སྤང་བླང་གི་བསླབ་བྱ་མདོར་བསྡུས་པའི་གཏམ་ཆོས་ཚུལ་བདུད་རྩིའི་སྤྲིན་ཆར།
༄༅། །སྤང་བླང་གི་བསླབ་བྱ་མདོར་བསྡུས་པའི་གཏམ། ཆོས་ཚུལ་བདུད་རྩིའི་སྤྲིན་ཆར་ཞེས་བྱ་བ་བཞུགས་སོ། །
༄༅། །ཨོཾ་སྭ་སྟི་སིདྡྷཾ། དཔག་ཡས་རྒྱལ་བ་སྲས་བཅས་རྣམས་དང་བླ་མ་འཕགས་པ་འཇམ་དབྱངས་ལ། །མཁའ་ཁྱབ་བགྲང་ཡས་མ་རྣམས་དང་བཅས་བདག་ཅག་དད་པས་ཕྱག་བྱས་ནས། །གཞན་ཕན་ལ་ཆགས་ལྷག་བསམ་བཟང་ལྡན་ཁ་བ་པད་རྩ་ལྟར་དཀར་བས། །སྤང་བླང་གནས་འགའ་ཤས་ཙམ་བསྙད་གང་ཡང་དག་དགའ་བས་མཉན་བྱ་ལགས། །ཀི་སོགས་ངག་གི་ཅ་ཅོའི་ཚེར་མ་སྣ་ཚོགས་ཡིད་ཀྱི་རྣམ་གཡེང་དང་། །ཁུ་འཕང་ལྟ་བུའི་ལུས་ཀྱི་སྤྱོད་ལམ་གནས་ངན་ལེན་བཅས་ཀུན་བསལ་ནས། །གེ་སར་འབྲས་བུས་རྣམ་པར་བརྒྱན་པ་དྲང་སྲོང་དགྱེས་པའི་རི་ངོགས་སུ། །ངོ་མཚར་ཀློག་དང་སྤོང་བའི་བྱ་བས་དམ་པའི་རྗེས་སུ་སློབ་པར་མཛོད། །
ཅི་ལྟར་ཁས་བླངས་ཚུལ་ཁྲིམས་རྣམ་དག་སོ་ཐར་བསླབ་གཞིའི་རྩ་བ་བརྟན། །ཆུ་སྐྱེས་ཇི་བཞིན་ཡིད་དུ་འོང་བའི་སྨོན་འཇུག་བྱང་སེམས་ཡལ་ག་རྒྱས། །ཇེ་ཞིག་མ་ཡིན་ཐ་མལ་དངོས་ཀུན་སྔགས་སུ་སྡོམ་པའི་འབྲས་བུས་དུད། །ཉོ་ཚོང་ལ་སོགས་བྱ་བ་ཀུན་སྤངས་འཕགས་བཞིའི་རིགས་སུ་བསྙེན་པར་མཛོད། །ཏི་ར་ཕྱུགས་ལྟ་བུར་བླང་དོར་གནས་ལ་རྨོངས་པའི་གཞན་དབང་རིང་བཅད་ཕྱིར། །ཐུ་མིའི་གཞུང་ལུགས་རྣམ་གཉིས་ནས་བཟུང་ཐུན་མོང་རིག་ལམ་ཇི་སྙེད་དང་། །དེ་བཞིན་གཤེགས་པས་ལེགས་པར་གསུངས་པའི་སྡེ་སྣོད་རྒྱུད་སྡེའི་ངེས་གསང་ཀུན། །ནོ་པི་སྒྲུབ་པ་ཀ་ཡི་ཆེད་དུ་བསླབས་པས་མཁས་པ་དགྱེས་པའི་དཔལ་ཐོབ་མཛོད། །པི་ཝཾ་
སྙན་པའི་འགྱུར་བས་མི་མཚོན་གཞུང་ལུགས་རྒྱ་མཚོ་འཆད་ལ་དབང་། །ཕུ་ཆུ་ལྷུང་ལྷུང་དལ་འབབས་ཇི་བཞིན་འཛད་མེད་རྩོམ་ཕྲེང་མགྲིན་པར་བརྒྱན། །བེ་ཏ་པ་ཡི་ཡལ་ག་ལྟར་གཟེངས་ཕས་རྒོལ་སྟོང་གི་དམ་བཅའ་ཀུན། །རྨོངས་པ་མོ་ཧའི་ཤུལ་དུ་རྐང་པ་འགོད་བྱེད་རྩོད་ངག་སེང་གེའི་སྒྲ་སྒྲོགས་མཛོད། །ཙི་ཏྲ་ཀ་བཞིན་གདུང་བ་སྐྱེད་པའི་ཉེས་པ་ལྔ་པོ་བསལ་སླད་དང་། །ཚུ་རོལ་མཐོང་བས་ནམ་ཡང་མི་མཚོན་འཕགས་པའི་ཡེ་ཤེས་མངོན་བྱེད་ཕྱིར། །ཛེ་ཏའི་ཚལ་མཚུངས་ཞི་བའི་ནགས་སུ་སྤོང་བའི་འདུ་བྱེད་བརྒྱད་བསྟེན་པས། །ཕོ་ཆུ་ལྷ་ཛི་ཧཱས་ཀྱང་སྨྲ་བར་མི་ནུས་བསམ་གཏན་བདེ་བས་སིམ་པར་མཛོད། །ཞི་ལ་མ་ཆགས་སྲིད་མཐར་མི་གནས་བརྩེ་དང་རིག་པས་འཁོར་འདས་མཐའ། །ཟུ་ཆ་མཉམ་པའི་བརྡ་རྙིང་གུ་ལུགས་སུ་དབུ་མར་འཛུད་བྱེད་ཤེས་རབ་ཟབ་མོར་མི་ཕྱེད་པས། །འེ་ཞེས་སྙན་པའི་སྨྲ་བ་དང་བཅས་སྦྱིན་སོགས་ཕར་ཕྱིན་ཀུན་སྤྱོད་ཅིང་། །ཡོ་ག་ཆེན་པོའི་ལམ་མཆོག་ལ་བརྟེན་ཚེ་འདིར་ཟུང་འཇུག་ཐོབ་པར་མཛོད། །རི་དབང་ལྟར་བརྟན་བྱང་ཆུབ་སེམས་དང་ཤེས་རབ་སྙིང་རྗེའི་མཐུས་བསྐུལ་ཏེ། །ལུ་མའི་ཆུ་བཞིན་རྒྱུན་མི་འཆད་པར་གཞན་ཕན་སྙིང་སྟོབས་གོ་ཆ་བགོ །ཤེ་མུན་སྟུག་པོ་ཉམ་ངར་འཁྱམས་པའི་མ་རྣམས་ཐར་པའི་ལམ་བཟང་ལ། །སོ་སོར་འགོད་པའི་གཡར་
དམ་བརྟན་པོས་སྲས་བཅས་རྒྱལ་བ་དགྱེས་པར་མཛོད། །ཧི་ཁ་བ་མའི་ཕུང་པོ་ཇི་བཞིན་རབ་དཀར་ཀུན་སློང་བཟང་པོས་གཞི་བཟུང་ནས། །ཨུ་ད་དྷི་ཆུ་འཛིན་ལྟར་སྙན་པའི་ངག་གིས་ཆོས་ཚུལ་བདུད་རྩིའི་ཆར་ཕབ་མཐུས། །ཀྱེ་ཧེ་ཞེས་ཚིག་གིས་བསྐུལ་བའི་མོད་ལ་འགྲོ་ཀུན་ཕན་བདེའི་ལམ་ཞུགས་ཏེ། སྨན། ཨོ་ཥ་དྷི་ལྟར་ཉོན་མོངས་ནད་སེལ་ཀུན་མཁྱེན་གོ་འཕང་མྱུར་ཐོབ་ཤོག །ཅེས་དབྱངས་ཨ་ངེས་པ་དང་། བོད་ཀྱི་ཡི་གེ་སུམ་ཅུ་ལ་ཨཱ་ལི་གསལ་བྱེད་བཞིས་བརྒྱན་པ་དང་སྤེལ་བས་རྗོད་བྱེད་བྱ་དཀའ་ཞིང་། བརྗོད་བྱ་བློ་གསལ་ཐར་འདོད་རྣམས་ཀྱི་སྤང་བླང་གི་བསླབ་བྱ་ཐམས་ཅད་མདོར་བསྡུས་ཏེ་མཚོན་པར་ནུས་པའི་གཏམ་གྱི་སྦྱོར་བ་ཉུང་ངུ་འདིའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་དཀར་པོའི་གནམ་ལོ་གསར་དུ་འཆར་བའི་དཀར་ཕྱོགས་ཀྱི་རྒྱལ་བ་དང་པོའི་ཉིན་བྲིས་པ་དོན་དང་ལྡན་པར་གྱུར་ཅིག། ༈ །།ཨོཾ་སྭ་སྟི། སྤང་བླང་གི་བསླབ་བྱ་མདོར་བསྡུས་པའི་གཏམ་གྱི་སྦྱོར་བ་འདིའི་བསྡུས་དོན་ཅུང་ཟད་འཆད་ན་གསུམ། ཀླད་དང་། གཞུང་དང་། མཇུག་གོ །དང་པོ་ལ་བཞི། མཚན་བསྟན་པ། ཤིས་པར་བརྗོད་པ། ཕྱག་བྱ་བ། བརྩམ་པར་དམ་བཅའ་བ་རྣམས་རིམ་པར། །སྤང་བླང་སོགས་དང་། ཨོཾ་སྭ་སྟི་སིདྡྷཾ་
