གསུང་ངག་རིན་པོ་ཆེའི་ལམ་རིམ་གསོལ་འདེབས་སྨོན་ལམ་མདོར་བསྡུས་པ་བྱིན་རླབས་དཔལ་སྟེར།
༄༅། །གསུང་ངག་རིན་པོ་ཆེའི་ལམ་རིམ་གསོལ་འདེབས་སྨོན་ལམ་མདོར་བསྡུས་པ་བྱིན་རླབས་དཔལ་སྟེར་ཞེས་བྱ་བ་བཞུགས་སོ། །
༄༅། །རྩ་བརྒྱུད་བླ་མ་ཡི་དམ་ཀྱེ་རྡོ་རྗེ། །རྣལ་འབྱོར་མ་དཔལ་ཆོས་སྲུང་ནོར་ལྷ་སོགས། །སྐྱབས་གནས་དཀོན་མཆོག་རྒྱ་མཚོའི་ཚོགས་རྣམས་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །བདག་གཞན་འགྲོ་ཀུན་སྐྱེ་བ་ཐམས་ཅད་དུ། །དམ་ཆོས་སྒྲུབ་པའི་རྟེན་མཆོག་ལེགས་ཐོབ་ནས། །ཐེག་ཆེན་རིགས་སད་དད་པ་རྣམ་གསུམ་གྱིས། །བཤེས་གཉེན་ཚུལ་བཞིན་བསྟེན་པར་བྱིན་གྱིས་རློབས། ཁམས་གསུམ་འཁོར་བ་མེ་འོབས་ལྟ་བུར་མཐོང་། །དལ་འབྱོར་རྙེད་དཀའ་འཇིག་སླའི་ངང་ཚུལ་རིག ། ལས་འབྲས་བསླུ་མེད་ཡིད་ཆེས་བརྟན་པོ་ཡིས། །བླང་དོར་འཁྲུལ་མེད་སྤྱོད་པར་བྱིན་གྱིས་རློབས། །མཁའ་ཁྱབ་འགྲོ་ཀུན་ཕ་མ་དྲིན་ཅན་ཕྱིར། །བྱམས་དང་སྙིང་རྗེ་བྱང་
ཆུབ་སེམས་གཉིས་འབྱོངས། །འབྲས་བུའི་ཡོན་ཏན་ཐོས་པས་རྒྱུད་བསྐུལ་ནས། །གསང་ཆེན་ལམ་ལ་འཇུག་པར་བྱིན་གྱིས་རློབས། །དབང་གིས་རྒྱུད་སྨིན་དམ་ཚིག་རྣམ་པར་དག །སྣང་སེམས་སྒྱུ་མ་རྟེན་འབྲེལ་བརྗོད་བྲལ་བའི། །འཁོར་འདས་དབྱེར་མེད་འོད་གསལ་ཕྱག་རྒྱ་ཆེ། །རྒྱུ་དུས་ལྟ་བ་རྟོགས་པར་བྱིན་གྱིས་རློབས། །ཐ་མལ་དངོས་ཀུན་ཕྱི་ནང་ལྷ་སྐུར་ཤར། །རླུང་དང་གཏུམ་མོས་གསལ་སྟོང་ཉམས་མྱོང་སྨིན། །དཔེ་དོན་ལྷན་སྐྱེས་ཡེ་ཤེས་མངོན་བྱེད་པའི། །དབང་བཞིའི་ལམ་བཟང་བསྒོམ་པར་བྱིན་གྱིས་རློབས། །མཐར་ཐུག་རྟེན་དང་བརྟེན་པ་གནས་གྱུར་པ། །འབྲས་བུ་སྐུ་བཞིའི་གོ་འཕང་མྱུར་ཐོབ་ནས། །ཕྲིན་ལས་ལྷུན་གྲུབ་རྒྱུན་མི་འཆད་པ་ཡིས། །དོན་།
གཉིས་ཡིད་བཞིན་འགྲུབ་པར་བྱིན་གྱིས་རློབས། །ཞེས་པའང་སྒྲུབ་བརྩོན་བླ་མ་དམ་པ་འགྱུར་མེད་ཕྲིན་ལས་དཔལ་ལྡན་ནས་ཞལ་གདམས་ཤིག་དགོས་ཞེས་གསུང་ངོར་གསོལ་འདེབས་སྨོན་ཚིག་དང་འབྲེལ་བར་གསུང་ངག་རིན་པོ་ཆེའི་དགོངས་དོན་མདོར་བསྡུས་པའི་ཚུལ་གྱིས་འཇམ་དབྱངས་མཁྱེན་བརྩེའི་དབང་པོས་བྲིས་པ་དོན་དང་ལྡན་པར་གྱུར་ཅིག །མངྒ་ལམ་བྷ་བ་ཏུ།། ༈ །།འཇམ་པའི་དབྱངས་སོགས་སྲས་བཅས་རྒྱལ་ཀུན་དང་། །དབྱེར་མེད་མཁྱེན་བརྩེའི་ཡེ་ཤེས་ཆེ་བརྙེས་པ། །མཁས་གྲུབ་དབང་པོ་དཔལ་ལྡན་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །འཁོར་བའི་གནས་ཀུན་མེ་འོབས་ལྟ་བུར་མཐོང་། །དལ་འབྱོར་རྙེད་དཀའ་ནམ་འཆི་ངེས་མེད་རྟོགས། །ལས་འབྲས་བསླུ་བ་མེད་པར་ཁོང་ཆུད་ནས། །བླང་དོར་ཚུལ་བཞིན་བརྩོན་པར་བྱིན་གྱིས་རློབས། །བྱམས་དང་སྙིང་རྗེ་སྨོན་འཇུག་བྱང་སེམས་འབྱོངས། །ཞི་གནས་ཏིང་འཛིན་རྒྱ་མཚོར་འཇུག་ཅིང་ལྡང་། །ལྷག་མཐོང་ཟབ་མོའི་ཤེས་རབ་ཕ་རོལ་ཕྱིན། །སྤྲོས་བྲལ་གནས་ལུགས་མཐོང་བར་བྱིན་གྱིས་རློབས། །དབང་གིས་སྨིན་ཅིང་དམ་ཚིག་རྣམ་པར་དག །གཞི་རྒྱུད་འཁོར་འདས་དབྱེར་མེད་ལྟ་བ་རྟོགས། །ལམ་རྒྱུད་རིམ་གཉིས་ཡེ་ཤེས་མངོན་དུ་གྱུར། །འབྲས་རྒྱུད་སྐུ་བཞི་འགྲུབ་པར་བྱིན་གྱིས་རློབས། །མདོར་ན་འདི་ནས་བྱང་ཆུབ་
སྙིང་པོའི་བར། །རྗེ་བཙུན་བླ་མས་འབྲལ་མེད་རྗེས་བཟུང་སྟེ། །བར་ཆད་ཀུན་ཞི་བསམ་སྦྱོར་ཆོས་བཞིན་འགྲུབ། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །ཞེས་དགེ་སློང་དགེ་བའི་བཤེས་གཉེན་བོ་དྷི་བྷ་དྲས་ཚུལ་འདི་ལྟ་བུ་ཞིག་དགོས་ཞེས་བསྐུལ་བ་ལྟར། གསུང་ངག་རིན་པོ་ཆེའི་ལམ་རིམ་མདོར་བསྡུས་པ་བརྗོད་བྱར་བྱས་ཏེ། གསོལ་འདེབས་བསླབ་བྱ་དང་འབྲེལ་བ་འདིའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་དོན་དང་ལྡན་པར་གྱུར་ཅིག། ༈ །།ཇོ་བོ་རིན་པོ་ཆེར་གསོལ་འདེབས་སྨོན་ལམ་དང་བཅས་པ་ཕན་བདེའི་སྒྲ་དབྱངས་ཞེས་བྱ་བ་བཞུགས་སོ། །ན་མོ་གུ་རུ་ཤཱཀྱ་མུ་ན་ཡེ། བླ་མ་མཆོག་གསུམ་དབྱེར་མེད་ཞལ་སྐྱིན་དངོས། །དྲན་པ་ཙམ་གྱིས་དགོས་འདོད་ཀུན་སྩོལ་བའི། །ཡིད་བཞིན་ནོར་བུའི་ཞབས་ཀྱི་པདྨོ་ལ། །གུས་པས་ཕྱག་འཚལ་མཆོད་སྤྲིན་རྒྱ་མཚོས་མཆོད། །སྟོབས་བཞིས་སྡིག་ལྟུང་ཚོགས་ཀུན་བཤགས་ཤིང་བསྡམ། །འཕགས་དང་སོ་སྐྱེའི་དགེ་བར་རྗེས་ཡི་རངས། །བརྗོད་མེད་ཆོས་འཁོར་རྟག་ཏུ་བསྐོར་བཞིན་དུ། །བསྐལ་པ་རྒྱ་མཚོར་བཞུགས་པར་གསོལ་བ་འདེབས། །དེ་ལྟར་བསགས་པའི་དགེ་ཚོགས་ཅི་མཆིས་པ། །བྱང་ཆུབ་སྙིང་པོར་ཡོངས་སུ་བསྔོས་པའི་མཐུས། །བདག་གཞན་སྐྱེ་ཞིང་སྐྱེ་བ་ཐམས་ཅད་དུ། །རྙེད་དཀའི་དལ་འབྱོར་རྟེན་བཟང་ཐོབ་
གྱུར་ཅིག །ཁྱད་པར་མཚན་ཉིད་ཀུན་ལྡན་བཤེས་གཉེན་མཆོག །དོན་ཡོད་རྣམ་བཞིས་རྟག་ཏུ་མཉེས་བྱས་ནས། །སོ་ཐར་བྱང་སེམས་རིག་པ་འཛིན་པ་ཡི། །སྡོམ་པ་གསུམ་གྱི་བཀའ་དྲིན་ནོད་པར་ཤོག ། བཅོས་མིན་དད་དང་ངེས་པར་འབྱུང་བ་དང་། །བྱམས་དང་སྙིང་རྗེ་བྱང་ཆུབ་སེམས་གཉིས་འབྱོངས། །སྤྲོས་པ་ཀུན་བྲལ་ཟབ་མོ་དབུ་མའི་ལམ། །ཡང་དག་རྒྱུད་ལ་སྐྱེ་བར་བྱིན་གྱིས་རློབས། །ཡོ་བྱད་ཀུན་ལ་མ་ཆགས་སྦྱིན་གཏོང་ཞིང་། །ཡོན་ཏན་གཞིར་གྱུར་ཚུལ་ཁྲིམས་རྣམ་པར་དག །གནོད་པའི་ཡུལ་ལ་བཟོད་ལྡན་གཉིད་རྨུགས་དང་། །ལེ་ལོ་སྤངས་ནས་མཆོད་ཕྱིར་བརྩོན་གྱུར་ཅིག །ཞི་གནས་བསམ་གཏན་ངང་ལས་མ་གཡོས་བཞིན། །ལྷག་མཐོང་སོ་སོར་རྟོག་པའི་ཤེས་རབ་ཀྱིས། །རིས་མེད་མཁས་གྲུབ་རྒྱ་མཚོའི་གཞུང་བཟང་ལ། །ཐོས་བསམ་སྒོམ་པའི་ཕ་རོལ་ཕྱིན་པར་ཤོག །ཁྱད་པར་དབེན་ཞིང་ཉམས་དགའི་ནགས་ཀླུང་དུ། །རྒྱལ་བ་དགྱེས་པའི་སྤྱོད་ཡུལ་རྣམ་དག་ཅིང་། །རིམ་གཉིས་ཟབ་མོའི་ལམ་གྱི་ཐབས་མཁས་ལ། །བརྟེན་ནས་ཟུང་འཇུག་གོ་འཕང་འགྲུབ་གྱུར་ཅིག །གཞན་ཡང་ཚེ་འདིར་འགལ་རྐྱེན་ཀུན་ཞི་ཞིང་། །མཐུན་རྐྱེན་ཚེ་བསོད་དཔལ་འབྱོར་ཡོན་ཏན་རྒྱས། །ཕྱི་མ་བདེ་བ་ཅན་གྱི་ཞིང་སྐྱེས་ནས། །མྱུར་དུ་བྱང་ཆུབ་ལུང་བསྟན་ཐོབ་པར་ཤོག །མདོར་ན་ཇི་ལྟར་སྨོན་པའི་དོན་རྣམས་ཀུན། །
གེགས་མེད་མྱུར་བ་ཉིད་དུ་འགྲུབ་པ་ཡིས། །བསྟན་འགྲོར་ཕན་བདེའི་དགའ་སྟོན་འགྱེད་པ་ལ། །བཅོམ་ལྡན་ཁྱེད་དང་མཉམ་པར་བྱིན་གྱིས་རློབས། །ཞེས་ཇོ་བོ་ཡིད་བཞིན་ནོར་བུའི་མདུན་དུ་གསོལ་འདེབས་སྨོན་ལམ་གྱི་རིམ་པའོ། །གཞན་ཡང་། ར་མོ་ཆེར། མི་བསྐྱོད་རྡོ་རྗེའི་ཞབས་ཀྱི་པདྨོ་ལ། །ཞེས་དང་། བསམ་ཡས་སུ། བྱང་ཆུབ་ཆེན་པོའི་ཞབས་ཀྱི་པདྨོ་ལ། །ཞེས་དང་། ཁྲ་འབྲུག་ཏུ། རྣམ་པར་སྣང་མཛད་ཞབས་ཀྱི་པདྨོ་ལ། །ཞེས་སོགས་རྟེན་གྱི་གཙོ་བོ་གང་ཡིན་དང་མཐུན་པའི་ཁ་བསྒྱུར་བྱས་པས་གྲུབ་པ་ཉིད་དོ། །ཞེས་པའང་དོན་གཉེར་ཅན་གྱི་ངོར་ཤཱཀྱའི་དགེ་སློང་འཇམ་དབྱངས་མཁྱེན་བརྩེའི་དབང་པོས་སྤེལ་བ་སརྦ་དཱ་མངྒ་ལཾ།། །།༄༅། །ལ ཀྵྨཱི བི ཡོ གབ ཀཱ ནཾ གུ ཎ སཱ གར མ ནྟ ཀཿ བུ དྡྷ ལོ ཀ སྱ ནེ ཐེ བྷི༔ སྠཱ ནཱ ཏྲཱ ཀུ རུ མ ངྒ ལཾ།།༅། །ཡེ ཥཱུ པ ཤཱ ནྟ ཙོ པ ཤྲཱི ཕུན་ཚོགས་བྲལ་དང་སྨིན་པ་ཡི། །ཡོན་ཏན་རྒྱ་མཚོའི་མཐར་སོན་པ། །སངས་རྒྱས་འཇིག་རྟེན་མགོན་པོ་ཡིས། །གནས་འདིར་ཀུན་ཏུ་ཤིས་པར་མཛོད། །གང་དུ་ཉེ་བར་ཞི་བ་དང་། །གང་གིས་ཉེར་ཞིའི་
ཡེ ན ཤཱ ནྟ སྱ དཱ ན ཡོཿ ས དྡྷ རྨཱ མྲཾ ཏ དཱི པྟེ བྷི སྟུ ཥྱཱ ཏྤ དྨ ཧི ཏི སུ ཁཾ། ཉྗདྨཏུཥྱཱཏྶུཡཾཧིཏཿ ཐ ཙ ཡཱ བ ཏ ནྟ རྦཻ ཛྙཱ ནཱ དྦྷུ ཏ སྱ ད རྴ ནཻ༔ ཏྲི སཱ བ ར དཔལ་སྟེར་བ། །དམ་ཆོས་བདུད་རྩིའི་སྣང་བ་ཡིས། །ཕན་བདེའི་པདྨོ་རྒྱས་གྱུར་ཅིག ། ༈ །ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་རྨད་བྱུང་བས། །སྒྲིབ་གསུམ་ཆ་བཅས་ངེས་གྲོལ་བ། ཎ ནི རྨུ ཀྟ ཪྻ ག ཎི སྶུ ཤཱུ བྷཾ ཀུ ཤ། ༄༅། །འོད་གསལ་འཆར་བའི་གསོལ་འདེབས་ཟབ་དོན་སྤྲིན་གྱི་རོལ་མོ་ཞེས་བྱ་བ་བཞུགས་སོ། །འཕགས་པའི་ཚོགས་ཀྱིས་དགེ་ལེགས་སྩོལ། ༄༅། །ན་མོ་གུ་རུ་བྷྱ༔ ཤིན་ཏུ་རྣམ་དག་འོད་གསལ་ཆོས་དབྱིངས་ངང་། །ཟུང་འཇུག་ལོངས་སྤྱོད་རྫོགས་སྐུའི་རྣམ་རོལ་གྱིས། །སྤྲུལ་པའི་གར་མཛད་རྩ་བརྒྱུད་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །བཅོས་མིན་དད་དང་ངེས་འབྱུང་སྙིང་རྗེ་དང་། །རླབས་ཆེན་བྱང་ཆུབ་སྤྱོད་པའི་མཐར་སོན་ནས། །མཆོག་གསང་རྡོ་རྗེའི་ལམ་གྱི་སྨིན་གྲོལ་གྱིས། །
