འཁོར་བ་སྡུག་བསྔལ་གྱི་ཚོམས་དང་འབྲེལ་བར་ཐར་པའི་ཕན་ཡོན་སྐྱེས་བུ་འབྲིང་གི་ལམ་རྣམ་པར་བཞག་པའི་སྐབས་ཏེ་རབ་བྱེད་བཞི་པའི་འགྲེལ་པ།
སྤྱི་དོན་བཞི་པ་འཁོར་བ་སྡུག་བསྔལ་གྱི་རང་བཞིན་རྣམ་པར་གཞག་པ་ནི། འཁོར་ལོ་དང་པོའི་གཏམ་དང་འབྲེལ་བར་སྟོན་པའི་ཕྱིར། མངོན་མཐོའི་གྲུ་བོ་མཆོག་ལ་བརྟེན་པ་རྣམས། །རེ་ཞིག་ངན་སོང་ཆུ་སྲིན་གདུག་པའི་ལྕེས། །བཏང་ཡང་ཐར་པའི་སྐམ་སར་མ་ཕྱིན་པས། །འཕགས་པའི་བདེན་པ་བཞི་ཡི་དེད་དཔོན་གཉེན། །བདག་ཅག་འཁོར་བའི་གནས་རིས་ན་མངོན་པར་མཐོ་བ་ལྷ་མི་ཁྱད་པར་ཅན་གྱི་རྟེན། གྲུ་བོ་ཆེ་ལྟ་བུར་བག་ཡངས་པ་བདེ་བའི་ཚོར་བ་འབའ་ཞིག་ཉམས་སུ་མྱོང་བ་ལ་བརྟེན་ནའང་། ངན་སོང་གི་གནས་ཆུ་སྲིན་གདུག་པའི་ལྕེས་ལྡག་པ་ལ་ཤིན་ཏུ་ཉེ་ཞིང་། གཏན་གྱི་བཙན་ས་ཐར་པ་དང་ཐམས་ཅད་མཁྱེན་པའི་གོ་འཕང་སྐམས་ལ་ཕྱིན་པ་ལྟ་བུ་ཉེ་ཞོ་མ་མཆིས་པའི་གནས་ཐོབ་པ་མ་ཡིན་པས་འཕགས་པའི་བདེན་པ་བཞིའི་དད་དཔོན་འབའ་ཞིག་ལ་བསྟེན་པར་བྱའོ། །ཞེས་གཟུགས་ཅན་གྱི་རྒྱན་དུ་སྦྱར་བ་སྟེ། དེ་ལ་བདག་ཅག་གི་སྟོན་པས་ཝཱ་ར་ཎཱ་སིར། ལྔ་སྡེ་བཟང་པོ་སོགས་ལ་དགེ་སློང་དག །འདི་ནི་སྡུག་བསྔལ་ལོ། །འདི་ནི་ཀུན་འབྱུང་ངོ་། །འདི་ནི་འགོག་པའོ། །འདི་ནི་ལམ་མོ། །དགེ་སློང་དག་སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་་པ་མངོན་དུ་བྱའོ། །ལམ་རྒྱུད་ལ་བརྟེན་པར་བྱའོ། །དགེ་སློང་དག་སྡུག་བསྔལ་ཤེས་པར་བྱ་སྟེ། ཤེས་པར་བྱར་མེད་པའི་མི་སྐྱེ་བ་ཤེས་པ་དང་ཀུན་འབྱུང་སྤང་བར་བྱ་སྟེ། སྤང་དུ་མེད་པའི་མི་སྐྱེ་བ་ཤེས་པ་དང་། འགོག་པ་མངོན་དུ་བྱ་སྟེ། མངོན་དུ་བྱར་མེད་པའི་མི་སྐྱེ་བ་ཤེས་པ་དང་། ལམ་རྒྱུད་ལ་བརྟེན་པར་
བྱ་སྟེ། བརྟེན་པ་བྱར་མེད་པའི་མི་སྐྱེ་བ་ཤེས་པ་དང་། ཞེས་བདེན་པ་བཞི་ལན་གསུམ་དུ་བཟློས་ཏེ་གསུངས་པ་ལས། དེ་ལ་སྡུག་བསྔལ་ཤེས་པར་བྱ་བ་ནི། །གནས་རིགས་དྲུག་པོ་དམའ་འམ་མཐོ་ཡང་རུང་། །སྡུག་བསྔལ་འགྱུར་དང་ཁྱབ་པ་འདུ་བྱེད་ཀྱིས། །དམ་ལ་མ་བཞག་འཁོར་བ་ཡོད་མ་ཡིན། །འདི་ལྟར་རྩ་བའི་སྡུག་བསྔལ་ཆེན་པོ་ནི་རྣམ་པ་གསུམ་སྟེ། སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་ལོ། །དང་པོ་ནི་སྡུག་བསྔལ་གཅིག་ཤོས་མ་སངས་པར་གཅིག་ཤོས་ཀྱིས་བརྩེགས་པ་མཛེ་ཐོག་ཏུ་ཕོལ་གྱིས་གཏུགས་པ་ལྟ་བུའོ། །གཉིས་པ་ནི། ད་ལྟ་བདེ་བར་ཡོད་འཕྲོ་ལ་གློ་བུར་དུ་སྡུག་བསྔལ་བའི་རྐྱེན་དང་ཕྲད་པ་སྟེ། དཔེར་ན་ནགས་ཁྲོད་དུ་སྐྱོ་སངས་ལ་ཕྱིན་པས་དུག་སྦྲུལ་གྱིས་གཙེས་པའམ། ཁ་ཟས་རོ་བདའ་བ་ཟོས་པས་སྲིན་ཕོ་བར་ལངས་པ་ལྟ་བུའོ། །གསུམ་པ་ནི། འཇམ་དུག་ཁོང་དུ་སོང་ན་ཕྱིས་ནད་འདུ་བྱེད་ཅིང་། བཙན་པོ་དང་། གདོན་ཆེན་པོ་སོགས་ལ་གནོད་པ་བྱས་པས་ཕྱིས་གནོད་ལན་འདུ་བྱེད་པར་གདོན་མི་ཟ་བ་ལྟར། རྣམ་པ་ཀུན་ཏུ་ཉོན་མོངས་པ་ཅན་གྱི་ཡིད་ཀྱིས་སྡིག་པའི་ལས་ལྐོག་གྱུར་དུ་བྱས་པའང་། ཕྱིས་སྡུག་བསྔལ་གྱི་རང་བཞིན་མངོན་གྱུར་དུ་འདུ་བྱེད་པ་ནི་ཁྱབ་པ་འདུ་བྱེད་ཀྱི་སྡུག་བསྔལ་བ་ལྟར་མི་མངོན་པའི་ཁྱད་པར་རོ། །དེ་ལྟར་སྡུག་བསྔལ་རྣམ་པ་གསུམ་མཐའ་དག་པའམ། ཅི་རིགས་པའི་དམ་འོག་ཏུ་མ་གཅུར་བའི་འཁོར་བ་ནི་ཡོད་མི་སྲིད་པས་ན་འཁོར་བའི་རང་བཞིན་སྡུག་བསྔལ་ཅན་ཁོ་ན་སྟེ། ལས་རྣམ་འབྱེད་ལས། སྲིད་པའི་སྡུག་བསྔལ་ནི་བསིལ་བའི་སྐབས་མེད་པ་མེའི་འོབས་ལྟ་བུའོ། །འཇིགས་ཤིང་ཉམ་ང་བས་གཅན་གཟན་ཁྲོ་བོ་ལྟ་བུའོ། །མི་རྒོད་ཀྱི་ནང་ན་གནས་པ་ལྟ་བུའོ། །
ཐར་པའི་གོ་སྐབས་དང་བྲལ་བས་རྒྱལ་པོའི་ཁྲི་མུན་ལྟ་བུའོ། །ཡང་ནས་ཡང་འབྱུང་བས་རྒྱ་མཚོའི་རླབས་ལྟ་བུའོ། །བདེ་འགྲོའི་སྲོག་འཇོམས་པས་དུག་ཧ་ལ་ཧ་ལ་ལྟ་བུའོ། །ཞེས་སོ། །དེའང་འདོད་པ་དང་ཡུལ་གཉིས་ཕན་ཚུན་རྟེན་དང་བརྟེན་པ་ལྟ་བུར་འབྲེལ་ནས་བསླུ་བའི་ཚུལ། ཕུང་དཀྲོལ་བསྐྱེད་ལ་མགོ་འཕང་བསྟོད་པ་ཡི། །མ་རུངས་འདོད་པའི་གདོན་དང་ཡུལ་གྱི་དགུ །ཕན་ཚུན་འཇིངས་ཤིང་གཏུགས་པའི་བཙོན་ར་ནས། །ཐར་པའི་སྐབས་མེད་ཉམ་ཐག་སྐྱོ་བ་འཕེལ། །འདི་ལྟར་འདོད་པ་ནི་ཕུང་དཀྲོལ་ཐམས་ཅད་ཀྱི་རྩ་བ་ཡིན་ཏེ། བདག་དང་གཞན་ལ་གནོད་པའི་ཕྱིར་སྦྲུལ་གདུག་པ་མགོ་འཕང་བསྟོད་པ་ལྟ་བུའོ། །དགེ་བའི་ལས་ཆུད་གསོན་པར་བྱེད་པས་དུག་བཞིན་དུ་གསོད་པའི་བདག་ཉིད་ཅན་ནོ། །ངན་སོང་དུ་འཁྲིད་པར་བྱེད་པས་ན་མཚོན་བཞིན་དུ་སྡུག་བསྔལ་བསྐྱེད་པའི་རྒྱུ་ཡིན་ནོ། །ལྷ་དང་མིའི་ཕུན་སུམ་ཚོགས་པ་ལས་ཐག་བསྲིང་བར་བྱེད་པས་ན་དགྲ་བོ་བཞིན་ནོ། །ཕྱིན་ཆད་གཡོ་ཞིང་འགྱོད་པ་བསྐྱེད་པའི་ཕྱིར་མེ་བཞིན་ནོ། །དེའི་ཕྱིར་འཇིག་རྟེན་ན་ཐོས་པ་ལ་སོགས་པ་དོན་ཆེན་པོ་ཉིད་ཀྱིས་བསྲུང་བ་བཞིན་དེ་ལ་ཡིད་འབྱུང་ནས་སྲན་བསྐྱེད་པའི་ཚུལ། བཤེས་སྤྲིང་ལས། གཡོ་བའི་སེམས་ནི་ཐོས་མཚུངས་བུ་ལྟ་བུར། །གཏེར་བཞིན་སྲོག་དང་འདྲ་བར་བསྲུང་བགྱི་སྟེ། །གདུག་པ་དུག་དང་མཚོན་དང་དགྲ་བོ་དང་། །མེ་བཞིན་འདོད་པའི་བདེ་ལས་ཡིད་དབྱུང་མཛོད། །ཅེས་འདོད་པའི་ཁམས་པ་ཐམས་ཅད་ཀྱི་སྲེད་པ་འཕེལ་བའི་དང་པོ་ངེས་འབྱུང་གི་བསླབ་པའི་གེགས། ཁྱིམ་གྱི་བཙོན་རར་འཆིང་བའི་སྒྲོག་དམ་པོ་རེག་པའི་བདེ་བ་ལ་སྨད་པའི་སྒོ་བསྟན་ནས་དེའི་གཉེན་པོར། བུད་མེད་གཞོན་ནུའི་ལུས་ནི་ལོགས་ཤིག་ཏུ། །དྲི་ང་བ་དང་སྒོ་དགུ་དོད་པ་དང་། །མི་གཙང་ཀུན་སྣོད་འགྲོ་བ་དགང་དཀའ་དང་། །ལྤགས་པས་གཡོགས་པར་
རྒྱན་ཡང་ལོགས་ཤིག་གཟིགས། །ཞེས་ལུས་དྲི་ང་བ་དང་། དབྱིབས་དང་། མི་གཙང་བའི་རྟེན་དང་། ངོམས་མི་ཤེས་པ་དང་། ཁོང་ཐམས་ཅད་སྲིན་བུ་དང་ནང་ཁྲོལ་གྱི་སྣོད་དུ་གྱུར་བའི་སྒོ་ནས་བཟང་པོ་མ་ཡིན་པར་སུན་དབྱུང་ནས། དེའི་ལུས་དང་རྒྱན་གཉིས་ཐ་དད་དུ་ཕྱེ་ནས་བལྟས་པས་འདོད་ཆགས་ཀྱི་མེ་ཞི་བར་འགྱུར་བའི་ཐབས་བསྟན་པའོ། །དེ་བཞིན་དུ་འདོད་པ་ནི་དང་པོར་སྤྱོད་པའི་དུས་ན་བདེ་བ་ལྟར་སྣང་མོད་ཀྱིས། ཐ་མར་ནི་ཡོངས་སུ་གདུང་བ་དང་འཁོར་བར་འཆིང་བའི་ལྕགས་སྒྲོག་ལྟ་བུ་ཡིན་པས་ན་ཀིམྤའི་འབྲས་བུ་དང་མཚུངས་སོ། །ཀིམྤའི་འབྲས་བུ་ནི་ཕྱིའི་ཤུན་པ་ཙམ་བལྟ་ན་སྡུག་པར་ཟད་ཀྱིས། ནང་ཐམས་ཅད་མ་རུངས་པས་ནད་དང་སྡུག་བསྔལ་མཐའ་དག་བསྐྱེད་པའི་ཕྱིར་སྔ་མ་ལས། འདོད་པ་རྣམས་ནི་ཕུང་དཀྲོལ་བསྐྱེད་པ་སྟེ། །ཐུབ་པའི་དབང་པོས་ཀིམྤའི་འབྲས་འདྲར་གསུངས། །དེ་དག་སྤང་བགྱི་དེ་ཡི་ལྕགས་སྒྲོག་གིས། །འཁོར་བའི་བཙོན་རར་འཇིག་རྟེན་འདི་དག་བཅིངས། །ཞེས་དང་། བླ་མ་ལ་སྦྲིང་བར། ནོར་བུའི་རྣ་ཆ་བུ་དང་ཆུང་མ་ལ། །ཡོངས་སུ་ཆགས་སེམས་གང་ཡིན་ལ་ལྟོས་ན། །ལྕགས་ཤིང་གྲེས་མ་ལས་བྱས་འཆིང་མ་གང་། །དེ་དག་དམ་པོ་མིན་ཞེས་འཕགས་པས་གསུངས། །ཞེས་གདམས་པ་ལྟར་རོ། །ཡུལ་ལྔ་སོ་སོ་ལ་བརྟེན་ནས་བསླུ་བ་སྟོན་པའི་ཕྱིར། །བདེ་བ་འདོད་ལ་མངོན་སྦྱོར་བརྩོན་པ་དག །གཏི་མུག་མཐུས་ནོན་སྡུག་བསྔལ་རྒྱུ་འབྲས་ཀྱི། །མཚོན་ཆ་རྣོན་པོའི་དབལ་ལ་བརྟེན་བྱས་པས། །གནོད་པའི་གནས་སུ་རང་ཉིད་ཡང་དག་སྦྱར། །མར་མེའི་གཟུགས་དང་ཕྱེ་མ་ལེབ་བཞིན་དུ། །སྒྲ་དང་དྲི་རོ་རེག་བྱས་བསླུ་བ་ནི། །རི་དྭགས་བུང་བ་ཉ་དང་གླང་པོ་ཆེ། །འདོད་པའི་ཡུལ་ལྔ་དག་དང་རྟེན་ཅིང་འབྲེལ། །དེའང་བདེ་བའི་
འབྲས་བུ་ལ་སྨོན་པ་ནི་ཐམས་ཅད་དེ། དེའི་རྒྱུ་ལ་བླང་དོར་བྱེད་པ་ནི་སྲིད་པ་ཙམ་མོ། །འདི་ལྟར་བདེ་བ་ཐོབ་པར་འདོད་ཀྱང་དེའི་རྒྱུ་དགེ་བ་ལ་ནི་མི་སྤྱོད་སྡུག་བསྔལ་འདོར་བར་སེམས་ཀྱང་དེའི་རྒྱུ་མི་དགེ་བ་ལ་ནན་གྱིས་འཇུག་པ་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་འབའ་ཞིག་པའི་ཀུན་འབྱུང་གི་མཚན་ཉིད་ལ་སྤུ་གྲིའི་སོ་ལ་ཆགས་པའི་སྦྲང་རྩིའི་རོ་མྱང་བ་བཞིན་དུ་སྤྱད་པས་རང་གིས་རང་ཉིད་གནོད་པའི་གནས་སུ་སྦྱར་ཏེ། སྤྱོད་འཇུག་ལས། སྡུག་བསྔལ་འདོར་འདོད་བློ་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས་སོ། །ཇི་ལྟར་འཇོམས་ན། ཕྱི་མ་ལེབ་ནི་མར་མེའི་གཟུགས་སམ། མེའི་འོད་ལ་ཆགས་ནས་འཆི་བ་སྟེ། སློབ་དཔོན་དབྱིག་གཉེན་གྱིས། འབར་བ་ཆེན་པོའི་ཚོགས་དག་གི། །མེ་ཆེན་དག་ནི་མཐོང་ནས་ཀྱང་། །གཟུགས་ལ་ཆགས་པ་ཆེན་པོ་ཡང་། །ཕྱེ་ལེབ་མེ་ལ་འཇུག་པར་འགྱུར། །ཞེས་སོ། །དེ་བཞིན་དུ་སྒྲ་ལ་ཆགས་པས་བསླུ་བ་ནི་རི་དྭགས་རྣམས་ཏེ། རྩྭ་ཡི་མྱུ་གུ་གཙང་མ་ཟ། །ཤིན་ཏུ་རིང་དུ་འགྲོ་ནུས་པ། །རི་དྭགས་རྔོན་པའི་གླུ་དབྱངས་ཀྱིས། །ངེས་པར་གསོད་པ་ཚོལ་བར་འགྱུར། །ཞེས་དང་། དྲིས་བསླུ་བ་ནི་བུང་བ་སྟེ། །རྟག་ཏུ་ནམ་མཁའ་ལ་རྒྱུ་ཞིང་། །གཟུགས་ནི་ཤིན་ཏུ་ཡིད་འོང་བའི། །བུང་བ་དྲི་ཡི་ཉེས་པ་ཡིས། །ངེས་པར་འཆི་བར་འགྱུར་བ་ཡིན། །ཅེས་དང་། ཉ་རྣམས་ལྕགས་ཀྱུའི་རྩེ་ལ་གནས་པའི་རོས་བསྐུ་བའང་། བཀག་པ་མེད་པའི་ལམ་འགྲོ་ཞིང་། །རྟག་ཏུ་རྣམ་པར་རྒྱུ་བ་ཡང་། །རོ་མྱོང་བ་ལ་ཆགས་པ་ཡིས། །ཉ་ནི་ལྕགས་ཀྱུས་རླག་པར་བྱེད། །ཅེས་དང་། གླང་པོ་ཆེ་དགའ་མའི་རེག་བྱས་སྲོག་དང་འབྲལ་བའི་ཚུལ། ས་སྲུངས་དང་ནི་
རབ་འགྲན་ཞིང་། །རི་ཡི་རྒྱལ་པོ་རྒྱུན་ཤེས་བྱའི། །བན་གླང་མོ་ཡི་ཉེ་རེག་གིས། །ངེས་པར་གླང་པོ་གསད་བར་སོང་། །ཞེས་སོ། །དེ་ལྟར་སེམས་ཅན་དེ་དག་ནི་འདོད་པའི་ཡོན་ཏན་རེ་རེས་ཀྱང་སྲོག་དང་འབྲལ་བར་ནུས་ན་སྐྱེས་བུ་རྣམས་ནི་ཡུལ་ལྔ་པོ་འདི་དག་ཐམས་ཅད་དང་རྟག་ཏུ་རྟེན་ཅིང་འབྲེལ་བ་ཡིན་པས་ཅིའི་ཕྱིར་ཉམ་ཉེས་པར་མི་འགྱུར། དེ་སྐད་དུ་སྔ་མ་ལས་ཀྱང་། སྐྱེས་བུ་དག་ནི་གཅིག་ལ་ཡང་། །ལྔ་པོ་འདི་དག་རྟག་ལྡན་ཞིང་། །ཉིན་མཚན་དུ་ནི་རབ་འཇོམས་ན། །བདེ་བའི་གནས་ཇི་ཐོབ་པར་འགྱུར། །ཞེས་བཤད་དོ། །དེ་བས་ན་གཟུང་བའི་ཡུལ་ལྔ་པོ་དང་། འཛིན་པའི་སེམས་གཉིས་འདྲེས་པ་ལས་ཉོན་མོངས་པ་སྐྱེ་ཞིང་། དེས་འཁོར་བ་མུ་མཐའ་མེད་པར་འཁྲིད་པས་ན་འཕགས་པ་སྤྱན་རས་གཟིགས་ཀྱིས་དགེ་སློང་རབ་གསལ་གཞོན་ནུ་ལ་སྤྲིངས་པར། གྲོགས་ཁྱོད་ཅི་སྟེའམ་དམ་བཅས་བརྗེད་དམ་ཅི། །འདོད་པ་མེ་མདག་དོང་འདྲ་འདི་ལ་ཅི་ཞིག་ཆགས། །ཤིན་ཏུ་སྐྱོ་བའི་ཡིད་ཀྱིས་རབ་ཏུ་མི་འབད་པར། །སྲིད་རྒྱུ་འདོད་པ་ད་དུང་གང་བ་ག་ལ་སྲིད། །ཅེས་དང་། བླ་མ་ལ་སྤྲིང་བར། བློ་ངན་ལོངས་སྤྱོད་ཀྱིས་བཅོམ་པ། །ཕ་རོལ་འཚོལ་བར་མི་བྱེད་ཅིང་། །བསམ་བརླག་འདོད་ལ་སྲེད་པ་ཡིས། །བདག་འཕུང་གཞན་ཡང་འཕུང་བར་བྱེད། །འདོད་པའི་རྣམ་སྨིན་སྡུག་བསྔལ་ཏེ། །དང་པོ་མངར་ལ་འབྲས་བུ་ཚ། །མེ་སྒྲོན་ལག་ནས་མ་བོར་ན། །མཇུག་ཏུ་བྱིས་པ་སྲེག་བྱེད་བཞིན། །ཞེས་གདམས་སོ། །འཁོར་བའི་སྡུག་བསྔལ་མཐུ་ཆེ་བར་སྟོན་པ་ནི། །སྲིད་པའི་ཡུལ་ལ་ཐུ་བ་གཏུམ་པོའི་མེ། ཁྲོ་བའི་མངོན་སྤྱོད་རྩུབ་པ་གཅན་གཟན་དང་། །མི་རྒོད་རྒྱལ་པོའི་ཆད་པ་ལས་མྱུར་བའི། །སྡུག་བསྔལ་
སྔ་ཕྱི་བརྒྱུད་མས་འགྲོ་འདི་མནར། །འདི་ལྟར་འཁོར་བ་ནི་སྡུག་བསྔལ་གྱི་རང་བཞིན། སྡུག་བསྔལ་གྱི་རྒྱུ་འབྲས། སྡུག་བསྔལ་གྱི་ཕུང་པོ་ཆེན་པོ་འབའ་ཞིག་ལ་བརྟེན་པའི་ཚུལ། འཇིག་རྟེན་ན་གང་དང་འཕྲད་པ་ཚར་གཅོད་པ་ནི་གཏུམ་པོའི་མེ་ཡིན་ཏེ། དེ་བས་ཀྱང་འཕགས་པ་རྣམས་ཀྱིས་གཟིགས་ངོ་ན་སྲིད་པའི་རྩེ་མོ་མན་ཆད་མེ་འབར་བ་ལྟ་བུའི་སྡུག་བསྔལ་ཅན་དུ་རྟག་པར་གཟིགས་པ་ཡིན། དེ་བཞིན་དུ་འབྲོག་དགོན་པ་ཆེན་པོ། མྱ་ངམ་གྱི་ཐང་། བཤེས་མེད་ཀྱི་གནས་སུ་སྟག་དང་། སེང་གེ་དང་། དོམ་དང་། དྲེད་དང་། མི་རྒོད་ལ་སོགས་པས་གཙེས་ནས་འབྲོས་པའི་ཐབས་འགགས་པའམ། རྒྱལ་པོའི་ཆད་པས་བཙོན་དོང་དམ་པོར་བཅུག་ནས་ལྕགས་སྒྲོག་དང་། ཤིང་སྒྲོག་དང་། ཐི་གུས་ནི་བཅིངས། མི་གཙང་བའི་དཀྱིལ་དུ་ཉལ། བདེ་བར་བརྐྱང་བསྐུམ་བྱེད་ས་ནི་མེད། མིག་དང་། སྙིང་དང་། ལྤགས་པའི་སྟེང་དུ་སྤུ་གྲིའི་དབལ་གྱིས་འཚེ་བར་ཉེ་བ་དེའི་སྡུག་བསྔལ་གྱི་ཚོར་བ་དེ་ཅི་འདྲ། དེ་བས་ཀྱང་སེམས་ཅན་རྣམས་ཐར་དུས་མེད་པ་བཟོ་ཆུན་གྱི་འཁྱུད་མོ་ལྟ་བུའི་འཁོར་བའི་བཙོན་དོང་གཏིང་རིང་པོར་ཞུགས། སྐྱེ་རྒ་ན་འཆི་དང་། སྡུག་བསྔལ་ཆེན་པོ་གསུམ་དང་བརྒྱད་ཀྱི་སྒྲོག་དམ་པོས་ནི་བཅིང་། སྲིད་པར་ཉིང་མཚམས་རེ་སྦྱོར་དུས་བར་མ་དོའི་མྱ་ངམ་གྱི་ཐང་ཆེན་པོ་བཟོད་པར་དཀའ་བ་ལ་ནི་འཁྱམ། ལས་ངན་གྱི་མི་གཙང་བས་ལུས་ལ་གོས། བདེ་བའི་སར་རང་སྟོབས་ཀྱི་དབུགས་མི་ཕྱིན། འོག་འགྱུ་དང་རྣམ་རྟོག་ངན་པའི་མཚོན་རྩེ་རྣོན་པོས་ཤེས་རབ་ཀྱི་མིག་དང་། བཟོད་པའི་སྙིང་དང་། དགེ་ཚོགས་ཀྱི་ལྤགས་པའི་སྟེང་དུ་འཛུགས་པས་འཁོར་བ་སྡུག་བསྔལ་གྱི་རྒྱ་མཚོར་དུས་ཚིགས་མེད་པར་འཁྱམ་དགོས་པ་ནི་གནས་སྐབས་ཀྱི་འཇིགས་པ་དེ་དག་གི་དོ་མ་ཡིན་ཏེ། རྒྱ་ཆེར་
རོལ་པ་ལས། བྱིས་རྣམས་འཁོར་བ་འདི་ལ་ཆགས་ཤིང་དགའ་བ་ནི། ཕག་མི་གཙང་བ་ལ་ཆགས་པ་ལྟ་བུའོ། །འདི་ན་སེམས་ཅན་བྱིང་བ་ནི་གླང་པོ་ཆེ་འདམ་དུ་བྱིང་བ་ལྟ་བུའོ། །འདི་ལ་སེམས་ཅན་རྣམས་ཆགས་པ་ནི་ཁྱི་ཀེང་རུས་ལ་ཆགས་པ་ལྟ་བུའོ། །འདི་ན་སེམས་ཅན་རྣམས་ལྷུང་བ་ནི་ཕྱེ་མ་ལེབ་མར་མེ་ལ་ལྷུང་བ་ལྟ་བུའོ། །འདི་ན་སེམས་ཅན་རྣམས་གཏུམས་པ་ནི་ཉ་རྒྱ་ཡིས་གཏུམས་པ་ལྟ་བུའོ། །འདི་ན་སེམས་ཅན་རྣམས་འཁོར་བ་ནི་རྫ་མཁན་གྱི་འཁོར་ལོ་ལྟ་བུའོ། །འདི་ན་སེམས་ཅན་རྣམས་བསླུས་པ་ནི་གཡོན་ཅན་གྱིས་བྱིས་པ་འདྲིད་པ་ལྟ་བུའོ། །ཞེས་སོ། །ཡང་། དགྲ་གཉེན་མ་ངེས་པས་ཕན་གནོད་ཀྱི་རྒྱུ་འབྲས་འཆོལ་བར་སྤྱོད་པས་སྡུག་བསྔལ་བའི་ཚུལ། བདག་ལ་བཤེས་སམ་མི་མཐུན་ཉེ་དང་འཁོན། །བསམ་པར་མི་ནུས་མཐའ་དག་སེམས་ལྡན་གྱིས། །དགྲ་དང་མཛའ་བཤེས་པར་མའི་ཕྱོགས་བཟུང་ནས། །ཕན་དང་གནོད་པ་སྦྱིན་པ་བསམ་ལས་འདས། །དེ་ལ་འཇིག་རྟེན་ན་གྲགས་པ་ཤིན་ཏུ་བརྟན་པའི་འདི་ནི་བདག་གི་མཛའ་བཤེས་སོ། །འདི་ནི་དགྲ་བོར་གྱུར་བའོ། །འདི་ནི་ཕའོ། །འདི་ནི་ཕའི་ཕྱོགས་ཀྱི་ཉེ་དུ་རིགས་དང་རུས་ལ་བརྟེན་པའོ། །འདི་ནི་མའོ། །འདི་ནི་མའི་ཕྱོགས་ཀྱི་ཉེ་དུ་ཆོ་དང་འབྲང་གི་བདག་ཉིད་ཅན་ནོ། །འདི་ནི་བར་མའོ། །བར་མ་ནི་བཏང་སྙོམས་ཀྱི་ཡུལ་ལ། མཛའ་བཤེས་ནི་ཕན་པའི་ཡུལ་ལོ། །དགྲ་བོ་ནི་ཚར་བཅད་པའི་གནས་སོ། །བུ་དང་བུ་མོ་ནི་ཡིད་གཅུགས་པའི་ཡུལ་ཞེས་མངོན་ཞེན་བརྟས་པའི་གནས་སུ་མི་རིགས་ཏེ། ཚེ་སྔ་མའམ། ཡང་ན་ཕྱི་མའི་གནས་སུ་ཕ་ནི་བུར་འགྱུར་རོ། །མ་ནི་ཆུང་མར་འགྱུར་རོ། །དགྲ་བོ་ནི་མཛའ་བཤེས་སུ་འགྱུར་རོ། །ཡང་ནི་དེ་བས་ཀྱང་ལྡོག་པར་འགྱུར་བས་ན། བཤེས་སྤྲིང་ལས། ཕ་ནི་བུ་
ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་ཡང་བཤེས་ཉིད་དང་། །བཟློག་པ་ཉིད་དུ་མཆི་བས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཞེས་དང་། འཕགས་པ་ཀཱ་ཏྱཱ་ཡ་ནས། ཁྱིམ་བདག་གཅིག་ལ་བསོད་སྙོམས་བསླངས་པས། དེས་དགྲ་བོ་བུ་ཆུང་དུ་གྱུར་པ་པང་དུ་ཐོགས། ཕ་ཉ་རུ་གྱུར་པ་བཟའ་ཞིང་མུར། མ་ཁྱི་རུ་སྐྱེས་ནས་ཉ་རུས་འཆའ་བ་ལ་བརྡེག་པ་གཟིགས་པས། ཕ་ཤ་བཟའ་ཞིང་མ་ལ་བརྡེག །ལས་ངན་དགྲ་བོ་པང་དུ་ཁུར། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་གསུངས་ལ། ཡང་ནས་ཡང་དུ་ཉིང་མཚམས་སྦྱོར་བའི་སྡུག་བསྔལ་ཀྱང་། བཅོམ་ལྡན་འདས་ཀྱིས། དགེ་སློང་དག་དཔེར་ན་སྐྱེས་བུ་འགའ་ཞིག་གིས་ས་ཆེན་པོ་འདི་ལ་རྒྱ་ཤུག་གི་ཚི་གུ་ཙམ་གྱི་རི་ལུ་ཐོགས་ཏེ། འདི་ནི་བདག་གི་མའོ། །འདི་ནི་བདག་གི་མ་དེའི་ཡང་མའོ་ཞེས་འདོར་བར་བྱེད་ན། དགེ་སློང་དག་ས་ཆེན་པོ་འདིའི་འཇིམ་པ་ནི། ཆེས་སྔར་ཟད་པར་འགྱུར་གྱིས། མི་རྣམས་ཀྱི་མ་བརྒྱུད་པ་ནི་དེ་ལྟ་མ་ཡིན་ནོ་ཞེས་ང་སྨྲའོ། །ཞེས་གསུངས་པའི་དོན་སློབ་དཔོན་འཕགས་པས་མའི་ཐུག་མཐའ་ལ་སོགས་པ་ཚིགས་སུ་བཅད་པ་ལྟར་རོ། །རྣམ་པ་ཐ་དད་པའི་ལུས་ཡང་དང་ཡང་དུ་འདོར་བའི་ཉེས་པའི་དབང་དུ་བྱས་ནས་སྤྱིར་བསྟན་པ། རྡུལ་ཕྲན་ལྟ་བུའི་ལུས་ཀྱི་བདག་གཅིག་པུའི། །སྲོག་རྟེན་གཟུགས་སུ་གྱུར་དང་འདོད་པའི་ཕྱིར། །མགོ་དང་ཡན་ལག་གཅད་གཏུབས་བགྱིས་སོ་ཅོག །སྤུངས་ན་ལྷུན་པོའི་ཆེ་ཐང་ཉམས་པར་འགྱུར། །དམྱལ་གནས་ཟངས་ཞུན་ཁོལ་མ་འཐུངས་པ་དང་། །ཡི་དྭགས་ལུས་གྱུར་རྣག་ཁྲག་མི་གཙང་ཟོས། །ཀུན་ཏུ་སྡུག་བསྔལ་རྒྱུ་ལས་མཆི་མ་ཟགས། །ཕྱོགས་མཐའ་གཏུགས་པའི་ཆུ་ཀླུང་དག་ལས་མང་
དེ་སྐད་དུ་དྲན་པ་ཉེར་གཞག་གིས་གསལ་བར་སྟོན་ཏེ། དགེ་སློང་དག་སྲིད་པའི་ཁམས་ལ་སྐྱོ་བར་གྱིས་ཤིག །དེ་ཅིའི་ཕྱིར་ཞེ་ན། ཐོག་མ་མེད་པའི་འཁོར་བ་ན་འཁོར་བ་གང་གི་ཚེ། གྲོག་སྦུར་དུ་སྐྱེས་ཏེ་དོར་བའི་ལུས་ཀྱང་གཅིག་ཏུ་བསྡོམས་ཏེ་ཕུང་པོར་བྱས་ན་རིའི་རྒྱལ་པོ་རི་རབ་བས་ཀྱང་ཆེས་མཐོ་ཞིང་། དུས་པའི་མཆི་མའང་རྒྱ་མཚོ་བཞིའི་ཆུ་བས་ལྷག་གོ །དམྱལ་བ་དང་ཡི་དྭགས་སུ་གྱུར་པ་དེའི་ཚེ་ལན་གྲངས་མེད་དཔག་མེད་པ་ཞིག་འཐུངས་པའི་ཟངས་ཞུན་ཁོལ་མ་དང་། ཁྲག་དང་། ཆུ་སེར་དང་། རྣག་དང་། ངར་སྣབས་ཀྱང་འདི་ལྟར་གླིང་བཞིའི་ནང་ནས་རྒྱ་མཚོར་འབབ་པའི་ཆུ་ཀླུང་བཞི་ལས་མང་ཞིང་། འདོད་པ་དག་གི་ཕྱིར་མགོ་དང་། མིག་དང་། ཡན་ལག་དང་། ཉིང་ལག་བཅད་པའང་གངྒཱའི་ཀླུང་གི་བྱེ་མ་སྙེད་ཀྱི་ཁམས་ནས་དང་། ཆུ་དང་། མེ་དང་། རླུང་གི་རྡུལ་ཤིན་ཏུ་ཕྲ་བ་སྙེད་ལས་འདས་པའི་གྲངས་དང་མཉམ་པར་འགྱུར་རོ། །ཞེས་སོ། །ད་ནི་འགྲོ་དྲུག་སོ་སོའི་ངེས་པའི་སྡུག་བསྔལ་ཉམས་སུ་མྱོང་བའི་ཉེས་པ་བསྟན་པའི་ཕྱིར་དམྱལ་བ་ནས་རིམ་པར་བཤད་པ། ཁྱད་པར་དམྱལ་བའི་སྡུག་བསྔལ་ཚད་མེད་དེ། །ཕན་ཚུན་གཅིག་གི་གཅིག་གསོད་ཡང་སོས་ལ། །ཐིག་ནག་སོག་ལེས་གཤོག་འབྱར་རྒྱུན་མི་འཆད། །བསྡུས་འཇོམས་མགོ་བརྙས་རི་དང་ཐོ་བས་འཐག །ངུ་འབོད་ལྕགས་ཞུན་བསྐོལ་བར་འཚེད་ཅིང་དབང་། །འབོད་སྒྲོག་ཆེན་པོ་ལྕགས་ཁྱིམ་འབར་བར་བསྲེག །ཚ་བ་གསལ་ཤིང་འབར་བས་ལུས་ལ་འབིགས། །རབ་ཏུ་ཚ་བ་མདུང་ཐུང་རྩེ་གསུམ་པས། །ལུས་ཀྱི་གཞུང་འབིགས་ཕྱི་ནས་ལྕགས་བསྲེགས་དཀྲི། ཁྲོ་ཆུ་ཁོལ་མར་འཚེད་དང་མནར་མེད་ནི། །ལྕགས་