དང་། དཔག་ཡས་སོགས་དང་། གཞན་ཕན་སོགས་ཀྱིས་བསྟན་ཅིང་། ཕྱི་མ་འདིའི་ཁོངས་སུ་དངོས་པོ་ངེས་བསྟན་ཡང་ཚང་ངོ་། །གཉིས་པ་ལ་གསུམ། སྤང་བླང་གི་གནས་མདོར་བསྡུས་ཏེ་བསྟན་པ། བླང་བྱའི་གནས་རྒྱས་པར་བཤད་པ། གཞན་ལ་ཕན་པ་སྒྲུབ་པའི་ཚུལ་གྱིས་དོན་བསྡུ་བའོ། །དང་པོ་ནི། ཀི་སོགས་ངག་གི་སོགས་སོ། །གཉིས་པ་ལ་གཉིས། རྒྱལ་བའི་བསྟན་པ་རིན་པོ་ཆེའི་སྒོར་འཇུག་ཚུལ་དང་། ཞུགས་པའི་རྟེན་དེས་ཐོས་བསམ་སྒོམ་གསུམ་ཇི་ལྟར་བྱ་བའི་ཚུལ་ལོ། །དང་པོ་ནི། ཅི་ལྟར་སོགས་སོ། །གཉིས་པ་ལ་གཉིས། ཀློག་པ་ཐོས་བསམ་གྱི་ཚུལ་ལ་བསྐུལ་བ་དང་། སྤོང་བ་བསམ་གཏན་གྱི་ཚུལ་ལ་བསྐུལ་བའོ། །དང་པོ་ལ་གཉིས། རང་དོན་དུ་ཐོས་བསམ་ཇི་ལྟར་བྱ་བའི་ཚུལ་དང་། གདུལ་བྱ་གཞན་རྗེས་སུ་འཛིན་པའི་ཚུལ་ཏེ། ཏི་ར་སོགས་དང་། པི་ཝང་སོགས་སོ། །གཉིས་པ་ལ་གཉིས། ཞི་གནས་བསམ་གཏན་བསྒོམ་ཚུལ་དང་། ལྷག་མཐོང་ཤེས་རབ་བསྐྱེད་ཚུལ་ཏེ། ཙི་ཏྲ་ཀ་སོགས་དང་། ཞི་ལ་མ་ཆགས་སོགས་ཀྱིས་བསྟན་ཅིང་། ཕྱི་མའི་ཁོངས་སུ་སྦྱིན་སོགས་ཕར་ཕྱིན་གཞན་དང་རྡོ་རྗེ་ཐེག་པ་ལ་བསླབ་ཚུལ་ཡང་མཚོན་ནོ། །གསུམ་པ་ནི། རི་དབང་ལྟར་བརྟན་སོགས་ཏེ། བྱ་བ་ལས་ཀྱི་འཁོར་ལོའང་མཚོན་པ་ཡིན་ནོ། །གསུམ་པ་
མཇུག་གི་དོན་ལ་གསུམ། བསམ་སྦྱོར་ཇི་ལྟ་བུས་བརྩམས་ཚུལ། བརྩམས་པའི་དགེ་བ་རྫོགས་བྱང་དུ་བསྔོ་བ། སྦྱར་བྱང་གིས་མཇུག་བསྡུ་བ་སྟེ། ཧི་མའི་སོགས་དང་། ཧེ་ཞེས་སོགས་དང་། ཅེས་དབྱངས་ཨ་ངེས་པ་སོགས་སོ། །ཞེས་པའང་མཉྫགྷོ་ཥ་རང་ཉིད་ཀྱིས་བྲིས་པ་དགེ། ༈ །།ཨོཾ་སྭ་སྟི་སིདྡྷཾ། རིགས་ཀུན་ཁྱབ་བདག་བླ་མ་ལ། །རྩེ་གཅིག་གུས་པས་ཕྱག་བཙལ་ནས། །ཟབ་ལམ་སྙིང་པོར་དྲིལ་བའི་གཏམ། །དད་ལྡན་ཉམས་ལེན་གསོས་སུ་སྦྱིན། །རང་རེ་རྣམས་ཀྱིས་རྙེད་པ་ཡི། །དལ་བརྒྱད་འབྱོར་བཅུ་ལྡན་པའི་ལུས། །འདི་འདྲ་རྙེད་དཀའ་དོན་ཆེ་བས། །སྙིང་པོ་ལེན་པའི་ཐབས་ལ་འབད། །དེ་ཡང་ངེས་པར་འཆི་བ་དང་། །ནམ་འཆི་ཆ་མེད་འཆི་བའི་ཚེ། །ཆོས་མིན་གང་གིས་མི་ཕན་པས། །དམ་ཆོས་མྱུར་དུ་བརྩོན་པས་བསྒྲུབ། །འཆི་བའི་འོག་ཏུ་དཀར་ནག་ལས། ཁོ་ནའི་རྗེས་སུ་འབྲང་བས་ན། །དགེ་སྒྲུབ་སྡིག་སྤང་དམ་བཅའ་ནི། །རྟག་ཏུ་སྙིང་ལ་རི་མོ་བྲིས། །འཁོར་བའི་གནས་རིས་གར་སྐྱེས་ཀྱང་། །སྡུག་བསྔལ་བསམ་གྱིས་མི་ཁྱབ་པས། །དེ་ལས་རང་གཞན་སེམས་ཅན་ཀུན། །མྱུར་དུ་ཐར་བར་འདོད་པའི་བློས། །དཀོན་མཆོག་གསུམ་ལ་སྐྱབས་འགྲོ་ཞིང་། །སྨོན་འཇུག་བྱང་ཆུབ་སེམས་གཉིས་བསྐྱེད། །སྒྲིབ་སྦྱོང་རྡོར་སེམས་སྒོམ་
བཟླས་དང་། །ཚོགས་གསོག་མཎྜལ་རྣལ་འབྱོར་བྱ། །ཁྱད་པར་བྱིན་རླབས་མྱུར་འཇུག་པས། །ལྷན་སྐྱེས་ཡེ་ཤེས་རྟོགས་པའི་ཐབས། །མོས་གུས་བླ་མའི་རྣལ་འབྱོར་ནི། །དུས་རྣམས་ཀུན་ཏུ་བརྩོན་པས་བསྒོམ། །སྤྱི་བོར་པད་ཉི་ཟླ་བའི་སྟེང་། །སྐྱབས་གནས་ཀུན་འདུས་བླ་མར་གསལ། །གདུང་ཤུགས་དྲག་པོས་གསོལ་གདབ་ཅིང་། །དབང་བཞི་བླངས་ཤིང་ཐུགས་ཡིད་བསྲེ། །ལུས་གནད་རྣམ་སྣང་ཆོས་བདུན་ལ། །ངག་གི་རླུང་གནད་དལ་བར་བསླབ། །མིག་གནད་བར་སྣང་གཡོ་མེད་གཏད། །ཡིད་གནད་དུས་གསུམ་སྤྲོས་པ་བཅད། །དེ་ཚེ་འདས་པའི་རྣམ་རྟོག་འགགས། །མ་འོངས་རྣམ་རྟོག་མ་སྐྱེས་ཤིང་། །ད་ལྟའི་ཤེས་པ་སྐད་ཅིག་མ། །ཉམས་སུ་མྱོང་བཞིན་བསམ་བརྗོད་བྲལ། །གསལ་སྟོང་ཟུང་འཇུག་རིག་པའི་གཤིས། །འདི་ཀ་གདོད་མའི་གནས་ལུགས་ཏེ། །བཅོས་མའི་བློ་ཡིས་མ་བསླད་པར། །རང་བབས་སྤྲོ་བསྡུ་བྲལ་བར་བསྐྱང་། །དེ་ཡི་ངང་ལས་གཟུང་འཛིན་གྱི། །རྣམ་པར་རྟོག་པ་ཅི་ཤར་ཡང་། །དྭངས་པའི་ཤེལ་ལ་ཚོན་རིས་ལྟར། །མ་འདྲེས་འཛིན་མེད་རང་སར་གྲོལ། །དུས་དང་གནས་སྐབས་ཐམས་ཅད་དུ། །གསལ་རིག་དེ་ཀའི་རྒྱུན་བསྐྱངས་ནས། །བསྒོམ་མེད་ཡེངས་མེད་ཆེན་པོའི་ངང་། །མཐར་ཐུག་བཙན་ས་ཟིན་པར་མཛོད། །
མདོར་ན་ཅིར་སྣང་ལྷ་ཡི་སྐུ། །སྒྲར་གྲགས་གསང་སྔགས་རྡོ་རྗེའི་སྒྲ། །དྲན་རྟོག་དབྱིངས་ལས་མ་གཡོས་ན། །མཆོག་དངོས་ཚེ་འདིར་འགྲུབ་པར་ངེས། །དེ་སྐད་དད་ལྡན་མོས་པའི་ངོར། །རྣལ་འབྱོར་འཇིགས་པ་མེད་པའི་སྡེས། །གང་ཤར་ཡི་གེར་སྤེལ་བའི་དགེས། །གདོད་མའི་གྲོལ་གཞི་མངོན་གྱུར་ཤོག །སརྦ་མངྒ་ལཾ།། ༈ །།ན་མོ་གུ་རུ་བྷྱ༔ སྲས་བཅས་སངས་རྒྱས་ཐམས་ཅད་དང་། །དབྱེར་མེད་དཔལ་ལྡན་བླ་མ་ཡི། །ཡེ་ཤེས་གཟིགས་པའི་བྱིན་རླབས་ཀྱིས། །ཁྱོད་ལ་རྟག་ཏུ་སྲུང་གྱུར་ཅིག །རྒྱལ་བས་གདུལ་བྱའི་བསམ་པ་དང་། །རྗེས་མཐུན་དམ་པའི་ཆོས་ཀྱི་སྒོ། །མཐའ་ཀླས་སྣང་བར་མཛད་པ་ཡང་། །བསྡུ་ན་སྡེ་སྣོད་གསུམ་དུ་འདུ། །དེ་དག་ཀུན་གྱི་བརྗོད་བྱའི་དོན། །བསླབ་པ་གསུམ་དུ་ལེགས་རྟོགས་ནས། །གྲོལ་བ་འབའ་ཞིག་དོན་གཉེར་བློས། །ལམ་སྟོན་བཤེས་གཉེན་འབད་པས་བསྙེན། །དལ་དང་འབྱོར་བ་རྙེད་དཀའ་ཞིང་། །ནམ་འཆིའི་ངེས་པ་མ་མཆིས་ཕྱིར། །ལས་འབྲས་བླང་དོར་བརྩོན་པ་དང་། །སྲིད་ལས་ངེས་འབྱུང་རྟག་ཏུ་བསྒོམ། །མཐའ་ཡས་ཡོན་ཏན་དཔག་བསམ་ལྗོན། །བསྐྱེད་ཅིང་འཕེལ་བའི་ས་གཞི་ནི། །ཇི་ལྟར་ཁས་བླངས་ཚུལ་གནས་ཁྲིམས། །རྣམ་པར་དག་པའི་ཐབས་ལ་འབད། །ཤིན་ཏུ་ཞི་བའི་དབེན་གནས་སུ། །
