ཡོ་ག་གསུམ་གྱི་ཆོས་འབྱུང་གླིང་ཞིང་མཚན་ཉིད་སྤྱིར་བསྟན་པའི་སྐབས་ཏེ་སརྒ་གསུམ་པ།
གཉིས་པ་སྔ་འགྱུར་རྡོ་རྗེའི་ཐེག་པ་བཤད་པ་ལ་གཉིས། བྱུང་ཚུལ་གྱི་རྣམ་པར་གཞག་པ་དང་། དེའི་རྣམ་དབྱེ་བཤད་པའོ། །དང་པོ་ལ་གཉིས། གསུང་བ་པོ་སྟོན་པའི་བྱོན་ཚུལ་སྤྱིར་བསྟན་པ་དང་། གསུངས་ཚུལ་བྱེ་བྲག་ཏུ་བཤད་པའོ། །དང་པོ་ནི་སྒྱུ་འཕྲུལ་བླ་མ་ལས། དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། །འདུས་པས་ལོངས་སྤྱོད་དོན་གྱི་ཕྱིར། །སྲོད་དང་ཐོ་རངས་དུས་ཉིད་དུ། །ཉི་ཟླ་ཟ་བའི་དབང་བྱིན་ནས། །རོལ་པའི་ཀ་ར་བསྟན་པ་ཡིས། །དེ་བཞིན་དེ་བཞིན་གཤེགས་པའོ། །ཞེས་པ་ལྟར་ཐུན་མོང་གི་ལུགས་སུ་གྲགས
པའི་དང་པོར་སེམས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་བསགས། ཞིང་འདིར་མཛད་པ་བཅུ་གཉིས་ལས་དཀའ་བ་སྤྱོད་པའི་རྟེན་དེ་ལ་ཇི་སྐད་དུ་སངས་རྒྱས་ཡེ་ཤེས་ཞབས་ཀྱི་གྲོལ་བའི་ཐིག་ལེ་ལས། ཅི་ཕྱིར་ཤཱཀྱ་ཐུབ་པ་ཡིས། །གྲངས་མེད་གསུམ་དུ་ཚོགས་བསགས་ཀྱང་། །འདི་དོན་ནམ་རྟོགས་ནེ་རཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་ཕྱོགས་བཅུའི་བདེ་གཤེགས་ཀྱིས། །ཐལ་བྱུང་བློ་ཆགས་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་པས། །ནམ་ཕྱེ་དུས་ན་རྒྱལ་བ་ལྟར། །དེ་ཉིད་བསྒོམས་པས་ཐོ་རེངས་དུས། །སྐད་ཅིག་གཅིག་གིས་ཡང་དག་རྟོགས། །འགྲོ་བ་གདུལ་བར་བྱ་བའི་ཕྱིར། །བྱང་ཆུབ་སྙིང་པོར་བཞུགས་ནས་ཀྱང་། །དཔུང་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་དོན་དུ། །ཆོས་ཀྱི་འཁོར་ལོ་བསྐོར་བའོ། །ཞེས་པ་ལྟར་དཀའ་བ་སྤྱོད་པའི་ཚེ་རྣམ་སྨིན་གྱི་ལུས་དེ་ཉིད་དུ་བཞག། ཡེ་ཤེས་ཀྱི་ལུས་འོག་མིན་དུ་སངས་རྒྱས་ནས། སླར་ཡང་སེམས་ཅན་གྱི་དོན་དུ་རྡོ་རྗེ་གདན་དུ་འཚང་རྒྱ་བའི་ཚུལ་བསྟན་ནས་ཕྱི་ལྟར་ན་ཤཱཀྱ་ཐུབ་པ། ནང་ལྟར་རྡོ་རྗེ་འཆང་། གསང་བ་ལྟར་ན་གདོད་ནས་གཟུང་འཛིན་གྱི་འཆིང་བ་ལས་རྣམ་པར་གྲོལ་བའི་དཔལ་ཀུན་ཏུ་བཟང་པོ་སྟེ། ལང་ཀར་གཤེགས་པ་ལས་ཀྱང་། འདོད་པའི་ཁམས་དང་གཟུགས་མེད་དུ། །སངས་རྒྱས་མངོན་པར་སངས་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་སངས་རྒྱའོ། །ཞེས་དང་། གཞན་ཡང་། ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱས། །ཞེས་སོ། །བློ་ཆུང་ཞིང་མོས་པ་ཞན་བདག་དེ་ལྟ་བུའི་སྐུ་གསུམ་གྱི་སྟོན་པ་ངོ་བོའི་སྒོ་ནས་ཀྱང་ཐ་དད་དུ་བཟུང་ནས་ཕྱོགས་དང་རིས་སུ་བཅད་དེ་ཡང་
། དག་པའི་རྒྱུད་ལུང་མང་པོ་ལ་ལོག་པར་རྟོག་པའི་འཆིང་བས་དཀྲིགས་པ་ནི། སངས་རྒྱས་ཀྱི་ཐུགས་རྗེའི་རོལ་པ་ཚད་མེད་ཅིང་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རྣམ་པར་འཕྲུལ་བའི་ཆོས་ཉིད་ཀྱི་དོན་ལ་རྨོངས་པར་ཟད་དེ། དབྱིངས་ན་བཞུགས་པའི་ཟླ་བ་གཅིག་ཉིད་ལས་གདུལ་བྱའི་མོས་པ་དང་རྗེས་སུ་མཐུན་པའི་ཆུ་སྣོད་ཐ་དད་པར་ཟླ་བའི་གཟུགས་བརྙན་དེ་སྙེད་དུ་འཆར་བ་ལྟར། སྐུ་གསུམ་གྱི་སྟོན་པ་དེ་དག་རང་བཞིན་ནི། ཆོས་སྐུའི་གནས་སྐབས་ན་ཐོག་མ་མེད་པའི་གནས་སུ་རིག་པའི་ཆོས་ཉིད་གཟུང་འཛིན་གྱི་འཆིང་བ་ལས་རྣམ་པར་གྲོལ་བའི་མངའ་དབང་རྫོགས་པའི་སྟོན་པ་ཀུན་ཏུ་བཟང་པོ་ཉིད། ལོངས་སྤྱོད་རྫོགས་པ་སྐུའི་གནས་སྐབས་ན་རིགས་ལྔའི་སངས་རྒྱས་སུ་བཞེངས་པའི་ངང་ནས། སྤྲུལ་པ་སྐུའི་གནས་སྐབས་ན་གདུལ་བར་བྱ་བའི་དབང་གིས་འོག་མིན་ཁང་བུ་བརྩེགས་པ་སྟེ་གཙང་མའི་གནས་སུ་རྡོ་རྗེ་འཆང་ངམ། རིགས་དྲུག་པ་དང་། འགྲོ་དྲུག་སོ་སོའི་གནས་སུ་ཤཱཀྱ་ཐུབ་པ་ལ་སོགས་དྲུག་ཏུ་སྣང་བ་གྲངས་མེད་པས། གདུལ་བྱ་རང་རང་གི་མོས་པ་དང་མཐུན་པའི་ཆོས་དཔག་ཏུ་མེད་པ་དང་། ཁྱད་པར་རྡོ་རྗེའི་ཐེག་པའི་ཆོས་ཀྱི་འཁོར་ལོ་བསྐོར་བ་ཡིན་ཏེ། ཕྱག་ན་རྡོ་རྗེ་དབང་བསྐུར་བའི་རྒྱུད་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འཛིན། འཇིག་རྟེན་གྱི་ཁམས་གཞི་དང་སྙིང་པོ་མེ་ཏོག་གིས་བརྒྱན་པར་དབང་བསྐུར་བའི་རྗེས་ལ། དེ་ནས་འཇིག་རྟེན་གྱི་ཁམས་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པའི་མཚན་གྱིས་གླིང་བཞི་པ་བར་མའི་འཇིག་རྟེན་གྱི་ཁམས་ཀྱི་འཛམ་བུའི་གླིང་དུ་བདུད་ཕམ་པར་མཛད་ནས་བྱང་ཆུབ་ཏུ་མངོན་པར་སངས་རྒྱས། ཞེས་པ་དང་། དཔལ་སྒྱུ་འཕྲུལ་དྲྭ་བ་ཆེན་པོའི་ཆོས་ཀྱི་རྣམ་གྲངས་སྟོང་ཕྲག་བརྒྱ་བ་ལས་སེམས་དང་ཡེ་ཤེས་རང་སྣང་བར་སྟོན་པའི་པའི་གནས་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས། ཐུགས་རྗེ་ཆེན་
པོའི་བྱིན་རླབས་ཞེས་བྱ་བ། རིགས་པའི་སྐྱེས་བུ་ཐུབ་པ་དྲུག །དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །འཐོན་ནས་ཀྱང་ལས་ཀྱི་དབང་གིས་སྣྲེལ་གཞི་དང་། ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར། ཐུབ་པ་ཆེན་པོ་བཅོམ་ལྡན་འདས་རེ་རེས། འདུལ་བ་རྣམ་པ་བཞིས་འགྲོ་བ་ལྔའི་དོན་མཛད་དེ། །ཞེས་སོ། །གཉིས་པ་བྱེ་བྲག་ཏུ་བཤད་པ་ནི། པདྨ་དཀར་པོ་ལས། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་འདི་ནི་ངས་ཐོབ་སྟེ། །ང་ནི་རྟག་ཏུ་ཆོས་ཀྱང་རབ་འཆད་དོ། །ཞེས་པ་ལྟར་བསྐལ་པ་ལ་སོགས་པའི་གྲངས་ཀྱི་རྣམ་གཞག་དང་བློའི་ནུས་པས་བསམ་པར་མི་ནུས་པའི་རང་བཞིན་ཅན། འཁོར་འདས་ཐམས་ཅད་ཀྱི་སྤྱི་གཞི་ལས་ཁྱད་པར་གྱི་ཆོས་རྣམ་པ་དྲུག་གི་སྒོ་ནས་སྤངས་རྟོགས་ཀྱི་ཡོན་ཏན་མཐར་ཕྱིན་ཏེ་འོད་གསལ་ཆོས་ཀྱི་སྐུར་མངོན་པར་བྱང་ཆུབ་པའི་མངའ་དབང་རྫོགས་པའི་སྟོན་པ་ཀུན་ཏུ་བཟང་པོས། ཐབས་སྙིང་རྗེ་ཆེན་པོའི་རྩལ་ལས་གཞི་སྣང་ཡེ་ཤེས་ཀྱི་རོལ་པ་འགག་མེད་རང་བྱུང་གི་སྣང་ཆར། སྟོན་པ་གསུམ་ལ། ཞིང་ཁམས་གསུམ་དང་། བསྟན་པ་གསུམ་དང་། འཁོར་གསུམ་ལ་སོགས་པའི་རོལ་པ་ཚད་མེད་པར་བཀོད་པ་ནི། ཆོས་ཀྱི་སྐུའི་སྟོན་པ་དཔལ་ཀུན་ཏུ་བཟང་པོ། ཆོས་རང་བཞིན་རྫོགས་པ་ཆེན་པོ་གསང་སྔགས་བླ་ན་མེད་པ། འཁོར་ཡེ་ཤེས་རྒྱ་མཚོ། དུས་བསམ་གྱིས་མི་ཁྱབ་པ། གནས་ཆོས་ཉིད་དོན་གྱི་འོག་མིན་ནོ། །ལོངས་སྤྱོད་རྫོགས་པའི་སྐུ་སྟོན་པ་ངེས་པ་རིགས་ལྔའི་སངས་རྒྱས། ཆོས་ངེས་པ་གསང་སྔགས་ཕྱི་ནང་། འཁོར་ངེས་པ་དབང་པོ་དང་ཡུལ་སྣང་དག་པའི་འབྲས་བུའི་སེམས་དཔའ། དུས་ངེས་པ་རྟག་པ་
རྒྱུན་གྱི་འཁོར་ལོ། །གནས་ངེས་པ་རང་སྣང་སྟུག་པོ་བཀོད་པའི་ཞིང་ཁམས་ཏེ་ངེས་པ་ལྔ་དང་ལྡན་པར་ཁ་སྦྱོར་ཡན་ལག་བདུན་ལྡན་གྱི་རྣམ་རོལ་ཆེན་པོར་བཞུགས་པ་སྟེ། དེ་ལ་ཡན་ལག་བདུན་ནི། འབྲས་བུའི་ཡན་ལག་དང་། རྒྱུའི་ཡན་ལག་སྟེ་བདུན་ཚན་གཉིས་ལས། དང་པོ་འབྲས་བུའི་བདུན་ནི། འོག་མིན་ཆེན་པོར་དག་པའི་འཁོར་ལ་ཟབ་གསལ་གཉིས་སུ་མེད་པའི་ཡེ་ཤེས་ཀྱི་ཆོས་འཁོར་ལ་རྟག་ཏུ་ལོངས་སྤྱོད་པས་ན་ལོངས་སྤྱོད་ཀྱི་ཡན་ལག། མཚན་རྫོགས་ཀྱི་ལོངས་སྐུ་རང་འོད་ཀྱི་ཡུམ་དང་འདུ་འབྲལ་མེད་པ་ཁ་སྦྱོར་གྱི་ཡན་ལག། ཟག་མེད་ཡེ་ཤེས་ཀྱི་བདེ་བ་རྒྱུན་ཆད་མེད་པ་བདེ་བ་ཆེན་པོའི་ཡན་ལག། དམིགས་པ་མེད་པའི་ཐུགས་རྗེ་ཆེན་པོ་མཁའ་ལྟར་ཁྱབ་པ་སྙིང་རྗེས་གང་བའི་ཡན་ལག། ཕྲིན་ལས་ཀྱི་རོལ་བ་འཁོར་བའི་ཕ་མཐར་བརྡལ་བ་རྒྱུན་མི་འཆད་པའི་ཡན་ལག། ཞི་བའི་མཐའ་ལ་མི་གནས་པ་འགོག་པ་མེད་པའི་ཡན་ལག། སྟོང་ཉིད་དང་སྙིང་རྗེ་ཟུང་དུ་འཇུག་པའི་རང་བཞིན་སྤྲོས་པའི་མཐའ་ལ་མི་གནས་པ་རང་བཞིན་མེད་པའི་ཡན་ལག་སྟེ་བདུན་ནོ། །སྐྱེད་བྱེད་རྒྱུའི་ཡན་ལག་བདུན་ནི། ཟུང་དུ་འཇུག་པའི་ལམ་གྱི་ཡེ་ཤེས་ལ་དངོས་པོའི་མཐའ་དང་བྲལ་བས་རང་བཞིན་མེད་པའི་ཡན་ལག། ཀུན་རྫོབ་དང་དོན་དམ་གྱི་ཁམས་ཐམས་ཅད་གདོད་ནས་ལྷུན་གྲུབ་ཏུ་ཤེས་པ་ཁ་སྦྱོར་གྱི་ཡན་ལག། བྱུང་ཚོར་འདུ་ཤེས་ཀྱི་རྟེན་འབྲེལ་ཐམས་ཅད་བདེ་ཆེན་ལྷན་སྐྱེས་ཀྱི་ངོ་བོར་རྟོགས་པ་བདེ་བ་ཆེན་པོའི་ཡན་ལག །འདོད་པའི་ཡོན་ཏན་ལྔ་ལ་སོགས་ཏེ་སྣང་ཆའི་རྟེན་འབྲེལ་བཟང་ངན་གྱི་འཆིང་ཞེན་རོ་མཉམ་ཆེན་པོར་ལོངས་སྤྱོད་ཀྱི་ཡན་ལག དེ་ལྟར་དུ་མ་རྟོགས་པའི་འགྲོ་བ་ལ་རིས་མེད་ཀྱི་ཕན་པ་བསྒྲུབ་པའི་གོ་ཆ་བགོ་བ་ནི་སྙིང་རྗེས་གང་བའི་ཡན་ལག །དེ་ལྟ་བུའི་བརྩོན་པ་རྒྱུན་མི་འཆད་པར་རིམ་པ་གཉིས་ཀྱི་འཁོར་ལོ་གཞན་དོན་ལག་ཡེལ་བ་མེད་པ་བསླབ་པ་ནི་རྒྱུན་
ཆད་མེད་པའི་ཡན་ལག །དེའང་ཆོག་འཛིན་བདག་ལྟའི་གཟེབ་ལས་གྲོལ་ཏེ་འཁོར་གསུམ་རྣམ་གྲོལ་དུ་སྤྱོད་པ་འགོག་པ་མེད་པའི་ཡན་ལག་སྟེ། །དེ་ལྟར་ཕྱི་མ་བདུན་ནི་སྒྲུབ་བྱེད་འགྲུབ་པའི་རྒྱུའམ། ས་བོན་ཡིན་ཏེ་ཞར་ལ་སྨྲས་པའོ། །སྤྲུལ་པ་སྐུའི་སྟོན་པ་རྡོ་རྗེ་འཆང་དང་ཐུབ་པ་དྲུག། ཆོས་ཐེག་པ་ཆེ་ཆུང་། འཁོར་སར་གནས་དང་། སོ་སོ་སྐྱེ་བོ་དང་། མཁའ་འགྲོ་དང་། རིགས་སྔགས་འཆང་བ་ལ་སོགས་མ་ངེས་པ་སྟེ། དུས་ཆོས་འབྱུང་གདུལ་བྱ་དང་མཚུངས་པ་ད་ལྟར་བ། གནས་ལྷ་གནས་ཀྱི་འོག་མིན་དང་། དུར་ཁྲོད་ཆེན་པོ་དག་རྡོ་རྗེ་བཙུན་མོའི་བྷ་ག་ལ་སོགས་པའི་གསང་ཆེན་གྱི་འོག་མིན་དང་། འགྲོ་དྲུག་གི་གནས་རིགས་ཐ་དད་པའོ། །དེའི་ཕྱིར་ཐོག་མ་མེད་པའི་དུས་ནས་ད་ལྟ་ཕྱི་མའི་མཐའི་མུར་ཐུག་གི་བར་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རོལ་པས་ཚད་མེད་པའི་གདུལ་བྱ་རྣམས་ཐར་བ་དང་། རྣམ་པར་བྱང་ཆུབ་པའི་ལམ་བཀྲི་བའི་ཕྱིར་ཆོས་ཀྱི་རྣམ་གྲངས་དཔག་ཏུ་མེད་པར་གསུངས་པ་ཡིན་ནོ། །གཉིས་པ་ལ་གཉིས། ཐེག་པའི་རྣམ་གྲངས་སྤྱིར་དབྱེ་བ་དང་། བླ་ན་མེད་པའི་ཐེག་པ་བྱེ་བྲག་ཏུ་བཤད་པའོ། །དང་པོ་ནི། དེ་ལྟར་སྐུ་གསུམ་སོ་སོའི་སྟོན་པས་ཆོས་བསྟན་པ་ཐམས་ཅད་ཀྱང་དབང་པོའི་རིམ་པ་དང་སྦྱར་ནས་གསུངས་པ་དང་། གཉེན་པོའི་དོན་རྣམས་བསྡུས་ཏེ་གསུངས་པ་དང་། དུག་གསུམ་སྤྱི་དང་བྱེ་བྲག་གི་གཉེན་པོར་གསུངས་པ་དང་གསུམ་དུ་ངེས་ཏེ། སྒྲ་ཐལ་འགྱུར་རྩ་བའི་རྒྱུད་ལས། གསུངས་ཚུལ་དགོངས་པ་གསུམ་དང་བཅས། གཉེན་པོ་བསྡུ་དང་དབང་པོའི་དོན། །ཚིག་རྣམས་བསྡུས་ཏེ་བསྟན་པར་བྱ། །ཞེས་སོ། །དེའང་གཉེན་པོའི་དོན་དུ་གསུངས་པ་ནི། སྦྱང་གཞི་འདོད་ཆགས། །ཞེ་སྡང་། གཏི་མུག། དེ་གསུམ་ཆ་མཉམ་པའི་ཉོན་མོངས་པ་ཉི་ཁྲི་ཆིག་སྟོང་སྟེ་སྤྱིར་བརྒྱད་ཁྲི་བཞི་སྟོང་གི་གཉེན་པོར། འདུལ་བ།
མདོ་སྡེ། མངོན་པ། སྡེ་སྣོད་གསུམ་ཆ་མཉམ་པ་ཉི་ཁྲི་ཆིག་སྟོང་སྟེ་ཆོས་ཀྱི་སྒོ་ཡང་བརྒྱད་ཁྲི་བཞི་སྟོང་ངོ། །བསྡུ་བའི་དོན་དུ་གསུངས་པ་ནི་གསང་སྔགས་ཕྱི་ནང་གཉིས་ཏེ། གསང་སྔགས་ཕྱི་པ་ཀྲཱི་ཡ། ཨུ་པ། ཡོ་ག་དང་། ནང་པ། ཨ་ནུ། ཨ་ཏི་གསུམ་སྟེ་རྒྱུད་སྡེ་དྲུག་ཏུ་གསུངས་པ་ནི་ཐལ་འགྱུར་ལས། འདས་པ་རྒྱུ་དང་འབྲས་བུ་ལས། །རྒྱུ་ལ་གསུམ་དང་འབྲས་ལ་གཉིས། །གཉིས་པོ་ལས་བྱེ་དྲུག་ཏུ་འགྱུར། །ཅེས་སོ། །དབང་པོའི་དོན་དུ་གསུངས་པ་ནི་ཐེག་པ་རིམ་པ་དགུ་སྟེ། བཀོད་པ་ཆེན་པོ་ཡིད་བཞིན་མཆོག་གི་རྒྱུད་ལས། ཆུང་ངུ་གསུམ་ལ་བསྟན་པ་ནི། །མཚན་མར་འཛིན་ལ་ཉན་ཐོས་ཏེ། །འདུ་ཤེས་ཅན་ལ་རང་རྒྱལ་ཉིད། །རྟོག་འཇུག་ཅན་ལ་བྱང་སེམས་སོ། །ཞེས་བཀའ་དང་པོ་བདེན་པ་བཞི་ནི་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་འདུལ་བའི་སྡེ་སྣོད་ཉན་ཐོས་ཀྱི་ཐེག་པ། བཀའ་བར་པ་མཚན་ཉིད་མེད་པ་ནི་ཏིང་ངེ་འཛིན་གྱི་བསླབ་པ་གཙོ་བོར་སྟོན་པ་མདོ་སྡེའི་སྡེ་སྣོད་རང་རྒྱལ་གྱི་ཐེག་པ། ཐ་མ་དོན་དམ་རྣམ་པར་ངེས་པ་ནི་ཤེས་རབ་ཀྱི་བསླབ་པ་གཙོ་བོར་སྟོན་པ་མངོན་པའི་སྡེ་སྣོད་བྱང་སེམས་ཀྱི་ཐེག་པ་སྟེ། སྡེ་སྣོད་གསུམ་པོར་ཀུན་འབྱུང་འདྲེན་པའི་ཐེག་པ་ཞེས་བྱའོ། །དེ་བཞིན་དུ་སྔ་མར། འབྲིང་པོ་གསུམ་ལ་བསྟན་པ་ནི། རབ་ཏུ་དམན་ལ་བྱ་བ་སྟེ། དམན་པ་རྣམས་ལ་སྤྱོད་པའོ། །རྣམ་ཤེས་ཅན་ལ་རྣལ་འབྱོར་ཉིད། །ཅེས་པས། ཐེག་པ་ཆེན་པོ་ཀྲཱི་ཡ་སྟེ་བྱ་བའི་རྒྱུད། སྤྱོད་པ་འོག་མ་བྱ་རྒྱུད་དང་། ལྟ་བ་གོང་མ་ཡོ་ག་དང་མཐུན་པའི་གཉིས་ཀར་སྤྱོད་པས་མ་ནིང་གི་ཐེག་པའམ། སྤྱོད་རྒྱུད་ཨུ་པ་ཡ། ཡོ་ག་རྣལ་འབྱོར་གྱི་རྒྱུད་དེ་ཕྱི་རྒྱུད་སྡེ་གསུམ་པོར་དཀའ་ཐུབ་རིག་བྱེད་ཀྱི་ཐེག་པ་ཞེས་གྲགས་སོ། །དེ་བཞིན་དུ་བཀོད་པ་ཆེན་པོར། ཆེན་པོ་གསུམ་ལ་བསྟན་པ་ནི། །སེམས་ཡས་པ་ལ་བསྐྱེད་པ་སྟེ། །སེམས་བཅུད་ཅན་
ལ་རྫོགས་པ་ཉིད། །མཆོག་གསང་རབ་ལ་རྫོགས་པ་ཆེ། །ཞེས་པ་ལྟར་གཞི་རྫོགས་འཕོ་མེད་ཀྱི་དབྱིངས་ལས་རང་ཤར་བའི་ཡེ་ཤེས་འོད་གསལ་གྱི་དགོངས་པ་བརྗོད་དུ་མེད་པ་ལས། རིག་པའི་ཆོ་འཕྲུལ་དུ་སྣང་བ་ཆོས་ཐམས་ཅད་ཀྱི་གཞི་ལྟ་བུ་རྒྱུད་བསྐྱེད་པ་མ་ཧཱ་ཡོ་ག། རིག་པའི་རོལ་རྩལ་དུ་སྣང་བ་ཆོས་ཐམས་ཅད་ཀྱི་ལམ་ལྟ་བུ་རྫོགས་པ་ལུང་ཨ་ནུ་ཡོ་ག། རིག་པ་རང་སྣང་བ་ཆོས་ཐམས་ཅད་ཀྱི་འབྲས་བུ་ལྟ་བུ་མན་ངག་རྫོགས་པ་ཆེན་པོ་ཨ་ཏི་ཡོ་ག་སྟེ་ནང་རྒྱུད་སྡེ་གསུམ་པོར་དབང་བསྒྱུར་ཐབས་ཀྱི་ཐེག་པ་ཞེས་གྲགས་ཏེ། བཤད་རྒྱུད་དགོངས་པ་འདུས་པ་ལས། །ཀུན་འབྱུང་འདྲེན་པ་དཀའ་ཐུབ་རིག། དབང་བསྒྱུར་ཐབས་ཀྱི་ཐེག་པའོ། །ཞེས་སོ། །དེ་དག་ལས་གསང་སྔགས་ཕྱི་ནང་གཉིས་ལ་ཤེས་བྱེད་རྒྱུད་སྡེའི་རྣམ་གྲངས་མཐའ་ཡས་པར་བཞུགས་པ་ལས། རྒྱལ་བློན་སྔ་དར་གྱི་ཚེ། སློབ་དཔོན་ཞི་བ་འཚོ་དང་། རིག་འཛིན་ཆེན་པོ་པདྨ་འབྱུང་གནས་དང་། གྲུབ་པའི་འཁོར་ལོས་སྒྱུར་བ་བི་མ་ལ་མི་ཏྲ་སོགས་པས་པཎྜིི་ཏ་བགྱིས། བཻ་རོ་ཙ་ན་དང་། གཉགས་ཛྙཱ་ན་ཀུ་མཱ་ར་དང་། རྨ་རིན་ཆེན་མཆོག་དང་། ཨཱ་ཙཱ་རྱ་ཡེ་ཤེས་དབྱངས་ལ་སོགས་པས་ལོ་ཙཱ་བ་བགྱིས་ཏེ་བསྒྱུར་བའི་ཆོས་ཀྱི་རྣམ་གྲངས་ངེས་པ་ནི་གྲུབ་པའི་མཐའ་རིན་པོ་ཆེའི་མཛོད་ལགས་ལ་ཞིང་། །སོ་སོའི་རང་བཞིན་ནི་འོག་ཏུ་འགོད་པ་ཡིན་ནོ། །འོ་ན་ཐེག་པའི་རྣམ་གྲངས་དགུ་པོ་ཉིད་ལས་མི་འདའ་བའི་ཆོས་ཅན་ནམ་ཞེ་ན། འདུལ་བའི་དབང་གིས་དེ་། ལྟར་བཤད་ཀྱིས་དགོས་པའི་དབང་གིས་བཅུ་དྲུག་ཏུ་དབྱེ་བའི་རྣམ་གཞག་ཀྱང་ཡོད་དེ། གསང་བ་སྤྱོད་པ་ས་བོན་གྱི་རྒྱུད་ལས། ཐེག་པའི་དང་པོ་བཅུ་དྲུག་མགོན། །ཞེས་པས་སོར་བཞག་ལྷ་མིའི་ཐེག་པ་གཉིས། རྟག་ཆད་མུ་སྟེགས་ཀྱི་ཐེག་པ་གཉིས། ཕྱོགས་རྟོགས་ཉན་ཐོས་ཀྱི་ཐེག་པ་བྱེ་བྲག་པ་དང་མདོ་སྡེ་གཉིས། ཡང་དག་པ་ཇི་ལྟ་བ་བཞིན་མ་རྟོགས་པ་དབུ་མ་སེམས་ཙམ་པ་དང་།
རང་རྒྱུད་པ་གཉིས། དབུ་མ་ཐལ་འགྱུར་བ་སྟེ། བྱང་ཆུབ་སེམས་དཔའི་ཐེག་པ་གསུམ། འདུལ་བ་བྱ་བ། དགོངས་པ་སྤྱོད་པ། གསང་བ་སྦྱོར་བ། རང་བཞིན་གསང་བའི་དོན་རྒྱུད་སྡེ་བཞིའམ་དྲུག་སྟེ། བྱ་བ་དང་སྤྱོད་པ། རྣལ་འབྱོར་དང་མ་ཧཱ། ཨ་ནུ་དང་ཨ་ཏི་སྟེ་བཅོ་ལྔ། འོད་གསལ་རྡོ་རྗེ་སྙིང་པོའི་ཐེག་པ་དང་བཅུ་དྲུག་ཏུའང་གསུངས་ཏེ། དེ་སྐད་དུ་གསང་བའི་སྙིང་པོ་ལས་ཀྱང་། མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཞེས་སོ། །དེ་ལ་མ་རྟོགས་པ་ནི། སོར་བཞག་ལྷ་མིའི་ཐེག་པ་སྟེ། །གང་གི་ཕྱིར་ལྷ་མིའི་ཐེག་པ་བྱ་ཞེ་ན། གསང་བ་མཆོག་གི་རྒྱུད་ལས། དགེ་བཅུ་སྤྱད་ཅིང་མི་དགེ་དོར་བ་ཡིན། །འདོད་པའི་ལྷ་དང་མི་རུ་སྐྱེ་བའི་རྒྱུ། །ཞེས་པས། དགེ་བ་བཅུའི་ཏིང་ངེ་འཛིན་དང་འབྲེལ་བས་འབྲས་བུ་ལྷ་མིའི་གོ་འཕང་ལ་སྦྱོར་བའི་ཕྱིར་རོ། །ལོག་པར་རྟོགས་པ་ནི་རྟག་ཆད་མུ་སྟེགས་པ་སྟེ། དབྱེ་ན་མུ་སྟེགས་བྱེད་ཀྱི་སློབ་དཔོན་སྔ་མ་དག་རྟོག་གེ་སྡེ་ལྔར་བཞེད་པ་ལས། །གྲངས་ཅན་པ་ནི་ཀུན་གྱི་ཕྱི་མོར་འདོད་དེ། འཇུག་པ་ལས། ཟ་པོ་རྟག་དངོས་བྱེད་པོ་ཡིན་པའི་བདག། ཡོན་ཏན་བྱར་མེད་གྲངས་ཅན་རྣམས་ཀྱིས་བརྟག། དེ་དབྱེ་དེ་དོན་ཅུང་ཟད་ལ་བརྟེན་ནས། །མུ་སྟེགས་ཅན་རྣམས་ལུགས་ནི་ཐ་དད་འགྱུར། །ཅེས་སོ། །དེ་ལ་རྟག་པར་བལྟ་བ་ནི། གྲངས་ཅན་པ། །དབང་ཕྱུག་པ། ཁྱབ་འཇུག་པ། རྒྱལ་བ་པ་བཞི་ཡིན་ལ། ཆད་པར་སྨྲ་བ་ནི་ཕུར་བུའོ། །དེ་དག་ལ་ནང་གསེས་ཀྱི་དབྱེ་བ་དང་གྲུབ་མཐའ་བསམ་ཡས་པར་ཡོད་དེ། ཀུན་གྱི་ཕྱི་མོ་གྲངས་ཅན་པ་ནི་སྐྱེ་དགུ་རྣམས་ཚེ་ལོ་ཉི་ཁྲི་ཐུབ་པའི་དུས་སུ་བྱུང་སྟེ། དཀའ་ཐུབ་ལས་གྲོལ་བ་ཐོབ་པའི་དྲང་སྲོང་སེར་སྐྱ་
ཞེས་བྱ་བ་དེས་བསྟན་བཅོས་མང་དུ་བརྩམས་པ་ལས་གྲུབ་མཐའ་དེ་འཛིན་པ་བྱུང་ཞིང་། ཇི་སྐད་དུ། ཟ་བོ་རྟག་དངོས་བྱེད་པོ་ཡིན་པའི་བདག། ཡོན་ཏན་བྱར་མེད་གྲངས་ཅན་རྣམས་ཀྱིས་བརྟག། ཅེས་བརྟག་པའི་གཞུང་ཆོས་ལྔ་ལྡན་ལ་སོགས་པས་འགོད་པའོ། །དེ་བཞིན་དུ་དབང་ཕྱུག་གི་རྗེས་སུ་འབྲང་བ་དག། འགྲོ་བའི་བདེ་སྡུག་དང་། འཁོར་བ་དང་གྲོལ་བ་ཐམས་ཅད་དབང་ཕྱུག་མཉེས་པ་དང་མ་མཉེས་པས་བྱས་པ་འདོད་དེ། འགྲོ་བ་པོ་འདི་ཤེས་པ་ཡོད་མིན་ཏེ། བདག་གི་བདེ་སྡུག་བདག་ལ་རང་དབང་མེད། །དབང་ཕྱུག་གིས་བཏང་ཡང་ན་གཡང་སའམ། མཐོ་རིས་དག་ཏུ་འགྲོ་བ་ཁོ་ནར་འགྱུར། །ཅེས་ཟེར་རོ། །ཁྱབ་འཇུག་པ་ནི། དེས་བསྟན་བཅོས་འབུམ་སྡེ་བརྩམས་ཤིང་། ལྟེ་བ་པདྨོའི་སྐྱེད་ཚལ་ནས་ཚངས་པ་གདོང་བཞི་པ་བྱུང་སྟེ། སྣོད་བཅུད་ཐམས་ཅད་ཚངས་པ་དེས་སྤྲུལ་པས་འཇིག་རྟེན་གྱི་མེས་པོ་ཞེས་གྲགས་སོ། །དེའི་གདོང་བཞི་ལ་སྙན་ངག་དང་། སྲིད་སྲུང་། མཆོད་སྦྱིན། ངེས་བརྗོད་ཀྱི་རིག་བྱེད་ཆེན་པོ་བཞི་བཤད་པ་རྣམས། ཐོག་མ་མེད་པའི་དུས་ནས་རྟག་པར་ཡོད་པ། ཚངས་པས་དྲན་པ་བརྗོད་པས། རིག་བྱེད་རྟག་པར་འདོད་པའོ། །ཕྱིས་དྲང་སྲོང་རྣམས་ཀྱིས་དེའི་གཞུང་བཀོད་པས་སྡེ་ཚན་ལྔར་གྱེས་ཤིང་། འདི་དག་ནི་སྙན་ངག་གིས་སྐྱེ་བོ་དགའ་བར་བྱེད་པ་དང་། སྲིད་སྲུང་གིས་རང་སྡེ་རྒྱལ་བར་བྱེད་པ་དང་། མཆོད་སྦྱིན་གྱིས་འདི་ཕྱིའི་དོན་སྒྲུབ་པ་དང་། དེས་བརྗོད་ཀྱིས་མཆོག་སྒྲུབ་པར་བྱེད་ཅིང་རིག་བྱེད་བཞི་ཚད་མར་འདོད་པའོ། །རྒྱལ་བ་པ་ནི། འདི་སྐད་དུ། དཀའ་བཟློག་དད་པས་ལུས་བསྲེགས་ན། །མཆོག་ཏུ་རྒྱལ་བར་སྤྱན་སྟོང་བཞེད། །གཟས་ཟིན་དུས་སུ་མགོ་བཅད་ན། །ཚངས་པ་ཐོབ་པར་ཀརྞ་འདོད། །བཅིངས་བསྲེགས་འགེགས་ཏེ་ཤི་བ་ནི། །གྲོལ་བར་འགྱུར་ཅེས་རྒྱལ་བ་སྨྲ།
ཞེས་པའི་རྗེས་སུ་འབྲེང་ཞིང་། ཐར་བ་མདོག་དབྱིབས་ཅན་དང་། ལྗོན་ཤིང་སེམས་ལྡན་དུ་འདོད་དེ། ལོ་འདབ་བཅད་ན་འཁུམས་པ་དང་པགས་པ་བཤུས་ན་བསྐམས་པས་འཆི་བའི་ཕྱིར་ཞེས་སྨྲའོ། །ཆད་པར་ལྟ་བ་ཕུར་བུ་པ་ནི། སུམ་ཅུ་རྩ་གསུམ་དུ་ཕུར་བུ་ལ་བརྟེན་ནས་གྲུབ་པ་ཐོབ་པ་ཞིག། བརྒྱ་བྱིན་གྱིས་སྒྲ་བསླབས་པས་ལྷའི་བླ་མར་མིང་ཐོགས་པའི་དྲང་སྲོང་དེས། ལྷ་ལ་ལྷ་མ་ཡིན་གྱིས་རྒོལ་བ་ན་ལྷ་རྣམས་རྒྱུ་འབྲས་ལ་འཛེམ་པས་སྤྲོ་བ་ཞན་པར་གྱུར་བ། རེ་ཞིག་ལྷ་རྣམས་སྤྲོ་ཞིང་གཡུལ་ལས་རྒྱལ་བའི་ཕྱིར། ལས་རྒྱུ་འབྲས་དང་། ཚེ་སྔ་ཕྱི་དང་། ཐར་བ་དང་གྲོལ་བ་སོགས་གང་ཡང་མེད་ཅེས་བྱ་བའི་བསྟན་བཅོས་བརྩམས་པ་ལས། དེ་ཉིད་ཕྱིས་མི་ཡུལ་དུ་གྲོག་མཁར་བས་དར་བར་བྱས་ཏེ། འདི་སྐད་དུ། བཟང་མོ་མ་ཤིའི་བར་དུ་དགའ་མགུར་སྤྱོད། །ཤི་ནས་དེ་ཡི་སྤྱོད་ཡུལ་མིན། །ལུས་ཀྱང་ཐལ་བ་བཞིན་སོང་ནས། །སླར་སྐྱེ་བ་དག་ག་ལ་སྲིད། །ཅེས་ཚེ་ཕྱི་མ་མེད་པར་འདོད་ཅིང་། ཀྱེ་མ་མང་ཐོས་གང་སྨྲ་བ། །སླུ་བྱེད་སྤྱང་ཀིའི་རྗེས་དང་མཚུངས། །ཞེས་གཞུང་ལུགས་ལ་སྐུར་བ་འདེབས་པ་དང་། ཇི་ཙམ་དབང་པོས་སྤྱོད་ཡུལ་པ། །སྐྱེས་བུའང་དེ་ཙམ་ཁོ་ནར་ཟད། །ཅེས་མིག་གིས་མཐོང་བའི་སེམས་ཅན་མ་གཏོགས་གཞན་མེད་པར་འདོད་པ་དང་། བློ་ནི་ལུས་ཀྱི་བདག་ཉིད་དང་། །ལུས་འབྲས་ལུས་ཀྱི་ཡོན་ཏན་དང་། །འདི་ལྟར་ལུགས་གསུམ་ལ་བརྟེན་ནས། །གོམས་པས་སྲིད་པ་ཡོད་མ་ཡིན། །ཞེས་ལམ་ལ་གོམས་པའི་འབྲས་བུ་སངས་རྒྱས་ལ་རྫུན་པར་སྨྲ་བ་དང་། པད་མོའི་གེ་སར་སུ་ཡིས་བྱས། །རྨ་བྱའི་རི་མོ་སུ་ཡིས་བྲིས། །ཚེར་མ་རྣོན་པོ་སུ་ཡིས་བརྡར། །ཐམས་ཅད་རྒྱུ་མེད་ངོ་བོས་བྱུང་། །ཞེས་པ་སྐྱེད་བྱ་སྐྱེད་བྱེད་ཀྱི་རྒྱུ་ལ་སྐུར་བ་འདེབས་ཤིང་། ངོ་བོ་ཉིད་རྒྱུར་སྨྲ་བས་སྤང་ལ་ཤ་མོ་བརྡོལ
བ་ལྟར་ཕྲལ་བྱུང་འདོད་ཅིང་། བདག་དང་བདེ་སྡུག་ལ་སོགས་པ་མ་ཤིའི་བར་ཡོད་ལ། ཤི་ནས་མེ་ཤི་བའི་དུད་པ་བཞིན་དུ་རྒྱུན་ཆད་པར་འདོད་དེ་མིང་གི་རྣམ་གྲངས་སུ། རྒྱང་འཕེན་པ། ཚུར་རོལ་མཛེས་པ་ཞེས་ཀྱང་གྲགས་སོ། །དེ་ལྟར་ཕྱི་རོལ་པའི་གཞུང་ལ་དབྱེ་ན་ལྟ་ལོ་གསུམ་བརྒྱ་དང་དྲུག་ཅུ་ཡོད་པར་བཤད་པའང་ལམ་ངན་པར་རྟོགས་ནས་མི་འཇུག་པ་དང་། དོན་གྱིས་དགག་པའི་ཕྱིར་གྲུབ་མཐའི་དབྱེ་བ་རྒྱས་པ་ཡིད་བཞིན་རིན་པོ་ཆེའི་མཛོད་དུའང་གསུངས་ཤིང་། དེ་སྐད་དུ་མདོ་སྡེ་ཚངས་པའི་དྲ་བ་དང་། ཡེ་ཤེས་རྒྱས་པར་བལྟ་བར་བྱའོ་ཞེས་གྲུབ་མཐའ་རིན་པོ་ཆེ་ནས་ཀྱང་ཁ་འཕངས་པ་ཡིན་ནོ། །འོ་ན་འདི་ཉིད་ཐེག་པའི་རྣམས་གྲངས་སུ་བཀོད་པ་ལ་དགོས་པ་ཅི་ཡོད་ཅེ་ན། སྤྱིར་ཐེག་པའི་གོ་བ་ནི་འོག་ནས་གོང་དུ་འདེགས་པའམ། རྣམ་གྲངས་ཙམ་དུ་བསྡུ་བའི་དོན་ཡིན་པས་སོར་གཞག་ལྷ་མིའི་འཇིག་རྟེན་གྱི་ཐེག་པ་ལ་ཞོན་ཏེ་རྟག་ཆད་ལོག་ལྟའི་ཐེག་པ་སུན་བྱུང་། ཡང་དག་པའི་ཐེག་པ་ལ་ཞུགས་ནས་འཇིག་རྟེན་ལས་འདས་པའི་སར་བགྲོད་པའི་ཕྱིར་ཐེག་པའི་རྣམ་གྲངས་སུ་བཞག་པ་ཡིན་ལ། དགོས་པ་ནི་ལམ་ངན་པ་དེ་དག་གི་རང་བཞིན་ཤེས་ནས་མི་འཇུག་པ་དང་། ནང་པ་ཡིན་པར་ཁས་བླངས་བཞིན་དུ་རྒྱུད་དང་སྤྱོད་ལམ་ལ་དེའི་བརྟུལ་ཞུགས་བག་ལ་ཉལ་གྱི་ཚུལ་དུ་མི་འགོ་བའི་ཕྱིར་དུ་སྟེ། འདི་སྐད་དུ། རིགས་ཀྱི་བུ་ཁྱོད་ལོག་པའི་ལམ་དུ་ཞུགས་ཀྱིས་དོགས་པའི་ཕྱིར་ངས་འཇིག་ཚོགས་ཀྱི་ལྟ་བ་མང་པོ་བསྡུས་ཏེ་བསྟན་པའོ། །ཞེས་ཐམས་ཅད་མཁྱེན་པས་བཤད་དོ། །སྐབས་འདིར་ཐེག་པའི་རྣམ་གྲངས་དགུ་རུ་འདྲེན་པ་སོགས་ལ་མི་བདེན་ཏོ་ཞེས་སྐུར་བ་འདེབས་པ་སྔོན་ཆད་བོད་འདིར་བྱུང་བས་ད་དུང་ཡང་དེ་དག་གི་རྗེས་འབྲང་བློ་ཆུང་བ་གང་ཞིག་ཐེ་ཚོམ་ཟ་བ་ནི་མི་རིགས་ཏེ། སྐྱེས་བུའི་བློ་སྟོབས་མ་ཟད་བར་ལ་མིང་ཚིག་ཡི་གེའི་རྣམ་གྲངས་དང་། ཡིད་དཔྱོད་ཀྱི་མཐའ་ལ་ཟད་པ་མེད་པས་ཐེག་པའི་སྒོ་ཡང་དེ་སྙེད་དུ