ཁྱིམ་འབར་བར་མེ་དང་གཉིས་མེད་བསྲེག །ཅེས་འདོམས་ཏེ། དེ་ལ་དམྱལ་བ་ཡང་སོས་ཞེས་བྱ་བ་ནི། ལྕགས་ཀྱི་མདག་མེ་འབར་བའི་སྟེང་དུ་ཕན་ཚུན་དགྲ་མི་ཤ་བོ་མཐོང་བ་བཞིན་ལས་ལས་བྱུང་བའི་མཚོན་ཆ་སྣ་ཚོགས་པས་ཡན་ལག་དང་ཉིང་ལག་གཅོད་ཅིང་བརྡེག་རེས་བྱེད་པས་ཤི་བ་དང་། ནམ་མཁའ་ནས་ཡང་སོས་པར་གྱུར་ཅིག་ཅེས་བྱ་བའི་སྒྲ་གྲག་མ་ཐག་སོས་ནས་སྔར་བཞིན་སྡུག་བསྔལ་ལོ། །དེའི་ཚེ་ཚད་དྲན་པ་ཉེར་གཞག་ལས། སེམས་ཅན་དམྱལ་བ་ཡང་སོས་པ་དག་གི་མི་རྣམས་ཀྱི་ལོ་བྱེ་བ་ཕྲག་འབུམ་དང་། ཡང་དྲུག་ཁྲི་དང་། སྟོང་ཕྲག་གཉིས་ཀྱི་བར་དུ་ཐུབ་སྟེ། ཞེས་དང་། དྲན་པ་ཉེ་བར་གཞག་པའི་ཆིག་ལེའུར་བྱས་པ་ལས། མི་གང་མི་ནི་གསོད་པ་དང་། །གཞན་ཡང་བསྐྱེད་ནས་གསོད་བྱེད་པ། །དེ་དག་ངེས་པར་ཡང་སོས་འགྲོ། །གང་གི་ཕྱིར་ན་ལོ་སྟོང་ཕྲག །མང་པོར་ཡང་ནི་དེ་དག་ཏུ། །བཏགས་ཤིང་བཏགས་ཤིང་ཡང་འཚོ་བས། །དེ་ཕྱིར་ཡང་སོས་ཡིན་པར་བཤད། །ཅེས་སོ། །ཐིག་ནག་ནི་གཅོད་པའི་འཁྲུལ་འཁོར་གྱིས་མནར་བ་སྟེ། དེ་ན་ཡོད་པའི་སྐྱེས་བུ་གནོད་པ་བྱེད་པ་རྣམས་ཀྱིས་རེ་དབྱིབས་སྣ་ཚོགས་པ་དག་གི་གསེབ་ཏུ་བཅུག་ནས་ལུས་ལ་ཐིག་དྲངས་ཏེ་ཤིང་བཞིན་དུ་གཤོག་ཅིང་བརྐོ་བར་བྱེད། དྲལ་ནས་ཡང་འབྱར་བར་བྱེད་དོ། །ཚེ་ཚད་མི་ལོ་བྱེ་བ་ཕྲག་ས་ཡ་ཉིས་འབུམ་དང་། ཡང་དགུ་ཁྲི། དྲུག་སྟོང་རྩ་བཅུ་གཉིས་སོ། །དེ་སྐད་དུ་སྔ་མ་ལས། ཕ་མ་དང་ནི་གྲོགས་དང་གཉེན། །བཤེས་གཉེན་ལ་ནི་འཁུ་བྱེད་དང་། །ཕྲ་མ་རྫུན་ནི་སྨྲ་བའི་མེ། །ཐིག་ནག་ཏུ་ནི་འགྲོ་བར་འགྱུར། །གང་ཕྱིར་དེ་ལ་ཤིང་བཞིན་དུ། །ཐིག་ནག་བཏབ་ནས་སོག་ལེ་དང་། །འབར་བ་ཡིས་ནི་གཤིག་བྱེད་དེ། །དེ་ཕྱིར་ཐིག་ནག་ཡིན་པར་བཤད། །ཅེས་སོ། །བསྡུས་འཇོམས་ནི་
འཐག་པའི་འཁྲུལ་འཁོར་ཅན་ཏེ། བྲག་རི་སྲོག་ཆགས་མགོ་བརྙན་ཅན་སྣ་ཚོགས་པའི་གསེབ་ཏུ་འཆིར་བ་དང་། དེ་བཞིན་དུ་ལྕགས་ཀྱི་འཆིར་དཔྱད་ཆེན་པོས་འཆིར་ཞིང་། སྟེང་ནས་རྡོ་ཆེན་པོའི་ལྕིད་ཀྱིས་དེའི་ལུས་ས་གཞི་ལ་གདུངས་པར་བྱེད་པས་ཁྲག་ཆུ་ཀླུང་ལྟ་བུར་འབབ་པའོ། །ཚེ་ཚད་མི་ལོ་བྱེ་བ་ཕྲག་སུམ་འབུམ་དང་། ཡང་། དྲུག་ཁྲི་བརྒྱད་སྟོང་རྩ་གཅིག་གི་བར་རོ། །སྔ་མ་ལས། ར་དང་ལུག་དང་ཝ་ཕག་དང་། །རི་བོང་བྱི་བ་རི་དྭགས་ཕག །གཞན་ཡང་བསྐྱེད་ནས་གསད་བྱས་ན། །ལུས་ཅན་བསྡུས་འཇོམས་འགྲོ་བར་འགྱུར། །གང་ཕྱིར་བསྡུས་ནས་དེར་འདོར་ནས། །ཡང་དག་གསོད་པར་བྱེད་པས་ན། །དེ་ཡི་ཕྱིར་ནི་བསྡུས་འཇོམས་ཏེ། །དེ་ལྟར་མིང་ནི་དོན་མཐུན་གྲགས། །ཞེས་སོ། །ངུ་འབོད་ནི། ལྕགས་ཞུན་བསྐོལ་བར་འཚོད་ཅིང་འོ་དོད་དྲག་པོ་དང་ལྡན་ལ། དེར་གནས་འཚོལ་བ་རྣམས་ལྕགས་ཀྱི་ཁང་པར་འཇུག་པར་བྱེད་ཅིང་ཞུགས་ནས་མེ་ལྕེ་དྲག་པོས་སྡུག་བསྔལ་ལོ། །ཚེ་ཚད་མི་ལོ་བྱེ་བ་ཕྲག་ས་ཡ་གཉིས་དང་། བྱེ་བ་ཕྲག་དགུ་འབུམ་བཞི་ཁྲི་དང་། ཡང་སྟོང་དང་བྱེ་བ་ཕྲག་བདུན་དུ་ཐུབ་བོ། །སྔ་མ་ལས། འདིར་ནི་ལུས་ཅན་གང་དག་གིས། །ལུས་དང་ངག་ཡིད་ཉོན་མོངས་བྱེད། །གང་དག་ལྷད་འཇུག་གཞན་གཡོ་བྱེད། །མི་དེ་དག་ནི་ངུ་འབོད་འགྲོ། །དེར་ནི་དྲག་པོའི་མེ་དག་གིས། །རྒྱུན་མི་འཆད་པར་བསྲེག་པས་ན། །གང་ཕྱིར་སྐད་ནི་དྲག་འབྱིན་པས། །དེ་ཕྱིར་དེ་དག་ངུ་འབོད་ཡིན། །ཅེས་སོ། །ངུ་འབོད་ཆེན་པོ་ནི། ལྕགས་ཀྱི་ཁང་སྒྲོམ་འབར་བར་མེས་བསྲེག་ཅིང་འཚོག་གོ །ཚེ་ཚད་མི་ལོ་བྱེ་བ་ཕྲག་ས་ཡ་གསུམ་དང་། ཡང་བྱེ་བ་ཕྲག་ལྔ་འབུམ་ལྔ་ཁྲི་ཉིས་སྟོང་དང་དྲུག་ཅུ་རྩ་དྲུག་གོ །སྔ་མ་ལས། གང་གིས་ལྷ་དང་བྲམ་ཟེ་
དང་། །བླ་མའི་རྫས་འཕྲོག་སྡུག་བསྔལ་བྱས། །གང་དག་གཏམས་པ་འཕྲོག་བྱེད་པ། །དེ་དག་ངུ་འབོད་ཆེན་པོར་འགྲོ། །མེས་བསྲེག་པ་ནི་དྲག་ཕྱིར་དང་། །ངུ་འབོད་པ་ཡང་ཆེ་ཕྱིར་དང་། །ལྕི་ཞིང་ཆེ་བ་ཉིད་ཀྱི་ཕྱིར། །དེ་ནི་ངུ་འབོད་ཆེན་པོ་ཡིན། །ཅེས་སོ། །ཚ་བ་ནི། ལྕགས་ཀྱི་གསལ་ཤིང་འབར་བས་ལུས་ཀྱི་གཞུང་འབིགས་ཤིང་ཀླད་པར་ཐལ་འབྱིན་ལ། དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མེ་འབྱུང་བའོ། །ཡང་སླ་ང་རབ་ཏུ་འབར་བར་བསྲེག་པ་དང་། །ལྕགས་ཀྱི་གཞི་ཀུན་ནས་འབར་བ་ལ་གན་རྒྱལ་དུ་བསྙལ་ནས་ལྕགས་ཀྱི་ཐོ་བ་འབར་བས་བརྡུང་བའོ། །ཚེ་ཚད་ནི་མི་ལོ་བྱེ་བ་ཕྲག་ས་ཡ་བརྒྱད་དང་། ཡང་བཞི་འབུམ་དང་། བྱེ་བ་ཕྲག་ཁྲིག་ཕྲག་དྲུག་སྟོང་ལྔ་བརྒྱ་དང་སུམ་ཅུའི་བར་རོ། །རབ་ཏུ་ཚ་བ་ནི། མདུང་རྩེ་གསུམ་པས་རྒྱབ་རོལ་ནས་བཏབ་པས་རྩེ་དབུས་མ་ཀླད་པར་ཐལ་འབྱིན་ལ། ལྷག་མ་གཉིས་པོ་ནི་ཕྲག་གོང་གཉིས་སུ་འཐོན་པ་དང་། ཡང་ལྕགས་ཀྱི་ལེབ་མ་མེ་འབར་བས་ལུས་ཐམས་ཅད་ལ་དཀྲི་བ་དང་། ལྕགས་ཟངས་ཀུན་ཏུ་འབར་བར་ཚ་སྒོའི་ཆུ་བསྐོལ་བའི་ནང་དུ་ཁ་སྤུབ་ཏུ་འཛུད་པར་བྱེད་པས་པགས་པ་དང་ཤ་ཁྲག་འཐོར་ནས་རུས་གོང་དཀར་པོའམ་ཀེང་རུས་ཙམ་གྱི་ལུས་རྟེན་ལ་གདུང་བས་ཤིན་ཏུ་སྡུག་བསྔལ་ལོ། །ཚེ་ཚད་ནི་བར་གྱི་བསྐལ་པ་ཕྱེད་དོ། །དེ་ལྟར་གཉིས་པོ་ནི། ཁང་པའི་འཁྲུལ་འཁོར་ཅན་ཏེ་སྡུག་བསྔལ་གྱི་ཁྱད་པར་གཞན་བརྗོད་པ་རྣམ་པར་དག་པ་ཙནྡྲ་གོ་མིས། ཁ་ཅིག་འབྲུ་མར་བསྐོལ་བའི་ཟངས་ཆེན་ནང་དུ་ལྟུང་། །གཞན་དག་བྱེ་མ་བསྲེགས་པའི་མེ་སྟག་འཕྲོ་བ་ཡི། །ས་གཞི་རྐང་པ་བཞག་པའི་གནས་མི་ཐོད་པར་ལྟུང་། །ཞེས་དང་། རབ་ཏུ་ཚ་བའི་ཁྱད་པར་དམྱལ་མེ་དུབ་ཆེ་དགུ་མནམ་པ་འཐུལ་བས་གནམ་མདོག་འགྱུར། །མེ་ལྕེའི་ལག་མང་རྣམ་པར་འཕྲོས་
ནས་ཕྱོགས་ཀྱི་དཀྱིལ་འཁོར་ཁེབས། །རུས་གོང་དཀར་དུམ་ཕྲེང་བའི་རྒྱན་གྱིས་སྤུད་པ་སྐྱི་གཡའ་བ། །གླང་ཆེན་གོས་གྱོན་སྡིག་ཐབས་ཀྱེ་མ་ཀྱི་ཧུད་ཟེར་བ་བཞིན། །ཞེས་དམྱལ་བའི་རྣམ་གྲངས་ཀྱང་རང་བཞིན་བབ་བབ་དུ་བསྟན་པ་ལས་མིང་ཁྲི། ས་ཀྱི་ངེས་པ་མི་སྣང་ཞིང་བརྗོད་པ་གཏིང་ཟབ་ཕྱིར་དཀའ་འགྲེལ་གཉིས་པོས་ཀྱང་གསལ་བར་ཁ་མི་ཕྱེད་པས་བསྟན་བཅོས་གཞན་དུ་ལུང་གི་རྒྱབ་སྐྱོར་ཀྱང་ཅི་རིགས་སུ་འབྱུང་མོད། འདིར་ནི་རྒྱ་འགྲེལ་གཉིས་ལ་སློབ་དཔོན་ཤེས་རབ་འབྱུང་གནས་ཀྱི་ལུགས་ལྷག་པར་བཤད་རླབས་ཆེ་བར་མངོན་ནས་དེའི་རྗེས་སུ་རྣམ་པར་དབྱེ་བ་ཡིན་ནོ། །མནར་མེད་པ་ནི་ཕྱོགས་བཞི་དང་། །བླ་འོག་མཐའ་དག་མེ་འབར་བས་འཁྲིགས་པར་འདུག་སྟེ། དེ་ན་སེམས་ཅན་དེ་དག་རྩ་སྐམ་ལ་མེ་སྦར་བ་རླུང་གིས་རབ་ཏུ་བསྐྱོད་པ་བཞིན། ཤ་དང་། ཆུ་རྒྱུས་དང་། རུས་པ་དང་། རྐང་གི་བར་དུ་ཞེན་ནས་མར་མེ་སྙིང་པོ་ལ་ཞེན་པའམ། ལྕགས་བསྲེག་དང་སོལ་མེ་མི་ཕྱེད་པ་བཞིན་འདི་དག་ནི་སེམས་ཅན་ནོ། །འདི་དག་ནི་མེའོ་ཞེས་དབྱེ་བར་མི་ནུས་པ་མེའི་ཕུང་པོ་གཅིག་གི་ཀློང་ནས་འོ་དོད་འབོད་པ་ཙམ་སྟེ་སྡུག་བསྔལ་བའི་མཐར་ཐུག་པའོ། །དེ་སྐད་དུ་སློབ་སྤྲིང་ལས། ཕྱི་ནང་གི་གནོད་པ་གཉིས་སུ་བསྟན་པའི་ཕྱིའི་གནོད་པ་ནི། །ལ་ལར་མེ་སྟག་ཆེར་འཕྲོ་འཁྲུག་པ་འུར་སྒྲ་ཏོག་ཡར་ལ། །ཞག་གི་བབ་ན་སྐད་ངན་འབོད་པའི་རྩེ་ཞིལ་ཆིལ་ཆིལ་འབར། །ཞེས་དང་། ནང་གི་གནོད་པ་ནི། བྲང་གི་རུས་པའི་ཁོང་དུ་ཐལ་ལ་ལྷག་ལྷག་སྒྲ་གྲགས་པ། །བསྐལ་པའི་དུས་ཀྱི་མེ་ཡིས་བསྐྱོད་དུ་མེད་པའི་ནང་དུ་ལྷུང་། །ཞེས་མདོར་བསྟན་ནས། རྒྱས་པར་བཤད་པའི་དོན་ལའང་ནང་གི་གནོད་པ་དང་། ཕྱིའི་གནོད་པ་གཉིས་སུ་དབྱེ་བའི་
དང་པོ་ནི། གློ་ནས་རྩ་སྐམ་སྙིང་ལ་སྦར་བ་ལྟ་བུར་མེ་ཚོགས་འབར། །མགྲིན་དང་ཁ་ནས་མེ་ལྕེ་འབར་བ་དུད་བཅས་བསྟུད་མར་འབྱུང་། ཁོང་ལྟོགས་པ་ནས་ལོང་ག་ནང་ཁྲོལ་ནར་བས་ཀུན་བྲེད་ཅིང་། །བརྡའ་མི་འཕྲོད་པའི་སྐད་ཆེན་ཙམ་ཞིག་འདོན་པར་བྱེད་པར་ཟད། །ཅེས་དང་། ཕྱིའི་གནོད་པ་ནི། སྡུག་བསྔལ་ཆེ་ལས་ཐར་བར་འདོད་པ་དེ་དག་ཡང་དང་ཡང་། །སྒོ་བྱེ་གསེབ་གཞན་མཐོང་ནས་ཐག་རིང་ཅི་ཞིག་ལྟར་ཏེ་འབྱེར། །གང་ཚེ་ལས་ཀྱི་སྒོ་འཕར་དམ་པོས་དེ་ཡང་བཅད་གྱུར་པ། །དེ་ཚེ་ཡི་མུག་བཟློག་བརླག་སྡུག་བསྔལ་གཞན་ཡང་འབྱུང་བར་འགྱུར། །ཞེས་གནས་ཁང་གི་གནོད་པ་དང་། དེ་བཞིན་དུ་མདའ་བོ་ཆེ་དང་། དབྱུག་པ་དང་། ཁུ་བ་འབར་བའི་གནོད་པ་རྣམས་སྟོན་པའི་ཕྱིར། མདའ་ཆེན་སྣ་ཚོགས་འབར་བ་ཆར་བཞིན་འབབ་པའི་རྗེས་ལ་ཡང་། །དམྱལ་བའི་སྲུང་མས་དབྱུག་པ་བཏབ་ཅིང་མཆི་མ་འཛག་བཞིན་དུ། །ལྕགས་ཞུན་ཁུ་བ་མེ་སྟག་འབར་བའི་ཕྲེང་བ་འཁྲིགས་པ་ལྡུད། ཁ་སྣ་རྣ་བའི་ག་དག་ནས་དུད་འཐུལ་གྱེན་དུ་འབྱུང་། །མིག་དང་ཀླད་སྤྲིས་བརྡོལ་གྱི་བར་དུ་ཀུན་བསྲེག་ཅིང་། །ཀླད་པའི་རྒྱས་ལ་འབར་བའི་མེ་ལྕེ་སྨུག་ནག་ཚོགས། །མེ་དེ་ཁྲོས་པ་ལྟ་བུར་དེ་ཡི་ལུས་ཕུང་ལ། །བུད་ཤིང་སྐམ་པོ་བཅེར་ལ་སྦར་བ་བཞིན་དུ་མཆེད། །ཅེས་དང་། དེ་དག་གི་དོན་བསྡུ་བའི་ཕྱིར། སྐྱེ་བོ་དེ་སྲོག་རི་གཟར་ཀླུང་གི་ཆུ་ལྟར་གཡོ། དམྱལ་བའི་མེ་ཡང་དེར་ཟད་ཚ་བའང་དེར་ཟད་དེ། །ལས་རྣམས་ཇི་ལྟར་ཐམས་ཅད་ཤིན་ཏུ་མི་བཟད་པ། །སྣང་བར་འགྱུར་བ་དེ་ལྟར་ཡོངས་སུ་བསྒྱུར་བ་བྱེད། །སྐྱེ་བོ་རང་གི་ལས་ཀྱིས་དབང་མེད་སྤྱོད་འཚལ་བ། །བརྒྱ་ལ་སྡིག་གནས་དམྱལ་བ་དག་ནས་ཐར་ན་ཡང་། །འཇིག་རྟེན་འགྲོ་བ་མཐའ་ཡས་བྱེ་བ་འཕྱེས་རྣམས་སུ། །མི་ཡི་དངོས་པོ་ཤིན་ཏུ་རྙེད་པར་དཀའ་བ་ཉིད། །ཅེས་མནར་མེད་པའི་སེམས་ཅན་དམྱལ་བ་
པ་དེའི་སྡུག་བསྔལ་ནི་ངོ་བོ་དབལ་ཚ་ཞིང་། རྣམ་པ་གྲངས་མང་བ། བར་དང་མཚམས་མེད་པས་ན་མཚམས་མེད་དམ་མནར་མེད་ཅེས་བཤད་ལ། དེ་དག་གི་ལུས་ཚད་ཀྱང་། མདོ་སྡེ་མྱང་འདས་ལས། མཚམས་མེད་བརྒྱད་བྱས་པ་ལ་དཔག་ཚད་བརྒྱད་ཁྲི་བའི་ལུས་ཡོད་ཀྱང་གཅིག་ལ་གཅིག་མི་ཐོགས་པར་བཤད་པ་དང་། ཐེག་པ་ཆེན་པོ་སྐུར་བའི་ལྕེ་དཔག་ཚད་འབུམ་དུ་བཤད་པ་སོགས་ཚོར་བ་རྒྱ་ཆེ་ལ། ཚེའི་ཚད་ཀྱང་དྲན་པ་ཉེར་གཞག་ལས་བར་གྱི་བསྐལ་པ་གཅིག་དང་། ལས་རྣམ་འབྱེད་ལས། མནར་མེད་པའི་སྒོ་ན་ལྕགས་ཀྱི་རི་དཔག་ཚད་སྟོང་དྲུག་ཁྲི་པ་ཞིག་ཡོད་དེ། དེ་ཉིད་སེམས་ཅན་དམྱལ་བ་བདག་གིས་དོར་བས་ཟད་པ་ན་དེ་དག་གི་ཚེ་འཕོ་བ་ཡིན་ཏེ་དཔག་ཏུ་མེད་དོ། །ཞེས་གསུངས་ལ། གལ་ཏེ་དེ་ནས་ཐར་ནའང་མིའི་དངོས་པོ་ནི་ཤིན་ཏུ་རྙེད་པར་དཀའ་ཞིང་རྙེད་ནའང་དབང་པོ་མ་ཚང་བ་ལ་སོགས་པར་སྐྱེ་བ་ནི་རྒྱུ་རླབས་པོ་ཆེའི་འབྲས་བུ་ལ་སྤྱོད་པའི་གནས་སྐབས་ཚོགས་ཤིང་དུས་ལ་བབ་པ་ཡིན་པའི་ཕྱིར་ཏེ། དམྱལ་བའི་རབས་ལས། ཡོན་ཏན་དག་གིས་ཆེ་བ་ལ། །གནོད་པ་དྲག་པོ་བྱས་པ་ལས། །ཕ་མ་བླ་མ་གསད་བྱས་པ། །ངེས་པར་བསྐལ་པར་མནར་མེད་འཚེད། །མེ་དྲག་དེར་ནི་ལུས་ངག་གི། །རུས་པ་དག་ཀྱང་ལྷགས་པར་འགྱུར། །གང་ཕྱིར་བདེ་བའི་སྐབས་མེད་པ། །དེ་ཕྱིར་མནར་མེད་ཡིན་པར་བཤད། །ཅེས་ཡོན་ཏན་གྱིས་ཆེ་བ་དམ་པའི་ཆོས་སྤངས་ཤིང་བསྐུར་བ་བཏབ་པ་དང་། དམ་ཚིག་ཉམས་པ་ལ་སོགས་དམྱལ་བ་མནར་མེད་དུ་སྐྱེ་བར་བཤད་དོ། །དེ་ལྟར་དམྱལ་བ་བརྒྱད་པོ་དེ་དག་གི་མེའི་ཚ་ཁྱད་ཀྱང་སྔ་མ་སྔ་མ་ལས་ཕྱི་མ་ཕྱི་མ་བདུན་འགྱུར་གྱིས་ཚ་བ་ནི་ཤིང་ཐ་མལ་དང་། ཙན་དན་དང་། དུས་མཐའི་མེ་ལ་ཁྱད་ཞུགས་པ་བཞིན་ཏེ། ལས་རྣམ་འབྱེད་ལས། ཐ་མལ་ཙན་དན་དུས་མཐའ་དང་། །དམྱལ་
མེ་རྣམས་ཀྱང་གོ་རིམ་བཞིན། །དེ་བཞིན་སྡུག་བསྔལ་བདུན་ཕྲག་འགྱུར། །ཞེས་ཚོར་བའང་བདུན་འགྱུར་གྱིས་རགས་སུ་འགྲོ་བས། སྡུག་བསྔལ་ཀྱང་བདུན་འགྱུར་རེས་ཆེར་འགྲོ་བ་ཡིན་ནོ། །ད་ནི་དེ་དག་གི་འཁོར་ལྷག་པ་ཉེ་འཁོར་བ་བཤད་པའི་ཕྱིར། སྡུག་བསྔལ་ཉིད་ལས་དབུགས་འབྱིན་ཀུན་རྟོག་གིས། །ཉེ་འཁོར་སྒོ་འཕར་བྱེ་བ་མ་དག་མེའི་འོབས། །རོ་མྱགས་འདམ་རྫབ་སྟུག་དང་རལ་གྲིའི་ནགས། །ཆུ་བོ་རབ་མེད་གཤིན་རྗེའི་ཁ་བས་ཐུ། །འདི་ལྟར་སེམས་ཅན་དམྱལ་བ་ཆེན་པོ་བརྒྱད་པོ་རེ་རེ་ཞིང་གི་ཕྱོགས་བཞི་པོ་སོ་སོར། མེ་མ་མུར་གྱི་འོབས། རོ་མྱགས་ཀྱི་འདམ། རལ་གྲི་ལོ་མའི་ནགས་ཚལ། ཆུ་བོ་རབ་མེད་དེ། བཞི་ཚན་རེ་རེ་འཁོར་གྱི་ཚུལ་དུ་གནས་པ་ལ་ལྷག་པ་བཅུ་དྲུག་ཞེས་བྱའོ། །དེ་སྐད་དུ་བཤེས་སྤྲིང་གི་འགྲེལ་བར། ལྷག་པ་བཞི་པོ་འདི་དག་ནི་སེམས་ཅན་དམྱལ་བ་ཐམས་ཅད་ཀྱི་སྒོ་བཞིན་གོ་རིམ་བཞིན་དུ་རྣམ་པར་གནས་ཏེ། དེ་ལྟ་བས་ན་སེམས་ཅན་དམྱལ་བ་ཆེན་པོ་བརྒྱད་འཆད་པར་འགྱུར་བ་རེ་རེ་ཞིང་ལྷག་པ་བཅུ་དྲུག་ཡིན་ནོ། །ཞེས་བཤད་དོ། །གོང་དུ་མྱོང་བྱའི་ལས་ཕལ་ཆེར་བསྲབས་པ་ན་ཕྱོགས་བཞིར་སྒོ་བྱེ་བ་སྙམ་བྱེད་ཅིང་དེར་འབྲོས་པའི་སྣང་བ་ཤར་བ་ན་ཐལ་ཚན་ཆུ་ཀླུང་དུ་འཁྲུལ་ནས་འཆིག་པའི་ཚུལ་དྲན་པ་ཉེར་གཞག་ལས། དེ་དེ་ལྟར་སོང་བ་ལས་ཆུ་ཀླུང་གི་འདུ་ཤེས་སྐྱེས་ཏེ་བརྒལ་མ་ཐག་ཏུ་རྐེད་པ་ལ་ཐུག་གི་ཤ་རྣམས་ཀྱང་ཚིག །རུས་པ་རྣམས་ཀྱང་བྱེ་ཞིང་དྲལ་བར་བྱུང་བ་ལས་སླར་སོས་ཤིང་། འགྲམ་དག་ན་སྔོན་རྣམ་པར་རྩེན་པའི་གཤིན་རྗེའི་སྐྱེས་བུས་བསྲུང་བར་སྣང་ངོ་། །ཞེས་པ་ལྟར། དེར་སྙེགས་པའི་ལམ་དུ་ལྕགས་ཀྱི་ཁྱི་རལ་པ་ཅན་གྱིས་འདེད་ཅིང་། མ་དག་མེ་འབར་བ་རྡོ་རྣོན་ཟུར་ཅན་གྱིས་གང་བའི་འོབས། པུས་མོ་ནུབ་པ་ཙམ་དེར་རྐང་པ་བཞག་པ་དང་། པགས་པ་དང་ཤ་ཁྲག་ཞིག་པར་འགྱུར་ལ་བཏེགས་
ན་སླར་སྐྱེ་བའི་སྡུག་བསྔལ་ལ་སྤྱོད་པ་སྟེ། སློབ་སྤྲིང་ལས། རལ་པའི་ཚོགས་མང་སྤུངས་པས་བསྒྱིངས་པའི་ཁྱི་དག་གིས། །མཆེ་བ་གཟང་རིང་རྡོ་རྗེའི་རྩེ་མོས་ལུས་འདྲད་ཅིང་། །ཆུ་བོ་རབ་མེད་ཐལ་སྐྱོ་མེ་ལྕེས་གང་བའི་ངོགས། །རྡོ་བཟུར་རྡོ་མ་རྩེ་རྣོན་མི་བཟད་ཅན་དུ་བདའ། །ཞེས་སོ། །རོ་མྱགས་ཀྱི་འདམ་ནི། ཕྱི་སའི་འདམ་རྫབ་ཆེན་པོར་ཆུང་ནས་སྲོག་ཆགས་ལུས་དཀར་ལ་མགོ་བོ་གནག་པ་མཆུ་རྣོན་ཅན་གྱིས་པགས་པ་འབིགས་ཤིང་། སྡུག་བསྔལ་གྱིས་མནར་ཆེས་པས་ལུས་བསྒུལ་བསྐྱོད་མི་ནུས་པར་སོང་ཡང་ལས་རྙི་དང་འདྲ་བ་ལ་སྲོག་བྱ་དང་འདྲ་བ་ཉིད་འཐོགས་པའི་ཚུལ་སྔ་མ་ལས། ཁ་ཅིག་འབུ་སྤྲང་ཕྲ་མོ་ལྕིག་ལྕིག་འདུག་པ་ཡི། །ཚོགས་ཀྱིས་ལུས་རྨུགས་པ་མ་ཞིང་རྣམ་པར་འཁྲུལ། །ལས་ཀྱི་རང་བཞིན་རྙི་ལ་ཚོར་བ་འཐོགས་པ་རྣམས། །བསྐྱོད་པ་ཙམ་ཡང་བྱ་བར་མི་ནུས་བཞིན་དུ་གསོན། །ཞེས་སོ། །རལ་གྲི་ལྟ་བུའི་ཚལ་ནི། མེ་མ་མུར་དང་། རོ་མྱགས་དང་། སྤུ་གྲིའི་སོ་གཏམས་པའི་ལམ་པོ་ཆེ་ལས་ཐལ་ནས་རྒྱས་བཅད་བཞིག་ན་ནགས་ཚལ་སྔོན་པོའི་རྣམ་པར་ཡོད་པ་བ་ཤེས་འགྲེལ་གྱིས་བསྟན་ཏེ། དེར་སྐྱབས་འཚོལ་ཕྱིར་བརྒྱུགས་པས། ལས་ལས་བྱུང་བའི་རླུང་གིས་ལྗོན་ཤིང་གཡོས་ནས་ལོ་མ་ཐམས་ཅད་མཚོན་ཆའི་ཆར་དུ་བབས་པས་ལུས་རྦད་ཅིང་ངུ་འབོད་བྱེད་པ་ཙམ་ལས་གཞན་པའི་བཤེས་དང་བྲལ་བའི་ཚུལ། སླབ་སྤྲིང་ལས། ཉི་ཆན་གྱིས་གདུངས་བཟོད་དཀའ་བརླག་པས་སྐྱོ་བའི་ལུས། །ལྗོན་ཤིང་ལོ་མ་སྔོ་སྟུག་མཐོང་ནས་སོང་བ་དང་། །དེ་ཡི་ལོ་མ་མཚོན་བརྒྱར་ལྷུང་བས་ལུས་རྦད་ཅིང་། །དེ་ན་ཡུན་རིང་དུད་མོ་ལས་བཤེས་བརླག་པར་གནས། །ཞེས་སོ། །ཆུ་བོ་རབ་མེད་ནི། བཤེས་འགྲེལ་ལས། ཚྭ་སྒོ་བཟོད་བརླག་ཆུ་
ཚན་དུ་སྟེ། ཆུ་བོ་རབ་མེད་ཅེས་བྱ་བ་ལོ་མ་རལ་གྲི་ལྟ་བུའི་ཚལ་འདབས་ན་དམྱལ་བ་འོབས་བཞིན་དུ་བསྐོར་ཏེ་འདུག་པ། ཞེས་བསྟན་ལ་དེའི་ལམ་ཐམས་ཅད་ཀྱང་སྤུ་གྲིའི་ཐང་དུ་ཡོད་ཅིང་། སྟེང་ནས་ལྕུག་ཚལ་གྱི་རལ་གྲིས་ཀྱང་སྣང་བར་བྱེད་པས་ལམ་ལ་ལྟར་ནས་སྤུ་གྲིའི་ཐང་དང་། ངོ་བོ་ཆུ་བོ་རབ་མེད་ཅེས་བུལ་ཏོག་ཚྭ་སྒོ་ཅན་གྱི་མུ་ཚན་མཚོན་ཆ་གཟིངས་པར་ལྟུང་བའི་ཚུལ། སློབ་སྤྲིང་ལས། སྤུ་གྲིའི་སོ་གཏམས་ལྕུག་ཚལ་ལོ་མ་རལ་གྲི་ཡི། །ནང་དུ་ཐང་ཆད་བརྒྱུགས་ན་ལུས་རྨས་སྐྱབས་མེད་པར། །རྩེ་གསུམ་མདུང་ཐུང་མདའ་དང་རལ་གྲི་རྣོས་གང་བའི། ཁྲོན་པ་གཤིན་རྗེའི་ཁབས་ཐུ་བའི་ནང་དུ་ལྷུང་། །ཞེས་སོ། །བཤད་མ་ཐག་པ་མཚོན་ཆའི་ཐང་དང་། འཆད་པར་འགྱུར་བའི་ཤལ་མ་ལི་ནི་ལྷག་པ་བཞི་པོར་མི་བགྲང་སྟེ། སློབ་དཔོན་བློ་གྲོས་ཆེན་པོས། བཞི་པོ་འདི་དག་ནི་ལྷག་པ་ཡིན་པར་བཤད་པ་འདི་དག་སྟེ། མེ་མ་མུར་དང་། རོ་མྱགས་དང་། ལོ་མ་རལ་གྲི་ལྟ་བུའི་ཚལ་དང་། ཆུ་བོ་རབ་མེད་དོ། །ཞེས་བཤད་པའི་ཕྱིར་འདིར་སློབ་སྤྲིང་དང་ལྟོ་སྦྱར་ནས་རྣམ་པར་དཔྱད་པར་རིགས་པར་བྱའོ། ཁྱད་པར་གཞན་ཤལ་མ་ལི་ནི་མཛའ་གཅུགས་དམ་བཅའ་དྲན་ནས་བསྙེགས་པའི་ལམ། ཚེར་མ་རྣོན་པོས་ཚབས་ཆེར་ཕུག་པའི་ལུས། །འབར་ཞིང་རྩུབ་པའི་ལྕགས་ཀྱི་བུད་མེད་ཀྱིས། །འཁྱུད་མཐར་ཁྭ་དང་བྱ་རྒོད་མིག་ལ་འདྲུ། །འདི་ལྟར་ལྕགས་ཀྱི་ཤལ་མ་ལི་གནོད་པའི་རང་བཞིན་ཅན་དེ་ཉམས་དགའ་བར་མངོན་པའི་རྩེ་མོ་ནས་སྔོན་ཆད་འཁྲིག་པའི་ཆོས་བརྟེན་པའམ། མཛའ་བར་གྱུར་པ་དག་གིས་འབོད་པར་མཐོང་ནས་དེར་ཕྱིན་པའི་ལམ་དུ་ཅེ་སྦྱང་དང་། ཁྱི་དང་། འོང་བུ་ལ་སོགས་པས་དེད་ཅིང་ལམ་ཐམས་ཅད་ལྕགས་ཀྱི་ཚེར་མ་རྣོན་པོ་གཟིངས་པས་ཤ་ཁྲག་གཟགས་པར་བྱེད་དེ། སྔ་མ་ལས། སྲེ་ཁྱི་བོང་བུ་ཅེ་སྦྱང་སྟོང་
ཕྲག་གིས་བྲེད་ནས། ཤལ་མ་ལི་མཐོ་མི་བཟད་དེ་ལ་མྱུར་འཇོགས་ན། ཚེར་མའི་ཚོགས་ཁ་ཐུར་དུ་བལྟས་པས་ཐལ་འབྱིན་ཞིང་། །ཟུག་རྔུ་ཚབས་པོ་ཆེ་དག་ཁོང་བརླག་ནུབ་པར་འགྱུར། །ཞེས་དང་། དེའི་དྲུང་ན་སླེབས་པའི་ཚེ་ཡིད་དུ་གཅུགས་པ་དེ་མ་ཡིན་པར་ལྕགས་ཀྱི་ཟུང་མེད་འཇིགས་སུ་རུང་བ་སོག་ལེ་ལྟ་བུར་རྩུབ་ལ་མེ་སྟག་འཕྲོ་བས་འཁྱུད་ཅིང་དམ་པོར་འཛིན་པ་སྟེ། སྔ་མ་ལས། བུད་མེད་ཀུན་ནས་མེ་ལྕེ་བརྒྱ་ཕྲག་འཐོན་པའི་མེ། །མེ་སྟག་ཕྲེང་བ་འཁྲིགས་པའི་རྒྱན་གྱིས་བཞགས་གྱུར་ཅིང་། །སོག་ལེ་ལྟ་བུར་རྩུབ་པའི་ལུས་ཀྱིས་ཟོན་མེད་པར། །ཤིན་ཏུ་སྡུག་པའི་ཚུལ་གྱིས་བཅུམ་ནས་འཁྱུད་པར་བྱེད། །ཅེས་སོ། །ཡང་རིའི་རྩ་བ་ནས་མཆིས་བྲང་དང་། ཉེ་དུ་ལ་སོགས་པས་འབོད་པར་མཐོང་ནས་ཕྱིན་པ་ན་ལྕགས་ཀྱི་ཚེར་མ་དང་། མདུང་ཐུང་ལ་སོགས་པས་སྔར་བཞིན་དུ་འབུགས་ཤིང་དྲན་པ་ཉམས་པ་ལས་གཡང་སར་ལྷུང་བ་དང་། ཁྭ་དང་། བྱ་རྒོད་དང་། སྦྲུལ་གདུག་པ་ཅན་དང་། དུར་བྱ་དང་། བྱ་གར་ལ་སོགས་པས་མིག་འབྱིན་རྒྱུ་ལྟོ་འདྲེན་པ་ལ་སོགས་པའི་སྡུག་བསྔལ་གྱིས་མནར་བར་བྱེད་པའི་ཚུལ། ཐུར་དུ་བབས་ན་ལྕགས་ཚེར་གྱེན་དུ་ཁ་བལྟས་པ། །རྩུབ་ལ་རྣོ་བ་མང་པོས་ལུས་ཕུག་དྲན་པ་ཉམས། །དེ་ན་ཁ་གཅིག་མདུང་ཐུང་རྩེ་གསུམ་འབར་བ་དང་། །ཟུག་རྔུ་རྣོན་པོས་ལུས་དབང་ཐུར་དུ་འབབ་མི་ནུས། །དེ་ཚེ་མཚོན་ཆ་བརྡར་བའི་མཆུ་ཅན་ཁྭ་རྣམས་ཀྱིས། །ཀུན་ཏུ་དྲངས་པས་རྒྱུ་ལྟོ་བྲང་བྲེང་ནར་ཞིང་འཐོར། ཁ་ཅིག་རི་བོའི་གཡང་ས་ཡ་ངར་གཡང་དུ་ལྷུང་། །ཞེས་དང་། གཤིན་རྗེའི་ལག་ན་ཐོགས་པ་དུས་ཀྱི་ཞགས་པ་ལྟའི། །སྦྲུལ་གདུག་མགོ་འཕང་བསྟོད་པས་དམ་བཞག་གཞུངས་ནས་ནི། །གསོན་པོར་ཁྭ་དང་བྱ་གར་ཀཾ་ཀ་བྱ་རྒོད་ཀྱིས། །དེ་ན་གནས་པའི་མིག་དག་ཚམ་ཚོམ་མེད་པར་འདྲུ། །ཞེས་སོ། །དེ་དག་གི་རྒྱུ་འབྲས་ཀྱང་དྲན་པ་
