིས་རང་རློབས་ཤིག །ཐ་སྙད་ཤེས་བྱའི་གནས་ནི་ནམ་མཁའ་ལྟར་ཡངས་ཤིང་། །དོན་དམ་རིག་སྟོང་རྗེན་པ་ཆུ་གཏེར་ལྟར་ཟབ་པས། །མཁས་གྲུབ་གཉིས་དང་ལྡན་པ་ཉིན་སྐར་ལས་དཀོན་ཕྱིར། །ལྟོ་དང་གྲགས་ཕྱིར་འབྲང་བར་དགོས་དོན་ནི་མི་འདུག །དབེན་གནས་བྱང་ཆུབ་ཤིང་ཁྲོད་ངེས་འབྱུང་གི་ཁང་བཟང་། །བསམ་གཏན་གྲུབ་པའི་དྲང་སྲོང་རྒན་པོ་ཡི་གནས་མལ། །རི་དྭགས་གཞོན་ནུའི་ཟློས་གར་སྐྱོ་གྲོགས་སུ་ཕེབས་པར། །རྩེ་གཅིག་སྒྲུབ་ལ་གཞོལ་བར་བྱིན་གྱིས་རང་རློབས་ཤིག །འབྲེལ་དང་དགྲ་གཉེན་འགྱུར་ལྡོག་དབྱར་སྤྲིན་ལས་མྱུར་བའི། །ངེས་མེད་གར་མཁན་ལག་པའི་གཉེན་ལྕུག་ལ་བལྟས་པས། །ཁྱིམ་ནས་ཁྱིམ་མེད་རབ་བྱུང་ངེས་འབྱུང་གི་བསམ་པས། །ཚུལ་ཁྲིམས་དོན་དུ་འགྱུར་བར་བྱིན་གྱིས་རང་རློབས་ཤིག །གཞན་ལ་སྨན་པར་འདོད་པའི་བསམ་པ་དང་བྲལ་ཡང་། །རང་གི་འདོད་པ་སྒྲུབ་སླབ་གཞན་དོན་དུ་བསྙད་པའི། །ངང་
ཚུལ་ཀུན་ལ་ཡིད་འབྱུང་བློ་རྟག་ཏུ་སྐྱེས་ནས། །བཅོས་མིན་བྱང་སེམས་འབྱོངས་པར་བྱིན་གྱིས་རང་རློབས་ཤིག །མངོན་ཞེན་མཚན་འཛིན་མ་སྤངས་ཐེར་ཟུག་གི་བསྐྱེད་རྫོགས། །སྡུག་ཡུས་སྒྲུབ་པར་འདྲེན་པའི་རང་བཞིན་དུ་མཐོང་ནས། །རྩེ་གཅིག་བརྩོན་པ་དྲག་པོས་རིག་སྟོང་གི་ཡེ་ཤེས། །གཉུག་མ་བརྡར་ཤ་ཆོད་པར་བྱིན་གྱིས་རང་རློབས་ཤིག །དོ་ནུབ་ཙམ་ཡང་འཆི་བདག་ཕོ་ཉ་ཡིས་བཏབ་སྟེ། །སང་ནས་རོ་ལ་ལིང་གིས་སོང་བ་དེ་མཐོང་བས། །འབད་པ་ཐམས་ཅད་དོན་མེད་འཁྲུལ་པ་རུ་གོ་ནས། །མྱུར་དུ་སྙིང་པོ་ལེན་བར་བྱིན་གྱིས་རང་རློབས་ཤིག །དེ་མཐུས་འགྱུར་བཅས་བློ་ཡི་ཆོས་ཉིད་ཀུན་ཟད་པའི། །ཡོངས་གྲུབ་དོན་དམ་བདེན་པའི་རང་ཞལ་ཉིད་མཐོང་སྟེ། །སྤང་བླང་བྲལ་ཐོབ་མེད་པའི་དབུ་མ་ཡི་སྦུབས་སུ། །ས་ལམ་གཅིག་ཅར་རྫོགས་པར་བྱིན་གྱིས་རང་རློབས་ཤིག །དེ་སྐད་རིགས་ཀུན་ཁྱབ་བདག་འཁོར་ལོ་ཡི་མགོན་པོ། །ངང་བཞག་འོད་གསལ་རྡོ་རྗེའི་ཕོ་བྲང་དུ་མཇལ་ཚེ། །བཟོད་མེད་མོས་གུས་དྲག་པོའི་ཕོ་ཉ་ཡིས་བསྐུལ་ནས། །གང་ཤར་སྨོན་པའི་ཚིག་འདི་ཐོལ་བྱུང་དུ་ཐལ་ལོ། །ཞེས་པའང་རིག་འཛིན་གྱི་བཙུན་པ་པདྨ་དགྱེས་པའི་སྡེས་གྲུབ་པ་མཆོག་གི་བསྟི་གནས་སེང་གེ་གནམ་རྫོང་དུ་གྲགས་པའི་འདབས་རོལ་དུ་སྐད་ཅིག་ལ་བརྗོད་པའོ།། ༈ །།ཟླ་བ་སྒྲ་གཅན་ལ་ཞུགས་པའི་རྟོགས་པ་བརྗོད་པའི་རྡོ་རྗེའི་ཐོལ་གླུ་གྲུབ་པའི་རྣ་རྒྱན་ཅེས་བྱ་བ། ཨ་
ཏུ་མི་འགྱུར་རྣམ་པ་ཀུན་ལྡན་གྱི་ཡེ་ཤེས། །ལྷུན་གྲུབ་ཟག་བྲལ་ཁ་སྦྱོར་མཚན་དཔེ་ཡི་རང་གདངས། །ཨེ་ཝཾ་གཉིས་སུ་མེད་པའི་བདེ་ཆེན་གྱི་ཐིག་ལེ། །དང་པོའི་སངས་རྒྱས་ཧེ་རུ་ཀ་དཔལ་ལ་འདུད་དོ། །འཁྲུལ་བཅས་ཀུན་བརྟགས་སྣང་བ་གཟུགས་ཕུང་གི་ཟླ་གཞོན། །གདོད་ནས་ཡོངས་གྲུབ་གདན་གསུམ་སྒྲ་གཅན་གྱིས་ཟོས་པས། །མེད་བཞིན་མཚན་མར་འཛིན་པའི་སྣང་ཆ་ཀུན་དག་ནས། །ཟུང་འཇུག་ལང་ཚོས་སྒེག་པའི་དཀྱིལ་འཁོར་དུ་ཆས་འགྲོ། །འགྲོ་འོང་རྟོག་པའི་བཞོན་པ་སྲོག་རྩོལ་གྱི་ཟླ་གཞོན། །འོད་གསལ་ཨ་ཝ་དྷུ་ཏིའི་སྒྲ་གཅན་གྱིས་ཟོས་པས། །སྣ་ཚོགས་འཁྲུལ་པའི་མཚན་མ་རང་གྲོལ་དུ་སོང་ནས། །གྲགས་སྟོང་རྡོ་རྗེ་ནཱ་དའི་དཀྱིལ་འཁོར་དུ་ཆས་འགྲོ། །ཉོན་མོངས་འཁོར་བར་འཆིང་བྱེད་རྩ་མདུད་ཀྱི་ཟླ་གཞོན། །ཞུ་བདེ་མས་བརྟན་དགའ་བཞིའི་སྒྲ་གཅན་གྱིས་ཟོས་པས། །ཕན་ཚུན་འཁྲིལ་བའི་འཁྱུད་རྒྱ་% ཡ་བྲལ་དུ་སོང་ནས། །ས་བཅུ་དབུ་མར་སྨིན་པའི་དཀྱིལ་འཁོར་དུ་ཆས་འགྲོ། ཐབས་ཤེས་སྣང་ཚུལ་དཀར་དམར་ཐིག་ལེ་ཡི་ཟླ་གཞོན། །ཟག་བྲལ་གཙུག་ཏོར་འཁོར་ལོའི་སྒྲ་གཅན་གྱིས་ཟོས་པས། །དྲི་བཅས་ཉོན་མོངས་འཁྲུལ་པའི་སྲེད་ལེན་ཀུན་སྦྱངས་ཏེ། །བདེ་སྟོང་རྣམ་ཀུན་མཆོག་ལྡན་དཀྱིལ་འཁོར་དུ་ཆས་འགྲོ། །གཟུང་དང་འཛིན་པའི་རང་གདངས་རྟག་ཆད་ཀྱི་ཟླ་གཞོན། །མི་ཕྱེད་ཤིན་ཏུ་ཕྲ་བའི་སྒྲ་
གཅན་གྱིས་ཟོས་པས། །ཉོན་ཤེས་གློ་བུར་བསལ་རུང་སྒྲིབ་པ་ཀུན་བྲལ་ནས། །རང་གྲོལ་དོན་གྱི་ཡེ་ཤེས་ནང་དབྱིངས་སུ་ཆས་འགྲོ། །ཕྱི་རོལ་ཀརླར་དབང་པོའི་གཟུགས་བརྙན་གྱི་ཐིག་ལེ། །སྲིད་གསུམ་རྣམ་པར་རྒྱལ་བའི་མགྲིན་པ་རུ་ཆུད་ཚེ། །ནང་དུ་རང་སེམས་ཟུང་འཇུག་གཉུག་མ་ཡི་གཤིས་ནས། །རྟོགས་པ་བརྗོད་པའི་རྡོ་རྗེའི་ཐོལ་གླུ་རུ་བླངས་སོ། །དེ་ཡི་དགེ་བས་སྲིད་ཞིའི་ཁམས་གྱུར་གྱི་འགྲོ་ཀུན། །བདེ་ཆེན་འདུས་མ་བྱས་པའི་ཕྱག་རྒྱ་རུ་གྲོལ་ནས། །བསམ་བརྗོད་ལས་འདས་ཆོས་རྣམས་ཐམས་ཅད་ཀྱི་བཞུགས་ཚུལ། །འབད་མེད་ཀུན་གྱིས་རྟོགས་པའི་ཡན་ལག་ཏུ་བསྔོའོ། །ཞེས་པའང་ངེས་དོན་སྨིན་གྲོལ་གྱི་ཆུ་གཏེར་བདེ་ཆེན་པདྨ་འོད་གླིང་བྱང་ཆུབ་ཤིང་གི་ནགས་ཁྲོད་དུ་མགོ་ཟླའི་དཀར་ཕྱོགས་ཀྱི་རྫོགས་པ་གསུམ་པའི་མཚན་ཐུན་ཐ་མ་ལ་གང་ཤར་སྨྲ་བ་པོ་ནི་རྣལ་འབྱོར་གཞོན་ནུ་འཇིགས་པ་མེད་པའི་སྡེའོ།། །།གཉུག་མར་གནས་པ་དང་གློ་བུར་ལྷགས་པའི་འབྱུང་པོ་ཀུན་ལ་གཏམ་དུ་བྱ་བའི་རྡོ་རྗེའི་ཐོལ་གླུ་ཧེ་རུ་ཀའི་ཞལ་ལུང་ཞེས་བྱ་བ། ཨ་ཧོ། ཆོས་ཅན་གྱི་སྣང་བ་ཐམས་ཅད་ཀུན། །ཆོས་ཉིད་ཀྱི་ཀློང་དུ་རང་གྲོལ་བ། །སྐུ་གསུམ་པོ་དབྱེར་མེད་ཐིག་ལེའི་གཟུགས། །དཔལ་ཁྱབ་བདག་ཐོག་མའི་མགོན་པོར་འདུད། །ཁྱེད་སྣང་ཞིང་སྲིད་པའི་འབྱུང་པོ་ཀུན། །འཁྲུལ་པ་ལ་བདག་ཏུ་བཟུང་བའི་མཐུས། །ཉིང་འཁྲུལ་གྱི་ཟློས་གར་རྒྱུན་ཆད་མེད། །གཞན་དག་ལ་གནོད་འཚེའི་བསམ་སྦྱོར་
འཆང་། །ང་འོད་གསལ་སེམས་ཀྱི་རྡོ་རྗེ་ལས། །ཟུང་འཇུག་གི་ལྷ་སྐུ་ཀཱི་ལ་ཡ །གདན་གསུམ་གྱི་ཕྱག་རྒྱའི་མངོན་རྟོགས་ཅན། །སྙིང་རྗེ་ཡི་རང་རྩལ་འབར་བས་བཞེངས། །སྒྲར་གྲགས་ཀུན་སྔགས་ཀྱི་རོལ་མོ་ལས། །ཐ་མལ་གྱི་འཇུག་ལྡངས་བྲལ་བ་ཡིས། །ཁམས་གསུམ་གྱི་དྲེགས་པ་ཐམས་ཅད་ཀུན། །དབང་མེད་དུ་འདར་ཞིང་འདུད་པར་བྱེད། །དོན་རིག་སྟོང་གདོད་ནས་དག་པའི་ཆོས། །སྙིང་དབུས་ཀྱི་དྷུ་ཏིར་སྦས་པའི་རླབས། །བསལ་བཞག་དང་བྲལ་བར་བསྐྱངས་པ་ཡིས། །རེ་དོགས་ཀྱི་འགྱུ་འཕྲོ་སྤྲིན་བཞིན་དེངས། །སྣ་ཚོགས་ཀྱི་ཆོ་འཕྲུལ་ཅིར་སྣང་ཡང་། །སྤང་བླང་གི་དངོས་པོ་རྡུལ་ཙམ་མེད། །ཐམས་ཅད་ཀྱི་ཆོས་ཉིད་ཁྱབ་གདལ་ཀློང་། །བྲལ་ཐོབ་ལས་འདས་པའི་གདངས་སུ་སྨིན། །དོན་དེ་ཕྱིར་སྟོང་ཉིད་སྙིང་རྗེ་གཉིས། །མཉམ་རྗེས་ཀྱི་རིམ་པར་འཆར་བ་ཡི། །གཏད་མེད་ཀྱི་རྣལ་འབྱོར་གཞོན་ནུ་ཡིས། །ཕྱག་རྒྱ་དེས་བརྟན་གཡོ་ཐམས་ཅད་བཏབ། །དམ་ཚིག་གི་གནས་ནི་འདའ་དཀའ་བ། །རྡོ་རྗེ་ལྟར་མི་ཕྱེད་སྙིང་པོ་ཅན། །ནང་དབྱིངས་སུ་འབར་བའི་དྲྭ་བ་ཡིས། །དུས་གསུམ་དུ་བསྡོམ་པར་གདོན་མི་ཟ། །ཨ་ཧོ་ངེས་པའི་གླུ་འདི་ཉོན། །རང་གཞན་ལ་འཚེ་བའི་རྣམ་འགྱུར་སྤང་། །སྨོན་འཇུག་གི་བྱང་ཆུབ་སེམས་བསྐྱེད་ནས། །འཕྲལ་ཡུན་དུ་དགེ་བའི་དཔལ་ཐོབ་མཛོད། །འདི་ཉིད་ལས་བྱུང་བའི་དགེ་
ཚོགས་ཀུན། །འཁོར་གསུམ་ལས་འདས་པ་དབུ་མའི་ཀློང་། །འཕོ་འགྱུར་དང་བྲལ་བར་རོ་གཅིག་པས། །གདོད་མ་ཡི་གཏན་སྲིད་ཟིན་པར་ཤོག །ཅེས་པའང་དགོས་པ་འགའ་ཞིག་གི་ཆེད་དུ་སྨྲས་པའོ།། །།ཨོ་རྒྱན་སངས་རྒྱས་གཉིས་པའི་དུས་ཀྱི་མཆོད་པ་ལ་ཆེད་དུ་བརྗོད་པའི་རྡོ་རྗེའི་ཐོལ་གླུ་ངོ་མཚར་རྣ་རྒྱན་ཅེས་བྱ་བ། ཨ་ཧོ། སྲིད་དང་ཞི་བར་མི་གནས་རང་བྱུང་གི་ཡེ་ཤེས། །འཕོ་ཆེན་འཇའ་ལུས་རྡོ་རྗེའི་ལང་ཚོ་ལ་ཆགས་པས། །མཐའ་ཀླས་འགྲོ་ཀུན་ཐར་པའི་གྲོང་ཁྱེར་དུ་བཀྲི་བའི། །སྐུ་གསུམ་དབྱེར་མེད་པདྨ་ཐོད་ཕྲེང་ལ་འདུད་དོ། །གཞི་རྒྱུད་ལྷན་སྐྱེས་པདྨ་དྲ་བ་ཡི་ཀློང་ན། །ཁྱད་ཆོས་དྲུག་ལྡན་འཆི་མེད་མཚོ་སྐྱེས་ཀྱི་རྡོ་རྗེ། །རང་གྲོལ་སོ་སོར་རྟོག་པའི་ཡེ་ཤེས་ཀྱིས་མཇལ་བས། །བདེན་གཉིས་ཟུང་དུ་འཇུག་པའི་ཉམས་ལེན་འདི་ཨ་ཧོ། །དཀྱིལ་འཁོར་རྣམ་བཞི་པདྨ་དྲྭ་བ་ཡི་ཀློང་ན། །སྨིན་བྱེད་དབང་བཞིའི་འཆི་མེད་མཚོ་སྐྱེས་ཀྱི་རྡོ་རྗེ། །དད་བརྩོན་བརྟུལ་ཞུགས་ལྡན་པའི་སྐལ་བཟང་གིས་མཇལ་བས། །སྐུ་བཞིའི་ས་བོན་འཇོག་པའི་ཐབས་མཁས་འདི་ཨ་ཧོ། །ཕུང་ཁམས་སྐྱེ་མཆེད་པདྨ་དྲྭ་བ་ཡི་ཀློང་ན། །ཡོངས་གྲུབ་གདན་གསུམ་འཆི་མེད་མཚོ་སྐྱེས་ཀྱི་རྡོ་རྗེ། །སྲོག་རྩོལ་ཁ་སྦྱོར་བཟླས་པའི་བྱེད་ལས་ཀྱིས་མཇལ་བས། །རླུང་ལྔ་ཡི་གེའི་སྤྲིན་དུ་དེངས་པ་འདི་ཨ་ཧོ། །དཀར་དམར་ཐིག་ལེ་པདྨ་དྲྭ་བ་ཡི་ཀློང་ན། །ཟག་བྲལ་བདེ་ཆེན་འཆི་མེད་མཚོ་
སྐྱེས་ཀྱི་རྡོ་རྗེ། །འབར་འཛག་དགའ་བ་བཞི་ཡི་ཏིང་འཛིན་གྱིས་མཇལ་བས། །རྣམ་པ་ཀུན་གྱི་མཆོག་ལྡན་གྲུབ་པ་འདི་ཨ་ཧོ། །ཀ་དག་འོད་གསལ་པདྨ་དྲྭ་བ་ཡི་ཀློང་ན། །ལྷུན་གྲུབ་སྣང་བཞིའི་འཆི་མེད་མཚོ་སྐྱེས་ཀྱི་རྡོ་རྗེ། །ཟུང་འཇུག་དབྱིངས་རིག་དབྱེར་མེད་ཕྱག་རྒྱ་ཡིས་མཇལ་བས། །ཆོས་ཟད་བློ་འདས་ཕ་མཐར་སོན་པ་འདི་ཨ་ཧོ། །ངོ་མཚར་དུས་སྟོན་པདྨ་དྲྭ་བ་ཡི་ཀློང་ན། །མཚོན་བྱེད་དཔེ་ཡི་འཆི་མེད་ལ་བས། །མི་ཕྱེད་དད་གསུམ་ཆུ་གཏེར་འཕེལ་བ་འདི་ཨ་ཧོ། །མཐར་ཐུག་སྒྲིབ་བྲལ་པདྨ་དྲྭ་བ་ཡི་ཀློང་ན། །སྐུ་བཞིའི་བདག་ཉིད་འཆི་མེད་མཚོ་སྐྱེས་ཀྱི་རྡོ་རྗེ། །ཟབ་གསང་སྦས་པའི་ལམ་གྱི་མིག་འཕྲུལ་གྱིས་མཇལ་བས། །རྨད་བྱུང་དོན་གཉིས་ལྷུན་གྱིས་གྲུབ་པ་འདི་ཨ་ཧོ། །དེ་སྐད་ས་སྤྱོད་བསམ་གཏན་ཆོས་གླིང་གི་འདུས་གྲྭར། །ཆོ་འཕྲུལ་ཟླ་བའི་དཀར་ཕྱོགས་ཚེས་བཅུ་ཡི་དུས་སུ། །གང་ཤར་རྟོགས་པ་བརྗོད་པའི་རྡོ་རྗེ་ཡི་ཐོལ་གླུ། །གྱི་ནའི་སྤྱོད་པས་འཚོ་བའི་མགྲིན་པ་ནས་སྐྱེས་སོ། །ཞེས་པའང་མདོ་ཁམས་རྫོགས་ཆེན་པའི་འཁོར་ལོ་གསུམ་གྱི་ཕྱག་རྗེས་རྨ་མེད་པའི་གནས་རུ་དམ་བསམ་གཏན་ཆོས་གླིང་དུ་ཆོ་འཕྲུལ་ཟླ་བའི་ཚེས་བཅུའི་དུས་སྟོན་མཇལ་བའི་སྐབས་སུ་ཕྱི་རོལ་གྱི་ཡུལ་རྐྱེན་སྒྱུ་མ་ལྟ་བུས་བསྐུལ་ནས་རྣལ་འབྱོར་གཞོན་ནུ་ཨ་བྷཱ་ཡས་སོ།། ༈ །།འཕགས་མཆོག་ཐུགས་རྗེ་ཆེན་པོའི་དཀྱིལ་འཁོར་ཆེན་པོ་ཞལ་ཕྱེ་བའི་ཚེ་ཆེད་དུ་བརྗོད་
པའི་རྡོ་རྗེའི་ཐོལ་གླུ་རྣལ་འབྱོར་གསུམ་གྱི་འབབ་སྟེགས་ཅེས་བྱ་བ། ཨ་ཧོ། འགྱུར་མེད་ཀྱི་བདེ་སྟོང་ཟུང་འཇུག་ལས། །ཟག་བྲལ་གྱི་སྙིང་རྗེའི་དཔལ་འབར་བས། །འགྲོ་ཁམས་ལ་ལྷག་པར་ཆགས་རྒྱས་པ། །མགོན་ཕྱག་ན་པདྨས་དགེ་ལེགས་མཛོད། །ཕུང་ཁམས་ཀྱི་སྐྱེ་མཆེད་ཟ་མ་ཏོག །གདན་གསུམ་གྱི་ལྷ་སྐུར་རྒྱས་བཏབ་པས། །སྣང་བ་དང་སྟོང་པ་མི་ཕྱེད་པའི། །ཀུན་བརྟགས་ཀྱི་ཉམས་སྣང་འཇའ་ལྟར་བཀྲ། །ལྷན་སྐྱེས་ཀྱི་ཡེ་ཤེས་ཆེན་པོ་ནི། །བསལ་བཞག་དང་བྲལ་བར་མཉམ་རོལ་པས། །འཛིན་བྱེད་ཀྱི་འོད་གསལ་ཁོར་ཡུག་ངང་། །ཡོངས་གྲུབ་ཀྱི་རྟོགས་པ་མཁའ་ལྟར་ཡངས། །བདེ་སྡུག་ཀུན་ཆོས་ཉིད་ཀྱི་རོལ་པ་ལ། །བླང་དོར་གྱི་འདམ་ཁ་ཡེ་ནས་བྲལ། །རང་གྲོལ་གྱི་རིག་པ་སོ་མའི་ངང་། །ལམ་ཁྱེར་གྱི་བརྟུལ་ཞུགས་གཟེངས་སུ་མཐོ། །ཚོགས་དྲུག་གི་ཡུལ་ལ་ཤར་བའི་ཆོས། །ལན་ཚྭ་ཉིད་ཆུ་ལ་ཐིམ་པ་ལྟར། །ད་ལྟ་ཡི་ཤེས་པ་རྣམ་དག་པས། །བོགས་འདོན་གྱི་གདམས་ངག་གནད་དུ་ཐེབས། །སྒྲར་གྲགས་ཀུན་རང་བྱུང་སྔགས་ཀྱི་སྒྲ། །མི་ཤིགས་པ་ནཱ་དའི་རོལ་མོ་ཅན། །མགྲིན་པ་ནས་ལེན་པའི་པདྨོ་ཡིས། །གྲུབ་གཉིས་ཀྱི་བུང་བ་སྤྲིན་བཞིན་སྡུད། །ནང་གསལ་གྱི་ཀ་དག་གཉུག་མའི་གཤིས། །ཕྱིར་གསལ་གྱི་དབྱིངས་སུ་རྒྱས་བཏབ་པས། །སེམས་བྲལ་གྱི་རིག་པ་རྗེན་པའི་དངོས། །མངོན་སུམ་དུ་ལྷུག་པར་འཆར་འདི་
རྨད། །ཨ་ཧོ། ཡེ་གཞི་ཉིད་གཅིག་རྒྱུད་འཕགས་པ་མཆོག །ལམ་རྒྱུད་ཀྱིས་ཟག་བཅས་སྦྱངས་པ་ལས། །འབྲས་རྒྱུད་ཀྱི་ངོ་བོ་མངོན་གྱུར་པའི། །ངེས་དོན་གྱི་གྲུབ་མཐའི་གསང་ལམ་རྙོགས། །ཚིག་དེ་སྐད་ངོ་མཚར་ནི་ཙུ་ལའི། །དགའ་ཚལ་དུ་མིག་མི་འཛུམ་པའི་ལྷ། །བསྙེན་སྒྲུབ་ཀྱི་བྱིན་ཆེན་དབབ་པའི་ཚེ། །གཏད་མེད་ཀྱི་རྣལ་འབྱོར་གཞོན་ནུས་བྲིས། །ཞེས་པའང་མཆོག་གི་སྤྲུལ་པའི་སྐུ་བི་བྷ་ཡ་དྷརྨ་དྷཱ་ཏུ་བཛྲའི་ཞབས་ཀྱིས་ལྕང་ར་ལྷ་ཀླུ་འཆི་མེད་དགའ་ཚལ་དུ་ཐུགས་རྗེ་ཆེན་པོ་ཡང་གསང་བླ་མེད་ཀྱི་དཀྱིལ་འཁོར་དུ་རིལ་སྒྲུབ་གནང་བའི་སྐབས་ཉམས་མཚར་དུ་སྨྲས་པའོ།། །།འོད་གསལ་ཕྱག་རྒྱ་ཆེན་པོའི་ཤིང་རྟ་ཆེན་པོ་རྣམས་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ངེས་དོན་དཔྱིད་ཀྱི་ཐིག་ལེ་ཞེས་བྱ་བ། ཨ་ཧོ། ཤིན་ཏུ་རྣམ་པར་དག་པའི་སྤྲོས་བྲལ་གྱི་ཡེ་ཤེས། །འོད་གསལ་བདེ་བ་ཆེན་པོའི་ལང་ཚོ་ལ་སྦྱར་བས། །ཟུང་འཇུག་རྣམ་ཀུན་མཆོག་ལྡན་ཡོངས་གྲུབ་ཀྱི་མཚན་དཔེ། །སངས་རྒྱས་རྡོ་རྗེ་འཆང་ཆེན་སྙིང་དབུས་ནས་དྲན་བྱུང་། །སྐྱེ་མེད་གཉུག་མ་རྟོགས་པར་བྱིན་གྱིས་རང་རློབས་ཤིག །སྲིད་གསུམ་ཟ་བྱེད་རྡོ་རྗེ་བཙུན་མོ་ཡི་སྒྱུ་མས། །སྐལ་བཟང་གྲུབ་པ་གཉིས་ཀྱི་དགའ་སྟོན་ལ་སྦྱར་ནས། །རང་གྲོལ་དོན་གྱི་གནས་ལུགས་མངོན་སུམ་ལ་སྟོན་པའི། །ཡེ་ཤེས་ཌཱ་ཀིའི་ཚོགས་རྗེ་སྙིང་དབུས་ནས་དྲན་བྱུང་། །མི་འགྱུར་མཆོག་བདེ་འགྲུབ་པར་བྱིན་གྱིས་རང་རློབས་ཤིག །གཟོད་ནས་འཕོ་འགྱུར་མེད་
པའི་ཆོས་ཉིད་ཀྱི་ཐིག་ལེ། །ཆོས་ཅན་གདན་གསུམ་སྤྲུལ་པའི་ཟློས་གར་ལ་རྩེན་པས། །རྣལ་འབྱོར་གསང་མཐའི་ཉེ་ལམ་སྐལ་བཟང་ལ་སྩལ་བའི། །ཏེ་ལོ་པྲཛྙཱ་བྷ་དྲ་སྙིང་དབུས་ནས་དྲན་བྱུང་། །བློ་འདས་བྱར་མེད་རྟོགས་པར་བྱིན་གྱིས་རང་རློབས་ཤིག །བརྒྱད་གཉིས་དཀའ་བའི་སྤྱོད་པ་རྨད་བྱུང་གི་ཤིང་རྟས། །ཁྱབ་བདག་དཔལ་ལྡན་བླ་མའི་ཞབས་པད་དུ་བསྙེན་པས། །ས་ལམ་ཡོན་ཏན་ནོར་བུ་ཀླུ གཅིག་ཅར་དུ་ཐོབ་པའི། །རྗེ་བཙུན་ནཱ་རོ་ཏ་པ་སྙིང་དབུས་ནས་དྲན་བྱུང་། །སྨིན་གྲོལ་བདུད་རྩི་ཐོབ་པར་བྱིན་གྱིས་རང་རློབས་ཤིག །རྣམ་མང་བཤད་སྒྲུབ་རྒྱ་མཚོར་གསང་རྒྱུད་ཀྱི་མེ་ཏོག །མན་ངག་སྙིང་པོའི་སྦྲང་རྩིའི་བཅུད་ལེན་དུ་གཡོ་བས། །དབང་རྣོན་གྲུབ་པ་མཆོག་གི་ངལ་བསོ་ལ་སྦྱར་བའི། །རྣལ་འབྱོར་མར་པ་ལོ་ཙཱ་སྙིང་དབུས་ནས་དྲན་བྱུང་། །ལྷན་སྐྱེས་ཡེ་ཤེས་རྟོགས་པར་བྱིན་གྱིས་རང་རློབས་ཤིག །བཅོས་མིན་ངེས་འབྱུང་དྲག་པོའི་དྲི་བཞོན་གྱིས་བསྐུལ་ནས། །ནང་གི་དེ་ཉིད་གཉུག་མའི་གྲུ་བོ་ལ་འཆེལ་ཏེ། །སྲིད་དང་ཞི་བའི་རྒྱ་མཚོའི་ཕ་རོལ་དུ་བརྒལ་བའི། །མི་ལ་བཞད་པ་རྡོ་རྗེ་སྙིང་དབུས་ནས་དྲན་བྱུང་། །ཚེ་གཅིག་གྲུབ་མཐའ་རྙོག་པར་བྱིན་གྱིས་རང་རློབས་ཤིག །ཕྱི་ལྟར་བྱང་ཆུབ་སེམས་འབྱོངས་ཐེག་ཆེན་གྱི་བཤེས་གཉེན། །ནང་ལྟར་རྡོ་རྗེ་ཐེག་པའི་སྨིན་གྲོལ་གྱི་ལམ་མཁན། །གསང་བ་ཟབ་དོན་
སྙིང་པོའི་བསྟན་འཛིན་གྱི་གཙུག་རྒྱན། །ཆོས་རྒྱལ་ཟླ་འོད་གཞོན་ནུ་སྙིང་དབུས་ནས་དྲན་བྱུང་། །དོན་གཉིས་ལྷུན་གྱིས་གྲུབ་པར་བྱིན་གྱིས་རང་རློབས་ཤིག །མདོར་ན་མྱུར་ལམ་མཐར་ཐུག་སྙན་བརྒྱུད་ཀྱི་སྒྲོན་མེས། །གངས་ཅན་འགྲོ་ཀུན་ཐར་པའི་སྣང་བ་ལ་སྦྱོར་ཅིང་། །འབྲེལ་ཚད་སྐུ་གསུམ་བདེ་ཆེན་གྲོང་ཁྱེར་དུ་བཀྲི་བའི། །རང་གྲོལ་དྭགས་པོ་བཀའ་བརྒྱུད་སྙིང་དབུས་ནས་དྲན་བྱུང་། །ཅིར་སྣང་སྒྱུ་མར་རྟོགས་པར་བྱིན་གྱིས་རང་རློབས་ཤིག །ཨ་ཧོ། རྙེད་དཀའ་དལ་འབྱོར་མི་ལུས་རིན་ཆེན་དེ་ཐོབ་ཀྱང་། །སྐད་ཅིག་མི་རྟག་འགྱུར་བའི་སྣང་ཚུལ་ལ་སྐྱོ་ཞིང་། །འཁོར་བ་གར་སྐྱེས་སྡུག་བསྔལ་རང་བཞིན་དུ་རྟོགས་པས། །རྒྱུ་འབྲས་བླང་དོར་ནུས་པར་བྱིན་གྱིས་རང་རློབས་ཤིག །གནས་གྲོགས་ལོངས་སྤྱོད་སྒྱུ་མའི་ཟློས་གར་དུ་ཤེས་པས། །ཅིས་ཀྱང་དགོས་མེད་ཞེན་ལོག་སྙིང་དབུས་ནས་དྲན་ཅིང་། །ཤིན་ཏུ་དབེན་ཞིང་* ཉམས་དགའི་བྲག་སྐྱིབས་ཀྱི་ཁང་བུར། །རྩེ་གཅིག་སྒྲུབ་ལ་གཞོལ་བར་བྱིན་གྱིས་རང་རློབས་ཤིག །དཀོན་མཆོག་གསུམ་པོ་སྐྱབས་ཀྱི་དྭངས་མ་རུ་བཟུང་སྟེ། །སྨོན་དང་འཇུག་པའི་བྱང་ཆུབ་སེམས་མཆོག་ལ་སྦྱངས་ཤིང་། །སྟོབས་བཞིས་སྒྲིབ་པའི་ཚོགས་ཀུན་ལྷག་མེད་དུ་བཅིལ་ནས། །ཚོགས་གཉིས་ལམ་ལ་བརྩོན་པར་བྱིན་གྱིས་རང་རློབས་ཤིག །ཁྱད་པར་དུས་གསུམ་རྒྱལ་བ་ཐམས་ཅད་ཀྱི་རང་གཟུགས། །
ཀུན་མཁྱེན་ཡེ་ཤེས་ཕུང་པོའི་རྣམ་རོལ་དུ་ཤར་བའི། །ཁྱབ་བདག་བཀའ་དྲིན་སུམ་ལྡན་དཔལ་ལྡན་གྱི་བླ་མར། །བཅོས་མིན་མོས་གུས་འབྱོངས་པར་བྱིན་གྱིས་རང་རློབས་ཤིག །དེ་མཐུས་རྡོ་རྗེ་ཡེ་ཤེས་འཕོ་བ་ཡི་དབང་གིས། །སྒོ་གསུམ་ཆ་མཉམ་འཕོ་བའི་བག་ཆགས་ཀུན་སྦྱངས་ཏེ། །འཕོ་མེད་དོན་གྱི་གནས་ལུགས་མངོན་སུམ་དུ་མཐོང་བས། །འཁོར་འདས་དབུ་མར་གྲོལ་བར་བྱིན་གྱིས་རང་རློབས་ཤིག །ངོ་བོ་སྟོང་པ་ཉིད་ཀྱི་རང་བཞིན་ལས་སྐྱེས་པའི། །རྣམ་པ་སྣང་སྟོང་ཟུང་འཇུག་ལྷ་སྐུ་རུ་བལྟ་བས། །ཐ་མལ་འཁྲུལ་པའི་ཀུན་རྟོག་གཡོ་མེད་དུ་འཆིང་བའི། །བསྐྱེད་རིམ་ལམ་བཟང་གོམས་པར་བྱིན་གྱིས་རང་རློབས་ཤིག །སྦྱོང་བ་རྣམ་པ་གསུམ་གྱི་བདུད་རྩི་ཡིས་བརླན་པས། །འཇུག་གནས་ལྡང་བའི་རླུང་ཀུན་ཁ་སྦྱོར་དུ་བསྒྲུབས་ཤིང་། །ཕྱི་ནང་གསང་བའི་གཏུམ་མོའི་རྣལ་འབྱོར་ལ་གོམས་པས། །འབར་ས་ཤིག །མཉམ་གཞག་ཉེར་ཐོབ་དོན་གྱི་ཡེ་ཤེས་ལ་འཇོག་ཅིང་། །རྗེས་ཤེས་དངོས་ཀུན་སྒྱུ་མའི་དཔེ་བརྒྱད་དུ་མཐོང་བས། །ཞེན་མེད་དག་པའི་སྒྱུ་མའི་གསལ་སྟོང་ལ་གོམས་ནས། །ཟུང་འཇུག་གོ་འཕང་འགྲུབ་པར་བྱིན་གྱིས་རང་རློབས་ཤིག །རིག་འཛིན་རྗེས་གཞིག་མཆོག་བདེའི་འོད་གསལ་ལ་འཇུག་ཅིང་། །སྟོང་པ་བཞི་ཡི་ངོ་བོར་རོ་སྙོམས་སུ་སྦྱར་བས། །
ཡོངས་གྲུབ་སེམས་ཀྱི་རྡོ་རྗེའི་མཁའ་དབྱིངས་སུ་གྲོལ་ནས། འཆི་སྲིད་ཆོས་སྐུར་ཐིམ་པར་བྱིན་གྱིས་རང་རློབས་ཤིག །མགྲིན་པའི་ཐིག་ལེར་རླུང་སེམས་དབྱེར་མེད་དུ་སྡུད་ཅིང་། །ཉིན་སྣང་རྨི་ལམ་ཁོ་ནའི་འཇུག་ལྡང་དུ་བལྟ་བས། །ཉིང་འཁྲུལ་རང་ངོ་ཤེས་པའི་ཉམས་ལེན་དང་སྦྲགས་ནས། །སྦྱང་སྤེལ་སྤྲུལ་བསྒྱུར་འབྱོངས་པར་བྱིན་གྱིས་རང་རློབས་ཤིག །དངོས་ཀུན་བདེན་མེད་བར་དོའི་སྣང་ཆ་རུ་གོམས་པས། །ལྷ་སྔགས་ཆོས་སྐུར་འཆར་བའི་ཐབས་མཁས་ཀྱི་ཉེ་རྒྱུས། །བར་སྲིད་ལོངས་སྤྱོད་རྫོགས་སྐུའི་གོ་འཕང་ལ་སྦྱོར་བའི། །མཆོག་གི་དངོས་གྲུབ་བརྙེས་པར་བྱིན་གྱིས་རང་རློབས་ཤིག །དོན་དམ་འགྲོ་འོང་སྤྲོས་པའི་མཚན་མ་ལས་འདས་ཀྱང་། །ཀུན་རྫོབ་སྲོག་དང་རྩོལ་བའི་ཕོ་ཉ་ལ་བརྟེན་ནས། །རླུང་སེམས་ཐིག་ལེ་དྷཱ་ཏིའི་མཁའ་དབྱིངས་སུ་འཕོ་བས། །འཕྱུགས་མེད་མཁའ་སྤྱོད་འགྲུབ་པར་བྱིན་གྱིས་རང་རློབས་ཤིག །ཕྲ་རགས་རྟོག་ཚོགས་སྤངས་པའི་ཞི་གནས་ཀྱི་ཏིང་འཛིན། །གཡོ་མེད་རྒྱ་མཚོ་ལྟ་བུ་ལྷུན་ཆགས་སུ་རྫོགས་པར། །བརྗོད་བྲལ་རང་བྱུང་གཉུག་མའི་ལྷག་མཐོང་གིས་འཁྱུད་པས། །དབྱེར་མེད་ཟུང་འཇུག་རྟོགས་པར་བྱིན་གྱིས་རང་རློབས་ཤིག །རྩེ་གཅིག་གསལ་སྟོང་ངང་གནས་སྣང་ཉམས་ཀྱི་རྣལ་འབྱོར། །སྤྲོས་བྲལ་གདོད་མའི་གནས་ལུགས་མཐོང་ལམ་དུ་རྟོགས་ཏེ། །སྤང་བླང་བསལ་བཞག་བྲལ་
བའི་རོ་གཅིག་གི་ངང་ནས། །སྒོམ་མེད་བཙན་ས་ཟིན་པར་བྱིན་གྱིས་རང་རློབས་ཤིག །གཟོད་ནས་ལྷན་ཅིག་སྐྱེས་པའི་འཕོ་མེད་ཀྱི་བདེ་ཆེན། །ཨེ་ཝཾ་མི་ཕྱེད་དཔྱད་ཀྱི་ཐིག་ལེ་ལ་གོམས་པས། །མཚོན་བྱ་དོན་གྱི་ཡེ་ཤེས་རྗེན་པ་རུ་སྦྱོར་བའི། །ངེས་དོན་ཕྱག་ཆེན་མཐོང་བར་བྱིན་གྱིས་རང་རློབས་ཤིག །དེ་ལྟར་མྱུར་ལམ་རྡོ་རྗེའི་རྣལ་འབྱོར་ལ་བརྟེན་ཅིང་། །དམ་ཚིག་སྡོམ་པའི་གནས་ལ་ཉེས་སྐྱོན་དང་བྲལ་བས། །འདིའམ་འཆི་ཁར་བར་དོའི་གནས་སྐབས་ཀྱི་སྣང་ཆར། །སྐུ་གསུམ་གོ་འཕང་བརྙེས་པར་བྱིན་གྱིས་རང་རློབས་ཤིག །གལ་ཏེ་ལས་ཀྱི་མཐུ་ཡིས་སྲིད་པ་ལ་འཇུག་ན། །དབང་རྣོན་རྡོ་རྗེ་ཐེག་པའི་རིགས་ཅན་དུ་སྐྱེས་ནས། །སྨིན་གྲོལ་བདུད་རྩིས་མྱོས་པའི་གླུ་དབྱངས་དང་སྦྲགས་ནས། །གྲུབ་པའི་གྲོང་དུ་གཤེགས་པར་བྱིན་གྱིས་རང་རློབས་ཤིག །དེ་ལྟར་མི་ཕྱེད་གུས་པའི་ངེས་དོན་གྱི་གསོལ་འདེབས། །དཔའ་བོ་ཌཱ་ཀི་འདུ་བའི་དམར་ཕྱོགས་ཀྱི་ཚེས་༡༥ལ། །ཆགས་བྲལ་པདྨ་དགྱེས་པའི་མགྲིན་པ་ནས་བླངས་པས། །བློ་འདས་འོད་གསལ་རྟོགས་པའི་སྨོན་ལམ་ཞིག་ཞུའོ། །ཅེས་འོད་གསལ་ཕྱག་རྒྱ་ཆེན་པོའི་ལམ་ནས་དངོས་གྲུབ་བརྙེས་པའི་སློབ་དཔོན་ཆེན་པོ་རྣམས་༢༥ལ་གསོལ་འདེབས་ལམ་ཟབ་མོའི་པྲ་ཎི་དྷ་དང་འབྲེལ་བ་འདི་ནི་གཙུག་ལག་སྨྲ་བའི་ཉི་མ་ཞེས་བགྱི་བའི་ད་རི་དྭས་དཔལ་སྟག་ལུང་ཆོས་གྲྭ་དང་ཉེ་བའི་འདབས་རོལ་དུ་སྣང་གསལ་ཞིག་གི་ངོགས་སུ་ཤར་མར་སྤེལ་བ་སིདྡྷི་རསྟུ། ༈
འཕཊ་ཡུལ་རིག་འཛིན་རྣམ་དགུ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་བདེ་སྟོང་ཌ་ཀའི་གླུ་གར་ཞེས་བྱ་བ། ཨེ་མ་ཧོ། །ཕྱི་ནང་རྩ་ཡི་འཕོ་ཆགས་ཐ་མལ་གྱི་རྒྱུ་བ། །སྣང་སྟོང་འཇམ་དཔལ་སྐུ་ཡི་དཀྱིལ་འཁོར་དུ་བསྡམས་པས། །རྡུལ་བྲལ་མེ་ལོང་ལྟ་བུའི་ཡེ་ཤེས་སུ་ཤར་བའི། །རིག་འཛིན་མཉྫམི་ཏྲ་སྙིང་དབུས་ནས་དྲན་བྱུང་། །ཕུང་ཁམས་སྤྲུལ་སྐུར་དག་པར་བྱིན་གྱིས་རང་རློབས་ཤིག །འགྲོ་འོང་སྲོག་དང་རྩོལ་བའི་དྲི་བཞོན་གྱི་རྒྱུ་བ། ། ཆཊ་བྲལ་པདྨ་གསུང་གི་དྲྭ་བ་རུ་བསྡམས་པས། །བདེ་ཆེན་སོ་སོར་རྟོག་པའི་ཡེ་ཤེས་སུ་ཤར་བའི། །རིག་འཛིན་ནཱ་ག་རྫུ་ན་སྙིང་དབུས་ནས་དྲན་བྱུང་། །ལྷ་སྔགས་ལོངས་སྐུར་རྫོཊ་པར་བྱིན་གྱིས་རང་རློབས་ཤིག །ཀུན་རྫོབ་གཟུང་འཛིན་འཁྲུལ་པའི་གཉིས་སྣང་གི་རྒྱུ་བ། །དོན་དམ་ཡང་དག་ཐུགས་ཀྱི་ཐིག་ལེ་རུ་བསྡམས་པས། །ཟུང་འཇུག་ལྷན་སྐྱེས་ཆོས་དབྱིངས་ཡེ་ཤེས་སུ་ཤར་བའི། །རིག་འཛིན་ཧཱུཾ་ཆེན་ཀཱ་ར་སྙིང་དབུས་ནས་དྲན་བྱུང་། །རྟོག་ཚོགས་ཆོས་སྐུར་སྨིན་པར་བྱིན་གྱིས་རང་རློབས་ཤིག །སྣ་ཚོགས་སྐྱེ་ཤིའི་འཁྲུལ་འཁོར་འཕོ་འགྱུར་གྱི་རྒྱུ་བ། །འཆི་མེད་ཡོན་ཏན་བདུད་རྩིའི་དཀྱིལ་འཁོར་དུ་བསྡོམས་པས། །འདའ་དཀའ་འཕོ་བ་ཆེན་པོའི་ཡེ་ཤེས་སུ་ཤར་བ། །རིག་འཛིན་བི་མ་མི་ཏྲ་སྙིང་དབུས་ནས་དྲན་བྱུང་། །ཟག་བཅས་འོད་སྐུར་འགྲུབ་པར་བྱིན་གྱིས་རང་རློབས་ཤིག །རྡུལ་མུན་སྙིང་སྟོབས་རང་
གཟུགས་ཁམས་གསུམ་གྱི་རྒྱུ་བ། །དབྱིངས་དང་རིག་པ་དབྱེར་མེད་ཕུར་བུ་རུ་བསྡམས་པས། །ཅིར་སྣང་བྱ་བ་གྲུབ་པའི་ཡེ་ཤེས་སུ་ཤར་བའི། །རིག་འཛིན་པྲ་བྷ་ཧ་སྟི་སྙིང་དབུས་ནས་དྲན་བྱུང་། །དབང་ཡུལ་ལྷ་སྐུར་དག་པར་བྱིན་གྱིས་རང་རློབས་ཤིག །བྱང་ཆུབ་སེམས་ཀྱི་ཆུ་རྒྱུན་གནས་བཞི་རུ་རྒྱུ་བ། །སྣང་སྲིད་མ་མོའི་དཀྱིལ་འཁོར་དབུ་མ་རུ་བསྡམས་པས། །སྲིད་ཞི་ཀློང་དུ་གྱུར་པའི་ཡེ་ཤེས་སུ་ཤར་བའི། །རིག་འཛིན་དྷ་ན་སཾ་སྐྲ་སྙིང་དབུས་ནས་དྲན་བྱུང་། །ཆར་ཡང་དགའ་བཞིར་རྫོགས་པར་བྱིན་གྱིས་རང་རློབས་ཤིག །སེམས་དང་སེམས་བྱུང་འཚོལ་བའི་ཉོན་མོངས་ཀྱི་རྒྱུ་བ། །ཟུང་འཇུག་འཇིག་རྟེན་མཆོད་བསྟོད་ཕྱག་རྒྱ་རུ་བསྡམས་པས། །འཁོར་འདས་གཞི་དབྱིངས་གྲོལ་བའི་ཡེ་ཤེས་སུ་ཤར་བའི། །རིག་འཛིན་རཾ་བུ་གུ་རྒྱ་སྙིང་དབུས་ནས་དྲན་བྱུང་། །སྒྲིབ་གསུམ་ཀ་ནས་དག་པར་བྱིན་གྱིས་རང་རློབས་འི ཤིག །ཀུན་བརྟགས་དངོས་པོར་ཞེན་པའི་གཞན་དབང་གི་རྒྱུ་བ། །ཡོངས་གྲུབ་དྲག་སྔགས་དམོད་པའི་དྲྭ་བ་རུ་བསྡམས་པས། །མཐའ་བརྒྱད་རང་སར་གྲོལ་བའི་ཡེ་ཤེས་སུ་ཤར་བའི། །རིག་འཛིན་ཤྲིནྟཾ་གནྡྷ་སྙིང་དབུས་ན་དྲན་བྱུང་། །འོད་གསལ་དབུ་མར་སྨིན་པར་བྱིན་གྱིས་རང་རློབས་ཤིག །ཚོགས་བརྒྱད་གློ་བུར་འཁྲུལ་བའི་འཇུག་ལྡང་གི་རྒྱུ་བ། །དཔལ་ཆེན་སྒྲུབ་སྡེ་བརྒྱད་ཀྱི་དཀྱིལ་འཁོར་དུ་བསྡོམས་པས། །
ཡེ་ཤེས་ཀློང་དགུའི་རང་གཟུགས་མཚན་དཔེ་རུ་ཤར་བའི། །རིག་འཛིན་པདྨ་སཾ་བྷཱ་སྙིང་དབུས་ནས་དྲན་བྱུང་། །དབྱེར་མེད་སྐུ་བཞིར་སྨིན་པར་བྱིན་གྱིས་རང་རློབས་ཤིག །དེ་སྐད་གསོལ་བ་འདེབས་པའི་རྡོ་རྗེ་ཡི་ཐོལ་གླུ། །བདེ་སྟོང་ཊཱ་ཀི་འདུ་བའི་དཀར་ཕྱོགས་ཀྱི་ཚེས་ལ། །འོག་མིན་གྲུབ་པ་མཆོག་གི་བསྟི་གནས་སུ་བླངས་པས། །དོན་གཉིས་ལྷུན་གྱིས་གྲུབ་པའི་དངོས་གྲུབ་ཞིག་ཞུའོ། །ཞེས་པའང་དཔལ་གྱི་བསམ་ཡས་མཆིམས་ཕུའི་བྲག་དམར་རྡོ་རྗེའི་ཀེའུ་ཚང་དུ་སྒྲུབ་སྡེ་ཆེན་པོ་བརྒྱད་ཀྱི་དཀྱིལ་འཁོར་ཞལ་ཕྱེ་ཞིང་། ཚོགས་ཀྱི་འཁོར་ལོ་སྟོང་ཕྲག་ཐལ་བས་དགྱེས་པ་བསྐྱེད་པའི་ཚེ་གང་ཤར་གྱི་རྟོགས་པ་གླུར་ལེན་པ་པོ་ནི་རྣལ་འབྱོར་པ་པདྨ་དགྱེས་པའི་སྡེའོ།། ༈ །།རང་བཞིན་རྫོགས་པ་ཆེན་པོའི་ཤིང་རྟ་པ་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་ལ་གསོལ་བ་འདེབས་པའི་རྡོ་རྗེའི་ཐོལ་གླུ་འོད་གསལ་དཔྱིད་ཀྱི་ཐིག་ལེ་ཅེས་བྱ་བ། ཨ་ཧོ། གཟོད་ནས་བྱང་ཆུབ་སྙིང་པོའི་ཐིག་ལེ་རུ་གཤེགས་ཀྱང་། །ངེས་དོན་བསྟན་པ་སྤེལ་ཕྱིར་ངུར་སྨྲིག་གི་སྒྱུ་འཕྲུལ། །ཀུན་མཁྱེན་ཆོས་ཀྱི་རྒྱལ་པོ་སྙིང་དབུས་ནས་དྲན་པའི། །གསོལ་འདེབས་རྡོ་རྗེའི་གླུ་ཡི་རོལ་མོ་ཞིག་འཁྲོལ་ལོ། །སྐྱེ་གནས་རྣམ་བཞིའི་འདྲ་འབག་ཀུན་བརྟགས་ཀྱི་རིམ་པས། །ཐ་མལ་སྣང་བའི་ཞེན་རྟོག་དཀྱིལ་འཁོར་དུ་ཤར་བའི། །སྣ་ཚོགས་གཟུགས་ཅན་འཆང་བ་སྤྲུལ་སྐུ་ཡི་རྣམ་རོལ། །ཀུན་མཁྱེན་ཆོས་ཀྱི་རྒྱལ་པོ་སྙིང་དབུས་ནས་དྲན་བྱུང་། །ཕུང་ཁམས་ལྷ་སྐུར་དག་པར་བྱིན་གྱིས་
རང་རློབས་ཤིག །ཁ་སྦྱོར་རྡོ་རྗེའི་ལམ་གྱི་ཐབས་མཁས་ཀྱི་ཕོ་ཉས། །འགྲོ་འོང་སྲོག་རྩོལ་རྒྱུ་བ་དབུ་མ་རུ་བཅིངས་པའི། །ཨེ་ཝཾ་གཉིས་སུ་མེད་པ་ལོངས་སྐུ་ཡི་རྣམ་རོལ། །ཀུན་མཁྱེན་ཆོས་ཀྱི་རྒྱལ་པོ་སྙིང་དབུས་ནས་དྲན་བྱུང་། །རླུང་ཁམས་ཡི་གེར་རྫོགས་པར་བྱིན་གྱིས་རང་རློབས་ཤིག །ལུགས་ལྡོག་དགའ་བ་རྣམ་བཞིའི་ཉེ་རྒྱུ་ཡིས་རེག་པས། །ལུགས་འབྱུང་འཕོ་བའི་བག་ཆགས་གཙུག་ཏོར་དུ་བཅོམ་པའི། །འོད་གསལ་རྣམ་ཀུན་མཆོག་ལྡན་ཆོས་སྐུ་ཡི་རྣམ་རོལ། །ཀུན་མཁྱེན་ཆོས་ཀྱི་རྒྱལ་པོ་སྙིང་དབུས་ནས་དྲན་བྱུང་། །འབར་འཛག་དབུ་མར་ཐིམ་པར་བྱིན་གྱིས་རང་རློབས་ཤིག །ཀ་དག་ལྷུན་གྲུབ་དབྱེར་མེད་ཟུང་འཇུག་གི་སྣང་བས། །སེམས་དང་སེམས་བྱུང་རྒྱུ་བ་ཆོས་ཟད་དུ་དག་པའི། །སྐུ་དང་ཡེ་ཤེས་རྒྱ་མཚོའི་ངོ་བོ་རུ་བཞུགས་པ། །ཀུན་མཁྱེན་ཆོས་ཀྱི་རྒྱལ་པོ་སྙིང་དབུས་ནས་དྲན་བྱུང་། །སྣང་བཞིའི་ཕ་རོལ་སོན་པར་བྱིན་གྱིས་རང་རློབས་ཤིག །དེ་སྐད་གུས་པས་གསོལ་འདེབས་རྡོ་རྗེ་ཡི་ཐོལ་གླུ། །དཔའ་བོ་ཌཱ་ཀི་འདུ་བའི་དགའ་ཚལ་གྱི་ངོགས་སུ། །ཀུན་རྨོངས་རྣལ་འབྱོར་གཞོན་ནུའི་མགྲིན་པ་ནས་བླངས་པས། །གདོད་མའི་གཏན་སྲིད་ཟིན་པའི་སྨོན་ལམ་ཞིག་ཞུའོ། །ཞེས་གངས་རིའི་ཁྲོད་ཀྱི་འོད་གསལ་རྡོ་རྗེ་སྙིང་པོའི་ཤིང་རྟ་ཆེན་པོ་ཀུན་མཁྱེན་དྲི་མེད་འོད་ཟེར་ལ་དོན་གྱི་རྟོགས་པ་བརྗོད་པ་དང་མཐུན་པའི་གསོལ་འདེབས་འདིའང་རྗེ་ཉིད་
ཀྱིས་བྱིན་གྱིས་བརླབས་པའི་གནས་མཆིམས་ཕུ་ནགས་ཀྱི་དུར་ཁྲོད་ཀྱི་བྲག་རིའི་བ་གམ་ཅན་དུ་ཚོགས་ཀྱི་མཆོད་པ་བགྱིས་པའི་ཚེ་གང་ཤར་གྱི་སྣང་ཆ་གླུར་བླངས་པའོ།། ༈ །།འཆི་མེད་པདྨ་ཐོད་ཕྲེང་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ཕྱིན་དྲུག་མི་ཤིགས་སྒྲ་དབྱངས་ཅེས་བྱ་བ། ཨེ་མ་ཧོ། ཨེ་དབྱིངས་ཤེས་རབ་འབར་བའི་ཙཎྜ་ལཱིའི་རེག་བྱས། །ཝཾ་ཡིག་ཐབས་མཆོག་དབང་པོའི་སྣང་ཆ་ལ་འཁྱུད་པས། །འབར་འཛག་དགའ་བཞིའི་ཆུ་རྒྱུན་དབུ་མ་རུ་འཇོ་བའི། །བདེ་སྟོང་སྦྱིན་པའི་ཕ་རོལ་ཕྱིན་པ་ལ་འདུད་དོ། །ལུགས་འབྱུང་འཕོ་བ་བཅུ་གཉིས་རྟེན་འབྲེལ་གྱི་ཕོ་ཉ། །ལུགས་ལྡོག་ཛ་ལནྡྷ་རའི་དགའ་ཚལ་དུ་བཅིངས་པས། །ཆར་ཡར་འཕོ་འཛགས་སྦར་བའི་ལང་ཚོ་ཡིས་སྒེག་པའི། །ཟག་བྲལ་ཚུལ་ཁྲིམས་ཕ་རོལ་ཕྱིན་པ་ལ་འདུད་དོ། །སེམས་དང་སེམས་བྱུང་རྒྱུ་བ་ཁམས་གསུམ་གྱི་རྟོག་པ། །གཟོད་ནས་རྣམ་པར་དག་པའི་གཤིས་ལུགས་སུ་བསྡམས་པས། །ནང་གསལ་ཤིན་ཏུ་ཕྲ་བའི་ཡེ་འི ཤེས་ལ་རོལ་པའི། །འོད་གསལ་བཟོད་པའི་ཕ་རོལ་ཕྱིན་པ་ལ་འདུད་དོ། །སྣ་ཚོགས་ཀུན་ཏུ་འགྲོ་བའི་ཕྲ་རྒྱས་ཀྱི་ཚོགས་ཀུན། །རླུང་སེམས་དྷ་ཏཱིར་འཆིང་བའི་ཐབས་མཁས་ཀྱིས་སྤངས་པས། །སྣང་སྟོང་སྒྱུ་འཕྲུལ་དྲྭ་བའི་ཟློས་གར་ལ་ཆགས་པའི། །ཟུང་འཇུག་བརྩོན་འགྲུས་ཕ་རོལ་ཕྱིན་པ་ལ་འདུད་དོ། །འཁོར་འདས་གཉིས་སུ་འཛིན་པའི་འཁྲུལ་ཆོས་ཀྱི་ཡོ་ལང་། །གཉིས་མེད་བརྟུལ་ཞུགས་གྲུབ་པའི་ཞགས་པ་
ཡིས་བཟུང་བས། །བདེ་སྟོང་ཕྱག་རྒྱ་ཆེན་པོའི་ངལ་གསོ་ལ་སྦྱར་བའི། །ཞི་གནས་བསམ་གཏན་ཕ་རོལ་ཕྱིན་པ་ལ་འདུད་དོ། །ཀ་དག་གཞི་དབྱིངས་རིག་པ་སྒྲིབ་བྲལ་གྱི་རང་རྩལ། །ལྷུན་གྲུབ་སྐུ་དང་ཡེ་ཤེས་ཕྲིན་ལས་སུ་ཤར་བས། །འཕོ་ཆེན་འཇའ་ལུས་རྡོ་རྗེའི་དགའ་བ་ཡིས་བསྙེམས་པའི། །ལྷག་མཐོང་ཤེས་རབ་ཕ་རོལ་ཕྱིན་པ་ལ་འདུད་དོ། །ཀོ་ཊ་ཁུ་སོགས་སྲོག་རྩོལ་འཇུག་ལྡངས་ཀྱི་རྒྱུ་བ། །ཐབས་ཤེས་ཁ་སྦྱོར་ལམ་གྱིས་གཞོམ་མེད་དུ་དག་པས། །འཆི་མེད་གཉུག་མའི་མཚན་དཔེ་ཡོངས་གྲུབ་ཏུ་ཤར་བའི། །མཐོང་ལམ་ཚེ་ལ་དབང་བའི་རིག་འཛིན་ལ་འདུད་དོ། །དཀར་དམར་ཐིག་ལེ་ལྡོག་ཁྱབ་བསྲེ་བ་ཡི་སྦྱོར་བས། །ཟག་བཅས་བརྟན་པ་འཕྲོག་པའི་བདེ་ཆེན་གྱི་ལང་ཚོས། །སྟོང་ཉིད་ཤེས་རབ་མཛེས་མའི་བཞིན་རས་ལ་འཁྱུད་པའི། །སྒོམ་ལམ་ཕྱག་རྒྱ་ཆེན་པོའི་རིག་འཛིན་ལ་འདུད་དོ། །གཅིག་པུ་མ་ཡིན་ཀུན་ཁྱབ་ལྷན་སྐྱེས་ཀྱི་རྣམ་འགྱུར། །དུ་མར་མི་གནས་བློ་བྲལ་རང་བྱུང་གི་ཡེ་ཤེས། །ཟུང་འཇུག་རྣམ་ཀུན་མཆོག་ལྡན་ཕ་མཐའ་རུ་གཤེགས་པའི། །མཐར་ལམ་ལྷུན་གྱིས་གྲུབ་པའི་རིག་འཛིན་ལ་འདུད་དོ། །དེ་ལྟར་སྐྱབས་ཀུན་འདུས་ཞལ་མཚོ་སྐྱེས་ཀྱི་རྡོ་རྗེར། །སྙིང་ནས་གུས་པའི་གསོལ་འདེབས་ཐོལ་གླུ་རུ་བླངས་པས། །འགྲོ་ཀུན་གདོད་མའི་བཙན་ས་ཟིན་པ་རུ་ཤོག་ཅིག །ཅེས་དུས་གསུམ་ཀུན་མཁྱེན་
ཨོ་རྒྱན་ཆེན་པོའི་ངེས་དོན་གྱི་རྟོགས་པ་བརྗོད་པ་དང་མཐུན་པའི་རྡོ་རྗེའི་ཐོལ་གླུ་འདིའང་། འཇམ་དཔལ་དབྱངས་དངོས་ལྷ་བཙད་པོ་ཁྲི་སྲོང་ལྡེའུ་བཙན་གྱི་ཐུགས་བསྐྱེད་ལས་གྲུབ་པའི་འོག་མིན་དཔལ་གྱི་བསམ་ཡས་སུ་རིག་འཛིན་གྱི་བཙུན་པ་པདྨའི་མིང་གིས་གང་ཤར་གླུར་བླངས་པའི་འཆར་གཞིའོ།། ༈ །།ངེས་པ་དོན་གྱི་རྡོ་རྗེའི་ཐོལ་གླུ་འོད་གསལ་གྲུབ་པའི་རྒྱན་ཅེས་བྱ་བ། ཨ་ལ་ལ་ཧོ། རང་རིག་གཉུག་མ་བསལ་བཞག་བྲལ་བའི་དབྱིངས། །སྐུ་གསུམ་མི་ཕྱེད་དོན་དམ་བདེན་པའི་དངོས། །འོད་གསལ་ཨུ་རྡོ་རྗེ་སྙིང་པོའི་གཤིས་ལུགས་ལ། །ངང་བཞག་ལྷུན་འབྱམས་ངང་ནས་ཕྱག་བགྱིའོ། །ངོ་བོ་རང་བཞིན་ཐུགས་རྗེ་མ་བཅོས་པ། །དཀོན་མཆོག་གསུམ་གྱི་ཞལ་སྐྱིན་བླ་ན་མེད། །དེ་ཕྱིར་སྤང་བླང་རང་སར་གྲོལ་བ་ཡིས། །རྟག་པར་འདུ་འབྲལ་མེད་པར་སྐྱབས་སུ་མཆི། །གང་ཕྱིར་བདག་དང་སེམས་ཅན་མ་དམིགས་པས། །རང་གཞན་གཉིས་སུ་འཛིན་པའི་བློ་ལས་འདས། །དེ་སླད་གནས་ལུགས་རྒྱུན་ཆད་མེད་པའི་ངང་། །ངེས་དོན་རྡོ་རྗེའི་སེམས་མཆོག་བསྐྱེད་པར་བགྱི། །ཟག་མེད་ལེགས་སྤྱད་རྒྱ་མཚོའི་ངོ་བོ་ནི། །འདུས་བྱས་ལས་འདས་སོ་སོར་རྟོག་པའི་གཤིས། །དེ་ལས་འཁྱུད་པའི་བློ་གྲོས་རབ་གསལ་བས། །ཚོགས་གཉིས་འདུམས་པའི་དགའ་བས་ཀུན་ཏུ་མཛེས། །རྣམ་པར་རྟོག་པའི་བགེགས་ཚོགས་མཐའ་ཀླས་ཀུན། །ཤར་གྲོལ་དུས་མཉམ་དོན་གྱི་དཔལ་ཆེན་པོས། །འདའ་དཀའི་ཕྱག་རྒྱ་གཉན་པོས་བཅིངས་
པའི་ཕྱིར། །འོད་གསལ་དབུ་མའི་ཀློང་ལས་འགྲོ་འོང་མེད། །རང་སྣང་ཤིན་ཏུ་རྣམ་པར་དག་པ་ནི། །རྡོ་རྗེའི་འོག་མིན་ཆེན་པོ་ཉིད་ཡིན་ན། །ཐམས་ཅད་ཆོས་ཉིད་གཅིག་གི་རོལ་པ་རུ།ཀུན་བརྟགས་ལས་འདས་སྲུང་འཁོར་གཟོད་ནས་གྲུབ། །ཐོག་མ་མེད་ནས་འཇུག་ལྡང་ལས་འདས་པའི། །ཀ་དག་རྫོགས་པ་ཆེན་པོའི་མཁའ་དབྱིངས་ནས། །ལྷུན་གྲུབ་མངོན་སུམ་སྣང་བ་རྣམ་པ་བཞིས། །མ་ལུས་ཆམ་ཆམས་གཅིག་ཏུ་བྱིན་དབབ་བོ། །ཚོགས་དྲུག་སྣང་བའི་འགྲོ་འོང་མ་ལུས་པ། །གཏད་མེད་སྒྱུ་མའི་དཔའ་བོར་ཕྱག་བྱས་པས། །ལུས་སེམས་བཀོད་པ་མཛེས་པའི་མཆོད་སྤྲིན་ཆེ། །བདེ་སྟོང་ཟུང་འཇུག་ཆེན་པོར་བྱིན་གྱིས་བརླབས། །ཤིན་ཏུ་རྣམ་དག་དེ་བཞིན་ཉིད་དབྱིངས་ལས། །འགགས་མེད་ཀུན་སྣང་སྙིང་རྗེའི་རྒྱུ་རུ་ཤར། །སྣང་སྟོང་སྒྱུ་འཕྲུལ་དྲྭ་བའི་དཀྱིལ་འཁོར་ལྷ། །མ་བསྐྱེད་ཡེ་རྫོགས་བསྐྱེད་རིམ་ངང་གིས་གྲུབ། །སྣང་གྲགས་རིགས་གསུམ་གདོད་ནས་བདེ་གཤེགས་ཀྱི། །སྐུ་གསུང་ཐུགས་ཀྱི་ཕྱག་རྒྱའི་རྒྱས་བཏབ་ཅིང་། །དབྱིངས་དང་རིག་པ་ཡེ་ཤེས་གཉིས་མེད་ལྷས། །འཁོར་འདས་ཀུན་ཁྱབ་ཆེན་པོར་དབང་བསྐུར་རོ། །གཞི་གྲོལ་ཆོས་སྐུའི་ངང་ལས་མ་གཡོས་ཀྱང་། །གཞི་སྣང་ལོངས་སྤྱོད་རྫོགས་སྐུའི་དཀྱིལ་འཁོར་ལྷ། །གཞི་གནས་འཕོ་འགྱུར་མེད་པའི་བརྟུལ་ཞུགས་ཀྱིས། །གཞི་དབྱིངས་རིག་སྟོང་
སྒྱུ་མར་སྤྱན་འདྲེན་ནོ། །ཇི་ལྟར་ཆུ་ལ་ཆུ་བུར་ཐིམ་པ་ལྟར། །དམ་ཚིག་སེམས་དཔའ་བདེ་གཤེགས་སྙིང་པོའི་གྲོང་། །ཡེ་ཤེས་སྒྲིབ་བྲལ་སེམས་དཔའི་ཐིག་ལེ་ཆེ། །ཁྱབ་ཅིང་རྟག་པའི་ཚུལ་གྱིས་བཞུགས་སུ་གསོལ། །ཚོགས་བརྒྱད་འཁྲུལ་པའི་རྟོག་ཚོགས་དབྱིངས་དེངས་པས། །ལྷན་སྐྱེས་ཉི་མ་འབར་བའི་ལང་ཚོ་ཡིས། །གློ་བུར་འཁྲུལ་པའི་དྲྭ་བ་ཀུན་ཟོས་ཕྱིར། །གཉིས་མེད་འདྲེས་པའི་ཕྱག་གིས་རྟག་ཏུ་བསྙེན། །དབང་ཡུལ་སྒྱུ་མར་ཞིག་པ་ཕྱིའི་མཆོད་སྤྲིན། །ཨེ་ཝཾ་མཉམ་སྦྱོར་སྨན་རག་གཏོར་མ་ནང་། །གསང་བ་བདེ་སྟོང་སྦྱོར་སྒྲོལ་རྨད་བྱུང་སྟེ། །ཡང་གསང་བྱང་ཆུབ་སེམས་ཀྱིས་དགྱེས་པ་བསྐྱེད། །རིག་སྟོང་སེམས་ཉིད་རྡོ་རྗེའི་རང་བཞིན་ལ། །བྲལ་སྨིན་ཡོན་ཏན་རྒྱ་མཚོ་ངང་གིས་གནས། །དེ་ཕྱིར་མཉམ་པར་མ་བཞག་མེད་པ་ཡི། །བསྟོད་དབྱངས་ཡན་ལག་རྒྱ་མཚོས་བསྟོད་པར་བགྱི། །འགྲོ་འོང་སྲོག་དང་རྩོལ་བའི་རྒྱུ་བ་ཀུན། །ཁ་སྦྱོར་རྡོ་རྗེའི་ལམ་གྱིས་གཅིངས་པ་ལས། །མི་ཤིགས་ནཱ་དར་དེངས་པའི་གླུ་དབྱངས་ཀྱིས། །ཟབ་གསང་བཟླས་པའི་འཕྲོ་འདུ་རྒྱུན་ཆད་མེད། །བདེ་སྟོང་འབར་འཛག་དགའ་བཞིའི་མཆོད་སྤྲིན་སྤྲོ། །གང་ཤར་རྟོག་པའི་མདུད་པ་ཕྲ་སར་བཅད། །དེ་ཡང་རང་རིག་གཅིག་པུར་རོ་མཉམ་པའི། །ཟག་མེད་ཚོགས་ཀྱི་འཁོར་ལོ་བསྐོར་བར་བྱ། །ཕུང་པོ་ལྔ་ཡི་དྭངས་མ་འཛག་མེད་འཆིང་། །དུག་ལྔའི་
འཁྲུལ་པ་སྐུ་བཞིའི་དྲྭ་བར་བསྡམས། །རླུང་སེམས་ཨ་ཝ་དྷཱ་ཏཱིར་གཞུག་པ་ཡི། །གཏོར་མའི་རྣལ་འབྱོར་ལྡན་པས་བར་ཆད་བསལ། །ཐོག་མ་ཉིད་ནས་སྐྱེ་བ་མ་དམིགས་ན། །གང་དུ་འགགས་པའི་ཕ་མཐར་སུ་ཡིས་དྲངས། །དེ་སླད་ཁམས་གསུམ་ལས་འདས་ཡེ་ཤེསཾ་ཀྱིས། །རྟེན་ཅིང་འབྲེལ་བར་འབྱུང་བར་རབ་ཏུ་གནས། །རླུང་སེམས་གཞན་དབང་ལ་ཆགས་བར་དོའི་ཡིད། །ཤར་གྲོལ་དུས་མཉམ་ངང་དུ་དབུགས་འབྱིན་ཅིང་། །ཐར་པ་ཆེན་པོའི་གྲོང་དུ་ཉེར་བཀྲི་བ། །གནས་ལུང་སྟོང་ཉིད་སྙིང་རྗེའི་ཕོ་ཉ་ཡིན། །ཀུན་གཞི་རང་བྱུང་ཀློང་ཡངས་ཐབ་ཁུང་དུ། །གཉུག་མ་བསམ་བརྗོད་བྲལ་བའི་ཡེ་ཤེས་མེར། །སེམས་དང་སེམས་བྱུང་སྒྲོ་བརྟགས་ཀུན་བསྟིམས་ཏེ། །གཟུང་འཛིན་དབུ་མར་ཞིག་པའི་བསྲེག་བླུགས་བྱ། །སྒོ་གསུམ་བྱེད་པ་ཨེ་ཝཾ་མཱ་ཡཱའི་དབྱིངས། །འགྱུར་བ་མེད་པར་བསྡམས་པའི་དེ་མ་ཐག །རང་སྣང་དག་པ་རབ་འབྱམས་ཆེན་པོ་རུ། །བདག་ཉིད་འཇུག་པའི་དབང་བཞི་བླང་བར་བརྩོན། །ངོ་བོ་ཀ་ནས་དག་པའི་ཕོ་བྲང་ནས། །རང་བཞིན་ལྷུན་གྲུབ་སྣང་བཞིའི་རྩ་གསུམ་ལྷ། །ཐུགས་ཚུ རྗེ་སྒོ་ཡུལ་རླུང་རིག་གནད་གཅུན་ནས། །ཆོས་ཟད་བློ་འདས་དོན་གྱི་ཕྲིན་ལས་བཅོལ། །རྟོག་གཉིས་ཞེན་པའི་དྲེགས་ཚོགས་མཐའ་ཀླས་ཀུན། །རྟོག་བྲལ་འདོད་འབྱུང་གཏོར་མས་ཚིམ་བྱས་ཏེ། །རྟོག་ཚོགས་
རང་གྲོལ་དཔལ་ཆེན་ཧེ་རུ་ཀས། །རྟོག་མེད་ཆད་མདོའི་དམ་ཚིག་གཉན་པོ་བསྒྲག །ཁ་སྦྱོར་བཅུ་གཉིས་གྲོང་དུ་གནས་བཅས་པའི། །འཕོ་ཆེན་བཅུ་གཉིས་གནས་སུ་དག་པའི་གཟུགས། །བོད་སྐྱོང་བརྟན་མ་བཅུ་གཉིས་འཁོར་བཅས་ལ། །ལུགས་འབྱུང་བཅུ་གཉིས་དག་པའི་བཤལ་ཆུས་མཆོད། །རྣམ་ཐར་གསུམ་དང་ལྡན་པའི་ཨེ་ཀློང་དུ། །དུག་གསུམ་རྒྱུ་འབྲས་ཆོས་ཀུན་རྒྱས་བཏབ་སྟེ། །ངོ་བོ་རང་བཞིན་ཐུགས་རྗེའི་བྲོ་བརྡུངས་པས། །རང་རིག་སྐུ་གསུམ་དགོངས་པ་འདུ་འབྲལ་མེད། །སྐྱེ་གནས་རྣམ་བཞིའི་བག་ཆགས་ལྷ་སྐུར་དག །ཐིག་ལེ་རྣམ་བཞི་དགའ་བཞིའི་སྤྲིན་དུ་རྫོགས། །གནས་སྐབས་རྣམ་བཞི་འོད་གསལ་དབྱིངས་སྨིན་པའི། །མཆོག་ཐུན་ཕྲིན་ལས་རྣམ་བཞིའི་དངོས་གྲུབ་བླང་། །མ་བཅིངས་མ་གྲོལ་རང་བབས་གནས་ཚུལ་ལ། །གློ་བུར་འཁྲུལ་བའི་དྲི་མ་ལས་འདས་ཕྱིར། །འགྲོ་འོང་མེད་པའི་ངང་དུ་མཐོལ་བཤགས་པས། །ཚངས་པ་མཆོག་གི་ས་ལ་མྱུར་དུ་རེག །སེམས་ཅན་ཀུན་གྱི་སྲོག་ཀྱང་ཡེ་ཤེས་སེམས། །སངས་རྒྱས་ཀུན་གྱི་ཐུགས་ཀྱང་ཡེ་ཤེས་སེམས། །སེམས་ཉིད་ཐིག་ལེ་གཅིག་ཏུ་བསྡུ་བ་ལས། །གསལ་སྣང་ལྷ་སྔགས་ཆོས་སྐུའི་དྲྭ་བར་ཤར། །དེ་ལྟའི་བླ་མེད་ཡེ་ཤེས་ཆེན་པོའི་རྒྱུན། །རང་ལས་བྱུང་ཞིང་རང་སར་བསྔོས་པའི་མཐུས། །སོ་མ་རང་གྲོལ་ངང་བཞག་ལྷུན་འབྱམས་ཀློང་། །འགྲོ་ཀུན་ཕྱམ་
གཅིག་སངས་རྒྱས་སྨོན་ལམ་གདབ། །ཚོགས་གཉིས་བསགས་ཕྱིར་གོང་མའི་ལམ་སྦྱོར་ཕྱིར། །ཆོས་ཉིད་བདེན་པ་མངོན་མཐོང་དེ་བསྒོམ་པས། །མི་སློབ་གོ་འཕང་འཐོབ་པའི་བཀྲ་ཤིས་ཀྱིས། །རྒྱུ་དང་མི་རྒྱུའི་དངོས་ཀུན་ཤིས་པར་བྱ། །དེ་ལྟར་ངེས་དོན་ཆོ་གའི་རྡོ་རྗེའི་གླུ། །འོད་གསལ་གྲུབ་པའི་དཔའ་བོའི་རྣ་རྒྱན་དུ། །གཏད་མེད་རྣལ་འབྱོར་གཞོན་ནུའི་མགྲིན་པ་ནས། །ས་ལ་སྤྱོད་པའི་འོག་མིན་ཆེན་པོར་བླངས། །ཞེས་པའང་གཏད་སོ་བྲལ་བའི་རིག་གདངས་ལས་ཇི་ལྟར་ཤར་བ་བཞིན་དཔལ་ས་ལ་སྤྱོད་པའི་འོག་མིན་བསམ་འགྲུབ་ཤེལ་གྱི་བྲག་ཕུག་གི་འདབས་རོལ་དུ་དམར་ཕྱོགས་མཁའ་འགྲོ་འདུ་བའི་དུས་ཚེས་དགེ་བར་ཡི་གེའི་གཟུགས་སུ་བྱས་པ་གུ་ཧུ།། །། འོད་གསལ་རྡོ་རྗེ་སྙིང་པོའི་ཤིང་རྟ་པ་ཆེན་པོ་ཀུན་མཁྱེན་གཉིས་པའི་ཞབས་ལ་གསོལ་བ་འདེབས་པ་རྡོ་རྗེའི་ཐོལ་གླུ་གྲུབ་གཉིས་རྣ་རྒྱན་ཅེས་བྱ་བ། ཨ་ཧོ། གཅིག་པུ་མ་ཡིན་འཁོར་འདས་བསྟན་གཡོ་ཀུན་ཁྱབ་ཅིང་། །དུ་མར་མི་གནས་བློ་བྲལ་རང་བྱུང་གི་གཤིས་ལུགས། །ཐིམ་ལ་མ་རྨུགས་ནང་གསལ་ཀ་དག་གི་བདག་ཉིད། །ངོ་བོ་ཆོས་སྐུ་ཁྱབ་བདག་ཀུན་མཁྱེན་གྱི་བླ་མར། །གཞི་གྲོལ་རིག་པའི་ངང་ནས་གསོལ་བ་ཞིག་འདེབས་སོ། །ཤིན་ཏུ་རྣམ་པར་གྲོལ་བའི་བདེ་སྟོང་གི་ཡེ་ཤེས། །ཟག་བྲལ་བཞིན་ལག་མཚན་དཔེའི་སྣང་ཆ་རུ་ཤར་བའི། །ཁ་སྦྱོར་ཡན་ལག་བདུན་ལྡན་ཕྱིར་གསལ་གྱི་རོལ་མོ། །རང་བཞིན་ལོངས་སྐུ་ཁྱབ་བདག་ཀུན་མཁྱེན་གྱི་
བླ་མར། །ཟུང་འཇུག་དགའ་བཞིའི་ངང་ནས་གསོལ་བ་ཞིག་འདེབས་སོ། །འགྲོ་འོང་རྟོག་པའི་མཚན་མ་རང་གྲོལ་དུ་ཞིག་ཀྱང་། །གཞན་ཕན་སྙིང་རྗེ་ཆེན་པོའི་ཐབས་མཁས་ལ་སྦྱར་བས། །སྣ་ཚོགས་སྒྱུ་འཕྲུལ་དྲྭ་བའི་ཟློས་གར་ལ་རྩེན་པའི། །ཐུགས་རྗེ་སྤྲུལ་སྐུ་ཁྱབ་བདག་ཀུན་མཁྱེན་གྱི་བླ་མར། །མི་ཕྱེད་གུས་པའི་ངང་ནས་གསོལ་བ་ཞིག་འདེབས་སོ། །ཆོས་དང་ཆོས་ཅན་རོ་གཅིག་གདོད་མ་ཡི་དབྱིངས་སུ། །སྒྲིབ་གཉིས་གློ་བུར་རྟོག་པའི་འཇུག་ལྡང་ཀུན་ཟད་པས། །སྐུ་གསུམ་དབྱེར་མེད་མི་ཕྱེད་འོད་གསལ་གྱི་ཐིག་ལེ། །ངོ་བོ་ཉིད་སྐུ་ཁྱབ་བདག་ཀུན་མཁྱེན་གྱི་བླ་མར། །མངོན་སུམ་ལྷུག་པའི་ངང་ནས་གུས་ཕྱག་ཞིག་འཚལ་ལོ། །ཨ་ཧོ། སྐྱེ་གནས་རྣམ་བཞིའི་འདྲ་འབག་བསྐྱེད་རིམ་གྱི་ཐབས་མཁས། །གཡོ་ཐོབ་གོམས་བརྟན་མཐར་ཕྱིན་ཕ་རོལ་དུ་སོན་པས། །ཐ་མལ་འཁྲུལ་པའི་རྒྱུ་བ་ལྷ་སྐུ་རུ་བསྡམས་པའི། །བུམ་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །མཐའ་མེད་འཁོར་བར་འཆིང་བའི་རླུང་སེམས་ཀྱི་གར་མཁན། །འོད་གསལ་ཨ་ཝ་དྷུ་ཏིའི་ཁྲི་མུན་དུ་བཅུག་པས། །གསལ་སྟོང་བསམ་མི་ཁྱབ་པའི་ཡེ་ཤེས་ལ་སྦྱོར་བའི། །གསང་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །ལུགས་འབྱུང་དགའ་བ་རྣམ་བཞིའི་ཕོ་ཉ་ཡི་རྣམ་འགྱུར། །ལུགས་ལྡོག་ཛ་ལནྡྷ་རའི་གྲོང་ཁྱེར་དུ་སོན་པས། །
སེམས་དང་སེམས་བྱུང་འཇུག་པ་བདེ་སྟོང་དུ་ནུབ་པའི། །ཤེར་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །སྐྱེ་འགགས་གནས་གསུམ་བྲལ་བ་དོན་དམ་གྱི་བདེན་པ། །བསམ་གྱིས་མི་ཁྱབ་བརྗོད་བྲལ་རང་བྱུང་དུ་མཐོང་བས། །གཟུང་འཛིན་སྤྲོས་པའི་འཆིང་བ་བཙན་ཐབས་སུ་ཞིག་པའི། །ཚིག་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག །མངོན་སུམ་རིག་པ་མཐོང་ཞིང་གོམས་པ་ལ་འཆེལ་བས། །ཉམས་སྣང་གོང་འཕེལ་ཚད་ཕེབས་ངལ་གསོ་ལ་སྦྱར་ཏེ། །ཆོས་ཉིད་ཟད་པའི་ཀློང་དུ་འཁོར་འདས་ཀུན་གྲོལ་བའི། །རྩལ་དབང་གྲུབ་མཐའ་སྙོགས་པར་བྱིན་གྱིས་རང་རློབས་ཤིག ། གལ་ཏེ་གྲུབ་པའི་གསང་ལམ་མ་སྙོགས་སུ་ཟིན་ན། །ནམ་ཞིག་འཕོས་ཚེ་མཁའ་སྤྱོད་ཌཱ་ཀི་ཡི་གྲོང་ཁྱེར། །འོག་མིན་པདྨ་དྲྭ་བའི་དགའ་ཚལ་དུ་རྩེན་ནས། །ས་ལམ་གཅིག་ཆར་རྫོགས་པར་བྱིན་གྱིས་རང་རློབས་ཤིག །དེ་སྐད་གང་ཤར་རང་གྲོལ་གྲགས་སྟོང་གི་གླུ་དབྱངས། །རིག་འཛིན་བླ་མ་དགྱེས་པའི་མཆོད་སྤྲིན་དུ་སྤྲོས་པས། །སྐྱེ་བའི་ཕྲེང་བ་ཀུན་ཏུ་ངེས་དོན་གྱི་ཐེག་མཆོག །འོད་གསལ་རྫོགས་ཆེན་སྒོམ་པའི་སྨོན་ལམ་ཞིག་ཞུའོ། །ཞེས་པའང་གྲུབ་པ་མཆོག་གི་བསྟི་གནས་དཔལ་ལྡན་པདྨ་འོད་གླིང་ཐེག་མཆོག་གླིང་གི་དྲི་གཙང་ཁང་དུ་ཚོགས་ཀྱི་འཁོར་ལོའི་མཆོད་པ་འདུ་བགྱིས་པའི་རྗེས་ཐོག་ཏུ་སྨྲས་པའི་དྷཱནྟ།། ༈ །།རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོའི་དོན་གྱི་རྣམ་
པར་ཐར་པ་ལ་བསྟོད་པའི་རྡོ་རྗེའི་ཐོལ་ཀླུ་ཡེ་ཤེས་དྲྭ་བའི་རྒྱན་ཅེས་བྱ་བ། ཨེ་མ་ཧོ། གཟོད་ནས་འགྱུར་བ་མེད་པའི་དངོས། །བདེ་ཆེན་གྲུབ་པའི་ཐིག་ལེ་ཅན། །ཁྱབ་བདག་རྡོ་རྗེ་སེམས་དཔའ་ལ། །གཉིས་སུ་མེད་པའི་ཕྱག་གིས་འདུད། །ཉེ་བར་སྦས་པའི་ཙཎྜ་ལཱིས། །བྱང་ཆུབ་སེམས་མཆོག་བཞུ་བའི་དཔྱིད། །རྟག་པ་དམ་པར་འཇོ་མཛད་པ། །སྦྱིན་པའི་ཕ་རོལ་ཕྱིན་ལ་འདུད། །ཟུང་འཇུག་གྲུབ་པའི་ཐབས་མཁས་ཀྱིས། །ཆར་ཡང་གཙུག་ཏོར་རྩེར་བཅིངས་པས། །འཕོ་འཛག་སྤྲོས་པ་རིང་བཅད་པ། །ཚུལ་ཁྲིམས་ཕ་རོལ་ཕྱིན་ལ་འདུད། །སྲོག་དང་རྩོལ་བའི་འཇུག་ལྡང་ཀུན། །ཨ་བ་དྷུ་ཏིར་རྒྱས་བཏབ་པས། །གཟུང་འཛིན་མཚན་མ་རང་གྲོལ་བ། །བཟོད་པའི་ཕ་རོལ་ཕྱིན་ལ་འདུད། །ཕྲ་མོའི་རྩ་ཡི་རྒྱུ་བ་ཡང་། །སྒྲ་གཅན་ཁམས་སུ་ཉེར་དག་པས། །འབད་པ་ཆེན་པོས་རབ་འཇུག་པ། །བརྩོན་འགྲུས་ཕ་རོལ་ཕྱིན་ལ་འདུད། །དངོས་ཡིད་ཕྱག་རྒྱ་ལ་སྦྱར་བའི། །བདེ་རླུང་སེམས་གསུམ་རོ་གཅིག་པས། །རྣམ་པར་རྟོག་པ་འཆིང་མཛད་པ། །བསམ་གཏན་ཕ་རོལ་ཕྱིན་ལ་འདུད། །ཀ་དག་འོད་གསལ་གཉུག་མའི་གཤིས། །ལྷུན་གྲུབ་ཕྲ་བའི་སྐུར་སྨིན་པས། །འཁོར་འདས་ཀུན་གྱི་ཁྱབ་བདག་ཆེ། །ཤེས་རབ་ཕ་རོལ་ཕྱིན་ལ་འདུད། །ཟག་པ་མེད་པའི་ཚོགས་གཉིས་ལམ། །དབུ་མའི་སྦུབས་སུ་རྫོགས་པ་ཡིས། །ཟག་པའི་ཆ་བཅས་མཐའ་
དག་ཀུན། །ཡོངས་སུ་བྱང་བདེ་ཁྱོད་ལ་འདུད། །གང་དུ་སྣང་བའི་བདེན་བདེན་ཀུན། །སྒྱུ་མའི་ལྷ་སྐུར་རྒྱས་བཏབ་པས། །འོད་གསལ་མཆོག་ལ་སྦྱོར་བའི་ལམ། །རྣམ་སྨིན་རིག་འཛིན་ཁྱོད་ལ་འདུད། །བསམ་གྱིས་མི་ཁྱབ་བརྗོད་དུ་མེད། །འཇུག་དང་ལྡང་བ་ཡོངས་སུ་སྤངས། །གཟོད་མའི་བཞུགས་ཚུལ་མཐོང་བའི་ལམ། །ཚེ་དབང་རིག་འཛིན་ཁྱོད་ལ་འདུད། །གང་ཤར་རྟོག་པ་རྒྱུ་དང་བཅས། །ངང་བཞག་ཆེན་པོར་སྒོམ་པའི་ལམ། །ཆོས་དང་ཆོས་ཅན་རོ་གཅིག་པའི། །ཕྱག་རྒྱ་ཆེན་པོ་ཁྱོད་ལ་འདུད། །ལམ་བདེན་བྲལ་བྱ་ཐམས་ཅད་ཀུན། །འགོག་བདེན་བྲལ་འབྲས་ཆོས་སྐུར་དག །མི་སློབ་ལམ་ཀྱི་འབྲས་བུ་ཅན། །ལྷུན་གྲུབ་རིག་འཛིན་ཁྱོད་ལ་འདུད། །ལྷན་སྐྱེས་གྲུབ་པས་རབ་དགའ་བ། །གློ་བུར་དྲི་མ་མེད་པའི་དཔྱིད། །ཉོན་མོངས་བུད་ཤིང་སྲེག་པ་ཡི། །འོད་གསལ་འདུ་བྱེད་ལྡན་ལ་འདུད། །སྲོག་རྩོལ་དག་པའི་འོད་འཕྲོ་ཞིང་། །རྡོ་རྗེའི་སྐུ་མཆོག་སྦྱང་དཀའ་བ། །བདེ་སྟོང་གྲུབ་པའི་བརྟུལ་ཞུགས་ཀྱིས། །མངོན་དུ་གྱུར་པ་ཁྱོད་ལ་འདུད། །སྲིད་དང་ཞི་ལས་རིང་དུ་སོང་། །ཉོན་མོངས་རྐྱེན་གྱིས་གཡོ་བ་མེད། །སོ་སོར་རྟོག་པའི་ཤེས་རབ་ཀྱིས། །ལེགས་པའི་བློ་གྲོས་ཐོབ་ལ་འདུད། །ཆོས་ཁམས་མི་ཤིགས་ནཱ་དའི་སྤྲིན། །པདྨ་ཅན་གྱི་སར་སྤྲོ་ཞིང་། །རིགས་ཀྱི་འཁོར་ལོ་མཐའ་ཡས་ཚོགས། །
འདུས་པ་ཆེན་པོ་ཁྱོད་ལ་འདུད། །འགྱུར་མེད་རྟག་པའི་རྡོ་རྗེ་ཡིས། །ཕྲ་མོའི་ས་བོན་ཡོངས་བཅོམ་སྟེ། །སྐུ་བཞིའི་རྒྱལ་ས་འཛིན་མཁས་པ། །ཧེ་རུ་ཀ་དཔལ་ཁྱོད་ལ་འདུད། །དེ་ལྟར་ཕ་རོལ་ཕྱིན་པའི་སྤྱོད་པ་ལམ་ལྔ་ས་བཅུའི་གཙུག་ཏོར་ཅན། །རྡོ་རྗེ་ཐེག་པའི་ལམ་གྱིས་བགྲོད་པས་གྲུབ་པའི་འཁྲི་ཤིང་གཅིག་པུ་ཁྱོད། །གང་ཤར་བསྔགས་པའི་རྡོ་རྗེའི་གླུ་འདིར་མོས་དང་ཡིད་ལ་བྱེད་པ་ཀུན། །འགྱུར་མེད་བདེ་ཆེན་རྡོ་རྗེའི་དགའ་བས་མི་ཕྱེད་སྙིང་ལ་འཁྱུད་པར་ཤོག །ཅེས་རིགས་དང་དཀྱིལ་འཁོར་ཀུན་གྱི་དེ་ཁོ་ན་ཉིད་རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པའི་ཐུན་མོང་མ་ཡིན་པའི་རྣམ་པར་ཐར་པ་ལ་བསྔགས་པའི་རྡོ་རྗེའི་ཐོལ་གླུ་ཡེ་ཤེས་དྲྭ་བའི་རྒྱན་ཅེས་བྱ་བ་འདི་ཡང་མགོན་པོ་གང་གི་རིན་པོ་ཆེའི་མཆོད་སྡོང་ཆེན་པོའི་མདུན་སར་ཕྱི་ནང་གི་ཚོགས་ཀྱི་མཆོད་པའི་འདུ་བ་འདུ་བགྱིས་པའི་རྗེས་ཐོག་ཏུ་གསོལ་བ་བཏབ་པ་སིདྡྷི་རསྟུ།། ༈ །།ཌཱ་ཀི་མཚོ་རྒྱལ་ལ་བསྟོད་པའི་རྡོ་རྗེའི་ཐོལ་གླུ་ཕྱིན་དྲུག་ནཱ་དའི་སྒྲ་དབྱངས་ཅེས་བྱ་བ། ཨེ་མ་ཧོ། གཙུག་ཏོར་བདེ་ཆེན་ཟླ་བ་བཞུ་བའི་རྒྱུན། །འོད་གསལ་དྷཱ་ཏཱིར་རྟག་ཏུ་འཇོ་བ་ཡིས། །འབར་འཛག་བདེ་བའི་ཉམས་བརྒྱས་སྒེག་པ་པོ། །སྦྱིན་པའི་ཕ་རོལ་ཕྱིན་མ་ཁྱོད་ལ་འདུད། །ལུགས་འབྱུང་དགའ་བ་རྣམ་བཞིའི་འཕོ་ཆགས་རྒྱུན། །ལུགས་ལྡོག་ཛ་ལནར་ར་བཅིངས་བ་ལས། །ཆར་ཡང་ཟག་པ་བྲལ་བས་བརྟུལ་ཞུགས་ཅན། །ཚུལ་ཁྲིམས་ཕ་རོལ་ཕྱིན་མ་ཁྱེད་ལ་འདུད། །གང་དུ་རླུང་
སེམས་འཇུག་པ་ཆ་དང་བཅས། །ཉེ་བར་ཞི་བའི་དབྱིངས་སུ་རོ་གཅིག་པས། །གཟུང་འཛིན་ཡུལ་གྱིས་བརྫི་བར་མི་ནུས་པའི། །བཟོད་པའི་ཕ་རོལ་ཕྱིན་མ་ཁྱོད་ལ་འདུད། །དཔྱིད་དང་ཐིག་ལེ་མཉམ་པར་སྦྱོར་བ་ཡི། །མི་ཤིགས་མཁའ་ཁྱབ་མཁའ་ཡི་རྡོ་རྗེ་ལ། །བསལ་བཞག་བྲལ་བའི་དགའ་བས་རྟག་བསྙེན་པའི། །བརྩོན་འགྲུས་ཕ་རོལ་ཕྱིན་མ་ཁྱོད་ལ་འདུད། །ཀ་དག་སེམས་ཉིད་གཉུག་མའི་ངོ་བོ་རུ། །ལྷུན་གྲུབ་སེམས་བྱུང་མཐའ་ཀླས་ཐིམ་པ་ལས། གཡོ་མེད་ཏིང་འཛིན་དག་པའི་རོས་མྱོས་པའི། །བསམ་གཏན་ཕ་རོལ་ཕྱིན་མ་ཁྱོད་ལ་འདུད། །ཨེ་ཝཾ་གཉིས་སུ་མེད་པའི་ཕྱག་རྒྱ་ཆེ། །མཐའ་བྲལ་དབུ་མའི་དགོངས་པ་ལེགས་ཤར་གང་། །དོན་དམ་འགོགས་བདེན་རྫོགས་པ་ཆེན་པོའི་ཞལ། །ཤེས་རབ་ཕ་རོལ་ཕྱིན་མ་ཁྱོད་ལ་འདུད། །མདོར་ན་དུས་གསུམ་རྒྱལ་བ་སྲས་བཅས་ཀྱི། །འབྱུང་གནས་རྡོ་རྗེ་བཙུན་མོའི་སྒྱུ་མ་ལ། །ཕྱིན་དྲུག་ལང་ཚོས་སྒེག་པའི་གླུ་དབྱངས་ཀྱིས། །རྟག་པ་རྒྱུན་གྱི་འཁོར་ལོར་བསྟོད་པར་བགྱི། །གཟུགས་སྣང་གདན་གསུམ་སྒྱུ་འཕྲུལ་དྲྭ་བར་དག །སྒྲར་གྲགས་མི་ཤིགས་ནཱ་དའི་ངོ་བོར་རྫོགས། །རྟོག་ཚོགས་མཐའ་གྲོལ་ཆོས་སྐུར་སྨིན་པ་ཡིས། །འགྲོ་ཀུན་གདོད་མའི་ས་ལ་ཕྱིན་པར་ཤོག །ཅེས་པའང་བསྒྲགས་མདའ་མཚོ་རྒྱལ་བླ་མཚོར་ཚོགས་ཀྱི་མཆོད་པ་སྟོང་ཕྲག་ཐལ་བ་འདུ་བགྱིས་པའི་ཚེ་སྣང་གསལ་ཆུང་ངུ་ཞིག་
གི་ངོགས་སུ་ཤར་མར་སྤེལ་པ་པོ་ནི་རྒྱལ་ཁམས་ཉུལ་བའི་དཱ་རི་དྭ་པདྨ་དགྱེས་པའི་ལང་ཚོའོ།། ༈ །།གྲུབ་པའི་དབང་ཕྱུག་བརྩོན་འགྲུས་བཟང་པོའི་ནང་གི་རྣམ་པར་ཐར་པ་ལ་བསྔགས་པ་རྡོ་རྗེའི་ཐོལ་གླུ་རིག་པ་འཛིན་པའི་མེ་ཏོག་ཅེས་བྱ་བ། ཨ་ཧོ། སྲིད་གསུམ་དུས་གཅིག་ཟ་བའི་ཙཎྜ་ལཱིར། །ཧཾ་ཡིག་བདུད་རྩིའི་བགོ་བཤར་སྦྱིན་པ་ཡིས། །འབར་འཛག་དབུ་མར་ཐིམ་པའི་ཡེ་ཤེས་སྐུ། །བདེ་སྟོང་གཏུམ་མོའི་ཕ་རོལ་ཕྱིན་ལ་འདུད། །དཀར་དམར་ཐིག་ལེའི་འཕྲོས་འདེད་ལ་གོམས་པས། །འཕོ་མེད་དགའ་བས་ཚིམ་པའི་ཚུལ་ཁྲིམས་ཀྱིས། །ཉིང་འཁྲུལ་རང་སར་དག་པའི་ནཱ་དའི་གསུང་། །གསལ་སྟོང་རྨི་ལམ་ཕ་རོལ་ཕྱིན་ལ་འདུད། །རབ་ཞི་སྐྱེ་མེད་བདུད་རྩིའི་རླབས་འཐུངས་པས། །ཟབ་མོའི་དོན་ལ་བཟོད་པའི་པདྨོ་ནི། །དྲི་བྲལ་མཚར་སྡུག་རྫོགས་པའི་རྡོ་རྗེའི་ཐུགས། །རིག་སྟོང་འོད་གསལ་ཕ་རོལ་ཕྱིན་ལ་འདུད། །ཆོས་ཀུན་བདེན་མེད་གོམས་པའི་བློ་གྲོས་དང་། །གཅིག་ཏུ་མཛའ་བའི་བརྩོན་འགྲུས་བརྩམས་པ་ཡིས། །ཉེ་འཁོན་ལས་འདས་ལྷུན་གྲུབ་ཡོན་ཏན་དཔྱིད། །སྣང་སྟོང་སྒྱུ་ལུས་ཕ་རོལ་ཕྱིན་ལ་འདུད། །དོན་དམ་འགྲོ་འོང་སྲེད་ལེན་མ་གྲུབ་ཀྱང་། །ཀུན་རྫོབ་སྲོག་རྩོལ་སྦྱོར་བའི་བསམ་གཏན་གྱིས། །འཕྱུགས་མེད་མཁའ་སྤྱོད་གྲུབ་པའི་ཕྲིན་ལས་ཅན། །ཚོར་སྟོང་འཕོ་བའི་ཕ་རོལ་ཕྱིན་ལ་འདུད། །བར་སྲིད་འཁྲུལ་པའི་སྣང་ཆ་ཇི་སྙེད་ཀུན། །ལྷ་སྔགས་ཆོས་སྐུར་རྟོགས་པའི་
ཤེས་རབ་ཀྱིས། །ཟུང་འཇུག་ལོངས་སྤྱོད་རྫོགས་སྐུར་ལྡང་ནུས་པའི། །མྱོང་སྟོང་བར་དོའི་ཕ་རོལ་ཕྱིན་ལ་འདུད། །མདོར་ན་ངེས་དོན་ཕ་རོལ་ཕྱིན་དྲུག་དང་། །དབྱེར་མེད་རྡོ་རྗེའི་ཆོས་དྲུག་ལ་གོམས་པས། །སྐུ་གསུང་ཐུགས་ཡོན་ཕྲིན་ལས་མི་ཟད་པ། །རྟག་པ་དམ་པའི་ཕ་རོལ་ཕྱིན་ལ་འདུད། །དེ་ལྟར་གུས་པའི་ཉི་གཞོན་བཅུད་གཡོ་བས། །རིག་འཛིན་དགྱེས་པའི་ཚིག་སྦྱོར་ཨུཏྤལ། །འཛུམ་བཅས་རོལ་འདིས་མགོན་པོ་ཁྱོད་ཉིད་དང་། །དབྱེར་མེད་གྲུབ་པའི་རྣམ་ཐར་འཛིན་པར་ཤོག །ཅེས་བསིལ་ལྗོངས་གྲུབ་རིགས་རྒྱ་མཚོའི་ཁྱུ་མཆོག་པདྨའི་རྣམ་འཕྲུལ་ཐང་སྟོང་པའི་ནང་གི་རྣམ་པར་ཐར་པ་ལ་ཡེ་ཤེས་ཌཱ་ཀི་ནི་གུ་མས་བཀྲལ་བའི་རྡོ་རྗེའི་ཆོས་དྲུག་གི་སྒོ་ནས་བསྔགས་པའི་གླུ་དབྱངས་འདིའང་། རྗེ་དེ་ཉིད་ཀྱིས་བྱིན་གྱིས་བརླབས་པའི་གནས་ཤྲཱི་ཛ་ལ་སརྦ་ཏའི་ལྕགས་ཟམ་དང་ཉེ་བའི་གནས་ལོ་ཧེ་ཏའི་ཕུང་པོ་དལ་གྱིས་འབབས་པ་རྐང་འཐུང་གི་ལང་ཚོས་བཀྲ་བའི་གཟིངས་ཀྱི་འཁྲུལ་འཁོར་ལ་བརྟེན་ནས་བརྒལ་བའི་ཚེ་བར་ཁོ་ནར་བྲིས་ཏེ་གསོལ་བ་བཏབ་པའོ།། ༈ །།རྗེ་བཙུན་མྱུར་མ་དཔའ་མོ་ལ་བསྔགས་པ་རྡོ་རྗེའི་ཐོལ་གླུ་ངེས་དོན་རོལ་མོ་ཞེས་བྱ་བ། ཨེ་མ་ཧོ། གཞི་གྲོལ་རིག་པ་འདུས་མ་བྱས། །ཐོག་མཐའ་དབུས་བྲལ་དག་པའི་དབྱིངས། །བདེ་ཆེན་རྡོ་རྗེའི་མཎྜ་ལ། །རྒྱལ་ཡུམ་འཕགས་མའི་ཕྱག་རྒྱར་འདུད། །གཉུག་མའི་ཕུང་ཁམས་སྐྱེ་མཆེད་ཀུན། །ཡོངས་གྲུབ་ལྷ་སྐུར་གདོད་ནས་ཤར། །གཉིས་སུ་མི་ཕྱེད་ཐིག་ལེ་ཆེ། །འགྲོ་འོང་སྲོག་དང་རྩོལ་བའི་
རླུང་། །ཁ་སྦྱོར་དབུ་མར་ཐིམ་པ་ལས། །འབར་འཛག་བདེ་བའི་རང་བཞིན་ཅན། །རྡོ་རྗེ་ནཱ་དའི་གསུང་དུ་བསྒྲགས། །རྣམ་པར་རྟོག་པའི་འཇུག་ལྡང་ཀུན། །སྤྲོས་བྲལ་དབྱིངས་སུ་རོ་གཅིག་བས། །སྲིད་དང་ཞི་ལ་མི་གནས་པའི། །ཆོས་སྐུའི་ཕ་རོལ་ཕྱིན་པར་རོལ། །གང་གི་འགྲོ་བའི་ཁམས་དབང་དང་། །བསམ་པའི་རིམ་པར་རྗེས་མཐུན་པའི། །འདོད་དགུའི་རེ་བ་སྦྱིན་པའི་ཕྱིར། །ཡོན་ཏན་རྨད་བྱུང་ཚད་ལས་འདས། །ལ་ལར་ཞི་དང་ཁ་ཅིག་ཏུ། །ཁྲོ་ཆགས་སྒེག་པའི་ཉམས་བརྒྱ་ཡིས། །རྣམ་བཞིའི་ཕྲིན་ལས་རབ་བསྒྲུབ་སླད། །གཅིག་དང་དུ་མའི་མཐའ་མ་དམིགས། །དེ་ཕྱིར་སོ་སྐྱེའི་བློ་གྲོས་ཀྱིས། །ཕྱོགས་རེར་གཞལ་བས་ཁྱོད་བསྔགས་ན། །རྣམ་པ་ཀུན་ཏུ་རིགས་མིན་པར། །འདི་ནི་བདག་གིས་ཡང་དག་མཐོང་། །ཨ་ལ་ལ་ཧོ། རྟག་ཆད་ལས་འདས་རང་རིག་པ། །རྣམ་ཀུན་མཆོག་ལྡན་འཕགས་མའི་ཞལ། །འདུ་འབྲལ་མེད་པར་མཇལ་བའི་ཕྱག །མཉམ་རྗེས་དབྱེར་མེད་ངང་ནས་འཚལ། །ཚོགས་དྲུག་ཡུལ་གྱི་སྣང་ཆ་ལ། །ཇི་ལྟར་ཤར་ཡང་རང་གྲོལ་བའི། །མ་བཅོས་ལྷུག་པའི་མཆོད་པ་ཡིས། །རྟག་པ་རྒྱུན་དུ་མཉེས་གྱུར་ཅིག །གཟོད་ནས་དག་པའི་དེ་ཁོ་ན། །གློ་བུར་དྲི་མས་བསྒྲིབས་པའི་མཐུས། །མི་འཚམས་ལས་དང་བཤེས་པ་ཀུན། །འོད་གསལ་གཉུག་མའི་ངང་དུ་བཤགས། །ལྷན་སྐྱེས་ཡེ་
