སྐྱེས་པ་རབས་ཀྱི་རྒྱུད་སྙན་དངགས་དམ་པའི་འཁྲི་ཤིང་དུ་བསྔགས་པའི་པྲ་ནི་དྷ་མིའམ་ཅི་ཀུན་ཏུ་དགའ་བའི་ཟློས་གར།
སྐྱེས་པ་རབས་ཀྱི་རྒྱུད་སྙན་དངགས་དམ་པའི་འཁྲི་ཤིང་དུ་བསྔགས་པའི་པྲ་ནི་དྷ་མིའམ་ཅི་ཀུན་ཏུ་དགའ་བའི་ཟློས་གར་ཞེས་བྱ་བ་བཞུགས། །
རྒྱ་གར་སྐད་དུ། ཛཱ་ཧ་ཀ་མཱ་ལ་བི་ཨུཏྟ་མ་བ་ཏ་བལླཱི་བརྞྞི་ཏ་པྲ་ནི་དྷ་ཀེ་ཧྣ་ར་ཨ་ནནྟཎྜ་པ་ནཱ་མ། བོད་སྐད་དུ། སྐྱེས་པ་རབས་ཀྱི་རྒྱུད་སྙན་དངགས་དམ་པའི་འཁྲི་ཤིང་དུ་བསྔགས་པའི་པྲ་ནི་དྷ་མིའམ་ཅི་ཀུན་ཏུ་དགའ་བའི་ཟློས་གར་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཔལ་གྱི་ཡོན་ཏན་དམ་པའི་ལམ་མཆོག་ནི། །དམ་བཅའ་ཁྱད་པར་ཅན་དང་དོན་མཐུན་པ་ནི་གཞན་ལ་བསྟན་པའི་ལམ་དེ་ཉིད་ཀྱང་གནས་པའོ། །བར་པ་གཉིས་གོ་སླ་དོན་སྤྱོད་པ་ནི་གཞན་ཐབས་ཇི་ལྟ་
བུས་ལམ་ལ་འཛུད་པའི་ཐབས་དེ་ལ་བྱའོ། །མཐུན་གྱུར་ཅིང་། །སྦྱིན་དང་སྙན་སྨྲ་དོན་སྤྱོད་ཤེས་རབ་དང་། །སྙིང་རྗེས་རྒྱུད་བརླན་ཕ་རོལ་ཕྱིན་བཅུའི་དངོས། །སྐྱེ་རྒུ་གཞན་གྱིས་བདག་གིར་མ་བཟུང་བའི། །ཐུབ་པའི་བྱང་ཆུབ་སྤྱོད་པ་རྨད་བྱུང་བ། །གྲགས་པ་མ་ནོར་ཆོས་དང་ལྡན་པའི་གཏམ། །སྨོན་ལམ་མེ་ཏོག་སྙིམ་པས་གུས་པར་མཆོད། །རིགས་ཀྱི་སྤྱོད་པ་སྲུང་བའི་ཆོ་ག་ལ། །ཡིད་གཞུངས་ལེ་ལོ་ཕམ་པའི་བརྩོན་འགྲུས་ཀྱི། །དཔལ་ལ་སྒྱུ་རྩལ་རྣམས་དང་རིག་པའི་གནས། །ཤིན་ཏུ་ཆུབ་པར་ཆགས་ཀྱང་ཁྱིམ་ན་མིན། །ནགས་ལ་མངོན་པར་དགའ་
བའི་བྲམ་ཟེའི་སྔུན། །བཀྲེས་པའི་གདུང་བ་མི་བཟད་ཚོར་བ་ཡིས། །སྤྱོད་པ་ཤིན་ཏུ་ཉམས་པའི་སྟག་མོ་ནི། །རང་གི་བུ་ཡང་བཟའ་བར་རྩོམ་པ་ལ། །སྙིང་རྗེས་གཞན་དབང་དྲག་པོས་སྲོག་གཞར་བ། །སྟག་མོ་ལུས་སྦྱིན་ལྟ་བུར་བདག་འགྱུར་ཤོག ༡ །རྒན་ལ་བཀུར་ཞིང་འཇུངས་སྤངས་ཤིན་ཏུ་དུལ། །རིག་པ་དུ་མས་ཕྱུག་པའི་བློ་གྲོས་ཀྱིས། །མི་བདག་གཞན་གྱི་གྲགས་པ་འཕྲོག་པ་ཡང་། །ཕོངས་པ་རྣམས་ལ་སྙིང་རྗེས་ལྷག་པར་བལྟ། །གཏན་པ་མེད་པའི་མཆོད་སྦྱིན་ཁང་བུ་ནི། །གྲོང་ཁྱེར་ཆེན་པོའི་མུ་ཁྱུད་ལ་བསྐོར་ནས། །དགོས་དགུ་ཤིན་ཏུ་ཚང་པའི་ལོངས་སྤྱོད་ཆར། །དབུལ་པོའི་གདུང་བ་འཕྲོག་ལ་མངོན་ཆས་
ཀྱང་། །སྦྱིན་ལས་གཞན་པའི་མངོན་མཐོའི་ཚོང་ཟོང་ནི། །དེ་ལ་ཡོད་མིན་སྲོག་ཀྱང་སྤྲོ་བཞིན་བཏང་། །ཤི་བིའི་རྒྱལ་པོ་ལྟ་བུར་བདག་འགྱུར་ཤོག།༢ །སྤྲོ་དང་གསང་ཚིག་ནུས་པའི་ཆུ་གཏེར་གྱི། །རྒྱུད་ལ་ཁེངས་པའི་ལྦུ་ཕྲེང་བརྩིག་མ་ནུས། །སྐལ་བ་ཕུན་སུམ་ཚོགས་པའི་རྣམ་སྨིན་ཡང་། །རབ་ཏུ་དང་བའི་སེམས་དང་སྣོད་ཀྱི་ཁྱད། །ཚུལ་ཁྲིམས་རིན་ཐང་མེད་པའི་དགེ་སྦྱོང་བཞིར། །དང་ཞིང་འཇམ་པའི་ཡིད་ཀྱིས་ཕྱག་བྱས་ནས། །ཟན་དྲོན་ཆངས་གཅིག་བྱིན་པའི་འབྲས་བུ་ནི། །རྟ་དང་གླང་པོ་ཤིང་རྟ་དམག་ཚོགས་དང་། །ས་ཆེན་ནོར་མང་བཙུན་མོའི་འབྱོར་པ་ཅན། །དེ་དེས་བསོད་ནམས་མཆོག་ལ་སླར་གུས་པའི། །ཀུན་རྟོག་སེར་སྣའི་གཡུལ་ངོར་ཕམ་པ་མིན། །ཀོ་ས་ལ་ཡི་རྒྱལ་པོ་ལྟར་འགྱུར་ཤོག ༣ །དེས་ཤིང་སྤྱོད་ལམ་འཇམ་པའི་སྒྱུ་རྩལ་ནི། །གཞན་གྱི་ཁུར་དུ་མི་འགྲོ་བསྔགས་འོས་ཅན། །བདག་གི་འབྱོར་པ་གཞན་དང་ཐུན་མོང་པའི། །ཁྱིམ་ལ་འཇུངས་པའི་གཏན་པ་ཡོད་མི་སྲིད། །བདོག་པ་བསོད་ནམས་ཟོང་དུ་བསྒྱུར་བ་ལ། །ཡོངས་སུ་བསྔོ་བ་དམ་པ་གསེར་འགྱུར་རྩིའི། །རྣམ་པ་མཆོག་ལ་མཁས་པའི་རང་སངས་རྒྱས། །ཚོགས་ཀྱི་དམ་པར་སྤྱོད་ལ་བདུད་སྡིག་ཅན། །མ་བཟོད་འཁྲུགས་པའི་ཡིད་ཀྱིས་དེའི་སྒོ་དྲུང་། །
དམྱལ་མེ་འབར་བར་སྤྲུལ་ནས་གེགས་བྱས་ཀྱང་། །སྦྱིན་པའི་སླད་དུ་བདག་ཉིད་བརླག་ནུས་པ། །ཚོང་དཔོན་སྦྱིན་ལ་དཔའ་བཞིན་བདག་འགྱུར་ཤོག ༤།འབྱོར་པས་མཐོ་རིས་ཐོབ་པ་ག་ལ་ཞིག །སྦྱིན་པས་མངོན་མཐོའི་རྟེན་ལ་སྦྱོང་བྱེད་ན། །སྡུག་བསྔལ་གནོད་པ་དུ་མའི་གཞིར་གྱུར་པ། །ནོར་ནི་ཤིན་ཏུ་མི་བཟད་ངན་འགྲོའི་རྒྱུར། །ཤེས་རྣམས་སེར་སྣའི་ཉེས་པས་ཟིལ་མི་ནོན། །གང་ཞིག་དམ་བཅའ་འདི་ནི་བརྟན་ནམ་མིན། །ཉམས་སད་སླད་དུ་དབང་པོས་ཟོར་བ་དང་། །ཐག་པ་གཅིག་པའི་བརྟུལ་ཞུགས་ལ་བཞག་ཀྱང་། །རྩྭ་ཡི་རིན་ལས་སྦྱིན་པའི་སྙིང་སྟོབས་སྤེལ། །འདི་ན་སློང་བས་བླང་ཞེས་སྨྲས་པ་ལ། །དེ་ཡིས་མེད་ཅེས་སྨྲ་ནུས་ལྟ་ཞོག་གི། །ཕོངས་པས་ཁྱིམ་ནས་ཕྱུང་ལའང་རབ་ཏུ་དགའ། །ཚོང་དཔོན་ཟིལ་གྱིས་མི་ནོན་ལྟར་འགྱུར་ཤོག ༥ །ནགས་ཀྱི་ངོ་མཚར་རྫོགས་པའི་འབྲོག་དགོན་པ། །རྩྭ་ལྗང་ལྗོན་པས་བག་ཕེབས་བསྟེན་བྱས་དེར། །བྱང་ཆུབ་སེམས་དཔའ་ཆེན་པོའི་རི་བོང་ནི། །སྲམ་དང་ཅེ་སྤྱང་སྤྲེའུའི་འཁོར་གྱི་དབུས། །གཞན་ལ་བསྟེན་ནས་བདག་ཉིད་དོན་ཡོད་འདོད། །དེ་ཡི་བསམ་པའི་ཁྱད་པར་རྟོག་པ་ལ། །བརྒྱ་བྱིན་མིག་སྟོང་བགྲད་བཞིན་གྱུར་ཀྱང་སླར། །རྣམ་པར་འཁྱམས་པའི་བྲམ་ཟེའི་གཟུགས་ཀྱིས་སུ། །བཀྲེས་ཤིང་ཉམས་པའི་ཆོ་ངེ་འདོན་པ་དེར། །
མདག་མེའི་ཕུང་པོ་འབར་བའི་མེ་དཔུང་ཐང་། །སྐྱེད་མོས་ཚལ་ལྟར་བལྟས་ནས་འཇུག་བྱེད་ཅིང་། །ལུས་སྲོག་སྟེར་བའི་སྙིང་སྟོབས་རྗེས་འགྲོར་ཤོག ༦ །བྲམ་ཟེའི་རིགས་ལ་མཁས་པའི་ཡོན་ཏན་དང་། །འབྱོར་པའི་ཁྱད་པར་མ་ལུས་རྫོགས་བྱས་ཀྱང་། །ཁྱིམ་ན་གནས་པ་བྱ་བ་ངན་པས་བྲེལ། །གསོག་དང་སྲུང་དང་སྤེལ་བས་རྣམ་པར་དཀྲུགས། །གྲགས་པ་ངན་པའི་ཐང་ལ་འཁྱམས་གྱུར་པའི། །ཉེས་པ་ཤིན་ཏུ་མི་བཟད་མཐོང་ནས་དེ། །དཀའ་ཐུབ་ནགས་སུ་སྡོམ་པའི་ཡོན་ཏན་ཅན། །དེས་བསྐྱེད་བསོད་ནམས་མཐུ་ལ་དབང་པོ་ཡང་། །རང་གི་དཔལ་འབྱོར་འཕྲོག་པའི་དོགས་པས་སྐྲག །སྐྱེས་བུ་ཆེན་པོའི་རྣམ་ཐར་འཇིག་རྟེན་རྣམས། །སྐྱེ་རྒ་ན་འཆིའི་གྲོང་ལས་དབུགས་འབྱིན་སླད། །དཀའ་ཐུབ་ནགས་ནའང་དཔའ་དང་གཏོང་ཕོད་ཅན། །དྲང་སྲོང་ཨ་གསྟ་བཞིན་བདག་འགྱུར་ཤོག ༧ །གཞན་དག་གསོད་དང་མདངས་འཕྲོག་ལ་དགའ་བའི། །མ་རུངས་གནོད་སྦྱིན་ལྔ་ཡི་དཔའ་དང་མཐུ། །དེ་ཡི་མདུན་ན་ལྷག་པར་ཉམས་པ་ནི། །བདག་ཉིད་ཆེན་པོའི་མཐུ་ཡི་ཁྱད་པར་ཏེ། །གང་ལ་བདག་གི་ཡིན་པར་བློ་བཞག་པའི། །མོད་ལ་མངའ་རིས་བསྲུངས་
བའི་དཔལ་ཐོབ་པས། །གྲགས་པ་ཤིན་ཏུ་ཉམས་པའི་གནོད་སྦྱིན་རྣམས། །བྲམ་ཟེའི་ཟོལ་གྱིས་རྫི་བོར་སྐབས་འཚོལ་ཞིང་། །མི་བཟད་ཚོར་བས་གདུངས་བ་སྙིང་རྗེ་ཡིས། །སླར་ལ་བཟུང་ནས་གསེར་གྱི་ཁ་དོག་ལྟའི། །ལུས་ལས་ཁྲག་ཕྱུང་སྤུ་གྲིས་ཤ་བཅད་དེ། །གནོད་སྦྱིན་གདུག་པའི་སེམས་ཀྱང་ཞི་ནུས་པ། །རྒྱལ་པོ་བྱམས་པའི་སྟོབས་ལ་རྣམ་པར་སྨོན། ༨ །ཕོངས་པའི་གདུང་བ་རབ་བསིལ་སྦྱིན་པའི་ཆར། །འབེབས་པའི་བརྟེན་པ་ཕལ་ཆེར་འདིས་ཉམས་ནུས། །འགྲན་ཟླར་ཆས་པའི་མི་བདག་བསླུ་བ་མཁན། །བརྐམ་ཆགས་བློ་ཡིས་གླང་པོའི་མཆོག་སློང་བར། །འཁུན་པ་མེད་པར་བྱིན་པས་གཞན་དག་འཁྲུགས། །རྒྱལ་སྲིད་དཔལ་ལ་ཕབ་པའི་གྲགས་པ་ནི། །དེ་ལ་ངོ་མཚར་བ་དན་སྒྲེང་བ་བཞིན། །ཡིད་ལ་ཤིན་ཏུ་སྡུག་པའི་བུ་སྨད་ཀྱང་། །འདོད་པ་བྲལ་བ་མིན་བཞིན་བཏང་བྱས་པའི། །མྱ་ངན་མེ་ཆེན་རབ་ཏུ་འཁྲུགས་པས་སྙིང་། །བཙོས་པའི་རླངས་པས་ན་བུན་འཕྱུར་བ་ཡང་། །འགྱོད་དང་ལྡོག་པའི་བསམ་པས་འཆིང་མ་ནུས། །རྒྱལ་པོ་ཐམས་ཅད་སྒྲོལ་བཞིན་བདག་འགྱུར་ཤོག ༩ །གང་ཞིག་སྙིང་རྗེའི་བདག་ཉིད་ཅན་ རྣམས་ལ། །གསོད་པའི་ཆོ་ག་ཡིད་ཀྱི་ཚེར་
མ་སྟེ། །གྲུབ་མཐའ་ངན་པའི་རྒྱུ་འབྲས་ལ་ཞེན་རྣམས། །ཆར་བའི་སླད་དུ་སྲོག་གི་མཆོད་སྦྱིན་སེམས། །དབང་ཕྱུག་རྣམས་ཀྱི་ཐབས་ལ་མཁས་པའི་བློ། །བསྒྲིམས་པའི་བློ་ཆུང་རྣམས་ཀྱི་མཐའ་འཚལ་མིན། །སྐྱེས་བུ་སྟོང་གི་སྲོག་ལ་གཞར་བྱེད་པའི། །ཚིག་གིས་གཞན་དག་མགོ་བོ་རྨོངས་བྱས་ནས། །དོན་གྱིས་འཇིག་རྟེན་ཆོས་རབ་ལྡན་ལ་སྦྱར། །མི་འཇིགས་ནང་ནའང་སྲོག་གི་སྦྱིན་པ་ལས། །ཁྱད་པར་གྱུར་པ་ཐུབ་པའི་ལུགས་ལ་མེད། །སྡིག་པའི་གྲོགས་ཀྱིས་བསླུ་བར་མི་ཚུགས་པ། །མི་བདག་མཆོད་སྦྱིན་བྱེད་ལྟར་དེང་འགྱུར་ཤོག ༡༠ །རིང་ནས་བསོད་ནམས་སྤྱོད་ལ་གོམས་པའི་མཐུ། །དབང་ཕྱུག་ཕུན་སུམ་ཚོགས་པའི་གཟི་བྱིན་ནི། །ལྷ་མིན་སྙིང་ལ་དྲེགས་པའི་མཚོན་ཆར་ལྡང་། །འགྲོ་ལྡོག་ཤིན་ཏུ་གཡོ་བའི་དཔུང་ཚོགས་བཞིས། །ཕན་ཚུན་ཀུན་ནས་འཁྲུགས་པའི་གཡུལ་བསྲེ་ལ། །བྲག་ལྟར་འཇིག་པའི་གླང་ཆེན་འཐབ་པའི་རྡུལ། །དུས་མཐའི་རླུང་དང་འགྲོགས་ནས་ཆས་པ་བཞིན། །མྱུར་དུ་སྲོག་ལ་ཟ་བའི་སྐབས་མཐོང་ཡང་། །དེ་ཡིས་ལྷག་པའི་བསམ་པ་མཐུ་བརྟན་པས། །ཤིང་རྟས་གཞན་ལ་གནོད་པ་མེད་པར་འགྲོ། །བདག་ཉིད་ཆེ་རྣམས་རྒུད་དམ་ཕུན་ཚོགས་ཀྱང་། །རང་གི་ངང་
ཚུལ་ཉམས་ལ་སྤྲོ་མ་ཡིན། །མཆོད་སྦྱིན་བརྒྱ་པར་སྐྱེས་བཞིན་བདག་འགྱུར་ཤོག ༡༡ །འདོད་པའི་སླད་དུ་ངོ་ཚ་འདོར་བྱེད་པས། །རིགས་དང་ཡོན་ཏན་བདག་གིར་བཟུང་ནུས་མིན། །འདི་ན་རིག་བྱེད་མཆོག་ལ་མཁས་པ་ཡིས། །སློབ་མའི་ཚོགས་ལ་ཉམས་སད་ཆོ་ག་བཅས། །གྲགས་པ་བསྲུང་ཕྱིར་མངོན་དུ་གཞན་གྱི་ནོར། །དབྲོག་པ་མ་ཡིན་ལྐོག་ཏུ་བླང་བྱ་བ། །བྲམ་ཟེ་རྒུད་པའི་ཆོས་སུ་སྒྲོ་བཏགས་པས། །ཕལ་ཆེར་རིགས་པ་མིན་པའི་གཏམ་གྱིས་བསླུས། །སྐྱེས་བུ་མཆོག་གི་ངོ་ཚའི་ཡ་ལད་ལ། །བརྟན་པ་བྲལ་བའི་མཚོན་གྱི་དོ་ཟླ་མིན། །སྡིག་པ་གཞན་གྱིས་མ་མཐོང་སྤྱད་རུང་བའི། །རྒྱུ་འབྲས་ངན་པ་དམོད་པས་འདེབས་ལ་དཔའ། །བྲམ་ཟེ་ཆེན་པོའི་རྣམ་ཐར་གྱིས་བརྒྱན་ཤོག ༡༢ །ཕོ་བྲང་སླས་དེ་ན་ཆུང་བཟང་མོ་མཆོག ། མྱོས་བྱེད་མ་ཡི་ལང་ཚོའི་ཁྱད་པར་གྱིས། །དྲང་སྲོང་རྣམས་ལའང་དངོས་གྲུབ་གེགས་འགྱུར་ན། །མི་དབང་ཆགས་པའི་རྙིས་ལྟ་ཅིས་མི་འཛིན། །བརྟན་པ་མེད་པར་བྱས་པའི་སེམས་ཀྱི་གཟུགས། །དེ་ཡི་དབང་དུ་ཧ་ཅང་གྱུར་པ་ལས། །ཤུགས་རིང་འདོན་ཞིང་གླལ་པ་ལྟར་ཉམས་ཀྱང་། །ཁྱུ་མཆོག་འགྲོ་བ་དྲང་དམ་གཡོ་བའི་རྗེས། །དོགས་པ་མེད་པར་བ་གླང་གཞན་དག་རྒྱུ། །གང་ཕྱིར་འཇིག་རྟེན་དག་གི་བདེ་སྡུག་ནི། །རྒྱལ་པོའི་
སྤྱོད་ལ་ལྷག་པར་རག་ལས་པར། །མཐོང་ནས་བསྲན་ཐུབ་གོ་ཆས་སེམས་རབ་བསྲུངས། །མྱོས་བྱེད་མ་ཡི་རབས་ལ་དཔྱོད་གྱུར་ཅིག ༡༣ །ཆོས་ལ་གནས་ན་བདེན་པའི་ཚིག་འགྲུབ་ཅིང་། །དགེ་བའི་བཤེས་ལ་བསྟེན་པའི་ཁྱད་པར་ནི། །གཟུགས་སུ་མཆིས་པ་འདི་ན་དབང་པོར་གྱུར། །གྲུ་ཆེན་རླུང་གིས་ཐལ་བའི་རྒྱ་མཚོའི་མཐར། །ཚོང་པ་རྣམས་ཀྱི་སྲོག་ཀྱང་གཞན་དབང་ཅན། །རླབས་ཀྱི་ཕྲེང་བ་ཁྲོས་པ་གཤེད་མ་བཞིན། །གང་དུ་ཕྱིན་ན་སླར་ལ་མི་ལྡོག་པའི། །རྒྱ་མཚོའི་ཀློང་ནི་འཆི་བདག་ཁ་གདངས་བཞིན། །འཇིག་རྟེན་ཕ་རོལ་མཐོང་ཆོས་ལ་གནས་པས། །ཚེ་ཟད་མཐའ་དང་ཀུ་ཅོ་འགྲན་པ་ཡང་། །རྒས་ཤིང་དྲན་པ་ཉམས་པའི་དེད་དཔོན་གྱིས། །བདེན་ཚིག་གཅིག་གི་མཐུ་ཡིས་དབུགས་འབྱིན་བྱས། །ལེགས་པར་ཕ་རོལ་ཕྱིན་བཞིན་བདག་འགྱུར་ཤོག ༡༤ ། ངང་ངུར་ཤུག་ཏུ་འགྲོགས་པ་ཞི་བ་དང་། །པདྨའི་ཚལ་གྱི་བསྟེན་པའི་མཚོར་བཅས་ཉ། །དཔྱིད་ཀྱིས་དུས་ཚིགས་ཁྲོས་པས་བསྲེགས་པ་ལ། །ཉིན་མོའི་དཔལ་ཡང་སྐོམ་པས་གདུངས་བ་བཞིན། །གདོན་མི་ཟ་བར་སྲོག་དང་བཅས་པའི་ལུས། །གཡོ་བའི་ངང་ཚུལ་ཅན་འདི་མངོན་སུམ་དུ། །དགྲ་ཡིས་བཟའ་བར་མཐོང་ལ་རང་
གི་མིག །སྡུག་བསྔལ་ཚོར་བ་མྱོང་ལ་བསྐོས་པ་བཞིན། །འདི་ན་ཕོངས་པར་གྱུར་ཀྱང་གཞན་སྲོག་ལ། །གནོད་པ་སྤངས་པའི་བདེན་པའི་མཐུ་ཆེན་དེས། །ཕྱོགས་ཀྱི་ཐ་གྲུ་འཇལ་འདྲའི་ལྷོ་སྤྲིན་ཡང་། །ཆར་སྤྲིན་མུ་ཏིག་དྲ་བ་དཔྱངས་བཞིན་བོས། །ཉ་ཆེན་སྐྱེས་པའི་རབས་ལ་རྣམ་པར་སྨོན། ༡༥ །ནགས་ཚལ་མེ་ཡིས་འཚིག་པའི་ཐུག་ཆོམས་ལ། །གླང་པོའི་ཚོགས་ཀྱང་སྐྲག་ནས་འབྱེར་བྱེད་ཅིང་། །མེ་ལྕེ་གཡོ་བའི་ལག་པ་མཚོན་ཆ་ཅན། །སྲོག་ལ་ཟ་བའི་ཟློས་གར་བསྒྱུར་བ་བཞིན། །བྱ་རོག་ལྟ་བུར་ཐམས་ཅད་བཟའ་བའི་སྤུན། །ལུས་ཉམས་བརྟས་པ་འཇིགས་ཤིང་རྟབས་པར་འཕུར། །འཚོ་བ་ཉོན་མོངས་མ་ཡིན་དགེ་སྡིག་དང་། །ངོ་ཚ་ཤེས་པ་ལང་ཚོའི་དགྲར་གྱུར་ནས། །ཤིན་ཏུ་རིད་ཅིང་འདོང་བའི་སྟོབས་ཉམས་ཀྱང་། །བདེན་པའི་ཚིག་ནི་བསླུ་བ་མེད་པ་ལ། །མེ་སྟག་འཕྲོ་བ་རླུང་གི་བཞོན་པ་ཅན། །ཐལ་མོ་སྦྱར་ནས་འབྲོས་པའི་གོ་སྐབས་བཙལ། །འདབ་ཆགས་སྲེག་པར་སྐྱེས་བཞིན་བདེན་འགྲུབ་ཤོག ༡༦ །གང་གིས་འཐུངས་པས་ལྟ་དང་ཚུལ་ཁྲིམས་ཉམས། །བྱ་བ་མ་ཡིན་གནས་ལ་དགའ་བཞིན་འཇུག །ཆེན་པོར་གྱུར་དང་འབྱོར་པས་བརྒྱན་པ་ཡང་། །བརླག་པར་བྱེད་ལ་ཆང་གིས་དོ་ཟླར་
མིན། །འདི་ན་བཤེས་གཉེན་ངན་པས་བསླད་གྱུར་པའི། །མི་བདག་ཐམས་ཅད་མཛའ་བོ་བློ་འབངས་རྣམས། །གྲགས་པ་ངན་པའི་ཆང་གིས་མྱོས་མཐོང་ནས། །བཞིན་བཟང་ལག་ན་མྱོས་བྱེད་བུམ་པ་ཅན། །འཇིག་རྟེན་དག་ན་ཚོང་ཟོང་ངན་ཡང་རུང་། །དེ་ལ་ཡོན་ཏན་བརྗོད་པས་སླུར་བྱེད་ཀྱང་། །རྫུན་དུ་སྨྲ་བས་འཇིགས་དང་ལྷག་བསམ་ཅན། །ཉེས་པ་འཆབ་པར་མི་བྱེད་ལྡོག་ལ་བརྩོན། །བརྒྱ་བྱིན་བུམ་པའི་རབས་བཞིན་གཞན་ཕན་ཤོག ༡༧ །གང་དག་རིགས་གཟུགས་འབྱོར་པའི་ཁྱད་པར་དང་། །བློ་གྲོས་གསལ་ཞིང་སྒྱུ་རྩལ་རྫོགས་པ་ལ། །འཇིག་རྟེན་འདི་ན་སྨོན་པའི་ཡུལ་གྱུར་ཀྱང་། །གྲོང་ཁྱེར་ལ་སྤྱོད་ཁེངས་པས་ཉོན་མོངས་ཤིང་། །སྲིད་པས་སྡུག་བསྔལ་འཇུངས་པས་རྣམ་པར་ཉམས། །ཚུལ་ཁྲིམས་ལྡན་པའང་མོད་ལ་དོན་མེད་བྱེད། །རྒྱགས་དང་ང་རྒྱལ་དྲེགས་པའི་ལྕགས་སྒྲོག་ཅན། །འཕགས་པ་རྣམས་ཀྱིས་སྨད་པའི་ལམ་དུ་འཇུག །དཀའ་ཐུབ་ནགས་ན་ཚོང་དང་སོ་ནམ་མེད། །འདུ་འཛི་མ་ཡིན་བྱིས་པའི་གྲོགས་དང་བྲལ། །རྣམ་པར་གྲོལ་བའི་ཁྱད་པར་ཤེས་ནས་དེའི། །དམ་བཅའ་སུས་ཀྱང་ལྡོག་པར་མི་ནུས་པ། །རྒྱལ་རིགས་འབྱོར་པས་བརྒྱན་བཞིན་བརྟན་ལ་སྨོན། ༡༨ །འཇིག་རྟེན་དག་
ན་བཅིང་ཞིང་གསོད་དང་བརྡེག །རྒྱལ་པོའི་དཔལ་ཉམས་མཛའ་བོ་རྣམས་དང་ཁོན། །ཆོས་ལས་ཉམས་ཤིང་ཕྱི་མར་སྡུག་བསྔལ་བའི། །རྒྱུ་ནི་འདོད་པའི་ཉེས་དམིགས་ཁོ་ན་སྟེ། །དེ་ཡང་ཁྱིམ་དང་རྟེན་ཅིང་འབྲེལ་འབྱུང་ཅན། །བས་མཐའི་ནགས་ནི་ཞི་བའི་གྲོང་ཁྱེར་མཆོག །གང་ལ་སྤྲོ་བས་སྦྲོན་པའི་མཆེད་ཟླར་བཅས། །པདྨའི་རྩ་བས་འཚོ་བའང་བརྒྱ་བྱིན་གྱིས། །ཉིན་བཞིན་ཕྲི་བས་རྒུད་པའི་མཐར་ལྷུང་ཡང་། །ཡིད་ལ་འཁྲུགས་པ་སྟེར་བའི་གནས་སྐབས་ནི། །སྲོག་གི་ཕྱིར་ཡང་དེ་ལ་ཡོད་མིན་ན། །མ་བྱིན་བླངས་ལ་ཁྲོ་བ་ལྟ་ཅི་སྨོས། །བྲམ་ཟེ་དཀའ་ཐུབ་ཅན་བཞིན་བདག་འགྱུར་ཤོག ༡༩ །བསྔགས་པར་འོས་པའི་ཡོན་ཏན་གྱིས་བཏང་བའི། །སྒྲོ་བཏགས་གཏམ་གྱི་ལྕགས་ཀྱུས་བློ་མཆོག་རྣམས། །ཁེངས་པར་མི་ནུས་གོ་འཕང་དེ་ལ་སྦྱོར། །ཁྱིམ་བདག་རིན་ཆེན་ལྟ་བུའི་ཚོང་དཔོན་ནི། །རྒྱལ་པོའི་ཕོ་བྲང་དོང་ལ་མཆིས་བྲང་དང་། །སྒྱུག་མོ་དོགས་པས་བསླུས་པའི་གཏམ་གྱི་འཛུམ། །འདི་ཡི་བསོད་ནམས་གཟུགས་སུ་གྱུར་ལ་ལྟོས། །ཁྱིམ་ནས་རྙེད་པར་མི་འགྱུར་ཚུལ་ཁྲིམས་ནོར། །རང་གིས་དབང་དུ་བྱས་པའི་གྲགས་པ་ཡང་། །གཞན་དག་བདག་ལ་བསྐུལ་བ་ལྟར་མཐོང་ནས། །གདོན་མི་ཟ་བར་རབ་ཏུ་འབྱུང་བའི་སེམས། །བཙན་
པོའི་མཐུས་ཀྱང་བརྫི་བར་ནུས་མ་ཡིན། །ཆོ་རིགས་བཙུན་པའི་ཚོང་དཔོན་ལྟར་འགྱུར་ཤོག ༢༠ །གང་གིས་བཞིན་རས་མཛེས་པའང་ཉམས་འགྱུར་ལ། །སྙིང་ཡང་མེར་འབར་ཟུག་རྔུའི་ཐག་པས་འཆིང་། །གཡང་ས་ཆེ་དང་ངན་འགྲོའི་ལམ་ངན་ལ། །སྤྲོ་བཞིན་འཇུག་པ་འདི་ནི་ཁྲོ་བའི་སྐྱོན། །ཁྱིམ་ནི་གཙུབ་ཤིང་གཙུབས་པའི་མེ་དཔུང་བཞིན། །ནགས་ཚལ་སྟུག་པོ་ཆུ་སྐྱེས་གེ་སར་ཅན། །བུང་བ་མྱོས་པའི་ཚོགས་དང་ལྷན་ཅིག་པར། །ཁྱོ་ཤུག་ཆགས་བྲལ་བརྟུལ་ཞུགས་ལ་གནས་པའི། །བཟང་མོའི་ཉེས་སྤྱོད་སྡོམ་པའི་བག་མ་ནི། །གློ་བུར་ལྷག་པའི་མི་བདག་མཐུས་བཅོམ་ཡང་། །ཁྲོ་བ་ཐུལ་ལ་དོ་ཟླ་རྙེད་མིན་ན། །སེམས་འཁྲུགས་གོ་སྐབས་སུ་ཡིས་བཙལ་བར་ནུས། །གཙུག་ཕུད་བྱང་ཆུབ་རབས་བཞིན་བདག་འགྱུར་ཤོག ༢༡ །བདག་ཉིད་ཆེ་རྣམས་མི་ཁོམ་གནས་སུ་ཡང་། །སྙན་པར་སྨྲ་དང་དམ་པའི་ངང་ཚུལ་ལས། །འདའ་བ་མ་ཡིན་དེ་ཡི་དཔལ་དང་གཟུགས། །ཡུལ་འཁོར་སྲུང་དང་སྡེ་དཔོན་བཞིན་བཟང་ལྟར། །ཡིད་བཞིན་མཚོ་ཡི་ལོངས་སྤྱོད་ཁྱད་པར་ལ། །འགྲན་ཟླ་རྫུས་པ་ལས་ཀྱང་ལྷག་པའི་མཚོར། །དོགས་པས་སྐྲག་པ་མིན་པ་ངང་པའི་རྒྱལ། །རྙི་ཡི་གདུ་བུས་འཁྱུད་པའི་རྐང་པ་དང་། །
དེ་ལ་བྱམས་པས་བཅིངས་པའི་ཞགས་པའི་མཐུ། །བགྲོད་པ་ཅིག་ཆར་འགོག་ལ་མཉམ་པ་ནི། །མཛའ་བཤེས་ཉམས་ཀྱིས་དོགས་པའི་ཁྲེལ་གཞུང་དང་། །སྐྱེས་བུ་ཆེན་པོའི་རྣམ་ཐར་འགྲན་ལས་བྱུང་། །ངང་པར་སྐྱེས་པའི་རབས་ལ་མཆོག་ཏུ་སྨོན། ༢༢ ། བཅོས་མའི་རིག་པས་བཀུར་སྟི་ཐོབ་པ་རྣམས། །ཕྲག་དོག་མེ་ཡིས་ཡོན་ཏན་ལྡན་ལ་བསྲེག །ཆོས་ལ་གཏམ་དུ་བྱ་བའི་ཀུན་ཏུ་རྒྱུ། །སྐྱེད་མོས་ཚལ་དུ་རྒྱལ་པོས་བསྙེན་པ་གང་། །བློན་པོའི་དབྱེན་གྱི་རིམ་གྲོ་ཉམས་བྱས་པས། །ནགས་ཚལ་མེ་ཏོག་བརྒྱན་པའི་ཀུན་དགའ་རར། །བསམ་གཏན་བཞི་དང་མངོན་ཤེས་ལྔ་ཡང་ཐོབ། །བདག་ཉིད་ཆེ་ལ་སྔོན་ཆད་ཕན་བཏགས་ཤིང་། །ཕྱི་ནས་གཡེལ་བྱས་དོན་མེད་མ་ཡིན་ཏེ། །ཆོས་ལས་ཉམས་ཤིང་གཡོ་དང་དགྲ་ཐབས་དང་། །འཇིག་ཚོགས་ལྟ་བས་བསླད་པའི་མི་དབང་ཡང་། །བྱས་པ་མི་གཟོར་མེད་པའི་དྲིན་གྱིས་བསྐྱངས། །བྱང་ཆུབ་ཆེན་པོར་སྐྱེས་པའི་རབས་བཞིན་ཤོག ༢༣ །གང་འགྲོའི་ཕྱོགས་བསླད་ལམ་སྟོར་འཁྱམས་པའི་མི། །འཆི་བདག་ཁ་དང་འདྲ་བའི་གཅོང་རོང་དུ། །ལྗོན་ཤིང་རྩེ་ལས་ལྷུངས་དེ་བརྟན་བྱས་པ། །བྱང་ཆུབ་སེམས་དཔའ་སྤྲེའུའི་སྙིང་སྟོབས་ལ། །ས་འདི་རི་དབང་ནགས་ཚལ་བཅས་པ་ཡང་། །དངོས་སམ་
རྫུ་འཕྲུལ་འཕྱང་མོ་ཉུག་ལ་བྲེལ། །ཕན་བཏགས་ལན་དུ་གནོད་པ་འདུ་བྱེད་པ། །དེ་ལ་དཀོན་ཅོག་ཁྲེལ་ལྟ་སྨོས་ཅི་དགོས། །ཡན་ལག་མཆོག་ལ་བསྣུན་པའི་རྡོ་བ་ཡང་། །ཁྲེལ་བས་གཉིད་ལས་སློང་བའི་ཕོ་ཉར་བྱས། །སྐྱེས་བུ་ཆེན་པོ་གཞན་གྱི་དགེ་བའི་མཐུ། །ཉམས་པས་རབ་གདུངས་བདག་ཉིད་སྡུག་བསྔལ་བ། །བུར་དུ་མི་ཕྱེད་སྤྲེའུའི་རབས་ལ་སྨོན། ༢༤ །གང་ཞིག་སྙིང་རྗེས་སྒྱུ་རྩལ་ལ་གོམས་པའི། །བགྲོད་པ་འགོག་པ་བློ་ངན་དོ་ཟླར་མིན། །ངེས་པར་སྲོག་ལ་ཟ་བའི་གཅོང་རོང་ཡང་། །བྱམས་པའི་གོམ་པ་གཅིག་གིས་བདེ་བླག་བགྲོད། །འཕོང་སྐྱེན་རི་དྭགས་ལུས་ལས་ང་འདོད་པའི། །མི་དབང་བཞོན་པ་རླུང་གིས་བགྲོད་པ་ཅན། །ལྷ་མིན་གཡུལ་ངོར་ཕམ་པའི་ལག་ཆ་བཞིན། །ངམ་གྲོག་གཏིང་ན་བསྣད་པའི་ཚོར་བས་ཉམས། །བདག་ཉིད་གསོད་ལ་དགྲ་རུ་འདུ་ཤེས་པ། །སེམས་དཔའ་ཆེན་པོའི་རྣམ་ཐར་མ་ཡིན་པས། །ད་དུང་གཞན་གྱི་སྡུག་བསྔལ་ཁུར་བཟོད་བློ། །གོར་མའི་ལྕིད་ལ་སྟ་གོན་རྩོམ་པས་བྲེལ། །རི་དྭགས་ཤ་ར་བྷ་ལྟར་བདག་འགྱུར་ཤོག ༢༥ །འདོད་ཆེན་དགྲ་ཡིས་དབང་དུ་གྱུར་པ་ཙམ། །ཤིན་ཏུ་འཁྲུགས་པའི་གཡུལ་ངོ་ན་ཡང་མིན། །གྲགས་པ་ཉམས་པས་ཚེ་འདི་མ་རུངས་གྱུར། །བསོད་ནམས་
ཉམས་པས་ཕྱི་མ་བརླག་པ་བཞིན། །འབབ་ཆུ་དྲག་པོར་སྲོག་ལ་སྐྱབས་སྦྱིན་པའི། །དྲིན་དང་བརྐམ་ཆགས་བློ་གཉིས་བར་མ་དོར། །རེ་ཞིག་འཁྱམས་པའང་འདོད་པས་དབྱེན་བཅོས་ཏེ། །བྱས་པ་མི་གཟོ་རྔོན་པའི་ས་མཁན་གྱུར། །བདེན་པར་སྨྲ་ལ་མཚོན་ཆ་ཡོད་མིན་ཏེ། །མ་རབས་ལག་པ་སྤུ་གྲིས་བཅད་པ་ལྟའི། །རྒྱུ་ལས་གཏམ་རྒྱུད་བརྗོད་པ་འཕྲོད་པའི་རྔོན། །ཁྲེལ་བདས་ཉག་ཕྲན་གྲོང་དུ་འཛུད་པའི་བར། །བདག་ལུས་རྡུལ་དུ་བརླག་ལ་རིངས་པ་བཞིན། །རི་དྭགས་རུ་རུར་སྐྱེས་བཞིན་བདག་འགྱུར་ཤོག ༢༦ །སྙིང་རྗེའི་གཟུགས་ནི་གང་དུའང་མི་འཕོ་བས། །དགྲ་ཡང་དགར་འགྱུར་དེ་ཡི་ངོ་བོ་ཉིད། །འཇིག་རྟེན་དག་ན་ཕུན་སུམ་ཚོགས་པའི་དཔལ། །ཕལ་ཆེར་བདེ་བ་འཇོམས་པའི་ཕོ་ཉ་སྟེ། །ནྱ་གྲོ་དྷའི་འབྲས་བུ་གཅིག་ཅིག་གིས། །རྒྱལ་པོའི་དཔུང་ཚོགས་བོས་པའི་སྤྲེའུའི་ཚོགས། །སྦ་ཡི་འཁྲི་ཤིང་སྟེང་ནས་དབུགས་འབྱིན་སླད། །མཆོངས་པ་གཅིག་གིས་གཞལ་བྱ་མ་ཡིན་པར། །འཇིག་རྟེན་ཕ་རོལ་ཉིད་ལ་སྐབས་བཙལ་བའི། །འབད་པ་དྲག་པོའི་མཐུ་ནི་ཟམ་པ་བཞིན། །སྟོན་པས་གཞན་གྱི་དོན་ལ་བརྩོན་པ་ཙམ། །སེམས་ཅན་རྣམས་ཀྱི་རང་དོན་བསྒྲུབ་ནུས་མིན། །སྤྲེའུའི་རྒྱལ་པོར་སྐྱེས་བཞིན་བདག་འགྱུར་