ཉེ་བར་གཞག་པའི་ཚིག་ལེའུར་བྱས་པ་ལས། ལུས་ཅན་གང་དག་གཅིག་ལས་གཅིག །གནོད་པར་དགའ་བས་གཡུལ་ངོར་གསོད། །སྡིག་ཅན་དེ་དག་སྡུག་བསྔལ་དང་། །ལྡན་པའི་རལ་གྲིའི་སེམས་ཅན་སྐྱེ། །ཞེས་པ་ལ་སོགས་པའི་དོན་ཉེ་བར་བསྡུ་ན། བྱི་ཕོ་བྱེད་པ་ཤལ་མ་ལིར། །འཛེག་ཅིང་ལྕགས་ཀྱི་བུད་མེད་འཚེ། །བག་ཕེབས་པ་ལ་གནོད་བྱས་ན། །རལ་གྲིའི་ཚལ་དུ་ལུས་ཆད་ནས། ཁྱི་དང་བྱ་རྒོད་འུག་པས་ཟ། །གཞན་ནོར་འཕྲོག་བཟང་ས་ཆེན་འཚོད། །ལྕགས་ཀྱི་ཐོ་ལུམ་འབར་བས་འཚོག །རྔོན་པའི་ལས་ལ་དགའ་བ་ནི། །ལོ་ནི་བྱེ་བར་ལྕགས་ཁྱིས་ཟ། །ཉ་གསོད་ཆུ་བོ་རབ་མེད་འགྲོ། །ཟངས་ཞུན་བསྐོལ་བའི་ནང་དུའང་འཆོད། །ཆོས་མིན་རང་འདོད་གཤགས་འགྱེད་ན། །ངུ་འབོད་གནས་སུ་འཁོར་ལོས་གཟིར། །གཟུགས་ཅན་ཀུན་ལ་གནོད་བྱེད་པ། །དེ་དག་རི་དང་ཐོ་བས་འཐག །ཆོས་ཀྱི་སྟེགས་བཤིག་ཆོས་མིན་སྨྲ། །སྤུ་གྲིའི་སོས་གཏམས་ལམ་དུ་འགྲོ། །སེན་མོས་ཤིག་གསོད་དེ་ཡི་ལུས། །ཆེར་སོང་བྲག་སྒོར་ཡང་ཡང་བཅར། །བརྟུལ་ཞུགས་བཟང་མནོས་མི་བསྲུང་བ། །དེ་ནི་མེ་མ་མུར་དུ་བསྲེག །ལོག་འཚོ་ལྔ་ལ་ལོངས་སྤྱོད་པ། །ཕྱི་སའི་འདམ་དུ་སྲིན་བུས་ཟ། །འབྲུ་ནང་འཁོད་པའི་སྲོག་ཆགས་ལ། །འཚེ་བ་བྱས་ན་གཏུན་བུར་འཐག ཁྲོ་གཏུམ་གཡོ་དང་རྫུན་ལ་དགའ། །གཞན་གནོད་གཤིན་རྗེའི་སྲིན་པོར་སྐྱེ། །ཞེས་སོ། །དེ་ནས་གྲང་དམྱལ་བཤད་པ་ལ། སྤྱི་མཐུན་གྱི་སྡུག་བསྔལ་བསྟན་པ་དང་། སོ་སོའི་རང་བཞིན་བཤད་པ་ལས། དང་པོ་ནི། བུ་ཡུག་སྦྲེབས་པ་འདར་བའི་ཐག་པ་ཡིས། །བཅིངས་ཏེ་བསྐྱོད་པར་མི་ནུས་བཞིན་གསོན་ཡང་། །རླུང་གི་མཚོན་ཆས་རུས་པའི་གཏིང་ཕུག་པའི། །གྲང་རེག་སོ་ཡི་བར་དུ་འཚིར་ལྟར་གདུང་། །འདི་ལྟར་གྲང་བའི་དམྱལ་བ་རྣམས་ནི་སའི་དཀྱིལ་འཁོར་རྡོག་པ་བཞག་ས་ཙམ་ཡང་མི་མངོན་པའི་གངས་རི་ཆེན་
པོ་གཅོང་རོང་མི་བཟོད་པ་ཅན་གྱི་ལྟོངས། ཁ་ཆར་དང་རླུང་འཐབས་པའི་བུ་ཡུག་གིས་རབ་ཏུ་སྦྲེས་པའི་གནས་མུན་ནག་འཐིབས་པོར། དཔེས་མི་མཚོན་པའི་ལྷགས་པའི་རེག་བྱ་རྣོ་ངར་ཅན་གྱིས་རུས་པའི་གཏིང་ཕུག་པར་ཕྱིན་པས་ལུས་ཀུམ་ཀུམ་པོར་གྱུར་ཏེ་བསྒུལ་བསྐྱོད་ཀྱི་གནས་སྐབས་ལས་ཐལ་ཀྱང་། ད་དུང་སྡུག་བསྔལ་གྱི་ཚོར་བ་ལ་རྣམ་པར་ཤེས་པ་འཐོགས་ནས་གསོན་པའི་གནས་སྐབས་ལས་མི་ཡོལ་བའོ། །སོ་སོའི་ཁྱད་པར་དབྱེ་བ་ནི། ཆུ་བུར་ཅན་དང་ཆུ་བུར་བརྡོལ་བ་དང་། །ཨ་ཆུའི་སྨྲེ་སྔགས་ཀྱི་ཧུད་སོ་འཐམས་ཅན། །ཨུཏྤ་ལ་ལྟར་པགས་པ་དྲུག་ཚལ་འགས། །པདྨ་དང་ནི་པདྨ་ཆེན་པོ་ལྟར། །བརྒྱད་དང་བཅུ་དྲུག་གྲངས་མེད་གས་པའི་རྨ། །སྲོག་ཆགས་མཆུ་རྣོན་ཅན་གྱིས་འབིགས་ཤིང་བཟའ། །ཞེས་འདོམས་པ་ལས། ཆུ་བུར་ཅན་ནི་ཧ་ཅང་གྲང་ཆེས་པས་ལུས་ཆུ་བུར་གྱིས་གང་བ་དང་། དེ་བཞིན་དུ་ཆུ་བུར་བརྡོལ་ནས་རྨར་གྱུར་པ་དང་། གྱུར་པ་དེས་ཨ་ཆུའི་སྨྲེ་སྔགས་ནར་མར་འབྱིན་པ་དང་། ཀྱི་ཧུད་ཅེས་ཤུགས་རིང་འབྱིན་པ་ཙམ་ལས་སྐད་ཀྱི་གདངས་ཆག་པ་དང་། དེའང་འདོན་པར་མ་ནུས་པས་སོ་ཐམ་ཐམ་པ་དང་། རྨ་དེ་དག་ལས་སྐྱེས་པའི་སྲོག་ཆགས་ཀྱིས་མཚོན་ཆའི་མཆུས་དབང་ནས་ཨུཏྤལ་ལྟར་པགས་པ་དྲུག་ཚལ་དུ་གས་པ་དང་། པདྨ་ལྟར་བརྒྱད་ཚལ་དུ་གས་པ་དང་། པདྨ་ཆེན་པོ་ལྟར་ལྡབ་འགྱུར་གསུམ་འགྱུར་ནས་གྲངས་མེད་ཀྱི་བར་དུ་གས་པའི་ནང་ནས་ཆུ་སེར་དང་། ཞག་དང་། རྐང་མར་ཀྱང་འཛག་པ་སྟེ། སློབ་མ་ལ་སྤྲིངས་པར། ལྷགས་པ་དཔེ་མེད་རུས་པ་ལ་ཡང་ཐིམ་པ་ཡིས། །ལུས་སྦྲེབས་འདར་ཤིང་བསྐུར་ནས་གུམ་གུམ་པོར་འདུག་པ། །ཆུ་བུར་བརྒྱ་བྱུང་བརྡོལ་བ་ལས་སྐྱེས་སྲོག་ཆགས་ཀྱིས། །རལ་གྲིས་དབང་ནས་ཞག་དང་ཆུ་སེར་རྐང་བཅས་འཛག །ཀོས་ཐག་སོ་འཐམས་སྐྲ་དང་སྤུ་རྣམས་
གཡེང་གྱུར་བ། །མིག་དང་རྣ་བ་ལྐོག་མ་གནོད་པས་ཀུན་གཟིར་ཞིང་། །ལུས་དང་སེམས་ཀྱི་བར་དག་རབ་ཏུ་བློང་གྱུར་ནས། །གྲང་བའི་དམྱལ་བར་གནས་ཤིང་ཤིན་ཏུ་འོ་དོད་འབོད། །ཅེས་པ་ལ་རྒྱ་འགྲེལ་ནས། ཆུ་བུར་ཅན་ནི་ལྷགས་པ་ཞེས་རྐང་པ་ཕྱེད་དང་གསུམ་མོ། །ཆུ་བུར་བརྡོལ་བ་ནི་བརྡོལ་བ་ཞེས་རྐང་པ་ཕྱེད་དང་གཉིས་སོ། །སོ་ཐམ་ཐམ་པ་ནི་ཀོས་ཐག་ཅེས་ཚིགས་སུ་བཅད་པ་གཅིག་གོ །ཞེས་པ་ལས་མ་བཤད་ཀྱང་། ཨུཏྤལ་ལྟར་གས་པ་ལ་སོགས་པ་རྣམ་པ་གསུམ་སྲོག་ཆགས་ཀྱིས་མཆུས་དབང་བ་ལས་བྱུང་བར་སྟོན་ཅིང་། ལུས་སེམས་ཀྱི་བར་རབ་ཏུ་བློང་བ་ལས་ཡིད་མི་བདེ་བའི་ཤུགས་རིང་ཀྱི་ཧུད་འབྱུང་བ་དང་། འོ་དོད་འབོད་པས་ཨ་ཆུའི་སྒྲ་འདོན་པར་ཤུགས་ཀྱིས་སྟོན་པར་གོ་བ་བླང་ཤེས་སོ། །དེ་དག་གི་ཚེའི་ཚད་ནི་དྲན་པ་ཉེར་གཞག་ལས། འདི་ལྟ་སྟེ། གྲོང་ཁྱེར་ཀོ་ས་ལའི་བྲེས་གྲངས་སུ་བཅལ་བའི་ཏིལ་གྱི་ཚོགས་བཅུ་ཚད་ཉི་ཤུ་ཤོང་བའི་རྫང་པ་ཞིག་ཏིལ་གྱིས་བར་མཚམས་མེད་པར་ཡོངས་སུ་གང་སྟེ། ཆུ་བུར་ཅན་གྱི་དམྱལ་བ་ལས་ལོ་བརྒྱ་བརྒྱན་ཏིལ་ཉག་མ་རེ་རེ་ཕྱིར་ཕྱུང་པས་ཟད་པར་གྱུར་བ་དེའི་ཚེ། ཆུ་བུར་ཅན་གྱི་སེམས་ཅན་དམྱལ་བ་བདེ་དག་ཚེ་འཕོ་བར་རིགས་པར་བྱ་སྟེ། གཞན་དག་ནི་དེ་ལས་ཀྱང་ཆེས་ལྷག་པ་ཉི་ཤུས་བསྒྲེས་པར་སྡུག་བསྔལ་ཆེན་པོ་མནག་དགོས་སོ། །ཞེས་པའི་བསྒྲེས་པ་ནི་བསྒྱུར་བའི་དོན་ཡིན་ནོ། །དེ་ཡང་ཚེའི་ཚད་ངེས་པ་ལྟར་བཤད་པ་ནི་ཐེག་དམན་རང་ལུགས་ཉིད་དེ། ཐེག་པ་ཆེན་པོའི་ལུགས་སུ་ནི་བྱང་ཆུབ་སེམས་དཔའ་དམྱལ་བའི་ཤིང་རྟ་འདྲེན་པ་གྱད་འབག་ཤི་ཏས་གྲོགས་པོ་ལ་སྙིང་རྗེ་སྐྱེས་ནས་འདིའི་ཐག་པ་ཡང་བདག་གི་གཉའ་བར་ཐོགས་ཤིག་ཅེས་གཞན་གྱི་སྡུག་བསྔལ་གྱི་ཁུར་བཟོད་པའི་ཐུགས་བསྐྱེད་ལས་དམྱལ་སྲུང་ཁྲོས་ཏེ་མགོ་ལ་ལྕགས་ཀྱི་ཐོ་ལུམ་བསྣུན་པས་གློ་བུར་དུ་
ཚེ་འབོས་པ་དང་། དེ་བཞིན་དུ་དེད་དཔོན་མཛའ་བོའི་བུ་མོ་བཞིན་གཉེན་པོ་དྲག་པོ་རྒྱུད་ལ་སྐྱེས་པ་ལ་ནི་མ་ངེས་སོ། །ཡང་རྡོ་རྗེའི་བླ་མ་ལ་བརྙས་པ་དང་དམ་པའི་ཆོས་སྤངས་པ་སོགས་པས་བསྐལ་ཆེན་དུ་མར་མི་འཕོ་བའང་ཡོད་དེ་ལས་ཀྱི་སྒྲིབ་པ་མཐུ་ཆེ་བའི་སེམས་ཅན་གང་དག་སྡུག་བསྔལ་དྲག་པོའི་ཚོར་བ་འདི་ལྟ་བུས་ཀྱང་འཆི་བར་མི་འགྱུར་བའི་ཚུལ་བཤེས་སྤྲིང་ལས། དེ་ལྟར་སྡུག་བསྔལ་ཤིན་ཏུ་མི་བཟད་ལོ། །བྱེ་བ་ཕྲག་བརྒྱར་ཉམས་སུ་མྱོང་ཡང་ནི། །ཇི་སྲིད་མི་དགེ་དེ་ཟད་མ་གྱུར་པ། །དེ་སྲིད་སྲོག་དང་འབྲལ་བར་མི་འགྱུར་རོ། །ཞེས་སོ། །ད་ནི་ཉི་ཚེ་བ་བཤད་པའི་ཕྱིར། །མགལ་རྡུམ་བཅད་དང་སྒོ་འཕར་མེད་ལ་འཐུམས། །སྒོ་དང་ཀ་བ་ཐབ་དང་ཐག་པ་སོགས། །སྣ་ཚོགས་ལས་ཀྱི་སྤྲུལ་པའི་རང་གཟུགས་ལ། །ཉེ་བར་ལེན་པའི་སྡུག་བསྔལ་ཟད་མི་ཤེས། །ཉི་ཚེ་བ་ནི་རི་བྲག་གམ། ཆུ་དང་། ཤིང་དང་། མེ་དང་། ནམ་མཁའ་ལ་སོགས་ངེས་པ་མེད་པའི་གནས་སུ། ཚེ་ཚད་དང་སྡུག་བསྔལ་ཀྱང་མ་ངེས་པ། མང་པོ་འདུས་པའམ། གཅིག་པུར་གྱུར་བའམ། ཉུང་ཟད་དུ་གནས་པ་སྟེ། ཚ་གྲང་བཀྲེས་སྐོམ་གཤགས་གཏུབས་བརྡེག་འཚོག་འཚེད་པ་ལ་སོགས་པའི་སྡུག་བསྔལ་གང་ཡང་རུང་བས་བཟོད་གླགས་མེད་པར་གདུང་བས་ཉི་ཚེ་བ་ཞེས་བྱ་ལ། དེའང་བྲག་གི་ནང་དུ་བཅར་བ་དང་། ཕ་ཝང་དང་། རྡོ་མཁྲེགས་ཀྱི་ལྟོང་ན་འདུག་པ་དང་། གངས་དང་ཆབ་རོམ་གྱི་ནང་དུ་འཁྱགས་ཤིང་རེངས་པ་དང་། ཆུ་ཚན་གྱི་ནང་དུ་འཚེད་པ་དང་། མེ་ནང་དུ་ཚ་ཞིང་བསྲག་པ་དང་། ཤིང་དང་ལོ་མའི་སྤུབས་སུ་གཏུམས་པ་དང་། ནམ་མཁའ་ལ་གཡོ་བ་དང་། ཉིན་མཚན་ཕྱེད་མའམ། ཡུད་ཙམ་མམ། རྟག་པར་ལས་ཀྱིས་ཉེ་བར་ལེན་པ་དང་མཚུངས་པར་སྡུག་བསྔལ་བའི་འདུ་ཤེས་འཁྲུལ་བ་ཅན་ལ་སོགས་པ་སྟེ། དེ་ལ་
ཉིན་མཚན་ཕྱེད་མར་མྱོང་བ་ནི། འདུལ་བ་ལུང་ལས། གྲོང་ཁྱེར་རྡོ་འཇོག་ཏུ་འཕགས་པ་ཀཱ་ཏྱ་ཡ་ནས་ཤན་པ་གཅིག་ལ་སྲོག་གཅོད་སྤོང་བར་གདམས། དེས་ཀྱང་མཚན་མོ་སྲོག་མི་གཅོད་པའི་ཁྲིམས་མནོས་པ་ལས། སྔར་གྱི་མི་དགེ་བའི་རྒྱུས་ཉི་ཚེ་བའི་དམྱལ་བར་སྐྱེས་ནས་ཉིན་མོ་ནི་སྡུག་བསྔལ་ལ། མཚན་མོ་ནི་ལྷའི་ལོངས་སྤྱོད་དང་ལྡན་པ་བཞིན་ནོ། །ཡུད་ཙམ་དུ་མྱོང་བའམ་རྟག་པར་མྱོང་བ་མ་ངེས་པ་ནི། འདུལ་བ་ལུང་ལས། དེ་ནས་མཽངྒལ་གྱི་བུས་རྒྱ་མཚོའི་མཐར་ཕྱིན་པ་ལས་ཉི་ཚེ་བའི་སེམས་ཅན་དམྱལ་བ་པ་གཏུན་ལྟ་བུ་དང་། ཕྱགས་མ་ལྟ་བུ་དང་། ལྗོན་ཤིང་ལྟ་བུ་རབ་ཏུ་མང་པོ་སྡུག་བསྔལ་གྱིས་གདུངས་པ་མཐོང་སྟེ། ཞེས་པ་ལྟར། གཏུན་དང་། ཕྱགས་མ་དང་། ཕྲུ་བ་དང་། སྒོ་དང་། སབ་མོ་དང་། ཐག་པ་དང་། སྒྱེད་པོ་དང་། ཀ་བ་ལ་སོགས་རེས་འགའ་བའམ་རྟག་པར་བཀོལ་ཞིང་སྤྱོད་པའི་འདུ་ཤེས་འཁྲུལ་བ་ཅན་དུ་སྐྱེས་ནས་སྡུག་བསྔལ་ཉམས་སུ་མྱོང་བ་དཔེར་ན་རྒྱལ་པོའི་ཁབ་ཀྱི་བ་གླང་གི་ཤན་པ་རུས་གོང་དྲི་ང་བ་ལ་བྱ་རོག་སོགས་ཀྱིས་འཐོག་པའི་སྡུག་བསྔལ་ཅན་དུ་སྐྱེས་པའི་གཏམ་རྒྱུད་བཞིན་ནོ། །དེ་བཞིན་དུ་ཤིང་སྡོང་པོའི་གཟུགས་ལ་བཅད་གཏུབས་བྱས་ན་རང་གི་ཡན་ལག་དང་ཉིང་ལག་ཆད་པའི་སྣང་བ་ཤར་ནས་སྡུག་བསྔལ་གྱི་ཚོར་བ་ཉམས་སུ་མྱོང་བ་དང་། འཕགས་པ་དགེ་འདུན་འཚོའི་རྟོགས་བརྗོད་ལྟར། རྣ་བ་བྱེ་བ་རིས་ཁང་པ་དྲྭ་བ་ཅན་གཅིག་ཏུ་གཎྜཱི་བརྡུངས་པ་ལས། ཉན་ཐོས་ཀྱི་གཟུགས་ལྔ་བརྒྱ་འདུས་མ་ཐག །གཅིག་གིས་གཅིག་མཚོན་གྱིས་ཁ་དག་པར་བྱས་ཤིང་། གདུགས་ཚོད་ཐོན་པའི་ཡུན་ན་ཕྱིར་ཡང་འོང་བ་མཐོང་བ་ལ་སོགས་དཔག་ཏུ་མེད་དེ་མཽངྒལ་གྱི་བུས། སྲིད་པ་ན་ནི་བདེ་བ་མེད། །ཉི་ཚེ་བ་བཞིན་འགྲོ་བ་ཀུན། །སོ་སོའི་སྡུག་བསྔལ་རྣམས་ཀྱིས་གདུང་། །འབར་བའི་
ཁྲོད་ན་གནས་པ་འདྲ། །ཞེས་བཤད་པ་ཡིན་ནོ། །སྤྱིར་དམྱལ་བའི་གནས་རིགས་གྲངས་ངེས་ཀྱི་སྒོ་ནས་རྣམ་གྲངས་བཅོ་བརྒྱད་དུ་བསྡུས་པ་ནི་བསྟན་བཅོས་རྣམས་ལ་ཡོངས་སུ་གྲགས་པ་སྟེ། གཞན་དུ་ན་ནམ་མཁའི་སྙིང་པོའི་མདོ་ལས་མནར་མེད་ཀྱི་འཁོར་བཤད་པའི་སྐབས་འདི་སྐད་དུ། ཚུལ་ཁྲིམས་བཤིག་པ་དང་། ཡོན་བདག་དད་པ་ཅན་གྱི་ཡོན་བླངས་པའི་ལས་ཀྱིས་ཡང་དམྱལ་བ་ཆུང་ངུ་རྣམས་ཀྱི་ནང་དུ་འཇུག་སྟེ། དེ་ལ་དམྱལ་བ་གྲང་སྤྲེབས་དང་། དམྱལ་བ་མུན་ནག་པ་དང་། དམྱལ་བ་རབ་ཏུ་ཚ་བ་དང་། སྤུ་གྲི་སོ་འཐམས་དང་། རལ་གྲིའི་འཁོར་ལོ་དང་། མེའི་ཤིང་རྟ་ཅན་དང་། ཕྱི་སའི་འདམ་དང་། ཆུ་ཚན་དང་། མེ་མུར་ཀླུང་དང། ནགས་ཚལ་རལ་གྲིའི་ལོ་མ་ཅན་དང་། ལྕགས་ཀྱི་འཁྲུལ་འཁོར་དང་། ལྕགས་ཀྱི་ཤལ་མ་རིག་པ་ཅན་དང་། ལྕགས་ཀྱི་ཁྲི་ཅན་དང་། ལྕགས་ཀྱི་འཁོར་ལོ་ཅན་དང་། ལྕགས་ཀྱི་ཕུག་དང་། ལྕགས་ཀྱི་ཐེ་ལུམ་དང་། བསྡུས་འཇོམས་ཐུག་རིམ་དང་། བངས་ཁོལ་དང་། ཞེས་པ་ལ་སོགས་གསུང་རབ་ལས་གསུངས་པ་ནི་མཐའ་དག་གོ །དེ་ལྟར་དམྱལ་བ་དེ་དག་དང་སྡིག་ཅན་རྣམས་ནི་དབུགས་འབྱུང་བ་དང་འགག་པ་ཙམ་གྱིས་བར་དུ་ཆེད་པ་ལས་མེད་ཀྱང་དེའི་སྡུག་བསྔལ་ལ་འཇིགས་མི་ཤེས་པ་རྣམས་ནི་རྡོ་རྗེའི་རང་བཞིན་ནོ། །ཞེས་ཧ་ཅང་ལ་ཐལ་བར་སྟོན་ཅིང་། དེ་བཞིན་དུ་དམྱལ་བ་རི་མོར་བྲིས་པ་མཐོང་བའམ། གཞན་གྱིས་བསྙད་པའམ། སྔོན་ཉམས་སུ་མྱོང་བ་དྲན་པའམ། དམྱལ་བའི་སྡུག་བསྔལ་ནི་འདི་ལྟ་བུའོ། །ཞེས་པའི་གཞུང་བཀླགས་པའམ་འཇིམ་པ་ལ་སོགས་པར་དེའི་གཟུགས་བརྙན་བྱས་པ་ལའང་འཇིགས་པ་ཆེན་པོ་སྐྱེ་བ་ཡིན་ན། རྣམ་སྨིན་མངོན་སུམ་པར་ཉམས་སུ་མྱོང་ན་སྨོས་ཅི་
དགོས་ཞེས་སྐྱོ་བ་བསྐུལ་བའི་ཕྱིར་བཤེས་སྤྲིང་ལས། སྡིག་ཅན་དབུགས་འབྱུང་འགག་པ་ཙམ་ཞིག་གིས། །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་ནམ་བཀླག་དང་གཟུགས་སུ་བགྱིས་རྣམས་ཀྱང་། །འཇིགས་པ་སྐྱེ་བར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་དགོས། །ཞེས་སོ། །འདིར་ངན་སོང་གཞན་གཉིས་པོ་ནི་ས་བཅད་ཙམ་ལས་མ་བསྟན་པ་ནི་ཚིག་སྡེབ་པ་ཉམས་སུ་མྱོང་སླད་སྔར་མི་ཁོམ་པའི་གནས་རིགས་སུ་བསྟན་ཟིན་པས་མ་བསྐྱར་ཏེ། ཚིག་མང་ལ་དོན་ཉུང་བ་བསྟན་བཅོས་ཀྱི་མི་མཐུན་ཕྱོགས་ཡིན་པའི་ཕྱིར་རོ། །དེ་ལྟ་ནའང་བཤེས་པའི་ཕྲིན་ཡིག་ལྟར་སོ་སོའི་རང་བཞིན་གང་བབ་བབ་ཏུ་སྟོན་པ་མི་འགལ་བའི་ཕྱིར་ཡི་དྭགས་ཀྱི་རིགས་སུམ་ཅུ་རྩ་དྲུག་པོ་བྱིངས་ན་གནས་པ་དང་། མཁའ་ལ་རྒྱུ་བ་གཉིས་སུ་རིགས་བསྡུ་བའི་བྱིངས་ན་གནས་པའི་ཡི་དྭགས་ཀྱི་སྡུག་བསྔལ་སྤྱིར་བསྟན་པ་ནི། དེ་ཉིད་ལས། ཡི་དྭགས་ནའང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་བཟད་བསྟེན་འཚལ་ལོ། །ཞེས་བཀྲེས་པ་ལ་སོགས་པས་ཡིད་གདུང་བའི་འདོད་པ་ནམ་ཡང་རྫོགས་པ་མེད་པས་རྒྱུན་ཆགས་ལ། རྟག་ཏུ་ཟས་སྐོམ་འབའ་ཞིག་འཚོལ་བའི་ཕྱིར་རྒྱུག་པས་ངལ་བ་དང་། སྐྱེས་བུ་རལ་གྲི་དང་། གཏུན་ཤིང་དང་ཞགས་པ་ལ་སོགས་པ་ཐོགས་པ་མཐོང་ནས་གཤེད་མ་འབའ་ཞིག་ཏུ་མངོན་པས་འཇིགས་པའོ། ཁྱད་པར་གྱི་སྡུག་བསྔལ་ནི། ནང་གི་སྒྲིབ་པ་ཅན་ལྟོ་བ་རི་རབ་ཙམ་ལ་ཁ་ཁབ་མིག་ལྟ་བུ་གཟུགས་མི་སྡུག་ཅིང་། ཟས་སྐོམ་མཐོང་ན་གཞན་
གྱིས་བསྲུང་བའམ། དྲུང་དུ་སླེབ་མ་ཐག་མེད་པར་འགྱུར་ཞིང་། ངན་སྐྱུགས་དང་མི་གཙང་བ་གྱི་ནར་བོར་བ་ཅུང་ཟད་རྙེད་ཀྱང་ཁའི་བུ་ག་ཕྲ་བ་ཉིད་ཀྱིས་བཟའ་བར་མི་ནུས་པས་ཤིན་ཏུ་སྡུག་བསྔལ་བའི་ཚུལ། སྔ་མ་ལས། ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་ལྟོས་ཙམ་བཀྲེས་པས་ཉེན། །མི་གཙང་གྱི་ནོར་བོར་བ་ཅུང་ཟད་ཀྱང་། །འཚལ་བའི་མཐུ་དང་ལྡན་པ་མ་ལགས་སོ། །ཞེས་དང་། ཟས་སྐོམ་གྱི་སྒྲིབ་པ་ཅན་ནི། སྔ་མའི་སྡུག་བསྔལ་གྱི་སྟེང་དུའང་མཚན་མོའི་ཆ་ཐམས་ཅད་ལ་ལྟོ་ནས་མེ་འབར་ཞིང་། ཟས་ཀྱང་བྱེ་མ་འབར་བའི་རང་བཞིན་ཅན་ཁར་འབབ་པས་ཁོང་དུ་མེ་འབར་ནས་ཤིན་ཏུ་སྡུག་བསྔལ་བ་སྟེ། ཁ་ཅིག་མཚན་ཞིང་ཁ་ནས་འབར་བ་སྟེ། །ཟས་སུ་འབར་བའི་ཁར་འབབ་བྱེ་མ་འཚལ། །ཞེས་སོ། །སྤྱི་མཐུན་གྱི་སྒྲིབ་པ་ནི། པགས་རུས་གཉིས་ཀྱི་བར་ན་ཤ་མེད་པས་སྐེམས་ཤིང་རིང་ལ་སྒྲེན་མོར་གྱུར་པས་ཤིང་ཏ་ལའི་མགོ་བསྐམས་པ་འདྲ་བར་ཡོད་དེ། སྔ་མ་ལས། ཁ་ཅིག་པགས་རུས་ལུས་ཤིང་གཅེར་བུ་སྟེ། །ཏ་ལ་ཡང་ཏོག་བསྐམས་པ་ལྟ་བུ་ལགས། །ཞེས་དང་། ཁྱད་པར་དམངས་རིགས་ཞེས་བསོད་ནམས་མ་བྱས་པའི་མཐར་ཐུག་པ་རྣམས་ནི། དམངས་རིགས་འགས་ནི་རྣག་དང་ཕྱི་ས་དང་། ཁྲག་སོགས་མི་གཙང་བ་ཡང་མི་རྙེད་དོ། །ཕན་ཚུན་གདོང་དུ་འཚོག་ཅིང་མགྲིན་པ་ནས། །ལྦ་བ་འབྱུང་བ་སྨིན་པའི་རྣག་འཚལ་ལོ། །ཞེས་རྣག་ཁྲག་དང་ཕྱི་ས་ལ་སོགས་པའང་མི་རྙེད་ཅིང་། ཕན་ཚུན་མཐོང་ནའང་ཁྲོས་པའི་དབང་གིས་གདོང་དུ་འཚོག་ཅིང་། གཅིག་ལ་གཅིག་བརྡེག་རེས་བྱེད་པ་དང་། མགྲིན་པ་ལས་ལྦ་བ་བྱུང་བ་དེ་རྣག་ཏུ་སྨིན་ནས་ཁོང་དུ་འཛག་པ་དེས་ཟས་ཀྱི་བྱ་བ་བྱེད་པ་ཙམ་དུ་ཉམ་
ཐག་གོ །ཕྱིའི་སྒྲིབ་པ་ཅན་ནི། ཚ་གྲང་ཁོད་མི་སྙོམས་པའི་སྡུག་བསྔལ་སོ་ཀའི་དུས་སུ་ནི་ཟླ་བའང་ཚལ། དགུན་གྱི་དུས་སུ་ནི་ཉི་མའང་བསིལ་བར་འགྱུར་ཞིང་། ཤིང་ལྗོན་པ་འབྲས་བུ་སྨིན་ཅིང་ཡལ་ག་དུད་པ་དག་ཀྱང་མེས་བསྲེགས་པ་བཞིན་དུ་མེད་པར་འགྱུར་ལ། དེ་ངག་གིས་བལྟས་པ་ཙམ་གྱིས་ཆུ་ཀླུང་ཡང་བསྐམས་པར་འགྱུར་བའི་ཚུལ། ཡི་དྭགས་རྣམས་ལ་སོ་ཀའི་དུས་སུ་ནི། །ཟླ་བ་ཚ་ལ་དགུན་ནི་ཉི་མའང་གྲང་། །ལྗོན་ཤིང་འབྲས་བུ་མེད་འགྱུར་འདི་དག་གིས། །བལྟས་པ་ཙམ་གྱིས་ཀླུང་ཡང་བསྐམས་པར་འགྱུར། །ཞེས་སོ། །དེ་ལྟ་བུའི་སྡུག་བསྔལ་ལ་མེད་པར་སྐབས་བཙལ་བའམ། བར་དུ་ཆད་པ་མེད་པའི་ཚོར་བས་ཉེན་པར་མི་རྣམས་ཀྱི་ཟླ་བ་ལ་ཡི་དྭགས་ཀྱི་ཉིན་ཞག་ཏུ་བརྩིས་པའི་རང་ལོ་ལྔ་བརྒྱའམ། མི་ལོ་ཁྲི་ལྔ་སྟོང་གི་བར་དུ་སྤྱོད་ཀྱང་འཆི་བར་མི་འགྱུར་བ་ནི་འཇུངས་པ་ལ་དགའ་བ་སྟེ་སེར་སྣའི་ལས་ཉེ་བར་སྤྱད་པའི་ཞགས་པ་སྲ་བས་བཅིངས་པ་ལས་འབྱུང་བའི་ཚུལ། བར་ཆད་མེད་པར་སྡུག་བསྔལ་བསྟེན་གྱུར་པ། །ཉེས་པར་སྤྱད་པའི་ལས་ཀྱི་ཞགས་པ་ནི། །སྲབས་བཅིངས་པའི་ལུས་ཅན་ཁ་ཅིག་ལོ། །ལྔ་སྟོང་དག་དང་ཁྲིར་ཡང་འཆི་མི་འགྱུར། །དེ་ལྟར་ཡི་དྭགས་རྣམས་ཀྱིས་སྣ་ཚོགས་པའི། །སྡུག་བསྔལ་རོ་གཅིག་ཐོབ་པ་གང་ལགས་པ། །དེ་ཡི་རྒྱུ་ནི་སྐྱེ་བོ་འཇུངས་དགའ་བ། །སེར་སྣ་འཕགས་མིན་ལགས་པར་རྒྱལ་བས་གསུངས། །ཞེས་སོ། །དེ་ལ་འཕགས་པ་མ་ཡིན་པ་ནི་ཉོན་མོངས་པ་ཅན་དུ་ཤེས་པར་བྱའོ། །ཡང་འདིར་སློབ་དཔོན་ཆེན་པོ་ཙནྡྲ་གོ་མི་ནི་ཡི་དྭགས་ཕྱིའི་སྒྲིབ་པ་ཅན་ས་ཕྱིན་ཅི་ལོག་བཞི་དང་། ནང་དང་ཟས་སྐོམ་གྱི་སྒྲིབ་པ་ཅན་ལ་ཁྱད་པར་གཉིས་ཀྱི་སྒོ་ནས་སྟོན་སྟེ། དེ་ལ་དང་པོའི་ཕྱོགས་ལས་རི་བོ་ཕྱིན་ཅི་ལོག་ཏུ་སྣང་བ་ནི། སློབ་སྤྲིད་ལས། དུས་རླབས་
རླུང་ལངས་ཆུ་འཐོར་རི་རྩེ་བསིལ་གྱུར་ཅིང་། །ཙན་དན་ལྗོན་པ་སྔོ་འཁྲུངས་མ་ལ་ཡར་སོང་ན། །དེ་ཡང་འདི་ལ་ནགས་བསྲེགས་མེ་ལྕེ་རྣོས་འཁྲིགས་ཤིང་། །འགལ་དུམ་འགྱེལ་བ་མང་པོས་རད་རོད་ཅན་དུ་འགྱུར། །ཞེས་ཆུ་བོ་ཆེན་པོ་དུས་བབས་ཀྱི་རླུང་གིས་བསྐྱོད་པ་འཐོར་བས་རི་བོ་ཐམས་ཅད་ཡང་བསིལ་ཞིང་བརླན་པ་ཉིད་དུ་གྱུར་ཅིང་། དེ་ལ་ཙན་དན་འབའ་ཞིག་གི་ནགས་ཚལ་སྟུག་པོ་བསིལ་བའི་རང་བཞིན་ཅན་སྐྱེས་ནས་མ་ལ་ཡ་ལྟར་ཚ་བའི་གདུང་བས་ཉེ་མི་ནུས་པར་གྱུར་པ་དེ་ཡང་། ཡི་དྭགས་རྣམས་ལ་ནི་ནགས་ཆེལ་སྐམ་པོ་ལ་མེ་མཆེད་ནས་མེ་ལྕེ་རྣོན་པོས་འཁྲིགས་ཤིང་། ཤུལ་ཐམས་ཅད་མགལ་དུམ་འགྱེལ་བས་རད་རོད་དུ་གང་བར་མཐོང་བའི་ཚ་རེག་ཅན་དུ་འགྱུར་རོ་ཞེས་སྟོན་པའོ། །ཆུ་བོ་ཕྱིན་ཅི་ལོག་ཏུ་སྣང་བ་ནི། །ཆུ་གཏེར་རླབས་འཇིགས་འཕང་མཐོ་གྱེས་པ་ལས་བྱུང་བའི། །དབུ་བ་བཅེར་བ་ལྷག་གེར་འདུག་པར་སོང་ན་ཡང་། །དེ་ཡང་འདི་ལ་བྱེ་ཚན་ཁུག་རྣ་དམར་རྩུབ་པའི། །རླུང་དམར་འཇེབས་པར་འཚུབ་པའི་མྱ་ངམ་ཉིད་དུ་འགྱུར། །ཞེས་ཆུ་གཏེར་རྒྱ་མཚོ་ཆེན་པོའི་རླབས་གྱེན་དུ་འཕང་མཐོ་བར་འཕགས་པའི་བླ་གབ་ཐམས་ཅད་ལྦུ་བའི་ཕྲེང་བས་ལྷག་གེར་གཡོ་བ་དེ་ཡང་། ཡི་དྭགས་རྣམས་ལ་བྱེ་ཚན་རླུང་དམར་གྱིས་དཀྲུགས་པ་དྲག་པོར་འཚུབ་པའི་མྱ་ངམ་གྱི་ཐང་དུ་མངོན་པའོ། །ཆར་སྤྲིན་ཕྱིན་ཅི་ལོག་ཏུ་སྣང་བ་ནི། འདི་ནི་དེར་གནས་ཆར་སྤྲིན་ལྡང་བར་འདོད་ན་ཡང་། །སྤྲིན་ལས་ལྕགས་མདའི་ཆར་པ་དུད་འཐུལ་མདག་མེར་བཅས། །ཚྭ་ཚྭ་རྡོ་རྗེའི་ཕ་བང་རྣམ་འཕྲོ་གསེར་མདོག་ལྟའི། །གློག་ཕྲེང་དམར་སེར་འགྱུ་བ་ལུས་ལ་ཆར་དུ་འབབ། །ཅེས་ཞིང་པ་ཐམས་ཅད་ལ་སྤྲོ་དགའི་སྣང་བ་གསར་དུ་བསྐྱེད་པའི་ཆར་སྤྲིན་སྔོན་པོ་ལྗོན་ཤིང་
ནྱ་གྲོ་དྷའི་འདབ་མ་གཡོ་བ་ལྟ་བུ་དེ་ཡང་། ཡི་དྭགས་རྣམས་ལ་ནི་སྟང་ཟིལ་བཅག་པ་ལྟ་བུར་ཁྲོས་པའི་སྤྲིན་གྱི་ཕང་པ་ནས་ལྕགས་མདའི་ཆར་པ་དུ་བ་འཐུལ་ཞིང་མེ་མདག་དང་བཅས་པ་དང་། མགར་གྱི་ཐོ་བའི་བར་ནས་ལྕགས་ཞུན་གྱི་ཚྭ་ཚྭ་ཡར་བ་རྡོ་རྗེའི་ཕ་བོང་ལྟ་བུར་འཕྲོ་ཞིང་། གློག་གི་ཕྲེང་བ་གཞོན་ནུ་མའི་ལག་པའི་གདུ་བུ་བཞིན་དུ་མཛེས་པ་དེ་ཡང་མཚོན་ཆའི་རང་བཞིན་དུ་བབས་ནས་ལུས་སྣང་བར་འཆར་རོ། །ཚ་གྲང་ཕྱིན་ཅི་ལོག་ཏུ་སྣང་བ་ནི། །ཚ་བས་ཉེན་ལ་བུ་ཡུག་ཀྱང་ནི་ཚར་འགྱུར་ལ། །ལྷགས་པས་ཉམ་ཐག་པ་ལ་མེ་ཡང་གྲང་བྱེད་དོ། །ཤིན་ཏུ་མི་བཟད་ལས་ཡོངས་སྨིན་པས་རྣམ་རྨོངས་པ། །འདི་ལ་སྣ་ཚོགས་འདི་ཀུན་ཕྱིན་ཅི་ལོག་ཏུ་སྣང་། །ཞེས་ཚ་བས་གདུངས་པའི་ཚེ་བུ་ཡུག་གྲང་བའི་རེག་པ་ཅན་དེ་ཡང་དེའི་གྲོགས་སུ་འགྱུར་ལ། ལྷགས་པས་ཉམ་ཐག་པའི་ཚེ་ནི་མེ་ཡང་དྲོད་དང་མི་ལྡན་པའི་གྲང་རེག་ཅན་དུ་འགྱུར་བའོ། །ཟས་སྐོམ་ལ་སྒྲིབ་པ་ཅན་གྱི་སྡུག་བསྔལ་ནི། །མི་བཟད་སྐོམ་པས་རྒྱང་ནས་ཆུ་ཀླུང་དྲི་མེད་པ། །མཐོང་ནས་བཏུང་བར་འདོད་དེ་སོང་ན་དེ་ཉིད་ཀྱང་། །སྐྲ་ཤད་ཉ་ལྕིབས་ཚོགས་དང་རྣག་སུངས་འདྲེས་པ་དང་། །འདམ་རྫབ་ཁྲག་དང་ཕྱི་སས་གང་བའི་ཆུར་འགྱུར་རོ། །ཞེས་སྐོམ་པ་འབའ་ཞིག་གིས་གདུངས་པ་དེས། རྒྱང་རིང་པོའི་ས་ན་ཆུ་ཀླུང་མཐོང་བ་ལ་བསྙེགས་པས། དེར་སླེབ་པ་དང་ཡང་ན་ནི་སྨིག་རྒྱུའམ་སྐྲ་ཤད། ཡང་ན་ནི་ཉ་ལྕིབས། ཡང་ན་རྣག་རུལ་བ་དང་། འདམ་རྫབ་དང་། ཁྲག་དང་། མི་གཙང་བས་འདྲེས་པའི་ཆུར་གནས་འགྱུར་བའོ། །ནང་གི་སྒྲིབ་པ་ཅན་ནི། ཁབ་མིག་ཙམ་གྱི་ཁ་ལ་དཔག་ཚད་མང་འཇིགས་པའི། །ལྟོ་ཅན་ཉམ་ཐག་རྒྱ་མཚོ་ཆེན་པོའི་ཆུ་འཐུངས་ཀྱང་། །མགུལ་ཕུགས་ཡངས་པ་ཉིད་དུ་ཕྱིན་པར་མ་གྱུར་བར་