ཤེས་ཕྱག་རྒྱ་མཆོག །རྒྱུད་ལ་བརྟེན་གོམས་སྦྱོར་བ་ལ། །གུས་པའི་འཕགས་དང་སོ་སྐྱེའི་སྡེར། །མི་ཕྱེད་དགའ་བའི་འཛུམ་དཀར་གྲོལ། །འགོག་བདེན་ཞི་བ་དམ་པའི་དངོས། །ལམ་བདེན་ཚིག་ཏུ་བརྗོད་པའི་སྒྲར། །རབ་ཏུ་འཇུག་པའི་བྱེད་ལས་ཀྱིས། །བརྗོད་བྲལ་ཆོས་འཁོར་རྟག་བསྐོར་བསྐུལ། །གང་ཁྱོད་སྐྱེ་དང་འགག་པ་ཡི། །ཕ་མཐའ་ལྟ་ཡང་ག་ལ་འཚལ། །དེ་ཕྱིར་འཆི་བ་མེད་པའི་དཔྱིད། །རྡོ་རྗེའི་སྐུ་མཆོག་སྟོན་པར་གསོལ། །དེ་ལས་བྱུང་བའི་དགེ་ཚོགས་ཀུན། །འཁོར་གསུམ་མཚན་མས་མ་རེག་པའི། །ཤེས་རབ་ཕ་རོལ་ཕྱིན་པའི་དབྱིངས། །ཐ་དད་མེད་པར་བསྔོ་བར་བགྱི། །ཀྱེ་མ་རྗེ་བཙུན་རྣལ་འབྱོར་མ། །ཐུགས་རྗེའི་བདག་ཉིད་ཁྱོད་དགོངས་ལ། །བདག་སོགས་སྙིགས་མའི་གདུང་བ་ཡིས། །མནར་བའི་འགྲོ་རྣམས་བསྐྱབ་པར་མཛོད། །རང་སྣང་འཁྲུལ་པའི་བྱེད་པོ་ཡིས། །མེད་བཞིན་སྣང་བྱས་ལས་ཉོན་དཔུང་། །ཐུགས་རྗེའི་དབྱིག་གིས་བསལ་ནས་ཀྱང་། །བདེ་བ་དམ་པས་རྒྱུད་བརླན་མཛོད། །ཕྱི་རོལ་བཟང་ངན་ཆོ་རོལ་ལ། །བླང་དོར་སྒྲིབ་པའི་འདུ་བྱེད་ཀྱིས། །ནད་མཚོན་མུ་གེའི་དུཉཁ་སོགས། །བརྒྱད་གཉིས་འཇིགས་ལས་དབུགས་དབྱུང་མཛོད། །ཚེ་དང་བསོད་ནམས་དཔལ་ལ་སོགས། །དབང་བཅུའི་ཡོན་ཏན་རབ་རྒྱས་པས། །གནས་སྐབས་མཐར་ཐུག་ཕན་དང་བདེའི། །ས་བོན་ཡིད་
འོང་སྨིན་པར་མཛོད། །སྣང་དང་ཕྱེད་སྣང་མི་སྣང་གི །གྲོང་ཁྱེར་གསུམ་དང་གཞན་ཡང་རུང་། །བསམ་པ་ཙམ་གྱིས་ཐོགས་མེད་པར། །དབང་དུ་འདུ་ཞིང་གུས་པར་མཛོད། །གལ་ཏེ་རང་སྣང་དགྲར་ལངས་པའི་བསམ་སྦྱོར་འཆང་བ་ཀུན། །དྲག་ཤུལ་ཆོ་གས་བརླག་པར་མཛོད། །ཁྱད་པར་བདག་གི་ལུས་ངག་ཡིད། །རྡོ་རྗེ་གསུམ་གྱིས་བྱིན་བརླབས་ནས། །འབར་གཡོ་བརྟན་པའི་ཐ་མ་རུ། །རྡོ་རྗེའི་ཡེ་ཤེས་བརྙེས་པར་མཛོད། །དེ་ཡིས་ཁྱོད་དང་དབྱེར་མེད་པའི། །གོ་འཕང་ཐོབ་ནས་སླར་ཡང་ནི། །དམིགས་མེད་སྙིང་རྗེའི་རོས་གང་བས། །འགྲོ་ཀུན་སྒྲོལ་བའི་མཐུ་བརྙེས་ཤོག །ཨ་ཧོ་གང་ཤར་རྡོ་རྗེའི་གླུས། །མཆོག་སྦྱིན་དཔའ་མོར་མཆོད་པའི་མཐུས། །ཁམས་གསུམ་བཀྲ་ཤིས་སྣང་བ་ཡིས། །དགེ་ལེགས་མེ་ཏོག་བཞད་པར་ཤོག ༈ །།འཕགས་མཆོག་ཕྱག་ན་པདྨོ་ལ་གསོལ་བ་འདེབས་པ་ཐུགས་དམ་བསྐུལ་བའི་རྡོ་རྗེའི་ཐོལ་གླུ་དྲང་སྲོང་དགྱེས་པའི་འབབ་སྟེགས་ཞེས་བྱ་བ། ཨ་ཧོ། སྲས་བཅས་རྒྱལ་བ་ཐམས་ཅད་ཀྱི་ཡེ་ཤེས། །ཚད་མེད་སྙིང་རྗེའི་རང་གཟུགས་སུ་སྣང་བས། །འགྲོ་ཀུན་ཐར་པའི་གོ་འཕང་ལ་སྦྱོར་བའི། །འཕགས་མཆོག་ཕྱག་ན་པདྨོ་ལ་འདུད་དོ། །སྤྲིན་བྲལ་ཟླ་བ་གསར་པ་ཡི་ལང་ཚོར། །རབ་མཛེས་མཚན་དཔེའི་མཚར་སྡུག་གིས་འཁྱུད་པས། །ཡིད་ཅན་ཐར་པའི་ངལ་གསོ་ལ་
སྦྱར་བའི། །འཕགས་མཆོག་ཕྱག་ན་པདྨོ་ལ་འདུད་དོ། །ཡན་ལག་དྲུག་ཅུའི་རྒྱུད་མངས་ཀྱི་གདངས་སྙན། །ལུང་རྟོགས་ཆོས་ཀྱི་བདུད་རྩི་དང་བསྲེས་ནས། །སྐལ་བཟང་རྣ་བའི་བཅུད་ལེན་དུ་སྩལ་བའི། །འཕགས་མཆོག་ཕྱག་ན་པདྨོ་ལ་འདུད་དོ། །ཐུགས་ནི་སྟོང་ཉིད་སྙིང་རྗེ་ཡི་རོལ་མོ། །དབྱེར་མེད་མཁྱེན་གཉིས་སྣང་བ་དང་འགྲོགས་པས། །སྲིད་དང་ཞི་བའི་མུན་སྟུག་ཀུན་སེལ་བའི། །འཕགས་མཆོག་ཕྱག་ན་པདྨོ་ལ་འདུད་དོ། །ལུས་ཅན་གང་གིས་ཁྱོད་མཚན་ཙམ་ཐོས་པས། །གནས་སྐབས་མཐར་ཐུག་འདོད་པ་ཀུན་འཇོ་བའི། །ཡོན་ཏན་ཟད་མེད་ཡིད་བཞིན་གྱི་ནོར་བུ། །འཕགས་མཆོག་ཕྱག་ན་པདྨོ་ལ་འདུད་དོ། །མཐའ་ཀླས་སེམས་ཅན་ཁམས་རྣམས་ཀུན་མ་ལུས། །མི་ཕྱེད་ཐུགས་རྗེའི་སྤྱན་རས་ཀྱིས་གཟིགས་ནས། །སྒྲོལ་བའི་ཕྲིན་ལས་ཁུར་ཆེན་ལ་འཆེལ་བའི། །འཕགས་མཆོག་ཕྱག་ན་པདྨོ་ལ་འདུད་དོ། །ཀྱེ་མ་ཀྱི་ཧུད་སྙིགས་མ་ཡི་འགྲོ་ཀུན། །ཤིན་ཏུ་བཟོད་དཀའི་དུ་ཁ་ལ་སྤྱོད་ཅིང་། །རྒྱལ་བསྟན་ཉི་མ་ནུབ་རི་ཡི་རྩེ་མོར། །རིངས་པར་ཐལ་བའི་ངང་ཚུལ་འདི་སྐྱོ་བ། །ཕན་བདེའི་འབྱུང་གནས་བཤད་སྒྲུབ་ཀྱི་སྙིང་པོ། །སྟོབས་དང་འབྱོར་པའི་གཟུགས་བརྙན་ལ་འཁྲུལ་ཏེ། །ཆོས་བཞིན་བཅོས་པས་ཆོས་མིན་ལ་སྦྱོར་བའི། །དགེ་སྦྱོང་ཀླ་ཀློའི་ཆོས་ལུགས་འདི་སྐྱོ་བ། །གཏན་གྱི་སྐྱབས་གཅིག་བསླུ་མེད་
ཀྱི་བདག་ཉིད། །རྒྱལ་དང་དེ་སྲས་རྣམ་འདྲེན་ཀུན་བོར་ནས། །རང་རྒྱུད་དྲེགས་པའི་ཕྱི་བཞིན་དུ་འདུད་པའི། །བློ་གྲོས་གདོན་གྱིས་བཏབ་པ་འདི་སྐྱོ་བ། །གནས་སྐབས་ཕྱག་ལེན་ཕྲ་མོ་ཡི་གནང་བཀག །སྲོག་ལྟར་གཅེས་པའི་བརྫུ་བག་ལ་བརྟེན་ནས། །མཐར་ཐུག་མི་དགེ་འཇོལ་ཉོག་ཏུ་སྤྱོད་པའི། །འདུལ་བ་འཛིན་པའི་གཟུགས་བརྙན་འདི་སྐྱོ་བ། །གཞན་ཕན་འགྲོ་དོན་སྒྲོ་བཏགས་ལ་བསྙད་ནས། །རང་དོན་ཕུགས་སུ་བཅུག་པ་ཡི་སྤྱོད་པས། །མངའ་ཐང་གཟི་བརྗིད་རྒྱལ་ཕམ་ལ་འགྲན་པའི། །བྱང་ཆུབ་སེམས་དཔའི་གྲགས་སྐམ་འདི་སྐྱོ་བ། །དངོས་གྲུབ་རྩ་བ་ཁྱབ་བདག་གི་བླ་མར། །དབང་ལུང་མན་ངག་གདམས་པ་ཀུན་ནོས་ཏེ། །དད་དང་དམ་ཚིག་རྩ་བ་ནས་འདོར་བའི། །རིག་པ་འཛིན་པའི་རྐང་འདྲེན་འདི་སྐྱོ་བ། །གཞུང་ལུགས་མང་པོར་ཐོས་བསམ་ལ་འབད་ཀྱང་། །ང་རྒྱལ་དྲེགས་པའི་སྣོན་མ་རུ་སོང་ནས། །རྒྱལ་བསྟན་ཐ་དད་འགལ་འདུ་རུ་བརྩི་བའི། །ཆོས་སྤངས་སྡིག་པའི་ཁུར་ཆེན་འདི་སྐྱོ་བ། །དབེན་པའི་གནས་སུ་བསམ་གཏན་ལ་འབད་ཀྱང་། །རྒྱུད་ལུང་མན་ངག་རྒྱང་རིང་དུ་དོར་ནས། །བླུན་སྒོམ་གཏི་མུག་ཉམས་ལེན་དུ་འདོད་པའི། །ངལ་བཅས་མི་ཚེ་སྟོང་ཟད་འདི་སྐྱོ་བ། །མདོར་ན་སྙིགས་མའི་འགྱུར་བ་ཡིས་བཏབ་པས། །གང་ལ་བསམས་ཀྱང་སྐྱོ་ཤེས་སུ་གྱུར་ན། །མགོན་ཁྱོད་ཕྲིན་ལས་རྩེ་གཅིག་
གིས་བསྐུལ་ན། །ད་ཙམ་ཐུགས་རྗེའི་སྒྱུ་འཕྲུལ་ཞིག་སྟོན་རན། །དུས་གསུམ་གཞན་དོན་ཁོ་ན་ལ་དགྱེས་པའི། །དམ་བཅའི་རི་མོ་བྲིས་པ་དེ་དགོངས་ལ། །གངས་ཅན་བསྟན་འགྲོར་ཕན་བདེ་ཡི་དགའ་སྟོན། །ནུབ་མེད་དད་བའི་དཔྱིད་དཔལ་ལ་སྦྱོར་མཛོད། །དེ་སྐད་བོད་ཡུལ་རུ་བཞི་ཡི་ལྟེ་བ། །གྲུ་འཛིན་གཉིས་པའི་ཕོ་བྲང་གི་འདབས་ཞོལ། །ནི་ཙུ་ལ་ཡི་དགའ་ཚལ་གྱི་དབུས་སུ། །འཁོས་མེད་རྣལ་འབྱོར་སྤྲང་པོ་དེས་བྲིས་སོ། །ཞེས་པའང་གངས་ཅན་བོད་ཀྱི་རྡོ་རྗེ་གདན་ར་ས་འཕྲུལ་སྣང་གི་གཙུག་ལག་ཁང་ཆེན་པོ་དང་ཉེ་བའི་ཕོ་བྲང་དམར་པོ་རིའི་འདབས་འབྱོར་དུས་ཟླའི་གྲལ་ཚེས་དགེ་བར་གང་ཤར་གླུར་བླངས་པའི་འཆར་གཞིའོ།། ༈ །།འདུན་ཅིང་སྨོན་པར་བྱ་བའི་རྡོ་རྗེའི་ཐོལ་གླུ་ཡོངས་རྫོགས་བསྟན་པའི་ལམ་རིམ་ཞེས་བྱ་བ། ཨ་ཧོ། གང་མཚན་གྱི་བདུད་རྩི་ཐོབ་པ་ལས། །སྲིད་ཞི་ཡི་ཚ་གདུང་རིང་བཅིལ་ནས། །རྣམ་གྲོལ་གྱི་ཨུཏྤལ་དར་བབས་པའི། །མགོན་ཕྱག་ན་པདྨོས་དགེ་ལེགས་མཛོད། །རྗེ་དེ་དང་ངོ་བོ་དབྱེར་མེད་ཀྱང་། །ཚུ་རོལ་གྱི་མཐོང་ངོར་ས་སྤྱོད་གཟུགས། མཚན་སྲོང་བཙན་སྒམ་པོར་རབ་འབར་བ། །གངས་ཅན་གྱི་ལྷ་གཅིག་དེ་ལ་འདུད། །སྐྱབས་ཁྱོད་ལ་སྙིང་ནས་གསོལ་བཏབ་པས། །བདག་གཞན་ཀུན་སྐྱེ་དང་ཚེ་རབས་སུ། །མི་ཁོམ་པའི་གནས་ལས་རབ་ལྡོག་ཅིང་། །རྟེན་དལ་འབྱོར་ཚང་བའི་ལུས་ཐོབ་ཤོག །དེར་ནམ་ཡང་མི་རྟག་འཆི་བ་དང་། །དུས་དེ་ཚེ་
བཟློག་ཐབས་བྲལ་བ་ཡི། །ངང་ཚུལ་ལ་བསམ་ནས་ཡིད་བྱུང་སྟེ། །འཕྲལ་དམ་པའི་ཆོས་ལ་འཇུག་པར་ཤོག །གནས་འཁོར་བ་མཐོ་དམན་གར་སྐྱེས་ཀྱང་། །སྡུག་བསྔལ་གྱི་དམ་འོག་ཆུད་པའི་ཕྱིར། །དཔེ་མེ་འོབས་ལྟ་བུར་མཐོང་བ་ཡིས། །བཅོས་མིན་གྱི་ངེས་འབྱུང་སྐྱེ་བར་ཤོག །ལས་དཀར་ནག་ས་བོན་བཏབ་པ་ལས། །བདེ་སྡུག་གི་འབྲས་བུ་སྨིན་ཤེས་ནས། །བླང་དོར་གྱི་ལག་ལེན་འཛོལ་མེད་པས། །མངོན་མཐོ་ཡི་གྲོང་དུ་བཀྲི་བར་ཤོག །མཚན་ཉིད་དང་ལྡན་པའི་བཤེས་གཉེན་ནི། །སྲིད་ཞི་ཡི་དགེ་ལེགས་ཐམས་ཅད་ཀྱི། །རྩ་བ་རུ་ངེས་པ་རྙེད་པའི་བློས། །ཚུལ་བཞིན་དུ་གུས་པས་བསྙེན་པར་ཤོག ། དུས་འདི་ནས་བྱང་ཆུབ་སྙིང་པོའི་བར། །མཐའ་ཀླས་པའི་སེམས་ཅན་ཀུན་དོན་དུ། །སྐྱབས་དཀོན་མཆོག་རིན་ཆེན་རྣམ་གསུམ་ལ། །སྙིང་ཐག་པ་ནས་སྐྱབས་སུ་འགྲོ་བར་ཤོག །ཡུལ་ཚད་མེད་མ་གྱུར་འགྲོ་ཀུན་ལ། །དུས་ཚད་མེད་སངས་རྒྱས་ཐོབ་ཀྱི་བར། །བློ་ཚད་མེད་རྣམ་བཞི་ལེགས་བསྒོམས་པས། །རྒྱུད་ཐེག་ཆེན་སྣོད་དུ་འགྱུར་བར་ཤོག །གཞན་དོན་གྱི་ཕྱིར་དུ་ཐར་འདོད་པའི། །ཆོས་ཀུན་གྱི་རྩ་བ་བྱང་ཆུབ་སེམས། །སྨོན་འཇུག་གི་གོ་ཆ་ལེགས་བགོས་ཏེ། །ཚོགས་གཉིས་ཀྱི་ལམ་ལ་བརྩོན་པར་ཤོག །ཁྱད་པར་དུ་མྱུར་ལམ་རྡོ་རྗེའི་ཐེག །ཚུལ་བཞིན་དུ་སྟོན་ནུས་བླ་མ་ལས། །སྨིན་བྱེད་ཀྱི་དབང་བསྐུར་
རིམ་ནོས་ནས། །རིམ་གཉིས་ཀྱི་ལམ་ལ་འཇུག་པར་ཤོག །སྣང་སྲིད་དང་འཁོར་འདས་ཆོས་སོ་ཅོག །ཡེ་གདོད་མ་ནས་སྤྲོས་པ་བྲལ་བ་ལས། །རྟེན་འབྱུང་གི་སྣང་ཚུལ་མ་འགགས་པའི། །གཞི་ལྟ་བའི་གནས་ལུགས་རྟོགས་པར་ཤོག །ཞི་གནས་ཀྱིས་ཉོན་མོངས་ཟིལ་མནན་ནས། །ལྷག་མཐོང་གིས་དྲུང་ནས་འབྱིན་པའི་ཕྱིར། །དེ་གཉིས་པོ་དབྱེར་མེད་ཉམས་ལེན་གྱིས། །ལམ་སྒོམ་པའི་ཕ་རོལ་སོན་པར་ཤོག །མཉམ་གཞག་ནི་མཁའ་ལྟར་མི་རྟོག་ཀྱང་། །རྗེས་ཐོབ་ཀྱི་སྣང་ཆ་སྒྱུ་མ་ལྟས། །ལེགས་སྤྱད་ཀྱི་དགེ་ཆོས་སྡུད་བཟོད་པའི། །ཐབས་མཁས་ཀྱི་སྤྱད་པ་སྤྱོད་པར་ཤོག །དེ་ལྟར་གྱི་ཐབས་ཤེས་ཟུང་འབྲེལ་གྱིས། །སྒྲིབ་གཉིས་ཀྱི་དྲི་མ་བསལ་བ་ལས། །སྐུ་ཡེ་ཤེས་ཕྲིན་ལས་དབང་འབྱོར་བའི། །བླ་མེད་ཀྱི་འབྲས་བུ་ཐོབ་བར་ཤོག །ཚིག་དེ་སྐད་གསོལ་འདེབས་སྨོན་བའི་གླུ། །དོན་བསྟན་པ་ཡོངས་རྫོགས་ཉམས་ལེན་གནད། །དཔལ་དེ་བཱི་ཀོ་ཊིའི་དགའ་ཚལ་དུ། །དུས་དཀར་ཕྱོགས་རྫོགས་པ་གཉིས་པར་བྲིས། །ཞེས་པའང་སྤྲུལ་པའི་རྒྱལ་པོ་ཕྱག་ན་པདྨ་སྲོང་བཙན་སྒམ་པོའི་སྒྲུབ་གནས་ཕ་ཝང་ཁ་བྱང་ཆུབ་ཤིང་གི་ནགས་ཁྲོད་དུ་གནས་འབྲེལ་ལྷགས་པའི་ཚེ་ཚོགས་ཀྱི་འདུ་བའི་རྗེས་ཐོག་ཏུ་བྲིས་པ་སྟེ་ས་ཟླའི་ཚེས་བཅུ་ལའོ།། ༈ །།ཀུན་མཁྱེན་སངས་རྒྱས་གཉིས་པ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ལྷན་སྐྱེས་སྐུ་བཞིའི་སྒྲ་དབྱངས་ཞེས་བྱ་བ། ཨ་ཧོ། ཕྱི་ནང་གི་འབྱུང་བ་རྒྱུ་དང་
བཅས། །འོད་གསལ་བའི་དབྱིངས་སུ་ཟད་ནས་སླར། །འཕོ་ཆེན་གྱི་ཕྱག་རྒྱར་ཡོངས་བཞེངས་པ། །རྗེ་སྐུ་ཡི་རྡོ་རྗེར་གསོལ་བ་འདེབས། །རྩ་གནས་ཀྱི་ཡི་གེའི་འཁོར་ལོ་ཀུན། །ཡེ་ཤེས་ཀྱི་དྲ་བར་བསྡོམས་ནས་སླར། །བརྗོད་མེད་ཀྱི་ཆོས་འཁོར་རྟག་བསྐོར་བའི། །རྗེ་གསུང་གི་རྡོ་རྗེར་གསོལ་བ་འདེབས། །སྐད་ཅིག་གི་རིག་པ་གདོད་མའི་སར། །རང་གྲོལ་གྱི་བཙན་ས་ཟིན་པ་ལས། །མཁྱེན་གཉིས་ཀྱི་ཡོན་ཏན་ཡོངས་རྫོགས་པ། །རྗེ་ཐུགས་ཀྱི་རྡོ་རྗེར་གསོལ་བ་འདེབས། །ནང་གསལ་གྱི་ངོ་བོ་བུམ་སྐུའི་སྦུབས། །ཞལ་ཕྱག་གི་སྤྲོས་པ་ཉེར་ཞི་ཡང་། །ཟུང་འཇུག་གི་སྒྱུ་འཕྲུལ་རྒྱུན་ཆད་མེད། །རྗེ་ཡེ་ཤེས་རྡོ་རྗེར་གསོལ་བ་འདེབས། །ཕྱི་བསྐྱེད་པ་རྡུལ་ཚོན་གྱི་དཀྱིལ་འཁོར་དུ། །ལུས་བུམ་པའི་དབང་གིས་སྨིན་བྱས་ནས། །དབྱིབས་ལྷ་སྐུར་བལྟ་བའི་རིམ་པ་ཡིས། །ཐ་མལ་གྱི་སྣང་ཞེན་དག་བྱིན་རློབས། །ནང་བྱང་ཆུབ་སེམས་ཀྱི་དཀྱིལ་འཁོར་དུ། །ངག་གསང་བའི་དབང་གིས་སྨིན་བྱས་ནས། །ལམ་རང་བྱིན་རླབས་པའི་རིམ་པ་ཡིས། ཁམས་བདེ་དྲོད་འབར་བར་བྱིན་གྱིས་རློབས། །ཐབས་ཕྱག་རྒྱ་བྷ་གའི་དཀྱིལ་འཁོར་དུ། །ཡིད་ཤེས་རབ་དབང་གིས་སྨིན་བྱས་ནས། །ལམ་ཕོ་ཉའི་རེག་བྱ་དང་འགྲོགས་པ། །དཔེའི་ལྷན་སྐྱེས་ཡེ་ཤེས་འགྲུབ་བྱིན་རློབས། །མཆོག་སྙིང་པོ་འོད་གསལ་དཀྱིལ་འཁོར་དུ། །རླུང་བཞི་པའི་དབང་
གིས་སྨིན་བྱས་ནས། །ལམ་རྡོ་རྗེའི་རྦ་རླབས་གོམས་པ་ལས། །དོན་མངོན་སུམ་རིག་པ་མཐོང་བྱིན་རློབས། །ཚིག་དེ་སྐད་ཀུན་མཁྱེན་ཆོས་ཀྱི་རྗེའི། །བྱིན་རླབས་ཀྱི་སྤྲིན་ཕུང་འཁྲིགས་པའི་གནས། །ཉམས་རབ་དགའ་དབེན་པའི་ནགས་ཁྲོད་ཆེར། སྤྲང་གཏད་མེད་པདྨ་དགྱེས་པས་བྲིས། །ཞེས་པའང་གངས་རི་ཐོད་དཀར་ཨོ་རྒྱན་རྫོང་འོད་ཟེར་སྤྲིན་གྱི་སྐྱེད་མོས་ཚལ་དུ་གནས་འབྲེལ་ལ་ལྷགས་པའི་ཚེ་ཚོགས་ཀྱི་འཁོར་ལོ་སྟོང་ཕྲག་ཐལ་བར་བགྱིས་བའི་དགའ་སྟོན་དུ་དམར་ཕྱོགས་ཌ་ཀི་འདུ་བའི་དུས་ཀྱི་རྒྱལ་པོར་གླུ་བླངས་པའོ།། ༈ །།ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་གྱི་དེ་ཁོ་ན་ཉིད་ཀྱི་རྣམ་པར་ཐར་པ་ལ་བསྔགས་པའི་རྡོ་རྗེའི་ཐོལ་གླུ་ཕྱིན་དྲུག་རོལ་མོ་ཞེས་བྱ་བ། ཨ་ཧོ། མཆོག་མི་འགྱུར་འབར་བའི་ཙཎྜ་ལཱིས། །ཐབས་བདེ་ཆེན་དམ་ཚིག་བསྲེགས་བཞུའི་ཕུལ། །བདེ་སྟོང་གི་སྙིང་པོས་ཚིམ་པ་ཅན། །རྗེ་སྦྱིན་པའི་ཕ་རོལ་ཕྱིན་ལ་འདུད། །ཁམས་ལུགས་འབྱུང་རྣམ་བཞིའི་འཕོ་ཆགས་རྒྱུན། །གནས་ཛ་ལནྡྷ་རར་འཆིང་བ་ལས། །ཟག་བྲལ་གྱི་བརྟུལ་ཞུགས་གྲུབ་པ་ཅན། །རྗེ་ཚུལ་ཁྲིམས་ཕ་རོལ་ཕྱིན་ལ་འདུད། །དོན་མངོན་སུམ་རིག་པའི་སྤོབས་པ་ཡིས། །ཟབ་དོན་ལ་འཇིགས་པ་མེད་བརྙེས་པས། ། ཡིད་དཔྱོད་ཀྱི་འཕྲང་ལས་བརྒལ་བ་པོ། །རྗེ་བཟོད་པའི་ཕ་རོལ་ཕྱིན་ལ་འདུད། །དབྱིངས་ཀློང་ཆེན་དྲི་མེད་དགོངས་པའི་མཛོད། །འོད་གསལ་གྱི་དྲྭ་བར་བཟླུམས་པ་ལས། །ཟུང་འཇུག་གི་ཡེ་ཤེས་མཆོག་
བརྙེས་པ། །རྗེ་བརྩོན་འགྲུས་ཕ་རོལ་ཕྱིན་ལ་འདུད། །རླུང་སེམས་ཀྱི་གར་མཁན་གཡོ་འཕྲུལ་པོ། །ལམ་བྱེད་པ་བཅིངས་པའི་ཐབས་མཁས་ཀྱིས། །རྩ་ཨ་ཝ་དྷུ་ཏིར་རྒྱས་བཏབ་པའི། །རྗེ་བསམ་གཏན་ཕ་རོལ་ཕྱིན་ལ་འདུད། །ལམ་སྣང་བ་རྣམ་བཞིའི་དོ་ར་རུ། །ཆོས་འཁྲུལ་སྣང་རགས་པ་ཀུན་ཟད་པས། །དཔལ་སོ་སོར་རྟོག་པའི་ཞལ་སྐྱིན་ཅན། །རྗེ་ཤེས་རབ་ཕ་རོལ་ཕྱིན་ལ་འདུད། །རང་གཞན་གྱི་གྲུབ་མཐའ་རྒྱ་མཚོ་རྟོགས། །མཆོག་གསང་བའི་དགོངས་དོན་སྙིང་ལ་ཤར། །འཁོར་འདས་ཀྱི་ཕ་མཐར་མི་གནས་པ། །རྗེ་ཀུན་མཁྱེན་ཆོས་ཀྱི་རྒྱལ་པོར་འདུད། །བདག་མཐའ་འཁོབ་སྐྱེས་པའི་དལ་འབྱོར་པ། །བློ་གཏད་མེད་བདེན་པ་མཐུ་ཆེ་བས། །ཕྱོགས་མེད་ཀྱི་རི་ལ་སྙེགས་ཙ་ན། །རྗེ་ཁྱེད་ཀྱི་སྒྲུབ་གནས་འདི་རུ་སླེབས། །དུས་དེ་ཚེ་བཟོད་མེད་དད་པ་ཡིས། །ངེས་དོན་གྱི་རྟོགས་པ་བརྗོད་པའི་གླུ། །དཔལ་ཡེ་ཤེས་སྐུ་ཅན་ཁྱེད་ལ་འབུལ། །རྒྱུད་བྱིན་གྱིས་བརླབ་པའི་བཀའ་དྲིན་སྩོལ། །བློ་བྲལ་གྱི་རིག་པའི་གཤིས་ལུགས་ལ། །ངེས་དོན་གྱི་གྲུབ་མཐའ་རབ་རྙོགས་ཤིང་། །སྣང་བཞི་ཡི་ཕ་རོལ་སོན་པ་ལས། །ཟུང་འཇུག་གི་གོ་འཕང་འགྲུབ་པར་ཤོག །ཅེས་གྲུབ་པའི་བསྟི་གནས་བོད་ཀྱི་རི་བོ་རྩེ་ལྔར་གྲགས་པའི་ས་འཛིན་གྱི་ལྟེ་བ་ལྷ་རི་ཀློང་ཆེན་བྲག་ཏུ་གང་ཤར་ཡི་གེར་བཀོད་པའི་འཆར་གཞིའོ།། ༈ །།སྤྲུལ་པའི་སྐུ་གུ་རུ་མཚན་བརྒྱད་ལ་གསོལ་བ་འདེབས་པའི་རྡོ་རྗེའི་
ཐོལ་གླུ་རིག་འཛིན་ཌཱ་ཀིའི་རྒྱུད་མངས་ཅེས་བྱ་བ། ཨོ་ཨཱཧཱུཾ། འཆི་མེད་བདེ་ཆེན་གཉུག་མའི་ཞལ། །ཟུང་འཇུག་གྲུབ་པའི་ཐིག་ལེ་ཅན། བརྟུལ་ཞུགས་སྤྱོད་པ་ཡོངས་ཀྱི་རྗེ། །མཚོ་སྐྱེས་རྡོ་རྗེ་ལ་ཕྱག་འཚལ། །གཟུང་འཛིན་འཁྲུལ་སྣང་རྒྱུར་བཅས་པ། །བདེ་སྟོང་དྷུ་ཏིར་དག་པ་ལས། །ཟག་བྲལ་མཆོག་ཏུ་དགྱེས་པའི་གར། །པདྨ་སཾ་བྷ་ལ་ཕྱག་འཚལ། །སོ་སོར་རྟོག་པའི་ཤེས་རབ་ཀྱིས། །ལེགས་པའི་བློ་གྲོས་རབ་བརྙེས་པས། །ཇི་ལྟ་ཇི་སྙེད་མཁྱེན་པའི་གཏེར། །བློ་ལྡན་མཆོག་སྲེད་ལ་ཕྱག་འཚལ། །རྡུལ་མུན་སྙིང་སྟོབས་ཁམས་གསུམ་པོ། །རིག་སྟོང་ཕྱག་རྒྱར་དབང་བྱས་པས། །གདོད་མའི་གོ་འཕང་ཆེར་གཤེགས་པ། །པདྨ་རྒྱལ་པོ་ལ་ཕྱག་འཚལ། །དངོས་ཀུན་འོད་གསལ་དྭངས་མའི་སྦུབས། །ལྷུན་གྲུབ་བུམ་སྐུར་བསྐྱིལ་བ་ལས། །འཆི་མེད་དཔྱིད་དུ་སྨིན་པའི་གར། །ཉི་མ་འོད་ཟེར་ལ་ཕྱག་འཚལ། །སེམས་དང་སེམས་བྱུང་བདུད་བཞིའི་དཔུང་། །ཡེ་ཤེས་སྒྱུ་མའི་མཐུས་བཅོམ་པས། །བྱང་ཆུབ་སྙིང་པོ་མངོན་བགྱིས་པའི། །ཤཱཀྱ་སེང་གེ་ལ་ཕྱག་འཚལ། །ཀུན་ཏུ་རྟོག་པའི་རླུང་སེམས་གཟུགས། །ཡོངས་གྲུབ་དབུ་མར་ཟོས་པའི་སྟོབས། །གཙུག་ཏོར་གདེངས་ཀར་རབ་སྨིན་པ། །སེང་གེ་སྒྲ་སྒྲོགས་ལ་ཕྱག་འཚལ། །གཅིག་དང་དུ་མ་ལས་འདས་པའི། །རྣམ་ཀུན་མཆོག་ལྡན་མཚན་དཔེའི་ཞལ། །འབར་གཡོ་བརྟན་པའི་ཕྱག་
རྒྱ་ཅན། །རྡོ་རྗེ་གྲོ་ལོད་ལ་ཕྱག་འཚལ། །དེ་ལྟར་གུས་པས་གསོལ་བཏབ་པས། །མཐར་ཐུག་འཕོ་བའི་བག་ཆགས་རྒྱུན། །བདེ་ཆེན་ཡེ་ཤེས་ཀྱིས་བཅོམ་པས། །སྐུ་གསུམ་མི་ཕྱེད་གྲུབ་གྱུར་ཅིག །ཅེས་པའང་དུས་གསུམ་མཁྱེན་པ་པདྨ་ཀ་རས་ཡེ་ཤེས་སྒྱུ་མའི་སྐུས་བྱིན་གྱིས་བརླབས་པའི་ཟངས་ཡག་བྲག་ཏུ་གཏད་མེད་ཀུན་ཏུ་རྒྱུ་བ་པདྨའི་མིང་གིས་གསོལ་བ་བཏབ་པའོ།། ༈ །།སྐྱབས་ཀུན་འདུས་ཞལ་འཆི་མེད་པདྨ་ཐོད་ཕྲེང་ལ་གསོལ་འདེབས་ཐུགས་དམ་སྐུལ་བྱེད་རྡོ་རྗེ་ཐོལ་གླུ་པདྨ་དྲྭ་བའི་ལམ་བཟང་ཞེས་བྱ་བ། ཨ་ཧོ། སྤྱིར་དུས་གསུམ་རྒྱལ་བའི་ཕྲིན་ལས་པ། །སྒོས་བོད་ཁམས་བསྟན་འགྲོ་ཡོངས་ཀྱི་མགོན། །རྗེ་པདྨ་འབྱུང་གནས་བཀའ་དྲིན་ཅན། །བདག་གསོལ་འདེབས་བུ་ལ་ཐུག༤ པ་རྗེས་གཟིགས། །གནས་འདི་ནས་ལྷོ་ནུབ་མཚམས་ཤེད་ན། །ས་སྤྱོད་ཀྱི་བསྟི་གནས་པདྨ་འོད། །ཉམས་དགའ་བ་འཇའ་ཟེར་འཁྲིགས་པའི་ཀློང་། །འཁོར་དཔའ་བོ་མཁའ་འགྲོའི་ཚོགས་དབུས་ན། །འཆི་མེད་ཀྱི་རིག་འཛིན་མཚོ་སྐྱེས་རྗེ། །སྐུའི་ཆ་ལུགས་རྣམ་འགྱུར་མ་ངེས་པ། །སྣ་ཚོགས་སུ་སྣང་བའི་རོལ་མོ་ཡིས། །ཆོས་བརྡ་ཐབས་ཀྱི་ཕྲིན་ལས་ཅིར་ཡང་སྟོན། །ཚུལ་དེ་འདྲ་སྙིང་ལ་དྲན་དྲགས་པས། །བཅོས་མིན་གྱིས་གསོལ་བ་འདེབས་ལགས་ན། །མགོན་སྐུ་ཡི་རྡོ་རྗེའི་ངོ་བོ་ཡིས། །ཕྱི་སྣང་སྟོང་བུམ་པའི་དབང་བསྐུར་ནས། །ཕུང་ཁམས་དང་སྐྱེ་མཆེད་རགས་པའི་ཆོས། །གདན་གསུམ་གྱི་ལྷ་སྐུར་དག་བྱིན་རློབས། །
མགོན་གསུང་གི་རྡོ་རྗེའི་ངོ་བོ་ཡིས། །ནང་གསལ་སྟོང་གསང་བའི་དབང་བསྐུར་ནས། །ཕུང་ཁམས་དང་སྐྱེ་མཆེད་རགས་པའི་ཆོས། །མི་ཤིག་པའི་ནཱ་དར་རྫོགས་བྱིན་རློབས། །མགོན་ཐུགས་ཀྱི་རྡོ་རྗེའི་ངོ་བོ་ཡིས། །མཆོག་བདེ་སྟོང་ཕྱག་རྒྱའི་དབང་བསྐུར་ནས། ཡིད་ཐིག་ལེ་སྲེད་ཞེན་རྒྱུར་བཅས་པ། །བདེ་ཆེན་གྱི་དྲྭ་བར་སྨིན་བྱིན་རློབས། །མགོན་ཡེ་ཤེས་རྡོ་རྗེའི་ངོ་བོ་ཡིས། །དོན་རིག་སྟོང་བཞི་པའི་དབང་བསྐུར་བས། །ཀུན་གཞི་དང་ཤེས་བྱའི་སྒྲིབ་པའི་ཚོགས། །བློ་འདས་ཀྱི་དབྱིངས་སུ་གྲོལ་བྱིན་རློབས། །དེ་ལྟ་བུའི་གྲུབ་མཐའ་མ་རྙོགས་ན། །ནམ་ཚེ་འདིའི་སྣང་བ་ནུབ་པའི་ཚེ། །རླུང་སེམས་ཀྱི་གཞན་དབང་གྱུར་པའི་ཡིད། །གནས་ཟངས་མདོག་དཔལ་རིར་དྲོང་དུ་གསོལ། །ཕྱི་ཚད་བཟུང་བྲལ་བའི་ཆུ་གཏེར་དབུས། །ས་འཛིན་གྱི་དབང་པོ་ཙིཏྟའི་དབྱིབས། །ཚེ་ནམ་མཁའི་ཁམས་སུ་སྙེགས་པ་ལྟའི། །གནས་ཟངས་མདོག་དཔལ་རིར་དྲོང་དུ་གསོལ། །དེ་སྟེང་དུ་འཇའ་ཟེར་ཐིག་ལེ་ཡི། །ཚོམ་བུ་དང་འདྲ་བར་འབྲེལ་པའི་སྦུབས། །རིན་ཆེན་ལས་གྲུབ་པའི་གཞལ་མེད་ཁང་། །གནས་ཟངས་མདོག་དཔལ་རིར་ཚུ དྲོང་དུ་གསོལ། །ཕྱོགས་ཀུན་ན་པདྨའི་འཁྲི་ཤིང་དང་། །བདུད་རྩི་ཡི་རྫིང་བུ་གཡོ་བའི་ཁྲོད། །དཔལ་རིག་འཛིན་ཌཱ་ཀིའི་གླུ་གར་རྩེན། །གནས་ཟངས་མདོག་དཔལ་རིར་དྲོང་དུ་གསོལ། །དབུས་ཐར་པ་ཆེན་
པོའི་གྲོང་ཁྱེར་དུ། །འོད་གསལ་བ་འཕོ་ཆེན་དྭངས་མའི་ཞལ། །སྐྱབས་ཀུན་འདུས་མགོན་ཁྱོད་དགྱེས་པར་བཞུགས། །གནས་ཟངས་མདོག་དཔལ་རིར་དྲོང་དུ་གསོལ། །འཁོར་དུས་གསུམ་རྩ་བརྒྱུད་བླ་མ་དང་། །ཡི་དམ་དང་མཁའ་འགྲོ་ཆོས་སྐྱོང་ཚོགས། །དཔེ་ཏིལ་གོང་ཁ་ཕྱེ་ལྟ་བུར་བཞུགས། །གནས་ཟངས་མདོག་དཔལ་རིར་དྲོང་དུ་གསོལ། །བར་ཁང་དུ་འཕགས་མཆོག་སྙིང་རྗེའི་བདག །མགོན་ཕྱག་ན་པདྨས་མཛེས་པའི་ལྷར། །རིགས་ཚོམ་བུའི་དཀྱིལ་འཁོར་རྒྱ་མཚོས་བསྐོར། །གནས་ཟངས་མདོག་དཔལ་རིར་དྲོང་དུ་གསོལ། །དེའི་སྟེང་ཁང་ཕྱོགས་བཅུའི་ཞིང་ཁམས་སུ། །དཔལ་འོད་མཚན་སྟོང་དུ་འབར་བའི་སྐུར། །འཁོར་རིག་པ་རང་སྣང་སེམས་དཔས་མཛེས། །གནས་ཟངས་མདོག་དཔལ་རིར་དྲོང་དུ་གསོལ། །རྣམ་ཐར་གྱི་སྒོ་བཞིའི་སྲུང་མ་རུ། །རིགས་བཞི་ཡི་དཔའ་བོ་ཌཱ་ཀིའི་བསྐོར། །དགའ་བ་བཞིའི་ཟློས་གར་ཅིར་ཡང་སྟོན། །གནས་ཟངས་མདོག་དཔལ་རིར་དྲོང་དུ་གསོལ། །ཕྱི་ལྟར་ན་སྤྲུལ་པའི་འོག་མིན་ཆེ། །ས་སྤྱོད་ཀྱི་བསྟི་གནས་ཉམས་རེ་དགའ། །རྔ་ཡབ་ཀྱི་གླིང་གི་ཟེའུ་འབྲུར་མཛེས། །གནས་ཟངས་མདོག་དཔལ་རིར་དྲོང་དུ་གསོལ། །ནང་ལྟར་ན་རྡོ་རྗེའི་ལུས་ཀྱི་གྲོང་། །སྙིང་དབུས་ཀྱི་མི་ཤིགས་ཐིག་ལེ་ཆེར། །ལྷན་སྐྱེས་ཀྱི་ཞིང་མཆོག་པདྨ་འོད། །གནས་ཟངས་མདོག་དཔལ་རིར་དྲོང་དུ་གསོལ། །
གཞན་དུ་ན་བསྐྱེད་རྫོགས་ཐབས་མཁས་ཀྱིས། །ཚོགས་བརྒྱད་ཀྱི་འཁྲུལ་པ་བསྡམས་པ་ལས། །ཞིང་པདྨ་དྲ་བར་རང་སྣང་བའི། །གནས་ཟངས་མདོག་དཔལ་རིར་དྲོང་དུ་གསོལ། །དེ་ལྟར་ན་རྣལ་འབྱོར་ཟབ་མོ་ལ། །སྨིན་གྲོལ་གྱི་ཆོ་གས་དགེ་བྱས་པས། །ལམ་རིག་འཛིན་རྣམ་བཞིའི་བགྲོད་པ་ཡིས། །སྐུ་གསུམ་གྱི་གོ་འཕང་མྱུར་ཐོབ་ཤོག །ཚུལ་དེ་ལས་ཚད་མེད་སྙིང་རྗེའི་མཐུས། །སྣ་ཚོགས་ཀྱི་ཕྲིན་ལས་ཟབ་མོ་ཡིས། །ཁམས་གསུམ་གྱི་འགྲོ་བ་ཡོངས་སྒྲོལ་བར། །རྗེ་ཁྱེད་དང་མཉམ་པར་བྱིན་གྱིས་རློབས། །ཚིག་དེ་སྐད་གསོལ་འདེབས་སྨོན་པའི་གླུ། །དཔལ་གཞོང་པ་ལྷ་ཆུའི་འགྲམ་ངོགས་སུ། །སྤྲང་གཏད་མེད་པདྨ་དགྱེས་པའི་སྡེས། ཡིད་བཟོད་མེད་དད་པའི་ངང་ནས་བྲིས། །ཞེས་རྒྱལ་ཀུན་འདུས་ཞལ་འཆི་མེད་པདྨ་ཐོད་ཕྲེང་གིས་སྒྱུ་འཕྲུལ་རྡོ་རྗེའི་བཀོད་པ་ལ་བརྟེན་ནས་སྣང་སེམས་རོ་གཅིག་ཏུ་འདྲེས་པའི་བརྡར་གྲམ་པ་ལས་བདུད་རྩིའི་རྒྱུན་བཟང་ཆལ་ཆིལ་གཡོ་བར་མཛད་པའི་སྟོད་ལུང་གཞོང་པ་ལྷ་ཆུར་རིགས་འདུས་གུ་རུའི་དཀྱིལ་འཁོར་དུ་ཚོགས་ཀྱི་མཆོད་པ་བརྒྱ་ཕྲག་ཐལ་བ་བགྱིས་པའི་རྗེས་ཐོག་སྐད་ཅིག་ལ་གསོལ་བ་བཏབ་པ་སརྦ་སིདྡྷི་མྨེ་པྲ་ཡཙྪནྟུ།། ༈ །།སྒྲུབ་རྒྱུད་སྙིང་པོའི་གྲུབ་པའི་རྣལ་འབྱོར་རྣམས་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ཟབ་དོན་རོལ་མོ་ཞེས་བྱ་བ། ཨ་ཧོ། སྤང་བྱ་ཡི་མཐར་ཐུག་འཕོ་བའི་དྲི། །བདེ་ཆེན་གྱི་ཡེ་ཤེས་ཀྱིས་བཅོམ་པས། །ཁ་སྦྱོར་ལ་ཡན་ལག་བདུན་ལྡན་སྐུ། །དཔལ་རྡོ་རྗེ་འཆང་ལ་
གསོལ་བ་འདེབས། །རྩ་རླུང་དང་ཐིག་ལེའི་རྟོག་པ་ཀུན། །ལྷན་སྐྱེས་ཀྱི་ཝཾ་ཡིག་གིས་བསྡོམས་པས། །བདེ་སྟོང་གི་མཚན་དཔེའི་མཚར་སྡུག་ཅན། །ཡུམ་རྡོ་རྗེ་རྣལ་འབྱོར་མ་ལ་འདུད། །སྣང་སེམས་ཀྱི་འཇུག་ལྡང་རྒྱུར་བཅས་པ། །ཕྱག་ཆེན་གྱི་དྲྭ་བར་བཅིངས་པ་ལས། །བློ་བྲལ་གྱི་བརྟུལ་ཞུགས་གྲུབ་པའི་གཉེན། །དཔལ་ས་ར་ཧ་ལ་གསོལ་བ་འདེབས། །ཐ་མལ་གྱི་སྣང་བ་གཡོ་འཁྲུལ་པོ། །འོད་གསལ་གྱི་དྷ་ཏིར་དག་པ་ལས། །ཟུང་འཇུག་གི་དགའ་བས་བསྙེམས་པའི་གཟུགས། །དཔལ་ལཱུ་ཧི་པ་ལ་གསོལ་བ་འདེབས། །ལམ་སྨིན་ཅིང་སྦྱངས་པའི་ཐབས་མཁས་ཀྱིས། །སྒོ་གསུམ་གྱི་བྱེད་པ་བཅིངས་པ་ལས། །སྲིད་ཞི་ལ་མི་གནས་ཧེ་རུ་ཀ །དཔལ་ཌོམྦི་པ་ལ་གསོལ་བ་འདེབས། །བཅུ་དྲུག་གི་དགའ་བའི་རྩེ་མོ་རུ། །ཆགས་བཅས་ཀྱི་འཆིང་བ་རབ་བཅད་པས། །ཉེ་རྒྱུ་ཡི་སྤྱོད་པའི་མཆོག་གྲུབ་པ། །དཔལ་དྲིལ་བུ་པ་ལ་གསོལ་བ་འདེབས། །མཆོག་དེ་རྣམས་ལས་བྱུང་གདམས་པའི་རྒྱུན། །མཐའ་དག་གིས་ཐུགས་མཚོར་གཏམས་པ་ལས། །གྲུབ་གཉིས་ཀྱི་མེ་ཏོག་མཛེས་འབར་བ། །དཔལ་ཏེ་ལོ་པ་ལ་གསོལ་བ་འདེབས། །རྗེ་དེ་ཡི་ཞབས་པད་ལེགས་བསྙེན་པའི། །དཀའ་སྤྱད་ཀྱིས་ས་ལམ་གཅིག་ཅར་བགྲོད། །རྒྱུད་ལུང་དང་མན་ངག་རྒྱ་མཚོའི་བདག །དཔལ་ནཱ་རོ་པ་ལ་གསོལ་བ་འདེབས། །གཟུང་འཛིན་གྱི་སྤྲོས་
པ་དབུ་མར་ཞིག །ཡིད་བྱེད་ཀྱི་རྟོག་པ་དབྱིངས་སུ་ཡལ། །གནས་ལུགས་ཀྱི་གཏན་སྲིད་ཟིན་པ་པོ། །དཔལ་མེ་ཏྲི་པ་ལ་གསོལ་བ་འདེབས། །མགོན་ཟུང་གི་སྙན་བརྒྱུད་སྒྲོན་མེ་ཡིས། །གངས་ཅན་གྱི་ལྗོངས་ཀུན་སྣང་མཛད་པ། །དགྱེས་རྡོར་གྱི་སྤྲུལ་པ་མི་གཟུགས་ཅན། །དཔལ་མར་པ་ལོ་ཙཱར་གསོལ་བ་འདེབས། །ཐབས་ངེས་འབྱུང་དང་སྙིང་རྗེ་མོས་གུས་ཀྱིས། །ཚེ་གཅིག་གིས་རྡོ་རྗེའི་སར་གཤེགས་པ། །གངས་ཁྲོད་ཀྱི་གྲུབ་རིགས་རྒྱ་མཚོའི་ཏོག །དཔལ་མི་ལ་རས་པར་གསོལ་བ་འདེབས། །གསུང་རྡོ་རྗེའི་བདག་ཉིད་བྱང་སེམས་ཚུལ། །ཕྱི་ནང་གི་ཡོན་ཏན་ཡོངས་སུ་རྫོགས། །ཕྱོགས་བྲལ་གྱི་གདུལ་བྱ་སྨིན་མཛད་པ། །དཔལ་སྒམ་པོ་པ་ལ་གསོལ་བ་འདེབས། །ཚུལ་དེ་ལས་འོངས་པའི་ཟབ་དོན་གྱིས། །སྒྲུབ་བརྒྱུད་ཀྱི་བསྟན་པ་འཛིན་མཁས་པ། །ཟུང་བཞི་སོགས་མཐའ་ཀླས་གྲུབ་བརྙེས་ཚོགས། །སྙིང་དབུས་ནས་དྲན་པས་གསོལ་བ་འདེབས། །གནས་འཁོར་བ་ལ་ངེས་པར་འབྱུང་བ་དང་། །མི་རྟག་པ་སྙིང་ནས་དྲན་པ་དང་། །ཅིས་ཀྱང་དགོས་མེད་ཀྱི་ཞེན་ལོག་གིས། །ཐེག་དམན་གྱི་ལམ་རིམ་རྫོགས་པར་ཤོག །སྡུག་བསྔལ་གྱིས་མནར་བའི་རིགས་དྲུག་འགྲོར། །བཅོས་མིན་གྱི་སྙིང་རྗེས་དྲངས་པ་ཡིས། །གཞན་ཕྱིར་དུ་སངས་རྒྱས་ཐོབ་འདོད་པས། །ཐེག་ཆེན་གྱི་ལམ་ལ་འཇུག་པར་ཤོག །
སྐྱབས་བླ་མ་སངས་རྒྱས་ཀུན་འདུས་སུ། །ངེས་ཤེས་ཀྱི་དད་པས་རྒྱུད་བརླན་ཅིང་། །མོས་གུས་ཀྱིས་ཁམས་འདུས་གསོ་ནུས་པའི། །གསང་སྔགས་ཀྱི་ལམ་ལ་བརྩོན་པར་ཤོག །ཚུལ་དེ་ལྟའི་རྟེན་འབྲེལ་ལེགས་འགྲིགས་ནས། །མི་ཕྱེད་ཀྱི་དབང་བཞིའི་བདུད་རྩི་ཡིས། །གནས་སྐབས་བཞིའི་འཁྲུལ་པའི་དྲི་སྦྱངས་ནས། །སྐུ་བཞི་ཡི་ས་བོན་ཐེབས་པར་ཤོག །ཁྱད་པར་དུ་རྡོ་རྗེའི་ཡེ་ཤེས་མཆོག །མངོན་སུམ་དུ་འཕོ་བའི་དབང་བསྐུར་གྱིས། །གཅིག་ཤེས་པས་ཀུན་གྲོལ་ཕྱག་རྒྱ་ཆེའི། །གནས་ལུགས་དེ་རྗེན་པར་མཐོང་བར་ཤོག །ཐ་མལ་གྱི་སྣང་ཞེན་འཆིང་བ་དང་། །ཡོངས་གྲུབ་ཀྱི་རིམ་པའི་སྨིན་བྱེད་དུ། །ཀུན་བརྟགས་ཀྱི་བསྐྱེད་རིམ་ལེགས་བསྒོམས་ཏེ། །ཕུང་ཁམས་ཀུན་ལྷ་སྐུར་འཆར་བར་ཤོག །ལུས་འཁྲུལ་འཁོར་གྱིས་རྩ་ཡི་བྱེད་པ་བཅིངས། །ངག་ཁ་སྦྱོར་གྱིས་སྲོག་རྩོལ་དྷཱ་ཏཱིར་བསྡམས། །ཡིད་འབར་འཛག་དབུ་མར་ཐིམ་པ་ལས། །ལམ་གཏུམ་མོའི་ཕ་རོལ་ཕྱིན་པར་ཤོག །དོན་དམ་གྱི་ལྷ་སྐུ་སྒྱུ་མ་དང་། །ཀུན་རྫོབ་ཀྱི་སྣང་བ་སྒྱུ་མ་ལྷས། །མཉམ་རྗེས་སུ་བསྲེ་བའི་ཉམས་ལེན་གྱིས། །ལམ་སྒྱུ་ལུས་ཀྱི་ཕ་རོལ་ཕྱིན་པར་ཤོག །རིལ་འཛིན་དང་རྗེས་སུ་གཞིག་པ་ཡིས། །སྟོང་གཞི་ཡི་འོད་གསལ་ཆེར་འཇུག་ཅིང་། །ཟུང་འཇུག་གི་ལྷ་སྐུར་ལྡང་ནུས་པའི། །ལམ་འོད་གསལ་ཕ་རོལ་ཕྱིན་པར་ཤོག །རླུང་སྦྱོར་དང་
འདུན་སྟོབས་གོམས་པའི་མཐུས། །ཉིང་འཁྲུལ་གྱི་རང་ངོ་ཤེས་པ་དང་། །སྦྱོང་སྤེལ་དང་སྤྲུལ་བསྒྱུར་འབྱོངས་པ་ཡིས། །ལམ་རྨི་ལམ་གྱི་ཕ་རོལ་ཕྱིན་པར་ཤོག །དོན་འགྲོ་འོང་སྲེད་ལེན་མ་གྲུབ་ཀྱང་། །ཐབས་སྲོག་རྩོལ་གནད་ལ་གོམས་པ་ལས། །ཞིང་དག་པའི་གྲོང་དུ་བགྲོད་ནུས་པའི། །ལམ་འཕོ་བའི་ཕ་རོལ་ཕྱིན་པར་ཤོག །འཆི་སྲིད་ཀྱི་རིམ་པ་ཆོས་སྐུར་དག །བར་སྲིད་ཀྱི་ཡིད་ལུས་ལོངས་སྐུར་རྫོགས། །སྐྱེ་སྲིད་ཀྱང་སྤྲུལ་སྐུར་སྨིན་ནུས་པའི། །ལམ་བར་དོའི་ཕ་རོལ་ཕྱིན་པར་ཤོག །གཟོད་མ་ནས་ལྷན་སྐྱེས་གཉུག་མའི་དངོས། །བྱུང་ཚོར་གྱི་སྤྲོས་པ་ལས་འདས་པ། །སྐྱེ་འགགས་དང་གནས་གསུམ་བྲལ་བའི་གཤིས། །སྐུ་གསུམ་གྱི་དགོངས་དོན་རྟོགས་པར་ཤོག །འཁོར་འདས་ཀྱི་ཆོས་ཀུན་སེམས་ཀྱི་རྩལ། །སེམས་དེ་ཡང་རིག་སྟོང་ནམ་མཁའི་དཀྱིལ། །ཟུང་འཇུག་གི་རང་བཞིན་བརྗོད་ལས་འདས། །རང་གྲོལ་གྱི་བཙན་ས་ཟིན་པར་ཤོག །ལམ་གསལ་སྟོང་གི་ངང་དུ་རྩེ་གཅིག་གནས། །སྤྲོས་བྲལ་གྱི་ཆོས་ཉིད་བདེན་པ་མཐོང་། །སྣང་སེམས་ཀྱི་རྟེན་འབྲེལ་རོ་གཅིག་པས། །སྒོམ་མེད་ཀྱི་ཕ་མཐར་སོན་པར་ཤོག །སྒྲིབ་གཉིས་ཀྱི་ས་བོན་བཅོམ་པ་ལས། །སྐུ་གསུམ་གྱི་འབྲས་བུ་ཉེར་སྨིན་ཅིང་། །སྨོན་ལམ་དང་སྙིང་རྗེའི་འཕེན་པ་ཡིས། །མཐའ་ཀླས་ཀྱི་འགྲོ་བ་འདྲེན་པར་ཤོག །ཚིག་དེ་སྐད་གསོལ་
འདེབས་ཉམས་ཀྱི་གླུ། །ས་སྤྱོད་ཀྱི་བསྟི་གནས་ཉམས་དགའ་བར། །སྤྲང་གཏད་མེད་པདྨའི་མིང་ཅན་གྱིས། །བཅོས་མིན་གྱི་དད་པས་བསྐུལ་ནས་བྲིས། །ཞེས་པའང་ཕྱག་ན་པད་དཀར་འཆང་བ་སུམ་ལྡན་རྡོ་རྗེ་འཛིན་པའི་རྣམ་རོལ་གྱིས་རྩེན་པ་མཐོན་མཐིང་གི་ཅོད་པན་འཆང་བ་ཆེན་པོའི་གདན་ས་མཁའ་སྤྱོད་དཔལ་གྱི་མཚུར་ཕུར་ས་ཟླ་ཕྱི་མའི་དཀར་ཕྱོགས་ཀྱི་རྒྱལ་བ་གཉིས་པའི་གྲལ་ཚེས་དགེ་བར་བཀའ་བབས་བཞི་ལྡན་གྱི་སྒྲུབ་རྒྱུད་སྙིང་པོའི་རྣམ་ཐར་ལ་རྩེ་གཅིག་གིས་དད་པས་རྐྱེན་བྱས་ཏེ་གང་ཤར་གསོལ་བ་བཏབ་པ་དེ་དེ་བཞིན་དུ་འགྲུབ་བར་གྱུར་ཅིག། ༈ །།འཆི་མེད་པདྨ་ཀཱ་ར་ལ་གསོལ་བ་འདེབས་པ་རྡོ་རྗེའི་ཐོལ་གླུ་བདེ་སྟོང་དཔྱིད་ཀྱི་ཕོ་ཉའི་རྒྱང་གླུ་རིང་མོ་ཞེས་བྱ་བ། ཨེ་མ་ཧོ། རང་རིག་གདོད་ནས་དག་པའི་རྩལ། །ཟུང་འཇུག་སྒྱུ་འཕྲུལ་དྲྭ་བའི་གར། །འཆི་མེད་པདྨ་ཐོད་ཕྲེང་ལ། །གཉིས་སུ་མེད་པས་ཕྱག་འཚལ་ལོ། །རྡོ་རྗེ་ཕུང་པོའི་གྲོང་ཁྱེར་ན། །རྩ་ཁམས་དག་པ་རབ་འབྱམས་སྒྲུབས། །ཐིག་ལེ་ཚོམ་བུར་གྲོལ་བའི་སྐུ། །ལྷུན་གྲུབ་རིག་འཛིན་ཁྱོད་ལ་འདུད། །འགྲོ་འོང་སྲོག་དང་རྩོལ་བའི་རླུང་། །ཨ་བ་དྷཱ་ཏཱིར་ཐིམ་པ་ལས། །བརྗོད་བྲལ་བདེ་ཆེན་ནཱ་དའི་དངོས། །གསུང་གི་རྡོ་རྗེ་ཁྱོད་ལ་འདུད། །འཇུག་དང་ལྡང་བའི་རྟོག་པ་ཀུན། །རྣམ་ཐར་གསུམ་ལྡན་དབྱིངས་སུ་བཅོམ། །བསམ་གྱིས་མི་ཁྱབ་སྤྱོད་ཡུལ་ཐུགས། །ལྷན་ཅིག་སྐྱེས་པ་ཁྱོད་ལ་འདུད། །སྣང་སེམས་འཛིན་པ་མཐའ་དག་དང་། །ཕྲ་མོའི་ས་བོན་བཅོམ་པ་ལས། །གང་བཞེད་
དེ་ངོར་འཆར་བ་ཡི། །ཡོན་ཏན་མཐའ་ཡས་ཁྱོད་ལ་འདུད། །ཆོས་ཀུན་སྡོམ་པ་གཅིག་པུ་ཉིད། །དུ་མའི་གར་དུ་རོལ་པ་ལས། །རྣམ་བཞིའི་ཕྲིན་ལས་སྦྱིན་མཛད་པའི། །ཧེ་རུ་ཀ་དཔལ་ཁྱོད་ལ་། འདུད། །རྒྱལ་ཀུན་ཐུགས་རྗེའི་གོང་བུ་ནི། །ཁྱབ་བདག་དཔལ་ལྡན་བླ་མ་སྟེ། །དེ་ཕྱིར་སྐྱབས་གནས་འདུས་པའི་ཞལ། །རྡོ་རྗེ་སློབ་དཔོན་ཁྱོད་ལ་འདུད། །ཕུང་ཁམས་སྐྱེ་མཆེད་འདུས་བྱས་ལས། །རྣམ་གྲོལ་ཁ་སྦྱོར་མཚན་དཔེའི་དཔལ། །རབ་འབར་ཡི་དམ་ལྷ་ཡི་དངོས། །ཕྱག་རྒྱ་ཆེན་པོ་ཁྱོད་ལ་འདུད། །གནས་དང་ཡུལ་གྱི་ཌཱ་ཀི་ཀུན། །རྡུལ་བྲལ་ལྷག་མེས་ཞུ་བདེ་ཡིས། །བརྟན་པ་འཕྲོགས་ནས་རོལ་མཛད་པ། །མཁའ་འགྲོའི་ཚོགས་རྗེ་ཁྱོད་ལ་འདུད། །ཡིད་ཆོས་དབུ་མར་འཁྱུད་པ་ཡི། །འདའ་དཀའི་དམ་ཚིག་གིས་གཟིར་བས། །ཆོས་སྲུང་དྲེགས་ཚོགས་མཐའ་དག་གི །ཆེ་བའི་ཆེ་མཆོག་ཁྱོད་ལ་འདུད། །ཁྱད་པར་ཚོགས་བརྒྱད་འཁྲུལ་པའི་ཆོས། །ཡེ་ཤེས་དྲྭ་བར་བསྡོམས་པ་ལས། །བརྟུལ་ཞུགས་གྲུབ་པའི་སློབ་དཔོན་མཆོག །རྣམ་པ་བརྒྱད་དུ་སྟོན་ལ་འདུད། །ཀ་དག་ངང་ལས་མ་གཡོས་ཀྱང་། །ལྷུན་གྲུབ་སྙིང་རྗེའི་སྤྲིན་བཀོད་པས། །ཟུང་འཇུག་འཇའ་ལུས་རྡོ་རྗེའི་ཞལ། །པདྨ་ཀཱ་ར་ལ་ཕྱག་འཚལ། །སོ་སོར་རྟོག་པའི་ཡེ་ཤེས་མེས། །སྒྲིབ་གཉིས་རྒྱུར་བཅས་ཡོངས་བསྲེགས་པས། །ཐམས་ཅད་
མཁྱེན་པའི་སྣང་བ་ཅན། །བློ་ལྡན་མཆོག་སྲེད་ལ་ཕྱག་འཚལ། །བདེ་སྟོང་འཕོ་མེད་གྲུབ་པའི་སྲོག །ཐུགས་ཀྱི་ཐིག་ལེར་རོ་གཅིག་པས། །ཕྱོགས་ལས་རྣམ་རྒྱལ་སྤྱོད་པ་ཅན། །ཉི་མ་འོད་ཟེར་ལ་ཕྱག་འཚལ། །བདག་ཏུ་བལྟ་བའི་ཉེར་ལེན་ཀུན། །བདག་མེད་སྙིང་རྗེ་ཁྲོས་པའི་མཐུས། །སྤྲོས་བྲལ་ཆོས་དབྱིངས་ཆེན་པོར་བཅོམ། །སེང་གེ་སྒྲ་སྒྲོགས་ལ་ཕྱག་འཚལ། །རླུང་སེམས་རྟོག་ཚོགས་རྒྱུར་བཅས་པ། །ཨེ་ཝཾ་གཉིས་སུ་མེད་པར་བསྡོམས། །སྣ་ཚོགས་ཕྱག་རྒྱའི་གཟུགས་འཆང་བ། །པདྨ་སཾ་བྷ་ལ་ཕྱག་འཚལ། །ཟག་པ་བྲལ་བའི་ཚུལ་ཁྲིམས་མཆོག །གཙུག་ཏོར་གདེངས་ཀར་མངོན་རྫོགས་པས། །ཕྱི་ནང་བདུད་ཚོགས་ཕམ་མཛད་པ། །ཤཱཀྱ་སེང་གེ་ལ་ཕྱག་འཚལ། །རྡུལ་མུན་སྙིང་སྟོབས་ཁམས་གསུམ་པོ། །དབུ་མའི་གྲོང་དུ་དབང་བྱས་པས། །རྗེས་ཆགས་ཞུ་བདེའི་ལང་ཚོ་ཅན། །པདྨ་རྒྱལ་པོ་ལ་ཕྱག་འཚལ། །ཀུན་བརྟགས་གཉིས་སུ་སྣང་བ་ཡི། །གཞན་དབང་གྱུར་པའི་བར་ཆད་བགེགས། །ཡོངས་གྲུབ་ཕྱག་རྒྱར་སྒྲོལ་མཛད་པ། །རྡོ་རྗེ་གྲོ་ལོད་ལ་ཕྱག་འཚལ། །མདོར་ན་སྲིད་དང་ཞི་བ་ཡི། །ཕན་བདེའི་དངོས་ཀུན་ཡོངས་སྩོལ་བ། །སྐྱབས་ཀུན་འདུས་ཞལ་མཚོ་སྐྱེས་རྗེར། །དུས་གསུམ་དུས་མེད་ཆེན་པོར་འདུད། །ཀུན་རྫོབ་དམ་ཚིག་སེམས་དཔའ་ལ། །དོན་དམ་ཡེ་ཤེས་སེམས་དཔའ་ཡིས། །བྱིན་གྱིས་བརླབས་
པའི་དེ་མ་ཐག །གཟུང་འཛིན་བྲལ་བས་ཕྱག་བགྱིའོ། །བརྟན་དང་གཡོ་བའི་དངོས་པོ་ཀུན། །རང་གྲོལ་གཉུག་མར་དག་པའི་མོད། །སྣོད་བཅུད་མཆོད་པའི་སྤྲིན་ཕུང་ཆེ། །འཁོར་གསུམ་ཡང་དག་ངང་ནས་འབུལ། །རང་རིག་བདེ་གཤེགས་སྙིང་པོ་ལ། གློ་བུར་འཁྲུལ་པའི་ནོངས་པས་སྒྲིབ། །མཉམ་རྗེས་མཐའ་ལས་འདས་པའི་དབྱིངས། །དག་པ་གཉིས་ལྡན་ཆེན་པོར་བཤགས། །ཆོས་ཉིད་བདེན་པ་མཐོང་བ་དང་། །ཚོགས་གཉིས་ཀྱིས་མཚོན་དགེ་བའི་ཚོགས། །འཕགས་དང་སོ་སྐྱེའི་ཡུལ་གྱུར་པར། །མི་ཕྱེད་དགའ་བས་རྗེས་ཡི་རངས། །གང་ཞིག་རྒྱུད་ལ་བརྟེན་པ་ཡིས། །ཆགས་བྲལ་ཐབས་མཁས་སྦྱིན་བྱེད་པ། །འགོགས་དང་ལམ་གྱི་བདེན་པའི་དབྱངས། །རྟག་པ་རྒྱུན་དུ་སྟོན་གྱུར་ཅིག །ཐོག་མར་སྐྱེ་བ་མ་མཆིས་ན། །ཐ་མར་གང་དུ་འགགས་པར་འགྱུར། །དེ་ཕྱིར་འཆི་མེད་ཡེ་ཤེས་སྐུ། །སེམས་ཀྱི་རྡོ་རྗེར་བཞུགས་པར་གསོལ། །དེ་ལྟར་བསགས་ལས་བྱུང་བ་ཡིས། །མཐའ་ཀླས་དགེ་བ་གང་ལགས་པ། །ཐོག་མ་བླ་མ་དང་བྲལ་བ། །བློ་ལ་མི་གནས་ངང་དུ་བསྔོ། །ཨེ་མ་རྒྱལ་བ་ཐམས་ཅད་ཀྱི། །ཡེ་ཤེས་ཕུང་པོའི་རང་གཟུགས་མཆོག །སྐྱབས་གཅིག་མ་ཧཱ་གུ་རུ་རྗེར། །གུས་པས་གསོལ་འདེབས་བུ་ལ་དགོངས། །དངོས་ཉམས་རྨི་ལམ་སྣང་ཆ་རུ། །མགོན་ཁྱོད་དགྱེས་པའི་ཞལ་བསྟན་ནས། །གསུང་གི་
བདུད་རྩིའི་དབུགས་དབྱུང་བའི། །སྐལ་བ་བཟང་པོ་གྲུབ་པར་མཛོད། །དེ་མཐུས་དྲི་བཅས་འཁྲུལ་པའི་ལུས། །སྣང་སྟོང་ཆེན་པོར་བྱིན་བརླབས་པས། །སྐྱེ་དང་འཆི་བ་བྲལ་བ་ཡིས། །རྡོ་རྗེའི་སྐུ་མཆོག་འགྲུབ་བྱིན་རློབས། །འགྲོ་འོང་རླུང་གི་རྒྱུ་བ་ཀུན། །དག་པའི་སྔགས་ཀྱིས་བྱིན་བརླབས་པས། །འཇུག་ལྡང་བྱེད་རྩོལ་བྲལ་བ་ཡིས། །རྡོ་རྗེའི་གསུང་མཆོག་འགྲུབ་བྱིན་རློབས། །རྣམ་པར་རྟོག་པའི་སྒྱུ་མ་ཀུན། །མཁའ་ཁྱབ་རིག་པས་བྱིན་བརླབས་པས། །གཟུང་འཛིན་མཚན་མ་ལས་འདས་པའི། །རྡོ་རྗེའི་ཐུགས་མཆོག་འགྲུབ་བྱིན་རློབས། །གནས་སྐབས་བདག་གཞན་འགྲོ་བ་ལ། །རྣམ་པར་འཚེ་བའི་འཇུག་པ་ཅན། །བརྒྱད་གཉིས་འཇིགས་པའི་དཔུང་ཚོགས་ཀུན། །ཡོངས་སུ་ཞི་བར་བྱིན་གྱིས་རློབས། །ཚེ་བསོད་དཔལ་འབྱོར་སྟོབས་བཅུ་ཡི། །ཡོན་ཏན་འབད་པ་མེད་པའི་གཏེར། །ཕྱོགས་དུས་ཀུན་ཏུ་རྒྱས་པ་ཡིས། །དོན་གཉིས་འགྲུབ་པར་བྱིན་གྱིས་རློབས། །བརྟན་དང་གཡོ་བའི་དངོས་པོ་ནི། །ཡིད་ལ་མཛའ་བའི་ཉེར་སྤྱོད་ཚོགས། །དྲན་པ་ཙམ་གྱིས་རང་དབང་དུ། །འགྱུར་བའི་དགའ་སྟོན་ཐོབ་བྱིན་རློབས། །གང་ན་མི་དང་མི་མིན་གྱི། །དཔུང་པས་བཏེགས་པའི་ཉེར་འཚེའི་གཡུལ། །རྡོ་རྗེ་སྲིན་པོ་ཁྲོས་པའི་གཟིས། །ལྷག་མེད་བཅོམ་པར་བྱིན་གྱིས་རློབས། །མཐར་ཐུག་ཕྱོགས་བཅུའི་འགྲོ་བ་ཡི། །
མོས་དང་སྐལ་བར་ཉེར་འཚམས་པའི། །སྣ་ཚོགས་གཟུགས་ཅན་འཆང་བ་པོ། །སྤྲུལ་པའི་སྐུ་རུ་འགྲུབ་བྱིན་རློབས། །བདེ་སྟོང་ཁ་སྦྱོར་བདུན་ལྡན་པའི། །དག་པ་དོན་དམ་སྒྱུ་མའི་ཚུལ། །འོག་མིན་ཞིང་དུ་རྣམ་རོལ་པ། །ལོངས་སྤྱོད་རྫོགས་སྐུར་བྱིན་གྱིས་རློབས། །མཁའ་ཁྱབ་མཁའ་ཡི་རྡོ་རྗེ་ནི། །ཆ་དང་བཅས་པའི་ཡུལ་ལས་གྲོལ། །ཤིན་ཏུ་རྟག་པ་མཆོག་གི་དཔྱིད། །ཆོས་ཀྱི་སྐུ་རུ་འགྲུབ་བྱིན་རློབས། །ནམ་ཞིག་ཚེ་འདིའི་སྣང་བ་ནུབ། །ཕྱི་མའི་སྣང་བ་མ་ཤར་ཚེ། །བརྗོད་བྲལ་འོད་གསལ་མཚོ་སྐྱེས་རྗེར། །སྐད་ཅིག་གྲོལ་བར་བྱིན་གྱིས་རློབས། །གལ་ཏེ་རླུང་སེམས་ཟག་པ་ཡིས། །གཞན་གྱི་དབང་དུ་གྱུར་པ་ན། །ཟུང་འཇུག་རྡོ་རྗེའི་སྐུར་ལྡངས་ནས། །མི་སློབ་གོ་འཕང་ཐོབ་བྱིན་རློབས། །དེར་ཡང་བརྟན་པ་མ་ཐོབ་ན། །དག་པའི་སྣང་བ་ལ་གོམས་པས། །ས་སྤྱོད་ཟངས་མདོག་དཔལ་རི་རུ། །ཐོགས་མེད་བགྲོད་པར་བྱིན་གྱིས་རློབས། །དེ་ཚེ་མགོན་པོ་མཆོག་ཁྱོད་ཀྱིས། །སྨིན་གྲོལ་བདུད་རྩིས་ཉེར་གསོས་པས། །རིག་འཛིན་རྣམ་བཞིའི་གསང་ལམ་དུ། །མཆོག་གི་དངོས་གྲུབ་ཐོབ་བྱིན་རློབས། །ཨ་ཧོ་གང་ཤར་རྡོ་རྗེའི་གླུས། །ཡེ་ཤེས་སྐུ་ཅན་ཁྱོད་མཆོད་པས། །སྐྱེ་ཞིང་སྐྱེ་བར་བདག་སོགས་འགྲོ། །ཁྱོད་ཞབས་རྟག་ཏུ་བསྙེན་པར་ཤོག །ཅེས་པའང་དུས་གསུམ་མཁྱེན་པ་ཨོ་རྒྱན་ཆེན་པོ་དེ་ཉིད་ཀྱིས་བྱིན་གྱིས་བརླབས་པའི་
གྲུབ་པ་མཆོག་གི་ནགས་ཚལ་ཡེར་བ་ཟླ་བ་ཕུག་ཏུ་ས་ཟླ་ཕྱི་མའི་དཀར་ཕྱོགས་ཀྱི་རྫོགས་པ་གཉིས་༡༠པར་ཚོགས་ཀྱི་འདུ་བ་བརྒྱ་ཕྲག་བགྱིས་པའི་རྗེས་ཐོག་ཏུ་ཉམས་དགའི་རྟོགས་པ་ཀླུར་ལེན་པ་པོ་ནི་གཏད་མེད་ཀུན་ཏུ་རྒྱུ་བ་རྡོ་རྗེ་ཐུགས་མཆོག་རྩལ་ཏེ་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ།། ༈ །།ཟབ་དོན་སྙིང་པོའི་རྡོ་རྗེའི་ཐོལ་གླུ་པྲཎི་དྷ་གྲུབ་པའི་ལམ་བཟང་ཅེས་བྱ་བ། ཨ་ཧོ། རིགས་དང་དཀྱིལ་འཁོར་རྒྱ་མཚོའི་ཅོད་པན་དུ་གྱུར་ཀྱང་། །ཚུར་མཐོང་འགྲོ་བ་སྒྲོལ་ཕྱིར་དུར་སྨྲིག་གི་སྒྱུ་འཕྲུལ། །ཁྱབ་བདག་དཔལ་ལྡན་བླ་མའི་ཞབས་སེན་གྱི་པདྨོ། །སྙིང་དབུས་མི་ཤིགས་ཐིག་ལེར་འབྲལ་མེད་དུ་བཞུགས་ཤིག །མཐའ་ཀླས་མ་གྱུར་འགྲོ་ཀུན་འཁོར་མཚོ་ལས་བསྒྲལ་ཕྱིར། །བྱམས་དང་སྙིང་རྗེས་དྲངས་། པའི་སྨོན་འཇུག་གི་ལམ་ནས། །གཞན་ཕན་ཡིད་བཞིན་ནོར་བུའི་འཁྲི་ཤིང་ལ་རེག་པའི། །བཅོས་མིན་བྱང་སེམས་འབྱོང་པར་བྱིན་གྱིས་རང་རློབས་ཤིག །རང་ལུས་ཐ་མལ་ཞེན་པའི་འཁྲུལ་སྣང་གི་དྲི་མ། །སྣང་སྟོང་ཟུང་འཇུག་གཉུག་མའི་ལྷ་སྐུ་རུ་གསལ་ཞིང་། །སྒྲར་གྲགས་གསང་བ་སྔགས་ཀྱི་དེ་ཉིད་ལ་གཞོལ་བའི། །བསྐྱེད་རིམ་ལམ་བཟང་གོམས་པར་བྱིན་གྱིས་རང་རློབས་ཤིག །གཙུག་ཏོར་ཛ་ལནྡྷ་རའི་དགའ་ཚལ་གྱི་དབུས་སུ། །སྐྱབས་ཀུན་འདུས་ཞལ་ཁྱབ་བདག་འཁོར་ལོ་ཡི་མགོན་པོར། །ཁྱེད་ཤེས་དད་པས་གསོལ་བཏབ་ལམ་དབང་གི་ས་བོན། །རང་རྒྱུད་ཞིང་སར་སྨིན་པར་བྱིན་གྱིས་རང་རློབས་ཤིག །
གཟོད་ནས་སྤྲོས་བྲལ་འོད་གསལ་གཉུག་མ་ཡི་གཤིས་ལུགས། །སྐྱེ་འགགས་གནས་གསུམ་བྲལ་བའི་རང་ངོ་ལ་བལྟས་པས། །ཞི་ལྷག་ཟུང་དུ་འབྲེལ་བའི་ཉམས་ལེན་དང་སྦྲགས་ནས། །ལྷན་སྐྱེས་སྐུ་བཞི་འགྲུབ་པར་བྱིན་གྱིས་རང་རློབས་ཤིག །དེ་ལྟར་བསགས་དང་ཡོད་པའི་ཚོགས་གཉིས་ཀྱི་འབྲས་བུ། །འཁོར་གསུམ་མཚན་མས་མ་བཅིངས་ཉམས་ལེན་གྱི་ངང་ནས། །བླ་མེད་ཕྱག་རྒྱ་ཆེན་པོའི་ཉེ་རྒྱུ་རུ་བསྔོས་པས། །དོན་གཉིས་ལྷུན་གྱིས་གྲུབ་པར་བྱིན་གྱིས་རང་རློབས་ཤིག །དེ་སྐད་ཟབ་དོན་སྙིང་པོའི་ལམ་རིམ་གྱི་གནད་གསང་། །ཉུང་ངུའི་ཚིག་གིས་སྨོན་པའི་རྡོ་རྗེ་ཡི་ཐོལ་གླུ། །བྱིན་རླབས་བཀྲ་ཤིས་འབྱུང་བའི་དབེན་གནས་ཀྱི་ངོས་སུ། །གཏད་མེད་ཀུན་ཏུ་རྒྱུ་བའི་རྣལ་འབྱོར་དེས་བླངས་སོ། །ཞེས་པའང་འཕགས་མཆོག་ནཱ་ག་རྫུ་ནའི་ཡེ་ཤེས་སྒྱུ་མའི་ཟློས་གར་འཇིག་རྟེན་གསུམ་གྱི་མགོན་པོ་འབྲི་གུང་པའི་གདན་ས་ཐིལ་བྱང་གླིང་རྡོ་རྗེའི་གདན་དུ་རྟེན་གསུམ་གྱི་ཕྲེང་བ་ཚར་དུ་དངར་བའི་མདུན་སར་ཕྱག་རྒྱ་ཆེན་པོ་ལྔ་ལྡན་གྱི་ལམ་རིམ་དང་འབྲེལ་བར་གང་ཤར་སྨོན་ལམ་བཏབ་པ་སིདྡྷི་རསྟུ།། ༈ །།འོད་གསལ་རང་བཞིན་རྫོགས་པ་ཆེན་པོའི་ལམ་གྱི་རིམ་པ་དང་འབྲེལ་བར་རྡོ་རྗེའི་ཐོལ་གླུ་ཡེ་ཤེས་གྲུབ་པ་ཅེས་བྱ་བ། ཨ་ཧོ། གཟོད་ནས་དྲི་མེད་གཉུག་མའི་ངང་། །འོད་གསལ་སྣང་བཞིའི་རྩལ་རྫོགས་པས། །སྐུ་གསུམ་ལྷུན་གྲུབ་ཆེན་པོའི་ཞལ། །ངེས་དོན་བླ་མར་ཕྱག་འཚལ་ལོ། །རྒྱལ་བས་ཐེག་པ་སྣ་ཚོགས་པ། །
བསྟན་ཀྱང་མཐར་ཐུག་རྫོགས་པ་ཆེའི། །ལམ་གྱི་ངལ་སྟེགས་ཉིད་དོ་ཞེས། །ཟབ་གསང་སྙིང་པོའི་རྒྱུད་ལས་གསུངས། །དེ་སླད་དེ་ཡི་ལམ་གྱི་རིམ། །སྐལ་བཟང་ཚེ་གཅིག་གྲོལ་འདོད་པའི། །དབང་རྣོན་རྣམས་ཀྱི་བགོ་སྐལ་དུ། །མདོར་བསྡུས་གང་ཤར་དབྱངས་སུ་ལེན། །ཐོག་མར་དབེན་ཞིང་ཉམས་དགའི་སར། །ཕྱི་ནང་འབྱུང་བ་སྙོམས་པའི་དུས། །བདེ་བའི་སྟན་ལ་ལེགས་འདུག་སྟེ། །འབྱུང་བའི་རླུང་དུག་ལན་གསུམ་བུས། །སྤྱི་བོར་དཔལ་ལྡན་བླ་མ་བསྒོམ། །ཁྱེད་ཤེས་དད་པས་གསོལ་བ་གདབ། །དེ་ནས་དལ་འབྱོར་ཚང་བའི་རྟེན། །འདི་ཉིད་དཔེ་གྲངས་རྒྱུ་ངོ་བོའི། །རྙེད་པར་དཀའ་བའི་ཚུལ་བསམས་ལ། །ཚེ་འདིའི་འཁྲུལ་པའི་སྣང་ཞེན་ལྡོག །ཕྱི་ནང་སྣོད་བཅུད་གང་ལ་ཡང་། །མཐའ་བཞིའི་ཕྱག་རྒྱས་བཏབ་པའི་ཕྱིར། །ནམ་འཆི་ཆ་མེད་བློས་བསྐུལ་ཏེ། །སྙོམ་ལས་ལེ་ལོའི་ཞགས་པ་ཕྲོལ། །འཆི་ཚེ་དཀར་ནག་ལས་འབྲས་ཀྱི། །རྗེས་སུ་འབྲེངས་ལས་གཞན་མིན་ན། །སྙིང་ནས་དགེ་སྡིག་བླང་དོར་ལ། །རྣམ་པ་གཅིག་ཏུ་དམ་བཅའ་བརྟན། །འཁོར་བ་གར་སྐྱེས་རྣམ་གསུམ་གྱི། །སྡུག་བསྔལ་རྒྱུ་འབྲས་ཀྱིས་གཟིར་ཕྱིར། ལྟར་སྣང་བདེ་བ་གང་ལ་ཡང་། །བཅོས་མིན་ངེས་འབྱུང་དྲག་པོ་བསྐྱེད། །དེ་ཕྱིར་དེ་ལས་འདྲེན་ནུས་པ། །མཚན་ལྡན་དགེ་བའི་བཤེས་གཉེན་མཆོག །མཉེས་པ་གསུམ་གྱིས་ཉེར་བསྟེན་
ནས། །ཚེ་གཅིག་ཐར་པའི་གོ་འཕང་བསྒྲུབ། །དེ་ལྟར་ཡང་ཡང་བསམ་པ་ཡིས། །བློ་རྒྱུད་ལས་སུ་རུང་བ་ན། །སྐྱེས་བུ་ཆེན་པོའི་སེམས་ཀྱིས་སུ། །དཀོན་མཆོག་གསུམ་ལ་སྐྱབས་སུ་འགྲོ། །མཐའ་ཀླས་མ་གྱུར་འགྲོ་ཀུན་ལ། །བཟོད་མེད་སྙིང་རྗེས་དྲངས་པ་ཡིས། །སྨོན་དང་འཇུག་པའི་བྱང་ཆུབ་སེམས། །རྣམ་པ་ཀུན་ཏུ་བསྐྱེད་པར་བྱ། །འགལ་རྐྱེན་སྡིག་སྒྲིབ་བསལ་བའི་ཕྱིར། །སྟོབས་བཞིའི་གནད་དང་ལྡན་པ་ཡིས། །རྡོ་རྗེ་སེམས་དཔའི་བསྒོམ་བཟླས་ངང་། །ཡང་དག་གཉུག་མའི་གནས་ལུགས་བལྟ། །མཐུན་རྐྱེན་ཚོགས་གཉིས་མྱུར་འདུམ་པ། །ཕྱི་ནང་གསང་བ་དེ་ཁོ་ནའི། །རབ་འབྱམས་མཆོད་པའི་མཎྜལ་གྱིས། །སྐུ་གསུམ་དཀྱིལ་འཁོར་ལྷ་ཚོགས་མཆོད། །ཁྱད་པར་རྡོ་རྗེའི་ཡེ་ཤེས་མཆོག །མངོན་སུམ་རྒྱུད་ལ་འཕོ་བྱེད་པ། །མོས་གུས་བླ་མའི་རྣལ་འབྱོར་ནི། །ཉམས་ལེན་ཀུན་གྱི་རྩ་བའོ། །དེ་ལྟར་ལམ་གཞན་ཐུན་མོང་གི །སྔོན་འགྲོའི་བདུད་རྩིས་སྙིང་བརླན་པས། །ཐུན་མོང་མ་ཡིན་ཉམས་རྟོགས་ཀྱི། །ས་བོན་རྒྱུད་ལ་ཆགས་པར་འགྱུར། །རྡོ་རྗེའི་ཐོལ་གླུ་ཡེ་ཤེས་གྲུབ་པ་ལས། །སྦྱོར་བའི་ལམ་གྱི་རིམ་པའི་ཚོམས་ཏེ་དང་པོའོ།། །།དེ་ནས་ཁྱད་པར་སྔོན་འགྲོ་ལ། །དང་པོ་རིག་པའི་སྣ་འཁྲིད་ཕྱིར། །འཁོར་འདས་རུ་ཤན་དབྱེ་བ་ནི། །སྲིད་དང་ཞི་བའི་སྤྱོད་པ་གང་། །ལུས་ངག་ཡིད་ཀྱིས་རྗེས་
སྤྱད་ཅིང་། །སྤྱད་བྱ་རིགས་དྲུག་ས་བོན་རྣམས། །སྦྱོང་བྱེད་འབྲུ་གསུམ་འོད་ཀྱིས་སྦྱངས། །དེ་འབྲས་གནས་སྐབས་འཁྲུལ་པའི་རྒྱུ། །འཁོར་བའི་ས་བོན་ལས་ལྡོག་ཅིང་། །མཐར་ཐུག་སྒོ་གསུམ་བྱེད་པ་ཀུན། །རྡོ་རྗེ་གསུམ་གྱི་དྲྭ་བར་བསྡོམས། །གཉིས་པ་སེམས་ཀྱི་སྣ་འཁྲིད་ཕྱིར། །ལུས་ནི་རྡོ་རྗེའི་འདུག་སྟངས་ཏེ། །ངག་ནི་ཧཱུཾ་གི་རྒྱས་གདབ་དང་། །རྩལ་སྦྱང་གཉེན་བཙལ་ལམ་དུ་གཞུག །ཡིད་ཀྱང་བྱུང་གནས་འགྲོ་གསུམ་པོ། །བརྟག་པས་ཐ་མལ་སྒོ་གསུམ་པོ། །སྒྲིབ་བྲལ་རྡོ་རྗེ་གསུམ་དུ་བྱེད། །དེ་བཞིན་འགུལ་སྤྱོད་སྨྲ་བརྗོད་དང་། །རྟོག་པ་བྲལ་བར་རྣལ་དབབ་ཅིང་། །ཉན་ཐོས་བྱང་སེམས་ཁྲོ་བོ་ཡི། །ལྟ་སྟངས་ཉིད་ཀྱིས་སོར་ཡང་གཞུག །དངོས་གཞི་སྒོམ་མེད་ཁྲེགས་ཆོད་དང་། །སྒོམ་ཡོད་ཐོད་རྒལ་རྣམ་པ་གཉིས། །དང་པོ་དབང་བསྐུར་སྔོན་འགྲོ་བས། །ཡིད་དཔྱོད་ལས་འདས་མངོན་སུམ་དོན། །རང་གསལ་རྗེན་པར་ངོ་སྤྲད་དེ། །དེ་ཚེ་ད་ལྟའི་རིག་པ་ནི། །བཅས་བཅོས་སྤྲོ་བསྡུ་བྲལ་བའི་གཤིས། །ཡེ་བབས་གཉུག་མའི་གནས་ལུགས་དོན། །གདོད་མའི་གཞི་དབྱིངས་ལྷག་གེར་མཐོང་། །དེ་ལྟའི་ཆོས་ཉིད་མི་འགྱུར་དོན། །བསྒོམ་པས་རྩལ་སྦྱང་བསྟེན་པ་ནི། །ཅོག་གཞག་བཞི་ཡི་རྣལ་འབྱོར་ལ། །ལྷུམས་སུ་ཞུགས་པར་བྱ་བ་སྟེ། །དེ་ལྟའི་ཡིན་ལུགས་བསམ་ངོ་དང་། །བྲལ་བའི་ངང་དེར་ལྷོད་ཀྱིས་ཀློད།
རྒྱ་ཡན་འཕོ་འགྱུར་མེད་པར་འཇོག །ལྟ་བ་རི་བོ་ཅོག་གཞག་གོ །སྐྱིལ་ཀྲུང་བར་སྣང་ལྟ་སྟངས་གཏད། །ཚོགས་དྲུག་སྣང་བའི་འཇུག་ལྡོག་ཀུན། །བཟོ་མེད་དྭངས་གསལ་རྗེན་པར་རོལ། །སྒོམ་པ་རྒྱ་མཚོ་ཅོག་གཞག་གོ །སྒོ་གསུམ་རབ་བབས་ཁ་ཡན་ངང་། །ལྟ་སྒོམ་བཟའ་གཏད་མདུད་པ་བཤིག །རང་གསལ་ཡེ་ཤེས་ཅར་ཕོག་བསྐྱང་། །སྤྱོད་པ་མན་ངག་ཅོག་གཞག་གོ །ཕྱི་རོལ་ཡུལ་ལྔའི་ཤེས་པ་ལ། །གང་ཤར་སྤང་བླང་བྲལ་བ་ཡིས། །ནང་དུ་ངང་བཞག་རྗེན་པར་འཆར། །འབྲས་བུ་མ་བཅོས་ཅོག་གཞག་གོ །མདོར་ན་སྟོང་པར་རྒྱས་འདེབས་དང་། །དབྱིངས་ལ་གཏོད་པའི་འཛིན་པ་སྤངས། །ད་ལྟའི་ཤེས་པ་མྱོང་ཐོག་ཏུ། །ངོ་ཤེས་ཐག་ཆོད་བརྟན་པ་ཐོབ། །དེ་ལྟར་གོམས་པ་བརྟན་པ་ལས། །སྐུ་དང་ཡེ་ཤེས་ཕྲིན་ལས་ཀྱང་། །ལྷུན་གྲུབ་ཆེན་པོར་རྫོགས་པའི་ཕྱིར། །ལམ་བདེན་སྤྲོས་པ་དབྱིངས་སུ་ཡལ། །འདི་ནི་གྲངས་མེད་རྡོ་རྗེ་འཆང་། །བྱོན་དང་འབྱོན་འགྱུར་ཐམས་ཅད་ཀྱི། །ཉེ་ལམ་སྦས་པ་ཟབ་མོ་སྟེ། །འབྲས་བུའི་ཐུས་ཀ་བླ་ན་མེད། །གཉིས་པ་འོད་གསལ་གསང་བ་ཆེ། །ཁྱད་པར་བདུན་གྱི་འཕགས་པའི་ཆོས། །སྐུ་གསུམ་ལམ་གྱི་སྣང་བ་ལ། །རྩལ་རྫོགས་ཐོད་རྒལ་གདམས་པ་ནི། །སྒོ་གསུམ་དགེ་དང་མི་དགེ་བའི། །བྱ་བ་དགུ་ཕྲུགས་བཏང་ནས་ཀྱང་། །ལུས་གནད་སེང་གླང་དྲང་སྲོང་ཚུལ། །
ངག་གནད་སྨྲ་བ་ཡོངས་སུ་སྤངས། །སེམས་གནད་རིག་པ་མཁའ་ལ་གཏད། །དེ་ནས་འཆར་བྱེད་སྒོ་ཡི་གནད། །སྐུ་གསུམ་གཟིགས་སྟངས་ལྡོག་ཕབ་དང་། །ཟུར་གྱིས་བལྟའམ་ཐུན་མོང་དུ། །ཕྱེད་བཙུམ་ཟིལ་བུས་ཡུལ་ཉིད་ལ། །གྲུ་གང་ཙམ་གྱིས་མ་རེག་བལྟ། །འཆར་གཞི་སློང་བྱེད་རྐྱེན་གསུམ་དང་། །བྲལ་བ་ཟེར་གཉིས་དུས་སུ་སྟེ། །རླུང་གནད་མཆུ་སོར་མ་རེག་པར། །དལ་བུས་འཇུག་དང་ལྡང་བར་ཨཱ བྱེད། །དེ་ལྟར་བཤད་མ་ཐག་པ་ཡི། །གནད་ལ་གཡོ་བ་མེད་པ་ཡིས། །ཐོག་མར་འོད་སྣང་སྔོ་རིབ་ནི། །ཤིན་ཏུ་དག་པར་སྣང་བ་ལས། །ནང་དབྱིངས་ཕྱི་རུ་གསལ་བའི་གདངས། །འོད་ལྔའི་དྲ་བས་འབྲེལ་བ་ཤར། །དེ་དབུས་ཐིག་ལེ་སྟོང་སྒྲོན་ནི། །ཐིག་ཟླུམ་འོད་ལྔའི་མུ་ཁྱུད་ཅན། །མཐོང་ཚེ་ནང་དུ་སྟོང་གསལ་ཉམས། །འཆར་བ་ཤེས་རབ་རང་བྱུང་གི །སྒྲོན་མ་ཉིད་ཡིན་དེ་ཉིད་ལས། །ལྷག་མཐོང་རྡོ་རྗེ་ལུ་གུ་རྒྱུད། །མུ་ཏིག་བསྟར་ལ་བརྒྱུས་པ་ལྟར། །ཤར་ཚེ་དབྱིངས་རིག་དྲྭ་བ་རུ། །བཙུད་ཅིང་བསྒོམ་པ་རིག་པའི་གནད། །དེ་ཡང་ཞེན་མེད་རང་གསལ་དང་། །ཐུན་བཞིའི་རྣལ་འབྱོར་དང་ལྡན་པས། །ཉམས་ལེན་སྲང་དུ་གཞུག་པ་ཡིས། །སྣང་བཞིའི་ཕ་རོལ་སོན་འགྱུར་ཏེ། །དང་པོ་ཆོས་ཉིད་མངོན་སུམ་ནི། །བདེ་གཤེགས་སྙིང་པོའི་རང་གདངས་ཕྱིར། །ཤར་བའི་དབྱིངས་སྣང་མཐོང་ནས་བཟུང་། །ཐིག་
ལེ་ཐིག་ཕྲན་འོད་ཟླུམ་དང་། །ཐིག་ལེ་སུམ་འབྲེལ་སྣང་བའི་མཚམས། །ཀ་དག་རིག་པ་ལུ་གུ་རྒྱུད། །ཕྲ་ཞིང་འཁྱོགས་ལ་ཐིག་ལེས་འབྲེལ། །འགྲོ་འོང་བཅས་པར་ཤར་བ་གང་། །དབྱིངས་རིག་ཕྱག་རྒྱར་བཅིངས་ནས་བསྒོམ། །དེ་ཚེ་ནང་དུ་རྟོག་དཔྱོད་ཀྱིས། །ཤེས་རབ་ཁྱད་པར་ཅན་འཆར་ཞིང་། །ཡེ་ཤེས་སུམ་ཆ་ཙམ་ལ་དབང་། །འདི་དུས་བར་དོ་ཆོད་གྱུར་ཀྱང་། །རང་བཞིན་སྤྲུལ་སྐུའི་ཞིང་ཁམས་སུ། །དབུགས་འབྱིན་ཐོབ་པར་ཐེ་ཚོམ་མེད། །གཉིས་པ་ཉམས་སྣང་གོང་འཕེལ་ནི། །སྔ་མའི་འོད་སྣང་དེ་ཉིད་ལས། །ཆེས་ཆེར་འཕེལ་ཞིང་རྩིབས་ཤར་དང་། །གྱེན་འགྲེང་ཟླུམ་འཕྲིགས་མཆོད་རྟེན་དབྱིབས། །པདྨ་མཁར་ཐབ་མདུང་རྩེ་དང་། །དྲྭ་བ་དྲྭ་ཕྱེད་མིག་མངས་རིས། །ཐིག་ཟླུམ་སྲན་མ་ཙམ་ནས་བཟུང་། །བསེ་ཕུབ་ཙམ་གྱི་བར་སྐྱེ་ཞིང་། །ལུག་རྒྱུད་འགྲོ་འོང་གཡོ་བ་ཡང་། །འདབ་ཆགས་འཕུར་སྐྱེན་ཙམ་ཉིད་ནས། །བུང་བ་བཅུད་ལ་འཁོར་བ་བཞིན། །ཅུང་ཟད་གོམས་པའི་རིམ་པ་ཡིས། །འོད་སྣང་འཕེལ་དང་རིག་པ་དལ། །མཐར་གྱིས་སྟོང་ཉམས་འོད་གསལ་གྱི། །སྣང་བས་གར་བལྟས་གཡོ་མེད་ཁྱབ། །དབྱིངས་སྣང་ཟླུམ་འཕྲིག་པད་འདབ་བཞིས། །བརྒྱན་པའི་ཚོམ་བུ་འཆར་གྱུར་ན། །འཆི་སྲིད་འོད་གསལ་ངང་དུ་འགྲོ། །གསུམ་པ་རིག་པ་ཚད་ཕེབས་ནི། །ཡེ་ཤེས་ལྔ་ཡི་ཐིག་ལེའི་དབུས། །
སྐུ་གསུམ་ཚོམ་བུ་ཐ་དད་པ། །རིམ་བཞིན་གསལ་བས་གདོས་བཅས་འགགས། །ཅིར་སྣང་དག་པ་རབ་འབྱམས་སུ། །ཤར་ཞིང་ཡུལ་དུ་ཐོགས་རྡུགས་བྲལ། །ལུས་སེམས་རྟེན་འབྲེལ་རྒྱུན་ཆད་པས། །ཁམས་གསུམ་གནས་སུ་མི་ལྡོག་གོ །བཞི་པ་ཆོས་ཉིད་ཟད་པ་ནི། །ལས་རླུང་གཡོ་མེད་ཡེ་ཤེས་སུ། །འཕེལ་བས་ཕྱི་འབྱུང་གཟུང་ཡུལ་དང་། །ནང་འབྱུང་འཛིན་པའི་སེམས་བྱུང་བཅས། །འགགས་ཤིང་གསང་བ་འོད་གསལ་གྱི། །སྣང་བ་ཀུན་ཀྱང་ཆོས་དབྱིངས་ཐིམ། །དེ་ཚེ་སྐྱེ་བར་དབང་ཐོབ་པས། །སྣང་སྟོང་ཆུ་ཟླ་ལྟ་བུའི་ངང་། །འོད་གསལ་འཕོ་ཆེན་དྭངས་མའི་སྐུས། །འགྲོ་སྒྲོལ་ཕྲིན་ལས་རྟག་ཏུ་སྤྱོད། །དེ་བཞིན་འཇུག་པར་དབང་ཐོབ་པས། །གདོད་མའི་གཞི་དབྱིངས་ཆེན་པོ་རུ། ནང་གསལ་ཐིམ་ལ་མ་རྨུགས་པར། །སྐུ་དང་ཡེ་ཤེས་འདུ་འབྲལ་མེད། །དེ་ལྟར་དངོས་གཞིའི་ཉམས་ལེན་མཐིལ། །བསྟན་ནས་མཐའ་བརྟེན་མན་ངག་ནི། །མི་འགུལ་གསུམ་གྱི་གཞི་བཅའ་ཞིང་། །སྡོད་པ་གསུམ་གྱིས་ཚད་བཟུང་སྟེ། །ཐོབ་པ་གསུམ་གྱིས་གཟེར་གདབ་པར། །གདིང་བཞིའི་གྲོལ་ཚད་བསྟན་པའོ། །དང་པོ་བཞུགས་སྟངས་གཟིགས་སྟངས་དང་། །བཟོ་མེད་ངང་ལས་མི་གཡོ་བས། །རྩ་རླུང་དལ་ཞིང་སྣང་བ་འཕེལ། །དབྱིངས་རིག་ཟུང་དུ་ཆུད་པར་འགྱུར། །གཉིས་པ་ལུས་ཀྱི་བྱ་བ་དང་། །རྩ་ཁམས་འཕེལ་མེད་
སྣང་བ་ཡང་། །འདར་འཕྲིག་མེད་པར་སྡོད་པ་ཡིས། །འཁྲུལ་སྣང་འཁྲུལ་རྟོག་ཀུན་ཟད་ཅིང་། །ཞིང་ཁམས་ཚད་ལ་ཕེབས་པར་འགྱུར། །འདི་དུས་སྣང་བ་རྣམ་བཞི་ལ། །ལུས་ངག་ཡིད་ཀྱི་རྟགས་ཚད་རྫོགས། །དེ་ཚེ་བར་ཆད་བདུད་དང་ནི། །འཕེལ་འགྲིབ་ཉམས་དང་མི་འགྱུར་བ། །གསང་བའི་རྟགས་ཀྱང་ངེས་པ་ཡིས། །སོ་སོའི་འཇུག་ལྡོག་མ་འཁྲུལ་བྱ། །གཞན་ཡང་དྲོད་ཚད་ཉིང་འཁྲུལ་ནི། །རབ་ཀྱིས་འོད་གསལ་ཉིད་དུ་འཆར། །འབྲིང་གིས་ངོ་ཤེས་སྤྲུལ་སྒྱུར་ནུས། །ཐ་མས་བག་ཆགས་ངན་པའི་རྒྱུན། །ཆད་ཅིང་དགེ་བའི་རྨི་ལམ་འགྱུར། །གསུམ་པ་ཕྱི་ནང་ཡུལ་དང་ལུས། །གསང་བ་རླུང་སེམས་དབང་ཐོབ་པས། །རྐྱེན་སྣང་ཞིང་ཁམས་ཉིད་དུ་འཆར། །གདོས་བཅས་ཕུང་པོ་འོད་དུ་གསལ། །མཚམས་མེད་ལྔ་དང་ལྡན་པ་ཡི། །རྣམ་ཤེས་ཡིད་ཀྱང་འདྲོངས་པར་ནུས། །བཞི་པ་འཁོར་བའི་སྡུག་བསྔལ་དང་། །རྒྱུ་འབྲས་རྣམ་སྨིན་གདོད་ནས་དག །མྱ་ངན་འདས་པའི་གོ་འཕང་དང་། །བྲལ་བའི་འབྲས་བུ་བཙལ་དུ་མེད། །དེ་ཕྱིར་ཞི་དང་སྲིད་པ་ཡི། །རེ་དོགས་རྫུན་ཕུག་རང་སར་ཡལ། །ཐར་པ་ཆེན་པོའི་གྲོང་ཁྱེར་དུ། །ཡང་དག་མངོན་པར་རྫོགས་སངས་རྒྱས། །མདོར་ན་སྲས་དང་བཅས་པ་ཡི། །རྒྱལ་བ་ཀུན་གྱི་ཡེ་ཤེས་མཆོག །འོད་གསལ་ཐིག་ལེ་ཆེན་པོའི་དབྱིངས། །རང་གྲོལ་་ང་ཙན་ས་ཟིན་པའོ། །
རྡོ་རྗེའི་ཐོལ་གླུ་ཡེ་ཤེས་གྲུབ་པ་ལས། །དངོས་གཞིའི་ལམ་གྱི་རིམ་པའི་ཚོམས་ཏེ་གཉིས་པའོ། །དེ་ལྟར་དབང་པོ་རྣོན་པོའི་ཚོགས། །ཚེ་འདིར་གྲོལ་བའི་ལམ་བསྟན་ནས། །སླར་ཡང་འབྲིང་དང་རྟུལ་པོའང་། ། དབུགས་འབྱིན་བགྱི་སླད་ཚུལ་འདི་གདམས། །གང་ཞིག་རང་བཞིན་བར་དོ་རུ། །ཐོས་བསམ་སྒྲོ་འདོགས་ལེགས་ཆོད་ཅིང་། །ལྷག་པར་ཐེག་མཆོག་སྙིང་པོའི་ལམ། །ཚུལ་བཞིན་སྟོན་ནུས་བཤེས་གཉེན་བསྟེན། །དེ་ནས་ནམ་ཞིག་ཚེ་འདི་ཡི། །འཕེན་པ་རྫོགས་པར་བརྩམ་པ་ན། །འཆི་ཁའི་བར་དོ་ཞེས་བྱ་སྟེ། །དུས་དེར་ཆགས་ཞེན་འཁྲི་བ་བཅད། །སྐུ་དང་ཡེ་ཤེས་དབྱེར་མེད་དབྱིངས། །འོད་གསལ་སྦུབས་ལ་འཇུག་བྱའི་ཕྱིར། །ཕུང་པོ་སེང་གེ་ཉལ་སྟབས་ཀྱིས། །ཤེས་པ་མིག་ལ་གཏད་ནས་ཀྱང་། །དེ་ཉིད་དབྱིངས་རིག་ཐིག་ལེར་གཏད། །ཡང་ན་གྲོང་འཕོ་གྲོང་འཇུག་ནི། །དབུགས་ཀྱི་འགྲོ་འོང་དང་བསྟུན་ནས། །རིག་པ་ཨ་ཡི་རྣམ་པར་འཕང་། །འདི་དག་གིས་ནི་བཙན་ཐབས་སུ། །གྲོལ་བའི་གོ་འཕང་སྟེར་བར་བྱེད། །གལ་ཏེ་ལས་ཀྱི་གཞན་དབང་གིས། །དུས་དེར་བརྟན་པ་མ་ཐོབ་ན། །ཕྱི་རོལ་འབྱུང་བཞི་ཐིམ་པ་དང་། །ནང་དུ་རླུང་ལྔ་འགྲོས་ཐིམ་རྗེས། །རིག་གདངས་སྙིང་གི་སྦུབས་སུ་འཇུག །རླུང་ནི་ཁ་སྣའི་ལམ་ནས་སྡུད། །སེམས་ནི་ཡེ་ཤེས་རྒྱབ་གྱེས་ཏེ། །ཚེ་འདིའི་སྣང་བ་འགགས་པར་འགྱུར། །དེ་
ཚེ་དབུགས་ཀྱི་སྦྱོར་བ་ཡིས། །རྣམ་ཤེས་ཡུལ་ལ་དྲངས་པའི་རྗེས། །ཐིག་ལེ་སྟོང་པའི་སྒྲོན་མ་ནི། །མཐེབ་འཛུབ་སྦྱོར་བས་མཚོན་བྱས་ཏེ། །རང་སྣང་ཡེ་ཤེས་ཆེན་པོ་རུ། །ཕྱིར་མི་ལྡོག་པའི་ངོ་སྤྲོད་གདབ། །གཞན་དུ་སྐྱེ་མེད་ཡི་གེའི་སྒྲས། །གོང་ནས་གོང་དུ་འཕོ་བར་བྱ། །དེ་ནས་ཀུན་གཞིའི་རྣམ་ཤེས་ཉིད། །དྲན་བྱ་དྲན་བྱེད་མེད་པའི་ཕྱིར། །ནམ་མཁར་ཐིམ་པའི་བརྡར་བཏགས་ཚེ། །ཆོས་ཉིད་བར་དོའི་སྣང་བ་ནི། །རྒྱ་ཆད་ཕྱོགས་ལྷུང་བྲལ་བར་འཆར། །དེ་ཚེ་སྤང་བླང་མེད་པ་རུ། །རང་སར་བཞག་པའི་སྐད་ཅིག་མར། །གཞི་ལས་ཁྱད་ཆོས་དྲུག་ལྡན་གྱིས། །འཕགས་པའི་ནང་དབྱིངས་ཆེན་པོར་གྲོལ། །གལ་ཏེ་དེ་རུ་མ་གྲོལ་ན། །ནམ་མཁའ་འོད་གསལ་ལ་ཐིམ་སྟེ། །ཕྱོགས་དང་ཕྱོགས་མཚམས་ལྔ་ལྡན་གྱི། །འོད་ཟེར་ཚོམ་བུས་ཁྱབ་པའི་དུས། །རང་སྣང་རང་བཞིན་མེད་པ་རུ། །ངོ་ཤེས་རང་གྲོལ་བཙན་ས་ཟིན། །དེ་ནས་འོད་གསལ་ཟུང་འཇུག་ལ། །ཐིམ་པས་སྣང་བ་དེ་རྣམས་ཀུན། །ཁྲོ་བོའི་དཀྱིལ་འཁོར་ཆེར་ཤར་ཏེ། །སྒྲ་འོད་ཟེར་གྱིས་འཇིགས་པའི་ཚེ། །སེང་གེའི་གསོབ་ལྟར་རང་སྣང་ལ། །བག་མི་ཚ་བའི་གདེངས་རྙེད་བྱ། །དེ་བཞིན་བསམ་གཏན་ཞག་ལྔ་ལ། །ཡེ་ཤེས་རིག་པའི་ཚོམ་བུར་སྣང་། །རིག་པ་འོད་ལ་འཇུག་པ་དང་། །འོད་ཉིད་རིག་པར་འཇུག་པ་རྣམས། །གཞན་མིན་རང་གི་རང་རྩལ་དུ། །