སྲིད་དེ། ལང་ཀར་གཤེགས་པ་ལས། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་སོ། །དེའི་ཕྱིར་ཐེག་པ་མཐའ་ཡས་པ་ཙམ་དུ་གྲུབ་པའི་མཐའ་ཡང་མཐའ་ཡས་ཏེ། རང་རང་གི་ཐེག་པའི་ལུགས་བསྒྲུབ་པའི་ཕྱིར་རོ། །དེ་སྐད་དུ་ཀུན་མཁྱེན་གྱིས། བློ་ཆུང་ཞིང་ཤེས་རབ་ཀྱི་མིག་རྒྱང་ཐུང་བདག་གཅིག་ཏུ་ཞེན་ནས། ཐེག་པའི་གྲངས་དང་གྲུབ་མཐའི་རྣམ་གྲངས་བསམ་གྱིས་མི་ཁྱབ་པའི་རྣམ་གཞག་ལ་སྡངས་ཤིང་མི་བདེན་ཏོ་ཞེས་སྨྲ་བ་ནི། བ་ལང་ལ་སོགས་པ་མ་ཧེ་དག་བདག་ཅག་དུད་འགྲོ་རྣམས་ནི་རྭ་དང་བཅས་པའི་ཕྱིར། མི་དང་ལྷ་རྣམས་ཀྱང་རྭ་ཅན་ཁོ་ནའོ་ཞེས་འཛིན་པ་བཞིན་ནོ། །དེ་བས་ན་ཐེག་པའི་ཚུལ་རྣམས་ནི། མིང་ཚིག་དང་དོན་གྱི་རྣམ་གྲངས་མཐའ་ཡས་ཤིང་། ལམ་བགྲོད་ཚུལ་དང་ས་དང་ཏིང་ངེ་འཛིན་གྱི་འཇོག་ཚུལ་དཔག་ཏུ་མེད་དེ། ཐམས་ཅད་མཁྱེན་པ་ནི་གང་ཡང་མཁྱེན་ཅིང་གསུངས་པའི་ཕྱིར། ལམ་བགྲོད་དུ་ཡོད་པ་དང་། མེད་པ་དང་། རྩོལ་བ་དང་བཅས་པ་དང་། རྩོལ་བ་མེད་པ་དང་། ཚེ་གཅིག་གིས་གྲོལ་བ་དང་། བསྐལ་པས་གྲོལ་བ་ལ་སོགས་པ་ནས། གྲུབ་པའི་རྣམ་གཞག་གང་ལ་དགའ་ཞིང་མོས་པའི་བསམ་པ་དང་མཐུན་པའི་ཆོས་གསུངས་ཏེ། ཆོས་ཚུལ་རྒྱ་མཚོ་རྣམས་ལ་སྡངས་ཤིང་སྐྲག་པས་ལོག་པར་ལྟ་བ་རྣམས་དོར་ནས། དོན་དུ་གཉེར་བས་འཇུག་པར་བྱ་བ་ནི་གདམས་ངག་དམ་པའོ། །ཞེས་གསུངས་པ་ནི་བསྟན་པ་ཐམས་ཅད་འགལ་མེད་དུ་རྟོགས་པའི་རྣམ་པར་ཐར་བ་དོན་ལ་གནས་པ་ཡིན་ནོ། །གཉིས་པ་བླ་ན་མེད་པའི་གསང་བ་ཆེན་པོ་དབང་བསྒྱུར་ཐབས་ཀྱི་ཐེག་པ་སྟེ་ཡོ་ག་རྣམ་པ་གསུམ་གྱི་རྣམ་པར་གཞག་པ་ལ་གཉིས། ལྷ་མིའི་ཡུལ་དུ་བྱུང་ཚུལ་དང་། སོ་སོའི་རང་བཞིན་བཤད་པའོ། །དང་པོ་ནི། སེང་གེ་རྩལ་རྫོགས་ཆེན་པོའི་རྒྱུད་ལས། བསྐྱེད་པ་མ་ཧཱ་ཡོ་ག་ནི་ཆོས་ཐམས་
ཅད་ཀྱི་གཞི་ལྟ་བུའོ། །ལུང་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ། །རྫོགས་པ་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ། །ཞེས་བསྐྱེད་པ་ཐབས་ཀྱི་གཞི་ལ། རྫོགས་པ་ཤེས་རབ་ཀྱི་ལམ་བཀོད་ནས། བླང་དོར་གཉིས་མེད་དུ་རྫོགས་པའི་འབྲས་བུའི་གོ་འཕང་ལ་འཇོག་པ་ནང་རྒྱུད་སྡེ་གསུམ་ལས་དང་པོ་བསྐྱེད་པ་མ་ཧཱ་ཡོ་ག་ལའང་རྒྱུད་སྡེ་དང་སྒྲུབ་སྡེ་གཉིས་སུ་ཡོད་པའི་རྒྱུད་སྡེའི་བྱུང་ཚུལ་ནི། དཔལ་གདོད་མའི་མགོན་པོ་བཅོམ་ལྡན་འདས་ཀུན་ཏུ་བཟང་པོས་རྒྱལ་ཚབ་རིགས་ལྔ་དང་། དེས་རྒྱལ་སྲས་སེམས་དཔའ་རྡོ་རྗེ་ལ་དགོངས་པས་བརྒྱུད་དེ་རིགས་གསུམ་སེམས་དཔའ་ལས་བསྟན་པ་ལས། མཛེས་པའི་ལང་ཚོ་དང་ལྡན་པ་འཇམ་དཔལ་གཞོན་ནུའི་ངང་ཚུལ་དང་ལྡན་པ་དེས་ལྷ་གྲགས་ལྡན་མཆོག་སྐྱོང་སོགས་ལ་བརྒྱུད་ནས་ལྷ་དེ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཞིང་རྒྱལ་བའི་གདུང་བསབས་པར་གྱུར་ཏོ། །སྤྱན་རས་གཟིགས་བདུད་རྩི་སྨན་གྱི་སྐུ་དང་ལྡན་པ་དེས་ཀླུ་རྒྱལ་གྷྲྀན་ནག་པོ་སོགས་ལ་བརྒྱུད་དེ་ཀླུ་དེ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཞིང་རྒྱལ་བའི་གདུང་བསབས་སོ། །ཕྱག་ན་རྡོ་རྗེ་རྡོ་རྗེ་སྙིང་པོ་མི་འཇིགས་པའི་བརྟུལ་ཞུགས་དང་ལྡན་པ་དེས་གནོད་སྦྱིན་སྐར་མདའ་གདོང་སོགས་ལ་བཤད་ནས་དེ་རྣམས་ཀྱང་བྱང་ཆུབ་སེམས་དཔའི་རིགས་འཛིན་ཅིང་གདུང་བསབས་སོ། །དེ་དག་ཀྱང་རང་རང་གི་ལུས་དང་བསམ་པ་དང་མཐུན་པར་བསྟན་ཅིང་རིགས་གསུམ་སེམས་དཔས་ལྷ་ཀླུ་གནོད་སྦྱིན་གསུམ་དང་། ལངྐ་མགྲིན་བཅུས་མི་མ་ཡིན། ལི་ཙ་བྱི་དྲི་མེད་གྲགས་པས་མི་རྣམས་ལ་བསྟན་པས་རང་རང་གི་འཁོར་ཚོམ་བུ་དང་བཅས་པར་སངས་རྒྱས་པ་ལ་རིག་འཛིན་བརྡའི་བརྒྱུད་པ་ཞེས་གྲགས་སོ། །དེའི་ཚེ་རྒྱ་གར་ཤར་ཕྱོགས་ཟ་ཧོར་རྒྱལ་པོ་ལུང་བསྟན་རྡོ་རྗེ་ལ་གླེགས་བམ་གྱི་བཀའ་བབས་ནས་བརྒྱུད་པ་ནི། སྤྱི་མདོ་ལས། ང་ནི་འདི་ནས་མི་སྣང
ནས། ལོ་ནི་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག། འཛམ་གླིང་ཤར་ལྷོའི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛ་ཞེས་བྱ་བ་ལ། །སྔོན་དུ་ལྟས་རྣམས་སྣང་བར་འགྱུར། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་ཅན་དམན་པའི་ལུས། །ལངྐའི་བདག་པོ་ལ་སོགས་པ། །ལག་ན་རྡོ་རྗེས་སྣང་བར་འགྱུར། །ཅེས་དང་། གསང་བའི་སྙིང་པོ་ལས། རེ་ཞིག་སྣོད་དང་ལྡན་པའི་མི། །དེ་མིང་རྒྱལ་པོ་ཛ་ཞེས་བྱ། །ཕྱག་ན་རྡོ་རྗེའི་མཐུས་སྣང་འགྱུར། །ཅེས་པ་ལྟར། ཨོ་རྒྱན་གྱི་རྒྱལ་པོ་ཨིནྡྲ་བྷོ་དྷི་ཆེ་བའི་སྲས་འབྲིང་པོའི་ཡབ་ཏུ་ངོས་འཛིན་པ་རྒྱལ་པོ་ཛ་སྟེ། དེ་ཡང་འདྲ་འབག་ཆེན་མོར། དེ་ལ་རི་མ་ལ་ཡའི་ཤར་ལྷོ་ན་ཨ་སུ་ར་གསང་བའི་བྲག་ཕུག་ན་རྒྱལ་པོ་ཛའི་ཕོ་བྲང་ཡོད་དོ། །རི་མ་ལ་ཡ་ནི་སངས་རྒྱས་ཐམས་ཅད་ཀྱིས་གསང་སྔགས་སྟོན་པའི་གནས་ཡིན་ཏེ། རི་དེ་ནི་ཤིན་ཏུ་བཀྲ་ཤིས་ཤིང་བྱིན་ཆེ་བ་མཐོང་སྣང་དུ་མ་ཡོད་པ། དག་པ་ལ་རིན་པོ་ཆེ་སྣ་ཚོགས་ལས་གྲུབ་པར་སྣང་བ། ལ་ལ་ནི་བྲག་རི་ཤིན་ཏུ་རྣོ་ཞིང་གཟར་ལ་མཐོ་བར་སྣང་བ་དང་། ལ་ལ་ནི་གནམ་ལྕགས་འབར་བ་གང་གིས་ཀྱང་བགྲོད་མི་ནུས་པར་སྣང་ངོ། །ངོས་ལ་ཙན་དན་གྱི་སྡོང་པོའི་རྩན་གཅན་གཟན་གྱི་རྒྱལ་པོ་སེང་གེ་གནས་པའོ། །ལོགས་ལ་བྲག་དཀར་པོ་སེང་གེ་འདྲ་བ་ལ་འདབ་ཆགས་ཀྱི་རྒྱལ་པོ་བྱ་རྒོད་ཀྱི་ཚང་བཅས་པ། རྩ་བ་ཙན་དན་གྱི་ནགས་ལ་སྟག་གི་འཁྲས་ཡོད་པ། རི་དེའི་རྩེ་མོ་རྩིབས་བརྒྱད་དུ་ཡོད་པ། དེ་ན་ཕྱག་ན་རྡོ་རྗེའི་ཕོ་བྲང་ཡོད་དེ། དེ་ལ་སྐལ་མེད་ཀྱིས་མི་བགྲོད་ལ། སྐལ་ལྡན་རྣམས་འདུ་ཞིང་གསང་བ་སྒྲོགས་པའོ། །རི་དེའི་ཤར་ལྷོ་ན་ཨ་སུ་ར་གསང་བའི་བྲག་ཕུག་ཡོད་པ། བྲག་ཕུག་དེའི་སྒོ་ཟླ་གམ་དུ་ཡོད་པའི་ནང་ན་བཀྲ་ཤིས་ཀྱི་རྟགས་རིན་པོ་ཆེ་ཟུར་བརྒྱད་
ལ་ཉི་ཟླ་གཉིས་ཀྱི་རྒྱན་ཡོད་པའོ། །ལོགས་ལ་བྱ་ཀ་ལན་ཏ་ཀའི་ཚང་བཅས་པའོ། །ཞེས་སོ། །དེ་སྐད་དུ་རྒྱུད་ལས་ཀྱང་། མི་ཡི་གནས་ཀྱི་འཇིག་རྟེན་ཁམས། །གླིང་བཞི་ལས་ནི་འཛམ་གླིང་གི། །དྲག་ཤུལ་ཅན་ཞེས་བྱ་བའི་རི། །གནོད་སྦྱིན་འདུ་བའི་གནས་ཡིན་ཏེ། །ཆོས་འཛིན་རིགས་ཀྱིས་བསྒྲུབ་གནས་ཡིན། །ཞེས་སོ། །དེ་ལྟ་བུའི་རྒྱལ་པོ་ཛས་ཡུལ་བྷངྒ་ལའམ་ཤར་ཕྱོགས་ཟ་ཧོར་གྱི་རྒྱལ་སར་མངའ་དབང་བསྒྱུར། འདྲ་འབག་ཆེན་མོ་ནས་བཤད་པ་ལྟར་སྟོན་པ་མྱ་ངན་ལས་འདས་ནས་ལོ་བརྒྱ་དང་ཉི་ཤུ་རྩ་བརྒྱད་སོང་བ་ཆོ་འཕྲུལ་གྱི་ཟླ་བའི་རྒྱལ་གྱི་ཉིན་ངོ་མཚར་བའི་ལྟས་སྣ་ཚོགས་བྱུང་བ་ན། རྒྱལ་པོ་འཁོར་དང་བཅས་པས་མཆོད་པ་བཤམས་པས་དེའི་ནུབ་མོ་རྒྱལ་པོའི་ཕོ་བྲང་གྲོང་ཁྱེར་རི་བོ་དང་བཅས་འོད་ཀྱིས་གང་བར་གྱུར་ཏོ། །དེའི་ཚེ་གསང་བའི་བདག་པོ་ཕྱག་ན་རྡོ་རྗེས་གསང་སྔགས་ཀྱི་ཆོས་འཁོར་བསྐོར་བའི་དུས་ལ་བབ་པར་དགོངས་ཏེ་མངོན་པར་གཤེགས་ནས་འཁོར་ལྷའི་རིག་འཛིན་གྲགས་ལྡན་མཆོག་སྐྱོང་། དེ་བཞིན་དུ་ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མིའི་སྐལ་ལྡན་ལི་ཙ་བྱི་སྟེ་དམ་པའི་རིགས་ཅན་དྲ་མ་ལྔ་ལ་གསང་རྒྱུད་རྒྱ་མཚོའི་ཆོས་འཁོར་བསྐོར། བློ་གྲོས་ཐབས་ལྡན་གྱིས་ཡི་གེར་བསྡུས་ཏེ་བྱིན་གྱིས་བརླབས་པ་ལས། རྒྱལ་པོ་ཛ་ཨ་སུ་ར་གསང་བའི་བྲག་ཕུག་ཏུ་རྡོ་རྗེའི་རྣལ་འབྱོར་ལ་གཞོལ་བའི་ཚེ་རྨི་ལྟས་ཁྱད་པར་ཅན་བདུན་བྱུང་སྟེ། སྐུ་གསུང་ཐུགས་རྟགས་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་འགྲོ་བ་བྱེད་པ་དང་། །ཀུན་གྱི་དམ་པར་གྲགས་པ་དང་། །མཆོད་པ་ཆེན་པོ་བྱེད་པ་དང་། །རིན་ཆེན་ཆར་དུ་འབབ་པ་དང་། །སངས་རྒྱས་པར་ལུང་བསྟན་པའོ། །དེའི་ནངས་པར་མནལ་སད་དང་རྒྱལ་པོས་འཁོར་རྣམས་བསྡུས་ཏེ་རྨི་ལམ་ཟློས་པ། མདང་
སུམ་བདག་ལ་རྨི་ལམ་འདི་ལྟར་རྨིས། །མ་ལ་ཡ་ཡི་རྩེ་མོ་ན། །ཕྱག་ན་རྡོ་རྗེའི་ཕོ་བྲང་བཞུགས། །སྐུ་ལས་འོད་འཕྲོས་ཐམས་ཅད་བསྲེགས། །གསུང་སྒྲ་འབྲུག་ཏུ་སྟོང་གསུམ་བསྒྲགས། །ཐུགས་ལས་འོད་བྱུང་སྣང་སྲིད་གསལ། །སྐུ་ལས་ཉི་འོད་སྤྱི་བོར་ཐིམ། །གསུང་ལས་ཟླ་འོད་རྐང་མཐིལ་ཐིམ། །རྡོ་རྗེར་འོད་འབར་ཐུགས་ཀར་ཐིམ། །འབྲུ་གསུམ་ཡི་གེ་གནས་གསུམ་ཐིམ། །སྣང་སྲིད་ལྷོ་རུ་ཟོས་པ་རྨིས། །མཁའ་ལས་རིན་ཆེན་སྤྲིན་ལྟར་འཐིབས། །རིན་ཆེན་ཉི་འོད་འབར་བ་ལ། །རིན་ཆེན་སྨུག་པོའི་སྒྲོམ་ཆེན་ནས། །རིན་ཆེན་གསེར་གྱི་གླེགས་བམ་ལ། །བཻ་ཌཱུར་ཞུན་མའི་རྩི་ཡིས་བྲིས། །སྐར་མདའ་བཞིན་དུ་བབས་པ་རྨིས། །སངས་རྒྱས་བྱང་ཆུབ་སེམས་དཔའ་རྣམས། །ཉི་ཟླ་ཞོན་ནས་མཁའ་ལ་བྱོན། །གསེར་གྱི་འཁོར་ལོ་ཕྱག་ཐོགས་ཏེ། །སྲིད་གསུམ་ཁ་ལོ་གྱེན་ལ་བསྒྱུར། །གསང་སྔགས་འགྲོ་བ་མཛད་པ་རྨིས། །སངས་རྒྱས་ཀུན་དང་རིག་འཛིན་གྱིས། །ཀུན་གྱི་དམ་པར་བདག་སྒྲོག་རྨིས། །གླེགས་བམ་ཆེན་པོ་དེ་དག་ལ། །སངས་རྒྱས་བྱང་ཆུབ་རིག་པ་འཛིན། །མཁའ་འགྲོ་ལྷ་དང་གནོད་སྦྱིན་ཚོགས། །ཀུན་ཀྱང་ཕྱག་དང་བསྐོར་བ་དང་། །མཆོད་ཅིང་བསྟོད་པ་བྱེད་པ་རྨིས། །མཁའ་ལ་རིན་ཆེན་སྤྲིན་ལྟར་གཏིབས། །ཆོ་འཕྲུལ་འབྲུག་སྒྲ་ཀློག་སྟོང་འཁྱུག། རིན་ཆེན་སྣ་ཚོགས་ཆར་བཞིན་འབབ། །རིན་ཆེན་མེ་ཏོག་བཏུས་པ་རྨིས། །སངས་རྒྱས་གསུང་གི་འོད་ཟེར་ལས། །སངས་རྒྱས་ས་ལ་ལུ་བསྟན་རྨིས། །ཞེས་གསུངས་སོ། །དེར་རྒྱལ་པོའི་རྨི་ལམ་ལ་ཐམས་ཅད་ངོ་མཚར་ཏེ་བལྟས་པས། ཕོ་བྲང་གི་ཡང་ཐོག་ན་རིན་པོ་ཆེ་གསེར་གྱི་གླེགས་བམ་ལ་བཻ་ཌཱུརྻ་ཞུན་མས་བྲིས་པ། རྩ་བ་རང་ནན་ཏུ་བྱས་པའི་གསང་སྔགས་ཀྱི་རྒྱུད་སྡེའི་གླེགས་བམ་མང་པོ་དང་།
ཕྱག་རྡོར་གྱི་སྐུ་ཁྲུ་གང་བ་གཅིག་འདུག་པས་རྒྱལ་པོས་འདི་སྐད་ཅེས་གསོལ་ཏོ། །སྔོན་ཚེ་གོང་ནས་བསྒྲུབས་པའི་ལྷ། །ལས་ཀྱིས་མཇལ་བའི་ས་ཕྱོགས་འདིར། །བསྟན་པའི་སྙིང་པོ་དམ་པ་ནི། །ནམ་གཞག་གཏན་དུ་མི་གཏང་ངོ། །ངོ་མཚར་ཡ་མཚན་རྨད་ཀྱི་སྐུ། །འདྲེན་པ་མཆོག་གི་དཔལ་ཡང་གྲགས། །ལས་ཀྱིས་འབྲེལ་བའི་ལྷ་མཆོག་ཁྱོད། །མོས་པའི་གཟུགས་སུ་ལྷ་མཆོག་འཛིན། །ཞེས་གསུངས་ཏེ་པོ་ཏི་རྣམས་བལྟས་པས་བརྡམ་མཇལ། དེར་རྒྱལ་པོ་ཐུགས་མུག་སྟེ་དར་ཅིག་བཤུམས་སོ། །ཡང་མཁས་པ་གཞན་འདྲ་བཞུགས་པར་དགོངས་ཏེ་སྤྱན་འདྲེན་དུ་བཏང་བས། པཎྜི་ཏ་ཀུན་མཐུན་པར་ཤེས་ན་ངོ་མཚར་ཆེ་སྟེ་མ་ཤེས་ན་སྐྱེངས་པར་འགྱུར་གྱིས་དོགས་ནས་འབྱོན་དུ་མ་བཞེད་པར་པོ་ཏི་འདིར་ཁྱེར་ཤོག་གསུངས་པ་ལྟར། གླང་པོ་ཆེ་ལ་པོ་ཏི་ཀུན་བཀལ་ཏེ་སྤྱན་སྔར་འགྲིམ་པས། ཨུ་པ་རཱ་ཛ་ལ་སོགས་པ་ཀུན་གྱིས་བརྡ་མ་ཁྲོལ་བར་ཕྱིར་ལྡོག་གོ། དེར་རྒྱལ་པོས་ཅུང་ཟད་བསམས་པས། རང་གི་སྒྲིབ་མ་དག་ཚོགས་གཉིས་མ་རྫོགས་པས་ལན་པར་དགོངས་ཏེ། སྐུ་དང་གླེགས་བམ་ལ་གསོལ་བ་བཏབ་པས། སྒྱུ་འཕྲུལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པ་དང་ཞལ་མཐོང་གི་ལེའུ་གཉིས་ཤེས་སོ།། །།དེར་ཕྱག་རྡོར་གྱི་སྐུ་སྒྲུབ་རྟེན་དུ་བཟུང་ནས་བསྒྲུབས་པས། ཟླ་བ་དྲུག་ན་རྡོ་རྗེ་སེམས་དཔའི་ཞལ་མངོན་སུམ་དུ་མཐོང་སྟེ། དངོས་གྲུབ་ཅི་འདོད་གསུངས་པ་ལ། བདག་གིས་གླེགས་བམ་འདི་རྣམས་རྟོགས་པར་འཚལ་ལོ་ཞེས་ཞུས་པས། ཕྱག་ཤིང་དང་ཆོས་འཁོར་གཏད་དེ། དབང་བསྐུར། གནང་བ་བྱིན། ལུང་བསྟན། དོན་གྱི་མདོ་ཙམ་གསུངས་ནས་མི་སྣང་བར་གྱུར་ཏོ། །དེའི་བྱིན་རླབས་ཀྱིས་གླེགས་བམ་ཡོངས་སུ་རྫོགས་པར་ཤེས་ཏེ་ཚིག་བརྒྱུད་རྣམས་ལི་ཙ་བྱི་དྲི་མེད་གྲགས་པར་ཞུས་ནས་མི་ཡུལ་དུ་དར་བ་སྟེ། རྡོ་རྗེས་འོག་གི་རྒྱུད་ལས་ཀྱང་། རྒྱུ་ལ་སྦྱོར་བ་རྒྱུ་
ཡི་ཆོས། །འཁོར་ལོ་བཞིན་དུ་བསྐོར་བྱས་ནས། །འབྲས་བུའི་ཐེག་པ་ཉེ་ལམ་ཞིག། མ་འོངས་དུས་ན་འབྱུང་བར་འགྱུར། །ཅེས་གསུངས་པ་དང་ཡང་མཐུན་པ་ཡིན་ནོ། །ཁ་ཅིག་ཏུ་སྔོན་ལ་ཕྱག་རྡོར་གྱིས་སྒྲུབ་པ་མཛད་པས། ཞལ་གཟིགས་ནས་གླེགས་བམ་གྱི་ཆར་པ་བབས། གླེགས་བམ་གྱི་དོན་རྣམས་མཁྱེན་ཀྱང་མ་མཁྱེན་པ་ལྟར་མཛད་ནས་ཨུ་པ་རཱ་ཛ་སོགས་ལ་ཞུས་ཀྱང་བརྡ་མ་ཁྲོལ། དགེ་སློང་ཀུ་ཀུ་རཱ་ཛས་སྒྱུ་འཕྲུལ་དྲྭ་བ་ལེའུ་སྟོང་ཕྲག་བརྒྱ་པའི་ལེའུ་གསུམ་པ་རྡོར་སེམས་ཞལ་མཐོང་གི་ལེའུ་རྟོགས། ཟླ་བ་བདུན་བསྒྲུབས་པས་འགྲུབ་པ་ལུང་བསྟན་པ་བཞིན་ཟླ་བ་བདུན་དུ་ཕྱག་རྡོར་བསྒྲུབས་པས་དངོས་སུ་བྱོན། དབང་བསྐུར་ཞིང་བྱིན་གྱིས་བརླབས་ནས་ཚིག་རྣམས་ལི་ཙ་བྱི་དྲི་མེད་གྲགས་པར་ཞུས་ཤིག་པར་ལུང་བསྟན་ཏོ་ཞེས་པ་ཡང་གླེང་ངོ། །དེ་ལྟར་རྒྱལ་པོ་ཛ་ལ་བརྒྱུད་པའི་ཏནྟྲ་སྡེ་བཅོ་བརྒྱད་ནི། སངས་རྒྱས་མཉམ་སྦྱོར་གླང་པོ་རབ་འབོགགླང་པོ་ཆེ་ཆུར་འཇུག་སྟེ་སྐུའི་རྒྱུད་གསུམ། ཟླ་གསང་ཐིག་ལེ། གཅིག་ལས་འཕྲོས་པ། དུ་མ་ལས་འཕྲོས་པ་སྟེ་གསུང་གི་རྒྱུད་གསུམ། གསང་བ་འདུས་པ། རི་བོ་བརྩེགས་པ། རྩེ་གཅིག་འདུས་པ་སྟེ་ཐུགས་ཀྱི་རྒྱུད་གསུམ། དཔལ་མཆོག་དང་པོ། བདུད་རྩི་མཆོག་དང་པོ། ཡིད་བཞིན་ནོར་བུ་སྟེ་ཡོན་ཏན་གྱི་རྒྱུད་གསུམ། ཀརྨ་མཱ་ལེ། སྒྲོལ་མ་འབར་བ། ཀཱི་ལ་ཡ་ཡིག་འབྲུ་བཅུ་གཉིས་ཏེ་ཕྲིན་ལས་ཀྱི་རྒྱུད་གསུམ། སྒྱུ་འཕྲུལ་དྲྭ་བ། དམ་ཚིག་ས་མ་ཡ་འབུམ་སྟེ་བཀོད་པ། རྡོ་རྗེ་ཐབས་ཀྱི་ཞགས་པའི་རྒྱུད་དེ་སྤྱིའི་རྒྱུད་གསུམ་རྣམས་བསྡོམས་པས་བཅོ་བརྒྱད་དོ། །དེར་རྒྱལ་པོ་ཛ་ནས་གང་ཟག་སྙན་ཁུང་དུ་བརྒྱུད་དེ། ཀུ་ཀུ་རཱ་ཛ། ཨིནྡྲ་བྷཱུ་ཏི། སིངྷ་རཱ་ཛ། ཨུ་པ་རཱ་ཛ། སྲས་མོ་གོ་མ་དེ་ཝཱི་སྟེ། དེ་ཡན་ཆད་ནི་ཚོགས་ཀྱི་དཀྱིལ་འཁོར་སྤྱོད་པའི་ཉེ་རྒྱུ་ལ་བརྟེན་རང་རང་གི་ཚོམ་བུ་དང་བཅས་རྡོ་རྗེ་།
འཆང་ཆེན་པོའི་གོ་འཕང་བརྙེས་པ་ཤ་སྟག་གོ །སྲས་མོས་སྒེག་རྡོར་དང་། སངས་རྒྱས་གསང་བ། དེ་གཉིས་ཀས་བི་མ་ལར་བཤད་པ་ཡིན་ནོ། །དེ་དག་ལས་འཕྲོས་ཏེ་འཕགས་པའི་ཡུལ་དུ་བསྟན་བཅོས་བྱུང་ཚུལ་ཡང་། སློབ་དཔོན་ཀུ་ཀུ་རཱ་ཛས་རྒྱུད་སྡེ་བཅོ་བརྒྱད་ཀྱི་དོན་ཐུགས་སུ་ཆུད་ནས། དང་པོ་ཨིནྡྲ་བྷཱུ་ཏིའི་དོན་དུ་དཔལ་ཕྲེང་དཀར་པོའི་རྒྱུད་འགྲེལ་མཛད། དེ་ནས་སྒྱུ་འཕྲུལ་རྒྱས་པ་དང་། སངས་རྒྱས་མཉམ་སྦྱོར་གྱི་འགྲེལ་བ་དང་བསྡུས་དོན་མང་དུ་མཛད་དོ། །དེ་ནས་ཨིནྡྲ་བྷཱུ་ཏིས་དཔལ་གསང་བའི་སྙིང་པོ། ཐབས་ཀྱི་ཞགས་པ་བདུད་རྩི་རོལ་བ། སངས་རྒྱས་མཉམ་སྦྱོར་རྟོགས་པ་བཅུ་པ་དང་། བདུན་པ་དང་། གསང་བ་འདུས་པ་ལ་སོགས་པའི་རྒྱུད་འགྲེལ་མང་པོ་དང་། བསྡུས་དོན། སྒྲུབ་ཐབས་ལ་སོགས་པ་མང་དུ་མཛད་དོ། །སྲས་མོ་གོ་མ་དེ་ཝིས་ཀྱང་འགྲེལ་བ་དང་སྒྲུབ་ཐབས་མང་དུ་བརྩམས། དེ་བཞིན་དུ་སྒེག་པའི་རྡོ་རྗེ། སངས་རྒྱས་གསང་བ། ཨོ་རྒྱན་ཆེན་པོ། བི་མ་ལ་སོགས་པའི་འགྲེལ་བའང་རྒྱ་ཆེར་བཞུགས་སོ། །དེ་དག་ལས་ད་ལྟའི་བར་དུ་རྒྱུད་ཀྱི་བཤད་སྲོལ་མ་ཉམས་པ་ནི་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་དུ་གླེང་ངོ། །གཉིས་པ་སྒྲུབ་སྡེ་ལ་གཉིས། བཀའ་མའི་ལུགས་སུ་མདོར་བསྟན་པ་དང་། གཏེར་མའི་ལུགས་སུ་རྒྱས་པར་བཤད་པའོ། །དང་པོ་ནི། གྲུབ་པ་བརྙེས་པའི་སློབ་དཔོན་ཆེན་པོ་བརྒྱད་ལ་བཀའ་བབས་པ་སྟེ། དེ་ཡང་དང་པོ་རྣམ་པར་སྣང་མཛད་འཇམ་དཔལ་སྐུ་ལས་བརྒྱུད་པ་ནི། ཇི་སྐད་དུ། བཅོམ་ལྡན་འདས་ཀྱིས་བཀའ་སྩལ་པ། །ང་ནི་མྱ་ངན་འདས་འོག་ཏུ། །ལྔ་བརྒྱ་ཕྲག་བཅུའི་དང་པོ་ལ། །ལྷོ་ནུབ་སྲིན་པོ་གྱད་ཡུལ་དུ། །སིངྒ་ལ་ཡི་ནགས་སུ་ནི། །གཤིན་རྗེ་གཤེད་ཀྱི་སྤྲུལ་པ་ནི། །མིང་ནི་བཤེས་གཉེན་ཞེས་སུ་གྲགས། །འབྲས་བུར་གྲགས་པ་ཀུན་རྫོགས་ནས། །བསྟན་པ་འཛིན་ཞིང་དར་བར་འགྱུར།
ཅེས་པ་ལྟར་འཇམ་དཔལ་རྡོ་རྗེ་དང་གཉིས་མེད་པའི་སྐུའི་རིག་འཛིན་སློབ་དཔོན་འམ་དཔལ་བཤེས་གཉེན་སིངྒ་ལའི་རྒྱལ་པོ་བཞོན་ནུ་དཔལ་གྱི་སྲས་སུ་འཁྲུངས། མཚན་ཁྱེའུ་དཔལ་བཟང་ཞེས་གྲགས་སོ། དེས་སྲིད་པའི་འཆིང་ཞེན་སྤངས་ཏེ་ལྷོ་ཕྱོགས་བྷེ་ཏའི་ཡུལ་དུ་བྲོས། སྤྲུལ་པའི་སྐུ་དགའ་རབ་རྡོ་རྗེ་ལས་རབ་ཏུ་བྱུང་། དབང་དང་གདམས་ངག་ཐམས་ཅད་བྱས་ཏེ་རྒྱུད་ཞུང་གཅིག་ཏུ་ཐུགས་སུ་ཆུད། དེར་འཇམ་དཔལ་ལ་ཡི་དམ་མཛད་དེ་བསྒྲུབས་པས། གྲུབ་པའི་རྟགས་ནི། བྲིས་སྐུ་བཞད་ཅིང་བུམ་པ་ཁོལ། མེ་ཏོག་ཡང་འཁྲུངས་སོ། །དེའི་ནུབ་མོ་འཇམ་དཔལ་གྱི་ཞལ་མངོན་སུམ་པར་བསྟན་ནས་ཚེ་དབང་གི་དངོས་གྲུབ་ཐོབ། ཕྱི་ནུབ་ཡི་གེ་འཁོར་ལོ་ཚོགས་ཆེན་གྱིས་ནོན་བས་འཇམ་དཔལ་ཡ་མནྟ་ཀའི་ཞལ་གཟིགས། ཕྱི་ནང་གསང་བའི་དབང་བསྐུར། རྒྱུད་ལུང་མན་ངག་ཐམས་ཅད་རྫོགས་བཤད་པ་རྨིས་ནས་མན་ལས་ད་ཙན་གཤིན་རྗེ་གཤེད་མི་སྣང་བ་སྤྲུལ་པའི་གཤིན་རྗེས་མང་པོས་བསྐོར་བ་བྱེད་པ་གཟིགས། དེ་ཐམས་ཅད་ཀྱིས་སྲོག་སྙིང་ཕུལ། དེའི་ཚེ་ནམ་མཁའ་ལས་སྒྲ་ཆེན་པོ་གྲགས་པ་ན། པཎྜི་ཏ་རྣམས་ཀྱིས་རྒྱུ་མཚན་དྲིས་བས། སློབ་དཔོན་དགའ་རབ་རྡོ་རྗེས། དགེ་སློད་དཔལ་བཟང་གིས་འཇམ་དཔལ་གྲུབ་པ་ཡིན་ཏེ། མཚན་ཡང་འཇམ་དཔལ་བཤེས་གཉེན་དུ་བཏགས་སོ། །དེའི་ཚེ་ནམ་མཁའ་ལས་སྐྱེ་མེད་རྡོ་རྗེའི་རང་སྒྲ། རིག་ནམ་ལྕགས་མ་ལ་ཡར་སོང་ཞིག །ད་ན་རྒྱུད་སྡེ་མ་ལུས་པ་ཡོད་དེ། དེ་དག་ལ་ལོངས་སྤྱོད་ལ་འགྲོ་བའི་དོན་གྱིས་ཤིག །ཅེས་ལུང་བསྟན་བྱུང་ངོ་། །དེར་གཤིན་རྗེ་གཤེད་ཀྱི་བརྟུལ་ཞུགས་ལ་བསྙེམས་ནས་སྒྲུབ་པ་མཛད། སྐུ་གཅེར་བུར་ཕྱུང་ནས་ཕྱོགས་ལས་རྣམ་རྒྱལ་གྱི་སྤྱོད་པས་གྲུབ་རྟགས་མང་དུ་མཛད་པས་སྨྱོན་བ་བརྟུལ་ཞུགས་ཅན་དུ་གྲགས། གྲོང་ཁྱེར་དུ་བྱོན་པས་རྒྱལ་པོ་ངོ་མཚར་སྐྱེས་ཏེ་རྣལ་འབྱོར་དབང་ཕྱུག་ཏུ་གླེང་། རི་མ་ལ་ཡ་ཞེས་ཉིན་གཞིན་ཆར་མི་བཟད་པར་འཁྲིགས། མཚན་མེ་འབར་བ་དེར་བྱོན་བས་གནོད་སྦྱིན་གྱི་བུ་མོ་འོད་
འཕྲོ་མ་སོགས་ཀྱིས་བར་ཆད་བརྩམས་ནས་འབྱོན་དུ་མ་སྟེར་བར། བདེན་པས་བཀྲོལ། དེར་ལྕགས་ཀྱི་སྡིག་པ་ཤིན་ཏུ་འཇིགས་པ་ཞིག་བྱུང་བ་བདེ་གཤེགས་ཀྱིས་སྤྲུལ་པར་མཁྱེན་ཏེ་ཕྱག་མཆོད་ཕུལ་བས། དེ་བསེའི་སྒྲོམ་བུར་སོང་སྟེ་ནང་ནས་ལས་བཞི་ཚང་བའི་གསེར་གྱི་གླེགས་བམ་བཻ་ཌཱུརྻས་བྲིས་པ་བྱུང་། གཟིགས་པས་ཐུགས་སུ་ཆུད་དེ་རྡོ་རྗེ་གདན་གྱི་བྱང་དུ་གཏེར་ལ་རྒྱས་བཏབ། དེའི་ནང་ནས་མུ་སྟེགས་འདུལ་བའི་དོན་དྲག་པོ་ཁོལ་བུར་ཕྱུང་སྟེ་བསྒྲུབས་ནས་འཆི་བདག་སྡེ་བརྒྱད་བཀོལ་ཏེ་མུ་སྟེགས་ཀྱི་རྒྱལ་ཁམས་ཐམས་ཅད་བརླག་པར་མཛད་དོ། །དེ་ལ་རྗེས་སུ་སློབ་པའི་སློབ་མའི་དངས་མ་གསུམ། སློབ་དཔོན་ཧཱུྃ་ཀཱ་རའི་ལུགས་རིག་འཛིན་ཆེན་པོ་པདྨ་འབྱུང་གནས་ལ་བརྒྱུད། དྷ་ན་ཏ་ལ་མན་ངག་གསུངས། གཞན་ཡང་སློབ་མ་མཐའ་ཡས་ཤིང་། ཁ་ཅིག་ཏུ་འཇམ་དཔལ་བཤེས་གཉེན། ཤཱནྟི༚ི༚་གྷརྦྷ། དེས་རྒྱ་གར་གྱི་རྒྱལ་པོ་ཀུན་སྐྱོང་དང་། བལ་པོ་བ་སུ་དྷར་གཉིས་ལ་བརྒྱུད་ཅིང་མདོར་ན། གཤེད་སྐོར་རྒྱ་མཚོ་སློབ་དཔོན་འདི་ལས་བརྒྱུད་པ་ཤ་སྟག་གོ། །སྣང་བ་མཐའ་ཡས་པདྨ་གསུང་གི་བརྒྱུད་པ་ནི། ཆོས་སྐུ་ནས་རིམ་པར་བརྒྱུད་པའི་བཅུ་གཉིས་པ་དཔལ་མགོན་འཕགས་པ་ཀླུ་སྒྲུབ་བམ་སློབ་དཔོན་ནཱ་གཱརྫུ་ན་གསུང་གི་རིག་འཛིན་ཏེ། ལང་ཀར་གཤེགས་པ་ལས། ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིགས་པ། །ང་ཡི་ཐེག་པ་འཇིག་རྟེན་དུ། །བླ་མེད་ཐེག་པ་རབ་བཤད་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་པ་ལྟར་སྟོན་པ་མྱ་ངན་ལས་འདས་ནས་ལོ་བཞི་བརྒྱ་ན། ལྷོ་ཕྱོགས་བེ་ཏའི་ཡུལ་དུ་བྲམ་ཟེའི་རིགས་སུ་འཁྲུངས། མཚན་མཁན་ལ་བསྟན་པས་ཞག་བདུན་གྱི་ཚེ་ལས་མེད་དོ་ཞེས་ཟེར། ཐབས་དྲིས་པས། བྲམ་ཟེ་བརྒྱ་ལ་སྟོན་མོ་དྲངས་ན་ཟླ་བ་བདུན། དགེ་སློང་བརྒྱ་ལ་དྲངས་ན་ལོ་བདུན། དེ་ནས་ཐབས་མེད་ཟེར་བས་དེ་བཞིན་བྱས་
ལོ་བདུན་དུ་ཉེ་བ་དང་བུའི་རོ་ཕ་མས་མཐོང་བའི་མི་བཟོད་ཅེས་འཁོར་དང་བཅས་ལྗོངས་རྒྱུ་བར་བཏང་། ཅི་ཞིག་ན་ན་ལེནྡྲའི་མཁན་པོ་སྒྲ་གཅན་འཛིན་བཟང་པོའི་སྒོར་སོན་ནས་དེར་རིག་བྱེད་བསྒྲགས་པས་ནང་དུ་བོས། རྒྱུ་མཚན་དྲིས་པ་ལྟར་གསོལ་བས། རབ་ཏུ་འབྱུང་ནུས་སམ་གསུངས། ནུས་སོ་ཞུས་པས་དེར་རབ་ཏུ་བྱུང་། རྨ་བྱ་ཆེན་མོ་ཡི་དམ་དུ་ཕོག །འཇམ་དཔལ་རྩ་རྒྱུད་ལས། ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །བདག་ཉིད་ཆེན་པོ་དེས་འགྲུབ་བོ། །ཞེས་པ་ལྟར། བདུན་པའི་ཚེ་གཟུངས་མཚན་རིལ་པོར་སྟོན་པས་འགྲུབ་སྟེ། ལོ་དྲུག་བརྒྱར་འཚོ་བའི་ཐུན་མོང་གི་དངོས་གྲུབ་བརྙེས། སླར་བསྙེན་པར་རྫོགས། གསེར་འགྱུར་མཛད་ནས་དགེ་འདུན་རྣམས་མུ་གེ་ལས་སྐྱོབས། མཁན་པོ་སྤྱོད་པ་ལ་གཤེགས་ནས་ན་ལེན་དྲའི་མཁན་པོ་མཛད། ཀླུའི་ཡུལ་དུ་གཤེགས་ནས་ཀླུའི་རྒྱལ་པོ་ཟུག་རྔུ་ལས་བསྒྲལ། །གཏང་རག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་སྡེ་རྣམས་བླངས། ཀླུ་འཇིམ་ཡང་དེའི་ཚེ་བྱུང་ངོ། །སྤྱིར་ཐེག་པ་ཆེན་པོའི་བསྟན་པའི་སྲོག་ཤིང་དུ་གྱུར། ཁྱད་པར་དུ་བླ་མེད་ཐེག་པ་རབ་བཤད་ནས། །ཞེས་པ་ལྟར་རྒྱུད་སྡེ་རྒྱ་མཚོའི་དེད་དཔོན་དུ་གྱུར་བ་དེས་རྟ་མཆོག་ཧེ་རུ་ཀའི་དགོངས་པ་མངོན་དུ་བྱུང་ནས་རིག་འཛིན་ཆེན་པོ་པདྨ་འབྱུང་གནས་ལ་བཤད་པ་ཡིན་ནོ། །རྡོ་རྗེ་མི་བསྐྱོད་པ་སྟེ་ཡང་དག་ཐུགས་ནི། གདོད་མའི་སངས་རྒྱས་ནས་རིམ་པར་དགའ་རབ་རྡོ་རྗེ་ལ་བརྒྱུད། དེས་འཇམ་དཔལ་བཤེས་གཉེན། རོ་ལངས་བདེ་བ། སངས་རྒྱས་གསང་བ། དེས་བལ་པོ་ཧཱུྃ་ཀཱ་ར་ཐུགས་ཀྱི་རིག་འཛིན་ཏེ། སློབ་དཔོན་འདི་བལ་པོའི་ཡུལ་དུ་འཁྲུངས། ཡོ་བྱད་དབུལ་པོར་གྱུར་བས་རྒྱ་གར་དུ་བྱོན་ཏེ་རྒྱལ་པོའི་ཕྱུགས་རྫི་བྱས། མིང་ཕྱུགས་རྫི་གོ་ལེབ་ཅེས་གྲགས། རེ་ཞིག་ན་ནགས་གསེབ་ན་ཕྱུགས་འཚོ་བ་ལ་ཕྱིན་པས་དེར་
