ཤོག་ལྷེབ་ ༤༩༩ ནས་ ༦༠༠ བར།
ཀློང་ཆེན་ནམ་མཁའི་རྣལ་འབྱོར་གྱི་གསུང་འབུམ་ཐོར་བུ་ལས་སྐྱེད་རྫོགས་སྒོམ་ཕྱོགས་དྲིས་ལན་དང་། ཞལ་གདམས་རྣམས་ཕྱོགས་སུ་བསྡེབས་པ་བཞུགས་སོ།
དང་པོའི་སངས་རྒྱས་དྲི་མེད་འོད་ཟེར་ལ་ཕྱག་འཚལ་ལོ། །སྒོམ་ཕྱོགས་སྐོར་ལ་དྲན་པས་ནམ་སླེབ་བརྟག་དཔྱད་བསམ་གཞིག་མེད་པར་འདུན་པ་ནམ་གཏད་གནས་བཞིན་རྟོག་པ་ཕྲ་མོ་ལམ་ལམ་ཤར་བ་ཡང་དེ་མ་ཐག་ཞིག་ཀྱང་། དེའི་རྗེས་ཤེས་ལམ་ལམ་ལ་སྟོང་པ་ལོགས་སུ་འཚོལ་དགོས་པའི་དྲན་རིག་ཁོ་རང་དོགས་མ་བདེ་བ་འཆར་ཚུལ། ཐ་མལ་གྱི་རིག་པ་བཟོ་མེད་སྒོམ་ལམ་ཤར་ནས་ཅུང་ཟད་ནམ་དྲན་དྲན་གསལ་སྟོང་ཙམ་དུ་འདུག་དགོངས་པའི་འཛིན་སྟངས་ལ་སྒོམ་གྱི་ངོ་བོ་བཅོལ་
བའི་སྐྱོན་དུ་གོ་ལགས། དེ་ལ་ནི་རྣམ་རྟོག་མ་ཤར་ན་སྒོམ་བདེ། རྣམ་རྟོག་ཤར་ཚེ་རྣམ་རྟོག་ལ་གྲོལ་མ་གྲོལ་གྱི་བརྟག་དཔྱད་བྱེད་དགོས་པ་ཞིག་གིས་རྐྱེན་བྱས་དྲན་རིག་ཀྱང་དོགས་མ་བདེ་ར་སོང་བ་འདྲ་མོ་ཡོང་། རྫོགས་པ་ཆེན་པོའི་ཁྱད་ཆོས་དྲན་པས་ནམ་སླེབས་ཚེ་དགེ་གཅིག་པོས་ཆོག་པར་བྱས་ནས་དྲན་པའི་རྒྱུན་པ་བསྐྱང་། ཐ་མལ་གྱི་ཤེས་པ་སེམས་ལ་བློས་བྱས་ཀྱིས་བསྒྱུར་བཀོད་སྤུ་ཙམ་མ་སོང་བ་དེ་ཉིད་རང་ཀ་དག་གི་དགོངས་པ་ཡིན་ཏེ། ཀུན་མཁྱེན་ཆེན་པོས། ཆོས་ཐམས་ཅད་སྤྲོས་པ་ཉེ་བར་ཞི་ཞིང་། ཁས་ལེན་ཐམས་ཅད་དང་བྲལ་བ་མདོ་ལུགས་ལའང་ཡོད་མོད། ད་ལྟའི་ཤེས་པ་འདི་སྤུ་མ་བརྗེས་མདོག་མ་
བསྒྱུར་བས་སངས་རྒྱས་སུ་འགྲུབ་པར་འདོད་པ་ནི་ཕ་རོལ་ཏུ་ཕྱིན་པ་ལ་ག་ལ་ཡོད། དེས་ན་ཐབས་ཤེས་གཉིས་ཀས་གསང་སྔགས་ཁྱད་པར་འཕགས་ཏེ། ཞེས་ཚུལ་གསུམ་སྒྲོན་མེའི་ལུང་དང་བཅད་ལྟ་བ་ཤེས་རབ་ཀྱི་ཆ་ནས་ཀྱང་བློས་བཅོས་པའི་སྤྲོས་བྲལ་དང་། བློས་མ་བཅོས་པ་ལ་ལྷུན་གྱིས་གྲུབ་པའི་སྤྲོས་བྲལ་གྱི་ཁྱད་གནམ་ས་ལྟ་བུར་བསྟན་པའི་ཕྱིར། ད་སྒོ་བྱེད་དགོས་སྙམ་པའི་དྲན་པ་སླེབས་མ་ཐག་པའི་རིག་པ་སྐད་ཅིག་མ་དགེའི་རྒྱུན་བསྐྱངས་ན་ནོ་ར་འཁྲུལ་དང་གོལ་ཤོར་མེད། འཁོར་བར་འཁྱམས་མཁན་མ་རིག་པ་ཡིན་པས། དྲན་པ་ངོས་ཟིན་ན་མ་རིག་པ་རང་སངས་ཡིན། དྲན་པ་དེའི་ངང་ནས་རྣམ་རྟོག་ཅི་ལྟ་བུ་ཤར་ཡང་ད་རེས་འདི་འདྲས་འཆར་གྱི་འདུག་བསམ་མཁན་གྱི་དྲན་པ་གཅིག་པོ་དགེ་ངོས་ཟིན་པར་བྱས་ནས་རྣམ་རྟོག་གི་རྗེས་སུ་འབྲང་བ་དང་། རྟོག་དཔྱོད་གཏང་བ་གང་ཡང་མ་བྱས་པས་རྣམ་རྟོག་རང་གྲོལ་ལ་འགྲོ་བར་མ་ཚད། རྣམ་རྟོག་ཀྱང་ལམ་དུ་མ་ལོངས་པའི་རྒྱུ་མཚན་འོག་འགྱུར་སོང་བའི་རྣམ་རྟོག་ནི་རྡོ་ལ་རི་མོ་བྲིས་པ་དང་འདྲ། དེའི་བག་ཆགས་སྟོབས་སུ་གྱུར་པས་འཁོར་བ་མུ་མཐའ་མེད་པར་ཁྲིད་པ་ཡིན། དྲན་པས་ཟིན་པའི་རྣམ་རྟོག་ཆུ་ལ་རི་མོ་བྲིས་པ་དང་
འདྲ། འདྲི་བ་དང་ཞིག་པ་དུས་མཚུངས་པས་ཕྱིན་ཆད་བག་ཆགས་དང་འཁོར་བའི་རྟེན་མི་བྱེད་དེ། །སློབ་དཔོན་དགའ་རབ་རྡོ་རྗེའི་རིག་པ་སྤྱི་ལུགས་ལས་ཀྱང་། ཤར་བའི་དུས་ན་མཉམ་ཤར་བཟང་ངན་མེད། གནས་པའི་ཚེ་མཉམ་གནས་བཟང་ངན་མེད། གྲོལ་བའི་ཚེ་ན་མཉམ་གྲོལ་བཟང་ངན་མེད། ཅེས་སོ། །ཆོས་སྐད་གཞན་པའི་རང་སྟོང་གཞན་སྟོང་དང་། སྟོང་ཉིད་མེད་དགག་དང་། །མ་ཡིན་དགག་དང་། ཟུང་འཇུག་དང་། ལྷན་ཅིག་སྐྱེས་པ་དང་། རྣམ་ཀུན་མཆོག་ལྡན་ལ་སོགས་པའི་ལྟ་སྒོམ་ཟབ་ཟབ་མོ་ལ་སྙེག་པའི་བློས་བྱས་ཀྱི་རང་ལྟ་ཕྱོགས་འཛིན་འདིས་སྨྲ་བསམ་བརྗོད་མེད་ལ་ཤེས་སྒྲིབ་ཀྱི་ལྷན་པ་འདེབས་པ་ཡིན་པའི་ཚུལ་ཐུན་མོང་གི་མདོ་སྡེ་ལས་ཀྱང་། བཅོམ་ལྡན་འདས་ཏེ་དགྲ་བཅོམ་པ་འདི་སྙམ་དུ་བདག་གིས་དགྲ་བཅོམ་པ་ཉིད་ཐོབ་བོ་སྙམ་དུ་སེམས་པར་འགྱུར་ན། དེ་ཉིད་དེའི་བདག་ཏུ་འཛིན་པར་འགྱུར་ལགས་སོ། །སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་ལགས་སུ། །ཞེས་པ་ལྟར་རོ། །དེའི་ཕྱིར་ཕུང་པོ་ལྔ་དང་ཚོགས་བརྒྱད་ཀྱིས་མ་བསླད་བའི་བདེ་གཤེགས་སྙིང་པོའི་རང་བཞིན་མ་འགྱུར་པ་ནི། སྤྲོས་བྲལ་དོ་ཧ་མཁས་པས་སྤངས་པ་ལ་འདུག་པས་ཀ་ནས་དག་
པའི་ཤེས་པ་ལ་བསྒྱུར་དགོས་སྤུ་ཙམ་མ་སོང་བ་འདི་ག་དྲན་པའི་རྒྱུན་གྱིས་བསྐྱངས་པ་དེ་དག་གཅིག་པུས་ཆོག །དེའི་རྒྱུ་མཚན་མོད་སྡེ་བསྐལ་བཟང་ལས་ཀྱང་། ངོ་བོ་ཉིད་མེད་པར་མཐོང་པ་གང་ཡིན་པ་དེ་ནི་བསམ་གཏན་གྱིའོ། །སྐྱེ་བ་མེད་པར་མཐོང་བ་གང་ཡིན་པ་དེ་ནི་ཤེས་རབ་སྟེ། ཞེས་པས་གསལ་ལ། དེའི་ངང་ནས་རྣམ་རྟོག་ལམ་དུ་ཁྱེར་ལུགས་ཀྱང་གོང་དུ་བསྟན་པ་ལྟར་ཡིན་ཏེ། གནས་ལུགས་མཛོད་ལས། ཕྱི་ཡུལ་ལྔ་དུ་མ་སྣ་ཚོགས་སུ་སྣང་བ་ལ་ནང་དྲན་རྟོག་ཅི་ཤར་ཡང་དུས་དེར་ཡུལ་ལ་ཤར་བ་ངོ་ཤེས། ཤར་བའི་ནུས་པ་རྩལ་རྫོགས། །དེ་ག་ལ་བསྡད་པས་རང་ཡལ་རྗེས་མེད་དུ་འགྲོ་བ་གང་ཤར་ཅོག་གེ་གཞག་པ་དང་། ཡེངས་པ་འགྱུར་འཇུག་པ་དང་། སྣང་ཐོག་ཤར་བ་དེ་གློད་པ་གསུམ་གང་རུང་དུ་འགགས་བསྡམས་པས་ཆོས་སྐུ་རང་མལ་དུ་ས་ཟིན་པར་བྱེད་པའོ། །དེ་ཡང་ངོ་མ་ཤེས་ན་ཕྱལ་བ་རང་ག །རྩལ་མ་རྫོགས་པས་བལྟས་པས་ཡལ་ན་དེ་བས་ཆེབས་རྐྱེན་མི་ཐུབ། རང་མ་ཡལ་ན་ཐད་ཀར་ཆོད་པ་ལ་སོགས་པའི་ཕྱིར་གནད་འདི་གསུམ་གལ་པོ་ཆེ་ཡིན་ནོ། །ཞེས་གསུངས་སོ། །དེ་ཡང་དྲན་པ་ཁོ་ནར་སྒོམ་གྱི་རྟེན་སོ་བྱེད་མིན་མཚམས་ལ། ཀུན་མཁྱེན་གྱིས། དང་པོའི་ལས་ཅན་འདུ་བྱེད་ཡེངས་བྱ། མཉམ་རྗེས་སློབ་རྣམས་ཆོས་ཉིད་མ་ཡེངས་བྱ། །གོམས་པས་དྲན་
སྣང་ཡེ་ཤེས་མ་ཡེངས་བྱ། །ཀློང་གྱུར་དུས་སུ་ཡེང་མིག་ཡེང་མཁན་མེད། བརྟན་པ་མཐར་ཡེངས་ཡུལ་ཆོས་ཉིད་ངེས། ཆོས་ཟད་དུས་ན་མཚོན་བརྗོད་ཡུལ་ལས་འདས། དེ་འདྲའི་ཆད་དུ་སྐྱོལ་བ་མཛད་པ་ཞུ། །ཞེས་དྲན་པ་ལ་ཁྱད་པར་ཆེ་བ་འདི་གཅིག་པུའི་གནད་རྟོགས་པའང་ཤིན་ཏུ་དཀོན་པར་ཨ་ཐོར་ལ། དེས་ན་ད་ལྟ་དྲན་པས་དྲན་པ་བརྟན་ཙམ་བྱེད་དགོས་འདི། འདུ་བྱེད་ཀྱི་དྲན་པ་ཡིན་ནོ། །ལྷར་སྣང་དང་ཆོས་ཉིད་ཟུང་དུ་མི་འཇུག་པ་ད་ལྟ་བཏན་པ་མཐོང་བའི་ཉམས་ཏེ། ལྷ་དང་སྣང་བ་ཆོས་ཉིད་གསུམ་འདྲེས་པ་རྣམ་སྨིན་རིག་འཛིན་གྱི་གོ་འཕང་ཡིན་གཤིས་ལོ་ཟླ་ཙམ་ལ་ཤར་གྱིས་འབྱུང་བ་དཀའ་བས་ཐུགས་ཞུམས་སྤངས། འོན་ཀྱང་ལམ་ཁྱེར་ལ་ལྷའི་སྣང་ཆ་བཀ་གསལ་ལེའི་བའི་ངང་ནས་དྲན་པ་བརྗེད་འབྱམས་སུ་མ་སོང་ཕྱིན། སྟོང་ཉིད་ལུགས་སུ་སྒོམ་མི་དགོས། ལྷར་སྣང་གསལ་མཁན་ཁོ་རང་གནས་ལུགས་ཡིན་པའོ། །དེ་བརྗེད་སྐྱེན་པ་འདྲ་མོ་ཡོད་པ་ནི་ད་ལྟ་ལྷག་མཐོང་ཤུགས་ཆུང་བ་ཡིན་མོད། དེ་ལ་རེས་འགའ་ལྷའི་གསལ་སྣང་ལ་ཤུགས་བསྐྱེད། མི་གསལ་བའི་ཚེ་ང་རྒྱལ་དང་དྲན་རིག་ཟུང་སྦྲེལ། རེས་འགའ་དག་དྲན་ལ་ཐུགས་གཏོད་པ་སོགས་དུབ་པ་སྤང་བའི་ཐབས་ལ་འབད། ཤིན་ཏུ་གསལ་དཀའ་ན་བྲིས་སྐུ་ལ་དྲན་པ་མངོན་དུ་
གཞག །དེའི་བག་ཆགས་བརྟས་པའི་སྐུ་ལམ་མེ་བ་དེ་ག་མ་བརྗེད་ཙམ་ནས་འོག་འབྱམས་སུ་མ་སོང་ཕྱིན་ལམ་མེ་གསལ་མཁན་ཁོ་རང་དྲན་པའམ་སེམས་ཉིད་ཡིན་བས་སྟོང་པ་ལོགས་སུ་བསྒྲུབ་མི་དགོས། མཐར་ཚོགས་གཉིས་རྫོགས་པའི་འབྲས་བུ་སྒྱུ་མའི་སྐུར་རང་ཤུགས་ཀྱིས་འཆར་འོང་ལགས་ཞུ། ཞེས་ལྕགས་ཟམ་མཆོག་སྤྲུལ་རིན་པོ་ཆེར་ཕུལ་བ། །ལགས། ཇི་ཕེབས་སྒོམ་ཕྱོགས་སྐོར། རིག་པ་གཏིང་གསལ་དྲི་མེད་དུ་གོམས་པ་ལ་ཞི་ལྷག་ཏུ་དབྱེ་བའང་རྟོག་བཅས་ཀྱི་བསམ་གཏན་ནོ། །མདོ་ཕྱོགས་ནས་ཞི་ལྷག་རྣམས་གྲངས་མང་པོར་དབྱེ་བ་ནི། བྱིས་པ་རྣམས་ཆོས་དབྱིངས་དྲི་མེད་ལ་ཡིད་ཆེས་པར་དཀའ་བས་དེ་དག་དྲང་བའི་ཕྱིར་གཉིས་སུ་མེད་པའི་ཡེ་ཤེས་ལ་ཀུན་གཞིར་གདགས་པས་མཚོན་གནས་ལུགས་ཀྱི་མཚན་ཉིད་སོ་སོར་དབྱེ་བའི་དགོངས་པ་ཙམ་དུ་ཟད་པ་ལ། ཀློག་པ་ཐོས་བསམ་པ་ཕལ་ཆེར་ནི། ངོ་བོའི་ཆ་ལ་འདུག་ཚུལ་ཇི་བཞིན་བརྒྱུད་ལ་ཉམས་སུ་མ་མྱོང་བཞིན་དུ་ཚིག་གི་ཆ་ལ་རྟོག་པས་སྒྲོ་བཏགས་པས་བསྒམ་གྱིས་མི་ཁྱབ་པའི་ཡེ་ཤེས་དང་། རྟོག་དཔྱོད་ཀྱི་ཤེས་རབ་རྗེས་འགལ་བའི་ཚུལ། དྲིན་ལན་བསབ་པའི་མདོར། དོན་ལ་གནས་ཀྱིས་ཡི་གེའི་རྗེས་སུ་མི་གནས། ཡེ་ཤེས་ལ་གནས་ཀྱིས་རྣམ་པར་ཤེས་པའི་རྗེས་སུ་མི་
གནས་ཞེས་རྒྱ་ཆེར་གསུངས། ཚོགས་དྲུག་རང་སའི་སྟོང་ཡུལ་གྱི་རྣམ་པ་བློ་དང་མ་འདྲེས་པའི་མཉམ་གཞག་དངོས་བསྟན་ནི། ཆོས་ཉིད་གསལ་ལ་དམིགས་པ་མེད་པ། ངོ་བོས་སྟོང་ལ་ཆད་ལྟ་མ་ཡིན་པ། ལྟ་རྒྱུ་དང་སྒོམ་རྒྱུའི་ཁས་ལེན་ཐམས་ཅད་དང་བྲལ་བ། རང་བཞིན་བག་ལ་ཉལ་དང་ཐ་མལ་ལུང་མ་བསྟན་གྱི་དྲིས་མ་གོས་པ། ཡུལ་གྱི་འཛིན་སྟངས་སམ་ཡིད་ཆེས་ཀྱི་ངེས་ཚེས་དང་བཅས་པའི་དར་འཛིན་དང་བྲལ་བ་དེ་ཞི་ལྷག་ཟུང་འབྲེལ་གྱི་ཏིང་ངེ་འཛིན་བྱ་བ་ལགས་ཏེ། ཐེག་པ་ཆེན་པོའི་མདོ་སྡེ་ཟབ་མོ་ནས། བློ་བརྟན་པ་གང་ཡིན་པ་དེ་ནི་བསམ་གཏན་གྱིའོ། །ཟག་པ་ཟད་པའི་རྒྱུ་གང་ཡིན་པ་དེ་ནི་ཤེས་རབ་སྟེ། སེམས་ཀུན་ནས་དཀྲིས་པ་དང་བྲལ་བ་གང་ཡིན་པ་དེ་ནི་བསམ་གཏན་གྱིའོ། །བག་ལ་ཉལ་ཀུན་ནས་འཇོམས་པའི་དེ་ནི་ཤེས་རབ་ཀྱིའོ། །ཞེས་པས་སོ། །གཞན་སྟོང་ནི་གཙོ་བོར་ཇོ་ནང་པའི་ཆོས་སྐད་དུ་འདུག་ཅིང་ཉམས་ཆོས་བར་པ་གསུམ་གྱི་དགོངས་པ་རང་ལུགས་ཀྱི་དབུ་མར་འདོད་པའི་གཏན་ཚིགས་། རྣམ་པར་གཞག་བྱ་འཇོག་བྱེད་མེད། །རྣམ་གཞག་ཐམས་ཅད་རྫུན་པ་ཡིན། །ཞེས་དང་། ཁྱད་པ་དག་པ་ཡེ་ཤེས་ཀྱི་ཀུན་གཞི་འཁོར་བའི་ཆོས་ཐམས་ཅད་ཀྱིས་སྟོང་པས། གཞན་
སྟོང་རྟག་བརྟན་ཐེར་ཟུག་ནི་ཡོངས་གྲུབ་བདེ་གཤེགས་སྙིང་པོའི་ངོ་བོ་དོན་དམ་པའི་བདེན་པ་ཡིན་ལ། མ་དག་པ་འཁོར་བའི་ཀུན་གཞི་རྣམ་ཤེས་རང་སྟོང་ཡིན་པས་གཞི་མ་གྲུབ་ཀྱང་རྣམ་པར་དཔྱད་ན་དངོས་མེད་ཡིན་པའི་རྒྱུ་མཚན་གྱིས་གཞན་སྟོང་གི་སྒྲུབ་བྱེད་བཀོད་པར་སྣང་ངོ། །རང་ལུགས་ལ་ཡུམ་ལས་ཕྱི་སྟོང་པ་ཉིད་དང་། ནང་སྟོང་པ་ཉིད་སོགས་སྟོང་ཉིད་བཅུ་དྲུག་ཏུ་གསུངས་པའི་དང་པོ་ཕྱི་སྟོང་པ་ཉིད་ཀྱིས་གཟུང་ཡུལ་སྣང་བ་རང་བཞིན་མེད་པར་བསྟན། ནང་སྟོང་པ་ཉིད་ཀྱིས་འཛིན་བྱེད་ཀྱི་ཤེས་པ་རང་བཞིན་མེད་པར་བསྟན། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཅེས་པས། ནང་སྟོང་གཞན་སྟོང་དུ་འཛིན་མཁན་པོའམ་ངོ་བོ་ཡང་བརྗོད་བྲལ་ཤེས་བྱའི་ཡུལ་ལས་འདས་པར་རྟོགས་པས་འཁོར་ལོ་བར་མཐའི་དགག་བསྒྲུབ་དང་ཡི་གེ་མང་པོ་མཐོང་ཡང་བློ་བྲལ་ཉམས་རྟོགས་བཟང་པོས་མ་བསླད། ཐ་མལ་ལུང་མ་བསྟན་གྱིས་མ་བསླད། བསྒོམ་བྱ་སྒོམ་རིམ་གསུམ། ཇོ་གསེར་གཉིས། སྒྲ་ཚད་མ། འབྲས་ཆོས་གཉིས་སོགས། སྒོམ་བྱེད་ལས་འདས་པའི་འོད་གསལ་ཀློང་ཡངས་ཆེན་པོ་གཞི་གནས་ཀྱི་རིག་པ་གདོད་ནས་སངས་རྒྱས་རློན་པར་བཞུགས་པ་འདི་ཁོ་བོའི་རྒྱུ་ལ་ཨོ་རྒྱན་ཡབ་ཡུམ་གྱིས་བྱིན་གྱིས་བརླབས། པཎ་ཆེན་བི་མ་ལས་བརྡས་བརྒྱུད། ཀློང་ཆེན་རབ་འབྱམས་ཀྱིས་དག་ཐེར་མཛད་པ་ནས་
བཟུང་གྲུབ་ཆེན་ས་ར་ཧ་པ་དང་མཇལ་ཡང་འདྲི་གཏུག་ཞུ་རྒྱུ་མེད་སྙམ་པའི་ངང་འདི་ཀ་དབུགས་དང་འགྲོགས་པ་ལགས། གང་ཉིད་འཆི་བ་ལ་ཐེ་ཚོམ་དང་མ་སྡད་པ་ལ་བྲོད་དཔ་མེད་པའི་གདེང་ཁེལ་བ་དེ་རྗེས་སུ་ཡི་རང་ནའང་། བླ་མ་སྔས་མགོར་གསལ་ནས་རིག་པ་ཐུགས་ཀར་འཕངས་པ་དེ་དུས་མིན་དུ་འཕོས་པའི་ཉེས་པ་དང་། སྐུ་ཚེ་ལའང་ཅུང་ཟད་གཞར་བས་བླ་མ་སྙིང་ག་རང་དུ་གསལ་བ་ལ། དམིགས་གཏད་དང་བྲལ་བའི་རིག་པ་བསྲེས་ནས་མནལ་བ་ཁོ་ན་འོད་གསལ་གྱི་མན་ངག །ཞིང་སྦྱོང་གི་མཆོག་གྱུར་ཡིན་ཏེ། དག་པའི་ཞིང་ཁམས་ཀྱང་རང་སྣང་ལས་གུད་དུ་མ་བཅས་པའི་ཕྱིར་སྐུ་གསུམ་གྱི་སྣང་ཆ་ཐམས་ཅད་རིག་པ་ཁོ་ནའི་འཆར་སྡུད་ཡིན་པས་དགོངས་འཚལ། སྒྲུབ་དབང་དྷརྨ་ཀཱི་རྟིའི་མཆིད་ལན། ཀྱེ་མ། ད་ནི་དུས་ངན་སྙིགས་མའི་དུས། །ཆོས་དྲན་པ་ཉིན་མོའི་སྐར་མ་ཙམ། །ཆོས་པ་རྣམས་ཀྱང་རླུང་གིས་ཁྱེར། །ལམ་སྟོན་རྣམས་ཀྱང་ཚེ་འདི་སྒྲུབ། །ཡོན་ཏན་ཅན་རྣམས་ཆོས་དང་འགས། །དེ་འདྲའི་དུས་ངན་ཤར་ཙ་ན། །ཁྱེད་རང་བསླབ་ཤེས་ཡོན་ཏན་དང་། །དཀོར་ཕྱིར་ཁྱི་ལྟར་མི་རྒྱུག་པར། །བློ་སྣ་བསྟུངས་པ་ངོ་མཚར་ཆེ། །སྟེས་དབང་སྟབས་ལེགས་ཙམ་མིན་པའི། །ཆོས་སྐལ་ལས་ཀྱི་འཕྲོ་ཅན་
སྙམ། །རྣལ་འབྱོར་ང་ཡང་གློ་བ་དགའ། །དེ་ཕྱིར་ཞལ་ཏ་ཚིག་གསུམ་ཡོད། །ཇི་ལྟར་དྲི་བའི་སྙིང་པོར། རྫོགས་པ་ཆེན་པོ་ལྟ་བ་ཡིན་པས་ཐོག་མ་ཉིད་ནས་རིག་པ་བཟོ་མེད་རང་བབས་སུ་གཞག་པའི་རྒྱུན་བསྐྱངས་པ་དེ་ཀ་ནོར་འཁྲུལ་གོལ་ཤོར་ཉུང་བ་ཡིན། དེ་ལྟར་བྱས་ན་རྣམ་རྟོག་འོག་འགྱུར་འགྲོ་རྟགས་ཙམ་འདུག་ཟེར་བ་སྔར་བཤད་པའི་རང་བབས་ཀྱི་རྒྱུན་ལ་ཅུང་ཟད་གནས་འབྱམས་ཀྱི་རིག་ཆ་མ་ཤར་བའི་སྐྱོན་ཡིན། དེའི་ཚེ་རིག་པ་རྟེན་མེད་ཅེར་ཡན་ཁོ་རང་ཐེར་ལ་བཏོན་ནས་བསྐྱངས་ཙ་ན་རྣམ་རྟོག་ངོ་ཤེས་བཞིན་དུ་གྲོལ་འགྲོ་བ་དེ་ཀར་གདའ། བསྐྱེད་རིམ་དང་སྔགས་འདྲེན་པ་སོགས་ན་སྒོམ་མི་བདེ་ཞིང་ཡེངས་ཚབས་ཆེ་བ་དེ་ད་ལྟ་ལས་དང་པོ་པ་སེམས་ཉིད་ལས་སུ་མ་རུང་བའི་རྟགས་ཡིན་པས་རིམ་པས་གོམས་ཡོད། སྒོམ་སྙིང་འགའ་ཞིག་ལ་ལྷག་མཐོང་གི་རྩལ་མ་ཤར་བའི་ཞི་གནས་རྐྱང་པར་ལྷུང་བས་བསྐྱེད་རྫོགས་གཉིས་ཕན་ཚུན་མི་འཁྲུགས་པ་ལྟར་སོང་བ་བའང་ཡོང་སྟེ་ཁྱེད་རང་གི་དེ་དེ་འདྲས་མ་རེད། ལར་སྒོམ་འདི་ཧ་ཅང་གྲིམས་པ་དང་ཧ་ཅང་གློད་པ་གཉིས་ཀ་མ་ཡིན་པའི་དཔེ་གྲིམས་ལྷོད་རན་པ་ལས་འབྱུང་བ་ནི། སྔོན་འཕགས་པ་ཀུན་དགའ་བོས་གྲོ་བཞིན་སྐྱེས་ལ་བསམ་གཏན་བསླབས་པས་དེ་ཉིད་རེས་འགའ་ནི་གྲིམས།
རེས་འགའ་ནི་ལྷོད་པས་བྱ་དཀའ་བར་གྱུར་པ་ན། སྟོན་པའི་དྲུང་དུ་ཞུས་པས་བཀའ་སྩལ་པ། ཚེ་དང་ལྡན་པ་ཁྱོད་ཁྱིམ་དུ་གནས་པའི་ཚེ་པི་ཝང་སྒྲེང་ཤེས་སམ། གསོལ་པ། དེ་ནི་ཤིན་ཏུ་མཁས་ལགས་སོ། །འོ་ན་ཁྱོད་ཀྱི་པི་ཝང་གི་རྒྱུད་ཧ་ཅང་བསྡམས་པ་ལས་སྒྲ་སྙན་པ་བྱུང་ངམ། བཅོམ་ལྡན་འདས་དེ་ནི་མ་ལགས་སོ། །འོ་ན་ཧ་ཅང་ལྷོད་པ་ལས་བྱུང་ངམ་། ཡང་མ་ལགས་སོ། །འོ་ན་ཐང་ལྷོད་རན་པ་ལས་བྱུང་ངམ། བཅོམ་ལྡན་འདས་དེ་བཞིན་ལགས་སོ། །འོ་ན་ཚེ་དང་ལྡན་པ་ཁྱོད་ཀྱི་སེམས་ཀྱང་དེ་བཞིན་ཏེ། ཧ་ཅང་གྲིམས་པ་ཡང་མ་ཡིན། ཧ་ཅང་ལྷོད་པ་ཡང་མ་ཡིན། ཞེས་གསུངས་པས་དེས་དགྲ་བཅོམ་ཐོབ་པ་ལྟ་བུ་སྟེ། དོན་ལ་གྲིམས་ལྷོད་ཀྱི་མཚམས་འདིར་ཡོད། ཡེངས་དོགས་བསྒྲིམས་ནས་བཞག་ན་སྒྲིམ་མཁན་དེ་ག་བློའམ་ཆོས་ཉིད་ཀྱིས་སྒྲིབ་པ་ཡིན། ཐ་མལ་ལྟར་གང་དགའ་གང་འགྲོ་ར་བཏང་ན་དེའི་རང་བཞིན་རྣམ་རྟོག་དང་མ་རིག་པ་ཁོ་ན་ལས་མི་འདའ་བས། ད་ལྟའི་ཤེས་པ་བཟོ་མེད་ལྷོད་དེ་སྐྱོངས་། དེ་ཡུན་ཏིང་ཙམ་སོང་ཙ་ན་ཡང་མན་ནེ་མུན་ནེ་ཉོག་གེ་བ་ཞིག་ལ་ཤུགས་ཀྱིས་འགྲོ། དེ་ཙ་ན་བྱིང་བ་ཡིན་པས་གྲུང་ཆ་བཏོན། ཕཊ་རྒྱབ། །དེས་གེགས་སེལ། ཡུན་ཐུང་གྲངས་མང་ཟེར་བའི་གནད་ཀྱང་དེ་
ལ་ཟེར། གཞན་གྲངས་མང་བ་ལ་དགའ་རྒྱུ་ཅི་ཡོད། མིག་ཀྱང་སྣང་ཐོག་ཏུ་མདུང་ཚུགས་སུ་གཏོད་པ་ལས་རིག་ཐོག་ཏུ་ཅེར་ཡན་དུ་གློད་པ་གནད་ཁྱད་པར་དུ་ཟབ་ཡིན། མོས་གུས་དང་སྙིང་རྗེ་སྐྱེ་དགའ་བ་འཕགས་པའི་ནོར་ཡིན་པས་བདེན་ཡོང་། སྐྱོ་ཤས་དང་ངེས་འབྱུང་ནམ་འཆི་ཆ་མེད། བདེ་སྡུག་གཏོང་ལེན། ཅིས་ཀྱང་དགོས་མེད་སོགས་ལ་བསླབས་པས་རིམ་པས་ཡོན་ཏན་ཏོང་འཕེལ་དུ་འགྲོ་ཚུལ་སློབ་དཔོན་ཞི་བ་ལྷའི་སྤྱོད་འཇུག་ལ་ལྟོས། མཆོད་ཕྲེང་གི་ལྷ་མོ་རང་ལས་བྱུང་ཞིང་རང་ལ་ཐིམ་པ་སྒྱུ་མ་ལྟ་བུའི་ཏིང་འཛིན་ལ་རྩལ་སྦྱོང་བའི་རྟེན་འབྲེལ་ཡིན་ནོ། །ཇི་ལྟར་དྲི་བའི་སྐོར། ལྷ་སྐུ་གསལ་པོར་སྒོམས་ན་ཡིད་ཡུལ་དུ་རྡོས་བཅས་ལྟ་བུར་འགྲོ་ཉེན་དང་། ཡང་སྟོང་པའི་ཉམས་ཀྱིས་གཅུན་ན་སྐུ་རྒྱན་ཆ་ལུགས་མི་གསལ་བའི་སྣང་སྟོང་རྒྱུད་ཐོག་ལ་འགེལ་དཀའ་བ་འདུག་ཟེར་བ། སྤྱིར་ཟུང་འཇུག་གི་ལམ་ལ་བརྟན་པ་མ་ཐོབ་པར་ལ་དེ་བཞིན་ཡོང་བ་བདེན་མོད། བློས་འཆུན་ན་སེམས་གང་དུའང་མ་ཡེངས། མ་འཁྲུལ། བརྗོད་དུ་མེད་པའི་རྩལ་ལམ་མདངས་སམ། གསལ་ཆ་དེ་ག་ལྷ་སྐུར་ཁྲ་ལམ་མེར་གསལ་ཞིང་དེ་ལྟར་གསལ་བ་ལ་སྒོམ་མཁན་ང་ཡིན། ངས་བསྒོམས་པའི་འབྲས་བུར་ལྷ་