ངོ་ཤེས་བརྟན་པ་ཐོབ་པར་འགྱུར། །སླར་ཡང་ཟུང་འཇུག་ཡེ་ཤེས་ལ། །ཐིམ་པས་སྙིང་ནས་མཐིང་དཀར་སེར། །དམར་བའི་འོད་སྣམ་རིམ་བརྩེགས་སྟེང་། །སོ་སོའི་མདངས་མཚུངས་ཐིག་ལེ་ནི། །འོད་ལྔའི་ཐིག་ཕྲན་གྱིས་བརྒྱན་པ། །འཆར་ཚེ་གང་ཤར་ཐད་ཀ་རུ། །རིག་པ་གཡོ་མེད་བཞག་པ་ཡིས། །ཡེ་ཤེས་བཞི་སྦྱོར་ཀློང་དུ་གྲོལ། །དེ་ནས་ཡེ་ཤེས་ལྷུན་གྲུབ་ལ། །ཐིམ་པས་ཀ་དག་སྣང་བ་ནི། །མཁའ་ལྟར་དག་པའི་འོག་རོལ་དུ། །སྟེང་ཁར་ཁྲོ་བོ་ཐད་ཀ་རུ། །ཞི་བའི་དཀྱིལ་འཁོར་འཁོར་ལོ་སྟེ། །འོག་ཏུ་རིགས་དྲུག་གནས་རིགས་ནི། །འདུལ་བྱེད་སྟོན་པར་བཅས་པ་ཀུན། །ཐུགས་རྗེའི་འོད་དང་སྐུ་ཡེ་ཤེས། །གཉིས་མེད་མཐའ་གྲོལ་མ་དག་དང་། །དག་པའི་སྒོ་ལྟར་ཤར་བ་ཡིས། །འཁོར་འདས་གཉིས་སུ་རྒྱ་མ་ཆད། །ཆེས་ཕྲའི་ཡེ་ཤེས་ནང་དུ་གསལ། །སྣང་བ་གང་དུའང་མི་ཕྱེད་ལ། །རྟེན་འབྲེལ་ཟང་ཐལ་རྗེན་པའི་ངང་། །ཤེས་པ་རྩེ་གཅིག་ཉིད་དུ་གནས། །རྟག་ཆད་མཐའ་གྲོལ་ངོ་བོར་སངས། །སྲིད་པའི་འབྱུང་ཁུངས་མ་འགགས་ཤིང་། །འོད་གསལ་ཆོས་ཉིད་མ་བུ་འདྲེས། །དེ་ལྟའི་འཆར་ཚུལ་བརྒྱད་པོ་ཡང་། །རིག་གདངས་གཅིག་གི་ལྡོག་ཆ་ལས། །འཁོར་འདས་སྣང་ཆ་མ་འགགས་ཤར། །གཞན་ཡང་ལྷ་དང་ལམ་སྐྱེ་གནས། །བསམ་གཏན་ལྟ་བ་གདམས་ངག་རྣམས། །རྗེས་སུ་དྲན་པས་ཡི་དམ་ལྷའི། །ཞལ་
མཐོང་བར་དོའི་ཆོས་ཉིད་དབང་། །སྤྲུལ་སྐུའི་ཞིང་དུ་དབུགས་འབྱིན་ཞིང་། །བསམ་གཏན་ལ་གནས་རང་སྣང་དང་། །གཉིས་སུ་མེད་སྤྱོད་སྔར་འདྲིས་ཀྱི། །མི་དང་འཕྲད་བཞིན་གྲོལ་བ་ཐོབ། །དེ་བཞིན་སྔོན་གྱི་སྐྱེ་གནས་དང་། །འཆི་འཕོ་སྐྱེ་བ་ཕ་རོལ་གྱི། །སེམས་དང་སྣང་བ་ལྐོག་གྱུར་ཤེས། །རིགས་དྲུག་གནས་མཐོང་དབང་པོ་རྣམས། །རྣམ་དག་མངོན་ཤེས་དྲུག་ཀྱང་འཆར། །དེ་ལྟར་ལྷུན་གྲུབ་སྣང་བ་ལ། །སོམ་ཉི་མེད་པའི་གདིང་རྙེད་པས། །འཆར་ལུགས་བརྒྱད་ཀྱང་རང་ཐིམ་སྟེ། །ཐུགས་རྗེ་ཐུགས་རྗེ་ལ་ཐིམ་པས། །རིགས་དྲུག་འཁོར་བའི་འཁྲུལ་སྣང་ཟད། །འོད་ཉིད་འོད་ལ་ཐིམ་པ་ཡིས། །འཇའ་ཚོན་ནམ་མཁར་ཡལ་བ་བཞིན། །སྐུ་ཉིད་སྐུར་ཐིམ་མཚན་མ་ཡི། །ཞལ་ཕྱག་ནང་གསལ་ཆེན་པོར་དག །ཡེ་ཤེས་ཡེ་ཤེས་ལ་ཐིམ་པས། །ཆོས་ཉིད་མ་བུ་དབྱེར་མེད་འདྲེས། །གཉིས་མེད་གཉིས་མེད་ལ་ཐིམ་པས། །གདོད་མའི་ཆོས་སྐུར་འཇུག་ལྡང་བྲལ། །མཐའ་གྲོལ་མཐའ་གྲོལ་ལ་ཐིམ་པས། །བློས་འདས་ཆེན་པོའི་དགོངས་པར་གནས། །མ་དག་ཡེ་ཤེས་སྐོར་ཐིམ་པས། །ཐིག་ལེ་ཉག་གཅིག་ཀློང་དུ་འདྲེས། །དག་པ་ཡེ་ཤེས་ངོ་བོ་ལ། །ཐིམ་པས་གདོད་མའི་བཙན་ས་ཟིན། །མདོར་ན་དུས་འདིར་གྲོལ་བའི་གནད། །ཕྱི་རོལ་སྣང་བའི་འཆར་སྒོ་ལ། །རྟོག་པས་བཏགས་ན་མཐའ་མེད་ཀྱང་། །དཔྱོད་མཁན་
ཉིད་ལ་ཚུར་བརྟགས་པས། །གང་དུའང་གྲུབ་པ་མེད་པའི་ངང་། །མེད་དོ་སྙམ་པའང་རང་གྲོལ་བ། །འདི་ནི་ཉམས་ལེན་སྙིང་པོའོ། །གལ་ཏེ་གོམས་པའི་སྟོབས་ཞེན་པས། །སྲིད་པ་བར་དོར་ཁ་འཁྱལ་ཚེ། །ཇི་ཙམ་གནས་ཀྱི་ཕྱེད་ཆ་ཡན། །སྔ་མའི་གཟུགས་ཀྱི་རྣམ་པ་དང་། །གཅིག་ཤོས་ཕྱི་མའི་གཟུགས་འཛིན་ཞིང་། །དྲི་ཟ་ཕྲ་མོའི་མངོན་ཤེས་ཅན། །ངེས་མེད་རྨི་ལམ་ལྟ་བུ་རུ། །སྣང་བ་བན་བུན་བཟའ་གཏད་བྲལ། །དེ་ཚེ་བར་དོའི་གནས་སྐབས་སུ། །ངོ་ཤེས་མོད་ནས་ཕྱོགས་བཅུ་ཡི། །སྤྲུལ་པའི་ཞིང་ཁམས་དྲན་པའི་མོད། །ཆོས་ཉིད་བདེན་པའི་ནུས་མཐུ་དང་། །རྡོ་རྗེ་བླ་མའི་བྱིན་རླབས་ཀྱིས། །སྐད་ཅིག་ཉིད་དུ་དབུགས་འབྱིན་འགྱུར། །གཞན་ཡང་མངལ་དུ་འཇུག་བརྩམ་ཚེ། །མཐོ་རིས་འོད་དཀར་མགོ་ཡང་གྱེན། །ལྷ་མིན་ཁ་ཆར་བྱོལ་སོང་ནི། །ཁྲག་བཙོའི་རྣམ་པ་འཕྲེད་དུ་སྟེ། །ཡི་དྭགས་དུ་བ་དམྱལ་བ་ལ། །སྡོང་དུམ་ལྟ་བུར་འོག་ཏུ་བལྟ། །དེ་ཚེ་རབ་ཀྱིས་བདེན་མེད་ངང་། །འབྲིང་གིས་བདེ་སྟོང་ལམ་ཁྱེར་ཏེ། །ཐ་མས་འདོད་ཆགས་མི་གཙང་བའི། །འདུ་ཤེས་བསྒོམ་པས་ཞེན་པ་སྤངས། །དེས་ཀྱང་ལྡོག་པར་མ་ནུས་ན། །མངལ་སྒོ་དམན་པ་སྨོན་ལམ་དང་། །སྐྱབས་སུ་འགྲོ་བའི་མཐུས་དགག་སྟེ། །ཁམས་དྲུག་ལྡན་པའི་རྡོ་རྗེའི་ལུས། །ཐེག་ཆེན་རིགས་སུ་སྐྱེ་སྲིད་བཟུང་། །དེ་ལྟར་དབང་པོ་ཐ་མ་ནི། །
ངེས་གསང་ལམ་འདིར་ཞུགས་གྱུར་ཀྱང་། །མོས་པས་སྤྱོད་པ་ཙམ་ཉིད་ལས། །འདིའང་འཆི་ཁ་ཆོས་ཉིད་ཀྱི། །བར་དོར་བརྟན་པ་ཐོབ་པ་ཡི། །གྲུབ་མཐའ་མངོན་དུ་མ་རྙོགས་ཚེ། །དུས་འདིར་བླ་མའི་མོས་གུས་ཀྱིས། །གདམས་ངག་རྗེས་སུ་དྲན་པ་ལས། །རང་བཞིན་སྤྲུལ་སྐུའི་ཞིང་ཁམས་སུ། །འདུན་པ་གཏད་པའི་དེ་མ་ཐག །རྣམ་གྲོལ་དབུགས་ཆེན་འབྱིན་པ་ལྟར། །བདེ་གཤེགས་རིགས་ལྔའི་ཞལ་མཐོང་ཞིང་། །དབང་བསྐུར་ལུང་བསྟན་དབུགས་དབྱུང་ནས། །ཀ་དག་གདོད་མའི་གཞི་དབྱིངས་སུ། །མངོན་པར་རྫོགས་སངས་རྒྱས་པར་འགྱུར། །རྡོ་རྗེའི་ཐོལ་གླུ་ཡེ་ཤེས་གྲུབ་པ་ལས། །འཕྲོས་དོན་གྱི་ཁྱད་པར་གཞན་ཕྱེ་བའི་ཚོམས་ཏེ་གསུམ་པའོ།། །།དེ་ལྟར་སྡེ་གསུམ་ཀློང་དགུའི་བཅུད། །མཐར་ཐུག་མན་ངག་སྙིང་ཏིག་གི །ཐུན་མོང་ཁྱད་པར་ལམ་གྱི་རིམ། །ཉུང་ངུའི་ངག་གིས་འདོམས་པ་གང་། །གཏད་མེད་ཀུན་ཏུ་རྒྱུ་བ་ཡི། །རྣལ་འབྱོར་པདྨ་དགྱེས་པའི་སྡེས། །གནས་གསུམ་ཌཱ་ཀིའི་དགའ་ཚལ་ཆེར། །གང་ཤར་རྡོ་རྗེའི་གླུ་རུ་བླངས། །འདི་ལ་ནོངས་པར་གྱུར་པ་གང་། །རང་རིག་གཞུག་མའི་ཀློང་དུ་འཆགས། །དགེ་བས་འགྲོ་ཀུན་སྐུ་གསུམ་གྱི། །གྲོང་ཁྱེར་མཆོག་ཏུ་འཇུག་གྱུར་ཅིག །ཅེས་པའང་དུས་གསུམ་མཁྱེན་པ་ཨོ་རྒྱན་ཆེན་པོས་ཡེ་ཤེས་ཌཱ་ཀི་བདེ་ཆེན་མཚོ་རྒྱལ་ལ་མན་ངག་སྙིང་གི་ཐིག་ལེའི་ཆོས་འཁོར་བསྐོར་བའི་གནས་ཀྱི་གཙུག་ཏོར་
གཞོ་སྟོད་ཏི་སྒྲོ་མཁའ་འགྲོའི་ཚོགས་ཁང་ཆེན་མོར་མེ་མཆོད་དང་ཚོགས་ཀྱི་འདུ་བ་བགྱིས་པའི་ཚེ་ཇི་ལྟར་ཤར་བ་བཞིན་དེ་དང་ཉེ་བའི་འདབ་རོལ་དྲང་སྲོང་དགྱེས་པའི་ཚལ་དུ་བྲིས་པ་ལས་རྣམ་པར་ཕྱེ་བ་སྟེ་ཤིན་ཏུ་གསང་བའི་སྡེ་ཚན་ནོ། །གུ་བྱ།། ༈ །།རྣལ་འབྱོར་གསུམ་གྱི་རྡོ་རྗེའི་ཐོལ་གླུ་འོད་གསལ་སྣང་བ་ཞེས་བྱ་བ། ཨ་ཧོ། དབྱིངས་དང་རིག་པ་དབྱེར་མེད་པའི། །འོད་གསལ་ཐིག་ལེ་ཆེན་པོའི་ཀློང་། །འཁོར་འདས་འཛིན་པ་རང་གྲོལ་བ། །ཁྱབ་བདག་དོན་གྱི་བླ་མར་འདུད། །ཤིན་ཏུ་རྣལ་འབྱོར་ཟབ་མོའི་ལམ། །ཉིན་མཚན་ཀུན་ཏུ་ཉམས་ལེན་ཕྱིར། །ཁྲེགས་ཆོད་ཐོད་རྒལ་ཟུང་འཇུག་གི །གདམས་པའི་སྙིང་པོ་འདི་ལྟར་བསྒོམ། །དེ་ཡང་ཉིན་པར་འཆར་གཞིའི་ཡུལ། །སློང་བྱེད་རྐྱེན་གྱིས་སྤངས་པའི་ཚེ། །ཕྱི་དབྱིངས་ནམ་མཁའ་སྤྲིན་བྲལ་དང་། །ནང་དབྱིངས་ཀ་ཏི་ཤེལ་སྦུབས་རྩ། །གསང་དབྱིངས་ཀ་དག་རིག་པ་སྟེ། །དབྱིངས་གསུམ་ལུས་ཀྱི་གནད་གཅུན་ནས། །རང་རིག་འོད་གསལ་སྦུབས་སུ་འཇུག །མངོན་སུམ་ཡེ་ཤེས་ལྷུག་པར་འཆར། །འདི་ལ་གོམས་པ་བརྟན་པ་ཡིས། །འཆི་སྲིད་ཆོས་སྐུའི་གྲོང་ཁྱེར་དུ། །འཕོ་མེད་བཙན་ས་ཟིན་པར་འགྱུར། །ཉིན་མོའི་རྣལ་འབྱོར་སྣང་སེམས་ཨར་གཏད་ཀྱི་རིམ་པའོ། །དེ་ནས་མཚན་མོའི་དུས་ཀྱི་ཚེ། །སྣོད་བཅུད་སྦྱངས་ནས་རང་ལ་བསྟིམ། །རང་ལུས་དབང་ཆེན་ཡབ་ཡུམ་སྐུ། །སྣང་སྟོང་ཆུ་ཟླ་ལྟ་བུར་གསལ། །ཨ་ཝདྷུ་ཏཱིའི་དཀྱིལ་འཁོར་དུ། །
འོད་ལྔའི་ཐིག་ལེ་ཟླུམ་སྐོར་སྦུབས། །ཡེ་ཤེས་སེམས་དཔའ་ཀུན་ཏུ་བཟང་། །སྟོང་གསལ་འཇའ་ཚོན་ཕྱག་རྒྱའི་གཟུགས། །དེ་ལས་འོད་འཕྲོས་ཕུང་ཁམས་ཀུན། །འོད་གསལ་ཐིག་ལེ་ཆེན་པོར་སྡུད། །འགྲོ་འོང་ལས་འདས་གཉུག་མའི་ངང་། །སྣང་ལ་ཞེན་མེད་རང་རྩལ་སྦྱངས། །གོམས་པས་ཕྱི་ནང་འབྱུང་བའི་དངོས། །ཟད་ས་ཉིད་དུ་ཕྱིན་པར་འགྱུར། །མཚན་མོའི་རྣལ་འབྱོར་རྒྱ་མཚོ་ཨར་གཏད་ཀྱི་རིམ་པའོ། །ནང་ནུབ་འཆར་དང་སྡུད་པ་ཡི། །ཟེར་གཉིས་དང་བསྟུན་སྣང་བ་བཞིའི། །རྣལ་འབྱོར་ཉམས་སུ་བླང་བ་ནི། །སྒོ་གསུམ་བྱ་བ་དགུ་ཕྲུགས་བཏང་། །བཞུགས་སྟངས་གཟིགས་སྟངས་སྒོ་ཡུལ་རླུང་། །རིག་པའི་གནད་ཀྱིས་དབྱིངས་ལ་གཟིར། །དེ་ཚེ་འོད་ཁྱིམ་ཐིག་ལེ་ནི། །བར་མཚམས་རྡོ་རྗེ་ལུག་རྒྱུད་ཀྱིས། །འབྲེལ་བའི་ཆོས་ཉིད་མངོན་སུམ་མཐོང་། །གོམས་པས་འོད་སྣང་ཆེར་འཕེལ་ཞིང་། །རིག་པ་དལ་དང་འོད་ཟེར་གྱིས། །གར་བལྟས་ཁྱབ་ཅིང་གཡོ་མེད་པས། །ཉམས་ཀྱི་སྣང་བ་གོང་དུ་འཕེལ། །དེ་ནས་ལོངས་སྐུ་ཚད་ཕེབས་མཐུས། །ཐིག་ལེ་སྐུ་གསུམ་ཚོམ་བུར་སྨིན། །ཅིར་སྣང་དག་པ་རབ་འབྱམས་ཀྱི། །ཕྱག་རྒྱ་ཆེན་པོ་ཉིད་དུ་རྫོགས། །མཐར་ཕྱིན་ཆོས་ཉིད་ཟད་པ་ན། །སྲོག་རྩོལ་གཡོ་བ་ཡེ་ཤེས་སུ། །དེངས་པས་འབྱུང་སེམས་འོད་གསལ་གྱི། །ཆོས་ཀུན་སྣང་དབྱིངས་ཆེན་པོར་ཐིམ། །
སྐྱེ་དང་འཇུག་པར་དབང་ཐོབ་པས། །སྐུ་གསུམ་ལྷུན་གྱིས་གྲུབ་པར་འགྱུར། །ནང་ནུབ་རྣལ་འབྱོར་དབྱིངས་རིག་ཨར་གཏད་ཀྱི་རིམ་པའོ། །ཚུལ་འདི་གདོད་མའི་མགོན་པོ་མཆོག །ཀུན་མཁྱེན་ཆོས་རྗེས་བྱིན་བརླབས་པའི། །རྒྱ་མ་ལྕོགས་པའི་ཉེ་འདབས་སུ། །རྣལ་འབྱོར་པདྨ་དགྱེས་པས་བྲིས། །དགེ་བས་སྲིད་དང་ཞི་བའི་ཆོས། །འོད་གསལ་དབུ་མར་ཐིམ་པ་ལས། །རང་གྲོལ་དོན་གྱི་བླ་མའི་ཞལ། །ཡོངས་གྲུབ་ཆེན་པོར་མཇལ་གྱུར་ཅིག །གུ་བྱ།། ༈ །།བསྐྱེད་རིམ་གསལ་འདེབས་ཀྱི་རྡོ་རྗེའི་ཐོལ་གླུ་སྣང་སྲིད་གཞིར་བཞེངས་ཞེས་བྱ་བ། ཨ་ཧོ། འཁོར་འདས་ཆོས་རྣམས་གཟོད་མ་ནས། །ཡོངས་གྲུབ་ལྷ་ཡི་ཕྱག་རྒྱ་ཆེ། །དེ་ཕྱིར་གཉིས་སུ་མེད་པ་ཡི། །དོན་གྱི་ལྟ་བས་མཇལ་ཕྱག་འཚལ། །སྣང་བ་གང་ཤར་ཐམས་ཅད་ཀུན། །ཡི་དམ་ལྷ་ཡི་སྐུ་རུ་གསལ། །དེ་ཡང་ཞེན་པ་མེད་པའི་དངོས། །ཆུ་ཟླའི་གར་མཁན་ཉིད་དུ་དག ། འགྲོ་འོང་སྲོག་དང་རྩོལ་བའི་རླུང་། །ཁ་སྦྱོར་སྔགས་ཀྱི་སྤྲོ་བསྡུ་ཡིས། །རྡོ་རྗེ་མི་ཤིགས་ནཱ་དའི་གླུ། །འོད་གསལ་དྷཱུ་ཏཱིའི་སྦུབས་སུ་རྫོགས། །དྲན་རིག་ཅི་ཤར་རང་གྲོལ་བ། །ད་ལྟའི་ཤེས་པ་གཉུག་མའི་སྲོག ། ཡེངས་མེད་ངང་དུ་གཟེར་ཐེབས་པས། །འབྲས་བུ་ཡེ་ཤེས་ཆེན་པོར་སྨིན། །ཕྱི་སྣོད་འོད་ལྔ་ཡུམ་ལྔའི་མཁར། །ནང་བཅུད་པདྨ་ཧེ་རུ་ཀ །སྒྲར་གྲགས་ཧཱུྃ་གི་སྣང་གླུ་ཡིས། །བརྟན་གཡོའི་ཞེན་པ་ཕྲ་སར་
བཅད། །དེ་ཚེ་གཟུང་འཛིན་བདུད་དགྲའི་སྡེར། །སྤང་གཉེན་བྲལ་བའི་རྒྱས་བཏབ་པས། །རང་སྣང་དོན་གྱི་འོག་མིན་དུ། །དག་པ་རབ་འབྱམས་གཅིག་ཏུ་ཤར། །ཨ་ཧོ་གསལ་འདེབས་ཉམས་ཀྱི་གླུ། །འོན་ཕུ་སྟག་ཚང་གསང་ཕུག་ཏུ། །ཚོགས་ཀྱི་འདུ་བ་བགྱིས་པའི་ཚེ། །རྣལ་འབྱོར་པདྨ་དགྱེས་པས་བླངས། །དགེ་བས་སྣང་ཞེན་ལྷ་སྐུར་དག །འབྱུང་འཇུག་རླུང་ཁམས་སྔགས་སུ་རྫོགས། །གཟུང་འཛིན་ཆོས་སྐུར་སྨིན་པ་ཡི། །ཧེ་རུ་ཀཿདཔལ་མངོན་གྱུར་ཤོག། ༈ །།ཟབ་མོ་བདུད་ཀྱི་གཅོད་ཡུལ་དང་འབྲེལ་བའི་བརྟུལ་ཞུགས་ལམ་ཁྱེར་གྱི་རྡོ་རྗེའི་ཐོལ་གླུ་འཁོར་འདས་རང་གྲོལ་ཅེས་བྱ་བ། ཨ་ཧོ། ཆོས་སྐུ་ཤེས་རབ་ཕ་རོལ་ཕྱིན། །ལོངས་སྤྱོད་རྫོགས་སྐུ་རྣལ་འབྱོར་མ། །ཟུང་འཇུག་སྤྲུལ་པའི་ཟློས་གར་ཅན། །ལབ་ཀྱི་སྒྲོལ་མར་ཕྱག་འཚལ་ལོ། །གང་དེས་ཉེ་བར་རྗེས་བསྟན་པ། །དམ་ཆོས་བདུད་ཀྱི་གཅོད་ཡུལ་ལས། །སྙིང་པོར་དྲིལ་བའི་རྡོ་རྗེའི་གླུ། །སྐལ་བཟང་རྣམས་ཀྱི་དོན་དུ་དབྱེ། །དེ་ཡང་ཐོག་མར་དལ་བའི་རྟེན། །འདི་ཉིད་ཤིན་ཏུ་རྙེད་པར་དཀའ། །རྙེད་ན་སྲིད་པའི་མཐར་འགྲོ་བའི། །དོན་གྱི་སྙིང་པོ་དང་ལྡན་ཀྱང་། །ནམ་འཆི་ངེས་པ་མ་མཆིས་ཤིང་། །དེ་ལ་ཅིས་ཀྱང་མི་སྟོངས་པར། །འཆི་ཚེ་དཀར་ནག་ལས་འབྲས་ཀྱི། །རྗེས་སུ་འབྲང་བའི་ཚུལ་བསམས་ནས། །འཁོར་བ་སྡུག་བསྔལ་ཅན་ཕུང་པོར། །ངེས་འབྱུང་བསམ་
པས་ཡིད་དྲངས་ཏེ། །འདི་ནས་བྱང་ཆུབ་སྙིང་པོའི་བར། །བླ་མ་དཀོན་མཆོག་རྣམ་གསུམ་ལ། །སྐྱབས་ཀྱི་སྙིང་པོར་བཟུང་བ་དང་། །གཞན་ཕྱིར་སངས་རྒྱས་ཐོབ་འདོད་བློས། །སྨོན་དང་འཇུག་པའི་བྱང་སེམས་བསྐྱེད། །ཁྱད་པར་ཐུན་མོང་ཐུན་མིན་གྱི། །ཡོན་ཏན་ཐམས་ཅད་འབྱུང་བའི་གཞི། །ཟབ་མོ་བླ་མའི་རྣལ་འབྱོར་བསྒོམས། །ཁྱེད་ཤེས་དད་པས་རྒྱུད་བསྐུལ་ཏེ། །དབང་བཞི་སྟན་ཐོག་གཅིག་ཏུ་བླང་། །ལུས་དང་ལོངས་སྤྱོད་ཡོ་བྱད་ཀུན། །འཁོར་གསུམ་ཡང་དག་མཎྜལ་འབུལ། །རེ་དོགས་ཐད་ཀར་ཆོད་པ་དང་། །འཁོར་འདས་འཛིན་པ་རང་གྲོལ་ནས། །གནས་ལུགས་མ་བཅོས་གཉུག་མའི་ངང་། །བཙན་ས་ཟིན་པར་གསོལ་བ་གདབ། །འདི་དག་ལམ་གྱི་སྔོན་འགྲོ་སྟེ། །ངེས་པར་རྒྱུད་ལ་མ་སྐྱེས་ན། །དངོས་གཞིའི་ཉམས་མྱོང་མི་འབྱུང་ཕྱིར། །ཁ་ཙམ་མ་ཡིན་གནད་དུ་བསྣུན། །བརྟུལ་ཞུགས་ལམ་ཁྱེར་གྱི་རྡོ་བ རྗེའི་ཐོལ་གླུ་འཁོར་འདས་རང་གྲོལ་ལས་སྦྱོར་བའི་ལམ་གྱི་རིམ་པར་ཕྱེ་བའི་ཚོམས་ཏེ་དང་པོའོ།། །།དངོས་གཞི་གཟོད་ནས་ལྷན་སྐྱེས་པའི། །རྒྱལ་བ་ཀུན་གྱི་ཡུམ་གྱུར་མ། །ཤེས་རབ་ཕ་རོལ་ཕྱིན་མ་ནི། །འགྲོ་ཀུན་སྙིང་ལ་ཡང་དག་གནས། །འོན་ཀྱང་གློ་བུར་འཁྲུལ་པའི་དྲིས། །བསྒྲིབས་ལས་ལྐོག་ཏུ་གྱུར་པ་ཉིད། །མངོན་སུམ་ཅར་ཕོག་ངོ་སྤྱད་ཕྱིར། །སྔོན་དུ་འདི་ལྟར་བརྟག་པར་བྱ། །ལུས་གནད་རྣམ་སྣང་
ཆོས་བདུན་ཏེ། །ངག་གནད་སྲོག་རྩོལ་རང་བབ་བཞག །སེམས་གནད་བྱུང་གནས་འགྲོ་གསུམ་དང་། །དབྱིབས་དང་ཁ་དོག་དཔྱད་ཅིང་གཞིག །དེ་ཚེ་བཙལ་བས་མ་རྙེད་ཅིང་། །གང་དུའང་གྲུབ་པ་མེད་མཐོང་བ། །གནས་ལུགས་ཉིད་ལ་འཕྲིགས་ཚུད་ཕྱིར། །མ་བཅོས་རང་བབ་ངང་དུ་བཞག །དེ་ནས་ནམ་མཁའ་སྒོ་འབྱེད་ལ། །བརྟེན་ནས་སྙིང་པོ་ཉམས་བླང་ཚུལ། །དོན་ཁྲིད་ཉིད་དུ་ངོ་སྤྲད་ཅིང་། །ཆིག་ཁྲིད་དག་གིས་གཏན་ལ་དབབ། །ཉམས་ཁྲིད་སྒོ་ནས་བསྐྱང་བར་བྱ། །དང་པོ་མ་ཡེངས་རིག་པ་ནི། །རང་གསལ་ངང་དུ་ཧྲིལ་གྱིས་བསྒྲིམ། །བློ་འདས་དབྱིངས་སུ་ལྷོད་ཀྱིས་ཀློད། །དམིགས་གཏད་བྱ་རྩོལ་བྲལ་བའི་གཤིས། །བཅས་བཅོས་མེད་པར་ལྷུག་པར་འཇོག །དེ་ཉིད་མདོ་རྒྱུད་དགོངས་མཐུན་གྱི། །ཡིད་ཆེས་ལུང་གི་སློབ་དཔོན་ནི། །གཟུགས་རྣམས་མིང་མཐོང་ཚོར་བ་དང་། །འདུ་ཤེས་འདུ་བྱེད་སེམས་པ་ཡང་། །རྟོག་བྲལ་དོན་དམ་བདེན་པ་ནི། །ཤེས་རབ་ཕ་རོལ་ཕྱིན་ཞེས་མཐོང་། །ཡོན་ཏན་རིན་ཆེན་སྡུད་པ་ལས། །ཇི་ལྟར་བཤད་པས་མཚོན་བྱས་ཏེ། །མཐའ་ཀླས་སྡེ་སྣོད་རྒྱ་མཚོས་བསྟན། །དེ་བཞིན་ཡེ་ཤེས་ཌཱ་ཀིས་ཀྱང་། །གང་ཡང་ཡིད་ལ་མ་བྱས་ན། །བག་ཆགས་མི་འབྱུང་ས་ལམ་རྫོགས། །ཞེས་སོགས་གསུང་སྒྲོས་མན་ངག་གིས། །སློབ་དཔོན་གྱིས་ཀྱང་ངེས་ཤེས་བསྐྱེད། །དེ་ལྟར་ངོ་སྤྱད་ཇི་
བཞིན་དུ། །རང་རིག་བསམ་བརྗོད་བྲལ་བའི་དབྱིངས། །གཟོད་ནས་ལྷུན་གྲུབ་མཐོང་བ་ནི། །ཉམས་མྱོང་ཡིད་ཆོས་སློབ་དཔོན་ནོ། །ཚུལ་འདིས་ངེས་པར་རྟོགས་པའི་དོན། །བསྒོམ་པས་འབྲས་བུ་མཆོག་རྙེད་ཕྱིར། །འདུ་འཛི་བྲལ་བའི་དབེན་གནས་སུ། །མཉམ་བཞག་རྩེ་གཅིག་གཉུག་མ་བསྒོམ། །རྗེས་ཐོབ་སྣང་ཆ་སྒྱུ་མར་བལྟ། །དུས་ཀུན་རང་རིག་བློ་འདས་རྩལ། །འགགས་མེད་ཤར་ཡང་དངོས་པོས་@དབེན། །དེ་ཕྱིར་མཉམ་རྗེས་དབྱེར་མེད་པ། །ཟུང་འཇུག་ཆེན་པོར་ལ་བཟླའོ། །དེ་ཚེ་དགའ་བྲོད་སྙེམ་བྱེད་དང་། །ཐོག་བཅས་ཐོག་མེད་བདུད་བཞི་པོ། །ཐོལ་གྱིས་ཤར་བའི་དེ་མ་ཐག །ཕཊ་ཅེས་འཛིན་མེད་དབྱིངས་སུ་གཅོད། བརྟུལ་ཞུགས་ལམ་ཁྱེར་གྱི་རྡོ་རྗེའི་ཐོལ་གླུ་འཁོར་འདས་རང་གྲོལ་ལས། དངོས་གཞིའི་ཉམས་སུ་བླང་བའི་རིམ་པར་ཕྱེ་བའི་ཚོམས་ཏེ་གཉིས་པའོ།། །།དེ་ནས་རྐྱེན་ངན་ཐོག་བརྫིས་ཀྱིས། །རོ་སྙོམས་ལམ་དུ་ཁྱེར་བ་ཡིས། །ཉམས་རྟོགས་བཙན་ཐབས་སྐྱེ་བྱེད་པ། །བོགས་འདོན་གསང་བའི་སྤྱོད་པ་ནི། །ལུང་སྟོང་ལྷ་ཁང་དུར་ཁྲོད་སོགས། །འཇིགས་ཤིང་སྐྱི་གཡའི་གནས་ཉིད་དུ། །མཚན་མོ་ལྷ་འདྲེ་འདུ་བའི་དུས། །གནས་གདོན་ལུས་གདོན་འཁྱམས་པོ་དང་། །ས་བདག་ཀླུ་གཉན་བཅས་པ་ཀུན། །དབང་དུ་བསྡུས་ནས་གང་དམིགས་སར། །འདེད་ཅིང་རང་གི་ལུས་ལ་བསྟིམ། །ལྟ་
སྟངས་ཕྱག་རྒྱས་གཟིར་བ་སྟེ། །འགྲོ་ལུགས་རྣམ་བཞིའི་དཔའ་བོའི་སྟག་འགྲོས། མཁའ་འགྲོའི་གར་འགྲོས། སྦྲུལ་ནག་འཁྱོགས་འགྲོས། རྣལ་འབྱོར་ལྡིང་འགྲོས་སོ། །མཆན། ཚུལ་གྱིས་འགྲོ། །དངོས་གཞི་གནས་དང་ལྷ་འདྲེ་དང་། །བདག་ཉིད་ཟིལ་གནོན་དམིགས་པ་ནི། །དང་པོར་དབྱིངས་རིག་བསྲེས་པའི་ངང་། །བདག་ལུས་ཕྱོགས་དེ་ཀུན་ཁྱབ་པར། །གསལ་བཏབ་འཁོར་བ་མ་སྟོང་བར། །གཞན་དུ་གཡོ་མེད་གནས་པར་དམིགས། །གཉིས་པ་སེམས་བསྐྱེད་སྔོན་འགྲོ་བས། །གནོད་བྱེད་གཙོར་གྱུར་ལྷ་འདྲེ་ལ། །སྙིང་རྗེའི་ཡིད་ཀྱིས་རླུང་ཕྱིར་བུས། །ཁོར་ཡུག་ཐམས་ཅད་ཡོངས་བཀང་སྟེ། །དེ་དག་དབང་དུ་འདུས་པའི་ངང་། །ནང་དུ་རྔུབ་པས་རང་ཉིད་ཀྱི། །མལ་གྱི་འོག་ཏུ་ཧྲིལ་བཅུག་གནས། །ཕྱོགས་མཚམས་རྩ་གསུམ་ཆོས་སྲུང་གིས། །བསྲུངས་པའི་གུར་གྱིས་བཅད་པ་ཡིས། །ནམ་ཡང་འདའ་བ་མེད་པར་དམིགས། །གསུམ་པ་རང་སེམས་རང་བཞིན་གྱིས། །རྣམ་པར་དག་པ་ཉིད་ཡིན་ཡང་། །དེ་ལྟར་མ་རྟོགས་ལྷ་འདྲེ་རྣམས། །འཁྲུལ་པར་སྤྱོད་པ་ཐང་རེ་ཆད། །སྙམ་དུ་ཕཊ་ཅེས་བརྗོད་པའི་རྗེས། །མ་ཡེངས་བློ་བྲལ་གཉུག་མའི་ངང་། །སྤྲོ་བསྡུ་མེད་པར་ཆམ་མེར་བཞག །དེ་ལྟར་འབད་པས་ལྷོངས་ཚད་ནི། །ཕྱི་རོལ་ཡུལ་གྱི་འཇིགས་སྣང་དང་། །ནང་དུ་ལུས་ལ་ན་ཚ་དང་། །གསང་བ་སེམས་ལ་རེ་དོགས་ཀྱི། །རྣམ་པར་
རྟོག་པ་སྣ་ཚོགས་འབྱུང་། །དེ་ཚེ་རིག་པའི་ཆོ་འཕྲུལ་དུ། །ངོ་ཤེས་ཐག་ཆོད་གདིང་ཐོབ་པས། །ཕཊ་ཅེས་སྣང་བ་ཐད་ཀར་བཅད། །དབྱིངས་རིག་བསྲེས་ལ་ཅི་བདེར་བཞག །རྗེས་སུ་ཕུང་པོ་གཟན་བསྒྱུར་ནི། ། ལུས་གནད་ཆོས་བདུན་ལྡན་པའི་ངང་། །མིག་གནད་བར་སྣང་ཧ་རེར་གཏད། །སེམས་ཉིད་ཐིག་ལེའི་རྣམ་པ་རུ། །ཕཊ་ཀྱིས་རིམ་སྤར་ནམ་མཁར་བསྲེ། །ནམ་མཁས་གར་ཁྱབ་རིག་སྟོང་གིས། །ཁྱབ་པའི་བརྗོད་བྲལ་འོད་གསལ་ངང་། །སྤང་བླང་མེད་པར་ལྷུག་པར་འཇོག །གལ་ཏེ་རྣམ་རྟོག་འཕྲོ་གྱུར་ན། །རང་རིག་རྡོ་རྗེ་རྣལ་འབྱོར་མར། །གསལ་བའི་ཕྱག་གཡས་གྲི་གུག་གིས། །བེམས་པོའི་མགོ་བོ་བྲེགས་ནས་ཀྱང་། །ཕུང་ཁམས་དཀར་འགྱེད་བདུད་རྩི་ཡིས། །མཆོད་སྦྱིན་མགྲོན་རྣམས་ཐམས་ཅད་མཆོད། །ཁྲ་འགྱེད་འདོད་རྒུའི་ཕུང་པོ་ནི། །ནམ་མཁའ་མཛོད་ཀྱི་སྒོ་འཕར་དབྱེ། །དམར་འགྱེད་ཤ་ཁྲག་རུས་པའི་དངོས། །སྟོང་གསུམ་ཁྱབ་པས་གདོན་བགེགས་ཚིམས། །ནག་འགྱེད་རང་གི་སྡིག་ལྟུང་ཀུན། །བསྡུས་ཏེ་ལྷ་འདྲེའི་ཚོགས་ལ་སྦྱིན། །མཐར་གྱི་ནམ་མཁར་འཇའ་ཐིམ་ལྟར། །དབྱིངས་རིག་ཟུང་འཇུག་ངང་དུ་བཞག །དེ་རྣམས་ཐོ་རངས་ཉི་དྲོས་དང་། །ཉི་ནུབ་སྲོད་དུས་གཙོ་བོར་སྤྱད། །དུས་དེར་ཆགས་སྡང་འཇིགས་སྐྲག་སོགས། །བདུད་བཞིའི་རྣམ་འགྱུར་ཅི་བྱུང་ཡང་། །ལུས་ནི་ཚོགས་སུ་ཕྱིན་ཟིན་ཅིང་། །
སེམས་ནི་སྐྱེ་འགགས་སྤྲོས་བྲལ་ཕྱིར། །རེ་དོགས་མེད་པར་ལ་བཟླའོ། །རྗེས་ལ་འཁོར་གསུམ་མི་དམིགས་ངང་། །ཕཊ་ཅེས་བརྗོད་ལ་དབྱིངས་རིག་བསྲེ། །བདེ་སྡུག་གཏོང་ལེན་དམིགས་པ་ཡིས། །དགེ་རྩ་བྱང་ཆུབ་ཆེན་པོར་བསྔོ། །དེ་ལྟར་རྩེ་གཅིག་འབད་པ་ཡིས། །དུས་ཀྱི་ཚར་ཚད་ཞག་གསུམ་དང་། །བདུན་དགུ་བཅུ་གཅིག་ལ་སོགས་ཏེ། །རྟགས་ནི་དངོས་ཉམས་རྨི་ལམ་དུ། །ཐུན་མོང་ཁྲོམ་ཚོགས་འདུ་བ་ཡིས། །རང་ལ་བསྙེན་བཀུར་བྱེད་པ་དང་། །ཉམ་ངའི་གནས་བརྒལ་སེང་གླང་ཞོན། །ལུས་ལས་འོད་ཟེར་འཕྲོ་སོགས་སྣང་། །ཁྱད་པར་ཉོན་མོངས་འབྲེལ་རྒྱུན་ཆོད། །ཉམས་དང་རྟོགས་པའི་མཛོད་ཀློང་རྡོལ། །མངོན་ཤེས་རྫུ་འཕྲུལ་སྣ་ཚོགས་འབྱུང་། །དེ་ལྟར་ན་ཡང་དགའ་བྲོད་ཀྱིས། །མ་བཅིངས་གང་ཤར་ངང་དུ་བཞག །གཞན་ཡང་འདི་ལ་མུ་བཞི་སྟེ། །ཚར་ཚད་འདྲ་བའི་ལྷོངས་ཚད་ནི། །གོས་དམར་གྱོན་དང་ཤ་ཁྲག་ཟ། །མ་གུས་ཕྱག་འཚལ་སྐད་མེད་པའི། །རོལ་ཆ་བརྡུང་བ་ལ་སོགས་ཏེ། །ལྷོངས་ཚད་འདྲ་བའི་ཚར་ཚད་ནི། །དུད་འགྲོ་རྭ་ཅན་རྣམ་པ་ཡིས། །བརྡུངས་དང་མི་གཙང་རྣག་ཁྲག་འབབས། །རང་གི་ཡན་ལག་གཏུབ་སོགས་འབྱུང་། །གཉིས་ཀ་འདྲ་བའི་འདྲེས་མ་ནི། །ནམ་སྟོད་ཚར་ཚད་རྟགས་མཐོང་ལ། །ནམ་སྨད་དེ་ལས་ལྡོག་པ་སོགས། །མ་ངེས་འཆོལ་བར་སྟོན་པ་དང་། །
འདྲེས་མ་འདྲ་བའི་བག་ཆགས་ནི། །རང་ཉིད་ཉོན་མོངས་གང་ཞིག་ལ། །གོམས་པ་བརྟས་པ་དེ་དང་དེར། །ལྷག་པར་ཞེན་པའི་རྟོག་པ་སྐྱེ། །དེ་སོགས་བཟང་ངན་ཅིར་སྣང་ཡང་། །རེ་དོགས་བླང་དོར་དབྱིངས་སུ་ཀློད། །ཇི་ལྟར་བརྩོན་ཀྱང་ལྷོངས་ཚད་ལས། །ཚར་ཚད་བྱུང་བར་མ་གྱུར་ན། །ཕྱི་རོལ་གནས་དང་ནང་ཕུང་པོ། །གསང་བ་བདག་འཛིན་མཐའ་གཏད་ནི། །ཤིན་ཏུ་འཇིགས་པའི་གཉན་ཁྲོད་དུ། །ཕྱིན་ལ་ཉམས་ལེན་དཔའ་གདིང་བསྐྱེད། །སེམས་ཀྱིས་ཚེ་རབས་དུ་མ་རུ། །ཕུང་པོ་འདི་འདྲ་དོན་མེད་འདོར། །ལྷ་འདྲེར་སྦྱིན་ལ་སྤྲོ་བ་བསྐྱེད། །གཏོང་མ་ནུས་ན་བདག་ཞན་ཅིང་། །ཟ་མ་ནུས་ན་ཁྱོད་ཞན་ཕྱིར། །སྐད་ཅིག་ཙམ་ཡང་མ་བཞག་པར། །ལྷག་མ་མེད་པར་རོལ་པ་དང་། །གཞན་ཡང་བདག་གི་སྒོ་གསུམ་ལ། །འགལ་རྐྱེན་ཅི་ནུས་ཐོང་སྙམ་པ། །བཅོས་མིན་རྒྱུད་ལ་སྐྱེས་པའི་ཚེ། །བདུད་ཚོགས་ཀུན་གྱིས་གླགས་མི་རྙེད། །དེ་ལྟར་འབད་ཀྱང་བོགས་མེད་ན། །གདམས་ངག་སྟོན་པའི་བླ་མ་ལ། །སངས་རྒྱས་དངོས་ཀྱི་མོས་གུས་དང་། །མར་གྱུར་འགྲོ་བ་ཐམས་ཅད་ལ། །བཟོད་དུ་མེད་པའི་སྙིང་རྗེ་དང་། །འགལ་རྐྱེན་སྡུག་བསྔལ་ཅི་བྱུང་ཡང་། །ཐོག་བརྫིས་ནུས་པའི་བརྟུལ་ཞུགས་ཏེ། །དེ་གསུམ་གཅིག་ཏུ་དྲིལ་བྱས་ལ། །ཉམས་སུ་བླངས་པས་བོགས་ཆེན་འབྱིན། །རྗེས་ཐོག་གནས་གཞན་འགྲོ་བའི་ཚེ། །
ཟིལ་གནོན་དམིག་པའི་འཁྲུལ་འཁོར་ཀློད། །ཤུལ་དུ་ཐོད་ཀར་བརྩིགས་པ་ཉིད། །ཐུགས་རྗེ་ཆེན་པོར་བསྐྱེད་པ་ཡི། །སྐུ་ལས་བདུད་རྩིའི་རྒྱུན་བབས་ཏེ། །གཉན་ཁྲོད་དེ་ཡིས་གཞི་བདག་དང་། །གནོད་བྱེད་གཙོར་བྱས་ལྷ་འདྲེ་ཀུན། །ཟག་མེད་བདེ་བས་ཚིམ་པར་བསམ། །རྣམ་དག་བསྔོ་སྨོན་རྒྱ་ཆེར་གདབ། །གཞན་ཡང་ཕྲ་མོའི་དམ་ཚིག་ནི། །རྐང་རྗེན་དག་གིས་མི་བགྲོད་ཅིང་། །མཚན་མོར་མེ་འོད་སྤངས་པ་དང་། །གཤང་གཅི་ཕྱོགས་གཅིག་དག་ཏུ་འདོར། །གནས་གཅིག་ནམ་ཡང་འགྲོ་མི་བྱ། །ཚར་ཚད་རྫོགས་ནས་མི་སྡོད་ཅིང་། །དེ་བར་གཞན་དུ་མི་འཕོའོ། །མདོར་ན་ཕྱི་ལྟར་ཕྱོགས་མེད་ཀྱི། །གཉན་ས་རི་ཁྲོད་ཀུན་ཏུ་རྒྱུ། །ནང་ལྟར་ཕུང་པོ་གཟན་བསྒྱུར་གྱིས། །ཚོགས་གཉིས་མྱུར་དུ་འདུམས་པར་བྱ། །གསང་བ་འཁོར་འདས་རང་གི་སེམས། །ཐིག་ལེ་ཉག་གཅིག་ཆེན་པོར་གཅོད། །ལྟ་བ་ཡུམ་དོན་ངོ་འཕྲོད་ཅིང་། །སྒོམ་པ་མཉམ་རྗེས་ཟུང་འཇུག་དང་། །སྤྱོད་པ་རོ་སྙོམས་ལམ་ལོངས་ནས། །འབྲས་བུ་གདོད་མའི་བཙན་ས་ཟིན། །བརྟུལ་ཞུགས་ལམ་ཁྱེར་རྡོ་རྗེའི་ཐོལ་གླུ་འཁོར་འདས་རང་གྲོལ་ལས། རྗེས་ཐོབ་བོགས་འདོན་སྤྱོད་པའི་རིམ་པར་ཕྱེ་བའི་ཚོམས་ཏེ་གསུམ་པའོ།། །།ཚུལ་འདི་མ་གཅིག་ཡེ་ཤེས་ཀྱི། །མཁའ་འགྲོས་བྱིན་གྱིས་བརླབས་པའི་གནས། །ཟངས་རི་མཁར་དམར་གསང་ཕུག་ཏུ། །
ཚོགས་ཀྱི་འདུ་བ་བགྱིས་པའི་ཚེ། །ཇི་ལྟར་ཤར་བའི་རྟོགས་པ་དང་། །ཟབ་ལམ་མན་ངག་ཟུང་སྦྲེལ་ཏེ། །རྡོ་རྗེའི་གླུ་རུ་བླངས་པའི་དགེས། །འགྲོ་ཀུན་རང་གྲོལ་ས་བརྙེས་ཤོག །ཅེས་པའང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱད་པ་སྤྱོད་པར་འདོད་པའི་རང་གཞན་ཀུན་ལ་སྨན་པའི་ཕྱིར་གཏད་མེད་རྣལ་འབྱོར་གྱི་ན་བ་པདྨ་དགྱེས་པའི་སྡེས་སྦྱར་བ་སྟེ་ཐུན་མོང་མ་ཡིན་པའི་མན་ངག་གུ་།། ༈ །།ཚོགས་ཀྱི་འཁོར་ལོའི་རྟོགས་པ་བརྗོད་པའི་རྡོ་རྗེའི་ཐོལ་གླུ་ཚིམ་པ་དྲུག་ལྡན་གྱི་རོལ་མོ་ཅེས་བྱ་བ། ཨ་ཧོ། འཆི་མེད་རྣམ་ཀུན་མཆོག་ལྡན་ཡེ་ཤེས་ཀྱི་སྒྱུ་འཕྲུལ། །འཆི་མེད་འོད་གསལ་གཉུག་མའི་མཚན་དཔེ་རུ་ཤར་བས། །འཆི་མེད་བདུད་རྩིའི་དགའ་སྟོན་སྐལ་བཟང་ལ་སྦྱིན་པའི། །འཆི་མེད་མཚོ་སྐྱེས་རྡོ་རྗེ་སྙིང་དབུས་ནས་དྲན་བྱུང་། །འཆི་མེད་རིག་འཛིན་འགྲུབ་པར་བྱིན་གྱིས་རང་རློབས་ཤིག །ཏིང་ངེ་འཛིན་གྱིས་སྤྲུལ་པའི་སྣང་སྟོང་གི་དཀྱིལ་འཁོར། །ཐབས་ཤེས་ཟུང་འཇུག་མཆོད་པའི་སྤྲིན་ཕུང་གིས་ཚིམས་པས། །བདེ་སྟོང་མཆོག་ཏུ་མི་འགྱུར་དངོས་གྲུབ་ལ་སྦྱོར་བའི། །འཕོ་མེད་སྦྱིན་པའི་ཕ་རོལ་ཕྱིན་པ་འདི་ཨ་ཧོ། །སྙིང་དབུས་མི་ཤིགས་ཐིག་ལེ་ཡོངས་གྲུབ་ཀྱི་དཀྱིལ་འཁོར། །ལྷན་སྐྱེས་ཡེ་ཤེས་འགུགས་པའི་བདུད་རྩི་ཡིས་ཚིམས་པས། །རླུང་སེམས་ཐིག་ལེའི་བྱེད་པ་དྷཱ་ཏཱི་རུ་སྦྱོར་བའི། །ཟག་བྲལ་ཚུལ་ཁྲིམས་ཕ་རོལ་ཕྱིན་པ་འདི་ཨ་ཧོ། །ཡིད་ཆོས་དབུ་མར་ཐིམ་པའི་དྲེགས་ཚོགས་ཀྱི་དཀྱིལ་
འཁོར། །ཕུང་ལྔའི་དྭངས་མ་འཆིང་བའི་གཏོར་མ་ཡིས་ཚིམས་པས། །གཟོད་ནས་རྣམ་པར་དག་པའི་ཡེ་ཤེས་ལ་སྦྱོར་བའི། །འོད་གསལ་བཟོད་པའི་ཕ་རོལ་ཕྱིན་པ་འདི་ཨ་ཧོ། །འདའ་དཀའི་དམ་ཚིག་ཉམས་མེད་རྣལ་འབྱོར་གྱི་དཀྱིལ་འཁོར། །བཟའ་བཅའ་བཏུང་བར་བཅས་པའི་འདོད་ཡོན་གྱིས་ཚིམ་པས། །སྨིན་གྲོལ་ཉེ་རྒྱུའི་ལམ་ལ་གཡེལ་མེད་དུ་སྦྱོར་བའི། །རང་གྲོལ་བརྩོན་འགྲུས་ཕ་རོལ་ཕྱིན་པ་འདི་ཨ་ཧོ། །ཕུང་པོ་ཁམས་དང་སྐྱེ་མཆེད་གདན་གསུམ་གྱི་དཀྱིལ་འཁོར། །གྲགས་སྟོང་རྡོ་རྗེའི་གླུ་ཡི་ཟློས་གར་གྱིས་ཚིམས་པས། །ཐ་མལ་འཁྲུལ་པའི་སྣང་ཞེན་ལྷ་སྐུ་རུ་སྦྱོང་བའི། །ཞི་གནས་བསམ་གཏན་ཕ་རོལ་ཕྱིན་པ་འདི་ཨ་ཧོ། །རྩ་གསུམ་འཁོར་ལོ་བཞི་ལྡན་རང་བྱུང་གི་དཀྱིལ་འཁོར། །ཆར་ཡང་ལྡོག་ཁྱབ་བསྲེ་བའི་བདེ་བ་ཡིས་ཚིམས་པས། །སྟོང་ཆེན་རྡོ་རྗེ་བཙུན་མོའི་སྒྱུ་མ་ལ་སྦྱོར་བའི། །ལྷག་མཐོང་ཤེས་རབ་ཕ་རོལ་ཕྱིན་པ་འདི་ཨ་ཧོ། །དེ་སྐད་ཕྱི་ནང་གཞན་གསུམ་དབྱེར་མེད་ཀྱི་དཀྱིལ་འཁོར། །དྲུག་ལྡན་ཚོགས་ཀྱི་མཆོད་པའི་འདུ་བ་ཡིས་ཚིམས་པས། །ངེས་དོན་ཕ་རོལ་ཕྱིན་པའི་ཉེ་ལམ་ལ་སྦྱོར་བའི། །རྟོགས་པ་བརྗོད་པའི་རྡོ་རྗེའི་ཐོལ་གླུ་འདི་ཨ་ཧོ། །ཞེས་པའང་དུས་གསུམ་མཁྱེན་པ་ཨོ་རྒྱན་ཆེན་པོས་ལྷ་སྲས་མཆོག་གྲུབ་རྒྱལ་པོར་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་དུ་སྨིན་གྲོལ་མཛད་པའི་གནས། དཔལ་གཡོ་རུ་ཁྲ་འབྲུག་གི་གནྡྷོ་ལའི་
ཁྱམས་སྟོད་དུ་ཀུན་ལྡན་ཆུ་སྟོད་ཟླ་བའི་གྲལ་ཚེས་༨དགེ་བར་ཚོགས་ཀྱི་མཆོད་པ་བརྒྱ་ཕྲག་ཐལ་བར་བགྱིས་པའི་རྗེས་ཐོག་ཏུའོ།། ༈ །།ངོ་མཚར་རང་བྱུང་གི་མཆོད་སྡོང་ཆེན་པོའི་རྟོགས་པ་བརྗོད་པའི་རྡོ་རྗེའི་ཐོལ་གླུ་ཟབ་གསང་རྒྱུད་མངས་ཅེས་བྱ་བ། ཨ་ཧོ། སྙིང་དབུས་ཐིག་ལེར་འབྲལ་མེད་དུ་བཞུགས་པའི། །སྐུ་བཞིའི་དབང་ཕྱུག་ཁྱབ་བདག་གི་བླ་མར། །སྒོ་གསུམ་གུས་པའི་དད་ཕྱག་ཞིག་འཚལ་ནས། །གང་ཤར་ཉམས་དགའི་གླུ་དབྱངས་ཞིག་ལེན་ནོ། །རྡོ་རྗེ་ཕུང་པོའི་དགའ་ཚལ་གྱི་དབུས་ན། །གདན་གསུམ་ཡོངས་སུ་གྲུབ་པ་ཡི་མཆོད་སྡོང་། །སྣང་སྟོང་ཟུང་འཇུག་འདྲེན་བྱེད་ཀྱིས་མཇལ་ནས། །རིག་འཛིན་རྣམ་བཞིའི་ཤུལ་ལམ་ལ་ཆས་འགྲོ། །ཟག་བྲལ་དྷ་ཏིའི་དགའ་ཚལ་གྱི་དབུས་ན། །ཨ་ཧཾ་ལྷན་སྐྱེས་འབར་འཛག་གི་མཆོད་སྡོང་། །གསལ་སྟོང་ཟུང་འཇུག་འདྲེན་བྱེད་ཀྱིས་མཇལ་ནས། །མི་ཤིགས་ནཱ་དའི་ཤུལ་ལམ་དུ་ཆས་འགྲོ། །རྗེས་ཆགས་ཐིག་ལེའི་དགའ་ཚལ་གྱི་དབུས་ན། །མཆོག་ཏུ་མི་འགྱུར་བདེ་ཆེན་གྱི་མཆོད་སྡོང་། །བདེ་སྟོང་ཟུང་འཇུག་འདྲེན་བྱེད་ཀྱིས་མཇལ་ནས། །རྣམ་ཀུན་མཆོག་ལྡན་ཤུལ་ལམ་དུ་ཆས་འགྲོ། །ཀ་དག་གཉུག་མའི་དགའ་ཚལ་གྱི་དབུས་ན། །ལྷུན་གྲུབ་འོད་གསལ་སྣང་བཞི་ཡི་མཆོད་སྡོང་། །དབྱིངས་རིག་ཟུང་འཇུག་འདྲེན་བྱེད་ཀྱིས་མཇལ་ནས། །འཇའ་ལུས་རྡོ་རྗེའི་ཤུལ་ལམ་ལ་ཆས་འགྲོ། །ལོ་ཧི་ཏ་འགྲམ་དགའ་ཚལ་གྱི་དབུས་ན། །ངོ་མཚར་
རང་བྱུང་རྡོ་བ་ཡི་མཆོད་སྡོང་། །མི་ཕྱེད་དད་པའི་འདྲེན་བྱེད་ཀྱིས་མཇལ་ནས། །ཕྱོགས་མེད་རྒྱལ་ཁམས་ཤུལ་ལམ་ལ་ཆས་འགྲོ། །དེ་སྐད་གང་ཤར་ངོ་མཚར་གྱི་རྟོགས་པ། །གྱི་ནར་འཕྱན་པའི་རྣལ་འབྱོར་གྱི་མགྲིན་ལས། །རྡོ་རྗེའི་གླུ་ཡི་རྒྱུད་མངས་འདི་བསྒྲེངས་པས། །དོན་གཉིས་འགྲུབ་པའི་སྨོན་ལམ་ཞིག་ཞུའོ། །ཞེས་པའང་གནས་སྐབས་ཀྱི་སྟེས་དབང་བ་བརྟེན་ནས་ཟུར་མཁར་ནི་ཙུ་ལའི་དགའ་ཚལ་དང་ཉེ་བའི་ངོ་མཚར་རྡོ་བའི་མཆོད་སྡོང་གི་འདབ་རོལ་དུ་རས་དཀར་གྱི་ལྡིང་གུར་ལ་བརྟེན་ནས་ངལ་གསོ་བའི་ཚེ་གང་ཤར་རྩེ་འཇོའི་ཚུལ་དུ་བྲིས་པའོ།། ༈ །།འཇམ་དཔལ་སྐུའི་དཀྱིལ་འཁོར་དུ་རྟོགས་པ་བརྗོད་པའི་རྡོ་རྗེའི་ཐོལ་གླུ་དུས་དགྲའི་དབང་པོའི་ཞལ་ལུང་ཅེས་བྱ་བ། ཨ་ཧོ། གཟོད་ནས་རྣམ་པར་དག་པའི་འོད་གསལ་གྱི་ངང་ལས། །ཟུང་འཇུག་བཞིན་ལག་མཚན་དཔེའི་སྣང་ཆ་རུ་ཤར་བས། །གྲུབ་གཉིས་ལྷུག་པར་སྩོལ་བའི་ཡི་དམ་གྱི་ལྷ་མཆོག །འཇམ་དཔལ་དུས་དགྲའི་དབང་པོའི་དཀྱིལ་འཁོར་ལ་བཏུད་ནས། །ཟབ་དོན་རྡོ་རྗེའི་གླུ་ཡི་རོལ་མོ་ཞིག་དཀྲོལ་ལོ། །སྒོ་གསུམ་ཀུན་གཞིར་བཅས་པའི་ཉོན་མོངས་ཀྱི་བདུད་དགྲ། །སྨིན་འཇམ་དཔལ་སྒྱུ་འཕྲུལ་དྲྭ་བ་ལས། །འཇིག་རྟེན་གསུམ་ན་གཞོན་ལུས་གཅིག ། གནས་བརྟན་རྒན་པོ་སྐྱེ་རྒུའི་བདག །སུམ་ཅུ་རྩ་གཉིས་མཚན་འཆང་བ། །སྡུག་གུ་འཇིག་རྟེན་གསུམ་ན་མཛེས། །ཞེས་གསུངས་པ་ཉིད་སྨིན་གྲོལ་གྱི་ལམ་འཁོར་དང་བཅས་པ་ལ་སྦྱར་དུ་ཡོད་པ་ལྟ་བུ་དང་འབྲེལ་ལོ། །མཆན། བྱེད་འཇམ་དཔལ་ཁྲོས་པའི་
ཐབས་མཁས་ཀྱིས་བཅོམ་པས། །བསྐྱེད་རྫོགས་ཟུང་འཇུག་བསྒོམ་རུང་སྐལ་བ་ལ་སྦྱོར་ཞིང་། །སྐུ་བཞིའི་ས་བོན་འཇོག་པའི་ལམ་བཟང་འདི་ཨ་ཧོ། །ཐ་མལ་འཁྲུལ་པའི་སྣང་ཞེན་ཀུན་བརྟགས་ཀྱི་བདུད་དགྲ། །སྣང་སྟོང་འཇམ་དཔལ་ཁྲོས་པའི་དཀྱིལ་འཁོར་ཟླ་གསང་སྙིང་པོ་ལས། ཁམས་དྲུག་ལྡན་པའི་ལུས་ཀྱི་རྟེན། །རྡོ་རྗེ་བཞི་ཡི་གོ་འཕང་ལ། །སྦྱོར་བ་རྡོ་རྗེའི་ཏན་ལས། །རྒྱུ་འབྲས་དག་གྲོལ་ལམ་གྱིས་མིན། །སོགས་གསུངས་པའི་ཕྱིར་རོ། ། ལ་བཏུད་ནས། །གསལ་བརྟན་གྱད་དུ་གྱུར་བའི་ཉམས་ལེན་དང་སྦྲགས་ནས། །ཕུང་ཁམས་ལྷ་སྐུར་སྨིན་པའི་ཐབས་མཁས་འདི་ཨ་ཧོ། །རྩ་རླུང་ཐིག་ལེར་བཅས་པའི་འཁྲུལ་བཅས་ཀྱི་བདུད་དགྲ། །མྱུར་ལམ་འཇམ་དཔལ་ཁྲོས་སྒྱུ་དྲྭར། ས་ཡི་དཀྱིལ་འཁོར་གཞི་ཡི་ཁྱོན། །རྐང་པ་ཡ་གཅིག་མཐེབ་ཀྱིས་གནོན། །རྐང་མཐིལ་སེན་མོའི་ཁྱོན་གྱིས་ཀྱང་། །ཚངས་པའི་ཡུལ་ས་རྩེ་ནས་གནོན། །ཞེས་སོགས་དང་འབྲེལ། པའི་དཀྱིལ་འཁོར་ལ་བཏུད་ནས། །བྱེད་བཅིངས་ཁ་སྦྱོར་ཞུ་བདེའི་སྒྱུ་ཐབས་དང་འགྲོགས་ནས། །འཕོ་མེད་འཇའ་ལུས་འགྲུབ་པའི་མིག་འཕྲུལ་འདི་ཨ་ཧོ། །གཟུང་འཛིན་གློ་བུར་ཤར་བའི་གཉིས་སྣང་གི་བདུད་དགྲ། །དབྱིངས་རིག་འཇམ་དཔལ་ཁྲོས་རྒྱུད་ལས། ཡེ་ནས་མ་སྐྱེས་གཤིན་རྗེ་ཆེན་པོའི་ཚོགས། །དབྱིངས་ཀྱི་རང་བཞིན་རྣམ་པར་དག་པ་ལས། །གཉིས་མེད་འདུས་པའི་སྲས་མཆོག་གཤིན་རྗེའི་གཤེད། །ཅེས་དང་། ཞི་བ་གཉིས་མེད་ཆོས་དབྱིངས་ངང་ཉིད་ལས། །སྙིང་པོ་གཉིས་མེད་བྱང་
ཆུབ་སེམས་ཀྱི་དོན། །ཐམས་ཅད་འདུས་པ་བླ་མེད་དམ་པ་སྟེ། །དེ་བཞིན་གཤེགས་པའི་སྙིང་པོ་ཞེས་བཤད་དོ། །ཞེས་སོ། །པའི་མཚོན་ཆ་ཡིས་བཅོམ་པས། །ཟུང་འཇུག་གདོད་ནས་དག་པའི་ངལ་གསོ་དང་སྦྲགས་ནས། །སྐུ་དང་ཡེ་ཤེས་ལྷུན་གྱིས་གྲུབ་པ་འདི་ཨ་ཧོ། །གནས་སྐབས་ལས་ཉོན་ངར་འཛིན་ཕས་རྒོལ་གྱི་བདུད་དགྲ། །དྲག་ཤུལ་འཇམ་དཔལ་ཁྲོས་པའི་བརྟུལ་ཞུགས་ཀྱིས་བཅོམ་ནས། །གང་འདུལ་ཕྲིན་ལས་རྣམ་བཞིའི་རྒྱུད་ལས། ངང་གིས་ཞི་བའི་དབྱིངས་ལས་མ་གཡོས་ཀྱང་། །ཕྲིན་ལས་རྣམ་བཞིས་འགྲོ་བ་སོ་སོར་འདུལ། ཞེས་སོ། །རོལ་མོ་དང་སྦྲགས་ཏེ། །ཕན་བདེའི་དགའ་སྟོན་གྲུབ་པའི་རྣམ་ཐར་འདི་ཨ་ཧོ། །དེ་སྐད་སྙིང་དབུས་འཇམ་དཔལ་ཁྲོས་པ་ཡི་དཀྱིལ་འཁོར། །བདེ་སྟོང་ཚོགས་ཀྱི་འཁོར་ལོའི་འདུ་བ་ཡིས་མཉེས་པའི། །ཟབ་ལམ་རྡོ་རྗེའི་ཚིག་རྐང་རང་བྱུང་གི་ཐོལ་གླུས། །དོན་གཉིས་དགའ་སྟོན་འགྲུབ་པའི་སྨོན་ལམ་ཞིག་ཞུའོ། །ཞེས་པའང་སྐུའི་དབེན་གནས་བསྒྲགས་ཀྱི་ཡོངས་རྫོངས་སུ་གྲོ་བཞིན་ཟླ་བའི་དཀར་ཕྱོགས་རྒྱལ་བ་དང་པོར་འཇམ་དཔལ་དུས་དགྲའི་དབང་པོའི་དཀྱིལ་འཁོར་དུ་ཚོགས་ཀྱི་འདུ་བ་བགྱེས་པའི་ཚེ་གང་ཤར་རྡོ་རྗེའི་གླུར་བླངས་པའོ།། ༈ །།པདྨ་གསུང་གི་དཀྱིལ་འཁོར་དུ་རྟོགས་པ་བརྗོད་པའི་རྡོ་རྗེའི་ཐོལ་གླུ་སོ་སོར་རྟོག་པའི་ཞལ་ལུང་ཅེས་བྱ་བ། ཨ་ཧོ། ཆགས་བྲལ་སོ་སོར་རྟོག་པའི་ཡེ་ཤེས་ཀྱི་སྒྱུ་འཕྲུལ། །འགགས་མེད་པདྨ་ཁྲོས་པའི་ལང་ཚོ་རུ་ཤར་བས། །ཉོན་མོངས་བདུད་དགྲའི་སྒྱུ་ཐབས་ཆོས་
དབྱིངས་སུ་བཅོམ་པའི། །དབང་ཆེན་རྟ་མཆོག་རོལ་པའི་དཀྱིལ་འཁོར་ལ་བཏུད་ནས། །རང་མཚན་ཟབ་པའི་ལམ་གྱི་ཐོལ་གླུ་ཞིག་ལེན་ནོ། །སྒྲིབ་གཉིས་རྒྱུ་དང་འབྲས་བུའི་གནས་སྐབས་ཀྱི་དྲི་མ། །ཟབ་ལམ་སྣོད་དུ་རུང་རྟ་མཆོག་རོལ་པའི་རྒྱུད་ལས། རིགས་ཀྱི་བུ་མ་འོངས་པའི་འགྲོ་བ་གསང་སྔགས་ཀྱི་ལམ་དུ་འཇུག་པར་འདོད་པ་དག་ནི། །རྡོ་རྗེ་སློབ་དཔོན་ལ་བརྟེན་ནས་གཟུགས་བརྙན་གྱི་དཀྱིལ་འཁོར་དུ་གཞུག་པར་བྱའོ། །ཞེས་སོ། །བའི་དབང་བསྐུར་གྱིས་སྦྱངས་ནས། །རྨད་བྱུང་རྡོ་རྗེ་སྙིང་པོའི་འདུལ་བ་ལ་བསླབས་པས། །རྣམ་བཞིའི་རྒྱུད་ལས། མཆོག་ཏུ་གསང་བའི་གྲོང་ཁྱེར་འདིར། །གང་གིས་འདོད་དོན་གང་སྟེར་བ། །དེས་ནི་སྒྲིབ་སོགས་ཀུན་སྤངས་ཤིང་། །མི་གནས་ཡེ་ཤེས་གསལ་བར་སྦྱོར། །ཞེས་སོ། །ཡེ་ཤེས་མཐོང་བའི་ཐབས་མཁས་འདི་ཨ་ཧོ། །གཟུང་འཛིན་འཁྲུལ་པ་ལས་འདས་ཆོས་ཉིད་ཀྱི་གཤིས་ལུགས། །བདེན་གཉིས་རྣམ་དབྱེར་མེད་རྒྱུད་སྔ་མ་ལས། ཐམས་ཅད་སྒྱུ་མ་ལྟ་བུའི་ཚུལ། །ཐམས་ཅད་རང་བཞིན་སྟོང་པ་ཉིད། །ཟུང་དུ་འཇུག་པའི་ཡེ་ཤེས་ནི། །དེ་ནི་བླ་མེད་མཆོག་དམ་པ། །ཞེས་སོ། །པའི་རང་བཞིན་དུ་རྟོགས་པས། །དོན་དམ་འགོགས་བདེན་དབང་ཆེན་སྙིང་དབུས་སུ་སད་པའི། རྟ་མགྲིན་དགོངས་པ་ལུང་སྟོན་པའི་རྒྱུད་ལས། །ཡུལ་སེམས་རབ་ཏུ་རྟོགས་གྱུར་ན། །གང་བལྟས་པདྨ་དབང་གི་ལྷ། །ཇི་ལྟར་བྱས་ཀྱང་སྐྱོན་མེད་པ། །དབང་ཆེན་ཞེས་ནི་དེ་ལ་སྦྱར། སོགས་དང་འབྲེལ་ལོ། །གཞི་འབྲས་དབྱེར་མི་ཕྱེད་པའི་ཉམས་ལེན་འདི་ཨ་ཧོ།
ཕུང་པོ་ཁམས་དང་སྐྱེ་མཆེད་ཐ་མལ་གྱི་སྣང་ཞེན། །གདན་གསུམ་ཡོངས་སུ་གྲུབ་པའི་ལྷ་སྐུ་རུ་ཤར་བས། རྒྱུད་ལས། ཕུང་པོ་ཆོས་རྣམས་སངས་རྒྱས་ཏེ། །འབྱུང་ལྔ་དབྱིངས་ཕྱུག་ཡུམ་གྱི་མཁའ། །ཁམས་དང་སྐྱེ་མཆེད་སེམས་དཔའ་དང་། སེམས་མའི་ཚོགས་དང་ཁྲོ་མོའི་སྐུ། །ཕྱི་ནང་གསང་གསུམ་དངོས་སྣང་བའི། །དཀྱིལ་འཁོར་རིགས་ཀྱི་བདག་ཉིད་ཆེ། །ཞེས་སོགས་རྒྱས་པར་བཀའ་སྩལ་ཏོ། །སྣོད་བཅུད་དག་པ་རབ་འབྱམས་བརྟན་གཡོ་དངོས་པོ་ཐམས་ཅད་ཀུན། །བདེ་ཆེན་སྐུ་ལས་གཞན་མེད་དོ། །སོགས་ཀྱི་དོན། གྲོང་ཁྱེར་དུ་མཐོང་བའི། །སྣང་སྲིད་གཞིར་བཞེངས་ཆེན་པོའི་བསྐྱེད་རིམ་འདི་ཨ་ཧོ། །ཁམས་གསུམ་ཀུན་ཏུ་འཕོ་བའི་བག་ཆགས་ཀྱི་རྒྱུ་བ། །བདེ་ཆེན་ཐིག་ལེ་ཕྲ་མོའི་རྣལ་འབྱོར་གྱིས་བཅོམ་པས། རྒྱུད་ལས། པདྨ་རང་གི་གནས་སུ་བསྒོམ། །འདོད་ཆགས་ཆོས་ཀུན་སྤྱོད་པ་ཡི། །མགོན་པོ་རང་རང་གནས་ན་གསལ། །དྲི་མེད་དག་པའི་ཐིག་ལེ་ལས། །འོད་ཟེར་ལྔ་ཡི་སྣང་བར་བཅས། །རང་གི་གནས་ནས་འཕྲོ་མཛད་ཅིང་། །སོགས་ཀྱི་སྦས་དོན། རྒྱུད་ལས། ཡེ་ཤེས་འདི་ནི་ཤིན་ཏུ་ཕྲ། །རྡོ་རྗེ་སྙིང་པོ་མཁའ་འདྲ་ཞིང་། །རྡུལ་བྲལ་ཐར་པ་ཞི་བའི་ཆོས། །དྭང་བའི་རང་བཞིན་དེ་ཡིན་ནོ། །ཞེས་སོ། །ཡེ་ཤེས་ནམ་མཁའི་གཟུགས་ཅན་མངོན་སུམ་དུ་མཐོང་བའི། །མ་བཅོས་གཉུག་མར་བཞག་པའི་ཉམས་ལེན་འདི་ཨ་ཧོ། །གནས་སྐབས་རྡོ་རྗེ་གསུམ་གསལ་སྣང་བ་ལ་གོམས་པས། །རྣམ་བཞིའི་ཕྲིན་རྒྱུད་ལས། རྒྱལ་
བ་ཀུན་གྱི་བདག་ཉིད་དེ། །རྣམ་གསུམ་ཕྱག་རྒྱ་ལ་སྦྱར་ནས། ལས་ཀྱི་དངོས་གྲུབ་སྒྲུབ་པ་ནི། །གནས་བཟང་དག་ཏུ་བརྩམ་པར་བྱ། །ཞེས་སོགས་ཀྱིས་བསྟན། ལས་གྲུབ་པའི་བརྟུལ་ཞུགས་དང་སྦྲགས་ནས། །མཐར་ཐུག་སློབ་པའི་རྣལ་འབྱོར་རིམ་གཉིས་ཀྱི་སྦྱོར་བས། རྒྱུད་ལས། སློབ་པའི་རྣལ་འབྱོར་གཉིས་བརྟེན་ནས། །ལྷུན་གྱིས་གྲུབ་པ་ལ་གོམས་ཏེ། །མི་འགྱུར་བདེན་པ་གཉིས་ལ་གནས། ཞེས་སོ། །ལྷུན་གྲུབ་གདོད་མའི་ཕ་མཐར་སོན་པ་འདི་ཨ་ཧོ། །དེ་སྐད་དྷ་ཏིར་སྦས་པའི་འོད་གསལ་གྱི་ཐིག་ལེ། །བདེ་སྟོང་སོ་སོར་རྟོག་པའི་ཡེ་ཤེས་ཀྱི་ཞལ་ལུང་། །གྲགས་སྟོང་རྡོ་རྗེའི་གླུ་ཡི་རོལ་མོ་རུ་ཤར་བས། །ལྷན་སྐྱེས་སྐུ་བཞི་འགྲུབ་པར་བྱིན་གྱིས་རང་རློབས་ཤིག །ཅེས་པའང་གསུང་གི་དབེན་གནས་བསམ་ཡས་མཆིམས་ཕུར་གྲོ་བཞིན་ཟླ་བའི་དཀར་ཕྱོགས་ཀྱི་ཚེས་བཅུར་དབང་ཆེན་རྟ་མཆོག་རོལ་པའི་དཀྱིལ་འཁོར་དུ་ཚོགས་ཀྱི་འདུ་བ་བགྱིས་པའི་ཚེ་གང་ཤར་གླུར་བླངས་པའི་རྟོགས་པའོ།། །།ཡང་དག་ཐུགས་ཀྱི་དཀྱིལ་འཁོར་དུ་རྟོགས་པ་བརྗོད་པའི་རྡོ་རྗེའི་ཐོལ་གླུ་ཧེ་རུ་ཀའི་ཞལ་ལུང་ཅེས་བྱ་བ། ཨ་ཧོ། བརྟན་གཡོ་ཀུན་ལ་ཁྱབ་པའི་ཆོས་ཉིད་ཀྱི་རང་བཞིན། །བདེ་སྟོང་ཁ་སྦྱོར་མཚན་དཔེའི་སྣང་ཆ་རུ་ཤར་བས། །གློ་བུར་འཁྲུལ་པའི་རྒྱུ་བ་འོད་གསལ་དུ་ཐིམ་པ། །ཧེ་རུ་ཀཿ ཧེ་རུ་ཀའདུས་པ་ལས། །ཧེ་ནི་དགྱེས་པ་ཆེན་པོ་སྟེ། །རུ་ནི་ཚོགས་དང་བྲལ་བ་ཉིད། །ཀནི་ཕྲིན་ལས་མཛད་པར་ཤར། །ཅེས་སྐུ་གསུམ་དུ་རྣམ་པར་བཞག་གོ །དཔལ་འབར་བའི་དཀྱིལ་འཁོར་ལ་བཏུད་ནས། །ངེས་དོན་རྡོ་རྗེའི་
ལམ་གྱི་ཐོལ་གླུ་ཞིག་ལེན་ནོ། །མཚན་ཉིད་ཀུན་ལྡན་ཁྱབ་བདག་འཁོར་ལོ་ཡི་མགོན་པོས། །དད་བརྩོན་བརྟུལ་ཞུགས་ལྡན་པའི་སྐལ་བཟང་གི་སློབ་མར། །ཕྱི་ནང་གསང་སྔ་མ་ལས། དཀྱིལ་འཁོར་འདི་ལ་རིམ་ཞུགས་ནས། །དབང་བཞི་རིམ་པ་བཞིན་དུ་སྦྱིན། ཞེས་སོ། །བའི་དབང་བསྐུར་དམ་ཚིག་ཀུན་བྱིན་པས། །རྒྱུད་དག་ནུས་པ་དེ་ཉིད་ལས། གང་གིས་གང་ལ་དབང་བསྐུར་བ། །རྒྱུད་དག་ནུས་པ་ཐོབ་ཕྱིར་དབང་། །ཞེས་སོ། །ཐོབ་པའི་འཇུག་སྒོ་འདི་ཨ་ཧོ། །ཡང་དག་གྲུབ་པ་གཅིག ཧེ་རུ་ཀགལ་པོ་ལས། ཡང་དག་གྲུབ་པ་གཅིག་པུ་ནི། །སངས་རྒྱས་བདེ་གཤེགས་ཀུན་འདུས་པ། །རྣལ་འབྱོར་ཟབ་མོ་སྐུ་གསུམ་རྫོགས། །མཁའ་འགྲོ་སྒྱུ་མ་བདེ་བའི་མཆོག །ཅེས་པས་རྒྱུད་གསུམ་གྱི་རྣམ་བཞག་དང་སྦྱར་ནས་རིམ་པར་བསྟན། པུའི་ལྷན་སྐྱེས་ཀྱི་རྣམ་འགྱུར། །སྲིད་དང་ཞི་བ་རོ་མཉམ་མཁའ་ཁྱབ་ཀྱི་ཡེ་ཤེས། །སངས་རྒྱས་ཀུན་དང་མཉམ་སྦྱོར་བློ་འདས་ཀྱི་གཤིས་ལུགས། །འགགས་མེད་མངོན་སུམ་རང་ངོར་ཤར་བ་འདི་ཨ་ཧོ། །མཉམ་བཞག་ལྷ་སྐུ་སྒྱུ་མའི་ཕྱག་རྒྱ་ལ་རོལ་ཞིང་། །རླུང་སྔགས་མི་ཤིག་རུ་ལུའི་སྒྲ་དབྱངས་སུ་གོམས་པས། །རྗེས་ཐོབ་ཅིར་སྣང་དག་པ་རབ་འབྱམས་སུ་སད་པའི། ཧེ་རུ་ཀའདུས་པ་ལས། སྐུ་ནི་སྣང་བ་ཐམས་ཅད་སྟེ། །གསུང་ནི་བརྗོད་པ་ཀུན་ཉིད་དོ། །དྲན་རྟོགས་ཐུགས་སུ་དབྱེར་མེད་པས། །མ་ལུས་སྐུ་གསུང་ཐུགས་སུ་རྫོགས། །ཞེས་སོ། །འཁོར་འདས་དབྱེར་མེད་ཟླ
གནས་སྐབས་གསུམ་གྱི་སྣང་ཞེན་རྣལ་འབྱོར་དུ་སྦྱོར་བས། སངས་རྒྱས་མཉམ་སྦྱོར་བའི་རྒྱུད་ལས། །ལྡང་བ་སྤྲུལ་པའི་སྐུ་ཡིན་ཏེ། །རྨི་ལམ་ལོངས་སྤྱོད་རྫོགས་པའི་སྐུ། །གཉིད་ལོག་ཆོས་སྐུར་བསྒོམ་པར་བྱ། །ཅེས་པས་བསྟན། །སྐྱེ་བར་འཆི་བའི་རིམ་པ་སྐུ་གསུམ་དུ་རྫོགས་ཤིང་། །མཚན་མེད་ཇི་བཞིན་ཉིད་དབྱིངས་ཕྱག་རྒྱ་ཡིས་བཏབ་པས། །གཞི་འབྲས་གཉིས་སུ་མེད་པར་གྲོལ་བ་འདི་ཨ་ཧོ། །ཐུན་མོང་གང་འདུལ་ཕྲིན་ལས་རྣམ་བཞི་སྔ་མར། སྟོང་དང་སྟོང་མིན་ཧེ་རུ་ཀ །བདེ་ཆེན་ཆོ་འཕྲུལ་སྣ་ཚོགས་གཟུགས། །ཞི་ལ་ཞི་དང་ཁྲོ་ལ་ཁྲོ། །ཆགས་ལ་ཆགས་དང་རྨོངས་ལ་རྨོངས། ཞེས་པས་བསྟན། ལ་སྤྱོད་ཅིང་། །ཁྱད་པར་ལམ་གྱུར་འབྲས་བུའི་བརྟུལ་ཞུགས་དང་འགྲོགས་ནས། དེ་ཉིད་ལས། རབ་ནི་སྐུ་ལྔ་ལྷུན་གྲུབ་ཐོབ། །འབྲིང་ནི་རིག་འཛིན་རྣམ་བཞིའི་ལུས། ཐ་མ་ལྷ་མིའི་མཚན་རྫོགས་པ། །འགྲུབ་པར་འགྱུར་བ་གདོན་མི་ཟ། །ཞེས་དང་། གལ་པོ་ཆེར། རྡོ་རྗེ་ཕུང་པོ་རིགས་ལྔ་ཉིད། །ཉོན་མོངས་ཡེ་ཤེས་ཆེན་པོར་གསལ། །ཁར་ཆད་དངོས་གྲུབ་ཉིད་དུ་གྲོལ། །རྡོ་རྗེའི་སྐུ་ལ་འཆི་བདག་མེད། །ཅེས་སོ། །མཁའ་ལྟར་དག་པའི་དབྱིངས་འགྲོ་ཡེ་ཤེས་ཀྱི་སྐྱ་ལུས། མཉམ་སྦྱོར་བས། ངོ་མཚར་སྒྱུ་མའི་ཕྱག་རྒྱ་ནི། །མཁའ་འགྲོ་མ་ཞེས་རབ་བསྟན་ཏོ། །དེ་ནི་ནམ་མཁའ་འགྲོ་བ་ཞེས། །ཁམས་ལས་མངོན་དུ་བརྟག་བ་སྟེ། །ནམ་མཁའ་ཀུན་གྱི་སྤྱོད་གྲུབ་པས། །མཁའ་འགྲོ་མ་ཞེས་རབ་ཏུ་བརྟགས། །ཅེས་བསྟན། བདེ་ཆེན་མཆོག་ཏུ་མི་འགྱུར་གྲུབ་པ་འདི་ཨ་ཧོ། །དེ་སྐད་རྡོ་རྗེ་ཕུང་པོའི་གྲོང་ཁྱེར་གྱི་དབུས་ན། །གདོད་
ནས་ཡོངས་གྲུབ་བཞུགས་པའི་དཔལ་ཆེན་གྱི་དཀྱིལ་འཁོར། །བདེ་སྟོང་བདུད་རྩིས་མྱོས་པའི་ཟབ་དོན་གྱི་རྒྱངས་གླུས། །འགྲོ་ཀུན་གདོད་མའི་བཙན་ས་ཟིན་པ་རུ་ཤོག་ཅིག །ཅེས་པའང་ཐུགས་ཀྱི་དབེན་གནས་ལྷོ་དྲག་མཁར་ཆུ་དཔལ་གྱི་ཕུག་རིང་དུ་ཀུན་ལྡན་གྱི་ལོའི་ཁྲུམས་ཟླའི་དམར་ཕྱོགས་ཀྱི་སྟོང་པ་གསུམ་པར་དཔལ་ཡང་དག་ཟླ་གམ་དགུ་པའི་དཀྱིལ་འཁོར་དུ་ཚོགས་ཀྱི་འཁོར་ལོའི་འདུ་བ་བགྱིས་པའི་ཚེ་གང་ཤར་གྱི་རྟོགས་པ་བརྗོད་པའི་ས་བོན་ནོ། ༈།ཡོན་ཏན་བདུད་རྩིའི་དཀྱིལ་འཁོར་དུ་རྟོགས་པ་བརྗོད་པའི་རྡོ་རྗེའི་ཐོལ་གླུ་བདེ་ཆེན་གྲུབ་པའི་ཞལ་ལུང་ཅེས་བྱ་བ། ཨ་ཧོ། མི་འགྱུར་མཁའ་ལྟར་དག་པའི་འོད་གསལ་གྱི་རང་མདངས། །འགགས་མེད་སྐུ་དང་ཡེ་ཤེས་ཕྲིན་ལས་སུ་ཤར་བས། །ཐམས་ཅད་ལྷན་སྐྱེས་གྲུབ་པའི་ཐིག་ལེ་རུ་སྦྱོར་བའི། །ཡོན་ཏན་བདུད་རྩིའི་དཀྱིལ་འཁོར་འཁོར་ལོ་ལ་བཏུད་ནས། །རྒྱུ་ལམ་འབྲས་བུའི་རྣལ་འབྱོར་གླུ་དབྱངས་སུ་ལེན་ནོ། །བདུད་རྩི་མཆོག་གི་ལུང་བམ་པོ་བརྒྱད་པར། །སྒྲུབ་དང་བསྒྲུབ་པར་བྱ་བ་དང་། །འབྲས་བུ་ཐོབ་པར་བྱ་བའི་ཕྱིར། །གསང་སྔགས་གསང་བའི་མན་ངག་འདི། །བདུད་རྩི་དམ་པ་མཆོག་གི་ལུང་། ཞེས་དང་། ལྟ་བ་དང་ནི་སྤྱོད་པ་དང་། །དམ་ཚིག་སྒྲུབ་པ་ཕྲིན་ལས་དང་། །ངེས་བར་སྒྲུབ་པ་བསྒྲུབ་བྱའི་ཕྱིར། །ཟབ་མོ་བསྡུས་པའི་ལུང་འདི་གསུངས། །ཞེས་པ་དང་འབྲེལ་ལོ། །སྐྱེ་མེད་སྤྲོས་པ་ཀུན་བྲལ་ཆོས་ཉིད་ཀྱི་བདུད་རྩི། སྔ་མར། ཆོས་བདུད་རྩི་ཆེན་པོའི་དོན་འདི་ཡང་། །མ་སྐྱེས་མ་འགགས་མི་རྟོག་པས། མཚན་མ་དང་། མཚན་མ་མེད་པ་དང་། མི་
གནས་པ་ཐམས་ཅད་ལ་ཁྱབ་སྟེ་གནས་སོ། །ཞེས་དང་། བདུད་རྩི་ཆེན་པོའི་རང་བཞིན་ནི། །ཁ་དོག་དབྱིབས་དང་མཚན་མ་མེད། །འགོགས་པ་མེད་ཅིང་དབྱེ་བའང་མེད། །རྩ་བ་མེད་ཅིང་བསྟན་པའང་མེད། །བདུད་རྩི་ཆེ་ལ་བརྗོད་པའང་མེད། །ཉོན་མོང་དུག་དང་བདུད་བཞི་བཅོམ། །དྲི་མེད་དག་པའི་བྱང་ཆུབ་སེམས། །ངེས་དོན་དེ་ལ་འདུད་པར་བྱོས། །ཞེས་དང་། སྣང་སྲིད་ཡེ་ནས་བདུད་རྩི་ལྔ། །མ་བཅོས་མ་བསླད་དེ་བཞིན་གཤེགས། །ཞེས་སོགས་གསུངས་ཤིང་། གཞན་ཡང་ཆོས་དོན་རྟགས་ཀྱི་བདུད་རྩི་ལ་སྦྱར་ཚུལ་སོགས་ཞིབ་པར་དབྱེ་རུ་ཡོད་དོ། །འཁོར་འདས་ཡོངས་སུ་ཁྱབ་པའི་རང་བཞིན་ལ་བལྟས་པས། །སྣང་སྲིད་གདོད་ནས་བྱང་ཆུབ་འཕོ་མེད་ཀྱི་དྲ་བར། །གློ་བུར་འཁྲུལ་པའི་བདུད་བཞི་འཆིང་བ་འདི་ཨ་ཧོ། །ལྷུན་གྲུབ་རྡོ་རྗེ་ཕུང་པོའི་རང་བྱུང་གི་བདུད་རྩི། །ཡེ་ནས་རིགས་མཆོག་རྣམ་ལྔའི་དམ་རྫས་སུ་རྫོགས་ཤིང་། སྔ་བམ་ལས། བྱང་ཆུབ་སེམས་ནི་དཀར་བས་ན། །དྲི་མེད་དག་པ་ཡེ་ཤེས་སྐུ། །ཞེས་སོགས་ནས། སྐུ་ལྔ་ལྷུན་གྲུབ་བདུད་རྩི་འདི། །སོ་སོའི་ལུས་ལ་གནས་པ་ཡིན། །ཅེས་པའི་བར་གྱིས་བསྟན། རྩ་བ་ཡན་ལག་སྟོང་དེ་ཉིད་ལས། རྩ་བ་སྡོང་བུ་ཡལ་ག་དང་། །ལོ་མ་འདབ་མ་མེ་ཏོག་དང་། །ཤུན་ལྤགས་འབྲས་བུ་སྙིང་པོར་བཅས། །རོ་དང་མཐུ་དང་ཁ་དོག་ལས། །རྩ་བ་གཅིག་ལ་ཡན་ལག་བརྒྱད། །ཡན་ལག་བརྒྱད་ལས་ཡོན་ཏན་སྟོང་། །ཞེས་སོ། །སྦྱར་སྨན་མཆོག་དང་སྦྱར་བས། །སྐལ་བཟང་སྨིན་ཅིང་སྦྱོང་བའི་ཉེ་རྒྱུ་འདི་ཨ་ཧོ། །ཐ་མལ་མཚན་མའི་རྟོག་ཚོགས་བདུད་རྩི་རུ་སྦྱར་བའི། དེ་ལས། རྒྱུ་དང་
དམ་རྫས་ཐམས་ཅད་ནི། །སངས་རྒྱས་སྒྲུབ་པའི་རྒྱུ་དང་གཞི། །དམ་ཚིག་དམ་པར་སྲུང་བའི་རྫས། །བྱིན་གྱིས་བརླབ་པར་བྱ་བའོ། །བསྙེན་སྒྲུབ་ཡན་ལག་བཞི་ཡི་གྲོང་ཁྱེར་གྱི་དབུས་ན། །རྨད་བྱུང་ཏ་ན་ག་ནའི་བརྟུལ་ཞུགས་ལ་སྤྱོད་པའི། །གསང་སྔགས་ཐབས་ཀྱི་སྔ་མར། རི་ནི་ཉམས་དགའ་མདངས་བཟང་བ། །ཡིད་འོང་གནས་སུ་འདུག་ནས་ན། །བྱིན་རླབས་མཚམས་བཅད་བརྟག་བྱས་ལ། །དཀྱིལ་འཁོར་འདོམ་གང་གྲུ་བཞི་པ། །དྲི་སྣ་ལྔ་ཡི་མཎྜལ་བྱ། སོགས་ཀྱིས་རྒྱས་པར་བསྟན། ལམ་མཆོག་ཟབ་མོ་འདི་ཨ་ཧོ། །གནས་སྐབས་རྣམ་པར་གྱུར་པའི་གདུང་བ་ཀུན་ཞི་ཞིང་། །བདེ་སྟོང་ཁམས་ཀྱི་འདུ་བ་དབུ་མ་རུ་རྒྱས་ཏེ། སྒྱུ་འཕྲུལ་དྲྭ་བ་ལས། འཐུང་ན་ངན་སོང་སྒྲིབ་པ་བྱང་། །རྟག་བརྟན་དངོས་གྲུབ་མཆོག་ཀྱང་འགྲུབ། །བཞི་བརྒྱ་རྩ་བཞིའི་ནད་སེལ་ཞིང་། །ལྷ་ལ་རྟག་ཏུ་མཆོད་བྱས་ན། །བདག་དང་གཉིས་སུ་མེད་པར་འགྱུར། །མི་མཐུན་ཕྱོགས་ལ་གཏོར་བྱས་ན། །དྲག་པོ་གཏུམ་པོའང་ལྷན་ནེར་འགྱུར། །གཞན་ཡང་དངོས་གྲུབ་ཐམས་ཅད་ནི། །ཇི་ལྟར་དམིགས་པ་བཞིན་དུ་འགྲུབ། ཅེས་སོ། །སྙིང་པོ་བདེ་བམ་བརྒྱད་ལས། སྐྱེ་མེད་ཡེ་ཤེས་ཡུམ་གྱི་དབྱིངས། །གཉིས་མེད་བདུད་རྩི་ཆེན་པོ་སྟེ། །ཡབ་ཡུམ་བདེ་བའི་ངང་དུ་གསལ། །འདི་ནི་སྙིང་པོ་བྱང་ཆུབ་སེམས། །བདེ་གཤེགས་ཀུན་གྱིས་བཀའ་སྩལ་ཏོ། ། ཞེས་སོ། །བ་ཆེན་པོའི་ཕྱག་རྒྱ་ལ་སྦྱར་བས། །གཟུང་འཛིན་དབྱིངས་སུ་སྒྲོལ་བའི་དངོས་གྲུབ་འདི་ཨ་ཧོ། སྔ་མར། ཡེ་ནས་རྒྱུ་ཉིད་དག་པ་ལ། །ང་དང་བདག་ཏུ་འཛིན་པ་ཡིས། །ཁམས་གསུམ་འཁོར་བའི་རྒྱུ་རུ་འགྱུར། །ཁམས་གསུམ་
དེ་དག་བསྒྲལ་བའི་ཞིང་། ཞེས་སོགས་རྒྱས་པར་བསྟན་ཏོ། །མཐར་ཐུག་ཕུང་པོའི་ཟག་ཟད་འཆི་མེད་ཀྱི་ལང་ཚོས། །མཁའ་སྤྱོད་རིག་པ་འཛིན་བའི་གོ་འཕང་ལ་བརྟེན་ནས། དེ་ཉིད་ལས། ཟག་པ་ཟད་པས་ནམ་མཁར་འཕུར། ། རྡོ་རྗེའི་འགྲོས་ཀྱི་ནམ་མཁར་འགྲོ། །མཁའ་སྤྱོད་གོ་འཕང་འདིས་ཐོབ་བོ། །ཞེས་སོ། །སྐུ་གསུམ་དབྱེར་མི་ཕྱེད་པའི་ཡེ་ཤེས་ཀྱི་དབྱིངས་སུ། །སྒྲིབ་གཉིས་རྒྱུ་བཅས་དག་པའི་འབྲས་བུ་འདི་ཨ་ཧོ། །དེ་སྐད་རང་བྱུང་ཡེ་ཤེས་སྔ་མར། ནམ་མཁའི་མཚན་ཉིད་སངས་རྒྱས་ཏེ། །མཚན་ཉིད་མེད་པས་ནམ་མཁའ་འདྲ། །བྱ་བ་མེད་པས་གྲོལ་བ་སྟེ། །བདུད་རྩི་མཆོག་ལ་ཕྱག་འཚལ་ལོ། །ཞེས་སོགས་ཀྱིས་བསྟན། ཨ་མྲྀ་ཏའི་ཕུང་པོ། །དཀྱིལ་འཁོར་དྲུག་དང་སྦྱོར་བ་བརྒྱད་ལྡན་དུ་ཤར་བའི། །རྟོགས་པ་བརྗོད་པའི་རྡོ་རྗེའི་ཐོལ་གླུ་འདི་བླངས་པས། །གཉིས་སྣང་རང་སར་གྲོལ་བའི་སྨོན་ལམ་ཞིག་ཞུའོ། །ཞེས་པའང་ཡོན་ཏན་དབེན་གནས་བསམ་འགྲུབ་ཤེལ་གྱི་བྲག་ཕུག་ཏུ་ཆུ་སྟོད་ཟླ་བའི་དཀར་ཕྱོགས་ཀྱི་ཚེས་བཅུར་ཆེ་མཆོག་བདུད་རྩིའི་དཀྱིལ་འཁོར་ཆེན་པོར་འཇུག་པའི་སྐབས་གང་ཤར་རྡོ་རྗེའི་གླུར་བླངས་པའི་རྟོགས་པའོ།། ༈ །།ཕྲིན་ལས་རྡོ་རྗེ་གཞོན་ནུའི་དཀྱིལ་འཁོར་དུ་རྟོགས་པ་བརྗོད་པའི་རྡོ་རྗེའི་ཐོལ་གླུ་རྡོ་རྗེ་ཁྲོས་པའི་ཞལ་ལུང་ཅེས་བྱ་བ། ཨ་ཧོ། ཆོས་དབྱིངས་འགྱུར་མེད་རྣམ་ཀུན་མཆོག་ལྡན་གྱི་ཡེ་ཤེས། །ཐབས་དང་ཤེས་རབ་ཟུང་འཇུག་གཟུགས་སྐུ་ཡི་སྒྱུ་འཕྲུལ། །གང་འདུལ་ཕྲིན་ལས་རྣམ་བཞིའི་རོལ་མོ་རུ་སྟོན་པའི། །བཅོམ་ལྡན་རྡོ་རྗེ་ཕུར་པ་རྣལ་འབྱོར་ཆེན་པོའི་རྒྱུད་
ལས། རྡོ་རྗེ་ཆོས་དབྱིངས་མི་འགྱུར་བ། །གཞོན་ནུ་གཟུགས་སྐུ་རྣམ་གཉིས་སོ། །ཞེས་བཤད། གཞོན་ནུའི་དཀྱིལ་འཁོར་ལ་བཏུད་ནས། །ཟབ་གསང་སྙིང་པོའི་ལམ་གྱི་ཐོལ་གླུ་ཞིག་ལེན་ནོ། །བུམ་གསང་ཤེས་རབ་ཡེ་ཤེས་དབང་བཞི་ཡི་ཕུར་བུ། །གནས་སྐབས་རྣམ་བཞིའི་བསྐྱེད་པའི་འཁྲུལ་ཆོས་ལ་ཐེབས་པས། ཐུགས་རྗེ་ཁྲོས་པའི་བཤད་རྒྱུད་ལས། །རྡུལ་ཚོན་ལུས་དང་བྱང་ཆུབ་སེམས། །དེ་བཞིན་ཉིད་ཀྱི་དཀྱིལ་འཁོར་མཆོག །བརྟེན་ནས་དབང་རྣམས་ཡང་དག་བསྐུར། །བུམ་པ་གསང་བ་ཤེས་རབ་དབང་། །བཞི་པ་མཆོག་གི་དབང་ཆེན་ཡིན། །ཞེས་སོ། །ཕྱི་ནང་གསང་བ་མཐར་ཐུག་དཀྱིལ་འཁོར་བཞིའི་ཀློང་ནས། །སྐུ་གསུམ་དབྱེར་མེད་རྡོ་རྗེ་གཞོན་ནུ་དང་མཇལ་བྱུང་། །ཤིས་བློ་འདས་ཀྱི་ཕུར་བུས། ཕུར་པ་རྡོ་རྗེ་བཀོད་པའི་རྒྱུད་ཀྱི་རྒྱལ་པོ་ལས། །ཕུར་ནི་ཐབས་ཀྱི་རྒྱལ་པོ་ལ། །པ་ནི་ཤེས་རབ་ཡུམ་གྱི་དོན། །གཉིས་སུ་མེད་པ་རྡོ་རྗེའི་ངང་། །ཅེས་འབྱུང་ངོ་། །གཟུང་འཛིན་སྤང་བླང་བྲལ་བའི་ཆོས་དབྱིངས་སུ་ཐེབས་པས། ཕུར་པ་རྣལ་འབྱོར་ཆེན་པོའི་རྒྱུད་ལས། །ཕུར་པ་རང་བྱུང་ཡེ་ཤེས་ལ། །དབྱེ་བ་རྣམ་པ་བཞི་ཡིན་ཏེ། །རང་རིག་ཡེ་ཤེས་ཕུར་པ་ཡིས། །ཡུལ་ཆོས་དབྱིངས་ལ་གདབ་པ་དང་། །ཐུགས་རྗེ་ཆེན་པོའི་ཕུར་བ་ཡིས། །ཁམས་གསུམ་སེམས་ཅན་ཀུན་ལ་གདབ། །གསང་བ་བྱང་སེམས་ཕུར་པ་ཡིས། །ཡུམ་གྱི་མཁའ་ལ་གདབ་པ་དང་། །མཚན་མ་བྱང་སེམས་ཕུར་པ་ཡིས། །ཉམས་པ་བདུན་ལ་གདབ་པའོ། །ཞེས་གསུངས་ཤིང་། རྒྱུད་གཞན་ལས་ཀྱང་དེ་དང་མཐུན་པར་བསྟེན་པའི་དོན་རིམ་
པར་ཕྱེ་བ་སྟེ་ལུགས་འདིའི་གྲུབ་པའི་མཐའ་ཐུན་མོང་མ་ཡིན་པའོ། །འཁོར་འདས་གཉིས་སུ་མི་ཕྱེད་རྡུལ་བྲལ་གྱི་ཀློང་ནས། །ངེས་དོན་འགོགས་བདེན་རྡོ་རྗེ་གཞོན་ནུ་དང་མཇལ་བྱུང་། །ཚད་རྡོ་རྗེ་བཀོད་པ་ལས། ལྟ་བ་མཉམ་པར་བཀོད་པ་དང་། །སྤྱོད་པ་ཅིར་ཡང་མི་སྙམས་ཞིང་། །ཐབས་ཀྱིས་འགྲོ་བའི་དོན་བྱེད་པ། །དེ་ནི་དམ་ཚིག་མཆོག་ཏུ་གསུངས། །ཞེས་སོ། །མེད་ཐུགས་རྗེ་ཆེན་པོའི་སྤྲུལ་པ་ཡི་ཕུར་བུ། །སྲིད་པ་སུམ་ཅུ་རྩ་གཅིག་གྲོང་ཁྱེར་དུ་ཐེབས་པས། འཁོར་བ་གདོད་ནས་དག་པའི་དཀྱིལ་འཁོར་གྱི་ཀློང་ནས། །སྣང་སྲིད་གཞིར་བཞེངས་རྡོ་རྗེ་གཞོན་ནུ་དང་མཇལ་བྱུང་། །རྗེས་ཆགས་སྒྱུ་མར་ཤར་བའི་བྱང་སེམས་ཀྱི་ཕུར་བུ། །ཤེས་རབ་སྟོང་ཆེན་ཡུམ་གྱི་མཁའ་དབྱིངས་སུ་ཐེབས་པས། །དབབ་བཟློག་འདྲེན་དགྲམ་དགའ་བཞིའི་ཕུར་པ་ཕྲིན་ལས་ཀྱི་རྒྱུད་ལས། །མཚན་ལྡན་ཤེས་རབ་དག་ལ་ནི། །སྣ་ཚོགས་དྲི་ཡིས་རབ་བརྒྱན་ཞིང་། །བསྲུབས་དང་སྒྲུབ་པའི་ཐབས་དག་ལས། །མི་རྟོག་པ་ནི་རབ་ཏུ་སྐྱེ། །དགའ་བ་མཆོག་ཏུ་དགའ་བ་དང་། །མངོན་དགའ་རང་བཞིན་དགའ་བ་སྟེ། །རྡོ་རྗེ་དབྱིངས་ཀྱི་དབང་ཕྱུག་མ། །བགྲོད་བྱེད་མན་ངག་དག་གིའོ། །ཞེས་སོ། །དཀྱིལ་འཁོར་གྱི་ཀློང་ནས། །བདེ་སྟོང་ཟུང་འཇུག་རྡོ་རྗེ་གཞོན་ནུ་དང་མཇལ་བྱུང་། །རྟེན་འབྲེལ་སྣང་ཚུལ་མ་འགགས་འདུས་བྱས་ཀྱི་ཕུར་བུ། །ཉོན་མོངས་རང་གར་ཤོར་བའི་དགྲ་བགེགས་ལ་ཐེབས་པས། །ལས་ངན་རྒྱུན་ཐག་གཅོད་བའི་དཀྱིལ་ཕུར་པ་རྡོ་རྗེ་བཀོད་པའི་རྒྱུད་ལས། །གང་ལ་
དམིགས་པའི་ངོ་བོ་ལ། །གདབ་པའི་ལས་དག་བྱས་ནས་ནི། །རྣམ་ཤེས་དབྱིངས་སུ་ཡང་དག་སྦྱར། །ལྷག་མ་ལྷ་ལ་མཆོད་པར་བྱ། །ཞེས་དང་། གཞན་ཡང་རྣལ་འབྱོར་ཆེན་པོའི་རྒྱུད་ལས། བསྲེག་པ་མེ་ཡི་ལས་ལ་བསྐུར། །མནན་པ་ས་ཡང་དེ་བཞིན་ཏེ། །འཕང་བ་ཟོར་རུ་ཤེས་པར་བྱ། ཞེས་སོགས་ཀྱང་འདྲེན་ཏོ། །འཁོར་གྱི་ཀློང་ནས། །སྲིད་གསུམ་ཡོངས་སྒྲོལ་རྡོ་རྗེ་གཞོན་ནུ་དང་མཇལ་བྱུང་། །དེ་སྐད་རྡོ་རྗེ་ཁྲོས་པའི་ཞལ་ལུང་ལས་སྐྱེས་པའི། །རྒྱུད་ལུང་མན་ངག་སྙིང་པོར་དྲིལ་བ་ཡི་ཐོལ་གླུས། །དབྱིངས་དང་ཡེ་ཤེས་དབྱེར་མེད་རྡོ་རྗེ་ཡི་ཕུར་པར། །འཁོར་འདས་རང་སར་གྲོལ་བའི་སྨོན་ལམ་ཞིག་ཞུའོ། །ཞེས་པའང་ཕྲིན་ལས་ཀྱི་དབེན་གནས་མོན་ཁ་ནེའུ་རིང་སེང་གེ་རྫོང་དུ་ཀུན་ལྡན་དབྱུག་པ་ཟླ་༩བའི་དཀར་ཕྱོགས་ཀྱི་དགའ་བ་གཉིས་༦པར་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་དུ་ཚོགས་ཀྱི་མཆོད་པ་བརྒྱ་ཕྲག་ཐལ་བ་བགྱིས་པའི་རྗེས་ཐོག་ཏུ་རྐང་འཐུང་ལང་ཚོས་བཀྲ་བའི་བསྟི་གནས་ཉམས་དགའ་བར་བྲིས་པའོ།། །།འདི་དག་དབེན་གནས་སོ་སོར་གནས་འབྲེལ་རེ་བྱས་པའི་ཚེ་བྲིས་པ་ལ། སླད་ནས་ཕྱོགས་གཅིག་ཏུ་བསྡེབས་ཤིང་རྒྱུད་དོན་དང་ཇི་ལྟར་འབྲེལ་བའི་ཚུལ་མཚོན་ཙམ་མཆན་བུ་གསལ་བར་བྱས་པ་སྟེ། གཞན་དུ་ཚུལ་འདི་ལས་བརྩམས་ནས་སོ་སོའི་གྲུབ་པའི་མཐའ་ཆུང་ཟད་འཆད་དུ་ཡོད་ཀྱང་། རྒྱུད་ལུང་མན་ངག་དབང་པོར་བཞག་ནས་ཟབ་མོའི་ལམ་སྒྲ་ཇི་བཞིན་དུ་སྟོན་པ་ལས། ཁམ་རེའི་ཟས་ལ་འདོམས་པས་མཚོན་གལ་ཆུང་ཆོས་ལ་བྱེད་པའི་དུས་འདིར་སྙིང་ནས་དོན་དུ་གཉེར་བ་ནམ་མཁའི་མེ་ཏོག་གི་སྤུན་ཟླར་སོང་བས་རེ་ཞིག་སྙིང་དབུས་དབུ་མའི་གྲོང་ཁྱེར་དུ་ངལ་གསོ་བར་བྱའོ། །གུ་