ཉེས་པ་ལྔ་སྤངས་འདུ་བྱེད་བརྒྱད། །བསྟེན་པའི་ཡན་ལག་རྫོགས་པ་ཡིས། །སེམས་གནས་རྣམ་དགུའི་ཏིང་འཛིན་སྒྲུབས། །བདག་དང་ཕུང་པོ་རྣམ་རིག་གི །སྤྲོས་པའི་སྦྱོར་བ་ལས་འདས་པ། ། སྣང་དང་སྟོང་པ་འགལ་མེད་པའི། །དོན་དམ་རྟོགས་པའི་ཤེས་རབ་བསྐྱེད། །ཀུན་རྫོབ་ཏུ་ཡང་ཆོས་རྣམས་ཀུན། །བདེན་གཉིས་དབྱེར་མེད་ངེས་བྱས་ནས། །དེ་ཀུན་ལྷ་དང་ཡེ་ཤེས་ཀྱི། །བསྐྱེད་རྫོགས་ཟུང་འཇུག་ཆེན་པོར་སྦྱང་། །མདོར་ན་ངེས་འབྱུང་སྙིང་རྗེ་དང་། །མོས་གུས་དྲག་པོས་མཚམས་སྦྱར་ནས། །སྣང་གྲགས་རྟོག་ཚོགས་ལྷ་སྔགས་དང་། །ཡེ་ཤེས་ཆོས་སྐུར་ལམ་ཁྱེར་འཚལ། །རང་ལ་བསླབ་དང་གྲོལ་བ་ཡི། །ཡོན་ཏན་ཅུང་ཟད་མེད་མོད་ཀྱི། །ལྷག་བསམ་དག་པས་གསོལ་འདིས་ཀྱང་། །དོན་གཉིས་འགྲུབ་པའི་བཀྲ་ཤིས་ཤོག །ཅེས་ཤྲཱི་པརྦ་ཏ་ཐེག་པ་མཆོག་གི་གླིང་ནས་བློ་གསལ་པྲཛྙཱའི་མཚན་ཅན་གྱིས་ཆེད་དུ་བསྐུལ་བ་ཡིད་ལ་དྲན་པས་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རིང་མོའི་ལམ་ནས་གདམས་པ་དགེ་ལེགས་སུ་གྱུར་ཅིག། ༈ །། རྒྱལ་རྣམས་གཞན་དོན་སངས་རྒྱས་ཕྱིར། །བདག་ཅག་ཁོ་ནར་ཐུགས་བརྩེ་བས། །ལམ་སྟོན་དགེ་བའི་བཤེས་གཉེན་དུ། །སྣང་ལ་དངོས་པོ་ཀུན་གྱིས་འདུད། །ལུང་མ་བསྟན་ལས་ཀུན་བསླང་
བའི། །སེམས་ནི་དགེ་ལ་མངོན་བཞག་ནས། །དེ་ནས་ཀུན་ཏུ་སྤྱོད་པ་ཡང་། །རྣམ་པར་དག་པའི་ཐབས་ལ་འབད། །བསམ་པ་ཕུན་སུམ་ཚོགས་པ་ཡིས། །སྦྱོར་བ་གང་ལ་འཇུག་གྱུར་ཡང་། །གསེར་འགྱུར་རྩི་ཡིས་ཐེབས་པ་ཡི། །དངོས་བཞིན་དོན་དང་བཅས་པར་འགྱུར། །རྣམ་པར་མ་གྱུར་ཀུན་འབྱུང་ལས། །རྣམ་འགྱུར་སྡུག་བསྔལ་ནད་ཆེན་འདི། །ཐབས་གང་གིས་ནི་བཟློག་འགྱུར་ཅེས། །ཉིན་མཚན་རྟག་ཏུ་བསམ་པ་ན། །དམ་པའི་ཆོས་ཀྱི་སྨན་ཆེན་ལས། །གཞན་མིན་དེ་ཡང་སྨན་པ་མཆོག །དགེ་བའི་བཤེས་ལ་རག་ལས་ཤིང་། །ངེས་པ་བརྟན་པོ་རྙེད་པའི་ཚེ། །ལྟ་དང་སྤྱོད་པ་རྣམ་དག་ཅིང་། །རྗེས་སུ་འཛིན་པའི་སྙིང་བརྩེ་ནས། །སྐྱེས་བུ་དམ་པ་ངེས་བཙལ་ནས། །མཉེས་པ་གསུམ་གྱིས་བསྟེན་པར་བྱ། །དེ་ནས་ཉེས་སྤྱོད་སྤོང་བ་ཡི། །ཚུལ་གནས་ཁྲིམས་ཀྱིས་གཞི་བཟུང་སྟེ། །དགེ་ཆོས་ཕུན་ཚོགས་སྡུད་མཁས་པ། །ཐོས་བསམ་ཤེས་རབ་བསྐྱེད་ནས་ཀྱང་། །ཇི་ལྟར་དཔྱད་པས་གྲུབ་པའི་དོན། །རང་རྒྱུད་འདུལ་བའི་ཐབས་ཁོ་ནར། །སྦྱར་ཏེ་ཞི་བའི་ནགས་ཀླུང་དུ། །བསྒོམ་པའི་བདུད་རྩི་མི་ཕྱེད་བཏུང་། །སྔོན་དུ་འགྲོ་བའི་རྩིག་ངོས་སུ། །དངོས་གཞིའི་རི་མོ་ལེགས་འབར་བ། །རྗེས་སུ་བསྐྱངས་པའི་ཐབས་མཁས་ཀྱིས། །འཇིག་རྟེན་གསུམ་གྱི་
མཆོད་རང་གཞན་དོན་གཉིས་ཕུན་ཚོགས། སྡོང་འགྲུབ། །ཁྱད་གཞི་དང་ནི་ཁྱད་ཆོས་ཀྱི། །དལ་འབྱོར་རྙེད་དཀའི་ཚུལ་རྟོགས་ནས། །ཕྲ་བའི་མི་རྟག་ལེགས་བསམས་ན། །སྤྱོད་ཡུལ་དོན་མེད་ཇི་ལྟར་བཟོད། །ཀྱེ་མ་འཁོར་བ་སྡུག་བསྔལ་ཏེ། །ལྟར་སྣང་བདེ་བའང་བསླུ་བའི་རྒྱུ། །དེ་བས་འབད་པ་ཐམས་ཅད་ཀྱིས། །སྲིད་པའི་རྩ་བ་བཅད་པར་བྱ། །རང་དོན་མཐར་ཕྱིན་འགྲོ་ཀུན་ལ། །ཕན་བཞེད་ཐབས་དང་བཅས་པ་ཡི། །རྫོགས་སངས་རྒྱས་ལ་སྐྱབས་སོང་ནས། །ཆོས་དང་དགེ་འདུན་དག་ཀྱང་བསྙེན། །འབྱུང་རྔུབས་དབང་པོ་བློ་དག་གི །རིག་པས་སྔ་མའི་སྐྱེ་ཡོད་པར། །འགྲུབ་ཅིང་དེ་ཡང་ཐུག་མེད་ཕྱིར། །འགྲོ་ཀུན་ཕ་མར་ངེས་བྱས་ཏེ། །དྲིན་བཟོའི་ཚུལ་ལ་རྣམ་བརྟགས་ན། །བྱམས་དང་སྙིང་རྗེ་ལྷག་བསམ་དང་། །སྨོན་དང་འཇུག་པའི་བདག་ཉིད་ཀྱི། །བྱང་ཆུབ་སེམས་རྣམས་རིམ་བཞིན་སྐྱེས། །དེ་མཐར་འཁོར་རྩ་བདག་འཛིན་དང་། །དངོས་གཉེན་བདག་མེད་རྟོགས་པ་ཡི། །ཤེས་རབ་ཉིད་ལས་གཞན་མིན་ཕྱིར། །འདི་ཉིད་རྟོགས་པའི་ཐབས་ལ་འབད། །གང་ཚེ་ངར་འཛིན་ལྷན་སྐྱེས་ཉིད། །ཕུང་སོགས་རྟེན་དང་གཅིག་པའམ། །ཐ་དད་གང་ཡིན་དཔྱད་པ་ན། །གཅིག་ན་དངོས་ཀུན་གཅིག་ཏུ་འགྱུར། །ཐ་དད་ཉིད་ན་གདགས་གཞི་རྣམས། །བློ་ཡི་གུད་དུ་
ཕྱེ་བ་ན། །བདག་འཛིན་རྫ་ས་གཞན་མ་དམིགས་ཕྱིར། །གཞི་མེད་འཁྲུལ་པོ་ཉིད་དུ་ཟད། །དེ་ནས་གདགས་གཞིའི་ཕུང་པོ་སོགས། །དོན་དང་སེམས་སུ་ལེགས་བསྡུས་ནས། །ཕྱོགས་དང་ཕྲད་པ་བརྟག་པ་སོགས། །བློ་གྲོས་ཞིབ་མོས་དཔྱད་པ་ན། །ཐག་ཁྲ་སྦྲུལ་དུ་འཛིན་པའི་ཚེ། །ཐག་པ་ཉིད་དང་སྐུད་པ་དང་། །རྡུལ་དང་ཆ་མེད་རིམ་པ་བཞིན། །བདག་མེད་རྣམ་གཉིས་མངོན་དུ་བྱེད། །དེ་ལྟར་ན་ཡང་ཆོས་རྣམས་ཀུན། །བརྟེན་ནས་གདགས་པ་ཙམ་ཉིད་དང་། །དེ་ཡང་དཔྱད་མཐར་མི་སོན་པའི། །བརྗོད་བྲལ་བློ་འདས་དགོངས་པར་འཇུག །གང་ཚེ་དོན་དམ་གྲུབ་ཚད་དང་། །ཉམས་སུ་མྱོང་བ་མི་ཕྱེད་པའི། །སྟོང་དང་རྟེན་འབྱུང་འགལ་མེད་པས། །རྨི་ལམ་ལྟ་བུའི་བསོད་ནམས་སྤྱད། །མཛད་འཕྲོ་ལུས།། ༈ །།བདག་མེད་རྣམ་གཉིས་ལས་བརྩམས་པའི་གདམས་པ་མདོར་བསྡུས་བདུད་རྩིའི་ཟེག་མ་ཞེས་བྱ་བ། ཤེས་དང་ཤེས་བྱ་རོ་གཅིག་པར། །ཐུགས་སུ་ཆུད་པའི་རྒྱལ་བའི་སྲས། །གཞན་ཕན་ཕ་མཐའ་ཡས་པ་ཡིས། །ཁྱེད་ལ་ཤིས་པ་སྦྱིན་གྱུར་ཅིག །བྱང་ཆུབ་མཆོག་ལ་རབ་དམིགས་ནས། །སྲིད་ལས་ཇི་ལྟར་ཐར་འགྱུར་ཞེས། །ངེས་འབྱུང་བློ་འདི་ཐོག་མ་ནས། །འབད་པས་བསྐྱེད་པར་བྱ་བ་ཉིད། །དེ་ཚེ་སྲིད་པའི་རྩ་བ་ནི། །གང་ཡིན་ལེགས་པར་
