ཤོག་ལྷེབ་ ༣༠༡ ནས་ ༤༠༠ བར།
རང་བཞིན་དུ་འཆད་པ་ཡིན་ནོ། །དེའི་གྲུབ་མཐའ་མ་འདྲེས་ཡོངས་སུ་རྫོགས་པ་ནི། ས་བདུན་པ་ནས་བཅུ་པའི་བར་བཞི་པོ་ལ་ངག་དག་པ་ཨཱ་ལི་ཀཱ་ལི་ལ་དབང་བས་འགྲོ་དྲུག་གི་སྐད་དང་བརྡའ་འཕྲོད་ཆོས་ཀྱང་དེའི་སྐད་དུ་སྟོན། དགུ་པར་སོ་སོ་ཡང་དག་རིག་བཞི་ལ་དབང་ཐོབ་པས་ཆོས་ཐམས་ཅད་ཀྱི་དེ་ཉིད་རིགགལ་ཏེ་གྲུབ་མཐའ་མ་སྙོགས་ན་འདའ་ཀ་མ་དཔེའི་འོད་གསལ་ནི། འཆི་ཁའི་སྡུད་རིམ་གྱི་རྐྱེན་བྱས་ཏེ་རླུང་ཐམས་ཅད་དབུ་མར་ཚུད་ནས་རྣམ་པར་མི་རྟོག་པའི་ཏིང་ངེ་འཛིན་སྐྱེ་ཞིང་ཡི་གེའི་འགྲོས་ཐིམ། གསུང་རྡོ་རྗེ་ལོངས་སྤྱོད་རྫོགས་པ་འགྲུབ་པ་སྟེ། གླང་པོ་རབ་འབོགས་ལས། ཡི་གེའི་འགྲོས་ཐིམ་སྔགས་ཀྱི་ལམ་དག་པ། །ངག་གི་སྒྲིབ་དག་རྫོགས་རིམ་ལོངས་སྤྱོད་རྫོགས། །ཞེས་སོ། །གསང་དབང་གི་དམ་ཚིག་ཏུ་བདུད་རྩི་ལྔ་དང་སྒྲོན་མ་ལྔ་བསྟེན་ཞིང༌། རིག་མ་མི་སྤང༌། སྲོག་ཆགས་མི་གསད། བླ་མ་མི་བསྐུར་བ་རྣམས་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་སྟོན་པའི་ཕྱིར། གདན་གསུམ་མངོན་རྟོགས་ངོམ་པའི་མཛེས་མ་ཡི། །གསང་བའི་དཀྱིལ་འཁོར་ལ་བརྟེན་ཤེར་དབང་གིས། །ལག་བཅངས་ཚིམ་པ་དགའ་ལྡན་འདོད་ཆགས་དག །ཡིད་ཀྱི་སྒྲིབ་སྦྱང་སྣང་མཆེད་ཐོབ་གསུམ་དང༌། །དགའ་
བཞིའི་ཡེ་ཤེས་ཁམས་ཀྱི་ཞུ་བདེས་འགྲུབ། །གྲུབ་མཐའ་བདེ་སྟོང་དབྱེར་མེད་ཉམས་སུ་མྱོང༌། །འདའ་ཀ་དེར་སྣང་མ་གྲུབ་རྡོ་རྗེ་སེམས། །སྙིང་གའི་རྩ་མདུད་གྲོལ་བ་དཔེའི་ཡེ་ཤེས། །མཁའ་ཁྱབ་ཐུགས་ཀྱི་རྡོ་རྗེ་དངས་མའི་སྐུ། །དེ་ལ་དགའ་ལྡན་པ་རྣམས་ནི་ལག་བཅངས་ཀྱི་འདོད་པས་གདུང་བར་བྱེད་པས་དེའི་གཉེན་པོར་དབང་གསུམ་པ་བསྟན་ལ། དེ་ཡང་རིག་མའི་ཐབས་ཀྱི་ཆོ་ག་སྒྲ་ཇི་བཞིན་པ་ལམ་དུ་ལྷོངས་ཤིང་དེ་ཉིད་རིག་པ་རྣམས་ལ་ནི་སངས་རྒྱས་ཀྱི་ཡེ་ཤེས་མ་ནོར་བ་མངོན་སུམ་དུ་མཐོང་ཞིང་སྟོན་པའི་ཐབས་ཀྱི་མཐར་ཐུག་པ་འདི་ལས་གཞན་དུ་མེད་དེ་སྒྲོལ་མ་རྣལ་འབྱོར་མའི་རྒྱུད་ལས། ཤེས་རབ་རྟོགས་པར་བྱེད་པ་ཐབས། །ཤེས་རབ་མེད་ལ་ཐབས་མཁས་མེད། །རྡོ་རྗེ་པདྨ་རྒྱས་བྱེད་ཀྱི། །པདྨས་རྡོ་རྗེ་འབྱེད་པར་བྱེད། །སྤྲུལ་པ་བདེ་ཆེན་འཁོར་ལོས་ཀྱང༌། །ཆོས་དང་ལོངས་སྤྱོད་རྣམ་པར་འབྱེད། །དེ་ལྟས་འདི་ནི་གསང་ཆེན་ཏེ། །རྒྱུད་གཞན་དུ་ནི་འབད་པས་སྦས། །ཞེས་སོ། །དེ་ཡང་གཞན་གྱིས་མ་མཐོང་བ་བྱས་ལ་བསྟེན་པའི་ཚུལ་ཁང་བུ་བརྩེགས་པའི་རྒྱུད་ལས། ཕྱག་རྒྱ་མཐོང་ན་དངོས་གྲུབ་མེད། །དེས་ན་མཐོང་བ་མེད་པར་བསྟེན། །ཞེས་སོ། །དེ་བས་ན་བདེ་བ་མི་བསྟེན་པའི་གནས་སྐབས་ན་ཡོན་གྱིས་མགུ་བར་བྱས་ལ་རང་གི་གནས་སུ་
བཏང་ངོ༌། །དེ་ལྟ་ནའང་ཚངས་སྤྱོད་ཀྱི་རྟེན་ལྡན་ལ་སོགས་པ་རང་བཞིན་མ་བརྟགས་པས་འདོད་རྒྱལ་དུ་སྤྱོད་པ་རྣམས་ལ་ཉེས་སྤྱོད་ཆེན་པོའི་གཡང་ས་ཡང་འདི་ཡིན་ནོ། །ཡོན་ཏན་གྱི་ཆ་ནས་ཕྲ་ཞིང་རྟོགས་པར་དཀའ་ལ་མ་རྟོགས་ནས་ལམ་དུ་མ་ལྷོངས་ནའང་ཉེས་དམིགས་ཆེན་པོ་ཡིན་པས་ན་རྡོ་རྗེ་མཁའ་འགྲོ་ལས། གང་ཞིག་དགེ་སློང་དངོས་གནས་པ། །དེ་ལ་དེ་ཉིད་བསྟེན་མི་བྱ། །ཞེས་དང༌། ལམ་སྒྲོན་ལས། གསང་བ་ཤེས་རབ་དབང་བསྐུར་ནི། །དང་པོའི་སངས་རྒྱས་རྒྱུད་ཆེན་ལས། །རབ་ཏུ་འབད་པས་བཀག་པའི་ཕྱིར། །ཚངས་པར་སྤྱོད་པས་བླང་མི་བྱ། །ཞེས་བསྐྱེད་རྫོགས་གོང་མའི་དེ་ཁོ་ན་ཉིད་ལ་ནང་བྱན་མ་ཆུད་ཅིང༌། རང་ལམ་གྱི་བརྟུལ་ཞུགས་ལ་མཆོག་ཏུ་འཛིན་པས་དབང་དེ་གཉིས་བླངས་ན། ངོ་ཚ་དང་ཁྲེལ་ཡོད་གཉིས་ལྡན་རྣམས་ནི་བརྟུལ་ཞུགས་དེ་ཉམས་སོ་སྙམ་ནས་འགྱོད་པར་འགྱུར་ཏེ། དཔེར་ན་ཤེར་ཕྱིན་ཉན་པས་ཉན་ཐོས་མང་པོ་ཁ་ནས་ཁྲག་སྐྱུགས་ཏེ་ཤི་བ་བཞིན་ནོ། །གཉིས་དང་མི་ལྡན་པ་རྣམས་ནི་གསང་སྔགས་ཀྱི་གཟུགས་བརྙན་ལ་ཕས་ཕམ་པའི་ཆོས་ཉམས་སུ་མྱོང་ནས་ངན་སོང་དུ་འགྲོ་བས་ན་སྤྱོད་པ་དུས་ཚོད་དང་འབྲེལ་བ་ཤིན་ཏུ་གལ་ཆེ་བ་ཡིན་ལ། འོན་ཀྱང་ཡིད་ཀྱིས་བཏགས་པ་ཙམ་
ནི་མི་འགོག་པས་ཚིག་ཙམ་གྱིས་དབང་བསྐུར་བར་བྱང་ཆུབ་སེམས་འགྲེལ་ལས་བཤད་དོ། །ཡང་ཁ་ཅིག་ལུང་དེ་གཉིས་ལ་བརྟེན་ནས་སོ་སོར་ཐར་པའི་རྟེན་ཁྱད་པར་ཅན་ལ་དགག་བྱ་དམིགས་བསལ་མེད་བཞིན་དུ་དབང་གོང་མ་གཏན་འགོག་པའང་རིགས་པ་མ་ཡིན་ཏེ། དེ་ལྟ་ན་རབ་བྱུང་གི་སྡོམ་པས་རྡོ་རྗེ་ཐེག་པའི་ཟབ་ལམ་བཀག་པས་སྡོམ་པ་གསུམ་གནད་ཀྱིས་མི་འགལ་བ་ཡར་ལྡན་དུ་འགྱུར་བ་ལས་ལོག་སྟེ། ཐེག་པ་ཡན་མན་དགྲ་གཤེད་ལྟར་འགྱུར་བའི་ཕྱིར་དང༌། དུས་འཁོར་གྱི་དབང་གོང་མའི་སྐབས་སུ་དགེ་སློང་ལ་སྣ་ཚོགས་གཟུགས་ཅན་གྱིས་འཁྱུད་པའི་དབང་ཤིན་ཏུ་གསལ་པར་གསུངས་པ་དང་མཐུན་པར། ཚངས་པར་སྤྱོད་པའི་རྟེན་ཁྱད་པར་ཅན་ནི་དབང་གོང་མའི་སྣོད་ཡིན་པར། རྡོ་རྗེ་གདན་པས། དགེ་སློང་ལུས་ལ་ཕྱག་རྒྱ་བསྟེན། །ལྷོ་ནུབ་སྲིན་པོའི་ཁ་གནོན་མཛད། །པདྨ་ཀ་ར་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་དང༌། དགེ་ཚུལ་ལུས་ལ་གདོལ་བའི་རིགས། །ཕྱག་རྒྱ་མ་དང་དངོས་གྲུབ་བརྙེས། །ཀུ་ཀུ་རི་པ་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་པ་དང༌། དེ་བཞིན་དུ་དགེ་སློང་རྡོ་རྗེ་འཛིན་པ་ཉིད་སྔགས་འཆང་གི་དང་པོར་གསུངས་པ་དེ་ཡང་བུམ་དབང་འཁོར་བཅས་ཙམ་ཐོབ་པས་ནི་མ་ཡིན་ཏེ་དེ་ཙམ་གྱིས་
རྒྱུད་སྡེ་ཟབ་མོ་ཉན་བཤད་དང༌། རྫོགས་རིམ་ཟབ་མོའི་སྣོད་ལ་མི་དབང་བའི་ཕྱིར་དེ་ལྟར་གསུངས་པའི་དོན་ཡང་ལྡོག་པར་འགྱུར་ཞིང༌། རབ་ཏུ་བྱུང་བ་ཐམས་ཅད་བླ་མེད་ཟབ་ལམ་གྱི་སྣོད་མ་ཡིན་པར་སོང་བས་འཛམ་བུའི་གླིང་གི་རྒྱན་དྲུག་གི་གཙོ་བོ་སློབ་དཔོན་འཕགས་པ་དང༌། ཀླུ་བྱང་དང༌། ཟླ་བ་གྲགས་པ་དང༌། ཤཱནྟི་པ་དང༌། སངས་རྒྱས་ཡེ་ཤེས་ལ་སོགས་པའང་སྔགས་ཀྱི་ལམ་ནས་དངོས་གྲུབ་བརྙེས་ནས་གྲུབ་བརྒྱའི་གྲལ་དུ་བཞུགས་པའང་སྡིག་ཅན་དུ་འགྱུར་བས་སོ། །དེ་བས་ན་འདུ་ཤེས་གསུམ་དང་མི་ལྡན་པ་ལ་གསང་དབང་བཀག་ལ། དེའི་སྟེང་དུ་འཛག་པའི་གཉེན་པོ་མེད་པ་ལ་ཤེར་དབང་བཀག་གིས། གལ་ཏེ་བཟོད་པ་ཆུང་ངུ་ཐོབ་ཀྱི་བར་བསྲིང་དགོས་ན་དེའི་ལམ་རྟགས་མངོན་སུམ་དུ་སྐྱེས་པ་འཇིག་རྟེན་ན་དཀོན་པས་རབ་བྱུང་ཐམས་ཅད་བླ་མེད་ཟབ་ལམ་གྱི་སྣོད་མ་ཡིན་པར་འགྱུར་བས་རྩ་ལྟུང་ལ་རིན་ཐང་ཆེན་པོ་བྱེད་པ་ཉིད་དོ། །དེ་ལ་གསུམ་པའི་དབང་ནི་ཤེས་རབ་མའི་བྷ་གའི་དཀྱིལ་འཁོར་དུ་བསྐུར་བ་ཡིན་པས་དེའི་རྣམ་པར་གཞག་པ་ལ་བདུན། རིག་མ་བརྟག་ཅིང་དགུག་པ་དང༌། བྱང་ཆུབ་ཀྱི་སེམས་རྒྱས་པར་བྱ་བ་དང༌། བསླབ་བྱའི་སྒོ་ནས་སྣོད་ལྡན་དུ་བསྒྲུབ་པ་དང༌། སློབ་མ་ལ་གཏད་ནས་གོ་
བར་བྱ་བ་དང༌། རྩ་བསླང་ནས་སྦྱོར་ཐབས་བཤད་པ་དང༌། བལྟ་བ་བཞི་དང་སྦྱར་ནས་དབང་དོན་ངོས་བཟུང་བ་དང༌། འཕོ་མེད་ཀྱི་དོན་ལ་སྦྱར་ནས་ཡིན་ཚུལ་ལྟར་ལྡོག་ཅིང་དགྲམ་པའོ། །དང་པོ་ནི་དབང་བཀོད་པ་ཆེན་པོ་ལས། སངས་རྒྱས་རིགས་ཀྱང་བྱེ་བྲག་ལས། །རིག་མའང་དེ་བཞིན་བྱེ་བྲག་འགྱུར། །ཞེས་པས་རིགས་སོ་སོ་དང་མཐུན་པའི་རིག་མ་མེད་ན་མི་འགྲུབ་པས་རིགས་བརྟག་པ་འདི་གལ་ཆེ་ལ། དེ་ལ་ཕྱི་ནང་གསང་གསུམ་ལས་ཕྱི་ལྟར་དུ་རྒྱལ་རིགས་ཀྱིས་དེ་བཞིན་གཤེགས་པ། རྗེའུ་རིགས་ཀྱིས་རྡོ་རྗེ། དམངས་རིགས་ཀྱིས་རིན་པོ་ཆེ། བྲམ་ཟེ་པདྨ། གདོལ་བས་ལས་ཀྱི་རིགས་ཀྱི་སངས་རྒྱས་འགྲུབ་པ་ཡིན་ནོ། །ནང་ལྟར་ན་ཀྱེ་རྡོ་རྗེ་མཁའ་འགྲོ་སྡོམ་པ་ལས། ལྷ་དང་ལྷ་མིན་མི་རྣམས་དང༌། །གནོད་སྦྱིན་མིའམ་ཅི་ལས་ཀྱང༌། །ཕྱག་རྒྱ་བཀུག་ལ་རབ་ཏུ་བརྟག །ཅེས་པས་རྫུ་འཕྲུལ་ཐོབ་པའི་སློབ་དཔོན་བཛྲ་ཧེ་དང༌། དཔལ་ལྡན་བདེ་ཆེན་ལ་སོགས་པ་བཞིན་ལྷ་དང་ལྷ་མིན་ལ་སོགས་པའི་བུ་མོ་དགུག་པར་ནུས་པ་རྣམས་ལ་དངོས་བསྟན་ལྟར་ཡིན་ལ། གཞན་དུ་ལོ་གྲངས་དང་རིགས་ཀྱི་སྒོ་ནས་དེ་དག་ཏུ་གདགས་པར་ཡང་བཤད་དོ། །སྤྱིར་བུད་མེད་ཐམས་ཅད་རིགས་ཅན་ལྔའི་རྩ་དང་ལྡན་པ་སྟེ། སྔ་མའི་འཕྲོར། བུད་མེད་
ཐམས་ཅད་རིགས་ཅན་ལྔ། །དེ་ཡི་བཀོད་པ་བདེ་བ་ཆེ། །རྣལ་འབྱོར་དངོས་གྲུབ་རྫོགས་པའོ། །ཞེས་པས་རིགས་ཅན་ལྔར་མ་འདུས་པ་མེད་ཅིང་རྩ་ལྔ་པོ་དེས་བསྟུམས་པས་བྱང་སེམས་དཀར་པོའང་དངོས་སུ་མི་འབྱུང་ངོ༌། །སྐྱེས་པ་རྣམས་ལ་ནི་རྩ་ལྔ་པོ་མེད་པས་ཁུ་བ་དངོས་སུ་འཐོན་ལ། རྡུལ་འབྱུང་བའི་རྩ་ཁ་ཁྱད་པར་གྱི་གནས་འགྱུར་བ་མེད་པས་བྱང་སེམས་དམར་པོ་ཐུར་དུ་མི་འབབ་ཀྱང༌། རྩ་གྱེན་རྒྱུག་ཏུ་ཡོད་པས་སྣ་སྦུག་གཡས་པ་ནས་རྐྱེན་དང་འགྲོགས་པའི་ཚེ་འབབ་པའོ། །དེ་ལས་གསང་བ་ལྟར་བརྟག་པ་ནི། རྡོ་རྗེ་མཁའ་འགྲོ་ལས། རི་མོ་ཅན་ནི་སེམས་གཡོ་ཞིང༌། །འོ་མ་འཛིན་སྦོམ་པདྨ་ཅན། །ལྟེ་བ་དུང་འདྲ་དུང་ཅན་མ། །དེ་དག་རིམ་པ་བཞིན་དུ་བརྗོད། །ཅེས་སོ། །རང་བཞིན་གསལ་བར་སྟོན་པ་ནི་དབང་བཀོད་ལས། པདྨའི་རིགས་དང་དུང་ཅན་ཏེ། །རི་མོ་ཅན་དང་ཧ་སྟིའོ། །རིགས་ནི་དེ་དག་བརྟག་པ་སྟེ། །ཁ་དོག་འགྲོས་དང་སྐད་ཀྱིས་བརྟག །ཁ་དོག་བརྟག་པ་འདི་ལྟ་སྟེ། །པདྨའི་རིགས་སུ་གང་འདོད་པ། །བྱད་ནི་ཟླུམ་ཞིང་ཤ་མདོག་སྨུག །སྐད་ཕྲ་ཡིད་དུ་འོང་སྨྲ་ཞིང༌། །གཟུགས་དང་བོངས་ནི་ཆུང་ཞིང་སྦོམ། །ཡིད་དུ་འོང་ཞིང་ཆགས་པ་སྐྱེ། །སྐྲ་ཡི་མདོག་སེར་ལི་ལ་འཇམ། །སེན་མོའི་འོད་ཀྱང་
དམར་ལ་དངས། །སྨིན་མཚམས་བར་ཡང་མ་ཆད་དེ། །ལོ་ནི་བཅོ་ལྔ་ཉིད་ལོན་པ། །པདྨའི་མཚན་ཉིད་ཡིན་པར་འདོད། །དུང་ཅན་དག་གི་མཚན་ཉིད་ནི། །བྱད་ཉིད་ཆེ་ཆུང་སྙོམས་པ་སྟེ། །ཁ་དོག་དཀར་ཞིང་སོ་ཡང་དཀར། །ལུས་ནི་རགས་ཤིང་དཔའ་བརྟུལ་ཆེ། །གཟུགས་བཟང་ཡིད་དུ་འོང་བ་སྟེ། །མིག་རྩ་ཡིད་ཙམ་དམར་བ་ལ། །སྐྲ་ཡང་གནག་ཅིང་འཛུམ་ཁ་སྙི། །སོར་མོ་ཕྲ་ཞིང་མཉེན་ལྕུག་ཆེ། །སེང་གེ་ལྟ་བུའི་འགྲོས་དང་ལྡན། །སྐད་ནི་ཚངས་པའི་དབྱངས་དང་མཚུངས། །བཅུ་དྲུག་ལོ་དང་ལྡན་པ་ནི། །དུང་ཅན་ཡིན་པར་རབ་ཏུ་བཤད། །རི་མོ་ཅན་གྱི་མཚན་ཉིད་ནི། །ཁ་ཉིད་ཆུང་ཞིང་ཤ་ཡང་སེར། །བྱད་ཀྱི་དཀྱུས་ཀྱང་རིང་བ་སྟེ། །གཟུགས་ཉིད་ཕྲ་ཞིང་སྨྲ་བ་ཉུང༌། །དཔའ་བརྟུལ་ཆེ་ཞིང་ཞུམ་པ་ལྟར། །མིག་གི་འབྲས་བུ་དཀར་ནག་ཕྱེད། །སྐད་ཀྱི་ང་རོ་ཆུང་བ་སྟེ། །ཤ་སྲབ་མཚན་སྤུ་གསལ་བ་དང༌། །ཡིད་དུ་འོང་ཞིང་གླང་ཆེན་འགྲོས། །བཅུ་བཞི་ལོ་དང་ལྡན་པ་སྟེ། །རི་མོ་ཅན་དུ་ཡང་དག་འདོད། །ཧ་སྟི་མ་ཡི་མཚན་ཉིད་ནི། །བྱད་དཀྱུས་དག་ནི་རིང་པ་ལ། །ཤ་ཡི་མདོག་ནི་ཡིད་ཙམ་སྔོ། །སོ་དཀར་མིག་གི་འབྲས་བུ་གནག །གཟུགས་ཆེ་སྐེད་སྐབས་ཕྱེད་པ་སྟེ། །སྣ་རྒྱུད་བཟང་ཞིང་སྨིན་མ་བཟང༌། །སྐབས་སྐབས་སྐད་ཀྱང་མཛེར་བར་བྱེད། །
སྤྱོད་པ་དལ་ལ་ཚིག་འཇམ་སྨྲ། །བ་གླང་འགྲོས་འདྲ་བརྟུལ་ཞུགས་ཆེ། །སུམ་ཅུ་མན་ཆད་ལོ་རྣམས་སོ། །དེ་ལྟར་མཚན་དང་ལྡན་པས་ན། །ཧ་སྟིའི་རིགས་སུ་ཡང་དག་འདོད། །གསང་བའི་ཡུམ་དེ་རེ་རེ་ཡི། །འབྲས་བུ་རེ་རེ་ཐོབ་པ་སྟེ། །རི་མོ་ཅན་དང་ཧ་སྟི་མཆོག །ཡང་ན་བུ་མང་ལོངས་སྤྱོད་ལྡན། །ལོ་ཚད་ངེས་པ་མེད་པར་བསྟན། །ཡང་ནི་ཡིད་འོང་གཞོན་ནུ་མ། །སྐྱེས་པས་མ་གཙེས་བརྟུལ་ཞུགས་ལྡན། །བཅུ་བཞི་ལོ་དང་ལྡན་པའོ། །དེ་ལྟར་བསྟེན་པའི་ཡུམ་ལ་ཡང༌། །སྦྱར་བས་འགྲུབ་དང་བསྟེན་པས་འགྲུབ། །བསམ་པས་འགྲུབ་དང་མཐོང་བའོ། །རི་མོ་ཅན་ལ་སྦྱར་བས་ཏེ། །དུང་ཅན་བསྟེན་པའི་སྟོབས་ཀྱིས་འགྲུབ། །པདྨའི་རིགས་ནི་བསམ་པར་བྱ། །ཧ་སྟི་མཐོང་ཞིང་རེག་པས་སོ། །དབང་ཉིད་རྒྱས་པར་བྱེད་པ་ན། །རིགས་ནི་བཞི་ཀ་ཚང་བར་བྱ། །དེ་མེད་ནའང་སོ་སོ་བཤད། །སྦྱར་བར་བྱས་ན་དངོས་གྲུབ་རབ། །བསྟེན་པས་དངོས་གྲུབ་འབྲིང་དུའོ། །བསམ་པས་འགྲུབ་པ་ཐ་མའོ། །མཐོང་བས་གསུམ་ཀའི་གྲོགས་སུ་བསྟེན། །ཞེས་སོ། །དེ་བཞིན་དུ་སྡོམ་འབྱུང་གི་སོ་གཅིག་པ་ལས། ལཱ་མ་དང༌། ཁཥྟ་རོ་ཁ་ལ་སོགས་པའི་མིང་གཞན་གྱིས་བཤད་དོ། །དེ་ཡང་
ཁྱད་པར་དུ་རྩའི་སྒོ་ནས་བརྟག་པ་སྟེ། པདྨ་ཅན་ནི་པདྨ་རྒྱས་པ་ལྟ་བུའི་རྩ་དང་ལྡན་པས། དེ་ལ་རྩ་ཁ་འབྱེད་པའི་གདམས་ངག་གལ་ཆེ་ཞིང་བདེ་བའི་ཡེ་ཤེས་སྟེར་བས་ཆོས་ཉིད་གསལ་བའི་གྲོགས་ཞེས་བྱའོ། །དུང་ཅན་མ་ནི། རྩ་ཁ་དུང་གི་ཁ་སྒོ་ལྟར་འཁྱིལ་ནས་ཡོད་པས་དེ་ལ་རྩ་གཅུད་པའི་མན་ངག་གཙོའོ། །རི་མོ་ཅན་ནི་རི་དྭགས་ཅན་དང་མཚུངས་པས། །རི་དྭགས་ཨེ་ན་ཡའི་བྱིན་པ་ལྟར་རྩ་མཇུག་ཕྲ་ལ་གྲིམས་པ་སྟེ། དེ་ལ་རྩ་སློང་བའི་མན་ངག་གཙོ་ཆེའོ། །ཧ་སྟི་མ་ནི་གླང་སྣ་ཅན་ཏེ་གླང་པོའི་སྣ་ལྟར་གྱེན་ལ་གདེངས་པས་འདི་ལ་རྩ་འགུགས་པའི་མན་ངག་གཙོ་ཆེའོ། །བ་གླང་ཅན་ནི་འདིར་མ་སྨོས་པ་སྟེ། རྩ་བག་ལ་ཉལ་དང༌། ཤེས་པ་ལ་སྒྲིན་པ་མེད་པས་ཡོན་ཏན་ཆུང་བའོ། །དེ་ལ་རྩ་སྦྱང་བའི་མན་ངག་གཙོ་ཆེ་བ་ཡིན་ནོ། །དེའང་རྩ་སྣ་རིང་བ་དང༌། ཐུང་བ་དང༌། འབྲིང་པོ་གསུམ་ལས་རིང་བ་ནི་བདེ་བ་ཁ་སྲ་ལ་ཕྱི་ནས་ལྷག་པར་སྐྱེ། ཐུང་བ་ནི་བདེ་བ་ཁ་སྙི་ལ་ཡུན་ཐུང༌། འབྲིང་པོ་ནི་རྣམ་ཤེས་མེད་པ་དང་འདྲ་བར་རིགས་པར་བྱའོ། །རྩ་སོ་སོའི་བྱེད་ལས་ཀྱི་དབང་དུ་ན། རི་དྭགས་ཅན་གྱིས་ལུས་སྤེལ་བའི་ལས་འགྲུབ། དུང་ཅན་མས་ངག་སྤེལ་བའི་ལས་འགྲུབ། གླང་སྣ་མས་ཡིད་སྤེལ་བའི་ལས་འགྲུབ། བ་གླང་ཅན་མས་སེམས་སྤེལ་བའི་
ལས་འགྲུབ། པདྨ་ཅན་གྱིས་བདེ་བ་ལུས་ལ་རྒྱས་པའི་ལས་འགྲུབ་པའོ། །ཡང་ཞིང་སྔགས་ཀྱི་རིགས་ཅན་མཆོག་དམན་གཉིས་ཀྱི་སྒོ་ནས་བརྟག་པ་ལ། མཁའ་འགྲོ་མ་ནི། སྐྲ་གྱེན་དུ་གཡེངས་པ། འགྲམ་ཡངས་ལ་ཡན་ལག་ཕྲ་བ། མིག་དཀྱུས་རིང་བའོ། །ཕལ་པའི་རིགས་ནི་མིག་ཡངས་པ། །སྐྲ་གཡས་སུ་འཁྱིལ་བ། ཡ་སོ་ལྷག་པ། གཡོན་ནས་བལྟས་ན་དགྱེ་ལ། གཡས་ནས་བལྟས་ན་དགུ་བའོ། །ཐད་ཀ་ནས་བལྟས་ན་རབ་ཏུ་དྲང་བ་སྟེ། དཔལ་རྡོ་རྗེ་མཁའ་འགྲོ་ལས། ཐ་མལ་སྔགས་ཀྱི་ལུས་ཅན་དང༌། །ཞིང་སྐྱེས་མ་ནི་གང་ཡང་རུང༌། །ཞེས་སོ། །དེའང་རིག་མའི་ངེས་ཚིག་ནི། རིག་པའི་ཡེ་ཤེས་མངོན་དུ་བསྐྱེད་པས་རིག་པ་དང༌། དེ་ལ་མ་བརྟེན་ན་སངས་རྒྱས་ཀྱི་ཡེ་ཤེས་མི་རྟོགས་པས་ཡོན་ཏན་ཐམས་ཅད་ཀྱི་འབྱུང་གནས་ས་གཞི་ལྟར་སྐྱེད་བྱེད་འགྲུབ་པའི་ཆ་ནས་མ་ཞེས་བྱ་ལ། ཡང་ན་བདེ་བའི་གཟུངས་དང་ལུས་ཀྱི་གཟུངས་དེའི་ལུས་ལ་བརྟེན་ནས་སྐྱེ་བས་ན་གཟུངས་དང༌། མ་ནི་ནམ་མཁའ་དང་འདྲ་བར་འདོད་པའི་ཡོན་ཏན་ཐམས་ཅད་ཀྱི་འབྱུང་གནས་ཡིན་པས་གཟུངས་མ་ཞེས་འབྱུང་ངོ༌། །ཡང་ན་འཁོར་བ་ལས་སངས་རྒྱས་ཀྱི་སར་འཛིན་པར་བྱེད་པས་ཕྱག་དང༌། དེ་ལས་བྱུང་བའི་ཡེ་
ཤེས་ཀྱི་འཁོར་བའི་རང་བཞིན་སངས་རྒྱས་སུ་རྒྱས་འདེབས་པར་བྱེད་པས་རྒྱ་དང༌། མ་ནི་རྟོགས་པའི་ཡོན་ཏན་དེ་ལས་འབྱུང་བས་སྤང་དུ་མི་རུང་བའི་ཕྱིར་ཕྱག་རྒྱ་མ་ཞེས་བྱ་སྟེ། སྒྲོལ་མ་རྣལ་འབྱོར་མའི་རྒྱུད་ལས། རྩ་ཡི་དྲ་བ་ལྷ་མོ་སྟེ། །དེ་བཞིན་ཁམས་དང་གཉེར་བཅས་པ། །བུད་མེད་རྣལ་འབྱོར་མའི་དཀྱིལ་འཁོར། །སྤངས་ནས་རི་མོ་སུ་ཞིག་ལེན། །ཞེས་སོ། །སྤྱི་མཚན་དུ་དབྱིབས་དང༌། ཁ་དོག་དང༌། སྤྱོད་ལམ་གསུམ་གྱི་སྒོ་ནས་བརྟག་པ་ནི། རྐེད་པ་ཕྲ་བ་དང༌། རང་བཞིན་ལྡེམ་པ་དང༌། ཡན་ལག་ལྕུག་ཅིང་སེན་མོ་དམར་བཀྲག་ཆེ་བ་དང༌། ལུས་བོང་འཚམས་པ་དང༌། ཧ་ཅང་དཀར་བ་དང༌། གནག་པ་མ་ཡིན་པ་དང༌། དེ་བཞིན་སེར་བ་དང༌། དམར་བའི་མཐའ་གཉིས་སྤངས་པས་སྔོ་སང་དུ་འཇུག་པ་དང༌། མིག་ཡངས་པས་སྨིན་མཚམས་འབྲེལ་བ་དང༌། སོ་དཀར་ལ་ཐགས་དམ་པ་དང༌། སྤྱོད་ལམ་དལ་བ་དང༌། འགྲོ་ན་གཡས་སུ་འགྲོ་ཞིང་ངང་པའི་འགྲོས་འདྲ་བ་དང༌། ངག་སྙན་ལ་བག་ཆེ་བ་དང༌། སྨྲ་བ་ཉུང་ཞིང་སོས་དལ་བ་དང༌། གཡོན་པའི་ཀུན་སྤྱོད་བྱེད་པ་དང༌། སེམས་རྒྱུད་འཇམ་ཞིང་ངོ་ཚ་ཆེ་བ་དང༌། ཐབས་ལ་གུས་ཤིང་ཕྲག་པ་ཡངས་པ་སྟེ། དེ་ལྟ་བུ་ལ་བརྟེན་ན་ཆོས་ཉིད་རྣམ་པར་མི་
རྟོག་པ་འགྲུབ་པའི་ཚུལ་ཡང༌། བུ་མོའི་ལོངས་སྤྱོད་བདེ་བ་ཡིས། །རྣམ་པར་མི་རྟོག་གཉིས་མེད་འགྲུབ། །རི་བོ་ཉམས་ནི་དགའ་བ་དང༌། །ནགས་ཚལ་དབེན་པའི་ས་ཕྱོགས་སུ། །མིག་བཟང་བརྟན་པའི་བློ་ལྡན་བཟུང༌། །ཞེས་སོ། །ཞར་ལ་དགུག་པའི་མན་ངག་ཀྱང༌། །ལྟོ་འགྲོས་ལག་འགྲོ་བཟུང་བ་ན། །དེ་དག་དུད་མེད་ཐལ་བར་བྱ། །སྦྲང་རྩི་སྦྱར་བ་མཆན་ཁུང་དུ། །ཐིག་ལེ་བྱས་ན་འགུགས་པར་འགྱུར། །མི་ཚིལ་མི་ཡི་ཐོད་པར་བཞག །ན་རྨའི་བལ་གྱི་སྡོང་བུར་བྱ། །གཟུགས་འཚང་ཐོད་པ་དག་ལས་ནི། །སྣག་ཚ་བླངས་ཏེ་བུ་མོ་ལ། །ཐིག་ལེ་བྱས་ན་འགུགས་པར་འགྱུར། །ཞེས་སོ། །གཉིས་པ་ནི། རྡོ་རྗེ་མཁའ་འགྲོའི་སོ་བརྒྱད་པ་ལས། ཏིལ་དཀར་པོ་དང༌། ན་ག་གེ་སར་དང༌། དཔའ་བོའི་ཚིག་འགྲེང་གི་རྩ་བ་རྣམས་བཏགས་ཏེ། སྦྲང་རྩི་དང་མ་ཧེའི་མར་དང་ལྷན་ཅིག་ཏུ་སྦྱར་ཏེ་བསྐུས་ན་བྷོ་ལ་རེངས་ཤིང་འདོད་པའི་བདག་ཉིད་ཅན་རྣམས་ཡིད་འཕྲོག་པར་འགྱུར་ཞེས་སོགས་པས་བསྟན་ཏོ། །གསུམ་པ་ནི་དེ་ལ་ལས་རྒྱུ་འབྲས་ཀྱི་ཆོས་བསྟན་ལ་སྲིད་པ་ལ་བློ་ལོག་པར་བྱ། རབ་ཏུ་དབང་བསྐུར་ནས་མན་ངག་སྦྱིན་པ་དང༌། ཐ་ནའང་དགེ་བསྙེན་གྱི་སྡོམ་པ་སྦྱིན་པ་ལ་སོགས་པས་རྒྱུད་དག་པར་བྱ་སྟེ། སྒྲོལ་མ་རྣལ་འབྱོར་མ་ལས། དང་པོར་འདུས་པ་བྱས་ནས་ནི། །རྡོ་རྗེ་
