འབྲས་བུ་ལྷུན་གྲུབ་ཆེན་པོའི་རྣམ་པར་བཞག་པ་སྟེ་ལེའུ་བཅུ་གསུམ་པའི་འགྲེལ་པ།
དེ་ལྟར་གསང་མཆོག་ངེས་པའི་ཐེག་པ་དམ་པའི་གནད་ཀྱིས་གྲོལ་བའི་གཞི་ལམ་གྱི་རིམ་པ་བསྟན་ནས། ད་ནི་མཐར་ཕྱིན་པ་འབྲས་བུའི་རང་བཞིན་གཏན་ལ་དབབ་པ་ལ་གཉིས། རང་གི་རང་བཞིན་ཅི་ཡིན་པ་མངོན་དུ་གྱུར་པ་ལས་གཞན་བྱུང་མ་ཡིན་པར་བསྟན་པ་དང་། སྐུ་དང་ཡེ་ཤེས་ཀྱི་རང་བཞིན་བྱེ་བྲག་ཏུ་བཤད་པའོ། །དང་པོ་ནི། དེ་ལྟར་གཞི་ལམ་མཚན་ཉིད་ལེགས་རྟོགས་ནས། །མཐར་ཕྱིན་འབྲས་བུ་སྐུ་དང་ཡེ་ཤེས་ནི། །གཞན་ལས་མ་བྱུང་ཀུན་གཞིའི་རྙོག་པ་དྭངས། །སེམས་དང་སེམས་བྱུང་ཆོས་དབྱིངས་ཞི་བ་ཡིན། །གང་དུ་གཞི་ལས་གཞི་སྣང་གཡོས་པ་ཡི། །བདག་འཛིན་བག་ཆགས་ཤེས་བྱའི་ཆ་འཛིན་པའི། །ཚོགས་བརྒྱད་ཉེར་ལེན་སྦྱིན་དང་འདྲ་བ་རྣམས། །རྣམ་པར་དག་པའི་ཡེ་ཤེས་ཉི་མ་ནི། །སྒྲིབ་པ་མེད་པར་རང་བཞིན་འོད་དུ་གསལ། །དེ་ལ་ཤེས་བྱའི་ཆོས་ཐམས་ཅད་ཀྱི་ཤེས་བྱེད་ལམ་བདེན་འདུས་བྱས་པ་ཐམས་ཅད་ངོ་བོ་ཉིད་མེད་པའི་འབྲས་བུའི་ཀློང་དུ་ཐུགས་རང་བཞིན་རྫོགས་པ་ཆེན་པོའི་ལུགས་ཀྱི་གཞིའི་ཆོས་ཉིད་ལེགས་པར་གཏན་ལ་ཕེབས་ནས།
དངོས་དང་ཐ་དད་མ་ཡིན་པའི་ལམ་འབད་རྩོལ་མེད་པའི་གནད་ལ་བྱང་ཆུབ་པས་དྲི་མ་གློ་བུར་བ་ཆ་དང་བཅས་པའང་དབྱིངས་རིག་གཉིས་སུ་མེད་པའི་རང་བཞིན་ཅི་ཡིན་པ་སྟོབས་སུ་གྱུར་པས་སྦྱངས་པ་ན་ནོར་བུ་དྲི་མ་དང་བྲལ་བ་ལས་དགོས་འདོད་ལྷུན་གྱིས་གྲུབ་པ་བཞིན། །ཀུན་གཞིའི་རྙོག་པ་དྭངས་པ་ལས་རང་ངོའི་སྐུ་དང་ཡེ་ཤེས་འདུ་འབྲལ་མེད་པའི་ངོ་བོ་མངོན་དུ་གྱུར་པ་སྟེ་སྐུ་གདུང་འབར་བ་ལས། རང་གི་ངོ་བོར་རང་ཐིམ་ནས། །དབྱེར་མེད་འབྱེད་པ་མེད་པར་འགྱུར། །ཞེས་དང་། རྒྱུད་བླ་མ་ལས། ཉེས་པ་གློ་བུར་དང་ལྡན་དང་། །ཡོན་ཏན་རང་བཞིན་ཉིད་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་སོ། །དེ་ཡང་འདི་ལྟར་གྲོལ་སའི་ངོ་བོ་རང་བཞིན་གྱིས་རྣམ་པར་དག་པའི་གཞི་དབྱིངས་ལས་གཞི་སྣང་དུ་ཤར་བ་ལ་བདག་ཏུ་འཛིན་པའི་བག་ཆགས་བརྟས་པ་ལས་སྣང་བའི་འཁྲུལ་སྣང་ཆ་དང་བཅས་པ་དང་། སེམས་དང་སེམས་ལས་བྱུང་བའི་ཚོགས་བརྒྱད་ཉེར་ལེན་གྱི་ཕུང་པོ་ལྔ་དང་བཅས་པའི་གློ་བུར་གྱི་སྒྲིབ་པ་སྤྲིན་དང་འདྲ་བ་དབྱིངས་སུ་ཞི་བའི་དུས་རང་བཞིན་འོད་གསལ་གྱི་ཡེ་ཤེས་ཉི་མ་ལྟར་ལྷུན་གྱིས་གྲུབ་པའི་ནུས་པ་ཅི་ཡོད་པ་མངོན་དུ་གྱུར་པ་སྟེ། རྒྱུད་བླ་མ་ལས། རང་བཞིན་འོད་གསལ་ཞེས་བརྗོད་ཉི་དང་མཁའ་བཞིན་གློ་བུར་གྱི། །ཉོན་མོངས་ཤེས་བྱའི་སྤྲིན་ཚོགས་སྟུག་པོས་བསྒྲིབས་པ་ལས་ནི་བྲལ་གྱུར་པ། །དྲི་མེད་སངས་རྒྱས་ཡོན་ཏན་ཀུན་ལྡན་རྟག་བརྟན་གཡུང་དྲུང་སངས་རྒྱས་ཉིད། །དེ་ནི་ཆོས་ལ་མི་རྟོག་རྣམ་འབྱེད་ཡེ་ཤེས་དག་ལ་བརྟེན་པས་འཐོབ། །ཅེས་སོ། །གཉིས་པ་ལ་གཉིས། སྐུ་ལྔ་ཡེ་ཤེས་ལྔར་འབྱུང་བའི་འཐད་པ་དང་། སོ་སོའི་རང་
བཞིན་བཤད་པའོ། །དང་པོ་ནི་རྫོགས་པ་རང་བྱུང་ལས། སྐུ་ལྔ་ཡེ་ཤེས་ཆོས་ལྔའོ། །ཞེས་དང་། འཇམ་དཔལ་ལས། སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །ཅེས་པས་བསྟན་ཏོ། །གཉིས་པ་ལ་གཉིས། །སྐུ་ལྔའི་ཁྱད་པར་བཤད་པ་དང་། །ཡེ་ཤེས་ལྔའི་ཁྱད་པར་བཤད་པའོ། །དང་པོ་ནི་རང་ཤར་ལས། འགྱུར་མེད་དོན་གྱི་སྐུ་ལྔར་གནས། །ཞེས་གཞི་དང་། ལམ་དང་། འབྲས་བུ་གསུམ་ཀ་རིག་པ་ཀ་དག་གཅིག་ལས་འགྱུར་བ་མེད་པའི་ལྡོག་ཆ་ལས་སྐུ་ལྔར་ཕྱེ་ན། མི་འགྱུར་རྡོ་རྗེ། མངོན་པར་བྱང་ཆུབ། ཞི་བ་ཆོས། ལོངས་སྤྱོད་རྫོགས་པ། ཅིར་ཡང་སྤྲུལ་པའི་སྐུ་དང་ལྔ་ལས། དང་པོའི་མཚན་ཉིད་སྟོན་པའི་ཕྱིར། དག་པ་གཉིས་ལྡན་བྱང་ཆུབ་མཆོག་གི་དངོས། །གདོད་མའི་སངས་རྒྱས་སྨོན་པ་མེད་པའི་དབྱིངས། །ཉ་རྒྱས་ཟླ་བ་སྤྲོས་པ་ཕྱིར་གསལ་ཅན། །སྟོང་གི་ཆ་ལ་དབྱིངས་སུ་ནུབ་པ་ལྟར། །ཀུན་ཏུ་མི་རྟོག་ཆོས་ཉིད་འཕོ་འགྱུར་མེད། །དབྱིངས་ཀྱི་རྟག་པ་མི་འགྱུར་རྡོ་རྗེའི་སྐུ། །དེ་ལ་རང་བཞིན་ཡོངས་གྲུབ་ཆེན་པོའི་ཆོས་སྐུ་མི་འགྱུར་རྡོ་རྗེ་ནི། །གདོད་ནས་རང་བཞིན་གྱིས་རྣམ་པར་དག་པའི་བདག་ཉིད་ཅན་ལ་གློ་བུར་གྱི་དྲི་མས་ཀྱང་གོས་མ་མྱོང་བས་ཆོས་ཉིད་འགྱུར་བ་མེད་པ་སྟེ། ངོ་བོ་གང་དུའང་མ་གྲུབ་པའི་བདེན་པ་དབྱེར་མེད་དག་མཉམ་ཆེན་པོ་ལ་རང་ངོའི་ཆ་ནས་སྐུ་དང་ཡེ་ཤེས་ཀྱི་ཆོས་སུ་བལྟར་མི་མངོན་པའི་ཆོས་ཉིད་ནམ་མཁའ་ལྟ་བུར་སྨོན་པ་མེད་པའི་དབྱིངས། མཐར་ཐུག་གི་འབྲས་བུ་བླ་ན་མེད་པ་ཆེན་པོ་སྟོང་པ་ཡེ་ཤེས་ཀྱི་སྙིང་པོ་ཅན་ནི་གནས་སྐབས་ཐམས་ཅད་དུ་འགྱུར་བ་མེད་པས་དབྱིངས་ཀྱི་རྟག་པ་མི་འགྱུར་རྡོ་རྗེའི་སྐུ་
སྟེ། རང་ཤར་ལས། སྤྲོས་བྲལ་ཆོས་ཉིད་འགྱུར་བ་མེད། །མཐའ་དང་དབུས་མེད་ཕྱོགས་ཆ་བྲལ། །རང་སྣང་ཆོས་དབྱིངས་རྣམ་དག་ཅིང་། །དང་པོའི་སངས་རྒྱས་རྒྱུ་མེད་པ། །ཐ་མ་རྐྱེན་གྱིས་བསྐྱེད་ཏུ་མེད། །སྟོང་པ་ཡེ་ཤེས་སྙིང་པོ་ཅན། །མཐའ་ལ་མི་གནས་རྡོ་རྗེའི་སྐུ། །ཞེས་དང་། ཡེ་ཤེས་དྲྭ་བ་ལས། དབྱིངས་ཀྱིས་དག་པ་རྡོ་རྗེའི་སྐུ། །མི་འགྱུར་མི་ཤིགས་བསམ་ལས་འདས། །ཞེས་སོ། །དབུ་མ་ཐལ་འགྱུར་པ་དག་ནི། །ཆོས་སྐུ་རྣམ་དག་སྟོང་པ་དེ་ལ་འདོད་ཀྱང་། ཕྲ་བའི་ཡེ་ཤེས་དབྱིངས་ན་བ་ལྟར་མི་མངོན་པར་བཞུགས་པའི་ཆ་མི་འབྱེད་པས། གཞན་སྣང་ལ་འབྱུང་བའི་སངས་རྒྱས་ཀྱི་ཐུགས་རྗེ་དང་ཕྲིན་ལས་ཀྱང་ནོར་བུ་དང་དཔག་བསམ་གྱི་ཤིང་ལྟར་རྣམ་པར་མི་རྟོག་བཞིན་དུ་གདུལ་བྱའི་སྨོན་ལམ་གྱི་དབང་ལས་སྣང་བར་འདོད་དེ་འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་པ། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བ་ཡིན། །ཞེས་སོ། །འདིར་ནི་རྣམ་པར་རྟོག་བཅས་མ་ཡིན་ཀྱང་དབྱིངས་ཀྱི་ངང་ན་བལྟར་མི་མངོན་པའི་ཡེ་ཤེས་ཀྱི་འཆར་གཞི་ལྷུན་གྲུབ་དུ་ཡོད་པས། སྨོན་ལམ་གྱི་རྒྱུ་ལ་མ་ལྟོས་པར་གཞན་སྣང་ལ་ཐུགས་རྗེའི་འཇུག་པ་རྒྱུན་མི་ཆད་ཅིང་། གཟུགས་སྐུ་ཕྲིན་ལས་དང་བཅས་པ་རང་བཞིན་དུ་འབྱུང་བར་འདོད་པ་འདི་རྟོགས་པར་དཀའ་བའི་གནད་གཅིག་ཏུ་ཡོད་དེ་རང་ཤར་ལས། སྤོས་པ་བྲལ་བའི་ཆོས་ཉིད་ལ། །ངོ་བོ་རང་བཞིན་ཐུགས་རྗེའི་བདག །ཡེ་ཤེས་སྐུ་གསུམ་འོད་དུ་གསལ། །མཁའ་ལ་ཉི་ཤར་མུན་པ་སེལ། །ཡེ་ཤེས་ལྔ་ཡི་མཚན་ཉིད་གསལ། །སངས་རྒྱས་སྤྲུལ་པ་རབ་
འབྱམས་འབྱུང་། །ཞེས་སོ། །གཉིས་པ་མངོན་བྱང་གི་མཚན་ཉིད་ནི། །རྣམ་པ་ཀུན་གྱི་མཆོག་ལྡན་ཞི་བའི་དབྱིངས། །སྟོབས་སོགས་ཡོན་ཏན་རྒྱ་མཚོ་ཀུན་ཆུབ་ཀྱང་། །སྣང་ཆ་ངོ་བོར་མ་འདྲེས་སྤངས་རྟོགས་ཀྱི། ཆ་ནས་གཞལ་བ་མངོན་པར་བྱང་ཆུབ་སྐུ། །འདི་ལྟར་དབྱིངས་རང་བཞིན་གྱིས་རྣམ་པར་དག་པ་གྲུབ་བསལ་མེད་པའི་ཆོས་ཉིད་ལ་གློ་བུར་གྱི་དྲི་མ་དག་པར་བྱས་ནས་ཟད་པ་དང་མི་སྐྱེ་བ་ཤེས་པའི་ཡེ་ཤེས་བརྙེས་པའི་དག་པ་གཉིས་ལྡན་གྱི་རང་བཞིན་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་ཞི་བ་ཆེན་པོའི་དབྱིངས་ཏེ། སྡོམ་འབྱུང་ལས། རྣམ་པ་ཐམས་ཅད་ཀྱི་ནི་མཆོག །དབང་པོ་ཀུན་འདས་རྣམ་པ་མེད། །དངོས་དང་དངོས་མེད་བདག་ཉིད་དེ། །དངོས་དང་དངོས་མེད་རྣམ་པར་སྤངས། །བེམ་པོ་མིན་ཕྱིར་བདག་ཉིད་རིག །མི་ཤེས་རྣམ་པར་མི་མཐོང་བའོ། །ཞེས་སོ། །དེའང་སྤངས་རྟོགས་མཐར་ཕྱིན་དུ་ཞི་བ་བརྙེས་པའི་ཆ་ནས་ཐམས་ཅད་མཁྱེན་པའི་ཆོས་ཚུལ་རྒྱ་མཚོ་གཞོན་ནུ་མ་ལ་པྲ་ཕབ་པའི་སྣང་བས་མ་མཐོང་བའི་ཆོམ་རྐུན་མཐོང་བ་ལྟར་རྡུལ་ཕྲ་རབ་ལས་འདས་པས་གཟུགས་ཀྱི་མཚན་ཉིད་ཡུལ་སོ་སོར་འཛིན་པ་དབང་ཤེས་འབྲེལ་པ་ལྟ་བུས་རང་མཚན་ཅན་དུ་གཟིགས་པ་མ་ཡིན་ཀྱང་། དམིགས་པ་མེད་པའི་ཤེས་རབ་ཀྱིས་ཤེས་བྱ་མཐའ་དག་རྫུན་པའི་རང་བཞིན་མ་འདྲེས་མངོན་སུམ་པར་ཡེ་ཤེས་ཀྱི་སྣང་ཆ་ལ་མཁྱེན་པས་གུགས་ལས་གཞན་པའི་མཚན་ཉིད་ཅན་ཡང་མ་ཡིན་པའི་ཚུལ་དང་པོའི་སངས་རྒྱས་ལས། གཞོན་ནུ་མ་ཡིས་པྲ་ལས་ནི། །མ་མཐོང་པ་ཡིས་རྐུན་མོ་མཐོང་། །ཉི་ཚེ་བ་ཡི་མིག་གཉིས་ཀྱིས། །བསྐྱོད་དེ་སྒྲུབ་
པ་པོ་ཡིས་མཐོང་། །གལ་ཏེ་ཡོད་པའི་གཟུགས་མཐོང་ན། །བདག་གི་གདོང་པ་ཅིས་མི་མཐོང་། །འོན་ཏེ་མེད་པའི་གཟུགས་མཐོང་ན། །རི་བོང་རྭ་ནི་ཇི་ལྟར་མིན། །མིག་གཞན་གྱིས་ནི་མི་མཐོང་ཞིང་། །བདག་གི་མིག་གིས་ཀྱང་མི་མཐོང་། །མ་སྐྱེས་པ་ཉིད་མཐོང་བ་ཡིན། །གཞོན་ནུ་མ་ཡི་བུ་བཞིན་ནོ། །ཞེས་གཞོན་ནུ་མ་ཡིན་པས་བུའི་འབྱུང་གནས་མཐོང་བ་བཞིན་རྣམ་ཀུན་མཆོག་ལྡན་གྱི་བདེ་བ་ཆེན་པོ་ནི་སྤངས་རྟོགས་མཐར་ཕྱིན་པའི་ངོ་བོ་ཉིད་ཀྱི་ཡེ་ཤེས་ཡིན་པའི་ཚུལ། དྲི་མེད་འོད་ལས་ཀྱང་། ཕྲ་རབ་རྡུལ་གྱི་ཆོས་ཉིད་འདས། །པྲ་ཕབ་པ་ཡི་རང་བཞིན་ཅན། །རྣམ་པ་ཀུན་གྱི་མཆོག་ལྡན་མ། །ཕྱག་རྒྱ་ཆེན་མོ་དེ་ལ་འདུད། །ཅེས་སོ། །དེ་ལྟར་ཡེ་ཤེས་སྤངས་རྟོགས་མཐར་ཕྱིན་པའི་ཆ་ནས་གཞལ་བས་སྟོབས་བཅུ། མི་འཇིགས་པ་བཞི། ཆོས་མ་འདྲེས་པ་བཅོ་བརྒྱད། ཐུགས་རྗེ་ཆེན་པོ། །ཆོས་སུམ་ཅུ་རྩ་བདུན་ལ་སོགས་པ་ཐམས་ཅད་མཁྱེན་པའི་ཆོས་ཚུལ་རྒྱ་མཚོ་ལྟ་བུའི་ཡོན་ཏན་ཡོད་པའི་ཆ་ནས་མངོན་པར་བྱང་ཆུབ་པའི་སྐུ་ཞེས་བརྗོད་དེ། ཡེ་ཤེས་དྲ་བ་ལས། དྲི་མ་བྲལ་ཕྱིར་བྱང་བ་སྟེ། །ཡོན་ཏན་རྒྱས་པས་ཆུབ་པ་ཉིད། །གཉིས་མེད་འདྲེས་ཕྱིར་ཟུང་འཇུག་ཕྱིར། །མངོན་པར་བྱང་ཆུབ་སྐུར་བརྗོད་དོ། །ཞེས་སོ། །དེ་ཡང་མི་འགྱུར་རྡོ་རྗེའི་ནང་དབྱིངས་ལས་མངོན་པར་བྱང་ཆུབ་ཏུ་ཕྱེ་བའི་གནས་སྐབས་ན་རྣམ་པ་ཐམས་ཅད་མཁྱེན་པའི་ཡེ་ཤེས་མི་གནས་པའི་ལྷག་མཐོང་གི་བདག་ཉིད་དུ་གནས་པའི་ཚུལ། རྫོགས་པ་ཆེན་པོའི་རྒྱུད་ལས་ཀྱང་། །སྒོ་ལྔའི་སྙིང་པོ་སྤྱན་གྱི་མཆོག །མི་གསལ་གསལ་བའི་བདག་ཉིད་ཅན། །མཚོན་གང་འོད་ཀྱིས་ཀུན་ཏུ་ཁྱབ། །མཁའ་ལ་གནས་པའི་རིག་པ་དང་། བག་ཆགས་སྦུབས་ཀྱི་རིག་པ་གཉིས། །ཡེ་ཤེས་སྒོ་ཡི་མཚམས་སྦྱར་ནས། །གསལ་སྟོང་ཟང་ཐལ་ཆེན་
པོར་གནས། །ཞེས་པས་གསལ་ལོ། །ཚུལ་འདི་དག་གིས་རྫོགས་པ་ཆེན་པོའི་ལུགས་སུ་སྐུ་གསུམ་ལམ་སྣང་ཡང་ཡིན་ལ། འབྲས་བུ་ཡིན་པ་ཡང་མི་འགལ་བའི་མཚན་ཉིད་ཀྱང་གསལ་བར་བསྟོན་ཏེ་གོ་བདེ་བར་བྱས་ན་རྒྱལ་བའི་ཞབས་ཀྱིས། དང་པོ་ལམ་སྣང་ཡིན་ཏེ་ལྷུན་གྲུབ་ཀྱི་སྦུབས་ཀ་དག་ཆེན་པོ་དེ་དོན་གྱི་འབྲས་བུ་ཁང་པ་ལྟ་བུ་ལས། དེར་འཇུག་པ་དང་། དེ་ནས་ཕྱིར་མཆེད་པ་གཞི་ཀ་དག་ལས་ཕྱིར་སྣང་དུ་འཆར་དགོས་པའི་ཕྱིར་རོ། །འཆར་ཚུལ་ངོ་བོ་སྐུར་གནས་པ་ལས་འཆར་རོ། །ལམ་སྣང་ལ་གཉིས་ཡོད་དེ། རང་ཉིད་སངས་རྒྱས་བསྒྲུབ་པའི་ལམ་འབྲས་བུའི་སྔོན་རོལ་པ་རྣམས་དང་། རང་ཉིད་སངས་རྒྱས་གྲུབ་ཟིན་ནས་གདུལ་བྱ་འདྲེན་པའི་ལམ་སྐུ་གསུམ་མངོན་པར་སྣང་བས་དོན་མཛད་པའོ། །དེ་ལས་འདིར་མི་སློབ་པའི་ལམ་སྣང་དུ་འདོད་པས་སྐུ་གསུམ་ལམ་སྣང་ཡིན་པ་དང་། འབྲས་བུ་ཡིན་པ་གཉིས་མི་འགལ་བའི་ཕྱིར་རོ། །དེའང་ནང་གསལ་འཆར་གཞིའི་སྐུ་དང་ཡེ་ཤེས་འདུ་འབྲལ་མེད་པ་རྡོ་རྗེ་སེམས་དཔའི་ཆོས་ཉིད་དང་། དེ་ལས་ཕྱིར་གསལ་དུ་སྐུ་གསུམ་གྱི་ལམ་སྣང་དུ་རང་ཤར་བ་གཉིས་རིག་པའི་ངང་དུ་འདྲ་ཡང་། ཕྱི་ནང་གི་ཁྱད་པར་ཕྱེ་ལ་རང་སྣང་གི་ཆ་ལས་གདུལ་བྱའི་སྣང་ངོར་ལོངས་སྤྲུལ་པས་དོན་མཛད་པའང་རིག་པའི་རོལ་པར་གཅིག་ཀྱང་། རང་སྣང་གདུལ་བྱས་མི་མཐོང་ལ། དེ་ལས་ཤར་བ་དེ་མཐོང་བའི་ཁྱད་ཡོད་པས་འདྲ་གཉིས་ཤན་ཕྱེད་པར་བསྟན་པ་ཡང་སེང་གེ་རྩལ་རྫོགས་ལས། རྡོ་རྗེ་སེམས་དཔའི་ཆོས་ཉིད་དང་། །རང་སྣང་དཀྱིལ་འཁོར་དག་པ་གཉིས། །འདྲ་གཞི་གཅིག་ལ་གོལ་ས་ཆེ། །ཞེས་བཤད་དོ། །དེ་ལྟར་ནང་དབྱིངས་དང་ཕྱིར་གསལ་ལམ་སྣང་གི་ཆ་མ་ཕྱེད་པར་སྐུ་གསུམ་རང་སྣང་གི་
འབྲས་བུར་འདོད་ན། །སྤྲུལ་སྐུ་གདུལ་བྱ་ལ་སྣང་བ་བཞིན་གྲོལ་སའི་ཀ་དག་གི་ཆོས་སྐུ་གདུལ་བྱ་ལ་སྣང་བར་ཐལ། སྐུ་གསུམ་ངོ་བོ་གཅིག་ཡིན་པའི་ཕྱིར། ཆོས་སྐུ་འཕྲོ་འདུ་དང་ཁ་དོག་ཏུ་སྣང་བར་ཐལ། ཁྱོད་དང་ངོ་བོ་གཅིག་པའི་ལོངས་སྤྲུལ་ལ་ཆོས་དེ་སྣང་བའི་ཕྱིར་ཡང་ན་སྤྲུལ་སྐུ་གདུལ་བྱ་ལ་མི་སྣང་བར་ཐལ། ཆོས་སྐུ་མི་སྣང་བའི་ཕྱིར་རོ། །དེས་ན་སྐུ་གསུམ་ཡང་རིག་པར་ངོ་བོ་གཅིག་གི །རྣམ་པ་ངོ་བོ་གཅིག་པ་དེ་འདྲ་ཁས་མི་བླང་ཞིང་། སྤྲུལ་སྐུ་ཐུགས་རྗེའི་ཆ་ཡིན་ལ། དེས་སྤྲུལ་པའི་སྣང་བ་དེ་གཟུགས་བརྙན་སྤྲུལ་པ་ཡིན་གྱི། སྤྲུལ་སྐུ་དངོས་མ་ཡིན་ཏེ། ཐུགས་རྗེ་མ་ཡིན་པའི་ཕྱིར་རོ། །གྲུབ་མཐའ་དབྱེ་བ་འདི་ཡང་ཤིན་ཏུ་ཕྲ་བས་ཤེས་རབ་ཅན་རྣམས་ཀྱིས་དཔྱོད་ལ་ཁོང་དུ་ཆུད་པར་གྱིས་ཤིག །གནད་ག་འཁོ་ཆེའོ་ཞེས་གསུངས་པ་ཡིན་ནོ། །གསུམ་པ་ཆོས་སྐུའི་མཚན་ཉིད་ནི། ཤེས་བྱའི་ཡུལ་ལ་བློ་ཡི་འཇུག་པ་ཞི། །ཤེས་བྱེད་བློ་ལ་འཛིན་པའི་ཀུན་རྫོབ་སྤངས། །སོ་སོ་རང་རིག་རྟག་ཆད་མཐར་མ་ལྷུང་། །ཐིམ་ལ་མ་རྨུགས་ཕྲ་བའི་ཡེ་ཤེས་ནི། །མཁྱེན་ཆ་འགག་མེད་སྐུ་དང་ཡེ་ཤེས་རྟེན། །ཤིན་ཏུ་མཉམ་པར་བཞག་པ་རྣམས་ཀྱིས་མཐོང་། །གང་ལ་ཞི་བ་ཆོས་ཀྱི་སྐུ་ཞེས་བརྗོད། །དེ་ལ་ཆོས་སྐུའི་ངོ་བོ་ནི་རང་བྱུང་གི་ཡེ་ཤེས་ནང་གསལ་སྤྲོས་པ་ཐམས་ཅད་དང་བྲལ་ཡང་ཐམས་ཅད་མཁྱེན་པའི་ཡེ་ཤེས་ཀྱི་འཆར་གཞིར་གྱུར་པ་སྟེ་སྒྱུ་འཕྲུལ་བླ་མ་ལས། ཆེས་ཕྲའི་ཡེ་ཤེས་ནང་དུ་གསལ། །དམིགས་མེད་འཆར་གཞི་ཆོས་ཀྱི་སྐུ། །ཞེས་སོ། །དེའང་ཕྱི་ཤེས་བྱས་གཟུང་བའི་ཡུལ་ལ་གློ་དང་སྙམ་བྱེད་ཀྱི་འཇུག་པ་ཞི་བས། ནང་ཤེས་བྱེད་ཀྱི་བློའི་འཛིན་སྟངས་ཀུན་རྫོབ་པ་ཐམས་ཅད་ཀྱང་སྐྱེ་འགག་མེད་པའི་
ངང་དུ་རང་ཞི་ནས། ཁམས་གསུམ་གྱིས་བསྡུས་པའི་སེམས་སེམས་བྱུང་གི་ཉེ་བར་ལེན་པ་ལས་བྱུང་བ་འཁོར་བའི་རྟེན་ཅིང་འབྲེལ་བར་འབྱུང་བ་མཐའ་དག་འགགས་ཤིང་འགག་གཞིའི་དེ་ཁོ་ན་ཉིད་སོ་སོ་རང་གིས་རིག་པ་རྟག་ཆད་གང་གི་ཡང་མཐར་མ་ལྷུང་བ། རང་བྱུང་གི་ཡེ་ཤེས་ཆེན་པོའི་སྐུས་མངོན་སུམ་དུ་མཛད་པའི་ཚུལ། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་ནས་ཞི་དེ་རྒྱལ་རྣམས་ཆོས་སྐུ་སྟེ། དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགག་པ་དེ་སྐུ་ཡིས་མངོན་སུམ་མཛད། །ཅེས་སོ། །དེའང་སྟོང་ཚད་ནམ་མཁའ་ལྟ་བུ་མ་ཡིན་པས་ཆོས་སྐུའི་དུས་ན་ཐམས་ཅད་མཁྱེན་པའི་ཡེ་ཤེས་ཟབ་ཅིང་གཏིང་དཔག་དཀའ་བ་ནང་གསལ་ཐིམ་ལ་མ་རྨུགས་པས་སྟོང་གི་ཟླ་བ་དབྱིངས་སུ་ནུབ་པ་ལྟར་གཞན་སྣང་ལ་མི་མངོན་པར་བཞུགས་ཀྱང་། དེ་ལས་གཟུགས་སྐུ་ནམ་མཁྱེན་ཕྱིར་གསལ་དུ་སྣང་བའི་ཡེ་ཤེས་ཀྱི་གདངས་ནམ་ཡང་རྒྱུན་ཆད་མེད་པ་སྟེ་ཡེ་ཤེས་སྣང་བ་ལས། དབྱིངས་སུ་འཁྱིལ་བས་མཐོང་དུ་མེད། །མེད་པ་མིན་ཏེ་ཕྲ་བའི་ཕྱིར། །ཆོས་ཀྱི་སྔོན་རོལ་ཟླ་བ་བཞིན། །ཟབ་པ་ཞི་བ་ཆེས་ཕྲ་བའོ། །ཞེས་དང་། ཀློང་དྲུག་པ་ལས། གཏིང་གསལ་ཆེན་པོའི་གཞི་མར་བཞུགས། །ཁྱབ་དང་ཁྱབ་པ་ཉིད་ཀྱིས་སྟོང་། །ཕྱང་ནས་ཆད་པ་མེད་སྣང་བར། །གསལ་བྱེད་སྣང་བའི་ཆ་མ་འགགས། །ཞེས་དང་། དེ་ལྟ་བུའི་ཆོས་ཉིད་ནི་ཡེ་ཤེས་ཀྱི་ལུས་ཅན་རྣམས་ལ་མངོན་སུམ་པས་ཤིན་ཏུ་མཉམ་པར་བཞག་པ་རྣམས་ཀྱིས་མཐོང་ཞེས་སྨོས་པའང་ནམ་དུའང་མཉམ་པར་མ་བཞག་པ་མེད་པའི་སངས་རྒྱས་ཀྱིས་མཐོང་བའི་ཐ་སྙད་འཕགས་པ་སྡུད་པ་ལས། ནམ་མཁའ་
མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་བའི་དོན་དེ་བརྟག་པར་བགྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །ཞེས་སོ། །དེ་ཡང་མཚན་གཞིའི་སྒོ་ནས་བཞག་ན་མུ་བཞི་གར་མཐུག་ཅིང་ཡུལ་ལ་མི་འཇུག་པའི་ཆ་ནས་ཞི་བ། གཟུགས་སྐུ་གཉིས་ཀྱི་མཛད་པ་མི་སྣང་བའི་ཚེ་ཆོས་སྐུའི་སའི་ཟག་པ་མེད་པའི་དེ་ཁོ་ན་ཉིད་འབྲེལ་བས་ཆོས། མཚན་མ་ཞལ་ཕྱག་ཏུ་མེད་ཀྱང་རིག་པའི་ངོ་བོ་མི་འགྱུར་ཞིང་ཕུང་པོ་ཐམས་ཅད་དབྱིངས་སུ་བསྡུས་པའི་ཆ་ནས་སྐུ་ཞེས་བཏགས་པའི་ཆོས་སྐུའོ། །དེ་སྐད་དུ་ཀློང་དྲུག་པ་ལས། ཀྱེ་སྟོན་པ་ཀུན་ཏུ་བཟང་པོ། སངས་རྒྱས་ཀྱི་མཛད་པ་མེད་པའི་ཚེ་སྟོན་པ་ཇི་ལྟར་བཞུགས་པ་ལགས། བསྟན་པའི་འདུལ་སྟངས་ནི་གང་ལགས། བཀའ་བསྩལ་པ། སངས་རྒྱས་ཐམས་ཅད་ཀྱི་མཛད་པ་མི་སྣང་བའི་ཚེ། ངའི་སྐུ་ནི་ཕུང་པོ་ཐམས་ཅད་གཅིག་ཏུ་བསྡུས་པ་ཞེས་བྱ་སྟེ། མི་སྣང་། མི་འབྱེད། མི་ལེན། མི་འདོར། མི་རྟོག །མི་འཛིན། མི་གནས། མི་འགྱུར། མི་མངོན། མི་གསལ། མི་མཛད། མི་གཏོང་། མི་སེམས། མི་རེག །མི་སྡུག །མི་སྟོང་པའི་རྣམ་པར་ཤར་ནས། སྟོང་པ་ཡུལ་གྱི་སྤྲོས་པ་མེད། །གསལ་ཡོད་མེད་མཐའ་ལས་འདས། །དྲན་པས་མི་བརྗེད་གཟུངས་དང་ལྡན། །སྣང་བ་མངོན་སུམ་ཉིད་ཀྱི་ལམ། །མཚོན་ཚིག་དུ་མའི་སྤྲོས་དང་བྲལ། །ཞེས་སོ། །དེ་ལྟར་དབྱིངས་ཀྱི་སྐུ་གསུམ་པོ་ནི་ཡང་དག་པའི་ཡེ་ཤེས་ཉིད་ལ་རིགས་དང་ཡོན་ཏན་གྱི་དབྱེ་བའི་ངོས་ནས་བཏགས་པ་རྣམ་གྲངས་ཀྱི་ཆོས་ལས་སྐུར་སྨིན་པའི་དངོས་པོ་མེད་པའི་ངོ་བོ་ཉིད་དུ་གནས་པའི་ཚུལ། སོ་སོ་རང་གི་རིག་བྱ་རྒྱལ་
བའི་ཁམས། །གཅིག་དང་དུ་མར་མ་ཡིན་དངོས་པོ་དང་། །དངོས་མེད་ལས་འདས་མཁའ་ལྟར་རྣམ་མི་རྟོག །གོས་པ་མེད་ཅིང་རྣམ་འགྱུར་སྤྲོས་པ་ཞི། །ངག་གི་ཡུལ་འདས་དོན་དམ་བདེན་པས་བསྡུས། །རྟོག་དཔྱོད་ཐ་སྙད་གཏན་ཚིགས་ཀྱིས་མི་མཚོན། །བློ་དང་སྙམ་བྱེད་དཔེ་དང་འགལ་བའི་ཕྱིར། །ས་བཅུའི་དབང་ཕྱུག་གི་ཡང་སྤྱོད་ཡུལ་མིན། །དེ་ལ་དབྱིངས་ནང་གསལ་དུ་ཡོད་པའི་ཆ་ནས་ཇི་ལྟ་བའི་མཁྱེན་པའི་ཡེ་ཤེས་སོ་སོ་རང་གི་རིག་བྱར་གནས་པས་རྒྱལ་བའི་ཁམས་ཞེས་བླ་དགས་སུ་བྱས་པ་སྟེ། དོན་ལ་གཅིག་དང་དུ་མའི་སྤྲོས་པ་ལས་འདས་པས་དངོས་པོ་ཅན་མ་ཡིན་ལ། ཇི་སྙེད་ཡེ་ཤེས་ཀྱི་མཁྱེན་ཆ་ནང་དུ་གསལ་བས་དངོས་མེད་ལས་ཀྱང་འདས་པས་ཆོས་ཅན་ལོངས་སྤྱོད་རྫོགས་པ་དང་། ཡེ་ཤེས་ལྔའི་རང་བཞིན་སོ་སོར་མ་འདྲེས་པའི་འཆར་གཞིར་ཡོད་པས་རྒྱལ་སྲས་སར་གནས་དང་། སེམས་ཅན་གྱི་ཚོགས་ལ་གཟུགས་སྐུར་སྣང་བ་དང་། གསུང་ཐོས་པ་དང་། འཕགས་པའི་ཚུལ་ཁྲིམས་ཀྱི་ངད་ལྡང་བ་དང་། ཆོས་ཀྱི་རོ་མྱོང་བ་དང་། བསམ་གཏན་ལ་དགའ་བ་དེའི་རེག་སྣང་བ་དང་། སོ་སོར་རྟོག་པའི་ཤེས་རབ་ཀྱི་ཚིག་དོན་ལ་འཇལ་བའི་རྒྱུ་བྱེད་ཀྱང་རང་ངོ་ལ་རྣམ་པར་མི་རྟོག་ཅིང་། གང་གིས་ཀྱང་གོས་པ་མེད་པས་རྣམ་འགྱུར་གྱི་སྤྲོས་པ་ལས་འདས་པའི་ཚུལ་རྒྱུད་བླ་མ་ལས། དེ་བཞིན་གཤེགས་པ་མཁའ་བཞིན་དམ་པ་ཡིས། །དབང་པོ་དྲུག་དོན་ཉམས་སུ་མྱོང་བའི་རྒྱུ། །འབྱུང་མེད་གཟུགས་དོན་བལྟ་དང་གཏམ་བཟང་ནི། །གཙང་མ་མཉན་དང་བདེ་གཤེགས་ཚུལ་ཁྲིམས་ཀྱི། །དྲི་གཙང་སྣོད་དང་འཕགས་ཆེན་དམ་ཆོས་རོ། །མྱོང་དང་ཏིང་
འཛིན་རེག་བདེ་ཉམས་མྱོང་དང་། །རང་གི་ངོ་བོ་ཉིད་ཀྱིས་ཟབ་པའི་ཚུལ། །རྟོགས་པའི་རྒྱུར་གྱུར་ཞི་བ་མོར་བསམས་པ་ན། །དོན་དམ་བདེ་མཛད་དེ་བཞིན་གཤེགས་པ་ནི། །ནམ་མཁའ་བཞིན་དུ་རྒྱུ་མཚན་རྣམས་དང་བྲལ། །ཞེས་སོ། །མདོར་ན་གསུམ་པོའི་རང་བཞིན་ནི་སྟོང་ཉིད་གང་དུའང་མ་གྲུབ་ཅིང་། མཚན་ཉིད་གང་གིས་ཀྱང་གཏན་ལ་མི་ཕེབས་པ། ངག་གི་ཡུལ་ལས་འདས་ཤིང་དོན་དམ་པའི་བདེན་པས་བསྡུས་པ། ཤེས་བྱ་དང་རྟོག་དཔྱོད་ཀྱིས་མ་ཐུག་པས་ཐ་སྙད་དང་གཏན་ཚིགས་ཀྱིས་སྒྲ་ཇི་བཞིན་པར་མི་མཚོན་ལ། ཤེས་བྱེད་ཀྱི་བློ་དང་། སྙམ་བྱེད་དང་། དཔེ་ལ་སོགས་པ་མཐའ་དག་དང་འགལ་བས་སྟོབས་བཅུའི་བདག་ཉིད་རྣམས་ལས་ས་བཅུ་རྒྱུན་མཐའ་བའི་ཡང་སྤྱོད་ཡུལ་མ་ཡིན་པའི་ཚུལ་རྒྱུད་བླ་མར། ངག་ཡུལ་མིན་ཕྱིར་དོན་དམ་གྱིས་བསྡུས་ཕྱིར། །རྟོག་གནས་མིན་ཕྱིར་དཔེ་ལས་འདས་པའི་ཕྱིར། །བླ་ན་མེད་ཕྱིར་སྲི་ཞིས་མ་བསྡུས་ཕྱིར། །རྒྱལ་ཡུལ་འཕགས་རྣམས་ཀྱིས་ཀྱང་བསམ་མི་ཁྱབ། །ཅེས་སོ། །ཚུལ་དེ་ལྟ་བུ་ནི་སངས་རྒྱས་རྣམས་ཀྱི་ཁམས་ཇི་ལྟ་བ་ཡང་དག་པའི་ཡེ་ཤེས་མི་གནས་པའི་མྱ་ངན་ལས་འདས་པ་ཆོས་སྐུའི་བདག་ཉིད་ཅན། གཟུགས་སྐུ་གཉིས་ལྟར་བཏགས་པ་ཙམ་མ་ཡིན་པ། རྣམ་པར་མི་རྟོག་བཞིན་དུ་སྨོན་ལམ་གྱི་དབང་ལས་གཟུགས་སྐུར་སྣང་ནས་སེམས་ཅན་གྱི་དོན་མཛད་ཅིང་ཕྲིན་ལས་རྒྱུན་མི་འཆད་པའི་བདག་ཉིད་ཅན་ཏེ་གསེར་འོད་དམ་པ་ལས། དེ་བཞིན་གཤེགས་པ་ཐམས་ཅད་ལ་སྐུ་གསུམ་མངའ་སྟེ། ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུའོ། །ཆོས་ཀྱི་སྐུ་ནི་ཡང་དག་པའི་ཡེ་ཤེས་ཉིད་ཙམ་དུ་གནས་པ་ལ་བྱའོ། །