འདི་གསལ་ལོ་སྙམ་པ་ལྟ་བུའི་བདེན་འཛིན་ཨ་འཐས་རང་རྒྱུད་པ་མེད་པའི་ངང་དུ་གནས་ན་སྣང་སྟོང་འཇུག་ལོགས་སུ་མེད། བསྐྱེད་རིམ་གྱི་སྣང་ཆ་དེ་གའི་ངང་དུ་རྫོགས་རིམ་གྱི་སྟོང་ཆ་དཔེར་ན། ཆུ་ནང་དུ་ལན་ཚ་ཞུ་བ་བཞིན་དུ་དབྱེ་རྒྱུ་མེད་པའི་ཟུང་འཇུག་ལྷུན་གྲུབ་ཆེན་པོའི་གནད་གོ་བ་གལ་ཆེ། དེ་ལྟར་མ་ཡིན་པའི་ཀུན་བརྟགས་ཀྱི་བློས་ལྷའི་རྣམ་འགྱུར་གསལ་པོར་བསྒོམས་རྗེས་སླར་དེ་ཉིད་དུ་སྟོང་པ་ཡིན་སྙམ་རྒྱས་འདེབས་བྱས་ན་ཕྱོགས་གཉིས་ཀ་མཚན་མའི་རྣམ་རྟོག་ཡིན་པས་མི་རུང་ལ། འོན་ཀྱང་བསྐྱེད་རིམ་གཙོ་ཆེ་བར་སྟོན་པའི་རྣལ་འབྱོར་རྣམས་སུ་དང་པོ་རྟག་པའི་སྐུར་རྩལ་སྦྱང་བ་ཡང་གསུངས་པའི་ཕྱིར། ཡིད་ཡུལ་དུ་དངོས་མཚན་ཅན་དུ་གསལ་བ་ལྟ་བུ་བྱུང་ན་དེའི་ཚེ། འདི་ལྟ་བུར་གསལ་གྱི་འདུག་བསམ་མཁན་གྱི་འདུ་ཤེས་དེ་གཏད་མེད་དུ་བསྲེས་ལ་རེ་ཞིག་མི་གསལ་དུ་སོང་ཡང་བསྒོམ་བྱ་སྒོམ་བྱེད་ཀྱི་གྲིམས་ཆེ་དེ་ལྷོད་དེར་བསྒྱུར་ནས་བསྒོམས་པས་སྣང་སྟོང་གི་རྩལ་འབྱོངས་པ་ཡིན། ལར་བསྐྱེད་རིམ་དང་། མོས་གུས། སྙིང་རྗེ་གང་ལའང་བརྗོད་དུ་མེད་པ་དེ་ངོ་བོ་སྟོང་པ་ཡིན། བསྐྱེད་རིམ་དུ་སྣང་བའམ། མོས་གུས་སུ་གསལ་བའམ། སྙིང་རྗེར་ཤར་བ་ཐམས་ཅད་ངོ་བོ་སྟོང་པའི་རང་བཞིན་
གསལ་བ་ཡིན། དེའི་ངང་ནས་བསྐྱེད་རིམ་གྱི་ཚེ་འོད་ཟེར་སྤྲོ་བསྡུ། མོས་གུས་ཀྱི་ཚེ་དབང་བཞི་ལེན་པ་སོག་གདུང་བ་དྲག་དཔ། སྙིང་རྗེ་ཚེ་སྨོན་འཇུག་གི་འཕྲིན་ལས་སོགས་དང་། རྫོགས་རིམ་རྐྱང་པའི་དཔེར་བརྗོད་ན། ཆུ་ལ་ཆུ། མེ་ལ་མེ། ཤིང་ལ་ཤིང་སེམས་ཅན་ལ་སེམས་ཅན་ནོ་སྙམ་པའི་འདུ་ཤེས་གུད་དུ་བཅད་ནས་ཡུལ་ཐོག་ཏུ་འབྱམས་པ་མེད་པས་ཀུན་དང་མ་འདྲེས་བཞིན་དུ་ཀུན་ལ་ཁྱབ་པས་ཐུགས་རྗེ་ཀུན་ཁྱབ་ཅེས། ངོ་བོ་གཅིག་ལ་ཚོགས་པ་གསུམ་གྱི་དེ་ཉིད་ཚང་བའི་གནད་ཤེས་ན་དགེ་སྦྱོར་ཐམས་ཅད་ལ་དམིགས་པ་མེད་པའི་ཤེས་རབ་ཀྱི་རྩིས་ཟིན་ཅིན། དེ་ཟིན་ན་སྣང་སྟོང་། གསལ་སྟོང་། རིག་སྟོང་ཐམས་ཅད་ཀྱི་གནད་ཤེས་པ་ཡིན་ནོ། །དེ་མཚུངས་མོས་གུས་ལ་ཡང་སྐྱེ་བོ་ཕལ་པ་ལྟར་དྲན་པའི་རྩི་དང་བྲལ་བའི་མོས་གུས་ཁོ་ནའི་རྗེས་སུ་རྟག་བརྟན་གྱི་ཐེར་ཟུག་བྱས་ན་སེམས་ཡེངས་ནས་རང་བཞིན་རྣམ་དག་གི་དྲན་པ་བརྗེད་པ་འགྲོ་བ་ཡིན། རང་བཞིན་རྣམ་དག་གི་དྲན་པ་མ་བརྗེད་ཕྱིན་དམིགས་པ་མེད་པའི་མོས་གུས་སྒོམ་གྱི་ནོ་བོར་ཡོང་བས་དེ་ལམ་དུ་ཁྱེར་ནས་སྒོམ་པ་མཆོག་སྟེ་དགེ་ལེགས་ཀྱི་ཡོན་ཏན་ཐམས་ཅད་བསྐྱེད་པའི་ལམ་ཁྱད་པར་བ་ཡིན་ནོ། །དེ་ལྟར་བསྒོམས་པའི་བར་མཚམས་ཐམས་ཅད་དུ་བླ་མ་དང་རང་སེམས་དབྱེར་མེད་དུ་བསྲེས་ནས་འཇོག་
པ་དོན་དམ་པའི་མོས་གུས་འབྲས་བུ་བླ་ན་མེད་པའི་སྐྱེལ་སོ་ཡིན། དེ་མཚུངས་སྙིང་རྗེ་ལའང་ངོ་བོ་སྟོང་པ་ཉིད་ཀྱི་རྩི་དང་མ་བྲལ་བའི་རྩལ་སྙིང་རྗེར་ཤར་བ་ཞིག་དགོས། སྙིང་རྗེ་རང་ཚན་པར་བསྒོམས་པའི་རྗེས་ལ་སྟོང་པས་རྒྱས་འདེབས་པ་ནི་ཤོར་ས་ཡིན་ནོ། །སྐྱབས་རྒྱལ་ཀུན་འདུས་པའི་སྤྱི་གཟུགས་མཆོག །མ་མཁའ་འགྲོའི་ཚོགས་རྗེ་པདྨ་འབྱུང་། །དེ་འགྲོ་ངོར་མི་ཡི་རོལ་གར་ཅན། །ཕ་དྲིན་ཅན་བླ་མར་ཕྱག་བགྱིའོ། །ཁྱོད་གསན་དང་དག་སྣང་དམ་ཚིག་ཅན། །སྤྱིར་ཁམས་གསུམ་འཁོར་བའི་གྲོང་ཁྱེར་ན། །ལས་སྡུག་བསྔལ་འབའ་ཞིག་མ་ལགས་པ། །སྐྱིད་ཟོས་བདེའི་གོ་སྐབས་ཆེས་དཀོན་ཞིང་། །སྒོས་ངན་སོང་གསུམ་གྱི་སྡུག་བསྔལ་ལ། །མིག་ལྟོས་དང་སྙིང་རྩ་དབང་མེད་འདར། །ཚུལ་དེ་ཕྱིར་དལ་རྟེན་སྟོང་ཟད་དུ། །གཏང་བཟོད་པ་མེ་ལུས་དུད་འགྲོའི་སེམས། །དེ་མང་སྟེ་དེ་རྗེས་མ་འབྲེང་བར། །ཚེ་ངེས་མེད་དྲི་ཟའི་གྲོང་ཁྱེར་ལ། །ཡིད་རྟག་བརྟན་ཐེར་ཟུག་མ་མཛད་པར། །སྐྱབས་བླ་མ་མཆོག་གསུམ་སྤྱི་བོར་བསྟེན། །དེ་གསུངས་པའི་སྤང་བླང་དོན་ལ་སྦྱང་། །ཆོས་སྙིང་ནས་འདོད་པའི་གང་ཟག་ཅིག །ཡིན་ངེས་ན་རྣམ་གཡེང་འདུ་འཛི་ཡིས། །དགྲ་འདི་སྐོར་ཟོན་བག་འཇུག་པ་དང་། །གྱོང་ལྟོ་གོས་གཏམ་ལ་མ་བསྐུར་
ན། །ངས་བྱའོ་སྙམ་པའི་འོག་གྲབས་ཀྱི། །ཡིད་སྨོན་གྱི་ངང་དུ་མི་ཚེ་ཟད། །དགྲ་འཆི་བ་བཙན་ཐབས་སུ་འོང་ཉན་འདའ། །དེ་གཙོ་བོར་སྙིང་ལ་བཅགས་པའི་ངོས། །སྒོམ་བྱེད་དོ་སྙམ་པའི་སྡུག་བཙིར་དང་། །སྒོམ་མི་དགོས་སྙམ་པའི་བློས་བཏང་སོགས། །སེམས་བཟོ་བཅོས་ཐམས་ཅད་རང་སར་ཞོག །དེ་བཞག་པས་ཡོད་མེད་བློ་འདས་ཀྱི། །དོན་ལྟ་བའི་རང་ངོ་རྗེན་པར་མཐོང་། །སྤྱིར་དུས་དང་རྣམ་པ་ཐམས་ཅད་དུ། །དྲན་རིག་ལ་དོ་གལ་མ་བྱས་ན། །ཞི་གནས་ཀྱིས་རང་ཞལ་མཐོང་དུས་མེད། །བློས་ཆེད་དུ་བཟོས་པའི་ལྟ་སྒོམ་དེ། །གཤིས་ཇི་ལྟར་བཟང་ཡང་རྣམ་རྟོག་ཡིན། །ཁྱེད་དེ་ཕྱིར་རང་སེམས་མ་བཅོས་པའི། །རྒྱུན་རྩེ་གཅིག་སྐྱོང་བར་སྙིང་རུས་བསྐྱེད། །སྐབས་དོན་ལ། རང་སེམས་ལ་བཅོས་བསྒྱུར་བཟོ་བཅོས་གང་ཡང་མ་བྱས་པར་སེམས་ཁོ་རང་གི་རང་ངོ་ཤེས་ཙམ་རིག་པའི་ངང་དུ་འཇོག་པ་དེ་ལས་ལྷག་པར་བྱ་རྒྱུ་གང་ཡང་མེད། །དེ་ལྟར་བཞག་པས་ཀྱང་མི་སྡོད་པར་འགྱུ་བ་བན་བུན་དུ་ཤར་བ་བྱུང་ན། གང་ཤར་གྱི་རྣམ་རྟོག་དེ་ལ་འཇིག་རྟེན་ཕལ་པ་ལྟར་འདི་ནི་འདིའི། །དེ་ནི་དེ་འདྲ་ཞིག་གོ་བསམ་པ་ལྟ་བུའི་རྗེས་སྙོགས་བརྟག་དཔྱད་བསམ་གཞིག་གང་ཡང་མི་བྱེད་པར་ཤར་མཁན་དེ་གང་ན་འདུག །གང་འདྲ་ཞིག་
ཡིན་ཁ་ནང་དུ་སློག་ནས་བལྟས་པས་རྣམ་རྟོག་ལ་དང་པོ་འབྱུང་བའི་ཁུངས་མེད། ད་ལྟའི་ནས་པའི་ས་མེད། ཐ་མར་འགྲོ་བའི་ཡུལ་མེད་པས་རང་སྟོང་གཞི་མེད་རྩ་བྲལ་དུ་འགྲོ་བ་ཡིན། མདོར་ན་དགའ་སྡུག་བཏང་སྙོམས་ལུང་མ་བསྟན་གྱིས་རྣམ་རྟོག་ཇི་འདྲ་ཞིག་འཆར་ཡང་གང་ཤར་ངོས་ཟིན་ཞིང་། བརྗེད་འབྱམས་འོག་འགྱུར་མ་ཤོར་བར་བྱ། དགའ་སྡུག་ལ་སོགས་པའི་རྩིས་གཞག་གང་ཡང་མ་བཏང་བར་རང་ཐོག་ཏུ་བཞག་པས་ཅིག་ཞིག་ན་གནས་པ་ལ་རང་དབང་ཐོབ། ལྷག་མཐོང་གི་རྩལ་ཐོན་པས་སྒོམ་ལ་ཡར་སྐྱེད་འབྱུང་བ་ཡིན། དེའི་ཚེ་བློ་ཚོད་རྒྱུད་ཚོད་ལ་དཔགས་པའི་བོག་འདོན་། བླ་མ་ལྟ་དགོངས་ཀྱི་མཁྱེན་པ་ཅན་ལ་ཞུས་པས་ཆོག །ལར་རྟོགས་པ་དང་མ་རྟོགས་པ་གཉིས་ཀྱི་མཚམས་ལ་ལག་པའི་ལྟོ་རྒྱབ་ཙམ་ལས་མེད་པས་རང་ངོ་རང་གིས་ཤེས་པ་ལ་སྒོམ་ཟེར། མ་ཤེས་པ་ལ་འཁྲུལ་པ་ཟེར། ཐུགས་དམ་པ་དང་འཇིག་རྟེན་པའི་རྣམ་རྟོག་ཤར་ལུགས་ལ་ཁྱད་མེད་ཀྱང་རྣམ་རྟོག་ལ་བདག་རྐྱེན་སྤྲོད་ཀྱིས་ཁྱད་པར་ཡོད། འཇིག་རྟེན་པ་རྣམས་སེམས་ལ་གང་ཤར་ལ་བདག་རྐྱེན་སྤྲད། །འདི་བྱས་ན་ཡོང་། འདི་མ་བྱས་ན་མི་ཡོང་། འདི་ལ་འདི་བྱེད།
སྔོན་ལ་དེ་བྱས་ན། རྗེས་ལ་འདི་ཡོང་བསམ་པ་དེ་སྦུགས་ལ་བསྐྱིལ། ཁ་ལ་བཏོན། ལག་པར་བླངས་པས་ཆགས་སྡང་རྨོངས་གསུམ་གྱི་ངང་དུ་འཕྲུལ་པ་ལུ་གུ་རྒྱུད་དུ་སོང་སྟེ། དེའི་བག་ཆགས་ཨ་འཐས་པས་འཁོར་བ་མཐའ་མེད་དུ་འཁྱམས་པ་ཡིན་མོད། ཐུགས་དམ་པས་གང་ཤར་རང་ཐོག་ཏུ་གཞི་རྩ་བཅད། ཤེས་པ་ལུང་མ་བསྟན་ཐེར་ལ་བཏོན། སྐྱོན་ཡོན་གང་གིས་ཀྱང་མ་བསླད་པའི་ད་ལྟའི་རིག་པ་རྗེན་པ་འདི་ཉམས་སུ་བླངས་པས། དགོངས་པ་ཀློང་དུ་གྱུར་ཙ་ན་མྱ་ངན་ལས་འདས་པའི་ས་ལ་སླེབས་པ་ཡིན། དེ་ལྟ་བུ་དོན་དུ་གཉེར་བ་ལ་འཇིག་རྟེན་མི་ཁྱུ་ནས་བུད། བློ་བླ་མ་དང་དཀོན་མཆོག་ལ་གཏད་དེ་གཞན་གྱི་ཁ་ལ་མི་ཉན། རང་ཚོད་རང་གིས་བཟུང་སྟེ་གྲུབ་ཐོབ་གོང་མའི་རྣམ་ཐར་ལ་བལྟ། རྐྱེན་ངན་དང་གནད་གདོན་བྱུང་ན་སྒྲིབ་པའི་བུད་ཤིང་དུ་བསམས་ཏེ་ལས་ངན་ཟད་ཡིན་སྙམ་ནས་དགའ་བསྒོམ། །ཟས་གོས་གང་འབྱུང་ཙམ་ལ་བློ་ཕུགས་གཏོད་པ་ལས་ལྟོ་ཕྱིར་ཆོས་བློས་མི་གཏང་། དགའ་པོ་དང་སྐྱིད་པོ་བྱུང་ཡང་དེ་ཉིད་རྟག་པ་མེད་ཅིང་མདང་གི་རྨི་ལམ་དང་འདྲ་བས་འདོད་ཡོན་སྒྱུ་མྲ་སྦྱང་། དེ་ལྟ་བུའི་ཕོ་ཚུགས་ཀྱིས་གཡའ་ཁྲོད་དང་གངས་ཁྲོད་ལ་སོགས་པར་སྒྲུབ་པའི་སྲོག་མཁར་
བཙུགས་ནས་གྲུབ་ཐོབ་གོང་མའི་རྣམ་ཐར་འཁྱོངས་ཏེ་སྐྱེ་འཆིའི་འདུ་ཤེས་ཟད་པ་ཙམ་མ་བྱུང་ཡང་། འཆི་ཁར་འགྱེད་པ་མེད་པ་ཞིག་ངེས་པར་ཡོང་དགོས་པར་ཆོས་བྱས་པའི་དོན་རྡོ་ལགས། ཞེས་རང་བྱུང་པདྨའི་གསུང་གི་སྒྲུབ་གནས་དབང་ཆེན་ཕོ་བྲང་འོག་མིན་རང་བྱུང་གི་བྱ་སྐྱིབས་འདུ་འཛིས་དབེན་པའི་མཚམས་མལ་ནས་རྣལ་འབྱོར་པ་མཁྱེན་བརྩེའི་འོད་ཟེར་གྱི་རིག་འཛིན་ལྷུན་གྲུབ་ལ་གདམས་པ་དགེ་བར་གྱུར་ཅིག །བཟོ་མེད་ལྷིང་པ་རྒྱ་ཡན་ཅོག་བཞག་ཀློང་། །འཁོར་འདས་གཉིས་མེད་བྱ་རྩོལ་བློ་འདས་ཀྱི། །རིག་པ་ལྟ་སྒོམ་སྤྱོད་པ་ལས་འདས་པའི། །གཉུག་མའི་གཤིས་ལ་བླང་དོར་མེད་པར་འདུད། །སེམས་ཀྱི་འཇོག་སོ་ནི། ད་ལྟའི་ཐ་མལ་གྱི་ཤེས་པ་རང་འགྲོས་བཅོས་བསླད་དང་བྲལ་བ་གསལ་རིག་རྗེན་པ། བརྗོད་བྱས་གཏན་ལ་མི་ཕེབས་པ་འདི་ག་ཡིན། འདི་གཉིས་དུས་རྟག་པར་མ་བརྗེད་ཙམ་དུ་སྐྱོང་བ་ལ་སྒོམ། འདི་བརྗེད་སྒོམ་མེད། མ་བརྗེད་ན་སྒོམ་ཡོད། མཐར་ཐུག་གི་འཇོག་སོ་ལག་བཅངས་འདི་ཀ་ཡིན་ཏེ་ཀུན་མཁྱེན་གྱིས། རང་ངོ་འཕྲོད་ཀྱང་གོམས་འདྲིས་མ་བྱས་ན། །རྣམ་རྟོག་དགྲས་ཁྱེར་གཡུལ་ངོའི་བུ་ཆུང་འདྲ། །ཞེས་གསུངས་བའི་ཕྱིར་རོ། འདི་ལས་ལྷག་པའི་
སྒོམ་གནས་ཉམས་དགའ་སྤྲོ་ཅན་དང་། གསལ་ཉམས་ཞེན་པ་ཅན་དང་། མི་རྟོགས་པ་ནག་ཡོར་ཡོར་སོགས་ཅི་བྱུང་ཡང་གོལ་ས་དང་ཤོར་ས་ལས་མ་འདས། དེ་བཞིན་དུ་སྒོམ་བྱེད་དོ། །སེམས་གནས་འདུག་གོ་།འདི་ག་རང་ཡིན་ནོ་བསམ་པའི་ངེས་ཤེས་ཐམས་ཅད་ཀྱང་བློའི་ཤུན་པ་ཡིན་པའི་རྒྱུ་མཚན་སྔ་མའི་འཕྲོར། སྒོམ་ཡུན་རིང་ཡང་ཞེན་བློ་མ་ཞིག་ན། །ངལ་བ་དོན་མེད་རབས་ཆད་ཁེ་གྲགས་འདྲ། ཞེས་པས་ཤེས་སོ། །དེའི་ཕྱིར་ད་ལྟའི་ཤེས་པ་བཅོས་བསླད་བསམ་བརྗོད་དང་བྲལ་བ་འདི་དུས་རྟག་པར་དྲན་མཁས་ན་སྒོམ་ཟེར། རིག་པ་ཟེར། ཀ་དག་ཟེར། འདི་མ་དྲན་ན་འཁྲུལ་པ་ཟེར། །མ་རིག་པ་ཟེར། སེམས་ཟེར། འཁོར་འདས་གཉིས་རིག་མ་རིག་ཙམ་ལས་གཞན་ཅི་ཡང་མིན། དེ་ལྟར་དུ་སྒོམ་དུས་རྣམ་རྟོག་ཟི་སྦྱིར་གྱིས་གནོད་པ་བྱུང་ན། རྣམ་རྟོག་རང་ཡང་སྒོམ་ལས་མ་འདས་པས་རྣམ་རྟོག་དེ་འོག་འགྱུ་ཁྱེར་རྐྱང་མ་ཡིན་པར་ཁོ་རང་གིས་ཁོ་རང་ངོ་ཤེས་ན་དེ་ལ་རྣམ་རྟོག་སྒོམ་ཤར་ཟེར། ཡིན་ཡང་དང་པོའི་རིང་ཡེངས་མ་ཡེངས་ཀྱི་སོ་མཚམས་ཕྱེད་པར་ཤིན་ཏུ་དཀའ་བས་ཐོག་མ་ནས་རྣམ་རྟོག་ལམ་ཁྱེར་མི་བྱེད་ཅིང་། གང་ཤར་ལ་ཆེར་གྱིས་བལྟས་ནས་དེ་ལ་བརྟག་དཔྱད་དང་བསམ་གཞི་ཅི་ཡང་མི་བྱེད་པར་རིག་པ་རང་ཚོད་ཟིན་
ནས་འཇོག །དེ་ལ་བརྟན་པ་ཐོབ་ཙ་ནས་ནས་ཐོག་ནས་རྣམ་རྟོག་ལྷང་གིས་ཤར་བ་ཞིག་འབྱུང་། དེའི་ཚེ་ལྷག་མཐོང་གི་རྩལ་ཤར་བ་ཡིན་པས་གནས་འགྱུ་དབྱེར་མེད་ལ་སྔར་གྱི་ཆེད་དེ་ལྟ་བས་རྒྱས་འདེབས་དེ་ཡང་མི་བྱེད་པར་འཛིན་མེད་ཁོང་གྲོལ་དུ་བསྐྱང་ངོ། །དེ་ཙ་གྱིས་ཞི་ལྷག་ཟུང་འབྲེལ་གྱི་བདེན་པ་ཐུན་མོང་བ་མཐོང་ལ་ཐུག་པའི་གེགས་སེལ་བོགས་འདོན་གྱི་བསྡོམས་ཚིག་བསྟན་ཟིན་ཏོ། །ཨེ་མ་ནམ་འཆི་ངེས་མེད་ནམ་མཁའི་གློག་དང་འདྲ། །དགྲ་གཉེན་ངེས་མེད་སྟོན་ཀའི་སྤྲིན་དང་འདྲ། །འདུས་པ་མི་རྟག་ཚོང་དུ་འགྲོན་པོ་འདྲ། །མི་རྟག་རྟག་པར་མ་འཛིན་ལྷ་ཆོས་རེམས། །ཚེ་འདིའི་ཁེ་གྲགས་ཟས་ནོར་ལོངས་སྤྱོད་ཀྱི། །བསླུས་པ་མ་གཏོགས་ཕན་ཆེར་བཏགས་པ་མེད། །འདོད་ཡོན་སྣང་བ་སྒྱུ་མ་ལྟ་བུ་ལ། །བདེན་ཞེན་འཆིང་བའི་རེ་དོགས་ཕྲ་སར་ཚོད། ༢ །དཀར་ནག་ལས་འབྲས་ཤིན་ཏུ་དབང་བཙན་པས། །མྱོང་འགྱུར་ཐམས་ཅད་རང་གི་གཉའ་བར་འབབ། །དེ་ཕྱིར་སྡིག་སྤོང་དགེ་བསྒྲུབ་བླང་དོར་ལ། །ཤེས་བཞིན་དྲན་པས་བརྟགས་ནས་སྙིང་པོ་ལེན། ༣ །སྐྱབས་གནས་ཀུན་འདུས་ཨོ་རྒྱན་ཆེན་པོ་དང་། །བོད་ཀྱི་ལྷ་སྐལ་ཐུགས་རྗེ་ཆེན་པོ་ལ། །
བློ་སྙིང་བྲང་གསུམ་ཐོད་ལ་གསོལ་བ་ཐོབ། །སྙིང་པོ་བཛྲ་གུ་རུ་ཡིག་དྲུག་དྲོངས། ༤ །སྣང་གྲགས་རིག་གསུམ་ལྷ་སྔགས་ཆོས་ཉིད་ལ། །ཐ་མལ་རང་དགར་ལྟ་བའི་དངོས་ཞེན་སྤང་། །བསྐྱེད་རིམ་བཟླས་བརྗོད་ཚེས་བཅུའི་དུས་མཆོད་ལ། །ཆག་མེད་དམ་བཅའི་རི་མོ་བརྟན་པར་ཟུང་། ༥ །མ་བྱས་ལྷུན་གྲུབ་རང་ལུས་དཀྱིལ་འཁོར་ན། །རིག་རྩལ་ཞི་ཁྲོའི་ལྷ་ཚོགས་འགྲལ་མེད་ཕྱིར། །བཟའ་བཏུང་ཚོགས་ཀྱི་འཁོར་ལོར་མོས་ལ་འབུལ། །དེ་ཡིས་ལོག་འཚོའི་ཟས་ཀྱི་ཉེས་པ་འགག་༦ །བཟང་ངན་སྐྱིད་སྡུག་ལེགས་ཉེས་འཆི་བ་སོགས། །ཐམས་ཅད་སེམས་ཉིད་གཅིག་པུའི་ཆོ་འཕྲུལ་ཏེ། ཀ་དག་བྱ་རྩོལ་བྲལ་བའི་དབྱིངས་ཆེན་པོར། །རོ་གཅིག་གཉུག་མའི་དང་ལ་བསྒྱུར་ནས་ཞོག་༧ །རྒྱུད་སྡེ་རྒྱ་མཚོའི་དྭངས་བཅུད་ཡོ་ག་གསུམ། །དེ་ཡི་བསྐྱེད་རིམ་ལམ་འཁྱེར་དེ་ལ་ཚང་། །ལེ་ལོ་ཕྱི་བཤོལ་སྤངས་ལ་རྡོ་རུས་གཏུགས། །པདྨ་འོད་དུ་འཛོམ་པའི་སྨོན་ལམ་ཐོབ། ༨ །ད་ནི་མི་སྡོད་དབེན་པར་སྒོམ་དུ་འགྲོ། །ཆགས་སྡང་སྒྲོག་ལས་གྲོལ་བའི་བྲག་ཕུག་ན། །སྣང་སེམས་དབྱེར་མེད་པའི་ཐིག་ལེ་དང་། །བློ་ཟད་ཆོས་ཟད་དངོས་གྲུབ་ཡོད་དོ་སྐད། ༩ །འདི་ནི་གངས་རིའི་ཁྲོད་ཀྱི་སྒྲུབ་པ་པོ། །ཤེས་
རྒྱུད་མཁའ་ལྟར་དག་པའི་བྱ་བྲལ་བ། །ལྟོས་མེད་ཅི་དགར་སྤྱོད་པའི་གཉའ་ཡངས་པོས། །དག་སྣང་དཀར་བའི་ཚོམ་བུར་སླར་ཡང་གདམས། ༡༠ །ཞེས་པའང་གསར་བུ་བ་རྣམས་ལ་ཉམས་ཁྲིད་དམར་བཅངས་ཀྱི་རྒྱབ་སྐྱོར་དུ་གདམས་པའོ། །བླ་མ་རྣམས་ལ་ཕྱག་འཚལ་ལོ། །ཚེ་འདི་སྐྱེད་ཀྱང་དེ་རིང་ཉིན་གང་ཙམ། །ཕྱི་མའི་སྣང་བ་མི་རིང་སང་བཞིན་འོང་། །བར་དོའི་འཁྲུལ་སྣང་དོ་ནུབ་རྨི་ལམ་ཚུལ། །ད་ལྟ་ཉིད་ནས་དམ་པའི་ཆོས་ལ་འབུངས། །སང་བྱ་གནངས་བྱས་མི་ཚེའི་བསྲེག་བརྡར་བྱེད། །ཆོས་ལ་འཇུག་ཁར་གེགས་ནི་ཅིར་ཡང་བརྫུ། །གཏན་འདུན་སློབ་མཁས་བླ་མ་གཏོགས་པ། །སུ་ཡང་མི་འབྱུང་བློ་སྣ་ཕྲལ་དུ་བསྟུངས། །དྲག་ཞན་མཆོག་དམན་ཐམས་ཅད་ཤི་བ་ལས། །མ་འདས་དེ་ལ་ཡན་པ་ཆོས་ལས་མེད། །འཆི་བ་བཙན་ཐབས་བྱུང་ན་འགྱོད་ཀྱང་ཕྱིས། །དེ་རིང་ཉིད་ནས་རི་ཁྲོད་དབེན་གནས་སྙོགས། །ད་ནི་དུས་ངན་སྙིགས་མའི་མཐའ་ལ་ཐུག །མི་འདོད་སྡུག་བསྔལ་ཐམས་ཅད་ཐོག་ཏུ་བབས། །སེམས་ཅན་ཀུན་ལ་བདེ་སྐྱིད་མི་འདུག་པས། །གཏན་བདེའི་འབྱུང་གནས་དམ་པའི་ལྷ་ཆོས་འབུངས། །ཚེ་འདི་རིང་ཡང་ལོ་བརྒྱའི་ཁོངས་སུ་འཛད། །ཤི་
བས་མི་ཆོག་ངན་སོང་སྡུག་བསྔལ་འཇིགས། །བསྐལ་པར་བསགས་པའི་ལས་འབྲས་རྗེས་ལ་འབྲེང་། །དེ་ལ་ཕན་པའི་མན་ངག་ལྷ་ཆོས་མཛོད། །རི་ཁྲོད་བས་མཐར་གོམ་བདུན་བོར་ན་ཡང་། །ཕན་ཡོན་དཔག་མེད་རྒྱལ་བ་ཉིད་ཀྱིས་གསུངས། །སྒྲུབ་པར་གཞོལ་ན་ཚེ་གཅིག་ལུས་གཅིག་ལ། །མངོན་སངས་རྒྱ་བ་གསང་སྔགས་ཁྱད་ཆོས་ཡིན། །སྙིང་རུས་གནད་དུ་སྨིན་པ་ཁྱོད་ཀྱིས་མཛོད། །གདམས་ངག་ཟབ་དགུའི་བདུད་རྩི་ཁོ་བོས་སྟེར། །ཚེ་དང་སྒྲུབ་པ་མཉམ་པའི་རྟེན་འབྲེལ་ཞིག །འགྲིག་ན་ཕྱི་མའི་འགྲོ་ས་པདྨས་སྟོན། །སངས་རྒྱས་གཉིས་པ་སློབ་དཔོན་ཆེན་པོ་དེ། །བོད་འབངས་ཁ་བ་ཅན་གྱི་ལྷ་སྐལ་ཡིན། །གསོལ་འདེབས་ནུས་ན་མི་བསླུའི་ཐ་ཚིག་ཡོད། །བློ་སྙིང་བྲང་གསུམ་ཐོང་ལ་གསོལ་བ་ཐོབ། །བདག་འདྲ་རྨོངས་ཀྱང་བརྒྱུད་པ་བཟང་པོའི་བུ། །འཇིག་རྟེན་སྣང་བ་རྨི་ལམ་སྒྱུ་མར་མཐོང་། །དབེན་གནས་རི་ཁྲོད་འགྲིམ་པ་ཆོས་ལུགས་ཡིན། །བདག་རྗེས་འབྲང་ལ་དལ་རྟེན་དོན་ཡོད་མཛོད། །ཅེས་ཆོས་ལ་མོས་པའི་བློ་ཅན་དབུལ་ཚལ་སྐོར་ལམ་རྒྱབ་པའི་མི་རྒན་དབང་འདུས་ལ་བྱ་བྲལ་མཁྱེན་བརྩེའི་འོད་ཟེར་གྱིས་འོག་མིན་རྡོ་རྗེའི་བྲག་ཏུ་གདམས་པའོ། །ཨེ་མ་ཧོ བཀའ་དྲིན་འཁོར་མེད་རྒྱལ་སྲས་