ཁའི་དུགས་ཀྱིས་ཆུའི་ཐིགས་པོའང་བསྐམས་པར་འགྱུར། །ཞེས་པ་ནི། དེའི་ཁ་ནི་ཁབ་མིག་ཙམ་མོ། །དེའི་ལྟོ་བའི་ཁྱོན་གཞལ་བ་ནི་དཔག་ཚད་མང་པོ་ཡང་འཇིགས་སོ། །ཅིའི་ཕྱིར་ན་ཉི་མའི་སྙིང་པོའི་མདོ་ལས། ཡི་དྭགས་ཆེ་བའི་ལུས་དཔག་ཚད་སྟོང་དང་། ཆུང་ཤོས་མཐོ་གང་བར་གསུངས་པས་སོ། །དེ་ཟས་སྐོམ་གྱི་ཉམ་ཐག་པས་རྒྱ་མཚོ་ཆེན་པོའི་ཆུ་འཐུངས་ཀྱང་མགུལ་བ་རྟ་རྔ་བཞིན་དུ་ཕྲ་བ་ལ་ཆུད་པར་མ་གྱུར་བའི་བར་ལ། ཁའི་དྲོད་ཀྱིས་ཆུའི་ཐིགས་པ་དེ་ནི་དེ་ཉིད་དུ་བསྐམས་ནས་ནང་དུ་འགྲོ་བའི་གནས་མེད་དོ་ཞེས་སྟོན་པའོ། །དེ་ལྟར་བརྗོད་པ་ཤིན་ཏུ་གཙང་བའི་སློབ་དཔོན་འདི་ལ་ནི་འཛམ་བུའི་གླིང་མཛེས་པའི་རྒྱན་སློབ་དཔོན་ཆོས་ཀྱི་གྲགས་པཱ་ཀྱང་བསྔགས་པར་བྱེད་པ་ཡིན་པས་རྒྱ་འགྲེལ་གཉིས་ཀྱིས་ཟུར་ཙམ་ལས་མ་བསྟན་པའི་དོན་ཚིག་འགྲེལ་ཉིད་དུ་གསལ་བར་སྨོས་པའོ། །ཡང་མཁའ་ལ་རྒྱུ་བའི་ཡི་དྭགས་ནི་ལུས་སྲུལ་པོ་དང་། རོ་ལངས་དང་། སྨྱོ་བྱེད་དང་། བརྗེད་བྱེད་དང་། གནོད་སྦྱིན་དང་། ཤ་ཟ་དང་། གྲིབ་གནོན་དང་། སྐེམ་བྱེད་དང་། ནམ་གྲུ་དང་། བྱད་གདོན་དང་། སྲིན་པོ་དང་། བཙན་དང་། རྒྱལ་པོ་ལ་སོགས་འབྱུང་པོའི་རིགས་ཅན་མཐའ་དག་སྟེ། དྲན་པ་ཉེར་གཞག་ཆུང་ངུ་ལས། །གང་ཞིག་བྱིས་པ་རྣམས་ལ་འཚེ། །སྲེད་པས་འདྲིད་པར་བྱེད་པ་དེ། ཁོང་གི་དྲི་མ་ཟ་བྱེད་པའི། །ལུས་སྲུལ་པོར་ནི་སྐྱེ་བར་འགྱུར། །གང་ཞིག་གྲོང་བཅས་འབེབས་ཤིང་སྟེར། །སྦྱིན་ཞིང་གནོད་པར་བྱེད་པ་དེ། །གྲུལ་བུམ་བྱད་ནི་མི་སྡུག་པ། །མཆོད་པར་འོས་པར་སྐྱེ་བར་འགྱུར། །རྟག་ཏུ་དྲི་དང་ཕྲེང་ལ་དགའ། །སྦྱིན་བྱེད་ཁྲོ་བ་ཆུང་བ་ནི། །ལྷ་རྣམས་དགའ་བའི་རྒྱུར་འགྱུར་བ། །དྲི་ཟ་རྣམས་སུ་སྐྱེ་བར་འགྱུར། །གང་ཞིག་ཁ་ཅིག་ཕྲ་མ་ཆེ། །
ཁྲོ་ཞིང་དགོས་པའི་ཆེད་བྱིན་ན། །དེ་ནི་ཤ་ཟ་མ་རུངས་ཉིད། །བཞིན་མི་སྡུག་པར་སྐྱེ་བར་འགྱུར། །རྟག་ཏུ་རབ་སྡང་རྟབས་བག་ཅན། །རྟག་ཏུ་སྦྱིན་ལ་དགའ་བ་ནི། །དེ་ནི་ཤི་ནས་འབྱུང་པོར་སྐྱེ། །མ་རུངས་ཁྲོ་ཞིང་སྦྱིན་བྱེད་ལ། །ཆང་ཞིམ་དག་ལ་དགའ་བའི་མི། །ཤི་ནས་གནོད་སྦྱིན་མ་རུངས་པ། །ཆང་ལ་དགའ་བ་རྣམས་སུ་སྐྱེ། །གང་དག་ཕ་མ་བླ་མ་རྣམས། །ཇི་ལྟར་འདོད་པའི་བཞོན་པར་འདེགས། །དེ་དག་གཞལ་མེད་ཁང་རྒྱུ་བའི། །གནོད་སྦྱིན་བདེ་བ་ལྡན་པར་སྐྱེ། །སྲེད་དང་སེར་སྣའི་སྐྱོན་གྱིས་ནི། །ཤི་ནས་ཡི་དྭགས་སྐྱེ་བར་འགྱུར། །ཞེས་བཤད་པ་ལྟར་རོ། །འོན་ཀྱང་གྲུལ་བུམ་དང་། དྲི་ཟ་གཉིས་ནི་འདོད་ལྷ་དང་པོ་གཉིས་ཀྱི་སྡེ་ཚན་བྱེ་བྲག་པ་ཡིན་ཀྱང་། འདིར་གདོན་གྱི་སྡེ་ཚན་དུ་བསྡུས་པར་རིགས་པར་བྱའོ། །འདི་དག་ལས་ཀྱི་རྫུ་འཕྲུལ་དང་ལྡན་ཞིང་། ཁ་ཅིག་སྔོན་གྱི་དགེ་བ་ཕྲ་མོས་ལོངས་སྤྱོད་དང་ལྡན་ཡང་། མི་བརྟན་ཞིང་དུས་ཚིགས་ལོག་པ་དང་། ཡུལ་ཡིད་དུ་མི་འོང་བ་དང་། འཚེ་བ་དང་། ཉམ་ང་བ་དང་། བཀྲེས་སྐོམ་དང་། ཚེ་དང་མདངས་འཕྲོག་པ་ལ་བརྩོན་ཞིང་ཕ་རོལ་འབའ་ཞིག་ལ་གནོད་པ་བསྒྲུབ་པས་སླད་ཀྱི་སྡུག་བསྔལ་འདུ་བྱེད་པ་དང་། རྫུ་འཕྲུལ་གྱིས་སོང་ཡང་ལམ་འཕྲང་དུ་བསྲུང་བར་སྣང་བ་དང་། གང་དུ་སྙིང་ཉེ་ནས་ཕྱིན་པ་དེ་དག་ལ་རང་ཉིད་སྔོན་འཆི་ཀའི་གནད་འཆད་པའི་ཆོར་བ་འཕོ་བས་རིགས་སྔགས་དང་། ཐུན་གྱི་ཆད་པས་འཚེ་བ་རྦེབ་པ་དང་། རང་ཡང་གནད་འཆད་པའི་སྡུག་བསྔལ་གྱི་ཚོར་བ་དེས་རྟག་པར་གདུང་བས་དེ་ནད་པ་གཞན་ལ་སྤོ་བའི་བསམ་སྦྱོར་ངན་པ་དང་། རང་ཚན་གི་ལུས་སྒོ་ལྟ་བུ་དང་། ས་ག་ལྟ་བུ་དང་། མགལ་དུམ་ལྟ་བུ་ཉི་ཚེ་བའི་སྡུག་བསྔལ་དང་མཚུངས་པའམ། ཁྱི་དང་བྱ་
ལ་སོགས་རྣམ་པ་སྣ་ཚོགས་པར་ཡོད་ལ། གཞན་གྱི་བདེ་བ་དང་ལོངས་སྤྱོད་དེ་ལ་སྡུག་བསྔལ་དུ་འཆར་བ་དང་། སྔར་བཤད་པའི་ཕྱིན་ཅི་ལོག་བཞིའི་སྣང་བ་ཐུན་མོང་དུ་འཆར་བའང་ཡོད་པས་གཤིན་རྗེའི་འཇིག་རྟེན་དུ་སོང་ནས་སྡུག་བསྔལ་བ་ཞེས་བྱའོ། །ད་ནི་དུད་འགྲོའི་སྡུག་བསྔལ་བསྟན་པའི་ཕྱིར། བཤེས་སྤྲིང་ལས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིངས་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤང་བ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཞེས་པ་ལ་སྤྱིར་བསྟན་པ་དང་། ཁྱད་པར་གྱི་སྡུག་བསྔལ་གཉིས་སུ་དབྱེ་བ་ལས། དང་པོ་ནི་དྲན་པ་ཉེར་བཞག་ལས་དབྱེ་བ་སུམ་ཅུ་རྩ་བཞིར་བསྟན་ཀྱང་ཁ་འཐོར་དང་། བྱིང་གནས་གཉིས་སུ་བསྡུ་བའི་ཁ་འཐོར་བ་ལའང་མི་དང་མི་ཡིན་པས་བྱས་པའི་དབང་དུ་བྱས་ན། སྤྱིར་གསོད་པ་ཉིད་དུ་གཅིག་ཀྱང་གསོད་ལུགས་ཀྱི་སྡུག་བསྔལ་ཆེ་ཆུང་ཀྱང་བསམ་གྱིས་མི་ཁྱབ་པ་རྔོན་པས་རི་དྭགས་མཐའ་ལ་གཅུར་བ་དང་། ཀླ་ཀློའི་སྡེ་རིགས་ཀྱིས་གསོན་པོར་པགས་པ་བཤུ་བ་དང་། མེས་བསྲེག་པ་དང་། དངུལ་ཆུ་ལ་སོགས་པ་རྫས་དང་དཔྱད་པའི་ཆེད་དུ་ལྕགས་ཀྱི་ཡོལ་གོ་ལ་སོགས་པའི་ནང་དུ་འཚེད་པ་དེ་དག་ནི་བདག་ཉིད་ལ་ཚེར་མ་ཟུག་པའང་མི་བཟོད་བཞིན་དུ་ཁྲོ་ཆགས་རྨོངས་གསུམ་གྱི་དབང་གི་སྲོག་ལྡན་གྱི་ལུས་ཀྱང་བེམ་པོ་ལྟ་བུར་བལྟས་ན་དམྱལ་བ་པ་བཞིན་དུ་མནར་ཞིང་སྤྱོད་པ་དང་། ཐག་པ་ལ་སོགས་པས་འཆིང་ཞིང་གོ་རར་འཛུད་པ་དང་། ལྕགས་དང་དབྱུག་པ་ལ་སོགས་པས་ཁྲིམས་བཞིན་དུ་བརྡེག་པ་དང་། དེ་བཞིན་དུ་སྣ་དབུག་པ་དང་། བྱ་གཅོད་པ་དང་། ཁལ་འགེལ་བ་དང་། བཞོན་པར་སྤྱོད་པ་དང་། རྨེ་
ཞིང་བཀོལ་བ་དང་། གསོན་ཁྲག་འབྱིན་པ་དང་། བལ་འཐོག་པ་དང་། འདོད་པ་བསྲུང་བ་ལ་སོགས་པའི་སྡུག་བསྔལ་བཟོད་པར་དཀའ་བའོ། །རང་གི་རིགས་ལས་བྱུང་བའི་སྡུག་བསྔལ་གྱི་དབང་དུ་བྱས་ན། ལས་བརྒྱ་པར་ཆུ་སྲིན་དཔག་ཚད་ཉིས་སྟོང་བདུན་བརྒྱ་བའི་ལུས་སུ་བཤད་པ་ལ་ཆུང་བ་རྣམས་ཀྱིས་འབིགས་ཤིང་དེས་མཐའ་དག་ཟ་བས་མཚོན་ངེས་པར་འབྱེད་པའི་ཆ་དང་མཐུན་པའི་དགེ་བ་སྤངས་པ་རྣམས་ནི་གཅིག་ལ་གཅིག་ཟ་ཞིང། ཚ་གྲང་བཀྲེས་སྐོམ་འཚེ་བ་འབའ་ཞིག་གིས་འཇིགས་ཤིང་ཉམ་ཐག་པས་གླིང་བར་མུན་ནག་གི་རྒྱ་མཚོར་གནས་པ་དང་། ཆུ་གཏེར་བཞིའི་ཁྱོན་ལ་གནས་པའི་བྱིངས་གནས་ཀྱི་དུད་འགྲོ་རྣམས་ཀྱི་སྡུག་བསྔལ་ཀྱང་བཟོད་པར་དཀའ་བ་ཉིད་དོ། །གཉིས་པ་ནི་སྔ་མ་ལས། ཁ་ཅིག་མུ་ཏིག་བལ་དང་རུས་པ་དང་། །ཤ་དང་པགས་པའི་ཆེད་དུ་གསོད་པར་འགྱུར། །དབང་མེད་གཞན་དག་རྡོག་པ་ལག་པ་དང་། །ལྕག་དང་ལྕགས་ཀྱུ་བཏབ་པས་བཏབ་སྟེ་བཀོལ། །ཞེས་མུ་ཏིག་གི་ཕྱིར་འཆི་བ་ཉ་ལྕིབས་དང་། རུས་པའི་ཕྱིར་འཆི་བ་གླང་པོ་ཆེ་དང་། ཤའི་ཕྱིར་འཆི་བ་རི་དྭགས་དང་ར་ལུག་ལ་སོགས་པ་དང་། པགས་པའི་ཕྱིར་འཆི་བ་གཅན་གཟན་རྣམས་དང་། དབང་མེད་དུ་རྡོག་པས་བཀོལ་བརྟ་ལ་སོགས་པ་དང་ལག་པས་བཏབ་སྟེ་བཀོལ་བ་མ་ཧེ་ལ་སོགས་པ་དང་། ལྕག་གིས་བཀོལ་བ་བོང་བུ་ལ་སོགས་དང་། ལྕགས་ཀྱུས་བཀོལ་བ་གླང་པོ་ཆེ་ལ་སོགས་གཞན་དབང་འབའ་ཞིག་གི་ཕྱིར་ལུས་ཆུད་གསོན་པས་བཙོན་པ་ཁྲི་མུན་དུ་བཅུག་པ་ལྟ་བུའོ། །དེ་བཞིན་དུ་ཀླུ་རྣམས་ཀྱང་ཉིན་མཚན་དང་སྔ་དྲོ་ཕྱི་དྲོ་འགྱུར་བའི་སྡུག་བསྔལ་ནི་སྔ་དྲོ་ལྟ་བུ་བདེ་བའི་རང་བཞིན་ལ་གནས་ཀྱང་། ཕྱི་དྲོ་ཚ་གྲང་བཀྲེས་སྐོམ་རྣམ་ཤེས་རྨོངས་པ་ལ་སོགས་སྡུག་བསྔལ་
གྱི་ཆ་མང་པོས་གཙེར་བ་དང་། གདེངས་ཀ་མང་བ་དེ་ཙམ་དུ་སྡུག་བསྔལ་དེ་སྙེད་བསྐྱེད་པ་དང་། ཁ་ཅིག་གི་གནས་སུ་བྱེ་ཚན་གྱི་ཆར་འབབ་པ་དང་། ཐམས་ཅད་ཀྱིས་སྤངས་ཏེ་ཁྱུར་མི་ཚུད་པའི་སྡུག་བསྔལ་དང་། ནམ་མཁའ་ལྡིང་གི་འཇིགས་པ་དང་། དེའང་ནམ་མཁའ་ལྡིང་རྫུས་སྐྱེས་ཀྱིས་ནི་ཀླུ་རིགས་བཞི་ཀ་ཟ་ལ། སྒོང་སྐྱེས་ཀྱིས་སྐྱེ་གནས་མཐུན་པ་དང་། མངལ་སྐྱེས་ཀྱིས་དེ་གཉིས་ཅར་ཟ་ལ། དྲོད་གཤེར་སྐྱེས་ཀྱིས་རྫུས་སྐྱེས་ལས་གཞན་པ་གསུམ་ཀ་ཟའོ། །རིགས་སྔགས་ཀྱི་འཇིགས་པ་དང་། སྤྱི་མཐུན་དུ་རྨོངས་པ་དང་། ཚེ་དང་ལུས་ཚད་ཀྱང་མ་ངེས་ཏེ། འཇོག་པོ་ལ་སོགས་བསྐལ་པར་གནས་ཤིང་སྨད་རྒྱ་མཚོ་ལས་མ་འཕགས་པར་ལུས་སྟོང་སུམ་ཅུ་རྩ་གསུམ་དུ་རྨྱང་ནས་སངས་རྒྱས་ལས་ཆོས་ཉན་ནུས་པ་དང་། ཉིན་ཞག་གཅིག་པ་དང་། ཡུད་ཙམ་ལ་སོགས་པའོ། །དེ་དག་གི་རྒྱུ་འབྲས་ནི་དྲན་པ་ཉེར་བཞག་གི་ཚིག་ལེའུར་བྱས་པ་ལས། འདོད་ཆགས་ཀྱིས་ནི་རྨོངས་པ་དང་། །ངང་པ་ཕུག་རོན་ལ་སོགས་དང་། །བོང་བུ་འདོད་ཆགས་ཅན་རྣམས་ཀྱི། །སྐྱེ་གནས་སྲིན་སོགས་སྐྱེ་གནས་ཏེ། ཁོང་ཁྲོ་འཛིན་པས་སྦྲུལ་དུ་སྐྱེ། །ང་རྒྱལ་ཁེངས་སེམས་སེང་གེར་འགྱུར། །ཆེ་བ་ཡི་ནི་ང་རྒྱལ་གྱིས། ཁྱི་དང་བོང་བུའི་སྐྱེ་གནས་ཏེ། །སེར་སྣ་ཕྲག་དོག་ལ་སོགས་པའི། །སྐྱོན་གྱིས་ལུས་ཅན་ཤི་ནས་སྦྲེའུ། །མུ་ཅོར་སྨྲ་བ་སྤྱི་བརྟོལ་ཆེ། །རང་བཞིན་མི་བརྟན་ཁྲར་སྐྱེའོ། །གསོད་དང་འཚང་དང་སེར་སྣ་ཡིས། །ལུས་ཅན་བ་ལང་ཁྱི་ལ་སོགས། །འགྱུར་རོ་མི་སྲུན་ལས་ཀྱིས་ནི། །སྡོམ་དང་སྡིག་པ་མི་སྡུག་སྐྱེ། ཁྲོ་དང་སེར་སྣ་ཅན་གྱི་མི། །ཤི་ནས་ཤ་ནི་ཟ་བྱེད་པ། །སྟག་དང་སྤྲེའུ་ཝ་དང་དོམ། །བྱ་རྒོད་སྤྱང་ཀི་ལ་སོགས་སྐྱེ། །མི་སྲུན་ཁྲོ་གཉེར་
སྦྱིན་བྱེད་མི། །རྫུ་འཕྲུལ་ཆེན་པོའི་ཀླུར་སྐྱེའོ། །གཏོང་ཞིང་ཁྲོ་དང་དྲེགས་པ་ཡིས། །ནམ་མཁའ་ལྡིང་གི་དབང་ཕྱུག་ཆེ། །རང་གི་ལུས་དང་ངག་ཡིད་ཀྱི། །སྡིག་པའི་ལས་ནི་གང་བྱས་པ། །དེ་ནི་དུད་འགྲོར་སྐྱེ་བས་ན། །དེ་ནི་ཆུང་ཡང་མ་བྱེད་ཅིག །ཅེས་སོ། །དེ་ལྟར་ངན་སོང་གསུམ་གྱི་སྡུག་བསྔལ་ནི་བཟོད་པར་དཀའ་བ་ཉིད་དེ། བདེ་འགྲོ་མཐོ་རིས་ཀྱི་འཇིག་རྟེན་དུ་སོང་ན་བདེ་བ་འབའ་ཞིག་གོ་སྙམ་པའི་སྲེད་པ་ལ་འཇུག་པའང་རིགས་པ་མ་ཡིན་ཏེ། སྲེད་པ་ནི་སྡུག་བསྔལ་ཐམས་ཅད་ཀྱི་ཉེ་བར་ལེན་པ་པོ་སྟེ། དེ་ལས་སྲེད་པ་དང་སྐྱེ་བར་འབྲེལ་བས། སྐྱེ་བའི་རང་བཞིན་ནི་གནས་རིགས་མཐོ་ཡང་། ཡུལ་ཕྲན་ལ་ཤྭ་འོད་བརྡོལ་བ་ལྟ་བུ། སྡུག་བསྔལ་གྱི་རྦ་རླབས་དང་། རྣམ་པར་གྲོལ་བའི་ལམ་དང་འགལ་བའི་ཅ་ཅོ་མི་བཟད་པར་སྒྲོག་པས་ན་ད་རེས་ཀྱི་དལ་འབྱོར་ཐམས་ཅད་ཚང་བའི་ལུས་རྟེན་ལྷ་བས་ལྷག་པ་འདི་ཡང་། འབབ་ཆུ་གནོད་པ་ཅན་གྱིས་ཆུ་ལོན་བཤིག་པ་བཞིན་དུ་གློ་བུར་དུ་མེད་པར་གྱུར་ནས་ཡང་སྲིད་པར་ཉིང་མཚམས་སྦྱོར་བའི་སྡུག་བསྔལ་ལ་སྤྱོད་པའི་ཕྱིར་སྐྱེ་བ་བཟློག་པའི་ཐབས་འབའ་ཞིག་བསམ་པའི་ཚུལ། དེ་ཕྱིར་སྐྱེ་བའི་ཤྭ་འོད་སྡུག་བསྔལ་གྱི། །རྦ་རླབས་ཅ་ཅོ་སྒྲོག་འདི་མ་བཟློག་ན། །ལྷ་བས་ལྷག་པའི་ལུས་རྟེན་ཆུ་ལོན་ཡང་། །བརྟན་པ་བྲལ་བའི་མྱ་ངམ་ཐང་དུ་འཁྱམས། །ཞེས་སྨོས་ནས་སོ་སོའི་སྡུག་བསྔལ་གྱི་རང་བཞིན་གོང་མའི་ཁམས་ནས་རིམ་བཞིན་བཤད་པ་ནི། གཟུགས་མེད་ཏིང་འཛིན་ལུང་མ་བསྟན་པའི་ལས། །ཟད་ནས་སྲིད་ཕྱི་མར་འདུ་བྱེད་དང་། །གཟུགས་ཁམས་བསམ་གཏན་སྔ་མའི་ལས་ཟད་དེ། །འོག་མར་ལྟུང་བ་འགྱུར་བའི་སྡུག་བསྔལ་མྱོང་། །ཞེས་ཁམས་གོང་མ་གཉིས་ན་སྡུག་བསྔལ་གྱི་སྡུག་བསྔལ་
ལ་སོགས་པ་རགས་པ་རྣམས་མེད་ཀྱང་། གཟུགས་མེད་པའི་གནས་སྐབས་ཀྱི་བདེ་བ་ཞི་གནས་ཀྱི་ཏིང་ངེ་འཛིན་དེ་ལས་ཟད་པ་དང་སད་པའི་གནས་སྐབས་ཐོབ་ནས་འཆི་འཕོ་བ་ན་ཡང་སྲིད་པ་ཕྱི་མའི་སྡུག་བསྔལ་འདུ་བྱེད་པས་སྐྱོ་བ་དང་། ཚངས་རིས་ལ་སོགས་གཟུགས་ཁམས་འབྲས་བུ་ཆེ་བའི་བར་གྱི་ལྷ་རྣམས་ཀྱང་འཆི་བའི་ཚེ་བསམ་གཏན་ལས་ཐོབ་པའི་བདེ་བ་དེ་འགྱུར་ནས་སྲིད་པ་ཕྱི་མ་ལ་འཇུག་པའི་སྡུག་བསྔལ་ལ་སྤྱོད་པའི་ཕྱིར་ཀླུའི་དབང་པོས། ཚངས་རིས་ལ་སོགས་བསམ་གཏན་ལྷུན་གྲུབ་ཀུན། །འོད་དང་ཁ་དོག་གཟི་བརྗིད་མཐའ་ཡས་ཀྱང་། །བདག་རྟོག་བག་ལ་ཉལ་བ་མ་གཟིགས་ནས། །ཤི་ནས་དམྱལ་བར་སྐྱེ་བ་ཆ་མེད་དམ། །ཞེས་བསོད་ནམས་དང་གཟི་བརྗིད་ཀྱི་ཆ་ནས་མཉམ་པ་མེད་པ་ཉིད་དེ། རྣམ་པར་རྟོག་པ་བག་ལ་ཉལ་སྐྱེ་བ་མེད་པའི་དབྱིངས་སུ་བྱང་མ་ཆུབ་པས་ད་དུང་ལས་ཀྱི་ཕྱི་བཞིན་འབྲང་ངོ་། །ཡང་། ཚངས་དང་ལྷ་དབང་འཁོར་ལོས་སྒྱུར་བ་ཡང་། །སྤྲིན་པར་ཉི་བཞིན་དཀར་པོའི་རྣམ་སྨིན་གྱིས། །སྐབས་བཙལ་སྤངས་པའི་མོད་ལ་མར་མེའི་ལྕེས། །འཐུངས་པའི་ཞུན་མར་བཞིན་དུ་ཉམས་པར་འགྱུར། །ཞེས་གཟུགས་ཁམས་པ་ཚངས་པ་ཉིད་ཀྱིས་འདོད་པའི་འདོད་ཆགས་རྣམ་པར་གནོན་པའི་ཆགས་བྲལ་གྱི་བདེ་བ་ཐོབ་ཀྱང་། དུས་གཞན་ན་མི་དགེ་བའི་ལས་བསགས་པའི་ཕྱིར་ལན་གྲངས་གཞན་ལ་མྱོང་འགྱུར་གྱི་ལས་ཀྱི་འཕེན་པས་དམྱལ་བ་མནར་མེད་པའི་བུད་ཤིང་དུ་འགྱུར་བའང་ཡོད་པའི་ཕྱིར་བཤེས་སྤྲིང་ལས། ཆངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་འགྱུར་བ་ཡིས། །སྡུག་བསྔལ་རྒྱུན་མི་འཆད་པར་བསྟེན་འཚལ་ལོ། །ཞེས་གསུངས་ལ།
དེ་བཞིན་དུ་འདོད་པའི་ཁམས་ན་ས་གཞི་ལ་བརྟེན་ནོ་ཅོག་ལ་ཆེ་ཞིང་དཔལ་འབྱོར་དང་ལོངས་སྤྱོད་ཕུན་སུམ་ཚོགས་པ་ཀཽ་ཤིག་དང་། འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་གྱིས་མདུན་བདར་ཞིང་། མགར་གྱིས་མ་བྱས་པའི་འཁོར་ལོ་རིན་པོ་ཆེའི་ཕྱི་ནས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་གླིང་བཞིའི་འཇིག་རྟེན་དུ་འགྲོ་བ་དེ་དག་རེ་ཞིག་ཅིག་དཀར་པོའི་རྣམ་སྨིན་གྱི་འབྲས་བུས་སྐབས་བཙལ་བའི་བདེ་སྐྱིད་ལ་སྤྱོད་ཀྱང་། ཇི་ལྟར་སྤྱད་པ་ཙམ་གྱིས་སྔ་མའི་དགེ་འབྲས་མཐའ་དག་ནི་མར་མེའི་ལྕེ་ལྡེས་འཐུངས་པའི་ཞུན་མར་བཞིན་དུ་ཟད་ནས་སྐྱེ་གནས་ཤིན་ཏུ་ཉམ་ཐག་པར་ལྟུང་བའི་ཚུལ་བཤེས་སྤྲིང་ལས། བརྒྱ་བྱིན་མཆོད་འོས་ཉིད་དུ་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང་། །འཁོར་ལོས་སྒྱུར་རྒྱལ་ཉིད་དུ་གྱུར་ནས་ཀྱང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་སོ། །དེ་བཞིན་དུ་ལྷའི་དབང་པོ་ཉིད་ཀྱིས་ས་དང་དབང་ཕྱུག་ལ་ཆགས་པའི་ཉེས་དམིགས་སྟོན་ཕྱིར། མནན་ན་ནེམས་པའི་རེག་པ་འཇམ་པོ་དང་། །ལྷ་ཀླུ་མིའམ་ཅི་ཡི་ལ་ཐོད་ཀྱིས། །རྐང་པའི་ཆུ་སྐྱེས་དམར་བྱས་དབང་པོ་ཡང་། །ལྕགས་ཀྱི་གསལ་ཤིང་འབར་བའི་རྩེ་མོར་གདུང་། །གྲོང་ཁྱེར་བལྟ་ན་སྡུག་གི་ས་གཞི་ལ་རྐང་པ་བཞག་ན་ནེམས་བྱེད་པས་སོར་བཞིའི་དམའ་བར་འགྱུར་ལ། བཏེགས་ན་སྦར་བྱེད་པས་སོར་བཞིས་མཐོ་བར་བྱེད་པའི་ས་གཞི་དང་། དབང་ཕྱུག་ནི་རྒྱལ་ཆེན་རིས་བཞི་པ་དང་། སུམ་ཅུ་རྩ་གསུམ་པའི་ལྷ་དང་། ཀླུ་དང་། མིའམ་ཅིའི་མགོ་བོའི་ཅོད་པན་གྱི་ནོར་བུ་མ་རྒད་ལ་སོགས་པའི་བོད་ཀྱིས་བརྒྱ་བྱིན་གྱི་རྐང་པ་ལ་གཏུགས་པ་དེའི་འོད་ཀྱིས་རྐང་པའི་ཆུ་སྐྱེས་ཀྱང་དམར་པོར་གྱུར་བའི་ཁེངས་དྲེགས་ཅན་དེ་སླར་དམྱལ་བའི་འཇིག་རྟེན་དུ་ལྕགས་ཀྱི་
གསལ་ཤིང་ཆེར་མ་ཅན་ལ་རྒྱུ་བའི་གནས་འཐོབ་པ་ཡོད་དེ། སློབ་སྤྲིང་ལས། རྐང་བཞག་ནེམས་དང་འཕར་བྱེད་རེག་ན་བདེ་བ་ཡི། །རི་རབ་སྤོ་ཡི་དཀྱིལ་དུ་ཡུན་རིང་གནས་ནས་ཀྱང་། །ཕྱིར་ཡང་བྱེ་མ་བསྲེགས་པའི་མེ་མ་མུར་གྱི་ཚོགས། །བརླ་དང་རྐང་ལག་ཀུན་ཏུ་ཞིག་པར་འཁྱམས་པར་འགྱུར། །ཞེས་དང་། གང་དུ་ལྷ་ཀླུ་མིའམ་ཅི་ཡི་མགོ་རྒྱན་གྱིས། །འོད་ཀྱི་ཚོགས་ཀྱི་རྐང་རྟེན་དམར་བའི་བརྒྱ་བྱིན་ཡང་། །ལས་ཀྱི་རླུང་འཁྲུགས་འགྲོ་བ་ངན་པར་འགྲོ་འགྱུར་བ། །དེ་ལ་སྐྱེས་བུ་སུ་ཞིག་འཇིགས་པ་བསྟེན་མི་བྱེད། །ཅེས་སོ། །ཡང་འདོད་པའི་ཉེས་དམིགས་དང་ལྗོན་ཤིང་དང་། གཞལ་ཡས་ཁང་ལ་ཆགས་པའི་ཉེས་པ་སྟོན་པ་ནི། །མཐོ་རིས་བུ་མོའི་ནུ་མ་གསར་པ་ལ། །རེག་པའི་འཁྲི་ཤིང་བསྟེན་དེ་དགའ་ཚལ་དང་། །གཞལ་མེད་ཁང་མཛེས་མུ་ཏིག་དྲྭ་ཕྱེད་ཅན། །སྤངས་ནས་མེ་མུར་འོབས་ནང་སྤྱིའུ་ཚུགས་ལྟུང་། །འདི་ལྟར་མཚེའུ་དལ་གྱིས་འབབ་པར་ལྷའི་བུ་མོ་འདོད་པའི་སྒྱུ་རྩལ་དྲུག་ཅུ་རྩ་བཞི་ལ་བྱང་ཆུབ་པ་རྣམས་ཀྱི་ནུ་མ་ལ་རེག་པའི་བདེ་བ་ཉམས་སུ་མྱོང་ཞིང་། དགའ་བའི་ཚལ་དུ་དཔག་བསམ་གྱི་ཤིང་བཟའ་བཏུང་དང་། གོས་དང་། རྒྱན་དང་། རོལ་མོའི་བྱེ་བྲག་འབྱུང་བ་རྣམ་པ་བཞི་དང་། གཞལ་མེད་ཁང་བཟང་མུ་ཏིག་གི་དྲྭ་བ་དང་། དྲྭ་བ་ཕྱེད་པ་ཅན་སྟེང་གཡོགས་ནས་དྲིལ་བུའི་སྒྲ་སྙན་པར་སྒྲོགས་པ་རྣམས་ལ་འཕྲལ་ཐབས་གློངས་པ་སྟེ་ཕུན་སུམ་ཚོགས་པའི་དྲེགས་པ་དེ་ཡང་དབང་མེད་དུ་སྤངས་ནས་མེ་མུར་གྱི་འོབས་དང་། རལ་གྲི་ལྟ་བུའི་ནགས་ཚལ་དང་། ཆུ་བོ་རབས་མེད་དང་། སྐྱབས་མེད་པའི་མུན་ནག་འཐིབས་པོར་ལྷུང་བའི་ཚུལ། སྔ་མ་ལས། ལྷ་ཡི་བུ་མོ་དལ་གྱིས་འབབ་པའི་ཆུ་རྒྱུན་གྱིས། །འཕྲལ་
ཐབས་གློངས་པ་རྣམས་དང་ལྷན་ཅིག་རྩེ་མྱོང་ནས། །ཕྱིར་ཡང་ཆུ་བོ་རབས་མེད་དཔའ་དྲག་འབོགས་པ་ཡིས། །རྨས་པའི་སྡུག་བསྔལ་མི་བཟད་བསྟེན་པར་བྱ་དགོས་སོ། །ལྷ་ཚལ་དཔག་བསམ་ཤིང་ལོའི་གདིང་བ་ཀུན་བཀྲམ་པའི། །ལྷ་ཡི་བུ་མོ་དང་བསྟེན་བདེ་བར་གནས་ནས་ཀྱང་། །ཕྱིར་ཡང་མཚོན་རྣོན་མང་པོ་འབབ་པས་ལུས་རྦད་པ། །ལོ་མ་རལ་གྲི་ལྟ་བུའི་ནགས་ཚལ་བགྲོད་དགོས་སོ། །རྐང་བཞག་ནེམས་དང་འཕར་བྱེད་རེག་ན་བདེ་བ་ཡི། །རི་རབ་སྤོ་ཡི་དཀྱིལ་དུ་ཡུང་རིང་གནས་ནས་ཀྱང་། །ཕྱིར་ཡང་བྱེ་མ་བསྲེག་པའི་མེ་མ་མུར་གྱི་ཚོགས། །བརླ་དང་རྐང་ལག་ཀུན་ཏུ་ཞིག་པར་འཁྱམས་པར་འགྱུར། །དྲིལ་བུ་མཛེས་འཁྲོལ་མུ་ཏིག་ཕྲེང་ཚོགས་ལྷག་གེ་བ། །གཞལ་མེད་ཁང་དུ་ཞུགས་ནས་ལྷ་ཡུལ་བགྲོད་ནས་ཀྱང་། །མི་བཟད་སྐྱབས་མེད་མུན་ནག་ཐིབས་པོ་དཔག་མེད་པ། །ཕ་མཐའ་མེད་པའི་ནང་དུ་སྤྱི་ཚུགས་ལྷུང་བར་འགྱུར། །ཞེས་སོ། །ད་ནི་སྤྱི་མཚན་དུ་སྲོག་ལ་ཆགས་པའི་ཉེས་པ་གཞན་འཕྲུལ་དབང་བྱེད་ཀྱི་བར་ཡོད་པའི་འཆི་འཕོ་ལྟུང་བྱེད་ཀྱི་སྡུག་བསྔལ་བཤད་པ། གོས་སྟན་མེ་ཏོག་རྙིངས་པའི་ལྷ་མོ་དང་། །རྡུལ་གྱིས་གདོང་བ་བཀྲུ་བའི་ཟོལ་ཞིག་ནས། །ཉེ་དུ་རྣམས་ལ་བལྟ་ཞིང་དུ་བ་ཡི། །འཆི་འཕོའི་སྡུག་བསྔལ་ལྟ་བུ་མི་ལ་མེད། །འདི་ལྟར་ལྷ་རྣམས་ལ་གནད་འཆད་པའི་ཚོར་བ་མེད་པས་ལུས་ཀྱི་སྡུག་བསྔལ་མེད་མོད་ཀྱིས། འཆི་འཕོ་བའི་སྔ་ལྟས་ལྔ་མཐོང་ནས་སེམས་ཤིན་ཏུ་སྡུག་བསྔལ་བ་སྟེ། ཇི་སྐད་དུ། དེ་ནས་ལྷའི་བ་ཞིག་སྙིང་རྗེ་རྗེ་སྐད་ངུ་ངུ་ཞིང་། ཀྱི་ཧུད་དལ་གྱི་འབབ། ཀྱི་ཧུད་རྫིང་བུ་ཞེས་སྨྲེ་སྔགས་འདོན་ཏོ། །ཞེས་པ་ལྟར་རོ། །དེ་ལ་རྟགས་ལྔ་ནི། སྔོན་གྱི་གཟི་བརྗིད་ཕུན་སུམ་ཚོགས་པ་ལས་ཉམས་ཏེ་ལུས་ཀྱི་མདོག་ངན་པ་དང་། རང་གི་སྟན་ལ་མི་དགའ་བ་དང་། མེ་ཏོག་གི་ཕྲེང་བ་རྙིངས་པ་དང་། གོས་ལ་དྲི་མ་ཆགས་པ་དང་། ལུས་ལ་རྡུལ་འབྱུང་བའོ། །དེའི་ཚེ་ལྷ་ཟླ་བོས་ནི་སྤོང་། ཆུང་མས་ནི་གཞན་དང་ཉལ། འདུ་ཤེས་ནི་འཁྲུག །ཕྱི་མའི་སྐྱེ་གནས་ནི་ལྷའི་མིག་གིས་མཐོང་བས་