ཤོག ༢༧ །བཞིན་རས་གསལ་བར་བྱེད་པའི་རྣ་ཆ་དང་། །ཅོད་པན་མཛེས་པའི་ཁྱིམ་ཐབ་ཀྱིས་བཟུང་བའི། །འཕྱར་ཞིང་འཆོས་པ་བཟང་མོའི་སྒྱུ་མ་ཡང་། །དུལ་ཞིང་བཟོད་པའི་རྒྱུན་གྱི་གཞན་དབང་སོང་། །འདོད་པའི་ལྕགས་ཀྱུས་ཤིན་ཏུ་ཉམས་བྱས་ཤིང་། །ཕྲག་དོག་ལུས་སྟོབས་བརྟས་པའི་རྒྱལ་པོ་ཡིས། །དྲང་སྲོང་མཆོག་ལ་སྐུར་བའི་དམག་ཚོགས་དང་། །རལ་གྲི་རྣོན་པོས་ཡན་ལག་བཅད་གྱུར་ཀྱང་། །དེ་ཡི་བཟོད་པའི་གོ་ཆ་བརྟན་པོའི་ལུས། །གྲགས་པ་མཆོག་གི་ཡན་ལག་དང་འགྲོགས་ཤིང་། །དགེ་དང་ཞི་བའི་སྲོག་གིས་བསྟེན་བྱས་པས། །ད་དུང་དགྲ་བོ་ཉམས་ཀྱིས་དོགས་པས་སྐྲག །དྲང་སྲོང་བཟོད་པར་སྨྲ་བཞིན་བདག་འགྱུར་ཤོག ༢༨ །ཁ་ན་མ་ཐོའི་ནང་ན་མཐུ་ཆེ་བ། །ལོག་པར་ལྟ་ལ་ཞེན་པ་ལམ་གང་ལས། །ལྡོག་པའི་བརྟུལ་ཞུགས་མཆོག་ལ་མ་གནས་པ། །དེ་སྲིད་སེམས་དཔའ་ཆེ་ལ་བདེ་མི་ཐོབ། །འཇིག་རྟེན་ཕ་རོལ་མེད་པའི་གཏན་ཚིགས་ལ། །སྤྲོ་ཞིང་འཇུག་པའི་རྒྱལ་པོ་ཡན་ལག་མེད། །འབར་ཞིང་གསལ་བའི་གཟི་བྱིན་མཐུས་གནོན་ལ། །ཚངས་པའི་འཇིག་རྟེན་ཉིད་ནས་སྐབས་བཙལ་བཞིན། །མངོན་སུམ་རྟགས་སུ་བཀོད་པའི་ཚད་མས་ཀྱང་། །རྟག་ཆད་གྲུབ་མཐའ་འཇིག་
པར་ཉམས་མི་བདེ། །སྤྱི་བརྟོལ་ལྟ་བ་ངན་པའི་ཚིག་གི་ཚོགས། །དམྱལ་མེའི་གཏམ་གྱི་གཡུལ་ངོར་རབ་ཏུ་ཕམ། །ཚངས་པའི་འཇིག་རྟེན་སྐྱེས་བཞིན་བདག་འགྱུར་ཤོག ༢༩ །མྱ་ངམ་དགོན་པ་ཐ་གྲུ་མི་མངོན་པར། །རྒྱལ་པོས་བསྐྲད་པའི་སྐྱེ་བོ་བརྒྱ་ཕྲག་བདུན། །མཆི་མས་གདོང་བཀྲུ་སྨྲེ་སྔགས་འདོན་པའི་སྒྲས། །བྱམས་པའི་བདག་པོ་རྣམས་ལ་བོས་པ་བཞིན། །ལྕགས་ཀྱུས་མ་ཡིན་སྙིང་རྗེའི་ཁ་ལོ་པས། །རིངས་པར་རིངས་པར་བསྐུལ་བའི་གླང་པོ་མཆོག །མ་འཇིགས་མ་འཇིགས་སྒྲ་ཡིས་དབུགས་འབྱིན་ནོ། །གངས་རིའི་རྩེ་མོས་གོམ་པ་དོར་བར་རྫུ། །འཇིགས་པ་ཆེ་ལས་སྐྱོབས་ལྟ་སྨོས་ཅི་དགོས། །དེ་ཡིས་ལུས་ཀྱང་གངས་ལྡན་དབང་པོ་ཡི། །སྟེང་གཡོགས་ལྷུང་ལྟར་གཡང་ས་ཆེར་བཏང་བའི། །སྙིང་སྟོབས་མཆོག་ལ་ས་ཡང་སྐྲག་ནས་འདར། །གླང་ཆེན་སྐྱེས་པའི་རབས་ལྟར་བདག་འགྱུར་ཤོག ༣༠ །སྙིང་ལ་མེ་ཏོག་གཞུ་ཡི་འཁྲི་ཤིང་ཅན། །སྡིག་ཏོའི་གདོང་ནི་ཁྲོ་གཉེར་རབ་ཏུ་ལྡོན། །སུ་དཱ་སའི་བུ་ཤ་ཟ་གཏུམ་པོའི་མཐུར། །རྒྱལ་པོའི་དཔུང་ཡང་བརྟན་པ་བྲལ་ནས་བྱེར། །དམ་པ་རྣམས་དང་ཕྲད་པའི་ཁྱད་པར་དང་། །བདེན་པའི་ཚིག་ལ་བསྲུང་བའི་གཞུ་བདུངས་ན། །གཅན་གཟན་ཁྲོ་བོའི་མཐུས་ཀྱང་མི་མཚོན་པའི། །
སྡིག་སེམས་རྩུབ་མོའི་སྙིང་ཡང་ཞི་བར་བཀས། །ཐོས་ལ་བརྟེན་དང་ཆོས་ཀྱི་གཟི་བྱིན་གྱིས། །དེ་ཡི་སྡིག་པ་རབ་ཏུ་ཉམས་བྱས་པས། །རྒྱལ་རིགས་བརྒྱ་ཕྲག་གཅིག་ཏུ་ལྡང་བའི་བུ། །མཆོད་སྦྱིན་སླད་དུ་བཙོན་རར་བཅིངས་པའང་བཏང་། །རྒྱལ་བུ་ཟླ་བའི་སྙིང་སྟོབས་རྗེས་འགྲོར་ཤོག ༣༡ །མཐོ་རིས་བུ་མོས་སྤྲུལ་པའི་སྐྱེད་ཚལ་དུ། །ཤིང་རྟ་མཆོག་ལ་བརྟེན་ནས་འགྲོ་འགྱུར་ཅིང་། །བཟང་མོ་སྟོང་གིས་བསྙེན་བཀུར་སྟོབ་པ་ཡང་། །རྒ་ཤིས་ཉམས་བྱས་ཕ་རོལ་འགྲོ་བ་ཡིན། །གླང་ཆེན་མྱོས་པས་མཁར་གྱི་རྟ་བབས་དང་། །དཔུང་ཚོགས་ཡན་ལག་བཞི་ཡང་ཕམ་ནུས་ལ། །བསྙེམས་པས་གད་པ་ཆེན་པོའི་ངོས་འདྲལ་བའི། །སྟོབས་ཀྱིས་འཆི་བདག་དགྲ་བོ་ཕམ་མ་ནུས། །དེ་ཕྱིར་ལྷ་ཡི་འབྱོར་པས་མངོན་མཐོ་ཡང་། །རྒྱལ་སྲིད་རང་བཞིན་གཡོ་ཞིང་མི་བརྟན་པར། །སྐྱོ་བའི་གཏམ་ནི་རླུང་གི་སྤུ་གྲི་ལྟས། །གཞན་དག་དབུགས་འབྱིན་བདག་ཀྱང་ནགས་སུ་འགྲོ། །ལྕགས་ཀྱི་ཁྱིམ་ན་སྐྱེས་པའི་རབས་ལ་སྨོན། ༣༢ །རྭ་རྩེས་རྡོ་རྗེའི་མཐུ་ཡང་སྤ་བཀོང་ལ། །ཡན་ལག་འཕྲས་པ་བྲག་ལ་འདམ་རྫབ་བཞིན། །བྲག་རི་བགྲོད་པ་རྩོམ་ལྟའི་མ་ཧེ་ལ། །ཉམ་ཆུང་སྤྲེའུས་རྒོལ་འདི་བྱམས་པའི་
མཐུ། །དེ་ལ་སྙིང་རྗེས་ཡུན་རིང་འདྲིས་བྱས་པས། །ཁྲོ་ཞིང་འཁྲུག་པ་མེད་པའི་སྐབས་རྙེད་ནས། །མི་བསྲུན་གནོད་པ་སྣ་ཚོགས་འདུ་བྱེད་ལ། །གནོད་སྦྱིན་དག་ཀྱང་ཁྲེལ་ནས་གཟུགས་སྟོན་གྱུར། །འདི་ན་ལང་ཚོ་ཡོལ་བའི་བྱིས་པ་རྣམས། །གཡོ་སྒྱུ་མ་བྱིན་ལེན་པ་ཁེ་རུ་སྨྲ། །གང་ན་གནོད་པ་ཡོད་ན་དེ་ཉིད་ལ། །བརྟེན་ནས་བཟོད་པའི་ཁེ་འཚོལ་དམ་པའི་ལུགས། །མ་ཧེར་སྐྱེས་པའི་རབས་ལྟར་བཟོད་ཐོབ་ཤོག ༣༣ །གླང་པོའི་སྤྱི་བོ་འདྲད་པའི་སེང་གེ་ཡང་། །རལ་པས་རྡུལ་འཆག་ས་ལ་འགྲེ་བྱས་ནས། །བསྙེམས་པའི་བརྟུལ་ཞུགས་འདོར་ལ་རིངས་པ་ནི། །རུས་པའི་ཆ་ཤས་ཙམ་གྱི་དགྲ་བོའི་མཐུ། །དེ་ཡི་གྲེ་བར་འཇུག་པའི་ཤིང་རྟ་མོ། །ཟུག་རྔུ་དབྱུང་ལ་མཁས་པའི་ངང་ཚུལ་ནི། །ཤེས་རབ་རྣོན་པོས་བསྒྲིམས་པའི་མཐུ་མ་ཡིན། །རིང་ནས་འདྲིས་པའི་སྙིང་རྗེའི་མཁྱུད་དཔྱད་ཡིན། །རང་བཞིན་ངན་དང་ཁྲོ་ཆགས་སེར་སྣའི་སྐྱོན། །སེམས་ཅན་རྣམས་ཀྱི་ཆོས་ཉིད་ལ་གནས་ཕྱིར། །བྱས་པ་མི་གཟོད་ཁྲེལ་བདས་སྐུར་བཏབ་ཀྱང་། །མ་གོམས་ཕྱིར་ན་ཁྲོ་བ་འཛིན་མི་ནུས། །འདབ་ཆགས་ཤིང་རྟ་མོ་བཞིན་བདག་འགྱུར་ཤོག ༣༤ །འཆར་ཀའི་དུས་མཚམས་
གསར་པས་བཙོས་པ་ལྟའི། །ངུར་སྨྲིག་གོས་ལ་སྲོག་ལས་ལྷག་བལྟ་རྣམས། །དྲང་སྲོང་རྒྱལ་མཚན་རྔོན་པས་བརྫུར་བྱས་ཀྱང་། །གུས་པ་མི་ལྷོད་བདག་ཉིད་ཆེན་པོའི་མཐུ། །གཏམ་ངན་གོས་སུ་གྱོན་པའི་མ་རབས་མིག །ཕྱི་མའི་གནས་རིགས་བལྟ་ལ་ལྡོངས་གྱུར་པས། །བསོད་ནམས་ཕུང་པོར་སྤུངས་པའི་སེང་གེའི་སྲོག །དུག་མདས་ཅིག་ཆར་འཕྲོག་འདི་སྨད་པའི་གནས། །དེ་ཡི་བྱང་ཆུབ་སེམས་ཀྱི་ཁྱད་ཆོས་ནི། །པགས་པ་གསེར་གྱི་མདོག་དང་འདའ་ཀའི་ཚེག །མ་རུངས་འདོད་པ་གཞན་དུ་བྱེད་པ་ལ། །ལས་དང་དེ་ཡི་འབྲས་བུས་བསྐོས་པ་ཡིན། །སེངྒེའི་རྒྱལ་པོ་ཡི་དམ་བརྟན་བཞིན་སྨོན། ༣༥ །འདི་ན་འགྱུར་པའི་སྡུག་བསྔལ་བལྟ་འདོད་རྣམས། །ཚོང་པར་བསྙེམས་ནས་རྒྱ་མཚོར་གཟིངས་སུ་འཇུག །སྟང་ཟིལ་བཅག་པའི་དུམ་བུ་ཁོལ་བ་ལྟའི། །སྤྲིན་གྱི་ཕང་ནས་ལྷུང་བའི་ཐོག་སེར་དང་། །རབ་ཏུ་ཁྲོས་པའི་རླུང་དང་འཐབས་པའི་རླབས། །ལྕགས་ཀྱིས་འཁྱུད་མོས་བསྡམས་པའི་གྲུ་གཟིངས་ལ། །ཁོན་དུ་འཛིན་པ་མེད་བཞིན་བཤིག་པའི་སྒྲ། །གནམ་ས་གྲུམ་པའི་འོ་དོད་འབོད་པ་བཞིན། །སྲོག་ལས་ཕོངས་པའི་ཁྱད་ནོར་རྒྱ་མཚོར་མིན། །
འཇིག་རྟེན་ཕ་རོལ་ཅ་ཅོས་འབོད་པ་ལ། །སྤུ་གྲི་རྣོན་པོས་རང་གི་སྲོག་བྱིན་ནས། །ཕུང་པོའི་གྲུ་ཡིས་གཞན་དག་དབུགས་འབྱིན་བརྩོན། །དེད་དཔོན་བརྩོན་འགྲུས་ཆེན་པོ་ལྟར་འགྱུར་ཤོག ༣༦ །ལྷ་དག་བག་མེད་འཁྲི་ཤིང་རྩེར་སོན་ན། །སྦྲུལ་ནག་ལྕེ་མང་བསྐྱོད་འདྲའི་ཆར་སྤྲིན་དང་། །བཤེས་པ་མ་ཡིན་དགེ་བཅུས་བཀབ་པའི་ཡུལ། །ལོ་ཏོག་གསར་པའི་རྣ་ཆས་འདོར་བ་ཡིན། །འཛམ་བུའི་གླིང་གི་བཟའ་བའི་དངོས་པོ་ཀུན། །བརྩོན་འགྲུས་མཐུ་ཡིས་བསྡུས་ཤིང་བསྲི་བས་ཀྱང་། །མུ་གེའི་གདུང་བ་འཕྲོག་པར་མ་ནུས་པ། །བསོད་སྙོམས་གཅིག་གི་འབྲས་བུས་དབུགས་འབྱིན་བྱས། །བྲེ་གང་ལུས་པའི་རྒྱལ་པོའི་བང་མཛོད་དག །ལྷ་མིག་དག་པའི་རང་རྒྱལ་གྱིས་གཟིགས་ནས། །བླངས་ཤིང་སྨོན་པས་ཕབ་པའི་ལོངས་སྤྱོད་ཆར། །ལྷ་མིའི་གྲོང་ཁྱེར་ན་ཡང་འབེབས་པ་མེད། །རྒྱལ་པོ་གསེར་མདོག་ཅན་བཞིན་བདག་འབྱུང་ཤོག ༣༧ །ཚེ་རབས་གཞན་དུ་སྡིག་པ་ལ་གོམས་པའི། །རྨི་ལམ་ཉིད་ཀྱང་དེ་ཡི་ཕྱོགས་འཛིན་ཏེ། །བ་སྤུའི་འཁྲི་ཤིང་གསེར་གྱི་བྱུག་པ་ལྟའི། །ཀུནྡ་ནགས་ན་གནས་པ་མངོན་སུམ་གྱུར། །རྒྱལ་པོ་ཚངས་བྱིན་འདོད་ལ་བརྐམ་པའི་
ངག །རྔོན་པས་ཉམས་སུ་བརྟགས་པའི་ཆོ་ག་རྣམས། །མྱ་ངམ་དགོན་པ་ཤིན་ཏུ་ཡ་ང་བར། །ཆོ་ངེའི་སྒྲ་དང་སྟབས་གཅིག་ཉམས་གྱུར་ཀྱང་། །སེམས་དཔའ་མཆོག་གི་སྙིང་རྗེའི་པགས་པ་ནི། །སྤུ་གྲི་རྣོན་པོའི་དཔལ་ལའང་བཟོད་ཐོབ་སྟེ། །སྤྲོ་བཞིན་སྟེར་བའི་སྙིང་སྟོབས་ལ་གུས་ནས། །ལྷ་ཡང་མཆི་མའི་མེ་ཏོག་གཏོར་བས་བྲེལ། །གཅན་གཟན་ཀུན་དར་སྐྱེས་བཞིན་བདག་འགྱུར་ཤོག ༣༨ །ཐབས་ལ་མཁས་པའི་གཏམ་གྱི་མཚོན་རྣོན་པོས། །མི་དགེར་སྤྱོད་པའི་སྲོག་ལ་གཟས་པ་འདིས། །རིགས་དང་རིགས་མིན་ལས་འདས་ཀུན་གཞིའི་ཁམས། །སྙིང་རྗེའི་གཟུགས་སུ་འཕོས་པའི་ཁྱད་པར་བསྟན། །བརྩོན་འགྲུས་མཐུ་ཡིས་བྱས་པའི་བསོད་ནམས་ནི། །ཡུད་ཙམ་ལ་ཡང་མང་པོར་འཕེལ་འགྱུར་བས། །འཆི་བདག་བདུད་ཀྱང་དེ་ཡི་སྤྱོད་པ་ལ། །སྤྲོ་བ་བརྟས་ནས་ཚེ་ལོ་ལྔ་བརྒྱར་བཏང་། །དགྲ་ཐབས་མཐུ་ཡིས་མ་བྱས་རིགས་ངན་ཞིག །འཛམ་བུའི་གླིང་གི་དབང་པོར་གྱུར་ནས་སུ། །ཆོས་ལ་ཀུན་སྦྱར་དབུལ་བའི་སྡུག་བསྔལ་བསལ། །སྤུ་གྲིའི་རྩེ་ནས་མིག་དང་པགས་པའང་བྱིན། །རྒྱལ་པོ་བསོད་ནམས་སྟོབས་བཞིན་བདག་འགྱུར་ཤོག ༣༩ །ཤིན་ཏུ་བྱ་དཀའི་གནས་ལ་
བརྩོན་འགྲུས་ཀྱི། །འཛིན་དཔྱད་དམ་པོས་འཁྱུད་པའི་ཤེས་རབ་ནི། །ལེ་ལོའི་གཡང་དང་ལྷན་ཅིག་གནས་པ་མིན། །བྱང་ཆུབ་སེམས་དཔའི་སྙིང་སྟོབས་ཁྱད་པར་ལྟོས། །སྙིང་པོ་མེད་པའི་ལུས་ནི་སྡོང་བུ་བཞིན། །སྙིང་པོར་བྱ་བ་བཅོས་བུའི་རས་ཀྱིས་དཀྲིས། །དེ་ལ་མེ་ལྕེས་རེག་པའི་རྣོ་དབལ་ཟུར། །ཡིད་ཀྱིས་ཆོ་གར་བཀོད་ནའང་བ་སྤུ་ཟིང་། །བྱང་ཆུབ་སེམས་དཔའ་དང་པོའི་ལས་ཅན་གྱི། །བློ་ནི་གོང་ནས་གོང་དུ་སྤྱོད་པ་དང་། །སངས་རྒྱས་དོན་ཡོད་གཤེགས་ལ་མཆོད་པའི་སླད། །ལུས་ཀྱང་འབྲུ་མར་འབར་བའི་ཞུགས་ལ་བཞིན། །དགེ་སློང་གྲགས་པའི་འོད་བཞིན་བདག་འགྱུར་ཤོག ༤༠ །ཁྱིམ་ལ་རི་བོང་མཚན་མ་བྲིས་པ་མིན། །ལྷག་བསམ་སྟོན་ཀའི་ཟླ་གཞོན་གྱིས་འཁྱུད་པས། །ཟད་མི་ཤེས་པའི་ནོར་དང་བརྩེ་བའི་དཔལ། །འགྲོ་བ་ཀུན་ལ་སྙོམས་པར་འགྱེད་ལ་ལྟོས། །འདི་ཡིས་བརྩོན་པའི་མཐུ་དང་ལྷག་བསམ་སྟོབས། །མཁྱེན་ནས་བདེ་གཤེགས་འོད་ཟེར་དཔག་མེད་ཀྱང་། །དཔག་ཚད་བྱེ་བ་ཕྲག་བཅུའི་ཕ་རོལ་ནས། །ཁྱིམ་ལས་དབུགས་འབྱིན་དེ་ལ་འབོད་པ་བཞིན། །ཉོན་མོངས་ཚེར་མ་རྣོན་པོའི་ཟུག་རྔུའི་དབལ། །བསམ་གཏན་མེ་ཆེན་གཅིག་གིས་བསྲེགས་པ་ནི། །སངས་རྒྱས་འཇིག་རྟེན་བྱོན་པའི་ཁྱད་ཆོས་
དང་། །དེ་ཡིས་སྡེ་སྣོད་གསུངས་པའི་ཡོན་ཏན་ཡིན། །ཁྱིམ་བདག་དབེན་པ་འདོད་ལྟར་བདག་འགྱུར་ཤོག ༤༡ །ལྷ་དབང་དཔལ་ལ་ཉོ་ཚོང་བྱས་པ་ལྟའི། །འཛམ་བུའི་གླིང་གི་ལོངས་སྤྱོད་གང་ཡིན་པ། །སྲིད་ཀྱི་འབྱོར་པའི་ཁྱད་པར་ལ་ཐོབ་ཀྱང་། །ཕྱག་དང་ཕུང་པོ་ཙམ་ལས་མཐོང་བ་མེད། །དཔྱ་ཡི་སླད་དུ་བཅིངས་པའི་སྐྱེས་བུ་ནི། །དེ་ལ་ངེས་འབྱུང་ཤིང་རྟ་འདུ་བྱེད་བཞིན། །རྒྱལ་སྲིད་འདོད་པའི་ཆུ་སྲིན་ལྟོ་བ་ནས། །དཀའ་ཐུབ་ནགས་ཚལ་མཛེས་པར་རབ་ཏུ་སོང་། །རྒྱལ་མཚོར་འཇིགས་པས་སྐྲག་པའི་དེད་དཔོན་རྣམས། །ལག་པར་སྒྲོན་མེ་སྦར་ནས་དབུགས་འབྱིན་ལ། །ཚངས་པའི་གནས་པ་བཞིན་དང་མངོན་ཤེས་ལྔ། །ལྷག་བསམ་རྩ་བ་བརྟན་པོས་བཙུགས་པ་བཞིན། །རྒྱལ་པོ་སྒྲོན་མ་སྣང་བྱེད་ལྟར་འགྱུར་ཤོག ༤༢ །ཡུལ་རྣམས་ཕལ་ཆེར་ཞེན་པའི་ལྕགས་སྒྲོག་སྟེ། །ཁྱིམ་གྱི་བཙོན་རར་འཆིང་བ་དམ་པོས་བཅིངས། །འདོད་དང་ཁྲོ་བ་སྤངས་པའི་སྨན་ལྗོངས་དག ། བསམ་གཏན་འདོད་པ་རྣམས་ལ་འབོད་པ་བཞིན། །ངུར་སྨྲིག་ཚོས་ཀྱིས་བཙོས་པ་མ་ཡིན་ཏེ། །རང་བཞིན་དག་པའི་བྱང་ཆུབ་སེམས་དཔའ་ནི། །དུད་འགྲོར་གྱུར་ཀྱང་བསམ་
གཏན་ལ་སྤྱོད་རྣམས། །གཞན་གྱི་བརྟུལ་ཞུགས་ཉམས་ཀྱིས་དོགས་པས་སྐྲག །བསོད་སྙོམས་ཕྱིར་ན་གྲོང་ཁྱེར་ལ་སེམས་པའི། །བྲམ་ཟེའི་དྲང་སྲོང་ནགས་སུ་བསྟི་བའི་སླད། །རེག་པ་ཤིན་ཏུ་མི་བཟད་མེ་དཔུང་ཡང་། །ལུས་ལ་མནབས་ཏེ་དེ་ལ་འབུལ་བར་བྱེད། །རི་བོང་དབེན་པ་ལ་དགའ་ལྟར་འགྱུར་ཤོག ༤༣ །ཁེངས་པས་རབ་དྲེགས་སྲིད་པའི་འཆིང་བ་ཅན། །རྒྱལ་པོའི་སྲིད་ཀྱི་ལོངས་སྤྱོད་ཁྱད་པར་ཡང་། །འདོད་པའི་ཁམས་ན་རེག་བྱ་རྡོ་རྗེ་མ། །ཨུཏྤལ་མིག་ཅན་བཙུན་མོའི་དོ་ཟླར་མིན། །གྲོང་ཁྱེར་མ་ཡི་སྒྱུ་རྩལ་དྲུག་ཅུ་བཞིས། །རྐང་གདུབ་ནོར་བུའི་སིལ་ཁྲོལ་གཡོ་བ་ཅན། །ཁྲི་ཕྲག་བརྒྱད་ཀྱི་གྱ་གྱུའི་ཞགས་པས་ཀྱང་། །ཁྱིམ་དུ་འཆིང་བར་མ་ནུས་བསམ་གཏན་མཐུ། །རེག་པའི་བདེ་བས་མྱོས་པའི་ཡིད་སྲུབས་མདའ། །ལྕུག་ཕྲན་ནོར་བུས་བརྒྱན་པའི་སོར་རྩེར་ནས། །འཕངས་པའི་བརྟུལ་ཞུགས་ལྡོག་པར་དཀའ་བ་ཡང་། །བསམ་གཏན་ཆོ་ག་གཅིག་གིས་དོན་ལྡན་བྱས། །རྒྱལ་པོ་ཀུན་ཏུ་གོ་བྱེད་ལྟར་འགྱུར་ཤོག ༤༤ །དཀའ་ཐུབ་མཐུ་ཡིས་བསྲུངས་པའི་མུ་ཁྱུད་ལ། །སྡིག་སེམས་རྩུབ་མོས་འདའ་བར་མ་ནུས་པས། །རྔོན་པའི་བརྟུལ་ཞུགས་ལག་ནས་རྒྱལ་པོ་ཡང་། །བྱང་
ཆུབ་སེམས་དཔའ་གཞོན་ནུའི་རྐང་སྟེགས་གྱུར། །བསྡམས་པ་མ་ཡིན་གཡོ་སྒྱུ་ཕྱོགས་བསླད་པའི། །དགེ་སྦྱོང་ཆུ་སྲིན་རྒྱལ་མཚན་བསྙེན་པ་རྣམས། །རང་རང་གྲགས་པ་ཉམས་ཀྱིས་དོགས་པའི་སེམས། །དབྱེན་གྱི་གཟུགས་བརྙན་འཆོས་ལ་རིངས་པ་བཞིན། །འཇིག་རྟེན་ཕལ་ཆེར་ཆོས་ཀྱི་སྣོད་མ་ཡིན། །འདི་ཕྱིར་ཉམས་པ་སྡིག་པའི་གྲོགས་པོའི་མཐུ། །དེ་ལ་མི་བརྟེན་བག་ཡོད་སྲུང་བ་རྣམས། །བསླུ་བར་མི་ཚུགས་བསོད་ནམས་དམ་པའི་ཁྱད། །ཁྱེའུ་མར་མེ་མཛད་དང་། ཤཱཀྱ་ཐུབ་ཡིན། གཉིས་ཀྱིས་སྐྱེས་པའི་རབས་ལ་སྨོན། ༤༥ །བྱེ་བ་བརྒྱ་ཕྲག་བདུན་ཅུ་ལས་ཐལ་བའི། །གྲོང་ཁྱེར་རིན་ཆེན་སྣ་བདུན་རང་བཞིན་དང་། །བགྲང་གིས་མི་ལང་སྐྱེད་མོས་ཚལ་གྱི་མཆོག །བཟའ་ཤིང་མེ་ཏོག་འབྲས་བུས་རབ་བརྒྱན་ཅིང་། །པདྨས་མཛེས་པའི་རྫིང་བུ་བལྟ་ན་སྡུག །འདབ་ཆགས་རྣམ་པ་མང་པོས་བསྟེན་པ་ལ། །རྒྱལ་བུ་བརྒྱ་ཕྲག་ལྔ་ཡང་རྩེ་བྱེད་ཅིང་། །མཚོན་གྱི་ཆད་པ་མེད་པའི་རྒྱལ་སྲིད་ཀྱང་། །དོར་ནས་རབ་བྱུང་བརྟུལ་ཞུགས་ལ་ཞེན་ན། །འབྱོར་པ་ཉུང་ཞིང་དཔྱ་དང་ཆད་པས་འཚེ། །དབུལ་ཞིང་སྡུག་བསྔལ་མང་པོས་ཉམ་ཐག་པའི། །གནས་ངན་ཁྱིམ་ལ་སུ་ཞིག་སྤྲོ་བར་བྱེད། །རྒྱལ་པོ་བརྟན་པས་བྱིན་
བཞིན་བདག་འགྱུར་ཤོག ༤༦ །སྐར་ཚོགས་གྲངས་སུ་བཏབ་པའི་སྣང་གསལ་དང་། །དེ་སྙེད་བླ་ན་ཡོད་པས་ཚངས་བྱིན་གདུང་། །རི་མོར་བགྱིད་པའི་རྒྱལ་པོ་དཔལ་དབྱངས་མཐུ། །མཆོད་པའི་ཁྱད་པར་གཅིག་གིས་ཉམས་སད་བྱས། །པདྨའི་རྣལ་མ་མཆོག་གི་ལག་པ་ནི། །ཀ་ཤིས་དཀྲིས་པའི་རིན་ཐང་ལ་འཇིགས་ནས། །འབྲུ་མར་རྡུལ་དུ་འཛགས་པ་བསྲེག་བྱ་ཟས། །རྣམ་པར་སྦར་བའི་བཞིན་ཡང་འགོད་པ་བཞིན། །དེ་ཡི་སྙིང་སྟོབས་མཆོག་ལ་ཉིན་བྱེད་ཀྱང་། །དད་ནས་རང་གི་སྣང་བའི་དཔལ་སྟེར་ཞིང་། །སྒྲ་གཅན་ཁ་ནས་ལྷུང་བའི་ཟླ་བ་ཡང་། །སོར་ཆུད་དབུགས་འབྱིན་དེ་ཡི་ལག་པར་འཕོ། །བྱང་སེམས་བདེ་བ་སྦྱིན་ལྟར་བདག་འགྱུར་ཤོག ༤༧ །འགྲོ་བའི་དོན་ལ་བརྩོན་པའི་གོ་ཆ་ནི། །གཡུལ་ངོའི་གཏམ་དང་ལྷན་ཅིག་གནས་པ་མིན། །བསྟན་པ་ཤིན་ཏུ་སྙིགས་མར་གྱུར་པའི་དུས། །རྒྱལ་པོའི་ཁྱིམ་ཡང་དབེན་པ་ལྟ་བུར་གཟིགས། །ཤིན་ཏུ་མ་རུངས་གྱུར་པའི་སེམས་ཅན་རྣམས། །དུས་ལས་ཡོལ་བ་མེད་པའི་ཚུལ་ཁྲིམས་དང་། །དྲན་དང་རྟོགས་པར་ལྡན་པའི་བསམ་གཏན་ལ། །བཞག་པས་བདུད་ཀྱི་གཉེན་རྣམས་འཁྲོ་ཞིང་འཁྲུགས། །དམ་པ་རྣམས་ཀྱི་བསོད་ནམས་གཞན་ཕན་ཏེ། །མུན་པའི་བློ་ལ་རང་
ལས་ཕྲོགས་པ་བཞིན། །རྙེད་ལ་བརྐམ་པའི་དགེ་སྦྱོང་བརྒྱ་ཕྲག་གིས། །འཕངས་པའི་མཚོན་ཆ་མེ་ཏོག་གྱུར་ལ་ལྟོས། །དགེ་སྦྱོང་བསྙེན་པའི་འོད་བཞིན་བདག་འགྱུར་ཤོག ༤༨ །རྫིང་བུ་བསིལ་བའི་དཔལ་གྱི་ལྡིང་ཁང་དུ། །སེམས་ཅན་དམྱལ་བ་འཕོས་པའི་རྒྱལ་བུ་ནི། །མངལ་གྱི་འདམ་རྫབ་སྤངས་པའི་མེ་ཏོག་ལྟར། །ཡབ་ཅིག་སྤྲོ་བའི་ཤིང་རྟར་འཛེག་སླད་འོངས། །དེ་ཡིས་སྔོན་རབས་དྲན་པའི་མེ་ལོང་ནང་། །དམྱལ་དང་རྒྱལ་སྲིད་ཕན་ཚུན་ལན་དུ་མར། །བརྗེས་པའི་གཟུགས་བརྙན་མཐོང་བས་རྒྱལ་པོའི་སྲིད། །སྙིང་ལ་མཚོན་ཆ་རྣོན་པོས་བཀས་ལྟར་གྱུར། །ཅོན་པན་ལྟ་བུར་གཡོ་བའི་ཡན་ལག་དང་། །ལྷ་ཡིས་སིལ་སྙན་འཁྲོལ་འདྲེའི་སྨྲ་སྒོ་ཡང་། །ལྐུགས་ཤིང་འཕྱེ་བོར་བརྫུ་བའི་སྒྱུ་ཐབས་འདིས། །དྲང་སྲོང་རྒྱལ་མཚན་ཕང་བར་བླངས་པ་ཡིན། །ཁྱེའུ་ཆུ་སྐྱེས་ལྟ་བུར་བདག་འགྱུར་ཤོག ༤༩ །སྦྱིན་པའི་མཐུ་ཡིས་ས་ཆེན་འབྱོར་བར་སྐྱོང་། །ཚུལ་ཁྲིམས་མཆོག་དང་བཟོད་པའི་ལྗོན་ཤིང་ལས། །རིགས་གཟུགས་ལང་ཚོའི་བ་དན་གཡོ་བ་ཅན། །དེ་ལ་འབངས་རྣམས་སྙིང་ཉེ་སྙིང་རྗེའི་མཐུ། །ལྷ་དབང་ལྷའི་དཔལ་འབྱོར་དྲངས་བྱས་ནས། །འཇིག་རྟེན་གང་དུ་མི་ཡི་ལྷར་བྱོན་ལྟའི། །མི་དབང་འཇིག་
རྟེན་སྣ་ཚོགས་དགའ་བ་ཡང་། །སྐྱེ་ཤིས་འཇིགས་པའི་སོ་ནམ་མཁས་པ་ཡིན། །རྣམ་རྟོག་ཚེར་མ་ཉེར་ཞི་བས་མཐའི་གྲོང་། །ལྷག་མཐོང་གསལ་བའི་འབབས་ཆུ་ལྷུང་ལྷུང་སྒྲས། །མྱང་འདས་གོ་འཕང་མཆོག་ལ་འབོད་པ་དང་། །བསམ་གཏན་བདུད་རྩིའི་དགའ་སྟོན་འགྱེད་དེ་གང་། །སྣ་ཚོགས་མངོན་པར་དགའ་བཞིན་བདག་འགྱུར་ཤོག ༥༠ །བདོག་པ་སེར་སྣས་བསྡམ་ལ་མ་འདྲིས་ཀྱང་། །ལེགས་བཤད་རིན་ཆེན་ནོར་ལ་བརྐམ་དེའི་ཕྱིར། །བུ་དང་ཆུང་མའང་དམ་པའི་ཕྱོགས་བཏང་ལ། །དཔའ་བོས་ཉག་ཕྲན་འཕེན་པའི་ཀུན་སྤྱོད་བཞིན། །སྐྲ་མཚམས་ནོར་བུས་མཛེས་པའི་ལྟ་དབང་གང་། །ཆར་སྤྲིན་ལྟ་བུར་གནག་པའི་གནོད་སྦྱིན་གཟུགས། །མི་སྡུག་ཁྲོས་པའི་བཞིན་གྱི་ལེགས་བཤད་ཀྱང་། །གུས་པ་མི་ལྷོད་ཤེས་རབ་མཆོག་གིས་མཉན། །སྡིག་ལས་ལྡོག་པའི་ཚིགས་བཅད་གཅིག་གི་སླད། །བདག་ལུས་གང་གཱའི་རྡུལ་སྙེད་བཏང་བཟོད་ན། །མཆོག་སྦྱིན་སྐྱེས་བུའི་ཡོན་ཏུ་དེ་ཡི་སེམས། །དད་པས་བརྟན་པ་བྲལ་ལ་འཆོང་བ་བཞིན། །རྒྱལ་པོ་ཚངས་བྱིན་ལྟ་བུར་བདག་འགྱུར་ཤོག ༥༡ །བྱང་ཆུབ་སེམས་དཔའ་མཁས་པའི་བརྟུལ་ཞུགས་ནི། །རྒྱལ་རིགས་ཆེན་པོའི་དཔལ་གྱིས་འབྱོར་ན་ཡང་། །
གཏི་མུག་སྒྲིབ་པ་སེལ་བའི་ཆོས་འཚོལ་ཕྱིར། །བསྙེམས་པ་བྲལ་བའི་བགྲོད་པས་ཀུན་ཏུ་འགྲོ། །དེ་བཞིན་གཤེགས་པའི་ཚན་དང་ལྡན་པའི་གཏམ། །འཆིང་བ་ཀུན་གྱིས་བཅིངས་བའི་སྐྱེ་བོ་ཡིས། །རྙེད་པའི་སླད་དུ་ཚིགས་སུ་བཅད་ལ་ཡང་། །གོས་རྒྱན་རིན་ཐང་སྤངས་པ་བྱིན་ལ་ལྟོས། །འདོད་པའི་ཚེར་མ་རྣོན་པོས་ངོ་ཚའི་གདོང་། །སྨད་པ་མ་རབས་སྐྱེ་བོའི་མཚན་ཉིད་དེ། །གཞན་དག་བསམ་པ་རྫོགས་ན་རང་ལུས་ཀྱང་། །གཡང་སར་གཏོང་ལ་མི་འཇིགས་དམ་ཆོས་བསྲུངས། །རྒྱལ་པོ་གཞོན་ནུ་ཆོས་འཚོལ་ལྟར་འགྱུར་ཤོག ༥༢ །རྙེད་པ་ངུར་སྨྲིག་ཚོས་ཀྱིས་འཚོལ་བའི་དབུས། །བག་ཡོད་སྟོན་པ་གཅིག་ཀྱང་འཇིག་རྟེན་མིག །ས་ཆེན་སྐྱོང་བའི་མི་དབང་ཡེ་ཤེས་སྟོབས། །དགེ་སློང་ཡང་དག་བློ་ལ་གུས་པ་བཞིན། །མི་བདག་རིགས་ཀྱི་ཐིག་ལེ་གཞོན་ནུ་མའི། །ལྷག་བསམ་ཟླ་བ་ཞུན་མས་བྱུགས་མིན་ཏེ། །བདག་ཉིད་ཉམས་ཀྱིས་དོགས་པའི་མུན་ནག་ཀུན། །དེ་ཡི་མདུན་ན་འབྲོས་ལ་རིངས་པ་ཡིན། །འཇིག་རྟེན་ལྡོངས་པ་དག་ལ་ཏིང་འཛིན་གྱི། །མིག་སྦྱིན་དགེ་སློང་ན་བུས་ཉམ་ཐག་པར། །སྨན་པས་རང་གི་བརླ་ལས་ཤ་བྲེགས་ཤིང་། །ཁྲག་གིས་གསོ་བ་འདི་ནི་སུ་
ཞིག་ཡིན། །རྒྱལ་པོའི་བུ་མོ་ཡེ་ཤེས་ལྡན་ལ་སྨོན། ༥༣ །སྨན་པ་མཆོག་གི་ཆོ་གའི་བདག་ཉིད་ཀྱང་། །གསོ་དཔྱད་ཕལ་པའི་བརྟུལ་ཞུགས་འདི་འཛིན་ཏེ། །རྒྱལ་པོ་ལྷ་ཡི་དབང་ཕྱུག་མངའ་རིས་རྣམས། །ནད་ཀྱིས་གདུངས་པ་ཤེས་བྱའི་མཐུ་ཡིས་བསལ། །ཆུ་ཀླུང་ཆེན་པོས་རབ་སྤངས་ལྟེང་ཀའི་ཉ། །མངོན་སུམ་ཤ་ཟའི་གདོན་གྱིས་གཙོས་པ་གང་། །མཐོང་བའི་མོད་ལ་བྱང་ཆུབ་སེམས་དཔའི་སྙིང་། །ཕྲ་རབ་རྡུལ་དུ་ཞིག་པའི་ཚོར་བ་མྱོང་། །གླང་པོའི་གཉའ་ན་མཛེས་པར་ཁྱབ་མ་ཡིན། །བརྒྱ་ཕྲག་བརྒྱ་ཡི་ཉ་ལ་སྲོག་སྦྱིན་ཡིན། །བཟའ་བས་ཚིམས་པར་བྱས་པ་ཤེས་རབ་མིན། །བདེ་གཤེགས་མཚན་གྱིས་ཁྱོད་ལ་དོན་ཡོད་བྱས། །སྨན་པ་ཆུ་འབེབས་ལྟ་བུར་བདག་འགྱུར་ཤོག ༥༤ །གང་ལ་ཤེས་རབ་ཕུན་སུམ་ཚོགས་པ་དེར། །སྲིད་ཞིའི་ཡོན་ཏན་རྣམས་ཀྱང་རྗེས་འབྲང་སྟེ། །སེང་གེའི་ཁྲི་དང་བཅས་པའི་རྒྱལ་སྲིད་ཀྱང་། །རྒྱལ་བུ་ཐ་ཆུང་གཅིག་གིས་དབང་དུ་བྱས། །རྟགས་ལ་བརྟེན་ནས་དོན་གྱི་ཁྱད་མཐོང་བ། །བློ་གྲོས་རྣམ་པར་དག་པའི་ཁྱད་གཞི་སྟེ། །བླུན་པོ་རྣམས་ལ་མིག་གི་མདུན་སར་ཡང་། །ཁྱད་ཆོས་གནས་པ་སྤངས་པ་བཞིན་དུ་འགྱུར། །འཇིག་རྟེན་དག་ན་འཐབ་དང་