པད་འབྱུང་དང་། །ཡེ་ཤེས་ཌཱ་ཀྐིའི་གཙོ་མོ་མཁར་ཆེན་བཟའ། །བིམ་བཻ་རོ་རྗེ་འབངས་ལོ་པཎ་གྱི། །བཀའ་དྲིན་བསམས་བཞིན་འཁོར་བསམ་མ་མཆིས་སོ། །ཁྱོད་ཀྱི་སྙན་དབད་། །ཆུ་སྐྱེས་པདྨའི་དབུས། །ཙིཏྟ་དམར་པོའི་འདབ་སྟོང་རབ་བཀྲོལ་བའི། །གཏམ་གསུམ་བདུད་རྩིའི་ཐིག་པ་སྒྲོན་པྱིན། །འདུ་ཤེས་རྣལ་མར་ཞོག་ལ་གསོན་དང་ཞུ། །དལ་འབྱོར་རིན་ཆེན་ཐོབ་པ་ད་རེས་ཙམ། །ཉིན་སྐར་མཚན་མོའི་ཉི་མ་ཇི་བཞིན་དུ། །མི་སྲིད་པ་ཞིག་རྙེད་ཀྱང་ཆུ་བུར་དང་། །ནམ་མཁའི་གློག་བཞིན་ཤིན་ཏུ་ཡ་མ་བརླ། །ངེས་པར་འཆི་བ་མེད་རྟག་མ་དྲན་ན། །ཆོས་ཀྱི་དྲན་བསྐུལ་ལྕགས་འདེབས་མི་འབྱུང་བས། །སྲོད་སྨད་ཀུན་ཀ་ཤི་བའི་མི་རོ་ལ། །གཟིགས་ནས་དུས་བཞིར་འཆི་བ་དྲན་པ་གཅེས། ཟང་ཟིང་ལོངས་སྤྱོད་ཕུན་སུམ་ཚོགས་ན་ཡང་། །འཆི་ཚེ་ཁྱེར་དབང་ཡོད་པ་ལྟ་ཞོག་གི། རང་གི་སྙིང་ལྟར་གཅེས་པའི་དངོས་པོ་ཡང་། །དགྲ་ཡི་དྭངས་མས་སྤྱོད་པ་མ་གཟིགས་སམ། །སང་དང་འཇིག་རྟེན་ཕྱི་མའི་བར་ལག་ན། །དབུགས་ཀྱི་འབྱུང་འཇུག་ཙམ་ལས་མི་འདུག་པས། ཕྲལ་སྣང་སྲིད་པའི་དེ་ལ་མ་ཞེན་པར། །ངེས་འབྱུང་རྒྱུད་ལ་བསྐུལ་ནས་རི་ཁྲོད་འགྲིམས། །ཕྱི་ཡི་ནམ་ཟླ་དུས་བཞིའི་
འགྱུར་ལྡོག་དང་། །ནང་གི་དགྲ་གཉེན་པར་མའི་འགྱུར་ལྡོག་དང་། །གསང་བར་རྣམ་རྟོག་འཕྲོ་འདུའི་འགྱུར་ལྡོག་གསུམ། །གཟིགས་དང་ལྟད་མོ་ཆེན་པོ་འདི་ན་སྣང་། །འཁོར་འདས་ལེགས་ཉེས་ཐུགས་ཅད་སེམས་ཀྱིས་བྱས། །བདེ་དང་སྡུག་བསྔལ་ལས་ལ་བརྟགས་གྱུར་ན། །གང་ལ་ཞེན་པའི་ཕྱི་ལ་མི་ཚེ་ཟད། །དལ་འབྱོར་རིན་ཆེན་སྟོང་ཟད་བྱད་པ་མང་། །དགྲ་གཉེན་བར་མ་གསུམ་གྱི་རྣམ་རྟོག་ཀྱང་། །ཐ་མལ་སྐྱེ་བོའི་ངོ་ཁར་ཆགས་སྡང་ཆེ། །ཆོས་པས་བྱུང་གནས་འགྲོ་གསུམ་བརྟག་ཤེས་ན། །བདེན་པར་གྲུབ་པ་རྡུལ་ཙམ་ཡོད་མ་ཡིན། །ཚེ་འདི་ནམ་འཆི་ཆ་མེད་ཡིན་པ་ལ། །རྟག་ཆགས་ཞེས་པར་བཟུང་བས་གཏན་འདུ་ཉེས། སྐྱིད་སྡུག་དགྲ་གཉེན་རྣམ་རྟོག་ཡལ་བ་ཅུག་ན། །སྐྱིད་པོའི་རྩ་བ་མ་བྱས་ལྷུན་གྲུབ་ཡིན། །བྲག་ཕུག་རང་ཤོང་ས་བུག་སྐྱིལ་ཆུང་སོགས། །སྡེ་དགོན་འདུ་འཛིས་དབེན་པའི་གནས་ཤིག་ཏུ། །སྐྱོ་ཤས་ངེས་འབྱུང་ངམ་ངམ་ཤུགས་ལ་འཆར། །དེ་ཕྱིར་བས་མཐའི་ཕན་ཡོན་བསམ་མི་ཁྱབ། །ཆོས་བརྒྱད་འདུ་འཛིས་རྒྱགས་པའི་སྒྲོབ་བརྗིད་དང་། །སྲིད་བདེའི་འཆིང་བར་ཞེན་པའི་འུད་གོག་འདིས། །ཐར་ལམ་དམྱལ་བར་འདྲེན་པའི་ཕོ་ཉ་བྱེད། །
དབེན་གནས་རྫ་ཆུ་བསིལ་བའི་ཡོན་ཏན་སོམས། །ཀྱེ་ཧོ་དེ་རིང་རིག་པའི་ཁྱིའུ་ཆུང་། །སྐྱོ་ཤས་ངེས་འབྱུང་བསིར་བུར་རབ་བསྐུལ་བས། །གྲུབ་ཐོབ་གོང་མའི་རྣམ་ཐར་ཐར་པ་དྲན། །འཇག་ཚོ་གཞོན་པའི་མི་ཚེ་བུད་པས་འགྱོད། །ད་ནི་སྙིགས་མའི་ལོག་སྤྱོད་འགྲོ་ཀུན་གྱི། །རྒྱུད་ལ་ཞུགས་ནས་ཆོས་བྱར་མི་ཁོམ་པས། ཕལ་ཆེར་ངན་སོང་བསྒྲུབ་པའི་སོ་ནམ་སྤེལ། །འདི་གོ་བསམས་བཞིན་སྙིང་རླུང་གཅོང་གིས་ཟིན། །ཀྱི་ཧུད་སོ་དཀར་མི་ཚེ་ཡད་ཡུད་ལ། །སོང་བས་ད་ནི་འཆི་ལ་རྗེ་ཉེར་སོང་། །ཤི་ཚེ་དམ་པའི་ལྷ་ཆོས་མ་གཏོགས་པ། །གཞན་གྱིས་ཕན་པ་མེད་པས་སེམས་པ་སྐྱོ། །ཨ་ཧོ་བདག་ལ་མོས་པའི་མཆེད་གྲོགས་ཀུན། །ཚེ་འདིའི་ལེགས་ཉེས་མཐའ་དག་ཆམ་གྱི་བསྒྱུར། །ན་དགའ་ཤི་སྐྱིད་གང་བྱུང་དེས་ཆོག་བློས། །བས་མཐའི་ནགས་ཁྲོད་འགྲིམ་པར་ད་ནི་སྐྱོན། །འཇིག་རྟེན་སྣང་སྲིད་དྲི་ཟའི་གྲོང་ཁྱེར་འདྲ། །དེ་ལ་ཞེན་པས་འཆིང་བ་མཚང་རེ་ཆེ། །རྟོག་མེད་སྤྲོས་བྲལ་གཞི་གྲོལ་གཉུག་མའི་ངང་། །གློད་དང་གཏན་འདུན་འགྲུབ་པ་ང་རང་ཤེས། བསྟན་པའི་བདག་པོ་ཤཱཀྱ་སེང་གེ་དང་། བོད་ཀྱི་ལྷ་སྐལ་འཕགས་
མཆོག་སྤྱན་རས་གཟིགས། །བཀའ་དྲིན་མཚུངས་མེད་སློབ་དཔོན་ཆེན་པོ་ལ། བློ་སྙིང་བྲང་གསུམ་གཏོད་དང་བསམ་དོན་འགྲུབ། །ཡོན་ཏན་འབྱུང་གནས་སུམ་ལྡན་བླ་མ་དེ། །རྒྱལ་ཀུན་འདུས་པར་རྒྱལ་བས་ལན་བརྒྱད་བསྔགས། །གསལ་འདེབས་མོས་གུས་ནུས་ན་བྱིན་རླབས་འཇུག །ཐུགས་རྒྱུད་རྟོགས་པ་འཕོས་ཚེ་འཚོངས་པ་ཡིན། །སྣ་ཚོགས་བྲག་རིའི་བག་མ་བརྗིད་ཆགས་ཤིང་། །ལྕུག་ཕྲན་ལུ་གུ་རྒྱུད་དུ་ཡོངས་འབྲེལ་ལ། །བྱ་དང་རི་དྭངས་རྩེད་འཇོར་རོལ་པའི་གནས། །དེ་རུ་གཤེགས་ལ་ཟབ་མོའི་ཏིང་འཛིན་སྒོམས། །བདེ་གཤེགས་སྙིང་པོ་ཀུན་ལ་ཁྱབ་གདལ་བས། །སེམས་ཅན་ཀུན་ཀྱང་ཐམས་ཅད་མཁྱེན་པའི་རྒྱུ། །རིག་དང་མ་རིག་གཉིས་ཀྱི་ལྟོ་རྒྱབ་ལས། །མེད་དོ་ད་ནི་ཟག་མེད་འོད་གསལ་སྒོམས། །དེ་སྐད་ཀློང་གསལ་རིག་པའི་གསལ་མདངས་ལ། །ཤར་བ་ཇི་བཞིན་ཡི་གེར་འགོད་དགོས་ཅེས། །ཙནྡྲའི་མཚན་ཅན་དེ་ཡིས་བསྐུལ་བ་བཞིན། །འོག་མིན་ལྗོན་ཤིང་བསིལ་གྲིབ་ལ་བརྟེན་བྲིས། །དགེ་བས་འགྲོ་ཀུན་བློ་ཁ་དམ་ཆོས་ལ། །འགྱུར་བར་དུས་གསུམ་རྒྱལ་བས་བྱིན་གྱིས་རློབས། །ཨེ་མ་ཧོ། །བཟོ་མེད་ལྷུག་པར་ཁ་ཡན་རང་གའི་གཤིས། །བླང་དོར་བརྗོད་བྲལ་གཏིང་གསུལ་བུམ་པའི་སྐུ། །གུ་ཡངས་རང་གྲོལ་དྲི་མེད་འོད་
ཟེར་ལ། །བློ་འདས་དྲན་པའི་རྒྱུན་གྱིས་ཕྱག་བགྱིའོ། །སྒོམ་དོན་གྱི་སྙིང་པོ་དཔེ་དང་ཚིག །ངོས་བཟུང་དང་བྲལ་བ་ཡིན་ནོ་ཞེས། །ས་སྟེང་ལ་རླུང་ལྟར་གྲགས་མོད་ཀྱི། །དྲན་རིག་ལ་བཅོས་བསྒྱུར་མེད་པ་གནད། །བྱིང་རྒོད་ཀྱི་རྐྱེན་སེལ་མ་ལགས་པ། །རིག་པ་ལ་རྒྱ་སྐྱེད་ནང་འགུགས་སོགས། །བློས་བྱས་ཀྱི་ལྟ་བ་ཡིན་པའི་ཕྱིར། །སྤྲོ་བསྡུ་དང་འཛིན་ཞེན་གང་དགར་ཐོང་། །དྲན་ཙམ་ལས་སྐྱོང་རྒྱུ་མེད་པ་སྐད་ཕྱག་རྫོགས་ཀྱི་ལྟ་སྒོམ་ཡིན་མོད་ཀྱང་། །དྲན་རིག་ལ་འཛིན་ཞེན་ཞུགས་པ་ན། །འདི་གཉིས་ཀྱིས་སྒོམ་ཆེན་ཕལ་ཆེར་བསླུ་བརྗོད་མེད་ཀྱི་ཤེས་པ་ཡེ་འབྱམས་ལ། །ཡིན་མིན་གྱི་ཐེ་ཚོམ་ཟ་བ་དེ། །ཐོས་པ་ལ་ཐག་ཆོས་མེད་པས་ལན། །ཁ་ཡན་དུ་ཐོང་ལ་རང་བབས་ཞོགས། །གང་ཤར་གྱི་རྣམ་རྟོག་ཐམས་ཅད་ལ། །ཆེད་འཛིན་གྱིས་རྒྱང་སོ་བྱ་མ་དགོས། །ཤར་མཁན་གྱི་རིག་སྟོང་རྗེན་པའི་ཀློང་། །ཡིན་མིན་གྱི་སྤུ་རིས་མ་བྱེད་ཅིག །བདེ་གསལ་དང་མི་རྟོག་གསུམ་གྱི་ཉམས། །རྩེ་གཅིག་གི་བློ་ཤུན་ཁོ་ན་ཡིན། །འདོད་གཟུགས་ཀྱི་ས་བོན་ལས་མི་འདའ། །འཛིན་ཞེན་གྱིས་མ་བསླད་ཤིན་ཏུ་གཅེས། །ཤར་གྲོལ་གྱི་ཡིན་ལུགས་རིག་པའི་ཚེ། །ལྷག་མཐོང་གི་རྒྱང་སོ་ཚུགས་པ་ཡིན། །འདི་ཉིད་ལ་གཤིས་ཤོར་གྱི་གོལ་ས་ལྡང་། །གཏད་མེད་ཀྱི་
ངང་འཇུར་དྲན་གློད་། །ལས་དང་པོའི་དུས་སུ་དྲན་པ་གཙོ། །དྲན་པ་ལ་བཅོས་བསྒྱུར་མི་དགོས་ཚེ། །གཟུང་དྲན་འདིས་ཐུགས་དམ་བཅོས་པ་མང་། །མ་བསྒོམས་པར་རིག་པ་དབྱེངས་བསྒྱུར། །སྒོམ་བྱེད་དང་ཡིན་མིན་ཤན་འབྱེད་ཀྱི། །ཤེས་པ་དེ་ཁུངས་མེད་བརྗོད་བྲལ་དུ། །མ་སོང་བར་མོས་དཔྱོད་ཁོ་ན་ལས། །ཡང་དག་གི་བདེན་པ་མཐོང་བ་མིན། །འཕྲོ་གནས་ཀྱི་སྤུ་རིས་ཡོད་ཕྱིན་ཆད། །ཤེས་སྒྲིབ་ཀྱི་གོལ་ས་ལྡན་པའི་ཕྱིར། །ལྟ་སྒོམ་གྱི་ཞེན་པ་ཁོང་གྲོལ་དུ། །མ་སོང་བར་སྙིང་ལ་རྡོ་རུས་གཏུགས། །དོན་གྱི་འཇོག་སོར། །རིག་པ་ཕྱིར་རྒྱ་བསྐྱེད་དང་། ནང་དུ་བསྡུ་བའི་ཤེས་པ་གཉིས་ཀ་གཏད་མེད་རང་བབས་སུ་བསྒྱུར་ལ་དྲན་ཙམ་པའི་བྱར་མ་ཡེངས་པའི་ངང་ནས་དྲན་མཁན་ཁོ་རང་ལས་ལྷག་པའི་བདེ་གསལ་གསལ། སྟོང་ཆམ་ཆམ། དགའ་ཡལ་ཡལ། །འདི་ཡིན་པར་འདུག །འདི་མིན་པ་འདུག་བསམ་པའི་རྟོག་དཔྱོད་ཐམས་ཅད་གཡས་མེད། རྩིས་མེད། །ལྟོས་མེད་ཁོ་ནར་བསྒྱུར་ཐོང་། ད་སྒོམ་བྱའོ། །བྱས་སོ། །བྱེད་དོ། །སྐྱེས་སོ། །འཛིན་པ་མི་འདུག་གོ །འདི་ག་ཡིན་ནོ་སྙམ་པའི་དྲན་རྒྱུན་ལྷང་ངེ་བ་ཞིག་ཡོད་ཀྱང་། གོལ་ས་ལས་མ་འདས་པས་དབྱིངས་རིག་ཆམ་བརྡལ་གྱི་ངང་ནས་ཡིན་མིན་གྱི་འཛིན་སྟངས་ཞིག་པའི་གུ་
ཡངས་རང་བབས་ཀྱི་ཤེས་པ་ལྟ་སྒོམ་ལས་འདས་པ་ཞིག་དགོས། རྣམ་རྟོག་རིག་རིག་ཁྱུག་ཁྱུག་གིས་སྐྱོང་སྒོམ་དགའ་བ་འདུག་སྐད་པ་དེ་རྣམ་རྟོག་ཁོ་རང་ཆོས་ཉིད་དུ་མ་ཤེས་པའི་སྐྱོན་ཡིན་པས་སྐྱོང་མི་དགོས། །སྒོམ་མི་དགོས། །རྣམ་རྟོག་དེ་གའི་ཐོག་ཏུ་ཤེས་པ་སྤུ་མ་བརྗེད་མདོག་མ་བསྒྱུར་བར་ཞོག་དང་རྗེས་མེད་རྩི་མེད་དུ་འགྲོ་བ་ཡིན། གཙོ་བོར་ཐུགས་དམ་གྱི་རིགས་འདི་བླ་མའི་བྱིན་རླབས་ཁོ་ཞུགས་པ་ལས་བླ་མའི་རྟོགས་པ་རང་རྒྱུད་ལ་འཕོས་ན་དགོངས་བརྒྱུད་ཀྱི་འཕོ་བ་ཐོབ་པ་ཡིན་པས་བླ་མའི་རྣལ་འབྱོར་ལ་གནད་དུ་བསྣུན་པ་ག་ལ་ཆེ། །ཕ་ཨོ་རྒྱན་རྗེ་ལ་སྙིང་ནས་བདུད། །ལམ་མཆོག་གསང་བླ་མེད་རྫོགས་པ་ཆེའི། །དོན་གཉུག་སེམས་འཛིན་སྟངས་ཞིག་པའི་ཀློང་། །གཞི་ཀ་དག་བཙན་ས་ཟིན་པར་ཤོག །ཁྱོད་ཀྱིས་དྲི་བ་གཉིས་པའི་དོན། །རང་བབས་ཤེས་པ་སྤང་བླང་དང་། །བྲལ་ཐབས་མ་མཆིས་རིག་ཁྱུག་གི་།རསཧ་རྟོག་རང་ཤར་རང་གྲོལ་ལས། །རྒྱུན་ཆད་མེད་ཅིང་ཚོར་མཁན་གྱི། །ཤེས་པའི་ངོ་བོ་ཁོ་རང་ཡང་། །ངོ་ཤེས་ཙམ་ནས་བརྗོད་བྲལ་སྟོང་། །འདི་ཡིན་མེད་པ་འདུག་པ་ལས། །སྒོམ་རྒྱུ་གང་ཡང་མི་འདུག་ཅེས། །ས་མྚར་
རི་མོར་བྲིས་པ་འབྱོར། །རང་བབས་ཤེས་པ་བླང་དང་། །ནམ་ཡང་བྲལ་ཐབས་མི་འདུག་ཚེ། །མཚན་མོའི་གཉིད་ལ་ཇི་ལྟར་འདུག །རྣམ་རྟོག་རང་ཤར་རང་གྲོལ་ལ། །རྒྱུན་ཆད་མེད་པར་ངོ་མཚར་ཆེ། །རང་ཤར་རང་གྲོལ་སྐད་པ་དེ། །སྒོམ་ཆེན་ཡོངས་ལ་གྲགས་ཆེ་མོད། །དེ་ཕྱིར་འདི་ལ་རྣམ་གྲངས་མང་། །རྣམ་རྟོག་ཐོལ་སྐྱེས་ཕྲལ་དུ་རིག །རིག་ཙམ་ཉིད་ནས་སྟོང་པ་རུ། །འདུག་གམ་ཡང་ན་རིག་མཁན་དང་། །རྣམ་རྟོག་གཉིས་པོ་དང་པོ་ནས། །དབྱེར་མེད་ཤར་ནས་དབྱེར་མེད་དུ། །གྲོལ་ནས་སྟོང་པར་འགྲོ་འདུག་གམ། །ཡང་ན་ཤར་དང་མ་ཤར་གྱི། །སྤུ་རིས་འབྱེད་པའི་མཁན་པོ་དེ། །མེད་བཞིན་རང་རིག་ཐ་མལ་གྱི། །རིག་པ་ཟང་ཐལ་ཆེན་པོའི་ངང་། །གནས་འཕྲོའི་ཐ་སྙད་བྲལ་བ་ཞིག །འདུག་གམ་དེ་ཡི་གནས་ལུགས་སྨོས། །ལར་སྒོམ་ལ་སྐྱོང་རྒྱུ་མེད་དེ། །གཟི་གཉུག་མའི་རང་འགྲོས་ལོས་མོད་ཀྱང་། རྒྱུ་མ་རིག་གསུམ་གྱི་སྒྲིབ་པ་འདིས། །དོན་ཡིན་ལུགས་ཀྱི་རང་ཞལ་འགགས་པ་མང་། །ལར་སེམས་དང་རིག་པ་མ་ཕྱེད་ཅིང་། །སྒོམ་སྟོང་གསལ་གྱི་འཛིན་སྟངས་མ་ཞིག་ན། །དེ་རྫོགས་པ་ཆེན་པོའི་ཀ་དག་མིན། །དེ་ཡིན་མིན་ཐེག་མཆོག་མཛོད་ལ་བྲིས། །དུས་སྙིགས་མའི་སྣང་
ཚུལ་གད་མོ་བྲོ། །ཉམས་རྟོགས་པ་གཉིས་ཀྱི་ཤན་རྣམས། །སྐབས་མ་བྱེད་དྲན་པ་རྒྱུན་ཆགས་ལ། །ཨ་འཐས་ཀྱི་སྟོང་སྦོས་ཁྱེར་བ་མང་། །དེ་ཅི་ཕྱིར་ཞེ་ན་གྲོལ་ཐིག་ལས། །དྲན་པ་རང་གྲོལ་ཐིག་ལེའི་དང་༔ ཁྱབ་གདལ་ནམ་མཁའི་ཁོར་ཡུག་ལ༔ དྲན་པས་བཟུང་དང་མ་བཟུང་མེད། །དྲན་པས་སྒྲོག་གིས་བཅིངས་པ་བཤགས༔ ཞེས་ཀུན་བཟང་ཡེ་གྲོལ་དགོངས་པ་བཤད། །ཁྱོད་རྣམ་རྟོག་རང་ཤྲ་རང་གྲོལ་ལ། །དུས་རྒྱུན་ཆད་མེད་དང་རིག་ཁྱུག་གིས། །སྐབས་འགའ་ལ་སྐྱོར་སྒོམ་དཀའ་བའི་ཚིག །དོན་སྔ་ཕྱི་མི་མཚུངས་དེར་གཞིགས་ན། །ཅི་བརྫུ་ལམ་ཅོ་འདྲིའི་རི་མོ་ལས། བདག་ཅུང་ཟད་ཐོས་པས་ཐེ་ཚོམ་ཆོད། །དོན་ཡིན་ལུགས་བསམས་པས་གནད་དོན་རིག །ཚེས་ལྟོ་མེད་དུ་བསྒོམས་པས་བདེན་པ་མཐོང་། །ཚུལ་འདི་འདྲར་སྐྱོ་འཇིགས་བག་ཚ་མེད། །ཅི་ད་དུང་གོ་མྱོང་རྟོགས་གསུམ་གྱི། །ཉམས་དྲི་མེད་འདོད་ན་སྤྲོས་པས་ཆོག །རྩེ་གཅིག་སྟོང་ཕྱོགས་ཀྱི་གོ་བཱི་ཀུན་རྟོག་རྟེན་ཅིང་འབྲེལ་འབྱུང་ལས་ཤར་བའི་དྲི་བ་དམིགས་གསལ་གྱི་སྐབས་དོན་ལ། ལུས་ཀྱི་མཚམས་ཁང་དུ་སེམས་ཀྱི་སྒྲུབ་པ་པོ་ཞེས་པའི་ཡིན་ཚུལ། །ཀུན་གཞི་ཚོགས་བརྒྱད་དང་བཅས་པའི་རྣམ་པར་རྟོག་པ་སྣ་ཚོགས་པའི་ལས་ཀྱིས་གཡེང་
དུ་མི་འཇུག་པར་དྲན་རིག་ཡེད་མེད་རང་གྲོལ་དུ་བསྟན་པ་ལ་དེ་སྐད་དུ་བརྡ་ཆད་བཞག་པ་སྟེ། དེའི་རྒྱུ་མཚན་ལུས་མཚམས་ཁང་དུ་བཞག་ཀྱང་འོད་གསལ་དྲན་པའི་རྩི་མ་ཟིན་ན་སེམས་ཀྱི་དྲན་རྟོག་སྣ་ཚོགས་པས་ཡུལ་བགྲོད་པར་འགྱུར་ཏེ་སྙིང་པ་ཅི་ཡང་མེད་པ་བཙོན་པ་ཁྲི་མུན་དུ་བཅུག་པ་ལྟ་བུ་ལས་མ་འདས་ཕྱིར་རོ། །ཡང་ལྷ་བྲིས་འབུར་སེམས་མེད་ས་སེམས་སུ་བཏགས་པ་ཞེས་ཟེར་བ། ལྷ་རབ་གནས་ཚུལ་མཐུན་གྱིས་ཟིན་པའི་བྱིན་ལྡན་ཞིག་ཡིན་ཕྱིད་ཆད་དེ་ལ་སེམས་ཞེས་སྣང་བ་དཀར་དམར་དུ་འབྱེད་པའི་ཀུན་རྟོག་རགས་པ་མེད་ཀྱང་། སེམས་ཅན་གྱི་ཁམས་ལས་ཆེས་ཁྱད་པར་དུ་འཕགས་པ་རྟོག་པ་དང་བྲལ་བའི་ཡེ་ཤེས་ཐུགས་རྗེ་ཆེན་པོ་གདུལ་ཡུལ་ལ་འཆར་བའི་ནུས་པ་ཚད་མེད་པས་བོད་ཀྱི་གཙུག་ལག་ཁང་རྣམ་གསུམ་ལ་སོགས་པས་མཚོན་ཏེ་རྟེན་གསུམ་ཁྱད་པར་ཅན་ལས་དཀར་པོ་རྣམ་པར་འཕེལ་བའི་གཟུགས་སྐུ་ལ་ཡེ་ཤེས་འདྲེས་པ་ལས་བུང་བ་ཤེས་པར་བྱ། ཡང་ཐུགས་དམ་སྒོམ་ཕྱོགས་ལ་བྱ་རྒྱུད་མེད་བཞིན་ཆེད་དུ་བྱས་པ་ཐུགས་དམ་ལ་དགེ་མཚན་ཅི་ཡོད་སྐད་པ། གནས་ལུགས་ཀྱི་བཞུགས་ཚུལ་གོམས་པས་གཤིས་ཐོག་ཏུ་འབེབས་དགོས་པའི་མཚན་ཉིད་ལ་རྨོངས་པ་སྟེ། ཉོན་
མོངས་དང་མ་རིག་པའི་སྒྲིབ་བྱེད་ཀྱི་ངོ་བོའི་བཞུགས་ཚུལ་ལ་སྒྲིབ་པའི་ཉེས་སྐྱོན་འགགས་ཕྱིར་དེ་གའི་ངང་དུ་དྲན་པ་བརྟན། འདུས་བྱས་ཀྱི་དགེ་བས་ཚོགས་བསགས། རང་བཞིན་མེད་པས་རྩལ་སྦྱང་བ་སོགས་བྱ་རུ་ཡོད་དེ། ཨུ་རྒྱན་ཆེན་པོས། སྒོམ་དུ་མེད་ཀྱང་རྩལ་སྦྱང་བསྒྲུབ་དུ་ཡོད༔ ཅེས་གསུངས་པའི་ཕྱིར་རོ། །སྔོན་འགྲོའི་སྐབས་སུ། སྐྱབས་འགྲོ་ལ་མཚོན་ན། སྐྱབས་ཡུལ་ཚོགས་ཞིང་ལ་མཁྱེན་བརྩེ་ནུས་གསུམ་གྱི་ཡོན་ཏན་ཚད་མེད་པ་མངའ་བ་གཞིར་བཞག་ནས། བསྐྱབ་བྱ་རང་ཉིད་ཐ་མལ་པའི་རྣམ་པ་ཅན་འཁོར་བའི་སྡུག་བསྔལ་ལ་འཇིགས་པ་དང་། སེམས་ཅན་ལ་སྙིང་རྗེ་བ། དཀོན་མཆོག་གི་ཡོན་ཏན་ལ་དད་པ་གསུམ་གྱིས་སྐྱབས་སུ་འགྲོ་ཞིང་་ཐུན་མཇུག་ཏུ་བསྐྱབ་བྱ་སྐྱོབ་བྱེད་གཉིས་སུ་མེད་པའི་ངང་དུ་མཉམ་པར་འཇོག་པ་ནི་གནས་ལུགས་དོན་གྱི་སྐྱབས་འགྲོ་བྲལ་ཐོབ་དང་བསླུ་བ་མེད་པ་ཡིན་ནོ། །དེ་ལྟར་མ་གོ་བར་ཐོག་མ་ནས་བསྐྱབ་བྱ་སྐྱོབ་བྱེད་མེད་པར་འདོད་གྲངས་ཅན་མུ་སྟེགས་ཀྱི་གྲུབ་མཐར་གོལ་ལ། མཐར་སྐྱབས་ཡུལ་རང་སེམས་སུ་གོལ་བའི་ཕྱིར་གནད་གཉིས་སུ་ཕྱེད་པ་ཡིན་ནོ། བསང་གསུར་སོགས་བདག་བསྐྱེད་དམིགས་
བསལ་ཡོད་རིགས་མ་གཏོགས་མེད་པ་རྣམས་ལ་རང་ཡི་དམ་གང་བྱེད་གསལ་བ་དེ་གས་འཐུས་པ་སྤྱི་ཁྱབ་ཡིན། སྨོན་ལམ་འདོན་པ་སོགས་ཁ་ཏོན་གྱི་རིགས་ལ་དྲན་རིག་རང་བཞིན་མེད་པའི་རྟོགས་པའི་ཁྱབ་གདལ་གྱི་དྲན་པའི་རྩིས་ཟིན་པའི་ངང་ནས་རྗེས་ཐོབ་ཀྱི་མདངས་ཚིག་ཕྱིར་གཞོལ་བས་འབྲས་བུ་མངོན་དུ་འགྱུར་བ་ཆོས་ཉིད་ཡིན། གཏོར་མ་ལ་མདུན་བསྐྱེད་ཁ་ཅིག་ལྷར་ཤེས་པ། མཆོད་པའི་ཚེ་འདོད་ཡོན་དུ་ཤེས་པ། །དངོས་གྲུབ་ལེན་པའི་ཚེ་བྱིན་རླབས་སུ་ཤེས་པ་ལྟ་བུས་མཚོན་སྐབས་སོ་སོའི་དབྱེ་བ་ཕྱེད་པའི་ཤེས་པ་སུམ་ལྡན་དུ་འགྱུར་དགོས་པ་གསང་སྔགས་རྙིང་མའི་རང་སྐལ་ཡིན་ལ། དེ་ཡང་བསྙེན་སྒྲུབ་ཀྱི་ཁྱད་པར་དང་། ཞི་དྲག་གི་ངེས་པ་སོགས་ཟུང་ཟད་དབྱེ་བ་བྱར་ཡོད། དེས་མཚོན་ནས་སྨན་རཀ་སྦྲན་པ་ལའང་འབག་བཙོག་སྦྱང་བ་དང་། བགེགས་བསལ་དང་། མཆོག་པ་འབུལ་བ་དང་། ཆང་ལ་ཕབས་བཏབ་པ་བཞིན་དུ་ཐུགས་དམ་རྒྱུད་བསྐུལ་དུ་འགྱུར་བ་སོགས་དགོས་པ་སྣ་ཚོགས་དང་ལྡན་པ་ཁོ་ནའོ། །ཡང་མཆོད་བསྟོད་རྣམ་ལྷས་ལྷ་ལ་བགྱིས་པ་ལྟ་བུ་ནི་ཤིན་ཏུའང་ཡིན་ཏེ། མ་དག་པའི་སྣོད་བཅུད་དག་པའི་སྣོད་བཅུད་དུ་སྦྱངས་། དག་པའི་སྣོད་བཅུད་སྤྲུལ་པའི་བསྐྱེད་
རིམ་དུ་བསྒྱུར་བ་ལ་མཆོད་པ་བྱེད་མཁན་རང་རྒྱུད་ག་ན་ཡོད། བསྐྱེད་བྱ་སྐྱེད་བྱེད་ངོ་བོའི་ཆ་ནས་སྲིད་ཞི་ཁྱབ་གདལ་དུ་མཉམ་ཡང་། གདོད་སྐྱེ་གནས་རྣམ་པ་བཞིའི་བར་སྲིད་ལ་འཇུག་པ་རྣམས་བསྐྱེད་རིམ་གྱི་ལན་ནས་སྦྱངས་ཞིང་གནས་སྐབས་སུ་བསོད་ནམས་ཡང་ཡེ་ཤེས་ཀྱི་ཚོགས་བསགས་པའི་སྟོབས་ཀྱིས་ཀྱང་ལྷའི་ངོ་བོར་གྲུབ་པ་ཡིན་ཏེ་གཞན་ནས་བྱུང་བ་ནི་མེད་དོ། །དེའང་དཀྱིལ་འཁོར་སྒྲུབ་མཆོད། བསྐྱེད་རིམ། བཟླས་བརྗོད། མཆོད་བསྟོད་ལ་སོགས་པས་བསོད་ནམས་ཀྱི་ཚོགས་རྫོགས། དེའི་རང་བཞིན་སྟོང་པ་ཉིད་ཀྱི་ངང་ལས་འདའ་བ་མེད་ཅིང་མཐའ་གྲོལ་གྱི་ལྟ་བས་རྒྱས་ཐེབས་པས་ཡེ་ཤེས་ཀྱི་རྫོགས་པ་ཡིན་ནོ། བླ་མ་ལ་ཕྱག་འཚལ་ལོ། །ཡང་ཅིག་ལན་འདི་སྐད་སྨྲ། བླ་མ་ཡི་དམ་མཁའ་འགྲོ་གསུམ། །བསྒྲུབ་ལ་བྱིན་རླབས་ཆེ་ཆུང་དང་། །ཐུགས་རྗེ་ཉེ་རིང་ཡོད་མིན་ཏེ། །དེ་ཀུན་བླ་མའི་རྟེན་འབྲེལ་ལ། །བརྟེན་ནས་འབྱུང་ཕྱིར་རྒྱུད་ལུང་དང་། །མན་ངག་ཀུན་ནས་བླ་མ་ཉིད། །བསྒྲུབ་ལས་ཟབ་པ་མེད་ཅེས་གསུངས། །གཅིག་ཏུ་བསྒྲུབ་ན་བླ་མའི་སྐུ། །ཡི་དམ་ཐུགས་ནི་མཁའ་འགྲོར་གསལ། །ཡང་ན་ངོ་བོ་བླ་མ་ལ། །རྣམ་པ་ཡི་དམ་ཉིད་དུ་བསྒྲུབ། །བཟླས་བརྗོད་མཁའ་