བསྡངས་ཤིང་བརྒྱལ། མཛའ་བཤེས་རྣམས་ཀྱིས་རྒྱང་རིང་པོ་ནས་བོས་ཏེ་མི་དང་ལྷར་སྐྱེ་བ་སྨོན་ལམ་འདེབས་ཀྱང་འཆི་ལྟས་ཡོད་པ་ལ་ཉེ་ནི་མི་ནུས། དེའི་ཕྱིར་མཐོ་རིས་ཀྱི་བདེ་བའང་སྤྱད་ནས་ཟད་པར་འགྱུར་བའི་སྡུག་བསྔལ་དཔག་ཏུ་མེད་ཕྱིར་བདེ་བ་བས་ཀྱང་སྡུག་བསྔལ་ཆེ་བས་སྲེད་པ་མི་བགྱི་བའི་ཚུལ། བཤེས་སྤྲིང་ལས། དེ་ལྟར་བསམས་ནས་ཡ་རབས་རྣམས་ཀྱིས་ནི། །ཟད་འགྱུར་མཐོ་རིས་སླད་དུ་སྲེད་མི་བགྱི། །ལུས་ཀྱི་ཁ་དོག་མི་སྡུག་གྱུར་པ་དང་། །སྟན་ལ་མི་དགའ་མེ་ཏོག་ཕྲེང་རྙིངས་དང་། །གོས་ལ་དྲི་མ་ཆགས་དང་ལུས་ལ་ནི། །སྔོན་ཆད་མེད་པའི་རྡུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྤྲོན་བགྱིད་སྔ་ལྟས་ལྔ། །ཞེས་སོ། །ཡང་། གཉའ་ཤིང་འཛིན་རིའི་ས་བླ་བཀེགས་པ་ཡི། །གདུགས་གྱུར་སྣང་བྱེད་ཆེན་པོ་ཉི་ཟླ་གཉིས། །སླན་ཆད་མུན་པའི་སྨག་གི་བཙོན་ར་རུ། །ལོང་བ་ཆེན་པོའི་གནས་སྐབས་འཐོབ་པར་འགྱུར། །ཞེས་རི་གཉའ་ཤིང་འཛིན་གྱི་ས་བླར་གདུགས་ལྟ་བུས་གྱུར་ནས་གླིང་བཞིའི་འཇིག་རྟེན་ཐམས་ཅད་ཀྱི་མུན་པ་བསལ་བར་ནུས་པའི་སྣང་བྱེད་ཆེན་པོ་ཉི་མ་དང་ཟླ་བ་གཉིས་པོའི་རྟེན་གཞལ་མེད་ཁང་པའི་འོད་ཀྱིས། ཅི་ཞིག་ན་བརྟེན་པ་ལྷའི་བུ་གཉིས་པོ་སྤངས་པའི་ཚེ། འཇིག་རྟེན་སོ་སོའི་བར་དག་ན་ཡོད་པའི་མུན་པའི་སྨག་རུམ་དམ་པོར་བཙོན་བཞིན་དུ་བཅིང་ནས་རང་གི་ལག་པ་བརྐྱང་བསྐུམ་ཡང་མི་མཐོང་བའི་ལོང་བ་ཆེན་པོའི་གནས་ཐོབ་པ་སྟེ། དེ་སྐད་དུ་བཤེས་སྤྲིང་ལས། ཉི་མ་ཟླ་བ་ཉིད་ཐོབ་རང་ལུས་ཀྱི། །འོད་ཀྱིས་འཇིག་རྟེན་མཐའ་དག་སྣང་བྱས་ཏེ། །སླར་ཡང་མུན་ནག་སྨག་ཏུ་ཕྱིན་གྱུར་ནས། །རང་གི་ལག་པ་བརྐྱང་པའང་མཐོང་མི་འགྱུར། །ཞེས་སོ། །འདིར་རང་ལུས་ཞེས་བཤད་པ་ནི། འཇིག་རྟེན་པ་རྣམས་ཀྱིས་རྟེན་དང་བརྟེན་པ་གཅིག་པར་འབོད་
པའི་སླད་དུ་དགོངས་པའོ། །དེ་ལྟར་ཟག་བཅས་ཀྱི་བདེ་བ་མཐའ་དག་སྡུག་བསྔལ་ཁོ་ནའི་རང་བཞིན་ཅན་ཡིན་ཀྱང་དེ་ལ་ང་རྒྱལ་གྱིས་མངོན་པར་རློམ་པའི་ཉེས་དམིགས་ལས་འཁོར་བའི་སྡུག་བསྔལ་འབའ་ཞིག་ལ་སྤྱོད་པའི་ཚུལ། སློབ་སྤྲིང་ལས། སྡུག་བསྔལ་མེ་ཚོགས་འཕུང་པས་འཇགས་པའི་འཇིག་རྟེན་འདིར། །སྐྱེ་བོ་བདེ་སྙམ་མངོན་པའི་ང་རྒྱལ་བྱེད་པ་གང་། །དེ་ནི་གཤིན་རྗེའི་ཁ་ཡང་འབྱེད་པར་བྱེད་པ་སྟེ། །དེ་ནི་སྐྱེ་བ་ཕྱི་མའི་ལྗོན་ཤིང་ས་བོན་ཡིན། །ཅེས་དང་། སྡུག་བསྔལ་བདེ་བར་རློམ་པའི་དཔེ་དགོད་པ་ཡང་། དམྱལ་རྣམས་ཟངས་ཆེན་ལྷག་ལྷག་བསྐོལ་བ་ཚ་བའི་ཤུགས་དྲག་ནས། །སྐད་ཅིག་ཙམ་ཞིག་མགོ་བསྟོད་དབུགས་འབྱིན་འགྱུར་བ་རྣམས། །ལྕགས་ཀྱི་ཐོ་བ་རབ་ཏུ་མང་པོ་ཁྲོས་ཏེ་གཟས་པ་ཡིས། །བརྒྱབ་ན་དེ་ཉིད་མཆོག་ཏུ་བདེ་བ་ཡིན་པར་སེམས་པ་ལྟར། །ཞེས་དམྱལ་བའི་ཟངས་ཆེན་དུ་བཙོས་པའི་སྡུག་བསྔལ་ཧ་ཅང་དྲག་ཐལ་ནས་མགོ་གྱེན་དུ་འཐོན་ནས་དབུགས་འབྱིན་པའི་རེས་གཅིག་ལ། ད་ནི་ཤི་ན་ཅི་མ་རུང་སྙམ་པས་མགོ་ལ་ཐོ་བ་བསྣུན་པའང་བདེ་བར་བསྐོམ་པ་བཞིན་དོན་དེ་དང་འདྲ་བར་སྦྱར་བ་མྱ་ངན་ལས་འདས་པ་མ་ཐོབ་ཀྱི་བར་ལ་སྡུག་བསྔལ་འབའ་ཞིག་གིས་གཟིར་བ་ལས། རེ་ཞིག་ཙམ་ཞིག་ལྷ་དང་མིར་སྐྱེས་ནས་ཇི་ཞིག་ལྟར་བསགས་པའི་དབང་གིས་ངན་འགྲོའི་སྐྱེ་ཤིའི་འཁྲུལ་འཁོར་མེད་པའི་སྐད་ཅིག་སྟེ། བདེ་འགྲོར་གནས་པའི་རིང་ངན་འགྲོའི་སྡུག་བསྔལ་མེ་ལྕེ་ལྟ་བུ་གཉུག་མར་བཟོད་དཀའ་བ་ཞི་བར་འགྱུར་ན། ལྷ་དང་མིའི་འདོད་པའི་ཡོན་ཏན་ཁམ་འགའ་ལ་སྲེད་པ་ལྟ་བུ་སྟེ་སྔ་མའི་འཕྲོར། དེ་བཞིན་སྡུག་བསྔལ་མི་བཟད་པ་ཡིས་དབང་མེད་རྟག་གཟིར་ཞིང་། རེ་ཞིག་ཙམ་ཞིག་ཇི་ཞིག་ལྟར་ཏེ་སྐྱེ་ཤིའི་འཁྲུགས་མེད་ནས། །སྐད་ཅིག་སྡུག་བསྔལ་གཉུག་མར་བཟོད་དཀའ་མེ་ལྕེ་གཞིལ་འགྱུར་ན། །
འཇིག་རྟེན་ཐམས་ཅད་བདེ་བ་ཁམ་འགའ་ལ་སྲེད་སྲེད་པར་བྱེད། །ཅེས་སོ། །ལྷའི་གནས་རིགས་དེ་དག་གི་རྒྱུ་འབྲས་ཀྱང་། །དྲན་པ་ཉེར་བཞག་ལས་བཏུས་པར། །གང་ཞིག་བདག་མེད་མི་འདོད་ཅིང་། །ཡོངས་སུ་བཟུང་ལ་མི་དགའ་བ། །དེ་ནི་བཟའ་རྣམས་དག་གི་མཆོག །རྒྱལ་ཆེན་བཞི་པ་དག་ཏུ་འགྱུར། །ཕ་མ་ཕ་ཚན་གཙོ་བོ་ལ། །བཀུར་བྱེད་བསྟོད་ལྡན་བཟོད་པར་བྱེད། །འཐབ་མོ་ལ་ནི་དགའ་བ་དང་། །དེ་ནི་སུམ་ཅུ་རྩ་གསུམ་སྐྱེ། །རྩོད་དང་འཐབ་མོར་མི་འགའ་ཞིང་། །གཅིག་ཏུ་དགེ་ལ་བརྩོན་པ་གང་། །དེ་དག་འཐབ་བྲལ་ཉིད་དུ་འགྲོ། །ཐོས་པ་མང་དང་ཆོས་འཛིན་དང་། །ཤེས་རབ་ལྡན་ཞིང་ཐར་པ་འདོད། །ཡོན་ཏན་དགའ་རྣམས་དགའ་ལྡན་འགྲོ། །རང་ཉིད་དུལ་བ་ལ་ཞུགས་ཤིང་། །ཚུལ་ཁྲིམས་འབོགས་པར་སྤྲོ་བ་གང་། །གདོན་མི་ཟ་བར་འཕྲུལ་དགར་འགྲོ། །སེམས་ཅན་གང་དག་སྨན་མིན་མཆོག །སྦྱིན་དང་དུལ་དང་ཡང་དག་སྡོམ། །ཕུལ་བྱུང་ཡོན་ཏན་ལྷག་གྱུར་དེ། །ངེས་པར་གཞན་འཕྲུལ་དབང་བྱེད་དོ། །ཚུལ་ཁྲིམས་ཀྱིས་ནི་མཐོ་རིས་ཐོབ། །བསམ་གཏན་གྱིས་ནི་ཁྱད་པར་འགྱུར། །ཡང་དག་ཇི་བཞིན་ཡོངས་ཤེས་པས། །མཐར་ནི་ཡང་སྲིད་མེད་པར་འགྱུར། །ཞེས་ཚིག་སྣ་ཅུང་ཟད་བསྟུངས་སོ། །ལྷ་མ་ཡིན་གྱི་སྡུག་བསྔལ་བཤད་པ་ནི། ལྷ་ཡི་དཔལ་ལ་སྡང་བའི་ཕྲག་དོག་གི །དགྲ་སྟྭས་རང་སྙིང་ཚལ་བར་བཀས་ནས་སླར། །དཔུང་པ་གཏུམ་པོའི་གཡུལ་ངོར་བདག་ཉིད་ཀྱི། །མགོ་དང་ཡན་ལག་གཏུབས་པས་ལྷ་མིན་མནར། །འདི་ལྟར་ལྷ་མ་ཡིན་རྣམས་ལ་ནི་རང་བཞིན་གྱིས་སྙེམས་པའི་ང་རྒྱལ་ཡོད་པས་ན་ཉོན་མོངས་པས་ཀུན་ནས་ཉོན་མོངས་པའི་སྡུག་བསྔལ་དང་། ཁྱད་པར་ལྷའི་དཔལ་ལ་སྡང་བའི་ཕྲག་དོག་གིས་ཡིད་གདུང་ཞིང་ལྷ་དང་
གཡུལ་འགྱེད་པའི་སྡུག་བསྔལ་ཡོད་དོ། །རྒྱུ་གང་གིས་ན་དྲན་པ་ཉེར་གཞག་ནས་ནི་འཛམ་བུའི་གླིང་པ་རྣམས་ཀྱིས་བསོད་ནམས་མ་ཡིན་པའི་ལས་སྟོབས་ཆེན་པོ་བསགས་པ་དང་། ས་སྡེ་ལས་ནི་ལྷ་རྣམས་ལྷ་མིན་གྱི་བུ་མོ་ལ་བལྟ་བའི་ཕྲག་དོག་དང། ལྷ་མིན་རྣམས་ཀྱིས་ལྷའི་བདུད་རྩི་ལ་ཆགས་པའི་དབང་གིས་དང་། མདོ་གཞན་དག་ལས་ནི་ལྷའི་དཔག་བསམ་གྱི་ཤིང་མེ་ཏོག་དང་འབྲས་བུས་བརྒྱན་པ་མཐོང་ནས་ཁྲོས་ཏེ། ཤིང་འདིའི་དཔལ་ཕུན་སུམ་ཚོགས་པ་ནི་ལྷའི་དབང་དུ་གྱུར་ན། རྩ་བ་བདག་ཅག་གི་གནས་སུ་དོན་མེད་དོ་ཞེས་སྟྭ་རེས་གཅོད་པར་བྱེད་པ་ལས་རྩོད་པ་འབྱུང་བར་སྟོན་ཏོ། །དེ་ལ་དང་པོར་སྲིད་སྡེ་སོ་སོར་བཅད་ནས་འཐབ་པ་ནི། དགའ་བོ་དང་ཉེར་དགའ་ལ་སོགས་དཀར་པོའི་ཕྱོགས་ཀྱི་ཀླུ་བརྒྱད་དང་། ཧུ་ལུ་དང་། ཧུ་ལུ་ཀ་ཆེན་པོ་སོགས་ནག་ཕྱོགས་པ་བརྒྱད་འཐབ་ཅིང་རྩོད་པ་ལས་གང་རུང་གཅིག་ཕམ་པ་དེས་རང་རང་གི་ཕྱོགས་ལ་གནས་པའི་བར་སྣང་གི་ལྷ་དག་སྦྲོན་ནོ། །སྤྲན་ནས་འཐབས་པ་དེའི་ཚེ་ནག་ཕྱོགས་ཀྱི་ཀླུ་ཕམ་ན་ཆུ་མཚམས་ཀྱི་སྒྲ་གཅན་ཡང་སྦྲན་ནས་འཐབ་བོ། །གང་དུ་སྒྲ་གཅན་རྒྱལ་བར་གྱུར་ན་དཀར་ཕྱོགས་ཀྱི་ཀླུ་དང་བར་སྣང་གི་ལྷས་རྒྱལ་ཆེན་རིགས་བཞིའི་དཔུང་རྣམས་སྤྲན་ཏེ། དེ་དག་གི་སྡེ་རིས་ཐམས་ཅད་གོ་ཆ་སྲ་བར་གྱོན་ནས་འཐབ་པ་ལས། ལྷ་མ་ཡིན་གྱི་དཔུང་རྣམས་ཕམ་པར་གྱུར་བ་དེའི་ཚེ། དཀའ་ཕྲེང་གི་གནས་ནས་མགུལ་ཕྲེང་ཅན་ཡང་ལྷ་མ་ཡིན་གྱི་དཔུང་དང་ཕྱོགས་གཅིག་འཐབ་པ་ལས་ཀྱང་ཕམ་ནས་ཐགས་བཟངས་རིས་ལ་སྤྲོན་ནོ། །དེའི་ཚེ་ཐགས་བཟངས་རིས་ཁྲོས་ནས་གསེར་གྱི་ས་གཞི་ལ་རྐ་བརྡབས་པས་ས་ཆེན་པོ་འདི་གཡོ་ཞིང་རི་རབ་ཀྱང་འགུལ་ལ། ལྷའི་དབང་པོའི་སྟན་ཡང་གཡོའི། །དེར་དབང་པོས་བསམས་
པ། ཅི་འདི་ལྟར་ས་གཡོ་བའི་རྒྱུ་ནི་བྱང་ཆུབ་སེམས་དཔའ་ས་ནས་སར་འཕགས་སམ། དེ་བཞིན་གཤེགས་པའི་སྤྲུལ་པས་འཇིག་རྟེན་དུ་ཆོ་འཕྲུལ་མཛད་དམ། བསོད་ནམས་མ་ཡིན་པ་རླབས་པོ་ཆེའི་ལས་མཐུན་པའམ། ལྷ་མ་ཡིན་གྱི་དབང་པོ་གཡུལ་གྱི་བྱ་བ་ལ་ཞུགས་སམ་སྙམ་དུ་ལྷའི་མངོན་ཤེས་ཀྱིས་བརྟགས་པ་ན། གཡུལ་འགྱེད་པར་ཤེས་ནས། འདུན་ས་ཆོས་བཟངས་སུ་འདུས་ནས་བསྒོ་བ། ལྷ་གང་དག་ཚེའི་ལྷག་མར་གྱུར་ཅིང་འཆི་བའི་ལས་བདག་གིར་བྱེད་པའི་དུས་ལ་བབ་པ་རྣམས་རང་གནས་སུ་འདུག་ཅིག །དེ་ལས་གཞན་པ་རྣམས་གཡུལ་གྱི་བྱ་བ་ལ་སྤྲོ་བར་གྱིས་ཤིག །ཅེས་སྨྲས་ནས་བྱང་ཕྱོགས་དགའ་བའི་ཚལ་དུ་སོང་ཏེ་ལྗོན་པའི་ནང་ན་ཡོད་པའི་གཟིམས་ཁྲི་ལ་བལྟས་ནས། གཡུལ་རྒྱལ་བའི་མཚན་མ་རྣམས་ཁོང་དུ་ཆུད་པར་བྱེད་དོ། །དེ་ནས་ལྷའི་ཚོགས་དེ་དག་རྩུབ་འགྱུར་གྱི་ཚལ་དུ་སོང་ནས་དེའི་རྫིང་བུར་ཞུགས་པ་ཙམ་གྱིས་ཞེ་སྡང་གི་ཀུན་དུ་རྟོག་པ་གསར་དུ་ཐོབ་ནས་གཡུལ་གྱི་བྱ་བ་ལ་སྤྲོ་བར་གྱུར་པ་དང་། དེའི་ཤར་ཕྱོགས་གོ་ཆའི་ཚལ་ནས་ཤིང་ལྗོན་པ་དག་ལས་རིན་པོ་ཆེ་སྣ་ཚོགས་ཀྱི་གོ་ཆ་ཤིན་ཏུ་སླབ་བྱུང་བ་དག་བགོས་ཏེ། གཡུལ་དོར་སྤྱོད་པའི་གླང་པོ་ཆེ་རབ་བརྟན་ལུས་དཔག་ཚད་བདུན་པ་ལ་བཞོན་པར་བྱས་ནས། མགོ་སུམ་ཅུ་རྩ་གསུམ་གྱི་སྟེང་དུ་དུས་ད་ལྟ་བའི་ལྷའི་དབང་པོ་ནི་མིག་མཛེས་ཞེས་བྱ་བ་སྟེ། བྱང་ཆུབ་སྟེ། སྟོབས་མཆོག་ལ་སོགས་པའི་ནོར་ལྷ་བརྒྱད། ཚོགས་བདག་དང་། བྷྲིད་གི་རི་ཏི་ལ་སོགས་པའི་གྲོགས་བཅུ་གཉིས། དགའ་བོ་དང་། ཉེར་དགའ་ལ་སོགས་ཉི་མའི་བུ་བཅུ་གཉིས་ཏེ་ཉེ་དབང་སོ་གཉིས་པོ་གནས་ཤིང་མགོ་བོ་རེ་རེའང་བདུན་བདུན་དུ་སྤྲུལ་པའི་སྟེང་ན་ལྷའི་དཔུང་དེ་སྙེད་དང་། མགོ་བོ་དེ་དག་ལ་མཆེ་བ་
བདུན་བདུན་སྤྲུལ་ནས་མཆེ་བ་རེ་རེ་ལ་སྐྱེད་མོས་ཚལ་དང་རྫིང་བུ་བདུན་བདུན། དེ་ན་ལྷའི་བུ་མོ་ཤིན་ཏུ་མཛེས་པ་གླུ་གར་བྱེད་པ་བདུན་བདུན། དེ་རེ་རེ་ལ་བྲན་མོ་བདུན་བདུན། དེ་རེ་རེ་ལ་སིལ་སྙན་བདུན་བདུན་དུ་སྤྲུལ་ནས་རི་རབ་ཀྱི་ནུབ་ངོས་ཆུ་མཚམས་ལ་ཐུག་པར་བསུས་ནས་གཡུལ་སྤྲོད་པ་ལས། ལྷ་མ་ཡིན་སྟོབས་ཅན་འདོད་ཆགས་ཅན་ངག་ནི་དབང་པོའི་མདུན་དུ་དགའ་མའི་སྒྱུ་རྩལ་ཁོ་ནས་སེམས་མྱོས་པའི་མོད་ལ། ལྷའི་རྡོ་རྗེ་དང་འཁོར་ལོ་ལ་སོགས་པས་འཇོམས་པར་འགྱུར་རོ། །དེའི་ཚེ་ལྷ་རྣམས་བསོད་ནམས་ཀྱི་མཐུས་མི་འགྲེང་བདུན་ཆེན་དུ་ལྷ་མ་ཡིན་ལས་འཕགས་ཤིང་། ཉི་ཟླའི་ངོས་ནས་རྡོ་རྗེ་དང་། འཁོར་ལོ་དང་། མདའ་དང་། གཏུན་ཤིང་དང་། རི་རབ་ལ་སོགས་པ་འཕེན་པས་ལྷ་མ་ཡིན་རྣམས་འཇོམས་པར་བྱེད་དོ། །ལྷ་མ་ཡིན་རྣམས་ཀྱང་གླང་པོ་ཆེ་དང་། རྟ་དང་། ཤིང་རྟ་དང་། དཔུང་གི་ཚོགས་ཡན་ལག་བཞི་པ་དང་ལྷན་ཅིག་འོང་སྟེ། རྡོ་རྗེ་དང་། མངའ་བོ་ཆེ་དང་། ཤག་ཏི་དང་། རི་རབ་དང་། འཁོར་ལོ་ལ་སོགས་པས་ལྷ་རྣམས་འཇོམས་པ་ལ་བརྩོན་ཀྱང་། ཐགས་བཟངས་རིས་ཀྱི་ཤིང་རྟ་དཔག་ཚད་བདུན་པ་མྱུར་དུ་འགྲོ་བ་དེའང་དབང་པོའི་ལག་པ་གཡོན་པས་འཛིན་པར་ནུས་ཤིང་། དེ་དག་གིས་རི་རབ་འཕངས་པ་དག་ཀྱང་བརྒྱ་བྱིན་གྱི་རྡོ་རྗེས་དུམ་བུར་བྱས་པ་རོལ་མཚོར་ལྷུང་བ་ལས་སྲོག་ཆགས་དུ་མ་ཤི་ནས་རོལ་མཚོའང་དམར་པོར་འགྱུར་རོ། །དེའི་ཚེ་ལྷ་རྣམས་ནི་མགོ་བོ་ཆད་པ་མ་གཏོགས་ཡན་ལག་གཞན་ཆད་པའང་འཕྲལ་དུ་སྐྱེ་ཞིང་རྨ་མེད་ལ། ལྷ་མ་ཡིན་རྣམས་ནི་མི་བཞིན་དུ་གནད་དུ་ཕོག་ཚད་འཆི་བར་འགྱུར་རོ། །དེ་ལྟ་ནའང་སྒྲ་གཅན་གྱི་ལུས་ཆད་པར་རིག་བྱེད་ཀྱི་གཞུང་ལས་བཤད་པར་དཔགས་ནས་ལྷ་མ་ཡིན་གཞན་པ་རྣམས་ལ་དེའི་རིགས་པ་བསྒྲེ་བ་ནི་འཐད་པ་མ་ཡིན་ནོ། །དུས་
དེར་ས་རྣམས་གཡོ། མཚོན་ཆའི་རི་རབ་རྣམས་རྡུལ་དུ་སོང་བས་འཛམ་བུའི་གླིང་ལ་སོགས་པའི་ནམ་མཁའ་རྡུལ་གྱིས་འཁྲིགས། གོ་ཆའི་འོད་གདངས་འཚེར་བ་དང་། སྒྲ་ཆེན་པོ་ནི་སྒྲོགས། སྒྲ་གཅན་དུད་འགྲོ་ཡིན་པས་དེའི་མིག་གིས་ཉི་ཟླའི་ཟེར་མི་བཟོད་ནས་ལག་པས་བསྒྲིབ་པས་ཉི་ཟླ་གཟས་ཟིན་པ་ཞེས་དྲན་པ་ཉེར་གཞག་ལས་བཤད་དོ། །དུས་འཁོར་ལ་སོགས་པའི་རྒྱུད་ལས་ནི་གདོང་མཇུག་གིས་བསྒྲིབ་པར་འདོད་པས་དུས་མེ་འཇུག་པ་ཞེས་ཀྱང་བྱ། གཞུང་ལ་ལར་ཁར་ཟོས་པ་ཨོལ་བར་དོན་པའོ། །ཞེས་ཀྱང་ཟེར་རོ། །དུས་ཚོད་དེར་བསོད་ནམས་ཀྱི་ཁྱད་པར། ཟླ་བའི་མདོར། དེ་དག་གཟས་ཟིན་པ་ན་ཟླ་བར་འབུམ་དང་། ཉི་མ་ལ་བྱེ་བའི་འགྱུར་བཤད་དོ། །དེ་ལྟ་མོད་ཀྱིས་གཡོ་བ་དང་། སྒྲ་འོད་དང་། ཉི་ཟླ་འཛིན་པ་ལ་སོགས་པའི་རྒྱུ་བྱང་ཆུབ་སེམས་དཔའ་ས་འཕར་བ་དང་། སྐུ་བལྟམས་ཞུགས་གཤེགས་པ་ལ་སོགས་དང་། དགེ་མི་དགེའི་ལས་རླབས་པོ་ཆེ་དང་། སངས་རྒྱས་ཀྱི་སྤྲུལ་པའི་ཆོ་འཕྲུལ་དང་། ལྷ་གནས་རྒྱ་ཆེར་བསྐྱེད་པ་དང་། གཡུལ་འགྱེད་པའི་མཆན་མ་ལས་བྱུང་ཞིང་། ཉི་ཟླ་འཛིན་པའང་དུས་ཀྱི་འཁོར་ལོ་དང་། བྱེད་པའི་ལག་རྩིས་ཀྱི་བརྟག་པ་ཅན་དུའང་གཏན་ལ་ཕབས་པའི་ཕྱིར་དྲང་ངེས་ཀྱི་རྣམ་གཞག་ཕྱིན་ཅི་མ་ལོག་པར་ཤེས་པར་བྱའོ། །དེ་བཞིན་དུ་ས་གཡོ་བའང་དགེ་མི་དགེ་ལས་འབྱུང་བ་སྔར་བཤད་ཟིན་ལ། ཡང་ཉ་བོ་ཆེ་འདྲེ་ལྡོག་པ་ལས་འདོད་པའང་འཇིག་རྟེན་གྱི་གྲགས་ཚོད་ལྟར་རོ། །དེའང་ལྷ་རྣམས་རྒྱལ་བའི་རྒྱུ་ནི་མི་རྣམས་ཆོས་བཞིན་སྤྱོད་པ་དང་། ཕ་ལ་ཕར་འཛིན་པ་དང་། མ་ལ་མར་འཛིན་པ་དང་། དགེ་སྦྱོང་དང་བྲམ་ཟེ་ལ་དེ་དང་དེར་འཛིན་པ་ལས་འབྱུང་བ་ནི་བདག་ཅག་གི་
སྟོན་པའི་ལུགས་ཡིན་ལ། རྒྱལ་བའི་དགེ་མཚན་ཡང་། འཇིག་རྟེན་གྱི་ཁམས་སུ་ཆར་འབབ་པ་དང་། ལོ་ལེགས་པ་དང་། ནད་འཁྲུགས་མེད་པ་ལ་སོགས་སུ་མངོན་ནོ། །ལྷ་མ་ཡིན་རྣམས་རྒྱལ་ན་དེ་ལས་ལྡོག་པ་རྣམས་འབྱུང་བས་ན་རྟག་ཏུ་ལས་འབྲས་ལ་ཡིད་ཆེས་པར་བྱའོ། །སྤྱིར་བསོད་ནམས་ཀྱི་སྟོབས་ཀྱིས་ལྷ་རྣམས་ཕལ་ཆེར་རྒྱལ་བ་ཡིན་ཏེ། འཇིག་རྟེན་ན་མི་དགེ་སྤྱོད་པའི་རྒྱུས་རེ་ཞིག་ཕམ་པ་དེའི་ཚེ། རི་རབ་ཀྱི་རྩེ་ལ་ཕྱོགས་ནས་བྲོས་པའི་སླད་བཞིན་དུ་ལྷ་མ་ཡིན་གྱི་དཔུང་རྣམས་སོང་བ་ན། གྲོང་ཁྱེར་བལྟ་ན་སྡུག་པས་འཕར་བཅད། སྐར་ཁུང་ཡང་བཀབ་ནས་ཞག་བདུན་གནས་པའི་ཚེ། ནམ་མཁའ་ལས་ལྷའི་རྔ་བོ་ཆེས། ཀྱེ་ལྷ་རྣམས་ཀྱི་རྒྱལ་བར་འགྱུར་རོ། །ལྷ་མ་ཡིན་རྣམས་ནི་ཕམ་པར་འགྱུར་རོ། །དུད་འགྲོ་དག་བདའ་བར་བྱའོ། །ཅེས་པའི་སྒྲ་བྱུང་མ་ཐག །ལྷ་མ་ཡིན་གྱི་དཔུངས་རྣམས་བྱེར་བར་འགྱུར་རོ། །དེའི་ཚེ། ཆུང་མ་རྣམས་ཀྱིས་མཚོ་ཀུན་སྣང་དུ་བལྟས་པས་རང་རང་གི་ཁྱོ་བསད་པའི་གཟུགས་བརྙན་ཤར་བས་ངུ་ཞིང་སྡུག་བསྔལ་ལོ། །ལྷ་མ་ཡིན་རྣམས་ཕམ་པ་དེའི་ཚེ་རི་རབ་ཀྱི་ཁོང་སེང་གསེར་གྱི་ས་གཞི་ལ་ཐུག་པར་བྲེས་པའི་སླད་བཞིན་དུ་ལྷའི་དཔུང་གི་ཚོགས་ཀྱིས་བདས་ནས་གྲོང་ཁྱེར་གསེར་ལྡན་གྱི་སྒོ་ཡང་བསྡམ། སྐར་ཁུང་ཡང་བཅད་དེ་ཞག་བདུན་འདས་པ་ན། ཡང་ལྷ་མ་ཡིན་རྣམས་རྒྱལ་བར་གྱུར་ཅིག །ལྷ་རྣམས་ཕམ་པར་གྱུར་ཅིག་ཅེས་པའི་སྒྲ་ཐོས་ན་ལྷ་རྣམས་རང་གནས་སུ་ལྡོག་གོ །དེ་ལྟར་གཞན་སྡེ་དང་འཐབ་པའི་ཚེ། ནམ་མཁའི་དཀྱིལ་རལ་བ་ལྟ་བུའི་སྒྲ་དང་། མཚོན་ཆའི་ཆར་མཐོ་དམ་འཐུག་པར་འབབ་པ་དང་། ལྷའི་གཟི་བྱིན་གྱི་འོད་དང་། སྦྱུགས་པའི་འཐོར་རླུང་ཆེན་པོ་ཐོས་པ་ན། མཐུ་ཆུང་བ་རྣམས་ནི་བརྒྱལ་ནས་འགྱེལ་ཞིང་སྙིང་གས་པ་ལྟ་བུའི་
འཇིགས་སྐྲག་དང་། སླར་རང་གི་གནས་ནས་བསྐྲོད་པའི་སྡུག་བསྔལ་དང་། མགོ་དང་ཡན་ལག་ཆད་པ་རྣམས་ནི་གསོན་དུ་རེ་བ་མེད་པའི་སྡུག་བསྔལ་དང་། རང་སྡེའང་འཐབ་ཅིང་རྩོད་པ་དང་། རྟག་པར་སུམ་ཅུ་རྩ་གསུམ་པའི་བདེ་འབྱོར་མཐོང་ནས་དེ་ལ་ཁོང་ཁྲོ་དང་ཕྲག་དོག་གིས་ཡིད་བདེ་བའི་སྐབས་མེད་ཅིང་། ལ་ལར་དགེ་བ་དང་མི་དགེ་བ་ལ་རྣམ་པར་དཔྱོད་པའི་བློ་ཡོད་དུ་ཟིན་ཀྱང་གནས་རིགས་དེའི་འགྲོ་བའི་སྒྲིབ་པས་ཉན་རང་གི་མཐོང་ལམ་ནི་མི་ཐོབ་པའི་ཕྱིར་མགོན་པོ་ཀླུས། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་བའི་ཡིད་ཀྱིས་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་སོ། །དེ་ལྟ་མོད་ཀྱིས་ཐེག་པ་ཆེན་པོའི་སྡེ་སྣོད་ནི་བསམ་གྱིས་མི་ཁྱབ་པས། དེའི་ཚེ་ཆོས་ཀྱི་རྣམ་གྲངས་འདི་བཤད་པ་ན་ལྷ་དང་། ཀླུ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་བགྲང་བ་ལས་འདས་པ་དག་གིས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་བོ། །ཞེས་དཀོན་མཆོག་བརྩེགས་པ་ལས་བཤད་པ་ལྟར་རོ། །དེར་སྐྱེ་བའི་རྒྱུ་འབྲས་ཀྱང་ལྷ་མ་ཡིན་གྱི་རབས་ལས། རྟག་ཏུ་གཡོ་དང་སྒྱུ་སྤྱོད་ཅིང་། །སྡིག་པ་དག་ནི་མ་བྱས་ལ། །འཐབ་ལ་དགའ་ཞིང་སྦྱིན་བྱེད་པ། །དེ་ནི་ལྷ་མིན་དབང་ཕྱུག་འགྱུར། །ཞེས་སོ། །ད་ནི་མིའི་སྡུག་བསྔལ་བཤད་པ་ལ། སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་ཏེ་རྩ་བའི་སྡུག་བསྔལ་ཆེན་པོ་གསུམ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། དགྲ་མི་སྡུག་པ་དང་ཕྲད་པ་དང་། གཉེན་སྡུག་པ་དང་བྲལ་བ་དང་། འདོད་པ་ཐོག་ཏུ་མ་ཕྱིན་པ་དང་། ཉེ་བར་ལེན་པའི་ཕུང་པོ་ལྔས་
སྡུག་བསྔལ་གྱི་མཚན་ཉིད་འཛིན་པས་རྣམ་པ་བརྒྱད་ཀྱིས་རྟག་ཏུ་མནར་བ་ལས། སྡུག་བསྔལ་གྱི་སྡུག་བསྔལ་བཤད་པའི་ཕྱིར། འཚོ་བ་ཆུ་བུར་ལྟ་བུར་གཡོ་བ་ཡི། །མི་དགེ་ཡིད་མི་བདེ་དང་འཁྲུགས་པ་སོགས། །སྡུག་བསྔལ་སྔ་མས་ཕྱི་མ་ཉེ་བར་ལེན། །མཛེ་ཅན་ཕོལ་གྱི་ཐོག་ཏུ་རྨས་གཏུགས་བཞིན། །འདི་ལྟར་སྐྱེས་བུ་ཤེས་ལྡན་དག་ནི་སྔོན་བསྐལ་པ་བཟང་པོར་གྱུར་པ་དང་། སྒྲ་མི་སྙན་ལ་སོགས་པའི་མིའི་འགྲོ་བ་གཞན་ལ་ལྟོས་ན་ལྷོ་གླིང་འདིའི་ད་ལྟ་བའི་གནས་སྐབས་ཀྱི་ཚེའི་སྙིགས་མ་ཆུའི་ལྦུ་བ་ལྟར་མི་རྟག་པ་ཉིད་ལའང་རང་བཞིན་གྱི་སྐྱོ་བའི་སྡུག་བསྔལ་དང་མི་འབྲལ་བའི་སྟེང་། གློ་བུར་དུ་ནད་དང་། གདོན་དང་། དགྲ་དང་། འབྱུང་བའི་གནོད་པ་ལ་སོགས་པའི་སྡུག་བསྔལ་དུ་མས་བརྩེགས་པ་ཆོས་ཅན། དེ་ལྟ་ནའང་ཕལ་ཆེར་མ་བརྟགས་པ་ཉིད་ཀྱི་ཕྱིར་ཕྱི་མའི་གནས་སྐབས་མཐོང་བ་ལ་སྡུག་བསྔལ་བ་མེད་ཀྱང་ནད་ཀྱིས་མནར་བའི་སྟེང་དུ། གཅན་གཟན་གྱིས་ཟ་བར་ངེས་པ་ལྟ་བུའམ། མཛེ་ཐོག་ཏུ་ཕོལ་གྱི་ཟུག་རྔུས་བརྩེགས་པ་ལྟ་བུའོ། །འགྱུར་བའི་སྡུག་བསྔལ་ནི། མངོན་མཐོའི་ཡོན་ཏན་རྫོགས་པའི་སྐྱེད་ཚལ་དུ། །འདོད་པའི་རོ་ལ་གདུང་བ་དུག་ཅན་གྱི། །བཟའ་བས་རྣམ་པར་སྨ་བབ་དཀའ་ཐུབ་ལུས། །མིག་འཕྲུལ་ལྟ་བུར་ཐོབ་འདི་འགྱུར་བ་ཅན། །སྐྱེས་བུ་གང་ཞིག་སྐྱེད་མོས་ཚལ་ལམ། ཁང་བཟངས་ལ་སོགས་པའི་ནང་དུ་རྩེད་འཇོ་དང་གླུ་གར་གྱིས་བག་ཕེབས་པད་པའི་མོད་ལ་གྱུར་པའམ། སྦྱར་བ་ལས་བྱུང་བའི་དུག་ཅན་གྱི་བཟའ་བཏུང་ཚབས་པོ་ཆེ་ཁང་དུ་ཆུད་པས། ལུས་ཀྱི་མདངས་ཉམས། མིག་གི་འཕང་སྨད། མལ་དུ་འདྲེ་ལྡོག་པའི་དཀའ་ཐུབ་ཀྱིས་ལུས་རིད་པོ་ཡུད་ཙམ་ལ་ཐོབ་ནས་སྡུག་བསྔལ་བའམ། སྒྱུ་རྩལ་ལ་སྤྲོ་བའི་ལུས་སྒྱུ་རྩལ་ཉིད་ཀྱིས་བདེ་བླག་ཏུ་