སློབ་དཔོན་ཀུ་ཀུ་རཱ་ཛ་སྒོམ་གྱི་ན་བཞུགས་པར་མཐོང་བས་ཤིན་ཏུ་དད་པར་གྱུར་ནས་ཕྱག་དང་བསྐོར་བ་བྱས། མ་ཧེའི་འོ་མ་བཞོས་ཏེ་དྲངས་པ་ན། སློབ་དཔོན་གྱི་ཞལ་ནས། བྱིས་པ་ཁྱོད་ཀྱིས་ཆོས་ཞུ་ནུས་སམ་གསུངས་པས། ཆོས་ནུས་ཏེ་བརྒྱགས་མེད་ཞུས། བརྒྱགས་མི་དགོས་པའི་ཆོས་ཀྱང་ཡོད་དོ་གསུངས་པས་དེ་ལྟར་ན་ཞུའོ་བྱས་པས། རྡོ་རྗེ་སེམས་དཔའ་རྒྱན་གཅིག་པའི་སྒོམ་བཟླས་གནང་། དེས་ཕྱུགས་སྐྱོང་བཞིན་པར་བསྒོམས་པས་རྡོ་རྗེ་སེམས་དཔའ་འགྲུབ་སྟེ། ལན་ཅིག་བྲག་ལ་སྒོམ་གྱི་ན་འདུག་པ་དང་། རྒྱལ་པོས་མཁར་གྱི་རྩེ་ནས་བྲག་ཁ་ན་རྡོ་རྗེ་སེམས་དཔའ་འོད་སྒོར་རེ་བཞུགས་པ་མཐོང་ངོ། །དགོངས་མོ་ཕྱུགས་ཐམས་ཅད་དེའི་མདུན་དུ་འདུས། རྡོ་རྗེ་སེམས་དཔས་ཕྱུགས་དེད་ནས་བྱུང་བས། ཕོ་བྲང་ལ་ཉེ་བར་སོང་དུས་ལྷ་མི་གསལ་དུ་སོང་། སྒོར་སླེབས་དུས་ཕྱུགས་རྫི་ཁོ་རང་དུ་འདུག་པས། རྒྱལ་པོ་ཐེ་ཚོམ་ཟོས་ཏེ་ནངས་པར་གོས་བརྗེས་ནས་ཕྱུགས་རྫིའི་ཕྱིར་ཕྱིན་ནས་བལྟས་པས། བྱིས་པ་དེ་ཁར་སང་ལྟར་རྡོ་རྗེ་སེམས་དཔའ་ཀྲོང་ངེ་སོང་བས་ཡིད་ཆེས། སླར་ཕྱུགས་རྫི་སླེབས་དུས་གཙང་ཁང་དུ་བོས་ཏེ། སྔན་ཆད་ངོ་མ་ཤེས་པ་བཟོད་པར་བགྱིས་ལ་ངའི་མཆོད་གནས་མཛད་པར་གསོལ་ཞེས་སོགས་བསྒོས་པས། བྱིས་པ་ན་རེ། བདག་ལ་ཆེ་བའི་ཡོན་ཏན་ཅི་ཡང་མེད་ཟེར། རྒྱལ་པོས་གོང་གི་ལོ་རྒྱུས་བརྗོད་པས། བྱིས་པ་ན་རེ། ངས་སྐྱེ་བ་འདི་ལ་རྒྱལ་པོ་འདུལ་བའི་དུས་ལ་མ་བབ། ཕྱི་མ་ཤར་ཕྱོགས་མངོན་པར་དགའ་བའི་ཞིང་དུ་མཇལ་ལོ་ཟེར། རྒྱལ་པོ་ན་རེ། འོ་ན་ངས་ཡོ་བྱད་སྦྱར་གྱིས་སྒྲུབ་པ་གྱིས་ཞེས་གསུངས་པ་ལས། བྱིས་པ་དེ་སྔར་གྱི་སློབ་དཔོན་ཀུ་ཀུ་རཱ་ཛའི་དྲུང་དུ་བྱོན། གདམས་པ་ཞུས་པས་དེའི་ཞལ་ནས། སྔར་ལས་འཕྲོ་ཡོད་པས་ལྷ་ངོ་བསྟན་པ་ཡིན་གྱི། ངས་འདུལ་བའི་དུས་ལ་མ་བབ་པས། ཨུ་ཏ་ཡའི་གྲོང་ཁྱེར་ན་སློབ་དཔོན་དུར་ཁྲོད་བདེ་བ་བཞུགས་པས་དེར་སོང་
ཞིག་གསུངས་པས། ལུང་བསྟན་པ་ལྟར་གྲོང་ཁྱེར་དེར་སོང་སྟེ་སློབ་དཔོན་བཙལ་བས། སློབ་དཔོན་གྲོངས་ནས་པུར་དུར་ཁྲོད་དུ་བསྐྱལ་ཟེར་རོ། །སླར་ལོག་སྟེ་སློབ་དཔོན་ཀུ་ཀུ་རཱ་ཛ་ལ་ཞུས་པས། རོ་ལངས་བསྒྲུབ་པའི་ཐབས་གནང་། དེས་བ་མ་ལ་ཡེ་ཤེས་སེམས་དཔའ་དགུག། ཞུག་གི་སྒྲུབ་པ་བྱས་པས་ཞག་ཉེར་གཅིག་ལ་གྲུབ་སྟེ་རོ་ལངས་བདེ་བའི་དངོས་གྲུབ་ཅེས་གྲགས་སོ། །གཤིན་རྗེ་མཁན་པོ་ཁ་ཅིག། སློབ་དཔོན་འཇམ་དཔལ་བཤེས་གཉེན་གྱིས་འཇམ་དཔལ་ཏནྟྲ་འབུམ་སྡེ་དཔེ་ལ་བཀོད། མ་གཤིན་ཚོགས་ཀྱི་དཀྱིལ་འཁོར་ལ་ཕྱེ་ནས་བསྒྲུབས་པའི་ཚེ། བ་མ་ལ་ཡེ་ཤེས་སེམས་དཔའ་དངོས་སུ་ཞུགས་ཏེ་བཞེངས་པ་རོ་ལངས་བདེ་བའི་དངོས་གྲུབ་ཡིན་ཅེས་གླེང་ངོ། །དེ་ལྟར་སློབ་དཔོན་དེས་ཡན་ལག་དྲུག་ཅུ་རྩ་བརྒྱད་ཀྱི་དཀྱིལ་འཁོར་བཞེངས་ནས་སྨིན་པར་བྱེད་པའི་དབང་བསྐུར། དེའི་ཚེ་དཀྱིལ་འཁོར་གྱི་མེ་ཏོག་སྟེང་ཕྱོགས་ཀྱི་གྲོང་པོ་ཧཱུྃ་ཀ་ར་ལ་བབས་པས། གསང་མཚན་བཛྲ་ཧཱུྃ་ཀ་ར་ཞེས་གྲགས་སོ། །དེར་གདམས་པ་བུམ་པ་གང་བྱོར་གནང་ནས། ཁྱོད་འདིར་མ་འདུག་པར་ཕྱག་རྒྱ་མཚན་དང་ལྡན་པ་ཞིག་ཁྲིད་ལ་བསེ་བྲག་བྱ་ཁྱུང་གི་ཚལ་དུ་སྒྲུབ་བགྱིས་ཤིག་ཅེས་ལུང་བསྟན། དེ་ནས་བྱིས་པས་རིགས་ངན་གྱི་གྲོང་ཁྱེར་དུ་བྱོན་ནས་ཕྱག་རྒྱ་མོ་བཙལ་བས་རྒན་རྒོན་རང་འཐག་མཁན་གཉིས་ལ་བུ་མོ་མཚན་དང་ལྡན་པ་ཞིག་འདུག་ནས་བསླངས་པས། བུ་མོ་ཁྱོད་ལ་མི་བསྐུར་ཟེར་སྟེར་དུ་མ་འདོད། དེར་རིན་འཇལ་བྱས་ནས་ཡུལ་དེའི་རྒྱལ་པོ་ལ་ཞལ་ལྕེ་བཅོལ་བས་གསེར་མོ་རང་ཙམ་ཞིག་གཞོལ་ཟེར་རོ། །དེར་རོ་ལངས་ཀྱི་དྲུང་དུ་བྱོན་ནས་ལོ་རྒྱུས་བརྗོད་པས། མི་ངོ་གསེར་དུ་བསྒྲུབ་པའི་མན་ངག་གནང་། དུར་ཁྲོད་ནས་རོ་བཙལ་ཏེ་བསྒྲུབས་པས་ལོ་གཅིག་ལ་གྲུབ། དེ་བུ་མོ་དང་བརྗེས་བུ་མོ་ཁྲིད་དེ་སློབ་དཔོན་ཀུ་ཀུ་རཱ་ཛའི་དྲུང་དུ་བྱོན་ནས་གདམས་པའི་མཐའ་ཞིབ་ཏུ་བཅད། སློབ་དཔོན་སངས་རྒྱས་
གསང་བ་སྐྱེད་ཚང་གི་མངའ་བདག་ཏུ་བཞུགས་པའི་དྲུང་དུའང་གཏུགས་ནས་སྒྲོ་འདོགས་ལྷག་མ་མ་ལུས་པར་བཅད་དོ། །གཞན་ཡང་སློབ་དཔོན་སོ་ཀྱ་དེ་ཝ་ལའང་ཡང་དག་གི་སྒྲུབ་པའི་མན་ངག་ཞུས་ཏེ་བསེ་བྲག་བྱ་ཁྱུང་གི་ཚལ་དུ་བསྒྲུབས་པས། ཚེ་ལ་དབང་བའི་རིག་འཛིན་ཐོབ། གཞན་དོན་དུ་ཡང་དག་རྩ་བའི་སྒྲུབ་པ་མཛད། སྒྲུབ་སྡེ་མོས་ཀྱང་མཱ་མ་ཀཱིའི་དངོས་གྲུབ་ཐོབ་བོ། །དེ་ལྟ་བུའི་སློབ་དཔོན་ཧཱུྃ་ཆེན་ཀཱ་རས་ཨོ་རྒྱན་ཆེན་པོ་པདྨ་ལ་གསུངས་པ་ཡིན་ནོ། །རིན་འབྱུང་བདུད་རྩི་ཡོན་ཏན་ནི་བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་གྱིས་རྒྱལ་ཚབ་འཆད་པའི་སྐྱེས་བུ་རིགས་ལྔའི་སངས་རྒྱས་ལ་དགོངས་པས་བརྒྱུད། འཇམ་དཔལ་ནི་རྣོན་པོ་དང་། རྡོ་རྗེ་ཆོས་ཀྱི་ས་བསྡུས། རིག་འཛིན་་རིག་པའི་བརྒྱུད་པ་ལི་ཙ་བྱི་དྲི་མེད་གྲགས་པས་ས་བཅུའི་བྱང་སེམས་ལ་བཤད། ལི་ཙ་བྱིས་དགའ་རབ་རྡོ་རྗེ་སོགས་ལ་གང་ཟག་སྙན་བརྒྱུད་ཀྱི་ཚུལ་དུ་བཤད་པས་དགོངས་བརྡ་སྙན་གསུམ་ཀའི་བརྒྱུད་པ་ཡོད་ཅིང་རིམ་པར་བརྒྱུད་པའམ། བདུད་རྩི་ཐོབ་པ་ནི་ཡོན་ཏན་གྱི་རིག་འཛིན་མཁས་པ་བི་མ་ལ་མི་ཏྲ་སྟེ། དེའི་ལོ་རྒྱུས་གདུལ་བྱའི་སྣང་བ་དང་བསྟུན་ནས་གཅིག་ཏུ་མ་ངེས་པར་འཆད་ཀྱང་། ལུགས་གཅིག་ཏུ་ཁྱིམ་བདག་བདེ་ལྡན་ཞེས་བྱ་བ་དང་། ཡུམ་བདག་ཉིད་མ་གསལ་རིག་ཅེས་བྱ་བའི་སྲས་སུ་འཁྲུངས། ལོ་བདུན་ནས་སློབ་མའི་གྲར་ཞུགས་པ་ལ་སུས་ཀྱང་ངོ་མེད་པ་ཞིག་བྱུང་། རིག་པ་ཆེ་བའི་སྙན་པས་ཁྱབ་སྟེ་བསྟན་པ་ལ་བཙུད་ནས་བཤེས་གཉེན་མང་དུ་བསྟེན། རིག་པའི་གནས་རེ་རེ་ལ་སློབ་དཔོན་གསུམ་གསུམ་བརྟེན་ནས་སློབ་དཔོན་བཅོ་ལྔ་ལས་བསླབས་པས། ལོ་ཉི་ཤུ་རྩ་གཅིག་ལོན་ཚེ་པཎྜི་ཏའི་གྲལ་དུ་ཚུད། སྒྲ་སྐད་མི་འདྲ་བ་སུམ་བརྒྱ་དྲུག་ཅུ་མཁྱེན། འབྱུང་བ་བཞི་དང་། དུད་འགྲོའི་སྐད་ལས་ཀྱང་དོན་འཆང་ནུས། མདོ་སྡེ་ཤེར་ཕྱིན་གྱི་བཀའ་ཐམས་ཅད་ཐུགས་ལ་ཆུད་ནས་ཞལ་འདོན་དུ་མཛད་པ་དེས། བཤད་
ལུང་དང་སྒོམ་ལུང་ནོད་པས་སློབ་དཔོན་བརྒྱ་དང་དྲུག་ཅུ་ཡོད་པའི་ནང་ཚན་ལས་བདུད་རྩི་ཡོན་ཏན་གྱི་ཆོས་འཁོར་འདས་ཐམས་ཅད་བཅིང་གྲོལ་མེད་པའི་བདུད་རྩིའི་ངོ་བོར་ཡེ་སངས་རྒྱས་པའི་རང་བཞིན་འདི། སློབ་དཔོན་ཆེན་པོ་སངས་རྒྱས་གསང་བ་ལ་ཞུས། རྒྱུད་སྡེ་མ་ལུས་པ་ཁོང་དུ་ཆུད་ནས་བདུད་རྩི་བམ་བརྒྱད་ཀྱི་འགྲེལ་བ་ལ་སོགས་མན་ངག་གི་ཡི་གེའི་མང་དུ་མཛད་ཅིང་དར་བ་ཡིན་ནོ། །དོན་ཡོད་གྲུབ་པ་ཕུར་བ་ཕྲིན་ལས་ནི། ཆོས་སྐུ་ཀུན་ཏུ་བཟང་པོ་ནས་རྒྱལ་པོ་ཛ་ལ་བརྒྱུད། ཕྱག་ན་རྡོ་རྗེའི་སྒོ་ནས་དངོས་གྲུབ་བརྙེས་པའི་སློབ་དཔོན་པྲ་བྷ་ཧ་སྟི་ཞེས་རྡོ་རྗེ་ཕུར་བའི་རྒྱུད་ཀྱི་མངའ་བདག་ཆེན་པོ། ཕུར་བ་འབུམ་སྡེའི་རྒྱུད་ལ་འགྲེལ་བ་དང་སྒྲུབ་ཐབས་མང་དུ་མཛད་པའི་བདག་ཉིད་ཆེན་པོ་དེ་ལ་བཀའ་འབབས་པའི་རིག་འཛིན་དུའང་བཤད་ཅིང་། བདེ་འདུས་རྩ་རྒྱུད་ཀྱི་འགྲེལ་བ་ལྟར་ན། ཨོ་རྒྱན་གྱི་སློབ་དཔོན་ཆེན་པོ་རིག་འཛིན་པདྨ་འབྱུང་གནས་ཡིན་ཏེ། ཇི་ལྟར་ཡང་དོན་ལ་སྙེལ་བ་མེད་དེ། སློབ་དཔོན་པྲ་བྷ་ཧ་སྟི་ནི་ཨོ་རྒྱན་ཆེན་པོ་ལ་རྡོ་རྗེ་ཕུར་བ་སྟོན་པའི་སློབ་དཔོན་ཡིན་པའི་ཕྱིར་རོ། །དེའང་ལྗོངས་འདིར་རྒྱུད་འདིའི་དར་སོ་ཆེ་ཞིང་དངོས་གྲུབ་མྱུར་བ། བཀའ་གཏེར་གྱི་རྣམ་གྲངས་ཀྱང་ཆེས་མང་ཞིང་གྲགས་ཆེ་བས་ཕྱི་མ་ལྟར་གྱི་ལོ་རྒྱུས་ཅུང་ཟད་གླེང་ན། སྔོན་ཨོ་རྒྱན་རྡོ་རྗེ་འཆང་གིས་ཕྱག་རྒྱ་ཆེན་པོའི་རིགས་འཛིན་བསྒྲུབ་པར་དགོངས་ཏེ། རྒྱ་གར་ཡུལ་གྱི་ཚུར་རོལ། བལ་པོའི་ཡུལ་གྱི་ཕ་རོལ། ཡང་ལེ་ཤོད་ཀྱི་བྲག་ཕུག་ཏུ་བལ་མེ་ཤཱཀྱ་དེ་བས་སྒྲུབ་བདེ་མོ་བྱས་ཏེ་དཔལ་ཡང་དག་མར་མེ་དགུ་པའི་དཀྱིལ་འཁོར་ཞལ་ཕྱེ་ནས་བསྒྲུབས་པས། གླུ་གྱོང་པོ། གནོད་སྦྱིན་རྒོད་མ་ཁ། བྱི་དུར་བར་སྣང་ཁམས་ཀྱི་གློག་མ་སྤྲིན་དང་གསུམ་གྱིས་བར་ཆོད་བྱས་ཏེ་ནམ་མཁའ་ལས་ཆར་གྱི་རྒྱུན་བཅད། རྩི་ཤིང་དང་ལོ་ཏོག་ཐམས་ཅད་བསྐམས་པ་ལས། སློབ་
དཔོན་གྱིས་བར་ཆོད་དུ་མཁྱེན་ཏེ། བལ་པོ་ཀུན་ཞི་དང་། བལ་པོ་ཤི་ལ་མཉྫུ་གཉིས་རྒྱ་གར་གྱི་པཎྜི་ཏ་རྣམས་ཀྱི་དྲུང་དུ་བར་ཆད་འདུལ་བ་ལ་བསྔགས་པའི་ཆོས་ལེན་དུ་མངགས་པས། པཎྜི་ཏ་རྣམས་ཀྱིས་ཤྲཱི་ན་ལནྡྲའི་གཙུག་ལག་ཁང་ནས། དཔལ་ཆེན་རྡོ་རྗེ་ཕུར་བའི་རྒྱུད་བི་ཧོ་ཏ་མ་ཡ་འབུམ་སྡེ་དང་། ཕུར་བ་མི་ཁུར་གཉིས་བརྫངས་ཏེ་ཡང་ལེ་ཤོད་དུ་ཕེབས་པ་ཙམ་གྱིས་བར་ཆོད་ཀྱི་ཚང་ཚིང་སྟུག་པོ་བྱིན་རླབས་ཀྱི་མེ་ལྕེས་བསྲེགས་པར་གྱུར་ཏོ། །དེར་ནམ་མཁའ་ལས་ཆར་རྒྱུན་བབས། ས་གཞི་ལས་འབྲུ་སྨིན། དེའི་སྒྲུབ་པ་མཛད་པས་ཟླ་བ་གཅིག་ན་ཞལ་གཟིགས། ཡང་ཕུར་སྒྲགས་མའི་སྒྲུབ་པ་མཛད་པའི་ཚེ། ནམ་གྱི་སྲོད་ལ་ཤྭ་ན་མ་མཆེད་བཞིས་སྲོག་སྙིང་ཕུལ་ཏེ་དམ་ལ་བཏགས། གུང་ལ་རེ་མ་ཏི་མཆེད་བཞིས་སྲོག་སྙིང་ཕུལ་ཏེ་དམ་ཚིག་གི་ར་བར་བཙུད། ཐོ་རངས་བསེའི་ལྷ་མོ་མཆེད་བཞིས་ཀྱང་སྲོག་སྙིང་ཕུལ་ཏེ་དམ་ལ་བཏགས་སོ། །དེའི་ཚེ་ན་ཨོ་རྒྱན་ཆེན་པོས། བི་ཏོ་ཏ་མ་ལའི་རྒྱུད་ལས་འཕྲོས་ཏེ་རྒྱུད་སྡེ་བཞི་བཅུ་ཞེ་བརྒྱད་དམ། སུམ་ཅུ་རྩ་དྲུག་ཏུ་ཕྱེ་ཞེས་གྲགས་པའི་རྒྱུད་སྡེའི་ངེས་བརྗོད་ཕྱི་མ་ལྟར་ན། རྩ་བའི་རྒྱུད་གསུམ་ནི། ཀཱི་ལ་ཡ་འབྲུ་བཅུ་གཉིས་རྒྱུད། བི་ཏོ་ཏ་མ་ལ་རྩ་བའི་རྒྱུད། རྣལ་འབྱོར་བླ་ན་མེད་པ་གསང་ཆེན་དམ་པའི་རྒྱུད་དོ། །བཤད་པའི་རྒྱུད་བཅུ་ནི། གབ་པ་འཁོར་ལོ་ནག་པོ་སྟོང་སྡེའི་རྒྱུད། ཀཱི་ལ་ཡ་མེ་ལྕེ་ཕྲེང་བའི་རྒྱུད། དྲག་པོ་འདུད་པའི་རྒྱུད། འཇིག་རྟེན་སྣང་བྱེད་ཀྱི་རྒྱུད། རྡོ་རྗེ་བཀོད་པའི་རྒྱུད། དཔྱང་ཐག་ཆད་པའི་རྒྱུད། མྱ་ངན་ལས་འདས་པའི་རྒྱུད། དགོངས་པ་དམ་པའི་རྒྱུད། གསང་བ་དམ་པའི་རྒྱུད། ཁུ་བྱུག་རོལ་པའི་རྒྱུད་དོ། །མན་ངག་གི་རྒྱུད་བཅུ་ནི། ཧཱུྃ་ཀཱ་ར་སེར་བ་འབེབས་པ། སྟོབས་ཆེན་སེར་བཟློག་པ། རྣམ་རྒྱལ་དབང་བསྐུར་བ། དབྱུག་
སྔོན་སྦྱིན་བསྲེག་བྱ་བ། གཤིན་རྗེའི་གཤེད་བཟློག་པ། མི་གཡོ་སྔོན་པོ་དགྲ་ལ་རྦད་པ། རྟ་མགྲིན་ནཱ་ག་ཀླུ་འདུལ་བ། གཞན་གྱིས་མི་ཐུབ་པ་ལས་ལ་གཟུད་པ། བདུད་རྩི་འཁྱིལ་བ་བྱིན་གྱིས་བརླབ་པ། ཁམས་གསུམ་རྣམ་རྒྱལ་གྱི་འཕྱང་དྲུག་ལས་ལ་རྦད་པའི་རྒྱུད་དོ། །ལོ་མ་ལྟ་བུའི་རྒྱུད་གསུམ་ནི། ཤྭ་ན་དཀར་ནག་ཐུན་གྱི་རྒྱུད། རེ་མ་ཏི་སྦས་པ་ནག་པོའི་རྒྱུད། བསོ་མ་སྦས་པ་གཏེར་གྱི་རྒྱུད་དང་གསུམ་མོ། །སྙིང་པོ་དོན་གྱི་རྒྱུད་ལྔ་ལ། སྐུའི་རྒྱུད་ཡེ་ཤེས་ཀྱི་འཁོར་ལོ། གསུང་གི་རྒྱུད་པདྨ་གསང་བ། ཐུགས་ཀྱི་རྒྱུད་རྡོ་རྗེ་འབར་བ། ཡོན་ཏན་གྱི་རྒྱུད་རིན་ཆེན་གཙུག་ལག། ཕྲིན་ལས་ཀྱི་རྒྱུད་ཀརྨ་མཱ་ལེ་དང་ལྔའོ། །འབྲས་བུའི་རྒྱུད་བཞི་ནི། རྡོ་རྗེ་རྩེ་མོའི་རྒྱུད། སངས་རྒྱས་རྩེ་མོའི་རྒྱུད། རྣལ་འབྱོར་རྩེ་མོའི་རྒྱུད། ཡེ་ཤེས་རྩེ་མོའི་རྒྱུད་དོ། །སྐྱེས་བུ་གིང་བཞི་ལ། མཚོན་ཆ་སྤུངས་པའི་རྒྱུད་དོ། །དེ་ལྟར་སུམ་ཅུ་རྩ་དྲུག་ཏུ་ཕྱེ་བ་རྣམས་ལས་བྱུང་བའི་མན་ངག་གི་ཡི་གེ་མཛད་པ་ནི། རྩ་བ་སྡེ་ལྔ་ལ། ཕྱི་ནང་གི་གནོད་གདུག་བསྒྲལ་བའི་ཕྱིར། ལིངྒ་བཅའ་ཐབས་གཙོ་བོར་སྟོན་པ་ཐུགས་གསང་བ། དེ་དང་འབྲེལ་བའི་དཀྱིལ་འཁོར་གྱི་རིམ་པ་གཙོ་བོར་སྟོན་པས་གསང་བ། སྒྲོལ་བའི་ཐབས་ཁྱད་པར་ཅན་སྟོན་པ་རྡོ་རྗེ་གཞོན་ནུའི་རྩ་བ། ལས་ཀྱི་གཞུང་སྲང་བསྟོན་པ་ཕུན་སུམ་ཚོགས་པའི་རྩ་བ་ལས། དེ་ཡང་ལྟ་དགོངས་ཁྱད་པར་ཅན་གྱི་ཕུལ་དུ་བྱུང་བར་སྟོན་པ་བི་ཏོ་ཏ་མ་ལའི་རྩ་བ། དེ་ཐམས་ཅད་ཀྱི་ལུང་རྩ་བར་གྱུར་བ་བཅུ་གཅིག་པ། རྡོ་རྗེ་རིགས་ཀྱི་ལེའུ་གུད་དུ་བཀོད་པ་དྲུག་གོ །གཞན་ཡང་སྒྲུབ་ཐབས་དང་། མན་ངག་དང་། དབང་གི་རིམ་པ་དང་། ཕྲིན་ལས་ཀྱི་བྱང་བུ་དང་། བསྒྲོལ་བ་ཆོས་ཉིད་དུ་གནས་སྦར་བྱ་བ། ཚེ་ལུང་གི་གདམས་པ་ལ་སོགས་ཕུར་སྨད་ཉི་ཤུ་ཐམ་པ་མཛད་ནས། སྔར་གྱི་རྒྱུད་སྡེ་དང་བཅས་པ་ཕོ་ཉ་
པ་གཉིས་ལ་བསྐུར་ནས་གཤེགས་པ་ལས། ཡུལ་ཚ་བ་ཚ་ཤོད་ཅེས་བྱ་བར་ནུབ་གཅིག་བཞུགས་པའི་ནམ་ཕྱེད་ན་ཆོ་འཕྲུལ་མི་བཟད་པ་ཞིག་བྱུང་། གཟིགས་པས་མདུན་ན་ནེ་གུ་དྲུང་དུའང་གཅིག་འདུག། དེ་ཕྱག་རྒྱས་བསྡམས་ལྷུང་བཟེད་དུ་བཅུག་ནས་བཞག་སྟེ། སང་ནངས་པར་ཆུ་མིག་བྱང་ཆུབ་རིས་སུ་དྲོ་བཏབ། དེར་ལྷུང་བཟེད་ཁ་ཕྱེ་ནས་གཟིགས་པས་བུད་མེད་མཛེས་སྡུག་དང་ལྡན་པ་བཞི་འདུག། ཁྱོད་རྣམས་སུ་ཡིན་དྲིས་པས། ངེད་རྣམས་ཡུལ་ཚ་བ་ཚ་ཤོད་ལ་དབང་བྱེད་པའི་ས་བདག་མོ་བཞི་ཡིན། སློབ་དཔོན་ཁྱེད་ཀྱིས་ངེད་ཅག་རྣམས་སེམས་ཅན་ཐམས་ཅད་ཀྱི་ཚེ་སྲོག་ལ་དབང་བྱེད་པའི་བདག་པོར་དབང་བསྐུར་ཅིག་སྐད། སློབ་དཔོན་གྱིས་དེ་ལྟར་མི་རུང་། གསང་སྔགས་རྡོ་རྗེ་ཕུར་བ་བསྒྲུབ་པ་ལ་བར་དུ་གཅོད་པའི་དགྲ་བགེགས་ཀྱི་སྲོག་ལ་དབང་བྱེད་པར་བསྐུར་གྱི་གསུངས་ནས་དེ་ལྟར་དུ་བསྐུར། གསང་བའི་མཚན་རྡོ་རྗེ་ཡ་བྱིན། དེ་བྱིན། བསེ་བྱིན། ཕག་བྱིན་ཞེས་བཏགས་སོ། །དེ་ནས་སྔར་གྱི་ཕུར་བའི་རྒྱུད་སྡེ་བྱུང་བའི་གནས་ཤྲཱིན་ལེ་ནར་བྱོན། པཎྜི་ཏ་རྣམས་ལ་དཔེ་སྔ་མ་གཏད། ཕྱི་མ་རང་གིས་ཕྱེ་བ་དང་། བཀྲལ་བ་རྣམས་གཟིགས་སུ་བཅུག་པས། འདི་དག་ནི་ལུང་དང་མི་འགལ་ཞིང་། སྒྲུབ་པ་པོའི་ཆ་རྐྱེན་དུ་འགྱུར་རོ་ཞེས་བསྔགས་ཏེ། རྒྱལ་མཚན་གྱི་རྩེ་ལ་ཕྱར། དེའི་ཚེ་སློབ་དཔོན་པྲ་བྷ་ཧ་སྟིས་ལུང་བསྟན་ཏེ་དུར་ཁྲོད་སོ་ས་གླིང་དུ་མཁའ་འགྲོ་མ་བདེ་བའི་འཁོར་ལོས་རྡོ་རྗེ་ཕུར་བའི་དཀྱིལ་འཁོར་དུ་དབང་བསྐུར། སླར་ཡང་བལ་ཡུལ་ཡང་ལེ་ཤོད་དུ་བྱོན། ཟ་ཧོར་གྱི་མཁན་པོ་བི་མ་ལ་མི་ཏྲ། བལ་པོ་ཤཱི་ལ་མཉྫུ་དང་གསུམ་གྱིས་དཔལ་རྡོ་རྗེ་ཕུར་བའི་དཀྱིལ་འཁོར་དུ་ནོ་པི་ཀ་མཛད་ཅིང་། སྒྲུབ་པའི་རྟགས་ཀྱང་སོ་སོར་བསྟན་ནོ། །སྤྱིར་རྡོ་རྗེ་ཕུར་བ་ལ་སློབ་དཔོན་ཆེན་པོ་ཀླུ་སྒྲུབ། ཐོགས་མེད། རོ་ལངས་བདེ་བ་རྣམས་
ཀྱིས་མཛད་པའི་གཞུང་ཡང་ཡོད་ཅེས་རྒྱ་གར་གྱི་སློབ་དཔོན་བདེ་བྱེད་གླེང་ངོ། །དེ་ལྟར་རིགས་ལྔ་ལ་རང་བཞིན་ཡེ་ཤེས་ཀྱི་དཀྱིལ་འཁོར་ལྔ་ཞེས་བྱ་ལ། དེ་ལས་སྤྲུལ་པ་ལས་ཀྱི་དཀྱིལ་འཁོར་གསུམ་ནི། སྤྲོ་གཞི་དཀྱིལ་འཁོར་གྱི་བདག་ཉིད་དཔལ་ཆེན་ཆེ་མཆོག་ཧེ་རུ་ཀ་མ་མོ་རྦོད་གཏོང་ངམ། བླ་མེད་ཧེ་རུ་ཀའི་རོལ་བར་བཞེངས་པ་ལ་ཀུན་ཏུ་བཟང་མོ་གནམ་ཞལ་མ་ཡུམ་ཉིད་གཞི་མུ་ཁ་ལི་ཞེས་པའི་རྣམ་རོལ་དུ་གྱུར་ནས་ཐབས་མཆོག་བདེ་བ་ཆེན་པོ་དང་། སྟོང་ཉིད་ཤེས་རབ་ཀྱི་རང་བཞིན་དབྱེར་མེད་དུ་སྦྱོར་བའི་དཀྱིལ་འཁོར་དུ་བཀའ་བབས་ཀྱི་རིག་འཛིན་དྷ་ན་སིངྒ་འམ། །པདྨ་ནག་པོ། གསང་བའི་བདག་པོ་ཕྱག་ན་རྡོ་རྗེ་འཇིག་རྟེན་གྱི་དྲེགས་པ་འདུལ་བའི་ཕྱིར་སྤྲུལ་པའི་རོལ་གར་དྲེགས་པ་ཀུན་འདུལ་དང་། སྟོབས་ལྡན་ནག་པོར་བཞེངས་པ་ལ། གནམ་ཞལ་མའི་སྤྲུལ་པ་ཡུམ་གཉིས་ཀྱིས་འཁྲིལ་བ་དེར་བཀའ་བབས་ཀྱི་རིག་འཛིན་གུ་ཧྱ་ཙཎྜ་དང་། ཤཱནྟི༚་གྷརྦྷ་ཞེས་དུར་ཁྲོད་བསིལ་བའི་ཚལ་ནས་གནམ་ལྕགས་སྡིག་པའི་ཆོས་སྐོར་དགོངས་པའི་རྩལ་གྱིས་བླངས་པའི་དྲག་སྔགས་ཀྱི་བཀའ་བབས་ཀྱི་རིག་འཛིན་ཏེ། ཁ་ཅིག་འདི་གསུམ་ལ་འཇིག་རྟེན་པའི་སྡེ་གསུམ་ཞེས་བོད་དུ་ལྷ་འདྲེད་མ་ལ་བཏགས་ཏེ་ཕྱི་བར་གྲགས་པ་ནི་མི་རིགས་ཏེ། འོག་ཏུ་སྒྲོམ་བུ་བབས་པའི་རྣམ་གཞག་དང་འགལ་བར་འགྱུར་ལ། འོན་ཏེ་འཁོར་གྱི་རོལ་བ་དྲེགས་པ་ཤས་ཆེ་བར་བྱུང་བ་ལ་ཐ་སྙད་འཇོག་ན། དུས་ཀྱི་འཁོར་ལོ་ལ་ཉི་ཟླ་གཟའ་སྐར་ལ་སོགས་པས་བསྐོར་ཞིང་། དཔལ་ལྡན་འབྲས་སྤུངས་རྒྱུ་སྐར་གྱི་དཀྱིལ་འཁོར་ཞེས་གྲགས་པའང་འཇིག་རྟེན་པར་ཐལ་བའི་ཕྱིར་རོ། །དེའི་ཕྱིར་ཨོ་རྒྱན་སངས་རྒྱས་གཉིས་པས། ཕྱི་ལྟར་བྱང་སེམས་ནང་ལྟར་སྒྲུབ་པ་བརྒྱད། །གསང་བ་སློབ་དཔོན་བཀའ་བབས་རྣམས་བརྒྱད་དང་། །ཞེས་གསུངས་པས་ངེས་
པའི་དོན་དུ་བསྒྲུབ་བྱ་སྒྲུབ་བྱེད་གཉིས་སུ་མ་ཡིན་པའི་རིག་འཛིན་བརྒྱད་ལ་བཀའ་འབབས་པའི་ཚུལ་བསྟན་ཏོ། །འོན་ཀྱང་མཐའ་དྲུག་དང་ཚུལ་བཞིས་མདོ་རྒྱུད་ཀྱི་དགོངས་པ་རྣམ་པར་འགྲེལ་བ་སྐྱེས་བུ་མཆོག་གི་སྣང་ཚུལ་དུ་དེས་ཕྱིར་པཎྜི་ཏ་ས་མུ་དྭ་ལ་སོགས་པས་དེ་སྐད་དུ་འཆད་པ་ནི་དགོངས་པའི་དབང་ཡིན་གྱི། འོག་ཏུ་བདེ་གཤེགས་འདུས་པའི་ལུགས་ཇི་ལྟ་བ་བཞིན་ཁས་བླངས་པའི་ཕྱིར་རོ། །དེ་ལས་ཕྱིན་ཅི་ལོག་ཏུ་སྨྲ་བ། གསར་མའི་གཤེད་སྐོར་ལ་སྦྱངས་པ། རྒྱ་གར་གྱི་སློབ་དཔོན་དཔལ་འཛིན་དང་དོ་མཉམ་པར་རང་གིས་རང་ཉིད་ལ་བསྙེམས་པས་མིང་དེ་སྐད་དུ་གྲགས་པའི་མངོན་པའི་ང་རྒྱལ་ཅན་དབུ་རུ་དཔལ་འཛིན་གྱིས། མཐོང་ཆོས་སུ་མནར་མེད་པའི་དམྱལ་བ་བསྒྲུབ་ཕྱིར་སྔ་འགྱུར་རྡོ་རྗེའི་ཐེག་པ་ལ་ལོག་པར་ལྟ་བའི་སྐུར་བ་མི་བཟད་པའི་ངན་རྟོག་གིས་དུག་ཆུ་འཐོར་བའི་ཚེ། ཆོས་ཀྱི་རྣམ་གྲངས་འདི་དག་ལའང་སྨྱོན་པའི་ངང་ཚུལ་གྱིས་ཅི་ཡང་སྨྲ་སྟེ། རང་གིས་འཇིགས་བྱེད་ལྕགས་མཁའ་སོགས་ལ་ཡིག་ཆ་འཇོག་པའི་ཚེ། རྒྱ་གཞུང་དུ་ལྕགས་མཁར་དྲུག་ཅུ་པ་མེད་པའི་ཁུངས་སྨོས་པའི་མཐར། འོན་ཀྱང་རྙིང་མ་པ་ལྟར་རྟོག་པས་བརྟགས་ན་ཞེས་གཞན་ལ་ཆགས་སྡང་གི་ངག་འཁྱལ་སྒྲོགས་བཞིན་དུ། རྒྱ་གཞུང་ལ་མེད་ཀྱང་བྱེད་དུ་རུང་བའི་ཤེས་བྱེད་གླེང་བས་མཚོན་ཏེ་སྲིན་བྱའི་རྫུན་དྲུག་ཏུ་སྨྲ་བ་ལ་ཡིད་བརྟན་མ་ཡིན་པར་ཤེས་པར་བྱ་ལ། དེ་ལྟར་ནའང་གཞུང་ལོག་པར་སྒྲུབས་པ་ལ་དགག་བྱའི་ཐོ་ལུམ་མ་བསྣུན་ན་སེམས་ཅན་བློ་ཆུང་བ་གང་ཞིག་ཚིག་གི་རྗེས་སུ་འབྲངས་པས་ཉེས་པ་མི་བཟད་པ་འཕེལ་གྱིས་དོགས་པས་དེ་ལྟར་དུ་འཆད་ཀྱི། གཞན་དུ་དེ་ལ་གནས་སྐབས་ཐམས་ཅད་སྡང་ཞེན་གྱི་ཡུལ་མ་ཡིན་ཏེ། དྲང་སོང་རིག་པའི་ཡེ་ཤེས་ཀྱིས། གནོད་བརྩོན་དགྲ་ལའང་ཕན་གདགས་གཙོར་བྱས་ཏེ། །བྱམས་པས་བྱང་ཆུབ་མཆོག་གིས་སེམས་ཉིད་བསྐྱེད། །ཅེས་གསུངས་ཕྱིར་ལས་ཀྱི་ནུས་པས།
དེད་པའི་དེ་དག་ནི་ཤིན་ཏུའང་སྙིང་རྗེའི་ཡུལ་ལོ། །དེ་སྐད་དུ་མཆོག་སྤྲུལ་མངའ་རིས་པཎ་ཆེན་གྱིས། ཁྱད་པར་འབྲི་གུང་དཔལ་འཛིན་གྱིས། །རྫོགས་ཆེན་ལོག་པའི་ཆོས་སུ་སྨྲ། །སྔ་འགྱུར་རྡོ་རྗེ་ཐེག་པ་ཡི། །འཆད་བྱེད་ལོ་པཎ་མང་པོ་དང་། །སྒྱུར་བྱེད་ལོ་ཙཱ་མཁས་པ་ཡིས། །བསྒྱུར་བའི་ཆོས་རྣམས་ཐམས་ཅད་ལ། །མ་བྱུང་མ་བསྒྱུར་ཞེས་སྨྲ་བའི། །ལོ་རྒྱུས་གཏན་ཚིགས་བཀོད་ནུས་ནས། །སྒྱུ་འཕྲུལ་ཡང་ཕུར་རྟ་མགྲིན་དང་། །བདུད་རྩི་མ་མོ་རྫོགས་པ་ཆེ། །བཀའ་གཏེར་བཀའ་བརྒྱད་ཐམས་ཅད་ལ། །ཆོས་མིན་ཞེས་པའི་གཏན་ཚིགས་ཀྱིས། །ཡི་གེ་གསལ་བར་བཀོད་པའི་ཚེ། །མཁའ་ལ་རྡོ་རྗེའི་འབྲུག་བསྒྲགས་ཤིང་། །བར་སྣང་འཇིགས་པའི་གློག་ཆེན་འཁྱུག། སྤྲིན་ནག་འཁྲུགས་པའི་གུར་ཁྱམ་ནས། །རྡོ་རྗེའི་དམྱལ་བར་ཨ་ལ་ལ། །ཞེས་པ་ཁྲག་གིས་བྲིས་པའི་རྡོ། །ཆར་བཞིན་བབས་ནས་འཛིན་མའི་ས། །རབ་ཏུ་གས་པའི་ནང་ཚུད་དེ། །ལྕེ་རྩ་སྡིག་པས་ཟ་བ་དང་། །སྤྱིའུ་ཚུགས་སུ་བྱས་ནས་ནི། །དབུར་ལྟོད་བྱང་གིས་དེར་དི་མ། །ད་ལྟ་ཚད་གཟུང་མེད་པ་ཡི། །སྡུག་བསྔལ་དྲག་པོ་མྱོང་བ་ལ། །ཞེ་འགྲས་མེད་པའི་བཟོད་པ་ཡིས། །ངན་སོང་དོང་སྤྲུགས་ཆོ་ག་དང་། །ཡི་གེ་དྲུག་མའི་སྔགས་རྒྱུན་དང་། །མི་འཁྲུགས་རྒྱལ་པོའི་གཟུངས་ཆོག་དང་། །ངན་སོང་སྦྱོར་བ་གཙུག་ཏོར་གྱི། །ཆོ་ག་བཟང་བ་ཉིད་དང་ནི། །སྤྱོད་བྱེད་ཀུན་གྱི་རིག་པ་དང་། །སྨན་བླ་མཆོད་བདུན་མདོ་ཆོག་སོགས། །ཀུན་ནས་ཐུགས་རྗེས་གཟུང་དུ་གསོལ། །དེ་དག་སོ་སོའི་རྩོད་ལན་ནི། །ཁོ་བོས་མང་དུ་བྱས་ཟིན་གྱི། །སླར་ཡང་བགྱིད་པར་དམ་བཅའོ། །ཞེས་གདམས་པ་ཡིན་ནོ། །གཉིས་པ་གཏེར་མའི་ལོ་རྒྱུས་ནི་བདེ་གཤེགས་འདུས་པ་རྩ་བའི་རྒྱུད་ཀྱི་འགྲེལ་བ་སློབ་དཔོན་སངས་རྒྱས་གཉིས་པ། པཎ་ཆེན་
དྲི་མེད་བཤེས་གཉེན། ལོ་ཆེན་བཻ་རོ་ཙ་ན་གསུམ་གྱིས་མཛད་པའི་བརྒྱུད་པའི་ལོ་རྒྱུས་ཀྱི་སྐབས་སུ་གསུངས་པ་རྩ་བར་བཟུང་ནས་བརྗོད་པར་བྱ་བ་ནི། གང་གི་ཚེ་དབྱིངས་རིག་དོན་གྱི་འོག་མིན་ཆེན་པོར་རིག་པའི་ཡེ་ཤེས་གཟུང་འཛིན་གྱི་འཆིང་བ་ལས་རྣམ་པར་གྲོལ་བའི་བཅོམ་ལྡན་འདས་དཔལ་དང་པོའི་སངས་རྒྱས་ཀུན་ཏུ་བཟང་པོ་དུས་བཞི་མཉམ་པ་ཉིད་ཀྱི་ངང་དུ་ཆོས་སྐུའི་ངོ་བོར་བཞུགས་པ་ལས། ཡུམ་ཀུན་ཏུ་བཟང་མོས་དབྱིངས་རིག་རྣམ་དག་གི་ཀློང་ནས་རྡོ་རྗེའི་དམ་ཚིག་ཆེན་པོའི་གླུས་བསྐུལ་ནས་ལོངས་སྤྱོད་རྫོགས་པའི་སྐུར་བཞེངས་ཏེ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་བསྟན་ཏོ། །ཞི་བས་མི་ཐུལ་བ་རྣམས་ཀུན་བཟང་ཆེ་མཆོག་ཧེ་རུ་ཀའི་སྐུར་བཞེངས་ཏེ་ཁྲོ་བོའི་དཀྱིལ་འཁོར་ཆེན་པོ་ཆོས་ཉིད་ཀྱི་རང་སྒྲས་གསུངས་པ་སྟེ། དེའང་རིག་འཛིན་རྡོ་རྗེ་ཆོས་རང་ཉིད་ཚོམ་བུ་དགུའི་དཀྱིལ་འཁོར་དུ་འཁོར་གྱི་ཚུལ་དང་། དཀྱིལ་འཁོར་སོ་སོའི་རིག་འཛིན་བླ་མའི་དཀྱིལ་འཁོར་དུ་རང་ཉིད་གཙོ་བོ་དང་གཞན་འཁོར་གྱི་རྣམ་པར་བསྟན་ཏོ། །དེའང་ཇི་ལྟར་གསུངས་པའི་རྒྱུད་སྡེའི་ངེས་བརྗོད་ནི། བདེ་གཤེགས་འདུས་པ་རྩ་བའི་རྒྱུད། །ཕྱི་མ་མངོན་འབྱུང་གི་རྒྱུད། ཕྱི་མའི་ཕྱི་མ་སྔགས་ཀྱི་རྒྱུད། མ་ཚང་བ་ཁ་སྐོང་བའི་རྒྱུད། འབྱེད་པ་ལྡེ་མིག་གི་རྒྱུད་དེ་ཞི་ཁྲོ་སྤྱིའི་རྒྱུད་ལྔ། དེ་རྣམས་ཀྱི་རྩ་རྒྱུད་གསང་འདུས་ཞི་བ་འདུས་པ་སོགས་བརྒྱད་དང་། ཞི་ཁྲོ་ལྷན་ཅིག་པ། རིག་འཛིན་འདུས་པ་སྟེ་བྱེ་བྲག་གི་རྒྱུད་བཅུ། དེ་ནས་འཇམ་དཔལ་གཤིན་རྗེ་སོགས་སོ་སོའི་གཙོ་བོར་སྤྲུལ་ཏེ་གསུངས་པ་ཡན་ལག་གི་རྒྱུད་ལ། འཇམ་དཔལ་གསང་རྒྱུད་གསང་བ་གྲུབ་པ་བརྗོད་པ་གླུར་བླངས་སོགས་དང་། དམེ་བརྩེགས། འཇིགས་བྱེད་དམར་ནག་དང་བཅས་པ་སྟེ་འཇམ་དཔལ་སྐུའི་རྒྱུད་སོ་བཞི་ལ་སོགས་ཏེ་སྒྲུབ་སྡེ་རང་རང་གི་རྒྱུད་ཀྱི་ཤེས་བྱེད་སྒྲོམ་བུའི་སྐབས་སུ་སྟོན་པའི་གྲངས་ངེས་པ་རྣམས་རྒྱལ་བ་དགོངས་པས་བརྒྱུད་དེ་བརྗོད་པའི་སྒྲ་