འགྲོར་ཤེས་པར་བྱ། །ཅི་ལྟར་བྱས་ཀྱང་འགལ་བ་མེད། །རྟེན་འབྲེལ་མོས་པའི་ཁྱད་པར་ཡིན། །བསྙེན་དང་སྒྲུབ་པ་ལས་སྦྱོར་གསུམ། །བསྙེན་པས་རྒྱུད་ལ་བྱིན་རླབས་འཇུག །སྒྲུབ་པས་དངོས་གྲུབ་ཆེན་པོ་ཐོབ། །ལས་སྦྱོར་ཐུགས་རྗེ་རོལ་པའི་རྩལ། །དཔེར་ན་བསོད་ནམས་བྱེད་པ་ལ། །ཕྲུ་སློག་མ་བྱས་ས་མི་དུལ། །ས་བོན་མ་བཏབ་འབྲས་མི་འབྱུང་། །རྔོད་འཐག་མ་བྱས་བཟར་མི་བཏུབ། །དེ་བཞིན་སེམས་དཔའ་རྣམ་གསུམ་ནི། །བདག་ཉིད་དམ་ཚིག་སེམས་དཔའ་ལ། །ཡེ་ཤེས་སེམས་དཔའ་སྤྱན་དྲངས་བཅུག །ཐུགས་སྲོག་ཡིག་འབྲུ་ཏིང་འཛིན་སེམས། །བོད་ཟེར་སྤྲོ་བསྡུའི་དགོས་པ་ནི། །ཐུགས་རྗེས་དབྱིངས་ནས་བསྐུལ་བ་དང་། །ཚོགས་གཉིས་ས་བོན་འདེབས་པ་དང་། །རིག་པའི་རྩལ་སྦྱོང་བྱེད་པ་དང་། །དྲེགས་པ་གནད་ལ་བོར་བ་སོགས། །ཞི་རྒྱས་དབང་དྲག་མཆོག་དང་ལྔའི། །དགོས་པ་སྣ་ཚོགས་ཉིད་དུ་གྲུབ། །བླ་སྒྲུབ་མ་ངེས་ཐ་དད་པར། །སྤྱི་བོ་སྙིང་ག་ནམ་མཁའ་སོགས། །བསྐྱེད་ཚུལ་མ་ངེས་སྣ་ཚོགས་པའི། །རྒྱུ་མཚན་སྤྱི་བབཏང་ཉིད་དུ་ནི། །སྤྱི་བོར་བསྐྱེད་པས་བྱིན་རླབས་འཇུག །དང་པོའི་ལས་ཅན་ཁྲིད་ཕྱིར་རོ། །སྙིང་གར་བསྒོམས་པས་ཡེ་ཤེས་འབར། །དངོས་གཞིའི་
ཉམས་ལེན་མན་ངག་མཐིལ། །ནམ་མཁར་བསྐྱེད་པའི་རིམ་པ་ལ། །དགོས་པ་ཁྱད་པར་དམིགས་གསལ་གྱིས། །དབྱེ་པ་རང་སྐབས་ཕྱེད་པར་བྱ། །བླ་མ་དང་ནི་ཨོ་རྒྱན་རྗེ། །གཉིས་མེད་གཅིག་ཏུ་བསྲེ་ལུགས་ནི། །ལྔ་བརྒྱ་ཐ་མའི་དུས་ཀྱི་ཚེ། །ང་ཉིད་རྡོ་རྗེ་སློབ་དཔོན་གྱི། །གཟུགས་སུ་སྤྲུལ་ནས་འགྲོ་དོན་བྱེད། །ཅེས་པའི་ལུང་ལ་སོགས་པ་ཡི། །ཚིག་ལ་དཔྱད་ཅིང་དོན་ལ་བསམ། །ངོ་བོ་རྩ་བའི་བླ་མ་ལ། །རྣམ་འགྱུར་ཨོ་རྒྱན་ཆེན་པོར་གསལ། །དགོངས་པ་གཉིས་མེད་བརྗོད་བྲལ་ལོ། །གསང་སྔགས་ཟབ་མོའི་དཀྱིལ་འཁོར་ལས །གཏོར་མ་མཆོད་པའི་ཡོ་བྱད་དང་། །དབྱངས་རོལ་ལ་སོགས་སྤྲོས་བཅས་ཀྱི། །རིམ་པ་བཤད་པའི་མཐའ་དག་ལ། །དགོངས་གཞི་དགོས་པ་དཔག་ཏུ་མེད། །གསང་སྔགས་ཐབས་ཀྱིས་ཆེ་བའི་ཕྱིར། །འདོད་པའི་ཡོན་ཏན་མི་སྤང་ཞིང་། །རྩ་གསུམ་དམ་ཅན་དགྱེས་པ་བསྐང་། །གདུལ་བྱའི་སྣང་བ་བསྒྱུར་བ་དང་། །གསང་བ་བོན་དུ་མི་གྱེར་སོགས། །རྟེན་འབྲེལ་དགོས་པ་མཐའ་ཡས་མོད། །འོན་ཀྱང་གཙོ་བོར་དོན་དམ་པའི། །བསྐྱེད་རྫོགས་མན་ངག་མེད་བཞིན་དུ། །ཀླུ་ཤོན་བྲོ་གར་ལ་འགྲན་པའི། །འབག་འཆམ་བླུན་པོའི་མགོ་བསྐོར་ལ། །
དགོས་ཆེད་ཡོད་པ་མ་ཡིན་ཏེ། །སྙིགས་མ་ལྔ་བདོའི་དུས་རྟགས་ལ། །ཆོ་ག་དབྱངས་དང་རོལ་མོ་ཡི། །སྒྲ་ལ་རེ་ཞེས་པདྨས་བཤད། །ད་ཕྱིར་བྱེ་བྲག་ཕྱེད་པར་བྱ། །སྤྱིར་གྱི་ཁ་ཏོན་དེ་དག་ལ། །འཇམ་གཉེན་ཡིད་ལ་འཇུག་པ་ཞིག །དགོས་ཀྱང་གསོལ་འདེབས་རྒྱུད་བསྐུལ་དང་། །ངེས་འབྱུང་གདུང་བའི་དབྱངས་ལ་སོགས། །སྐད་གསུངས་མཐོན་པོར་སྒྲོག་བྱས་ན། །སྣང་བ་འགྱུར་ཅིང་དམིགས་པ་གསལ། །སྤྱི་ལ་བག་ཆགས་གསལ་དག་སྙན། །དེ་ལས་གཞན་དུ་མ་ཡིན་ནོ། །སྒོ་གསུམ་དཀྱིལ་འཁོར་རྣམ་གསུམ་སྟེ། །ལུས་ལྷ་ངག་སྔགས་སེམས་ཆོས་ཉིད། །དེ་ཡི་གཤིས་ལ་རྩལ་སྦྱངས་པས་། །རབ་ནི་རགས་པ་ཐ་མལ་ལུས། །དྭངས་མ་ལེ་ཤེས་ལྷ་ཡི་སྐུར། །གནས་འགྱུར་ཞིང་ཁམས་བགྲོད་པ་ཡོད། །འབྲིང་གི་ལུས་ལ་ཐ་མལ་དུ། །འཛིན་པའི་ཞེན་པ་ཡོངས་དག་ནས། །རང་སྣང་ལྷ་སྐུར་སྨིན་པ་ཡིས། །ཐ་མལ་བཀོད་པ་མ་འགྱུར་ཀྱང་། །སྒྱུ་མའི་ལུས་རྟེན་བོར་མ་ཐག །ས་ཚྭ་བཀོས་ཕོར་ཕྱུང་བ་ལྟར། །བར་དོར་ལྷ་ཡི་སྐུ་རུ་སྨིན། །རྣམ་པར་སྨིན་པའི་རིག་འཛིན་ཟེར། །ཐ་མས་དེ་ལྟར་མ་གྲུབ་ཀྱང་། །བསྐྱེད་རིམ་བསྒོམས་ཤིང་སྔགས་བགྲངས་པས། །ལུས་ངག་སྒྲིབ་པ་རྣམ་སྦྱོང་
ཞིང་། །ནད་གདོན་གཡུལ་ལས་རྒྱལ་བ་སོགས། །ཡོན་ཏན་བསམ་གྱིས་མི་ཁྱབ་བོ། །ཡང་ཅིག་ཁྱེད་ལ་འདི་སྐད་སྨྲ། །དེ་ལྟར་བསྐྱེད་རྫོགས་བསྒོམས་གྱུར་ཀྱང་། །ནམ་ཞིག་ལུས་རྟེན་དང་བྲལ་ཚེ། །ལུས་ནི་དུར་ཁྲོད་དབེན་པར་བོར། །ངག་ནི་ན་བུམ་ལྟ་བུར་ཡལ། །སེམས་ནི་དངོས་མེད་རྩ་བྲལ་བ། །བསད་བརྡུངས་བཅད་པས་མི་གནོད་ཅིང་། །མེར་བསྲེགས་ཆུར་བསྒྱུར་གང་གིས་ཀྱང་། །དེ་ལ་སྡིག་པ་མི་འདུག་པས། །བསྐྱེད་དང་རྫོགས་པའི་བྱེད་པ་ཡིས། །དགོས་པ་མེད་སྙམས་དོགས་པ་ན། །སེམས་ལ་མ་རིག་ལས་ཉོན་དང་། །སྡིག་པའི་དགོས་པའི་བག་ཆགས་ཀྱིས། །འཁོར་བར་བསྒྱུར་མ་གོ་བར། །སྟོང་ཕྱོགས་དངོས་པོའི་བཞུགས་ཚུལ་གྱི། །བབས་ལ་རིག་པས་ཞིག་པ་ཡིས། །གོ་ཡུལ་ཙམ་དུ་སོང་གི་ས་དོགས། །ཅི་ཕྱིར་དོན་ནུབ་ཉལ་བ་ན་རྨི་ལམ་འཁྲུལ་པ་འདུག་མི་འདུག །འདུག་ན་ལུས་ཀྱིས་འདིར་ཉལ་ནས། །རྣི་ལམ་དེ་ཡིས་ལུང་པ་དང་། །བྱ་བྱེད་འགྲོ་འདུག་སྨྲ་བ་དང་། །བདེ་དང་སྡུག་བསྔལ་ལ་སོགས་པའི། །བྱེད་པོ་དེ་ནི་སུ་ཡིས་བྱས། །དེ་ཕྱིར་བག་ཆགས་ལ་བརྟེན་ནས། །ཡ་གི་སྲིད་པའི་རྩེ་མོ་ནས། །
མ་གི་དམྱལ་ཁམས་བཅོ་བརྒྱད་ཚུན། །མེད་བཞིན་ལས་ཀྱི་འཁྲུལ་ངོར་སྣང་། །བདེ་དང་སྡུག་བསྔལ་སྣ་ཚོགས་སྐྱོང་། །དེ་ཕྱིར་བག་ཆགས་ལ་བརྟེན་ནས། །མེད་བཞིན་སྣང་བའི་འཁྲུལ་སྣང་འདི། །སྦྱང་ཕྱིར་བསྐྱེད་རྫོགས་མན་ངག་བྱུང་། །བག་ཆགས་དབྱིངས་སུ་ཟད་པའི་ཚེ། །སེམས་ཉིད་འོད་གསལ་སྟོང་པ་ལ། །འཁོར་འདས་གཉིས་ཀ་མིང་མེད་པས། །ལུས་ངན་ལེན་པར་མི་འགྱུར་ཞིང་། །དེ་ཚེ་སེམས་ལ་བཅད་བཏུབ་དང་། །མེར་བསྲེག་ཆུར་བསྒྱུར་བྱེད་མཁན་དང་། །བྱེད་བྱ་མྱོང་མཁན་མེད་པ་ཡིན་། །དགོངས་པའི་བཙན་ས་ཟིན་གྱུར་པས། །ཁོང་ལ་ཀུན་བཟང་ཡབ་ཡུམ་ཟེར། །དེ་ལ་དོན་གྱི་སངས་རྒྱས་ཟེར། །དེ་ལ་ཐོག་མའི་མགོན་པོ་ཟེར། །དེ་ལ་སྤང་རྟོགས་མཐར་ཕྱིན་ཟེར། །དེ་ལས་མི་སྨྲ་ཨེ་མ་ཧོ ཞེས་དང་ལྡན་མ་ཎི་བྷ་ཏྲ་ལའོ། བླ་མ་སངས་རྒྱས་དངོས་སུ་མཐོང་ཞིང་། །གདམས་ངག་བདུད་རྩིའི་སྙིང་པོར་གོ་ལ། །འཁོར་བ་དུག་སྦྲུལ་ནག་པོར་མངོན་པའི། །སློབ་མའི་ཡོན་ཏན་ཀུན་ཚང་ཁྱོད་ལ། །ཚོགས་དྲུག་གེགས་སེལ་གནད་ཀྱི་མན་ངག །ལྷུག་པར་བཤད་ཀྱིས་ཡིད་ལ་ཟུངས་དང་། །མཛེས་དང་མི་མཛེས་དགའ་དང་མི་དགའ། །སྙན་དང་མི་སྙན་ཞིམ་དང་མི་ཞིམ། །
བསུང་དང་མི་བསུང་འཇམ་དང་མི་འཇམ། །ཚོགས་དྲུག་ཡུལ་ཕྱིར་ཤོར་བའི་རྐྱེན་དུ། །གོ་བས་གྲུབ་པ་མེད་པར་ཤེས་ཤིང་། །མྱོང་བས་རང་གྲོལ་ཆེན་པོར་དག་འགྲོ། །རྟོག་པས་ཡེ་སྟོང་གཞི་མེད་རྩ་བྲལ། །མཛེས་པོ་ཐམས་ཅད་མིག་གི་བཟུང་ཡུལ། །མཛེས་པར་ཆགས་མཁན་མིག་གི་རྣམ་ཤེས། །དགའ་བོ་ཐམས་ཅད་ཡུལ་གྱི་འཆར་སྒོ། །དགའ་བར་འཛིན་མཁན་ཀུན་གཞིའི་རྣམ་ཤེས། །སྙན་པོ་ཐམས་ཅད་ཕྱི་ཡི་གྲག་པ། །སྙན་པར་འཛིན་མཁན་རྣ་བའི་རྣམ་ཤེས། །ཞིམ་པོ་ཐམས་ཅད་བཟའ་བཏུང་རོ་མཆོག །ཞིམ་པར་འདོགས་མཁན་ལྕེ་ཡི་རྣམ་ཤེས། །བསུང་པོ་ཐམས་ཅད་དྲི་ཡི་བྱེ་བྲག །བསུང་པོར་འཛིན་མཁན་སྣ་ཡི་རྣམ་ཤེས། །འཇམ་པོ་ཐམས་ཅད་གོས་སོགས་རེག་བྱ། །འཇམ་པོར་ཞེན་མཁན་རེག་བྱའི་རྣམ་ཤེས། །ཚོགས་དྲུག་ཅེས་བྱ་དེ་ལ་ཟེར་བས། །དེ་ཉིད་མ་སྤངས་རང་གྲོལ་རྟོགས་ན། །རིག་པའི་གཤིས་ལ་དེ་དག་མ་གྲུབ། །འཁོར་འདས་བཟང་ངན་བདེ་སྡུག་ལེགས་ཉེས། དུ་མ་རོ་གཅིག་ཆེན་པོར་ལོས་འགྲོ། །རོ་གཅིག་ཟེར་ན་དེ་ལ་ཐོགས་ཤིག །མཛེས་པོར་མཐོང་ན་ཆགས་སེམས་སྐྱེ་ཞིང་། མི་མཛེས་མཐོང་ན་སྡང་སེམས་འཆར་བའི། །ཆགས་
སྡང་སེམས་ལ་གཏད་སོ་འདུག་པས་། །རང་ངོ་ཤེས་ཀྱང་རྗེས་ཤེས་ཡིན་ནོ། །ད་དུང་གཏད་མེད་རང་གྲོལ་སྦྱོངས་ཤིག །དེ་བཞིན་སྙན་དང་མི་སྙན་ལ་སོགས། །ཚོགས་དྲུག་སེམས་ལ་རིག་པས་ལྟོས་ལ། །མཐའ་གྲོལ་ཀློང་ཡངས་ཆེན་པོའི་གཤིས་སུ། མི་ཚེའི་ཉི་མ་ཟད་དུ་ཆུག་ཅིག །ཆགས་སྡང་ཡུལ་མེད་རྩ་བྲལ་རྟོགས་ཤིག །རྐྱེན་ངན་ཆོས་སྐུར་ལམ་ལམ་འཆར་ན། །སྒོམ་མེད་རྒྱལ་པོའི་ཁྲི་ལ་འཇོགས་པས། །གང་ཟག་དེ་ལ་སྐྱབས་སུ་མཆིའོ། །དོན་དུ་ཚེ་འདིའི་ཁེ་གྲགས་གཉེར་ལ། །སྒོམ་དུ་བདེ་གསལ་མི་རྟོག་སྐྱོང་བའི། །གྲུབ་ཐོབ་དེ་འདྲ་མངའ་ཐང་ཆེ་ཡང་། །གཞོན་པའི་ཡིད་སེམས་བ་སྤུ་མི་འགུལ། །ཆགས་མེད་རང་གྲོལ་ཆོས་མེད་རྣལ་འབྱོར། །བློ་བདེ་གུ་ཡངས་རྒྱུན་ཆད་མེད་པ། །གནད་ཀྱི་མན་ངག་གསེར་གྱི་ཡང་ཞུན། །དད་ལྡན་ཁྱོད་ལ་བརྩེ་བས་གདམས་སོ། །དགེ་བས་ཉོན་མོངས་རང་གྲོལ་གྱུར་ཅིག །ཁྱོད་རང་གྱི་ཐོད་རྒལ་ཉམས་ལ་ལྷ་སྐུ་འཆར་གྱི་འདུག་གསུང་དེ་ཉིད་མང་ཉུང་ཇི་ལྟར་འདུག་ཀྱང་མངོན་དགའ་ལ་སོགས་རང་བཞིན་སྤྲུལ་སྐུའི་ཞིང་ཁམས་སུ་ཐག་རྦད་ཀྱིས་ཆོད་ལ། རང་གི་རིག་པ་འོད་གིང་གི་རྣམ་པར་སྙིང་
དབུས་ནས་འཐོན། རྒྱང་ཞགས་ཆུའི་སྒྲོན་མ་མིག་གི་སྒོ་ནས་འཐོན་ཏེ་ལྷ་སྐུའི་ཐུགས་ཀར་འཕོས་ལ། ལྷ་དང་རང་སེམས་གཉིས་སུ་མེད་པའི་ངང་ལ་མཐོང་བྱ་མཐོང་བྱེད་ཀྱི་གཉིས་འཛིན་དང་བྲལ་ནས་རང་བབས་སུ་སྒོམ་པ་ཞུ། འདི་རྒྱུད་ཉི་ཟླ་ཁ་སྦྱོར་གི་མན་ངག་བཤད་དུ་ཕངས་པ་ཞིག་ཡིན་པས་གསང་རྒྱ། །སྟོང་པ་ཆེད་དུ་བསྒོམས་ཤིང་། །དྲན་མེད་འོག་འགྱུར་མ་སོང་བའི། །ཧྲིག་གི་རིག་པའི་དྲན་པ་འདི། །བརྗོད་མེད་བློ་ལས་འདས་པ་ཡོད། །དེ་ལ་ལྟ་བ་ཟེར་བ་ཡིན། །དེ་ཉིད་དུས་དང་རྣམ་པ་ཀུན། །དྲན་ཙམ་རིག་ཙམ་བྱེད་པ་ལ། །སྒོམ་པ་ཞེས་བྱའི་མིང་དུ་བཏགས། །དམིགས་པས་སྒོམ་རྒྱུ་སྤུ་ཙམ་མེད། །དོན་ལ་ལྟ་སྒོམ་དབྱེར་མེད་ཡིན། །སྤྱོད་པ་རྣམ་གྲངས་མང་ན་ཡང་། །ཆོས་དང་མཐུན་པའི་སྤྱོད་པའི་མཆོང་། །ལྟ་སྒོམ་སྤྱོད་པའི་ཡི་གེ་འདི། །མཁའ་སྤྱོད་རིག་འཛིན་སྒྲོལ་མ་ཡི། །ཐུགས་ལ་བསྟིམ་ཞིག་ས་མ་ཡ། ཨ། ད་ལྟའི་ཤེས་པ་བཟོ་མེད་འདི། །ངེས་པ་དོན་གྱི་ཀུན་ཏུ་བཟང་། །སྒོམ་དུ་མེད་ལ་ཡེངས་སུ་ཕངས། །རང་སོར་ཞོག་ཅིག་སྙིང་གི་བུ། །ཉམས་དང་རིག་པ་ཤན་ཕྱེད་པའི། །དྭངས་གསལ་དྲན་པ་
བརྗོད་མེད་འདི། །ཀ་དག་དོན་གྱི་གནས་ལུགས་ཡིན། ཞེ་འདོད་སྤངས་ཤིག་སྙིང་གི་བུ། །གཏམ་དང་སྙན་གྲགས་མཐུ་རྩལ་སོགས། །བྱང་ཆུབ་བསྒྲུབ་པའི་བདུད་བཅོས་ཡིན། །རི་སུལ་མི་མེད་ལུང་སྟོངས་སུ། །འཇའ་ལུས་སྒྲུབས་ཤིག་སྙིང་གི་བུ། །སྙིང་གཏམ་ཚིག་གསུམ་མ་ཞེས་བྱ་བ་འདི་ཡང་རྡོ་བོད་མཚམས་མོག་པ་ལྷ་རྩེའི་ནགས་ཁྲོད་དུ་རྫོགས་ཆེན་པ་པདྨ་དབང་ཆེན་ཡེ་ཤེས་རོལ་པའི་རྡོ་རྗེས་སྨྲའོ། །བསམ་མེད་རང་གྲོལ་རྫོགས་པ་ཆེན་པོ་ལ། །གཏད་མེད་རྒྱ་ཡན་ཡེ་གྲོལ་གཉུག་མ་ཡིན། །དམིགས་མེད་བློ་འདས་ཆེན་པོར་ཕྱག་བགྱིའོ། །བརྗོད་མེད་ལྷུན་འབྱམས་དགོངས་པའི་གསང་མཛོད་ཕྱེ། །ཁྲིམས་མེད་ཁ་ཡན་མཁྱེན་བརྩེའི་འོད་ཟེར་གྱི། །ཆོས་མེད་ཆོས་གཏམ་རང་བབས་རྗེན་པའི་གཏམ། །བྱར་མེད་དགོངས་པའི་གསང་མཛོད་ཁ་ཕྱེ་ནས། །བརྗོད་མེད་དོན་ལ་བརྗོད་བྱས་ཁ་གསག་བྱེད། །ད་ལམ་སམྦྷ་ཊར་དྲི་ཚིག་བསྲིངས་པའི་སྐབས་དོན་ལ། །བླ་མ་སྤྱི་བོ་ནམ་མཁའ་སོགས་ལ་བསྐྱེད་ཀྱང་རང་སེམས་དང་དབྱེར་མེད་ཡོང་བ་ཆད་ལྟར་མ་གོལ་ལམ་ཞེས་པ་སྤྱིར་བླ་མ་སྒོམ་པ་གཅིག་
པུར་མ་ཟད་བསྐྱེད་རིམ་ཐམས་ཅད་རང་སེམས་ཀྱི་གདངས་ཙམ་དུ་འཆར་བའི་དོན་ལ་སྒོམ་མཁན་ཟུང་འཇུག་ཏུ་མ་ཤེས་ན་ཡ་བྲལ་ནི་ཤིན་ཏུ་རྨོངས་པ་སྟེ། དེས་ན་རང་སེམས་དང་དབྱེར་མེད་དེ་གའི་ངང་ནས་མོས་གུས་སུ་ཤར་བའི་དེ་ཁོ་ན་བླ་མ་ཆོས་སྐུའི་ཞལ་མཇལ་བ་ཡིན་པས་ནོར་འཁྲུལ་དུ་དོགས་པར་མི་བྱ། །ལྷག་དོན་གོ་ཉམས་དང་ཕོ་ཚོད་སོགས་མ་ཡིན་པར། རང་བཞིན་རྡོགས་པ་ཆེན་པོའི་གནས་ལུགས་གཞི་ཐོག་ཏུ་འཁྱོལ་བའི་ཚེ། །བླ་མ་གཟུགས་སྐུར་བལྟ་བ་ལ་གོལ་ན་མོས་གུས་ལམ་དུ་མ་ལོངས་པ་ཡིན། ཆད་ལྟ་ནི་མུ་སྟེགས་རྒྱང་འཕེན་པ་ལས་འབྲས་མི་བདེན། མི་ཤི་བའི་བདུད་པ་བཞིན་སོང་ཟེར་བ་ལྟ་བུའམ། བླུན་སྒོམ་ཁ་ཅིག་ཆོས་ཐམས་ཅད་རྟོགས་པས་སྟོང་པར་སྦྱངས་པ་དེ་ལ་ཟེར་བ་ཡིན། ཡང་སྒོམ་དངོས་གཞིའི་སྐོར་ཤར་གྲོལ་གྱི་བག་ཆགས་མཚན་མོ་སྐབས་སུ་འདུག་སྐད་པ། འདི་ལ་ནོར་ས་ཡོད་པས་ཉིན་སྣང་ལ་ཅུང་ཟད་དྲན་པའི་གཉེན་པོས་བཅིངས་དྲགས་པའི་རྟགས་ཡིན། འདིའི་བག་ཆགས་ཆེར་བརྟས་པ་ལས་སྒོམ་ཉིན་མཚན་འདྲེས་པར་རློམ་པ་མང་པོ་མངོན་ཏེ་ཡ་ཆེ། རྟོག་པ་སྔ་མས་
ཕྱི་མ་དགུག་པའི་ཉམས་ཤུགས་ལ་འཆར་ཉེན་སྲིད་བྱས་པ་ད་ལམ་བཅར་རྒྱག་ངོས་ཟིན་འདུག །ཡང་དེང་སང་གི་ཤེས་པ་སྤྲོ་བསྡུ་མ་དགོས་པའི་བློ་ཡུལ་ལས་འདས་པའི་དུག་སྐད་མཁྱེན་བླ་མ་པྲ་ཛྙཱ་ར་སྨིས། འབྲལ་མེད་ཉམས་མྱོང་དེར་གནས་དེས་ཤེས་དང་། །ཤུགས་འབྱུང་མྱོང་བྱ་བྲལ་བའི་སྟོང་པ་ཉིད། འཁྲུལ་མེད་མ་ནོར་བ་ཞིག་གནད་དུ་ཆེ། །ཡིད་ལ་མི་བྱེད་ཡང་དག་དྲན་པ་དང་། །ཡིད་དང་རྟོག་མེད་ཧད་པོར་ལུས་པ་གཉིས། །འཁྲུལ་མེད་མ་ནོར་བ་ཞིག་གནད་དུ་ཆེ། །རྩོལ་མེད་རང་ཤར་རང་ཞལ་ལྟ་བ་དང་། །བློས་བྱད་ཆེད་འཛིན་ཕ་མོ་རྒྱས་འདེབས་གཉིས། །འཁྲུལ་མེད་མ་ནོར་བ་ཞིག་གནད་དུ་ཆེ། །ཞེས་གསུངས་པ་ལྟར་རིག་པ་ཐ་མལ་བསྒྱུར་བཀོད་སྐྲ་རྩེ་ཙམ་མ་ཡང་མ་སོང་ལ། དེར་འཛིན་གྱི་གཉེན་པོ་འདི་ལྟར་ཡིན་པ་འདུག་སྙམ་མཁན་ཡང་དག་པའི་དྲན་ཤེས་དབྱིངས་ཀྱི་ངང་དུ་རིག་པའི་གཟེར་ཐེབས་པ་ཞིག་འདུག་ན་དེ་ལས་ལྷག་པར་མི་དགོས། ལར་ཇི་སྐད་དུ། སྒོམ་ཆེན་སྒོམ་གྱིས་མ་བསླུས་ན། གཞན་གྱིས་བསླུ་བར་མི་འགྱུར་རོ། །ཞེས་པ་ལྟར་བརྟན་པ་ཅུང་ཟད་ཐོབ་ནས་དྲན་རིག་འཇུར་དྲན་གྱི་གཉེན་པོ་འདི་གས་
རང་ཞལ་འགེབས་པ་མང་བས་རང་སར་གློད། མ་བསྒོམས་པར་བསྒྱུར། མ་བྱེད་པར་ཞོག །མ་བལྟ་བར་ཐོང་། དེ་ཐམས་ཅད་ལ་ཤུགས་འབྱུང་ཡང་དག་གི་དྲན་པས་ཟིན་པར་གྱིས། ཨ་ལ་ལ་གནད་ཡོད་དེ། རིག་པ་ཀློང་ནས་གྲོལ་ན་ཇི་ལྟར་བྱས་ཀྱང་གཉའ་ཡངས། དབྱིངས་རིག་ཆམ་བརྡལ་ལ་སོང་བས་བློ་བདེ། གང་ཤར་ཡེ་ཤེས་ཀྱི་འཁོར་ལོར་ཤར་བ་འདི་གད་མོ་བྲོ། ཁྲིམས་མེད་ཁ་ཡན་དུ་སྡོད་པ་འདི་ཧམ་པ་ཆེ། ཀུན་ཏུ་བཟང་པོ་ལ་ཞལ་ཕྱག་ཡོང་བ་རྫུན་དུ་པས། གཞི་དབྱིངས་སུ་གཞི་སྣང་ཐིམ་པས་ལྟད་མོ་ཆེ། བྱ་བྱ་དང་བྱེད་བྱེད་ཀྱི་ཁེངས་པ་བསྐྱུངས་ལ་སྒྲུབ་པའི་རྒྱལ་མཚན་ཚུགས་ཤིག་གོ །ཕཊཅེས་འོག་མིན་རྡོ་རྗེ་བྲག་ནས་སོ། །དེ་གར་ཁྱེད་རབ་ཐུགས་དམ་གོང་འཕེལ་མཚམས་རྒྱ་དམ་པར་ཡོད་པ་ནས་གནས་ཚུལ་རྟེན་ལྡན་འབྱོར་པ་སེམས་སྤྲོ་རྗེས་སུ་ཡི་རང་ངོ། །ཇི་སྐད་ཟེར་བ་བཞིན་སྣང་བ་ལ་རིག་པས་རྒྱས་བཏབ་སྟེ་ཐེ་ཚོམ་མེད་པའི་ཉམས་ཤར་བ་དེ་བློས་བརྟགས་ཀྱི་སྒོམ་ཡིན་མོད། ད་འདྲ་མི་དགོས་པར་བལྟ་བྱ་དང་ལྟ་བྱེད་གཉིས་མེད་དུ་སོང་བ་དེ་བསྒོམ་བྱ་མ་འཁྲུལ་བ་ཡིན། སྣང་བ་རིག་པའི་རྩལ་
ཡིན་པ་ཧ་ཅང་ཆེ། སྣང་བ་མི་དགོས་འཁོར་འདས་ལམ་གསུམ་གྱི་ཆོས་ཐམས་ཅད་རིག་པའི་གདངས་ལས་འགྲོ་ས་མེད། དེ་ཡང་ཐུགས་དམ་སྐྱོང་བའི་ངོ་བོ་ལ་གཉིས་འཛིན་རགས་པ་མ་བྱུང་ཡང་འདི་ག་ཡིན་འདུག་སྙམ་པའི་ཡིད་ཆེས་ཀྱེ་བ་ནི་མྱོང་ཞེན་ཤེས་བྱའི་སྒྲིབ་པ་ཡིན་པས་འདི་འདྲ་སྤང་པ་ནི་དཀའ་ལས་ཅི་ལས་ཆེ། ཨོ་རྒྱན་ཆེན་པོས། ས་ལམ་དྲོད་རྟགས་རེ་བས་བཅིངས༔ ཉམས་རྟོགས་རོ་ལ་ཆགས་པས་ཕུང་༔ སྨིག་རྒྱུའི་ཆུ་ཡིས་རང་ཉིད་བསླུས༔ ཞེས་གསུངས་པའི་ཕྱིར་རོ༔ དེ་དོན་གྱི་སྙིང་པོར་སེམས་ལ་མིང་འདོགས་ཐམས་ཅད་དང་བྲལ་བར་ཤུགས་འབྱུང་གི་རིག་པ་ཞིག་འདུག་སྐད་པ་དེ་ཀ་ཟ་ཉལ་འགྲོ་འདུག་གང་གི་ཚེའང་། བཅོས་མེད་ལྷད་མེད་དུ་བྱུང་ན་དེ་ཀས་འཐུས། རླུང་བཟུང་སྐོར་ཐུན་གཅིག་ཆ་བཞག་པའི་རྒྱུན་འཛིན་འདི་ཤིན་ཏུ་ཟབ་པ་ཡིན་པས་དེ་གཙིགས་མཛོད། སྙན་བརྒྱུད་ལྟ་བུའི་མན་ངག་དམིགས་གསལ་ཅན་གྱིས་རླུང་སེམས་དབུ་མར་བསྡུ་བ་ཡིན་ན་མ་གཏོགས་གཞན་མ་རྫོགས་ཆེན་རང་ལུགས་ལ་རྩོལ་མེད་ཀྱི་ངང་དུ་བར་རླུང་བསྐྱིལ་བས་ཡེ་ཤེས་ཀྱི་རླུང་གིས་ཐམས་ཅད་ལ་རང་དབང་ཤུགས་ཀྱིས་བསྒྱུར་བ་གསུངས་ཕྱིར་ཀུན་མཁྱེན་ཆེན་པོས་ཀྱང་། །