དཔེ་དོན་འོད་གསལ་མཐོང་བར་བྱིན༴ ཁྱད་པར་གཟོད་ནས་སྤྲོས་པ་ཀུན་བྲལ་བའི། །སེམས་ཀྱི་རྡོ་རྗེ་གཉུག་མའི་དེ་བཞིན་ཉིད། །ཀུན་ཁྱབ་ཀུན་གྱི་རང་བཞིན་ཕྱག་རྒྱ་ཆེ། །གཞི་ཡི་འོད་གསལ་རྟོགས་པར༔ རིལ་པོར་འཛིན་དང་རྗེས་སུ་གཞིག་པ་ཡིས། །སྣང་ཆའི་ལྷ་སྐུ་ནཱ་དར་སྙོམས་འཇུག་བཞིན། །ལྷན་ཅིག་སྲོག་རྩོལ་ཁ་སྦྱོར་རྣལ་འབྱོར་གྱིས། །རླུང་སེམས་དབུ་མར་འདུས་པར༔ དེ་མཐུས་རྣམ་ཤེས་སྣང་བ་ལ་ཐིམ་ཞིང་། །དེ་ཉིད་རིམ་པར་མཆེད་དང་ཉེར་ཐོབ་ལ། །ཐིམ་ཚུལ་ངོས་ཟིན་ཐམས་ཅད་སྟོང་པའི་ངང་། །ལམ་གྱི་འོད་གསལ་གོམས་པར ཉིན་སྣང་རྨི་ལམ་སྒྱུ་མར་རྗེས་དྲན་ཞིང་། །ཟབ་མོའི་ལམ་ལ་རྩེ་གཅིག་མཉམ་བཞག་པས། །སྣང་བཞིའི་ཕ་རོལ་སོན་པའི་ཡེ་ཤེས་དབྱིངས། །གཉིད་ཀྱི་འོད་གསལ་ཟིན་པར༔ གལ་ཏེ་གོམས་པ་སྟོབས་སུ་མ་གྱུར་ན། །སྙིང་དབུས་དྷཱ་ཏིའི་པདྨོར་ངལ་འཚོ་བའི། །མི་ཤིགས་ཡི་གེའི་སྤྲིན་གྱི་སྣང་བ་ཡིས། །ཉམས་ཀྱི་འོད་གསལ་འཆར་བར༔ དེ་ཚེ་ཉིང་འཁྲུལ་སྣང་ཆ་ཐམས་ཅད་ཀུན། །གཟུང་སྤེལ་སྒྱུ་མར་སྦྱང་བའི་ཉམས་ལེན་དང་། །སྤྲུལ་བསྒྱུར་དེ་ཁོ་ན་ཉིད་རྗེས་དྲན་པས། །གཉིས་འཛིན་རང་སར་གྲོལ་བར༔ སྔོན་འགྲོ་སྦྱང་བ་རྣམ་གསུམ་མཐར་ཕྱིན་ཅིང་། །རླུང་དང་གཏུམ་མོའི་འབར་འཛག་ལ་བརྟེན་ནས། །ཞུ་བདེས་དྲངས་པའི་ཡེ་ཤེས་མངོན་གྱུར་པ། །
མི་རྟོག་འོད་གསལ་འབྱོང་བར༔ ལུགས་འབྱུང་སྟོང་པ་རྣམ་བཞིའི་ལྷན་སྐྱེས་ལས། །ལུགས་ལྡོག་གཟུགས་སྐུར་བཞེངས་པའི་འཕེན་པ་ཡིས། །དག་པའི་སྒྱུ་ལུས་སྐུ་གསུམ་དབྱེར་མེད་པ། །འབྲས་བུའི་འོད་གསལ་འགྲུབ་པར་ཚེ་འདིར་ཟུང་འཇུག་གོ་འཕང་མ་ཐོབ་ན། །འཆི་སྲིད་འོད་གསལ་ཆོས་སྐུའི་དབྱིངས་སུ་ཐིམ། །བར་སྲིད་ལོངས་སྤྱོད་རྫོགས་སྐུའི་རྣམ་རོལ་དང་། །སྐྱེ་སྲིད་སྤྲུལ་པ་འཆར་བར༴ གཞན་ཡང་རླུང་སེམས་མི་ཕྱེད་ཐིག་ལེའི་གཟུགས། །ནང་གི་ལམ་ནས་འཕོ་བའི་རྣལ་འབྱོར་གྱིས། །འོད་གསལ་གཟུགས་སུ་ཤར་བའི་རྡོ་རྗེའི་གྲོང་། །མཁའ་སྤྱོད་ཞིང་དུ་བགྲོད་པར༔ མདོར་ན་གཏུམ་མོའི་འབར་སྣང་སྒྱུ་མར་རྫོགས། །འོད་གསལ་ངང་ལས་རྨི་ལམ་རྩལ་འབྱོངས་ཤིང་། །བར་དོའི་སྣང་བ་བསྲེ་འཕོའི་ཉམས་ལེན་གྱིས། །སྐུ་གསུམ་མངོན་དུ་འགྱུར་བར་བྱིན་གྱིས་རློབས། །དེ་ལྟར་རྩེ་གཅིག་སྨོན་པའི་གནས་སྐབས་ཀུན། །འཁོར་ལོའི་དབང་ཕྱུག་ཧེ་རུ་ཀ་དཔལ་དང་། །ཉེར་བཞིའི་ཡུལ་གྱི་དཔའ་བོ་རྣལ་འབྱོར་མས། །གེགས་མེད་མྱུར་དུ་འགྲུབ་པར་བྱིན་གྱིས་རློབས། །ཞེས་ལམ་ཐམས་ཅད་ཀྱི་མཐར་ཐུག་འོད་གསལ་སྙིང་པོའི་རྣལ་འབྱོར་དུ་དྲིལ་ཏེ། རྡོ་རྗེའི་ལམ་གཞན་རྣམས་ཀྱང་ཞར་ལ་ཚང་བའི་དོན་བརྗོད་བྱར་བྱས་པའི་ངེས་གསང་རྒྱུད་སྡེའི་ཡང་བཅུད་ཁྱད་པར་ཅན་འདིའང་། གྲུབ་པའི་དབང་ཕྱུག་བྱེ་བ་
གཤེགས་པའི་རིང་ལུགས་ལ་མོས་པ་བརྟན་པོར་ཐོབ་པའི་རྣལ་འབྱོར་གཞོན་ནུ་འཇིགས་པ་མེད་པའི་སྡེས་སྦྱར་བ་སིདྡྷི་རསྟུ།། ༈ །།ཡེ་ཤེས་ལུས་ཅན་ལྷ་བཞི་དབྱེར་མེད་སྐུ། །དོན་གཉིས་ཆར་འབེབས་སྡེ་སྣོད་གསུམ་གྱི་གསུང་། །གྲུབ་པ་མཐར་སོན་བསླབ་གསུམ་རྣམ་དག་ཐུགས། །བསྟན་པའི་རྒྱལ་མཚན་ཞབས་ལ་གསོལ་བ་འདེབས། །ཟབ་རྒྱས་རྒྱུད་སྡེ་བཞི་དང་སྡེ་སྣོད་གསུམ། །འགལ་མེད་སྟན་ཐོག་གཅིག་ཏུ་ཉམས་བླངས་པས། །མཁས་ཤིང་བཙུན་ལ་གྲུབ་པའི་མཆོག་བརྙེས་པ། །བཀའ་གདམས་རྣམ་ཐར་འགྲུབ་པར་བྱིན་གྱིས་རློབས།། ༈ །།ཕྱོགས་བཅུའི་སངས་རྒྱས་ཆོས་དང་འཕགས་པའི་ཚོགས། །རྩ་གསུམ་སྲུང་མ་ཀུན་འདུས་ངོ་བོ་ཉིད། །རིགས་ཀུན་ཁྱབ་བདག་དྲིན་ཅན་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །དལ་འབྱོར་རྙེད་དཀའ་ནམ་འཆི་ངེས་མེད་དྲན། །བློ་སྣ་ཆོས་ལ་འགྱུར་བར་བྱིན༴ ལས་འབྲས་བསླུ་མེད་འཁོར་བའི་ཉེས་དམིགས་མཐོང་། །དམ་ཆོས་ལམ་དུ་འགྲོ་བར་བྱིན༴ བྱམས་དང་སྙིང་རྗེ་སྨོན་འཇུག་བྱང་སེམས་འབྱོངས། །ལམ་གྱི་འཁྲུལ་པ་ཞི་བར་བྱིན་གཟུང་འཛིན་ལས་འདས་དོན་དམ་བྱང་སེམས་རྟོགས། །འཁྲུལ་སྣང་དབྱིངས་སུ་ཐིམ་པར་བྱིན༔ སེམས་དང་སེམས་བྱུང་འཇུག་པ་དབྱིངས་སུ་ཞི། །རྩེ་གཅིག་ཏིང་འཛིན་བརྟན་པར་བྱིན༔ ཉམས་སུ་མྱོང་ཡང་
མཚོན་བརྗོད་ལས་འདས་པའི། །སྤྲོས་བྲལ་གནས་ལུགས་མཐོང་བར༔ སྣང་སེམས་དབྱེར་མེད་འོད་གསལ་ཕྱག་རྒྱ་ཆེ། །རོ་གཅིག་མངོན་དུ་འགྱུར་བར༴ མཉམ་རྗེས་ལས་འདས་ཁོར་ཡུག་ཆོས་སྐུའི་ཀློང་། །སྒོམ་མེད་འབྲས་བུ་འགྲུབ་པར་བྱིན་གྱིས་རློབས། །མདོར་ན་བདག་སོགས་མཐའ་ཡས་སེམས་ཅན་ཀུན། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ཕྱི་མ་བདེ་བ་ཅན་གྱི་ཞིང་སྐྱེས་ནས། །མྱུར་དུ་བྱང་ཆུབ་ཐོབ་པར་བྱིན་གྱིས་རློབས། །ཞེས་པའང་སྒྲུབ་བརྒྱུད་སྙིང་པོའི་རིང་ལུགས་འཛིན་པ་གླུ་བྲོ་དགོན་གྱི་བླ་མ་དགེ་འདུན་རྣམས་ནས་གསུངས་ངོར་ཞལ་གདམས་གསོལ་འདེབས་སྨོན་ལམ་དང་འབྲེལ་བ་འདིའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དོན་དང་ལྡན་པར་གྱུར་ཅིག། ༈ །།ཐེག་པ་རིམ་དགུའི་སྨོན་ལམ་རྡོ་རྗེའི་ཚིག་རྐང་བཞུགས་སོ། །ན་མོ་གུ་རུ་བྷྱ༔ རྒྱལ་བའི་གདུལ་བྱའི་རྗེས་འགྲོ་ལེགས་གསུང་ཆོས། །གོང་ནས་གོང་དུ་བགྲོད་བྱེད་ཐེག་པའི་ཚུལ། །དབང་པོའི་རིམ་པ་དང་མཚུངས་རྣམ་པ་དགུ །མ་འདྲེས་ཡོངས་རྫོགས་ཉམས་ལེན་མཐར་ཕྱིན་ཤོག །ཉན་ཐོས་ཐེག་པའི་བདེན་བཞིའི་བླང་དོར་ཐོས། །རང་རྒྱལ་ཐེག་པའི་རྟེན་འབྲེལ་འཇུག་ལྡོག་བསམ། །བྱང་སེམས་ཐེག་པའི་བདེན་གཉིས་དབྱེར་མེད་བསྒོམ། །ཀུན་འབྱུང་འདྲེན་པའི་ཐེག་པས་རྒྱུད་སྦྱོང་ཤོག །ཀྲྀ་
ཡའི་ཐེག་པས་མཐའ་བྲལ་ལྟ་བ་རྟོགས། །ཨུ་བྷའི་ཐེག་པས་ཕྱི་ནང་མཉམ་པར་བསྒོམ། །ཡོ་གའི་ཐེག་པས་སངས་རྒྱས་མཛད་པ་སྤྱོད། །དཀའ་ཐུབ་རིག་བྱེད་ཐེག་པས་རྒྱུད་སྨིན་ཤོག །མ་ཧཱའི་ཐེག་པས་གཞི་རྒྱུད་ལྷ་སྐུར་དག །ཨ་ནུའི་ཐེག་པས་ལམ་རྒྱུད་བདེ་སྟོང་རྫོགས། །ཨ་ཏིའི་ཐེག་པས་འབྲས་རྒྱུད་ཡེ་ཤེས་སྨིན། །དབང་བསྒྱུར་ཐབས་ཀྱི་ཐེག་པས་རྒྱུད་གྲོལ་ཤོག །མདོར་ན་ངེས་འབྱུང་བྱང་སེམས་གཏིང་ནས་འབྱོངས། །ལྷག་པའི་ལྷ་ཡི་བྱིན་རླབས་སྙིང་ལ་ཞུགས། །སྣང་གྲགས་རིག་པ་དཀྱིལ་འཁོར་གསུམ་གྱི་ངང་། །འགྲོ་ཀུན་ཕྱམས་གཅིག་སངས་རྒྱས་སར་འགོད་ཤོག །ཅེས་པའང་རྨོག་སྟོན་གསང་བདག་ཆེན་པོའི་སྤྱན་སྔར་གཞོན་ནུ་ཨ་བྷཱ་ཡས་རང་ལོ་བཅུ་བཞི་པར་རྩེད་མོའི་ཚུལ་དུ་བྲིས་པ། དགྱེས་པའི་གད་མོ་དང་བཅས་ཁྱོད་ཀྱི་འདི་ལ་ཐེག་པ་རིམ་དགུའི་སྨོན་ལམ་རྡོ་རྗེའི་ཚིག་རྐང་ཞེས་གྱིས་ཤིག་ཅེས་བཀའ་སྩལ་ཏོ། །མངྒ་ལཾ།། ༈ །སྡོམ་པ་གསུམ་གྱི་སྨོན་ལམ་དོན་གཉིས་ངལ་བསོ་བཞུགས། །ན་མོ། རྒྱལ་བ་ཀུན་གྱི་ཐུགས་བསྐྱེད་མཁའ་ཀློང་ལས། །ཕན་བདེའི་སྤྲིན་གྱི་བླ་བྲེ་མཛེས་པའི་དབུས། །སྡོམ་གསུམ་བདུད་རྩིའི་ཆར་རྒྱུན་འཇོ་བ་ཡིས། །ཐར་པ་མཆོག་གི་མྱུ་གུ་བཞད་པར་ཤོག ༡ །མཐོན་མཐིང་ལྕང་ལོའི་ཟུར་ཕུད་བྲེགས་པ་ཡིས། །སྲིད་པའི་འཆིང་བ་མ་ལུས་བརྒལ་བྱས་ཏེ། །ངུར་སྨྲིག་བླ་