ཆོ་ག་རབ་ཏུ་བསྒྲུབ། །དེ་བཞིན་གཤེགས་པའི་བཙུན་མོའི་མཆོག །དམ་ཚིག་ཆེན་པོར་བྱིན་གྱིས་བརླབ། །ཅེས་སོ། །བཞི་པ་ནི། སློབ་མས་གསོལ་བ་བཏབ་པའི་རྗེས་ལ། སློབ་དཔོན་ཉིད་དཀྱིལ་འཁོར་གྱི་བདག་པོར་གསལ་ཞིང༌། སློབ་མ་འདོད་ཆགས་རྡོ་རྗེའི་ངོ་བོ་ཉིད་འོད་དཔག་མེད་དུ་བསྐྱེད་དུ་བཅུག་པའི་ལག་པ་གཡོན་པར་གདན་གསུམ་ཚང་བའི་དཀྱིལ་འཁོར་གྱི་བདག་ཉིད་རིགས་ཀྱི་ལྷ་མོའི་སྙིམ་པ་གཡས་པར་སྦྱིན་པ་ལ་བཅངས་ནས། རྡོ་རྗེ་དང་བཅས་པའི་ལག་པ་གཡས་པ་སློབ་མའི་སྤྱི་བོར་བཞག་སྟེ། ལྷ་མོ་འདི་ནི་ཕྱག་རྒྱ་ཆེ། །མཐའ་ཡས་བདེ་བ་སྦྱིན་པ་མོ། །རྣམ་པ་ཀུན་ཏུ་ཕྱག་རྒྱ་ལོངས། །བུ་ཡིས་བླ་མེད་མཆོད་པ་གྱིས། །ཞེས་གནང་བ་བྱིན་པས། སྣ་ཚོགས་ལུས་ཅན་མས་ཀྱང་གུར་གུམ་ལ་སོགས་པ་དྲི་ཞིམ་པོས་ལུས་ལ་བགོས། རྒྱན་གྱི་བྱེ་བྲག་དུ་མས་བརྒྱན་ནས་དམ་ཚིག་དྲི་བའི་ཕྱིར། དཔའ་བོ་བྱང་ཆུབ་སེམས་ཟ་བར། །ཁྱོད་ནི་སྤྲོ་བ་ཡིན་ནམ་ཅི། །རིགས་ལྔ་ལས་ནི་རབ་བྱུང་བའི། །རིག་མ་མཆོད་པ་ལ་གུས་སམ། །དྲི་ཆེན་དྲི་ཆུ་སྟོབས་དྲག་སོགས། །ཟ་བ་རང་ལྟ་ཡིད་ཆེས་སམ། །རྗེས་སུ་མཐུན་སྨྲོས་དམ་ཚིག་བཟང༌། །ཇི་ལྟར་དགའ་བ་སྨོས་ཤིག་བུ། །ཞེས་བརྗོད་པས་སློབ་མས་ཕྱག་འཚལ་
ཞིང་མེ་ཏོག་འཐོར་བ་དང་བཅས་སྤྲོ་བ་དྲིས་པ་དང་དུ་བླང་བའི་ཕྱིར། ཇི་ལྟར་གསུངས་པའི་དམ་ཚིག་སོགས། །ལྷ་མོ་བདག་ནི་ཅིས་མི་སྤྲོ། །བུད་མེད་རྟག་གུས་ཅིས་མི་བྱ། །པདྨ་མཆོད་པར་ཅིས་མི་བགྱིད། །ཅེས་ལན་གདབ་བོ། །དེ་ནས་བླ་མ་ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོའི་སྒྲ་དང་འོད་ཀྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་འདོད་ཆགས་རྡོ་རྗེའི་རྣམ་རོལ་ཅན་དུ་བཀུག་སྟེ། མདུན་གྱི་ནམ་མཁར་སྟོང་གསུམ་གཡོ་བ་ཙམ་གྱིས་རྗེས་ཆགས་མཛད་པས་བྱང་ཆུབ་ཀྱི་སེམས་དཀར་དམར་གྱི་ངོ་བོ་འོད་དུ་ཞུ་ནས་དབང་རྟེན་དང་སློབ་མ་ལ་ཐིམ་པར་བསྒོམ་དུ་བཅུག་པས་དེ་གཉིས་ཀྱང་ཆགས་པའི་སེམས་ཀྱིས་མྱོས་པར་གྱུར་པ་ལས། ཁྱད་པར་རིག་མ་ཉིད་ཀྱི་ཐ་མལ་དུ་རྟོག་པའི་ཀུན་དུ་རྟོག་པ་རང་འགགས་ནས་སྐྲ་གྲོལ་ལུས་གཅེར་བུར་ཕྱུང༌། འཛུམ་པ་དང་བཅས་པའི་ཟུར་མིག་གི་མདས་དཔའ་བོའི་སྙིང་ལ་འབིགས་པ་དང་ཆབས་ཅིག་གཡོན་པ་རང་ཉིད་ཀྱི་པདྨའི་གཡོན་གྱི་ཆར་སོན་པའི་རྩའི་ཐད་དུ་ཁུ་ཚུར་དང་བཅས་པའི་མཐེ་བོང་བསྣུན་ནས་བདེ་བ་འབབ་པའི་རྩ་རྡོ་རྗེ་དབྱིངས་ཀྱི་དབང་ཕྱུག་མ་སྟོན་ཅིང༌། གསང་བའི་ཆུ་སྐྱེས་དངོམ་པ་གང་ཞིག་དངོས་གྲུབ་ཆེན་པོའི་འབྱུང་གནས་ཡིན་པར་ངོ་སྤྲད་ནས་
རྟོགས་པ་བསྐྱེད་པ་ནི། ཨེ་མ་བདག་གི་པདྨ་འདི། །བདེ་བ་ཐམས་ཅད་ཀྱི་ནི་གནས། །ཅི་སྟེ་ཆོ་ག་བཞིན་བསྟེན་ན། །དེ་ཡི་མདུན་ན་ང་འདུག་སྟེ། །སངས་རྒྱས་མཉེས་པ་ལ་སོགས་པའི། །བྱ་བ་པདྨ་ཇི་བཞིན་བྱེད། །བདེ་ཆེན་རྒྱལ་པོ་རང་ཉིད་དེ། །འདི་ཉིད་ན་ནི་རྟག་ཏུ་བཞུགས། །རྨོངས་པ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །པདྨ་བྷཉྫ་མོ་ཀྵ་ཧོཿ ཞེས་བརྗོད་དེ་ཐབས་ཀྱི་པང་དུ་ཕྱིན་ནོ། །དེ་ལ་པདྨ་ནི་ཐབས་དེའི་དཀྱིལ་འཁོར་གྱི་མིང་སྨོས་པ་ཡིན་ལ། བྷཉྫ་ནི་བསྟེན་ཅིག་པ་སྟེ། གང་བསྟེན་ན་མོཀྵ་སྟེ་ཐར་པའི་རང་བཞིན་སྤྲོས་པ་ཐམས་ཅད་དང་བྲལ་བའོ། །ལྔ་པ་ནི་ཕྱག་ཆེན་ཐིག་ལེ་ལས། གཟུགས་བཟང་བཅུ་དྲུག་ལོན་པ་དང༌། །སིཧླ་ག་བུར་ཡོད་པ་ཡི། །ཕྱག་རྒྱ་གཅེར་བུར་བྱས་ནས་ནི། །ལེགས་དགྱེས་དབྱངས་ཀྱིས་མཆོད་པར་བྱ། །པདྨ་ཁ་སྦྱར་སྦྱོར་བ་ཡིས། །ཡང་དང་ཡང་དུ་འདོད་པ་བྱ། །ཞེས་པ་ལྟར་ཐབས་ཀྱི་པང་དུ་ཕྱིན་ནས། ཐབས་ཤེས་གཉིས་ཀ་ལྷར་འདུ་ཤེས་པའི་གནས་གསུམ་དུ་ཡི་གེ་གསུམ་དང༌། ཐབས་ཀྱི་རྡོ་རྗེ་ཧཱུྃ་ལས་རྡོ་རྗེ་ལྔ་པའི་རྩེ་མོར་ཨོཾ་གྱིས་མཚན་ལ། ཤེས་རབ་ཀྱི་པདྨ་ཨཱཿལས་པདྨ་འདབ་མ་དམར་པོ་འདབ་མ་བཞི་པའི་ཟེ་འབྲུར་ཧྲཱིཿས་མཚན་པས་ཡི་གེར་འདུ་ཤེས་
པ་དང༌། ཐབས་ཀྱི་ནང་ནས་ཐབས་མཆོག་ཏུ་གྱུར་པ་འདི་ལ་བརྟེན་ནས་སེམས་ཅན་ཐམས་ཅད་ཀྱི་དོན་དུ་བདེ་ཆེན་ལྷན་ཅིག་སྐྱེས་པའི་ཡེ་ཤེས་མངོན་དུ་བྱའོ་སྙམ་པའི་སེམས་བསྐྱེད་པ་ཆོས་ཀྱི་འདུ་ཤེས་ཏེ། འདུ་ཤེས་གསུམ་དང་ལྡན་པའི་ངང་ནས་ཧཱུྃ་ཧཱུྃ་ལ་སོགས་པས་དབུ་མའི་མར་སྣེར་བདེ་བ་མངོན་དུ་རྒྱུ་བའི་རྩ་གཟུང་འཛིན་དང་བྲལ་བའི་བདག་ཉིད་ཅན་བཙལ་བཞིན་པས་སྙོམས་པར་འཇུག་པར་བྱ་སྟེ། ཕྱག་ཆེན་ཐིག་ལེ་ལས། པདྨའི་སྙིང་པོའི་དབུས་ན་ནི། །རྡོར་དབྱིངས་དབང་ཕྱུག་མ་ནི་བཞུགས། །དེ་མ་རྙེད་པའི་བར་དུ་ནི། །ཐབས་གཞན་ལས་ནི་བྱང་ཆུབ་མེད། །དེ་ནི་རང་གི་དགའ་བའི་གཟུགས། །ཕྲ་མོའི་ཕྲ་མོ་ཡང་དག་མཆོག །ཅེས་སོ། །འཚོལ་བའི་ཚུལ་ནི་སོར་མོས་གོ་བར་བྱ་བ་སྟེ་མཛུབ་མོའི་རྩེ་དང་ལྕེ་རྩེ་ལ་འདོད་ཆགས་རྡོ་རྗེའི་ངོ་བོ་ཡི་གེ་ཧྲཱིཿཡིག་དམར་པོ་བསམས་ལ་ཤཱི་ཏཱ་བརྗོད་པ་སྔོན་དུ་འགྲོ་བས་ཡང་དག་པར་བསྐུལ་ནས་རྩ་བྱ་རོག་གདོང་དང་ཕྲད་པར་བྱས་ཏེ། ཨཱོཾ་ཤཱི་ཤཱི་ཤཱི་ཧ་ཧ་ཧ་སྭཱ་ཧཱ་ཞེས་དང༌། ཨཱོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ལ་སོགས་པའི་སྔགས་དོན་གྱི་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པའི་རྡོ་རྗེའི་རང་བཞིན་གྱི་བདག་ཉིད་ངའོ་སྙམ་པའི་རྗེས་ཆགས་དང་ལྡན་པས་རྣམ་པར་
འགྱུར་བ་དང་འཁྱུད་པའི་སྟབས་བརྒྱད་ལ་མཁས་པར་བྱ་སྟེ། དོན་དམ་པ་འདུས་པ་ཞེས་བྱ་བའི་རྣལ་འབྱོར་མའི་རྒྱུད་ལས། ཁྱོགས་དང་བླ་ཞེས་བྱ་བ་དང༌། །དེ་བཞིན་ཤིན་ཏུ་བརྐྱང་བ་དང༌། །ཁབ་དང་གྲུ་མོའི་མཚན་ཉིད་བྱ། །བུང་བ་ལྟ་བུར་ཨི་ཡི་སྒྲ། །ངེས་པར་བློ་དང་ལྡན་པས་བསྐུལ། །སྒེག་འཆོས་སྟབས་ཀྱིས་འཁྱུད་ནས་ནི། །མགོ་བོའི་སྐྲ་བཟུང་ལྐོག་མ་གཟིར། །མ་མཆུའི་སྦྲང་རྩི་གཞིབས་པར་བྱ། །རྡོ་རྗེ་འཁྱུད་པས་འཁྱུད་པ་དང༌། །རྡོ་རྗེ་འོ་ཡིས་འོ་གདབ་ཅིང༌། །སོ་དང་སེན་མོ་བསྣུན་པར་བྱ། །རྡོ་རྗེ་པདྨར་རབ་འཇུག་ཅིང༌། །སཱིཏ་ཀྱི་སྒྲ་རྣམས་འབྱེད་པ་དང༌། །ནུ་མ་འཚིར་དང་སྐྱེས་པའི་ཚུལ། །སྦྱོར་བ་ཐམས་ཅད་བྱ་བར་བྱ། །ནུ་མ་སོར་མོ་སྐེ་དང་མ་མཆུ་དང༌། །རྣ་བ་མིག་དང་སྤྱི་བོ་བྷ་ག་དང༌། །འོ་བྱ་རྣ་བ་མཆན་ཁུང་སྐེ་དང་ལྟག །སེན་མོས་བཏབ་བྱ་ནུ་མ་མཆན་ཁུང་དང༌། །མཁུར་ཚོས་འགྲམ་དང་རྐང་ལག་མཐིལ་དག་ཏུ། །ཉེད་པར་བྱ་ཞིང་འཁྱུད་པའི་སྟབས་བརྒྱད་བྱ། །སོར་མོ་ལིངྒ་ལྕེ་དང་ལྕེས་བསྐྱོད་ནས། །པདྨ་བསྐུལ་ཞིང་རྩ་མཆོག་གསད་པར་བྱ། །ཞེས་སོ། །དེའི་ཚེ་བདེ་བ་བརྟེན་པར་བྱེད་པའི་མན་ངག་ནི། རྡོ་རྗེ་མཁའ་འགྲོ་ལས། འབྱུང་པོའི་ཤིང་གི་རྩ་བ་འབད་པས་ཁར་བཅུག་ན་ཇི་སྲིད་དུ་བུ་མོའི་བདེ་བ་རྙེད་པ་དེ་སྲིད་ཀྱི་བར་དུ་སྔགས་པས་
འཛིན་པར་འགྱུར་རོ། །གཞན་དུ་ཤ་དང་ལཀྵ་ནའི་སྨན་བཏགས་ཏེ་ཏིལ་མར་དུ་བཙོས་ལ་རྐང་པ་ལ་བསྐུས་ན་ཡང་འདོད་པ་ལ་སྤྱོད་པ་རྣམས་ཀྱིས་བསྔགས་སོ། །ཞེས་སོ། །དྲུག་པ་ནི། དགའ་བ་བཞིའི་ཡེ་ཤེས་ལ་བརྟེན་ནས་དབང་དོན་ཤེས་པར་བྱ་བ་སྟེ། དེ་ཡང་རྟེན་ཤེས་རབ་མ་ལས་བརྟེན་པ་དགའ་བཞིའི་ཡེ་ཤེས་བསྐྱེད་པའི་ཚུལ་རྣམ་གྲངས་ཀྱི་སྒོ་ནས་ཕྱེ་ན་གོམས་པ་ལ་ལྟོས་པའི་དགའ་བ་བཞི། སྤང་བྱ་ལ་ལྟོས་པའི་དགའ་བ་བཞི། རང་གི་ངོ་བོ་ལ་ལྟོས་པའི་དགའ་བ་བཞི། གནས་ལ་ལྟོས་པའི་དགའ་བ་བཞི་ལས་རྟེན་ཅན་གྱི་ལམ་གྱི་གཙོ་བོ་ནི་ཐོག་མར་རྩ་རླུང་ཐིག་ལེ་གསུམ་གྱི་མན་ངག་ལ་ལྟོས་པའི་ཚུལ་གཏུམ་པོའི་རྒྱུད་ལས། བཅོམ་ལྡན་འདས་ཀྱིས་བཀའ་བསྩལ་པ། །རྐྱང་མ་ཤེས་རབ་རང་བཞིན་ཏེ། །གཡོན་པའི་རྩ་རུ་རབ་ཏུ་གྲགས། །རོ་མ་ཐབས་ཀྱི་རང་བཞིན་གྱི། །གཡས་པ་ལ་ནི་ཡང་དག་གནས། །རྐྱང་མ་རོ་མའི་དབུས་དག་ལ། །ཀུན་འདར་མ་ནི་རབ་ཏུ་གསུངས། །གང་ཚེ་ཨ་ཝ་དྷཱུ་ཏིར་རླུང༌། །ཁུ་བ་དང་ནི་རོ་གཅིག་འགྱུར། །ཞེས་དང༌། ལྟེ་བར་གནས་པའི་ཙནྡ་ལཱི། །མར་མེ་ལྟར་འབར་དེ་ཡིས་ནི། །ཞུ་བའི་ཁུ་བ་མཆོག་ལ་ནི། །དེ་ལས་སྐྱེས་པའི་བདེ་བ་ལ། །ཞེས་ཞུ་བདེ་ལ་བརྟེན་ནས་ཡེ་ཤེས་འདྲེན་
དགོས་པ་གང་ཞིག་གནས་ཀྱི་སྒོ་ནས་ངོས་བཟུང་བའི་ཁྱད་པར་ལ་དུས་འཁོར་ལྟར་ན། གཙུག་ཏོར་ནས་ནི་མཛོད་སྤུ་ཡི། །པདྨ་ཁུ་བར་འོངས་དགའ་བ། །མགྲིན་པ་སྙིང་གར་མཆོག་དགའ་བ། །ཁྱད་པར་དགའ་བ་དེ་ནས་འགྱུར། །སྣ་ཚོགས་དགའ་བྱེད་ལྟེ་བར་ཏེ། །གསང་བའི་པདྨའི་གང་འོངས་པའོ། །གསང་གནས་རྡོ་རྗེ་ནོར་བུའི་བར། །ལྷན་སྐྱེས་དགའ་བ་མི་འཕོ་བའོ། །ཞེས་འདོད་ལ། ཁ་ཅིག་ཏུ་སྙོམས་འཇུག་གི་དང་པོ་བལྟ་བ་ལ་སོགས་པའི་དུས་སུ་དགའ་བ། རྡོ་རྗེའི་རྩ་བར་ཐིག་ལེ་གཡོས་པས་མཆོག་དགའ། བདེ་བ་ཕྱིར་འབྱུང་བ་ལ་ཐུག་པ་ཁྱད་དགའ། འཛག་བདེ་བཀག་པ་ཡུན་རིང་དུ་གོམས་པ་ལས་རྡོ་རྗེ་ནོར་བུར་བྱང་སེམས་བརྟན་ཅིང་སྣང་བ་གསུམ་དང༌། འོད་གསལ་གྱི་རྟགས་ཤར་བ་ལྷན་ཅིག་སྐྱེས་དགར་འདོད་པའང་ཡོད་དེ་ཉམས་སུ་མྱོང་བའི་ལུགས་སུ་སྣང་ངོ༌། །སྤྱི་མཚན་དུ་ནི་ཕྱག་ཆེན་ཐིག་ལེ་ལྟར་གྲགས་པ་བརྟན་པ་ཡིན་ཏེ། ཚངས་བུག་ནས་ནི་མགྲིན་གནས་སུ། །དེ་ཙམ་དུ་ནི་ཐིག་ལེ་བཞི། །དེ་ཡི་གནས་སུ་དགའ་བ་བཞི། །རོ་གཉིས་དང་ནི་ལྡན་པའོ། །མགྲིན་པ་ནས་ནི་སྙིང་གར་གནས། །ཡང་ནི་དེ་ཙམ་བཞི་ཡིན་ནོ། །མཆོག་གི་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །སྙིང་གའི་གནས་
ནས་རིན་ཆེན་སྐེར། །ཡང་ནི་དེ་ཙམ་བཞི་ཡིན་ནོ། །དགའ་བྲལ་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །རིན་ཆེན་སྐེད་ནས་སྟེང་མི་གནས། །ཡང་ནི་དེ་ཙམ་བཞི་ཡིན་ནོ། །ལྷན་ཅིག་སྐྱེས་དགའ་བཞི་ཡིན་ཏེ། །རོ་གཉིས་དང་ནི་ལྡན་པའོ། །དགའ་བ་བཅུ་དྲུག་ཐིག་ལེ་སྟེ། །ཐིག་ལེ་ཟླ་བའི་ཆ་རུ་དྲན། །ཨཱ་ལི་ཐིག་ལེར་ཤེས་པར་བྱ། །འཁོར་ལོ་བཞི་ཡི་རིམ་པས་སོ། །ཞེས་འཁོར་ལོ་བཞི་སོ་སོར་དགའ་བཞིའི་འགྲོས་རེ་རེ་ལ་དགའ་བ་བྱེ་བྲག་པ་བཞི་བཞིར་ཕྱེ་བའི་བཅུ་དྲུག་ཏུ་བསྟན་པ་ཡིན་ནོ། །དེ་ཡང་རྣམ་རྟོག་ཤིན་ཏུ་རགས་པ་ཆོད་པས་དགའ་བ་དང༌། ཆེན་པོ་ཆོད་པས་མཆོག་དགའ་དང༌། འབྲིང་པོ་ཆོད་པས་ཁྱད་པར་གྱི་དགའ་བ་དང༌། རགས་པའི་ཆ་མེད་པས་ལྷན་སྐྱེས་ཀྱི་དགའ་བ་སྟེ་བཞི་པོ་དབང་བཞི་དང་སྦྱར་ན་སྔ་མ་གསུམ་རྟོག་བཅས་ཀྱི་དགའ་བ་ཡིན་ཏེ། དང་པོས་འཇུག་པའི་ཡེ་ཤེས་རླུང་གི་འཕེན་སྡུད་ལ་སྤྱོད། གཉིས་པས་ཚོར་བ་སྟེ་མྱོང་བའི་དངོས་རྗེས་ལ་སྤྱོད། གསུམ་པས་བདེ་བ་སྟེ་སེམས་དང་ཡེ་ཤེས་འཁྲུག་པའི་ས་གསུམ་གྱིས་བུམ་པ་དང༌། གསང་བ་དང༌། ཤེས་རབ་ཡེ་ཤེས་ཀྱི་བདག་ཉིད་དང༌། ཕྱི་མ་ནི་མྱོང་བ་སྟེ་སེམས་དང་ཡེ་ཤེས་དབྱེར་མི་ཕྱེད་པ་རྟོག་
མེད་ལྷན་ཅིག་སྐྱེས་པའི་དགའ་བས་དབང་བཞི་དཔེའི་ཡེ་ཤེས་སུ་མཚོན་ནས་དོན་གྱི་ཡེ་ཤེས་བཞི་པའི་དུས་ན་སེམས་དང་ཡེ་ཤེས་གང་དུ་ཡང་མ་ཕྱེད། མི་འབྱེད་མཐའ་གཉིས་ལས་འདས་པར་སྦྱོར་བ་ལ་ལྔ་པའི་ཐ་སྙད་ཀྱིས་བསྟན་པའང་ཡོད་དེ་ཁང་བུ་བརྩེགས་པའི་རྒྱུད་ལས། དང་པོ་དགའ་བ་ཙམ་ཉིད་ལས། །གཉིས་པ་ཚོར་བ་མྱོང་རིག་ལ། །གསུམ་པ་བདེ་བ་ཉིད་ཅེས་བྱ། །བཞི་པ་མྱོང་བས་ལྷན་ཅིག་སྐྱེས། །ལྔ་པ་སྟོང་པ་ཉིད་ཅེས་སོ། །ཞེས་སོ། །དེ་དག་དབང་བཞི་དང་སྦྱར་བའི་ཚུལ་ཕྱག་ཆེན་ཐིག་ལེ་ལས། གནས་བཞི་ལ་ནི་དབང་བཞི་སྟེ། །ལེགས་སྐྱེས་དབང་མོར་ཤེས་པར་བྱ། །རྒྱུ་དང་འབྲས་བུའི་རིམ་པ་ཡི། །མདོར་བསྡུས་པ་ནི་བཞི་ཡིན་ཏེ། །སྤྲུལ་དང་ཆོས་དང་ལོངས་སྤྱོད་དང༌། །བདེ་བ་ཆེན་པོ་བཞི་པའོ། །དེ་དག་སྐུ་ནི་བཞི་ཡིན་ཏེ། །དོན་དམ་པར་ནི་ཤེས་པར་བྱ། །ཞེས་སོ། །དེ་ཡང་གསང་དབང་གི་ལམ་ལ་གོམས་པ་དང༌། སྔོན་གྱི་སྦྱངས་སྟོབས་ཅན་ལ་རང་བཞིན་བརྒྱད་ཅུའི་རྟོག་པ་འགགས་པའི་རིམ་པ་དང་བསྟུན་ནས་ངོས་འཛིན་པ་ཡིན་ནོ། །ཇི་ལྟར་ཡང་དེའི་ཚེ་སྣང་མཆེད་ཐོབ་གསུམ་གྱིས་བསྡུས་པའི་འོད་གསལ་ནི། མཆེད་པ་ལ་བདེ་བ་ཤས་ཆེ་བས་ཆགས་པ་ཆེན་པོ། ཉེར་ཐོབ་ལ་བདེ་བ་དང་
སྟོང་པ་ཆ་མཉམ་པས་ཆགས་པ་བར་མ། སྣང་བ་ལ་སྟོང་པ་ཤས་ཆེ་བས་ཆགས་བྲལ་ཞེས་གོ་རིམ་མ་ངེས་པ་དང༌། དེ་ཡང་སྣང་བའི་དུས་ན་རང་བཞིན་བརྒྱད་ཅུའི་རྟོག་པ་སྐྱེད་བྱེད་ཀྱི་རླུང་དང་བཅས་པ་རང་དག་པས་སྟོང་པ། མཆེད་པའི་དུས་ན་སྣང་བ་སྐྱོད་བྱེད་ཀྱི་རླུང་དང་བཅས་པས་སྟོང་པས་ཤིན་ཏུ་སྟོང་པ། ཉེར་ཐོབ་ཀྱི་དུས་ན་མཆེད་པ་རླུང་དང་བཅས་པས་སྟོང་པས་ན་སྟོང་པ་ཆེན་པོ། དེ་ཡང་རགས་པའི་རླུང་སེམས་ཀྱི་ཆས་ཁུར་བའི་བསླད་པ་ཐམས་ཅད་དང་བྲལ་བས་སྟོང་པ་འོད་གསལ་ཞེས་བྱ་སྟེ་དོན་དམ་པའི་རྫོགས་རིམ་གྱིས་སྙིང་གའི་རྩ་མདུད་གྲོལ་བ་ལ་བརྟེན་ནས་འབྱུང་བས་དཔེའི་ཡེ་ཤེས་ཉིད་དེ། བདེ་བས་ཐབས་བྱས་པའི་སྟོང་པ་ཡིན་པས་སོ། །དེ་དུས་གང་གི་ཚེ་སྐྱེ་ན། །རིན་ཆེན་སྐེ་ནས་སྟེང་གི་གནས། །ཞེས་པས་བྱང་ཆུབ་ཀྱི་སེམས་རིན་པོ་ཆེ་རྡོ་རྗེ་ནོར་བུར་སླེབ་ནས་ཕྱིར་མ་འཕོས་པའི་དུས་ན་དགའ་བ་བཅུ་དྲུག་པོའི་ཡང་མཐར་ཐུག་པས་གནས་སྐབས་དེ་ཉིད་དབང་གསུམ་པའི་ཡེ་ཤེས་སུ་འདོད་དགོས་པ་ཡིན་ཏེ། ཕྲིན་ལས་ཀྱི་རྒྱུད་ལས། རྟོག་པའི་བག་ཆགས་འཇོམས་པར་བྱེད། །དབང་གསུམ་འབྲས་བུ་དེ་བཞིན་ནོ། །ཞེས་དང༌། ཕྱག་ཆེན་ཐིག་ལེ་ལས། ཤེས་རབ་ཡེ་ཤེས་བདག་གིས་བཤད། །
ཤེས་རབ་མྱ་ངན་འདའ་ཞེས་བཤད། །ཡེ་ཤེས་སྲིད་པ་ཞེས་བྱར་དྲན། །འཁོར་བ་འདི་ནི་མཆོག་དགའ་བ། །མྱ་ངན་འདས་པ་དགའ་བྲལ་དྲན། །ཡང་ན་མྱ་ངན་འདས་གྲགས་པ། །སངས་རྒྱས་རིན་ཆེན་པདྨའི་སྣོད། །བུད་མེད་བྷ་གའི་ཕྱག་རྒྱའོ། །དེ་ནི་ཤེས་རབ་ཅེས་བྱར་དྲན། །ཡེ་ཤེས་སྣོད་ནི་ཡིན་པར་གྲགས། །ཐམས་ཅད་བདེ་བའི་མཆོག་གི་གནས། །ཁུ་བ་ཤེས་རབ་ཅེས་སུ་ཤེས། །ཡེ་ཤེས་བདེ་བ་ཞེས་སུ་དྲན། །དབང་བསྐུར་འོད་དུ་ཞུ་བར་འགྱུར། །ཡེ་ཤེས་དུས་ལས་གཞན་པའོ། །དེ་ནི་འགོག་པ་བཞི་པ་སྟེ། །རང་བཞིན་ཡེ་ཤེས་མཚན་ཉིད་དོ། །ཞེས་སོ། །འོ་ན་འདི་མཐོང་ལམ་རྣམ་པར་མི་རྟོག་པའི་ཡེ་ཤེས་བཞི་པ་དང་མཚུངས་སམ་ཞེ་ན། ལམ་ལ་བཀྲི་ཚུལ་གྱི་ཆ་ནས་མི་མཚུངས་པས་དབང་གི་གོ་རིམ་སོ་སོར་བྱུང་ལ། དེ་ལྟ་ནའང་དབང་གསུམ་པའི་ཡེ་ཤེས་མཐོང་ལམ་དུ་གྲུབ་ཆེན་མཻ་ཏྲི་པས་ཀྱང་འདོད་ཅིང༌། ཁྱད་པར་ཌོམ་བྷི་ཧེ་རུ་ཀས། ཨེ་མ་ངོ་མཚར་རྨད་ཀྱི་ཆོས། །ཕྱག་རྒྱའི་རྐྱེན་ཀྱིས་རྟོགས་པ་ཡིན། །མངོན་སུམ་ལམ་དུ་གྲགས་པ་སྟེ། །བྱིན་རླབས་ལམ་དུ་གྱུར་པ་ཡིན། །ཞེས་དང༌། ཁ་ཅིག་དཔེ་ཞེས་ཟེར་བ་ནི། །ཡང་དག་དོན་ལ་རྒྱབ་ཕྱོགས་པའི། །བྱིས་པ་རྣམས་
ཀྱི་སྨྲ་བ་ཡིན། །དེས་ནི་ལྷན་ཅིག་སྐྱེས་པ་ཡི། །ཡེ་ཤེས་མིང་ཙམ་ཐོས་པར་ཟད། །ཅེས་སོགས་དགག་བསྒྲུབ་རྒྱ་ཆེར་འབྱུང་མོད། དེ་ལྟ་ནའང་སྙེ་མ་ལྔ་པ་ལས། དེ་ཅི་འདི་མཐོང་བའི་ལམ་ཡིན་ནམ་ཞེ་ན། དེ་ལྟ་མ་ཡིན་ཏེ་ཞེས་པ་ལ་སོགས་ཀྱིས་དེ་ལྟར་འདོད་པ་བཀག་པས་ཕྱོགས་གཉིས་སུ་འཛིན་པའི་རྟོག་གེའི་རིགས་པ་འབའ་ཞིག་གིས་སྔགས་ལམ་འགྲེལ་ཞིང་སྐྱེ་འགག་ཏུ་འཛིན་པ་རྣམ་གྲངས་པའི་དོན་དམ་ཀྱིས་ཡེ་ཤེས་ཀྱི་རང་བཞིན་གཞལ་བ་རྣམས་ཀྱི་དགག་བསྒྲུབ་ནི་བྱིས་པ་འདྲིད་པའི་ཚིག་བླ་དྭགས་ཙམ་དུ་གོ་ལ། སྤྱིར་གང་ཟག་གི་སྦྱངས་པ་དང་དབང་པོའི་རིམ་པ་ལ་ལྟོས་ནས་དབང་ཐོབ་ལུགས་ནི་མང་དུ་སྣང་བས་གྲུབ་ཆེན་དེ་གཉིས་ལྟ་བུའི་ངོས་ནས་དབང་འོག་མ་གཉིས་ཀྱི་འབྲས་བུའི་གོ་འཕང་གང་ཡིན་པ་མངོན་དུ་གྱུར་པའི་ཚེ་དབང་གསུམ་པ་མཉན་པས་དེའི་ལྷན་སྐྱེས་ཉམས་མྱོང་གི་ཟག་པ་དང་བྲལ་བ་གཅིག་ཅར་དུ་མཐོང་ན་བཞི་པའི་ཡེ་ཤེས་དཔེ་ལ་མ་ལྟོས་པ་ཐོད་རྒལ་དུ་སྐྱེས་པའི་མཐའ་ཡང་འགོག་པར་མི་ནུས་ཏེ། འདི་ལྟར་རྒྱུད་ལས་དགའ་བཞིའི་རིམ་པ་དང༌། དབང་བཞི་སྦྱར་བའི་ཕྱིར་དང༌། ཁྱད་པར་རྡཽ་རྗེ་ཐེག་པའི་ལམ་ནི་བྱང་ཆུབ་ཀྱི་སེམས་མི་ཤིགས་པ་བདེ་བར་གཤེགས་པའི་