སྐུ་གཉིས་ནི་བཏགས་པ་ཙམ་མོ། །ཆོས་ཀྱི་སྐུ་ནི་ཡང་དག་པ་སྟེ་སྐུ་གཉིས་ཀྱི་གཞི་བྱེད་པའོ། །དེ་ཅིའི་ཕྱིར་ཞེ་ན། ཆོས་ཀྱི་དེ་བཞིན་ཉིད་དང་། རྣམ་པར་མི་རྟོག་པའི་ཡེ་ཤེས་ལས་གུད་ན་སངས་རྒྱས་ཀྱི་ཆོས་མེད་པའི་ཕྱིར་རོ། །གསོལ་པ། དེ་བཞིན་ཉིད་ཀྱི་ཡེ་ཤེས་ལ་རྣམ་པར་མི་རྟོག་བཞིན་དུ་ཕྲིན་ལས་ལ་མངའ་བརྙེས་པ་གང་ལགས། བཀའ་བསྩལ་པ། དཔེར་ན་ཉི་ཟླ་དང་ཆུ་དང་མེ་ལོང་ལ་རྟོག་པ་མེད་ཀྱང་གཟུགས་བརྙན་འབྱུང་བ་བཞིན་དུ། དེ་བཞིན་ཉིད་ཀྱི་ཡེ་ཤེས་ཀྱང་མི་རྟོག་བཞིན་དུ་སྨོན་ལམ་གྱི་དབང་གིས་སེམས་ཅན་གྱི་དོན་མཛད་དོ། །སྤྲུལ་པའི་སྐུ་ནི། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའོ། །ལོངས་སྤྱོད་རྫོགས་པའི་སྐུ་ནི། ལྷག་མ་མེད་པའི་མྱ་ངན་ལས་འདས་པའོ། །ཆོས་ཀྱི་སྐུ་ནི་མི་གནས་པའི་མྱ་ངན་ལས་འདས་པའོ། །ཞེས་སོ། །དེའང་རྒྱུད་བླ་མ་དང་མངོན་རྟོགས་རྒྱན་ལས་སྐུ་བཞིར་གསུངས་པ་མདོ་ལམ་དུ་དེ་ཉིད་ལྟར་བཤད་ཟིན་ལ། བསྡུ་བའི་སྒོ་ནས་གསུམ་དུ་གནས་པ་ནི་མདོ་སྡེའི་རྒྱན་ལས། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་བྱ་སྟེ། །སྐུ་གསུམ་དག་གིས་རང་གཞན་གྱི། །དོན་འདི་རྟེན་དང་བཅས་པར་བསྟན། །ཞེས་པ་ལྟར་རོ། །དེ་ལྟ་བུའི་སངས་རྒྱས་ལ་མངའ་དབང་རྫོགས་པའི་སྟོན་པ་ཀུན་ཏུ་བཟང་པོ་ཞེས་བྱ་སྟེ། ཆོས་ཀྱི་དབྱིངས་སུ་ཇི་ལྟར་བཞུགས་ན། འདྲེན་པ་རྣམས་ལ་མངོན་སུམ་གྱུར་པའི་གནས། །ཟབ་ཞི་གཞོན་ནུ་བུམ་པའི་ཁང་མཛེས་ནང་། །དུས་གསུམ་སངས་རྒྱས་རྣམས་ནི་རྟག་བཞུགས་ཀྱང་། །རྣམ་པའི་ཆ་ནས་གཅིག་གིས་གཅིག་མི་གཟིགས། །རང་བཞིན་སྤྲོས་བྲལ་དབྱིངས་ནས་དགོངས་ཀློང་གཅིག །འདི་ལྟར་སངས་རྒྱས་ཉིད་ཀྱི་
ཡེ་ཤེས་གྱི་ཆོས་ཉིད་ལ་མངོན་སུམ་བ། ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བའི་གཞལ་མེད་ཁང་བསམ་གྱིས་མི་ཁྱབ་པས་ཟབ་པ། རང་བཞིན་གྱིས་རྣམ་པར་དག་པས་ཞི་བ། རྒྱ་ཆད་དང་ཕྱོགས་ལྷུང་མེད་པ་ཆོས་ཀྱི་སྔོན་རོལ་པའི་ཟླ་བ་ལྟར་ནད་གསལ། གཞོན་ནུ་བུམ་པའི་སྐའི་ཁང་མ་རྫེས་ན། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དང་གཉིས་སུ་མེད་པའི་དུས་གསུམ་གྱི་སངས་རྒྱས་རྣམས་དགོངས་པ་ལ་སྔ་ཕྱི་དང་མཐོ་དམན་མེད་པར་བཞུགས་ཀྱང་། རང་སྣང་དབྱིངས་སུ་ཐིམ་པའི་ཞི་བ་ཆེན་པོ་ལ་རྣམ་པའི་ཆོས་མེད་པས་རྟན་དང་བརྟེན་པར་ཐ་སྙད་ཙམ་གྱིས་མཚན་པ་ལས་གཞན་སྣང་ལ་བལྟར་ཡོད་པ་གདུལ་བྱའི་འཁྲུལ་སྣང་གི་རང་གཟུགས་གནས་གཙང་མའི་སྟེང་གི་འོག་མིན་ལྟ་བུ་མ་ཡིན་པས། སངས་རྒྱས་ཉིད་ཀྱི་ཡེ་ཤེས་རང་སྣང་ཙམ་དུ་གནས་པའི་ཚུལ་ཀུན་བྱེད་ལས། སྟོན་པ་ཆོས་སྐུའི་གནས་ནི་འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། །ཡང་དག་དོན་གྱི་འོག་མིན་དེ་རུ་བཤད། །ཅེས་དང་། གཅིག་གིས་གཅིག་གཟིགས་པའི་ཡུལ་ལས་འདས་པའང་། །རྨད་བྱུང་རྒྱལ་པོ་ལས། ཆོས་ཀྱི་དབྱིངས་ཀྱི་ཕོ་བྲང་ན་དུས་གསུམ་གྱི་སངས་རྒྱས་ཐམས་ཅད་གཅིག་གིས་གཅིག་མི་གཟིགས་པའི་ཚུལ་གྱིས་བཞུགས་ཏེ། ཞེས་སོ། བཞི་པ་ལོངས་སྤྱོད་རྫོགས་པའི་སྐུལ་བསྟན་བཤད་གཉིས་ལས། དང་པོ་ནི། མཁྱེན་ཆ་འགག་པ་མེད་པའི་རང་གདངས་ལས། །ཐུགས་རྗེ་ཕྱིར་གསལ་ལོངས་སྤྱོད་རྫོགས་པའི་སྐུ། །གནས་དང་དུས་དང་སྟོན་པ་ཆོས་དང་འཁོར། །ངེས་པ་ལྔ་ལྡན་སྐུ་དང་ཞིང་ཁམས་དང་། །མཚན་དཔེ་ཡོན་ཏན་རྒྱ་མཚོའི་བདག་ཉིད་ཅན། །དེ་ལ་ནང་དབྱིངས་
ལ་འཕྲིན་ལས་ཀྱི་སྤྲུལ་སྐུའི་ཆ་བཟུང་། སྤྲོས་བྲལ་ཆོས་ཉིད་ཀྱི་དང་ལས་མི་གཡོ་ཡང་རང་བཞིན་དུ་འོད་གསལ་གྱི་མཁྱེན་ཆ་འགག་པ་མེད་པའི་གདངས་ཕྱིར་གསལ་ལོངས་སྤྱོད་རྫོགས་སྐུ་ངེས་པ་ལྔ་ལྡན་ནི། མཚན་དང་དཔེ་བྱེད་རྒྱ་མཚོའི་བདག་ཉིད་ཅན་ཏེ། དེའི་ཐུགས་ཀྱིས་ཆོས་སྐུའི་ཚ་བཟུང་བས་སྐུ་གསུམ་ཐ་མི་དང་པའི་རང་བཞིན་ཅན་ཡིན་པའང་མཚན་བརྗོད་ཀྱི་འགྲེལ་པར། རིག་པ་རང་བཞིན་གྱི་འོད་གསལ་བ་ནི་ལོངས་སྤྱོད་རྫོགས་པའི་སྐུ། རིག་པ་སྣ་ཚོགས་སུ་འཆར་བ་ནི་སྤྲུལ་པའི་སྐུ། ཇི་ལྟར་སྣང་ཡང་དོན་སྐྱེ་མེད་ལས་མ་འདས་པ་ཆོས་ཀྱི་སྐུའོ། །ཞེས་སོ། །དེ་ལྟར་ཡིན་པས་སངས་རྒྱས་ཀྱི་རང་སྣང་ཙམ་ལས་ཕྱོགས་གཤེད་ན་ཡོད་པའི་རྟེན་དང་བརྟེན་པ་རང་མཚན་པར་མི་བཟུང་སྟེ་སྒྱུ་འཕྲུལ་ལམ་རིམ་ལས། ལྷུན་རྫོགས་རིག་པ་རང་སྣང་བའི། །ཞིང་དང་གཞལ་ཡས་གདན་ཁྲི་རྒྱན། །འོད་ཟེར་དུ་མར་སྣང་བ་སྟེ། །ཞེས་སོ། །གཉིས་པ་སོ་སོའི་རང་བཞིན་རྒྱས་པར་བཤད་པ་ལ། དང་པོ་གནས་ཕུན་སུམ་ཚོགས་པ་ནི། །གནས་ནི་ལྷུན་རྫོགས་འོག་མིན་སྟུག་པོ་བཀོད། །ཡེ་ཤེས་ལྔ་ཡི་འོད་ཟེར་གསལ་འཚེར་འབར། །མཁའ་དབྱིངས་དབང་པོའི་མཚོན་ཆས་བཀབ་པ་བཞིན། །མནན་ན་ནེ་མ་ཞིང་བཏེག་ན་འཕར་བ་ལྟའི། །གཞལ་མེད་ཁང་མཛེས་སྒོ་འཕར་རྣམ་བཞིར་ལྡན། །རྟ་རྐང་རྒྱན་ལྡན་ཡེ་ཤེས་ལྔའི་བརྩིག་པ། །ཕ་གུ་དྲ་ཕྱེད་མངའ་ཡབ་བུ་ཤུ་ཅན། །སྣམ་བུར་འདོད་པའི་ཡོན་ཏན་མིག་ཡངས་མ། །བདེ་སྟོང་མཆོད་སྤྲིན་བརྩེ་དགའ་གཡོ་བ་ཅན། །རྔ་ཡབ་འཕན་གདུགས་རྒྱལ་མཚན་ནོར་བུའི་ཏོག །བླ་བྲེ་ཟར་ཚགས་གཙང་ཁང་པྱུར་བུར་མཛེས། མཆུ་ཞེང་སྲིད་དུ་མི་མངོན་གང་བལྟས་གང་། །གྲངས་ཀྱིས་མི་གཏུགས་མཁའ་དབྱིངས་
སྣོད་གྱུར་བཞིན། །རྟེན་གཞི་གཞལ་མེད་ཁང་པ་རེ་རེའི་ནང་། །བརྟེན་པའི་གཙོ་བོ་ལྔ་ཡི་གདན་ཁྲི་ནི། །འཕྲོག་བྱེད་གཉིས་འཐུང་ཅང་ཤེས་ཟློས་གར་ཅན། །ཤང་ཤང་ཏེའུ་ཆུ་སྐྱེས་ཉི་ཟླའི་སྟེང་། །ཞེས་གཞུང་ཉིད་ཀྱིས་གསལ་བར་སྨོས་ཤིང་། །དེ་ཡང་ཀུན་རྫོབ་པའི་རྣམ་པ་གཞན་ཐམས་ཅད་ལས་ཁྱད་དུ་འཕགས་པའི་ལོངས་སྤྱོད་རྫོགས་པའི་རྟེན་དང་བརྟེན་པ་ནི་བྱང་ཆུབ་ཕྱོགས་ཀྱི་ཆོས་མཐའ་དག་དང་ཡོངས་སུ་འབྲེལ་བའི་རྣམ་པ་ཁྱད་པར་བ་ལས་གྲུབ་པས་གཞལ་མེད་ཁང་གི་བརྡའ་དོན་གྱི་དག་པའང་ལེའུ་བཅུ་པར་བཤད་པ་བཞིན་དྲན་པར་བྱ་ཞིང་། དེ་ཡེ་ཤེས་ཀྱི་རང་སྣང་ཡིན་པས་མཆུ་ཞེང་དང་ཕྱོགས་སུ་རྒྱ་མ་ཆད་ཅིང་། སྲིད་དུ་བལྟར་མི་མངོན་ལ། གཅིག་ཐ་དད་ཀྱི་ཕྱོགས་སུ་མ་ལྷུང་བའི་ཚུལ་ཡང་གུ་ཧྱ་གརྦྷ་ལས། འོག་མིན་གྱི་གནས་མཐའ་དང་དབུས་མེད་པ་ན། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཡེ་ཤེས་རིན་པོ་ཆེ་འབར་པའི་གཞལ་ཡས་ཁང་། རྒྱ་ཕྱོགས་བཅུར་ཡོངས་སུ་མ་ཆད་པ། ཡོན་ཏན་དཔག་ཏུ་མེད་པ་རྒྱས་པའི་ཕྱིར་གྲུ་བཞིར་གྱུར་པ། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་དང་། སོ་སོ་མ་ཡིན་ངོ་བོ་གཅིག་པའི་ཡེ་ཤེས་ཀུན་ཏུ་འཁྱིལ་པ། ཞེས་དང་། གང་ལ་མངའ་བའི་ཡོན་ཏན་གྱི་དག་པ་གདན་ཁྲིས་མཚོན་པའི་ཚུལ་ཡང་། མི་འཇིགས་པ་སེང་གེའི་ཁྲི་དང་། སྟོབས་གླང་པོ་ཆེའི་ཁྲི་དང་། རྫུ་འཕྲུལ་རྟའི་ཁྲི་དང་། དབང་རྨ་བྱའི་ཁྲི་དང་། ཐོགས་པ་མེད་པ་ནམ་མཁའ་ལྡིང་གི་ཁྲི་དང་། རང་བཞིན་གྱི་འོད་གསལ་བ་ཉི་ཟླའི་དཀྱིལ་འཁོར་དང་། གོས་པ་མེད་པ་པདྨ་རིན་པོ་ཆེའི་གདན་ལ། ཞེས་
པས་གསལ་ལོ། །གཉིས་པ་དུས་ཕུན་སུམ་ཚོགས་པ་ནི། དུས་གསུམ་བཞིར་རྫོགས་ཀུན་ཏུ་བཟང་པོའི་དུས། །དེ་ལ་གདུལ་བྱའི་རྣམ་པར་རིག་པ་ཅན་གྱིས་དུས་གསུམ་དུ་ངེས་པ་འདྲེན་པ་ལས་འདས་པ་ནི་ཆོས་ཉིད་གཞིར་རྫོགས་ཀུན་ཏུ་བཟང་པོ་འདུས་མ་བྱས་པའི་དུས་ཏེ། དཔེར་ན་སངས་རྒྱས་ཀྱི་རང་བཞིན་ནི་ཆོས་ཉིད་སྤྲོས་པ་དང་བྲལ་བ་ཡིན་པས་བསམ་གྱིས་མི་ཁྱབ་པ་ཉིད་ལའང་སངས་རྒྱས་ཀྱི་དུས་ན་ཞེས་གཞལ་ཡུལ་ལ་ལྟེས་ནས་གཞག་པ་བཞིན། འདིར་ཡང་ཆོས་ཐམས་ཅད་རང་བཞིན་རྫོགས་པ་ཆེན་པོ་དང་གནས་འཕོ་འགྱུར་མེད་པ་ངོ་བོ་ཉིད་ཀྱིས་རྟག་པའི་དུས་ལ་བརྡར་བཏགས་པ་སྟེ་འཇམ་དཔལ་ལས། དུས་གསུམ་དུས་མེད་རྟོགས་པ་པོ། །ཞེས་སོ། །འདི་ལྟ་བུའི་དུས་བཞིའི་ཚུལ་ནི་ཐུན་མོང་གི་མདོ་སྡེ་ལས་བཤད་པའི་ཚུལ་སྔར་ཡང་དྲངས་ཟིན་ལ་དེ་སྐད་དུ་འཕགས་པ་དཀོན་མཆོག་བརྩེགས་པ་ལས་ཀྱང་། འོད་སྲུང་སེམས་དང་ཆོས་ཀྱི་དེ་བཞིན་ཉིད་ནི་གང་ནས་ཀྱང་མ་འོངས་གང་དུ་ཡང་མ་སོང་གར་ཡང་མི་གནས་པས་ན་མ་ངེས་པ་སྟེ་བསམ་གྱིས་མི་ཁྱབ་པའི་དུས་སོ། །ཞེས་སོ། །གསུམ་པ་སྟོན་པ་ཕུན་སུམ་ཚོགས་པ་ནི། འཕོ་འགྱུར་བྲལ་བའི་མཚན་རྫོགས་སྟོན་པ་ལྔ། །རྣམ་སྣང་མི་བསྐྱོད་རྡོ་རྗེ་རིན་ཆེན་འབྱུང་། །འོད་མཚན་སྟོང་འབར་དོན་ཡོད་གྲུབ་པ་ནི། །རང་རང་རིགས་ཀྱི་ཡུམ་དང་བཅས་པ་རྣམས། ཁ་སྦྱོར་བདུན་གྱི་བདག་ཉིད་ཆེན་པོར་བཞུགས། །དེ་ཡང་ངོ་བོ་ཆོས་ཉིད་ལས་གཡོས་པ་མེད་པས་འཕོ་འགྱུར་དང་བྲལ་ལ། རང་བཞིན་དུ་མཚོན་དཔེ་རྫོགས་པའི་སྐུར་སྣང་བས་ལོངས་སྤྱོད་རྫོགས་པ་ཆེན་པོ་སྟེ། གསང་བའི་སྙིང་པོ་ལས། བཅོམ་ལྡན་འདས་དེ་བཞིན་གཤེགས་པ་
རྣམ་པར་ཤེས་པའི་རྒྱལ་པོ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་དང་། དེ་བཞིན་གཤེགས་པ་ཚོར་བའི་རྒྱལ་པོ་དང་། དེ་བཞིན་གཤེགས་པ་འདུ་ཤེས་ཀྱི་རྒྱལ་པོ་དང་། །དེ་བཞིན་གཤེགས་པ་འདུ་ཁྱེད་ཀྱི་རྒྱལ་པོ་དང་། དེ་དག་ཀུན་ཀྱང་མཐིང་ག་དང་། དཀར་པོ་དང་། སེར་པོ་དང་། ལེབ་རྒན་དང་། ལྗང་གུའི་མདོག་ཏུ་འཚོ་རབ་བཙུན་མོ་དམ་པ་སྣང་བའི་དབྱིངས་དང་། སྲ་བའི་དབྱིངས་དང་། མཉེན་པའི་དབྱིངས་དང་། དྲོ་བའི་དབྱིངས་དང་། སྐྱོད་པའི་དབྱིངས་ལ་སོགས་པ་བཙུན་མོའི་ཚོགས་དང་གཉིས་སུ་མེད་པར་ཆོས་དབྱིངས་ཀུན་ཏུ་མཐའ་ཡས་པར་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གང་བུ་བཞིན་དུ་གང་ནས་ཁྱབ་པར་བཞུགས་སོ། །ཞེས་འཁོར་བའི་དུས་ཀྱི་ཕུང་པོ་ལྔ་པོ་ལས་འཕགས་པའི་ལྡན་ཆོས་རྒྱལ་པོའི་སྒྲས་སྨོས་པའི་རྒྱལ་བ་ལྔ་དང་། ཁམས་ལྔ་པོ་ལ་དབྱིངས་ཀྱི་སྒྲས་འཕགས་ཆོས་རས་བཟུང་ནས་ཡུམ་ལྔའི་རང་བཞིན་དུ་གདོད་ནས་མངོན་པར་རྫོགས་པར་སངས་རྒྱས་པ་གང་ཞིག་རང་རང་གི་རིགས་དང་མཚུངས་པའི་ལྷ་མོ་དང་སྙོམས་པར་ཞུགས་པས་ཁ་སྦྱོར་ཏེ། ཕར་ཕྱིན་གྱི་ལོངས་སྐུ་ཙམ་པོ་ལས་ཁྱད་པར་དུ་བྱས་པ་ནི་བདེ་སྟོང་གཉིས་སུ་མེད་པའི་བྱང་གཞིར་རང་བྱུང་བའོ། །དེའང་འདོད་ཁམས་པ་རྣམས་ནི་ལྷག་པར་རྗེས་སུ་ཆགས་པས་སྤྱོད་པ་ཡིན་པ་གང་ཞིག་རྗེས་སུ་གཟུང་བའི་ཕྱིར་རྒྱལ་བས་སྙོམས་པར་འཇུག་པ་བསྟན་པ་ལས། དབང་གསུམ་པས་ལུས་ཀྱི་བདེ་བ་ཉམས་སུ་མྱོང་པ་ནི་ཡིད་བདེ་བ་འགྱུར་བའི་རྒྱུ་དང་ཡིད་ཀྱི་བདེ་བ་ལྷན་ཅིག་སྐྱེས་པའི་ཡེ་ཤེས་སུ་ཤར་བ་ལས་ཕུང་པོ་ལྔ་དང་། །རྣམ་པར་ཤེས་པའི་ཚོགས་བརྒྱད་སེམས་དང་སེམས་བྱུང་གི་སྤྲོས་པ་མཐའ་དག་འགགས་ནས་སངས་རྒྱས་རྣམས་ཀྱི་ཐུགས་དངོས་པོའི་དེ་ཁོ་ན་ཉིད་ལ་འཇུག་པས་
འཁོར་བའི་སེམས་ཀྱི་ཟག་པ་ལས་གྲོལ་ཞིང་ཤིན་ཏུ་རྒྱ་ཆེ་བ་དང་། གྱ་ནོམ་པའི་བདེ་སྟོང་གི་ཡེ་ཤེས་འཆར་བས་བདེ་བ་ཆེན་པོ་ཞེས་བྱའོ། །དེ་ལྟ་བུའི་བདེ་ཆེན་ཀྱང་རང་བཞིན་མེད་པ། རྣམ་པ་ཐམས་ཅད་པའི་མཆོག་དང་ལྡན་པའི་སྟོང་པ་ཉིད་ཀྱི་ཕྱིར། སྦྱོར་བ་བདུན་པ་ལས། དངོས་པོ་ཀུན་གྱི་ནང་ནས་ཀྱང་། །རང་བཞིན་མེད་པ་གཙོ་བོར་བཤད། །ཅེས་སོ། །དེའི་ངང་ལས་དམིགས་པ་མེད་པའི་སྙིང་རྗེ་ཆེན་པོས་ཡིད་བཞིན་གྱི་ནོར་བུ་རིན་པོ་ཆེ་ལྟར་རྣམ་པར་མི་རྟོག་བཞིན་དུ་སེམས་ཅན་གྱི་དོན་རང་འབྱུང་ལ། དེ་ཡང་། ཤེས་པས་སྲིད་ལ་མི་གནས་ཤིང་། །སྙིང་རྗེས་ཞི་ལ་མི་གནས་པས། །མྱ་ངན་འདས་དང་འཁོར་མི་གནས། །ཞེས་པ་ལྟར། ཤེས་བྱ་ཤེས་བྱེད་ཀྱི་རྣམ་པར་རྟོག་པ་དང་བཅས་པས་སྲིད་པར་གནས་པའམ། ཐེག་དམན་གྱི་མྱང་འདས་ལྟར་ཞི་བ་ཕྱོགས་གཅིག་པའི་མཐའ་གཉིས་སུ་མ་ལྷུང་བཞིན་དུ་རང་ངོའི་ཡོན་ཏན་གྱི་རྒྱུན་ལ་རྟག་པར་འཇུག་ཅིང་བར་ཆད་མེད་པས་རྒྱུན་མི་འཆད་པ་དང་། དེ་ཡང་ལོངས་སྐུ་དེ་རྟག་པ་རྒྱུན་གྱི་འཁོར་ལོར་བཞུགས་ནས་རྣམ་པར་ཆད་པ་མིན་པའི་ཕྱིར་འགོག་པ་མེད་པ་སྟེ་ངག་གི་དབང་ཕྱུག་གིས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་དང་འགོག་པ་མེད། །ཅེས་སོ། །དེ་ལྟར་རྣམ་པ་ལོངས་སྤྱོད་རྫོགས་ཀྱང་ངེས་ཆོས་ཀྱི་སྐུ་དང་སྤྲུལ་པའི་སྐུ་ཡང་བཟུང་བས་སྐུ་གསུམ་ཡན་ལག་བདུན་ལྡན་དུ་བཞུགས་པའི་ཚུལ། དམིགས་པ་མེད་པའི་ཐུགས་རྒྱུད་སྙིང་རྗེ་ཆེན་པོས་གང་བ་དང་། དེའི་ཕྲིན་ལས་ཐུགས་རྗེའི་འཇུག་པ་སེམས་ཅན་གྱི་ཁམས་ལ་རྒྱུན་མི་འཆད་པ་དང་། འགོག་པ་མེད་པ་སྟེ་སྤྲུལ་སྐུའི་ཡན་
ལག་གསུམ། ཡེ་ཤེས་ཀྱི་སྐུ་རང་འོད་ཀྱི་ལྷ་མོ་དང་སྦྱོར་བས་ཁ་སྦྱོར་དང་། དེ་ལས་ཟག་པ་མེད་པའི་བདེ་བ་ཆེན་པོ་རྒྱུན་མི་འཆད་པ་དང་། ཚིག་དང་ཡི་གེ་མེད་པ་དགོངས་རྒྱུད་ཀྱི་ཆོས་འཁོར་ལ་རྟག་པར་ལོངས་སྤྱོད་པ་སྟེ། ལོངས་སྐུའི་ཡན་ལག་གསུམ། རྣམ་པ་དེ་དག་དང་ལྡན་ཀྱང་རང་གི་ངོ་བོ་སྤྲོས་པ་ཀུན་གྱི་ཕ་རོལ་ཏུ་སོན་པས་རང་བཞིན་མེད་པ་ཆོས་སྐུའི་ཡན་ལག་གཅིག་སྟེ་སྤྱིར་བདུན་གྱི་བདག་ཉིད་ཅན་དུ་བཞུགས་པའོ། །བཞི་པ་འཁོར་ཕུན་སུམ་ཚོགས་པ་ནི། ཉིད་ལས་མི་གཞན་སེམས་དཔའ་སེམས་མའི་འཁོར། །སྒོ་བ་བཞི་ངང་དེ་བཞིན་སོ་སོའི་ཡུམ། །དེ་སྐད་དུ་གསང་སྙིང་ལས། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། བྱང་ཆུབ་ཆེན་པོ་རྡོ་རྗེ་ཐོས་པ་དང་། བྱང་ཆུབ་ཆེན་པོ་རྡོ་རྗེ་སྣོམ་པ་དང་། བྱང་ཆུབ་ཆེན་པོ་རྡོ་རྗེ་མྱོང་བ་དང་། བཙུན་མོ་མཐོང་བར་བྱ་བ་དང་། མཉན་པར་བྱ་བ་དང་། བསྣམ་པར་བྱ་བ་དང་། མྱང་བར་བྱ་བའི་ཚོགས་དང་། བྱང་ཆུབ་ཆེན་པོ་རྡོ་རྗེ་ཐོས་བྱེད་དང་། བྱང་ཆུབ་ཆེན་པོ་རྡོ་རྗེ་སྣོམ་བྱེད་དང་། བྱང་ཆུབ་ཆེན་པོ་རྡོ་རྗེ་མྱོང་བྱེད་དང་། བཙུན་མོ་འདས་པ་དང་། ད་ལྟར་དང་། འབྱུང་བ་དང་། མ་བྱོན་པའི་ཚོགས་དང་། འཇོམས་པ་ཆེན་པོ་རྡོ་རྗེ་རེག་པ་དང་། འཇོམས་པ་ཆེན་པོ་རྡོ་རྗེ་རེག་བྱེད་དང་། འཇོམས་པ་ཆེན་པོ་རྡོ་རྗེ་རེག་བྱ་དང་། འཇོམས་པ་ཆེན་པོ་རྡོ་རྗེ་རེག་ཤེས་དང་། བཙུན་མོ་རྟག་པར་མ་ཡིན་པ་དང་། ཆད་པར་མ་ཡིན་པ་དང་། བདག་ཏུ་མ་ཡིན་པ་དང་། མཚན་མར་མ་ཡིན་ལ་སོགས་པ་དེ་ལྟ་བུའི་ཚོགས་བརྗོད་ཀྱིས་མི་ལང་པ་དང་། གཉིས་སུ་མེད་པར་བཞུགས་སོ། །ཞེས་རྒྱུ་དུས་ཀྱི་མིག་ལ་སོགས་པའི་དབང་པོ་བཞི་འབྲས་བུའི་དུས་ན་ཕྱིའི་སེམས་དཔའ་བཞིར་གནས་དག་པའི་ཚུལ་ཡང་སངས་རྒྱས་ཀྱི་ས་ན་དབང་ཤེས་ལྔ་པོ་རེ་རེས་ཀྱང་ཡུལ་ལྔ་ལ་འཇུག་པའི་ཁྱད་པར་མདོ་སྡེའི་རྒྱན་ལས་
ཀྱང་། དབང་པོ་ལྔ་རྣམས་གཞན་གྱུར་ན། །དོན་ཀུན་འཇུག་དང་ཐམས་ཅད་ཀྱི། །ཡོན་ཏན་བརྒྱ་ཕྲག་བཅུ་གཉིས་འབྱུང་། །ཞེས་བཤད་པ་ལྟར་རྡོ་རྗེའི་སྤྱན་སྒྲིབ་པ་མེད་པས་ཡུལ་ལྔ་འཛིན་པའི་རྟེན་བྱེད་པ་བྱམས་པ། སྙན་གྱི་དབང་པོ་ཉམས་པ་མེད་པས་ཡུལ་ལྔ་གསལ་བའི་རྟེན་བྱེད་པ་སྒྲིབ་པ་རྣམ་སེལ། །ཤངས་ཀྱི་དབང་པོས་ཡུལ་ལྔ་འཛིན་པའི་རྟེན་བྱེད་པ་ཀུན་ཏུ་བཟང་པོ། །ལྗགས་ཀྱི་དབང་པོས་ཆོས་ཀྱི་རོ་བྲོ་བའི་མཆོག་མཁྱེན་པ་འཇམ་དཔལ། རིགས་ཀྱི་བཙུན་མོ་རྣམས་ཀྱང་རིམ་པ་བཞིན་འདས་པའི་དུས་ལ་ཆགས་ཐོགས་མེད་པའི་ཡེ་ཤེས་གཟིགས་པ་བདུག་སྤོས་མ། ད་ལྟར་གྱི་དུས་ལ་ཆགས་ཐོགས་མེད་པར་གཟིགས་པ་མེ་ཏོག་མ། །མ་འོངས་པའི་དུས་ལ་ཆགས་ཐོགས་མེད་པའི་ཡེ་ཤེས་གཟིགས་པ་སྣང་གསལ་མ། མ་ངེས་པའི་དུས་ལ་ཆགས་ཐོགས་མེད་པའི་ཡེ་ཤེས་གཟིགས་པ་དྲི་ཆབ་མ་སྟེ། ཕྱི་སྒེག་བཞིའོ། །དེ་བཞིན་དུ་རྒྱུ་དུས་ན་མིག་གི་རྣམ་ཤེས་ལ་སོགས་པའི་དབང་ཤེས་བཞི། འབྲས་བུའི་དུས་ན་ནད་གི་སེམས་དཔའ་བཞིར་གནས་དག་པའི་ཚུལ། སངས་རྒྱས་ཀྱི་སྤྱན་སྒྲིབ་པ་མེད་པ་ཡུལ་ལྔ་ག་ལ་འཇུག་པས་ཆོས་ཉིད་རོ་གཅིག་ཏུ་གཟིགས་པའི་རྡོ་རྗེ་མཐོང་བ་སའི་སྙིང་པོ། སངས་རྒྱས་ཀྱི་སྙན་གྱིས་ཡུལ་ལྔ་ལ་འཇུག་ཅིང་དེ་བཞིན་ཉིད་དུ་རོ་གཅིག་པར་གསན་པའི་རྡོ་རྗེ་ཐོས་པ་ཕྱག་ན་རྡོ་རྗེ། སངས་རྒྱས་ཀྱི་ཤངས་ཀྱིས་ཡུལ་ལྔ་ལ་འཇུག་ཅིང་སྐྱེ་མེད་གཅིག་ཏུ་ཚོར་བ་རྡོ་རྗེ་སྣོམ་པ་ནམ་མཁའི་སྙིང་པོ། །སངས་རྒྱས་ཀྱི་ལྗགས་ཀྱིས་ཡུལ་ལྔ་ལ་འཇུག་ཅིང་གཉིས་མེད་རོ་གཅིག་ཏུ་མྱོང་བ་རྡོ་རྗེ་མྱོང་བ་སྤྱན་རས་གཟིགས། རིགས་ཀྱི་བཙུན་མོ་རྣམས་ཀྱང་རིམ་པ་བཞིན་མཐོང་བྱ་ཡེ་ཤེས་ཀྱི་སྣང་བས་ཡུལ་གཟུགས་སྒེག་མོ་མ། དེ་བཞིན་དུ་མཉན་པར་བྱ་བ་གླུ་མ། སྣོམ་པར་བྱ་བ་ཕྲེང་བ་མ། མྱང་
བར་བྱེད་པ་གར་མ་སྟེ་ནང་སྒེག་བཞིའོ། །དེ་དག་ནི་རྒྱུད་འགྲེལ་རྣམས་ལས་རིགས་སྡུད་པའི་དབང་དུ་བཤད་པའི་རྗེས་སུ་འབྲངས་ལ། རྒྱུད་ཀྱི་དངོས་བསྟན་ལས་ནི་རྟོག་པའི་ཡུལ་དང་ཡུལ་ཅན་ཡབ་ཡུམ་དུ་སྟོན་པས་དེ་ལྟར་ན་ག་ར་ཕྲེང་གཉིས་ཀྱང་ཐབས་ཤེས་སུ་འབྲེལ་བར་མ་མཐོང་ལ། དེའང་དུས་བཞི་ཡུམ་དུ་སྦྱོར་བ་ལ་གླང་པོ་རབ་འབོགས་དཔྱད་བཟོད་པའི་ཚུལ། འདས་པ་མེ་ཏོག་ལ་སྦྱར་བས་དེ་ཉིད་སྐྱེད་ཚལ་ནས་ཕྱུང་སྟེ་མཆོད་ཡུལ་ལ་ཕུལ་བས་རྒྱུ་འབྲས་གཉིས་ག་ལ་སྤྱད་ཚར་བ་མཚོན། དྷུ་པེ་ད་ལྟ་ལ་སྦྱར་བས་རྒྱུ་བསྲེག་བྱའི་དངོས་པོ་ཐལ་པ་དང་། འབྲས་བུ་དྲི་མ་ལྷོངས་བདུས་མཉམ་པའི་ཕྱིར། མ་འོངས་པ་མར་མེ་ལ་སྦྱར་བ་རྒྱུ་འབྲས་གཉིས་ཀ་ཚོགས་ཀྱང་ད་དུང་སྤྱད་དུ་ཡོད་པས་སོ། །མ་ངེས་པ་དྲི་ཆབ་ལ་སྦྱར་བས་རྒྱུ་འབྲས་ཡོད་ལ་མཚོགས་པ་ཉེ་བར་སྤྱད་པའི་རྣམ་པ་མ་ངེས་པའི་ཕྱིར་ཞེས་བཤད་ན་གཞུང་ལེགས་པ་ཡིན་ནོ། །དེ་བཞིན་དུ་བགེགས་ཀྱི་དགྲ་བོ་སྒོ་བ་ཡབ་ཡུམ་བཞི་ལ་འཇོམས་པའི་སྒྲས་ཐབས་ཡབ་ཀྱི་ཆ་དང་། ཆེན་པོའི་སྒྲས་ཤེས་རབ་ཡུམ་གྱི་ཆར་བཏགས་པའི་ཐབས་ཤེས་གཉིས་མེད་ཀྱི་རྣམ་པར་འཕྲལ་པ་ཆེན་པོས་འདུད་དང་གཤིན་རྗེ་ལ་སོགས་པའི་གདུག་པ་ཅན་ནམ་བགེགས་རྣམས་མ་ལུས་པའི་དགྲ་བོར་གྱུར་པས་ན་རྡོ་རྗེའོ། །དེའང་སྒོ་གསུམ་འཛིན་པ་དང་བཅས་པ་སྒོ་བར་གནས་གྱུར་པའི་ཚུལ་ནི། ཐ་མལ་པའི་དུས་ན་ལུས་ཀྱི་ཆའི་རེག་པས་ཚོར་བ་སྐྱེ་བ་ལ་རེག་བྱའི་ཡུལ་དང་རེག་བྱེད་ཀྱི་ལུས་ཕྲད་པ་ལས་རེག་བྱ་ཤེས་པ་ནི་ལུས་རྣམ་ཤེས་ཏེ། སངས་རྒྱས་ཀྱི་དུས་ན་སྐུའི་རེག་བྱའི་ཁམས་ཡུལ་ལྔ་ལ་འཇུག་པའི་ཕྱིར། དེ་དག་གནས་སུ་དག་པ་ལས་བདུད་རྩི་འཁྱིལ་པ་དང་། རྟ་མགྲིན་དང་། སྟོབས་པོ་ཆེ་དང་། གཤིན་རྗེ་གཤེད་དོ། །དེ་བཞིན་དུ་ཐ་མལ་པའི་དག་གི་ཆའི་རེག་པ་སྒྲར་
གྱུར་ཏེ། སྒྲའི་ཤེས་བ་སྐྱེ་བ་ལ། རྗོད་བྱེད་སྒྲ། བརྗོད་བྱ་ཡུལ། གཉིས་ཀའི་རྐྱེན་ཚོགས་པ་ལས་སྒྲ་ཤེས་སྙན་དང་མི་སྙན་བར་མ་གསུམ་དུ་འགྱུར་བ་ལས་ཁྱད་པ་རང་བྱས་པ་སངས་རྒྱས་ཀྱི་དུས་ན་གསུང་གི་གདངས་སྒྲིབ་པ་ཐམས་ཅད་དང་བྲལ་བ་ཡུལ་ལྔ་ལ་འཇུག་པའི་དོད་ཁྲོ་བོ་བཞིར་སྣང་བའོ། །ཡིད་ཀྱི་ཚེ་ཆོས་སུ་བསྒྱུར་ཏེ། ཡིད་ཀྱི་ཡུལ་ཆོས་ཀྱི་སྐྱེ་མཆེད་དུ་སྐྱེ་བ་ལ། རིག་བྱེད་ཡིད། །རིག་བྱ་དོན་སྤྱིའི་རྣམ་པ་མ་ངེས་པ་ཡུལ། དེ་གཉིས་ཚོགས་པས་དགག་བསྒྲུབ་ཆགས་སྡང་ལ་སོགས་པའི་ཤེས་པ་སྐྱེ་བ་ལས་འཕགས་པ། རྒྱལ་བའི་ཡེ་ཤེས་སྒྲིབ་པ་མེད་པ་དོན་སྤྱིའི་འཛིན་པ་ལ་མི་ལྟོས་པར་མངོན་སུམ་དུ་གྱུར་པས་ཚོགས་སྡང་ལས་གྲོལ་བ་མཚོན་བྱེད་དུ་སྒོ་བ་ཁྲོ་བ་བཞིར་སྣང་ཞིང་དེ་ཡང་སྐྱེ་འཇིག་མེད་པ་དང་། བརྗོད་དུ་མེད་པ་དང་། རྣམ་པར་རིག་བྱེད་མེད་པ་དང་། རྣམ་པ་མེད་པར་རྟོགས་པའི་ཡེ་ཤེས་ཀྱི་བཞིར་གནས་དག་པའོ། །དེ་དག་གི་ཡུམ་བཞི་ཡང་རིམ་པ་བཞིན་དུ་གཟུགས་རྟག་པ་མ་ཡིན་པ་གཟུགས་བརྙན་དང་འདྲ་བར་མཚོན་ཞིང་། དེའི་རྣམ་པ་བྱམས་པ་ཚད་མེད་དང། སྦྱིན་པའི་དངོས་པོས་སེམས་ཅན་རྣམས་སྡུད་པའི་མཚོན་བྱེད་ལྕགས་ཀྱུ་མ། སྒྲ་ཆད་པ་མ་ཡིན་པ་སྨིག་རྒྱུ་ལྟ་བུར་མཚོན་ཞིང་། དེའི་རྣམ་པ་སྙིང་རྗེ་ཚད་མེད་དང་སྙན་པར་སྨྲ་བས་སེམས་ཅན་སྡུད་པའི་ཕྱིར་ཞགས་པ་མར་སྣང་བའོ། །ཡིད་བྱེད་པ་པོ་དགག་བསྒྲུབ་ཀྱི་གཟུང་དུ་མེད་པ་རྨི་ལམ་ལྟར་མཚོན་ཞིང་། དེའི་རྣམ་པ་དགའ་ང་ཚད་མེད་དང་དོན་མཐུན་པས་འགྲོ་བ་དབང་དུ་བྱེད་པའི་བརྡར་ལྕགས་སྒྲོག་མའོ། །ཆོས་བྱ་བ་མོ་དངོས་མཚན་རང་གར་མ་གྲུབ་པས་སྤྲུལ་པ་ལྟ་བུར་རྫུན་ཞིང་། དེའི་རྣམ་པ་བཏང་སྙོམས་ཚད་མེད་དང་དོན་སྤྱོད་པས་འགྲོ་བ་རྣམས་ཞི་བ་ལ་བཀོད་པ་མཚོན་