ཚིག་རང་མཚན་པ་གང་ཡང་མེད་དོ། །དེ་ནས་ཀུན་བཟང་ཧེ་རུ་ཀ་ཉིད་ཀྱི་ཐུགས་རྗེའི་རོལ་པ་ཚད་མེད་པས་སྐུ་གསུང་ཐུགས་ཡོན་ཏན་ཕྲིན་ལས་ལ་སོགས་པའི་སོ་སོའི་རིག་པ་འཛིན་པའི་བྱང་ཆུབ་སེམས་དཔའ་རྣམས་དང་། གཞན་ཡང་ས་ཐོབ་པ་དང་། ལྷུན་གྱིས་གྲུབ་པ་དང་། རིགས་པ་འཛིན་པ་དང་། ཕྱག་རྒྱ་ཆེན་པོ་དང་། དེད་དཔོན་ལ་སོགས་པའི་རིག་པ་འཛིན་པ་རྣམས་ལ་ཐུགས་རང་བྱུང་ཡེ་ཤེས་ཀྱི་ཀློང་ནས་གཟིགས་སྟངས་དང་། ཕྱག་རྒྱ་དང་། འོད་ཟེར་ལ་སོགས་པའི་བརྡས་བརྒྱུད་པས་སྟོན་འཁོར་ངོ་བོ་གཅིག་པའི་རྣམ་རོལ་གྱིས་མ་རྟོགས་པ་དང་། ལོག་པར་རྟོག་པའི་དྲི་མས་མ་གོས་པར་ཇི་ལྟ་བ་བཞིན་མངོན་དུ་མཛད་པ་ལས། བཀའི་བསྡུ་བ་མཛད་པར་ཞལ་བགྲོས་ཏེ་རིག་འཛིན་དེ་དག་གི་གཙོ་བོར་གྱུར་བ་ཀུན་ཏུ་བཟང་པོ་དང་གཉིས་སུ་མ་ཡིན་པའི་བྱང་ཆུབ་སེམས་དཔའ་རྡོ་རྗེ་ཆོས་སམ། རྡོ་རྗེ་སེམས་དཔའ། ལག་ན་རྡོ་རྗེ། རྡོ་རྗེ་སྙིང་པོ། རྡོ་རྗེ་ཐོད་པ་རྩལ། རྡོ་རྗེ་དྲག་པོ་རྩལ། མིའི་ཐོད་པ་ཅན། རིག་འཛིན་གྱི་རྒྱལ་པོ་ཀུཉྫ་ར་ལ་སོགས་པའི་མཚན་གྱི་རྣམ་འགྱུར་ཅན་དེས། རང་ཉིད་སྟོན་པ་པོ་དང་། རིག་འཛིན་གཞན་རྣམས་འཁོར་དུ་བྱས་པ་ལ་རིག་འཛིན་སློབ་དཔོན་དུ་གྲགས་ཤིང་ལྷོ་ནུབ་ཀྱི་ཚོམ་བུའི་དཀྱིལ་འཁོར་ལའང་འཁོད་པ་ནི་ཇི་སྐད་དུ། དགྱེས་རྡོར་རྩ་རྒྱུད་བརྟག་པ་གཉིས་པ་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་སྡུད་འཁོར་ཀྱང་ང་། །འཇིག་རྟེན་སྟོན་པ་བསྒྲུབ་བྱ་ང་། །འཇིག་རྟེན་འཇིག་རྟེན་འདས་པ་ང་། །ཞེས་པ་ལྟར། རང་ཉིད་ཀྱིས་བསྟན་པར་མཚམས་སྦར་ནས་བསྡུས་ཏེ་གསེར་གྱི་གླེགས་བུར་བཻ་ཌཱུརྻ་ཞུན་མས་བྲིས་ནས་སྤྱི་དང་བྱེ་བྲག་གི་རྒྱུད་རྣམས་སོ་སོར་ཕྱོགས་སུ་བསྡེབས་ཏེ། གླེགས་བམ་དུ་བྱས་ནས་གཞན་ལ་སྣང་བར་མཛད་པ་ལ་རིག་འཛིན་བརྡའི་བརྒྱུད་པ་ཞེས་བྱའོ།
དེ་ནས་མཁའ་འགྲོ་གཏད་རྒྱ་བརྒྱུད་དེ་གཏེར་དུ་སྦས་ཚུལ་ནི། རིག་འཛིན་དེ་རྣམས་ཀྱིས་མིའི་ནང་ནས་སྐལ་ལྡན་མ་རྙེད་དེ། ཀུན་ཏུ་བཟང་མོའི་ཐུགས་སྤྲུལ་ཡེ་ཤེས་དང་ལས་ལས་གྲུབ་པའི་མ་མོ་མཁའ་འགྲོ་རྣམས་ཀྱི་གཙོ་བོ་རྣལ་འབྱོར་མའི་བདག་མོ། འཇིག་རྟེན་དྲེགས་པའི་ཚོགས་ཀྱི་མ་ཆེན་མོ་མཚན་གྱི་རྣམ་གྲངས་སུ། རྡོ་རྗེ་ཕག་མོ། བདག་མེད་ལྷ་མོ། ཉི་ཟླ་ཐོད་ཕྲེང་དུ་གྲགས་ཤིང་། སྐབས་འདིར་མཁའ་འགྲོ་མ་ལས་ཀྱི་དབང་མོ་ཆེར་འབོད་པ་ལ་བཤད་ཅིང་དབང་བསྐུར་ནས། ཁྱོད་ཀྱིས་བཀའ་ཡང་དག་པའི་རྒྱུད་སྡེ་འདི་རྣམས་ཀྱི་སྤྱི་རྒྱུད། བྱེ་བྲག་གི་རྒྱུད་རྣམས་སོ་སོར་ཕྱེ་ལ་རིན་ཆེན་གྱི་སྒྲོམ་སོ་སོར་བཞུགས་སུ་གསོལ་ཏེ་རིག་པ་འཛིན་པའི་རྣལ་འབྱོར་སྐལ་ལྡན་རྣམས་ལ་དངོས་གྲུབ་བྱིན་ཅིག་ཅེས་ལུང་བསྩལ་བས། མཁའ་འགྲོ་མས་སྤྱི་རྒྱུད་ལྔ་ལ་སོགས་པ་རིན་པོ་ཆེ་སྣ་བརྒྱད་ལས་བྱས་པའི་སྒྲོམ་དང་། འཇམ་དཔལ་སྐུའི་རྒྱུད་ལྕགས་སྒྲོམ། པདྨ་གསུང་གི་རྒྱུད་ཟངས་སྒྲོམ། ཡང་དག་ཐུགས་ཀྱི་རྒྱུད་དངུལ་སྒྲོམ། ཆེ་མཆོག་ཡོན་ཏན་གྱི་རྒྱུད་རྣམས་གསེར་སྒྲོམ། ཕུར་བ་ཕྲིན་ལས་ཀྱི་རྒྱུད་རྣམས་གཡུ་སྒྲོམ། མ་མོ་རྦོད་གཏོང་གི་རྒྱུད་རྣམས་བསེ་སྒྲོམ། འཇིག་རྟེན་མཆོད་བསྟོང་གི་རྒྱུད་རྣམས་མཆོང་སྒྲོམ། དམོད་པ་དྲག་སྔགས་ཀྱི་རྒྱུད་རྣམས་གཟིའི་སྒྲོམ་བུར་བཅུག། སོ་སོའི་རིགས་དང་མཐུན་པའི་ཕྱག་རྒྱས་བཏབ། འཛམ་གླིང་གི་ལྟེ་བ་རྡོ་རྗེའི་གདན་དང་ཉེ་བའི་གནས། མཆོག་གི་དངོས་གྲུབ་བདེ་བླག་ཏུ་ཐོབ་པའི་ས། དུར་ཁྲོད་ཆེན་པོ་བསིལ་བའི་ཚལ་ལམ། རོ་མྱགས་དང་འདམ་བུའི་ཚལ་ཞེས་བྱ་བའི་དབུས་ན་འཁོད་པ་རང་བྱུང་གི་མཆོད་རྟེན་བདེ་བྱེད་བརྩེགས་པ་ཞེས་བྱ་བ། ཕྱི་མཆོད་རྟེན་ལ་ནང་གཞལ་ཡས་ཁང་གི་རྣམ་པར་གནས་པའི་ནང་དུ་རིན་པོ་ཆེའི་སྒྲོམ་རྣམས་རྒྱས་བཏབ་པ། གཞན་དུ་མཆོད
རྟེན་གྱི་རྨང་ནས་ཏོག་གི་བར་ལ་ཆོས་ཀྱི་རྣམ་གྲངས་ཐ་དད་དུ་སྦས་པའི་རྣམ་གཞག་ཀྱང་འཆད་དེ་དགོངས་པ་ཙམ་མོ། །དེར་འཇིག་རྟེན་དང་འཇིག་རྟེན་ལས་འདས་པའི་མ་མོ་མཁའ་འགྲོ་ཐམས་ཅད་ཀྱིས་བཀུར་སྟི་ཕུན་སུམ་ཚོགས་པས་མཆོད་ཅིང་། ཆོ་འཕྲུལ་ཆེན་པོ་རྒྱུན་མི་འཆད་པར་སྟོན་པ་ནི་མཁའ་འགྲོ་གཏད་རྒྱའི་བརྒྱུད་པར་གྲགས་སོ། །དེ་ནས་གྲུབ་ཐོབ་རྣལ་འབྱོར་དུ་བརྒྱུད་པ་ནི། རེ་ཞིག་གི་ཚེ་གསང་བའི་བདག་པོ་རིག་འཛིན་རྡོ་རྗེ་ཆོས་ཀྱི་ཐུགས་ཆོས་དབྱིངས་རྣམ་པར་དག་པའི་རོལ་པ་བཀོད་པའི་རྩལ་ལས་ཤར་བའི་ཡེ་ཤེས་དགུའི་སྒྱུ་འཕྲུལ་གྱི་རྣམ་རོལ་ནས་རིག་འཛིན་གྱི་སློབ་དཔོན་ཆེན་པོ་བརྒྱད་དགོངས་པ་ལ་བཞུགས་པའི་སྤྱི་མཐུན་གྱི་གཟིགས་སྣང་ལ། དུར་ཁྲོད་ཆེན་པོ་དེ་ན་ཉིན་པར་རླུང་དང་འཚུབས་མ་འཁྲིགས་ཤིང་། ཐོག་དང་སེར་བ་འབབ། མཚན་མོ་འོད་དང་མེར་འབར་གློག་འཁྱུག་པ་ལ་སོགས་པའི་ཆོ་འཕྲུལ་སྣ་ཚོགས་བྱུང་བས། ཐམས་ཅད་བཀའ་བགྲོས་ཏེ་འདི་ནས་འཇིག་རྟེན་གྱི་ཁམས་འཆོངས་པའི་ཆོས་མ་ནོར་འོང་། ཡང་ན་འཇིག་རྟེན་ཕུང་བའི་ངན་སྔགས་འབྱུང་བས་བཏོན་ན་འཐད་ཅེས་ཞལ་འཆམ་ནས། ནམ་མཁའ་ལ་བྱོན་ཏེ་དགོངས་པ་གཅིག་ཏུ་བསྡུས་ནས་མཆོད་རྟེན་ཆེན་པོའི་མདུན་དུ་མཐུན་པའི་དམ་རྫས་རྒྱ་ཆེན་པོ་བཤམས། བཀའ་བདེན་པའི་ཆོས་མང་དུ་གསུངས། གཞན་དོན་དུ་བརྟུལ་ཞུགས་ཀྱི་དགོངས་པ་བསྐྱེད་ནས་ཏིང་ངེ་འཛིན་གྱི་ལྕགས་ཀྱུ་རྣོན་པོས་མ་ཚོགས་མཁའ་འགྲོ་རྣམས་ཀྱི་སྙིང་ནས་དྲངས་ཏེ་དབང་དུ་བསྡུས་པས། དགུང་ཞག་བདུན་གྱི་ནུབ་མོ་མཁའ་འགྲོ་མ་ལས་ཀྱི་དབང་མོ་ཆེས་གཙོས། མཁའ་འགྲོ་དང་སྡེ་བརྒྱད་ཐམས་ཅད་དབང་དུ་འདུས་ཤིང་བསྟོད་ཅིང་བཀའ་ཉན་པས། ཐུགས་ཀྱིས་གཟིགས་པ་ལྟར་རིན་པོ་ཆེའི་སྒྲོམ་བྱིན་ཞེས་པར་བསྒོས་པས། མཆོད་རྟེན་གྱི་ནང་ནས་སྒྲོམ་རྣམས་གཏེར་སྐྱོང་རྣམས་ཀྱིས་ཕྱུང་ནས། ལས་ཀྱི་དབང་མོ་ཆེས་
གསེར་གྱི་སྒྲོམ་དུ་བི་མ་ལ་མི་ཏྲ། དངུལ་གྱི་སྒྲོམ་ཧཱུཾ་ཀཱ་ར། ལྕགས་ཀྱི་སྒྲོམ་འཇམ་དཔལ་བཤེས་གཉེན། ཟངས་ཀྱི་སྒྲོམ་སློབ་དཔོན་ཀླུ་སྒྲུབ། གཡུའི་སྒྲོམ་སློབ་དཔོན་པདྨ། གཞན་དུ་པྲ་བྷ་ཧ་སྟིར་བཤད་པས་གདམ་པ་ཅན་ཡིན། བསེ་སྒྲོམ་དྷ་ན་སཾ་ཀྲི། མཆོང་གི་སྒྲོན་རོམ་བུ་གྱུ་ཧྱ། གཟིའི་སྒྲོམ་ཤཱནྟི༚་གརྦྷ་སྟེ། སྒྲོམ་བུ་སོ་སོ་བ་བརྒྱད་རིག་འཛིན་རྣམ་བརྒྱད་ལ་གཏད་ནས་རང་རང་གི་བཀའ་ལུང་བསྩལ། དེར་སོ་སོའི་སྒྲོམ་བུ་ཞལ་ཕྱེ་བ་ལས། སློབ་དཔོན་བི་མ་ལའི་གསེར་སྒྲོམ་གྱི་ནང་ནས། ཆེ་མཆོག་ཡོན་ཏན་གྱི་ཆོས་སྡེ། བདུད་རྩི་ཡོན་ཏན་གྱི་རྒྱུད་བདུད་རྩི་བམ་པོ་བརྒྱད་པ། བདུད་རྩི་འཁོར་ལོ་འབར་བ། བདུད་རྩིས་ཕྲེང་བ། བདུད་རྩིའི་བུམ་པ། བདུད་རྩིར་རོལ་པ་ཆེ་ཆུང་། རྣམ་དག་དྲི་མེད། དངོས་གྲུབ་གཏེར་མཛོད། བདུད་རྩི་ཐིགས་པ། ཉེ་བའི་སྙིང་པོ། ལས་རྒྱ་མཚོ་ལ་སོགས་པ་རྣམས་སོ། །སློབ་དཔོན་ཧཱུཾ་ཀཱ་རའི་དངུལ་སྒྲོམ་གྱི་ནང་ནས། ཡང་དག་ཐུགས་ཀྱི་རྒྱུད། ཁྲག་འཐུང་འདུས་པ་ཆེ་ཆུང་། ཧེ་རུ་ཀ་གལ་པོ་ཆེ་ཆུང་། འཇིག་རྟེན་ལས་འདས་པའི་མདོ། སངས་རྒྱས་མཉམ་སྦྱོར། ཟླ་གསང་ཐིག་ལེ། གསང་བ་འདུས་པ། ཡེ་ཤེས་རྔམ་པ་གློག་གི་འཁོར་ལོ་སོགས་ཡང་དག་ཐུགས་ཀྱི་རྒྱུད་སྡེ་བཅོ་བརྒྱད་བྱུང་ངོ། །སློབ་དཔོན་འཇམ་དཔལ་བཤེས་གཉེན་གྱི་ལྕགས་ཀྱི་སྒྲོམ་བུ་ནས། འཇམ་དཔལ་སྐུའི་གསང་རྒྱུད་ལེའུ་ཁྲི་དྲུག་སྟོང་པ། ཟླ་གསང་ནག་པོའི་རྒྱུད་ལེའུ་འབུམ་པ། གཞོན་ནུ་གདོང་དྲུག། མེ་ལྕེ་ཕྲེང་བ། རྡོ་རྗེ་ཐོག་འབེབས། མེ་རླུང་སྐྱིན་ཐང་འཁྲུག་པའི་རྒྱུད། འཇིགས་བྱེད་དམརནག་ལ་སོགས་འཇམ་དཔལ་སྤྱི་དང་བྱེ་བྲག་གི་རྒྱུད་སྡེ་སུམ་ཅུ་རྩ་བཞི་རྣམས་བྱོན་ནོ། །སློབ་དཔོན་ཀླུ་སྒྲུབ་ཀྱི་ཟངས་སྒྲོམ་ནས་པདྨ་གསུང་གི་རྒྱུད་རྟ་མཆོག་རོལ་བ།
རྔོག་མ་ལེ་བརྒན། དབང་ཆེན་འདུས་ལ། སྤུ་གྲི་གསང་བ། དྲེགས་པ་ཚར་གཅོད། ཡང་གསང་ཁྲོས་པ། ནཱ་ག་ཀླུ་འདུལ་ལ་སོགས་པདྨ་གསུང་གི་རྒྱུད་བཅུ་གཉིས་བྱོན། སློབ་དཔོན་པདྨའི་གཡུའི་སྒྲོམ་བུ་ནས། །ཕུར་བུ་ཕྲིན་ལས་ཀྱི་རྒྱུད་བྱི་ཏོ་ཏ་མ་ལ་འབུམ་སྡེ། ཕ་རྒྱུད་རྣལ་འབྱོར་དམ་པ་གསང་ཆེན་ཀཱི་ལ་ཡ་བུ་གཉིས། གཉིས་ཀའི་རྒྱུད་དེ་ཕུར་བའི་སྤྱི་རྒྱུད་དང་། བྱེ་བྲག་ཏུ་ཕུར་བ་མ་རྒྱུད་ལ་རྡོ་རྗེ། ཡེ་ཤེས། སངས་རྒྱས། རྣལ་འབྱོར་རྩེ་མོ་སྟེ་རྩེ་མོ་བཞི། དེའི་ཡན་ལག་བཟློག་པར་བཅུ་གཉིས་ཀྱི་རྒྱུད། ཕྲིན་ལས་རྣམ་པ་བཞིའི་རྒྱུད། སྲུང་མ་བཅུ་གཉིས་ཀྱི་རྒྱུད་དོ། །ཕ་རྒྱུད་ལ་ཡང་སྙིང་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ། སྙིང་པོའི་རྒྱུད་གསུམ། ཡན་ལག་ཁྲོ་བོ་བཅུའི་རྒྱུད་བཅུ། ལོ་མའི་རྒྱུད་བཞི། མེ་ཏོག་གི་རྒྱུད་བཅུ། འབྲས་བུའི་རྒྱུད་བཞི། མ་ཚང་བ་ཁ་སྐོང་གི་རྒྱུད་ལྔ་སྟེ་རྩ་བའི་རྒྱུད་གསུམ། ཡན་ལག་ཕྲ་མོའི་རྒྱུད་མཐའ་ཡས་པ་བྱུང་ངོ། །སློབ་དཔོན་དྷ་ན་སངྐྲིའི་བསེ་སྒྲོམ་ནས། མ་མོ་རྦོད་གཏོང་གི་རྒྱུད། མ་མོ་གསང་བ་གཏན་ཚིགས་ཀྱི་རྒྱུད། སྲིད་པའི་ཀློང་ཆེན་མ་མོ་འབུམ་ཕྲག་གཅིག་སྟེ་རྩ་རྒྱུད་ལེའུ་བརྒྱ་རྩ་བརྒྱད། རྒྱུད་ཕྱི་མ་ལེའུ་གཅིག་དང་། བྱེ་བྲག་ཏུ་ཤེལ་མཚོ་དངས་པ་ལ་སོགས་དཀར་མོ་སྐུའི་རྒྱུད་དགུ །ཙིཏྟ་གདོང་བཟློག་སོགས་སྨུག་མོ་གསུང་གི་རྒྱུད་བཞི། སྨུག་ནག་འཁྱིལ་བ་སོགས་ནག་མོ་ཐུགས་ཀྱི་རྒྱུད་བདུན། སེར་མོ་ཡོན་ཏན་དང་། ལྗང་མོ་ཕྲིན་ལས་ལ་བརྒྱད་ཚན་རེ། གཞན་མཁའ་འགྲོའི་སྒོས་རྒྱུད་མཐའ་ཀླས་པ་བྱུང་ངོ། །སློབ་དཔོན་རོམ་བུ་གུ་ཧྱའི་མཆོད་གི་སྒྲོམ་བུ་ནས། འཇིག་རྟེན་མཆོད་བསྟོད་ལ་དྲེགས་པ་འདུས་པ་སྐུའི་རྒྱུད། ངན་སྔགས་ནག་པོ་གསུང་གི་རྒྱུད། སྲོག་ཏིག་ནག་པོ་ཐུགས་ཀྱི་རྒྱུད། ཡོན་ཏན་དྲེག་པའི་གཏེར་རྒྱུད། ཕྲིན་ལས་དྲེགས་པའི་ལས་རྒྱུད་སོགས།
དྲེགས་པ་འདུས་པའི་རྒྱུད་ལྔ། ཡན་ལག་གི་རྒྱུད་དྲེགས་པའི་སྡེ་དཔོན་སོ་སོའི་སྒོས་རྒྱུད་དཔག་ཏུ་མེད་པ་བྱུང་ངོ། །སློབ་དཔོན་ཤཱནྟི༚་གརྦྷའི་གཟིའི་སྒྲོམ་བུ་ནས། དམོད་པ་དྲག་སྔགས་ཀྱི་སྐོར། ཤེལ་ཕྲེང་དཀར་པོ་སྐུའི་རྒྱུད། དྲག་སྔགས་འདུས་པ་གསུང་གི་རྒྱུད། ཙིིཏྟ་དམར་འབྱིན་ཐུགས་ཀྱི་རྒྱུད། གཏེར་མཛོད་ཆེན་པོ་ཡོན་ཏན་གྱི་རྒྱུད། ལས་མཐའ་སྣ་ཚོགས་ཕྲིན་ལས་ཀྱི་རྒྱུད་ལ་སོགས་པ་དྲག་སྔགས་སྤྱིའི་རྒྱུད། སྔགས་བདག་དྲེགས་པ་བཅོ་བརྒྱད་ཀྱི་སྒོས་རྒྱུད་མཐའ་ཀླས་པ་དང་བཅས་བྱུང་ངོ། །དེ་ལྟར་སློབ་དཔོན་དེ་ཀུན་ཀྱང་སོ་སོའི་དངོས་གྲུབ་ཏུ་ཐོབ་པའི་རྒྱུད་དོན་ལས་མཁས་ཤིང་རང་དབང་བསྒྱུར་བའི་ནུས་པ་ཅན་དུ་གྱུར་ལ། ཆོས་ཐམས་ཅད་དགོངས་པའི་ཀློང་ནས་རང་ཤར་ཡང་གསང་སྔགས་རང་ཉིད་ལེན་པ་ལ་སོགས་པའི་ཁ་ན་མ་ཐོ་བ་སྤང་ཕྱིར། གདམས་པ་ནོད་རེས་དང་མན་ངག་གི་དགོངས་ཉམས་བསྡུར་བ་ལ་སོགས་པས་སྒྲོ་འདོགས་ཆོད་པའི་ཚུལ་བསྟན། རང་རང་ལ་བཀའ་བབས་པའི་རྒྱུད་སྡེ་རྣམས་ལ་བརྟེན་ནས་དངོས་གྲུབ་རྣམ་པ་གཉིས་བདེ་བླག་ཏུ་བརྙེས་ནས་མ་འོངས་པའི་དོན་དུ་རྒྱུད་རྣམས་ལ་དགོངས་འགྲེལ་བསྟན་བཅོས་ཀྱང་རྒྱ་ཆེར་མཛད་ཅིང་གང་ལ་གང་འདུལ་གྱི་རོལ་བ་ཚད་མེད་པས་སེམས་ཅན་མང་པོ་རྣམ་པར་བྱང་བའི་ལམ་ལ་བཀྲ་ཤིས་པ་ཉིད་དོ། །དེ་དག་ཕལ་ཆེར་ཀྱང་བརྟུལ་ཞུགས་སྤྱོད་ཅིང་སྦས་པའི་ངང་ཚུལ་ཅན། སྤྲུལ་པ་དང་། རྣམ་འགྱུར་དང་། སྐུ་ཚེ་དང་། ཕྲིན་ལས་ཀྱི་རོལ་པ་ཚད་མེད་པའི་ཕྱིར། རྟོག་གེའི་རིག་པ་དང་། གདུལ་བྱ་ངོར་སྣང་གིས་གཏན་ཚིགས་རྣམ་གཞག། དྲང་དོན་གྱི་རྣམ་པར་ཐར་བ་ལ་སོགས་པའི་དབང་པོ་བཀོད་ཀྱང་བསམ་པར་མི་ནུས་པའི་རང་བཞིན་ཅན་ཡིན་པའང་ཤེས་པར་བྱ་སྟེ། དཀོན་མཆོག་བརྩེགས་པ་ལས་ཀྱང་། ནམ་མཁས་ཇི་སྙེད་ཁྱབ་གྱུར་བ། །སྐུ་ཡིས་ཀྱང་ནི་དེ་སྙེད་ཁྱབ།
སྐུ་ཡིས་ཇི་སྙེད་ཁྱབ་གྱུར་བ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱིས་ཇི་སྙེད་ཁྱབ་གྱུར་བ། །གསུང་གིས་ཀྱང་ནི་དེ་སྙེད་ཁྱབ། །ཅེས་སོ། །དུས་དེར་རིན་པོ་ཆེ་ས་བརྒྱད་ལས་གྲུབ་པའི་སྒྲོམ་ནི་དབུས་སུ་བཞག་པ་ལས་རྒྱ་མ་བཀྲོལ་བ་སླར་ཡང་བདེ་བྱེད་བརྩེགས་པའི་མཆོད་རྟེན་དེ་ཉིད་དུ་མཁའ་འགྲོ་མ་ལས་ཀྱི་དབང་མོ་ཆེས་གཏེར་དུ་སྦས་པ། དུས་རིང་ཞིག་གི་ཚེ་སློབ་དཔོན་ཆེན་པོ་པདྨ་འབྱུང་གནས་ཀྱིས་མཁའ་འགྲོ་མ་ལས་ཀྱི་དབང་མོ་ཆེ་ལ་མཆོད་ཅིང་བཀའ་བསྒོས་པས་མཁའ་འགྲོ་མས་སྒྲོམ་ཕྱུང་སྟེ་རྒྱ་བཀྲོལ་དབང་བསྐུར་ཨུ་རྒྱན་ཆེན་པོ་ལ་གཏད་པ་ཞལ་ཕྱེ་བའི་ནང་ནས། སྒྲུབ་པ་བཀའ་བརྒྱད་པོ་ཐམས་ཅད་ཀྱི་སྤྱི་རྒྱུད་ལྔ། ཁ་སྐོང་གི་ལུང་ལྔ། བྱེ་བྲག་གི་སྒོས་རྒྱུད་བཅུ་ལ་སོགས་ཆོས་ཚན་བརྒྱ་དང་སོ་ལྔ་བྱུང་བ་ནི། སྒྲུབ་སྡེ་བརྒྱད་དཀྱིལ་འཁོར་གཅིག་ཏུ་བྱས་ཤིང་། སྒྲོམ་གཅིག་ཏུ་བཞུགས་པ་གང་ཟག་གཅིག་ལ་ཚོམ་བུ་ཡོངས་རྫོགས་ཀྱི་ཚུལ་དུ་བཀའ་བབས་པ་བཀའ་བརྒྱད་བདེ་གཤེགས་འདུས་པ་ཞེས་གྲགས་སོ། །གང་ཟག་སྙན་བརྒྱུད་ནི། རྒྱལ་བློན་སྔ་དར་གྱི་ཚེ་ཨོ་རྒྱན་ཆེན་པོས་བོད་དུ་གསུངས་ཤིང་བསྒྱུར་ནས་དར་བ་སྟེ་འོག་ཏུ་འཆད་དོ། །གཉིས་པ་ལུང་ཨ་ནུ་ཡོ་ག་ནི། སྟོན་པ་མྱ་ངན་ལས་འདས་ནས། སྣོད་བཅུད་ཀྱི་བཀྲག་མདངས་ཉམས་ཏེ་མ་རུངས་པར་གྱུར་བའི་ཚེ། མུ་སྟེགས་བྱེད་རྣམས་ཀྱི་ས་གོའུ་ཏ་མའི་བསྟན་པ་ནི་མེ་ཤི་བའི་དུད་པ་བཞིན་དུ་སོང་ངོ་ཞེས་སྨྲས་པའི་ཚེ། དམ་པའི་རིགས་ཅན་དྲ་མ་ལྔ་ལོ་ཉེར་བརྒྱད་དུ་ཏིང་ངེ་འཛིན་ལ་ཞུགས་པ་ལས་ལངས་ཏེ་ཉེས་པ་རྣམས་མཐོང་བས་རི་མ་ལ་ཡའི་རྩེ་མོར་འདུས་ཏེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཡིད་ལ་བྱས་ནས་གདུང་བའི་ཚིག་ཉི་ཤུ་རྩ་གསུམ་གྱིས་བསྐུལ་བ་ནི་འདི་སྐད་དུ། ཨེ་མ་ཀྱི་ཧུད་ཨེ་མ་ཀློང་། སྟོན་པ་སྒྲོན་མེའི་འོད་ནུབ་ན། །འཇིག་རྟེན་མུན་པ་གང་གིས་སེལ། །
ཚད་མའི་ཞལ་དེ་མི་བཞུགས་པས། །ཚད་མས་གསུངས་པའི་བསྟན་པ་ལ། །འཇུག་པར་འཚལ་བའི་འགྲོ་བ་རྣམས། །ལོག་པར་འཇུག་པར་མི་འགྱུར་རམ། །ཚད་མར་དམ་བཅས་གང་ཟག་གིས། །ངེས་མ་རྙེད་པའི་གང་ཟག་ལ། །ཕན་པར་བྱ་ཕྱིར་བཀའ་བཀྲོལ་བ། །གཏན་ལ་ཕབ་པར་འགྱུར་ཞིག་གུ། །ལེགས་ཉེས་འབྱེད་པའི་སྤྱན་ཟུམ་པས། །བཀའ་ཉིད་ཁྱད་དུ་གསོད་བྱེད་པའི། །སྐྱོན་གྱི་སྤྱི་གཙུག་མཐར་ཕྱིན་པས། །ལོག་སྟོབས་འཕེལ་བར་མི་གྱུར་རམ། །ལོག་པའི་བསྟན་པའི་སྤྲིན་འཁྲིགས་པས། །བདེན་པ་གཉིས་ཀྱི་ཉི་ཟླ་ནུབ། །འགྲོ་བ་གང་ཞིག་ལམ་འཚོལ་བ། །མུན་པར་འཁྱམས་པར་མི་འགྱུར་རམ། །སྟོན་པ་མྱ་ངན་འདས་འོག་ཏུ། །བདུད་དང་སྲིན་པོ་མུ་སྟེགས་དང་། །གནོད་སྦྱིན་འབྱུང་པོ་མི་མ་ཡིན། །མ་རུངས་གདུག་པ་སུས་འདུལ་འགྱུར། །དྲི་མེད་བསྟན་པའི་བདུད་རྩི་འདི། །ནུབ་ནས་ཤིན་ཏུ་མ་རུངས་ན། །རྩལ་དང་ལྡན་པ་སུ་ཞིག་གིས། །འབར་ཞིང་སྣང་བར་བྱེད་པར་འགྱུར། །བསླབ་པ་དམ་པ་རིན་པོ་ཆེ། །བྲལ་ནས་ཤིན་ཏུ་མ་རུངས་ན། །སྐྱེས་བུ་དམ་པ་གང་ཞིག་གིས། །ཚུལ་རྣམས་འཛིན་པར་བྱེད་པར་འགྱུར། །སྟོན་མ་མི་བཞུགས་དེ་རྗེས་ན། །སྟོན་པའི་སློབ་མ་ཇི་སྙེད་པ། །འཕགས་དང་གང་ཟག་ཐ་དད་ལ། །ལུང་བསྟན་འབྱུང་བ་གང་སུ་ཞིག །བསྟན་པ་ནམ་མཁའ་འདྲ་བ་ལ། །མོས་པ་ཐ་དད་པར་བཟུང་ནས། །ཡིན་དང་མ་ཡིན་ཆ་འཛིན་ཞིང་། །རྩོད་པ་འཕེལ་བར་མི་འགྱུར་རམ། །དེ་ཉིད་ངེས་པར་རིགས་གཅིག་ལ། །ལུགས་མི་མཐུན་པར་ཐ་དད་སྤྱོད། །རིགས་གཉིས་ཐ་དད་རིགས་རྣམས་སུ། །བསླད་ཅིང་བཅོམ་པར་མི་འགྱུར་རམ། རིང་ཐང་མེད་པའི་རིན་པོ་ཆེ། །མི་མཁས་གང་ཟག་ཐ་དད་པས། །ཉོན་མོངས་འདོད་པས་ཁྲིད་དབང་
གིས། །དུག་དང་བརྗེ་བར་མི་འགྱུར་རམ། །ཆོས་ཀྱི་རྒྱལ་པོ་སྟོན་པ་དེ། །འདི་སྔོན་ཕན་ཆད་ཞལ་བཞུགས་ཏེ། །མ་རུངས་པ་དག་འཚོ་བགྱིས་ན། །གདུག་པ་དགའ་བར་མི་འགྱུར་རམ། །གང་འདིར་བསྟན་པ་གནས་པའི་ཡུམ། །ཇི་སྲིད་གཅིག་ཏུ་གནས་པར་འགྱུར། །གང་འདིར་སྔར་བྱུང་གང་སྔར་བྱུང་། །ཕྱིས་འབྱུང་དུས་འདིར་ཇི་ལྟར་འགྱུར། །སྟོན་པའི་བསྟན་པ་ཐ་མའི་ཚེ། །ངེས་པར་ཇི་ལྟར་འགྱུར་ཞིག་གུ། །བསླབ་པ་འཛིན་པའི་སློབ་མ་རྣམས། །ཐ་མར་ཇི་ལྟར་འགྱུར་ཞིག་གུ། །འདི་ནས་མྱ་ངན་འདས་འོག་ཏུ། །གང་ལྟར་སུ་ཡིས་སྟོན་པར་གཤེགས། །ཞིང་ཁམས་ཕྱོགས་ནི་གང་ན་བཞུགས། །དེ་ན་བསྟན་པ་ཅི་ཞིག་སྒྲོག། དེ་ཡང་འཇིག་རྟེན་མགོན་མེད་རྣམས། །མགོན་དང་སྐྱབས་སུ་སུ་ཞིག་འགྱུར། །འཕྲུལ་གྱི་བློ་དང་གྲོས་སྟོར་ན། །བློ་དང་གྲོས་ནི་གང་ནས་བཙལ། །ངེས་པའི་དོན་འདི་མ་རྙེད་ན། །དེ་ཡང་ངེས་པ་གང་ལ་བཟུང་། །མཆོད་གནས་ཡིད་བརྟན་མི་བཞུགས་ན། །སྐུ་གདུང་ཇི་ལྟར་འགྱུར་ཞིག་གུ། །སླད་ཀྱི་མཆོད་གནས་ཅི་ལ་བགྱི། །དེ་ལྟར་སྟོན་པ་འདས་འོག་ཏུ། །གདུང་འཚོབ་སྐྱེས་བུ་འབྱུང་འགྱུར་རམ། །ཨེ་མ་ཀྱི་ཧུད་ཨེ་མ་ཀློང་། །ཞེས་གདུངས་པས་དུས་གསུམ་གྱི་རྒྱལ་བ་ཚད་མེད་པའི་སྙིང་རྗེ་དང་ཐུགས་རྗེའི་བདག་ཉིད་ཅན་རྣམས་ལྕང་ལོ་ཅན་དུ་འདུས་ཏེ། གསང་བའི་བདག་པོ་ལ་འདི་སྐད་ཅེས་བསྐུལ་ལོ། །གསང་བ་འཛིན་པའི་བདག་པོ་ཁྱོད། །སྔོན་གྱི་གོ་ཆ་སྲ་ལམ་ཅི། །འཇིག་རྟེན་སྡུག་བསྔལ་མི་ཤེས་སམ། །སྙིང་རྗེའི་ས་ལ་བབས་ནས་ཀྱང་། །འཇིག་རྟེན་གདུང་བ་བསལ་བར་རིགས། །སོ་སོ་རིགས་ཀྱི་ཆ་བཟུང་ནས། །མ་རུངས་པ་དག་ཀུན་བཏུལ་ཏེ། །འདོད་ཁྲིད་ཐབས་ཀྱི་ཚིག་རྣམས་ཀྱིས། །ལས་ཀྱི་ཆ་དང་སྤྱོད་མཐུན་པར། །འདུ་ཤེས་བསྒྱུར་བ་བྱས་ནས་ནི། །བཀའ་ཡི་བགྲོ་བ་བཤད་སྦྱར་ནས། ཡང་དག་དོན་ལ་འགོད་
པར་རིག །ཅེས་འཇིག་རྟེན་གྱི་གདུང་བ་སེལ་བར་བསྐུལ་བས་གསང་བའི་བདག་པོ་དངོས་སུ་བྱོན་ཏེ། འོག་མིན། དགའ་ལྡན། རི་རབ་ཀྱི་རྩེ་སྟེ་ལྷ་གནས་གསུམ་དུ་གྲགས་པའི་གནས་ལ་སོགས་པར་སེང་གེ་རྣམ་པར་བསྒྱིངས་པའི་ཏིང་ངེ་འཛིན་གྱིས་དབྱིངས་བདེ་ཆེན་རྣལ་འབྱོར་གྱི་རྒྱུད་སྡེ་ཆེན་པོ་སྔགས་ཀྱི་མདོ་དྲུག་དང་རྩ་བའི་རྒྱུད་བཞི། མན་ངག་གི་རྒྱུད་དྲུག། བྱེ་བྲག་གི་བསྒྲུབ་པ་སྡེ་དྲུག། ལས་ཁ་ཚར་གྱི་རྒྱུད་བཅུ་གཉིས་ལ་སོགས་པ་སྟེ། འདི་དག་གཙོ་ཆེ་ཆུང་གི་སྒོ་ནས་ཨ་ནུའི་རྒྱུད་དུ་བཞག་པ་ལས། རང་བཞིན་དུ་མ་ཧཱ་དང་། ཨ་ནུ་གཉིས་ཀར་གཏོགས་པས་མན་ངག་གི་རྒྱུད་ཡིན་ཏེ། དམ་པའི་རིགས་ཅན་དྲ་མ་ལྔ་ལ་གསང་བའི་བདག་པོས་དངོས་སུ་གསུངས། །དེ་དག་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུརྱ་ཞུན་མས་བྲིས་ནས་དགོངས་པའི་རྩལ་བདུན་གྱིས་ནམ་མཁའ་ལ་སྦས། ཆོས་ཀྱི་རྣམ་གྲངས་དེས་གདུལ་བའི་དུས་ལ་བབས་པའི་ཚེ་ལངྐའི་ཡུལ་དུ་གྲགས་པ་སིང་ག་ལའི་གླིང་གི་ནགས་སུ་བབས་པའོ། །གཞན་ཡང་འདྲ་འབག་ཆེན་མོར། །ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་དུ། གསང་བའི་བདག་པོ་ཕྱག་ན་རྡོ་རྗེས། སྤྲུལ་པའི་སྐུ་དགའ་རབ་ནས་མར་ལ་དཔལ་ཡང་དག་གི་རྒྱུད་དང་། མན་ངག་ལ་སོགས་པ་གསུངས་ཚུལ་དང་། གཞན་ཡང་ཕུར་བ་དང་། མ་མོ་ལ་སོགས་པ་ཇི་ལྟར་བབས་པའི་ཚུལ་རྒྱས་པར་གསུངས་སོ། །ཞེས་ཀྱང་བཤད་དོ། །དོན་གསུམ་པ་ཐེག་པ་མཐའ་དག་གི་ཡང་རྩེ། རྒྱུད་སྡེ་ཐམས་ཅད་ཀྱི་བཅུད་ཕུར། མན་ངག་ཐམས་ཅད་ཀྱི་ཡང་ཞུན་རང་བཞིན་རྫོགས་པ་ཆེན་པོ་རྩོལ་མེད་ཨ་ཏིའི་བསྟན་པ་ལྷ་གནས་གསུམ་དུ་གྲགས་པ་དང་། རྒྱ་གར་འཕགས་པའི་ཡུལ་དུ་བབས་ཚུལ་ལས། དང་པོ་ནི་འོད་གསལ་རྡོ་རྗེ་སྙིང་པོ་བཀའ་ཆེན་རྫོགས་པ་ཆེན་པོ་ལ་བཀའ་བབས་སུམ་ལྡན་དུ་གྲགས་པའི་རྒྱལ་བ་དགོངས་པའི་བརྒྱུད་པ། ཡང་དག་དོན་གྱི་འོག་མིན་ཕྱི་ནང་མེད་པ་ཡེ་ཤེས་རང་གསལ་བའི་གཞལ་ཡས་ཁང་། ཆོས་ཉིད་འདུ་འབྲལ་མེད་པའི་གནས་སུ་དུས་གསུམ་
འཕེལ་འགྲིབ་མེད་པར་མངོན་པར་བྱང་ཆུབ་པའི་སྟོན་པ་ཆོས་ཀྱི་སྐུ་ཀུན་ཏུ་བཟང་པོས་ཆོས་སྐུའི་བྱིན་རླབས་ཀྱིས་རང་གྲོལ་མངོན་སུམ་དུ་གསུངས། ལོངས་སྤྱོད་རྫོགས་པའི་སྐུས་རང་གི་ངོ་བོས་གསུངས། །གསང་བ་རྡོ་རྗེའི་སྐུས་བདེ་ཆེན་ཐབས་ཀྱིས་གསུངས་ཏེ། ཐུགས་རིག་པ་འོད་གསལ་བའི་ཀློང་དུ་དགོངས་པ་གསལ་འགྲིབ་མེད་པར་བསྡུས་སོ། །དེའང་གསང་སྔགས་འབྱུང་བའི་དུས་དྲུག་ལ་བབས་པའི་ཚེ་རྩོལ་མེད་ཨ་ཏིའི་ཐེག་པ་མངོན་དུ་གྲགས་པ་ནི། ཉོན་མོངས་རྒྱུད་དྲག་མོས་མཐུ་ཞན། །ལས་ཀྱིས་ཚེ་ཐུང་བཀའ་དོན་སྟོར། །བསྟན་རྙིང་གྲུབ་མཐའ་ངན་པས་བསྒྱུར། །གཉེན་པོས་མི་ནོན་སྒྲུབ་ཚུལ་ཞན། །དེ་ཚེ་རིག་པའི་རྣམ་རྟོག་ཤར། །ཞེས་པ་ལྟར་སེམས་ཅན་རྣམས་ཉོན་མོངས་པ་རྒྱུད་དྲག། དད་པ་མེད་ཅིང་མོས་པའི་མཐུ་ཞན། ལས་དབང་གི་ཚེ་ཐུང་། བཀའི་དོན་ཚིག་ཙམ་ལ་བསྟན་ཞིང་ཡིན་ཚུལ་གྱི་དོན་སྟོར། བསྟན་པའི་སྙིགས་མར་གྱུར་བས་གྲུབ་མཐའ་ངན་པའི་ནུས་པ་ཆེ། ཉོན་མོངས་པ་གཉེན་པོས་མི་ནོན་ཞིང་རྩོལ་གྲུབ་ཞན་པའི་དུས་སུ། ཤ་ན་འབྱེད། ལ་བཟླ། རང་གྲོལ། མངོན་སུམ་དུ་སྟོན་པ་ཨ་ཏིའི་བསྟན་པ་བྱུང་། དུས་དེའི་ཚེ་སུམ་ཅུ་རྩ་གསུམ་གྱི་ལྷའི་གནས་ན། ལྷ་དེ་བ་བཟང་སྐྱོང་ཞེས་བྱ་བར་བུ་ལྔ་བརྒྱ་རྩ་གཅིག་ཡོད་པའི་བུ་ཀུན་དགའ་སྙིང་པོར་གྲགས་པ། སྐྱེད་ཟླ་གཞན་ལས་བློ་གྲོས་དང་སྒྱུ་རྩལ་ཁྱད་དུ་འཕགས་པ་ཞིག་བྱུང་། དེར་ལྷའི་བུ་གཞན་དག་དགའ་བའི་ཚལ་ལ་སོགས་པར་རོལ་མོ་དང་། རྩེད་འཇོ་དང་། གླུ་གར་ལ་སོགས་པར་དགའ་ནའང་། ཀུན་དགའ་སྙིང་པོ་བསམ་གཏན་གྱི་ཁང་བུར་གཅིག་པུར་འདུག་ཅིང་རྡོ་རྗེའི་བཟླས་པ་ལ་དགའོ། །དེ་ལ་ལྷའི་བུ་སེམས་ལྷག་ཅན་ཞེས་བྱ་བར་གྲགས་སོ། །ལྷའི་བུ་དེ་ལ་ཆུ་མོ་གླང་གི་ལོ་ཆོ་འཕྲུལ་གྱི་ཟླ་བ་ལ་རྨི་ལྟས་ཁྱད་པར་ཅན་བཞི་རྨིས་པར་གྲགས་པ་འདི་ལྟ་སྟེ། དང་པོར་སངས་རྒྱས་ཐམས་ཅད་ལས་འོད་