ངེས་བྱས་ཏེ། །དེ་ཉིད་གཅོད་པའི་རིག་པ་ལས། །བསྟེན་གོམས་བྱ་ཞེས་མཁས་རྣམས་གསུངས། །འདི་ནི་གཅིག་ཏུ་འཐད་པ་སྟེ། །ཇི་ལྟར་སྲོག་འཕྲོག་དུག་སོགས་ཀྱི། །རྩ་བ་དྲུངས་ནས་མ་བྱུང་ན། །མྱུ་གུ་བཅད་ཀྱང་སླར་ལ་སྐྱེ། །དེ་བས་ཁམས་གསུམ་ཡིད་ཅན་ཀུན། །འཇིགས་ཚོགས་ལྟ་དང་མཚུངས་ལྡན་པའི། །བདག་ཏུ་འཛིན་པ་ལ་བརྟེན་ནས། །ཕ་མཐའ་མི་མངོན་འཁོར་བར་འཁྱམས། །དེ་ལ་ཐབས་ཀྱི་ཕྱོགས་གཞན་གྱིས། །དངོས་སུ་གནོད་པ་ནུས་མིན་ཏེ། །གང་དང་འཛིན་སྟངས་འགལ་བ་ཡི། །བདག་མེད་རྟོགས་པའི་ཤེས་རབ་བརྟེན། །འདི་ལྟར་ཕུང་པོ་ཚོགས་ཙམ་ལ། །བསྟེན་པའི་ངར་འཛིན་ལྷན་སྐྱེས་དང་། །གཞན་སྡེས་གསར་དུ་བཏགས་པ་ཡི། །བདག་དེ་རིག་པས་རྣམ་དཔྱད་ན། །བེམ་ཤེས་ལྡན་མིན་འདུ་བྱེད་དེ། །རྣམ་པ་གསུམ་ལས་འདའ་བ་མེད། །དེ་དག་ཀྱང་ནི་རྡུལ་ཕྲན་དང་། །སྐད་ཅིག་བར་དུ་བསིལ་བྱས་ནས། །ཕྱོགས་དང་དུས་ཀྱི་ཆ་ཤས་ཀྱི། །ངེས་པས་ལེགས་པར་བརྟགས་པ་ན། །གདགས་གཞི་ཉིད་ཀྱང་མ་གྲུབ་ཕྱིར། །གདགས་པ་ཇི་ལྟར་འགྲུབ་པར་འགྱུར། །འོ་ན་མངོན་སུམ་སྣང་བ་འདི། །ཇི་ལྟར་ཞེ་ན་ཐོག་མེད་ནས། །འཁྲུལ་པའི་གཉིད་ཀྱིས་བསླད་པ་ཡི། །རྫུན་པའི་རི་མོ་ཙམ་དུ་ངེས། །གལ་ཏེ་ཡུལ་ཉིད་བདེན་མིན་
ཡང་། །དེ་འཛིན་ཤེས་པ་བདེན་ཅེ་ན། །རྨི་ལམ་སྣང་དང་ཤེས་པ་བཞིན། །གང་བདེན་གང་ནི་འཁྲུལ་པར་འགྱུར། །མདོར་ན་སྣང་ཙམ་མི་འགོག་ཀྱང་། །བདེན་ཞེན་བློ་ནི་དགག་བྱ་ཉིད། །མཐར་ཐུག་གཉིས་ཀ་མ་དམིགས་ཕྱིར། །བློ་ཡི་ཡུལ་ལས་ཤིན་ཏུ་གྲོལ། །ཨེ་མ་རྟེན་ཅིང་འབྲེལ་འབྱུང་གི །རྐྱེན་ལས་སྐྱེས་ཕྱིར་དེ་མ་སྐྱེས། །འོན་ཏང་འགགས་པའང་མ་མཆིས་པའི། །ཟུང་འཇུག་ཚུལ་འདི་རྟོགས་པར་མཛོད། །དེ་ལྟར་གནས་དང་སྣང་ཚུལ་གྱི། །ངེས་པས་མཐའ་གཉིས་མུན་བསལ་ཏེ། །བསོད་ནམས་ཡེ་ཤེས་ཚོགས་ཟུང་གིས། །གློ་བུར་དྲི་མ་བསལ་ལ་བརྩོན། །བློ་གྲོས་མཆོག་ཏུ་གྱུར་པ་ན། །ད་གཟོད་དཔྱད་པས་མི་མཚོན་པའི། །ལྷན་ཅིག་སྐྱེས་པའི་ཕྱག་རྒྱ་ཆེ། །རྡོ་རྗེ་སྔགས་ཀྱི་མཐུ་ཡིས་བསྐྱེད། །གང་གི་ཤེས་རབ་ཟབ་མོ་དང་། །ཐབས་ཀྱི་ཁྱད་པར་མི་ཕྱེད་པས། །ཚེ་གཅིག་ཁོ་ནས་ཟུང་འཇུག་གི །གོ་འཕང་མངོན་དུ་བརྙེས་གྱུར་ཅིག །ཅེས་པའང་ཐུབ་བསྟན་རྡོ་རྗེ་བྲག་གི་ཆོས་མཛད་ས་མནྟས་ཆེད་དུ་བསྐུལ་བ་བཞིན་རྣལ་འབྱོར་འཇིགས་པ་མེད་པའི་སྡེས་ཨོ་རྒྱན་སྨིན་གྲོལ་གླིང་གི་ཆོས་གྲྭར་གདམས་པ་དགེ་ལེགས་སུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། ༈ །།བླ་མ་ལ་གསོལ་བ་འདེབས་པ་ཞལ་གདམས་དང་འབྲེལ་བ་བཞུགས་སོ། །ན་
མཤཱི་མཱི་གུ་རུ་བྷྱ༔ སྲས་བཅས་ཕྱོགས་བཅུའི་རྒྱལ་བ་ཐམས་ཅད་ཀྱི། །མཁྱེན་བརྩེ་ནུས་པའི་ཡེ་ཤེས་གཅིག་བསྡུས་ནས། །འགྲོ་བ་འདྲེན་ཕྱིར་བཤེས་གཉེན་མཆོག་གི་སྐུར། །ཡོངས་ཤར་དཔལ་ལྡན་བླ་མར་གསོལ་བ་འདེབས། །ཁྱོད་སྐུ་དགེ་འདུན་གསུང་གསང་དམ་པའི་ཆོས། །ཐུགས་ནི་སངས་རྒྱས་ཡོན་ཏན་ཕྲིན་ལས་རྣམས། །མཁའ་འགྲོ་ཆོས་སྐྱོང་ངོ་བོར་ཤེས་པའི་བློས། །སྙིང་ནས་འབོད་དོ་ཐུགས་རྗེའི་སྤྱན་གྱིས་གཟིགས། །བདག་དང་མགོན་མེད་འགྲོ་བ་མ་ལུས་ལ། །རྗེ་བཙུན་ཁྱོད་ལས་སྐྱབས་གཞན་མ་དམིགས་ཕྱིར། །འདི་ནས་བྱང་ཆུབ་སྙིང་པོར་མཆིས་ཀྱི་བར། །འབྲལ་མེད་བྱིན་གྱིས་རློབས་ཤིག་བླ་མ་རྗེ། །དལ་འབྱོར་རྙེད་དཀའ་ནམ་འཆི་ངེས་མེད་དྲན། ཁམས་གསུམ་འཁོར་བ་སྡུག་བསྔལ་ཕུང་པོར་རིག །ལས་འབྲས་བླང་དོར་ཚུལ་བཞིན་གོམས་པ་ཡིས། །ཐུན་མོང་སྔོན་འགྲོ་འབྱོང་བར་བྱིན་གྱིས་རློབས། །བླ་མ་དཀོན་མཆོག་བསླུ་མེད་སྐྱབས་སུ་ཤེས། །བྱམས་པ་སྙིང་རྗེ་བྱང་ཆུབ་སེམས་གཉིས་བསྐྱེད། །ཚོགས་བསགས་སྒྲིབ་སྦྱོང་བླ་མའི་མོས་གུས་ཀྱིས། ། ཁྱད་པར་སྔོན་འགྲོ་འབྱོང་བར་བྱིན་གྱིས་རློབས། །འཁོར་འདས་ཆོས་ཀུན་སེམས་ཀྱིས་བཏགས་པ་སྟེ། །སེམས་ཙམ་སྐྱེ་འགག་གནས་གསུམ་སྤྲོས་པ་བྲལ། །སྤྲོས་བྲལ་ངང་ལས་གསལ་རིག་འགགས་