བྱེད་དྲིལ་བུ་མར་བསྟན་པའོ། །དེ་ལྟར་གནས་གྱུར་པའི་ཚུལ་ཡང་འོག་མ་རྣམས་སུ་ནི་རྒྱུ་འབྲས་སྤང་གཉེན་ཅན་སྦྱང་གཞི་དང་སྦྱོང་བྱེད་ཀྱང་དར་རས་ཚོན་གྱིས་བསྒྱུར་བ་ལྟ་བུར་འདོད་ལ། བདེན་པ་དབྱེར་མེད་དག་མཉམ་ཆེན་པོར་སྟོན་པའི་རྒྱུད་སྡེ་ཟབ་མོ་རྣམས་སུ་ནི། གཟོད་ནས་རང་བཞིན་འགྱུར་བ་མེད་ཅིང་དྲི་མ་དང་བྲལ་བའི་ཆོས་ཉིད་ལ། གློ་བུར་ཀུན་ཏུ་བརྟགས་པའི་རྟོག་པས་སྤགས་པས་འཁོར་བའི་དུས་ན་ལས་དང་བདེ་སྡུག་སྣ་ཚོགས་ཀྱི་རྟེན་བྱེད་ཀྱང་། རང་ངོ་སྤང་བླང་དང་སྦྱང་བསྒྱུར་ལས་འདས་པར་རྟོགས་པས་ཆབ་རོམ་ཆུ་རྒྱུན་དུ་བཞུ་བ་ལྟར་འཁོར་བ་ཉིད་ཀྱང་མྱང་འདས་སུ་གྲོལ་བའི་ཚུལ་སངས་རྒྱས་མཉམ་སྦྱོར་ལས། ཨེ་མ་སངས་རྒྱས་ཀུན་གྱི་གསང་། རྫོགས་པའི་སངས་རྒྱས་སྐྱེ་བ་མེད། །སྐྱེ་བ་མེད་ལས་ཐམས་ཅད་སྐྱེས། །སྐྱེས་ཙམ་ཉིད་ནས་སྐྱེ་བ་མེད། །ཅེས་དང་། བརྟག་གཉིས་ལས། རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཡུལ་གྱི་དངོས་པོ་དག་པའི་ཕྱིར། །རང་གི་རིག་པའི་བདེ་བ་མཆོག །གཟུགས་ལ་སོགས་པའི་ཡུལ་རྣམས་དང་། །གཞན་ཡང་རྣལ་འབྱོར་པས་མཐོང་བ། །དངོས་པོ་དེ་ཀུན་དག་པ་སྟེ། །འདི་ལྟར་འགྲོ་བ་སངས་རྒྱས་འགྱུར། ཞེས་པས་གསལ་ལོ། །ལྔ་པ་ཆོས་ཕུན་སུམ་ཚོགས་པ་ནི། །རང་བཞིན་རྫོགས་པ་ཆེན་པོའི་ཆོས་འཁོར་ནི། །སྒྲ་ཚིག་མཚན་མའི་ཡུལ་ལས་འདས་པར་བསྐོར། །ཞེས་སྨོས་ཏེ། དེའི་ཚུལ་ཡང་སྟོན་པས་གསུང་བ་མེད་བཞིན་འཁོར་གྱི་སེམས་དཔའ་རྣམས་ལ་རང་ངོའི་ཤེས་རབ་ཀྱི་རྟོག་དཔྱོད་ལས་རྨི་ལམ་གྱི་ཚིག་ལྟར་སྣང་བའི་ཚུལ་ཀློང་དྲུག་པ་ལས། ཉིད་ཀྱིས་ཞལ་ནས་མ་གསུངས་པར། །རྨི་ལམ་ལྟ་བུའི་མཚན་ཉིད་དུ། །འཁོར་གྱི་སེམས་དཔའ་རྣམས་ལ་ནི། །ཤེས་རབ་རྟོག་དཔྱོད་བློ་ལ་སྣང་། །ཞེས་དང་། དེ་སྐད་དུ་མདོ་
ལས་ཀྱང་། རྒྱལ་བའི་སྲས་པོ་ཅང་མི་གསུང་། མ་གསུངས་པ་ཉིད་རྒྱ་ཆེར་གསུངས། ཞེས་པ་ལྟར་སངས་རྒྱས་རྣམས་ཀྱི་དོན་དམ་པའི་ཆོས་ཀྱི་འཁོར་ལོ་ནི་སྐྱེས་བུའི་རྣམ་རིག་དང་འབྲེལ་བ་མ་གྲུབ་པས་སྒྲ་ཚིག་མཚན་མའི་སྤྱོད་ཡུལ་ལས་འདས་པའི་དོན་རང་བཞིན་རྫོགས་པ་ཆེན་པོ་བརྗོད་བྲལ་བློ་འདས་ཆེན་པོའི་ངོ་བོར་གནས་པ་ཡིན་ཏེ། ཀུན་བྱེད་ལས། ཆོས་ནི་རང་བཞིན་རྫོགས་པ་ཆེན་པོ་སྟེ། །སྙིང་པོ་ལྷུན་འབྱམས་སྨྲ་བསམ་བརྗོད་ལས་འདས། །ཞེས་སོ། །དེ་ལྟ་བུའི་ཆོས་འཁོར་ལ་འགོག་ལམ་གྱི་བདེན་པ་མཐའ་དག་རྫོགས་པའི་ཚུལ་ཡང་ཟླ་བ་སྒྲོན་མ་ལས། གང་གིས་ཆོས་གཅིག་པོ་ཡོངས་སུ་བསླབས་པས་ཡོན་ཏན་གྱི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །གཅིག་པུ་གང་ཞེ་ན། གང་དེ་ཁོ་ན་ཉིད་དུ་ཤེས་པའོ། །ཞེས་སོ། །དེ་ལྟ་བུའི་ཡན་ལག་བདུན་ལྡན་གྱི་ལོངས་སྐུས་དོན་ལ་སྐུ་གསུམ་ཐམས་ཅད་ཀྱི་མཚན་ཉིད་གཟུང་བས་ལམ་དུས་ཀྱི་ལས་རླུང་དག་ནས་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་སྙིང་ག་ལས་བཏེག་སྟེ་རང་སྣང་སྤྲུལ་པའི་དཀྱིལ་འཁོར་བཀོད་པའི་ཚུལ་ལ་ཞི་ཁྲོ་གཉིས་ལས་དང་པོ་ནི། དཔལ་སྒྱུ་འཕྲུལ་དྲ་བ་དང་བསྟུན་ནས། སྟེང་ཁང་ཞིབ་བྱང་ཆུབ་སྙིང་པོའི་གནས། །དབང་མཛད་ཞི་བ་བཞི་བཅུ་རྩ་གཉིས་ལས། །དམ་པའི་སྟང་དཔྱལ་གཉིས་ནི་སྤྲུལ་གཞི་སྟེ། །ཀུན་ལ་ཁྱབ་པར་གདལ་བས་ཆོས་ཀྱི་སྐུ། །འགྲོ་དྲུག་སོ་སོའི་གནས་སུ་དོན་མཛད་པའི། །རིགས་པའི་སྐྱེས་བུ་དྲུག་ནི་སྤྲུལ་པར་ཤར། །རང་སྣང་ལོངས་སྐུའི་ཞིང་ན་སུམ་ཅུ་བཞི། །གཙོ་བོ་བཅུ་ལ་ཉེར་བཞི་འཁོར་གྱི་ཚུལ། །ཕུང་ཁམས་སྐྱེ་མཆེད་གནས་སུ་དག་པའི་ལྷ། །གདན་གསུམ་ཚང་བའི་དཀྱིལ་འཁོར་ཆེན་པོ་ཡིན། །དེ་ལ་དབྱིངས་དང་རིག་བཟུང་དུ་འཇུག་པ་ལ་དམ་པའི་སྟང་དཔྱལ་དུ་སྨོས་པ་
ཀུན་བཟང་ཡབ་ཡུམ་ནི་ཆོས་ཀྱི་སྐུ་དམིགས་བསམ་སྤྲོས་པ་ལས་འདས་པ་ཡིན་པས་ཀུན་ལ་ཁྱབ་པར་གདལ་ཞིང་གཟུགས་སྐུ་གཉིས་ཀྱི་སྤྲུལ་གཞི་ཙམ་དུ་བཞུགས་པ་ལས་བཞིན་ལག་གི་རྣམ་པ་ཅན་གྱི་ལོངས་སྤྲུལ་འཆར་བའི་ཚུལ་སློབ་དཔོན་བི་མ་ལའི་རིན་ཆེན་སྒྲོན་མ་ལས་ཀྱང་། མི་གནས་ཆོས་དབྱིངས་དཀྱིལ་འཁོར་ན། །ཀུན་བཟང་ཡབ་ཡུམ་ཞེས་བྱའོ། །དེ་ལས་ལོངས་སྐུར་བཞེངས་པ་ན། །རིགས་ལྔའི་སངས་རྒྱས་ཡིན་པར་གྲགས། །སྤྲུལ་པས་འགྲོ་དོན་སྤྱོད་པ་ན། རྡོ་རྗེ་སེམས་དཔའི་རྡོ་རྗེ་འཛིན། །གྲངས་མེད་དཔག་གིས་མི་ལང་ངོ་། །ཞེས་པ་ལྟར་རོ། །ཐུབ་པ་དྲུག་ནི་སངས་རྒྱས་ཀྱི་ཐུགས་རྗེའི་འཇུག་པ་གདུལ་བྱ་རང་རང་གི་བསོད་ནམས་ཀྱི་སྣང་བས་བསྡུས་པ་ཡིན་པས་འོག་མིན་དུ་མི་སྣང་ཡང་རྒྱལ་བའི་ཡེ་ཤེས་ཀྱི་།།ཐུགས་རྗེ་གདུལ་ཡུལ་དྲུག་ཏུ་འཇུག་པའི་ཕྲིན་ལས་ཀྱི་གཟུགས་བརྙན་ལྷག་པ་ཏིང་ངེ་འཛིན་གྱི་དཀྱིལ་འཁོར་དུ་སྣང་བའོ། །དེ་སྐད་དུ་ཕལ་པོ་ཆེ་ལས། ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང་། །ཟླ་བ་གཉིས་སུ་གྱུར་པ་མེད། །དེ་བཞིན་ཆགས་མེད་མཁྱེན་ལྡན་རྣམས། །ཆགས་མེད་རྣམ་པར་འཆེད་རྒྱུ་བ། །ཞིང་ཁམས་ཀུན་ན་རབ་ཏུ་སྣང་། །སངས་རྒྱས་ལ་ནི་གཉིས་སྣང་མེད། །ཅེས་པ་ལྟར་རོ། །བློ་གྲོས་ཕྱིན་ཅི་ལོག་དག་ཐུན་མོང་དུ་གྲགས་ཆོད་ཀྱི་སྟོན་པ་ཙམ་ལས་རྒྱལ་བའི་ཡེ་ཤེས་ལས་སྤྲུལ་པ་རིགས་པའི་སྐྱེས་བུ་ལས་དང་ཉོན་མོངས་པ་ཐམས་ཅད་བཅོམ་པས་ཐུབ་པའི་མངོན་བརྗོད་དུ་གསལ་བ་འཇིག་རྟེན་དྲུག་གི་འདྲེན་པ་བདུལ་བ་རྣམ་པ་བཞིའི་ཕྲིན་ལས་ཅན་མི་སྲིད་པར་འགོགས་པ་ནི་རང་མཚད་སྟོན་པའི་རྣམ་འགྱུར་ཏེ། དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། འཇམ་དཔལ། དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་མཐོང་བས་གདུལ་
བར་བྱ་བ་ཡིན་ན། །དེ་བཞིན་གཤེགས་པའི་སྐུ་ཡང་གསེར་གྱི་ཁ་དོག་ཏུ་སྣང་ངོ་། །དེ་བཞིན་དུ་བཻ་ཌཱུརྻ་དང་། ཨནྡ་རྙིལ་དང་། སྤུག་དང་། མུ་ཏིག་དམར་པོའི་ཁ་དོག་གིས་གདུལ་བར་བྱ་བ་ཡིན་ན། དེ་དག་གི་ཁ་དོག་ཏུ་བཞུགས་སོ། །དེ་བཞིན་དུ་འཇིག་རྟེན་སྐྱོང་བ་དང་། བརྒྱ་བྱིན་དང་། ཚངས་པ་དང་། དབང་ཕྱུག་དང་། ལྷ་མ་ཡིན་དང་། མི་དང་། དུད་འགྲོ་དང་། དམྱལ་བ་དང་། གཤིན་རྗེའི་འཇིག་རྟེན་པས་གདུལ་བར་བྱ་བ་ཡིན་ན་དེ་དག་གི་གཟུགས་སུ་བཞུགས་ནས་ཆོས་སྟོན་ཏོ། །ཞེས་པའི་དོན་ཕྱོགས་ཙམ་ཡང་མ་མཐོང་བས་རྨོངས་པར་ཟད་དོ། །གདུལ་བ་བཞི་ནི་བསོད་ནམས་ཀྱིས་གདུལ་བ་དང་། དོན་ཐམས་ཅད་མངོན་སུམ་དུ་གྱུར་བས་གདུལ་བ་དང་། རྫུ་འཕྲུལ་ཆེན་པོས་གདུལ་བ་དང་། རིག་པས་གདུལ་བའོ། །དེ་བས་ན་རང་སྣང་དོན་གྱི་འོག་མིན་ན་བལྟར་མངོན་པའི་གཤེགས་པ་གཤེགས་མ། སེམས་དཔའ་སེམས་མ། སྒོ་བ་སྒོ་མ་སྟེ་གདན་གསུམ་སྤྱིར་དྲིལ་བའི་གཙོ་འཁོར་སུམ་ཅུ་རྩ་བཞི་པོ་ནི། ཕུང་པོ་དང་། ཁམས་དང་། སྐྱེ་མཆེད་གསུམ་པོ་འོག་མའི་ལུགས་ལྟར་གནས་སུ་དག་པའམ། དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་ལུགས་ཀྱི་ཆོས་ཉིད་སྟོང་པ་ཉིད་དང་ཆོས་ཅན་སྣང་བ་ཉིད་ནི་རང་བཞིན་གྱི་རྡོ་རྗེ་ཕུང་པོ། །དེའི་ཡན་ལག་རྣམ་པར་ཤེས་པ་ལ་སོགས་པའི་ཕུང་པོ་ལྔ་པོ་མི་བསྐྱོད་པ་ལ་སོགས་པའི་སངས་རྒྱས་ལྔ་དང་། གཟུགས་ལ་སོགས་པའི་ཡུལ་དྲུག་ལ་མིག་ལ་སོགས་པའི་དབང་ཤེས་དྲུག་སྐྱེ་ཤིང་། དེའི་སྐད་ཅིས་ཕྱི་མར་རྒྱུན་མཆེད་པས་སྐྱོ་མཆེད་བཅུ་གཉིས་སམ་མིག་དང་གཟུགས་དང་། མིག་གི་རྣམ་པར་ཤེས་པའི་ཁམས་ཞེས་གསུམ་མཚན་དྲུག་ཏུ་སྦྱར་བའི་ཁམས་བཅོ་བརྒྱད་པོ་བྱང་ཆུབ་སེམས་དཔའ་སྟང་དཔྱལ་བརྒྱད། འབྱུང་བ་ལྔ་ནི་དེ་བཞིན་གཤེགས་པ་ལྔའི་ཡུམ་གྱི་ངོ་བོར་གནས་པས། ཕྱི་ནང་གི་འབྱུང་བ་དང་རྟོག་ཚོགས་ཀྱིས་
བསྡུས་པའི་སྲིད་པ་གསུམ་པོ་འདི་ཡང་རྟོགས་པ་རྣམས་ཀྱི་ངོར་ཡེ་ནས་སངས་རྒྱས་ཀྱི་ཞིང་ཁམས་ཉག་གཅིག་ཏུ་གནས་པའི་ཚུལ། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཞེས་སོ། །དེ་ལྟ་བུའི་དཀྱིལ་འཁོར་ལ་རང་སྣང་དང་གཞན་སྣང་གི་ཁྱད་དབྱེ་བའི་ཕྱིར། འདི་དག་སྒྱུ་འཕྲུལ་དྲྭ་བ་མཉམ་སྦྱོར་སོགས། །བླ་མེད་རྒྱུད་ལས་ལུས་གྲུབ་དཀྱིལ་འཁོར་ནི། །ཇི་སྙེད་བསྟན་དང་རྣམ་དག་མཚུངས་པ་ཡིན། །འདི་ལྟར་སྒྱུ་འཕྲུལ་དྲྭ་བ་དང་། །སངས་རྒྱས་མཉམ་སྦྱོར་དང་། འདུས་པའི་རྒྱུད་སྔ་ཕྱི་གཉིས་ལ་སོགས་པའི་བླ་མེད་ཕལ་མོ་ཆེའི་ལུས་གྲུབ་ཀྱི་དཀྱིལ་འཁོར་རྣམས་ནི་རང་སྣང་གིས་བསྡུས་པའི་ཞིང་ཁམས་ཡིན་པས་རྣམ་དག་ཀྱང་མཚུངས་པ་ཡིན་ལ། གཞན་སྣང་ལ་ཤར་བའི་ཞི་བའམ། ཁྲོ་བོའི་དཀྱིལ་འཁོར་ནི་འོག་མིན་གྱི་ཞིང་ཁམས་ལས་གཞན་དུ་གྱུར་པ་སྟེ། དཔེར་ན་བསྒྲུབ་སྡེ་ལས་བགེགས་འདུལ་ཕྱིར་རྨི་ལམ་ལྟར་སྤྲུལ་པ་འཇིག་རྟེན་པའི་འཁོར་གཙོ་བོར་གྱུར་པའི་དཀྱིལ་འཁོར་གསུམ་དུ་བསྟན་པ་བཞིན་ཏེ་དེ་མ་ཐག་ཏུའང་འཆད་པར་འགྱུར་རོ། །ད་ནི་འོག་ཁང་ཁྲོ་བོའི་དཀྱིལ་འཁོར་འདུས་པ་མདོ་ལྟར་བསྟན་པ་ནི། འོག་ཁང་ཚོགས་ཆེན་འདུས་པའི་དཀྱིལ་འཁོར་ནི། །འབར་བའི་གཞལ་ཡས་ཕྱི་ནང་རིམ་པ་དགུ། །སྒོ་ཁྱམས་དགུ་པའི་ཕྱི་མར་རྒྱུ་འབྲས་ཀྱི། །རྟ་བབས་གཉིས་ལྡན་ཕོ་བྲང་དབུས་མའི་ནང་། །རྡོ་རྗེའི་བྲག་ཆེན་པདྨ་སྟོང་བརྡལ་ལ། །ཐབས་ཤེས་ཉི་ཟླར་དབང་ཕྱུག་ཁྱོ་ཤུག་ནི། །ཉི་ཤུ་རྩ་གཅིག་སྟེང་དུ་དཔའ་གཏུམ་སྟག །འཇིགས་བྱེད་སེང་གེ་གདུག་པ་
གཟིག་དང་ནི། །གཏུམ་པ་དོམ་དང་སྟོབས་ཆེན་གླང་པོ་དང་། །བརྗིད་པའི་མ་ཧེ་འཛིན་པའི་ཆུ་སྲིན་དང་། །ཞེ་སྡང་ལྟོ་འགྲོ་བྱོལ་སོད་གཙོ་བརྒྱད་རེས། །དྲེགས་པ་ཕོ་མོ་བཟུང་ཞིང་བརྫིས་པའི་སྟེང་། །འཁོར་འདས་ཀུན་ཀྱི་སྤྱི་དཔལ་བཅོམ་ལྡན་འདས། །ཆེ་བའི་ཆེ་མཆོག་ཨིནྡྲ་ནཱི་ལའི་མདངས། །ཉི་མ་བྱེ་བའི་འོད་ལྡན་བདུན་གསུམ་ཞལ། །ཞབས་བརྒྱད་ཕྱག་ནི་བཞི་བཅུ་རྩ་གཉིས་ན། །ཞི་བའི་ལྷ་ཚོགས་བཞི་བཅུ་རྩ་གཉིས་བསྣམས། །གནམ་ཞལ་ཡུམ་མཆོག་དཔུང་དགུ་ཕྱག་བཅོ་བརྒྱད། །རྩ་བའི་ཕྱག་གཉིས་རྡོ་རྗེ་དུང་ཁྲག་འཛིན། །ལྷག་མ་གནས་ཡུལ་མ་མོ་ཕྲ་མེན་བསྣམས། །ཡབ་ཡུམ་ཁྲོ་མཁར་ཚུལ་ལམ་མཉམ་པར་སྦྱོར། །སྲིད་དང་ཞི་བའི་ཆོས་ཁམས་མ་ལུས་པ། །བཅོམ་ལྡན་འདས་ཀྱི་ཞབས་ཀྱི་གདན་ཁྲི་ནས། །དབུ་རྒྱན་འཁོར་ལོའི་བར་ལ་རང་བཞིན་རྫོགས། །དབང་མཆོག་དང་ནི་ཧེ་རུ་ཀ་དཔལ་དགུ། །གློ་འབུར་བཞི་དང་གྲུ་ཆད་རྣམ་བཞི་ལ། །རྣམ་ཤེས་ཚོགས་དག་གཽ་རི་ལ་སོགས་བརྒྱད། །དཀྱིལ་འཁོར་དང་པོའི་ཁྱམས་ལ་ཕྲ་མེན་བརྒྱད། །གཉིས་པའི་ཁྱམས་ལ་སྤོར་མ་རྣམ་པ་བརྒྱད། །གསུམ་པའི་ཁྱམས་ལ་དབང་མོ་ཉི་ཤུ་བརྒྱད། །ཀུན་ལ་རང་རང་སྒོབ་བཞི་བཞིར་ལྡན། །འབར་བའི་རྣམ་རོལ་གར་དགུའི་ཉམས་ཀྱིས་བརྗིད། །འདི་དག་རང་སྣང་ལོངས་སྐུའི་དཀྱིལ་འཁོར་སྟེ། །གཞི་སྣང་ལྷུན་གྲུབ་དོན་གྱི་འོག་མིན་ཡིན། །བཞི་པའི་ཁྱམས་ལ་མཁའ་འགྲོ་སུམ་ཅུ་གཉིས། །ལྔ་པའི་ཁྱམས་ལམ་བདུན་སྲིང་མོ་བཞི། །དྲུག་པའི་ཁྱམས་གིང་ཆེན་དྲུག་ཚན་གསུམ། །བདུན་པར་ཁྲོ་བོ་ཡབ་ཡུམ་བཅུ་ཕྲག་དྲུག །བརྒྱད་པར་ཕོ་ཉ་ཉིས་བརྒྱ་བཞི་བཅུ་སྟེ། །དགུ་པའི་ཁྱམས་ལམ་མོ་དྲུག་ཅུ་རྣམས། །ལོག་འདྲེན་གདུལ་ཕྱིར་སྤྲུལ་པས་བསྡུས་པའི་ཕྱིར། །བགེགས་སོགས་གདུལ་བྱ་སོ་སོའི་རང་ངོར་སྣང་། །
དེ་ཕྱིར་རང་སྣང་འོག་མིན་དཀྱིལ་འཁོར་མིན། །དེ་ལ་རྩ་བའི་རྒྱུད་ཀུན་འདུས་རིག་པར། དཀྱིལ་འཁོར་གྱི་ལྟེ་བ་འཁོར་ལོ་དྲུག་བརྩེགས་ལ་རོལ་པའམ། ཆོ་འཕྲུལ་དམ་ཚིག་ལ་སོགས་པ་བརྟེན་པ་ལྷ་དྲུག་ཅུ་རྩ་བཞི་དང་། གྲུ་ཆད་ལག་ནས་ཡུལ་སྒོ་སྐྱོང་། །དའི་ཕྱི་རོལ་ཏུ་ཁྲོ་བཅུ་ནས་རིམ་པར་བཤད་ཅིང་། དེའང་གབ་པའི་དབང་ལེ། ཧེ་རུ་ཀ་འདུས་པ་སོགས་དགོད་ཚུལ་གྱི་རྣམ་པ་ཐ་དད་པ་ལས་སྒོ་སྤྲག་དགུ་མ་དང་། བཅུ་གཅིག་པ་གཉིས་སུ་གྲགས་ཀྱང་དང་པོའི་ཕྱོགས་བཙན་པའི་ཚུལ་ཀུན་འདུས་རིག་པའི་རྒྱུད་ལེའུ་དང་པོ་ལས། སྒོ་དགུས་ཀུན་ཏུ་གསལ་བར་གྱུར་པའི་གནས་ན་རྡོ་རྗེ་རྒྱལ་ཆབ་ཅེས་བྱ་བའི་ཞེ་སྔར་རྡོ་རྗེ་དང་། ཞེས་པས་སོ། །དེ་ཡང་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བཅོམ་ལྡན་འདས་ཀྱི་གདན་ཁྲི་ནས་དབུའི་གཙུག་ཏོར་ལ་ཇི་ལྟར་རྫོགས་པའི་ཚུལ་ནི་རྩ་རྒྱུད་དེ་ཉིད་ལས། དེ་ནས་འདུས་པ་ཕལ་མོ་ཆེའི་འཁོར་རྣམས་ཀྱིས་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བཅོམ་ལྡན་འདས་གསང་བ་མཆོག་གི་བདག་པོའི་ཞབས་ཀྱི་གདམ་ཁྲི་ཡན་ཆད་ནས། དབུའི་གཙུག་ཏོར་མན་ཆད་དུ་རྫོགས་པར་མཐོང་ངོ་། །དེ་ཡང་འཁོར་བ་འདོད་པ་ཁམས་ནི་ཁྲག་གི་རྒྱ་མཚོར་རྫོགས། འཁོར་བ་གཟུགས་གྱི་ཁམས་ནི་ཞིང་ཆེན་གྱིས་གཞི་བརྡལ་བ་ལ་རྫོགས་པར་མཐོང་ངོ་། །ཀེང་རུས་ལ་གཟུགས་མེད་པའི་ཁམས་རྫོགས་པར་མཐོང་། རི་རབ་ཀྱི་ཁ་མུ་ཏིག་གི་གཅལ་དང་། ཨ་སྨ་གརྦྷ་འབར་བའི་འོད་འཁྲིགས་པའི་ནོར་བུ་རིན་པོ་ཆེ་འབར་བའི་བྲག་གཏམས་པ་ལ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་རྫོགས་པར་མཐོང་ངོ་། །ནོར་བུ་རིན་པོ་ཆེའི་སྟེང་དུ་རྡོ་རྗེ་རྩེ་གསུམ་པ་དང་རྩེ་ལྔའི་བྲག་གཏམས་པ་ལ་ཀྲི་ཡ་དང་ཨུ་པ་ཡ་དང་ཡོ་ག་རྣམས་རྫོགས་པར་མཐོང་
ངོ་རྡོ་རྗེ་བྲག་ཆེན་གྱི་སྟེང་ན་པདྨ་དཀར་པོའི་མཎྜལ་ལ་བསྐྱེད་པའི་རྣལ་འབྱོར་པ་ཐམས་ཅད་རྫོགས་པར་མཐོང་ངོ་། །པདྨའི་སྟེང་ན་ཉི་མ་ཉི་ཤུ་རྩ་བཞི་དང་། ཟླ་བ་ཉི་ཤུ་རྩ་བཞི་ཁ་སྦྱོར་དུ་བཀོད་པ་ལ་དབང་ཕྱུག་ཕོ་ཉི་ཤུ་རྩ་བཞི་དང་། མོ་ཉི་ཤུ་རྩ་བཞི་རྫོགས་པར་མཐོང་ངོ་། །དབང་ཕྱུག་ཕོ་མོའི་སྟེང་བྱོལ་སོང་གི་གཙོ་བོ་བརྒྱད་ནི་རིག་འཛིན་ཆེན་པོའི་རྣལ་འབྱོར་ཉོན་མོངས་པ་སྦྱངས་ནས་ཤེས་བྱའི་སྒྲིབ་པ་སྦྱང་པའི་ཕྱིར་དཔའ་གཏུམ་སྟག་དང་། འཇིགས་བྱང་སེང་གེ་དང་། གདུག་པའི་གཟིག་དང་། གཏུམ་པོའི་དོམ་དང་། སྟོབས་ཀྱི་གླང་པོ་དང་། བརྗིད་པའི་མ་ཧེ་དང་། འཛིན་པའི་ཆུ་སྲིན་དང་། ཞེ་སྡང་གི་སྤྲུལ་རྣམས་ལ་རིགས་འཛིན་ཐམས་ཅད་ས་ལ་ཡོངས་སུ་རྫོགས་པར་མཐོང་ངོ་། །གཞལ་ཡས་ཆེན་པོ་འབར་བལ་ཡུམ་ཀུན་ཏུ་བཟང་མོ་རྫོགས་པར་མཐོང་ངོ་། །མེ་དཔུང་ཆེན་པོ་དགུལ་ཡེ་ཤེས་ཀྱི་སྒོ་དགུ་བརྩེགས་སུ་ཡོངས་སུ་འབར་བར་མཐོང་ངོ་། །ཞབས་བརྒྱད་ལ་གསང་བའི་ཡུམ་བཞི་དང་། སྒོམ་བཞི་རྫོགས་པར་མཐོང་ངོ་། །དུ་ཁྲོད་ཀྱི་རྒྱན་ཆེན་པོ་བཅོ་བརྒྱད་ནི་མ་མོ་ཆེན་མོ་བཅོ་བརྒྱད་ཡོངས་སུ་རྫོགས་པར་གསལ་ལོ། །ཕྱག་མཚན་བཞི་བཅུ་རྩ་གཉིས་ནི་ཕྲ་མེན་མ་བཅུ་དབྱུག་པ་འཕྱར་བའི་ལག་ན་ཁྱུང་བཅུ་འབར་བའི་ཁ་ནས་མཚོན་ཆ་སྣ་ཚོགས་འཕྲོ་བ། མཁའ་འགྲོ་བརྒྱད་དབྱུག་པ་འཕྱར་བའི་ལག་ན་སེང་གེ་ཁ་གླལ་བ་བརྒྱད་ཀྱི། ཁ་ནས་རལ་གྲི་འབར་པ་བརྒྱད་འཕྲོ་བ། ཤུགས་འགྲོ་བརྒྱད་དབྱུག་པ་འཕྱར་བའི་ལག་ན་སྟག་མཆེ་བ་གཙིགས་པ་བརྒྱད་ཀྱི་ཁ་ནས་རྡོ་རྗེ་སྣ་ཚོགས་འཕྲོ་བ། མ་མོ་བརྒྱད་དབྱུག་པ་འཕྱར་བའི་ལག་ན་མགོ་བརྒྱད་རྡོ་རྗེ་ལུ་གུ་རྒྱུད་ཀྱིས་བཏོགས་ནས་
ཀླད་ལ་བསྐོར་བ། འབར་མ་བརྒྱད་དབྱུག་པ་འཕྱར་བའི་ལག་ན་མེ་དཔུང་འབར་བ་བརྒྱད་ལས་ཐོ་ལུམ་འཕྲོ་བ་སྟེ་བཞི་བཅུ་རྩ་གཉིས་སུ་གསལ་ལོ། །ཕྱག་བཞི་བཅུ་རྩ་གཉིས་ན་ཁྲག་འཐུང་འབར་བ་བཞི་གིང་ཕོ་དགུ་མོ་དགུ། །ཟ་བྱེད་ཆེན་པོ་ཕ་བཅུ་གསོད་བྱེད་མ་བཅུ་སྟེ་བཞི་བཅུ་རྩ་གཉིས་སུ་གསལ་ལོ། །ཞལ་ཉི་ཤུ་རྩ་གཅིག་ནི་སྲིད་པ་ཟ་བྱེད་གསང་བའི་དུར་ཁྲོད་ཉི་ཤུ་རྩ་གཅིག་ཏུ་གསལ་ལོ། །སྤྱན་འབར་བ་དྲུག་ཅུ་རྩ་བཞི་ནི་ཧེ་རུ་ཀ་ཡབ་ཡུམ་དྲུག་ཅུ་རྩ་བཞིར་གསལ་ལོ། །དབུ་ཉི་ཤུ་རྩ་གཅིག་ནི་དུས་གསུམ་གྱི་སངས་རྒྱས་ཉི་ཤུ་རྩ་གཅིག་ཏུ་གསལ་ལོ། །གཡས་ཀྱི་དབུ་བདུན་གྱི་སྤྱི་གཙུག་ན་སངས་རྒྱས་ཀྱི་སྐུ་རེ་རེ་བྱུང་བའི་དབུ་ལ་འཁོར་ལོ་འོད་ཟེར་དང་བཅས་པ་རེ་རེ་འབར་བ། །དབུས་ཀྱི་དབུ་བདུན་ལས་དབུ་རྒྱན་སངས་རྒྱས་ཀྱི་སྐུ་རེ་རེ་བྱུང་བའི་དབུ་ལ་རིན་པོ་ཆེའི་མཆོད་རྟེན་འབར་བ་བདུན་དུ་གསལ་བ། གཡོན་གྱི་དབུ་བདུན་ལས་དབུ་རྒྱན་སངས་རྒྱས་ཀྱི་སྐུ་རེ་རེ་བྱུང་བའི་དབུ་ལ་ནོར་བུ་རིན་པོ་ཆེ་བདུན་དུ་གསལ་ལོ། །འཁོར་ལོ་དང་། མཆོད་རྟེན་དང་། རིན་པོ་ཆེ་དེ་དག་གི་ལྟེ་བ་དང་། བུམ་པ་དང་རྩེ་མོ་ལས་རྒྱལ་མཚན་ཆེན་པོ་བཅུ་འབར་བ་ནི་རྒྱ་བྱེའུ་ལྕགས་ཀྱི་རྒྱལ་མཚན་དང་། གདུལ་བྱ་ཤ་བའི་རྒྱལ་མཚན་དང་། གཅན་གཟན་གཟིག་གི་རྒྱལ་མཚན་དང་། སྤྲུལ་པ་རྡོ་རྗེའི་རྒྱལ་མཚན་དང་། རིན་ཆེན་སྤྲུལ་ནག་གི་རྒྱལ་མཚན་དང་། དཔའ་བསྟག་གི་རྒྱལ་མཚན་དང་། གཟི་མདངས་མིའི་རྒྱལ་མཚན་དང་། དམར་གསལ་ཁྲག་གི་རྒྱལ་མཚན་དང་། །རྩལ་ཆེན་སེང་གེའི་རྒྱལ་མཚན་དང་། གཏུམ་ཆེན་དོམ་གྱི་རྒྱལ་མཚན་དང་། རྒྱལ་མཚན་དེ་རྣམས་ཀྱི་རྩེ་མོ་གཅིག་ཏུ་འདུས་ཏེ། གསེར་གྱི་གཙུག་ཏོར་ཏོག་སྟོང་འབར་བའོ། །དེ་ནས་འདུས་པ་ཕལ་མོ་ཆེའི་འཕོར་གྱིས་ཞབས་ཀྱི་
གདན་ཁྲི་ཡན་ཆད་ནས་དབུའི་གཙུག་ཏོར་མན་ཆད་དུ་ཡོངས་སུ་རྫོགས་པར་མཐོང་ངོ་། །དབུ་ལས་བྱུང་བའི་སངས་རྒྱས་ཉི་ཤུ་རྩ་གཅིག་དང་། རྒྱལ་མཚན་ཆེན་པོ་བཅུ་ལ་རྫོགས་པའི་རྣལ་འབྱོར་ཡོངས་སུ་རྫོགས་པར་མཐོང་ངོ་། །དབུའི་གཙུག་ཏོར་རྒྱལ་མཚན་གྱི་རྩེ་མོ་ལ་གསེར་གྱི་ཏོག་སྟོང་ནི། རྫོགས་པ་ཆེན་པོའི་རྣལ་འབྱོར་ཉིད་དུ་གསལ་བར་མཐོང་ངོ་། །དེ་ལྟར་མཐོང་ཞིང་གསལ་བར་གྱུར་པ་དང་། ཆོས་ཐམས་ཅད་སྐུ་ལ་ཡོངས་སུ་རྫོགས་པའི་དོན་ལ་འཁོར་ཐམས་ཅད་དོམས་ཤིང་ངོ་མཚར་སྐྱེས་པར་གྱུར་ཏོ། །ཞེས་སོ། དེ་ཡང་ཁྱམས་བཞི་པ་ནས་དགུ་པའི་བར་སྤྲུལ་པས་བསྡུས་པའི་འཐད་པ་ཡང་སློབ་དཔོན་སངས་རྒྱས་གསང་བས་གོ་འཕང་མཆོག་དམན་ལ་ལྟོས་ནས་སྤྱན་འགྲེལ་དུ་འོག་མིན་ལ་རིགས་དྲུག་ཏུ་ཕྱེ་བའི་དོན་འདི་ལྟར། དོན་ཀྱི་འོག་མིན་དང་། རྟགས་ཀྱི། རིག་པའི། གསང་བའི། རྟག་པའི། འཇིག་རྟེན་གྱི་འོག་མིན་རྣམས་ལས། །འདི་ནི་ལྷག་པ་ཏིང་ངེ་འཛིན་གྱི་དཀྱིལ་འཁོར་དམ་པའི་བཞུགས་གནས་དོན་སྤྱི་འཇལ་བྱེད་ཀྱི་རྟོག་པ་དེའི་གོང་ན་གཞན་མེད་པའི་འོག་མིན་དུ་སྣང་བས་སོ། །འདིར་འབྲས་བུའི་ཡོན་ཏན་བརྗོད་པའི་སྐབས་ཡིན་པས་མ་འབྲེལ་ཏོ་ཟེར་ན། ལམ་དུས་དེ་ལྟར་གོམས་པ་ལས་བར་ཆད་མེད་ལམ་མངོན་དུ་གྱུར་ནས་འབྲས་བུའི་དུས་གཞི་སྣང་ལྷུན་གྲུབ་རྟགས་ཀྱི་འོག་མིན་དབྱིངས་དང་ཡེ་ཤེས་དབྱེར་མེད་པའི་རང་སྣང་ལོངས་སྤྱོད་རྫོགས་པའི་ཞིང་དུ་མངོན་པར་སངས་རྒྱས་ནས་ཆོས་ཀྱི་དབྱིངས་དོན་དམ་པའི་འོག་མིན་ལ་སྦྱོར་བའི་ཆ་ནས་སྐབས་འདིར་དོན་གྱི་འོག་མིན་དུ་སྨོས་པའི་ཚུལ་སྒྱུ་འཕྲུལ་རྒྱ་མཚོ་ལས། རང་སྣང་རྒྱལ་བ་སེམས་ལྕོགས་དང་། །དང་པོའི་སངས་རྒྱས་བ་རྒྱལ་