སྙིང་པོ་ཅན་ཡིན་ལ་མི་ཤིགས་པ་ཉིད་ཀྱིས་མི་འགྱུར་བའི་བདེ་བ་མངོན་དུ་བྱས་པ་འབྲས་བུ་ཡིན་ན་ལམ་དེས་དེ་འཐོབ་པ་འོག་ཏུ་བསྟན་པའི་ཕྱིར་རོ། །ཡང་དབང་པོ་ཤིན་ཏུ་རྟུལ་པོས་ཐབས་ལམ་ཟབ་མོའི་ཆོ་ག་ལ་བརྟེན་ནས་བདེ་བ་དང་བཅས་པའི་མི་རྟོག་པ་ཡུད་ཙམ་ཉམས་སུ་མྱོང་བའི་ཚེ་རྟོག་པ་རགས་པ་མང་པོ་ཞིག་འགགས་པ་ཡོད་ཀྱང་འདོད་ཆགས་བདེ་ཆེན་དུ་འཆིང་མ་ནུས་ན་རང་བཞིན་སྙོམས་འཇུག་གི་གནས་སྐབས་ལྟར་སྣང་བ་ཙམ་སྟེ་དེ་ནི་གཤིས་ཀྱི་གནས་ཚུལ་གཏན་མ་རྟོགས་པའི་གང་ཟག་ལའང་སྐྱེ་མོད་ཀྱིས། དེས་མཐོང་ལམ་གྱི་བདེན་པ་མཐོང་བ་མ་ཡིན་ནོ། །དེ་བས་ན་དབུས་མཐའ་ལས་སེམས་མེད་པའི་གནས་སྐབས་ལྔར་ཆོས་སྐུ་ཉམས་སུ་མྱོང་བར་བཤད་པའི་དོན་ནི་སྣང་ཡུལ་མི་འཛིན་པའི་ཆ་ལ་བཏགས་པ་ཙམ་ཡིན་པ་ལྟར། འདིར་སྙོམས་འཇུག་གི་རྐྱེན་ལས་སོ་སོ་རང་རིག་གིས་རིག་ཆ་དང་འགལ་བའི་རྟོག་མེད་ཙམ་སྐྱེས་པ་གང་ཞིག་མས་བརྟན་གྱི་དགའ་བ་ལ་བརྟེན་ནས་འདོད་ཆགས་བདེ་ཆེན་དུ་འཆིང་མི་ནུས་པ་རྣམས་ལ་ནི་དཔེར་ཡང་རུང་བ་དཀའ་སྟེ་འཕོ་མེད་ཀྱི་བདེ་བ་ལ་ཡུན་དུ་གོམས་ནས་དེའི་རང་བཞིན་ཤེས་དགོས་པའི་ཕྱིར་རོ། །འདི་ལྟར་སྔགས་ནི་མངོན་སུམ་གྱི་ལམ་ཡིན་པས་རྗེས་དཔག་དང་འགལ་བའི་ཕྱིར་གང་
ཟག་རིམ་གྱིས་པ་རྣམས་ལ་སྔ་ཕྱི་རྒྱུ་འབྲས་ཀྱི་ཚུལ་དུ་གནས་པས་གསུམ་པའི་ལམ་དུ་དཔེའི་ཡེ་ཤེས་ཞེས་བྱ་བ་ཆོས་ཐམས་ཅད་བསམ་དུ་མེད་པ་དེ་ཁོ་ན་ཉིད་ཀྱི་གཟུགས་བརྙན་བདེ་བས་ཐབས་བྱས་པའི་ལྷན་ཅིག་སྐྱེས་དགའི་ཤེས་རབ་ལ་གོམས་པར་བྱས་པ་ལས་བཞི་པའི་དུས་ན་རང་བཞིན་ཅི་ཡིན་པ་མཐོང་བའི་ཐབས་བྱུང་འབྲས་བུའི་ལྷན་སྐྱེས་མངོན་སུམ་དུ་སྐྱེ་བ་ཡིན་ཏེ། རྡོ་རྗེ་ཁྲོས་པའི་རྩ་རྒྱུད་ལས། དེ་ཡི་ཤེས་རབ་ཡེ་ཤེས་ཀྱི། །དབང་གི་རྡོ་རྗེ་ཐུགས་ཉིད་དག །རྡོ་རྗེ་སེམས་དཔའི་བྱིན་རླབས་ཀྱིས། །སེམས་ཉིད་མཁའ་དང་མཚུངས་པར་མཐོང༌། །ཞེས་སོ། །རྒྱུ་མཚན་དེས་དབང་འདི་ནི་གསང་དབང་གི་ཉམས་སུ་མྱོང་བ་བརྟན་པ་དག་ལས་གཞན་དུ་སྦྱིན་པར་བྱ་བ་མ་ཡིན་པའང་ཤུགས་ལ་ཤེས་པར་འགྱུར་ལ། དེ་བས་ན་འཕོ་མེད་ཀྱི་བདེ་བ་ལྷག་མཐོང་གིས་ཟིན་པ་ལས། ལྷན་ཅིག་སྐྱེས་པའི་ཡེ་ཤེས་རྟོགས་པར་འགྱུར་བའི་ཚུལ་ཡང་དབང་མདོར་བསྟན་ལས། ཇི་ལྟར་ལྕགས་ཀྱིས་ཕུག་པའི་ལྕགས། །ལྕགས་ཉིད་དུ་ནི་རྗེས་འགྲོ་མིན། །དེ་བཞིན་བདེ་བས་ཕུག་པའི་སེམས། །སྡུག་བསྔལ་ཉིད་དུ་རྗེས་འགྲོ་མིན། །ཆགས་བྲལ་ལས་གཞན་སྡིག་པ་མེད། །བདེ་བ་ལས་གཞན་བསོད་ནམས་མེད། །
དེ་ཕྱིར་འགྱུར་མེད་བདེ་བར་སེམས། །ཞེས་དང༌། གཞོན་ནུ་མ་ཡི་དགའ་བ་ནི། །མེད་པར་དགའ་བ་སྨྲ་མི་ནུས། །བདེ་བ་ཆེན་པོ་རང་གིས་རིག །དེ་བཞིན་ཏིང་འཛིན་དང་བྲལ་བའི། །བདེ་བ་སྨྲ་བ་ནུས་མ་ཡིན། །འགྱུར་མེད་ཏིང་འཛིན་ཐོབ་པ་ན། །རྣལ་འབྱོར་པ་ཡིས་རང་རིག་འགྱུར། །འགྱུར་མེད་ལས་སྐྱེས་བདེ་རིག་པ། །ཐམས་ཅད་མཁྱེན་ལའང་ཐེ་ཚོམ་ཟ། །དེ་ལྟ་ན་ཡང་ཡིད་བདེ་མིན། །ཆགས་བྲལ་ཉིད་དུ་མི་བྱའོ། །འཕོས་པ་ལས་ནི་ཆགས་བྲལ་འགྱུར། །ཆགས་བྲལ་ལས་ནི་སྡུག་བསྔལ་འབྱུང༌། །སྡུག་བསྔལ་སྐྱེས་བུའི་ཁམས་ཟད་བྱེད། །ཟད་པ་ལས་ནི་འཆི་བར་བརྗོད། །ཤི་ནས་སླར་ཡང་དེ་རྣམས་ཀྱི། །སྲིད་པའོ་སྲིད་ལས་སླར་འཆི་འཕོ། །དེ་ལྟར་སེམས་ཅན་གྱི་སྲིད་པ། །ཆགས་བྲལ་ལས་བྱུང་གཞན་དུ་མིན། །དེ་ཕྱིར་འབད་པ་ཐམས་ཅད་ཀྱིས། །འཕོ་བའི་ཆགས་པ་རྣམ་པར་སྤང༌། །གང་གིས་འགྱུར་མེད་བདེ་ཆེན་འགྱུར། །ཞེས་སྲིད་པའི་རྩ་བ་འཛག་བདེ་ཡིན་ན་དེའི་བྱེད་པ་བཅིངས་པ་ལས་གནས་སྐབས་སུའང་སྡུག་བསྔལ་གྱི་རྒྱུ་འབྲས་མཐའ་དག་འགོག་ཅིང་དཔེ་ལ་བརྟེན་ནས་དོན་ཤེས་པས་མས་བརྟན་གྱི་ཡེ་ཤེས་ལུགས་ལས་ལྡོག་པ་ཉམས་སུ་མྱོང༌། དེའི་ཚེ་དབང་པོ་རབ་ཏུ་གྱུར་པས་དེ་ཉིད་དུའམ། འབྲིང་གིས་ཀྱང་གོམས་
པ་ཤིན་ཏུ་བརྟན་པའི་ཚེ་ཁམས་ཀྱི་སྙིགས་མ་མཐའ་དག་སྦྱངས་ནས་མཐར་ཐུག་གི་འབྲས་བུ་འགྱུར་བ་མེད་པའི་བདེ་བ་ཆེན་པོ་འཐོབ་པར་འགྱུར་བ་ནི་དབང་གསུམ་པའི་བྱེད་ལས་ཐུན་མོང་མ་ཡིན་པ་ཉིད་དང༌། སྐབས་འདིར་ནི་རྣལ་འབྱོར་མ་ལས། སྐྱེས་པ་གཅིག་གི་འདོད་ཆེན་གྱི། །མི་ཡི་བུ་མོ་ཁྲི་ཕྲག་དང༌། །ཉིན་རེར་ལྷ་དང་ལྷ་མིན་མོ། །བུད་མེད་འབུམ་ཕྲག་ཟིལ་གནོན་པ། །ཁུ་བ་རེངས་པའི་བྱེད་པ་ལས། །གཅིག་གིས་ཐམས་ཅད་འདོད་སྤྱོད་ལ། །རྡོ་རྗེར་བྱེད་པ་རབ་ཏུ་བཤད། །ཅེས་པ་ལྟར་ཞུ་བ་རྗེས་སུ་དྲན་པ་ལས་རྡོ་རྗེ་ནོར་བུར་བྱང་ཆུབ་ཀྱི་སེམས་བརྟན་པར་བྱ་བའི་ཐབས་ཀྱི་སྒོ་ནས་གནས་སྐབས་ཀྱི་རང་འབྲས་བདེ་བའི་ཆ་མི་བསྐྱོད་པའི་དབུགས་དབྱུང་དང༌། རྟོགས་པའི་ཆ་རྡོ་རྗེ་འཆང་གི་དབུགས་དབྱུང་གཉིས་ཉམས་སུ་མྱོང་པར་འགྱུར་ཏེ། ཐབས་དང་ཐབས་བྱུང་དབྱེ་བ་ཡིས། །བཞི་པའི་དོན་ནི་རྣམ་པ་གཉིས། །འདོད་གཅིག་དེ་བཞིན་གཤེགས་དངོས་གྲུབ། །གཞན་ནི་རྡོ་རྗེ་འཛིན་པར་འདོད། །ཅེས་པས་དགའ་བ་བཞི་པའི་དོན་གྱི་བལྟ་བ་ལྷན་ཅིག་སྐྱེས་དགའི་ཡེ་ཤེས་ལ་གོམས་པར་བྱེད་པ་དབང་གསུམ་པའི་དོན་པོ་ཡིན་ནོ། །དེ་བལྟ་བ་བཞི་དང་སྦྱར་ནས་ངོ་སྤྲད་པ་དངོས་ནི། གཞན་ལུས་ལ་བརྟེན་པའི་བདེ་བས་སེམས་
ཀྱི་ཚོར་བ་གཟིར་ནས་སྡུག་བསྔལ་གྱི་ཆ་ལས་ལོག་པ་ནི་བལྟ་བ་གཡོ་བའི་དུས་ཞེས་བྱ་སྟེ་དགའ་བའི་ཡེ་ཤེས་སོ། །བདེ་བའི་ཚོར་བ་དེས་ཐ་མལ་གྱི་རྟོག་པ་ཤིན་ཏུ་རགས་པའི་ཆ་རྣམས་རང་འགགས་པས་སེམས་སྟོང་པ་ཙམ་དུ་ཤེས་ཀྱང༌། སྟོང་ཉིད་རང་བཞིན་དང་མ་འདྲེས་པའི་དུས་ན་བལྟ་བ་ཐོབ་པ་ཞེས་བྱ་སྟེ་མཆོག་དགའི་ཡེ་ཤེས་སོ། །དེ་ནས་ཞུ་བདེའི་ཉམས་ཆེར་རྒྱས་ནས་རྟོག་པ་ཕལ་ཆེར་འགགས་ཀྱང༌། སེམས་དང་སེམས་བྱུང་འབྲེལ་མ་ཆོད་པའི་ཆ་ནས་མྱོང་བ་ལ་ཐོབ་ཤོར་ཅུང་ཟད་འཆར་བའི་དུས་ན་ལྟ་བ་གོམས་པ་ཞེས་བྱ་སྟེ་ཁྱད་པར་གྱི་དགའ་བའི་ཡེ་ཤེས་སོ། །དེ་ནས་ལུས་སེམས་གཉིས་མེད་བདེ་བའི་རོས་མྱོས་ནས་རྣམ་པར་མི་རྟོག་པ་ཉག་གཅིག་ཏུ་ཤར་ཡང༌། དེའི་རང་བཞིན་ཉམས་སུ་མྱོང་བ་ཟག་པ་དང་བཅས་པ་རྐྱེན་ལས་སྐྱེས་པའི་རེས་འགའ་བ། གློག་འགྱུ་བ་ལྟར་སྐད་ཅིག་ཙམ་པ་འཇིག་རྟེན་པ་ཀུན་རྫོབ་པའི་ཆ་དང་བཅས་པ་ནི་བཅོས་མ་ཉིད་ནའང་བལྟ་བ་བརྟན་པ་ཞེས་བྱ་སྟེ་ལྷན་ཅིག་སྐྱེས་དགའི་ཡེ་ཤེས་ཡིན་ལ། གལ་ཏེ་ལྷན་སྐྱེས་ལྟར་སྣང་བ་དེ་གོམས་པའི་མཐུ་ལས་རང་ངོའི་ཉམས་སུ་མྱོང་བ་རྒྱུ་མཐུན་པ་དང་བཅས་པའི་དྲི་མ་དག་ནས་སོ་སོ་རང་གིས་རིག་པ་རྣམ་པར་མི་རྟོག་པ་དམིགས་བྱ་དམིགས་བྱེད་ལས་འདས་པ་སྟེ་ཁྱད་ཆོས་གསུམ་ལྡན་གྱི་རྣམ་པ་ཐམས་ཅད་པའི་མཆོག་དང་ལྡན་
པའི་དེ་ཁོ་ན་ཉིད་འཇིག་རྟེན་ལས་འདས་པའི་ཡེ་ཤེས་མཐོང་ན་རང་གི་ངོ་བོས་རྟོགས་པའི་འབྲས་བུའི་ལྷན་སྐྱེས་ཀྱི་ཡེ་ཤེས་ཡིན་པས་དེ་ལྟར་དུ་ངོ་སྤྲད་པར་བྱའོ། །བདུན་པ་ནི། དེའི་ཚེ་མས་བརྟན་གོམས་པར་བྱ་བའི་ཐབས་ལ་བསླབ་དགོས་ཏེ། སྒྲོལ་མ་རྣལ་འབྱོར་མའི་རྒྱུད་ལས། ཧཿཞེས་བྱ་བ་མཆོག་ཏུ་དགའ་བའི་ཚེ་བཅིང་བར་བྱའོ། །ཡང་ན་ཧཱུྃ་ཞེས་བྱ་བ་སྙིང་ག་ལ་གནས་པའི་སྒྲ་ཡིས་སོ། །ཡང་ན་ཧྲིཾ་ཧ་ཞེས་བྱ་བ་མགྲིན་པ་ལ་གནས་པའི་སྒྲ་ཡིས་སོ། །ཧཱུྃ་དང་ཕཊ་ཀྱི་བྱ་བ་དང༌། མདའ་བོ་ཆེའི་སྦྱོར་བ་བྱས་ལ་ཁུ་བ་བཅིང་བར་བྱའོ། །གཞན་ཡང་ཆ་བཞི་པའི་ཕྱེད་ཀྱི་མཚམས་སུ་ལྷན་ཅིག་སྐྱེས་པ་བསྒོམ་པར་བྱ་སྟེ། གལ་ཏེ་བྷ་གའི་ཟེ་འབྲུ་ལ་གནས་པའི་ཐིག་ལེ་ཡང་རྡོ་རྗེའི་ཁས་བཏུང་བར་བྱའོ། །བསྐོར་བ་ལ་སོགས་པའི་སྦྱོར་བ་དང༌། རླུང་གིས་སྦྱོར་བ་མཉམ་པར་བྱའོ། །ཞེས་དང༌། དེ་ལས་དགའ་བ་བཞིའི་དབྱེ་བས་སྒྲུབ་པ་པོ་ལ་རེངས་པ་དང༌། རྔུལ་བ་དང༌། བ་སྤུ་ལྡང་བ་དང༌། དབུགས་འགྱུར་བ་དང༌། འདར་བ་དང༌། ཁ་དོག་ལོག་པ་དང༌། མཆི་མ་འབྱུང་བ་དང༌། ཐིམ་པ་ཞེས་བྱ་བ་སྙིང་སྟོབས་བརྒྱད་འབྱུང་ངོ༌། །བུ་མོས་ཡེ་ཤེས་ཐོབ་པ་ནི། །སྙིང་ནི་འགུལ་ཞིང་བསྐྱོད་པ་དང༌། །འདར་དང་དྲན་པ་ཉམས་པ་དང༌། །སྐྲ་གྲོལ་གཅེར་བུ་གཤེར་བས་
ཁྱབ། །མདོག་དམར་རབ་ཏུ་ཕྲ་བའི་མིག །ཡེ་ཤེས་ལྔ་ཡི་རྣམ་པར་འཕྲུལ། །བུད་མེད་ཤེས་རབ་ཡེ་ཤེས་ཏེ། །དེ་ལས་ཡེ་ཤེས་ལྔ་ཐོབ་འགྱུར། །རྡོ་རྗེ་ཆུ་སྐྱེས་སྦྱོར་ལྡན་པ། །སྐུ་ཡི་རྡོ་རྗེ་སྙན་པར་བརྗོད། །རླུང་ནི་མཉམ་པར་གྱུར་པ་དང༌། །སཱིཏ་ཀྱི་སྒྲ་དང་སྐད་འགྱུར་བ། །གསུང་ནི་ཉེ་བར་བསྒྲུབ་པའོ། །བསྐྱོད་པ་ལས་ནི་རབ་ཞུ་བ། །ནོར་བུ་བཅུ་དྲུག་ཆ་བབས་ཏེ། །ཡིད་ཀྱི་བདེ་བས་གཉིས་འགགས་པ། །ཐུགས་ཀྱི་དེ་ཉིད་བསྒྲུབ་པར་བརྗོད། །གཞུ་ཡི་གཟུགས་ཅན་རབ་སྦྱོར་བས། །དུང་དང་ཀུནྡ་ལྟར་ཐིག་ལེ། །སྡོམ་བརྩོན་བདེ་བས་གཟུང་བར་བྱ། །རང་གི་རིག་པའི་ཡེ་ཤེས་མཆོག །བསྒྲུབ་པ་ཆེན་པོ་དེ་ཉིད་སྟེ། །རྣམ་ཤེས་ཡེ་ཤེས་དག་པར་བྱེད། །འདི་ཡི་རྡོ་རྗེ་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོ་འགྲུབ་པར་འགྱུར། །ཡེ་ཤེས་ཆེན་པོ་རབ་སྦྱོར་བས། །ཤིན་ཏུ་རྣལ་འབྱོར་མཁས་པས་བསྟོད། །བུད་མེད་སྒྱུ་མའི་ཕྱག་རྒྱ་འདི། །དམ་ཚིག་རྣམས་ཀྱི་མཆོག་གི་མཆོག །ངན་ཟོས་ངན་སྤྱོད་ཐམས་ཅད་ཀྱིས། །སྒྲིབ་པ་དག་ཏུ་ཡོངས་མི་འགྱུར། །ཞེས་སོ། །རྒྱ་ལ་ཀུནྡ་ནོར་བུའི་ལམ་ནས་ཐལ་བ་སྲིད་ན་ཆུ་སྐྱེས་ཉིད་ལས་རོ་འཛིན་གྱིས་བླངས་ཏེ་དམ་ཚིག་གི་ངོ་བོར་མོས་ནས་བཏུང་བར་བྱ་སྟེ། དབང་མདོར་བསྟན་
ལས། འཇིག་དང་འཛག་འགྱུར་དེ་ནས་འཛག །ཅེས་སོ། །དེ་ལྟ་བུའི་ཤེར་དབང་ཐོབ་པས་བྱ་བའི་ལས་གང་ལ་དབང་ན། སྦྱོར་བདུན་ལས། ཐབས་ཀྱི་ཁྱད་པར་ཆེ་བའི་ཕྱིར། །རྡོ་རྗེ་ལྟ་བུར་ཡང་དག་གནས། །མཆོག་གི་དངོས་གྲུབ་བསྒྲུབ་པའི་ཕྱིར། །བརྟུལ་ཞུགས་ཆོ་ག་རིམ་པ་བསྟན། །གཟུང་དང་འཛིན་པའི་ངོ་བོ་ཡིད། །ཆོས་ཀུན་རྟོགས་པར་བྱ་བའོ། །ཞེས་དྲང་དོན་དུ་སྣ་ཚོགས་གཟུགས་ཅན་མ་བརྟེན་ནས་ཕོ་ཉའི་ལམ་བསྒོམ་པ་དང༌། སྦས་དོན་དུ། ལྷ་མོ་དགའ་སྦྱིན་གནས་སྦྱིན་མ། །ཞེས་པའི་དགའ་སྦྱིན་ནི་གཉིས་ཤོར་ཞུ་བ་དང༌། གནས་སྦྱིན་ནི་འཕོ་མེད་དུ་བཅིངས་པའི་མཉམ་གནས་སྦྱིན་པ་ལས་ཕྱག་རྒྱ་ཆེན་པོ་དང་སྦྱོར་བའི་ཁ་སྦྱོར་གྱི་ཐིག་ལེ་ནོར་བུའི་ལམ་ནས་གཙུག་ཏོར་གྱི་རྩེར་འཁྱེར་བ་ལ་དབང༌། ཡིད་དག་པ་ཐུགས་རྡོ་རྗེའི་སྤངས་རྟོགས་ཁྱད་པར་ཅན་རྒྱུད་ལ་བཞག་པ་ནི་དབང་གི་ངོ་བོ་སྟེ། སྦྱོར་བ་བདུན་པ་ལས། དེ་ཡི་རང་གི་ངོ་བོ་ནི། །ཐུགས་ཀྱི་རྡོ་རྗེའི་རང་བཞིན་ནོ། །ཞེས་སོ། །སྒྲིབ་པ་གང་འདག་ན་བརྣབ་སེམས་ལ་སོགས་པ་འདག་ཚུལ་སྔར་བཞིན་དང༌། ཡེ་ཤེས་ཀྱི་སྒྲིབ་པ་སྟེ་ཤེས་སྒྲིབ་རགས་པ་དང༌། གནས་སྐབས་བཞི་ལས་གཉིད་འཐུག་གི་དང༌། དེ་ཚོགས་དྲུག་རགས་པ་
འགགས་པའི་རྣམ་རྟོག་ཡིན་པས་ཡིད་ཀྱི་ཐིག་ལེ་དང༌། འཆི་བདག་གི་བདུད་ལ་སོགས་ཉེས་པའི་ཚོགས་འཇོམས་པ་སྟེ། སྦྱོར་བ་བདུན་པ་ལས། བརྣབ་སེམས་ལ་སོགས་སྔ་ཕྱི་ཡི། །ངག་དང་ཉེས་པར་མི་འགྱུར་རོ། །ཞེས་སོ། །ལམ་གྱི་གནས་སྐབས་སུ་དེ་ལྟར་གོམས་པ་ལས་ཡུམ་གྱི་རྩ་འབྱོངས་པའི་ཚད་ནི་སྙོམས་འཇུག་བྱས་མ་བྱས་འདྲ་བར་བདེ་བའི་རང་བཞིན་དང་མི་འབྲལ་ཞིང༌། རྩ་ནང་ནས་ཁྲག་དང་ཆུ་སེར་མི་རྒྱུ། ནད་དང་སྡུག་བསྔལ་ལས་གྲོལ། རྩའི་ནང་སྟོངས་ཏེ་ཁ་བྱེ་ནས་ཡེ་ཤེས་ཀྱི་རླུང་གིས་དབང་བྱས་པས་མི་རྟོག་པའི་ཡེ་ཤེས་ལ་རྒྱུན་དུ་གནས་པའོ། །ཡབ་ཀྱི་ཐིག་ལེ་འབྱོངས་པའི་ཚད་ནི་བྷ་གའི་ནང་ནས་དྭངས་མ་ཚུར་འཕྲོག་པར་ནུས། ཀུནྡ་ཆུའི་རྣམ་པ་ལྟར་སླ་ཞིང་སྒྲིབ་པ་མེད་པར་མཆེད་པས་ལུས་ཀྱི་ནང་འབྱོངས། ཐིག་ལེ་དངོས་སུ་མཐོང་བའི་དངོས་པོ་མེད་པར་གྱུར་པས་འཁོར་བའི་རྩ་བ་གཅོད། ཕྱི་རུ་ལུས་འབྱོངས་པས་རིམ་པ་དགུ་བརྗེ་ཞིང་སྐྲ་དཀར་དང་གཉེར་མ་མེད་ལ་གཞོན་ཤ་ཆགས་འདུ་བའི་ནད་ཞི་ནས་ཚེ་ཉི་ཟླ་དང་མཉམ་ཐིག་ལེ་རོ་མ་ལ་བཏབ་ན་ཟས་མི་དགོས། རྐྱང་མ་ལ་བཏབ་ན་གོས་མི་དགོས། ཀུན་དྷར་མ་ལ་བཏབ་ན་རི་བྲག་ལ་ཟང་ཐལ། རྩ་ཁམས་དྭངས་མའི་དྭངས་མ་ཆེན་པོའི་ནང་གི་མཁའ་འགྲོ་ཡབ་ཡུམ་ཐམས་ཅད་
དབུ་མ་འབའ་ཞིག་གི་ཕོ་བྲང་དུ་འདུ་བས། ཕྱི་ཡུལ་མ་དག་པ་གསར་དུ་ཆགས་འཇིག་ཅན་འཛམ་བུའི་གླིང་ལ་སོགས་པའི་ཡུལ་ཉེར་བཞིའི་དཔའ་བོ་མཁའ་འགྲོ་སྤྲུལ་པའི་སྐུའི་བདག་ཉིད་ཅན་རྣམས་ནང་གི་རྩ་ཁམས་ཤིན་ཏུ་རྣམ་པར་དག་པའི་ཡུལ་ཉི་ཤུ་རྩ་བཞི་ལ་འདུས་པས། གསང་བ་མཁའ་ཁྱབ་ལོངས་སྐུའི་ཞིང་གི་ཡུལ་ཉེར་བཞིའི་ཞིང་གི་དཔའ་བོ་མཁའ་འགྲོ་དང༌། དོན་དམ་པར་ཆོས་ཀྱི་སྐུའི་བདག་ཉིད་ཅན་ཐམས་ཅད་ཀྱང་རྡོ་རྗེའི་ལུས་ལ་ཐ་མི་དད་པའི་ཚུལ་གྱིས་བཞུགས་ནས་བྱིན་གྱིས་བརླབས་པར་བྱེད། དེའི་གྲུབ་མཐའ་ནི་བདེ་སྟོང་དབྱེར་མེད་དུ་རྟོགས་པ་ས་བཅུ་གཅིག་པ་དང་བཅུ་གཉིས་པའི་གནས་སྐབས་དང་སྐལ་བ་མཉམ་ཞིང༌། གྲུབ་མཐའ་མ་སྙོགས་ན་འདའ་ཀའི་ཚེ་སྡུད་རིམ་གྱིས་རྐྱེན་བྱས་ནས་རྩ་མདུད་དྲལ་བས། དོན་དམ་པའི་བྱང་ཆུབ་སེམས་ཀྱི་རྟེན་ཁམས་ཀྱི་ཐིག་ལེ་ཀུན་རྫོབ་པ་རྣམས་ལྷན་ཅིག་ཏུ་ཚོགས་ཤིང༌། དབུ་མར་ཅུང་ཟད་ཞུགས་པས་དེར་སྣང་མ་གྲུབ་པའི་རྡོ་རྗེ་སེམས་དཔའ་མཐོང་བར་འགྱུར་ཏེ། དེ་ལ་རྡོ་རྗེ་ནི་སྟོང་པ། སེམས་དཔའ་ནི་བདེ་བ་སྟེ་རྡཽ་རྗེ་ལྟ་བུའི་ཏིང་ངེ་འཛིན་གྱི་བདེ་སྟོང་ཉམས་སུ་མྱོང་ནས་བར་དོ་མེད་པ་མཐར་ཐུག་གི་འབྲས་བུ་ཐུགས་རྡོ་རྗེ་ཆོས་སྐུའི་རང་བཞིན་འགྲུབ་པ་སྟེ། གླང་པོ་རབ་འབོགས་
ལས། བདུད་རྩི་ཁམས་ཀྱི་དངས་མ་བཅུད་ཀྱི་ལམ། །སེམས་ཀྱི་སྒྲིབ་སྦྱངས་དང་མ་ཆོས་ཀྱི་སྐུ། །ཞེས་སོ། །དམ་ཚིག་ནི་སྒྲོལ་མ་རྣལ་འབྱོར་མ་ལས། བུད་མེད་བྲལ་ལ་སྡོམ་བརྩོན་མེད། །འདོད་ལྡན་ཚངས་སྤྱོད་ཆེན་པོ་ནི། །ཞི་བའི་དམ་ཚིག་འདོད་ཆགས་སྤོང༌། །ཞེས་དང༌། དམ་ཚིག་ཤིན་ཏུ་འདའ་བར་དཀའ། །པདྨའི་སྙིང་པོ་བདེ་བ་ཅན། །ཇི་སྲིད་མ་རྙེད་འབྲས་བུ་མེད། །ཅེས་སོ། །དེ་བས་ན་བུད་མེད་མཐོང་ན་ཡང་གཡོན་ནས་བསྐོར་བ་གསུམ་བྱེད་པ་སོགས་བཤད་དོ། །བཞི་པ་ཚིག་དབང་རིན་པོ་ཆེའི་རང་བཞིན་སྟོན་པའི་ཕྱིར། བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ནས། གསུམ་པའི་ཉམས་མྱོང་ཚིག་གིས་མཚོན་པའི་དབང༌། འཐབ་བྲལ་མན་ཆོད་འཁྱུད་སྦྱོར་འདོད་ཆགས་དང༌། །སྒོ་གསུམ་སྒྲིབ་དག་ཐ་དད་འཛིན་པ་སྦྱང༌། །སྟོང་པའི་ཐིག་ལེ་རིག་པའི་སྙིང་པོ་ཅན། །གྲུབ་མཐའ་བསམ་མི་ཁྱབ་པའི་ཡེ་ཤེས་ཏེ། །འདའ་ཀ་གསང་ཆེན་ཕྱག་རྒྱ་ཆེན་པོ་ལ། །འབྲས་བུ་མཁའ་ཁྱབ་ངོ་བོ་ཉིད་སྐུའོ། །དེ་ལ་འཐབ་བྲལ་མན་ཆོད་ནི་གཉིས་འཁྱུད་ཀྱི་འདོད་པས་གདུང་བར་བྱེད་པས་དག་བྱ་དེའི་གཉེན་པོར་དག་བྱེད་ཚིག་དབང་རིན་པོ་ཆེ་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་བསྐུར་བ་སྟེ། དེ་ལ་དངོས་བསྟན་བཤད་
པ་དང༌། འདོད་པ་གཞན་ཞར་བྱུང་དུ་འགོད་པའོ། །དང་པོ་ནི། དབང་གསུམ་པའི་དུས་ན་སྣ་ཚོགས་གཟུགས་ཅན་མ་ལས་རྙེད་པའི་དཔེའི་ལྷན་སྐྱེས་དེ་ནི་དོན་དམ་པའི་བྱང་ཆུབ་སེམས་ཀྱི་མྱུ་གུ་ལྟ་བུ་ཡིན་ཏེ། དཔའ་བོ་གཅིག་པ་ཉིད་དུ་བསྟན་པའི་གཏུམ་པོའི་རྒྱུད་ལས། མདོ་སྡེ་ཆོས་མངོན་ཐམས་ཅད་ནས། །བུད་མེད་རྣམས་ནི་སྨོད་མཛད་པ། །སྣ་ཚོགས་སློབ་མའི་སྣོད་ཕྱིར་བཤད། །དེ་ཁོ་ན་ཉིད་སྦས་ནས་གསུངས། །ཕུང་པོ་ལྔ་དང་རྣམ་བྲལ་བའི། །མྱ་ངན་འདས་པ་བལྟ་བར་བྱ། །ཞེས་ཕ་རོལ་ཏུ་ཕྱིན་པ་མན་ཆད་དུ་དེ་ཁོ་ན་ཉིད་ཟབ་མོ་རྗེས་དཔག་ཙམ་ལས་སྟོན་པར་མ་ནུས་པ་སྔགས་ལམ་དུ་ཐབས་ལ་བརྟེན་ནས་སྒྲིབ་པ་གཉིས་བག་ཆགས་དང་བཅས་པ་གློ་བུར་དུ་བཅོམ་ནས་སྒྲ་ཇི་བཞིན་པ་ཉིད་མངོན་སུམ་དུ་རྟོགས་པར་འགྱུར་བ་ནི་འཕོ་མེད་ཀྱི་ཞུ་བདེ་ལས་སྐྱེས་པའི་ཡེ་ཤེས་དེས་སྣང་བ་གསུམ་དང༌། འོད་གསལ་ལ་གོམས་པར་བྱས་པས་ཕུང་པོ་ལྔའི་ཉེ་བར་ལེན་པ་མཐའ་དག་དབྱིངས་སུ་དེངས། སྟོང་པ་གཉིས་ཀྱི་ཆགས་པ་ལས་ཀྱང་འདས་ཤིང༌། མུན་ཆེན་གྱི་ཆགས་བྲལ་ཀྱང་མ་ཡིན་པས་མཐའ་གང་དུའང་མ་ལྷུང་ལ། འཛག་མེད་ཀྱི་བདེ་བ་ཆེན་པོའི་རོས་ཡིད་ཀྱི་དྲི་མ་བཀྲུས་