མེད་པའི། །ཡེ་ཤེས་ཉམས་སུ་མྱོང་བར་བྱིན་གྱིས་རློབས། །མཉམ་གཞག་ཀུན་རྟོག་རླུང་གིས་མི་གཡོ་ཞིང་། །རྗེས་ཐོབ་ཉམས་མྱོང་རྩི་དང་མ་བྲལ་བར། །ཞི་ལྷག་ཟུང་དུ་འཇུག་པའི་རྣལ་འབྱོར་གྱིས། །མཆོག་དངོས་ཚེ་འདིར་འགྲུབ་པར་བྱིན་གྱིས་རློབས། །མདོར་ན་རྣམ་ཀུན་ཆོས་བཞིན་སྤྱོད་པ་ལ། །བར་ཆད་མཚན་མ་ནམ་ཡང་མི་འབྱུང་ཞིང་། །ཐོས་བསམ་སྒོམ་པའི་ཆོས་སྤྱོད་མཐར་ཕྱིན་ནས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །ཞེས་བླ་མ་ལ་གསོལ་འདེབས་ཞལ་གདམས་དང་འབྲེལ་བ་འདི་ཡང་དོན་གཉེར་ཅན་གྱི་ངོར་བྱ་བྲལ་བ་འཇམ་དབྱངས་མཁྱེན་བརྩེས་ཆུ་བྱི་དབོ་ཟླ་བའི་དཀར་ཕྱོགས་ཀྱི་དགའ་བ་དང་པོར་གང་ཤར་བྲིས་པ་འགྲུབ་པར་གྱུར་ཅིག །མངྒ་ལཾ།། ༈ །།དོན་གྱི་རྟོགས་བརྗོད་མདོར་བསྡུས་གདམས་པ་དང་འབྲེལ་བ་གཞན་ཕན་བདུད་རྩིའི་སྤྲིན་ཆར་ཞེས་བྱ་བ། ཨོཾ་སྭ་སྟི་སིདྡྷི་རསྟུ། ཕྱོགས་དུས་རྒྱལ་བ་ཀུན་གྱི་ཡེ་ཤེས་སྒྱུ་མའི་སྐུ་གཅིག་པུ་དཔལ་ལྡན་བླ་མ་རྣམས་ཀྱི་ཞབས་ཀྱི་པདྨོ་དྲི་མ་མེད་པ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །སྐྱེ་བ་ནས་ཚེ་རབས་ཀྱི་ཕྲེང་བ་ཐམས་ཅད་དུ་བྱིན་གྱིས་བརླབ་ཏུ་གསོལ། །ཕྱི་ལྟར་ན་རིག་པའི་གནས་འགའ་ཞིག་གི་མིང་ཙམ་ཐོས་པའི་གཙུག་ལག་སྨྲ་བའི་གཟུགས་བརྙན། ནང་ལྟར་ན་
གཞན་ལ་ཕན་པའི་སེམས་ཁོ་ན་ཡིད་ལ་འཆང་བའི་རྒྱལ་སྲས་བྱང་ཆུབ་སེམས་དཔའི་ཟོལ་ཅན། གསང་བ་ལྟར་ན་ཁྱབ་བདག་བླ་མ་དམ་པ་མཁས་ཤིང་དངོས་གྲུབ་བརྙེས་པ་དུ་མས་སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོར་བྱིན་གྱིས་བརླབས་པའི་ཐེག་པ་མཆོག་གི་རྣལ་འབྱོར་པ་འཇམ་དབྱངས་མཁྱེན་བརྩེའི་དབང་པོ་ཞེས་བགྱི་བའི་གཏམ། ཕུན་སུམ་ཚོགས་པའི་བླ་མ་དགེ་འདུན་པ་རྣམས་ཀྱི་སྙན་ལམ་དུ་གསོལ་པ། ཁོ་བོ་ཅག་ཆུང་ངུ་ནས་རབ་ཏུ་བྱུང་བའི་ངང་ཚུལ་ལ་དད་ཅིང་། ཅུང་ཟད་ནར་སོན་པ་ན་རིག་པའི་གནས་འགའ་དང་། ལྷག་པར་བཀའ་དྲིན་ཆེ་བའི་ཡོངས་འཛིན་དམ་པ་ཉི་ཤུ་རྩ་གསུམ་གྱིས་མཚོན་ཆོས་སྨྲ་བའི་བཤེས་གཉེན་བརྒྱད་ཅུ་རྩ་ལྷག་ལས་སྡོམ་པ་གསུམ་གྱི་རྒྱུན་རྣམ་པར་དག་པ་ཐོབ་ཅིང་། སྡེ་སྣོད་གསུམ་དང་རྒྱུད་སྡེ་བཞིའི་ཟབ་རྒྱས་གདམས་པའི་བདུད་རྩི་ངོམ་པ་མེད་པར་བཏུང་། དེ་དག་གི་དོན་ལ་ཅུང་ཟད་དཔྱད་པས། ནམ་འཆི་ཆ་མེད་དང་། ཅེས་ཀྱང་དགོས་མེད་སྙམ་པའི་བློ་སྣ་ཐུང་དེ་བས་གཞི་བཟུང་། སོ་ཐར་གྱི་དབང་དུ་བྱས་ན་རྩ་བཞི་ཆང་བག་མེད་བཏུང་བ་སྟེ་ལྔ་སྤོང་བ་དང་། བྱང་ཆུབ་སེམས་དཔའི་དབང་དུ་བྱས་ན་གཞན་ལ་ཞེ་ཐག་པ་ནས་གནོད་པའི་སེམས་སྤངས་ཤིང་། ཕན་པ་ཁོ་ན་རྒྱུད་ལ་བསྟེན་པ། གསང་སྔགས་ཀྱི་དབང་དུ་བྱས་ན་བླ་མ་དམ་པ་
རྣམས་ལ་སྙིང་ནས་སྨོད་པའི་ལོག་ལྟ་སོགས་རྨི་ལམ་དུའང་སྤངས་ཤིང་། དག་སྣང་ཅི་ནུས་སྦྱང་བས་སྡོམ་པ་གསུམ་གྱི་རྩ་བ་ལ་ཉེས་པས་མ་གོས་ཤིང་། ཡན་ལག་ཕྲ་ཞིབ་རྣམས་བཤགས་སྡོམ་སོགས་ཀྱི་འདུན་པ་ལ་སྦྱོར། དུས་ནམ་དུའང་སུའི་ཁ་ལ་མི་ཉན་ཅིང་ཉེ་ཆེ་བ་དང་། མཁོན་ཆེ་བ་གཉིས་ཀའི་ཕྱོགས་སུ་མ་ལྷུང་བས་བསྟན་པ་དང་སེམས་ཅན་ལ་ཕན་པ་མ་འགྲུབ་ཀྱང་རུང་། གནོད་ཚབ་ཆེ་བ་རང་མ་གྱུར་ཅིང་། གང་དུ་གནས་ཀྱང་བློ་བདེ་ཞིང་སྐྱིད་པ་བདོག་པ་ནི་སྔར་ཕན་ཡོན་ཏན་དུ་རློམ་པའི་རྟོགས་པ་བརྗོད་པ་ལགས་ཤིང་། སླད་ནས་ཅི་འགྱུར་བླ་མ་དང་དཀོན་མཆོག་གི་ཐུགས་རྗེ་ལ་རགས་ལས་པ་ཡིན་མོད། གཞན་སུ་ལའང་རེ་དོགས་མེད། ཉིད་རྣམས་ནས་ཀྱང་དལ་འབྱོར་གྱི་རྟེན་ལན་གཅིག་ཐོབ་པ་འདི་རྙེད་དཀའ་ཞིང་ཕན་འདོགས་ཆེ། ནམ་འཆི་བའི་ཆ་མེད། ཤི་བའི་ཚེ་ཆོས་མ་གཏོགས་པ་གང་གིས་ཀྱང་མི་ཕན་ངེས་པས་ནམ་འཆི་ཆ་མེད་ཀྱི་དྲན་ཤེས་དང་མ་བྲལ་བའི་ངང་སྡོམ་པ་གསུམ་གྱི་རྩ་བ་གོང་དུ་བཤད་པ་རྣམས་ལ་སྲུང་སྡོམ་སྲོག་དང་བསྡོས་ཏེ་བྱ།། རང་རེ་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཡིན་པས་དགོན་པར་སྡོད་ཅི་ཚུགས་སུ་བྱ་བ་ལས། གྲོང་ནག་ཏུ་འཁྱམས་པ་ལ་དགེ་མཚན་ཅི་ཡང་མེད། དགྲ་འདུལ། གཉེན་སྐྱོང་། ཁྱིམ་གྱི་འཚོ་
ཆིས། ཚོང་དང་སོ་ནམ། ཆགས་སྡང་རེ་དོགས་སོགས་བྱ་བ་ངན་ངོན་ཅུང་ཟད་ལ་ཆགས་ནས་དེ་ཉིད་མཆོག་ཏུ་འཛིན་པ་ནི་ཁྱི་ལུད་ལ་གསེར་དུ་འཁྲུལ་ནས་གཅེས་སྤྲས་སུ་བྱེད་པ་དང་མཚུངས་ངེས་པ་ཡིན་པས། སྙིང་ཡོད་རྣམས་ཀྱིས་མནོ་བསམ་ཐོངས། དེ་བས་ན་དལ་འབྱོར་སྟོང་ལོག་མི་ཚེ་ཅི་ཆོད་དུ་མ་སོང་བར། གཙོ་བོར་རང་དོན་དུ་ཐོས་བསམ་སྒོམ་གསུམ་ཅི་ནུས་དང་། ལས་རྒྱུ་འབྲས་ལ་ཞིབ་ཏུ་དཔྱད། འཁོར་བ་ལ་ངེས་འབྱུང་། སེམས་ཅན་ལ་སྙིང་རྗེ། བླ་མ་ལ་མོས་གུས། འཁོར་འདས་དབྱེར་མེད་ཀྱི་ལྟ་བ་རྣམས་ལ་མྱོང་བ་ཅི་ཐོན་དུ་བྱ། ལྷག་པར་ཆོས་སྡེའི་བསྒྲིགས་ཀུན་སྤྱོད་དང་མ་འགལ་བའི་ངོས། བསམ་པ་བཟང་པོ་ཁོ་ན་ཐེག་ཆེན་ལམ་དུ་ཞུགས་ཚད་ཐམས་ཅད་ཀྱི་ལམ་གྱི་རྩ་བ་ཡིན་པས་དགོངས་འཚལ། དེ་ཙམ་ལས་ལྷག་པའི་ཞུ་བ་མང་པོ་ནི་བཀའ་དང་བསྟན་བཅོས་རྒྱ་མཚོ་ལྟ་བུ་ལ་གཟིགས་པས་ཁྱབ་པའི་ཕྱིར་འདིར་སྙིང་པོར་དྲིལ་བ་ལགས་སོ། །ཨ་ཧོ་རང་ལ་ཡོན་ཏན་མ་མཆིས་ཀྱང་། །རྗེ་བཙུན་བླ་མ་རྣམས་ཀྱི་བྱིན་རླབས་དང་། །ལྷག་བསམ་བསམ་པ་བཟང་པོས་ཚིག་འགའ་ཞིག །བླ་མེད་དགེ་འདུན་བཅས་པའི་སྙན་དུ་གསོལ། ཁོ་བོ་ཕྱོགས་མེད་རྒྱལ་ཁམས་བྱ་བྲལ་བ། །གཏད་མེད་ཀུན་ཏུ་རྒྱུ་བའི་ཐ་མའི་ཚིག །གསོན་ཡང་ལབ་གླེང་དེ་ལས་མ་མཆིས་