བ། །སེམས་དཔའ་ཆེ་དང་འཇོམས་པ་ཆེ། །ཞེས་སོ། །དེའི་ཕྱིར་ཁྱམས་བཞི་བ་ནས་དགུ་པའི་བར་གྱི་རྟེན་དང་བརྟེན་པ་ནི་ལོག་པར་འདྲེན་པའི་གཤེད་དུ་སྤྲུལ་པས་བསྡུས་པ་ཡིན་པས་རང་སྣང་གི་འོག་མིན་དུ་མི་བགྲང་ངོ་། །དེ་ལྟ་བུའི་བརྟེན་པའི་ལྷ་ཚོགས་ཀྱི་རྣམ་འགྱུར་ཡང་ཞི་བ་རྣམས་ནི་ཚུལ་དགུ་དང་ལྡན་པ་སྟེ་རྔམ་གློག་ལས། དེ་ལྟ་བུའི་སྐུ་མཆོག་རེ་རེ་ལ། །ཚུལ་དགུ་དག་དང་ལྡན་པ་སྟེ། །མཉེན་དང་ལྕུག་དང་འཁྲིལ་པ་དང་། །ལྡེམ་བག་ཆགས་དང་གཞོན་ཚུལ་ཅན། །ཞེས་སོ། །ཁྲོ་བོ་རྣམས་ནི་གར་གྱི་ཉམས་དགུ་དང་ལྡན་པར་བཞུགས་ཏེ་གལ་པོ་ལས། སྒེག་པ་དཔའ་བ་མི་སྡུག་པ། །དགོད་དང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་སྟེ། །གར་དགུའི་ཚུལ་གྱིས་བསྒྱིངས་པའོ། །ཞེས་པ་ལྟར་རོ། །དེ་ལ་གཙོ་བོ་ཡབ་ཡུམ་འཁྲིལ་སྦྱོར་རྣལ་མ་འམ། ཁྲོ་མཁར་ཚུལ་དུ་བཞུགས་ཚུལ་ནི་བདུད་རྩི་ཡོན་ཏན་གྱི་དཀྱིལ་འཁོར་སྦྱོར་བ་བརྒྱད་ལྡན་ལས་འཆི་མེད་བདུད་རྩིའི་དཀྱིལ་འཁོར་ལྟར་གྲུབ་ལ། དེ་ཡང་གཙོ་བོའི་དབུ་ཉི་ཤུ་རྩ་གཅིག་ས་ཉི་ཤུ་རྩ་གཅིག་ཏུ་སྦྱོར་བ་ལ་སོགས་པའི་རྣམ་དག་ནི་རང་གཞུང་གིས་སྲིད་པ་ཟ་བྱེད་གསང་བའི་དུར་ཁྲོད་ཀྱི་བརྡས་བརྟན་པ་ལྟར་སློབ་དཔོན་ཆེན་པོ་སངས་རྒྱས་གཉིས་པས་བསྡུབ་སྡེའི་གཞུང་དུའང་གསལ་བར་བསྟན་པ་བཞིན་ནོ། །དེ་ལྟ་བུའི་ཞིང་ཁམས་ཀྱང་རང་ངོའི་སྒྲིབ་པ་ལས་གྲོལ་སྟོབས་ཀྱི་ཡོན་ཏན་ལས་བྱུང་བའི་རང་སྣང་ཆེན་པོར་བཀོད་པའི་ཚུལ། ཆོས་སྐུའི་ཡེ་ཤེས་ཕྱི་རུ་གསལ་བའི་མདངས། །ཕུན་ཚོགས་ལྔ་ལྡན་ལོངས་སྐུར་རྫོགས་པའི་གནས། །གང་དུ་སྒྲིབ་པ་མཐའ་དག་སྤངས་གྱུར་པའི། །སངས་རྒྱས་ཁོ་ནའི་རྒྱུད་ཀྱིས་བསྡུས་པ་ཡེ། །རོལ་པ་ཉིད་ཕྱིར་གཙོ་འཁོར་མཆོག་དམན་མཉམ། །ཀུན་གྱི་ཐུགས་ཀྱང་རྣམ་པར་མི་རྟོག་ཅིང་། །གསུང་ནི་བརྗོད་བྲལ་སྐུ་ནི་མཚན་དཔེར་རྫོགས། །རང་སྣང་
ཡེ་ཤེས་མཐོང་བ་དག་པའི་སྤྱན། །གཅིག་གིས་གཅིག་གཟིགས་ནམ་ཡང་སྒྲིབ་པ་མེད། །འདི་ལྟར་ལོངས་སྤྱོད་རྫོགས་པའི་ཞིང་ཁམས་དེ་ཉིད་ཕུན་སུམ་ཚོགས་པ་ལྔ་ལྡན་དུ་བསྟན་ཡང་གཙོ་འཁོར་ལ་མཆོག་དམན་མེད་ཅིང་། ཆོས་དང་གནས་དུས་ལ་འདུས་བྱས་རང་མཚན་པའི་བློས་ཐུག་པ་མ་ཡིན་ཏེ། བདེ་གཤེགས་སྙིང་པོའི་ཁམས་ཀྱི་སྒྲིབ་པ་གློ་བུར་མཐའ་དག་དང་བྲལ་བ་ཆོས་སྐུ་ངོ་བོ་ཉིད་ཀྱི་རྟག་པའི་གདངས་ལས་ལོངས་སྤྱོད་རྫོགས་པའི་སྐུ་རྒྱུན་གྱིས་རྟག་པའི་ཞིང་ཁམས་སུ་ལྷུན་གྱིས་གྲུབ་ནས། སྤྲུལ་པའི་སྐུ་རྒྱུན་མི་འཆད་དུ་རྟག་པའི་འཆར་གཞིར་བཞུགས་པའི་སངས་རྒྱས་ལོངས་སྤྱོད་རྫོགས་སྐུ་དེའི་གཙོ་འཁོར་དང་ཞིང་ཁམས་ཀྱི་རོལ་པ་ནི་སངས་རྒྱས་ཉིད་ཀྱི་སྣང་བས་བསྡུས་པ་ཡིན་པས་རྨི་ལམ་གྱི་དུས་ན་སྣང་བའི་གཙོ་འཁོར་ལྟར་དོན་ལ་བཟང་ངན་དང་བྱེ་བྲག་ཆད་པ་མེད་པའོ། །དེ་ལྟར་ལོངས་སྐུའི་དངོས་གཅིག་ལ་སྐུ་གསུམ་གྱི་ཆོས་ཉིད་རྫོགས་པའི་དབྱིངས་འཇལ་ཚུལ་ཀྱང་སྐུ་གསུམ་བསྟན་པའི་མདོ་ལས། ཆོས་ཀྱི་སྐུ་ནི་ངོ་བོ་ཉིད་ཀྱི་རྟག་པའོ། །ལོངས་སྤྱོད་རྫོགས་པའི་སྐུ་ནི་རྒྱུན་གྱི་རྟག་པའོ། །སྤྲུལ་པའི་སྐུ་ནི་རྒྱུན་མི་འཆད་པའི་རྟག་པའོ། །ཞེས་སོ། །དེ་ལྟ་བུའི་ལོངས་སྐུ་ནི་ཐུགས་ཆོས་སྐུའི་ངང་ལས་མི་གཡོ་བས་རྣམ་པར་མི་རྟོག་པ་དང་། གསུང་སྒྲ་ཚིག་རང་མཚན་ལས་འདས་པས་བརྗོད་པ་བྲལ་བ་དང་། སྐུ་མཚན་དང་དཔེ་བྱད་རྒྱ་མཚོའི་བདག་ཉིད་དུ་གསལ་བས་གཟི་བརྗིད་ཆེན་པོར་སྣང་བས། རང་སྣང་མཐོང་བ་དག་པའི་ཡེ་ཤེས་ཀྱི་སྤྱན་གྱིས་ཕན་ཚུན་སྒྲིབ་པ་མེད་པར་གཅིག་གིས་གཅིག་གཟིགས་པའི་ཚུལ་ཡོངས་གྲུབ་ཀྱི་བསྐྱེད་རིམ་གོམས་པའི་སྣང་བ་བཞིན་ནོ། །དེ་ལས་གཞན་དུ་སྤངས་
རྟོགས་མཐར་ཕྱིན་པའི་སངས་རྒྱས་ཀྱི་རང་བཞིན་གང་ཡིན་པ་དེ་ནི་ས་བཅུའི་བྱང་སེམས་ཀྱིས་ཀྱང་མི་མཐོང་བའི་ཚུལ། དུས་གསུམ་རྒྱལ་བ་རྣམས་ཀྱི་སྤྱོད་ཡུལ་ནི། །བླ་ན་མེད་ཕྱིར་སྲིད་ཞིས་མ་བསྡུས་ཕྱིར། །དག་པའི་སེམས་ཅན་ཆེན་པོ་རྣམས་ཀྱིས་ཀྱང་། །མཐོང་བར་མ་ནུས་རྒྱལ་བའི་ཡེ་ཤེས་དང་། །འགལ་བའི་སྒྲིབ་ཆས་ད་དུང་མ་སྤངས་ཕྱིར། །དེ་ལ་དུས་གསུམ་དུ་གཤེགས་ཤིང་བྱོན་པའི་རྒྱལ་བ་རྣམས་ཀྱི་ཁམས་དང་ཡོན་ཏན་གྱི་སྤྱོད་ཡུལ་ནི་ནམ་མཁའ་ལྟང་བསམ་གྱིས་མི་ཁྱབ་པའི་བདག་ཉིད་ཅན། བླ་ན་མེད་པ། གོང་ནམ་མཆིས་པ། སྲིད་ཞི་གཉིས་ཀའི་ཕྱོགས་སུ་མ་ལྷུང་བས་རྟག་ཆད་ཀྱིས་མ་བསྡུས་པ། ངག་གི་བརྗོད་ཡུལ་ལས་འདས་ཤིང་། དོན་དམ་པའི་མཐར་ཐུག་པ། རྟོག་པས་གཞལ་བྱ་དང་། དཔེ་དང་ཐ་སྙད་ཀྱིས་མི་ཐུག་པས་ས་དང་པོ་ནས་ས་བཅུ་པའི་བར་གྱི་དབང་བཅུ་ཐོབ་པའི་བྱང་ཆུབ་སེམས་དཔའ་འམ། སེམས་ཅན་ཆེན་པོ་རྣམས་ཀྱིས་ཀྱང་སྒྲ་ཇི་བཞིན་པ་མཐོང་བར་མི་ནུས་ཏེ། ཅིའི་ཕྱིར་ན་ད་དུང་ཁམས་ཀྱི་སྒྲིབ་པ་མཐའ་དག་མ་སྤངས་ཤིང་རྒྱལ་བ་རྣམས་ཀྱི་ཇི་ལྟ་བ་དང་། ཇི་སྙེད་པའི་ཡོན་ཏན་མཐའ་དག་ལ་གཟིགས་པའི་བློ་མིག་མ་ཐོབ་པའི་ཚུལ། །རྒྱུད་བླ་མ་ལས། བླ་མེད་ཡེ་ཤེས་ཐུགས་རྗེ་ཆེ་སོགས་ཡོན་ཏན་གྱིས། །ཡོན་ཏན་ཕ་རོལ་ཕྱིན་པའི་རྒྱལ་བ་བསམ་མི་ཁྱབ། །དེས་ན་རང་བྱུང་རྣམས་ཀྱི་ཐ་མའི་ཚུལ་འདི་ནི། །དྲང་སྲོང་ཆེན་པོ་དབང་ཐོབ་རྣམས་ཀྱིས་ཀྱང་རིག་མིན། །ཞེས་སོ། །དོ་བས་ན་རྒྱལ་བ་ཁོ་ནའི་སྤྱོད་ཡུལ་ཡིན་པར་སྟོན་པའི་ཚུལ། འདས་དང་མ་འོངས་ད་ལྟ་དུས་གསུམ་གྱི། །ངེས་པ་ལས་འདས་འོག་མིན་ཆེན་པོ་ན། །བཞུགས་པའི་སངས་རྒྱས་དུས་བཞིའི་བདག་ཉིད་ཅན། །གཙོ་འཁོར་ངོ་བོ་མཐུན་པའི་རང་སྣང་ངོ་། །ང་ལ་འདས་མ་འོངས་ད་
ལྟར་ཏེ་འདུས་བྱས་ཀྱི་དུས་ཀུན་རྫོབ་པ་ལས་འདས་ཤིང་། ཆོས་ཉིད་འདུས་མ་བྱས་པ་ཡོད་མེད་རྟག་ཆད་ལས་འདས་པས་བསམ་གྱིས་མི་ཁྱབ་པའི་དུས་བཞི་པའི་བདག་ཉིད་ཅན་གྱི་འབྲས་བུའི་སངས་རྒྱས་དེ་ནི་རང་སྣང་དོན་གྱི་འོག་མིན་ན་རྟག་པ་རྒྱུན་གྱི་འཁོར་མོར་བཞུགས་ཤིང་གཙོ་འཁོར་དགོངས་པ་མཉམ་པའི་རང་སྣང་སྟེ་གསང་སྙིང་ལས། ཕྱོགས་བཅུ་དུས་བཞི་རྫོགས་པ་ཡི། །ཞིང་ཁམས་བསམ་ཡས་རྣམ་དག་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེན་གསུང་ལས་དོན་འབྱུང་བའང་། །མཐུན་པའི་ཡེ་ཤེས་རང་སྣང་བའོ། །ཞེས་སོ། །ལྔ་པ་སྤྲུལ་པའི་སྐུ་བཤད་པ་ནི། །དེ་ཉིད་ངང་ལས་སེམས་ཅན་གདུལ་བའི་ཕྱིར། །འདུལ་བྱེད་སྟོན་པ་གསུམ་དུ་བཀོད་པ་ནི། །རང་བཞིན་སྤྲུལ་པ་འགྲོ་འདུལ་སྤྲུལ་པ་དང་། །སྣ་ཚོགས་སྤྲུལ་པ་གསུམ་ལས་རང་བཞིན་ནི། །རྒྱལ་བའི་ཡེ་ཤེས་སྣང་བ་འོག་མིན་གྱི། །དབྱིངས་སྣང་ལོངས་སྐུའི་དཔེ་བྱད་དངས་ཤེལ་ནང་། །འཕོས་ལྟའི་གཟུགས་བརྙན་ཕྱེད་སྤྲུལ་ལོངས་སྐུའི་གནས། །དེ་ལ་རང་བཞིན་སྤྲུལ་པ་དང་། འགྲོ་འདུལ་སྤྲུལ་པ་དང་། སྣ་ཚོགས་སྤྲུལ་པ་གསུམ་ལས། དང་པོ་ནི། རྒྱལ་སྲས་འཕགས་པ་ལ་སོགས་པ་གདུལ་བྱ་མཆོག་ལ་སྣང་བས་གཟུགས་བརྙན་ལོངས་སྐུའི་སྟོན་པར་ཡང་བརྗོད་ལ། རང་སྣང་ལ་དབྱིངས་ཀྱི་ལོངས་སྐུ་དང་ཆ་འདྲ་ཡང་དངོས་མ་ཡིན་པའི་དཔེ་ནི་ནམ་མཁའི་ཟླ་བ་དངོས་དང་། དེའི་གཟུགས་བརྙན་གཉིས་པ་ཆུ་ནང་དུ་འཕོས་པ་ལྟ་བུ་སྟེ། རྒྱུད་བླ་མར་ཇི་ལྟར་སྤྲིན་མེད་ནམ་མཁའི་ཟླ་བའི་གཟུགས། །སྟོན་གའི་ཆུ་སྔོན་མཚོར་ནི་མཐོང་བ་ལྟར། །དེ་བཞིན་རྒྱལ་སྲས་རྣམས་ཀྱི་ཁྱད་བདག་
གཟུགས། །རྫོགས་སངས་དཀྱིལ་འཁོར་ནང་དུ་མཐོང་བར་འགྱུར། །ཞེས་སོ། །དེའི་ཕྱིར་དབྱིངས་ཀྱི་ལོངས་སྐུ་ནི་སངས་རྒྱས་ཉིད་ཀྱི་རང་སྣང་ཙམ་དུ་ཟད་ལ། །གཟུགས་བརྙན་གྱི་ལོངས་སྐུ་གཉིས་པ་ནི་སེམས་དཔའ་སར་གནས་པས་མཐོང་བས་སྤྲུལ་པའི་མིང་གིས་བསྡུས་པའི་ཁྱད་པར་ཏེ། དེ་ལྟ་བུའི་ལོངས་སྤྱོད་རྫོགས་སྐུ་གཉིས་པས་སེམས་དཔའ་ཆེན་པོ་རྣམས་ཚིམ་པར་བྱེད་པས་ཉེ་བ་ཞེས་བརྗོད་ལ། དེའི་ཆ་མཐུན་མཚན་དཔེས་སྤྲས་པའི་མཆོག་གི་སྤྲུལ་པའི་སྐུ་རྣམས་ནི་རྣམ་པར་དག་པའི་དབྱིངས་ལ་བརྟེན་པས་རིང་བ་ཞེས་བརྗོད་པའི་ཚུལ་རྒྱུད་བླ་མ་ལས། མཐོང་ན་ཚིམ་ཁྱེད་ཡོན་ཏན་གང་། །སུམ་ཅུ་རྩ་གཉིས་ཞེས་བྱ་བ། །སྤྲུལ་པ་ཆོས་ལ་རྫོགས་པར་ནི། །ལོངས་སྤྱོད་གཟུགས་སྐུ་གཉིས་ལ་བརྟེན། །དག་ལས་ཉེ་དང་རིང་རྣམས་ལ། །འཇིག་རྟེན་རྒྱལ་བའི་དཀྱིལ་འཁོར་དུ། །ཆུ་དང་ནམ་མཁར་ཟླ་གཟུགས་བཞིན། །དེ་མཐོང་བ་ནི་རྣམ་པ་གཉིས། །ཞེས་སོ། རང་བཞིན་རྒྱས་པར་བཤད་པ་ལ་གནས་དང་། སྟོན་པ་དང་། ཡེ་ཤེས་དང་། འཁོར་དང་། དུས་དང་། སྦྱང་བྱའི་ཁྱད་པར་དང་དྲུག་ལས་དང་པོ་ནི། གཙང་མ་རིགས་ཀྱི་འོག་མིན་ལས་ཁྱད་པར་དུ་འཕགས་པའི་གནས་ཕུན་སུམ་ཚོགས་པ་དབང་ཕྱུག་ཆེན་པོའི་འོག་མིན་བླ་ན་མེད་པ་སྟེ། དབུས་ན་འོག་མིན་ཤར་ན་མངོན་པར་དགའ། །ལྷོན་དཔལ་ལྡན་ནུབ་ན་པདྨ་བརྩེགས། །བྱང་ན་ལས་རབ་གྲུབ་པ་རྣམ་པ་ལྔར། །ཞེས་པས་གསལ་ལོ། །གཉིས་པ་ནི། །གཟུགས་ཀྱི་རྒྱལ་པོ་ལ་སོགས་སྟོན་མཆོག་ལྔ། །མཚན་དཔེ་ཡོན་ཏན་རྒྱ་མཚོའི་བདག་ཉིད་ཅན། །ཞི་དང་ཁྲོ་བོའི་རྣམ་འགྱུར་དཔག་མེད་ཅིང་། །འདི་ལྟར་དབུས་ན་རྣམ་སྣང་། །ཤར་ན་མི་བསྐྱོད་པ། ལྟོ་ན་རིན་འབྱུང་། ནུབ་
ན་སྣང་མཐའ། བྱང་ན་དོན་ཡོད་གྲུབ་པ་ལྔར་སྣང་བའང་འཁོར་ཀྱི་སེམས་དཔའ་ཆེན་པོ་དེ་དག་གི་རྒྱུ་ལམ་གྱི་སྒྲིབ་པ་ཕྲ་མོ་ཚུན་ཆོད་སྦྱངས་པའི་མཐར་སྐུ་ལྔ་དང་ཡེ་ཤེས་ལྔ་ཐོབ་པར་བྱེད་པ་ལ་ལྟོས་ནས་རང་སྣང་བ་སྟེ། དེ་དག་གི་མཚན་དཔེ་ནི་མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུའི་བདག་ཉིད་ནི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པའི་ཚུལ་སྔར་བཤད་པ་ལྟར་རོ། །རྒྱུད་གཞན་ལས་གཙོ་བོ་མི་བསྐྱོད་པར་བཤད་ན་འདིར་རྣམ་སྣང་འབྱུང་བའི་རྒྱུ་གང་ཡིན་ཟེར་ན། རྔམ་གློག་ལས། དབུས་སུ་རྣམ་པར་སྣང་མཛད་གཙོ། །ཞེས་པ་དང་འཆོད་མ་ཐག་པས་ཀྱང་ཤེས་པར་འགྱུར་རོ། །དེའང་ཀུན་མཁྱེན་ཆེན་པོ་ནི་རྣམ་པར་ཤེས་པའི་རང་བཞིན་ཐ་དད་དུ་འཆར་ཞིང་མེ་ལོང་དུ་གཟུགས་བརྙན་འཛིན་པ་ལྟ་བུའི་ཡེ་ཤེས་དང་ལྡན་པ་རྣམ་པར་སྣང་མཛད་དུ་ཐུན་མོང་མ་ཡིན་པའི་རྒྱུད་སྡེར་འགྲེལ་ཏོ། །གསུམ་པ་ནི། ཡེ་ཤེས་རྣམ་པ་ལྔ་པོ་རེ་རེ་ལའང་། །བཞི་བཞིའི་འཁོར་དང་བཅས་པས་ཉི་ཤུ་ལྔ་། །ཆོས་དབྱིངས་ཡེ་ཤེས་གཡོ་བ་མེད་པ་ནི། ནམ་མཁའི་གཟུགས་བཞིན་ཤེས་བྱའི་མཐའ་ལས་འདས། །མེ་ལོང་ཡེ་ཤེས་གཟུང་འཛིན་རྡུལ་བྲལ་ནི། །མངོན་པར་འདུ་བྱེད་མེད་བཞིན་མཆེད་པའི་གཞི། །མཉམ་ཉིད་ཡེ་ཤེས་ཆོས་ཀུན་མཚན་ཉིད་མེད། །སྲིང་ཞི་དབྱེར་མེད་ཞི་བའི་དབྱིངས་སུ་བཞུགས། །སོར་རྟོག་ཡེ་ཤེས་ཆོས་ཉིད་ཇི་ལྟ་དང་། །ཆོས་ཅན་ཤེས་བྱ་ཇི་སྙེད་རྟག་ཐོགས་མེད། །བྱ་གྲུབ་ཡེ་ཤེས་ཕྲིན་ལས་གཞན་ཕན་ཅན། །ཆགས་ཐོགས་སྤངས་པའི་མཛད་པ་ལྷུན་གྱིས་གྲུབ། །དེ་ལྟར་སྟོན་པ་ལྔ་པོ་རེ་རེ་ལའང་རང་བཞིན་རྒྱུད་གཅིག་པའི་ཡེ་ཤེས་ལྔ་ལྔ་སྟེ་སྤྱིར་ཉི་ཤུ་རྩ་ལྔར་ལྡན་པའི་ཚུལ་དབྱེ་བ་སྤུའི་
ཁྱད་པར་ལས་ཡིན་པའང་། རང་ཤར་ལས། ཡེ་ཤེས་དབྱེ་བ་འདི་ལྔ་སྟེ། །ཉི་ཤུ་རྩ་ལྔའི་ངོ་བོ་ལས། །བསྡུ་ན་རྣམ་པ་ལྔར་འདུས་སོ། །ཞེས་སོ། །དེ་ལ་གཙོ་བོའི་ཡེ་ཤེས་ནི་རྣམ་སྣང་ནས་རིམ་པར་བྱེ་བའི་ཚུལ་ཡང་སངས་རྒྱས་ཀྱི་སའི་མདོ་ལས། ཆོས་ཀྱི་དབྱིངས་ཀྱི་ཡེ་ཤེས་ནི་དཔེར་ན་ནམ་མཁའི་གཟུགས་སུ་གྱུར་པ་ཐམས་ཅད་ན་ཡོད་ཀྱང་དེའི་རང་བཞིན་བརྗོད་པར་བྱ་བ་མ་ཡིན་པས་སྣ་ཚོགས་སུ་མེད་པ་རོ་གཅིག་གོ །དེ་བཞིན་དུ་ཆོས་ཀྱི་དབྱིངས་ཀྱི་ཡེ་ཤེས་ཀྱང་ཤེས་བྱ་ཐམས་ཅད་ལ་ཡོད་ཀྱང་བརྗོད་པར་བྱ་བ་མ་ཡིན་པས་སྣ་ཚོགས་མ་ཡིན་པའི་ཕྱིར་རོ་གཅིག་གོ །མེ་ལོང་ལྟ་བུའི་ཡེ་ཤེས་ནི་དཔེར་ན་མེ་ལོང་གི་ངོས་ལ་གཟུགས་བརྙན་སྣང་ཡང་ཡོད་པ་མ་ཡིན་ཏེ་རྩོལ་བ་ཡང་མེད། མངོན་པར་འདུ་བྱ་བ་ཡང་མེད་དོ། །དེ་བཞིན་དུ་མེ་ལོང་ལྟ་བུའི་ཡེ་ཤེས་ལ་ཐམས་ཅད་མཁྱེན་པའི་གཟུགས་བརྙན་སྣ་ཚོགས་བྱུང་ཡང་ཡོད་པ་མ་ཡིན་ཏེ་རྩོལ་བ་དང་། མངོན་པར་འདུ་བྱ་བ་མེད་དོ། །མཉམ་པ་ཉིད་ཀྱི་ཡེ་ཤེས་ནི་ཆོས་ཐམས་ཅད་མཚན་ཉིད་མེད་པར་མཉམ་པ་ཉིད་ཁོང་དུ་ཆུད་ཅིང་བདེ་བ་དང་སྡུག་བསྔལ་རོ་གཅིག་པས་མཉམ་པར་གྲུབ་པའོ། །སོ་སོར་རྟོག་པའི་ཡེ་ཤེས་ནི་དཔེར་ན་འཇིག་རྟེན་གྱི་ཁམས་ནི་གླིང་དང་ཉི་ཟླ་ལ་སོགས་པས་སོ་སོར་ཕྱེ་བ་ཡིན་ནོ། །དེ་བཞིན་དུ་སོ་སོར་རྟོག་པའི་ཡེ་ཤེས་ཀྱང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་དང་། རྒྱུ་དང་འབྲས་བུར་བཅས་པ་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་ཡང་དག་པར་གྲུབ་པ་སོ་སོར་མཁྱེན་ཏོ། །བྱ་བ་གྲུབ་པའི་ཡེ་ཤེས་ནི་དཔེར་ན་སེམས་ཅན་རྣམས་ཀྱི་ལུས་དང་ངག་དང་ཡིད་ཀྱི་བྱ་བ་གྲུབ་པར་བྱེད་དོ། །དེ་བཞིན་དུ་བྱ་བ་གྲུབ་པའི་ཡེ་ཤེས་ནི་སྐུ་དང་གསུང་དང་ཐུགས་ཀྱིས་སེམས་ཅན་གྱི་དོན་ལྷུན་གྱིས་གྲུབ་པར་མཛད་པའོ། །ཞེས་པས་ཤིན་ཏུ་
གསལ་ལོ། །དེ་ཡང་ཆོས་ཀྱི་དབྱིངས་ཀྱི་ཡེ་ཤེས་ནི་ཀུན་ཁྱབ་བརྗོད་པ་དང་བྲལ་བ་ཉིད་ཡིན་ལ་མེ་ལོང་ཡེ་ཤེས་ནི་མངོན་པར་འདུ་བྱ་བ་མེད་བཞིན་དུ་ཡེ་ཤེས་གཞན་གསུམ་པོའི་ཡང་འཆར་གཞིར་གྱུར་ཅིང་རྣམ་པ་ཀུན་གྱི་མཆོག་ལྡན་དག་པའི་རྟེན་གཞིར་གྱུར་པའི་ཚུལ་མདོ་སྡེའི་རྒྱན་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་ཉིད་ཡེ་ཤེས་སོ་སོར་རྟོག །བྱ་བ་གྲུབ་པ་ཁོ་ནའོ། །ཞེས་སོ། །བཞི་པ་ནི། འཁོར་ནི་ས་བཅུའི་སེམས་དཔའ་འབའ་ཞིག་ལ། །སྐུ་ཡིས་ཆོས་རྣམས་འཇལ་བའི་འོད་བཀྱེ་བས། །བྱད་ཀྱི་དྲི་མ་མེ་ལོང་ནང་གསལ་ལྟར། །ད་དུང་བདག་དང་སྟོན་པའི་ཁྱད་མཐོང་ནས། །བྱང་ཆུབ་སྒྲིབ་པ་གཏིང་དཔག་དཀའ་བ་དག །སྦྱངས་ནས་བཅུ་གཅིག་ཀུན་ཏུ་འོད་ལ་འགྲོ། །དེ་ལ་འཁོར་ནི་སྟོན་པ་རང་ལས་རྒྱུད་གཞན་གྱིས་བསྡུས་པའི་སར་གནས་ཀྱི་བྱང་ཆུབ་སེམས་དཔའ་རྣམས་དང་ཐབས་གཅིག་ཏུ་བཞུགས་ནས། ཆོས་ཕུན་སུམ་ཚོགས་པ་སྐུ་ལས་འོད་ཟེར་བཀྱེ་བའི་ལོངས་སྤྱོད་ཀྱི་དགའ་བ་དེ་ལ་ཉེ་བར་སྤྱོད་པའི་ཚུལ་འགྲེལ་ཆུང་ལས། བྱང་ཆུབ་སེམས་དཔའ་ས་ཆེན་པོ་ལ་བཞུགས་པ་རྣམས་དང་། ཐབས་གཅིག་ཏུ་ཐེག་པ་ཆེན་པོའི་ཆོས་ཀྱི་ལོངས་སྤྱོད་ཀྱི་དགའ་བ་དང་བདེ་བ་ཤིན་ཏུ་ཁ་ན་མ་ཐོ་བ་མེད་པ་ལ་ཉེ་བར་སྤྱོད་པའི་ཕྱིར་སངས་རྒྱས་བཅོམ་ལྡན་འདས་ཀྱི་ལོངས་སྤྱོད་རྫོགས་པའི་སྐུ་ཡིན་ནོ། །ཞེས་སོ། །དེའི་ཚུལ་ཡང་སྒྱུ་འཕྲུལ་པའི་ལུགས་ཀྱི་འདི་ལྟར་མེ་ལོང་བལྟས་པས་བྱད་ཀྱི་དྲི་མ་རང་སྟོབས་ཀྱིས་སྦྱོང་ནུས་པ་ལྟར། ས་བཅུ་པའི་བྱང་ཆུབ་སེམས་དཔའ་དེས་སྤྲུལ་པའི་ལོངས་སྐུ་ལ་བལྟས་པས་རང་གི་ས་ལ་ཇི་ལྟར་ཡོད་པའི་སྒྲིབ་པའི་ཁྱད་པར་དེའི་སྐུ་ལ་སྣང་བ་ལྟར་མཐོང་བ་ནི་སྐུའི་
བརྡས་འཇལ་བའི་ཆོས་ཏེ། དེའི་ཚེ་ས་དེ་དག་གི་དྲི་མ་སྦྱོང་བ་ལ་བརྩོན་ནོ། །དེའང་ས་དང་པོར་སེར་སྣ། །གཉིས་པར་ཚུལ་འཆལ། གསུམ་པར་ཁོང་ཁྲོ། བཞི་པར་ལེ་ལོ། ལྔ་པར་རྣམ་གཡེང་། དྲུག་པར་ཤེས་འཆལ། བདུན་པར་ཐབས་ལམ་མཁས་པ། བརྒྱད་པར་གཞན་དོན་གྱི་སྙིང་སྟོབས་ལ་སྒྲིབ་པ། དགུ་པར་སྨོན་པའི་དོན་ལ་གཡེལ་བ། བཅུ་པར་ཤེས་སྒྲིབ་ཕྲ་མོའི་ས་བོན་དང་བཅས་པ། ཕ་རོལ་ཏུ་ཕྱིན་པ་བཅུ་དང་། སའི་ཡོངས་སུ་སྦྱང་བས་ལྷག་མེད་དུ་སྦྱངས་ནས་བླ་ན་མེད་པའི་བྱང་ཆུབ་འཐོབ་པའི་ཚུལ་གསང་སྙིང་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་མཇལ་བར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །དེ་ནས་ས་བཅུ་རིམ་གྱིས་འབྱུང་། །བླ་མེད་བྱང་ཆུབ་ཡང་དག་འཐོབ། །ཅེས་སོ། །ལྔ་པ་ནི། དུས་ནི་ས་བཅུའི་དབང་ཕྱུག་ཆེན་པོ་རྣམས། །འཇིག་རྟེན་མགོན་པོ་ངོ་བོ་མེད་པའི་དབྱིངས། །མི་ཟད་རྒྱན་འཁོར་སྐུ་གསུང་ཐུགས་ཀྱི་ངང་། །སྟོན་འཁོར་དགོངས་པ་གཅིག་ཏུ་མ་གྱུར་པར། །འཆི་བའི་བདུད་བཅོམ་འཇིག་རྟེན་འབྱོར་སླད་རྟག །དེ་ལ་གཟུགས་བརྙན་ལོངས་སྐུའི་སྟོན་པ་དེ་ནི་རང་གི་འཁོར་ས་བཅུའི་བྱང་ཆུབ་སེམས་དཔའ་རྣམས། དེ་བཞིན་གཤེགས་པའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དང་དུ་ཆོས་ཉིད་ངོ་བོ་མེད་པར་འདྲེས་ནས་སྟོན་འཁོར་དགོངས་པ་གཅིག་ཏུ་མ་གྱུར་པ་དེ་སྲིད་དུ། དུས་མི་ཟད་བརྟག་པ་རྒྱན་གྱི་འཁོར་ལོར་བཞུགས་པ་ཡིན་པའི་ཚུལ་རྒྱུད་བླ་
མར། ཆོས་ཀྱི་དབང་ཕྱུག་འཆི་བའི་བདུད་བཅོམ་དང་། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཅེས་སོ། །དྲུག་པ་སྤང་གཉེན་ཆོས་མཚུངས་པའི་ཞིང་དང་སྟོན་པས་སྦྱང་བའི་ཚུལ། གདུལ་བྱའི་གཏི་མུག་ལ་སོགས་ཉོན་མོངས་ལྔ་གང་གི་གཉེན་པོར་ཆེ་བའི་ཞིང་ཁམས་དང་། སྟོན་པར་བསྟན་པའི་སྐུ་ལྔ་ཆོས་རབ་ལྔ། །གནས་འགྱུར་ཡེ་ཤེས་རྣམ་པ་ལྔ་པོ་ཡང་། །མཐོང་ལམ་ནས་བཟུངས་བཅུ་རྒྱུན་མཐའི་བར། །རིམ་རྫོགས་རྫོགས་པའི་བྱང་ཆུབ་སྙིང་པོར་འགྲོ །དེ་ལ་བྱང་ཆུབ་སེམས་དཔའ་འདི་དག་གི་གཏི་མུག་ལ་སོགས་པའི་སྦྱང་བྱའི་དྲི་མ་བག་ལ་ཉལ་ལྔ་ལ་ལྟོས་ནས་སྦྱོང་བྱེད་འོག་མིན་ལ་སོགས་པའི་ཞིང་ཁམས་ལྔར་རྣམ་པར་སྣང་མཛད་ལ་སོགས་པའི་སྟོན་པ་ལྔ་དང་། ཆོས་དབྱིངས་ཡེ་ཤེས་ལ་སོགས་པ་སྒྲ་ཚིག་ཐ་སྙད་ལས་འདས་པའི་ཆོས་རབ་ལྔར་སྣང་བས་གནས་གྱུར་ལྔ་འཐོབ་པའི་ཚུལ་ཡང་སྒྱུ་འཕྲུལ་བརྒྱད་ཅུ་པར། འདོད་ཆགས་ལ་སོགས་ཉོན་མོངས་ལྔ། །རྣམ་དག་ཡེ་ཤེས་ལྔར་བཤད་དོ། །ཞེས་སོ། །དེའང་གཏི་མུག་གི་དྲི་མ་སྦྱོང་དུས་བཅོམ་ལྡན་འདས་གཟུགས་ཀྱི་རྒྱལ་པོ་ལས་ཆོས་ཀྱི་དབྱིངས་ཀྱི་ཡེ་ཤེས། དེ་བཞིན་དུ་ཞེ་སྡང་ལ་རྣམ་པར་ཤེས་པའི་རྒྱལ་པོས་མེ་ལོང་ཡེ་ཤེས། ང་རྒྱལ་ལ་ཚོར་བའི་རྒྱལ་པོས་མཉམ་ཉིད་ཡེ་ཤེས། འདོད་ཆགས་ལ་འདུ་ཤེས་ཀྱི་རྒྱལ་པོས་སོར་རྟོག་ཡེ་ཤེས། ཕྲག་དོག་ལ་འདུ་བྱེད་ཀྱི་རྒྱལ་པོས་བྱ་གྲུབ་ཡེ་ཤེས་ཀྱི་ཆོས་རབ་ལྔ་བསྟན་པས་གནས་གྱུར་ལྔ་ཐོབ་པ་ཡིན་ནོ། །དེ་ལྟར་ལྔ་ཚན་ལྔ་ཡང་ས་བཅུ་པོ་དང་སྦྱར་ནས་གསུངས་པའི་ཚུལ། མཐོང་ལམ་གྱི་དུས་སུ་ཀུན་བརྟགས་ལས་གྱུར་པའི་གཏི་མུག་གནས་གྱུར། ཀུན་གཞི་དབྱིངས་སུ་ནུབ་པ་ཆོས་དབྱིངས་ཡེ་ཤེས་ཀྱི་ངོ་བོ་ས་དང་པོ་རབ་ཏུ་དགའ་བ་ཐོབ། རྣམ་སྣང་མཐོང་།
དེ་བཞིན་དུ་འཕགས་པའི་བསྒོམ་ལམ་ཆུང་དུ་གསུམ་དུ་ང་རྒྱལ་གནས་གྱུར། ཡིད་ཀྱི་རྣམ་ཤེས་དབྱིངས་སུ་ནུབ་པ་མཉམ་པ་ཉིད་ཀྱི་ཡེ་ཤེས་བརྙེས། དྲི་མ་མེད་པ་དང་། འོད་བྱེད་པ་དང་། འོད་འཕྲོ་གསུམ་ཐོབ། རིན་ཆེན་འབྱུང་ལྡན་མཐོང་། འབྲིང་པོ་གསུམ་དུ་རྣམ་པ་ཐམས་ཅད་པའི་ཆགས་རྟོག་གནས་གྱུར། ཉོན་མོངས་པ་ཅན་གྱི་ཡིད་དབྱིངས་སུ་ནུབ་པ་སོ་སོར་རྟོག་པའི་ཡེ་ཤེས་ཐོབ། སྦྱང་དཀའ། མངོན་གྱུར། རིང་དུ་སོང་བ་གསུམ་ཐོབ། སྣང་བ་མཐའ་ཡས་མཐོང་། ཆེན་པོའི་གསུམ་ལས་ས་བརྒྱད་པ་ལ་ཞེ་སྡང་གི་ས་བོན་རྟོག་པའི་ཟུག་རྡུ་དང་། ཀུན་གཞིའི་རྣམ་པར་ཤེས་པ་གནས་གྱུར། མེ་ལོང་ལྟ་བུའི་ཡེ་ཤེས་རྣམ་པ་ཐམས་ཅད་ཀྱི་འཆར་གཞིར་གྱུར་ཀྱང་རྣམ་པར་མི་རྟོག་པའི་བདག་ཉིད་ཐོབ། མི་བསྐྱོད་པ་མཐོང་། དགུ་པ་དང་བཅུ་པར་ཕྲག་དོག་གི་ས་བོན་དག །སྒོ་ལྔའི་རྣམ་པར་ཤེས་པ་དབྱིངས་སུ་ནུབ་ནས་སོ་སོ་ཡང་དག་རིག་པ་བཞིས་འགྲོ་བ་རྒྱ་མཚོའི་དོན་བྱེད་པའི་ཕྲིན་ལས་རླབས་པོ་ཆེའི་བདག་ཉིད་བྱ་བ་གྲུབ་པའི་ཡེ་ཤེས་ཐོབ། དོན་ཡོད་གྲུབ་པའི་སྐུ་མཐོང་། ད་ལྟར་ས་བཅུ་རྒྱུན་མཐའི་བྱང་ཆུབ་སེམས་དཔའ་དེ་ལ་ཕྱོགས་བཅུའི་སངས་རྒྱས་ཐམས་ཅད་ཀྱི་སྨིན་མཚམས་ནས་འོད་ཟེར་ཆེན་པོའི་དབང་བསྐུར་བ་སྤྱི་གཙུག་ཏུ་ནུབ་པའི་མོད་ལ། རྡོ་རྗེ་ལྟ་བུའི་ཏིང་འཛིན་ལ་སོགས་ཡོན་ཏན་བརྗོད་དུ་མེད་པ་སྙེད་ཐོབ་པའི་ཚུལ་མདོ་སྡེའི་རྒྱན་ལས། བསྒོམ་པ་ཐ་མ་རྫོགས་ནས་ནི། །འོད་ཟེར་ཆེན་པོའི་དབང་བསྐུར་བ། །ཞེས་སོ། །དེའི་ཚེ་རང་ལ་ཡོད་པའི་ལྷུན་གྲུབ་ཀྱི་ཡོན་ཏན་ཅི་ཡིན་པ་མངོན་དུ་གྱུར་ནས་དབྱིངས་ཀྱི་འོག་མིན་དུ་རྒྱལ་བའི་མཛད་པ་ཆེན་པོ་རྫོགས་པའི་ཚུལ་སྒྱུ་འཕྲུལ་མངོན་བྱང་ལས། དག་པ་ས་ཡི་དབང་ཉིད་ཕྱིར། །སྟོན་པ་ལྔ་དང་ཆོས་རབ་ལྔ། །ཡེ་ཤེས་ལྔ་ཡོངས་རྫོགས་པ་ལས། །རྫོགས་པའི་