པས་དབང་པོའི་སྡུག་བསྔལ་གྱི་གྲོང་ཁྱེར་མཐའ་དག་པ་ནི་བཅོམ་རང་བཞིན་མི་ཤིགས་པ་ཆེན་པོའི་དངས་མས་རྣམ་སྨིན་གྱི་ལུས་ཐམས་ཅད་ཁྱབ་པའི་རྐྱེན་ལས་རྣམ་ཐར་བཞི་ལྡན་གྱི་བདེ་བ་ཆེན་པོའམ་བསམ་གྱིས་མི་ཁྱབ་པའི་དེ་ཁོ་ན་ཉིད་ཀྱི་ལྷུམས་སུ་ཞུགས་པ་ནི་དབང་བཞི་པའི་ངོ་བོ་ཉིད་ཡིན་ཏེ། རྡོ་རྗེ་ཁྲོས་པའི་བཤད་རྒྱུད་ལས། ཆོས་སྐུ་མངོན་སུམ་མཐོང་བའི་ཚེ། །དབང་གི་མཆོག་ཏུ་དེ་ཉིད་ངེས། །ཞེས་དང༌། དེའི་རང་བཞིན་སེམས་ལས་འདས་པའི་ཡེ་ཤེས་ཡིན་པའི་ཚུལ། དབང་མདོར་བསྟན་ལས། ཇི་ལྟར་ཟངས་ཀྱི་དྲི་མ་ནི། །རོ་ཡི་སྦྱོར་བས་ཉམས་པར་འགྱུར། །དེ་ཡི་ཡོད་ཉིད་ཉམས་པ་མེད། །དྲི་མེད་གཉིས་ཀྱིས་ཡང་དག་གནས། །དེ་བཞིན་སེམས་ཀྱི་དྲི་མ་ནི། །སྟོང་ཉིད་སྦྱོར་བས་རྣམ་ཉམས་འགྱུར། །དེ་ཡི་ཡེ་ཤེས་ཉིད་ཉམས་མེད། །དྲི་མེད་ཉིད་ཀྱིས་ཡང་དག་གནས། །ཞེས་སོ། །དེ་ཡང་དོན་གྱི་དབང་དུ་ན་སྒྲ་དང་རྟོག་པའི་ཡུལ་དུ་ཡོད་པ་མ་ཡིན་ཏེ། རྒྱུད་ལས། ཡོད་དང་མེད་པ་ལས་གྲོལ་བ། །དེ་ནི་ངག་གི་སྤྱོད་ཡུལ་མིན། །ཞེས་སོ། །དེ་ལྟ་ནའང་རེ་ཞིག་ཚིག་གིས་མཚོན་ནས་དེའི་རང་བཞིན་གོ་བར་བྱ་དགོས་པས་ཚིག་དབང་ཞེས་བྱ་ལ། དེའི་ཕྱིར་ཚིག་ཙམ་གྱི་སྒོ་ནས་བསྐུར་བའི་བརྡའ་ཆད་
ནི། དབང་གསུམ་པའི་བལྟ་དགོད་ལག་བཅངས་ལ་སོགས་པའི་སྒོ་ནས་རྡོ་རྗེ་ནོར་བུར་བྱང་ཆུབ་སེམས་ཀྱིས་གང་བའི་བར་སྔར་ལྟར་ཉམས་སུ་མྱོང་བ་ལས། ཤེས་རབ་ཀྱི་རྩ་དཔྱིད་ཀྱི་ཐིག་ལེ་ཉི་གཞོན་འཆར་ཀའི་འོད་ཟེར་གྱི་ཕུང་པོ་ཚད་མེད་པ་ཅན་དེ་དང་ཕྲད་པ་ཙམ་གྱིས་ཡས་བབས་ཀྱི་དགའ་བ་རྫོགས་པའི་མཐར་ཐུག་པའི་གནས་སྐབས་ན་མཁས་པ་བཞི་དང་ལྡན་པའི་ཐབས་ཀྱིས་ལྡོག་པ་ལས། མས་བརྟན་གྱི་དགའ་བ་བཞིའི་མཐར་ཉམས་སུ་མྱོང་བའི་ལྷན་ཅིག་སྐྱེས་པའི་ཡེ་ཤེས་ཀུན་རྫོབ་པ་གང་ཞིག་གི་དྲི་མའི་ཆ་སྤངས་པའི་རང་བཞིན་གྱི་འོད་གསལ་དེ་ཉིད་འབྲས་བུའི་ལྷན་སྐྱེས་སུ་སློབ་དཔོན་གྱི་ཚིག་ཙམ་གྱིས་བརྡའ་ངོ་སྤྲད་ནས་སློབ་མས་གོ་བ་ཚིག་གི་བཞི་པ་ཡིན་ཏེ། ཕྲིན་ལས་ཀྱི་རྒྱུད་ལས། བཞི་པའི་དབང་ནི་བསྐུར་བྱ་བ། །རླུང་གི་རང་བཞིན་ངེས་ཤེས་ཤིང༌། །ཕོ་ལ་ཀ་ཀོ་ལ་སྦྱར་བ། །རང་བཞིན་བདེ་སྟོང་ཕན་ཚུན་འབྱུང༌། །གཟུང་དུ་མེད་དེ་བརྗོད་དུ་མེད། །རྟོག་པ་ཀུན་དང་བྲལ་བ་ཡི། །རང་བཞིན་འོད་གསལ་དེར་གནས་པ། །ཚིག་ཚོགས་དབང་གི་རང་བཞིན་བྱིན། །ཞེས་སོ། །དེའང་ཡས་བརྟན་གྱི་བདེ་བའི་རང་བཞིན་སྟོང་པ་ཉིད་དང་དབྱེར་མི་ཕྱེད་པར་སྦྱར་བའི་དེ་ཁོ་ན་ཉིད་ལས་སླར་
འགྱུར་མེད་དུ་བྱེད་ནུས་ན་ཁམས་ཐམས་ཅད་རང་བྱུང་གིས་གྱེན་དུ་འགྲོ་བས་དེའི་སྙིགས་མ་མཐའ་དག་བཟའ་བར་བྱེད་ཅིང༌། དབུ་མར་གཟུང་འཛིན་གཉིས་ཀྱི་རྦ་རླབས་རེངས་པ་གསུམ་གསུམ་ལས་རྫུ་འཕྲུལ་ཡ་མ་ཟུང་དང༌། མངོན་པར་ཤེས་པ་འཆར་ཞིང༌། འཁོར་ལོ་ཐམས་ཅད་དངས་མས་ཁྱབ་པའི་ཐ་མ་གཙུག་ཏོར་དུ་བརྟན་པའི་ཚེ་རྣམ་པ་ཐམས་ཅད་པའི་མཆོག་དང་ལྡན་པའི་འགྱུར་མེད་ཀྱི་བདེ་བ་ཆེན་པོ་འཐོབ་པ་ནི་མྱ་ངན་ལས་འདས་པའི་དོན་གྱི་བཞི་པ་སྟེ། རྒྱུད་ལས། མྱ་ངན་ལས་འདས་པའི་བདེ་བ་འཕོ་མེད་ལྷན་ཅིག་སྐྱེས་པ་འགྱུར་མེད་ནི་བཞི་པ་སྟེ། ཞེས་འགྱུར་བ་མེད་པའི་བདེ་བ་ལ་དབང་བཞི་པར་བཞག་གོ །དེ་ལྟ་བུའི་ཡེ་ཤེས་ངོས་མ་ཟིན་ན་ལས་རྒྱ་ལ་བརྟེན་ནས་ཐབས་ཀྱི་ཆོ་གས་ཉམས་མྱོང་འདྲེན་པ་རྟེན་ཅན་གྱི་བཞི་པ་སྟེ། དབང་དེ་དངོས་ལ་བདེ་ཆེན་གྱི་མཚན་ཉིད་མཚོན་བྱེད་དུ་གནས་པའི་ཚུལ་སྦྱོར་བ་བདུན་པ་ལས། འོན་ཀྱང་ཤེས་རབ་ཡེ་ཤེས་ལ། །བདེ་ཆེན་མཚན་ཉིད་གཟུགས་སུ་གནས། །ཞེས་སོ། །དེ་ཉིད་ལམ་དུ་གོམས་པར་བྱས་པས་མཐར་གྱིས་སྒྲིབ་པ་མཐའ་དག་ཟད་ནས། འཇིག་རྟེན་ལས་འདས་པའི་དབང་བཞི་པ་ལ་སྦྱོར་བའི་ཚུལ་དེ་ཉིད་ལས། མི་གནས་ཀྱང་ནི་མི་བསླུའི་ཕྱིར། །བདེ་བ་ཆེན་པོ་ཞེས་སུ་བཤད། །ཅེས་ད་ལྟ་
དངོས་སུ་མི་གནས་ཀྱང་དེ་ཡན་ལག་དང་བཅས་པ་གོམས་པས་འབྲས་བུའི་བདེ་ཆེན་འཐོབ་པ་ལ་མི་བསླུ་བ་ཉིད་དེ། འདི་ལྟར་རྟེན་ཅན་ལ་ལྟོས་ནས་དགའ་བ་བཞི་པོ་རེ་རེ་ལ་བཞི་བཞིར་ཕྱེ་བའི་དང་པོ་བཞིས་ཚོགས་ལམ། ལྔ་པས་སྦྱོར་ལམ། དྲུག་པས་མཐོང་ལམ། བདུན་པ་ནས་བཅོ་ལྔའི་བར་གྱིས་བསྒོམ་ལམ། ཐ་མ་བཅུ་དྲུག་པས་མི་སློབ་པའི་ལམ་ལ་སྦྱོར་བའི་ཚུལ། རྡོ་རྗེ་ལས་རིམ་ལས། གནས་ནི་ཡེ་ཤེས་བཅུ་དྲུག་པོ། །ཚོགས་སྦྱོར་ལ་སོགས་དང་པོ་ནས། །མཐར་ཕྱིན་སངས་རྒྱས་ས་ཉིད་དེ། །གནས་བཞི་དེ་བཞིན་དབྱེ་བ་ལས། །གཉིས་པའི་གཉིས་པ་རབ་དགའ་སོགས། །ཕ་རོལ་ཕྱིན་དང་ས་མཚན་ཉིད། །མཚུངས་ཀྱང་རྫོགས་པར་བཤད་པ་ཡིན། །ཞེས་ཡས་བབས་རྣམས་རྒྱུ་དང༌། མས་བརྟན་རྣམས་འབྲས་བུའི་ས་ལམ་དང་སྦྱར་ཏེ་ལུགས་ལྡོག་གི་བཅུ་དྲུག་པའི་མཐར་ཁུ་རྡུལ་གཉིས་སྟེང་འོག་ཏུ་ཐིམ་པའི་སྐད་ཅིག་མ་ལ་རླུང་འགགས་པས། གསུམ་པོའི་འགྱུར་བ་མྱོང་བའི་ཤེས་རྒྱུན་ཀྱང་ཆད་དེ། སྐུ་བཞི་མངོན་དུ་བྱེད་པ་ནི་འབྲས་བུའི་བཞི་པ་སྟེ། དེ་སྐད་དུ་འགྲེལ་ཆེན་དྲི་མེད་འོད་ལས། ཕྱག་རྒྱ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་མི་འགྱུར་བའི་བདེ་བ་ཆེན་པོའི་སྐད་ཅིག་མ་རྣམས་ཀྱི་ཐ་མ་མངོན་པར་རྫོགས་པར་བྱང་ཆུབ་པའི་མཚན་ཉིད་
མི་ཆོད་པ་སྟེ། དེ་བཅོམ་ལྡན་འདས་གང་གིས་བྱང་ཆུབ་ཤིང་དྲུང་དུ་ཐོབ་པ། དེ་ནི་དབང་མཆོག་ཐོབ་པའོ། །ཞེས་སོ། །དེ་ལྟ་བུའི་དབང་བཞི་པ་མ་ཐོབ་ན་སངས་རྒྱས་ཀྱི་ཡེ་ཤེས་ཤེས་པ་མེད་པས་དོན་དང་མི་ལྡན་པའི་ཚུལ་སྔ་མ་ལས། དེ་ལྟར་དབང་བཞི་པ་མ་རྟོགས་པའི་ཕྱིར་དབང་ཐམས་ཅད་དོན་མེད་པར་འགྱུར་རོ། །ཞེས་པས་འཇིག་རྟེན་ལས་འདས་པ་དོན་དམ་པའི་དབང་གི་མཆོག་ཏུ་གྱུར་པ་ཚིག་གི་དབང་ཐོབ་པས་ལྟ་བ་རང་བྱུང་གི་ཡེ་ཤེས་མཐོང་ལམ་གྱི་བདེན་པ་མངོན་སུམ་དུ་སྟོན་པའི་གནས་ལུགས་བསམ་གྱིས་མི་ཁྱབ་པ་དང༌། སྟོང་པ་ཉིད་ཀྱི་ཐིག་ལེ་རིག་པའི་ཡེ་ཤེས་ཀྱི་སྙིང་པོ་ཅན་ཐོད་རྒལ་ལ་སོགས་པ་དོན་དམ་འོད་གསལ་གྱི་རྫོགས་རིམ་བསྒོམ་པ་ལ་དབང༌། སྒྲིབ་པ་གང་འདག་ན་སྒོ་གསུམ་ཐ་དད་དུ་འཛིན་པའི་སེམས་ཀྱི་དྲི་མ་ཤིན་ཏུ་ཕྲ་བ་ཆ་མཉམ་པར་སྦྱོང་ཞིང་ལྷའི་བུའི་བདུད་བཅོམ་གནས་སྐབས་བཞི་ལས་སྙོམས་འཇུག་གི་གནས་སྐབས་དང༌། དེའང་འཛག་བདེའི་སྲེད་པ་ཡིན་པས་ཁུ་རྡུལ་རླུང་གསུམ་ལས་འཁོར་བའི་ལུས་ངག་ཡིད་གསུམ་དང༌། བདེ་སྡུག་བཏང་སྙོམས་གསུམ་འཆར་བས་ཁུ་རྡུལ་རླུང་གསུམ་ལ་ཆ་མཉམ་དུ་འཇུག་པའི་སེམས་དང༌། ཤེས་སྒྲིབ་ཆེས་ཕྲ་བ་འཕོ་བའི་བག་ཆགས་ཀྱི་སྒྲིབ་པ་ཆ་དང་བཅས་པ་སྦྱོང་བ་ཡིན་ལ། དེའི་གྲུབ་
མཐའ་བསམ་གྱིས་མི་ཁྱབ་པ་ནི་བདེ་སྟོང་གི་ཡེ་ཤེས་རྒྱ་ཆད་ཕྱོགས་ལྷུང་དང་བྲལ་བ་ཉིད་དེ། ཕྱེད་བཅས་བཅུ་གསུམ་གྱི་ས་ལ་འཁོར་འདས་ཐམས་ཅད་བདེ་སྟོང་གཅིག་ཏུ་རྟོགས་པས་བླང་དོར་དང་སྤང་གཉེན་མེད་པའོ། །གྲུབ་མཐའ་མ་སྙོགས་ན་འདའ་ཀ་མ་ཕྱག་རྒྱ་ཆེན་པོས་འཕོ་བ་ལ་སྦྱང་བ་དང༌། གོམས་སུ་འཇུག་པ་དང༌། ལས་ལ་སྦྱར་བ་གསུམ་ཡིན་ནོ། །མཐར་ཐུག་གི་འབྲས་བུ་ནི་དབང་གི་ས་བོན་རྒྱུད་ལ་ཐེབས་པ་དེ་རིམ་གཉིས་ཀྱིས་སད་པར་བྱས་པས་མཆོག་ཏུ་མི་འགྱུར་བའི་སྟོང་གཟུགས་ཕྱག་རྒྱ་ཆེན་པོ། ཡེ་ཤེས་ཀྱི་རླུང་རིག་ལས་གྲུབ་པའི་མཚན་དཔེའི་བདག་ཉིད་ཅན་ཁ་སྦྱོར་ཡན་ལག་བདུན་ལྡན་གྱི་བདག་ཉིད་བདེ་ཆེན་ལྷན་ཅིག་སྐྱེས་པའི་ཡེ་ཤེས་ངོ་བོ་ཉིད་ཀྱི་སྐུ་འགྲུབ་པའི་ཚུལ་གླང་པོ་རབ་འབོགས་ལས། རླུང་གི་འགྲོས་ཐིམ་མི་ཤིགས་རྡོ་རྗེའི་སྐུ། །ལུས་ངག་ཡིད་དག་ངོ་བོ་ཉིད་ཀྱི་སྐུ། །ཞེས་སོ། །གཉིས་པ་འཕྲོས་དོན་ནི། རྒྱུད་སྡེ་ཕལ་ཆེར་ལས་དབང་གསུམ་པ་དཔེའི་ཡེ་ཤེས་སུ་བྱས་ནས། དེ་ལས་བཞི་པའི་དོན་གྱི་ཡེ་ཤེས་མཐོང་བར་བཤད་ཀྱང་བཞི་པའི་རང་བཞིན་ནི་སྒྲ་རྟོག་དང་ཞེན་པའི་ཡུལ་དུ་འགལ་བས་ཚིག་གིས་སྟང་གཅོད་པ་མངོན་སུམ་དུ་མི་གནས་ལ། འདྲ་བའི་ཕྱིར་ན་དངོས་མ་ཡིན་པ་ཉིད་ཀྱིས་འཕགས་པའི་ཡུལ་དུའང་
འདོད་པ་དུ་མར་སྣང་སྟེ། འདི་ལྟར་ནོར་བུར་གནས་པའི་བདེ་བ་གསུམ་པར་བྱས་ནས། དེ་ལས་འཕོས་པ་དང་བྱང་སེམས་ལྕེས་མྱངས་པ་བཞི་པར་བྱེད་པའི་སྒྲོ་བཏགས་དང༌། ཕལ་ཆེར་ཤེས་རབ་ཡེ་ཤེས་ཀྱི་ལྷན་སྐྱེས་བརྫུན་པར་རྟོགས་ནས་དེའི་བདེ་བ་ལ་སྟོང་པའི་རྒྱས་བཏབ་པ་གང་ཞིག་བདེ་སྟོང་དབྱེར་མེད་ཀྱི་བཞི་པར་འདོད་པ་ནི་དེ་ཁོ་ན་ཉིད་ལ་ཤིན་ཏུ་འཁྲུལ་པའི་ཕྱོགས་ཡིན་པས་དུས་འཁོར་འགྲཻལ་ཆེན་ལས། དགོད་པ་དང་བལྟ་བ་དང་ལག་པ་བཅངས་པ་དང་གཉིས་གཉིས་སྦྱོར་བ་ཞེས་པ་དབང་རྣམ་པ་བཞི་ནི་དེ་ཁོ་ན་ཉིད་དུ་མི་འགྱུར་རོ། །འདིར་དེ་ཁོ་ཉིད་ནི་གཉིས་འཁྱུད་པ་མེད་པ་སྟེ་ལས་ཀྱི་ཕྱག་རྒྱའི་རྒྱུ་ལས་སྐྱེས་པ་ན་རྣམ་པར་དཔྱད་ན་གཉིས་སུ་མེད་པའི་ཡེ་ཤེས་སུ་མི་འགྱུར་རོ། །ཞེས་པའི་དགོངས་པ་ཡང་དེ་ཡིན་ནོ། །འདིར་ནི་གསུམ་པའི་ཉམས་མྱོང་ལྷན་ཅིག་སྐྱེས་པའི་ཡེ་ཤེས་དེའི་ཐབས་ལ་བརྟེན་ནས་གང་ཞིག་རྟོགས་བྱའི་མི་མཐུན་ཕྱོགས་ཤིན་ཏུ་ཕྲ་བའི་རྣམ་རྟོག་ཀུན་ཆོད། ཁུ་རྡུལ་གཉིས་སྟེང་འོག་ཏུ་ཐིམ་ཞིང་འགགས་པའི་མོད་ལ་རང་བཞིན་གྱིས་དག་པར་བྱེད་པས་དབང་བཞི་པའི་དཔེར་རུང་ལ་དོན་དམ་པར་བདག་ཏུ་བལྟ་བ་དང༌། འཁོར་འདས་ཀྱི་ཆོས་སུ་འཛིན་པའི་རྣམ་པར་རིག་པ་ཐམས་ཅད་རང་གི་ངོ་བོས་སྟོང་པའི་དེ་ཁོ་ན་ཉིད་ལ་དབང་བཞི་པའི་བླ་དྭགས་སུ་བཏགས་
ནས་གནས་སྐབས་སུ་ཚིག་ཙམ་གྱིས་མཚོན་པར་བྱེད་ལ། མཐར་ཐུག་དེའི་དོན་གཉིས་སུ་མེད་པའི་ཡེ་ཤེས་གང་ཡིན་པ་ནི་དད་པ་དང་བྱིན་རླབས་ཀྱིས་རྟོགས་པར་བྱ་བའི་དབང་ཡིན་པས་ན། དོ་ཧ་ལས། བླ་མའི་བྱིན་རླབས་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཞེས་སོ། །དབང་བཞི་པ་ལ་ཡན་ལག་བདུན་ལ་སོགས་པའི་འབྲས་བུའི་ཕྱོགས་ནས་བསྙད་ན་མཐའ་མི་ཐུག་པར་འགྱུར་བས་འདིར་དེ་ཙམ་མོ། །དབང་བཞི་པའི་དམ་ཚིག་ནི། ཁྱོད་ཀྱིས་སྲོག་ཆགས་གསད་པར་བྱ། །གཞན་གྱི་བུད་མེད་རྣམས་སྤྱད་ནས། །མ་བྱིན་པར་ཡང་ཁྱོད་ཀྱིས་ལོང༌། །ཐམས་ཅད་ལ་ཡང་བརྫུན་ཚིག་སྨྲ། །ཞེས་སོ། །དེ་ལྟར་དྲི་མ་འཁྲུད་བྱེད་ཀྱི་དབང་བཞི་པོ་ལ། སྒྲ་དོན་སྦྱར་ན་ཨ་བྷི་ཥཱིཉྩའི་སྒྲས། །གློ་བུར་དྲི་མ་གཏོར་དང་ཥེ་ཀ་ཏས། །སྐལ་བ་བླུགས་པ་རྣམ་པ་གཉིས་སུ་འགྲུབ། །ཅེས་སྨོས་ཏེ། དེ་ལ་དབང་གི་སྒྲ་བཤད་ནི། སྣོད་དུ་རུང་བ་དང་ལུགས་སུ་ལུགས་པའི་རྣམ་པ་ལྟར་ལམ་བསྒོམ་རུང་དང༌། འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་རྒྱུད་ལ་བླུགས་པ་ལྟར་འཇོག་པས་ན་དབང༌། དྲི་མ་དག་པར་བྱེད་པས་ན་གཏོར་བའི་དོན་དུ་འཇོག་པ་སྟེ་སྔ་མ་ལས། སྣོད་དུ་རུང་ཕྱིར་བུམ་དབང་སྟེ། །བླུགས་གཏོར་དག་པར་བྱེད་པས་
དབང༌། །ཞེས་དང་བརྟག་གཉིས་ལས་ཀྱང༌། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་སོ། །དེ་ལྟ་བུའི་དབང་བཞིའི་རིམ་པ་ད་ལྟ་ནས་རྒྱུ་ལམ་འབྲས་བུའི་རང་བཞིན་དུ་གནས་པའི་ཚུལ། དབང་མཆོག་རང་ལ་གནས་པ་ཁམས་དྲུག་གི ། རྟེན་དང་འབྱོར་པ་རྒྱུ་ཡི་དབང་ཡིན་ཏེ། །སློབ་དཔོན་ཉིད་ཀྱིས་ཆོ་གས་བསྐུར་བ་དང༌། །རང་གི་དམིགས་པས་འདྲིས་པ་ལམ་གྱི་དབང༌། །རྒྱུ་དུས་འོད་ཟེར་ཆེན་པོའི་དབང་བཞིན་དུ། །རང་སེམས་སྐུ་བཞིར་སྨིན་པ་འབྲས་བུའི་དབང༌། །དབང་བཞི་རྫོགས་ཚེ་རིག་འཛིན་སྡོམ་པ་འཐོབ། །དེ་ལ་སེམས་ནི་མིང་བཞིའི་ཕུང་པོ་ཅན་ཡེ་ཤེས་ཀྱི་རྟེན་ཡིན་ལ། ཕུང་པོའི་རྟེན་ནི་འབྱུང་བ་ལྔ། འབྱུང་བའི་རྟེན་རྩ་དང༌། རྩའི་བརྟེན་པ་སྲོག་གི་རླུང༌། རླུང་གི་བརྟེན་པ་བྱང་ཆུབ་ཀྱི་སེམས་ཡིན་པས་དེ་དག་ཀྱང་སྨན་གྱི་རོ་དང༌། ནུས་པ་དང༌། དྲི་དང༌། ཞུ་རྗེས་ལྟ་བུར་གཅིག་ལ་གཅིག་བརྟེན་དུ་ཚོགས་པ་གཅིག་པ་ལས་རང་གི་སེམས་རྒྱུད་དྲི་མས་གོས་མ་མྱོང་བ་དེ་བཞིན་གཤེགས་པའི་སྙིང་པོ་ཅན་ལ་དབང་གི་རང་བཞིན་གདོད་ནས་གནས་པའི་ཚུལ། རྡོ་རྗེ་ཕུར་པའི་བཤད་རྒྱུད་ལས། སེམས་ཉིད་རྟོགས་ན་དབང་ཡིན་ཏེ། །ཐམས་ཅད་རང་རིག་ཕུར་བུ་མཆོག །ཅེས་སོ། །དེའང་འཁོར་བའི་གནས་
སྐབས་ན་འབྱུང་བ་ལྔ་དང༌། དེའི་སྟེང་དུ་ཡེ་ཤེས་བསྣན་པས་ཁམས་དྲུག་གི་རྟེན་ཁྱད་པར་ཅན་གྱི་རྐྱེན་དང་འབྱོར་པ་མཚུངས་ལྡན་གྱི་རྒྱུའི་དབང་དུ་གནས་པའི་ཚུལ་ནི། རྡོ་རྗེ་འབར་བའི་རྒྱུད་ལས། སེམས་ནི་མིང་བཞིའི་ཕུང་པོ་སྟེ། །ཕུང་པོའི་རྟེན་ནི་འབྱུང་བ་ལྔ། །འབྱུང་བའི་རྟེན་ནི་རྩ་རྣམས་སོ། །རྩ་རྣམས་བརྟེན་པ་སྲོག་གི་རླུང༌། །སྲོག་རླུང་བརྟེན་པ་བྱང་ཆུབ་སེམས། །ཞེས་པ་ལྟར་ལས་རྒྱུ་དུས་ཀྱི་ཕུང་པོ་ལྔ་རྒྱལ་བ་རིགས་ལྔ། འབྱུང་བ་ལྔ་ཡུམ་ལྔ། སྐྱེ་མཆེད་སེམས་དཔའ་སེམས་མ་ལ་སོགས་གདན་གསུམ་ཚང་བའི་ལྷའི་རྣམ་པར་འགྱུར་བ་ཅན་གྱི་དཀྱིལ་འཁོར་གྱི་འཁོར་ལོར་རྫོགས་པ་ནི་བུམ་པའི་དབང་གི་རང་བཞིན་དུ་ཡོད་པ་སྟེ་སྡོམ་འབྱུང་ལས། དང་པོ་ལྷ་ཡི་རང་བཞིན་དུ། །རྡོ་རྗེ་སེམས་དཔའ་རྣམ་པར་བཞུགས། །ཞེས་སོགས་པས་བསྟན་ནོ། །དེ་བས་ན་ལམ་བསྒོམ་པའི་སྔོན་དུ་འགྲོ་བ་ཅན་བུམ་དབང་གི་ས་བོན་ལུས་འདིའི་རྩའི་གཙོ་བོ་རྣམས་ཡེ་ནས་སྤྲུལ་སྐུར་གནས་པས་དེའི་གློ་བུར་བའི་དྲི་མ་དག་བྱེད་བུམ་པའི་དབང་བསྐུར་བ་ནི་ལམ་གྱི་དབང་ཡིན་ལ། དེ་བཞིན་དུ་གསང་དབང་གི་ས་བོན་དག་ཡི་གེའི་རང་བཞིན་ལོངས་སྤྱོད་རྫོགས་པའི་སྐུར་གནས་པ་དེའི་གློ་བུར་བའི་དྲི་མ་དག་བྱེད་གསང་བའི་དབང་དང༌། ཤེར་དབང་གི་ས་བོན་ཀུན་རྫོབ་
བྱང་སེམས་དང་རྟེན་བརྟེན་པར་འབྲེལ་པ་སེམས་ཉིད་བདེ་ཆེན་ཆོས་སྐུའི་རང་བཞིན་དུ་གནས་པ་དེའི་གློ་བུར་བའི་དྲི་མ་དག་བྱེད་ཤེར་དབང་སྟེ་ཤེས་རབ་ནི་ལྷན་ཅིག་སྐྱེས་པའི་ལྟ་བ་དང༌། ཡེ་ཤེས་ནི་དེའི་རང་བཞིན་ཤེས་པའི་ལྷག་མཐོང་ངོ༌། །དབང་བཞི་པའི་ས་བོན་ད་ལྟ་བལྟར་མི་མངོན་ཀྱང་བདེ་སྟོང་གི་མྱོང་ཞེན་དང་བཅས་པའི་ལྷན་ཅིག་སྐྱེས་པའི་ཡེ་ཤེས་སུ་གནས་པ་དེའི་གློ་བུར་བའི་དྲི་མ་ཚིག་དབང་གིས་དག་པར་བྱེད་པས་རླུང་སེམས་དངས་པའི་ཡེ་ཤེས་རིག་སྟོང་མཐའ་བྲལ་རྣམ་ཐར་གསུམ་གྱི་མཚན་ཉིད་ཅན་གྱི་ནུས་པ་རྒྱུད་ལ་འཇོག་པའི་ལམ་དབང་བཞིའམ། དེའང་གཞན་དུ་ཐོག་མར་ཆོ་ག་ལ་བརྟེན་པའི་བསྐུར་བྱ་སྐུར་བྱེད་ལ་ལྟོས་ཏེ་དབང་གི་བརྡའ་འཕྲོད་པར་བྱེད་པའི་ཆ་ནས་རྒྱུ་དབང་དུའང་བཞག་པ་ཡིན་པས་དེ་ལྟར་བླ་མས་སློབ་མ་ལ་བསྐུར་བ་ནི་གཞི་ལམ་གཉིས་ཀའི་དབང་དུ་བསྡུ་རུང་ལ། དེ་ལས་གཞན་པ་བདག་འཇུག་དང༌། རྣལ་འབྱོར་ཟབ་མོའི་དབང་བཞི་དང༌། བྱིན་རླབས་འཕོ་བའི་རྒྱུན་ལ་གོམས་སུ་འཇུག་ཅིང་དད་པས་ནན་ཏན་དུ་བྱ་བ་ཐམས་ཅད་ལམ་དབང་ཡིན་ལ། རྒྱུ་དུས་ན་རང་གི་རིག་ཆ་ལ་ལྡན་པའི་དབང་གི་དེ་ཁོ་ན་ཉིད་ཉི་མའི་དཀྱིལ་འཁོར་ལྟ་བུ་དེ་འཁོར་བའི་རང་བཞིན་ཀུན་གཞི་ཚོགས་བརྒྱད་དང་བཅས་པའི་དྲི་མ་གློ་བུར་བ་སྤྲིན་སྦུབས་ལྟ་བུས་བལྟར་མི་མངོན་པར་
བྱས་པ་གང་ཞིག ལམ་དུས་ཀྱི་དབང་མངོན་རྟོགས་རྣམ་པ་བཞིའི་རྩལ་སྣང་རྒྱས་པའི་བྱེད་ལས་ཀྱི་ཐབས་ལ་མཁས་པས་སྤྲིན་སྦུབས་ལྟ་བུའི་དྲི་མ་གློ་བུར་བ་དེ་ཉིད་སྐད་ཅིག་ལ་བསལ་བ་ལས་གནས་སྐབས་ཀྱི་ཡོན་ཏན་རྒྱ་ཆེན་པོ་དང༌། ཕ་རོལ་ཏུ་ཕྱིན་པ་ལས་ཁམས་བདེ་བར་གཤེགས་པའི་སྙིང་པོ་ས་བོན་ཙམ་དུ་འགྲོ་བའི་རྒྱུད་ལ་ཡོད་པ་རྐྱེན་ཚོགས་གཉིས་ལས་བསྐལ་པ་གྲངས་མེད་གསུམ་དུ་འཕེལ་བ་སློབ་ལམ་རྫོགས་པའི་རྒྱུན་མཐར་འོད་ཟེར་ཆེན་པོའི་དབང་བསྐུར་ཐོབ་པའི་རྒྱུ་འབྲས་སྔ་ཕྱིར་སྨོན་པ་ལྟར་མ་ཡིན་པར། འདིར་རྒྱུ་དུས་ནས་རང་སེམས་སྐུ་བཞིར་སྦྱོར་བའི་འབྲས་དུས་ཀྱི་དབང་འོད་ཟེར་ཆེན་པོའི་རང་བཞིན་དུ་ཐོབ་པའང་ཡོད་པའི་ཕྱིར་འབྲས་བུའི་དབང་ཞེས་བྱ་བ་ཡིན་ནོ། །དེ་ལྟ་ན་ད་ལྟ་དེ་དང་དེའི་ཡོན་ཏན་དངོས་སུ་མ་སྐྱེས་པས་རྒྱུ་ལ་འབྲས་བུའི་མིང་བཏགས་པ་ཙམ་ལས་ས་ཟིན་གཞན་པ་མེད་དོ་ཟེར་ན། གང་ཟག་དབང་པོ་རབ་ཏུ་གྱུར་པ་དག་ནི་དབང་བསྐུར་ཉིད་ཀྱིས་གྲོལ་བ་ཡང་ཡོད་དེ་གྲུབ་ཆེན་རྣམས་ཀྱི་རྣམ་པར་ཐར་པས་གསལ་ལ། གལ་ཏེ་སྨིན་པའི་ཚད་དེའི་རྒྱུད་ལ་སྔར་མེད་ཀྱྀ་ཡོན་ཏན་ཆེན་པོ་ཐོབ་པས་ཀྱང་མ་ཡིན་པར་གཟུགས་ཀྱི་རྣམ་འགྱུར་གསར་པ་འཐོབ་དགོས་ན། དགྲ་བཅོམ་པ་རྣམས་ཀྱང་ལུས་ཀྱི་རྣམ་པ་མི་འགྱུར་བས་འབྲས་བུ་ཐོབ་པའི་སྟང་གང་གིས་གཅོད། འདི་