གོས་གསར་པའི་གཟི་འོད་ཀྱིས། །ས་གསུམ་ཕན་བདེའི་སྣང་བས་ཁྱབ་གྱུར་ཅིག ༢ །གཞི་གསུམ་ཆོ་གའི་རྩ་བ་ལེགས་བརྟེན་ཅིང་། །སྤངས་དང་འཇུག་པའི་ཚུལ་ཁྲིམས་ཡལ་ག་རྒྱས། །སྲིད་པའི་དགྲ་བཅོམ་གེ་སར་མཛེས་གྱུར་པའི། །དམ་ཆོས་འདུལ་བའི་ཚལ་བརྒྱ་འཕེལ་བར་ཤོག ༣ །གཞན་ཕན་ག་བུར་བརྩེགས་པའི་མཛའ་བཤེས་ཀྱིས། །འགྲོ་ཀུན་དགའ་བའི་ཀུན་རྒྱས་པ་དང་། །ལྷན་ཅིག་འཁོར་བའི་མུན་སྟུག་རབ་བཅོམ་སྟེ། །ཟག་མེད་བདུད་རྩིའི་དཔལ་གྱིས་འཚོ་བར་ཤོག ༤ །སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་དང་། །བསམ་གཏན་ཤེས་རབ་ནོར་བུའི་འཁྲི་ཤིང་ཆེར། །ཕ་རོལ་ཕྱིན་པའི་ལམ་ལ་བརྟེན་པ་ཡིས། །བྱང་ཆུབ་མཆོག་གི་འབྱོར་པས་ཕྱུག་པར་ཤོག ༥ །ལུང་དང་རྟོགས་པའི་ཆོས་ཚུལ་རྒྱ་མཚོ་ཆེ། །ཤེས་རབ་གསུམ་གྱི་གྲུ་གཟིང་གཡོ་བ་ཡིས། །རྒྱལ་གསུང་ལམ་བདེན་ཕ་མཐར་བརྒལ་བྱས་ནས། །ཐམས་ཅད་མཁྱེན་པའི་གླིང་དུ་ཕྱིན་པར་ཤོག ༦ །ལེགས་བཤད་ཉིན་བྱེད་གསར་པའི་འོད་ཟེར་གྱིས། །སྐལ་བཟང་བློ་གྲོས་པདྨོ་བཞད་པ་དང་། །ལྷན་ཅིག་ལམ་མིན་མུན་པ་བསལ་བྱས་ཏེ། །རྒྱལ་བསྟན་སྣང་བས་ཡོངས་སུ་ཁྱབ་པར་ཤོག ༧ །ཆོས་བརྒྱད་འཆིང་བ་རབ་གྲོལ་དབེན་གནས་སུ། །འདུ་འཛིའི་སྤྱོད་པ་མ་ལུས་རིང་དོར་ཏེ། །རྩེ་གཅིག་ཏིང་འཛིན་མཆོག་ལ་གཡོ་མེད་པས། །
དོན་གཉིས་མ་ལུས་ལྷུན་གྱིས་གྲུབ་པར་ཤོག ༨ །རྡོ་རྗེ་ཐེག་པའི་བརྒྱུད་འཛིན་བུམ་བཟང་ནས། །སྨིན་བྱེད་བདུད་རྩིའི་ཐིགས་པས་བྲན་པ་ལས། །ཐར་པའི་ཞིང་ས་རབ་ཏུ་བརླན་བྱས་ཏེ། །གཡེལ་མེད་དམ་ཚིག་ས་བོན་ཆགས་པར་ཤོག ༩ །སྐུ་གསུང་ཐུགས་ཀྱི་རྡོ་རྗེ་རབ་བཟུང་ཞིང་། །ཕྲ་རགས་རྣམ་པར་དབྱེ་བ་རྒྱུད་ལ་འཆང་། །སྲུང་མཚམས་ལས་འདས་དབྱིངས་སུ་གྲོལ་བ་ཡིས། །གསང་སྔགས་ལམ་གྱི་དེ་ཉིད་མངོན་གྱུར་ཤོག ༡༠ །བསྐྱེད་རྫོགས་མཛེས་པའི་ཁ་ཕྲུས་བྲན་པ་ལས། །རྩ་རླུང་ཐིག་ལེའི་གདུང་བ་རབ་བཅིལ་ཏེ། །སྐུ་བཞིའི་པད་དཀར་རྒྱས་པའི་བསིལ་གཡབ་ཏུ། །མ་ལུས་འགྲོ་བའི་བསྟི་གནས་འབྱུང་བར་ཤོག ༡༡ །དོན་དམ་གང་དུའང་མི་གནས་ཡེ་ཤེས་སེམས། །ལྷན་ཅིག་དགའ་བའི་རྩེ་དགས་རོལ་པར་ཤོག །ཚུར་མཐོང་རྣམ་པར་གྲོལ་བའི་འཁོར་ལོ་ཆེ། །སྒྱུ་འཕྲུལ་དྲྭ་བའི་ངོ་བོར་རྟག་བརྟན་ཤོག ༡༢ །བསླབ་གསུམ་ཁྲིམས་ཀྱི་བདུད་རྩི་རྟག་རོལ་ཞིང་། །ཟུང་འཇུག་བདེ་དང་སྟོང་པས་རབ་མྱོས་པའི། །རིག་གྲོལ་གཉིས་མེད་དགེ་འདུན་འདུས་པའི་སྡེས། །སྲིད་པའི་ཁམས་ཀུན་དོག་པོར་བགྱིད་པར་ཤོག ༡༣ །དེ་མཐུས་ཚོགས་གཉིས་དཔྱིད་ཀྱིས་ཉེར་དྲངས་པའི། །རྫོགས་ལྡན་དབྱར་གྱི་འབྱོར་པར་སྤྱོད་པ་ཡིས། །འགྲོ་ཀུན་ཉོན་མོངས་ཚོགས་རྣམས་རབ་ཞི་སྟེ། །ཆོས་མཐུན་དགེ་
བའི་དཔལ་གྱིས་འཚོ་བར་ཤོག ༡༤ །འདིས་མཚོན་རྣམ་དག་སྨོན་པའི་དྲི་བཞོན་གྱིས། །བསླབ་གསུམ་སྤྲིན་གྱི་བླ་བྲེས་བསྐུལ་བ་ལས། །མངོན་མཐོ་ངེས་ལེགས་བདུད་རྩིའི་དཔལ་འཇོ་བས། །འགྲོ་ཀུན་སྲིད་པའི་ཚ་གདུང་བཅིལ་བར་ཤོག ༡༥ །ཅེས་པའང་སྲིད་ལས་ངེས་པར་གྲོལ་བའི་བློས་བསླབ་པ་རིན་པོ་ཆེ་དམ་དུ་འཆང་བ་ནི་བསྟན་ལ་སྨོན་པ་ཡོངས་ཀྱི་ངེས་བརྗོད་དུ་སྣང་བའི་ཕྱིར། དེའི་རྗེས་སུ་སྨོན་པ་ཙམ་དུ་རྨོངས་བརྟུལ་ཨ་བྷ་ཡའི་མིང་གིས་སོ།། ༈ །།རྒྱུན་གྱི་དམ་བཅའ་སྨོན་ལམ་ཆེན་མོ་ཕན་བདེའི་ས་བོན་ཞེས་བྱ་བ་བཞུགས་སོ། །བཀྲ་ཤིས་མཚན་གྱི་དབྱངས་སྙན་ཐོས་པས་ཀྱང་། །ཕུན་ཚོགས་སྲིད་ཞིའི་དགེ་ལེགས་སྦྱིན་མཛད་པ། །རྩ་བརྒྱུད་བླ་མ་དཀོན་མཆོག་རྣམ་གསུམ་སོགས། །སྐྱབས་གནས་རྒྱ་མཚོའི་ཚོགས་ལ་ཕྱག་འཚལ་ལོ། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །ཚེ་རབས་བསགས་པའི་སྡིག་ལྟུང་བཤགས་ཤིང་བསྡམ། །འཕགས་དང་སོ་སྐྱེའི་དགེ་བར་རྗེས་ཡི་རངས། །ཟབ་རྒྱས་ཆོས་ཀྱི་འཁོར་ལོ་བསྐོར་བཞིན་དུ། །རྟག་པར་མྱ་ངན་མི་འདའ་བཞུགས་གསོལ་འདེབས། །དགེ་བ་འདིས་མཚོན་དུས་གསུམ་ལེགས་བྱས་ཚོགས། །འགྲོ་ཀུན་ཀུན་མཁྱེན་གོ་འཕང་ཐོབ་བྱའི་ཕྱིར། །བྱང་ཆུབ་སྙིང་པོར་ཡོངས་སུ་བསྔོ་བར་བགྱི། །བསོད་ནམས་གང་དེས་བདག་གཞན་ཡིད་ཅན་ཀུན། །
དེང་ནས་བཟུང་སྟེ་ཚེ་རབས་ཐམས་ཅད་དུ། །འཁོར་ལོ་བཞི་དང་ལྡན་པའི་རྟེན་ཐོབ་ནས། །ཐེག་མཆོག་བཤེས་དང་ནམ་ཡང་མི་འབྲལ་ཤོག །མཉེས་པ་གསུམ་གྱིས་དམ་པའི་ཞབས་བསྟེན་ནས། །ཇི་ལྟར་ཁས་བླངས་ཚུལ་ཁྲིམས་རྣམ་པར་དག །མང་དུ་ཐོས་དང་བསམ་པའི་ཕ་རོལ་ཕྱིན། །རྩེ་གཅིག་ཟབ་མོའི་དོན་མཆོག་བསྒོམ་པར་ཤོག །དལ་འབྱོར་རྙེད་དཀའ་འཇིག་སླའི་ངང་ཚུལ་ཅན། །འཁོར་བའི་སྡུག་བསྔལ་དྲན་པའི་ངེས་འབྱུང་གིས། །དགེ་སྡིག་བླང་དོར་ཚུལ་བཞིན་ལེགས་སྤྱོད་པའི། །སྔོན་འགྲོ་རྟེན་གྱི་ཆོས་ལ་བློ་འབྱོངས་ཤོག །གཟུང་བའི་ཆོས་ཀུན་རྨི་ལམ་ལྟ་བུར་རྟོགས། །འཛིན་པའི་ཤེས་པ་མ་སྐྱེས་རིག་པའི་གཤིས། །སྤྲོས་བྲལ་བློ་འདས་ངང་དུ་མཉམ་བཞག་པས། །བདེན་གཉིས་ཟུང་འཇུག་གནས་ལུགས་མངོན་གྱུར་ཤོག །བདག་གི་བདེ་དགེ་སེམས་ཅན་རྣམས་ལ་གཏོང་། །གཞན་གྱི་སྡུག་བསྔལ་ཀུན་འབྱུང་རང་ལ་བླངས། །རྣམ་པ་ཀུན་ཏུ་འགྲོ་ལ་ཕན་བརྩོན་པའི། །རླབས་ཆེན་བྱང་ཆུབ་སེམས་མཆོག་འབྱུང་བར་ཤོག །རྐྱེན་ངན་ཐམས་ཅད་བྱང་ཆུབ་ལམ་དུ་གྱུར། །ཚེ་གཅིག་ཉམས་ལེན་སྟོབས་ལྔའི་དམ་བཅའ་བརྟན། །བློ་སྦྱོང་ཚད་ཕྱིན་བསླབ་བྱ་དམ་ཚིག་རྣམས། །ནམ་ཡང་ཉམས་མེད་སྲོག་བཞིན་བསྲུང་ནུས་ཤོག །བསམས་བཞིན་གཞན་སྲོག་གཅོད་དང་མ་བྱིན་ལེན། །འདོད་པས་ལོག་
གཡེམ་རྫུན་སྨྲ་སྤངས་པ་སྟེ། །ཡོངས་རྫོགས་དགེ་བསྙེན་སྡོམ་པའི་བསླབ་བྱ་རྣམས། །དགྲ་བཅོམ་འཕགས་པའི་རྗེས་སུ་སློབ་ནུས་ཤོག །སྡིག་ཟས་གཙོ་བོ་ཤ་ཁྲག་ལོངས་སྤྱོད་དང་། །མྱོས་བྱེད་ཆང་དང་ཐ་མ་ཁ་ལ་སོགས། །བག་མེད་རྩ་བར་གྱུར་བ་ཀུན་སྤངས་ནས། །རྟག་ཏུ་དྲན་ཤེས་བག་ཡོད་སྤྱོད་པར་ཤོག །རང་དོན་ཉི་ཚེའི་བསམ་པ་ལ་བརྟེན་པའི། །ལུས་ངག་སྦྱོར་བས་གཞན་ལ་གནོད་པ་དང་། །ཉེས་ཀུན་རྩ་བ་ངག་འཁྱལ་ཚིག་རྩུབ་སོགས། ཁ་ན་མ་ཐོའི་ཚོགས་ཀུན་སྤོང་ནུས་ཤོག །མདོར་ན་གཞན་ལ་དངོས་སུ་མ་ཕན་ཡང་། །རྣམ་པ་ཀུན་ཏུ་གནོད་པར་མི་འགྱུར་ཞིང་། །དགེ་བའི་རྩ་བ་ཅི་ནུས་བསྒྲུབ་པ་དང་། །སྡིག་པ་ཚབ་ཆེན་ནམ་ཡང་མི་བགྱིད་ཤོག །བསམ་པ་བྱང་ཆུབ་སེམས་མཆོག་རྣམ་པར་དག །སྦྱོར་བ་དམིགས་མེད་ཚོགས་གཉིས་ཟུང་འབྲེལ་སྤྱོད། །རྗེས་ཐོབ་ཡོངས་སུ་བསྔོ་བས་མཚམས་སྦྱར་ཏེ། །རང་གཞན་དོན་མཆོག་ལྷུན་གྱིས་གྲུབ་པར་ཤོག །རྩ་བརྒྱུད་བླ་མ་མཆོག་གསུམ་བྱིན་རླབས་དང་། །ཆོས་ཉིད་ཆོས་ཅན་རྒྱུ་འབྲས་བསླུ་མེད་མཐུས། །ཇི་ལྟར་སྨོན་པའི་གནས་ཀུན་ཡོངས་གྲུབ་ནས། །ཕན་བདེའི་དགེ་ལེགས་རྒྱས་པའི་བཀྲ་ཤིས་ཤོག །ཅེས་པའང་ལུགས་གཉིས་ལ་དཔྱོད་པའི་བློ་གྲོས་ཡངས་ཤིང་། སྐྱེས་བུ་ཆེན་པོའི་ལམ་ལ་དམ་བཅའ་བརྟན་པ་དྲུང་དཔོན་ཚེ་རིང་དོན་གྲུབ་བམ། འཇམ་
དབྱངས་གཞན་ཕན་ཉི་མས་རང་ཉིད་ཀྱིས་ཇི་ལྟར་ཞལ་གྱིས་བཞེས་པའི་གཡར་དམ་གྱི་གོ་ཆ་མཐར་ཕྱིན་པར་བྱ་བའི་སླད། བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་དཔལ་གདོང་ལོའི་དབྱུག་པ་ཟླ་བའི་དུས་ཆེན་ཡར་ཚེས་བཅོ་ལྔའི་སྔ་ཆར་བྲིས་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།ཁ་སྦྱོར་བདུན་ལྡན་རྒྱལ་བ་རྡོ་རྗེ་འཆང་། །གསང་བ་མཆོག་གིས་དགྱེས་པ་བདག་མེད་མ། །གང་དེས་རྗེས་བཟུང་གྲུབ་ཆེན་བིརླ་པ། །རྣལ་འབྱོར་དབང་ཕྱུག་ཌོམྦྷི་ཧེ་རུ་ཀ །རིམ་བརྒྱུད་བཤད་སྲོལ་གསལ་མཛད་དཔའ་བོའི་མཚན། །གངས་ཅན་བསྟན་པའི་སྣང་བྱེད་འབྲོག་མིའི་ཞབས། །རྒྱུན་བཞིའི་གདམས་པའི་རྒྱ་མཚོ་ས་སྐྱ་པ། །རྒྱལ་བས་ལུང་བསྟན་ངོར་ཆེན་ཡབ་སྲས་སོགས། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །དཔའ་བོ་མཁའ་འགྲོ་ཆོས་སྐྱོང་སྲུང་མར་བཅས། །བུ་གཅིག་པ་ལ་བརྩེ་བའི་མ་བཞིན་དུ། །མྱུར་དུ་ཡེ་ཤེས་སྤྱན་གྱིས་རབ་གཟིགས་ནས། །ཇི་ལྟར་སྨོན་པའི་གནས་འདི་མྱུར་འགྲུབ་མཛོད།། ༈ །།རྡོ་རྗེ་འཆང་དངོས་རྣལ་འབྱོར་དབང་ཕྱུག་དང་། །དཔལ་ལྡན་ས་སྐྱ་ཡབ་སྲས་བརྒྱུད་བཅས་ཀྱི། །བཤད་སྒྲུབ་བསྟན་པ་ཕྱོགས་བརྒྱར་འཕེལ་བ་ཡིས། །འགྲོ་ཀུན་བདེ་སྐྱིད་འབྱུང་བར་བྱིན་གྱིས་རློབས། །ཁྱད་པར་མཚན་