རྩོད་པ་འགྱེད། །ཕལ་ཆེར་མ་རིག་གདོན་གྱི་མཐུ་ཡིན་ཏེ། །མཁས་པའི་ཤེས་རབ་ཆོ་གས་བསྲུངས་པའི་ཡུལ། །དུས་ཀྱི་ཆད་པས་བཤིག་པར་ནུས་མ་ཡིན། །རྒྱལ་བུ་མེ་ལོང་གདོང་བཞིན་བདག་འགྱུར་ཤོག ༥༥ །གང་ན་རྒྱལ་སྲིད་གྲོས་ཀྱིས་འཚོ་བ་སྟེ། །ཤེས་རབ་ཆེན་པོས་ཡུལ་ཁམས་བསྲུངས་ནུས་པས། །མདུན་ན་འདོན་རྣམས་རྒྱལ་པོའི་བློ་གྲོས་ཀྱི། །བསྣོན་མར་འགྱུར་པ་བྲམ་ཟེའི་ཁྱེའུ་བཞིན། །སྲེད་རྣམས་སྡིག་ཏོའི་སྒྲ་གཅན་ལག་པ་ཡིས། །མ་བཀབ་འཇིག་རྟེན་ཆོས་བཞིན་སྐྱོང་མཁས་པས། །འབངས་དང་རྒྱལ་པོ་གློ་བ་ཉེ་བྱེད་ཅིང་། །གྲགས་པ་གསལ་བའང་ཤེས་རབ་ཁོ་ནའི་མཐུ། །བློ་གྲོས་མཐུན་པ་ཉིད་དུ་བཟོ་ཤེས་ན། །མངའ་རིས་བགོ་ཤར་བྱེད་ལའང་འཇུངས་མ་ཡིན། །མཐར་ཐུག་དམ་པའི་ཆོས་ལ་ཀུན་སྦྱོར་བ། །ཐབས་ལ་མཁས་པའི་མཐུས་ཡིན་གཞན་གྱིས་མིན། །བྲམ་ཟེ་གནག་ལྷས་སྐྱེས་ལྟར་བདག་འགྱུར་ཤོག ༥༦ །འདི་ན་འཇིག་རྟེན་མ་རུངས་སུས་བྱས་ཞེས། །དགེ་སྦྱོང་དང་ནི་བྲམ་ཟེ་མཁས་པའི་ཚོགས། །ཇི་སྙེད་བློ་གྲོས་མཐུ་ལ་ཉམས་སད་ཀྱང་། །སྤོབས་པར་མ་གྱུར་མ་རིག་གཞན་དབང་མཐུ། །རྒ་བས་ལང་ཚོའི་མཛེས་པ་འཕྲོག་བྱེད་ཅིང་། །
ན་བས་ཟུག་རྔུའི་སྡུག་བསྔལ་མངོན་སུམ་འབོད། །ཤི་བས་འཇིག་རྟེན་ཕ་རོལ་འགྲོ་བ་ཡི། །གནོད་ཆེན་འདི་ལས་ཐར་བ་སུ་ཞིག་ཡོད། །གང་ལས་དབུགས་འབྱིན་ཆོ་ག་རབ་མཁྱེན་པའི། །ཐམས་ཅད་མཁྱེན་པ་འཇིག་རྟེན་ཁྲིད་མཛད་ལས། །རྣམ་པ་སྣ་ཚོགས་སྡུག་བསྔལ་སྣོད་དང་བཅུད། །དེ་ཡི་རང་བཞིན་ཤེས་ནས་གྲོལ་བྱེད་པ། །རྒྱལ་བུ་ཞི་བའི་བློ་གྲོས་ལྟར་འགྱུར་ཤོག ༥༧ །ཤེས་རབ་གདེངས་ཀ་འཛིན་པ་ངན་འགྲོར་ཡང་། །སྙིང་རྗེ་ནོར་བུའི་ཏོག་གིས་སྤང་བ་མིན། །ཀླུ་རྒྱལ་རྔ་ལ་རྔ་སྒྲ་ཁོང་འཁྲུགས་པའི། །ལྕེ་ཡིས་ཐོག་མདའ་བྱམས་པའི་མཐུ་ཡིས་མནན། །ཧ་ཅང་དགྲ་དང་གཉེན་དུ་བལྟ་བ་རྣམས། །ཡལ་ག་རྙིང་ལ་འབད་པས་འཇུ་བ་བཞིན། །བདག་ཉིད་ལྷུང་ཞིང་ཕ་རོལ་བརླག་པའི་རྒྱུ། །དེ་ཡི་བླང་དོར་ཤེས་པའང་ཤེས་རབ་ཡིན། །འཇིག་རྟེན་དག་ན་མཁས་པ་བདེ་བར་འཚོ། །དེ་ལ་གནོད་བྱེད་བྲལ་བ་མ་ཡིན་ཏེ། །ཤེས་རབ་མཐུ་ཡིས་གནོད་བྱའི་རྒྱུ་འབྲས་རྣམས། །རང་བཞིན་ཤེས་ནས་ལྡོག་ལ་མཁས་པའི་ཕྱིར། །བརྟུལ་ཞུགས་བརྟན་པ་རྔ་ཆེན་ལྟར་འགྱུར་ཤོག ༥༨ །རིགས་དང་སྤྱོད་པ་མཐུན་ལའང་བཟར་བྱེད་པ། བླུན་པོ་གཟུ་ལུམས་ཅན་གྱི་རང་བཞིན་ཏེ། །ངན་གཡོར་རྟག་ཏུ་
གོམས་པའི་ཆུ་སྲེག་རྒན། །ཡན་ལག་གདུང་བས་ཉམས་པར་འཆོས་པས་ཕུང་། །བྱ་བ་ངན་པ་ཁོང་ན་སྦས་གྱུར་ཀྱང་། དེ་ཡི་གཞན་དབང་གྱུར་པའི་རྣམ་ཤེས་ནི། །ཤེས་རབ་ཆེན་པོའི་ཟིལ་ལ་བཟོད་ནུས་མིན། །ཧ་ཅང་གྲིམས་པ་གཟུགས་སུ་གྱུར་པ་བཞིན། །མཁས་པའི་གཏམ་གྱི་རལ་གྲི་རྣོན་པོ་ལ། །ཟུག་རྔུ་བསྐྱེད་པའི་བེམ་ཆོས་མི་ལྡན་ཡང་། །མ་རབས་སྙིང་ལ་ལྷག་པར་འབིགས་བྱེད་པས། །སྡིག་ཅན་གནས་ནས་བསྐྲོད་པའི་གཤེད་མར་བསྐོས། །བྱང་ཆུབ་སེམས་དཔའ་ཆུ་སྲེག་ལྟར་འགྱུར་ཤོག ༥༩ །ཡུལ་ལ་དབང་པོས་ཉེ་བར་ལེན་པའི་སེམས། །རྟོག་དཔྱོད་དང་བཅས་འཇིག་རྟེན་བསམ་གཏན་ཏེ། །ཡུལ་གྱི་ཀུན་རྟོག་ནུབ་ལའང་ལྷག་མཐོང་མེད། །མྱ་ངན་མི་འདའ་སྲིད་རྩེའི་ཏིང་འཛིན་ཡིན། །གང་ན་དྲང་སྲོང་རིག་མཆོག་མ་ཡིན་པ། །མཐའ་གཉིས་འདས་པའི་གོ་འཕང་བར་མ་ནི། །དབུ་མའི་ལམ་གྱི་སྤངས་པ་ལྟར་འགྱུར་པས། །འཇིགས་ཚོགས་ལྟ་བའི་གཡུལ་ངོར་རབ་ཏུ་ཕམ། །འདི་ན་བདག་མེད་རྟོགས་པའི་ཤེས་རབ་ནི། །ཡུལ་གཟུགས་སྟོང་པའོ། །དང་སྟོང་ཉིད་སྟོང་པ་ཉིད་གཟུགས་སོ། །ཐ་དད་རིས་མི་ཕྱེད། །གཅིག་ཏུ་གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །མི་གནས་ཡོངས་གྲུབ་ཆེན་པོར་
སྟོན། །སྟོན་པ་ཤེས་རབ་སྣ་ཚོགས་ལྟར་འགྱུར་ཤོག ༦༠ །རྣམ་པར་ཤེས་པའི་ཚོང་པ་ལྔ་བརྒྱ་ཡང་། །སྙིང་རྗེའི་དེད་དཔོན་གཅིག་གིས་དབང་བྱས་པས། །དབྱིག་དང་ནོར་བུས་གང་བའི་གྲུ་ཆེན་ནི། །སྡིག་ཏོའི་ཆུ་སྲིན་ལྟོ་བས་འཇུ་བ་མིན། །མདའ་དང་མཚོན་ཆའི་ཐབས་ལ་ལྷ་མིན་བཞིན། །བརྐུ་ཞིང་འཕྲོག་ལ་བྱི་ལའི་བརྟུལ་ཞུགས་ཅན། །གཡོན་ཅན་སེམས་ཀྱི་ཚེར་མ་རྣོན་པོ་ལ། །རྒྱ་མཚོའི་ལྷ་ཡང་ཁྲེལ་ནས་དགོད་ལ་ལྟོས། །དེ་ཡི་སྡིག་པ་སྤུ་གྲིས་གཞར་ནུས་མིན། །སྲོག་དང་བཅས་ཕུང་པོའི་ལྗོན་ཤིང་ནི། །རལ་གྲིའི་བདེ་བླག་གཅིག་གིས་མཐར་བྱས་པའི། །དགེ་བ་འདི་ལས་རྨད་བྱུང་སུ་ཡིས་མཐོང་། །དེད་དཔོན་སྙིང་རྗེ་ཆེན་པོ་ལྟར་འགྱུར་ཤོག ༦༡ །གང་དུ་རྗེ་བོས་སྤངས་པའི་འཇིག་རྟེན་ཡང་། །བག་མེད་ཆུ་སྲིན་གདུག་པའི་ལྟོ་བ་ནས། །ངན་འགྲོའི་གཡང་ས་ཆེན་པོར་སྐྱས་འདེབས་པ། །ཅེ་སྤྱང་རྙི་ལས་གྲོལ་བའི་གནས་སྐབས་བཞིན། །གླིང་བཞིའི་ཅོན་པན་མཛེས་པའི་འཁོར་ལོས་སྒྱུར། །དགེ་བ་བཀོད་པ་རྒྱལ་བུ་སྟོང་དང་བཅས། །ཚངས་པར་སྤྱོད་པས་སྤངས་པའི་རྒྱལ་སྲིད་ནི། །ཆུ་སྐྱེས་གསར་པའི་ཡུ་བ་ལ་བཟུང་བཞིན། །ཐབས་ལ་མཁས་པའི་བྱང་ཆུབ་ཆེན་པོའི་གོས། །
མིག་སྨན་མདོག་ཏུ་འདུག་ཀྱང་གནག་པ་མིན། །བསླབ་པ་བརྒྱད་ཀྱི་ཚུལ་ཁྲིམས་ལ་གནས་པས། །ཁྱིམ་ཡང་ཐར་པ་ཆེན་པོའི་གྲོང་ཁྱེར་ཡིན། །གཞོན་ནུ་སྙིང་རྗེ་ཆེར་སེམས་ལྟར་འགྱུར་ཤོག ༦༢ །ཚུལ་ཁྲིམས་ལང་ཚོ་དར་བའི་བཞིན་རས་ལ། །དཀར་ནག་ཕྱོགས་ཀྱི་འཕེལ་འགྲིབ་ཡོད་མིན་ཡང་། །དེ་ཡི་ལྷག་བསམ་བཅོ་ལྔའི་ཟླ་རྒྱས་སུ། །འཁྲུལ་བའི་བུ་མོ་ཀུནྡར་བརྫུ་བས་བྲེལ། །ལོ་གྲངས་བརྒྱད་ཁྲི་ཉིས་སྟོང་ནགས་ཁྲོད་དུ། །ཚངས་པར་སྤྱད་པའི་རིན་ཆེན་རིན་ཐང་ཅན། །སྲོག་གི་ཚོང་ཟོང་ཁྱེར་བའི་ལང་ཚོས་ཀྱང་། །མ་ཁུགས་ངོ་ཚའི་གདོང་པ་ས་ལ་འབྱར། །ཉོན་མོངས་ཐབས་ཀྱིས་བཅོམ་པའི་ནུས་པ་ལ། །དཀའ་ཐུབ་བརྟུལ་ཞུགས་འདིས་ཀྱང་འགོང་ནུས་མིན། །འདི་ན་གོམ་པ་བདུན་པའི་སྙིང་རྗེ་ཡིས། །ཚངས་པའི་འཇིག་རྟེན་ཆེད་དུ་ཉོས་པ་བཞིན། །བྲམ་ཟེའི་ཁྱེའུ་སྐར་མ་ལྟར་འགྱུར་ཤོག ༦༣ །ས་འདི་རིར་བཅས་དེ་ཡི་ཁུར་མིན་མི་དགེར་སྤྱོད་ལ་བཟའ་བ་རྣམས། །ངན་འགྲོའི་ཅེ་སྤྱང་གདུག་པའི་ཁར་སོང་འདིས་ནི་བྱང་ཆུབ་སེམས་དཔའ་དེའི། །ཕྲག་པ་དུབ་བྱས་གདོང་ལ་རྡུལ་རིས་གྱ་གྱུར་བྲིས་ནས་ཉམས་པའི་གཟུགས། །མི་སྡུག་གནོད་སྦྱིན་བྱད་དུ་འཕོ་ཡིན་སེམས་བསྐྱེད་དམ་བཅའ་ལྷག་པར་བརྟན། །
གང་དུ་སྤྲུལ་པའི་མི་དག་ལ། །ཆད་པས་བཅད་པའི་ཡན་ལག་ནི། །འཇིག་རྟེན་མ་རུངས་སྡིག་ཏོ་ཅན། །རྣམས་ལ་གོ་སྐབས་འཚོལ་བ་ཡིན། །བརྒྱ་བྱིན་སྣང་བྱེད་ལྟ་བུར་ཤོག ༦༤ །ཆགས་བྲལ་རྣམས་ལ་འདོད་པ་ནི། །སྦྲང་རྩིས་བཟུང་བའི་དུག་བཞིན་ཏེ། །རང་གིས་རང་ཉིད་རྨོངས་བྱེད་ཅིང་། །རྣམ་གཡེང་མཐུ་ཡིས་བསམ་གཏན་ཉམས། །འདི་ན་སློབ་དཔོན་མཁན་པོ་ནི། །སློབ་མ་གཞན་དུ་སྤངས་བཞིན་དུ། །རི་དྭགས་ལ་ཡང་བགྲོ་བྱེད་པ། །ཆོག་ཤེས་ཁྱད་པར་སྟོན་པའི་སླད། །དཀའ་ཐུབ་ཅན་དང་རི་དྭགས་གཉིས། །སྤྱོད་ཡུལ་མཉམ་པར་དམ་བཅའ་བ། །ཐབས་ལ་མཁས་པས་སློབ་མ་རྣམས། །གདུལ་ཕྱིར་ཡིན་གྱིས་གཞན་དུ་མིན། །སྟོན་པ་བྲམ་ཟེ་ལྟར་འགྱུར་ཤོག ༦༥ །བརྩེ་དགའི་ཀྱོ་བས་དབང་དུ་མི་བྱེད་པའི། །འཇིག་རྟེན་དེ་ཡང་ཆོས་ཀྱི་སྣོད་མ་ཡིན། །མཚར་སྡུག་ལང་ཚོའི་གེ་སར་ཀྱིས་བོས་པའི། །སྐྱེས་བུ་འདི་དག་བུང་བའང་མ་ཡིན་ནོ། །གཞོན་ནུ་མ་ཡི་སོར་མོའི་ལྕུག་ཕྲན་རྣམས། །ནོར་བུའི་འཁྱུད་མོས་བསྡམས་པའི་ཟློས་གར་དང་། །བན་དྷུ་ཛི་ཝ་ཀ་འདྲའི་མཆུ་སྒྲོས་ནས། །ལྷུང་ལྷུང་འབབ་པའི་གླུ་ཡི་ཉམས་འགྱུར་ལ། །དེ་ཡི་མགྲིན་པར་ཀ་ལ་པིང་ཀ་དང་། །དྲི་ཟའི་ན་ཆུང་བལྟར་མི་མངོན་པ་ཡང་། །འཁྱལ་པའི་
ངག་དང་འགྲེ་བ་མ་ཡིན་ཞེས། །རབ་བསྔགས་མེ་ཏོག་གཏོར་བས་བྲེལ་བ་བཞིན། །གར་མཁན་འགྲོ་བའི་དཔལ་མོ་ལྟར་འགྱུར་ཤོག ༦༦ །མི་དབང་རིན་ཆེན་བདུན་གྱི་ཁྱད་ནོར་དང་། །དཔའ་ཞིང་རྟུལ་ཕོད་ལྡན་པའི་བུ་སྟོང་གི། །ཡབ་གྱུར་གླིང་བཞིའི་དབང་ཕྱུག་ང་ལས་ནུའི། །བསོད་ནམས་རྙོག་པར་བྱེད་པ་སུ་ཞིག་ཡིན། །དམོད་པས་དྲང་སྲོང་མཐུ་ཡང་ཉམས་སད་ལ། །དཔའ་བས་ལྷ་མིན་གཡུལ་ངོ་ཟློག་བྱེད་ཅིང་། །དྲེགས་པས་བརྒྱ་བྱིན་ཉིད་དང་སྟན་གཅིག་པ། །བསམ་ངན་གཅིག་གིས་ནུས་པས་བརླག་ལ་ལྟོས། །སྲེད་པའི་མེ་ལྕེ་གཏུམ་པོའི་ལྕེ་ཞགས་མཐུས། །རི་དབང་ལྟ་བུར་མཐོ་ཞིང་བརྟན་པ་ཡི། །རྣམ་དཀར་སྐད་ཅིག་ཡུད་ལ་བསྲེགས་གྱུར་པའི། །མངོན་སུམ་ཚད་མས་ཞན་དག་ལམ་ངན་འགོག །འཁོར་ལོས་སྒྱུར་རྒྱལ་སྤྱི་བོ་སྐྱེས་བཞིན་ཤིག༦༧ །བསགས་པས་བཏང་བའི་ལོངས་སྤྱོད་ནི། །འབྲུ་མར་ཟད་པའི་སྡོང་བུ་ལྟར། །དབུལ་ཞིང་ཕོངས་ པས་ཉམ་ཐག་ཚེ། །སྡིག་པའི་མུན་ནག་སྟུག་པོར་འཇུག །གང་ལ་རྟག་ཏུ་ཕན་བཞེད་པ། །བདག་ཉིད་ཆེན་པོའི་སྙིང་རྗེ་ནི། །ས་འོག་ཏུ་ཡང་ས་བོན་ལྟར། །གྱུར་པས་ས་འདི་དབྱིག་གིས་བཀང་། །དབུལ་བས་ཉམས་པའི་སེམས་ཅན་རྣམས། །ས་འོག་གཏེར་
ལ་ལོངས་སྤྱོད་པའི། །བརྔན་གྱིས་རབ་ཏུ་དག་འགྱུར་ནས། །ཐེག་གསུམ་ཆོས་ལ་ཀུན་ཀྱང་བཀོད། །ཀླུ་རྒྱལ་གཏེར་སྤྱོད་ལྟར་འགྱུར་ ཤོག ༦༨ །བྱང་ཆུབ་སེམས་དཔའ་སེང་གེའི་ལྷག་བསམ་ཡོངས་འདུ་ས་བརྟོལ་ལྗོན་པ་ལ། །འཁྲི་ཤིང་ཐོབ་པའི་སྤྲེའུ་ཁྱོ་ཤུག་བུ་ཡང་སྐྱབས་སུ་དོང་བཅུག་ནས། །བག་རྐྱང་ཕ་མས་ནགས་སུ་དེངས་པའི་དྭ་ཕྲུག་ལ་ཡང་རྒོལ་བྱེད་པ། །བྱ་རྒོད་སྡེར་མོའི་ཁ་ན་མ་ཐོས་ངོ་ཚའི་ནམ་འཕང་དམན་ལ་སྦྱར། །གཞན་ཕྱིར་བདག་གི་སྲོག་བཏང་བ། །བྱང་ཆུབ་སེམས་དཔའི་ཁྱད་ཆོས་ཏེ། །དགྲ་ཡང་དེ་ལ་ཡི་རང་བས། །ཕྱི་ནས་མི་དགེ་སྤང་བར་འགྱུར། །ཡན་ལག་མ་སྨད་ལྟར་འགྱུར་ཤོག ༦༩ །རིག་བྱེད་དང་ནི་སྔགས་རྒྱུད་ཆོ་ག་སོགས། །གང་ལ་རིགས་ཀྱི་ཡོན་ཏན་ཐོབ་པ་དེའི། །ཕྱི་བཞིན་འདོད་པའི་ལོངས་སྤྱོད་སོན་ན་ཡང་། །བརྟུལ་ཞུགས་བརྟན་པ་ཁྱིམ་དུ་འཆིང་བ་མིན། །རྒོད་ཅིང་མི་བརྟན་འཕྱར་ཞིང་གཡེང་བ་ཡི། །ཁྱིམ་ཐབ་འབྲངས་པས་དེ་ལ་བསླུར་མ་ཚུགས། །ཐུབ་པ་དགྱེས་པའི་སྤྱོད་པ་མཐར་སོན་པ། །དེ་ཡི་མོད་ལ་སངས་རྒྱས་མཐོང་བ་ཡིན། །རྣམ་པར་མི་རྟོག་མཐུ་ཡིས་རྒྱལ་བའི་མཚན། །ཚང་ངམ་མ་ཡིན་རྟོག་དཔྱོད་ཤེས་རབ་ནི། །འོད་མཚན་སྟོང་དུ་འབར་བའི་ཐུགས་རྗེ་དང་། །ལུང་བསྟན་བསྐུལ་
བའི་དཔལ་གྱི་རྔ་ཆེན་ཡིན། །བྲམ་ཟེའི་ཁྱེའུ་སྤྲིན་བཞིན་བདག་འགྱུར་ཤོག ༧༠ །ཆོ་ག་ཞིབ་མོས་བརྟུལ་བའི་གླང་ཆེན་ཡང་། །བརྩེ་དགའི་བསམ་ཡས་རབ་ཏུ་རྒོད་བྱས་ཤིང་། །གླང་མོའི་གདུང་བས་བཅིངས་པ་ལྕགས་ཀྱུས་མིན། །དེ་ཡི་གཉའ་བར་འཆི་བདག་གནས་པ་བཞིན། །ཕྱོགས་རྣམས་རྣམ་པར་འཆོལ་ཞིང་གཡོ་བའི་རྗེས། །རི་དང་ཤིང་ཡང་གྱ་ཚོམ་རྒྱུག་པ་ལྟས། །ཤིན་ཏུ་རྟབ་པར་བྱས་པའི་རྗེ་དང་འབངས། །ཡལ་གའི་རི་དྭགས་ཁུར་གྱིས་དུབ་པས་ཉམས། །གང་ཞིག་འདོད་པའི་གླང་པོ་གཉའ་རེངས་ནི། །ཐུབ་པ་མཆོག་གི་སྡོམ་པས་མ་ཐུལ་ན། །སྲིད་པའི་ཆུ་གཏེར་ཀུན་ནས་ཡ་ང་བར། །དབང་མེད་འགྲོ་བ་མཐོང་ནས་ཆོས་ལམ་གནས། །རྒྱལ་པོ་རབ་གསལ་ལྟ་བུར་ཡུལ་གྱི་མིང་ལས་འོད་ལྡན་ཞེས་ཀྱང་རུང་སྟེ། དཔག་བསམ་འཁྲི་ཤིང་ལྟར་ཡིན།བདག་འགྱུར་ཤོག ༧༡ །གསེར་གྱི་ཁང་བུ་བརྩེགས་པ་རང་གི་རིན། །གཞི་རྣམས་གསེར་གྱིས་གཡོགས་ཀྱང་མ་ཡིན་སྙམ། །ནོར་བུའི་དོ་ཤལ་མཛེས་པའི་བླ་བྲེ་ནི། །ཁྱོད་མཐུས་བདག་ཅག་བར་སྣང་དཔྱངས་སོ་ཞེས། །ཕན་ཚུན་འགྲན་དང་ཡུས་པས་དབང་པོ་ལ། །མཆོད་པའི་ལས་སུ་བསྐོས་པའི་སྨིན་ལེགས་མ། །རྣ་ཆ་གཡོ་བ་སྙིམ་པའི་མེ་ཏོག་དང་། །སྣ་ཚོགས་རོལ་
མོའི་སྒྲ་ཡིས་སྟངས་གཅོད་བཞིན། །རྫོགས་པའི་སངས་རྒྱས་སྒྲིབ་མེད་ལུང་བསྟན་ལ། །ཡོངས་སུ་མཆོད་པའི་སྒྲ་དང་རྫུ་འཕྲུལ་གྱིས། །ཏཱ་ལ་བདུན་གྱི་སྲིད་དུ་དེ་དྲངས་པས། །སྨོན་ལམ་ཐ་གུའི་རྩེ་ནས་ལྷུང་བ་མེད། །བྲམ་ཟེ་རྣམ་པར་གྲགས་བཞིན་བདག་འགྱུར་ ཤོག ༧༢ །གང་དག་ཁྱིམ་གྱིས་དབང་ཐང་ཡོད་དོ་འཚལ། །རྒྱན་པོས་རབ་ཉམས་དབུལ་བོའི་གོ་འཕང་ལ། །སྤྲོ་བ་མིན་ཡང་བདེ་བླག་ཉིད་སོན་པ། །བདེན་པར་སྨྲ་བ་གཅིག་གིས་དབུགས་འབྱིན་བྱས། །རྙོག་བྲལ་སེམས་ཀྱི་རྫིང་བུ་བླ་གོས་དང་། །པ་ཎ་ལྔ་ཡིས་རྒྱན་འདིས་ཆོས་སྨྲས་ཚལ། །བརླན་བྱས་སྨོན་པའི་ས་བོན་མ་རྙིང་པའི། །ལོ་ཏོག་འདི་ལས་མྱུར་བར་གང་དུ་སྨིན། །དབུལ་པོའི་ཁྱིམ་གྱི་ར་བའི་ཁྲོན་པ་ན། །ཟབས་ཆེན་དབྱིག་གིས་གང་བའི་གྲགས་སྙན་ནི། །དེ་ལ་རྒྱལ་སྲིད་བསྐོ་བ་ལྟར་གྱུར་ནས། །དཔུང་པའི་གྲིབ་མས་འཇིག་རྟེན་གདུང་བ་བསལ། །རྒྱན་པོ་རྒྱལ་བ་ལྟ་བུར་བདག་འགྱུར་ཤོག ༧༣ །སྐབས་གསུམ་དཔལ་གྱིས་འབྱོར་པས་མ་སྙེམས་པར། །བག་མེད་གཡུལ་ངོལ་ཕམ་པ་འཛམ་བུའི་གླིང་། །བྱམས་པའི་གདུགས་ཀྱིས་འགེགས་ལ་རྡུལ་བྲལ་མིག །བརྒྱ་བྱིན་མིག་བཟང་མིག་སྟོང་བགྲད་ནས་བལྟ། །ནད་ཀྱི་བསྐལ་པས་བཏབ་པའི་འཇིག་
རྟེན་ནི། །རྣམ་པ་སྣ་ཚོགས་ཟུག་རྔུའི་ལྕེ་ཞགས་ཅན། །གསོད་དཔྱད་མཐུ་ཡིས་བཏང་བའི་ཆོ་ངེའི་སྒྲ། །ལྷ་ཡི་རྣ་བས་བཟོད་པའི་གོ་ཆ་མིན། །གཟུགས་ཀྱི་མཚན་ཉིད་སྤངས་པའི་སྙིང་རྗེའི་གཟུགས། །སྨོན་ལམ་དྲོད་གཤེར་དངར་པོས་བསྐྱེད་བསྲིངས་པའི། །ལང་ཚོའི་མྱུ་གུ་གསར་བའི་སྨན་མཆོག་ནི། །ནམ་མཁའི་ངོས་ལ་བཅད་གཏུབས་བྱས་པ་བཞིན། །སྲོག་ཆགས་དེས་པར་སྐྱེས་བཞིན་བདག་འགྱུར་ཤོག ༧༤ །དེ་ཡི་སྙིང་རྗེ་ཆེན་པོའི་སྟོབས། །གངས་རིའི་དུམ་བུ་ལ་བཙོངས་པས། །མཆེ་བ་དྲུག་གི་རིན་ཐང་དེས། །ཚོར་བ་སྡུག་བསྔལ་གནས་ལ་སྦྱར། །གཡོ་སྒྱུའི་ཚེར་མ་རྣོན་པོ་ལ། །ངུར་སྨྲིག་ཚོས་ཀྱིས་བཙོས་པ་དེས། །གླང་པོ་མཆོག་ལ་རེག་པའི་དུག །ཉམ་ཕྲན་ལྕེ་ཡིས་བླུད་པས་ཉམས། །ཀྱེ་ཧོ་སེམས་དཔའ་ཆེན་ པོ་ནི། །ད་དུང་གཤེད་མ་ཉམས་ཀྱིས་དོགས། །ལུས་ཀྱང་དེ་ལ་བསིལ་ཡབ་བཞིན། །སྤྲོ་བས་རོས་པའི་གེ་སེར་གཏོང་། །གཉིས་འཐུང་མཆེ་བ་དྲུག་པ་སྨོན། ༧༥ །འཇིག་རྟེན་རྟེན་ཅིང་འབྲེལ་འབྱུང་ལས། །ཕུང་པོ་ལྔ་རུ་འཛིན་པ་ཡང་། །སྐྱེ་རྒ་ན་དང་འཆི་བ་ཡི། །གྲོང་ཁྱེར་ཆེན་པོར་རྟག་ཏུ་འཆིང་། །མ་རིག་རྒྱ་ལས་རབ་ཐར་པའི། །བཅིང་མེད་སེམས་ཀྱི་རི་དྭགས་ལ། །བདག་ཏུ་འཛིན་
པའི་རྔོན་པས་ཀྱང་། །འཆིང་གྲོལ་མ་ནུས་གཉུག་མར་དེང་། །གང་དག་འདོད་དང་ཁྲོ་བ་དང་། །གཏི་མུག་ཞགས་པ་དམ་པོ་ཡི། །འཁོར་བར་བཅིངས་རྣམས་མངོན་ཤེས་དང་། །སྨོན་ལམ་སྟོབས་ཀྱིས་རབ་གདུལ་བ། །ཀུན་ཏུ་འཆར་ཀ་ལྟར་འགྱུར་ཤོག ༧༦ །རྒྱ་མཚོའི་སྐ་རགས་ལྡན་པའི་གླིང་གི་ཁྱོན། །དཔུང་པས་ཇི་ལྟར་བཟུང་བའི་སྐྱེ་དགུ་དང་། །སྟོང་ཕྲག་གཅིག་ཏུ་ལྡང་བའི་རྒྱལ་བའི་ཚོགས། །བསྟན་པ་ནུབ་པའི་སྐྱོ་བས་ཆོས་ལ་བསྐུལ། །ཐར་པའི་དབུགས་དང་བྲལ་བའི་ཚུལ་ཁྲིམས་ཀྱི། །གཟུགས་བརྙན་མེ་ལོང་ནང་དུ་དྭངས་པའི་འཛུམ། །མཛའ་གཅུགས་སེམས་སུ་མ་ཡིན་རྒྱལ་བུ་དྲུག །སེམས་བསྐྱེད་དམ་བཅས་མངའ་རིས་ཉོ་རུ་སྩལ། །བྱང་ཆུབ་སེམས་ཀྱི་དཔུང་པའི་གྲིབ་མ་ནི། །ཕན་ཚུན་འཐབ་དང་རྩོད་པ་མི་གནས་པས། །འཇིག་རྟེན་དུས་ཀྱི་ཆད་པས་གདུངས་བ་དེར། །སྨོན་པས་བཏང་བའི་ཤ་རུས་ལྷུན་པོ་བཞིན། །རྒྱལ་པོ་ནོར་ཅན་ལྟ་བུར་བདག་འགྱུར་ཤོག ༧༧ །དམ་པ་རྣམས་ཀྱི་ཡོན་ཏན་ནི། །འགྲོ་བ་ཀུན་ལ་སྨན་བཞིན་ཏེ། །གང་ལས་རྙེད་པ་ཐོབ་པ་ཡང་། །འཇིག་རྟེན་དག་དང་ཐུན་མོང་ཡིན། །འབུམ་ཕྲག་བརྒྱད་ཀྱི་ལོའི་སྲིད་དུ། །མཆོད་སྦྱིན་བརྩོན་པའི་བཀད་ས་ལ། །རྒྱལ་བའི་ཉན་ཐོས་མི་འཇུག་
པ། །བདག་ལ་འདྲེན་པ་སྟོན་ལྟར་གྱུར། །སངས་རྒྱས་རྣམས་ཀྱི་འོད་ཟེར་ནི། །གང་ལ་འཕོག་པ་དོན་ལྡན་ཏེ། །མྱ་ངན་བྲལ་ལ་བསྙེན་བཀུར་བའི། །སྨོན་ལམ་འདི་ཡི་ཁྱད་པར་ལྟོས། །བྲམ་ཟེ་ཟླ་དགའ་ལྟར་འགྱུར་ཤོག ༧༨ །ཚིམས་པ་ཐོབ་པའི་ཆོག་ཤེས་མི་མངོན་མཐའ་དག་ཆུ་གཏེར་འདོད་པའི་དབའ་རླབས་གཡོ་བ་ན། །སློང་བའི་ཆུ་སྲིད་གདུག་པའི་ལྟོ་ནི་དབྱིག་དང་ནོར་བུ་ཟས་གོས་ཚོགས་ཀྱིས་གཏོང་བས་མིན། །བུ་དང་ཆུང་མ་རྒྱལ་སྲིད་ལོངས་སྤྱོད་ཡོངས་སུ་གཏོང་བས་ཀྱང་མིན་དབང་པོ་ཡན་ལག་རྣམས། །ཤིན་ཏུ་གཏོང་བའི་མཚོན་གྱིས་རེག་པར་འཇིགས་པ་མ་ཡིན་ཁྲག་གི་རླབས་ཕྲེང་འཕྱུར་ལ་ལྟོས། །ཚོར་བའི་སྡུག་བསྔལ་རབ་ཏུ་བརྣག་དཀའ་ཡང་། །དེ་ལ་འདོད་པའི་ཡོན་ཏན་ལྟར་གྱུར་པས། །བརྒྱ་ཕྲག་བཅུ་ཡིས་བགྲང་བྱར་གཡོ་བའི་ལུས། །སྦྱིན་པའི་དངོས་པོར་མི་ཟད་སྨོན་ལམ་མཐུ། །ས་སྤྱོད་ནམ་མཁའ་ལྟ་བུར་བདག་འགྱུར་ཤོག ༧༩ །བསྲེགས་བཅད་བརྡར་བ་མ་ཡིན་དེ་ཡི་སེམས། །ཐུབ་པའི་ལེགས་བྱས་ཆོས་ལ་རབ་གནས་པས། །འཕངས་ཀྱང་ཡོངས་འདུ་ས་བརྟོལ་ལྗོན་པ་བཞིན། །ལྷ་ཡི་གྲོང་ཁྱེར་བལྟ་ན་སྡུག་ཏུ་འགྲོ། །འཁྱུད་པའི་རྗེས་ཆགས་མེས་གདུངས་དྲང་སྲོང་ལ། །བཙུན་མོ་བྱིན་པས་
ས་འདི་འདར་བའི་རྒྱུས། །གང་ལ་བོས་པར་ལྟར་སོང་མིག་སྟོང་པ། །སྐེད་སྐབས་ཆད་པའི་ཟོལ་གྱིས་སློང་ལ་ཞུགས། །སྐྱེ་དགུའི་བསོད་ནམས་ལྗོན་པ་མི་དབང་ནི། །རེག་པ་ཤིན་ཏུ་རྩུབ་ཨོ་སོག་ལེའི་ལྕེས། །ཐིག་ནག་ལྟ་བུར་བྲེགས་པའི་གདུང་བ་ཡང་། །སྨོན་ལམ་དམ་བཅའ་བརྟན་པོས་དོན་ཡོད་བྱས། །ས་སྤྱོད་དཔལ་གྱི་སྡེ་བཞིན་བདག་འགྱུར་ཤོག ༨༠ །གང་དུ་རྒྱལ་སྲིད་འབྱོར་པའི་སྐྱེད་མོས་ཚལ། །དོན་མཐུན་སྤྱོད་པས་སྔངས་པ་ལྟར་གྱུར་ནས། །འོད་མ་སྟུག་པོས་ཁེབས་པའི་ནགས་ཚལ་དུ། །སྙིང་སྟོབས་ལ་ཞོན་མཆེད་ཀྱང་སྦྲན་ནས་སོང་། །དེ་ན་ཕྲུག་གུས་འབྲངས་པའི་སྟག་མོ་ནི། །ཉམ་ཐག་མཐོང་བའི་མོད་ལ་ལུས་སྦྱིན་ཡང་། །གཅན་གཟན་ཁྲོ་བོའི་བརྟན་པ་རབ་ཉམས་པ། །དེ་ཡིས་བཟའ་བར་མ་སྤོབས་སྲེད་པས་གདུང་། །འོད་མ་རྣོན་པོས་ཕུག་པའི་མགུལ་པ་ནས། །ཁྲག་གི་ཆུ་རྒྱུན་འབབ་པའི་གཞོན་ནུའི་ལུས། །ཤིན་ཏུ་སྙིང་རྗེའི་བསམ་པས་བསྟབས་བྱས་པའི། །གོས་རྣམས་ཡལ་གའི་ལོགས་ལ་གདུང་བ་བཞིན། །རྒྱལ་བུ་སྙིང་སྟོབས་ཆེན་པོ་ལྟར་འགྱུར་ཤོག ༨༡ །སྲོག་གི་སླད་དུ་བདག་ཉིད་མི་བསྲུངས་སྐྱེས་བུ་ཆེན་པོའི་བློ་སྟོབས་ཀྱིས། །གྲགས་སྙན་མུ་ཏིག་
གདུགས་དཀར་ཡུ་བ་ལ་རེག་བྲམ་ཟེ་དྲག་པོས་མིག །སློང་བ་འབྲས་མེད་བགྱིད་ལ་མངོན་ཕྱོགས་གྲོང་ཁྱེར་ལ་ནི་གཟུགས་ཅན་མས། །བློ་ཆེན་བློན་པོ་ཟླ་བར་སྤྲིན་ལས་གསེར་གྱི་མགོ་བོས་བསླུར་བརྩམས་ཀྱང་། །སྡིག་སེམས་རྩུབ་མོའི་སྒྲ་གཅན་གདོང་དེའི་སློང་བ་དོན་མཐུན་ལ་སེམས་པ། །མི་བདག་རང་གི་ཅོན་པན་བཀྲོལ་བའི་མོད་ལ་སྐྱེ་དགུ་གཞན་གྱི་མགོའི། །ཅོན་པན་རྣམས་ཀྱང་ས་ལ་རང་ལྷུང་གཙུག་ཕུད་བཅིང་པའི་ལྗོན་པ་ཡང་། །ཆོ་ངེའི་སྒྲར་ལྡན་དྲི་མེད་སྨོན་པས་མགོ་བོའི་འཁྲི་ཤིང་ཡང་དག་བཅད། །བྱང་ཆུབ་སེམས་དཔའ་ཟླ་བའི་འོད་ཀྱི་སྙིང་སྟོབས་དེས་ནི་བདག་འཁྱུད་ཤོག ༨༢ །སྨན་པས་རབ་ཏུ་བཏང་བའི་ནད་པའི་སྲོག །འཁར་བའི་རྩེ་མོར་འདར་ཞིང་རྡུལ་བའི་ཆུས། །མི་དབང་སྤྱན་གྱི་གེ་སར་ལ་བཀྲུས་པས། །སྙིང་རྗེའི་སྤྲིང་ཡིག་གསར་པ་འགྲེམས་པ་བཞིན། །གང་དུ་བཙའ་བའི་ཚོར་བ་མྱོང་བ་ནས། །དེ་ཡི་འདུ་ཤེས་ཁོང་ཁྲོའི་འདམ་རྫབ་ཀྱིས། །དྲི་བཅས་མ་ཡིན་སྐྱེས་བུའི་ཟུངས་ཁྲག་གིས། །ནད་འདི་སོར་ཆུད་གཞན་གྱི་མ་ཡིན་ལོ། །བདག་ལ་ལྐོག་ཏུ་མ་གྱུར་སྨན་གྱི་མཆོག །དབྱུང་ལ་དཔྱད་མཁན་ལག་ཆ་ཤོར་བ་ཡང་། །སྐྱེས་བུ་ཆེན་པོའི་བློ་སྟོབས་
ཀྱིས་བཟུང་ནས། །རྩ་ཆེན་གཏུབས་པའི་ཁྲག་གིས་དེ་ལ་གསོ། །ཤི་བའི་རྒྱལ་པོ་ལྟ་བུར་བདག་འགྱུར་ཤོག ༨༣ །རིག་བྱེད་བཞི་དང་གསང་ཚིག་ལ་སོགས་པ། །རིགས་ཀྱི་ཡོན་ཏན་གྲགས་པའི་ཟླ་འོད་ཀྱིས། །བདག་ཉིད་གསར་བྱས་བྲམ་ཟེ་ལྔ་བརྒྱ་ཡི། །སློབ་དཔོན་ཉིད་དུ་གྱུར་ཀྱང་དེས་སྨྲས་པ། །ཀྱེ་མ་ངེས་པར་འདུ་བྱེད་ལྡན་པ་འདུ། །མི་བཟད་གཤིན་རྗེའི་གཡུལ་ངོལ་ཕམ་པ་ཡིན། །སྣ་ཚོགས་རིགས་པ་དཔྱད་དུ་བཟོད་པས་ཀྱང་། །རྨོངས་པ་བཅོམ་པའི་ཕ་རོལ་འདའ་མི་ནུས། །ཐུབ་པས་བསྔགས་པའི་དྲང་སྲོང་རྒྱལ་མཚན་ནི། །ཐར་བའི་རི་དབང་རྩེ་ན་མངོན་པར་མཐོ། །དེ་ཕྱིར་ཁྱེད་ཀྱང་ཚངས་སྤྱོད་བརྟུལ་ཞུགས་ལ། །སྤྲོ་བར་གྱིས་ཞེས་ཀུན་ཀྱང་ཆོས་ལམ་བཞག །སྟོན་པ་རྩིབས་ཀྱི་མུ་ཁྱུད་ལྟར་འགྱུར་ཤོག ༨༤ །གསུམ་རིག་དབང་པོ་ཐུལ་བའི་སྐྱེས་བུ་ཆེས། །བྱང་ཆུབ་སེམས་ཀྱི་བསླབ་པའི་མཐུ་བསྟན་ཡང་། །སྙིགས་མའི་གདོན་གྱིས་ནོན་པའི་དགེ་སྦྱོང་རྣམས། །རྣལ་དུ་མི་འཛིན་གཞན་བརྙས་ཆོས་སུ་སེམས། །གཏི་མུག་སྟུག་པོའི་སྨག་རུམ་ལ་ཆགས་པའི། །ང་རྒྱལ་སྤྲིན་གྱི་ལྕུག་མའི་གད་མོ་དང་། །ལྷན་ཅིག་དབྱིག་པས་བསྐྲད་པའི་གཟུ་ལུམས་ཀྱང་། །དེ་ལ་ཁྲོ་བ་འགོད་པར་ཡོང་མི་བདེ། །ལྷག་བསམ་