ཁོ་བོ་ཅག་ཁ་སྣའི་རླུང་བཟུང་བས་བྱང་ཆུབ་ཐོབ་པར་མི་འདོད། །ཁ་སྣའི་རླུང་ནི་སྦུད་པའི་སྒང་སྟོང་དང་འདྲ་ཞེས་གསུངས་པ་ཡང་གནད་འདི་ལ་དགོངས། འོན་ཀྱང་སྦྱོར་བ་བཞི་ལྡན་གྱི་རླུང་བཟུང་དུས་ཁབ་མིག་ཏུ་སྐུད་པ་འཛུད་འཛུད་ལྟ་བུའི་ཤེས་པ་བཞུར་ལ་མ་བཅུར་བར་སེམས་ཡེངས་ན་སྲོག་རླུང་སོགས་ཀྱིས་གེགས་ཆེ་བས་སེམས་ལ་ཞོག །སྒྲུབ་པ་ལ་ཧུར་བསྐྱེད་སྙིང་རུས་བྱས་པ་རྗེས་སུ་ཡི་རང་། ད་དུང་རྟོག་པ་ཤར་བ་དང་སྒྲིབ་པ་དག་པ་ལ་བླ་མ་ལ་མོས་གུས་བྱེད་པ་ལས་བོགས་ཆེ་བ་ལ་ཡོང་བས་རྩ་བའི་བླ་མ་དང་ཨུ་རྒྱན་ཆེན་པོས་དགྱེར་མེད་དུ་ཤེས་པར་བྱས་ནས་བླ་སྒྲུབ་ལ་འབུངས། ཁྱེད་ཀྱི་ཐུགས་དམ་སྐོར། སྔོན་ཆད་སྐྱོང་དཀའ་བ་ནི་ད་ལྟའི་ཐ་མལ་གྱི་རིག་པ་སྒོམ་ལར་ཤར་བའི་སྐྱོན་དང་། བདེ་བ་དང་འབྲེལ་མི་ཕོད་པ་ནི་ཞི་གནས་ཕྱོགས་གཅིག་ཏུ་ལྷུང་བའི་བདེ་ཉམས། སེམས་ནང་དུ་བཀུག་ནས་སྐྱོང་བ་ལ་ད་འདི་ཡིན་འདུག་སྙམ་པ་ཕྱི་རབས་པ་རྣམས་ཀྱི་སྒོམ་ཆགས་གྱུ་མ་ཞེས་པ་དང་ཆ་མཚུངས་པ་སོགས་དེ་དག་ཐམས་ཅད་ལྟ་བ་ཡང་དག་པ་མ་ཡིན། ད་ཆ་དེ་དག་མེད་པའི་ཤུགས་རྒྱབ་མི་དགོས་པར་རང་བབས་སུ་དྲན་པ་ཞིག་ལས་སྒོམ་རྒྱུ་མེད་པ་ཞིག་འདུག་
སྐད་པ་ལམ་གྱི་སྒོམ་པ་ནོར་འཁྲུལ་མེད་ཙམ་ཡིན། ལས་རླུང་ཅུང་ཟད་མགོ་ནོན་པའི་རྩེ་གཅིག་གི་ཤེས་པ་ཟེར་བ་དེ་ཡིན་བྱར་རུང་། འདི་ལ་སྒོམ་རྒྱུ་མེད་པས་སྒོམ་མེད་འདི་ཀ་ཡིན་འདུག་སྙམ་པའི་རང་མཐོང་སྐྱེ་བ་སོགས་འབྱུང་ཉེན་ཆེ་བས་བློས་ལྟ་བ་མཐོ་དམན་གྱི་ཚད་མི་འཇོག་པར་ད་དུང་དེ་གའི་གཤིས་སུ་ཟ་ཉལ་འགྲོ་འཆག་ཐམས་ཅད་དུ་མ་བརྗོད་ཙམ་གྱིས། དོན་གྱི་སྙིང་པོར། ད་ལྟའི་དྲན་པ་སྐྱེ་འགག་གནས་གསུམ་དང་བྲལ་བར་རྫོགས་པ་ཆེན་པོའི་དགོངས་པ་ཡེ་གྲོལ་དུ་ཡོད་ཅིང་། དེ་ལས་ལྷག་པའི་ཐུགས་དམ་གསལ་པོ། བདེ་བདེ་པོ། འདི་ཡིན་འདུག་སྙམ་པའི་བློས་སྟངས་གཅོད་རྒྱུ་གཞིག་བྱུང་ཕྱིན་ཆད་རྫོགས་པ་ཆེན་པོའི་དགོངས་པ་མ་ཡིན། འོད་གསལ་གྱི་རྒྱུད་སེང་གེ་རྩལ་རྫོགས་ལས། མུ་མཐའ་མེད་པར་རྩོལ་བ་གང་ཡིན་པ། །བྱ་ལོང་ནམ་མཁའི་མཐའ་འཚོལ་འདྲ་སྟེ་རྙེད་པ་མིན། །མི་རྙེད་དོན་འདི་ཉིད་ལ་སུས་ཀྱང་བཅོས་མི་སྲིད། །ཤེས་བྱ་སྤྲོས་མེད་འདི་ལ་ཕ་མཐའ་མི་སྲིད་དོ། །ཞེས་གསུངས། འདིའི་ཚེ་བོགས་མོས་གུས་ཀྱིས་འདོན་དགོས་པས་ཐུན་བཞིར་བླ་མའི་རྣལ་འབྱོར་ལ་རྩལ་འདོན་ཞིང་དེ་ཡང་སྙིང་ཁོང་རུས་པའི་གཏིང་ནས་བླ་མ་སངས་རྒྱས་སུ་མཐོང་བའི་དད་པ། བདེ་སྡུག་
བཟང་ངན་ཐམས་ཅད་ཁྱེད་རང་ཁོ་ན་མཁྱེན་ནོ་སྙམ་པའི་བློ་ལིང་བསྒྱུར་གྱིས་ཁྱེད་ཤེས་མོས་གུས་གཟོད་མེད་དུ་འབར་ཞིང་ལུས་རྡུལ་བ་དང་མཆི་མ་རང་སར་ཐོན་ནུས་པ་སོགས་ཀྱིས་གསོལ་བ་སྙིང་ཁོང་རུས་པའི་གཏིང་ནས་མ་བཏབ་ན། ཁ་ཏོན་ཚིག་ཤར་རེ་ཙམ་གྱིས་བྱིན་རླབས་ཀྱི་འཕོ་བ་རྒྱུད་ལ་ཐོབ་མི་ནུས་པས་གནད་དེ་ལྟ་བུའི་གསོལ་འདེབས་རེམ། དབང་བཞི་བླང་། རང་དང་བླ་མའི་དགོངས་པ་དབྱེར་མེད་དུ་བསྲེས་པའི་ངང་ལ་དྲན་པ་རང་བབས་མཐའ་བྲལ་གློད། དེ་ལྟར་བགྱིས་པས་ཅི་ཞིག་གསལ་སྟོང་གི་ཉམས་ཤེས་བྱའི་སྒྲིབ་པ་ནང་མཚང་ཅན་གྱི་ཤུབས་ནས་དོན་ཏེ། ཚིག་དང་དཔེས་མི་མཚོན་པའི་མཐའ་བཞིའི་སྤྲོས་པ་དབྱིངས་སུ་ཟད་པའི་དགོངས་པ་རྒྱུད་ལ་སྐྱེས་པ་དང་དུས་མཚུངས་པར་ལམ་རྟགས་ཀྱི་ཡོན་ཏན་ནམ་མཁའ་ལས་ཁ་ཆར་བབས་པ་བཞིན་དུ་འབྱུང་བ་ཡིན་པས་ཐུགས་ལ་ཞོག །ཅེས་གསུངས་ལས་ལའོ། །ཇི་ལྟར་སྒོམ་གྱི་སྐོར། དྲན་པ་ཤུགས་ཆེ་ལ་རྣམ་རྟོག་གཉིས་ཀ་ཤུགས་ཆུང་ཆུང་བ་དེ་གསལ་ཉམས་ཡིན། དེ་བྱུང་སྐབས་མིག་ལ་སང་བ་ལྷོད་དེ་ཞོག །ཡང་རེས་འགའ་དྲན་པ་དང་རྣམ་རྟོག་གཉིས་ཀ་
ཤུགས་ཆུང་ཆུང་ཡོད་པ་མི་རྟོག་པ་ཉམས་ཡིན། དེའི་སྐབས་མིག་བར་སྣང་ལ་ཧ་རེ་བཞག །རླུང་རོ་འབུད། ད་ལྟའི་ཤེས་པ་སྐད་ཅིག་མ་ཡེ་རེ་སྐྱོང་། ཡང་ན་རྣམ་རྟོག་ཐོ་ལོང་ཀོ་ལོང་དྲན་པའི་གཡའ་ཙམ་མེད་པ་འདུག་ཟེར་བ་རྣམ་རྟོག་སྒོམ་དུ་མ་ཤར་བར་གནས་འགྱུ་སོ་སོར་ཡ་བྲལ་བའི་སྐྱོན་ཡིན། དེ་སྐབས་རྣམ་རྟོག་འདི་འདྲ་འཆར་གྱིན་འདུག་བསམ་མཁན་དེ་ག་དྲན་བ་ཡིན་པས་གང་ཤར་གྱི་རྗེས་མ་འབྲང་བར་རྣམ་རྟོག་ཤར་དེ་ཀའི་ངོ་བོ་གཅུར་གྱིས་བསྒྲིམས་ལ་འཛིན་མེད་ལྷོད་དེ་ཞོག །དོན་དུ་གོང་གི་འཆར་སྒོ་དེ་ཚོ་གང་ཤར་ཡང་ད་ལྟའི་དྲན་པ་སྐད་ཅིག་མ་གྲུང་ཆ་དང་ལྡན་པ་འདི་ཀ་ཧུར་ཕྱུང་ལ་སྒོམ། རྣམ་རྟོག་ལ་སྐྱོན་དུ་བལྟ་བ་དང་། གནས་པ་ལ་ཡོན་ཏན་དུ་བལྟ་བ་གང་ཡང་མ་བྱེད་པར་གནས་ན་གནས་པའི་ངོ་བོ་བརྗོད་མེད་གསུམ་ཧུ་རེ། འགྱུ་ན་འགྱུ་བ་ངོ་ཤེས་པའི་རང་ངོ་རྗེན་ལྷང་ངེར་ཞོག །ཐོད་རྒལ་གྱི་འཆར་སྒོ་རྫོགས་ཆེན་གྱི་ཁྱད་ནོར་ཡིན་ཡང་དགའ་སྤྲོ་དང་ཐིག་ལེ་ལུག་རྒྱུད་ལ་ཆེད་འཛིན་མ་ཞུགས་པའི་ངང་ནས་སྒོམ་གྱི་དམིགས་རྟེན་ལྟ་བུར་གྱིས་ལ་མཐོང་རྒྱུ་དང་མཐོང་མཁན་གཉིས་མེད་དུ་སྐྱོངས། རྨི་ལམ་བཟང་ངན་ཇི་ལྟ་བུར་ཤར་ཡང་གཡས་མེད་དུ་སྒྱུར། དུས་རྟག་པར་འཁོར་བ་ལ་ཞེ་ལོག་གེ །
སེམས་ཅན་ལ་སྙིང་རྗེ་དུང་ངེ། བླ་མ་ལ་མོས་གུས་ལྷང་ངེ་དང་མ་བྲལ་བགྱིས། ད་ལྟ་ཕན་བླ་མའི་རྣལ་འབྱོར་གྱི་བཟླས་པ་འབུམ་ཕྲག་བརྒྱ་སྐོར་སོང་འདུག་པ་དགའ་རབ་ཡིན། འབུམ་ཕྲག་བརྒྱ་དང་ཁ་བསྐང་སོང་མཚམས་སྒྲུབ་ཡིག་བསྐུར་ཆོག་པ་བྱེད། འཁོར་བ་སྡུག་བསྔལ་གྱི་རྒྱ་མཚོ་བ་བདེ་བའི་གོ་སྐབས་མི་འདུག་པས་རང་རེ་གུ་རུའི་སྒྲུབ་གནས་སུ་མཚམས་སྒྲུབ་ལ་གནས་བསུ་ལས་ཀྱང་བསོད་ནམས་ཆེ་བས་དགའ་བ་བསྒོམ་ལ་དལ་འབྱོར་དོན་དང་ལྡན་པ་མཛད། ཅེས་པདྨ་ཆོས་འཛོམ་ལའོ། །ཐུགས་དམ་སྒོམ་ཕྱོགས་སྐུར། ཇི་སྐད་གསུངས་པ་བཞིན། རིག་པ་བཅོས་མེད་ལས་ལྷག་པ་མེད། ཤེས་པ་ལས་རླུང་གིས་བསྐྱོད་པ་ལས་རྣམ་རྟོག་ཤར་བ་ཡིན་ཚེ། ཤར་ཕྲལ་ཉིད་དུ་ངོས་གཟུང་མེད་པར་ཡལ་ན་དེ་ཀ་རང་གིས་ཆོག་པ་ཡིན། ལར་གནས་པ་ལ་དགའ་བ་དང་། མི་གནས་པ་ལ་སྡུག་པ་མ་བྱས་ན་ནོར་མི་བཏུབ། རིག་པ་རང་བབས་སུ་བཞག་པའི་ཐོག་ནས་གནས་འགྱུ་ཐམས་ཅད་འགོ་འབྱམས་ལུང་མ་བསྟན་དུ་མ་སོང་བར་ཁོ་རང་གིས་ཁོ་རང་ངོ་ཤེས་པ་ལྟ་བུ་ཞིག་འདུག་ན་དེས་ཆོག་འདི་གནས་འགྱུ་ལ་དྲན་པ་གཞུར་པོས་བརྟག་དཔྱད་བྱེད་པ་དང་མ་ནོར་བ་ཞིག་དགོས།
ཞེས་ལྗང་རྩེ་མ་ཎི་བྷ་དྲ་ལའོ། བསྙེན་སྒྲུབ་ཀྱི་དྲི་བའི་ཆ་ལ། བཟླས་པའི་དུས་ལྷ་སྐུ་རང་ལ་སེམས་འཛིན་པའི་ངང་ལ་རིག་པ་གློད་ནས་བསྒོམས་ན། དང་པོར་ལྷ་སྐུའི་གསལ་སྣང་ལ་ཅུང་ཟད་གནས་ཀྱང་མཇུག་ཏུ་གསལ་སྣང་ཞིག་ནས་གསལ་སྐྱོར་བྱས་ཀྱང་འཆར་དགའ་བ་ཞིག་འདུག་སྐད། སྤྱིར་བསྐྱེད་རིམ་ལ་རིག་འཛིན་གོང་མས། ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ། ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ། ལྷ་སྐུ་ཞལ་ཕྱག་དང་བཅས་པ་སྤྲུལ་པའི་བསྐྱེད་རིམ་ཞེས་གསུངས་པས་རྟོགས་པ་ཀློང་དུ་གྱུར་མཁན་ཡིན་ན་ཀུན་བརྟགས་བློས་བྱས་ཀྱི་བསྐྱེད་རིམ་ལ་མ་ལྟོས་གདོད་ནས་ལྷུན་གྲུབ་འདུས་མ་བྱས་པའི་བསྐྱེད་རིམ་རང་ཤར་ལྷུན་རྫོགས་ཀྱི་ངང་དུ་རྣམ་བཞིའི་ཕྲིན་ལས་རབ་འབྱམས་ལ་དབང་འབྱོར་བ་ཡིན་ཡང་། རང་རེ་ལས་དང་པོ་པ་ཡིན་ཚེ་སྟོང་ཉིད་ཤེས་རབ་ཀྱི་གསལ་སྣང་ཐབས་ཀྱི་ཆ་ལྷ་སྐུར་ཝལ་ལེ་འཆར་བ་ལ་ཡུན་ཅི་གནས་སྒོམ་ཞིང་། དེ་ལྟ་མི་འཆར་བའི་ཚེ་ལྷ་སྐུའི་བརྡ་དོན་གྱི་དག་པ་དྲན་པ་དང་། ང་རྒྱལ་ལ་འཇོག་པ་རེས་འཇོག་སྤེལ་མར་བསྒོམས་པས་ཅི་ཞིག་ན་གཡོ་ཐོབ་གོམས་བརྟན་མཐར་ཕྱིན་ལྔའི་རྩལ་རྫོགས་
ནས་དྲན་རྫོགས་ཀྱི་ལྷ་སྐུར་ལྡང་ནུས་པ་འོང་། དེ་ཡང་ད་ལྟ་ཞག་གཅིག །ཞག་གཉིས། ཟླ་གཅིག་ཟླ་གཉིས་ལ་བཙན་ཐབས་སུ་ཨེ་ཡོང་སྙམ་པའི་རེ་བ་བྱེད་མི་ཉན། སེམས་ཉིད་ལྷ་སྐུར་སྨིན་པ་ན་རྣམ་སྨིན་གྱི་རིག་འཛིན་ཐོབ་པ་རྒྱུད་འགྲེལ་ཆེན་པོ་རྣམས་ནས་གསུངས་ཕྱིར་རོ། །ད་ལྟ་འགའ་ཞིག་གིས་བསྐྱེད་རིམ་གཏན་ཆགས་ཡོང་ཁུལ་བྱེད་པ་ལར་མི་བདེན་པས་སུ་ཤར་ཙམ་ན། །ཐ་མལ་རྟོག་པ་འཇིག་པར་འགྱུར། །བར་དུ་ལྷ་ཡི་མོས་པ་སྒོམ། །མོས་གུས་བརྟན་པར་གྱུར་ཙམ་ན། །རང་དབང་རང་གིས་ཐོབ་པར་འགྱུར། །མཐར་ནི་ལྷ་ཡི་བྱིན་རླབས་སྒོམ། བྱིན་རླབས་ནུས་པས་གཞན་སྣང་བསྒྱུར། །རང་རིག་དོན་དང་མཇལ་བར་འགྱུར། ཞེས་གསུངས་པས་ད་ཆ་དོན་གྱི་སྙིང་པོར་ཡོ་ག་འོག་མ་རྣམས་སུ་དམིགས་རྟེན་ལ་སོགས་པས་སེམས་འཇུར་ཐབས་མང་པོ་གསུངས་ཀྱང་རང་རེ་རྫོགས་པ་ཆེན་པོའི་ལྟ་བ་བསང་རྒྱུ་ཡོད་པའི་ཁུངས་ཡིན་ཙ་ན། ལྟ་བ་བརྗོད་མེད་བློ་འདས་དེ་ཉིད་ཀྱི་གསལ་སྣང་ལྷ་སྐུར་
འཆར་ཐུབ་པ་དེ་སྲེད་དུ་སྒོམ། དེས་དུབ་པ་ལྟར་བྱུང་ན་སྔར་བཞད་པ་ལྟར་ང་རྒྱལ་ལ་སེམས་བཟུང་སྟེ་འོག་འགྱུ་རྒྱུ་འབྱམས་སུ་མ་ཤོར་བའི་ངང་ལེ་ཞོག །དེ་ག་རམས་བྱས་པས་འཐུས། ཡང་འོག་འགྱུ་ངོས་མི་ཟིན་འདུག་ཟེར་བ་ལོས་བདན། འོག་འགྱུ་ངོས་ཟིན་པ་ལ་ལྷག་མཐོང་གི་རྩལ་རྫོགས་པ་དགོས། དེ་ལ་འོག་འགྱུའི་རྗེས་ལ་འབྲེང་མི་འབྲེང་གི་རྣམ་རྟོག་ལུ་གུ་རྒྱུད་ཕུག་མའི་འོག་གི་ཆུ་དོང་ལྟ་བུ་དེ་རང་སར་བསྒྱུར་ལ་འོག་འགྱུ་ཤར་མཁན་ཁོ་རང་ཤེས་ཙམ་རིག་ཙམ་པའི་ངང་དུ་རང་ཚོ་བཟུང་ཅི་ཐུབ་ཀྱིས་དང་། འགོ་འགྱུ་རང་གྲོལ་དུ་འགྲོ་བ་ཡིན། འདི་ལ་ཤིང་རྟེན་ཆེན་མོས། སེང་གེ་ལ་རྡོ་འཕངས་པ་དང་། ཁྱི་ལ་རྡོ་འཕངས་པའི་དཔེ་བརྗོད་ལུང་འདྲེན་མཛད་པ་ཤིན་ཏུ་ཡིན་ཏེ། གང་ཞེ་ན། སེང་གེ་ལ་འཕངས་ན་རྡོ་རང་སར་བཞག་སྟེ་བརྡེག་མཁན་ལ་མཆོངས་པས་ཕྱིན་ཆད་རྡོ་ཕོག་པའི་ཐེས་མེད། ཁྱི་ལ་འཕངས་ན་བརྡེག་མཁན་བཞག་སྟེ་རྡོའི་རྗེས་ལ་རྒྱུགས་པས་ད་དུང་རྡོ་གྲངས་མེད་འཕོག་པ་དང་འདྲ། རྣམ་རྟོག་ལ་བལྟ་བ་དང་། རྣམ་རྟོག་ཤར་མཁན་ལ་བལྟ་བ་གཉིས་ཁ་ཕྱི་བལྟས་ནང་བལྟས་ཀྱི་ཁྱད་དེ་ལྟ་བུ་ཡོད། ཡང་ཚོགས་དྲུག་གི་སྣང་བ་ཐད་ཀར་ཁྱེར་ལུགས་མ་གོ་ཟེར་བ་ཡང་བདེན་ཏེ།
དེ་ལ་ཚོགས་དྲུག་ཅེས་པ་སྒོ་ལྔ་དང་ཡིད་ཀྱི་རྣམ་ཤེ་བཅས་དྲུག་ལ་ཟེར། དཔེར་ན་རྣ་བའི་རྣམ་ཤེས་ཀྱི་སྒྲ་ལྷང་ལྷང་ཐོས་པ་ན་སྒྲ་དེ་ལ་བརྟག་དཔྱད་དང་བསམས་གཞིགས་གང་ཡང་མི་བྱེད་པར་སྒྲ་དེ་ཐོབ་མཁན་རང་རིག་ལྷན་སྐྱེས་ཀྱི་ངང་དུ་སྐྱེ་བ་མེད་པར་རྟོག་པ་ལ་ཐད་ཀར་འཁྱེར་བ་ཟེར། དེས་གཞན་ལའང་རིགས་འདྲ། འདི་ནི་ལེའུ་བདུན་མའི་འདི་ལྟར་མིག་གི་ཡུལ་དུ་སྣང་བ་ཡི། །སོགས་ཀྱི་དོན་ལ་བརྟགས་པས་ཤེས་སོ། །འོ་ན་ཚོགས་དྲུག་ཅེས་པའི་ཡོད་ལུགས་ཀྱིས་རྣམ་ཤེས་དྲུག་ཡོད་དམ་སྙམ་ན་མ་ཡིན་ཏེ། ཀུན་གཞིའི་རྣམ་ཤེས་གཅིག་པོ་དེ་དབང་པོའི་ཡུལ་སོ་སོའི་རྩ་ནང་དུ་རླུང་ཡོད་པས་ཁྲིད་དེ་སེམས་ཀྱིས་རྟ་བྱས་ནས་ཐོས་པ་ལ་སོགས་པའི་བྱ་བ་བྱེད་དེ། དཔེར་ན་ཁང་པ་བུག་པ་ལྔ་ཡོད་པ་ཞིག་ལ་སྤྲེའུ་གཅིག་བཅུག་ན། སྤྲེའུ་དེས་བུ་པ་ཐམས་ཅད་ནས་མགོ་རྡོག་ཙམ་རེ་བྱས་པ་ལ་སྤྲེའུ་དུ་མར་འཁྲུལ་ཀྱང་དོན་ལ་སྤྲེའུ་ལྔ་མི་དགོས་པའམ། ཡང་ན་ཁང་པ་དེའི་ནང་དུ་མེ་སྒྲོན་ཆེན་པོ་གཅིག་སྦར་ན་བུག་པ་ལྔ་ཁར་མེ་ཇི་བཞིན་པ་མངོན་པ་ཡིན་གྱིས་དེ་ལ་ལྔ་མི་དགོས་པའི་དཔེས་ཤེས་པར་བྱའོ། །དེའི་ཕྱིར་ཡིད་ཀྱི་རྣམ་པར་ཤེས་པ་གཅིག་པོའི་ཆོ་འཕྲུལ་ཡིན་པ་གོ་བར་བྱོས་ཤིག་དང་།
དེ་ལྟར་བྱས་པས་དེ་ལ་བཅས་བཅོས་མེད་པར་བཞག་ཚེ་ཚོགས་དྲུག་ལྷུག་པའི་དྲན་པའམ། ཐད་ཀར་འཁྱེར་ཤེས་པ་ལ་ཚོགས་མེད་པ་ཡིན་ནོ། །རྒྱུ་མཚན་འདི་ལ་དཔྱད་ན་འཕྱིས་ཀྱི་གང་ཟག་ལྟ་སྒོམ་མཐོན་པོར་རློམ་པ་རྣམས་ཀྱང་གང་ཡང་མ་ཕྱིན་པར་གོ་ལགས། ཞེས་ཝ་གིནྡྲ་དྷརྨ་ཀཱི་རྟི་ལ་གདམས་པའོ། ལོ་གཅིག་འབག་བསྙེན་བྱས་པ་བས༔ ཟླ་གཅིག་སྨྲ་བཅད་བྱས་པ་མཆོག །ཅེས་ཨོ་རྒྱན་ཆེན་པོས་གསུངས་མོད། སྤྱིར་ངག་བྱིན་རླབས་དང་། གྲག་སྟོང་སྔགས་སྒྲར་ཤེས་པ་སོགས་གསང་སྔགས་ཀྱི་ལམ་ཁོག་ཡངས་པོ་ཡིན་ཡང་། ལས་དང་པོའི་རིང་དེ་དེ་བཞིན་ནོ་སྙམ་པའི་རྒྱས་འདེབས་ལས། འཁྲུལ་སྣང་ཡེ་ཟད་ཆེན་པོའི་ས་ལ་སླེབ་པའི་རང་བཞིན་ལྷུན་གྲུབ་ཀྱི་གྲག་སྟོང་སྔགས་སུ་ལམ་ལམ་བཅོས་བསྒྱུར་མེད་པར་གོ་བའི་གདིང་ཚད་མེད་ཕྱིར། མི་ཚིག་གིས་བསྒྲིབས་པས་སྔགས་ཀྱི་ནུས་པ་འཕྲོག་པ་སོགས་གེགས་སྐྱོན་མང་པོ་འབྱུང་པའི་སོ་མཚམས་ཕྱེད་པ་ཞིག་དགོས་པར་གོ་ལགས། ཞེས་པ་འདི་སྦྱོར་སྤྲུལ་རིན་པོ་ཆེས་མཛད་པའི་ང་སྔགས་སུ་གོ་ཕྱིར་སྨྲ་བ་གཅོད་མི་དགོས་པ་འདྲ་ཕེབས་པའི་ལན་དུ་ཕུལ། ལར་སྤྲོས་བཅས་ཀྱི་དགེ་སྦྱོར་སྤྲོས་མེད་མེད་ཀྱི་སྐབས་ཆག་
ཀྱང་དགའ་རབ་ཨེ་ཡོང་ཕེབས་པ། སྤྲོས་མེད་ཀྱི་ཡིན་ལུགས་ཇི་བཞིན་དུ་རྟོགས་པ་དེས་རྣམ་གཡེང་ཟླ་གྲོགས་སོགས་སྤངས་ནས་ཕུར་ཚུགས་སུ་སྒོམ་ལ་གནས་པ་ལྟ་བུ་ཡིན་ན་ནི། རྫོགས་ཆེན་ནས་བྱ་བ་དགུ་ཕྲུགས་སུ་གཏང་བར་གསུངས་པ་དང་། དེ་མཚུངས་རྗེ་མི་ལས་ཀྱང་། དྭངས་པོ་ལྷ་རྗེ་ལ། ཕྱག་རྒྱ་ཆེན་པོ་སྒོམ་དུས་སུ། །ལུས་ངག་གི་དགེ་སྦྱོར་མ་བརྩོན་ཅིག །མི་རྟོག་ཡེ་ཤེས་ཡལ་ཉེན་ཡོད། །མ་བཅོས་གཉུག་མའི་ངང་ལ་ཞོག །ཅེས་གསུངས་པ་ལྟར་ལས་རླུང་ཁ་ཡན་དུ་མི་འཚོར་བའི་ཕྱིར་སྒོ་གསུམ་རྩོལ་མེད་ཁོ་ནར་འཇོག་པ་བོགས་པ་ལོས་ཆེ་ཡང་། རང་རེ་སྙིགས་དུས་ཀྱི་ཆོས་པ་ཟླ་གྲོགས་དང་མོལ་མཆིད་ཚེ་འདིའི་རྣམ་གཡེང་དང་བསྟུན་དགོས་པ་ལྟ་བུས་ནི་དགེ་སྦྱོར་དེ་དག་སྤངས་བཞིན་དུ་འཕྲོས་གཏམ་སོགས་སྤངས་པར་མ་ནུས་ན་དམ་བཅའ་དང་འགལ་ཞིང་མི་ཚེ་རི་སྦུག་དུ་དོན་མེད་ལ་ཟད་ཀྱིས་དོགས་པས། དོན་དམ་ནམ་མཁའ་ལྟ་བུའི་དོན་འཕྱུགས་པ་མེད་པའི་ངང་ནས་ཀུན་རྫོབ་སྒྱུ་མ་ལྟ་བུའི་རོལ་པར་དགེ་སྦྱོར་ཡང་སྤང་བར་མི་བྱ་སྟེ། ཇོ་བོ་རྗེ། རྣམ་རྟོག་མ་ཟད་བར་དུ་ལས་ཡོད་པས། ལས་ཀྱི་རྣམ་པར་སྨིན་ལ་ཡིད་ཆེས་བྱ། །ཞེས་གསུངས། དོན་དུ་དགེ་སྦྱོར་མཚན་
བཅས་འདི་དག་ནི་ཀུན་རྫོབ་ཡིན། ཕན་གནོད་མེད་སྙམ་པའི་བློ་ཡོད་ནས་མ་བྱས་པར་བཞག་ན་ནི། སྟོང་ཕྱོགས་ཀྱི་གོ་བས་ཐབས་ཁྱད་དུ་བསད་ནས་སྟོང་པར་སྦྱངས་པ་ཡིན་ཕྱིར་མི་རུང་ངོ། །ཡང་དགེ་སྦྱོར་བྱས་ཀྱང་བྱས་པའི་དགེ་རྩ་ལ་ལྷུར་ཐག་བཏང་བ་ཡིན་སྙམ་པ་ཡང་མི་སྐྱེ་ལ། ཆད་ཀྱང་ཆད་སོང་སྙམ་པའི་སྣང་བ་གང་ཡང་མེད་པར་རིག་པ་ཟང་ཐལ་ཡུག་འབྱམས་ལྟ་བུར་གྱུར་སྐབས་ནི། ཇི་སྐད་དུ་རྫོགས་ཆེན་ནས། ཉམས་ལ་རྟོགས་པར་མ་ཞེན་ཅིག །རྟོགས་ནས་ཉམས་ལ་མ་ཞེན་ཅིག །ཅེས་གསུངས་པ་ལྟར། དོན་དམ་བཞག་ནས་ཀུན་རྫོབ་དང་དུ་བླངས་པ་ལྟ་བུ་ཡིན་པས་རང་གི་དགོངས་པ་མཐོ་དམན་དང་སྦྱར་ཤེས་པ་དགོས་ཏེ་རེ་ཞིག་བཞག་ཇི་ལྟར་སམོྦྷ་ཊའི་ནང་གི་རྨི་ལྟས་སྔ་ཕྱིར་བློར་ངེས། ད་ཆ་རྨི་ལྟས་བཟང་ངན་ཡི་གེར་འགོད་པ་འདི་ཡང་རྨི་ལམ་ལ་མངོན་ཞེན་སྐྱེས་ཏེ་བདུད་ཀྱི་འཇུག་པའི་སྒོ་ཡིན་པས་ད་ནས་བཟུང་ལེགས་ཉེས་ཅི་བྱུང་ཡང་བདེན་མེད། ཞེན་མེད། སྣང་མེད། ཁྱབ་གདལ་རང་དུ་བཞག་པ་གལ་ཆེ། དེའི་རྒྱུ་མཚན། རྨི་ལམ་སྔ་མ་ཚེའི་རིག་འཛིན་ཐོབ་བོ་ཟེར་བ་དང་། རྗེས་མ་ལ་དོ་ནུབ་ཁྱོད་ཀྱི་ཚེ་ཟད་ཟེར་བ་