ཙམ་ཐོས་པའི་རྣ་ལུང་དུ། །གྲངས་མེད་བསྐལ་པའི་བསོད་ནམས་ལས་གྲུབ་པ། །སྙིང་པོ་དགྱེས་པ་རྡོ་རྗེའི་རྒྱུད་ཟབ་མོ། །བཤད་པས་ཕྱོགས་བརྒྱར་འཕེལ་བར་བྱིན་གྱིས་རློབས། །མདོ་སྔགས་སྤྱི་དོན་བློ་གྲོས་རབ་རྒྱས་ཤིང་། །མཚན་ཙམ་གྱིས་ཀྱང་རྒྱུད་དོན་ཁོང་དུ་ཆུད། །བཤད་ཐབས་བདུན་གྱིས་སྨྲ་བའི་དབང་ཕྱུག་ཏུ། །ཕྱོགས་ལས་རྣམ་པར་རྒྱལ་བར་བྱིན་གྱིས་རློབས། །རྒྱུ་རིགས་སྤང་བྱ་རྐྱེན་ལ་ལྟོས་པ་ཡིས། །གཞི་དོན་རྒྱུད་ལ་སྒྲོ་འདོགས་ཆོད་པ་དང་། །སྤྱོད་དང་ལྟ་བ་རིམ་མཐར་བསླབ་པ་ཡིས། །བསླབ་གསུམ་རྣམ་པར་དག་པར་བྱིན་གྱིས་རློབས། །སྨིན་བྱེད་དབང་གིས་སྨིན་ནས་དམ་ཚིག་དག ། མཆོག་དང་ཐུན་མོང་གྲུབ་པའི་མངོན་རྟོགས་ཀྱིས། །ལམ་གྱི་རིམ་པའི་ཕ་མཐར་སོན་པ་ལས། །འབྲས་བུ་མྱུར་དུ་འགྲུབ་པར་བྱིན་གྱིས་རློབས། །ཐབས་ཤེས་གཉིས་མེད་དགྱེས་པ་རྡོ་རྗེ་དང་། །སྟོང་ཉིད་མཁའ་ཁྱབ་མཁའ་འགྲོ་རྡོ་རྗེ་གུར། །བདེ་སྟོང་ཡང་དག་ཡེ་ཤེས་སྦྱོར་བ་ཡི། །བཤད་པས་ཕྱོགས་ཀུན་ཁྱབ་པའི་བཀྲ་ཤིས་ཤོག །མདོར་ན་དཔལ་ལྡན་དགེས་པ་རྡོ་རྗེ་ཡི། །བཤད་སྲོལ་འཇིག་རྟེན་ཀུན་ཏུ་རྒྱས་པ་དང་། །སྙིང་པོའི་སྒྲུབ་པ་ལམ་འབྲས་ལྷུར་ལེན་པས། །དོན་གཉིས་གྲུབ་པའི་དགེ་མཚན་རྒྱས་གྱུར་ཅིག །ཅེས་པའང་ལྕགས་ཕག་སྔོན་ཟླ་བའི་ཤེར་ཕྱོགས་ཀྱི་བཟང་པོ་དང་པོར་རྒྱལ་ཁམས་ཉུལ་བའི་
དཱ་རི་དྭ་འཇམ་དབྱངས་མཁྱེན་བརྩེའི་དབང་པོས་སྒྲ་བསྒྱུར་ལོ་ཙཱ་ཕུག་གི་སྒོ་འདབས་སུ་གང་ཤར་རྩེ་གཅིག་པས་གསོལ་བ་བཏབ་པ་དེ་དེ་བཞིན་དུ་གེགས་མེད་པར་འགྲུབ་པར་བྱིན་གྱིས་བརླབ་ཏུ་གསོལ། སརྦ་དཱ་སིདྡྷི་རསྟུ།། ༈ །།ཐེག་པ་ཆེན་པོའི་ལམ་གྱི་རིམ་པའི་སྨོན་ལམ་རྣམ་གྲོལ་དགའ་སྟོན་ཞེས་བྱ་བ་བཞུགས་སོ། །ན་མོ་གུ་རུ་བྷྱ༔ མཁའ་ཁྱབ་རྒྱལ་བ་ཀུན་གྱི་སྐུ་ཡེ་ཤེས། །གཅིག་བསྡུས་དཔལ་ལྡན་རྡོ་རྗེ་སེམས་དཔའ་དང་། །དབྱེར་མེད་ཁྱབ་བདག་དྲིན་ཆེན་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །བདག་གཞན་སྐྱེ་ཞིང་སྐྱེ་བ་ཐམས་ཅད་དུ། །དལ་འབྱོར་མཆོག་ཐོབ་འཁྲུལ་མེད་བསྟན་ལ་ཞུགས། །མཚན་ལྡན་དགེ་བའི་བཤེས་ཀྱིས་རྗེས་བཟུང་ནས། །ཐོས་བསམ་སྒོམ་པའི་ཕ་རོལ་ཕྱིན་པར་ཤོག །རྣམ་དག་ངེས་འབྱུང་བདུད་རྩིའི་དོ་ཤལ་གྱིས། །སོ་ཐར་ཁྲིམས་ཀྱི་པདྨོ་བསྐྱེད་བསྲིངས་ནས། །བདེན་བཞིའི་ལམ་གྱི་མཚར་སྡུག་ཡོངས་རྫོགས་པས། །སྲིད་པའི་ཚ་གདུང་མཐའ་དག་འཇིལ་གྱུར་ཅིག །མཁའ་ཁྱབ་འགྲོ་ཀུན་མར་ཤེས་དྲིན་དྲན་ནས། །དྲིན་བཟོའི་སླད་དུ་བདེ་བ་ཀུན་ཐོབ་ཅིང་། །སྡུག་བསྔལ་བྲལ་ཕྱིར་བྱམས་དང་སྙིང་རྗེའི་བློ། །ཟུང་འཇུག་ལྷག་བསམ་མཆོག་ཏུ་འབྱོང་བར་ཤོག །དེ་ལ་བརྟེན་ནས་གཞན་ཕྱིར་བླ་མེད་པའི། །ཡང་དག་རྫོགས་པའི་བྱང་ཆུབ་དོན་གཉེར་
བས། །སྔོན་ཆད་རྨི་ལམ་དུ་ཡང་མ་མྱོང་བའི། །སྨོན་འཇུག་བྱང་ཆུབ་སེམས་མཆོག་བཟུང་བར་ཤོག །འགྲོ་རྣམས་གནས་སྐབས་མཐར་ཐུག་ཕན་བདེའི་ལམ། །འགོད་ཕྱིར་ཟང་ཟིང་མི་འཇིགས་དམ་ཆོས་ཀྱི། ། གཏོང་ལ་གོམས་པའི་ནོར་བུའི་སྤྲིན་ཆེན་ལས། །འདོད་དགུའི་གྲུ་ཆར་རྟག་ཏུ་འབེབས་པར་ཤོག །ཉེས་སྤྱོད་མཐའ་དག་སྡོམ་པའི་པད་དཀར་ནི། །དགེ་ཆོས་ཡོངས་སུ་སྡུད་པའི་དྲི་བསུང་དང་། །གཞན་ཕན་ཟེའུ་འབྲུའི་མཛེས་པ་དར་བབས་པའི། །ཚུལ་གནས་ཁྲིམས་ཀྱི་དགའ་ཚལ་རྒྱས་པར་ཤོག །ཡུལ་ལས་སྐྱེས་པའི་ཁྲོ་བ་དབྱིངས་སུ་ཞི། །ཆོས་ཕྱིར་དཀའ་བ་སྤྱད་ལ་ལྷག་པར་བཟོད། །ཟབ་མོའི་དོན་ལ་འཇིགས་མེད་སྤོབས་པའི་མཐུ། །འཇམ་དཔལ་གཞོན་ནུའི་རྗེས་སུ་སློབ་པར་ཤོག །བསམ་པ་གོ་མའི་བརྩོན་འགྲུས་རབ་ཏུ་བརྟན། །སྦྱོར་བ་རྒྱལ་སྲས་སྤྱོད་ལས་མི་གཡེལ་ཞིང་། །སེམས་ཅན་དོན་ལ་ངལ་བ་མི་་བསྟེན་པར། །སྲིད་པ་མཐར་བྱས་བར་དུ་འཇུག་པར་ཤོག །ལུས་སེམས་ཤིན་སྦྱངས་མཐོང་ཆོས་བདེ་བར་གནས། །སོ་སོར་རྟོག་པའི་ཡེ་ཤེས་དབང་དུ་འབྱོར། །འཕགས་པའི་ལམ་གྱི་དེ་ཉིད་མངོན་གྱུར་པའི། །བསམ་གཏན་ཏིང་འཛིན་རྒྱ་མཚོར་འཇུག་པར་ཤོག །དང་པོ་ཐོས་པས་དོན་སྤྱིའི་གནས་ལུགས་གོ །བར་དུ་བསམ་པས་དྲང་ངེས་སྒྲོ་འདོགས་ཆོད། །ཐ་མར་བསྒོམས་པས་བདེན་གཉིས་ཟུང་འཇུག་པའི། །
ཤེས་རབ་ཟབ་མོའི་སྣང་བ་རྒྱས་པར་ཤོག །ཐབས་ལ་མཁས་པས་དམན་ལམ་ཟིལ་གནོན་ཞིང་། །སྙིང་རྗེའི་སྟོབས་ཀྱིས་འཁོར་བ་མི་བཏང་བར། །སྨོན་ལམ་རྒྱ་མཚོ་ཡོངས་སུ་རྫོགས་པ་ལས། །ཡེ་ཤེས་དམ་པའི་ཕ་རོལ་ཕྱིན་པར་ཤོག །ཕྱོགས་དུས་རྒྱལ་བ་སྲས་དང་བཅས་པ་ཀུན། །རྨད་བྱུང་མཆོད་པའི་སྤྲིན་གྱིས་མཉེས་བྱས་ཏེ། །དེ་དག་རྣམས་ཀྱི་དམ་ཆོས་འཛིན་པ་དང་། །ཀུན་གྱི་འདུན་སར་རྟག་ཏུ་བསྙེན་པར་ཤོག །དེ་བཞིན་འགྲོ་དོན་རྒྱ་ཆེན་བསྒྲུབ་པ་དང་། །སེམས་ཅན་ཡོངས་སྨིན་འཇིག་རྟེན་ཁམས་ཀུན་འཇུག །ཞིང་ཀུན་ཡོངས་སྦྱངས་ཐེག་ཆེན་ལམ་འཇུག་དང་། །སྤྱོད་ཀུན་དོན་ཡོད་ཐེག་ཆེན་བསྒྲུབ་པར་ཤོག །ཁྱད་པར་ཚེ་གཅིག་ཟུང་འཇུག་གོ་འཕང་ལ། །སྦྱོར་བའི་ཁྱད་པར་བླ་མེད་རྡོ་རྗེའི་ཐེག །ཇི་བཞིན་སྟོན་མཁས་ཁྱབ་བདག་བླ་མ་ལས། །རྣམ་དག་དབང་བཞིའི་སྒོ་གསུམ་སྨིན་པར་ཤོག །གནས་སྐབས་གྲུབ་ཆེན་བརྒྱད་དང་ཕྲིན་ལས་བཞིའི། །ཕྱི་ནང་དབང་བཅུའི་ཡོན་ཏན་མཐར་ཕྱིན་ནས། །བརྟུལ་ཞུགས་སྤྱོད་པ་གསུམ་གྱིས་མཚམས་སྦྱར་ནས། །སློབ་པའི་ཟུང་འཇུག་མྱུར་དུ་ཐོབ་པར་ཤོག ། མཐར་ཐུག་ཕྱག་རྒྱའི་ཉེ་རྒྱུ་ལ་བརྟེན་ནས། །སློབ་པ་མིན་པའི་ཟུང་འཇུག་རྡོ་རྗེའི་གར། །སྐུ་དང་ཡེ་ཤེས་ཕྲིན་ལས་རབ་འབྱམས་ཀྱིས། །རང་གཞན་ཕན་པ་མཐའ་ཀླས་འགྲུབ་པར་ཤོག །གཞན་ཡང་བཤད་
སྒྲུབ་བསྟན་པ་དར་ཞིང་རྒྱས། །བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན། །འགྲོ་རྣམས་དགེ་བཅུའི་སྤྱོད་པས་འཇིག་རྟེན་ན། །རྫོགས་ལྡན་གསར་པའི་དགའ་སྟོན་ལོངས་སྤྱོད་ཤོག །དེ་ལྟར་བདག་གི་ལྷག་པའི་བསམ་པ་ཡིས། །རྩེ་གཅིག་སྨོན་པའི་གནས་སྐབས་ཐམས་ཅད་ཀུན། །གེགས་མེད་མྱུར་བ་ཉིད་དུ་འགྲུབ་པ་ཡི། །བཀྲ་ཤིས་སྣང་བས་རྟག་ཏུ་མཛེས་གྱུར་ཅིག །ཅེས་པའང་། སྨིན་ཟླའི་དཀར་ཕྱོགས་ཀྱི་རྒྱལ་བ་གཉིས་པར་འོག་མིན་ཆེན་པོ་དཔལ་གྱི་བསམ་ཡས་དབུ་རྩེའི་འོག་ཁང་བྱང་ཆུབ་ཆེན་པོའི་སྤྱན་སྔར་མཆོད་པའི་སྤྲིན་གྱིས་བསྙེན་བཀུར་ཅུང་ཟད་བགྱིས་པའི་ཚེ་བཅོས་མིན་གྱི་མོས་པ་བརྟན་པོས་གསོལ་བ་བཏབ་པའི་སྨོན་ལམ་གྱི་ཚིགས་སུ་བཅད་པ་འདིའང་རྒྱལ་ཁམས་ཀྱི་དཱ་རི་དྭ་གཙུག་ལག་སྨྲ་བའི་ཉི་མས་སོ། །སརྦ་དཱ་མངྒ་ལཾ།། ༈ །།ཐེག་པ་རིམ་དགུའི་སྨོན་ལམ་ཤིན་ཏུ་བསྡུས་པ་དོན་གཉིས་ཆུ་སྐྱེས་བཞུགས་སོ། །ཨོཾ་སྭ་སྟི་སིདྡྷཾ། སྤངས་རྟོགས་ཡོན་ཏན་ལྡན་པའི་རང་གཟུགས་ནི། །མཚན་དཔེའི་ངོ་མཚར་གསར་པའི་འཇོ་སྒེག་ཅན། །རྒྱལ་དང་དེ་སྲས་དེས་གསུངས་དམ་པའི་ཆོས། །གང་ཉིད་འཛིན་པའི་ཚོགས་རྣམས་ཀུན་ལ་འདུད། །བག་ཡོད་ཁྲིམས་ཀྱིས་རྒྱུད་བསྡམས་སོ་ཐར་དང་། །རྟེན་འབྲེལ་འབྱུང་ལྡོག་ལམ་ཁྱེར་རང་སངས་རྒྱས། །བདག་མེད་གཞན་དོན་ལ་བརྩེ་བྱང་སེམས་ཏེ། །
ཀུན་འབྱུང་འདྲེས་པའི་ཐེག་པས་རྒྱུད་གྲོལ་ཤོག །བདག་དམན་ལྷ་ལ་མཆོག་ལྟ་བྱ་བའི་རྒྱུད། །གཉིས་མེད་གྲོགས་ཀྱི་ཚུལ་བཞིན་སྤྱོད་པ་དང་། །གཉིས་ཀ་ཡེ་ཤེས་ལྷར་བསྐྱེད་རྣལ་འབྱོར་ཏེ། །དཀའ་ཐུབ་རིག་བྱེད་ཐེག་པས་ལམ་ཁྱེར་ཤོག །སྣོད་བཅུད་དཀྱིལ་འཁོར་གསུམ་རྟོགས་མ་ཧཱ་དང་། དབྱིབས་ཡེ་གཉིས་མེད་བདེ་སྟོང་ཨ་ནུའི་ལམ། །རང་གྲོལ་ཀ་དག་འོད་གསལ་རྫོགས་པ་ཆེ། །ཐབས་ཀྱི་ཐེག་པས་མཐར་ཐུག་ལམ་འགྲུབ་ཤོག །དེ་ལྟར་སྐུ་དང་ཡེ་ཤེས་ཟབ་གསང་ལམ། །མ་དག་སྣང་བར་སྦྱོར་དང་མི་སྦྱོར་གྱིས། །རྒྱུ་འབྲས་ཐེག་པའི་རྣམ་པར་དབྱེ་བ་ཀུན། །མ་འདྲེས་ཡོངས་རྫོགས་གྲུབ་མཐའ་རྟོགས་པར་ཤོག །འདིར་ནི་བདག་གི་གཞན་དོན་སྨོན་པའི་མཐུ། །མཆོག་གསུམ་རྩ་གསུམ་སྐུ་གསུམ་དཀྱིལ་འཁོར་ལྷས། །ཡོངས་སུ་འགྲུབ་པའི་མཐུན་འགྱུར་མཛད་ནས་ཀྱང་། །ཕུན་ཚོགས་ཕན་བདེའི་དཔལ་གྱིས་འབྱོར་བར་ཤོག །ཅེས་པའང་གཞོན་ནུ་འཇིགས་མེད་ཡེ་ཤེས་རྡོ་རྗེའི་རོལ་པའི་སྒྱུ་འཕྲུལ་གྱིས་འཕྲལ་དུ་གང་དྲན་བརྗོད་པའོ། །སརྦ་མངྒ་ལཾ།། ༈ །།འཕགས་མཆོག་ཐུགས་རྗེའི་གཏེར་ལ་ཕྱག་འཚལ་ལོ། །སྲིད་ལས་ངེས་འབྱུང་དྲག་པོས་རྒྱུད་བསྐུལ་ནས། །རྙེད་དཀའ་འཇིག་སླའི་དལ་འབྱོར་དོན་ཡོད་ཕྱིར། །ལས་འབྲས་བླང་དོར་སྙིང་ནས་བརྩོན་པ་ཡིས། །ཐར་པའི་ས་བོན་ཐེབས་པར་བྱིན་གྱིས་