བརྟན་པོས་བོས་པའི་སངས་ རྒྱས་ནི། །སྒྲ་དབྱངས་རྒྱལ་པོས་བསྟན་པ་དམ་པའི་ཆོས། །པད་མ་དཀར་པོའི་ཀེ་ས་ར་བཞད་པས། །མེ་ཏོག་ཟས་ཅན་རྣམས་ལ་དོན་ཡོད་བྱས། །རྟག་ཏུ་བརྙས་པ་བཟོད་བཞིན་བདག་འགྱུར་ཤོག ༨༥ ། གང་གིས་སྐ་རགས་བཅིངས་པ་ཙམ་གྱིས་ཀྱང་། །བདེ་འགྲོའི་བརྟན་པ་མ་ལུས་ཉམས་གྱུར་པ། །ཚོང་པ་ལྔ་བརྒྱའི་གྲོགས་དང་དཀོར་གྱི་དབྱིག །ཅིག་ཆར་འཕྲོག་པའི་དུག་སྦྲུལ་སུ་ཡིས་བོས། །ཅ་ཅོས་བྱང་ཆུབ་སེམས་དཔའ་ལ་སྦྲན་པས། །འཕྲོག་བྱེད་དབང་པོའི་སྡེར་མོ་རྡོ་རྗེའི་རྡུལ། །གླང་པོའི་སྤྱི་བོས་བཏུད་པའི་ཐལ་མོའི་གཟི། །གདེངས་ཀ་རྣོན་པོས་མ་བཟོད་ཕ་རོལ་སོང་། །ལྟོ་འགྲོའི་དུག་གིས་ སེང་གེའི་སྲོག་བཏང་ལ། །སེང་གེའི་ཤུགས་ཀྱིས་གླང་ཆེན་མིག་ཟུམ་ཡང་། །ཐབས་ཀྱིས་ཟིན་པའི་སྙིང་རྗེའི་བརྟུལ་ཞུགས་འདིར། །རྣལ་མ་མ་ཡིན་ལས་འབྲས་གཞན་ཞིག་ཡོད། །སེང་གེའི་རྒྱལ་པོ་རལ་པ་ཅན་བཞིན་ཤོག ༨༦ །དམ་པ་རྣམས་ཀྱིས་སྙིང་སྟོབས་དང་། །བརྩོན་འགྲུས་གལ་ཏེ་གཟུགས་མཆིས་ན། །ལྷུན་པོའི་དཔལ་ཡང་ཕྲག་དོག་གི། །གདོང་ལ་གཉེར་མའི་བང་རིམ་བརྩིག ། འགྲོ་བ་གཞན་གྱི་དབུལ་བའི་གདོན། །ཡིད་བཞིན་ནོར་བུས་གཞོམ་འདོད་དེའི། །རེ་བ་ཆུ་གཏེར་དབུས་འཁྱམས་
པའི། །ཕ་མཐའ་དཔག་པའི་སེམས་ལ་ལྟོས། །རྒྱ་མཚོ་སྐམ་པར་འདོད་པ་ཡིས། །སྙིམ་པའི་ཆུ་ཕྱགས་མཐོང་བའི་ལྷ། །རང་གི་བརྩོན་འགྲུས་སྨ་བབས་ནས། །ཡི་རང་ཟོལ་གྱིས་ནོར་བུ་འབུལ། །དེད་དཔོན་སློང་ལྡན་ལྟར་འགྱུར་ཤོག ༨༧ །ཧ་ཅང་ཟླུམ་པ་མ་ཡིན་བིམ་པའི་སྒྲོས། །རྣ་རྒྱན་རི་དྭགས་མིག་གིས་ཉོས་པའི་བཞིན། །མིའམ་ཅི་ཡི་བུ་མོ་ཡིད་འཕྲོག་མའི། །གཙུག་ཕུད་དོན་ཡོད་ཞགས་པའི་གཞན་དབང་ཅན། །ཕ་རོལ་གནོན་ལ་རྟུལ་ཕོད་ནོར་བཟང་གིས། །རྩེ་དགའི་འཁྲི་ཤིང་གསར་བར་རབ་བཟུང་དེའི། །སོར་མོའི་ལྕུག་ཕྲན་འདར་བའི་གདུ་བུའི་སྒྲ། །ཁྱོ་ཤུག་མཛའ་བའི་བརྩོན་པ་བྱེད་པ་བཞིན། །ཕན་ཚུན་སྙིང་ལ་སྡུག་པའི་རི་མོ་ནི། །བླུན་པོའི་གཡོ་སྒྱུས་འདུ་འབྲལ་ལ་བཀོད་ཀྱང་། །བགྲོད་དཀའ་ཉོན་མོངས་བརྒྱ་ཡིས་བསྲུངས་བའི་ལམ། །སྙིང་སྟོབས་མཐུ་ཡིས་བརྒལ་ནས་སླར་ལ་བརྩེ། །གཞོན་ནུ་ནོར་བཟང་ལྟ་བུར་བདག་འགྱུར་ཤོག ༨༨ །སྙིང་ལ་སྡིག་པའི་དུས་མེ་རབ་ཞུགས་པའི། །བླུན་པོས་མི་བདག་དཔུང་པ་བཅོམ་པའི་གཡུལ། །རིགས་ཀྱི་ཐིག་ལེར་འཁུ་བའི་མངོན་བརྗོད་སྒྲ། །ཡུལ་གཞན་གདུང་བས་བགྲོད་པའི་སྤྲིང་ཡིག་གྱུར། །སྲོག་ལ་བཟའ་བར་བྱེད་པའི་མྱ་ངམ་ཐང་། །བཤུལ་རིང་ལམ་གྱི་མཐུ་ཡིས་ཟིལ་གནོན་པའི། །
ཡབ་ཅིག་དེ་ལས་ཅིག་ཤོས་སྲས་དང་བཅས། །འགྲེ་བཞིན་རྒྱལ་བའི་ཤ་ལས་བཅད་ཅིང་ཟོས། །ས་སྤྱོད་གཞན་གྱི་དཔུང་པའི་གྲིབ་བསིལ་ལ། །དབུགས་འབྱིན་ཐོབ་ཏུ་ཉེ་བའི་སར་སོན་ཚེ། །ཞོ་ཤས་བསྟན་པར་མ་ནུས་རུས་པའི་ཁུར། །རྩ་བ་བཅད་པའི་ལྗོན་པ་བཞིན་དུ་དེངས། །རྒྱལ་བུ་སུ་ཤ་ད་བ་ལྟར་འགྱུར་ཤོག ༨༩ །གཟུགས་དང་བརྩོན་འགྲུས་བཟོ་དང་ཤེས་རབ་དང་། །བསོད་ནམས་མིང་གི་ཅོད་པན་ཁུར་བཟོད་ནས། །རང་རང་དོན་མཐུན་ལ་སྙེམས་རྒྱལ་བུ་ལྔས། །བསོད་ནམས་དམ་པའི་ཟིལ་ལ་བཟོད་མ་ནུས། །རྒྱལ་པོ་རང་གི་ཡུལ་ན་ཆེ་བའི་ཁབ། །སྤངས་པའི་ཕ་རོལ་གྱི་ནར་མངོན་འཕྱན་ནས། །གཟུགས་སོགས་ཡོན་ཏན་མཐུ་ཡིས་འཚོ་བའི་སྟོབས། །དབུལ་པོའི་ཁྱིམ་དུ་ཞུགས་པའི་གཞོན་ནུས་ཕྲོགས། །བསྡུ་དངོས་བཞི་པའི་དཔུང་གི་ཡན་ལག་ནི། །དེ་ཡི་བསོད་ནམས་བྱིང་དང་རབ་འཕྲོགས་པས། །གཡུལ་གྱི་བགྱི་བ་རྩུབ་མོས་མ་ཡིན་པར། །འཛམ་བའི་གླིང་གི་དབང་ཕྱུག་ཆེན་པོར་གྱུར། །རྒྱལ་བུ་བསོད་ནམས་སྟོབས་བཞིན་བདག་འགྱུར་ཤོག ༩༠ །ཐུབ་རྣམས་རལ་པའི་ཟུར་ཕུད་ལ། །ལྔ་ཕྲག་ཡེ་ཤེས་ཅོད་པན་མཛེས། །ཀུན་ཏུ་རྒྱུ་ཡི་ཡོ་བྱད་གསུམ། །འདོད་པ་ཟིལ་གྱིས་གནོན་པའི་དཔལ། །རྣལ་འབྱོར་རྗེས་
མཐུན་ནགས་ཁྲོད་ན། །བསམ་གཏན་མཐུ་ཡིས་མངོན་བསྐྱོད་པའི། །བཟོ་བའི་གནས་དང་མངོན་ཤེས་ལྔས། །ཐུབ་པའི་བརྟུལ་ཞུགས་རྫོགས་མ་ཡིན། །ཇི་སྙེད་མཁྱེན་པའི་ཡེ་ཤེས་ཀྱང་། །གང་དུ་འགོག་དང་སྐྱེ་བའི་གནས། །རང་བཞིན་དག་པའི་ཆོས་ཉིད་ཀྱིས། །ཇི་ལྟའི་ཡེ་ཤེས་རྣལ་མར་སྦྱོར། །དྲང་སྲོང་འོད་བཟང་ལྟར་འགྱུར་ཤོག ༩༡ །ཤེས་བྱའི་ཡུལ་ལ་ཤེས་རབ་ཀྱིས། །སྣང་བས་ཉིན་མོར་རབ་བྱས་པས། །མངོན་སུམ་རྗེས་དཔག་གཏན་ཚིགས་གཉིས། །འདུ་འབྲལ་གསར་བ་གསལ་བར་བཀོད། །སེམས་དང་སེམས་བྱུང་འདུ་བྱེད་ཀྱིས། །ཡུལ་རྣམས་གདུང་བས་བགྲོད་བྱས་པའི། །སྣ་ཚོགས་ལས་ཀྱི་ས་བོན་འདིས། །འགྲོ་འདི་ཤིན་ཏུ་མ་རུངས་བྱས། །བདག་མེད་རྟོགས་པའི་ཡེ་ཤེས་ནི། །ཤེལ་ལ་ཆགས་མཚོན་མི་གནས་ལྟའི། །མཚན་ཉིད་ལ་སྤྱོད་གྲོང་ཁྱེར་དང་། །ཡུལ་རྣམས་ཡེ་ཤེས་མཐུ་ཡིས་གདུལ། །དྲང་སྲོང་ཕྱི་མཐའ་བསྒྲུབ་བཞིན་ཤོག ༩༢ ། ཆོས་སྟོབས་འབར་བའི་རྒྱལ་པོ་རྣམས། །བློ་གྲོས་གྲགས་པའི་འཛུམ་དཀར་ལས། །ཡེ་ཤེས་མཆོག་གི་སྤོབས་པའི་གཏམ། །སུམ་རྩེན་གནས་སུའང་ཡང་དག་འགྲོ། །ཕུང་པོ་ཁམས་དང་སྐྱེ་མཆེད་དང་། །ཆོས་དང་གང་ཟག་ལ་སོགས་པ། །དངོས་པོར་
བལྟ་བའི་ལྕགས་སྒྲོག་གིས། །འཁོར་བའི་བཙོན་རར་འཇིག་རྟེན་བཅིངས། །ཐུབ་པ་རྣམས་ཀྱི་ཡེ་ཤེས་ནི། །གཟུང་འཛིན་ཡུལ་ལ་རབ་ཞི་བའི། །ངོ་བོ་ཉིད་ཀྱི་གྲོང་ཁྱེར་ཆེར། །སེམས་ཅན་ཁམས་རྣམས་ཡང་དག་འཛུད། །རྟོག་གི་བློ་གྲོས་ལྟར་འགྱུར་ཤོག ༩༣ །དྲི་བཞིན་གཡོ་བའི་ཤིང་རྟས་དྲངས་མིན་པ། །སོ་ཀའི་ཆར་སྤྲིན་སྔོན་པོའི་དཔལ་སྟུག་དང་། །ཤིན་ཏུ་འཁྲུལ་པ་སྐྱེད་བྱེད་ནྱ་གྲོ་ཏཱའི། །ཡལ་ག་རྒྱང་གྲགས་གཅིག་པའི་མུ་ཁྱུད་ཅན། །ཉོན་མོངས་རྙོག་པ་རབ་ཞིའི་རྟོག་དཔྱོད་ཀྱི། །ཆོ་ག་ཤིན་ཏུ་ཞིབ་མོས་འདབ་མའི་གྲངས། །གཞལ་ལ་ལོ་གྲངས་བཅུ་གཉིས་ངལ་བྱས་པ། །དྲང་སྲོང་སྣང་བའི་བརྟུལ་ཞུགས་ཡུད་ལ་སྨད། །དབང་པོས་ཡུལ་ལ་འཇལ་བའི་ཤེས་རབ་ནི། །ས་མཐོར་གཤེགས་ལ་ཤེས་བྱའི་སྒྲིབ་པ་སྟེ། །ཇི་ལྟ་ཇི་སྙེད་མཁྱེན་པའི་ཡེ་ཤེས་ལ། །སྲིད་ཞིའི་ཆོས་རྣམས་ལྐོག་ཏུ་གྱུར་པ་མེད། །བྲམ་ཟེ་སྔོ་སངས་ལྟ་བུར་བདག་འགྱུར་ཤོག ༩༤ །འཁོར་བ་ཆུ་སྲིན་འབྱུང་གནས་བདག་ལྟའི་རིས། །རྣམ་པ་སྣ་ཚོགས་ཚོན་དུ་བཀྲག་བརྟས་པའི། །ཉོན་མོངས་དབའ་ཀློང་འཁྲུགས་པའི་རྣམ་གཡེང་རླབས། །ཞི་བའི་གྲུ་གཟིངས་གསར་པས་རབ་ཏུ་བརྒལ། །གཟུགས་ནི་བདག་མིན་བདག་ལ་གཟུགས་མི་གནས། །དེ་བཞིན་ཚོར་
དང་འདུ་ཤེས་འདུ་བྱེད་དང་། །རྣམ་པར་ཤེས་པའི་ཕུང་པོ་སྒྱུ་འདྲའི་ཆོས། །རང་བཞིན་ཉིད་དུ་དག་པའི་ཤེས་བྱས་འདུལ། །བྲམ་ཟེ་ཉི་ཕྲེང་སྤོང་བཞིན་བདག་འགྱུར་ཤོག ༩༥ །རིགས་ཀྱི་བརྟུལ་ཞུགས་ཉམས་པའི་བཞིན། །ཕ་མས་མ་བཟོད་རྣམ་པར་འཁྱམས། །དཀའ་ཐུབ་སྤྱོད་པའི་བསྟི་གནས་སུ། །སྔོན་གནས་རྗེས་དྲན་སྟོབས་སུ་འབར། །འཇིག་རྟེན་མེས་པོ་ཚངས་པ་ཡང་། །གཟའ་དང་རྒྱུ་སྐར་ཆུ་ཚོད་ཀྱི། །རྟེན་ཅིང་འབྲེལ་འབྱུང་ལ་རྨོངས་ནས། །མཚན་ཉིད་དེ་ལ་དྲི་བར་མཁས། །ལོ་ནི་དྲུག་ཁྲིའི་དཀར་ཐུབ་བར། །བརྟན་པ་ཐོབ་པའི་ཡེ་ཤེས་ཀྱིས། །མཁའ་ལ་གཟའ་སྐར་བཀྲམ་པའི་ཁྱད། །མེ་ལོང་ནང་གི་གཟུགས་བཞིན་བསྟན། །དྲང་སྲོང་རྔ་བོང་ལྟར་འགྱུར་ཤོག ༩༦ །མི་བདག་ཡེ་ཤེས་མངོན་གྱུར་རྣམས། །བག་མེད་རླབས་ཀྱིས་འཁྲུགས་པ་མིན། །སྦྱིན་དང་སྙན་སྨྲ་དོན་སྤྱོད་དང་། །དོན་མཐུན་ཤིང་རྟ་རྩིབས་སྟོང་པས། །ཟད་དང་མི་སྐྱེ་ཤེས་པ་ལ། །བཟོད་པ་ཐོབ་པའི་རིན་ཆེན་གླིང་། །འགྲོ་ཀུན་སྒྲོལ་བའི་གྲགས་སྙན་རྔས། །ཆོས་བཟང་ལྷ་ཡི་འདུན་སར་བོས། །ལྷ་དབང་ཉིད་དང་སྟན་གཅིག་པའི། །གྱ་ནོམ་འདོད་པའི་ཡོན་ཏན་ཀྱང་། །དེ་ཡིས་ཡེ་ཤེས་དམ་པའི་ཟིལ། །མ་བཟོད་རིན་ཐང་ཉམས་ལ་ལྟོས། །རྒྱལ་པོ་མུ་ཁྱུད་ལྟར་
འགྱུར་ཤོག ༩༧ །དག་བྱེད་གཏེར་གྱིས་འཁྱུད་མོས་རབ་བསྡམས་པའི། །ནོར་འཛིན་དཔུང་བའི་གྲིབ་མས་བཀབ་པ་ཡང་། །མི་རྟག་གཡོ་བའི་སེར་བུའི་གཞན་དབང་གིས། །མངོན་སྤྱོད་མཐུ་ཡིས་བཤིག་ལ་རབ་ཏུ་སྐྱོ། །བགྲང་དུ་མི་སྤྱོད་སྲས་དང་བཙུན་མོའི་འཁོར། །འབྱོར་བའི་བག་མ་བརྗིད་པའི་རྒྱལ་པོའི་སྲིད། །ཐར་པའི་རྒྱལ་མཚན་ཏོག་ལ་རབ་སྦྱར་བའི། །བུད་མེད་དག་ཀྱང་སྐྱེས་པའི་དབང་པོར་གྱུར། །ལོག་ལྟ་དགྲ་སྟྭའི་དུམ་བུས་སྙིང་བཀས་པའི། །ཤོར་བ་གཞོན་ནུས་རབ་བྲིད་ཚོགས་པར་བཅས། །སྙིང་རྗེ་སྟོབས་སུ་གྱུར་པའི་བསིལ་ཡབ་ཀྱིས། །བཀབ་པས་ལྟ་ལོག་གདུང་བ་རིང་དུ་བྲོས། །དགེ་སློང་ཨུཏྤལ་བཞིན་བདག་འགྱུར་ཤོག ༩༨ ། ཐར་པའི་ལམ་མཆོག་གསལ་ལ་ཕྲག་དོག་གི། །མུན་པ་སྟུག་པོའི་བཞིན་རས་བྱུགས་བྱས་ཀྱང་། །ད་དུང་ཆགས་བྲལ་ཟོལ་གྱིས་འདོད་ཡོན་ལ། །རབ་ཏུ་བསྔགས་པར་བྱེད་འདི་བདུད་ཀྱི་ལས། །མི་བསྲུན་འཕྱང་ཞིང་གཡེང་བའི་མགྲིན་པ་ནི། །རྣམ་བཀྲའི་དོ་ཤལ་གསར་བས་རབ་སྤངས་ནས། །ཁྱི་རོ་རུལ་བའི་དཔྱང་ཐག་ལ་འབྲེལ་བ། །བདུད་ཀྱི་བདུད་གྱུར་སྐྱེས་བུ་ཆེན་པོའི་མཐུ། །ཤུགས་འཆང་དཔུང་པས་བཀབ་པའི་གཞན་འཕྲུལ་དབང་། །འདོད་པའི་ཅ་ཅོས་
སྲུང་བའི་མིག་ཡངས་མ། །ཁྲི་ཕྲག་དགུ་བཅུ་རྩ་དགུ་བྱང་ཆུབ་ལམ། །བཞག་པས་བདུད་ཀྱི་འཇིག་རྟེན་སྟོངས་པར་བྱས། །བྱང་ཆུབ་སེམས་དཔའ་དཔའ་བའི་སྟོབས་ལྟར་ཤོག ༩༩ །ཕྲ་རབ་རྡུལ་གྱི་རྒྱལ་བའི་ཞིང་ཁམས་ལ། །ཞབས་སེན་རི་མོས་བཀོད་པའི་འོད་ཟེར་གྱིས། །འགྲོ་རྣམས་མ་རིག་འཐིབས་པོའི་གཉིད་སད་ནས། །སངས་རྒྱས་མཐོང་བའི་མིག་ཐུར་འཛུགས་པ་བཞིན། །བདེ་གཤེགས་འོད་མཐའ་ཡས་པའི་ཞིང་ཁམས་ཁྱོན། །འོད་ཟེར་སྣང་བས་བཀོད་པའི་མུ་ཁྱུད་ལ། །བསྐལ་པ་གྲངས་མེད་གཉིས་སུ་རྫུ་འཕྲུལ་གྱིས། །བགྲོད་པས་ཕ་མཐའ་མ་ཐུག་གཏམ་འདི་རྫུན། །གང་དུ་རྒྱལ་སྲས་སྙིང་སྟོབས་བརྟུལ་ཕོད་ལ། །ཕ་ལམ་རྡོ་རྗེའི་མཐུ་ཡང་འབྱེར་བྱེད་ན། །སྒྱིད་ལུག་ཁུར་ཆེན་འདི་ནི་བལྟར་སྣང་ཙམ། །སྟོང་གསུམ་དར་ཡུག་ཆེན་པོའི་བྱེད་པོ་སུ། །གཟི་བརྗིད་དྲག་པོ་ལྟ་བུར་བདག་འགྱུར་ཤོག༡༠༠། འདི་ལྟར་གྲངས་མེད་གསུམ་གྱི་བསྐལ་པའི་སྲིད། །འཁོར་བ་ཆུ་སྲིན་འབྱུང་གནས་ལ་འགྲོགས་ཀྱང་། །བྱང་ཆུབ་སྤྱོད་པའི་འཁྲི་ཤིང་གསར་བ་ནི། །བློ་དང་རིག་པ་སྙིང་རྗེའི་གྲིབ་བསིལ་ཅན། །ཕ་རོལ་ཕྱིན་བཅུའི་ཆ་ཤས་ཉ་གང་བར། །ཚོགས་གཉིས་དབང་པོའི་མཚོན་གྱི་རྣ་ཆ་འདི། །ཆེད་དུ་བཏགས་པ་མིན་ཡང་མཛད་པའི་ཁྱིམ། །
བཅུ་གཉིས་བགྲོད་པའི་ལྟད་མོར་འོངས་པ་བཞིན། །གང་དུ་རྣམ་པ་ཉི་ཤུས་བྱང་ཆུབ་པའི། །ཁ་སྦྱོར་བདུན་ལྡན་རྡོ་རྗེ་སེམས་དཔའི་དངོས། །བྱང་གྲོལ་མེ་ལོང་ནང་གི་དཔེ་བྱད་གཟུགས། །རྡོ་རྗེའི་གདན་གྱིས་སྤོ་ལས་མངོན་རྫོགས་པའི། །ཀུན་མཁྱེན་དེ་ཡི་གོ་འཕང་མྱུར་ཐོབ་ཤོག ༡༠༡ །སྐྱེས་པ་རབས་ཀྱི་རྒྱུད་སྙན་དངགས་དམ་པའི་འཁྲི་ཤིང་དུ་བསྔགས་པའི་པྲ་ནྀ་དྷ་མིའམ་ཅི་ཀུན་ཏུ་དགའ་བའི་ཟློས་གར་ཞེས་བྱ་བ། བློ་གསལ་དབང་པོ་ཝ་གིན་དྲས་བསྐུལ་བའི་ངོར། མ་ཧཱ་སན་དྷི་ནི་ར་བྷ་ཡ་དྭཱི་པ་མཁྱེན་བརྩེའི་ལྷས་སྦྱར་བ་རྗོགས་སོ།། །།སངས་རྒྱས་དང་བྱང་སེམས་སྤྲུལ་བར་བཅས་པའི་བསྟོད་ཚོགས་ཚངས་པའི་རྒྱུད་མངས་ཞེས་བྱ་བ་བཞུགས། །སངས་རྒྱས་སུམ་ཅུ་སོ་ལྔ་ལ་བསྟོད་པ་ལྗོན་པའི་གླུ་ཕྲེང་ཞེས་བྱ་བ། །ཁྱོད་མཚན་བསླུ་བ་སྤགས་པ་ནོར་བུའི་ཏོག །མཐོན་མཐིང་འོད་ཆགས་འཛུམ་པའི་གདེངས་ཀ་སྟེ། །ཐལ་མོས་བཏུད་པའི་མོད་ལ་བསྐལ་ཁྲིའི། །ཉེས་བྱས་འཁིར་ཤིང་གཅོད་པ་ཤཱཀྱའི་རྒྱལ། །ཐབས་དང་བརྩོན་འགྲུས་མཐུ་ཡིས་འཕགས་པར་འདུད། །༡བསམ་གཏན་ཕ་རོལ་ཕྱིན་པ་རྡོ་རྗེ་ལྟའི། །ཏིང་འཛིན་གཞུ་རྒྱུད་བདུངས་པའི་སྙིང་པོའི་མཚོན། །བདུད་ཀྱི་དབུང་དང་བསྐལ་ཆེན་ཁྲི་ཕྲག་ལྔའི། །སྡིག་པའི་སྙིང་ལ་འཇུག་པས་རབ་འཇོམས་པ། །གསེར་མདོག་ཆོས་འཆད་མཛད་ལ་
སྤྱི་བོས་བཏུད། ༢།རྒ་ཤིའི་ཆད་པས་ནོན་པའི་འཇིག་རྟེན་དུ། བསྐལ་ཆེན་ཁྲི་ཕྲག་ལྔ་སྟོང་གོམས་བྱས་པའི། །ངན་སོང་རྒྱུ་འབྲས་དག་དང་བདུད་ཀྱི་དཔུང་། །མཐར་བྱེད་རིན་ཆེན་འོད་འཕྲོའི་ལྷུན་བོ་ནི། །གསེར་ཅན་ཆོས་འཆད་མཛད་ལ་སྐྱབས་སུ་དོང་། །མ་དྲོས་ཀླུ་ཡིས་འཛམ་བུའི་གླིང་པ་བཞིན། །སྟོང་གསུམ་འགོག་ལམ་བདེན་པའི་ཆོས་ཆར་ཅན། །ཀླུ་དབང་རྒྱལ་པོ་གདེངས་ཅན་ཞལ་མགྲིན་དཀར། །བསྐལ་བ་བརྒྱད་ཀྱི་སྡིག་པའི་དུས་མེ་འཇོམས། །ཨིནྡྲ་ནི་ལ་ཆོས་འཆད་རྒྱལ་ལ་འདུད། ༤།རྟག་ཆད་མཚོན་ཆ་རྣོན་པོའི་གཞན་དབང་གིས། །དཀྲུགས་པའི་བདུད་དང་མུ་སྟེགས་གླང་པོའི་སྤྱི། །ཀུན་མཁྱེན་སྡེར་མོས་འདྲད་པ་དཔའོ་བོའི་སྡེས། །ངག་གིས་ཉེས་བྱས་དགྲ་སྟྭའི་དུམ་བུ་བཅོག །གསེར་ཞུན་སྐྱབས་སྦྱིན་ཆོས་འཆད་གཙུག་ན་བསྟེན། ༥།འཇིག་རྟེན་ཕ་རོལ་སོན་པ་སོར་ཆུད་ལས། །ཁྱོད་ཀྱིས་འཚོ་གཞེས་འགྲོ་བ་གཞན་དོན་དུ། །གཏོང་ལ་དཔལ་ལྟར་གཟིགས་ནས་རབ་དགྱེས་པས། །ཡིད་ཀྱིས་ཉེས་བྱས་འཆབ་པ་མེད་པར་བཅོམ། །གསེར་གྱི་ལྷུན་པོ་ཆོས་འཆད་མཛད་ལ་འདུད། ༦།དབང་ཕྱུག་རྣམས་ལ་ཡེ་ཤེས་སྣང་བ་དང་། །བར་མི་རྒྱུད་ལ་སྨིན་པའི་ནུས་པ་བསྐྱེད། །ཀུན་དཀྲིས་ཉོན་མོངས་བསྲེགས་པའི་རིན་ཆེན་མེ། །དགེ་འདུན་དཀོར་འབགས་རྣམ་སྨིན་བྱིན་ཟའི་གདོན། །
བདུད་འདུལ་ཕྱག་རྒྱ་གཙུག་ཏོར་ནོར་བུའི་ཏོག ༧།མཁྱེན་རབ་རིན་ཆེན་སྒྲོན་མའི་ཟླ་འོད་ཀྱིས། །ཕྱོགས་ཀྱི་མཛེས་མའི་བཞིན་རས་སྣང་མཛད་ཅིང་། །མེ་སྤྲུལ་དགྲ་དང་རྡོ་རྗེའི་འཇིགས་པ་ཡིས། །ཕྱོགས་ཙམ་མི་མཚོན་འཕགས་པ་སྐུར་བའི་སྡིག །དག་བྱེད་དཀར་པོ་ཆོས་འཆད་སྐྱི་བོས་མཆོད། །བལྟ་བས་མི་ངོམས་འདོམ་གང་འོད་ཀྱི་སྐུ། །མཐོང་བ་དོན་ཡོད་ཡིན་པས་བསྐལ་པའི་སྡིག །རིངས་པར་འབྲོས་པའི་གོ་སྐབས་སྟེར་བྱེད་ན། །དམྱལ་བའི་མེ་མདག་སྐྱབས་སྦྱིན་ཕྱག་རྒྱ་ཡིས། །བསིལ་བྱེད་བཻ་ཌཱུརྱ་ཡི་ལྷུན་པོར་འདུད། །གསང་གསུམ་རིན་ཆེན་ཟླ་བ་ག་བུར་རྡུལ། །དྲི་མེད་སྤྲོས་བྲལ་མཁའ་ལ་རྒྱས་ཐེབས་པའི། །མཚན་དཔེ་མཐོང་བའི་མདོ་ལམ་བསད་པའི། །སྡིག་ཏོའི་སྲོག་གི་ཟུངས་གཏོང་བྱང་ཆུབ་མཆོག །ཕྱག་རྒྱ་རི་ཐང་སྤངས་པ་སྤྱི་བོས་བཏུད། ༡༠།བདག་ཉིད་དག་པའི་ཆོ་གས་གདོད་ཀྱི་གཞན། །མཆོག་ཏུ་དག་བྱེད་དབང་སྔོན་ཞུན་མའི་མཁས། །དྲི་མ་མེད་པའི་དཔལ་གྱུར་ཆོས་འཆད་སྡེས། །ཕ་བསད་སྡིག་ཏོའི་གཡུལ་ངོ་མཐར་བྱས་ན། །ཡན་ལག་མཆོག་གི་ཏོག་ཏུ་གསལ་གྱུར་ཅིག ༡༡།བསོད་ནམས་བྱང་ཆུབ་ལམ་དུ་བསྒྱུར་བ་ལ། །མུ་བཞིའི་ཆོ་ག་དག་པའི་ན་ཁྱེན་རབ་མཚོན། །བསྔོ་བ་དམ་དམ་དཔལ་བྱིན་ཆོས་འཆད་སེར། །མཐོང་བའི་
མོད་ལ་དགྲ་བཅོམ་གསོད་པ་དེ། །མནར་མེད་གྲོང་དུ་འཇུག་པའི་སོ་འཕར་གཅོད། ༡༢།གང་ལ་རིག་དང་ཆགས་སུ་ལྡན་པ་པོར། །ཚངས་པའི་མཚན་དུ་བྲམ་ཟེས་མངའ་གསོལ་ཡང་། །བདེ་གཤེགས་སྐུ་ལ་དན་སེམས་ཁྲག་ཕྱུག་བའི། །ལྟུང་བྱེད་ཆེན་པོ་ཚངས་པའི་ཁྱུ་མཆོག་ནི། །སྟོབས་བཅུའི་དཔལ་ལྡན་ས་གནོན་མཉམ་གཞག་སེར། །གང་ལ་སྐྱབས་སུ་དོང་བ་དེ་ཡིས་སེལ། ༡༣།གཞི་གསུམ་རྩ་བ་བརྟན་པོའི་ཁྱད་ཆོས་ཀྱིས། །ཚངས་པར་སྤྱོད་དང་ཚངས་པའི་གནས་པ་བཞི། །དོན་མཐུན་ལམ་སྦྱོར་ཕྱིར་ཚངས་པས་ཀྱང་། །ཆོས་འཁོར་བསྐུལ་ཞིང་ཐར་ལམ་གསལ་བར་བྱིན། །གསེར་ཞུན་རྡུལ་བ་རྩེགས་ཆོས་འཆད་ལ་ཕྱག་འཚལ། ༡༤།དཀའ་ཐུབ་བརྟུལ་ཞུགས་གཙང་མའི་ཆུ་གཏེར་དང་། །ཁ་ན་མ་ཐོའི་ཆུ་སྲིན་སྡིག་ཏོ་ཅན། །རྟེན་དང་བརྟེན་པར་འགལ་བས་དགྲ་བཅོམ་པ། །སུན་བྱུང་ཉེས་སྤྱོད་ཟུག་རྡུ་དག་བྱེད་ཆོས། །ཆུ་དཀར་པོ་མཉམ་པར་ཞག་ལ་འདུད། །འཇིག་རྟེན་སྲི་ཞུའི་གནས་གྱུར་བདེ་བྱེད་དེའི། །བསྟི་སྟང་མ་དྲོས་ཀླུ་དབང་དཔལ་གྱུར་ཡང་། །རང་གི་གདེངས་ཀ་གཞན་།དབང་གྱུར་ལ་དེར། །ཆུ་ལྷའི་ལྟར་གྲགས་ཆོས་འཆད་ག་བུར་རྡུལ། །བྱང་ཆུབ་སེམས་དཔའོ་ངེས་གསང་སྡིག་ཏོའི་སྨན། ༡༦།འདྲེན་པ་ཀུན་གྱི་བསྟི་སྟང་རེག་བྱ་ཡིས། །ཐུགས་
ལ་ཡང་དག་འཁྱུད་ཀྱང་ཉེར་ཞི་བ། །འཇིག་རྟེན་ཀུན་ལ་དཔལ་མཛད་བཟང་པོ་སེར། འཕགས་པ་སློབ་པ་བསད་པའི་སྡིག་ཏོའི་སྒྲ། །སྐྱབས་སྦྱིན་ཆོས་འཆད་ཅན་ལ་ཕྱག་བགྱིའོ། ༡༧།ཉོན་མོངས་འཐིབས་པོའི་ནགས་ཀྱིས་གདུངས་བ་ཀུན། །ཙན་དན་བསིལ་བའི་དྲི་བཞོན་གྱིས་སྤངས་པའི། །དཔལ་སྟུག་ཕྱོགས་ཀྱི་གོས་ཅན་བདུད་འདུལ་རྒྱས། །དགེ་འདུན་འདུས་བའི་སྒོ་འཕར་ཕྲོགས་བའི་ཁུར། །དབུགས་འབྱིན་མཛད་པ་ཁྱོད་ལ་ཕྱག་འཚལ་ལོ། ༡༨།རྒྱལ་བ་ཁྱོད་ཀྱི་དཔལ་དང་གཟི་བརྗིད་ལ། །དོ་ཟླར་ཆས་པ་རྟག་ཆད་མཐར་ལྟའི་མིག །བདུན་གྱི་བདུན་པའི་བདུན་སར་ཉམས་བྱེད་པའི། །གཟི་བརྗིད་མཐའ་ཡས་དམར་པོ་ཆོས་འཆད་ཅན། །མཆོད་རྟེན་བཤིག་པའི་རྣམ་སྨིན་སྦྱོང་ལ་འདུད། ༡༧།ཁེངས་དང་རྒྱལ་ཆུ་སྲིན་གདུག་པའི་ལྟོ། །བྱང་ཆུབ་མཆོག་གི་རྒྱག་རྒྱས་དབྲོལ་པའི་མཚོན། །ཆོ་ག་ཤིན་ཏུ་ཞི་བའི་འོད་ཟེར་ནི། །ཞེ་སྡང་ལས་གྱུར་ཀུན་སློང་ཆེམ་པོ་མཆོག །བདེ་གཤེགས་འོད་དཔལ་སྔིན་པོ་ལ་ཕྱག་འཚལ། ༢༠།ཚོགས་གཉིས་ཁམས་ལ་བཞུ་བཏུལ་མཐར་མཛད་རྣམས། །ཕུང་སོགས་སྐྱེ་མཆེད་ཆོད་དང་བཤེས་མ་ཡིན། །མྱ་ངན་མེད་པའི་དཔལ་སྟུག་དམར་སྐྱ་ནི། །འདོད་ཆགས་ལས་གྱུར་ངན་འགྲོའི་ལམ་དོན་སྒོ། །རབ་གཅོད་མཉམ་
པར་གཞག་ལ་ཕྱག་བགྱིའི། ༢༡།མཐའ་དག་རྟེན་ཅིང་འབྲེལ་འབྱུང་ཞགས་པ་ཡིས། །ཉོན་མོངས་གསུམ་གྱི་བསྐལ་པའི་སྲིད་འགྲོགས་སྡིག །སྟོབས་ལྡན་སྲེད་པར་གོམས་པའི་ཟུག་རྔུ་དང་། །ལྷན་ཅིག་གསོ་བའི་སྨན་པ་སྲེད་མེད་བུ། །གསེར་མདོག་ཆོས་འཆད་སྟེང་འོག་ཅན་ལ་འདུད། ༢༢།མཐའ་དག་མཛེས་པས་ཁྱོད་ལ་བསྙེན་བཀུར་བའི། །རྣམ་པ་ཀུན་གྱི་མཆོག་ལྡན་མེ་ཏོག་དཔལ། །གཡས་བརྐྱང་མཐེབ་མཛུབ་སྦྱར་བའི་མཚན་དཔེའི་དཔྱིད། །འཛམ་བུའི་གསེར་གྱིས་བྱུགས་ལ་སྐྲག་གྱུར་ནས། །འབུམ་ཕྲག་བསྐལ་པའི་སྡིག་ཚོགས་ཡུད་ལ་བྲོས། ༢༣།སྡིག་ཏོའི་མཚོན་ཆ་རྣོན་པོས་བསྐལ་པ་སྟོང་། །གཞར་བ་མུན་པའི་བཞིན་རས་ཀུན་དཀྲིས་ཅན། །ཚངས་པའི་འོད་ཟེར་རྣམ་པར་རོལ་པ་ཡི་། སྣང་མཛད་ཡེ་ཤེས་མངོན་པར་མཁྱེན་པའི་མཚོན། །གསེར་གྱི་རྡུལ་བརྩེགས་ས་གནོན་མཉམ་གཞག་རྒྱལ། ༢༤།རེག་ན་བདེ་བར་འཆར་བའི་མཚོན་ཆས་ཀྱང་། །བསྐལ་པ་བདུན་གྱི་སྡིག་ཏོའི་དུས་མེ་གསོར། །པདྨའི་འོད་ཟེར་རྣམ་པར་རོལ་པའི་ཐུགས། །ལྐོག་གྱུར་ཡོང་ཡེར་མ་བཟུང་མངོན་པར་མཁྱེན། །བཙོ་སྦྱངས་གནོན་མཉམ་གཞན་ཅན་ལ་འདུད། ༢༥།རིན་ཐང་ཉམས་བ་མེད་པའི་བསོད་ནམས་ནི། །འགྲོ་ལ་ཚུལ་ཁྲིམས་ནོར་དང་དཔལ་བྱིན་ནས། །
ལས་མཐའ་སྔམས་བཞག་པའི་བག་ཆགས་སྡིག །མཉམ་གཞག་ཆ་ོག་ཟབ་མོའི་བྱི་དོར་གྱིས། །བསལ་ནས་ནམ་མཁའི་མངོན་རྟོགས་རྔོམ་ལ་འདུད། ༢༦།དྲན་པ་ཉེ་བར་གཞག་སོགས་རྣམ་བྱང་ཆོས། །མཐའ་དག་ལམ་ལྔའི་འཛིན་བྱད་ཀྱིས་བཟུང་བའི། །ཁྱོད་མཚན་དྲན་པའི་དཔལ་གྱི་མདུན་སར་ཡང་། །ལུས་ཀྱི་ཉེས་བྱས་ཚོགས་ཤིང་དུས་བབ་པའི། །སྐབས་ཡོལ་གསེར་མདོག་མཉམ་གཞག་ཅན་གྱི་མཐུ། ༢༧།ཐུབ་རྣམས་ཆོས་ཀྱི་འཁོར་ལོའི་གྲགས་སྙན་རྔ། །གྲོང་ཁྱེར་གསུམ་གྱི་རྣ་ལུང་ལ་དཔྱངས་པའི། །མཚན་དཔལ་ཤིན་ཏུ་ཡོངས་གྲགས་ཆོས་འཆད་དཀར། །སངས་རྒྱས་འབྱུང་ལ་མཉེས་པར་མི་བགྱིད་པའི། །སྟོབས་ཆེན་སྡིག་པའི་དབུགས་འཕྲོག་རྒྱལ་གྱུར་ཅིག ༢༨།དབང་པོའི་གཙུག་ན་ཏོག་གྱུར་རྒྱལ་མཚན་གྱི། །གཡོན་པའི་ཕྲག་པ་ཡངས་བྱས་གཡས་བས་བཟུང་། །དང་དང་སྟོབས་བཅུའི་ཟིལ་གྱིས་བདུད་ཚོགས་ལས། །རྒྱལ་བའི་དབང་པོ་གཡོན་པ་མཉམ་གཞག་ཅན། །ཕྲག་དོག་ལས་གྱུར་རྣམ་པར་འཐག་པས་སྲུངས། ༢༩།འཇིག་ཚོགས་ཆོས་ལ་ལྟ་བའི་སྤྲིན་དཀར་དུམ། །ཡེ་ཤེས་རྡོ་རྗེའི་མཚོན་རྣོན་གདོང་བ་ལྔས། །ཤིན་ཏུ་རྣམ་པར་གནོན་པའི་རལ་གྲི་སྔོན། །གཞན་དག་བགྱིད་དུ་རྩལ་བའི་སྡིག་ཏོའི་སྲོག །འཕྲོག་ལ་དཔའི་
ངང་ཚུལ་སྟོན་དེར་འདུད། ༣༠།ཀུན་ནས་དཀྲིས་ཤིང་གཏུམ་པའི་ཉོན་མོངས་སྡེས། །བལྟར་མི་བཟོད་པ་ཁྱོད་ཀྱི་དཀའ་ཐུབ་དགྲའི། །གཡུལ་ལས་ཤིན་ཏུ་རྣམ་རྒྱལ་དཔལ་ཕྲོགས་པས། །ང་རྒྱལ་རྩུབ་མོས་འཕངས་བའི་ལྷ་མིན་མཚོན། །བཟོད་པའི་གོ་ཁྲབ་དཔལ་ལམ་ཆགས་འབྲོས། ༣༡།བགྲོད་པ་གཉིས་པ་སྤངས་པའི་ཤིང་རྟ་ཡི། །བདུད་དང་ངན་འགྲོའི་འཇིགས་ཚོགས་ཉ་ལྕིབས་ཅན། །རྣམ་པར་གནོན་པས་གཤེགས་བའི་དཔལ་སྔོན་པོའི། །མདུན་སར་ཕྲ་མའི་རིན་ཐང་བཅལ་བའི་རླབས། །གཉེར་བའི་བང་རིམ་འཇིག་པའི་སྟོང་གཟུགས་རྔོམ། ༣༢།ཀུན་ནས་སྣང་བ་བཀོད་བའི་རྔུ་འཕྲུལ་མཚན། །ལི་ཁྲིའི་དཔལ་གྱིས་བྱུགས་པ་མཐོང་བའི་མོད། །ཕ་རོལ་སྡིག་པའི་ལྕིད་ཀྱིས་ནོན་པའི་ཁུར། །རྗེས་སུ་ཡི་རང་རིན་གྱིས་ཉོས་པ་རྣམས། །དམ་བཅའ་འཇིག་པ་སྐྱབས་སྦྱིན་ཆོས་འཆད་མཐུ། ༣༣།རྟག་ཆད་ཐར་པར་རེ་བ་ཕྱི་རོལ་པའི། །རྒྱུ་སྐར་སྐྱ་རེངས་ཞགས་པས་དམ་བཅིངས་ནས། །ས་མཆོག་རིན་ཆེན་པདྨས་རྣམ་པར་གནོན། །སྐྱབས་སྦྱིན་ཆོས་འཆད་ཉི་འོད་དམར་སེར་མདུན། །དམ་ཆོས་སྤངས་པའི་མུན་ནག་ཅིག་ཅར་འཇིག ༣༤།རིན་ཐང་རྣམ་པར་སྤངས་བ་བསོད་ནམས་ཚོགས། །མཐའ་དག་བརྗོད་པས་མ་ཐུག་ཡེ་ཤེས་ཏེ། །སྐུ་གསུམ་རི་དབང་རྒྱལ་པོ་ཕྱག་སོར་རྩེར། །