བྱ།། ༈ །།འོད་གསལ་ཕྱག་རྒྱ་ཆེན་པོའི་ལམ་གྱི་རིམ་པ་དང་འབྲེལ་བའི་རྡོ་རྗེའི་ཐོལ་གླུ་ངེས་དོན་གྲུབ་པ་ཞེས་བྱ་བ། ཨ་ཧོ། རང་གྲོལ་གཉུག་མའི་ཡེ་ཤེས་ནི། །དྲི་མེད་སེམས་ཀྱི་རྡོ་རྗེ་སྟེ། །དོན་དམ་འགོགས་བདེན་ཆེན་པོའི་ཞལ། །ཡོངས་གྲུབ་བླ་མར་ཕྱག་བགྱིའོ། །སྦྱང་གཞི་རང་བཞིན་འོད་གསལ་བའི། །སྦྱང་བྱ་གློ་བུར་འཁྲུལ་པའི་དྲི། །སྦྱོང་བྱེད་རྡོ་རྗེའི་རྣལ་འབྱོར་གྱིས། །སྦྱངས་འབྲས་ལྷན་སྐྱེས་མངོན་དུ་འགྱུར། །དེ་སླད་དེ་ཡི་ཨཱི ལམ་གྱི་རིམ། །སྐལ་བཟང་ཚེ་གཅིག་གྲོལ་འདོད་པའི། །དབང་རྣོན་རྣམས་ཀྱི་བགོ་སྐལ་དུ། །མདོར་བསྡུས་གང་ཤར་གླུ་རུ་ལེན། །ཐོག་མར་མཚན་ཉིད་ཀུན་ལྡན་པའི། །རྡོ་རྗེའི་སློབ་དཔོན་མཉེས་བྱས་ཏེ། །ཟབ་མོའི་མན་ངག་ལེགས་ཐོབ་ནས། །བློ་སྦྱོང་རིམ་པོ་འདི་ལྟར་བརྟག །དལ་བ་བརྒྱད་དང་འབྱོར་པ་བཅུས། །བརྒྱན་པའི་མི་ལུས་རིན་ཆེན་གང་། །དཔེ་གྲངས་རྒྱུ་དང་ངོ་བོ་ཡིས། །རྙེད་དཀའ་རྙེད་པ་འབྲས་བུར་བཅས། །དེ་ལྟ་ན་ཡང་བརྟན་གཡོའི་དངོས། །ཅིས་ཀྱང་མི་རྟག་འཇིག་པའི་ཕྱིར། །ནམ་འཆི་ཆ་མེད་འཆི་བའི་ཚེ། །དམ་ཆོས་མ་གཏོགས་སྐྱབས་གཞན་མེད། །ཤི་ནས་དཀར་ནག་ལས་ཉིད་ཀྱི། །རྗེས་སུ་ངེས་པར་འབྲངས་བ་ལས། །བདེ་བ་དང་ནི་སྡུག་བསྔལ་གྱི། །འབྲས་བུ་མི་བསླུ་སོ་སོར་སྨིན། །ཚུལ་དེས་འཁོར་བའི་གནས་རིགས་ནི། །གང་དུ་སྐྱེས་ཀྱང་འདུ་བྱེད་དང་། །འགྱུར་དང་སྡུག་བསྔལ་
སྡུག་བསྔལ་ལས། འདའ་བ་མེད་པར་ངེས་རྙེད་བྱ། །དེས་ནི་དོན་མེད་བགྱི་བ་དང་། །ལེ་ལོ་དཀར་མིན་འཇུག་པའི་ལས། །སྲིད་པའི་གནས་ལས་བློ་ལྡོག་ཕྱིར། རྒྱུད་དང་འདྲེས་པར་ཉམས་སུ་བླང་། །དེ་ནས་ད་ལྟའི་མ་གྱུར་འགྲོ། །ཐམས་ཅད་བྱང་ཆུབ་མཆོག་ཐོབ་ཕྱིར། །བླ་མ་དཀོན་མཆོག་རྣམ་གསུམ་པོ། །མི་ཕྱེད་གཏན་གྱི་སྐྱབས་སུ་བཟུང་། །གཞན་ཕྱིར་རྫོགས་བྱང་འདོད་པའི་བློས། །སྨོན་དང་འཇུག་པའི་བྱང་ཆུབ་སེམས། །ཡང་དག་ཉིད་དུ་བླངས་ནས་ཀྱང་། །རྟག་ཏུ་བསླབ་ལ་གནས་པར་བྱ། །རྟོགས་པའི་ཡོན་ཏན་སྐྱེ་བའི་གེགས། །སྡིག་སྒྲིབ་རྒྱུར་བཅས་སྦྱང་བྱའི་ཕྱིར། །སྟོབས་བཞིའི་གནད་དང་ལྡན་པ་ཡིས། །རྡོ་རྗེ་སེམས་དཔའི་བསྒོམ་བཟླས་འབད། །མཐུན་རྐྱེན་བསོད་ནམས་ཡེ་ཤེས་ཀྱི། །ཚོགས་གཉིས་མྱུར་དུ་བཟླུམས་པའི་སླད། །ཕྱི་ནང་གསང་བའི་མཎྜལ་གྱི། །མཆོད་པའི་སྤྲིན་* ཕུང་རྒྱ་ཆེར་སྤྲོ། །ཁྱད་པར་བྱིན་རླབས་འཕོ་བའི་དབང་། །ཐོབ་པའི་སྐད་ཅིག་དེ་ཉིད་ལ། །མངོན་སུམ་གཉུག་མའི་དོན་མཐོང་ཕྱིར། །བླ་མའི་རྣལ་འབྱོར་གནད་དུ་བསྣུན། །མདོར་ན་འདིར་སྣང་ཞེན་པ་ལྡོག ། མོས་གུས་དྲན་དང་ཤེས་བཞིན་དང་། །བཅོས་མིན་སྙིང་རྗེས་རྒྱུད་བརླན་པས། །ཚེ་གཅིག་དོན་གྱི་བཙན་ས་ཟིན། རྡོ་རྗེའི་ཐོལ་གླུ་ཡེ་ཤེས་གྲུབ་པ་ལས། སྔོན་དུ་འགྲོ་བའི་ལམ་གྱི་རིམ་པ་རྣམ་པར་ཕྱེ་བའི་
ཚོམས་ཏེ་དང་པོའོ། །དེ་ལྟར་ཐུན་མོང་ཐུན་མིན་གྱི། །སྦྱོར་བའི་ཆོས་ཀྱི་རིམ་པ་ལ། །ཉམས་མྱོང་བརྟན་པོར་སྐྱེས་པ་ཡིས། །དངོས་གཞིའི་ལམ་འདིར་འཇུག་པར་བྱ། །ཐོག་མར་གནས་ལུགས་གཅིག་ཉིད་ཀྱི། །དོན་ལ་རྗེས་སུ་དཔག་པའི་ཚེ། །བློ་དང་དབང་པོའི་ངོ་སྐལ་ལས། །རང་སྡེའི་གྲུབ་མཐའ་རྣམ་བཞིར་དབྱེ། །འོན་ཀྱང་བྱེ་མདོ་སེམས་གསུམ་པོ། །དངོས་པོར་སྨྲ་བའི་ཕྱོགས་བསླན་ནས། །དེ་ཀུན་རྩེ་མོར་གྱུར་པ་ནི། །དབུ་མ་ཉིད་དུ་འཇོག་པར་མཛད། །དེ་ལའང་གནས་སྐབས་ངེས་དོན་དང་། །མཐར་ཐུག་ངེས་དོན་གྱིས་དབྱེ་བས། །རང་སྟོང་གཞན་སྟོང་སྨྲ་བ་ཡི། །ཤིང་རྟའི་ལམ་སྲོལ་རྣམ་གཉིས་བྱུང་། །ཕྱི་མ་འཁོར་ལོ་ཐ་མ་ཡི། །མདོ་སྡེ་ལས་ཀྱང་རབ་གསལ་ཞིང་། །ས་བཅུའི་དབང་ཕྱུག་མ་ཕམ་པས། །རྡོ་རྗེའི་ཚིག་གིས་ལེགས་པར་བསྡུས། །དེ་ཡང་ཀུན་རྫོབ་ཆོས་རྣམས་ཀུན། །རང་གི་ངོ་བོས་སྟོང་པ་དང་། །དོན་དམ་བདེ་གཤེགས་སྙིང་པོ་ནི། །ཉོན་མོངས་གཞན་གྱིས་སྟོང་ཞེས་གསུངས། །ངོ་བོ་རྟག་བརྟན་འགྱུར་མེད་ཕྱིར། །རང་བཞིན་གནས་པའི་རིགས་ཞེས་བྱ། །སེམས་ཅན་ཁམས་ལ་ལྷུན་གྲུབ་ཏུ། །དབུལ་པོའི་ཁྱིམ་གྱི་གཏེར་བཞིན་བཞུགས། །དེ་ལྟ་ན་ཡང་གཉིས་འཛིན་མཐུས། ཀུན་གཞི་ཡིད་ཤེས་ཚོགས་དྲུག་དང་། །ཉོན་མོངས་ཡིད་ཀྱི་རྒྱུ་འབྲས་ལས། །སྲིད་པའི་འཁོར་ལོ་རྟག་ཏུ་འཕྱན། །ལམ་
དུས་ཚོགས་གཉིས་མཐུས་སྦྱངས་པས། །རྒྱས་འགྱུར་རིགས་ཀྱིས་གློ་བུར་གྱི། །དྲི་མ་བསལ་ཏེ་ཡོན་ཏན་ཚོགས། །འབྲས་བུའི་ཤིང་བཞིན་གོང་དུ་འཕེལ། །མཐར་ཐུག་དག་པ་གཉིས་ལྡན་གྱི། །ཆོས་ཉིད་འདུས་མ་བྱས་པ་ཡི། །སྦྱང་གཞི་མངོན་དུ་གྱུར་པའི་ཕྱིར། །གཞི་འབྲས་རྣམ་དབྱེར་མེད་པའོ། །འདི་ནི་སྔགས་ཀྱི་སྡེ་སྣོད་དུའང་། །རྒྱུ་ཡི་རྒྱུ་དང་དག་པའི་བདག །སེམས་ཀྱི་རྡོ་རྗེ་འོད་གསལ་སེམས། །རྣམ་པ་ཀུན་གྱི་མཆོག་ལྡན་སོགས། །རྡོ་རྗེའི་མིང་གིས་རབ་ཕྱེ་ཞིང་། །ཁྱད་པར་ངེས་དོན་ཕྱག་རྒྱ་ཆེ། །ཁམས་གསུམ་ཀུན་ལ་རྒྱས་གདབ་པ། །བླ་ན་མེད་པའི་ཡེ་ཤེས་ནི། །འདི་ཁོ་ན་ལས་འདའ་བ་མེད། །དེ་ལྟར་རྟོགས་པའི་སྐལ་བཟང་དེས། །བསྒོམ་པའི་རིམ་པར་འཇུག་པ་ནི། །ཤིན་ཏུ་དབེན་ཞིང་ཉམས་དགའི་གནས། །འདུ་འཛིའི་གཡེང་བ་དང་བྲལ་བར། །བསམ་གཏན་ཚེར་མ་རིང་སྤངས་ནས། །ཞི་ལྷག་ཟུང་འབྲེལ་ཉམས་བླངས་ཏེ། །དང་པོ་བདེ་བའི་སྟན་ཉིད་ལ། །ལུས་གནད་རྣམ་སྣང་ཆོས་བདུན་དང་། །སེམས་གནད་འདས་པའི་རྗེས་མི་འབྲིངས། །མ་འོངས་འཁྲུལ་པའི་འདུན་མི་བསུ། །* ད་ལྟའི་རྟོག་པ་ཅི་ཤར་ཡང་། །ཐད་ཀར་བཟོ་མེད་ལྷན་ནེར་འཇོག །སྐབས་སུ་ཤིང་བུ་རྡེའུ་དང་། །ཁྱད་པར་ཐུབ་པའི་དབང་པོའི་སྐུར། །དམིགས་པ་ཉེ་བར་གཏད་ནས་ནི། །དེ་རྒྱུན་རྣམ་པར་གཡེང་མི་བྱ། །
གཞན་ཡང་བུམ་ཅན་སྦྱོར་བ་དང་། །རྡོར་བཟླས་ཐིག་ལེ་ཕྲ་མོ་དང་། །སྟོང་ཆེན་རིམ་སྡུད་བསམ་གཏན་སོགས། །ཇི་ལྟར་འོས་པའི་སེམས་འཛིན་བསྟེན། །གང་ཚེ་བྱིངས་ན་སྤྱི་བོར་དང་། །རྒོད་ན་ལྟེ་འོག་ཐིག་ལེ་ལ། །དམིགས་པ་གཏོད་སོགས་ཐབས་མཁས་དང་། །མ་བཅོས་རང་གྲོལ་ངང་དུ་བཞག །དེ་ལྟར་འབད་པས་འཇུག་པ་ལ། །དང་པོ་རྣམ་རྟོག་གཡོ་བ་ཡིས། །མཉམ་བཞག་ངང་དུ་མི་གནས་པ། ། རི་གཟར་འབབ་ཆུ་ལྟ་བུ་འབྱུང་། །དེ་ནས་ཆུ་བོ་དལ་འབབ་ལྟར། །རྟོག་པ་རེས་འཕྲོ་རེས་ཟིན་པས། །ཐ་མ་རྒྱ་མཚོ་ཆེན་པོ་ལྟར། །གཡོ་མེད་ཉིད་དུ་རྩེ་གཅིག་གནས། །གཞན་དུ་གཡོ་ཐོབ་གོམས་བརྟན་དང་། །མཐར་ཕྱིན་ཉམས་ལྔར་བཤད་པ་ཡང་། །དོན་དུ་སྨོས་མ་ཐག་པ་ཡི། །ཉམས་ཀྱི་རིམ་པར་འདུ་བའོ། །མདོར་ན་ཡུལ་དང་ཡུལ་ཅན་གྱི། །སྣང་བ་གསལ་ལ་འཛིན་མེད་དང་། །ལྷན་ནེར་གནས་ཤིང་ལུས་དང་སེམས། །ཤིན་ཏུ་སྦྱངས་པའི་བདེ་བས་ཚིམ། །དེ་ཚེ་ཟག་པར་བཅས་པ་ཡི། །མངོན་ཤེས་རྫུ་འཕྲུལ་སྣ་ཚོགས་འབྱུང་། །ཉོན་མོངས་ཞེན་པ་ཤུགས་ཀྱིས་ཆུང་། །འདི་དག་གོམས་པའི་རྟགས་སུ་བཤད། །གཉིས་པ་ཆོས་རྣམས་རབ་འབྱེད་པའི། །སྒོམ་བྱུང་ཤེས་རབ་ཟབ་མོ་ཡིས། །སྔ་མ་བས་ལྷག་ངོ་བོ་ཉིད། །མངོན་སུམ་ཉིད་དུ་མཐོང་བ་སྟེ། །འདི་ལྟར་ཕྱི་རོལ་སྣང་བ་ཀུན། །བདེན་མེད་སྒྱུ་མ་
རྨི་ལམ་བཞིན། །དེ་ཡང་སེམས་ཀྱི་རྣམ་འཕྲུལ་དུ། །ལེགས་པར་བརྟགས་པས་གཟུང་ཡུལ་འཇིག །ནང་གི་སེམས་ཀྱང་སྐྱེ་འགགས་དང་། །འགྲོ་འོང་གནས་པའི་མཚན་མ་སྟོང་། །བསམ་གྱིས་མི་ཁྱབ་ཆེན་པོ་སྟེ། །འཛིན་པའི་རང་གཟུགས་ངེས་པར་སྤངས། །དེ་ལྟར་གཟུང་འཛིན་བྲལ་བ་ཡི། །འགྱུར་མེད་རིག་སྟོང་ཕྱག་རྒྱ་ཆེ། །འཁོར་དང་འདས་པའི་དུས་ཀུན་ཏུ། །སྤང་ཐོབ་མེད་པར་ལྷུན་གྱིས་གྲུབ། །མཐར་ཐུག་གློ་བུར་སྒྲིབ་པའི་རྒྱུན། །རྡོ་རྗེ་ལྟ་བུའི་ཏིང་འཛིན་གྱིས། །བཅོམ་ལས་གདོད་མའི་དེ་ཁོ་ན། །རང་རིག་གཉུག་མའི་ངོ་བོར་གྲོལ། །གཞན་དུ་འདི་ལ་རིག་པ་དང་། །སྔ་མར་རྐང་པའི་སྒྲས་བསྟན་ཏེ། །རྟེན་དང་བརྟེན་པའི་ཚུལ་ཉིད་ཀྱིས། །ཐར་པའི་གྲོང་དུ་དཀྲི་ཕྱིར་རོ། །གསུམ་པ་ཞི་གནས་གོམས་པ་ལས། །ལྷག་མཐོང་ཤེས་རབ་སྐྱེས་པའི་ཚེ། །དེ་ཉིད་བསམ་གཏན་ངོ་བོ་རུ། །རྫོགས་པས་ཟུང་དུ་འཇུག་པ་ཡིན། །དེ་སླད་བསལ་བཞག་སྤང་བླང་དང་། །དགག་སྒྲུབ་རེ་དོགས་ལས་འདས་པའི། །ཐ་མལ་ཤེས་པ་རྗེན་པའི་ངང་། །མ་ཡེངས་དྲན་པའི་རང་རྩལ་སྐྱོངས། །མདོར་ན་མཉམ་པར་བཞག་པའི་སྐབས། །ཞི་ལྷག་ཟུང་འབྲེལ་རྣལ་འབྱོར་དང་། །རྗེས་ཐོབ་སྣང་ཆ་ཐམས་ཅད་ཀུན། །རྟེན་འབྱུང་སྒྱུ་མའི་ཚུལ་དུ་བལྟ། །དེ་ལྟར་མ་རྟོགས་འགྲོ་བ་ལ། །བཟོད་མེད་སྙིང་རྗེས་རྒྱུད་བརླན་ཅིང་། །
གང་གི་ངོ་བོ་སྟོང་པ་རུ། །རྟོགས་པས་དོན་གཉིས་ལྷུན་གྱིས་གྲུབ། །རྗེས་སུ་བསགས་དང་ཡོད་པ་ཡི། །རྣམ་པར་དཀར་བའི་ཚོགས་གཉིས་རྒྱུན། །འཁོར་གསུམ་ཡང་དག་ཆེན་པོའི་ངང་། །འགྲོ་ཀུན་ཚོགས་གཉིས་རྒྱུ་རུ་བསྔོ། །གེགས་སེལ་བོགས་འདོན་བླ་མ་ལ། །སྙིང་ནས་གསོལ་གདབ་དབང་བཞི་བླང་། །གང་ཤར་རང་ངོར་འཇོག་པ་དང་། །ཐབས་ཤེས་ཟུང་འབྲེལ་དགེ་ཆོས་སྡུད། །མཐར་གྱིས་དྲན་འཛིན་རྩོལ་བ་དང་། །མཉམ་གཞག་རྗེས་ཐོབ་སོ་མཚམས་ཞིག །གཉིས་སྣང་ཕྲ་མོ་བཅས་པ་ཡང་། །སྤངས་པས་གཟོད་མའི་ས་ལ་རེག །དེ་ཚེ་ངོ་བོ་རང་བཞིན་དང་། །ཐུགས་རྗེ་དབྱེར་མི་ཕྱེད་པ་ཡི། །ལྷན་སྐྱེས་སྐུ་བཞི་མངོན་གྱུར་པ། །བྲལ་སྨིན་ལས་འདས་འབྲས་བུའོ། རྡོ་རྗེའི་ཐོལ་གླུ་ངེས་དོན་གྲུབ་པ་ལས། དངོས་གཞིའི་ལམ་གྱི་རིམ་པ་རྣམ་པར་ཕྱེ་བའི་ཚོམས་ཏེ་གཉིས་པའོ།། །།སླར་ཡང་དེ་ལས་འཕྲོས་པ་ཡི། །ཚིག་འགའ་སྙིང་པོར་དྲིལ་ཏེ་བརྗོད། །གང་དག་བླ་ན་མེད་པ་ཡི། །སྤྱོད་ཡུལ་ཟབ་མོ་འདི་རྟོགས་ནས། །མཐའ་བྲལ་བདེན་པའི་མཆོག་བརྙེས་ཕྱིར། །ངེས་དོན་དབུ་མ་ཆེན་པོ་སྟེ། །དང་པོ་ལྷན་ཅིག་སྐྱེས་པ་ལ། །ཕྱིས་ནས་སྦྱོར་བར་བྱེད་པའི་ཕྱིར། །ལྷན་ཅིག་སྐྱེས་སྦྱོར་ཞེས་སུ་བརྗོད། །འཁོར་འདས་ལམ་གསུམ་ཆོས་རྣམས་ཀུན། །རིམ་དང་གཅིག་ཅར་བྲལ་བ་རུ། །གཉུག་མའི་དབྱིངས་སུ་རྫོགས་པའི་ཕྱིར། །
རང་བཞིན་རྫོགས་པ་ཆེན་པོ་ཡིན། །རྟོག་ཚོགས་ཤར་གྲོལ་དུས་མཉམ་དབྱིངས། །ཉེ་བར་ཞི་བས་ཞི་བྱེད་ལ། །གཟུང་འཛིན་ཐད་ཀར་གཅོད་པའི་ཕྱིར། །གཅོད་ཡུལ་ཞེས་སུ་སྒྲོགས་པར་མཛད། །མདོར་ན་ཟབ་དང་རྒྱ་ཆེའི་ཆོས། །མཐའ་དག་དངོས་དང་རྒྱུད་ཉིད་ནས། །སྦྲང་རྩིའི་རོ་དང་ཁོང་སྦུབས་བཞིན། །དམ་པའི་ཆོས་འདིར་གཞོལ་ཞིང་འབབ། །ཁྱད་པར་དུས་གསུམ་རྒྱལ་བའི་ཡུམ། །ཤེས་རབ་ཕ་རོལ་ཕྱིན་མ་ཞེས། །གྲགས་པ་ཆོས་ཀྱི་འབྱུང་གནས་ཀྱང་། །ཕྱག་རྒྱ་འདི་ལས་མི་གཞན་ནོ། །ལས་ཆོས་དམ་ཚིག་སྔོན་སོང་བས། །སྒྲུབ་པ་རིམ་འཇུག་ཙམ་ཞིག་སྟེ། །དབང་རྣོན་གཅིག་ཅར་རིགས་ཅན་གྱིས། །སྐད་ཅིག་གཅིག་གིས་མཐོང་ཞིང་གྲོལ། །རླུང་དང་ཕྱག་རྒྱའི་བྱེད་ལས་ལས། །བྱུང་བའི་གསལ་བདེའི་ལྟ་བ་དང་། །བློ་དང་ལྷན་ཅིག་གནས་པའི་ཕྱིར། །གྲོལ་བ་ཉིད་དང་ཁ་ཐག་རིང་། །དེ་ཕྱིར་གཅིག་ཤེས་ཀུན་གྲོལ་གྱི། །ལྟ་བའི་རིམ་པ་འདི་རྟོགས་ནས། །བསྒོམ་པའི་ལམ་ལ་འཇུག་པ་ཡང་། །འབྲས་བུའི་ཉམས་ལེན་མཐར་ཐུག་སྟེ། །དབང་བསྐུར་ཀུན་གྱི་དེ་ཁོ་ན། །རྡོ་རྗེ་ཡེ་ཤེས་འཕོ་བ་ཡི། །དཔེ་དང་གཏན་ཚིགས་ཙམ་མིན་པར། །རྒྱུ་རྒྱུད་གནས་ལུགས་མངོན་སུམ་བསྟན། །ལམ་རྒྱུད་གང་གིས་རྒྱས་འདེབས་པ། །ཟབ་མོའི་བླ་མའི་རྣལ་འབྱོར་ནི། །ཀུན་བརྟགས་ཙམ་མིན་ཡོངས་གྲུབ་པའི། །
བསྐྱེད་པའི་རིམ་པའི་མཆོག་ཡིན་ཏེ། །མི་ཤིགས་ནཱ་དར་སོན་པ་ཡི། །ཟུང་འཇུག་བཟླས་པ་རྒྱུན་ཆད་མེད། །འོད་གསལ་ལྷན་ཅིག་སྐྱེས་པའི་དངོས། །རྫོགས་རིམ་ཀུན་གྱི་རྩེ་མོར་ཤར། །རྡོ་རྗེ་ལུས་ཀྱི་བྱེད་ལྷ པ་ནི། །གཉིས་མེད་ཡེ་ཤེས་ཉིད་དུ་བཅིངས། །འབྱུང་ལྔའི་རླུང་སེམས་རྒྱུར་བཅས་པ། །འགྲོ་འོང་མེད་པའི་དབྱིངས་སུ་ཐིམ། །འཕོ་ཆགས་བྲལ་བའི་བདེ་ཆེན་རོལ། །མཚན་མའི་ཐིག་ལེ་རབ་ཟོས་པས། །སྣང་སེམས་ཉམས་མྱོང་ཀུན་འཆར་ཞིང་། །མཐར་ཐུག་དབུ་མར་མཆོག་འགྲུབ་བོ། །གཞན་ཡང་སྔགས་ཀྱི་འདུལ་བ་ནི། །འདུ་ཤེས་འདོད་ཆགས་བྲལ་བ་ལ། །ཡེ་སྲུང་ཆེན་པོར་རྫོགས་པས་ནས། །སྡོམ་དང་སྡོམ་མིན་ཡོངས་སུ་སྤངས། །སྣང་སེམས་གཉིས་ཀྱིས་བསྡུས་པའི་ཆོས། །རོ་མཉམ་ཆེན་པོར་བརྡལ་བའི་ཕྱིར། །ཉེ་རྒྱུའི་སྤྱོད་པའི་མཐར་ཐུག་གིས། །གཟུང་འཛིན་འཁྲུལ་པའི་ཕྱོགས་ལས་རྒྱལ། །ཤེས་དང་ཤེས་བྱ་སྙོམས་འཇུག་པ། །མཆོག་ཏུ་མི་འགྱུར་ཚོགས་རྫོགས་པས། །ལྷན་སྐྱེས་སྒྲིབ་བྲལ་འབྲས་བུའི་རྒྱུད། །ཚེ་འདི་ཉིད་ལ་མངོན་དུ་བྱེད། །དེ་བཞིན་ཕར་ཕྱིན་ཐེག་པ་དང་། །རྗེས་མཐུན་ས་ལམ་རྫོགས་པའི་ཚུལ། །རེ་ཞིག་ཐུན་མིན་བཞེད་པའི་སྙིང་། །རྣལ་འབྱོར་བཞི་ཡི་རིམ་པའང་། །རྩེ་གཅིག་འཇིག་རྟེན་ཚོགས་ལམ་སྟེ། །ཐོག་མར་ཆུང་ངུའི་གནས་སྐབས་སུ། །ངོ་བོ་མི་རྟོག་པར་གནས་ཤིང་། །
འབྲིང་པོར་དེ་ཉིད་བརྟན་པ་དང་། །མཐར་ཕྱིན་ཉིན་མཚན་ཁོར་ཡུག་འབྱུང་། །འདི་ལ་བདེ་གསལ་སྟོང་ཉིད་ངང་། །གཡོ་མེད་གནས་པ་མཉམ་བཞག་དང་། །གཅིག་ཤོས་རྗེས་ཐོབ་ཉིད་ཡིན་ཕྱིར། །འདུ་འཛི་སྤངས་པའི་བརྩོན་འགྲུས་ཀྱིས། །ཞེན་པ་མེད་པར་ཉམས་བླངས་པས། །ཟག་བཅས་མངོན་ཤེས་སོགས་ཀྱང་འགྲུབ། །དེ་ནས་སྔར་གྱི་ཉམས་ཞིག་པས། །རང་སེམས་སྐྱེ་འགགས་བྲལ་བ་དང་། །བཟང་ཞེན་འཆིང་བ་རྣམ་སྤངས་པའི། །སྤྲོས་བྲལ་ཆུང་ངུ་འབྲིང་པོའི་མཐུས། །ངོ་བོའི་བཞུགས་ཚུལ་ཇི་ལྟ་བའི། །ཉམས་མྱོང་རྣལ་མར་སྦྱོར་བའི་ལམ། །མཐར་ཕྱིན་ཕྱི་རོལ་སྣང་ཆ་ཀུན། །སེམས་ཀྱི་རོལ་པར་ཤེས་པ་དང་། །དེ་ཡང་བློ་འདས་ལྷུན་གྲུབ་ཏུ། །རྟོགས་པས་ཆོས་ཉིད་བདེན་པ་མཐོང་། །དུས་འདིར་དྲན་པས་ཟིན་ཙམ་ནས། །རྩོལ་བྲལ་མཉམ་བཞག་དབང་བསྒྱུར་ཞིང་། །དེ་ལས་ལྡོག་ཚེ་འཁྲུལ་བཅས་པའི། །རྗེས་ཐོབ་ཡིན་ཕྱིར་དྲན་འཛིན་གཅེས། །མཐོང་ཟིན་ཡིད་བྱེད་ལས་འདས་པས། །གོམས་པར་བྱ་བ་སྒོམ་པའི་ལམ། །ཆུང་ངུར་འཁོར་དང་འདས་པའི་ཆོས། །སྣང་སྟོང་རོ་མཉམ་གཅིག་ཏུ་རྟོགས། །འབྲིང་པོར་སྣ་ཚོགས་གཟུང་འཛིན་ཡུལ། །སེམས་ཉིད་ཁོ་ནའི་རང་རྩལ་དུ། །ཤེས་པས་སྟོང་ཉིད་རྒྱུ་འབྲས་སུ། །ཤར་ནས་སྒྲོ་སྐུར་རང་ངོར་ཞིག །ཆེན་པོར་སྣང་སྲིད་སྐྱེ་མེད་དབྱིངས། །ཞི་བས་
གཉིས་སྣང་ཕྲ་མོའང་སྤངས། །ཡུལ་ཅན་གཉུག་མའི་ཡེ་ཤེས་དང་། །ཡུལ་སྣང་ལུང་མ་བསྟན་པ་ལ། །མཉམ་རྗེས་ཐ་དད་གདགས་པ་སྟེ། །དོན་དུ་བློས་བྱས་འཇུར་དྲན་དང་། །ཐ་མལ་འཁྲུལ་པས་མ་བསླད་པའི། །ཡེངས་མེད་འཛིན་མེད་རྣལ་འབྱོར་མཆོག །གོ་ཡུལ་ཙམ་མིན་ཉམས་སུ་མྱོང་། །མཐར་ཐུག་བཞག་བྱ་འཇོག་བྱེད་ཀྱི། །སྤྲོས་པ་མ་ལུས་རྒྱུན་ཆད་ནས། །མཉམ་རྗེས་རེས་འཇོག་སྤངས་པ་ཡི། །སྒོམ་མེད་ཆུང་ངུར་རྗེས་ཐོབ་ཀྱི། །སྒྱུ་མའི་གཟུགས་བརྙན་སྤངས་པ་སྟེ། །འབྲིང་པོར་རྗེས་ཤེས་བག་ཉལ་གྱི། །གཉིས་སྣང་ཤིན་ཏུ་ཕྲ་བ་ཉིད། །རྡོ་རྗེ་ལྟ་བུའི་ཏིང་འཛིན་གྱིས། །བཅོམ་པའི་སྐད་ཅིག་དེ་ཉིད་ལ། །ཆེན་པོར་སློབ་ལམ་ལས་འདས་པའི། །ཐམས་ཅད་མཁྱེན་པའི་ཡེ་ཤེས་ཐོབ། །མདོར་ན་ཉམས་སྣང་རྩེ་གཅིག་བརྟན། །རྣམ་རྟོག་སྤྲོས་བྲལ་ཆོས་སྐུར་ཤར། །སྣང་བ་སྒོམ་དུ་རོ་གཅིག་ཅིང་། །སྒྱུ་མའི་མྱོང་བ་བྲལ་བའོ། །འདི་ནི་རྡོ་རྗེ་ཐེག་པ་ཡི། །འཇུག་སྒོ་དབང་བཞིའི་རྟོགས་པ་སྟེ། །དེས་ན་ཀུན་ཉོན་ས་བོན་བཅས། །མཐའ་དག་སྤངས་པའི་ནུས་པར་ལྡན། །དེ་ལྟའི་ཉམས་ལེན་གནས་སྐབས་སུ། །གོལ་ཤོར་ནོར་སའི་གེགས་བསལ་ཏེ། །དང་པོ་བདེ་གསལ་མི་རྟོག་ཀྱང་། །ཉམས་ཀྱི་འཆར་སྒོ་ཙམ་ཉིད་ཕྱིར། ཞེན་ན་འདོད་གཟུགས་གཟུགས་མེད་ཀྱི། །ཁམས་གསུམ་ངག་ཏུ་འཆིང་བར་བྱེད། །གཉིས་
པ་སྟོང་ཉིད་གཤེས་དང་ལམ། །རྒྱས་འདེབས་གཉེན་པོར་ཤོར་བ་སྟེ། །དེ་ཡང་ཐམས་ཅད་སྟོང་ཉིད་ཕྱིར། རྒྱུ་འབྲས་གྲུབ་པ་མེད་སྙམས་དང་། །ཇི་ཙམ་གོ་ཡང་རང་རྒྱུད་ལ། །ཉམས་མྱོང་བྲལ་བ་དང་པོའོ། །སྐུ་གསུམ་ལྷན་སྐྱེས་མ་ཤེས་པར། །འབྲས་བུ་གཞན་ན་རེ་བ་དང་། །མ་བཅོས་གཉུག་མ་ལས་གཞན་པའི། །བློ་བྱས་འཛིན་རྩོལ་གཉིས་པར་བཤད། །ཐབས་ཤེས་དབྱེར་མེད་མ་རྟོགས་པར། །ཐབས་ལ་སྟོང་པས་རྒྱས་འདེབས་དང་། །གང་ཤར་སྣང་བ་ལམ་ཁྱེར་ལ། །རེ་དོགས་བླང་དོར་གསུམ་པ་སྟེ། །རྟོག་ཚོགས་གཟོད་ནས་རང་གྲོལ་ཀྱང་། །གཉེན་པོའི་ཡེ་ཤེས་བརྟེན་པ་དང་། །སེམས་བྱུང་འཇུག་པ་སྟོང་འཛིན་གྱིས། །ཆེད་དུ་དགག་པ་བཞི་པར་འདོད། །གསུམ་པ་ཚོགས་དྲུག་དགག་པ་དང་། །གསལ་ཆ་མེད་པའི་མི་རྟོག་པ། ལུང་མ་བསྟན་དུ་བྱིང་བ་སོགས། །ཞི་གནས་རྩེ་གཅིག་ཤར་བར་རློམ། །རྟོག་གེ་ཁོ་ནའི་ཐལ་འགྱུར་རོ། །ཡིད་དཔྱོད་བཅོས་མའི་ཆོས་ཉིད་དང་། །དྲན་པས་མ་ཟིན་འཁྲུལ་པ་ལ། །ལྷག་མཐོང་ཡེ་ཤེས་ཉིད་དོ་ལོ། །ཟུང་འཇུག་གནས་ལ་རྨོངས་པའམ། །ཞི་གནས་ཙམ་དང་མ་བྲལ་བཞིན། །རྟོག་ཅིང་དཔྱོད་པར་སྨྲ་བ་སོགས། །ཐམས་ཅད་འཁྲུལ་པའི་ཕྱོགས་སུ་ལྷུང་། །དེ་ཕྱིར་རྟོགས་པ་མཆོག་ལྡན་པའི། །བཤེས་གཉེན་དམ་པར་གུས་བསྟེན་ནས། །སྤྲོས་བྲལ་མངོན་སུམ་
མཐོང་བའི་བར། །རིམ་པ་བཞིན་དུ་རྗེས་སུ་སློབས། །གཞན་ཡང་ཉམས་ལེན་བོགས་འདོན་ཅིང་། །དགེ་སྦྱོར་སྲང་དུ་གཞུག་པའི་ཕྱིར། །དུས་ཀྱི་གནས་སྐབས་དང་བསྟུན་པའི། །རྣལ་འབྱོར་རྣམ་པ་དྲུག་ཡིན་ཏེ། །ཐོ་རངས་ཡེ་ཤེས་གསལ་འདེབས་ཕྱིར། །གཉིད་ལས་སད་པའི་དེ་མ་ཐག །སྟོང་ཉིད་སྙིང་རྗེ་ཟུང་འཇུག་པས། །གཞན་ཕྱིར་དགེ་བའི་སྤྱོད་པ་བརྩམས། །ཉིན་པར་སྣང་བ་གང་ཤར་ཀུན། །རྨི་ལམ་སྒྱུ་མར་རྒྱས་གདབ་སྟེ། །རང་བཞིན་མེད་པར་བསྒོམ་པ་ཡིས། །བདེན་འཛིན་འཇིག་ཅིང་བར་དོ་འབྱོངས། །ནང་ནུབ་བཟའ་བཏུང་འདོད་ཡོན་ཀུན། །ཞེན་མེད་སྟོང་པར་ལམ་ཁྱེར་རམ། །ཕུང་ཁམས་དཀྱིལ་འཁོར་མཆོད་པའི་ཕྱིར། །རོལ་པས་མི་འཆིང་ཚོགས་ཆེན་རྫོགས། །སྲོད་ལ་དབང་པོ་གཞི་བསྡུའི་ཕྱིར། །ཉིན་པར་ཚུལ་མིན་ཡིད་བྱེད་ཀྱི། །རྗེས་སུ་མི་འབྲེངས་རང་ངོ་བལྟ། །མཚན་མོ་རྣལ་འབྱོར་སྲང་དུ་འཛུད། །ནམ་གུང་ཤེས་བྱ་བུམ་གཞུག་གིས། །སྙིང་དབུས་ཁྱབ་བདག་བླ་མ་བསྒོམ། །གསོལ་གདབ་སྤྲོས་བྲལ་ངང་དུ་བཞག །འོད་གསལ་མ་བུ་འདྲེས་པར་བྱེད། །ནམ་ཞིག་འཆི་བའི་དུས་བབ་ཚེ། །ཡེ་ཤེས་ཟང་ཐལ་རྣལ་འབྱོར་ནི། །དངོས་པོ་ཀུན་ལ་ཆགས་ཞེན་བཅད། །ཉེས་ལྟུང་བཤགས་ཤིང་སྙིང་ནས་བསྡམ། །དགེ་ཚོགས་རྗེས་སུ་ཡི་རང་བློས། །བླ་མེད་བྱང་ཆུབ་རྒྱུ་རུ་བསྔོ། །ཕུང་ཁམས་ཟག་མེད་
བདུད་རྩི་ཡིས། །མཆོད་སྦྱིན་མགྲོན་རྣམས་ཚིམ་བྱས་ཏེ། །འདི་ལྟར་ཐོག་མར་མ་སྐྱེས་ཕྱིར། །ཐ་མར་གང་དུ་འགགས་པར་འགྱུར། །དེ་ཕྱིར་སྐྱེ་འཆི་བྲལ་བ་ཡིས། །ཕྱག་རྒྱ་ཆེན་པོར་མཉམ་བཞག་པས། །དོན་གྱི་བསྲེ་འཕོ་ལམ་དུ་ལོངས། །མདོར་ན་འཆི་བའི་རྟོག་པ་ནི། །མ་བཅོས་ཆོས་སྐུའི་དབྱིངས་སུ་གྲོལ། །བར་དོ་སྣང་སྟོང་རོ་མཉམ་དུ། །རྟོགས་པས་ལོངས་སྤྱོད་རྫོགས་སྐུར་ཤར། །སྐྱེ་སྲིད་བླ་མའི་མོས་གུས་ཀྱིས། །སྤྲུལ་པའི་སྐུ་རུ་དབུགས་འབྱིན་ཕྱིར། །དབང་པོའི་རིམ་པ་རྗེས་མཐུན་པའི། །ལམ་གྱི་རྣལ་འབྱོར་རྫོགས་པའོ། །སྤྱོད་པ་གནས་སྐབས་རྗེས་ཐོབ་ཏུ། །སྒྱུ་མ་ལྟ་བུའི་དགེ་ཆོས་སྡུད། །གཞན་དུ་མཉམ་བཞག་སེམས་བརྟན་ན། །དེ་ལ་གཙོ་བོར་སྟོན་མི་བྱ། །ཅི་ཕྱིར་ཟག་བྲལ་ཚུལ་ཁྲིམས་དང་། །དམིགས་མེད་སྙིང་རྗེ་དོན་དམ་སེམས། །རྣམ་གྲོལ་དམ་ཚིག་སྡོམ་པ་སྟེ། །སྦྱིན་སོགས་ཐབས་ཀྱི་སྤྱོད་པ་ཡང་། །དེ་ཁོ་ན་ལས་མི་འདའ་བར། །རྡོ་རྗེའི་ཚིག་གིས་རབ་བཀྲལ་ཞིང་། །གྲུབ་པའི་སློབ་དཔོན་རྣམས་ཀྱིས་ཀྱང་། །དགོངས་པ་གཅིག་ཏུ་འབབ་པར་གསུངས། །དེ་སླད་བཅིང་གྲོལ་ལས་འདས་པའི། །གནས་ལུགས་འདི་ནི་སུས་རྟོགས་པ། །དབང་རྣོན་གཅིག་ཅར་རིགས་ཅན་ཏེ། །སྐད་ཅིག་གཅིག་གིས་རྫོགས་སངས་རྒྱས། །རྟེན་དང་བརྟེན་པར་བཅས་པ་ཡི། །བྲལ་སྨིན་ཡོན་ཏན་མཐའ་ཀླས་ཀྱང་། །
གཞོན་ནུ་མ་ཡི་སྲད་བཞིན་དུ། །ཨེ་ཝཾ་གཉིས་སུ་མེད་པར་བཞུགས། །རང་བཞིན་ལྷན་སྐྱེས་ཆོས་སྐུ་སྟེ། །འགགས་མེད་ཟུང་འཇུག་ལོངས་སྤྱོད་རྫོགས། །སྣ་ཚོགས་གཟུགས་ཅན་སྤྲུལ་པའི་གར། །དབྱེར་མེད་བདེ་ཆེན་ངོ་བོ་ཉིད། །དག་པའི་ཡེ་ཤེས་མ་འདྲེས་པར། །གཟིགས་པས་མེ་ལོང་ལྟ་བུ་དང་། །དངོས་ཀུན་གཅིག་ཏུ་ཐུགས་ཆུད་ཕྱིར། །མཉམ་པ་ཉིད་ཅེས་བྱ་བར་བཤད། །ཀུན་ཁྱབ་འགྱུར་མེད་བདེན་པ་ཡིས། །ཤེས་བྱ་ཀུན་མཁྱེན་སོ་སོར་རྟོགས། །སྒྲིབ་གཉིས་ཆ་དང་བཅས་པའི་རྒྱུན། །ཤིན་ཏུ་རྣམ་དག་ཆོས་དབྱིངས་སོ། །དེས་ན་སྐུ་དང་ཡེ་ཤེས་ཀྱི། །ཡོན་ཏན་བདེ་ཆེན་རོ་མྱོང་བརྒྱད། །འདུ་འབྲལ་མེད་པར་དབང་བྱས་པས། །ཇི་སྲིད་འཁོར་བ་དེ་སྲིད་དུ། །རྟག་ཅིང་ཁྱབ་དང་ལྷུན་གྲུབ་པའི། །དོན་གཉིས་ཕྲིན་ལས་རྒྱུན་མི་ཆད། །དེ་ཕྱིར་སྐལ་བཟང་རྣམ་དཔྱོད་ཅན། །ཚེ་གཅིག་བྱང་ཆུབ་ཐོབ་འདོད་ཀུན། །བཤད་པ་གང་དེའི་རྗེས་ཞུགས་ཏེ། །གྲུབ་པའི་རྣམ་ཐར་འཛིན་པར་མཛོད། །རྡོ་རྗེའི་ཐོལ་གླུ་ངེས་དོན་གྲུབ་པ་ལས། འཕྲོས་དོན་གྱི་རིམ་པ་རྣམ་པར་ཕྱེ་བའི་ཚོམས་ཏེ་གསུམ་པའོ།། །།འདི་ནི་གྲུབ་པའི་ཧེ་རུ་ཀཿ །རྗེ་བཙུན་ཆོས་ཀྱི་བློ་གྲོས་ཀྱིས། །བྱིན་བརླབས་འོག་མིན་གཉིས་པའི་ཞིང་། །པུ་ཏྲ་ཀོ་ཊི་ཞེས་གྲགས་པར། །གཏད་མེད་ཀུན་ཏུ་རྒྱུ་བ་ཡི། །རྣལ་འབྱོར་པདྨ་དགྱེས་པའི་སྡེས། །མགོན་པོ་
གང་གི་ཞལ་སྐྱིན་ལ། །སྙིང་ནས་དད་པས་གསོལ་བཏབ་སྟེ། །ལམ་དབང་ཆོ་གས་དགེ་བྱས་ཚེ། །ཇི་ལྟར་ཤར་བའི་རྟོགས་པ་ལས། །མདོ་སྔགས་ཐུན་མོང་ཁྲིད་ཚུལ་གྱི། །འོད་གསལ་ཕྱག་རྒྱ་ཆེན་པོའི་ལམ། །ཟབ་ཅིང་རྒྱ་ཆེའི་གཞུང་བཟང་ཀུན། །སྙིང་པོར་དྲིལ་ཏེ་ཉེ་བར་གདམས། །འོན་ཀྱང་སོ་སྐྱེའི་བློ་གྲོས་ཀྱིས། །ནོངས་པ་གྱུར་ཀུན་མཐོལ་བགྱིད་ཅིང་། །དགེ་བས་ནང་གི་དེ་བཞིན་ཉིད། །ཡེ་ཤེས་མིག་གིས་མཐོང་བ་ལས། །སྲིད་མཚོར་བྱིངས་པའི་འགྲོ་བ་ཀུན། །ཕྱག་རྒྱ་ཆེན་པོར་རེག་གྱུར་ཅིག། ༈ །།ན་ཚ་ལམ་ཁྱེར་གྱི་རྡོ་རྗེའི་ཐོལ་གླུ་ཆོས་ཉིད་གྲུབ་པའི་བདུད་རྩི་ཞེས་བྱ་བ། ཨ་ཧོ། འཁོར་འདས་ཀྱི་ཆོས་རྣམས་ཐམས་ཅད་ཀུན། །འོད་གསལ་བའི་དབྱིངས་སུ་ཟད་ནས་སླར། །འཕོ་ཆེན་གྱི་གཟུགས་སྐུར་ཡོངས་བཞེངས་པ། །དཔལ་འཆི་མེད་པདྨ་ཀཱ་རར་འདུད། །ཕྱི་འབྱུང་བཞི་འདུས་པའི་ཕུང་པོ་ལ། །གློ་བུར་བྲོ་ནད་ཀྱིས་ཐེབས་པའི་ཚེ། །ནང་རིག་སྟོང་གཉུག་མའི་ཁྱེའུ་ཡིས། །སྣང་བ་ལམ་ཁྱེར་གྱི་གླུ་འདི་བླངས། །གནས་འཁོར་བ་མཐོ་དམན་གར་སྐྱེས་ཀྱང་། །ཚུལ་འདི་ལྟའི་སྡུག་བསྔལ་འབའ་ཞིག་ལས། །གཏན་བདེ་བའི་གོ་སྐབས་བྲལ་བར་མཐོང་། །འདི་ངེས་འབྱུང་ལམ་ཁྱེར་གྱི་གནད་གཅིག་ལགས། །དོན་དེ་སླད་མ་གྱུར་འགྲོ་བ་ཡི། །སྡུག་བསྔལ་བདག་ལ་ལེན་པ་དང་། །བདག་ཉིད་ཀྱི་བདེ་བ་གཞན་ལ་
གཏོང་། །འདི་སྙིང་རྗེ་ལམ་ཁྱེར་གྱི་གནད་གཅིག་ལགས། །ཚེ་རབས་ནས་བསགས་པའི་སྡིག་ལྟུང་ཚོགས། །རྐྱེན་ངན་ལ་བསྟེན་ནས་སྦྱང་བའི་ཕྱིར། །ཕ་བླ་མའི་ཐུགས་རྗེར་སྙིང་ནས་དད། །འདི་མོས་གུས་ལམ་ཁྱེར་གྱི་གནད་གཅིག་ལགས། །ནད་ཟུག་རྔུའི་ངོ་བོར་བལྟས་པའི་ཚེ། །སྤང་གཉེན་གྱི་གཟུང་འཛིན་དབྱིངས་སུ་ཡལ། །བདེ་སྟོང་གི་ཉམས་ཤིག་དེ་རུ་འཆར། །འདི་ཕྱག་ཆེན་ལམ་ཁྱེར་གྱི་གནད་གཅིག་ལགས། །ནང་བདག་གཞན་གཉིས་ཀ་རྒྱུ་མེད་པས། །སྐྱེ་བ་དང་འགགས་པ་མ་མཆིས་ཕྱིར། །སྟོང་པ་དང་རྟེན་འབྱུང་འགལ་མེད་རྟོགས། །འདི་དབུ་མ་ལམ་ཁྱེར་གྱི་གནད་གཅིག་ལགས། །སྡུག་བསྔལ་གྱི་ཟུག་རྔུ་མྱོང་བའི་སེམས། །རང་རིག་པའི་དཔའ་བོས་ཟིལ་མནན་པས། །ཅེར་གྲོལ་གྱི་ཡེ་ཤེས་དེ་རུ་མཇལ། །འདི་རྫོགས་ཆེན་ལམ་ཁྱེར་གྱི་གནད་གཅིག་ལགས། །གཤིས་གདོད་ནས་དག་པའི་ཆོས་ཉིད་ལ། །གློ་བུར་གྱི་རྟོག་པ་རང་སར་གྲོལ། །དོན་དེ་ཕྱིར་སྨྲ་བསམ་བརྗོད་ལས་འདས། །འདི་ལྟ་བ་ལམ་ཁྱེར་གྱི་གནད་གཅིག་ལགས། །སེམས་ཐོག་ཏུ་ནད་ཟུག་མ་བླངས་པར། །ནད་ཐོག་ཏུ་རིག་སྟོང་རྗེན་པར་བཞག ། ཡེངས་མེད་ལ་འཛིན་མེད་ཀྱི་དྲན་པས་སྐྱོང་། །འདི་སྒོམ་པ་ལམ་ཁྱེར་གྱི་གནད་གཅིག་ལགས། །ཀུན་རྫོབ་ཏུ་གཟུགས་ཕུང་ཚོགས་སུ་ཕུལ། །དོན་དམ་དུ་དབྱིངས་རིག་དབྱེར་མེད་བསྲེས། །དུས་ཀུན་ཏུ་
འཁོར་གསུམ་སྒྱུ་མར་བལྟས། །འདི་སྤྱོད་པ་ལམ་ཁྱེར་གྱི་གནད་གཅིག་ལགས། །བཟོད་མེད་ཀྱི་ནད་ཟུག་གཡོ་འཕྲུལ་པོ། །ད་ལྟ་ཡེ་ཤེས་པ་རྗེན་པའི་ཀློང་། །སྐྱེ་འགགས་དང་གནས་གསུམ་བྲལ་བར་ཐིམ། །འདི་ཆོས་སྐུ་ལམ་ཁྱེར་གྱི་གནད་གཅིག་ལགས། །དབྱིངས་བློ་འདས་རྣམ་ཀུན་མཆོག་ལྡན་པས། །རྩལ་སྣང་སྟོང་ཆུ་ཟླ་ལྟ་བུར་ཤར། །ཤར་ཙམ་ནས་རང་གི་ངོ་བོར་གྲོལ། །འདི་ལོངས་སྐུ་ལམ་ཁྱེར་གྱི་གནད་གཅིག་ལགས། །རྐྱེན་གང་བྱུང་ངོ་བོའི་ཐུགས་རྗེ་ལ། །རོ་སྙོམས་ཀྱི་བརྟུལ་ཞུགས་ལམ་ལོངས་པས། །རེ་དོགས་ཀྱི་བླང་དོར་ཐད་ཀར་བཅད། །འདི་སྤྲུལ་སྐུ་ལམ་ཁྱེར་གྱི་གནད་གཅིག་ལགས། །ཚིག་དེ་སྐད་གསལ་འདེབས་ཉམས་ཀྱི་གླུ། །གནས་ལྷོ་མོན་ནགས་མའི་ལྗོངས་ཀྱི་མགོ །དཔལ་སྐུ་ལྷ་མཁའ་རིའི་ཉེ་ཞོལ་དུ། །སྤྲང་གཏད་མེད་པདྨ་དགྱེས་པས་བྲིས།། ༈ །།པཎྜི་ཏ་ཆེན་པོ་དྲི་མེད་བཤེས་གཉེན་དང་ཀུན་མཁྱེན་ཆོས་ཀྱི་རྒྱལ་པོ་གཉིས་སུ་མེད་པར་བསྔགས་པའི་རྡོ་རྗེའི་ཐོལ་གླུ་དད་པའི་ཏམྦུར་ཞེས་བྱ་བ། ཨ་ཧོ། ཀ་དག་ལྷུན་གྲུབ་དབྱེར་མེད་ཀྱི་གྲོང་དུ། །ཟུང་འཇུག་གྲུབ་པའི་ངལ་གསོལ་རོ་ལ་ཀྱང་། །འཕོ་ཆེན་འཇའ་ལུས་རྡོ་རྗེ་རུ་བཞེངས་པའི། །པཎ་ཆེན་དྲི་མེད་བཤེས་གཉེན་ལ་འདུད་དོ། །གང་གི་ཡེ་ཤེས་ཆེན་པོ་ཡི་སྒྱུ་འཕྲུལ། །ཚུར་མཐོང་གདན་གསུམ་རྩེ་དགའ་རུ་ཆགས་པས། །སྙིང་པོའི་བསྟན་པའི་ཤིང་རྟ་རུ་སྣང་བའི། །
ཀུན་མཁྱེན་ཆོས་ཀྱི་རྒྱལ་པོ་ལ་འདུད་དོ། །རྨད་བྱུང་ཟག་བྲལ་ཚུལ་ཁྲིམས་ཀྱི་ལང་ཚོར། །རིག་གྲོལ་སྤོབས་པའི་འཇོ་སྒེག་གིས་འཁྱུད་པས། །ཟབ་ཅིང་རྒྱ་ཆེའི་བློ་གྲོས་ཀྱི་མཚར་སྡུག །དཔྱོད་ལྡན་ཀུན་ཡིད་འཕྲོག་པ་ལ་འདུད་དོ། །ངག་གི་དཔལ་གྱུར་འཇམ་མགོན་གྱི་ཞབས་སེན། །སྙིང་དབུས་མི་ཤིགས་དགའ་ཚལ་དུ་བཀོད་པས། །ཤེས་བྱའི་གནས་ཀུན་ཐོགས་མེད་དུ་གཟིགས་པའི། །ངོ་མཚར་གྲུབ་པའི་དབང་པོ་ལ་འདུད་དོ། །དྲི་བྲལ་དབྱིངས་རིག་དབྱེར་མེད་ཀྱི་ཆོས་ཉིད། །འོད་གསལ་འཇའ་ཟེར་ཐིག་ལེ་ཡི་གར་མཁན། །ཡིད་དཔྱོད་དང་བྲལ་མངོན་སུམ་དུ་གཟིགས་པས། །མཐའ་གཉིས་འཕྲང་ལས་བརྒལ་བ་ལ་འདུད་དོ། །འཁྲུལ་ཆོས་ལས་འདས་སྣང་ཉམས་ཀྱི་རོལ་མོ། །གོང་འཕེལ་དབྱིངས་ཀྱི་བཀོད་པ་ལ་སྦྱར་བས། །སྣ་ཚོགས་ཡུལ་གྱི་རྒྱུ་བ་ཀུན་མ་ལུས། །གང་ཤར་རང་སར་གྲོལ་བ་ལ་འདུད་དོ། །གཞི་འཛིན་ལྷག་མཐོང་ཡུལ་སྣང་གི་རིག་པ། །དབྱེར་མེད་དག་པ་ཚད་ཕེབས་ཀྱི་ནམ་མཁར། །བློས་བྱས་འཛིན་རྩོལ་སྤྲིན་ཚོགས་ཀུན་དེངས་པའི། །རྡོ་རྗེའི་རྣལ་འབྱོར་གྲུབ་པ་ལ་འདུད་དོ། །ཤིན་ཏུ་ཕྲ་བ་ཆོས་ཉིད་ཀྱི་ཀློང་དུ། །སྤང་གཉེན་བསལ་བཞག་མཚན་མ་ཀུན་ཟད་པས། །བདེ་ཆེན་མཆོག་ཏུ་མི་འགྱུར་བའི་ཡེ་ཤེས། །རབ་འབྱམས་རྒྱལ་ཀུན་ངོ་བོ་ལ་འདུད་དོ། །རྟག་པར་གཞན་ཕན་སྙིང་རྗེ་ཡིས་དྲངས་
པས། །བསམ་ལས་སྤྲུལ་པའི་ཕྲིན་ལས་དང་སྦྲགས་ནས། །འགྲོ་ཁམས་རྒྱ་མཚོ་ཐར་པ་ལ་སྦྱོར་བའི། །ཡོན་ཏན་ཕ་མཐའ་ཡས་པ་ལ་འདུད་དོ། །རང་སྣང་རྡུལ་བྲལ་འོག་མིན་གྱི་ཞིང་དུ། །ཁ་སྦྱོར་རྡོ་རྗེའི་མཚན་དཔེ་ཡི་གཟི་བརྗིད། །ཡན་ལག་བདུན་ལྡན་ཆེན་པོ་རུ་འབར་བའི། །ལོངས་སྤྱོད་ཡོངས་རྫོགས་འཁོར་ལོ་ལ་འདུད་དོ། །གཞི་ལས་འཕགས་པའི་གཞི་སྣང་གི་ཕྱག་རྒྱར། །ཀློང་ཡངས་ནང་གསལ་ཟུང་འཇུག་གི་སྣང་བས། །དྲི་བཅས་འཁྲུལ་པའི་མུན་པ་ཀུན་ཟོས་པས། །འཕོ་མེད་ཁྱད་ཆོས་དྲུག་ལྡན་ལ་འདུད་དོ། །དེ་སྐད་མགྲིན་པ་ལོངས་སྤྱོད་ཀྱི་རྒྱུད་མངས། །གང་ཤར་བསྔགས་པའི་སོར་མོ་།. ཡིས་བསྐུལ་བས། །རང་སྣང་པདྨ་དྲྭ་བ་ཡི་གླིང་དུ། །མཆོག་དངོས་གྲུབ་པའི་སྨོན་ལམ་ཞིག་ཞུའོ། །ཞེས་པའང་ལྷོ་མོན་ནགས་མའི་ལྗོངས་ཀྱི་ནུབ་ཕྱོགས་ལྷ་ལུང་ཐེག་མཆོག་རབ་རྒྱས་གླིང་དུ་ཀུན་མཁྱེན་ཆེན་པོ་དེ་ཉིད་ཀྱི་དབུ་ཀླད་རིང་བསྲེལ་། གྱི་ཕུང་པོ་ངོ་མཚར་ཟད་མི་ཤེས་པ་མངོན་སུམ་འདྲེན་བྱེད་བདུད་རྩིར་ལོངས་སྤྱད་པའི་རྗེས་ཐོག་ཏུ་དད་གདུང་ཆེར་འབར་ཏེ་བརྗོད་པ་འགྲོ་ཀུན་ཀ་དག་དང་ལྷུན་གྲུབ་ཟུང་དུ་འཇུག་པའི་ནང་དབྱིངས་ཆེན་པོར་སྐད་ཅིག་ལ་གྲོལ་བའི་རྒྱུར་གྱུར་ཅིག། ༈ །།རྡོ་རྗེའི་གནས་ཡུལ་འཛུམ་བཅས་ཨུཏྤལ་འབར་བས་རེག་པའི་ནགས་ཚལ་དང་། །དེ་དེར་རྒྱུ་བའི་རྣལ་འབྱོར་གཞོན་ནུ་སྦྲང་རྩིས་མགྲིན་པར་འཁྱུད་པ་སྟེ། །གང་གིས་མི་ཟད་གླུ་དབྱངས་སྒྲོག་པའང་རྣ་བར་བདུད་རྩིའི་དགའ་སྟོན་
ཕྱིར། །སྔོན་མེད་དཔྱིད་ཀྱི་དཔལ་མོ་འདི་ཡིས་སྐལ་བཟང་ཚོགས་རྣམས་ངལ་འཚོར་གྱུར། དེ་སླད་དོན་བཟང་རོ་ལྡན་པའི། །ཚིག་སྙན་པུཎྜ་རཱི་ཀའི་ཕྲེང་། །དབང་རྣོན་མཛེས་མའི་རྣམ་འབྱེད་པའི། །མཚར་སྡུག་གྲོགས་སུ་ད་ལོངས་ཤིག །ཅེས་པའང་བར་སྐབས་ཀྱི་ཆེད་དུ་བརྗོད་པའི་སྙན་ངགས་ཀྱི་ཏམྦུར་ཅུང་ཟད་བསྒྲེངས་པའོ། །སརྦ་དཱ་ཤྲཱི་ཡོ་བྷ་བ་ཏུ།། ༈ །།ཞེས་བྱ་བ་བཞུགས། ན་མོ་གུ་རུ་བྷྱ༔ ཡེ་གྲོལ་གདོད་ནས་རྣམ་དག་ཀ་དག་གི་གཞི་དབྱིངས། །བསྐྱར་གྲོལ་རང་ཤེས་རང་གྲོལ་ལྷུན་གྲུབ་ཀྱི་ངོ་བོ། །མཐའ་གྲོལ་གཞོན་ནུ་བུམ་སྐུའི་བླ་མ་དེ་མཁྱེན་ནོ། །དག་པ་གཉིས་ལྡན་ཆོས་སྐུའི་དངོས་གྲུབ་དེ་སྩོལ་ཤོག །བདེ་སྟོང་གཉིས་སུ་མེད་པའི་ཡེ་ཤེས་ཀྱི་སྒྱུ་འཕྲུལ། །སྟོང་དང་སྙིང་རྗེ་ཟུང་འཇུག་ཕྱིར་གསལ་གྱི་རང་གདངས། །གང་འདུལ་ལོངས་སྤྱོད་རྫོགས་སྐུའི་བླ་མ་དེ་མཁྱེན་ནོ། །ཁ་སྦྱོར་ཡན་ལག་བདུན་ལྡན་དངོས་གྲུབ་དེ་སྩོལ་ཤོག །ཆོས་ཉིད་ཇི་བཞིན་ཉིད་དབྱིངས་རྣམ་དག་གི་ཀློང་ནས། །ཆོས་ཅན་འགྲོ་རྣམས་བདེ་ཆེན་ཡེ་ཤེས་སུ་སྒྲོལ་ཕྱིར། །སྣ་ཚོགས་མ་ངེས་སྤྲུལ་པའི་བླ་མ་དེ་མཁྱེན་ནོ། །འགྲོ་འདུལ་མཁྱེན་དང་བརྩེ་བའི་དངོས་གྲུབ་དེ་སྩོལ་ཤོག །སྐུ་གསུམ་རྣམ་པར་དབྱེ་བའི་ངོ་བོ་དང་རང་བཞིན། །ཐུགས་རྗེའི་བྱེ་བྲག་སོ་སོར་འབྱེད་པ་ཡི་ཆོས་རྣམས། །རོ་གཅིག་བློ་
འདས་དབྱེར་མེད་བླ་མ་དེ་དྲན་བྱུང་། །ངོ་བོ་ཉིད་སྐུའི་ཡེ་ཤེས་ཆེན་པོ་དེ་སྩོལ་ཤོག །བྱང་ཆུབ་ཕྱོགས་ཆོས་སུམ་ཅུ་ལ་སོགས་ཀྱི་ཡོན་ཏན། །རང་རིག་བདེ་གཤེགས་སྙིང་པོ་ཉག་གཅིག་ལ་རྫོགས་པས། །། མངོན་པར་བྱང་ཆུབ་དཔལ་ལྡན་བླ་མ་དེ་དྲན་བྱུང་། །ས་ལམ་ཡོན་ཏན་རྫོགས་པར་བྱིན་གྱིས་རང་རློབས་ཤིག །གང་ལྟར་སྣང་ཡང་སྣང་སྲིད་འཁོར་འདས་དེ་མ་གྲུབ། །ཇི་ལྟར་གཡོས་ཀྱང་རང་བྱུང་ཐུགས་རྗེ་ཡི་ཡེ་ཤེས། །མི་འགྱུར་རྡོ་རྗེའི་ངོ་བོ་བླ་མ་དེ་དྲན་བྱུང་། །བློ་བྲལ་འགྱུར་མེད་རྟོགས་པར་བྱིན་གྱིས་རང་རློབས་ཤིག །ཨ་ཧོ། མ་སྐྱེས་གདོད་ནས་དག་པ་ཀ་དག་གི་ངང་ནས། །འགག་མེད་རྡོ་རྗེའི་ཐོལ་གླུའི་སྐྱེས་བཟང་དེ་བླངས་པས། །དཔའ་བོ་མཁའ་འགྲོ་དགྱེས་པའི་འཛུན་ཞལ་རང་སྟོན་ནས། །ལྷན་སྐྱེས་སྐུ་བཞི་ཐོབ་པར་བྱིན་གྱིས་རང་རློབས་ཤིག ༈ །།བླ་མ་སྐུ་གསུམ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་གཉུག་མའི་སྒྲ་དབྱངས་ཅེས་བྱ་བ། ཨ་ཧོ། ཡེ་ནས་མངོན་སངས་རྒྱས་པའི་ཀ་དག་གི་ཀློང་ནས། །གཟུང་འཛིན་འཁྲུལ་པས་མ་གོས་རང་རིག་གི་ངོ་བོ། །ཐོག་མའི་མགོན་པོ་ཀུན་བཟང་ཡབ་ཡུམ་དེ་བཞུགས་ཡོད། །ཁྱད་ཆོས་དྲུག་ལྡན་ཆོས་སྐུའི་དངོས་གྲུབ་རང་སྩོལ་ཤོག །རང་སྣང་རང་བཞིན་མེད་པའི་ངོ་བོ་ལས་སྐྱེས་པའི། །ཀུན་བརྟགས་འཁྲུལ་པ་ཟད་པའི་རིག་སྟོང་གི་རོལ་པ། །རིགས་ལྔའི་སངས་རྒྱས་འཁོར་ཚོགས་རྒྱ་མཚོ་དེ་
བཞུགས་ཡོད། །ཁ་སྦྱོར་ཡན་ལག་བདུན་ལྡན་དངོས་གྲུབ་རང་སྩོལ་ཤོག །ཐུགས་རྗེ་ཕྱོགས་རིས་མེད་པའི་བདེ་ཆེན་གྱི་ཀློང་ནས། །གང་ཤར་མཚན་དཔེའི་ཡོན་ཏན་རང་ངོ་རུ་གྲོལ་བའི། །རིག་འཛིན་མཁའ་འགྲོ་རྒྱ་མཚོའི་ཚོམ་བུ་དེ་བཞུགས་ཡོད། །སྣང་སྟོང་ལྷུན་གྲུབ་ཆེན་པོའི་དངོས་གྲུབ་རང་སྩོལ་ཤོག །ཚོགས་བརྒྱད་དབུ་མར་ཐིམ་པ་སྲིན་ཡུལ་གྱི་གྲོང་དུ། །འཁོར་འདས་མིང་བཏགས་ཟད་པའི་སྐུ་གསུམ་གྱི་ངོ་བོ། །འཆི་མེད་འཇའ་ལུས་པདྨ་ཐོད་ཕྲེང་དེ་བཞུགས་ཡོད། །དོན་གཉིས་ལྷུན་གྱིས་གྲུབ་པའི་དངོས་གྲུབ་རང་སྩོལ་ཤོག །རང་ལུས་ཕུང་ཁམས་སྐྱེ་མཆེད་ཡོངས་གྲུབ་ཀྱི་ཀློང་ནས། །ཞི་དང་ཁྲོ་གར་རྨད་བྱུང་སྒྱུ་འཕྲུལ་གྱི་དྲྭ་བ། །གདན་གསུམ་ཡོངས་རྫོགས་དཀྱིལ་འཁོར་ལྷ་ཚོགས་དེ་བཞུགས་ཡོད། །སྣང་ཞེན་ཕྱག་རྒྱར་རོལ་པའི་དངོས་གྲུབ་རང་སྩོལ་ཤོག །འཁོར་ལོ་ལྔ་ཡི་རྩ་སྦྱོང་རྩ་གནས་ཀྱི་གྲོང་དུ། །བདེ་སྟོང་མཉམ་པར་སྦྱོར་བའི་ལྷན་སྐྱེས་ཀྱི་གར་མཁན། །དཔའ་བོ་ཌཱ་ཀིའི་ཕྱག་རྒྱས་མཛེས་པ་དེ་བཞུགས་ཡོད། །རླུང་སེམས་དབུ་མར་ཐིམ་པའི་དངོས་གྲུབ་རང་སྩོལ་ཤོག །སྒྲོན་དྲུག་འཇའ་ཟེར་བཞད་པའི་འཛུམ་དཀར་གྱི་ཀློང་ནས། །སྣང་བཞིའི་ངོ་བོ་གོང་འཕེལ་རང་ངོ་རུ་གྲོལ་བའི། །ཆོས་ཟད་བློ་འདས་དོན་གྱི་བླ་མ་དེ་བཞུགས་ཡོད། །ཟག་བཅས་འོད་སྐུར་ཐིམ་པའི་དངོས་གྲུབ་རང་སྩོལ་ཤོག །རང་བྱུང་རང་
ལ་ཤར་བའི་གསོལ་འདེབས་ཀྱི་གླུ་དབྱངས། །མགྲིན་པ་རྡོ་རྗེའི་རོལ་མོའི་དཀོར་མཛོད་ནས་བླངས་པས། །ལྷན་སྐྱེས་སྐུ་བཞིའི་དབང་ཕྱུག་བདེ་གཤེགས་ཀྱི་སྙིང་པོར། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ།། ༈ །།དུས་གསུམ་ཀུན་མཁྱེན་པདྨ་འབྱུང་གནས་ལ་གསོལ་བ་འདེབས་པ་ཡོ་ག་གསུམ་གྱི་གླུ་དབྱངས་ཞེས་བྱ་བ། ཨ་ཧོ།ལྷོ་ནུབ་སྲིན་ཡུལ་ཟངས་མདོག་དཔལ་རི་ཡི་གྲོང་ཁྱེར། །སྐུ་གསུམ་རིགས་འདུས་འཆི་ང མེད་མཚོ་སྐྱེས་ཀྱི་རྡོ་རྗེ། །རིག་འཛིན་ཌཱ་ཀིའི་ཚོམ་བུའི་བསྐོར་བ་དེ་བཞུགས་ཡོད། །དག་པ་རབ་འབྱམས་ངང་ནས་གསོལ་བ་རང་འདེབས་སོ། །སྒྱུ་ལུས་རྩ་ཁམས་རྣམ་དག་འོད་གསལ་གྱི་ཀློང་ནས། །གཡོ་བ་རླུང་ཀུན་དབུ་མར་ཐིམ་པ་ཡི་རིག་གདངས། །ཐིག་ལེ་ཚོམ་བུར་ཤར་བའི་མཚོ་སྐྱེས་ཀྱི་རྡོ་རྗེར། །བདེ་སྟོང་གཉིས་མེད་ངང་ནས་གསོལ་བ་རང་འདེབས་སོ། །སྙིང་དབུས་ཚོགས་བརྒྱད་རྣམ་དག་དཔལ་རི་ཡི་གྲོང་ཁྱེར། །འགྲོ་འོང་རྟོག་པ་བྲལ་བའི་ཡེ་ཤེས་ཀྱི་ཀློང་ནས། །མཐའ་གྲོལ་གཞོན་ནུ་བུམ་སྐུ་མཚོ་སྐྱེས་ཀྱི་རྡོ་རྗེར། །སྤྲོས་བྲལ་གཉུག་མའི་ངང་ནས་གསོལ་བ་རང་འདེབས་སོ། །སྒྲོན་དྲུག་འཇའ་ཟེར་སྒྱུ བཞད་པའི་དཀྱིལ་འཁོར་གྱི་དབུས་ནས། །ཚད་ཕེབས་དཔའ་བོ་མཁའ་འགྲོའི་ཚོགས་འཁོར་ལ་རོལ་པའི། །འཕོ་ཆེན་རྡོ་རྗེའི་སྐུ་བརྙེས་མཚོ་སྐྱེས་ཀྱི་རྡོ་རྗེར། །ཟག་བཅས་རྟོག་བྲལ་ངང་ནས་གསོལ་བ་རང་
འདེབས་སོ། །ཕྱི་ནང་གཞན་གསུམ་ཉམས་ལེན་སྦྱར་བ་ཡི་སྒྲ་དབྱངས། །ཡོ་ག་རྣམ་གསུམ་གླུ་དབྱངས་གཏད་མེད་དུ་འབུལ་བས། །ཕུང་ཁམས་སྐྱེ་མཆེད་འདུ་བ་དབུ་མ་རུ་ཐིམ་ནས། །དོན་དམ་ཆོས་ཟད་ཆེན་པོ་མངོན་གྱུར་དུ་ཤོག་ཅིག ཅེས་བདེ་བ་ཆེན་པོ་པདྨ་ཀ་ར་ལ་ཐུན་མོང་མ་ཡིན་པར་གསོལ་བ་གདབ་པའི་རིམ་པའོ།། ༈ །།སྙིང་ཐིག་བསྟན་པ་འཛིན་པའི་མངའ་བདག་ཆེན་པོ་བརྒྱུད་པར་བཅས་པ་རྣམས་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ཟུང་འཇུག་འོད་གསལ་གཉུག་མའི་སྒྲ་དབྱངས་ཞེས་བྱ་བ། ན་མ་ཛྙཱ་ན་གུ་རུ་བྷྱ༔ ཡེ་གྲོལ་འགྱུར་མེད་རྡུལ་བྲལ་ཤེར་ཕྱིན་གྱི་ངོ་བོ། །ཡེ་ཤེས་ནང་གསལ་རྣམ་ཐར་གསུམ་ལྡན་གྱི་མཁའ་དབྱིངས། །ཡེ་ནས་འཕོ་འགྱུར་བྲལ་བའི་བདེ་སྟོང་གི་མཚན་དཔེ། །ཡེ་རྫོགས་ཀུན་བཟང་ཡབ་ཡུམ་སྙིང་དབུས་ནས་དྲན་བྱུང་། །ཀ་དག་རང་ངོར་གྲོལ་བར་བྱིན་གྱིས་རང་རློབས་ཤིག །ཚད་ཕེབས་བཀོད་པ་མཐར་ཕྱིན་ཕྱིར་གསལ་གྱི་རོལ་པ། །ཚད་མེད་ཡན་ལག་བདུན་ལྡན་ཁ་སྦྱོར་གྱི་དཀྱིལ་འཁོར། །ཚད་བཟུང་མུ་མཐའ་བྲལ་བའི་སྣང་སྟོང་གི་ངོ་བོ། །ཚད་མའི་སྟོན་པ་ལོངས་སྐུའི་སངས་རྒྱས་དེ་དྲན་བྱུང་། །ལྷུན་གྲུབ་འོད་སྐུར་གྲོལ་བར་བྱིན་གྱིས་རང་རློབས་ཤིག །དགའ་ཆེན་སྒྱུ་མར་རོལ་པའི་ཡེ་ཤེས་ཀྱི་ཀློང་ནས། །དགའ་ལྡན་ལྷ་བརྒྱའི་མགོན་དུ་ཞབས་པད་དུ་བཀོད་ཅིང་། །དགའ་བཞིའི་མྱུ་གུ་གསར་པ་འཛམ་གླིང་དུ་བསྒྱུར་བའི། །དགའ་རབ་དགྱེས་
པ་རྡོ་རྗེ་སྙིང་དབུས་ནས་དྲན་བྱུང་། །ཟབ་མོའི་བསྟན་པ་འཛིན་པར་བྱིན་གྱིས་རང་རློབས་ཤིག །སྙིང་པོར་གྱུར་པའི་ངེས་གསང་འབྲས་བུ་ཡི་ཐེག་པ། །སྙིང་ནས་བསྒྲེང་བའི་ཐུགས་བསྐྱེད་རྨད་བྱུང་དང་ལྡན་ཅིང་། །སྙིང་ཏིག་སྡེ་གསུམ་བསྟན་པ་སྐལ་བཟང་ལ་སྤེལ་བའི། །སྙིང་རྗེའི་གཟུགས་སྐུ་མཉྫམི་ཏྲ་དེ་དྲན་བྱུང་། །བླ་མེད་དོན་མཆོག་མཐོང་བར་བྱིན་གྱིས་རང་རློབས་ཤིག །དཔལ་ལྡན་རྒྱལ་བའི་སྒྱུ་འཕྲུལ་འགོགས་མེད་དུ་རྒྱུ་བས། །དཔལ་སྟུག་འདྲེན་པ་ཡོངས་ཀྱི་ཐུགས་རྗེ་ཡི་རོལ་པ། །དཔལ་མཆོག་འོད་གསལ་དྲྭ་བའི་འཁོར་ལོ་རུ་རོལ་པའི། །དཔལ་གྱི་སེང་གེར་གྲགས་པ་སྙིང་དབུས་ནས་དྲན་བྱུང་། །ཟབ་དོན་དགོངས་པ་རྟོགས་པར་བྱིན་གྱིས་རང་རློབས་ཤིག །རྣམ་བཅས་མཚན་མའི་ཆོས་ཀུན་ཟུང་འཇུག་ཏུ་ཐིམ་པས། །རྣམ་མང་མཁྱེན་པའི་གཏེར་མཛོད་རང་བྱུང་དུ་རྡོལ་ཅིང་། །རྣམ་དག་འཇའ་ལུས་རྡོ་རྗེའི་ཕྱག་རྒྱ་རུ་རོལ་པའི། །རྣལ་འབྱོར་ཛྷཱ་ན་སཱུ་ཏྲ་སྙིང་དབུས་ནས་དྲན་བྱུང་། །སྲིད་ཞི་དབྱེར་མེད་རྟོགས་པར་བྱིན་གྱིས་རང་རློབས་ཤིག །འོད་གསལ་འཕོ་བ་ཆེན་པོའི་ཡེ་ཤེས་སུ་སྨིན་པའི། །འོད་གསལ་རྫོགས་ཆེན་སྤེལ་ཕྱིར་གཟུགས་སྐུ་ཡི་སྒྱུ་འཕྲུལ། །འོད་གསལ་འཛིན་རྟོག་བྲལ་བའི་བདེ་ཆེན་གྱི་ལང་ཚོ། །འོད་གསལ་བི་མ་མི་ཏྲ་སྙིང་དབུས་ནས་དྲན་བྱུང་། །འཁོར་འདས་རང་སར་གྲོལ་བར་བྱིན་གྱིས་རང་
རློབས་ཤིག །ཟག་མེད་འདུས་བྱས་བྲལ་བའི་སྣང་སྟོང་གི་ཡེ་ཤེས། །ཟག་བཅས་གདན་གསུམ་བྲལ་བའི་འཁོར་ལོ་རུ་བཞེངས་ཀྱང་། །ཟག་ཟད་མཁྱེན་བརྩེའི་ཡེ་ཤེས་མཁའ་མཐའ་རུ་གདལ་བའི། །ཟག་བྲལ་མཚོ་སྐྱེས་རྡོ་རྗེ་སྙིང་དབུས་ནས་དྲན་བྱུང་། །དོན་གཉིས་ལྷུན་གྱིས་གྲུབ་པར་བྱིན་གྱིས་རང་རློབས་ཤིག །རང་རིག་བརྗོད་པ་བྲལ་བའི་ཆོས་ཉིད་ཀྱི་ཀློང་ནས། །རང་སྣང་འགྲོ་བ་འདུལ་ཕྱིར་གཟུགས་སྐུ་ཡི་རོལ་པ། །རང་བྱུང་པདྨས་རྗེས་བཟུང་རྣལ་འབྱོར་གྱི་དབང་ཕྱུག །རང་གྲོལ་རྗེ་འབངས་ཉེར་ལྔ་སྙིང་དབུས་ནས་དྲན་བྱུང་། །ཚེ་འདིར་གྲུབ་མཐའ་རྙོག་པར་བྱིན་གྱིས་རང་རློབས་ཤིག །ཀློང་ལྔ་མི་ཤིགས་ཟློ ཟབ་དོན་བདུད་རྩི་ལ་རོལ་པས། །ཀློང་ཡངས་འོད་གསལ་རྟོགས་པའི་ངོ་བོ་རུ་མྱོས་ཏེ། །ཀློང་གསལ་སྣང་བ་བརྡ་དང་དཔེ་ཆ་རུ་ཤར་བའི། །ཀློང་ཆེན་དྲི་མེད་འོད་ཟེར་སྙིང་དབུས་ནས་དྲན་བྱུང་། །དབང་བཞིའི་དོན་རྒྱུད་སྨིན་པར་བྱིན་གྱིས་རང་རློབས་ཤིག །ཀུན་ཏུ་སྤྲོས་བྲལ་ཆོས་སྐུའི་ངོ་བོ་ལས་མ་གཡོས། །ཀུན་སྣང་སྟོང་དང་སྙིང་རྗེ་ཟུང་འཇུག་གི་རོལ་པ། །ཀུན་ཁྱབ་སྤྲུལ་པའི་སྒྱུ་འཕྲུལ་དྲྭ་བ་རུ་བཞེངས་པའི། །ཀུན་མཁྱེན་འཇིགས་མེད་གླིང་པ་སྙིང་དབུས་ནས་དྲན་བྱུང་། །དགོངས་བརྒྱུད་འཕོ་བ་ཐོབ་པར་བྱིན་གྱིས་རང་རློབས་ཤིག །འཕོ་མེད་སྣང་སྟོང་ཟུང་འཇུག་གདན་གསུམ་གྱི་གཟུགས་སྐུ། །ཟག་མེད་གསང་
སྔགས་འཁོར་ལོ་བདེན་གཉིས་ཀྱི་སྒྲ་དབྱངས། །སྤྲོས་མེད་གཉུག་མར་རོལ་པའི་བདེ་སྟོང་གི་ཡེ་ཤེས། །བླ་མེད་ཁྱབ་བདག་བླ་མ་སྙིང་དབུས་ནས་དྲན་བྱུང་། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རང་རློབས་ཤིག །ཨ་ཧོ། ཕུང་ཁམས་སྐྱེ་མཆེད་སྣང་སྟོང་སྒྱུ་འཕྲུལ་གྱི་དྲྭ་བ། །སྲོག་རྩོལ་རླུང་ཀུན་མཉམ་རོལ་ཟུང་འཇུག་གི་ངོ་བོ། །རྟོག་ཚོགས་གང་ཤར་སྐྱེ་འགག་མཐའ་གྲོལ་གྱི་ཡེ་ཤེས། །རྣལ་འབྱོར་གསུམ་གྱི་དངོས་གྲུབ་རང་ངོ་རུ་སྩོལ་ཤོག །སྒྲོན་དྲུག་ལམ་ནས་ཐོན་པའི་སྣང་བཞི་ཡི་རོལ་པར། །ཟག་བཅས་འཁྲུལ་པའི་ཆོས་རྣམས་མ་ལུས་ཀུན་ཐིམ་པས། །དངོས་སྣང་འོད་གསལ་ཆེན་པོའི་དྲྭ་བ་རུ་བསྡམས་པའི། །ཡིད་བྱེད་རྟོག་པ་བྲལ་བའི་དངོས་གྲུབ་དེ་སྩོལ་ཤོག །རྩ་ཁམས་དབུ་མར་ཐིམ་པའི་བདེ་སྟོང་གི་གཟུགས་སྐུ། །ཁམས་གཉིས་ནཱ་དར་བཅིངས་པའི་རྡོ་རྗེ་ཡི་གསུང་མཆོག །རླུང་སེམས་ཐིག་ལེར་མཉམ་སྦྱོར་འཕོ་མེད་ཀྱི་ཡེ་ཤེས། །སྒོ་གསུམ་འཁྲུལ་པ་ཟད་པར་བྱིན་གྱིས་རང་རློབས་ཤིག །གཞན་གནོད་གཞི་བཅས་སྤངས་པ་ཉན་ཐོས་ཀྱི་ཚུལ་ཁྲིམས། །གཞན་ཕན་ཡོངས་སུ་བསྒྲུབས་པ་བྱང་སེམས་ཀྱི་ལམ་མཆོག །གཉིས་ཀ་ཐབས་ཀྱིས་ཟིན་པ་གསང་སྔགས་ཀྱི་དམ་ཚིག །སྡོམ་གསུམ་ཉམས་མེད་བསྲུང་བར་བྱིན་གྱིས་རང་རློབས་ཤིག །དེ་སྐད་འབར་འཛག་བདུད་རྩིའི་ཐིག་ཕྲེང་གི་གཡོ་བས། །རླུང་
སེམས་སྣང་བ་གཏད་མེད་རང་ངོ་རུ་གྲོལ་ཚེ། །གང་ཤར་གསོལ་བ་འདེབས་པའི་རྡོ་རྗེ་ཡི་ཐོལ་གླུས། །འགྲོ་རྣམས་དཔལ་ལྡན་བླ་མའི་གོང་འཕང་དེ་ཐོབ་ཤོག། ༈ །།འོད་གསལ་རྫོགས་པ་ཆེན་པོའི་ཉེ་བརྒྱུད་ལ་གསོལ་བ་འདེབས་པའི་རྡོ་རྗེའི་ཐོལ་གླུ་བདེ་སྟོང་གཉུག་མའི་རྒྱན་ཅེས་བྱ་བ། ཨ་ཧོ། བདེ་སྟོང་ཟུང་འཇུག་ལྷན་སྐྱེས་དཀྱིལ་འཁོར་གྱི་ཀློང་ནས། །རྟག་ཆད་མཚན་མ་མ་དམིགས་གཞོན་ནུ་ཡི་བུམ་སྐུ། །རང་རིག་ཀུན་བཟང་གདོད་མའི་མགོན་པོ་དེ་མཁྱེན་ནོ། །གཟུང་འཛིན་གཉུག་མར་ཞིག་པར་བྱིན་གྱིས་རང་རློབས་ཤིག །ངེས་པ་ལྔ་ལྡན་འཇའ་ཟེར་ཐིག་ལེ་ཡི་ཀློང་ནས། །སྟོང་དང་སྙིང་རྗེ་ཟུང་འཇུག་བདེ་ཆེན་གྱི་ངོ་བོ། །རང་གསལ་ལོངས་སྤྱོད་རྫོགས་སྐུའི་སངས་རྒྱས་དེ་མཁྱེན་ནོ། །མཚན་འཛིན་དབུ་མར་ཞིག་པར་བྱིན་གྱིས་རང་རློབས་ཤིག །སྣང་སྟོང་ཟུང་འཇུག་གང་འདུལ་དེར་སྟོན་གྱི་ཀློང་ནས། །དགའ་ཆེན་སྒྱུ་མར་རོལ་པའི་ཡེ་ཤེས་ཀྱི་ངོ་བོ། །མཆོག་གི་སྤྲུལ་སྐུ་དགྱེས་པ་རྡོ་རྗེ་དེ་མཁྱེན་ནོ། །ཟག་བཅས་འོད་སྐུར་ཐིམ་པར་བྱིན་གྱིས་རང་རློབས་ཤིག །ཚོགས་བརྒྱད་དབུ་མར་བསྒྲལ་བའི་དུར་ཁྲོད་ཀྱི་ཀློང་ནས། །དགའ་བཞི་འཁོར་ལོར་སྦྱོར་བའི་རྣལ་འབྱོར་གྱི་དབང་ཕྱུག །རིག་འཛིན་ཀུན་གཙོ་ཤཱི་སིདྷ་དེ་མཁྱེན་ནོ། །སྣང་བཞི་གོང་དུ་བགྲོད་པར་བྱིན་གྱིས་རང་རློབས་ཤིག །ཀ་དག་གཏིང་མཐའ་བྲལ་བའི་ཆུ་གཏེར་གྱི་ཀློང་ནས། །ལྷུན་གྲུབ་ཟག་
བྲལ་བདེ་ཆེན་པདྨོ་ཡི་སྦུབས་སུ། །རྡོ་རྗེའི་སྐུ་བརྙེས་པདྨ་འབྱུང་གནས་དེ་མཁྱེན་ནོ། །དོན་གཉིས་ལྷུན་གྱིས་གྲུབ་པར་བྱིན་གྱིས་རང་རློབས་ཤིག །ཨ་ཧཾ་འབར་འཛག་ཞུ་བདེའི་དཀྱིལ་འཁོར་གྱི་ཀློང་ནས། །བཅུ་དྲུག་དགའ་བའི་ཡེ་ཤེས་མཚན་དཔེ་རུ་བཞད་པའི། །ཌཱ་ཀིའི་གཙོ་མོ་ཛྙཱ་ན་སཱ་ར་དེ་མཁྱེན་ནོ། །བདེ་སྟོང་དབུ་མར་སྨིན་པར་བྱིན་གྱིས་རང་རློབས་ཤིག །རང་སྣང་རྣམ་པར་དག་པའི་དཀྱིལ་འཁོར་གྱི་ཀློང་ནས། །གཞན་སྣང་གང་ལ་གང་འདུལ་དེར་སྟོན་དུ་རོལ་པས། །གཉིས་སྣང་རྟོག་བྲལ་དྲིན་ཆེན་བླ་མ་དེ་མཁྱེན་ནོ། །སྣང་རིག་དབྱེར་མེད་རྟོགས་པར་བྱིན་གྱིས་རང་རློབས་ཤིག །དོན་དམ་སྟོང་ཉིད་བརྗོད་བྲལ་ཡེ་ཤེས་ཀྱི་ཀློང་ནས། །ཀུན་སྣང་སྙིང་རྗེར་རོལ་པའི་སྒྱུ་འཕྲུལ་དུ་ཤར་བའི། །སྐུ་གསུམ་ཟུང་འཇུག་དཀྱིལ་འཁོར་ལྷ་ཚོགས་དེ་མཁྱེན་ནོ། །གདན་གསུམ་དབྱེར་མེད་རྟོགས་པར་བྱིན་གྱིས་རང་རློབས་ཤིག །ཕྱི་སྣོད་རབ་འབྱམས་རྔ་ཡབ་དཔལ་རི་ཡི་གྲོང་ཁྱེར། །ནང་བཅུད་འགྲོ་ཀུན་ཟུང་འཇུག་མཚོ་སྐྱེས་ཀྱི་རྡོ་རྗེ། །གཞན་སྣང་རྟོག་བྲལ་དཀྱིལ་འཁོར་གསུམ་ལྡན་གྱི་ངང་ནས། །ཉམས་དགའི་རྡོ་རྗེའི་ཐོལ་སྤྱི གླུ་བླངས་པ་ཡི་དགེ་བས། །གཞི་རིག་འཁྲུལ་བྲལ་རང་བྱུང་གཉུག་མ་ཡི་གཤིས་སུ། །ལྟ་སྒོམ་སྤྱོད་པའི་མིང་འདོགས་ཐ་སྙད་ཀུན་བྲལ་ཏེ། །གློ་བུར་འཁྲུལ་པའི་ཚོགས་ཀུན་གཏད་མེད་དུ་དག་པས། །སྐུ་
གསུམ་རང་རྩལ་རྫོགས་པའི་སྨོན་ལམ་ཞིག་ཞུའོ། །འོད་གསལ་རྫོགས་པ་ཆེན་པོའི་ཉེ་བརྒྱུད་ལ་གསོལ་བ་འདེབས་པའི་རྡོ་རྗེའི་ཐོལ་གླུ་བདེ་སྟོང་གཉུག་མའི་རྒྱན་ཅེས་བྱ་བ་འདི་ཡང་དུས་ཀྱི་རྒྱལ་པོའི་ཚེས་བཅུ་ལ་བརྗོད་པའོ།། ༈ །།བླ་མ་སྐུ་བཞིའི་བདག་ཉིད་ལ་གསོལ་བ་འདེབས་པའི་རྡོ་རྗེའི་ཐོལ་གླུ་བྱིན་རླབས་ཐིག་ལེ་ཅེས་བྱ་བ། ཨ་ཧོ། གདོད་ནས་སྤྲོས་པ་བྲལ་བའི་ཡེ་ཤེས་ཀྱི་ཀློང་ནས། །ཚོགས་སྦྱོར་མཐོང་སྒོམ་ལམ་ཀུན་མི་སློབ་ཏུ་རྫོགས་པའི། །རིག་སྟོང་ཟུང་འཇུག་ཆོས་སྐུའི་བླ་མ་དེ་མཁྱེན་ནོ། །དག་པ་གཉིས་ལྡན་ཆེན་པོར་བྱིན་གྱིས་རང་རློབས་ཤིག །སྟོང་དང་སྙིང་རྗེ་ཟུང་འཇུག་བདེ་ཆེན་གྱི་ཀློང་ནས། །སྐུ་གསུམ་ཡན་ལག་བདུན་ལྡན་ཁ་སྦྱོར་དུ་རྫོགས་པའི། །གསལ་སྟོང་ཟུང་འཇུག་ལོངས་སྐུའི་བླ་མ་དེ་མཁྱེན་ནོ། །རྟོག་ཚོགས་རང་སར་གྲོལ་བར་བྱིན་གྱིས་རང་རློབས་ཤིག །གང་འདུལ་སྣ་ཚོགས་སྒྱུ་མར་འཕྲུལ་པ་ཡི་ཀློང་ནས། །ཐབས་ཤེས་མཚན་དང་དཔེ་བྱད་ཡོན་ཏན་དུ་རྫོགས་པའི། །སྣང་སྟོང་ཟུང་འཇུག་སྤྲུལ་སྐུའི་བླ་མ་དེ་མཁྱེན་ནོ། །དཀྱིལ་འཁོར་གསུམ་དུ་སྨིན་པར་བྱིན་གྱིས་རང་རློབས་ཤིག །སྐུ་གསུམ་དབྱེར་མེད་ལྷན་སྐྱེས་གཉུག་མ་ཡི་ཀློང་ནས། །ཟབ་ཞི་སྤྲོས་བྲལ་ནང་གསལ་ཆེན་པོ་རུ་རྫོགས་པའི། །བདེ་སྟོང་ཟུང་འཇུག་ཉིད་སྐུའི་བླ་མ་དེ་མཁྱེན་ནོ། །བློ་བྲལ་ངང་བཞག་རྟོགས་པར་བྱིན་གྱིས་རང་རློབས་ཤིག །དེ་སྐད་གསོལ་བ་འདེབས་པའི་རྡོ་རྗེ་ཡི་ཐོལ་གླུ། །
མགྲིན་པ་ལོངས་སྤྱོད་འཁོར་ལོའི་དཀོར་མཛོད་ནས་བླངས་པས། །གཟུང་འཛིན་འཁྲུལ་པར་སྤྱོད་པའི་འགྲོ་བ་ཡི་ཚོགས་ཀུན། །རང་རིག་བརྗོད་བྲལ་མཐོང་བར་བྱིན་གྱིས་རང་རློབས་ཤིག ༈ །དཔལ་ལྡན་བླ་མ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ཡོ་ག་གསུམ་གྱི་སྒྲ་དབྱངས་ཞེས་བྱ་བ། ཨ་ཧོ། འཇིགས་མེད་རྒྱལ་བ་ཀུན་གྱི་སྤྱི་སྐྱེས་སུ་གྱུར་ཀྱང་། །སྲིད་འདིར་མི་ཡི་མྱུ་གུ་དམ་པ་རུ་བཟུང་ནས། །སྐལ་བཟང་འགྲོ་ཀུན་ཐར་པའི་ལམ་མཆོག་ལ་སྦྱོར་བའི། །ཁྱབ་བདག་འཁོར་ལོའི་མགོན་པོ་སྙིང་དབུས་ནས་དྲན་བྱུང་། །བློ་སྣ་ཆོས་ལ་འགྱུར་བར་བྱིན་གྱིས་རང་རློབས་ཤིག །རྙེད་དཀའི་དལ་འབྱོར་མི་ལུས་རིན་ཆེན་དེ་ཐོབ་ཀྱང་། །འཆི་བདག་གཤིན་རྗེའི་ཕོ་ཉ་ནམ་འོང་ནི་མི་འདུག །དེ་ཚེ་དཀར་ནག་ལས་འབྲས་འཕེན་པ་ཡི་རྗེས་འགྲོ། །སྡུག་བསྔལ་འཁོར་བའི་རྒྱ་མཚོ་ཟད་མེད་དུ་འཁྱམས་ཚེ། །ངེས་འབྱུང་གཏིང་ནས་སྐྱེ་བར་བྱིན་གྱིས་རང་རློབས་ཤིག །མཚན་ལྡན་བླ་མ་དགེ་བའི་བཤེས་གཉེན་དང་མཇལ་ཏེ། །གསང་ཆེན་རྡོ་རྗེ་ཐེག་པའི་ལམ་མཆོག་ལ་ཞུགས་ཤིང་། །སྨིན་གྲོལ་བདུད་རྩིའི་དགའ་སྟོན་ཟད་མེད་དུ་རོལ་པས། །བསྐྱེད་རྫོགས་ཟུང་འཇུག་ཉེ་ལམ་སྣོད་མཆོག་ཏུ་གྱུར་ནས། །དམ་ཚིག་ཉམས་མེད་སྲུང་བར་བྱིན་གྱིས་རང་རློབས་ཤིག །གདན་གསུམ་དབྱེར་མེད་སྒྱུ་འཕྲུལ་དྲྭ་བ་ཡི་ཀློང་ནས། །སྣང་སྟོང་ཟུང་འཇུག་ཕྱག་རྒྱ་རྣམ་
བཞི་རུ་རོལ་པས། །བཀོད་པ་ལུས་ཀྱི་དཀྱིལ་འཁོར་ལྷ་སྐུ་རུ་རྫོགས་པའི། །ཉམས་ལེན་མཐའ་རུ་ཕྱིན་པར་བྱིན་གྱིས་རང་རློབས་ཤིག །འཁོར་ལོ་རྣམ་ལྔའི་ཞིང་དུ་རིག་འཛིན་དང་ཊཱ་ཀི། །ཡས་བབས་མས་བརྟན་དགའ་བཞིའི་བདུད་རྩི་ཡིས་ཚིམ་པས། །ཞུ་བདེ་མི་རྟོག་བདེ་སྟོང་དྲྭ་བ་ཡི་འཁོར་ལོ། །རླུང་སེམས་དབུ་མར་ཐིམ་པར་བྱིན་གྱིས་རང་རློབས་ཤིག །སྤྲོས་པའི་མཐའ་བརྒྱད་ཀུན་བྲལ་ལྟ་བ་ཡི་ཡང་རྩེ། །སྐྱེ་འགག་རང་སར་གྲོལ་བའི་ངང་བཞག་གི་སྒོམ་པ། །དམིགས་གཏད་ཆེད་འཛིན་སྤངས་པའི་ཡང་དག་གི་སྤྱོད་ལམ། །འབྲས་བུ་རང་ངོར་རྫོགས་པར་བྱིན་གྱིས་རང་རློབས་ཤིག །སྒྲོན་མ་རྣམ་བཞིར་བཞད་པའི་ཉམས་ལེན་གྱི་ཀློང་དུ། །སྣང་བཞིའི་རྟོགས་པ་གོང་འཕེལ་ཆོས་ཟད་དུ་བསྐྱལ་བས། །ནང་གསལ་ཁྱད་ཆོས་དྲུག་ལྡན་ངོ་བོ་རུ་རོལ་པའི། །ཟག་བཅས་འོད་སྐུར་ཐིམ་པར་བྱིན་གྱིས་རང་རློབས་ཤིག ། དེ་སྐད་དུས་ཀུན་སྐྱོ་ཤས་ངེས་འབྱུང་གི་ངང་ནས། །དཔལ་ལྡན་བླ་མར་དད་པའི་རང་བཞིན་ལས་སྐྱེས་པའི། །འགག་མེད་རྡོ་རྗེའི་ཐོལ་གླུ་བསྒྱུར་བ་ཡི་དགེ་བས། །འགྲོ་རྣམས་གང་དང་དབྱེར་མེད་འགྲུབ་པ་རུ་ཤོག་ཅིག །དཔལ་ལྡན་བླ་མ་ལ་གསོལ་བ་འདེབས་པ་རྡོ་རྗེའི་ཐོལ་གླུ་ཡོ་ག་གསུམ་གྱི་སྒྲ་ཚིག་ཅེས་བྱ་བ་འདི་ཡང་ངེས་འབྱུང་གི་བློ་ཅན་ཨ་བྷ་ཡའི་མིང་གིས་རང་ལོ་བཅུ་དྲུག་པར་བརྗོད་མེད་ཀྱི་ངང་ནས་གསོལ་བ་བཏབ་པའོ།། ༈ །།རྗེ་བཙུན་རྣལ་འབྱོར་གྱི་དབང་ཕྱུག་
བཞད་པ་རྡོ་རྗེ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་སྤྲོས་བྲལ་བདུད་རྩིའི་སྒྲ་དབྱངས་ཞེས་བྱ་བ། ཨ་ཧོ། །གདོད་ནས་སྤྲོས་པ་བྲལ་བའི་ཆོས་ཉིད་ཀྱི་ངང་ནས། །སྣ་ཚོགས་སྣང་བའི་སྒྱུ་འཕྲུལ་གཟུགས་སྐུ་རུ་སྟོན་པས། །ཟུང་འཇུག་བདེ་བ་ཆེན་པོའི་བདུད་རྩི་ཡིས་མྱོས་པའི། །དཔའ་བོ་ཌཱ་ཀིའི་ཕྱག་རྒྱ་མཛེས་པ་ལ་འདུད་དོ། །ཤིན་ཏུ་བརྒལ་བར་དཀའ་བའི་སྡུག་བསྔལ་གྱི་སྲིད་པར། །ངེས་འབྱུང་གཏིང་ནས་སྐྱེ་བའི་དྲི་བཞོན་གྱི་ཕོ་ཉས། །རྩེ་གཅིག་སྒྲུབ་པའི་སྣང་བྱེད་བར་མེད་དུ་བསྐུལ་བས། །ཉོན་མོངས་འཆིངས་བརྒྱའི་མུན་པ་བཅོམ་པ་ལ་འདུད་དོ། །ཐོབ་པར་དཀའ་བའི་སྙན་བརྒྱུད་བདུད་རྩི་ཡི་ཐིགས་པས། །རང་རྒྱུད་ཞིང་ས་གཤིན་པོར་བར་མེད་དུ་བྲན་ནས། །ཚེ་གཅིག་སྐུ་བཞིའི་འབྲས་བུའི་གོ་འཕང་ལ་གཤེགས་པའི། །ཧེ་རུ་ཀ་དཔལ་འཁོར་ལོའི་མགོན་པོ་ལ་འདུད་དོ། །ཡས་བབས་མས་བརྟན་དགའ་བཞི་བདེ་སྟོང་གི་བདུད་རྩིས། །རྩ་གསུམ་འཁོར་ལོའི་མདུད་པ་དབུ་མ་རུ་གྲོལ་བས། །ཟག་བཅས་གཟུགས་ཀྱི་འཁོར་ལོ་ས་བཅུ་རུ་སྨིན་པའི། །དཀྱིལ་འཁོར་ཀུན་གཙོ་རྣལ་འབྱོར་དབང་ཕྱུག་ལ་འདུད་དོ། །སྲོག་དང་རྩོལ་བའི་རྒྱུ་བ་དྷཱ་ཏི་རུ་བཅིལ་ནས། །ཐབས་ཤེས་ཡི་གེའི་འཁོར་ལོ་མགྲིན་པ་རུ་སྨིན་ནས། །སྣང་གྲགས་རྡོ་རྗེའི་སྒྲ་དབྱངས་ཟད་མེད་དུ་བསྒྱུར་བའི། །ཆོས་ཕུང་བརྒྱད་ཁྲི་བཞི་སྟོང་ངོ་བོ་ལ་འདུད་དོ། །གཟུང་འཛིན་རྟོག་
པའི་དྲི་བཞོན་གཉུག་མ་རུ་ཐིམ་པས། །མཁྱེན་དང་བརྩེ་བའི་ཉི་ཟླ་བློ་བྲལ་དུ་ཤར་ཏེ། །ཆོས་ཅན་སྤྲོས་པའི་དྲྭ་བ་ཆོས་ཉིད་དུ་ཐིམ་པའི། །ཀུན་ཁྱབ་ལྷན་སྐྱེས་ཕྱག་རྒྱ་ཆེན་པོ་ལ་འདུད་དོ། །བུམ་གསང་ཤེས་རབ་ཡེ་ཤེས་མཉམ་བཞག་གི་དམ་ཚིག །སྐུ་གསུང་ཐུགས་མཆོག་ལྷན་སྐྱེས་བདེ་ཆེན་དུ་བཅིངས་པས། །གནས་ཡུལ་དུར་ཁྲོད་དཔའ་བོ་ཌཱ་ཀི་ཡི་གྲོང་ཁྱེར། །སྤྲོ་དང་སྡུད་མཛད་བརྟུལ་ཞུགས་གྲུབ་བརྙེས་ལ་འདུད་དོ། །རླུང་སེམས་རྟོག་པའི་འཕྲོ་འདུ་ཡེ་ཤེས་སུ་རོལ་པས། །བཀོད་པ་ལུས་ཀྱི་རྫུ་འཕྲུལ་འགག་མེད་དུ་བསྒྱུར་ནས། །མཐོང་ཐོས་དྲན་རེག་འགྲོ་ཀུན་གཏན་བདེ་ལ་རེག་པའི། །གྲུབ་པའི་མཚན་མ་མངོན་དུ་བརྙེས་པ་ལ་འདུད་དོ། །ཕྱི་ལྟར་གང་སྣང་དེར་སྟོན་སྤྲུལ་པ་ཡི་དཀྱིལ་འཁོར། །ནང་ལྟར་ཁ་སྦྱོར་བདེ་ཆེན་ལོངས་སྤྱོད་ཀྱི་རྫོགས་སྐུ། །གསང་བ་ཟབ་ཞི་སྤྲོས་བྲལ་ཆོས་དབྱིངས་སུ་རོལ་པའི། །སྐུ་གསུམ་དབྱེར་མེད་རྣལ་འབྱོར་དབང་ཕྱུག་ལ་འདུད་དོ། །དངོས་ཡིད་ལས་བྱུང་ཤེས་རབ་ཌ་ཀི་ཡི་ཕོ་ཉས། །ཨ་ཧོ་བདུད་རྩིའི་འབྲོས་འདེད་བར་མེད་དུ་སྦྱར་བས། །ཉོན་མོངས་རྟོག་ཚོགས་ཡང་དག་དབུ་མ་རུ་བཤད་པའི། །རྡོ་རྗེའི་རིག་འཛིན་བདེ་བའི་བདག་ཉིད་ལ་འདུད་དོ། །ཁྱོད་མཚན་ནོར་བུའི་དོ་ཤལ་རྣ་ལུང་དུ་དཔྱངས་པས། །ངན་སོང་འགྲོ་བར་སྤྱོད་པའི་དབུལ་བ་ཀུན་སེལ་ཏེ། །གཏན་བདེའི་འབྱོར་པའི་