ཟེར་ཕྱོགས་བཅུར་འཕྲོས་ཏེ་མཐར་རང་ལ་འོད་ཟེར་ལ་སོགས་པས་བསྐོར་བ་བྱས་ཏེ་སྤྱི་གཙུག་ཏུ་ཐིམ་པ་རྨིས་སོ། །གཉིས་པ་ལ་ཚངས་པ་དང་། ཁྱབ་འཇུག །གུ་ལང་གསུམ། ཁྱུར་མིང་དུ་ཟོས་པ་རྨིས་སོ། །གསུམ་པ་ལ་ནམ་མཁའི་དབྱིངས་སུ་ཉི་ཟླ་གཉིས་ཤར་ནས། དེ་གཉིས་རང་གི་ལག་ཏུ་བྱུང་ནས་འཇིག་རྟེན་གྱི་ཁམས་ཐམས་ཅད་འོད་ཀྱིས་གང་བར་བྱས་པ་རྨིས་སོ། །བཞི་པ་ལ་ནམ་མཁའ་ནས་སྤྲིན་རིན་པོ་ཆེའི་ཁ་དོག་ཅན་ལས་བདུད་རྩིའི་ཆར་བབས་ཏེ། རྩི་ཐོག་དང་ནགས་ཚལ་ཐམས་ཅད་རྒྱས་ནས་རིན་པོ་ཆེའི་མྱུ་གུ་མེ་ཏོག་དང་འབྲས་བུ་ཐམས་ཅད་དུས་གཅིག་ལ་རྒྱས་པར་རྨིས་སོ། །དེ་ལྟར་རྨི་ལྟས་བཞི་པོ་ནངས་པར་ལྷའི་དབང་པོ་ལ་བཟླས་པས། ལྷའི་དབང་པོ་ན་རེ། ཨེ་མ་ཧོ། སྙིང་པོ་རྣལ་མ་འབྱུང་བའི་དུས། །ཡང་སྤྲུལ་སྣང་ནུས་དུས་གསུམ་བྱང་ཆུབ་རྫོགས། །ལོ་ཀའི་མུན་སེལ་དུས་མཐའི་ས་ནོན་པའི། །ཐུགས་སྲས་འཛམ་གླིང་དཔལ་འགྱུར་ངོ་མཚར་ཨ། །ཞེས་བསྟོད་ནས་རྨི་ལམ་བཞི་ལ་འབྲེལ་བར་བྱས་པ་ནི། དང་པོ་དུས་གསུམ་སངས་རྒྱས་ཐམས་ཅད་ཀྱི་དགོངས་པ་ཐུགས་སུ་ལོན་ནས། སངས་རྒྱས་ཐམས་ཅད་ཀྱི་རྒྱལ་ཚབ་བྱེད་པའི་རྟགས་ཡིན། གཉིས་པ་བདུད་ཐམས་ཅད་དབང་དུ་འདུས་ཤིང་དུག་གསུམ་མ་སྤངས་པར་རྩད་བཅད་དེ། མངོན་པར་རྫོགས་པར་སངས་རྒྱས་པའི་རྟགས་ཡིན། གསུམ་པ་ཐབས་དང་ཤེས་རབ་ཟབ་པ་དང་རྒྱ་ཆེ་བའི་སྣང་བས་འགྲོ་བ་ཀུན་གྱི་མ་རིག་པའི་མུན་པ་སེལ་བའི་རྟགས་ཡིན། བཞི་པ་མན་ངག་རང་བྱུང་བདུད་རྩིའི་ཆུས་ཉོན་མོངས་པའི་གདུང་བ་གཏན་ནས་བསལ་ཏེ། རྩོལ་མེད་ཀྱི་འབྲས་བུ་ལྷུན་གྱིས་གྲུབ་པའི་རྟགས་ཡིན། ཞེས་སྤྲོ་བ་བསྐྱེད་པས། ལྷའི་བུ་ཤིན་ཏུ་དགའ་བར་གྱུར་ཏེ། ཕྱོགས་བཞིར་གདོང་ཕྱོགས་ནས་སངས་རྒྱས་ཐམས་ཅད་ལ་བསྐུལ་བ། གསུང་གི་མངའ་བདག་ཐམས་ཅད་ཀྱི། །རྩོལ་བའི་ཐེག་པ་མཐར་བཏོན་ནས། །རྩོལ་མེད་ཐེག་པ་མི་གསུངས་པ། །ཐུགས་རྗེ་ཆེན་པོ་ཡལ་ལམ་
ཅི། །སྐལ་ལྡན་གདུལ་བྱ་མཆིས་པ་ན། །ལྷུན་གྱིས་གྲུབ་པ་གསུང་དུ་གསོལ། །ཞེས་གསོལ་བ་བཏབ་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་དང་རིགས་ལྔའི་སངས་རྒྱས་རྣམས་ཀྱིས་དཔལ་རྡོ་རྗེ་སེམས་དཔའ་བྱིན་གྱིས་བརླབས་ཤིང་ཚིགས་སུ་བཅད་པས་རྩོལ་མེད་རྒྱུ་འབྲས་ལས་འདས་པའི་ཐེག་པ་སྣང་བར་བྱ་བའི་དུས་ལ་བབ་པར་བསྐུལ་བས། རྡོ་རྗེ་སེམས་དཔའི་ཞལ་ནས། རྡོ་རྗེ་སེམས་དཔའ་ནམ་མཁའ་ཆེ། །ཚིག་གིས་སྤྱོད་ཡུལ་མ་ཡིན་པས། །བདག་གིས་འགྲོ་བ་ཤིན་ཏུ་དཀའ། །མ་རྟོག་པ་ལ་ཚིག་སྒོ་ནས། །མཚོན་ནས་རྟོགས་པར་བྱ་བའི་ཕྱིར། །ཅི་རིགས་པ་ན་རྣམ་པར་འགྲོ། །ཞེས་གསུང་བར་ཁས་བླངས་ནས་སངས་རྒྱས་ཐམས་ཅད་ཀྱི་དགོངས་པ་དང་མི་འགལ་བར་བྱ་བའི་ཕྱིར་དུས་གསུམ་གྱི་བདེ་བར་གཤེགས་པ་ཐམས་ཅད་རིགས་ལྔའི་ངོ་བོར་བཞུགས་པ་ལ་འདྲི་བ་དང་ལན་ལྡོན་པའི་ཚུལ་གྱིས་གཞི་འབྲས་ཀྱི་དོན་ལ་སྒྲོ་འདོགས་བཅད་པའི་མཐར་སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟང་གི་དབུ་རྩེ། སྲོག་ཤིང་རྡོ་རྗེ་རྩེ་དགུ་པ་དང་བཅས་པའི་གནས་སུ་བྱོན། དེའི་རྩེ་མོར་རིན་པོ་ཆེ་འབར་བའི་ཁྲི་བཤམས། རིན་ཆེན་སྣ་ཚོགས་ལས་གྲུབ་པའི་གདུགས་ཕུབ། དེར་གསང་བ་འཛིན་པ་བཞུགས་ནས་ལྷའི་བུ་སེམས་ལྷག་ཅན་ལ་རྒྱལ་ཐབས་སྤྱི་བླུགས་ཀྱི་དབང་བསྐུར་ནས་མན་ངག་འཕྲུལ་གྱི་ལུང་བཅུ་ཕོག། ལྷུན་གྲུབ་གསུམ་གྱི་དབང་བསྐུར་ནས་སྐུ་གསུམ་ཐུག་ཕྲད་ཀྱི་གདམས་ངག་བྱིན། ཐིག་ལེ་ཆེན་པོའི་དབང་བསྐུར་ནས་སེམས་ཉིད་འགྱུར་མེད་ཀྱི་མན་ངག་བྱིན། མི་འགྱུར་བརྟན་པའི་དབང་བསྐུར་ནས་སྤྱོད་ལམ་རིག་པའི་མན་ངག་བྱིན། རིག་པ་སྤྱི་བླུགས་ཀྱི་དབང་བསྐུར་ནས་ཡེ་ཤེས་རྫོགས་པའི་མན་ངག་བྱིན། གཉིས་མེད་འདྲེས་པའི་དབང་བསྐུར་ནས་ཕྱག་རྒྱ་ཆེན་པོའི་མན་ངག་བྱིན། གཞན་ཡང་དབང་དང་མན་ངག་གི་རྒྱུད་སྡེ་མང་པོ་དུས་མཐའི་སྐད་ཅིག་ལ་རྫོགས་པར་བྱིན་ནས། རྒྱལ་ཚབ་ཏུ་མངའ་གསོལ་བ་སྟེ། དེ་སྐད་དུ།
རྨད་བྱུང་བསྟན་པའི་སྙིང་པོ་འདི། །ལྷ་གནས་གསུམ་དུ་གྲགས་གྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་བྱོས། །ཞེས་སོ། །གཉིས་པ་སྣང་བ་དང་མི་སྣང་བ་དང་། ཕྱེད་སྣང་བའི་གྲོང་ཁྱེར་ཅེས་ཁམས་གསུམ་གྱི་མིང་གིས་རྣམ་གྲངས་སུ་འཇོག་པ་ལས། སྣང་བའི་གྲོང་ཁྱེར་ཏེ་མིའི་ཡུལ་དུ་ཇི་ལྟར་གྲགས་པའི་རྣམ་གཞག་སྤྱིར་བསྟན་པ་དང་། རིག་འཛིན་ངེས་པའི་ལུང་བསྟན་ལྟར་དར་ཚུལ་བྱེ་བྲག་ཏུ་བཤད་པའོ། །དང་པོ་ནི་དེ་ཡང་གདོད་མའི་མགོན་པོ་དཔལ་ཀུན་ཏུ་བཟང་པོ་དེས་ཐོག་མཐའ་མེད་པའི་དུས་ནས་འཁོར་འདས་ཀུན་གྱི་བླ་མར་བྱོན་ཏེ། སྐུ་གསུམ་གྱི་སྣང་བ་ལ་ཞིང་ཁམས་མི་འདྲ་བ་གསུམ་དུ་བཀོད་ཅིང་། དེའི་གོ་ན་ཀུན་ཏུ་བཟང་པོ་ཉིད་ཀྱིས་སྤྲུལ་པའི་སངས་རྒྱས་དང་། དེས་བྱིན་གྱིས་བརླབས་པའི་གྲགས་ཆེན་གྱི་སྟོན་པ་བཅུ་གཉིས་ལ་སོགས་པ་དུས་གསུམ་དུ་གཤེགས་པ་མཐའ་དག་དང་། སེམས་ཅན་གྱི་ཁམས་ཚད་མེད་པས་ཁྱབ་ཅིང་། སེམས་ཅན་དེ་དག་གི་འཁྲུལ་སྣང་ལ་རྡུལ་ཕྲན་རེའི་གོ་ནའང་ཞིང་ཁམས་གྲངས་མེད་པས་གང་སྟེ། ལས་དག་པའི་སྣང་བ་ལ་། སངས་རྒྱས་ཀྱིས་མཛད་པ་ཆེན་པོ་སྣ་ཚོགས་སུ་སྣང་ཞིང་། སླར་མྱ་ངན་ལས་འདས་པ་དང་། བསྟན་པ་གནས་པ་དང་། ལམ་སྒྲུབ་པ་ལ་སོགས་མཐོ་རིས་དང་ཐར་བའི་བདེ་འབྲས་སྤྱོད་ཅིང་། མ་དག་པ་རྣམས་ལ། བསྟན་པ་ནུབ་པ་དང་། ངན་སོང་གི་སྡུག་བསྔལ་དང་། བསྐལ་པ་འཇིག་པ་ལ་སོགས་པ་བདེ་སྡུག་སྣ་ཚོགས་སུ་སྣང་བ་རྨི་ལམ་ལྟ་བུའི་རྣམ་འགྱུར་ལ་སྤྱོད་པས། གང་ན་རྫོགས་པ་ཆེན་པོའི་བསྟན་པ་དར་བ་དང་། གང་ན་རྫོགས་པ་ཆེན་པོའི་བསྟན་པ་ནུབ་པ་དང་། གདུལ་བྱ་དང་འདུལ་བྱེད་ཀྱི་རང་བཞིན་འདི་ཙམ་ཞིག་གོ་ཞེས་བློས་དཔག་པར་མི་ནུས་ཀྱང་། རེ་ཞིག་ཞིང་འདིར་བསྟན་པའི་བཙས་གསུམ་གྱི་བྱིན་རླབས་ལས་སྒྲོན་མེའི་བསྟན་པ་འཛིན་པར་ལུང་བསྟན་པའི་ཚུལ་ནི། དེ་ཡང་སྤྱིར་སྤྲུལ་སྐུས་འདུལ་བའི་གནས་འཛམ་
བུའི་གླིང་འདིར། ཆོས་སྐུའི་བསྟན་པ་དངོས་རང་བཞིན་རྫོགས་པ་ཆེན་པོའི་བྱིན་རླབས་ལས་རང་ཤར་བ། རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་འཁྲུངས་པའི་རྡོ་རྗེ་ཚེ་ལོ་དཔག་མེད་ནས། ད་ལྟའི་བར་གྱི་མི་རྣམས་ཀྱི་ཆག་གང་བ་ཞིག་ཡོད་པ་བསྟན་པའི་བཙས་དང་པོ་སྟེ། དེའང་སྐུའི་བསྟན་པའི་དུས་ཨོ་རྒྱན་གྱི་ཡུལ་རྒྱ་མཚོ་ལན་ཚྭའི་རོ་དང་ལྡན་པའི་གླིང་ན་གནས་ཤིང་། སྐབས་སུ་འོད་དང་སྒྲ་དང་དགེ་སློང་རྫུ་འཕྲུལ་དང་ལྡན་པའི་སྤྲུལ་པ་གྲངས་མེད་པ་འབྱུང་བར་བྱེད་དོ། །གསུང་གི་བསྟན་པའི་དུས་རི་མ་ལ་ཡ་ལག་ན་རྡོ་རྗེའི་གནས་ན་གནོད་སྦྱིན་གྱི་རྒྱལ་པོ་རྣམས་ཀྱིས་ཕྱག་བྱེད་དོ། །ཐུགས་ཀྱི་བསྟན་པའི་དུས་རྡོ་རྗེ་གདན་གྱི་ནམ་མཁའ་ལ་ཡོད་དོ། །དེ་བཞིན་དུ་ལོངས་སྐུའི་བསྟན་པ་དངོས་རང་བྱུང་བསྟན་པ་བུ་གཅིག་གི་བྱིན་རླབས་ལས་རང་ཤར་བ། རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་འཁྲུངས་པའི་གླེགས་བམ་སོར་བཞི་པ་ཆོས་ཀྱི་རང་སྒྲ་སྒྲོག་པ་བསྟན་པའི་བཙས་གཉིས་པ་སྟེ། སྐུའི་བསྟན་པའི་དུས་ན་རྡོ་རྗེ་གདན་གྱི་དཔག་ཚད་ལྔ་བརྒྱའི་སྟེང་གི་ནམ་མཁའ་ལ་མཁའ་འགྲོ་མ་རྣམས་ཀྱིས་བཟུང་ནས་གནས་སོ། །གསུང་གི་དུས་ཀྱང་རྡོ་རྗེ་གདན་གྱི་ནམ་མཁའ་ན་མཁའ་འགྲོ་མས་བཟུང་ངོ། །ཐུགས་ཀྱི་དུས་རབ་ཏུ་ཁྲོས་པ་དྲང་སྲོང་གི་ཕུག་ན་གནས་སོ། །སྤྲུལ་སྐུ་བཅུ་གཉིས་པོའི་བྱིན་རླབས་ལས་རང་ཤར་བའི་རིན་པོ་ཆེ་བརྒྱ་རྩ་གཅིག་གི་རྒྱུ་ལས་སུས་ཀྱང་མ་བྱས་པར་རང་བྱུང་བའི་སྐུ་གཟུགས་འགྲོ་བའི་ལུས་བོངས་དང་འཚམས་པ་ནི་བསྟན་པའི་བཙས་གསུམ་པ་སྟེ། སྐུའི་བསྟན་པའི་དུས་ན་རྡོ་རྗེ་གདན་གྱི་དཔག་ཚད་ལྔ་བརྒྱའི་སྟེང་གི་ནམ་མཁའ་ལ་མཁའ་འགྲོ་མས་བཟུང་ངོ། །གསུང་གི་དུས་ནས་གཅིག་ཏུ་མ་ངེས་ཏེ་འཛམ་བུའི་གླིང་འཁོར་བར་འཕར་ཞིང་། །ལྷ་དང་མིའི་འདུ་བ་ཁྱད་པར་ཅན་གྱིས་མཆོད་པའི་ཞིང་བྱེད། སྐབས་སུ་བསྟན་པ་ལ་གནོད་པ་བྱུང་བའི་ཚེ་སྐུ་ལས་འོད་དང་། ཞལ་ནས་ཧཱུྃ། སྤྱན་ལས་མེ་བྱུང་སྟེ་ཟློག་པར་བྱེད་དོ། །ཐུགས་ཀྱི་བསྟན་པའི་དུས་སུམ་ཅུ་རྩ་གསུམ་བའི་ལྷ་རྣམས་ཀྱི་གཞལ་མེད་ཁང་།
ལག་ན་རྡོ་རྗེའི་ཁང་པ་བརྩེགས་པ་ཞེས་བྱ་བའི་ཡང་ཐོག་ཏུ་གནས་པ་སྟེ། དེ་ལྟ་བུའི་སྐུ་གསུང་ཐུགས་ཀྱི་སྤྲུལ་པ་དེ་གསུམ་ནི་སུས་ཀྱང་མ་བྱས་པས་འཇིག་པར་མི་ནུས་ལ། སྐུ་གསུང་ཐུགས་ཀྱི་བྱིན་རླབས་ལས་རང་ཤར་བས་རྫུ་འཕྲུལ་དང་ཡོན་ཏན་དཔག་ཏུ་མེད། གང་དང་ཕྲད་པ་འབྱུང་བ་རང་དངས་སུ་གྲོལ་བའི་ཕྲིན་ལས་ཅན་ནོ། །དེའང་སྐུའི་རྟེན་དེ་ནི་གང་དང་ཕྲད་པའི་ལུས་འོད་གསལ་དུ་གྲོལ་བའི་ཕྲིན་ལས་བྱེད་དོ། །གསུང་གི་རྟེན་དེ་ནི་ཕྲད་པ་དང་སྒྲ་ཐོས་པ་ཙམ་གྱིས་གྲོལ་བའོ། །ཐུགས་ཀྱི་རྟེན་དེ་ནི་འགྲོ་བ་གང་དག་ནད་ཞི་བར་འདོད་པ་རྣམས་ཀྱི་ནད་ཞི་བར་བྱེད་པ་ལ་སོགས་ཏེ། འདོད་པ་ཐམས་ཅད་སྐོར་ཅིང་ཐར་བ་ལ་སྦྱོར་བར་བྱེད་དོ། །དེའང་ཚེ་ལོ་དཔག་མེད་ནས་སྟོང་ཐུབ་པའི་དུས་མན་ཆད་ལ་སྐུས་འདུལ་བའི་བསྟན་པ་དང་། དེ་ནས་ཚེ་ལོ་བདུན་ཅུ་པའི་བར་དུ་གསུང་གིས་འདུལ་བ། །དེ་ནས་ཚེ་ལོ་བཅུ་པའི་བར་དུ་ཐུགས་ཀྱིས་འདུལ་བའི་བསྟན་པ་སྟེ། དེའི་ཕྱིར་ད་ལྟའི་དུས་ན། རྡོ་རྗེ་ནི་རྡོ་རྗེ་གདན་གྱི་བར་སྣང་ལ་ཡོད་དོ། །གླེགས་བམ་ནི་རབ་ཏུ་ཁྲོས་པ་དྲང་སྲོང་གི་ཕུག་ན་ཡོད་དོ། །སྐུ་ནི་སུམ་ཅུ་རྩ་གསུམ་གྱི་གཞལ་མེད་ཁང་། ལག་ན་རྡོ་རྗེ་ཁང་བུ་བརྩེགས་པའི་ཡང་སྟེང་ན་བཞུགས་སོ། །དེ་ལྟ་བུའི་སྤྲུལ་པ་གསུམ་གནས་པས་འཛམ་བུའི་གླིང་གཞན་ལས་ཆོས་འཕགས་ཤིང་རང་བཞིན་རྫོགས་པ་ཆེན་པོའི་ལུང་རྟོགས་ཀྱི་བསྟན་པ་དར་བ་ཡང་། ཐལ་འགྱུར་ལས། བཀའ་གསང་ངེས་པ་བཅུ་བདུན་དང་། །བསྟན་པའི་གཟེར་དང་འཕྲུལ་ཡིག་བཅས། །སྤྲུལ་སྐུའི་ཞིང་ཁམས་ཐོག་མ་ལ། །སྟོན་པ་ཀུན་ཏུ་བཟང་པོ་ཡིས། །སྟུག་པོ་བཀོད་པའི་གནས་སུ་བཟུང་། །དེ་ནས་ལྕང་ལོ་ཅན་གྱི་གནས། །ཀུན་རིག་རྣམ་པར་སྣང་མཛད་ཀྱིས། །འདི་ཉིད་བཟུང་བས་རིགས་ལྔར་སྨིན། །དེ་ནས་ང་ཡིས་བཟུང་བ་ཡིས། །བསྟན་པའི་སྲོག་ཤིང་དམ་པ་ཡིན། །སངས་རྒྱས་སྟོང་དང་རྩ་གཉིས་ནི། །འདི་ལ་བརྟེན་ནས་ངེས་པར་འབྱུང་། །ཞེས་སོ། །ཚུལ་འདིས་ད་ལྟ་མི་མཇེད་འདིར་སངས་རྒྱས་།
སྟོང་བྱོན་ནས་སེམས་ཅན་གྱི་དོན་མཛད་པའང་བསྟན་པའི་བཙས་གསུམ་གྱི་བྱིན་རླབས་ཡིན་པར་བལྟའོ། །དེ་ལས་ཁྱད་པར་དུ་གྲགས་ཀྱི་སྟོན་པ་བཅུ་གཉིས་ལུང་བསྟན་པ་ནི། དེ་ཉིད་ལས། རྫུས་དང་སྒོང་ལས་སྐྱེས་དང་། དྲོད་དང་མངལ་ལས་སྐྱེས་པ་ཡི། །སེམས་ཅན་རྣམས་ནི་སྨིན་པར་བྱེད། །གདུལ་གཞིའི་བསྟན་པ་འདི་ཉིད་ནས། །བཅུ་གཉིས་ཆོས་ཀྱི་འཁོར་ལོ་བྱུང་། །འདི་ཡིས་མཛད་པ་སུམ་ཅུ་དྲུག། སྐུ་གསུང་ཐུགས་ལ་བརྟེན་ནས་ནི། །གདུལ་ཡུལ་སེམས་ཅན་རྣམས་ལ་སྣང་། །ཞེས་གསུངས་པ་སྟེ་དེའི་རང་བཞིན་རྒྱས་པ་ནི་ཐེག་པའི་མཆོག་རིན་པོ་ཆེར་གསུངས་པས་འདིར་མ་བཀོད་དོ། །དེའང་རྡོ་རྗེ་འཆང་གིས་ཚངས་ཆེན་གྱི་ཞིང་ཁམས་བཀོད་ནས་བསྐལ་པ་གྲངས་མེད་འདས་པའི་རྗེས་ལ། ཞིང་འདི་ཆགས་པའི་མགོ་རྩོམ་པ་ན་བསྟན་པའི་བཙས་གསུམ་པོ་འདི་ནས་བྱང་ཕྱོགས་གཡོ་ལྡན་ཞེས་བྱས་པའི་ཞིང་ན་གནས་ཏེ། ཞིང་དེར་ཡང་སེམས་ཅན་སོ་སོའི་ལས་ཀྱིས་འདི་དག་འབྱུང་བའི་དུས་བདུན། མི་འབྱུང་བའི་དུས་བདུན་ཏེ་བཅུ་བཞི་ལ་དར་ནུབ་ཏུ་འགྱུར་རོ། །འབྱུང་བའི་དུས་བདུན་ནི། སྙིང་པོ་ལྡན། རྫོགས་ལྡན། རྫོགས་ལྡན་ཆེན་པོ། ཉིས་ལྡན་སུམ་ལྡན། རྩོད་ལྡན་ཆེན་པོ་སྟེ་རྩོད་ལྡན་ཆེན་པོ་སྟེ་བདུན་ནོ། །དེ་དག་གི་བར་དུ་ནུབ་པས་མུན་པའི་བསྐལ་བ་བདུན་ཞེས་བྱའོ། །དེའང་སྔོན་སྟུག་པོ་བཀོད་པར་ཀུན་ཏུ་བཟང་པོས་བཟུང་། དེ་ནས་ལྕང་ལོ་ཅན་དུ་རྣམ་པར་སྣང་མཛད་ཀྱིས་བཟུང་། དེ་ནས་ཞིང་འདིའི་སྣོད་བཅུད་ཆགས་ནས་བསྐལ་བ་དང་པོ་དགའ་ལྡན་བརྩེགས་པ་ལ་སྟོན་པ་བྱོན་པས། བསྟན་པའི་བཙས་གསུམ་པོ་འདིར་བབས་ནས། རིམ་པ་བདུན་གྱིས་དེར་ནུབ་བྱས་ཏེ་མཐར་གཞན་དུ་འཕར་བ་ནི། སྒྲ་ཐལ་འགྱུར་ལས། འདི་ལྟར་བསྟན་པ་འདི་ཉིད་ལ། ལྷག་མའི་བསྟན་པ་འདི་ལྟ་བུ། དུས་ཀྱི་ངེས་པ་ཆེ་བར་བཤད།
སྙིང་པོ་ལྡན་དང་རྫོགས་ལྡན་དང་། །རྫོགས་ལྡན་དག་ནི་ཆེན་པོ་དང་། །དེ་བཞིན་གཉིས་དང་སུམ་ལྡན་པ། །རྩོད་ལྡན་དང་ནི་རྩོད་ལྡན་ཆེ། །དེ་དག་རེ་རེའི་བར་དག་ཏུ། །མུན་པའི་བསྐལ་པ་དྲུག་ཅུ་ལ། །བསྟན་པའི་བཙས་ནི་གཞན་དུ་འགྱུར། །བྱང་གི་ཕྱོགས་ནི་གཡོ་བ་ལྡན། །བསྟན་པའི་སྒྲོན་མེ་དེར་གནས་ཏེ། །དཔལ་ལྡན་སྐྱོང་ཞེས་བྱ་བ་ཡིས། །ཞེས་པ་ལ་སོགས་པའི་ལུང་གིས་གསལ་བར་བསྟན་པ་ལྟར། བྱང་ཕྱོགས་གཡོ་ལྡན་དགེ་སློང་དཔལ་ལྡན་སྐྱོང་དང་སྦྱིན་བདག་རྒྱལ་པོ་ཛི་ན་མི་ཏྲ་ཞེས་པ་ལ་ལོ་སྟོང་དང་སུམ་བརྒྱ་སྒྲོན་བསྐལ་དང་། །དེ་ནས་མུན་བསྐལ་དྲུག་ཅུ། དེ་ནས་ལྷོ་ཕྱོགས་འཚལ་བ་སྐྱོབ་ཏུ་དགའ་བའི་དཔལ་དང་། ཡོན་བདག་དགེ་བའི་དངོས་གྲུབ་ཀྱིས་སྒྲོན་བསྐལ་ལོ་བརྒྱ། དེ་ནས་མུན་བསྐལ་ལོ་བརྒྱ་ཉི་ཤུ། དེ་ནས་ཤར་ཕྱོགས་རྡོ་རྗེ་འབྱུང་བའི་རི་རྩེར་བབས་ཏེ། རྒྱལ་པོ་སུ་ཏྲ་སྡེ་དང་། ཡོན་བདག་ཟམ་ཟེ་ཨ་ཀ་རས་བཟུང་སྟེ་སྒྲོན་བསྐལ་སྟོང་བཞི་བརྒྱ་དང་དེ་འོག་མིན་བསྐལ་ལོ་ལྔ་སྟོང་། དེ་ནས་ནུབ་ཕྱོགས་བྷ་ཏིས་ལིར་བབས་ཏེ་དགེ་སློང་བདེ་བའི་སྐྱོང་དང་། ཡོན་བདག་དཔའ་བོ་འཇིགས་ཀྱིས་སྒྲོན་བསྐལ་ལོ་སྟོང་དང་། དེ་ནས་མུན་བསྐལ་ལྔ་སྟོང་། དེ་ནས་འདིར་བབས་པ་ནི་ཐལ་འགྱུར་ལས། དེ་ནས་ཡང་ནི་འདིར་བབས་ཏེ། །རྡོ་རྗེ་གདན་ཞེས་འབྱུང་བའི་གནས། འདི་ཉིད་འཕེལ་ནས་འོད་འབར་བ། །ལོ་ནི་ལྔ་བརྒྱ་ལྔ་བཅུའོ། །འདི་ཉིད་བློ་གྲོས་བཟང་པོས་འཛིན། །དེ་ཡི་ཡོན་བདག་མཁའ་འགྲོ་མ། །བསིལ་བྱེད་གཙང་མས་བྱས་ནས་ནི། །དེའི་འོག་ཏུ་འཇིག་རྟེན་འདི། །ས་ཆུ་མེ་རླུང་བསྡེབ་འཁྲུག་ནས། །མི་གནས་སྟོངས་པ་ཆེན་པོར་འགྱུར། །ཅེས་པ་ལྟར་ལས་བློ་གྲོས་བཟང་པོ་ནི་འདི་འཛིན་པ་ཐམས་ཅད་དང་། ལོ་ལྔ་བརྒྱ་ནི་ལོ་བོ་ཆེ་ཞེས། །ལོ་ལྔ་བརྒྱ་ལྔ་བརྒྱར་ལོངས་པའི། །ཞེས་ཀུན་མཁྱེན་ཆེན་པོས་གསུངས་སོ། །དེ་ཙམ་ཞིག་མའི་འཇིག་རྟེན་དུ་བསྐལ་བ་དང་པོ་ནས། ཚེ་ལོ་བཅུ་པའི་ཡ་ཐོག་འདིའི་བར་སྣང་ལ། གཞན་རྣམས་ནི་མ་མ་ཡིན་བ་མཁའ་འགྲོ་མའི་གནས་དོན་བྱེད་པར་
གྲགས་སོ། །དེ་ལས་ཁྱད་པར་འཛམ་བུའི་གླིང་འདི་ཉིད་ཀྱི་དར་ནུབ་བཅུ་བཞི་ནི། སྒྲ་ཐལ་འགྱུར་ལས། བསྟན་པ་འཇིག་པའི་ཉེ་རྒྱུ་ནི། །དེ་དག་སོ་སོའི་གནས་དག་ཏུ། །གང་ཟག་ལོག་སྲེད་ཅན་ཞེས་བྱ། །རེ་རེ་དག་གིས་བསྟན་པ་ཀུན། །འཇིག་པར་བྱེད་པའི་ཉེ་རྒྱུ་ཡིན། །ཞེས་པས་མུན་པར་བྱེད་པའི་གང་ཟག་སྤྱིར་བསྟན་ནས། །འདི་ཉིད་དང་པོ་མུན་པའི་དུས། །འཛམ་བུའི་གླིང་གི་ནུབ་ཕྱོགས་སུ། །རྒྱལ་པོ་ལག་པ་སོར་མོ་དྲུག། མདུན་ན་སོ་ལྷག་སྔོན་པོ་ཡོད། །ལག་པ་གཡས་པའི་གྲུ་མོ་ལ། །སྨེ་བ་ནག་པོ་སྡིག་པའི་དབྱིབས། །རབ་ཏུ་འཇིག་པ་ཡོད་པ་ཡིས། །སངས་རྒྱས་བསྟན་པ་མུན་པར་གྱུར། །ལོ་ནི་དྲུག་ཅུའི་བར་ལ་འགྱུར། །ཅེས་དང་པོ་མུན་པར་ཡོད་ཅིང་། །དེ་ནས་སྒྲོན་མེའི་དང་པོ་ལ་ལོ་སྟོང་དང་སུམ་བརྒྱ་ཡོད་པ་ནི། སྔ་མ་ལས། དེ་ནས་དཔལ་འཛིན་དང་པོ་འཛིན། །སྟོང་དང་སུམ་བརྒྱ་འདས་འོག་ཏུ། །ཞེས་བཤད་ལ། །མུན་པ་ནི། །ཡང་ནི་འཛམ་གླིང་བྱང་གི་ངོས། །གཟི་བརྗིད་ལྡན་པའི་རི་ཡི་རྩེར། །དགེ་སྦྱོང་གཟུགས་ལ་བྱང་སེམས་བྲལ། །གཡས་པ་ལ་ནི་རྣ་བ་གཉིས། །མིག་ནི་ཟུར་གསུམ་མས་ཡར་འགེབས། །འདི་དང་མུ་སྟེགས་སྡེ་རྩོད་ནས། །ལོ་ནི་དྲུག་ཅུ་མུན་པར་འགྱུར། །ཅེས་སོ། །དེ་ནས་སྒྲོན་མེ་གཉིས་པ་ནི། སྔ་མ་ལས། །དེ་འོག་བདེ་བའི་ལྷ་ཞེས་བྱ། །ལོ་བརྒྱའི་བར་དུ་འཕེལ་བར་བྱེད། །ཅེས་དང་། ཡང་མུན་པ། དེ་འདས་འཛམ་གླིང་བྱང་ཤར་དུ། །ཆུ་བོ་རབས་མེད་འབབ་པའི་རྩར། །རྒྱལ་པོའི་ལུས་ལ་བསོད་ནམས་ལྡན། །མིག་ནི་གཅིག་ལས་མེད་པ་ལ། །ཡན་ལག་རགས་ཤིང་ལུས་ཤེད་ཅན། །འཕོང་དང་སྒྱུ་རྩལ་རྣམས་ཀྱིས་བརྒྱན། །འདིས་ནི་ཆོས་བྱེད་བསྣུབས་ནས་ནི། །ལོ་ནི་དྲུག་ཅུ་བསྟན་པ་ཉིད། །འདིར་ནི་ནུབ་ནས་གཞན་དུ་འགྱུར། །ཅེས་སོ། །ཡང་སྒྲོན་མེ་གསུམ་པ། དེ་འདས་རང་སངས་རྒྱས་
ཀྱི་གཟུགས། །རྡོ་རྗེ་གདན་ནས་ནུབ་ཏུ་འབྱུང་། །དེས་ནི་བསྟན་པ་དམ་པ་ཉིད། །ལོ་ནི་བརྒྱ་དང་ཉི་ཤུར་གནས། །ཞེས་དང་། མུན་པ། དེ་འདས་འོག་ཏུ་འཛམ་གླིང་དབུས། །གསེར་གྱི་གྲོང་ཁྱེར་ཞེས་བྱ་བར། །གནས་བརྟན་ལུས་ལ་ལྕེ་རྩེ་གཉིས། །བོངས་ཆུང་ཡན་ལག་ཐུང་བ་ཞིག། སྡེ་བ་རྩོད་ཅིང་མཚོན་ཆ་འཛིན། །འདི་བྱུང་བས་ནི་མུན་པར་ཡང་། །ལོ་ནི་དྲུག་ཅུའི་བར་ལ་འགྱུར། །ཅེས་སོ། །སྒྲོན་མེ་བཞི་པ་ནི། དེ་འདས་འོག་ཏུ་འཛམ་གླིང་ཤར། །ཆུ་བོ་དག་ནི་ལོ་ཀ་ཏེ། །གཡས་ཀྱི་ཕྱོགས་ཀྱི་འགྲམ་དག་ཏུ། །དཔལ་གྱི་སེང་གེ་ཞེས་བྱ་བས། །ལོ་ནི་སྟོང་དང་བཞི་བརྒྱར་གནས། །ཞེས་དང་། མུན་པ། དེ་ནས་ཡང་ནི་འཛམ་གླིང་དབུས། །ཆུ་བོ་ཆེན་པོ་གངྒཱའི་འགྲམ། །རྒྱལ་པོའི་བུ་ལ་དཔུང་པ་ནི། །མར་གད་མདོག་དང་མཚུངས་པ་ལ། །རབ་ཏུ་བྱུང་བ་སོར་བཞིའི་ཚད། །འདི་བྱུང་ནས་ནི་མུན་པར་ཡང་། །ལོ་ནི་དྲུག་ཅུའི་བར་ལ་འགྱུར། །ཅེས་སོ། །སྒྲོན་མེ་ལྔ་པ་ནི། དེ་འདས་འོག་ཏུ་ཀ་མ་ལ། །ཤཱི་ལ་ཞེས་པའི་གཙུག་ལག་ཁང་། །དེ་ཡི་བདག་པོ་གཞོན་ནུའི་མགོན། །འདིས་ནི་ལོ་སྟོང་བར་དུ་གནས། །ཞེས་དང་། །མུན་པ། དེ་འོག་འཛམ་བུའི་གླིང་གི་ལྷོ། །ཚངས་པའི་གླིང་ཞེས་བྱ་བའི་གྲོང་། །དམངས་ཀྱི་རིགས་ལ་སེངྒེའི་མགོ །འདི་ནི་སྐྱེས་ནས་ཟླ་གསུམ་ནས། །དྲུག་ཅུའི་བར་ལ་མུན་པར་འགྱུར། །ཅེས་སོ། །སྒྲོན་མ་དྲུག་པ་ནི། དེ་འོག་བྱ་རྒོད་ཕུང་པོ་ལ། །དགེ་སློང་མཛེས་བྱེད་གཞོན་ནུ་ཡིས། །ལོ་ནི་ལྔ་བརྒྱ་ལྔ་བཅུར་གནས། །ཞེས་དང་། །མུན་པ། དེ་འདས་འོག་ཏུ་འཛམ་གླིང་མཚམས། །ཁ་ཆེའི་ཡུལ་ཞེས་བྱ་བ་ཡི། །སྒྲ་དང་ལྡན་པའི་གྲོང་ཁྱེར་དུ། །བྱ་ཡི་ལུས་ལ་མི་ཡི་གདོང་། །རིགས་ངན་དག་གི་ནང་དུ་སྐྱེ། །འདི་ཉིད་སྐྱེས་ནས་ལོ་བཅུ་ན། །དྲུག་ཅུ་དག་ཏུ་མུན་པར་འགྱུར། །ཅེས་སོ། །དེ་ནས་སྒྲོན་མེའི་ཐ་མ་བདུན་པ་ནི། དེ་འདས་འོག་ཏུ་འཛམ་གླིང་གི་
དབུས་ནས་ཤར་དུ་དཔག་ཚད་ལྔ། །དགེ་སློང་ཤཱཀྱ་ཇི་ཀ་ཡི། །འདིས་ནི་ལོ་བཅུའི་བར་དག་ཏུ། །སྒྲོན་མེ་འབར་བ་བཞིན་དུ་འགྱུར། །དེ་ལྟར་རིམ་པ་བདུན་གྱིས་ནི། །འཛམ་བུའི་གླིང་དུ་འཕེལ་འགྲིབ་བྱེད། །ཅེས་བཤད་པའི་ལོ་བཅུ་ཡང་ལོ་བོ་ཆེར་ཤེས་པར་བྱ་ཞིང་། དེ་ཡང་དང་པོའི་སངས་རྒྱས་ལས། སྟོང་པ་སྟོང་བ་མཁའ་ཀླུ་ལག་པ་ཐུབ་པ་རི་བོང་ཅན་ནི་རྫོགས་ལྡན་དུས་ཀྱི་ཚད་ཡིན་ནོ། །མཁའ་མཁའ་སྟོང་པ་རོ་དང་དགུ་དང་ཉིན་མོར་བྱེད་པ་སུམ་ལྡན་ལོ་ཡི་གྲངས་སུ་རབ་ཏུ་གྲགས། །སྟོང་བ་མཁའ་དང་རིག་བྱེད་རོ་དང་ལག་རོ་ཞེས་བྱ་ཉིས་ལྡན་ཡིན་ཡང་དག་གོ། །སྟོང་པ་ནམ་མཁའ་མཁའ་དང་མིག་དང་ཡོན་ཏན་གཏེར་བརྩོད་ལྡན་ལོ་ཡི་གྲངས་སུ་འགྱུར། །ཅེས་དུས་བཞི་སོ་སོའི་ཚད་རྫོགས་ལྡན་ལ་མི་ལོ་འབུམ་ཕྲག་བཅུ་བདུན་དང་སྟོང་ཕྲག་ཉི་ཤུ་རྩ་བརྒྱད། སུམ་ལྡན་ལ་འབུམ་ཕྲག་བཅུ་གཉིས་དང་སྟོང་ཕྲག་དགུ་བཅུ་རྩ་དྲུག། ཉིས་ལྡན་ལ་འབུམ་ཕྲག་བརྒྱད་དང་སྟོང་ཕྲག་དྲུག་ཅུ་རྩ་བཞི། རྩོད་ལྡན་ལ་འབུམ་ཕྲག་བཞི་དང་སྟོང་ཕྲག་སུམ་ཅུ་རྩ་གཉིས་ཡོད་པའི་གཏན་ཚིགས་ཀྱིས་བསམ་པར་མི་བྱ་སྟེ། དེ་ལ་དམིགས་བསལ་གྱི་དུས་བདུན་དུས་རྣམ་པར་གཞག་པ་དང་། དངོས་ཀྱི་བསྟན་པ་དེས་ཇི་ཙམ་གདུལ་བྱའི་གྲངས་ཡིན་པ་ཤེས་པར་བྱའོ། །གཉིས་པ་རིག་འཛིན་ངེས་པའི་ལུང་བསྟན་བྱེ་བྲག་ཏུ་བཤད་པ་ནི། དེ་ལྟར་དར་ནུབ་ཀྱི་རིམ་པ་བདུན་ཚེ་ལོ་བཅུ་པས་ཚངས་པའི་སྒྲོན་མེའི་བསྟན་པ་མཐའ་མ་འདི་ཉིད་འཛིན་པ་པོ་བྱེ་བྲག་ཏུ་ཐལ་འགྱུར་ནས་ལུང་བསྟན་པ་ལྟར་གླེང་བ་ནི། །ང་ནི་མྱ་ངན་འདས་འོག་ཏུ། །ནུབ་ཕྱོགས་ཨུ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བཛྲ་ཧེ། །འདས་ན་དམ་པའི་བསྟན་པ་འཛིན། །ཅེས་ཞིང་འདིའི་རྒྱ་གར་འཕགས་པའི་ཡུལ་དུ་རྒྱུ་འབྲས་ལས་འདས་པའི་རྩེ་མོ་སྣང་བར་བྱེད་པའི་སྟོན་པ་མཆོག། གསང་བདག་སྤྲུལ་པའི་སྐུ་རིག་འཛིན་གྱི་
གཙོ་བོ་དགའ་རབ་རྡོ་རྗེ་སྟེ། དེའི་ལོ་རྒྱུས་ལ་གཅིག་ཏུ་མ་ངེས་པའི་རྣམ་པར་ཐར་བ་མཐའ་ཡས་པར་སྣང་བ་ནི། རྒྱུད་བླ་མ་ལས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཡོན་ཏན་སངས་རྒྱས་ཕྲིན་ལས་རྣམས། །དག་པའི་སེམས་ཅན་གྱིས་ཀྱང་བསམ་བྱ་མིན། །ཞེས་པ་ལྟར་སྐུ་གསུང་ཐུགས་ཀྱི་རོལ་པ་ཚད་མེད་ཅིང་གདུལ་བར་བྱ་བའི་སྣང་ཚུལ་དང་བསྟུན་ནས་གང་ཟག་རེའི་མོས་ངོར་ཡང་མཛད་པ་མཐའ་ཡས་པར་སྟོན་པའི་ཕྱིར་རྟག་པ་ཐེར་ཟུག་ཏུ་སྨྲ་བར་མི་རིགས་ཀྱང་། རེ་ཞིག་གདུལ་བྱ་ངོར་སྣང་གི་མཛད་པ་དང་བསྟུན་ནས་གླེང་ན། རྒྱ་གར་ནུབ་ཕྱོགས་ཨོ་རྒྱན་གྱི་ཡུལ། དྷ་ན་ཀོ་ཤའི་གླིང་། མཚོ་ཀུ་ཏྲའི་འགྲམ། རྡོ་རྗེ་གླིང་ཕུག་བྱ་བའི་གནས་སུ། ཡབ་རྒྱལ་པོ་དྷ་ཧེ་ན་ཏ་ལོ་ཞེས་བྱ་བ་དང་། ཡུམ་རྒྱལ་མོ་བརྩོན་རྒྱལ་གཉིས་ཀྱི་སྲས་མོ་པྲ་ར་ནི་ཞེས་བྱ་བ་མཚན་དང་ལྡན་ལ། དགེ་བའི་སེམས་དང་བྱང་ཆུབ་ཀྱི་ཐུགས་ལྷག་པར་ལྡན་པ་ཞིག་ཡོད་པ། རབ་ཏུ་བྱུང་ནས་དགེ་སློང་མའི་ཁྲིམས་རྣམ་པར་དག་པ་བསྲུངས་ཤིང་། འཁོར་དགེ་སློང་མ་ལྔ་བརྒྱ་དང་བཅས་གནས་པ་ན། ཤིང་མོ་གླང་གི་ལོ་དབྱར་ཟླ་ར་བའི་ཚེས་བརྒྱད་ཀྱི་ཐོ་རེངས་ཁའི་རྨི་ལམ་ན། དེ་བཞིན་གཤེགས་པ་ཐམས་ཅད་ལས་འོད་འཕྲོས་ཏེ་ཉི་ཟླ་གཉིས་སུ་གྱུར་བ་ལས། ཉི་མ་སྤྱི་བོ་ནས་མར་དང་ཟླ་བ་རྐང་པ་ལས་ཡར་ཐིམ་པ་རྨིས་སོ། །དེའི་ནངས་པར་རྟོག་པ་སྐྱེས། མཚོ་ཀུ་ཏྲའི་འགྲམ་དུ་ཁྲུས་བྱས་ཏེ་ཁ་ཤར་དུ་ཕྱོགས་ནས་འདུག་པ་ལས། ཕྱག་ན་རྡོ་རྗེས་གསེར་གྱི་ངང་པ་ཞིག་ཏུ་སྤྲུལ་ནས་ལྷའི་བུ་སེམས་ལྷག་ཅན་ཡི་གེ་ཧཱུཾ་ཞིག་ཏུ་བསྡུས། སྤྲུལ་པའི་བྱ་ངང་པ་བཞི་དང་བཅས་ནམ་མཁའ་ལས་བབས་ཏེ་སྲས་མོའི་མདུན་དུ་ཁྲུས་བྱས་པའི་མཐར། སྤྲུལ་པ་བཞི་ནམ་མཁའ་ལ་འཕུར། སྤྲུལ་པའི་གཙོ་བོ་་གསེར་གྱི་བྱ་སྲས་མོའི་ཐུགས་ཀར་ཆགས་ཏེ་མཆུ་ལན་གསུམ་གཏུགས་ནས་ཧཱུཾ་འོད་འབར་བ་ཞིག་བསྟིམས་ཏེ་སྔར་གྱི་གནས་ལ་འཕུར་རོ། །དེར་སྲས་མོ་ཡ་མཚན་དུ་གྱུར་ཏེ་རྨི་ལམ་དང་བྱ་ངང