རློབས། །མཁའ་ཁྱབ་འགྲོ་ཀུན་ཕ་མར་ཤེས་པའི་བློས། །ཚད་མེད་བྱམས་དང་སྙིང་རྗེ་ཆེན་པོ་དང་། །བྱང་ཆུབ་སེམས་གཉིས་བདུད་རྩིས་ཉེར་འཚོ་བས། །རྣམ་མཁྱེན་པདྨོ་རྒྱས་པར་བྱིན༔ དབང་གིས་རྒྱུད་སྨིན་སྡོམ་གསུམ་རྣམ་པར་དག །འཁོར་འདས་དབྱེར་མེད་གཉུག་མའི་དེ་ཉིད་མཐོང་། །སྣང་སེམས་ལྷ་དང་བདེ་བ་ཆེན་པོར་ཤར། །མཆོག་གི་འབྲས་བུ་འགྲུབ་པར་བྱིན༔ གནས་སྐབས་སུ་ཡང་ཆོས་བཞིན་སྤྱོད་པ་ལ། །འགལ་རྐྱེན་ཀུན་ཞི་མཐུན་རྐྱེན་ཕུན་སུམ་ཚོགས། །རིགས་བདག་བླ་མ་མཆོག་དང་མི་འབྲལ་བས། །རང་གཞན་དོན་གཉིས་འཕེལ་བར་བྱིན༴ དེ་ལྟར་རྩེ་གཅིག་སྨོན་པའི་གནས་རྣམས་ཀུན། །སྐྱབས་གནས་ཀུན་འདུས་བླ་མ་མཆོག་གསུམ་དང་། །ཡི་དམ་མཁའ་འགྲོ་ཆོས་སྲུང་བདེན་སྟོབས་ཀྱིས། །གེགས་མེད་མྱུར་དུ་འགྲུབ་པར་བྱིན་གྱིས་རློབས། །ཞེས་དགེ་སློང་དགེ་བའི་བཤེས་གཉེན་འཇམ་དབྱངས་མཆོག་གྲུབ་པའི་ཆེད་དུ་བརྗོད་པ་དགེ་ལེགས་སུ་གྱུར་ཅིག། ༈ །།ན་མོ་གུ་རུ་བཛྲ་སཏྭཱ་ཡ། ཕྱོགས་བཅུ་དུས་བཞིའི་རྣམ་འདྲེན་སྲས་བཅས་ཀྱི། །སྐུ་གསུང་ཐུགས་ཡོན་ཕྲིན་ལས་ངོ་བོ་ཉིད། །སྐྱབས་གནས་ཀུན་འདུས་གཏེར་ཆེན་རྡོ་རྗེ་འཆང་། །སྙིང་ནས་འབོད་དོ་ཡེ་ཤེས་སྤྱན་གྱིས་གཟིགས། །མི་ཕྱེད་གུས་པས་ཕྱག་འཚལ་སྐྱབས་སུ་མཆི། །ལུས་དང་ལོངས་སྤྱོད་དགེ་ཚོགས་ལྟོས་མེད་འབུལ། །སྡོམ་དང་
དམ་ཚིག་ཉམས་པ་མཐོལ་བཤགས་ན། །སྒྲིབ་མེད་ཚངས་པ་མཆོག་གི་དངོས་གྲུབ་སྩོལ། །བདག་ཅག་བརྒྱུད་འཛིན་སློབ་མར་བཅས་རྣམས་ཀུན། །མགོན་པོ་ཁྱོད་ལས་སྐྱབས་གཞན་མ་མཆིས་པས། །སྙིང་དབུས་མི་ཤིགས་ཐིག་ལེར་རྟག་བཞུགས་ནས། །ཐུགས་ཡིད་གཅིག་ཏུ་འདྲེས་པའི་བྱིན་ཆེན་ཕོབ། །གནས་སྐབས་དམ་ཆོས་སྒྲུབ་པའི་འགལ་རྐྱེན་ཞི། །མཐུན་རྐྱེན་མ་ལུས་ཕུན་སུམ་ཚོགས་པ་དང་། །རྣམ་པར་དཀར་བའི་ལེགས་བྱས་ཇི་སྙེད་ཀྱིས། །མགོན་ཁྱོད་ཐུགས་དགོངས་ཡོངས་སུ་རྫོགས་པར་ཤོག །མཐར་ཐུག་པདྨས་ཁེབས་པའི་ཞིང་ཁམས་སུ། །བྱང་སེམས་ཁྱུ་མཆོག་པདྨའི་མྱུ་གུ་དང་། །སྟོན་འཁོར་དགོངས་པ་དབྱེར་མེད་གཅིག་གྱུར་ཏེ། །མཁའ་མཉམ་འགྲོ་ཀུན་འདྲེན་པར་བྱིན་གྱིས་རློབས། །རྒྱལ་བ་ཀུན་དངོས་བླ་མས་རྗེས་སུ་བཟུང་། །རྒྱལ་བའི་སྲས་པོ་ཞབས་པད་བསྐལ་བརྒྱར་བརྟན། །རྒྱལ་ཁམས་དྲི་མེད་བཤད་སྒྲུབ་ཕྲིན་ལས་རྒྱས། །རྒྱལ་ཁམས་ཀུན་ཏུ་བཀྲ་ཤིས་བདེ་ལེགས་ཤོག །ཅེས་པའང་ལུང་ཟིན་སྤྲུལ་པའི་དྷཱ་ཀི་ནཱིས་བཀའ་སྩལ་རིན་པོ་ཆེའི་ཕྲེང་བས་བསྐུལ་བ་ལྟར། མཚོ་སྐྱེས་བླ་མ་དགྱེས་པའི་འབངས་འཇམ་དབྱངས་མཁྱེན་བརྩེའི་དབང་པོས་སྙིང་ནས་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།། ༈ །།བླ་མའི་ཞབས་ལ་
ཕྱག་འཚལ་ལོ། །ཕྱི་རོལ་སྣང་བ་ཐམས་ཅད་ཀུན། །སེམས་ཀྱི་ཆོ་འཕྲུལ་རྨི་ལམ་འདྲ། །རང་གི་སེམས་ལ་ཚུར་བལྟས་པས། །དང་པོར་སྐྱེ་མེད་སྟོང་སང་ངེ་། །བར་དུ་འགག་མེད་གསལ་ལམ་མེ། །ཐ་མར་། གང་དུའང་མི་གནས་པར། །ཉམས་སུ་མྱོང་ཡང་བསམ་བརྗོད་འདས། །འདུ་འབྲལ་མེད་པ་གཉུག་མའི་གཤིས། །རིག་སྟོང་ཟུང་དུ་འཇུག་པ་ནི། །དོན་གྱི་མཁའ་སྤྱོད་དབང་མོ་སྟེ། །དེ་ཡི་ངང་དུ་མ་ཡེངས་ཤིང་། །བཟོ་བཅོས་མེད་པར་རྟག་ཏུ་བསྐྱང་། །འབྲས་བུའི་ལྷན་སྐྱེས་མངོན་གྱུར་ཤོག །བན་རྒན་ཡེ་ཤེས་ལའོ།། ༈ །།ཆོས་སྡེའི་བཅའ་ཡིག །ཨོཾ་སྭ་སྟི་སིདྡྷཾ། བཀྲ་ཤིས་མཚན་གྱི་སྣང་བ་ཡིས། །ཕན་བདེའི་ལམ་བཟང་གསལ་མཛད་པ། །བླ་མ་མཆོག་གསུམ་ཆོས་སྲུང་གིས། །དགེ་ལེགས་མེ་ཏོག་ཆར་དུ་བསྙིལ། །ཅེས་ཤིས་པར་བྱ་བའི་ཚིག་གིས་མདུན་བསུས་ཏེ། དེང་གི་ཆར་ཡང་། བོད་ཆེན་པོའི་ལྗོངས་འདིར་འབྲི་རྫ་ཟལ་མོ་སྒང་གི་ནོར་འཛིན་གྱི་ཐིག་ལེར་སངས་རྒྱས་ཀྱི་ཕྲིན་ལས་རིས་མེད་པར་འཇུག་པས་ཐུབ་བསྟན་རིན་པོ་ཆེ་སྒོ་དུ་མ་ནས་ལྷག་པར་རྒྱས་པའི་ནང་ཚན། ཁོ་བོ་ཅག་གི་ཡབ་མེས་གོང་མ་སྤྲུལ་པའི་ཆོས་རྒྱལ་རིམ་བྱོན་དང་། མདོ་ཁམས་རྫོགས་ཆེན་པ་སྐུ་ཕྲེང་རིམ་བྱོན་ཡོན་མཆོད་ཀྱི་རྟེན་འབྱུང་རྨད་དུ་བྱུང་བའི་ཐུགས་བསྐྱེད་དང་བཀའ་དྲིན་ལ་བརྟེན། སྦས་པའི་གནས་མཆོག་རུ་དམ་གངས་ཀྱི་ར་བའི་
འདབས་འབྲེལ་དུ་སྔ་འགྱུར་རྡོ་རྗེ་ཐེག་པའི་བཤད་སྒྲུབ་ཀྱི་ཆུ་གཏེར་ཆེན་པོ་འོག་མིན་ཨོ་རྒྱན་བསམ་གཏན་ཆོས་གླིང་ཞེས་གྲགས་པའི་ཡི་གེས་མཛེས་པར་གྱུར་པ་འདིར། ཕྱིས་སུ་ལོ་ཆེན་བཻ་རོ་དངོས་བྱོན་རྗེ་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་ཐུགས་སྲས་རྣམས་དང་བཅས་པའི་ཐུགས་རྗེ་དང་བཀའ་དྲིན་གྱི་ཤིང་རྟས་ཐུབ་བསྟན་ཡོངས་སུ་རྫོགས་པའི་ཉིན་བྱེད་ཆེན་པོ་གསར་དུ་དྲངས་པའི་ཤྲཱི་སཾ་ཧའི་ཆོས་གྲ་རིག་གྲོལ་འདུས་པའི་གླིང་གི་མགོན་དུ། འཛམ་གླིང་བསྟན་འགྲོའི་གཙུག་རྒྱན་དཔལ་ས་སྐྱ་པ་ཁྲི་ཆེན་བཀྲ་ཤིས་རིན་ཆེན། གདུང་སྲས་ཕྱོགས་ཀྱི་གླང་པོ། སྨིན་གླིང་ཁྲི་ཆེན་རིན་པོ་ཆེ། སྐྱབས་མགོན་རྫོགས་ཆེན་རྣམས་ཀྱིས་མགྲིན་གཅིག་ཏུ་ལུང་བསྟན་ཅིང་། སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པའི་གཏེར་ལུང་ཨོ་རྒྱན་དུས་གསུམ་མཁྱེན་པའི་རྡོ་རྗེའི་གསུང་གིས་ཀྱང་གསལ་བར་བསྔགས་པ་ལྟར་བླ་མ་གོང་མ་དེ་ཉིད་ཀྱི་སྤྲུལ་པའི་སྐུ་འཁྲུལ་མེད་ཐར་རྩེ་རྡོ་རྗེ་འཆང་ཁུ་དབོན་གྱི་བཀའ་དྲིན་ལ་བརྟེན་དབུས་གཙང་དག་པའི་ཞིང་ནས་ལྗོངས་འདིའི་བསོད་ནམས་ཀྱི་མགྲོན་དུ་བྱོན་པ་འདི་ཉིད། ལྕགས་ལ་ས་དབང་ཆེན་པོ་དང་། ཁོ་བོ་ཅག་ཞང་དབོན་ཐམས་ཅད་དང་བླ་མ་གོང་མ་དེ་ཉིད་ཆོས་དམ་འབྲེལ་ཟབ་ཆེ་བར་མ་ཟད། ད་ལྟའི་སྤྲུལ་པའི་སྐུ་འདི་ཉིད་ཀྱང་བསྟན་པའི་གསལ་བྱེད་ཆེན་པོར་འབྱུང་བ་
གདོན་མི་ཟ་བས་མངའ་གསོལ་གཟེངས་བསྟོད་ཀྱི་འོས་སུ་གྱུར་པ་བཞིན། འདི་ནས་ཀྱང་རྗེ་རྒྱལ་བའི་སྲས་པོའི་ཆོས་ཀྱི་ཁྲི་འཕང་མཐོན་པོར་དབང་བསྐུར་ཞིང་བསྟན་འགྲོའི་དཔལ་མགོན་མཆོག་ཏུ་མངའ་གསོལ་བ་ཡིན་པས་མཆོག་དམན་ཐམས་ཅད་ནས་ཡིད་ངེས་དང་། ལྷག་པར་དམ་པའི་སྐྱེས་བུ་རྣམས་ལ་རིགས་ཀྱི་ཡོན་ཏན་ལྷུན་གྱིས་གྲུབ་པ་ཆོས་ཉིད་ཀྱང་། ཡོན་ཏན་དེ་ཉིད་སད་པར་བྱེད་པའི་རྐྱེན་རྒྱལ་བའི་བསྟན་པ་ལ་རིམ་གྱིས་ཞུགས་ཤིང་ཡོངས་སུ་རྫོགས་པ་ཁོ་ན་ལ་རག་ལས་པས་ན། དགེ་བའི་བཤེས་གཉེན་མཚན་ཉིད་དང་ལྡན་པ་ལ་བརྟེན་ནས་གཞི་ཚུལ་ཁྲིམས་དག་པ། ལམ་གསན་བསམ་རྫོགས་པ། འབྲས་བུ་བསྒོམས་བྱུང་གི་ཤེས་རབ་ལ་དབང་འབྱོར་བས་མཚོན། མདོར་ན་ཐུན་མོང་གི་གདུལ་བྱའི་ངོར་ཡང་བླ་མ་གོང་མ་དེ་ཉིད་དང་སྤངས་རྟོགས་ཀྱི་ཡོན་ཏན་མིག་མཐོང་ལག་ཟིན་དུ་མཉམ་པ་ཞིག་མ་བྱུང་གི་བར་རང་དབང་འདུས་པར་མཛད་དེ་དགོན་སྡེ་རི་ཁྲོད་གར་དབེན་དུ་བསླབ་པ་གསུམ་གྱི་ཡོན་ཏན་མཐར་ཕྱིན་དུ་མཛད་པ་ལས། རྣམ་གཡེང་འདུ་འཛི་དང་། གྲོང་ཆོག །རྙེད་འཚོལ་སོགས་ཆུང་ངུའི་ཕྱིར་དུ་ཆེན་པོ་གཏོང་བ་རང་གཞན་གང་ཐད་ནས་བྱས་འཐུས་མེད་པ་དང་། རང་དོན་དུ་མཁྱེན་རྟོགས་ཀྱི་ཡོན་ཏན་ཡོངས་སུ་རྫོགས་ནས། གདུལ་བྱ་གཞན་དོན་གྱི་ཕྲིན་ལས་རབ་འབྱམས་ཕྱོགས་བྲལ་དུ་སྐྱོང་བ་དང་།
ཉེ་ཆར་ཧྥི་སི་ཧའི་ཆོས་གྲྭ་དེ་ཉིད་ཀྱང་རྗེ་བླ་མ་གོང་མའི་ཐུགས་བཞེད། ངོས་རང་མཆོད་ཡོན་གྱི་བཅའ་ཁྲ་བཀའ་བཀོད་རིམ་ཅན་དུ་བསྩལ་དང་སྩོལ་མུས་ལྟར་སྒྲིག་ཁྲིམས་རྣམ་པར་དག་པ་དང་། རྒྱལ་བསྟན་བཤད་སྒྲུབ་ཀྱི་བྱ་བ་ཉམས་པ་སོར་ཆུད། མ་ཉམས་གོང་འཕེལ། འཕེལ་བ་བརྟན་ཅིང་སྲིད་མཐར་རྒྱས་པའི་འཁོར་ལོ་གསུམ་གྱི་ལེགས་མཛད་འཕྲལ་འཕྲལ་དུ་འཐུས་ཤོར་མེད་པར་མཛད་ནས། འདི་བྱས་འདི་བྱེད་ཀྱི་སྙན་ཞུ་ཡོད་པ་དགོས་པ་ལས་གཡེང་ལུས་ཅུང་ཟད་ཙམ་ཡང་མི་ཆོག་པ་དང་། འདི་ནས་ཀྱང་བསྟན་དོན་ལར་རྒྱུར་དགོངས་པའི་ཉེས་པ་ཚར་གཅོད་དང་། ལེགས་པ་གཟེངས་བསྟོད་ཀྱི་རྒྱབ་གཉེར་ཚུལ་བཞིན་མཛད་རྒྱུ་ཡིན་པ་བཅས་མཆོག་དམན་བར་གསུམ་ཐམས་ཅད་ཀྱི་ཡིད་ལ་ངེས་པར་བྱས་ཤིང་བསམ་སྦྱོར་གཉིས་ཀའི་སྒོ་ནས་སྤང་བླང་ཚུལ་བཞིན་དུ་ཡོང་བ་གྱིས། །ཞེས་རབ་བྱུང་བཅོ་ལྔ་པའི།། ཚེས་དགེ་བར་བླ་མ་གོང་མ་རྣམས་དང་། སྤྲུལ་པའི་ཆོས་རྒྱལ་རིམ་བྱོན་གྱིས་བྱིན་གྱིས་བརླབས་པའི་གནས་ལྕང་ར་ལྷ་ཀླུ་འཆི་མེད་དགའ་ཚལ་གྱི་ཕོ་བྲང་ནས་སྤེལ་བ་སརྦ་དཱ་སུ་ཐེ་ཡོ་བི་ཛ་ཡནྟུ།། ༈ །།ཐམས་ཅད་མཁྱེན་པ་ལ་ཕྱག་འཚལ་ལོ། །གངས་ཅན་བསྟན་པའི་མངའ་བདག་ས་སྐྱ་པ། །རྒྱལ་བས་ལུང་བསྟན་ངོར་ཆེན་རྡོ་རྗེ་འཆང་། །སྙན་བརྒྱུད་རྒྱ་མཚོའི་མངའ་བདག་ཚར་ཆེན་རྗེ། །བརྒྱུད་པར་བཅས་པས་