ལྟར་ཡེ་ཤེས་སྐྱེ་བའི་སྣ་འདྲེན་ནི་དབང་གི་ཐབས་ལ་བརྟེན་ནས་བྱེད་པ་ཡིན་པས་ད་ལྟ་མངོན་སུམ་དུ་བལྟར་མི་མངོན་ཀྱང༌། སྨིན་པའི་ཚད་དུ་རུང་བའི་རྒྱུ་མཚན་ནི། ཕར་ཕྱིན་ཐེག་པར་རྟེན་གང་ཞིག་ལ་མཐོང་སྤང་སྤོང་རུང་དང༌། མཐོང་ལམ་སྐྱེ་རུང་ལ་སྨིན་པའི་འཐད་པ་འཇོག་པ་ལྟ་བུ་སྟེ། མདོ་སྡེའི་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །གཟག་དང་དཔྱད་དུ་རུང་བས་སྨིན་འདོད་ལྟར། །དེ་ཕྱིར་རྟེན་འདིར་ཕྱོགས་གཉིས་ཞི་བ་དང༌། ཡོངས་སུ་དཔྱད་པ་ཉིད་དུ་སྨིན་པར་བསྟན། །ཞེས་པ་ལྟར་རོ། །དེ་བས་ན་སྔགས་ཀྱི་དབང་བསྐུར་བ་ཐོབ་ཅིང་དམ་ཚིག་དང་སྡོམ་པ་རྣམ་པར་དག་པ་རྣམས་ནི་རིམ་གཉིས་ཀྱི་རྟེན་འབྲེལ་ལས་འབད་པ་ཆུང་ངུས་ཀྱང་ཚེ་འདི་ཉིད་ལ་དངོས་གྲུབ་ཐོབ་པ་ནི་སྔགས་ཀྱིས་བཏབ་པའི་ས་བོན་ཡུད་ཙམ་ལ་སྨིན་པ་མ་ཤའི་སྦྱོར་བ་བཞིན་ནོ། །དེ་དག་ཀྱང་བསྡུ་ན་རྒྱུ་འབྲས་ཀྱི་དབང་གཉིས་སུ་འདུ་སྟེ། བུམ་པ་དང༌། གསང་བ་དང༌། ཤེས་རབ་ཡེ་ཤེས་གསུམ་ནི་བར་ཆད་ཀྱི་བདེ་བ་དང་བཅས་པས་འཇིག་རྟེན་པའི་དབང་ཞེས་བྱ་སྟེ། དང་པོའི་སངས་རྒྱས་ལས། གསུམ་པོ་འཇིག་རྟེན་ཀུན་རྫོབ་སྟེ། །བཞི་པ་དོན་གྱི་དམ་པ་ཡིན། །ཞེས་སོ། །རྒྱུ་མཚན་འདིས་སྔགས་སུ་བུམ་དབང་གི་འབྲས་བུ་བཅུ་གཅིག་ཀུན་ཏུ་འོད་ལ་བཞག་པ་ལ་སོགས་པའི་རིམ་པས་
ཀྱང་མདོ་ལམ་གྱིས་དྲང་དོན་ཡིན་པའི་མཚན་ཉིད་ལེགས་པར་ཤེས་ནུས་སོ། །དེ་ནས་མཐའ་རྟེན་དུ་བརྟུལ་ཞུགས་བྱིན་ནས་ལུང་བསྟན་པ་དང༌། རྗེས་གནང་དང་དབུགས་དབྱུང་གཉིས་ལས། དང་པོ་ནི་དབང་རྟེན་གྱི་ལག་པ་སློབ་མར་གཏད་ལ་གཉིས་ཀ་ནས་རང་གི་ལག་གཡོན་གྱིས་བཟུང༌། རྡོ་རྗེ་དང་བཅས་པའི་གཡས་པ་སློབ་མའི་སྤྱི་བོར་བཞག་ལ། དེ་བཞིན་གཤེགས་པ་རྣམས་དཔང་དུ་བཙུགས་ནས། འདིར་ནི་ཁྱེད་རྣམས་དཔང་པོ་ཡིན། །བདག་གིས་འདི་ལ་འདི་གཏད་དོ། །ཐབས་གཞན་གྱིས་ནི་སངས་རྒྱས་མིན། །འགྲོ་གསུམ་འདི་ཡང་དག་པ་ཡིན། །དེ་ཕྱིར་འདི་དང་བྲལ་བར་ནི། །ཁྱེད་ཀྱིས་ནམ་ཡང་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱི། །རིག་པའི་བརྟུལ་ཞུགས་བླ་ན་མེད། །རྨོངས་པ་གང་གིས་འདའ་བྱེད་པ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་ནས་བྱིན་ནོ། །དེ་བཞིན་དུ་སློབ་མ་རྡོ་རྗེ་སེམས་དཔར་བསྐྱེད་ནས་རྡོ་རྗེའི་བརྟུལ་ཞུགས་བྱིན་པ་ནི་ཡེ་ཤེས་ལྔའི་རང་བཞིན་ནང་གི་རྡོ་རྗེ་དང་མི་འབྲལ་བའི་དོན་ཏེ། ཕྲེང་བ་ལས། གང་ཚེ་རྣམ་པར་མི་རྟོག་པའི། །ལས་ཀུན་ཐབས་དང་བཅས་པར་སྤྱོད། །རྣམ་པར་མི་རྟོག་བསྒོམ་པ་ལས། །བརྟུལ་ཞུགས་རྣམས་ཀྱི་མཆོག་གི་མཆོག །ཅེས་སོ། །དེ་
བཞིན་དུ་ཁ་ཊྭཱཾ་ག་དང༌། ཅང་ཏེའུ་དང༌། པདྨའི་སྣོད་ལ་སོགས་པ་གཏད་ནས་སྤྱོད་པའི་བརྟུལ་ཞུགས་བྱིན་པ་ཡང༌། ཁ་ཊྭཱཾ་ག་ནི་ལྷ་ཡི་སྐུ། །ཅང་ཏེའུ་ཤེས་རབ་ཏུ་ནི་བརྟག །སྔགས་ནི་བཏུང་བའི་ཐོད་པའོ། །ཞེས་ཀུན་སྤྱོད་ལས་བཤད་དོ། །གཞན་ཡང་ཁམས་གསུམ་དང་དབྱེར་མེད་པའི་ཆོས་ཉིད་རྟོགས་པར་ནུས་པ་ཁྱོད་ཡིན་ནོ་ཞེས་གཟེངས་བསྟོད་པའི་དོན་དུ་ལུང་བསྟན་པ་ཡང་སངས་རྒྱས་མཉམ་སྦྱོར་ལས། སློབ་མ་དཀྱིལ་འཁོར་བསྡུས་ནས་ནི། །ཡོན་གྱི་མཆོག་དེ་བླངས་ནས་ནི། །རྡོ་རྗེ་མིང་གི་དབང་བསྐུར་བས། །དེ་བཞིན་གཤེགས་པར་དེ་ལུང་བསྟན། །ཕྱག་རྒྱའི་སྦྱོར་བ་འདི་དག་གིས། །བྱང་ཆུབ་སྙིང་པོའི་བར་དུ་ནི། །རྡོ་རྗེའི་མིང་དུ་རབ་ཏུ་གྲགས། །དེ་ནས་སངས་རྒྱས་སྲས་སུ་འགྱུར། །ཞེས་སོ། །གཉིས་པ་ནི། རྣམ་སྣང་མངོན་བྱང་ལས། དེ་ནས་རྐང་པའི་བར་འོག་ཏུ། །ཆོས་ཀྱི་འཁོར་ལོ་བཞག་པར་བྱ། །དེ་ནས་ལག་པ་གཡས་པར་ཡང༌། །ཤིན་ཏུ་བཟང་པོའི་དུང་བྱིན་ཏེ། །ཆོས་ཀྱི་དུང་ནི་བླ་མེད་པ། །ཀུན་ཏུ་རྒྱས་པར་བུས་ནས་སུ། །དེ་རིང་ཕྱིན་ཆད་འཇིག་རྟེན་ལ། །སྐྱོབ་པ་རྣམས་ཀྱི་འཁོར་ལོ་བསྐོར། །སོམ་ཉི་ཡིད་གཉིས་མི་བྱ་ཞིང༌། །དོགས་པ་མེད་པའི་སེམས་ཀྱིས་ཁྱོད། །གསང་སྔགས་སྤྱད་པའི་ཚུལ་གྱི་
མཆོག །འཇིག་རྟེན་འདི་ལ་རབ་ཏུ་ཤོད། །དེ་ལྟར་བྱས་ན་སངས་རྒྱས་ལ། །ཕན་འདོགས་བྱས་པ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང༌། །ཁྱོད་ལ་རྣམ་པ་ཀུན་ཏུ་བསྲུང༌། །ཞེས་དང༌། རིགས་སོ་སོའི་རྗེས་གནང་གི་ཚིག་སྒྲ་བསྒྱུར་ནས་དཀྱིལ་འཁོར་བྲི་བཤད་བྱེད་པའི་རྗེས་གནང་ཡང་སྦྱིན་པ་ཡིན་ནོ། །དེ་ནས་དབུགས་དབྱུང་བ་ནི། ཁྱོད་ནི་འདོད་པ་ལ་ཉེ་བར་ལོངས་སྤྱོད་ཀྱང་སངས་རྒྱས་ཉིད་ཡིན་ནོ། །ཞེས་དཀྱིལ་འཁོར་དུ་འཇུག་པ་དང༌། དབང་བསྐུར་བ་སོགས་ཀྱིས་སངས་རྒྱས་ཐོབ་ནུས་ཀྱི་ས་བོན་འཕེལ་བར་བྱ་བའི་ཚུལ་སློབ་མས་གོ་བར་བྱས་ནས་སློབ་མ་དཀྱིལ་འཁོར་ལ་འབུལ་བའི་ཚུལ། སྤྱི་རྒྱུད་ལས། དེ་ནས་བླ་མ་བདག་ཉིད་ཀྱི། །དེ་ཡི་སྤྱི་བོར་གདུགས་ཀྱང་བཟུང༌། །ཐལ་མོ་སྦྱར་བར་བྱས་ནས་ནི། །དཀྱིལ་འཁོར་ལེགས་པར་བསྐོར་དུ་གཞུག །ཅེས་པ་ལྟར་སློབ་མས་དཀྱིལ་འཁོར་བསྐོར་བའི་མཐར་ཤར་སྒོ་ནས་ལུས་ས་ལ་ཕབ་པའི་ཕྱག་བྱས་ནས་མགོ་བོ་མ་བཏེག་པ་གང་ཞིག་དཀྱིལ་འཁོར་ལ་ཚིག་འདིས་དབུལ་བར་བྱ་སྟེ། རྒྱུད་རྣམས་འཛིན་པར་འགྱུར་བ་ཡིན། །སློབ་མ་འདི་ནི་ཕུལ་བ་ལགས། །ཞེས་སོ། །དེ་ནས་དབང་བཞི་ཀ་ཐུན་མོང་དུ་གྱུར་པའི་དམ་ཚིག་ནི་རྡོ་རྗེ་ཕུར་བུའི་རྒྱུད་ལས། བུམ་པའི་དམ་ཚིག་གང་ཡིན་པ། །
བསྐྱེད་པའི་རིམ་པ་བརྟག་པ་དང༌། །རྨོངས་པ་རྣམས་ལས་འདའ་བྱ་སྟེ། །སྣོད་ཀྱི་འཇིག་རྟེན་གཞལ་ཡས་ཁང༌། །བཅུད་ཀྱི་སེམས་ཅན་ལྷ་ཡི་མཆོག །དེ་ནི་བུམ་པའི་དམ་ཚིག་ཡིན། །གང་ཞིག་གསང་བ་སྟོན་པ་ལ། །གསང་བའི་དམ་ཚིག་འདི་ཡིན་ཏེ། །བུད་མེད་ཤེས་རབ་རང་བཞིན་པས། །ཙཎྜ་ལཱི་ལ་རྟག་ཏུ་བསྒོམ། །ཟས་ལྔ་རྟག་ཏུ་བཟའ་བར་བྱ། །སྤྱོད་པར་བྱ་བའི་མཆོག་ཡིན་ནོ། །ཡེ་ཤེས་ཆེན་པོའི་དམ་ཚིག་ནི། །མོ་རྣམས་ཀུན་ལ་སྤྱད་པ་དང༌། །དགའ་བ་རྟག་ཏུ་བསྟེན་པར་བྱ། །སེམས་ཉིད་དྷཱུ་ཏིར་རབ་ཏུ་བལྟ། །ཡེ་ཤེས་སྙིང་པོའི་དམ་ཚིག་གོ །དེ་ལྟ་བུ་དང་མི་ལྡན་པའི། །དབང་དང་དམ་ཚིག་ཀུན་ལས་འདས། །བསྒྲུབས་ཀྱང་འགྲུབ་པར་མི་འགྱུར་ཏེ། །སྔགས་པ་བྱ་བ་གང་ཡང་མེད། །སྔགས་པ་སྔགས་པ་ཞེས་བྱ་བ། །རྩ་བ་དང་ནི་ཡན་ལག་དང༌། །ཁྱད་པར་དམ་ཚིག་གང་ཡིན་དང༌། །ཤིན་ཏུ་དབང་གི་དམ་ཚིག་དང༌། །རྩ་དང་རླུང་གི་དམ་ཚིག་དང༌། །བྱང་ཆུབ་སེམས་ཀྱི་བཞག་ས་རྣམས། །གང་ཞིག་བཞག་པ་སྔགས་པ་ཡིན། །དེ་ལ་མཆོག་གི་དངོས་གྲུབ་འབབ། །ཅེས་སྔགས་སྡོམ་ཐོབ་པ་མི་ཉམས་པའི་ཕྱིར་དུ་བསྒྲག་པ་སྟེ། བསྙེན་པར་རྫོགས་པའི་དངོས་པོ་ཐོབ་ནས་བསླབ་པ་བསྒྲགས་པ་བཞིན་ནོ། །
དེ་ལྟ་དབང་བཞི་མཐའ་རྟེན་དང་བཅས་པ་རྫོགས་པའི་དུས་ན་རིག་འཛིན་གྱི་སྡོམ་པའང་ཐོབ་པ་ཡིན་ཏེ། དེའང་སློབ་མའི་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པའི་དུས་ནས་བརྩམས་ཏེ་རྒྱུད་སྡེ་འོག་མ་གསུམ་ལ་རང་ལུགས་ཀྱི་དངོས་གཞི་རྫོགས་ནས་སློབ་དཔོན་གྱི་དབང་བསྐུར་བའི་མཐའ་དང༌། བླ་མེད་ལ་བུམ་དབང་གི་མཐར་བསྐྱེད་རིམ་གྱི་སྔགས་སྡོམ་དངོས་བསྟན་དང༌། དབང་གོང་མ་གསུམ་ལ་དེའི་ལྡོག་ཆས་ཕྱེ་བའི་སོ་སོའི་དམ་ཚིག་གསར་ཐོབ་རེ་རེ་སྟེ། ངོ་བོ་གཅིག་པའི་ཆ་ནས་སྡོམ་པར་ཡང་བཞག་ཏུ་རུང་བ་རྣམས་ཐོབ་པའི་མཚམས་སྐབས་འདི་ཡིན་པས་ན་རང་རང་ལ་ལྟོས་པའི་ཡོན་ཏན་དང༌། རྩ་ལྟུང་གཉིས་ཀ་བསྐྱེད་པའི་རྟེན་དུ་སོང་བ་ཡིན་ནོ། །དེ་ནས་སློབ་མས་སློབ་དཔོན་ལ་ཕྱག་བྱས་ལ། གཙོ་བོས་ཇི་ལྟར་བཀའ་སྩལ་པ་སོགས་ལན་གསུམ་གྱིས་དམ་བཅས་ལ། མོས་གུས་ཆེན་པོའི་སེམས་ཀྱིས་བདག་གི་ལུས་དང་ལོངས་སྤྱོད། ས་གཞིས་ཡུལ་འཁོར། བུ་དང༌། བུ་མོ། ཆུང་མ་ནས་ཇི་ལྟར་འབྱོར་བའི་བར་དུ་དབུལ་བར་བྱ་སྟེ། མྱ་ངན་ལས་འདས་པའི་རྒྱུད་ལས། གསེར་ལ་སོགས་པའི་ཡོ་བྱད་དང༌། །རང་གི་ལུས་དང་ནོར་གྱི་དབྱིག །མ་སྲིང་མོ་རྣམས་བརྒྱན་པ་དང༌། །གྲོང་དང་གྲོང་ཁྱེར་བཅས་པ་རྣམས། །དམིགས་པ་
མེད་པའི་སེམས་ཀྱིས་ནི། །དེ་དང་མཉམ་པ་ཁོ་ནར་འབུལ། །ཞེས་དང༌། དཀྱིལ་འཁོར་སོ་སོའི་རིགས་ལ་དམིགས་པའི་ཡོན་ནི་གསང་བའི་དགོངས་རྒྱུད་ལས། བདག་ལུས་སྲོག་དང་ནོར་ལ་སོགས། །བུ་དང་ཆུང་མར་བཅས་པ་རྣམས། །ཞུམ་པ་མེད་པའི་སེམས་ཀྱིས་དབུལ། །རྡོ་རྗེ་རིགས་ཀྱི་ཡོན་ཡིན་ནོ། །བྲན་དང་བཅས་པའི་འདོད་ཡོན་ལྔ། །འཁོར་ལོ་ཅན་གྱི་ཡོན་ཡིན་ནོ། །རིན་ཆེན་སྣ་ལྔ་ལ་སོགས་དང༌། །གླང་པོ་རྟ་དང་མ་ཧེར་བཅས། །རིན་ཆེན་རིགས་ཀྱི་ཡོན་ཡིན་ནོ། །མ་དང་སྲིང་མོ་ཆུང་མ་དང༌། །རབ་ཏུ་བརྒྱན་པ་དགོད་པ་དང༌། །རྒོད་མ་ལ་སོགས་མོ་ཆགས་རྣམས། །པདྨ་རིགས་ཀྱི་ཡོན་དུ་དབུལ། །རྟ་དང་གླང་ཆེན་མ་ཧེ་དང༌། །རྫས་ཀྱི་རྣམ་པ་མང་བཀལ་བ། །ལས་ཀྱི་རིགས་ཀྱི་ཡོན་དུ་དབུལ། །ཞེས་སོ། །རྒྱུ་དེ་ལས་སངས་རྒྱས་ཐམས་ཅད་ཀྱི་ངོ་བོ་ཉིད་བླ་མ་མཉེས་པ་ལས་དངོས་གྲུབ་ཐོབ་པའི་ཚུལ་རྒྱུད་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་པའི། །ཡེ་ཤེས་མཆོག་ནི་འཐོབ་པར་འགྱུར། །ཞེས་བཤད་དོ། །དབང་ཐོབ་པའི་ཕན་ཡོན་སྟོན་པའི་ཕྱིར། དབང་ཐོབ་སྐྱེས་བུ་ཐ་པའི་སྐྱོན་སྦྱངས་བའི། །ཞིང་སར་ས་བོན་བཞག་པ་ཇི་བཞིན་དུ། །
སྒྲིབ་པ་གཉིས་དག་སྐུ་བཞི་མངོན་དུ་བྱེད། །འདི་ལྟར་རྡོ་རྗེ་སློབ་དཔོན་མཚན་ཉིད་དང་ལྡན་པ་ལ། ཐར་པ་དང་ཐམས་ཅད་མཁྱེན་པ་འདོད་པའི་བློ་ཅན་གྱི་སློབ་མས་དབང་བསྐུར་བ་རྫོགས་པར་ནོད་པའི་དེ་མ་ཐག་ཐར་པའི་ལམ་སྣ་ཟིན་ཅིང་རྒྱལ་བའི་སྲས་སུ་འགྱུར་བའང་སྒྱུ་འཕྲུལ་ལས། དུས་འདི་མན་ཆད་རྒྱལ་བའི་སྲས། །ཞེས་པས་རིག་པ་འཛིན་པའི་མིང་ཡང་འཐོབ་ཅིང༌། བདེན་པ་མཐོང་ནས་དངོས་གཞི་འཐོབ་པ་ཡིན་ནོ། །དེའང་དངོས་གྲུབ་ཀྱི་རྩ་བ་རྡོ་རྗེའི་བླ་མ་མིག་བཞིན་དུ་བསྟེན་ནས་ཅི་གསུང་གི་བཀའ་ནོད་ཅིང༌། བསྐྱེད་རྫོགས་ཀྱི་སྔོན་དུ་འགྲོ་བའི་བསག་སྦྱངས་ཀྱི་རིམ་པ་མཐའ་དག་པ་དང་འབྲེལ་བར་བསྐྱེད་རིམ་དང་རྫོགས་པའི་རིམ་པ་བསྒོམ་པ་ལ་ཞུགས་པ་ན་རྣམ་པར་སྨིན་པའི་ལུས་ལྷའི་རང་བཞིན་དུ་བལྟ་བ་ལ་སོགས་པའི་དབྱེ་བས་དྲན་པ་ཉེར་གཞག་བཞིའི་དོན་བསྒོམ་པ་ལ་སོགས་པ་ཚོགས་ལམ་དང་མཐུན་ནོ། །དེ་ནས་རིམ་གྱིས་བསྐྱེད་རྫོགས་སོ་སོའི་ཡོན་ཏན་སྟོབས་སུ་གྱུར་ནས་རྣམ་པར་མི་རྟོག་པའི་ཡེ་ཤེས་མཐོང་ལམ་ལ་སྦྱོར་བས་སྦྱོར་ལམ་དང༌། རྒྱུ་དེ་ལས་བལྟ་བ་ཤིན་ཏུ་རྣམ་པར་དག་པའི་ཆོས་ཉིད་ཆོས་ཀྱི་མིག་རྡུལ་དང་བྲལ་བ་མཐོང་བས་མཐོང་ལམ། མཐོང་ཟིན་སྒོམ་པར་བྱེད་པས་བསྒོམ་ལམ། བསླབ་བྱ་མཐའ་དག་པ་ཡོངས་སུ་རྫོགས་
ནས་སློབ་ཏུ་མེད་པ་མི་སློབ་པའི་ལམ་སྟེ་ཕ་རོལ་ཏུ་ཕྱིན་པ་ལས་གསུངས་པའི་བསྐལ་པ་གྲངས་མེད་གསུམ་གྱིས་ཐོབ་བྱ་ཐེག་བསྡུས་ལས། བཟང་དང་སྨོན་པའི་སྟོབས་ཆེན་གྱིས། །བྱང་ཆུབ་སེམས་དཔའ་གྲངས་མེད་གསུམ། །ཀུན་ཏུ་བརྩམས་པར་མཛད་ཅེས་བརྗོད། །ཅེས་པའི་ཚད་གཟུང་ཅན་འདིར་གསང་སྔགས་ཕྱི་པའི་ཚུལ་ལས་ཀྱང༌། སྐལ་བ་བར་མ་དང༌། མོས་པ་རབ་དང༌། མཉམ་པར་གཞག་པ། མཆོག་ཏུ་གྱུར་པས་བསྙེན་པ་དང་མཚན་མ་བསྙེན་པར་གྱུར་པ་ལས་མཐོང་བའི་ཆོས་ལ་དངོས་གྲུབ་ཆེན་པོ་འཐོབ་པར་འགྱུར་ལ། དེ་ལྟར་འཐོབ་པས་སངས་རྒྱས་ཀྱི་ཞལ་མཐོང་བར་ནུས་ནས། དེ་ནས་སྐྱེ་བ་གཅིག་གམ། གཉིས་སམ། གསུམ་ལ་སོགས་པའི་རིམ་གྱིས་བླ་མེད་པའི་བྱང་ཆུབ་འཐོབ་ལ། རྣལ་འབྱོར་བླ་ན་མེད་པ་ལས་ནི། སྐལ་བ་ཆུང་བར་གྱུར་ཀྱང་མོས་པ་དང༌། བརྩོན་འགྲུས་དང༌། དགེ་བའི་བཤེས་གཉེན་གྱི་སྟོབས་གསུམ་ཚོགས་ནས་མཐོང་བའི་ཆོས་ལ་རྣམ་པར་སྨིན་པ་དང་ཚེ་ལ་དབང་བའི་རིག་འཛིན་འཐོབ་པར་འགྱུར་ལ། ཚེ་དེས་ཀྱང་མྱུར་དུ་སངས་རྒྱས་ཀྱི་ས་འཐོབ་པའི་ཚུལ་ཡང་འདུས་པ་ལས། འདི་ཡིས་བཅོམ་ལྡན་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོ་རྣམ་པར་བརྒྱན། །ཚེ་འདི་ཉིད་ལ་
ཐོབ་པར་འགྱུར། །ཞེས་དང༌། དུས་ཉེ་བ་ནི་གསང་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ན་ནི། །མ་བསྒོམས་པར་ཡང་དངོས་གྲུབ་འཐོབ། །ཅེས་སོ། །དེའང་ངེས་པའི་དོན་དུ་ནི་དུས་ཀྱི་ཚད་གཟུང་བར་མི་རུང་སྟེ། འདི་ལྟར་དུས་ནི་རྟོག་པས་བཏགས་པའི་སྣང་བ་སྟེ། དེ་བས་ན་གང་དུ་སེམས་ལ་རང་དབང་མ་ཐོབ་ཀྱི་བར་དུ་ནི་ཡུལ་དང་དུས་ལ་སོགས་པའང་སོ་སོའི་རང་མཚན་འཛིན་པ་ལྟར་སྣང་ལ། སེམས་ལ་དབང་ཐོབ་ཕན་ཆད་ནི་ཡུལ་དུས་དེ་དག་ཀུན་རྫོབ་པ་ཡིན་ཏེ། འཕགས་པ་དྲི་མ་མེད་པས་བསྟན་པ་ལས། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་བརླབ་བོ། །ཞེས་གསུངས་པའི་ཕྱིར་རོ། །དེ་བཞིན་དུ་ས་ཐོབ་པའི་ཡོན་ཏན་དང་དབང་ཐོབ་པའི་ཡོན་ཏན་གཉིས་མཐོང་ཆོས་སུ་རྫུ་འཕྲུལ་ལ་སོགས་པ་མི་འདྲ་ཡང༌། སངས་རྒྱས་ཐོབ་པ་ལ་འབྲས་བུ་ལམ་དུ་བྱེད་པའི་ཆ་ནས་འདི་ཉིད་ཉེ་བས་ལམ་ཤིན་ཏུ་ཟབ་པ་ཡིན་ཏེ། འདི་ལྟར་སྔགས་ཀྱི་དབང་ཐོབ་པའི་སྐྱེས་བུ་ནི་ཐ་པ་ལེགས་པར་སྦྱངས་པའི་ཞིང་ས་ལ་ས་བོན་སྐྱོན་མེད་བཞག་པ་བཞིན་དུ། གཞི་དང་པོའི་གནས་ལུགས་ལ་གློ་བུར་བའི་དྲི་མ་གཉིས་ཀྱིས་བསླད་པའི་
སྦྱང་གཞི། རྟེན་ཅིང་འབྲེལ་བར་འབྱུང་བའི་དབང་གིས་སྦྱངས་པས། ཟག་པ་དང་བྲལ་བའི་སྐྱེ་མེད་ཀྱི་ཡེ་ཤེས་མཐོང་བའི་འབྲས་བུ་ལ་སྤྱོད་པས་ན་ལམ་ཡང་འབྲས་བུ་དང་མཐུན་པས། འབྲས་བུ་ལམ་དུ་བྱེད་པ་ཞེས་བྱ་སྟེ། དངོས་པོའི་གནས་ལུགས་དང་མཐུན་པར་སྦྱོང་བ་ཡིན་པས་རྒྱུ་ལ་འབྲས་བུས་རྒྱས་གདབ་པའམ། འབྲས་བུ་ལ་རྒྱུས་རྒྱས་གདབ་པའི་ཕྱིར་དབང་བསྐུར་ཁོ་ནས་སྨིན་པ་ཞིག་དགོས་ཀྱིས། དེ་ལྟར་སྨིན་པ་ལ་དབང་གི་དེ་ཁོ་ན་ཉིད་ལེགས་པར་ཤེས་དགོས་པའི་ཚུལ་མཉམ་སྦྱོར་ལས། དཀྱིལ་འཁོར་དུ་ནི་མ་ཞུགས་དང༌། །དམ་ཚིག་རྣམས་ནི་སྤངས་པ་དང༌། །གསང་བའི་དེ་ཉིད་མི་ཤེས་པས། །བསྒྲུབས་ཀྱང་ཅི་ཡང་མི་འགྲུབ་བོ། །ཞེས་དང༌། སངས་རྒྱས་ཐོད་པ་ལས། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོངས་པ་ཉིད། །དེ་བཞིན་དབང་དང་བྲལ་བའི་ལུས། །ཡེ་ཤེས་ཀུན་གྱིས་སྟོངས་པ་ཡིན། །དཔེར་ན་པི་ཝང་སྦྱོར་སོགས་ཀུན། །རྒྱུད་དང་བྲལ་ན་བརྡུང་མི་ནུས། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །ཞེས་པས་དབང་ནི་ལམ་གྱི་འཇུག་སྒོ་ཙམ་དུ་བལྟ་བ་མ་ཡིན་པར། དཔེར་ན་གསེར་ལ་བསྲེགས་བཅད་བརྡར་བ་ཞེས་བསྲེགས་པས་གསེར་ཡིན་
མིན་གྱི་མཚང་བརྟོལ་བ་དང༌། བཅད་པས་གསེར་གྱི་སྲོག་ཤེས་པར་བྱ་བ་དང༌། བརྡར་བས་བསླད་པ་ངན་པ་དང༌། རང་བཞིན་ངན་པའི་བྱེ་བྲག་ཤེས་པར་བྱ་བ་བཞིན་དུ། ཕྱིན་ཅི་མ་ལོག་པའི་རྒྱུད་དང༌། ངེས་པའི་ལུང་དང༌། དངོས་གྲུབ་ཐོབ་ཅིང་མཁས་པར་གྱུར་པའི་བླ་མ་དག་གི་མན་ངག་དང༌། དེ་གཉིས་དང༌། མཐུན་པར་ཞུགས་པའི་སོ་སོར་རྟོག་པའི་ཤེས་རབ་ཀྱིས་མངོན་སུམ་དུ་རྟོགས་པར་མ་བྱས་ན་སྔགས་ཀྱི་དོན་ནི་ཟབ་ཅིང་བརླིང་ལ། དཀྱེལ་ཆེ་བས་རྗེས་སུ་དཔགས་པ་ཙམ་གྱིས་དངོས་གྲུབ་ཐོབ་པ་མ་ཡིན་ནོ། །ཅིའི་ཕྱིར་ན་རྡོ་རྗེ་ཐེག་པའི་གཞི་ལམ་འབྲས་བུའི་ཆོས་སྒོ་མཐའ་དག་པ་ནི། དབང་གི་རང་བཞིན་ལ་ལེགས་པར་རྫོགས་ཤིང་རིམ་པ་གཉིས་ཀྱི་ལམ་ཡང་དེར་འདུ་བ་ཡིན་པས། རྒྱུད་སྡེ་རྣམས་ནས་ཀྱང་དབང་བསྐུར་ཁོ་ནའི་བསྔགས་པ་གསུངས་ལ། དེའང་ཐོག་མར་སྟ་གོན་དང་དཀྱིལ་འཁོར་དུ་གཞུག་པའི་སྐབས་སུ་སྐྱབས་སུ་འགྲོ་བ་དང༌། སེམས་བསྐྱེད་པ་དང༌། ཐེག་ཆེན་ཐུན་མོང་བ་དང༌། བྱེ་བྲག་པའི་སྡོམ་བཟུང་བསླབ་བྱ་དང་བཅས་པ་ལ་ལེགས་པར་དཔྱོད་ཤེས་ན་བྱང་ཆུབ་སེམས་དཔའི་སྡེ་སྣོད་ལ་ལོགས་སུ་བསླབ་མི་དགོས་པའི་ཤུགས་བསྟན་གྱིས་ཉན་ཐོས་ཀྱི་སྡེ་སྣོད་ཀྱང་ཞར་
ལ་ཁོང་དུ་ཆུད་ནས་མདོ་སྔགས་རྫས་འགལ་བའི་ལོག་རྟོག་ཀྱང་ལྡོག་པར་འགྱུར་ལ། དངོས་གཞི་དབང་གི་ངོ་བོ་དང༌། དེ་ཐོབ་པས་རྒྱུད་ལ་ནུས་པ་ཇི་ལྟར་འཇོག་དང༌། ལམ་གང་བསྒོམ་པ་ལ་དབང་དང༌། འབྲས་བུ་ཇི་ལྟ་བུ་ཐོབ་པའི་ཚུལ་ཡང་ལེགས་པར་ཤེས་པ་ཡིན་ལ། དེའི་བདག་པོའི་རྐྱེན་དུ་གྱུར་པ་ནི་ཐོག་མར་བླ་མ་ཁོ་ན་ལ་རག་ལུས་པ་ཡིན་པས་དེའི་མཚན་ཉིད་སྔར་ལེགས་པར་བཤད་པ་ལྟར་གྱི་སྟེང༌། དབང་དོན་མི་ཤེས་ན་སྨོས་ཅི་དགོས་ཏེ་ཤེས་ཀྱང་རྩ་ལྟུང་དག་པར་མ་བྱས་པ་དང༌། ཆོ་ག་ལ་ནོར་འཁྲུལ་དང་གཟུ་ལུམ་སླ་ཆོས་འཚལ་བ་དག་གིས་ནི་སློབ་མའི་རྒྱུད་ལ་རིག་འཛིན་གྱི་སྡོམ་པ་གཞག་པར་མི་ནུས་ཏེ། སོ་ཐར་གྱི་ལས་ཆོ་ག་ལ་ནོར་འཁྲུལ་བྱུང་ན་སོ་ཐར་གྱི་སྡོམ་པ་མི་སྐྱེ་བ་བཞིན་ནོ། །དེའང་ལས་ཆོག་ལ་ནོར་འཁྲུལ་བྱུང་ན་དགྲ་བཅོམ་པའི་གོ་འཕང་ལ་བསྒྲིབ་པ་ཙམ་ཡིན་མོད། དབང་ལ་ནོར་འཁྲུལ་བྱུང་ན་རྣམ་པ་ཐམས་ཅད་མཁྱེན་པའི་གོ་འཕང་ལ་བསྒྲིབ་པས་དེ་གཉིས་ཀྱི་འབྲས་བུ་ལ་རྒྱ་མཚོ་དང་བ་གླང་གི་རྨིག་རྗེས་ཀྱི་ཆུ་ཙམ་མོ། །དེ་བས་ན་བུམ་དབང་གི་ལམ་བསྐྱེད་རིམ་གྱི་སྦྱང་གཞི་སྦྱོང་བྱེད་དང༌། གསང་དབང་གི་ལམ་གཏུམ་མོའི་དྲོད་ཙམ་ལ་དམིགས་པ་མུ་སྟེགས་བྱེད་ལའང་ཡོད་མོད་ཀྱི་ནང་དུ་ཡེ་ཤེས་སྐྱེ་བའི་