གོ་མི་མཚུངས་པ་དེས་ཀས་ཤེས། དེ་ཡང་རིག་འཛིན་ནི་སྔགས་ལུགས་ཀྱི་རིག་འཛིན་རྣམ་པ་བཞི་ལས། ཆོས་མཆོག་ཆེན་པོ་མཐར་ཕྱིན་ནས་མཐོང་ལམ་བསྒོམས་ཏེ་སྐྱེ་ཤིའི་མིང་ཡང་ཟད་པ་སློབ་དཔོན་ཆེན་པོ་པདྨ་འབྱུང་གནས་ལྟ་བུ་ཡིན་པ་ལ། ད་ལྟ་ཡང་ཅག་ཚོགས་སྦྱོར་གཉིས་ཀྱིས་བསྡུས་པའི་བསྐྱེད་རྫོགས་ལ་གོམས་པ་ཐོབ་པ་རྣམ་སྨིན་བྱི་རིག་འཛིན་ཙམ་ཡང་མ་ཐོབ་པར་མངོན་གྱུར་དུ་གསལ་བས་རྨི་ལམ་དུ་ལུང་སྟོན་མཁན་དེ་ག་འཇིག་རྟེན་གྱི་ཌཱ་ཀྐི་མར་ངེས། ཅིའི་ཕྱིར་ན་རིག་འཛིན་བཞི་པོའི་རྣམ་དབྱེ་ཁོ་རང་གིས་མ་ཕྱེད་པའི་ལུང་སྨྲས་ཟིན་པའི་ཕྱིར་རོ། །གང་ཞི་ན་སྡང་བ་དགྲར་ལངས་པ་མ་ཡིན་ཏེ་ཡེ་ཤེས་སྒྲིབ་བྲལ་གཟིགས་པའི་མངོན་མཁྱེན་ནི་ཤཱཀྱ་ཐུབ་པ་དང་། སློབ་དཔོན་པདྨ་སོགས་དུས་གསུམ་མཁྱེན་པ་རྣམས་ལས་གཞན་ལ་མེད་དེ། དེའི་རྒྱུ་མཚན་སྡེ་སྣོད་དང་རྒྱུད་སྡེའི་གཞུང་ཆེན་པོ་རྣམས་ཀྱིས་ཤེས་ལ་ད་ལྟ་རྟོག་པ་ཀློང་དུ་གྱུར་པ་ཅི། ཞི་གནས་མཚན་མ་མེད་པའང་རྒྱུད་ལ་མ་སྐྱེས་པའི་གང་ཟག་ཆེ་ཆུན་ངེས་པའི་དག་གིས་ལུང་བསྟན་ཡིན་ཟེར་མང་པོ་ཞིག་བཤད་ཡོད་འདུག་པ་ཡང་ན་ལྷ་འདྲེའི་ཆོ་འཕྲུལ་རྫས་སྦྱོར་ལ་སོགས་པའི་མཐུར་ངེས།
གལ་ཏེ་ཐུགས་དམ་གྱི་མྱོང་བ་ཅུང་ཟད་ཡོད་ཀྱང་དགོངས་པ་ཚོམ་ཟིན་པའི་རིགས་ཅན་ཕལ་ཆེར་དང་། གཞི་ཕུན་སུམ་ཚོགས་པ་ཙམ་ཡིན་དུ་སྲིད་ཀྱང་བསྐྱེད་རྫོགས་ལ་བརྟན་པ་མ་ཐོབ་པའི་ཕལ་ཆེ་བ་ནི་ཡུལ་ཅན་གྱིས་རྩ་ཁམས་དྭངས་པའི་རྩལ་སྣང་ར་རི་ཡུལ་ལ་ཤར་བ་རེ་གཉིས་བདེན་བདེན་ཡིན་ཡིན་འདྲ་མོའི་རློམ་སེམས་བསྐྱེད་པའི་ཚེ་མཁའ་འགྲོ་མས་བར་ཆད་བརྩམས་ནས་བདེན་པ་དང་མི་བདེན་པའི་ལུང་བསྟན་ཡོང་བར་བཤད། དེ། རྫོགས་པ་ཆེན་པོའི་རྒྱུད་རིག་པ་རང་གྲོལ་ལས། དེ་ནས་ཡང་མཁའ་འགྲོ་མའི་ཆ་བྱད་དུ་ཞུགས་ནས་རིགས་ཀྱི་བུ། ངས་ཁྱོད་ལ་ལུང་བསྟན་ཕྱིས་དེ་ནི་ཡང་དག་པ་མ་ཡིན་ནོ། །དེ་ནས་ལོག་པ་ཁོ་བའོ། །འདི་ལྟར་བྱས་ན་རིགས་ཀྱི་བུ་ཁྱོད་གྲོལ་བར་འགྱུར་ཞེས་ལུང་བསྟན་པ་ནི་བདུད་ཡིན་པར་ཤེས་པར་བྱའོ། །དེའི་དུས་སུ་རང་གི་དེ་ཉིད་མ་ཡེངས་པར་བྱའོ། །གླང་པོའི་ལྟ་སྟངས་ཀྱིས་བལྟ་བར་བྱའོ། །ཞེས་དང་། བཀའ་བརྒྱད་ཡོངས་འདུས་ལས། ལུས་ལ་བདེ་བ་ལ་སོགས་འབྱུང་། །ངག་ལ་བདེན་ཐོབ་ཆོས་སྨྲ་འབྱུང་། །སེམས་ལ་མངོན་ཤེས་ལ་སོགས་འབྱུང་། །ཕྱི་རུ་བྱིན་རླབས་ལུང་བསྟན་འབྱུང་། །དེ་དག་དམ་པས་དགོངས་སྤྱོད་དུ། །བཟུང་ན་ཉམས་ཀྱི་བདུད་དུ་འགྱུར། །
ཞེས་དང་། གང་ལ་ཆེད་དུ་འཛིན་པ་དེ། །བདུད་རྣམས་ཀུན་གྱི་དཔྱིད་ཡིན་ཏེ། །ཞེས་དེ་ལ་བདེན་པར་བརྩི་ཞིང་རློམ་སེམས་དང་བཅས་ཡ་མཚན་དུ་བརྩི་བ་ལ་ཟེར་ནའང་བྱེད་མཁན་མང་ངོ། །དེ་སྐད་དུ་བྱང་གཏེར་ཐུགས་སྒྲུབ་ཀྱི་ཉམས་རྟགས་གསལ་བའི་སྒྲོན་མེ་ལས་ཀྱང་། མཁའ་འགྲོ་བདག་གིས་དབང་དུ་མ་འདུས་ཤིང་། །བདག་མཁའ་འགྲོ་མའི་དབང་དུ་ཤོར་བས། །དུས་མ་ཡིན་པའི་སྨྱོན་སྤྱོད་དང་། བརྟུལ་ཞུགས་བྱེད་པ་དང་། དུས་རྟག་ཏུ་དྲན་པའི་རྩིས་མ་ཟིན་པར་འགྲོ་བ་དང་། རྒོད་ཅིང་སེམས་བསྡད་སར་མི་སྡོད་པར་ལུས་ངག་ཡིད་གསུམ་གྱིས་སྤྱོད་པ་ལོག་པ་སྣ་ཚོགས་བྱེད་པ་འབྱུང་ངོ། །དེ་ནི་རང་མཁའ་འགྲོ་མའི་དབང་དུ་ཤོར་བ་ཡིན་པས། དུས་ཕྱིས་འཇིག་རྟེན་མཁའ་འགྲོ་མས་དབང་བྱས་ཏེ་ལོག་པའི་ལུང་བསྟན་ཕྲ་མོས་བསམ་པ་ཕྲ་མོ་འགྲུབ། མངོན་ཤེས་ཕྲ་མོ་འབྱུང་། ལོག་འཚོ་སྣ་ཚོགས་སྤྱོད་ཅིང་ལོག་པའི་ལམ་དུ་ཁྲིད་པས། རང་བླ་མ་ལ་གསོལ་བ་དྲག་ཏུ་བཏབ། གནས་ལུགས་ལ་བློ་གཞག་སྣང་བ་རང་སྣང་ཁ་འཁྱེར་དུ་མི་བཏང་ངོ། །ཞེས་གསུངས་པས་ཤེས། ལར་རྟོགས་པ་ཀློང་དུ་གྱུར་པའི་རིགས་ཅན་ཞིག་མིན་ཕྱིན་ཆད་མངོན་ཤེས་མི་དགོས་རྡོ་ལ་ཞབས་རྗེས་འཇོག་ཤེས་པ་བྱུང་ཡང་
དཔྱད་པར་བྱ་སྟེ། བྲོག་གམ། བདུད་ཀྱིས་བྱིན་གྱིས་བརླབས་པའི་རྟགས་སུ་ཤེས་པའི་ཚུལ། དུས་གསུམ་མཁྱེན་པས། གྲུབ་ཐོབ་མང་སྟེ་རྟོགས་ལྡན་ཉུང་། །རྟོགས་པ་མེད་པས་གྲུབ་ཐོབ་དེ། །གྲུབ་རྟགས་མང་ཡང་འཁོར་བའི་རྒྱུ། །ཞེས་པ་ལ་སོགས་ཏེ་བརྗོད་བྱ་ཟད་མི་ཤེས་པ་ཡོད་དོ། །ཁོ་བོ་ལའང་སྔར་རྩེ་གཅིག་ཆེན་པོའི་ཉམས་ཀྱི་ཡུལ་སྣང་ལ་འཆར་སྒོ་གང་ཡང་བྱུང་སྟེ། བདེན་འཛིན་མེད་པར་བཞག་པས། སྤྲོས་བྲལ་མངོན་དུ་གྱུར་བ་ནས་བཟུང་། ཡུལ་སེམས་རིས་རིས་མེད་དུ་དགུ་པས་ཞལ་སྟོན་མཁན་གྱི་ལྷ་དང་། ལུང་སྟོན་མཁན་གྱི་འདྲེ་སོགས་གང་ཡང་མི་འདུག་སྟེ། ང་ལ་ཞལ་གཟིགས་ལུང་བསྟན་མེད་སྙམ་པའི་ཡིད་མུག་གི་སྐྱེ་ཞིང་གཞན་གྱི་ཅ་ཅོའི་མཚང་ཤེས་པའི་བློ་བདེ་བ་ཞིག་རྒྱུན་དུ་ཡོད་པ་ལགས། རྣམ་རྟོག་ཐོལ་སྐྱེས་རིག་ཙམ་དེ་གའི་མོད་ལ་རྣམ་རྟོག་ཤར་མ་ཤར། གནས་མ་གནས་གང་ཡང་ཟེར་དུ་མེད་པ་ཞིག་འདུག་སྐད་པ་སྟོང་འབྱམས་ལུང་མ་བསྟན་དང་མ་ནོར་བར་རིག་པ་ཁོ་རང་ཞེན་མེད་ཧུ་རེ་བར་འདུག་ན་རྟོགས་པའི་ལྷག་མཐོང་དུ་ཐག་ཉེ། ད་དུང་དེ་གའི་མུ་ལས་རྣམ་རྟོག་དེ་ལ་བརྟག་དཔྱད་ཀྱིས་སྟོང་པར་རྒྱས་འདེབས་དང་། དྲན་རྒྱུན་གྱིས་མུས་འཐུད་རྣམ་རྟོག་ཕྱི་མ་བསྒུག་པ་ལྟ་བུའི་ཉམས་ཤིག་འཆར་ཉེ་སྲིད་པས་དེ་དག་གང་
ཡང་མི་བྱ་བར་རང་བབས་ཁ་ཡན་དུ་ཀློད་ལ་བཅོས་མེད་ཀྱི་དྲན་པ་རྟེན་མེད་དུ་སྐྱོངས། ལར་གཉུག་མའི་ཡིན་ལུགས་རང་ལ་ཡོད་ཀྱང་ཡིན་ཚུལ་ལ་གནས་པ་དང་འཁྲུལ་འབྱམས་སུ་གཤོར་བ་གཉིས་བསྐལ་པ་ནས་ཚེ་རབས་ཀྱིས་གོམས་ཤུགས་ཁྱད་པར་ཤོར་བས་རང་ངོ་རང་གིས་བསྒྲིབས་པའི་ཕྱིར། ཚོགས་ལམ་པས་གོ་།སྦྱོར་ལམ་པས་མྱོང་། མཐོང་ལམ་པས་རྟོགས་ཞེས་པའི་ཕྱིར་རྒྱུད་ལྡན་གྱི་བླ་མ་དང་། མན་ངག་ཚད་ལྡན་གྱི་བཤད་བ་ལྟ་ལུང་རིག་དང་འབྲེལ་བ། པ་དང་། རང་གིས་རྟོགས་སྒོམ་པ་ཉམས་མྱོང་དང་འབྲེལ་བ། ཚད་ན་དེ་ནས་ཤར་བ་གསུམ་འགལ་འདུ་ཅན་མ་ཡིན་པ་དེ་ཆོས་ཉིད་རྣལ་མ་ཡིན། བླུན་པོ་ཁ་གཅིག་ཤེས་རབ་རྣམ་པ་གསུམ་གྱིས་བཏང་བའི་རྗེས་སུ་འབྲངས་ཏེ་རྒྱུད་དང་མན་ངག་རྣམས་ལ་སྦྱོང་བརྡར་མི་དགོས། ང་རྒྱལ་སྐྱེ་རོགས་ཡིན་ཟེར་ནས་མིག་རུ་ཟང་ཟང་ཞིག་ལ་སྦུབས་ཚོད་མོད་དེ། སྟོན་པ་སངས་རྒྱས་ལའང་མཁྱེན་པ་གཉིས་ཀྱིས་ཡོན་ཏན་ལས་ནི་ཅང་མི་མངའ། ཀུན་མཁྱེན་ཀློང་ཆེན་པ་ལ་སོགས་ཏེ་མཁས་གྲུབ་ཐམས་ཅད་ཀྱིས་ཀྱང་རང་གི་ཇི་ལྟ་བའི་མཁྱེན་པའི་གཟིགས་ནས་དེའི་དོན་གཞན་ལ་ཇི་སྙེད་པའི་མཁྱེན་པས་འདོམས་པའི་ནུས་པ་ཐོན་ནས་བསྟན་པའི་བྱ་བ་མཛད་པ་མ་གཏོགས། རྩལ་བཤད་དང་ཕོ་ཚད་ཀྱིས་བསྟན་བཅོས་
རྩོལ་པར་མི་གདའ། རོང་པ་རྫོགས་ཆེན་པ་ཇི་སྐད་གསུངས་པ་ལྟར་སྙིགས་མའི་དུས་ཀྱི་སྒོམ་ཆེན་པར་རློམ་པ་རྣམས་ཀྱིས་རྒྱུད་དང་མན་ངག་རྣམས་དགྲ་ལྟར་སྤངས། དེ་ལས་ཟབ་ཟབ་མོ་ཞིག་ཡོད་བའི་ཁུངས་བྱས། རྫོགས་པ་ཆེན་པོའི་ལྟ་བ་ཐུན་མོང་མ་ཡིན་པའི་གནད་ཆ་ཙམ་ཡང་མ་རྟོགས། ཡིད་དཔྱོད་དང་ཕོ་ཚོད་ཁོ་ནར་སྐུ་ཚེ་མཐར་བསྐྱེད་བྱེད། ད་ཧྲིལ་གྱིས་ད་ལྟའི་ཤེས་པ་སྐྱོན་ཡོན་གང་གིས་ཀྱང་མ་བསླད་པའི་རང་བབས་ལྷུག་པ་འདི་ཀ་རྫོགས་པ་ཆེན་པོའི་ཀ་དག་གི་ངོ་བོར་མ་བྱས་ལྷུན་གྲུབ་ཏུ་ཡོད། གང་ཟག་སྦྱངས་པ་ཅན་ཐོས་གྲོལ་གྱི་ཅིག་ཆར་རེ་རེ་ཙམ་མ་གཏོགས་གཞན་ལ་ངོ་སྤྲད་ཀྱང་ཤེས་བྱའི་སྒྲིབ་པས་བསླད་དེ་སྒོམ་གོ་ཆོད་པ་མི་སྲིད་པས་བདེ་གསལ་མི་རྟོག་པའི་ཕྲང་ལ་བཤར་དགོས་པ་རང་མང་། འོན་ཀྱང་ཅི་ཞིག་ན་ཉམས་གསུམ་གྱི་ཤུབས་ནས་དོན་དེ་སྤྲོས་བྲལ་བསམ་མེད་ཚུལ་བཞིན་དུ་རྟོགས་འོང་བ་ཡིན། ཁྱེད་རང་ཡང་ད་ལྟའི་བབས་དྲན་པ་མ་ཡེངས་པའི་ངང་ནས་རྣམ་རྟོག་ཐོལ་ཤར་རྗེས་ཐོབ་བརྗོད་དུ་མེད་པ་ཞིག་འདུག་ན་སྐྱོན་ཤོར་མདོག་མ་ཁ་ཡང་། དྲན་པའི་རྒྱུན་དང་། རྣམ་རྟོག་རང་ངོ་ཤེས་པ་འདི་ལ་ཉམས་དང་རྟོགས་པ་གཉིས་སུ་ཡོད་པས། དྲན་པ་ཡང་རྩོལ་བྱས་འཇུར་དྲན་མ་
ཡིན་པར་ཡང་དག་རྩོལ་མེད་ཡེ་བབས་ཀྱི་དྲན་པ། དེ་བཞིན་རྣམ་རྟོག་རང་ངོ་ཤེས་པ་ཡང་ཆེད་འཛིན་གྱིས་རྟོག་དཔྱོད་མ་ཡིན་པར་ལྷག་མཐོང་གི་ཡེ་ཤེས་ཟང་ཐལ་ཤེལ་གོང་ལྟ་བུ། མདོར་ན་སྒོམ་བློ་ཏིལ་གྱི་ཤུན་པ་ཙམ་མེད་ལ་ཡེངས་སུ་སྐད་ཅིག་ཀྱང་མེད་པ། ལྟ་བ་མཐོན་པོས་ཕན་མ་བཏགས། རྣམ་རྟོག་ངན་པས་གནོད་མ་བསྐྱལ། ངེས་ཤེས་ཀྱི་བློ་དང་བྲལ་བ་ཞིག་ཏུ་ལ་བཟློས་པའི་ཚེ་སྒོམ་བདག་པོའི་ལག་ཏུ་འཁྱོལ་བ་ཡིན་ཏེ། ཀུན་ཏུ་བཟང་པོ་དང་ཞལ་མི་གཉིས་པ་ཀུན་མཁྱེན་ཀློང་ཆེན་པོས། མ་བཅོས་ལྷུག་པར་ཡེ་གྲོལ་ཟབ་ཀ་མ། །ཅོག་བཞག་ཅེར་མཐོང་བསམ་ཡུལ་འདས་པ་ནི། །སོ་མ་གཉུག་མ་ཅིག་བཞིན་ཆོས་ཉིད་དང་། །ཡེ་བཞིན་རྣམ་དག་ཕྱོགས་ལྷུང་ཀུན་དང་བྲལ། །དུས་བཞི་འཕོ་འགྱུར་མེད་པའི་དོན་ལ་ཞོག །རེ་དོགས་ཆེད་འཛིན་ཞིག་ན་རྣལ་མའི་དོན། །སུས་ཀྱང་བཅོས་སུ་མེད་ཀྱི་གཞི་བྲལ་དང་། །དམིགས་བསམས་གདོད་ནས་དག་པར་ཤེས་པར་བྱ། །གནས་ལུགས་ཡེ་གཞི་ལྷུན་གྲུབ་བཅོས་བསླད་མེད། །མཁའ་ལྟར་རྣམ་དག་ཕྱོགས་ལྷུང་ཀུན་དང་བྲལ། །དེ་ཉིད་རྟོགས་པ་རྣལ་འབྱོར་ལམ་གྱི་གཞི། །ཕྱོགས་བྲལ་ནམ་མཁའ་འདྲ་བས་གུད་མ་བཅད་། །མ་རྟོགས་སྐྱོན་རྣམས་སོ་སོར་བཟུང་ལས་བྱུང་། །
དེ་བས་བསམ་འདས་ཕྱམ་བརྡལ་མཁྱེན་པར་མཛོད། །ཅེས་གསུངས། མདོར་ན་རྫོགས་པ་ཆེན་པོ་ཐུན་མོང་མ་ཡིན་པའི་སྐབས་སུ་བཅོས་མེད་ཡི་ཐ་མལ་ཤེས་པ་འདི་ཀ་བདེ་བར་གཤེགས་པའི་སྙིང་པོ། སྐྱོན་ཀ་ནས་དག་ཅིང་ཡོན་ཏན་ལྷུན་གྲུབ་མཆིས་པ་ཡིན་པས་འདི་ཉིད་ངོ་འཕྲོད་ཕྱིན་ཆད་ནས་ཀུན་གཞི་ལུང་མི་བསྟན་ལྷན་སྐྱེ་ཀྱི་མ་རིག་པ་དང་། རིག་པ་ཡུལ་ཕྱིར་འབྲེང་བ་ཀུན་བརྟགས་ཀྱི་མ་རིག་པ་གཉིས་ཀྱིས་དབང་དུ་སྐད་ཅིག་ཀྱང་མི་བཏང་བར་ཡེ་བབས་ཀྱི་རྒྱུན་སྐྱོང་བ་ལ་སྒོམ་གྱི་མིང་བཏགས་པ་ཙམ་མ་གཏོགས་ཡིད་ལ་བྱེད་པའི་སྒོམ་རྒྱུ་རྡུལ་ཙམ་ཡོད་ཕྱིན་ཆད་གོལ་ས་དང་། ནོར་ས་དང་། ཤོར་ས་ཁོ་ན་ཡིན་ཏེ། ཀུན་མཁྱེན་གྱིས། གཉུག་མའི་སེམས་ལ་སྒྲིན་པོའི་གཟེབ་བསྐུར་ཏེ། །བཅོས་ཤིང་བཅོས་ཤིང་སྙིང་པོའི་དོན་ལ་བསྒྲིབ། །དེ་བས་གཟེབ་བྲལ་གླེན་སྣང་ལྷོད་ཡོད་པས། །མི་རྟོག་ཆོས་ཉིད་ཡངས་པའི་དང་དེར་ཞོག །ཅེས་གསུངས་པས་གོ་ལ། ཡང་རིག་པ་འཐོམས་པ་ལྟ་བུ་ཞིག་ནས་ཕྱོགས་གཅིག་ཏུ་ལྷུང་བ་སྙོམས་འཇུག་གི་ཏིང་ངེ་འཛིན་ལྟ་བུའི་གེགས་སེལ་ལ། ཤེས་པ་ནམ་མཁར་གཏད་དེ་དབྱིངས་སྟོང་པ་ཉིད་དང་། རིག་པ་བརྗོད་དུ་མེད་པ་བསྲེ་ཞིང་རླུང་རོ་འབུད། རླུང་ཕྱིར་འཛིན། བདེ་གསལ་མི་རྟོག་པ་གསུམ་སྐུ་གསུམ་
གྱི་བསྒྲུབ་གཞི་བྱང་ཆུབ་ཀྱི་ལམ་ཙམ་ལས་འབྲས་བུ་དངོས་མ་ཡིན་པས་དེ་དག་ནམ་ཤར་ལ་ཕཊ་དྲག་པོ་རེ་རྒྱབ། དེའི་རྗེས་ལ་ཤེས་པ་གཏད་མེད། ཁུངས་མེད། །ཧད་དེ། ཕྱད་དེ། ངོས་གཟུང་བ་བདེན་འཛིན་ལས་གྲོལ་བ་ཞིག་འཆར། འདི་ཉིད་རིག་པ་རང་གནས་ཀྱི་བསམ་གཏན་ཡིན་པས་འདི་ཁོ་ན་ལ་སྒོམ་གྱི་བློ་ཕུགས་འཆའ་བ་གནད་ཀྱི་སྙིང་གཏམ་སངས་རྒྱས་ལག་བཅངས་སུ་བཤད་པ་ཡིན་ནོ། །ཨེ་མ་རང་རིག་སྐུ་གསུམ་ལྷུན་གྲུབ་ལ། །བློས་བཏགས་བྱ་རྩོལ་གཟེབ་ཀྱིས་མ་བཅིངས་པར། །ཕྱོགས་ཡན་ཡངས་པའི་ཀློང་དུ་གློད་ཤེས་པས། །ལྟ་སྒོམ་སྤྱོད་པའི་སྒྲོ་བཏགས་མིང་འདོགས་ཟད། །མ་བཅོས་སྤྲོས་བྲལ་གདོད་མའི་གནས་ལུགས་ལ། །ཀུན་བཟང་དགོངས་པ་ཡོད་པར་ད་བཟོད་གོ་།ཡིད་མིན་དགག་བསྒྲུབ་ཕྱོགས་ཆའི་འཛིན་སྟངས་ཀུན། བློ་འདས་རྫོགས་པ་ཆེན་པོའི་ངང་དུ་ཟད། །གངས་ཅན་འདི་ན་གྲུབ་པའི་མཐའ་མང་ཞིང་། །རང་རང་ཕྱོགས་ལྔའི་མཐའ་བཞག་མཐུན་འཇུག་གཏམ། །གླེང་ཡང་ཡིད་དཔྱོད་སྒྲོག་ལས་གྲོལ་བའི་གནད། །ཆོས་ཉིད་མངོན་སུམ་མཐོང་བས་སྐལ་པ་བཟང་། །སྐྱེ་འགྲོའི་ཚེ་སྲོག་གློག་གམ་ཆུ་བུར་བཞིན། །ཤིན་ཏུ་མེ་རྟག་ཡ་མ་བརླར་གྱུར་ཀྱང་། །རྟག་འཛིན་འདོད་པས་ངན་སོང་ལྷུར་ལེན་ཚོར། །བསམ་
ཀྱང་རང་ཅག་དལ་འབྱོར་དོན་དང་ལྡན། །འཇིག་རྟེན་མི་ཡི་ཁྱུ་རུ་མ་འགྲོ་ཞིང་། །འཁོར་དང་ཟང་ཟིང་འབྱོར་པས་ཕོངས་ན་ཡང་། །འདི་ན་རྒྱལ་སྲས་སྤྲོད་པར་བསླབས་པ་དེས། །འོ་ཅག་མཆེད་གྲོགས་སྣང་བ་ཅི་ལས་བདེ། །སྔོན་བྱོན་འཕགས་པའི་རྣམ་འཕྲུལ་གྲུབ་བརྙེས་ཀྱིས། །མཛད་ཕྲིན་ནམ་མཁའི་ཕ་མཐར་བརྡལ་པ་ལ། །སྐྱིད་འདོད་ཆོས་བརྒྱད་བྱ་བའི་སྒྲ་མི་འཇུག །འཁོར་འདས་བྲག་ཕུག་ནང་ནས་རུ་ཤན་གྱེས། །གང་ཤར་རང་གྲོལ་བློ་བདེ་གུ་ཡང་དང་། །ཕྱི་ཚིགས་རེ་དོགས་དགྲ་བོ་ཐ་མཐར་བསྐྲད། །སྣང་བ་གདོང་འདེད་འུར་གཏུམ་རྦད་དྲགས་ཀྱིས། །སྤྲང་པོའི་མདུན་མ་ཆོས་ཉིད་ཀློང་དུ་ཟད། །བསམས་བཞིན་བློ་བདེ་རུ་ལས་སྐྱིད་པ་མེད། །འུ་ཅག་ཉམས་རྩལ་རྫོགས་པའི་ཁྱུང་ཕྲུག་ཡིན། །སྒྱུ་མའི་འདུ་བྱེད་བཏང་པ་དེ་མ་ཐག །གདོད་མའི་གཞི་ཡི་ཀློང་གུ་ཕུར་ནས་འགྲོ། ༈ བླ་མ་ལ་ཕྱག་འཚལ་ལོ། །དགེ་སློང་བཟོད་པའི་མཚན་ཅན་གྱིས་ཟུར་གསལ་ཕེབས་དོན། ཁོ་བོ་དང་རྨི་ལམ་དུ་མཇལ་ཞིང་ཉམས་ཀྱི་བོག་འདོན་བྱུང་ཚུལ་སྐོར། སྤྱིར་རྨི་ལམ་འཁྲུལ་པའི་རང་གཟུགས་ལ་བདེན་འཛིན་ཆར་མི་སྲིད་མོད་ཀྱང་། །རྣམ་པ་ཀུན་ཏུ་དགེ་བའི་ལྷག་བསམ་ཅན་གང་ཉིད་ཡོན་གནས་ཀུན་ལ་དག་པའི་སྣང་བ་ཆེས་དཀར་བ་ཞིག་འདུག་པས་ཐུགས་
རྗེ་ཡུལ་ལ་ཤར་བ་ཡིན་ཤས་ཆེ། དེ་ཡང་ནང་དོན་སྐོར་གྱི་འཇོག་སོ་སྣོད་བཅུད་དཀྱིལ་འཁོར་གསུམ་གྱི་འཁོར་ལོར་ཤེས་པ་མ་ཧཱ་ཡོ་ག་སྟེ། གསང་སྔགས་སྤྱི་སྐད་ལྟར་ན་རྣལ་འབྱོར་བླ་ན་མེད་པ་མན་ཆད་ཀྱི་བསྒོམ་བྱ་སྟེ། དེ་ལྟ་ནའང་བསྐྱེད་རིམ་གྱི་སྙིང་པོ་ཞེན་མེད་ཁོ་ན་གཙོ་ཆེ་བ་ལ་སྣང་སྟོང་འཇའ་ཚོན་ལྟ་བུའི་ཐ་སྙད་བཏགས། རྫོགས་རིམ་ལ་མཚན་བཅས་དང་མཚན་མེད་གཉིས་ཀྱི་ཕྱི་མའི་གནས་ལུགས་ལ། ཁྱེད་རང་ཆོས་རྗེ་ས་སྐྱ་པའི་རྗེས་འབྲེང་གི་ཆོས་སྐད་ལའང་ཚར་པ་ཆོས་རྗེས། སྐྱེ་འགག་གནས་གསུམ་བྲལ་བ་གདོད་མའི་གཤིས། སྟོང་གསལ་བརྗོད་དུ་མེད་པ་གཉུག་མའི་གང་། །ཞེས་བཤད་པའི་གཉུག་མའི་དངོས་འཛིན་བློ་ལས་འདས་པའི་ཐ་མལ་གྱི་དྲན་པ་གཟུང་འཛིན་ཡུལ་དུ་མ་ཤོར་བ་ཞིག་ལ་འདོད་པ་ལགས། དེ་ཡང་རིལ་འཛིན་དང་རྗེས་གཞིག་ལ་བརྟེན་པ་ལམ་འབྲས་ལྟ་བུའི་བསྐྱེ་རྫོགས་རིམ་འཇུག་ཅན་དང་། མཁའ་སྤྱོད་སྐོར་གསུམ་ལ་སོགས་ཏེ་གསེར་ཆོས་སུ་འདོགས་པའི་སྙན་བརྒྱུད་རླུང་སེམས་དབུ་མར་བསྡུ་བའི་རྫོགས་རིམ་ཀུན་ཀྱང་ལམ་དུས་སུ་བསོད་ནམས་དང་། ཡེ་ཤེས་ཀྱི་ཚོགས་གཉིས་ཟུང་འབྲེལ་དུ་བསག་ལུགས་
འདོད་པ་ཐ་དད་པ་ཙམ་ལས་འབྲས་བུ་དག་པ་གཉིས་ལྡན་གྱི་གོ་འཕང་བསྒྲུབ་བྱའམ། གཉེར་བྱ་ཁོ་ནའི་ཕྱིར་ཕྱག་རྫོགས་དབུ་གསུམ། ཞི་བྱེད་གཅོད་ཡུལ་ལམ་འབྲས་ལ་སོགས་པ་ཐམས་ཅད་འབྲས་བུའི་གྲོལ་ས་མི་མཐུན་པ་མེད་མོད། འོན་ཀྱང་གནས་སྐབས་ཀྱི་འཇུག་སྒོ་ལ་ཀུན་རྫོབ་དང་། དོན་དམ། སྒྲ་ཇི་བཞིན་པ་དང་། ཇི་བཞིན་མ་ཡིན་པ་སོགས་ཀྱི་ས་ལམ་ཐད་དྲང་དུ་སྟོན་མིན་གྱི་མྱུར་བུལ་ལ་ལྟོས་ནས་ལམ་ཟབ་ཁྱད་བཞག་པའི་ཕྱིར། ངེད་ཅག་རྫོགས་ཆེན་པའི་རང་སྐད་ཀྱི་གྲུབ་མཐའ་ལའང་ཀ་དག་དང་། ལྷུན་གྲུབ་ཐོད་རྒལ་གཉིས་སུ་འཆད་པ་ལ་ཟབ་ཁྱད་བྱར་ཡོད་ཅིང་། དེའང་དུས་ཀྱི་འཁོར་ལོ་ལ་སོགས་ཏེ་གསང་སྔགས་གསར་མའི་རྒྱུད་སྡེ་ནས་ལུགས་འདིའི་ཐོད་རྒལ་དང་ཆ་འདྲ་བའི་ཐིག་ལེ་དང་ཐིག་ཕྲན། དུ་བ་འཇའ་ཚོན་ལ་སོགས་པའི་རྟགས་བཅུའི་ངེས་པ་འཆད་ཀྱང་རྩོལ་བ་ཅན་དང་བྱ་རྩོལ་མེད་པའི་ཁྱད་པར་ཡོད་ཅིང་བྱེ་བྲག་ཏུ་ཤེས་ཉམས་དང་། སྣང་ཉམས་ཀྱི་ཁྱད་པར་ཤིན་ཏུ་ཆེ་བའི་རྣམ་བཞག་ཡོད་ཀྱང་འདིར་བུ་མའི་ལམ་དུ་བཞག་ནས། དོན་གྱི་འཇོག་སོར། །གསལ་བ་དང་། སྟོང་པ་དང་། ཟུང་འཇུག་གསུམ་ལ་ཡ་མ་བྲལ་བའི་ཆོས་སྐད་ཀྱང་རིག་