བཀོད་བའི་དཔལ་ལ་ཕྲག་པ་དོག་པ་དེས། །དགེ་འདུན་མཛའ་གཅུགས་དམ་བཅའ་འདྲལ་བའི་སྡིག །དམིགས་པ་མེད་པའི་དབྱིངས་སུ་བཅིང་ཁྱོད་རྒྱལ། ༣༥།ཕུང་པོ་གསུམ་པའི་ཡན་ལག་དང་པོ་བདེ་བར་གཤེགས་པ་སུམ་ཅུ་རྩ་ལྔའི་མངོན་པར་རྟོགས་པ་དང་། །བྱེད་ལས་ཀྱི་སྒོ་ནས་བསྔགས་པར་བརྗོད་བ་ལྗོན་པའི་བླུ་ཕྲེང་ཞེས་བྱ་བ་འདི་ནི་གཉིས་མེད་གསུང་བའི་བསྟན་པ་ལ་ཞུགས་པ་མཁྱེན་བརྩེའི་འོད་ཟེར་གྱིས་ཤིང་རྟ་ཆེན་པོ་ཀླུའི་དབང་པོ་དང་། མ་ཏི་ཙི་ཏྲལ་སོགས་པའི་རྒྱ་གཞུང་དང་བསྟུན་ནས་སྙན་དངགགས་ཀྱི་མེ་ཏོག་དང་མངོན་བརྗོད་ཀྱི་དོ་ཤལ་སྤེལ་མར་དཔྱངས་པའོ། །ཚིག་སྦྱོར་གྱི་ཁོང་ནས་མངོན་རྟོགས་མི་གསལ་བ་རྣམས་ལ། །ཕྱག་གཡོན་པ་གང་བྱུང་མཉམ་གཞག་དང་། སྐུ་མདོག་མ་བསྟན་པ་རྣམས་བཙོམ་པའི་མདོག་སངས་རྒྱས་ཀྱི། །ཁྱེད་ཆོས་སུ་སྣང་བས་ཤེས་པར་འགྱུར་རོ། །ཐུབ་དང་གྲོང་ཁྱེད་མ་ལ་བསྟོད་པ། བཞེངས་ཤིང་འཆག་པ་གྲོང་ཁྱེར་ལ་གདུང་མིན། །གཞན་སྡེམ་རུངས་བགྱིད་པའི་གླང་ཆེན་གྱི། །བཞིན་རས་གཡུལ་གྱི་ཁྲག་གིས་བཀྲུ་བའི་རྒྱུན། །རྣམ་བར་གཅོད་པའི་སྐུ་མཆོག་བལྟར་མི་ངོམས། །སྡིག་ཏོས་ནོན་པའི་ལྷས་སྦྱིན་མ་སྐྱེས་དགྲའི། །མདུན་སར་ཞུགས་ཤིང་སྦྲན་པའི་ནོར་སྐྱོང་གི་། །དཔའ་བོའི་ངང་ཚུལ་གཏུམ་པའི་ཕྲག་དོག་
མཚོན། །ཁྱོད་སྐུ་མཐོང་བའི་མོད་ལ་མཛའ་གཅུགས་བཞིན། །ཐུབ་དབང་གྲོང་ཁྱེར་མ་ལ་རང་བྱུང་རྡོ་རྗེས་སོ། །དུས་གསུམ་དང་ཕྱོགས་བཅུའི་དེ་བཞིན་གཤེགས་པ་རྣམས་ལ་མཚན་དོན་གྱི་སྒོ་ནས་བསྔགས་པ་དད་པའི་ཕོ་ཉ་ཞེས་བྱ་བ། །རྣམ་པར་སྣང་མཛད་ཡེ་ཤེས་གང་ཆེན་མཚོའི། །ཕྲ་རབ་རྡུལ་གྱི་སྙེད་གྲགས་དཔག་དཀའ་བའི། །ཞིང་ནད་ལྟ་འཚོ་ཞིང་གཞེས་པ་ཀུན། །ཤཱཀྱའི་རྒྱལ་པོར་རྣམ་རོལ་ལ་ཕྱག་འཚལ། །གཞན་དོན་རླབས་ལ་ཡོལ་བ་མ་མཆིས་ཀྱང་། །བཅུ་གཉིས་མཛད་པའི་ཆ་ཤས་ནང་དབྱིངས་སུ། །མངོན་བྱང་ཆུབ་ལ་འདས་པའི་སངས་རྒྱས་སུ། །ཡོད་གྲགས་མར་མེ་མཛད་ལ་ཕྱག་འཚལ་ལོ། །བརྒྱད་ཁྲིར་འཚོ་བའི་དབྱིག་འཛིན་དུང་གི་གྲོང་། །ཚོགས་གཉིས་དཔལ་གྱི་དུམ་བུའི་རིན་ཐང་གིས། །ཉོས་པ་བྱམས་པ་ལེགས་པའི་མཆོག་ལྡན་དེ། །མཐོང་ལ་རིངས་པའི་དད་པས་ཕྱག་འཚལ་ལོ། །སྟེང་གིས་ཕ་རྒྱས། །འདོད་ཆགས་ཟམ་པ་བཤིག་པའི་ཐུང་པ་ནི༑ །རྫུ་འཕྲུལ་སྐང་པ་ཁོ་ནས་ཆོས་ཉིད་ཀྱི། །མཁའ་ལ་རྣག་བཞིན་མེད་པར་གཤེགས་གྱུར་ཀྱང་། །འཇིག་རྟེན་དགའ་བའི་དཔལ་གྱིས་སྐྱོང་ལ་འདུད། །ཤར། །རྣམ་ཤེས་ཚོགས་པའི་ཡུལ་ལ་ཡུལ་ཅན་གྱི། །དཔེ་བྱད་ལྟར་སྣང་མ་ཡིན་གསུམ་བྱིན། །འགྲོ་ཁམས་བདེ་གཤེགས་སྙིང་པོའི་དཔལ་གྱུར་པས། །དཀོན་མཆོག་འབྱུང་གནས་ཞེས་གྲགས་དེར་ཕྱག་འཚལ། །ལྷོ།
རིག་དང་ཞབས་སུ་ལྡན་སོགས་བདེ་གཤེགས་ཀྱི། །སྣང་བ་འབུམ་ཕྲག་འབར་བའི་ཉིན་བྱེད་དཔལ། །འཇིག་རྟེན་སྒྲོན་མར་གསལ་བ་དྲན་པའི་མོད། །མྱ་ངན་མེད་པའི་དཔལ་སྟེར་ལ་ཕྱག་འཚལ། ནུབ། སྟོབས་བཅུའི་སྣང་བ་འབུམ་ཕྲག་འཕྲོ་བའི་གཟིས། །ཕུང་པོའི་ཉེར་ལེན་འཕྲོག་པ་སངས་རྒྱས་ཀྱི། །རང་བཞིན་ཉིད་ན་ཁམས་དང་སྐྱེ་མཆེད་མུན། །རིན་ཆེན་འོད་འཕྲོས་ཕྲག་དོག་བསལ་དུ་གསོལ། །བྱང་། རྣམ་པ་ཀུན་གྱི་མཆོག་ལྡན་ཆོས་ཀྱི་སྐུའི། །ཡེ་ཤེས་གཟོ་དམ་ཉིད་ནས་བྱང་ཆུབ་ཀྱང་། །ཚོགས་གཉིས་འདབ་བརྒྱ་གྲོལ་བའི་ཆོ་ག་ཡིས། །རྒྱལ་བའི་དབང་པོར་སྟོན་ལ་ཕྱག་འཚལ་ལོ། །ཤར་ལྷོ། བདེན་བཞིའི་ཆོས་ཀྱི་འཁོར་ལོས་འཇིག་ཚོགས་ལ། །ལྟ་བའི་རི་པོ་ཉི་ཤུའི་དགྲ་བཅོམ་ནས། །སྙོམས་འཇུག་སྒྲིབ་པའི་སྤུངས་ལས་དབུགས་འབྱིན་པ། །པདྨོ་དམ་པའི་དཔལ་ལ་ཕྱག་འཚལ་ལོ༑ ༑ལྷོ་ནུབ། །གཞན་དང་མ་འདྲེས་རྒྱལ་བའི་ཆོས་བཅོ་བརྒྱད། །རྣམ་པ་ཀུན་གྱི་མཆོག་ལྡན་ལ་ཆགས་པས། །གཟུང་འཛིན་བློ་ཡི་མུན་བ་དྲུངས་འབྱིན་པ། །ཉི་མ་སྣང་བའི་དཔལ་ལ་ཕྱལ་འཚལ་ལོ། །ནུབ་བྱང་། བདུད་རྣམས་ཀུན་གྱི་བདུད་དུ་གྱུར་ཟིན་ཀྱང་། །སྣང་ཆེན་ཡུལ་ལ་མི་གནས་བྱམས་པའི་གཟུགས། །འགྲོ་ལ་ཐུགས་རྗེ་ཆེན་པོའི་གྲིབ་བསིལ་ཅན། །གདུགས་ཆེན་དམ་པའི་དཔལ་ལ་ཕྱག་འཚལ་ལོ། །
བྱང་ཤར། འཁོར་ལོ་དང་པོའི་མངོན་པར་རྟོགས་པ་ཡི། །ཁུར་དུ་མི་བཟོད་ཐེག་པ་ཆེན་པོའི་ལམ། །སྨོན་འཇུག་གཉིས་དང་རྣམ་ཐར་གསུམ་གྱི་དབྱིངས། །འདེགས་མཛད་གླང་པོ་དམ་པའི་དཔལ་ལ་འདུད། །འོག རྫོགས་སྨིན་སྦྱངས་བའི་ཡོན་ཏན་རྒྱ་མཚོའི་བཟིང་། །བྱང་ཆུབ་ཕྱོགས་ཆོས་ཚད་མེད་གྲུས་བརྒལ་བཞིན། །འཁོར་བའི་འདམ་ལ་སྙིང་རྗེས་སླར་དགོངས་ཀྱང་། །སྐྱོན་ཀྱིས་མ་གོས་པདྨོའི་དཔལ་ལ་འདུད། །ཅེས་བའང་རང་ཉིད་ཀྱི་དད་རྟེན་དུ་ཐང་ཆེན་ཐོག་ཚད་མ་བཅུ་གསུམ་བཞེངས་པའི་ཚེ་རྫོགས་ཆེན་པ་མཁྱེན་བརྩེའི་ལྷས་དཔལ་ལྡན་པདྨ་འོད་གླིང་དུ་བསྟོད་ཕྱག་བྱས་པ་སྟེ། འདི་ལྟར་ཐར་བ་ཆེན་པོ་ཕྱོགས་སུ་རྒྱས་པའི་མདོ་སྡེ་ནས་སངས་རྒྱས་འདི་དག་གིས་མཚན་ནས་བརྗོད་པའི་ཕན་ཡོན་ལ་དམིགས་ནས་འདོད་བའི་དད་བས་ཀྱང་འདི་ཉིད་ཁ་ཏོན་བགྱིད་པར་བསྐུལ་ན་དད་ཅན་རྣམས་ཀྱི་བསོད་ནམས་ལ་སྨན་པར་གྱུར་ཅིག །རྙིང་མ་རྒྱུད་འབུམ་གསར་བཞེངས་ལ་བསྔགས་བ། །རྒྱལ་བསྟན་ཉིན་མོར་བྱེད་པའི་གཟི་བྱིན་འབུམ། །ཟླ་བ་ཞུན་མའི་རྡུལ་བརྩེགས་གངས་རིའི་ཁྲོད། །ཐུགས་བསྐྱེད་མྱུར་འགྲོ་བདུན་གྱི་མཐུས་འབོད་པའི། །ཁུར་ཆེན་ཚངས་པས་བཟོད་མིན་ཁྲི་སྲོང་རྗེ། །འདི་ན་སྡེ་སྣོད་བཞི་པའི་རྔ་བོ་ཆེ། །རིག་པ་འཛིན་བའི་རྒྱུད་དུ་ལེགས་བརྡུང་བ། །ཨྱོ་ན་དྷཱུ་མ་ཐ་ལའི་གན་
མཛོད་དང་། །སྤྲུལ་བའི་ལོ་པཎ་རྣམས་ཀྱི་ཁྱད་པར་ཆོས། །སྔ་འགྱུར་རྒྱུད་སྡེ་རྒྱ་མཚོའི་ལེགས་བྲིས་ལྗོན། །བསྟན་པའི་སྲོག་ཏུ་འཛུགས་མེད་གླིང་། །གསེར་གྱི་མངལ་ཅན་བྱ་བའི་ཁུར་བསྟན་ཚེ། །དྲང་སྲོང་རིག་འཛིན་ཚོགས་ཀྱང་གཡེངས་པ་བཞིན། །ཡི་གེའི་ལུས་ཀྱི་རྣམ་འགྱུར་རྫུ་འཕྲུལ་གྱི། །ཡན་ལག་བཅུ་དྲུག་རྔོམ་པའི་རི་དྭགས་གཟུགས། །ལྔ་ལྡན་ཤོག་བུའི་མདུན་སར་སླར་འོང་བའི། །བྱེད་པོ་ལེགས་བྱིན་ཉི་མའི་སྤུན་ཟླར་སོང་། །རྙེད་དང་བཀུར་སྟིའི་སླད་དུ་དམ་པའི་ཁུར། །བསྟན་པ་ཅི་ཞིག་རྒྱལ་དང་དེ་སྲས་ཀྱི། །མཚན་དཔེའི་ངོ་མཚར་སྟོན་ལ་དགེ་མཚན་མཐུས། །མགྲོན་པོར་བོས་པ་འདི་ནི་བསྔགས་པའི་གནས། །ཞེས་པདྨ་འོད་གླིང་ཐར་པ་ཆེན་པོའི་གྲོང་ཁྱེར་དམ་པར་ལྕགས་མོ་ཡོས་ཀྱི་ལོར། །སྔ་འགྱུར་རོད་རྗེ་ཐེག་པའི་རྒྱུད་འབུམ་རིན་པོ་ཆེའི་བསྟན་པའི་དངོས་པོ་གསར་དུ་སྣང་བར་བགྱིས་པའི་དབུ་ལྷའི་ཚོགས་རྣལ་འབྱོར་སྤྱོད་པ་དྷརྨ་ཀོརྟི་དང་། །ཡི་གེའི་གཟབ་བྲིས་རྒྱལ་རྩེ་ཡང་སྟེང་དྲུང་ཡིག་འཇིགས་མེད་དཔལ་འབར་འདུ་བྱེད་དགེ་བའི་འབྲས་བུར་སད་པའོ། །དེ་བཞིན་གཤེགས་པའི་མཆོད་རྟེན་རྣམ་པ་ཐམས་ཅད་རྫོགས་པ་བརྒྱད་ལ་བསྟོད་པ། །པདྨ་སྤུངས་པ། །ལྷུམས་ཀྱི་འདམ་རྫབ་སྤངས་བའི་དགེ་མཚན་ལ། །བརྒྱ་ཕྲག་ལྔ་ཡི་གཏེར་དང་ཞབས་མཐིལ་མཚན། །འཁོར་ལོའི་རེ་
ཁཱས་པདྨའི་ཀེ་སར། །སྤུངས་པའི་གྲགས་པ་ལུམྦིའི་ཚལ་ན་སྙན། །བྱང་ཆེན། །འདོད་ལྷ་སྡེར་བཅས་སྙིང་གི་ཚངས་པའི་ཐིག །ཆེར་མས་། འདྲལ་བ་སྙིང་རྗེའི་གཞན་དབང་སྟེ། །བདུད་ལས་རྣམ་རྒྱལ་བྱང་ཆུབ་ཕྱོགས་ཀྱི་ཆོས། །རྣམ་པ་ཐམས་ཅད་པ་འདི་བསྔགས་པར་འོས། །བཀྲ་ཤིས་རྒོ་མངས། །བདེན་བཞིའི་ཆོས་ཀྱི་འཁོར་ལོས་ལྔ་སྡེ་བཟང་། །ཚངས་པར་སྤྱོད་པ་དོན་མཐུན་ལ་སྦྱར་བའི། །རྣམ་པར་ཐར་དང་རྟེན་འབྲེལ་སྟོང་ཉིད་ཀྱི། །བཀྲ་ཤིས་གོ་འཕར་མང་པོ་འདིར་ཡང་ཕྱེ། །ཆོ་འཕྲུལ། སྟོབས་བཅུ་མི་འཇིགས་རྣམ་བཞིའི་ཆོ་འཕྲུལ་ཆེས། །འཇིག་ཚོགས་ལ་བལྟ་མངོན་བའི་ང་རྒྱལ་གྱི། །རི་ངོ་དུས་མཐའི་མེ་ལྕེའི་བཟང་བ་རུ། །བོས་བས་མཉན་དུ་ཡོད་པ་འདར་བ་སྙམ། །ལྷ་བབས། །གཞི་གསུམ་རྩ་བ་བརྟན་པོའི་ལྗོན་ཤིང་གི། འཆི་མེད་བུ་མོའི་གྲོང་ཁྱེར་མཛེས་བྱས་ནས། །གསལ་ལྡན་ཡུལ་དུ་ལྷ་ལས་བབས་པ་ཡིས། །གྲགས་པའི་འཁྲི་ཤིང་གཙུག་གཏོར་ནོར་བུས་བརྟེན། །དབྱེན་བསྡུམས། །སེམས་ཀྱི་གླང་པོ་ཁ་ན་མཐོ་བའི། །ལྷས་བྱིན་དགེ་འདུན་དབྱེན་གྱི་སྣ་ཞགས་ཅན། །མཆོག་ཟུང་ཐུགས་རྗེའི་ཀྱོ་བས་རབ་བསྡུམས་པའི། །གྲགས་པ་མ་གྷདྷཱ་ན་ཤོང་བ་མིན། །རྣམ་རྒྱལ། །རྫུ་འཕྲུལ་རྐང་པ་བཞི་ལ་མཆོག་ཐོབ་བཞིན། །མེ་ཏོག་མདའ་ཅན་རབ་ཏུ་དགར་བྱས་ནས། །སྐུ་ཚེའི་འདུ་བྱེད་བཏང་ཡང་ཙུནྡའི་
ངོར། །འཚོ་བའི་འདུ་བྱེད་བྱིན་བརླབས་རྣམས་པར་རྒྱལ། །མྱང་འདས། །མཛད་པའི་ཆ་ཤས་རྫོགས་པའི་འོད་དཀར་ཅན། །རྣམ་ཀུན་མཆོག་ལྡན་དབྱིངས་སུ་སྤྲོས་བྲལ་ཆེ། །གྲོང་ཁྱེར་རྩྭ་ཅན་མྱ་ངན་ཁུང་བུ་ལས། །འདའ་ཀའི་གདུང་བ་རིང་བསྲེལ་སྣོད་འདིས་བསལ། །ཞེས་པའང་ཚོང་དཔོན་དབྱར་རྔ་རྣམ་རྒྱལ་གྱིས་ཙན་དན་གསེར་ཟངས་འཁོར་ལོས་མཛེས་པའི་བདེ་གཤེགས་མཆོད་རྟེན་བཞེངས་པའི་ཞལ་བྱང་དུ་རིག་པ་འཛིན་པ་མཁྱེན་བརྩེའི་ལྷས་སོ། །བྱང་ཆུབ་སྨེས་དཔའི་དགེ་འདུན་ཆེན་པོ་ཉེ་བའི་སྲས་བརྒྱད་ལ་བསྟོད་པ། །འཇམ་དབྱངས་ལ། །གང་ལ་རེག་ན་རྨོངས་དང་མ་རིག་དོན། །རྣམ་ཐར་བཞི་དམ་པའི་ཆོས་པདྨ་དཀར་པོ་ལས་ཡི་མཐར་བྱེད་མཁྱེན་རབ་མཚོན། །རལ་བའི་སྟ་ཟུར་མ་མཛེས་པའི་ཆོ་ག་ལ། ཟུར་ཕུད་ལྔ་ཡང་དོ་ཟླར་ལྷགས་པ་བཞིན། །ཕྱག་རྡོ་པ་སྡེ་དོན་གསུམ་དང་རྒྱུད་དོ་ཅོག་རྣམས་ཀྱི། །མཐའ་དག་དངོས་བསྟན་གསང་བ་འཛིན་པ་ལ། །རྒྱལ་ཀུན་ཐུགས་ཀྱི་ཐིག་ལེས་ཁྱོད་ཀྱི་མཚན་ལན་ན་རྡོ་རྗེ་མགོན་པར་དབང་བསྐུར་བའི་རྒྱུད་སོགས། །ནམ་ཡང་སྤངས་པ་མེད་དོ་རྡོ་རྗེ་ཅན། །སྤྱན་རས་གཟིགས་ལ། །མིག་མི་འཛུམ་བའི་མཚན་གྱི་མེ་ཏོག་ནི། །གང་གི་རྣ་ལུང་དཔྱངས་པའི་ཡིད་ཅན་ལའང་། །ཟུག་རྡུའི་གདུང་བ་ཉེ་བར་པདྨ་དཀར་མོ་མི་མཆིན། །སེམས་དམྱལ་རྣམས་ཀྱིས་ཁྱོད་ཅིག་མཐོན་བར་ཤོག །
ས་སྙིང་ལ། སེམས་ཅན་ཁམས་ལ་རབ་སྨན། །སྨོན་བའི་སེམས། །ཕྱིན་དྲུག་ཤིང་རྟའི་སྒྱུ་ཐབས་ལ་ཆགས་པ། །རྡུལ་དང་ལྟ་བ་མ་སྐྱེས་དགྲའི་འགྱོད་བསལ་ཀུན་དང་བྲལ་བ་ནི། །འཕགས་པ་རྣམས་ཀྱི་ཁྱད་ཆོས་ཁོ་ན་ཡིན། །སྒྲིབ་པ་རྣམ་སེལ་ལ། །སངས་རྒྱས་གཟུགས་སུ་མ་ཡིན་ཆོས་ཉིད་དེ། །ཆོས་ནི་སྒྲ་ཚིག་མ་ཡིན་འདོད་ཆགས་བྲལ། །དགེ་འདུན་ཚོགས་ལ་མ་ཡིན་འདུས་མ་བྱས། །ཤེས་རབ་མིད་དག་སྒྲིབ་པ་རྣམ་པར་སེལ། །ནམ་མཁའི་སྙིང་པོ་ལ། །ཆོས་ཁམས་རྒྱ་མཚོའི་ལམ་དང་འབྲས་བུ་ལ། །གང་ཞིག་ལྟུང་བའི་ཕུང་པོས་རེག་བྱས་ཀྱང་། །འཆབ་པ། །ཁྱའུ་སྣང་བ་བསམ་གྱིས་མི་ཁྱབ་པས་བསྟན་པ། མེད་བའི་བྱི་རོར་ལ་བརྩོན་ན། །དེ་ལ་ཁྱོད་ཀྱི་མཚན་དཔེ་ཐབས་ལ་མཁས་པའི་མདོ་དང་ནམ་སྙིང་གི་མདོ་ལྷགས་པར་རྔམ། །བྱམས་པ་ལ། །འདོད་སྲེད་སྤངས་པ་བྱམས་པའི་ངོ་བོ་སྟེ། མེ་ཏོག་གཞུ་ཅན་གཡུལ་ལས་རྣམ་རྒྱལ་བས། །མ་ཕམ་པ་ཞས་ཀུན་ནས་བསྔགས་པ་བྱམས་ཁ་ལུང་བསྟན་པའི་མདེར་ཁྱོད། །དུས་ཀྱི་ཆད་པ་བཤིག་པའི་དེད་དཔོན་ཡིན། །ཀུན་ཏུ་བཟང་བ་ལ། །ཁྲིམས་དང་ལྡན་ནམ་དེ་ལས་ཅིག་ཤོས་ཉིད། །དེ་བཞིན་མཁས། །བླུན་ཐབས་དང་ལྡན་ནམ་མིན། །དམ་ནན་མ་ཅིག་ཤོས་དམ་ལ་རིག་པ་མཆོག་གི་རྒྱལ་པོར་མ་བཞག་པ། །ཀུན་ཏུ་བཟང་པོའི་སྤྱོད་པ་སྨོན་པས་འགྲུབ། །ཅེས་པའང་འབྲུག་རྣམ་པར་རྒྱལ་བས། །འདོད་ལི་ལས་གྲུབ་པའི་ཉེ་སྲས་
བརྒྱད་ཀྱི་སྣང་བརྙན་ཁྲུ་གང་བ་རེ་བཞེངས་བའི་ཚེ་བསྔགས་བརྗོད་ཤློ་ཀ་རེ་དགོས་ཞེས་བསྐུལ་བ་ལ་དེ་བཞིན་གཤེགས་པས་ལེགས་པར་གསུངས། པའི་ཆོས་ཀྱི་སྒྲ་དོན་གྱིས་ཕྱུག་པར་བྱས་ཏེ་མཁྱེན་བརྩེའི་འོད་ཟེར་གྱིས་དཔལ་ལྡན་པདྨ་འོད་གླིང་དུ་སྦྱར་བའོ། །ད་ནི་འདི་དག་ལ་དོན་འགྲེལ་ཅུང་ཟད་བཞག་པ། དང་པོ་འཕགས་པ་འཇལ་དཔལ་ལ་མཚོན་ན། །སྤྱིར་ཤེས་རབ་ཕུན་སུམ་ཚོགས་པ་ནི་འཕགས་པའི་ནོར་གྱི་ཕྱི་མོ་ཡིན་ཏེ། །བྱང་ཆུབ་སེམས་དཔའ་རྣམས་སློབ་པ་ལམ་གྱི་གནས་སྐབས་ན། འཕགས་པའི་སྤངས་རྟོགས་ཇི་བཞིན་བ་མངོན་དུ་མ་བྱས་ཀྱང་མཁྱེན་རབ་ཀྱི་མཚོན་ཆ་རྣོན་པོས་ཆོས་ཀྱི་ཚིག་དོན་ལ་རྣམ་པར་དཔྱོད་ཅིང་། །བསམ་གྱིས་མི་ཁྱབ་པའི་དོན་ལ་སེམས་པ་ཆོས་ཉིད་ཡིན་ཏེ། །དམ་པའི་ཆོས་པདྨ་དཀར་པོ་ལས། །འཇམ་དཔལ་འདི་ལྟ་སྟེ། དཔེར་ན་བྱའི་རྒྱལ་པོ་ཀ་ལ་པིངྐའི་ཕྲུལ་དུ་སྒོ་ངའི་སྒྲུབས་ན་འདུག་བ་སྒོང་ཆག་ཅིང་སྦུབས་ནས་མ་བྱུང་ཡང་འདི་ལྟ་སྟེ། །སྒྲ་ཡིད་དུ་འོང་བ་ཀ་ལ་པིངྐའི་སྒྲ་ཉིད་སྒྲོགས་སོ། །འཇལ་དཔལ་དེ་བཞིན་བྱང་ཆུབ་སེམས་དཔའ་མ་རིག་པའི་སྒོངའི་སྦུགས་ཞུགས་པ། །འཇིགས་ཚོགས་ལ་ལྟ་བ་མ་བཅོམ་པ། ཁམས་གསུམ་ན་མངོན་པར་མ་བྱུང་ཡང་འདི་ལྟ་སྟེ། །སྒྲ་སྟོང་པ་ཉིད་དང་། །ཚན་མ་མེད་པ་དང་། །
སྨོན་པ་མེད་པ་དང་། །མངོན་པར་འདུ་བྱ་བ་མེད་པ་དང་། །སངས་རྒྱས་ཀྱི་ཆོས་ཀྱི་སྒྲ་ཉིད་སྒྲོགས་སོ། །འཇལ་དཔལ་འདི་ལྟ་སྟེ། །ཀ་ལ་པིངྐ་རྨ་བྱའི་ནང་དུ་སོང་ན་ཀ་ལ་པིངྒའི་སྒྲ་མི་སྒྲོགས་སོ། །ཀ་ལ་པིངྐའི་ནང་དུ་སོང་ན་ཀ་ལ་པིངྐའི་སྒྲ་སྒྲོགས་སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཉན་ཐོས་དང་རང་སངས་རྒྱས་ཀྱི་ནང་དུ་སོང་ན་ཆོས་བསམ་གྱིས་མི་ཁྱབ་པའི་སྒྲ་མི་སྒྲོགས། །བྱང་ཆུབ་སེམས་དཔའི་ནང་སོང་ན་སངས་རྒྱས་ཀྱི་ཆོས་བསམ་གྱིས་མི་ཁྱབ་པའི་སྒྲ་སྒྲོགས་སོ། །ཞེས་གསུངས་ལ། །ཁྱད་པར་འཕགས་པ་འཇལ་དཔལ་ནི་གཟུངས་ཀྱི་དབང་ཕྱུག་ཆེན་པོ་དྲན་པ་མཉམས་བའི་བདག་ཉིད། །བློ་གྲོས་མ་རྨོངས་པ། རྟོག་པ་མ་གཡེངས། ཤེས་རབ་མངོན་དུ་བྱེད་པ། །ཆོས་ཐམས་ཅད་ཀྱི་ཚིག་རབ་རུ་ཐ་དད་པ་ཤེས་པ། །རྨོངས་པ་དང་མ་རིག་པའི་ཕྱོགས་མཐའ་དག་ཆར་གཅོད་པའི་མཁྱེན་རབ་ཀྱི་མཚོན་ཆ་རྣོན་པོ་གདེངས་པས། །ཤེས་རབ་ཀྱིས་རྒན་པ་དང་། །ཐོབ་པས་རྒན་པ་དང་། སྤོབས་པས་རྒན་པའི་ཕྱིར་གྲལ་གྱི་ཐོག་མར་སྨོས་པ་ཡིན་ནོ། །གཉིས་པ་ཕྱག་ན་རྡོ་རྗེ་ནི། །འདུལ་བ་དང་མདོ་སྡེ་མངོན་པ་སྟེ་སྡེ་སྣོད་གསུམ། །རྒྱུད་དོ་ཅོག་ཅེས་མང་ཚིག་གིས་འདོམས་པའི་སྔགས་རྒྱུད་ཕྱི་ནང་གི་ཆོག་སོ་སོ་སྐྱེ་བོས་གྲངས་དང་རྣམ་དབྱེ་བསམ་པར་མི་ནུས་པ་ཐམས་ཅད་གསང་བའི་
བདག་པོའི་སྐུའི་བཀོད་པ་སྣ་ཚོགས་པས་བཟུན་བ་ཡིན་ཏེ། །སྡེ་སྣོད་ཀྱི་ཆ་ཀུན་དགའ་བོ་དང་། །རྡོ་རྗེ་སྙིང་པོ་ལ་སོགས་བ་དང་། །རྒྱུད་སྡེའི་གནས་ཀྱི་གསང་བ་མཐའ་དག་རྡོ་རྗེ་འཛིན་པ་དང་། རྡོ་རྗེ་ཆོས་དང་། རྡོ་རྗེ་སྨྲ་བ་དང་། །རྡོ་རྗེ་རྣོན་པོ་ལ་སོགས་པའི་མཚན་གྱི་གྲངས་ཐ་དད་པས་བསྡུས་ཤིང་བཟུང་བའི་མཚན་ཉིད་ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་སོགས་ནས་ལེགས་པར་བསྟན་ལ། དེ་དག་ཀྱང་དོན་དམ་པར། །འཆད་པ་བོ་ད་ཆོས་ཀྱང་། །ཞེས་སོགས་ཀྱིས་སངས་རྒྱས་ཐམས་ཅད་ཀྱི་ཐུགས་རྣམ་པར་མི་རྟོག་པའི་ཡེ་ཤེས་དང་གཉིས་སུ་མེད་པས་ན། །རྒྱལ་ཀུན་ཐུགས་ཀྱི་ཐིག་ལེར་ཞེས་པའི་བསྙོན་དོར་གྱི་སྒྲ་ཞུགས་བར་བསྟོད་པའོ། །གསུམ་པ་སྤྱན་རས་གཟིགས་ནི། །གང་གི་བྱང་ཆུབ་ཆེན་པོར་སེམས་བསྐྱེད་པའི་མཐུ་ལྷག་པར་ཡང་ཚད་མེད་པས་དེའི་མཚན་འཛིན་པ་ཙམ་ཡང་སྡུག་བསྔལ་ལས་གྲོལ་བར་པདྨ་དཀར་པོར། །རིགས་ཀྱི་བུ་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་མིང་འཛིན་བདེ་དག་གལ་ཏེ་མེའི་ཕུང་བོ་ཆེན་པོར་ལྟུང་ན་ཡང་། ད་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་གཟི་བརྗིད་ཀྱིས་མེའི་ཕུད་པོ་འབར་བ་
ལས་ཐར་བར་འགྱུར་རོ། །ཞེས་པ་ནས་ཆུ་ཀླུང་ལ་སོགས་ཏེ་འཇིགས་པ་མཐའ་དག་ལ་སྦྱར་ནས་གསུངས་པ་ཡིན་ནོ། །རྒྱུ་དེས་མཚན་ཐོས་པ་ལའང་ཡོན་ཏན་དེ་ལྟ་བ་མང་བ་ན། །ངན་སོང་ལ་སོགས་པའི་སྡུག་བསྔལ་བྲང་པར་དཀའ་བས་ལྷག་པར་གཟིར་བའི་དམྱལ་བ་ལ་སོགས་པའི་འགྲོ་བ་རྣམས་ཀྱིས་ཀྱང་གང་སྐུ་མཐོང་བར་ཤོག་ཅིག་ཅེས་སྨོན་བ་ནི་སྤྱོད་འཇུག་ལས་ཀྱང་། །མ་ཏོག་འཆར་པ་སྤོས་ཆུ་དང་འདྲེས་འབབ་པ་ཡིས། །དམྱལ་བའི་མེ་དམག་ཆིལ་ཆིལ་གསོད་བ་མཐོང་གྱུར་ན། །གློ་བུར་བདེ་བས་ཚིམས་པ་འདི་ཅི་སྙམ་པ་དང་། །སེམས་དམྱལ་རྣམས་ཀྱིས་ཕྱག་ན་པདྨ་མཐོང་བར་ཤོག །ཅེས་གསུངས་སོ། །བཞི་པ་དང་ལྔ་པ་གཉིས་ལ་བྱང་ཆུབ་སེམས་དཔའ་མཐའ་དག་པའི་ངོ་བོའི་ཆོས་ཉིད་ཀྱི་སྒོ་ནས་བསྔགས་བ་སྟེ། །སའི་སྙིང་པོ་ལ། །དེ་ལ་ལམ་དང་འབྲས་བུའི་བྱེ་དྲག་གིས་ཕྱེ་བ་སངས་རྒྱས་དང་བྱང་ཆུབ་སེམས་དཔའི་ཁྱད་པར་སྤྱིར་བསྟན་པ་དང་། །བྱང་ཆུབ་སེམས་དཔའི་བྱེ་བྲག་སྒོས་སུ་སྟོན་པ་ལས། །དང་པོ་ནི། ཆོས་ཐམས་ཅད་ལ་སྒྲིབ་པ་མེད་པའི་ཡེ་ཤེས་བརྙེས་པ་དེ་སངས་རྒྱས། བར་ཆད་མེད་པའི་ལམ་དུ་ཞུགས་ད་ནི་བྱང་ཆུབ་སེམས་དཔའ་ཡིན་ཏེ། །ཤེར་ཕྱིན་ལས། །རབ་འབྱོར་འདི་ལྟ་སྟེ་དཔེར་ན། ཞུགས་པའང་གཞན་ལ། །འབྲས་བུ་ལ་གནས་
པའང་གཞན་ཏེ། །དེ་གཉིས་ཀའང་འཕགས་པའི་གང་ཟག་མ་ཡིན་ཞེས་མི་བྱའོ། །རབ་འབྱོར་དེ་བཞིན་དུ་བྱང་ཆུབ་སེམས་དཔའི་སེམས་དཔའི་ཆེན་པོ་ནི་བར་ཆད་མེད་པའི་ལམ་དུ་ཞུགས་པ་ཡིན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཆོས་སེམས་དང་པོ་བསྐྱེད་པ་ནི་སྨོན་སེམས་ཐམས་ཅད་ལ་སྒྲིབ་པ་མེད་པའི་ཡེ་ཤེས་བརྙེས་པ་ཏེ། རབ་འབྱོར་དེ་ནི་བྱང་ཆུབ་སེམས་དཔའ་ཆེན་པོ་དང་། །དེ་བཞིན་གཤེགས་པ་དགྲ་བཅིམ་པ་ཡང་དག་པར་རྫོགས་པའི་སངས་རྒྱས་ཀྱི་ཁྱད་པར་རོ། །ཞེས་སོ། །གཉིས་པ་བྱང་ཆུབ་སེམས་དཔའི་ཁྱད་པར་ལ་བཞི་སྟེ།སྤྱོད་པ་ལ་ཞུགས་པ་ནི་ཕྱིན་དྲུག །ཕྱིར་མི་ལྡོག་པ་ནི་དག་པའི་ས་གསུམ་ལ་གནས་པ། །སྐྱེ་བ་གཅིག་གིས་ཐོགས་པ་ནི་ཕྱིན་ཆད་ལམ་ལ་མི་གནས་པ་སྟེ། །ས་མཚམས་བཞིར་བློ་གྲོས་རྒྱ་མཚོས་ཞུས་པར་བཤད་པས། །འདིར་ཀ་མ་ཤཱི་ལའི་འདོད་པ་བཏང་སྙོམས་སུ་བཞག་གོ །དེ་ལ་འཕགས་པའི་ངེས་ཚིག་ནི། མ་སྐྱེས་དགྲའི་འགྱོད་པ་བསལ་བ་ལས། །རྡུལ་དང་ལྟ་བ་ཐམས་ཅད་དང་བྲལ་བའི་ཕྱིར་འཕགས་པ་ཞེས་བྱའོ། །ཞེས་གསུངས་སོ། །ལྔ་བ་ནི། ཐླྷཻ། སྒྲིབ་བ་རྣམ་པར་སེལ་བའི་མཚན་གཞི་དོན་དམ་བདེན་པ་ལ་སྦྱར་ན། །སངས་
རྒྱས་ལ་གཟུགས་སུ་བལྟ་བ་དང་། ཆོས་ལ་སྒྲ་ཚིག་དུ་གོ་བ་དང་། །དགེ་འདུན་ལ་ཚོགས་སུ་བལྟ་བ་དང་། ཤེས་རབ་ཀྱི་མིག་མ་དག་པ་རྣམས་ནི་ས་བཅུའི་བྱང་ཆུབ་སེམས་དཔའ་རྣམས་ལ་ཤེས་བྱའི་སྒྲིབ་པར་འགྱུར་པ་སྟེ་སྤངས་ཤིང་རྣམ་པར་སེལ་བ་ལ་སྦྱོར་ཏེ། །ཁྱེའུ་སྣང་བ་བསམ་གྱིས་མི་ཁྱབ་བས་བསྟན་པ་ལས། །སངས་རྒྱས་ལ་ཆོས་ཉིད་དུ་མཐོང་གིས། །གཟུགས་སུ་མ་ཡིན་པ་དང་། །ཆོས་ལ་འདོད་ཆགས་དང་བྲལ་བར་མཐོང་གིས་ཡི་གེ་དང་། །ངེས་པའི་ཚིག་དུ་མ་ཡིན་པ་དང་། དགེ་འདུན་ལ་འདུས་མ་བྱས་སུ་མཐོང་གིས་ཚོགས་སུ་མ་ཡིན་པ་དང་། ཤེས་རབ་ཀྱི་མིག་ཡོངས་སུ་དག་པར་འགྱུར་བ་སྟེ། །བཞི་པོ་དེ་དག་གོ །ཞེས་གསུངས་སོ། །དྲུག་པ་ནམ་མཁའི་སྙིང་པོ་ནི། །སྨོན་ལམ་དང་ཐབས་ལ་མཁས་པའི་ཐུགས་བསྐྱེད་ཀྱིས་སེམས་ཅན་རྣམས་ཀྱི་ཉོན་མོངས་པ་དང་། །སྡིག་པའི་ལྟ་བ་དང་། །ངན་སོང་དུ་འགྲོ་བའི་ལས་དང་། །ཁྱད་པར་ལྟུང་བའི་ཉེས་པ་སྤྱི་དད། །བྱེ་བྲག་ཏུ་རྒྱལ་པོ་ལ་གདམས་པ་ལྔ། བློན་པོ་ལ་གདམས་པ་ལྔ། ཉན་ཐོས་ཀྱི་ལྔ། །ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་ལས་དང་པོ་པ་དག་གི་བརྒྱད་ལ་སོགས་པའི་ཉེས་པ་ཐམས་ཅད་འཁྲུད་པའི་གཉེན་པོ་ཡིན་ཏེ། །ནམ་མཁའི་སྙིང་པོའ་མདོ་ལས། །རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་ནམ་མཁའི་སྙིང་པོ་འདི་ནི་སྙིང་རྗེ་ཆེན་པོ་དང་ལྡན་པ། །སེམས་ཅན་ལ་ཕན་པའི་ཕྱིར་ཞུགས་པ། །སྡུག་བསྔལ་ཆེན་པོ་ལས་ཐར་བར་བྱེད་པ་སྟེ། །སེམས་དག་དག་ལྟུང་བའི་རྩ་བ་འབྱུང་བ། །ངན་སོང་དུ་འགྲོ་བ། །དགེ་བའི་རྩ་བ་ཐམས་ཅད་སྤུགས་པར་བྱེད་པ། །འཇིག་པར་བྱེད་པའི་སེམས་ཅན་དེ་དག་ལ་རིགས་ཀྱི་བུ་འདི་ནི་སྨན་དུ་གྱུར་པའོ། །མ་རིག་པའི་མུན་ནག་དང་ལྟ་བ་ངན་པས་སྡུག་བསྔལ་བར་འགྱུར་པ་རྣམས་ལ་ནི་འདི་ཉི་མ་དང་མཚུངས་པའོ། །ལྟུང་བའི་རྩ་བ་འཆགས་སུ་འཇུག་པའོ། །དེ་དག་གི་སྙིང་ལ་ཐེ་ཚོམ་ཡོད་པ་དང་འབྲལ་བར་བྱེད་པའོ། །གང་དག་གི་སྙིང་གི་སྣོད་ཆག་པར་གྱུར་བ། །ལྟུང་བར་གྱུར་པ། །ཕམ་པར་གྱུར་པ། །སེམས་ཅན་དགེ་བའི་ཆོས་ཐམས་ཅད་ཞིག་པར་གྱུར་པ། །ངན་སོང་དུ་འགྲོ་བ། མགོན་མེད་པ། །རྟེན་མེད་པ། །ཁམས་པ་ཐམས་ཅད་ཀྱིས་སྤངས་པ་རྣམས་ལ་ནི་རིགས་ཀྱི་བུ་འིད་འཁོར་བ་དང་མཚུངས་པའོ། ལམ་སྟོན་པའོ། སྡིག་པ་ཐམས་ཅད་དང་། །དྲི་མི་ཞིམ་བ་ཐམས་ཅད་སྟོན་པར་བྱེད་པ་འཁྲུ་བར་བྱེད་པའོ། །འགྲོ་བ་ངན་པའི་ལམ་ལས་ལྡོག་པར་བྱེད་པའོ། །ཤིང་རྟ་དང་མཚུངས་པའོ། །མཐོ་རིས་དང་ཐར་བ་ལ་འཛེག་བར་བྱེད་པའོ། །རིགས་ཀྱི་བུ་འདི་ནི་སེམས་ཅན་