བྱང་ཆུབ་སྙིང་པོར་འགྲོ །ཞེས་སོ། །དེ་ལྟ་བུའི་ཞིང་ཁམས་ལ་ཕྱེད་སྤྲུལ་དུ་གདགས་པའི་འཐད་པ། ཞིང་འདི་ས་བཅུའི་བྱང་ཆུབ་སེམས་དཔའ་ལས། །གཞན་གྱི་སྤྱོད་པའི་ཡུལ་དུ་སྣང་མིན་ཞིང་། །དེ་བཞིན་སྟོན་པ་ལོངས་སྤྱོད་རྫོགས་ནའང་། །འཁོར་སོགས་རང་སྣང་མ་ཡིན་རྒྱུད་གཞན་པས། །བསྡུས་ཕྱིར་ཕྱེད་སྣང་རང་བཞིན་སྤྲུལ་པ་ཞེས། །ཉི་ཟླ་ཁ་སྦྱོར་ཆེན་པོའི་རྒྱུད་ཀྱིས་བསྟན། དེ་ལ་སྔར་བཤད་དབྱིངས་ཀྱི་ལོངས་སྐུ་མཚན་ཉིད་པའི་ཞིང་རྣམས་ནི་སངས་རྒྱས་ཉིད་ཀྱི་སྣང་བས་བསྡུས་པ་ཡིན་པས་སྟོན་འཁོར་དུ་བསྟན་ཡང་དོན་ལ་བཟང་ངན་དང་འཕོ་འགྱུར་མེད་པས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོར་སྣང་ལ། དེའི་ངང་ལས་སྤྲུལ་པ་ཆེན་པོ་དང་། སྤྲུལ་པ་སྣ་ཚོགས་པས་གདུལ་བྱའི་དོན་མཛད་པ་ལས། སྤྲུལ་པ་ཆེན་པོ་ནི་སེམས་དཔའ་ལ་སྣང་བའི་ལོངས་སྐུ་ཡིན་ལ། སྣ་ཚོགས་པ་ནི་མཆོག་གི་སྤྲུལ་པ་ལ་སོགས་པ་ཐ་མལ་པ་ཡང་སྣང་བས་སོ། །དེ་བས་ན་སེམས་དཔའ་ལ་སྣང་བའི་ལོངས་སྐུ་ནི་མཚན་དཔེ་ལ་སོགས་པ་དབྱིངས་ཀྱི་ལོངས་སྐུ་དང་མཚུངས་ཀྱང་། ཟླ་བ་དངོས་དང་ཆུ་ཟླ་ལྟར་དེའི་གཟུགས་བརྙན་ནམ་སྤྲུལ་པ་བསྒོམ་ལམ་ས་བཅུ་པའི་སྣང་བས་བསྡུས་པ་ཡིན་པས་སྟོན་འཁོར་ཡང་མཆོག་དམན་དུ་སྣང་བས་ཕྱེད་སྤྲུལ་ལོངས་སྐུ་ཞེས་ཉི་ཟླ་ཁ་སྦྱོར་ལ་སོགས་པའི་རྒྱུད་ཀྱིས་བསྟན་ལ། དེ་ཡང་སློབ་ལམ་གྱི་གནས་སྐབས་ཕྱི་མའི་རང་སྣང་ཙམ་གྱིས་རྣམ་པར་འཕྲུལ་ཞིང་སྤྲུལ་པའི་འོག་མིན་ཡིན་པས་རང་བཞིན་སྤྲུལ་པའི་ཞིང་ཞེས་ཀྱང་བརྗོད་པའོ། །དེ་ལ་ས་དང་པོ་ནས་རྣམ་སྣང་ལ་སོགས་པ་རིམ་པར་མཐོང་བ་དང་། ས་བཅུ་པའི་སྣང་བ་འབའ་ཞིག་གིས་བསྡུས་པའི་ཕྱོགས་གཉིས་འདོད་པ་
ཡང་། དང་པོ་ནི་ཟབ་མོའི་རྒྱུད་འགྲེལ་གྱི་དགོངས་པ་སྟེ། དེའི་ཁུངས་ཀྱང་ཀུན་བྱེད་ལས། སྟོན་པ་ལོངས་སྤྱོད་རྫོགས་སྐུའི་འཁོར་བསྟན་པ། །མོས་དཔྱོད་བཞི་ཡིས་ལས་འདས་པ་ཡིས། །དང་པོར་རབ་ཏུ་དགའ་བའི་ས་མནན་ནས། །ས་བཅུ་ཆོས་ཀྱི་སྤྲིན་གྱི་ས་པ་སྟེ། །དེ་ནི་ལོངས་སྤྱོད་རྫོགས་པའི་འཁོར་དུ་བསྟན། །ཞེས་འཇིག་རྟེན་ལས་འདས་པའི་གནས་ཀྱི་འོག་མིན་ཁང་བུ་བརྩེགས་པའི་སྟོན་འཁོར་གྱི་རང་བཞིན་བཤད་ནས་ས་བཅུ་གའི་སེམས་དཔའ་ལ་རིམ་བཞིན་སྣང་བའི་ལོངས་སྐུ་ནི་སྤྲུལ་པ་ཆེན་པོའི་ལོངས་སྐུར་བསྟན་པ་ཡིན་ནོ། །གཉིས་པ་ནི་ཕ་རོལ་ཏུ་ཕྱིན་པའི་དགོངས་པ་སྟེ། དེ་ཡང་སྒྱུ་འཕྲུལ་དྲྭ་བ་ཆེན་པོ་ལ་སོགས་པའི་རྒྱུད་སྡེ་གོང་མས་ཡས་གཞལ་ན་རང་བཞིན་ལ་བགྲངས་པ་དང་གནས་པ་གཉིས་སུ་འདོད་པའི་སྔ་མ་ནི་ཕ་རོལ་ཏུ་ཕྱིན་པའི་ས་ལམ་གྱིས་བགྲངས་པའི་རང་བཞིན་སྤྲུལ་པ་ཡིན་ནོ། །དེ་ལྟ་ནའང་རང་ལུགས་སུ་སྤྲུལ་པར་དམ་མི་འཆའ་བས་འབྲས་བུའི་ས་བཅུ་གཅིག་ཀུན་ཏུ་འོད་བརྙེས་པ་དེའི་ཚེ་འོག་མིན་དུ་སངས་རྒྱས་ཏེ་ལོངས་སྤྱོད་རྫོགས་པའི་སྐུ་བྱང་སེམས་ས་བཅུ་པའི་སྣང་བ་ལ་སྣང་ཞིང་། སྤྲུལ་པས་སེམས་ཅན་ཀྱི་དོན་བྱེད་པར་འདོད་དོ། །དེའང་རང་ལམ་གྱི་སེམས་དཔའ་དེ་དག་གིས་སངས་རྒྱས་ཀྱི་གསུང་ནི་ཐོས་ལ། ཤེས་བྱའི་སྒྲིབ་པས་བསྒྲིབས་པས་སྐུ་ནི་མི་མཐོང་སྟེ། སྐུ་ནམ་མཐོང་བ་ན་ཤེས་བྱའི་སྒྲིབ་པ་ཟད་ནས་སངས་རྒྱ་བར་འདོད་པས་ལོངས་སྐུ་ནི་ས་བཅུ་པའི་སྣང་བ་འབའ་ཞིག་གིས་བསྡུས་པའི་ཁྱད་པར་རོ། །ཕྱི་མ་ནི། ཁྱད་པར་རང་བཞིན་རྫོགས་པ་ཆེན་པོ་ཡི། །རང་སྣང་ཡེ་ཤེས་དཀྱིལ་འཁོར་དམ་པ་རུ། །མཆོག་གཟིགས་བླ་མས་དབང་བསྐུར་མ་ཉམས་ལ། །ཉིན་དུས་རང་སྣང་མངོན་སུམ་འོད་
གསལ་དང་། །མཚན་མོ་སྙིང་གའི་འོད་གདངས་གོམས་པ་རྣམས། །རྟོགས་པའི་རང་བཞིན་ཚད་དུ་མ་ཕྱིན་ཡང་། །ཆོས་ཉིད་བདེན་པ་བླ་མའི་བྱིན་རླབས་ཀྱིས། །ས་ཐོབ་རྣམས་དང་སྐལ་བ་མཚུངས་གྱུར་ནས། །གཞི་སྣང་ལྷུན་གྲུབ་ཕྱོགས་བཅུ་སྤྲུལ་པར་འགྲོ། །དེ་ལ་གནས་པའི་རང་བཞིན་བགྲོད་པ་ནི་ས་ཐོབ་པའི་ངེས་པ་ལ་མ་ལྟོས་ཏེ། ལམ་དུས་སུ་སྙིང་ག་ན་ཡོད་པའི་ཆོས་ཉིད་མངོན་སུམ་པའི་རང་གདངས་མཆོག་གཟིགས་ཀྱི་བླ་མ་དམ་པས་ཕྱིན་ཅི་མ་ལོག་པར་དོ་སྤྲད་ཅིང་། རང་སྣང་ཡེ་ཤེས་ཀྱི་དཀྱིལ་འཁོར་དུ་ལྟ་སྟངས་དང་གཟིགས་སྟངས་ལ་སོགས་པའི་ཐབས་ཀྱི་ས་བཅུན་ནས་ཐོད་རྒལ་རིག་པའི་རྩལ་དབང་བསྐུར་བའི་བྱིན་རླབས་དང་། དེའི་སྲོག་དམ་ཚིག་རྣམ་པར་དག་ཅིང་ཉིན་དུས་ཟེར་གདངས་ཀྱི་འོད་གསལ་དང་། མཚན་དུས་ཤེས་བྱ་བུམ་འཇུག་གི་མན་ངག་ལ་གོམས་པ་དང་། ཆོས་ཉིད་བདེན་པའི་བྱིན་རླབས་རྣམས་ཟུང་དུ་འཇུག་པ་ལས་ལུས་རྟེན་གྱི་རྒྱ་ལས་གྲོལ་བའི་ཚེ་སྤྲུལ་པའི་ཞིང་ཡིད་ལ་དྲན་པའི་དེ་མ་ཐག་ཐོབ་པའི་སེམས་དཔའ་རྣམས་དང་སྐལ་བ་མཚུངས་པར་གྱུར་ནས། ཕྱོགས་བཅུ་སྤྲུལ་པའི་ཞིང་མཐོང་བའི་མོད་ལ་བཅུ་གཅིག་ཀུན་ཏུ་འོད་དུ་དབུགས་འབྱིན་པའི་ཚུལ་ཨ་ཏི་བཀོད་པ་ཆེན་པོ་ལས། སྙིགས་མ་ལྔ་བརྒྱ་དུས་ཀྱི་ཐ་མ་ལ། །གསང་བའི་སྙིང་པོ་འདི་ནི་མི་ཡུལ་སྣང་། །དེ་རྗེས་འཛིན་པའི་གང་ཟག་སྐལ་བ་ཅན། །སྙིང་པོ་འདི་ནི་སུ་ལ་སྣང་གྱུར་པ། །དེ་དག་རྣམས་ནི་མི་འགྱུར་ས་ལ་འདའ། །གལ་ཏེ་སྙིགས་མཚེ་ཐུང་ནད་མང་བས། །སྙིང་པོའི་དོན་འདི་གདེང་དུ་མ་གྱུར་ཀྱང་། །འདི་ཉིད་མཐོང་བས།
དབུགས་ཆེན་ཉིད་འབྱིན་པ། །བཅུ་གཅིག་ཀུན་ཏུ་འོད་དེ་སྤྲུལ་པའི་ཞིང་། །བརྫུས་སྐྱེས་དག་བས་མངལ་གྱི་རྒྱ་དང་བྲལ། །ཞེས་སོ། །དེ་ཡང་སྤྱིར་ཞིང་བཅུ་དུར་ཁྲོད་མེ་རི་འབར་པ་དང་བཅུ་གཅིག་ཡོད་ཀྱང་། རྣམ་གྲོལ་དབུགས་ཆེན་འབྱིན་པ་ལྔའི་བཀོད་པ་ནི། ཁྱད་པར་རྣམ་གྲོལ་དབུགས་ཆེན་འབྱིན་པ་ལྔ། །ཤར་ནས་རིམ་བཞིན་ཤེལ་དང་སུ་ཝ་རྞ། །པད་རག་ཨིནྤ་ནཱི་ལའི་གཞལ་མེད་ཁང་། །སྒོ་ཁྱམས་རྟ་བབས་སྣང་བྱེད་པ་ལང་མིག །ཟུར་བཞིར་མུ་ཏིག་མཆོད་རྟེན་དྲིལ་བུ་དང་། །ག་ལེར་ཁས་སྦྲེལ་བའི་དབྱེར་ཐག་རླུང་བསྐྱོད་སྒྲ། །རྣམ་ཐར་གསུམ་ལྡན་ཆོས་དབྱིངས་ངར་དིར་སྒྲོག །ཕྱོགས་བཞིར་སྤོས་སྤྲིན་གཡོ་བའི་བ་དན་བཞི། །ཕྱི་རིམ་ཡན་ལག་བརྒྱད་ལྡན་རྫིང་བུའི་འགྲམ། །ཏ་ལའི་ལྗོན་པ་དྲ་ཕྱེད་འཕྱང་འཕྲུལ་ཅན། །ཤང་ཤང་ཏེའུ་རྨ་བྱ་ཀ་ཏ་རི། །ནེ་རྩོ་མི་སྐད་འབྱིན་དང་ངང་པ་གཞོན། །རི་སྐེགས་ཟེར་མོ་སྦབ་དང་ཀངྐ་རི། །ལྷའི་བྱ་དྲིལ་དུའི་སྒྲ་ཅན་ཁུ་བྱུག་དང་། །གསེར་གྱི་རྡོ་རྗེའི་གཟུགས་ཅན་ཀྲི་ཏི་བ། །གཡུ་དང་བྱེ་རུ་ཨིནྡྲ་ནཱི་ལ་དང་། །དུང་ལྟར་ཁ་དོག་ཕྱེད་བའི་བྱ་ཚོགས་ཀྱིས། །སྙན་སྒོག་མགྲིན་པའི་རྒྱུད་མང་ཀུན་ཏུ་འཁྲོལ། །དེ་ན་བཞུགས་པའི་བྱང་ཆུབ་སེམས་དཔའ་རྣམས། །ཉོན་མོངས་གནོད་བཞི་པའི་ཆུ་ཀླུང་ལ། །སྦྱང་པ་ཙམ་གྱིས་འདུ་བའི་ནང་མི་འབྱུང་། །ཡིད་ལ་ཅི་བསམ་དྲན་པའི་མོད་ལ་འབྱུང་། །སུམ་ཅུ་རྩ་གསུམ་ལྷ་དང་ལོངས་སྤྱོད་མཉམ། །ཕྱི་རིམ་རིན་ཆེན་སྣ་བདུན་ཕ་གུ་ཅན། །ཞིང་མཆོག་དེ་ན་རིགས་བཞིའི་སྟོན་པ་ཡི། །དུས་བཞིར་ཆོས་ཀྱི་སྒྲ་སྒྲོག་རྒྱུན་མི་ཆད། །ཀུན་གྱི་བར་སྣང་ཧེ་རུ་ཀ་དཔལ་ཞིང་། །དུར་ཁྲོད་ཆེན་བ་མེ་རི་འབར་བ་ན། །སྟོན་པ་གཞོན་ནུ་དཔའ་བོ་བཅོམ་ལྡན་འདས། །ལག་
ན་རྡོ་རྗེ་ལ་སོགས་དཔའ་བོ་དང་། །མཁའ་འགྲོའི་སྤྲིན་ཕུང་འཕྲོ་བའི་དབུས་ཉིད་ན། །འབྲས་བུ་བླ་ན་མེད་པའི་ཆོས་འཁོར་བསྐོར། །པདྨ་ལས་སྐྱེས་རྒྱལ་སྲས་དཔག་ཏུ་མེད། །ཀུན་ཀྱང་ལྷ་དང་ལྷ་མོ་ཁྱེའུ་དང་། །བུ་མོའི་རྣམ་པ་དྲང་སྲོང་གྲུབ་པ་ཅན། །རྣམ་པར་རྟོག་པ་མེད་ཅིང་སེམས་གསུམ་མེད། །ཡིད་དྲུག་དང་ནི་ཉོན་མོངས་དྲུག་ཀྱང་མེད། །མ་རིག་པ་མེད་རྐྱེན་བཞི་ཡོད་མ་ཡིན། །དེ་དང་མཚུངས་པར་ལྡན་པ་རྣམས་བྱང་མེད། །སྟོན་པ་རྡོ་རྗེ་འཆང་གི་བྱིན་རླབས་ལས། །རང་བཞིན་ཉིད་དུ་བཀོད་ཕྱིར་རང་བཞིན་ནི། །སྤྲུལ་པའི་ཞིང་ཞེས་རྒྱལ་སྲས་རྣམས་ལ་གྲགས། །རང་བཞིན་རྫོགས་པ་ཆེན་པོའི་གསང་ལམ་དུ། །རིག་པ་རང་ཤར་ཆེན་པོའི་རྒྱུད་ལས་བསྟན། །དེ་སྐད་དུ་རང་ཤར་ལས། འདི་ནས་ཤར་ཕྱོགས་ཀྱི་འཇིག་རྟེན་གྱི་ཁམས་ན་ཞིང་ཁམས་མངོན་པར་དགའ་བ་ཞེས་བྱ་བ་ཡོད་དེ། སྤྲུལ་པའི་ཞིང་ཁམས་དོན། །སྤྲུལ་པའི་སྐུ་རྡོ་རྗེ་སེམས་དཔའ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་དམ་པ་ཐོབ་པའི་གནས་དེ་ན། གཞལ་ཡས་ཁང་གི་ཡོན་ཏན་དཔག་ཏུ་མེད་པ་ཡོད་དེ། དེ་ཡང་འདི་ལྟ་སྟེ། རིན་པོ་ཆེ་ཤེལ་ལས་གྲུབ་པའི་ཁང་བསྒོ་བཞི་དང་ལྡན་པ། རིན་པོ་ཆེའི་རྟ་བབས་དང་ལྡན་པ། ས་གཞི་ཐམས་ཅད་ཀྱང་རིན་པོ་ཆེ་ཤེལ་ལས་གྲུབ་པ། ཤིན་ཏུ་ཡིད་དུ་འོང་བ། བསྟན་སྡུག་པ། ཐེམ་སྐས་དང་། སྐར་ཁུང་དང་ལྡན་པ། ཕྱོགས་བཞིན་གསང་སྐར་ཆེན་པོ་བཞི་ཡོད་པ། གསེང་སྐར་ནས་ཉི་མ་འཆར་བས་རིན་པོ་ཆེ་ཤེལ་ལས་གྲུབ་པ་ལ་ཕོག་ནས། ནང་དུ་ཉིན་མོ་འོད་ལྔའི་སྣང་བ་ལྷུག་པར་འཆར་རོ། །གཞལ་ལས་ཁང་དེའི་ཕྱི་རིམ་ན་
ཡན་ལག་བརྒྱད་དང་ལྡན་པའི་ཆུའི་འོབས་ཡོད་པ། ཆུ་དེ་ལ་ནད་ཀྱིས་བཏབ་པ་རྣམས་ཀྱིས་འཐུངས་པ་ན་ནད་འཚོ་བར་འགྱུར་ལ། དེའི་ཕྱི་རིམ་ན་མཚོའུ་བརྒྱད་ཡོད་དེ། །དེ་རྣམས་ཀྱི་ནང་ན་བྱ་སྐད་སྙན་པ་སྣ་ཚོགས་ཏེ། དེ་ཡང་འདི་ལྟ་སྟེ། བྱའི་རྒྱལ་པོ་དང་པ་གསེར་ལྡན་དང་། མཐིང་རལ་དང་། བྱ་ཀ་ཏ་རི་དང་། ནེ་ཙོ་མི་སྐད་ཤེས་པ་དང་། །བུ་བྱུག་དང་། ཤང་ཤང་ཏེའུ་དང་། རི་སྐེགས་དང་། དེ་ལ་སོགས་ཏེ་བྱ་སྐད་སྙན་པའི་བྱ་རིགས་སྟོང་ཕྲག་བརྒྱད་ཅུ་དང་ཡིད་དུ་འོང་བའི་བྱ་རིགས་འདི་ལྟ་སྟེ། ཀང་ཀ་རི་དང་། སྦ་བ་དང་། ཟེར་མོ་དང་། ལྷའི་བྱ་དྲིལ་བུའི་སྐད་ཅན་དང་། བྱ་ཀྲི་ཏི་པ་གསེར་གྱི་རྡོ་རྗེའི་གཟུགས་ལ་སོགས་ཏེ། གཡུའི་མདོག་ལྟར་སྔོ་བ་དང་། དུང་གི་མདོག་ལྟར་དཀར་བ་དང་། བྱེ་རུའི་མདོག་ལྟར་དམར་པ་དང་། ཨིནྡྲ་ནཱི་ལ་ལྟར་ལྗང་བ་ལ་སོགས་ཏེ། ཡིད་དུ་འོང་བ་དང་། སྐད་སྙན་པ་བསམ་གྱིས་མི་ཁྱབ་པ་ཡོད་དོ། །དེའི་ཕྱི་རིམ་ན་རིན་པོ་ཆེ་སྣ་བདུན་གྱི་ལྕགས་རི་ཡོད་དོ། །དེ་རྣམས་ཀྱི་དབུས་ན་རིན་པོ་ཆེ་སྣ་བདུན་ལས་བྱས་པའི་ཁྲི་ཆོས་འཆད་པའི་སྟན་དང་ལྡན་པ་ཡོད་དོ། །དེར་སྤྲུལ་པའི་སྐུ་རྡོ་རྗེ་སེམས་དཔའ་ཞེས་བྱ་བ་ད་སྲོད་ལ་འཁོར་རྣམས་བརྒྱུའི་ཆོས་འཆད་དོ། །ནམ་བྱད་ན་སྔགས་ཕྱིའི་ཆོས་འཆད་དོ། །ཐོ་རངས་ནང་གི་ཆོས་འཆད་དོ། །ཉི་མ་ཕྱེད་ན་རྫོགས་པ་ཆེན་པོ་འབྲས་བུ་བླ་ན་མེད་པའི་ཆོས་འཆད་དོ། །དེ་ལྟར་ཞག་རེ་རེ་ལ་ཆོས་ཐུན་བཞི་བཞི་འབྱུང་ངོ་། །དེ་ན་གནས་པའི་བྱང་ཆུབ་སེམས་དཔའ་དེ་དག་ཀྱང་སྐྱེ་བ་གཅིག་གིས་ཐོགས་པ་ཤ་སྟག་གོ །ལོ་ཡང་ལྔ་བརྒྱ་ལྔ་བཅུ་ཐུབ་བོ། །ཞིང་ཁམས་དེ་ན་ཟས་དང་སྐོམ་ཡང་ཡིད་ལ་དྲན་པ་ཙམ་གྱིས་ཚིམ་པ་ཡོད་དོ། །དན་ནད་མེད་པས་མཆོག་ཏུ་བདེ་ལ། བྱུང་སྲིད་ན་ཡང་ཆུ་ཡན་ལག་བརྒྱད་དང་ལྡན་པ་དེ་འཐུངས་བས་ནད་སེལ་ཏོ། །མེ་ཏོག་སྣ་ཚོགས་ཀྱིས་སྤྲུལ་པའི་སྐུ་དེ་ལ་
མཆོད་པ་ཆེར་བྱེད་པ་ཤ་སྟག་གོ །གཞལ་ཡས་ཁང་དེའི་ཟུར་བཞིན་མུ་ཏིག་ལས་གྲུབ་པའི་མཆོད་རྟེན་བཞི་ཡོད་དོ། །དེ་བཞིའི་བར་ན་དྲིལ་བུ་གཡེར་ཁའི་དྲ་བའི་ཐག་པས་སྤེལ་ནས་ཡོད་དོ། །ཐག་པ་དེ་རླུང་གིས་བསྐྱོད་པ་དང་། དྲིལ་བུའི་སྒྲ་ཡིད་དུ་འོང་བ་སྣ་ཚོགས་འབྱུང་ངོ་། །ཕྱོགས་བཞིན་དར་སྣ་ཚོགས་ཀྱི་བདན་བཞི་ཡོད་དེ། དེ་རླུང་གིས་བསྐྱོད་པ་ལས་དྲི་ཞིམ་པ་སྣ་ཚོགས་འབྱུང་ངོ་། །གཞལ་ཡས་ཁང་དེ་ནི་འདི་ནས་ཤར་ཕྱོགས་ན་དཔག་ཚད་ལྔ་བརྒྱ་འདས་པའི་སྟེང་ན་ཡོད་དོ། །དེར་སྐྱེས་པའི་བྱང་ཆུབ་སེམས་དཔའ་དེ་དག་ཀྱང་སུམ་ཅུ་རྩ་གསུམ་གྱི་ལྷ་དང་ལོངས་སྤྱོད་མཉམ་མོ། །ཤར་ཕྱོགས་ཀྱི་སྤྲུལ་པ་སྐུའི་ཞིང་ཁམས་དེ་ན་དེ་བཞིན་དུ་ཡོད་དོ། །འདི་ནས་ལྷོ་ཕྱོགས་ན་དཔལ་དང་ལྡན་པའི་ཞིང་ཁམས་སྤྲུལ་པ་སྐུའི་གནས་དེ་ནའང་རིན་པོ་ཆེ་གསེར་ལས་གྲུང་པའི་ཁང་པ་གྲུ་བཞི་པ་བ་གམ་དང་བཅས་པ། སྒོ་བཞི་རྟ་བབས་དང་བཅས་པ། ཟུར་བཞི་མཆོད་རྟེན་དང་བཅས་པ། ལོགས་བཞི་བ་ངན་དང་བཅས་པ། ཕྱོགས་བཞི་གསེང་སྐར་དང་བཅས་པ། མཚོ་བདུན་བྱ་དང་བཅས་པ། ཡན་ལག་བརྒྱད་དང་ལྡན་པའི་ཆུ་ལྕགས་རི་དང་བཅས་པ། ཁྲི་དང་ཆོས་ཀྱང་གོང་ལྟར་བཤད་དོ། །བྱང་ཆུབ་སེམས་དཔའ་དེ་དག་སྐྱེ་བ་གཅིག་གིས་ཐོགས་པ་ཤ་སྟག་གོ །སྤྲུལ་པའི་སྐུ་རིན་པོ་ཆེ་འབྱུང་ལྡན་གྱི་ཞིང་ཁམས་དེ་ན་ཡོན་ཏན་དེ་ལྟ་བུ་ཡོད་དོ། །འདི་ནས་ནུབ་ཕྱོགས་པདྨ་བརྩེགས་པའི་ཞིང་ཁམས་ན། སྤྲུལ་པའི་སྐུ་སྣང་བ་མཐའ་ཡས་ཞེས་བྱ་བ་ཡོད་དེ། དེ་ན་ཡང་གོང་གི་ཡོན་ཏན་དང་མཉམ་པ་ཡོད་དོ། །འདི་ནས་བྱང་ཕྱོགས་ཀྱི་འཇིག་རྟེན་གྱི་ཁམས་ན། རིན་པོ་ཆེ་རྣམ་པར་བཀོད་པ་ཞེས་བྱ་བ་ཡོད་དེ། དེ་ནའང་སྤྲུལ་པའི་སྐུ་དོན་ཡོད་གྲུབ་པ་ཞེས་བྱ་བའི་ཞིང་ཁམས་དོན། གཞལ་ཡས་
ཁང་གི་ཡོན་ཏན་འདི་ལྟ་བུ་ཡོད་དེ། རིན་པོ་ཆེ་ཨིནྡྲ་ནཱི་ལ་ལས་གྲུབ་པའི་ཁང་པ་གྲུ་བཞི་དང་ལྡན་པ་ཡོད་དེ། དེ་ཡང་ཕྱོགས་བཞིན་གསེང་སྐར་ཆེན་པོ་བཞི་ཡོད་ལ། དེ་ནས་ཉི་མ་ཤར་བས་འོད་ལྗང་གུས་ནང་ཁེངས་ནས་ཡོད་དོ། །ས་གཞི་ཐམས་ཅད་ཀྱང་ཨིནྡྲ་ནཱི་ལ་ལས་གྲུབ་ནས་ཡོད་དོ། །དེའི་ཕྱི་རིམ་ན་ཆུ་ཡན་ལག་བརྒྱད་དང་ལྡན་པ། ཆུ་དེ་ཡང་རེ་གན་བདེ་བ། །འཐུངས་ན་ནད་ཐམས་ཅད་སེལ་བ་ཡོད་དོ། །དེའི་ཕྱི་རིམ་ན་མཚེའུ་བདུན་ཡོད་དེ། དེའི་ནང་ན་བྱ་སྐད་སྙན་པ་རྣམ་པ་སྣ་ཚོགས་པ་གནས་ཏེ། དེ་ཡང་འདི་ལྟ་སྟེ། བྱའི་རྒྱལ་པོ་ངང་པ་གསེར་ལྡན་དང་། མཐིང་རིལ་དང་། བྱ་ཀ་ཏ་རི་དང་། རྨ་བྱ་དང་། ནེ་ཙོ་མི་སྐད་ཤེས་པ་དང་། ཁུ་བྱུག་དང་། ཤང་ཤང་ཏེའུ་དང་། རི་སྐེགས་དང་། དེ་ལ་སོགས་ཏེ་སྐད་སྙན་པའི་བྱ་རིགས་སྟོང་ཕྲག་བརྒྱད་ཅུ་དང་། ཡིད་དུ་འོང་བའི་བྱ་རིགས་འདི་ལྟ་སྟེ། ཀང་ཀ་རི་དང་། ཟེར་མོ་དང་། སྦ་བ་དང་། ལྷའི་བྱ་དྲིལ་བུའི་སྐད་ཅན་དང་། །བྱ་ཀྲི་ཏི་བ་གསེར་གྱི་རྡོ་རྗེའི་གཟུགས་དང་། དེ་ལ་སོགས་ཏེ་གཡུའི་མདོག་ལྟར་སྔོ་བ་དང་། དུང་གི་མདོག་ལྟར་དཀར་བ་དང་། བྱེ་རུའི་མདོག་ལྟར་དམར་བ་དང་། ཨིནྡྲ་ནཱི་ལའི་མདོག་ལྟར་ལྗང་བ་དང་། དེ་དག་ལ་སོགས་ཏེ་ཡིད་དུ་འོང་བ་དང་། སྐད་སྙན་པ་བསམ་གྱིས་མི་ཁྱབ་པ་ཡོད་དོ། །དེའི་ཕྱི་རིམ་ན་རིན་པོ་ཆེ་སྣ་བདུན་གྱི་ལྕགས་རི་ཡོད་པ། དེ་རྣམས་ཀྱི་དབུས་ན་རིན་པོ་ཆེ་མར་གང་ལས་གྲུབ་པའི་ཁྲི་ཆོས་བཤད་པའི་སྟན་དང་བཅས་པ་ཡོད་དོ། །དེར་སྤྲུལ་པའི་སྐུ་དོན་ཡོད་གྲུབ་པ་ཞེས་བྱ་བ་དེ། སྲོད་ལ་གདམས་ངག་གི་ཆོས་སྟོན་ཏེ། །ནམ་ཕྱེད་ན་དབང་གི་ཆོས་སྟོན་ཏོ། །ཐོ་རེངས་སྤྱོད་པའི་ཆོས་སྟོན་ཏོ། །ཉི་མ་ཕྱེད་ན་ལྟ་སྒོམ་ཀྱི་ཆོས་སྟོན་ཏོ། །དེ་ལྟར་ཞག་རེ་ལ་ཆོས་ཐུན་བཞི་བཞིས་འཁོར་རྣམས་ཀྱི་རྒྱུད་འགྲོལ་ཏོ། །དེ་ན་གནས་པའི་བྱང་ཆུབ་སེམས་དཔའ་རྣམས་ཀྱང་སྐྱེ་བ་གཅིག་གིས་ཐོགས་བ་ཤ་སྟག་གོ །ལོ་ཡང་སྟོང་ཐུབ་བོ། ཞིང་ཁམས་དེ་ན་ཟས་དང་སྐོམ་
ཡིད་ལ་དྲན་པ་ཙམ་གྱིས་ཚིམ་པ་ཡོད་དོ། །དེ་ན་བད་ཀན་ལས་གྱུར་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་བ་དང་། འདུས་པ་ལས་གྱུར་བའི་ནད་མེད་དོ། །མེ་ཏོག་སྣ་ཚོགས་པས་སྤྲུལ་པའི་སྐུ་དེ་ལ་མཆོད་པ་རྒྱ་ཆེར་བྱེད་པ་ཤ་སྟག་གོ །བྱང་ཆུབ་སེམས་དཔའ་དེ་དག་ཀྱང་ཁ་དོག་ལྗང་གུ་ཤ་སྟག་གོ །རྟ་དང་བཞོན་པ་ཡང་ལྗང་གུ་ཤ་སྟག་གོ །ཁྱེའུ་དང་བུ་མོའི་གཟུགས་སུ་སྣང་བ་ཤ་སྟག་གོ །ཀུན་ཀྱང་སེམས་ཀྱི་རྣམ་པར་རྟོག་པ་མེད་པའོ། །ཞིང་ཁམས་དེ་ན་སེམས་རྣམ་པ་གསུམ་མེད་དོ། །ཡིད་དྲུག་མེད་དོ། །ཉོན་མོངས་པ་དྲུག་མེད་དོ། །མ་རིག་པ་མེད་དོ། །རྐྱེན་བཞི་དང་བཅས་པ་མེད་དོ། །མ་རིག་པ་དང་མཚུངས་པར་ལྡན་པའི་ཡིད་མེད་དོ། །ཀུན་ཀྱང་རྣམ་རྟོག་དང་བྲལ་བ་ཤ་སྟག་གོ །གཞལ་ཡས་ཁང་གི་འཁོར་གྱི་ཡོན་ཏན་ནི། །གཞལ་ཡས་ཁང་དེའི་གྲུ་བཞིན་རིན་པོ་ཆེ་ཤེལ་གྱི་མཆོད་རྟེན་ཁྲི་འཕང་དགུ་པ་ཞིག་ཡོད་དེ། དེ་དག་གི་བར་རྣམས་གསེར་གྱི་དྲིལ་བུ་གཡེར་ཁའི་དྲྭ་བས་སྦྲེལ་ནས་ཡོད་དེ། དེ་དག་རླུང་གིས་བསྐྱོད་པ་ལས་དྲིལ་བུའི་སྒྲ་སྙན་པ་སྣ་ཚོགས་འབྱུང་ངོ་། །མཆོད་རྟེན་བཞི་ལ་ཉི་མ་ཕོག་པས་འོད་ལྔའི་ཞགས་པས་འབྲེལ་ནས་ཡོད་དོ། །ཕྱོགས་བཞིན་རྨ་བྱའི་བ་དན་བཞི་ཡོད་དེ། །དེ་རླུང་གིས་བསྐྱོད་པས་ཡིད་དུ་འོང་བ་དང་མཛེས་པ་སྣ་ཚོགས་འབྱུང་ངོ་། །ཡོན་ཏན་དཔག་ཏུ་མེད་པ་ལྟ་བུ་ཡོད་དོ། །གཞལ་ཡས་ཁང་དེ་ནི་འདི་ནས་བྱང་ཕྱོགས་ན་དཔག་ཚད་ལྔ་བརྒྱའི་སྟེང་ན་ཡོད་དེ། དེར་སྐྱེས་པའི་བྱང་ཆུབ་སེམས་དཔའ་དེ་དག་ཀྱང་གཟུགས་ཁམས་ཀྱི་ལྷ་དང་ལོངས་སྤྱོད་མཉམ་མོ། །བྱང་ཕྱོགས་ཀྱི་སྤྲུལ་པའི་ཞིང་ཁམས་དེ་ན་དེ་བཞིན་དུ་ཡོད་དོ། །ཞིང་ཁམས་དེ་དག་གི་མདུན་གྱི་བར་སྣང་ལ་སྤྲུལ་པའི་སྐུ་ཁྲོ་བོའི་ཞིང་ཁམས་ཡོད་དོ། །དུར་ཁྲོད་ཆེན་པོ་མེ་རི་འབར་བཞེས་བྱ་བ་འདི་ཡོད་དོ། དེ་ཡང་གཞལ་ཡས་ཁང་འདི་ལྟ་བུ་ཡོད་དོ། །ཐོད་
པའི་ཁང་པ་གྲུ་བཞི་དང་ལྡན་པ་ཡོད་དེ། དེ་ཡང་འདི་ལྟ་སྟེ། ཐོད་པ་སྐམ་པོས་འབྲས་བུ་བྱས་པ། ཤར་རི་ཡོད་པས་རྩིག་པ་བྱས་པ། བྷན་དྷ་ལྕང་ལོ་ཅན་གྱིས་ཁ་བད་བྱས་པ། རྒྱ་དང་དབངས་སུ་དཔག་ཏུ་མེད་དེ། གནམ་ལྕགས་ཀྱི་གཟེར་བཏབ་པ། རཀྟའི་ཞ་མཆུ་འབབ་པ། ཉི་ཟླའི་ཀ་གདན་བྱས་པ། ཆུ་སྲིན་ཁའི་ཀ་གཞུ་བྱས་པ། ལྷ་ཆེན་པོ་བརྒྱད་གདུང་དུ་བྲེས་པ། མཆོག་ཆེན་པོའི་གྲབ་བཏང་བ་ཡོད་དོ། །ཉིན་མོ་རླུང་འཚུབ་པ། མཚན་མོ་མེ་འབར་བ། གཞལ་ཡས་ཁང་དེའི་གྲུ་བཞི་ན་ཞིང་ཆེན་གྱི་གདུག་ཕུབ་པ། ལྷ་མོ་ལྔ་གར་བྱེད་པ། ས་གཞི་ཐམས་ཅད་ཀྱང་རཀྟའི་རྦ་ཀློང་འཁྲུགས་པའོ། །གཞལ་ཡས་ཁང་དེའི་ནང་ན་བཅོམ་ལྡན་འདས་གཞོན་ནུ་དཔའ་བོ་སྟོབས་ལྡན་ཞེས་བྱ་བ། ཐུགས་ཞི་བ་ལས་མ་གཡོས་ཀྱང་། སྐུ་ཁྲོ་བོའི་ཆ་བྱད་དུ་བསྟན་པ། མཁའ་འགྲོ་མ་དང་ཁྲོ་བོའི་ཚོགས་དཔག་ཏུ་མེད་པས་བསྐོར་ནས་ཡོད་དེ། དེ་ཡང་འདི་ལྟ་སྟེ། མཁའ་འགྲོ་མ་པུརྞ་ཉེ་བར་ཞི་བ་དང་། ཚངས་པ་དུང་མགྲིན་ཅན་དང་། དྲང་སྲོང་ཟླ་འོད་གཞོན་ནུ་དང་། ཡང་འཁོར་གྱི་མཁའ་འགྲོ་མ་ཨེ་ཀ་ཙ་ཏི་སྤུན་དྲུག་དང་། དེའི་བྲན་མོ་བཅུ་བཞི་དང་། གཡོག་མོ་ལྔ་བཅུ་རྩ་བརྒྱད་དང་། ཡང་གཡོག་འབུམ་ཁྲི་འབུམ་སྟོང་ལ་སོགས་ཏེ་མཁའ་འགྲོ་མའི་འཁོར་དཔག་ཏུ་མེད་པས་བསྐོར་བའོ། །བཅོམ་ལྡན་འདས་དེའི་ཐུགས་ལས་སྤྲུལ་པའི་འཁོར་ཕྱག་ན་རྡོ་རྗེ་ལ་སོགས་ཏེ་ཁྲོ་བོའི་འཁོར་བསམ་ཀྱིས་མི་ཁྱབ་པས་བསྐོར་བ། དགའ་རབ་རྡོ་རྗེ་ལ་སོགས་ཏེ་མིའི་འཁོར་དཔག་ཏུ་མེད་པས་བསྐོར་བའོ། །འཁོར་རྣམས་ལ་འབྲས་བུ་གསང་སྔགས་བླ་ན་མེད་པའི་ཆོས་ཀྱིས་འཁོར་ལོ་བསྐོར་བས། ཞི་བ་སྤྲུལ་པའི་སྐུའི་བྱང་ཆུབ་སེམས་དཔའ་རྣམས་གྲོལ་བར་བྱེད་པ། །ཐམས་ཅད་ཀྱང་ཁྲོ་བོའི་གཉེར་མ་དང་ལྡན་པ་ཤ་སྟག་གོ །གཞལ་ཡས་ཁང་དེ་ཤིན་ཏུ་ཡངས་པ་དང་ལྡན་པའོ། །དབང་པོ་ཐ་མའི་གང་ཟག་དེ་དག་ནི། དར་
བྲེད་ཅིང་སྔངས་ནས་སྤྲུལ་པའི་སྐུའི་ཞིང་ཁམས་སུ་སྐྱེ་བ་ཤ་སྟག་གོ །ཞེས་པས་གསལ་ལོ། །ཚུལ་འདི་ནི་གསང་སྔགས་མཐུན་མོང་དུ་དག་པ་མཁའ་སྤྱོད་དང་། ས་སྤྱོད་ལ་སོགས་པའི་ཞིང་དུ་གྲུབ་མཐའ་སྙོགས་པར་གྲགས་པ་དང་རྣམ་པ་ཙམ་དུ་མཐུན་པའི་ཚུལ། གཞན་དུ་བདེ་ཆེན་མཁའ་ལ་སྤྱོད་པ་དང་། །ས་སྤྱོད་ཞེས་གྲགས་དོན་གྱི་འོད་གསལ་ལ། །དབང་ཐོབ་ལྷན་ཅིག་སྐྱེས་པའི་ཌཱཀྐི་དང་། །ཡུལ་ཆེན་ཉེར་བཞིར་སྤྱོད་པའི་ཞིང་སྐྱེས་མ། །ལ་སོགས་དཔའ་བོ་རྣལ་འབྱོར་མ་ཆོགས་དང་། །སྐལ་བ་མཉམ་པའི་རིག་འཛིན་གྲལ་གང་དུ། །ལས་ཀྱི་འཕོ་སྦྱོང་རིག་པ་འཛིན་པ་ཡི། །རྡོ་རྗེའི་བླ་མ་རྣམས་ནི་རབ་བཞུགས་ནས། །སྔགས་ཀྱི་ལྟ་སྤྱོད་རླབས་པོ་ཆེ་ལ་སྤྱོད། །འདི་དག་རང་སྣང་དག་པའི་ས་བོན་དང་། །བསྐྱེད་རྫོགས་ཟབ་མོའི་བརྟུལ་ཞུགས་མཐར་སོན་པའི། །གསང་སྔགས་གྲུབ་པ་རྣམས་ལ་སྣང་བ་ལས། །རྟོག་འདོད་ཅན་གྱིས་ཕྱིན་དུ་ཡོད་པ་ཡི། །རིས་ཆད་ཅན་དུ་བསམ་པར་མི་བྱའོ། །དེ་ཡང་གསང་སྔགས་གྲུབ་པ་རྣམས་ལ་གྲགས་ཤིང་མངོན་སུམ་དུ་སྣང་བའི་མཁའ་སྤྱོད་དང་། ས་སྤྱོད་ལ་སོགས་པའི་ཞིང་ནི་བསྐྱེད་རྫོགས་གོམས་པའི་རང་སྣང་ཕྱིར་གསལ་དུ་མངོན་པའི་ཞིང་ཁམས་བཀོད་པ་མཛེས་ཤིང་པ་ལྟ་ན་སྡུག་པ་རྣམས་ཏེ། དེ་ཁོ་ན་ཉིད་ཀྱི་བདེན་པ་ལ་སྔགས་སྤྱིའི་ལུགས་ཀྱི་ཕྱག་རྒྱ་ཆེན་པོ་མཆོག་གི་དངོས་གྲུབ་ཏུ་གྲགས་པའམ། འདི་ལྟར་རིག་པ་འཛིན་པའི་ས་ལ་བཞུགས་པའི་སྐྱེས་བུ་རྣམ་པར་སྨིན་པ་དང་། ཚེ་ལ་དབང་བ་དང་། ཕྱག་རྒྱ་ཆེན་པོ་སྟེ་སློབ་ལམ་བཞིའི་ཡོན་ཏན་ཁྱད་པར་བ་ཐོབ་པ་རྣམས་མཐོང་སྤངས་དང་བསྒོམ་སྤངས་ཀྱི་དྲི་མ་སྦྱོང་ཕྱིར་འདོད་གཟུགས་ཀྱི་ལྷ་དང་རྗེས་མཐུན་པའི་ལུས་རྟེན་བྱེ་བྲག་པ་ཐོབ་པ་ལ་སོགས་པས་མངོན་སུམ་དུ་མཁའ་སྤྱོད་ཀྱི་གྲུབ་མཐའ་སྙོགས་ནས་མཁའ་ལ་འགྲོ་བ་དང་། ས་ལ་