རྟེན་ཅིང་འབྲེལ་འབྱུང་ཤེས་པ་དང༌། དབང་གོང་མ་གཉིས་ཀྱི་ཡེ་ཤེས་དམིགས་གཏད་ཅན་ཙམ་སྐྱེས་ནའང༌། ཉོན་མོངས་པ་དང་རྣམ་རྟོག་འབྱེད་པའི་ཐབས་ལ་མི་མཁས་པའི་བླ་མས་ནི་དབང་དོན་ཤེས་པ་མ་ཡིན་པས་དེ་ལྟ་བུ་ལ་སློབ་མས་མོས་པ་བྱས་ཀྱང་གནས་སྐབས་ཀྱི་བདེ་སྐྱིད་ཙམ་དང༌། རིམ་གྱིས་འགྲུབ་པའི་རྒྱུ་ཙམ་དུ་སྲིད་ཀྱིས། གསང་སྔགས་ནས་བླ་མ་སངས་རྒྱས་དངོས་སུ་གསུངས་པའི་བྱིན་རླབས་འབྱུང་བ་མ་ཡིན་པས་ཚེ་འདིའམ་བར་དོར་སངས་རྒྱས་ཀྱི་འབྲས་བུ་སྦྱིན་མི་ནུས་སོ། །ཅིའི་ཕྱིར་ན་ཕ་རོལ་ཏུ་ཕྱིན་པ་མན་ཆད་དུ་བླ་མ་སངས་རྒྱས་སུ་བལྟ་བར་བྱ་ཞེས་གསུངས་ལ། སྔགས་སུ་བླ་མ་སངས་རྒྱས་དངོས་ཡིན་པ་ནི་དབང་བསྐུར་བ་ཚུལ་བཞིན་ཐོབ་པའི་སློབ་དཔོན་གྱི་ངོ་ཁ་ལ་ཡིན་ཏེ། དེ་སྐད་དུ་ཞང་ཞུང་པཎྜི་ཏས། སྐྱོན་ཅན་སྤང་བྱའི་སློབ་དཔོན་གྱིས། །དབང་གི་ཆོ་ག་བྱས་ཀྱང་ནི། །སངས་རྒྱས་ས་བོན་ཚུལ་བཞིན་དུ། །ཐེབས་པར་འགྱུར་བ་མ་ཡིན་ཏེ། །དེ་བརྟེན་གཉིས་ཀ་དམྱལ་བ་རུ། །འདྲེན་པར་བྱེད་པ་གསུངས་པ་ཡིན། །ཞེས་སོ། །དེ་བས་ན་སྒྲིབ་པ་བཞི་དག་ཅིང་འབྲས་བུ་བཞི་མངོན་དུ་བྱེད་པ་དབང་ལ་རག་ལས་པ་ཡིན་པས། དེའང་རྒྱུ་ལ་གནས་ཚུལ་ཤེས་ནས་རྐྱེན་བླ་མ་དང་
དཀྱིལ་འཁོར་ལས་ཐོབ་པའི་གནད་འཁྲུལ་པ་མེད་པ་ཤེས་པར་བྱས་ནས་འབྲས་བུ་བསྒྲུབ་པའི་ཐབས་ལ་མཁས་པས་ནན་ཏན་དུ་འབད་པར་བྱའོ། །དབང་གི་ཆོ་གའི་རྗེས་ཀྱི་བྱ་བ་རྣམས་ནི་དཀྱིལ་ཆོག་རྣམས་ཀྱིས་ཤེས་པར་སླ་བས་འདིར་མ་བྲིས་སོ། །གཉིས་པ་ལམ་ལ་བསྐྱེད་རྫོགས་རྣམ་གཉིས་ལས། དང་པོ་བསྐྱེད་རིམ་སྐྱེ་གནས་རྣམ་པ་བཞིའི། །བག་ཆགས་སྦྱང་ཕྱིར་དེ་དང་མཐུན་པར་སྟོན། །བསྐྱེད་ཚུལ་འཁོར་བའི་རྣམ་པ་དང་མཐུན་པས། །སྲིད་པ་གསུམ་པོ་མ་ལུས་སྦྱོང་ཞིང་དག །མྱ་ངན་འདས་དང་བཞུགས་ཚུལ་མཐུན་པ་ཡི། །ལྷ་ཡི་རྣམ་པས་འབྲས་བུ་གཞི་ལ་རྫོགས། །གཉིས་ཀའང་རྫོགས་པའི་རིམ་པའི་སྨིན་བྱེད་དུ། །འགྲོ་བའི་དག་རྫོགས་སྨིན་གསུམ་སྤྱི་ལ་གཅེས། །དེ་ལ་ཐེག་པ་ཆེན་པོའི་སྒོར་ཐབས་ཀྱི་སྤྱད་པ་སྤྱོད་པའི་སྐྱེས་བུ་ཆེན་པོ་གཉིས་ཀྱི་དོན་དུ་གཉེར་བྱ་ནི་སེམས་ཅན་གྱི་དོན་དུ་གཟུགས་ཀྱི་སྐུ་བསྒྲུབ་པ་ཁོ་ན་ཡིན་ལ། དེ་འཐོབ་པའི་ཐབས་ནི་སྔགས་ཀྱི་ལམ་དུ་དམ་ཚིག་དང་སྡོམ་པ་རྣམ་པར་དག་པར་བྱས་ནས་འཁོར་བའི་རྣམ་པ་དང་མཐུན་པའི་ལྷའི་རྣལ་འབྱོར་ལམ་དུ་བྱེད་པས་སྲིད་པ་གསུམ་དུ་གོལ་བའི་ཐ་མལ་གྱི་སྣང་ཞེན་མ་ལུས་པ་སྦྱོང་ཞིང་དག་པར་བྱེད་ལ། དེ་ལྟར་དག་པས་མྱང་འདས་དང་བཞུགས་ཚུལ་མཐུན་པའི་
ལྷའི་རྣམ་པ་ལམ་བྱེད་ཀྱིས་མཚན་དཔེའི་སྐུ་འགྲུབ་པའི་རྒྱུ་བྱས་ཏེ་དོན་གཉིས་ལྷུན་གྲུབ་ཀྱི་ས་ལ་ཕྱིན་པ་ནི་ཐོབ་བྱ་འབྲས་བུའི་རྒྱུད་གཞི་རྫོགས་ཆེན་པོའང་ཡིན་ལ། དེ་གཉིས་རྫོགས་རིམ་གྱི་སྨིན་བྱེད་དུ་འགྲོ་ཚུལ་དང༌། དག་རྫོགས་སྨིན་གསུམ་གྱི་མཚན་ཉིད་འོག་ཏུ་བཤད་པར་བྱའོ། །དེ་ལྟར་འབྲས་བུའི་རྒྱུད་དེ་མངོན་དུ་བྱེད་པ་ལ་ཉེ་བར་ལེན་པའི་རྒྱུ་དང༌། ལྷན་ཅིག་བྱེད་པའི་རྐྱེན་གཉིས་ཐབས་ཤེས་ལྟ་བུར་ཚོགས་དགོས་པས་ཉེར་ལེན་ནི་གཞིའམ་རྒྱུའི་རྒྱུད་དང༌། བྱེད་ཅན་ནི་ཐབས་སམ་ལམ་གྱི་རྒྱུད་ཡིན་པས་འཁོར་འདས་ལམ་གསུམ་གཞི་ལམ་འབྲས་བུའི་རྒྱུད་དུ་འདུས་པའི་ཚུལ་ཧེ་བཛྲ་ལས། འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཉིད། །འཁོར་བ་སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །ཞེས་པས་རང་བཞིན་ལྷན་ཅིག་སྐྱེས་པའི་དུས་ན། གསལ་བ་ནི་འཁོར་བ། སྟོང་པ་ནི་མྱང་འདས། ཉམས་ལེན་གྱི་སྐབས་སུ། སེམས་ནི་འཁོར་བ། རང་བཞིན་མེད་པ་ནི་མྱང་འདས། འབྲས་རྒྱུད་ཀྱི་སྐབས་སུ་ལྷུན་གྲུབ་འཁོར་བ། གནས་འགྱུར་མྱང་འདས་ཏེ། དེ་ཀུན་ལ་ལམ་གྱི་མན་ངག་ཐབས་རྒྱུད་སྦྱར་བས་ཐབས་དང༌། རྒྱུ་དང་འབྲས་བུའི་རྒྱུད་གསུམ་དུ་གནས་པ་ཡིན་ནོ། །དེ་ལ་
སེམས་ཅན་ཐམས་ཅད་ལ་རང་ཆས་སུ་ལྡན་པའི་སེམས་ཀྱི་རང་བཞིན་བདེ་བར་གཤེགས་པའི་སྙིང་པོ་མི་ཤིགས་པ་ཁྱད་པར་གསུམ་ལྡན་རྟོགས་ན་མྱང་འདས་དང༌། མ་རྟོགས་ན་འཁོར་བའི་རྒྱུ་བྱེད་པ་གང་ཞིག་འཁོར་འདས་ཐམས་ཅད་དུ་འགྱུར་བ་མེད་པར་རྒྱུན་ཆགས་པས་ན་གཞིའམ་རྒྱུའི་རྒྱུད་ཅེས་བྱ་སྟེ། ངོ་བོ་ཉིད་དང་འཆིང་གྲོལ་མེད་པའི་ཆ་ནས་དོན་གྱི་གནས་ལུགས། རྣམ་པ་དྲི་མ་དང་བཅས་ཀྱང་རང་ངོ་ལ་གོས་མ་མྱོང་བས་བདེ་གཤེགས་སྙིང་པོ། མཚན་ཉིད་མེད་པའི་ཆ་ནས་ཆོས་སྐུ་དང༌། རང་བཞིན་གྱི་གདངས་མ་འགགས་པའི་ཆ་ནས་གཟུགས་སྐུའི་ཡོན་ཏན་གྱི་རྟེན་དུ་གནས་པ་གང་ཞིག་ལམ་དུས་སུ་བྱང་ཆུབ་ཀྱི་སེམས་དང༌། བདེན་པ་དབྱེར་མེད་དང༌། རང་བྱུང་གི་ཡེ་ཤེས་ལ་སོགས་པའི་ཐ་སྙད་སྣ་ཚོགས་སུ་ཆགས་པ་སྟེ། རྟེན་མེད་ཅིང་བདག་ཉིད་ཐོབ་པ་མེད་བཞིན་དུ། རྒྱུད་ལས། རང་བྱུང་ཡེ་ཤེས་གནས་མེད་སྣང༌། །ཞེས་པ་ལྟར་ལྷན་ཅིག་བྱེད་པའི་རྐྱེན་གདམས་ངག་བར་མ་ཆད་པའི་ཐབས་ཀྱི་རྒྱུད་ལ་བརྟེན་ནས་གློ་བུར་གྱི་དྲི་མ་སྦྱངས་པས་ཡོངས་སུ་དག་པའི་ཞིང་ཁམས་ན་སྐུ་དང་ཡེ་ཤེས་ཀྱི་བཀོད་པ་སྣ་ཚོགས་སུ་སྣང་བ་ནི་གཞན་གྱིས་མི་འཕྲོགས་པ་འབྲས་བུའི་རྒྱུད་ཅེས་བྱའོ། །དེ་ལྟ་བུའི་གཞི་ལམ་འབྲས་བུའི་རྒྱུད་ནི་ཀུན་ཁྱབ་
ཀྱི་ཚད་མ་གསུམ་ལ་བརྟེན་ནས་གཏན་ལ་དབབ་དགོས་ཏེ། རྒྱལ་བའི་བཀའ་དྲི་མ་མེད་པའི་ལུང་ཚད་མ་དང༌། མཁས་པས་ཉམས་སུ་བླངས་ཤིང་གྲོལ་བའི་དབང་པོ་ཡོད་པའི་མན་ངག་ཚད་མ་དང༌། གཉིས་ཀ་དང་རྗེས་སུ་མཐུན་པའི་རིགས་པ་ཚད་མ་སྟེ་རྡོ་རྗེ་མེ་ལོང་ལས། ལུང་དང་རིགས་པ་མན་ངག་གིས། །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་སོ། །དེ་ལྟར་ཚད་མ་གསུམ་གྱིས་གཏན་ལ་ཕབ་པའི་ཡིད་ཆེས་རྣམ་པ་གསུམ་ལ་བརྟེན་ནས་རྒྱུད་ཀྱི་དོན་ཁོང་དུ་ཆུད་པར་བྱ་བའང་དུས་ཀྱི་འཁོར་ལོ་ལས། དང་པོར་བླ་མ་ལ་ཡིད་ཆེས་པར་བྱའོ། །དེའི་རྗེས་སུ་རང་ཉིད་ལ་ཡིད་ཆེས་པར་བྱའོ། །དེའི་རྗེས་སུ་རྒྱུད་ཀྱི་རྒྱལ་པོ་ལ་ཡིད་ཆེས་པར་བྱའོ། །དེ་ལྟར་ཡིད་ཆེས་རྣམ་པ་གསུམ་གྱིས་རྒྱུད་དོན་མ་ལུས་པ་རྟོགས་པར་འགྱུར་རོ། །ཞེས་སོ། །དེ་ཡང་སྔགས་རང་གཞུང་གི་གྲུབ་པའི་མཐའ་ལ། ཐོག་མར་རྟོགས་བྱའི་ལྟ་བ་རྒྱུ་རྒྱུད་གནས་ལུགས་ཀྱི་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་དགོས་ཏེ་རྒྱལ་བའི་ཞབས་ཀྱིས། དེ་ལ་དང་པོར་གནས་ལུགས་ཤེས་པ་གཅེས། །ཐེག་པའི་དབང་གིས་རྣམ་པ་མང་ན་ཡང༌། །ངེས་པའི་སྙིང་པོ་བདེན་པ་དབྱེར་མེད་དེ། །སངས་རྒྱས་རྣམས་ཀྱི་གསང་པའི་མཛོད་ཁང་ཡིན། །ཞེས་གསུངས་ལ། དེ་ཤེས་
པ་ནི་རྟོག་གེ་རྣམ་པར་འཁྱམས་པའི་ལུང་རིགས་ལྟར་སྣང་བ་ཙམ་གྱིས་གཏན་ལ་མི་ཕེབས་པས་བླ་མ་མཚན་ཉིད་དང་ལྡན་པ་བཙལ་ཏེ་དེ་ལ་སྙིང་ཐག་པ་ནས་ཡིད་ཆེས་པས་སངས་རྒྱས་ཀྱི་འདུ་ཤེས་བཞག མོས་གུས་ཀྱི་ལྕགས་ཀྱུས་བླ་མའི་ཐུགས་ཤིན་ཏུ་རྣམ་པར་མི་རྟོག་པའི་ཡེ་ཤེས་དབང་དུ་བསྡུས་ནས་རང་གིས་མངོན་སུམ་དུ་མཐོང་བའི་ཆོས་ཉིད་ལ་ཐེ་ཚོམ་མི་སྐྱེ་བ་ནི་རང་ལ་ཡིད་ཆེས་པ་ཞེས་བྱའོ། །དེ་སྐད་དུ་བརྟག་གཉིས་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟན་པ་དང༌། །རང་གི་སེམས་ཉིད་ལས་ཤེས་བྱ། །ཞེས་སོ། །དེའི་ཚེ་ཐ་སྙད་ཀྱི་ཤེས་ངོ་ཙམ་མ་ཡིན་པའི་གཤིས་ཀྱི་བཞུགས་ཚུལ་ཇི་ལྟ་བར་རྟོགས་པས་ཆོས་ཐམས་ཅད་དོན་དམ་པར་སྐྱེ་འགག་མེད་པ་དང༌། ཀུན་རྫོབ་ཏུ་སྒྱུ་མ་ཙམ་དུ་མི་འགག་པས་ཕ་རོལ་ཏུ་ཕྱིན་པ་དང་ཐ་སྙད་ཙམ་དུ་མཐུན་པས་ཚིག་གི་ལམ་དུ་མདོ་སྔགས་ཀྱི་ལྟ་བ་ལ་ཁས་ལེན་གཉིས་པ་མ་མཆིས་ཀྱང༌། སྔགས་ལམ་དུ་ཀུན་རྫོབ་པའི་ཆ་ཐམས་ཅད་ཡོངས་སུ་དག་པའི་ལྷའི་རྣམ་རོལ་དུ་རང་ཤར་ཞིང༌། བདེན་པ་གཉིས་ཀྱང་དུས་མཉམ་དུ་རང་བཞིན་ཡོངས་གྲུབ་ཆེན་པོར་ཟུང་དུ་འཇུག་པའི་ཐ་དད་རིས་མེད་ཆེན་པོ་ལ་དུས་སྔ་ཕྱི་མེད་པས་རིམ་གཉིས་
ཕྱོགས་རེ་བ་དང་ཕྱོགས་རེ་བ་མ་ཡིན་པ་ཉིད་དུ་རྣམ་པའི་བློས་བརྟགས་ཤིང་དཔྱད་པའི་བློ་རྫས་སོ་སོ་བ་སླར་ཟུང་དུ་འཇུག་ཏུ་མེད་པའི་ཁྱད་པར་ཤེས་ན་ལྟ་བའི་གནས་ལུགས་ཕྱག་རྒྱ་ཆེན་པོའང་མན་ངག་ལྟར་བཤད་པའི་རྒྱུད་ཀྱི་དོན་དུ་གནས་པ་མཐོང་ནས་ཡིད་ཆེས་ཁྱད་པར་ཅན་སྐྱེ་བར་འགྱུར་ཏེ། ས་ར་ཧས། སྲིད་དང་ཞི་བ་མཉམ་པ་ཉིད་ལེགས་ཕྱག་རྒྱ་ཆེ། །ཞེས་བཤད་དོ། །དེའང་གཞིའི་ཆས་གནས་སྐབས་སུ་བདག་གིར་བྱས་པའི་དྲི་མ་དེ་ཐབས་སམ། ལམ་གྱི་རྒྱུད་སྨིན་གྲོལ་གཉིས་ཀྱིས་སྦྱོང་བ་ལས་དང་པོ་ནི་སྔར་བཤད་ཟིན་ལ། གཉིས་པའི་དོན་ནི་སྦྱང་བྱ་འཁྲུལ་པའི་རང་བཞིན་གློ་བུར་པ་ཀུན་བརྟགས་དང༌། དེའི་ས་བོན་གྱི་ཆ་གཉིས་ལ་ལྟོས་ནས་སྦྱོང་བྱེད་བསྐྱེད་རྫོགས་གཉིས་སུ་གསུངས་ཏེ། སྙིང་པོའི་རྒྱུད་ཕྱི་མ་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་པ་དང་མཐུན་པར་སློབ་དཔོན་འཕགས་པས་ཀྱང༌། བསྐྱེད་པའི་རིམ་པར་ལེགས་གནས་ཏེ། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་
གསུངས། །ཞེས་སྦྱང་གཞི་ལ་ལྟོས་ནས་བསྐྱེད་རྫོགས་སོ་སོ་བར་བཤད་པའི་དབང་དུ་བྱས་ན་དང་པོ་བསྐྱེད་རིམ་གྱི་དགོས་པ་ནི་སོ་སྐྱེའི་དུས་ན་དྲི་བཅས་དེ་བཞིན་ཉིད་ཀྱི་སྣང་བ་ཀུན་བརྟགས་པས་གློ་བུར་དུ་བཟོས་པའི་སྣོད་དང་བཅུད་ལ་ཐ་མལ་དུ་འཛིན་པ་བཅོས་མ་བསྐྱེད་པའི་རིམ་པས་སྦྱོང་ཞིང༌། ཞར་ལ་ཐལ་བྱུང་གི་སྟོང་རྐྱང་དུ་བལྟ་བའང་ལྡོག་པར་འགྱུར་ལ། ལམ་གྱི་ཆ་ནས་མ་དག་པའི་ས་བདུན་བགྲོད་པ་དང༌། འབྲས་བུ་གཟུགས་སྐུའི་རྟེན་འབྲེལ་སྒྲིག་པ་སྟེ་རྡོ་རྗེ་མཁའ་འགྲོ་ལས། དཀྱིལ་འཁོར་ལ་སོགས་ལས་གང་ནི། །བཅོས་མའི་སེམས་ཀྱིས་གང་བྱེད་པ། །ཕྱི་རོལ་ལས་རྣམས་གསལ་བྱེད་པས། །དང་པོའི་ལས་ཅན་རྣམས་ལ་བསྔགས། །ཞེས་རྫོགས་རིམ་བསྐྱེད་པའི་རྟེན་ལྟ་བུར་ཡང་གསུངས་སོ། །གཉིས་པ་རྫོགས་རིམ་གྱི་དགོས་པ་ནི། འཕགས་པའི་ལམ་དུ་བཅོས་མ་དང་བྲལ་བ་མངོན་སུམ་པའི་ལྷའི་རྣལ་འབྱོར་ཞེས་བྱ་སྟེ་བཞིན་ལག་གི་རྣམ་པ་ཅན་དུ་མི་གནས་པའི་ཞུ་བདེ་མཚུངས་ལྡན་གྱི་ལྷ་སྐུ་ཁ་སྦྱོར་ཞེས་པ་གོང་བུའི་བདག་ཉིད་ཅན་ལ་བརྟེན་པ་སྟེ། སྡོམ་འབྱུང་ལས། རྩ་རྣམས་དེ་དག་ཐམས་ཅད་ནི། །ལུས་ནི་དགེ་བར་བྱེད་པ་སྟེ། །དེ་ཡི་ཚོགས་ལས་ཡང་དག་བྱུང༌། །གོང་བུ་ལྷ་ཡི་བདག་ཉིད་དོ། །གཟུགས་ལས་
འདས་པ་གོང་བུར་འགྱུར། །ཞེས་སོ། །དེས་སྦྱང་བྱ་འཕོ་བའི་བག་ཆགས་ཀྱི་དྲི་མ་སྦྱོང་ཞིང༌། ལམ་གྱི་ཆ་ནས་དག་པའི་ས་གསུམ་བགྲོད་པ་དང༌། འབྲས་བུ་ལྷན་སྐྱེས་བདེ་བ་ཆེན་པོའི་སྐུ་དང་མཆོག་གི་དངོས་གྲུབ་བསྒྲུབ་པའོ། །དེ་ལྟར་བསྐྱེད་རྫོགས་སོ་སོའི་སྦྱང་གཞི་ལ་ལྟོས་ན་དང་པོའི་སྦྱང་གཞི་སྲིད་པར་བསྐྱེད་རིམ་གཉིས་པའི་སྦྱང་གཞི་ཆོས་ཉིད་སྡུད་རིམ་ལ་བྱེད་པ་སྟེ། བརྟག་གཉིས་ལས། སྲིད་པ་སྐྱེ་བ་བསྐྱེད་རིམ་འགྱུར། །འགགས་པ་ཤེས་རབ་སྲིད་མཐར་བྱེད། །ཅེས་དང༌། དེ་གཉིས་སྐྱེ་འཕགས་ཀྱི་ལམ་གཉིས་སུ་བཞག་ནས་རང་རང་དང་རྗེས་སུ་མཐུན་པའི་དངོས་གྲུབ་ཐོབ་ཚུལ་ཡང་སྙིང་པོའི་རྒྱུད་ཁ་ཆེ་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་འཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་དང༌། འདུས་པ་ལས་ཀྱང༌། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང༌། །རྫོགས་པ་ཡི་ནི་རིམ་པའོ། །ཞེས་སོ། །དེ་གཉིས་སོ་སོའི་བསྐྱེད་སྡུད་ཀྱི་རིམ་པས་སྐྱེ་འཆི་གཉིས་ཀྱི་རང་བཞིན་བདེན་པ་གཉིས་ལ་སྦྱོར་ཚུལ་ནི། བསྐྱེད་རིམ་མཐར་
ཕྱིན་ནས་རྫོགས་རིམ་ཐོབ་པ་ཞིག་སྤྱོད་པའི་འཕྲོར་ལུས་ན། འཆི་བའི་དུས་ན་ནི་དོན་དམ་བདེན་པ་མངོན་དུ་བྱ་ལ། སྐྱེ་བའི་དུས་སུ་ནི་ཀུན་རྫོབ་བདེན་པས་སྒྱུ་ལུས་སུ་ལྡང་བར་བྱའོ་སྙམ་པའི་འཕེན་པ་གཏོང་བ་སྟེ་ལམ་རིམ་ལས། སྲིད་པ་རིམ་པར་སྨིན་ཚུལ་དུ། །འཇུག་པའི་ཡན་ལག་ལྔ་རུ་བཞག །གང་དག་དངོས་སུ་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་དང༌། སྤྱོད་བསྡུས་ལས། སྐྱེ་བའི་མིང་ནི་ཀུན་རྫོབ་བདེན་པ་སྟེ། །འཆི་བའི་མིང་ཡང་དོན་དམ་བདེན་པ་ཡིན། །ཞེས་སོ། །དེ་ལྟ་ན་བུམ་དབང་དང་དེའི་ལམ་བསྐྱེད་རིམ་ལ་བརྟེན་ནས་ཀྱང་རྒྱུའི་ས་བཅུ་གཅིག་པ་སོགས་མཆོག་གི་དངོས་གྲུབ་ཐོབ་པའི་རྣམ་གཞག་དང་འགལ་བར་འགྱུར་རོ་ཞེ་ན། དེ་དང་དེའི་རྟེན་འབྲེལ་བསྒྲིགས་ཤིང་ནུས་པ་རྒྱུད་ལ་འཇོག་ཕྱིར་དེ་སྐད་དུ་བསྟན་པ་སྟེ། ཧེ་རུ་ཀ་འདུས་པ་ལས། གང་གིས་གང་ལ་དབང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང༌། །ཞེས་པ་ལྟར། ད་ལྟ་དངོས་སུ་མ་ཐོབ་ཀྱང་ཕྱིས་མངོན་དུ་འགྱུར་ངེས་ཀྱི་རྒྱུ་ཚོགས་ཤིང་གྲངས་ཚང་བར་སོང་བའི་ཕྱིར་ཏེ། འདི་ནི་ཚད་མའི་གཞུང་ལས་ཀྱང༌། མ་ཚང་མེད་རྒྱུ་དེ་ལ་ནི། །
འབྲས་བུ་གང་གིས་བཟློག་པར་བྱེད། །ཅེས་བསྟན་པས་སོ། །ད་ནི་སོ་སོའི་རང་བཞིན་བཤད་པ་ལ་རྫོགས་རིམ་གྱི་རྟོགས་པ་ཁྱད་པར་ཅན་མ་རྙེད་བར་དུ་བསྐྱེད་རིམ་ལ་བརྟེན་ནས་རྟོག་པས་རྟོག་པ་འདུལ་བར་བྱེད་པ་ནི། རྣལ་འབྱོར་ཆེན་པོའི་རྒྱུད་ཀྱི་དགོངས་པ་ཡིན་ཏེ། རྡོ་རྗེ་སྙིང་འགྲེལ་ལས། རྣམ་རྟོག་བག་ཆགས་ཀྱིས་བཅིངས་ལ། །ཐོག་མར་རྟོག་པའི་ཆོ་ག་བསྟན། །ཞེས་པས་ཆོ་གའི་ཁྱད་པར་ནི་ཁྱད་ཆོས་བཞི་དང་ལྡན་པ་སྟེ། རྒྱུ་དང་མཐུན་པའི་བསྐྱེད་ཆོག་ཚང་བ། རང་འབྲས་ཀྱི་སྔགས་ཀྱི་ཡོན་ཏན་བསྐྱེད་པ། ངོ་བོ་ཞུ་བདེ་དང་སྟོང་ཉིད་འབྲེལ་བ། བྱེད་ལས་དག་རྫོགས་སྨིན་གསུམ་ཚང་བའོ། །དང་པོ་ནི། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་འཁོར་བའི་འདྲ་འབག་སྐྱེ་གནས་རྣམ་པ་བཞིའི་བག་ཆགས་སྦྱོང་བ་ལ་ལྟོས་ནས་བསྐྱེད་ཚུལ་རྣམ་པ་བཞིར་བསྟན་པའི་དང་པོ་སྒོང་སྐྱེས་སྦྱོང་བའི་ཚུལ། ཇི་ལྟར་སྒོང་སྐྱེས་ལན་གཉིས་སྐྱེ་བ་ལྟར། །བདག་སྲས་གཞན་སྲས་རྣམ་པ་གཉིས་སུ་བསྐྱེད། །བདག་གི་སྲས་སུ་གཞན་བྱ་བ་ལ་ལྔ། །ས་བོན་ལས་ནི་གཙོ་བོ་
བསྐྱེད་པ་དང༌། །ཕྱོགས་བཅུའི་སངས་རྒྱས་བཀུག་ནས་མཁར་བསྟིམ་དང༌། །སེམས་ཅན་བཀུག་ནས་སྒྲིབ་པ་སྦྱང་བ་དང༌། །གཉིས་སུ་མེད་ལ་ཆེ་བ་བསྐྱེད་པ་དང༌། །མཁའ་ནས་བཏོན་ནས་གདན་ལ་འགོད་པའོ། །གཞན་གྱི་སྲས་སུ་བདག་བྱ་བ་ལ་བརྒྱད། །སྒོ་ང་སྨིན་པ་དེ་དང་དེར་གྱུར་བཞིན། །གཙོ་བོ་འོད་ཞུ་ས་བོན་གྱུར་པ་དང༌། །དེ་ལས་ཡབ་ཡུམ་སྐྱེ་མཆེད་རྫོགས་པ་དང༌། །ཡབ་ཀྱི་རྟོག་པ་ཡི་གེར་གྱུར་པ་དང༌། །ཡུམ་ལས་འོད་འཕྲོ་ལྷ་ལ་གསོལ་གདབ་དང༌། །ཀུན་ཀྱང་རང་བསྟིམ་ང་རྒྱལ་བཟུང་བ་དང༌། །སྙོམས་པར་ཞུགས་ནས་མཁའ་རུ་དཀྱིལ་འཁོར་བསྐྱེད། །རྟོག་པ་ཞེས་གཉིས་ལྷར་གསལ་ཕྱིར་གདོན་དང༌། །ཕྱག་རྒྱ་བཞི་ཡིས་བཅིངས་དང་རྒྱས་གདབ་བོ། །དེ་ལ་འཁོར་བའི་རྣམ་པ་གྲུབ་ཚུལ་སྤྲོས་པ་ཅན་སྒོང་སྐྱེས་སྦྱོང་བའི་བསྐྱེད་རིམ་ནི་དང་པོའི་ལས་ཅན་རྣམས་ལ་བསྔགས་ཤིང༌། དེའང་ལས་དང་པོ་པའི་ཚད་ནི་བཞི་བརྒྱ་ལྔ་བཅུ་པའི་འགྲེལ་པར་རགས་པའི་དཀྱིལ་འཁོར་ཡུད་ཙམ་གྱིས་མངོན་དུ་བྱེད་ནུས་པ་ཚུན་ཆད་ལ་བཤད་ཅིང༌། བསྐྱེད་རྫོགས་སོ་སོའི་ཆ་ནས་བཞག་ན་བསྐྱེད་རིམ་ཀྱི་གནས་སྐབས་ཐམས་ཅད་ལས་དང་པོ་དང༌། རྫོགས་རིམ་ནི་དེ་ལས་ལྡོག་པར་རིམ་ལྔ་དང་སྤྱོད་བསྡུས་ལས་བཤད་དོ། །དེའང་ཐོག་མར་
སྒོ་ང་དང༌། དེ་ལས་གཟུགས་སུ་སྨིན་པ་ལྟར་གཉིས་སྐྱེས་ཀྱི་སྲིད་པ་དེའི་བག་ཆགས་སྦྱོང་བའི་གཉེན་པོ་ཁྱད་པར་ཅན་བདག་སྲས་གཞན་སྲས་ཀྱི་རྣམ་པས་བསྟན་པའི་དང་པོ་ནི། ཡེ་ཤེས་རྩེ་མོ་ལས། སྲས་དང་བཙུན་མོར་བཅས་པ་ནི། །འཁོར་བའི་ཆོས་ལས་སྐྱེས་པ་སྟེ། །སེམས་ཅན་གྱིས་ནི་སྲས་སུ་བྱ། །ཞེས་སོ། །འདི་ལ་གཉིས། མན་ངག་ཏུ་བསྟན་པ་སྒྲུབ་སྡེའི་ལུགས་དང༌། རྣམ་པར་འགྱུར་བར་བསྟན་པ་རྒྱུད་སྡེའི་ལུགས་སོ། །དང་པོ་ནི། རིག་འཛིན་ཆེན་པོ་པདྨ་སམྦྷ་ཝའི་དགོངས་པ་སྟེ། བླ་དཔེ་ལས། བདག་གི་སྲས་སུ་གཞན་བྱ་བ་ལ་ལྔ། །རྒྱུའི་ས་བོན་ལས་གཙོ་བོ་ཡབ་ཡུམ་བསྐྱེད་པ་དང༌། ཕྱོགས་བཅུའི་བུདྡྷ་བཀུག་ནས་མཁའ་རུ་བསྟིམ་པ་དང༌། སེམས་ཅན་རྣམས་བཀུག་ལ་སྒྲིབ་པ་སྦྱང་བ་དང༌། གཉིས་སུ་མེད་པ་ལ་ཆེ་བ་བརྗོད་པ་དང༌། མཁའ་ནས་བཏོན་ལ་དཀྱིལ་འཁོར་དུ་དགོད་པའོ། །ཞེས་པ་སྟེ། བསྒྲུབ་གཞིའི་རྣམ་པར་སྨིན་པའི་ལུས་བསམ་གཏན་གསུམ་གྱི་མན་ངག་ལ་བརྟེན་ནས་ནམ་མཁའི་དབྱིངས་སུ་རྒྱུའི་རྡོ་རྗེ་འཛིན་པ་ཡབ་ཡུམ་དུ་བསྐྱེད་ཅིང༌། དེའི་མཁའ་གསང་དུ་ཕྱོགས་བཅུའི་སངས་རྒྱས་རྣམས་སྤྱན་དྲངས་ནས་བདག་གི་སྲས་སུ་བྱ་བའི་ས་བོན་དུ་བསྒྲུབ་
