པར་བྱང་གསལ་བཤད།

---

^{[མ་དཔེ་གཟིགས་ན་འདིར་གནོན།]}

པར་བྱང་གསལ་བཤད། རྒྱལ་བསྟན་རིས་མེད་བསྟན་པ་ཡོངས་ཀྱི་མགོན། །ངོ་མཚར་བཀའ་བབས་བདུན་གྱི་ཤིང་རྟ་ཆེ། །རིགས་བརྒྱའི་ཁྱབ་བདག་པདྨ་མདོ་སྔགས་གླིང་། །མི་འབྲལ་སྤྱི་བོའི་རྒྱན་དུ་རྟག་པར་རོལ། །དེའང་གངས་ལྗོངས་རྒྱལ་བསྟན་རིས་མེད་ཀྱི་མངའ་བདག་ངོ་མཚར་བཀའ་བབས་བདུན་ལྡན་ཀུན་གཟིགས་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོའི་ཞབས་ཀྱི་བཀའ་འབུམ་གློག་ཀླད་དུ་འབྲུ་ལེན་ཇི་ལྟར་བྱས་པའི་ཚུལ་ནི། མཁྱེན་བརྩེ་སྐུ་ཕྲེང་གཉིས་པ་འཇམ་དབྱངས་ཆོས་ཀྱི་བློ་གྲོས་ནས་རྗེ་གོང་མའི་གསུང་འབུམ་འཚོལ་བསྡུད་མཛད་དེ་འཇམ་མགོན་རྣམ་གཉིས་ཀྱི་ཞལ་སློབ་གནས་གསར་བཀྲ་ཤིས་ཆོས་འཕེལ་ནས་དཀར་ཆག་བཏབས་ཏེ་རྩ་བའི་གདན་ས་རྫོང་སར་བཀྲ་ཤིས་ལྷ་རྩེར་ཤིང་པར་པོད་ཆེན་བཅུ་གསུམ་བརྐོས་མཛད། ༡༩༥༨ལོར་དུས་འགྱུར་སྐབས་རྫོང་སར་དགོན་རྟེན་དང་བརྟེན་པར་རྩ་རླག་འགྲོ་བ་དང་ཆབས་ཅིག་པར་ཤིང་རྩ་རླག་སོང་། དེ་ནས་རྒྱ་གར་འབྲས་ལྗོངས་མཁྱེན་བརྩེའི་བླ་བྲང་དུ་མཁྱེན་བརྩེ་སྐུ་ཕྲེང་གསུམ་པ་འཇམ་དབྱངས་ཐུབ་བསྟན་ཆོས་ཀྱི་རྒྱ་མཚོའི་ཕྱག་ཏུ་སྔར་རྫོང་སར་ཤིང་པར་དཔེ་ཁ་ཚང་ཞིག་འབྱོར་འདུག་པ་འདྲ་བཤུས་བྱས་ཏེ་པོད་ཉེར་གསུམ་བྱས་ཏེ་འཕྲུལ་པར་དུ་བསྐྲུན་མཛད། དེའི་པར་གཞི་བོད་རྫོང་སར་དུ་འབྱོར་བ་ལ་

---

^{[མ་དཔེ་གཟིགས་ན་འདིར་གནོན།]}

པར་གཞི་བྱས་ཏེ་རྫོང་སར་བོད་སྨན་ཁང་བུད་མེད་གློག་ཀླད་འཛིན་གྲྭ་ནས་༢༠༠༧ལོ་ནས་འགོ་བཙུགས་ཏེ་གློག་ཀླད་དུ་སམྦྷོ་ཊའི་ཡིག་གཟུགས་སུ་འབྲུ་ལེན་ཞུས། དེའི་ཁར་ད་ལམ་གསར་རྙེད་གྲས་ལ། སྔར་འཇམ་དབྱངས་མཁྱེན་བརྩེའི་དབང་པོ་དང་འཇམ་མགོན་བློ་གྲོས་མཐའ་ཡས་ཏེ་འཇམ་མགོན་རྣམ་གཉིས་སློབ་ཚོགས་དང་བཅས་པས་ཕྱོགས་སྒྲིག་གནང་བའི་རྒྱུད་སྡེ་ཀུན་བཏུས་དང་། སྒྲུབ་ཐབས་ཀུན་བཏུས། གདམས་ངག་མཛོད། རིན་ཆེན་གཏེར་མཛོད་སོགས་སུ་མ་འཁོད་པ། ཡང་ཟབ་དཀོན་མཆོག་སྤྱི་འདུས་ཀྱི་བསྙེན་ཡིག་དང་ལས་བཞིའི་སྦྱིན་བསྲེག་སྙིང་པོ་མདོར་བསྡུས། འཇམ་དབྱངས་ལྡེལ་མོའི་ལག་ལེན་རྣམ་གསལ་ནོར་བུའི་མེ་ལོང་། མཆོད་རྟེན་ཆ་བརྒྱད་ཐིག་རྩ་ཐོ་ཆུང་། ལྟུང་བཤགས་ཀྱི་ཆོ་ག་ཤིན་ཏུ་བསྡུས་པའི་སྡིག་ལྟུང་གཞོམ་པའི་ཐོ་བ་བཅས་ཚན་བཞི་དང་། དཔལ་ནཱ་རོ་པའི་རྡོ་རྗེའི་གསུང་ཕྱག་རྒྱ་ཆེན་པོ་ཚིག་བསྡུས་ཀྱི་མན་ངག་རྒྱུད་ཀྱི་ལུང་དང་སྦྱར་བ་གཙོ་བོར་བཏོན་པའི་འགྲེལ་ཆུང་རྟོགས་པར་སླ་བ་ཞེས་པ་འདི་གདམས་ངག་མཛོད་དུ་བཞུགས་ཀྱང་འདི་རྩ་འགྲེལ་ཕྱེས་པའི་དཔེ་རྙིང་ཞིག་ཐོབ་པ་བཅས་ཚན་བཞི་པོད་ཉེར་བཞི་པའི་མཇུག་ཏུ་གསར་བཅུག་ཞུས་ཡོད། གཞན་ཡང་དེང་དུས་བཀའ་འབུམ་གསར་སྒྲིག་སྐབས་རྩོམ་པ་པོའི་རྣམ་ཐར་རེ་འཇོག་ཚུལ་ལྟར་རྗེ་མཁྱེན་བརྩེའི་དབང་པོའི་རྣམ་ཐར་