སྤྱོད་པ་དང་། དོན་གྱི་འོད་གསལ་ཐོབ་པའི་ལྷན་ཅིག་སྐྱེས་མ་དང་། ཡུལ་ཉེར་བཞིར་སྤྲུལ་པ་བཟུང་བའི་ཞིང་སྐྱེས་མ་དང་། སྔགས་ལས་སྐྱེས་པ་དང་། གྲུབ་པ་ཅན་ལ་སོགས་པས་ཐོབ་པའི་རྣལ་འབྱོར་དབང་ཕྱུག་གཞན་དག་དང་སྐལ་བ་མཚུངས་པས་རྡོ་རྗེ་དང་། རིན་པོ་ཆེ་དང་། པདྨ་དང་། ལས་དང་། དེ་བཞིན་གཤེགས་པའི་རིགས་ཀྱི་ལྷ་དང་ལྷ་མོའི་རྣམ་འགྱུར་ཞི་ཁྲོ་གང་དང་ཉེ་བར་བསྙེན་པ་དེའི་ཞིང་དང་། སྟོན་པ་དང་། འཁོར་གྱི་བཀོད་པ་ཅན་གྱི་དག་ཞིང་དུ་སོང་ནས་ཆོས་དང་ཚོགས་ཀྱི་དགའ་བ་དང་། ལྟ་བ་དང་། ཏིང་ངེ་འཛིན་མཐུན་པའི་སྔགས་ཀྱི་ལྟ་སྤྱོད་རླབས་པོ་ཆེ་ལ་སྤྱོད་ཅིང་། དེ་ཡང་ཉིད་མཚམས་སྦྱོར་ཁར་ཞིང་དེ་དག་གི་དཔའ་བོ་དང་། མཁའ་འགྲོ་མའི་ཚོགས་ཀྱིས་གདུགས་དང་། རྒྱལ་མཚན་དང་། རོལ་མོའི་སྤྲིན་ཕུང་གིས་བསུ་ཞིང་། རིག་འཛིན་གྱི་ས་ལ་མངོན་སུམ་དུ་བཞུགས་པའི་རྡོ་རྗེའི་བླ་མ་དམ་པ་རྣམས་ཀྱིས་དབུགས་དབྱུང་བ་དང་། གཟེངས་བསྟོད་པ་དང་། གོ་འཕང་ཁྱད་པར་ཅན་ལ་འཇོག་པའི་གནས་རྣམས་ལ་བདེ་ཆེན་མཁའ་སྤྱོད་ཅེས་གྲགས་པའི་ཚུལ་རིན་ཆེན་རྒྱ་མཚོ་ལས། སར་བཞུགས་རྣམས་ལ་སྣང་བ་བཞིན། །རིག་པ་འཛིན་ལ་ཁྲོ་བོའི་ཞིང་། །མཁའ་སྤྱོད་ཡོན་ཏན་ཚོགས་ཆེན་པོ། །གྲུབ་པའི་མཚན་མས་བརྒྱན་པ་ཞིག །དངོས་གྲུབ་ཡ་མཚན་ཆེན་པོར་སྣང་། །ཞེས་སོ། །ཚུལ་དེ་ལྟ་བུའི་གནས་དང་ཡོན་ཏན་གྱི་བཀོད་པ་ཡང་སངས་རྒྱས་ཀྱི་སྤྲུལ་པ་དང་། ཕྲིན་ལས་བསམ་གྱིས་མི་ཁྱབ་པའི་མཐུ་དང་། བྱང་ཆུབ་སེམས་དཔའ་རང་རང་གི་བསྐྱེད་རྫོགས་ཟབ་མོ་ལ་སོགས་པའི་དགེ་བའི་རྩ་བ་རྨད་དུ་བྱུང་བས་བསྐྲུན་པའི་ཉེར་ལེན་ལས་སེམས་དཔའ་སར་གནས་རྣམས་ལ་བྱེད་སྤྲུལ་ཏུ་སྣང་བ་ལྟར་གྲུབ་པའི་ཚུལ། བདེ་བ་ཅན་དང་མི་འཁྲུགས་པའི་ཞིང་གི་ཡོན་ཏན་གྱི་བཀོད་པ་ལ་སོགས་པའི་མདོ་ལས་རྒྱས་པར་འབྱུང་བས་མཚོན་ལ།
དེར་ཡང་མ་ཟད་འཕགས་པ་ཏིང་ངེ་འཛིན་རྒྱལ་པོ་ལས། སྐྲ་རྩེའི་ཁྱོན་ལ་སངས་རྒྱས་མང་པོ་ནི། །གངྒཱའི་ཀླུང་གི་བྱེ་མ་ཅི་ཡོད་སྙེད། །རྒྱལ་བ་དེ་དག་ཞིང་ཡང་དེ་སྙེད་དེ། །དེ་དག་མཚམ་ཉིད་མི་འདྲ་སྐལ་མི་མཉམ། །ཞེས་པས་དེ་བཞིན་གཤེགས་པ་རྣམས་ནི་ཇི་ལྟ་བའི་ཡེ་ཤེས་ཆོས་ཀྱི་དབྱིངས་དང་། མཉམ་པ་ཉིད་ཀྱི་ཡེ་ཤེས་ཀྱི་ངང་དུ་སྤྲོས་པ་བྲལ་བར་བཞུགས་བཞིན་དུ། ཇི་སྙེད་པའི་ཡེ་ཤེས་མེ་ལོང་ལྟ་བུ་དང་། སོ་སོར་རྟོག་པ་དང་། བྱ་བ་གྲུབ་པའི་མཁྱེན་ཆོས་ཐམས་ཅད་གཟིགས་ཤིང་། ཐུགས་རྗེ་ཚད་མེད་པས་ཡུངས་འབྲུ་གཅིག་གིས་གོ་ནའང་། དག་པ་དང་མ་དྲག་པའི་སྣོད་བཅུད་ཀྱི་རྣམ་པ་གྲངས་མེད་པར་སྣང་བར་མཛད་ནས། སེམས་ཅན་ཐམས་ཅད་ལ་རྣམ་པར་གྲོལ་བའི་ཆོས་བསྟན་ནས་སོ་སོའི་སྐལ་པ་དང་མཚུངས་པའི་བྱང་ཆུབ་གསུམ་ལ་འགོད་པའི་ཕྲིན་ལས་ཚད་མེད་པའི་ཕྱིར་རོ། །དེ་བས་ན་སངས་རྒྱས་ཀྱི་ཐུགས་རྗེས་སྤྲུལ་པའི་ཞིང་ཁམས་རང་སྣང་དགེ་བའི་བསོད་ནམས་ཀྱི་ཚོགས་བླ་ན་མེད་པའི་ཐབས་ཀྱིས་མངོན་སུམ་དུ་བྱས་པ་ལས། གང་ཟག་རང་རྒྱུད་ལྡན་ལ་མཐུན་སྣང་གྲུབ་པའི་རྫས་ཡོད་མ་ཡིན་པས། རང་བཞིན་མ་དག་པའི་རྟོག་འདོད་ཅན་གྱིས་ཕྱིན་དུ་ཡོད་པའི་གནས་རིགས་རིས་ཆང་ཅན་དུ་བསམ་པར་མི་བྱ་བའི་ཚུལ་གསང་སྙིང་ལས། དཔག་བསམ་ཤིང་དང་ཡིད་བཞིན་གྱི། །རིན་པོ་ཆེ་དང་འབྱུང་པ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་ནམས་བརྟས་པ་ཡིན། །ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་དང་དུ་བྱུང་། །ཞེས་སོ། །འགྲོ་འདུལ་སྤྲུལ་པའི་ཁྱད་པར་ནི། །དེ་ཉིད་ངང་ལས་ལོངས་སྤྱོད་རྫོགས་པ་ཡི། །ཡི་གེའི་སྤྲིན་གྱི་འོད་ཟེར་རབ་འཕྲོས་པས། འཇིག་རྟེན་
འདུལ་བྱེད་སྤྲུལ་པའི་སྐུ་མཆོག་ནི། །གནས་རིགས་དྲུག་གི་གདུལ་བྱའི་སྣང་བ་ལ། །རང་རང་མིང་གི་མངོན་བརྗོད་རྗེས་འགྲོ་བའི། །འདུལ་བྱེད་རིགས་པའི་སྐྱེས་བུ་ཐུབ་པ་དྲུག་ཕྱོགས་བཅུ་མཐའ་ཡས་མུ་མེད་སྟོང་གསུམ་གྱི། །སྟེང་ཆེན་སྙེད་དང་མཉམ་པར་རབ་སྤྲུལ་ནས། །གདུལ་བ་བཞི་ཡི་འགྲོ་དོན་བསམ་མི་ཁྱབ། དེ་ལ་འགྲོ་བ་སོ་སོའི་གནས་རིས་སུ་དེ་དང་དེའི་སྣང་བ་དང་མཐུན་པས་དོན་མཛད་པའི་ཚུལ་ནི། །གསང་སྙིང་ལས། དེ་ནས་དེ་བཞིན་གཤེགས་པ་ཐམས་ཅད་ལས་ཐུགས་རྗེ་ཆེན་པོའི་བྱིན་གྱིས་བརླབས་ཞེས་བྱ་བའི་རིགས་པའི་སྐྱེས་བུ་ཐུབ་པ་དྲུག་དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །འཐོན་ནས་ཀྱང་ལས་ཀྱི་དབང་གིས་སྣྲེལ་ཞི་དང་ཡས་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེ། ཐུབ་པ་ཆེན་པོ་བཅོམ་ལྡན་འདས་རེ་རེས་འདུལ་བ་རྣམ་པ་བཞིས་འགྲོ་བའི་དོན་མཛད་དེ། ཞེས་པ་ལྟར་འོག་མིན་ན་བཞུགས་པའི་ལོངས་སྤྱོད་རྫོགས་པའི་སངས་རྒྱས་ཀྱི་སྐུའི་གནས་དྲུག་གི་འོད་ཟེར་ལས་ཡི་གེ་ཕྲེང་བའི་འཁོར་ལོ་སྤྲོས་པ་འགྲོ་བ་དྲུག་གི་གནས་སུ་རང་རང་འདུལ་བྱེད་ཀྱི་སྤྲུལ་པར་ཤར་བའི་ཚུལ་ལས། ལྷའི་གནས་སུ་དབང་པོ་ལ་སོགས་པའི་མིང་གི་མངོན་བརྗོད་དྲུག་དང་རྣམ་འགྱུར་ནི་དཀྱིལ་འཁོར་གང་དུ་དེ་བཞིན་གཤེགས་པ་རྣམས་ཀྱི་ཐུགས་རྗེ་དང་ཕྲིན་ལས་ཚད་མེད་པ་མངོན་རྟོགས་ཀྱི་བློ་ནས་མཚོན་པ་ཙམ་སྟེ། ངོ་བོ་དབྱིངས་ནས་སྤྲུལ་པའི་སངས་རྒྱས་ཡིག་ལ། སྤྲུལ་པ་དེས་ཀྱང་སེམས་ཅན་གྱི་ངོར་ཡང་སྤྲུལ་ཚད་མེད་པ་བཀྱེ་ནས་དོན་མཛད་པའི་ཚེ། གནས་རིགས་དེ་དག་ཏུ་རྣམ་པ་ཡང་དེ་ཁོ་ནར་མ་ངེས་པའི་ཚུལ་ཕལ་པོ་ཆེ་ལས་ཀྱི་རིགས་ཀྱི་བུ་དེ་བཞིན་གཤེགས་པའི་སྤྲུལ་པ་ནི་ཚད་མེད་དེ། འགྲོ་བ་གང་དང་གང་གིས་འདུལ་བདེ་དང་དེའི་གཟུགས་དང་ཁ་དོག་
དང་མིང་གིས་དོན་མཛད་དོ། །འདི་ལྟ་སྟེ། །དབང་བསྒྱུར་གྱི་གནས་སུ་ནི་ལྷའི་བདག་པོ་དབང་བསྒྱུར་དུ་སྤྲུལ་ནས་དགེ་བ་བཅུའི་ལས་ཀྱི་ལམ་ཡང་དག་པར་ལེན་དུ་འཇུག །ཅེས་པ་ནས། དགེ་སྦྱོང་དང་། བྲམ་ཟེ་དང་། ཡི་དྭགས་དང་། དམྱལ་བ་པའི་གཟུགས་ཀྱིས་འདུལ་བ་རྣམས་ལའང་། དེའི་གཟུགས་སུ་སྤྲུལ་ཞིང་དོན་མཛད་པའོ། །ཞེས་སོ། །ཚུལ་འདི་ལྟ་བུས་ཆོས་ནི་ཚིག་ལ་མི་རྟོན། །དོན་ལ་རྟོན་པའི་ཤེས་བྱ་ལ་རྨོངས་པར་གྱུར་ཏེ་གནས་རིགས་དེ་དག་ཏུ་གཟུགས་བརྙན་དེ་འདྲའི་སྟོན་པ་ཡོད་དོ་བར་འཁྲུལ་ནས་རྒྱུད་སྡེ་ཟབ་མོ་ལ་བསྐུར་བ་དག་ནི་ཆོས་ཀྱི་ཚིག་དོན་འཇལ་བ་ལ་གློ་ཁ་མ་ཕྱོགས་བཞིན་དུ་ད་དུང་མཁས་སུ་རེ་བའི་ཀུན་འབྱུང་བསྒོམ་པ་མཚར། དགོངས་འདུས་ལས། ཐེག་པ་ཆེན་པོ་གསང་སྔགས་ནི། མཐུན་འཇུག་ཐབས་ཀྱི་སྒྲར་བསྟན་པ། །ཚིག་དང་དོན་ལ་བློ་མི་བཞག །ཅེས་པའི་དོན་སྤྱི་ཅེམ་པའང་བདེ་བ་མ་ཆགས་པའི་བཞིན་བཟང་ཁྱོད་ལ་ད་དུང་དོགས་པའི་རྣམ་འགྱུར་བག་ལ་ཉལ་བསླང་བར་འོས་ཏེ། འདི་ལྟར་སྔགས་རྒྱུད་རྣམས་སུ་ཕྱོགས་སྐྱོང་བཅུའི་མགོ་བོ་ཁྲོ་བཅུས་གཟིར་ནས། བགེགས་ཀྱི་སྡེ་ཚན་དུ་བཞག་པ་དང་། དེ་དག་ལ་སོགས་པའི་མགོན་པོ་བདུན་ཅུ་རྩ་ལྔ་ཐེག་པ་ཆེན་པོའི་དགེ་འདུན་དཀོན་མཆོག་གི་ངོ་བོ་ཆོས་སྐྱོང་བའི་སྲུང་མ་ཁྱད་པར་ཅན་དུ་བཞག་པའང་ཁྱོད་ཀྱིས་འགལ་བ་ལུང་མེད་དུ་མཐོང་ཞིང་། དེ་དག་གི་དགོས་པའང་རིག་པར་མི་འགྱུར་བས་བཞང་གད་ཀྱི་གནས་ཙམ་ལས་དགག་བསྒྲུབ་མི་དགོས་པའི་ཚུལ་ཆོས་ཀྱི་གྲགས་པས། ལོག་པའི་ལམ་ལ་མཐའ་མེད་བྱིར། དེ་དག་འདིར་ནི་སྤྲོ་བྱ་མིན། ཞེས་པ་ལྟར་རོ། །དེ་ཡང་སྣྲེལ་གཞི་དང་ཡན་མན་གྱི་སྒྲར་བྱུང་བ་ཕྱོགས་བཞི་དང་སྟེང་འོག་ཏུ་འཁྲུལ་ནས་འགྲོ་བ་དྲུག་ཏུ་འདོད་པ་ནི་རང་ལུགས་པས་ཀྱང་གཞུང་གི་ཕྱོགས་མ་མཐོང་ཞིང་། འགྲོ་བ་བཞི་ཕྱོགས་
བཞིར་སྡེ་ཚན་དུ་ཆད་པའི་སྐྱོན་ཡོད་ལ། དེའི་ཚུལ་ནི་ཕལ་པོ་ཆེ་ལས། །ལས་ཀྱི་བྱེ་བྲག་བསམ་མི་ཁྱབ། །དམྱལ་བའི་འཇིག་རྟེན་ཐུར་འཕྱང་ཞིང་། །གཤིན་རྗེའི་འཇིག་རྟེན་སྣྲེལ་གཞི་སྟེ། །བྱོལ་སོང་ལྷ་མི་གྱེན་དུ་འགྲོ། །ཞེས་པས། མཐོ་རིས་གཉིས་མ། གོ་གྱེན་ལ་བལྟ་བ་དང་། དམྱལ་བ་ཐུག་གཤིན་རྗེའི་འཇིག་རྟེན་ཏེ་ཡི་དྭགས་དངོས་སུ་སྨོས་ནས་སྣྲེལ་གཞིའི་སྒྲས་བྱོལ་སོང་སྟེ་འགྲོ་བ་ལྔ་དང་། ལྷ་མིན་ནི་དཀོན་མཆོག་བརྩེགས་པ་ལས་ངན་འགྲོ་བཞི་པར་ཡང་བཤད་པ་ཡིན་ནོ། །ད་ལྟ་བུའི་ཐུབ་པ་དྲུག་ཏུ་སྣང་བའི་སྤྲུལ་གཞི་ལས་སྤྲུལ་པ་བསམ་གྱིས་མི་ཁྱབ་པས་དོན་མཛད་པའི་ཡུལ་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་སྟེ། དེའི་ཚུལ་ཡང་འཕགས་པ་ཏིང་ངེ་འཛིན་རྒྱལ་པོ་ལས། སྐྲ་རྩེའི་ཁྱོན་ལ་འགྲོ་བ་ལྔ་རྣམས་ཏེ། །སེམས་ཅན་དམྱལ་དང་དུད་འགྲོའི་འགྲོ་བ་དང་། གཤིན་རྗེའི་འཇིག་རྟེན་ལྷ་དང་མི་རྣམས་བཞུགས། འདྲེས་པ་མེད་ཅིང་གནོད་པར་གྱུར་པ་མེད། །དེ་དག་གནས་སུ་མཚོ་དང་རྒྱ་མཚོར་བཅས། །ཆུ་ཀླུང་དེ་བཞིན་མཚོ་དང་ལྟེང་ཀ་དང་། །འདྲེས་པ་མེད་ཅིང་གནོད་པར་གྱུར་མེད་དེ། །དེ་ལྟར་རྒྱལ་བའི་ཆོས་ནི་བསམ་མི་ཁྱབ། །དེ་ཡི་གནས་སུ་རི་བོ་དུ་མ་སྟེ། །ཁོ་ར་ཁོརཡུག་ལྷུན་པོ་རག་ལྷུན་དང་། །བཏང་བཟུང་དང་ནི་བཏང་བཟུང་ཆེན་པོ་དང་། །འབིགས་བྱེད་བྱ་རྒོད་ཕུང་པོ་གངས་ཀྱི་རི། །གནས་དར་སེམས་ཅན་དམྱལ་བ་མི་བཟད་པ། །ཐ་དང་རབ་ཏུ་ཚ་བ་ཉམས་མི་དགའ། །དེ་ན་སེམས་ཅན་དམྱལ་བའི་ཚོར་བ་ནི། །སྡུག་བསྔལ་དེ་དག་རྗེས་སུ་མྱོང་བར་བྱེད། །དེ་ཡི་གནས་ན་ལྷ་ཡི་གཞལ་མེད་ཁང་། །དེ་དག་དཔག་ཚད་བཅུ་གཉིས་དབྱིངས་དགའ་བ། །ལྷ་རྣམས་སྟོང་ཕྲག་མང་པོ་དག་གིས་ཀྱང་། །ལྷ་ཡི་དགའ་བ་ཤིན་ཏུ་བདེ་བ་མྱོང་། །དེ་ཡི་གནས་སུ་སངས་རྒྱས་རྣམས་སྐྱེ་ཞིང་། །འཇིག་རྟེན་རིག་པའི་བསྟན་པ་འབར་བ་སྣང་། །དེ་ཡིས་
གནས་ཉིད་ན་ཡང་ཆོས་ནུབ་ཅིང་། །འདྲེན་པ་མྱ་ངན་འདས་པའི་སྒྲ་ཡང་ཐོས། །མི་དག་བདག་གི་ཁྱིམ་ན་རྨི་ལམ་བཞིན། །འདོད་པའི་ཡོན་ཏན་དག་ལ་དགའ་མྱོང་ནས། །ཕྱིར་མ་དོན་ཡང་དེ་ཡི་འདོད་མ་མཐོང་། །དེ་ན་རྨི་ལམ་ཡིན་པ་དེ་ཡིས་ཤེས། །དེ་བཞིན་མཐོང་ཐོས་རིག་དང་བྱེ་བྲག་བྱེད། །འདི་དག་ཐམས་ཅད་མ་བདེན་རྨི་ལམ་བཞིན། །ཞེས་པ་ལྟར་བདག་ཅག་གི་འཇིག་རྟེན་འདི་ཡང་རྣམ་སྣང་གང་ཆེན་མཚོའི་ཕྱག་ན་རྡུལ་ཕྲ་རབ་གཅིག་གི་ནང་ན་ཡོད་པ་ལྟར། །ཆུང་དུའི་ངོར་ཆེན་པོ་ཚུད་པའི་མོད་པ་གསལ་སྣང་ནི་སེམས་ཅན་གྱི་འཁྲུལ་པ་ཚད་མེད་པ་དང་། དབང་བཅུ་ཐོབ་པའི་བྱང་ཆུབ་སེམས་དཔའ་དང་སངས་རྒྱས་ཀྱི་རྫུ་འཕྲུལ་གྱི་སྣང་བ་ལས་འཆར་བར་རུང་ལ་དེའི་ཚུལ། ས་ལ་སོགས་པ་འབྱུང་བ་བཞིའི་རྡུལ་དང་། ནམ་མཁའ་ཁབ་ཀྱི་མིག་ཙམ་ནའང་ལས་མཐུན་པར་བསགས་པའི་སེམས་ཅན་དང་བཅས་པས་སྣོད་བཅུད་དུ་སྣང་བའི་འཇིག་རྟེན་གྲངས་མེད་པ་སྣང་བ་ཐམས་ཅད་དུ་རྒྱལ་བའི་ཡེ་ཤེས་ཀྱི་གཟིགས་པ་འཇུག་པས་དོན་མཛད་པ་ཡིན་ལ། དེ་ལྟར་དོན་མཛད་ཡུལ་གྱི་སྟོང་གསུམ་ཀྱང་ཕྱི་རོལ་པའི་དྲང་སྲོང་དང་། ཉན་རང་དགྲ་བཅོམ་དང་། བྱང་ཆུབ་སེམས་དཔའ་དང་། སངས་རྒྱས་རྣམས་ཀྱི་ཚུལ་གོང་ནས་གོང་དུ་ཆེ་ཆེར་མང་ཁྱད་ཞུགས་པར་མཐོང་བའང་། སངས་རྒྱས་ཀྱི་ཡུལ་དང་ཡེ་ཤེས་བསམ་གྱིས་མི་ཁྱབ་པའི་མདོ་ལས། སྟོང་གསུམ་གྱི་ལྷ་དང་མི་རྣམས་ནི་ཆེས་ཉུང་གིས། ཕྱི་རོལ་པའི་དྲང་སྲོང་མངོན་པར་ཤེས་པ་དང་ལྡན་པ་གཅིག་གིས་ཤིང་རྟའི་འཕང་ལོ་ཙམ་གྱི་སའི་ཁྱོན་ལ་སེམས་ཅན་མཐོང་བ་ནི་དེ་བས་ཆེས་མང་ངོ་། །དེ་དག་གིས་སྟོང་གསུམ་དུ་མཐོང་བ་ནི་ཉན་ཐོས་རྣམ་པར་ཐར་པ་བརྒྱད་ལ་བསམ་གཏན་པའི་གང་ཟག་གཅིག་གིས་ཤིང་རྟའི་འཕང་ལོ་
ཙམ་ལ་མཐོང་བ་ཆེས་མང་ངོ་། །དེ་དག་གིས་སྟོང་གསུམ་དུ་མཐོང་བ་བས་ནི། བྱང་ཆུབ་སེམས་དཔའ་རྣམ་པར་ཐར་པ་བརྒྱད་ལ་བསམ་གཏན་པ་གཅིག་གིས་ཤིང་རྟའི་འཕང་ལོ་ཙམ་ལ་མཐོང་བ་ཆེས་མང་ངོ་། །དེ་དག་གིས་སྟོང་གསུམ་དུ་མཐོང་བ་བས་ནི། །དེ་བཞིན་གཤེགས་པའི་སྤྱན་གྱི་ཤིང་རྟའི་འཕལ་ལོ་ཙམ་གྱི་སའི་ཁྱོན་ལ་གཟིགས་པ་ཆོས་མང་ངོ་། །ཞེས་སོ། །དེ་ལྟ་བུའི་སེམས་ཅན་གྱི་ཁམས་ཚད་དང་མུ་མེད་པའི་གནས་རིས་སུ་འདུལ་བ་རྣམ་པ་བཞིའི་སྒོ་ནས་འགྲོ་དོན་མཛད་ཚུལ་ཡང་། དེའང་བསོད་ནམས་ཆེན་པོའི་འདུལ་བ་ནི། །སྐུ་ཡི་མཛད་པ་ཆེན་པོ་བཅུ་གཉིས་ཡིན་གསུང་གིས་མཛད་པ་ཐེག་པ་གསུམ་མམ་གཅིག །གང་ཡང་འདུ་ཤེས་རྗེས་འགྲོ་སེམས་ཅན་གྱི། །ཉོན་མོངས་གཉེན་པོར་དགོངས་ཏེ་གསུངས་པ་ལ། །ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གྲངས། །གསུང་ལྟར་སྣང་ཡང་སྒྲ་ཚིག་རང་མཚན་པ། །མ་ཡིན་སེམས་ཆེན་ཁམས་ལ་བྱིན་བརླབས་མཐུས། །རྣམ་པར་རིག་པ་ཉིད་དང་མཐུན་པར་ཤར། །ཐུགས་ཀྱི་གདུལ་བ་དུས་གསུམ་མཁྱེན་ཅིང་གཟིགས། །དུས་ཀྱང་སོ་སོར་མི་རྟོག་དུས་མེད་དུས། །རང་བཞིན་གདོད་མའི་གནས་སྐབས་ཀུན་ཏུ་བཟང་། །གཞན་གྱི་སེམས་རྒྱུད་མཁྱེན་དང་དེ་བཞིན་དུ་རྫུ་འཕྲུལ་ཆེན་པོའི་སྤྱན་དང་སྙན་ལ་སོགས། །མངོན་ཤེས་དྲུག་པ་དུས་ལས་ཡོལ་བ་མེད། །ཕྲིན་ལས་གདུལ་བ་ཀུན་ཏུ་སྐུ་དང་ནི། །ཀུན་ཏུ་ཐུགས་དང་དེ་བཞིན་ཀུན་ཏུ་ཞལ། །ཀུན་ཏུ་གསུང་གི་གསང་བ་གསམ་མི་ཁྱབ། །སྐུ་གསུང་ཐུགས་ཀྱིས་དངོས་སུ་དོན་མཛད་ལ། ཕྲིན་ལས་ཀྱིས་ཞི་དངོས་རྒྱུད་ཀུན་ཏུ་མཛད། །དེ་ལྟར་དབྱིངས་ལས་སྤྲུལ་པའི་སྐུ་མཆོག་རྣམས། ཆོས་ཉིད་ལ་ལྟོས་ཇི་ལྟའི་ཡེ་ཤེས་དང་། །ཆོས་ཅན་ལ་ལྟོས་ཇི་སྙེད་མཁྱེན་པ་ཡི། །ཡེ་ཤེས་གཉིས་ཀྱིས་གདུལ་བྱའི། རྒྱུད་འགྲོ་ལ་ཞིང་། །ཉེ་བར་ཞི་དང་མ་འདྲེས་ཆོས་ཚུལ་སྟོན། །དེ་ལ་སྐུ་བསོད་
ནམས་ཆེན་པོས་འདུལ་བ་མཛད་པ་བཅུ་གཉིས་ལ་སོགས་པས་འདུལ་བ་ནི། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར་སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྟུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་གྱིས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས་སུ། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་སོ། །གསུང་ཐེག་པ་སྣ་ཚོགས་པས་འདུལ་བ་ནི་གསང་སྙིང་ལས་འདུལ་བའི་དབང་གིས་ལྷ་མའི་ཐེག་པ་དང་། ཉན་ཐོས་ཀྱི་ཐེག་པ་དང་། རང་བྱང་ཆུབ་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་དང་། བླ་ན་མེད་པའི་ཐེག་པས་མ་རིག་པའི་རྣམ་པར་རྟོག་པ་ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར་ཆོས་པུང་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། །གསུང་བར་འགྱུར་རོ། །ཞེས་སོ། །དེ་ཡང་གདུལ་བྱའི་རྣ་བ་ཚིག་སྡེ་བ་སྦྱོར་ལེགས་པ་དང་། ཚངས་པའི་དབྱངས་ཡན་ལག་དྲུག་ཅུ་དང་ལྡན་པར་ཐོས་པའི་ཚུལ་ཐལ་འགྱུར་ལས། གསུང་ནི་ཚིག་སྦྱོར་ལེགས་པ་ལ། །ཚངས་པའི་དབྱངས་ནི་ཡན་ལག་དྲུག །ཅེས་སོ། །དེ་ལྟར་གསུངས་པ་གདུལ་བྱ་རང་རང་གི་མོས་པའི་སྐལ་བ་ཅི་ཡོད་པ་དང་མཐུན་པར་སོ་སོའི་རྣམ་རིག་གིས་ཐོས་པ་ལས་གསུང་སྒྲ་ཚིག་རང་མཚན་པར་མ་ཡིན་པའི་ཚུལ། དཀོན་བརྩེགས་ལས། འགྲོ་བའི་བསོད་
ནམས་ལས་དག་ལས། །རྒྱལ་བའི་གསུང་དབྱངས་གཅིག་སྣང་བ། །མོས་པའི་དབང་གིས་སོ་སོར་ཐོས། །འདི་ཡང་གསུང་གི་གསང་བའོ། །ཞེས་པས་མཚོན་ནོ། །ཐུགས་མངོན་པར་ཤེས་པ་ཆེན་པོས་འདུལ་བ་ནི། དུས་གསུམ་གྱིས་བསྡུས་པའི་ཆོས་ཐམས་ཅད་མཁྱེན་པས་སྔོན་གནས་རྗེས་སུ་དྲན་པ་དང་། གསུམ་པོའང་སྐྱེ་པ་མེད་པར་རྟོགས་པས་རྣམ་པར་མི་རྟོག་བཞིན་དུ་གཞན་གྱི་སེམས་རྒྱུད་པྲ་ཕྲབ་པའི་རྣམ་པ་ལྟར་མཁྱེན་པ་དང་། དེ་བཞིན་དུ་གཟིགས་པ་ལྷའི་མིག་གིས་མངོན་ཤེས་ཀྱིས་དག་མ་དག་གི་འཇིག་རྟེན་གྱི་འཆི་འཕོ་དང་། སྐྱེ་བ་ལས་སོགས་མཁྱེན་པ་དང་། གསན་པ་རྣ་བའི་མངོན་ཤེས་ཀྱིས་འཇིག་རྟེན་ཁམས་ཀྱི་སྒྲ་སྐད་ཆེ་ཆུང་ཐམས་ཅད་མཁྱེན་པ་དང་། རྫུ་འཕྲུལ་གང་གིས་འགྲོ་བ་འདུལ་བདེ་ལྟར་སྟོན་པའི་མངོན་ཤེས་ཀྱིས་འགྲོ་བའི་མོས་པ་དང་མཐུན་པའི་དོན་སྤྱོད་པ་དང་། སྒྲིབ་གཉིས་བག་ཆགས་དང་བཅས་པ་དབྱིངས་སུ་དག་པ་ཟག་པ་མེད་པའི་མངོན་ཤེས་ཀུན་ཏུ་བཟང་པོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་སྤྱོད་པ་ཡོངས་སུ་རྫོགས་པ་དང་དྲུག་གིས་ཐུགས་ཀྱི་རྗེས་སུ་འགྲོ་ཞིང་དུས་ལས་ཡོལ་བ་མེད་པས་སེམས་ཅན་གྱི་དོན་མཛད་པ་ནི་ཐུགས་ཀྱིས་དུལ་བ་ཡིན་པའི་ཚུལ་སྒྱུ་འཕྲུལ་ལས། དུས་བཞི་ཀུན་ཏུ་མཁྱེན་པ་དང་། ཐམས་ཅད་ཀྱི་སེམས་ཀྱི་རྒྱུད་ཀུན་ཏུ་མཁྱེན་པ་དང་། རྫུ་འཕྲུལ་གྱི་སྤྱན་གྱིས་ཐམས་ཅད་ཀུན་ཏུ་གཟིགས་པ་དང་། རྫུ་འཕྲུལ་གྱི་སྙན་གྱིས་ཀུན་ཏུ་གསན་པ་དང་། རྫུ་འཕྲུལ་གྱི་ཚོགས་ཀུན་ཏུ་དོན་སྤྱོད་པ་དང་། ཟག་པ་མེད་པའི་ཀུན་ཏུ་བཟང་པོའི་སྤྱོད་པ་ཡོངས་སུ་རྫོགས་པའི་མངོན་པར་ཤེས་པ་ཆེན་པོ་དྲུག་དང་། ཞེས་པ་ལྟར་རོ། །ཕྲིན་ལས་བསམ་གྱིས་མི་ཁྱབ་པས་འདུལ་བ་ནི། སྐུ་མི་ཟད་པ་རྒྱན་གྱི་འཁོར་ལོ་གཟུགས་སྐུ་མཚན་དང་དཔེ་བྱད་དུ་གསལ་བ་དང་། སྐུ་གཅིག་ལས་ཞལ་མང་པོར་སྟོན་པ་དང་། རྣམ་པར་སྣང་མཛད་གང་ཆེན་མཚོའི་
ཕྱག་གི་པདྨའི་སྟེང་ནས་འཇིག་རྟེན་གྱི་ཁམས་ཉི་ཤུ་རྩ་ལྔའི་ཞིང་ཁམས་ཡོངས་སུ་བཀོད་པའི་རྒྱན་དང་། ཆོས་ཀྱི་སྐུ་སྤྲོས་པ་མཐའ་དག་ཉེ་བར་ཞི་བའི་རང་བཞིན་ཅན་ནོ། །གསུང་མི་ཟད་པ་རྒྱན་གྱི་འཁོར་ལོ་དབྱངས་ཀྱི་ཡན་ལག་རྒྱ་མཚོས་འགྲོ་དྲུག་སོ་སོའི་སྐད་དུ་མ་འདྲེས་པར་སྟོན་པས། བརྡའི་གསུང་བརྡའ་དང་རྣམ་འགྱུར་བསྟན་པས་དོན་གོ་བར་མཛད་པ་དང་། མཛད་པ་ཆེན་པོའི་གསུང་སེམས་ཅན་གྱི་མོས་པ་ལྟར་གང་ལ་གང་འདུལ་གྱི་ཆོས་ཀྱི་རྣམ་གྲངས་བསམ་གྱིས་མི་ཁྱབ་པའི་འཁོར་ལོ་དང་བཅས་པའོ། །ཐུགས་མི་ཟད་བརྒྱན་གྱི་འཁོར་ལོ་ནི། སྤངས་པ་དང་རྟོགས་པའི་རང་བཞིན་ཚད་མེད་པ། མངོན་པར་ཤེས་པ་དང་། ཏིང་ངེ་འཛིན་རྒྱ་མཚོའི་སྙིང་པོ་གངས་ཆེན་མཚོ་ལ་སོགས་པས་འདུལ་བའོ། །དེ་དག་ཀུན་ལ་ཁྱབ་པའི་ཡོན་ཏན་སྟོབས་བཅུ་དང་། མི་འཇིགས་པ་བཞི་དང་། དྲན་པ་ཉེ་བར་གཞག་པ་ལ་སོགས་པ་སྟེ། སྔ་མ་ལས། ཀུན་ཏུ་སྐུ་བསམ་གྱིས་མི་ཁྱབ་པ་དང་། ཀུན་ཏུ་ཐུགས་བསམ་གྱིས་མི་ཁྱབ་པ་དང་། ཀུན་ཏུ་ཞལ་བསམ་གྱིས་མི་ཁྱབ་པ་དང་། ཀུན་ཏུ་གསུང་བསམ་གྱིས་མི་ཁྱབ་པ་དང་། བསམ་གྱིས་མི་ཁྱབ་པ་གྲངས་མེད་པ་ཕྱོགས་བཅུར་སྣང་བར་གྱུར་ཏོ། །ཞེས་སོ། །དེ་ཡང་སྐུ་གསུང་ཐུགས་གསུམ་གྱི་དངོས་སུ་དོན་མཛད་ལ། ཕྲིན་ལས་ཀྱིས་དངོས་རྒྱུད་ཐམས་ཅད་དུ་མཛད་པས་ན་སྔ་མ་ནི་མིའི་ཐུབ་པའི་མཛད་པ་དང་འགྲེལ་ཆེ་ལ། ཕྱི་མ་ནི་ལྷག་མ་ལྔ་པོའི་གདུལ་བ་གཙོ་བོར་ཤེས་པ་བྱུང་ན་སྐྱེས་བུ་ཤེས་རབ་ཅན་དུ་རིག་པར་བྱའོ། །དེའང་རྒྱལ་བའི་ཡེ་ཤེས་ལས་སྤྲུལ་པའི་རིགས་པའི་སྐྱེས་བུ་དྲུག་པོས་ཡེ་ཤེས་གཉིས་ཀྱི་སྒོ་ནས་དོན་མཛད་པའི་ཚུལ་ནི་ངོ་བོ་ཆོས་སྐུའི་ཀློང་ན་ཇི་ལྟ་བའི་ཆོས་ཉིད་ལས་མི་གཡོ་བཞིན་དུ། །རྟོག་པའི་འོག་མིན་དུ་རང་