ཐོག་ཏུ་གོ་བས་དཔྱད་པའི་ཡིན་ལོ་ཙམ་ལ་མི་རེ་བར་གྲུབ་མཐའ་ངོ་བོ་ཉིད་གསུམ་གྱི་དགོངས་པ་ད་ལྟའི་ཤེས་པ་དྲི་མེད་གཅེར་ཡན་ལྷུན་གྲུབ་རང་གནས་ཆེན་པོ་ལ་རྡོ་རུས་སིང་སྟེ་ཐུག་པ་ཞིག་དགོས་ལགས་ཏོ། ཀུན་མཁྱེན་གྱིས། རིག་པ་མཐའ་གྲོལ་རྟེན་མེད་མ་ཤེས་པར། །རླུང་སེམས་ཉམས་ལ་གནས་ལུགས་དོན་དུ་ཞེན། །ཆགས་སྲེད་ཞེན་པས་ཉོན་མོངས་ཕྱི་ཕྱིར་འཕེལ། །ལམ་གོལ་དམན་པར་ཞུགས་ལ་སེམས་འདི་སྐྱོ། །ཞེས་གསུངས་པའི་ཕྱིར་སྟོང་ཉིད་བསམ་དུ་མེད་པ་བླ་མ་མཚན་ལྡན་གྱི་དགོངས་བརྒྱུད་ཀྱི་འཕོ་བ་ཐོབ་པའི་རྟེན་འབྲེལ་འབྱུང་ལ་ངེས་པར་ལྟོས་པ་གལ་ཆེ་ཞིང་། བློས་བསྒྲུབ་པའི་ཟུང་འཇུག་གིས་ཆོས་སྐད་ལ་ཡིད་མི་རྟོན་པ་ཞིག་ལ་ཐུགས་རྩེ་གཏོད་པར་ཞུ། ཞེས་ས་སྐྱ་པའི་དགེ་བཤེས་དག་སྣང་ཅན་ཞིག་གིས་ཟུང་འཇུག་གསུམ་དང་རྫོགས་པ་ཆེན་པོ་གནད་ཨེ་གཅིག་གསུངས་པ་ལ་སྨྲས་པའོ། ༈ སྤྲོས་བྲལ་འགྱུར་མེད་བདེ་ཆེན་གྱི། །ངོ་བོའི་བཞུགས་ཚུལ་ཇི་ལྟ་བ། །ཚིག་སྤྱོད་ཀྱི་ནར་མ་གྱུར་པས། གཤིས་ཀྱི་རང་བཞིན་ཇི་སྙེད་ཀྱི། །ཤེས་བྱས་རྣམ་དཔྱད་སྟོང་ཉིད་འདི། །སྟོན་མཆོག་རྫོགས་པའི་
སངས་རྒྱས་ཀྱིས། །འཁོར་ལོ་ཐ་མར་བཞག་པ་དེ། །དེ་ཕྱིར་ངེས་དོན་དབུ་མ་ཆེ། །རྫོགས་པ་ཆེན་པོར་སངས་རྒྱས་ཀྱིས། །གྲུབ་མཐའ་ཇི་བཞིན་འདོམས་པ་ལ། །མ་རིག་ལྟ་བ་མཆོག་འཛིན་གྱི། །བདུད་ལས་རྣམ་རྒྱལ་རྒྱལ་དབང་མཆོག །ཀུན་མཁྱེན་ངག་གི་དབང་པོའི་ཞབས། །སྙིང་གི་ཐིག་ལེར་རོ་གཅིག་ཤོག །འདི་ན་གང་ཞིག་ཡེངས་པ་ན། །ཐ་མལ་ཉིད་དུ་རྣམ་རྟོག་ལ། །དྲན་པའི་རྩི་དང་མ་བྲལ་ཚེ། །བསམ་ལ་སྟོང་པའི་འཛིན་སྟངས་ཀློང་། །རྟོག་ཚོགས་ནུས་མེད་ཡལ་བ་གད། །དཔྱིད་ཀའི་འདུ་བྱེད་དྲན་པའི་ངང་སྒོམ་ལ། །ནུབ་འཁྱགས་ཉིན་མོ་ཞུ་བའི་དཔེས། །མཚོན་པར་ནུས་ཀྱི་ཡིད་དཔྱོད་ལམ། །འདི་ནི་བློ་དང་བཅས་པ་ཡིས། །སྒོམ་ཡུན་ཐུགས་པའི་མཚན་ཉིད་ལས། རང་སའི་ལམ་ལ་གོལ་འཕྱུག་མེད། །འོན་ཀྱང་གང་ཤར་ལ། །སྔོན་བསུ་རྗེས་གཅོད་མི་བྱ་བར། །ཤར་མཁན་རང་སངས་རྗེན་པའི་ཀློང་། །ཤེས་པ་རང་ས་ཟིན་པ་གནད། །རེས་འགའ་ལུས་གནད་ལྟ་སྟངས་བཅས། །མིག་གི་རྗེས་སུ་སེམས་ཕྱོགས་ཏེ། །ཡུན་དུ་བསྲིངས་པའི་གནས་སྐབས་ན། །སྔོན་ལ་
གནས་ཉམས་ལམ་མེ་ལ། །ཕྱི་ནས་ཝལ་ལེ་ར་རྨུགས་པའི་ངང། །དྭངས་ཆ་དེ་ཡང་འཐུམས་འགྲོ་ལ། །གཉིད་ཀྱང་མགྲོན་དུ་འགུགས་བྱེད་པ། །དེ་ནི་རིག་པ་གཅུར་ནས། །གནས་ཉམས་འབའ་ཞིག་སྒོམ་དུ་ཞེན། །ཞི་གནས་རྐྱང་པར་ལྷུང་བའི་ཉམས། །རྫོགས་ཆེན་རང་བབས་ཡེ་གྲོལ་ལ། །བསྐྱར་གྲོལ་བསྒོམས་པས་ཕུང་བ་ཡིན། །འོན་ཀྱང་རང་བབས་ཤེས་པ་ལ། །རྩོལ་པའི་དྲན་པ་འདུ་བྱེད་པ། །འདི་ནི་འདི་གའི་གནས་སྐབས་ན། །སྒོམ་གྱི་ངོ་ཏིང་ཡོད་ལགས་པས། །དེར་འཛིན་གཉེན་པོས་སྲངས་པ་ཡི། །ལྡོག་སྒོམ་རྩལ་གྱིས་རྒྱས་བཏབ་ན། །གཉེན་པོའི་ཕྱོགས་སུ་ཤོར་ཏ་རེ། །དེ་ཕྱིར་འདུ་བྱེད་དྲན་པ་འདི། །ཆོས་ཉིད་དྲན་འདིའི་མཚན་ཉིད་ཞིབ་པར་ཤེས་པར་འདོད་ན་ཁོ་བོས་བྱས་པའི་དྲན་པའི་གཏམ་ཡོན་ཏན་རྒྱ་མཚོ་ལ་བལྟའོ། པར་གྲོལ་བའི་ཐབས། །བསྐྱེད་དང་རྫོགས་པའི་རིམ་པ་དང་། །ཁྱད་པའི་མོས་གུས་སྙིང་རྗེ་གཉིས། །བཅོས་མིན་རྒྱུད་ལ་ཤར་ཤར་དགོས། །དེ་ལ་གོ་མྱོང་མི་མཐུན་པ། །ཐོས་པ་ཕུན་སུམ་ཚོགས་པ་དང་། །མན་ངག་དམ་པས་ཟིན་པ་དང་། །གོམས་པ་གདེང་དུ་མ་གྱུར་གསུམ། །འགལ་བ་ལྟག་འཛོམ་པ་
ལགས། །ཡང་ཅིག་ཕེབས་སྒོ་གཉིས་པའི་ལན། །མཉམ་གཞག་སྐྱོན་མེད་ཁོ་ན་ནི། །ཕུང་པོ་ལྔ་བྲལ་ཉིད་ལ་ཟེར། །རྫོགས་པའི་སངས་རྒྱས་དགོངས་པ་ཡིན། །སྒོ་ལྔའི་རྣམ་ཤེས་གནས་འགྱུར་པས། །རྗེས་མཐུན་གདགས་སུ་རུང་བ་ནི། །འཕགས་པའི་ཡེ་ཤེས་ཉིད་ལ་བརྗོད། །སྒོམ་ཆེན་རྣམ་པའི་མཉམ་གཞག་ནི། །ཕྱོགས་མཐོང་རང་སའི་སྒྲིབ་པ་ཅན། ཉོན་མོངས་ཉེ་བར་ལེན་པའི་སེམས། །མངོན་གྱུར་མེད་ཀྱང་ཡུལ་རྐྱེན་དང་། །ཕྲད་ཚེ་ལྷན་སྐྱེས་ནད་རོ་ལྡང་། །དེ་ཕྱིར་དུ་མ་རོ་གཅིག་ང་། །རོ་གཅིག་དུ་མར་མ་ཤར་ཚུན། །རྐྱེན་སྣང་བདེ་སྡུག་རགས་པ་ཀུན། །ཅིག་འཆར་ཆོམས་པ་ག་ལ་ཞིག །འདི་ཚམ་གོ་བའི་སྒྲོམ་ཆེན་ཀྱང་། གངས་རིའི་ཁྲོད་ན་དེང་དཀོན་ན། །བགྲོ་གླེང་བྱེད་པ་སྐལ་བ་བཟང་། །དེ་བཞིན་རྗེས་ཐོབ་ལམ་འཁྱེར་ཚུལ། །རྣམ་ཤེས་དྲུག་དང་ཀུན་ཉོན་ཡིད། །བརྒྱད་པོའི་དྲི་མ་རྣམ་བྱུང་བའི། །རྗེས་ཐོབ་འཕགས་པའི་ཡེ་ཤེས་ཏེ། །ཚོགས་དྲུག་རང་སའི་ཡུལ་ཤར་ཚེ། །དེ་ཉིད་སྒོམ་དང་བསྲེ་བའི་ཚུལ། །གང་ཞིག་བྱ་བའི་ཡུལ། །དེ་ལ་མངོན་པར་སེམས་བཞག་ན། །སྣང་བས་མི་འཆིང་ཞེན་པས་འཆིང་། །ཞེན་པ་ཆོད་ཅིག་ནཱ་རོ་པ། །ཞེས་
པའི་དོན་དང་འགལ་ཏ་རེ། །ཅི་ཕྱིར་གཟུང་ཡུལ་སྣ་ཚོགས་ལ། །འཛིན་པས་འཆིང་བ་ཤིན་ཏུ་གོལ། །ལྕགས་ཀྱུ་དང་ནི་གླང་པོ་བཞིན། །ཡེ་ཤེས་ཆོམས་པོར་འདི་ཉིད་ཆེ། །དཔེར་ན་ལམ་གྱི་བཞི་མདོ་རུ། །བྱ་མཁན་ཤིང་ལ་རྩེ་བ་དེའི། །ཡུལ་ལ་དམིགས་པའི་རྟེན་བྱས་ན། །རྩལ་གྱི་ངོ་བོ་བསླུ་བའི་ཚུལ། །ལག་པ་ལྷུང་བའི་འཆར་དར་བཞིན། །ལྷན་ཅིག་སྐྱེས་པའི་མ་རིག་པས། །རང་ངོའི་དྲན་པ་ཉམས་བྱེད་ཅིང་། །ཡུལ་ཐོག་ཤོར་འབྱམས་མཐུ་བརྟས་པས། །འཁོར་བའི་ས་བོན་རྒྱུན་ཆགས་ལ། །ཀུན་བརྟགས་གདོན་ཆེན་ལྡང་བ་ཡིན། །དེ་ཕྱིར་ཤར་སར་མི་བལྟས་ལ། །ཤར་མཁན་གཞི་མེད་རྩ་བྲལ་གྱི། །རིག་པ་རང་སངས་རྗེན་པའི་ངང་། །ཡུལ་ལ་ཞེན་པ་རྣམ་དག་པས། །སྣང་བ་ཡེ་ནས་བོད་མ་མྱོང་། །འདི་ལ་ཉམས་རྗེས་དབྱེར་མེད་ཟེར། །ཞེས་མཁྱེན་རབ་ཀྱི་དབང་ཕྱུག་ལྕགས་ཟམ་སྤྲུལ་པའི་སྐུ་མཆོག་དམ་པའི་མཆིད་ལན་དུ་རིག་པ་རང་བཞིན་གྱིས་འཛིན་པ་ཀློང་ཆེན་ནམ་མཁའི་རྣལ་འབྱོར་གྱིས་གཡོར་པོ་ཆེའི་གྲོང་ཁྱེར་དུ་བྲིས་ནས་ཕུལ་བ་ལགས། དྲན་པ་ཀློང་ཆེན་རབ་འབྱམས་ནི། །བདེ་གཤེགས་ཀུན་གྱི་ཐུགས་ཀྱང་ཡིན། །རིག་པ་དྲི་མེད་འོད་
ཟེར་ལ། །འདུ་འབྲལ་མེད་པར་ཕྱག་བགྱིའོ། །ལར་སངས་རྒྱས་རྣམས་ཀྱི་ཐུགས་རྣམ་པར་མི་རྟོག་པ་དང་། བདེ་གཤེགས་སྙིང་པོ་ལ་སོགས་པ་ཆོས་སྐད་མང་པོས་གྲུབ་པའི་མཐར་བཞག་པ་ཐམས་ཅད་ཀྱི་ངོ་བོ་ལམ་གྱི་གནས་སྐབས་འདིར་ཁོ་བོའི་བླ་མ་པདྨ་ལེགས་གྲོལ་གྱི་བཞེད་པས་ཆོས་ཐམས་ཅད་དྲན་པ་རྣམ་པ་དྲུག་ཏུ་རྫོགས་པའི་སྒོ་ནས་སྙེན་བསྐུལ་ཞུ་བ་ལ། མཉམ་གཞག་གི་ངོ་བོ་ཤེས་པ་མདུང་ཚུགས་ཀྱིས་བསྐྱང་བ་ནི་རེ་ཞིག་སེམས་མི་ཡེངས་པའི་གཉེན་པོ་འདུ་བྱེད་ཀྱི་དྲན་པ་བྱ་བ་ཡིན། འདི་ལ་གཏད་མེད་ཀྱི་དྲན་པ་མཚན་ཉིད་པ་མི་གནས་ལགས། འོན་ཀྱང་དྲན་རིག་འདི་ཐ་མ་ལུང་མ་བསྟན་འཇིག་རྟེན་པའི་སེམས་བརྗེད་འབྱམས་རྨོངས་གསུམ་གྱི་གཉེན་པོ་ཡིན་པས་སྒོམ་པའི་འདུན་པ་དྲག་པོ་འདི་མ་བརྗེད་མ་ཡེངས་པ་འདུག་གམ་མི་འདུག་གཉིད་དུ་སོང་ནས་རང་དབང་མི་འདུ་བའི་སྐབས་མ་ཏོགས། གཞན་ཇ་ཧུབ་སྔོན་མ་དང་ཕྱི་མའི་སྲུབས་ལའང་བརྟག་དགོས་པ་ཡིན། དེ་ལྟར་བརྟག་པའི་དྲན་པ་དེ་སླེབ་ཕྱིན་ཆད་དྲན་ཐོག་ཏུ་རང་སར་ཅོག་གེ་འཇོག་པ་ལས་ལྷག་པའི་སེམས་ལ་སེམས་ཀྱི་ས་བལྟ་ཞིང་གཅུར་བ་དང་བརྟག་དཔྱོད་མང་པོ་བྱ་བ་ནི་ཀློག་པ་ཐོས་བསམ་
པ་ཁ་ཅིག་གི་གྲུབ་པའི་མཐའ་ཡིན་སྲིད་དོ། །སྤོང་བ་བསམ་གཏན་པ་རྣམས་ནི་འཆིང་བའི་ཐག་པ་རང་དུ་འདུག་ལགས། འོ་ན་གང་ཡང་མ་བྱས་པར་འབད་མེད་དུ་གྲོལ་ལམ་སྙམ་ན། སེམས་ཅན་ཕལ་པས་ཆོས་ཉིད་རང་ལ་གནས་ཀྱང་དེའི་བཞུགས་ཚུལ་མི་ཤེས་པར་འཁོར་བ་ལུ་གུ་རྒྱུད་དུ་འཁྲུལ་པ་ཡིན། སྒོམ་ཆེན་པོའི་སེམས་ཀྱི་གནས་ལུགས་ཡོད་མེད་མུ་བཞི་དང་བྲལ་བར་མཚན་ལྡན་གྱི་བླ་མས་ངོ་སྤྲད་པའི་ཡེ་བཞག་རང་བབས་ཀྱི་གནས་ལུགས། ཕྱི་རོལ་གྱི་ཡུལ་དང་མ་འདྲེས། ནང་དུ་གཅུར་བ་ཡང་མ་ཡིན། བར་དུ་སྒོམ་འཛིན་གྱི་གཉེན་པོས་མ་བསླད་པར། གདོད་ནས་རང་བཞིན་རྣམ་དག་ཏུ་ཡོད་པའི་ངང་གནས་ཀྱི་རིག་པ་བློ་བྲལ་གྱི་རྒྱུན་བསྐྱངས་པ་ལ་སྒོམ་བྱ་མ་ཁྲུལ་བའི་རྫོགས་པ་ཆེན་པོ་ཟེར་བ་ཡིན། དེ་གོམས་པ་སྟོབས་སུ་གྱུར་པ་ལས་སྒོམ་འཛིན་གྱི་ཤེས་སྒྲིབ་དག་ནས་སྤྲོས་བྲལ་ཀླུངས་སུ་ཕེབས་པའི་ཚེ་གཏད་མེད་མཚན་ཉིད་པ་དེ་འོང་བ་ཡིན། དེང་སང་སྒོམ་ཆེན་པ་ཕལ་གྱིས་མིག་ཐོག་ཏུ་སེམས་གཅུན། སེམས་ཐོག་ཏུ་སྟོང་པའི་ཁུར་བཀལ། རྣམ་རྟོག་ཤར་གྲོལ་གནས་གསུམ་ལ། །བསྲུང་བྱ་བྱེད་པ་ལྟ་བུ་ནི། །སྐྱེ་འགག་
གྲངས་སུ་འདེབས་བསམ་གཏན་ཞེས་བྱ་སྟེ། ལམ་རྣལ་མ་དང་མ་འབྲེལ་ལོ། །ལར་གནས་པ་སྒོམ་དུ་འདོད། མ་གནས་པ་ལ་འཁྲུལ་པར་བལྟ། གསལ་བ་ཡེ་ཤེས་ས་འཛིན། སྟོང་པ་ཆོས་ཉིད་དུ་རེ་བ་རྣམས་ལ་སྒོམ་གྱི་མུ་གེ་ལྡང་བ་ཡིན་པས། གནས་ན་གནས་ཐོག་ཏུ་རང་ཚོ་འཛིན་ཞིང་དེའི་གོལ་ས་གནས་པའི་ངོ་བོ་ལ་བསྒྲིམས་ཏེ་མི་བལྟ། འགྱུ་ན་འགྱུ་ཐོག་ཏུ་རང་ངོ་རིག་ཅིང་དེའི་ཤོར་ས་བརྟག་དཔྱད་ཀྱིས་རྗེས་མི་འཐུད། དེ་དག་གང་ཡང་མ་ཡིན་པའི་ལུང་མ་བསྟན་གྱི་གཉེན་པོར་དྲན་རིག་ཞུ་བདུངས་པ་ལྟ་བུ་དགོས། ལར་དྲན་པས་ཟིན་པའི་སྐད་ཅིག་མ་དང་པོ་འདི་ལ་སྤྲོས་བྲལ་རང་གནས་ཀྱི་ཡེ་ཤེས་ཕྱིན་ཆིག་མ་ལོག་པ་ཡོད་པས་གསེར་སྲང་སྟོང་རི། གཞན་བདེ་འབོལ་འབོལ་དང་། གསལ་ཧྲིག་ཧྲིག །སྟོང་ཆམ་ཆམ་ལ་སོགས་པ་རྣམས་ལྟ་བ་ལ་ཉམས་ཞེན་གྱི་ཐུམས་བཏང་བ་ཞེས་བྱ་སྟེ་དེས་རྐྱེན་མི་ཐུབ། འོན་ཀྱང་ལས་དང་པོ་པ་ནི་གོམས་སྟོབས་སུ་མ་གྱུར་པས་ལྟ་བ་ལས་ཉམས་ཞེན་རང་ཞུགས་ཆེ་ཡོང་བས་དཀོར་གྱི་ལྷོངས་ལ་སོགས་པ་ཡུལ་སྣང་སྣ་ཚོགས་ཀྱི་རྐྱེན་ལས་ཁྲོ་ཆགས་རྨོངས་གསུམ་གྱི་ཉོན་མོངས་པར་རགས་པ་ཤར་བའི་ཚེ། དེའི་ཐད་ཀ་ནས་རིག་མ་གཏོགས་གཞན་གང་ཡང་མེད་
པས་ཉོན་མོངས་པ་དེ་ཀའི་རང་ཞལ་ལྟ་བ་ཞེས་བྱ་སྟེ། དེའི་རང་བཞིན་ལ་རྟོག་དཔྱོད་འཛིན་ཞེན་གྱི་རྣམ་རྟོག་རང་སང་བཅད། མིག་ནམ་མཁའི་ལ་ལྟ་སྟངས་ཧྲིག་གེ་བསྒྱུར་བ་དང་ལྷན་ཅིག་རྣམ་རྟོག་དེ་ཤར་བ་ལ་མི་བལྟ་བར་ཤར་མཁན་ལ་བལྟས་པས་རང་ཡལ་རྗེས་མེད་དུ་འགྲོ་བ་ཡིན། དེ་ལ་ཤར་ས་དང་ཤར་མཁན་གྱི་ཁྱད་ནི་ཤར་ས་ཡུལ་ཡིན་ལ། ཤར་མཁན་ཡུལ་ཅན་ཏེ་རིག་པའི་འཛིན་ཆ་ཡིན་ནོ། །ཡང་དྲན་པ་བརྟེན་ཀྱང་མི་ཐུབ་པ་འདྲ་བ་ནི། ཉོན་མོངས་པ་དང་རྣམ་རྟོག་གི་རང་བཞིན་ལ་རྟག་ཏུ་གོམས་ཆེས། དེའི་གཉེན་པོ་དང་ཆོས་ཉིད་ཀྱི་རྩལ་སྦྱོང་ལ་མ་འདྲིས་ཤིང་ཤེད་མ་སྐྱེ་བ་ལས་ཤིན་ཏུ་དང་པོ་པའི་རྟགས་ཡིན་པས་བརྩོན་འགྲུས་བསྐྱེད་དོ། །མཚན་མོ་རྣལ་འབྱོར་ལ་ཤེས་བྱ་བུམ་འཇུག་གི་སྐབས་བླ་མ་སྙིང་གར་བསྒོམ་པས་གཉིད་བསྲབས་པ་ནི་དོན་གྱིས་ཡིན་ཏེ། གཉིད་ནི་གཏི་མུག་གི་རང་བཞིན་ཡིན་པས་བག་མེད་པ་དང་མ་རིག་པའི་ནང་དུ་འཇུག་པ་བདེ་ལ། བླ་མའི་གསལ་སྣང་ནི་དྲན་རིག་གི་རྩལ་ལས་བསྐྱེད་དགོས་པས་དེ་གཉིས་རྫས་འགལ་བ་ཡིན་ཕྱིར་བསྐྱེད་རྫོགས་ཀྱི་ལམ་ལ་ཞུགས་ཕྱིན་ཆད་ནས་གཉིད་ལ་སོགས་ཉོན་མོངས་པ་རྣམས་ཤུགས་
ཀྱིས་བསྲབས་ན་དེ་ཉིད་དེའི་ཡོན་ཏན་དུ་འགྲོ་དགོས་པའི་ཕྱིར་རོ། །བསྙེན་པའི་དུས་ཚེ་བཅུ་སོགས་ལ་ཆོ་ག་གཞན་བཏང་བ་ལ་འགལ་བ་ཡོད་ཅེས་ཟེར་བའང་། ཡི་དམ་ལ་སྤོང་ལེན་གྱི་དོགས་པ་ངན་པ་ནི་ཤར། བདེ་གཤེགས་གཅིག་སྒྲུབ་ཀུན་གྱི་ངང་། །ཞེས་པ་དེའི་ཆོས་ཉིད་བསམ་གྱིས་མི་ཁྱབ་པའི་དོན་ལ་རྨོངས་པ་རྣམས་ལ་དེའང་ཡིན་ཏེ། ཆོས་ཐམས་ཅད་ཀྱི་ངོ་བོ་བྱང་ཆུབ་ཀྱི་སེམས་ཐིག་ལེ་ཉག་གཅིག་ལས་གྱེས་པའི་གོ་དོན། མ་ཧཱ་ཡོ་ག་ནི་བསྐྱེད་རིམ་གྱི་སྐབས་སུ་དེ་བཞིན་ཉིད་ཀྱི་ཏིང་ངེ་འཛིན་ནས་རིམ་པར་བྱང་ཆུབ་སེམས་སྣང་སྒྱུ་མའི་ལྷ་སྐུར་རྫོགས་པའི་ཆོས་གཅིག་པུ་ཉིད་གང་ལ་གང་འདུལ་རིགས་དང་ཡེ་ཤེས་ཐ་དད་པའི་ཆོ་གས་སད་པའི་དབྱིངས་མཇལ་མ་ནུས་པར། ཡི་དམ་གྱི་ལྷ་རང་བརྒྱུད་པར་བཟུང་བས་ནོངས་པ་སྟེ། དོན་དེ་ལྟ་བུ་བློར་མི་ཆུད་པ་དག་གིས་བསྐྱེད་རྫོགས་ཀྱང་རེ་ཞིག་གཟུགས་བརྙན་ཙམ་ཡིན་པས། དེ་དང་དེའི་ལས་འབྲས་ཀྱང་རྣམ་རྟོག་གི་རྗེས་སུ་འབྲང་ཉེ་ལ། སངས་རྒྱས་ཐམས་ཅད་ངོ་བོ་གཅིག་ལ་རྣམ་པ་གང་ལ་གང་འདུལ་དུ་ཤར་བའི་གོ་དོན་ལྷོངས་པ་དག་ལ་ཉེས་པ་དེ་ཤེས་བྱ་ལ་མི་སྲིད་དོ། །ཡང་ཐུན་མཇུག་ཏུ་རྫོགས་རིམ་བསྡུ་བ་ནི་རྟག་ལྟ་ཞིག་པའི་ཉེར་བསྡུ་ཡིན་པས་ངེས་པར་དགོས་ལ། ཆོ་ག་མཚན་ཉིད་པ་ཐམས་ཅད་ལ་དེ་གའི་རྗེས་སུ་ཆད་ལྟ་གཞིག་པའི་གཉུག་མའི་ལྷར་སྣང་ཡང་ཡོང་བས། བསྐྱེད་རིམ་འབའ་ཞིག་ལ་སློབ་པ་རྣམས་ལྷར་
སྣང་དེ་དང་མ་བྲལ་བའམ། ཡང་ཆབ་གཏོར་སོགས་ཞི་བའི་ང་རྒྱལ་དགོས་པ་རྣམས་ལ་དེ་ཀ་གནས་འགྱུར་གྱི་ཚུལ་དུ་ཐུན་མཚམས་ཀྱི་བྱ་བ་ལ་འཇུག་པ་ཉིད་ལེགས། གདམས་ཕྲན་འགའ་ཞིག་གི་བཞེད་པར་གཙོ་བོ་རབ་ཏུ་བརྟན་པའི་ཐུགས་ཀ་ནས་ལས་ཀྱི་ཧེ་རུ་ཀ་སོགས་ཀྱི་བྱ་བ་ལ་འཇུག་ཟེར་བ་དེ་སྣང་བ་རྟེན་དང་བརྟེན་པར་རྫོགས་པའི་གསལ་སྣང་ལ་སློབ་པའི་གེགས་སུ་འགྱུར་པའི་ཀུན་འབྱུང་གི་བསྐྱེད་རིམ་ཉི་ཚེ་བའོ། །ཡང་གཞན་གྱི་ཐུགས་དམ་སྐྱབས་འོག་ཏུ་ཆུད་པའི་གསོལ་བ་འདེབས་པ་དེ་ལ། བདག་ཉིད་ཆེན་པོའི་རྣམ་ཐར་ལྷུར་མཛད་པས་ཁྱབ་སྟེ། དམ་པའི་སྐྱེས་བུ་ལ་རང་བཞིན་བཟང་པོའི་རྣམ་ཐར་མངའ་ནའང་། ཐོས་པ་ཕུན་སུམ་ཚོགས་པའི་གྲུབ་མཐས་བློ་ཁྱད་པར་ཅན་དུ་བཅོས་ནས་ཅི་མཛད་བསྟན་པ་དང་སེམས་ཅན་ལ་ཕན་པའི་ཐབས་སུ་འགྱུར་པ་ཞིག་བྱུང་ན་སེམས་ཅན་ཐམས་ཅད་རང་བཞིན་གྱི་སྐྱབས་འོག་ཏུ་ཚུད་པ་ཡིན་ཏེ། གང་ཞིག་སེམས་ཅན་ཐམས་ཅད་བྱིས་པའི་གྲོགས། དེ་དང་ཕྲད་ཅིང་འདྲིས་པ་ཙམ་ལ་ཡང་། །འཁོར་བར་དགའ་བའི་གཏམ་དང་མི་དགེའི་ཆོས། །ཞར་གྱིས་འགོ་བ་ཆོས་ཉིད་ཡིན་པའི་ཕྱིར། །དེ་ལ་སྣ་ཚོགས་གཏམ་དུ་བསྲེ་བ་དང་། རྩེད་
འཇོ་ག་ཞ་བཞད་གད་ལ་སོགས་པ། །བྱིས་དང་འགྲོགས་པའི་ཉེས་དམིགས་བསམ་ནས་སྤང་། །ཕྱོགས་དང་ཕྱོགས་སུ་ཡང་ཡང་རྒྱུ་བ་དང་། །ཡུལ་དང་གནས་ལ་སྤྱན་རས་བཙའ་བ་འདིས། །རྣམ་པར་གཡེང་ཞིང་དམ་པའི་ངང་ཚུལ་ལས། །ཉམས་པར་བྱད་པས་སྒོམ་ཞིང་ཟུངས་ཐུང་བའི། །བརྟུལ་བཞུགས་བརྟན་པོ་འདིས་ལ་རབ་འདྲིས་འཚལ། །རྒྱལ་བའི་གསུངས་དང་དགོངས་འགྲེལ་བསྟན་བཅོས་རིགས། །ཚིགས་སུ་བཅད་པ་བཞི་པའི་རས་མ་ཞིག །སྲང་མདོར་ཕྲད་ཀྱང་དེ་ཡིས་ཚིག་དོན་ལ། །ཤེས་བྱས་རབ་ཏུ་གཞིག་པའི་ཐོས་པ་བསྐྱེད། །གང་ཞིག་འདི་ན་ཐོས་དང་མི་ལྡན་ན། །དེ་ཡིས་བྱང་ཆུབ་སེམས་ཀྱི་ཡོན་ཏན་ཀུན། །ལོ་ཏོག་བཟང་པོ་ཆུ་ཡིས་སྤངས་པ་བཞིན། །ད་ལྟ་ཡོད་པའི་འཕྲོ་ལ་ཉམ་ཉེས་འགྱུར། །ཁྱད་པར་བདག་ཅག་རྣམས་ཀྱི་གྲུབ་པའི་མཐའ། །ཤིང་རྟ་གསུམ་དང་མཛོད་ཆེན་རྣམ་པ་བདུན། །སྡོམ་པ་གསུམ་གྱི་རྣམ་པར་ངེས་པ་ལ། །ཡང་ཡང་དཔྱད་ཅིང་གཞིག་པའི་མཐུ་སྟོབས་བསྐྱེད། །དེ་ལྟར་ཐོས་དང་བསམ་པའི་ཡོན་ཏན་གྱིས། །ཡང་དག་དང་ནི་ལྟར་སྣང་འབྱེད་པ་ཡི། །བློ་གྲོས་ཐོགས་པ་མེད་པའི་མཐུ་ཐོབ་པས། །ལས་ངན་ལམ་ལོག་གོལ་སར་འཁྱམས་མི་འགྱུར། །གང་
ན་བདེ་གཤེགས་རྣམས་ཀྱིས་གཤེགས་པའི་ཤུལ། ཐོས་བསམ་འབྲས་བུ་སྒོམ་པའི་ཡོན་ཏན་གྱིས། །མྱུར་དུ་སངས་རྒྱས་ལ་གཤེགས་པའི་སླད། རྟག་ཏུ་དབེན་པར་རིམ་གཉིས་ཉམས་བཞེས་བརྩོན། །དེ་ཡང་ཐེག་པ་ཆེན་པོའི་ལམ་མཆོག་ནི། །སྙིང་རྗེ་ཆེན་དང་ཤེས་རབ་ཁྱད་པར་ཕྱིར། །རྟག་ཏུ་བྱང་ཆུབ་སེམས་ཀྱི་ཡོན་ཏན་དང་། །ལྟ་བ་ཟབ་མོའི་གནད་ལ་གོམས་འཚལ་ལོ། །དེ་ལྟར་གོམས་པས་བདག་ཉིད་སྐྱེས་བུ་མཆོག །ཚིག་ཙམ་མིན་པའི་གོ་འཕང་ལ་སོན་པས། །བར་ཆད་རྐྱེན་གྱིས་བརྫི་བ་མ་ལགས་ཤིང་། །གཞན་དོན་ཉིད་ཀྱང་རྩོལ་བ་མེད་པར་འགྱུར། །སྐྱབས་སུ་འོས་པ་རྣམས་ལ་སྐྱེ་བོ་དག །སྤྱི་བོས་བཏུད་ནས་དད་པས་མཆི་བ་ཡིས། །ཡིད་ལ་སྨོན་པའི་འདོད་པ་འགྲུབ་བྱེད་པའི། །རྒྱུ་འབྲས་འདི་ལ་བྱེད་པོ་གཞན་ཡོད་མིན། །དེ་ལྟ་ན་ཡང་དམིགས་རྣམས་ཕྱེད་པའི་སླད། །སེམས་བསྐྱེད་དང་ནི་སྐྱབས་སུ་འགྲོ་བ་དང་། །འོད་ཟེར་སྤྲོ་བསྡུ་བསྔོ་བ་སྨོན་ལས་སོགས། །གང་ལའང་འདུན་པའི་བྱེ་བྲག་བསྒྱུར་བ་ནི། །ཤིང་རྟ་མཁན་གྱི་འཕང་ལོའི་རྒྱུ་ཐབས་བཞིན། དེ་བཞིན་གདོན་གྱིས་མནར་བའི་སྐྱེ་བོ་ལ། །བཀའ་བསྒོའི་ཚེ་ཡང་གདོན་དང་ནད་པ་གཉིས། །