སྨ་བབ་པ་ལྟ་བུའོ། །འདུ་བྱེད་ཀྱི་སྡུག་བསྔལ་ནི་ཀུན་ལ་ཁྱབ་པ་ཅན་ཏེ། རྐང་པའི་རེག་པ་ཁུར་དུ་མི་བཟོད་པའི། །ངལ་བཅས་སེམས་ཀྱིས་གླང་པོའི་གཉར་འཛེགས་ཀྱང་། །དེ་ཡི་བསམ་པ་རྩེ་དགས་རྒོད་གྱུར་ནས། །གཡང་སར་སྨད་པ་འདུ་བྱེད་སྡུག་བསྔལ་མཚོན། །དོན་འདི་ལ་ནི་སྐྱེས་པ་རབས་ཀྱི་རྒྱུད་དང་དཔེ་སྦྱར་ཏེ། འོད་ལྡན་ཞེས་བྱ་བའི་རྒྱལ་པོའི་ཁབ་ཏུ་རྒྱལ་པོ་རབ་གསལ་གླང་པོའི་གཉའ་བ་ལ་འཛེགས་པར་སྤྲོ་བ་བཏེག་ནས་གླང་པོ་ཆེ་འདུལ་སྦྱོང་མཁན་ལ་སྨྲས་པ། ཀྭ་ཡེ་ཤེས་པར་གྱིས་ཤིག །གླང་པོའི་མཆོག་འདི་ནི་བདག་ཅག་གི་རྐང་པ་ས་ལ་རེག་པར་མི་བཟོད་པའི་བསོད་ནམས་ཀྱི་མཐུས་འཐོབ་ན་ཁྱོད་ཀྱིས་འདི་ཉིད་འདུལ་བ་འཛིན་དུ་ཆུག་ཅིག །དེས་ཀྱང་ལྷ་བཀའ་བཞིན་འཚལ་ལོ་ཞེས་ཁས་བླངས་ནས། ལྕགས་ཀྱི་ཐོ་ལུམ་མེ་འབར་བའང་སྣས་ཚམ་ཚོམ་མེད་པར་ལེན་པའི་བསྒོ་བ་ཉན་པ་དེ་སྲིད་དུ་འདུལ་བ་འཛིན་པར་བྱས་སོ། །དེ་ནས་རྗེ་འབངས་གཉིས་གླང་པོའི་གཉའ་བ་ལ་ཞོན་ནས་ཡུལ་ཉེ་བར་སྤྱོད་པའི་སྐྱོ་སངས་ལ་སྤྲོ་བཞིན་དུ་བཏེག་པ་ན་བདག་ཉིད་ལ་སྡུག་བསྔལ་བསྒྲུབ་པའི་རྒྱུ་ཐམས་ཅད་བལྟར་མི་མངོན་པ་འདུ་བྱས་པ་ཉིད་ཀྱི་ཕྱིར་དང་། གླང་པོ་ཆེ་གང་དག་ནི་ཐུབ་པ་མཆོག་གིས་ཉོན་མོངས་པ་འདུལ་བའི་སྡོམ་པས་སེམས་མ་དུལ་ལ། འདུལ་སྦྱོང་མཁན་གྱི་ལྕགས་ཀྱུས་ལུས་དུལ་བ་ཙམ་གྱུར་པའི་ཕྱིར་གླང་མོའི་དྲི་བསྣོམ་པའི་རྩེ་དགས་ཡིད་རབ་ཏུ་རྒོད་པར་གྱུར་ནས། ས་གཞི་ཐམས་ཅད་ཤིང་རྟའི་འཕང་ལོ་བསྐོར་བ་ཉིད་དང་འཁྲུལ་པ་བསྐྱེད་པ་ཙམ་དུ་རྒྱུགས་པས་རྒྱལ་པོ་རབ་གསལ་ཉིད་སྲོག་དང་བྲལ་བ་ལ་ཉེ་བའི་སྡུག་བསྔལ་ཐོབ་པ་ལྟ་བུ་སྟེ། འདུ་བྱེད་ཀྱི་
སྡུག་བསྔལ་འདི་ནི་སེམས་ཅན་ཐམས་ཅད་ལ་བལྟར་མི་མངོན་པ་ཉིད་དུ་ཤས་ཆེ་བར་ཡོད་པར་རིགས་པར་བྱའོ། །དེ་ལྟར་རྩ་བའི་སྡུག་བསྔལ་ཆེན་པོ་གསུམ་ནི་སེམས་ཅན་རྣམས་རང་རང་གི་ལས་དང་མཐུན་པར་འཁྱམས་པའི་འབྲོག་དགོན་པ་ཆེན་པོ་ལྟ་བུར་གྱུར་ནས། དེར་སྐྱེ་རྒ་ན་འཆི་ལ་སོགས་པ་རྣམ་པ་བརྒྱད་པོས་མི་རྣམས་སྡུག་བསྔལ་བའི་ཚུལ། དེ་ལྟར་སྡུག་བསྔལ་ཉིད་གསུམ་འབྲོག་དགོན་ན། །སྐྱེ་རྒ་ན་འཆིའི་ཚོར་བ་རྣམ་པར་འཁྱམས། །སྨོན་པ་མེད་པའི་མི་སྡུག་དགྲ་དང་ཕྲད། །སྡུག་པ་ཡིད་ལ་གོམས་བྱས་གནས་མིན་ཕྱོགས། །འདོད་པའི་ཡུལ་ལ་འབྱོར་པས་ངོ་ཚར་བྱས། །ཉེར་ལེན་ཕུང་པོའི་སྟེང་དུ་དཀའ་ཐུབ་འདུས། །རྣམ་པ་བརྒྱད་ཀྱི་སྡུག་བསྔལ་རྟུལ་ཕོད་པས། །མི་ཡི་སྐྱེ་བའི་འཁྲི་ཤིང་རྟག་ཏུ་གཙེར། །ཞེས་མདོར་བསྟན་ནས་སོ་སོའི་རང་བཞིན་རྒྱས་པར་དབྱེ་བའི་ཕྱིར། །ཐོག་མར་སྐྱེ་བའི་དུཁ་བཤད་པ་ནི། །ཤིན་ཏུ་དྲི་ང་མི་གཙང་རྙོག་མ་ཅན། །ཀུན་ནས་དོག་པ་མུན་ནག་ཐིབས་པོའི་ཁྲོད། །མངལ་གནས་ལྕགས་ཁྱིམ་སྒོ་འཕར་སྤངས་ལྟའི་ནང་། །མ་རིག་རྣམ་ཤེས་ཁུ་ཁྲག་དབུས་ན་བརྟེན། །ཞེས་མངལ་གྱི་རང་བཞིན་ནི་འདམ་རྫབ་ལྟ་བུ་ཀུན་ནས་དྲི་ང་བ། ཡངས་པར་མི་མངོན་ལ། སྒོ་གླེགས་མེད་པའི་ལྕགས་ཀྱི་ཁྱིམ་ལྟ་བུའི་ནང་དུ། སྔོན་རོལ་པ་ཤས་ཆེ་བའི་བར་མདོའི་དྲི་ཟ་ཉེ་བར་འཇུག་པའི་རྣམ་ཤེས་རིག་པ་མ་ཡིན་པ་དེ་རླུང་སེམས་ཀྱི་ཆས་ཁུར་ནས་ཕ་མའི་ཁུ་ཁྲག་གི་དབུས་ན་གནས་པའི་ཚུལ། མེར་མེར་ནུར་ནུར་ལྟར་ལྟར་མཁྲེང་གོར་ཉ། །རུས་སྦལ་བཞིན་ཏེ་བདུན་ཕྲག་བདུན་རྩ་དྲུག །གནས་འགྱུར་ཡིད་མི་འོང་བའི་རྣམ་པ་ལ། །དབང་པོ་ཡན་ལག་བ་སྤུ་ལ་སོགས་འགྲུབ། །བདུན་ཕྲག་སུམ་ཅུ་རྩ་བདུན་གྲངས་རྙེད་ཚེ། །བརྟས་དང་
ཆེར་བསྐྱེད་གཡོ་ཞིང་ཚོར་བས་གདུངས། །མ་ཡི་སྤྱོད་ལམ་བཀྲེས་སྐོམ་ཚྭ་གྲང་གི། །རྣམ་འགྱུར་ལས་བྱུང་སྡུག་བསྔལ་དཔག་ཏུ་མེད། །བཙའ་བའི་དུས་ཀྱི་རྗེས་འགྲོ་དེ་ཡི་ལུས། །བཟོད་དཀའི་བསྡུས་འཇོམས་ཁུར་དུ་འཕོས་པ་ལྟའི། །སྡུག་བསྔལ་ཉེ་བར་ལེན་པས་མཐོ་བཙམས་ནས། །མ་བུ་གཉིས་ཀ་མོད་ལ་སྲོག་འདོར་རམ། །ཅིག་ཤོས་གནོད་པ་བདོ་བའི་ཁུར་གྱིས་བཙའ། །མངལ་གནས་རློན་པས་དཀྲིས་ཤིང་དྲི་ང་བ། །སྲན་མི་བཟོད་པ་ཤ་རྨེན་ཞིག་པ་ལྟས། །སྔོན་གྱི་དྲན་པའི་སྟོབས་རྣམས་ཉམས་བྱས་ཤིང་། །རག་པའི་གནོད་པས་གཟིར་བའི་སྡུག་བསྔལ་མྱོང་། །ཞུགས་པའི་བདུན་ཕྲག་དང་པོ་ནི་མེར་མེར་གྱུ་གྱུ་བ་དངུལ་ཆུའི་རྣམ་པ་ལྟ་བུའོ། །གཉིས་པར་ནུར་ནུར་པོ་བལ་སྣབས་ཀྱི་རྣམ་པ་ལྟ་བུའོ། །གསུམ་པར་ལྟར་ལྟར་པོ་མཛུབ་མོའི་རྣམ་པ་ལྟ་བུའོ། །བཞི་པར་མཁྲང་གྱུར་སྒོ་ངའི་རྣམ་པ་ལྟ་བུའོ། །ལྔ་པ་གོར་གོར་པོ་ཁུར་བའི་རྣམ་པ་ལྟ་བུའོ། །དྲུག་པར་ཁྱབ་འཇུག་ཉའི་རྣམ་པ་ལྟ་བུའོ། །བདུན་པར་རུས་སྦལ་ལྟར་མགོ་དང་རྐང་ལག་ཅུང་ཟད་མངོན་པའོ། །དེ་ནས་བདུན་ཕྲག་ཉི་ཤུ་རྩ་དྲུག་གི་བར་དུ་ལུས་ཀྱི་ཡན་ལག་དང་། སོར་མོ་དང་། ནང་གི་དོན་ལྔ་སྣོད་དྲུག་དང་། མིག་ལ་སོགས་དབང་པོའི་རྟེན་དང་། རྩ་དང་རླུང་དང་། ཁམས་དྭངས་མ་དང་། ཁྲག་དང་། ཆུ་སེར་དང་། བ་སྤུ་དང་། སྐྲ་དང་། ཕོ་མོའི་དབང་པོ་ལ་སོགས་པའི་བར་གྱིས་སྐྱེ་མཆེད་རྫོགས་པར་བྱེད་ཅིང་། ཁམས་ཀྱི་ཟས་ནི་འདོད་པ་ན་སྤྱོད་པའི་ལྷ་ལྟར་ཕྲ་བ་དྭངས་མའི་རང་བཞིན་དུ་སྤྱོད་པས་གཤང་གཅིའང་མེད་དོ། །དེ་ནས་བདུན་ཕྲག་སུམ་ཅུ་རྩ་དྲུག་གི་བར་དུ་ལུས་ཟུངས་ཉམས་བལྟས་པར་བྱེད་དེ་མའི་ཟས་སྐོམ་གྱི་དྭངས་མས་བུའི་བཟའ་བཏུང་གི་བྱ་བ་བྱེད་ཅིང་། སྐབས་སུ་མ་ཡང་ལུས་མི་བདེ་བ་ཙམ་གྱི་འཕར་གཡོ་བྱེད་དོ། །སུམ་ཅུ་རྩ་
བདུན་པ་ལ་མངལ་དུ་གནས་པའི་ཚོར་བ་ཉམས་སུ་མྱོང་བས་མུན་ནག་གི་སྣང་བ་དང་། དོག་ཅིང་སྐྱུག་བྲོ་བ་དང་། འཁུམས་པས་སྡུག་བསྔལ་པ་དང་། མ་ཉིད་འགྲངས་ཐལ་ན་རིས་མནན་པ་ལྟ་བུ་དང་། བོམས་ཐལ་ན་རྒྱ་མཚོས་མནན་པ་སྙམ་པ་དང་། ངལ་དུབ་དང་། བསྒུལ་བསྐྱོད་སོགས་སྤྱོད་ལམ་མི་གཟོ་བས་གཡང་ལ་བསྐྱུར་བ་ལྟ་བུའི་སྡུག་བསྔལ་ཡོད་དེ། དགའ་བོ་ལ་མངལ་འཇུག་བསྟན་པ་ལས་ཞག་བདུན་ཕྲག་སུམ་ཅུ་རྩ་བདུན་པ་ལ་ཕྱིན་ཅི་མ་ལོག་པའི་འདུ་ཤེས་ལྔ་འབྱུང་སྟེ། ལྔ་གང་ཞེ་ན། མི་གཙང་བའི་འདུ་ཤེས་དང་། དྲི་མི་ཞིམ་པ་དང་། བཙོན་ར་དང་། མུན་ནག་དང་། ཕྱིར་འབྱུང་བའི་འདུ་ཤེས་ཏེ། ཞག་བདུན་ཕྲག་སུམ་ཅུ་རྩ་བརྒྱད་འདས་ནས་འབྱུང་འདོད་པའི་ཚེ་སྡུག་བསྔལ་སྣ་ཚོགས་མྱོངས་ནས་འབྱུང་བར་འགྱུར་ཏེ། དེའི་ཕྱིར་སྡུག་བསྔལ་ཆེན་པོའོ། །ཞེས་དང་། སློབ་མ་ལ་སྤྲིང་བར། ཤིན་ཏུ་མི་བཟད་དྲི་ང་མི་གཅོང་བཅེར་བས་འགགས། །རབ་ཏུ་དོག་པའི་མུན་ནག་འཐིབས་པོར་འདུག་པ་ཡི། །མངལ་གནས་དམྱལ་བ་ལྟ་བུའི་ནང་དུ་དེ་ཞུགས་ནས། །ལུས་ཡོངས་བསྐུམས་ལ་སྡུག་བསྔལ་ཆེན་པོ་མནག་དགོས་སོ། །ཅེས་སོ། །དེའང་ཁྱེའུ་རྣམས་ནི་མའི་གློ་གཡས་ནས་ཁ་ནང་དུ་བལྟས་ཏེ་ཐལ་མོ་གཉིས་ཀྱིས་གདང་བཀབ་ནས་གནས་ལ། བུ་མོ་ནི་གཡོན་ནས་ཕྱིར་བལྟ་བས་གནས་ཤིང་། ནུ་ཞོས་བརྟག་པའང་ལྐོག་གྱུར་མི་བསླུ་བ་ཡན་ལག་བརྒྱད་པའི་རྒྱུད་ལས། དེ་ཡང་རྩིབ་ལོགས་ལ་བསྟེན་དཀུ་གཡས་མཐོ། །ནུ་ཞོ་གཡས་པ་སྔར་འབྱུང་ཁྱེའུ་སྟེ། །ཞེས་དང་། ཅིག་ཤོས་གོ་ལྡོག་པར་བཤད་དོ། །དེ་ནས་བཙའ་བའི་དུས་ལ་བབ་སྟེ་ལས་ཀྱི་རླུང་གིས་མགོ་འཇུག་ལྡོག་པ་དེ་རུས་པའི་འཁྲུལ་འཁོར་གྱི་བར་དུ་བཙིར་ནས་བཙའ་བས། བུ་ལ་བསྡུས་འཇོམས་ཀྱི་དམྱལ་བའི་སྡུག་བསྔལ་ཙམ་དང་། མ་ཡང་སྲོག་འདོར་
རམ་བརྟན་ཆ་མི་ཕྱེད་པ་ཙམ་དུ་སྡུག་བསྔལ་བའི་ལོངས་སྤྱོད་དང་ལྡན་པ་ཉིད་དེ། ཤིཀྵ་ལེ་ཁར། དེ་ནི་རིམ་གྱིས་ཏིལ་མར་བཅིར་དཔྱད་སྲ་བ་ཡིས། །བཙིར་བ་ལྟར་བྱས་དེ་ནས་ཇེ་ཞིག་ལྟ་སྟེ་བཙས། །འོན་ཀྱང་དེ་སྲོག་མོད་ལ་མི་འདོར་གང་ཡིན་པ། །སྡུག་བསྔལ་ཉེ་བར་སྤྱད་པའི་རྣམ་པར་མཐོ་བཙམ་མོད། །ཅེས་སོ། །དེ་ནས་མངལ་གནས་རློན་པ་དཀྲིས་པའི་སྲན་མི་བཟོད་པ་དེ་ལ་རེག་མ་ཐག་པགས་པ་བཤུས་པ་ལྟ་བུའི་སྡུག་བསྔལ་དང་། ཁྲུས་བྱས་དུས་ཤ་རྨེན་ཟུག་རྔུའི་ཚོར་བ་ཤིན་ཏུ་གཙོང་བ་ལ་མཐོ་བཙམས་པ་ལྟ་བུས་སྡུག་བསྔལ་གསར་པའི་གནས་སྐབས་མཐོང་ནས་མངལ་ན་གནས་པའི་སྡུག་བསྔལ་རྣམས་བརྗེད་པར་འགྱུར་བས་དྲན་པས་སྤོང་ཞེས་གསུངས་པ་སྟེ། སྔ་མ་ལས། མངལ་གནས་རློན་པ་དཀྲིས་ཤིང་དྲི་ང་མི་བཟད་ལྡན། །གཟིར་བས་གནོད་པ་བརྡོ་སྟེ་རྨ་རྨེན་ཞིག་པ་ལྟར། །སྐྱུག་ལ་ཐུག་པ་བཞིན་དུ་སྔོན་གྱི་དྲན་པ་སྤོང་། །ཞེས་སོ། །ཚུལ་ཞིབ་པ་ནི་དགའ་བོ་ལ་མངལ་གནས་བསྟན་པ་དང་། མངལ་འཇུག་གི་མདོ་གཉིས་ལ་བལྟའོ། །དེ་ནས་རྒ་བའི་སྡུག་བསྔལ་བཤད་པ། རྒ་བའི་ཆད་པས་ནོན་པའི་ལང་ཚོ་ལ། །ཉམས་དང་ཡིད་མི་བདེ་བའི་ཁུར་བབ་པས། །བསྐྱོད་པའི་མཐུ་ཉམས་འཁར་བའི་གཞན་དབང་ཅན། །འགྲོ་ལྡོག་གཡོ་བའི་ལྷུ་ཚིགས་རྣམ་པར་འགྱུར། །དབང་པོ་རྒུད་པས་འདོད་པའི་ཡོན་ཏན་དང་། །ཡུལ་གྱི་ལོངས་སྤྱོད་སྤྲིན་གྱིས་བཀབ་པ་ཡི། །ཚ་ཟེར་བཞིན་དུ་རྨོངས་དང་མཐུ་ཉམས་པའི། །འདུ་ཤེས་འཁྲུགས་པའི་མལ་དུ་ཤིན་ཏུ་འཁྱམ། །གཞོན་ནུའི་ལང་ཚོ་དེ་ནི་རིམ་བཞིན་རྒས་ཤིང་འཁོགས་པའི་མཐུས་བཅོམ། ལུས་ཀྱི་སྟོབས་ཉམས་པས་ཚོར་བའི་སྡུག་བསྔལ་རྣམ་པ་སྣ་ཚོགས་ཀྱི་ཁུར་བབ། ལྷུ་ཚིགས་
ཉམས་པས་འགྲོ་བར་མི་ནུས། ཟས་ཀྱང་མི་འཇུ། དབང་པོ་རྒུད་པས་མིག་འགྲིབས། རྣ་བ་འོན། ལྕེ་ལྡིབས། དྲན་པ་རྨོངས། སོ་ཕྲེང་ཟག་པས་ཟས་ཀྱི་རོ་ལྕེ་ལ་མི་འཕོ། འདོད་པའི་ཡོན་ཏན་དང་། ཡུལ་གྱི་ལོངས་སྤྱོད་ལ་ཉམས་མི་དགའ་ཞིང་། དགའ་ནའང་མངོན་དུ་སྤྱོད་པའི་མཐུ་མེད་པས་ཡིད་གདུང་། གཞན་གྱིས་བརྙས་ཤིང་སུན་འབྱིན་པའི་སྐྱེ་བ་ཉམས་སུ་མྱོང་། ཚ་གྲང་གང་ཡང་མི་བཟོད་ཅིང་བློ་སྲབས་པས་ཚོར་བ་ཡིད་དུ་མི་འོང་བའི་སྡུག་བསྔལ་སྣ་ཚོགས་ལ་སྤྱོད་པས་ན། རྒན་ལ་བཀུར་སྟི་བྱས་པ་ལའང་ཕན་ཡོན་ཆེ་བར་ཡང་བསྔགས་པ་སྟེ། སློབ་དཔོན་ཆེན་པོ་མ་ཏི་ཙི་ཏས། སྐྱེ་བ་ཅན་ལ་ངེས་པར་ནི། །རྒས་དང་འཆི་དང་ན་མཆིས་ན། །མ་བགྲེས་མ་བསྙུངས་མ་འགྲོངས་ཞེས། །ལེགས་སྨོན་གསོལ་ཡང་ཅི་ལ་ཕན། །ཞེས་དང་། འདི་ལྟར་གང་ཞིག་མི་འཚལ་བ། །དེ་ཉིད་ཀྱིས་ནི་སྡུག་བསྔལ་ཏེ། །མཁས་པ་སུ་ཞིག་མགར་བ་ལྟར། །ཚིག་པ་ལ་ནི་ཡང་བསྲེག་བཞིན། །ཞེས་སྡུག་བསྔལ་གྱིས་མནར་བ་གང་དག་ལ་སྡུག་བསྔལ་གྱི་བསྣོན་པ་མི་སྟེར་བར་གསུངས་པས་མཚོན་ནོ། །དེ་ནས་རྣ་བའི་སྡུག་བསྔལ་བསྟན་པའི་ཕྱིར། །རང་བཞིན་སྙོམས་ལྡན་འདུ་བའི་རྫིང་བུ་ནི། །སྙོག་པ་ཅན་བགྱིད་ན་བའི་ཚོར་བ་ཡིས། །ཕུང་པོ་ལྔ་ཡི་ཉེར་ལེན་དུབ་བྱས་ཏེ། །འཚོ་བའི་བརྟན་པ་བྲལ་བའི་དོགས་པས་སྐྲག །འདི་ལྟར་འབྱུང་བ་བཞིས་བསྡུས་པའི་ལུས་ཅན་ལ་རླུང་དང་། མཁྲིས་པ་དང་། བད་ཀན་ཏེ། དེ་དག་ཆ་མ་མཉམ་པའམ་འདུས་པའམ་གཅིག་ལ་གཅིག་ལྡན་ཏེ་འདྲེས་པ་ལས་བྱུང་བའི་ནང་ནི་འདུ་བསྙོམས་པའི་ལུས་ཀྱི་རྫིང་བུ་རྙོག་མར་བྱེད་པ་པོའོ། །དེ་ལ་ན་བ་ཞེས་བྱ་བ་ནི། གཟུགས་ལ་ན་ཚའི་སྡུག་བསྔལ། ཚོར་བས་དེ་ཉིད་སྡུག་བསྔལ་དུ་ཤེས་པ། འདུ་ཤེས་ཀྱི་
འབྲེལ་ཆགས། འདུ་བྱེད་ནི་ནད་གཅིག་བཅོས་པས་གཅིག་ཤོས་འདུ་བྱེད། རྣམ་པར་ཤེས་པས་ཟུག་གི་ངོ་བོ་ཉིད་ཉམས་སུ་མྱོངས་ནས་ཉེར་ལེན་གྱི་ཕུང་པོ་ལྔ་པོ་སྡུག་བསྔལ། དེས་སེམས་འཁྲུགས་པས་དགའ་བའི་ཡུལ་ཐམས་ཅད་ཕྱིན་ཅི་ལོག་ཏུ་གནས་འགྱུར། ན་བ་ནི་ངེས་པར་འཆི་བའི་སྔོན་དུ་འགྲོ་བའོ་སྙམ་པའི་འཇིགས་པ་ཆེ་བ་སྟེ། ལས་བརྒྱ་བའི་སྟོད་འགྲེལ་ལས། ན་བས་གདུངས་པའི་ལུས་ཅན་ནི། །དམྱལ་བའི་ཚོར་བ་དེ་འདྲ་སྟེ། །ཞེས་སོ། །འཆི་བའི་སྡུག་བསྔལ་ནི། །སྲིད་པ་འདི་ན་སྲོག་གི་རིན་ཐང་ལ། །ཐུག་པ་མེད་པས་འཆི་བའི་སྡུག་བསྔལ་གྱིས། །རྣམ་པར་གཏུགས་པའི་སྐྱེས་བུ་གཉེན་འདུན་དང་། །ལོངས་སྤྱོད་ལས་ཐལ་ས་ཚུགས་མེད་པར་འགྲོ། །འཇིག་རྟེན་གྱི་དཔལ་འབྱོར་ཡོད་དགུ་སྤུངས་ཀྱང་སྲོག་གི་རིན་ཐང་ལ་ཐུག་པ་མེད་པ་ཉིད། དེའང་འཆི་བའི་སྡུག་བསྔལ་ལས་ནི་ནམ་ཡང་ཐར་བ་མེད་པས། མལ་གྱི་མཐའ་མར་ནི་ཉལ། སྐྱེས་ཆེན་པོ་འདེགས་པའི་དུས་ལ་ནི་བབ། མངའ་རིས་དང་། ལོངས་སྤྱོད། གནས་ཁང་དང་། གཉེན་གྲོགས། བུ་ཆ་དང་། འཁོར་འདབ་དང་། ཟས་གོས་ལ་སོགས་པ་ཇི་ཙམ་ཡོད་ཀྱང་ཆ་ཤས་རྩམ་ཡང་ཁྱེར་དབང་ནི་མེད། རྗེས་སུ་ནི་མི་འབྲང་། བློས་ཐོངས་པ་ནི་མེད། ཕྱི་མ་ལ་ནི་མི་དབང་། ཉེ་དུའི་ཚོགས་ཀྱིས་བསྐོར་ཡང་གནད་གཅོད་ཀྱི་སྡུག་བསྔལ་དྲག་པོ་དེ་ནི་རང་གཅིག་པུས་མྱོང་། སྙིང་མི་དགའ་བཞིན་པའི་ངང་ལ་དྲན་པ་ནི་ཉམས། འདུ་ཤེས་ནི་འཁྲུལ། དབུགས་ནི་ཆད། འགྲོ་བ་རིགས་དྲུག་གང་དུའང་མི་ཐེ་བའི་བར་མ་དོ། མགོན་དང་སྐྱབས་མེད་པ། གཟུགས་ཀྱི་ཕུང་པོས་སྤངས་པ། མིང་བཞི་འདུས་པའི་ཕུང་པོ། ཡིད་ལུས་
བག་ཆགས་ཀྱི་བྱད་གཟུགས། ཚོར་བ་ཐམས་ཅད་སྡུག་བསྔལ། སྣང་བ་མཐའ་དག་འཇིགས་སྐྲག་ཏུ་འཆར་བའི་ཚེ། གཅེས་པར་བསྐྱངས་པའི་ལུས་ནི་ཐ་གུས་འཆིང་། རྡོག་པས་བརྫི། དུར་ཁྲོད་ཉམས་མི་དགའ་བར་འགྲོ་ཞིང་འཚོག །འཁོར་ལོས་བསྒྱུར་བའི་འཛད་སྤྱོད་དང་ལྡན་ཀྱང་དྲི་ཟ་བའི་དུས་ལ་ནི་བབ། ཉེ་དུའི་ཚོགས་ནི་སྡུག་བསྔལ་བར་བྱེད་ཀྱང་མི་བས་ནོར་ལ་འཕངས། དུས་དེའི་ཚེ་རྗེས་སུ་འབྲེལ་བ་ནི་ལས་དང་བག་ཆགས་གཉིས་པོ་ལས་མ་མཆིས་ན་ཅིའི་ཕྱིར་སྐྱོ་བར་མི་བྱེད། དེ་སྐད་དུ་ཀ་ནིས་ཀའི་འཕྲིན་ཡིག་ལས། འཆི་བདག་གིས་ནི་དྲངས་པ་ན། །དགེ་དང་སྡིག་པ་མ་གཏོགས་པ། །འགྲོ་བ་ཐམས་ཅད་ཕྱིར་ལོག་ནས། །འགའ་ཡང་ཁྱོད་རྗེས་མི་འབྲང་བར། །མཁྱེན་པར་མཛོད་ལ་ལེགས་པར་སྤྱོད། །ཅེས་དང་། ཀུན་ལ་སྲོག་ནི་འཕངས་པ་སྟེ། །ཀུན་ལ་གསོན་པ་སྡུག་པ་ལགས། །ཐམས་ཅད་འཆི་བའི་ཆོས་ཅན་ཏེ། །ཐམས་ཅད་སྡུག་བསྔལ་རྣམས་ཀྱིས་གདུངས། །ཞེས་སོ། །དེ་ནས་དགྲ་མི་སྡུག་པ་དང་འཕྲད་པའི་སྡུག་བསྔལ་ནི། །མི་སྡུག་ཡུལ་དང་ཕྲད་པའི་སྡུག་བསྔལ་གྱིས། །ཕོ་ཉས་རྣམ་པར་གཟིར་ཞིང་སྨད་པ་རྣམས། །བདེ་བའི་འབབ་སྟེགས་ཞིག་པའི་ངལ་གསོ་ལྟར། །དབུགས་འབྱིན་ཐོབ་པས་ལྷག་པར་ཉེན། །འདི་ལྟར་སེམས་ཅན་རྣམས་ཀྱི་རང་བཞིན་ནི་བྱ་བ་མ་ཡིན་པ་ལ་གོམས་ཤིང་། ངོ་ཚ་ཁྲེལ་ཡེད་ཀྱི་བླང་དོར་དང་དམ་པའི་མགོན་གྱིས་ཟིན་པ་ཤིན་ཏུ་ཉུང་བས་གནོད་པ་ལ་གོམས་པ་ཆོས་ཉིད་ཡིན་ཏེ། སྔ་མ་ལས། འཇིག་རྟེན་འདི་ན་བློ་གྲོས་ཀྱི། །ཉམ་ཆུང་གྱུར་དང་མགོན་མེད་པ། །བྱ་བ་མ་ཡིན་བྱེད་པ་ལ། །གདོན་མི་ཟ་བར་འཇུག་པར་འགྱུར། །ཞེས་རང་གཞན་གྱི་བདེ་འབྲས་འཇོམས་པ་འབའ་ཞིག་ལ་བརྩོན་ན། བྱིས་པའི་གྲོགས་དང་ཡུལ་གྱི་ཉེས་
དམིགས་ལ་བརྟེན་པ་བདག་ཅག་ལ་བཟོད་པའི་དཀའ་ཐུབ་ནི་མེད། མཁས་པའི་ཤེས་རབ་ཀྱི་བསྲུང་བའི་ཆོ་ག་ལ་ནི་མི་མཁས་པས། སྐྱེ་བོ་གཞན་དང་གཞན་དག་གིས་བལྟར་མངོན་པའམ་མི་མངོན་པར་དགྲ་བཞིན་དུ་བལྟས་ནས་ལུས་དང་། ལོངས་སྤྱོད་དང་། སྲོག་ལ་མ་རུངས་བྱེད་པས་ལུས་སེམས་ལ་གདུང་བ་ཆེན་པོ་བསྐྱེད་པ་ནི་དཔེར་ན་ཁུར་གྱིས་ནོན་པའི་སྐྱེས་བུའི་ངལ་སྟེགས་ཞིག་པ་བཞིན་ནོ། །ཡང་གཉེན་དང་བྲལ་བའི་སྡུག་བསྔལ། བྱམས་སྡུག་འདུ་འབྲལ་གསར་པར་བཀོད་པ་ཡི། །གདུང་པས་ཉམས་པའི་དཀར་ཐུབ་གཟུགས་གྱུར་ན། །ནོར་བཟང་དྲི་ཟ་མོ་ཡི་དབང་གྱུར་པའི། །ལམ་འཕྲང་འཚེ་བས་བཀབ་ལས་ལས་མཐའ་རིང་། །བདག་ཉིད་ལ་བྱམས་ཤིང་ཕན་པའི་ཕ་མའམ། ཡིད་ལ་སྡུག་པའི་མཛའ་བཤེས་དང་བྲལ་བར་གྱུར་ན་དེའི་ཡོན་ཏན་དང་། སྤྱོད་ལམ་དང་། རྣམ་འགྱུར་དྲན་ནས་སེམས་ཤིན་ཏུ་གདུང་བས་སྡུག་བསྔལ་བའི་དཀའ་ཐུབ་ནི་གཞོན་ནུ་ནོར་བཟང་དྲི་ཟའི་བུ་མོ་ལ་ཆགས་པའི་ཞགས་པས་བཅིངས་པའི་དབང་གིས་ལམ་འཕྲང་འཚེ་བ་ཅན་བགྲོད་པ་ལས་ཀྱང་ལས་ཀྱི་མཐའ་རིང་བ་ཉིད་དེ། དཔག་བསམ་འཁྲི་ཤིང་ལས། ཡུལ་གྱི་རོ་ལ་གཙིགས་པ་ཡི། །ཀུན་རྨོངས་གྱིས་གཟིར་སེམས་ཅན་རྣམས། །ཀྱེ་མ་ཁྱིམ་གྱི་བདེ་ཉིད་ལས། །ཡིད་འབྱུང་ལས་ནི་ཕྱིར་ཕྱོགས་དཀོན། །ཞེས་དང་། མཇའ་ལ་ཆགས་པའི་རྡུལ་གྱི་ཆ། །གནོད་ཅིང་དགའ་མེད་བཟོད་དཀའ་བ། །ངེས་པར་བཟློག་པར་དཀའ་བ་ཉིད། །ཀུན་ཏུ་རྣམ་འགྱུར་ཉིད་ཀྱིས་བསླད། །ཅེས་དང་། བདག་བྲལ་རི་དྭགས་མིག་ཅན་དེ། །འཇུག་ངོགས་ངུར་བ་མོ་བཞིན་དུ། །བ་གམ་ཅན་ན་མྱ་ངན་དག །སྒྲོག་ཅིང་མི་ཉལ་ཡོད་དམ་སྙམ། །གང་
ཕྱིར་ཆགས་པའི་མེས་གདུངས་པའི། །དཀའ་ཐུབ་སྡུག་བསྔལ་བཟོད་པར་དཀའ། །ཞེས་བཤད་པ་ཡིན་ནོ། །འདོད་པས་ཕོངས་པའི་སྡུག་བསྔལ་གྱིས་ཉེན་པ་ནི། །འདོད་པས་ཕོངས་དང་དབུལ་བའི་སྐྱེས་བུ་རྣམས། །བཀྲེས་སྐོམ་དོན་མ་གྲུབ་པའི་རེ་དོགས་ཀྱིས། །གཞན་དབང་ཁོ་ནར་ལུས་ངག་ཆུད་གསོན་པའི། །སྡུག་བསྔལ་ས་ལ་རྒྱུ་བའི་ཡི་དྭགས་དངོས། །ཇི་སྲིད་དུ་ཆོག་ཤེས་པ་དང་། འདོད་པའི་ཉེས་དམིགས་ལ་ཡིད་འབྱུང་མ་སྐྱེས་པ་ད་སྲིད་དུ་སྨོན་པའི་དོན་མ་གྲུབ་པའི་རེ་དོགས་ཀྱིས་འཇིག་རྟེན་འཆིང་བ་ཆོས་ཉིད་ཡིན་ན། བཀྲེན་ཞིང་དམན་པ་རྣམས་ནི་ཟས་གོས་གནས་མལ་ལ་སོགས་པས་ཤིན་ཏུ་ཉམ་ཐག་ཅང་། ཕ་མ་དང་། བུ་ཚ་དང་། གཉེན་བཤེས་ཀྱང་བསྲུང་མི་ནུས་པའི་སྟེང་། དཔྱ་དང་། ཁྲལ་དང་། ཞོ་ཤས་འཚོ་བས་ལུས་དང་ངག་ཆུད་གསོན་པའི་སྡུག་བསྔལ་ལ་སྤྱོད་ཅིང་ད་དུང་དེ་ལས་ལྡོག་པའི་བྱ་བ་ནི་མི་བྱེད་པའི་ཚུལ་སྔ་མ་ལས། རྡོ་ཡིས་མྱུར་དུ་བཅོམ་པ་བཞིན། །སྐྱེ་བོ་སྡུག་ལ་མྱ་ངན་བྱེད། །ཕོངས་པ་དྲག་པོ་དེ་བཟློག་པའི། །བྱ་བ་སླར་ཡང་མི་བྱེད་དོ། །ཞེས་སོ། །ད་ནི་སྡུག་བསྔལ་དེ་དག་ཐམས་ཅད་ཀྱི་རྟེན་ཉེ་བར་ལེན་པའི་ཕུང་པོ་ལྔ་ཡིན་པར་སྟོན་པའི་ཕྱིར། གཟུགས་ལ་རྟན་བཅས་ཚོར་བས་རང་བཞིན་ཤེས། །འདུ་ཤེས་ལས་དེ་རྒྱུན་ཆགས་འདུ་བྱེད་ཀྱིས། །ཕྱིན་ཆད་ས་བོན་བསྐྲུན་དང་རྣམ་ཤེས་ཀྱིས། །སྡུག་བསྔལ་ཉམས་སུ་ལེན་པའི་ཉེ་བར་ལེན། །ཕུང་པོ་ལྔ་པོ་འདི་དག་སྡུག་བསྔལ་རྣམས། །ཀུན་གྱི་འབྱུང་གནས་ཀུན་གྱི་རྟེན་དང་སྣོད། །ཀུན་གྱི་རྒྱུ་འབྲས་བདག་པོར་མཁྱེན་འཚལ་ནས། །ཀུན་འབྱུང་ལས་དང་ཉོན་མོངས་སྤང་འཚལ་ལོ། །འདི་ལྟར་གཟུགས་སམ་གཟུགས་སུ་འདུ་ཤེས་པ་ནི་སྡུག་བསྔལ་ཐམས་ཅད་ཀྱི་རྟེན་ནོ། །ཚོར་བས་ནི་དེའི་རང་བཞིན་ལ་རྣམ་
པར་རྟོག་གོ །འདུ་ཤེས་ཀྱིས་ནི་ལུ་གུ་རྒྱུད་དུ་འབྲེལ་ནས་རྒྱུན་ཆགས་སོ། །འདུ་བྱེད་ཀྱིས་ནི་སླད་ཀྱི་སྡུག་བསྔལ་མཐའ་དག་པའི་ས་བོན་བསྐྲུན་ནོ། །རྣམ་ཤེས་ཀྱིས་ནི་ཐམས་ཅད་ཀྱི་ཉེ་བར་ལེན་ཏོ། །དེ་སྐད་དུ་ཡུམ་བར་མ་ལས། རབ་འབྱོར་ཉེ་བར་ལེན་པའི་ཕུང་པོ་ལྔ་ནི་ཟག་པ་དང་བཅས་པའི་ཕྱིར་སྡུག་བསྔལ་ཐམས་ཅད་ཀྱི་གནས་སོ། །སྡུག་བསྔལ་ཐམས་ཅད་ཀྱི་རྟེན་ནོ། །སྡུག་བསྔལ་ཐམས་ཅད་ཀྱི་འབྱུང་ཁུངས་སོ། །ཞེས་སོ། །དེའི་ཕྱིར་ཉེ་བར་ལེན་པའི་ཕུང་པོ་ལྔའི་མཚན་ཉིད་ཀྱི་སྐྱེ་བའི་སྡུག་བསྔལ་གྱི་བདེན་པ་འཁོར་བའི་རང་བཞིན་ལ་ཡིད་འབྱུང་ནས་ཀུན་འབྱུང་གི་བདེན་པ་ཡང་སྲིད་པ་ལ་འབྱུང་ཞིང་སྲེད་པ། དེ་ལ་ཡིད་བདེ་ཞིང་དགའ་བའི་འདོད་ཆགས་དང་ལྷན་ཅིག་ལ་སྲིད་པ་ལ་དམིགས་ཤིང་མངོན་པར་དགའ་བ་ལས་དང་ཉོན་མོངས་པ་ལས་སྐྱེས་པའི་མི་དགེ་བའི་ཚོགས་ཇི་སྙེད་ཡོད་པ་སྤང་བར་བྱའོ། །དེ་ལྟར་སྤངས་ནས་སྐྱེས་བུ་འབྲིང་གི་ལམ། །བདེན་པ་བཞི་ཡི་ཤིང་རྟ་ལ་ཞོན་རྣམས། །འགོག་པ་མངོན་གྱུར་མྱ་ངན་འདས་པའི་ཁམས། །ཐར་བ་མཆོག་གི་གོ་འཕང་ཉིད་དུ་འགྲོ། །ཞེས་སྨོས་ནས། ཀུན་འབྱུང་བ་འགོག་པ་གང་ཡིན་པ་དེ་ནི་ཐར་པ་སྟེ། ཐར་པ་ནི་ལམ་གྱི་བདེན་པ་ཉིད་ལ་ལྟོས་དགོས་པས་ན། བཤེས་སྤྲིང་ལས། སྐྱེ་འདི་སྡུག་བསྔལ་སྲེད་པ་ཞེས་བགྱི་བ། །འདི་ནི་དེ་ཡི་ཀུན་འབྱུང་རྒྱ་ཆེན་ཏེ། །འདི་འགོག་པ་ནི་ཐར་པ་ལགས་ཏེ་དེ། །འཐོབ་བགྱིད་འཕགས་ལམ་ཡན་ལག་དེ་བརྒྱད་ལགས། །ཞེས་ཡང་དག་པའི་ལྟ་བ་ཟག་པ་མེད་པའི་ཤེས་རབ་དང་། ཡང་དག་པའི་འཚོ་བ་ཁ་གསག་དང་ལོག་འཚོ་སྤང་བ་དང་། ཡང་དག་པའི་རྩོལ་བ་ནི་བརྩོན་འགྲུས་ཏེ་དེའང་ཡང་དག་སྤོང་བ་བཞིའོ། །ཡང་དག་པའི་དྲན་པ་དམིགས་པ་མ་བརྗེད་པ། དེའང་ལུས་