སྣང་ནས། རང་བཞིན་ཇི་སྙེད་པའི་ཁྱེན་པས་ཤེས་བྱའི་ཆོས་རྒྱ་མཚོ་ལྟ་བུ་དང་། སེམས་ཅན་གྱི་གནས་རིས་དང་། བདེ་སྡུག་གི་ཆོས་རྟོག་པ་མེད་བཞིན་དུ་ལག་མཐིལ་ན་སྐྱུ་རུ་ར་བཞག་པ་ལྟར་མཁྱེན་པས་དེ་དག་གི་ལས་དང་ཉོན་མོངས་པ་སེལ་བའི་ཐུགས་རྗེ་དུས་ལས་མི་ཡོལ་བའི་ཕྲིན་ལས་ཚད་མེད་པ་རྒྱུན་མི་འཆད་པའི་ཕྱིར་རོ། །ད་ནི་འགྲོ་འདུལ་གྱི་སྤྲུལ་པ་དེ་དག་ལས་ཡང་སྤྲུལ་འབྱུང་ཚུལ་སྟོན་པའི་ཕྱིར། དེ་ལས་ཡང་སྤྲུལ་རྣམ་པ་བརྗོད་མི་ལང་། །འགྲོ་བ་དྲུག་གི་གནས་རིགས་དེ་སྙེད་དུ། །ལྷ་རྣམས་གདུལ་བྱེད་ཚངས་དབང་བདེ་འབྱུང་སོགས་མི་ལ་ཉན་རང་བྱང་སེམས་འཁོར་ལོས་བསྒྱུར། །དེ་བཞིན་ལྷ་མ་ཡིན་ལ་ཐགས་བཟང་རིས། །བྱ་ལ་ཤིང་རྟ་མོ་དང་རི་དྭགས་ཕྱིར། །སེང་གིའི་རྒྱལ་པོ་ཡི་དམ་བརྟན་པ་སོགས། །མདོར་ན་དམྱལ་བ་ཡི་དྭགས་གང་དང་གང་། །འདུལ་བྱེད་དེ་དང་དེ་འདྲའི་གཟུགས་སྤྲུལ་ནས། །སེམས་ཅན་དོན་ལ་ནམ་ཡང་གཡེལ་བ་མེད། །འདི་ནི་འཇིག་རྟེན་དག་གི་ཞིང་རྣམས་སུ། །ལས་དང་བག་ཆགས་དགེ་སྡིག་རྒྱུ་འབྲས་ཀྱི། །གནས་རིགས་བདེ་སྡུག་མཐོ་དམན་ལྟར་སྣང་བའི། །རང་སྣང་མཐུན་པའི་སྟོན་པས་དོན་མཛད་ཅིང་། །ཆོས་ཀྱང་མ་ངེས་གདུལ་བྱའི་ཟླ་རྟོག་ལྟར། །དུས་ཀྱང་རང་རང་སྐལ་པའི་རྗེས་འགྲོ་བ། །མ་དག་ཞིང་གི་འགྲོ་ལ་དེ་ལྟར་སྣང་། །དེ་ལ་སེམས་ཅན་གྱི་ཁམས་བསམ་གྱིས་མི་ཁྱབ་ཀྱང་གནས་རིགས་དྲུག་ཏུ་འདུས་པ་ལ་དགོངས་ནས་དེ་དག་འདུལ་བྱེད་ཀྱི་སྤྲུལ་གཞིའི་ཐུབ་པ་དྲུག་ཏུ་རྣམ་པར་སྤྲུལ་པ་ལས་ཀྱང་། ཡང་སྤྲུལ་དུ་སྣང་བ། ལྷའི་གནས་སུ་རྒྱལ་ཆེན་རིགས་བཞི་ནས་འོག་མིན་གྱི་བར་དུ་ཚངས་བ་དང་། དབང་པོ་དང་། བདེ་འབྱུང་ལ་སོགས་པ་སོ་སོའི་གནས་རིས་ཀྱི་གཙོ་བོས་འཁོར་རྣམས་ཀྱི་རྒྱུད་ལ་སྡིག་པ་སྤོང་བའི་ཆོས་སེམས་ཅན་སོ་སོའི་སྐད་དུ་མཐུན་པར་སྟོན་པ་འམ། སྡུག་བསྔལ་སེལ་
བར་བྱེད་ལ། དེ་བཞིན་དུ་མིའི་འཇིག་རྟེན་དུ་ཉན་རང་དང་། བྱང་ཆུབ་སེམས་དཔའ་ལ་སོགས་ཆོས་ཀྱི་གང་ཟག་གམ། འཁོར་ལོས་སྒྱུར་བ་དང་། ཁམས་ཀྱི་རྒྱལ་ཕྲན་དང་། བྲམ་ཟེ་དང་། རྔོན་པ་དང་། སྨད་འཚོང་མ་ལ་སོགས་ཆགས་སྡང་ཅན་ཀྱི་རྣམ་པས་འདུལ་བའི་ཚུལ་ཡང་། དཔུང་བཟང་ལས། གང་གི་རང་བཞིན་ཆགས་སྡང་རྣམ་བྲལ་ཡང་། །ཆགས་པ་ཅན་ལ་ཆགས་བཅས་ལྟར་སྟོན་ཞིང་། །གདུག་པ་འདུལ་ཕྱིར་ཁྲོལ་ཁྲོར་སྟོན་པ། །ཐབས་ཀྱིས་རྣམ་འདྲེན་དེ་ལ་ཕྱག་འཚལ་ལོ། །ཞེས་པ་ལྟར་རོ། །དེ་བཞིན་དུ་ལྷ་མ་ཡིན་ལ་ཐགས་བཟང་རིས་དང་། བྱ་ལ་ཤིང་རྟ་མོ་དང་། རྨ་བྱའི་རྒྱལ་པོ་གསེར་དུ་སྣང་བ་དང་། སྲེག་པ་ལ་སོགས་པ་དང་། རི་དྭགས་ཀྱི་ཕྱིར་སེང་གེའི་རྒྱལ་པོ་ཡི་དམ་བརྟན་པ་དང་། ཤར་བྷ་དང་། ཀུནྡ་དང་། དམྱལ་བ་ལ་གྱང་འབག་ཤིང་ཏོ་དང་། ཡི་དྭགས་ལ་སོགས་པ་མདོར་ན་སྐྱེས་པ་རབས་ཀྱི་རྒྱུད་དུ་གསལ་བ་དཔེར་མཚོན་ཏེ། འདུལ་བྱེད་དང་མཐུན་པའི་རིགས་དྲུག་སོ་སོའི་གཟུགས་མཐའ་མི་འཚལ་ཞིང་གནས་རིགས་དང་བདེ་སྡུག་སྣ་ཚོགས་ལྟར་སྣང་བའི་ཚུལ་གསེར་འོད་དམ་པ་ལས། སངས་རྒྱས་བཅོམ་ལྡན་བསམ་མི་ཁྱབ། །དེ་བཞིན་གཤེགས་པ་རྟག་པའི་སྐུ། །སེམས་ཅན་རྣམས་ལ་ཕན་པའི་ཕྱིར། །བཀོད་པ་རྣམ་པ་སྣ་ཚོགས་སྟོན། །ཞེས་སོ། །དེ་བཞིན་དུ་ཐེག་པ་ཆེ་ཆུང་གི་ཆོས་ཀྱི་རྣམ་གྲངས་དང་ཐ་སྙད་ལའང་མ་ངེས་ཏེ། གང་ན་སྡིག་པ་སྤོང་ཞིང་གནས་སྐབས་དང་མཐར་ཐུག་སེམས་ཅན་ལ་ཕན་པའི་ཕྱོགས་སུ་ཉེན་ཟ་མ་ཏོག་བཀོད་པར་བདུད་སྡིག་ཅན་རིན་པོ་ཆེའི་ཁྲི་ལ་འདུག་པས་ཆོས་བསྟན་པ་དེ་ཉིད་ཀྱང་སངས་རྒྱས་པའི་མདོ་སྡེར་བཞག་པ་ལྟར་གནས་གང་དུ་སྟོན་འཁོར་གྱི་རྟེན་ཅིང་འབྲེལ་འབྱུང་ཚོགས་པའི་དུས་ན་སེམས་ཅན་རང་རང་གི་སྐལ་བ་དང་འཚམ་པར་ཐོས་
པའི་ཆོས་ཀྱང་མ་ངེས་པ་སྟེ། ཅིའི་ཕྱིར་ན། དེ་བཞིན་གཤེགས་པའི་བསྟན་པ་ནི་བདག་རྐྱེན་གྱི་སྒོ་ནས་རྣམ་པར་གཞག་པའི་ཚེ་ཞལ་ནས་གསུངས་པ་དང་། བྱིན་གྱིས་བརླབས་པ་དང་། རྗེས་སུ་གནང་བའི་བཀའ་གསུམ་དུ་ངེས་པའི་ཕྱིར་རོ། །དེ་ཡང་ཆོས་སྐུའི་གནས་དོན་དམ་པའི་འོག་མིན་དུ་སྟོན་པ་ཀུན་ཏུ་བཟང་པོས་ཡེ་ཤེས་རྒྱ་མཚོའི་འཁོར་ལོ་རང་གི་ངོ་བོས་གསུངས་པ་དང་། བཅོམ་ལྡན་འདས་རྡོ་རྗེ་འཆང་ཆེན་པོ་ལ་སོགས་པས་ལྷུན་སྟུག་པོ་བཀོད་པའི་འོག་མིན་ལོངས་སྤྱོད་རྫོགས་པའི་ཞིང་ལྔ་དང་། གསང་བའི་འོག་མིན་རྡོ་རྗེ་བཙུན་མོའི་བྷ་ག་ལ་སོགས་པར་རང་སྣང་རིག་པའི་འཁོར་ལ་སྒྲ་ཚིག་བརྗོད་བྲལ་དུ་གསུངས་པ་དང་། སྤྲུལ་པ་སྐུའི་གནས་ཐ་དད་པར་བཅོམ་ལྡན་འདས་ཤཱཀྱ་ཐུབ་པས་འཁོར་རྣམ་པ་བཞི་ལ་ཚིག་སྡེ་བ་སྦྱོར་ལེགས་པས་གསུངས་པ་རྣམས་སོ། །གཉིས་པ་ནི། སྐུས་བྱིན་གྱིས་བརླབས་པའི་བཀའ་བྱང་ཆུབ་སེམས་དཔའ་རྡོ་རྗེ་སྙིང་པོའི་སྤྱི་བོར་ཕྱག་གིས་རེག་པའི་མོད་ལ་མདོ་སྡེ་ས་ཅུ་པ་འཆད་པའི་སྤོབས་པ་སྐྱེས་ཤིང་། རྣམ་པར་གྲོལ་བའི་ཟླ་བས་དྲིས་པ་ལྟ་བུའོ། །གསུང་གིས་བྱིན་གྱིས་བརླབས་པའི་བཀའ་ནི་འཇམ་དཔལ་ལ་མ་སྐྱེས་དགྲའི་འགྱོད་པ་སོལ་ཅིག་ཅེས་བཀའ་བ་སྩལ་པས། དེའི་མདོ་བྱུང་བ་ལྟ་བུའོ། །ཐུགས་ཀྱིས་བྱིན་གྱིས་བརླབས་པ་ནི་བཅོམ་ལྡན་འདས་ཟབ་མོ་སྣང་བའི་ཏིང་ངེ་འཛིན་ལ་བཞུགས་ནས། ཤཱ་རིའི་བུ་དང་སྤྱན་རས་གཟིགས་ལ་བྱིན་གྱིས་བརླབས་པས། དེ་གཉིས་གཅིག་ཤོས་ཀྱིས་འདྲི་བ་དང་། གཅིག་ཤོས་ཀྱིས་ལན་ལྡོན་པའི་སྤོབས་པ་ཐེབ་ནས་ཤེས་རབ་སྙིང་པོ་བྱུང་བ་ལྟ་བུའོ། །ཡོན་ཏན་དང་ཕྲིན་ལས་ལྷུན་གྱིས་གྲུབ་པའི་བྱིན་རླབས་ལས་རང་བྱུང་བ་ནི་བཤད་སྦྱར་ལས། སྟོན་པ་འདི་ཡི་བྱིན་རླབས་ཀྱིས། །བྱའམ་ཤིང་བུ་རྡེའུ་དང་། །པདྨོ་དག་དང་དཔག་བསམ་ཤིང་། །རྔ་བོ་ཆེ་ལས་བྱུང་བ་ཡང་། །རྒྱལ་བས་བྱིན་གྱིས་
བརླབས་པའི་ཕྱིར། དེ་དག་བཀའ་ཞེས་བྱ་བར་འདོད། ཅེས་པ་དང་མཚུངས་པར་ཨ་ར་ལི་ལས་ཀྱང་བཤད་དོ། །མདོར་བསྡུ་ན་བཀའི་དངོས་པོར་འགྲུབ་པ་གང་དག་ཆོས་སྨྲ་བ་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ལ་སོགས་པ་ཅི་འདྲའི་གཟུགས་ཀྱིས་བྱུང་ཡང་དེ་དག་དེ་བཞིན་གཤེགས་པའི་ཕྲིན་ལས་ཆེན་པོའི་མཐུས་སྟོན་པ་ཉིད་ལས་རང་སྟོབས་ཀྱི་མ་ཡིན་པས་བཀར་བཞག་པའི་ཚུལ། སྡུད་པ་ལས། རྒྱལ་བའི་ཉན་ཐོས་གང་དག་ཇི་སྙེད་ཆོས་སྟོན་དང་། འཆད་དང་རིགས་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པ་སྐྱེས་བུའི་མཐུ། །ཅི་ཕྱིར་ཞེ་ན་རྒྱལ་བས་ཆོས་ཚུལ་གང་བསྟན་པ། །དེ་ལ་མི་མཆོག་སློབ་མར་གྱུར་པས་མངོན་བསླབས་ཤིང་། །མངོན་སུམ་བྱས་ནས་བསླབ་པ་ཇི་བཞིན་སྟོན་བྱེད་པ། །སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། །ཞེས་གསུངས་པའི་ཕྱིར་རོ། །འོ་ན་ཚིག་དོན་གཉིས་ཀའི་ཆ་ནས་ནོར་བ་དང་། འབྲས་བུ་ལ་བསླུ་བ་རྣམས་ཀྱང་བཀར་བཞག་དུ་རུང་ངམ་ཞེ་ན། དེ་ནི་མ་ཡིན་ཏེ། འཆད་དང་རིགས་པ་དག་དང་ལྡན་པར་བརྗོད་པ་དང་། མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །ཞེས་པས་བཀའི་དངོས་པོར་མི་འགྲུབ་པའི་མི་མཐུན་ཕྱོགས་ཞར་ལ་བསྟན་པ་ཡིན་ནོ། །གསུམ་པ་ནི། སྟོན་པ་མྱ་ངན་ལས་འདའ་ཁར། ང་ཡོངས་སུ་མྱ་ངན་ལས་འདས་ནས་འདུལ་བ་ལ་སྣང་། མདོ་སྡེ་ལ་འཇུག །ཆོས་ཉིད་དང་མི་འགལ་ན་བཀའ་ཡིན་པར་བཟུང་། །ཞེས་པས་རྗེས་སུ་གནང་བའི་བཀའི་སྡོམ་བསྟན་པ་ཡིན་ནོ། །དེ་བཞིན་དུ་ཀུན་བྱེད་ལས། སྤྲུལ་པའི་སྐུ་ཡིས་འདུལ་པའི་ཞིང་
ཁམས་ནི། །སྟོང་གསུམ་འཇིག་རྟེན་བྱེ་བ་ཕྲག་བརྒྱ་སོགས། །རང་བྱུང་ཡེ་ཤེས་ཐུགས་རྗེས་རྒྱུད་དྲུག་འདུལ། །ཞེས་པ་ལྟར་སྤྲུལ་སྐུའི་གདུལ་ཞིང་མ་དག་པའི་འཇིག་རྟེན་སྟོང་གསུམ་བྱེ་བ་ཕྲག་བརྒྱ་གྲངས་མེད་པ་སྙེད་དུ་ གདུལ་བར་བྱ་བའི་ཁམས་དང་། དེས་འདུལ་བའི་ཐབས་དང་དེ་དག་སོ་སོའི་གཉེན་པོ་དང་། གདུལ་ཚུལ་ལ་བསྙེལ་བ་མི་མངའ་བས་ངན་སོང་ནི་མཐོ་རིས་སུ་འདྲེན། མཐོ་རིས་པ་ནི་ཐར་པ་དང་རྣམ་མཁྱེན་ལ་བཀྲི་བའི་ཚུལ་གྱིས་དོན་མཛད་ལ། དེ་དག་གི་ཚུལ་ཡང་རྒྱུད་བླ་མར་བརྒྱ་བྱིན་གྱི་རྔ་སྒྲ་ལ་སོགས་པའི་དཔེ་དགུས་སྟོན་པའི་ཚུལ་མེད་ལམ་དུ་དྲངས་ཟིན་པ་ལྟར་གྱིས་གཞན་དོན་མཛད་པ་སྟེ། དེ་ལྟར་མཛད་ཀྱང་མཛད་ཡུལ་སེམས་ཅན་དང་མཛད་པོ་སངས་རྒྱས་ཉིད་ཀྱང་དོན་ལ་རང་བཞིན་མ་གྲུབ་པ་རྨི་ལམ་ལྟ་བུ་ཡིན་པའི་ཚུལ། གང་ཞིག་རྨི་ལམ་ནང་དུ་སངས་རྒྱས་མཐོང་། །རྨི་ལམ་ལྟ་བུར་སྤྲུལ་པའི་ཆོས་བསྟན་ཡང་། །ངོ་བོ་ཉིད་མེད་རང་བཞིན་མ་གྲུབ་ལ། །བདག་མེད་སྟོང་པ་གསོག་ཏུ་རིག་བྱ་ཞེས། །ཟབ་མོའི་མདོ་སྡེ་དག་ལས་གསུངས་པས་ན། །འཁོར་འདས་རྨི་ལམ་ལྟ་བུའི་རོལ་པ་ལ། །སྣང་བའི་སངས་རྒྱས་ངོ་བོ་དག་ནའང་། །རྣམ་པ་གདུལ་བྱ་ཉིད་ལྟར་སྣང་བའི་ཕྱིར། །མ་དག་ཐུགས་རྗེ་རོལ་པའི་སྤྲུལ་པ་ཡང་། །ཇི་སྲིད་འཁོར་བའི་རྗེས་འགྲོ་རྒྱུན་མི་འཆད། །དེའང་གདུལ་བྱ་ལ་ལྟོས་ན་བདེ་གཤེགས་སྙིང་པོའི་རང་བཞིན་གློ་བུར་གྱི་དྲི་མས་ཕྱོགས་བསླད་དེ་ཡུལ་དང་། དོན་དང་། སེམས་སུ་བག་ཆགས་ནས་གཟུང་འཛིན་གྱི་སྣང་བས་བཀོད་པའི་འཁོར་བའི་གནས་རིགས་བདེ་སྡུག་སྣ་ཚོགས་སུ་ཤར་བ་དེ་ཡང་མེད་སྣང་འཁྲུལ་པའི་རང་གཟུགས་རྨི་ལམ་ལྟ་བུའི་རོལ་པ་ལས་བདེན་པར་གྲུབ་པ་རྡུལ་ཙམ་མ་མཆིས་པའི་ཚུལ་དྲན་པར་ཉེར་གཞག་ལས། སྣ་ཚོགས་ལུས་དང་ལོངས་སྤྱོད་དང་། །བདེ་སྡུག་ཉིད་དུ་སྣང་བ་དེ། །
སེམས་ཀྱིས་སྤྲུལ་ཞིང་སེམས་ཀྱིས་བྱས། །སེམས་ལས་གཞན་དུ་ཅུང་ཟད་མེད། །དཔེར་ན་རྨི་ལམ་ཇི་བཞིན་ནོ། །ཞེས་སོ། །དེ་བཞིན་དུ་འདུལ་བྱེད་ལ་ལྟོས་ཀྱང་དྲི་མ་མཐའ་དག་དང་བྲལ་བས་རང་གི་རང་བཞིན་ཤེས་པའི་སངས་རྒྱས་རྣམས་ཀྱི་བྱིན་རླབ་དང་སེམས་ཅན་སོ་སོའི་སྨོན་ལམ་དང་། དགེ་བའི་ལས་སྣང་གི་ནང་གསལ་དབྱིངས་ཀྱི་སྐུ་གསུམ་པོའི་ཐུགས་རྗེ་གཞན་སྣང་ལ་ཕྱིར་གསལ་དུ་ཤར་བ་ཡེ་ཤེས་ཕྲིན་ལས་དག་པའི་གཟུགས་སྐུ་གཉིས་དང་ཁྱད་པར་སོ་སོ་སྐྱེ་བོ་ལའང་སྒྲིབ་མེད་དུ་གསལ་བའི་མཆོག་གི་སྤྲུལ་པའི་སྐུ་རྒྱལ་བ་ཤཱཀྱ་སེང་གེ་ལ་སོགས་པས་མངོན་གྱུར་དུ་སེམས་ཅན་རྣམས་ཀྱི་དོན་མཛད་པ་དེ་ཡང་རང་བཞིན་གྱིས་མ་གྲུབ་པ་རྨི་ལམ་གྱི་དུས་ན་སངས་རྒྱས་མཐོང་བ་ལྟ་བུ་སྟེ། འཕགས་པ་དཀོན་མཆོག་བརྩེགས་པ་ལས། ངས་ནི་རྨི་ལམ་ལྟ་བུའི་འགྲོ་བ་ལ། །རྨི་ལམ་ལྟ་བུར་སྤྲུལ་ནས་ཆོས་བསྟན་པར། །ངོ་བོ་མེད་དེ་རང་བཞིན་གཉིས་སུ་མེད། །བདག་མེད་སྟོང་པ་གསོག་ཏུ་རིགས་པར་བྱ། །ཞེས་སོ། །དེ་བས་ན་འཁོར་བའི་རང་བཞིན་འཁྲུལ་སྣང་གི་བཀོད་པས་སྣོད་བཅུད་ཀྱི་སྣང་བརྫུན་པའི་རང་བཞིན་ཅན་ན། དེ་ཉིད་འདུལ་བྱེད་ཀྱི་སྤྲུལ་པའི་སངས་རྒྱས་ཀྱང་ངོ་བོ་དག་པ་གཉིས་ལྡན་གྱི་ཆོས་སྐུ་ལས་མི་གཡོ་ཡང་། རྣམ་པའི་གཟུགས་བརྙན་སེམས་ཅན་གྱི་འཁྲུལ་ངོ་ཙམ་དུ་སྡུག་བསྔལ་བདེན་པས་བསྡུས་པ་ལྟར་སྟོན་པས་གཉིས་ཀའང་མེད་བཞིན་སྣང་བ་རྨི་ལམ་དང་སྒྱུ་མའི་རྟ་གླང་ལྟ་བུ་སྟེ། ཡུམ་བར་མ་ལས། རབ་འབྱོར་ཆོས་ཐམས་ཅད་རྨི་ལམ་ལྟ་བུ། སྐྱུ་མ་ལྟ་བུ། མྱ་ངན་ལས་འདས་པ་ཡང་རྨི་ལམ་ལྟ་བུ་སྒྱུ་མ་ལྟ་བུ། །ཞེས་སོ། །དེ་ལྟར་གདུལ་བྱ་འདུལ་བྱེད་གཉིས་ཀྱང་དབྱིངས་གཅིག་ལས་མ་གཡོས་བཞིན་དུ་དྲི་མ་དང་ལྡན་གྲོལ་གྱི་ཁྱད་པར་ལས་འཁོར་འདས་སོ་སོའི་རྣམ་འགྱུར་དུ་ཤར་
བའི་གནས་ལུགས་གཤེས་ཐོག་ཏུ་ཕེབས་པ་ལ་དེ་ཁོ་ན་ཉིད་མཐོང་བའི་སྐྱེས་བུ་ཞེས་བྱ་སྟེ། །འཕགས་པ་ཆོས་ཐམས་ཅད་འགྱུར་བ་མེད་པའི་མདོ་ལས། སངས་རྒྱས་མེད་ཅིང་ཆོས་དང་དགེ་འདུན་མེད། །དེ་ལྟར་སུས་ཤེས་དེ་ནི་མཁས་པ་ཡིན། །སེམས་ཅན་རང་བཞིན་བྱང་ཆུབ་ཉིད་དུ་གསུངས། །བྱང་ཆུབ་རང་བཞིན་སེམས་ཅན་ཐམས་ཅད་དེ། །སེམས་ཅན་རྣམས་དང་བྱང་ཆུབ་གཉིས་མ་ཡིན། །དེ་ལྟར་སུས་ཤེས་སྐྱེས་བུ་མཆོག་ཏུ་འགྱུར། །ཞེས་སོ། །སྣ་ཚོགས་སྒྲུབ་པ་ནི། དེ་ཉིད་དང་ལས་སྣ་ཚོགས་སྤྲུལ་པ་ནི། རང་བཞིན་བྱོན་དང་འདུ་བྱེད་ལས་བྱུང་བ། །འབུར་དུ་བྱས་དང་རིས་སུ་བྲིས་པ་དང་། གནྡྷོ་ལ་དང་ཁང་བཟང་སྐྱེད་མོས་ཚལ། །མྱ་ངམ་ཐང་ལ་སྤྲུལ་པའི་གྲོང་ཁྱེར་དང་། པདྨ་དཔག་བསམ་ཤིང་དང་ཡིད་བཞིན་ནོར། །གྲུ་གཟིངས་ཟམ་པ་ཤིང་རྟ་ཟས་གོས་སོགས། །སེམས་མེད་བེམ་པོའི་ཚུལ་དུ་སྣང་བ་དང་། སྐྱེ་བ་མུ་གེའི་ཆེ་ན་ཉ་བོ་ཆེ། །ནད་ཀྱི་གདུངས་ལ་སྲོག་ཆགས་དེས་པ་དང་། །སྲིན་མོའི་གླིང་དུ་ཅང་ཤེས་པ་ལ་ཧ། །མི་གཙང་འདམ་དུ་གསེར་གྱི་བུང་བ་སོགས། །སྤྲུལ་པ་སྣ་ཚོགས་རྣམ་ཀུན་བདེ་བའི་གཞིར། །རྟོག་པ་མེད་ཅིང་ གཡོ་བ་མེད་པ་ལྟས། །དོན་ཆེན་གྱིས་ནི་དཔལ་དུ་ཉེ་བར་གནས། །དེ་སྐད་དུ་མདོ་སྡེའི་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་ནོ། །ཞེས་འཇིག་རྟེན་གྱི་ཁམས་བསམ་གྱིས་མི་ཁྱབ་པའི་འཁྲུལ་སྣང་དང་མཚུངས་པར་སངས་རྒྱས་ཀྱི་རྣམ་པར་འཕྲུལ་པའང་དེ་སྙེད་དུ་འཆར་བས་དོན་མཛད་པའི་བྱེ་བྲག་ཡིད་ཀྱིས་བྱེད་པ་པོ་དང་། ཆོས་སུ་བྱར་མེད་བཞིན་པུ་རང་བཞིན་གྱིས་རི་དག་དང་ཡུལ་ལྗོང་ལ་སོགས་པར་སྐུ་གསུང་ཐུགས་ཀྱི་རྟེན་རང་བྱོན་
དུ་སྣང་བ་དང་། ཡུལ་ཉེར་བཞི་ལ་སོགས་པའི་བཀོད་པ། སྐྱེས་བུའི་རྩོལ་བ་དང་འདུ་བྱེད་ལས་བཟོག་ནས་སྤྲུལ་པ་རང་ཤར་བ་འབུར་དུ་དོད་པ་དང་། རིས་སུ་བྲིས་པ་དང་ཐགས་སུ་བཏགས་བ་ལ་སོགས་དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་མངོན་གྱུར་བ་སྟེ། སྤྱི་མདོ་དགོངས་བདུས་ལས། ལངྐའི་བདག་པོ་གཟུགས་བརྙན་གྱི་སྤྲུལ་པ་ནི་ཐ་དད་དོ། །ཞེས་སོ། །དེ་བཞིན་དུ་རིགས་ལྔའི་རང་བཞིན་ཕྱག་རྒྱ་དང་རྣམ་བཅས་ཀྱིས་བསྡུས་བསྐྱེད་མོས་ཚལ་དང་། ཁང་བཟང་དང་། པདྨ་དང་། དཔག་བསམ་གྱི་ཤིང་དང་། ནོར་བུའི་བྱེ་བྲག་དང་། གྲུ་གཟིངས་དང་། ཟམ་པ་དང་། ཤིང་རྟ་དང་། ཟས་གོས་དང་། ཆུ་ཀླུང་དང་། བྲག་རིའི་ཕུག་ལ་སོགས་པ་སེམས་མེད་བེམ་པོའི་ཚུལ་དུ་སྣང་ནས་དོན་མཛད་པའི་ཚུལ་ཡང་འདི་ལྟར་གཙུག་ལག་ལང་ངམ། །སྐུ་གསུང་ཐུགས་ཀྱི་རྣམ་པ་གང་ཞིག་མཐོང་བ་ཙམ་གྱིས་དད་པའི་རྣམ་འགྱུར་དང་གདུང་ཤུགས་གཡོ་བས་དེའི་རྒྱུད་ཀྱི་སྒྲིབ་པ་འཛད་ཅིང་། བསོད་ནམས་སུ་བྱ་བ་འཕེལ་ནས་ཐར་བའི་ས་བོན་བསྐྲུན་པའི་ཚུལ་ཕལ་པོ་ཆེ་ལས། ལན་གཅིག་ཙམ་ཡང་དང་པ་སྐྱེས་པ་ནི། བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་པས་མཚོན་ནོ། །དེ་བཞིན་དུ་ནོར་བུ་དང་དཔག་བསམ་གྱི་ཤིང་ལས་དགོས་འདོད་འབྱུང་བ་དང་། གྲུ་གཟིངས་དང་ཟམ་པ་ལ་སོགས་ཀྱིས་འདོད་པའི་གནས་སུ་བདེ་བར་ཕྱིན་པ་དང་། ཟས་གོས་དང་ཆུ་ཀླུང་ལ་སོགས་པས་ཚིམ་པ་ཐོབ་དང་། ནགས་ཚལ་དང་བྲག་རིའི་ཁང་བཟང་ལ་སོགས་པས་གདུང་བ་དང་འཇིགས་པ་ལས་སྐྱོབ་པ་སྟེ། ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། སྐྱེད་མོས་ཚལ་དང་། ནོར་བུ་དང་། སྨན་དང་། རིགས་སྔགས་དང་། ཉེ་བར་མཁོ་དགུའི་ཡོ་བྱད་དུ་སྣང་བས་གདུལ་བར་བྱ་བ་ཡིན་ན་དང་དེའི་
གཟུགས་དང་ཁ་དོག་ཏུ་སྣང་ངོ་། །ཞེས་སོ། །སྐྱེ་བ་སྤྲུལ་པ་ནི་འགྲོ་བ་ཕལ་པའི་ལུས་སུ་སྤྲུལ་ནས་དངོས་སམ་རྒྱུད་ནས་ཕན་འདོགས་བ་སྟེ། འདི་ལྟར་ཉ་པོ་ཆེ་དང་། བླང་པོ་དང་། སྲོག་ཆགས་དེས་པར་སྐྱེས་པའི་རབས་དང་། དེ་བཞིན་དུ་འཕགས་པའི་བྱིན་རླབས་དང་རྫུ་འཕྲུལ་སྲིན་མོས་གླིང་དུ་ཅང་ཤེས་བ་ལ་ཧ་དང་། མི་གཙང་བའི་འདམ་དུ་གསེར་གྱི་བྷ་མར་ལ་སོགས་པ་བཞིན་ཏེ་དེ་སྐད་དུ། སྒྱུ་འཕྲུལ་བླ་མ་ལས། སྣ་ཚོགས་སྤྲུལ་པ་རྒྱུན་མི་འཆང་། །རྔོན་དང་སྨད་འཚོང་ལ་སོགས་པར། །བསྒྱུར་ནས་སེམས་ཅན་དོན་མཛད་དོ། །ཅེས་སོ། །བྱང་ཆུབ་མཆོག་གི་སྤྲུལ་པ་ནི་སྔར་བཤད་ཟིན་ལ། དེ་ཡང་ཐུན་མོང་མ་ཡིན་པ་རང་བཞིན་རྫོགས་པ་ཆེན་པོའི་ལུགས་ཀྱི་རྣམ་པར་འཕྲུལ་པ་གདུལ་བྱའི་དབང་དུ་བྱས་ན། མི་མཛད་འདིར་སྤྲུལ་པ་སྐུའི་ཆོས་སྐུ་དཔལ་རྡོ་རྗེ་འཆང་ཆེན་པོ་སྐྱེ་བ་བཞིའི་ལུས་སུ་རྣམ་པར་འཕྲུལ་ཏེ་མཛད་པ་སུམ་ཅུ་རྩ་དྲུག་མཐར་ཕྱིན་ནས་སྟོང་གསུམ་གྱི་སྟོང་བྱེ་བ་ཕྲག་བརྒྱའི་ཞིང་ལ་སོགས་པ་ཚངས་ཆེན་གྱི་བསྐལ་པ་གཅིག་གིས་བསྡུས་པ་ལ་མངའ་མཛད་ཅིང་། དེའང་གནས་མེ་ཏོག་པདྨ་སྟོང་དང་ལྡན་པ། འཁོར་སྐྱེ་བ་བཞིར་བསྡུས་པའི་འགྲོ་བ། བསྟན་པ་སྡེ་སྣོད་ཀུན་གྱི་རྩ་བ་སྒྲ་ཐལ་འགྱུར། །དུས་ཚེ་ལོ་དཔག་ཏུ་མེད་པའི་དུས་ན་ཆོས་ཀྱི་འཁོར་ལོ་བསྐོར་བ་ལ་སོགས་པའི་མཛད་པའི་ཆོ་འཕྲུལ་ཚད་མེད་དེ། ལ་སང་རྒྱ་བ་ལས། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་པ་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུ་མ་ལས་ཡལ་མི་མངའ། །ཞེས་སོ། །དེ་ལྟར་སྤྲུལ་པའི་རོལ་པ་དེ་དག་གིས་ཀྱང་གནས་སྐབས་སུ་སེམས་ཅན་རྣམས་ཀྱི་ལུས་ངག་ཡིད་གསུམ་ལ་ཕན་པ་རྒྱ་ཆེན་པོ་བསྒྲུབ་ཅིང་མཐུན་པ་དང་ལྡན་པའི་བདེ་བ་ཆེན་པོ་སྟེར་བ་དང་། གྱུད་ནས་བྱང་ཆུབ་གསུམ་གྱི་གོ་འཕང་ལ་འགོད་པའི་དོན་ཆེན་གྱི་དཔལ་དུ་ཉེ་བར་གནས་ཀྱང་། སྤྲུལ་
གཞིའི་ངོ་བོ་ཉིད་ནི་རྣམ་པར་རྟོག་པ་དང་བྲལ་བ་ཡིན་པས་རང་བཞིན་ལྷུན་གྱིས་གྲུབ་པའི་ཕྲིན་ལས་ཆེན་པོ་སྟེ་རྒྱུད་བླ་མ་ལས། སྣང་བདེ་ནི་ཤིན་ཏུ་ཡང་། །རྟོག་པ་མེད་ཅིང་གཡོ་བ་མེད། །དེ་ལྟ་མོད་ཀྱིས་སྟེང་ན། །དོན་ཆེན་གྱིས་ནི་ཉེ་བར་གནས། །ཞེས་སོ། །དེ་ལྟ་བུའི་སངས་རྒྱས་རྣམས་ཀྱི་མཛད་པ་ཕྲིན་ལས་དང་པོར་ཡང་དབྱིངས་ལས་བྱུང་ཞིང་མཐར་ཡང་དབྱིངས་སུ་སྤྲོས་པ་ཉེ་བར་ཞི་བའི་ཚུལ། གལ་ཏེ་གདུལ་བར་བྱ་བའི་དུས་ཡོལ་ན། །འདུལ་བྱེད་དབྱིངས་སུ་ནུབ་པའི་མཚོན་དཔེ་ནི། །ཇི་ལྟར་ཆུ་སྣོད་མེད་ཚེ་ཆུ་ཟླའི་གཟུགས། །སྤྲུལ་གཞིའི་ཟླ་བ་ཉིད་ལ་ཐིམ་པ་ལྟར། །གདུལ་བའི་སྣང་བས་བསྡུས་པའི་སྤྲུལ་པ་རྣམས། །རང་སྣང་ལོངས་སྤྱོད་རྫོགས་པའི་དབྱིངས་སུ་ཐིམ། །དེའང་གནམ་སྟོང་ཟླ་བ་གཅིག་ཤོས་ནས། །གཅིག་ཏུ་ཐིམ་པ་མེད་ཀྱང་ཕྱིར་གསལ་གདངས། །ནང་དབྱིངས་སྤྲོས་པ་མེད་པའི་ངང་ཐེམ་ལྟར། །ལོངས་སྤྱོད་རྫོགས་པའི་རང་སྣང་ཆོས་ཀྱི་སྐུའི། །ཡེ་ཤེས་ཆེན་པོར་འཁྱིལ་བ་དེ་ཉིད་ལ། །དབུ་མ་པ་རྣམས་འཇུག་པ་ཆོས་དབྱིངས་སུ། །ཞི་བའི་འགོག་པ་དམ་པ་ཞེས་འདོད་ལ། །འདིར་ནི་སོ་སོ་རང་རིག་ཡེ་ཤེས་ཉིད། །ཕྲ་བའི་ཡེ་ཤེས་ནང་གསལ་ཆོས་ཀྱི་དབྱིངས། །ཐིམ་ལམ་རྨུགས་གཞོན་ནུ་བུམ་པའི་སྐུ། །གང་དུ་གདུལ་བྱ་སྣང་བའི་མོད་ཉིད་ལ། །འགག་མེད་ཐུགས་རྗེའི་ཡེ་ཤེས་མཆོད་པའི་གཞི། །ཤིན་ཏུ་མཉམ་པར་གཞག་པའི་ཆོས་ཉིད་ནི། །འབྲས་བུ་ལྷུན་གྲུབ་ཆེན་པོའི་གོ་འཕང་ཡིན། །དེ་ལ་ཆུ་སྣོད་ལྟ་བུའི་གདུལ་བྱ་མེད་ན་སྤྲུལ་པའི་གཟུགས་བརྙན་ཆུ་ཟླ་ལྟ་བུ་ཡང་སྤྲུལ་གཞིའི་ཟླ་བ་ལ་རང་ཐིམ་པ་ལྟར། གདུལ་བྱའི་རང་སྣང་གིས་བསྡུས་པའི་སྤྲུལ་པ་རྣམས་ཀྱང་སངས་རྒྱས་ཀྱི་ཡེ་ཤེས་ཀྱི་རང་སྣང་དབྱིངས་ཀྱི་ལོངས་སྐུ་ལ་ཐིམ་པ་ལྟར་གནས་པས་ཐུགས་རྗེ་ཕྱིར་གསལ་
གྱི་སྤྲུལ་པ་ཡང་པ་ལྟར་མི་མངོན་ནོ། །དེའང་ཚེས་ཀྱི་སྔ་རོལ་པའི་ཟླ་བ་གཅིག་ནས་གཅིག་ཤོས་སུ་ཐིམ་པའམ་གཏན་མེད་དུ་སོང་བ་མེད་ཀྱང་གསལ་ཆ་དབྱིངས་སུ་ཐིམ་པ་ལྟར། ཆོས་སྐུའི་གདངས་ལོངས་སྤྱོད་རྫོགས་པར་ཤར་པའི་ཕྱིར་གསལ་གྱི་ཆེད་ཡང་ནང་དབྱིངས་སྤྲོས་པ་མེད་པའི་ཀློང་དུ་ཉེ་བར་ཞི་བ་ལ་ཆེས་སྐུའི་ཡེ་ཤེས་ཀློང་དུ་འཁྱིལ་བ་ཞེས་བྱ་སྟེ། །སྒྲོན་མ་སྣང་བྱེད་ལས། ཆོས་སྐུའི་ཡེ་ཤེས་གཞི་གནས་ཏེ། ཤེས་པའི་ཆ་ནི་གསལ་བྱེད་ལ། །འཛིན་པ་རགས་པའི་རྟོག་པ་མེད། །དད་དམ་ཤུགས་ཀྱི་ཐུགས་རྗེའོ། །གསལ་ཞིང་ཤེས་པ་རིག་དང་བཅས། །ཆ་ལ་འདྲེས་པ་མེད་པར་གནས། །ཞེས་སོ། །འདིའི་ཆོ་དབུ་མ་པ་རྣམས་ཤེས་བྱའི་འཇུག་པ་ཆོས་ཀྱི་དབྱིངས་སུ་ཞི་ནས་འགོག་པ་དམ་པའི་ངང་ལ་མཉམ་པར་གཞག་པར་འདོད་དེ་འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་ནས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགགས་པ་དེ་སྐུ་ཡིས་མངོན་དུ་མཛད། །ཅེས་སོ། །དེའི་མཚན་ཉིད་ཀྱང་རང་ལུགས་སུ་འགགས་གཞི་རྣམ་པར་ཤེས་པའི་ཚོགས་བརྒྱད་དང་། ཁམས་གསུམ་གྱིས་བསྡུས་པའི་སེམས་དང་སེམས་བྱུང་གི་བག་ཆགས་ཕྲ་རགས་པ་སྟེ། བདེན་གཉིས་ལས། སེམས་དང་སེམས་བྱུང་ཁམས་གསུམ་པའི། །སྒྲོ་བཏགས་རྣམ་པ་ཅན་རྟོག་ཡིན། །ཞེས་པ་དེ་འགགས་པ་ལས་སོ་སོ་རང་རིག་པའི་ཡེ་ཤེས་ནང་གསལ་ཐིམ་ལ་མ་རྨུགས་པའི་ཆ་གཏན་འགགས་པ་ནི་མ་ཡིན་ཏེ། དེ་ལྟར་འགགས་ན་མྱང་ངན་ལས་འདས་པའི་ཡོན་ཏན་སྟོབས་དང་མི་འཇིགས་པ་ལ་སགས་པ་ཤིན་ཏུ་རྒྱས་པའི་ཆ་དང་། ཡེ་ཤེས་ཀྱི་ཆོས་ཉིད་ཉི་མ་དང་འོད་ཟེར་ལྟར་གནས་པའི་འཆར་གཞི་འགག་པ་མེད་པའང་རྒྱུན་ཆད་པར་འགྱུར་བས་སོ། །དེ་བས་ན་རྟེན་དབྱིངས་ལ་བརྟེན་པ། ཡེ་ཤེས་