རྣམ་ཀུན་དགེ་ལེགས་སྩོལ། །མདོ་ཁམས་ལྷོ་རྫ་ལྷ་གཉན་ཆེན་པོ་རྒྱམ་རྒྱལ་རྡོ་ཐི་གངས་དཀར་གྱི་འདབས་འབྲེལ་གདོང་དགོན་ཆོས་འཁོར་གླིང་འདི། ཐར་རྩེ་རྡོ་རྗེ་འཆང་བྱམས་པ་ནམ་མཁའ་འཆི་མེད་ཀྱི་ཐུགས་བསྐྱེད་དང་། རྡོ་རྗེ་འཛིན་པ་བསྟན་འཛིན་ཕུན་ཚོགས་དང་། ཀུན་རྡོར་སྤྲུལ་པའི་སྐུ་གོང་འོག་སོགས་ཀྱི་ཕྲིན་ལས་ཀྱིས་གསར་དུ་ཆགས་ཤིང་། དཔལ་སའི་ཚངས་པ་སྡེ་དགེ་ཆོས་རྒྱལ་ཆེན་པོ་དང་མཆོད་ཡོན་གྱི་འབྲེལ་རྒྱུན་ལ་བརྟེན་ད་ལྟའི་བར་མ་ཉམས་གོང་འཕེལ་ལྟར། རྗེ་བཙུན་ས་སྐྱ་ཁྲི་ཆེན་རིན་པོ་ཆེ། རྡོ་རྗེ་འཆང་བྱམས་པ་ནམ་མཁའ་འཆི་མེད། སྡེ་དགེ་ཡབ་རྗེ་རིན་པོ་ཆེ་རྣམས་ཀྱི་བཅའ་ཡིག །གྲ་ཡིག ། ལེགས་སྤེལ་ཉེས་བསྲུང་ཀྱི་བཀའ་གཏན་ཆེ་ཕྲ་རིམ་སྩལ་དང་། ལུང་ཟིན་སྤྲུལ་པའི་ཆོས་རྒྱལ་དཔལ་ལྡན་འཆི་མེད་རྟག་པའི་རྡོ་རྗེས་ཀྱང་རྒྱབ་གནོན་དམིགས་བསལ་གནང་འགྱུར་བཅས་ཀྱི་དགོངས་དོན་ལྟར། རིག་པ་འཛིན་པའི་དགེ་འདུན་བཙུན་པ་ཞེས་སོ་སོ་ཐར་པའི་འདུལ་ཁྲིམས་གཙང་མས་གཞི་བཟུང་། བྱང་ཆུབ་སེམས་གཉིས་ཀྱིས་རྒྱུད་སྦྱངས། དམ་ཚིག་དང་སྡོམ་པ་རྣམ་པར་དག་ཅིང་བསྐྱེད་རྫོགས་ཟབ་མོ་ལ་ཉམས་མྱོང་ཡོད་པ་ཞིག་གཞིར་བཞག་དགོས་པ་ཤེས་གསལ་ལྟར་དང་། སྐབས་དོན་བྱེ་བྲག་གྲྭ་རིགས་རྣམས་ཐོག་མར་དགོན་དུ་ཞུགས་ནས་བཟུང་དཔེ་ཆ་བསླབ་སྦྱང་ཆིག་རྒྱུགས་ཕེར་བ། ཐིག་རྡུལ་ཚོན།
གཏོར་བཟོ། འབུད་བརྡུང་། དབྱངས་རོལ་འཆམས་སོགས་བློ་ཚོད་དང་བསྟུན་པའི་བསླབ་སྦྱང་དང་། བསླབ་ཕྱིན་ལག་ལེན་ཁུངས་དག་ཤེས་ངེས། ལོ་ཚོད་ལ་སླེབས་ནས་ངོར་ཨེ་ཝཾ་དུ་གྲྭ་སར་འགྲོ། མར་སླེབས་འཕྲལ་ཀྱེ་རྡོར་གཞི་བསྙེན་དང་། ཀུན་རིག་བསྙེན་པ་སྟན་ཐོག་གཅིག་ཏུ་ཚར་ངེས་ཁ་སྐོང་གི་སྦྱིན་སྲེག་བཅས་ཚད་ལྡན་གཏོང་། དུས་རྒྱུན་གྲྭ་བ་རྣམས་དགོན་ནང་སྡོད་ཚུགས་པ་ཤིན་ཏུ་གལ་ཆེ། མོ་ཁྲིམས་ཆང་ཁྲིམས་དམ་ངེས་བསྡམ། དུས་རྒྱུན་གྲྭ་ཆས་འབྲལ་མེད་ལས་སྐྱ་ཆས། སོག་ཆས། སྐྲ་རིང་པོར་བཞག་པ། འཛིང་མོ་འུར་ཞོག །ཚོང་བུན་བསྐྱེད་སོགས་མི་བྱེད་པར་ཐམས་ཅད་ཐུགས་མཐུན་ཁྲིམས་གཙང་། ཞི་དུལ་དྲན་ཤེས་བག་ཡོད་བརྟན་པས་མི་སྨོན་རང་སྐྱིད་འདི་ཕྱིར་བདེ་བ་ཞིག་ལ་བློ་རྩེ་གཏད་དགོས། ལྷ་ཁང་གད་བརྡར་མཆོད་འབུལ། གྲ་ཚག་ཁང་ཚག་སོགས་ལོ་རེ་བཞིན་དུ་ཞིབ་དཔྱོད་ཀྱིས་མཐའ་ཐུབ་ངེས་བྱེད། རང་ལུགས་ལྟ་གྲུབ་སྤྱོད་གསུམ་གཙང་མ་ལས་ཉ་དང་ཉུང་མ་བསྲེ་བའི་ལག་ལེན་འཆོལ་སྤྱོད་སུས་ཀྱང་མི་བྱེད། གལ་སྲིད་བསྒྲིགས་དང་འགལ་བ་བྱུང་ན་དྲག་ཞན་སུ་ཡིན་རུང་ཡན་པོར་མི་བཞག་པར་ཉེས་པའི་བབས་དང་བསྟུན་པའི་བཤགས་སྦྱང་ཁྲིམས་གཅོད་འཕྲལ་དུ་གཏོང་། ཆེ་བཙན་རྒྱབ་ཁུར་གྱི་ངན་ཤེད་འཐབ་འཛིང་གྱོད་སྦྱར། ཕྱི་སྣེ་ནང་ཁྲིད། ནག་ཆང་རྐུན་གསུམ་ལྟ་
བུའི་ངན་སྤྱོད་མངོན་མཚན་ཆེ་བར་བྱུང་ན་ལུས་སྟེང་མནར་སྦྱངས་དང་། ཆད་ལས་ཀྱིས་མཚམས་སྦྱར་ནས་དགོན་པ་ནས་མདོ་སྒྲུབ་དང་བཅས་གནས་དབྱུང་ངན་པ་ཕྱི་ལམ་ལེགས་ངེས་བྱེད་པ་ལས་མི་ངོ་རྒྱུ་ངོ་ལྟ་བུའི་ཅི་ལོ་ཅི་ཉན་དེ་འདྲ་གཏན་ནས་མི་བྱེད། སྔར་ཡོད་འཚོགས་སྒོ་སྒྲུབ་མཆོད་དང་། ངེད་ནས་ཀྱང་རྟེན་སྐལ་དུ་རྗེ་བཙུན་སྒྲོལ་མའི་སྣང་བརྙན་གསེར་ཟངས་ལས་གྲུབ་པ་ཁྲུ་ཚད་ཆེ་བ་སྒྲོས་ལེགས་བྱིན་ཅན་དང་། དཔལ་གསང་བ་འདུས་པ་མི་བསྐྱོད་རྡོ་རྗེ་དང་། འཁོར་ལོ་བདེ་མཆོག་ལཱུ་ཧི་པའི་དབང་བསྐུར་ཞིང་དབྱར་དགུན་ལན་གཉིས་སུ་རས་བྲིས་དང་རྡུལ་ཚོན་ལ་བརྟེན་པའི་སྒྲུབ་མཆོད་གསར་བཙུགས་ཞལ་འདེབས་རྒྱ་དངུལ་སྲང་བཅུ། དབྱར་མཆོད་སྐབས་བཟང་སྤྱོད་ཉིན་ཚོགས་བརྒྱ་མཆོད་དངོས་གཙང་དང་བཅས་པའི་རྟེན་དངུལ་སྲང་བཅུ་བདུན་སྤྲད་པ་བཅས་འདི་རིགས་ཇི་སྲིད་བསྟན་པ་ནམ་གནས་པར་ཚོགས་བཙུགས་སྒོ། འགྱེད་མང་ཇ། མར་མེ་ཞལ་ཟས་སོགས་ཡར་ལྡན་དུ་དགོས་པ་ལས་གཏོང་རྩ་ཉམས་ཆག །གཏོང་སྒོ་ཆག་འཕྲི་དཔུས་ཞན་རྒྱུ་ངན་སོགས་གཏན་ནས་བྱེད་མི་ཆོག་པ་བཅས་དགོན་པ་རང་ནས་ངེས་རྒྱུ་དང་། གཞན་གྲྭ་རྩ་ཆོས་བརྒྱུད། དཀོར་ས་དགེ་ཁུངས་སོགས་བཀའ་གཏན་རིམ་ཆོད་ལ་སུས་ཀྱང་རྩོད་ནོག་མི་ཆོག་པ་གཞིར་བཅས་སུ་མ་ཟད། བདག་པོའི་སྡིག་ཐམ་ངོ་མ་དང་འབྲེལ་བའི་བཀའ་
བཀོད་དམིགས་བསལ་བྱུང་ན་མ་གཏོགས། ཕྱི་ནང་ཆེ་བཙན་སུས་ཀྱང་སློང་མོ། སྒོ་བཞག །དཔུས་བསྒྱུར། ལག་གཡར། ས་ཚིགས་ཁྲལ་འདེད་སོགས་བྱེད་པ་ཤར་ཚེ་འདེད་མཁན་དང་། སྤྱོད་མཁན་གཉིས་ཀར་གསེར་སྲང་ལྔའི་འབའ་བཞག་པ་ཡིན་པར་མ་ཟད། རྡོ་རྗེའི་ཆོས་སྲུང་དྲག་རྩལ་ཅན་རྣམས་ལ་གཉེར་དུ་གཏད་ཡོད་པས་ཐམས་ཅད་ནས་ཡིད་ངེས་ཀྱིས་འདི་ཕྱི་ཁྲིམས་གསུམ་ལས་མི་འགལ་བ་བྱེད་དགོས། དམ་པའི་ཆོས་དང་ལྡན་པའི་མཛད་པ་གོང་འཕེལ་གནང་ན་དགོན་སྡེ་གྲ་རིགས་ཀྱིས་མཚོན་འབྲེལ་ཚད་ཐམས་ཅད་གནས་སྐབས་སུ་བར་ཆད་ཞི། བསམ་དོན་འགྲུབ། ཡུལ་ཕྱོགས་དགེ་ཞིང་བཀྲ་ཤིས། མཐར་ཐུག་བྱང་ཆུབ་ཆེན་པོའི་གོ་འཕང་ཐོབ། བཤད་སྒྲུབ་ལས་གསུམ་གྱི་བསྟན་པ་དར་ཞིང་རྒྱས་ལ་ཡུན་རིང་དུ་གནས་པར་གདོན་མི་ཟ་ཞིང་། ངོས་ནས་ཀྱང་བླ་མ་དཀོན་མཆོག་ལ་ཐུགས་རྗེ་བསྐུལ་བའི་གསོལ་འདེབས་འདུན་སྨོན་རྩེ་གཅིག་བགྱི་བ་ལགས། །བཤད་སྒྲུབ་བསྟན་པ་དར་ཞིང་རྒྱས་གྱུར་ཅིག །ཆོས་ལྡན་རྒྱལ་པོའི་མངའ་ཐང་འཕེལ་བར་ཤོག །འགྲོ་ཀུན་ཕན་བདེའི་དགའ་སྟོན་དར་གྱུར་ཅིག །ཀུན་ཀྱང་བྱང་ཆུབ་སྙིང་པོ་མྱུར་ཐོབ་ཤོག །ཅེས་པའང་འཇིགས་བྲལ་གྱི་སློབ་དཔོན་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོས་བསྟན་པ་རིན་པོ་
ཆེར་ལྷག་པའི་བསམ་པས་བྲིས་པ་དོན་དང་ལྡན་པར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།དེ་སྔ་ཕན་གྱི་གླེང་གཞི་བརྗོད་པའི་ཡི་གེ །རྫོང་སར་དགོན་གསར་རྙིང་བླ་ཆོས་སྤྱི་གསར་རྙིང་བཅས་ཐམས་ཅད་ནས་ངེས་རྒྱུར། རྫོང་སར་དགོན་འདི། བདག་པོའི་མངའ་འོག་ས་དགོན་སུམ་ཅུ་སོ་དགུའི་ནང་ནས་ཨངྒི་གཉིས་པ། དགེ་འདུན་ཞལ་གྲངས་ཉིས་བརྒྱ་ཡོད་རྒྱུའི་བཀའ་དེབས་ཅན་མཁར་མདོའི་མཚན་མ་དེ་ཡིན་འདུག་པ་ལྟར། ངེད་རང་ནས་ཀྱང་ས་ངོར་གྱི་བསྟན་པའི་མཛེས་རྒྱན་དང་། བདག་པོའི་ཞབས་བརྟན་རང་གཞན་ཚོགས་རྫོགས་ལ་དམིགས་པའི་བསམ་པ་བཟང་པོ་ཟོལ་མེད་པས་ཐུབ་དབང་གནས་བཅུ་ལྷ་ཁང་ངོ་མཚར་ཀུན་ཏུ་གཟིགས་ཀྱི་ཞིང་ཁམས་ཆེན་པོ་སྟེང་ཤོད་རྟེན་དང་བརྟེན་པར་བཅས་པ་རྒྱ་དངུལ་རྡོ་ཚད་སུམ་ཅུ་ལྷག་གི་རྒྱུ་རྩས་བསྐྲུན་པ་དང་། ལམ་འབྲས་ལྷ་ཁང་། དེ་དག་གི་མཆོད་རྒྱུན། ཁྱད་པར་རྒྱལ་བའི་བཀའ་འགྱུར་རིན་པོ་ཆེ་གཙོས་རང་དང་གཞན་བསྐུལ་གྱིས་དབང་ལུང་ཁྲིད་གསུམ་འཆད་སྤེལ། དགེ་འདུན་གྱི་སྡེ་ལ་བསྙེན་བཀུར་སོགས་ཆོས་དང་ཟང་ཟིང་སྒོ་དུ་མས་ཅི་ནུས་སུ་བསྐྱང་། དགེ་འདུན་རྣམས་དགོན་པར་སྡོད་ཚུགས་པས་གཞི་བཟུང་། མོ་ཁྲིམས་སོགས་དམ་པར་བསྡམ། བློ་ཆེ་བ་རྣམས་ཀྱིས་ཕྱི་ནང་གི་རིག་གནས། ཆུང་བ་རྣམས་ཀྱིས་ཀྱང་ཆོ་ག་ཕྱག་ལེན་བསླབ་སྦྱང་། གྲྭ་སར་