གང་དག་སེམས་ཤིན་ཏུ་འདོད་པར་འཇུག་པ་དང་། །གང་དག་ཤིན་ཏུ་ཁྲོ་བ་དང་། གནོད་སེམས་དང་། གནོད་པ་འཆང་པ་དང་། །སེར་སྣས་སེམས་འཁྲུགས་པར་འགྱུར་བ་དང་། །གང་དག་ཤིན་ཏུ་གཏི་མུག་གི་མུན་པར་སོང་བ་དང་། །རྒྱུ་མེད་པར་སྨྲ་བ་དང་། །འཇིག་རྟེན་ཕ་རོལ་གྱིས་མི་འཇིག་པར་བལྟ་བ་དང་། །གང་དག་ནོར་སོགས་པས་ཆོག་མི་ཤེས་པ་དང་། །གང་དག་མི་དགེ་པའི་ཆོས་བཅུའི་སར་དང་། རྟག་ཏུ་ཤིན་ཏུ་ལྡན་པའི་སེམས་ཅན་དེ་དག་གི་ངན་སོང་གི་སྒོ་གཅོད་པར་བྱེད་བ་ནས་ཤིང་རྟ་དང་མཚུངས་པའི་བར་དུ་ཡིན་ཏེ། སེམས་ཅན་རྣམས་མཐོ་རིས་དང་ཐར་པ་ལ་གཞོག་པར་བྱེད་པའོ། །དེ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མ་གཏོགས་པར་རིགས་ཀྱི་བུ་འདི་ནི་ལྷ་དང་བཅས་པའི་འཇིག་རྟེན་གྱིས་མཆོད་པར་བྱ་བ་ཡིན། ཞེས་གསུངས་པ་ལྟར་བྱང་ཆུབ་སེམས་དཔའ་ནམ་མཁའི་དྲན་ཞིང་མིང་ནས་བརྗོད། བདུག་པས་བདུགས། །རིག་པ་བཟླ་བ་དང་། ཕྱག་བཙལ་ནས་ཉལ་བ་དེའི་མདུན་དུ་བྱང་ཆུབ་སེམས་དཔའ་དེ། དགེ་སྤྱོད་དང་། །བྲམ་ཟེ་དང་། བརྒྱ་བྱིན་དང་། དཔལ་དང་། །དབྱངས་ཅན་དང་། །རྒྱལ་བློན་དང་། །སྨན་པ་དང་། །བུ་དང་། བུ་མོ་ལ་སོགས་པའི་གཟུགས་སུ་བྱོན་ནས་སེམས་
ཅན་དེའི་སྡིག་པ་དང་། ནད་དང་ལྟུང་བ་དང་ཉོན་མོངས་པ་ཐམས་ཅད་ཞི་བར་བྱེད་པའི་ཕྱིར་མདོ་དེ་ཉིད་ལས་ཏིན་ངེ་འཛིན་རྒྱ་མཚོ་དང་མཚུངས་པ། །བསླབ་པ་རི་རབ་དང་མཚུངས་པ། ཡེ་ཤེས་ནམ་མཁའ་དང་མཚུངས་པ། བརྩོན་འགྲུས་རླུང་དང་མཚུངས་པ། བཟོད་པ་རྡོ་རྗེ་དང་མཚུངས་པ། དགེ་བའི་རྩ་བ་ཆད་དེ་ལྕང་རྣམས་ཀྱི་འཁོར་བའ་ལྟ་བུ། ཚིག་ངན་པ་དང་སྐུར་པས་གདུངས་བ་རྣམས་ཀྱི་གདུགས་ལྟ་བུ་ཞེས་གསུངས་སོ། །བདུན་པ་བྱང་ཆུབ་སེམས་དཔའ་བྱམས་བ་ནི། ཚེ་ལོ་བརྒྱ་བའི་དུས་ནས་དགའ་ལྡན་ན་ལྷའི་བུ་དམ་པ་ཏོག་དཀར་པོའི་རྒྱལ་ཚབ་ཏུ་བྱང་ཆུབ་སེམས་དཔའི་དང་ཚུལ་དུ་བཞུགས་ཤིང་མ་འོངས་པ་ན་སངས་རྒྱ་བའི་ཚུལ་བྱམས་པའི་མདོར། །མྱ་ངན་ལས་འདས་ནས་རིམ་གྱིས་རྣམ་པ་ལྔ་ནུབ་པར་འགྱུར་ཏེ། །ཞེས་འབྲས་བུ་ཐོབ་པ་དང་། །སྒྲུབ་པ་ལ་གནས་བ། ལུང་གི་ཆོས།དུར་སྨྲིག་གི་རྟགས།ཐུབ་པའི་རིང་བསྲེལ་རྣམས་སྟོང་ཕྲག་ལྔ་ཡིས་ནུབ་པར་གྱུར་ནས།ལོ་ལྔ་བལ་ཁྱིམ་ཐབས་བྱེད་པའི་ཚེ་ལོ་བཅུ་པ་དང་། མུ་གེ་དང་།ནང་དང་།མཚོན་གྱི་བར་གྱི་བསྐལ་པ་གསུམ་རྫོགས་ནས༑ འབྲས་ས་ལུ་དང་གོས་རྒྱན་རིན་པོ་ཆེ་སྣ་བདུན་གྱི་ཆར་འབབ། ཚེ་ལོ་གྲངས་མེད་བར་འཕེལ་ཞིང་། དེ་ནས་འགྲིབ་པ་བརྒྱད་ཁྲི་བའི་ཚེ། །འཛམ་
བུའི་གླིང་ཐམས་ཅད་ལྷ་དང་སྐྱེ་མཆེད་མཚུངས།སྣོད་བཅུད་ཀྱི་འབྱོར་བ་ཡང་ལྷའི་ལོངས་སྤྱོད་ལྟ་བུར་གྱུར་པའི་ཚེ། །བྱམས་པ་འཇིག་རྟེན་དུ་འབྱོན་པར་འགྱུར་ཏེ་མདོ་དེ་ཉིད་ལས། དེའི་དུས་ན་བྱང་ཆུབ་སེམས་དཔའ་བྱམས་པ་འདི་གྲངས་མེད་པའི་བསྐལ་བ་འབུམ་ཕྲག་གཅིག་དང་བཅུ་དྲུག་ཏུ་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་ཕ་ཏོལ་ཏུ་ཕྱིན་པ་ཐམས་ཅད་རྫོགས་ནས་ཐམས་ཅད་སྒྲོལ་བའི་ཚུལ་གྱིས་ཐ་མ་ཉིད་དུ་སྦྱིན་པ་ཆེན་པོ་སྟེ། ཕ་ཏོལ་ཏུ་ཕྱིན་བའི་ཚོགས་ཐམས་ཅད་མཐར་ཕྱིན་ཅིང་འདི་ནས་དགའ་ལྡན་དུ་མངོན་པར་སྐྱེས་ཏེ། དེའི་དུས་ན་འཇིག་རྟེན་གྱི་ཁམས་སྟོང་ཕྲག་བཅུའི་ལྷ་ཐམས་ཅས་འོངས་ཏེ་སངས་རྒྱས་འཇིག་རྟེན་དུ་འབྱུང་བར་འགྱུར་རོ་ཞེས་སྒྲ་དབྱངས་སྙན་པ་ཆེན་པོ་འབྱིན་ཞིང་མངོན་པར་རྫོགས་པར་འཚང་རྒྱ་བར་གསོལ་ཞེས་བསྐུལ་བར་བྱེད་དོ། །དེ་ནས་གཟིགས་པ་རྣམ་པ་ལྔ་ལ་མངོན་པར་གཟིགས་ཏེ། དགའ་ལྡན་གྱི་ལྷའི་འཁོར་ནས་འོངས་ཏེ་རྒྱལ་པོ་དུང་གི་གྲོང་ཁྱེར་རྒྱལ་མཚན་བློ་གྲོས་སུ་བྲམ་ཟེ་མདུན་ན་འདོན་ཚངས་རབ་ཅེས་བྱ་བའི་བཙུན་མོ་ཚངས་ལྡན་ཞེས་བྱ་བའི་ལྷུམས་སུ་འཇུག་སྟེ། འཇིག་རྟེན་གྱི་ཁམས་སྟོང་ཕྲག་བཅུ་འདར་ཞིང་གཡོ་པར་འགྱུར་རོ། །དེར་ཟླ་བ་བཅུ་སོང་ནས་དྲང་སྲོང་ལྷུང་བའི་རི་དྭགས་རྒྱུ་བའི་གནས་སུ་ཡུལ་ལས་འཁྲུངས་ཏེ་རིམ་གྱིས་
ནར་སོན་ནས་རང་གི་བསོད་ནམས་ཀྱི་མཐུ་ལས་ས་འོད་གནས་ནོར་བུ་རིན་པོ་ཆེ་བདུན་ལས་གྲུབ་པའི་ཁང་བཟང་བཞི་བྱུང་བའི་ནང་དུ་རང་ཉིད་ལྷ་བཞིན་དུ་ལྷ་མོ་ཟླ་བའི་གདོང་ཅན་དང་།གཞན་ཡང་ལྷ་མོ་ལྟ་བུའི་བུད་མེད་མང་པོ་དང་ལྷམ་གཅིག་ཏུ་ལོ་སྟོང་ཕྲག་གཅིག་ཏུ་ལྷའི་ལོངས་སྤྱོད་ལྟ་བུ་ལ་བདེ་བར་སྤྱོད་དེ།དེ་ནས་ཐ་མའི་ཞག་ལ་བཙུན་པའི་བཟུགས་ཞིག་མཐོང་ནས་གསེར་གྱི་ཁང་བུར་སེང་གེའི་རྒྱལ་པོ་མི་དགའ་བ་བཞིན་དུ་རིན་པོ་ཆེའི་ཁང་བཟངས་དཔལ་མང་པོ་ཡོད་པ་ལ་མི་དགའ་ཞིང་ངེས་པར་འབྱུང་བ་ཆེན་པོའི་སེམས་བྱུང་སྟེ། འཇིག་རྟེན་འཁོར་ལོ་སྟོང་ཕྲག་བཅུ་ཐམས་ཅད་ཀྱི་ལྷ་རྣམས་ལྷའི་མེ་ཏོག་ལག་ཏུ་ཁྱེར་ནས་འཇིག་རྟེན་གྱི་འཁོར་ལོ་འདིར་འོངས་ཏེ་འཁོད་པར་བྱེད་དོ། །རྒྱལ་པོ་དུང་དང་བཅས་པའི་མི་མང་པོ་ཡང་མེ་ཏོག་དང་།དྲི་དང་།སྤོས་ཁྱེར་ཏེ་ཁང་བཟངས་ལ་བསྐོར་ནས་འཁོད་པར་བྱེད་དོ། །ནམ་མཁའི་ལྷ་རྣམས་ཀྱང་ལྷའི་མེ་ཏོག་ལག་ཏུ་ཁྱེར་ནས་ལེགས་སོ་ལེགས་སོ་ཞེས། །འོད་མིན་གྱི་བར་དུ་སྒྲ་ཆེར་སྒྲོགས་ཅིང་འཁོད་པར་བྱེད་དོ། །དེ་ནས་རིན་པོ་ཆེའི་ཁང་བཟངས་རྫ་མཁན་གྱི་འཁོར་ལོ་བཞིན་དུ་འཁོར་ཤིང་ནམ་མཁའ་ལ་སོང་ནས་བཅོ་ལྔའི་ཟླ་བ་སྐར་མའི་ཚོགས་ཀྱིས་ཡོངས་སུ་བསྐོར་བ་བཞིན་དུ་བྱང་ཆུབ་སེམས་དཔའི་ནི་ཟླ་བའི་གདོང་ཅན་མ་དང་།
གཞན་བཙུན་མོའི་ཚོགས་དང་བཅས་པ་ནམ་མཁའ་ལ་འགྲོ་བར་བྱེད་དེ། སེམས་དཔའ་ཆེན་པོ་དེ་དང་ཐབས་གཅིག་ཏུ་འགྲོ་བའི་སེམས་ཡོད་པ་ཐམས་ཅད་ཀྱང་ནམ་མཁའ་ལ་འགྲོ་བར་བྱེད་དོ། །དེ་ནས་ཚངས་པ་ཆེན་པོས་ནི་བག་ཚད་གསུམ་ཙམ་ཡོད་པའི་གདུགས་དཀར་པོ་འཛིན་ཅིང་ལྷའི་དབང་པོའི་རྒྱལ་པོས་དུང་འབུད་པར་བྱེད་དོ། །འདི་ལྟར་བསོད་ནམས་ཀྱིས་དཔལ་ཆེན་པོའི་ལྷ་དང་མིས་བསྐོར་བའི་ཁང་བཟངས་དང་བཅས་བས་བྱང་ཆུབ་ཀྱི་ཤིང་གི་དྲུང་དུ་ཉེ་བར་འོངས་ཏེ། ཞེས་དང་། དེ་ལྟར་བྱང་ཆུབ་ཀྱི་ཤིང་ཀླུང་ཤིང་ཉེ་འཁོར་དུ་འོངས་ཏེ་ནམ་མཁའ་ལས་བབས་ནས་ཁང་བཟངས་སའི་ཉེ་འཁོར་ཡིད་དུ་འཐད་པའི་སྟེང་དེ་ཉིད་དུ་འཁོད་བར་བྱེད་དོ། །དེར་དཔལ་གྱི་ཁང་བཟངས་ཀྱི་ནང་དུ་ཞག་བདུན་དུ་དཀའ་འཐུབ་བྱེད་དོ། །དེ་ནས་ཚངས་པ་ཆེན་པོས་ཕུལ་བ་མཁོ་བའི་ཡོ་བྱད་བླངས་ཏེ་རབ་ཏུ་བྱུང་བར་བྱེད་དོ། །འཁོར་ཐམས་ཅད་ཀྱང་རབ་ཏུ་འབྱུང་བར་འགྱུར་རོ། །འདི་ལྟ་སྟེ། བརྒྱས་ཁྲི་བཞི་སྟོང་གྲངས་སྙེད་ཀྱི། །བྲམ་ཟེའི་རིག་བྱེད་རབ་མཁས་པས། །ང་ཡི་རྗེས་སུ་རབ་ཏུ་འབྱུང་། །འཁོར་རྣམས་ཀུན་ཀྱང་རབ་ཅུ་འབྱུང། །དེ་ལྟར་རབ་ཏུ་བྱུང་ནས་ལྷ་མོ་ཟླ་བའི་གདོང་ཅན་མས་ཕུལ་བའི་སོ་ཐུག་རོ་སྣ་ཚོགས་དང་ལྡན་པ་གསོལ་བར་བྱེད་དོ། །དེའི་དགོངས་ཐུན་ལ་
བྱང་ཆུབ་ཀྱི་ཤིང་དྲུང་དུ་ཉེ་བར་འོངས་ཏེ་རྣམ་པར་རྒྱལ་བའི་ཁང་བཟངས་སུ་ཁྲི་བཤམས་པ་ལ་ཤར་གྱི་འཇིག་རྟེན་ལ་མངོན་པར་གཟིགས་ཏེ་བཞུགས་པར་མཛད་དོ། །དེ་ནས་རིམ་གྱིས་ཉི་མའི་སྐྱ་རེངས་ཤར་བའི་དུས་ན་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་མངོན་དུ་མཛད་དེ་འདི་སྐད་གསུང་རབ་འགྱུར་རོ། །འཁོར་བའི་སྐྱེ་བོ་མང་པོར་ནི་དུག་མེད་པ་ཡི་དོན་གྱི་ཕྱིར། །གནས་བཟང་ཀུན་ཏུ་བཙལ་བྱས་ཀྱང་། །ཡང་ཡང་སྐྱེ་བའི་སྡུག་བསྔལ་བྱུང་། །ད་ནི་གནས་བཟང་མཆོག་ཐོབ་པས། །ད་གཟོད་གནས་གཞན་མི་འགྲོ་སྟེ། །དུག་ཁྱིམ་སྡུག་བསྔལ་ཐམས་ཅད་བཅས། །རབ་བཅོམ་ཐོ་བས་བཤིག་པ་ཡིན། །ཉོན་མོངས་དུག་བཅས་འདོད་པ་ཡི། །ཡིད་ནི་རྣམ་པར་དག་པར་བྱས། །འདི་སྐད་ཅེས་གསུངས་ནས་བྱང་ཆུབ་ཀྱི་ཤིང་ལ་ཉེ་བར་གནས་ཏེ་ཞག་བདུན་ཕྲག་བདུན་སོང་བ་དང་། ཚངས་པས་གསོལ་བ་འདེབས་བ་གསན་ནས་དྲང་སྲོང་ལྷུང་བའི་གནས་སུ་ཕྱིན་ཏེ་ཆོས་ཀྱི་འཁོར་ལོ་བསྐོར་བ་ལ་གཤེགས་པའི་ཚེ། ཞབས་ནི་བསྐྱོད་པ་མེད་པར་ཡང་། །ཤིན་ཏུ་རྒྱས་པའི་པད་སྟེང་གཤེགས། །འདབ་མ་ཁྲུ་ནི་སུམ་ཅུར་བཅས། །བར་གྱི་འདབ་མ་ཉི་ཤུ་ལྔ། །གེ་སར་ཉི་ཤུའི་ཁྲུ་དང་ལྡན། །ཟེའུ་འབྲུ་ལ་ནི་བཅུ་དྲུག་སྟེ། །གེ་སར་ཁ་དོག་ཤིན་ཏུ་དམར། །
མེ་ཏོག་པདོྨ་ཆེན་པོ་འབྱུང་། །སྟོབས་བཅུ་མངའ་བའི་འོད་ཟེར་རབ་ཏུ་འབར་ཞིང་གསལ་ཏེ་ཉི་མའི་འོད་དམིགས་ལ་ཞིང་ཉིན་མཚན་བྱེ་བྲག་མེད་པར་འགྱུར་རོ། །དེའི་ཚེ་སྔ་དྲོད་དགོངས་མོ་བྱའི་སྒྲས་ཤེས་པར་བྱེད་པ་དང་། །མེ་ཏོག་རྒྱས་བས་ཀྱང་འཇིག་རྟེན་པ་རྣམས་གོ་བར་བྱེད་དོ། །གང་དང་གང་ན་ཆོས་འཆད་པ་ཡོད་པ་དེ་དང་དེར་ཆོས་ཀྱི་སྒྲ་ཐམས་ཅད་ལ་རབ་ཏུ་གྲགས་ཤིང་འཆད་པར་བྱེད་དོ། །དེའི་ཚེ་བྲམ་ཟེ་བརྒྱད་ཁྲི་བཞི་སྟོང་དང་། ཚངས་པ་ས་ཡ་ཕྲག་བཅོ་བརྒྱད་ཀྱིས་ཐོག་མར་ཆོས་ཀྱི་བདུད་རྩི་འཐུངས་ཏེ། འདི་ལྟར་བཅོམ་ལྡན་འདས་བསོད་ནམས་དང་བྱིན་རླབས་བརྒྱ་ཕྲག་མང་པོ་དང་ལྡན་པ་འོད་ཟེར་ཁ་དོག་སྣ་ཚོགས་པ་འགྱེད་ཅིང་། བརྒྱ་ཕྲག་མང་པོའི་མཚན་ཅན་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བརྒྱད་ཅུ་མཉམ་པར་ལྡན་ཞིང་ངོ་མཚར་མང་པོ་མངའ་བ། བརྒྱ་ཕྲག་མང་པོའི་འོད་དེའི་སྐུ་ལས་འབྱུང་བ་ཡིན་ནོ། །ཞེས་དང་། དེ་ལྟ་བུའི་སངས་རྒྱས་དེ་ནི་དཔེ་མེད་པའི་དཔལ་དང་། སངས་རྒས་ཀྱི་ཡོན་ཏན་མཐའ་མེད་པ་དང་ལྡན་ཞིང་། འཇིག་རྟེན་འཁོར་ལོ་སྟོང་ཕྲག་བཅུ་པོ་ཐམས་ཅད་ཀྱི་ལྷ་དང་མིའི་དབུས་སུ་བཞུགས་ནས་ཆོས་ཀྱི་འཁོར་ལོ་བསྐོར་ཞིང་བསྟེན་པར་མཛད་བ་ཡིན་ནོ། །དེའི་རྗེས་སུ་ས་ཡ་འབུམ་ཕྲག་གཅིག་གི་ལྷ་དང་མི་རྣམས་འཛིན་བ་མེད་པར་དང་པོ་ཉིད་
ནས་དང་པོ་ཉིད་དུ་ཆོས་ཀྱི་མཆོག་གིས་རྣམ་པར་གྲོལ་བ་ཐོབ་པར་འགྱུར་ཏེ། རྣམ་པར་གྲོལ་བ་མཐོབ་པ་རྣམས་ལྷའི་ཡུལ་དུ་སྐྱེ་བར་འགྱུར་རོ། །འདི་ལྟར་བྱམས་པ་ལེགས་པའི་མཆོག་ཆེན་པོ་དེ་གང་གིས་མི་མཐོང་ཞེ་ན། །མ་བསད་པ་དང་། །ཕ་བསད་པ་དང་། །དགྲ་བཅོམ་པ་བསད་བ་དང་། དགེ་སློང་མ་སུན་བྱུང་བ་དང་། དགེ་འདུན་གྱི་དབྱེ་ན་བྱེད་པ་སྟེ་སྡིག་པའི་ལས་ལྔ་བྱེད་བ་དང་། མཆོག་རྟེན་བཤིག་པ་དང་། བྱང་ཆུབ་ཀྱི་ཤིང་བཅད་པ་དང་། བྱང་ཆུབ་སེམས་དཔའ་བསད་པ་དང་། །དགེ་འདུན་གྱི་འཚོ་ཉམས་པར་བྱེད་བ་དང་། །སེར་སྣ་ཆེ་བ་དང་། རྟག་ཆད་དུ་ངེས་པར་ལྟ་བའི་མུ་སྟེགས་དང་། འཕགས་པ་རྣམས་ལ་སྨོད་པ་དང་། །གཅེར་བུ་བའི་རིགས་ཅན་རྣམས་ཀྱིས་མི་མཐོང་བ་ཡིན་ནོ། །ཚིགས་སུ་བཅད་པ་སྟོང་ཕྲག་གཅིག་གི་རྒྱན་ཡོད་པའི་ཐམས་ཅད་སྒྲོལ་བའི་སྐྱེས་རབས་ཆེན་པོ་སྟོང་ཕྲག་གསུམ་བཞག་གཅིག་ལ་འཆད་ཅིང་ཉན་པར་བྱེད་པའི་མི་དང་། མར་མེ་སྟོང་ཕྲག་གཅིག་འབུལ་བ་དང་། །དྲི་བཟང་པོ་མེད་ན་ཡང་མེ་ཏོག་སྟོང་ཕྲག་གཅིག་ཙམ་འབུལ་བ་དང་། ཨུཏྤལ་སྔོན་པོ་སྟོང་ཕྲག་གཅིག་ཙམ་འབུལ་བ་དང་། སངས་རྒྱས་ཀྱི་རིང་བསྲེལ་ཡོད་པའི་མཆོད་རྟེན་དང་། སངས་རྒྱས་ཀྱི་སྐུ་ལ་མཆོད་པ་བྱེད་པ་ཐམས་ཅད་ནི་སངས་རྒྱས་བྱམས་པ་
དེ་ཆོས་འཆད་པའི་དུས་སུ་ངའི་དྲུང་དུ་ཆོས་ཀྱི་མཆོག་གིས་རྣམ་པར་གྲོལ་བ་ཐོབ་པ་དང་། མཐོང་བར་འགྱུར་རོ། །དེ་མ་ཡིན་བ་སེམས་ཅན་སྦྱིན་པ་གཏོང་བ་དང་། སྡོམ་པ་བསྲུང་བ་དང་ལྷ་ཁང་བྱེད་པ་དང་། བྱང་ཆུབ་ཀྱི་ཤིང་གི་ས་བོན་སྐྱེད་བ་དང་། རིང་བསྲེལ་གྱི་མཆོད་རྟེན་བྱེད་པ་དང་། བྱང་ཆུབ་ཀྱི་ཤིང་དང་མཆོད་རྟེན་ལ་ཞབས་ཏོག་བྱེད་པ་དང་། །སེམས་ཅན་ལ་ཕན་པའི་ཚུལ་བྱེད་པ་དང་། ཟམ་བ་བྱེད་པ་དང་། ལམ་འཆོས་པ་དང་། མགྲོན་པོའི་གནས་ཁང་བྱེད་པ་དང་། ཆུ་མིག་བྱེད་བ་དང་། སངས་རྒྱས་ཀྱི་བསྟན་པ་ལ་དད་པར་བྱེད་པ་དང་། སངས་རྒྱས་ཀྱི་ཆོས་འདི་དག་འཆང་བ་ལ་དྲི་དང་མེ་ཏོག་ལ་སོགས་པའི་མཆོད་པ་བྱེད་པ་དང་། ཁྲིལ་བྱི་དོར་བྱེད་ཅིང་ལེགས་པར་ཆོས་ཉན་བ་དང་། དགེ་འདུན་ལ་བསྙེན་པ་བཀུར་དམ་པ་བྱེད་བ་དང་། །མ་དང་ཕའི་ཞབས་ཏོག་བྱེད་བ་དང་། རིགས་ཀྱིས་ཆེ་བ་ལ་གུས་པར་བྱེད་བ་དང་། སྡོམ་པ་སྲུང་བའི་དུས་སུ་དགེ་འདུན་ལ་བསྙེན་བཀུར་བྱེད་པ་དང་། ཚེས་བཅོ་ལྔ་ལ་དུས་སྟོན་བྱེད་བ་དང་། ལྷུང་བཟེད་འབུལ་བ་དང་། སྟན་སྟེར་བར་བྱེད་པ་ཐམས་ཅད་ཀྱིས་ཡང་དག་པར་རྫོགས་པའི་སངས་རྒྱས་བྱམས་པ་མཐོང་ཞིང་མཇལ་བ་ཡིན་ནོ། །དེ་ལྟ་བུའི་བསོད་ནམས་མང་པོ་མི་ནུས་ན་
ཡང་མེ་ཏོག་སྦར་མོ་རེ་ཙམ་དང་། མར་མེ་གཅིག་ཙམ་འབུལ་བར་བྱེད་པ་དང་། གཞན་གྱི་བསོད་ནམས་ལ་རྗེས་ཡི་རང་བའི་དགེ་བར་བྱེད་པའི་ལྷ་དང་མི་རྣམས་ཀྱིས་དེའི་དུས་ན་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བ་ཡིན་ནོ། །ཡང་དག་པར་རྫོགས་པའི་སངས་རྒྱས་བྱམས་བ་དེ་མཐོང་བར་འདོད་བའི་དང་བ་ཡོད་ཅིང་སྦྱིན་པ་གཏོང་བ་དང་། ཚུལ་ཁྲིམས་སྲུང་བ་དང་། བསྙེན་གནས་སྒྲུབ་པ་དང་། དོན་ཡང་དག་བར་སྒོམ་བ་དང་། དགེ་བའི་ལས་ཤིན་ཏུ་ལེགས་པར་བྱེད་པ་རྣམས་ཀྱིས་ཤིན་ཏུ་ལེགས་པར་མཐོང་བ་ཡིན་ནོ། །ཞེས་གསུངས་སོ། །དེ་ལྟ་བུའི་སངས་རྒྱས་དེ་ནི་སྔོན་གྱི་བསོད་ནམས་ཀྱི་མཐུས་སྣོད་བཅུད་ཀྱི་འབྱོར་པ་ཤིན་ཏུ་རྒྱས་བའི་དུས་ན་འབྱོན་ཞིང་། རང་གི་སྐུ་ཚད་དང་ཁྲུ་བརྒྱད་ཅུ་རྩ་བརྒྱད་པའི་སྲིད་དུ་རིང་ལ་གདུལ་བྱ་བསམ་གྱི་མི་ཁྱབ་པའི་ཚུལ་བྱམས་བ་ལུང་བསྟན་པའི་མདོར། །སངས་རྒྱས་བྱམས་པ་མི་མཆོག་དེའི། །འབྱོར་བ་རྒྱས་པར་ཁྱེད་ལ་དས༑ །ལུང་བསྟན་བྱ་ཡིས་ངལ་ཉོན། །དེ་ཡི་ཚོན་ཡུལ་གྱི་མི། །དར་ཞིང་འབྱོར་པ་ཚད་པ་མེད། །འཆི་མེད་མི་ནི་དེ་དག་ཀྱང་། དགེ་བ་བྱེད་པ་དག་ཏུ་འགྱུར། །ས་གཞི་ཚེར་མ་མེད་པ་དང་། །མཉམ་ཞིང་ནེའུ་གསིང་སྔོ་དང་ལྡན། །མངར་ཞིང་
དྲི་མི་ལྡན་བ་ཡི། །ས་ལུ་མ་རྨོས་པར་སྐྱེས་ཏེ། སོགས་བའི་མུར། །འགྱུར་འབྱུང་དཔའ་བོ་ཆེན་པོ་སྟེ། །བསོད་ནམས་བརྒྱ་ཡི་སྟོབས་ལས་སྐྱེས། །ཞེས་དང་། །དེ་ཡི་སྐུ་ཡི་ཁྲུན་དུ་ནི། །ཁྲུ་ནི་བརྒྱད་ཅུ་དག་རུ་འགྱུར། ཞེང་ནི་ཁྲུ་རྣམས་ཉི་ཤུ་སྟེ། །ཞལ་གྱི་དཀྱིལ་འཁོར་དེ་ཡི་ཕྱེད། །ཅེས་དང་། །དེ་ཡི་འདུས་པ་དང་པོ་ནི། ཉན་ཐོས་སྲིད་པ་བཅད་གྱུར་པ། །དུང་ཕྱུར་ཕྲག་དགུ་བྱེ་ཕྲག་དྲུག །ཚངས་བའི་ཉན་ཐོས་འབྱུང་བར་འགྱུར། །དེ་ཡི་འདུས་བ་གཉིས་པ་ནི། །ཉོན་མོངས་འཆིང་བ་ལས་གྲོལ་བའི། །དུང་ཕྱུར་ཕྲག་དགུ་བྱེ་བྲག་བཞི། །ཚངས་བའི་ཉན་ཐོས་འབྱུང་བར་འགྱུར། །དེ་ཡི་འདུས་པ་གསུམ་པ་ནི༑ །སེམས་ཞི་རྣམ་པར་གྲོལ་གྱུར་པ། །དུང་ཕྱུར་ཕྲག་དགུ་བྱེ་ཕྲག་གཉིས། །ཚངས་པའི་ཉན་ཐོས་འབྱུང་བར་འགྱུར། །ཆོས་ཀྱི་འཁོར་ལོ་རབ་བསྐོར་ནས། །ལྷ་དང་མི་རྣམས་རྣམ་བཏུལ་ཏེ། །ཉན་ཐོས་དགེ་འདུན་ཐབས་གཅིག་ཏུ། །གྲོང་དུ་བསོད་སྙོམས་སྤྱོད་ལ་རྒྱུ། །དེ་ནས་རྟོག་ལྡན་དགའ་ལྷ་ཡི། །གྲོང་ཁྱེར་དེར་ནི་གཤེགས་པ་ན། །གྲོང་ཁྱེར་མཆོག་ཏུ་མནྡཱ་རའི། །མེ་ཏོ་ཆར་ཆེན་འབབ་བར་འགྱུར། །ཐུབ་པ་གྲོང་དེར་གཤེགས་པ་ལ། །ལྷ་ཡིས་མེ་ཏོ་འཐོར་བ་འགྱུར། །རྒྱལ་པོ་ཆེན་པོ་བཞི་དག་དང་། །བརྒྱ་བྱིན་སུམ་ཅུ་རྩ་གསུམ་དབང་། །ཚངས་པ་ལ་སོགས་
ཐབས་གཅིག་ཏུ། །དེ་ལ་མཆོད་པ་བྱེད་པར་འགྱུར། །ལྷ་ཡི་བུ་ནི་མཐུ་ཆེན་གྱིས། །ཨུཏྤལ་པདྨ་ཀུ་མུ་ཏ། །པདྨ་དཀར་པོ་དྲི་ཞིམ་དང་། །ཨ་ཀ་རུ་དང་ཅན་དན་དང་། །དེ་བཞིན་ལྷ་རྫས་ཕྲེང་བ་དང་། །ལྷ་རྫས་གོས་ཀྱང་མཐོང་བར་འགྱུར། །འཇིག་རྟེན་མགོན་དེ་གྲོང་ཁྱེར་གྱི། །མཆོག་གི་གཤེགས་པ་མཐོང་ནས་ནི། །ཤིང་བལ་འདབ་ལྟར་འཇམ་བ་ཡི། །ས་དེར་གདིང་བ་རྒྱ་ཆེར་འདིངས། །དེ་དག་ལམ་དཀར་ཕྲེང་བ་ནི། །སྣ་ཚོག་ས་མཛེས་པ་རྣམ་པར་འགྲེམས། །ལྷ་ཡི་བུ་ནི་མཐུ་ཆེན་དང་། །མི་རྣམས་ཡིད་ནི་རང་དང་བ། །གདུགས་དང་རྒྱལ་མཚན་བ་དན་དང་། །སྤོས་དང་ཕྲེང་བ་བྱུག་པ་དང་། རོལ་མོ་སྒྲ་སྙན་བསྒྲགས་པ་ཡིས། །སྟོན་པ་ལ་ནི་མཆོ་བར་འགྱུར། །བརྒྱ་བྱིན་མིག་སྟོང་ལྷ་རྣམས་ཀྱིས། །རྒྱལ་པོ་བདེ་སོགས་བདག་པོ་དེ། །རབ་མགུ་ཐལ་མོ་སྦྱར་ནས་ནི། །འཇིག་རྟེན་མགོན་ལ་བསྟོད་པ་བྱེད། །ཅེས་དང་། །དེའི་ཚེ་སེམས་ཅན་རྣམས་ཀྱང་ཉོན་མོངས་པ་ཆུང་ཞིང་མགོན་པོ་ཐུགས་རྗེ་ཆེན་པོ་དང་ལྡན་པས་ཚངས་པར་སྤྱོད་པ་དག་ཀྱང་མྱ་ངན་ལས་འདའ་བར་སླ་སྟེ། །དེ་སྐད་དུ། གང་དག་བྱམས་པའི་བསྟན་པ་ལ། །ཚངས་པར་སྤྱད་པ་སྤྱོད་གྱུར་པ། །དེ་དག་གདོན་མི་ཟབ་ནི། །ཉོན་མོངས་མེད་ཅིང་ཐེ་ཐོམ་མེད། །གང་དག་བྱམས་
པའི་བསྟན་པ་ལ། །ཚངས་པར་སྤྱད་པ་སྤྱོད་གྱུར་བ། །དེ་དག་གདོན་མི་ཟ་བར་ནི། །སྲིད་པའི་དྲཱ་བ་བཅད་བ་དང་། །བསམ་གཏན་རྫོགས་པར་བྱས་ནས་ནི། །དགའ་དང་བདེ་དང་ཡང་དག་ལྡན། །འབྱུང་པོ་ཀུན་ལ་ཐུགས་བརྩེ་བ། །བྱམས་པ་རྐང་གཉིས་རྣམས་ཀྱི་མཆོག །ལོ་ནི་དྲུག་ཁྲི་དག་ཏུ་ཡང་། །དམ་པའི་ཆོས་ནི་སྟོན་པར་འགྱུར། །དེ་ན་སྲོག་ཆགས་བརྒྱ་སྟོང་དང་། །འབུམ་ཕྲག་རྣམ་པར་འདྲེན་པ་སྟེ། །དམ་པའི་ཆོས་ལ་བཏུལ་ནས་ནི། །དེ་ནས་མྱ་ངན་འདས་བར་འགྱུར། །ཐུབ་པ་ཆེན་པོས་གསུངས་པ་དེ། །ཡོངས་སུ་མྱ་ངན་འདས་ནས་ཀྱང་། །དེ་ཚེ་དེ་ཡི་དམ་ཆོས་ནི། །ལོ་ཁྲི་དག་ཏུ་གནས་པར་འགྱུར། །རྒྱལ་བ་ཤཱཀྱ་ཐུབ་དེ་ལ། །སེམས་ནི་རབ་ཏུ་དད་པར་གྱིས། །དེས་བ་བྱམས་པ་རྐང་གཉིས་མཆོག །རྫོགས་པའི་སངས་རྒྱས་མཐོང་བར་འགྱུར། །དེ་ཕྱིར་སངས་རྒྱས་ཆོས་དག་དང་། །དགེ་འདུན་ཚོགས་ཀྱི་མཆོག་ལ་ནི། །སེམས་ནི་རབ་ཏུ་དད་གྱིས་དང་། །དོན་ཆེན་རབ་ཏུ་འགྲུབ་བར་འགྱུར། །ཐུགས་རྗེ་ཆེ་ལྡན་དེ་ལྟ་བུའི། །བྱམས་པ་རྐང་གཉིས་མཆོག་གྱུར་པ། །ད་ཚོ་མཉེས་པར་བྱས་ནས་ནི། །དེ་ནས་མྱ་ངན་འདའ་བར་གྱུར། །ཡ་མཚན་འདི་དག་ཐོབ་གྱུར་ཅིང་། །འབྱོར་པ་མི་ཉུང་མཐོང་
མཛད་དེ། །ནག་པོའི་རིགས་ཀྱང་དད་འགྱུར་ན། །མཁས་པ་སུ་ཞིག་དད་མི་འགྱུར། །དེ་ཕྱིར་འདི་ན་བདག་ཉིད་ཆེ། །འདོད་ཅིང་བདག་ལ་ལེགས་འདོད་པས། །སངས་རྒྱས་བསྟན་པ་དྲན་བཞིན་དུ། །དམ་པའི་ཆོས་ལ་གུས་པར་བྱ། །ལོ་ཁྲི་དག་ཏུ་གནས་པར་འགྱུར། །ཅེས་གསུངས་པས་བསྟན་པ་འདི་ལ་མྱ་ངན་ལས་མི་འདའ་བར་དེས་པ་དག་དཔ། ཚུལ་ཁྲིམས་འཆལ་བ་རྣམས་བྱམས་བའི་བསྟན་པ་ལ་འབྲས་བུ་ཐོབ་བར་ཤིན་ཏུ་ཡང་སྨོན་བའི་གནས་བླ་ན་མེད་པའི་ཕྱིར་ཅུང་ཟད་རྒྱས་བར་བཤད་པའོ། །བརྒྱད་བ་ཀུན་ཏུ་བཟང་པོ་ལ་མཚན་གཞི་དང་ཕན་ཡོན་གྱི་སྒོ་ནས་བསྔགས་པ་ནི། ཀུན་ཏུ་ནི་དུས་གསུམ་དུས་མེད་རྣམ་པ་ཐམས་ཅད་པ་སྟེ། །དཔལ་གསང་བའི་སྙིང་པོ་ལས་ཀྱང་དེ་སྐད་དུ་བཤད་ཅིང་། དེ་ལ་སྔ་རབས་པ་དག་གིས་བཟེར་བའང་རང་ཉིད་མཐོང་བ་ཆུང་བར་དམ་འཆའ་བ་སྟེ། ཁྱེའུ་སྣང་བ་བསམ་གྱིས་མི་ཁྱབ་བས་བསྟན་པ་ལས་སྔོན་གྱི་མཐའ་དབེན་པ་དང་། །ཕྱི་མའི་མཐའ་མི་འཕོ་བ་དང་། །ད་ལྟར་བྱུང་བ་འཇིག་བར་ཤེས་བ་དང་། དུས་གསུམ་མཉམ་བ་ཉིད་དེ་བཞི་པོ་དེ་དག་གོ །ཞེས་པས་གསལ་བར་བསྟན་ནོ། །བཟང་པོ་ནི། །སྤྱིར་དཀར་བོའི་ཕྱོགས་མཐའ་དག་བའམ། བྱེ་བྲག་ཏུ་བྱང་
ཆུབ་སེམས་དཔའ་རྣམས་ཀྱི་སྦྱིན་པ་དང་། །ཚུལ་ཁྲིམས་དང་། །བཟོད་བ་དང་། །བརྩོན་འགྲུས་ཏེ་སྤྱོད་པའི་ཕྱོགས་བཞི། །བསམ་བཏན་དང་། ཤེས་རབ་སྟེ་ལྟ་སྒོམ་གྱི་ཕྱོགས་གཉིས་སམ། ཁ་གཅིག་ཏུ་བསམ་གཏན་སྤྱོད་པར་བསྡུ་བའི་ཕ་རོལ་ཏུ་ཕྱིན་པ་དྲུག་གང་ཡང་སེམས་ཅན་གྱི་ཁམས་ཚད་མེད་པ་ལ་ཕན་བདེ་སྟེར་བ་དང་། །སངས་རྒྱས་ཀྱི་ཆོས་ཁམས་རྒྱ་མཚོ་བསྒྲུབ་པའི་ཚོགས་གཉིས་རླབས་པོ་ཆེ་ལ་རྟག་པ་རྒྱན་གྱི་འཁོར་ལོར་ཀུན་ཏུ་བཟང་པོར་སྤྱོད་དཔའི་ཐུགས་བསྐྱེད་དང་སྨོན་ལམ་ནམ་མཁའི་མཐས་ཀྱང་མི་གཏུག་བའི་ཚུལ་ཕལ་པོ་ཆེའི་མདོ་དང་། ཕྱོགས་གླང་གི་འགྲེལ་པས་སྟོན་ལ། གཞོན་ནུ་ནོར་བཟང་གིས་བཤེས་གཉེན་མང་དུ་བསྟེན་པ་ཐམས་ཅད་ཀྱི་ཕྱི་ནའང་བྱང་ཆུབ་སེམས་དཔའ་ཀུན་ཏུ་བཟང་པོ་ཉིད་ལ་བསྟེན་ཞིང་། །དེའི་མཚན་དོན་དང་མཚུངས་བའི་སྤྱོད་པ་སྨོན་ལམ་དུ་བཏབ་པར་ཡང་། །གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་བཏོན་ཏམ་ཀློག་པ་ཡི། །སོགས་དང་། ཕན་ཡོན་ཆེ་བའི་སྒོ་ནས་བསྔགས་པ་ནི། །རིག་པ་མཆོག་གི་རྒྱལ་པོར༑ ཚུལ་ཁྲིམས་དང་ལྡན་ཡང་རུང་། །མི་ལྡན་ཡང་རུང་། །དམན་པའམ། དམན་པ་མ་ཡིན་བ་ཡང་རུང་། །མཁས་པའམ། །མཁས་པ་མ་ཡིན་པའང་