---

^{[མ་དཔེ་གཟིགས་ན་འདིར་གནོན།]}

མང་དུ་བཞུགས་པ་ལས་རྗེ་ཉིད་ཀྱི་ཞལ་སློབ་ཀྱི་ཐུ་བོ་འཇམ་མགོན་བློ་གྲོས་མཐས་ཡས་ཀྱིས་མཛད་པའི་རྣམ་ཐར་ཆེན་མོ་པོད་གཅིག་གསར་བསྣན་བྱས་ཏེ་ཁྱོན་པོད་ཉེར་ལྔ་སྡེབ་ཤར་སྣ་རིང་དུ་བསྒྲིགས་ཡོད་དོ། །སླར་དེ་ཉིད་ཧི་མ་ལའི་ཡིག་གཟུགས་སུ་བསྒྱུར་ཏེ་དེབ་གཟུགས་མགོ་ཚེམ་མ་དེབ་ཉེར་ལྔར་བསྒྲིགས་པ་དང་། སླར་གློག་ཀླད་ཨེ་ཕེར་pad སྟབས་བདེར་གཟིགས་ཆོག་པ་དེབ་དཀར་ཆག་ལ་མནན་ན་གཞུང་གི་ས་བཅད་དཀྱུས་སུ་རང་འཚོལ་ཐུབ་པའི་པར་གཞི་གཅིག་བཅས་པར་གཞི་ཁག་གསུམ་པར་སྒྲིག་ཞུས་ཡོད། །དེ་སྐབས་ལས་ཞུགས་མི་སྣའི་སྐོར་ནི། ཐོག་མར་ཡུལ་ཐེ་ཝན་ནས་ཡིན་པའི་བླ་མ་ཀརྨ་སྦྱིན་པ་ནས་རྫོང་སར་བཤད་གྲྭའི་གློག་ཀླད་འཛིན་གྲྭ་དང་། རྫོང་སར་བོད་སྨན་ཁང་བུད་མེད་གློག་ཀླད་འཛིན་གྲྭ་གཉིས་ལ་གློག་ཀླད་ཀྱི་ཤེས་བྱ་བསླབ་པས་རྫོང་སར་ཕྱོགས་ལ་དར་མགོ་ཚུགས། དེ་ནས་གོང་སྨྲོས་ལྟར་༢༠༠༧ལོ་ནས་མཁྱེན་བརྩེའི་བཀའ་འབུམ་འགོ་བཙུགས་ཏེ་རྫོང་སར་བོད་སྨན་ཁང་བུད་མེད་གློག་ཀླད་འཛིན་གྲྭ་རུ་དགེ་རྒན་རྫོང་གྲྭ་འཆི་མེད་རྡོ་རྗེ་དང་། སློབ་མ་ཚེ་ཀྲུག །འབང་དགའ། བཀྲ་ཤིས་ལྷ་མོ། ཟླ་བ་ལྷ་མོ། བསོད་ནམས་ཆོས་མཚོ། ཚེ་རིང་ལྷ་མོ། དཔལ་མོ། སངས་རྒྱས་དཔལ་སྒྲོན་བཅས་ནས་གློག་ཀླད་དུ་ཚར་གཉིས་སྦྲག་བསྡུར་བཅས་འབྲུ་ལེན་ཞུས། རྫོང་བླ་འཇམ་དབྱངས་གྲགས་