པའི་ལོ་རྒྱུས་རང་གི་ཡབ་དང་འཁོར་སོགས་ལ་ཟློས་པས། ཡབ་ཡ་མཚན་པར་གྱུར་ཏེ་སངས་རྒྱས་ཀྱི་སྤྲུལ་པ་འབྱུང་ངེས་གསུངས་ཤིང་བྱ་དགའ་དང་རིམ་གྲོ་ཡང་མང་དུ་མཛད་དོ། །ལོ་དུས་ན་སྲས་མོའི་ཐུགས་ཀ་ནས་གསེར་ལས་གྲུབ་པའི་རྡོ་རྗེ་རྩེ་དགུ་པ་གཅིག་བྱུང་བ་ལས་ཐམས་ཅད་ཡ་མཚན་པར་གྱུར་ཏོ། །དེར་རྡོ་རྗེ་དེ་རང་ཞིག་པ་ལས་ཁྱེའུ་མཚན་དཔེས་བརྒྱན་པ། ཕྱག་གཡས་ན་རྡོ་རྗེ་དང་། གཡོན་ན་རིན་པོ་ཆེའི་ཕྱག་ཤིང་ཐོགས་པ། རྡོ་རྗེ་སེམས་དཔའ་ནམ་མཁའ་ཆེ་ལ་སོགས་པ་ཞལ་འདོན་དུ་མཛད་པ་ཞིག་བྱུང་ངོ། །ཁྱེའུ་དེར་ནངས་པར་ཉི་མའི་འོད་ཟེར་ལ་བ་སྤུའི་བུ་ག་ནས་དེ་བཞིན་གཤེགས་པ་ཐམས་ཅད་གཤེགས་བཞུད་མཛད་ཅིང་། དེ་དག་གིས་མགྲིན་གཅིག་ཏུ་ཁྱོད་ཀྱིས་སེམས་ཅན་གྱི་དོན་གྱིས་ཤིག་པར་ལུང་བསྟན་པ་དང་། ལྷ་མ་སྲིན་སྡེ་བརྒྱད་ཐམས་ཅད་ཀྱང་ཕྱག་བྱེད་པར་སྣང་ངོ། །རེ་ཞིག་གི་ཚེ་དཔལ་རྡོ་རྗེ་སེམས་དཔའ་དངོས་སུ་བྱོན་ནས་གཡས་སུ་ཀློང་ཆེན་བམ་པོ་ཉི་ཁྲི་ཆིག་སྟོང་གི་པུ་ཏི་དང་། གཡོན་དུ་བྱང་ཆུབ་སེམས་ཀྱི་ཕྱག་ཤིང་ལ་སེམས་མདོ་བཅོ་བརྒྱད་ཡོད་པ་གཏད་ནས། བྱང་ཆུབ་ཡེ་ནས་མ་བཅོས་པ། །ཡེ་ནས་སངས་རྒྱས་པར་བཤད་ན། །སྐྱེ་ཤི་མེད་པར་དབང་བསྐུར་རོ། །ཞེས་གསུངས་ནས་མི་སྣང་བར་གྱུར། དེར་ཐམས་ཅད་དགའ་སྟེ་བྲམ་ཟེ་མཚན་མཁན་ལ་བསྟན་པས། བྲམ་ཟེ་ཤིན་ཏུ་ངོ་མཚར་ཏེ། འདི་ནི་སྤྲུལ་པའི་སྐུ་ཐེག་པ་མཆོག་གི་བསྟན་པའི་བདག་པོར་འགྱུར་ཅེས་ལུང་བསྟན། མཚན་ཡང་དགའ་རབ་རྡོ་རྗེར་བཏགས་སོ། །དེར་གཞོན་ནུ་ནས་རོལ་རྩེད་ལ་སོགས་པ་ཐམས་ཅད་ལ་འགྲན་ཟླ་མེད་པར་གྱུར་ནས་རྒྱལ་སྲིད་བཟུང་བ་ན། གསང་བའི་བདག་པོ་ཕྱག་ན་རྡོ་རྗེ་དངོས་སུ་བྱོན་ནས། རྒྱལ་ཐབས་སྤྱི་བླུགས་རྫོགས་པའི་དབང་ལ་སོགས་པ་དབང་རྣམས་རྫོགས་པར་བསྐུར། ལྷོ་ནུབ་འདམ་ཤོད་ཀྱི་གླིང་ནས་པུ་ཏྲ་རྣམ་གསུམ་བཀུག་སྟེ་དབང་བསྐུར་དམ་ལ་བཞག །ཀློང་དགུ་བམ་པོ་ཉི་ཁྲི་ལ་སོགས་པའི་རྒྱུད་དབང་མན་ངག
ཐམས་ཅད་དུས་མཐའི་སྐད་ཅིག་ལ་རྫོགས་པར་གཏད་ནས་བསྟན་པའི་སྒྲོན་མེ་ཆེན་པོར་དབང་བསྐུར་དམ་ཅན་རྣམས་ལ་གཉེར་དུ་གཏད་དོ། །དེར་སྤྲུལ་པའི་སྐུ་དགའ་རབ་རྡོ་རྗེ་ཉིད་སྐད་ཅིག་ཉིད་ལ་རྩོལ་མེད་རྫོགས་པ་ཆེན་པོའི་ས་ལ་མངོན་པར་སངས་རྒྱས། དུས་གསུམ་གྱི་སངས་རྒྱས་ཐམས་ཅད་དང་དགོངས་པ་གཅིག་ཏུ་གྱུར། སྤྱིར་རྒྱུ་འབྲས་ཀྱི་ཆོས་མཐའ་ཡས་པ་དང་། །ཁྱད་པར་རྩོལ་མེད་རྫོགས་པ་ཆེན་པོའི་བསྟན་པ་དམ་པའི་ཆོས། རྩ་བའི་རྒྱུད་ཀློང་དགུ་བམ་པོ་ཉི་ཁྲི། ཡན་ལག་གི་རྒྱུད་རྒྱལ་བ་རིགས་ལྔ། གསང་བདག་དཔའ་བོའི་བཤད་རྒྱུད། བྱེ་བྲག་གི་རྒྱུད་སྡེ་བསམ་གྱིས་མི་ཁྱབ་པ་ཐམས་ཅད་དང་། རང་གྲོལ་མངོན་སུམ་དུ་སྟོན་པའི་མན་ངག། །རྒྱལ་ཐབས་སྤྱི་བླུགས་ལ་སོགས་ཏེ་རྒྱལ་བ་སྐུ་བཞིའི་དབང་གི་ཆུ་བོ་ཐམས་ཅད་ཐུགས་འོད་གསལ་ནམ་མཁའ་ཀློང་ཆེན་གྱི་དབྱིངས་སུ་རྫོགས་ནས། རྩོལ་མེད་རང་བྱུང་རྫོགས་པ་ཆེན་པོའི་བསྟན་པ་འཁོར་ཐུན་མོང་མ་ཡིན་པ་ལ་སྒྲོགས་ཤིང་བཞུགས་སོ། །དེ་ལྟ་བུའི་སློབ་དཔོན་དགའ་རབ་རྡོ་རྗེ་ལ་ཐུགས་ཀྱི་སྲས་འཇམ་དཔལ་བཤེས་གཉེན་གཙོ་བོར་གྱུར་བའི་གསུམ་བརྒྱུད། བདུན་རྒྱུད། ཉི་ཤུ་རྩ་གཅིག་བརྒྱུད་ལ་སོགས་མཐའ་ཀླས་པར་ཡོད་དེ་སེམས་ཕྱོགས་སྤྱིའི་བརྒྱུད་པ་དང་འདྲ་འབག་ཆེན་མོར་གསལ་ལོ། །དེ་ལས་ཤན་འབྱེད་པ་བྲམ་ཟེའི་སྐོར། ལ་བཟླ་བ་རྒྱལ་པོའི་སྐོར། རང་གྲོལ་མངོན་སུམ་དུ་སྟོན་པ་མན་ངག་གི་སྐོར་དང་གསུམ་ལས། ཁྱད་པར་དུ་གྱུར་བ་ཕྱི་མ་མན་ངག་གི་སྐོར་ལའང་བརྒྱུད་སྲོལ་ཐ་དད་པ་ཡོད་དེ་འདིར་རིག་འཛིན་ངེས་པའི་ལུང་བསྟན་ལྟར་བརྡ་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་གྱུར་ཀྱང་བསྟན་པ་ཡོངས་སུ་རྫོགས་པར་བྱ་ཕྱིར་རྒྱུད་དང་མན་ངག་ལ་ནན་ཏན་དུ་བྱས་པའི་སློབ་དཔོན་ཆེན་པོ་འཇམ་དཔལ་བཤེས་གཉེན་ནི་ཐལ་འགྱུར་ལས། དེ་ཡི་རྗེས་འཛིན་ནུབ་ཀྱི་ཕྱོགས།
བྲམ་ཟེའི་ཕྲུག་གུ་སྐལ་ལྡན་པ། །མཉྫུ་ཤྲཱི་པ་ཏི་ཞེས། །ལོ་ནི་བདུན་ཅུ་རྩ་ལྔར་འཛིན། །ཞེས་པ་ལྟར་གང་གི་ཚེ་ཡབ་བྲམ་ཟེ་དཔལ་ལྡན་སྐྱོང་དང་། ཡུམ་བྲམ་ཟེ་མོ་ཀུ་ཧ་ན་ཞེས་བྱ་བ་ལ། འཇམ་དཔལ་དབྱངས་ཀྱི་སྤྲུལ་པའི་སྲས་ཁྱེའུ་མཚན་དང་ལྡན་པ་ཞིག་བྱུང་སྟེ། དེའི་མིང་བྲམ་ཟེ་སྙིང་པོ་གྲུབ་པའམ། བདེ་མཆོག་སྙིང་པོ་ཞེས་གྲགས་ཏེ་རིག་པའི་གནས་ལྔ་ལ་མཁས་པའི་དགེ་སློང་རྒྱུ་འབྲས་ཀྱི་ཆོས་ཐམས་ཅད་ཐུགས་སུ་ཆུད་པ་ཞིག་གྱུར་ཏོ། །དེ་པཎྜི་ཏ་ལྔ་བརྒྱའི་མཆོག་ཏུ་གྱུར་ནས་བཞུགས་པའི་ཚེ། སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བས་རྒྱུ་འབྲས་ལས་འདས་པའི་རྨད་བྱུང་བསྟན་པའི་སྙིང་པོ། རྩོལ་མེད་རྫོགས་པ་ཆེན་པོ་ཞེས་བྱ་བ་སྒྲོག་གོ་ཞེས་པཎྜི་ཏ་ཀུན་གྱིས་ཐོས་པ་ལས། དེར་བྲམ་ཟེ་སྙིང་པོ་གྲུབ་པ་ལ་འཕགས་པ་འཇམ་དཔལ་གྱིས་ལུང་བསྟན་པ། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་། མཚོ་ཆེན་པོ་ཀུ་ཤའི་འགྲམ། དུར་ཁྲོད་གསེར་གླིང་ཧེ་ཆེན་བརྡལ་བའི་འདབས་རྡོ་རྗེ་གླིང་གི་ཕུག་ན། རྡོ་རྗེ་སེམས་དཔའི་སྤྲུལ་པ་སངས་རྒྱས་ཐམས་ཅད་ཀྱིས་རྩོལ་མེད་བསྟན་པའི་སྒྲོན་མེར་དབང་བསྐུར་བ། སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བ་ཡོད་ཀྱི། དེ་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ་བྱ་རྩོལ་མེད་པར་སྐད་ཅིག་ལ་སངས་རྒྱ་བའི་ཆོས་ཡོད་པས་དེ་ལོང་ལ་སྤྲུལ་པའི་སྡུད་པ་པོ་གྱིས་ཤིག་པར་ལུང་བསྟན་ནོ། །དེར་པཎྜི་ཏ་གཞན་རྣམས་ན་རེ། རྒྱུ་འབྲས་ལས་འདས་པའི་ཆོས་ཡོད་པ་མི་རིགས་ཞེས་སུན་དབྱུང་བར་འབྲོས་སོ། །བྲམ་ཟེ་སྙིང་པོ་གྲུབ་པས་ཀྱང་མཁྱེན་བཞིན་དུ་ཆོས་དང་གང་ཟག་གི་ཆེ་བ་འབྱིན་པའི་ཕྱིར་པཎྜི་ཏ་རྣམས་ཀྱི་རྗེས་སུ་བགྲོས་པ་ལས་ཐམས་ཅད་ཞལ་འཆམ་སྟེ་ཨོ་རྒྱན་གྱི་ཡུལ་ས་ཐག་རིང་བ་དང་། ཀུན་གྱིས་མི་བགྲོད་པས། སྙིང་པོ་གྲུབ་པ་དང་། རཱ་ཛ་ཧ་སྟི་ལ་སོགས་པ་བདུན་སུན་དབྱུང་བར་མངགས་སོ། །དེར་བདུན་པོས་དགའ་རབ་རྡོ་རྗེའི་དྲུང་དུ
རྟོལ་ཏེ་ཉམས་སད་པའི་ཕྱིར་དུ་རྒྱུ་འབྲས་ཀྱི་ཐེག་པའི་ཆེ་བ་དང་། ཆོས་ཀྱི་འགྲོ་བ་བྱས་པས། རྒྱུའི་ཆོས་སྡེ་སྣོད་གསུམ་དང་། འབྲས་བུའི་ཆོས་གསང་སྔགས་ཕྱི་ནང་གཉིས་གང་གི་སྒོ་ནས་ཀྱང་མ་ཐུབ་པས། བདེ་མཆོག་སྙིང་པོས་མཁྱེན་བཞིན་དུ་པཎྜི་ཏ་གཞན་རྣམས་ལ་འོ་ཅག་གིས་རྩོད་པ་ནོངས་པས་སྤྲུལ་པའི་སྐུ་འདི་ལ་རྒྱུ་འབྲས་ལས་འདས་པའི་ཆོས་མི་ཞུའམ་ཞེས་འགྲོ་བ་ལྟར་མཛད་པས། པཎྜི་ཏ་ལ་ལ་ནི་སྐྱེངས་ནས་ངོ་གནག་པར་གྱུར་ཞིང་། ལ་ལ་ནི་འོ་ཅག་གིས་རྩོད་ཅིང་བརྙས་པ་བྱས་པས་ཞུ་བར་མི་སྤོབས་ཟེར་རོ། །དེར་བདེ་མཆོག་སྙིང་པོ་ལ་སོགས་པས་བཤགས་པ་བྱ་བར་བགྲོས་ཏེ་པཎྜི་ཏ་རྣམས་ཀྱིས་སྤྲུལ་པའི་སྐུ་དགའ་རབ་རྡོ་རྗེ་ལ་ཕྱག་དང་བསྐོར་བ་བྱས། མཆི་མ་སྙིལ་བའི་ཚེ་སྙིང་པོ་གྲུབ་པ་རང་གི་ལྕེ་བཅད་དེ་བཤགས་པ་བྱ་བར་དགོངས་པ་དང་། རིག་འཛིན་མཆོག་གི་སྤྲུལ་སྐུ་དགའ་རབ་རྡོ་རྗེས་མཁྱེན་ཏེ་ཚིགས་སུ་བཅད་པ་འདི་གསུངས་སོ། །མཉམ་ཉིད་ཕྱོགས་བྲལ་ལྷུན་གྲུབ་བདེ་བ་ཆེ། །ཆོས་རྣམས་ཐམས་ཅད་བྱང་ཆུབ་སྙིང་པོ་ལ། །འགྲོ་དྲུག་རང་ལ་ཡུལ་བཟུང་ཞེན་པས་བཅིངས། །མུ་སྟེགས་མཐར་འཛིན་རྟག་ཆད་ལོག་ལྟར་ཞུགས། །ཐེག་བརྒྱད་རང་ལ་གཉིས་བཟུང་ཡིན་མིན་གྱིས། །ཞེ་འདོད་ཕྱོགས་རིས་དབྱིངས་ལ་ཕྱོགས་སུ་ཞེན། །མཉམ་པའི་དོན་ལ་ཕྱོགས་དང་རིས་སུ་བཅད། །རང་ལ་ཡོད་བཞག་མེད་པ་གཞན་དུ་འཚོལ། །ལྷུན་གནས་བདེ་བོར་རྩོལ་བས་དང་དུ་ལེན། །རང་སེམས་སངས་རྒྱས་ནམ་ཞིག་དུས་ལ་ལྟོས། །མཉམ་ཉིད་མ་རྟོགས་ཞེ་འདོད་ཕྱོགས་ལྟ་ལ། །འདི་ཡིན་ཐར་ཆད་ཡུས་རྒྱས་སྙིང་རྗེ་རེ། །དེ་བས་ཕྱོགས་འཛིན་ཞེན་པའི་དུག་ཆོམས་ལ། །མཉམ་ཉིད་ཕྱོགས་བྲལ་བདེ་བའི་དོན་ལ་ཞུགས། །ཞེས་གསུངས་ནས་སྙིང་པོ་གྲུབ་པ་ལ་ཁྱོད་ཀྱིས་ལྕེ་བཅད་པས་སྡིག་པ་མི་འདག། རྒྱུ་འབྲས་ལས་འདས་པའི་ཆོས་ཁྱད་དུ་འཕགས་པ་ཞིག་རྩོམས་ཤིག །དེས་སྡིག་པ་འདག་པར་འགྱུར་རོ། །ཞེས་གསུངས་པས
ཕྱིན་ཆད་བྱང་སེམས་སྡེ་ལ་འགྲེལ་བ་གསེར་ཞུན་བརྩམས་ཤིང་བཀའི་བསྡུ་བ་པོ་མཛད། དེར་བརྡ་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་གྱུར་ཀྱང་བསྟན་པ་ཡོངས་སུ་རྫོགས་པར་བྱ་བའི་སླད་དུ་ཕྱག་དང་བསྐོར་བ་བྱས། རིན་པོ་ཆེའི་མཎྜལ་སྣ་ཚོགས་པ་སྤྲུལ་པའི་སྐུ་དགའ་རབ་རྡོ་རྗེ་ལ་ཕུལ་ནས་བསྟན་བཅོས་རྒྱུད་ཀྱི་དངོས་པོ་ཅན། གསོལ་བ་བཏབ་སྟེ་སྙིང་པོའི་དོན་ཞུས་པས། སེམས་སྡེའི་སྐོར་རྩ་བའི་རྒྱུད་བརྒྱད་དང་། །ཡན་ལག་གི་རྒྱུད་མཐའ་ཡས་པ། དབང་དང་མན་ངག་ལ་སོགས་པ་རྒྱས་པར་གནང་། དེ་ནས་ཀློང་སྡེའི་སྐོར། ཕྱི་རྩིབས་རྒྱ། ནང་གསང་རྒྱ། གསང་བ་རྒྱའུ་ཆུང་། དགོངས་པ་གཏད་རྒྱའི་སྐོར་ལ་སོགས་པ་རྒྱུད་མན་ངག་དང་བཅས་པས་མཚོན་ཏེ་ཨ་ཏི་ཡོ་གའི་རྒྱུད་དཔག་ཏུ་མེད་པ་གསུངས་སོ། །དེས་ཀྱང་ཐུགས་མ་ཚིམ་པར་ཕྱག་དང་བསྐོར་བ་བྱས་ཏེ་རིན་པོ་ཆེའི་མེ་ཏོག་ཕུལ་ནས་གསོལ་བ་བཏབ་པས། རྒྱལ་ཐབས་སྤྱི་བླུགས་ཀྱི་དབང་བསྐུར། རང་གྲོལ་མངོན་སུམ་དུ་སྟོན་པ་མན་ངག་སྡེའི་སྐོར་ཡང་ཕྱིན་ཏེ་ཕྱི་ལྟར་འཇམ་དཔལ་བཤེས་གཉེན། ནང་ལྟར་རྡོ་རྗེ་བདེ་བ་རྩལ་དུ་མིང་བཏགས། སླར་ཆུ་བོ་ལྡན་ཏིའི་མགོར་དགའ་རབ་རྡོ་རྗེ་འོད་ཕུད་དུ་ཡལ་བའི་ཚེ། འདས་རྗེས་ཀྱི་གླེགས་བམ་བབས་པ་གཟིགས་པ་ཙམ་གྱིས་ཐུགས་སུ་ཆུད། དགའ་རབ་རྡོ་རྗེ་དང་རྟོགས་པ་མཉམ་པར་གྱུར་བས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་བཏུས་ནས་གནས་པ་སེམས་ཀྱི་སྡེ། བྱ་བྲལ་ཀློང་གི་སྡེ། ཟབ་པ་མན་ངག་གི་སྡེ་དང་གསུམ་དུ་ཕྱེ་ནས། གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་། རྣར་རྒྱུད་གཉིས་སུ་ཕྱེ་ནས་རྣར་རྒྱུད་མཆན་དུ་བཏབ། བཤད་རྒྱུད་སྙིང་གི་ཐིག་ལེ་སྤེལ་བའི་གནས་མ་རྙེད་པས་རྡོ་རྗེ་གདན་དུ་གཏེར་ལ་སྦས་ཏེ་རྒྱལ་པོ་དྷ་ཧེ་ན་ཏ་ལོ་སོགས་པ་ལ་དགོངས་པའི་དོན་སྟོན་བཞིན་སོ་ས་གླིང་གི་དུར་ཁྲོད་དུ་ལོ་བརྒྱ་དང་ཉི་ཤུ་རྩ་
དགུར་བཞུགས་སོ། །འདྲ་འབག་ཆེན་མོར་སློབ་དཔོན་འདིས་དགའ་རབ་རྡོ་རྗེའི་དངོས་སློབ་དྷ་ཧེ་ན་ཏ་ལོ། དེས་རང་གི་སྲས་ཐུ་བོ་རཱ་ཛ་ཧ་སྟི། དེས་སྲས་མོ་བྲ་ར་ནི། དེས་ཀླུའི་རྒྱལ་པོ་ནཱ་ག་རཱ་ཛ་སངྒྀ་ཏ། དེས་གནོད་སྦྱིན་མོ་བྱང་ཆུབ། དེས་སྨད་འཚོང་མ་བ་རི་ནི། དེས་ཁ་ཆེའི་མཁན་པོ་རབ་སྣང་། དེས་མ་ཧཱ་རཱ་ཛ། དེས་སྲས་མོ་གོ་མ་དེ་ཝཱི། དེས་ཨཱ་ཙཱ་རྱ་ཨ་ལོ་ཀེ། དེས་ཁྱིའི་རྒྱལ་པོ་སྔ་མ་ཞེས་རིག་པའི་གནས་ལྔ་དང་ཏནྟྲ་སྡེ་བཅོ་བརྒྱད་ལ་མཁས་པ་ཞེས་པས། དགེ་སློང་ཀུ་ཀུ་རཱ་ཛའོ། །དེས་དྲང་སྲོང་བ་ཤི་ཏ། དེས་སྨད་འཚོང་མ་བདག་ཉིད་མ། དེས་ནཱ་གཱ་རྫུན་སྟེ་མགོན་པོ་ཀླུ་སྒྲུབ། དེས་ཁྱིའི་རྒྱལ་པོ་ཕྱི་མ། དེས་འཇམ་དཔལ་ཕྱི་མ་ཞེས་བྱ་བ་རྒྱུ་འབྲས་ཀྱི་ཆོས་ལ་ཤིན་ཏུ་མཁས་པ་ཞེས་བཤད་པ་ནི། སློབ་དཔོན་འཇམ་དཔལ་བཤེས་གཉེན་གཤེགས་ནས་ལོ་བརྒྱ་ཉེར་ལྔ་ན་འཇམ་དཔལ་བཤེས་གཉེན་ཉིད། ནུབ་ཕྱོགས་སུ་པདྨ་ལས་རྫུས་ཏེ་སྐྱེས་པ་ལ་འཇམ་དཔལ་བཤེས་གཉེན་ཕྱི་མར་གྲགས་འདིས་ཨཱ་རྱ་དེ་ཝ་ལ་གདམས་པ་སྙིང་ཐིག་ལྐོག་ཆོས་སུ་བསྟན་པས་ཨཱ་རྱ་དེ་ཝ་ཡང་འཇའ་ལུས་ཀྱི་གྲུབ་མཐའ་སྙོགས། རྫོགས་པ་ཆེན་པོ་དང་དོན་ཐ་མི་དད་པའི་འཇམ་དཔལ་ཞལ་ལུང་ཞེས་སྔགས་གསར་མར་གྲགས་ཆེ་བ་དེ་བརྩམས། སངས་རྒྱས་ཡེ་ཤེས་ཞབས་ལ་སོགས་པའི་སློབ་མ་ཡང་མང་། ཁྱད་པར་ཨོ་རྒྱན་ཆེན་པོ་ལ་གོང་དུ་བཤད་པའི་རྣལ་འབྱོར་ཆེན་པོའི་རྒྱུད་སྡེ་དང་། གཤེད་སྐོར་རྒྱ་མཚོ་སྟོན་པའི་སློབ་དཔོན་ཡང་འདི་ཉིད་དོ། །འདྲ་འབག་ཏུ་སློབ་དཔོན་འཇམ་དཔལ་བཤེས་གཉེན་གྱིས་རྫོགས་ཆེན་ལ་རང་བྱན་ཆུད་པའི་རྟོགས་པ་བརྗོད་པའི་ཚེ། བདག་ནི་འཇམ་དཔལ་དཔལ་བཟང་སྟེ། །ཞེས་པའི་མཚན་གྱིས་ཀྱང་ཤེས་པར་ནུས་ལ། འོ་ན་གོང་དུ་བཤད་མ་ཐག་པའི་འཇམ་དཔལ་བཤེས་གཉེན་སྔ་མ་ལ་དགའ་རབ་རྡོ་རྗེ་འོད་ཕུང་དུ་ཡལ་རྗེས་སུ་འདས་རྗེས་བབས་པར་བཤད་པའི་ཕྱིར། དགེ་སློང་དཔལ་བཟང་གིས་འཇམ་དཔལ་གྲུབ་པ་ཡིན་ཞེས་པའི་ལུང་སློབ་དཔོན་དེ་ཉིད་ཀྱིས་བསྟན་པས་སྔ་ཕ
གོ་མི་མཚུངས་ཞེ་ན། དགའ་རབ་རྡོ་རྗེ་འོད་ཕུང་དུ་ཡལ་ལོ་ཞེས་པ་ལས། ལྷག་མ་མེད་པའི་དབྱིངས་སུ་མྱ་ངན་ལས་འདས་པའམ། ཐ་མལ་ལྟར་ལུས་སེམས་བྲལ་ནས་འཚོ་བའི་འདུ་བྱེད་ཟད་པ་ལྟ་བུ་མ་ཡིན་པའི་ཕྱིར། ངེས་གསང་རྫོགས་པ་ཆེན་པོ་ལ་སྐྱེ་བ་དང་འཇུག་པའི་སོ་མཚམས་ནས་སྣང་བ་རང་ལོག་གི་མན་ངག་ཡོད་ཅིང་། དེར་ཡང་མ་ཟང་གྲུབ་ཐོབ་ཀྱི་རྣམ་པར་ཐར་བ་ཡིན་པས་པཎ་ཆེན་ནཱ་རོ་པ་སྤྱོད་པ་ལ་གཤེགས་པ་ལྟར་ཀུན་གྱིས་སྤྱོད་ཡུལ་དུ་མི་མངོན་པ་ནས་བཟུང་འོད་ཕུང་དུ་ཡལ་བའི་བརྡར་བརྟགས་པ་ལས། གཞན་དུ་དག་པའི་གདུལ་བྱ་ལའང་མི་སྣང་བའི་གཏན་ཚིགས་བསྒྲུབ་ཏུ་མེད་པས་འགལ་བ་མེད་པར་གྲུབ་ལ། དཔེར་ན་སློབ་དཔོན་ཆེན་པོ་བི་མ་ལ་རི་བོ་རྩེ་ལྔ་ན་བཞུགས་པ་བཞིན་ནོ། །དེའི་ཕྱིར་སྔགས་གསར་མ་ལ་གྲགས་ཆེ་བའི་སློབ་དཔོན་ཆེན་པོ་དེ་དག་གིས་ཀྱང་རྫོགས་པ་ཆེན་པོ་ཐུགས་ཉམས་སུ་བསྟན་ཞིང་། རྒྱུད་དེ་དག་ནས་ལུ་གུ་རྒྱུད་ཀྱི་མིང་ཙམ་བརྗོད་ཀྱང་དམ་ཚིག་ཉམས་པར་བཤད་པའི་གསང་རྒྱ་ལ་རྒྱ་གར་གྱི་སློབ་དཔོན་དེ་དག་ཚུལ་བཞིན་དུ་སྤྱོད་པའི་ཕྱིར་སྤྱི་མཐུན་གྱི་སྣང་ངོར་ཆོས་དེ་དག་གི་མིང་ཙམ་ཡང་མ་གྲག་པར་མངོན་ཏེ། དཔེར་ན། དཔལ་ནཱ་རོ་པས་སློབ་མ་སོ་སོའི་བཀའ་བབས་དང་བསྟུན་པའི་མན་ངག་བྱིན་པས་སློབ་མ་ཅིག་ཤོས་ཀྱིས་མིང་ཡང་མ་ཐོས་པའི་ཆོས་ཀྱི་རྣམ་གྲངས་ཅིག་ཤོས་ལ་གྲགས་པ་བཞིན་ནོ། །སྤྱིར་ཐེག་པའི་ཡང་རྩེ་འདི་ཚིག་བརྒྱུད་ལྟ་བུར་ཤིན་ཏུ་བཀའ་རྒྱ་དམ་ཞིང་དྲིལ་བསྒྲགས་སུ་འཆད་པ་མེད་ལ། སློབ་དཔོན་དེ་དག་ཀྱང་སངས་རྒྱས་ཀྱིས་དྲི་ཟར་བ་དགའ་བཏུལ་བ་ལྟར་གདུལ་བྱའི་སྣང་ངོར་སྐད་ཅིག་སྐད་ཅིག་ལ་སྣང་ཞིང་། རོལ་པ་བཀོད་པའི་ཆོ་འཕྲུལ་ཚད་མེད་པའི་བདག་ཉིད་ཅན་ལས་སྤྱི་མཐུན་དུ་གྲགས་པ་ལྟར་མ་ཡིན་པས་རྒྱ་གར་གྱི་ཡུལ་གྲུ་ཆུང་ངུ་རེ་བགྲོད་ཅིང་། གཙུག་ལག་ཁང་ཆུང་ངུ་རེའི་ཆོས་ཀྱི་རྣམ་གྲངས་ཡི་གེར་འགོད་པའི་ལོ་ཙཱ་བ་གསར་བུ་རྣམས་ཀྱིས་ཆོས་སྤོང་བའི་ཡུས་ཚིག་སྨྲ་བ་ལ་ཡིད་བརྟན་མེད་པར་ཤེས་པར
བྱ་ཞིང་། ཚུལ་འདི་ལྟ་བུའང་ཐོས་པ་དང་གཟུ་བོའི་བློས་བསམ་པའི་ཡོན་ཏན་ཡིན་པར་བལྟའོ། །དེ་ལྟར་འཇམ་དཔལ་བཤེས་གཉེན་ནམ། རྡོ་རྗེ་བདེ་བ་རྩལ་གྱི་དངོས་སློབ་ཤྲཱི་སིངྷ་ནི་ཐལ་འགྱུར་ལས། དེ་ཡི་རྗེས་སུ་སྐལ་ལྡན་པ། །སོ་ས་གླིང་ཞེས་བྱ་བ་རུ། །ཁྱིམ་བདག་རིགས་སྐྱེས་ཤྲཱི་སིང་། །ཞེས་བྱ་བ་ཡིས་འཛིན་པར་འགྱུར། ཅེས་པ་ལྟར། རྒྱ་ནག་ཞོ་ཤའི་གླིང་གི་ཡབ་རྒྱལ་པོ་གྲུ་ཁྱེར། ཡུམ་ནན་ཀ་ཞེས་བྱ་བ་གཉིས་ཀྱི་བུ། ཤྲཱི་སིངྷ་པཱ་པ་ཏ་ཞེས་བྱ་བ། པཎྜི་ཏ་ལྔ་བརྒྱ་ལ་རིག་པ་སྦྱངས་པས་རིག་པའི་གནས་ལྔ་ལ་མཁས་པ་ཞིག་ཡོད་པ་དེར་སྤྱན་རས་གཟིགས་ཀྱིས་ལུང་བསྟན་ཏེ་སློབ་དཔོན་འཇམ་དཔལ་བཤེས་གཉེན་གྱི་དྲུང་དུ་ལྷགས། སློབ་དཔོན་ལོ་ཉེར་ལྔའི་བར་དུ་བསྟེན་ནས་རྫོགས་པ་ཆེན་པོའི་རྒྱུད་མན་ངག་མཐའ་ཡས་པ་ཉན། དེ་ནས་སློབ་དཔོན་འོད་ཕུང་དུ་ཡལ་བའི་རྗེས་ལ་འདས་རྗེས་ཤྲཱི་སིངྷ་ར་བབས་པས་སློབ་དཔོན་དང་དགོངས་པ་མཉམ་པར་གྱུར། མན་ངག་གི་དཔེ་ཕྱུང་ནས་ཐིག་ལེའི་སྐོར་ལ་ཕྱི་སྐོར། ནང་སྐོར། གསང་སྐོར། བླ་མེད་ཀྱི་སྐོར་ཏེ་རྣམ་པ་བཞིར་ཕྱེ་ནས་གསང་སྐོར་ཡན་ཆད་གཏེར་ལ་སྦས། ཡང་གསང་བླ་ན་མེད་པ་ཐུགས་ལ་གབ་སྟེ་བཞུགས་པ་ལས་རེ་ཞིག་གི་ཚེ་མཁའ་འགྲོས་ལུང་བསྟན་ཏེ་དེ་ཉིད་གཏེར་ལ་སྦས་ཏེ་སློབ་དཔོན་ཉིད་བསིལ་སྦྱིན་དུར་ཁྲོད་དུ་བཞུགས་སོ། །དེའི་ཚེ་ཐལ་འགྱུར་ལས། རྡོ་རྗེས་འཛིན་པ་གདོལ་པའི་རིགས། །ཛྙཱ་ན་སཱུ་ཏྲས་འདི་ཉིད་འཛིན། །ཞེས་པ་ལྟར། ཡབ་གདོལ་པའི་རིགས་ཨ་བ་དྷ་ཛ་ན་བྱ་བ་དང་། ཡུམ་རྒྱ་མཚོ་མ་བྱ་བའི་བུ་སྦྲུལ་གྱི་གདེངས་ཀས་མཚན་པ་ཅིག་བྱུང་ཕ་མ་གཉིས་སྐྲག་སྟེ་དུར་ཁྲོད་དུ་བསྐྱལ་བས་ཁྱེའུ་ན་རེ། སྙིང་པོའི་དོན་ལ་ཐུགས་ཕངས་པའི་སྤྲུལ་པ་ཡིན་གྱི། ལས་ཀྱིས་འབྲེལ་བའི་ཕ་མ་ཡིན་པས་གསོས་ཤིག་ཅེས་ཟེར་བས། བདེན་པར་བཟུང་ནས་བླངས་ཏེ་གསོས། བྱང་ཆུབ་སེམས་དཔའི་སྤྲུལ་པ་ཀླུའི་རྒྱལ་པོ་དགའ་བོས་རྩོལ་མེད་ཀྱི་ཐེག་པ་འཇུག་པར་མཁྱེན་ནས
སྤྲུལ་པ་ཡིན་པས་མིང་ནཱ་ག་རཱ་ཛ་པ་ཏྲི་ཞེས་བྱ་བར་བཏགས། འདྲ་འབག་ཆེན་མོར་ཛྙཱ་ན་སཱུ་ཏྲ་དམིགས་བསལ་མ་བྱུང་ཤིང་རིགས་དང་མཚན་ཟུར་གཅིག་བལྟར་དཔྱད་པའོ། །ཁྱེའུ་དེ་སྐྱེད་ཆེ་ཞིང་བློ་གྲོས་དང་ལྡན་པར་གྱུར་ནས་རྒྱལ་པོ་ཧ་སྟི་དང་། སྲས་མོ་པྲ་ར་ནི་སོགས་ལས་སེམས་ཕྱོགས་ཀྱི་ཆོས་མང་དུ་ཉན། དེས་མ་ཚིམ་པར་རྡོ་རྗེ་སེམས་དཔའི་ལུང་བསྟན་ལྟར་སློབ་དཔོན་ཤྲཱི་སིངྷ་ར་གཏུགས་ནས། རྣམ་རྒྱུད་ཕྱི་ནང་གསང་གསུམ་སྤྲོས་པ་མེད་པའི་དབང་། རུ་ཤན་འབྱེད་པའི་སྤྱོད་པ། ཤིན་ཏུ་སྤྲོས་མེད་ཀྱི་དབང་། རབ་ཏུ་སྤྲོས་མེད་ཀྱི་དབང་རྫོགས་པར་གནང་བས་བརྟན་པ་ཐོབ། དེའི་བརྒྱུད་འཛིན་ནི་ཐལ་འགྱུར་ལས། །རྡོ་རྗེས་འཛིན་པ་ཁྱིམ་བདག་རིགས། །ཕྱག་རྒྱ་རྒྱ་ཆེན་དག་གིས་འཛིན། །ཞེས་པ་སློབ་དཔོན་བི་མ་ལ་སྟེ་དེའི་རྣམ་པར་ཐར་བ་མཐའ་ཡས་ཀྱང་ལོ་རྒྱུས་བཙན་པ་ལྟར་སྨྲས་ཟིན་གྱི། །ཁ་ཅིག་ཏུ། ཕ་མེད་ཀྱི་བུར་གྱུར་བས་ཡུམ་གནོང་སྟེ་གཡོག་མོ་བྱེ་མའི་ཁུང་དུ་སྦ་བར་མངགས། དེ་ལྟར་བྱས་རྗེས་ཕྱིས་བལྟས་ཙ་ན་མིག་བཀྲ་ཧྲིག་གེ་མ་ཤི་བར་འདུག་པས་སྤྲུལ་པའི་སྐུ་ཡིན་པར་ཤེས་ནས་བླངས། སླར་པཎྜི་ཏ་ལྔ་བརྒྱའི་སྤྱི་ཕུད་དུ་གྱུར་ནས་དགེ་སློང་ཆེན་པོ་བི་མ་ལ་མི་ཏྲ་སྟེ་བོད་སྐད་དུ། པཎ་ཆེན་དྲི་མེད་བཤེས་གཉེན་དུ་གྲགས་ཏེ་རིག་པའི་གནས་ལྔ་ལ་མཁས་པར་གྱུར་ཅེས་གྲགས་སོ། །དེའི་ཕྱིར་རྒྱུ་ས་ལ་མི་མཁས་པ་རེ་ཙམ་གྱིས་སྨྲ་བ་ལ་ཡིད་བརྟན་མི་རུང་བའི་ཕྱིར། དེ་ཙམ་ཤེས་བྱེད་དུ་དྲངས་ནས་ཨ་ཏི་དང་སྤྱི་ཏི་ལ་ལོག་པའི་ཀུན་རྟོག་སྨྲ་བའང་ཤ་ཐང་ཆད་པའི་རང་བཞིན་ནོ། །དེ་ལྟ་བུའི་སློབ་དཔོན་ཆེན་པོ་བི་མ་ལ་སྟེ་འཛམ་བུའི་གླིང་གི་སྒྲོན་མེ་ཆེན་པོས་སྔོན་ལ་ཤྲཱི་སིང་ཧར་གཏུགས། རྣར་རྒྱུད་ཕྱི་ནང་གསང་གསུམ་གྱི་མན་ངག་གསན་ནས་ལོག །ཕྱིས་ཤྲཱི་སིངྷ་འོད་ཕུང་དུ་ཡལ་ཁར་ཛྙ་ན་སཱུ་ཏྲས་གསོལ་བ་བཏབ་པས། ཞལ་ཆེམས་གཟེར་བུ་བདུན་པ་གསང་བའི་མན་ངག་དང་བཅས་པ་ཛྙཱ་ནར་བབས་པས་གདམས་པ་ཡོངས་སུ་རྫོགས། དེའི་
ཚེ་བི་མ་ར་མཁའ་འགྲོས་ལུང་བསྟན་ནས་སྔ་མ་ལས་ཟབ་པ་གསང་བ་སྙིང་ཐིག་གི་མན་ངག་ཡོད་པ་ལོང་ཞིག་གསུངས་པ་ལྟར། ཛྙཱ་ན་སཱུ་ཏྲ་སྟེ་ཡེ་ཤེས་མདོར་ཞུས་ནས་གདམས་པ་ཡོངས་སུ་རྫོགས། སློབ་དཔོན་དེ་འོད་དུ་ཡལ་ཁར་འདས་རྗེས་པཎྜི་ཆེན་པོ་བི་མ་ལའི་ཕྱག་ཏུ་བབས་པས་དགོངས་པ་ཆོས་དབྱིངས་བྱ་རྩོལ་མེད་པའི་ངོ་བོར་སངས་རྒྱས་སོ། །དགའ་རབ་རྡོ་རྗེ་ཡན་ཆད་ལ་དགོངས་བརྒྱུད་དང་། དེ་མན་ཆད་ལ་མཆོག་གི་དངོས་གྲུབ་བརྙེས་པའི་རིག་འཛིན་བརྡ་བརྒྱུད་དུ་འདྲེན་པའི་རྣམ་གཞག་ཀྱང་ཡོད་དོ། །འདི་མན་ཆད་སྙན་བརྒྱུད་དེ་བོད་དུ་བསྟན་པ་དར་བའི་སྐབས་སུ་གླེང་བར་འཐད་ཀྱང་། རིག་འཛིན་ངེས་པའི་ལུང་བསྟན་གྱི་འགྲོས་ལྟར་དཀྱུས་སུ་གླེང་ན། ཐལ་འགྱུར་ལས། དེ་ཡི་རྗེས་ལ་རྒྱལ་པོའི་རིགས། །སྤྲུལ་པ་ཕྱག་བརྙན་བཅས་པས་འཛིན། །ཞེས་འོད་གསལ་ལྷ་ལས་ཆད་པའི་རྒྱལ་རིགས་འཇམ་དཔལ་དབྱངས་ལྷ་གཅིག་ཁྲི་སྲོང་སྡེའུ་བཙན། ཉང་ཏིང་འཛིན་བཟང་པོ་དང་གཡུ་སྒྲ་སྙིང་པོ་སོགས་ཕྱག་བརྙན་ཏེ་འཁོར་གྱི་རིགས། དེ་ལས་ཆོས་རྒྱལ་དང་གཡུ་སྒྲ་ནི། །བྱ་བ་དགུ་ཕྲུགས་སུ་བཏང་ཞིང་། གནད་རྣམ་པ་གསུམ་ལ་བརྟེན་ནས་སྙིགས་མའི་ལུས་གཞལ་ལྟ་བུར་དངས་པ་ནི་བསྟན་པ་དང་སེམས་ཅན་གྱི་དོན་རླབས་པོ་ཆེ་སྒྲུབ་དགོས་པས་མ་ཡིན་ཀྱང་། དགོངས་པ་ཀ་དག་ཆོས་ཟད་ཀྱིས་ལ་གྲུབ་མཐའ་སྙོགས་པ་ཡིན་ལ། ཉང་ཏིང་འཛིན་བཟང་པོས་སྒྲུབ་པ་རྩེ་གཅིག་ཏུ་མཛད་པས་ལྷ་ས་བྲག་ལྷའི་ཕུག་ཏུ་སྣང་བཞི་མཐར་ཕྱིན་ནས་འོད་ཕུང་དུ་ཡལ་བ་བོད་དུ་འཇའ་ལུས་འགྲུབ་པའི་ཐོག་མ་ཡིན་ནོ། །དེ་ཡི་རྗེས་ལ་དགེ་སྦྱོང་གཟུགས། །ལྷུན་གྱི་རྒྱལ་མཚན་དག་གིས་འཛིན། །ཞེས་གནས་བརྟན་ལྡང་མ་བ་ལྷུན་གྲུབ་རྒྱལ་མཚན། དེ་རྗེས་སིངྷ་ཤྭ་རས་འཛིན། །ཞེས་པ་ལྕེ་བཙུན་ཆེན་པོ་སེང་གེ་དབང་ཕྱུག་སྟེ། ཕྱི་མ་ནི་ལྷུན་གྲུབ་རྫོགས་པ་ཆེན་པོའི་འོད་གསལ་གྱི་སྣང་བ་དབྱིངས་སུ་ཟད་དེ་རྒྱུད་ཉི་ཟླ་ཁ་སྦྱོར་གྱི་དགོངས་པ་ལྟར།