ཕན་ཚུན་གནོད་བྱ་གནོད་བྱེད་ལས་ངན་གྱིས། །བསྐྱེད་པའི་རྒྱུ་འབྲས་རྟེན་དང་བརྟེན་པ་ཅན། །གཉིས་ཀར་རབ་ཏུ་སྙིང་རྗེ་ཆེན་པོའི་གདངས། །ཚད་མེད་བཞི་ཡིས་བློ་ནི་རབ་སྦྱངས་པས། །གདོན་གྱི་སེམས་ཀྱང་རང་བཞིན་དུལ་འགྱུར་ཅིང་། །བྱང་ཆུབ་སེམས་ཀྱི་ནུས་པའི་མཐུ་བརྟན་པོས། །གདོན་ལ་ཁྲོ་དང་ནད་པར་ཆགས་མིན་པར། །གར་དགུའི་རྣལ་རོལ་གཉེན་པོ་སྟོབས་ཀྱི་ལྷའི། །གསལ་བརྟན་གཟི་བྱིན་དྲག་སྔགས་དམོད་པའི་དཔལ། །མ་བཟོད་གདོན་རྣམས་རང་བཞིན་མེད་པའི་དབྱིངས། །དེངས་པའི་མདོ་ལ་བདག་གཞན་གདོན་གསུམ་པོ། །མི་དམིགས་སྟོང་པ་ཉིད་ཀྱི་ངང་ལ་འཇོག །གནས་གདོན་འདིར་རྨོངས་མངོན་པའི་ང་རྒྱལ་གྱིས། །བསྐྱེད་རིམ་རང་རྒྱུད་སྡང་མིག་གཡོ་བ་ཅན། །དེ་ལ་ཕྲ་མེའི་གདོན་དག་འབྲོས་སྲིད་ཀྱང་། །མ་རུངས་དྲེགས་པས་སླར་ལ་བདག་ཉིད་བསླུ། །དེ་ཕྱིར་སྙིང་རྗེ་བརྔམ་དང་ཞི་བ་ནི། །འབར་བའི་ཁྲོ་ཆེན་རྣམས་ཀྱི་ཐུགས་ཀྱི་ཉམས། །ཡིན་པར་ཤེས་པའི་སྔགས་པ་ཡོད་སྲིད་ན། །དེ་ལ་གདོན་ཀྱང་ཉན་པ་ཆོས་ཉིད་ཡིན། །ཡང་འདིར་གསོན་བྱང་སྲེག་པའི་སྐབས་དོན་ལ། །རྒྱུད་ནས་བཤད་
ལྤའི་ས་ཟིན་མ་མཐོང་ཡང་། །སེམས་ཅན་རྣམས་ཀྱི་བསམ་པའི་ཁྱད་པར་ལས། །ཕན་གནོད་ལས་འབྲས་དེ་དང་དེར་འགྲུབ་པས། །དམ་པས་སྲོལ་གཏོད་དགག་པར་ཡང་མི་བྱ། །དོན་གྱི་སྒྲིབ་སྦྱོང་རྣམ་པ་མཐའ་ཡས་པས། །དེ་ཉིད་ཁོ་ན་དོན་དུ་གཉེར་བའང་མིན། །འོན་ཀྱང་གཞན་གྱི་བསམ་པའི་བྱེ་བྲག་དང་། །མཐུན་པར་འཇུག་པའང་རྒྱལ་བའི་ཕྲིན་ལས་ཕྱིར། །དེ་དང་དེ་ཡི་ཁ་བསྒྱུར་ལྷན་ཐབས་ནི། །གནས་ལུང་སྙིང་རྗེའི་ཕོ་ཉ་ཉིད་དུ་གསལ། །ཞེས་པའང་སྤྲུལ་པའི་སྐུ་པདྨ་ཆོས་འབྱོར་རྒྱ་མཚོའི་དྲིས་ལན་དུ་རྫོགས་ཆེན་པ་ཀློང་ཆེན་ནམ་མཁའི་རྣལ་འབྱོར་གྱིས་མཆིམས་ཕུ་དཔལ་གྱི་ནགས་ཁྲོད་དུའོ། །རིགས་ཀྱི་བུ་ཉོན་ཅིག །མི་ལུས་ལན་ཅིག་ཐོབ་པ་འདི་ཡིད་བཞིན་གྱི་ནོར་བུ་རྙེད་པ་ལས་ལྷག་གོ །དམ་པའི་ཆོས་དང་མཇལ་བ་ནི་ཚེ་སྔོན་བསོད་ནམས་བསགས་པའི་འབྲས་བུ་ཡིན་ནོ། །འདི་གེགས་དབང་དང་། རྐྱེན་དབང་དུ་མི་ཤོར་བའི་ཐབས་དང་། ཚོགས་གསོག་སྒྲིབ་སྦྱོང་། །བོགས་འདོན་གྱི་ཆེད་དུ་རྒྱལ་བས་ཞབས་ཀྱིས་བཅགས་པའི་གནས་གངས་རི་ཏི་སེ། བལ་ཡུལ་ཤིང་ཀུན། བྱ་རུང་ཁ་ཤོར་
རྣམས་ཀྱིས་མཚོན་བལ་བོད་རྒྱ་མཚམས་ཀྱི་གནས་ཆེན་དང་གནས་ཕྲིན་བྱིན་རླབས་ཅན་ཐམས་ཅད་དུ་རིག་པ་གཏད་མེད། སྐྱེད་སྡིག་རོ་སྙོམས། ན་དགའ་ཤི་སྐྱིད། རེ་དོགས་ཆམ་བརྡལ་གྱི་ངང་ནས་བྱ་རྒོད་རྙི་ལས་ཤོར་བ་བཞིན་དུ་དེངས་ཤིང་། དགེ་སྦྱོར་གྱི་གཙོ་བོ་བྱང་ཆུབ་ཏུ་སེམས་བསྐྱེད་པ་དང་། བླ་མའི་རྣལ་འབྱོར། ལྟ་བ་བློ་འདས་ཀྱི་དྲན་པའི་རྩི་དང་མ་བྲལ་བའི་གསུམ་ལ་འབུངས་ཤིང་། ལ་ཆུ་འཕྲང་གསུམ་གྱི་དགའ་སྤྱད། ལུས་ལ་ན་ཚ། སེམས་ལ་སྡུག་བསྔལ། གློ་བུར་ཡེ་འབྲོག །གཞན་གྱིས་རྙེད་འཚོལ། འཕྲོག་ཆོམས་རྡེག་བཙོག །ཚིག་རྩུབ་མཚང་འབྲུ་ལ་སོགས་ཅི་ལྟ་བུ་བྱུང་ཡང་བཟོད་པའི་གོ་གོན། གནོད་ལན་ཕན་པས་འཇལ། དྲན་དང་ཤེས་བཞིན་གྱི་བག་ཡོད་བརྟེན་ཅིང་། །འཇིག་རྟེན་པ་རྣམས་ཚེ་འདིའི་དོན་ཙམ་ལའང་ལུས་སྲོག་འབེམ་ལ་འཛུག །དཀའ་སྤྱད་ཁུར་བོར་འཁྱེར། ཚ་གྲང་བཀྲེས་སྐོམ་གཏམ་ངན་ན་ཚ་སྡིག་བསྔལ་ཐམས་ཅད་ཁྱད་དུ་བསད། ཚེ་ཕྱི་མ་དམྱལ་གནས་སོགས་ངན་སོང་གི་སྡུག་བསྔལ་བཟོད་པར་དཀའ་བ་ལ་འགྲོ་བའི་རྒྱུ་མཚན་ཤེས་བཞིན་དུ་སྦྲང་བུ་མེ་འོད་མཆོངས་པ་བཞིན་ལས་མཐའ་ལོག་པའི་བྱ་བ་
ལ་བརྩོན་པ་བསྐྱེད་ན། ཆོས་ཀྱི་ཕྱིར་དུ་འབད་པའི་ན་ཚ་སྡུག་བསྔལ་སྲོག་ལ་འབབ་པ་བྱུང་ཡང་བསྐལ་པར་བསགས་པའི་སྡིག་སྒྲིབ་འདག་ཅིང་། བསོད་ནམས་དཔག་ཏུ་མེད་པ་སྐྱེ་བ་ཡིན་པས་དེ་དག་ལ་བྱས་ཡུས་དང་རེ་དོགས་ཀྱི་འཕྲིག་མ་ཚུད་པ་གྱིས་ཤིག །རྣམ་པར་རྟོག་པ་ནི་རི་མོ་མཁན་དང་འདྲ་བས་ད་ལྟ་རང་དགེ་བའི་རྣམ་པ་ཅན་དུ་ཡོད་འཕྲོ་ལ། སྔོན་གྱི་ལས་དང་། འཕྲལ་རྐྱེན་སྣ་ཚོགས། ཡུལ་སྣ་ཚོགས་པའི་རྟེན་འབྲེལ། དཀོར་གྱི་ལྷོངས། གྲོགས་ངན་གྱི་རྒྱུ་རྐྱེན་ལས་སྐད་ཅིག་ཙམ་ལ་ལྷས་བྱིན་གྱི་བརྟུལ་བཞུགས་འཛིན་པ་ལ་ཚོགས་མེད། སྐྱེས་རབས་ལས། གང་ཚེ་ཐར་པའི་ལམ་མཚོག་གསལ་གྱུར་པ། དེ་ཚེ་བདུད་རྣམས་ཟུག་རྔུ་ལྡང་གྱུར་ཏེ། རིན་ཆེན་རིན་ཐང་མེད་པ་རྙེད་གྱུར་པ། །དེ་ལ་དགྲ་བྱེད་མང་འདི་ཆོས་ཉིད་ཡིན། །ཞེས་གསུངས་པ་འདི་དྲན་པར་བྱས་ནས། བླ་མའི་དྲུང་དུ་ཁས་བླངས་པའི་དམ་བཅའ་ཡལ་བར་མ་འདོར་ཞིག །གསང་སྔགས་ཀྱི་ལམ་ནས་དངོས་གྲུབ་ཚེ་འདི་ཉིད་ལ་ཐོབ་མི་ཐོབ་དམ་ཚིག་གཅིག་པོ་ལ་རགས་ལས་པས་སྟོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་
ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབ་ཀྱང་སླ། །རྟག་ཏུ་དམ་ཚིག་བསྲུང་བར་བྱ། །ཞེས་གསུངས་པའི་ཕྱིར་རོ། །སྔོན་ཆད་རང་རྒྱུད་ཉམས་ཆག་ཉེས་ལྟུང་གིས་སྦགས་འདུག་ན་སྙིང་ཐག་པ་ནས་འགྱོད་སེམས་དྲག་པོས་བཤགས་པ་གྱིས་ཤིག །དྲིན་ཁྱེད་རང་ལ་ཆེ་བ་ཡིན་ནོ། །ལུས་ངག་གི་མི་དགེ་བ་བདུན་སེམས་བསྐྱེད་དང་རྟོགས་པ་མཆོག་ཏུ་གྱུར་པའི་བྱང་ཆུབ་སེམས་དཔའ་ལ་སེམས་ཅན་གྱི་དོན་དུ་གནང་བ་ཡིན་པས་ད་ལྟ་དེའི་ལ་མ་བབ། སྤྱིར་མི་དགེ་བཅུའི་རྣམ་རྟོག་སྐྱེས་ཙམ་ཉིད་ནས་དེ་ལ་དགྲ་བཞིན་དུ་བྱོལ་ཞིག །བྱེ་བྲག་ཏུ་ནོར་རྫས་ལ་གསོག་འཇོག་དང་བདག་འཛིན་སྤོངས་ཤིག །དེ་སྦྱིན་པའི་ཕ་རོལ་ཏུ་ཕྱིན་པ་ཡིན། །ཁྲེལ་ཡོད་དང་ངོ་ཚས་དམ་ཚིག་དང་སྡོམ་པ་སྲུངས་ཤིག །དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡིན་ནོ། །གནོད་པ་ལ་ལན་དང་ཁྲོང་ཁྲོ་མི་བྱེད་ཅིང་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་དྲན་པར་གྱིས་ཤིག །དེ་བཟོད་པའི་ཕ་རོལ་ཏུ་ཕྱིན་པ་ཡིན་ནོ། །གཉིད་དང་སྙོམས་ལས་མི་འཕྲད་ན་དགའ་ཚོར་སྐྱེ་བ་དེ་ཆོས་ལ་ལེ་ལོའི་གདོན་ཡིན་པས་ད་ལྟ་རང་འཆི་ནད་ཀྱིས་ཐེབས་ན་གདེང་ཅི་ཞིག་འདུག་བརྟགས་ལ་ཆོག་ཤེས་མེད་པའི་
དགེ་སྦྱོར་ལ་བརྩོན་ཅིག དེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡིན་ནོ། །བསྐྱེད་རྫོགས་ཟབ་མོ་དང་སེམས་རྒྱུད་བསྲེས་ནས་ཐ་མལ་དུ་ནམ་ཡང་མ་ལུས་པ་གྱིས་ཤིག །དེ་བསམ་གཏན་གྱི་ཕ་རོལ་ཏུ་ཕྱིན་པ་ཡིན་ནོ། །གཤིས་ཐོག་ཏུ་ངོ་སྤྲད་པའི་ལྟ་བ་ཕྱི་རུ་ལྟ་སྟངས་ཀྱིས་མ་འཛིན། །སྟོང་ལྟའི་གོལ་ས་ཞི་འདུག་གོ་།ནང་དུ་གཉེན་པོས་མ་འཆིང་། །རྟག་ལྟའི་གོལ་ས་ཞིག་འདུག་གོ །གོ་བས་ཨོ་སོབ་མ་བྱེད། །རྣམ་རྟོག་དང་རྐྱེན་ངན་དྲག་པོའི་ཐག་ཏུ་ཏུ་རིག་པ་རྗེན་པ་དེ་བཞག་པས་བློ་བྲལ་གྱི་ཤེས་པ་ལ་འཁུ་འཕྲིག་མི་འདུག་ན་ཨ་ལ་ལ་ཧོ དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །གཞན་ཁྱེད་རྣམས་པའི་ཐུགས་དམ་འདི་ད་ལྟ་རང་ལྟ་བ་མི་འདྲ། ཉམས་ཡིན་ལས་ཆེ། ཉམས་ལ་ལྷ་མཐོང་འདྲེ་མཐོང་དང་མངོན་ཤེས་ཕྲན་བུ་འདྲ་ཡང་ཡོང་སྟེ་དེས་རང་མཐོང་སྐྱེས། བློ་ལད། རྐྱེན་མི་ཐུབ། བར་ཆད་འཇུག །བདུད་སྡིག་ཅན་གྱིས་བསླུ་བྲིད་ཅིང་ཡང་བརྫུ་བ་དེ་མ་གོ་བའི་ཚེ། ངས་ཁྱེད་རྣམས་ལ་ཕན་གདགས་སུ་བཏུབ། ལྷོངས་ཚད་མཐར་ཕྱིན་པ་དེ་བླ་མ་དང་ཆོས་ལ་ལོག་ལྟ་སྐྱེ་བ་དེ་ཡིན་པར་བཤད་པས། འགལ་རྐྱེན་
དེ་རྣམས་ཀྱི་རྒྱུ་མཚན་ལེགས་པར་སྙིང་ལ་ཕུར་ལ་བླ་མ་དང་ཐུགས་ཡིད་འདྲེས་པ་ཞིག་གྱིས་ཤིག །ཐུགས་ཡིད་འདྲེས་པ་ཟེར་བ་དེ་བཟའ་ཚང་ལྟ་བུར་སྙིང་ཉེ་བ་གཅིག་པུ་ལ་མི་ཟེར། མོས་གུས་དང་དམ་ཚིག་རྣམ་པར་དག་པས་བླ་མའི་སྤངས་རྟོགས་ཀྱི་ཡོན་ཏན་སློབ་མའི་རྒྱུད་ལ་འདྲེས་པ་ཞིག་དགོས་སོ་ལགས། དེའི་ཕྱིར་བཟང་བརྫུ་དང་སྤོམ་ཡོར་ཆོས་བརྒྱད་དང་མ་འདྲེས་པར་ལོ་གསུམ་གྱི་བར་དུ་གནས་གང་གཉན། བྱིན་རླབས་གང་ཆེར་དགེ་སྦྱོར་གོང་འཕེལ་གྱི་ཁེབས་བརྩིས་ལ་རོ་སྙོམས། ཤེས་རྒྱུད་ཆོས་དང་འདྲེས་ངེས་སུ་མཛད་འཚལ། ཞེས་པའང་ལ་ལ་དག་བོགས་འདོན་གྱི་སྤྱོད་པ་ལ་དེངས་སུ་བཅུག་པའི་ཚེ་རྫོགས་ཆེན་པ་ཀློང་ཆེན་ནམ་མཁའི་རྣལ་འབྱོར་གྱིས་རྗེས་གདམས་པའོ། བུ་ཉོན་དང་འཇིགས་མེད་ཀུན་གྲོལ་བ། །ཡིན་མིན་དང་བྲལ་བ་ལྟ་བའི་གདེང་། །ངེས་ཤེས་དེ་རང་སའི་སྒྲིབ་པ་ཡིན། །སྤྲོས་བྲལ་ལ་སྦར་ཚོད་མ་བྱེད་པར། །བློ་བྲལ་ལ་སྦར་འཛིན་གྱིས་ཤིག་ཨང་། །ཕྱི་ཡུལ་སྤྲིན་དང་ཁུ་རླངས་ཀྱིས། །ནང་གི་ཤེས་པ་རྨོངས་འགྱུར་ཅིང་། །ཡུལ་ལ་དགའ་གདུང་རྒྱས་པའི་གདོན། །སྟོང་ཉིད་ཀྱི་ལྟ་བས་མི་ནོན་ན། །རོ་གཅིག་རྒྱ་མཚོའི་མཐའ་
ལས་རིང་། །རྟག་ཏུ་སྒོམ་ཡུན་སྲིངས་ཤིག་ཨང་། །ཡུལ་གྱི་རྐྱེན་དང་ཡུལ་ཅན་སེམས། །ཕན་ཚུན་རྟེན་དང་བརྟེན་པ་ཡི། །འབྲེལ་བའི་རྩ་བ་ཆོད་པའི་ཚེ། །ཆགས་སྡང་ཡུལ་ལ་མི་གནས་པས། །སྒོམ་ཉམས་ཟད་སར་སྐྱོལ་ཅིག་ཨང་། །ལྟ་བ་ཉམས་དང་མ་འདྲེས་པའི། ཅིར་ཡན་རང་གནས་ཆེན་པོ་ལ། །དྲན་སྣང་ཡེ་ཤེས་རྩིས་ཐེགས་དུས། །ཉམས་ཀྱིས་སྒོམ་ཆེན་བསླུ་བས་ན། །བདེ་གསལ་ལ་བསྟི་སྟང་མ་བྱེད་ཨང་། །ཆོས་ཀྱི་ཚོགས་བཅད་ཐོས་པ་དང་། །སྣང་བ་རྨི་ལམ་ཡ་མཚན་ཅན། །བྱིན་རླབས་ཞུགས་པའི་རྟགས་ཡིན་ཡང་། །སྙིང་རྗེ་རྒྱུད་ལ་མ་སྐྱེས་ན། །སྟོང་ཉིད་ཟོལ་མར་འགྲོ་བས་ན། །མོས་གུས་ལམ་དུ་འཁྱེར་ཅིག་ཨང་། གཅིག་པུར་བྱ་བ་རབ་བཏང་ནས། །སྒྲུབ་ཚུགས་ཟིན་པའི་གནས་ཐོབ་པ། །དེ་བས་ཆེ་བའི་བསོད་ནམས་ནི། །སྟོང་གསུམ་འདི་ནི་མི་རྙེད་པས། །གསོལ་བ་སྙིང་ནས་བཏབ་པས་ཆོག །ང་དང་མཇལ་བར་མ་རིང་ཨང་། །མཐུན་འཇུག་ཐག་པས་བཅིངས་པ་ཡིས། །འགྲོ་དོན་བདུད་ཀྱི་ལས་ཡིན་པས། །ཞེན་པ་ནང་ནས་གྲོལ་ཙ་ན། །ཅི་བྱས་གཞན་
ཕན་འགྲོ་བ་ཡི། །ཕྲིན་ལས་མི་འདོད་ཤུགས་ལ་འབྱུང་། །གཞན་གྱི་ཕྱེ་གཏོར་མ་འགམ་ཨང་། །ལྟ་བའི་ངོ་བོ་སྤྲོས་བྲལ་ཡིན། །སྒོམ་པའི་ངོ་བོ་དྲན་པ་ཡིན། །ལྟ་སྒོམ་དུ་མ་རོ་གཅིག་ཏུ། །འདྲེས་པའི་ས་མཚམས་ཕྱེད་པའི་ཕྱིར། །རྟོགས་པའི་འདྲ་འབག་བཀོད་པ་ཡི། །དྲན་པའི་གཏམ་འདི་ཟུང་ཞིག་ཨང་། །མདོར་ན་ཡང་དུ་སྨོས་ཅི་དགོས། །སྤྲོས་བྲལ་རོ་ཅིག་སྒོམ་མེད་རྣམས། །ཆ་ལ་བཏགས་པའི་ཉམས་ཡིན་པས། །ཀུན་གཞིའི་རྣམ་པར་ཤེས་པ་སོགས། །ཡེ་ཤེས་ལྔ་རུ་གནས་འགྱུར་དང་། །དག་པའི་གྲུབ་མཐའ་མ་སྙོམས་པར། །པཎིྜ་ཏ་ཡི་དཔྱད་སྒོམ་དང་། །སྒོམ་ཆེན་རྣམས་པའི་མཉམ་གཞག་གཏམ། །ཚིག་དང་དོན་དུ་འབྱོར་དཀའ་ཞིང་། །ཡུལ་དང་ཉོན་མོངས་མི་གྲོལ་བས། །སྒོམ་ཡུན་མི་ཚེར་སྲིངས་ཤིག་ཨང་། །འཆི་ཁར་ལྷག་པར་དགོས་སོ་ཨང་། །བར་དོར་དེ་བས་གཅེས་སོ་ཨང་། །དེ་སྐད་པདྨ་འོད་གླིང་ནས། །སྟོན་པས་ལེགས་པར་གསུངས་པ་ཡི། །རྣམ་ཐར་སྒོམ་གསུམ་རྫོགས་པ་ཆེའི། །ངོ་བོར་མྱོང་བས་འདྲེས་ཙམ་དེས། སྤྱི་བརྟོལ་གཏམ་ལ་རྒྱབ་བསྟན་ནས། །བུམ་ཐང་ཐར་པའི་བྲག་བསྟེན་པའི། །སློབ་མ་དྲང་སྲོང་ཁྱོད་ལ་གདམས། །
ཕ་རྗེས་བུ་ཡིས་ཟིན་པར་ཤོག །ཡང་རྨི་ལམ་དུ་དངོས་དང་འཕྲད། ཞི་གནས་ལྷག་མཐོང་དང་མངོན་སུམ་གྱི་ངོ་སྤྲོད་གསུངས་པའི་རྗེས། དོན་དམ་ངོ་བོ་ཨོཾ་ཨཱཧཱུྃ། ཡི་གེ་གསུམ་གྱི་རྣམ་པར་གནས། །དེ་ལ་བསམ་བརྗོད་སྤྲོས་པ་བྲལ། །ཞེས་གསུངས་པའི་དོན་འགྲེལ་དགོས་སྐད་པ། དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ནི། །ཀུན་རྫོབ་བདེན་པའི་ངོ་བོ་རུ། །དབང་བསྐུར་རྒྱས་གདབ་བྱིན་རློབ་ཀྱི། །མཚོན་བྱ་ཡི་གེ་གསུམ་དུ་གནས། །དེ་ཉིད་དོན་དམ་བདེན་པའི་ངོར། །གསལ་བ་བསམ་གྱིས་མི་ཁྱབ་པ། །ཚིག་དང་ཡི་གེ་དཔེ་ལས་འདས། །བསམ་བརྗོད་སྤྲོས་པ་བྲལ་བར་བཞུགས། རྒྱལ་བས་གསུངས་པའི་ཆོས་རྣམས་ཀུན། །བདེན་པ་གཉིས་ལམ་འདུས་མེད། །མོ་གུས་དམ་ཚིག་དག་པ་ལ། །བླ་མའི་གསུང་གི་རྗེས་གནང་ཐོབ། །ཡང་དབང་ཆོ་ག་བཤུ་བའི་སྐབས། །དགོངས་པས་བརྒྱུད་པའི་ཆོས་དཀའ་འདིར། །ཤོག་དྲིལ་ཁ་དོག་རྣམ་ལྔ་ལས། །བཞི་ནི་ཀློང་ཆེན་སྙིང་ཐིག་སྟེ། །གཉིས་ནི་ད་དུང་གཏན་མ་ཕེབས། །ཞེས་གསུངས་བྱུང་བས་གཏན་ལ་འབེབས་རྒྱུ་བཏང་སྙོམས་སུ་མི་བཞུགས་པ་མཁྱེན་སྐད་པ། །ཉིད་ལ་ཡན་ལག་ལྔ་པའི་བསོད་ནམས་ཐོབ་མོད། །གནད་བྱང་ཐུགས་ཀྱི་སྒྲོམ་བུ་ལྟར་རྟེན་འབྲེལ་མཐའ་དག་ཚོགས་ན། རིགས་ལྔ་ཡེ་ཤེས་ལྔའི་ཤོག་དྲིལ་ལས་མུ་མཐའ་མེད་པའི་གཏེར་སྨྱོན་གྱི་གནད་བྱང་མཆི་སྟེ། གནས་འདུས་ཀྱི་རྟེན་འབྲེལ་རྣམ་པ་སྣ་ཚོགས་སུ་
ཤེར། ཆོས་དང་ཆོས་མིན་ཕྱེད་དཀའ་གསེར་དང་བོང་བ་མཉམ། ཐེ་ཚོམ་གནས་འགྱུར་མང་བའི་གདུལ་བྱའི་སྤྱོད་པས་སྐྱོ། ཕ་རབས་བུ་ཡིས་ཟིན་ན་འདི་གས་ཆོག་པ་ཡོད། །ཨོཾ་ཨཱཧཱུྃ་སྭཱ་ཧཱ། ཞབས་བརྟན་སྙན་ཚིག་ཅན་དགོས་ཟེར་བ། སྙན་ཚིགས་ནི་རབ་བརྟགས་ཁོ་ན་ལ་ཤུགས་ཀྱིས་བསྟན་དགོས་ན། ཤེས་ལྡན་ལ་མི་མཛེས་ཤིང་གདོང་པགས་འཐུག་པའི་རྟགས་སུ་མཆི། སྟོན་པ་སེར་སྐྱ་ན་བཞུགས་པའི་ཚེ། ཤཱཀྱའི་རིགས་བརྒྱུད་བཤད་ན་མུ་སྟེགས་པ་རྣམས་བདག་ཉིད་ལ་བསྟོད་ཀྱི་ཤེས་པའི་གནས་ཡོད་ཀྱིས། མཽངྒལ་གྱི་བུའི་ནུས་པས་དེ་སྟོན་དུ་གཞུག་གོ་སྙམ་སྟེ། མཽངྒལ་གྱི་བུ་ང་རྒྱབ་བསྙུན་པས་རེ་ཞིག་བདེ་བསལ་གྱི། ཁྱོད་ཀྱིས་ཤཱཀྱའི་རིགས་བརྒྱུད་ལས་བརྩམས་ཏེ་སྤོབས་པར་གྱིས་ཤིག །ཅེས་བདག་ཉིད་ཀྱི་བསྔགས་པ་གསུང་བར་མ་སྤོབས། ཚིག་སྦྱོར་ཤེས་ནས་སངས་རྒྱས་བྱང་སེམས་ལ་བསྟོད་ན་བདེ་གཤེགས་དུས་མཁྱེན་ལྟར་རང་གིས་རྩོམ་པས་དོན་ཡོད་བྱས་པར་འགྱུར་བློ་གསལ་ཁྱོད་ཚིག་སྦྱོར་བཟང་པོ་ལ་མོས་པར་འདུག་པས་བསྟོད་ཚོགས་འགའ་ཞིག་བསྐུར་ཡོད། ངེད་ལ་རིང་འཚོ་དགོས་ཟེར་དུ་མང་དུ་བྱུང་ཡང་མོས་པ་ཡོད་ན་
མིང་སྒྲ་གསུམ་ཚང་བའི་ཤོླ་ཀ་གཅིག་པོ་གསོལ་འདེབས་དང་བརྟན་བཞུགས་ཐམས་ཅད་ལ་བསྒྱུར་ཆོག་པ་དེ་ག་ལ་ཡི་དམ་དུ་གཟུང་བར་བསྐུལ་བ་ཡིན་ནོ། །ཞེས་པའང་མོན་བུམ་ཐང་ཐ་པའི་བྲག་ཏུ་སྒྲུབ་པའི་རྒྱལ་མཚན་འཛིན་པའི་བྱ་བྲལ་བ་པདྨ་འོད་གླིང་ནས་གདམས་པའོ། སྒོམ་པའི་ཤེས་རབ་ལ་མྱོང་བ་ཅུང་ཟད་ཡོད་པ་ལ་གདམས། །རྟོག་མེད་རང་གསལ་ཡུལ་དང་མ་འདྲེས་ཙམ་ཀུན་གཞིའི་རྣམ་པར་ཤེས་པའི་མཚན་ཉིད་ཀྱང་ཡིན་པས། དེའི་ངང་ལས་མཐོང་ཡུལ་གཟུགས་སུ་འཆར་བ་སོགས་དབང་པོའི་ཤེས་པ་ལྔ་ལས་རང་ལོག་པ་དང་། དགག་བསྒྲུབ་ཆགས་སྡང་དུ་རྟོག་པ་ཉོན་མོངས་པའི་ཡུལ་ལས་འདས་པ་དང་། དེའི་མཚན་ཉིད་ལ་འདི་ལྟར་ཡིན་ནོ་བའི་ངེས་ཤེས་རང་སའི་སྒྲིབ་པ་དང་བྲལ་བ་གསུམ་ཚང་ན་རྒྱལ་བས་གསུངས་པའི་སོ་སོར་རྟོག་པའི་ཤེས་རབ་དངོས་གནས་དེ་ཡིན་པ་རྗེས་ལ་ཐོབ་པའི་ཡེ་ཤེས་ཀྱི་མཚད་རིག་པ་ཡིན། ད་ལྟ་ལྟ་བའི་གནས་ཚུལ་གླེང་བ་རྣམས་གཟུགས་ལ་སོགས་པའི་དེར་འཛིན་རགས་པ་དང་བྲལ་ཡང་གཟུགས་སྟོང་ཡུལ་གྱི་རྣམ་པས་བློ་ལ་འདྲེས་ཤིང་། བློ་ཡུལ་
གྱི་ཆོས་ཉིད་ལ་རོ་མྱོང་བས་ངེས་ཤེས་ཀྱི་འཛིན་སྟངས་འདྲེས་པས་ལྟ་བ་མཆོག་འཛིན་གྱི་ཤེས་བྱའི་སྒྲིབ་པ་སྤང་དཀའ་བ་དང་འགྲོགས། གངས་རིའི་ཁྲོད་ན་བསམ་གྱིས་མི་ཁྱབ་པའི་ཡེ་ཤེས་ཀྱི་ལམ་ནས་དངོས་གྲུབ་བརྙེས་པའི་སྤོང་བ་བསམ་གཏན་པ་འཁྲུལ་མེད་ཀུན་གྱི་ལྟ་བ་ལོག་པའི་ལམ་དུ་སུན་དབྱུང་ནས་འཛིན་སྟངས་དང་མི་འགལ་བ་སོ་སོར་རྟོག་པའི་ཤེས་རབ་ཏུ་སྨྲ་བ་སྣང་སྟེ། རྒྱལ་བའི་ཡུམ་དང་། དེའི་དགོངས་པ་གང་དྲན་པ་མེད་ཅིང་ཡིད་ལ་བྱར་མེད་པའི་སོ་སོར་རྟོག་པའི་ཤེས་རབ་མཚན་ཉིད་གོམས་སྟོབས་ཀྱིས་མྱོང་བའི་རྒྱ་བོད་ཀྱི་རྣལ་འབྱོར་དབང་ཕྱུག་རྣམས་ཀྱིས་ལྟ་བ་ལས་ཕྱི་རོལ་ཏུ་གྱུར་པ་མ་ཡིན་ནོ། །དེ་དག་ཐོས་པའི་ཤེས་རབ་ལ་དཔྱད་པ་མ་ཞུགས་པའི་གླེན་པ་གོམས་པའི་བསམ་གཏན་ཡིན་སྙམ་ན། རྔོག་ལོ་ཆེན་པོའི་རིག་གྲར་ཤིང་རྟ་ཆེན་པོའི་གྲུབ་པའི་མཐའ་ལ་དོ་ཟླ་སྤངས་པའི་མཁྱེན་རབ་ཐོབ་ལ། བོད་དུ་གསར་བྱུང་གི་གྲུབ་པའི་མཐའ་དེ་དང་དེ་དག་ལའང་གློ་བ་ཤིན་ཏུ་བྱང་བའི་མཐར་དབེན་པ་འབའ་ཞིག་སྒོམ་བྱུང་གི་ཤེས་རབ་ལ་མྱོང་བ་བརྟན་ནས་ཡི་དམ་གྱི་ལྷ་ལས་ཀྱང་ལྟ་བ་མི་འཁྲུལ་བའི་དབུགས་འབྱིན་ཐོབ་པ་རྗེ་བཙུན་ཤནྟ་པུ་རི་པས། ཆོས་ཀུན་ཡེ་མེད་པའི་སྟོང་