རུང་། །ཐབས་དང་ལྡན་པའམ། །མི་ལྡན་པའང་རུང་། ངེས་པར་འགྲུབ་བར་འགྱུར་རོ། །དད་བ་མེད་པ་དང་། །བྱང་ཆུབ་སེམས་བསྐྱེད་པ་ནི་མ་གཏོགས་སོ། །ཞེས་པ་ལྟར། མཚམས་མེད་ལྔ་པོ་བདག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །ཅེས་ཕན་ཡོན་གྱི་སྒོ་ནས་བསྔགས་བ་ལ་ཆེད་དུ་བརྗོད་བའོ། །ཆོ་འཕྲུལ་ཆེན་མོའི་དུས་ཆེན་ལ་ཆེད་དུ་བརྗོད་པ་ཚོགས་གཉིས་ཤིང་རྟ་ཞེས་བྱ་བ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །ཚོགས་གཉིས་གསེར་གྱི་ཤིང་རྟས་དྲངས་པའི་སྐུ། །མཚན་དཔེ་ཡོན་ཏན་རྒྱ་མཚོའི་འཁྲི་ཤིང་ཅན། །བདུད་སྡེ་བྱེ་བའི་གཡུལ་ལས་རྣམ་རྒྱལ་བས། །རྒྱལ་བའི་མཚན་གྱིས་བསྔགས་བ་དེ་ལ་འདུད། །ཆོས་རྣམས་མ་ལུས་བློ་ཡི་བཏགས་པ་དེ། །བཏགས་པའི་ཆོས་ལ་ལས་དང་དེའི་འབྲས་བུ། །གྲུབ་པའི་རང་བཞིན་མཁྱེན་ནས་བཅོམ་ལྡན་གྱི། །ཆོ་འཕྲུལ་ཆེན་པོས་དུས་ཀྱང་བྱིན་གྱིས་བརླབས། །ཆུ་ཤེལ་དབང་པོའི་དཀྱིལ་འཁོར་མཆུས་ཉ་ཞིང་། །ཞག་གི་ཕུང་པོ་བུམ་པའི་གྲོང་ཁྱེར་གྱིས། །རང་དབང་བྱས་པའི་དུས་ཀྱི་ཁྱད་པར་ལ། །མཉན་དུ་ཡོད་བར་ཆོ་འཕྲུལ་འདུན་ཁང་གཤེགས། །ཟག་པར་བཅས་པའི་
སེམས་ཀྱི་གླང་པོ་ཡིས། །སྟོབས་བཅུ་མི་འཇིགས་བཞི་ལྡན་སེང་གེ་ལ། །རྒོལ་འདི་སེམས་ཅན་རྣམས་ཀྱི་བསོད་ནམས་མཐུར། །ཤེས་ནས་ལྷ་དང་བཅས་པའང་ལྟད་མོར་ལྷགས། །དགའ་བ་དང་པོ་ཚེས་གཅིག་ཉིན་ཞག་ལ། །མི་དབང་གསལ་རྒྱལ་བསྙེན་བཀུར་བསྟབས་པའི་ཚེ། །ས་ལ་བཙུགས་པའི་ཚོམས་ཤིང་ལྗོན་པ་ནི། །དཔག་ཚད་ལྔ་བརྒྱའི་སྲིད་དུ་ལོ་འབྲས་དུད། །དབང་ཡུལ་བདེ་བས་ཁྱབ་མཛད་དེར་ཕྱལ་འཚལ། །ཚེས་གཉིས་རྒྱལ་པོ་ཨུ་ཏྲ་ཡ་ནས་མཆོད། །སྟོན་མཆོག་མཚན་དཔེར་འབར་བའི་སྐུའི་གཡས་གཡོན། །རིན་ཅེན་རི་བོ་ནོར་བུའི་དོ་ཤེལ་ཅན། །རོབ་དའི་འབྲས་དང་རྩ་ལྗང་སྤྲུལ་བསྒྱུར་ལས། །མི་ཕྱུགས་ཆིམས་པར་མཛད་བ་དེར་ཕྱལ་འཚལ། །ཚེས་གསུམ་མི་ཡི་དབང་པོ་ཤུ་སྨི་དས། །མཆོད་ཚོགས་བསིལ་ལས་ལ་དོ་རབ་ཡང་། །བཻཌཱུ་ཞུན་མའི་ཆུ་མཚོར་གྱུར་པའི་སྟེང་། །རིན་ཆེན་པདྨའི་མྱུ་གུ་རྣམ་བཞད་པས། །མཐོ་རིས་ས་བོན་བསྒྲུན་དེར་ཕྱལ་འཚལ་ལོ། །བཞི་བའི་ཚེས་ལ་ཨིནྡུ་ལྦ་རྨི་ཡིས། །བསྟི་སྟང་ཚེ་ན་རྫིང་བུའི་དོགས་བཞི་ནས། །ཆུ་ཀླུང་ཆེན་པོ་ཡུར་བ་བརྒྱད་དུ་འཐོན། །སྙན་བའི་སྒྲ་བཅས་བསྙེར་ཞིང་དེ་རུ་འབབས། །བྱང་ཆུབ་ཆོས་སྒྲ་སྒྲོགས་བ་དེར་ཕྱག་འཚལ། །ཚེས་ལྔར་མི་ཡི་དབང་པོ་ཚངས་བྱིན་གྱིས། །
གཡོས་སྦྱར་ཤིན་ཏུ་འཛུམ་བའི་ཞལ་སྒོ་ལས། །བྱུང་བའི་འོད་ཀྱིས་སྟོང་གསུམ་ཀུན་གསལ་ཞིང་། །འོད་ཀྱིས་ལུས་ལ་རིག་པའི་སྐྱེད་གུ་ཀུན། །སྒྲིབ་པ་ལྔ་ཡི་དི་མ་འཁྲུད་དེར་འདུད། །ཚེས་དྲུག་ཡི་ཙ་བྱི་ཡིས་ཉེར། མཆོད་ཚེ། །རྣམ་བར་ཤེས་བ་ལྐོག་ཏུ་གྱུར་བས་ཀྱང་། །ཕན་ཚུན་འཛིན་བར་མ་ནུས་ཕན་ཚུན་གྱི། །ཁམས་དང་བསམ་པའི་ཁྱད་བར་མངོན་གྱུར་དུ། །ཤེས་པའི་བྱིན་བརླབས་མཛད་དེར་ཕྱག་འཚལ་ལོ། །ཚེས་བདུན་གཽ་གམ་ཤཱཀྱའི་རིགས་ཀྱིས་མཆོད། །སློབ་མའི་ཚོགས་ཀུན་རྩིབས་གྱི་མུ་ཁྱུད་ལྟའི། །འཁོར་ལོས་སྒྱུར་བའི་རྒྱལ་པོ་སྲས་སྟོང་ལྡན། །རྒྱལ་ཕྲན་བློན་འབངས་བཅས་པར་གནས་བསྒྱུར་ནས། །ངོ་མཚར་དད་པའི་གཞིར་བཀོད་དེར་ཕྱག་འཚལ། །ཚེས་བརྒྱད་ལྷ་ཡི་དབང་པོས་སྲི་ཞུའི་ཚེ། །དེས་བཤམས་ཁྲིལ་བཞུགས་བཞིན་མི་སྣང་བས། །ཕྱོགས་བཞིར་སྤྱོད་ལམ་བཞི་དང་སྒྲ་འོད་འབྱིན། །སྐུ་སྨད་མེ་འབར་སྟོད་ནས་ཆུ་འབྲུབ་ཆིང་། །ཀླུ་ཡིས་ཕུལ་པའི་པདྨའི་སྙིང་པོ་ལ། །རང་འདྲའི་སངས་རྒྱས་མང་པོར་སྤྲུལ་ནས་བཞུགས། །ལ་ལ་འབར་ཞིང་ལ་ལ་གསལ་བ་སོགས། །བཀོད་པ་བསམ་གྱིས་མི་ཁྱབ་རྫུ་འཕྲུལ་མེས། །འགྲན་ཟླའི་རང་མཚད་འཚིག་པའི་སྟོན་བ་དྲུག་གཅིག་གིས་གཅིག་བསྐུལ་འབྲོས་ལ་རིངས་པའི་ཚེ། །
བསོད་ནམས་བརྒྱ་ལས་གྲུབ་པའི་ཕྱ་གཡོར་གྱིས། །སེང་གེའི་ཁྲིལ་རེག་པའི་སྐད་ཅིག་མར། །སྒྲ་དང་བཅས་ཏེ་འཇིགས་རུང་སྲིན་པོ་ལྔ། །འཐོན་པས་ལོག་པར་སྨྲ་བའི་ཁྲི་བཤིག་ཅིང་། །གསང་བའི་བདག་པོས་འབར་བའི་རྡོ་རྗེས་བསྡིགས། །དྲག་སུམ་སྦྱོར་བ་རྣོན་པོས་ཚར་བཅད་དེ། །ཡོག་སྨྲའི་འཁོར་འབངས་དགུ་ཁྲི་རབ་རུ་བྱུང་། །བ་སྤུ་འོད་ཟེར་འབར་བའི་སངས་རྒྱས་རྣམས། །རང་རང་འཁོར་ལ་ཆོས་སྟོན་དེར་ཕྱལ་འཚལ། །ཆོས་དགུར་དྲེགས་ལྡན་མི་མཇེད་བདག་པོ་ཡིས། །མཆོད་ཚེ་རེག་བའི་དབུའི་གཙུག་ཏོར། །བལྟར་མི་མངོན་པའི་ངང་ཚུལ་འདིའོ་ཞེས། །སྟོན་ཕྱིར་ཚངས་བའི་ཡུལ་སར་སྙེག་པའི་ཚུལ། །མངོན་སུམ་གསལ་བར་མཛད་པ་དེར་ཕྱལ་འཚལ། །ཡར་ངོའི་ཆེས་བཅུར་འཇིག་རྟེན་སྐྱོང་བ་བཞི་ས། །སྲི་ཞུ་སྦྱར་ཚེ་མཚན་དཔེར་འབར་བའི་སྐུ། །སྲིད་རྩེར་ཁྱབ་པའི་འོད་ཀྱིས་འཇིག་རྟེན་གགསུམ། །མངོན་སུམ་ལྟ་བའི་སྐལ་བར་སྦྱར་བ་ཡིས། །གདུལ་བྱ་དད་བར་མཛད་ལ་ཕྱག་འཚལ་ལོ། །བཅུ་གཅིག་ཁྱིམ་བདག་མགོན་ན་མེད་ཟས་སྦྱིན་མཆོད། །གར་སྐུ་འོད་ཟེར་དྲྭ་བས་ལེགས་འཁྱུད་པའི། །དཔལ་གྱི་མགུར་ལས་བདུད་རྩིའི་དགའ་སྟོན་གྱིས། །མཐོ་རིས་དང་ནི་དགྲ་བཅོམ་ཐེམ་སྐས་ལ། །འཇོག་པའི་སྐལ་པ་ཕྱིན་དེར་ཕྱལ་འཚལ་ལོ། །
བཅུ་གཉིས་ཆོས་ལ་ཙིནྟས་བསྙེན་བཀུར་ཚེ། །བཙོ་སྦྱངས་ཞུན་མར་འཕྲོ་བའི་ཟེར་འོད་མཚོན། །བརྟན་གཡོའི་ཁམས་ལ་རེག་པས་འཁོར་རྣམས་ཀྱི། །དུག་གསུམ་རྟོག་པ་སྦྱངས་ཏེ་ཉ་དང་ཁོ་ན། །སྤངས་པའི་མཛའ་བཤེས་གནས་འགྱུར་དེར་ཕྱལ་འཚལ༑ །བཅུ་གསུམ་ཤུནྟ་ད་ལས་མཆོད་པའི་ཚེ། །ལྟེ་བའི་སྒྲུབས་ནས་འོད་ཟེར་ཟུང་ལྡན་རྩེར། །པདོྨའི་སྟེང་ན་སྤྲུལ་པའི་སངས་རྒྱས་གཉིས། །དེ་ལས་དེ་འདྲ་གྲངས་མེད་གྱུར་པའི་ཚུལ། །ཀུན་ལ་སྣང་བར་མཛད་པ་དེར་ཕྱལ་འཚལ། །བཅུ་བཞི་རས་དབང་ཨུ་ཏྲ་ཡ་ནས་མཆོད། །སྐུ་ལ་གཏོར་བའི་མེ་ཏོག་སྐད་ཅིག་མར། །རིན་པོ་ཆེ་ཡི་ཁམས་སུ་གནས་འགྱུར་ཅིང་། །ཚངས་པའི་འཇིག་རྟེན་ཐུག་པར་གསེར་བཞིན་འབར། །སྟོང་དང་ཉིས་བརྒྱ་ལྔ་བཅུའི་གྲངས་དེ་སྙེད། །སྤྲུལ་པའི་སངས་རྒྱས་བཞུགས་བསྟན་དེར་ཕྱག་འཚལ། །བཅོ་ལྔར་རྒྱལ་པོ་གཟུགས་ཅན་སྙིང་པོས་མཆོད། །སྣོད་ཀུན་རོ་བརྒྱ་ལྡན་པའི་ཟས་གང་བ། །ཆོ་འཕྲུལ་ལྟ་བར་འདུས་པས་མྱོད་བྱིན་བརླབས། །ས་ལ་འཁོར་ལོས་མཚན་པའི་ཕྱག་རེག་སྟེ། །དམྱལ་བའི་གྲོང་ཁྱེར་བསྟན་པས་འཁོར་ཚོགས་རྣམས། །འཇིགས་དང་སྙིང་རྗེའི་དང་གཟུགས་འགྲན་པའི་མོད། །ངེས་པར་འབྱུང་བས་རྒྱུད་བསལ་བློ་ཆེན་རྣམས། །བྱང་ཆུབ་སེམས་དཔའི་གནས་ལ་
རང་བཞག་ཅིང་། །དམྱལ་བའི་འགྲོ་བས་ཐུབ་དབང་ཞལ་མཐོང་བས། །ཚེ་འཕོས་མཐོ་རིས་རྟེན་ལ་འགོད་པ་སོགས། །སྤྱོད་ཡུལ་བསམ་གྱིས་མི་ཁྱབ་དར་ཕྱག་འཚལ། །འདི་ལྟར་བསྟོན་མཆོག་རྫོགས་པའི་སངས་རྒྱས་ཀྱི། །ཆོ་འཕྲུལ་ཆེན་པོའི་མཛད་པ་ཁ་ཏོན་དུ། །བྱས་ཤིང་ཡིད་ལ་དྲན་པའི་དགེ་བ་ཡིས། །འགྲོ་ཀུན་ཁྱོད་ཀྱི་སྤྱོད་པ་དེ་འདྲ་བས། །རྫོགས་སྨིན་སྦྱངས་གསུམ་མཐར་ཕྱིན་སངས་རྒྱས་ཤོག །ཅེས་ཆོ་འཕྲུལ་ཆེན་པོའི་མཛད་པའི་རྣམ་གྲངས་ཁ་ཏོན་དུ་བྱས་ཚོག་པ་ཞིག་དགེ་ས་ཞེས་། །བཟོ་གནས་ཀྱི་རིག་པ་ལ་གོམས་ཤིང་ཡང་དག་འཇོག་ལ་བློ་གཞིལ་བ་ལྦ་གིནྡྲ་དྷརྨ་ཀཱིརྟིས་བསྐུལ་ངོར། །བདག་ཅག་གི་སྟོན་པ་དང་། །དེས་གསུངས་པའི་བསྟན་པ་ལ་འདུན་པ་ཙམ་དང་། ཞེ་སྡང་དང་། །གཏི་མུག་གིས་མ་ཡིན་པར་རྒྱུ་མཚན་ཤེས་ནས་མི་བསླུ་བར་ངེས་པའི་དད་པ་ཅན་ཆོས་ཀྱི་རྗེས་སུ་འབྲེལ་བ་པོ་མཁྱེན་བརྩེའི་འོད་ཟེར་གྱིས་ཐུན་མོང་དང་མཐུན་པར་བྲིས་པ་སྟེ། བསོད་ནམས་འཕེལ་བའི་ཁྱད་པར་ལ་ནི། ཇི་སྐད་དུ། ཁ་ཅིག་བཅོ་ལྔ་ཕན་ཆད་ཅེས། །ཟླ་བའི་བགོ་བཤའ་བྱེད་མོད་ཀྱང་། །རྗེ་བཙུན་བྱམས་པའི་ལུང་བསྟན་ལས། །ཆོ་འཕྲུལ་གྱི་ནི་ཟླ་བ་ལ། །ཞེས་པའི་བཀའ་སྩལ་གསུངས་བ་དང་། །ཐེག་པ་ཆེ་འབྲིང་རྣམ་གསུམ་དུ། །ཟླ་བའི་བགོ་བཤའ་མ་གསུངས་པས། །ཟླ་བ་གཅིག་བུ་ཉིད་དུ་
ངེས། །ཞེས་བོད་མཁས་པའི་བསྟན་བཅོས་ལས་བྱུང་མོད། །རྟོག་པས་བརྟགས་ན་དཔྱད་པར་བྱ་བའང་སྣང་སྟེ་ཟླ་བ་རིལ་པོ་དུས་བཟང་དུ་བྱས་ནས་བསོད་ནམས་བསོག་པར་འདོད་པ་དག་གི་དགེ་བའི་གེགས་སུ་འགྱུར་བའི་ཕྱིར་དེ་བཞིན་གཤེགས་བའི་ཐབས་དང་སྤྱོད་ཡུལ་བསམ་གྱིས་མི་ཁྱབ་པའི་དོན་དྲན་པར་བྱའོ། །བཅོམ་ལྡན་འདས་རྟ་མཆོག་རོལ་བ་གསང་བ་སྒྲུབ་པ་ལ་བསྟོད་པ། །འགྲོ་འདིའི་ཀུན་རྟོག་ཆུ་སྲིན་གྲོང་ཁྱེར་ལས། །གདོན་པ་བགེགས་ཀྱི་དགྲ་བོའི་མཚན་དཔེའི་དཔལ། །སྣང་ཆར་འཛུམ་བའི་མོད་ལ་མཚོ་སྐྱེས་རྗེའི། །དྲག་ཤུལ་ཆོ་གར་བསྙེམས་པའི་ཞལ་སྐྱིན་མཐོང་། །རྒྱལ་རྣམས་ཡེ་ཤེས་ཞགས་པའི་མུ་ཁྱུད་དུ། །འཆིང་བ་སྤངས་པའི་ཡིད་ཅན་འགའ་མེད་ཀྱང་། །སྡུག་བསྔལ་ཆུ་གཏེར་གྱིས་བཟུང་གར་མཁན་ལྕེ། །ཀྱོ་བའི་མཚོན་ཆས་འདེབས་པ་ཁྱོད་ལས་སུ། །ཡིད་གཉིས་མུན་པའི་གོ་སྐབས་འཕྲོག་པའི་གདོན། །ཁྱེད་ཤེས་ཉི་གཞོན་འཆར་ཀའི་དཔལ་འཛིན་དེར། །སྙིང་དབུས་ལས་གཞན་གཉིས་པའི་པདྨ་འོད། །མཆིས་མིན་འདུ་བྱེད་བཏང་བའི་མོད་མཐོང་ཤོག །ཅེས་རྫོགས་ཆེན་པ་མཁྱེན་བརྩེའི་ལྷས་སོ། །ཟངས་མདོག་དཔལ་རི། །རྒྱལ་རྣམས་ཡེ་ཤེས་གཞལ་ཡས་སྒྱུ་འཕྲུལ་ནི། །པད་རག་ལྷུང་པོའི་གཙུག་གཏོར་གྱིས་བརྟེན་པའི། །གཟུགས་བརྙན་གཉིས་པར་སྤོས་པའི་བསྟི་
སྟང་གིས། །ཚོགས་བརྒྱད་སྲིན་པོའི་གྲོང་ཁྱེར་གནས་འགྱུར་ཤོག །ཡོན་ཏན་གཏེར་མཛོད་ལས་གསུངས་བའི་མན་ངག་བཅུ་གསུམ་ལ་བསྔགས་པ། །སྣ་ཚོགས་མོས་བའི་དཔྱངས་ཐག་ཡོན་ཏན་གྱི། །གཏེར་མཛོད་དུ་མས་ཕྱུག་པའི་ནོར་བུའི་རིན། །སྣོད་བཅུད་འབྱོར་པས་མ་ཁུགས་མཚོ་སྐྱེས་རྗེའི། །ཐུགས་རྗེའི་གཟུགས་སུ་འཁོས་པའི་ཁྱད་བར་བསྟན། །རྣམ་ཐར་སིནྷྲུ་ར་མ་ལ། །ཆུ་སྐྱེས་གཞོན་ནུས་བསྐྲུན་པའི་ཀེ་སར། །གངས་རིའི་ལ་ཐོད་རྒྱལ་དུ་སྤུང་པ་ཡི༑ །རྣམ་ཐར་གཟུགས་བརྙན་གསལ་བའི་དོ་ཤལ་འདི། །ཐུགས་རྗེའི་སྤྱན་དགྱུས་རིང་མོ་ལ་ཐོགས་ཤིག །རིག་འཛིན། གང་ལ་འདྲེས་ན་དགེ་མཚན་གྱི། ཕྱིན་དང་བརྟུལ་ཞུགས་མ་སྨད་པ། །རྒྱལ་རྣམས་ཡེ་ཤེས་གཟིགས་པའི་དཔལ། །དང་པོའི་འགྲོས་ཀྱིས་འདིར་རྩེན་མཛོད། །མཁན་པོ།མཐའ་གཉིས་ལས་བརྒལ་ཞི་བའི་ཆུ་གཏེར་གྱི། ལྤུ་ཕྲེང་ཚུལ་ཁྲིམས་གསུམ་བའི་འཛུམ་དཀར་ལ། རྒྱལ་བསྟན་རྙོག་པ་དྭགས་པའི་ཀེ་ཏ་ཀ། རིན་ཐང་ཆེན་པོར་བྱས་བ་ཁྱོད་ཀྱི་དྲིན། །སློབ་དཔོན། འོད་མཚན་སྟོང་དུ་འབར་བའི་ཡེ་ཤེས་མཚོན། །ཟུག་རྡུའི་དཔལ་གྱིས་སྤངས་པའི་མཐུ་སྟོབས་མེ། །སྣང་སྲིད་དྲེགས་པའི་སྙིང་ལ་རབ་འབར་བའི། །སྣང་བརྙན་ཡེ་ཤེས་བྱིན་དང་རབ་འགྲོགས་ཤིག །ཆོས་རྒྱལ། །མཐོན་མཐིང་རལ་པའི་ཟུར་ཕུད་ལ་ཐོད་ཀྱི། །གདེངས་ཀས་བསྒྲིགས་
པའི་མོད་ལ་གངས་རིའི་ཁྲོད། །པཎ་གྲུབ་གཡུལ་གྱི་ཕྲུ་མས་བཏབ་པ་འདི། །ཚངས་བའི་མེ་ཏོ་གསར་པའི་ཕྲིན་ལས་ཡིན། །སེངྒེའི་སྒྲ། སྟོན་བས་འཁོར་ལོ་གསུམ་དུ་བདེན་གསུང་བ།སྟོང་ཉིད་སྙིང་རྗེར་ཤར་བའི་སྡེར་མོའི་དཔལ། །མ་རིག་ལྟོ་འགྲོའི་སྙིང་ལ་བཟའ་བྱེད་པ། །སེང་གེའི་སྒྲ་ཆེན་སྒྲོགས་པས་དེ་བསྲུངས་ཤིག །སྡོམ་བརྩོན་དམ་པ། །ངེས་སྤྱོད་དབུ་མར་སྡོམ་པ་ཞི་བའི་མཚོ། །སེམས་ཅན་དོན་ལ་སངས་རྒྱས་པདྨའི་ཞལ། །དགེ་བའི་ཆོས་རྣམས་སྡུད་བྱེད་ལྷའི་མེ་ཏོག །མཁན་སློབ་ཆོས་རྒྱལ་ལོ་པཎ་ཞལ་སྐྱིན་རྨང་། །སྐད་གཉིས་སྨྲ་དབང་དང་མོས་རྣམ་རྩེན་ཞིང་། །ཆུ་སྐྱེས་གེ་སར་བཞད་བའི་རྣ་ལུང་ན། །པདྨའི་ངང་ཚུལ་གསར་པས་བསྟེན་པ་གང་༑ ༑བྱིན་ཟའི་མི་མཐུན་བཟའ་བྱེད་ཤེས་པས་སྲུངས། །ཚེ་རིང་ཡུལ་ལྗོངས། །འོད་མཚན་སྟོང་དུ་འབར་བའི་ཕྲིན་ལས་ནི། །རྣམ་པ་ཀུན་ནས་བལྟར་མི་མངོན་པ་ཡི། །ཆོ་འཕྲུལ་འཆི་བ་མེད་བའི་གྲོང་ཁྱེར་དེས། །མཐོ་རིས་ཡོན་ཏན་བདུན་དང་མཛའ་བོར་བྱས། །གནམ་གྱི་ཤེ་མོང་དབུང་བའི་ཁྲི་ཤིང་གིས། རང་གི་ར་བྱས་པའི་ཡུལ་གྲུ་ཆེན་པོ་ན། །ལུས་སེམས་ཤིན་ཏུ་སྦྱངས་པའི་བཏུལ་ཞུགས་ལ། །དབང་བསྒྱུར་དྲང་སྲོང་རྒན་པོའང་འདིར་སྤྱོན་ཅིག །རྣམ་བཅུ། དབྱིངས་ཕྱུག་ནམ་མཁའི་རྡོ་རྗེ་བཙུན་མོའི་ཁྱིམ། །སྤྱན་སོགས་འབྱུང་བཞིའི་དགའ་མ་མཚར་སྡུག་གཟུགས། ཡར་ལྦ་ལའི་སྤྱི་བོས་བཏུད་པའི་མ། །རྣམ་པ་སྣོད་ཀྱི་རྟེན་གཞི་འབྱུང་བའི་ས་བོན་ཡི་གེ་འབྲུ་བཞིའི་སྤྱི་བོ་ན་ལྷུང་པོ་མཚོན་པའི་མདངས་བཞི་པ། །བལྟ་ན་སྡུག་པ་ལྷུན་པོའི་བག་མ་ཡིན།སྣང་དང་ཕྱེད་སྣང་མི་སྣང་གྲོང་ཁྱེར་གསུམ།སངས་རྒྱས་ཐམས་ཅད་ཀྱི་ཐུགས་རྡོ་རྗེ་ནམ་མཁའི་དབྱིངས་ཕྱུག་
མའི་ཀློང་དུ། ས་སངས་རྒྱས་སྤྱན་མ།ཆུ་མཱ་མ་ཀཱི།མི་གོས་དཀར་མོ།རླུང་དམ་ཚིག་སྒྲོལ་མ་སྟེ་རིགས་ཀྱི་བཙུན་མོ་རྣམས་དང་གཉིས་སུ་མེད་པར་སངས་རྒྱས་ཀྱང་།མཐར་ཟད་ཡི་གེ་ཀྵ་དང་ཧས་མཚོན་པའི།གཙུག་གཏོར་ཤར་གྱི་ཐིག་ལེས་དཀྲིས་པའི་ཏོག །ཀུན་གསལ་འགྲམ་པར་འཕྱང་བ་འདི་སྟེང་འདོད་དང་གཟུགས་མེད་དེ་ཁམས་གསུམ་མཚོན་པའི་ཡི་གེ་བརྩེགས་མ་འབྲུ་གསུམ། ནཱ་དའི་དབྱངས། །མཐའ་གཉིས་སྤངས་པའི་སྒྲ་གསན་ལྟོ་བ་རུ།ཀུན་འབུང་སྲིད་པའི་གྲོང་ཁྱེར་རྣམ་པ་བཅུ།དག་བྱེད་ཕྱི་ནང་གཞན་གསུམ་དེ་སྟེང་རྫུལ་རླུང་གསུམ་གྱི་དག་བྱ་མཚོན་བཟླ་ཚེས། །ཆོས་ཁམས་ཉི་མའི་དཀྱིལ་འཁོར་སྤྲིན།སྒྲ་བཅས་ཀྱི་རླུང་།དང་པོའི་སངས་རྒྱས་རྒྱུད་ཀྱི་དགོངས་པ་ཡིན། །ཞེས་རྣམ་བཅུ་དབང་ལྡན་གྱི་ཞལ་གཟུང་འཛིན་རོ་རྐྱང་གི་རྣམ་རྟོག བྱང་རང་བྱུང་རྡོ་དབུ་མའི་དབྱིངས་བུ་དེན་བ། །རྗེ་ཨ་བྷ་ཡས་སོ། །བྱང་གྲོལ་འཁོར་ལོ། །རྒྱལ་བའི་ཡོན་ཏན་ཕྲིན་ལས་གང་ཆེན་མཚོར། །མེས་དཔོན་ཐུགས་བསྐྱེད་གསར་བཞད་པའི་རྩེར། བསླབ་གསུམ་གིན་ཅེན་མཛོད་ཁང་ཡངས་པ་ལ། རྣམ་
ཡང་ཡོན་ཏན་རྫོགས་པའི་མཆོད་སྡོང་འབར། །ཕྱི་རྒྱུད་སྡེ་གསུམ་རིན་པོ་ཆེ་ཡི་མཛོད། །ཤེས་རབ་དབྱིངས་ཀྱི་རོལ་མོས་ཉེར་མཚོན་ལ། །དཀའ་ཐུབ་མཐུ་ཡིས་མི་གདུང་རྡོ་རྗེའི་ལམ། །དབང་པ་ཚར་བཅས་ལས་འདས་དགའ་བའི་ཆར། །བསྟན་པ་ཡོངས་རྫོགས་བྱང་གྲོལ་འཁོར་ལོ་འདི། སྡུག་བསྔལ་ཀུན་འབྱུང་འགོག་པའི་དྲང་དོན་ལ། །མི་རྟོན་བདེན་གཉིས་དབྱེར་མེད་རྣམ་མཁྱེན་ཆོས། །འདྲེན་པའི་ངེས་དོན་ཤིང་རྟ་ཆེན་པོ་ཡིན། །རྫོགས་ཆེན་པ་རང་བྱུང་རྡོ་རྗེས་སོ། །སྤྲུལ་པའི་སྐུ་མཚན་བརྒྱད་བསྟོད་བ། །རྣམ་ཤེས་འདམ་གྱིས་མ་བཟུང་ཡེ་ཤེས་ནི། །པདྨ་གཞོན་ནུའི་སྲོག་ཏུ་དམ་བཅས་ནས།་།འཛམ་བུའི་སྐ་རགས་བཅིངས་པའི་གེ་སར་དབུས། །ཡོན་ཏན་རིན་ཆེན་འབྱུང་གནས་གཅིག་ཏུ་བརླིང་། ༡།མེ་ཏོག་མནྡཱ་ར་གླིངས་ཧོ་རའི། །མི་བདག་དཔུང་པ་གཏུམ་པོའི་བྱིན་ཟའི་མཚོན། །རེ་བ་འབྲས་ལྡན་མིན་པའི་ཆུ་གཏེར་དབུས། །ལྷུང་བྱེད་པདྨ་སམྦྷ་གངས་རིའི་རྒྱན། ༢།སྣ་ཚོགས་ཤེས་བྱའི་ཡུལ་ལ་མངོན་ཕྱོགས་ནས། །རྣམ་གསུམ་ཡོ་ག་འཛམ་བུ་ཆུ་བོའི་གསེར། །བསྲེགས་བཅད་བརྡར་ལ་དཔའ་བའི་བློ་ལྡན་ཁྱོད། །མཆོག་གི་གོ་འཕང་ཉིད་ལས་གཞན་མི་སྲིད། ༣།བརླིང་ལ་ཅ་ཅོ་མི་སྒྲོག་པདྨའི་མཚོས། །གཤེས་མའི་མེ་ཡི་བརྟུལ་ཞུགས་བསླུས་གྱུར་བ། །མཐོང་བའི་མོད་ལ་ཨིནྡྲ་བྷོ་དྷི་ཡིས། །རྒྱལ་ཐབས་
བདག་པོའི་ཅོད་པཎ་ཁྱོད་ལ་བཅིངས། ༤།མཚོན་གྱིས་གཞར་ནུས་མ་ཡིན་ལས་ཉོན་ཆབ། །ཐུགས་རྗེའི་ཉི་མ་བྱེ་བའི་འོད་ཟེར་གྱིས། །ཡུད་ལ་སྐམ་པའི་རྒྱུ་འབྲས་སྤྲིང་ཡིག་ནི། །རྣམ་ཀུན་གྱི་མཆོག་ལས་ས་དེངས། ༥།སྡོམ་པ་གསུམ་གྱི་དགག་དགོས་གཉིས་འཐུང་སེམས། །རྡོ་རྗེ་འཛིན་པའི་ཐག་པས་བཏགས་གྱུར་ཀྱང་། །ཤཱཀྱའི་བསྟན་ལ་རབ་ངགའི་གཙུག་ཏོར་རིན། །འོད་མཚན་སྟོང་འབར་གེའི་ང་རོས་བསྲུན། ༦།བྱམས་པའི་མཐུ་ཡིས་ཁུར་དུ་མི་བཟོད་པའི། །བྲམ་ཟེའི་སྟོན་པ་སྙིང་རྗེ་ཚད་མ་ཡིས། །རྣམ་པར་དཀྲུགས་པའི་ཐལ་འགྱུར་སེང་གེའི་སྒྲ། །སྒྲག་རྒྱུ་འབྲས་གནམ་ལྕགས་ཞུན་མར་ཁོལ། ༧།གདུག་རྩུབ་རིམས་ཀྱིས་རྣལ་དུ་མི་གནས་པ། །མཐའ་དག་འཆོལ་བའི་རྡོ་རྗེ་གྲོ་ལོད་ཀྱི། །མཐུ་སྟོབས་ལུགས་ཀྱུའི་དབང་དུ་སོང་བ་ཡིས། །བསླབ་པ་གང་ལ་འདའ་བར་ནུས་མ་ཡིན། ༨།སྟོན་དང་བསྟན་པའི་ཉི་མ་འཇིག་རྟེན་དུ། །ཆས་པ་བསྔགས་པར་འོས་བསོད་ནམས་ཏེ། གངས་རིའི་ལ་ཐོད་མཛེས་པ་ཁྱོད་ཅིག །ཁོ་ནའི་བཀའ་དྲིན་དྲན་ནས་འདིར་བོས་སོ། །བྱང་ཆེན་ལ་གཏུགས་དེ་སྲིད་ཀྱི། །རིགས་ཀྱི་བདག་པོའི་ཞབས་སེན་ནི། །གང་ཞིག་གཙུག་ཏོར་གདེངས་ཀ་ལ། །ཡོངས་སུ་ཆགས་པའི་ངལ་བ་སྤོངས། །ཞེས་པའང་རང་བྱུང་རྡོ་རྗེས་སོ། །དཔལ་བསམ་ལས་པ་ཀུན་མཁྱེན་ངག་གི་དབང་པོ་ལ་བསྟོད་པ་གནྷ་རྦ་ར་བདགའི་རྒྱུད་
མངས་ཀྱི་སྒྲ་ལས་དྲངས་པའི་སྙན་ཚིག་དཔྱིད་ཀྱི་རྒྱལ་མོའི་རྒྱད་གླུ་ཞེས་བྱ་བ། །རྗེ་བཙུན་འཇམ་དཔལ་དབྱངས་ལ་ཕྱལ་འཚལ་ལོ། །གདོད་མའི་མགོན་པོ་སྤྲོས་ཀུན་ཕྲེང་བའི་གསལ་བྱེད་ལས་དྲངས་པའི་རྒྱན་ཀུན་ཉེར་ཞི་མཆོག་ཏུ་མི་འགྱུར་ཁྱད་ཆོས་དྲུག་ལྡན་རྡོ་རྗེའི་ཁམས། །རྣམ་ཐར་བཞི་ལྡན་སྟོང་ཉིད་བདེ་ཆེན་སྙིང་རྗེའི་སྒེག་མོས་གདུལ་བྱའི་དོན་དུ་རབ་བསྐུལ་ལས། །དུ་མའི་བསྐལ་པ་བཟང་པོའི་སྡ་རོལ་ཕུན་ཚོགས་ལྔ་ལྡན་གཞི་སྣང་ཆེན་པོའི་ཞིང་ཁམས་དེར། །མངོན་རྫོགས་སངས་རྒྱས་ར་ིརབ་མར་མེའི་རྒྱལ་མཚན་ཞེས་བྱ་ཆོས་ཀྱི་རྒྱལ་པོ་ཀློང་ཆེན་པ། ༡།མགོན་ཁྱོད་ཐོག་མཐའ་མེད་པའི་སྔོན་རོལ་བསྡུས་ཤིང་མ་བསྡུས་པའི་གཟུགས་ཅན་ནས། །སྤངས་རྟོགས་བཅུ་དྲུག་ཆ་ཤས་ཡོངས་རྫོགས་ཀྱང་། །བརྩེ་ཆེན་ཐུགས་རྗེས་མ་བཟོད་གདུལ་བྱའི་དོར། །སྐྱེས་རབ་འཕེལ་འགྲིབ་རྣམ་ཐར་ཅི་ཡང་འཆར། ༢།ཆོས་སྲིད་ཉི་ཟླའི་གཅིག་ལ་གཅིག་ལྟོས་ཀྱི་སྲས་བུར་སྤྲེལ་བའི་རབ་སྤེལ་སྣང་བྱེད་ཤུགས་ཀྱིས་ཁམས་གསུམ་མུན་སེལ་ཁྲི་སྲོང་རྗེའི། །ཀུནྡ་བྱང་སེམས་མྱུ་གུ་གསར་པ་པདྨ་གསལ་དུ་སྤྲུལ་པའི་གར། །བསྒྱུར་བ་དེ་ཉིད་བགྲང་བྱའི་ཙ་ཀྲ་གདེངས་ཅན་གྲངས་སུ་ཉེར་བསྡུའི་ཚེ། །རང་བྱུང་པདྨས་སྙིང་ཏིག་བདག་པོར་དབུགས་དབྱུང་གཟེངས་བསྟོད་ཀློང་ཆེན་པ།ཉྲ།ཚེ་དབང་རིག་ཡལ་ལག་གཅིག་པའི་གཟུགས་ཅན། །འཛིན་ལུང་བསྟན་བདེན་པའི་དབྱར་གྱི་རྔ་གསང་འབར་བ་ལས། །སྟོང་པའི་
དབྱིངས་ལས་སྤྲུལ་པའི་གར་མཁན་རིན་ཆེན་ཚུལ་རྡོར་ཆར་ཟིམ་རྒྱུན། །བབས་པའི་ཚེ་ནམ་མཁའ་འགྲོའི་སྙིང་ཏིག་གཏེར་གྱི་མྱུ་གུ་བཞད་ནུས་པའི། །གཞི་ལམ་འབྲས་བུའི་དོན་བརྒྱུད་བདག་པོ་པདྨ་ལས་འབྲེལ་ཀློང་ཆེན་པ། ༤།ཐལ་གྱུར་རྩ་རྒྱུད་རྨ་བྱའི་མཚུངས་པར་སྟོན་པའི་གསལ་བྱེད་ཀྱི་སྒྲས་ཤན་སྦྱར་བའི་དཔེ་རྒྱན་རུམ་ནས་འབྱུང་འགྱུར་ལུང་གི་ལྔ་ལྡན་སྒོ་ང་བརྡོལ་བ་ལས། །རུ་བཞིའི་ཆ་ལས་གཡོར་པོའི་འཛིན་མར་འབྲོམ་སྟོན་མཆོག་དབྱངས་རིགས་རུས་དྲོད་ཀྱིས་བསྐྱེད་བསྲིངས་པ། །དུས་ཀྱི་ཕོ་ཉའི་ནུས་བ་རྫོགས་ཚེ་བར་ལྔའི་ཕུར་བུའི་ད་པོ་ཟླ་ཡར་ངོའི་ཚེས་བཅུའི་ཉིན། །ཐུབ་དབང་མཆོག་གི་སྤྲུལ་།ཀུར་ཅོ་འདྲིའི་དགེ་མཚན་གཤོག་རླབས་གཡོ་བཞིན་བལྟམས་པ་ཀློང་ཆེན་པ། ༥།དེ་ཚེ་འདོད་ཁམས་ཡོན་ཏན་རང་བཞིན་བརྗོད་པའི་རྒྱན་སྒྲོ་སྐུར་དང་བྲལ་གསྣོད་གསུམ་གྱི་ཚུལ་ཁྲིམས་བསླབ་པས་རྒྱུད་བསྔགས་ཤིང་དབང་མོ་ནམ་གྲུ་མས། །ཕྱག་གིས་བླངས་ཤིང་འཕྲང་རྐྱེན་མི་བསྲུན་བཅོམ༑ ༑སྐྱེ་བས་ཐོབ་པའི་མཁྱེན་རབ་ཕུལ་བྱུང་དང་། །སྙིང་རྗེའི་རླབས་ཆེན་ཟླ་བྲལ་ཀློང་ཆེན་པ། ༦།གཞོན་ནུ་ཉིད་ནས་རྡོ་རྗེའི་ཐེག་པར་གོམ་པའི་ནང་ཤེས་བྱེད་ཀྱི་རྒྱུ་ལ་ལྡན་གཟུགས་ཀྱིས་སྤུད་པ་འདེགས་འཇིག་བསྒྱུར་ཟིན་ཡང་། །བསྟན་པའི་གཞི་རྟེན་སྡེ། །སྦྱངས་པའི་ཡོན་ཏན་བཅུ་གཉིས་ཁྱིམ་ནང་བདེན་གཉིས་ཟུང་འཇུག་ཉི་ཟླའི་འགྲོས། །རྟགཔར་བསྒྱུར་བས་ལམ་ལྔ་ས་བཅུའི་