འོ་ཡུག་ལ་ཕྱི་གོང་གི་རྫའི་ཐད་ཀྱི་ནམ་མཁའ་ལ་འོད་ཕུང་གི་རྣམ་པར་གཤེགས་པ་ཡིན་ནོ། །དེ་ཡང་སྔ་མའི་འཕྲོར། དེ་རྗེས་ས་ལ་གནས་པ་ཡི། །བྱང་ཆུབ་སེམས་དཔའ་དག་གིས་འཛིན། །དེ་འོག་ལག་ན་རྡོ་རྗེ་ཡི། །སྤྲུལ་པ་བཛྲ་ཕ་ལས་འཛིན། །དེ་འོག་རྒྱལ་པོ་སེང་གེ་སྟེ། །བཟང་པོ་དག་གིས་འཛིན་པ་ཡིན། །དེ་འོག་སྒྲ་མཁས་དཔལ་འཛིན་ནོ། །དེ་འོག་ཡོ་གི་པྲ་བས་འཛིན། །དེ་འོག་རྒྱལ་པོ་ཁྲི་འོད་དོ། །དེ་འོག་དགེ་སློང་དཔལ་དང་ལྡན། །དེ་ནས་བློ་གྲོས་མཆོག་གིས་འཛིན། །དེ་ནས་མཁའ་འགྲོ་དཔལ་འཛིན་མས། །བསྟན་པ་འདི་ཉིད་བཟུང་ནས་ནི། །ཚེ་ལོ་བཅུ་པའི་དུས་ལ་དར། །དེ་ནས་མི་གནས་རང་ས་ལའོ། །ཞེས་ལུང་བསྟན་པ་ལས། ཕལ་ཆེར་བབས་ལུང་ཆེན་མོར་ལོ་བརྒྱ་བརྒྱ་ན་བི་མ་ལའི་སྤྲུལ་པར་རེ་བྱོན་ནས་སྙིང་ཏིག་གི་ལྟ་སྒོམ་ཐུན་མོང་མ་ཡིན་པ་ཡིད་དཔྱོད་དང་འདྲེས་པ་གསལ་བར་ལུང་བསྟན་པ་ལྟར། ལྡང་མ་མན་ཆད་ན་འབྱུང་བར་ངེས་ཤིང་། དེ་དག་ཀྱང་ཕལ་ཆེར་སར་གནས་ཀྱི་སེམས་དཔའ་སྦས་པའི་ངང་ཚུལ་ཅན་ཡིན་པས་རང་བཞིན་གཅིག་ཏུ་མ་ངེས་ཀྱང་། བརྟག་ན་རིག་པ་རང་ཤར་ལས། །རྡོ་རྗེའི་ནོན་ལྡན་སློབ་དཔོན་ནི། །ངང་རྒྱུད་བཟང་ཞིང་སློབ་ལ་མཁས། །དབང་ཐོབ་གསང་སྔགས་དོན་ལ་སྦྱོར། །ཕྱི་ནང་བྱ་བ་ཐམས་ཅད་ཤེས། །ཡི་དམ་ལྷ་དང་འདུ་འབྲལ་མེད། །ཏིང་ངེ་འཛིན་ལ་ཡེང་བ་མེད། །རྫོགས་ཆེན་མན་ངག་དོན་ལྡན་པའི། །གསང་སྔགས་གསང་བའི་རྒྱུད་ལ་མཁས། །ཕྱི་ནང་སྒྲུབ་པ་ཐམས་ཅད་བྱེད། །ལྟ་བའི་དོན་ལས་མི་འདའ་ཞིང་། །ཕྱི་ནང་གསང་བའི་བྱ་བ་བཏང་། །ཡོན་ཏན་ནོར་བུ་རིན་ཆེན་ལྟར། །ཟད་མེད་གཏེར་ལ་སྤྱོད་པའོ། །ཞེས་དང་། ཀུན་མཁྱེན་གྱིས། འདིར་མཚན་ཉིད་དྲུག་ལྡན་ལ། འཁོར་བའི་ཆོས་རྒྱབ་ཏུ་དོར་བ། འདོད་པ་ཆུང་ཞིང་ཆོག་ཤེས་པ། ལག་ལེན་ལ་མཁས་ཤིང་ཉམས་མྱོང་ཡོད་པ། རྒྱུད་ཀྱི་ཚིག་དོན་ལ་མཁས་ཤིང་
སྒྲུབ་པ་ལ་བརྩོན་པ། ལྟ་བའི་དོན་ལ་མཁས་ཤིང་ནུས་པ་རྫོགས་པ། སྙིང་རྗེ་ཆེ་ཞིང་གཏོང་ལ་དགའ་བའོ། །དེ་དག་རྫོགས་པ་ནི་དཔལ་ལྡན་རྡོ་རྗེ་འཛིན་པ་ཞེས་བྱ་སྟེ། སློབ་མའི་རིགས་དྲུག་གི་ས་བོན་སྟོངས་ནས། ཉོན་མོངས་པ་དྲུག་སྦྱོང་ཞིང་། ཡེ་ཤེས་དྲུག་གི་དོན་འཆར་བ་སྟེ། དེ་ཉིད་ལ་ནུས་པ་མངའ་བའི་ཕྱིར་རོ། །ཞེས་སོ། །དེ་ལྟ་བུའི་ངང་ཚུལ་དང་ལྡན་པ་དེ་ནི་སྤྱིར་སངས་རྒྱས་བསྟན་པའི་སྲོག་ཤིང་ཡིན་ལ། སྒོས་སུ་རྡོ་རྗེ་ཐེག་པའི་རྒྱལ་མཚན། ཁྱད་པར་རྫོགས་པ་ཆེན་པོའི་སྟོན་པ་སྟེ་སློབ་དཔོན་བི་མ་ལའི་སྤྲུལ་པའང་དེ་ལས་གཞན་སུ་ཞིག་གོ། །དེའི་ཕྱིར་དགེ་སློང་དཔལ་ལྡན་ནི་ཀུ་མ་རཱ་ཛར་གྲགས་ལ། བློ་གྲོས་མཆོག་ནི་ཁོ་བོ་ཅག་གི་བླ་མ་དམ་པ་ཐམས་ཅད་མཁྱེན་པ་ཀློང་ཆེན་པ་སྟེ། དེ་སྐད་དུ་བཀའ་ཆེམས་ལས་ཀྱང་། བློ་གྲོས་མིང་ཅན་ཐོགས་མེད་བྱ་བཞིན་རྒྱུ། །ཞེས་སོ། །གཞན་ཡང་ཨ་ཏི་བཀོད་པ་ཆེན་པོ་ལ་སོགས་ཏེ་བཀའ་གཏེར་རིས་མེད་པ་ནས་ལུང་གིས་བསྔགས་ཤིང་། དོན་དམ་པར་གངས་རིའི་ལྗོངས་འདིར་ཤཱཀྱ་སེང་གེའི་ལུང་རྟོགས་ཀྱི་བསྟན་པ་འཛིན་པའི་ཤིང་རྟ་ཆེན་པོ། ཁྱད་པར་ངེས་གསང་རྫོགས་པ་ཆེན་པོའི་བསྟན་པ་གཞི་བཞེངས་སུ་མཛད་ཅིང་། མཁས་པ་དང་གྲུབ་པའི་འཁོར་ལོས་སྒྱུར་བའི་རང་བཞིན་ཆེན་པོར་རྩོད་པ་མེད་པར་ཡོངས་སུ་གྲགས་ཤིང་ཀུན་གྱིས་བསྔགས་ལ། མཆོག་གི་སྤྲུལ་པའི་སྐུ་འདིའི་རྣམ་པར་ཐར་བ་ནི། མཐོང་བ་དོན་ལྡན་དུ་གྲགས་པ་ལ་སོགས་ཏེ་ཕྱི་ནང་གསང་བའི་རང་བཞིན་དུ་མ་ལོ་རྒྱུས་མན་ངག་ནས་བཤད་པའི་ཕྱིར་འདིར་མ་བརྗོད་ལ། རྟོགས་པ་བརྗོད་པ་དང་མཐུན་པའི་བསྟོད་ཚིག་དཔྱིད་ཀྱི་རྒྱལ་མོའི་རྒྱང་གླུར་བསྒྲག་པ་ནི། འོག་མིན་དཔལ་གྱི་མཆིམས་ཕུའི་ནགས་ཀྱི་དུར་ཁྲོད་ཆེན་པོ་ག་ལ་བ་དེར་ཕ་ཞལ་བུས་མཐོང་བའི་ཚེ་གླེངས་ཟིན་ཏོ། །དེ་ལྟར་གོང་གི་ལུང་དུ། ཚེ་ལོ་བཅུ་པའི་དུས་ལ་
དར། དེ་ནས་མི་གནས་རང་ས་ལའོ། །ཞེས་བཤད་མ་ཐག་པ་ལྟར་འཛམ་གླིང་འདིའི་འཕེལ་འགྲིབ་ལན་བདུན་རྫོགས་ཏེ། ཚེ་ལོ་བཅུ་པའི་བར་ཁུག་མན་ཆད་ལ་བསྟན་པའི་བཙས་གསུམ་ཡང་ཞིང་འདིར་མི་གནས་པར་འདི་ནས་ལྷོ་ཕྱོགས་མཛེས་ལྡན་བཀོད་པའི་ཞིང་དུ་འཕར་བ་ནི་ཐལ་འགྱུར་ལས། དེ་ནས་མཛེས་ལྡན་བཀོད་པ་ཡི། །ཞིང་ཁམས་དག་ཏུ་ངེས་འཕར་ནས། །ཚེ་ལོ་དག་ནི་བཅུ་འོག་ཏུ། །འདི་ན་མི་གནས་དེར་སྣང་ངོ། །ཞེས་སོ། །ཞིང་དེའི་ཡང་མཛད་པ་དར་འགྲིབ་བདུན་གྱིས་རྫོགས་ཚེ། མི་མཇེད་སྟོངས་པའི་དུས་ལ་བབ་པ་སྟེ། དེའི་ཚེ་བསྟན་པའི་བཙས་གསུམ་པོ་བྱང་ཕྱོགས་ཡངས་པ་སྐྱོབ་པའི་འཇིག་རྟེན་དུ་འཕར་བ་ནི་སྔ་མ་ལས། དེ་ལྟར་དར་འགྲིབ་རྫོགས་ནས་ནི། །བསྟན་པ་དམ་པའི་སྙིང་པོ་འདི། །ཡངས་པ་སྐྱོབ་པའི་འཇིག་རྟེན་དུ། །སངས་རྒྱས་བསྟན་པ་གནས་བྱེད་པའི། །ཨུཏྤལ་མེ་ཏོག་མཛེས་ཞེས་པའི། །སྟོན་པ་སངས་རྒྱས་བཅོམ་ལྡན་འདས། །བདེ་བྱེད་བརྩེགས་པའི་ཁང་བཟངས་སུ། །སྟོང་ཕྲག་ལྔ་དང་བཅས་པའི་འཁོར། །ཐམས་ཅད་བྱང་ཆུབ་སེམས་ཆེན་པོ། །མི་སྐྱེའི་ཆོས་ལ་བཟོད་ཐོབ་སྟེ། །དགེ་བའི་སེམས་ལྡན་འབའ་ཞིག་བྱུང་། །སྟོན་པ་དེ་ཉིད་བྱོན་པ་དང་། །ལོག་སྲེད་ཅན་རྣམས་དེས་བཏུལ་ནས། །བསྟན་པ་དམ་པ་འདི་ཉིད་ནི། །ལོ་ནི་ལྔ་སྟོང་ཕྲག་སྟོང་དུ། །བསྟན་པའི་སྙིང་པོ་གནས་པར་བྱེད། །དེ་ནས་ཡང་ནི་སྔ་མ་བཞིན། །རིམ་པ་བདུན་གྱི་འཕེལ་འགྲིབ་བྱེད། །ཅེས་པ་ལྟར་ཞིང་ཁམས་དེར་སངས་རྒྱས་ཨུཏྤལ་མཏོག་གིས་བཟུང་ནས་དར་ནུབ་བདུན་རྫོགས་པའི་འོག་ཏུ། ནུབ་ཕྱོགས་གཙུག་ཕུད་དབྱངས་ཞེས་བྱ་བའི་འཇིག་རྟེན་དུ་འཕར་ནས། །སངས་རྒྱས་འཁོར་བའི་འཇིག་གིས་བཟུང་། དེར་ལོ་འབུམ་ཕྲག་བདུན་དུ་དར་ནུབ་བདུན་གྱི་ཚུལ་དུ་གནས་པའི་འོག་ཏུ། །ཞིང་ཁམས་དེ་དང་། རྡོ་རྗེ་འཆང་གིས་བཀོད་པའི་ཚངས་ཆེན་གྱི་བསྐལ་
པ་ན་ཡོད་པའི་ཞིང་ཁམས་ཐམས་ཅད་ཀྱི་འགྲོ་བ་མཐའ་དག་གདོད་མའི་སར་གྲོལ་ཏེ། ཚངས་ཆེན་གྱི་བསྐལ་པ་སྣོད་བཅུད་དང་བཅས་པ་སྟོངས་ཏེ་ཐམས་ཅད་ནམ་མཁའི་རང་བཞིན་དུ་གྱུར་བ་ལ་བསྐལ་པ་བརྒྱད་ཅུ་རྩ་ལྔར་གནས་ཤིང་། བསྟན་པའི་བཙས་གསུམ་ཡང་རྡོ་རྗེ་འཆང་གི་མཛད་པ་ཆེན་པོ་རྫོགས་པས། ཆོས་ཉིད་ཞི་བའི་དབྱིངས་སུ་རང་ཡལ་ནས་མི་སྣང་བར་འགྱུར་ཏེ་སྔ་མ་ལས། དེ་འོག་གཙུག་ཕུད་དབྱངས་ལྡན་པའི། །འཇིག་རྟེན་ཁམས་ནི་ཡངས་པས་ནི། །སྟོན་པ་མཐའ་ཡས་འཁོར་བ་འཇིག། འཁོར་ནི་བརྒྱ་ཕྲག་ཕྱེད་དང་བརྒྱད། །ཀུན་ཀྱང་དགྲ་བཅོམ་ཟག་པ་ཟད། །བྱ་བ་བྱས་ཤིང་ཁུར་བོར་བའོ། །དེས་ཀྱང་བསྟན་པའི་སྙིང་པོ་ཉིད། །ལོ་ནི་འབུམ་ཕྲག་བདུན་དུ་གནས། །སྔར་ཤུགས་ཉིད་ཀྱི་རིམ་པ་ཡིས། །དེ་ལྟར་གནས་པ་བདུན་ཐལ་ནས། །བསྐལ་པ་བརྒྱད་ཅུ་རྩ་ལྔར་ཡང་། །ཆོས་རྣམས་སངས་རྒྱས་སྐུར་ཐིམ་ནས། །འཇིག་རྟེན་ཁམས་ནི་གང་དུ་ཡང་། །སངས་རྒྱས་བསྟན་པ་མི་གནས་སོ། །ཞེས་སོ། །དེ་ལྟར་བསྐལ་པ་སྟོངས་པར་གྱུར་བ་ཡང་། །ཡང་རེ་ཞིག་གི་ཚེ་རྡོ་རྗེ་འཆང་གིས་སྤྲུལ་པས་ཚངས་ཆེན་བཀོད་དེ། འགྲོ་བ་དབྱིངས་ནས་སྣང་བ་དང་། བསྐལ་པས་ཡ་དྲུག་འབུམ་དུ་གདུལ་བྱའི་སྣང་བ་ལ་འདུལ་བྱེད་ཀྱི་སྟོན་པ་བྱོན་དུས། བསྟན་པའི་བཙས་གསུམ་ཡང་ཀུན་ཏུ་བཟང་པོའི་བྱིན་རླབས་ལས་རང་ཤར་ཏེ། འཕེལ་འགྲིབ་མེད་པར་སེམས་ཅན་གྱི་དོན་འབྱུང་བར་འགྱུར་ཏེ་སྔ་མ་ལས། དེ་འདས་འཇིག་རྟེན་འོག་མ་ལ། །བསྐལ་པ་ས་ཡ་དྲུག་འབུམ་དུ། །སངས་རྒྱས་བསྟན་པ་ཡུན་རིང་གནས། །འདི་ལ་འཕེལ་འགྲིབ་འབྱུང་བ་མིན། །འགྲོ་བ་རྣམས་ནི་སྨིན་བྱེད་དོ། །ཞེས་བཤད་དོ། །དེའི་ཕྱིར་གསང་ཆེན་ངེས་པའི་བསྟན་པ་བླ་ན་མེད་པ་འདིས་གདུལ་བར་བྱ་བའི་ཞིང་ཁམས་དང་། དུས་ཀྱི་རིམ་པ་ཚད་མེད་པ་ཙམ་དུ་གྲོལ་བའི་རྣམ་གྲངས་ཀྱང་ཚད་མེད་པར་འགྱུར་ཏེ།
མི་མ་ཡིན་དང་མཁའ་འགྲོ་མ་གྲོལ་བའི་གྲངས་ན་གངྒཱའི་ཀླུང་གི་བྱེ་མའི་རྡུལ་གྱིས་ཀྱང་བགྲངས་བར་མི་སྤོབས་སོ། །འཛམ་བུའི་གླིང་འདིར་སྐྱེས་པ་དང་། བུད་མེད་དང་། རབ་ཏུ་བྱུང་བ་དང་། ཁྱིའུ་དང་། བུ་མོ་དང་། ཛོ་ཀིའི་རྣམ་འགྱུར་ཅན་དག་ཚེ་འདི་དང་བར་དོ་ལ་སོགས་པར་གྲོལ་བའི་རྣམ་གྲངས་ངེས་པ་ནི། བཀོད་པ་ཆེན་པོ་ལས། ཉོན་ཅིག་རིགས་ལྡན་དགེ་སྦྱོང་དཔལ། །ང་ནི་འདི་ནས་མི་གནས་ནས། །ཚེ་ལོ་དྲུག་ཅུ་ཡན་ཆད་ལ། །འབྲས་བུར་གྲོལ་བ་སྟོང་ཕྲག་གཅིག། འབྱུང་བ་རང་དེངས་དག་ཏུ་སྟེ། །དགེ་སྦྱོང་གཟུགས་ནི་དེ་ཡིས་ཕྱེས། །ལྷག་མ་བྱང་ཆུབ་སེམས་དཔའ་འོ། །དེ་ནས་ལྔ་བཅུ་ལ་ཐུག་པར། །འབྱུང་བ་རང་སར་རེངས་པ་ནི། །འབུམ་ཕྲག་གཉིས་ཀྱིས་སྐྱེས་མེད་ཐོབ། །ཕལ་ཆེར་བུད་མེད་དག་གིས་གཟུགས། །སྐྱེད་པ་དག་ནི་སྟོང་ཕྲག་གཉིས། །དེ་ནས་ཚེ་ལོ་སུམ་ཅུའི་བར། །འབུམ་ཕྲག་དག་ནི་དྲུག་པ་སྟེ། །འདི་དག་ཕལ་ཆེར་སྐྱེས་པ་ལ། །བུད་མེད་འབུམ་ཕྲག་གཅིག་གིས་ཡིན། །འབྱུང་བ་དག་ནི་དང་དེངས་སོ། །དེ་དག་སྔོན་བྱུང་ང་ཡི་འཁོར། །སྙིགས་མའི་དུས་ན་སངས་རྒྱས་ཐོབ། །ངེས་གསང་སྙིང་པོ་ཡང་བསྡུས་པ། །འབྲས་བུ་ཉིད་ནི་ཐོབ་པ་ལས། །བསྟན་པ་གཞན་གྱི་འབྲས་བུ་མིན། །གལ་ཏེ་བསྟན་པ་གཞན་དག་ལ། །མངོན་པར་སངས་རྒྱས་འབྱུང་དག་ན། །འདི་ཉིད་ཕྲད་དེ་དེ་བཞིན་ནོ། །འབྲས་བུ་ཀུན་གྱི་ཐུས་ཀ་རུ། །འདི་ཉིད་དག་ནི་བསྟན་པའོ། །ཞེས་པ་སྟེ། འདི་རྣམས་ནི་འབྱུང་བ་རང་དེངས་ཀྱི་གྲངས་སུ་ངེས་པའོ། །གང་ན་སང་རྒྱས་ཐོབ་པ་དེདག་ཐམས་ཅད་གསང་ཆེན་འདིའི་སྒྲོན་སངས་རྒྱས་པའི་ཕྱིར་དུས་གསུམ་གྱི་བདེ་གཤེགས་པ་ཐམས་ཅད་ཀྱི་གཤེགས་ཤུལ་ཞེས་བརྗོད། ཅིའི་ཕྱིར་ན། རིག་པ་མངོན་སུམ་གྱི་ཆོས་ཉིད་ལ་གོམས་ནས་སངས་རྒྱས་ཀྱི། དེ་ལས་གཞན་གྱི་མ་ཡིན་པའི་ཕྱིར་རོ། །བར་དོར་གྲོལ་
བའི་གྲངས་ནི་བཀོད་པ་ཆེན་པོ་ལས། །སྐྱེ་གཉིས་བར་དུ་མངོན་པར་སངས་རྒྱས་པ། །ཚེ་ལོ་བཅུ་པའི་བར་ལ་འདི་དག་གོ། སྟོང་ཕྲག་བདུན་ནི་སྣང་བ་མ་དང་ཕྲད། །སྐྱེས་པ་དག་ནི་སྟོང་ཕྲག་དྲུག་ཉིད་ལ། །བུད་མེད་གཟུགས་ནི་སྟོང་ཕྲག་གཅིག་ཡིན་ནོ། །དེ་ལྟར་སྐྱེས་དང་བུད་མེད་ཁྱིའུ་བུ་མོ། །ཇི་ལྟར་འགྱུར་བའི་གཟུགས་སུ་འདུག་ཀྱང་བླའི། །འདི་དང་ཕྲད་རྣམས་རྣམ་པར་གྲོལ་བའོ། །ཞེས་སོ། །དེའི་ཕྱིར་བླ་ན་མེད་པའི་ཐེག་པ་འདི་འབྲས་བུའི་ཐུས་ཀ་ཡིན་པའི་ཕྱིར་གསང་མཆོག་ངེས་པའི་ལམ་འདི་ལ་ཞུགས་ནས་ཁྲིད་དང་གདམས་པ་ཐོབ་ན། གོ་དོན་མ་རྙེད་ཀྱང་ཐོས་པའི་ཕན་ཡོན་ཁོ་ནས་ཀྱང་རིང་པོར་མི་ཐོགས་པར་གྲོལ་བ་ཡིན་ནོ། །གཏི་མུག་ཅན་ཁ་ཅིག་ཐོས་པས་གྲོལ་བ་དང་བཏགས་པས་གྲོལ་བ་ཞེས་མི་རིགས་པའི་ཤེས་བྱེད་དུ་འདྲེན་པ་ནི། སངས་རྒྱས་ཐབས་མཁས་ལ་ཐུགས་རྗེ་ཆེ་བས་བསྐལ་བས་གྲོལ་བ་དང་། ཚེ་གཅིག་ལ་གྲོལ་བ་དང་། བཙན་ཐབས་སུ་གྲོལ་བ་ལ་སོགས་པའི་ཆོས་ཀྱི་རྣམ་གྲངས་ཚད་མེད་པར་སྟོན་པ་རྣམས་ལའང་ཡིད་མ་ཆེས་པ་སྟེ། བཟང་སྤྱོད་ལས་ཀྱང་། གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་བཏོན་ཏམ་ཀློག་པ་ཡིས། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག། ཅེས་ཐུན་མོང་གི་ཐེག་པ་ནས་ཀྱང་དེ་ལྟར་དུ་བཤད་པ་མ་བསམས་པའི་ཕྱིར་རོ། །དེས་ན་གསང་སྔགས་ཟབ་མོ་འདི་ལྟ་བུས་བཙན་ཐབས་སུ་གྲོལ་བ་ཅིའི་ཕྱིར་མི་འཐད། བློ་ཆུང་ཁྱོད་བསྐལ་པ་གྲངས་མེད་གསུམ་དུ་སངས་རྒྱ་བའི་ཆོས་ཁོ་ན་སྒུག་པ་ལས་གཞན་ལ་རྫུན་པར་འཛིན་པའང་རང་གི་ལས་སུ་ཤེས་པར་བྱ་སྟེ། དཔེར་ན་དཀོན་མཆོག་བརྩེགས་པའི་ལེའུ་དང་པོར། འོད་སྲུངས། དགེ་སློང་ཀོ་ཀ་ལི་ཀ་དང་། དགེ་སློང་ལྷས་བྱིན་དང་། དགེ་སློང་ཁཎྜ་ར་བྱ་བ་དང་། དགེ་སློང་ཀརྟ་ཏི་ཤྱ་དང་། དགེ་སློང་རྒྱ་མཚོས་བྱིན་ལ་ལྟོས། འོད་སྲུངས། རྟ་ཐུལ་དང་། ནབས་སོལ་ལྟོས། །འོད་སྲུངས།
དགེ་སློང་སྐར་བཟང་འདི་ངའི་གཡོག་བྱེད་དེ། ངའི་མདུན་ན་སྨྲ་ཞིང་འཆག་པ་དང་འདུག་པ་ལ་ཡང་བལྟ། རྫུ་འཕྲུལ་གྱི་སྟོབས་ཀྱིས་སྟེང་གི་བར་སྣང་ལ་འཆག་པ་ལ་ཡང་བལྟ། ཆོས་དང་མཐུན་པས་མུ་སྟེགས་ཅན་སྟོང་ཚར་བཅད་པ་ལ་ཡང་བལྟ། དེ་ང་ལ་དད་པར་མི་བྱེད་ཅིང་། ཚིག་རེ་རེ་ལ་ཡང་མཐུན་སྐར་མ་རྒྱལ་ལ་སྐྱེས་པར་བརྟེན་རྒྱལ་ལམ། སྐར་བཟང་། རྒྱུ་སྐར་བཟང་པོ་ཞེས་བརྟགས་པ་ལེགས་པའི་སྐར་མ་ཡིན།པར་མི་བྱེད་པ་ལ་ལྟོས། གང་ཚིག་རེ་རེ་ལ་ཡང་མཐུན་པར་མི་བྱེད་པ་དེ་ནི། ངན་པར་འགྲོ་བར་འགྱུར་རོ། །ཞེས་གསུངས་པས་ཤེས་པར་འགྱུར་ལ། དེའི་ཕྱིར་བདག་ཅག་གི་བསྐལ་པ་གྲངས་མེད་པར་སངས་རྒྱས་མང་པོ་མཆོད་ཅིང་ཀུན་ཏུ་བཟང་པོའི་འཁོར་དུ་འདུས་པ་ཆོས་ཅན། ཡང་གསང་བླ་ན་མེད་པའི་ཐེག་པ་དང་མཇལ། དེ་ལ་ཡིད་ཆེས་ནས་ཚུལ་བཞིན་དུ་སྤྱོད་པའི་ཕྱིར་རོ། །ཐུན་མོང་གི་ཐེག་པ་དང་ཕྲད་པ་ཙམ་ལའང་སངས་རྒྱས་མཆོད་པ་ལ་སོགས་པའི་དགེ་རྩ་སྔོན་དུ་སོང་ངེས་ན། ཚེ་འདིའམ། བར་དོའམ། རང་བཞིན་སྤྲུལ་སྐུའི་ཞིང་གང་རུང་དུ་མྱུར་བོར་སངས་རྒྱས་འགྲུབ་པའི་འབྲས་བུའི་ཐུས་ཀ་འདི་ལྟ་བུ་དང་མཇལ་བ་སྔོན་གྱི་ལས་འཕྲོ་ཁྱད་པར་ཅན་ཡོད་ཅིང་བསོད་ནམས་མ་ཡིན་པའི་ལས་ལ་ཕྱིར་ཕྱོགས་པར་གདོན་མི་ཟའོ། །དེ་ལྟར་རྒྱུད་ཀྱི་ཆོས་འབྱུང་གླེངས་ཤིང་ཐེག་པའི་རང་བཞིན་དབྱེ་བ་ནི་རྒྱུད་འཆད་པའི་མན་ངག་ལས་ཆིངས་ཆེན་པོ་ལྔས་ཁོག་དབུབ་པ་སྟེ། ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །རྩ་བ་དོན་གྱིས་མ་བཤད་ན། །ཆོས་རྣམས་རིག་པར་མི་འདུས་པས། །མཐའ་ཡས་པ་ཡི་སྐྱོན་དུ་འགྱུར། །ཡོ་ག་དོན་གྱིས་མ་བཤད་ན། །ཐེག་པའི་རུ་ཤན་མི་ཕྱེད་པས། །ཆེ་ཆུང་རིམ་པ་དོན་མེདའགྱུར། །ཚིག་གི་དོན་གྱིས་མ་བཤད་ན། །རྒྱུད་རྣམས་རིམ་པར་གསལ་བའི་ཚིག།
འབྲུ་མི་ཆོམས་པའི་སྐྱོན་དུ་འགྱུར། །དགོས་ཆེད་དོན་གྱིས་མ་བཤད་ན། །རྫོགས་ཆེན་བྱ་རྩོལ་མེད་པ་ལ། །དོན་མེད་པ་ཡི་སྐྱོན་དུ་འགྱུར། །ཅེས་གསུངས་པའི་ཕྱིར་རོ། །གཉིས་པ་སོ་སོའི་རང་བཞིན་རྣམ་པར་གཞག་པ་ལ་གཉིས། རྒྱུད་ཀྱི་འཆད་ཐབས་སྤྱིར་བསྟན་པ་དང་། རང་བཞིན་བྱེ་བྲག་ཏུ་དབྱེ་བའོ། །དང་པོ་ནི། ཐུན་མོང་གི་གླེང་གཞི་ཕུན་སུམ་ཚོགས་པ་ལྔས་མདོར་བསྟན། ཐུན་མོང་མ་ཡིན་པའི་གླེང་སློང་ཕུན་སུམ་ཚོགས་པ་ལྔའི་ཆིངས་ཀྱིས་རྒྱས་པར་བཤད་པ་སྟེ། དེའང་ཐུན་མོང་བ་རྣམ་ལས་གླེང་གཞི་གང་རུང་གཅིག་ལས་མི་འབྱུང་ལ། འདིར་ཐལ་འགྱུར་ལས། ཐེག་གཞན་རྣམས་དང་སྒོ་བསྟུན་ཕྱིར། །ཐུན་མོང་དག་གི་གླེང་གཞི་ཡིས། །སྡུད་པོ་རང་གི་འཁོར་རྣམས་ལ། །ཡིད་ཆེས་བྱ་ཕྱིར་བསྟན་པ་སྟེ། །གདུལ་གཞི་ལས་ནི་འདུལ་བྱེད་དུ། །བྱུང་བས་བསྟན་པ་གནས་པར་བྱེད། །ཅེས་གཞི་རང་བཞིན་གྱི་འོད་གསལ་བ་ཆོས་དབྱིངས་དོན་གྱི་འོག་མིན་དུ། རང་རིག་འཕོ་འགྱུར་མེད་པས་བླང་དོར་གྱི་ཆོས་ཉིད་ལས་འདས་པའི་རང་བཞིན་སྟོན་པ། འདི་སྐད་བདག་གིས་བསྟན་ཅིང་བཤད་པའི་དུས་ན་ཞེས་འབྱུང་ལ། ཚིག་གི་རྒྱུད་དེ་ཉིད་གནས་གང་དུ་བྱུང་བས་ཉམས་སུ་ལེན་པ་ད་ལྟ་བའི་དུས་མཚོན་ལ། འདི་སྐད་བདག་གིས་ཐོས་པའི་དུས་གཅིག་ན་ཞེས་གླེང་གཞི་གཉིས་སུ་བཀའ་སྩལ་པ་ཡིན་ནོ། །འདུ་ཤེས་ལོག་པ་དག། མདོ་རྒྱུད་གཞན་ནས་འདི་སྐད་བདག་གིས་ཐོས་ཞེས་གསུངས་ཀྱིས། འདིར་བསྟན་ཞེས་བྱུང་བས་རྒྱུད་མ་ཡིན་ཏོ་ཟེར་བ་ནི་བློ་གྲོས་ཀྱི་མི་གཟུམ་པ་སྟེ། བསྟན་པས་བཅོས་མ་ཡིན་ན་འཇམ་དཔལ་ལས། གསང་བའི་བདག་པོ་དེ་ཕྱིར་ངས། །ཁྱོད་ལ་ལེགས་པར་བསྟན་པར་བྱ། །ཞེས་དང་། བདེ་མཆོག་རྩ་རྒྱུད་ལས། དེ་ནས་གསང་བ་བསྟན་པར་བྱ། །ཞེས་གསུངས་པས་དེ་དག་ཀྱང་། བཅོས་མར་འགྱུར་པའི་སྐྱོན་ཡོད་དོ། །ད་དུང་ཁྱད་པར་གྱི་ཆོས་
བསྒྲུབ་ན། ཐུན་མོང་དུ་འདི་སྐད་བདག་གིས་ཐོས་ཞེས་པ་ཚིག་ཙམ་ཐོས་ཀྱི་དོན་ཁོང་དུ་མ་ཆུད་ཅེས་པའི་དོན་དང་། བླ་ན་མེད་པ་འདི་བསྟན་ཅིང་བཤད་པའི་དུས་ཀྱི་སྒྲས་ཚིག་དོན་མ་ལུས་པ་ཁོང་དུ་ཆུད་ཅིང་སྟོན་པ་དང་སྡུད་པོ་གཉིས་སུ་མེད་པའི་ཆེ་བའང་ཞར་ལ་གྲུབ་པས་ཁྱད་པར་དུ་འཕགས་པ་ཡིན་ནོ། །དེའི་ཕྱིར་དོན་གྱི་རྒྱུད་འབྱུང་བར་སྟོན་པ་ཐུན་མོང་མ་ཡིན་པའི་གླེང་གཞི་ཡིན་ལ། ཚིག་གི་རྒྱུད་འབྱུང་བར་མཚོན་པ་ཐུན་མོང་གི་གླེང་གཞི་སྟེ་ཐེག་པ་ཀུན་མདོ་མཐུན་པར་བསྟན་པའོ། །བཤད་ཐབས་དངོས་ལ་ཆིངས་ཆེན་པོ་ལྔ། ཡན་ལག་རྣམ་པ་བཞིར་ཡོད་པའི་སྔ་མ་ནི་དྲངས་ཟིན་ལ། ཡན་ལག་བཞི་ནི་རིག་པ་རང་གྲོལ་ལས། ཁྱུང་ཆེན་མཁའ་ལྡིང་ལྟ་བུའི་བློས། །དོན་གྱི་ཁོག་རྣམས་ཕུབ་སྟེ་བཤད། །སྟག་མོའི་མཆོངས་རྟངས་ཤེས་རབ་ཀྱིས། །དོན་གྱི་ས་ཆེན་བཅད་དེ་བཤད། །རུས་སྦལ་ནུར་འགྲོས་ལྟ་བུའི་བློས། །ཡི་གེའི་འབྲུ་རྣམས་ཆོམ་པར་བཤད། །མུ་ཏིག་བསྟར་བརྒྱུས་ལྟ་བུའི་བློས། །མན་ངག་དོན་དུ་བསྡེབས་ལ་བཤད། །ཅེས་པས། དོན་གྱི་ཁོག་ཁྱུག་གི་ནམ་མཁའི་དབྱིངས་འཇལ་བ་ལྟར་ཕུབ། དཀྱུས་ཀྱི་ས་སྟག་མོ་ནགས་ལ་མཆོངས་པ་ལྟར་བཅད། ཚིག་གི་དོན་རུས་སྦལ་དལ་གྱིས་འགྲོ་བ་ལྟར་བཤད། མན་ངག་གི་དོན་མུ་ཏིག་སྟར་ལ་བརྒྱུས་པ་བཞིན་བསྡུ་བ་སྟེ་རྒྱུད་ཀྱི་བཤད་ཐབས་སྤྱིར་བསྟན་པ་ཡིན་ནོ། །གཉིས་པ་སོ་སོའི་རང་བཞིན་བྱེ་བྲག་ཏུ་དབྱེ་བ་ལས། དང་པོ་བསྐྱེད་པ་མ་ཧཱ་ཡོ་ག་ནི། དེའང་ཞེ་སྡང་ཤས་ཆེ་ཞིང་རྟོག་པ་མང་བ་རྣམས་ལ་སྣང་བ་ཐབས་ཀྱི་རང་བཞིན་པའི་རྒྱུད་དུ་བསྟན་པ་སྟེ། དེ་ལ་གསུམ། ངོ་བོ། དབྱེ་བ། ངེས་བྱེད་དོ། །དང་པོ་ནི། མ་ཧཱའི་སྒྲ་ལས་དྲངས་པ་ཆེན་པོ། ཡོ་གའི་སྒྲ་ལས་དྲངས་པ་རྣལ་འབྱོར། ཏནྡྲའི་སྒྲ་ལས་དྲངས་རྒྱུད་དེ། རྣལ་འབྱོར་ཆེན་ཐབས་ཀྱི་རྒྱུད་ཅེས་བྱ་བ། ་འདི་ལྟར་
སྣང་སྲིད་ཀྱི་རོལ་བར་སྣང་བ་ཐམས་ཅད་ལྷ་དང་གཞལ་མེད་ཁང་ཆེན་པོར་བལྟ་ཞིང་། ཕུང་པོ་ལྔ། ཁམས་དྲུག། སྐྱེ་མཆེད་བཅུ་གཉིས་ལ་སོགས་པ་ལྷའི་ཕྱག་རྒྱ་གཅིག་ཏུ་གསལ་ཞིང་། རླུང་ལྔ་གཙོ་བོར་གྱུར་བའི་བདེ་གསལ་མི་རྟོག་པའི་ཡེ་ཤེས་ཆེན་པོ་གཉིས་སུ་མེད་པའི་ལམ་གཙོ་བོར་བྱས་ནས་སྣང་གྲགས་རིགས་གསུམ་དཀྱིལ་འཁོར་གསུམ་གྱི་ངོ་བོར་རྫོགས་པས་ཚེ་འདིར་གྲོལ་བར་འདོད་པའོ། །གཉིས་པ་དབྱེ་བ་ལ་གསུམ། ངོ་བོ་གཞི་ལམ་འབྲས་བུ་གཙོ་བོར་འདོད་པ་དང་། ཐབས་ལམ་བསྒྲུབ་པ་གཙོ་བོར་འདོད་པ་དང་། སྣ་ཚོགས་ལམ་འགྱུར་གཙོ་བོར་འདོད་པའོ། །དང་པོ་ནི། བཤད་རྒྱུད་མེ་ལོང་ལས། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཞེས་དང་། སྙིང་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། ཐབས་དང་རྒྱུ་ལས་འབྲས་བུའོ། །ཞེས་གང་རྟོགས་པར་བྱ་བ་རང་བཞིན་གཞིའི་རྒྱུད་སེམས་ཉིད་འོད་གསལ་བ་དང་། དེ་མཚོན་བྱེད་མིང་ཚིག་ཡི་གེར་སྣང་བས་རྟོགས་པར་བྱེད་པའི་བགྲོད་པ་ཐབས་སམ་ལམ་གྱི་རྒྱུད་སྨིན་བྱེད་ཀྱི་དབང་དང་གྲོལ་བྱེད་ཀྱི་བསྐྱེད་རྫོགས་ཟབ་མོའི་ཏིང་ངེ་འཛིན་ལས་རྩེ་གཅིག་ཏུ་མི་གཡོ་བའི་དྲོད་ལས་ཡོན་ཏན་གོང་ནས་གོང་དུ་བསྒྲུབ་པ་སྟེ། དེ་སྐད་དུ། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་སོ། །དེ་ལྟར་བསྒྲུབས་པས་མཐར་ཕྱིན་པ་འབྲས་བུའི་རྒྱུད་རང་བྱུང་གི་ཡེ་ཤེས་མངོན་དུ་བྱེད་པ་མཆོག་གི་བསྒྲུབ་པ་གཙོ་བོ་ཡིན་པའང་འདོད་དེ། སྦྱང་གཞི་རྒྱུའི་རྒྱུད་ལ་བརྟེན་ནས། སྦྱང་བྱ་གློ་བུར་གྱི་དྲི་མ་རྣམས་སྦྱོང་བྱེད་ལམ་མམ་ཐབས་ཀྱི་རྒྱུད་ཀྱིས་ལེགས་པར་སྦྱངས་པས། སྦྱངས་འབྲས་བླ་ན་མེད་པ་མཆོག་གི་འབྲས་བུ་ནམ་ཡང་རྒྱུན་ཆད་མེད་པའི་རྒྱུད་ཀྱི་དབྱིངས་ལ་སྦྱོར་བ་ལ་ཐ་སྙད་བཞག་པ་སྟེ། སྒྱུ་འཕྲུལ་བྱེ་བྲག་བསྟན་པ་ལས། གྲུབ་པའི་རྣལ་
འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་པའང་། །བརྟགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་བཤད་དོ། །གཉིས་པ་ཐབས་ལམ་བསྒྲུབ་པ་གཙོ་བོར་འདོད་པ་ནི། སྐུའི་དཀྱིལ་འཁོར་འཇམ་དཔལ་སྒྱུ་འཕྲུལ་དྲྭ་བ། གསུང་གི་དཀྱིལ་འཁོར་པདྨ་སྒྱུ་འཕྲུལ་དྲྭ་བ། ཐུགས་ཀྱི་དཀྱིལ་འཁོར་ཁྲག་འཐུང་། ཡོན་ཏན་གྱི་དཀྱིལ་འཁོར་རིན་པོ་ཆེ། ཕྲིན་ལས་ཀྱི་དཀྱིལ་འཁོར་སྒྱུ་འཕྲུལ་དྲྭ་བ་ལམ་དུ་བྱེད་པ་སྟེ། དཀྱིལ་འཁོར་ལྔ་གང་རུང་གི་སྒྲུབས་པ་ལ་བརྟེན་ནས། རྟོགས་པ་དང་ཏིང་ངེ་འཛིན་རྗེས་ལ་སྐྱེ་བས་བསྒྲུབ་པ་ལས་དངོས་གྲུབ་འདོད་ཅིང་ལམ་བསྒྲུབས་པས་གཞི་འབྲས་ཞར་ལ་འདོད་པའོ། །གསུམ་པ་སྣ་ཚོགས་ལམ་གྱུར་ལ་རྒྱུད་དང་། སྒྲུབ་ཐབས་གཉིས་ལས། རྒྱུད་ལ་བསྐྱེད་རྫོགས་རིམ་ཅན་དུ་འདོད་པ་རཏྣ་ཀཽ་ཏུ་བྷ་དང་རྡོའི་ཁམས་ལྷན་ཅིག་ཏུ་བཞག་པས་རིམ་གྱིས་གསེར་གྱི་རང་བཞིན་དུ་འགྱུར་བ་ལྟ་བུ་དང་། དུས་ཅིག་ཅར་དུ་འདོད་པ་མཀྵི་ཀའི་སྦྱོར་བས་ལྕགས་ཁམས་མྱུར་བོར་གསེར་དུ་བསྒྱུར་ནུས་པ་བཞིན་ཏེ། གཉིས་ཀས་གཞི་ལམ་ཞར་ལ་འདོད་པའོ། །ནོ་པི་ཀ་ལ་གཉིས། སོ་ཏ་ནོ་པི་ཀ་ཐམས་ཅད་སེམས་ཀྱི་རོལ་བར་ཤེས་པ་གཙོ་ཞིང་ཡན་ལག་དང་བཅས་བསྒྲུབ་པ་དང་། མཎྜལ་ནོ་པཾ་ཀ་དཀྱིལ་འཁོར་དུ་འཇུག་པ་ཚོགས་གཙོ་བོར་བྱས་ཏེ་བསྒྲུབ་པའོ། །དེ་དག་གི་ངོ་བོ་ཀུན་རྫོབ་ཙམ་དུ་ཡང་དག་པའི་ཀུན་རྫོབ་ཀྱི་གནས་སྐབས་ཕྱི་སྣོད་ཀྱི་འཇིག་རྟེན་གཞལ་ཡས་ཁང་དུ་བལྟ། ནང་བཅུད་ཀྱི་སེམས་ཅན་བརྟེན་པ་ལྷ་དང་ལྷ་མོའི་དཀྱིལ་འཁོར་དུ་བལྟས་པས། འགྲོ་བ་ཐམས་ཅད་ལྷ་དང་ལྷ་མོའི་གཟུགས་སུ་མཐོང་བས། །གནས་སྐབས་སུ་ཡི་དམ་གྱི་ལྷ་ལ་སྲོག་གཅོད་པ་དང་། རྫུན་དུ་སྨྲ་བ་ལ་སོགས་པས་མཚོན་ཏེ་མི་དགེ་བའི་ལས་སྤང་བ་དང་། མཐར་ཐུགས་བདེན་པས་ཕྲལ་དུ་མ་གོལ་བར། དོན་དམ་པ་ཅིའི་ངོ་བོར་ཡང་མ་གྲུབ་པའི་ཟུག་འཇུག་དབྱེར་མེད་དུ་རྟོགས་པ་ཡིན་པའི་ཕྱིར་རོ།