དང་། ཚོར་བ་དང་། སེམས་དང་། ཆོས་ལ་དམིགས་ནས་དྲན་པ་ཉེ་བར་གཞག་པ་བཞི་ཡིན་ནོ། །ཡང་དག་པའི་ཏིང་ངེ་འཛིན་ནི་བསམ་གཏན་བཞི་པའོ། །ཡང་དག་པའི་ངག་ནི་དགེ་བའི་ལས་ཀྱི་ལམ་བཞིའོ། །ཡང་དག་པའི་ལས་ཀྱི་མཐའ་ནི་ལུས་ཀྱི་མི་དགེ་བའི་ལས་ཀྱི་ལམ་སྤོང་བའི་རང་བཞིན་གསུམ་མོ། །ཡང་དག་པའི་རྟོག་པ་ནི། གནོད་སེམས་མེད་ཅིང་དགེ་བའི་རྟོག་པ་དུ་མའོ། །དེ་ལྟར་འཕགས་པའི་བདེན་པ་བཞི་པོ་དེ་དག་མཐོང་བས་མྱ་ངན་ལས་འདས་པ་ཐོབ་པ་ལ་སྦྱོར་བར་བྱེད་པ་ནི་ཁྱིམ་པའི་རྟེན་ལའང་མ་ངེས་ཏེ། སྔ་མ་ལས། དེ་ལྟར་ལགས་པས་འཕགས་པའི་བདེན་པ་བཞི། །འཐོབ་པར་བགྱིད་སླད་རྟག་ཏུ་བརྩོན་པར་བགྱི། །པང་ན་དཔལ་གནས་ཁྱིམ་པ་རྣམས་ཀྱིས་ཀྱང་། །ཤེས་པས་ཉོན་མོངས་ཆུ་བོ་ལས་བརྒལ་བགྱིས། །ཞེས་ཁྱིམ་པ་རྒྱལ་སྲིད་ལ་གནས་པ་གཟུགས་ཅན་སྙིང་པོ་ལ་སོགས་པས་ཀྱང་འཕགས་པའི་བདེན་པ་བཞི་ཤེས་པས་ཉོན་མོངས་པའི་ཆུ་བོ་ལས་བརྒལ་བས་ན། འཕགས་པའི་ལམ་དེ་ནི་སྐྱེས་བུའི་རྩལ་གྱིས་བསྒྲུབ་པར་བྱེད་པ་ཡིན་གྱིས། དང་པོ་ནས་ཤེས་པ་ཡོངས་སུ་གྲུབ་ཟིན་པ་ཅིག་གནམ་ནས་བབས་པ་ཡང་མ་ལགས། ལོ་ཏོག་བཞིན་དུ་ས་རུམ་ནས་འཐོན་པ་ཡང་མ་ལགས་པས་ན་སོ་སོའི་སྐྱེ་བོ་ཡིན་ཡང་དགེ་བའི་བཤེས་གཉེན་ལ་བསྟེན་ནས་འབད་དེ་ཉོན་མོངས་པའི་ཆུ་བོ་ལས་བརྒལ་བ་ལ་སྐྲག་པར་མ་བྱེད་ཅིག་ཅེས་འཕགས་པ་ཀླུའི་དབང་པོས་བསྟན་པ་ཡིན་ཏེ། དེ་སྐད་དུ། གང་དག་ཆོས་མངོན་བགྱིས་པ་དེ་དག་ཀྱང་། །གནམ་ལས་བབས་པ་མ་ལགས་ལོ་ཏོག་བཞིན། །ས་རུམ་ནས་འཐོན་མ་ལགས་དེ་དག་སྔོན། །ཉོན་མོངས་རག་ལས་སོ་སོའི་སྐྱེ་བོ་ལས། །ཞེས་གསུངས་པ་ཡིན་ནོ། །དེ་ལྟ་མོད་ཀྱི་དྲན་པ་ཉེ་བར་མ་བཞག་པ་རྣམས་ནི་སྡུག་བསྔལ་ལ་བདེ་བར་འཛིན། མི་རྟག་
པ་ལ་རྟག་པར་འཛིན། བདག་མེད་པ་ལ་བདག་གོ་སྙམ་པ་དང་། མི་གཙང་པ་ལ་གཙང་ངོ་སྙམ་དུ་འདུ་ཤེས་ཕྱིན་ཅི་ལོག་བཞིར་བལྟ་བས་ངན་སོང་དང་འཁོར་བའི་རྒྱུ་བསྒྲུབ་པའི་ཕྱིར། སྔ་མ་ལས། དྲན་པ་ཉེ་བར་མ་བཞག་རྣམས་ཀྱིས་ནི། །ཕྱིན་ཅི་ལོག་བཞིར་ལྟ་བ་ཕུང་ཁྲོལ་བ། །ཞེས་གསུངས་སོ། །དེ་ལྟར་དུ་བལྟ་བའི་བདག་གཅིག་ཀྱང་མེད་ན། ལས་དགེ་བ་དང་ནི་མི་དགེ་བའི་འབྲས་བུ་སུ་ཞིག་གི་སྤྱོད་སྙམ་ན། དེའི་རང་བཞིན་བདག་གཟུགས་ལ་སོགས་པའི་ངོ་བོ་ཉིད་ཡིན་པས་བཀག་པར་བྱ་བ་ནི། བཤེས་སྤྲིང་ལས། གཟུགས་ནི་བདག་མ་ཡིན་ཞེས་གསུངས་ཏེ་བདག །གཟུགས་དང་མི་ལྡན་གཟུགས་ལ་བདག་གནས་མིན། །བདག་ལ་གཟུགས་མི་གནས་ཏེ་དེ་བཞིན་དུ། །ཕུང་པོ་ལྷག་མ་བཞི་ཡང་སྟོང་རྟོགས་བགྱིས། །ཞེས་པས། བདག་ནི་གཟུགས་ལ་སོགས་པའི་ངོ་བོ་ཉིད་མ་ཡིན་ཏེ། གཟུགས་ལ་སོགས་པ་དང་འདྲ་བ་ཁོ་ནར་མི་རྟག་པ་ཉིད་དུ་འགྱུར་བའི་ཕྱིར་རོ། །འོན་ཏེ་གཟུགས་ལ་སོགས་པ་ལས་གཞན་པ་ཞིག་ཡིན་ནོ་ཞེ་ན། དེ་ལ་དཔྱད་པར་བྱ་བ་རྣམ་པ་གསུམ་སྟེ། སྐྱོང་བྱེད་མ་ཧེ་དང་ལྡན་པ་བཞིན་དུ་གཟུགས་ལ་སོགས་པ་དང་ལྡན་པ་ཞིག་ཡིན་ནམ། སྐྱོང་བྱེད་ནེའུ་གསིང་ལ་འདུག་པ་བཞིན་དུ་གཟུགས་ལ་སོགས་པའི་སྟེང་ན་གནས་པ་ཞིག་ཡིན་ནམ། ཡང་འཁྲི་ཤིང་དང་གེལ་བ་ལ་སོགས་པ་ལ་བརྟེན་པ་ལྷང་ངེ་ལ་གཟུགས་ལ་སོགས་པ་བརྟེན་པ་ཞིག་ཡིན་གྲང་དེ་ལ་རིགས་པ་བརྗོད་དེ། བདག་གཟུགས་ལ་སོགས་པ་དབང་བ་ཅི་ཞིག་མཆིས་ཏེ། སྐྱོང་བྱེད་མ་ཧེའི་ཁྱུ་རྣམས་བཀོལ་བ་དང་། བཞོབ་ལ་སོགས་པར་དབང་བ་བཞིན་དེའི་འདོད་པས་གཟུགས་ལ་སོགས་པ་འདོར་བ་དང་ལེན་པ་ནི་མེད་དོ། །མི་འདོད་བཞིན་དུའང་གཟུགས་ལ་སོགས་པ་འཇིགས་པ་མཐོང་བའི་
ཕྱིར་བདག་གཟུགས་དང་ལྡན་པ་མ་ཡིན་ནོ། །ཕྱོགས་གཉིས་པའི་དོན། ཇི་ལྟར་འདི་གཟུགས་ལ་སོགས་པ་ལ་གནས་པ་ཞེས་བརྗོད་པར་བྱ་སྟེ། གཟུགས་ཅན་མ་ཡིན་པའི་ཆོས་ལ་ནི་སྐྱོང་བྱེད་ནེའུ་གསིང་ལ་འདུག་པ་ལྟར་བླ་འོག་ཏུ་གནས་པ་རུང་བ་མ་ཡིན་ནོ། །གང་གི་ན། དེ་དག་ནི་གནས་པ་མངོན་པར་གྱུར་པ་དེ་ལ་གནས་པའི་བདག་གིས་ཀྱང་གཟུགས་ལ་སོགས་པ་ལ་ཕན་ཅུང་ཟད་ཀྱང་མི་འདོགས་ལ། གཟུགས་ལ་སོགས་པས་ཀྱང་དེ་ལ་དེ་བཞིན་ནོ། །ཡང་འདི་དེ་ལ་ཞོན་ནས་དེ་དག་ལ་འཇུག་པར་བྱེད་དེ། དཔེར་ན་གླང་པོ་ལ་ཞོན་ནས་གླང་པོ་བཞིན་ནོ་ཞེ་ན། དེ་ཡང་རུང་བ་མ་ཡིན་ཏེ། མི་འདོད་བཞིན་དུའང་འཇུག་པ་དང་ལྡོག་པ་མཐོང་བའི་ཕྱིར། བདག་གིས་འདོད་པས་གཟུགས་ལ་སོགས་པ་ལ་འཇུག་པ་དང་ལྡོག་པར་འགྱུར་བ་ནི་མེད་དོ། །ཕྱོགས་གསུམ་པ་ལ་རིགས་པ་ནི། འཁྲི་ཤིང་ལ་སོགས་པ་ནི་ས་ལ་བརྟེན་ཅིང་། དེ་ལ་བརྟེན་ནས་གཟུགས་ལ་སོགས་པ་སྐྱེ་བ་དང་། གནས་པ་དང་འཕེལ་བ་མཐོང་བའི་ཕྱིར་རོ། །གཟུགས་ལ་སོགས་པ་མི་སྐྱེ་བ་ལ་སོགས་པ་ནི་དེ་ལྟར་བདག་ལ་རག་ལས་པ་མ་ཡིན་ཏེ། བདག་མེད་པའི་དུས་སུ་ཡང་ཕྱིའི་གཟུགས་ལ་སོགས་པ་རང་སར་ཡོད་པའི་ཕྱིར་རོ། །གང་དག་གི་ལྟར་ན་རྩྭ་ལ་སོགས་པ་སྲོག་ཡོད་པ་དེ་དག་ལྟར་ན་ལན་ཚྭ་ལ་སོགས་པ་མ་ངེས་པ་ཡིན་ནོ། །ཞེས་འཇིག་ཚོགས་ལ་ལྟ་བ་ཉི་ཤུ་མངོན་པར་གཞོམ་པ་འདི་མན་ངག་གི་དོན་པོ་ཡིན་པས་འདིར་རྒྱ་གཞུང་ལྟར་རྣམ་པར་བཞག་པ་ཡིན་ནོ། །དེའི་ཕྱིར་གཟུགས་བདག་མ་ཡིན་པ་དང་། བདག་གཟུགས་དང་མི་ལྡན་པ་དང་། གཟུགས་ལ་བདག་གནས་པ་ཡང་མ་ཡིན་པ་དང་། བདག་ལ་གཟུགས་མི་གནས་པ་དེ་བཞིན་དུ་ཚོར་བ་དང་། འདུ་ཤེས། འདུ་བྱེད་དང་། རྣམ་པར་ཤེས་པ་བཞི་པོ་ཡང་
སྟོང་པར་ཤེས་ནས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ནི་ཡེ་ཤེས་ཀྱི་རྡོ་རྗེས་བཅོམ་པ་ལ་རྒྱུན་དུ་ཞུགས་པའི་འབྲས་བུ་ཐོབ་པ་ཅེས་བྱའོ། །ཅིའི་ཕྱིར་དེ་དག་ལ་འཕགས་པའི་བདེན་པ་བྱ་ཞེ་ན། འཕགས་པ་རྒྱུན་དུ་ཞུགས་པ་ལ་སོགས་པས་བདེན་པ་ཉིད་དུ་གཟིགས་པའི་ཕྱིར་རོ། །འཕགས་པའི་མཚན་ཉིད་གང་དུ་བཞག་ན་མ་སྐྱེས་དགྲའི་འགྱོད་པ་གསལ་བ་ལས། རྡུལ་དང་ལྟ་བ་ཐམས་ཅད་དང་བྲལ་བའི་ཕྱིར་འཕགས་པ་ཞེས་བྱའོ། །ཞེས་བཤད་དོ། །རྡུལ་ཅེས་བྱ་བ་གང་ཡིན་ན། །མཽངྒལ་གྱི་བུ་ལ་སེམས་ཅན་མེད་པ་དེ་སེམས་ཅན་གྱི་རྡུལ་བྲལ། བདག་མེད་པ་སྟེ་འདོད་ཆགས་ཀྱི་རྡུལ་བྲལ། སྲོག་མེད་པ་སྟེ་སྐྱེ་འཆི་འཕོ་བ་དང་བྲལ་བ། གང་ཟག་མེད་པ་སྟེ་སྔོན་གྱི་མཐའ་དང་ཕྱི་མའི་མཐའ་ཡོངས་སུ་མ་ཆད་པ། ཞི་བ་དང་ཉེར་ཞིའི་མཚན་ཉིད་འདོད་ཆགས་དང་བྲལ་བ་ལ་སོགས་པས་བསྟན་ལ། དེ་བཞིན་དུ་འཕགས་པ་མ་ཡིན་པ་ནི་ཉོན་མོངས་ཅན་དུ་ཀླུའི་དབང་པོས་བཤད་པ་ཡིན་ནོ། །ཡང་ཐར་པ་བདག་ལ་རག་ལས་འདི་ལ་ནི། །གཞན་གྱི་གྲོགས་བགྱིར་ཅི་ཡང་མ་མཆིས་ཀྱིས། །ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། །བདེན་པ་རྣམ་པ་བཞི་ལ་འབད་པར་མཛོད། །ལྷག་པའི་ཚུལ་ཁྲིམས་ལྷག་པའི་ཤེས་རབ་དང་། །ལྷག་པའི་སེམས་ལ་རྟག་ཏུ་བསླབ་པར་བགྱི། །བསླབ་པ་བརྒྱ་རྩ་ལྔ་བཅུ་ལྷག་གཅིག་ཀྱང་། །གསུམ་པོ་འདི་ནང་ཡང་དག་འདུ་བར་འགྱུར། །ཞེས་གསུངས་པ་ལྟར་ཐར་པ་ནི་གྲོགས་ཀྱི་བསྟང་བའི་ཁོ་ན་རག་ལས་པ་མ་ཡིན་པར། བདག་འབའ་ཞིག་གི་བརྩོན་པ་ལ་ལྟོས་པ་ཡིན་ཏེ། འདུལ་བ་ལུང་ལས། ངས་ནི་ཁྱེད་ལ་ཐར་པའི་ཐབས་བསྟན་གྱིས། །ཐར་པ་རང་ལ་རག་ལས་བརྩོན་པར་གྱིས། །ཞེས་གསུངས་པ་ལྟར།
དེ་བཞིན་གཤེགས་པའི་བསྟན་པ་འབའ་ཞིག་ལ་བརྟེན་ནས་ལུས་དང་། རིགས་པ་དང་། གཏན་ཚིགས་དང་། དཔྱད་བཟོད་པ་དང་། ལྡན་པ་དང་མཐུན་པའི་མང་དུ་ཐོས་པ། ཉམས་པ། བཅོམ་པ། ལྟུང་བ། ཕམ་པར་གྱུར་པ་མེད་ཅིང་། དེའང་མྱ་ངན་ལས་འདའ་བར་ཡོངས་སུ་བསྔོ་བས་ལྷག་པའི་ཚུལ་ཁྲིམས་སོ། །ལྷག་པའི་སེམས་ཀྱི་བསླབ་པ་ནི་འཕགས་པའི་ལམ་གྱི་རྟེན་བསམ་གཏན་བཞི་པའོ། །ལྷག་པའི་ཤེས་རབ་ཀྱི་བསླབ་པ་ནི་ངེས་པར་འབྱེད་པའི་ཆ་དང་མཐུན་པའོ། །དེ་ལྟར་བསླབ་པ་གསུམ་ཀ་ཡོངས་སུ་རྫོགས་པར་བྱེད་པ་ནི་སྡེ་སྣོད་གསུམ་ཀ་ལ་ལྟོས་པ་ཡིན་ཡང་། འདིར་རེ་ཞིག་སྐྱེས་བུ་འབྲིང་གི་རང་ལམ་ཅུང་ཟད་རྣམ་པར་བཞག་ན་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་སོ་སོ་ཐར་པའི་ཚུལ་ཁྲིམས་གཞི་རྟེན་དུ་བྱས་ནས་དམ་པའི་ཆོས་འདུལ་བ་ལ་ངེས་པར་འབྱུང་བ། ཉན་ཐོས་ཐེག་པའི་ངོ་བོ་ནི་འཁོར་བ་ལས་རང་ཉིད་གཅིག་པུ་ཐར་བར་འདོད་པའི་བློ་གང་ཟག་གི་བདག་མེད་རྟོགས་པའི་ཐབས་སུ་འགྱུར་བའོ། །གང་ཟག་གི་བདག་མེད་ནི། ང་མེད་བདག་མེད་ཀྱི་གཞི་རྩ་གཅོད་པའོ། །ངེས་ཚིག་ནི་སློབ་དཔོན་ལ་ལྟོས་ནས་ཆོས་ཉན་ཤིང་ཐོས་ནས་གཞན་ལ་སྒྲོག་པའི་ཕྱིར་ཐོས་སྒྲོག་གམ་ཉན་ཐོས་སོ། །དགོས་པ་ནི་སྲིད་པ་ཐ་མའི་བྱང་ཆུབ་འགྲུབ་ནས་འཁོར་བ་ལས་ངེས་པར་འབྱིན་པའོ། །འབྲས་བུ་ནི་ལྷག་བཅས་དང་ལྷག་མེད་ཀྱི་མྱང་འདས་ཐོབ་པའོ། །དེ་ལ་དང་པོ། ཕུང་པོའི་ལྷག་མ་དང་བཅས་པ་ནི་དབང་པོ་དུལ་བས་རབ་ཏུ་ཕྱི་བའི་ཕྱིར། དུལ་བ་ཞེས་བྱ་བའི་སྒྲས་སྟོན་ཏོ། །གཉིས་པ་ནི། སྡུག་བསྔལ་ཉེ་བར་ཞི་བས་རབ་ཏུ་ཕྱེ་བའི་ཕྱིར་ཞི་བ་ཞེས་བྱ་བའི་སྒྲས་སྟོན་ཏོ། །དབྱེན་མདོ་སྡེ་པ་དང་། བྱེ་བྲག་ཏུ་སྨྲ་བ་གཉིས་ལས། དང་པོ་ནི།
བསྟན་བཅོས་ལ་ཡིད་མི་རྟོན་ཞིང་། མདོ་སྡེའི་ཕྱོགས་ལས་ལམ་བསྒྲུབ་པར་མ་ཟད། ཤེས་རབ་ཟབ་པས་ཡང་དག་པའི་སྟོང་ཉིད་དང་ཉེ་བ་ཡིན་ལ། དེའང་དམིགས་པར་བྱ་བའི་ཡུལ་བདེན་པ་བཞི་ལ་དམིགས་པར་བྱེད་པའི་ཤེས་པ་བཅུ་གཉིས་སུ་བྱེད་པས། ཉོན་མོངས་པ་ཕྲ་རྒྱས་བརྒྱད་ཅུ་རྩ་བརྒྱད་སྤངས་ཏེ། ཡེ་ཤེས་དམ་པའི་དོན་ཁོང་དུ་ཆུད་པར་འདོད་དོ། །དེ་ལ་གང་ཟག་གི་བདག་མེད་འདྲ་ཡང་། ཆོས་ཀྱི་ཁམས་བྱེ་བྲག་ཏུ་སྨྲ་བ་ལས་ཕྱོགས་གཅིག་གིས་འཕགས་ཏེ། དེའང་ཆ་དང་བཅས་པའི་རྡུལ་ཕྲན། གཙོ་བོ་སེམས་ཀྱི་གཞི། འཁོར་སེམས་ལས་བྱུང་བའི་གཞི། ལྡན་པ་མ་ཡིན་པའི་འདུ་བྱེད་ཕུང་པོའི་གཞི། འདུས་མ་བྱས་རྟག་པའི་གཞི། སྣང་བ་གཟུགས་ཀྱི་གཞི་དང་ལྔ་པོ་གཙོ་བོས་ཁེགས་ལ། ཆ་མེད་ཀྱི་རྡུལ་ཕྲན་ཙམ་མ་ཁེགས་ཏེ། ཆོས་ཀྱི་ཁམས་ཕྱོགས་བྱེད་གཟུང་ཡུལ་རགས་པའི་སྣང་བ་རྡུལ་ཕྲན་འདབ་ཆགས་རེག་ལ་མ་འབྱར་བས་བརྩམས་པ་དེའང་ཆ་མེད་དུ་རྟོགས་པས་བྱེ་བྲག་པ་ལས་འཕགས་ཏེ། དོན་གྱི་ལྟར་མེད་པས་རྡུལ་ཕྲན་ཁས་མ་བླངས་པ་དང་མཚུངས་སོ། །བྱེ་བྲག་ཏུ་སྨྲ་བ་ནི། བཤད་མཛོད་ཆེན་མོའི་རྗེས་སུ་འབྲང་ལ། ཡོད་པར་ཞེན་པ་ལ་གོམས་པ་ཤེས་ཆེ་ཞིང་མཚན་མར་འཛིན་པ་ཕྱིར་ལམ་དམན་པ་སྟེ། དེའང་རགས་པ་ཀུན་རྫོབ་ཀྱི་བདེན་པ་འདི་གཡག་རྔ་དང་ནེའུ་གསེང་ལྟར་འདོད་པས། སྣང་དུས་ན་ཚོགས་པ་གཅིག་པ་ལྟར་ཏེ། དོན་དམ་པར་རྡུལ་ཕྲན་ཆ་ལྡན་སིལ་བུར་འདོད་ལ། ཤེས་པའི་རྒྱུན་ཀུན་རྫོབ་སྐད་ཅིག་དོན་དམ་ཆ་མེད་པ་བུམ་ཆུ་ལྟ་བུ་སྟེ། ཕུང་པོ་དང་། ཁམས་དང་སྐྱེ་མཆེད་ལས། རགས་སྣང་རྡུལ་ཕྲན་བསྐོར་བ་དང་བཅས་པར་འདོད་ལ། གང་ཟག་གི་བདག་མེད་པར་ཁས་བླངས་ཀྱང་ཆོས་ཀྱི་བདག་རྡུལ་ཕྲན་དང་
སྐད་ཅིག་ཡོད་པར་ཁས་བླངས་པས་སྔ་མ་ལས་ཕྱོགས་གཅིག་གིས་དམན་ནོ། །དེ་ཡང་བདེན་པ་བཞིས་བསྡུས་པའི་ཆོས་ལ་རྒྱུ་འབྲས་སྤང་བླང་དུ་ཤེས་ནས། རྒྱུ་ཀུན་འབྱུང་བ། འགོག་པ། རྐྱེན་གྱི་རྣམ་པ་བཞི་ལ་དམིགས་ནས། ཤེས་པའི་རྣམ་པ་སྡུག་བསྔལ་ཤེས་བྱ། ཀུན་འབྱུང་སྤང་བྱ། ལམ་བསྟེན་བྱ། འགོག་པ་ཐོབ་བྱའི་ཚུལ་གྱིས་ཤེས་པར་བྱ་བ་དང་། སྡུག་བསྔལ་བས་སྤང་བྱ་དང་། སྟོང་པ་དང་། བདག་མེད་པར་རྟོགས་པའི་རྣམ་པས། ལམ། རིག་པ། བསྒྲུབ་པ། ངེས་པར་འབྱིན་པས། འགོག་པ། ཞི་བ། གྱ་ནོམ་པ། བདག་མེད་པའི་ངང་ཚུལ་བསྒོམ་པས། ཁམས་གསུམ་གྱི་མཐོང་བ་དང་། བསྒོམ་པས་སྤང་བར་བྱ་བ་བཞི་བརྒྱ་དང་བཅུ་བཞི་སྤངས། ཟད་པ་དང་། མི་སྐྱེ་བ་ཤེས་པའི་ཡེ་ཤེས་དམ་པ་མངོན་དུ་རྟོགས་ནས་གྲོལ་བར་འདོད་པའོ། །གྲུབ་མཐའ་གཉིས་ཀའང་ལམ་བསྒོམ་དུས་ལམ་ལྔ་སྐྱེ་བའི་རིམ་པས་ནན་ཏན་དུ་བྱེད་པ་ན། དུག་གསུམ་སྤྱིའི་གཉེན་པོར་བདག་མེད་པ་དང་སྒྱུ་མ་བསྒོམ་ལ། སོ་སོའི་གཉེན་པོར། འདོད་ཆགས་ལ་མི་གཙང་བའི་རྫས་བརྒྱད་དང་། ཀེང་རུས་བསྒོམ་ལ། ཞེ་སྡང་ལ་བྱམས་པ་དང་། གཏི་མུག་ལ་རྟེན་འབྲེལ་འབྱུང་ལྡོག་བསྒོམ་ཞིང་། རྣམ་རྟོག་གི་གཉེན་པོར་དབུགས་འབྱུང་རྔུབ་བགྲང་གཞི་གཞལ་དུ་བསྒོམ་མོ། །དེའི་བདག་མེད་བསྒོམ་པའང་ཡུལ་དང་ཡུལ་ཅན་འགགས་པའི་འགོག་པ་ཅི་ཡང་མི་དམིགས་པའི་དོན་བསྒོམ་ཞིང་། བྱིང་རྨུགས་གཏི་མུག་གི་གཉེན་པོར་སྤྱི་གཙུག་ཏུ་མར་མེ་ལ་སེམས་གཏོད་པའོ། །དེ་ལྟར་བྱས་པས། དབང་པོ་རྟུལ་འབྲིང་ཡིན་ཡང་བརྩོན་འགྲུས་ཆེན་པོ་དང་ལྡན་ན་ཚེ་དེ་ཉིད་ཀྱིས་འབྲས་བུ་ཐོབ་ལ། རྣོན་པོ་དང་། བྱང་ཆུབ་སེམས་དཔའ་ཁ་ཅིག་ལམ་ལྔ་སྔོན་སོང་གི་ཚོགས་མང་དུ་བསགས་པའི་རྟེན་ལ་སྟན་ཐོག་གཅིག་ཏུ་
ལམ་ལྔ་རྫོགས་པར་འདོད་པའོ། །དེའང་ཉན་ཐོས་ཀྱི་ཐེག་པ་ནས། རང་ལམ་དེ་བློ་ཆུང་བ་དང་། འབྲིང་དང་། ཆེ་བས་ཉན་ཐོས་དང་། རང་སངས་རྒྱས་དང་། སངས་རྒྱས་ཀྱི་བྱང་ཆུབ་གསུམ་འགྲུབ་པར་འདོད་ཀྱིས། སྔགས་ཀྱི་ལམ་ལྟ་ཅི་ཐེག་པ་ཆེན་པོ་ཞེས་བྱ་བ་ཡང་མི་འདོད་ཅིང་བློར་མི་ཆུད་པས་ན་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེས་རིགས་ཅན་གསུམ་གྱི་ཐེག་པ་རྣམ་པར་བཞག་པའོ། །རང་སངས་རྒྱས་ཀྱི་ཐེག་པའི་ངོ་བོ་ནི། བསེ་རུ་དང་ཚོགས་སྤྱོད་ཆེ་ཆུང་གི་དབྱེ་བས་ཚོགས་བསྐལ་ཆེན་བརྒྱ་ནས་མི་ཚེ་བཅོ་ལྔ་ཡན་ཆད་ཀྱི་བསྡུས་པ་བསགས་པའི་རྟེན་དེ་ཉིད་ལ་བྱང་ཆུབ་ཐོབ་པའི་སྐལ་བ་མེད་པར་རིགས་ནས། ཉན་ཐོས་ཀྱི་སྡེ་སྣོད་ལ་ཐོས་བསམ་མཁས་པར་བྱས་ཏེ། སྨོན་ལམ་རྣམ་པ་གསུམ་བཏབ་པ་ལ་བརྟེན། སྐྱེ་བ་དེའི་འོག་ཏུ་སངས་རྒྱས་དང་ཉན་ཐོས་མེད་པའི་འཇིག་རྟེན་དུ་སྐྱེས་ནས་སློབ་དཔོན་ལ་མ་བརྟེན་པར་སྲིད་པ་ཐ་མའི་ཚེ་མངོན་དུ་བྱེད་པའི་ཐབས་བདག་མེད་ཕྱེད་དང་གཉིས་རྟོགས་པའི་རང་བཞིན་ཅན་ནོ། །ངེས་ཚིག་ནི་སེམས་ཅན་མང་པོའི་དོན་དུ་སེམས་མི་བསྐྱེད་པར་རང་ཉིད་གཅིག་པུ་སངས་རྒྱས་སུ་འདོད་པའོ། །དགོས་པ་ནི་འཁོར་བ་ལས་ཐར་པའི་བྱང་ཆུབ་འབྲིང་ཐོབ་པའོ། །འབྲས་བུ་ནི་དགྲ་བཅོམ་གཉིས་སོ། །དབྱེ་ན་ནེ་ཙོ་ལྟར་ཁྱུས་འཚོ་བ་དང་། བསེ་རུ་ལྟར་གཅིག་པུར་གནས་པ་གཉིས་ལས། ནེ་ཙོ་ལྟ་བུ་ནི་རྟེན་འབྲེལ་ལུགས་ལྡོག་ཏུ་བསྒོམ་སྟེ་དུར་ཁྲོད་དུ་སོང་ནས་རུས་པ་མཐོང་མ་ཐག་ཡིད་བྱུང་ནས། ཀྱེ་མ་རུས་པ་འདི་དག་ཅི་ལས་བྱུང་། རྒ་ཤི་ལས་བྱུང་། རྒ་ཤི་ཅི་ལས་བྱུང་སོགས་རྟེན་འབྲེལ་ལུགས་འབྱུང་དུ་བརྟགས་པའི་མཐར། འདི་ལས་ཇི་ལྟར་ཐར་བར་བྱ་སྙམ་པ་ལས། ཡང་མ་རིག་པ་འགགས་ནས་རྒ་ཤིའི་བར་དུ་
འགག་པའི་རྟེན་འབྲེལ་ལུགས་ལྡོག་རྩ་བ་ཆོད། བདག་མེད་ཕྱེད་དང་གཉིས་རྟོགས་པ་གཞིར་བྱས་ཏེ། སྦྱོར་ལམ་ལ་སོགས་པའི་ལམ་གྱི་རྟོགས་པ་རང་བྱུང་དུ་རྒྱུད་ལ་སྐྱེས་ནས་བསྒོམ་ལམ་གྱི་མཐར་ཟད་པ་དང་། མི་སྐྱེ་བ་ཤེས་པའི་ཡེ་ཤེས་གཉིས་མངོན་དུ་བྱས་ནས་དགྲ་བཅོམ་ཐོབ་པའོ། །བསེ་རུ་ལྟ་བུ་ནི། དམིགས་ཡུལ་བདེན་པ་བཞིས་བསྡུས་པའི་ཆོས་རྣམས་ལ་རྟེན་འབྲེལ་བཅུ་གཉིས་ལུགས་འབྱུང་དུ་བསྒོམས་པས། ཁམས་གསུམ་པའི་ཕྲ་རྒྱས་ཐམས་ཅད་སྤང་བར་འདོད་དོ། །དེ་ཡང་མ་རིག་པའི་རྒྱུ་ལས་འདུ་བྱེད། དེ་ལས་རྣམ་པར་ཤེས་པ་ནས་རྒ་ཤིའི་བར་ལ་སྔ་ཕྱི་རྒྱུ་འབྲས་སུ་ཤེས་ནས། ལྟ་བ་གང་ཟག་གི་བདག་དང་། ཆོས་བདག་གི་ཕྱེད་ཕྱི་བཟུང་བ་རྡུལ་ཕྲན་ཆ་བཅས་དང་ཆ་མེད་གཉིས་ཀ་མེད་པར། གཟུགས་བརྙན་ལྟར་རང་བཞིན་གྱིས་ངོ་བོ་མེད་ཅིང་མ་སྐྱེས་པར་རྟོགས་པའོ། །དེའང་ཆོས་བདག་ལ་ཕྱི་གཟུང་བ་དང་། ནང་གཉེན་པོར་འཛིན་པའི་ཤེས་པ་གཉིས་བདེན་པར་སྒྲོ་བཏགས་པ་ཡིན་ལ། གང་ཟག་གི་བདག་ནི་ཕུང་པོ་ལྔས་བསྡུས་པའི་ཆོས་ལ་སྤང་བྱའི་ཤེས་པར་དང་ང་ཡིར་འཛིན་པ་སྟེ། གང་ཟག་དང་ཆོས་ཀྱི་བདག་ཅེས་བྱའོ། །འཕགས་པ་ཉན་ཐོས་ཀྱིས་གང་ཟག་གི་བདག་མེད་རྟོགས་ཀྱང་ཆོས་ཀྱི་མ་རྟོགས། རང་སངས་རྒྱས་ཀྱི་དེའི་སྟེང་དུ་ཆོས་ཀྱི་ཕྱེད་ཕྱི་གཟུང་བ་མེད་པར་རྟོགས་ཀྱང་། ནང་འཛིན་པ་མེད་པར་མ་རྟོགས་སོ། །དེའི་རང་བཞིན་གོ་བདེ་བར་བརྗོད་ན། གཟུང་བ་ཆོས་ཀྱི་བདག་མེད་ནི། །ཕྱི་རོལ་གྱི་ཡུལ་ཐམས་ཅད་རང་བཞིན་མེད་པར་བསྒོམ་པའོ། །འཛིན་པ་ཆོས་ཀྱི་བདག་མེད་ནི། འཛིན་བྱེད་ཀྱི་ཤེས་པ་སྐྱེ་འགག་གནས་གསུམ་དང་བྲལ་བའི་སྐྱེ་མེད་སྟོང་པ་ཉིད་དེ། ཕྱི་མ་འདི་ཐེག་པ་ཆེན་པོས་རྟོགས་པ་ཡིན་པས་ཉན་རང་གིས་མ་རྟོགས་པའི་ཕྱིར་ཆོས་ཀྱི་བདག་མེད་ལ་ཕྱེད་སྒྲ་
ཞུགས་པའོ། །རང་སངས་རྒྱས་རིགས་གཉིས་ཀའང་ལུས་ཀྱི་བརྡའི་སྒོ་ནས་ཆོས་སྟོན་གྱིས། ངག་གི་སྒོ་ནས་མི་སྟོན་པའོ། །དེ་ཡང་ཉན་རང་གཉིས་ཀ་ལ་དཀར་པོ་རྣམ་པར་མཐོང་བའི་ས་ལ་སོགས་པ་དམན་པའི་ས་བརྒྱད་བཤད་དེ། དེ་ལ་བརྟེན་ནས་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་སྟེ། རེ་རེ་ལ་ཞུགས་པ་དང་། གནས་པ་གཉིས་གཉིས་སུ་ཕྱེ་བས་སྐྱེས་བུ་ཆེན་པོའི་རིམ་པ་བརྒྱད་དམ་ཟུང་བཞི་ཡ་བརྒྱད་ཅེས་ཀྱང་གྲགས་པའོ། །བྱང་ཆུབ་སེམས་དཔའ་ལ་ནི་རབ་ཏུ་དགའ་བ་ལ་སོགས་པའི་ས་བཅུ་ལའང་དགེ་སྦྱོང་གི་འབྲས་བུ་བཞི་ཡོད་པར་བཤད་པ་ལ་སོགས་ནི་རྒྱལ་བ་གཉིས་པའི་ལུགས་རྣམ་པར་བཞག་པ་ཡིན་ནོ། །དེ་ཡང་དགྲ་བཅོམ་པ་ཞེས་པ་ནི་ཡེ་ཤེས་གཉིས་ལྡན་གྱི་འབྲས་བུ་ཡིན་ཏེ། གང་ཞེ་ན་ཟད་པ་དང་། མི་སྐྱེ་བ་ཤེས་པའོ། །དེ་ལྟར་ཉན་རང་གི་དགྲ་བཅོམ་དེ་དག་ལྷག་མེད་དུ་འདས་ནས་འགོག་པའི་དབྱིངས་ལ་བཞུགས་པ་ཉིད། རང་གི་ལུགས་ལ་རྟག་པར་མི་གཡོ་བར་འདོད་ཀྱང་། ཐེག་ཆེན་པས་ཡས་གཞལ་ན། སྔར་ཚོགས་ཇི་ཙམ་བསགས་པའི་ཡུན་དུ་བློའི་འཇུག་པ་ཞི་བར་ཐིམ་ཡང་། དེ་ནས་བདེ་བ་ཅན་ལ་སོགས་པའི་དག་ཞིང་དུ་པདྨོའི་སྦུབས་སུ་སྐྱེ་བ་བཟུང་ནས་མ་རིག་པའི་བག་ཆགས་དང་། ཤེས་བྱའི་སྒྲིབ་པ་ཕྲ་མོའི་མཐུས་ལོ་བདུན་དུ་པདྨོ་ཁ་ཟུམ་ནས་གནས་པ་ལ། ཞིང་དེའི་སངས་རྒྱས་ཀྱི་ཐུགས་རྗེའི་མཐུས་པདྨོ་ཁ་འབྱེད་ཅིང་། ཏིང་ངེ་འཛིན་དེ་ལས་བསླང་བས། ཐེག་པ་ཆེན་པོ་ལ་འཇུག་པའི་སྤྲོ་བ་སྐྱེས་ནས་ལམ་བསྒོམ་པས་སྐུ་ཚེ་དེ་ཉིད་ལ་འཚང་རྒྱ་བ་ནི། པདྨ་དཀར་པོ་ལས། ཉན་ཐོས་དེ་དག་ཇི་སྲིད་དུ། །སངས་རྒྱས་རྣམས་ཀྱིས་མ་