འགྲོ་རྒྱུ། མཚམས་བསྙེན་སྒྲུབ་སོགས་དལ་འབྱོར་ལན་གཅིག་ཐོབ་པ་སྟོང་ལོག་མ་སོང་ཙམ་གྱི་ཚེ་འདི་ཕྱི་གཉིས་ཀའི་དོན་དུ་རང་གིས་རང་ལ་ཤ་ཚ་སྙིང་རྗེས་རང་དྲིན་རང་ལ་ཆེ་བ་ཞིག་དགོས་རྒྱུ་རེད་ཅེས་ལྕེ་མ་བྱང་། རྣ་བ་མ་སུན་བར་སྔ་ཕྱིར་ལོ་གྲངས་བཅོ་ལྔ་ལྷག་ཏུ་བཤད་བཤད། ཉན་ཉན་པ་ཡིན་མོད་ཀྱང་། དུས་དབང་གིས་ཡིན་ནམ་ལོ་རེ་ལས་ལོ་རེ་ཇེ་ཞན་གྱིས་ཆོས་དམ་ཚིག །འདི་ཕྱི་ལས་འབྲས་ཁྲེལ་ཁྲིམས་ངོ་ཚ་སོགས་སྟོན་ཀའི་ཐན་སྤྲིན་བཞིན་དུ་དེངས་པ་ཞིག་ཕྱོགས་སྤྱི་དང་བྱེ་བྲག་ཕལ་ཆེར་ཐམས་ཅད་དུ་བྱུང་ནས། བསོད་ནམས་ཀྱི་མཐས་གཏུགས་པའི་ཡུལ་དུས་གང་ཟག་གི་ཉེ་བར་ལེན་པའི་རང་གཟུགས་ལས། བོད་ཕུང་དམ་སྲིའི་གཙོ་བོ་ཉག་རོང་པས་ཉེན་བསླངས་ཏེ་ཕྱི་ནང་གི་སྒོ་དུ་མ་ནས་རྐྱེན་སྦྱར་བས་དུས་ངན་ཆུ་ཕག་ལོའི་ཟླ་༣ཚེས་༡༤ལ་ཆུ་ཚོད་བཅུ་དྲུག་གི་ཡུན་གྱིས་བསྟན་དགོན་གྱང་རོལ་ཆེན་པོ་འཇིགས་སུ་རུང་བའི་དམ་གྲོག་མེ་ལྕེའུ་རུ་རུ་འབར་ཞིང་ཐལ་ཕུང་ཕྱུ་རེ་བ་བལྟ་བས་མི་བཟོད་པའི་སྐབས་ཀྱང་ཞུམ་པ་མེད་པའི་སྙིང་སྟོབས་བསྐྱེད། དཀོན་མཆོག་ལ་བདེན་པར་གསོལ་ཏེ་ཕྱི་གཙུག་ལག་ཁང་མེའི་འཇིགས་པ་ལས་བསྲུངས། ཉག་རོང་མགོ་བྱེད་བི་ན་ཡ་ཀ་ཆེན་པོ་དག་བདེན་པའི་ཚིག་དང་། ཀ་ཅའི་ཡས་སྟགས་ཀྱིས་ཚིམ་པར་བྱས་ཏེ་ནང་རྟེན་གསུམ་མཆོད་ཆ་ཙམ་དུ་མ་ཟད། སྤྱི་ཁང་ཞེས་མིང་དོན་
མཐུན་པ་དགོན་ཡུལ་ཐམས་ཅད་ཀྱི་སྤྱི་མཛོད་ཆེན་པོ་དེ་གྲ་མ་ཆག་གྲུ་མ་ཉམས་པར་བྱས། དམ་སྲིས་བརླམས་པ་ཁ་ཅིག་ན་རེ། ཁྱེད་རང་འདིར་བསྡད་ན་ད་དུང་ཉག་རོང་གིས་ཁྲི་མུན་དུ་བཅུག་སྟེ་མཐར་ཆུ་ལ་བསྒྱུར་སྐད་ཀྱི་འཇིགས་འཇིགས་རྔམ་རྔམ་ཅི་ཟེར་རུང་རྣ་བའི་ཕྱིར་ཕྱོགས་ལ་མ་ཉན་པར་འཇིགས་པ་མེད་པའི་དཔའ་བསྐྱེད་དེ། ཆོས་ཁྲིམས་བློ་གྲོས་གྲགས་པས་ཅི་ཟེར་ཉན་པ་ལྟར་བསླབ་བྱ་བཀོད་འདོམས་ཀྱིས། དེ་འཕྲལ་ཟླ་༤ ཚེས་༡༣ལ་ངེད་རང་ནས་ཤིང་སློང་བའི་ཆོ་ག་བགྱིས་པས་ནག་ཕྱོགས་པའི་འཚུབས་འགྱུར་ཆེན་པོས་ལག་པར་སྐྱ་ལྷོག་ཟིན་ཏེ་འཆི་ལ་ཐུག་པ་བྱུང་ཡང་ཇི་མི་སྙམ་པའི་བརྟུལ་ཞུགས་ཀྱིས། །ཆོས་རྗེ་རྣམ་གཉིས་མན་ལ་ཞ་རྟེན་དང་བཅས་ཞུ་བ་ཕུལ་ཏེ། སྔ་ཕྱིར་ཉག་རོང་ལ་འཇིགས་སྐྱོབ་ཞ་རྟེན་ཨ་མ་ཞིག་ཡིན་རྩིས་དོན་མེད་དང་། དགོན་པ་གསར་ཆགས་ཀྱི་དོན་དང་། འཚོ་རྟེན་དུ་དམིགས་མ་ཎི་་འདོན་ཡོན་ཡན་ཆད་ཀྱི་དོན་ཡོད་པ་བཅས་གང་ལྟར་ཡང་དངོས་ཇ་འཁོར་དྲུག་བཞི་བརྒྱ་ཐམ་པའི་རྒྱུ་ཚོགས་བཏང་ནས་ལོ་དེར་བླ་བྲང་གཉིས་ཀྱིས་གཙོ་བྱས་གྲ་གཤག་བཞི་བཅུ་ཙམ་གྲུབ། ཕྱི་ལོ་ཤིང་བྱི་ལོར་ངེད་ན་བ་དང་། ཉག་བོད་ཀྱི་དུས་གཟེངས་གསར་པས་ཐམས་ཅད་སྒྱིད་ལུག་སྟེ་ལུས། ཤིང་གླང་ལོར་འཕྲོ་མཐུད་དེ་ཟླ་བ་ལྔ་པ་ནས་ལྕགས་རི་བཅས་ཆེ་ལམ་གྲུབ། དེ་ནས་རིམ་པར་མདའ་དཔོན་པད་ཚལ་བ།
བཀའ་བློན་ཆེན་པོ་ཕུ་ལུང་བ། ཞོལ་གཉེར་བྲག་དཀར་པོ་སོགས་ཀྱི་བཀའ་བཀོད་རིམ་ཅན་དང་། བདག་པོ་རིན་པོ་ཆེ་ཡར་ཕེབས་འཕྲལ་ཡར་ལམ་བཀའ་ཤོག་དང་གཉེར་བཀྲ་དོན་ནས་ཞིབ་བསེད་ཀྱི་བཀོད་པ། དེ་རྗེས་མེ་སྟག་ལོར་གཞུང་ས་ཆེན་པོའི་སྐུ་ངོ་ཞབས་པད་ས་དབང་རིན་པོ་ཆེ། གོང་མ་ཆེན་པོའི་བཀས་མངགས་རྒྱ་དཔོན་རྨ་ཏཱ་ལོ་ཡེ། སྤྲུལ་པའི་ཆོས་རྒྱལ་སྡེ་དགེ་བཅས་ཀྱི་བཀའ་ཁྲ་གཏན་ཚིག་ཆེན་མོ་རྒྱབ་གནོན་དང་བཅས་ངེད་ཀྱི་ལག་ཏུ་སྩལ་བ་གུས་པས་སྤྱི་བོར་མཆོད་དེ། ཞིབ་མོའི་བརྡ་སྤྲད་པ་ཡང་ནས་ཡང་དུ་མོལ་པར་མ་ཟད། མེ་སྟག་ཟླ་༩ཚེས་༡༤་ས་མཆོད་ཆེན་མོའི་ཉིན། འཇམ་དཔལ་དམར་སེར་གྱི་རྗེས་གནང་སྔོན་དུ་འགྲོ་བས་བཀའ་ཁྲ་བཅའ་ཡིག་ཞིབ་ཀློག་གིས་དེ་དག་གི་དགོངས་དོན་རང་ནས་གང་ཤེས་ཚིག་དོན་རེ་རེ་བཞིན་གལ་པོ་ཆེ་ཐང་དགུའི་དཔེ་ལྟར་ལན་གྲངས་མང་དུ་བསྐྱར་ཏེ། སྐྱ་འདུ་སེར་ཚོགས་སུམ་བརྒྱ་ལས་མི་ཉུང་བར་བཤད་བཤད་པ་དེ་རྣ་བ་དྲུག་བརྒྱ་སུན་སུན་དུ་གོ་རྒྱུ་དེ་རེད། དེའི་འགགས་དོན་གཙོ་བོ་ནི། མོ་ཁྲིམས་དམ་པར་བསྡམ་པ་དང་། ༡ གྲ་ཁྲལ་གསར་རྙིང་ཞིབ་སྡུད་དང་། ༢ གྲ་ཁང་ཉམས་གསོ་གསར་བཞེངས་མཐའ་བསྡུ་རྒྱུ་བཅས་དང་། ༣ དཔེ་ཆ་བསླབ་གཉེར་གདངས་དབྱངས་རོལ་མོ་སོགས་སྦྱང་རྩོལ་དང་། ༤ ལོ་ཚོད་སླེབས་པ་ཐམས་ཅད་གྲ་
སར་རྡེལ་བཀོད་བྱེད་ནས་མངག་རྒྱུ་དང་། ༥ མར་སླེབས་ནས་བསྙེན་པ་ཆེ་ཆུང་སྡོད་རྒྱུ་དང་། ༦ གཞན་དགོན་ནང་དུ་སྡོད་ཚུགས་པ་དང་བསྒྲིག་ལམ་ཀུན་སྤྱོད་ཐ་ན་སྐ་རག་འཆིང་ལུགས་ཀྱིས་མཐའ་རྟེན་པ་ཚུན། ། ཕོ་ཚོག་ལབ་ཡམ་ཙམ་གྱི་ཧེ་རུ་ཀའི་ཆེ་བསྒོས་མ་ཡིན་པར་ལས་བྱེད་རྣམས་ནས་རེ་རེ་བཞིན་ཞིབ་ཅ་དགོས་རྒྱུ་དེ་རེད་ཀྱང་། དེ་ནས་བཟུང་སྟེ་དེ་སྔ་ལོ་ཧྲིལ་པོ་གསུམ་རེད་སོང་སྟེ་འདི་བྱས་ཆེན་པོ་ཅི་ཡོད་ངས་ནི་ཆེར་མ་ཤེས། ཕར་ཟེར་ཚུར་གཏམ་ཚིག་གཅིག་ཀྱང་མ་བྱུང་། ཐ་ན་མོ་ཁྲིམས་གཅིག་པོའི་ཐད་ནས་ཀྱང་། ཡུལ་པའི་ཁ་རྒྱགས་རྣམས། རྫོང་སར་དགོན་པའི་མོ་ཁྲིམས་དང་འདྲ། དགུན་ཁ་བསྡམ། དབྱར་ཁ་བཤིག །ཇོ་མོའི་ཁྲིམས་ལུག་ཐུག་ཁེབས་རྒེབ་སྟངས་བྲེམ་རྒྱུ་དེ་རེད། ཞག་སྡོད་ཚུན་ཆོད་བྱེད། དགོངས་པ་ཨམ་ཞིག་ཀྱང་ཞུ་ཞུ་གནང་གནང་ངོ་གནང་ཆོག་མཁན་དེ་ཤཱཀྱ་ཐུབ་པའི་གྲལ་མགོར་སྡོད་མཁན་ཞིག་ལོས་ཡིན། ན་ཉིན་ངོར་གྱི་གདན་ས་ཆེན་པོ་ནས་བླ་ཁག་སྤྱིའི་བཀའ་བགྲོས་ཆེན་མོས། བདག་པོའི་མདུན་དུའང་སྤྱིར་བཏང་གི་ཞུ་རྒྱ་ནན་ཏན་དང་། རྫོང་སར་དགོན་པར་དམིགས་བསལ་གྱི་གྲ་རྒྱུན་མངགས་དགོས་སོགས་བཀའ་ཤོག་ཞིབ་ནན་རྟེན་བཅས་སྩལ་བ་ལའང་ཞུ་ལན་ཙམ་ཡང་ཕུལ་སྐད་མ་ཐོས་པ། གཞན་ཕར་ཞོག །རང་གི་རྩ་བའི་གྲ་ས་དེའི་བཀོད་པ་སྣ་
རྒྱབ་ཀྱི་རླུང་ལྟར་བྱེད་པ་ཆོས་དམ་ལའང་ཨེ་བཏུབ་ན་སྙམ་སྟེ། ཡིན་པའི་ནི་ལོས་ཡོད། དེ་ལྟར་ཡན་གྱི་ལོ་རྒྱུས་འདི་རྣམས་ངས་བྱས་ངས་རྒོད་ཀྱི་ཡུས་ཆེ་འཚང་བ་ནི་མིན་ཡང་། ངེད་རང་ལྟ་བུ་ཕུ་འབྲོག་མདའ་ཞིང་། འཁོར་སྒེར་དུད་སོགས་ལྟ་ཅི། ས་ཆ་སྦར་མཐིལ་ཙམ་ཡང་མེད་པའི་རྒྱལ་ཁམས་ཀྱི་བྱ་བྲལ་གྲ་རྐྱང་ཉམ་ཆུང་ཞིག་གིས་ལྷག་བསམ་དེ་ཙམ་བྱས་པའང་དཔལ་ལྡན་ས་ངོར་གྱི་ཆོས་དམ་ཚིག་དང་། བདག་པོའི་མཚན་དབུ་ན་ཁོ་ན་ལ་བསམ་པ་ལས། ངེད་རང་རང་ངོས་ནས་ནི་ཁྱེད་རྫོང་སར་དགོན་པའི་མངའ་ཐང་ལ་དེ་སྔའང་རེ་བ་ཕྲ་མོ་ཞིག་བྱས་པ་མེད། ད་ནི་དེ་ལས་ག་ན་ཡོད། བན་རྒན་ནད་པ་འཆི་རན་པ་ཞིག་གིས་ཕ་རྒན་ཞེན་ཆགས་ཆེན་པོས་བུ་ཚ་ལ་ཁ་ཆེམས་ཀྱི་དཔེ་ལྟར་འདི་ཙམ་བྱས་དུས་མི་ཚེ་ལ་དཀོར་ཟན་དམར་ཧྲིལ་ལེགས་ཉེས་ཅུང་ཟད་དཔྱོད་ཤེས་མཁན་རྣམས་ཀྱིས་བསམ་མནོ་རེ་རེ་ཙམ་བཏང་ཨི་སྲིད་སྙམ་དུ། མ་བྱས་བྱས་སྐད་ཀྱི་ཁ་ཧམ་མིན་པར་གཟུ་བོའི་བློས་དྲང་པོའི་ཚིག་རྒྱས་ཙམ་སྨྲས་པ་ལས། ཚིག་ངན་བརྡུང་བ་ནི་མིན་ཡང་། གལ་ཏེ་མ་བཟོད་ན། སེམས་ཅན་ལས་ངན་སྤྱོད་པ་ལ། །སངས་རྒྱས་ཀྱིས་ཀྱང་ཅི་བྱར་ཡོད། །ཅེས་པ་དེ་གདའ་བས་མ་ཎི་འདོན་པ་ལས་འོས་ཅི་ཡོད། དེ་ཡན་གྱིས་སྔོན་གྱི་བྱུང་བ་བརྗོད་པའི་གླེང་གཞི་དེ་ཐལ། ད་དགོས་ཀྱི་དོན་ཧྲིལ་
གྱིས་དྲིལ་བའི་ཡིག་ཆུང་ཟུར་ན་ཡོད་པ་དེ་ལྟོས་ཤིག །ཨོཾ་མ་ཎི་པདྨེ་ཧཱུྃ། ༈ །མཆོག་གླིང་ལ་ཕུལ་བའི་ཀརྨ་ལྷ་སྟེང་བཅའ་ཡིག །སྲས་བཅས་སྟོབས་བཅུ་མངའ་བ་ཡོངས་ཀྱི་ཕྲིན་ལས་པ་ཆེན་པོ་སྤྲུལ་པའི་གཏེར་འབྱིན་རྒྱ་མཚོའི་འཁོར་ལོས་སྒྱུར་བ་མཆོག་གི་ཞབས་ཀྱི་པདྨོའི་ཉེ་དྲུང་དུ། གུས་པ་ཆེན་པོས་ནང་ལུགས་སྟབས་བདེར་ལྷག་བསམ་རྩེ་གཅིག་པས་གང་དྲན་སྤྱི་བརྟོལ་བསྐྱེད་དེ་ཞུ་གསོལ། དེང་། མཁས་པའི་འབྱུང་གནས། གྲུབ་པའི་འདུན་ས། མ་ཧཱ་བྷོ་ཊའི་མཛེས་རྒྱན་གཅིག་པུ་གཉིས་སུ་མ་དམིགས་པས་སྤྱོད་གསུང་གི་འཁོར་ལོའི་སྤྲུལ་པའི་ལྷ་ཁང་ཆེན་མོ་དང་ཉེ་བའི་རི་སུལ་དུ། འོག་མིན་རྡོ་རྗེ་བཀོད་པའི་ཕུན་སུམ་ཚོགས་པ་ལྔ་ཀའི་གསང་བ་ཆེན་པོ་མངོན་པར་སྣང་བའི་རྫུ་འཕྲུལ་གྱིས། ལུང་སྡེ་སྣོད་གསུམ་གྱི་བཤད་པ་དང་། མངོན་རྟོགས་བསླབ་པ་གསུམ་སྒྲུབ་པའི་འདུས་པ་ཆེན་པོའི་སྡེ་བཀོད་པ་དང་། འཆི་མེད་པདྨ་དྲྭ་བའི་མཚོ་གླིང་། མི་འགྱུར་གངས་ཀྱི་རི་བོའི་ཐིག་ལེ། དཔའ་བོ་ཌཱ་ཀི་དགྱེས་རྒུར་སྤྱོད་པའི་གནས་སུ་འོད་གསལ་རྡོ་རྗེ་སྙིང་པོའི་རྣལ་འབྱོར་གྱི་འདུ་བས་འཇའ་ལུས་རྡོ་རྗེའི་ལམ་སྲོལ་གསར་དུ་བཏོད་པ་སོགས་རྒྱལ་བའི་བསྟན་པ་ལ་མདོ་སྔགས་ཀྱི་སྟོན་བཟུང་གི་ཕྲིན་ལས་དུས་གཅིག་ཏུ་འཆར་བའི་དགེ་ལེགས་གྱི་སྣང་བས་ས་གསུམ་ཁྱབ་པར་མཛད་པའི་ངོ་མཚར་དང་བཀའ་དྲིན་ནི་ཚངས་ཆེན་འབུམ་