ཤིང་། །ཤི་ཡང་ཁ་ཆེམ་སྙིང་པོ་འདི་ཀ་ལགས། །ཀྱེ་མ་བསྟན་འཛིན་མཆོག་རྣམས་ཞིང་གཞན་གཤེགས། །བཤད་སྒྲུབ་བསྟན་པ་མིང་གི་ལྷག་མར་གྱུར། །འགྲོ་བའི་བདེ་སྐྱིད་ནམ་མཇུག་སྦྲང་བུ་ལྟར། །གྱུར་པའི་ཚུལ་འདིར་སུ་ཞིག་སྐྱོ་མི་བྱེད། །དེ་སླད་ཚེ་ལྷག་ཅི་ཙམ་མཆིས་པ་འདིར། །ཚེ་འདིའི་སྣང་བའི་རྗེས་སུ་མི་འབྲང་བར། །འཆི་ཆོས་སྙིང་ནས་ནུས་པ་བླ་མ་དང་། །དཀོན་མཆོག་རིན་ཆེན་གསུམ་གྱི་བྱིན་བརླབ་མཛོད། །རང་རེ་དཔོན་སློབ་ཆོས་དམ་འབྲེལ་བའི་མཐུས། །ཚེ་འདིར་ཡང་ཡང་མཇལ་ཞིང་ཆོས་མཐུན་གྱི། །བསམ་སྦྱོར་མཐའ་དག་གེགས་མེད་འགྲུབ་པ་དང་། །སྲིད་ཞིའི་ལེགས་ཚོགས་རྒྱས་པའི་བཀྲ་ཤིས་ཤོག །ཅེས་པའང་རྒྱལ་སྲས་བྱང་ཆུབ་སེམས་དཔའི་སྤྱོད་པ་ལ་སྙིང་ནས་དད་པ་ཐོབ་པའི་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བོད་ཆེན་པོའི་ལྗོངས་ནས་དབུས་གཙང་ལོངས་སྤྱོད་རྫོགས་སྐུའི་ཞིང་ཁམས་སུ་བསྐྱོད་པའི་ཚེ་གང་དྲན་སྨྲས་པ་ཀུན་ལ་ཕན་པར་གྱུར་ཅིག །སརྦ་དཱ་མངྒ་ལཾ།། ༈ །།རྫོགས་པ་ཆེན་པོ་གཞི་ལམ་འབྲས་གསུམ་ལས་འཕྲོས་པའི་གཏམ་ཉུང་ངུ་བཞུགས། །ན་མོ་གུ་ར་ཝེ། གང་གི་རང་བཞིན་གཟུང་འཛིན་སྤྲོས་པའི་ཚོགས། །མ་ལུས་ཤར་གྲོལ་དུས་མཉམ་དབྱིངས་སུ་ཐིམ། །ད་ལྟའི་ཤེས་པ་
བསམ་བརྗོད་བྲལ་བའི་གཤིས། །འོད་གསལ་སེམས་ཀྱི་རྡོ་རྗེས་ཁྱོད་བྱིན་རློབས། །རྒྱལ་བས་གདུལ་བྱ་རྒྱ་མཚོའི་ཁམས་དབང་དང་། །བསམ་པའི་རྗེས་མཐུན་བགྲང་ཡས་ཐེག་པའི་རིམ། །བསྟན་ཀྱང་དབང་པོ་ཤིན་ཏུ་རྣོན་པོ་ལ། །ངེས་དོན་རྫོགས་པ་ཆེན་པོའི་ཆོས་ཆར་ཕབ། །དེ་ཕྱིར་ཐེག་བརྒྱད་བློ་ཡི་གྲུབ་མཐའི་ཕྱིར། །དེ་ལས་བསྟན་པའི་སྡོམ་པ་རྣམ་གསུམ་དང་། །ཕར་ཕྱིན་དྲུག་དང་ས་བཅུ་ལམ་ལྔ་སོགས། །ཀུན་ཀྱང་ཤིན་ཏུ་རྣལ་འབྱོར་རྐང་སྟེགས་ཡིན། །དེ་ལྟའི་ཐུན་མོང་མ་ཡིན་ཚུལ་འདིར་ཡང་། །གཞི་རྒྱུད་འཁོར་འདས་བསལ་བཞག་མ་གྲུབ་པའི། །ཀ་དག་ནང་གསལ་གཞོན་ནུ་བུམ་སྐུའི་གཤིས། །ཕྱིར་གསལ་ལྷུན་གྲུབ་སྒོ་བརྒྱད་སྤྲིན་དུ་ཤར། །དེ་ཉིད་རང་ངོ་རིག་པའི་སྐད་ཅིག་ཏུ། །གཞི་ལས་འཕགས་པའི་གཞི་སྣང་ཡེ་ཤེས་སུ། །ཁྱད་ཆོས་དྲུག་དང་ལྡན་པར་སངས་རྒྱས་པ། །ཐོག་མའི་མགོན་པོ་ཀུན་ཏུ་བཟང་པོའོ། །དེ་ལྟར་མ་རྟོགས་གཉིས་སུ་འཛིན་པའི་བློས། །མ་རིག་གསུམ་གྱིས་འཁོར་བའི་ཐོག་མ་བཀོད། །རྐྱེན་བཞིས་འཁོར་བའི་ལས་སྣང་འདུ་བྱས་པས། །མུ་མཐའ་མེད་པའི་སྲིད་ཁམས་རྒྱ་མཚོར་འཁྱམས། །ལམ་དུས་དཔལ་ལྡན་བླ་མའི་བཀའ་དྲིན་གྱིས། །རིག་སྟོང་རྗེན་པ་མངོན་སུམ་ངོ་འཕྲོད་ནས། །ཅོག་བཞག་བཞི་ཡི་ལྷུམས་སུ་ཞུགས་པ་
ཡིས། །གྲོལ་བཞིའི་གདེང་ཐོབ་གཉིས་ཆོས་རིག་ངོར་ཡལ། ཁྱད་པར་སྟོང་ངོས་ཀ་དག་ཉམས་ལེན་ནི། །འཛིན་པའི་ཆོས་ཀུན་ཟད་པར་བྱེད་པ་སྟེ། །གཟོད་ནས་དག་པའི་མཚན་གྱིས་མོས་པས་ན། །འཁོར་ལོ་བར་ཉིད་ལྟ་བ་མཐར་ཐུག་ཡིན། །སྣང་ངོས་ལྷུན་གྲུབ་ཐོད་རྒལ་ལམ་གྱི་མཆོག །ཉམས་བླངས་གཟུང་བའི་ཡུལ་ཀུན་གྲོལ་བྱེད་དེ། །བདེ་གཤེགས་སྙིང་པོའི་རང་རྩལ་མངོན་མཐོང་ཕྱིར། །འཁོར་ལོ་ཐ་མའི་བཞེད་གཞུང་དྲི་བྲལ་ལགས། །དེས་ན་ཤིན་ཏུ་རྣལ་འབྱོར་གྲུབ་མཐའ་ནི། །ཀུན་དང་མཐུན་ལ་ཀུན་ལས་ཁྱད་འཕགས་ཤིང་། །ཀུན་གྱིས་ཕྱོགས་རེ་ཙམ་ལས་མ་མཐོང་ཕྱིར། །འདི་ཉིད་ཁོ་ནས་ངེས་དོན་མཆོག་ཏུ་གྲུབ། །འབྲས་དུས་ངོ་བོ་ཡེ་ནས་དག་པ་ལ། །གློ་བུར་དྲི་མའི་རང་བཞིན་རྟོགས་སྒོམ་གྱིས། །བསྐྱར་ནས་དག་སྟེ་ཆོས་སྐུ་དམ་པའི་གྲོང་། །ཟུང འཇུག་རབ་ཏུ་མི་གནས་ཆེན་པོར་གྲོལ། །དེ་ལས་མ་འགག་རོལ་པའི་སྙིང་རྗེའི་སྤྲིན། ཁ་སྦྱོར་བདུན་ལྡན་ལོངས་སྤྱོད་རྫོགས་པ་དང་། །སྣ་ཚོགས་སྤྲུལ་པའི་རྣམ་གྲོལ་མཐའ་ཀླས་ཀྱིས། །མཁའ་ཁྱབ་འགྲོ་བའི་དོན་ལ་རྟག་པར་འཇུག །མདོར་ན་དེ་ལས་མང་དུ་སྨོས་ཅི་དགོས། །ལྟ་བ་བྱར་མེད་བསྒོམ་པ་བློ་དང་བྲལ། །འབྲས་བུ་མཉམ་རྗེས་ལས་འདས་ཆོས་ཉིད་ཀློང་། །འདུ་འབྲལ་མེད་པའི་ཚུལ་