ཆོས་རང་བཞིན་ལྷུན་གྲུབ་ཀྱི་རིག་པ་དང་དབྱེར་མེད་ཡེ་ལྡན་དུ་ཡོད་ཀྱང་། བློའི་གང་དུ་རྣམ་པར་ཤེས་པའི་ཚོགས་བརྒྱད་དང་ཕུང་པོ་ལྔའི་ཉེར་ལེན་གྱི་སྒྲིབ་པས་བསྒྲིབས་ནས་ལྐོག་ཏུ་གྱུར་པའི་ཚུལ་ཡང་ཀུན་གསལ་ལས། གནམ་སྟོང་ནུབ་མོ་ཟླ་བ་ཡོངས་རྫོགས་ཀྱང་། །ཉི་མའི་སྟོབས་ཀྱིས་མངོན་དུ་མི་སྣང་བས། །ཆེས་གཅིག་གོང་ནས་བཅོ་ལྔར་རྫོགས་གྱུར་ཏེ། །དེ་ནས་ཟླ་བ་བསྐྱེད་དུ་མེད་པ་ལྟར། །རིན་ཆེན་བུབས་ལ་འདུ་འབྲལ་མེད་ཀྱིས་ཀྱང་། །འཁྲུལ་པའི་སྟོབས་ཀྱིས་མངོན་དུ་གསལ་མ་ནུས། །དང་པོའི་ས་ནས་བཅོ་ལྔར་ཡོངས་རྫོགས་ཏེ། །དེ་ལས་ཡར་གཤེགས་གུང་ལ་ཤུལ་མི་མངའ། །ཞེས་སོ། །དེ་བས་ན་ཟླ་བ་རང་སྟོབས་ཀྱིས་ཉ་གང་བ་ལྟར་སྤངས་རྟོགས་མཐར་ཕྱིན་པའི་དེ་བཞིན་གཤེགས་པ་རྣམས་ཀྱི་སྐུ་དང་ཡེ་ཤེས་ཀྱི་མཚན་ཉིད་སུ་ཤིག་གིས་མཐོང་ཞེ་ན་ཤིན་ཏུ་མཉམ་པར་གཞག་པ་སྟེ་མཉམ་པར་མ་གཞག་པ་མེད་པ་ནི་སངས་རྒྱས་ཁོ་ནའི་མ་འདྲེས་པའི་ཡོན་ཏན་ཡིན་པས་དེའི་ཆོས་ཉིད་ལ་འབྲས་བུ་ལྷུན་གྱིས་གྲུབ་པའི་ཡེ་ཤེས་ཀྱི་ཡོན་ཏན་རྫོགས་པའི་ཚུལ་སྐུ་གསུམ་ལ་འཇུག་པའི་མདོ་ལས། ཀུན་གཞི་དབྱིངས་ནུབ་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །ཀུན་གཞིའི་རྣམ་པར་ཤེས་པ་དབྱིངས་སུ་ནུབ་པ་ནི་མེ་ལོང་ལྟ་བུའི་ཡེ་ཤེས་སོ། །ཡིད་ཀྱི་རྣམ་ཤེས་དབྱིངས་སུ་ནུབ་པ་ནི་མཉམ་པ་ཉིད་ཀྱི་ཡེ་ཤེས་སོ། །ཉོན་མོངས་པ་ཅན་གྱི་ཡིད་དབྱིངས་སུ་ནུབ་པ་ནི་སོ་སོར་རྟོག་པའི་ཡེ་ཤེས་སོ། །སྒོ་ལྔའི་རྣམ་པར་ཤེས་པ་དབྱིངས་སུ་ནུབ་པ་ནི་བྱ་བ་གྲུབ་པའི་ཡེ་ཤེས་སོ། །ཞེས་སོ། །དེ་ལྟར་ལྔ་པོའང་ཆོས་དབྱིངས་དང་། མཉམ་པ་ཉིད་ནི་ཇི་ལྟ་བའི་མཁྱེན་པའི་ཡེ་ཤེས་སུ་འདུ་བས་མཁའ་མཉམ་སྤྲོས་པ་དང་བྲལ་བ་ཆོས་སྐུའི་ངོ་བོ་ཉིད་ཡིན་ལ། ལྷག་མ་གསུམ་པོ་ནི་ཇི་སྙེད་པ་མཁྱེན་པའི་ཡེ་ཤེས་སུ་འདུ་ཡང་། མཁྱེན་
ཆ་ནང་གསལ་གྱི་ཚེ་མེད་ཅེས་གཞག་ཀྱང་རང་བཞིན་དུ་ཆོས་ཉིད་ཞི་བའི་ངང་ན་རྣམ་པ་ཐམས་ཅད་མཁྱེན་པའི་འཆར་གཞིར་བཞུགས་ནས་སེམས་ཅན་གྱི་ཁམས་ལ་དམིགས་པ་མེད་པའི་ཐུགས་རྗེ་རྒྱུན་མི་འཆད་པ་ཡིན་ནོ། །དེའི་ཚུལ་ཡང་འདུས་པ་མདོར། །གསང་བའི་བདག་པོ་སངས་རྒྱས་དང་སེམས་ཅན་ཀུན་སྟོང་ན་གང་གི་ཐུགས་རྗེ་ཆེན་པོས་གང་ལ་ཇི་ལྟར་མཛད། ཐུགས་རྗེ་ཆེན་པོ་དེ་གང་གི་ཚིག་བླ་དྭགས་ལགས། སྨྲས་པ། ལངྐའི་བདག་པོ་ཆོས་ཐམས་ཅད་སྟོང་པ་ཉིད་ལ་རང་བཞིན་གྱིས་གནས་པ་ན་གཉིས་སུ་མ་མཐོང་བས་སྙིང་རྗེའི་ཡུལ་མེད་པ་ནི་ཐམས་ཅད་ཀྱི་བྱང་ཆུབ་ཏུ་ཡོ་བ་སྒྲལ་བའི་སྙིང་རྗེ་ཆེན་པོ་ཡིན་ལ། བྱིས་པའི་སྙིང་རྗེ་དག་གིས་སྟོང་གསུམ་གྱི་སྟོང་ཆེན་པོའི་སེམས་ཅན་གྱི་སྲོག་བཏོན་པ་དང་། གང་ཐར་བར་བཏོན་པ་དེ་ནི་སྙིང་རྗེ་ཆུང་ངུར་རིགས་པར་བྱའོ། །ཞེས་སོ། །དེ་ལྟ་བུའི་སངས་རྒྱས་ཀྱི་རང་བཞིན་ཡང་གློ་བུར་གྱི་དྲི་མ་དག་སྟོབས་ཀྱིས་རང་ངོ་ལ་ཡོད་པའི་ཡོན་ཏན་མངོན་དུ་གསལ་བ་ཉི་མ་ཤར་བ་ན་འོད་ཟེར་ལྷན་ཅིག་ཏུ་འབྱུང་བ་ལྟར་ས་ལམ་གྱི་རྟོགས་པ་ཐོབ་པ་དང་སྤངས་རྟོགས་ཀྱི་ཡོན་ཏན་བལྟར་མངོན་པ་ཉིད་ལས་གཞན་བྱུང་གི་འབྲས་བུར་མི་བསམ་པའི་ཚུལ་རྒྱུད་བླ་མའི་འགྲེལ་པ་ལས་ངེས་དོན་གྱི་མདོ་སྡེ་སངས་རྒྱས་ཕལ་པོ་ཆེའི་དགོངས་པ་སྟོང་གསུམ་དར་ཡུག་ཆེན་པོའི་དཔེས་འཆད་པའི་སྔོན་རོལ་ན། །འདི་སྐད་དུ། དེ་ལ་དྲི་མ་མེད་པའི་སངས་རྒྱས་ཀྱི་ཡོན་ཏན་ནི། གཅིག་ཏུ་ཀུན་ནས་ཉོན་མོངས་པ་སོ་སོ་སྐྱེ་བོའི་ས་ལ་ཡང་རྣམ་པར་དབྱེར་མེད་པའི་ཆོས་ཉིད་སླ་གྱི་ཁྱད་པར་མེད་པ་ཡོད་པའི་ཕྱིར་གནས་པ་འདི་བསམ་གྱིས་མི་ཁྱབ་སྟེ། གང་གི་ཕྱིར་གང་ལ་དེ་བཞིན་གཤེགས་པའི་ཡེ་ཤེས་མཐའ་དག་རྗེས་སུ་མ་ཞུགས་པའི་སེམས་ཅན་དེ་དག་ནི་སེམས་ཅན་གྱི་རིགས་ན་འགའ་ཡང་མེད་དོ། །འོན་ཀྱང་འདུ་བྱེད་ཀྱི་འཛིན་པས་དེ་བཞིན་
གཤེགས་པའི་ཡེ་ཤེས་མི་མངོན་ནོ། །འདུ་ཤེས་ཀྱི་འཛིན་པ་དང་བྲལ་བ་ལས་ནི་ཐམས་ཅད་མཁྱེན་པའི་ཡེ་ཤེས། རང་བྱུང་གི་ཡེ་ཤེས་ཐོགས་པ་མེད་པར་རབ་ཏུ་འབྱུང་ངོ་། །ཀྱེ་རྒྱལ་བའི་སྲས་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་དང་མཉམ་པའི་དར་ཡུག་ཆེན་པོ་གཅིག་ཡོད་པར་གྱུར་ལ། དར་ཡུག་ཆེན་པོ་དེ་ལ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྫོགས་པར་བྲིས་པར་གྱུར་ཏེ། འདི་ལྟ་སྟེ་ཁོར་ཡུག་ཆེན་པོའི་ཚད་ནི་ཁོར་ཡུག་ཆེན་པོ་བྲིས། ས་ཆེན་པོའི་ཚད་ནི་ས་ཆེན་པོ་བྲིས། སྟོང་གཉིས་པ་བར་མའི་འཇིག་རྟེན་གྱི་ཚད་དུ་ནི་སྟོང་གཉིས་པའི་འཇིག་རྟེན་གྱི་ཁམས། སྟོང་གི་འཇིག་རྟེན་གྱི་ཚད་དུ་ནི་སྟོང་གི་འཇིག་རྟེན་གྱི་ཁམས། གླིང་བཞིའི་འཇིག་རྟེན་གྱི་ཁམས་ཀྱི་ཚད་དུ་ནི་གླིང་བཞི་པའི་འཇིག་རྟེན་གྱི་ཁམས། རྒྱ་མཚོ་ཆེན་པོའི་ཚད་དུ་རྒྱ་མཚོ་ཆེན་པོ། འཛམ་བུ་གླིང་གི་ཚད་དུ་ནི་འཛམ་བུ་གླིང་། ཤར་གྱི་ལུས་འཕགས་ཀྱི་ཚད་དུ་ནི་ཤར་གྱི་ལུས་འཕགས་གླིང་། ནུབ་ཀྱི་བ་གླང་སྤྱོད་ཀྱི་ཚད་དུ་ནི་ནུབ་ཀྱི་བ་གླང་སྤྱོད། བྱང་གི་སྒྲ་མི་སྙན་གྱི་ཚད་དུ་ནི་བྱང་གི་སྒྲ་མི་སྙན། རི་རབ་ཀྱི་ཚད་དུ་ནི་རི་རབ། ས་ལ་སྤྱོད་པའི་ལྷའི་གཞལ་ཡས་ཁང་གི་ཚད་དུ་ནི་ས་ལ་སྤྱོད་པའི་ལྷའི་གཞལ་ཡས་ཁང་། འདོད་པ་ན་སྤྱོད་པའི་ལྷའི་གཞལ་ཡས་ཁང་གི་ཚད་དུ་ནི་འདོད་པ་ན་སྤྱོད་པའི་ལྷའི་གཞལ་ཡས་ཁང་། གཟུགས་ན་སྤྱོད་པའི་ལྷའི་གཞལ་ཡས་ཁང་གི་ཚད་དུ་ནི་གཟུགས་ན་སྤྱོད་པའི་ལྷའི་གཞལ་ཡས་ཁང་བྲིས་སོ། །དར་ཡུག་ཆེན་པོ་དེ་ཡང་ཆུ་ཞིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་ཙམ་དུ་གྱུར་ལ། དར་ཡུག་ཆེན་པོ་དེ་ཡང་རྡུལ་ཕྲ་རབ་ཀྱི་རྡུལ་གཅིག་ཏུ་བཅུག་བར་
གྱུར་རོ། །འདི་ལྟར་རྡུལ་ཕྲ་རབ་ཀྱི་རྡུལ་གཅིག་ཏུ་དར་ཡུག་ཆེན་པོ་བཅུག་པ་དེ་བཞིན་དུ། རྡུལ་ཕྲ་རབ་ཀྱི་རྡུལ་མ་ལུས་པ་རྣམས་སུ་དེའི་ཚད་ཀྱི་དར་ཡུག་ཆེན་པོ་ནང་དུ་བཅུག་པར་གྱུར་རོ། །དེ་ནས་མཁས་པ་མཛངས་པ་གསལ་བ་ཡིད་གཞུངས་པ། དེར་ཉེ་བར་ཞུགས་པའི་སྤྱོད་པ་ལྡན་པའི་སྐྱེས་བུ་འགའ་ཞིག་སྐྱེས་ཏེ། དེའི་མིག་ལྷའི་མིག་ཏུ་གྱུར་ཅིང་ཀུན་ཏུ་ཡོངས་སུ་དག་པ་འོད་གསལ་བར་གྱུར་པ་ཅིག་ལ། དེས་ལྷའི་མིག་གིས་རྣམ་པར་བལྟས་ཏེ། འདི་ལྟ་བུར་གྱུར་པའི་དར་ཡུག་ཆེན་པོ་འདི་རྡུལ་ཕྲ་རབ་ཀྱི་རྡུལ་ཆུང་ངུ་འདི་ཉིད་ལ་གནས་ཏེ། སེམས་ཅན་འགའ་ལ་ཡང་ཉེ་བར་འཁོར་བར་མ་གྱུར་ཏོ། །དེ་འདི་སྙམ་དུ་སེམས་ཏེ། ཀྱེ་མ་མ་ལ་གང་དག་གིས་བརྩོན་པ་ཆེན་པོའི་སྟོབས་དང་མཐུས་རྡུལ་ཕྲ་རབ་ཀྱི་རྡུལ་དེ་ཕྱེ་སྟེ། དར་ཡུག་ཆེན་པོ་འདི་འགྲོ་བ་ཐམས་ཅད་ཀྱི་ཉེ་བར་འཚོ་བར་བྱའོ་སྙམ་པས། དེ་བརྩོན་འགྲུས་ཆེན་པོའི་སྟོབས་ཀྱི་མཐུ་བསྐྱེད་དེ་རྡོ་རྗེ་ཕྲ་མོས་རྡུལ་ཕྲ་རབ་ཀྱི་རྡུལ་དེ་ཕྱེ་ནས་བསམ་པ་ཇི་ལྟ་བ་བཞིན་དུ། དར་ཡུག་ཆེན་པོ་དེས་འགྲོ་བ་མཐའ་དག་ཉེ་བར་འཚོ་བར་བྱེད་ཅིང་གཅིག་ལས་ཇི་ལྟ་བ་དེ་བཞིན་དུ་རྡུལ་ཕྲ་རབ་ལུས་པ་མེད་པ་མཐའ་དག་ལ་དེ་ཁོ་ན་བཞིན་བྱེད་དོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཚད་མེད་པའི་ཡེ་ཤེས་སེམས་ཅན་ཐམས་ཅད་ཉེ་བར་འཚོ་བའི་ཡེ་ཤེས་ཀྱང་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་མ་ཚང་བ་མེད་པར་རྗེས་སུ་ཞུགས་ཏེ། སེམས་ཅན་གྱི་སེམས་ཀྱི་རྒྱུད་དེ་དག་དེ་བཞིན་གཤེགས་པའི་ཡེ་ཤེས་དང་འདྲ་བར་ཚད་མེད་དོ། །ཞེས་སོ། །དེ་བས་ན་ངོ་བོ་ཉིད་མེད་པ་ནམ་མཁའ་ལྟ་བུ་ལ་ལྟོས་ན་ཡོན་ཏན་གྱི་ཆོས་འོད་ཟེར་ལྟར་རང་དང་ངོ་བོ་གཅིག་པར་ལྡན་པའི་ཚུལ་དུ་ལྷུན་གྱིས་གྲུབ་པས་སྐྱོན་གྱིས་གོས་མ་མྱོང་ལ། རྣམ་པའི་ཆ་འགག་པ་མེད་པ་ལ་ལྟོས་ན་འཁོར་བའི་ཆོས་ཉི་མ་དང་སྤྲིན་བཞིན་བསྒྲིབ་བྱ་སྒྲིབ་བྱེད་དུ་ལྡན་པས་འཁོར་
བ་དང་མྱང་འདས་གཉིས་ཀའི་འཆར་གཞིར་གྲུབ་པ་ནི་ཐ་སྙད་ཀྱི་བརྗོད་པའི་སྟེང་དུ་འགལ་བ་ལྟར་སྣང་ཡང་གཤིས་ཐོག་ཏུ་བསམ་གྱིས་མི་ཁྱབ་པའི་ཚུལ་ཡང་འགྲེལ་པ་དེ་ཉིད་ལས། དེ་ལ་དྲི་མ་མེད་པའི་དེ་བཞིན་ཉིད་སྔར་དྲི་མས་ཀུན་ནས་ཉོན་མོངས་པར་མ་གྱུར་ལ། ཕྱིས་རྣམ་པར་དག་པའི་ཕྱིར་གནས་འདི་བསམ་གྱིས་མི་ཁྱབ་བོ། །ཅེས་སོ། །དེ་བས་ན་བསམ་གྱིས་མི་ཁྱབ་པའི་ཆོས་ཉིད་ནི་ཆོས་སྐུའི་ངོ་བོ་དག་པ་གཉིས་ལྡན་ལས་གཞན་དུ་མི་འགྱུར་བས་དེ་ཉིད་མཐོང་བའི་ཐབས་སུ་སེམས་ཀྱི་དེ་ཁོ་ན་ཉིད་ལ་གོམས་པར་བྱ་བ་ཁོ་ན་སྟེ། དེ་ལྟར་གོམས་པ་ལས་ཆོས་ཉིད་ཀྱི་བདེན་པ་མཐོང་ཏེ་སྤངས་པ་གཉིས་ལ་བརྟེན་ནས་ཉོན་ཤེས་གྱི་སྒྲིབ་པ་བཅོམ་ནས་རྣམ་པ་ཐམས་ཅད་མཁྱེན་པའི་སངས་རྒྱས་སུ་འགྱུར་བའི་ཚུལ། དཔལ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཀྱང་། གསང་ཆེན་འདི་ཡི་དོན་བསླབས་ནས། །རང་གི་སེམས་ལ་གོམས་བྱས་ན། །ཆོས་ཉིད་བདེན་པའི་དོན་མཐོང་སྟེ། །ཆོས་རྣམས་ཀུན་ལ་མཁས་པར་འགྱུར། །སེམས་ལས་ཆོས་འབྱུང་འབུམ་ཕྲག་ཡས། །ཆོས་ཀྱི་རྒྱལ་པོར་དེ་གྱུར་ནས། །སངས་རྒྱས་སྨྲ་བའི་སེང་གེ་ཞེས། །ཞིང་ཁམས་ཀུན་ཏུ་གྲགས་པར་འགྱུར། །ཞེས་སོ། །ཡོན་ཏན་རིན་པོ་ཆེའི་མཛོད་ལས། །འབྲས་བུ་ལྷུན་གྲུབ་ཆེན་པོའི་རྣམ་པར་བཞག་པ་སྟེ་ལེའུ་བཅུ་གསུམ་པའི་འགྲེལ་བ་རྫོགས་སོ། །རྒྱལ་བའི་གཞུང་ལུགས་ཡོན་ཏན་གྲུ་འཛིན་ཐེག་པ་རིན་ཆེན་ཟ་མ་ཏོག །སྐུ་གསུམ་སྟོན་པའི་ཆོས་ཆར་བདུད་རྩི་མ་ལུས་ལུས་པ་མེད་པའི་མཛོད། །བདེན་པ་གཉིས་དང་རྣམ་པ་ཀུན་མཁྱེན་ཤིང་རྟའི་སྒྱུ་ཐབས་ལ་དྲངས་བ། །འདི་ན་སྣོད་དང་སྐལ་བ་སྣ་ཚོགས་གདུལ་བྱའི་རྗེས་འགྲོ་དགའ་བའི་ཆར། མཐའ་ཡས་ཐེག་པའི་འབྲས་བུའི་ ཐུགས་འཕགས་ལམ་ཡེ་ཤེས་རྫོགས་
པ་ཆེའི། །ལམ་སྲོལ་ཁུར་བཟོད་གླང་ཆེན་ཐལ་ཀར་ཞིང་ཁམས་གཞན་དུ་གཟིགས་གྱུར་ཀྱང་། །ལྷ་བརྒྱའི་མདུན་ས་སྐལ་ངན་མི་བགྱིད་མ་རྒྱལ་ལས་རྒྱལ་ཆོས་འཁོར་ལྟར། །ཡོན་ཏན་རིན་ཆེན་མཛོད་ཀྱི་མཆོད་སྡོང་བཤད་རླབས་གཡོ་བའི་ཤིང་རྟས་དྲངས། །ཀུན་འབྱུང་འདྲེན་པའི་ཐེག་པ་རྒྱ་མཚོའི་གདུལ་ཞིང་རྣམ་སྣང་གངས་ཆེན་མཚོར། །དཀའ་ཐུབ་རིག་བྱེད་ཞིང་ཁམས་བཀོད་ལེགས་ཕྲ་རབ་རྡུལ་སྙེད་གྲངས་ལྡན་ཡང་། །དབང་བསྒྱུར་ཐབས་ཀྱི་རྩེ་མོ་ལས་གཞན་རྒྱུ་འབྲས་ཐེག་པ་ཀུན་རྫོགས་པས། །གདུལ་མིན་དམ་བཅའི་རི་མོ་འགོད་ལ་ཀུན་མཁྱེན་ཡེ་ཤེས་འཇིགས་མེད་གླིང་། །འདི་ན་འཁོར་བའི་རང་བཞིན་གཏིང་ཟབ་འདུ་བྱེད་རླབས་ཀྱིས་དཀྲུགས་པ་ནི། ལས་ཀྱི་ཆུ་སྲིན་གདུག་པའི་ལྟོ་བར་དམ་ལ་མ་བཞག་ཡོད་མིན་པ། གང་ལས་དབུགས་འབྱིན་ཆོ་ག་མཁན་པོ་དོན་དམ་དེ་ཉིད་ལས་གཞན་མེད། །དེ་ཡི་གནས་ཀྱང་ཀུན་འབྱུང་རྒྱ་མཚོའི་དབྱེན་གྱི་ཐལ་འགྱུར་མང་པོས་དཀྲུགས། །ངེས་པར་རྒྱལ་བའི་སྤངས་རྟོགས་གཟུགས་གྱུར་མ་བྱོན་སངས་རྒྱས་རི་དབང་རྒྱལ། །ཞིང་འདིར་པདྨའི་ཞལ་སྐྱིན་མངོན་སུམ་མཛད་པ་ཐ་མའི་ནང་དབྱིངས་ནས། །བགྲོད་པ་རྣམ་གཉིས་བརྒྱ་ཕྲག་བརྒྱད་དུ་ཉེ་བའི་དུས་ནའང་ཡེ་ཤེས་ལུས། །མངོན་དུ་བསྟན་ནས་སྒྲིབ་མེད་གསུང་གིས་ཆོས་མིག་རྡུལ་བྲལ་གནས་ལ་སྦྱར། །གང་ཚེ་ལོངས་སྤྱོད་འཁོར་ལོའི་རྩ་གཟུགས་ཡི་གེ་ཚོགས་པའི་སྤྲིན་ཆེན་པོ། །འགྲོ་འོང་མེད་པའི་ཡེ་ཤེས་བཞོན་པས་རང་དབང་ཉིད་དུ་མངོན་བྱས་པས། །སོ་སོ་རང་རིག་སྤོབས་པའི་གཏེར་མཛོད་དགྲོལ་ལ་གཞན་དྲིང་མི་འཇོག་པ། །བདེ་གཤེགས་སྙིང་པོའི་ཁམས་ཀྱི་ཡོན་ཏན་བླ་མའི་དྲིན་གྱིས་མཐོང་ལས་བྱུང་། །རང་ཕྱོགས་འཕྱར་བའི་བསམ་པས་མ་ཡིན་རྒྱལ་བསྟན་ཆུ་ལྷར་ཕྱོགས་པ་དང་། །འབྲས་བུའི་
བསྟན་པ་གཟུགས་བརྙན་གྱུར་ལ་རྙོག་བྲལ་དམ་པའི་སེམས་བསྐྱེད་ནི། །ཉི་ཟླའི་རྗེས་སོང་དེ་ཕྱིར་འདི་ཡི་སྣོད་དུ་མ་གྱུར་འགའ་མེད་ཀྱང་། །སྐལ་བས་བསྡུས་དང་སྨོན་པའི་འཁྲི་ཤིང་ཅན་ནི་མཚོ་ལ་ངང་དུར་བཞིན། ༧ །དེ་ཡི་དགེ་ཚོགས་རྙོག་པ་མེད་པའི་ཀླུང་ཆེན་ནི། །ཕན་བདེའི་གཞུང་ཤིང་ནུབ་པ་མེད་པའི་རྒྱལ་བསྟན་གཟིངས། །འགྲོ་ཀུན་ཉེར་འཚོའི་རྟ་གདོང་རྣ་རྒྱན་གཡོ་བ་དེའི། །བཞོན་པར་གྱུར་ནས་རིན་ཆེན་ཞི་བའི་གླིང་ཕྱིན་ཤོག ༨ །སློབ་པ་ལམ་གྱི་གནས་སྐབས་ནའང་རང་གཞན་དོན་ལ་གཡེལ་དེ་སྲིད། །བསླུ་བའི་ཆོས་ཅན་དབང་པོ་དྲུག་ཡུལ་ཚར་བཅད་དཔའ་བོའི་གནས་ཐོབ་སླད། །སེམས་ཀྱི་གླང་པོས་ཉེ་བར་སྤྱད་པའི་འདུ་འཛི་བརྒྱ་ཕྲག་ལས་ཐར་ནས། །ཞི་བའི་ནགས་སུ་ངེས་འབྱུང་འབའ་ཞིག་བརྩོན་འགྲུས་དམ་པའི་སྐུ་ལ་མར་ཤོག ༩ ། ཚོར་བ་སིམ་པའི་བྲག་རིའི་ཁང་བཟང་སྨན་ཤིང་མེ་ཏོག་མྱུ་གུར་ལྡན། །བྱིས་དང་སྡིག་གྲོགས་རིང་པོར་བསྲིངས་ན་གསོག་དང་བསྲུང་དང་སྤེལ་བའང་མེད། །ཆགས་སྡང་ཚིག་གི་ཆོར་མ་གཞར་ལ་འབབ་ཆུ་ལྷུང་སྒྲ་སྒྲོག་པ་བཞིན། །བྱ་དང་རི་དྭགས་ཁྲོ་བ་མེད་དང་ལྷན་ཅིག་བསམ་གཏན་རོ་མྱོང་ཤོག ༡༠ །མཁའ་ལྟར་རྒྱ་ཆེའི་རྣམ་མཁྱེན་ཤེས་རབ་ཞི་བདེའི་གནས་ལས་རིང་གྱུར་ནས། །བྱང་ཆུབ་སེམས་ཀྱི་བསླབ་པ་གསར་པ་སྟོན་ཟླའི་མཛེས་པ་ལས་འགོང་ཞིང་། །ནོར་བུ་རིན་ཆེན་འབར་བའི་དཔལ་ལྟར་གཞན་ཕན་ཆོས་ཀྱི་འཁོར་ལོ་དང་། །རླབས་ཆེན་ཕྲིན་ལས་ཞིང་ཁམས་རྒྱ་མཚོའི་རྡུལ་ལས་འདས་པའི་གནས་ཐོབ་ཤོག ༡༡ ། རྒྱུ་མེད་པར་ཡང་འགྲོ་ལ་མཉེས་གཤིན་རྒྱལ་དང་དེ་སྲས་མངོན་བརྗོད་དེ། །གང་ལས་ཤིན་ཏུ་ལུགས་ལྡོག་སྤྱོད་པ་སེམས་ཅན་རྣམས་ཀྱི་ཆོས་ཉིད་ཕྱིར། །བསླབ་པ་མཆོག་ལྡན་
འོད་སྲུང་རྒྱལ་དེར་སེམས་ཀྱི་དམ་པ་མཆོག་བརྙེས་པས། །འཇུག་པའི་སྤྱོད་ལ་ཁྲོ་ཞིང་གཤུང་པའང་བདེ་བའི་ལམ་འབྲེལ་དོན་ཡོད་ཤོག ༡༢ །ཆེས་དཀར་ལས་དང་མི་སྲུན་སྨོན་པས་མཚམས་སྦྱར་གང་ཡང་བྱང་ཆུབ་སེམས་དཔའི་ཕྲིན་ལས་ཕྱིར། །བདག་ཉིད་མཐོང་ཐོས་དྲན་ནམ་རེག་གམ་ལེགས་བཤད་ཐོས་དང་གཤེའམ་མི་སྙན་བརྗོད་ཀྱང་རུང་། །མིག་མི་འཛུམས་པ་རྔ་སྒྲའི་དབྱངས་སྙན་བདེ་གཤེགས་རྒྱལ་བ་ཅན་དུ་དབུགས་དབྱུང་དེར་གྱུར་ཚེ། །འདུས་པ་དང་པོའི་འཁོར་དུ་ལྡན་ལ་རྣམ་མཁྱེན་བདུད་རྩིའི་དགའ་སྟོན་འགྱེད་པའི་བཀྲ་ཤིས་ཤོག ༡༣ །ཡོན་ཏན་རིན་པོ་ཆེའི་མཛོད་ཀྱི་སྨད་ཆའི་ཡལ་འདབ་བཞི་ལ་འབྲས་བུ་སྔགས་ཀྱི་ཐེག་པ་རྒྱ་མཚོ་ལྟ་བུ་གཏན་ལ་དབབ་པའི་རྒྱ་ཆེར་འགྲེལ་རྣམ་པ་ཐམས་ཅད་མཁྱེན་པའི་ཤིང་རྟ་ཞེས་བྱ་བ་འདི་སྔོན་ནས་ས་སྐྱ་གོང་མ་རིན་པོ་ཆེའི་བཀའ་གནང་གི་ཐོག་སྐལ་ལྡན་གྱི་སློབ་མ་དམ་པ་ཆོས་རྗེ་བྲག་ཕུག་པས་རིན་ཆེན་གཉིས་པའི་མཎྜལ་བཀྲ་ཤིས་ཀྱི་རྟགས་ལྡན་མེ་ཏོག་ཁོར་ཡུག་ཅན་ལ་ནཻ་པ་ལའི་དོང་ཙེ་བརྒྱ་ཕྲག་གི་ཚོམ་བུར་ལྡན་པ་བཟང་གོས་ཀྱི་ལྷ་རྫས་བཟང་པོས་བཏེག་ནས་ནན་ཏན་ཆེན་པོས་གསོལ་བ་བཏབ་ཅིང་། ཟིན་རིས་ལས་ཡི་གེ་གཉིས་པར་འབེབས་པའི་ངལ་བ་དང་ལན་གྱི་རྟེན་ཅིང་འབྲེལ་འབྱུང་ཚོགས་པ་ལས། བ་ལང་ལྟ་བུའི་སྐྱེ་བོ་རྣམས་ཀྱིས་ཚུར་མཐོང་གི་སྣང་བ་དང་སྐལ་པ་མཉམ་པར་འགྲོགས་ཤིང་། རྗེས་ལ་ཐོབ་པའི་ཤེས་རབ་ཀྱང་སྐྱོ་ཤས་དང་ངེས་འབྱུང་གི་བསྲུང་བའི་བསམ་གཏན་གྱི་ངང་དུ་ཡིད་སྡུད་པ་ལས་ཉེ་བར་སློང་བའི་གྲུབ་འབྲས་རྒྱལ་བའི་ཕྲིན་ལས་སུ་ཤར་བ་འདི་ནི། དཔལ་ཨོ་རྒྱན་གྱི་སློབ་དཔོན་ཆེན་པོ་སངས་རྒྱས་གཉིས་པས་རྗེས་སུ་བཟུང་བའི་རྫོགས་ཆེན་པ་རང་བྱུང་རྡོ་
རྗེ་མཁྱེན་བརྩེའི་ལྷས། །དཔལ་ལྡན་པདྨ་འོད་གླིང་ཞེས་བྱ་བའི་བས་མཐའི་གཙུག་ལག་ཁང་དུ་སྦྱར་བའོ།། །།ཨོཾ་ས་སྟི། འཇིགས་བྲལ་གླིང་པའི་དགོངས་བཅུད་ཆུ་འཛིན་ལས། །ཟབ་རྒྱས་ཤིང་རྟ་ཕྲིན་ལས་དབྱར་གྱི་རྔ་། །མདོ་རྒྱུད་ཡོངས་སྙིང་སྙན་དབྱངས་བསྒྲགས་པ་ན། །སྐལ་བཟང་རྨ་བྱའི་བརྩེ་དགའ་ཅི་ཡང་རོལ། །ཐ་སྙད་གྲུབ་མཐར་ཞེན་པའི་དྷ་དྷུ་རས། །གཞན་དབང་གྱུར་པའི་ཐེག་མཆོག་ཀེ་ལ་ཤ། སྔོན་པོ་འཁྲུལ་པའི་ལོག་རྟོག་མཁས་རློམ་ཀུན། །ཕུལ་བྱུང་ཐེག་མཆོག་སྣོད་དུ་སྐལ་བར་དམན། །ཟུར་མཛོད་སྐུ་མཆེད་གསུམ་གྱི་ལྷག་བསམ་གྱིས། །ཤིང་རྟ་རྣམ་གཉིས་བཞེངས་པས་དགེ་ཚོགས་ཟླས། །ལས་ཉོན་སྨག་རུམ་དྲུངས་ཕྱུང་དངོས་གྲུབ་འོད། །སྣང་བའི་སྐྱེ་དགུའི་པད་དཀར་བཞད་གྱུར་ཅིག །ཅེས་པའང་ཆོས་ཀྱི་སེང་གེས་སོ། །ཞེས་བསྟན་དང་འགྲོ་བ་ཐམས་ཅད་ལ་ཕན་ཐོག་རྒྱ་ཆེན་འབྱུང་བའི་བསམ་པས་ཀུན་ནས་བླང་ཏེ་ཆོས་རྒྱུན་རྒྱ་ཆེར་སྤེལ་བའི་ཆེད་དུ་བདེན་གཉིས་ཤིང་རྟར་གྲ་ནང་སློབ་དཔོན་ལགས་ནས་དངུལ་སྲང་ཉི་ཤུ་དང་། སྐལ་བཟང་བུ་ཁྲིད་ཀྱིས་ལེ་སྦྲམ་གྱི་སེ་མོ་དེའི་རིན་དངུལ་སྲང་བཅོ་ལྔ། འཕྲེང་པོ་བསམ་གཏན་པ་དཔལ་ལྡན་ཆོས་འབྱོར་ནས་དངུལ་སྲང་དོ་ཞོ་དོ་སྐར་ལྔ་དང་ཕྱི་མཛོད་གཅིག །ཟུར་མཛོད་ཀྱི་གཟའ་ཟླ་རྣམ་རྒྱལ་བུ་ཁྲིད་ནས་མགྲིན་པའི་དོ་ཤལ་རིན་དངུལ་སྲང་ལྔ་བཅུ། འཕྲོས་ཟུར་མཛོད་ཚེ་རིང་དོན་འགྲུབ་ནས་དངུལ་སྲང་དགུ་བཅུ་གོ་བརྒྱད་དང་ཞོ་ལྔ་སྐར་ལྔ་བཅས་མིང་གོང་འཁོད་རྣམས་ཀྱི་ཁྱོན་བསྡོམས་དངུལ་སྲང་བརྒྱ་དང་བརྒྱད་ཅུ་གྱ་དྲུག་དང་ཞོ་དོ་སོང་བ་དང་རྣམ་མཁྱེན་ཤིང་རྟར་ཁེ་གཞིས་བསོད་ནམས་རྒྱལ་པོ་ནས་དངུལ་སྲང་བརྒྱ་ཐམ་པ།
སྐྱབས་རྗེ་དྷརྨ་སེང་གེ་ནས་དངུལ་སྲང་བཅུ། དངོས་སློབ་བཀྲ་ཤིས་ཆོས་འཕེལ་ནས་དངུལ་སྲང་བཅུ་གཅིག་དང་ཞོ་གསུམ་ཟུང་སྤྲུལ་རིན་པོ་ཆེ་ནས་དངུལ་སྲང་གསུམ་ཟུང་མཁར་ཐུགས་སྲས་ཐུབ་བསྟན་ལགས་ནས་དངུལ་སྲང་ལྔ་འཕྲོས་ཤིང་རྟ་ཆེན་མོའི་ཞལ་འདེབས་ཁ་ལྷག་ཐོགས་ནས་དངུལ་སྲང་བཞི་བཅུ་ཞེ་བདུན་དང་ཞོ་དགུ་བཅས་ཁྱོན་བསྡོམས་དངུལ་སྲང་བརྒྱ་དང་བདུན་ཅུ་དོན་བདུན་དང་ཞོ་དོ་སོང་བས་འབྲེལ་པ་ཐོགས་ཚད་དགེ་ལེགས་འཕེལ་བར་གྱུར་ཅིག །། ༄༅། །ན་མོ་མཉྫུ་ཤྲི་ཡེ། དྲི་མེད་འོད་ཟེར་དགྱེས་པའི་གསར་ནི། །མཁྱེན་བརྩེའི་འདབ་བརྒྱ་གྲོལ་དབུས་ངལ་གསོ་ཞིང་། །ལེགས་བཤད་དྲི་བསུང་ཐུབ་བསྟན་འགྲོ་བའི་དཔལ། །འཇིགས་མེད་གླིང་པར་དང་གསུམ་མེ་ཏོག་བརྩེགས། ༡ རྒྱ་ཆེན་གཞུང་མང་བཤད་པའི་རླབས་ཀྱིས་མཛེས། །བརྒྱུད་གསུམ་མན་ངག་རིན་ཆེན་གཏེར་གྱིས་གཏམས། །མཁས་གྲུབ་ཀླུ་དབང་བྱེ་བས་རྩོན་པའི་གནས། །ངོ་མཚར་ཡོན་ཏན་གཞལ་དུ་མེད་པའི་མཛོད། ༢ །བདེན་གཉིས་གཞི་ལམ་མ་འདྲེས་དོན་བཟང་ལ། །མིང་ཚིག་བརྗོད་པ་དག་བས་ཚིག་འབྲུ་བཟང་། །ཐེག་གསུམ་ཆོས་ཀྱི་འཇུག་སྒོ་ཡོངས་སུ་རྫོགས། །རྣམ་མཁྱེན་ལམ་བཟང་བགྲོད་པའི་ཤིང་རྟའང་ལགས། ༣ འདི་ནི་སྲིད་པ་མྱ་ངམ་ཐང་ཆེན་དུ། །སྣ་ཚོགས་ལས་དང་ཉོན་མོངས་
ཀྱིས་དུབ་པའི། །འགྲོ་ལ་ཞི་བསིལ་བདེ་བའི་བདུད་རྩིའི་རོ། །སྦྱིན་པའི་ངལ་སྟེགས་རིན་ཆེན་བུམ་བཟང་ཡིན། ༤ །དེ་སླད་ཆོས་སྦྱིན་པར་གྱི་སྒོ་འཕར་ནི། །སྔོན་ནས་དབྱེ་མེད་དུས་ཀྱི་ཉག་བྲན་གྱིས། །སྣང་བ་ལྷག་བསམ་དངོས་པོ་དག་པ་ཡིས། །སླར་ཡང་གསོ་བའི་སྨན་ཡོན་ལེགས་པར་བསྒྲུབས། ༥ །དེ་ལས་ཐོབ་པའི་རབ་དགེ་མ་དྲོས་རྒྱུན། །རང་གཞན་ལེགས་བྱས་ཆུ་ཀླུང་འབུམ་དང་བཅས། །ཀུན་བཟང་བསྔོ་བའི་རླབས་ཕྲེང་འགྲེམས་བཞིན་དུ། །སྐུ་བཞིའི་རྒྱ་མཚོ་ཆེན་པོར་གཞོག་གྱུར་ཅིག །༦ །ལེགས་བཤད་འོད་སྟོང་འབར་བའི་སྒྲོན་མེ་འདི། །བཤད་དང་སྒྲུབ་པའི་དཔུང་པས་ཡོངས་བཟུང་བས། །ཐེག་མཆོག་ལམ་བཟང་སྣང་བས་ས་གསུམ་ཁྱབ། །ཀུན་མཁྱེན་བླ་མའི་བཞེད་དགོངས་འགྲུབ་གྱུར་ཅིག ༧ ཅེས་པ་འདིའང་ཡོན་ཏན་མཛོད་རྩ་འགྲེལ་སྔོན་ནས་པར་དུ་འཁོད་པ་ལྷ་ལྡན་དུ་རྒྱ་བོད་སྡེ་ཟར་སྐབས་མེ་སྐྱོན་གྱིས་པར་ཤིང་ཁ་ཚང་མིན་གྲངས་བརྒྱ་དང་བརྒྱད་ཅུ་གསར་བསྐོ་དང་། བྱིངས་ལ་ཉམས་གསོ་བཅས་རབ་ཚེས་མེ་ཕོ་འབྲུག་གི་ལོ་འདི་གཟུར་ཁང་ནས་རྒྱུ་ཡོན་སྦྱར་ཏེ་བསྒྲུབས་སྐབས་སྨོན་ཚིག་ཏུ་བཀའ་དྲུང་ཆེ་བའི་མིང་འཛིན་པདྨ་དབང་ཆེན་གྱིས་བྲིས་པ་དགེ། སརྦ་མངྒ་ལཾ།། །།