གྱི་བློས་བསམ་ནའང་ཆ་ཙམ་རྫོགས་པའི་མཐའ་མ་དམིགས་ན། སྐྱབས་འོག་ཐ་ཆུང་པ་བདག་ལྟ་བུའི་འདུ་ཤེས་གསུམ་པ་དད་སྤྲོའི་པདྨོ་ཉིན་རེ་བཞིན་ཡང་དང་ཡང་དུ་ཁ་བྱེ་བ་ལ་མཚར་དུ་ཅི། ད་སྟེ་ཞུ་གསོལ་སྙིང་པོར། ཉིད་རིན་པོ་ཆེ་སྤྲུལ་པའི་གཏེར་སྟོན་ཆེན་པོ་འགྲན་ཟླ་དང་བྲལ་བ་ཞིག་གི་གདན་ས་དང་མཛད་པ་ཕྱག་རྗེས་ཡིན་དུས། ས་དགེ་ཀར་གསུམ་གྱི་ལུགས་གང་ཡང་ཡིན་དོན་མེད། སྔ་འགྱུར་རྙིང་མ་འཁྲུལ་མེད་ཅིག་ཡིན་དགོས། གསར་མིན་རྙིང་མིན། རྙིང་མ་ཉི་ཚེ་བ་དེ་འདྲ་ཞིག་གིས་ཅིའང་མི་ལོ། འོ་ན་རྙིང་མ་དོན་ཐ་སྙད་གཉིས་ཀ་མ་འཁྲུལ་བ་དེ་གང་ཡིན་སྙམ་ན། གཙོ་བོར་མདོ་སྒྱུ་སེམས་ཀློང་སོགས་བཀའ་མས་གཞུང་བསྲང་། གཏེར་ཁ་གོང་འོག་སོགས་གཏེར་མས་ཟུར་བརྒྱན་པ་ཞིག་ཡིན། དེའི་རིང་ལུགས་འཛིན་པ་ལ་འགྲན་ཟླ་མེད་པའི་མཁས་གྲུབ་ཀུན་གཟིགས་རོང་ཟོམ་པ། རྒྱལ་བ་ཀློང་ཆེན་པ། མངའ་རི་མ་ཧཱ་པཎྜིཏ་རྣམས་ཡིན། དེས་ན་ཀུན་རྫོབ་ཀྱི་ཐ་སྙད། དོན་དམ་གྱི་འཇོག་ཚུལ། སྙིང་པོའི་ཉམས་གཞེས་རྣམས་དམ་པ་དེ་རྣམས་ཀྱི་རྗེས་སུ་འབྲངས་དགོས། ཁྱད་པར་ཕྱི་དུས་འདིར་བཀའ་གཏེར་རྒྱ་མཚོའི་རིང་ལུགས་བཀའ་ཡོད་ལ་བསླད་མེད་པར་འཛིན་མཁན་དེ་ཨོ་རྒྱན་སྨིན་གྲོལ་གླིང་པ་ཡིན། བླུན་པོ་འགའ་རེས་སྨིན་གླིང་པའི་བསྒྲིགས་ལམ་ཀུན་སྤྱོད་ཀྱང་གཏེར་བདག་གླིང་པ་ཞལ་
འཁོས་བཟང་། ལོ་ཆེན་ཐུགས་རབ་བཟང་། ཡིད་བཞིན་ལེགས་གྲུབ་གསུང་སྐད་དང་སྐུ་གཟུགས་བཟང་བས་ལྟར་སྣང་ཅི་མཛེས་གཙོ་བོར་བཏོན་པ་ཡིན་སྙམ་པ་གདའ་སྟེ། དེ་འདྲ་ཡིན་མིན་སྒྱུ་འཕྲུལ་རྩལ་འཆམས་དང་། བཀའ་བརྒྱད་ཀྱི་གདངས་ཡིག་ཁོ་ན་ལ་དཔྱད་ཀྱང་སོ་ཟུར་གནུབས་གསུམ་དང་། གཏེར་ཁ་གོང་འོག་སོགས་ཀྱི་ཕྱག་རྒྱུན་རྣམ་དག་རེ་རེ་བཞིན་དཀའ་བ་དང་འབད་པ་ཆེན་པོས་བླངས་ཏེ་བྱི་དོར་མཛད་ཚུལ་བརྒྱུད་ཡིག་ཚུན་ཞིབ་ཆ་མཛད་པ་དེ་ལྟ་བུ་ལས་འཕྱོན་མའི་བུ་བཞིན་ཁུངས་མེད་གཟུ་ལུམ། སྣང་ཞལ་འཕྱར་གཡེང་། མཁས་པའི་རང་བཟོ། བླུན་པོའི་ཚུགས་ཁྱེར། རྨོངས་ཧམ་སྤྱི་བརྟོལ། གཞན་ལས་བརྐུས་པ། ཞལ་གཟིགས་ལུང་བསྟན་ལ་བསྙད་པ་ཙམ་ཡང་མིན་པ་དབྱིངས་རིན་པོ་ཆེར་མངའ་བ་ལྟར་ལགས་ན། གདངས་དབྱངས་རོལ་མོ་བསྒྲིགས་ལམ་ཀུན་སྤྱོད་སོགས་ཕྱག་བཞེས་ཆེ་ཕྲ་ཐམས་ཅད་གཏེར་གསར་རང་ལུགས་དམིགས་བསལ་ཡོད་པ་རྣམས་དེ་ཁོ་ན་བཞིན་ཅིས་ཀྱང་མཛད་དགོས་པ་གཞིར་བཅས་ལ། སྤྱིར་བཏང་ཐམས་ཅད་སྨིན་གླིང་པའི་ལུགས་སོར་བཞག་དང་། ཁྱད་པར་སོ་ཐར་གྱི་སྡོམ་རྒྱུན་ཡང་མཚན་བརྗོད་པར་དཀའ་བ་བོད་ཀྱི་ཤཱཀྱ་ཐུབ་པ་མཁན་ཆེན་ཞི་བ་འཚོ་ནས་བརྒྱུད་པ་ཞིག་ངེས་པར་དགོས་མོད། རེ་ཞིག་མཁན་སློབ་སོགས་ཀྱི་སྟབས་འགྲིགས་མིན་ཇི་ལྟར་རུང་། གཞི་
གསུམ་གྱི་ཕྱག་བཞེས་འདོན་ཆ་ལོ་མགོ་འཛིན་ཚུལ་ཚུན་ལོ་ཆེན་རིན་པོ་ཆེའི་གསུང་རབ་སོར་བཞག་དང་། འཆད་ཉན་གྱི་གཙོ་བོའང་རྙིང་མ་ལས་ཆེས་རྙིང་མའི་གཞུང་རིག་པ་དང་གཙུག་ལག་མཐའ་དག་གི་ཕྱི་མོ་སུམ་རྟགས་གཉིས་ཀྱི་བཤད་པ་དང་འབྲི་ཀློག་པ་བྱང་ཆུབ་པ་གཞིར་བཞག་པའི་སྟེང་། སྡོམ་གསུམ་རྣམ་ངེས་རྩ་འགྲེལ་དང་། རྒྱུད་གསང་བ་སྙིང་པོ་ཁོ་ན་རྩལ་དུ་བཏོན་ནས་འཆད་ཉན་མཛད་ན་སྔ་འགྱུར་བའི་མདོ་སྔགས་བསྟན་པའི་ལམ་གནད་དང་ཉམས་ལེན་ཐམས་ཅད་དེར་མ་འདུས་པ་མེད་པས་ལས་སླ་ལ་ཆོད་ཆེ་བ་ཞིག་ཡིན། དེས་ན་སྡོམ་གསུམ་རྩ་བ། གསང་སྙིང་རྒྱུད། དགོངས་རྒྱན་དབུའི་སྤྱི་དོན་ཏེ། འདི་གསུམ་བསྒྲིགས་དེར་ཞུགས་ཚད་ཀྱི་ཐོག་མ་ནས་ཁེར་རྒྱུགས་ཕེར་ངེས་བློར་བཟུང་། ཚེས་སྡོམ་གསུམ། བརྒྱད། བཅོ་རྒྱུད། ལྔ། གནམ་སྤྱི་དོན་གང་ལྟ་བུར་ཚོགས་འདོན་གྱི་སྲོལ་བཙུགས་ན་མ་མཐའ་ཚིག་བྱང་བར་ཤེས་པ་དེ་ཙམ་ཡང་ཐོས་བསམ་གྱི་འཇུག་སྒོར་ཁྱད་ཤིན་ཏུ་ཆེ། དེ་མིན་བློ་གྲོས་ཆེ་བ་རྣམས་ཀྱིས་གཞུང་ཆེ་བ་དང་། རིག་གནས་སོགས་མང་པོ་ཇི་ཙམ་ཤེས་ན་ལོས་བཟང་སྟེ། དེང་དུས་བློ་གྲོས་དང་བརྩོན་འགྲུས་གཉིས་ཀ་འཛོམ་པ་ཤིན་ཏུ་དཀོན་པས། གཞུང་ལུགས་དང་ཉམས་ལེན་གང་ལའང་ཚ་རན་མིན་བལྟ་བ་འདྲ་མོ་དེ་གཅིག་ཏུ་འབྲེལ་འཇོག་ལྟ་བུའི་ལེགས་པོ་ཡིན་པའང་སྲིད་མོད། གཉིས་
སུ་བོན་སྣེ་མང་། མི་འགྲུབ་དྲན་རྒྱ། སྤྲང་པོའི་ཕྱེ། འབལ་མོའི་ཟས་ལྟ་བུ་བྱ་དཀའ་ལ་ཆོད་ཆུང་བ། དོན་མེད་ལ་ཡིད་སྨོན་གྱིས་སུན་པའི་དབུལ་པོ་ཚོང་དུས་སུ་ཕྱིན་པའི་དཔེ་ལས་ཅི་ཡང་མེད་པ་ལགས། །གཞན་ཡར་ངོའི་ཚེས་བཅུར་གཏེར་གསར་རང་གི་ཐུགས་སྒྲུབ་རིགས་དང་། མར་ངོའི་ཚེས་བཅུར་ཟབ་བདུན་སྐོར་སོགས་ཡི་དམ་རིགས་འདོན་རེས་ཀྱི་ཚོགས་སྐོར་རེ་ཙམ་དང་། ཚེས་བརྒྱད་ལ་སྒྲོལ་མ་མཎྜལ་བཞི་པའི་ཆོ་ག །ཉེར་དགུར་ཆོས་སྐྱོང་དགོངས་འདུས་ལྟ་བུས་མཚོན་ཟླ་འདོན་དང་། སྤྲེལ་ཟླའི་ཚེས་བཅུ་རྒྱས་པ་དང་། ཉི་ལྡོག་གམ་དབུ་ཆེན་ལྟ་བུར་བཀའ་བརྒྱད་གཏོར་ཟློག་རེ་ཙམ་གྱིས་མཚོན་དུས་མཆོད་དངོས་གཙང་ཞིང་མི་མང་བ་ཞིག་མཛད་ན་ལེགས་སྙམ། བྱུང་ན་བཀའ་མའི་འདུས་པ་མདོའམ། སྒྱུ་འཕྲུལ། མ་མཐའ་འང་ཡང་དག་རེ་ཙམ་གྱི་སྒྲུབ་མཆོད་ཞིག་བྱུང་ན་སྤྱན་ལྟོས་ལ་ཤིན་ཏུ་ཕན་ཡང་རིམ་གྱིས་། བབས་གཟིགས་དང་། རྒྱུན་ཇ་བསྟར་ཆགས་ཡོད་ཚེ། སྔ་དྲོའི་ཚོགས་ཐེངས་ལ་རྒྱུན་ཆགས་གསུམ་པ་དང་། འཕྲོག་མའི་གཏོར་བསྔོ། ཡན་ལག་བདུན་པའི་རིམ་པ་གཙོ་བོར་བཏོན་ངོས། ཐུབ་བསྟོད་སྤྱི་དང་། །ཁྱད་པར་འཕགས་བསྟོད། ལྷ་ལས་ཕུལ་བྱུང་གི་བསྟོད་པ། གནས་བརྟན་ཕྱག་མཆོད། ལེའུ་བདུན་མའི་ལེའུ་རེ་རེ་ཙམ་གྱིས་མཚོན་གསུང་རེས། ཉིན་གུང་གུང་ཚིགས་ཀྱི་འདོན་ཆ་མདོ་ཟབ་མདོ། བསྔོ་དང་
བཅས་པ་དང་། སྒྲོལ་མ་ལྟུང་བཤགས་སོགས། སྡོམ་གསུམ་ལྟ་བུའི་གཞུང་ལེའུ་ཆ་ཤས་རེ་གསུང་རེས། ཕྱི་དྲོ་ཐུགས་སྒྲུབ་ཕྲིན་ལས་སྙིང་པོ་ལྟ་བུའི་གཞུང་བསྲངས་ནས། དམ་ཅན་སྤྱི་གཏོར་ལ་གཏེར་གསར་གྱི་སྲུང་མ་ཁྱད་པར་བ་རྣམས་བསྣན་པ་ལྟ་བུའི་གཏོར་བསྔོ་ཉུང་བསྡུས་ཚོགས་མཆོད་བཅས་ཀྱི་མཐར་བཟང་སྤྱོད་དང་། བྱམས་སྨོན་སོགས་འདོན་རེས་དང་། ཡང་ཟློག་གམ་ལོཀྟི་ལྟ་བུའི་བྱད་ཟློག་ཐུང་ཙམ་རེ་མཛད་ན་སྨིན་གླིང་པའི་ཕྱག་བཞེས་དང་སྒོ་མཐུན་པའི་སྐབས་སུ་བབ་པ་འོང་སྙམ་ཞིང་། སྔ་དྲོའི་སྐབས་སྒྲོལ་དཀར་ལྟ་བུའི་ཚེ་སྒྲུབ་གང་རུང་གི་སྒོམ་བཟླས་ཉུང་ཙམ་མཛད་ནའང་ལེགས་སོ། །། འོན་ཀྱང་འདོན་རྒྱུ་མང་ན་ཟབ་མདོ་བརྗེད་པའི་དཔེ་ལྟར། ཧ་ཅང་ཚོགས་འདོན་མང་བ་བཞག་ནས་གཞུང་གི་འཆད་ཉན་གཙོ་བོར་འདོན་དགོས། མདོར་ན་སྡོམ་པ་གསུམ་གྱི་ཁས་བླངས་རྣམ་པར་དག་པས་གཞི་བཟུང་། མདོ་སྔགས་ཀྱི་འཆད་ཉན་གཙོ་བོར་བཏོན། རྒྱུད་སྡེ་ཆེན་པོ་དང་མཐུན་པའི་རིམ་གཉིས་ཀྱི་ཉམས་ལེན་སྙིང་པོར་དྲིལ་བའི་དགེ་སློང་རྡོ་རྗེ་འཛིན་པ་གཅིག་བྱུང་ནའང་སྙིགས་དུས་འདིར་སངས་རྒྱས་འཇིག་རྟེན་དུ་བྱོན་པ་དང་འདྲ་བའི་བཤེས་གཉེན་ཆེན་པོར་ངེས་ན། དེ་ལྟ་བུ་མང་དུ་ཚོགས་པ་ནི་ལྟ་སྨོས་ཀྱང་ཅི་དགོས་པས་སྲིད་ཞིའི་ཕན་བདེ་མ་ལུས་པ་འབྱུང་བའི་སྒོ་བཀྲ་ཤིས་ཀྱི་དགེ་མཚན་བྱེ་བསྙེད་
ཀྱི་རྒྱ་མཚོ་ཆེན་པོར་ངེས་པ་ཉིད་དོ། །ཞེས་པའང་སངས་རྒྱས་གཉིས་པ་པདྨ་སཾ་བྷ་ཝ་ཡབ་སྲས་ཀྱི་ཐུགས་རྗེའི་སྐྱབས་འོག་ཏུ་ངལ་འཚོ་བ་རིག་འཛིན་གྱི་བཙུན་པ་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་དྲང་པོའི་བློས་བསམ། གཟུ་བོའི་རིགས་པས་དཔྱད། ལྷུག་པའི་ཚིག་གིས་ལུང་རིགས་མན་ངག་དང་མཐུན་པར་གསོལ་བ་འདེབས་པའི་རྟེན་བཀྲ་ཤིས་པའི་ལྷ་གོས། བཅས་བསམ་པ་དག་ཅིང་སྦྱོར་བ་གུས་པས་འབུལ་ལམ་ཞུས་པ་ལགས་ན། སྐྱབས་མགོན་མཆོག་ཉིད་ཞབས་པད་བསྐལ་བརྒྱར་བརྟན་ཅིང་། ཕྲིན་ལས་མཁའ་ཁྱབ་ཏུ་རྟག་པ་དང་། ཕུན་སུམ་ཚོགས་པའི་དགེ་འདུན་གྱི་འདུ་བ་འབུམ་ཕྲག་མང་པོས་མདོ་སྔགས་ཀྱི་བསྟན་པ་རིན་པོ་ཆེ་དྲི་མ་མེད་པ་བཤད་སྒྲུབ་ལས་གསུམ་གྱི་སྒོ་ནས་སྲིད་མཐར་རྒྱས་པར་མཛད་པའི་དགེ་ལེགས་གྱི་སྣང་བས་འགྲོ་རྣམས་བདེ་སྐྱིད་ཆོས་འབྱོར་གྱི་དགའ་སེ སྟོན་ལ་དུས་རྟག་ཏུ་ལོངས་སྤྱོད་པར་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། །།