---

^{[མ་དཔེ་གཟིགས་ན་འདིར་གནོན།]}

པ་དང་རྫོང་གྲྭ་བཀྲ་ཤིས་རྣམ་རྒྱལ། འཇམ་ཤེས། འཇམ་དབྱངས་བདུད་འདུལ། སྟོབས་ཆེན། ཤཀྱ་འོད། ཚེ་དབང་ནོར་བུ། ཚུལ་ཁྲིམས་རྡོ་རྗེ། ཕུན་ཚོགས་བཟང་པོ་བཅས་ཀྱིས་དཔེ་བསྡུར་ལན་གཉིས། རྫོང་བླ་ཀརྨ་ཚེ་རིང་ངམ་དམར་མ་ནས་ཞུ་བཙུད། བླ་མ་འཇམ་དབྱངས་གྲགས་པ། ཨོ་རྒྱན་ཚེ་རིང་། ཤཀྱ་འོད། ཀརྨ་ཚེ་རིང་དང་། གྲྭ་བཀྲ་ཤིས་རྣམ་རྒྱལ་དང་། འཇམ་ཤེས། སྟོབས་ཆེན། ཚུལ་ཁྲིམས་རྡོ་རྗེ་བཅས་ནས་ཞུ་དག་ཚར་གསུམ། དེ་དག་རྫོང་བླ་ཀརྨ་ཚེ་རིང་དང་རྫོང་གྲྭ་ཨོ་རྒྱན་ཚེ་རིང་གཉིས་ནས་ཞུ་བཙུད། བུ་མོ་ཆོས་དགའ་དང་སྦྱིན་པ་རྫོང་གྲྭ་ཤེས་རབ་གསུམ་ནས་སྔ་རྗེས་དཔེ་བློགཟུགས་སྣ་རིང་གི་ཐིག་ཁང་དུ་བསྒྲིགས། དེ་ནས་རྫོང་གྲྭ་ཨོ་རྒྱན་ཚེ་རིང་ནས་བཀའ་འབུམ་ཡོངས་རྫོགས་ཞུ་ཐ་མ་ཚར་གཅིག །ཁོ་བོ་བློ་གྲོས་ཕུན་ཚོགས་ནས་ཞུ་ཐ་མའི་འབྲུ་བཅོས་ཐག་གཅོད་པོའི་ཁུལ་བླངས། སླར་དེ་དག་ཚང་མ་རྫོང་གྲྭ་ཤེས་རབ་ནས་ཧི་མ་ལའི་ཡིག་གཟུགས་བསྒྱུར་ཏེ་དེབ་གཟུགས་མགོ་ཚེམ་མ་དང་གློག་ཀླད་ཨེ་ཕེ་pad འཇོག་རྒྱུ་པར་སྒྲིག་བྱས་སོ། །དེ་དག་འགྲོ་གྲོན་ནི། ཀརྨ་ཚེ་རིང་དང་བུ་མོ་ཆོས་དགའ་སོགས་རང་གི་ནང་མི། ཀརྨ་སྦྱིན་པ་བཅས་ལ་ཡོན་མི་དགོས་པ་ཞལ་འདེགས། དེ་མིན་ལ་གླ་ཡོན་ཡོངས་རྫོགས་ཁོ་བོ་ཁྲ་འབུ་ཚང་ནང་མི་ལྷན་ནས་ཀྲུང་སྒོར་ཁྲི་བཅོ་ལྔ་ལྷག་བཏང་སྟེ་

---

^{[མ་དཔེ་གཟིགས་ན་འདིར་གནོན།]}

༢༠༡༤ལོའི་ཟླ་༢་ཚེས་༢༤་ཉིན་ལེགས་པར་གྲུབ་བོ། །དགེ་འདིས་མཚོན་པའི་དུས་གསུམ་ལེགས་བྱས་ཀྱིས། །དཔལ་མགོན་བླ་མའི་ཐུན་མོང་མ་ཡིན་པ། །ངོ་མཚར་བཀའ་བབས་བདུན་གྱི་གསང་བའི་མཛོད། །འཛིན་མའི་ཁྱོན་ཀུན་དར་བའི་རྒྱུར་གྱུར་ཅིག །ཅེས་པའང་རྫོང་སར་བ་ཁྲ་འབུ་བློ་གྲོས་ཕུན་ཚོགས་ནས་རབ་བྱུང་བཅུ་བདུན་པའི་ཤིང་རྟ་༼༢༠༡༤་༣་༡༣༽ལོའི་ལོའི་བོད་ཟླ་༡ཚེས་༡༢་རྒྱལ་ཕུར་འགྲུབ་སྦྱོར་གྱི་དུས་ཚེས་དགེ་བའི་ཉིན་རང་ཤག་ཏུ་བྲིས་པ་དགེ་ལེགས་འཕེལ།