དཔལ་གྱིས་མངོན་པ་རུ་ཕྱུག་པའི། །ཐུགས་རྗེ་ཚད་མེད་སྤྲུལ་པའི་འཁོར་ལོ་ལ་འདུད་དོ། །མཉམ་གཞག་རང་དབང་བསྒྱུར་བ་རྩེ་གཅིག་གི་རྣལ་འབྱོར། །མཉམ་རྗེས་དབྱེར་མེད་སྤྲོས་བྲལ་ཆེན་པོ་རུ་དག་ཅིང་། །སྣང་སེམས་མི་ཕྱེད་ཆོས་ཉིད་རོ་གཅིག་གི་ཀློང་དུ། །སྒོམ་མེད་སྐུ་གསུམ་རང་རྩལ་རྫོ་བ ས་པ་རུ་ཤོག་ཅིག །སྣང་སྟོང་བརྗོད་པའི་མཐའ་བྲལ་རང་རིག་གི་ངོ་བོ། །རྟག་ཆད་མཚན་མ་ཉེར་ཞི་བློ་བྲལ་གྱི་སྦུབས་སུ། །ཡེངས་མེད་འཛིན་བྲལ་བདེ་ཆེན་འཁོར་ལོ་རུ་སྤྱོད་པའི། །ཕྱག་རྒྱ་ཆེན་པོ་མངོན་དུ་གྱུར་པ་རུ་ཤོག་ཅིག །རང་ལུས་རྡོ་རྗེ་ཕུང་པོ་གདན་གསུམ་དུ་དག་ཅིང་། །འགྲོ་འོང་རླུང་ཀུན་སྐྱེ་མེད་བཟླས་པ་རུ་རྫོགས་ཏེ། །གཉིས་སྣང་འོད་གསལ་སྤྲོས་བྲལ་ཆེན་པོ་རུ་སྨིན་པའི། །ཉམས་ལེན་མཐའ་རུ་ཕྱིན་པར་བྱིན་གྱིས་རང་རློབས་ཤིག །དེ་སྐད་དུས་ཀུན་རྗེ་བཙུན་ཆེན་པོ་ཡི་རྣམ་ཐར། །མཐོང་ཐོས་རྗེས་སུ་སྨོན་པའི་དྲན་འཛིན་ལས་སྐྱེས་པའི། །འགག་མེད་རྡོ་རྗེའི་ཐོལ་གླུ་བསྒྱུར་བ་ཡི་དགེ་བས། །འགྲོ་ཀུན་བློ་བྲལ་གཉུག་མ་མཐོང་བ་རུ་ཤོག་ཅིག། ༈ །།རིག་འཛིན་འཇིགས་མེད་གླིང་པ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་– བདེ་སྟོང་ཌཱ་ཀིའི་སྒྲ་དབྱངས་ཞེས་བྱ་བ། ཨ་ཧོ། གདོད་ནས་འཇིགས་མེད་བདེ་ཆེན་ཆོས་སྐུ་ཡི་ཀློང་ནས། །ཁ་སྦྱོར་ཡན་ལག་བདུན་ལྡན་མཚན་དཔེ་རུ་བཞད་པས། །སྐལ་བཟང་འགྲོ་ཀུན་ཐར་པའི་གླིང་མཆོག་ལ་
སྦྱོར་བའི། །འོད་གསལ་རྫོགས་ཆེན་སྟོན་པ་སྙིང་དབུས་ནས་དྲན་བྱུང་། །དལ་འབྱོར་དོན་དང་ལྡན་པར་བྱིན་གྱིས་རང་རློབས་ཤིག །རྣམ་པ་ཀུན་བྲལ་ཟུང་འཇུག་ཆོས་དབྱིངས་ཀྱི་ཀློང་ནས། །རྣམ་བཅས་གདན་གསུམ་སྒྱུ་འཕྲུལ་དྲྭ་བ་རུ་སྟོན་པས། །རྣམ་མང་ཞི་དང་ཁྲོ་བོའི་ངོ་བོ་རུ་བཞུགས་པའི། །རྣམ་ཐར་ཡོངས་རྫོགས་གཟུགས་ཀྱི་འཁོར་ལོ་ལ་འདུད་དོ། །གཡོ་བྱེད་རླུང་གི་འཁོར་ལོ་ཡི་གེ་རུ་དེངས་པས། །གྲག་སྟོང་བརྗོད་པ་བྲལ་བའི་ཆོས་ཕུང་གི་ངོ་བོ། །རྣམ་ཀུན་མཆོག་ལྡན་ཀློང་ལྔའི་གསང་མཛོད་ནས་ཤར་བའི། །ལོངས་སྤྱོད་ཡོངས་རྫོགས་གསུང་གི་ངོ་བོ་ལ་འདུད་དོ། །ཨེ་ཝཾ་མཉམ་པར་རོལ་པའི་བདེ་ཆེན་གྱི་ཀློང་ནས། །ཉོན་མོངས་བཅུ་དྲུག་དགའ་བའི་ཡེ་ཤེས་སུ་བཞད་པས། །རྟོག་བྲལ་འོད་གསལ་ཆོས་སྐུའི་རྒྱལ་ས་རུ་བཞུགས་པའི། །འགྱུར་མེད་གཉུག་མ་ཐུགས་ཀྱི་རྡོ་རྗེ་ལ་འདུད་དོ། །ངོ་བོ་མཚན་ཉིད་མེད་པས་རྟག་པ་ནི་མ་ཡིན། །རང་བཞིན་བསམ་གྱིས་མི་ཁྱབ་ཆད་མཐའ་དང་བྲལ་བའི། །ཟུང་འཇུག་བློ་ལ་མི་གནས་དོན་དམ་གྱི་བདེན་པ། །མཐའ་བྲལ་དབུ་མ་ཆེན་པོའི་ངོ་བོ་ལ་འདུད་དོ། །ཕྱི་ནང་གཞན་གསུམ་རྟོག་པའི་མཚན་མ་ཡི་ཆོས་ཀུན། །ལྷན་ཅིག་སྐྱེས་པའི་ཡེ་ཤེས་ཆེན་པོ་རུ་ཐིམ་པས། །གཟུང་འཛིན་རྣམ་སྤང་མི་ཕྱེད་འཕོ་མེད་ཀྱི་ཐིག་ལེ། །ཁྱབ་བདལ་ཕྱག་རྒྱ་ཆེན་པོའི་ངོ་བོ་ལ་འདུད་དོ། །ཀ་དག་
གདོད་ནས་སྐྱེ་མེད་ཆོས་སྐུ་ཡི་སྦུབས་སུ། །ལྷུན་གྲུབ་རང་རྩལ་འགགས་མེད་སྣང་བཞི་ཡི་ངོ་བོ། །ཟུང་འཇུག་ཁྱད་ཆོས་དྲུག་ལྡན་དགོངས་པ་ལ་རོལ་པའི། །བློ་བྲལ་རྫོགས་པ་ཆེན་པོའི་ངོ་བོ་ལ་འདུད་དོ། །རྨད་བྱུང་མཁྱེན་པའི་ལང་ཚོའི་སྒྱུ་རྩལ་གྱིས་བརྒྱན་ཅིང་། །འཁོར་ལོ་གསུམ་ལྡན་གསེར་གྱི་དྲྭ་བ་ཡིས་གཡོགས་ཏེ། །བསྟན་དང་འགྲོ་བའི་ཁུར་ཆེན་ཐར་ལམ་དུ་འདེགས་པའི། །མཁས་གྲུབ་གཉིས་ལྡན་ས་སྲུང་དབང་པོ་ལ་འདུད་དོ། །གུས་པའི་ཡིད་ལས་སྐྱེས་པའི་རྡོ་རྗེ་ཡི་ཐོལ་གླུས། །དཔལ་ལྡན་བླ་མར་གསོལ་འདེབས་དུས་ཀུན་ཏུ་བསྒྱུར་བས། །སྐྱེ་བའི་ཕྲེང་བ་ཀུན་ཏུ་ཁྱོད་རྗེས་སུ་ཞུགས་ཤིང་། །གསང་སྔགས་སྙིང་པོའི་བསྟན་པ་འཛིན་པ་རུ་ཤོག་ཅིག །ཀུན་རྫོབ་གསལ་སྣང་གདན་གསུམ་ལྷ་སྐུ་རུ་བལྟ་ཞིང་། །དོན་དམ་ཞུ་བདེའི་སྟོང་ཉིད་མཚུངས་ལྡན་དུ་རོལ་བས། །བདེན་གཉིས་དབྱེར་མེད་གཟུགས་སྐུའི་ཕྲིན་ལས་ལ་རོལ་ཏེ། །ཚོགས་གཉིས་མྱུར་དུ་རྫོགས་པར་བྱིན་གྱིས་རང་རློབས་ཤིག །བདེ་དང་སྟོང་པ་གཉིས་མེད་དགའ་བཞི་ཡི་ཕོ་ཉས། །ལྷན་སྐྱེས་ཨ་ཝ་དྷུ་ཏིའི་མཁའ་དབྱིངས་ལ་རོལ་བས། ། དོན་དམ་ཨེ་ཝཾ་མཉམ་སྦྱོར་རྣམ་ཀུན་གྱི་མཆོག་ལྡན། །འཕོ་མེད་ཟུང་འཇུག་ཕྱག་རྒྱར་ཐིམ་པ་རུ་ཤོག་ཅིག །དོན་དམ་བརྗོད་པའི་མཐའ་བྲལ་རང་རིག་གི་ཡེ་ཤེས། །ཡོངས་གྲུབ་བཅོས་བསྒྱུར་བྲལ་བའི་མཉམ་
བཞག་ཏུ་གོམས་པས། །ཀུན་བརྟགས་འཁྲུལ་པའི་ཚོགས་ཀུན་རང་ངོ་རུ་དག་སྟེ། །གཞན་དབང་སྲིད་པའི་འཁྲུལ་འཁོར་འགག་པ་རུ་ཤོག་ཅིག །དེ་སྐད་གསོལ་བ་འདེབས་པའི་རྡོ་རྗེ་ཡི་ཐོལ་གླུ། །མགྲིན་པ་ལོངས་སྤྱོད་འཁོར་ལོའི་དཀོར་མཛོད་ནས་བླངས་པས། །རྟོག་འཛིན་འཁྲུལ་པར་སྤྱོད་པའི་འགྲོ་བ་དེ་མ་ལུས། །བདེ་གཤེགས་སྙིང་པོའི་ངོ་བོར་གྲོལ་བ་རུ་ཤོག་ཅིག། ༈ །།རྗེ་གྲུབ་ཐོབ་ཆེན་པོ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་སྐུ་གསུམ་དྲྭ་བ་ཅེས་བྱ་བ། ན་མོ་གུ་ར་ཝེ། སྣང་སྟོང་ཟུང་འཇུག་བདེ་བ་ཆེན་པོ་ཡི་ཀློང་ནས། །གང་འདུལ་སྒྱུ་མར་རོལ་པའི་ཀུན་སྣང་གི་ཡེ་ཤེས། །གདན་གསུམ་དབྱེར་མེད་ལྷ་ཡི་འཁོར་ལོ་ལ་རོལ་བའི། །བརྟན་གཡོ་ཀུན་ཁྱབ་རྡོ་རྗེའི་སྐུ་མཆོག་ལ་འདུད་དོ། །འགྲོ་འོང་རླུང་གི་རྒྱུ་བ་དབུ་མ་རུ་བཅིལ་ཏེ། །གྲགས་སྟོང་གཞོམ་མེད་ནཱ་དའི་ངོ་བོ་རུ་རྫོགས་པས། །སྒྲ་ཚིག་ལས་འདས་ཆགས་བྲལ་སོར་རྟོག་གི་མཁའ་དབྱིངས། །གསལ་སྟོང་དབྱེར་མེད་རྡོ་རྗེའི་གསུང་མཆོག་ལ་འདུད་དོ། །ཐབས་ཤེས་ལྷན་སྐྱེས་ཌཱ་ཀིའི་འཁོར་ལོ་རུ་རོལ་པས། །ཁ་སྦྱོར་རྩ་གནས་མདུད་པ་དབུ་མ་རུ་གྲོལ་ཏེ། །བདེ་སྟོང་དགའ་བཞི་སྒྱུ་འཕྲུལ་དྲྭ་བ་རུ་རོལ་པའི། །སྤྲོས་པ་ཀུན་བྲལ་རྡོ་རྗེའི་ཐུགས་མཆོག་ལ་འདུད་དོ། །རྟག་ཆད་མཚན་མའི་གཟུང་འཛིན་ཀ་དག་ཏུ་རོལ་པས། །ཡིད་བྱེད་རྟོག་པའི་དྲྭ་བ་ལྷུན་གྲུབ་ཏུ་གྲོལ་ཏེ། །ཟུང་འཇུག་
ལྷན་ཅིག་སྐྱེས་པའི་ཆོས་ཉིད་དུ་ཤར་བའི། །སྐུ་གསུམ་དབྱེར་མེད་བདེ་བ་ཆེན་པོ་ལ་འདུད་དོ། །སྟོང་དང་སྙིང་རྗེ་ཟུང་འཇུག་ཞི་ཁྲོ་ཡི་རོལ་པས། །མ་ཧཱ་བྷྱོ་ཊའི་ལྗོངས་ཀུན་རྫོགས་ལྡན་ལ་སྦྱོར་ཏེ། །ངོ་མཚར་གྲུབ་པའི་རྫུ་འཕྲུལ་ཟད་མེད་དུ་སྟོན་པའི། །རྣལ་འབྱོར་དབང་ཕྱུག་ཧེ་རུ་ཀ་དཔལ་ལ་འདུད་དོ། །འཇིག་རྟེན་འཇིག་རྟེན་ལས་འདས་ཤེས་རབ་ཀྱི་མཁའ་འགྲོས། །འབར་འཛག་བདེ་སྟོང་བདུད་རྩིས་དབུ་མ་རུ་བྲན་པས། །ཉི་ཟླའི་རྒྱུ་བ་སྒྲ་གཅན་མཁའ་དབྱིངས་ལ་རོལ་ཏེ། །འཆི་མེད་འཇའ་ལུས་རྡོ་རྗེ་གྲུབ་པ་ལ་འདུད་དོ། །ལྷོ་མོན་ཚལ་ན་གནས་པའི་ཁུ་བྱུག་གི་གླུ་དབྱངས། དབྱར་སྐྱེས་གཞོན་ནུ་འདྲེན་པའི་སྐྱོ་གྲོགས་ལ་ཕེབས་བཞིན། །སྐུ་གསུང་ཐུགས་རྟེན་ཆུ་ཀླུང་ལྕགས་ཞུན་གྱི་སྐ་རགས། །འཆིང་བའི་བྱེད་ལས་ཕན་བདེའི་དགའ་སྟོན་དུ་ཕེབས་སོ། །དེ་སྐད་གསོལ་བ་འདེབས་པའི་རྡོ་རྗེ་ཡི་ཐོལ་ཀླུ། །མགྲིན་པ་ལོངས་སྤྱོད་འཁོར་ལོའི་དཀོར་མཛོད་ནས་བླངས་པས། །ཀུན་རྟོག་དགེ་བར་མཛའ་བའི་ཤིང་རྟ་ཡིས་དྲངས་པའི། །ཆོས་བཞིན་སྤྱོད་པའི་ཉིན་བྱེད་འབར་བ་རུ་ཤོག་གཅིག །ཕྱི་ལྟར་སྣོད་བཅུད་འཁྲུལ་པར་སྤྱོད་པ་ཡི་འགྲོ་ཀུན། །ནང་ལྟར་བདེ་ཆེན་གཉུག་མའི་ངོ་བོ་རུ་རོལ་ཏེ། །སྐུ་བཞི་དབྱེར་མེད་ཟུང་འཇུག་ཐང་སྟོང་གི་རྒྱལ་པོར། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ།། ༈ །།དམ་ཅན་
ཆོས་སྐྱོང་ལ་ཕྲིན་དུ་བཅོལ་བའི་རྡོ་རྗེའི་ཐོལ་གླུ་ཧེ་རུ་ཀའི་སྒྲ་དབྱངས་ཞེས་བྱ་བ། ཨ་ཧོ། །ཚོགས་བརྒྱད་དབུ་མར་ཐིམ་པའི་རང་རྩལ་ལས་བྱུང་བའི། །ཐབས་ཤེས་མཉམ་སྦྱོར་བདེ་སྟོང་ཟུང་འཇུག་གི་ངོ་བོ། །དམ་ཅན་ཆོས་སྐྱོང་། རྒྱ་མཚོ་སྐྱོ་གྲོགས་ལ་ཕེབས་དང་། །ང་ཡི་གཟུང་འཛིན་རྟོག་པ་ཟད་ས་རུ་བསྒྲལ་མཛོད། །ཀུན་གཞི་བདེ་གཤེགས་སྙིང་པོ་འཁྲུལ་གྲོལ་ལས་འདས་ཀྱང་། །སྣ་ཚོགས་སྣང་བའི་ཆོ་རོལ་ཨེ་དབྱིངས་སུ་བསྒྲལ་།། བའི། །ས་བཅུའི་བཀའ་རྟགས་འཆང་བ་གཟའ་བདུད་ཀྱི་རྒྱལ་པོ། །ང་ཡི་འཁྲུལ་པ་རང་གྲོལ་ཆེན་པོ་རུ་ཐོང་ཞིག །སྲིད་ཞི་ཀུན་ཁྱབ་སེམས་ཉིད་གཅིག་པུ་ཡི་ཆོ་འཕྲུལ། །དངོས་པོའི་བདེན་གྲུབ་བྲལ་བའི་ཟླ པདྨོ་རུ་རོལ་པའི། །ཤེས་རབ་དབྱིངས་ཀྱི་ཌ་ཀི་སྔགས་སྲུང་གི་རྒྱལ་མོ། །ང་ཡི་ཡིད་དཔྱོད་འོད་གསལ་ཆེན་པོ་རུ་སྒྲོལ་མཛོད། །སྣང་དང་སྟོང་པའི་མཚན་འཛིན་ཟུང་འཇུག་ཏུ་ཐིམ་པས། །སྤྲོས་བྲལ་བདེ་ཆེན་དཔའ་བོའི་སྣང་ཚུལ་དུ་སྟོན་ཅིང་། །ཁྲོ་ཆགས་སྒེག་པའི་ཉམས་ཅན་རྡོ་རྗེ་ཡི་ལེགས་པ། །ང་ཡི་གཉིས་སྣང་ཟད་པའི་ཐེག་པ་རུ་སྒྲོལ་མཛོད། ཨ་ཧོ། ཁྲག་གི་ཆུ་གཏེར་རྦ་རླབས་འཁྱིལ་བ་ཡི་ཀློང་ནས། །གར་དགུའི་ཕྱག་རྒྱ་དཔའ་བའི་ཡེ་ཤེས་ཀྱི་མགོན་པོ། །མཐིང་ནག་སྤྱན་གསུམ་མེ་འབར་དམ་ཚིག་ལ་བཞེངས་ནས། །སེམས་དང་སེམས་བྱུང་འཆོལ་བའི་དགྲ་བགེགས་ཀུན་གཞོམ་མཛོད། །གངས་རིའི་ཕྲེང་
བས་བསྐོར་བའི་ཁང་བཟང་གི་དབུས་སུ། །ཆུ་ཤེལ་གཞོན་ནུའི་དཔལ་འཛིན་སྨན་བཙུན་གྱི་ཌཱ་ཀི །བདེ་སྟོང་ལང་ཚོ་གསར་པའི་འཇོ་སྒེག་དང་སྦྲགས་ནས། །ཟུང་འཇུག་ཕྱག་རྒྱ་ཆེན་པོའི་ངལ་བསོ་ལ་སྦྱོར་མཛོད། །གདུག་པའི་སྣང་ཚུལ་སྟོན་པ་འཇིག་རྟེན་གྱི་མཁའ་འགྲོ། །ཞིང་སྐྱོང་འབྱུང་པོ་ཀུན་གྱི་སྡེ་དཔོན་དུ་བཞེངས་ནས། །རྣལ་འབྱོར་བུ་བཞིན་སྐྱོང་བ་དུར་ཁྲོད་ཀྱི་ལྷ་མོས། །ང་ཡི་རྟེན་དང་བརྟེན་པ་མེལ་ཚེ་ཡིས་སྐྱོངས་ཤིག །གཞན་ཡང་སྣང་ཚུལ་བརྗོད་བྲལ་ཕྱི་ནང་གི་བསྟན་སྲུང་། །ཕོ་རྒྱུད་མོ་རྒྱུད་སྤྲུལ་འཁོར་བཅས་པ་ཀུན་མ་ལུས། །ཧེ་རུ་ཀ་དཔལ་འབར་བའི་དམ་ཚིག་ལ་དགོངས་ཏེ། །རྟེན་ཅིང་འབྲེལ་འབྱུང་ལོག་པའི་བར་ཆད་ཀུན་བཟློག་ཅིག །ཁྱད་པར་འོད་གསལ་རྡོ་རྗེ་སྙིང་པོ་ཡི་བསྟན་པ། །རྣལ་འབྱོར་གསུམ་གྱི་ལམ་མཆོག་རྨད་བྱུང་གི་ནོར་བུ། །རྟག་པར་བསྟན་འཛིན་ཚོགས་ཀྱི་ཤིང་རྟ་ཡིས་དྲངས་ཏེ། །བོད་ཁམས་ཨོ་ཌི་བི་ཤ་གཉིས་པ་རུ་འགྱུར་མཛོད། །གཞན་ཡང་རི་སུལ་དབེན་པའི་བྲག་སྐྱིབས་ཀྱི་ཁང་བུར། །བསྐྱེད་རྫོགས་དོན་ལ་བརྩོན་པའི་དམ་བཅའ་ལ་འཇུག་ཀུན། །ཡིད་སྲུབ་སྦྱོར་བ་ཚུ མིང་གི་ལྷག་མ་རུ་བཅོམ་ནས། །ངེས་གསང་སྒྲུབ་པའི་རྒྱལ་མཚན་ཚུགས་པ་རུ་ཤོག་ཅིག །ཅེས་པ་འདི་ཡང་ཆོས་སྲུང་གི་ཚོགས་ལ་འདོད་དོན་གཞོལ་བའི་ཕྱིར་གང་ཤར་དུ་བླངས་པ་ཛ་ཡནྟུ། །།དགའ་སྟོན་ཚོགས་ཀྱི་འཁོར་ལོ་ཡི་རྟོགས་པ་
བརྗོད་པའི་རྡོ་རྗེའི་ཐོལ་གླུ་ཡོ་ག་གསུམ་གྱི་རྒྱན་ཅེས་བྱ་བ། ཨ་ཧོ། མ་སྐྱེས་མི་འགགས་སྤྲོས་པའི་མཚན་མ་ཀུན་བྲལ་ཞིང་། །ཡིད་བྱེད་རྟོག་པའི་དྲྭ་བ་རང་ངོ་རུ་གྲོལ་བའི། །ནང་གསལ་སྐྱེ་བ་མེད་པའི་ཡེ་ཤེས་ཀྱི་ཀློང་ཡངས། ། ཀ་དག་སྤྲོས་མཚན་བྲལ་བའི་དངོས་གྲུབ་ཞིག་ཞུའོ། །ཡུལ་ཅན་མཚན་མའི་དྲི་མ་རང་ངོ་རུ་དག་ཀྱང་། །ཡུལ་སྣང་ཡེ་ཤེས་ཆེན་པོར་གཉིས་མེད་དུ་རོལ་པས། །ཁ་སྦྱོར་ཡན་ལག་བདུན་ལྡན་ཚད་ཕེབས་ཀྱི་རིག་གདངས། །ལྷུན་གྲུབ་ཕྱིར་གསལ་ཆེན་པོའི་དངོས་གྲུབ་ཞིག་ཞུའོ། །ཟུང་འཇུག་བདེ་སྟོང་དབྱེར་མེད་ཡེ་ཤེས་ཀྱི་སྒྱུ་འཕྲུལ། །སྲིད་ཞི་གཉིས་ཀྱི་ཁམས་ལ་རང་བྱུང་དུ་ཁྱབ་པས། །འགྲོ་འོང་བྲལ་བཞིན་སྣ་ཚོགས་མཛད་པ་རུ་རོལ་པའི། །གང་འདུལ་སྤྲུལ་པའི་འཁོར་ལོའི་དངོས་གྲུབ་ཞིག་ཞུའོ། །ཐབས་ལྡན་ལུས་ཀྱི་དཀྱིལ་འཁོར་གདན་གསུམ་གྱི་གྲོང་དུ། །ཞི་དང་ཁྲོ་གར་སྣ་ཚོགས་སྒྱུ་འཕྲུལ་གྱི་དྲྭ་བ། །གཉིས་མེད་མཉམ་པར་སྦྱོར་བའི་རང་བྱུང་གི་ལྷ་ཚོགས། །གདོད་ནས་དབྱེར་མེད་རྟོགས་པའི་དངོས་གྲུབ་ཞིག་ཞུའོ། །འགྲོ་འོང་རླུང་གི་རྟོག་པ་དབུ་མ་རུ་རོལ་པས། །འབར་འཛག་བདུད་རྩིའི་ཐིགས་ཕྲེང་ཟད་མེད་དུ་གཡོ་བས། །དགའ་བཞིའི་གྲོང་དུ་བདེ་སྟོང་ཡེ་ཤེས་ཉིད་འཕེལ་བའི། །ཉོན་མོངས་རང་ངོར་གྲོལ་བའི་དངོས་གྲུབ་ཞིག་ཞུའོ། ཐབས་ཤེས་སྣང་སྟོང་གཉིས་མེད་ཤིང་རྟ་ཡི་འཕངས་སུ། །ཨེ་ཝཾ་མཉམ་
པར་རོལ་པའི་ཉིན་བྱེད་ཀྱི་ཐིག་ལེ། །དམིགས་བསམ་བརྗོད་པ་བྲལ་བའི་མཁའ་དབྱིངས་སུ་རོལ་པའི། །ཟུང་འཇུག་བདེ་སྟོང་དབྱེར་མེད་དངོས་གྲུབ་ཞིག་ཞུའོ། །ཡོད་མེད་རྟག་ཆད་སྐྱེ་འགག་འགྲོ་འོང་གི་རྟོག་པ། །བློ་དང་བྲལ་བའི་ཡེ་ཤེས་འཁོར་ལོ་རུ་ཟད་པས། །ཟབ་ཞི་སྤྲོས་བྲལ་སྨྲ་བསམ་བརྗོད་འདས་ཀྱི་ཆོས་ཉིད། །ཀུན་ཁྱབ་འཁོར་འདས་དབྱེར་མེད་དངོས་གྲུབ་ཞིག་ཞུའོ། །ངོ་བོ་ཀུན་ཏུ་བརྟགས་པའི་མཚན་མ་དེ་བྲལ་ཡང་། །རང་བཞིན་གང་དུའང་དམིགས་མེད་བདེན་གཉིས་ཀྱི་མཚན་ཉིད། །ཐུགས་རྗེས་འཇུག་པའི་ཡུལ་ཀུན་སྣ་ཚོགས་སུ་སྟོན་པ། །སྐུ་གསུམ་རང་ངོར་རྫོགས་པའི་དངོས་གྲུབ་ཞིག་ཞུའོ། །མ་སྐྱེས་གདོད་ནས་དག་པའི་ཀ་དག་གི་རིག་གདངས། །མ་འགགས་རང་རྩལ་དབྱེར་མེད་ལྷུན་གྲུབ་ཀྱི་རོལ་པ། །ཐ་དད་ཟུང་འཇུག་འོད་གསལ་དྲྭ་བ་ཡི་འཁོར་ལོ། །གཉུག་མ་རང་ངོར་གྲོལ་བའི་དངོས་གྲུབ་ཞིག་ཞུའོ། །བཟའ་དང་བཅའ་བར་བཅས་པའི་འདོད་ཡོན་གྱི་རོལ་པ། །ཐབས་ཤེས་གཉིས་སུ་མེད་པའི་ཕྱི་ནང་གི་འབྱོར་ཚོགས། །ཟག་བཅས་རྫས་ཀྱིས་ཟག་མེད་བདེ་བ་མཆོག་འཕེལ་བའི། །ཚིམ་པ་དྲུག་དང་ལྡན་པའི་དངོས་གྲུབ་ཞིག་ཞུའོ། །ཀུན་གཞི་འཁྲུལ་གྲོལ་ལས་འདས་འཛིན་མ་ཡི་ལྟོ་བ། །རིག་པ་རང་རྩལ་རྫོགས་པའི་སྣ་ཚོགས་ཀྱི་འབྲས་བུ། །ཐབས་ཤེས་གཉིས་མེད་ཡེ་ཤེས་དྲྭ་བ་རུ་རོལ་
པའི། །བཱ་ལི་གཏོར་ཚོགས་རྒྱ་མཚོའི་དངོས་གྲུབ་ཞིག་ཞུའོ། །ཟུང་འཇུག་རྟོགས་པའི་བདུད་རྩིའི་ཐིགས་ཕྲེང་གིས་རེག་པས། །སྲོག་རྩོལ་རླུང་ཀུན་སྒྱུ་འཕྲུལ་དྲྭ་བ་རུ་མྱོས་ནས། །གང་ཤར་སྣང་བ་གཏད་མེད་རང་ངོ་རུ་གྲོལ་བའི། །ཐབས་ལམ་གསང་སྔགས་བཏུང་བའི་དངོས་གྲུབ་ཞིག་ཞུའོ། །རྟེན་འབྲེལ་བཅུ་གཉིས་འཁོར་བར་འཁོར་བ་ཡི་དགྲ་སྡེ། །ཀུན་སྣང་ལྷ་ཡི་ཕྱག་རྒྱའི་དཔུང་ཆེན་དེས་བཅོམ་པས། །ཕུང་ཚོགས་སྒྱུ་འཕྲུལ་དྲྭ་བའི་འཁོར་ལོ་རུ་རོལ་པ། །མ་ཧཱ་ཚྭ་སའི་བཟའ་བའི་དངོས་གྲུབ་ཞིག་ཞུའོ། །གནས་ཡུལ་དུར་ཁྲོད་ཕྱི་ནང་རོལ་པ་ཡི་ཞིང་ཀུན། །རྣམ་ཐར་གསུམ་གྱི་མཁའ་རུ་གཏད་མེད་དུ་མཆོད་པས། །མ་ཚོགས་མཁའ་འགྲོ་རྒྱ་མཚོ་དགྱེས་པ་མཆོག་བསྐྱེད་པའི། །གདོད་ནས་རྣམ་དག་ཆེན་པོའི་དངོས་གྲུབ་ཞིག་ཞུའོ། །དྲི་མར་བཅས་པའི་རྩ་རླུང་ཐིག་ལེ་ཡི་ཚོགས་ཀུན། །སྐུ་གསུམ་དབྱེར་མེད་ལྷ་ཡི་འཁོར་ལོ་རུ་དག་ནས། །ཀུན་སྣང་ཕྱག་རྒྱ་ཆེན་པོའི་ངོ་བོ་རུ་འགྱུར་བའི། །ཐབས་མཆོག་བསྐྱེད་པའི་རིམ་པའི་དངོས་གྲུབ་ཞིག་ཞུའོ། །དཀར་དམར་དཔའ་བོ་ཌཱ་ཀི་ཐབས་ཤེས་ཀྱི་གར་མཁན། །གཅིག་ཏུ་མཉམ་པར་རོལ་པའི་བཅུ་དྲུག་གི་བདེ་ཆེན། །ཟག་བྲལ་འོད་གསལ་དབུ་མའི་མཁའ་དབྱིངས་སུ་ཤར་བའི། །ཤེས་རབ་རྫོགས་པའི་རིམ་པའི་དངོས་གྲུབ་ཞིག་ཞུའོ། །དཔྱད་དུ་མེད་པས་ངོ་བོ་རྟག་པ་ནི་མ་
ཡིན། །འཁོར་འདས་ཀུན་ཁྱབ་རང་བཞིན་ཆད་མཐའ་དང་བྲལ་བའི། །འདུས་མ་བྱས་པའི་ཐ་མལ་རང་བྱུང་གི་རིག་པ། །གཉིས་མེད་མཉམ་པར་སྦྱོར་བའི་དངོས་གྲུབ་ཞིག་ཞུའོ། །སྒྲོན་དྲུག་འཇའ་ཟེར་བཞད་པའི་འཛུམ་དཀར་གྱིས་བསུས་པས། །འགྲོ་འོང་རྟོག་པ་ཚད་ཕེབས་རང་ངོ་རུ་གྲོལ་ནས། །སྣང་བཞིའི་ལམ་ཀུན་ཡང་དག་དབུ་མ་རུ་རོལ་པ། །ཟག་བཅས་འོད་སྐུར་ཐིམ་པའི་དངོས་གྲུབ་ཞིག་ཞུའོ། །རང་བྱུང་བྲག་སྐྱིབས་མེ་ཏོག་འབྲས་བུ་ཡིས་བརྒྱན་ཅིང་། །ལྗོན་ཤིང་ལང་ཚོ་བཀྲ་བའི་བསིལ་གཡབ་དང་བཅས་པ། །བདེ་སྟོང་བུང་བ་གཞོན་ནུའི་འཕུར་རྩལ་དེ་གཡོ་བའི། །ཆོས་བརྒྱད་རང་ངོར་གྲོལ་བའི་དངོས་གྲུབ་ཞིག་ཞུའོ། ཨ་ཧོ། རིག་པ་གདོད་ནས་དག་པའི་མན་ཤེལ་གྱི་སྦུབས་སུ། །ཚོགས་བརྒྱད་ཉེར་ལེན་བྲལ་བའི་རང་བྱུང་གི་ཡེ་ཤེས། །ཁྱད་ཆོས་དྲུག་ལྡན་མ་འགག་འཆར་གཞི་རུ་གནས་པའི། །ཀ་དག་ཆོས་ཀྱི་སྐུ་ཡི་སྨོན་ལམ་ཞིག་ཞུའོ། །རང་སྣང་ཉིན་བྱེད་གསར་པའི་ཕོ་ཉ་ཡིས་བསུས་པས། །ཁ་སྦྱོར་བཞི་ལྡན་རྡོ་རྗེ་སེམས་དཔའ་ཡི་ཆུ་སྐྱེས། །ཟག་བྲལ་རྣམ་པར་གྲོལ་བའི་སྣང་སྟོང་གི་རོལ་པ། ། ལྷུན་གྲུབ་ལོངས་སྤྱོད་རྫོགས་སྐུའི་སྨོན་ལམ་ཞིག་ཞུའོ། །གནས་རིགས་ཁམས་ལ་དམིགས་པའི་འདུ་ཤེས་དེ་བྲལ་ཡང་། །མོས་དང་བསམ་པའི་སྐལ་པ་ཇི་བཞིན་དུ་སྟོན་ནས། །ཐུགས་རྗེའི་ཡུལ་ཀུན་ཐར་པའི་
གོ་འཕང་དུ་སྦྱོར་བའི། །གཉིས་མེད་ཟུང་འཇུག་སྤྲུལ་སྐུའི་བླ་མ་དེ་མཁྱེན་ནོ། །མཁའ་ལ་ལྷ་རྣམས་མནྡཱ་ར་བ་ཡི་ཆར་འབེབས། །ས་ལ་འགྲོ་ཀུན་རྫོགས་ལྡན་དགའ་སྟོན་ལ་སྤྱོད་ཅིང་། །སྣོད་བཅུད་ཕྱི་ནང་བཀྲ་ཤིས་དགེ་མཚན་གྱིས་ཕྱུག་པའི། །གནས་སྐབས་དོན་རྣམས་ལྷུན་གྲུབ་སྨོན་ལམ་ཞིག་ཞུའོ། །འཁོར་གསུམ་རྣམ་པར་དག་པའི་ཤིང་རྟ་ཡི་བཞོན་པར། །བསོད་ནམས་ཡེ་ཤེས་ཚོགས་གཉིས་ཉིན་བྱེད་ཀྱི་དཔལ་ཡོན། །མི་གནས་མཐའ་གྲོལ་ཆོས་དབྱིངས་མཁའ་ཁམས་སུ་བསྔོས་པས། །དོན་གཉིས་ལྷུན་གྱིས་གྲུབ་པའི་སྨོན་ལམ་ཞིག་ཞུའོ། །མཚན་དཔེ་ནང་གསལ་ལ་གནས་དོན་དམ་གྱི་སངས་རྒྱས། །སྒྲ་ཚིག་རང་མཚན་ལས་འདས་ངེས་དོན་གྱི་དམ་ཆོས། །འགྲོ་འོང་རྟོག་པ་རང་གྲོལ་ཚད་ཕེབས་ཀྱི་དགེ་འདུན། །དཀོན་མཆོག་རིན་ཆེན་གསུམ་གྱི་བཀྲ་ཤིས་དེ་ཤོག་ཅིག །ཅེས་པའང་འཁོར་ལོའི་མགོན་པོའི་བྱིན་རླབས་ཀྱིས་བསྐྱངས་པའི་གཞོན་ནུ་ཨ་བྷཱ་ཡས་སོ།། ༈ །།རང་གཞན་གྱི་རྟོགས་པ་བརྗོད་པའི་རྡོ་རྗེའི་ཐོལ་གླུ་དཔེ་དོན་འབྲེལ་བ་ཞེས་བྱ་བ། ཨ་ཧོ། ཆོས་ཀུན་གདོད་ནས་སྐྱེ་མེད་ཆེན་པོ་རུ་ཐིམ་པས། །ཟུང་འཇུག་རིག་སྟོང་དབྱེར་མེད་དོན་དམ་གྱི་སངས་རྒྱས། །འཁོར་འདས་མིང་བཏགས་ཟད་པའི་བློ་བྲལ་གྱི་རོལ་པ། །འདུ་འབྲལ་སྤངས་པའི་གཞོན་ནུ་བུམ་སྐུ་ལ་འདུད་དོ། །རྙེད་དཀའི་དལ་འབྱོར་སྤུ་སྡུག་མཚར་བ་ཡི་ཀློང་དུ། །རྒྱུ་འབྲས་བསླུ་མེད་
དགེ་བར་སྤྱོད་པ་ཡི་འདབ་གཤོག །སྐྱོ་ཤས་ངེས་འབྱུང་དྲི་བཞོན་གཡོ་བ་དང་འགྲོགས་ཏེ། །སྡུག་བསྔལ་ཀུན་བྲལ་གཏན་བདེའི་མཁའ་དབྱིངས་ལ་འཕྱོ་བའི། །ང་ཅག་འདུན་པ་འདབ་ཆགས་རྒོད་པོ་ལ་ཤོར་སོང་། །ཆོས་བརྒྱད་འཆིང་བ་རབ་གྲོལ་བས་མཐའ་ཡི་ཚལ་དུ། །ཟུང་འཇུག་གསང་སྔགས་ཆུ་རྒྱུན་བཏུང་བ་ལ་རོལ་ཅིང་། །འགྱུར་མེད་སྐུ་བཞིའི་སྨན་ལྗོངས་ངོས་ཡངས་སུ་རྩེ་ནས། །བསམ་གཏན་གཉུག་མའི་བྲག་སྐྱིབས་གནས་མལ་དུ་བཟུང་བའི། །ང་ཅག་འདུན་པ་སྐྱེད་ཚལ་རི་དྭགས་ལ་ཤོར་སོང་། །སྐྱབས་གསུམ་རང་ངོ་ཤེས་པའི་གྲིབ་བསིལ་ལ་བསྟི་ཞིང་། །གཞན་ཕན་པདྨ་གཞོན་ནུའི་ཟེའུ་འབྲུ་ལ་ཆགས་པས། །ཕར་ཕྱིན་སྤྱོད་པ་རྒྱ་མཚོའི་སྦྲང་རྩི་ཡིས་མྱོས་ཏེ། །ལུང་རྟོགས་ཆོས་ཚུལ་རྒྱ་མཚོ་མགྲིན་གླུ་རུ་ལྡིར་བའི། །ང་ཅག་འདུན་པ་སྨན་ལྗོངས་བུང་བ་ལ་ཤོར་སོང་། །རང་རྒྱུད་དུལ་བའི་ཞིང་ས་གཤིན་པོ་ཡི་ངོགས་སུ། །སྨིན་གྲོལ་བདུད་རྩིའི་ཆར་གྱིས་བར་མེད་དུ་བྲན་པས། །ཐར་པའི་ས་བོན་བསྐྱེད་རྫོགས་ཕང་ཕུང་དུ་གཡོ་བར། །ཟུང་འཇུག་བདེ་ཆེན་སྐུ་བཞིའི་འབྲས་བུ་ཡིས་མཛེས་པ། །ང་ཅག་འདུན་པ་སྟོན་ཀའི་ལོ་ཏོག་ལ་ཤོར་སོང་། །འཆད་རྩོད་རྩོམ་པའི་སྤྲིན་དཀར་ལང་ལོང་དུ་གཡོ་ཞིང་། །གཞན་ཕན་སེམས་བསྐྱེད་དབྱར་གྱི་རྔ་གསང་དེ་བརྡུངས་པས། །སྐལ་བཟང་ཐིག་ལེས་སྒེག་པའི་འདབ་ཆགས་
ཀྱི་ཚོགས་ཀུན། །དགའ་དང་གུས་པའི་ཟློས་གར་སྣ་ཚོགས་སུ་རྩེ་བའི། །ང་ཅག་འདུན་པ་དབྱར་གྱི་རྨ་བྱ་ལ་ཤོར་སོང་། །ཚོགས་གཉིས་འབྲས་བུས་ཕྱུག་པའི་ནགས་ཚལ་གྱི་དབུས་ནས། །དོན་གཉིས་གཅིག་ཅར་འགྲུབ་པའི་གླུ་དབྱངས་ཀྱི་རོལ་མོས། །སྲིད་པའི་སྡུག་བསྔལ་བྲལ་བའི་ངལ་བསོ་ལ་སྦྱར་ཅིང་། །མྱང་འདས་ཐར་པའི་དགའ་ཚལ་མངོན་སུམ་དུ་འགུགས་པའི། །ང་ཅག་འདུན་པ་དཔྱིད་ཀྱི་ཁུ་བྱུག་ལ་ཤོར་སོང་། །ཐོས་པའི་གངས་རིའི་སྤོ་ལ་གནས་མལ་དུ་བཅས་ཤིང་། །བསམ་བྱུང་རྣམ་པར་དག་པའི་གཡུ་རལ་གྱིས་མཛེས་ཏེ། །སྒོམ་སྤང་འཕགས་པའི་ང་རོ་བར་མེད་དུ་སྒྲོགས་བས། །ལོག་རྟོག་འཁྲུལ་པའི་རི་དྭགས་ཆོས་དབྱིངས་སུ་བཅིལ་བའི། །ང་ཅག་འདུན་པ་སེང་ལྕམ་དཀར་མོ་ལ་ཤོར་སོང་། །སྣང་དང་སྟོང་པ་ཟུང་འཇུག་ཤིང་རྟ་ལ་ཞོན་ནས། །བསྐྱེད་དང་རྫོགས་པའི་འོད་ཟེར་བར་མེད་དུ་སྤྲོ་བས། །ལས་ཉོན་ཤེས་བྱའི་སྒྲིབ་པའི་མུན་པ་ཀུན་བཅོམ་སྟེ། །བདེ་སྟོང་དབྱེར་མེད་སྐུ་བཞིའི་ཆུ་སྐྱེས་མཆོག་བཞད་པའི། །ང་ཅག་འདུན་པ་སྣང་བྱེད་བདག་པོ་ལ་ཤོར་སོང་། །དཔེ་བརྒྱད་དོན་བརྒྱད་སྦྱར་བའི་ཉམས་ལེན་གྱི་གླུ་དབྱངས། །གང་ཤར་རང་གྲོལ་ཆོས་ཉིད་གཉུག་མ་ཡི་རང་སྒྲ། །མགྲིན་པ་ལོངས་སྤྱོད་འཁོར་ལོའི་དཀོར་མཛོད་ནས་བླངས་པས། །ཆོས་བརྒྱད་འཁྲུལ་པ་ཞིག་པར་བྱིན་གྱིས་རང་རློབས་ཤིག ༈ །
དཔེ་དོན་དང་འབྲེལ་བའི་རྡོ་རྗེའི་ཐོལ་གླུ་གཞན་གསོས་མགྲིན་པའི་རོལ་མོ་ཞེས་བྱ་བ། ན་མོ་གུ་རུ་ཛྙཱ་ན་ཝེ། ཡར་གཅིག་བལྟས་པས་ནམ་མཁའ་དྭངས་པ་ཡི་དཀྱིལ་ན། །ཁྲི་གདུགས་ཉི་མས་གླིང་བཞི་བསྐོར་བ་དེ་མཐོང་ནས། །ད་ལྟ་དལ་འབྱོར་ཉིན་མོའི་སྣང་བ་དང་ལྡན་ཚེ། །བླ་མེད་ཐར་པའི་ཤུལ་ལམ་རྙོགས་དགོས་དེ་དྲན་བྱུང་། །ཕར་གཅིག་བལྟས་པས་ཞིང་ས་དུལ་མ་ཡི་ངོགས་སུ། །ཐ་དད་འབྲས་བུ་སོ་སོར་སྨིན་པ་དེ་མཐོང་བས། །དཀར་ནག་ལས་ཀྱི་འབྲས་བུ་བསླུ་མེད་དེ་འབྱུང་ཕྱིར། །ཐར་པ་ཆ་མཐུན་དགེ་ལ་གཞོལ་བ་དེ་དྲན་བྱུང་། །ཚུར་གཅིག་བལྟས་པས་སྨན་ལྗོངས་གཞོན་ནུ་ཡི་དོ་རར། །ཉེས་མེད་རི་དྭགས་རྔོན་པས་གཟིར་བ་དེ་མཐོང་བས། །མྱུར་དུ་ཐར་པ་དམ་པའི་ཐབས་ཚུལ་ལ་འགྱངས་ནས། །བཟློག་མེད་འཆི་བདགི་ཞགས་པས་བཏབ་པོ་དེ་དྲན་བྱུང་། །མར་གཅིག་བལྟས་པས་ལྷུང་ལྷུང་འབབ་པ་ཡི་ཆུ་རྒྱུན། །ཟད་མེད་སྣ་ཚོགས་རི་མོས་བཀྲ་བ་དེ་མཐོང་ནས། །འཁོར་བ་གང་དུ་སྐྱེས་ཀྱང་སྡུག་བསྔལ་གྱི་འཁོར་ལོ། །བཟོད་པར་དཀའ་བ་འཛད་དུ་མེད་པ་དེ་དྲན་བྱུང་། །ལྷོ་ནུབ་ནམ་མཁའི་ཁམས་སུ་འཇའ་ཚོན་གྱི་དཀྱིལ་འཁོར། །ཟླ་བ་ཞུན་མའི་མདོག་གིས་སྤྱད་པ་དེ་མཐོང་ནས། །རྔ་ཡབ་དཔལ་རི་སྤྲུལ་པའི་ས་འཛིན་གྱི་སྤོ་ལ། །སྐྱབས་གཅིག་མཚོ་སྐྱེས་རྡོ་རྗེ་བཞུགས་པ་དེ་དྲན་བྱུང་། །གངས་རི་དཀར་པོ་དྲི་མེད་ལྷུན་
ཆགས་ཀྱི་ངོས་སུ། །ན་བུན་འཁྲིགས་པའི་མགུལ་དར་བཀྲ་བ་དེ་མཐོང་ནས། །སྤྲོས་པ་ཀུན་བྲལ་འོད་གསལ་དབུ་མ་ཡི་ལྟ་བར། །རྟོག་གེའི་ཚིག་གིས་རང་ཞལ་བསྒྲིབས་པ་དེ་དྲན་བྱུང་། །སྤྲིན་དཀར་བར་ནས་གཡོ་བའི་ཆིལ་ཆིལ་གྱི་ཆུ་རྒྱུན། །ད་ལྟ་ཐན་པའི་གདུང་བས་འཕྲོག་བ་དེ་མཐོང་ནས། །ཡིད་བྱེད་ལས་འདས་བློ་བྲལ་ཕྱག་ཆེན་གྱི་སྒོམ་པར། །མི་བརྩོན་རང་གར་ཤོར་བའི་འཁྲུལ་འབྱམས་དེ་དྲན་བྱུང་། །འབྲས་ལྡན་ཤུགས་པའི་ཡལ་གར་ཁུ་བྱུག་གི་གླུ་དབྱངས། །སྙན་པར་སྒྲོགས་ཀྱང་སྙིང་པོས་དབེན་པ་དེ་མཐོང་ནས། །རྩེ་གཅིག་གཞན་དོན་ལ་གཞོལ་བྱང་ཆུབ་ཀྱི་སྤྱོད་པ། །རང་འདོད་ཚུལ་འཆོས་གསོབ་ཀྱིས་བསླུས་བ་དེ་དྲན་བྱུང་། །འོད་གསལ་ཟླ་བའི་བཞིན་རས་རྙོག་བྲལ་གྱི་ངོས་སུ། །གློ་བུར་ཆར་སྤྲིན་སྟུག་པོས་བཀབ་པ་དེ་མཐོང་ནས། །སྐུ་དང་ཡེ་ཤེས་ལྷུན་གྲུབ་རྫོགས་ཆེན་གྱི་འབྲས་བུར། །ཞེ་འདོད་མཚན་མའི་གོལ་སས་སྒྲིབ་པ་དེ་དྲན་བྱུང་། །སྣང་བ་ཡུལ་རྐྱེན་སྣ་ཚོགས་ཕོ་ཉ་ཡིས་བསྐུལ་ནས། །ངེས་འབྱུང་སྙིང་རྗེ་བྲལ་བའི་རང་རྒྱུད་ལ་བལྟས་པས། །སྐྱོ་ཤས་བཟོད་མེད་སྐྱེས་ཏེ་མ་བཅོས་ཀྱི་ཐོལ་གླུ། །གང་ཤར་རྡོ་རྗེའི་གླུ་ཡི་དཀོར་མཛོད་ནས་བླངས་སོ། །རང་གཞན་འགྲོ་ཀུན་ཐར་པ་བསྒྲུབ་པ་ལ་འདུག་ནས། །ཚེ་གཅིག་མཆོག་གི་གོ་འཕང་ཐོབ་པ་རུ་ཤོག་ཅིག ༈ །ཆེད་དུ་བརྗོད་པའི་རྡོ་རྗེའི་ཐོལ་གླུ་ལུང་དང་རྟོགས་པའི་རོལ་
མོ་ཞེས་བྱ་བ། ཨ་ཧོ། སྐུ་གསུམ་བདེ་བ་ཆེན་པོའི་ངོ་བོ་རུ་བཞུགས་པས། །རྣམ་གསུམ་སྣང་བའི་ཉམས་མྱོང་ཡེ་ཤེས་སུ་དག་པའི། །བརྒྱུད་གསུམ་རིག་འཛིན་བླ་མ་སྙིང་དབུས་ནས་མཁྱེན་ནོ། །སྒོ་གསུམ་སྤྲོས་དང་བྲལ་བར་བྱིན་གྱིས་རང་རློབས་ཤིག །ད་ལྟ་དལ་འབྱོར་མི་ལུས་རིན་ཆེན་འདི་ཐོབ་ཚེ། །བླ་མེད་གཏན་གྱི་འདུན་མ་གཅིག་ཅར་དུ་བསྒྲུབ་ཕྱིར། །ང་ཡི་དེད་དཔོན་བཤེས་གཉེན་སྐྱོ་གྲོགས་ལ་ཕེབས་དང་། །རི་ཁྲོད་དབེན་པར་རྩེ་གཅིག་སྒྲུབ་པ་ལ་བསྒྲིལ་གཏོང་། །ཆོས་བརྒྱད་རྒོད་དཀར་སྐྱོ་གྲོགས་ལ་ཕེབས་དང་། །ཟབ་གསང་རྫོགས་པ་ཆེན་པོའི་ལམ་སྣང་ལ་འབད་གཏོང་། །རྟག་འཛིན་ཚ་གདུང་སྟུག་པོ་གཏད་མེད་དུ་བཟློག་པས། །སྐྱོ་ཤས་ངེས་པར་འབྱུང་བའི་ཆུ་ཀླུང་གི་ངོགས་སུ། །ང་ཡི་མི་ཚེའི་གསེར་ཉ་སྐྱོ་གྲོགས་ལ་ཕེབས་དང་། །ཉིན་མཚན་བར་མེད་དགེ་བའི་གཤོག་རྩལ་རང་བསྒྱུར་གཏོང་། །འདུ་འཛི་ཁྱིམ་པའི་འཚོ་བ་ཞེན་ལོག་གིས་བཟློག་ནས། །ཐབས་ཤེས་ཟུང་འཇུག་འདེགས་འཇོག་བར་མེད་དུ་བསྒྱུར་བས། །ང་ཡི་བློ་སྣ་དབེན་རི་སྐྱོ་གྲོགས་ལ་ཕེབས་དང་། །བགྱི་བ་དོན་ལྡན་དམ་པའི་ལྷ་ཆོས་ལ་འབད་གཏོང་། །ཉེས་བྱས་དགུན་གྱི་ཕོ་ཉ་བསླབ་གསུམ་དུ་བསྡམས་པས། །སྤངས་
དང་འཇུག་པའི་ཚུལ་ཁྲིམས་སྨན་ལྗོངས་ཀྱི་དོ་རར། །ང་ཡི་སྤྱོད་ལམ་རི་དྭགས་སྐྱོ་གྲོགས་ལ་ཕེབས་དང་། །ཁོར་ཡུག་རིག་གྲོལ་གཉིས་ལྡན་འཚོ་བ་རང་སྦྱར་གཏོང་། །འཁོར་བ་སྡུག་བསྔལ་དཔག་མེད་གཟའ་སྐར་ལས་བཟློག་སྟེ། །འདུན་པ་དགེ་བར་སྤྱོད་པའི་སྐྱ་རེངས་ཀྱིས་དྲངས་ཚེ། །ང་ཡི་བསྐྱེད་རྫོགས་ཉིད་བྱེད་སྐྱོ་གྲོགས་ལ་ཕེབས་དང་། །བསྐལ་པར་གོམས་པའི་ལས་ཉོན་མུན་པ་འདི་བཟད་གཏོང་། །ལྷའཆད་རྩོད་རྩོམ་པའི་གྲགས་སྙན་དྲི་བཞོན་ལས་བཟློག་པས། །བཟླས་བརྗོད་ཆོས་སྤྱོད་དབྱར་རྔའི་ང་རོ་རུ་བསྒྲགས་ཚེ། །ང་ཡི་རླུང་སེམས་རྨ་བྱ་སྐྱོ་གྲོགས་ལ་ཕེབས་དང་། །ཡང་དག་དབུ་མར་སྨིན་པའི་ཟློས་གར་རང་བསྒྱུར་གཏོང་། །གཉིས་འཛིན་ཕྱོགས་ཆའི་དགུན་གྱི་གྲང་ངར་ལས་བཟློག་པས། །སྨོན་སེམས་དཔྱིད་ཀྱི་ཕོ་ཉ་ཅི་དགའ་རུ་རྒྱུ་བར། །ང་ཡི་འཇུག་པ་ཁུ་བྱུག་སྐྱོ་གྲོགས་ལ་ཕེབས་དང་། །ཚོགས་གཉིས་ཟུང་འབྲེལ་དབྱར་གྱི་དུས་སྟོན་ལ་སྦྱར་གཏོང་། །ཐ་མལ་འཁྲུལ་པའི་མུན་པ་ཕ་མཐའ་རུ་བཟློག་པས། །སྣང་སྟོང་ཟུང་དུ་འཇུག་པའི་གདན་གསུམ་གྱི་འོད་དཀར། །ང་ཡི་བསྐྱེད་རིམ་ཟླ་བ་སྐྱོ་གྲོགས་ལ་ཕེབས་དང་། །རིག་འཛིན་རྣམ་པ་བཞི་ཡི་ཀུན་རང་བཞད་གཏོང་། །འདོད་ཆགས་རྟོག་པའི་སྒྲོན་མེ་བདེ་ཆེན་དུ་བཟློག་པས། །ཆགས་བྲལ་དགའ་བའི་ལང་ཚོ་ཟུར་མིག་གིས་མཛེས་པ། །ང་ཡི་བྱང་སེམས་
ཌཱ་ཀི་སྐྱོ་གྲོགས་ལ་ཕེབས་དང་། །དབབ་བཟློག་འབེབས་སྐྱིལ་དགའ་བཞིའི་ངལ་བསོ་ལ་སྦྱར་གཏོང་། །མཐའ་བརྒྱད་སྤྲོས་པའི་རི་དྭགས་ཆོས་དབྱིངས་སུ་བཟློག་པས། །ཉམས་མྱོང་སྒོམ་པའི་གཡུ་རལ་སྟུག་པོ་ཡིས་བརྗིད་པ། །ང་ཡི་གཉུག་མ་སེང་ལྕམ་སྐྱོ་གྲོགས་ལ་ཕེབས་དང་། །ཁྱད་ཆོས་དྲུག་ལྡན་གངས་རིའི་ལ་ཐོད་ལ་སྦྱར་གཏོང་། །ཡིད་བྱེད་ལས་འདས་སྒྲོན་བཞིའི་འཛུམ་ཟེར་གྱིས་ཕྱེས་པའི། །ཐེག་བརྒྱད་རྩོལ་སྒྲུབ་ངལ་བསོའི་ཆུ་སྐྱེས་ཀྱི་ཟེ་འབྲུར། །ང་ཡི་དབྱིངས་རིག་བུང་བ་སྐྱོ་གྲོགས་ལ་ཕེབས་དང་། །སྣང་བཞི་གོང་འཕེལ་སྦྲང་རྩིའི་དགའ་སྟོན་ལ་སྦྱར་གཏོང་། །དགེ་ཚོགས་བདག་ཏུ་འཛིན་པའི་དྲི་བཞོན་ལས་བཟློག་པས། །འཁོར་གསུམ་རྣམ་པར་དག་པའི་གློག་ཕྲེང་གི་དོ་ཤལ། །ང་ཡི་བསྔོ་སྨོན་སྦྱང་ཆར་སྐྱོ་གྲོགས་ལ་ཕེབས་དང་། །ཆོས་དབྱིངས་མཐའ་བྲལ་ཆུ་གཏེར་ཆེན་པོ་རང་འཕེལ་གཏོང་། །སྣ་ཚོགས་ཀུན་བརྟགས་མཚན་མའི་སྤྲོས་པ་ཀུན་བཟློག་པས། །མགྲིན་པ་རྡོ་རྗེའི་ཐོལ་གླུའི་དཀོར་མཛོད་ཀྱི་ཀློང་ནས། །ང་ཡི་ཉམས་དགའི་སྒྲ་དབྱངས་སྐྱོ་གྲོགས་སུ་ཕེབས་པས། །གཟུང་འཛིན་ལས་འདས་ཆོས་ཉིད་མཐོང་བ་རུ་ཤོག་ཅིག ༈ །ཟབ་གསང་རྫོགས་པ་ཆེན་པོའི་རྡོ་རྗེའི་ཐོལ་གླུ་འོད་གསལ་སྤྲིན་གྱི་རོལ་མོ་ཞེས་བྱ་བ། ཨེ་མ་ཧོ། ཚོགས་བརྒྱད་འཁྲུལ་པ་དབུ་མར་ཐིམ་པ་ཡི་གྲོང་ཁྱེར། །རྔ་ཡབ་དཔལ་རི་འཇའ་ཟེར་ཐིག་
ལེ་ཡི་ཀློང་ནས། སྐུ་གསུམ་བདེ་བ་ཆེན་པོའི་ངོ་བོ་རུ་བཞུགས་པའི། །འཆི་མེད་པདྨ་ཀ་ར་སྙིང་དབུས་ནས་དྲན་བྱུང་། །ང་ཡི་སྣང་བ་དག་པ་རབ་འབྱམས་ལ་སྐྱོལ་ཐོང་། །རྩ་གསུམ་འཁོར་ལོ་ལྔ་ལྡན་ཌཱ་ཀི་ཡི་གྲོང་ཁྱེར། །སྲོག་རྩོལ་བདུད་རྩིའི་ཐིགས་ཕྲེང་འཆི་མེད་ཀྱི་ཆུ་རྒྱུན། །བརྒྱད་ཁྲི་བཞི་སྟོང་དྲི་བཞོན་ལྷན་སྐྱེས་ཀྱི་གར་མཁན། །རྡོ་རྗེ་ཕུང་པོའི་ངོ་བོ་མཚོ་སྐྱེས་རྗེ་དྲན་བྱུང་། །ང་ཡི་རྟོག་ཚོགས་ཡེ་ཤེས་ཆེན་པོ་རུ་སྦྱོར་ཐོང་། །ལྟ་བ་མཐའ་བརྒྱད་སྤྲོས་བྲལ་ཀ་དག་གི་ཀློང་ནས། །སྒོམ་པ་མ་བཅོས་ལྷུན་གྲུབ་ཚོགས་གཉིས་ཀྱི་ལམ་མཆོག །སྤྱོད་པ་ཤར་གྲོལ་དུས་མཉམ་ཁྱབ་གདལ་གྱི་ཡེ་ཤེས། །འབྲས་བུ་འཁོར་འདས་གཉིས་མེད་མཚོ་སྐྱེས་རྗེ་དྲན་བྱུང་། །ང་ཡི་མྱོང་བ་བློ་བྲལ་ཆེན་པོ་རུ་སྐྱོལ་ཐོང་། །སྒྲོན་མ་རྣམ་བཞིའི་འཇའ་ཟེར་འཛུམ་དཀར་གྱི་ཀློང་ནས། །སྣང་བཞིའི་ཆོས་ཉིད་ཡིད་དཔྱོད་མཐའ་གྲོལ་གྱི་ངོ་བོ། །རྟོག་ཚོགས་གཞོན་ནུ་བུམ་སྐུའི་ཕྱག་རྒྱ་རུ་བཅིངས་པའི། །འཕོ་མེད་འཇིགས་བྲལ་མཚོ་སྐྱེས་རྡོ་རྗེ་དེ་དྲན་བྱུང་། །ང་ཡི་ལས་རླུང་ཅོག་གཞག་འཁྱིལ་བ་རུ་སྐྱོལ་ཐོང་། །རྣམ་ཐར་གསུམ་ལྡན་བདེ་སྟོང་པདྨོ་ཡི་ཀློང་དུ། །ཟག་བཅས་འཁྲུལ་པའི་ཕུང་ཁམས་སྐྱེ་མཆེད་ཀུན་བཅིངས་པས། །དུས་གསུམ་རྒྱལ་ཀུན་དགྱེས་པའི་མཆོད་སྤྲིན་དུ་སྤྲོ་བའི། །ཤེས་རབ་ཕ་རོལ་ཕྱིན་ཡུམ་མཚོ་རྒྱལ་རྗེ་དྲན་བྱུང་། །ང་ཡི་ཀུན་
བརྟགས་ལྷན་སྐྱེས་ཆེན་པོ་རུ་སྐྱོལ་ཐོང་། །ཀུན་གཞི་ཕྱོགས་ལྷུང་བྲལ་བའི་གདོད་མ་ཡི་ཀློང་ནས། །རྣམ་ཤེས་འཁྲུལ་པའི་རྟོག་ཚོགས་ཕྱག་རྒྱ་རུ་བཅིངས་པའི། །ཆོས་དབྱིངས་ཡེ་ཤེས་དཔའ་བོ་ཌཱ་ཀི་ཡི་ཚོམ་བུ། །རིག་པ་རང་གསལ་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་སེམས་ཀ་དག་གཞི་དབྱིངས་སུ་སྐྱོལ་ཐོང་། །དབྱིངས་རིག་མཉམ་པར་སྦྱོར་བའི་བདེ་ཆེན་གྱི་ཀློང་ནས། །ཕུང་ཁམས་སྐྱེ་མཆེད་གདན་གསུམ་ཕྱག་རྒྱ་རུ་བཅིངས་པའི། །མེ་ལོང་ཡེ་ཤེས་རིག་འཛིན་ཌཱ་ཀི་ཡི་ཚོམ་བུ། །ཤེས་རབ་རང་བྱུང་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་ཆོས་ཉིད་མངོན་སུམ་དུ་འཁྲིད་དང་། །གི་ཀློང་ནས། །བདེ་སྡུག་བར་མའི་ཚོར་བ་ཕྱག་རྒྱ་རུ་བཅིངས་པའི། །མཉམ་ཉིད་ཡེ་ཤེས་རིག་འཛིན་ཌ་ཀི་ཡི་ཚོམ་བུ། །རྒྱངས་ཞགས་འོད་གསལ་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་རླུང་སེམས་ཉམས་སྣང་གོང་འཕེལ་དུ་སྦྱོར་ཐོང་། །འཇའ་ཟེར་ཐིག་ལེས་སྤྲས་པའི་འོད་གསལ་གྱི་ཀློང་ནས། །རྟོག་དཔྱོད་འདུ་ཤེས་རང་གྲོལ་ཕྱག་རྒྱ་རུ་བཅིངས་པའི། །སོར་རྟོག་ཡེ་ཤེས་དཔའ་བོ་ཌཱ་ཀི་ཡི་ཚོམ་བུ། །དག་པ་དབྱིངས་ཀྱི་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་རིག་པ་ཚད་ཕེབས་སུ་སྐྱོལ་ཐོང་། །ལས་རླུང་འཁྲུལ་པ་ཟད་པའི་བུམ་སྐུ་ཡི་ཀློང་ནས། །སེམས་བྱུང་
འདུ་བྱེད་རྟོག་ཚོགས་ཕྱག་རྒྱ་རུ་བཅིངས་པའི། །བྱ་གྲུབ་ཡེ་ཤེས་དཔའ་བོ་ཌཱ་ཀི་ཡི་ཚོམ་བུ། །ཐིག་ལེ་སྟོང་པའི་སྒྲོན་མའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་བློ་བྲལ་ཆོས་ཟད་ལ་སྐྱོལ་ཐོང་། །སྒྲ་ཚིག་ལས་འདས་ཟག་བྲལ་ལོངས་སྤྱོད་ཀྱི་འཁོར་ལོ། །ཉི་ཁྲི་ཆིག་སྟོང་དྲི་བཞོན་དག་པ་ཡི་ཀློང་ནས། །བདེ་སྟོང་འོད་གསལ་ཡི་གེའི་རོལ་མོ་རུ་བཀྲོལ་བའི། །ལུང་དང་རྟོགས་པ་གཉིས་ལྡན་སྐྱོ་གྲོགས་དེ་དྲན་བྱུང་། །ང་ཡི་སྣང་བ་བརྡ་དང་དཔེ་ཆ་རུ་སྐྱོལ་ཐོང་། །ཆོས་བརྒྱད་རེ་དོགས་འཆིང་བ་བྲལ་བ་ཡི་ཀློང་ནས། །རང་བྱུང་བྲག་སྐྱིབས་མེ་ཏོག་འབྲས་བུ་ཡིས་བརྒྱན་ཅིང་། །ཐབས་ཤེས་རི་དྭགས་ཁྱོ་ཤུག་རྩེ་དགའ་ལ་རོལ་པའི། །འདུ་འཛིའི་སྤྱོད་པ་བྲལ་བའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་ཟབ་མོའི་སྒོམ་སྒྲུབ་ལ་སྐོལ་ཐོང་། །སྨིན་གྲོལ་བདུད་རྩིའི་རྒྱན་བཟང་ཟད་མེད་དུ་བཏང་བས། །ཕན་ཚུན་དམ་ཚིག་ཕྱག་རྒྱ་གཅིག་པ་རུ་སྦྲེལ་ཞིང་། །བདེ་དང་སྟོང་པའི་སྙིང་པོས་རྟོག་ཚོགས་ཀུན་མྱོས་པའི། །ཕན་བདེའི་དགའ་སྟོན་སྤེལ་བའི་སྐྱོ་གྲོགས་དེ་དྲན་བྱུང་། །ང་ཡི་སྣང་བ་འོད་གསལ་ཆོས་སྐུ་རུ་སྐྱོལ་ཐོང་། །གནས་བཟང་མི་མེད་སྔར་འདས་གྲུབ་ཐོབ་ཀྱི་ཤུལ་ལམ། །བྱ་བ་དགུ་ཕྲུགས་གཏད་སྐྱེ་ཚད་ཕེབས་ཀྱི་ལམ་སྟེགས། །སྣང་བཞི་གོང་དུ་བགྲོད་པ་རྫོགས་ཆེན་གྱི་ཉམས་ལེན། །ཟག་བཅས་འོད་སྐུར་འགྲུབ་པའི་སྐྱོ་གྲོགས་དེ་དྲན་
བྱུང་། །ང་ཡི་སྣང་བ་གཞོན་ནུ་བུམ་སྐུ་རུ་སྐྱོལ་མཛོད། །འོན་ཀྱང་བརྩོན་འགྲུས་ལས་འཕྲོའི་མཐུ་སྟོབས་ཀྱིས་དམན་ནས། །དོན་གཉིས་ལྷུན་གྲུབ་ཕྱོགས་མེད་འགྲོ་དོན་ལ་སྤྱོད་ན། །སྐྱོ་གྲོགས་གཅིག་ཏུ་རྗེས་བཟུང་དྲིན་ཆེན་རྗེ་དྲན་བྱུང་། །ང་ཡི་སྣང་བ་མཁའ་སྤྱོད་དབུ་མ་རུ་ཁྲིད་མཛོད། །དེ་སྐད་རང་སྣང་དག་པ་རབ་འབྱམས་ཀྱི་ཀློང་ནས། །གང་ཤར་སྣང་བ་གཏད་མེད་ཆོས་སྐུ་རུ་གྲོལ་ཏེ། །དོན་བརྒྱུད་བྱིན་གྱིས་བརླབས་པའི་མཚན་མ་ཡིས་སྤྲད་ཚེ། །ང་ཡི་སྐྱོ་གྲོགས་ཌཱ་ཀིའི་དབྱངས་རྟ་ལ་དྲངས་སོ།། ༈ །།བསྐྱེད་རིམ་རྫོགས་པར་ཤར་བའི་རྡོ་རྗེའི་ཐོལ་གླུ་གྲུབ་པའི་རོལ་མོ་ཞེས་བྱ་བ། ཨ་ཧོ། ཨེ་དབྱིངས་རྡོ་རྗེ་གཞོན་ནུ་ཡེ་ཤེས་ཀྱི་ཀློང་ནས། །ཝཾ་ཡིག་འཁོར་ལོ་རྒྱས་འདེབས་དགའ་བ་ཡི་རང་གདངས། །གཉིས་མེད་སྒྱུ་འཕྲུལ་དྲྭ་བའི་འཁོར་ལོ་རུ་རོལ་པས། །དོན་དམ་རྣམ་དབྱེར་མེད་པའི་དངོས་གྲུབ་དེ་ཐོབ་བྱུང་། །རྡོ་རྗེ་ཕུང་པོ་རྩ་གནས་ཉེར་བཞི་ཡི་གྲོང་ཁྱེར། །ཡས་བབས་མས་བརྟན་དགའ་བའི་བདུད་རྩི་ཡིས་མཆོད་པས། །ཞུ་བདེ་མི་རྟོག་བདེ་སྟོང་དྲུ་བ་ཡི་འཁོར་ལོ། །རླུང་རིག་སྣང་སེམས་ཟད་པའི་ཀློང་དུ་དེ་རྫོགས་བྱུང་། །གདོད་ནས་རྣམ་དག་ཡེ་ཤེས་ཆེན་པོ་ཡི་ངོ་བོ། །འགག་མེད་བྱ་གྲུབ་གང་ཤར་སྣང་སྟོང་གི་རང་བཞིན། །གང་འདུལ་ཐུགས་རྗེ་ཁམས་གསུམ་ཡོངས་སྒྲོལ་གྱི་ཕྲིན་ལས། །མཐའ་བརྒྱད་སྤྲོས་བྲལ་ཡེ་
ཤེས་དྲྭ་བ་དེ་འགྲུབ་བྱུང་། །བསྐྱེད་རིམ་རྫོགས་པར་འཆར་བའི་ཉམས་ལེན་གྱི་གླུ་ཆུང་། །ཀུན་སྣང་ལྷ་ཡི་ཕྱག་རྒྱར་རྫོགས་པ་ཡི་ངང་ནས། །འགག་མེད་རྡོ་རྗེའི་རོལ་མོར་བསྒྱུར་བ་ཡི་དགེ་བས། །འགྲོ་རྣམས་དཔལ་ཆེན་གོ་འཕང་ཐོབ་པ་རུ་ཤོག་ཅིག ༈ །ཚོགས་གཉིས་ཟུང་འཇུག་གི་རྡོ་རྗེའི་ཐོལ་གླུ་འདོད་འཇོའི་འཁྲི་ཤིང་ཞེས་བྱ་བ། ཨ་ཧོ། ཀ་དག་སྲིད་ཞི་དབྱེར་མེད་བདེ་ཆེན་གྱི་རྫས་མཆོག །ཁ་དོག་སྣ་ཚོགས་ཤར་བ་རིགས་ལྔ་ཡི་རོལ་པ། །ག་བུར་འཛིན་མདོག་བདེ་སྐྱོང་སྣོད་མཆོག་ཏུ་བསྐྱིལ་བ། །ང་བདག་འཛིན་པ་བྲལ་བའི་འདོད་ཡོན་རུ་གྱུར་ཏོ། ཨོཾ་ཨཱཿཧཱུཾ། །ཅ་ཅོ་བྲལ་བའི་གུས་པའི་གདུང་དབྱངས་ཀྱིས་འབོད་ཚེ། །ཆ་ལུགས་དུ་མར་རོལ་པའི་ཚོགས་གཏོར་གྱི་མགྲོན་ཀུན། །ཇ་ཆང་ལས་འདས་ཟག་མེད་དམ་རྫས་མཆོག་བཞེས་ཕྱིར། །ཉ་ཟླ་ཆུ་ལ་རོལ་ལྟར་ཐུགས་རྗེ་ཡིས་གཤེགས་ཤིག །ཏ་ཐཱ་ག་ཏའི་སྙིང་པོ་གསང་སྔགས་ཀྱི་མཆོད་པ། །ཐ་དད་ཟུང་དུ་འཇུག་པའི་དགའ་བཞི་ཡི་འདོད་ཡོན། །ད་ལྟར་རྩ་གསུམ་དགྱེས་པའི་འདོད་ཡོན་དུ་འབུལ་ལོ། །ན་མར་ཐུགས་རྗེའི་བྱིན་རླབས་འབད་མེད་དུ་སྩོལ་ཅིག །པ་སངས་ལྟ་བུའི་ཉེས་བྱས་ཚུལ་ཁྲིམས་ཀྱི་བསླབ་པ། །ཕ་རོལ་ཕྱིན་ལམ་ཁྱད་པར་གསང་སྔགས་ཀྱི་དམ་ཚིག །བ་ལང་ལྟ་བུའི་རྨོངས་པའི་གཞན་དབང་གིས་འགལ་བ། །མ་ལུས་ཞལ་ཟས་མཆོད་པའི་སྤྲིན་ཕུང་གིས་བཤགས་སོ། །ཙ་ར་
གཟུགས་བརྙན་སྤྲུལ་པ་ཕྱག་རྒྱ་ཡི་གྲོང་དུ། །ཚ་གྲང་འདོད་པས་མནར་བའི་དགྲ་བགེགས་ཀུན་བཀུག་ནས། །ཛ་ཡ་དཔང་དུ་གསོལ་ཏེ་ཆོས་དབྱིངས་སུ་བསྒྲལ་བའི། །ཝ་སྐྱེས་ཤ་ཁྲག་རུས་པས་ཐུགས་དམ་དེ་བསྐང་ངོ་། །ཞྭ་ལྟར་མཐོ་བའི་སྲིད་རྩེའི་བྲོང་ཁྱེར་ནས་བཟུང་སྟེ། །ཟ་ལྟར་རྩུབ་པའི་མནར་སྤྱོད་དམྱལ་བ་དེ་ཡན་ཆོད། །འ་འུར་སྣང་སྲིད་གཞིར་བཞེངས་ཆེན་པོ་ཡི་ངོ་བོ། །ཡ་བྲལ་ཙམ་མིན་མཆོད་པའི་ཕྱག་རྒྱ་རུ་འབུལ་ལོ། །རཱ་ཙ་སྲིན་པོའི་གཟུགས་འཛིན་ལེགས་ཉེས་ཀྱི་རྗེས་གཅོད། །ལ་ཀླུང་ཉུལ་པའི་རྣལ་འབྱོར་ཚོགས་ཁང་དུ་འགྲིམ་པའི། །ཤ་ཟ་ཁྲག་འཐུང་སྲུང་མའི་ཚོགས་རྣམས་ཀུན་མ་ལུས། །ས་བཅུའི་ཀློང་དུ་རོལ་པའི་གཏོར་མ་འདི་བཞེས་ཤིག །ཧ་ལ་ལྟ་བུའི་རྟོག་པ་དབུ་མ་རུ་ཐིམ་པས། །ཨ་ཏི་ལྡོག་མེད་ཡེ་ཤེས་ཚོགས་མཆོད་དེ་རྫོགས་འགྲོ། །ཨ་ལས་སྐྱེས་པའི་བདེ་སྟོང་སྐྱེ་མེད་ཀྱི་ཌཱ་ཀིའི། །འབར་འཛག་བདེ་བས་མྱོས་པའི་དངོས་གྲུབ་ཤིག་ཞུའོ། ཞེས་ནང་དང་གསང་བའི་ཚོགས་འཁོར་དང་སྦྱར་བའི་རྡོ་རྗེའི་ཐོལ་གླུ་གུ་བྱ།། ༈ །།དགའ་སྟོན་ཚོགས་ཀྱི་འཁོར་ལོའི་རྡོ་རྗེའི་ཐོལ་གླུ་བདེ་སྟོང་འཁོར་ལོའི་སྒྲ་དབྱངས་ཞེས་བྱ་བ། ཨེ་མ་ཧོ། ཀ་ན་ཀ་ལྟར་བདེ་སྟོང་ཉིན་བྱེད་ཀྱིས་སྨིན་པའི། །ཁ་དོག་དཀར་དམར་ཟུང་འཇུག་སྟོང་གསལ་གྱི་ཐིག་ལེ། །ག་བུར་འཛིན་པ་གསར་པའི་ལང་ཚོ་ལས་ལྷག་པའི། །ངར་འཛིན་བདེ་བས་མྱོས་པའི་དངོས་གྲུབ་
ཤིག་ཞུའོ། །ཅ་ག་སྣ་ཚོགས་ཤར་བའི་སྣོད་བཅུད་ཀྱི་རོལ་པ། །ཆ་མཐུན་ཙམ་མིན་སྣང་སྟོང་ཟུང་འཇུག་གི་དཀྱིལ་འཁོར། །ཇ་ཧོང་སྲིད་པའི་མུན་ནག་རང་ངོ་རུ་བཅིལ་བའི། །ཉ་རྒྱས་ཟླ་འདྲས་བསྐྱེད་པའི་དངོས་གྲུབ་ཞིག་ཞུའོ། །ཏ་ཐཱ་ག་ཏའི་སྙིང་པོ་རྫོགས་པ་ཡི་ཆེན་པོ། །ཐ་དད་མ་དམིགས་རིག་སྟོང་ཟུང་འཇུག་གི་རོལ་པ། །ད་བཟོད་བསྐྱར་གྲོལ་འབྲས་བུ་རེ་འདོད་དང་བྲལ་བའི། །ན་མར་འོད་གསལ་དྲྭ་བའི་དངོས་གྲུབ་ཞིག་ཞུའོ། །པཱ་པ་རྡོ་རྗེའི་ལམ་ནས་བབ་པ་ཡི་བྱང་སེམས། །ཕ་མཐའ་བྲལ་བའི་སྲིད་གསུམ་ཡོངས་སྒྲོལ་གྱི་ཚྭ་ས། །བ་ལིཾ་གཏོར་ཚོགས་ཐབས་ཤེས་ཟུང་འཇུག་གི་མཆོད་སྤྲིན། །མ་དག་མཚན་མ་བྲལ་བའི་དངོས་གྲུབ་ཤིག་ཞུའོ། །ཙ་མ་ར་ལྟར་འཁྲུལ་པའི་མུན་པ་ཀུན་མ་ལུས། །ཚ་ཟེར་ཅན་བཞིན་གསང་སྔགས་ལམ་མཆོག་གིས་བཅོམ་སྟེ། །ཛ་ཧུའི་རྒྱུན་ལྟར་ཡེངས་མེད་སྒོམ་བྲལ་གྱི་ཏིང་འཛིན། །ཝ་ལྟར་བས་མཐར་སྒོམ་པའི་དངོས་གྲུབ་ཤིག་ཞུའོ། །ཞྭ་ལྟར་མཐོ་བའི་བླ་དཔོན་དྲེགས་པ་ཡང་སྤང་ཞིང་། །ཟ་ཐང་གྱི་ནར་རེ་བའི་སྙམ་ཆུང་གི་ངང་ནས། །འ་ཅག་ཐར་པར་ཕྱིན་པའི་ཉེ་ལམ་ལ་འབད་པའི། །ཡ་མཚན་དགེ་ལ་འདུན་པའི་དངོས་གྲུབ་ཤིག་ཞུའོ། །རྭ་ཅོ་ལྟ་བུའི་ལམ་གོལ་ཐེག་དམན་དུ་མི་འཁྱམས། །ལ་ཀླུང་རྒྱུ་བའི་ལྟར་སྣང་འགྲོ་དོན་དང་བྲལ་ཏེ། །ཤ་བ་ནགས་སུ་གནས་བཞིན་བག་
ཡངས་ཀྱི་ངང་ནས། །ས་བཅུ་རང་ལ་རྫོགས་པའི་དངོས་གྲུབ་ཤིག་ཞུའོ། །ཧ་ལའི་རྟོག་ཚོགས་བྲལ་བའི་རང་བྱུང་གི་ཡེ་ཤེས། །ཨ་ཏི་བྱ་རྩོལ་བྲལ་བའི་ཆོས་དབྱིངས་སུ་ཐིམ་ཚེ། །ཧ་ཅང་མཚན་མའི་ཆོས་ལ་དམིགས་གཏད་ཀུན་སྤངས་ཏེ། །ཨ་དོན་འོད་གསལ་དྲྭ་བའི་དངོས་གྲུབ་ཤིག་ཞུའོ། །སྲིད་པའི་དགྲ་ལས་རྒྱལ་བའི་བདེ་སྟོང་གི་མཚན་དཔེ། །སྲིད་ཞིའི་དེ་ཉིད་རྟོགས་པ་བདེ་ཆེན་གྱི་གསུང་དབྱངས། སྲིད་གསུམ་དབུ་མར་རོལ་པའི་འོད་གསལ་གྱི་ཐིག་ལེ། །སྲིད་ཞིའི་མཐའ་ལས་འདས་པའི་དངོས་གྲུབ་ཤིག་ཞུའོ། །འབར་འཛག་བདུད་རྩིའི་ཐིགས་ཕྲེང་བདུད་རྩི་ལ་རོལ་པས། །ཨེ་ཝཾ་ཟུང་འཇུག་བདེ་སྟོང་དྲྭ་བ་ཡི་འཁོར་ལོ། །འཆི་མེད་བཅུད་ལེན་བྲལ་བའི་སྣང་ཚུལ་དུ་བཞེངས་ནས། །བསྟན་འགྲོའི་འདོད་དོན་འཇོ་བའི་དངོས་གྲུབ་ཤིག་ཞུའོ། །དེ་སྐད་གང་ཤར་བདེ་བའི་གླུས། །ལོངས་སྤྱོད་ཡོངས་རྫོགས་འཁོར་ལོ་ནས། །གྲགས་སྟོང་རྡོ་རྗེའི་རོལ་མོར་བསྒྱུར། །ལྷན་སྐྱེས་བདེ་བར་རོ་གཅིག་ཤོག ༈ །འཆི་མེད་གཉུག་མའི་རྡོ་རྗེའི་ཐོལ་གླུ་བདེ་སྟོང་སྲོག་འཛིན་ཞེས་བྱ་བ། ཨེ་མ་ཧོ། ཨེ་དབྱིངས་ཐབས་མཆོག་བདེ་ཆེན་སྙིང་རྗེ་ཡི་ཀློང་ནས། །ཝཾ་ཡིག་ཤེས་རབ་སྟོང་ཉིད་ཟུང་འཇུག་ཏུ་རོལ་པས། །སྤྲོས་བྲལ་དགའ་བཞིའི་ཡེ་ཤེས་དབུ་མ་རུ་ཤར་བའི། །འཆི་མེད་འཇའ་ལུས་མཚོ་སྐྱེས་རྡོ་རྗེ་དེ་མཁྱེན་ནོ། །རང་རིག་
འཁྲུལ་གྲོལ་ལས་འདས་རྩེ་གཅིག་གི་ངོ་བོར། །ཆོས་ཉིད་མངོན་སུམ་བདུད་རྩིའི་ཐིགས་ཕྲེང་གིས་རེག་པས། །གདན་གསུམ་མངོན་རྟོགས་ངོམ་པའི་རྣམ་སྣང་གི་རང་ཞལ། །ལྷན་སྐྱེས་དགའ་བའི་ཡེ་ཤེས་བདེ་ཆེན་དུ་ཤར་རོ། །མཐའ་བརྒྱད་སྤྲོས་པ་ཀུན་བྲལ་གཉུག་མ་ཡི་ངོ་བོར། །ཉམས་སྣང་གོང་འཕེལ་བདུད་རྩིའི་ཐིགས་ཕྲེང་གིས་རེག་པས། །མཉམ་སྦྱོར་མཉམ་ཉིད་འཆི་བ་མེད་པ་ཡི་ཐིག་ལེ། །རང་བྱུང་མཆོག་གི་ཡེ་ཤེས་བདེ་སྟོང་དུ་ཤར་རོ། །འཁོར་འདས་སྣང་སྲིད་རོ་གཅིག་དབུ་མ་ཡི་ངོ་བོར། །རིག་པ་ཚད་ཕེབས་བདུད་རྩིའི་ཐིགས་ཕྲེང་གིས་རེག་པས། །ཆགས་བྲལ་སོ་སོར་རྟོག་པའི་འཆི་མེད་ཀྱི་ཐིག་ལེ། །དགའ་བྲལ་མི་ཤིགས་ཆོས་ཉིད་འཁོར་ལོ་རུ་ཤར་རོ། །ཡེངས་འཁྲུལ་བྲལ་བའི་བློ་བྲལ་སྒོམ་མེད་ཀྱི་ངོ་བོར། །ཆོས་ཟད་བློ་འདས་བདུད་རྩིའི་ཐིགས་ཕྲེང་གིས་རེག་པས། །འཛིན་བྲལ་བྱ་བ་གྲུབ་པའི་འཆི་མེད་ཀྱི་ཐིག་ལེར། །ལྷན་སྐྱེས་སྐུ་བཞི་དབྱེར་མེད་སྤྲུལ་པ་རུ་ཤར་རོ། །ཀ་དག་གདོད་མའི་ངོ་བོ་བུམ་སྐུ་ཡི་སྦུབས་སུ། །ལྷུན་གྲུབ་སྣང་བཞིའི་ཚོགས་ཀུན་ཟུང་འཇུག་ཏུ་རོལ་པས། །དབྱིངས་རིག་དབྱེར་མེད་བདེ་ཆེན་གཉུག་མ་ཡི་བདུད་རྩི། །སྐྱེ་འགགས་འཕོ་འཇིགས་བྲལ་བའི་ངོ་བོ་རུ་ཤར་རོ། །འགྲོ་འོང་རྟོག་པའི་དྲི་གཞོན་དབུ་མ་རུ་བཅིལ་བས། །ཐབས་ཤེས་ཨེ་ཝཾ་མཉམ་སྦྱོར་ཟུང་འཇུག་གི་བདུད་རྩི། །རྩ་
གསུམ་འཁོར་ལོ་བཞི་ཡི་ལྗོན་ཤིང་ལ་རེག་པས། །བདེ་སྟོང་འཆི་བ་མེད་པའི་འབྲས་བུ་རུ་ཤར་རོ། །ཧཾ་ཡིག་བྱང་ཆུབ་སེམས་མཆོག་འཕོ་མེད་ཀྱི་ཐིག་ལེ། །ཨ་ཤད་ཙཎྜའི་ཉི་མས་གནས་བཞི་རུ་བཞུ་བས། །ལྷན་སྐྱེས་དཔའ་བོ་ཌཱ་ཀི་ཡོངས་གྲུབ་ཀྱི་ལང་ཚོ། །བཅུ་དྲུག་འཆི་བ་མེད་པའི་རང་བཞིན་དུ་བཞད་དོ། །སྣང་སྟོང་ཟུང་འཇུག་རྡོ་རྗེ་ཕུང་པོ་ཡི་གྲོང་ཁྱེར། །གདན་གསུམ་དབྱེར་མེད་དཀྱིལ་འཁོར་ཉག་གཅིག་ཏུ་རྫོགས་པས། །ཕྱི་ནང་གཞན་གསུམ་མཉམ་སྦྱོར་རང་རིག་ཏུ་བསྡམས་ཏེ། །སྐྱེ་ཤི་གཉིས་མེད་ལྷུན་གྲུབ་ཆེན་པོ་རུ་ཤར་རོ། །དེ་སྐད་ལོངས་སྤྱོད་ཡོངས་རྫོགས་མགྲིན་པ་ཡི་རོལ་མོ། །ཐབས་ཤེས་ཨཱ་ལི་ཀཱ་ལིའི་ཡི་གེ་རུ་ཤར་བ། །གྲགས་སྟོང་སྐྱེ་མེད་རྡོ་རྗེའི་རོལ་མོ་རུ་བསྒྱུར་བས། །ལྷན་སྐྱེས་སྐུ་བཞིའི་ལམ་མཆོག་རྨད་བྱུང་དུ་གྲུབ་བོ། །དགེ་བ་དེ་ཡིས་ཕྱི་ནང་གཞན་གསུམ་གྱི་རྟོག་པ། །ཐབས་ཤེས་རོ་རྐྱང་ལམ་ནས་དྷ་ཏཱི་རུ་བཅིལ་བས། །ཞུགས་གནས་ཐིམ་གསུམ་ཡོངས་རྫོགས་ལྷན་སྐྱེས་ཀྱི་ངོ་བོར། །ཉེར་ལེན་སྲིད་པའི་འཁྲུལ་འཁོར་འགགས་པ་རུ་ཤོག་ཅིག། ༈ །།ཚོགས་ཀྱི་འཁོར་ལོའི་རྟོགས་པ་བརྗོད་པའི་རྡོ་རྗེའི་ཐོལ་གླུ་སྐུ་གསུམ་མཆོད་སྤྲིན་ཅེས་བྱ་བ། ཨ་ཧོ། རང་ལུས་རྡོ་རྗེ་ཕུང་པོ་གདན་གསུམ་གྱི་གྲོང་ཁྱེར། །འགྲོ་འོང་རླུང་ཀུན་སྐྱེ་མེད་སྐུ་གསུམ་གྱི་རོལ་གར། །རྟོག་ཚོགས་ཤར་གྲོལ་དུས་མཉམ་ཆོས་ཉིད་ཀྱི་ངོ་བོ། །ཡེ་
ནས་རང་གསལ་བདེ་ཆེན་དཀྱིལ་འཁོར་དེ་མཁྱེན་ནོ། །སྙིང་ག་རོ་རྐྱང་དབུ་མ་ཟུང་འཇུག་གི་སྣོད་དུ། །གཡོ་བྱེད་རླུང་གིས་མ་བསླད་རང་རིག་གི་བཅུད་མཆོག །དག་པ་གཉིས་ལྡན་ཆོས་སྐུའི་དཀྱིལ་འཁོར་དུ་མཆོད་པས། །གདོད་ནས་འཁྲུལ་བྲལ་རྟོག་པའི་ཡོ་ལང་ལས་འདས་སོ། །མགྲིན་པ་ལོངས་སྤྱོད་ཡོངས་རྫོགས་ཆགས་བྲལ་གྱི་སྣོད་དུ། །བཟའ་བཏུང་ལྷུན་གྲུབ་གསལ་སྟོང་དབྱེར་མེད་ཀྱི་བཅུད་མཆོག ། ངེས་པ་ལྔ་ལྡན་ལོངས་སྐུའི་དཀྱིལ་འཁོར་དུ་མཆོད་པས། །མཆོག་ཏུ་དགའ་བའི་ཉམས་མྱོང་ལྷན་སྐྱེས་སུ་ཤར་རོ། །སྤྱི་བོ་སྣང་སྟོང་ཟུང་འཇུག་བདེ་ཆེན་གྱི་སྣོད་དུ། །ཚོགས་དྲུག་རང་སར་གྲོལ་བའི་གཉུག་མ་ཡི་བཅུད་མཆོག །ཟུང་འཇུག་སྒྱུ་མ་སྤྲུལ་སྐུའི་དཀྱིལ་འཁོར་དུ་མཆོད་པས། །མཐའ་བྲལ་གཟུང་འཛིན་གཉིས་སྤང་ངོ་བོ་རུ་གྲོལ་ལོ། །འཁོར་འདས་འཛིན་རྟོག་བྲལ་བའི་བདེ་སྟོང་གི་སྣོད་དུ། །སྣ་ཚོགས་སྣང་བ་མ་འགག་སྣོད་བཅུད་ཀྱིས་གཏམས་ཏེ། །ཏིང་འཛིན་སྒྱུ་མར་སྤྲུལ་པའི་དཀྱིལ་འཁོར་དུ་མཆོད་པས། །དོན་གཉིས་ལྷུན་གྲུབ་ཚིམ་པ་དྲུག་ལྡན་དུ་ལོངས་སོ། །དེ་སྐད་དགའ་སྟོན་སྣོད་བཅུད་ཕྱི་ནང་གི་དཀྱིལ་འཁོར། །མཆོད་བྱ་མཆོད་བྱེད་ལས་འདས་དབུ་མ་ཡི་སྦུབས་ནས། །འབར་དང་འཛག་པའི་རྡོ་རྗེའི་ཐོལ་གླུ་འདི་བླངས་པས། །འགྲོ་ཀུན་རྟོག་བྲལ་བདེ་ཆེན་ཐོབ་པ་རུ་ཤོག་ཅིག ༈ །རེ་དོགས་གཉིས་འཛིན་བྲལ་བའི་
རྡོ་རྗེའི་ཐོལ་གླུ་ཕུང་པོ་མཆོད་སྦྱིན་ནོར་བུའི་འཁྲི་ཤིང་ཞེས་བྱ་བ། ཕཊ། ཀ་དག་གཉུག་མའི་ཀློང་ནས་གང་ཤར་གྱི་ཕྱག་རྒྱ། །ཁ་དོག་དམར་སྨུག་ཁྲོ་འཛུམ་ཆགས་པ་ཡི་འཇོ་སྒེག །ག་བུར་འཛིན་པ་ཇི་བཞིན་འོད་ཟེར་གྱི་ཕུང་པོ། །ང་བདག་འཛིན་བྲལ་ཡེ་ཤེས་ཌཱ་ཀི་རུ་ཤར་རོ། །ཅ་ག་མཚར་བར་རེ་བའི་ཕུང་ཁམས་དང་སྐྱེ་མཆེད། །ཆ་མཐུན་ཙམ་མིན་ཟག་མེད་བདེ་ཆེན་གྱི་བདུད་རྩི། །ཇ་ཆང་ལས་ལྷག་རྣམ་གྲོལ་བདེ་སྟོང་གི་མཆོད་སྤྲིན། །ཉ་རྒྱས་ཟླ་མདོག་བྱང་སེམས་ཐོད་པ་རུ་བསྐྱིལ་ལོ། །ཕཊ། ཏ་ཐཱ་ག་ཏའི་སྙིང་པོ་བྱང་སེམས་མཆོག་ཡིན་ཕྱིར། །ཐ་དད་མ་དམིགས་སྲིད་ཞི་མཉམ་ཉིད་ཀྱི་མགྲོན་ཀུན། །ད་ལྟའི་སྒྱུ་ལུས་ཚོགས་གཉིས་མཉམ་རྫོགས་སུ་སྤྱོད་ཕྱིར། །ན་མར་སྣང་སྟོང་སྒྱུ་མའི་རོལ་པ་ཡིས་གཤེགས་ཤིག །ཕཊ། པཱ་བ་རྡོ་རྗེའི་ལམ་ནས་བབ་པ་ཡི་བྱང་སེམས། །ཕ་རོལ་ཕྱིན་པའི་བདུན་པ་ཐབས་ལམ་གྱི་དགའ་བཞི། །བ་ལང་ལྟ་བུའི་རྨོངས་པའི་འཁྲུལ་འཁོར་ཀུན་བཅོམ་བྱེད། །མ་གཅིག་སྐུ་གསུམ་ལྷ་ལ་མཆོད་སྤྲིན་དུ་འབུལ་ལོ། །ཙཱ་རུའི་ཞལ་ཟས་ཀྱིས་མཚོན་འདོད་ཡོན་གྱི་རོལ་པ། །ཚ་གྲང་ཚིམ་པ་དྲུག་ལྡན་སྦྱོར་སྒྲོལ་གྱི་ཚོགས་འཁོར། །ཛ་ཧུའི་རྒྱུན་ལྟར་ཟག་མེད་སྣ་ཚོགས་ཀྱི་མཆོད་པས། །ཝ་སྐྱེས་དགྲ་བགེགས་སྒྲོལ་བའི་སྲུང་མ་ཀུན་མཆོད་དོ། །ཞྭ་ཐོད་གདུགས་སུ་གཡོ་བའི་འགྲོ་བ་ནས་བཟུང་སྟེ། །ཟ་
ཐང་གྱི་ནར་བརྟེན་པའི་ཚོགས་རྣམས་ཀུན་ཡན་ཆད། །འ་འུར་སྣང་སེམས་འཁྲུལ་པའི་སྲིད་པ་ཡི་མགྲོན་ཀུན། །ཡ་མཚན་གཏན་པ་བྲལ་བའི་མཆོད་སྦྱིན་ལ་རོལ་ཅིག །རཀ་གདུག་པས་མཚོན་པའི་སྣ་ཚོགས་ཀྱི་འབྱུང་པོ། །ལ་ཀླུང་འགྲོ་ལ་འཚེ་བའི་བསམ་སྦྱོར་དང་ལྡན་རྣམས། །ཤ་ཁྲག་རུས་པའི་བཟའ་བཅའ་ཟད་མེད་ལ་རོལ་ནས། །ས་བཅུ་ལྡོག་མེད་ཀློང་དུ་བྱང་ཆུབ་དེ་ཐོབ་ཤོག །ཧ་ཅང་རེ་དོགས་གཉིས་སུ་འཛིན་པ་ཡི་ལྷ་འདྲེ། །ཨ་ཏི་ཐོབ་ཤོར་ཟད་པའི་ཆོས་ཉིད་དུ་ཐིམ་སྟེ། །ཧ་ལའི་རྟོག་ཚོགས་བྲལ་པའི་རྣམ་དཀར་གྱི་དགེ་བ། །ཨ་དོན་སྐྱེ་མེད་རྟོགས་པའི་ཡན་ལག་ཏུ་བསྔོའོ། ཕཊ། ཅེས་ཐུན་མོང་མ་ཡིན་པའི་རོ་སྙོམས་སྤྱོད་པའི་ཚུལ་སྨྲས་པ་འདི་ཡང་གང་ཤར་དུ་བླངས་པ་གུ་བྱ།། ༈ །།གྲགས་སྟོང་རྡོ་རྗེའི་ཐོལ་གླུ་སྒྱུ་མའི་མཆོད་སྤྲིན་ཞེས་བྱ་བ། ཨ་ཧོ། ཚོགས་བརྒྱད་འཁྲུལ་པ་ཟད་པ་ཡི། །གཞི་གྲོལ་ཀ་དག་དཔལ་གྱི་རི། །འོད་གསལ་སྒྱུ་མར་རོལ་པའི་གར། །རིག་འཛིན་མཁའ་འགྲོའི་ཚོམ་བུར་འདུད། །ཡང་གྲགས་སྟོང་གླུ་ཡི་མཆོད་པ་ཡིས། །དཔའ་བོ་ཌཱ་ཀི་དགྱེས་ཕྱིར་ལེན། །རྩ་དག་པ་རབ་འབྱམས་ཀྱི་མགྲིན་པ་ནས། །སྣང་སྟོང་བསྐྱེད་རིམ་གྱི་གླུ་བླངས་པས། །ཀུན་བརྟགས་འཁྲུལ་པའི་ཕུང་ཁམས་ཚོགས། །གདན་གསུམ་ལྷ་ཡི་སྐུ་རུ་སྨིན། །རླུང་དབུ་མར་རོལ་པའི་མགྲིན་པ་ནས། །གསལ་སྟོང་བཟླས་བརྗོད་ཀྱི་གླུ་བླངས་པས། །སྒྲ་ཚིག་རང་
མཚན་ཞེན་པ་ཀུན། །ལུང་དང་རྟོགས་པའི་ངང་དུ་སྨིན། །ཐིག་ལེ་བདེ་ཆེན་གྱི་མགྲིན་པ་ནས། །བདེ་སྟོང་དགའ་བཞི་ཡི་གླུ་བླངས་པས། །ཐ་མལ་ཉོན་མོངས་ཀྱི་འཆིང་བ་ཀུན། །ཟུང་འཇུག་འོད་གསལ་གྱི་ངང་དུ་ཐིམ། །རང་རིག་བརྗོད་མེད་ཀྱི་མགྲིན་པ་ནས། །ངང་བཞག་ལྷུན་འབྱམས་ཀྱི་གླུ་བླངས་པས། །སྣ་ཚོགས་གཟུང་འཛིན་གྱི་རྟོག་པ་ཀུན། །ཤར་གྲོལ་དུས་མཉམ་གྱི་ངང་དུ་ཐིམ། །ཀ་ཏི་ཤེལ་སྦུག་གི་མགྲིན་པ་ནས། །འཇའ་ཟེར་ཐིག་ལེ་ཡི་གླུ་བླངས་པས། །ཕུང་ཁམས་གདོས་བཅས་ཀྱི་མཚན་མ་ཀུན། །ཆོས་ཟད་བློ་འདས་ཀྱི་ངང་དུ་ཐིམ། །སྒོ་གསུམ་ཆ་སྙོམས་ཀྱི་མགྲིན་པ་ནས། །བསྐྱེད་རྫོགས་རྫོགས་ཆེན་གྱི་གླུ་བླངས་པས། །འཁོར་འདས་གཉིས་འཛིན་གྱི་རྟོག་ཚོགས་ཀུན། །བྱར་མེད་འབྲས་བུ་ཡི་ཀློང་དུ་ཐིམ། །ཆོས་དྲེད་སྐལ་དམན་གྱི་མགྲིན་པ་ནས། །སྣ་ཚོགས་གྲགས་སྟོང་གི་གླུ་བླངས་པས། །བྱེད་སྙམ་བསྒྲུབ་འདོད་ཀྱི་དམ་ཆོས་ཀུན། །ལེ་ལོ་ཕྱི་བཤོལ་གྱི་ངང་དུ་ཐིམ། །དེ་ངེས་དོན་གླུ་ཡི་མཆོད་པ་ཡིན། །རང་རྒྱུད་ལ་སྐྱོ་བའི་གདུང་དབྱངས་ཡིན། །དགེ་བ་དེས་མ་རྒན་འགྲོ་བའི་ཁམས། །རང་རིག་གི་ངོ་བོར་ལྷུན་གྲུབ་ཤོག ༈ །གཏད་མེད་གྲུབ་པའི་རྡོ་རྗེའི་ཐོལ་གླུ་ཟུང་འཇུག་རོལ་གར་ཞེས་བྱ་བ། ཨེ་མ་ཧོ། ཚོགས་བརྒྱད་དབུ་མར་ཐིམ་པ་ཡི་རིག་གདངས། །ལྷོ་ནུབ་སྲིན་ཡུལ་ཟངས་མདོག་གི་དཔལ་རི། །
སྐུ་གསུམ་རིགས་འདུས་བདེ་ཆེན་གྱི་གྲོང་ནས། །འཆི་མེད་རིགས་འདུས་མཚོ་སྐྱེས་ཀྱི་རྡོ་རྗེ། །དཔའ་བོ་ཌཱ་ཀིའི་ཚོམ་བུ་ཡིས་བསྐོར་བའི། །དག་པའི་ཞིང་ཁམས་རབ་འབྱམས་དེ་མཁྱེན་ནོ། །བླུན་རྨོངས་བདག་ལ་ཐུགས་རྗེ་ཡིས་གཟིགས་མཛོད། །སྣང་སྟོང་དབྱེར་མེད་རྡོ་རྗེ་ཡི་བྲོ་གར། །ཟུང་འཇུག་སྒྱུ་མའི་མཆོད་སྤྲིན་དུ་སྤྲོའོ། །ཕུང་ཁམས་སྐྱེ་མཆེད་འདུས་བྱས་ཀྱི་གྲོང་ཁྱེར། །གདན་གསུམ་ཞི་ཁྲོའི་བྲོ་གར་དུ་རོལ་པས། །ཀུན་བརྟགས་སྣང་བའི་བདེན་ཞེན་ཀུན་ཟད་ནས། །རིག་འཛིན་བཞི་ཡི་གསང་ལམ་དུ་ཆས་འགྲོ། །འགྲོ་འོང་རླུང་ཁམས་ཉི་ཁྲི་དང་ཆིག་སྟོང་། །ཁ་སྦྱོར་གསལ་སྟོང་བྲོ་གར་དུ་རོལ་པས། །ཐ་མལ་ཉོན་མོངས་འཁྲུལ་ཆོས་ཀུན་ཟད་ནས། །ཛ་ལནྡྷ་རའི་དགའ་ཚལ་དུ་ཆས་འགྲོ། །སྣ་ཚོགས་འཁྲུལ་པའི་གང་ཤར་གྱི་རྟོག་པ། །ཤར་གྲོལ་དུས་མཉམ་བྲོ་གར་ལ་རོལ་པས། །མ་རིག་གཟུང་འཛིན་འཁྲུལ་ཆོས་ཀུན་ཟད་ནས། །འོད་གསལ་ཆོས་སྐུའི་དཀྱིལ་འཁོར་དུ་ཆས་འགྲོ། །དབྱིངས་རིག་དབྱེར་མེད་ལུག་རྒྱུད་ཀྱི་ཐིག་ལེ། །སྣང་བཞི་གོང་འཕེལ་བྲོ་གར་དུ་རོལ་པས། །གདོས་བཅས་འབྱུང་བའི་ཞེན་པ་ཀུན་ཟད་ནས། །ཆོས་ཟད་བློ་འདས་ཕོ་བྲང་དུ་ཆས་འགྲོ། །སྔོན་སྨོན་དུས་སུ་སྨིན་པ་ཡི་རྣལ་འབྱོར། །སྐྱོ་ཤས་ངེས་འབྱུང་བྲོ་གར་ལ་རོལ་པས། །རེ་དོགས་མཐུན་འཇུག་དགག་སྒྲུབ་ཀུན་ཟད་ནས། །
རི་ཁྲོད་དབེན་པར་ཏིང་འཛིན་ལ་ཆས་འགྲོ། །མདོ་མེད་ཤེས་བཞིན་དྲེད་པོ་ཡི་སྐལ་ངན། །སྣ་ཚོགས་ཆོས་བརྒྱད་བྲོ་གར་ལ་རོལ་པས། །དད་དང་མོས་གུས་བླང་དོར་ཀུན་ཟད་ནས། །ཐར་མེད་དམྱལ་བའི་གཏིང་རྡོ་རུ་ཆས་འགྲོ། །དེ་སྐད་ངེས་དོན་རྣལ་འབྱོར་གྱི་བྲོ་གར། །རིག་འཛིན་ཌཱ་ཀིར་མཆོད་དབྱངས་སུ་འབུལ་ལོ། །རང་རྒྱུད་རེངས་པའི་སྙིང་རྗེ་ཡི་སྐྱོ་གླུས། །ལེ་ལོ་སྙོམ་ལས་སེལ་བ་རུ་ཤོག་ཅིག །རྒྱལ་ཀུན་འདུས་ཞལ་དྲིན་ཆེན་གྱི་བླ་མ། །རྟག་ཏུ་མོས་པས་སྤྱི་གཙུག་ཏུ་བསྒོམས་ཏེ། །དད་གུས་བཟོད་མེད་བྲོ་གར་ལ་རོལ་ནས། །ཚུལ་བཞིན་དམ་པའི་སྤྱོད་ཚུལ་ལ་འཇུག་ཤོག། ༈ །།ཉམས་ལེན་ཐུན་མོང་དུ་གདམས་པའི་རྡོ་རྗེའི་ཐོལ་གླུ་དྲང་སྲོང་གི་གཏམ་ཅེས་བྱ་བ། ཨ་ཧོ། སྐུ་བཞིའི་དབང་ཕྱུག་རྗེ་བཙུན་རྡོ་རྗེ་འཆང་ཆེན་པོ། །ཚུར་མཐོང་འགྲོ་བའི་མོས་ངོར་གཟུགས་སྐུ་རུ་བཞེངས་པའི། །ཁྱབ་བདག་འཁོར་ལོའི་མགོན་པོ་སྙིང་དབུས་ནས་མཁྱེན་ནོ། །ཆོས་བརྒྱད་འཁྲུལ་པ་ཟད་པར་བྱིན་གྱིས་རང་རློབས་ཤིག །རྙེད་དཀའི་དལ་བརྒྱད་འབྱོར་བཅུའི་མི་ལུས་དེ་ཐོབ་ཀྱང་། །ངེས་ལེགས་ཐར་པའི་གོ་འཕང་སྒྲུབ་འདོད་དང་བྲལ་ཞིང་། །རྟག་ཏུ་དགྲ་གཉེན་ཕྱོགས་ཆའི་བརྟུལ་ཞུགས་ལ་གོམས་པའི། །སྣང་ཚུལ་འདི་ཡང་འཇིག་རྟེན་སྤྱི་མཐུན་གྱི་སྤྱོད་ཚུལ། །བཟློག་མེད་གཤིན་རྗེའི་ཕོ་ཉས་རང་གཞན་ཀུན་བཏབ་ཚེ། །བསགས་
པའི་ནོར་དང་མཛའ་བའི་གཉེན་བཤེས་ཀྱིས་བོར་ཏེ། །གཅིག་པུར་དབང་མེད་ལས་ཀྱི་ཕྱི་བཞིན་དུ་འབྲངས་ཚེ། །ཐུགས་རྗེས་ཟུང་ཞིག་རྗེ་བཙུན་བླ་མ་དེ་མཁྱེན་ནོ། །ཆགས་པས་རང་ཉིད་བསླུ་བའི་བདོག་པ་དེ་བསྒྱུར་ཐོང་། །ཁོང་ཁྲོས་གཞན་སེམས་མནར་བའི་ཚིག་རྩུབ་ཀྱང་སྤོངས་མཛོད། །རྟག་ཏུ་གཞན་ཕན་སྤྱོད་ཅིང་དུལ་བ་ལ་གོམས་པའི། །བག་ཡོད་ཆོག་ཤེས་འབྱོར་པས་ཕྱུག་པ་རུ་མཛོད་ཅིག །སྐྱབས་སུ་སོང་ཡང་བསླབ་བྱའི་ཡོན་ཏན་དང་བྲལ་ཞིང་། །སྨོན་འཇུག་སེམས་བསྐྱེད་བདག་གཞན་ཕྱོགས་རིས་སུ་དབྱེ་བ། །ཚོགས་དྲུག་དངོས་པོར་བཅིངས་པའི་ཀུན་རྟོག་དེ་སྤོངས་ལ། །རྒྱལ་སྲས་འཕགས་པའི་རྣམ་ཐར་ཇི་བཞིན་དུ་བསྙེན་ཅིག །དག་རྫོགས་སྨིན་གསུམ་བྲལ་བའི་མངོན་ཞེན་གྱི་བསྐྱེད་རིམ། །རླུང་ནུས་ཅུང་ཟད་ཐོན་པ་རྫོགས་རིམ་གྱི་མཐར་ཐུག །སེམས་འཛིན་གཉེན་པོས་རྒྱས་བཏབ་ཟུང་འཇུག་ཏུ་འདོད་པས། །ཡང་དག་ལམ་དང་བྲལ་བ་དུས་ཀུན་ཏུ་སྤོངས་ཤིག །ཆོས་དང་བསྒྲིགས་ལ་རེ་བའི་རིག་གྲོལ་གྱི་ཡོན་ཏན། །རྔ་རོལཾ་གཏོར་དབྱངས་གར་མཆམས་གསང་སྔགས་ཀྱི་སྙིང་པོ། །ཐོ་ཅོའི་སྤྱོད་པ་གྲུབ་པའི་རྣམ་ཐར་དུ་རློམ་པ། །གཞན་མགོ་གདུགས་ལྟར་བསྐོར་བའི་ཇོ་བརྫུ་རང་ཡིན་འདྲ། །རླུང་སེམས་དབུ་མར་མ་འདུས་རས་དཀར་གྱི་གོས་དང་། །གདོད་མའི་བཙན་ས་མ་ཟིན་རལ་པ་ཡི་ཟུར་ཕུད། །དོན་