པ་དང༌། སེམས་ཅན་རྣམས་བཀུག་ནས་སྒྲིབ་པ་སྦྱངས་ཏེ་འཁོར་འདས་རོ་གཅིག་ཏུ་ཞུ་བ་དང༌། གཉིས་མེད་ཀྱི་རང་བཞིན་ལ་ཆེ་བ་བརྗོད་པ་དང༌། དེའི་རྐྱེན་གྱིས་འབྲས་བུའི་རྡོ་རྗེ་འཛིན་པར་བཞེངས་པའི་མཁའ་གསང་ནས་འཁོར་རྣམས་བཏོན་ཏེ་དཀྱིལ་འཁོར་དུ་དགོད་པ་ལ་བདག་གི་སྲས་སུ་སངས་རྒྱས་བྱས་པ་ཞེས་བྱའོ། །གཉིས་པ་ནི། སྒྱུ་འཕྲུལ་རྒྱ་མཚོ་ལས། རང་བྱུང་དངོས་དང་མི་འགལ་ཞིང༌། །འབྲས་བུ་ཉིད་ལ་ལམ་ཤེས་པས། །མ་ལུས་དཀྱིལ་འཁོར་ཐིག་ལེ་རྣམས། །བདག་གི་སྲས་སུ་བསྒོམ་པར་བྱ། །ཞེས་པའི་དོན་རྒྱུད་ཀྱི་རྒྱལ་པོ་སྒྱུ་འཕྲུལ་ལྟར་བརྗོད་པ་ལ་གཉིས། གཙོ་བོ་ཡབ་ཡུམ་དུ་བསྐྱེད་ནས་སྙོམས་པར་འཇུག་པ་དང༌། ངོ་མཚར་སྲས་ཀྱི་དཀྱིལ་འཁོར་ཡི་གེའི་སྤྲིན་ལས་སྤྲོ་བའོ། །དང་པོ་ནི། ཨེ་མ་ཧོཿངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང༌། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ནས་སྐྱེ་བ་མེད། །ཅེས་པས་དོན་དམ་སེམས་བསྐྱེད་བརྟེན་པར་བྱས་ནས་བསྐྱེད་གཞིའི་ཏིང་ངེ་འཛིན་གསུམ་བསྒྲུབ་པར་བྱ་ཞིང༌། དེའང་གཞན་གཉིས་པོ་སྤྱི་དང་མཐུན་ལ། རྒྱུའི་ཏིང་འཛིན་གྱི་ཁྱད་པར་སྒྱུ་འཕྲུལ་ལས། རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །
སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཨཿཞེས་བརྗོད་པའི་རྐྱེན་ལས་སེམས་ཀྱི་རང་བཞིན་ཡི་གེར་རྫོགས་པ་སྤྲོ་བསྡུས་གསལ་འགྲིབ་མེད་པ་ཡོངས་སུ་གྱུར་པ་ལས་མངོན་བྱང་གི་རང་བཞིན་ཉི་ཟླའི་དཀྱིལ་འཁོར་ཨས་མཚན་པ་ལས་བྱུང་བའི་ཡི་གེ་རྒྱུ་དུས་ན་ནང་གི་ཁམས་དཀར་པོ། ལམ་དུས་ན་ཡི་གེའི་རྒྱུ་འམ་སྦྱང་གཞི། འབྲས་དུས་ན་མཚན་གྱི་ས་བོན་ཨཱ་ལི་ལ་ཚེག་དྲག་བསྣན་པའི་བཅུ་དྲུག་ཕྲག་གཉིས་དཀར་པོ་མུ་ཏིག་གི་ཕྲེང་བ་ལྟ་བུ། རྒྱུ་དུས་ན་ཁམས་དམར་པོ། ལམ་དུས་ན་ཡི་གེའི་རྒྱུའམ་སྦྱང་གཞི། འབྲས་དུས་ན་དཔེ་བྱད་ཀྱི་ས་བོན་ཀཱ་ལི་དམར་པོ་མར་མེའི་ཕྲེང་བ་ལྟ་བུ་སུམ་ཅུ་རྩ་བཞི་ལ་ཡ་ར་ལ་ཝ་ལ་སོགས་དྲུག་བསྣན་པའི་བཅུ་ཕྲག་གཉིས་པོས་རིམ་གཉིས་སུ་བསྐོར་བའི་ཡི་གེ་ཐོག་མཐའ་གཉིས་འོད་དུ་ཞུ་ནས་ཧཱུྃ་གིས་མཚན་པའི་རྡོ་རྗེར་གྱུར། དེ་ཡོངས་སུ་གྱུར་པ་ལས་རང་བཞིན་གཞིའི་ཀུན་ཏུ་བཟང་པོར་བསྒོམ་མོ། །དེའང་མྱང་འདས་དང་བཞུགས་ཚུལ་མཐུན་པའི་སྦྱོང་པའི་དབང་དུ་བྱས་ན་ཉི་ཟླའི་དཀྱིལ་འཁོར་ནི་མེ་ལོང་ལྟ་བུ་དང་རྡོ་རྗེའི་རིགས་སོ། །འོད་ཀྱི་གོང་བུ་ནི་མཉམ་པ་ཉིད་དང་རིན་པོ་ཆེའི་རིགས་སོ། །རྡོ་རྗེ་ཧཱུྃ་གིས་མཚན་པ་ནི་སོ་སོར་
རྟོག་པ་དང་པདྨའི་རིགས་སོ། །སྐུ་ཡོངས་སུ་རྫོགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་དང་དེ་བཞིན་གཤེགས་པའི་རིགས་སོ། །འབྲས་དུས་ཀྱི་མངོན་བྱང་ལྔའི་ཡོན་ཏན་ཡོངས་སུ་རྫོགས་པའི་ཚུལ། རྡོ་རྗེ་སྙིང་པོ་རྒྱན་གྱི་རྒྱུད་ལས། ཨཱ་ལི་དང་ནི་ཀཱ་ལི་དང༌། །རྡོ་རྗེ་ཟླ་བ་རྣམ་པ་གཉིས། །གཅིག་ཏུ་གྱུར་པ་མཉམ་ཉིད་དེ། །ས་བོན་མཚན་མར་གྱུར་པ་ནི། །སོ་སོར་རྟོག་པར་ངས་བཤད་དོ། །དེ་བྱུང་སངས་རྒྱས་ཐམས་ཅད་ཀྱི། །འགྲོ་དོན་བྱེད་པ་བྱ་ནན་ཏན། །གཟུགས་བརྙན་རྫོགས་པ་ཆོས་དབྱིངས་ཏེ། །ཞེས་སོ། །དེ་ནས་ཡེ་ཤེས་ཕྱོགས་བཞི་དབུས་བརྟགས་ཏེ། །ཞེས་པ་ནས། ཉི་ཟླ་པདྨ་རིན་པོ་ཆེ། །ཞེས་པའི་བར་གྱི་རྣམ་སྣང་གི་རང་བཞིན་གཞལ་ཡས་ཁང་བསྐྱེད་པར་བྱ་སྟེ། དེ་ལ་རྣམ་སྣང་ནི་སངས་རྒྱས་རྣམས་ཀྱི་སྐུའི་བདག་ཉིད་ཡིན་པས་སྐུ་དེས་གསུང་དང་ཐུགས་ཀྱི་རྟེན་བྱེད་པ་ལྟར་གཞལ་ཡས་ཁང་པས་ཀྱང་སངས་རྒྱས་རྣམས་བཞུགས་པའི་གནས་སམ་རྟེན་བྱེད་ཅིང་སྣོད་ཀྱི་འཇིག་རྟེན་གྱི་བག་ཆགས་སྦྱོང་བའི་ཕྱིར་ཏེ་གལ་ཕྲེང་ལས། སྣོད་ཀྱི་རིམ་པ་བྱུང་ཚུལ་གྱིས། །རིམ་བརྩེགས་གཞལ་ཡས་གཞུང་བཞིན་བསྐྱེད། །ཅེས་སོ། །ཨ་ནི་སྐྱེ་མེད་དེ་བཞིན་ཉིད། །ཀྵ་ནི་ཡེ་ཤེས་ཐུགས་ཀྱི་ཐུགས། །ཞེས་པས་ཀུན་ཏུ་བཟང་པོའི་གཡོན་དུ་བཟང་མོ་ཡབ་དང་འདྲ་བར་
བསྐྱེད་པ་དེ་དང་གཉིས་མེད་དུ་འཁྲིལ་ནས་སྙོམས་པར་འཇུག་པའི་ཚུལ། ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །འདའ་བར་མི་འཛད་དབང་མེད་རྒྱུ་རྐྱེན་ཚོགས་པའི་མཐུ་ཆེན་ཧོཿ ཞེས་ཡབ་ཡུམ་ཐབས་ཤེས་སུ་ཚོགས་པའི་བྱང་ཆུབ་སེམས་ཀྱི་རྒྱུ་སྙོམས་འཇུག་གི་རྐྱེན་ལས་འབྲས་བུ་རྒྱལ་བ་བཞི་བཅུ་རྩ་གཉིས་སུ་སྨིན་པའི་དམ་ཚིག་ལས་འདའ་བར་མི་མཛད་པ་ལ་ཧོ་ཞེས་དགྱེས་པ་བསྐྱེད་པའོ། །གཉིས་པ་ནི། སྦྱོར་མཚམས་ནས་བྱང་ཆུབ་སེམས་ཀྱི་སྤྲིན་ཡི་གེའི་རང་བཞིན་དུ་སྤྲོས་ནས་ངོ་མཚར་སྲས་ཀྱི་དཀྱིལ་འཁོར་དུ་བྱ་བ་ནི། ཋ་ནི་སྒྱུ་འཕྲུལ་རྡོ་རྗེ་ཉིད། །ཅེས་པ་ནས། ཨོཾ་ནི་ཐམས་ཅད་ཞིག་པ་ཡིན། །ཞེས་པའི་བར་གྱིས་བདག་གི་སྲས་སུ་སངས་རྒྱས་རྣམས་བྱས་པ་ལྷའི་དཀྱིལ་འཁོར་དུ་གྱུར་པས་རྒྱལ་བའི་མཛད་པ་བསྒྲུབས། སླར་འདུས་དཀྱིལ་འཁོར་དུ་བྱོན་ནས་རྣམ་སྣང་ཡབ་ཡུམ་ནི་གཙོ་བོ་ཡབ་ཡུམ་ལ་ཐིམ། ལྷ་གཞན་རྣམས་ནི་རང་གནས་སུ་བཞུགས་པར་བསམ་མོ། །གཉིས་པ་གཞན་སྲས་ནི་ཡེ་ཤེས་རྩེ་མོ་ལས། ཇི་ལྟར་སངས་
རྒྱས་མཐུ་ལས་བྱུང༌། །ལྷུན་གྱིས་གྲུབ་པའི་ཆོ་ག་དང༌། །ཆོ་གའི་ཡན་ལག་རྫོགས་པ་ལ། །མཁས་པ་སངས་རྒྱས་སྲས་ཡིན་ནོ། །ཞེས་པས་འདི་ལའང་སྒྲུབ་སྡེ་དང༌། རྒྱུད་སྡེའི་ལུགས་གཉིས་ལ། དང་པོ་ནི། བླ་དཔེ་ལས། གཞན་གྱི་སྲས་སུ་བདག་བྱ་བ་ལ་བརྒྱད་དེ། གཙོ་བོ་ཡབ་ཡུམ་ཞུ་སྟེ་རྒྱུའི་ས་བོན་དུ་གྱུར་པ་དང༌། དེ་ལས་ཡབ་ཡུམ་དུ་བསྐྱེད་པ་དང༌། ཡབ་ཀྱི་རྟོག་ཚོགས་ལས་ཡི་གེ་བསྐྱེད་པ་དང༌། ཡུམ་ལས་འོད་འཕྲོ་ཞིང༌། ལྷ་ལ་གསོལ་བ་གདབ་པ་དང༌། དཀྱིལ་འཁོར་ཐམས་ཅད་བདག་ཡབ་ཡུམ་ལ་བསྟིམས་པས་ཡེ་ཤེས་པར་ང་རྒྱལ་བསྐྱེད་པ་དང༌། ཡབ་ཡུམ་སྦྱོར་བ་བྱ་ཞིང་མཁའ་རུ་དཀྱིལ་འཁོར་བསྐྱེད་པ་དང༌། བདག་གི་རྟོག་པ་ཞེ་གཉིས་ལྷ་སྐུར་གྱུར་ཏེ་ཕྱིར་གདོན་པ་དང༌། ཡེ་ཤེས་པ་སྤྱན་དྲངས་ཤིང་རྒྱས་གདབ་པ་ལ་སོགས་པའོ། །ཞེས་པ་སྟེ། དེ་ལ་དང་པོ་ནི། གཙོ་བོ་ཡབ་ཡུམ་འོད་དུ་ཞུ་ནས་ཐིག་ལེ་མཐིང་ནག་གི་གོང་བུ་ས་བོན་ཕྱག་མཚན་གྱིས་མཚན་པར་གྱུར་པ་ནི་སྒོ་ང༌། གཉིས་པ་དེ་འབྲས་བུའི་རྡོ་རྗེ་འཛིན་པར་བཞེངས་པ་ནི་སྒོང་ཁྱིམ་བརྡོལ་ནས་བཙས་པ། གསུམ་པ་ནི། དབང་པོ་ཡུལ་ལ་སད་པའི་རྟོག་ཚོགས་ཡི་གེའི་སྤྲིན་དུ་སྤྲོས་ནས་ལྷའི་དཀྱིལ་འཁོར་དུ་བསྒྲུབ་པ་ནི། སྒྱུ་འཕྲུལ་ལས། ཋ་ནི་སྒྱུ་འཕྲུལ་རྡོ་རྗེ་
ཉིད། །ཅེས་པ་ནས། ཨོཾ་ནི་ཐམས་ཅད་ཞིག་པ་ཡིན། །ཞེས་པ་དང་མཚུངས་ལ། ཧཱུྃ་ཡིག་ལ་སོགས་པའི་ཡི་གེའི་སྤྲིན་བྱེ་བྲག་པ་ནི་རང་རང་གི་གཞུང་ལས་འབྱུང་བའོ། །བཞི་པ་ནི། རྡོ་རྗེ་ཕུར་བུ་ལ་མཚོན་ན་རྒྱུད་ལས། ཡབ་ཡུམ་འདོད་ཆགས་ང་རོ་བརྗོད། །བྱིན་གཉིས་དམ་དུ་རབ་འཁྱུད་དོ། །ལག་པ་དམ་འཁྱུད་མ་མཆུ་གཞིབ། །སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རྡོ་རྗེ་ཆོས་ཉིད་ལས། །འབར་བའི་ཁྲོ་བོ་མི་བཟད་པ། །སྐུ་ཡི་དབྱིག་ཏུ་སྲས་བསྐྱེད་ཅིག །ཅེས་པས་མཚོན་ནོ། །ལྔ་པའི་དོན་ནི། འདོད་ཆགས་ཆེན་པོའི་ཚུལ་གྱིས་ནི། །ཡེ་ཤེས་དཀྱིལ་འཁོར་ཀུན་བསྡུས་ཏེ། །འཁོར་རྣམས་ཐུགས་ལ་བཞུགས་པ་ཡི། །ཤེས་རབ་མ་ནི་དགའ་བར་བྱ། །ཞེས་སོ། །དྲུག་པ་ནི་མཁའ་གསང་བྱིན་གྱིས་བརླབས་ནས་ཕྱག་རྒྱ་བཞིས་སྙོམས་པར་ཞུགས་པ་སྟེ། རྡོ་རྗེ་ཕུར་བུ་འབར་བ་ལས། ཆགས་པ་ལྕགས་ཀྱུ་ཞེས་བྱ་སྟེ། །པདྨར་ཆུད་པ་ཞགས་པ་མོ། །ཁ་ཕྱེད་མ་ནི་སྒྲོག་ཡིན་ཏེ། །སྒྲ་གྲག་མ་ནི་དྲིལ་བུའོ། །ཞེས་དང༌། ཆོས་ཀུན་བྱང་ཆུབ་སེམས་སུ་གནས། །དང་པོར་བབས་པ་གཞལ་མེད་ཁང༌། གཉིས་པ་གདན་གྱུར་གསུམ་པ་ལས། །ཡབ་ཀྱི་
རྟོག་ཚོགས་ཡི་གེར་རྫོགས། །བྷ་ག་ཉིད་དུ་ལྷ་རྣམས་བསམ། །ཞེས་ཡི་གེའི་ས་བོན་རྣམས་ཡོངས་སུ་གྱུར་པ་ལས། ཡུམ་མཁར་ལྷ་ཚོགས་གསལ་གདབ་བོ། །བདུན་པ་དང་བརྒྱད་པའི་དོན་ཡང་འཆད་པར་འགྱུར་བ་དང་འདྲ་བས་ཤེས་པར་སླའོ། །གཉིས་པ་རྒྱུད་སྡེའི་ལུགས་ནི། སྒྱུ་འཕྲུལ་རྒྱ་མཚོ་ལས། གང་གིས་གང་ལ་གསོལ་བཏབ་པས། །ཐུགས་རྗེས་བྱིན་བརླབས་སྦྱངས་བྱས་ནས། །ཐུགས་ཞུགས་འདྲེས་པར་དབྱེར་མེད་ན། །སྲས་འགྱུར་དགོངས་པ་ཅི་ལ་གནས། །ཞེས་པ་སྟེ། དེ་ལ་དངོས་པོར་བལྟ་བ་སྣང་ཕྱོགས་ཀྱི་ཞེན་པ་སྦྱོང་བ་དང༌། ཆད་པར་བལྟ་བ་སྟོང་ཕྱོགས་ཀྱི་ཞེན་པ་སྦྱོང་བའི་ཚུལ་གཉིས་ལས། དང་པོ་ལའང་ཐུགས་དམ་བསྐུལ་བ་དང༌། བྱིན་རླབས་རྗེས་སུ་གནང་བ་གཉིས་ལས།དང་པོ་སྣང་ཕྱོགས་ཀྱི་ཞེན་པ་སྦྱོང་བ་ནི། གཙོ་བོའི་ཐུགས་ཀ་ནས་རིག་པའི་ཀུན་ཏུ་བཟང་པོ་སེམས་དཔའི་རྒྱན་ལྡན་རྣམ་སྨིན་གྱི་ལུས་ཀྱི་རྣམ་པ་ཅན་རྐང་པའི་ལོང་བུ་སྤྲད་ཅིང་ཐལ་མོ་སྦྱར་བ་ཐོན་ནས། དཀྱིལ་འཁོར་ལ་ལན་གསུམ་བསྐོར་ནས་དགའ་བ་ཆེན་པོའི་སྒོ་ནས་མེ་ཏོག་གཏོར་བཞིན་པས། ཨོཾ་སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་
བདག་སྦྱོར་ཅིག །ཅེས་གསོལ་བ་གདབ་བོ། །གཉིས་པ་ནི། ལྷ་རྣམས་ཀྱིས་བདག་ལ་རྗེས་སུ་དགོངས་ཏེ་ཐབས་དང་ཤེས་རབ་ཀྱི་འོད་ཟེར་སྤྲོས་པས། སེམས་དང་སེམས་བྱུང་གི་རྟོག་པ་དང༌། དེ་ལས་གྱུར་པའི་རྣམ་སྨིན་གྱི་ལུས་ངག་སྦྱངས། གཟུང་འཛིན་གཉིས་བྲལ་གྱི་རང་བཞིན་གསེར་ཞུན་མ་ལྟ་བུའི་འོད་ཀྱྀ་གོང་བུར་གྱུར་པ་ལ། དེ་བཞིན་གཤེགས་པ་རྣམས་ཀྱིས་སྐུ་གསུང་ཐུགས་ཀྱི་འོད་ཟེར་ཡི་གེ་གསུམ་གྱི་རྣམ་པས་བདག་ལ་བསྟིམས་པས། གོང་བུ་ཉིད་ཀྱང་དེ་དང་གཉིས་སུ་མེད་པའི་འབྲུ་གསུམ་དུ་གྱུར་ནས་རགས་པ་སྐུ་དང་གསུང་གི་ས་བོན་ཕྲ་བ་ཐུགས་ཀྱི་ས་བོན་ལ་འདྲེས་ནས་ཟླ་དཀྱིལ་ལ་ཧཱུྃ་དུ་གནས་པར་གྱུར། དེ་ཉིད་རླུང་གི་དཀྱིལ་འཁོར་གྱིས་བཏེགས་པས་གཙོ་བོའི་ཐུགས་ཀར་མདའ་འཕངས་པ་ལྟར་སོང་བའི་རྐྱེན་གྱིས་ཡབ་ཡུམ་བདེ་བའི་རོལ་མོས་ཚིམ་ནས་བྱང་ཆུབ་ཀྱི་སེམས་དང་གཉིས་སུ་མེད་པའི་གོང་བུར་གྱུར་པའི་ཡུམ་གྱི་མཁའ་ལ་གནས་པ་ལ་ལྷ་ཚོགས་ཐམས་ཅད་ཀྱང་རང་རང་གི་གསང་སྔགས་ཀྱི་སྒྲ་དང་བཅས་ནས་བྱང་ཆུབ་ཀྱི་སེམས་གོང་བུའི་བདག་ཉིད་ཅན་ལ་ཐིམ། དེའི་ངང་ལ་གཙོ་བོ་ཡབ་ཡུམ་ཡང་རྗེས་ཆགས་ཆེན་པོས་བདེ་བའི་ངོ་བོར་ཞུ་སྟེ་ཐམས་ཅད་གཅིག་
ཏུ་འདྲེས་པའི་གོང་བུར་བསམ་མོ། །གཉིས་པ་སྟོང་ཕྱོགས་ཀྱི་ཞེན་པ་སྦྱོང་བ་ནི། གོང་བུ་དེ་ཉིད་ཀྱང་ཡི་གེ་དང་ཕྱག་མཚན་གྱི་རྣམ་པར་སོང་བ་ཡོངས་སུ་གྱུར་པ་ལས་ཞི་བ་དང་ཁྲོ་བོའི་སྐུ་གང་ཡིན་པར་ང་རྒྱལ་བསྐྱེད་ནས། ཤཱུ་ནྱ་ཏའི་སྔགས་ཀྱིས་དེ་ལ་ཡེ་ཤེས་ལྔའི་དབང་བསྐུར། སྐུ་གསུང་ཐུགས་ཡོན་ཏན་ཕྲིན་ལས་ལྔར་བྱིན་གྱིས་བརླབ། དེ་ནས་གཙོ་བོ་ཡབ་ཡུམ་གྱི་མཁའ་གསང་རྡོ་རྗེ་དང་པདྨར་བྱིན་གྱིས་བརླབས་ནས་ས་མ་ཡ་ཧོ་ལ་སོགས་པའི་བརྡའ་དང་བརྡའ་ལན་གྱིས་བསྐུལ་ནས་སྙོམས་པར་ཞུགས་ཏེ། བྱང་ཆུབ་ཀྱི་སེམས་ཡུམ་གྱི་མཁའ་ལ་སྤྲོས་པས་མཁའ་གསང་གཞལ་ཡས་ཁང་དུ་བྱིན་གྱིས་བརླབ། དེའི་ནང་དུ་ལྷ་རྣམས་ཀྱི་ས་བོན་གསལ་བཏབ་ལ། ལྷ་སོ་སོའི་གསང་སྔགས་བརྗོད་པའི་རྐྱེན་གྱིས་སྐུ་ཡོངས་སུ་རྫོགས་པར་གྱུར། དེ་རྣམས་ཛཿཞེས་བརྗོད་པ་ཙམ་གྱིས་ཡུམ་གྱི་མཁའ་ནས་བཏོན་ཏེ་མདུན་གྱི་ནམ་མཁར་བཞག་པ་ལ་ཨོཾ་ཨཱཿཧཱུྃ་གིས་སྐུ་གསུང་ཐུགས་བྱིན་གྱིསབརླབས། འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་ནས་རང་རང་གི་གདན་ལ་བཞུགས་པར་བསམ་མོ། །དེའང་སྒྱུ་འཕྲུལ་ཞི་བའི་དབང་དུ་བྱས་ན་ཀུན་ཏུ་བཟང་པོ་ཡབ་ཡུམ་ནི་གཙོ་བོའི་ཐུགས་ཀའི་ཁྱམས་ལ་བཞུགས་པར་བསམ་
ཞིང༌། རིག་པའི་སྐྱེས་བུ་དྲུག་ནི་ཕྱིའི་ཁྱམས་ལ་བསྐྱེད་པ་ཡིན་ནོ། །འདུ་ཤེས་ཕྱིན་ཅི་ལོག་ཏུ་ཤར་ནས་རྒྱལ་བའི་ཕྲིན་ལས་ལ་སྐུར་བ་གདབ་པར་འདོད་པ་དག་ན་རེ། རིག་པའི་སྐྱེས་བུ་དྲུག་ལ་གླན་ཀ་བྱེད་པར་བསྙད་ནས་རང་ཉིད་ལ་བསོད་ནམས་མ་ཡིན་པ་འདུ་བྱེད་མོད། རྡོ་རྗེ་མཁའ་འགྲོའི་སུམ་ཅུ་པ་ལས། ཡེ་ཤེས་རྣམ་པ་ལྔ་དང་ནི། །བལྟ་བ་ལྔ་ཡི་ཕ་རོལ་འགྲོ། །ལྷ་ཡི་ཡེ་ཤེས་གསལ་བར་བལྟ། །ལྷ་མིན་ཡེ་ཤེས་ཁྲོ་བའོ། །ཡི་དྭགས་ཡེ་ཤེས་ཞན་པ་སྟེ། །དམྱལ་བའི་ཡེ་ཤེས་འཇིགས་པས་ནོན། །བྱོལ་སོང་ཡེ་ཤེས་བླུན་པ་སྟེ། །བརྟན་པ་རྣམས་ནི་སེམས་མེད་པའོ། །ཞེས་དང༌། ལས་རྣམས་ཀྱི་ནི་བྱེ་བྲག་གིས། །ཡེ་ཤེས་བྱེ་བྲག་སྤྲུལ་པ་ཡིན། །ཞེས་འགྲོ་བ་སོ་སོའི་གནས་རིགས་གདུལ་བའི་ཡེ་ཤེས་དེ་ལྟ་ན། དེའི་བརྟེན་པར་གྱུར་པའི་གཟུགས་ཀྱི་སྐུས་གདུལ་བའི་ཕྲིན་ལས་ཆེན་པོ་རྒྱུ་མཚན་གང་གིས་དགག་པར་ནུས། དེ་བས་ན་མཉམ་སྦྱོར་གྱི་རྩ་རྒྱུད་ལས་ཀྱང༌། གསང་སྔགས་མཐུན་པའི་ཁྱད་པར་གྱིས། །མོས་པའི་བློ་དང་མཐུན་པར་སྟོན། །ཞེས་པའང་དྲན་པར་བྱའོ། །དེ་ལྟར་སྒོང་སྐྱེས་སྦྱོང་བའི་བསྐྱེད་རིམ་གྱི་ཁྱད་པར་ནི་ལན་གཉིས་སུ་སྐྱེ་བ་དང་མཐུན་པ་ཁོ་ནར་སྦྱོང་བ་
ཡིན་པས་ན་སྤྲོས་པ་ཆུང་ངུའི་དབང་དུ་བྱས་ན་འདི་ལྟར། བསྡུ་ན་ཐོག་མར་རང་ཉིད་ལྷར་གསལ་བས། །མདུན་མཁར་དཀྱིལ་འཁོར་གསལ་བཏབ་རྒྱུན་བཤགས་བྱ། །གཉིས་ཀ་མི་དམིགས་ངང་ནས་ལྷ་སོ་སོའི། །དཀྱིལ་འཁོར་མངོན་རྟོགས་ཇི་བཞིན་བསྒོམ་པའོ། །ཞེས་སྨོས་པ་ནི་གཞུང་ཉིད་ཀྱིས་གོ་སླའོ། །གཉིས་པ་ལ་གཉིས། ཧེ་རུ་ཀ་གལ་པོ་ལྟར་མངོན་བྱང་བཞི་རྗེས་འབྲང་དང་བཅས་པ་བཤད་པ་དང༌། རྒྱུད་སྡེ་སྤྱི་ཁྱབ་དང་བསྟུན་ནས་མངོན་བྱང་ལྔའི་མཚན་ཉིད་བཤད་པའོ། །དང་པོ་ནི། མངལ་སྐྱེས་སྦྱོང་ཕྱིར་མངོན་བྱང་བཞིའམ་ལྔ། །དང་པོ་ཁྲག་འཐུང་གལ་པོའི་དགོངས་པ་སྟེ། །འཆི་སྲིད་བར་དོར་བཅས་པ་སྟོང་ཉིད་སེམས། །དྲི་ཟ་ཉེ་བར་ལེན་པའི་རྣམ་ཤེས་ནི། །ལྷ་ཡི་ས་བོན་གྱིས་སྦྱང་དེ་ཉིད་ཀྱང༌། །ཁུ་རྡུལ་རླུང་དང་འདྲེས་པའི་མེར་མེར་ནུར། །ས་བོན་ཉིད་ལས་ཕྱག་མཚན་གྱུར་པས་སྦྱོང༌། །ལྟར་དང་མཁྲང་གྱུར་ཕྱག་མཚན་འོད་གོང་གྱུར། །ཁྱབ་འཇུག་ཉ་དང་རུས་སྦལ་དབང་པོ་རྫོགས། །ལྷ་ཡི་རྣམ་པར་གྱུར་ནས་སྦྱང་བའོ། །དེ་སྐད་དུ་ཧེ་རུ་ཀ་གལ་པོ་ལས། དང་པོ་སྟོང་པ་བྱང་ཆུབ་སེམས། །གཉིས་པ་ས་བོན་འབྱུང་བ་སྟེ། །གསུམ་པ་ལ་ནི་གཟུགས་རྫོགས་པ། །བཞི་པ་ལ་ནི་ཡི་གེ་འགོད། །ཅེས་པས་འཆི་སྲིད་
བར་དོ་དང་བཅས་པ་སྟོང་ཉིད་བྱང་ཆུབ་ཀྱིས་སྦྱང༌། ཉེར་ལེན་དྲི་ཟའི་རྣམ་ཤེས་ཁུ་ཁྲག་དང་འདྲེས་པ་ལྷའི་ས་བོན་བསྡུ་བས་སྦྱང༌། རླུང་བཅུས་ལུས་རིམ་གྱིས་བསྐྱེད་ནས་གཟུགས་ཀྱི་རྣམ་པ་རྫོགས་པ་ལྷར་གྱུར་པས་སྦྱང༌། བཙས་ནས་དབང་པོ་ཡུལ་ལ་སད་པ་ནི་ཡི་གེ་འགོད་པས་སྦྱང་བ་སྟེ། ལྷ་མངལ་འབྱིན་གྱི་ས་བོན་སྤྲོ་བའམ། གནས་གསུམ་ལ་སོགས་པ་ཡི་གེས་རྒྱས་གདབ་པ་ལའང་སྦྱར་དུ་རུང་ངོ༌། །དེའང་ནང་གསེས་ཀྱི་དབང་དུ་རླུང་བཅུའི་འདུ་འཕྲོད་ཀྱིས་འགྱུར་བའི་གནས་སྐབས་ལྔ་ཉམས་སུ་མྱོང་བ་རྡོ་རྗེའི་ཆོ་ག་བཞིས་སྦྱོང་བའི་ཚུལ་ནི། ས་བོན་དེ་ཉིད་ལྷའི་ཕྱག་མཚན་དུ་གྱུར་པས་མེར་མེར་ནུར་ནུར་སྦྱང༌། ཕྱག་མཚན་འོད་གོང་དུ་གྱུར་པས་ལྟར་ལྟར་དང་མཁྲང་གྱུར་གཉིས་སྦྱང༌། འོད་གོང་ལྷར་གྱུར་པས་ཁྱབ་འཇུག་ཉ་དང་རུས་སྦལ། དབང་པོ་རྫོགས་པ་བཞི་པོ་སྦྱང་པ་སྟེ་འདུས་པ་ཕྱི་མ་ལས་ཀྱང་དེ་དང་ཚུལ་མཐུན་པར་བཤད་དོ། །དེ་ལ་བསྡུས་པའི་ཆོ་ག་གསུམ་བསྐྱེད་ནི། །ཕྱག་རྒྱ་སྐུ་ལ་ཡིག་འབྲུ་གསུང་རྡོ་རྗེ། །ཐུགས་ནི་ཕྱག་མཚན་ཉིད་དུ་སྦྱོར་བ་ལ། །རྡོ་རྗེའི་ཆོ་ག་གསུམ་ཞེས་ཕ་རྒྱུད་ལུགས། །དེ་ཡང་ལུས་འགྲུབ་པའི་ས་བོན་ཁུ་རྡུལ་གཉིས་གནས་སུ་དག་པ་
མཚོན་པ་ཉི་ཟླ་སྐུ་དང་གསུང༌། ཨཿཡིག་ལ་སོགས་པ་ཐུགས་སུ་མོས་ནས་སྦྱོང་བའི་ཚུལ། ཐིག་ལེ་ཟླ་བ་ཞུ་བ་སྐུ། །རྣམ་པར་གཅད་པ་ཉི་རྡུལ་གསུང༌། །ཨཿཡིག་མུན་ཅན་ཐུགས་རབ་བརྗོད། །ཅེས་སོ། །དེ་ལས་རྣམ་པ་གཞན་དུ་གྱུར་པ་རང་གི་དངོས་བསྟན་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་ངོ་བོ་ཉིད་རྡོ་རྗེ་རྩེ་ལྔ་པ་བསྒོམས་པས་སྦྱང་བྱའི་ཡིད་ཐུགས་རྡོ་རྗེར་དག ཕྱག་མཚན་དེ་ཉིད་ཡི་གེར་གནས་གྱུར་པའམ། གསུང་རྡོ་རྗེའི་ངོ་བོ་ཨཱཿདང་ཧཱུྃ་ལ་སོགས་པས་མཚན་པར་བསྒོམས་པས་སྦྱང་བྱའི་ངག་གསུང་རྡོ་རྗེར་རྫོགས། དེ་ལས་འོད་ཟེར་སྤྲོ་བསྡུའི་ཆོ་གས་དོན་གཉིས་བྱས་ཡོངས་སུ་གྱུར་པ། ལྷའི་རྣམ་པ་ཐམས་ཅད་རྫོགས་པར་བསྒོམས་པས་སྦྱང་གཞིའི་ལུས་སྐུ་རྡོ་རྗེར་སྨིན་པ་སྟེ། རྡོ་རྗེའི་ཆོ་ག་གསུམ་གྱི་དང་པོས་མངལ་དུ་ཁམས་དཀར་དམར་ཚོགས་པ་ལ་དྲི་ཟའི་རྣམ་ཤེས་ཞུགས་པ། གཉིས་པས་ཁུ་ཁྲག་སེམས་གསུམ་འདྲེས་ནས་མེར་མེར་པོ་ལ་སོགས་པ་འགྱུར་བའི་གནས་སྐབས་ལྔ་ཉམས་སུ་མྱོང་བ། གསུམ་པས་འབྱུང་བ་བྱེར་སྡུད་ཀྱི་ལུས་ཡོངས་སུ་གྲུབ་ནས་ཕྱིར་བཙས་པ་སྦྱོང་ལ། འབྲས་བུའི་དུས་ན་ལུས་ངག་ཡིད་གསུམ་རྡོ་རྗེ་གསུམ་དུ་བསྒྲུབ་པའི་རྟེན་འབྲེལ་བསྒྲིག་