དུ་ངལ་བསོས་ཤིག །དེ་ལྟར་ཐེག་རྩེ་མན་ངག་སྡེ་པ་ཡི། །དགོངས་དོན་གཞི་ལམ་འབྲས་བུའི་ཆོས་ཀྱི་གཏམ། །བློ་དམན་དགའ་བ་བསྐྱེད་ཕྱིར་ཚིག་གི་ཕྲེང་། །ཅུང་ཟད་ཙམ་དུ་བསྡུས་ཏེ་རབ་སྤེལ་མདོ། །གཞན་དུ་བཅུ་བདུན་རྒྱུད་དང་དེའི་དགོངས་འགྲེལ། །ཤིང་རྟ་ཆེན་པོ་དྲི་མེད་འོད་ཟེར་དང་། །ཡེ་ཤེས་སྐུ་ཅན་འཇིགས་མེད་གླིང་པ་སོགས། །དམ་པའི་བཞེད་གཞུང་རྣམས་ལ་ཐོས་བསམ་མཛོད། །ཤིན་ཏུ་གླེང་བར་འོས་པའི་སྤྲིངས་ཡིག་འདིས། །ཡིད་ལ་གྲུབ་པའི་ལང་ཚོ་འཛིན་གྱུར་ཏེ། །བྱང་ཆུབ་མཆོག་གི་རྒྱལ་སར་རོ་གཅིག་པར། །མི་ཕྱེད་རྡོ་རྗེའི་རྣལ་འབྱོར་མཐར་ཕྱིན་ཤོག ། རང་བཞིན་རྫོགས་པ་ཆེན་པོ་གཞི་ལམ་འབྲས་གསུམ་གྱི་ཚུལ་ལས་འཕྲོས་པའི་གཏམ་ཉུང་ངུ་འདི་ཡང་དཔྱོད་ལྡན་པརྱ་དྷརྨ་བྷ་དྲས་དགྱེས་པ་བསྐྱེད་པའི་ཕྱིར་དུ་ཐེག་རྩེ་ཤིན་ཏུ་རྣལ་འབྱོར་ལ་མོས་པ་བརྟན་པོས་ཆོས་འདིའི་རིགས་སུ་སད་པའི་སྐལ་བཟང་ཐོབ་ཀྱང་། སྙོམ་ལས་ཁོ་ནའི་བྲན་དུ་གྱུར་པ་སེར་གཟུགས་ཐ་ཤལ་ལས་ཀྱང་ཆེས་ཐ་ཤལ་བ་འཇིགས་མེད་མཁྱེན་བརྩེའི་ཟློས་གར་དུ་སྒྲོ་བཏགས་པས་སྣང་གསལ་ཞིག་གི་ངོགས་སུ་གང་ཤར་འདི་ཀ་ལྟར་བྲིས་ཏེ་ཕུལ་བ་སརྦ་སུ་ཛ་ག་ཏཱཾ། ༈ །།ན་མཤྲཱི་གུ་ར་ཝེ། གང་གི་མཚན་ཙམ་ལན་གཅིག་དྲན་པས་ཀྱང་། །གཟུང་འཛིན་སྙིང་གི་མུན་པ་ཀུན་
བསལ་ནས། །བློ་གྲོས་པདྨ་མཆོག་ཏུ་རྒྱས་མཛད་པ། །བླ་མ་འཇམ་དཔལ་གཞོན་ནུས་ཤིས་པར་མཛོད། །དམར་སེར་མཛེས་སྐུའི་སྣང་བརྙན་མངོན་སུམ་དུ། །སྐལ་བཟང་མིག་གི་བདུད་རྩིར་བཏུང་བ་དང་། །ལྷན་ཅིག་རྡོ་རྗེའི་གསུང་གིས་དབུགས་དབྱུང་བའི། །དགེ་མཚན་མཆོག་གིས་རྟག་ཏུ་སྐྱོང་གྱུར་ཅིག །གཟོད་ནས་མཐའ་བཞིའི་སྤྲོས་པ་ལས་འདས་པའི། །འོད་གསལ་སེམས་ཀྱི་རྡོ་རྗེ་འཇམ་པའི་དབྱངས། །སྙིང་དབུས་ཐིག་ལེར་སད་པའི་སྣང་བ་ཡི། །སྲིད་ཞིའི་རྒུད་པ་མཐའ་དག་སེལ་བར་ཤོག །དེ་ཚེ་ཐ་མལ་འཁྲུལ་བའི་རྟོག་ཚོགས་ཀུན། །འཇམ་དཔལ་ཡེ་ཤེས་སེམས་དཔས་བྱིན་བརླབས་པས། །སྣང་གྲགས་རིགས་གསུམ་ལྷ་སྔགས་ཆོས་ཉིད་ཀྱི། །དག་པའི་རྣམ་རོལ་གཅིག་ཏུ་འཆར་གྱུར་ཅིག །མཐར་ཐུག་སངས་རྒྱས་ཀུན་གྱི་ཡེ་ཤེས་སྐུ། །བཅོམ་ལྡན་རྡོ་རྗེ་རྣོན་པོའི་གསང་གསུམ་དང་། །དབྱེར་མེད་རྣམ་པ་ཉི་ཤུའི་བྱང་ཆུབ་པའི། །སྒྱུ་འཕྲུལ་དྲྭ་བའི་གོ་འཕང་བསྙེས་པར་ཤོག །ཅེས་པ་འདིའང་འཇམ་དབྱངས་མཁྱེན་བརྩེས་ཐོལ་བྱུང་དུ་སྨྲས་སོ།། ༈ །།ཨ་ཧོ། སྐྱབས་ཀུན་འདུས་ཞལ་མཚོ་སྐྱེས་རྡོ་རྗེ་དེ་མཁྱེན་ནོ། །བྱིན་རླབས་ཆར་ཆེན་ཕོབས་ཤིག་རིག་འཛིན་གྱི་བླ་མ། །དལ་འབྱོར་རྙེད་དཀའ་ཐོབ་པ་ད་རེས་ཙམ་ཡིན་ནོ། །དོ་ནུབ་ཁོ་ནར་མི་འཆིའི་
གདེང་ཚད་ཀྱང་མེད་པས། །སྲིད་ལས་ངེས་པར་འབྱུང་བའི་སྐྱོ་ཤས་དང་འགྲོགས་ནས། །དཀར་ནག་ལས་འབྲས་བླང་དོར་ཚུལ་བཞིན་དུ་འབད་འཚལ། །བླ་མ་དཀོན་མཆོག་གསུམ་ལ་སྐྱབས་གནས་སུ་བཟུང་ནས། །སྨོན་འཇུག་བྱང་ཆུབ་སེམས་གཉིས་འབྲལ་མེད་དུ་བསྐྱེད་ཅིང་། །བླ་མ་རྡོ་རྗེ་སེམས་དཔའི་རྣལ་འབྱོར་ལ་བརྟེན་ནས། །སྡིག་སྒྲིབ་ཉེས་ལྟུང་ཚོགས་ཀུན་ལྷག་མེད་དུ་སྦྱོངས་ཤིག །སྐུ་གསུམ་མཆོད་པའི་སྤྲིན་གྱི་མཎྜལ་ལ་བརྟེན་ནས། །ཚོགས་གཉིས་ཡོངས་སུ་རྫོགས་པའི་ཐབས་མཁས་ལ་འབད་ཅིང་། །ཁྱད་པར་མོས་གུས་བླ་མའི་རྣལ་འབྱོར་ལ་བརྟེན་ནས། །དབང་བཞིའི་ཡེ་ཤེས་འགྲུབ་པའི་ལམ་བཟང་ལ་བསྙེན་ཅིག །འཁོར་འདས་ཆོས་ཀུན་སེམས་ཉིད་གཅིག་པུ་ཡི་ཆོ་འཕྲུལ། །སེམས་ཀྱང་རིག་སྟོང་ཟུང་འཇུག་བློ་བྲལ་གྱི་རང་བབས། །མ་ཡེངས་མི་བསྒོམ་གཉུག་མའི་དྲན་པ་དང་འགྲོགས་ནས། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ། །ཞེས་ཕྱོགས་མེད་རིས་མེད་ལྟོས་མེད་ཀྱི་བྱ་བཏང་འཇམ་དབྱངས་མཁྱེན་བརྩེའི་དབང་པོས་བྲིས་པ་དོན་དང་ལྡན་པར་གྱུར་ཅིག། ༈ །ཨ། །ད་ལྟའི་ཤེས་པ་མ་བཅོས་གཉུག་མའི་གཤིས། །གསལ་སྟོང་ཟུང་འཇུག་བརྗོད་པའི་མཐའ་ལས་འདས། །འདི་ཀ་དོན་གྱི་བླ་མ་ཡི་དམ་སྟེ། །མ་ཡེངས་མི་བསྒོམ་ངང་དུ་ལྷུག་
པར་ཞོག །དེ་ཚེ་བླ་མ་རྣམས་དང་འདུ་འབྲལ་མེད། །ཡི་དམ་མཁའ་འགྲོ་ཆོས་སྐྱོང་མ་བསྒྲུབ་འགྲུབ། །རེ་དོགས་ཐམས་ཅད་ངོ་བོའི་སྟེང་དུ་ཆོད། །གཟུང་འཛིན་རྟོག་ཚོགས་རང་གྲོལ་དབྱིངས་སུ་ཐིམ། །མདོར་ན་རིག་སྟོང་ཟུང་འཇུག་འོད་གསལ་ངང་། །དུས་གསུམ་འདུ་འབྲལ་མེད་པའི་ཉམས་ལེན་གྱིས། །འཆི་མེད་སྐུ་གསུམ་ཀུན་འདུས་ཐོད་ཕྲེང་རྩལ། །བློ་འདས་གོ་འཕང་མངོན་འགྱུར་བཀྲ་ཤིས་ཤོག ༈ །།ཨ། རང་བྱུང་རིག་པ་སྟོང་གསལ་འདུས་མ་བྱས། །སྨྲ་བསམ་བརྗོད་མེད་བློ་ལས་འདས་པའི་ངང་། །བཅས་བཅོས་སྤང་བླང་མེད་པར་རང་བཞག་པས། །འཁོར་འདས་གཉིས་སྣང་མཚན་མ་དབྱིངས་སུ་གྲོལ། །དེ་ཕྱིར་ད་ལྟའི་ཤེས་པ་སྐད་ཅིག་མ། །འདི་ཉིད་ངང་དུ་རང་བབས་ཀློད་ལ་ཞོག །བླ་མ་ཡི་དམ་མཁའ་འགྲོ་ཐམས་ཅད་དང་། །འདུ་འབྲལ་མེད་པའི་ཡེ་ཤེས་རང་ལ་ཤར། །དང་པོ་མ་སྐྱེས་བར་དུ་གནས་པ་མེད། །ཐ་མ་འཆི་མེད་དོན་གྱི་པདྨ་འབྱུང་། །ངོ་ཤེས་ཐག་ཆོད་བརྟན་པ་ཐོབ་པ་ཡིས། །གདོད་མའི་བཙན་ས་ཟིན་པའི་བཀྲ་ཤིས་ཤོག །ཅེས་པའང་འཇམ་དབྱངས་མཁྱེན་བརྩེའི་དབང་པོས་སྨྲས་པ་དགེ་ལེགས་སུ་གྱུར་ཅིག། ༈ །།ཕྱོགས་དུས་རྒྱལ་བ་སྲས་བཅས་སྐུ་གསུང་ཐུགས། །ཡོན་ཏན་ཕྲིན་ལས་མ་ལུས་འདུས་པའི་