བརྒྱུད་བྱིན་རླབས་མེད་པའི་གླེགས་བམ་གྱི་དཀྱིལ་འཁོར། །སྙིང་པོས་དབེན་པ་རི་མོའི་མར་མེ་དང་འདྲ་བྱུང་། །དབང་བསྐུར་སྲང་མདོར་བཙུགས་པ་སྙིགས་མ་ཡི་སྤྱོད་ཚུལ། །གསང་སྔགས་ཁྱབ་གདལ་སྒྲོགས་པ་དམ་ཚིག་དང་རྒྱབ་འགལ། །ལོག་འཚོའི་གཟི་བྱིན་སྒྲུབ་པས་སྤངས་རྟོགས་ནི་མི་འབྱུང་། །བསྟན་པའི་ནང་དབྱེན་རླབས་ཆེན་དེ་ག་རང་ཡིན་མོད། །གཞན་དོན་ཕྱོགས་མེད་བསྒྲུབ་པའི་བགྱི་བ་རང་བྲལ་ཡང་། །རང་ཉིད་དགེ་བཅུའི་དོན་ལ་འབྲལ་མེད་དུ་སྤྱོད་ཅིང་། །སེམས་བསྐྱེད་བསྔོ་སྨོན་བཙན་པོའི་མཚམས་སྦྱོར་དང་འབྲེལ་ན། །ཐོག་ཐ་བར་གསུམ་རྣམ་དཀར་བྱང་ཆུབ་ཀྱི་ཤུལ་ལམ། །མཛའ་བའི་གྲོགས་དང་འགྲོགས་པ་ལྷ་བདུད་ཀྱི་གཡབ་མོ། །ལོང་གཏམ་བག་མེད་སྨྲ་བ་ཉེས་ལྟུང་གི་འབྱུང་ཁུངས། །གྲགས་སྙན་སྲིད་རྩེར་ཁྱབ་པ་ང་རྒྱལ་གྱི་ཕོ་ཉ། །བྱང་ཆུབ་སྒྲུབ་འདོད་ཀུན་གྱི་དེ་ག་རང་སྤོངས་མཛོད། །ཆགས་སྡང་ཆུ་ལྟར་འཁྲུགས་པའི་འཆད་རྩོད་དང་རྩོམ་པ། །བག་མེད་དཀོར་ལ་སྤྱོད་པ་ཐར་པ་ཡི་སྲོག་གཅོད། །ཤེས་བཞིན་ལེ་ལོར་འཁྱམས་པ་མདོ་མེད་ཀྱི་དྲེད་པོ། །འདི་འདྲས་རང་ཕུང་གཞན་བརླག་ངན་སོང་དེ་སྒྲུབ་འདུག །མི་ཚེའི་ཉི་མ་ནུབ་རིའི་གཟིམ་མལ་ལ་གཤེགས་ཏེ། །འཆི་བདག་མུན་པ་སྟུག་པོས་དབང་མེད་དུ་འདེད་ཚེ། །ག་ཙུག་དྲག་ཏུ་སྐྱོ་བའི་གདུང་དབྱངས་ཀྱིས་འབོད་ཀྱང་། །
དེ་ལ་ཕན་དང་བཤོལ་བའི་ཐབས་ཚུལ་ནི་མི་འདུག །སྐྱེད་མོའི་ཚལ་དུ་རྩེ་བ་གནས་སྐབས་ཀྱི་སྒྱུ་མ། །ཤ་ཆང་ཟས་ལ་རོལ་ཀྱང་འདུ་བྱེད་ཀྱི་སྡུག་བསྔལ། །བེར་གོས་ཁྲི་རྐང་མཐོན་པོ་དུར་ཁྲོད་དུ་བསྐྱལ་ཚེ། །ཕན་པ་མེད་པའི་ངང་ཚུལ་འདི་ཉིད་ལ་གཟིགས་མཛོད། །ཅི་ཙམ་སྨྲས་ཀྱང་སྐྱོ་ཤས་ངེས་འབྱུང་དང་བྲལ་བའི། །རང་རྩིས་དྲེགས་པས་མྱོས་པའི་སྐྱེ་བོ་ལ་ཅི་ཞུ། །ཐར་པའི་ཕྱོགས་ལ་འདུན་པའི་སྐལ་མཉམ་གྱི་གྲོགས་པོར། །ལོངས་སྤྱོད་འཁོར་ལོའི་མཛོད་ནས་རང་གྲོལ་དུ་བླངས་སོ། །དགེ་བ་དེ་ཡིས་སྲིད་ལམ་དུབ་པ་ཡི་འགྲོ་ཀུན། །དབེན་པར་ཚུགས་ཐུབ་བསླབ་གསུམ་བདུད་རྩི་ལ་རོལ་ཞིང་། །བློ་བྲལ་རྫོགས་པ་ཆེན་པོའི་གསེང་ལམ་ལ་བརྟེན་ཏེ། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ།། ༈ །།རང་གཞན་ལ་གདམས་པའི་རྡོ་རྗེའི་ཐོལ་གླུ་ཕན་བདེའི་ཆུན་པོ་ཞེས་བྱ་བ། ཀ་དག་ཁྱད་ཆོས་དྲུག་ལྡན་ཆོས་སྐུ་ཡི་ཀློང་དུ། །ཁ་སྦྱོར་ཡན་ལག་བདུན་ལྡན་ཕྱིར་གསལ་གྱི་རང་གདངས། །ག་བུར་ཐིགས་ཕྲེང་གཡོ་བས་གདུང་བ་དེ་སེལ་བཞིན། །ང་བདག་འཛིན་བྲལ་སྐུ་གསུམ་བླ་མ་དེ་མཁྱེན་ནོ། །ཅ་ཅོའི་ཚིག་གིས་མི་མཚོན་སྤྲོས་བྲལ་གྱི་ངོ་བོ། །ཆ་མཐུན་ཡིད་བྱེད་བྲལ་བའི་ངང་བཞག་གི་རོལ་པ། །ཇ་དར་དབྱིག་གིས་མི་བསྒྱུར་རང་བྱུང་གི་ཡེ་ཤེས། །ཉ་རྒྱས་ཟླ་འདྲའི་བྱང་སེམས་རང་ངོ་རུ་རྫོགས་མཛོད། །ཏ་ལའི་ནགས་ཚལ་དབེན་པར་བག་
ཡོད་ཀྱི་བསླབ་པས། །ཐ་དད་ཟུང་འཇུག་གསང་སྔགས་ཉེ་ལམ་ལ་སྤྱོད་དང་། །ད་གཟོད་བསྐྱར་གྲོལ་འབྲས་བུར་རེ་བ་ནི་མ་དགོས། །ན་མར་བདེ་སྟོང་འོད་གསལ་རོལ་པ་རུ་རྫོགས་འགྲོ། །པ་ར་མི་ཏའི་སྙིང་པོ་བྱང་སེམས་ལ་སྦྱངས་པས། །ཕ་མཐའ་བྲལ་བའི་རྣམ་ཐར་གསུམ་ལྡན་དང་མཇལ་འོང་། །བ་ལང་ལྟ་བུའི་རྨོངས་ཚོགས་གཉུག་མ་རུ་བསྐྱངས་པས། །མ་རིག་འཁྲུལ་པ་བློ་འདས་ཆོས་སྐུ་རུ་གྲོལ་འགྲོ། ཙཱ་རུའི་ཞལ་ཟས་འདྲེན་པས་ཚོགས་དྲུག་ནི་མི་གྲོལ། །ཚ་གྲང་ཚོགས་ཀྱི་འཁོར་ལོས་རླུང་སེམས་ཡང་མི་འདུ། །ཛ་ཧུའི་རྒྱུན་ལྟར་སྟོང་ཉིད་དབྱེར་མེད་དུ་བསྒོམས་ཏེ། །ཝ་མོས་རི་སུལ་འགྲིམ་ལྟར་བས་མཐའ་རུ་འགྲིམ་མཛོད། །ཞྭ་ལྟར་མཐོ་བའི་རྒྱལ་ས་ཆགས་སྡང་གི་གཞི་མ། །ཟ་ལྟར་རྩུབ་པའི་འཁོར་འབྲེལ་ངན་སོང་གི་ས་མཁན། །འ་འུར་རྒྱུ་འབྲས་འཆོལ་བའི་གདོལ་སྤྱོད་འདི་བསམ་ན། །ཡ་མཱནྟ་ཀས་འབོད་ཚེ་གར་འགྲོ་རང་མི་འདུག །ར་མ་ཎ་ལྟར་སྙིང་སྟོབས་སྒྲུབ་པ་ལ་བསྐྱེད་ཅིང་། །ལ་ཀླུང་ངེས་མེད་དགྲ་གཉེན་སྤངས་པ་རུ་རྒྱུ་ནས། །ཤ་ཁྲག་གཡོས་སུ་སྦྱར་བའི་དགའ་སྟོན་དེ་བསྒྱུར་ཐོང་། །ས་བཅུ་རང་ལ་སྒྲུབ་པའི་གདིང་ཆེན་ཞིག་སྒྲུབ་ཤོག །ཧ་ལ་ལྟ་བུའི་སྤང་གཉེན་རང་ངོ་རུ་གྲོལ་ཚེ། །ཨ་དོན་སྐྱེ་མེད་རྟོགས་པའི་རྣལ་འབྱོར་དུ་འདོགས་རུང་། །དོན་དམ་འོད་གསལ་ལྷུན་གྲུབ་སྣང་བཞི་ཡི་སྦུབས་སུ། །སྐུ་གསུམ་
རང་ལ་རྫོགས་པའི་སྨོན་ལམ་ཞིག་ཞུའོ། །དེ་སྐད་གང་ཤར་བཅོས་མེད་རྡོ་རྗེ་ཡི་ཐོལ་གླུ། །ཀ་མད་སུམ་ཅུའི་སྒྲ་དབྱངས་བྱུང་རྒྱལ་དུ་བླངས་པས། །ནང་དབྱིངས་གདོད་ནས་གྲོལ་བའི་བདེ་སྟོང་གི་ངོ་བོར། །སྲིད་ལམ་དུབ་པའི་འགྲོ་ཀུན་ངལ་བསོ་རུ་གྱུར་ཅིག ༈ །རྡོ་རྗེའི་ཐོལ་གླུ་ཡོ་ག་གསུམ་གྱི་རྒྱན་ཅེས་བྱ་བ། ཨ་ཧོ། ཆོས་དང་ཆོས་ཅན་སྤྲོས་པའི་འཆིང་བ་ཀུན་མ་ལུས། །ནང་གསལ་གཞོན་ནུ་བུམ་སྐུའི་ངང་གདངས་སུ་ཐིམ་པས། །སྐུ་གསུམ་འཆར་གཞི་སྐྱེ་འགགས་གནས་གསུམ་དང་བྲལ་བའི། །གདོད་ནས་རང་རྩལ་རྫོགས་པའི་བླ་མ་དེ་མཁྱེན་ནོ། །ངོ་བོ་གནས་ལུགས་མ་བཅོས་སྒོམ་མེད་ཀྱི་ལྟ་བ། །རང་བཞིན་གང་ཤར་རང་གྲོལ་བདེན་གཉིས་དེ་དབྱེར་མེད། །ཐུགས་རྗེ་འཇུག་པའི་ཡུལ་ཀུན་སྣང་སྟོང་དང་ཟུང་འཇུག །གཉུག་མའི་ཡེ་ཤེས་རང་ཞལ་ལྟ་བ་འདི་ཨ་ཧོ། །གདན་གསུམ་དབྱེར་མེད་སྣང་སྟོང་སྒྱུ་འཕྲུལ་གྱི་དྲྭ་བ། །རང་ལུས་རྡོ་རྗེ་ཕུང་པོའི་གྲོང་ཁྱེར་དུ་རྫོགས་པས། །བསྐྱེད་རིམ་ཟབ་མོའི་དཀྱིལ་འཁོར་གསུམ་ལྡན་གྱི་ངོ་བོ། །ཡེ་ནས་རང་ལ་རྫོགས་པའི་ཉམས་ལེན་འདི་ཨ་ཧོ། །བདེ་སྟོང་ཟུང་འཇུག་ཡེ་ཤེས་དྲྭ་བ་ཡི་ངང་དུ། །བཀོད་པ་རྩ་དང་གཡོ་བ་རླུང་གི་དེ་དཀྱིལ་འཁོར། །ཐིག་ལེ་བདུད་རྩིའི་འབྲོས་འདེད་བར་མེད་དུ་སྦྱར་བས། །རྡོ་རྗེ་གསུམ་དངོས་རང་ལ་རྫོགས་པ་འདི་ཨ་ཧོ། །དེ་སྐད་སྣང་སྲིད་ཕྱི་ནང་གཞན་གསུམ་གྱི་ཆོས་ཀུན། །རང་
རིག་བདེ་གཤེགས་སྙིང་པོའི་ངོ་བོ་རུ་རྫོགས་པས། །བདེན་གཉིས་ཁས་ལེན་བྲལ་བའི་བསྐྱེད་རྫོགས་ཀྱི་ཉམས་ལེན། །མགྲིན་པ་རྡོ་རྗེའི་ཐོལ་གླུའི་དཀོར་མཛོད་ནས་བླངས་སོ། །དེ་ཡི་དགེ་བས་མ་རྟོགས་འགྲོ་བ་ཡི་ཁམས་ཀུན། །བརྗོད་བྲལ་ཀ་ནས་དག་པའི་ཡེ་ཤེས་སུ་གྲོལ་ཏེ། །སྐུ་གསུམ་དབྱེར་མེད་བདེ་ཆེན་ངོ་བོ་ཡི་ཉིད་སྐུར། །གདོད་མའི་གཏན་སྲིད་ཟིན་པའི་སྨོན་ལམ་ཞིག་ཞུའོ།། ༈ །།རྣལ་འབྱོར་གསུམ་ལྡན་གྱི་རྡོ་རྗེའི་ཐོལ་གླུ་གསང་བ་སྔགས་ཀྱི་རོལ་མོ་ཞེས་བྱ་བ། ཀ་དག་རིག་སྟོང་ཟུང་འཇུག་བདེ་ཆེན་གྱི་ཀློང་ནས། །ཁ་དོག་སྣ་ཚོགས་ཤར་བའི་རྩ་རླུང་དང་ཐིག་ལེ། །ག་རུ་འདུག་ཀྱང་གདན་གསུམ་ཞི་ཁྲོ་ཡི་མངོན་རྟོགས། །ང་བདག་འཛིན་བྲལ་སྣང་སྟོང་དབྱེར་མེད་ཀྱི་དཀྱིལ་འཁོར། །རྣལ་འབྱོར་ཆེན་པོ་བསྒོམ་ན་དེ་ལྟར་དུ་མཛོད་ཅིག །ཅ་ཅོའི་བྱུང་གནས་འགྲོ་གསུམ་རླུང་སེམས་ཀྱི་རྒྱུ་བ། །ཆ་མཐུན་མཚན་ཉིད་བཞི་ལྡན་དབུ་མ་ཡི་ཀློང་དུ། །ཇ་ཆང་སྐྱེམས་ལ་རོལ་བཞིན་ཁ་སྦྱོར་དུ་འཁྱུད་པས། །ཉ་རྒྱས་ཟླ་ལྟར་བཅུ་དྲུག་བདེ་ཆེན་དེ་འཕེལ་བའི། །རྗེས་སུ་རྣལ་འབྱོར་བསྒོམ་ན་དེ་ལྟར་དུ་མཛོད་ཅིག །ཏ་ཐཱ་ག་ཏའི་སྙིང་པོ་རྫོགས་ཆེན་གྱི་གསེང་ལམ། །ཐ་དད་མ་དམིགས་རང་སེམས་གཉུག་མ་རུ་གཅིག་པས། །ད་བཟོད་བསྐྱར་གྲོལ་ལས་འདས་འབྲས་བུ་ཡི་མཐར་ཐུག །ན་མར་ངང་བཞག་ཤར་གྲོལ་དུས་མཉམ་གྱི་རང་བཞིན། །
ཤིན་ཏུ་རྣལ་འབྱོར་བསྒོམ་ན་དེ་ལྟར་དུ་མཛོད་ཅིག །པ་ར་མི་ཏའི་སྙིང་པོ་བྱང་ཆུབ་ཀྱི་སེམས་མཆོག །ཕ་རོལ་རྒྱུད་ལ་ལྷག་པར་མཛའ་བ་ཡི་ངང་ནས། །བ་ལང་ལྟ་བུའི་འདུ་ཤེས་འོད་གསལ་དུ་གྲོལ་ཏེ། །མ་རིག་མཐའ་ལས་འདས་པའི་སྐུ་གསུམ་གྱི་རོལ་པ། །བདེན་གཉིས་ཟུང་འཇུག་བསྒོམ་ན་དེ་ལྟར་དུ་མཛོད་ཅིག །ཙཱ་རུའི་ཞལ་ཟས་ཀྱིས་མཚོན་འདོད་ཡོན་གྱི་རོལ་པ། །ཚ་གྲང་ག་ཎ་ཙ་ཀྲའི་འདུ་བ་ལ་སྤྱོད་། ཅིང་། །ཛ་ཧུའི་རྒྱུན་ལྟར་ཡེངས་མེད་སྒོམ་མེད་ཀྱི་ངང་ནས། །ཝ་མོ་རི་སུལ་འགྲིམ་ལྟར་དབེན་པ་རུ་རྒྱུ་བའི། །ཚོགས་གཉིས་ཟུང་འཇུག་བསྒོམ་ན་དེ་ལྟར་དུ་མཛོད་ཅིག །ཞྭ་ཐོད་སྤངས་པའི་ཐོར་ཚུགས་གསང་སྔགས་ཀྱི་བརྡ་རྟགས། །ཟ་འདྲེ་གནོད་བྱེད་རྒྱུད་ཀྱང་སྙིང་རྗེ་ཡིས་བསྒྱུར་ནས། །འ་འུར་སྤངས་ཏེ་རང་རྒྱུད་དུལ་བ་ལ་བསྙེན་པས། །ཡ་མཱནྟ་ཀས་འབོད་ཚེ་འཇིགས་པ་དེ་མི་ཡོང་། །བསླབ་གསུམ་ཡར་ལྡན་བསྒོམ་ན་དེ་ལྟར་དུ་མཛོད་ཅིག །རཱ་ཙ་ལ་སོགས་མི་མིན་གདུག་པ་ཡི་ཚོགས་ཀུན། །ལ་ཀླུང་འགྲོ་ལ་འཚེ་བ་གཞན་ཕན་གྱིས་བཏུལ་ཏེ། །ཤ་ཁྲག་གཡོས་སུ་སྦྱར་བའི་དགའ་སྟོན་གྱི་བཟའ་བཏུང་། །ས་བཅུ་རང་ངོར་རྫོགས་ཚེ་བདེ་སྟོང་དུ་རོལ་པའི། །དོན་གཉིས་ལྷུན་གྲུབ་བསྒོམ་ན་དེ་ལྟར་དུ་མཛོད་ཅིག །ཧ་ཅང་རང་གིས་མ་རྟོགས་གཞན་རྒྱུད་ལ་གདམས་འདི། །ཨ་ལ་ལ་ཞེས་གུས་པས་འཛིན་པ་དེ་བྲལ་
ཡང་། །ཧ་ལ་ལྟ་བུའི་རྟོག་ཚོགས་ཤར་གྲོལ་དང་ཟུང་འཇུག །ཨ་ཏི་ཁྲེགས་ཆོད་ངང་ནས་གང་ཤར་དུ་བླངས་སོ། །དེ་སྐད་བརྗོད་པ་དུས་གསུམ་མཁས་གྲུབ་ཀྱི་ཚོགས་ལ། །མི་ཕྱེད་དད་དང་གུས་པའི་རང་བཞིན་ལས་སྐྱེས་ཏེ། །འོད་གསལ་སྤྲུལ་པར་ཤར་བའི་རིག་འཛིན་གྱི་གླུ་དབྱངས། །རང་དེར་སྐལ་མཉམ་དོན་དུ་སྤྲིང་པ་ཡི་གཏམ་མོ།། ༈ །།ལྟ་སྒོམ་སྤྱོད་པའི་དོན་བསྡུས་རྡོ་རྗེའི་ཐོལ་གླུ་ཟབ་དོན་ལྟ རོལ་མོ་ཞེས་བྱ་བ། ལྟ་བ་མཐའ་བརྒྱད་བྲལ་བ་ལ། །ཚིག་དང་གོ་བས་མ་དཔྱད་ཅིག །དོན་དམ་རང་ངོར་གྲོལ་བའི་ངང་། །འཛིན་མེད་ཡེ་གྲོལ་ཆེན་པོར་ཞོག །སྒོམ་པ་རང་གསལ་རང་གྲོལ་ལ། །བློས་བ བྱས་ཀྱི་ཞེན་པས་མ་འདེབས་ཤིག །དོན་ཡིན་ལུགས་བསམ་ངོ་བྲལ་བའི་ངང་། །ཤར་གྲོལ་དུས་མཉམ་ཆེན་པོར་ཞོག །སྤྱོད་པ་ཡེངས་མེད་དྲན་མེད་ལ། །བསྒོམ་བྱའི་མེ་བཙའ་མ་འདེབས་ཤིག །དོན་སྒོམ་མེད་གཏིང་མཐའ་བྲལ་བའི་ངང་། །ཤེས་རིག་རང་ཚུགས་ཟུང་ལ་ཞོག །འབྲས་བུ་བྲལ་ཐོབ་མེད་པ་ལ། །སླར་ཡང་གུད་ནས་མ་རེ་ཞིག །ད་ལྟའི་རིག་པ་རྗེན་པ་ལ། །སོ་མ་ངང་བཞག་ཆེན་པོར་ཞོག ། – ལྟ་སྒོམ་སྤྱོད་འབྲས་ཀྱི་ཐ་སྙད་དེ། །བཞག་ཐབས་རྣམ་བཞི་རུ་བསྟན་པ་འདི། །ཡེ་ཤེས་བླ་མའི་ཞལ་ལུང་སྟེ། །སྐལ་བར་ལྡན་པའི་སྙིང་ལ་ཟུང་།། ༈ །།ངོ་བོ་སྟོང་པ་ཆོས་ཀྱི་སྐུ། །རང་བཞིན་གསལ་བ་ལོངས་
སྤྱོད་རྫོགས། །ཐུགས་རྗེ་འགགས་མེད་སྤྲུལ་པའི་སྐུ། །སྐུ་གསུམ་ལྷུན་གྲུབ་ཞབས་ལ་འདུད། །ལྟ་བ་མཐའ་བརྒྱད་དྲི་བྲལ་ལ། །སྨྲ་བསམ་བརྗོད་པ་ཀུན་དང་བྲལ། །སྒོམ་པ་ཤར་གྲོལ་དུས་མཉམ་ལ། །སྐྱེ་འགགས་སྔ་ཕྱིའི་དབྱེ་བ་བྲལ། །སྤྱོད་པ་མཉམ་རྗེས་དབྱེར་མེད་ལ། །ཡེངས་དང་མ་ཡེངས་འཛིན་པ་བྲལ། །འབྲས་བུ་རང་རིག་རྗེན་པ་ལ། །འཁྲུལ་གྲོལ་རྟོག་པ་ཀུན་དང་བྲལ། །གྲོལ་བཞིའི་གདིང་ཐོབ་སངས་རྒྱས་ཏེ། །ཀ་དག་ཆེན་པོར་ཡེ་ནས་གྲོལ། །དེ་སྐད་བརྗོད་མེད་ཉམས་ཀྱི་གླུ། །སྤྲོས་བྲལ་ཚིག་ཏུ་ཤར་བ་འདི། །ཡེ་ཤེས་བླ་མའི་སྙན་བརྒྱུད་དེ། །སྐལ་བར་ལྡན་པའི་ཙིཏྟར་སྦོས།། ༈ །།རང་གཞན་ལ་གདམས་པ་རྡོ་རྗེའི་ཐོལ་གླུ་ལྷག་བསམ་ཆུན་པོ་ཞེས་བྱ་བ། ཀ་ནས་དག་པ་ཆོས་སྐུ་ཞལ་ཕྱག་མཚན་མ་བྲལ་ཡང་། །ཁ་སྦྱོར་ཡན་ལག་བདུན་ལྡན་ལོངས་སྤྱོད་རྫོགས་པའི་སྒྱུ་འཕྲུལ། །ག་ལ་བ་དེར་མཁྱེན་བརྩེའི་ཡོན་ཏན་ཡོངས་སུ་རྫོགས་པ། །ང་བདག་འཛིན་པ་བྲལ་བའི་སྐུ་གསུམ་བླ་མ་མཁྱེན་ནོ། །ཅ་ཅོའི་ཚིག་གིས་གཞལ་བས་མཐའ་བརྒྱད་སྤྲོས་བྲལ་མི་རྟོགས། །ཆ་མཐུན་བསྐྱེད་རྫོགས་བསླབ་པས་ལས་རླུང་འཁྲུལ་པ་ཟད་དེ། །ཇ་ཆང་འཛིན་རྟོག་བྲལ་བའི་བློ་འདས་གཉུག་མ་རྟོགས་ཡོང་། །ཉ་རྒྱས་ཟླ་འདྲའི་བྱང་སེམས་རྟག་ཏུ་གོམས་པ་གཅེས་སོ། །ཏ་ཐཱ་ག་ཏའི་ལམ་རིམ་བདེན་གཉིས་སོ་སོར་ཕྱེ་ཡང་། །ཐ་དད་ཟུང་
འཇུག་རྟོགས་ཚེ་གསང་སྔགས་ལས་ནི་ཅི་ཞིག །ད་ལྟའི་རིག་སྟོང་རྗེན་པ་དབང་བཞིའི་དོན་བརྒྱུད་ཡིན་ཕྱིར། །ན་མར་རྟོག་པའི་དྲ་བ་མཐའ་གྲོལ་ཆེན་པོར་ཐོངས་ཤིག །པ་སངས་གསར་པ་ལྟ་བུའི་སྨོན་འཇུག་གོ་ཆ་བགོས་ནས། །ཕ་མཐའ་བྲལ་བའི་ཉོན་མོངས་མུན་པ་གཏན་ནས་བཅོམ་མཛོད། །བ་མཆོག་ནོར་བུ་ལས་ལྷག་ཆགས་བྲལ་ཚུལ་ཁྲིམས་ཡིན་ཕྱིར། །མ་སྤང་རྟག་ཏུ་སྤྱོད་ལ་ཆོག་ཤེས་མེད་བར་བསྙེན་ཅིག །ཙཱ་རི་ཏྲ་སོགས་གནས་ཡུལ་ཌཱ་ཀིའི་གྲོང་ཁྱེར་ལགས་ཀྱང་། །ཚ་གྲང་ཡུས་ཀྱིས་བགྲོད་པས་ཚེ་འདིར་གྲུབ་མཐའ་མི་རྙོགས། །ཛ་ཧུའི་རྒྱུན་ལྟར་ཏིང་འཛིན་བསྐྱེད་རྫོགས་ཟུང་འཇུག་ཉེ་ལམ། །ཝ་ལྟར་རི་སུལ་འགྲིམ་ནས་རྟག་ཏུ་བསྒོམ་པར་མཛོད་ཅིག །ཞྭ་ཐོད་ཇི་བཞིན་དཀོན་མཆོག་སྤྱི་བོའི་གཙུག་ཏུ་འཁུར་ནས། །ཟ་མའི་ཚེ་ཡང་མི་རྟག་དྲན་ཚེ་ཕན་བདེ་སྦྱིན་ཡོང་། །འ་འུར་གདོལ་པའི་སྤྱོད་པས་པཚོ་རྒྱུ་འབྲས་ཁྱད་དུ་མ་བསད། །ཡ་མཱནྟ་ཀས་འབོད་ཚེ་འཇིགས་པ་མེད་པར་མཛོད་ཅིག །ར་མ་ཎ་ལྟར་དཔའ་ཆེན་སྙིང་སྟོབས་རང་ཕུང་གཞན་བརླག །ལ་ཀླུང་ངེས་མེད་ཉུལ་ནས་ཐར་བ་ཐོབ་པར་མཛོད་ཅིག ། ཤ་ཁྲག་གཡོས་སུ་སྦྱར་བས་ཚོགས་ཀྱི་འཁོར་ལོར་མི་འགྲོ། །ས་བཅུ་རང་ངོར་རྫོགས་པའི་ཟབ་མོའི་གསང་ལམ་སྒོམས་ཤིག །ཧ་ཅང་སྙིགས་མའི་དུས་འདིར་དེ་འདྲ་སྤྱོད་པ་དཀོན་ཡང་། །ཨ་དོན་སྐྱེ་མེད་ངང་
ནས་རེ་དོགས་བྲལ་བར་སྨྲས་སོ། །དགེ་བ་དེ་ཡིས་འགྲོ་ཀུན་ཉོན་མོངས་འཆིང་བ་གྲོལ་ཏེ། །ལྷན་སྐྱེས་སྐུ་བཞིའི་དབྱིངས་སུ་བཙན་ས་ཟིན་པར་ཤོག་ཅིག །ཅེས་པའང་རང་གཞན་གྱིས་བསླབ་པར་བྱ་བའི་ཚུལ་བྱུང་རྒྱལ་དུ་སྨྲས་པའོ།། ༈ །།རྫོགས་པ་ཆེན་པོ་གཞི་ལམ་འབྲས་གསུམ་གྱི་བསྡུས་དོན་རྡོ་རྗེའི་ཐོལ་གླུ་རིག་འཛིན་དགྱེས་པའི་སྒྲ་དབྱངས་ཞེས་བྱ་བ།། ཨ་ཧོ། བློ་ཡིས་མཚོན་དུ་མེད་པ་ནི། །རྣམ་ཐར་སྒོ་གསུམ་དབྱིངས་སུ་འདྲེས། །ཟུང་འཇུག་ཤེས་རབ་ཕ་རོལ་ཕྱིན། །ཡེ་ཤེས་ཌཱ་ཀིའི་ངོ་བོར་འདུད། །དོན་གནས་ལུགས་རྫོགས་པ་ཆེན་པོའི་ཞལ། །དྲན་པ་ཀུན་ཏུ་བཟང་པོ་ཞེས། །འགྲོ་རྒྱུད་ལ་གཉིས་མེད་གནས་མོད་དེ། །ཕུང་པོ་ལྔ་ཡི་སྒྲོག་གིས་བཅིངས། །རིག་པ་ཡེ་གྲོལ་སོར་བཞག་ལ། །ཚིག་དང་གོ་བས་མི་མཚོན་ཀྱང་། །གཞི་ལམ་འབྲས་བུ་རྣམ་པ་གསུམ། །འཁོར་འདས་ཀྱི་ཆོས་ཀུན་མཚོན་ཕྱིར་བཤད། །དེར་ཐོག་མར་གཞི་ཡི་གནས་ལུགས་ནི། །འཁྲུལ་གྲོལ་གྱི་སྦུབས་སུ་མ་ཆུད་པའི། །གཉིས་སྣང་དང་བྲལ་བའི་རང་ངོ་ལ། །ལམ་དུས་ཀྱི་རྟོགས་པའི་འཆར་གཞིར་གནས། །དེར་རླུང་རིག་གཡོས་པའི་རྩལ་སྣང་སེམས། །རང་ཤར་དུ་འབྱུང་བའི་སྐད་ཅིག་མར། །རྟོག་འཛིན་གྱི་ཤེས་པ་བྲལ་གྱུར་ཚེ། །གྲོལ་ལུགས་བརྒྱད་ཀྱི་རོལ་པ་ལས། །གཞི་དབྱིངས་ཀྱི་ངོ་བོར་རོ་གཅིག་སྟེ། །གདོད་མའི་མགོན་པོར་མངོན་སངས་རྒྱས། །དེ་རང་གཞན་རྟོག་པས་བཅིངས་ནས་ཀྱང་། །འཁྲུལ་
པ་ལ་བདག་ཏུ་བཟུང་བའི་མཐུས། །མ་རིག་པ་རྣམ་གསུམ་དང་འགྲོགས་ནས། །མཐའ་མེད་ཀྱི་འཁོར་བའི་རྒྱ་མཚོ་བྱུང་། །ཡང་ཉམས་ལེན་ལམ་གྱི་གནས་སྐབས་སུ། །ལྟ་སྒོམ་སྤྱོད་འབྲས་རྣམ་པ་བཞི། །གཟུགས་ཕུང་ལ་རྟེན་ཅིང་འབྲེལ་འབྱུང་ཞིང་། །ཚོར་བ་ཡིས་བདེ་སྡུག་སྣང་ཚུལ་མྱོང་། །འདུ་ཤེས་ཀྱི་སྣ་ཚོགས་ཡུལ་ལ་འཇུག །འདུ་བྱེད་ཀྱིས་སླད་མའི་རྗེས་སྒྲུབ་ཅིང་། །རྣམ་ཤེས་ཀྱིས་དེ་ཀུན་ངོ་བོར་ཁྱབ། །དེ་ཕུང་པོ་ལྔ་ཡི་རང་བཞིན་ཏེ། །དེ་ཡིན་ལུགས་བསམ་ངོ་བྲལ་བ་ལ། །ཟག་ཟད་ཀྱི་རིག་པ་མངོན་འགྱུར་ཕྱིར། །ཕུང་པོ་ལྔ་བྲལ་གྱི་ཡེ་ཤེས་ཏེ། །ཀ་དག་རྫོགས་པ་ཆེན་པོ་དང་། །གཞན་དུ་ཤེས་རབ་ཕ་རོལ་ཕྱིན། །རྣམ་ཐར་གསུམ་ལྡན་སྟོང་པ་ཉིད། །དོན་དམ་བདེན་པ་ཆེན་པོ་སྟེ། །ཡོངས་གྲུབ་འདི་ལྟ་བའི་རྩེ་མོ་ལགས། །དེ་ཉིད་ལྷན་སྐྱེས་ཉིད་ཡིན་ཀྱང་། །ཉོན་སྒྲིབ་དྲུ་བར་འཐུམས་ཆེས་ཤིང་། །ཤེས་སྒྲིབ་བློ་དང་ལྷན་ཅིག་ཕྱིར། །ཚོགས་གཉིས་མྱུར་དུ་འདུམ་བྱེད་པ། །མདོ་སྔགས་ཀྱི་ལམ་མཆོག་རྨད་བྱུང་སྤྱད། །ཁྱད་པར་དུ་སེམས་ཅན་ལ་སྙིང་རྗེ་དང་། །བླ་མ་ལ་མོས་གུས་སྲོག་བཟུང་ནས། །སྒོམ་མེད་བློ་བྲལ་གྱི་དོན་ལ་བལྟ། །ཉམས་དང་ཞེན་པའི་མཐའ་སྤངས་ནས། །ཡེངས་མེད་ཀྱི་དྲན་རིག་རྟག་ཏུ་སྐྱོངས། །མཐར་རྒྱུ་རྐྱེན་ཟད་པའི་མེ་བཞིན་དུ། །ཤར་གྲོལ་དུས་མཉམ་ཆེན་པོར་ལོངས། །
དེ་ཉམས་ལེན་སྒོམ་པའི་མདོ་འགག་ལགས། །ཁྱད་པར་རྫོགས་པ་ཆེན་པོའི་ལམ། །སྒྲོན་མ་རྣམ་བཞིའི་བསྐྱེད་པ་ཡི། །འཇའ་ཟེར་ཐིག་ལེའི་སྦུབས་འཇུག་པས། དབྱིངས་རིག་དབྱེར་མེད་སྣང་བཞིའི་ངང་། །ཕྱི་གཟུང་བ་འོད་གསལ་ཆེན་པོར་ཡལ། །ནང་འཛིན་པ་ཀ་དག་གཞི་རུ་གྲོལ། །བདེ་བའི་བསམ་གཏན་ཙམ་མིན་པའི། །ཁམས་གསུམ་འོད་གསལ་ཐུགས་ཀྱི་དངོས། །ཁྱད་ཆོས་དྲུག་ལྡན་ནང་དབྱིངས་སུ། །རོ་གཅིག་འགྱུར་བའི་ཁྱད་པར་ལྡན། །དུས་ཀུན་སྤྱོད་པས་ཉམས་བླང་ཕྱིར། །ཅོག་བཞག་རྣམ་བཞིའི་ལྷུམས་སུ་ཞུགས། །ཁྱད་པར་ནམ་མཁའ་སུམ་ཕྲུགས་དང་། །སེམས་རིག་དབྱེ་བའི་ཉམས་ལེན་ནི། །རྟག་པར་འབད་པ་གསང་བའི་ལམ། །བླ་ན་མེད་པར་ཤེས་མཛོད་ཀྱེ། །ལམ་དེའི་རྟོགས་པ་མངོན་གྱུར་ཏེ། །བསྒོམ་མོ་ཞེས་པའི་ཐ་སྙད་དང་། །མི་བསྒོམ་ཐ་མལ་བློས་བཏང་མིན། །རེ་དོགས་ལས་འདས་ཆོས་སྐུའི་ཞལ། །ཚེ་འདི་ཉིད་ལ་མངོན་དུ་འགྱུར། །འདི་ནི་འབྲས་བུའི་སྐྱེལ་སོ་ལགས། །གཞན་དུ་ཁྲེགས་ཆོད་ཐོད་རྒལ་ལ། །སོ་སོའི་གྲུབ་མཐའ་ཐ་དད་དེ། །སྔ་མ་ནང་དབྱིངས་ཆེན་པོ་རུ། །དབྱེར་མེད་མངོན་སངས་རྒྱས་པ་དང་། །ཕྱི་མས་སྣོད་བཅུད་འོད་གསལ་ངང་། །གྲོལ་བའི་ཁྱད་པར་མཁྱེན་འཚལ་ལོ། །སྤྱིར་རྒྱལ་བས་ཆོས་སྒོ་དཔག་མེད་ཀུན། །ཉོན་མོངས་ཀྱི་གཉེན་པོར་བསྟན་མོད་དེ། །ཚིག་སྤྲོས་
པའི་མཐའ་ལ་ཟད་མེད་ཀྱི། །དོན་ཉམས་སུ་ལེན་པ་དེ་ལ་མཛོད། །དེ་སྐད་ཉམས་སུ་ལེན་པའི་མོད། །མཁའ་སྤྱོད་རིག་འཛིན་དགྱེས་པའི་གླུ། །གང་ཤར་རང་གྲོལ་ངང་ནས་བྲིས། །དགེ་བས་འགྲོ་ཀུན་སངས་རྒྱས་ཤོག ༈ །ཆེད་དུ་བརྗོད་པའི་རྡོ་རྗེའི་ཐོལ་གླུ་གཞན་ཕན་ཟློས་གར་ཅེས་བྱ་བ། ཨ་ཧོ། ཀ་དག་བསམ་བརྗོད་བྲལ་བའི་རང་ངོ་ལ་བལྟས་པས། །ཁ་དོག་བཟོ་དབྱིབས་མཚན་མའི་འཁྲུལ་ཆོས་ཀུན་ཟད་ནས། །ག་བུར་འཛིན་ལྟར་དྲི་བྲལ་རིག་སྟོང་གི་གཤིས་སུ། །ང་བདག་ལས་འདས་ཆོས་སྐུའི་བླ་མ་དང་མཇལ་བྱུང་། །ཅ་ག་ངེས་འབྱུང་སོ་ཐར་ཚུལ་ཁྲིམས་ཀྱིས་བསྡམས་ཏེ། །ཆ་མཐུན་འགྲོ་ཀུན་སྒྲོལ་འདོད་བྱང་སེམས་ལ་བསླབས་ནས། །ཇ་ཆང་འཁྲུལ་རྟོག་རིག་འཛིན་དམ་ཚིག་གིས་འཆིང་བའི། །ཉ་རྒྱས་ཟླ་འདྲའི་བསླབ་གསུམ་ཡར་ལྡན་ལ་བསྙེན་ཅིག །ཏ་ཐཱ་ག་ཏའི་བསྟན་པ་རིམ་དགུ་རུ་ཕྱེ་ནས། །ཐ་དད་བདེན་གཉིས་དབྱེར་མེད་གསང་སྔགས་ཀྱི་ཉེ་ལམ། །ད་ལྟའི་ཤེས་པ་རིག་སྟོང་རྗེན་པ་རུ་རྫོགས་པས། །ན་མར་ཤར་གྲོལ་དུས་མཉམ་ཆེན་པོ་རུ་སྐྱོངས་ཤིག །པ་ར་མི་ཏིའི་སྤྱོད་པ་རྒྱ་མཚོ་ལ་བསླབས་པས། །ཕ་མཐའ་མི་མངོན་ས་ལམ་ཡོན་ཏན་ཀུན་རྫོགས་ཀྱང་། །བ་མཆོག་དཔག་བསམ་ཤིང་ལྟར་མཆོག་ཐུན་གྱི་དངོས་གྲུབ། །མ་ལུས་མྱུར་དུ་སྦྱིན་པ་གསང་སྔགས་ཀྱི་ཁྱད་ཆོས། །ཙཱ་རི་ཏྲ་སོགས་ཤུལ་ལམ་བཟོད་སྲན་
གྱིས་བགྲོད་པས། །ཚ་གྲང་ལས་འདས་རྣམ་ཀུན་མཆོག་ལྡན་དང་མི་མཇལ། །ཛ་ཧུའི་རྒྱུན་ལྟར་བདེ་སྟོང་ཏིང་འཛིན་ལ་རོལ་པས། །ཝ་ལྟར་ཉུལ་བའི་རླུང་སེམས་དབུ་མ་རུ་ཕེབས་སོ། །ཞྭ་ཐོད་གསེར་དུ་གཡོས་ཀྱང་ཆོས་སྐུ་ནི་མི་ཐོབ། །ཟ་ར་ཟི་རིའི་བཙུན་ཆས་ལོངས་སྐུ་དང་མི་མཛའ། །འ་འུར་དབྱངས་དང་རོལ་མོས་སྤྲུལ་སྐུ་ཡང་མི་འགྲུབ། །ཡ་མཱནྟ་ཀས་འབོད་ཚེ་གདིང་ཆེན་ཞིག་རྙེད་མཛོད། །རྭ་ཅོ་ལྟ་བུའི་ཐེག་དམན་རང་དོན་གྱི་འཁོར་ལོ། །ལ་ཀླུང་རྒྱུ་བའི་སྔགས་སྨོན་དམྱལ་བ་ཡི་གཏིང་རྡོ། །ཤ་ཁྲག་གཡོས་སུ་སྦྱར་བས་གསང་སྔགས་ནི་མ་ཡིན། །ས་བཅུ་རང་ངོར་རྫོགས་པའི་དངོས་གྲུབ་ཤིག་བརྙེས་མཛོད། །ཧཾ་ཡིག་བདེ་སྟོང་ལང་ཚོའི་འཇོ་སྒེག་དང་སྒྲགས་ནས། །ཨ་ཤད་གཏུམ་མོའི་མེ་ལྕེའི་འབྲོས་འདེད་ལ་སྦྱར་བས། །ཧ་ལའི་རྟོག་ཚོགས་ཅེར་གྲོལ་གཉུག་མ་རུ་ཐིམ་ནས། །ཨ་དོན་འོད་གསལ་རྫོགས་ཆེན་སྙིང་དབུས་སུ་ཕེབས་ཤོག ༈ །རྡོ་རྗེའི་ཐོལ་གླུ་ལམ་གྱི་རིམ་པ་ཉེ་བར་བསྡུས་པ་ཞེས་བྱ་བ། ཨ་ཧོ། རིག་སྟོང་སྤྲོས་བྲལ་འོད་གསལ་གཉུག་མ་ཡི་སྦུབས་ནས། །དབྱིངས་རིག་དབྱེར་མེད་སྐུ་གསུམ་བདེ་ཆེན་གྱི་ཌཱ་ཀི །ང་ཡི་སྙིང་དབུས་གཞོན་ནུ་བུམ་སྐུ་རུ་བཞུགས་དང་། །གཏད་མེད་གསང་སྔགས་ལམ་གྱི་ཐོལ་གླུ་རུ་བསྒྱུར་བཏང་། །དལ་བ་བརྒྱད་ཀྱི་འཁྲི་ཤིང་འབྱོར་བཅུ་ཡི་མེ་ཏོག །འཕྲལ་རྐྱེན་རིས་ཆད་མི་ཁོམས་ཚ་གདུང་
གིས་སྤངས་པས། །སྐྱོན་བྲལ་མི་ལུས་རིན་ཆེན་རྙེད་དཀའ་ཡི་བསིལ་ཡབ། །གཏན་བདེའི་ངལ་བསོ་བསྟེན་པའི་སྐྱོ་གྲོགས་སུ་ཕེབས་སོ། །དེ་ཡང་ཕྱི་སྣོད་མི་རྟག་རྣམ་བཞི་ལ་སྤྱོད་ཅིང་། །ནང་བཅུད་མཆོག་དམན་བར་མ་འཆི་བདག་གིས་བཟུང་ཕྱིར། །སྙིང་པོ་མེད་པའི་ངང་ཚུལ་མཐའ་བཞི་ཡིས་བསྡུས་པས། །སྐད་ཅིག་དལ་མེད་ཐར་པའི་གོ་འཕང་ལ་སྦྱོར་འཚལ། །དཀར་ནག་ལས་ཀྱི་ས་བོན་སོ་སོ་རུ་བཏབ་པས། །བདེ་སྡུག་འབྲས་བུ་མི་བསླུ་ཐ་དད་དུ་སྨིན་ནས། །གཞི་དང་བསམ་སྦྱོར་མཐར་ཐུག་ཡན་ལག་ཀུན་རྫོགས་ཕྱིར། །ཐར་པའི་དཔག་བསམ་དབང་པོ་བསྐྱེད་པ་རུ་མཛོད་ཅིག །སྣ་ཚོགས་ལས་ཀྱིས་སྣ་ཚོགས་སྣང་ཚུལ་ལ་སྤྱོད་པའི། །འགྲོ་དྲུག་སྡུག་བསྔལ་གསུམ་གྱིས་མནར་སྤྱོད་དེ་མཐོང་ནས། །བདེན་པ་བཞི་ཡི་ཤིང་རྟ་དམ་པ་ལ་ཞོན་ཏེ། །ངེས་ལེགས་ཐར་པའི་གླིང་དུ་ཕྱིན་པ་རུ་མཛོད་ཅིག ། གང་ཞིག་བསྟེན་ན་འཕྲལ་ཡུན་ཕན་བདེ་ཀུན་སྦྱིན་པའི། །དགེ་བའི་གྲོགས་དང་བཤེས་གཉེན་འབྲལ་མེད་དུ་བསྟེན་ཅིང་། །ངེས་ལེགས་ལམ་ཀུན་བསོད་ནམས་ཚོགས་ཀུན་ཏུ་སྤེལ་བའི། །འཁོར་ལོ་བཞི་ཡི་བདོག་པ་ཐོབ་པ་རུ་མཛོད་ཅིག །ཞི་བསིལ་བླ་ན་མེད་པའི་ཡོན་ཏན་གྱིས་ཕྱུག་ཅིང་། །སྲིད་ལས་རྣམ་གྲོལ་གཞན་དོན་ལྷུན་གྲུབ་ཀྱི་མཛད་པ། །མངོན་དུ་བརྙེས་པའི་འཕགས་པ་རྣམ་གསུམ་གྱི་གོ་འཕང་། །
ཚད་མེད་འབྲས་བུ་ལྡན་པས་ཉེ་བ་རུ་བླང་མཛོད། །ཁྱད་པར་སྐྱབས་གསུམ་ཟོལ་མེད་དད་པ་ཡིས་བསྟེན་ཏེ། །སྨོན་འཇུག་སེམས་གཉིས་འབྲལ་མེད་ཐེག་ཆེན་གྱི་སྐྱེས་བུ། །སྡིག་ལྟུང་ཞི་བྱེད་སྟོབས་བཞིའི་གོ་ཆ་དང་བཅས་ཏེ། །ཚོགས་གཉིས་སྤེལ་ཕྱིར་བསོད་ནམས་བསགས་པ་ལ་འབད་མཛོད། །དབང་བཞི་ཡོངས་རྫོགས་འཁོར་ལོའི་མགོན་པོ་མཆོག་དེ་ཉིད། །ཟབ་མོའི་རྒྱུད་ལས་རྒྱལ་བ་ཀུན་དངོས་སུ་གསུངས་ཕྱིར། །རྟག་ཏུ་བསྒོམ་ནས་གསོལ་གདབ་ལམ་དབང་དང་འབྲེལ་བར། །ཁྱེད་ཤེས་དད་པས་བསྐྱེད་པ་མདོ་སྔགས་ཀྱི་དགོངས་བཅུད། །དེ་ལྟར་སྔོན་འགྲོའི་ཆོས་ཀྱི་བློ་སྦྱོང་ལ་ཞུགས་ཏེ། །ཁྱད་པར་དབྱིབས་ཀྱི་རྗེས་འགྲོ་སྣང་སྟོང་གི་བསྐྱེད་རིམ། །རང་བཞིན་སྟོང་པའི་ལམ་འགྲོ་རྫོགས་རིམ་གྱི་ལམ་དང་། །ཟུང་འཇུག་འོད་གསལ་ངང་ནས་རྫོགས་ཆེན་གྱི་གསང་བ། །དམ་ཚིག་གྲོགས་བཅས་འབྲལ་མེད་འབད་པ་རུ་མཛོད་ཅིག །གདན་གསུམ་དབྱེར་མེད་རྡོ་རྗེ་ཕུང་པོ་ཡི་གྲོང་ཁྱེར། །ཉི་ཁྲི་ཆིག་སྟོང་སྲོག་རྩོལ་སྐྱེ་མེད་ཀྱི་བཟླས་པ། །བརྒྱད་ཁྲི་བཞི་སྟོང་རྟོག་ཚོགས་གཉུག་མ་རུ་རོལ་པའི། །དཀྱིལ་འཁོར་གསུམ་ལྡན་ཟབ་མོའི་གསང་ལམ་གྱི་དགོངས་བཅུད། །སྦྱོར་བ་བྱང་ཆུབ་སེམས་ཀྱི་ཀུན་སློང་གིས་བསྐྱེད་དེ། །དངོས་གཞི་འཁོར་གསུམ་མི་དམིགས་འཛིན་བྲལ་གྱི་ལམ་མཆོབ། །དེ་ལྟར་ཐོས་བསམ་སྒོམ་པའི་རྗེས་འགྲོ་
ཡི་སྤྱོད་ཚུལ། །བསླབ་གསུམ་དོན་དང་ལྡན་པའི་སྐ པ་བཟང་ལ་བསྙེན་ནས། །རང་གཞན་ཐར་བར་སྦྱོར་བའི་ཕྲིན་ལས་ཀྱིས་འབྱོར་པས། །ལེགས་གསུངས་དམ་ཆོས་རྒྱ་མཚོའི་སྙིང་པོ་རང་ཡིན་ནོ། །དེ་སྐད་ལམ་ཀུན་བསྡུས་པའི་རྡོ་རྗེ་ཡི་ཐོལ་གླུ། །རང་གཞན་དོན་དུ་སྨྲས་པའི་ཚོགས་གཉིས་ཀྱི་འབྲས་བུ། །དེང་ནས་འགྲོ་ཀུན་བླ་མེད་བྱང་ཆུབ་ཀྱི་ཤུལ་ལས། །རྒྱལ་ཀུན་གཤེགས་པའི་ས་དེར་བགྲོད་པ་རུ་ཤོག་ཅིག །ཅེས་པའང་ཟབ་མོའི་དོན་གྱི་གསལ་འདེབས་སུ་གང་ཤར་ལྷུག་པར་བརྗོད་པའོ།། ༈ །།ལམ་ཐུན་མོང་གི་རྡོ་རྗེའི་ཐོལ་གླུ་ངེས་པར་འབྱུང་བའི་རོལ་མོ་ཞེས་བྱ་བ། ཨ་ཧོ། སྤངས་རྟོགས་ཡོན་ཏན་ནོར་བུའི་ཟ་མ་ཏོག་གི་གཏེར། །ཕན་བདེའི་འདོད་འཇོ་མཚན་དཔེའི་དཔལ་གྱིས་མཛེས་འཁྱུད་སྐུ། །གང་གི་ཞབས་ན་སྲིད་ཞིའི་ཐོར་ཚུགས་ཀྱིས་བཏུད་པ། །དེ་ལ་བདག་ཀྱང་མི་ཕྱེད་དད་པའི་སྲིད་ཞུ་སྟོབ། །རྙེད་པར་དཀའ་ཞིང་རྙེད་ན་དོན་གྱི་མཆོག་ལྡན་པ། །ངོ་བོ་དལ་བ་བརྒྱད་ཀྱི་མྱུ་གུ་གཞོན་ནུའི་ངོགས། །ཁྱད་པར་འབྱོར་བཅུའི་ཀུན་གསར་བའི་ལ་ཐོད་ཅན། །འཕྲལ་རྐྱེན་རིས་ཆད་ཚ་གདུང་སྟུག་པོ་ལས་བརྒལ་མཛོད། །ཕྱི་སྣོད་བརྟེན་པ་ཆགས་གནས་འཇིག་སྟོང་རྣམ་བཞི་དང་། །ནང་བཅུད་སེམས་ཅན་སྐྱེ་རྒ་ན་འཆིའི་གཞན་དབང་ཅན། །ཀུན་ཀྱང་མཐའ་བཞིས་བསྡུས་པའི་ངང་ཚུལ་འདི་བསམས་ནས། །སྐད་ཅིག་བགྱི་བ་དལ་མེད་དགེ་བའི་
དོན་ལ་སྤྱོད། །དེ་ཡང་དཀར་ནག་ལས་ཀྱི་ས་བོན་བཙུགས་པ་ལས། །ཀུན་ཏུ་མི་བསླུའི་མྱུ་གུ་སོ་སོར་སྨིན་པ་གང་། །གཞི་དང་བསམ་སྦྱོར་མཐར་ཐུག་རྫོགས་པས་བྱུང་གྱུར་ན། །ཐར་པ་ཆ་མཐུན་ཚོགས་་གཉིས་ལམ་ལ་འབད་པར་འཚལ། །གང་ཞིག་མེ་ཚོགས་སྤུ་གྲིའི་སོར་ཆགས་སྦྲང་རྩི་བཞིན། །སྤྱོད་པ་ཙམ་ནས་སྡུག་བསྔལ་གསུམ་གྱི་ཁོར་ཡུག་ཅན། །གནས་རིས་དྲུག་གི་ཆུ་གཏེར་སྲིད་རྩེར་གཡོ་བ་ལས། །ངེས་པར་འབྱུང་བའི་རིན་ཆེན་གྲུ་བོ་བརྙེས་པར་མཛོད། །སྐྱོན་བྲལ་སྤངས་རྟོགས་ཡོན་ཏན་ཕུན་སུམ་ཚོགས་པའི་གཏེར། །སྲིད་པའི་འཇིགས་འཕྲོག་ཐར་པ་ལ་སྦྱོར་ཐུགས་རྗེ་ལྡན། །སངས་རྒྱས་དངོས་དང་མི་ཕྱེད་དད་པས་བླ་མ་མཆོག །རྟག་ཏུ་བསྙེན་ཅིང་དོན་ལྡན་གསུང་གི་གསང་བ་བསླབ། །རང་རྒྱུད་ཉེས་པ་སུམ་ཅུ་རྩ་དྲུག་རྡུལ་རྫབ་ཁྲོད། །ལྟུང་བའི་ནོར་བུ་དེ་ལྡོག་ཡོན་ཏན་ཡན་ལག་གིས། །ལེགས་བླངས་བྱི་དོར་དང་བཅས་ཐོས་པའི་རྣམ་པ་ནི། །བརྒྱད་ཅུ་རྩ་བཞིའི་གདུགས་དཀར་རྩེ་མོར་ངལ་བསོ་བྱ། །རྣམ་པ་ཀུན་ཏུ་སྒོ་གསུམ་ཐར་པ་ལས་གོལ་བའི། །ཤིན་ཏུ་རེངས་པ་སྦྲུལ་གདུག་ལྟ་བུའི་གྲོགས་པོ་ནི། །བསྟེན་པ་ཉིད་ནས་ཚུལ་མིན་དུག་གིས་མྱོས་བྱེད་ཕྱིར། །དེ་དག་ཕྱི་ཕྱིར་བསྲིང་བའི་དམ་བཅའ་ལེགས་བརྟན་པར། །བག་ཡོད་ཚུལ་ཁྲིམས་ནོར་གྱིས་རབ་ཕྱུག་སྤྱོད་པ་དང་། །བྱང་ཆུབ་སེམས་གཉིས་རིན་ཆེན་
དྲ་བའི་ཐོར་ཚུགས་ཅན། །འཇིག་རྟེན་འདི་ན་རྙེད་དཀའ་དགེ་བའི་གཉིས་འཐུང་དབང་། །ཕན་བདེའི་འདོད་པ་སྟེར་ཕྱིར་དུས་ཀུན་བཤེས་པར་བྱ། །དཀར་པོའི་ཡུལ་རྐྱེན་གྱིས་བསྐུལ་མི་ཕྱེད་དད་པའི་སྤྲིན། །རྟག་ཏུ་འབྲལ་མེད་འཁོར་བའི་ཚ་གདུང་ཀུན་སྐྱོབ་ཅིང་། །ཡོན་ཏན་ལོ་ཏོག་གོང་འཕེལ་འགྱུར་ཕྱིར་སྲོག་གི་ཕྱིར། །འདི་ཉིད་མི་བཏང་བསྙེན་པའི་འབྲས་བུ་ཚད་བཟུང་མེད། །གང་ན་སྙིང་པོའི་ལྕིད་ཀྱིས་ལྷག་པའི་གོ་འཕང་ནི། །སྲིད་པའི་སྡུག་བསྔལ་མཐའ་དག་མངོན་བཏང་འཕོ་འགྱུར་མེད། །ཞི་བདེ་བསིལ་བའི་བདུད་རྩིའི་སིམ་པ་སྟེར་བྱེད་པ། །འགྲོ་སྒྲོལ་ཕྲིན་ལས་ལྷུན་གྱིས་གྲུབ་ཕྱིར་སྤྲོ་བ་བསྐྱེད། །རྟག་ཏུ་ཐོས་པའི་རྩ་བ་མི་གཡོ་རྣམ་པར་བརྟན། །བསམ་བྱུང་ཤེས་རབ་ཡལ་ག་མཛེས་པའི་གདེངས་ཀ་ཅན། །སྒོམ་སྤང་དེ་ཉིད་ཁྱད་པར་འཕགས་པའི་འབྲས་བུའི་གཏེར། །འདི་ནི་རྒྱལ་བསྟན་ཡོངས་རྫོགས་ལྗོན་ཤིང་ཡིན་ཕྱིར་བསྙེན། །དེ་ལྟར་ཐུན་མོང་སྤྱོད་ཚུལ་སྙིང་པོ་མདོ་ཙམ་ཞིག །རང་གཞན་དོན་དུ་རྡོ་རྗེའི་གླུ་རུ་བླངས་པ་ལ། །རྣམ་པར་དགེ་བའི་ཚོགས་ཀུན་གཅིག་བསྡུས་མཁའ་མཉམ་འགྲོ། །བླ་མེད་བྱང་ཆུབ་དམ་པར་གཤེགས་པའི་རྒྱུ་རུ་བསྔོ།། ༈ །།ཐེག་པ་ཆེན་པོའི་རྡོ་རྗེའི་ཐོལ་གླུ་བྱང་སེམས་འཁྲི་ཤིང་ཅེས་བྱ་བ། ཨ་ཧོ། སྟོང་ཉིད་སྙིང་རྗེ་ཟུང་དུ་འཇུག་པའི་ཆུ་གཏེར་ལས། །ལེགས་དབྱུང་ཚོགས་གཉིས་ཡོངས་
སུ་རྫོགས་པའི་ཟླ་ཤེལ་དབང་། །རབ་གུས་དད་པའི་ཀུ་མུད་རྩེ་མོར་ངལ་བསོས་པས། །འདི་ན་བྱང་ཆུབ་སེམས་ཀྱི་འཛུམ་དཀར་གྲོལ་བར་འགྱུར། །གང་ཞིག་སྲིད་པའི་གཅོང་རོང་དམ་པོར་ལྷུང་བ་ཀུན། །དཀོན་མཆོག་གསུམ་གྱི་ཐུགས་རྗེའི་དཔྱང་ཐག་ལ་བརྟེན་ཏེ། །ཞི་བདེ་རིན་ཆེན་གླིང་དུ་ཕྱིན་ཕྱིར་ཐོག་མ་ནས། །དེ་ཉིད་ཁོ་ན་སྐྱབས་ཀྱི་སྙིང་པོར་བསྟེན་པར་བྱ། །དེ་ཡང་སྐྱེས་བུ་གསུམ་གྱི་ལམ་ནི་གང་རུང་བ། །བློ་ཡི་ནུས་སྟོབས་དག་གི་རྗེས་འགྲོས་ལེགས་བླངས་ཏེ། །འཇིག་རྟེན་ཕལ་དང་བདག་ལྟའི་སྐྱོབ་འདོད་མངོན་བཏང་ནས། །སྤངས་རྟོགས་ཡོན་ཏན་ཡོངས་སུ་རྫོགས་པའི་སངས་རྒྱས་དང་། །བརྗོད་བྱ་རྗོད་བྱེད་ཐར་པའི་ལམ་དཀྲི་དམ་པའི་ཆོས། །རིག་གྲོལ་འཕགས་པའི་ཡོན་ཏན་ལྡན་པ་དགེ་འདུན་ཏེ། །རྣམ་གསུམ་གདུག་དཀར་གཡོ་མེད་དད་པའི་དཔུང་པས་བཟུང་། །ཉིན་དང་མཚན་མོ་རྟག་ཏུ་སྐྱབས་འགྲོ་བྱང་ཆུབ་བར། །བསྙེན་ནས་སྤང་བྱ་བསླབ་བྱ་ཆ་མཐུན་འབད་པས་བསྒྲུབ། །གཞན་དུ་ཕྱི་ནང་གསང་བ་ཡང་གསང་བཞིར་དབྱེ་ཕྱིར། །ཐོག་མ་དེ་དང་དེ་རྗེས་གཞན་ལ་འཇུག་པའམ། །དབང་པོའི་རིམ་པའི་བགོ་སྐལ་ཇི་བཞིན་འབད་པར་བྱ། །ཁྱད་པར་གཤེགས་དང་གཤེགས་འགྱུར་རྒྱལ་ཀུན་གཞན་དོན་ཕྱིར། །བྱང་ཆུབ་སེམས་ཀྱི་གོ་ཆ་བརྟན་པོ་བགོས་པ་ན། །མཐར་ཕྱིན་འདོད་ལྷའི་སྙིང་ལ་ཚེར་མས་བཅིངས་
པའི་མདས། །སྡིག་པར་མ་ནུས་གོང་མའི་ཡོན་ཏན་ཚད་བཟུང་མེད། །རྟེན་ནི་རིགས་སད་བྱིན་གྱིས་བརླབས་དང་དད་ལྡན་སོགས། །ཁྱད་པར་སྙིང་རྗེ་ཆེན་པོའི་བློ་དང་ལྡན་པ་དེར། །སྦྱོར་དངོས་རྗེས་གསུམ་རྫོགས་པའི་ཆོ་གས་འཐོབ་བྱས་ནས། །བྱམས་པའི་མྱུ་གུ་སྙིང་རྗེའི་ཆུ་ཡིས་རབ་བརླན་ཅིང་། །དགའ་བའི་མེ་ཏོག་བཏང་སྙོམས་འབྲས་བུས་མཛེས་དུད་པའི། །སྨོན་སེམས་དབྱར་སྐྱེས་གཞོན་ནུ་མགྲོན་དུ་ཉེར་བསྟེན་ཏེ། །ཁྱད་པར་འཇུག་པའི་རིན་ཆེན་ཤིང་རྟ་བསྙེན་པར་བྱ། །ཐར་པ་ལ་སྦྱོར་དམ་ཆོས་སྦྱིན་པའི་གདུགས་དཀར་པོ། །འབད་མེད་དགོས་རྒུ་རྣམས་སྟེར་ནོར་བུའི་གཙུག་ཏོར་ཅན། །གནས་སྐབས་འཇིགས་བཅས་ཚ་གདུང་སྐྱོབ་པའི་གྲིབ་བསིལ་ཅན། །འདི་དེ་འགྲོ་བའི་བླ་ན་མངོན་པར་མཛེས་པར་བྱ། །རང་གཞན་ཉེས་སྤྱོད་རྡུལ་དང་རྣམ་པར་མི་མཛའ་ཞིང་། །དགེ་ཚོགས་བུང་བ་ཡོངས་སུ་བསྡུ་བའི་དྲི་བསུང་ཅན། །གཞན་དོན་མཆོག་གི་སྦྲང་རྩིའི་དོགས་པས་རབ་གཏམས་པའི། །ཚུལ་ཁྲིམས་ཆུ་སྐྱེས་སྤྱི་བོའི་ལ་ཐོད་བཞིན་དུ་བསྟེན། །གནོད་པའི་ཡུལ་གྱིས་ཁོང་མི་འཁྲུགས་པའི་བརྟུལ་ཞུགས་ཅན། །ཐར་པའི་ཕྱིར་ན་དཀའ་བ་སྤྱད་པའི་སྐྱེས་བུ་དེའི། །ཡིད་ནི་ཟབ་མོའི་དོན་དང་མཛའ་བ་སྐྲག་པ་མིན། །རྣམ་གསུམ་བཟོད་པའི་གོ་ཆ་བགོ་ལ་རྟག་ཏུ་འདུན། །བྱང་ཆུབ་བར་དུ་འདོར་མེད་བསྒྲུབ་པའི་
དམ་བཅའ་དང་། །རྟག་ཏུ་དེ་བཞིན་སྦྱོར་བས་ཉམས་བླངས་གཡེལ་བ་མེད། །མི་འགོད་མི་ལྡོག་ཆོག་མི་ཤེས་པས་བརྩོན་པ་གང་། །ཐར་པ་འཛིན་པའི་སྲོག་ཏུ་ཀུན་ནས་རིག་པར་བྱ། །དབེན་ཞིང་འདུ་འཛི་ལས་བརྒལ་ནགས་ཁྲོད་དམ་པ་དེར། །རྟག་ཏུ་ཞི་བར་མཉམ་བཞག་དོན་ལ་ལེགས་པར་སྦྱོར། །ལམ་ལ་མ་ཞུགས་དེ་ལྡོག་མོས་སྤྱོད་ཏིང་འཛིན་དང་། །ཟག་མེད་འཕགས་པའི་བསམ་གཏན་རྣམ་གསུམ་སྒྲུབ་པར་བྱ། །ཁྱད་པར་ཐོས་པའི་བདུད་རྩི་བར་མེད་བཏུང་བ་ལས། །དེ་དོན་རྗེས་སུ་བསམ་པའི་ལང་ཚོ་རབ་རྒྱས་ཤིང་། །སྒོམ་སྤང་དེ་ཉིད་བཅུད་ལེན་གྲུབ་པ་གང་དག་ནི། སྲིད་ཞི་ལས་གྲ་ལ་ཐར་པ་མཆོག་ལ་མྱུར་དུ་འགྲོ། བསླབ་བྱ་དེ་ཀུན་མི་མཐུན་ཕྱོགས་དང་བཤེས་མིན་ཅིང་། །ཀུན་ཏུ་གོང་འཕེལ་ཆུད་མི་འཛའ་བའི་གྲོགས་དང་བཅས། །རྟག་ཏུ་གཡེལ་མེད་སྐྱེས་བུ་ཆེན་པོའི་ལམ་མཆོག་ཉིད། །བསྙེན་པར་མཛོད་ཅིག་གུས་པའི་ཐལ་མོ་སྙིང་གར་འཛུམ། །མཐར་ཕྱིན་ཚོགས་སྦྱོར་མཐོང་སྒོམ་ལམ་ནི་རྣམ་པ་བཞིར། །ས་བཅུའི་མངོན་རྟོགས་ཡོན་ཏན་མ་ལུས་ཡོངས་རྫོགས་ཏེ། །གྲངས་མེད་གསུམ་མཐར་རྡོ་རྗེ་ལྟ་བུའི་ཏིང་འཛིན་གྱིས། །སྒྲིབ་ཀུན་སྤངས་ཏེ་མཐའ་རུ་ཕྱིན་པའི་ལམ་རྙེད་ནས། །སྐུ་དང་ཡེ་ཤེས་ཕྲིན་ལས་བསམ་མི་ཁྱབ་པར་སྤྱོད། །ཚུལ་འདི་སྡེ་སྣོད་གསུམ་གྱི་བརྗོད་བྱ་རྒྱ་ཆེ་ལ། །བརྗོད་དོན་ཟབ་ཕྱིར་
བརྒལ་བར་དཀའ་ཡང་རྡོ་རྗེའི་གླུའི། །རྣམ་པར་ཕྱེ་ལས་གྲུབ་པའི་དགེ་ཚོགས་རྨད་བྱུང་གིས། །འགྲོ་ཀུན་ཐར་པ་མཆོག་གི་ས་ལ་གཤེགས་གྱུར་ཅིག། ༈ །།སྒྲིབ་གཉིས་རྣམ་པར་ཞི་བའི་རྡོ་རྗེའི་ཐོལ་གླུ་རིག་སྟོང་གཉུག་མའི་རྒྱན་ཅེས་བྱ་བ། ཨ་ཧོ། བཟོད་ནས་གློ་བུར་དྲི་མའི་དག་བྱ་མ་ལུས་པ། །ཀུན་ཏུ་རྟོག་དང་ལྷན་ཅིག་མཛའ་བ་མིན་པའི་ཆོས། །གཟུང་འཛིན་ལས་འདས་རིག་སྟོང་ཟུང་འཇུག་བདེ་བ་ཆེ། །ཐོག་མའི་མགོན་པོ་ཀུན་ཏུ་བཟང་པོ་དེ་ལ་འདུད། །ཤིན་ཏུ་བརྒལ་དཀའ་འཇིགས་རུང་འཁོར་བའི་རྒྱ་མཚོ་ཆེ། །སྡུག་བསྔལ་གསུམ་གྱི་རྦ་རླབས་རབ་ཏུ་གཡོ་བའི་དབུས། །དལ་འབྱོར་རིན་ཆེན་གྲུ་བོ་མཆིས་པ་གང་ཉིད་ཀྱང་། །སྡིག་ལྟའི་འཐོར་རླུང་དྲག་པོས་བཅོམ་ལས་ཕྱིར་བཟློག་སླད། །བདེ་ཆེན་འཁོར་ལོའི་ཟུར་ཕུད་མཛེས་པ་ག་ལ་བར། །པད་དཀར་ཟླ་སྟེང་རྒྱལ་ཀུན་ཐུགས་མཆོག་རྡོ་རྗེ་སེམས། །ཤེས་རབ་ཡུམ་བཅས་མཉམ་པར་སྦྱོར་བའི་ཐུགས་ཀ་རུ། །གསང་སྔགས་ཐིག་ལེ་བརྒྱ་པའི་ཕྲེང་བ་རྣམ་བཀོད་དེ། །སྔར་བྱས་འགྱོད་དང་ཕྱིན་ཆད་སྡོམ་པའི་སེམས་བརྟན་པོས། །གུས་པའི་གསོལ་བ་གདབ་ཅིང་འདུན་པས་གཅུར་བ་ལས། །རྗེས་སུ་ཆགས་པའི་ཐུགས་རྗེས་རིངས་གཟིགས་སྦྱོར་མཚམས་ནས། །བདེ་ཆེན་བྱང་སེམས་ཟླ་བ་ཞུན་མ་ལྟར་བབས་ཏེ། །ཚངས་པའི་སྒོ་ནས་སྙོམས་པར་ཞུགས་དང་ཆབ་གཅིག་པར། །ནད་
གདོན་སྒྲིབ་ཀུན་དུད་སོལ་རྣམ་པར་ཕྱིན་ཐོན་ཏེ། །རྩ་གསུམ་འཁོར་ལོ་བཞི་ལྡན་གནས་ཀུན་ཁེངས་པ་ལས། །ལུས་སེམས་ཟག་མེད་བདེ་ཆེན་དགའ་བ་བཞི་ཡིས་མྱོས། །བསྐྱེད་པའི་འཁོར་ལོ་རང་ལ་བསྟིམ་ཞིང་རང་ཉིད་ཀྱང་། །ལྷག་པའི་ལྷར་གྱུར་དཀྱིལ་འཁོར་གསུམ་དང་ལྡན་པའི་ངང་། །སྡིག་དང་ལྟུང་བ་སྐྱེ་འགག་གནས་གསུམ་རབ་བྲལ་ཞིང་། །ཡང་དག་དྲན་པའི་ངང་དུ་མཉམ་པར་འཇོག་པ་ལས། །བཟང་ངན་ཤེས་བྱའི་རྟོག་པས་ཕ་མཐའ་ཐུག་མིན་པའི། །སྤྲོས་དང་བྲལ་བ་འདི་ནི་བཤགས་སྦྱང་ཀུན་གྱི་མཆོག །དེ་ལྟར་བསྐྱེད་དང་རྫོགས་པ་ཟུང་འཇུག་ཟླ་བའི་ཟེར། །ཤིན་ཏུ་གནག་པའི་ཁ་ན་མ་ཐོ་ལ་རེག་པས། །སྟོབས་བཞིའི་མཐུ་ཡིས་སྒྲིབ་གཉིས་མུན་པ་ཡོངས་སྦྱངས་ཏེ། །བླ་ན་མེད་པའི་གཏན་བདེའི་སྣང་བ་འཐོབ་པར་འགྱུར། །དེ་ལྟར་གང་ཤར་བཛྲ་གཱི་རྟིའི་རོལ་མོ་ཆེ། །མགྲིན་པ་ལོངས་སྤྱོད་འཁོར་ལོའི་མཛོད་ནས་འཁྲོལ་བའི་མོད། །སྒྲིབ་གཉིས་གཉིད་ལས་གཡུར་བ་མ་ལུས་ཀུན་སད་དེ། །བྱང་ཆུབ་མཆོག་གི་ངལ་བསོ་བསྟེན་པའི་རྒྱུ་རུ་བསྔོ། ཞེས་པའང་སྣང་ཆའི་རྟེན་འབྲེལ་གསར་པས་མཚམས་སྦྱར་ཏེ་གང་ཤར་ལྷུག་པར་བླངས་པའོ།། ༈ །།ཚོགས་གཉིས་ཡོངས་སུ་རྫོགས་པའི་རྡོ་རྗེའི་ཐོལ་གླུ་བསོད་ནམས་སྤྲིན་གྱི་གྲུ་ཆར་ཞེས་བྱ་བ། ཨེ་མ་ཧོ། །བླ་ན་མེད་མཆོག་བདེ་བ་ཆེན་པོའི་ངོ་བོ་ལ། །རྒྱུ་དང་འབྲས་བུའི་ཚོགས་ཆེན་གཉིས་ཀྱིས་སྤྱད་གྱུར་པས། །
གནས་སྐབས་མཐར་ཐུག་སྒྲིབ་འཇོམས་དགེ་ལེགས་འཕེལ་བགྱིད་པའི། །བྱེད་པོ་གང་ཡིན་དེ་ནི་ཡོངས་སུ་རྒྱལ་གྱུར་ཅིག །ཀུན་ལ་ཁྱབ་མཉམ་ལྷན་སྐྱེས་སྙིང་པོའི་རིགས་ཀྱི་ཁམས། །ལམ་དུས་ཐབས་དང་ཤེས་རབ་འཕེན་པས་བསྐྱེད་བསྲིངས་པས། །དག་པ་གཉིས་ལྡན་རང་བཞིན་གང་ཡིན་མངོན་བགྱིད་ཕྱིར། །བྱང་ཆུབ་འདོད་ཀུན་ཚུལ་འདིར་འབད་པས་འཇུག་པར་བྱ། །གང་ཞིག་མངོན་མཐོའི་དཔལ་གྱི་དཀྱིལ་འཁོར་ལེན་པའམ། །དེ་བཞིན་རྡོ་རྗེ་བཙུན་མོའི་མཁའ་དབྱིངས་ཉིད་དག་ཏུ། །རྣམ་ཐར་གསུམ་ལྡན་ཡེ་ཤེས་ཆེན་པོ་མཉམ་རྫོགས་ཕྱིར། །ཐུན་མོང་གསང་བའི་སྒྲ་དོན་ཉིད་དུ་ངེས་པར་བརྗོད། །སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་བསམ་གཏན་དང་། །ཤེས་རབ་ཕ་རོལ་ཕྱིན་པའི་བདག་ཉིད་གང་ཡིན་པ། །དྲི་ཡི་ཐིག་ལེ་རྣམ་པར་བསྒོས་པ་བྱས་གྱུར་ནས། །ཚོམ་བུའི་དཀྱིལ་འཁོར་ཡོངས་སུ་རྫོགས་པའི་ཚེ་ན་འགྲུབ། །ཛམྦུའི་གསེར་གྱི་ཞུན་མས་བྱུགས་པའི་ས་གཞིའི་ངོས། །སྣ་ཚོགས་རཏྣའི་བ་གམ་བརྩེགས་པའི་ལྷུན་པོ་ལ། །གླིང་བཞི་གླིང་ཕྲིན་ལྕགས་རི་མུ་ཁྱུད་མཛེས་པའི་དབུས། །དགོས་འདོད་ཀུན་འབྱུང་རིན་ཆེན་རི་བོ་དཔག་བསམ་ཤིང་། །འདོད་འཇོའི་བ་མཆོག་འབད་རྩོལ་བྲལ་བའི་འབྲས་བུའི་ཚལ། །འཁོར་ལོས་བསྒྱུར་རྒྱལ་བསོད་ནམས་ཆུ་གཏེར་ལས་འཁྲུངས་པའི། །ཡོན་ཏན་ཆ་ཤས་
ཡོངས་སུ་གང་བའི་རིན་པོ་ཆེ། །གནས་སྐབས་བདེ་སྟེར་རྣམ་པ་བདུན་གྱི་གཉིས་སྐྱེས་དབང་། །གཏེར་ཆེན་བུམ་བཟང་ཀུན་ཏུ་སྒེག་པའི་གཞོན་ནུ་དང་། །རིན་ཆེན་ཕྲེང་འཛིན་མཉན་པར་འོས་པའི་གླུ་དབྱངས་ཅན། །མཉེན་ལྕུག་འཁྲིལ་ལྡེམ་ཟློས་གར་རབ་མཛེས་ཆུ་སྐྱེས་ཐོགས། །སྣང་བའི་དཔལ་སྟེར་ནོར་བུའི་སྒྲོན་མེ་བསུང་ཞིམ་སྤྲིན། །སྙིང་ནས་སིམ་པ་སྟེར་བྱེད་དྲི་མཆོག་ཆུ་རྒྱུན་བཅས། །འཇིག་རྟེན་སྣང་བྱེད་ཉི་ཟླའི་རྣ་ཆ་མངོན་པར་གཡོ། །རིན་ཆེན་གདུགས་མཛེས་བསམ་འཕེལ་མཆོག་གི་གཙུག་ཏོར་ཅན། །ཕྱོགས་ལས་རྣམ་རྒྱལ་རྒྱལ་མཚན་ལྷབ་ལྷུབ་གཡོ་བ་སོགས། །སྲིད་པ་གསུམ་ན་ཡོངས་སུ་བཟུང་དང་མ་། བཟུང་བའི། །མཆོད་པའི་སྤྲིན་ཕུང་རབ་འབྱམས་ནམ་མཁའི་དབྱིངས་ཁྱབ་ཀུན། །བློ་ཡིས་བླངས་ཏེ་དཀོན་མཆོག་རིན་ཆེན་རྣམས་ལ་འབུལ། །གཞན་ཡང་ཚོགས་བརྒྱད་སྣང་བ་ཤར་ཀུན་འདོད་ཡོན་གཏེར། །རྡོ་རྗེ་ཕུང་ཁམས་སྐྱེ་མཆེད་ལྷུན་གྲུབ་མཉེས་པའི་སྤྲིན། །འཁོར་གསུམ་མི་དམིགས་བདེ་སྟོང་བློ་འདས་ཆེན་པོར་འབུལ། །གསང་གསུམ་མི་བཟད་རྒྱན་གྱི་འཁོར་ལོའི་སྤྲུལ་པའི་ཞིང་། །ངེས་པ་ལྔ་ལྡན་རྟག་ཏུ་ལོངས་སྤྱོད་ཡེ་ཤེས་སྐུ། །ནང་གསལ་རིག་སྟོང་ཟུང་འཇུག་ཆོས་སྐུའི་དེ་ཉིད་དབྱིངས། །སྨྲ་བསམ་བརྗོད་འདས་བླ་ན་མེད་པའི་མཆོད་སྤྲིན་ཏེ། །ཕྱི་ནང་གསང་བའི་བཀོད་པས་ཁྱད་པར་འཕགས་པ་གང་། །
སྐྱབས་ཀྱི་སྙིང་པོ་གང་དག་དད་ཅིང་དྲན་པ་དང་། །དེ་བཞིན་ཆོས་ཀྱི་འཁོར་ལོ་ཡོངས་སུ་བསྐོར་བའི་ཚེ། །ཆོས་བཞིན་སྤྱོད་པའི་སྙིང་པོ་འདི་ཉིད་དབུལ་བར་བགྱི། །དེ་ནི་ཡོན་ཏན་དམ་པ་ཚད་བཟུང་བྲལ་བ་སྟེ། །ཚོགས་གཉིས་མ་ལུས་ཡོངས་སུ་རྫོགས་པའི་མཐུ་དཔལ་གྱིས། །ཆོས་དང་གཟུགས་སྐུའི་འཁོར་ལོ་དབང་འབྱོར་རྒྱུན་མི་ཆད། །གནས་སྐབས་དག་ཏུ་འང་བདེ་བའི་འབྲས་བུ་ཀུན་ནས་ཐོབ། །དེ་སྐད་བསོད་ནམས་ཡོངས་སུ་རྫོགས་བྱེད་རྡོ་རྗེའི་གླུ། །ལོངས་སྤྱོད་འཁོར་ལོའི་མཛོད་ནས་གང་ཤར་འཁྲོལ་བའི་མོད། །དཀོན་མཆོག་གསུམ་དངོས་བྱང་ཆུབ་སེམས་ཀྱི་སྐྱེས་བུ་གང་། །གློ་བུར་འཁྲུལ་པའི་གཉིད་ལ་གཡུར་བ་སེལ་བགྱིད་ཤོག །ཅེས་པའང་ལམ་འདིར་འབད་པས་འཇུག་པའི་ཚེ་ཐོལ་བྱུང་དུ་བླངས་པའོ།། ༈ །།ལམ་ཟབ་མོའི་རྡོ་རྗེའི་ཐོལ་གླུ་གྲུབ་གཉིས་ཐིག་ལེ་ཞེས་བྱ་བ། ཨེ་མ་ཧོ། ལེགས་པའི་ཡོན་ཏན་ཀུན་གྱི་བདག་ཉིད་འི འཁོར་ལོའི་མགོན། །རྟག་པར་འབྲལ་མེད་སྙིང་དབུས་མི་ཤིགས་ཐིག་ལེ་རུ། །མངོན་པར་བཞུགས་ནས་གནས་སྐབས་མཐར་ཐུག་ཕན་བདེ་ཡི། །འདོད་དོན་ཅི་དགར་འཇོ་བའི་ཕྲིན་ལས་རྨད་བྱུང་སྩོལ། །གང་དེ་ལན་གཅིག་བསམ་པའི་ཡོན་ཏན་ཟད་མེད་པ། །རབ་ཏུ་བསྔགས་པ་བདེན་པར་གསུངས་ཕྱིར་འདིར་བཤད་དོ། །བདེ་བའི་སྟན་ལ་ཆོས་བདུན་ལྡན་པ་ཕུང་པོའི་གྲོང་། །རིག་རྩལ་ཡུལ་ལས་འཕྲོ་བ་སྡུད་
པའི་བསམ་གཏན་དང་། །རང་གི་སྤྱི་བོར་པདྨ་དཀར་པོ་ཉི་ཟླའི་སྟེང་། །རྒྱལ་ཀུན་འདུས་ཞལ་ཁྱབ་བདག་དྲིན་ཆེན་བླ་མ་རྗེ། །རྟོག་པའི་རིམ་པ་རྣམ་པ་རྡོ་རྗེ་སེམས་དཔའི་སྐུ། །སྟོན་མཚན་དྭངས་པའི་མཁའ་ལ་ཤར་བའི་ཟླ་བ་ལྟར། །ཀུན་ཏུ་རབ་དཀར་བདེ་སྟོང་རྡོ་རྗེ་དྲིལ་བུས་མཚན། །ཟག་བྲལ་སངས་རྒྱས་ཌཱ་ཀི་འཁྲིལ་བར་གསལ་བཏབ་བམ། །གཞན་དུ་འཆི་མེད་བདེ་བའི་བདག་ཉིད་མཚོ་སྐྱེས་རྗེ། །ཨུཏྤལ་དམར་པོའི་འདབ་མ་ཆུ་ཤེལ་དབང་པོ་ཡིས། །རྣམ་པར་མདངས་འདྲའི་མཚན་དཔེའི་དཀྱིལ་འཁོར་ལྷག་པར་རྒྱས། །ཐེག་གསུམ་ཆས་རྫོགས་ཐབས་ཤེས་རྡོ་རྗེ་བདེ་སྐྱོང་བསྣམས། །ཤེས་རབ་ཌ་ཀི་སྦས་ཚུལ་ཁ་ཊཾ་གྲུ་མོར་འཆང་། །རྗེས་སུ་ཆགས་པའི་སྤྱན་གྱིས་རྣམ་པར་གཟིགས་པར་བསྒོམ། །གཞན་ཡང་ལྷག་པའི་ལྷ་མཆོག་གང་ཡང་རུང་བར་གསལ། །གུས་གདུང་དད་པའི་སྤུ་ལང་མངོན་པར་གཡོ་བ་ཡིས། །ཞི སྙིང་ནས་གསོལ་བཏབ་བསྟོད་བསྔགས་མགྲིན་པའི་རོལ་མོར་འཁྲོལ། བདེ་ཆེན་ལོངས་སྤྱོད་ཆོས་ཉིད་འཁོར་ལོའི་འབྲུ་གསུམ་ལས། །འོད་ཟེར་འཕྲོས་ནས་གདན་གསུམ་ཆུ་གཏེར་ལ་ཞུགས་པས། །སྒྲིབ་བཞི་རྣམ་སྦྱང་ལམ་བཞི་བསྒོམ་རུང་འཛུམ་ཟེར་གྱིས། །སྐུ་བཞི་ཐོབ་རུང་ཀུན་བཞད་པའི་དཔལ་ཡོན་ཅན། །ཐུན་མོང་མ་ཡིན་སྨིན་བྱེད་ཟླ་བ་གསར་པ་ནི། །འབྲལ་མེད་རྟག་ཏུ་ཡིད་ཀྱི་ཐིག་ལེར་བསྟེན་གོམས་བྱ། །
དེ་རྗེས་ཉིད་དུ་ཨ་ཝ་དྷུ་ཏིའི་ཤུལ་ལམ་ནས། །ཚོགས་བརྒྱད་ལས་འདས་རིག་པ་སྤྲོས་བྲལ་བུམ་སྐུའི་སྦུབས། །སྙིང་དབུས་མི་ཤིགས་འཇའ་ཟེར་ཐིག་ལེར་དྲངས་བྱས་ཏེ། །རོ་གཅིག་ཉིད་གྱུར་ཕ་རོལ་ཚུལ་རོལ་མཐའ་ལ་མིན། །རྟག་ཆད་ལས་འདས་དབུ་མ་ཙམ་དུའང་མ་དམིགས་པའི། །བློ་འདས་ཟང་ཐལ་རྒྱ་ཡན་ཐ་མལ་ངང་དུ་བཞག །དེ་ནི་རྒྱུད་ལུང་མན་ངག་ཀུན་གྱི་སྙིང་ཐིག་སྟེ། །གཞན་དུ་ཕྲིན་ལས་གང་ཡང་འབད་པས་སྒྲུབ་མི་དགོས། །ཡིད་བཞིན་ནོར་ལྟར་གསོལ་བ་བཏབ་པ་ཙམ་གྱིས་འབྱུང་། །སྨིན་གྲོལ་གཉིས་ལྡན་བླ་མེད་མཆོག་གི་ཉམས་ལེན་ནོ། །གཞན་ཡང་ལྡང་ཚེ་བླ་མས་ལུང་བསྟན་དབྱུགས་དབྱུང་ཞིང་། །ཉིན་སྣང་ལྷ་སྔགས་ཆོས་ཉིད་གང་གི་རོལ་པར་སྦྱངས། བཟའ་བཏུང་ལྷུན་གྲུབ་ཚོགས་ཀྱི་འཁོར་ལོར་རྟག་ཏུ་དབུལ། བསྒུལ་བསྐྱོད་གར་དང་ཕྱག་རྒྱ་བསྐོར་བའི་ཚུལ་དུ་བསམ། །བདོག་པ་ཡོ་བྱད་དག་ཀྱང་མཎྜལ་དག་ཏུ་དབུལ། །ཚོགས་དྲུག་རང་གྲོལ་བདེན་མེད་སྒྱུ་མའི་མཆོད་སྤྲིན་སྤྲོ། །བྱང་ཆུབ་བར་དུ་སྐྱབས་གཞན་མེད་སྙམ་འབད་པས་སྒྲུབ། །མཉམ་འགྲོགས་ཐེ་ཚོམ་བར་ཆད་བདུད་ཡིན་རིང་དུ་སྤོང་། །ཡོན་ཏན་རྗེས་དྲན་དད་པ་མངོན་བསྐྱེད་རྟག་ཏུ་བླངས། །རྒྱལ་ཀུན་ཕྱག་གི་སོར་མོའི་ཆུ་སྐྱེས་དམར་འོད་ཀྱིས། །གང་ཞབས་དུས་གསུམ་བཏུད་ན་ཉོན་མོངས་ལྕགས་སྒྲོག་གིས། །
འཁོར་བའི་བཙོན་རར་རྟག་ཏུ་ཉམ་ཐག་འཆིང་གྱུར་པ། སུ་ཞིག་ཅི་ཕྱིར་དད་པའི་མཆོད་སྤྲིན་སྤྲོ་མི་བྱེད། །ཐུགས་ནི་བདེ་གཤེགས་རྣམས་དང་རོ་གཅིག་ཆུ་གཏེར་ལས། །རིག་གྲོལ་ཆ་ཤས་ཡོངས་གང་གདན་གསུམ་གཟུགས་སྐུའི་ཟླ། །བདག་ཅག་དད་པའི་གཙུག་ཏོར་རྩེ་མོར་མངོན་འཕགས་ཕྱིར། །ཐུན་མོང་མ་ཡིན་གུས་པའི་ཀུན་འཛུམ་པར་བགྱི། །གསུང་གི་གསང་བ་ཅི་ལྟར་གནང་བའི་རྗེས་སྒྲུབ་ཅིང་། །ལུས་སེམས་འདོར་ཕོད་སྙིང་སྟོབས་མཆོག་གི་སྲི་ཞུས་བསྙེན། །འདི་ལྡན་གྲུབ་པའི་ཐེམ་སྐས་མཆོག་ལ་མྱུར་འཛེགས་པ། །འཕགས་བོད་ཀུན་ན་ཡོངས་སུ་གྲགས་པ་རྣམ་པར་བསྟེན། །སྦྱོར་བ་སེམས་བསྐྱེད་དངོས་གཞི་དམིགས་མེད་རྗེས་བསྔོ་བ། །མཚམས་སྦྱོར་རྣམ་གསུམ་དུས་ཀུན་གཅེས་པས་དང་དུ་བླང་། །དེ་སྐད་ཐར་པའི་ལམ་མཆོག་སྒྲུབ་པའི་སྙིང་པོ་ནི། །གང་ཤར་མགྲིན་པའི་རོལ་མོར་འཁྲོལ་ལས་དགེ་བའི་འབྲས། །མཆིས་གྱུར་གང་དེས་རང་གཞན་བྱང་ཆུབ་དམ་པའི་མཆོག །མངོན་དུ་བརྙེས་ནས་སྲིད་པའི་ཆུ་གཏེར་སྐེམ་ནུས་ཤོག །ཅེས་པའང་འཁོར་ལོའི་མགོན་པོ་ཀུན་ལ་མི་ཕྱེད་པའི་དད་པ་ཅན་ཨ་བྷཱ་ཡས་གང་ཤར་བླངས་པའོ།། ༈ །།ཡན་ལག་བདུན་པ་དང་འབྲེལ་བའི་རྡོ་རྗེའི་ཐོལ་གླུ་འཁོར་ལོའི་མགོན་པོ་དགྱེས་པའི་རོལ་མོ་ཞེས་བྱ་བ། ཨ་ཧོ། དཔལ་ལྡན་སྐུ་བཞིའི་དབང་ཕྱུག་བདེ་ཆེན་རྡོ་རྗེའི་དངོས། །དཀྱིལ་འཁོར་འཁོར་ལོ་རྒྱ་མཚོའི་བདག་ཉིད་བདེ་བར་
གཤེགས། །གང་ཁྱོད་གཙུག་ཏོར་ནོར་བུའི་ཁང་བུར་ལེགས་བཞུགས་ཏེ། །རྟག་པར་རྒྱུན་དུ་འབྲལ་མེད་ཐུགས་རྗེས་གཟིགས་མཛོད་ཀྱེ། །རྟག་ཆད་རྡུལ་བྲལ་དོན་དམ་བདེན་པའི་ཡེ་ཤེས་ཆེར། །མཉམ་པར་སྦྱོར་བས་འདུད་བྱེད་བྲལ་བའི་གུས་ཕྱག་ནི། །མཐའ་གྲོལ་ཀློང་ཡངས་འོད་གསལ་སྦུབས་སུ་ཉེར་ཞི་ནས། །རོ་གཅིག་ཉིད་གྱུར་དབྱེར་མེད་མཇལ་བའི་དོན་ལ་སྤྱོད། །རྗེས་ཆགས་གོས་དཀར་ཊཱ་ཀི་བསྐུལ་བའི་ཧེ་རུ་ཀ །འཁོར་ལོ་ལྔ་ཡི་གཞལ་མེད་ཁང་དུ་ལེགས་སྦྱིན་པས། །ཟག་བྲལ་དགའ་བཞིའི་མཆོད་པའི་སྤྲིན་ཕུང་འབྱམས་ཀླས་པ། །ཚོགས་དྲུག་སྣང་བ་དབུ་མར་ཐིམ་པའི་ངང་དུ་འབུལ། །ཀུན་ཏུ་བྲལ་ཐོབ་སྤངས་པའི་དེ་ཉིད་ཆོས་ཀྱི་དབྱིངས། །གནག་པའི་ལས་ལ་རྗེས་སུ་གོམས་པས་བསླད་གྱུར་གང་། །འཁོར་གསུམ་མི་དམིགས་མཁའ་ལྟར་རབ་ཞི་དེ་ཉིད་ཀློང་། །ཉེ་བར་ཞི་བས་ལས་དང་བག་ཆགས་འབྲེལ་རྒྱུན་ཆད། །གང་ན་སྣ་ཚོགས་ཐེག་པའི་རིམ་པ་རྨད་བྱུང་དང་། །བགྲོད་བྱའི་རྩེར་གྱུར་མཆོག་ཏུ་ཟབ་པའི་གཞུང་ལམ་ལ། །བསྙེན་ཅིང་གྲོལ་བའི་འཕགས་དང་སློབ་པའི་ཚོགས་རྣམས་ལ། །མི་ཕྱེད་དགའ་བས་རྗེས་སུ་ཡི་རང་འཛུམ་དཀར་གྲོལ། །སྲིད་པའི་རྟེན་འབྲེལ་ཉི་ཟླའི་རྒྱུ་བ་གང་ཡིན་པ། །གཟུང་འཛིན་ཀུན་བྲལ་དབུ་མ་སྒྲ་གཅན་མཁར་རོལ་པས། །དོན་དམ་ཟག་བྲལ་དབྱིངས་སུ་གཤེགས་
པའི་རྒྱལ་ཀུན་ལ། །མི་ཕྱེད་ཉེར་གསང་རྡོ་རྗེའི་ཆོས་འཁོར་བསྐོར་བར་བསྐུལ། །འཕོ་འཇིག་བྲལ་བའི་ཡེ་ཤེས་མི་འགྱུར་རྟག་པ་ཉིད། །ཚུ་རོལ་སྣང་ངོར་སྐྱེ་དང་འགགས་པའི་ཟློས་གར་ཀུན། །བསྒྱུར་བ་མ་ཡིན་ཐབས་ཤེས་མཚན་དཔེའི་ཟ་མ་ཏོག །ཕྱོགས་བཅུའི་གཙུག་ཏོར་རྩེ་མོར་མཆོག་ཏུ་ངལ་བསོས་མཛོད། །ཁྱོད་ནི་བདག་གི་ཕ་དང་མ་སྟེ་དེ་བཞིན་དུ། །སྐྱོབ་པའི་མགོན་དང་མཛའ་བའི་བཤེས་གཉེན་ཉིད་ཡལགས་ན། །ལས་ཀྱི་རྗེས་འབྲངས་སྐྱེ་བའི་འཁྲི་ཤིང་གཙུག་ཀུན་ཏུ། །རིགས་བདག་པདྨ་དཀར་པོའི་ལ་ཐོད་དམ་པར་མཛོད། །ཨེ་མ་ཕྱོགས་བཅུའི་མགོན་པོ་ཀུན་གྱིས་དུས་ཀུན་ཏུ། །དད་པའི་ཕྱག་གིས་ཞབས་ཀྱི་འཁོར་ལོ་ལ་བཏུད་ནས། །ཉོན་མོངས་ལྕགས་སྒྲོག་དམ་པོས་བཅིངས་པ་བདག་སོགས་ཀྱིས། །རུས་པའི་ཁོང་ནས་མི་འགྱུར་དད་པ་དང་བཅས་ཏེ། །དངོས་དང་ཡིད་ཀྱི་ཉམས་སམ་གཞན་དུ་རྨི་ལམ་སྐབས། །ངེས་པར་མི་འབྲལ་ཁྱོད་ཞལ་དགྱེས་པར་མཐོང་བ་དང་། །ཐུགས་ཀྱི་དགོངས་ཏེ་འབྲལ་མེད་དལ་འབབ་ཇི་བཞིན་དུ། །བཟུང་བར་མཛོད་ཅེས་གུས་དང་སྐྱོ་བས་མངོན་པར་གསོལ། །དེ་ལས་བསྐྲུན་པའི་དགེ་བ་ཀུན་དང་དུས་གཞན་དུ། །བསགས་པ་ཆབས་གཅིག་བསྡོམས་ཏེ་ཆོས་དབྱིངས་ཟད་མེད་པ། །དག་པ་དོན་དམ་གཞོན་ནུ་བུམ་སྐུར་ཉེར་བསྔོས་པས། །འགྲོ་སྒྲོལ་ཕྲིན་ལས་ཡིད་བཞིན་འཁྲི་ཤིང་
ངེས་རྙེད་ཤོག །ཅེས་པའང་ཟབ་མོའི་དོན་གྱི་ཕྱོགས་ནས་གཙོ་བོར་བགྱིས་ཏེ་གང་ཤར་རྡོ་རྗེའི་གླུར་བླངས་པ་གུ་བྱ།། །།རྡོ་རྗེའི་ཐོལ་གླུ་སྨིན་པར་བྱེད་པའི་རྒྱན་ཅེས་བྱ་བ། ཨ་ཧོ། ཆོས་ཉིད་སྤྲོས་བྲལ་བློ་འདས་གཉུག་མ་ཡི་ངང་ནས། །འགགས་མེད་ཟུང་འཇུག་བདེ་ཆེན་སྙིང་རྗེ་ཡི་རང་བཞིན། །སྐུ་གསུམ་དབྱེར་མེད་དཔལ་ལྡན་བླ་མ་དེ་མཁྱེན་ནོ། །དབང་བཞིས་རང་རྒྱུད་སྨིན་པར་བྱིན་གྱིས་རང་རློབས་ཤིག །སྣང་སྟོང་མཉམ་རོལ་མཚན་མའི་དཀྱིལ་འཁོར་གྱི་ཀློང་ནས། །གདན་གསུམ་ཟུང་འཇུག་དབྱེར་མེད་རྡོ་རྗེ་ཡི་སློབ་དཔོན། །ཐུན་མོང་བུམ་པའི་དབང་བདུན་སྨིན་བྱེད་དུ་སྩལ་བས། །ཕུང་ཁམས་ཟབ་མོའི་ཉམས་ལེན་སད་པ་འདི་ཨ་ཧོ། །ཞུ་བདེ་མི་རྟོག་བྱང་སེམས་དཀྱིལ་འཁོར་གྱི་ཀློང་ནས། །ཐབས་ཤེས་མཉམ་སྦྱོར་བདེ་སྟོང་རྡོ་རྗེ་ཡི་སློབ་དཔོན། །ཞུགས་གནས་ཐིམ་གསུམ་དབུ་མར་སྦྱོར་བ་ཡི་བདུད་རྩི། །རྩ་ཁམས་ཡི་གེའི་སྤྲིན་དུ་དེངས་པ་འདི་ཨ་ཧོ། །ཡས་བབ་མས་བརྟན་བཅུ་དྲུག་དགའ་བ་ཡི་ཀློང་ནས། །ཨེ་ཝཾ་མཉམ་པར་རོལ་པའི་རྡོ་རྗེ་ཡི་སློབ་དཔོན། །འཁྱུད་སྦྱོར་ཤེས་རབ་བདེ་བའི་ཡེ་ཤེས་ལ་མྱོང་བས། །སྣང་མཆེད་ཐོབ་གསུམ་ཐིམ་པའི་འོད་གསལ་འདི་ཨ་ཧོ། །དོན་དམ་བདེན་གཉིས་མ་གྲུབ་སྤྲོས་བྲལ་གྱི་ཀློང་ནས། །ཀུན་རྫོབ་གང་འདུལ་དེར་སྣང་རྡོ་རྗེ་ཡི་སློབ་དཔོན། །ལྷན་སྐྱེས་ཡེ་ཤེས་མངོན་དུ་སྟོན་བྱེད་ཀྱི་ཐུགས་རྗེ། །གཅིག་དང་
དུ་བྲལ་འདུས་མ་བྱས་པ་འདི་ཨ་ཧོ། །སྦྱང་བྱ་ཉོན་མོངས་ཤེས་སྒྲིབ་ཕྲ་རགས་ཀྱི་རང་བཞིན། །སྤྱོད་བྱེད་སྣང་སྟོང་ཡེ་ཤེས་དཔེ་དོན་དུ་བཀྲལ་བའི། །སྦྱངས་འབྲས་སྐུ་གསུམ་ཟུང་འཇུག་ངོ་བོ་ཡི་ཉིད་སྐུ། །གཞི་ལམ་འབྲས་བུར་རྫོགས་པ་སྨིན་བྱེད་འདི་ཨ་ཧོ། །ཀུན་རྫོབ་མཚན་མ་རྫས་ཀྱི་དཀྱིལ་འཁོར་ལ་བརྟེན་ཅིང་། །དོན་དམ་ཡེ་ཤེས་དབྱིངས་རིག་ཉམས་སྣང་གི་ཀློང་དུ། །ཞུགས་དང་མ་ཞུགས་སྐལ་བར་ལྡན་པ་ཡི་སློབ་མ། །སྨིན་པར་བྱེད་འདོད་ཡོངས་ཀྱི་སྲོག་ཤིང་རང་ཡིན་ནོ། །བསྐྱེད་རིམ་ཟབ་མོ་གཡོ་ཐོབ་གོམས་བརྟན་གྱི་རང་བཞིན། །རྫོགས་རིམ་རླུང་སེམས་ཡང་དག་དབུ་མ་རུ་འཛུད་དང་། །ཟུང་འཇུག་དཔེ་དང་དོན་གྱི་ཡེ་ཤེས་དེ་བསྒོམ་ཕྱིར། །སྨིན་པར་བྱེད་པའི་རྡོ་རྗེའི་ཐོལ་གླུ་འདི་བླངས་སོ། །དེ་ལས་བྱུང་བའི་ཚོགས་གཉིས་དགེ་བ་ཡི་འབྲས་བུ། །འཁོར་གསུམ་རྣམ་པར་མི་རྟོག་ཆོས་དབྱིངས་སུ་བསྔོས་པས། །ཉོན་མོངས་ཤེས་བྱའི་སྒྲིབ་པ་མ་ལུས་ཀུན་བཅོམ་སྟེ། །འགྲོ་ཀུན་བླ་མེད་གོ་འཕང་ཐོབ་པ་རུ་ཤོག་ཅིག ༈ །རྣལ་འབྱོར་ཆེན་པོ་དང་འབྲེལ་བའི་རྡོ་རྗེའི་ཐོལ་གླུ་དཀྱིལ་འཁོར་གསུམ་ལྡན་ཅེས་བྱ་བ། ཨེ་མ་ཧོ། སྣང་སྲིད་སྣོད་བཅུད་གཟུང་འཛིན་འཁྲུལ་པ་ཡི་ཚོགས་ཀུན། །ཟུང་འཇུག་བདེ་ཆེན་གཉུག་མའི་དཀྱིལ་འཁོར་དུ་བསྡམས་པས། །བདེ་སྟོང་སྒྱུ་འཕྲུལ་དྲྭ་བའི་རང་བཞིན་དུ་ཤར་བའི། །ལྷན་སྐྱེས་ཀ་ནས་དག་པའི་ངོ་བོ་
ལ་འདུད་དོ། །སྦྱང་གཞི་ཀུན་ཁྱབ་བདེ་གཤེགས་སྙིང་པོ་ཡི་གནས་ལུགས། །སྦྱོང་བྱེད་དཀྱིལ་འཁོར་གསུམ་ལྡན་བསྐྱེད་རིམ་གྱི་སྙིང་པོ། །སྦྱང་བྱ་གློ་བུར་འཁྲུལ་པའི་རྟོགས་ཚོགས་ཀྱི་དྲྭ་བ། །སྦྱངས་འབྲས་དག་རྫོགས་སྨིན་གསུམ་གོ་འཕང་དུ་སྦྱོར་རོ། །སྒོང་མངལ་བག་ཆགས་སྦྱང་ཕྱིར་སྤྲོས་བཅས་ཀྱི་དཀྱིལ་འཁོར། །བདག་སྲས་གཞན་སྲས་རྣམ་པར་རིམ་སྐྱེས་སུ་བསླབས་ཤིང་། །ས་བོན་ལས་སྐྱེས་གློ་བུར་རང་བྱུང་གི་ལྷ་སྐུས། །དྲོད་གཤེར་སྐྱེས་ཀྱི་བག་ཆགས་མ་ལུས་པ་ཟད་དོ། གསལ་སྣང་གང་ཤར་ལྷ་ཡི་དཀྱིལ་འཁོར་དུ་རྫོགས་པས། །སྐད་ཅིག་མངོན་གྱུར་རྫུས་སྐྱེས་བག་ཆགས་ཀུན་སྦྱང་ངོ་། །དེ་ལྟར་གཞི་ལ་བརྟེན་པའི་ཉམས་ལེན་གྱི་ལམ་དུ། །གཡོ་ཐོབ་གོམས་བརྟན་མཐར་ཕྱིན་རྣམ་ལྔ་རུ་རྫོགས་པས། །འཁྲུལ་པའི་ཆོས་ཀུན་ཟུང་འཇུག་དཀྱིལ་འཁོར་དུ་སྡུད་དེ། །ཉེར་ལེན་སྲིད་པའི་འཁྲུལ་འཁོར་རང་ངོ་རུ་དག་གོ །སྲོག་སྡོམ་གཟེར་བཞིའི་གནད་ཀྱིས་ལྷན་སྐྱེས་སུ་གོམས་པས། །རྡོ་རྗེ་གསུམ་དང་ཕྲིན་ལས་དཀྱིལ་འཁོར་ལ་དབང་ཞིང་། །བསྙེན་སྒྲུབ་ཡན་ལག་བཞི་ཡི་རིམ་པ་ཡི་ཁོངས་སུ། །ལམ་ལྔ་རིག་འཛིན་རྣམ་བཞིའི་གོ་འཕང་ལ་སྦྱོར་རོ། །སྣང་སྟོང་ལུས་ཀྱི་འཁོར་ལོ་གདན་གསུམ་གྱི་རང་བཞིན། །སྒྱུ་འཕྲུལ་དྲྭ་བའི་དཀྱིལ་འཁོར་ཉག་གཅིག་ཏུ་རྫོགས་པས། །དག་བྱ་དག་བྱེད་དག་འབྲས་ང་རྒྱལ་ལ་
བསླབས་ཤིང་། །སྣང་ཡུལ་ལྷ་སྐུའི་ཁྱེར་སོ་རོལ་པ་རུ་ཤར་རོ། །འགྲོ་འོང་རླུང་གི་རང་བཞིན་གསང་སྔགས་སུ་གོམས་པས། །སྐྱོན་བཅུ་སྤངས་ལ་རྣམ་གསུམ་བཟླ་ཚུལ་གྱིས་སྤྲས་ཏེ། །སྒྲ་གྲགས་ཐབས་ཤེས་། མཉམ་སྦྱོར་དཀྱིལ་འཁོར་དུ་ཤར་བས། །མཐར་ཐུག་སྲོག་རྩོལ་ཡིད་བཞིན་འཁོར་ལོ་རུ་སྨིན་ནོ། །བསྒོམ་བྱ་འཇོག་བྱེད་བྲལ་བའི་སྤྲོས་བྲལ་གྱི་ངོ་བོ། །མཐའ་ལ་མི་གནས་དབུ་མའི་རང་བཞིན་དུ་དག་པས། ། ཚོགས་དྲུག་འཁྲུལ་པའི་བདེན་ཞེན་རང་རིག་ཏུ་གྲོལ་ཏེ། །ཤར་གྲོལ་དུས་མཉམ་སྐྱེ་མེད་ཆེན་པོ་རུ་སྨིན་ནོ། །དེ་སྐད་རྣལ་འབྱོར་ཆེན་པོའི་དཀྱིལ་འཁོར་གྱི་ཐོལ་གླུ། །མགྲིན་པ་ལོངས་སྤྱོད་འཁོར་ལོའི་དཀོར་མཛོད་ནས་བླངས་པས། །གཟུང་འཛིན་བདེན་ཞེན་འཁྲུལ་པ་ཐབས་མཆོག་གིས་བཟུང་སྟེ། །བདེ་སྟོང་མཚན་དཔེའི་དཀྱིལ་འཁོར་སྨིན་པ་རུ་ཤོག་ཅིག ༈ །རྗེས་སུ་རྣལ་འབྱོར་དང་འབྲེལ་བའི་རྡོ་རྗེའི་ཐོལ་གླུ་བདེ་སྟོང་བདུད་རྩིའི་རླབས་ཕྲེང་ཞེས་བྱ་བ། ཨ་ཧོ། རྣམ་ཀུན་མཆོག་ཏུ་མི་འགྱུར་བདེ་ཆེན་གྱི་ངོ་བོ། །ཟུང་འཇུག་ཀུན་ཁྱབ་ལྷན་སྐྱེས་གཉུག་མ་ཡི་རང་བཞིན། །ཉོན་མོངས་བདེ་བ་ཆེན་པོའི་ཡེ་ཤེས་སུ་སྦྱོར་བའི། །ཐབས་ཤེས་ཟུང་འཇུག་འཁོར་ལོའི་མགོན་པོ་ལ་འདུད་དོ། །རྡོ་རྗེ་ཕུང་པོའི་གྲོང་ཁྱེར་གདན་གསུམ་གྱི་ལྷ་ཚོགས། །རྩ་གསུམ་འཁོར་ལྔའི་མདུད་པ་ཌཱ་ཀི་ཡི་གྲོང་ཁྱེར། །སྣང་སྲིད་སྣོད་བཅུད་དག་པ་རབ་འབྱམས་ཀྱི་ངང་