བསྐུལ་བ། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་ཆགས་འབྱུང་ཞིང་། །བསོད་ནམས་ཡེ་ཤེས་ཚོགས་བསགས་ཏེ། །སངས་རྒྱས་བྱང་ཆུབ་ཐོབ་པར་འགྱུར། །ཞེས་པ་དང་མཐུན་པ་ལང་ཀར་གཤེགས་པ་ལས་ཀྱང་བཤད་དོ། །དེ་ལྟ་བུའི་མྱ་ངན་ལས་འདས་པ་ཐོབ་པའི་བར་ཆད་དུ་གྱུར་པ་ནི་འཇིག་རྟེན་ན་ལུང་མ་བསྟན་པ་བཅུ་བཞིར་གསུངས་པ་སྟེ། འདི་ལྟར་འཇིག་རྟེན་རྟག་པ་དང་། མི་རྟག་པ་དང་། རྟག་པ་ཡང་ཡིན། མི་རྟག་པ་ཡང་ཡིན་པ་དང་། རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་དང་། འཇིག་རྟེན་མཐའ་དང་ལྡན་པ་དང་། འཇིག་རྟེན་མཐའ་དང་མི་ལྡན་པ་དང་། མཐའ་དང་ལྡན་པ་ཡང་ཡིན། མཐའ་དང་མི་ལྡན་པ་ཡང་ཡིན་པ་དང་། མཐའ་དང་ལྡན་པ་ཡང་མ་ཡིན་མཐའ་དང་མི་ལྡན་པ་ཡང་མ་ཡིན་པ་དང་། དེ་བཞིན་གཤེགས་པ་ཤི་ཕན་ཆོད་ཡོད་པ་དང་། དེ་བཞིན་གཤེགས་པ་ཤི་ཕན་ཆད་མེད་པ་དང་། དེ་བཞིན་གཤེགས་པ་ཤི་ཕན་ཆད་ཡོད་ཀྱང་ཡོད་ལ་མེད་ཀྱང་མེད་པ་དང་། དེ་བཞིན་གཤེགས་པ་ཤི་ཕན་ཆད་ཡོད་པ་ཡང་མ་ཡིན་མེད་པ་ཡང་མ་ཡིན་པ་དང་། སྲེག་གང་ཡིན་པ་དེ་ལུས་ཡིན་པ་དང་། སྲོག་ཀྱང་གཞན་ལ་ལུས་ཀྱང་གཞན་ཞེས་བྱ་བ་སྟེ། དངོས་པོ་བཅུ་བཞི་པོ་འདི་དག་དྲིས་ན་ལུང་མ་བསྟན་པར་བྱ་བ་ཡིན་པས་དེ་དག་གི་བློ་ཞི་བར་མི་ནུས་པས་བསམ་པར་མི་བྱེད་པའི་ཚུལ། བཤེས་སྤྲིང་ལས། ལུང་མ་བསྟན་པ་བཅུ་བཞི་འཇིག་རྟེན་ན། །ཉི་མའི་གཉེན་གྱིས་རབ་གསུངས་གང་དག་ལགས། །དེ་དག་རྣམས་ལ་བསམ་པར་མི་བགྱི་སྟེ། །དེ་ཡིས་བློ་འདི་ཞི་བར་བགྱིད་མ་ལགས། །ཞེས་སོ། །འོ་ན་གང་ཞིག་བསམ་པས་བྱང་ཆུབ་ཀྱི་ཕྱོགས་དང་མཐུན་པ་མཐའ་དག་སྐྱེ་བར་
འགྱུར་ན། རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པོ་འདིས་རྒྱལ་བ་བདེན་པར་སྨྲ་བའི་ཆོས་ཀྱི་དེ་ཉིད་རྣམ་པར་རིག་ཅིང་གྲུབ་པའི་མཐའ་ཐམས་ཅད་གཏན་ལ་འབེབས་པའི་མཛོད་ཡིན་པར་སྟོན་པའི་ཕྱིར། རྟེན་ཆོས་ཀུན་གྱི་རྩ་བ་མ་རིག་པ། དེ་ལས་འདུ་བྱེད་རྣམ་ཤེས་མིང་དང་གཟུགས། །དེ་ལས་སྐྱེ་ཤིང་མཆེད་པ་རྣམ་པ་དྲུག །དེ་ལས་རེག་པ་དེ་ལས་ཚོར་བ་སྟེ། །དེ་ལས་སྲེད་པ་སྲེད་ལས་ལེན་པ་དང་། །དེ་ལས་སྲིད་པ་སྲིད་ལས་སྐྱེ་བ་སྟེ། །སྐྱེ་བ་ཡོད་ན་འདོད་པས་ཕོངས་པ་དང་། །མྱ་ངན་ན་རྒ་འཆི་སོགས་སྡུག་བསྔལ་གྱི། །ཕུང་པོ་ཤིན་ཏུ་ཆེ་བ་གྲུབ་པའི་ཕྱིར། །སྐྱེ་བ་འགགས་པས་ཐམས་ཅད་འགག་འགྱུར་བའི། །རྟེན་ཅིང་འབྲེལ་འབྱུང་རྒྱུ་འབྲས་ཟབ་མོ་ནི། །རྒྱལ་བ་བདེན་པར་སྨྲ་བའི་གསུང་གི་མཛོད། །ཅེས་སྨོས་ནས། མ་རིག་པའི་རྐྱེན་གྱིས་འདུ་བྱེད། འདུ་བྱེད་གྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། །དེ་བཞིན་དུ་སྦྱར་ནས་སྐྱེ་བའི་རྐྱེན་གྱིས་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། ཡིད་མི་བདེ་བ་ལ་སོགས་སྡུག་བསྔལ་གྱི་ཕུང་པོ་ཆེན་པོ་ཐམས་ཅད་འབྱུང་བས་ན། བཤེས་སྤྲིང་ལས། སྐྱེ་བ་བཟང་པོ་མ་ལགས་སྐྱེ་བ་ནི། །གནོད་པ་དུ་མའི་སྣོད་གྱུར་ལགས་མཁྱེན་མཛོད། །ཅེས་སོགས་གསུངས་པ་བཞིན་ནོ། །དེ་ལྟར་ལུགས་ལས་འབྱུང་བའི་རྟེན་འབྲེལ་དེ་ཉིད་ལྡོག་པར་བྱས་པས་སྐྱེ་བ་འགག་པར་འགྱུར་ཏེ། སྐྱེ་བ་འགགས་པས་རྒ་བ་དང་འཆི་བ་ལ་སོགས་སྡུག་བསྔལ་གྱི་ཕུང་པོ་འབའ་ཞིག་པ་འདི་འགག་པར་འགྱུར་ལ། དེ་བཞིན་དུ་སྐྱེ་བ་འགགས་པས་སྲིད་པ་འགག་པར་འགྱུར་ལ། མ་རིག་པ་འགགས་པས་འདུ་བྱེད་འགགས་
པའི་བར་དུ་འགྱུར་རོ། །མ་རིག་པ་ནི། མདོ་སྡེ་ནས་གང་སྔོན་གྱི་མཐའ་མི་ཤེས་པ་ཞེས་བྱ་བ་ལ་སོགས་བསྟན་ཀྱང་། དོན་ལ་སོ་སོ་རང་རིག་གི་ཡེ་ཤེས་ཀྱི་བདེན་པ་རྣམས་མི་ཤེས་པ་དེ་ནི་དོན་དམ་པར་མ་རིག་པ་ཡིན་ནོ། །བྱིས་པ་མ་རིག་པ་དེ་དང་ལྡན་པའི་ལས་དགེ་བ་དང་། མི་དགེ་བ་དང་། མི་གཡོ་བ་ནི་མ་རིག་པའི་རྐྱེན་གྱིས་འདུ་བྱེད་རྣམས་ཡིན་ནོ། །དེ་སྐད་དུ་རྩ་ཤེ་ལས། མ་རིག་པས་སྒྲིབ་ཡང་སྲིད་ཕྱིར། །འདུ་བྱེད་རྣམ་པ་གསུམ་པོ་དག །མངོན་པར་འདུ་བྱད་གང་ཡིན་པའི། །ལས་དེ་དག་གི་འགྲོ་བར་འགྲོ། །ཞེས་སོ། །དེ་ཡང་འདུ་བྱེད་ཀྱིས་གང་བྱས་པ་དང་མཐུན་པའི་རྣམ་པར་འགྲོ་བ་གང་རུང་དུ་འགྲོ་ཞིང་དེའི་ཤེས་པ་བསྐྱེད་པ་ནི་རྣམ་པར་ཤེས་པའོ། །མདོ་ལས་ནི་འབྲས་བུ་རྒྱུས་བསྟན་པའི་དབང་དུ་མཛད་ནས། རྣམ་པར་ཤེས་པ་ཚོགས་དྲུག་གོ །ཞེས་གསུངས་སོ། །རྣམ་པར་སྨིན་པའི་རྣམ་པར་ཤེས་པ་ནི་ཕྲ་བ་ཉིད་ཀྱིས་རང་གི་ངོ་བོ་བསྟན་པར་བྱ་བ་མ་ཡིན་ཏེ། འབྲས་བུ་བསྟན་པའོ། །རྣམ་པར་ཤེས་པ་དེ་ཡང་རང་གི་འགྲོ་བ་དེར་འཇུག་དུས་ཁུ་རྡུལ་རླུང་སེམས་འདུས་པའི་ཆ་དེར་ཞུགས་པ་ལས་འདུ་བྱེད་རྣམས་ཀྱིས་རིམ་པ་གང་གིས་མིང་གཟུགས་ལ་སོགས་པ་མངོན་པར་འགྲུབ་པར་བྱེད་པ་འཕངས་པའི་རིམ་པ་དེ་ཁོ་ནས་རྐྱེན་དུ་གྱུར་པའི་ཕྱིར་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ནས་རེག་པའི་རྐྱེན་གྱིས་ཚོར་བ་ཞེས་བྱ་བའི་བར་གྱིས་བཤད་དོ། །མིང་དང་གཟུགས་ནི། མའི་མངལ་དུ་ཉིང་མཚམས་སྦྱོར་བའི་གནས་སྐབས་ནས་ཚོར་བ་དང་། འདུ་ཤེས་དང་། འདུ་བྱེད། རྣམ་པར་ཤེས་པ་སྟེ་གཟུགས་ཅན་མ་ཡིན་པའི་ཕུང་པོ་བཞི་ནི་མིང་ཡིན་ལ། དེ་དག་འབྱུང་བ་དང་རྒྱུར་བྱས་པའི་གཟུགས་ཅི་རིགས་པར་སྦྱོར་རོ། །དེ་ལ་ཕུང་པོ་བཞི་ནི་ཡུལ་ལ་འགྲོ་བ་ཉིད་དང་ཡང་སྲིད་པར་འཁྲིད་
པའི་ཕྱིར་མིང་ཉིད་ཡིན་ནོ། །འབྱུང་བ་དང་རྒྱུར་བྱས་པའི་གཟུགས་ནི་ཚ་གྲང་ལ་སོགས་པས་འགྱུར་བ་བསྐྱེད་པའི་ཕྱིར་གཟུགས་ཉིད་ཡིན་ནོ། །མིང་དང་གཟུགས་དེ་ཉིད་རྣམ་པར་འཕེལ་བས་རིམ་གྱིས་མིག་དང་རྣ་བ་ལ་སོགས་སྐྱེ་བའི་གནས་སྐབས་ནི་སྐྱེ་མཆེད་དྲུག་གི་རྐྱེན་དུ་འགྱུར་ཏེ། གནས་སྐབས་དེ་ནི་སྐྱེ་མཆེད་དྲུག་རྫོགས་པར་འགྱུར་བས་སོ། །སྐྱེ་མཆེད་དྲུག་ཉིད་ནི་སེམས་དང་སེམས་ལས་བྱུང་བ་རྣམས་སྐྱེ་བའི་སྒོའི་དོན་གྱིས་སོ། །སྐྱེ་མཆེད་དྲུག་པོ་དེ་དག་ཡོངས་སུ་སྨིན་པ་དང་། དབང་པོ་དང་། ཡིད་ལ་བྱེད་པ་དང་། ཡུལ་གསུམ་འདུས་ཤིང་མངོན་དུ་གྱུར་པ་ལས་རེག་པ་སྐྱེ་སྟེ། དཔེར་ན་གཟུགས་དང་། མིག་དབང་དང་། མིག་ཤེས་གསུམ་འདུས་པ་ལས་མིག་གི་འདུས་ཏེ་རེག་པ་སྐྱེ་བ་ལྟར། མིང་གཟུགས་རྣམ་ཤེས་གསུམ་ལས་མངལ་དུ་རེག་པ་སྐྱེ་བའི་རྟེན་གྱི་བྱེ་བྲག་གི་སྐྱེ་མཆེད་རྣམ་པ་དྲུག་ཁོ་ནའོ། །གཞན་ཡང་བདེ་བ་མྱོང་བར་འགྱུར་བ་ལ་སོགས་པའི་རེག་པ་ཅི་འདྲ་བ་དེ་དང་དེ་འདྲ་བར་བདེ་བ་དང་། སྡུག་བསྔལ་དང་། གཉིས་ཀ་མ་ཡིན་པའི་ཚོར་བ་སྐྱེའོ། །དེ་ལྟར་ནང་དུ་འདུ་བྱེད་རྣམས་ཀྱིས་འཕགས་པའི་ཡན་ལག་སྲེད་པ་དང་ལེན་པས་མངོན་པར་བརླན་པ་ནི་འཆི་བའི་དུས་ནི་སྲེད་པར་འགྱུར་རོ། །དེ་ནས་ཇི་ལྟར་འཕངས་པའི་རིམ་པས་སྐྱེ་བར་ཡང་འགྱུར། རྒ་བ་དང་འཆི་བར་ཡང་འགྱུར་རོ། །དེ་ལ་སྲེད་པའི་མཚན་ཉིད་ནི་ཚོར་བ་ལས་སྲེད་པ་འཕེལ་ཏེ་བུར་ཤིང་གི་མངར་བ་ཚོར་བས་དེའི་རོ་ལ་སྲེད་པའམ། དེ་ལས་ལྡོག་པ་སྟེ། ཚོར་བ་བདེ་བ་ནི་མི་འབྲལ་བར་འདོད། སྡུག་བསྔལ་ནི་འབྲལ་བར་འདོད། གཉིས་ཀ་མ་ཡིན་པ་ལ་གཉིས་ཀར་མི་འདོད་པའོ། །དེ་ཡང་མདོ་ལས་འདོད་པ་དང་། གཟུགས་དང་
གཟུགས་མེད་ན་སྤྱད་པའི་བྱེ་བྲག་གིས་རྣམ་པ་གསུམ་དུ་བསྟན་ཏོ། །ལེན་པ་ནི་ཉེ་བར་ལེན་པ་སྟེ་འདོད་པ་ལ་སོགས་པ་ལ་འདུན་པའི་འདོད་ཆགས་གང་ཡིན་པའོ། །མདོ་ལས་ནི་དམིགས་པའི་བྱེ་བྲག་གི་འདོད་པ་དང་། ལྟ་བ་དང་། ཚུལ་ཁྲིམས་དང་། བརྟུལ་ཞུགས་དང་། བདག་ཏུ་བལྟ་བའི་ཉེ་བར་ལེན་པ་ཞེས་བྱ་བ་རྣམ་པ་བཞིར་བསྟན་ཏེ། འདུན་པའི་འདོད་ཆགས་དེས་འདོད་པ་ལ་སོགས་པ་ཉེ་བར་བླངས་པར་འགྱུར་བས་སོ། །སྲེད་པ་དང་ལེན་པ་གཉིས་ལ་ཁྱད་པར་འདི་ཡོད་དེ། ཁྱད་པར་མེད་པ་ཡང་སྲིད་པ་མངོན་པར་འདོད་པ་ནི་སྲེད་པའོ། ཁྱད་པར་དུ་མངོན་པར་འདོད་པ་ནི་ལེན་པའོ། །ཡང་ན་རིང་བའི་རྒྱུ་སྲེད་པ་དང་། ཉེ་བའི་རྒྱུ་ལེན་པ་ཡིན་པར་རིགས་པར་བྱའོ། །འདུ་བྱེད་ཀྱི་ས་བོན་སྲེད་པ་དང་ལེན་པས་མངོན་པར་བརླན་པ་དེ་ཉིད་འབྲས་བུ་བསྐྱེད་པར་མངོན་དུ་ཕྱོགས་པ་ནི་སྲིད་པ་ཞེས་བྱ་སྟེ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་ལྔ་ནི་སྲིད་པ་ཡིན་ནོ། །མདོ་ལས་ནི་སྔ་མ་བཞིན་དུ་ཁམས་གསུམ་པའི་སྲིད་པ་ཞེས་གསུངས་སོ། །འོན་ཀྱང་འདིར་ནི་འདས་པའི་སྲིད་པ་ཁོ་ན་ཡིན་པར་བཟུང་ངོ་། །སྲིད་པའི་མཇུག་ཐོགས་སུ་སྐྱེ་བ་ཡིན་ཏེ། མིང་དང་གཟུགས་ཀྱི་རིམ་གྱིས་ཚོར་བའི་བར་ཉིད་དོ། །སྐྱེས་ནས་ནི་རྒ་བ་དང་། འཆི་བ་ལ་སོགས་པར་འགྱུར་རོ། །ཡང་ཡན་ལག་བཅུ་གཉིས་མདོར་བསྡུས་ན། ཡན་ལག་བཞིར་ནི་བགྲངས་པ་སྟེ། །གསུམ་དང་བཞི་དང་གསུམ་དང་ནི། །གཉིས་པོ་དག་སྟེ་གོ་རིམ་བཞིན། །ཞེས་པ་ལྟར་འཕེན་པར་བྱེད་པའི་ཡན་ལག་དང་། འཕངས་པའི་ཡན་ལག་དང་། མངོན་པར་འགྲུབ་པར་བྱེད་པའི་ཡན་ལག་དང་། མངོན་དུ་འགྲུབ་པར་བྱེད་པའི་ཡན་ལག་གོ །ཞེས་རེ་ཞིག་སྐྱེ་བ་
གཉིས་རྣམ་པར་བཞག་པའི་དབང་དུ་མཛད་ནས་བཤད་དོ། །མདོ་ལས་ནི་མ་རིག་པ་དང་འདུ་བྱེད་འདི་ནི་སྔོན་གྱི་མཐའ་བའི་འཕེན་པར་བྱེད་པ་ཡིན་ནོ་ཞེས་འབྱུང་བའི་ཕྱིར། ཡན་ལག་བཅུ་གཉིས་སྐྱེ་བ་གསུམ་དུ་རྣམ་པར་བཞག་པའི་ཚུལ། མ་རིག་པ་དང་འདུ་བྱེད་ནི་འདས་པའི་སྐྱེ་བའོ། །རྣམ་པར་ཤེས་པ་ནས་སྲིད་པའི་བར་དུ་ནི་ད་ལྟར་འབྱུང་བའི་སྐྱེ་བའོ། །སྐྱེ་བ་དང་རྒ་བ་ནི་མ་འོངས་པའི་སྐྱེ་བའོ། །དེ་ལས་འདས་པའི་སྐྱེ་བ་ནི་མ་རིག་པའི་རྐྱེན་གྱིས་འདུ་བྱེད་བྱས་པ་རྣམས་ཀྱིས་སྐྱེ་བ་འདི་ལ་ཉིང་མཚམས་སྦྱོར་བའི་རྣམ་པར་ཤེས་པ་ནས་བཟུང་སྟེ། ཚོར་བའི་བར་གྱིས་རྣམ་པར་སྨིན་པ་འགྲུབ་ལ། ད་ལྟར་བྱུང་བའི་སྲེད་པ་དང་། ལེན་པ་དང་། སྲིད་པ་རྣམས་ཀྱིས་མ་འོངས་པའི་སྐྱེ་བ་ལ་སོགས་པ་བསྐྱེད་དོ། །སྐྱེ་བ་གསུམ་རྣམ་པར་བཞག་པའི་དགོས་པ་ནི། སྔོན་དང་ཕྱི་མའི་མཐའ་དང་། བར་དག་ལ་ཀུན་ཏུ་རྨོངས་པ་རྣམ་པར་བཟློག་པ་ཡིན་ནོ། །ཞེས་གསུངས་སོ། །ཡང་རྟེན་ཅིང་འབྲེལ་བར་འབྱུང་བ་དེ་ལམ་གསུམ་དུ་བཞག་པ་ནི། མ་རིག་པ་དང་སྲེད་པ་དང་ལེན་པ་རྣམས་ཉོན་མོངས་པའི་ལམ་མོ། །འདུ་བྱེད་དང་སྲིད་པ་ནི་ལས་ཀྱི་ལམ་མོ། །ཡན་ལག་ལྷག་མ་རྣམས་ནི་རྣམ་པར་སྨིན་པའི་ལམ་མོ། །ཞེས་སློབ་དཔོན་བློ་གྲོས་ཆེན་པོས་ལུང་དང་ཡང་བསྟུན་ནས་བཤད་པ་ཡིན་ནོ། །དེ་ལྟ་བུའི་རྟེན་འབྲེལ་རྒྱུན་ཆགས་ཀྱི་ངོས་ནས་རྫོགས་ཚུལ་ནི། སེམས་ཙམ་པས་རྒྱུ་འབྲས་ཚར་གཅིག་ཚེ་གཉིས་ལ་རྫོགས་པར་འདོད་དེ། ཚེ་སྔ་མ་ལ་མ་རིག་པ། འདུ་བྱེད། རྣམ་ཤེས། སྲེད་པ། ལེན་པ། སྲིད་པ་སྟེ་རྒྱུ་དྲུག་རྫོགས་ནས། འདིར་ལྷག་མ་དྲུག་འབྲས་བུའི་ཚུལ་དུ་རྫོགས་པའོ། །དེ་དག་ནི་ནང་གི་རྟེན་འབྲེལ་ཏེ། ཕྱིའི་རྟེན་འབྲེལ་ས་བོན་ལ་
བརྟེན་ནས་མྱུ་གུ་འབྱུང་བ་ལ་སོགས་པས་མཚོན་འཁོར་འདས་ཐམས་ཅད་རྟེན་ཅིང་འབྲེལ་འབྱུང་གི་ཆོས་ཉིད་དུ་གཏན་ལ་ཕེབས་པ་ཡིན་པས་ན། དེ་བཞིན་གཤེགས་པའི་གསུང་གི་གཅེས་པར་གྱུར་བ་དང་། གང་གིས་འདི་ཤེས་པ་དེས་སྟོན་པའི་བསྟན་པ་ཡང་དག་པར་རྟོགས་པ་ཡིན་ནོ། །ཞེས་ཐུན་མོང་གི་གཞུང་དང་མཐུན་པར་བསྟན་པ་དེ། ཇི་སྐད་དུ་དགེ་སློང་དག །གང་གིས་སཱ་ལུ་ལྗངས་པ་འདི་ཤེས་པ་དེས་རྟེན་ཅིང་འབྲེལ་བར་འབྱུང་བ་ཤེས་སོ། །གང་གིས་རྟེན་ཅིང་འབྲེལ་བར་འབྱུང་བ་ཤེས་པ་དེས་ཆོས་ཤེས་སོ། །གང་གིས་ཆོས་ཤེས་པ་དེས་སངས་རྒྱས་ཤེས་སོ། །གསུངས་པ་ལྟ་བུ་ཡིན་ནོ། །དེ་ལྟ་ནའང་། དམན་པའི་ལམ་དེ་དག་ནི་རེ་ཞིག་ཐེག་པ་ཆེན་པོའི་འབབ་སྟེགས་ཙམ་ཡིན་ཏེ། འོད་སྲུང་གིས་ཞུས་པའི་མདོ་ལས། དེ་དག་གི་རྟོག་པའི་སྟོང་པ་ཉིད་ནི་ཡུངས་འབྲུ་སྲིན་གྱིས་ཟོས་པའི་ནང་གི་ནམ་མཁའ་ལྟ་བུའོ། །ཅེས་དང་། ཡུམ་ལས་ཉན་ཐོས་ཀྱི་ས་ལ་མྱ་ངན་ལས་འདའ་བར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཞེས་པས་དོན་དམ་པར་ཆོས་ཉིད་སྐྱེ་བ་མེད་པ་ཡོངས་གྲུབ་ཆེན་པོའི་ལམ་ནས་མྱ་ངན་ལས་འདའ་བའི་གནས་གང་ཡིན་པ་འཐོབ་པར་འགྱུར་རོ་ཞེས་སྟོན་པའི་ཕྱིར། དེ་ལྟ་མོད་ཀྱི་སྲིད་པར་འདུ་བྱེད་པའི། །མཐོ་དམན་ལས་དང་དཀར་ནག་རྒྱུ་འབྲས་ཆོས། །ཀུན་ལས་འདས་པ་ཞི་བ་དམ་པའི་དངོས། །སྐྱེ་བ་མེད་པའི་ཆོས་ཉིད་རྟོགས་ལས་འབྱུང་། །འདི་ལྟར་འཁོར་བར་འདུ་བྱེད་པའི་རྒྱུའི་གཙོ་བོ་ནི་མ་རིག་པ་ལས་བྱུང་བའི་ལས་ཀྱི་མཐས་སྲིད་པའི་རྩེ་མོ་ནས་མནར་མེད་པའི་བར་གྱི་གནས་རིགས་མཐོ་དམན་དུ་འཁྲིད་པར་བྱེད་པ་དེ་ཡང་འོག་མའི་བློས་བཏགས་པ་ཙམ་ལས་དོན་ལ་མ་གྲུབ་པའི་ཆོས་ཉིད་ཞི་བ་ཆེན་པོ་སྐྱེ་བ་མེད་པ་ཉིད་དུ་མ་རྟོགས་
པ་ལས་བྱུང་སྟེ། རྣམ་ངེས་ལས། ཐམས་ཅད་མཁྱེན་པའི་གཟིགས་པ་མ་ལོག་པ་ནི་དུས་ཐམས་ཅད་དུ་མེད་པར་གོ་བར་བྱེད་པ་ཁོ་ན་ཡིན་ནོ། །ཞེས་པས་འདིར་དེའི་རང་བཞིན་ལྡོག་པར་བྱ་བའི་ཚུལ། བདེན་པ་བཞི་པོ་དེ་དག་ལས་སྡུག་བསྔལ་གྱི་བདེན་པ་དེ་ཡང་མེད་པ་ལ་ཡོད་པར་བཏགས་པའི་སྣང་བ་རྟེན་ཅིང་འབྲེལ་འབྱུང་གི་འཁྲུལ་བའི་སྣང་བ་སྟེ། ཀླུ་སྒྲུབ་ཀྱིས་རྟེན་ཅིང་འབྲེལ་འབྱུང་མ་ཡིན་པའི། །སྡུག་བསྔལ་ཡོད་པར་ག་ལ་འགྱུར། །མི་རྟག་སྡུག་བསྔལ་གསུངས་པ་དེ། །རང་བཞིན་ཉིད་ལ་ཡོད་མ་ཡིན། །ཞེས་དོན་དམ་པའི་བདེན་པ་གཟིགས་པ་རྣམས་ལས་རྒྱུར་སྨྲ་བ་འདོད་པ་མ་ཡིན་ནོ། །དེ་བཞིན་དུ་ཀུན་འབྱུང་ཀྱང་དཔེར་ན་མ་བྱིན་ལེན་ལ་མཚོན་ན། བླང་བྱའི་དངོས་པོ་དེ་དུས་གསུམ་དུ་ཕྱེ་ཞིང་། ཕྲད་པ་བརྟག་པ་དང་། སྐད་ཅིག་སྔ་ཕྱིར་དབྱེ་བས། བརྐུ་བའི་དུས་འགགས་པས་དངོས་པོར་མ་གྲུབ་པ་ཉིད་དེ། འདི་ལྟར་བརྐུ་བའི་ཡུལ་དང་། རྐུ་བྱེད་ཀྱི་ཤེས་པ་ལ་སོགས་པའི་སྐད་ཅིག་དུ་མ་འཐུད་ནས་རྒྱུན་བརྩམ་པ་ཡིན་ཏེ། སྐད་ཅིག་སྔ་ཕྱི་མ་ཕྲད་ན་རྐུན་པོའི་བྱ་བ་བྱེད་པར་མི་འགྱུར་ཏེ། དཔེར་ན་ཀེ་ལ་ཤ་ཞེས་བརྗོད་དུས་ཡི་གེའི་སྐད་ཅིག་མ་གསུམ་པོ་སྔ་ཕྱིར་བྲེང་ཆགས་སུ་འབྲེལ་བས་གངས་རིའི་མིང་འགྲུབ་ལ། མ་འབྲེལ་ན་མི་འགྲུབ་པ་བཞིན་ནོ། །དེ་ཕྱིར་རྩ་ཤེ་ལས། རང་བཞིན་ལས་ནི་ཡོད་མིན་ན། །ཅི་ཞིག་ཀུན་ཏུ་འབྱུང་བར་འགྱུར། །དེ་ཕྱིར་སྟོང་ཉིད་གནོད་བྱེད་ལ། །ཀུན་འབྱུང་ཡོད་པ་མ་ཡིན་ནོ། །ཞེས་བཤད་དོ། །འགོག་པ་ཡང་སྡུག་བསྔལ་དང་ཀུན་འབྱུང་གཉིས་རང་བཞིན་མེད་པར་ཁེགས་པས། དེ་གཉིས་འགག་པས་འགོག་པ་ཁེགས་ཏེ། དགག་གཞི་མེད་ན་འགོག་པ་མེད་པས་ནད་མེད་པ་ལ་སྨན་མི་དགོས་
པ་བཞིན་ནོ། །དེ་སྐད་དུ་སྔ་མ་ལས། སྡུག་བསྔལ་རང་བཞིན་གྱིས་ཡོད་ལ། །འགོག་པ་འཐད་པ་མ་ཡིན་ནོ། །ཞེས་སོ། ལམ་དགག་པ་ནི། ལམ་དེ་ཉོན་མོངས་པའི་གཉེན་པོར་བསྒོམ་ན། ཉོན་མོངས་པ་དེ་དང་དུས་མཉམ་དུ་བསྒོམ་མམ་ཐ་དད་དུ་བསྒོམ། དུས་མཉམ་དུ་བསྒོམ་ན་རྒྱུད་གཅིག་ལ་སྤང་བྱ་དང་གཉེན་པོ་རྫས་འགལ་ལ། ཐ་དད་དུ་བསྒོམ་ན་མར་མེ་སྐྱེ་བཞིན་པས་མུན་པ་སེལ་བར་མི་བྱེད་པ་བཞིན། ཉོན་མོངས་པ་སྐྱེ་བཞིན་པའི་གཉེན་པོ་དེས་ཉོན་མོངས་པ་ཟིལ་གྱིས་མི་ནོན་པ་སྟེ། སྔ་མ་ལས། གང་ཚེ་མར་མ་སྐྱེ་བཞིན་པ། །མུན་པ་དང་ནི་ཕྲད་པ་མེད། །ཇི་ལྟར་མར་མེ་སྐྱེ་བཞིན་པས། །མུན་པ་སེལ་བར་བྱེད་མ་ཡིན། །མར་མེ་ཕྲད་པ་མེད་པར་ཡང་། །གལ་ཏེ་མུན་པ་སེལ་བྱེད་ན། །འདི་ན་གནས་པ་དེས་བསལ་འགྱུར། །ཞེས་སོ། །ལམ་དེའི་སྤང་བྱ་དང་རྡུལ་ཕྲན་ཆ་མེད་ཀྱང་སྐད་ཅིག་སྔ་ཕྱི་ཕྲད་པ་མེད་པས་མ་གྲུབ་སྟེ། དཔེར་ན་ས་ར་ཧ་བརྗོད་དུས། ར་དེ་ཡི་གེ་སྔ་ཕྱི་གཉིས་དང་དུས་གཅིག་ཕྲད་དམ་རེ་མོས་སུ་ཕྲད། དུས་གཅིག་ཏུ་ཕྲད་ན་དུས་གསུམ་གྱི་དངོས་པོ་ཐམས་ཅད་དུས་མཉམ་པས་ན་སྐད་ཅིག་མ་ཁོ་ན་ལས་མི་སྲིད་པར་ཐལ། རེ་མོས་སུ་ཕྲད་ན་ར་ཞེས་པའི་སྐད་ཅིག་དེ་ཉིད་ཆ་གཉིས་སུ་ཐལ་ཏེ་དང་པོས་དང་ཕྲད་ཅིང་། ཕྱི་ནས་ཧ་དང་ཕྲད་པའི་ཕྱིར་རོ། །འདོད་ན་སྐད་ཅིག་ཆ་མེད་ཉམས་སོ། །དེ་སྐད་ད། སྔ་ཕྱི་གཉིས་ཀྱིས་ཕྲད་པ་ན། །སྐད་ཅིག་དུས་ཆ་གཉིས་སུ་འགྱུར། །གཉིས་པོ་དག་ནི་དུས་མཉམ་ན། །བསྐལ་པ་སྐད་ཅིག་གཅིག་པར་འགྱུར། །ཞེས་སོ། །འགོག་པ་མངོན་དུ་བྱེད་པའང་མི་རུང་སྟེ། འགོག་པ་ཉིད་བཀག་པས་མངོན་དུ་བྱེད་པ་ཁེགས་པ་ཉིད་དེ། དགག་བྱ་འདས་ན་འགོག་པའི་རྒྱུ་མེད་ལ། མ་འགགས་ན་མི་ཁེགས་པ་དང་། དེ་གཉིས་དུས་མཉམ་ན་ངོ་བོ་ཐ་དད་དུ་མི་རུང་། མི་
མཉམ་ན་དགག་བྱ་དང་འགོག་བྱེད་དུ་མི་རུང་བའི་ཕྱིར། བདེན་པ་བཞི་ཆར་མ་གྲུབ་པ་ཉིད་དེ། ཡུམ་ལས་འཕགས་པའི་བདེན་པ་རྣམས་ཀྱང་ངོ་བོ་ཉིད་མེད་དོ། །ཞེས་དང་། བྱིན་གྱིས་བརླབས་པའི་བཀར། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ། །ཞེས་དང་། ལང་ཀར་གཤེགས་པ་ལས། སྐྱེ་བ་མེད་པ་བདེན་པ་གཅིག་ཡིན་ཏེ། །བྱིས་པ་རྣམས་ནི་བདེན་པ་བཞི་ཞེས་སྨྲ། །བྱང་ཆུབ་སྙིང་པོར་ཞུགས་ནས་བདེན་གཅིག་ཀྱང་། །གྲུབ་པ་མེད་ན་བཞི་ལྟ་ག་ལ་ཡོད། །ཅེས་སོ། །དེ་བཞིན་དུ་རྟེན་འབྲེལ་ཀྱང་རྟེན་ཆོས་ཕན་ཚུན་ཕྲད་པར་མ་གྲུབ་སྟེ། མ་རིག་པ་ཚར་བཅད་པས་འདུ་བྱེད་དང་མཚམས་སྦྱོར་བ་ཁེགས་ལ། རྣམ་ཤེས་མངལ་དང་ཕྲད་པ་བཀག་པས་མིང་དང་གཟུགས་མེད་དོ། །སྐྱེ་མཆེད་དྲུག་མེད་དེ་རྣམ་ཤེས་བསྐྱེད་པའི་ནུས་པ་བཀག་པས་སོ། །རེག་ཚོར་དང་སྲེད་ལེན་སོགས་ཀྱང་དོན་སྤྱི་རྫུན་པ་ལ་ལྟོས་ནས་བཀག་གོ །དེའི་ཕྱིར་ཡུམ་ལས། རྟེན་ཅིང་འབྲེལ་བར་འབྱུང་བ་རྣམས་ཀྱང་རང་བཞིན་གྱིས་རྣམ་པར་དག །ཅེས་སོ། །དེ་ལྟ་མོད་ཀྱི་རྒྱུ་འབྲས་ལ་རྨོངས་པའི་གཉེན་པོར་ལས་དགེ་མི་དགེ་ལ་བརྟེན་ནས་འབྲས་བུ་འདོད་མི་འདོད་འབྱུང་བ་ཤེས་ནས་འདོར་ལེན་ལ་བརྩོན་ཅིང་། རྟེན་འབྲེལ་སྣང་ལ་རང་བཞིན་མ་གྲུབ་པ་ཙམ་དུ་བལྟ་བ་ཡིན་ནོ། །དེའི་ཕྱིར་ཉན་ཐོས་ཀྱི་ལམ་ལས་དགྲ་བཅོམ་ཞིང་འགོག་པར་བཞུགས་པ་དེ་དག་ཀྱང་། མཐར་ཐུག་བྱང་ཆུབ་ཏུ་ཐུགས་བསྐྱེད་ནས་ཐེག་པ་ཆེན་པོའི་ཚོགས་ལམ་ཆུང་ངུ་ནས་འཇུག་ཅིང་དེ་དང་མཐུན་པའི་ལམ་ལྔ་མངོན་དུ་བྱས་ནས་མྱ་ངན་ལས་འདའ་ཞིང་དེ་བཞིན་གཤེགས་པའི་རང་བཞིན་དུ་འགྱུར་བ་ཤ་སྟག་ཡིན་ཏེ། མྱང་འདས་ལས། དགྲ་བཅོམ་པ་ཡང་
ཡོངས་སུ་མྱ་ངན་ལས་འདས་ནས་འགག་པར་ཞུགས་ཏེ། བསྐལ་པ་སྟོང་ཕྲག་བཅུ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡིན་ནོ། །ཞེས་སོ། །དེ་ལྟར་སེམས་བསྐྱེད་ནས་ལམ་བསྒྲུབ་དུས་ཀྱང་སྔར་གྱི་ཞི་བ་གཅིག་པུ་འཆོལ་བའི་བློ་ངན་དེ་གོམས་པས་སངས་རྒྱས་ཀྱི་ཞིང་སྦྱོང་ཞིང་སེམས་ཅན་སྨིན་པའི་ཚོགས་རྫོགས་པ་ལ་བར་དུ་གཅོད་པས། བྱང་ཆུབ་སེམས་དཔའ་ལས་དང་པོ་པ་ཞིག་དང་སེམས་དང་པོར་བསྐྱེད་པ་དུས་མཉམ་ཡང་ཉན་རང་སེམས་བསྐྱེད་པ་དེ་ཕྱིར་བསྐལ་པ་བཞི་བཅུས་བུལ་བར་འགྱུར་ཏེ། མདོ་སྡེ་རྒྱན་ལས། དེ་གཉིས་ཡང་དང་ཡང་དུ་ནི། །རང་སེམས་ཀུན་ཏུ་འབྱུང་ལྡན་པས། །མྱ་ངན་འདས་ལ་མངོན་དགའི་ཕྱིར། །རྟོག་པ་བུལ་བ་ཡིན་པར་འདོད། །ཅེས་ཡང་དང་ཡང་དུ་འཁོར་བ་ལ་ཡིད་འབྱུང་ཞིང་། མྱུར་བ་མྱུར་བར་མྱ་ངན་ལས་འདའ་བར་འདོད་པའི་བློ་དེས་བྱང་ཆུབ་སེམས་དཔའ་སེམས་བསྐྱེད་པ་ཐོག་མཉམ་དང་ཁྱད་པར་བྱེད་པ་ཡིན་ནོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། འཁོར་བ་སྡུག་བསྔལ་གྱི་ཚོམས་དང་འབྲེལ་བར་ཐར་པའི་ཕན་ཡོན་སྐྱེས་བུ་འབྲིང་གི་ལམ་རྣམ་པར་བཞག་པའི་སྐབས་ཏེ་རབ་བྱེད་བཞི་པའི་འགྲེལ་བའོ།། །།