དངོས། །དྲན་པས་གདུང་སེལ་དཔལ་ལྡན་བླ་མ་ལ། །མི་ཕྱེད་སྒོ་གསུམ་གུས་པས་ཕྱག་འཚལ་ལོ། །གསོལ་བ་འདེབས་སོ་དྲིན་ཅན་ཆོས་ཀྱི་རྗེ། །བྱིན་གྱིས་རློབས་ཤིག་རྩ་བརྒྱུད་བླ་མའི་ཚོགས། །དངོས་གྲུབ་སྩོལ་ཅིག་དམ་ཅན་རྒྱ་མཚོའི་ཚོགས། །སྙིང་ནས་དྲན་ནོ་ཐུགས་རྗེའི་སྤྱན་གྱིས་གཟིགས། །དལ་འབྱོར་རྙེད་དཀའ་ནམ་འཆི་ངེས་མེད་དང་། །འཁོར་བའི་སྡུག་བསྔལ་དྲན་པའི་ངེས་འབྱུང་གིས། །ལས་འབྲས་བླང་དོར་ཚུལ་བཞིན་བརྩོན་པ་དང་། །བྱང་ཆུབ་སེམས་གཉིས་འབྱོང་བར་བྱིན་གྱིས་རློབས། །དབང་གིས་རྒྱུད་སྨིན་དམ་ཚིག་རྣམ་པར་དག །བསྐྱེད་པའི་རིམ་པས་ཅིར་སྣང་ལྷ་སྒྱུར་ཤར། །རྫོགས་རིམ་ཟབ་མོས་རླུང་སེམས་དབུ་མར་ཐིམ། །བདེ་ཆེན་ཡེ་ཤེས་འགྲུབ་པར་བྱིན་གྱིས་རློབས། །ཀ་དག་ཁྲེགས་ཆོད་གནས་ལུགས་མངོན་དུ་གྱུར། །ལྷུན་གྲུབ་ཐོད་རྒལ་རིག་པ་ཚད་ལ་ཕེབས། །ཟུང་འཇུག་ཁྱད་ཆོས་དྲུག་ལྡན་གཉུག་མའི་ཀློང་། །གདོད་མའི་གཏན་སྲིད་ཟིན་པར༔ གཟུང་འཛིན་སྤྲོས་བྲལ་དབུ་མ་ཆེན་པོའི་གཞི། །རང་བྱུང་རིག་པ་ཕྱག་རྒྱ་ཆེན་པོའི་ལམ། །དབྱིངས་རིག་དབྱེར་མེད་འོད་གསལ་རྫོགས་པ་ཆེའི། །འབྲས་བུ་མངོན་དུ་འགྱུར་བར བསམ་གྱིས་མི་ཁྱབ་ལྟ་བའི་གནས་ལུགས་མཐོང་། །དེ་ཉིད་ངང་གཞག་སྒོམ་པའི་རྩལ་ཆེན་རྫོགས། །
ཤར་གྲོལ་དུས་མཉམ་སྤྱོད་པ་མཐར་ཕྱིན་ནས། །འཁོར་འདས་སྤང་བླང་བྲལ་བར༴ ངོ་བོ་ཆོས་སྐུའི་དབྱིངས་ལས་མ་གཡོས་བཞིན། །རང་བཞིན་ལོངས་སྤྱོད་རྫོགས་སྐུའི་ཡེ་ཤེས་དང་། །ཐུགས་རྗེ་སྤྲུལ་པའི་རྣམ་འཕྲུལ་བསམ་ཡས་ཀྱིས། །རང་གཞན་དོན་གཉིས་འགྲུབ་པར་བྱིན༴ གཞན་ཡང་གནས་སྐབས་ཆོས་བཞིན་སྤྱོད་པ་ལ། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །མ་ལུས་ཕུན་སུམ་ཚོགས་པ་ཡིས། །དགེ་མཚན་སྣང་བ་རྒྱས་པའི་བཀྲ་ཤིས་ཤོག །ཅེས་པའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཞལ་གདམས་སྨོན་ལམ་གྱི་ཚུལ་དུ་བྲིས་པ་དོན་དང་ལྡན་པར་གྱུར་ཅིག །མངྒ་ལཾ། ༈ །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །དལ་འབྱོར་རྙེད་དཀའ་ནམ་འཆི་ངེས་པ་མེད། །ལས་ཀྱི་འབྲས་བུ་ནམ་ཡང་མི་བསླུ་ཞིང་། །འཁོར་བ་གར་སྐྱེས་སྡུག་བསྔལ་རང་བཞིན་ཕྱིར། །ངེས་འབྱུང་དྲག་པོས་སྲིད་ལས་འདའ་བར་མཛོད། །རང་ཉིད་གཅིག་པུར་འཁོར་བ་ལས་ཐར་ཡང་། །ཉན་རང་དམན་པའི་ལམ་ལས་མ་འདས་པས། །མ་གྱུར་འགྲོ་ལ་བྱམས་དང་སྙིང་རྗེ་དང་། །སྨོན་འཇུག་བྱང་ཆུབ་སེམས་གཉིས་རྟག་ཏུ་བསྐྱེད། །གཟུང་བའི་ཡུལ་ཀུན་རྨི་ལམ་སྒྱུ་མ་འདྲ། །འཛིན་པའི་སེམས་ཀྱང་སྟོང་གསལ་འདུས་
མ་བྱས། །སྤྲོས་མེད་ངང་ནས་སྣང་གྲག་རྟོག་ཚོགས་ཀུན། །ལྷ་སྔགས་ཆོས་ཉིད་གཉུག་མར་ལམ་ཁྱེར་འཚལ། །ཞེས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གདམས་པ་དོན་དང་ལྡན་པར་གྱུར་ཅིག། ༈ །།ཞལ་གདམས་སྨོན་ཚིག་བཞུགས། དུས་གསུམ་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་པའི་ཡེ་ཤེས་སྐུ། །གཅིག་བསྡུས་དཔལ་ལྡན་བླ་མ་ལ། །སྙིང་ནས་གུས་པས་གསོལ་བ་འདེབས། །དལ་དང་འབྱོར་པ་རྙེད་དཀའི་རྟེན། །ཡིད་བཞིན་ནོར་བུ་ལས་ཀྱང་ལྷག །དེ་ཕྱིར་སྙིང་པོ་ལེན་པའི་བློས། །ཐར་པའི་ལམ་ལ་འཇུག་པར་ཤོག །འདུས་བྱས་ཐམས་ཅད་མི་རྟག་ཅིང་། །ཆོས་མིན་ཕན་མེད་པས། །འཆི་ཆོས་སྙིང་ནས་སྒྲུབ་པར་ཤོག །དཀར་ནག་ལས་ཀྱི་འབྲས་བུ་ནི། །ནམ་ཡང་བསླུ་བ་མེད་པའི་ཕྱིར། །དགེ་སྡིག་བླང་དོར་མ་ནོར་བར། །དྲན་ཤེས་བརྟན་པོས་ཉམས་ལེན་ཤོག །འཁོར་བའི་གནས་རིས་མཐོ་དམན་ཀུན། །སྡུག་བསྔལ་གསུམ་གྱི་རང་བཞིན་དུ། །ཤེས་ནས་ངེས་པར་འབྱུང་བའི་བློས། །བདེན་བཞིའི་ཡུལ་ལ་འཇུག་པར་ཤོག །བླ་མ་དཀོན་མཆོག་རྣམ་གསུམ་ལ། །དང་འདོད་ཡིད་ཆེས་དད་པ་ཡིས། །སྙིང་ནས་སྐྱབས་སུ་འགྲོ་བ་དང་། །བསླབ་བྱ་ཚུལ་བཞིན་སློབ་པར་ཤོག །ཁྱད་པར་
མཁའ་མཉམ་སེམས་ཅན་ཀུན། །དྲིན་ཅན་ཕ་མར་ཤེས་པའི་བློས། །བྱམས་དང་སྙིང་རྗེ་བྱང་ཆུབ་སེམས། །བཅོས་མིན་རྒྱུད་ལ་སྐྱེ་བར་ཤོག །མདོར་ན་འདི་ཕྱི་བར་དོ་ཀུན། །རེ་ས་བླ་མ་ལས་གཞན་མེད། །ཐུགས་ཡིད་གཅིག་ཏུ་འདྲེས་པ་དང་། །བསམ་དོན་ཆོས་བཞིན་འགྲུབ་པར་ཤོག །ཅེས་པའང་གོང་རྗེ་ཆོས་རྒྱལ་ཆེན་པོའི་མདུན་ན་འདོན་རྣམ་པར་དཀར་བའི་ཐུགས་བསྐྱེད་ཅན་བཀྲ་ཤིས་ཚེ་འཕེལ་ལགས་ནས་ཞལ་གདམས་ཤིག་དགོས་ཞེས་བསྐུལ་བ་ལྟར་སྨོན་ཚིག་དང་འབྲེལ་བར་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་དོན་དང་ལྡན་པར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །།
ཤོག་སྟོང་