དུ། །བཀོད་པ་རྩ་ཁམས་རྣམ་དག་ཐབས་ཤེས་ཀྱི་རོལ་པ། །འགྲོ་འོང་སྲོག་རྩོལ་རླུང་ཀུན་རོ་རྐྱང་གི་ལམ་ནས། །ཁ་སྦྱོར་བདེ་བ་ཆེན་པོའི་གཉུག་མ་རུ་བསྡོམས་པས། །དབྱིངས་རིག་འཕོ་འགྱུར་བྲལ་བའི་འོད་གསལ་གྱི་ངང་དུ། །རྟོག་ཚོགས་ཐིམ་ལ་མ་རྨུགས་རང་གྲོལ་དུ་ཡོང་ངོ་། །ཨ་ཤད་གཏུམ་མོའི་ཉི་མ་མཁའ་དབྱིངས་སུ་འབར་བས། །ཧཾ་ཡིག་ཟླ་བའི་བདུད་རྩི་འཁོར་ལོ་རུ་བཞུ་ནས། །ཡས་བབས་རྒྱུ་དང་མས་བརྟན་འབྲས་བུ་ཡི་དགའ་བས། །ཉེ་བའི་འདུ་བ་ལྷན་སྐྱེས་ཡེ་ཤེས་སུ་ཤར་རོ། །འགྱུར་མེད་བདེ་ཆེན་ཞུ་བདེའི་བདུད་རྩི་ཡིས་མྱོས་པས། །རླུང་སེམས་མི་རྟོག་དབུ་མའི་ངོ་བོ་རུ་ཐིམ་ནས། །ཟག་བྲལ་རྡོ་རྗེ་གསུམ་གྱི་རང་བཞིན་ལས་སྐྱེས་པའི། །རྣལ་འབྱོར་ལྔ་ལྡན་དྷ་ཏིའི་མཁའ་དབྱིངས་སུ་སྨིན་ནོ། །ཐབས་ཤེས་རོ་རྐྱང་རྒྱུ་བ་དབུ་མ་རུ་བཅིལ་བས། །ས་བཅུའི་རྒྱུན་མཐར་ཛ་ལནྡྷ་ར་རུ་སྨིན་ཏེ། །ཞི འོད་ཟེར་ཆེན་པོའི་དབང་གི་བྱེད་ལས་ལ་བརྟེན་ནས། །མི་སློབ་ལམ་གྱི་གོ་འཕང་མངོན་འགྱུར་དུ་འགྲུབ་བོ། །གཞན་ལུས་ལ་བརྟེན་བདེ་ཆེན་རིག་མ་ཡི་ཕོ་ཉས། །ཟུང་འཇུག་བདུད་རྩིའི་ཉིང་ཁུ་མཉམ་སྦྱོར་དུ་འབེབ་པས། །བཅུ་དྲུག་དགའ་བའི་ཡེ་ཤེས་པདྨོ་རུ་རྫོགས་ཏེ། །ཕྱག་རྒྱ་ཆེན་པོ་ལྷན་སྐྱེས་ངོ་བོ་རུ་ཤར་རོ། །བྱ་བ་རྒྱུ་དང་བྱེད་པ་ལམ་མཆོག་གི་རྐྱེན་ལས། །བྱ་བྲལ་འབྲས་བུའི་གོ་འཕང་ཆེན་པོ་ལ་སྦྱོར་
ཏེ། །རྣམ་པར་གྲོལ་བའི་དཔལ་སྟེར་ཉེ་རྒྱུ་ཡི་སྤྱོད་པ། །རྨད་བྱུང་ཐབས་མཆོག་ངེས་པའི་གསང་ལམ་དུ་ཤར་རོ། །དེ་སྐད་ཨེ་དབྱིངས་སྣང་སྟོང་སྒྱུ་མ་ཡི་ཀློང་ནས། །ཝཾ་ཡིག་ཤེས་རབ་དགའ་བཞིའི་ཐོལ་གླུ་རུ་བླངས་པས། །ལྷན་ཅིག་སྐྱེས་པ་བརྗོད་བྲལ་རང་རིག་གི་གཤིས་སུ། །གདོད་མའི་གཏན་སྲིད་ཟིན་པའི་སྨོན་ལམ་ཞིག་ཞུའོ།། ༈ །།ཟུང་འཇུག་རྫོགས་པ་ཆེན་པོའི་རྡོ་རྗེའི་ཐོལ་གླུ་བྱ་བྲལ་གཉུག་མའི་རྒྱན་ཅེས་བྱ་བ། ན་མོ་གུ་རུ་ཛྷཱ་ན་ཝེ། གདོད་ནས་སྤྲོས་པའི་མཚན་མ་ཆོས་དབྱིངས་སུ་ཞི་བའི། །ནང་གསལ་ཁྱད་ཆོས་དྲུག་ལྡན་ཀ་དག་གི་ཀློང་དུ། །ཕྱིར་གསལ་ལོངས་སྤྱོད་ཡོངས་རྫོགས་འཁོར་ལོ་རུ་བཞེངས་པའི། །རང་རིག་བརྗོད་དུ་མེད་པའི་ངོ་བོ་ལ་འདུད་དོ། །ཀུན་གཞི་ལུང་མ་བསྟན་པའི་མན་ཤེལ་གྱི་ངོས་སུ། །སྣ་ཚོགས་སྣང་བའི་རང་རྩལ་གཉིས་སྣང་དུ་བཟུང་བས། །མཐའ་མེད་འཁོར་བའི་འོད་རིས་སྟུག་པོ་ཡིས་བསླུས་ཏེ། །མ་རིག་འཁྲུལ་པའི་སྡུག་བསྔལ་འདོར་མེད་དུ་སྤྱོད་དོ། །ངོ་བོ་སྟོང་ཉིད་བརྗོད་བྲལ་རྟག་པ་ནི་མ་ཡིན། །རང་བཞིན་གསལ་ལ་མ་འགག་ཆད་མཐའ་དང་བྲལ་ཞིང་། །བློ་འདས་ཟང་ཐལ་རྒྱ་ཡན་ཐ་མལ་གྱི་ངང་དུ། །གཟུང་འཛིན་གཉིས་བྲལ་གདོད་མའི་ཆོས་ཉིད་དུ་གྲོལ་ལོ། །དེ་ལྟའི་གཞི་རིག་འཁྲུལ་དང་མ་འཁྲུལ་ལས་འདས་པའི། །ཀ་དག་བསམ་བརྗོད་བྲལ་བའི་ཉམས་ལེན་གྱི་གནད་གསང་། །ཐེག་བརྒྱད་ཡིད་
དཔྱོད་ལས་འདས་རྫོགས་ཆེན་གྱི་ལམ་དུ། །བྱར་མེད་གཉུག་མའི་གཏན་སྲིད་ཟིན་པ་རུ་མཛོད་ཅིག །ཕུང་ལྔའི་ཉེར་ལེན་བྲལ་བའི་ཆོས་ཉིད་ཀྱི་དྲན་པ། །རིག་པ་བཟོ་མེད་ངང་གནས་ཤར་གྲོལ་དང་དུས་མཉམ། །འཁོར་འདས་མཉམ་ཉིད་འཁྲུལ་སྣང་ནང་དབྱིངས་སུ་དག་ནས། །ལྟ་སྒོམ་སྤྱོད་འབྲས་མིང་འདོགས་ཐ་སྙད་ཀུན་ཞིག་གོ །ཁྱད་པར་སྒྲོན་བཞིས་བསྐྱེད་པའི་སྣང་བཞི་ཡི་རོལ་པ། །རིག་གདངས་མངོན་སུམ་མཐོང་བ་ཐོད་རྒལ་གྱི་ལམ་མཆོག །གནད་གསུམ་གཅུན་པས་རྟོག་མེད་རང་གསལ་གྱི་ཉམས་ལེན། །འབྲས་བུའི་ཐུས་ཀ་ཟབ་གསང་མན་ངག་གི་མཐར་ཐུག །ཟུང་འཇུག་ཉམས་སུ་ལེན་པའི་སྐལ་ལྡན་གྱི་རྣལ་འབྱོར། །རྟག་པར་གྲོལ་བཞིའི་རྗེས་མཐུན་ཅོག་བཞག་གི་རིག་པ། །འབྲལ་མེད་བྱ་བྲལ་འབྲས་བུ་ཆོས་ཉིད་ལ་གཟིར་བས། །ཐེག་ཀུན་ཟད་སར་འཁྱོལ་བའི་གོ་འཕང་ལ་སྦྱོར་རོ། །མཐའ་གྲོལ་པའི ཆོས་སྐུ་གཡུང་དྲུང་འཁྱིལ་པ་ཡི་གྲོང་དུ། །འགྱུར་མེད་རང་གསལ་རྗེན་པའི་ཡེ་ཤེས་ལ་སྤྱོད་པས། །ས་ལམ་རྟོག་པའི་དྲྭ་བ་བརྗོད་བྲལ་དུ་རྫོགས་ཏེ། །སྣང་སྟོང་དབྱེར་མེད་འགྲོ་བའི་དོན་མཆོག་ལ་སྤྱོད་དོ། །དེ་སྐད་དགེ་བའི་བསམ་གཏན་ལས་འདས་ཀྱི་ཡེ་ཤེས། །ཁམས་གསུམ་འོད་གསལ་ཐུགས་སུ་སྒྲུབ་བྱེད་ཀྱི་ལམ་མཆོག །ཤིན་ཏུ་རྣལ་འབྱོར་རྡོ་རྗེའི་ཐོལ་གླུ་རུ་བླངས་པས། །ཀུན་བཟང་གདོད་མའི་གཞི་རུ་
རང་གྲོལ་དུ་ཤོག་ཅིག། ༈ །།ཤེས་རབ་ཀྱི་ཕ་རོལ་ཏུ་ཕྱིན་པ་དང་འབྲེལ་བའི་རྡོ་རྗེའི་ཐོལ་གླུ་སྤྲོས་བྲལ་སྒྲ་དབྱངས་ཞེས་བྱ་བ། ཨ་ཧོ། སྨྲ་བའི་ཚིག་ལམ་མི་གནས་ཡང་དག་གི་དྲན་པས། །བསམ་པས་དཔྱད་བྱ་བྲལ་བའི་བློ་འདས་ཀྱི་ཡེ་ཤེས། །བརྗོད་བྱས་གཏན་ལ་མི་ཕེབས་ལམ་བདེན་དང་འགལ་བའི། །བྱར་མེད་རྒྱལ་པོའི་གཤིས་ལུགས་གཉུག་མ་ཡི་ལྟ་བ། །ཤེས་རབ་ཡིད་བྱེད་ཀུན་གྱི་ཕ་རོལ་ཏུ་ཕྱིན་པས། །མ་སྐྱེས་ངོ་བོ་ཀ་དག་རྟག་པ་ནི་མ་ཡིན། །མི་འགག་རང་རྩལ་ལྷུན་གྲུབ་ཆད་མཐའ་དང་བྲལ་བའི། །འགྱུར་མེད་ཡོངས་གྲུབ་བདེན་པ་ནམ་མཁའ་ཡི་ངོ་བོ། །ཆོས་ཉིད་ཐོབ་ཤོར་བྲལ་བའི་གཉུག་མ་ལ་རོལ་པས། །སོ་སོར་རྟོག་པའི་རིག་ཤེས་ཀུན་བརྟགས་ཀྱི་ཡོ་ལང་། །གཟུང་འཛིན་གཉིས་ཆོས་བྲལ་བའི་རང་རིག་ལ་ཐིམ་སྟེ། །སྒྲོ་འདོགས་སྐུར་འདེབས་སྤངས་པའི་ངང་གནས་ཀྱི་ཡེ་ཤེས། །གྲུབ་མཐའི་ལྟོས་གཞི་ཟད་པའི་རྣལ་འབྱོར་གྱི་སྤྱོད་ཡུལ། །དུས་གསུམ་མཐའ་དང་བྲལ་བའི་པདྨོ་ཡི་ཀློང་དུ། །རྒྱལ་བའི་ཐུགས་ཀྱི་དེ་ཉིད་མངོན་སུམ་དུ་སྡུད་པས། །ཐོག་མའི་ཡུམ་གྱུར་རྣམ་ཐར་གསུམ་ལྡན་གྱི་ངོ་བོ། །རང་རིག་བདེ་གཤེགས་སྙིང་པོའི་བདག་ཉིད་ལ་འདུད་དོ། དེ་སྐད་དོན་དམ་དགོངས་བཅུད་ཉུང་ངུ་རུ་འདོམས་པའི། །སྤྲོས་བྲལ་སྤྲོས་པར་ཤར་བའི་རྡོ་རྗེ་ཡི་གླུ་དབྱངས། །དཔའ་བོ་ཌཱ་ཀི་དགྱེས་པའི་དགའ་སྟོན་དུ་བླངས་པས། །
འགྲོ་ཀུན་གཞོན་ནུ་བུམ་སྐུར་ཐིམ་པ་རུ་ཤོག་ཅིག། ༈ །།ལྷན་ཅིག་སྐྱེས་པའི་རྟོགས་པ་བརྗོད་པའི་རྡོ་རྗེའི་ཐོལ་གླུ་ཕྱག་རྒྱ་ཆེན་པོའི་ཐིག་ལེ་ཞེས་བྱ་བ། ན་མོ་གུ་རུ་མ་ཧཱ་མུ་དྲ་ཛྷཱ་ནཱ་ཡ། གཟུང་འཛིན་ཉི་ཟླའི་རྒྱུ་བ་དབུ་མ་སྒྲ་གཅན་མཁའ་རུ་རོལ། །སྲོག་ཐུར་དྲི་ཡི་བཞོན་པ་གཙུག་ཏོར་ཛ་ལནྡྷ་རར་བཅིངས། །ཞུགས་གནས་ཐིམ་གསུམ་ཡོངས་རྫོགས་བརྗོད་དུ་མེད་པའི་ངོ་བོ་གང་། །ལྷན་ཅིག་སྐྱེས་པའི་ཡེ་ཤེས་རྣམ་པ་ཀུན་ཏུ་རྒྱལ་གྱུར་ཅིག །བདེ་ཆེན་འཁོར་ལོར་མཛེས་པའི་རིགས་བདག་ཧེ་རུ་ཀ །ཁྱབ་བདག་བླ་མའི་ཞལ་ལས་ངེས་རྙེད་རྡོ་རྗེའི་དོན། །མི་ཕྱེད་བརྟག་པར་དཀའ་ཞིང་བསམ་ན་དོན་ལྡན་པ། །འདི་དེ་ཟབ་མོའི་རྒྱུད་དང་མན་ངག་རྗེས་འགྲོ་ཡིན། །དཔལ་ལྡན་རྡོ་རྗེ་ཐེག་པ་མཐའ་དག་བསྡུས་པའི་དོན། །གསང་བ་ངེས་པའི་ཚུལ་འདི་གཞན་དུ་མ་ཡིན་ཕྱིར། །འཇུག་སྒོ་གྲོགས་དང་ཉམས་ལེན་རང་གི་འབྲས་བུ་སྟེ། །རྣམ་པ་བཞི་ཡིས་ཡང་དག་ཉིད་དུ་བསྟན་པར་བྱ། །ཐོག་མར་ཕྱི་ཡི་དཀྱིལ་འཁོར་མཐོང་དང་དེ་བཞིན་དུ། །ནང་ན་བྱང་སེམས་གསང་བ་པདྨ་བྷཉྫའི་གྲོང་། །ཡང་གསང་དེ་ཉིད་ཆོས་སྐུའི་སྙིང་པོ་མ་ནོར་བར། །གཞུག་བྱ་འཇུག་པའི་སྦྱོར་བ་རྫོགས་ནས་དངོས་གཞིའི་ལམ། །སྣང་སྟོང་བདེ་ཆེན་ཟུང་འཇུག་དཔེ་དོན་ཡེ་ཤེས་ནི། །ངེས་པ་བརྡ་རྟགས་རྟེན་འབྲེལ་རྣམ་པ་ལམ་བྱེད་པས། །ས་བོན་བསླད་བྲལ་བྱིན་པ་ཇི་བཞིན་འགྱུར་
བ་སྟེ། །དེས་ནི་སྒྲིབ་བཞི་སྤང་དང་ལམ་བཞི་བསྒོམ་པ་དང་། །འབྲས་བུ་སྐུ་བཞི་ཐོབ་རུང་སྐལ་བ་མངོན་འཇོག་ཕྱིར། །ཐོག་མར་བླང་བྱ་གཅིག་ཏུ་གྱུར་པ་འདི་མཐོང་མཛོད། །དེ་ཡི་རྗེས་སུ་མི་ཉམས་འཕེལ་བའི་ཟླ་གྲོགས་ནི། །མཚན་རྟོག་ཉོན་མོངས་ཐབས་སུ་བསྡམ་མམ་གཞན་དུ་ཡང་། །འདའ་དཀའི་དམ་ཚིག་རྩ་བ་ཡན་ལག་གྲངས་ངེས་དང་། །མདོར་བསྡུས་སྣང་སྟོང་གདན་གསུམ་ལྷ་ཡི་དཀྱིལ་འཁོར་ལུས། །གྲགས་སྟོང་བརྗོད་བྲལ་གསང་བ་སྔགས་ཀྱི་རོལ་མོའི་ངག །ཆོས་ཅན་འཁྲུལ་པ་ཆོས་ཉིད་ཐིམ་པའི་མི་རྟོག་ཡིད། །སྒོ་གསུམ་གཞུག་མ་དག་ཏུ་རོལ་པའི་གར་མཛོད་ཅིག །ཁྱད་པར་དབང་བསྐུར་རྒྱུད་བཤད་མན་ངག་ཀུན་གནང་བའི། །དོན་དམ་དེ་ཉིད་མ་ནོར་སྨིན་པའི་བདག་པོ་ནི། །རྟག་ཏུ་མཉེས་པ་ཁོ་ན་བགྱིད་ནས་དུས་ཀུན་ཏུ། །སྒོམ་དང་སྒྲུབ་དང་རྗེས་སུ་སློབ་པའི་མཆོད་སྤྲིན་སྤྲོ། །དངོས་གཞི་ཉམས་སུ་ལེན་པའི་ཚུལ་ལ་རྣམ་གཉིས་ཏེ། །ཀུན་བརྟགས་བསྐྱེད་པས་སེམས་ཀྱི་ཐ་བ་འདུལ་ནས་ཀྱང་། །ཡོངས་གྲུབ་རྫོགས་པས་རྗེས་ཆགས་མྱུ་གུ་མངོན་པར་བདོ། །ཟུང་འཇུག་མི་ཕྱེད་ཕྱག་རྒྱ་ཆེན་པོའི་མེ་ཏོག་གིས། །མཛེས་གྱུར་འབྲས་བུ་གདོད་མའི་ངོ་བོར་རོ་གཅིག་འགྱུར། །དབྱིབས་ཀྱི་རྗེས་འགྲོ་གསལ་དག་བརྟན་པའི་སྐུ་རྡོ་རྗེ། །སྔགས་ཀྱི་རྗེས་འགྲོ་གྲགས་སྟོང་བཟླས་བརྗོད་གསུང་རྡོ་རྗེ། །ཟབ་པའི་རྗེས་འགྲོ་བདེ་
སྟོང་ཕྱག་རྒྱ་ཐུགས་རྡོ་རྗེ། །དབྱེར་མེད་ཡེ་ཤེས་རྡོ་རྗེར་རོལ་པའི་འོད་གསལ་དོན། །སྨིན་བྱེད་བཞི་ཡི་རྗེས་སུ་འགྲོ་བས་ངེས་པར་བསྒོམ། །ཐབས་དེས་ཐོབ་པའི་དོན་གྱི་ཕྱག་རྒྱ་ཆེན་པོ་ནི། །འགྱུར་བདེའི་མཐའ་སྤང་མི་ཕྱེད་བདེ་བའི་རོལ་པས་སྒེགས། །དུས་གསུམ་ཀུན་རིགས་ཁམས་གསུམ་མཐའ་གྲོལ་གདོད་མའི་གཞི། །སྐུ་གསུམ་དབྱེར་མེད་ཨེ་ཝཾ་མཉམ་སྦྱོར་པྲ་ཕབ་གཟུགས། །རོ་གཅིག་སྟོན་གནམ་དག་པའི་དབྱིངས་ལྟར་དྲི་མེད་རྟོགས། །ལས་མེད་རྒྱུ་བྲལ་འབྲས་བུའི་རྫུན་ཕུག་དེ་རུ་རྡིབ། །ལྟ་སྒོམ་སྤྱོད་པའི་སྒྲོ་བཏགས་རྣམ་པར་རྟོག་ཅན་དེའི། །ཐབས་ཤེས་འགལ་འདུའི་ཚིག་གི་ཕྲེང་བ་དབྱིངས་སུ་ཡལ། །པདྨ་དཀར་པོ་རྒྱས་པའི་དཔལ་ཅན་སྙིང་དབུས་སུ། །མི་ཤིགས་ཟག་བྲལ་སྦྲང་རྩིའི་བཅུད་ཀྱིས་ལེན་པ་ཅན། །རྟག་བརྟན་ལང་ཚོའི་རྣམ་པར་མཛེས་པའི་མེ་ནཱ་ཀ །སྟོང་གཟུགས་སྒྱུ་མའི་རོལ་པར་སྤྱོད་པའི་ངོ་མཚར་མཐོང་། །གང་དེ་གཞན་གྱིས་རྟོགས་པ་མིན་མོད་དོན་ལྡན་གྱི། །འཁོར་ལོའི་མགོན་པོ་སྲི་ཞུས་མཉེས་པའི་རྟེན་འབྲེལ་དང་། །རྩེ་གཅིག་ནང་དུ་མཉམ་པར་བཞག་ལས་བྱུང་བའི་ཕྱིར། །དོན་དེ་གཉིས་ནི་འདི་ཡི་སྲོག་ཏུ་གྱུར་པར་མཐོང་། །གཞན་དུ་ཌཱ་ཀི་མཚན་ལྡན་བཙལ་བའི་བརྟུལ་ཞུགས་དང་། །དབབ་བཟློག་འབེབས་བསྐྱིལ་བདེ་སྟོང་ལྷན་སྐྱེས་ཉམས་མྱོང་ཡང་། །བཏགས་པ་ཉིད་ཡིན་
དེ་ལྟ་ན་ཡང་ཞེན་པ་ལས། །རྣམ་པར་གྲོལ་བའི་རང་བཞིན་ཡོངས་གྲུབ་དོན་ལ་སྤྱོད། །བུང་བ་མྱོས་པའི་སྦྲང་རྩིའི་བཅུད་བཞིན་བདེ་བའི་བསམ་གཏན་ཙམ་མི་དམིགས། །རྟག་ཏུ་སྤྱོད་ཀྱང་འཛིན་པར་མི་འགྱུར་ཡེ་ནས་རང་ལ་གནས་པ་ཉིད། །ཐ་སྙད་ཚིག་གི་ཞེན་པའི་དྲྭ་བ་དོན་གྱི་རལ་གྲིས་བཀྲལ་བ་ལས། །མི་མནོ་མི་བསམ་མི་ཕྱེད་གཤིས་ལུགས་ལྷུག་པའི་ངང་དུ་གནས་པའོ། །ཡིད་ལ་མི་བྱེད་གཉུག་མ་ཕྱག་རྒྱ་ཆེ། །སྒོམ་མེད་ཡེངས་མེད་མཚོན་བརྗོད་དཔེ་ལས་འདས། །ཐ་སྙད་ཙམ་དུ་དངོས་ཀུན་དཔེར་གྲུབ་པའི། །དོན་དེ་རང་ངོ་མཐོང་ཞིང་རང་སར་གྲོལ། །སྐྱེ་བ་མེད་ཅིང་འགག་པ་མེད། །སྤྲོས་པ་ལས་འདས་སྟོང་ཉིད་ངང་། །འགྱུར་མེད་བདེ་བ་ཟུང་སྦྱོར་བའི། །རྣམ་པ་ཀུན་གྱི་མཆོག་ལྡན་ནོ། །བྱིན་ཟས་འཁྱུད་པའི་བུད་ཤིང་ཇི་བཞིན་སྐལ་མེད་ལ། །གསང་སྔགས་བསྟན་པས་རང་རྒྱུད་སྲེག་པའི་རྒྱུ་རུ་ཟད། །སྣོད་ལྡན་བཙལ་ལ་གདམས་པའི་བདུད་རྩི་དེ་བྱིན་ན། །ངེས་པར་ཡང་དག་མྱུར་དུ་གྲོལ་བ་མཐོང་བའི་ཆོས། །བརྟན་གཡོ་ཀུན་ཁྱབ་ལོངས་སྤྱོད་ཡོངས་རྫོགས་ཧེ་རུ་ཀཿཡིས་བསྐྱེད་པའི་རྒྱུ་ནི་རྩ་ཁམས་ཡི་གེའི་རོལ་མོ་ཉིད། །རྣམ་པར་དཀྲོལ་བའི་ལམ་མཆོག་རྨད་བྱུང་འདི་རུ་བསྟན་པ་ཟུང་འཇུག་གྲུབ་པའི་རྣལ་འབྱོར་དག་གི་རྗེས་འབྲང་ཏེ། །སྙིང་པོར་བསྡུས་པས་གཅིག་ཏུ་སྨན་པའི་ལང་ཚོ་ཡོངས་རྫོགས་ཟླ་བ་གསར་
པའི་ཕོ་ཉ་དེས། །རང་མཚན་སྦས་པའི་ཚུལ་གྱིས་མངོན་བསྟན་ཐེག་པ་བླ་མེད་ཀུནྡའི་འཁྲི་ཤིང་སྐྱེད་བསྲིངས་ཤོག །ཅེས་པའང་རང་གི་མྱོང་བ་བྲལ་ཡང་ལྷ་ཡུལ་གྱི་བདུད་རྩི་བརྗོད་པའི་དཔེ་ལྟར་སྔོན་བྱོན་ངག་གི་གཞུག་མའི་དོ་ཧ་ལས་གསུངས་པའི་དགོངས་དོན་མཚོན་ཕྱིར་གང་ཤར་གླུ་རུ་བླངས་པ་གུ༔ ༈ །།འོད་གསལ་རྫོགས་པ་ཆེན་པོའི་དོན་བསྡུས་དོན་གྱི་རྡོ་རྗེའི་ཐོལ་གླུ་ཡེ་ཤེས་འཁོར་ལོ་ཞེས་བྱ་བ། ཨ་ཧོ། ཚོགས་བརྒྱད་དབུ་མར་ཐིམ་པ་ཡི། །གཞི་གྲོལ་ཀ་དག་དཔལ་གྱི་རི། །རང་སྣང་རྣམ་དག་བུམ་སྐུའི་རྩལ། །རྗེ་བཙུན་མ་ཧཱ་གུ་རུར་འདུད། །རྡོ་རྗེ་ལུས་ཀྱི་དཀྱིལ་འཁོར་ལ། །འཇའ་ཟེར་ཐིག་ལེའི་འཆར་གཞིར་གནས། །ཞི་ཁྲོ་སྤྲུལ་པའི་ཕྱག་རྒྱ་ཡང་། །རང་ལས་བྱུང་ཞིང་རང་ལ་ཤར། །ལུང་མ་བསྟན་གྱི་ཀུན་གཞི་ལ། །འཁྲུལ་གྲོལ་དབང་གིས་འཁོར་འདས་ཀྱི། །འཆར་སྒོ་སོ་སོར་བྱུང་མོད་དེ། །རང་རིག་ཉག་གཅིག་ངང་ལས་ཤར། །གཟུགས་ཚོར་འདུ་ཤེས་འདུ་བྱེད་དང་། །རྣམ་པར་ཤེས་པའི་འཁྲུལ་ངོ་ལས། །འདས་པའི་ཀ་དག་གཉུག་མའི་གཤིས། །ཟག་པ་བྲལ་བའི་ཡེ་ཤེས་ཡིན། །ཅེར་གྲོལ་རང་ཤེས་སྐད་ཅིག་ལ། །སོ་སོ་རང་གིས་རིག་པའི་དོན། ། ཤར་གྲོལ་སྔ་ཕྱི་ལས་འདས་ངང་། །རྟག་ཏུ་བསྒོམ་མེད་མཉམ་པར་བཞག །ནང་དབྱིངས་འོད་གསལ་གསང་ཆེན་རྩལ། །ཕྱིར་གསལ་རིག་པ་ལུ་གུ་རྒྱུད། །དབྱེར་མེད་བསྲེས་ལ་གནད་གསུམ་གྱིས། །
གཅུན་པས་སྣང་བཞིའི་དཀྱིལ་འཁོར་སྨིན། །བློ་འདས་གདོད་མའི་ཡེ་ཤེས་ནི། །ད་ལྟའི་ཤེས་པ་སྐད་ཅིག་མར། །ངོ་ཤེས་ཐག་ཆོད་གདིངས་ཐོབ་པས། །སྤྱོད་པ་ཕ་རོལ་ཕྱིན་དྲུག་རྫོགས། །བདེ་བའི་ཉམས་ཀྱིས་མ་བསླུས་ཤིང་། །སྟོང་པ་ཚིག་གིས་མ་བསྒྲུབས་པའི། །ཡིད་དཔྱོད་ལས་འདས་རྫོགས་པ་ཆེ། །རྡོ་རྗེ་ལྟ་བུའི་ཏིང་ངེ་འཛིན། །སྒྲིབ་པའི་མཐའ་ཀུན་ཟད་བྱེད་ཅིང་། །ཕུང་པོ་ལྔ་ཡི་བདུད་བཅོམ་པས། ཡང་དག་སངས་རྒྱས་ས་བརྙེས་ཕྱིར། །རྒྱལ་བ་ཀུན་གྱི་གཤེགས་ཤུལ་ཡིན། །མདོར་ན་ལྷ་སྔགས་ཏིང་ངེ་འཛིན། །བསྐྱེད་རྫོགས་གྲུབ་མཐའི་དབྱེ་བསྡུ་ཀུན། །ལམ་འདིར་འཇུག་པའི་ངལ་སྟེགས་སུ། །༧ དགོངས་ནས་རྒྱལ་བས་རབ་ཏུ་བསྒྲགས། །སོ་སོའི་དོན་རྣམས་རྣལ་མ་རུ། །འདོད་པའི་ཐེག་བརྒྱད་ལྟ་སྒོམ་ཀུན། །ལས་འདིར་ངང་གིས་འདུ་བའི་ཕྱིར། །ཡེ་ཤེས་སྤྱི་ཡི་གཟུགས་སུ་བསྟན། །ཡོངས་སུ་དག་པའི་ཆོས་ཉིད་སྐུ། །རིག་གདངས་མངོན་སུམ་མཐོང་བ་ཡིས། །རྡོ་རྗེ་འཆང་ཆེན་ས་འགྲུབ་ཕྱིར། །ཀུན་ལས་ཐུན་མོང་མིན་པར་བསྔགས། །འབྲས་བུའི་མཐར་ཐུག་ནང་གསལ་དབྱིངས། །གཞི་ལས་ཁྱད་ཆོས་དྲུག་ལྡན་གྱིས། །རབ་འཕགས་ཀུན་ཏུ་བཟང་པོའི་ཞལ། །མཐོང་བྱེད་གསང་བ་མཆོག་གི་ལམ། །ངེས་པ་དོན་གྱི་མདོ་སྡེ་དང་། །གཉིས་སུ་མེད་པའི་རྒྱུད་སྡེ་ཡིས། །འདི་དོན་ཅུང་ཟད་གསལ་བྱས་ཀྱང་། །
སྦས་ལས་ཀུན་ཏུ་བསྟན་པ་མེད། །རྫོགས་ཆེན་སྡེ་གསུམ་མན་ངག་སྐོར། །ཟབ་གསལ་གཉིས་སུ་མེད་པའི་རྒྱུད། །ཀུན་དང་དེ་ཡི་དགོངས་འགྲེལ་བ། །འཕགས་ཡུལ་དགའ་རབ་འཇམ་དཔལ་། ཞབས། །ཤྲཱི་སེང་དྲི་མེད་བཤེས་གཉེན་རྩལ། །མཚོ་སྐྱེས་པདྨ་ཀ་ར་སོགས། །མཆོག་གཟིགས་འཕགས་པའི་ཟློས་གར་ཅན། །འཇའ་ལུས་འཕོ་ཆེན་རྡོ་རྗེའི་སྐུ། །མངོན་བརྙེས་རིག་འཛིན་རྒྱ་མཚོ་ཡི། །འགྲེལ་པས་བཀྲལ་ཞིང་ཉམས་སུ་བླངས། །བོད་འདིར་བེ་རོ་ཏིང་འཛིན་བཟང་། །དྲི་མེད་འོད་ཟེར་ཡབ་སྲས་སོགས། །མཁས་དང་གྲུབ་པའི་རྣམ་དཔྱོད་ཀྱིས། །སྙིང་ཐིག་བསྟན་པ་གསལ་མཛད་པའི། །。 རྗེ་བཙུན་རྣམས་ཀྱི་བཀའ་དྲིན་ལས། །ཟབ་མོའི་བཤད་སྒྲུབ་ཅུང་ཟད་དར། །མ་ནོར་ལམ་ལ་རབ་འཇུག་པའི། །ཉམས་ཙམ་ཕྱོགས་ལེན་མཆིས་དུས་འདིར། །ཀུན་ཀྱང་ཚུལ་དེར་རབ་ཞུགས་ནས། །ཆོས་ཀུན་ཟད་སར་འཁྱོལ་བར་མཛོད། །དེ་སྐད་རང་ཤར་ཉམས་ཀྱི་གླུ། །ཡེ་ཤེས་འཁོར་ལོར་རོལ་པའི་སྒྲ། །སྙིང་པོའི་བསྟན་པ་དེར་འཛིན་ལ། །མི་ཕྱེད་དད་པའི་ངང་ནས་སྨྲས།། ༈ །།སྤྲོས་བྲལ་ཤེས་རབ་ཀྱི་ཕ་སྒྱུ རོལ་ཏུ་ཕྱིན་པའི་རྡོ་རྗེའི་ཐོལ་གླུ་འོད་གསལ་དབུ་མའི་སྒྲ་དབྱངས་ཞེས་བྱ་བ། ཨ་ཧོ། མཐའ་བྲལ་མི་གནས་ཡེ་ཤེས་ཞལ། །ཟུང་འཇུག་རྣམ་ཐར་སྒོ་གསུམ་དབྱིངས། །འདུ་འབྲལ་སྤངས་པའི་ཆོས་ཉིད་ཆེ། །ཤེས་རབ་ཕ་རོལ་
ཕྱིན་ལ་འདུད། །རྒྱལ་བས་གསུངས་པའི་དམ་ཆོས་ཀུན། །བདེན་པ་གཉིས་ལ་ཡང་དག་བརྟེན། །ཇི་ལྟར་རབ་རིབ་མཐུས་བསྐྱེད་པས། །སྐྲ་ཤད་སོགས་སུ་སྣང་བ་ལྟར། །འཁྲུལ་ངོར་སྣང་བའི་ཆོས་ཇི་སྙེད། །འཇིག་རྟེན་ཀུན་རྫོབ་བདེན་པར་གྲགས། །གཟུང་དང་འཛིན་ལས་རྣམ་གྲོལ་ཞིང་། །སྤྲོས་པ་ཀུན་བྲལ་ཆོས་ཀྱི་དབྱིངས། །རྣམ་པར་རྟོག་མེད་ཟུང་འཇུག་དོན། །འགྱུར་མེད་དོན་དམ་བདེན་པར་བསྟན། །དེ་ཡང་གཟུགས་སོགས་ཕུང་ལྔ་ཡི། །འཁྲུལ་རྒྱུན་ཟད་པའི་འོད་གསལ་དོན། །བདག་དང་བདག་གིར་འཛིན་པ་ལས། །རྣམ་པར་གྲོལ་བའི་སྟོང་པ་ཉིད། །རྟོག་གེའི་བློ་ཡིས་མ་རིག་ཅིང་། །རང་བཞིན་ངང་།། གིས་གྲོལ་བའི་ཆོས། །ཁས་ལེན་དམིགས་གཏད་མཚན་མ་ལས། །རབ་འདས་གདོད་མའི་གཤིས་ལུགས་ལ། །སྒྲོ་བཏགས་སྐུར་འདེབས་ལས་གྲོལ་ཞིང་། །སངས་རྒྱས་སྤྱོད་ཡུལ་ལྷུན་གྲུབ་ཆོས། །རང་བཞིན་འབྱུང་ཕྱིར་སྨོན་པ་ཡི། །དངོས་པོ་ཀུན་ལས་ལྡོག་པའི་དོན། །ལྟ་བའི་གནས་ལུགས་རབ་ཤེས་ནས། །སྦྱོར་བ་བྱང་ཆུབ་སེམས་བསྐྱེད་པའི། །ཚུལ་ལ་བསྟེན་གོམས་བྱས་ནས་ཀྱང་། །དངོས་གཞི་ཆོས་རྣམས་ཐམས་ཅད་ཀུན། །སློབ་དཔོན་ནཱ་ག་རྫུ་ན་ཡིས། །གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། །རྟག་པ་མེད་པ་ཆད་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་
མིན་དོན་གཅིག་མིན། །སྤྲོས་པ་ཉེར་ཞིའི་ཆོས་བསྟན་པ། །ཞེས་པའི་དོན་ལྟར་ཐག་བཅད་དེ། །སེམས་དང་སེམས་བྱུང་སྤྲོ་བསྡུ་ལས། །འདས་པའི་ངང་དེར་མཉམ་བཞག་བྱ། །དེ་སྐད་དུ་ཡང་ཞི་བ་ལྷས། །གང་ཚེ་དངོས་དང་དངོས་མེད་པ། །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས་ཚུལ་དེར་གནས་ཀྱི་བར། །བསྒོམས་ནས་རྗེས་ཐོབ་དགེ་བ་བསྔོ། །དེ་ཉིད་དོན་དམ་བདེན་པ་ཆེ། །ཉམས་སུ་བླང་བའི་ཚུལ་ཡིན་ནོ། །མཉམ་བཞག་དེ་ལས་ལྡང་མ་ཐག །རྨི་ལམ་སྒྱུ་མ་ཆུ་ཟླ་དང་། །དྲི་ཟའི་གྲོང་ཁྱེར་བྲག་ཅའི་སྒྲ། །སྨིག་རྒྱུ་འཇའ་ཚོན་ལྟ་བུ་རུ། །བདེན་མེད་དག་ཏུ་རྟོག་བྱ་བ། །ཀུན་རྫོབ་ཉམས་སུ་བླང་ཚུལ་ཏེ། །མདོར་ན་གཞི་དུས་དབུ་མ་ནི། །བདེན་གཉིས་ཟུང་དུ་འཇུག་པ་སྟེ། །ལམ་དུས་ཚོགས་གཉིས་ཟུང་འཇུག་དང་། །འབྲེལ་བའི་སྤྱོད་པ་སྤྱད་བྱས་ནས། །མཐར་ཐུག་སྐུ་གཉིས་ཟུང་འཇུག་པའི། །འབྲས་བུ་དབུ་མ་ཆེན་པོ་འཐོབ། །རྣམ་ཐར་སྒོ་གསུམ་རབ་སྟོན་པའི། །འཁོར་ལོ་བར་བའི་སྡེ་སྣོད་དོན། །ཀླུ་སྒྲུབ་ཡབ་སྲས་ཀྱིས་བཀྲལ་ཞིང་། །གངས་ཅན་ལྗོངས་འདིར་ཀུན་མཁྱེན་མཆོག །རྒྱལ་སྲས་དྲི་མེད་འོད་ཟེར་སོགས། །མཁས་གྲུབ་ཀུན་གྱི་དགོངས་པའི་དོན། །ཉམས་སུ་ལེན་ཚུལ་ཅུང་ཟད་ཙམ། །བློ་གསལ་ཐར་པ་
འདོད་པ་ནི། །རང་ངམ་གཞན་དག་ཡིན་ཡང་རུང་། །དེ་དོན་དམིགས་ཏེ་གང་ཤར་དུ། །རྡོ་རྗེའི་གླུ་རུ་བླངས་པ་འདིས། །འགྲོ་རྣམས་མ་ལུས་སྒྲོལ་བར་ཤོག། ༈ །།ཟབ་དོན་བསྡུས་པའི་རྡོ་རྗེའི་ཐོལ་གླུ་ངེས་དོན་ཐེམ་སྐས་ཞེས་བྱ་བ། ཨེ་མ་ཧོ། །གཟུང་འཛིན་ལས་འདས་གདོད་མའི་དེ་བཞིན་ཉིད། །སྤྲོས་པ་ཀུན་བྲལ་འོད་གསལ་གཉུག་མའི་གཤིས། །འགྱུར་མེད་བདེ་བ་ཆེན་པོས་རབ་འཁྱུད་པའི། །རྣམ་པ་ཀུན་གྱི་མཆོག་ལྡན་སྙིང་གར་རོལ། ་།སྦས་དོན་གསང་བའི་དེ་ཉིད་སྟོན་པ་ཡི། །གྲུབ་པའི་རིག་འཛིན་རྣམས་ཀྱི་དགོངས་པའི་བཅུད། །རབ་མཐོང་མིན་ཀྱང་གང་ཤར་རྡོ་རྗེའི་གླུས། །ཟབ་མོ་དགའ་བའི་ཆུ་རྒྱུན་དེང་འདིར་འབེབས། །རྡོ་རྗེ་ལུས་ཀྱི་གནས་ལུགས་ངེས་པའི་དོན། །ཀུན་ཏུ་རྟོགས་ནས་གནད་དུ་བསྣུན་པ་ཡིས། །བདེ་སྟོང་ཡེ་ཤེས་སྐྱེ་བར་རབ་གཟིགས་ནས། །ཐབས་ལམ་ཟབ་མོ་རྫོགས་པའི་རིམ་པ་བསྟན། །དེ་ལ་བཀོད་པ་རྩ་དང་གཡོ་བ་རླུང་། །ཐིག་ལེ་བྱང་ཆུབ་སེམས་མཆོག་རྣམ་པ་གསུམ། །ཆགས་གནས་འཇིག་གསུམ་མཛད་པ་རྫོགས་པའི་གར། །རང་བཞིན་ཡེ་ཤེས་ཆེན་པོའི་རྟེན་དུ་གནས། །རྩ་གསུམ་འཁོར་ལོ་རྣམ་པ་བཞི་ལྡན་པའི། །མདུད་པ་ཀུན་དང་ཐབས་ཤེས་མ་ནིང་གི། །ཡི་གེ་གསུམ་དང་སྲོག་རྩོལ་མཉམ་པའི་རླུང་། །དེ་བཞིན་བདེ་སྟོང་འཁྲིལ་སྦྱོར་ཐིག་ལེ་སྟེ། །གསུམ་ཚན་རིམ་པས་བདེ་གསལ་མི་རྟོག་གི། །ཆོས་
ཉིད་བསྐྱེད་དང་སྐུ་གསུམ་རྟེན་འབྲེལ་འགྲུབ། །རྡོ་རྗེའི་ཆོས་དང་ལྡན་པ་རྩ་ཡི་ལམ། །གཅུན་ཅིང་འཁྲུལ་འཁོར་བྱ་བ་རྩ་ཡི་གནད། །སྲོག་རྩོལ་བུམ་པར་བསྐྱིལ་བ་རླུང་གི་ལམ། །སྦྱོར་བ་བཞི་ལྡན་རླུང་གི་གནད་མཆོག་ཡིན། །ཨ་ཧོ་ཞུ་བདེའི་འགྲོས་འདེད་ཐིག་ལེའི་ལམ། །འཁོར་ལོ་བཞི་རུ་བཅིངས་པ་ཐིག་ལེའི་གནད། །བདེ་སྟོང་ལྷ་སྐུར་ལྟ་བ་སྒྱུ་ལུས་ལམ། །ཞེན་མེད་སྤྲུལ་པར་ལྡང་བ་སྒྱུ་ལུས་གནད། །ཉལ་ཁར་འདུན་པས་གཅུར་བ་རྨི་ལམ་ལམ། །ཉལ་སློང་སྐྱེ་མེད་ལ་གཞོལ་རྨི་ལམ་གནད། །སྣོད་བཅུད་དྭངས་མར་བསྡུ་བ་འོད་གསལ་ལམ། །རླུང་སེམས་མཉམ་པར་འཆིང་བ་འོད་གསལ་གནད། །ཆོས་ཉིད་རྣམ་གསུམ་དྲན་པ་བར་དོའི་ལམ། །རྟག་ཏུ་འཁྲུལ་པར་ལྟ་བ་བར་དོའི་གནད། །ཚངས་བུག་དྭངས་མ་འཕོ་བ་འཕོ་བའི་ལམ། །རླུང་སེམས་བསྡུ་ཞིང་བཀག་པ་འཕོ་བའི་གནད། །དེ་ལྟར་རྩ་བ་ཡན་ལག་རིམ་པ་ཡིས། །ཟབ་མོ་རྫོགས་པའི་དོན་རྣམས་བསྡུས་པ་སྟེ། །གཞན་ལས་རླུང་ལ་གནད་དུ་བསྣུན་པ་ཡིས། །གསལ་བའི་ཉམས་དང་ཐིག་ལེ་བདེ་བ་ཉིད། །འཐོབ་བྱེད་སོ་སོར་དབྱེ་བས་རབ་ཏུ་བསྟན། ། མི་རྟོག་མཚན་མ་མེད་པའི་རྫོགས་རིམ་ནི། །གདོད་ནས་མ་སྐྱེས་མཁའ་འདྲའི་འོད་གསལ་དོན། །ཆོས་དང་གང་ཟག་བདག་གིས་མ་བཅིངས་པ། །སྟོང་པ་ཉིད་ཀྱི་མཆོག་ཏུ་རྣམ་པར་གནས། །དེ་ཕྱིར་ཕྱག་རྒྱ་
ཆེན་པོ་བློ་ཡུལ་ལས། །འདས་པའི་ཡིད་ལ་མི་བྱེད་སྙིང་པོའི་དོན། །རབ་ཀྱིས་དམ་པས་ངོ་སྤྲད་དེ་མ་ཐག །གཅེར་མཐོང་སྐྱེས་ནས་རང་བཞིན་ངང་གིས་གྲོལ། །གཞན་དག་མྱོང་བ་གང་སྐྱེས་དེར་བསྟུན་ནས། །རླུང་སེམས་ཐིག་ལེའི་གནད་ཀྱིས་གཅུན་པ་ཡིས། །བརྟེན་པ་འོད་གསལ་བསམ་མི་ཁྱབ་པར་འཆར། །དེ་སྐད་དུ་ཡང་རྗེ་བཙུན་ཏེ་ལོ་པས། །བློ་དམན་སྐྱེ་བོ་དོན་ལ་མི་གནས་ན། །རླུང་གི་གནད་བཟུང་རིག་པ་གཅུད་ལ་བོར། །ལྟ་སྟངས་དང་ནི་སེམས་འཛིན་དུ་མ་ཡིས། །རིག་པ་ངང་ལ་མི་གནས་བར་དུ་གཅུན། །དཔེར་ན་ནམ་མཁའི་དཀྱིལ་ནི་བརྟག་བྱས་ན། །མཐའ་དང་དབུས་སུ་འཛིན་པ་འགགས་པར་འགྱུར། །དེ་བཞིན་སེམས་ཀྱིས་སེམས་ལ་བརྟག་བྱས་ན། །རྣམ་རྟོག་ཚོགས་འགགས་ཐོགས་མེད་གནས་འགྱུར་ནས། །བླ་མེད་བྱང་ཆུབ་སེམས་ཀྱི་རང་བཞིན་མཐོང་། །ཞེས་གསུངས་དེ་ཕྱིར་ཟབ་མོའི་གསང་ལམ་གྱི། །ཐབས་ལ་བརྟེན་ནས་གནད་ཀྱིས་གཅུན་པ་ཡིས། །བརྩོན་འགྲུས་དག་དང་དབང་པོའི་བགོ་སྐལ་ལས། །དུས་གསུམ་སྒྲོལ་བ་སྙིང་པོའི་དོན་མཆོག་གོ །རིག་འཛིན་ཌཱ་ཀིའི་ཞལ་ལུང་ངེས་པའི་དོན། །རང་གི་རྒྱུད་ལ་མྱོང་བ་མ་སྐྱེས་ཤིང་། །མོས་པས་སྤྱོད་པའི་གྲལ་མཐར་ལྷུང་གྱུར་ཕྱིར། །འདི་ལྟར་སྨྲ་བར་འོས་མིན་དེ་ལྟ་ནའང་། །གང་ཤར་རྡོ་རྗེའི་རོལ་མོར་འཁྲོལ་བ་ལ། །ཉེས་པའི་ཚོགས་ཀུན་རྩ་གསུམ་དཀྱིལ་
འཁོར་ལ། །མི་འཆབ་མཐོལ་ཞིང་དགེ་ཚོགས་གང་མཆིས་དེས། །འགྲོ་ཀུན་ཕྱག་རྒྱ་ཆེ་ལ་གནས་པར་ཤོག། ༈ །།འདའ་དཀའ་མའི་རྡོ་རྗེའི་ཐོལ་གླུ་མྱུར་ལམ་ཐེམ་སྐས་ཞེས་བྱ་བ། ཨ་ཧོ། ཕ་སྐུ་བཞིའི་དབང་ཕྱུག་རྡོ་རྗེ་འཆང་། །དོན་རང་སེམས་ངོ་བོར་དབྱེར་མེད་པར། །ཡིད་དད་བརྒྱའི་སྒོ་ནས་གསོལ་བ་འདེབས། །རྟེན་འདི་ལ་བྱང་ཆུབ་ཐོབ་པར་ཤོག །ཡང་རང་གཞན་འཆི་ལ་ཉེར་ཕྱོགས་པའི། །ཅི་བྱ་གཏོལ་མེད་སྐྱོ་ཤེས་ཀྱིས། །གདུངས་ཀྱང་ཐབས་གཞན་བྲལ་བའི་ཕྱིར། །ཟབ་ལམ་གདམས་པའི་དབྱངས་གཅིག་ལེན། །ནམ་ཞིག་དུས་ལ་བབས་པའི་ཚེ། །སྤྱི་གཙུག་བདེ་ཆེན་འཁོར་ལོ་རུ། །ངོ་བོ་དྲིན་ཆེན་བླ་མ་ལ། ། རྣམ་པ་མགོན་པོ་འོད་དཔག་མེད། །སྐད་ཅིག་གིས་གསལ་གདབ་མོས་གུས་བཅས། །ལུས་ལོངས་སྤྱོད་དགེ་རྩ་ཡོངས་སུ་འབུལ། །ཆགས་ཞེན་གྱི་འཁྲི་བ་བཅད་ནས་ཀྱང་། །མྱུར་ལམ་འཕོ་བའི་གདམས་པ་ཡིས། །རིག་པ་ཧྲིཡིག་གི་རྣམ་པར་འཕང་། །དབྱེར་མེད་དུ་བསྲེས་ལ་མཉམ་པར་བཞག །ཐབས་ཤེས་ཀྱི་རླུང་རྣམས་ཕྱིར་འགྲོ་ཚེ། །གཉུག་མ་སེམས་ཀྱི་ངོ་བོ་དང་། །ཕྱི་རོལ་གྱི་མཁའ་དབྱིངས་དབྱེར་མེད་བསྲེས། །ནམ་མཁའ་སུམ་སྤྲུག་སྦུབས་སུ་འཇུག །དེ་ཟབ་མོའི་ལམ་གྱི་བཅུད་ཐིག་ཡིན། །འཆི་བ་ཞེས་སྡུག་བསྔལ་ཕུང་པོ་དེ། །དོན་བརྟག་ན་མཉམ་བཞག་རྗེས་ཐོབ་ཙམ། །ཐོག་མེད་ནས་ད་ལྟའི་བར་
འཁོར་ཡང་། །བདེ་གཤེགས་སྙིང་པོ་ལ་སྐྱེ་འཆིས་དབེན། །རྡོ་རྗེའི་རྣལ་འབྱོར་ལ་གོམས་པས། །མྱུར་ལམ་གྱི་ཐེམ་ལ་འཛེགས་པ་རྣམས། །བསྐྱེད་རྫོགས་ཀྱི་ངང་དུ་གྲོལ་བ་དང་། །དག་པའི་ཞིང་དུ་འཁྲིད་བྱེད་ཡིན། །དེ་ཕྱིར་སྐྱོ་ཤས་རབ་སྲངས་ལ། །དགའ་དང་སྤྲོ་བའི་སེམས་ཀྱིས་སུ། །ནུབ་བདེ་བ་ཅན་དང་པདྨ་འོད། །ཁེཌུརླ་སྣང་ཞིང་ལ་སོགས། །དག་པའི་སྣོད་བཅུད་ལ་རིག་པ་གཏད། །ལུས་ངག་ཡིད་གསུམ་གཡོ་མེད་དུ། །རང་ཉིད་ཀྱིས་གོམས་པའི་བསྐྱེད་རྫོགས་ལ། །རྩེ་གཅིག་ཏུ་མཉམ་བཞག་གནད་ཀྱི་གཟེར། །དེ་འདའ་དཀའི་གདམས་པའི་ཟབ་གསང་ཡིན། །ནམ་ཞིག་འདིར་སྣང་རྫོགས་པའི་ཚེ། །ཕྱི་ནང་གི་ཕྲ་རགས་ཀུན་ཐིམ་ནས། །སྟེང་འོག་ཁུ་རྡུལ་གྱི་རྒྱུ་བ་གཉིས། །དབུ་མའི་ལམ་ནས་སྙིང་གར་ཕྲད། །སྣང་མཆེད་ཐོབ་གསུམ་རྫོགས་པའི་མཐུས། །རང་བཞིན་བརྒྱད་ཅུའི་རྟོག་པ་འགགས། །དེ་ཉེར་ཐོབ་ནམ་མཁའ་ལ་ཐིམ་དུས། །རྣམ་རྟོག་སྔ་ཕྱིའི་རྒྱུན་ཐག་ཆད། །སྤྲིན་མེད་ནམ་མཁའ་ལྟ་བུ་ཡི། །ལྷན་སྐྱེས་སྟོང་གསལ་འཆར་བའི་ཚེ། །ཀ་དག་ལྷུན་གྲུབ་དབྱེར་མེད་པ། །གཉུག་མ་བློ་བྲལ་གོམས་པའི་མཐུས། །ངོ་ཤེས་ཐག་ཆོད་གདིངས་ཐོབ་སྟེ། །འཆི་སྲིད་ཆོས་སྐུའི་ཀློང་དུ་གྲོལ། །དེར་མཆོག་གི་བརྟན་པ་མ་ཐོབ་ཚེ། །ནམ་མཁའ་འོད་གསལ་ལ་ཐིམ་པས། །ཆོས་ཉིད་ཀྱི་བར་དོའི་གཞི་སྣང་ལས། །
འོད་ཟེར་རྣམ་པ་ལྔ་རུ་གསལ། །དེ་ལ་རང་བཞིན་མེད་པ་རུ། །ཡིད་ཆེས་གྲོལ་ནས་བཙན་ས་ཟིན། །དེ་ལྟའི་འོད་གསལ་ཟུང་འཇུག་ལ། །ཐིམ་པ་ཞི་དང་ཁྲོ་བོ་ཡི། །སྒྱུ་འཕྲུལ་རོལ་མོ་ཅིར་ཡང་འཆར། །མི་འཇིགས་གདིངས་ཆེན་ཐོབ་ནས་ཀྱང་། །གནད་གསུམ་དག་གིས་རྣམ་པར་གྲོལ། །དེ་ནས་ཟུང་འཇུག་ཡེ་ཤེས་ལ། །ཐིམ་ཚེ་བཞི་སྦྱོར་སྣང་བ་འཆར། །རྡོ་རྗེ་སེམས་དཔའི་ཁང་གསེང་ནས། །མ་ཡེངས་རིག་པའི་ངང་དུ་གྲོལ། །སླར་ཡང་ཡེ་ཤེས་ལྷུན་གྲུབ་ལ། །ཐིམ་པས་རིག་པ་ཤར་ལུགས་བརྒྱད། །འབྱུང་ཚེ་དག་པ་ལྟར་ཤར་བའི། །ཆོས་ཉིད་ལེགས་པར་ངོ་འཕྲོད་དེ། །སྔར་འདྲིས་མི་དང་འཕྲད་པ་ལྟར། །ཡིད་ཆེས་བཙན་ས་བཟུང་བས་གྲོལ། །དེ་ཚེ་མངོན་ཤེས་རྗེས་དྲན་དྲུག །འཆར་ཞིང་ཆོས་ཀུན་མི་བརྗེད་པའི། །གཟུངས་ལ་དབང་ཐོབ་ཏིང་ངེ་འཛིན། །ཉམས་སུ་མྱོང་བ་དག་ཀྱང་འབྱུང་། །དེ་ནས་ལྷུན་གྲུབ་སྣང་བ་ཉིད། །ཐིམ་ལུགས་བརྒྱད་ཀྱི་རིམ་པ་ཡིས། །གདོད་མའི་གཞི་ལ་གྲོལ་བའི་ཚེ། །ཁྱད་ཆོས་དྲུག་དང་ལྡན་པ་དེ། །འཁྲུལ་གཞི་ལས་འཕགས་རིག་པའི་དངོས། །རང་ངོའི་ཆོས་ཉིད་རྣམ་པར་གསལ། །སོ་སོ་རང་རིག་བྱེ་བྲག་ཕྱེད། །ཡེ་ཤེས་སྤྱོད་ཡུལ་དག་ཏུ་གྲོལ། །འབྲས་བུ་གཞན་རྐྱེན་ལ་རག་མིན། །ཆོས་ཉིད་རང་སར་གནས་པའོ། །དེ་ལྟར་རྟག་ཆད་ལས་འདས་པའི། །ངོ་བོ་ཆོས་
ཉིད་མ་འཁྲུལ་པ། །ཀ་དག་གཞོན་ནུ་བུམ་པའི་སྐུ། །ནང་གསལ་ཆེན་པོའི་འཆར་གཞི་ལས། །རང་བཞིན་གསལ་ལ་མི་རྟོག་པའི། །ཐུགས་རྗེའི་འཇུག་པས་འགྲོ་ཁམས་ལ། །ལྷུན་གྲུབ་རྟག་ཏུ་འཆར་བ་ནི། ། ཕྱིར་གསལ་ཆེན་པོ་རྣམ་པར་བརྗོད། །མདོར་ན་ཆོས་ཉིད་བར་དོ་ཡི། །སྣང་བ་མུ་མཐའ་མེད་པ་ལ། །ཕ་རོལ་བལྟས་ན་མཐའ་ཡས་ཀྱང་། །ཚུ་རོལ་སྤྱོད་མཁན་རང་རིག་པར། །བལྟས་ཚེ་གཅིག་ཀྱང་མ་མཆིས་ཤིང་། །མེད་དོ་སྙམ་པའི་འཛིན་པའང་། །ཤར་གྲོལ་དུས་མཉམ་ནམ་མཁའ་ལ། །སྤྲིན་དང་ཁུ་རླངས་དེངས་པ་ལྟར། །རང་སར་གྲོལ་བའི་སྐད་ཅིག་མར། །གདོད་མའི་ས་ལ་ཕྱིན་པའོ། །དེས་ན་ད་ལྟའི་ཤེས་པ་ལ། །དགག་སྒྲུབ་ཆགས་སྡང་གང་ཤར་ཀྱང་། །ཕྱི་རོལ་དག་ཏུ་རྗེས་མི་བཅད། །བར་དུ་བྱུང་ཁུངས་མི་བཙལ་ཞིང་། །ནང་དུ་གཉེན་པོས་མི་དགག་པར། །ཤར་ས་དེ་ཀར་མཉམ་བཞག་པས། །བར་དོའི་སྣང་བ་རིག་གདངས་སུ། །ཅེར་གྱིས་གྲོལ་བའི་གནད་མཆོག་གོ །གལ་ཏེ་གོམས་པའི་སྟོབས་ཞན་ཅིང་། །སྐལ་པ་དམན་པའི་གང་ཟག་ཕལ། །དེར་མ་གྲོལ་ན་སྲིད་པ་ཡི། །བར་དོ་འབྱུང་བཞི་འདུས་པའི་ལུས། །རྨི་ལམ་ཙམ་གྱི་གནས་སྐབས་ཅན། །འཇིག་པའི་སྒྲ་བཞི་གཡང་ས་གསུམ། །ངེས་དང་མ་ངེས་རྟག་འཆར་ཞིང་། དབང་པོ་ཀུན་ཚང་ཐོགས་མེད་རྒྱུ། །དྲི་ཟ་ཕྲ་མོའི་མངོན་ཤེས་ཅན། །
སྡུག་བསྔལ་ཚོར་བ་ཉམས་མྱོང་ཚེ། །བར་དོ་ཡིན་པར་ངོ་ཤེས་ནས། །སྐྱོ་ཤས་སྡུག་བསྔལ་རབ་སྤངས་ཏེ། །དགའ་དང་དད་པའི་སེམས་ཀྱིས་ནི། །ཕྱོགས་བཅུ་སྤྲུལ་པའི་ཞིང་ཁམས་ཀྱི། །ཡོན་ཏན་ཡིད་ལ་དྲན་བྱས་ནས། །འགྲོ་བའི་འདུན་པ་རབ་ཏུ་གཏད། །ཆོས་ཉིད་བདེན་པའི་ནུས་མཐུ་དང་། །བླ་མ་དམ་པའི་བྱིན་རླབས་ཀྱིས། །སྐྱེ་བ་ཕྱི་མ་མི་བརྒྱུད་པར། །དག་པའི་ཞིང་དུ་དབུགས་རབ་འབྱིན། །གལ་ཏེ་དེ་རུ་མ་གྲོལ་ན། །རིགས་དྲུག་སྐྱེ་བའི་ལྟས་ཤར་ཚེ། །གནས་ངན་འབྲེལ་བ་ཡོངས་བཅད་ཅིང་། །ཆགས་སྡང་མིག་སེར་རྣམ་པར་སྤང་། །སྣང་བ་བདེན་མེད་སྦྱོང་བའམ། །འབྲིང་གིས་བདེ་སྟོང་ལམ་ཁྱེར་དང་། །གཞན་དུ་འདོད་ཆགས་མི་གཙང་བའི། །འདུ་ཤེས་བསྒོམ་པས་ཞེན་ལོག་སྟེ། །རང་བཞིན་སྤྲུལ་སྐུའི་ཞིང་ཁམས་ཆེ། །ཡིད་ལ་བྱེད་པ་ཙམ་གྱིས་སླེབ། །ཐ་མ་ཆོས་ཀྱི་བག་ཆགས་ལས། །རིང་དུ་གྱུར་པ་གང་དག་ནི། །རིགས་དྲུག་མངལ་གྱི་རྒྱར་འཐུམས་ནས། །དབང་མེད་ལས་ཀྱི་རྗེས་འབྲངས་ཚེ། །མངལ་སྒོ་ངན་པ་སྨོན་ལམ་དང་། །སྐྱབས་འགྲོའི་མཐུ་ཡིས་ལྡོག་བྱས་ནས། །དག་པའི་སྐྱེ་བ་འཛིན་འདོད་པས། །དལ་འབྱོར་བཅོ་བརྒྱད་ཚང་བ་ཡི། །ལུས་རྟེན་ཕུན་སུམ་ཚོགས་ཐོབ་སྟེ། །དགེ་བའི་བཤེས་ཀྱིས་རྗེས་བཟུང་གྲོལ། །མདོར་ན་འདི་དུས་གྲོལ་འདོད་པས། །ཟབ་མོའི་གདམས་ངག་
སྟོན་མཛད་པའི། །བླ་མར་བཟོད་མེད་དད་པ་དང་། །ཉིན་དུས་རང་སྣང་གང་ཤར་ཡང་། །མངོན་སུམ་ཆོས་ཉིད་ངང་དུ་བཞག །རྗེས་ཐོབ་བར་དོར་འདུ་ཤེས་པས། །དག་པའི་ཞིང་ལ་འདུན་པ་གཏད། །སྨོན་ལམ་བཏབ་ཅིང་ངེས་ཤེས་བསྐྱེད། །ཉལ་ཁར་འཆི་བ་ལམ་ཁྱེར་ནས། །ཐིམ་རིམ་ངོ་ཡིས་བཟུང་བྱས་ཏེ། །རང་བཞིན་སྤྲུལ་སྐུའི་ཞིང་ཁམས་སུ། །འགྲོ་བའི་འདུན་པ་རབ་གཏད་ནས། །ཟབ་ལམ་རླུང་ཞོན་གདམས་པ་ལ། །རྟག་ཏུ་རང་རྩལ་འབྱོང་བ་གཅེས། །དེ་ལྟར་དུས་ཀུན་གོམས་པ་ཡིས། །སྲིད་པ་བར་དོར་ངོ་ཤེས་ཤིང་། །དག་པའི་ཞིང་དུ་འགྲོ་སྙམ་པའི། །རྟོག་པ་སྐྱེས་ཚེ་ངེས་པར་དུ། །པདྨོའི་སྦུབས་སུ་རྫུས་ཏེ་སྐྱེ། །སངས་རྒྱས་མཐོང་ཞིང་དམ་ཆོས་ཉན། །སྒྲིབ་པ་ཟད་ནས་བླ་མེད་ཀྱི། །བྱང་ཆུབ་མཆོག་ཏུ་རེག་པར་འགྱུར། །འཆི་ཆོས་སྲིད་པའི་བར་དོ་གསུམ། །སྐུ་གསུམ་ལམ་སྣང་མཆོག་ཡིན་བར། །རྒྱུད་སྡེ་ཀུན་ནས་གསལ་བར་བསྟན། །དེ་རུ་གྲོལ་བའི་གནད་ཀྱི་མཆོག །མཆོག་གསང་རྫོགས་པ་ཆེན་པོའི་གནད། གནད་བསྡུས་རྡོ་རྗེའི་རོལ་མོ་འདི། །འདིར་སྣང་ཟད་ཚེ་མངོན་གྱུར་ཤོག ། རང་རྒྱུད་མྱོང་བ་མ་སྐྱེས་ཤིང་། །སྡེབ་སྦྱོར་སྤེལ་བའི་མཐུ་དམན་ཡང་། །མཆོག་གཟིགས་རྣམས་ཀྱི་དགོངས་པའི་དོན། །གང་ཤར་རྡོ་རྗེའི་གླུ་རུ་བླངས། །འདི་ལ་ཉེས་པའི་ཆ་གང་མཆིས། །དཔལ་ལྡན་བླ་
མར་བཟོད་པར་གསོལ། །དགེ་བས་བདག་གཞན་འགྲོ་བ་ཀུན། །གཞི་གྲོལ་རིག་པ་སངས་རྒྱས་ཤོག །ཅེས་པའང་གཞན་བསྐུལ་ངོར་ལྷུག་པར་སྨྲས་སོ།། ༈ །།གེགས་སེལ་རྡོ་རྗེའི་ཐོལ་གླུ་རིན་པོ་ཆེའི་དྲྭ་བ་ཞེས་བྱ་བ། ཨ་ཧོ། གདོད་ནས་རྣམ་པར་དག་པའི་བློ་བྲལ་གྱི་ངོ་བོ། །བཏང་བཞག་ཆེད་འཛིན་ལས་འདས་གཉུག་མ་ཡི་སྦུབས་སུ། །སྒྲོ་འདོགས་སྐུར་འདེབས་འབད་རྩོལ་རང་གྲོལ་དུ་ཞིག་པའི། །སྐུ་གསུམ་ལྷུན་གྲུབ་ཆེན་པོའི་ངོ་བོ་ལ་འདུད་དོ། །གང་ཞིག་བརྗོད་པ་བྲལ་བའི་རང་བྱུང་གི་ཡེ་ཤེས། །འཁོར་ལོའི་མགོན་པོའི་ཐུགས་རྗེའི་རང་བཞིན་ལ་བརྟེན་ནས། །དད་དང་གུས་པའི་རྐྱེན་གྱིས་རང་ངོ་རུ་ཤར་བའི། །ཅེར་མཐོང་རིག་སྟོང་འོད་གསལ་རྫོགས་ཆེན་གྱི་ངོ་བོར། །གེགས་དང་གོལ་ཤོར་ནོར་བའི་ཐ་སྙད་ལས་འདས་ཀྱང་། །དེ་ལྟར་མ་རྟོགས་རིམ་སྐྱེས་མཉམ་རྗེས་ཀྱི་རོལ་པར། །འཛིན་བཅས་སེམས་ཀྱིས་བསླུས་པའི་ལྟ་སྒོམ་དང་སྤྱོད་འབྲས། །རྣལ་མའི་ལམ་དུ་སྒྲུབ་པའི་རྡོ་རྗེ་ཡི་ཐོལ་གླུས། །སྨིན་པའི་མོད་ལས་དགོས་འདོད་ལྷུན་གྲུབ་ཏུ་འབྱུང་ངོ་། །ཧོ་ཧོ། གདོད་ནས་དག་པའི་སྟོང་ཉིད་དེ། །མཚན་མའི་ཆོས་ལ་བརྟེན་པས་མིན། །མེད་དགག་བློ་ཡིས་དཔྱད་གྱུར་ན། །གཅེར་བུ་པ་ཡི་རྗེས་སུ་འགྲོ། །རྟོག་ཚོགས་སེམས་སུ་ཞི་བ་དེ། །རང་སར་དྭངས་གསལ་རྗེན་པ་ཡིན། །དྲན་མེད་ཧད་པོའི་སླད་ཞུགས་ན། །ལུང་མ་བསྟན་
གྱི་རྗེས་སུ་འགྲོ། །གནས་འགྱུ་རང་ངོ་ཤེས་པ་དེ། །གསལ་རིག་འཛིན་མེད་ལྷག་མཐོང་ཡིན། །བརྟག་ཅིང་དཔྱད་པའི་རྗེས་འབྲངས་ན། །རྟོག་པའི་འཁོར་ལོ་སྤེལ་ཏེ་མཆི། །ཅེར་མཐོང་ཡེངས་མེད་མཉམ་བཞག་ངང་། །རང་ཤེས་སྤྲུལ་བསྒྱུར་རྗེས་ཐོབ་སྟེ། །སྣང་བའི་ཐག་པས་འཆིང་བ་དང་། །སྒྱུ་མར་སྟོང་ཉིད་རྒྱས་འདེབས་ནོར། །འཁྲུལ་འབྱམས་འོག་འགྱུ་ལས་འདས་པའི། །ཡང་དག་གཉུག་མར་ཡེངས་མེད་དེ། །ཡེངས་ཀྱིས་དོགས་པའི་བྱ་ཤོར་ན། །གཉིས་ཆོས་མཚན་མ་བརྒལ་བ་མེད། །བསལ་བཞག་ལས་འདས་རྗེན་པ་ལ། །ཐ་མལ་རིག་པ་ཞེས་བཤད་དེ། །འཇིག་རྟེན་འཁྲུལ་པའི་བློར་བཟུང་ན། །གཟུང་དང་འཛིན་པའི་དྲྭ་བར་འཐུམ། །ཞེན་འཛིན་དག་པའི་རང་སེམས་ལ། །ཁྱབ་གདལ་ངང་གནས་སྒོམ་མེད་དེ། །དྲན་པས་བཏང་བའི་ཐ་མལ་ནི། །འཇིག་རྟེན་པ་ཡི་འཁྲུལ་པ་ཡིན། །གང་ཤར་དགག་སྒྲུབ་མེད་པ་རུ། །ཤར་མཁན་རིག་ཐོག་ཀློད་པ་དེ། །རང་གར་འཁྲུལ་རྟོག་རྗེས་འབྲངས་ནས། །བརྟག་དཔྱད་རྟོག་པའི་དོ་རར་ལྷུང་། །ཁྱད་པར་བདེ་གསལ་མི་རྟོག་ཀྱང་། །ལམ་གྱི་འཆར་སྒོ་ཙམ་ཉིད་དེ། །དེ་ཡི་ངོ་བོར་ཞེན་གྱུར་ན། །འདོད་གཟུགས་གཟུགས་མེད་དག་ཏུ་གོལ། །ངོ་བོ་གདོད་ནས་དག་པ་ཡི། །ཀ་དག་ཕྱོགས་ཡན་མ་རྟོགས་བཞིན། །སྟོང་པ་ལོག་ནས་བསྒྲུབ་པ་ན། །གཤིས་ལ་ཤོར་བ་ཞེས་སུ་
བཤད། །རང་རིག་ཟང་ཐལ་ཆེན་པོ་ལ། །རྒྱུ་འབྲས་ལྷུན་གྲུབ་མ་ཤེས་པར། །སྟོང་ཉིད་ལམ་ནས་འབྲས་བུ་གཞན། །བཙལ་བ་ལམ་དུ་ཤོར་བའོ། །སྤང་གཉེན་གཉིས་ལས་རབ་འདས་པའི། །སྦྲུལ་མདུད་ཞིག་ལྟར་ངང་གནས་ལས། །ཉམས་མྱོང་སྟེང་དུ་གཉེན་པོ་གཞན། །བསྒོམ་པ་གཉེན་པོར་ཤོར་བའོ། །གསལ་སྟོང་ལྷུན་གྲུབ་མ་རྟོགས་བཞིན། །བློ་དང་རྣམ་རྟོག་རྗེས་འབྲངས་ནས། །རྒྱུ་འབྲས་མེད་པར་སྐུར་འདེབས་པ། །འདི་ནི་རྒྱས་འདེབས་སྟོང་ལྟའོ། །ཆེད་དུ་འཛིན་པ་ཞུགས་པ་ནི། །གོལ་ཤོར་ནོར་ས་ཀུན་གྱི་གཞི། །དེས་ན་གང་ལའང་མཆོག་འཛིན་གྱི། །ཞེན་པ་མི་བྱ་རང་སར་ཀློད། །ཁྱད་པར་ཚངས་བ་འི་དཀྱིལ་འཁོར་དུ། །པད་དཀར་ཟླ་སྟེང་རྡོ་རྗེ་འཆང་། །དཔལ་ལྡན་བླ་མ་རྟག་བསྒོམ་ནས། །དབང་བཞི་བླང་ཞིང་ཐུགས་ཡིད་བསྲེ། །ཁྱེད་ཤེས་དད་པས་རྒྱུད་བསྐུལ་ནས། །སྒྲུབ་པས་མཉེས་པའི་མཎྜལ་འབུལ། །ལྟེམ་རྐྱང་མེད་པར་སངས་རྒྱས་ལས། །ལྷག་བའི་བཀའ་དྲིན་དྲན་པར་བྱ། །ལུས་ནི་དབེན་པའི་སྒྲུབ་ཁང་ལ། །ཚོགས་དྲུག་རང་ཤར་རང་གྲོལ་དོན། །སེམས་ཉིད་རིག་སྟོང་མཚམས་བསྡམས་ཏེ། །མ་ཡེངས་དྲན་པའི་བཟླས་བརྗོད་འབུངས། །སྒོམ་མེད་ཡེངས་མེད་སྒྲུབ་པ་ཐེམ། །འཁོར་འདས་མཐའ་ཀུན་རིག་ངོར་ཞིག །སྡུག་བཙིར་ཞེ་ཡུས་དབྱིངས་སུ་ཡལ། །བཟང་ངན་ཆོས་
བརྒྱད་མགོ་བོ་བཅོམ། །རྗེས་ཐོབ་དེ་ལྟར་མ་རྟོགས་པའི། །སེམས་ཅན་ཀུན་ལ་སྙིང་རྗེ་དང་། །དམིགས་པ་མེད་པའི་སེམས་བསྐྱེད་ཀྱིས། །མཚམས་སྦྱར་སྨོན་ལམ་རྣམ་དག་གདབ། །ཚོགས་གཉིས་རྫོགས་པའི་ཐབས་འབད་ཅིང་། །རྒྱུ་འབྲས་བླང་དོར་ཞིབ་པར་སྤྱོད། །དེ་དག་ཀུན་ཀྱང་སྒྱུ་མ་དང་། །རྨི་ལམ་ལྟ་བུར་ཞེན་མེད་བྱ། །ཚུལ་འདིར་འབད་པས་ཚེ་གཅིག་གམ། །བརྒྱུད་ནས་རིང་པོར་མི་ཐོགས་པར། ། མཆོག་གི་དངོས་གྲུབ་མངོན་བྱས་ཏེ། །སེམས་ཅན་སྒྲོལ་བའི་མཐུ་ཐོབ་འགྱུར། །དེ་སྐད་གང་ཤར་རྡོ་རྗེའི་གླུ། །སྔོན་བྱོན་མཁས་དང་གྲུབ་བརྙེས་པའི། །སྙིང་ཏིག་བསྟན་འཛིན་རྣམས་ཀྱི་རྗེས། །ཞུགས་པར་འདོད་དེ་ཀུན་ཏུ་སྨྲས། །དགེ་བ་ཅུང་ཟད་མཆིས་གང་དེས། །རང་གཞན་མོས་པའི་འགྲོ་རྣམས་ཀུན། །འཁོར་ལོའི་མགོན་པོས་རྗེས་བཟུང་ནས། །ཟབ་དོན་གྲུབ་མཐའ་རྙོག་པར་ཤོག །བསྐྱེད་རྫོགས་བོགས་འདོན་རྡོ་རྗེའི་ཐོལ་གླུ་གྲུབ་གཉིས་རོལ་མོ་ཞེས་བྱ་བ། ཨ་ཧོ། ཆོས་ཅན་གྱི་སྤྲོས་པ་མ་ལུས་ཀུན། །ཆོས་ཉིད་ཀྱི་ངང་དུ་ཐིམ་ཙ་ན། །གང་དུའང་མིང་བཏགས་ཟད་པ་ཡི། །ཁྱབ་བདག་རྡོ་རྗེ་སེམས་དཔར་འདུད། །རིག་སྟོང་གཉུག་མ་སྐྱོང་ཙ་ན། །བློས་བྱས་འཛིན་པས་གྲོལ་བ་མིན། །ངང་བཞག་འདུ་འབྲལ་སྤངས་པའི་དབྱིངས། །མ་ཡེངས་ཙམ་དུ་རང་སར་སྐྱོང་། །སྣང་སྟོང་བསྐྱེད་རིམ་གསལ་ཙ་ན། །ཀུན་བརྟགས་ཞེན་པས་
གྲོལ་བ་མིན། །བརྡ་རྟགས་མཚན་ཉིད་རྫོགས་པའི་ངང་། །དག་པ་རབ་འབྱམས་ཆེན་པོར་བསྒོམ། །གསང་སྔགས་བཟླས་བརྗོད་འབུངས་ཙ་ན། །སྒྲ་ཚིག་འདུ་འཕྲོས་གྲོལ་བ་མིན། །ཞེན་མེད་ལམ་ཁྱེར་ཆེན་པོའི་ངང་། །རིག་པ་མཁའ་དབྱིངས་ཨར་ལ་གཏད། །མཐའ་བརྒྱད་སྤྲོས་བྲལ་ལྟ་བ་དེ། །རྟོག་གེའི་ཚིག་གིས་གཞལ་བ་མིན། །རིག་པ་རྗེན་པ་ཅར་ཕོག་ཏུ། །ངོ་སྤྲད་ལྷན་སྐྱེས་ཡེ་ཤེས་ཡིན། །བདེ་སྟོང་དགའ་བཞི་བསྐྱེད་ཙ་ན། །ཉོན་མོངས་རང་གསལ་གྲོལ་བ་མིན། །ཐབས་ལྡན་གསང་སྔགས་ལམ་ཁྱེར་གྱིས། །ཞེན་མེད་འཛིན་མེད་ངང་དུ་སྤྱོད། །ཚོགས་གཉིས་མྱུར་རྫོགས་འབད་ཙ་ན། །ཐབས་ཤེས་ཡ་བྲལ་ལམ་གྱིས་མིན། །སོ་སོ་འགལ་མེད་སྤྱོད་བྱས་ཏེ། །མཆོག་འཛིན་སྤངས་པའི་བརྟུལ་ཞུགས་བཟུང་། །ཐེག་ཆེན་ལམ་ལ་འཇུག་ཙ་ན། །སྟོང་ཉིད་སྙིང་རྗེ་བྲལ་བས་མིན། །ངོ་བོ་གདོད་ནས་རྣམ་དག་པའི། །རང་གདངས་སྙིང་རྗེ་ཆེན་པོར་སྦྱངས། །སོ་སོར་ཐར་པར་བསླབ་ཙ་ན། །འཇིགས་སྐྱོབས་ལེགས་སྨོན་བློ་ཡིས་མིན། །ངེས་པར་འབྱུང་བའི་བསམ་པ་ཡིས། །ཚུལ་ཁྲིམས་དོན་ལྡན་གནས་ལ་སྦྱོར། ། གསང་བ་སྔགས་ལ་འཇུག་ཙ་ན། །དབང་བཞིའི་ལམ་དང་བྲལ་བས་མིན། །མཚན་ཉིད་ལྡན་པའི་བླ་མ་ལ། །མོས་གུས་བརྟན་པོས་དེ་ཉིད་བླངས། །བསྐྱེད་རྫོགས་དོན་ལ་བསྒོམ་ཙ་ན། །དམ་ཚིག་སྲོག་དང་
བྲལ་བས་མིན། །རྩ་བ་ཡན་ལག་མཉམ་རྗེས་དང་། །བཟའ་བཅའ་སྲུང་བའི་ལམ་ལ་བསླབས། །བརྟུལ་ཞུགས་སྤྱོད་པས་བསྐྱང་ཙ་ན། །ཚུལ་འཆོས་མཚན་མས་གྲོལ་བ་མིན། །འཁོར་འདས་རོ་སྙོམས་ཆེན་པོའི་ངང་། །རེ་དོགས་ཟིལ་གནོན་དགོངས་པར་སྦྱོར། །ཞལ་གཟིགས་ལུང་བསྟན་བྱུང་ཙ་ན། །དགའ་བྲོད་རྟོག་པས་གྲོལ་བ་མིན། །བདེན་མེད་སྒྱུ་མ་ལྟ་བུའི་ངང་། །སྤྲོས་བྲལ་དགོངས་པའི་རྒྱ་ཡིས་བཏབ། །ནད་གདོན་རྐྱེན་བགེགས་བྱུང་ཙ་ན། །འབུ་འཁྲིགས་ཐབས་ཀྱིས་གྲོལ་བ་མིན། །རེ་དོགས་གཉིས་མེད་ཐོག་བརྫིས་ཀྱིས། །སྣ་ཚོགས་རྟོག་པའི་རྫུན་ཕུག་བརྡིབ། །རྩེ་གཅིག་ཏིང་འཛིན་བསྒོམ་ཙ་ན། །སྡུག་བཙིར་ཡུས་ཀྱིས་གྲོལ་བ་མིན། །ངེས་འབྱུང་སྙིང་རྗེ་ཆེན་པོ་ཡིས། །སྐྱོ་དུབ་མེད་པར་ཉམས་སུ་བླངས། །དབེན་གནས་ནགས་ཁྲོད་རྙོགས་ཙ་ན། །རང་འདོད་ཚུལ་འཆོས་བཅས་པས་མིན། བཅོས་མིན་སྙིང་རྗེ་ཆེན་པོ་ཡིས། །མཚམས་སྦྱོར་ཀུན་ལ་སྙོམས་པར་བྱ། །སྣ་ཚོགས་ཕྲིན་ལས་བསྒྲུབ་ཙ་ན། །རང་རྒྱུད་ཁེངས་པས་གྲོལ་བ་མིན། །སེམས་ཅན་ཀུན་ལ་ཕན་འདོད་པས། །ཡང་དག་ཉིད་དུ་ཉམས་སུ་བླངས། །མདོར་ན་ཐབས་དང་ཤེས་རབ་དང་། །སྟོང་ཉིད་སྙིང་རྗེ་སྣང་སྟོང་སོགས། །ཡ་བྲལ་ལམ་གྱིས་གྲོལ་མིན་ཕྱིར། །ཟུང་འཇུག་དགོངས་པ་རྒྱུད་ལ་སྦྱོར། །བསྐྱེད་རིམ་བོགས་མེད་རྫོགས་རིམ་དང་། །དེ་བཞིན་
རྫོགས་པར་བསྐྱེད་རིམ་སོགས། །ཕན་ཚུན་ལྟོས་གྲུབ་རྟེན་འབྱུང་གིས། །འགལ་མེད་གྲོགས་སུ་སྤེལ་བྱས་ན། །མྱུར་དུ་འཁོར་ལོའི་མགོན་པོ་ཡིས། །རྗེས་སུ་གདམས་པའི་དོན་རྟོགས་ཏེ། །ཟུང་འཇུག་སྐུ་གཉིས་དབྱེར་མེད་པའི། །གོ་འཕང་མཆོག་ལ་སྦྱོར་འགྱུར་བ། །སྔོན་བྱོན་མཆོག་གི་དོན་གཟིགས་དང་། །མདོ་རྒྱུད་བསྟན་བཅོས་ཀུན་མཐུན་པར། །བླ་མེད་འདྲེན་པས་གསལ་བར་བསྟན། །འདིར་ཡང་དེ་དག་རྗེས་ཞུགས་ཏེ། །གང་ཤར་རྡོ་རྗེའི་ཐོལ་གླུ་རུ། །བརྗོད་པའི་དགེ་བས་བདག་དང་གཞན། །ཟག་མེད་བདེ་ཆེན་མཆོག་བརྙེས་ཤོག། ༈ །།སྨོན་པར་བྱ་བའི་རྡོ་རྗེའི་ཐོལ་གླུ་པྲ་ཎི་དྷ་གྲུབ་པའི་ཟློས་གར་ཅེས་བྱ་བ། ཨེ་མ་ཧོ། ནང་གསལ་ཁྱད་ཆོས་དྲུག་ལྡན་གཉུག་མ་ཡི་ཀློང་ནས། །ཕྱིར་གསལ་ངེས་པ་ལྔ་ལྡན་ལྷུན་གྲུབ་ཀྱི་བཀོད་པ། །རང་གདངས་སྤྲུལ་པའི་དཀྱིལ་འཁོར་ལྷ་ཚོགས་སུ་བསྒྱུར་བའི། །སྐུ་གསུམ་དབྱེར་མེད་རྗེ་བཙུན་བླ་མ་ལ་འདུད་དོ། །དལ་བརྒྱད་འབྱོར་བཅུའི་མཛེས་པའི་རྙེད་དཀའ་ཡི་ལུས་རྟེན། །མྱུར་དུ་མི་རྟག་འཆི་བའི་ངེས་འབྱུང་གིས་བསྐུལ་ནས། །འཁོར་བའི་སྡུག་བསྔལ་བཟོད་མེད་སྐྱོ་ཤས་དང་བཅས་ཏེ། །རྒྱུ་འབྲས་སྤང་བླང་སྤྱོད་པའི་སྨོན་ལམ་ཞིག་ཞུའོ། །མཚན་ལྡན་བླ་མས་དགྱེས་བཞིན་དུས་ཀུན་ཏུ་བསྐྱངས་པས། །གསང་ཆེན་རྡོ་རྗེ་ཐེག་པའི་སྨིན་གྲོལ་ལ་རོལ་ཞིང་། །སངས་རྒྱས་དངོས་
ལས་ལྷག་པའི་མོས་གུས་ཀྱི་སྲི་ཞུས། །ལུས་སྲོག་ཕོངས་མེད་བསྟེན་པའི་སྨོན་ལམ་ཞིག་ཞུའོ། །རང་རྒྱུད་རེངས་པའི་བསམ་སྦྱོར་དུས་ཀུན་ཏུ་སྤངས་པས། །འགྲོ་ཀུན་ཡོངས་སུ་དགའ་བའི་སྤྱོད་ཚུལ་དང་བཅས་ཏེ། །བཤེས་པ་ཙམ་ནས་མི་དགེ་རང་ཤུགས་ལ་འགོ་བའི། །སྡིག་པའི་གྲོགས་དང་འབྲལ་བའི་སྨོན་ལམ་ཞིག་ཞུའོ། །ཆོས་བརྒྱད་འཆིང་བ་བྲལ་བཞིན་དབེན་གནས་ཀྱི་ནགས་ཚལ། །དགེ་བའི་གྲོགས་ཀྱིས་བསྟེན་པར་བསམ་གཏན་ལ་གཞོལ་ཞིང་། །རྟག་ཏུ་དམན་ས་བཟུང་ནས་བག་ཡོད་དང་ཆོག་ཤེས། །གཞན་ཕན་ནོར་གྱིས་ཕྱུག་པའི་སྨོན་ལམ་ཞིག་ཞུའོ། །ངེས་འབྱུང་བསམ་པས་རབ་བླངས་སོ་ཐར་གྱི་ཚུལ་ཁྲིམས། །གཞན་ཕན་སྨོན་འཇུག་གཡེལ་མེད་བྱང་སེམས་ཀྱི་བསླབ་པ། །སྨིན་བྱེད་རྗེས་སུ་འབྲེལ་བའི་གསང་སྔགས་ཀྱི་དམ་ཚིག །སྡོམ་གསུམ་ཉམས་མེད་བསྲུང་བའི་སྨོན་ལམ་ཞིག་ཞུའོ། །ཕྱི་ནང་སྣོད་བཅུད་སྣང་སྟོང་ཟུང་འཇུག་གི་དཀྱིལ་འཁོར། །སྒྱུ་འཕྲུལ་དྲྭ་བའི་རོལ་གར་ཉག་གཅིག་ཏུ་གོམས་པས། །ཕུང་པོ་ཁམས་དང་སྐྱེ་མཆེད་གདན་གསུམ་གྱི་ངོ་བོར། །དག་རྫོགས་སྨིན་གསུམ་བརྙེས་པའི་སྨོན་ལམ་ཞིག་ཞུའོ། །འགྲོ་འོང་དྲི་ཡི་བཞོན་པ་དབུ་མ་རུ་བཅིལ་ནས། །འབར་འཛག་བདེ་སྟོང་དགའ་བཞིའི་ཏིང་འཛིན་ལ་རོལ་བས། །འཁྲུལ་པའི་རྩ་མདུད་ས་བཅུའི་དགའ་ཚལ་དུ་གྲོལ་ཏེ། །རྣམ་ཀུན་མཆོག་
ལྡན་གྲུབ་པའི་སྨོན་ལམ་ཞིག་ཞུའོ། །བློ་འདས་རིག་སྟོང་རྗེན་པའི་གཤིས་ལུགས་ལ་བལྟས་པས། །སྤང་བླང་བཟོ་བཅོས་བྲལ་བའི་ངང་བཞག་དང་མཇལ་ནས། །འོད་གསལ་སྤྲོས་བྲལ་སྐུ་བཞི་དབྱེར་མེད་ཀྱི་ངོ་བོ། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ། །དབྱིངས་རིག་དབྱེར་མེད་འཇའ་ཟེར་ཐིག་ལེ་ཡི་སྦུབས་སུ། །གཞི་སྣང་གོང་འཕེལ་ཆོས་ཟད་ཆེན་པོ་ལ་རོལ་ཞིང་། །འཕོ་ཆེན་འཇའ་ལུས་འོད་གསལ་ཟུང་འཇུག་གི་གཟུགས་སྐུས། །འགྲོ་ཀུན་ཟད་པར་སྒྲོལ་བའི་སྨོན་ལམ་ཞིག་ཞུའོ། །གནས་སྐབས་ཕྱོགས་རྣམས་ཀུན་ཏུ་དུས་བཞི་ཡི་མགྲོན་པོས། །སྣོད་བཅུད་རྫོགས་ལྡན་གསར་བའི་དགའ་སྟོན་ལ་སྦྱར་བས། །འཇིགས་ཆེན་བརྒྱད་དང་བཅུ་དྲུག་རང་བཞིན་དུ་བཅིལ་ནས། །ཆོས་མཐུན་སྤྱོད་པས་འཚོ་བའི་སྨོན་ལམ་ཞིག་ཞུའོ། །མཐར་ཐུག་བདག་ཉིད་མཐོང་ཐོས་དྲན་རེག་གི་འགྲོ་ཀུན། །མངོན་པར་དགའ་སོགས་རང་བཞིན་སྤྲུལ་པ་ཡི་ཞིང་དུ། །པདྨོའི་སྦུབས་ལས་གྲོལ་བའི་བྱང་སེམས་སུ་གྱུར་ཏེ། །ཀུན་མཁྱེན་གོ་འཕང་བརྙེས་པའི་སྨོན་ལམ་ཞིག་ཞུའོ། །ཁྱད་པར་དུས་གསུམ་བསགས་དང་བསགས་འགྱུར་གྱི་དགེ་ཚོགས། །དཔལ་ལྡན་བླ་མ་མཉེས་པའི་མཆོད་སྤྲིན་དུ་གྱུར་ནས། །ཐུགས་ཀྱི་དགོངས་པ་ཡོངས་རྫོགས་འགྲོ་བ་ཡི་མོས་ངོར། །རྟག་པར་ཞབས་པད་བརྟན་པའི་སྨོན་ལམ་ཞིག་ཞུའོ། །
དེ་ལྟར་རྒྱ་ཆེན་གསོལ་བཏབ་རྟེན་འབྱུང་གིས་བསྐུལ་ནས། །མཆོག་གསུམ་དབྱེར་མེད་དཔལ་ལྡན་བླ་མ་ཡི་བདེན་པས། །ཇི་སྐད་སྨོན་པའི་དོན་རྣམས་གེགས་མེད་དུ་འགྲུབ་སྟེ། །དོན་གཉིས་ཡོངས་སུ་སྨིན་པར་བྱིན་གྱིས་རང་རློབས་ཤིག །ཡུལ་སྣང་ཆོས་ཅན་བླ་མའི་གཟུགས་སྐུ་རུ་བལྟ་ཞིང་། །རང་རིག་ཆོས་ཉིད་འོད་གསལ་དད་པ་ཡིས་བསྐུལ་ཏེ། །སྣ་ཚོགས་སྨིན་པའི་རྡོ་རྗེའི་ཐོལ་གླུ་རུ་བླངས་སོ། །དགེ་བས་འགྲོ་ཁམས་རྒྱ་མཚོ་སྨིན་གྲོལ་དུ་ཤོག་ཅིག། ༈ །།ཤིས་པ་བརྗོད་པའི་རྡོ་རྗེའི་ཐོལ་གླུ་སྤྲིན་དཀར་འཛུམ་པའི་གླུ་དབྱངས་ཞེས་བྱ་བ། ཨེ་མ་ཧོ། བཟོ་མེད་ལྷུན་འབྱམས་ཀ་དག་གཉུག་མ་ཡི་གཤིས་ལུགས། །རྒྱ་ཡན་ཅོག་གཞག་འཁོར་འདས་གཟུང་འཛིན་གྱི་མཚན་མ། །ནང་གསལ་གཞོན་ནུ་བུམ་སྐུའི་ངང་གདངས་སུ་ཐིམ་པའི། །བླ་མ་ཆོས་ཀྱི་སྐུ་ཡི་བཀྲ་ཤིས་ལ་ཕེབས་དང་། །ས་ལམ་རང་ངོར་རྫོགས་པར་བྱིན་གྱིས་རང་རློབས་ཤིག ། གཞི་སྣང་ལྷུན་གྲུབ་འོད་གསལ་ཐུགས་རྗེ་ཡི་སྒྱུ་འཕྲུལ། །ཁ་སྦྱོར་བདེ་སྟོང་གཉིས་མེད་ཚོམ་བུ་རུ་ཤར་བའི། །ངེས་པ་ལྔ་ལྡན་ཡོངས་གྲུབ་ཆེན་པོ་ཡི་ཀློང་ནས། །བླ་མ་ལོངས་སྤྱོད་རྫོགས་སྐུ་བཀྲ་ཤིས་ལ་ཕེབས་དང་། །གཟུང་འཛིན་འཁྲུལ་པ་ཟད་པར་བྱིན་གྱིས་རང་རློབས་ཤིག །རིགས་ལྔ་གངས་ཆེན་མཚོ་ཡི་སྒྱུ་འཕྲུལ་ལ་ཆགས་པའི། །ཚད་མེད་ཞིང་ཁམས་རབ་འབྱམས་གདུལ་བྱ་ཡི་མོས་ངོར། །རང་རང་
པ། ༄༅། །བསམ་པའི་རྗེས་འགྲོ་ཆུ་ཟླ་ཡི་རོལ་གར། །བླ་མ་སྤྲུལ་སྐུའི་ཚོམ་བུ་བཀྲ་ཤིས་ལ་ཕེབས་དང་། །གང་འདུལ་སྒྱུ་མར་འཆར་བར་བྱིན་གྱིས་རང་རློབས་ཤིག །ཚོགས་བརྒྱད་དབུ་མར་ཐིམ་པའི་བདེ་སྟོང་གི་གྲོང་ཁྱེར། །སྙིང་དབུས་འཇའ་ཟེར་ཐིག་ལེའི་དཀྱིལ་འཁོར་གྱི་ཀློང་ནས། །ལྷན་སྐྱེས་བདེ་ཆེན་ཌཱ་ཀིའི་ཕྱག་རྒྱ་རུ་རོལ་པའི། །འཆི་མེད་མཚོ་སྐྱེས་རྡོ་རྗེ་བཀྲ་ཤིས་ལ་ཕེབས་དང་། །དབང་བཞི་ཡོངས་སུ་རྫོགས་པར་བྱིན་གྱིས་རང་རློབས་ཤིག །རང་ལུས་སྣང་སྟོང་ཟུང་འཇུག་དཀྱིལ་འཁོར་གྱི་དབུས་ནས། །ཕུང་ཁམས་སྐྱེ་མཆེད་དག་པ་རབ་འབྱམས་ཀྱི་ངོ་བོ། །ཞི་དང་ཁྲོ་གར་སྒྱུ་འཕྲུལ་དྲྭ་བ་རུ་སྟོན་པའི། །གདན་གསུམ་ཡི་དམ་ལྷ་ཚོགས་བཀྲ་ཤིས་ལ་ཕེབས་དང་། །གྲུབ་གཉིས་རྣལ་དུ་འབྱོར་པར་བྱིན་གྱིས་རང་རློབས་ཤིག །རྩ་གསུམ་འཁོར་ལོ་ལྔ་ལྡན་བདེ་སྟོང་གི་གྲོང་ཁྱེར། །སྲོག་རྩོལ་དབུ་མར་ཐིམ་པ་འོད་གསལ་གྱི་འཆར་གཞི། །གནས་ཡུལ་དུར་ཁྲོད་རང་བྱུང་ལྷུན་གྲུབ་ཀྱི་ཀློང་ནས། །དཔའ་བོ་ཌཱ་ཀི་རྒྱ་མཚོ་བཀྲ་ཤིས་ལ་ཕེབས་དང་། །དགའ་བཞིའི་ལང་ཚོ་རྒྱས་པར་བྱིན་གྱིས་རང་རློབས་ཤིག །སྤྱི་གཙུག་ཛ་ལནྡྷ་རའི་ཟུར་ཕུད་ཀྱི་རྩེ་ནས། །དད་དང་མོས་པའི་པད་དཀར་འདབ་བརྒྱ་ཡི་ཟེའུ་འབྲུར། །རྟག་ཏུ་གཡེལ་མེད་བཞུགས་པའི་ཐུགས་རྗེ་ཡི་མངའ་བདག །ཁྱབ་བདག་འཁོར་ལོའི་མགོན་པོ་བཀྲ་ཤིས་ལ་
ཕེབས་དང་། །ཚེ་འདིར་གྲུབ་མཐའ་རྙོག་པར་བྱིན་གྱིས་རང་རློབས་ཤིག །ཚོགས་བརྒྱད་དབུ་མར་བསྒྲལ་བའི་དུར་ཁྲོད་ཀྱི་དཀྱིལ་འཁོར། །ཀུན་བརྟགས་མཚན་འཛིན་ལས་འདས་ཁྲག་མཚོ་ཡི་ཀློང་ནས། ། ཉམས་པའི་དགྲ་བགེགས་བསྒྲལ་བའི་བརྟུལ་ཞུགས་ལ་རོལ་པའི། །དམ་ཅན་ཆོས་སྐྱོང་རྒྱ་མཚོ་བཀྲ་ཤིས་ལ་ཕེབས་དང་། །རྣམ་བཞིའི་ཕྲིན་ལས་འགྲུབ་པར་བྱིན་གྱིས་རང་རློབས་ཤིག །མཁའ་ལ་མནྡཱ་ར་བའི་ཆར་སྤྲིན་གྱིས་ཁེངས་ཤིང་། །ས་ལ་འགྲོ་ཀུན་རབ་སྙན་གླུ་དབྱངས་ལ་རོལ་ནས། །སྣོད་བཅུད་རྫོགས་ལྡན་གསར་བའི་དགའ་སྟོན་ལ་སྤྱོད་པའི། །ངོ་མཚར་ཕུན་སུམ་ཚོགས་པའི་བཀྲ་ཤིས་དེ་སྩོལ་ཤོག ། དེ་སྐད་ཀུན་ཏུ་ཤིས་པའི་རྡོ་རྗེ་ཡི་ཐོལ་གླུ། །བདེན་སྨོན་སྤྲིན་གཞོན་དཀར་པོའི་ཟློས་གར་འདི་བསྒྱུར་བས། །འགྲོ་རྣམས་གནས་སྐབས་མཐར་ཐུག་ཕན་བདེ་ཡི་ཆུ་སྐྱེས། །ནུབ་མེད་ཡོངས་སུ་རྒྱས་པའི་བཀྲ་ཤིས་མཆོག་ཞུའོ། མངྒ་ལཾ་ས་མནྟ་པུཊྚི་ཀུ་རཱནྟ། འདི་མན་ཆད་རང་ལོ་བཅུ་དྲུག་པ་ཁོ་ནར་གང་ཤར་རྡོ་རྗེའི་གླུ་རུ་བླངས་པའོ།། ༈ །།ཀུན་མཁྱེན་སངས་རྒྱས་གཉིས་པ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་གྲགས་སྟོང་སྒྱུ་མའི་གར་མཁན་ཞེས་བྱ་བ། ན་མོ་གུ་རུ་བྷྱ༔ ཀ་དག་ཆོས་ཉིད་མངོན་སུམ་གཉུག་མ་ཡི་ཀློང་ནས། །ཁ་དོག་ཉམས་སྣང་གོང་འཕེལ་འཇའ་ཟེར་གྱི་དཀྱིལ་འཁོར། །ག་ལ་བ་དེར་ཚད་ཕེབས་ཁ་སྦྱོར་གྱི་ཚོམ་བུ། །ང་བདག་འཛིན་བྲལ་ཆོས་
ཟད་བླ་མ་དེ་མཁྱེན་ནོ། །ཅ་ཅོའི་སྒྲ་ཚིག་ལས་འདས་དབུ་མ་ཡི་སྦུབས་ནས། །ཆ་མཐུན་ལུང་དང་རྟོགས་པའི་ཡེ་ཤེས་ཀྱི་རླུང་གིས། །ཇ་དར་སྐྱེམས་ཀྱིས་མི་མཚོན་ལོངས་སྤྱོད་ཀྱི་འཁོར་ལོ། །ན་རྒྱས་ཟླ་འདྲའི་རྣམ་པར་གྲོལ་བ་ལ་འདུད་དོ། །ཏ་ཐཱ་ག་ཏའི་སྙིང་པོ་ཀུན་ཁྱབ་ཀྱི་གཞི་རྒྱུད། །ཐ་དད་མོས་པའི་རྗེས་འགྲོ་ཐེག་དགུ་ཡི་ལམ་རྒྱུད། །ད་བཟོད་བསྐྱར་གྲོལ་ལས་འདས་སྐུ་གསུམ་གྱི་འབྲས་རྒྱུད། །ན་མར་ཁོར་ཡུག་མཉམ་པར་རོལ་པ་ལ་འདུད་དོ། །པ་ར་མི་ཏའི་སྙིང་པོ་གཞན་ཕན་གྱི་ལོ་འདབ། །ཕ་རོལ་ཕྱིན་པ་དྲུག་གི་མེ་ཏོག་གིས་མཛེས་ཤིང་། །བ་མཆོག་དཔག་བསམ་ཤིང་ལྟར་བསྡུ་དངོས་ཀྱི་འབྲས་བུས། །མ་རིག་འགྲོ་ཀུན་ཚིམ་པར་མཛད་པ་ལ་འདུད་དོ། །ཙཱ་རི་ཏྲ་སོགས་གདན་གསུམ་དཀྱིལ་འཁོར་དུ་རྫོགས་པས། །ཚ་གྲང་རྣམ་རྟོག་སྤངས་པའི་བདེ་སྟོང་གི་བདུད་རྩི། །ཛ་ཧུའི་རྒྱུན་ལྟར་འཁོར་ལྔའི་ཕོ་བྲང་དུ་བཀྲམ་པས། །ཝ་ལྟར་ཉུལ་བའི་རླུང་སེམས་སྡུད་པ་ལ་འདུད་དོ། །ཞྭ་ཐོད་སྤངས་པའི་གླེགས་རལ་ཆུ་སྐྱེས་ཀྱི་སྙིང་པོར། །ཟ་ཧོར་རྒྱལ་པོའི་མཆོད་གནས་མཚོ་སྐྱེས་ཀྱི་རྡོ་རྗེ། །འ་ཅག་འགྲོ་བ་སྒྲོལ་ཕྱིར་རིགས་བདག་ཏུ་བསྙེན་ནས། །ཡ་བྲལ་ལས་འདས་སྙིང་ཏིག་སྟོན་པ་ལ་འདུད་དོ། །རཱ་ཛ་དྲེགས་པས་བཀུར་ཀྱང་ཁེངས་སེམས་དང་བྲལ་ཞིང་། །ལ་ཀླུང་འགྲོ་བས་སྨད་ཀྱང་གཞན་དོན་ལ་སྤྱོད་པའི། །
ཤ་ཟ་འབོད་སྒྲོགས་རྒྱལ་པོ་ཕྲིན་ལས་ཀྱི་ཕོ་ཉ། །ས་བཅུའི་བྱང་སེམས་གཞོན་ནུར་བཞེངས་པ་ལ་འདུད་དོ། །ཧ་རིའི་དྲི་བསུང་འཐུལ་བའི་ངུར་སྨྲིག་གི་རྒྱལ་མཚན། །ཨ་དོན་ནང་གསལ་གཞོན་ནུ་བུམ་སྐུ་ལ་བཀླུབས་པས། །དྲི་མེད་འོད་ཟེར་སྟོང་ལྡན་མི་གཟུགས་སུ་བསྟན་པའི། །བསླབ་གསུམ་རྣམ་དག་གདོད་མའི་མགོན་པོ་ལ་འདུད་དོ། །དེ་ལྟར་གུས་པའི་ཆུ་གཏེར་ཆེན་པོ་ལས་སྐྱེས་ཤིང་། །ཡུལ་སྣང་རྟེན་འབྲེལ་རོལ་པའི་འཕྲིན་ཡིག་གིས་བསྐུལ་བས། །གང་ཤར་གསོལ་བ་འདེབས་པའི་གྲགས་སྟོང་གི་རླབས་ཕྲེང་། །རྣལ་འབྱོར་སྒྱུ་མར་སྤྱོད་པའི་ཉམས་དབྱངས་རང་ཡིན་ནོ། །དགེ་བ་དེ་ཡིས་ཐ་མལ་གཉུག་མ་ཡི་གཤིས་ལུགས། །བཏང་བཞག་འགྲོ་སྡོད་བྲལ་བའི་ངང་བཞག་གི་དབྱིངས་སུ། །མངོན་པར་བྱང་ཆུབ་འཁོར་འདས་དབྱེར་མེད་ཀྱི་ངོ་བོ། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ།། ༈ །།བདེ་ཆེན་མཚོ་རྒྱལ་ལ་བསྟོད་པ་རྡོ་རྗེའི་ཐོལ་གླུ་བདེ་སྟོང་ཆུ་སྐྱེས་གཞོན་ནུ་ཞེས་བྱ་བ། ན་མཛྙཱ་ན་ཌཱ་ཀི་ནཱི་ཡེ། ཀ་མ་ལ་ལྟར་རབ་བཀྲའི་ཆུ་སྐྱེས་ཀྱི་ཟེའུ་འབྲུར། །ཁ་དོག་མཚམས་སྤྲིན་གསར་པའི་འཇོ་སྒེག་ལ་རོལ་ཞིང་། །ག་བུར་འཛིན་དང་པུཎྜ་རཱི་ཀ་ཡི་རྒྱན་ལྡན། །ང་བདག་གདུང་སེལ་མཚན་དཔེའི་དཀྱིལ་འཁོར་ལ་འདུད་དོ། །ཅ་ཅོ་བྲལ་བའི་གསུང་དབྱངས་ནཱ་ད་ཡི་ངོ་བོར། །ཆ་མཐུན་བདེན་གཉིས་ཆོས་ཚུལ་ཀཱི་རྟི་རུ་འཇོ་བས། །