གོ །དེའང་རྒྱུད་ལས། བཙུན་མོའི་བྷ་ག་བདེ་ཆེན་དུ། །སྟོན་པ་སུམ་ཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུར་ལྡན། །ཞེས་པ་ལྟར། དེ་བཞིན་གཤེགས་པ་རྣམས་རྡོ་རྗེ་བཙུན་མོའི་བྷ་ག་ལ་བཞུགས་ནས་སེམས་ཅན་ལ་སྨན་པའི་མཛད་པ་ཕྲིན་ལས་སྐུ་གསུམ་ལྷུན་གྱིས་གྲུབ་པའི་བདག་ཉིད་དང་ཆོས་ཉིད་མཐུན་པར་སྦྱང་བའམ། མན་སྙེ་ལས། དེའི་རྗེས་སུ་བར་དོའི་སྲིད་པ་ཇི་ལྟ་བ་བཞིན་གྱི་གཟུགས་འགགས་པའི་རྗེས་ཀྱི་མངལ་གྱི་གནས་སྐབས་བཞིན་དུ་བྱང་ཆུབ་སེམས་དཔའ་རྣམས་ཀྱི་བར་ཆད་མེད་པའི་ལམ་འགགས་པའི་རྗེས་ལ་ས་བཅུ་པའི་གནས་སྐབས་རིག་པར་བྱ་སྟེ། འདི་རྣམས་སྒྲིབ་པ་དང་བཅས་པ་ཉིད་དོ། །ཞེས་པ་ལྟར་མངལ་ཞུགས་ཀྱི་རིམ་པ་དང་སྦྱོར་བའི་ཚུལ་དང༌། མངོན་བྱང་གི་མཚན་ཉིད་བྱེ་བྲག་ཏུ་བཤད་པ་གཉིས་ལས་དང་པོ་ནི། བར་མ་དོ་ནས་ལུས་འཚོལ་ཚོགས་ཀྱི་ལམ། །མངལ་དུ་རྣམ་ཤེས་འཇུག་པ་སྦྱོར་ལམ་སྟེ། །ལྷུམས་ཞུགས་བྱང་ཆུབ་ལྔ་པོ་མཐོང་བསྒོམ་དང༌། །ཟླ་བ་བཅུ་ནི་ས་དང་རབ་སྦྱར་ནས། །བཙའ་བ་མི་སློབ་ལམ་གྱུར་སྤྲུལ་པའི་སྐུ། །དེ་ལ་འཆི་བ་ཆོས་སྐུའི་འོད་གསལ་ལུགས་ལྡོག་ཏུ་མཆེད་པའི་ཡིད་ལུས་བར་དོ་ལོངས་སྤྱོད་རྫོགས་པའི་སྐུར་
ལྡང་མི་ནུས་པའམ། ནུས་ཀྱང་གཞན་དོན་དུ་སྐྱེ་བ་སྤྲུལ་སྐུའི་ལམ་འཁྱེར་ལ་འཇུག་པ་དག་གིས་བར་མ་དོ་ནས་སེམས་བསྐྱེད་དང་ལྡན་པས་ལུས་འཚོལ་བ་ཚོགས་ལམ། ཆོས་ལྡན་གྱི་ལུས་རྟེན་ཐོབ་པའི་མངལ་སྒོ་འདམས་ནས་ལུས་ལེན་པ་དངོས་ལ་སྦྱོར་བ་སྦྱོར་ལམ། བྱང་ཆུབ་རྣམ་པ་ལྔའི་རིམ་པས་མངལ་དུ་ཉིང་མཚམས་སྦྱོར་བའི་བྱེད་ལས་རང་རྒྱུད་པ་རྣམས་སྦྱང་བ་མཐོང་བསྒོམ་གྱི་ལམ་དང༌། ཟླ་བ་བཅུ་ས་བཅུར་མཚོན་ནས་རྡོ་རྗེ་མི་བསྐྱོད་པ་ལ་སོགས་ལྷག་པའི་ལྷ་གང་ཡིན་པའི་སྐུར་བཞེངས་ནས་མི་སློབ་པའི་ཟུང་འཇུག་སྐྱེ་བ་སྤྲུལ་པའི་སྐུར་འགྲུབ་པའི་ཚུལ་ཀློང་གསལ་ལས། མངལ་ཞུགས་བྱང་ཆུབ་རྣམ་ལྔ་སྟེ། །ཟླ་བ་བཅུ་ནི་ས་བཅུའི་ཚུལ། །སྐྱེས་པ་རང་བཞིན་སྤྲུལ་པའི་སྐུ། །ལྷུན་གྲུབ་སྐུ་གསུམ་བདག་ཉིད་དོ། །ཞེས་སོ། །གཉིས་པ་མངོན་བྱང་གི་ངོ་བོ་སྐྱེ་གནས་བཞིའི་རིམ་པ་དང་མཐུན་པར་རྒྱུ་འབྲས་གོ་རིམ་གྱི་དབང་དུ་མངལ་སྐྱེས་ལ་མཚོན་ན། མངོན་བྱང་དང་པོ་གཉིས་ཀྱིས་ཕ་མའི་ཁུ་ཁྲག་ཚོགས་པ། གསུམ་པས་དྲི་ཟའི་རྣམ་ཤེས་ཞུགས་པ། བཞི་པས་ཁུ་རྡུལ་རྣམ་ཤེས་གསུམ་འདྲེས་ནས་འགྱུར་བའི་གནས་སྐབས་རྣམས་མྱོང་བ། ལྔ་པས་མངལ་གྱི་གནས་སྐབས་རྫོགས་པ་སྟེ། དེ་དང་འབྲེལ་བར་ཕྲ་བའི་ཆ་ནས་མིང་
བཞིའི་ཕུང་པོ་དང༌། ཁམས་དང༌། རྣམ་ཤེས་དང༌། ཉོན་མོངས་པའི་ཚོགས་ཏེ་གཟུགས་ཅན་མ་ཡིན་པ་རྣམས་དང༌། གཟུགས་ཅན་དང་འདྲེས་པས་རགས་པ་སྐྱེ་གནས་བཞི་པོའི་སྦྱང་གཞི་སྦྱོང་བྱེད་སྟོན་པའི་ཕྱིར། མངོན་བྱང་དང་པོ་ཟླ་བའི་དཀྱིལ་འཁོར་ནི། །མངལ་སྐྱེས་ཁུ་བ་དྲོད་གཤེར་སྐྱེས་ཀྱི་གཤེར། །སྒོང་སྐྱེས་ཕ་དང་རྫུས་སྐྱེས་སྟོང་པའི་ཆ། །དེ་ལ་སྦྱང་གཞི་ནི་ཕུང་པོ་ལྔ་ལས་གཟུགས་ཀྱི་ཕུང་པོ། ཁམས་ལྔ་ལས་སའི་ཁམས། ལུས་ཀུན་གཞིའི་རྣམ་ཤེས། ཉོན་མོངས་པ་ལྔ་ལས་གཏི་མུག མངལ་སྐྱེས་ཀྱི་ཕའི་ཁམས། དྲོད་གཤེར་སྐྱེས་ཀྱི་གཤེར། སྒོང་སྐྱེས་ཀྱི་ཕ། བརྫུས་སྐྱེས་ཀྱི་སྟོང་པའི་ཆ་རྣམས་སོ། །སྦྱོང་བྱེད་ནི་རྣམ་སྣང་གི་ངོ་བོ་ཨཱཿལི་ལས་བྱུང་བའི་མངོན་བྱང་དང་པོ་ཟླ་བའི་དཀྱིལ་འཁོར་དུ་བསྒོམ་པ་རྣམ་པ་ལམ་བྱེད། དེའི་ངོ་བོ་ཆོས་ཐམས་ཅད་མེ་ལོང་གི་གཟུགས་བརྙན་ལྟར་སྣང་བས་མེ་ལོང་ལྟ་བུའི་ཡེ་ཤེས་སུ་མོས་པ་ནི་མོས་པ་ལམ་བྱེད། དེའང་ཆོས་སྐུའི་ཡེ་ཤེས་སྒྲིབ་མེད་དུ་གསལ་བ་ནི་འབྲས་བུ་ལམ་བྱེད། ལམ་བྱེད་གསུམ་ལ་བརྟེན་ནས་ཚོགས་གཉིས་རྫོགས་པའི་རྟེན་འབྲེལ་དུ་འགྱུར་བ་ནི་བྱིན་རླབས་ལམ་བྱེད་ཅེས་བྱ་སྟེ། ལམ་བྱེད་ཕྱི་མ་ནི་འོག་མ་རྣམས་ལའང་འགྲེའོ། །དེ་བཞིན་གཉིས་པ་ཉི་མའི་དཀྱིལ་འཁོར་ཡང༌། །མངལ་སྐྱེས་རྡུལ་དང་དྲོད་གཤེར་སྐྱེས་ཀྱི་དྲོད། །སྒོང་སྐྱེས་མ་
དང་བརྫུས་སྐྱེས་གསལ་བའི་ཆ། །དེ་ལ་སྦྱང་གཞྀ་ཚོར་བའི་ཕུང་པོ་དང་ནམ་མཁའི་ཁམས། ཉོན་མོངས་པ་ཅན་གྱི་ཡིད་དེ་སེར་སྣ་ང་རྒྱལ། མངལ་སྐྱེས་ཀྱི་མའི་ཁམས། སྒོང་སྐྱེས་ཀྱི་མའི་ཆ། དྲོད་གཤེར་སྐྱེས་ཀྱི་དྲོད། རྫུས་སྐྱེས་ཀྱི་གསལ་བའི་ཆ་རྣམས་སོ། །དེ་དག་སྦྱོང་བྱེད་ནི་རིན་འབྱུང་གི་ངོ་བོ་ཀཱ་ལི་ལས་བྱུང་བའི་བདུན་གྱི་བདུན་པའི་དཀྱིལ་འཁོར་དུ་བསྒོམ་པ་ནི་རྣམ་པ་ལམ་བྱེད། དེའི་ངོ་བོ་ཆོས་ཐམས་ཅད་མཉམ་པ་ཉིད་དུ་རྟོགས་པའི་ཡེ་ཤེས་སུ་མོས་པ་ནི་མོས་པ་ལམ་བྱེད། དེའང་སངས་རྒྱས་དང་སེམས་ཅན་གྱི་རང་བཞིན་དངོས་པོ་གཅིག་པར་ཐུགས་སུ་ཆུད་པའི་ཡེ་ཤེས་སྒྲིབ་མེད་དུ་གསལ་བས་ན་འབྲས་བུ་ལམ་བྱེད་དོ། །མངོན་བྱང་གསུམ་པ་ས་བོན་ཕྱག་མཚན་བཅས། །ཁུ་རྡུལ་གཉིས་བར་རྣམ་ཤེས་ཞུགས་པ་དང༌། །སྐྱེ་གནས་བཞི་པོའི་བར་དོའི་རྣམ་ཤེས་སྦྱོང༌། །དེ་ལ་སྦྱང་གཞི་ནི་འདུ་ཤེས་ཀྱི་ཕུང་པོ་དང༌། རླུང་གི་ཁམས། ངག་ཡིད་ཀྱི་རྣམ་པར་ཤེས་པ། ཉོན་མོངས་པ་འདོད་ཆགས། སྐྱེ་གནས་བཞིའི་དྲི་ཟ་ཉེ་བར་ལེན་པའི་རྣམ་ཤེས་རྣམས་སོ། །སྦྱོང་བྱེད་ནི་འོད་དཔག་མེད་ཀྱི་ངོ་བོ་ས་བོན་ཕྱག་མཚན་དང་བཅས་པའི་རྣམ་པར་བསྒོམ་པ་ནི་རྣམ་པ་ལམ་བྱེད། དེའི་ངོ་བོ་ཆོས་ཐམས་ཅད་མ་འདྲེས་པར་རྟོགས་པའི་ཡེ་ཤེས་སུ་མོས་པ་ནི་མོས་པ་ལམ་བྱེད། དེའང་ཆོས་ཐམས་ཅད་མ་བསྒྲིབས་པར་གསལ་ཞིང་མཁྱེན་པའི་ཡེ་ཤེས་སོ་སོར་རྟོག་པ་ནི་
འབྲས་བུ་ལམ་བྱེད་དོ། །མངོན་བྱང་བཞི་པ་རྣམ་གསུམ་གཅིག་ཏུ་འདྲེས། །ཁུ་རྡུལ་སེམས་གསུམ་རོ་གཅིག་འདྲེས་པ་དང༌། །དྲོད་གཤེར་སྐྱེས་ཀྱི་དྲོད་དང་རྣམ་ཤེས་དང༌། །བརྫུས་སྐྱེས་གསལ་ལ་སྟོང་པའི་ཆ་ཙམ་དང༌། །བར་སྲིད་འདྲེས་པའི་ཆ་རྣམས་སྦྱོང་བ་ཡིན། །དེ་ལ་སྦྱང་གཞི་འདུ་བྱེད་ཀྱི་ཕུང་པོ་དང་རླུང་གི་ཁམས། བྱ་བ་སྒོ་ལྔའི་རྣམ་ཤེས། ཉོན་མོངས་པ་ཕྲག་དོག སྐྱེ་གནས་བཞིར་འཇུག་པའི་ཚུལ་གྱི་མངལ་སྐྱེས། སྒོང་སྐྱེས་དང་བསྟུན་ན་དྲི་ཟའི་རྣམ་ཤེས་དང་ཁུ་རྡུལ་འདྲེས་པ། དྲོད་གཤེར་སྐྱེས་ཀྱི་དྲོད་དང་དྲི་ཟའི་རྣམ་ཤེས་འདྲེས་པ། བརྫུས་སྐྱེས་ཀྱི་གསལ་ལ་སྟོང་པ་ཙམ་དང་བར་སྲིད་འདྲེས་པའི་ཆ་རྣམས་སོ། །སྦྱོང་བྱེད་ནི་དོན་འགྲུབ་ཀྱི་ངོ་བོ་ཉི་ཟླ་ཕྱག་མཚན་ས་བོན་དང་བཅས་པ་འདྲེས་པའི་ཐིག་ལེ་གོང་བུའི་རྣམ་པ་ཅན་དུ་བསྒོམ་པ་ནི་རྣམ་པ་ལམ་བྱེད། དེའི་ངོ་བོ་སངས་རྒྱས་ཐམས་ཅད་ཀྱི་མཛད་པ་རོ་གཅིག་ཏུ་འདྲེས་པའི་ཡེ་ཤེས་སུ་མོས་པ་ནི་མོས་པ་ལམ་བྱེད། དེས་སེམས་ཅན་གྱི་བྱ་བ་ཐམས་ཅད་གྲུབ་པའི་ཡེ་ཤེས་ནི་འབྲས་བུ་ལམ་བྱེད་དོ། །མངོན་བྱང་ལྔ་པ་སྐུ་རུ་གྲུབ་པ་ནི། །སྐྱེ་གནས་བཞི་པོའི་སྐྱེ་མཆེད་ཡོངས་རྫོགས་ནས། །རགས་པའི་ཡུལ་ལ་དབང་པོ་སད་པ་ཡི། །
འཁོར་བའི་རྣམ་པ་ཆ་དང་བཅས་པ་སྦྱོང༌། །ཁམས་དང་ཕུང་པོ་རྣམ་པར་ཤེས་པའི་ཚོགས། །གནས་སུ་དག་པ་གདན་གསུམ་ཚང་བའི་ལྷ། །མྱ་ངན་འདས་དང་བཞུགས་ཚུལ་མཐུན་པ་ནི། །རྒྱུ་ལས་འབྲས་བུའི་ཧེ་རུ་ཀ་ཉིད་དོ། །དེ་ལ་སྦྱང་གཞི་ནི་རྣམ་ཤེས་ཀྱི་ཕུང་པོ་དང་སའི་ཁམས། ཡིད་དང་བཅས་པའི་རྣམ་ཤེས་ཚོགས་བརྒྱད་ཀྱི་ཆོས་ཉིད་དུ་འཛིན་པའི་ཆ། ཉོན་མོངས་པ་ཞེ་སྡང༌། སྐྱེ་གནས་བཞིའི་ལུས་གྲུབ་པའི་གནས་སྐབས་རྣམས་སོ། །སྦྱོང་བྱེད་ནི་མི་བསྐྱོད་པའི་ངོ་བོ་རྒྱུའི་ཧེ་རུ་ཀ་ཡབ་ཡུམ་དུ་བསྐྱེད་པ་ནི་སྐུའི་རྣམ་པ་ལམ་བྱེད་དེ། བཙས་ནས་དབང་པོ་ཡུལ་ལ་སད་པས་འཁོར་བའི་རྣམ་པ་ཆ་དང་བཅས་པ་སྦྱངས་ལ། དེའང་ལྷའི་རྣམ་པ་དེ་ལ་ཡན་ལག་དང་ཉིང་ལག་ལ་སོགས་པ་ཡོངས་སུ་རྫོགས་པ་ལྟར་ཡེ་ཤེས་དེ་ལ་ཡོན་ཏན་ཐམས་ཅད་རྫོགས་པར་མོས་པ་ནི་མོས་པ་ལམ་བྱེད། དེའི་ངོ་བོ་ཆོས་ཀྱི་དབྱིངས་ཀྱི་ཡེ་ཤེས་སུ་རོ་གཅིག་པ་ནི་འབྲས་བུ་ལམ་བྱེད་དེ། དགྱེས་རྡོར་ལས། ཟླ་བ་མེ་ལོང་ཡེ་ཤེས་ཏེ། །བདུན་གྱི་བདུན་པ་མཉམ་པ་ཉིད། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། །རྫོགས་པ་ཆོས་དབྱིངས་དག་པ་སྟེ། །ཞེས་སོ། །གཉིས་པ་རང་འབྲས་སྔགས་ཀྱི་
ཡོན་ཏན་བསྐྱེད་ཚུལ་ནི། འཁོར་བའི་འདྲ་འབག་རྣམ་པ་བཞིའི་སྐྱེ་སྲིད་དང༌། ཕུང་པོ་དང༌། ཁམས་དང༌། རྣམ་པར་ཤེས་པ་དང༌། ཉོན་མོངས་པའི་ཆ་དང་བཅས་མངོན་བྱང་ལྔའི་སྦྱོང་བྱེད་ཀྱིས་སྦྱངས་པའི་མཐར་རྒྱུའི་རྡོ་རྗེ་འཛིན་པར་རྫོགས་པ་ནི་མངལ་སྐྱེས་ལ་མཚོན་ན་རང་གི་ཕ་མ་མཚོན་པའི་སྦྱང་གཞི་ཡིན་ལ། དེའི་ངང་ལས་རྒྱུ་རྡོ་རྗེ་འཛིན་པ་ཡབ་ཡུམ་ཐིག་ལེར་ཞུ་བ་ནི་བར་སྐབས་དང་མཚུངས་ལ། དེ་ལས་ཞུ་བ་གླུས་བསྐུལ་གྱི་སྒྲའི་རྐྱེན་གྱིས་ཕུང་ཁམས་སྐྱེ་མཆེད་གནས་སུ་དག་པ་གདན་གསུམ་ཚང་བའི་ལྷའི་ངོ་བོ་འབྲས་བུའི་རྡོ་རྗེ་འཛིན་པར་བཞེངས་པ་ནི་ཕ་མ་དེ་གཉིས་ཀྱི་བུར་གྱུར་པའི་ཆ་དང་རྣམ་འགྱུར་སྦྱོང་ཞིང༌། དེའང་མཚན་དཔེའི་བདག་ཉིད་ཅན་དུ་བཞེངས་ནས་གཞན་ལ་ཕན་པ་རྒྱ་ཆེན་པོ་འགྲུབ་པ་ནི་མྱ་ངན་ལས་འདས་པ་དང་བཞུགས་ཚུལ་མཐུན་པ་ཡིན་ནོ། །དེ་ལྟར་སྒོ་ང་དང་མངལ་སྐྱེས་སྦྱོང་བའི་བསྐྱེད་རིམ་གཉིས་ལས། ཉིད་ཟླའི་བར་དུ་ས་བོན་དང་མཚན་མའི་རྣམ་པ་ཞུ་བ་སྒོང་སྐྱེས་དང༌། མངོན་བྱང་ལྔས་བསྐྱེད་ཞུ་བ་འཁོར་གྱི་ལྷ་མོའི་གླུས་བསྐུལ་བའི་རྐྱེན་གྱིས་བཞེངས་པ་མངལ་སྐྱེས་སྦྱོང་ཚུལ་ཏེ་ངེས་བརྗོད་བླ་མ་ལས། མངལ་སྐྱེས་གླུ་ཡི་སྦྱོར་བ་ཡི། །བསྒོམ་པ་རྣམས་ནི་
ཡོངས་སུ་བརྟག །སྒོང་སྐྱེས་གླུ་ནི་མེད་པ་སྟེ། །ཞེས་སོ། །གསུམ་པ་དེ་རྫོགས་རིམ་གྱི་སྨིན་བྱེད་དུ་འགྲོ་ཚུལ་ནི། ལམ་དུས་ཀྱི་བསྐྱེད་རིམ་ཞུ་བདེ་དང་སྟོང་ཉིད་དུ་འབྲེལ་བ་ལས། ཁུ་རྡུལ་རླུང་གསུམ་སེམས་དང་བཅས་པའི་ཆ། །རྣམ་པར་དག་པས་རྫོགས་རིམ་སྨིན་བྱེད་འགྱུར། །དེའང་འགྲོ་བའི་ལུས་རྟེན་ཁྱད་པར་ཅན་ལ་རིགས་སམ་ཁམས་ཀྱི་སྦྱང་གཞི་ལྷུན་གྲུབ་ཏུ་ཡོད་པ་གང་ཞིག་ཐབས་ཀྱིས་ཟིན་པའི་ཚེ་གྲོལ་བར་འགྱུར་བ་ཡིན་ཏེ། འདི་ལྟར་ཁམས་དཀར་དམར་གྱི་རྟེན་གཉིས་ལ་བརྟེན་པའི་ཚུལ་དུ་འབྲེལ་བའི་རྣམ་པར་ཤེས་པའི་སེམས་ཀྱི་རང་བཞིན་རྒྱུ་དུས་ན་དབང་གིས་སྨིན་པར་བྱས་པ་གང་ཞིག རྟོག་བཅས་ཀྱི་ལམ་བསྐྱེད་རིམ་གྱི་དུས་སུ་མངོན་བྱང་ལྔ་ལ་བརྟེན་ནས་བསྒོམས་པས་རྫོགས་རིམ་གྱི་སྨིན་བྱེད་དུ་འགྲོ་བ་ཡིན་ཏེ། ཅིའི་ཕྱིར་ན་དེའི་དུས་ནའང་གནད་དུ་བསྣུན་པའི་གཙོ་བོ་ནི་ཁམས་དཀར་དམར་གཉིས་དང་རྣམ་པར་ཤེས་པ་གསུམ་ཡིན་པའི་ཕྱིར་རོ། །བཞི་བ་བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ནི། མངོན་བྱང་སོ་སོའི་རང་བཞིན་རྒྱུ་འབྲས་འབྲེལ་བ་ཅན་ཡིན་པས་འཁོར་བ་དང་མཐུན་པའི་རྣམ་པ་ལམ་བྱེད་ཀྱིས་སྦྱང་བྱ་སྲིད་པའི་རང་བཞིན་སྦྱོང་ཞིང་དག་པར་བྱེད། རྒྱལ་བའི་བཞུགས་ཚུལ་དང་
མཐུན་པའི་མོས་པ་ལམ་བྱེད་ཀྱིས་སོ་སོའི་ཡེ་ཤེས་སུ་རྫོགས་པར་བྱེད། གཉིས་ཀ་རྫོགས་རིམ་གྱི་སྨིན་བྱེད་དུ་འགྲོ་བའི་འབྲས་བུ་ལམ་བྱེད་ཀྱིས་མཚན་དཔེའི་བདག་ཉིད་དུ་སྨིན་པར་བྱེད་པའོ། །གསུམ་པ་ནི་དེ་ལྟར་ཕ་མའི་འདུ་འཕྲོད་ལ་བརྟེན་པའི་སྐྱེ་གནས་རགས་པ་གཉིས་ཀྱི་སྦྱང་གཞི་སྦྱོང་བྱེད་སྤྲོས་པ་ཅན་མ་ཧཱ་ཡོ་ག་ལྟར་བཤད་ནས། ཕྲ་བ་ཁུ་རྡུལ་གྱི་རྒྱུ་ལམ་བརྟེན་པ་གཉིས་ནི་སྐྱེ་བ་འགྲུབ་པར་སླ་བས་བསྐྱེད་རིམ་ཀྱང་སྤྲོས་པ་ཆུང་བ་ཡིན་པའི་ཚུལ། དྲོད་གཤེར་སྐྱེས་ནི་གཉིས་པོ་འདུས་པ་ལས། །རྣམ་ཤེས་ཞུགས་པའི་མོད་ལ་གཟུགས་འགྲུབ་བཞིན། །ལྷ་ཡི་མཚན་དང་མངོན་རྟོགས་དྲན་ཙམ་ལ། །ཕྱག་རྒྱ་རྫོགས་པའི་བསྐྱེད་རིམ་ཚང་བར་བསྒོམ། །དེ་ཡང་བསྐྱེད་རིམ་སྤྲོས་པ་ཅན་གཉིས་ལ་གོམས་པ་ཆེར་ཐོབ་པ་རྣམས་ཀྱིས་ནི་དྲོད་གཤེར་སྐྱེས་སྦྱོང་བ་ཨ་ནུ་ཡོ་གའི་བསྐྱེད་རིམ་གྱི་གྲུབ་མཐའ་གཙོ་ཆེ་བར་བསྒོམ་སྟེ། བང་མཛོད་འཕྲུལ་གྱི་ལྡེ་མིག་ལས། ཨ་ནུ་ཡོ་གའི་ཐེག་པར་ནི། །སྙིང་པོ་ཙམ་ཞིག་བརྗོད་བྱས་པས། །མ་སྐྱེས་རྫོགས་པའི་ལྷ་རུ་བསྒོམ། །ཞེས་པ་ལྟར་བརྟན་པ་ཆེར་ཐོབ་པས་དབྱིངས་དང་ཡེ་ཤེས་ཟུང་དུ་འཇུག་པའི་རྩལ་སྣང་གི་འཕེན་པས་གནས་ལུས་ལ་སྲེད་པ་དང་ལེན་པའི་བག་
ཆགས་སྦྱང་བ་ཙམ་ལས། མངོན་བྱང་ལྔ་ལ་སོགས་པའི་རྣམ་པ་དང་ཚིག་སྤྲོས་ལ་མ་བརྟེན་པར་ལྷ་སོ་སོའི་སྙིང་པོ་བརྗོད་པ་ཙམ་གྱིས་ཤེས་རབ་གྱི་དབྱིངས་སྟོང་ཉིད་ཀུན་ཏུ་བཟང་མོའི་ཀློང་ལས་ཀུན་རྫོབ་བདེན་པའི་ཆ་ལྷའི་ཕྱག་རྒྱར་རྫོགས་པར་གསལ་བ་ནི་དྲོད་གཤེར་སྐྱེས་སྦྱོང་བའི་བསྐྱེད་རིམ་བདེ་སྟོང་དབྱེར་མེད་ཆེན་པོ་སྟེ། རང་ཤར་ལས། རིམ་གྱིས་འཇུག་པ་གང་ཞེ་ན། །དབྱིངས་དང་ཡེ་ཤེས་རིམ་གྱིས་ཞུགས་ནས་ནི། །ཞེས་པ་ལྟར་རོ། །བཞི་པ་ནི། བརྫུས་ཏེ་སྐྱེ་བ་སྐད་ཅིག་དྲན་རྫོགས་ཏེ། །མིང་དང་གཟུགས་ལ་མ་བརྟེན་ཝལ་གྱིས་གསལ། །འདི་ལྟར་ལྷ་དེའི་རྣམ་པའམ་སྙིང་པོ་ཙམ་དྲན་པའི་མོད་ལ་སྐད་ཅིག་དྲན་རྫོགས་སུ་བསྐྱེད་པ་ཆུ་ལས་ཉ་འཕར་བ་བཞིན་ཏེ། རང་ཤར་ལས། གཅིག་ཅར་འཇུག་པ་གང་ཞེ་ན། །ལྷ་རྣམས་མ་བསྐྱེད་སྙིང་པོ་དྲན་པས་རྫོགས། །ཞེས་དང༌། སྡོམ་འབྱུང་ལས། སྐད་ཅིག་ཙམ་པའི་རྣལ་འབྱོར་གྱིས། །རྫོགས་པའི་རིམ་པ་བསྒོམ་པ་ནི། །ཁམས་གསུམ་གཞལ་ཡས་ཁང་བདག་ཉིད། །སྲོག་ཆགས་རྣམས་ནི་དཀྱིལ་འཁོར་བ། །དེ་དབུས་སྐད་ཅིག་རྣམ་པ་ཡི། །དཀྱིལ་འཁོར་བདག་པོ་རྣལ་འབྱོར་པའོ། །ཞེས་པ་ལྟར་རོ། །དེ་ལ་ཁ་ཅིག་བསྐྱེད་ཚུལ་
ཕྱི་མ་ལ་བསྐྱེད་རིམ་གྱི་ཡན་ལག་མ་ཚང་ཞེས་དགག་པ་ནི་མུན་སྤྲུལ་ཏེ། དེ་ལྟ་ན་བརྫུས་སྐྱེས་སྦྱོང་བའི་བསྐྱེད་རིམ་ལའང་མངལ་འབྱིན་གྱི་གནས་སྐབས་ལ་སོགས་པའི་ཡན་ལག་སྦྱར་དགོས་པའི་ཕྱིར་དང༌། གཞན་ཡང་སྦྱོང་ཚུལ་བཞི་མེད་ན་འཁོར་བའི་འདྲ་འབག་བཞི་ཀ་ཚང་བ་ལམ་དུ་བྱས་པར་ག་ལ་འགྱུར། གལ་ཏེ་མངོན་བྱང་སོ་སོའི་གནས་སྐབས་སུ་སྐྱེ་གནས་བཞི་གའི་བག་ཆགས་སྦྱོང་བས་སོ་ཟེར་ན། འོ་ན་སྐབས་དེའི་མངོན་བྱང་དང་པོ་ལ་མཚོན་ན། བརྫུས་སྐྱེས་ཀྱི་སྦྱང་གཞི་སྟོང་པའི་ཆ་ཙམ་ལས་མེད་པས་དེར་སྦྱར་བར་འོས་པའི་ཡན་ལག་དེ་ཅི་ཞིག་ཡིན། དེ་ནི་དགྱེས་རྡོར་ལ་སོགས་པའི་རྒྱུད་གཞན་ལས་མ་བཤད་དོ་ཞེ་ན། རང་ཉིད་མོས་ཤིང་ཞེན་པའི་བག་ཆགས་དང་འབྲེལ་བ་མཐའ་དག་རྒྱུད་ཡིན་ལ། དེ་ལས་གཞན་པ་ནི་བརྫུས་མའོ་ཟེར་བ་འདི་གངས་རིའི་ཁྲོད་པ་རྣམས་ལ་གྲགས་པས་བདེན་མོད་ཀྱི་སྐད་ཅིག་དྲན་རྫོགས་ཀྱི་བསྐྱེད་རིམ་རྒྱལ་བའི་བཀའ་ལས་གཞན་དུ་གྱུར་པའོ་སྙམ་ན། མངོན་བརྗོད་བླ་མའི་རྒྱུད་ལས། གཅིག་ཅར་འཇུག་པའི་སྦྱོར་བ་ཡི། །བདག་གི་ལུས་ནི་རྣམ་པར་བསམ། །ཞེས་དང༌། གསང་བ་མཆོག་ནི་བླ་ན་མེད། །སྐད་ཅིག་གིས་ནི་བདག་བསྒོམ་
པ། །ཧེ་རུ་ཀ་དཔལ་གཟུགས་སུ་བྱ། །ཞེས་དང༌། སྡོམ་འབྱུང་ལས། དབང་པོ་རྣོན་པོས་སྐད་ཅིག་གིས། །རྣམ་པས་སེམས་ཙམ་དཀྱིལ་འཁོར་བསམ། །ཞེས་དང་རྡོ་རྗེ་དྲིལ་བུ་པས། །སེམས་ཅན་བརྫུས་ཏེ་སྐྱེ་བ་བཞིན། །ས་བོན་མེད་པར་རྣམ་པར་བསྒོམ། །ཞེས་སོ། །དེའང་སྒྱུ་མ་ལ་མ་བྱང་བ་རྣམས་ཀྱིས་ནི་སྒྱུ་མའི་དམིགས་གཏད་ལ་ཆེ་ཐང་དུ་བྱ་དགོས་ལ། སྒྱུ་མ་མཁན་ཆེས་བྱང་པ་རྣམས་ཀྱིས་ནི་སྒྱུ་མའི་སྤྲུལ་པ་བདེ་བླག་ཏུ་འགྲུབ་པ་དང་འདྲ་བས། སློབ་པའི་གནས་སྐབས་ན་གོམས་པ་བརྟན་པ་དང་མི་བརྟན་པའི་ཁྱད་པར་ལ་དཔགས་ནས་བསྒོམ་པ་ནི་འདིར་ཡང་འདོད་པ་ཡིན་པའི་ཚུལ། བསྒོམ་ཚུལ་བཞི་པོའང་དང་པོའི་ལས་ཅན་ལ། །སྒོང་སྐྱེས་སྦྱོང་བའི་བསྐྱེད་རིམ་གཙོ་བོར་བསྒོམ། །རིམ་བཞིན་གོམས་པ་བརྟན་དང་བརྟན་པ་ཆེ། །ཤིན་ཏུ་བརྟན་པའི་མཐུ་དང་མཐུན་པར་སློབ། །ཅེས་འདོམས་པ་སྟེ་གང་ཟག་གཅིག་ལའང་བྱིས་པ་དང༌། དར་བབས་དང༌། རྒན་པོའི་གནས་སྐབས་གསུམ་ཡོད་པ་བཞིན་རགས་པའི་དཀྱིལ་འཁོར་ཡུད་ཙམ་གྱིས་མངོན་དུ་བྱེད་མི་ནུས་ཚུན་དང་པོ་གཉིས་དང༌། ཕྲ་བ་དེའི་སྤྱན་གྱི་དཀར་ནག་ཚུན་ཆོད་ལ་གསལ་སྣང་ཐོབ་པའི་བར་དྲོད་གཤེར་སྐྱེས་དང༌། དཀྱིལ་འཁོར་གྱི་