གསུམ་པ་ངེས་འབྱེད་རྒྱུད་སྡེའི་རྣམ་གྲངས་ལ། རྩ་རྒྱུད་དང་མན་ངག་གི་རྒྱུད་གཉིས་ལས། རྩ་བའི་རྒྱུད་ལ། དཔལ་གསང་བ་འདུས་པ་ནམ་མཁའ་དང་མཉམ་པའི་རྒྱུད། རི་རབ་ཟེ་མ་རྒྱ་མཚོ་དང་མཉམ་པའི་རྒྱུད། ཡེ་ཤེས་རྒྱས་པ་ས་གཞི་དང་མཉམ་པའི་རྒྱུད་དོ། །གདམས་པ་མན་ངག་གི་རྒྱུད་ལ། བར་ཆད་སྲུང་བ་གཟི་ལྡན་འབར་བ་མཚམས་ཀྱི་རྒྱུད། རྔམ་བྱེད་མེ་ལྟར་འབར་བའི་རྒྱུད། ཟ་བྱེད་རོལ་བ་སྦྱིན་སྲེག་གི་རྒྱུད། སྟོབས་པོ་ཆེ་ཡོངས་སུ་སྒྲོལ་བའི་རྒྱུད། ཟླ་གསང་ནག་པོའི་རྒྱུད། ཞི་བ་ལྷའི་རྒྱུད་ལ་སོགས་པའོ། །གཉིས་པ་ལུང་ཨ་ནུ་ཡོ་ག་ནི། སྦྱང་གཞི་འདོད་ཆགས་ཤས་ཆེ་ཞིང་སེམས་གནས་པ་ལ་དགའ་བ་ལ། སྦྱང་བྱ་སྟོང་པ་དེ་ཁོ་ན་ཉིད་ཀྱི་རྫོགས་རིམ་ཤེས་རབ་མའི་རྒྱུད་དུ་བསྟན་པ་སྟེ། དེ་ལ་གསུམ། ངོ་བོ། དབྱེ་བ། ངེས་བྱེད་དོ། །དང་པོ་ནི། ཨ་ནུ་ཡོ་གའི་སྒྲ་ལས་རྗེས་སུ་རྣལ་འབྱོར། ཏནྡྲ་སྟེ་རྒྱུད། དབྱིངས་བདེ་ཆེན་རྣལ་འབྱོར་གྱི་རྒྱུད་ཆེན་པོ་སྟེ། སྣོད་བཅུད་ཐམས་ཅད་ལྷའི་རང་བཞིན་དུ་དབྱིངས་ན་སངས་རྒྱས་པར་རྟོགས་པའི་སྤྲོས་བྲལ་གྱི་མཐའ་གང་དུའང་མ་དམིགས་པའི་རང་བཞིན་གྱིས། ཐབས་བསྐྱེད་པའི་རིམ་པ་ཤས་ཆུང་ཞིང་། རྫོགས་པའི་རིམ་པ་ཤེས་རབ་རྩ་ཐིག་རླུང་གི་རྣལ་འབྱོར་ལ་བརྟན་དབབ་བཟུང་ལྡོག་ཁྱབ་ཀྱིས་སྦྱོར་བ་ལ་བདེ་སྟོང་གཉིས་སུ་མེད་པའི་ཡེ་ཤེས་བསྐྱེད་ཅིང་། བདེ་གསལ་མི་རྟོག་པའི་གནས་ལུགས་ལམ་དུ་བྱེད་པས་ཚེ་འདིར་གྲོལ་བའི་རང་བཞིན་ནོ། །གཉིས་པ་ནི། དབྱེ་ན་ལུང་དང་མདོ་གཉིས་ལས། ལུང་ལ་བསྟན་པའི་ལུང་སེམས་དང་སེམས་ལས་བྱུང་བ་དབྱིངས་དང་ཡེ་ཤེས་ཀྱི་རང་བཞིན་དུ་འདོད་པ་དང་། བརྗོད་པའི་ལུང་ཚིག་དང་ཐ་སྙད་ལས་གོ་བར་བྱེད་པའོ། །མདོ་ལས་སྒྱུ་་འཕྲུལ་གཞི་ལམ་ལས་ཁྱད་པར་དུ་གྱུར་བ་ཡེ་ཤེས་རྔམ་པ་གློག་གི་འཁོར་ལོ་གཞི་ལམ་རྣམ་དག་ཏུ་སྨྲ་བ་དང་། ཕུར་བུ་ཐལ་འབྱིན་གྱི་དོན་ངེས་པར་མཚོན་པ།
དུར་ཁྲོད་ཁུ་བྱུག་རོལ་བ་ཡེ་ཤེས་ཐོད་རྒལ་དུ་སྨྲ་བ་དང་། དཔལ་ཆེན་པོ་ཕྱག་རྒྱ་ཡང་དག་པ་ལས་ཁྱད་པར་དུ་འཕགས་པ་ཀུན་འདུས་རིག་པའི་མདོ་ཡང་དག་པ་ལམ་གྱུར་དབྱིངས་སུ་སྨྲ་བ་དང་། ཨ་ནུའི་རང་གཞུང་མངོན་པར་རྟོགས་པ་རང་གསལ་དུ་སྨྲ་བས་དབྱིངས་དང་ཡེ་ཤེས་དབྱེར་མེད་དུ་འདོད་པ་སངས་རྒྱས་ཐམས་ཅད་ཀྱི་དགོངས་པ་འདུས་པའི་མདོ། །སེམས་དང་ཡེ་ཤེས་འབྱེད་པ་སེམས་ལུང་ཆེན་མོ་ཡི་གེ་རྣམ་དག་གི་མདོ་དང་དྲུག་གི་རྗེས་སུ་འབྲངས་ནས། བདེ་སྟོང་དབྱིངས་དང་ཡེ་ཤེས་ཀྱི་རིམ་པ་ཅིག་ཅར་དུ་འདོད་པ་དང་། རིམ་གྱིས་པ་དང་། མཐར་ཆགས་པ་དང་། ཐོད་རྒལ་དུ་འདོད་པ་སྟེ། དབྱིངས་དང་ཡེ་ཤེས་བདེ་སྟོང་བྱང་ཆུབ་སེམས་ཀྱི་ཐེག་པའི་རང་བཞིན་ནོ། །གསུམ་པ་ངེས་བརྗོད་རྒྱུད་སྡེའི་རྣམ་གྲངས་ལ། བཤད་མ་ཐག་པའི་སྔགས་ཀྱི་མདོ་དྲུག་དང་། རྩ་བའི་རྒྱུད་ལ། ཐིག་ལེ་འདུས་པའི་རྒྱུད། སྒྱུ་མ་ཆེན་པོའི་རྒྱུད། ཟླ་གསང་ཐིག་ལེའི་རྒྱུད། རྡོ་རྗེ་གདན་བཞིའི་རྒྱུད་དོ། །གདམས་པ་མན་ངག་གི་རྒྱུད་ལ། སྐུའི་རྒྱུད་མེ་ལྟར་འབར་བ། གསུང་གི་རྒྱུད་དབང་ཆེན་འདུས་པ། ཐུགས་ཀྱི་རྒྱུད་པུཎྜ་རཱི་ཀ། །ཡོན་ཏན་གྱི་རྒྱུད་ལྷ་མོ་གསང་བ། ཕྲིན་ལས་ཀྱི་རྒྱུད་རིག་འཛིན་འདུས་པ། རིག་སྔགས་སྤྱིའི་སྒྲུབ་པ་ཧེ་རུ་ཀའི་ཏནྟྲ། བྱེ་བྲག་གི་སྒྲུབ་པ་ལ། འཇམ་དཔལ་སྐུའི་རྒྱུད་ཟླ་གསང་ནག་པོ། པདྨ་གསུང་གི་རྒྱུད་རྟ་མཆོག་རོལ་པ། ཡང་དག་ཐུགས་ཀྱི་རྒྱུད་ཧེ་རུ་ཀ་གལ་པོ་ཆེ། ཕུར་བ་ཕྲིན་ལས་ཀྱི་རྒྱུད་བྱི་ཏོ་ཏ་མ་ལ་འབུམ་སྡེ། བདུད་རྩི་ཡོན་ཏན་གྱི་རྒྱུད་བདུད་རྩི་རོལ་པ་ཆེ་ཆུང་། མ་མོ་རྦོད་གཏོང་གི་རྒྱུད་མ་མོ་ཀུན་འདུས་སོ། །སྒྲུབ་པ་སྡེ་དྲུག་ལས་ཁ་ཚར་གྱི་རྒྱུད་ལ། ཕྲིན་ལས་ཁ་སྐོང་བ་ཆོས་ཉིད་གཏོར་མའི་རྒྱུད། ལས་རྒྱ་མཚོ་ཇི་ལྟར་བྱ་བ་ཀརྨ་མཱ་ལེ་ཕྲིན་ལས་ཀྱི་རྒྱུད། བསོད་ནམས་དང་ཡེ་ཤེས་ཀྱི་ཚོགས་བསགས་པ་ཚོགས་ཀྱི་རྒྱུད་ཆེ་ཆུང་། མཆོད་པ་མི་ཟད་པའི་གཏེར་དུ་བྱིན་
གྱིས་བརླབས་པ་ནམ་མཁའ་མཛོད་ཀྱི་རྒྱུད། སྒྲོལ་བ་གནས་སུ་དག་པ་སྟོབས་པོ་ཆེ་ཡོངས་སུ་སྒྲོལ་བའི་རྒྱུད། སྦྱོར་བ་གནས་སུ་དག་པ་ཐིག་ལེ་ཀློང་གི་རྒྱུད། བརྟུལ་ཞུགས་དྲག་པོས་ཀུན་ཏུ་སྤྱོད་པ་གླང་པོ་ཆེ་རབ་འབོག་གི་རྒྱུད། ལས་བཞི་མཐར་ཕྱིན་པ་ཟ་བྱེད་རོལ་བ་སྦྱིན་སྲེག་གི་རྒྱུད། ལས་ཐམས་ཅད་ཀྱི་སྔོན་དུ་འགྲོ་བ་གཏོར་རྒྱུད་ཆེ་ཆུང་། བཀའི་འཁོར་ལོ་ལྷག་མས་བསྐངས་ནས་ལས་ལ་བསྐུལ་བ་དཔལ་འབར་ཁྲོ་མོའི་རྒྱུད། གདུག་པ་ཅན་གཟིར་མནན་གྱིས་ཚར་བཅད་པ་ཞིང་བཅུ་རོལ་པའི་རྒྱུད་ལ་སོགས་པའོ། །འདི་དག་གི་རྒྱུད་གཙོ་ཆེ་ཆུང་ལས། རང་བཞིན་དུ་མ་ཧཱ་དང་ཨ་ནུ་གཉིས་ཀར་གཏོགས་པའི་མན་ངག་གི་རྒྱུད་དུ་ཐམས་ཅད་མཁྱེན་པ་ཀློང་ཆེན་པས་ངོས་བཟུང་བ་ཡིན་ནོ། །དོན་གསུམ་པ་གདུལ་བྱ་གཏི་མུག་ཤས་ཆེ་ཞིང་བྱ་རྩོལ་ཅན་གྱི་དོན་དུ་གསུངས་པ་གཉིས་སུ་མེད་པའི་རྒྱུད་རང་བཞིན་རྫོགས་པ་ཆེན་པོ་ཨ་ཏི་ཡོ་ག་ལ་གཉིས། འོག་མ་རྣམས་ལས་འཕགས་པའི་ཚུལ་དང་། གསང་བ་ཆེན་པོ་དངོས་བཤད་པའོ། །དང་པོ་ནི། ཐེག་པ་འོག་མ་ཐམས་ཅད་རྩོལ་སྒྲུབ་དང་བླང་དོར་གྱི་རང་བཞིན་ཅན། བཅོས་སླད་དང་རེ་དོགས་ཀྱི་སྒྲིབ་པས་རང་བྱུང་གི་ཡེ་ཤེས་ལྷུན་གྲུབ་རང་གནས་ཆེན་པོ་ཡེ་གྲོལ་འདུས་མ་བྱས་པའི་དགོངས་པ་ལ་བསྒྲིབས་ཏེ་གོལ་བས། ཡང་དག་པའི་དོན་རྣལ་མ་ལ་རེག་པའི་དུས་སྐབས་བསྐལ་བ་ནི་ཀུན་བྱེད་རྒྱལ་པོ་ལྟ་བ་ནམ་མཁའ་དང་མཉམ་པའི་རྒྱུད་ལས། ཀྱཻ། སེམས་དཔའ་ཆེན་པོ་འདི་ཉོན་ཅིག། འཁོར་གྱི་སྟོན་པ་རྣམ་གསུམ་གྱི། །བསྟན་པ་གསུམ་ནི་གོལ་སྒྲིབ་སྟེ། །དེ་ཡང་ཇི་ལྟ་བུ་ཞེ་ན། ངེས་པ་ཐོབ་པའི་ཐེག་པ་དྲུག། རྫོགས་པ་ཆེན་པོའི་གོལ་སར་བསྟན། །ཅེས་གོལ་ས་སྤྱིར་བསྟན་ནས་བྱེ་བྲག་ཏུ་རང་རང་གི་ངོ་བོས་དབྱེ་སྟེ་གསལ་བར་བསྟན་པ་ནི། དེ་ཉིད་ལས། དེ་ཡང་ཇི་ལྟ་བུ་ཞེ་ན། །བྱང་ཆུབ་སེམས་དཔའི་མདོ་སྡེ་ནི། །ཀུན་ཏུ་འོད་ཀྱི་ས་འདོད་པ། བདེན་པ་གཉིས་ཀྱི་རྟོག་དཔྱོད་ཀྱིས། །ཆོས་ཉིད་སྟོང་པ་ནམ་མཁར་འདོད།
ཨ་ཏི་ཡོ་གའི་བདེ་ཆེན་ནི། །རྟོག་དཔྱོད་འདས་པའི་བྱང་ཆུབ་སེམས། །རྟོག་དཔྱོད་འདས་ལམ་མདོ་སྡེས་བསྒྲིབས། །རྫོགས་ཆེན་རྟོག་དང་དཔྱོད་པ་ནི། །མདོ་སྡེ་དག་ཏུ་གོལ་བར་བཤད། །ཅེས་སོ། །འོ་ན་བདེན་པ་གཉིས་ལ་མི་བརྟེན་པའི་ཆོས་དེ་གྲངས་ཅན་པའི་གྲུབ་མཐའ་ལྟར་རྒྱུ་འབྲས་ཐ་ཆད་དུ་སྨྲ་བ་དང་མི་མཚུངས་སམ་ཞེ་ན། མ་ཡིན་ཏེ་བསྐྱེད་བྱ་སྐྱེ་ད་བྱེད་ལ་སོགས་པའི་རྒྱུ་འབྲས་རྐྱེན་དང་བཅས་པ་མེད་པས། ཡེ་ནས་ནམ་མཁའ་ལྟ་བུའི་རང་བཞིན་འཕོ་འགྱུར་བྱ་རྩོལ་ལས་འདས་པ་དོན་དམ་པའི་བདེན་པ་དག་མ་དག་གིས་ཆོས་ཉིད་གང་དུའང་རིས་སུ་མ་ཆད་པའི་གནས་ལུགས་འོད་གསལ་བའི་དབྱིངས་ལ་ཀུན་རྫོབ་དང་དོན་དམ་གྱི་ཆོས་མེད་པ་སྟེ། ཀུན་བྱེད་ལས། བདེན་པ་གཉིས་ཀྱིས་གཏན་ལ་དབབ་ཏུ་མེད། །ངེས་པ་གཅིག་ལ་བདེན་པ་རྣམ་པ་གཉིས། །མ་ངེས་ཐེ་ཚོམ་ཅན་གྱི་ལུང་དེ་ལ། །ངེས་པར་གཅིག་ཏུ་བསྟན་པར་ག་ལ་ཡོད། །རྣལ་འབྱོར་གང་ཟག་ཆོས་ལ་རློམ་བྱེད་ནི། །སྟོང་གསུམ་རྒྱུ་འབྲས་ལུང་ལ་བརྟེན་སྨྲ་བ། །དེ་ལ་བདེན་གཉིས་ཚད་མ་བཞི་ཡང་དགོས། །ཀུན་བྱེད་གཞི་ཡིས་ཆོས་ཀུན་བྱས་པའི་ཕྱིར། །ངས་བྱས་ཆོས་ལ་བདེན་པ་གཉིས་མི་དགོས། །ངས་བྱས་ཆོས་ལ་བདེན་པ་གཉིས་དགོས་སུ། །ངས་བྱས་ཐམས་ཅད་བྱང་ཆུབ་སེམས་སུ་བྱས། །བྱང་ཆུབ་སེམས་ལ་ཀུན་རྫོབ་དོན་དམ་མེད། །ཅེས་སོ། །དེ་བཞིན་དུ་སྔགས་འོག་མ་ཐམས་ཅད་ལའང་སྤང་གཉེན་གྱི་གོལ་སྒྲིབ་ནི། ཀུན་བྱེད་རྒྱལ་པོ་ལྟ་བ་ནམ་མཁའ་དང་མཉམ་པའི་རྒྱུད་ལས། ཀྱཻ། ཀྲྀ་ཡ་རྡོ་རྗེ་འཛིན་འདོད་པ། །དག་པ་རྣམ་གསུམ་སྒོར་ཞུགས་ནས། །གཟུང་འཛིན་དག་པའི་ཡུལ་ལ་གནས། །ཨ་ཏི་ཡོ་གའི་བདེ་ཆེན་ནི། །གཟུང་འཛིན་འདས་པའི་བྱང་ཆུབ་སེམས། །གཟུང་འཛིན་འདས་ལ་ཀྲཱྀ་ཡས་བསྒྲིབས། །རྫོགས་ཆེན་གཟུང་དང་འཛིན་བྱེད་པ། །ཀྲཱྀ་ཡ་དག་ཏུ་གོལ་བར་བཤད། །ཨུ་པ་ཡ་ཡི་ལྟ་སྤྱོད་ནི། །ཀྲྀ་ཡ་སྤྱོད་འབྲེལ་བའི་དོན་མེད་པས། །གཉིས་སུ་མེད་པའི་དོན་མ་
རྟོགས། །ཨ་ཏི་ཡོ་གའི་བདེ་ཆེན་ནི། །གཉིས་སུ་མེད་པའི་བྱང་ཆུབ་སེམས། །གཉིས་སུ་མེད་ལ་ཨུ་པས་བསྒྲིབས། །རྫོགས་ཆེན་གཉིས་སུ་བྱེད་པ་ནི། །ཨུ་པ་ཡ་རུ་གོལ་བར་བཤད། །ཡོ་ག་སྟུག་པོ་བཀོད་འདོད་པ། །མཚན་མ་ཡོད་མེད་སྒོར་ཞུགས་ནས། །ཕྱག་རྒྱ་བཞི་ལ་གཙོར་བྱེད་ལ། །བླང་དོར་མེད་ལ་འཇུག་མ་ནུས། །ཨ་ཏི་ཡོ་གའི་བདེ་ཆེན་ནི། །བླང་དོར་མེད་པའི་བྱང་ཆུབ་སེམས། །བླང་དོར་མེད་ལ་ཡོ་གས་བསྒྲིབས། །རྫོགས་ཆེན་བླང་དང་དོར་བྱེད་པ། །ཡོ་ག་དག་ཏུ་གོལ་བར་བཤད། །མ་ཧཱ་རྡོ་རྗེ་འཆང་འདོད་པ། །ཐབས་དང་ཤེས་རབ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་སྒྲུབ་རྣམ་བཞི་སྒྲུབ་པར་བྱེད། །ཨ་ཏི་ཡོ་གའི་བདེ་ཆེན་ནི། །རྩོལ་སྒྲུབ་འདས་པའི་བྱང་ཆུབ་སེམས། །རྩོལ་སྒྲུབ་འདས་ལ་མ་ཧཱས་བསྒྲིབས། །རྫོགས་ཆེན་རྩོལ་སྒྲུབ་བྱེད་པ་ནི། །མ་ཧཱ་ཡོ་གར་གོལ་བར་བཤད། །ཨ་ནུ་དབྱེར་མེད་ས་འདོད་པ། །དབྱིངས་དང་ཡེ་ཤེས་སྒོར་ཞུགས་ནས། །འདི་ལྟར་སྣང་བའི་ཆོས་རྣམས་ལ། །རྒྱུ་ནི་དག་པའི་དབྱིངས་ལྟ་བ། །འབྲས་བུ་ཡེ་ཤེས་དཀྱིལ་འཁོར་ལྷ། །ཨ་ཏི་ཡོ་གའི་བདེ་ཆེན་ནི། །རྒྱུ་འབྲས་འདས་པའི་བྱང་ཆུབ་སེམས། །རྒྱུ་འབྲས་འདས་ལ་ཨ་ནུས་བསྒྲིབས། །རྫོགས་ཆེན་རྒྱུ་འབྲས་གཉིས་བལྟ་ན། །ཨ་ནུ་ཡོ་གར་གོལ་བར་བཤད། །ཅེས་སོ། །འོ་ན་ཐེག་པ་འོག་མ་དེ་དག་དགོས་པ་ཅིའི་སླད་དུ་བསྟན་སྙམ་ན་མ་དག་པ་འཁོར་བ་དང་ལམ་ལ་སོགས་པ་རྒྱུ་འབྲས་ཀྱི་ནུས་པས་བསྐྱེད་པས་རྒྱུ་འབྲས་ལ་ལྟོས་པའི་ལམ་གྱི་རྣམ་གཞག་གཙོ་ཆེ་བ་རྣམས་དབང་པོ་འབྲིང་མན་ཆོད་ཀྱི་དོན་དུ་བསྟན་པ། དབྱིངས་ངོ་བོ་ཉིད་ཀྱི་རྣམ་པར་དག་པའི་དོན་ལ་རྒྱུ་འབྲས་ཀྱི་ཆོས་མེད་པའི་ཕྱིར་དབང་པོ་རྣོན་པོ་ལ་ཡེ་བཞག་གི་དོན་འདི་ལྟ་བུ་བསྟན་ནས། དེ་ལ་བཅོས་ཤིང་བསྒྱུར་མི་དགོས་པར་འཆད་པ་ཡང་དེ་ཉིད་ལས། །ལྟ་བ་བསྒོམ་མེད་དམ་ཚིག་བསྲུང་དུ་མེད། །ས་ལ་སྦྱང་མེད་ལམ་ལ་བགྲོད་དུ་མེད། །ཕྲིན་ལས་བཙལ། མེད་དབང་ལ་བསྐུར་དུ་མེད།
སྒོ་གསུམ་རྩོལ་མེད་དཀྱིལ་འཁོར་བསྐྱེད་དུ་མེད། །རྒྱུ་འབྲས་གཉིས་མེད་ནམ་མཁའ་ལྟ་བུའོ། །ཞེས་དང་། བྱང་ཆུབ་སེམས་པ་ཡེ་ནས་མ་ནོར་ཡིན། །ཡེ་ནས་ཡིན་ལ་ཡེ་ནས་ནོར་བ་མེད། །ནོར་བ་མེད་ལ་བདེན་རྫུན་སྒྲོ་མི་འདོགས། །རྒྱུ་རྐྱེན་འབྲས་བུ་རྩོལ་སྒྲུབ་ཀུན་ལས་འདས། །བྱས་ཟིན་རྩོལ་སྒྲུབ་འདས་པ་མ་རིག་ནས། །རྩོལ་སྒྲུབ་བྱ་བྱེད་སྒོམ་པས་འགྲུབ་ལྟ་ན། །བྱང་ཆུབ་བགེགས་སུ་དེ་ལས་ཆེ་བ་མེད། །ཅེས་གསུངས་པའི་ཕྱིར་རོ། །དེ་ལྟ་ན་ཁམས་ཀྱི་དྲི་མ་བླང་དོར་གྱི་ཆོས་ཟབ་མོས་སྦྱང་དུ་མི་འདུག་པས། ཐ་མལ་བ་ལྟར་འདུག་པ་ཁོ་ནས་སངས་རྒྱས་འགྲུབ་བམ་ཞེ་ན། ཐ་མལ་བས་ཐད་ཀའི་སྣང་བ་ལམ་དུ་འཁྱེར་མི་ནུས་ཤིང་། གནས་ལུགས་ཀྱི་བཞུགས་ཚུལ་དེ་ལྟར་ཡིན་པ་མ་རིག་པས་ལས་དང་བག་ཆགས་ཀྱི་རྟེན་གཞིར་གནས་བཅས་ཤིང་རང་བཞིན་འོད་གསལ་བའི་གནས་ལུགས་རང་ལ་ཡོད་ཀྱང་། དབུལ་པོའི་ཁྱིམ་གྱི་གཏེར་བཞིན་དུ་དེས་གོ་མ་ཆོད་པས་དབུལ་པོའི་རང་བཞིན་འགྱུར་བ་མེད་པ་བལྟར་གནས་པ་དང་། རྫོགས་པ་ཆེན་པོ་བླ་མའི་མན་ངག་ལ་བརྟེན་ནས་ད་ལྟའི་རིག་པ་སྒྲོ་འདོགས་ཅིག་ཅར་དུ་ཆོད་པ་ལ་སངས་རྒྱས་ཀྱི་ཆེ་བའི་ཡོན་ཏན་ལྷུན་གྲུབ་ཏུ་ཚང་བའི་སྐུ་གསུམ་རང་ཆས་ཀྱི་བདེན་པ་མཐོང་བས་སངས་རྒྱས་ལོགས་ནས་བཙལ་མི་དགོས་པའི་སྤང་གཉེན་གྱི་ཆོས་པ་རབ་གཉིས་མི་མཚུངས་ཏེ། ཀུན་ཏུ་བཟང་པོ་ཀློང་དྲུག་པ་ལས། །རྙོག་པ་མེད་པའི་རང་སེམས་དང་། །རྟོག་པ་མེད་པའི་རང་རིག་གཉིས། །འདྲའོ་འདྲའོ་ནོར་ར་རེ། །མ་བསྒྲིབས་གཏིང་གསལ་སྣང་བ་དང་། །འགྲོ་བའི་བསམ་རྒྱུད་ཞེན་པ་གཉིས། །འདྲའོ་འདྲའོ་ནོར་ར་རེ། །མ་བཙལ་བཞག་པར་སྒོམ་པ་དང་། །རྩ་རླུང་སེམས་ཀྱི་ངལ་བསོ་གཉིས། །འདྲའོ་འདྲའོ་ནོར་ར་རེ། །དྲན་མེད་རིག་པ་ཡུལ་སྣང་དང་། །དྲན་བསམ་འགྲོ་དྲུག་འཁྲུལ་བ་གཉིས། །འདྲའོ་འདྲའོ་ནོར་ར་རེ། །ཞེས་གསུངས་པའི་ཕྱིར་རོ། །དེའི་ཕྱིར་སེམས་ཉིད་གཡོ་བ་མེད་པའི་ཆོས་
སྐུ་བྱང་ཆུབ་ཀྱི་སེམས་ནི་ཐེག་པའི་ཡང་རྩེ་རང་བཞིན་རྫོགས་པ་ཆེན་པོའི་དགོངས་པ་སྐུ་གསུམ་ལྷུན་གྱིས་གྲུབ་པའི་གནས་ལུགས་ཏེ་ཀུན་བྱེད་ལས། ཀྱེ་སེམས་དཔའ་ཆེན་པོ་ཉོན་ཅིག། ཆོས་ཀྱི་སྐུ་ནི་བྱང་ཆུབ་སེམས། །བྱང་ཆུབ་སེམས་ལས་ཆོས་ཀྱི་སྐུ། །རྡུལ་ཙམ་སུས་ཀྱང་བཅོས་པ་མེད། །དེས་ན་སངས་རྒྱས་སེམས་ལས་མེད། །ལོངས་སྤྱོད་རྫོགས་སྐུ་བྱང་ཆུབ་སེམས། །བྱང་ཆུབ་སེམས་ལས་ལོངས་སྤྱོད་རྫོགས། །སེམས་ལས་བྱུང་བའི་གཟུགས་རྣམས་ལ། །ལོངས་སྤྱོད་རྫོགས་ལས་སྐུ་གཞན་མེད། །སྤྲུལ་པའི་སྐུ་ནི་བྱང་ཆུབ་སེམས། །བྱང་ཆུབ་སེམས་ཀྱི་སྤྲུལ་པ་ལས། །འགྲོ་བའི་དོན་མཛད་གཞན་ན་མེད། །དུས་གསུམ་སངས་རྒྱས་ཐམས་ཅད་ཀྱང་། །བྱང་ཆུབ་སེམས་ལས་གཞན་མེད་དེ། །སྔ་རབས་འདས་པའི་སངས་རྒྱས་རྣམས། །རང་སེམས་མ་བཅོས་སྔར་མཐོང་རྟོགས། །ད་ལྟར་བཞུགས་པའི་སངས་རྒྱས་རྣམས། །མ་བཅོས་པ་ཡི་རང་སེམས་དེ། །མ་བཅོས་ཇི་བཞིན་རྟོགས་གྱུར་པས། །ད་ལྟར་འགྲོ་བའི་དོན་ཡང་མཛད། །སླད་ནས་འབྱོན་པའི་སངས་རྒྱས་རྣམས། །རང་སེམས་བྱང་ཆུབ་སེམས་ཉིད་འདི། །སྔ་མ་བཅོས་པར་ལུང་མ་བསྟན། །ད་ལྟར་ཏིང་འཛིན་སེམས་མི་འཆོས། །མ་བཅོས་ལམ་དུ་ཞུགས་ནས་བྱོན། །ཞེས་དང་། སེམས་ནི་ཇི་བཞིན་པ་ཡི་དངོས་པོ་སྟེ། །ཆོས་རྣམས་ཐམས་ཅད་དེ་བཞིན་དུ་གྲུབ། །ཇི་བཞིན་པ་ལ་འཆོས་པར་མ་བྱེད་ཅིག། ངོ་བོ་ཉིད་ལས་གཞན་དུ་མ་སྒྲུབ་ཅིག། བཙལ་ན་རྒྱལ་བས་དབྱིངས་ནས་རྙེད་མི་འགྱུར། །སྔར་བྱས་ཟིན་པས་ད་ནི་བྱེད་མི་དགོས། །སྔར་བསྒྲུབས་ཟིན་པས་ད་སྒྲུབ་མ་བྱེད་པར། །མི་རྟོག་ཅིར་མི་དགོངས་ལ་མཉམ་པར་ཞོག། ཅེས་དང་། །དེ་སྐད་དུ་གསང་བའི་སྙིང་པོ་ལས་ཀྱང་། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ལས། །སངས་རྒྱས་
གཞན་དུ་མ་འཚོལ་ཅིག །བཙལ་ཀྱང་རྒྱལ་བས་མི་རྙེད་དོ། །ཞེས་གསུངས་པ་ལྟར་ཐེག་པའི་རྒྱལ་པོ་འདིས་དབྱིངས་ཀྱི་ངོ་བོ་འོད་གསལ་རང་བྱུང་གི་ཡེ་ཤེས་སྤང་བླང་མེད་པར་བསྟན་ནས་བྱ་རྩོལ་དང་བྲལ་བའི་ས་ལ་སངས་རྒྱས་པའི་ཕྱིར་གཞན་ལས་ཆེས་འཕགས་པ་ཡིན་ནོ། །གཉིས་པ་ཁྱད་པར་ཅན་གྱི་གསང་བ་ཆེན་པོ་བཤད་པ་ལ་གསུམ། ངོ་བོ། དབྱེ་བ། རྣམ་གྲངས་ངེས་པའོ། །དང་པོ་ནི། ཨ་ཏིའི་སྒྲ་ལས་ཕུལ་བྱུང་ངམ་ཤིན་ཏུ། ཡོ་ག་རྣལ་འབྱོར་ཏེ། ཤིན་ཏུ་རྣལ་འབྱོར་རྫོགས་པ་ཆེན་པོའི་རྒྱུད་དེ་སྤྲོས་བྲལ་རང་བྱུང་གི་ཡེ་ཤེས་ལ་རྒྱ་ཆད་དང་ཕྱོགས་ལྷུང་བྲལ་བས་ཐེག་པ་མཐའ་དག་གི་དོན་ཡོངས་སུ་རྫོགས་པས་རྩེ་མོར་གྱུར་བའོ། །གང་གི་ཕྱིར་རྫོགས་པ་ཆེན་པོ་བྱ་ཞེ་ན། མ་དག་པ་འཁོར་བའི་ཆོས་སྣང་སྲིད་སྣོད་བཅུད་དུ་སྣང་བ་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པ་མཐའ་དག་དང་། དག་པ་ཡེ་ཤེས་ཀྱི་སྒོ་ལྟ་སྒོམ་སྤྱོད་པ་ཐེག་པའི་རྣམ་གྲངས་གཞི་ལམ་འབྲས་གསུམ་གྱི་རྣམ་རོལ་དུ་གྱུར་བའི་ཆོས་ཐམས་ཅད་སེམས་ཀྱི་བཟོ་བོས་གློ་བུར་དུ་བྱས་ཤིང་རྣམ་པར་སྒྲོ་བཏགས་པའི་ཕྱིར། དེའི་ངོ་བོ་བག་ཆགས་འཁྲུལ་འཛིན་དུ་ཤར་བས་བདེན་བདེན་ལྟ་བུར་སྣང་ཡང་དོན་ལ་ངོ་བོ་མ་གྲུབ་པས་རང་བྱུང་གི་ཡེ་ཤེས་ཉིད་ལས་མ་གཡོས་པས་སེམས་ཀྱི་ངང་དུ་རྫོགས་པ་དང་། སྤྲོས་བྲལ་རང་བྱུང་གི་ཡེ་ཤེས་འོད་གསལ་བའི་ངོ་བོ་སྟོང་པ། རང་བཞིན་གསལ་བ། ཐུགས་རྗེ་རིག་པ་སྟེ། དེའི་ངང་དུ་སྐུ་གསུམ་གྱི་ཆོས་ཐམས་ཅད་ཕུན་སུམ་ཚོགས་པ་ལྔའི་རྣམ་རོལ་དུ་རྫོགས་པས་ན་ཕུན་སུམ་ཚོགས་པར་རྫོགས་པ་དང་། དེ་བཞིན་དུ་འདི་ལྟར་སྣང་ཞིང་སྲིད་པའི་ཆོས་དག་པ་དང་། མ་དག་པ་དང་། ཤིན་ཏུ་དག་པ་ལ་སོགས་པ་ཐ་དད་དུ་སྣང་བ་ཐམས་ཅད་རང་རིག་བྱང་ཆུབ་སེམས་ཀྱི་ངོ་བོར་འདུས། དང་ལ་ཤར། དེའི་རང་བཞིན་ལ་གནས་པ། །དཔེར་ན་གཉིད་ཀྱི་དང་དུ་རྨི་ལམ་གྱི་ཆོས་མཐའ་ཡས་པ་རྫོགས་པ་ལྟར་ཐམས་ཅད་སེམས་ཉིད་བྱང་ཆུབ་སེམས་ཀྱི་ངང་དུ་
རྫོགས་པ་དང་། དེའང་སེམས་ནི་ཀུན་རྟོག་པ་ཀུན་གཞི་ལས་རྣམ་པར་ཤེས་པ་ཚོགས་བརྒྱད་ཀྱི་རྟེན་འབྲེལ་དུ་ཤར་བ་ནི་དག་བྱ་དྲི་མ་ཡིན་ལ། སྐྱེ་འགག་གཉིས་མེད་བྱང་ཆུབ་ཀྱི་སེམས། སེམས་ཉིད་འོད་གསལ་བ། སེམས་ཀྱི་དམ་པ། རྣམ་པར་མི་རྟོག་པའི་ཡེ་ཤེས་དབྱིངས་ཆོས་ཀྱི་སྐུ། དོན་དམ་པའི་བདེན་པ་དེ་བཞིན་ཉིད་རྫོགས་པ་ཆེན་པོ་ཞེས་པ་རྣམས་ནི། རང་བྱུང་། གི་ཡེ་ཤེས་བྱང་ཆུབ་སེམས་ཀྱི་སྙིང་པོ་དོན་དུ་གཉེར་བྱའི་མཐར་ཐུག་ལ་ངོས་འཛིན་པ་སྟེ། དེའི་ཕྱིར་ཀུན་བྱེད་ལས། གཅིག་རྫོགས་གཉིས་རྫོགས་སེམས་ལ་རྫོགས། །གཅིག་རྫོགས་སེམས་ཀྱིས་བྱས་པར་རྫོགས། །གཉིས་རྫོགས་སུམ་རྫོགས་ཚོགས་པར་རྫོགས། །ཀུན་རྫོགས་བྱང་ཆུབ་སེམས་སུ་རྫོགས། །ཞེས་དང་། ཆེན་པོ་ནི་དེའི་གོང་དུ་རྣམ་པར་གྲོལ་བའི་ཆོས་གང་ཡང་མེད་པ་སྟེ། རིག་པ་རང་ཤར་ལས། དེ་བཞིན་རྫོགས་ཆེན་ཨ་ཏི་ལ། །བསྒྲུབ་མེད་སྒྲུབ་དང་བྲལ་བའོ། །ཕྱས་མེད་བྱུང་བ་མེ་པའོ། །འགག་མེད་ཁྱབ་གདལ་འུབ་ཆུབ་བོ། །འགྱུར་མེད་ཀློང་ཡངས་ཆེན་པོའོ། །ཆོས་མེད་སངས་རྒྱས་ཆེན་པོའོ། །ཞེས་སོ། །གཉིས་པ་དབྱེ་བ་ལ་གཉིས། མདོར་བསྟན་པ་དང་། རྒྱས་པར་དབྱེ་བའོ། །དང་པོ་ལ་གསུམ། སེམས་སྡེ། ཀློང་སྡེ། མན་ངག་སྡེ་སྟེ། བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་གོ། །ཞེས་སོ། །དེ་ལྟར་གསུམ་དུ་ངེས་པ་ནི་ཕྱི་ནང་གི་ཆོས་རྣམས་དོན་གཞན་ནམ། དཀྱིལ་འཁོར་ལ་སོགས་པ་མཐའ་གཅིག་ཏུ་ཞེན་པ་རྣམས་ལ་གཉིས་འཛིན་རང་རྒྱུད་ལ་སྤང་བའི་ཕྱིར། མ་དག་པ་སྣོད་བཅུད་དང་། དག་པ་མྱང་འདས་ཀྱི་སྣང་ཆ་ཐམས་ཅད་རང་བྱུང་ཡེ་ཤེས་ཀྱི་རོལ་བ་གཅིག་ཏུ་བསྟན་ནས་གཉིས་མེད་མཐའ་གྲོལ་ཆེན་པོའི་དབྱིངས་སུ་སྡུད་པ་ནི་གནས་པ་སེམས་ཀྱི་སྡེའོ། །དེ་ལའང་ཞེན་པའི་འཆིང་བ་མཐའ་དག་གྲོལ་བར་བྱེད་པ་ཆོས་ཐམས་ཅད་ཡེ་ནས་ཡོད་མ་མྱོང་མེད་མ་མྱོང་། གདོད་ནས་དག་པའི་རྫོགས་
པ་ཆེན་པོ། དབྱིངས་དག་མཉམ་ཀ་དག་ཆེན་པོའི་ཀློང་དུ་ཆམ་བརྡལ་བས་གཉེན་པོར་ཞེན་པའང་རང་སར་གྲོལ་བ་ནི་བྱ་བྲལ་ཀློང་གི་སྡེའོ། །དེ་ལས་གཉེན་པོ་བླང་བྱའི་ཆོས་ཉིད་མཐའ་གྲོལ་སྟོང་ཞེན་གྱི་ཕྱོགས་དེ་ཡང་གཞོམ་པ་དང་། ལྷུན་གྲུབ་རང་གསལ་ཆེན་པོ་དག་པའི་དབྱིངས་ལ་ཇི་ལྟར་གནས་པ་དབང་པོའི་སྤྱོད་ཡུལ་དུ་མངོན་སུམ་པར་ཐད་དྲང་དུ་སྟོན་པ་ནི་ཟབ་པ་མན་ངག་གི་སྡེ་སྟེ། མདོར་བསྡུ་ན། སྤང་བྱ་དང་། གཉེན་པོ་དང་། གཉིས་ཀའི་མཐའ་ལས་གྲོལ་བ་གསུམ་གྱིས་སེམས་ཀློང་མན་ངག་གི་སྡེ་གསུམ་དུ་བྱུང་བ་རིག་པར་བྱ་སྟེ་གོ་བདེ་བར་བརྗོད་ན། རང་ངོ་ལས་གཞན་པའི་སེམས་གུད་ན་མེད་པས་སྣ་ཚོགས་སེམས་ཀྱི་སྡེ། ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་གཞན་མེད་པ་བྱ་བྲལ་ཀློང་གི་སྡེ། ཡིན་ལུགས་གནད་ཐོག་ཏུ་འབེབ་པ་ཟབ་པ་མན་ངག་གི་སྡེ་སྟེ། དང་པོ་ནི་སེམས་རང་བྱུང་གི་ཡེ་ཤེས་ལས་གཞན་དུ་གྱུར་བ་འགོག་པ། གཉིས་པ་ནི་ཆོས་ཉིད་ཀྱི་ཀློང་ནས་གཞན་འབྱུང་འགོག་པ། གསུམ་པ་ནི་གནད་མ་ཡིན་པ་གཞན་དུ་ལ་འབྱམས་པ་ལས་འགོག་པ་ཙམ་དུ་དགོངས་པ་སྟེ། དང་པོས་གཅོད་ཡུལ་དང་ཕྱག་རྒྱ་ཆེན་པོ་ལྟར་ཡུལ་ལ་ཆོས་ཉིད་ཀྱི་རྒྱས་འདེབས་མི་བྱེད་པར། ཡུལ་ཅན་གྱི་རིག་པ་སྟོང་པ་ཉིད་དུ་གཏན་ལ་འབེབས། གཉིས་པས་ལམ་འབྲས་དང་རིམ་ལྔ་ལྟར་བྱད་བཅིངས་ཀྱི་གནད་ལ་བརྟེན་ནས་རིག་འཛིན་དང་། རྗེས་གཞིག་ལ་སོགས་པའི་རྩོལ་བ་ལ་མི་བརྟེན་པར། དམིགས་གཏད་བྲལ་བའི་ངང་དུ་བྱ་རྩོལ་དང་འཛིན་ཞེན་སྤངས་ཏེ་འཇུག། འདིའི་སྒོ་ནས་སྤང་མི་ཕམ་མགོན་པོ་ལ་སོགས་སྐྱེས་མཆོག་མང་ཞིག་གིས་འཇའ་ལུས་འགྲུབ་པ་རྡོ་རྗེ་ཟམ་པའི་ལོ་རྒྱུས་ན་གསལ། གསུམ་པས་སྦྱོར་དྲུག་དང་ཕྲ་ཏིག་ལྟར་རླུང་གདངས་ལ་བརྟེན་པའི་ཤེས་ཉམས་ལ་མི་བརྟེན་པར། རིག་གདངས་ལ་བརྟེན་པའི་སྣང་ཉམས་མངོན་སུམ་པར་གཏན་ལ་འབེབས་པས་སྔ་མ་ལྟར་རགས་ལུས་དངས་མར་འགྱུར་བ་ཙམ་མ་ཡིན་པར། ཆོས་ཟད་
ཀྱི་སྣང་བ་མཐར་ཐུག་པས་ལུས་རྡུལ་ཕྲན་དུ་དེངས་ཤིང་སེམས་ཆོས་ཉིད་དུ་དེངས་པས་ལྷག་མེད་འགྲུབ་པ་ཡིན་ཏེ་སྔར་དགའ་རབ་རྡོ་རྗེ་ལ་སོགས་བརྗོད་ཀྱིས་མི་ལྡང་། ད་ལྟའི་རབ་བྱུང་བཅུ་གསུམ་པ་མ་ཤར་ཙམ་པའི་དུས་སུའང་ལ་སྟོང་ཕྱོགས་སུ་ངག་བྲག་ཅ་ལྟ་བུར་གྱུར་ནས་འཇའ་ལུས་ཀྱི་གྲུབ་མཐའ་སྙོགས་པའི་སྦས་པའི་རྣལ་འབྱོར་བ་ཞིག་བྱུང་མ་ཐག་པ་སྟེ། ལོ་རྒྱུས་ལ། ཁོངས་ཕུག་གཅིག་ཏུ་བཞུགས། འདབས་དེར་མི་གྲོང་ཡོད་པའི་ཆང་མ་ཞིག་གི །སྐབས་སུ་ཕམ་ཕབས་བཞེས་སུ་ཕེབས་པ་ལ་རེ་ཞིག་གི་ཚེ་དེར་ཡང་མ་བྱུང་། བལྟར་ཕྱིན་པ་ན་སྔ་མའི་ཤུལ་ན་བཞུགས་ཤིང་གཏམ་བརྗོད་ཀྱང་ལན་གང་ཡང་མི་སྒྲོག་པར་རྗེས་ཟློས་བྱེད་སྐད། དེའི་ཚེ་མི་དཔོན་ཞིག་གི་རྟ་སྟོར་བའི་མོ་ཕྱྭ་དང་བརྟག་པ་ཞུས་ཨེ་ཡོད་ཆང་མ་ལ་དྲིས་པས། དེ་ན་རེ། སྔར་ས་པུར་ཡེ་ན་རྟོགས་ལྡན་ཞིག་བཞུགས་ཏེ་ད་ནི་སྨྱོན་པ་ལྟར་བྱེད་ནས་རིང་ཞིག་ཐལ། ཞེས་སོགས་གནས་ཚུལ་གླེངས་པ་ཡིད་མཆེས་ཏེ་གཉིས་ཀས་བལྟར་ཕྱིན། དེར་གྲུབ་ཆེན་ཐུག་དམ་འཕེལ་ལམ་ཞུས་པས། ལན་དུའང་གྲུབ་ཆེན་ཐུགས་དམ་འཕེལ་ལམ་གསུང་། དེ་བཞིན་གང་བརྗོད་ཀྱང་དེ་ཀ་ལྟར་ཟེར་བས་དེ་རྣམས་ཀྱིས་སྨྱོན་པར་ངོས་བཟུང་ནས་ལོག། དེ་ནས་རིང་པོ་མ་ལོན་པ་ན་ཁོང་གཞའ་སྐུར་ཡལ་ནས་མི་སྣང་བ་མཐུན་སྣང་གྲུབ་པས་མཚོན་ཏེ། གཞན་ཡང་རྣམས་གྲངས་མང་ཞིག་ཐོས། འདི་ནི་རྒྱུད་ནས་བཤད་པའི་ལུས་དུར་ཁྲོད་ཀྱི་རོ་ལྟ་བུ། ངག་བྲག་ཅ་ལྟ་བུ་ཡིན་ཚུལ་གཤིས་ཐོག་ཏུ་ཕེབས་པ་ངོ་མཚར་བའི་ཆོས་ཅན། ཐེག་པ་འདི་བསམ་གྱིས་མི་ཁྱབ་པས་ཕྱིན་ཆད་ཀྱང་འབྱུང་བར་ངེས་སོ། །དྲི་ལན་རིན་པོ་ཆེའི་བསྟན་བཅོས་ལུང་གི་གཏེར་མཛོད་ཅེས་བྱ་བ་ལས། ཡོ་ག་གསུམ་གྱི་ཆོས་འབྱུང་གླིང་ཞིང་མཚན་ཉིད་སྤྱིར་བསྟན་པའི་སྐབས་ཏེ། སརྒ་གསུམ་པའོ། །