ཇ་ཆང་སྐྱེམས་ཀྱིས་མི་མཚོན་ཐར་མཆོག་གི་བཅུད་ལེན། །ཉ་རྒྱས་ཟླ་ལྟར་གོང་འཕེལ་སྦྱིན་པ་ལ་འདུད་དོ། །ཏ་ན་ག་ཎ་སྦྱོར་སྒྲོལ་ཟུང་འཇུག་གི་དབྱིངས་སུ། །ཐ་དད་གཟུང་འཛིན་འཁྲུལ་པ་དབུ་མ་རུ་བསྡམས་ཏེ། །ད་གཟོད་བདེ་བ་ཆེན་པོ་དགའ་བཞི་ཡི་ཕོ་ཉས། །ན་མ་ཁ་སྦྱོར་སྐུ་གསུམ་རོལ་པ་ལ་འདུད་དོ། །པཱ་པ་རྡོ་རྗེའི་ལམ་ནས་ཐབས་ཤེས་ཀྱི་བྱང་སེམས། །ཕ་རོལ་ཕྱིན་ལམ་རྣམ་ཐར་གསུམ་ལྡན་དུ་རོལ་པས། །བ་མོར་ཉི་བཞིན་འཁོར་བའི་བག་ཆགས་ཀུན་བཅོམ་སྟེ། །མ་ལུས་སྤངས་རྟོགས་པདྨོ་བཞད་པ་ལ་འདུད་དོ། །ཙཱ་རི་ཏྲ་སོགས་གནས་ཡུལ་ཌ་ཀི་ཡི་གྲོང་ཁྱེར། །ཚ་གྲང་ཉི་ཟླ་བཞུ་བའི་འཁོར་ལོ་རུ་རྫོགས་པས། །ཛ་ལང་འབོད་དབྱངས་རོལ་མོས་ཐ་དད་དུ་འགུགས་པའི། །ཝ་ལྟར་ཉུལ་བའི་རྟོག་ཚོགས་སྡུད་པ་ལ་འདུད་དོ། །ཞྭ་ཐོད་ཀུ་མུད་གསར་པའི་འཁྲི་ཤིང་ལ་ཆགས་པའི། །ཟ་ཧོར་རྒྱལ་པོའི་མཆོད་གནས་པད་འབྱུང་གི་ཟླ་བ། །འ་ཅག་བྱིན་གྱིས་བརླབ་ཕྱིར་གཟུགས་སྐུ་རུ་བཞེངས་ཏེ། །ཡ་བྲལ་ལས་འདས་བདེ་སྟོང་སྦྱིན་པ་ལ་འདུད་དོ། །ར་མ་ཎ་ལྟར་དཔའ་ཆེན་སྙིང་སྟོབས་ཆེ་བྲལ་ཀྱང་། །ལ་ལ་ན་སོགས་འཁྲི་ཤིང་དབུ་མ་རུ་སྡུད་པས། །ཤ་ཟ་འབོད་སྒྲོག་རྒྱལ་པོ་ཆགས་ཆེན་གྱིས་བསླུས་ཏེ། །ས་བཅུ་ཕོ་ཉའི་ལམ་གྱིས་བགྲོད་པ་ལ་འདུད་དོ། །ཧ་རིའི་དྲི་བསུང་འཐུལ་བའི་འབར་འཛག་གི་བདེ་ཆེན། །
ཨ་ཧཾ་ཟུང་འཇུག་འཁོར་ལྔའི་ཕོ་བྲང་དུ་ཆགས་པས། །ཧ་ལ་ལྟ་བུའི་རྟོག་ཚོགས་དབུ་མ་རུ་ཐིམ་པའི། །ཨ་དོན་སྐྱེ་མེད་ནང་གསལ་ཆོས་སྐུ་ལ་འདུད་དོ། །གྲགས་སྟོང་ཨཱ་ལི་ཀཱ་ལི་ཅང་ཏེའུ་ཡི་སྒྲ་དབྱངས། །ཚོར་སྟོང་ཕྱག་རྒྱ་ཆེན་པོའི་དཀྱིལ་འཁོར་དུ་རོལ་ཅིང་། །གཟུང་འཛིན་རྟོག་པའི་འཁྲི་ཤིང་བློ་བྲལ་དུ་གཅོད་པའི། །བདེ་ཆེན་གྲི་གུག་བདེ་བར་བསྟེན་པ་ལ་འདུད་དོ། །ཐ་མལ་སྣང་ཞེན་འཁྲུལ་པའི་འཁོར་ལོ་ཀུན་མ་ལུས། །གདན་གསུམ་ཟུང་འཇུག་དཀྱིལ་འཁོར་ཆེན་པོ་ལ་རོལ་ཅིང་། །རྩེ་གཅིག་བསྙེན་དང་སྒྲུབ་པའི་དྲི་བཞོན་གྱིས་བསྐུལ་བས། །ཕན་བདེའི་སྤྲིན་གྱི་མྱུ་གུ་འཇོ་བ་རུ་ཤོག་ཅིག །རྣམ་ཐར་གསུམ་དང་ལྡན་པའི་ཆུ་སྐྱེས་ཀྱི་ཟེའུ་འབྲུར། །སྲིད་གསུམ་ཐིག་ལེར་དྭངས་པའི་རྡོ་རྗེ་ཡི་སྐུ་མཆོག །ལྷན་སྐྱེས་བདེ་བའི་རོས་ཚིམ་མཚན་དཔེ་ཡི་དཀྱིལ་འཁོར། །མངོན་སུམ་མིག་གི་བདུད་རྩིར་མཐོང་བ་རུ་ཤོག་ཅིག ། འགྱུར་བཅས་འཕོ་བ་བཅུ་གཉིས་དྷཱ་ཏི་རུ་བཅིལ་བས། །ཟག་བྲལ་དྭངས་མ་ཛ་ལནྡྷ་ར་རུ་སྨིན་ནས། །ཉི་ཟླ་ནཱ་དར་དེངས་པའི་སྒྲ་གཅན་གྱི་ལྟོ་བར། །ཤེས་དང་ཤེས་བྱའི་ཆོས་ཀུན་བསྡམ་པ་རུ་ཤོག་ཅིག ། ཀུན་བརྟགས་འཁྲུལ་པའི་ཆོས་ཀུན་རང་ངོ་རུ་དག་ནས། །གཞན་དབང་སྲིད་པའི་འཁྲུལ་འཁོར་ཆོས་དབྱིངས་སུ་ཐིམ་སྟེ། །ཡོངས་གྲུབ་བདེ་གཤེགས་སྙིང་པོ་དོན་དམ་གྱི་གནས་ལུགས། །བསལ་བཞག་བྲལ་
བའི་ངང་དུ་སྨིན་པ་རུ་ཤོག་ཅིག །གཞི་སྣང་ཆོས་ཉིད་མངོན་སུམ་འཇའ་ཟེར་གྱི་དབུས་སུ། །གོང་འཕེལ་ཀློང་དུ་ཡིད་དཔྱོད་ལྷུན་གྲུབ་ཏུ་ཤར་བས། །ཚད་ཕེབས་སྐུ་དང་ཐིག་ལེ་འབྱམས་ཀླས་ལ་རོལ་ཏེ། རགས་ལུས་ཆོས་ཟད་དབྱིངས་སུ་བསྡམ་པ་རུ་ཤོག་ཅིག །གནས་སྐབས་བརྒྱད་གཉིས་འཇིགས་པའི་ཉིན་བྱེད་ཀྱི་ཞགས་པས། །སྒོ་གསུམ་ཨུཏྤལ་དཀར་པོ་བཅིངས་པ་ལས་གྲོལ་ཏེ། །མཁྱེན་བརྩེའི་ཟླ་བ་གསར་པའི་སྨན་མཆོག་གིས་རེག་པས། །ཚེ་དཔལ་འབྱོར་པའི་སྦྲང་རྩི་རྒྱས་པ་རུ་ཤོག་ཅིག །ཁྱད་པར་ནམ་ཞིག་ཚེ་ཡི་འདུ་བྱེད་འདི་བཏང་ཚེ། །རང་རིག་ཕྱག་རྒྱ་ཆེན་པོ་བདེ་སྟོང་གི་གཞོན་ནུ། །སྙིང་ག་དབུ་མའི་ལམ་ནས་མཁའ་སྤྱོད་དུ་ཁྲིད་པའི། །ང་ཡི་ཤེས་རབ་ཌ་ཀི་ཕོ་ཉ་རུ་ཕེབས་ཤིག །གང་ན་ཟག་བྲལ་མེ་ན་ཀ་རྣམས་ཀྱིས་བསྟེན་པའི། །ཁྱོད་ཞབས་པདྨ་དཀར་པོའི་འཁྲི་ཤིང་ལ་རེག་པས། །ཉོན་ཡིད་གློ་བུར་སྒྲིབ་པའི་ཚ་གདུང་ཀུན་བསལ་ཏེ། །ཐམས་ཅད་མཁྱེན་པའི་ངལ་བསོ་བསྟེན་པ་རུ་ཤོག་ཅིག །དེ་ལས་སླར་ཡང་ཡན་ལག་བདུན་ལྡན་གྱི་འཁོར་ལོ། །བཀོད་པའི་ཕུང་པོ་ཟླ་བའི་སྐྱེ་མཆེད་ཀྱི་གྲངས་བཞིན། །འགྲོ་ཀུན་སྲིད་ལས་སྒྲོལ་བའི་དམ་བཅའ་ལ་འཇུག་སྟེ། །མཐའ་གཉིས་རྣམ་བྲལ་ཁྱོད་དགོངས་འགྲུབ་པ་རུ་ཤོག་ཅིག །དེ་སྐད་ལོངས་སྤྱོད་ཡོངས་རྫོགས་ཡི་གེ་ཡི་རོལ་མོ། །ཉོན་མོངས་ལས་འདས་
བདེ་ཆེན་དྲི་བཞོན་གྱིས་བསྐུལ་བས། །གང་ཤར་བསྟོད་ཅིང་སྨོན་པའི་རྡོ་རྗེ་ཡི་ཐོལ་གླུས། །ཉེ་བའི་འདུ་བ་བདེ་སྟོང་བདུད་རྩི་ཡིས་མཉེས་སོ། །དེ་ལས་བྱུང་བའི་དགེ་ཚོགས་ཙིནྟ་ཡི་མ་ཎི། །ཟབ་ཞི་སྤྲོས་བྲལ་ཆོས་དབྱིངས་རྒྱ་མཚོ་རུ་བསྔོས་པས། །མི་བཟད་འགྲོ་བའི་ཀླུ་དབང་གཙུག་རྒྱན་དུ་གྱུར་ཏེ། །ཕན་དང་བདེ་བའི་དགའ་སྟོན་རོལ་པ་རུ་ཤོག་ཅིག །ཅེས་པའང་དམར་ཕྱོགས་མཁའ་འགྲོ་འདུ་བའི་དུས་ཀྱི་རྒྱལ་པོར་ཚོགས་ཀྱི་འཁོར་ལོས་དགྱེས་པ་བསྐང་བའི་ཚེ་ཕྱི་ནང་གསང་བའི་རྟགས་མཚན་དགེ་བ་ལ་བརྟེན་ནས་རིག་སྟོང་གཉུག་མ་བསལ་བཞག་བྲལ་བའི་འོད་གསལ་རྣམ་ཀུན་མཆོག་ལྡན་གྱི་ཀློང་ནས་གང་ཤར་ཐོལ་བྱུང་དུ་བཀོད་པ་འདིས་ཀྱང་སྐལ་ལྡན་གྱི་འགྲོ་བ་ཐམས་ཅད་ཡེ་ཤེས་མཁའ་འགྲོས་དགེས་པ་ཆེན་པོས་རྗེས་སུ་འཛིན་པའི་རྒྱུར་གྱུར་ཅིག སརྦ་མ་ཧཱ་སུ་ཁཛྷཱ་ན་ཌཱ་ཀི་ཤུ་བྷཾ།། ༈ །།རང་གིས་རང་ལ་གྲོས་གདབ་པའི་རྡོ་རྗེའི་ཐོལ་གླུ་བདེན་པའི་འཁྲི་ཤིང་ཅེས་བྱ་བ། ཨ་ཧོ། དཔལ་སྐུ་བཞིའི་དབང་ཕྱུག་ཧེ་རུ་ཀ །ཁྱབ་བདག་འཁོར་ལོའི་མགོན་པོ་ལ། །མི་ཕྱེད་གུས་པས་གསོལ་བ་འདེབས། །ཐུགས་རྗེ་ཆེན་པོས་རྗེས་སུ་སྐྱོངས། །སྔོན་བསྐལ་པ་རྫོགས་ལྡན་དུས་ཚོད་དེར། །ཕྱི་སྣོད་ཀྱི་འབྱུང་བ་ངང་གིས་སྙོམས། །ནང་བཅུད་ཀྱི་འགྲོ་བ་བདེ་ལ་སྤྱོད། །ལྷ་ཡི་དཔལ་འབྱོར་ལ་འགྲན་པའི་ཚེ། །ཆགས་སྡང་རགས་པའི་འདུ་བྱེད་ཀྱིས། །རང་གཞན་ཀུན་ངན་སོང་གི་གནས་མལ་ལ། །སྦྱར་བའི་ངང་ཚུལ་བག་ཉལ་བས། །རང་བཞིན་གྱི་རྣམ་པར་དུལ་
མོད་དེ། །དུས་དེང་སང་སྙིགས་མའི་གནས་སྐབས་འདིར། །ཕན་པར་སྨྲས་ཀྱང་ལོག་པར་བལྟ། །ཆོས་ལ་སྦྱར་ཞིང་ཕྱི་ཕྱིར་གྱོང་། །བསྒྲུབ་སླ་བའི་གསང་སྔགས་ལ་འཇུག་རློམ་ཞིང་། །དེ་དམ་ཚིག་གི་གྲོགས་ཀྱིས་རིང་སྤངས་ཚེ། །རྡོ་རྗེ་དམྱལ་བར་སྦྱོར་མོད་ཀྱང་། །ད་རུང་རིག་པ་འཛིན་པར་རློམས། །ཨ་ལ་བསྟན་པའི་ཞབས་འདྲེན་པ། །དེ་དག་རྣམས་ལ་ཅི་ཞིག་སྨོན། །དམ་པའི་བཤེས་ལ་བསྟེན་བྱས་ནས། །དམ་ལྡན་གྲོགས་དང་འགྲོགས་ནས་ཀྱང་། །དམ་པའི་གདམས་ངག་རྟག་མཉན་ཅིང་། །དམ་པའི་སྤྱོད་པར་བསླབ་འདོད་པར། །ཁྱད་པར་ཅན་གྱི་འཕྲིན་འདི་གདམས། །རང་ལ་ཡོན་ཏན་ནོར་བུའི་གཏེར། །ཕན་བདེའི་ཟ་མ་ཏོག་དག་གིས། །ཕྱུག་པ་ཅུང་ཟད་མེད་མོད་ཀྱང་། །ཡོད་པར་རློམ་པ་རིང་དུ་སྤང་། །གཞན་གྱིས་བསྙེན་བཀུར་འདོད་པའི་སྤྲིན། །རྟག་པར་སྙིང་ལ་ངལ་འཚོས་ཀྱང་། །རེ་དོགས་རྡོ་རྗེ་ལྕག་མ་ཡིས། །ཐར་པའི་བྲག་རི་ཚལ་བར་བཀས། །དེས་ན་གང་དང་གང་དུ་རུང་། །ཉམ་ཆུང་གྱི་ནའི་འཚོ་བ་གང་། །བག་ཡོད་བསླབ་པས་དུས་འདའ་ཞིང་། །ཆོག་ཤེས་ནོར་ལ་མངོན་པར་བསྙེན། །རང་ཉིད་དམའ་བའི་ས་བཟུང་ཞིང་། །ཀུན་དང་མཐུན་པར་དཀའ་ན་ཡང་། །སྙིང་ལ་འབབ་པར་སྨྲ་བའི་ཚིག །བདེན་པའི་དོན་གྱིས་ལྕི་བར་གླེང་། །མཁས་པ་དང་ནི་གྲུབ་པ་ཡི། །སྙན་གྲགས་ཤུགས་ལ་
བྱུང་ན་རུང་། །དེ་བས་འདོད་པར་མི་བྱ་བར། །རྟག་ཏུ་སྙིང་གི་ཐིག་ལེར་ཟུངས། །ཇོ་བོ་བཀའ་གདམས་བརྒྱུད་འཛིན་པའི། །དགེ་བའི་བཤེས་གཉེན་ཐམས་ཅད་ཀུན། །ཡོན་ཏན་སྦེད་པར་གཙོར་མཛད་ན། །བདག་གིས་ཅི་ཕྱིར་སྒྲོགས་པར་བྱེད། །འཇིག་རྟེན་འདི་ན་གྲགས་པ་ཡི། །ཆེན་པོ་འགའ་ཡང་ཆོས་བརྒྱད་ཀྱི། །ཞགས་པས་བཅིངས་པ་དེ་མཐོང་ནས། །འདི་ལ་བག་ཟོན་མཛད་པའི་རིགས། །ལར་ཡང་རྒྱ་གར་འཕགས་ཡུལ་དུ། །གྲུབ་པའི་དབང་ཕྱུག་བརྒྱད་ཅུ་དང་། །འཛམ་གླིང་མཛེས་པའི་རྒྱན་དྲུག་སོགས། །སྟོན་པ་གཉིས་པར་གྲགས་ཀུན་ཀྱང་། །ཚུལ་བཞིན་བསླབ་དང་བསྒྲུབས་པ་ལས། །ཚེ་འདིར་མཆོག་གི་གོ་འཕང་དུ། །གཤེགས་ལས་གདུང་དང་སྐུ་སྐྱེ་ཡི། །གྲགས་སྙན་མེད་ཀྱང་བྷྱོ་ཊ་འདིར། །དེ་ལ་གཙོ་བོར་བྱེད་པ་ལ། །ཕལ་ཆེར་ངོ་མཚར་ཆེ་མོད་ཀྱང་། །ཕལ་པ་འགའ་ཡང་དེ་རྗེས་སུ། །འབྲང་བ་མང་བས་སྐབས་དབྱེ་དཀའ། །དེ་ལྟར་ན་ཡང་ལུང་རིག་གིས། །རྗེས་སུ་བསྒྲུབ་པའི་ཡོན་ཏན་དག །མངའ་བ་ཛ་ལནྡྷ་ར་རུ། །ཞབས་སེན་བླང་བའི་ཡུལ་ཡིན་ཅིང་། །དག་སྣང་ཁྱབ་ལ་ཉིན་བྱེད་ཀྱིས། །དད་གསུམ་ཨུཏྤལ་ཕྱེ་བ་ཕལ། །རང་བཞིན་དུལ་བ་ཆོས་གཟུགས་ཡིན། །ཡིད་ཀྱི་ཟེའུ་འབྲུར་བསྟེན་པར་འོས། །ཁྱད་པར་རྒྱུད་ལུང་མན་ངག་ལས། །ཉེ་བར་བསྟན་པ་རྗེས་སྤྱོད་ཅིང་། །བྱ་བ་
རྣམས་སྤངས་བསླབ་གསུམ་ལྡན། །སྐྱབས་ཀྱི་དམ་པར་བཟུང་བར་མཛོད། །གཞན་ཟེར་ཚིག་གི་རྗེས་འབྲངས་ཤིང་། །གར་མཁན་ལག་པའི་མཉེན་ལྕུག་ལས། །བྲེལ་བའི་སྤྱོད་པར་ཡིད་དབྱུང་ནས། །དབེན་པའི་གནས་སུ་སྙེགས་ན་ལེགས། །བསྟན་བཅོས་རྩོམ་པའི་ངལ་བ་དང་། །འཆད་སྤེལ་སྨིན་གྲོལ་གཡེང་པ་ཡང་། །རང་འདོད་བྲལ་ན་ལེགས་མོད་དེ། །གཞན་དུ་བདུད་ཀྱིས་བློ་བསྒྱུར་ནས། །ཟས་ནོར་སྙན་གྲགས་བསྡུ་བའི་ཕྱིར། །འཇིག་རྟེན་མཐུན་འཇུག་ཤུལ་ལམ་དུ། །ཞུགས་པ་འདི་ལས་རིང་དུ་བྲོས། །ཕ་རོལ་ཡོན་ཏན་ལྡན་གྱུར་ཀྱང་། །སྐྱོན་གྱི་གོང་བུར་རབ་བཟུང་ནས། །བདག་གི་སྐྱོན་ཡང་ཡོན་ཏན་དུ། །རློམ་པའི་ང་རྒྱལ་རྩད་ནས་ཆོད། །བདེ་ན་ཚོགས་གཉིས་འབྲས་བུ་ལས། །དེ་ཉིད་བྱུང་བ་ཤེས་བྱས་ཏེ། །དཀར་པོའི་ཕྱོགས་ལ་འབད་བྱས་ནས། །དགའ་བའི་བདོག་པ་འགྲོ་ལ་བསྔོ། །སྡུག་ན་མི་དགེའི་འབྲས་སྐྱེས་པར། །མཐོང་ནས་བྱང་ཆུབ་སེམས་བསྒོམས་ཤིང་། །ཚུལ་མིན་ཀུན་ཀྱང་འགྲོ་རྣམས་ཀྱི། །དུ་ཁ་བདག་གི་ཁུར་དུ་བླངས། །གང་ལ་རབ་ཏུ་ཆགས་ཆེ་བའི། །ཡོ་བྱད་བསྙུང་ནས་སྦྱིན་ནུས་ན། །བསྐམ་ཆགས་གཞན་དག་མི་འདོད་ཕྱིར། །ཆོག་ཤེས་ནོར་གྱི་མཆོག་དེ་འཐོབ། །སྲོག་བཅད་མ་བྱིན་ལེན་པ་དང་། །མི་ཚངས་སྤྱོད་པ་རྫུན་སྨྲ་བ། །རྩ་བ་བཞི་པོ་ཆང་བཅས་པ། །རིང་
དུ་སྤང་བའི་ཚུལ་ཁྲིམས་བླངས། །ཕ་རོལ་ངན་སྨྲས་ཚིག་གི་མདས། །སྙིང་ལ་འབིགས་གང་ལྡོག་དཀའ་བའི། །ཟུག་རྔུའི་ཚོར་བས་མནར་མོད་དེ། །བཟོད་པའི་གོ་ཆ་རྟག་ཏུ་བགོ །རིམ་གྱིས་ཡོན་ཏན་གོང་འཕེལ་ཞིང་། །དེ་ལྡོག་ཕྱི་ཕྱིར་བསྲིངས་པའི་ཕྱིར། །བརྩོན་པ་དོན་ཡོད་རྡོ་བ་ལ། །རི་མོ་བྲིས་ལྟར་བསླུ་མི་བགྱིད། །གཅིག་པུར་སྡོད་པའི་དུས་ཀྱི་ཚེ། །བསམ་གཏན་ཐག་པས་དྲན་འཛིན་ཡིད། །འཆིང་བས་ཕྲ་རགས་ཉོན་མོངས་ཚོགས། །རྩེ་གཅིག་ཞི་བའི་དོན་ལ་གཞོལ། །མང་པོའི་དབུས་སུ་ཞུགས་པའི་ཚེ། །ལྷག་མཐོང་ཤེས་རབ་ཕ་རོལ་ཕྱིན། །རང་གྲོལ་རྗེན་པ་གཉུག་མའི་ངང་། །བསལ་བཞག་བྲལ་བར་ལ་བཟླ་བྱ། །ཡི་གེ་འབྲི་ཀློག་སྦྱིན་པ་སོགས། །ཆོས་སྤྱོད་བཅུ་ལ་རབ་འབད་ཅིང་། །རྟག་ཏུ་མི་དགེ་རྣམས་བསྡམ་སྟེ། །དགེ་བའི་དོན་ལ་བརྩོན་པའི་ཚེ། །སྦྱོར་བ་སེམས་བསྐྱེད་དངོས་གཞི་ནི། །དམིགས་མེད་འཁོར་གསུམ་ཡང་དག་ལ། །རྗེས་ཐོབ་བསྔོ་བས་མཚམས་སྦྱོར་བའི། །དམ་པ་གསུམ་གྱིས་ཟིན་པ་གཅེས། །མཐོ་ཡང་ང་རྒྱལ་རྣམ་སྤང་ཞིང་། །དམན་པར་ལྷག་པར་ཞུམ་པ་བྲལ། །བར་མའི་དུས་སུ་འཚམས་པར་སྤྱད། །འདི་ནི་དམ་པའི་བསླབ་པ་ཡིན། །དབེན་པར་བསྒོམ་ཚེ་འཆད་ཉན་སྤྲོ། །འཆད་ཉན་འབད་ཚེ་ཏིང་འཛིན་ལ། །གཞོལ་བར་ཕྱོགས་པའི་སྐྱེས་བུ་ནི། །མཐའ་མ་གཅིག་ཀྱང་གྲུབ་
པ་མེད། །ཁྱད་པར་སྤྲེའུའི་སྒྱུ་རྩལ་ལས། །བྲེལ་བའི་བློ་སྣ་ཚོགས་པ་ནི། །རླུང་མང་དབུས་ཀྱི་མར་མེ་ལྟར། །མྱུར་དུ་དམན་པར་འགྲོ་བའི་ལྟས། །མདོར་ན་མང་དུ་སྨོས་ཅི་དགོས། །རྟག་ཏུ་དམ་པའི་རྗེས་སློབ་ཅིང་། །ཡོན་ཏན་ཉེར་སྦས་སྐྱོན་རྣམས་བསལ། །སྙོམ་ཆུང་ཆོག་ཤེས་སྙན་གྲགས་ཀྱི། །བཀུར་སྟིའི་རེ་བ་རིང་དུ་ཆོད། །ངེས་པར་འཆི་བ་མ་དྲན་པའི། །ཐོས་བསམ་སྒོམ་གསུམ་ཐམས་ཅད་ཀུན། །ཚེ་འདིའི་ཤོམ་རར་འགྲོ་བའི་ཕྱིར། །བྱ་བྱེད་མང་པོའི་སྤྲོས་པ་སྐྱུངས། །ནམ་ཞིག་འཆི་འཕོ་དུས་ཀྱི་ཚེ། །དོན་གྱི་བཙན་ས་མ་ཟིན་ན། །འདིར་སྣང་ཚོགས་དྲུག་འཇའ་སྤྲིན་གྱིས། །བསླུ་བར་ངེས་སོ་ཡིད་ལ་ཟུངས། །བཅོམ་ལྡན་བདེན་པར་གསུངས་པ་དེས། །ནང་པའི་ཆོས་རྣམས་ཐམས་ཅད་ལས། །མི་རྟག་བསྒོམ་པ་མཆོག་ཡིན་ཅེས། །ཡང་ནས་ཡང་དུ་བཀའ་སྩལ་ཕྱིར། །འཕགས་ཡུལ་གྲུབ་པའི་དབང་ཕྱུག་དང་། །བོད་དུ་རྗེ་བཙུན་མི་ལ་སོགས། །མཁས་དང་གྲུབ་པས་ཕྱག་ལེན་གྱིས། །གཏན་ལ་ཕབ་པ་དེ་དགོངས་ལ། །རྙེད་དང་བསྟོད་སྨད་ཆགས་སྡང་སོགས། །ཚེ་འདིའམ་ལོ་དང་ཟླ་བ་ལས། །ངེས་པར་རྟག་མི་ཐུབ་པ་རུ། །བསམ་ནས་ངེས་ཤེས་བསྐྱེད་པར་མཛོད། །དེ་སྐད་རང་དང་གཞན་ཡང་རུང་། །སྐལ་མཉམ་དག་གི་དོན་ཆེད་དུ། །རྡོ་རྗེའི་གླུ་རུ་བླངས་པ་འདི། །བདེན་པའི་ཚིག་ཏུ་ངེས་པར་
བརྗོད། །དགེ་བས་ཆོས་མཐུན་སྤྱོད་ཚུལ་ལ། །རྟག་ཏུ་བསླབ་པས་མངོན་མཐོ་དང་། །ངེས་ལེགས་ཐེམ་སྐས་ལ་འཛེགས་ཏེ། །བྱང་ཆུབ་སྙིང་པོར་གཤེགས་པར་ཤོག ༈ །བུམ་དབང་གི་ལམ་ཁྱེར་དང་རྗེས་སུ་འབྲེལ་བའི་རྡོ་རྗེའི་ཐོལ་གླུ་སྣང་སྟོང་ཟུང་འཇུག་ཅེས་བྱ་བ། ཨ་ཧོ། གདན་གསུམ་དབྱེར་མེད་སྒྱུ་འཕྲུལ་དྲྭ་བ་ཡི་ཀློང་ནས། །ཞི་དང་ཁྲོ་གར་ཕྱག་རྒྱ་རྣམ་བཞི་རུ་བསྡམས་པས། །ཕུང་ཁམས་བདེ་བ་ཆེན་པོའི་ཡེ་ཤེས་སུ་སྨིན་པའི། །སྣང་སྟོང་ཟུང་འཇུག་སྤྲུལ་སྐུའི་བླ་མ་དེ་མཁྱེན་ནོ། །སྣོད་བཅུད་ལྷ་སྐུར་རྫོགས་པར་བྱིན་གྱིས་རང་རློབས་ཤིག །དག་མཉམ་འཁོར་འདས་དབྱེར་མེད་ཆོས་ཉིད་ཀྱི་ངང་ནས། །རྣམ་བཞིའི་སྐྱེ་གནས་སྦྱང་ཕྱིར་བསྐྱེད་རིམ་གྱི་འཁོར་ལོ། །ཐབས་ཤེས་མངོན་བྱང་ཆོ་གས་མངོན་གྱུར་དུ་སད་པས། །རིགས་གསུམ་འཁྲུལ་པའི་ཚོགས་ཀུན་རང་ངོ་རུ་དག་གོ །གཡོ་ཐོབ་གོམས་བརྟན་མཐར་ཕྱིན་ཏིང་འཛིན་གྱི་རོལ་པ། །བསམ་གཏན་ཉམས་ཀྱི་སྐྱེ་ཚུལ་རང་རྒྱུད་ལ་སྦྱོར་བས། །སྣང་བ་ལྷ་ཡི་དཀྱིལ་འཁོར་ཆེན་པོ་རུ་སྨིན་ནས། །གཉིས་ཆོས་མཚན་མའི་ཆོས་ཀུན་སྣང་སྟོང་དུ་ཤར་རོ། །འཁོར་བའི་འཁྲུལ་མཚན་ཆོས་ཀུན་ཏིང་འཛིན་དུ་དག་ཅིང་། །མྱང་འདས་བཞུགས་ཚུལ་འབྲས་བུ་གཞི་དབྱིངས་སུ་རྫོགས་ཏེ། །གོང་མའི་ས་བོན་ཐེབས་པའི་སྨིན་བྱེད་དུ་འགྲོ་བས། །ཁྱད་པར་བཞི་ལྡན་ལམ་མཆོག་སྙིང་པོ་རུ་བཟུང་ངོ་། །ཕྱི་སྣོད་
རབ་འབྱམས་ཐར་པ་ཆེན་པོ་ཡི་གྲོང་ཁྱེར། །ནང་བཅུད་འགྲོ་ཀུན་ཐབས་ཤེས་ཞི་ཁྲོ་ཡི་རོལ་པ། །སྒྲ་གྲགས་ཟུང་འཇུག་ཨ་ལི་ཀཱ་ལི་ཡི་རང་སྒྲ། །དྲན་རྟོག་སྤྲོས་བྲལ་དག་པ་རབ་འབྱམས་ལ་བསླབ་བོ། །རྗེས་སུ་ཆགས་པའི་མཆོད་བསྟོད་མཚན་མ་ལ་སྤྱོད་ཅིང་། །ཚིམ་པ་དྲུག་ལྡན་ཚོགས་ཀྱི་འཁོར་ལོ་ལ་རོལ་པས། །ཡུལ་ལ་སྲེད་པའི་མཆིལ་པ་བློ་བྲལ་དུ་ཞིག་སྟེ། །ཡུལ་ཅན་གནས་ལུགས་ཆེན་པོར་རང་གྲོལ་དུ་ལོང་ངོ་། །ཀུན་རྫོབ་བདེན་ཞེན་སྒྱུ་མའི་དཀྱིལ་འཁོར་དུ་རོལ་ཅིང་། །དོན་དམ་འོད་གསལ་འཕོ་འཇིགས་བྲལ་བ་རུ་ཐིམ་པས། །བདེན་གཉིས་ཟུང་འཇུག་དགྱེས་པའི་ཧེ་རུ་ཀའི་དབྱིངས་སུ། །སྐུ་གསུམ་དབྱེར་མེད་རང་རྩལ་རྫོགས་པ་རུ་ཤོག་ཅིག། ༈ །།གསང་དབང་གི་ལམ་ཁྱེར་དང་རྗེས་སུ་འབྲེལ་བའི་རྡོ་རྗེའི་ཐོལ་གླུ་གསལ་སྟོང་ཟུང་འཇུག་ཅེས་བྱ་བ། ཨ་ཧོ། ཀུན་རྫོབ་བྱང་ཆུབ་སེམས་མཆོག་འཕོ་མེད་ཀྱི་ཐིག་ལེ། །རྣམ་ལྔའི་རྩ་འཁོར་གྲོང་དུ་བཀྲམ་པ་ཡི་བདེ་བས། །ཁ་སྦྱོར་མདུད་པ་ཡང་དག་དབུ་མ་རུ་གྲོལ་བའི། །གསལ་སྟོང་ཟུང་འཇུག་ལོངས་སྐུའི་བླ་མ་དེ་མཁྱེན་ནོ། །རྩ་ཁམས་ཡི་གེར་དེངས་པར་བྱིན་གྱིས་རང་རློབས་ཤིག །ཟུང་འཇུག་ཨ་ཝ་དྷཱ་ཏིའི་འཁྲི་ཤིང་ལ་རེག་པའི། །ལ་ལ་ན་དང་ར་ས་ན་དག་གི་རོལ་པ། །འཁོར་ལོ་ལྔ་ཡི་མེ་ཏོག་མཛེས་པ་ཡིས་སྤུད་པའི། །བཀོད་པ་རྩ་ཁམས་རྣམ་དག་འོད་གསལ་གྱི་སྦུབས་སུ། །
སྲིད་པའི་རླུང་བཅུའི་རྟེན་འབྲེལ་རང་བཞིན་ལས་སྐྱེས་པའི། །ཉི་ཁྲི་ཆིག་སྟོང་རྟོག་ཚོགས་འགྲོ་འོང་གི་བཞོན་པ། །ཕུང་ཁམས་སྐྱེ་མཆེད་དྭངས་མའི་ཐིག་ལེ་རུ་འཆིང་བས། །རིན་ཆེན་འོད་འཕྲོ་སྐྱེ་མེད་བཟླས་པ་ལ་རོལ་ཅིང་། །དཀར་དམར་དབང་བོ་ཌཱ་ཀི་ཐབས་ཤེས་ཀྱི་གར་མཁན། །འབར་འཛག་དགའ་བ་བཞི་ཡི་བདུད་རྩི་ལ་རོལ་པས། །བདེ་སྟོང་རྟོགས་པའི་ངོ་བོས་ཉོན་མོངས་ཀྱི་འཁྲུལ་པ། །ཀུན་ཁྱབ་བདེ་ཆེན་དཔའ་བོའི་གྲིབ་བསིལ་ལ་རེག་གོ །གནས་ཡུལ་ཌཱ་ཀིའི་གྲོང་ཁྱེར་རང་ལུས་ལ་རྫོགས་པས། །ཨ་ཧཾ་ཟུང་འཇུག་བདེ་ཆེན་ཚོགས་འཁོར་ལ་རོལ་ཏེ། །ཉེ་བའི་འདུ་བ་ཟག་བྲལ་དྭངས་མ་ཡིས་མཆོད་པས། །མཆོག་ཐུན་ཕྲིན་ལས་གསར་པའི་དགའ་སྟོན་ལ་སྦྱོར་རོ། །མཐར་ཐུག་ཞུ་བདེའི་རོལ་མོས་མགྲིན་པ་ཡི་འཁོར་ལོ། །ཐབས་ཤེས་ཨཱ་ལི་ཀཱ་ལིའི་ཡི་གེ་རུ་འཁྲོལ་པས། །འཁོར་ལོའི་ཚོགས་ཆེན་རྒྱལ་སྲིད་རང་དབང་དུ་བསྒྱུར་ཏེ། །འཆི་མེད་གྲུབ་པའི་རིག་འཛིན་ཐོབ་པ་རུ་ཤོག་ཅིག། ༈ །།ཤེར་དབང་གི་ལམ་ཁྱེར་དང་རྗེས་སུ་འབྲེལ་བའི་རྡོ་རྗེའི་ཐོལ་གླུ་བདེ་སྟོང་ཟུང་འཇུག་ཅེས་བྱ་བ། ཨ་ཧོ། ཤེས་རབ་ཌ་ཀིའི་ཕོ་ཉས་ཐབས་མཆོག་ལ་འཁྲིལ་བས། །ཉེ་རྒྱུའི་ལམ་ནས་འབར་འཛག་ཚུལ་ཁྲིམས་ཀྱི་དོགས་པ། །དབྱིངས་རིག་དབྱེར་མེད་མཚན་དཔེའི་དཀྱིལ་འཁོར་དུ་ཆགས་པའི། །བདེ་སྟོང་ཟུང་འཇུག་ཆོས་སྐུའི་བླ་མ་དེ་མཁྱེན་ནོ། །དཔེ་ཡི་
འོད་གསལ་འགྲུབ་པར་བྱིན་གྱིས་རང་རློབས་ཤིག །རྣམ་ཐར་གསུམ་ལྡན་པདྨ་བྷཉྫལི་གྲོང་ཁྱེར། །ཐར་པ་མཆོག་གི་མེ་ཏོག་དབུ་མ་རུ་བཞད་དང་། །ཐབས་ཆེན་བདེ་སྟོང་ཟུང་འཇུག་བཅུད་མཆོག་ལ་རོལ་པས། །དགའ་བཞི་དབྱེར་མེད་རྟོགས་པའི་ཡེ་ཤེས་ཀྱིས་མྱོས་ཏེ། །ཡས་བརྟན་བཅུ་དྲུག་དགའ་བའི་འོད་གསལ་གྱི་ངང་དུ། །མི་སློབ་ལམ་གྱི་འབྲས་བུ་མཉམ་ཉིད་དུ་རྫོགས་སོ། །འཁོར་བའི་སྡུག་བསྔལ་འཕོ་མེད་ཐིག་ལེ་རུ་བཅིངས་ཤིང་། །མྱང་འདས་བཞུགས་ཚུལ་མངོན་སུམ་རྟོགས་པ་རུ་མྱོང་བས། །དབྱེར་མེད་སྒྱུ་འཕྲུལ་དྲྭ་བའི་ཞུ་བདེ་ཡི་བདུད་རྩི། །མ་དག་འཁྲུལ་པའི་སྐྱེ་ཤི་རང་ངོ་རུ་ནུབ་བོ། །གཉིས་མེད་མཁའ་དབྱིངས་རོལ་པའི་དྭངས་མ་ཡི་བཅུད་མཆོག །ཛ་ལནྡྷ་རའི་དཀྱིལ་འཁོར་ཆེན་པོ་རུ་སྨིན་ཚེ། །འོད་ཟེར་ཆེན་པོའི་དབང་གི་བྱིན་རླབས་ལ་བརྟེན་ནས། །རྣམ་ཀུན་མཆོག་ལྡན་ཡེ་ཤེས་བརྙེས་པ་རུ་ཤོག་ཅིག། ༈ །།བཞི་པའི་དབང་དང་རྗེས་སུ་འབྲེལ་བ་རྡོ་རྗེའི་ཐོལ་གླུ་རིག་སྟོང་ཟུང་འཇུག་ཅེས་བྱ་བ། ཨ་ཧོ། རྟག་ཆད་མཚན་མའི་ཆོས་ཀུན་ཟུང་འཇུག་ཏུ་རོལ་པས། །འཕོ་མེད་ལྷན་སྐྱེས་བདེ་སྟོང་དབྱེར་མེད་ཀྱི་ངོ་བོ། །ཉེར་ལེན་ཟག་བྲལ་བློ་འདས་གཉུག་མ་ཡི་གཤིས་ལུགས། །རིག་སྟོང་ཟུང་འཇུག་ཉིད་སྐུའི་བླ་མ་དེ་མཁྱེན་ནོ། །ཡེ་ཤེས་རྡོ་རྗེར་རོལ་པར་བྱིན་གྱིས་རང་རློབས་ཤིག །ངོ་བོ་སྟོང་ཉིད་བརྗོད་བྲལ་སྐྱེ་མེད་ཀྱི་ངང་
ནས། །རང་བཞིན་གསལ་ཁྱབ་ཕྲ་བའི་ཡེ་ཤེས་སུ་སྨིན་པས། །ཐུགས་རྗེ་འཁོར་འདས་མཉམ་ཉིད་སྣ་ཚོགས་ཀྱི་རོལ་པ། །བསམ་གྱིས་མི་ཁྱབ་ཐ་མལ་ཡིད་དཔྱོད་ཀྱིས་མི་མཚོན། །ངང་བཞག་འདུ་འབྲལ་སྤངས་པའི་ཆོས་སྐུ་ཡི་ཀློང་དུ། །ལམ་མཆོག་གྲོལ་བཞིའི་གདིང་གིས་རྟོག་ཚོགས་ཀྱི་འཁྲུལ་པ། །སྐྱེ་འགག་སྔ་ཕྱི་བྲལ་བའི་ལྷུན་གྲུབ་ཀྱི་རོལ་པས། །དབྱེར་མེད་རྣམ་པ་ཀུན་གྱི་མཆོག་ལྡན་དུ་ཤར་རོ། །སྒྲོན་བཞིའི་འཛུམ་ཟེར་གསར་པའི་ཕོ་ཉ་ཡིས་བསུས་པས། །སྣང་བཞིའི་ལམ་དུ་མཚན་མའི་འཁྲུལ་ཆོས་ཀུན་ཟད་དེ། །ཐིག་ལེ་བཞི་ཡི་འགྲོས་ཀུན་དབུ་མ་རུ་བསྡམས་ནས། །ནང་གསལ་ཁྱད་ཆོས་དྲུག་ལྡན་སྐུ་བཞི་རུ་ཐིམ་མོ། །མཐར་ཐུག་གཟུང་འཛིན་ཡུལ་ལས་རྣམ་གྲོལ་གྱི་རིག་པ། །སོ་སྐྱེའི་བློ་ཡིས་མ་གོས་བསམ་བྲལ་གྱི་ངོ་བོར། །སྐུ་དང་ཡེ་ཤེས་མཛད་པ་ཕྲིན་ལས་ལ་རོལ་བས། །ལྷུན་གྱིས་གྲུབ་པའི་ཡེ་ཤེས་བརྙེས་པ་རུ་ཤོག་ཅིག །ཅེས་དབང་བཞིའི་ལམ་ཁྱེར་དང་མཐུན་པར་མདོ་ཙམ་དུ་སྨོས་པ་འདི་ཡང་དུས་ཀྱི་རྒྱལ་པོ་ཚེས་བཅུའི་འདུ་བའི་ཚེ་གང་ཤར་དུ་བླངས་པ་ཛ་ཡནྟུ།། ༈ །།དབེན་པའི་ཡོན་ཏན་ལ་བསྔགས་བའི་རྡོ་རྗེའི་ཐོལ་གླུ་ཚོགས་དྲུག་སྒྱུ་མར་ཤར་བའི་རོལ་མོ་ཞེས་བྱ་བ། ཨ་ཧོ། ཆོས་ཉིད་སྤྲོས་བྲལ་གཞོན་ནུ་བུམ་སྐུ་ཡི་སྦུབས་ནས། །འོད་གསལ་རྡོ་རྗེའི་རིག་པ་ཅོག་གཞག་གི་ངོ་བོ། །ཁྱད་ཆོས་དྲུག་ལྡན་གཞོན་ནུ་བུམ་སྐུ་ལ་འདུད་དོ། །སྐུ་གསུམ་ལྷུན་གྲུབ་།
ཆེན་པོར་བྱིན་གྱིས་རང་རློབས་ཤིག །ཕྱི་ལྟར་ཚོགས་དྲུག་བདེན་ཞེན་གཟུང་འཛིན་གྱིས་མ་བཅིངས། །ནང་ལྟར་རིག་པ་བཅོས་བསྒྱུར་སྤང་གཉེན་དང་བྲལ་ཞིང་། །གསང་བ་གློ་བུར་འཁྲུལ་རྟོག་ཆོས་དབྱིངས་སུ་ཞི་བའི། །ཟུང་འཇུག་ཀུན་ཁྱབ་གདོད་མའི་དབེན་གནས་ལ་སྤྲོའོ། །ཡུལ་སྣང་ཉམས་དགའི་བྲག་སྐྱིབས་འདུ་འཛི་དང་བྲལ་ཞིང་། །ཡུལ་ཅན་རིག་སྟོང་རྗེན་པའི་མཛའ་གྲོགས་དང་འཕྲད་པས། །བརྩོན་པ་དོན་ལྡན་ལས་ཀྱི་འཕེན་པ་ཡིས་བསྐྱེད་ནས། །སྨོན་ལམ་རྣམ་པར་དག་པའི་ཞིང་མཆོག་ལ་དེངས་ཤིག །དེ་ན་བསྔགས་པར་འོས་པའི་ཡོན་ཏན་གྱི་རོལ་པ། །སྲ་མཁྲེགས་རྡོ་རྗེའི་བ་གམ་ཁང་བཟང་དུ་གྲུབ་པར། །སྣང་སྟོང་ལྗོན་ཤིང་ཕྲེང་པའི་ཡལ་འདབ་ཀྱིས་དུད་པས། །གདན་གསུམ་ཞི་ཁྲོའི་ཚོམ་བུ་རང་བྱུང་དུ་ཤར་རོ། །ཐོས་ན་མི་མཐུན་བྲལ་བའི་འབབ་ཆུ་ཡི་སྒྲ་སྐད། །གྲགས་སྟོང་བདེན་པ་གཉིས་འི ཀྱི་རོལ་མོ་རུ་འཁྲོལ་བས། །ལུང་རྟོགས་ཤེས་རབ་པདྨོ་རང་གྲོལ་དུ་བཞད་དེ། །སྣ་ཚོགས་སྤོབས་པའི་གཏེར་མཛོད་ཆོས་ཉིད་དུ་གྲོལ་ལོ། །མར་གད་ཞུན་མའི་མདོག་ལྡན་སྤང་ལྗོངས་ཀྱི་དོར་ར། །ལྷོ་རླུང་དལ་བུར་རྒྱུ་བའི་ཕོ་ཉ་ཡིས་བསྐྱོད་ནས། །ཚོར་སྟོང་ཆོས་སྤྲིན་འཁྲིགས་པས་ཐ་མལ་གྱི་རིག་པ། །ཟུང་འཇུག་ཕྱག་རྒྱ་ཆེན་པོའི་ངལ་བསོ་ལ་སྦྱར་རོ། །ལོ་འདབ་ལང་ཚོས་བཀྲ་བའི་འཁྲི་ཤིང་གི་ངོས་སུ། །
རོ་བརྒྱའི་དཔལ་ལ་འགོངས་པའི་འབྲས་བུ་ཡིས་སྤྱད་པས། །གསལ་སྟོང་གཞོམ་བྲལ་བདེ་བའི་དགའ་སྟོན་ལ་སྦྱོར་ཞིང་། །འཆི་མེད་བློ་བྲལ་གཉུག་མའི་བཅུད་ལེན་རང་སྦྱིན་ནོ། །སྲབ་འཇམ་ལྕིད་ཀྱིས་སྤངས་པའི་ལྗོན་པ་ཡི་ཡལ་འདབ། །ཚ་གྲང་གདུང་བ་སྐྱོབ་པའི་གདུགས་དཀར་དུ་གྱུར་པས། །རིག་སྟོང་ཕུང་ཁམས་སྐྱེ་མཆེད་གདན་གསུམ་གྱི་གྲོང་དུ། །འོད་གསལ་ཕྱག་རྒྱ་རྣམ་བཞིའི་ངལ་བསོ་རང་བསྟེན་ནོ། །སྙིང་ལ་འབབ་པར་སྨྲ་བའི་གྲགས་སྟོང་གི་འདབ་ཆགས། །ཡིད་འོང་གླུ་དབྱངས་བསྒྱུར་བའི་བདེ་སྟོང་གི་བུང་བ། །གཏད་མེད་གར་ལ་རོལ་པའི་རིག་སྟོང་གི་རི་དྭགས། །རྣམ་གསུམ་སྐྱོ་གྲོགས་ཡུལ་སྣང་གཉུག་མ་རུ་ཕེབས་སོ། །ཀུན་རྫོབ་འཁྲུལ་པའི་ཆོས་ཀུན་སྒྱུ་མ་རུ་ཤར་ཤིང་། །དོན་དམ་ནང་གི་རྩ་མདུད་དྷ་ཏི་རུ་གྲོལ་བའི། །ཡོངས་གྲུབ་རྣལ་འབྱོར་ཚོགས་ཀྱི་བཞུགས་གནས་ལ་བསྔགས་པ། །ངེས་པ་དོན་གྱི་རྡོ་རྗེའི་ཐོལ་གླུ་རུ་བླངས་སོ། །དགེ་བ་དེ་ཡིས་བླ་མེད་བྱང་ཆུབ་ཀྱི་ས་རུ། །མངོན་པར་རྫོགས་སངས་རྒྱས་པ་མ་ཐོབ་ཀྱི་བར་དུ། །ཤིན་ཏུ་དབེན་པའི་གནས་སུ་བག་ཡོད་ཀྱི་བསླབ་པས། །སྒོ་གསུམ་རྒྱུད་སྡོམ་རྣལ་འབྱོར་བརྙེས་པ་རུ་ཤོག་ཅིག། ༈ །།གསང་བསྔགས་ཀྱི་དོན་བསྡུས་རྡོ་རྗེའི་ཐོལ་གླུ་རིག་འཛིན་ཌཱ་ཀིའི་ཞལ་ལུང་ཞེས་བྱ་བ། ཨེ་མ་ཧོ། གདོད་ནས་རྣམ་དག་ནང་གསལ་ཆོས་སྐུའི་གཤིས་ལུགས་སུ། །ཞལ་ཕྱག་མཚན་འཛིན་
སྤྲོས་པ་འདས་ཀྱང་ཕྱིར་གསལ་གདངས། །ཁ་སྦྱོར་ཡན་ལག་བདུན་ལྡན་ལོངས་སྤྱོད་རྫོགས་པའི་གར། །འགྲོ་བའི་མོས་ངོར་སྣ་ཚོགས་སྟོན་པར་མཛད་དེ་རྒྱལ། །རྒྱུ་ལས་ཁྱད་ཞུགས་འབྲས་བུར་གྱུར་པའི་རྡོ་རྗེའི་ཐེག །ཟབ་དང་རྒྱ་ཆེའི་ལམ་ནས་མྱུར་བདེའི་བཅུད་སྦྱིན་ཅིང་། །ལྟ་བ་ཤིན་ཏུ་རྣམ་དག་མཉམ་པ་ཆེན་པོ་སྟེ། །འདིར་ནི་དེ་ཡི་བརྗོད་བྱར་གྱུར་པ་ཅུང་ཞིག་བསྟན། །ཐོག་མ་ཐ་མ་མཐའ་དང་དབུས་བྲལ་རྡོ་རྗེའི་ཁམས། །བཅིངས་གྲོལ་ལས་འདས་གློ་བུར་སྒྲིབ་ཚོགས་བཏགས་པའི་གཞི། །དོན་དམ་སྐར་བདུན་རྩལ་སྣང་ལས་སྐྱེས་སྐུ་ཡེ་ཤེས། །བདེན་གཉིས་དབྱེར་མེད་ཟུང་དུ་འཇུག་པའི་ཧེ་རུ་ཀ དེ་ཉིད་རྟོགས་ཤིང་གོམས་བྱེད་རིམ་པ་རྣམ་པ་གཉིས། །བསྐྱེད་དང་རྫོགས་པ་དངོས་བཏགས་ཀྱིས་དབྱེ་ལམ་གྱི་མཆོག །མཐར་ཐུག་རྫོགས་རིམ་ཆེན་པོ་འབྲས་བུའི་ཐུས་ཀ་སྟེ། །སུམ་ཆར་རྣམ་པར་ངེས་པ་ཁམས་དབང་བསམ་པའི་ཕྱིར། །བློ་བཟང་དང་པོ་གང་ཞིག་འཇུག་འདོད་ལས་ཅན་དེས། །སྨིན་པར་བྱེད་པས་བསྒོམ་དང་ཐོབ་རུང་སྐལ་བ་ཆེ། །འཇོག་ཕྱིར་གཞི་ལམ་འབྲས་བུའི་ཚུལ་གྱིས་ཤེས་བླངས་ཏེ། །སྡོམ་དང་དམ་ཚིག་དག་ལ་རྟག་ཏུ་ཉེར་གནས་བྱ། །ཡུལ་ལ་ལྟོས་པའི་སྟོང་ཉིད་དབུ་མའི་ལྟ་བ་ཆེ། །ཡུལ་ཅན་བདེ་བ་ཆེན་པོའི་ཡེ་ཤེས་ཀྱིས་བསྡམས་པས། །བདེ་སྟོང་ཟུང་འཇུག་རྣམ་ཀུན་མཆོག་ལྡན་གོ་
འཕང་ལ། །སྦྱོར་བར་བྱེད་པ་ཐུན་མོང་མ་ཡིན་གྲུབ་པའི་མཐའ། སྐྱེ་སོགས་བག་ཆགས་སྦྱང་ཕྱིར་རྗེས་སུ་མཐུན་པ་ཉིད། །དག་རྫོགས་སྨིན་གསུམ་ལྡན་པ་ཤེས་དང་འཇུག་པ་ཡིས། །རྣམ་པར་བསྒོམ་པས་ཉམས་ལྔ་མ་ལུས་ལྷུན་གྲུབ་སྟེ། །བསྙེན་སྒྲུབ་ཡན་ལག་རྣམ་བཞིས་རིག་འཛིན་གོ་འཕང་བགྲོད། །ཐབས་ཤེས་ཟུང་འཇུག་གསལ་སྟོང་དབྱེར་མེད་ཉམས་ལེན་ལ། །སྙིང་པོར་བཟུང་བས་དོན་དམ་ཐོབ་པར་འདོད་ཀུན་དང་། །རྩ་རླུང་ཐིག་ལེའི་ཁམས་ལ་གནད་དུ་བསྣུན་པ་ཡིས། །བདེ་སྟོང་མདུད་གྲོལ་ས་ལམ་ཡོན་ཏན་མྱུར་དུ་རྫོགས། །ཁྱད་པར་གཞི་དོན་ཀ་དག་གདོད་མའི་གནས་ལུགས་ཆེ། །འཇལ་བྱེད་སྡེ་གསུམ་རྫོགས་པའི་རིམ་པ་ཀུན་གྱི་རྩེ། །ལམ་མཆོག་བླ་མེད་ལྷུན་གྲུབ་ཐིག་ལེ་ཆེན་པོའི་དབྱིངས། །ཡིད་དཔྱོད་བློ་དང་བཅས་པའི་ཚོགས་ཀུན་ངལ་བསོས་ཤིག །གློ་བུར་སྒྲིབ་བྲལ་ངོ་བོའི་ཡོན་ཏན་མཐར་ཕྱིན་པའི། སྤངས་རྟོགས་ཡོངས་རྫོགས་སྐུ་དང་ཡེ་ཤེས་ཕྲིན་ལས་མཐའ། །བསམ་གྱིས་གཞལ་དཀའ་རྟག་ཁྱབ་ལྷུན་གྲུབ་དབང་འབྱོར་ནས། །འགྲོ་སྒྲོལ་ཕྲིན་ལས་མཆོག་ལ་ཡོངས་སུ་སྤྱོད་པར་འགྱུར། །འདི་ནི་ས་བོན་ཙམ་གྱིས་བསྡུས་པའི་ཚིག་གི་ཕྲེང་། །རིག་འཛིན་ཌཱ་ཀིའི་རྣམ་པར་ཕྱེ་བའི་ཞལ་ལུང་ལས། །ཡིན་ཕྱིར་དེ་ལ་སོ་སྐྱེའི་བློ་ཡིས་ནོངས་གྱུར་གང་། །སྟོན་དང་བསྟན་པའི་ཚོགས་ལ་སྙིང་ནས་བཟོད་
པར་གསོལ། །ཅུང་ཟད་དགེ་བའི་ཚོགས་མཆིས་གང་ཡང་རྣམ་པར་རྟོག །བྲལ་བའི་དམིགས་མེད་བསྔོ་བའི་ཚོགས་ཀྱི་རྗེས་ཞུགས་ཏེ། །སྦྱིན་པར་བྱའོ་མཐུ་དེས་ཀུན་ཁྱབ་གདོད་མའི་དངོས། །རྟོགས་ཏེ་མཐར་ཕྱིན་གོ་འཕང་མཆོག་ལ་གནས་གྱུར་ཅིག །ཅེས་པའང་དམར་ཕྱོགས་མཁའ་འགྲོ་འདུ་བའི་དུས་ཆེན་གྱི་མཚན་མོར་གང་ཤར་རྡོ་རྗེའི་གླུ་རུ་བླངས་པ་གུཧྱ༔ ༈ །།བརྗོད་མེད་བརྗོད་བྱར་སྟོན་པའི་རྡོ་རྗེའི་ཐོལ་གླུ་གཞུག་མའི་ཉམས་དབྱངས་ཞེས་བྱ་བ། ཨ་ཧོ། ཟུང་འཇུག་སྤྲོས་བྲལ་དེ་ཤེས་རབ་ཕར་ཕྱིན། །བདེ་སྟོང་དབྱེར་མེད་དེ་ལྷན་སྐྱེས་གཞུག་མ། ཡེ་ནས་ལྷུན་གྲུབ་དེ་ཁྱད་ཆོས་དྲུག་ལྡན། །འདུ་བྱེད་བྲལ་བ་དེ་ཡིད་དཔྱོད་རང་གྲོལ། །ངང་བཞག་ཆས་ཀུན་ཐུགས་རྗེ། །སྐུ་གསུམ་ལྷུན་གྲུབ་དེ་བདེ་གཤེགས་སྙིང་པོ། །སྣང་བ་རང་ཤར་དེ་སྐུ་ཡི་དཀྱིལ་འཁོར། །སྟོང་པ་ཚིག་བྲལ་དེ་གསུང་གི་དཀྱིལ་འཁོར། །ཟུང་འཇུག་འོད་གསལ་དེ་ཐུགས་ཀྱི་དཀྱིལ་འཁོར། །དཀྱིལ་འཁོར་སུམ་ལྡན་དེ་ལྷན་སྐྱེས་ཡེ་ཤེས། །འཁྲུལ་པའི་སྣང་བ་ནི་མ་བྱས་ལྷུན་གྲུབ། །སྐུ་དང་ཡེ་ཤེས་ནི་མ་བཙལ་ཡེ་རྫོགས། །རྣལ་འབྱོར་སྣང་བ་ནི་མ་སྤང་རང་གྲོལ། །ཉམས་མྱོང་གསུམ་ལྡན་དེ་སྲིད་ཞི་ཡོངས་ཁྱབ། །ཀ་དག་གནས་ལུགས་དེ་ཡིད་བྱེད་བྲལ་བ། །ལྷུན་གྲུབ་རང་རྩལ་དེ་ཐིག་
ལེ་ཆེན་པོ། །དབྱིངས་རིག་དབྱེར་མེད་དེ་ཀུན་བཟང་མཁའ་ཀློང་། །ཉམས་ལེན་གསུམ་ལྡན་དེ་རྫོགས་པ་ཆེན་པོ། །མ་སྐྱེས་རྩ་བྲལ་དེ་ཆོས་སྐུའི་དགོངས་པ། །ལྷུན་གྲུབ་འོད་གསལ་དེ་ལོངས་སྐུའི་རང་བཞིན། །གང་ཤར་སྣང་བ་དེ་སྤྲུལ་སྐུའི་ཐུགས་རྗེ། །སྐུ་གསུམ་ཡེ་རྫོགས་དེ་ཕྱག་རྒྱ་ཆེན་པོ། །དོན་དམ་བདེན་པ་དེ་ཁས་ལེན་བྲལ་བ། །ཀུན་རྫོབ་འཁྲུལ་པ་དེ་སྒྱུ་མའི་གར་མཁན། །ཟུང་འཇུག་འོད་གསལ་དེ་མྱང་བྱར་འདས་པའི། །གཏན་ཚིགས་གསུམ་ལྡན་དེ་དབུ་མ་ཆེན་པོ། །རྣལ་འབྱོར་རྟོགས་པ་དེ་གཞི་མེད་རྩ་བྲལ། །དགའ་བྲོད་འཁུ་འཕྲིགས་དེ་ཆུ་ནང་རི་མོ། །སྤང་བླང་དགག་སྒྲུབ་དེ་ནམ་མཁའི་འཇའ་ཚོན། །བདེན་མེད་རྣམ་གསུམ་དེ་ཞི་བྱེད་གཅོད་ཡུལ། །སྲིད་པའི་ལས་སྣང་དེ་བྱིས་པའི་རྩེད་མོ། །སྐུ་དང་ཡེ་ཤེས་དེ་སྒྱུ་མའི་གར་མཁན། །བདེ་སྡུག་དགག་སྒྲུབ་དེ་སྒྲིག་རྒྱའི་འོད་རླབས། །སྲིད་ཞི་དབྱེར་མེད་དེ་རོ་སྙོམས་ལམ་མཆོག །གསལ་ལ་འཛིན་མེད་དེ་ཆུ་ཟླའི་རོལ་གར། །སྟོང་ལ་གཟུང་བྲལ་དེ་བརྗོད་མེད་ཡེ་ཤེས། །འཁོར་འདས་དབྱེར་མེད་དེ་རང་སེམས་དྭངས་མ། །དཔྱད་ཚུལ་གསུམ་ལྡན་དེ་ལམ་དང་འབྲས་བུ། །སྣ་ཚོགས་ཞེ་འདོད་ཀྱི་གྲུབ་མཐའི་ལྟ་བ། །རང་བཞིན་རང་གསལ་གྱི་ཐ་མལ་རིག་པ། །ཅེར་གྲོལ་སྐད་ཅིག་མའི་ཤེས་པའི་སྟེང་དུ། །དགག་སྒྲུབ་བྲལ་སྙམ་དེ་ཁོ་ཐག་ཆོད་སོང་། །ཨ་ཧོ་
སྨྲས་ཀྱང་དེ་བརྗོད་མེད་ཡེ་ཤེས། །མངོན་སུམ་རྟོགས་པ་ཡི་རྣལ་འབྱོར་མིན་ཀྱང་། །དཔལ་ལྡན་བླ་མ་ཡི་ཐུགས་རྗེའི་རོལ་པས། །གོ་བ་སྐྱེས་ཚུལ་ཞིག་གླུ་རུ་ཐལ་ལོ།། ༈ །།ཉམས་སུ་ལེན་ཚུལ་བསྡུས་པའི་. རྡོ་རྗེའི་ཐོལ་གླུ་ཐར་པའི་ཐེམ་སྐས་ཞེས་བྱ་བ། ཨ་ཧོ། སྲིད་ཞིར་མི་གནས་ཡོན་ཏན་བརྙེས། །ཟུང་འཇུག་དབྱེར་མེད་ཆེན་པོའི་སྐུ། །འཁོར་ལོའི་མགོན་པོར་ཕྱག་བགྱིས་ཏེ། །ཉམས་སུ་ལེན་ཚུལ་མདོར་བསྡུས་འཆད། །དང་པོ་དལ་འབྱོར་རྙེད་དཀའ་དང་། །དེ་ཉིད་འཇིག་པར་སླ་བ་དང་། །དེ་ཚེ་ལས་འབྲས་རྗེས་འབྲངས་ཤིང་། །དེ་ལྟའི་འཁོར་བར་སྡུག་བསྔལ་བསྒོམ། །དེ་ནས་སྐྱབས་སུ་འགྲོ་བ་དང་། །སྨོན་འཇུག་བྱང་ཆུབ་སེམས་བསྐྱེད་དང་། །རྡོ་རྗེ་སེམས་དཔའི་བསྒོམ་བཟླས་དང་། །ཚོགས་གཉིས་རྫོགས་པའི་ཐབས་ལ་འབད། །དངོས་གཞི་བསྐྱེད་དང་རྫོགས་པ་གཉིས། །དང་པོ་བླ་མ་སྤྱི་བོར་བསྒོམ། །གསོལ་བ་གདབ་ཅིང་དབང་བཞི་བླངས། །སྣང་སྟོང་འཛིན་བྲལ་ཆེན་པོར་སྦྱངས། །དེ་རྗེས་བླ་མ་སྙིང་གར་བསྟིམ། །རིག་སྟོང་རྗེན་པའི་ངང་ཉིད་དུ། །དཔལ་ལྡན་བླ་མའི་རང་ཞལ་བལྟ། །ཉལ་ཁར་སྣོད་བཅུད་འོད་གསལ་དང་། །རིག་པ་སྙིང་གའི་ཨ་ལ་གཏད། །སྟོང་པ་བཞི་ཡི་འོད་གསལ་བཟུང་། །ལྡང་ཚེ་རིག་འཛིན་ཌཱ་ཀི་ཡི། །བདེ་སྟོང་རོལ་མོའི་སྒྲས་བསྐུལ་བསམ། །བཟའ་བཏུང་ཚོགས་ཀྱི་འཁོར་ལོ་དབུལ། །
མཉམ་བཞག་བཟོ་བཅོས་བྲལ་བ་ལ། །རྗེས་ཐོབ་སྒྱུ་མར་ཤེས་པས་སྤྱོད། །ཉིན་སྣང་བདེ་བ་ཆེན་པོར་སྦྱངས། །སྐྱེ་བའི་སྲེད་པ་ངེས་པར་བལྟ། །མཚན་སྣང་སྟོང་པ་ཆེན་པོར་སྦྱངས། །འཆི་བའི་དུས་སུ་ངེས་པར་བལྟ། །རྨི་ལམ་སྐྱེ་མེད་ཆེན་པོར་སྦྱངས། །བར་དོའི་དུས་སུ་ངེས་པར་བལྟ། །དེ་ལྟར་ལམ་དུ་ཁྱེར་ནས་ཀྱང་། །རྗེས་ལ་འཁོར་གསུམ་རྣམ་དག་པའི། །དམིགས་མེད་བསྔོ་བར་མཚམས་སྦྱོར་ཞིང་། །བདག་ཉིད་མཐོང་ཐོས་དྲན་རིག་ཀུན། །རྣམ་པར་གྲོལ་བའི་སྨོན་ལམ་གདབ། །རྟག་ཏུ་བདག་ལ་མ་ཆགས་ཤིང་། །གཞན་དག་ལ་ཡང་སྣང་བ་མིན། །གཉིས་ཀ་མཉམ་པ་ཉིད་དུ་སྤྱད། །བདེ་ན་འགྲོ་བའི་དོན་དུ་བསྔོ། །སྡུག་ན་ལུས་ཅན་སྡུག་བསྔལ་འཁུར། །བར་མ་ཉིད་ནི་མཉམ་བཞག་རྒྱུ། །གང་ལྟར་བྱས་ཀྱང་ཚོགས་གཉིས་འཕེལ། །དེ་ཕྱིར་རྟག་ཏུ་བརྩོན་པར་རིགས། །འདི་ནི་ཚིག་ཉུང་དོན་འདྲིལ་བ། །བློ་དམན་རྣམས་ལ་ཕན་བྱའི་ཕྱིར། །རྡོ་རྗེའི་གླུ་རུ་བླངས་ཏེ་ཐལ། །འགྲོ་ཀུན་བྱང་ཆུབ་མཆོག་ཐོབ་ཤོག། ༈ །།རྡོ་རྗེའི་ཐོལ་གླུ་ཚོགས་དྲུག་འཛིན་པ་བྲལ་བའི་རྒྱན་ཅེས་བྱ་བ། ཨ་ཧོ། སྣང་ཞིང་སྲིད་པའི་ཀུན་བརྟགས་མཐའ་གྲོལ་དུ་ཐིམ་པས། །ཟུང་འཇུག་ཆོས་དབྱིངས་ལྷན་སྐྱེས་ཡེ་ཤེས་ཀྱི་གར་མཁན། །གདོད་མའི་མགོན་པོ་ཁྱབ་བདག་བླ་མ་དེ་མཁྱེན་ནོ། །ཚོགས་དྲུག་གཉུག་མར་རྫོགས་པར་བྱིན་གྱིས་རང་རློབས་ཤིག །
འདི་ལྟར་མིག་གི་ཡུལ་དུ་སྣང་བ་ཡི་ཆོས་ཀུན། །སྣང་ཙམ་ཉིད་ནས་རང་རིག་རང་བཞག་ཏུ་གྲོལ་བས། །སྣང་སྟོང་ཟུང་འཇུག་སྒྱུ་མའི་དཀྱིལ་འཁོར་དུ་ཤར་ཏེ། །བུམ་དབང་ལམ་ཁྱེར་མ་སྒྲུབ་རང་བབས་སུ་འགྲུབ་བོ། །རྣ་བའི་ཡུལ་དུ་གྲགས་པའི་བཟང་ངན་གྱི་སྒྲ་ཀུན། །སྤྲོས་བྲལ་བདེ་བ་ཆེན་པོའི་ཡེ་ཤེས་སུ་ཐིམ་པས། །འགྲོ་འོང་བྲལ་བའི་གྲགས་སྟོང་སྐྱེ་མེད་ཀྱི་དཀྱིལ་འཁོར། །གསང་དབང་ལམ་ཁྱེར་གསལ་སྟོང་གཉིས་མེད་དུ་ཤར་རོ། །རྣབའི་ཡུལ་དུ་ཚོར་བའི་སྣ་ཚོགས་ཀྱི་དྲི་ཀུན། །ཆོས་ཉིད་ཁྱབ་གདལ་ཆེན་པོའི་ངོ་བོ་རུ་ཐིམ་པས། །ཚོར་སྟོང་བདེ་ཆེན་ལྷན་སྐྱེས་ཌ་ཀི་ཡི་དཀྱིལ་འཁོར། །ཤེར་དབང་ལམ་ཁྱེར་མ་སྒྲུབ་རང་བབས་སུ་འགྲུབ་བོ། །ལྕེ་ཡི་ཡུལ་དུ་སྤྱོད་པའི་སྣ་ཚོགས་ཀྱི་རོ་ཀུན། །ཆགས་བྲལ་མཉམ་པར་མ་བཞག་མེད་པ་རུ་ཐིམ་པས། །ཁོར་ཡུག་འོད་གསལ་གཟུང་འཛིན་བྲལ་བ་ཡི་དཀྱིལ་འཁོར། །ཚིག་དབང་ལམ་ཁྱེར་ཀ་དག་ཁྲེགས་ཆོད་དེ་འགྲུབ་བོ། །ལུས་ཀྱི་ཡུལ་དུ་སྤྱོད་པའི་སྣ་ཚོགས་ཀྱི་རེག་ཀུན། །ལྷུན་གྲུབ་གསང་བའི་སྐུ་དང་ཡེ་ཤེས་སུ་ཐིམ་ནས། །འཇའ་ཟེར་ཐིག་ལེ་དཀྱིལ་འཁོར་རང་བྱུང་དུ་བཞད་པས། །རྩལ་དབང་ལམ་ཁྱེར་དབྱིངས་རིག་ཟུང་འཇུག་ཏུ་འགྲུབ་བོ། །ཡིད་ཀྱི་ཡུལ་དུ་ཤར་བའི་རྟོག་ཚོགས་ཀྱི་ཡོ་ལང་། །ཤར་གྲོལ་དུས་མཉམ་འཁོར་འདས་རོ་གཅིག་ཏུ་ཐིམ་པས། །
སྤང་བླང་ཡེ་ཟད་རྫོགས་པ་ཆེན་པོ་ཡི་དཀྱིལ་འཁོར། །ཟུང་འཇུག་ལམ་ཁྱེར་མ་སྒྲུབ་རང་བབས་སུ་འགྲུབ་བོ། །དེ་ཡིས་ཚོགས་དྲུག་ཡུལ་སྣང་སྒྱུ་མ་རུ་ཤར་ཤིང་། །ཡུལ་ཅན་སེམས་ཀྱི་གནས་ལུགས་རྩ་བྲལ་དུ་རྟོགས་པས། །སྣང་སྲིད་འཁོར་འདས་ཆོས་ཀུན་རིག་ངོ་རུ་དག་སྟེ། །སྐུ་བཞི་དབྱེར་མེད་འགྲུབ་པར་བྱིན་གྱིས་རང་རློབས་ཤིག །ལོངས་སྤྱོད་ཡོངས་རྫོགས་འཁོར་ལོའི་དཀྱིལ་འཁོར་གྱི་དབྱིངས་ནས། །ཐབས་ཤེས་རྡོ་རྗེའི་གླུ་ཡི་རོལ་མོ་རུ་བཀྲོལ་བས། །གཉིས་འཛིན་སྤྲོས་པའི་འཆིང་བ་དབུ་མ་རུ་ཞིག་སྟེ། །འོད་གསལ་སེམས་ཀྱི་དེ་ཉིད་མཐོང་བ་རུ་ཤོག་ཅིག། ༈ །།ཟབ་མོ་ལས་ཀྱི་རྡོ་རྗེའི་ཐོལ་གླུ་བྱིན་རླབས་ཆར་རྒྱུན་འཇོ་བའི་སྤྲིན་དཀར་ཅེས་བྱ་བ། ཨེ་མ་ཧོ། བདེ་སྟོང་ཟུང་འཇུག་འོད་གསལ་དབུ་མ་ཡི་སྦུབས་སུ། །སྙིང་དབུས་མི་ཤིགས་གཞོན་ནུ་བུམ་སྐུ་ཡི་ངང་མདངས། །ཆོས་ཉིད་མངོན་སུམ་འཇའ་ཟེར་ཐིག་ལེ་ཡི་ཀློང་ནས། །ཉམས་སྣང་གོང་འཕེལ་ཁྱབ་བདག་དྲིན་ཆེན་གྱི་བླ་མ། །རིག་པ་ཚད་ཕེབས་མཚན་དཔེའི་འཇོ་སྒེག་ལ་རོལ་ཞིང་། །ཆོས་ཟད་བློ་འདས་མཉམ་གཞག་ཕྱག་རྒྱ་ཡིས་མཛེས་པའི། །གཟུགས་སྐུ་རིག་གྲོལ་གཉིས་ལྡན་དགེ་འདུན་གྱི་ངང་ཚུལ། །གསུང་དབྱངས་བདེན་གཉིས་ཟུང་འཇུག་དམ་ཆོས་ཀྱི་རོལ་མོ། །ཐུགས་རྗེ་ཚད་མེད་སྐྱབས་གནས་ཀུན་འདུས་ཀྱི་བདག་ཉིད། །རང་བཞིན་ཡོངས་གྲུབ་སྣང་སྟོང་
ཟུང་འཇུག་གི་གར་མཁན། །ཁྱེད་ཤེས་དད་པས་བསྐུལ་བའི་སྐལ་ལྡན་གྱི་མོས་ངོར། །རྟག་ཏུ་འདུ་འབྲལ་མེད་པར་དགྱེས་བཞིན་དུ་བཞུགས་སོ། ཨ་ཧོ། །འོད་གསལ་ཟབ་ཞི་སྤྲོས་བྲལ་ཆོས་ཉིད་ཀྱི་ངོ་བོ། །ཁ་སྦྱོར་ཡན་ལག་བཞི་ལྡན་ཟུང་འཇུག་གི་རོལ་པ། །ཚད་མེད་ཐུགས་རྗེས་གང་འདུལ་འགྲོ་བ་ཀུན་སྒྲོལ་བའི། །སྐུ་གསུམ་དབྱེར་མེད་ཁྱབ་བདག་དྲིན་ཆེན་གྱི་བླ་མ། །སྐྱབས་ཀུན་འདུས་པའི་བདག་ཉིད་སྙིང་དབུས་ནས་དྲན་བྱུང་། །ལུས་ཀྱི་བ་སྤུའི་འཁྲི་ཤིང་དབང་མེད་དུ་ལྡང་ནས། །ངག་གི་གདུང་དབྱངས་རོལ་མོའི་མཆོད་སྤྲིན་དང་བཅས་ཏེ། །རྩེ་གཅིག་ཁྱེད་ཤེས་དད་པས་གསོལ་བ་རང་འདེབས་ན། །རྟག་ཏུ་འདུ་འབྲལ་མེད་པར་ཐུགས་རྗེ་ཡིས་གཟིགས་ཤིག །མཐོང་ན་འཁོར་བའི་ལམ་ལས་རང་ཤུགས་ཀྱིས་བཟློག་ཅིང་། །སྣང་སྟོང་ཟུང་འཇུག་ཚུར་མཐོང་གདུལ་བྱ་ཡི་མོས་ངོར། །ཕུང་ཁམས་སྐྱེ་མཆེད་རྣམ་དག་གདན་གསུམ་གྱི་སྒྱུ་འཕྲུལ། །དཔལ་ལྡན་བླ་མའི་སྐུ་ཡི་དཀྱིལ་འཁོར་ལ་འདུད་དོ། །ཐོས་པས་ཐར་པའི་ས་མཁན་གཅིག་པུ་རུ་གྱུར་ཅིང་། །ལུང་རྟོགས་བདེན་གཉིས་དབྱེར་མེད་དམ་ཆོས་ཀྱི་སྒྲ་དབྱངས། །ལོངས་སྤྱོད་འཁོར་ལོའི་རྩ་ཁམས་ཡི་གེ་རུ་སྨིན་པའི། །དཔལ་ལྡན་བླ་མའི་གསུང་གི་དཀྱིལ་འཁོར་ལ་འདུད་དོ། །དྲན་པས་སྲིད་དང་ཞི་བའི་འཇིགས་པ་ཀུན་འཕྲོགས་ཤིང་། །རྟག་ཆད་གཟུང་
འཛིན་ལས་འདས་ནང་གསལ་གྱི་ཡེ་ཤེས། །འགྱུར་མེད་བདེ་བ་ཆེན་པོའི་འཇོ་སྒེག་གིས་འཁྱུད་པའི། །དཔལ་ལྡན་བླ་མའི་ཐུགས་ཀྱི་དཀྱིལ་འཁོར་ལ་འདུད་དོ། །ཕྱོགས་བཅུར་བཞུགས་པའི་རྒྱལ་བ་སྲས་བཅས་ཀྱི་ཕྱག་གིས། །དུས་གསུམ་ཀུན་ཏུ་ཁྱོད་ཀྱི་ཞབས་མཐིལ་ལ་བཏུད་ཅིང་། །གང་གིས་བསྟེན་ན་མྱུར་དུ་ཐར་པ་ལ་སྦྱོར་བའི། །ཡོན་ཏན་མི་བཟད་དཔལ་ལྡན་བླ་མ་ལ་འདུད་དོ། །བྱེ་བ་ཕྲག་བརྒྱའི་ཞིང་གི་འགྲོ་རྣམས་ཀྱི་མོས་ངོར། །སྐད་ཅིག་རེར་ཡང་གཟུགས་སྐུ་དེ་ཉིད་དུ་སྟོན་ནས། །ཕན་དང་བདེ་བའི་ཐེམ་སྐས་ཡིད་འོང་ལ་དཀྲི་བའི། །དཔལ་ལྡན་བླ་མའི་ཕྲིན་ལས་རོལ་པ་ལ་འདུད་དོ། །སྣོད་བཅུད་མི་རྟག་ཆུ་བོའི་མཉེར་མ་ལས་སྐྱེན་ཀྱང་། །རང་ཐོག་ངེས་པར་འོང་སྙམ་མེད་པ་ཡི་སེམས་པས། །ཆོས་བཞིན་སྤྱོད་ལ་བརྩོན་པ་ཕྱི་བཤོལ་དུ་བྱེད་ཚེ། །སྐྱོ་ཤས་གཏིང་ནས་སྐྱེ་བར་བྱིན་གྱིས་རང་རློབས་ཤིག ། འཁོར་བ་གང་དུ་སྐྱེས་ཀྱང་སྡུག་བསྔལ་གྱི་ཕུང་པོ། །བཟོད་དཀའ་ཐར་མེད་ལས་ཀྱི་གཏིང་རུམ་དུ་མཐོང་བཞིན། །རྒྱུ་འབྲས་བླང་དོར་ཚུལ་ལ་འཇོལ་ཉོག་ཏུ་སྤྱོད་ཚེ། །ངེས་འབྱུང་གཏིང་ནས་སྐྱེ་བར་བྱིན་གྱིས་རང་རློབས་ཤིག །བདག་ཅག་ཆོས་བཞིན་འདོད་ཀྱང་ཆོས་བརྒྱད་ཀྱི་དྲྭ་བར། །ལས་ངན་རྣམ་སྨིན་ཐག་པས་དབང་མེད་དུ་བཅིངས་ཚེ། །རེ་དོགས་འདུ་འཛི་བྲལ་བའི་ནགས་ཁྲོད་ལ་གནས་ཤིང་། །རྩེ་གཅིག་
ཏིང་འཛིན་བསྒོམ་པར་བྱིན་གྱིས་རང་རློབས་ཤིག །རྟག་ཏུ་ཆགས་དང་སྙོམ་ལས་ང་རྒྱལ་ཀུན་སྤངས་ནས། །བག་ཡོད་ཆོག་ཤེས་རབ་དུལ་དམན་པ་ལ་གནས་ཤིང་། །དགེ་བའི་བཤེས་དང་རབ་འགྲོགས་ཆོས་བཞིན་དུ་སྤྱོད་ནས། །སྡིག་པའི་གྲོགས་དང་བྲལ་བར་བྱིན་གྱིས་རང་རློབས་ཤིག །གཞན་གནོད་གཞིར་བཅས་རབ་སྤངས་སོ་ཐར་གྱི་ཚུལ་ཁྲིམས། །གཞན་ཕན་སྨོན་འཇུག་བསྒྲུབ་པ་བྱང་སེམས་གླུ ཀྱི་བསླབ་བྱ། །སྤང་བླང་ཐབས་ཀྱིས་ཟིན་པ་གསང་སྔགས་ཀྱི་དམ་ཚིག །ཉམས་མེད་ཡོངས་སུ་བསྲུང་བར་བྱིན་གྱིས་རང་རློབས་ཤིག །སྣང་སྟོང་ཟུང་འཇུག་ཀུན་བརྟགས་བསྐྱེད་རིམ་གྱི་བསམ་གཏན། །བདེ་སྟོང་དབྱེར་མེད་ཞུ་བདེ་མི་རྟོག་གི་རྫོགས་རིམ། །ཟུང་འཇུག་འོད་གསལ་ཀ་དག་ཁྲེགས་ཆོད་ཀྱི་གསང་ལམ། །ཚེ་འདིར་མངོན་དུ་བརྙེས་པར་བྱིན་གྱིས་རང་རློབས་ཤིག །ཤིན་ཏུ་དབེན་པའི་བས་མཐའི་བྲག་སྐྱིབས་ལ་བརྟེན་ཅིང་། །གསོལ་འདེབས་གདུང་དབྱངས་འོ་དོད་མགྲིན་པ་ནས་བརྩེགས་ཏེ། །རྩ་གསུམ་འདུས་ཞལ་བླ་མ་སྙིང་དབུས་ནས་དྲན་ནོ། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རང་རློབས་ཤིག །མདོར་ན་ས་ལམ་ཡོན་ཏན་མཐར་ཕྱིན་གྱི་བར་དུ། །རེ་ས་ཁྱོད་ལས་མེད་དོ་ཐུགས་རྗེ་ཡིས་གཟིགས་ནས། །གེགས་དང་གོལ་ཤོར་ནོར་བའི་བར་ཆད་ལས་བསྒྲལ་ཏེ། །དོན་གཉིས་ལྷུན་གྱིས་འགྲུབ་
པར་བྱིན་གྱིས་རང་རློབས་ཤིག །ཨ་ཧོ། བཅོས་མིན་མོས་གུས་དྲག་པོའི་ཕོ་ཉ་ཡིས་བསྐུལ་ཏེ། །འཁོར་ལོའི་མགོན་པོའི་གནས་གསུམ་ཆུ་གཏེར་གྱི་དབུས་ནས། །ཐུགས་རྗེའི་རང་གཟུགས་ཟླ་ཤེལ་གསར་པ་ཡི་འཛུམ་ཟེར། །བདག་གི་དད་པའི་གནས་བཞིའི་ཀུ་མུད་ལ་ཞུགས་ནས། །སྨིན་བྱེད་དབང་བཞིའི་བདུད་རྩིའི་བཅུད་ལེན་ལ་རོལ་ཞིང་། །གྲོལ་བྱེད་ལམ་བཞིའི་བསྒོམ་རུང་འདབ་བརྒྱ་ཡིས་མཛེས་པར། །ཟུང་འཇུག་སྐུ་བཞིའི་འབྲས་བུ་ཟད་མེད་དུ་འཇོ་བའི། །སྐལ་བཟང་ཐེག་པ་མཆོག་གི་དགའ་སྟོན་ལ་སྤྱོད་ནས། །མཐར་ཐུག་འོད་གསལ་གཉུག་མ་རིག་སྟོང་གི་ངང་དུ། །རྟོག་ཚོགས་ཤར་གྲོལ་དུས་མཉམ་བཟོ་མེད་དུ་ཐིམ་པས། །དཔལ་ལྡན་བླ་མ་རང་ཞལ་འབྲལ་མེད་དུ་མཇལ་ཏེ། །རེ་དོགས་ལས་འདས་ཆོས་སྐུའི་གོ་འཕང་ལ་སྦྱོར་རོ། །དེ་སྐད་གང་ཤར་རྡོ་རྗེའི་ཐོལ་གླུ་ཡི་སྒྲ་དབྱངས། །ལོངས་སྤྱོད་ཡོངས་རྫོགས་ཡི་གེའི་རོལ་མོ་ལས་སྐྱེས་པས། །རྟག་ཏུ་འཁོར་ལོའི་མགོན་པོར་མཆོད་སྤྲིན་དུ་སྤྲོས་ནས། །འགྲོ་ཀུན་རྗེས་སུ་འཛིན་པའི་སྨོན་ལམ་ཞིག་ཞུའོ། །ཞེས་པའང་འཁོར་ལོའི་མགོན་པོ་ལ་མི་ཕྱེད་པའི་དད་ནོར་འཆང་བ་གཞོན་ནུ་ཨ་བྷཱ་ཡས་སོ།། ༈ །།དཔལ་ལྡན་བླ་མ་དམ་པར་ཞབས་པད་བརྟན་པར་གསོལ་བ་འདེབས་པའི་རྡོ་རྗེའི་ཐོལ་གླུ་འཆི་མེད་སྤྲིན་དཀར་བཞད་པའི་རོལ་མོ་ཞེས་བྱ་བ། ཨ་ཧོ། ཀ་དག་ཟབ་ཞི་སྤྲོས་པའི་མཚན་མ་ལས་འདས་ཀྱང་། །རང་གདངས་ལྷུན་གྲུབ་
འོད་གསལ་གཉུག་མ་ཡི་གཤིས་ལུགས། །འགྱུར་མེད་བདེ་ཆེན་རྣམ་ཀུན་མཆོག་ལྡན་གྱི་ངང་དུ། །དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །འགྲོ་འོང་སྲོག་རྩོལ་དྲི་བཞོན་དབུ་མ་རུ་ཐིམ་ཞིང་། །གཟུང་འཛིན་ཉི་ཟླའི་རྒྱུ་བ་འཕོ་མེད་དུ་དག་པས། །ཕྱི་ནང་གཞན་གསུམ་རོ་གཅིག་བདེ་ཆེན་གྱི་ངང་དུ། །དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །དགའ་བཞིའི་ཕོ་ཉས་བསྐྱེད་པའི་རྩ་ཁམས་ཀྱི་དྭངས་མ། །ཐབས་ཤེས་ཟུང་འཇུག་ཛ་ལནྡྷ་ར་རུ་སྨིན་ནས། །སྣང་སྟོང་གདན་གསུམ་མཚན་དཔེའི་དཀྱིལ་འཁོར་དུ་འབར་བའི། །དཔལ་ལྡན་བླ་མའི་ཞབས་པད་བརྟན་པ་རུ་ཤོག་ཅིག །གསུང་དབྱངས་བདེན་གཉིས་དབྱེར་མེད་དམ་ཆོས་ཀྱི་སྒྲ་དབྱངས། །ཐར་པའི་ལམ་སྟོན་གཅིག་གྱུར་གྲགས་སྟོང་གི་རོལ་མོ། །སྐལ་བཟང་འགྲོ་བའི་མོས་ངོར་ཆད་མེད་དུ་སྩལ་བཞིན། །དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །ཐུགས་མཆོག་གདོད་ནས་འཁྲུལ་བྲལ་མཁྱེན་བརྩེ་ཡི་རོལ་པས། །ཇི་ལྟ་ཇི་སྙེད་ཤེས་བྱ་ཐོགས་མེད་དུ་གཟིགས་ཤིང་། །སྐད་ཅིག་རེར་ཡང་འགྲོ་རྣམས་བདེ་ཆེན་ལ་སྦྱོར་བའི། །ཚུ དཔལ་ལྡན་བླ་མ་ཞབས་པད་བརྟན་པ་རུ་ཤོག་ཅིག །འཇིགས་མེད་བདེ་སྟོང་ཟུང་འཇུག་ཆོས་སྐུ་ཡི་ཀློང་ནས། །འགགས་མེད་མཚན་དཔེའི་རོལ་གར་གཟུགས་སྐུ་རུ་སྟོན་པ། །དེང་འདིར་རྒྱལ་བའི་མྱུ་གུ་
གཞོན་ནུ་ཡི་ཚུལ་ཅན། །སྐུ་གསུམ་དབྱེར་མེད་ཞབས་པད་བརྟན་པ་རུ་ཤོག་ཅིག །མཁྱེན་རབ་འཇམ་དཔལ་གཞོན་ནུའི་བློ་གྲོས་དང་དབྱེར་མེད། །བརྩེ་ཆེན་པད་དཀར་དབང་པོའི་ཐུགས་རྗེ་དང་རོ་གཅིག །མཐུ་སྟོབས་གསང་བའི་བདག་པོའི་གོ་ཆ་ལ་རོལ་པའི། །རིགས་གསུམ་འདུས་ཞལ་ཞབས་པད་བརྟན་པ་རུ་ཤོག་ཅིག །སངས་རྒྱས་བྱང་སེམས་དྲང་སྲོང་གྲུབ་པ་ཡི་བདེན་སྟོབས། །བདག་གི་ལྷག་བསམ་སྨོན་པའི་མཐུན་འགྱུར་དུ་བཞེངས་ནས། །བསྐལ་བའི་བར་དུ་ཁྱབ་བདག་དྲིན་ཆེན་གྱི་བླ་མ། །ཞབས་པད་རྡོ་རྗེའི་ཁམས་སུ་བརྟན་པ་རུ་ཤོག་ཅིག །འཆི་མེད་པདྨ་ཀཱ་རའི་ཐུགས་རྗེ་ཡི་བྱིན་རླབས། །འཆི་མེད་གྲུབ་པའི་བདུད་རྩི་བཅུད་ལེན་དུ་གཡོ་བས། །འཆི་མེད་བདེ་སྟོང་དབུ་མའི་མཁའ་དབྱིངས་སུ་སྨིན་པའི། །འཆི་མེད་ཚེ་མཐའ་ཡས་པའི་ངོ་བོ་རུ་གྱུར་ཤོག །དེ་སྐད་གང་ཤར་རང་གྲོལ་གྲགས་སྟོང་གི་གླུ་དབྱངས། །མགྲིན་པ་རྡོ་རྗེའི་ཐོལ་གླུའི་དཀོར་མཛོད་ནས་བླངས་པས། །ཇི་སྐད་སྨོན་པའི་དོན་རྣམས་གེགས་མེད་དུ་འགྲུབ་སྟེ། །བསྟན་འགྲོར་ཕན་བདེའི་དགའ་སྟོན་འཕེལ་བ་རུ་ཤོག་ཅིག ། ན་མོ་གུ་རུ་ཨཱ་ཡུཛྙཱ་ན་བཛྲ་ཡེ་སྭཱ་ཧཱ།། ༈ །།སྨོན་པར་བྱ་བའི་རྡོ་རྗེའི་ཐོལ་གླུ་ངོ་མཚར་ཆུ་གཏེར་ཞེས་བྱ་བ། ཨེ་མ་ཧོ། རྣམ་བཅས་སྤྲོས་པའི་དྲྭ་བ་དབུ་མར་ཐིམ། །རྣམ་མང་གྲུབ་མཐའི་འདོད་པ་གཞི་ལ་རྫོགས། །རྣམ་
ཐར་གསུམ་ལྡན་དབྱིངས་སུ་རོ་གཅིག་པའི། །རྣམ་པ་ཀུན་གྱི་མཆོག་ལྡན་དེ་ལ་འདུད། །བསོད་ནམས་ཡེ་ཤེས་ཚོགས་གཉིས་ཆུ་གཏེར་ཆེ། །ཐར་འདོད་སྐྱེས་བུའི་རི་མོས་བསྲུབས་པ་ལས། །ངོ་མཚར་གཏན་བདེའི་བདུད་རྩིའི་བཅུད་ལེན་གྱིས། །འཆི་མེད་གྲུབ་པའི་ལང་ཚོ་རྒྱས་གྱུར་ཅིག །འདི་ན་ཕྱི་ནང་གསང་གསུམ་ཆོས་ཁམས་ཀུན། །ཡོངས་གྲུབ་བདེ་གཤེགས་སྙིང་པོར་རོ་གཅིག་པས། །མི་ཕྱེད་དགེ་མཚན་གསར་པའི་ཕོ་ཉ་ཡིས། །བར་ཆད་བདུད་ཀྱི་དཔུང་ཚོགས་འཐག་བགྱིད་ཤོག །སྦྱིན་དང་བཟོད་སོགས་ཐབས་ཤེས་ཕར་ཕྱིན་གྱི། །ཀུན་ནས་མུ་ཁྱུད་བཟང་པོས་ཡོངས་འཁྲིལ་ཞིང་། །རྡོ་རྗེ་ཐེག་པའི་ལྟེ་བར་གཅིག་བཟླུམས་པས། །བདེན་གཉིས་ཆོས་ཀྱི་རྒྱལ་སྲིད་དབང་བསྒྱུར་ཤོག །ཕུང་ཁམས་སྐྱེ་མཆེད་འདུས་བྱས་རྟག་མིན་ཁམས། །རྟག་བརྟན་གཞོམ་གཞིག་བྲལ་བའི་ཕྱག་རྒྱ་ཆེས། །གདན་གསུམ་ལྷ་ཡི་འཁོར་ལོར་མཉམ་སྦྱོར་ནས། །ལྷན་ཅིག་གྲུབ་པའི་དགའ་སྟོན་སྦྱིན་གྱུར་ཅིག །བདེ་སྟོང་ཟུང་འཇུག་ཆང་གིས་རབ་མྱོས་པས། །བཅུ་དྲུག་དགའ་བའི་ལང་ཚོ་ཆེར་བརྟས་པའི། །རྣམ་པ་ཀུན་བྲལ་གཉིས་འཐུང་དབང་པོ་ཡིས། །ཉོན་མོངས་འཁྲུལ་པའི་དཔུང་ཚོགས་འཐག་བགྱིད་ཤོག །སྙིང་དབུས་ཚོགས་བརྒྱད་ལས་འདས་བུམ་སྐུའི་སྦུབས། །མངོན་སུམ་ཡང་དག་རིག་པ་ལ་
གོམས་པས། །བློ་བྲལ་བདེ་བ་ཆེན་པོར་རོ་གཅིག་སྟེ། །གྲོལ་ལུགས་བརྒྱད་ཀྱི་དེ་ཉིད་མངོན་གྱུར་ཤོག །ཀ་དག་མཚོན་བརྗོད་ལས་འདས་ཆུ་གཏེར་ཆེར། །ལྷུན་གྲུབ་སྣང་བཞིའི་ཉིན་བྱེད་ཆེས་འབར་ཏེ། །མི་ཕྱེད་ནང་གསལ་ཁྱད་ཆོས་དྲུག་ལྡན་གཞིར། །འཕོ་འགྱུར་བྲལ་བའི་པདྨོ་བཞད་གྱུར་ཅིག །དེ་སྐད་ལོངས་སྤྱོད་འཁོར་ལོའི་ཡི་གེའི་སྤྲིན། །གྲགས་སྟོང་རླུང་གི་ཕོ་ཉས་བསྐུལ་བ་ལས། །གསང་ལམ་མཐར་ཐུག་སྨོན་པའི་བདུད་རྩི་ཡིས། །སྡུག་བསྔལ་བདེན་པའི་ཚ་གདུང་བཅིལ་བར་ཤོག །ཅེས་པའང་སྒྲུབ་པའི་དམ་བཅའ་ལ་ཐོག་མར་འཇུག་པའི་ཚེ་ཨོ་རྒྱན་སངས་རྒྱས་གཉིས་པས་རྫུ་འཕྲུལ་རྡོ་རྗེའི་བཀོད་པ་ལ་བརྟེན། ཕྱི་རོལ་གྱི་གྲུབ་མཐའ་ལས་རྒྱལ་བའི་དུས་ཀྱི་རྒྱལ་པོ་ཚེས་བཅུའི་མཆོད་པའི་སྐབས་སུ་གང་ཤར་ལྷུག་པར་བླངས་བ་འགྲུབ་གྱུར་ཅིག །སརྦ་སིདྡྷ་ནཱུབཛྲ་གཱི་རྟིའི་རྟོགས་པ་བརྗོད་པའི་རྡོ་རྗེའི་ཐོལ་གླུ་ངོ་མཚར་དྲང་པོའི་ས་བོན་ཅེས་བྱ་བ། ཨ་ཧོ། །དཔལ་སྐུ་བཞིའི་དབང་ཕྱུག་རྡོ་རྗེ་འཆང་། །དུས་གསུམ་གྱི་རྒྱལ་བ་ཀུན་གྱི་དངོས། །ཁྱབ་བདག་འཁོར་ལོའི་མགོན་པོ་ལ། །སྒོ་གསུམ་གུས་པས་གསོལ་བ་འདེབས། །ཐུགས་རྗེ་ཆེན་པོས་རྗེས་སུ་སྐྱོངས། །གང་ཤར་རང་སར་གྲོལ་བའི་དབྱིངས། །འོད་གསལ་དབུ་མའི་མཁའ་ཀློང་ནས། །གྲགས་སྟོང་རྡོ་རྗེའི་ཐོལ་གླུའི་སྒྲ། །ཟད་མེད་ལེན་པའི་དཔྱིད་དཔལ་འདི། །སྙིང་པོས་དབེན་པ་མ་ལགས་ཏེ། །སྔོན་སྨོན་གྱི་
བྱེད་པོ་དཀར་བ་དང་། །རྟེན་འབྲེལ་གྱི་འཆར་སྒོ་མ་འགགས་པས། །ཆོས་རྣམས་ལ་སྡུག་བཙིར་གྱི་བསླབ་པ་དང་། །རྟོག་གེའི་ཐལ་འགྱུར་རྣོན་པོ་ཡིས། །ཡེ་གྲོལ་ལ་རྗེས་དཔག་མ་དགོས་པར། །ཅེར་གྲོལ་གྱི་བདེན་པ་མཐོང་བའི་མཐུས། །གང་ཤར་ཀུན་རང་རིག་རྗེན་པར་གྲོལ། །རྟོག་འཛིན་གྱི་འཆིང་བ་མཐའ་དག་ཀུན། །ངང་བཞག་གི་སྦུབས་སུ་དག་ཙ་ན། །ཡུལ་སྣང་ཀུན་དག་པ་རབ་འབྱམས་ཏེ། །ཐ་མལ་གྱི་འཛིན་པ་དབྱིངས་སུ་ཡལ། །རྡོ་རྗེ་ལུས་ཀྱི་མཎྜ་ལར། །གདན་གསུམ་ཞི་ཁྲོའི་ལྷ་ཚོགས་ཀུན། །ཡོངས་གྲུབ་ཏུ་གནས་པ་ཤེས་པའི་མོད། །ཀུན་བརྟགས་ཀྱི་སྤུ་རིས་འཇའ་ལྟར་།དེངས། །འབྱུང་བ་དང་འཇུག་པའི་སྲོག་རྩོལ་རླུང་། །ཟག་བྲལ་གྱི་དྷཱུ་ཏཱིར་དབང་བྱས་པས། །མི་ཤིགས་ནཱ་དའི་མཁའ་དབྱིངས་ནས། །ལུང་རྟོགས་ཀྱི་ཆོས་ཕུང་འབད་མེད་བརྡོལ། །རྩ་གསུམ་དང་འཁོར་
ལྔའི་གྲོང་ཁྱེར་དུ། །ཐབས་ཤེས་ཀྱི་ཊཱ་ཀི་རང་ཆས་གནས། །འགྱུར་མེད་ཀྱི་བདེ་བས་བརླན་པའི་ཚེ། །གནས་ཡུལ་གྱི་ཡིད་བྱེད་ཆད་དེ་ཐལ། །སྣང་ཚུལ་གྱི་རང་བཞིན་སྣ་ཚོགས་ཀྱང་། །གནས་ལུགས་དང་མཐུན་པའི་གདིང་རྙེད་པས། །བཅོས་མ་ཡི་སྒོམ་ལ་རེ་མ་དགོས། །ཡིད་དཔྱོད་གྱི་མཚན་མ་རང་སར་དག །འདི་དོན་མེད་ཀྱི་ཁ་ཕོ་མ་ལགས་ཏེ། །ཁྱབ་བདག་དྲན་ཆོག་བླ་མ་ཡིས། །སྐད་ཅིན་རྗེན་
པར་ངོ་སྤྲད་པས། །འཁོར་འདས་ཀྱི་འདུག་ཚུལ་ཇི་བཞིན་རྟོགས། །འདི་རྡོ་རྗེ་ལམ་གྱི་གནད་ཅིག་ཡིན། །ཕྱི་རོལ་གྱི་ཡུལ་སྣང་མཐའ་དག་རྣམས། །སྒྱུ་མ་དང་རྨི་ལམ་ལྟ་བུར་མཐོང་། །དེ་མཐོང་བས་རེ་དོགས་བློ་སྣ་ཞིག །དེ་ཞིག་པས་གང་ཤར་གླུ་རུ་ལེན། །དེ་བླངས་པས་རང་སྣང་དབང་དུ་འདུས། །དེ་འདུས་པས་གཞན་སྣང་ཟིལ་གྱིས་གནོན། །དེ་ནོན་པས་སྲིད་ཞི་མཉམ་པར་བརྡལ། །ཚུལ་དེ་ལ་མོས་པར་མ་གྱུར་ཀྱང་། །རྨོངས་ཞེན་གྱིས་གཤེ་བར་མི་འཚལ་ཏེ། །སྟོང་པ་དང་རྟེན་འབྱུང་མ་འགགས་པའི། །རྒྱུ་འབྲས་གྱི་སྣང་ཚུལ་ཡིན་ཕྱིར་རོ། །དཔལ་དེ་རིང་དཀར་ཕྱོགས་ཀྱི་གོང་བ་ལ། །དགུང་མཁའ་ཁམས་མེ་ཏོག་ཆར་གྱིས་ཁེངས། །ས་གཞི་ཀུན་ཟླ་ཞུན་གོས་སུ་གྱོན། །ཕྱི་ནང་གི་འབྱུང་བ་ངང་གིས་སྙོམས། །སེམས་བདེ་གསལ་མི་རྟོག་ཁོང་ནས་འབར། །འདི་ཟབ་དོན་གྱི་སྒོ་འཕར་དབྱེ་བ་ལ། །ཁོང་དཔའ་བོ་ཌཱ་ཀིའི་ཚོམ་བུ་ཀུན། །ཐུགས་དགྱེས་པའི་རྟགས་སུ་གདོན་མི་ཟ། །དེ་གོའམ་གཟུར་གནས་དཔྱོད་ལྡན་ཚོགས། །ཨ་ལ་ལ་སྲིད་དང་ཞི་བ་ཀུན། །བདེན་མེད་དུ་མཐོང་བའི་རྣལ་འབྱོར་པ། །རེ་དོགས་གྱི་སྡུག་ཡུས་མ་མཆིས་ཀྱང་། །ཉམས་མཚར་གྱི་གླུ་འདི་ངག་ནས་ཐལ། །དེའི་དགེ་བས་མ་གྱུར་འགྲོ་བ་ཀུན། །བདེན་དོན་གྱི་ཤེས་པ་མངོན་མཇལ་ནས། །སྐུ་གསུམ་པོ་རྣམ་དབྱེར་
མི་ཕྱེད་པའི། །གདོད་མ་ཡི་གཏན་སྲིད་ཟིན་པར་ཤོག །ཅེས་པའང་སོ་སོ་སྐྱེ་བོའི་ཀུན་ཏུ་རྨོངས་པའི་འཆིང་བ་མཚུངས་པར་ལྡན་པའི་ཉམས་ཀྱི་ར་རི་འཆལ་གཏམ་དུ་བྱས་པ་ལ་རྡོ་རྗེའི་གླུར་སྒྲོ་བཏགས་པའི་ལེའུ་ཚན་འདི་རྣམས་ཕྱོགས་གཅིག་ཏུ་བསྡེབས་པའི་ཚེ་ཤིན་ཏུ་སྦ་བར་འོས་པའི་ཚིག་འདིའང་རྣལ་འབྱོར་པ་འཇིགས་པ་མེད་པའི་སྡེས་གང་ཤར་བླངས་པའི་དེ་འཕྲལ་ཉིད་དུ་ཟིན་བྲིས་སུ་བགྱིས་པ་སརྦ་སིདྡྷིནྟུ།། །།ངོ་མཚར་ཚིག་གི་གླུ་དབྱངས་སྙན་པོའི་ཁུ་བྱུག་དངོས་ཏེ་འདོད་པའི་ཕོ་ཉ་དེ་མ་ཡིན། །དོན་བཟང་སྤྲིན་གྱི་བཞད་ལྡན་མ་འདི་མདོངས་མཐའ་ཉིད་ཡིན་ལག་འགྲོའི་ཟས་ཅན་དེ་མ་ཡིན། །གྲུབ་གཉིས་བདུད་རྩིའི་བཀོ་བཤའ་འགྱེད་འདི་ཟླ་ཤེལ་དངོས་ཏེ་རྡུལ་གྱི་ཐིག་ལེ་དེ་མ་ཡིན། དེས་ཀྱང་སྐུ་བཞིའི་སྣང་བ་སྦྱིན་འདི་ཉིན་བྱེད་དངོས་ཡིན་ཚ་བའི་འོད་ཟེར་ཅན་དེ་མ་ལགས་སོ། །དེ་སླད་དབང་རྣོན་སྐལ་བཟང་ནི། །འགའ་ཞིག་སྲིད་ན་བློ་གྲོས་ཀྱི། །བུང་བ་རྣམ་པར་གཡོ་བ་ཡིས། །དོན་བཟང་སྦྲང་རྩིའི་བཅུད་འཐུངས་ཤིག །ཅེས་པའང་བར་སྐབས་ཀྱི་ཆེད་དུ་བརྗོད་པའོ། །འདི་ཡན་རང་ལོ་བཅུ་ཕྲག་གཅིག་ལ་བརྒྱད་ཀྱིས་ལྷག་པར་སོན་པ་མེ་ཁམས་ཡན་ལག་དྲུག་པ་སྟེ་གསེར་འཕྱང་གི་ལོའི་དབོ་ཟླའི་དཀར་ཕྱོགས་ཀྱི་རྒྱལ་བ་དང་པོར་ཕྱོགས་གཅིག་ཏུ་བསྡེབས་པའོ།། ༈ །།རྗེ་བཙུན་རྡོ་རྗེ་རྣལ་འབྱོར་མའི་ཚོགས་ཀྱི་མཆོད་པའི་རྡོ་རྗེའི་གླུ་བདེ་ཆེན་རྟག་པ་དམ་པའི་སྤྲིན་གྱི་རོལ་མོ་ཞེས་བྱ་བ། འོད་གསལ་རྣམ་ཀུན་མཆོག་ལྡན་ཡེ་ཤེས་ཀྱི་རོལ་མོ། །ཟུང་འཇུག་དྭངས་མའི་
གཟུགས་སྐུར་མངོན་སུམ་དུ་ཤར་བ། །དྲན་པས་སྙིང་གི་གདུང་སེལ་དཔལ་ལྡན་གྱི་བླ་མས། །བདེ་སྟོང་ཡེ་ཤེས་སྐྱེ་བར་བྱིན་གྱིས་རང་རློབས་ཤིག །ཨེ་དབྱིངས་ཤིན་ཏུ་རྣམ་དག་སྤྲོས་བྲལ་གྱི་གནས་ལུགས། །ཝཾ་ཡིག་བཅུ་དྲུག་དགའ་བའི་མཚན་དཔེ་རུ་བཞེངས་པའི། །ལྷན་སྐྱེས་མཁའ་ལ་སྤྱོད་པ་རྣལ་འབྱོར་གྱི་དབང་མོས། །རླུང་སེམས་དབུ་མར་ཐིམ་པའི་དངོས་གྲུབ་ཞིག་སྩོལ་དང་། །ཡུལ་ཆེན་ཉི་ཤུ་རྩ་བཞིར་རང་བཞིན་གྱིས་སྣང་བའི། །ཐབས་ཤེས་ཕྱག་རྒྱའི་གཟུགས་འཆང་དཔའ་བོ་དང་མཁའ་འགྲོ། །ཞིང་སྐྱེས་ཕོ་ཉའི་ཚོགས་ཀྱི་འདུ་བ་ལ་བརྟེན་ནས། །བདེ་ཆེན་ཉམས་བརྒྱས་སྒེག་པའི་སྐལ་བཟང་ལ་སྦྱོར་ཞིག །སྟོང་ཉིད་མཁའ་ལ་བྲིས་པའི་ཏིང་འཛིན་གྱི་ཉམས་འགྱུར། །ངོ་མཚར་དབང་པོའི་གཞུ་བཞིན་སྣ་ཚོགས་སུ་འཆར་བའི། །སྔགས་སྐྱེས་རྡོ་རྗེ་བཙུན་མོའི་བསམ་གཏན་གྱི་དགའ་མ། །ཅིར་སྣང་བདེ་ཆེན་འདྲེན་པའི་སྐྱོ་གྲོགས་ལ་ཕེབས་དང་། །རྨད་བྱུང་རྡོ་རྗེ་ཐེག་པའི་ལམ་བཟང་གི་མཐར་ཐུག །རྣལ་འབྱོར་གསང་མཐའི་བདུད་རྩིའི་དགའ་སྟོན་ལ་སྤྱོད་པས། །བརྟན་གཡོའི་ཚུལ་དུ་སྣང་བའི་ཐ་མལ་གྱི་དངོས་ཀུན། །ཧེ་རུ་ཀ་དཔལ་འགྲུབ་པའི་སྨོན་ལམ་ཞིག་ཞུའོ། །ཞེས་པའང་འཇམ་མགོན་བླ་མ་རིན་པོ་ཆེ་ངག་གི་དབང་ཕྱུག་བྱམས་པ་ཕུན་ཚོགས་དཔལ་བཟང་པོས་འདི་ལྟར་བྲིས་ཞེས་རྡོ་རྗེ་བཀའ་སྩལ་སྤྱི་བོར་མཆོད་དེ། བྱ་
བྲལ་བ་ཀུན་ཏུ་རྒྱུ་མཉྫ་གྷོ་ཥས་གསོལ་བ་བཏབ་པ་སིདྡྷི་རསྟུ།། དགེའོ།། དགེའོ།། དགེའོ།།