སྤངས་རྟོགས་མངོན་གྱུར་ཀློང་ཆེན་པ། ༧།ཀ་ཙན་པ་ཎྀ་དབྱངས་ཅན་མ་ཆ་ཤས་གསུགས་ཅན་ལ་སོགས། །ལེགས་སྦྱར་ཀུན་བཤད་སྒྲ་མེད་རྒྱ་མཚོའི་བཅུད། །འཐུངས་པས་བྱིངས་རྐྱེན་རྣམ་དབྱེའི་མཚམས་སྦྱོར་གྱི། །བརྡ་སྤྲོད་རྒྱང་གླུ་ལེན་མཁས་ཀློང་ཆེན་པ། ༨།མངོན་སུམ་རྗེས་དཔག་འགལ་གྲུབ་བརྒ་ཉམས་ལ་ལྡན་གཟུགས་ཀྱི་ཕྲ་བཀོད་པའི་རྒྱན་ལ་བརྟག་གི། རྩོད་པའི་འཁོར་ལོས་ལོག་སྨྲའི་གཉིས་འཐུད་དབང་། །ཀླད་པའི་འགེམས་ཕྱིར་གདོང་བ་ལྔ་པའི་ཟོལ། །ཚད་མའི་སྟོན་པ་ཀུན་མཁྱེན་ཀློང་ཆེན། ༧།ལྷ་དང་གཙུག་ལག་ཁང་ལ་སོགས་པའི་བཟོ་རིགས་སྲུངས་དབང་པོའི་སྟེང་། །སྡེ་སྣོད་གསུམ་དང་གསང་སྔགས་ཟབ་དོན་ནང་གི་རིག་པའི་མིག་སྟོང་བགྲད། །སྐྱེས་པ་བུད་མེད་ཤིང་རྒྱ་མཚོ་གོས་ནོར་རྟ་གླང་ཆེན་སོགས། །བརྟག་པ་འདུལ་བ་ཕྲན་ཚེགས་ལས་བརྒྱད་ཀྱི་སྐྱེད་མོས་ཚད་དུ་རྩེད་འཇོར་རོལ་པ་ཀློང་ཆེན་པ། ༡༠།རྟེན་འབྲེལ་བཅུ་གཉིས་ལུགས་འབྱུང་རྩ་བ་མ་རིག་བ་ཡི་ས་བོན་རིག་པ་བརྗོད་པ་ཐ་མའི་གསལ་བྱེད་ལ། །ཉོན་མོངས་གསུམ་གྱི་མྱུ་གུ་ནར་སྲོན་བྲོ་ནད་ཡལ་འདབ་རྒྱས་པའི་ཚེ། །
རོ་ནུས་ཞུ་རྗེས་སྡེབ་པའི་སྨན་དང་གཏར་བསྲེག་དཔྱད་ཀྱི་བདུད་རྩི་ཡིས། །ཟུག་རྡུ་གང་གི་ཚེ་ནོར་གྱུར་བདེའི་ཚེ་ཡི་གེ་བརླབ་པར་བྱའོ། །རིན་པོ་བརྟག་པ་དང་། །ཤིང་བརྟག་པ་དང་། །གཞི་བརྟག་པ་དང་། གོས་བརྟག་པ་དང་། གླང་པོ་ཆེ་བརྟག་པ།རྟབ་རྟག་པ་དང་།བུད་མེད་བརྟག་པ་དང་།སྐྱེས་པ་བརྟག་པར་ལ་མཁས་པར་གྱུར་ཏེ། ཞེས་གསུངས་པའི་ཕྱིར་རོ། །ཚར་བཅོད་གསོ་རི་སྨུ་ལ་གཡུ་ཐོག་གཉིས་པ་ཀློང་ཆེན་པ། ༡༡།བཅུ་ཕྲག་རང་གི་ངོ་བོས་སྟོན་པའི་སྲིད་པ་ཅན་རིག་པར་བསླབ་ཚ་མི་གཡོ་བ། །སྒྲ་དབྱངས་ལྷ་མོ་འཇལ་པའི་རྡོ་རྗེ་ཡི། །གསལ་སྟོང་སྒྱུ་མའི་རྣལ་འབྱོར་ལ་ཞུགས་པས། །ཞལ་གཟིགས་ལུང་བསྟན་མངོན་གྱུར་ཀློང་ཆེན་པ། ༡༢།ཨེ་དབྱིངས་ཤེས་རབ་གཎྜའི་ཚལ་དུ་ཐབས་མཆོག་བདེ་གསལ་ལྦ་ཡིག་གསར་པའི་ལེ་ཁ་ནི་ས། །བསྒྱུར་བཀོད་ཕྲི་བསྣན་རྣམ་འགྱུར་བརྒྱ་ཡིས་རི་མོའི་གར་སྟབས་རྣམ་དག་གྲུབ་པས་བསྒྱུར་བ་ལས། །གོ་ལའི་ངོས་ཀྱི་དྲང་སྲོང་རྒྱུ་སྐར་བཅུ་གཉིས་ཁྱིམ་དུ་དུས་བཞིའི་ལྟད་མོར་རྩེ་བ་མཐོང་། །དུས་ཀྱི་འཁོར་ལོ་ཕྱི་ནང་གཞན་གསུམ་ཐུགས་ཀྱི་ཐིག་ལེར་རོ་གཅིག་བཟླུམས་སོ་ཀློང་ཆེན་བསྐྱེད་བྱེད་གྲུབ་པའི་རྒྱུ་པ། །༡༣།ས་མཐོའི་གྲུབ་མཐའ་གངས་རིའི་སྤོ་ལ་སྔོན་ནས་སྙོགས་པས་ལོངས་སྤྱོད་འཁོར་ལོའི་རྩ་མདུད་རྒྱ། །ཅིག་ཅར་གྲོལ་བས་གཞུང་ལུགས་རྒྱ་མཚོར་བློ་གྲོས་རབ་རྒྱས་ལུང་རིག་གཡུ་རལ་ལན་བུ་གཡོ། །བརྒལ་བརྟག་རིག་པའི་སྡེར་མོའི་ལོག་སྨྲའི་གཉིས་འཐུང་ཀླད་པ་འགེམས་ཤིང་ཐལ་འགྱུར་གྱི། །མགྲིན་ལྔ་ལྡིར་པའི་རིགས་ལེའུ་དང་པོའི་ལྷོ་ཕྱོགས་བེ་དྷགྷའི་རབ་དངས་དང་ཁྱད་འཕགས་ཕུལ་འབྱུང་བསྲེས་པ། །གྲྭ་ཀུན་ཏུ་འགྲན་གྱི་ཟླ་མེད་མི་ཡི་སེངྒེཀློང་ཆེན་པ། ༡༤།རང་ལྟ་མཆོག་འཛིན་
ཕྱོགས་རེའི་མིག་རྐང་བཞིའི་ཅན་ཐོག་མན་ཡོད་པའི་ཟུང་ལྡན་དཔེ་རྒྱན་གྱིས་སྤྲས་པ། ལྟ་གྲུབ་སྒོ་དའི་སྦུབས་ལས་གྲོལ། རང་གཞན་ཕྱི་ནང་གྲུབ་མཐའི་གཞུང་ལུགས་གངས་ཅན་འདི་ན་དར་རོ་ཅོག །རང་རྒྱུད་ཉམས་སུ་ལེགས་པར་བསྟར་བས་ཐམས་ཅས་མཁྱེན་པའི་འདབ་གཤོག་རྒྱས། །རང་གཞན་དོན་གཉིས་ལྷུན་གྲུབ་མཁའ་ལ་འཕུར་བའི་རྩ་ལ་རྫོགས་ཀློང་ཆེན་བ། ༡༥།ཇི་སྙེད་མཁྱེན་པའི་མཐའ་དག་གཟུགས་ཅན་བསམ་རྒྱ་མཚོ་སྒོམ་པའི་གཟིངས་ཀྱིས་རྣམ་པར་བརྒལ་བའི་ཕ་མཐའ་ཆེ། །སྐུ་གསུམ་གྲོང་ཁྱེར་རིན་ཆེན་གླིང་ནས་ཇི་ལྟའི་རྟོགས་པ་བསམ་འཕེལ་དབང་རྒྱལ་ལེན་པའི་སླད། །ཅོག་ལ་བྲག་ཏུ་དབྱིངས་སྣང་གསལ་བྱེད་ཨར་གཏད་མུན་པའི་རྣལ་འབྱོར་ལམ་ལ་རྗེས་ཕྱོགས་པས། །ཀློང་ལྔའི་བདག་ཉིད་རྒྱལ་ཡུམ་འཕགས་མ་ཡིད་བཞིན་འཁོར་ལོས་ཞལ་གཟིགས་ལུང་བསྟན་ཀློང་ཆེན་པ། ༡༦།སྲིད་པའི་ཕུན་ཚོགས་རིག་བྱེད་གྱི་གཏམ་རྒྱུད་དང་སྦྱང་བའི་བསྡུས་ཤིང་མ་བསྡུས་པའི་གཟུགས་ཅན་ཐིག་ལེ་མཆོག་མར་ཆགས་པ་མིན་ཡང་མཁྱེན་བརྩེ་ནུས་མཐོའི་གདོང་བཞི་རྔོམ་ཕྱོགས་རེའི་གཞུང་ལ་རྒྱུགས་མ་ཡིན་ཤེས་བྱར་སྲིད་ཚད་མཁྱེན་རབ་འདྲེན་བྱེད་བརྒྱད་ཀྱིས་སྤྱོད། །ཐུབ་བསྟན་བཤད་སྒྲུབ་མདོ་སྔགས་ཆོས་ཀྱི་རྒྱལ་སྲིད་ཆེན་པོ་མི་མཇེད་ཡངས་པའི་ཁྲིར། །སྟོབས་བཅུ་མངའ་ཀུན་མགྲིན་
གཅིག་བླས་པའི་དབྱངས་ཀྱིས་གསོལ་མཆོག་གི་སྤྲུལ་སྐུ་ཀློང་ཆེན་པ། ༡༧།མཛེས་སོ་སྟོབས་བཅུ་མངའ་དབུས་ཉི་མའི་ཡོན་ཏན་བརྗོད་པའི་ཐོག་མའི་གསལ་བྱེད་གཉེན། །བདེ་འབྱུང་རལ་པའི་རྒྱན་དུ་ཆུ་ཤེལ་དབང་། །ནོར་འཛིན་བུ་མོའི་འགྲམ་པར་ཁྱུད་སྔོན་སྐྱེས། །གངས་ཅན་ཁམས་པའི་ཁྲོད་ན་ཀློང་ཆེན་པ། ༡༨།སྲིད་པའི་ལྷ་ཆེན་ཡར་ལྷ་ཤཾ་མཐའ་པོས་དག་གཟུགས་ཅན། སྲུང་བའི་དཔེན་གནས་སྐྱམ་གྱི་ཕུར། །བི་མ་མི་ཏྲ་མི་ཡི་རྫུར་ཞུགས་རིག་འཛིན་བླ་མ་ཀུ་མཱ་ར།རྫོགས་ཆེན་བདུད་རྩིའི་དགའ་སྟོན་འགྱེད་ལས་སྡེ་གསུམ་ཀློང་དགུའི་བཅུད་འཐུངས་པས། །ཐེག་བརྒྱད་གྲུབ་མཐའི་ཚུལ་ཆོས་ཞིག་སྟེ་རྟོགས་པས་མྱོས་པ་ཀློང་ཆེན་པ། ༡༧།ཀ་དག་དི་མེད་ཤེལ་གྱི་ཁང་མཛེས་གཞི་དབྱིངས་གསལ་བུམ་སྐུའི་ཀློང་། །མཐའ་བརྒྱད་སྤྲོས་བྲལ་ཁྱད་ཆོས་དྲུག་ལྡན་འོད་གསལ་གཉུག་མའི་གདན་ཁྲིལ། །དུས་གསུམ་དུས་མེད་ཁྱབ་གདལ་ཆེན་པོར་དགོངས་པའི་རྒྱལ་པོ་གཏན་སྲིད་ཟིན། །གཟུགས་སྐུའི་སྦུབས་ནས་ལྦོ་ཟད་ཆོས་ཟད་གདོད་མའི་མགོན་པོ་ཀློང་ཆེན་པ། ༢༠།ཨོ་ཊི་ཡན་བསིལ་བའི་ཚལ་མཚུངས་གཟུགས་ནད་ཅུང་ཟད་པ་སྤེལ་པའི་ཡོན་ཏན་རང་བཞིན་བརྗོད་པའི་རྒྱན། །མཆིམས་ཕུ་ནགས་ཀྱི་དུར་ཁྲོད་ཆེ། །གནས་ཀྱིས་གང་ཟག་བྱིན་གྱིས་རློབ་ནུས་གངས་རི་ཐོད་དཀར་སྙིང་པོའི་མགུལ། །མངོན་སུམ་རིག་པ་གནང་ལ་
གཟེར་བས་སྒྲོན་དྲུག་འཇའ་ཟེར་ཐིག་ལེའི་ཀློང་། །སྣང་བཞིའི་རྩལ་རྫོགས་ལོངས་སྐུའི་ཞིང་དུ་རྩེ་འཇོར་རོལ་པ་ཀློང་ཆེན་པ། ༢༡།ཀློང་གསལ་དགོངས་པའི་གཏེར་ཁྱད་འཕགས་ཕུལ་བྱུང་དཔའ་ཉམས་གྱིས་སྤྲས་པ་མཛོད་བརྡོལ་བས། །སེམས་ལྡན་ར་བརྟོག །སྣང་གྲག་བརྡ་དང་དཔེ་ཆར་ཤར་ཏེ་ཐུགས་གཏེར་རྒྱ་མཚོའི་ཅོད་པན་འཆང་། །པདྨའི་ལུང་བསྟན་བདེན་པས་རབ་བསྐུལ་ས་ཡི་སྙིང་པོའི་ཟབ་དོན་ཕྱུང་པས་དུས་གསུམ་གཏེར་བརྒྱ་རྩའི་ཏོག །ཤེས་བྱ་རིག་པའི་གཞུང་ལུགས་སྤྱི་དང་བསོ་སྐོར་གསུམ་ཆེན་།བདུན་གྱི་བསྟན་བཅོས་བང་རིམ་དུམ་ཆོས་བཀྲ།རྨད་བྱུང་སྤངས་རྟོགས་བག་མ་རབ་བརྗིད་མཁྱེན་པའི་ཟིལ་གྱིས་རྒྱན་དྲུག་མཆོག་གཉིས་ས་ཆེན་འདར་ནུས་ཀློང་ཆེན་པ། ༢༢ །རྩ་གསུམ་རྒྱ་མཚོས་ཞལ་གཟིགས་དབང་བསྐུར་རིག་པའི་རྩལ་དབང་མངོན་དུ་གྱུར། །དམ་ཅན་སྲུང་མས་འབངས་སུ་ཞལ་འཆེས་ཚར་གཅོད་རྗེས་འཛིན་ཕྲིན་ལས་བརྙེས། །གངས་ཅན་མཁས་གྲུབ་རྨུགས་འཛིན་དབང་པོས་འབྲལ་མེད་དད་པའི་རྟེན་དུ་བསྲུངས། །དགོངས་པའི་ཀློང་ནས་སྙིང་ཐིག་གསུམ་གྱི་ཡང་བཅུད་སྒྱུག་མཁས་ཀློང་ཆེན་པ། ༢༣།གསེར་འཁོར་རྩིབས་རྫས་དང་ཡོན་ཏན་མ་ཚད་བའི་ཁྱད་པར་ལ་བསྙོད་བ། སྟོད་སྔོན་དུ་འགྲོ་མིན་ཐུགས་རྗེའི་ཤུགས་ཀྱིས་ས་གསུམ་གདུལ་བྱར་རང་དབང་བསྒྱུར། ཡན་ལག་བཞི་
པའི་དཔུང་ཆེན་བཤམས་མིན་ཐར་པའི་དགྲ་བོ་ཀུན་རྟོག་བག་ཆགས་གཡུལ་ལས་རྒྱལ། །ལས་དབང་བསོད་ནམས་ཤུགས་ཀྱིས་མ་ཡིན་བསྡུ་བ་རྣམ་བཞིས་འགྲོ་ཀུན་རྣམ་མཁྱེན་ལམ་ལ་བཀྲི། །ཐེག་པ་རིམ་དགུའི་འཁོར་ལོས་སྒྱུར་བའི་ཆོས་ཀྱི་རྒྱལ་བོ་ཐམས་ཅད་མཁྱེན་གཟིགས་ཀློང་ཆེན་པ། ༢༤ཐུབ་པའི་བསྟན་པའི་འཆི་མེད་ཆ་ཤས་ཀྱི་གཟུགས་ཅན་གྲོང་ཁྱེར་བལྟ་ན་སྡུག་པའི་ཕོ་བྲང་དབུས། །སྔ་འགྱུར་རྫོགས་ཆེན་ས་སྲུངས་དབང་པོ་ཤིན་ཏུ་རྣལ་འབྱོར་ཐེག་པའི་སྟེང་། །སྣང་བ་བཞི་ཡི་མིག་སྟོང་བགྲད་ནས་རྣམ་པར་བསྒྱིངས་ཚེ་ཀུན་བརྟག་བློའི། །ཨ་སུར་ཚོགས་ཟིལ་གྱིས་གནོན་བའི་གྲགས་པ་དོན་ལྡན་ཀློང་ཆེན་པ། ༢༥།མུཀྟི་ཀ་ཡི་དེ་ཉིད་བརྗོད་པའི་དཔེ་བརྒྱན་དྲྭ་བས་ཐོད་བརྒྱན་འཇིག་རྟེན་དགའ་བའི་མཛེས་མ་མིན། །སྤུ་སྡུག་འཇའ་ཚོན་རི་མོས་བཀྲ་བའི་སྒྲོག་ཤོག་ཟླུམ་པོའི་རྨ་བྱ་མིན། །ལུང་རྟོགས་ཡོན་ཏན་ཐིག་ལེ་མཆོག་མའི་བཞིན་གྱི་དཀྱིལ་འཁོར་མཐོང་བའི་མོད། །ཆགས་བྲལ་ཞི་བ་འཇིག་རྟེན་མེས་པོའི་ཡིད་ཀྱང་ཕྲོགས་སོ་ཀློང་ཆེན་པ། ༢༦།ཕྱི་ནང་གཞུང་ལུགས་མད་རྨད་བྱུང་གི་ཉམས་ལ་སྙམ་སྒྲས་མཛེས་པར་བྱས་བ་དུ་ཐོས་པ་ལུང་གི་ཡོན་ཏན་ཕ་མཐའ་མི་དཔོགས་འཛམ་བུ་ཆུ་བོའི་སུ་ལྦ་རྣ། །ནན་ཏན་བསམ་པའི་དཔྱད་གསུམ་རྣམ་དག་མགར་གྱི་སྦྱོར་བས་བསྲེགས་བཅས་བརྡར་བའི་ཤིང་རྟ་གསུམ་གྱི་མཆོད་སྡོང་ལ། །གངས་རིའི་
མགུལ་བར་ཕུལ་བྱུང་སྒོམ་པའི་ཉམས་མྱོང་དྲོད་ཀྱིས་དག་པ་གཉིས་ལྡན་ས་ལ་སྦྱོར་བའི་ཕྲ། །སྨྲ་མཁས་ས་པཎ་ཚིག་ལ་འཆེལ་སྙམ་རིག་པའི་བསྟན་བཅོས་བཀའ་རྩིས་ཟོལ་གྱིས་སྒྲིབ་པར་བྱེད་དོ་ཀློང་ཆེན་པ། ༢༧།ཏིང་འཛིན་གྲུབ་པའི་དྲང་སྲོང་རྒན་པོའང་གནྡྷརྦ་ཡི་གླིང་བུས་སད༑ ༑ཁེངས་བས་དྲེགས་པའི་འཁོར་ལོས་སྒྱུར་ཡང་ལྗོངས་རྒྱུའི་ཟོལ་གྱིས་ལྟད་མོར་ལྷགས། །འགྲོ་འོད་མེད་པ་འཕགས་པའི་མཉམ་གཞག་དེས་ཀྱང་གཡོ་བར་མི་ནུས་པ། །མཛོད་ཆེན་བདུན་གྱིས་ཡིད་ཀྱི་ཆོམ་རྐུན་ཆེན་པོ་བྱས་སོ་ཀློང་ཆེན་པ། ༡༨།འཛམ་བུའི་གླིང་ན་རྒྱུའི་དཔེ་རྒྱན། །རྒྱན་དྲུག་མཆོག་གཉིས་འོད་ཟེར་ཆེ། །གངས་ཅན་འདི་ན་མེས་དཔོན་རྣམ་གསུམ་སྙིང་སྟོབས་ཆེ། །ཀུན་གྱི་ཕྲིན་ལས་འཇའ་ལུས་རིག་འཛིན་བརྟུལ་ཞུགས་ཆེ། །ལྔ་བརྒྱའི་མཐའ་ལ་བསྟན་པའི་སྣང་བྱེད་ཀློང་ཆེན་པ། ༢༩།ཕྱོགས་རེའི་སྐྱེ་བོ་གསོ་ཐིག་གི་གཏམ་རྒྱུད་དང་སྦྱར་བའི་བསྡུས་གཟུགས་ལྟ་གྲུབ་ཁྲོན་བའི་ཆུ་ཡིས་ལྟོ་བ་སྦོས་པའི་ཀརྐ་ཊས། །གསང་རྒྱུད་རྒྱ་མཚོར་འོད་ཚོད་མཛུབ་མོས་ལོག་སྨྲའི་ཚད་དུ་དཔོགས་པའི་ཚེ། །མོད་རྒྱུད་ཆུ་གཏེར་ཧུབ་ཀྱིས་འཐུངས་པའི་བརྒལ་བརྟག་ཏིག་པའི་སུན་འབྱིན་སྒྲས། །བསྟན་ལ་རི་མོར་བགྱིས་བ་ཡིན་ནོ་གྲགས་བ་དོན་ལྡན་ཀློང་ཆེན་པ། ༣༠།ཀ་དག་ཕྱོགས་ཡན་ལྟ་བར་
ཤར་བས་མཐའ་བརྒྱད་སྤྲོས་པ་དབྱིངས་སུ་ནུབ། །ལྷུན་གྲུབ་རང་ཡན་སྒོམ་པར་གྲོལ་བས་དྲན་འཛིན་གཉེན་པོ་ཕྱལ་བས་ལས། །གཏན་མེད་རང་གྲོལ་སྤྱོད་བར་གོམས་པས་རེ་དོགས་ཆོ་མ་རྐུན་ཟིལ་གྱིས་མནན། །གངས་ཅན་འདི་ན་མཁས་དང་གྲུབ་པའི་གྲགས་པའི་མུ་ཁྱུད་ཀློང་ཆེན་པ། ༣༡།ཤིང་རྟའི་ལམ་སྲོལ་འབྱེད་ལ་དེ་ཉིད་བརྗོད་པ་དར་བུ་ལ་བྱུང་བསྲེས་པའི་རྒྱན་ཀླུ་སྒྲུབ་རྗེར༑ ༑སྒྲོ་སྐུར་དང་བྲལ་བ་ཡོན་ཏན་རང་བཞིན་བརྗོད་པའི་རྒྱན། །མཚུངས་ཀྱང་མ་ཡིན་ཀུན་མཁྱེན་བསམ་ཡས་པ། །གསང་རྒྱུད་དགོངས་བ་ལོན་འདི་དགའ་རབ་རྗེ། །མ་ཡིན་གང་ཆེན་མཚོ་ཡིས་ཐུགས་བསྐྱེད་མཐུ། ༣༢།ཁྱོད་ཀྱི་སྤངས་རྟོགས་རབ་རྟོག་དོགས་སྒྲ་ཅན་མཚུངས་ནམ་མཁའི་མཐས་ཀྱང་ཐུག་པ་མེད་པའི་ངོ་མཚར་གཏམ་གྱི་བཻ་རོ་ཙ། །གླིང་བཞིའི་སྣང་བྱེད་ཉི་ཟླ་ཟུང་གིས་ནོར་འཛིན་བུ་མོའི་རྣ་བའི་རྒྱན་ཏུ་བཏགས་པ་ལས། །གྲུབ་བརྒྱའི་སྤྱི་མེས་སྤྲོས་བྲལ་དོ་ཧའི་རྒྱུངས་གླུ་ལེན་མཁས་སར་ཧའམ་མདའ་བསྣུན་རྗེ། །རང་མིན་གཉིས་པ་གཞན་ཞིག་ཡོད་སྙམ་འཕྱུང་མོ་ནུག་གི་དྲ་བར་བཙུད་ཀློང་ཆེན་པ༑ ༣༣༑གང་གིས་རྒྱན་དྲུག་མཆོག་གཉིས་ཞུན་མཐུ་ཕུན་ཚོགས་ཀྱི་ཟོལ་བསྟོད་ནུས་པའི། །ལྔ་རིག་གཙུག་ལག་སྨྲ་ལ་མཚར་དུ་ཅི། །གདོད་མའི་མགོན་པོའི་ཁྱད་ཆོས་དྲུག་ལྡན་གྱི། །དགོངས་པའི་ཀློང་དུ་བཙན་ས་ཟིན་མིན་ནམ། ༣༤།ཀྱེ་ཧོ་བརྟན་གཡོའི་ཐུན་མོང་མ་ཡིན་པའི་རྒྱན་ལས་ཤར་ཕྱོགས་གཽ་ཌ་བའི་བསྔགས་པ་ལ་སྦྱར་བའི་མཛེས་པའི་ཡོན་ཏན་གྱི་གཏམ།
ཆོས་ཁམས་རྒྱ་མཚོའི་རྡུལ། །ཀུན་མཁྱེན་ཁྱོད་ཀྱི་ཀློང་ཆེན་མེ་ལོང་དོགས། །མི་འཆར་ཤེས་བྱའི་སྣང་བརྙན་འདི་ཀོ་ཞེས། །སྟོབས་བཅུའི་མངའ་བདག་དེས་ཀྱང་བསྟན་དུ་མེད། ༣༥།འདུས་བྱས་རང་བཞིན་མ་བསྡུས་པའི་གཟུགས་ཅན་རྟག་པ་མ་ཡིན་འཕེལ་འགྲིབ་དུས་ཀྱི་འཐོར་རླུང་ཆེས། །དབུར་ཞྭའི་ལྷ་ཁང་སྤྲིན་གྱི་ཁང་མཛེས་དུམ་བུར་སྟོང་བ་བི་མ་ལས། །སྡིགས་མཛུབ་ཟོལ་གྱིས་ཞིག་གསོའི་ལུང་བསྟན་ཇི་བཞིན་མངོན་དུ་སྒྲུབ་པའི་ཚེ། །སྣང་བ་དབང་བསྒྱུར་བརྟུལ་ཞུགས་སྤྲོས་པས་བརྟན་གཡོ་ཟིལ་མནོན་ཀློང་ཆེན་པ། ༣༦།རྒྱལ་བ་རིག་འཛིན་བྱ་བའི་རང་བཞིན་བརྗོད་པ་བཀའ་བགྲོས་རྟང་དུན་པས། །བསྐུལ་ཏེ་མདོ་སྔགས་བསྟན་པའི་འོད་བརྒྱ་པ། །མི་ཡི་ཟོལ་ལ་བརྟེན་ནས་ཤར་བ་དེས། །མུ་ཅོར་སྨྲ་བའི་ཟིལ་གྱིས་མནན། ༣༧།ས་ཐོབ་རྣམས་ལ་བྱ་བ་བརྗོད་པ་ཐ་མའི་གསལ་བྱེད་སྐྱེ་འཆིའི་དངོས་པོ་རང་ཚན་མེད་དེ་རྟག་འཛིན་གདུལ་བྱ་སྐྱོ་བའི་སླད། །གཟུགས་སྐུའི་མཆོད་སྡོང་དཔལ་གྱི་མཆིམས་ཕུར་གདུང་ཆེན་ལྔ་དང་རིང་བསྲེལ་ཕྲ་མོའི་འབྱུང་ནས་སུ། །ཆོས་སྐུའི་བཞུགས་སྟངས་དྲང་པོས། གཞག་སྟ་ཞི་བར་གཟིམས་ཀྱང་གསང་གསུམ་ལུང་རྟོགས་རྒྱ་མཚོའི་ཕུལ། །ཡི་གེའི་ཟོལ་གྱིས་ཆོས་
སྐུའི་རིང་བསྲེལ་ཕུང་པོར་བཞག་བའི་བཀའ་དྲིན་བསམ་གྱིན་ཐལ་མོ་སྦྱར། ༣༨།དེ་སྐད་དུས་མཁྱེན་བསྡུས་པ་དང་མ་བསྡུས་པའི་གཟུགས་ཅན་བསྲེས་བ་རྗེས་སུ་ཕྱོགས་པའི་བསྲོད་ཚིག་འགྱུར་ཁུགས་དུས་ཀྱི་ཕོ་ཉའི་རྒྱངས་གླུ་འདིས། །བདག་གི་སྐྱེས་རབས་སྲིད་གསུམ་རྒྱ་མཚོའི་ཕ་མཐའ་འགྲིམ་པ་དེ་སྲིད་ཀུན་མཁྱེན་བླ་མ་དེའི། །རྗེས་སུ་ཞུགས་ཤིང་གང་གི་སྤངས་རྟོགས་ལེགས་བྲིས་ལམ་ལ་གོམ་པའི་འདེགས་འཇོག་བསྒྱུར་ནུས། ནས། །བསྟན་འགྲོའི་དོན་མཆོག་རླབས་ཆེན་འགྲུབ་པའི་སྙེ་མ་སྤོམ་པོ་གཡུར་དུ་ཟ་བར་ཤོག་ཅིག་གུ། ༣༧།དགོས་འབྲེལ་མེད་པ་ཕྱི་པའི་གཞུང་ལུགས་དཔེ་རྒྱན་ལས་ངེས་བའི་དཔེ་དང་། བྲམ་ཟེའི་རིག་བྱེད་ལྟ་བུས་བསྔགས་པ་མིན། །མདོ་སྔགས་བསྟན་པའི་སྲོག་ཤིང་འདི་ཡིན་བས། །རྒྱལ་བ་སྲས་དང་བཅས་པས་མཐུན་འགྱུར་མཛོད། ༤༠།ཅེས་སྟོན་བའི་ཞལ་ཚབ། །པདྨའི་གདུང་འཛིན། །བསྟན་པའི་སྒྲོན་མེ།མཁས་པའི་གཙུག་རྒྱན།གྲུབ་པའི་སྤྱི་མེས།མཚུངས་ཟླར་འོད་པ་འགའ་ཡད་མི་སྲིད་ཅིང་སྲིད་པར་མིན་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོ་ལ་དོན་དམ་བའི་ལམ་ནས་སྒྲོ་སྐུར་དང་བྲལ་བར་བསྟོད་པའི་དཔྱིད་ཀྱི་རྒྱལ་མོའི་རྒྱད་གླུར་ཞེས་བྱ་བ་འདི་ཚེ་རབས་ཀྱི་ཕྲེང་བ་མང་པོར་ཀུན་མཁྱེན་སངས་རྒྱས་གཉིས་པ་ཉིད་ཀྱིས་ཀློང་གསལ་མཁའ་ལྟར་དག་པའི་ཡེ་ཤེས་ཀྱིས་རྗེས་སུ་བཟུང་བའི་མཐུ་ལས་མངོན་གྱུར་
དུ་སད་པ་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུ་ལ་གཟུ་བོའི་བློ་གྲོས་དཔྱོད་བའི་སྐལ་བ་མིད་མན་ཞིང་། །གངས་རིའི་ལྗོངས་ཀྱི་གཞུངས་ལུགས་དང་མན་ངག་ཇི་སྙེད་ལ་སྡང་ཞེན་དང་ཕྱོགས་ལྷུང་གི་གཟེབ་ཏུ་མ་ཚུད་པས་ཐེག་པ་དང་གྲུབ་མཐའི་རྣམ་གྲངས་བསམ་གྱིས་མི་ཁྱབ་པ་དག་རྒྱལ་བའི་གདུལ་བྱའི་བློ་དང་འཚམས་པར་བསྟན་པའི་དབྱེ་བ་ཅུང་ཟད་ཕྱེད་ནས་འགལ་གྲུབ་སྤོང་ལེན་གྱི་མཐའ་དང་བྲལ་བའི་ངོས། །ཚིག་ཆོད་གཞི་རྫོགས་ཨ་ཏིའི་ཐེག་བར་ཡོད་དཔྱོད་བློ་བྲལ་དུ་ལ་བཟླ་བའི་འབྱོར་པ་རང་བྱུང་པདྨ་དགྱེས་པའི་མཁྱེན་བརྩེའི་འོད་ཟེར་ཞེས་བགྱི་བ་དེ་ཉིད་གངས་ཅན་བོད་ཀྱི་ཚནོྡྷ་ཧ་ཆེན་པོ་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོའི་གོང་པའི་ཚུལ་དུ་འབྲེལ་བའི་སྒྲུབ་གནས་མཆིམས་ཕུ་ནགས་ཀྱི་དུར་ཁྲོད་དབང་ཆེན་རོལ་པའི་ཕ་བྲང་ཆེན་པོའི་སའི་ཐིག་ལེ། འོག་མིན་བྲེ་དགུ་གེའུ་འོག་མཁའ་འགྲོའི་ཚོགས་ཁང་མེ་ཏོག་ཕུག་ལྷུན་གྲུབ་རང་བྱུང་གི་བྱ་སྐྱིབས་འོད་གསལ་གཉུག་མའི་ཕོ་བྲང་། །ཐིག་ལེ་དང་ལུ་གུ་རྒྱུད་ཀྱི་དྲྭ་བས་བཀོད་མཛེས་པའི་གནས་སུ་སྙིང་པོའི་སྒྲུབ་པ་ལ་གཞོལ་བའི་ཚེ། ཁྱུ་མཆོག་སྣྲོན་ཟླའི་དུས་ཀྱི་ཉི་ཁྲི་ཆིག་སྟོང་དྲུག་བརྒྱའི་རླུང་གི་དཀྱིལ་འཁོར་ཆེན་པོའི་ནང་དུ་རིག་པ་ཡུལ་ལྔའི་ཤེས་པ་ཀུན་། གཞི་མི་རྟོག་པའི་དང་དུ་དར་གཅིག་ཐིམ་པའི་སྣང་མཆེད་ལུགས་
ལྡོག་ཆེན་པོའི་ཡེ་ཤེས་ཀྱི་མེ་ལོང་དྲྭངས་བའི་དོགས་སུ། །རང་སྣང་གདོད་མའི་མགོན་པོ་མིའི་རྫུ་ལ་ཞུགས་པའི་མཚོན་བྱེད་དཔེའི་བླ་མ་གང་གི་གསང་པ་གསུམ་གྱི་སྣང་བརྙན་ཡུལ་ཅན་སྤྲུལ་པའི་ཟློས་གར་ཆུ་ཟླའི་རོལ་རྩེད་ལྟ་བུར་བསྟན་པའི་ཚེན་བཀོད་པ་ལུས་ཀྱི་གྲོང་ཁྱེར་ཆེན་པོ་ནས་རྩ་ཁམས་ཀྱི་ཡི་གེ་གཡོ་བྱེད་ཀྱི་རླུང་གིས་བསྐྱོད་པ་མིང་ཚིག་གྲུབ་པའི་བརྡ་རྟགས་སུ་ཤར་ཏེ་སྒྱུ་མ་དང་རྨི་ལམ་ལྟ་བུའི་རྣམ་རོལ་གྱིས་ལྗོན་བའི་བསིལ་གྲིབ་ལ་བརྟེན་ནས་རང་ལོ་སོ་གསུམ་བ་ལ་ཟིན་རིས་སུ་བྱས་པ་རིང་ཞིག་རྟོག་མེད་དུ་གཡེངས་ཏེ་དཀྱུས་སུ་འདིར་བ་མ་ཤར་བའི་ཐོག་མི་ཆོས་གཙང་མ་བཅུ་དྲུག་གི་རྣམ་ཐར་བཟང་པོས་ཡོངས་སུ་བསྲུངས་ཤིང་མི་འཕྲོགས་བའི་འདོད་ནོར་དང་ལྡན་པ་སྡེ་པ་རྡོ་རྗེ་ཕུན་ཚོགས་ཀྱིས་རྒྱན་མིང་ནོས་འཛིན་དང་བཅས་འཕྲལ་དུ་གཏན་ལ་ཕེབས་པ་ཞིག་དགོས་ཞེས་ལན་མང་པོར་བསྟུད་ནས་བསྐུལ་འདེབས་གནང་བ་ལས་ཇི་ལྟར་བཞད་བཞིན་དུ་བྲིས་པའོ། །སླར་སྨྲས་པ། ཀྱེ་ཧོ་མ་བཅོས་རང་བའི་དྲན་པ་ལ། །ཀུན་བརྟགས་ཅ་ཅོའི་ལྷན་པ་གདབ་མིན་ཡང་། །ཤེས་བྱའི་གོ་ན་སྲིད་ཚད་ཐམས་ཅད་ཀྱིས། །བསྟན་ལ་བྱ་བ་བྱེད་ཅེས་དམ་པས་བསྔགས། །དེ་ཕྱིར་སྒྲ་དོན་རྒྱན་གྱི་སྤྲོས་བཅས་གཏམ། །གྱ་གྱུའི་ཀུན་རྟོག་དྲུང་པོས་བཏགས་མིན་ཡང་། །སྤྲོས་མེད་ཀློང་གསལ་རིག་པའི་རོལ་རྩལ་ཆེར། །ཤེས་བྱའི་
ཡོན་ཏན་མ་སྦྱངས་རང་བྱང་མཚར། །དབུ་མར་ལས་རླུང་ཀུན་གྱིས་ཕྱག་བྱས་ཚེ། །རྟོགས་པས་འཁོར་འདས་ཀུན་གྱི་མཚང་རིག་ན། །རྒྱན་དང་མངོན་བརྗོད་བྱིས་པའི་རྩེད་མོར་གདའ་འདི་ཀོ་གྲུབ་ཡོངས་ཀྱི་ཤུལ་ལམ་ཡིན། །རྣལ་འབྱོར་པུ་ཏྲའི་གྲོགས་ཀྱིས་བསླུས་མིན་ཡང་། །གདུལ་བྱའི་བློ་དང་འཚམས་པའི་ཀླུང་རྟོགས་ཆོས། །འཛད་མེད་དགོངས་པའི་ཀློང་ནས་སྐྱུགས་པ་འདི། །བྱ་བྲལ་ཁོ་བོའི་རྣམ་ཐར་ཡིན་པས་སེམས། །ལོ་ཟླར་ཀུན་འབྱུང་སྒོམ་པའི་མ་རིག་བྱ་། །ད་དུང་སྒོ་ངའི་རྒྱ་ལས་མ་གྲོལ་ན། །མཁྱེན་གཉིས་མཁའ་ལ་འཕུར་བའི་ནུས་པ་ཅི། །སྲིད་རྩེའི་སྙོམས་འཇུག་མལ་དུང་ལ་བསོ་མཛོད། །ཚིགས་སུ་བཅས་བརྐང་པ་ལྔ་པ་ཞེས་བྱ་བ།གངས་རིའི་ཁྲིད་དུ་དཔལ་ཀུན་ཏུ་བཟང་པོ་རང་ཉི་སྤྲུལ་པའི་གཟུགས་སུ་གཤེགས་ནས་གནས་དུས་གདུལ་བྱའི་ཁམས་དང་འཚམས་པའི་སྟོན་པ་དང་བསྟན་པའི་སྣང་བ་གསར་དུ་བཀོད་པ་ལ་བསྟོད་བ། །འཛམ་གླིང་མཛེས་པའི་རྒྱན་དྲུག་མཆོག་གཉིས་དང་། །ཐུགས་རྗེ་ལུང་རྟོགས་མཉམ་པའི་མཐུ་མངཱ་ཡང་། །ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས། །འཁོར་འདས་ཆོས་སྐུར་རྫོགས་པའི་ཀློང་ཆེན་པ། །དྲི་མེད་འོད་ཟེར་སྟོན་པ་གཉིས་པ་ཡིན། །གངས་ཁྲོད་ལྟ་བ་མཐའ་དག་གཞན་དབང་དུ། །ཐལ་འགྱུར་མཚོན་ཆ་རྣོན་པོས་སྨ་ད་བབ་པའི། །ཕས་རྒོལ་རང་ཉིད་རྟག་ཆད་གྲུབ་མཐའ་རུ། །འགོད་བྱེད་
བསྟན་པའི་ཤིང་རྟའི་ཆོས་ཀྱི་རྣམ་གྲངས་བཅོ་ལྔ་དང་ཉིན་བྱེད་མ་ཤར་ན། །སྔོན་བྱོན་མཆོག་གཟིགས་མང་པོས་སྐལ་ངན་བྱས། །འཁོར་ལོ་བར་མཐའི་ལྡེམ་དགོངས་གཉིས་འཐུང་སྣས༑ ༑རྣམ་བར་དཀྲུགས་པའི་གྲུབ་མཐའ་གསར་བུའི་ཡིད། །རྟོག་གེའི་གཞན་དབང་གྱུར་པ་འཇིག་རྟེན་ན། །རྣམ་པར་རིག་ཅིང་ལྡན་པ། །མཛོད་ཆེན་བདུན་རྩ་འགྲེལ་རྣམས། །སངས་རྒྱས་ཀྱི། །ཡེ་ཤེས་མངོན་སུམ་མཐོང་བ་ཁྱོད་ཀྱིས་བཀྲལ། །ཚིག་ཚོགས་དབུ་བའི་ཐ་སྙད་སྲུང་བས་ཀྱང་། །ཁྱོད་གསུང་ཡོན་ཏན་རྫོགས་པའི་དཔལ་མཐོང་ནས། །མ་ནོར་ལམ་མཆོག་དགག་པ་རྩུབ་མོའི་དག །ཁ་ཡི་སྲང་མདོར་འཁྱམས་ལ་སྐྲག་གྱུར་ནས། །འགྱོད་པའི་རྣམ་ཕྲུལ་སློང་བ་མཐོང་བའི་ཆོས། །རང་ལས་གཞན་པའི་ལུགས་ནི་རྨོངས་བས་བསྒྲིབས་པའི་ཁན་མཐོ་བ་ཤ་སྟག་་གོ་སྙམ་པའི་ཀློག་པའི་སྡེ། །སྒྲུབ་གཤག་གི་བརྟུལ་ཞུགས་མྱུར་བའི་བཤེས་གཉེན་དག་གི་མདུན་སར་ཁོ་བོ་ཅག་གི་ཡིད་བཞིན་རིན་པོ་ཆེའི་མཛོད་འབྲམ་བས། རྣལ་ཐགས་དང་བ་གཏོར་བཟློག་ཐེས་བྲག་དང་བླུན་སྒོམ་ལ་གྲུབ་མཐར་གདེངས་འཆའ་བདག་གིས་དངོས་ཅག་གི་རྒྱུད་ལ་ལྟུང་བའི་ཆོས་སྦོམ་པོ་འདུ་བྱས་ཀྱི། འདི་ལྟ་བུ་གྲུབ་པའི་མཐའ་ལ་བདག་གིར་བགྱིད་པ་ཁྱོད་ཅག་གིས་བདག་། ཉིད་ལའང་ཕན་པ་རྒྱ་ཆེན་པོ་བསྒྲུབས་སོ་ཞེས་སྒྲོགས་ཤིང་ཡིག་ཆའང་འདུ་བྱས་སོ། །གང་ལས་ཐུབ་བསྟན་སྐབས་གསུམ་དབང་པོའི་གྲོང་། །ཀློག་པའི་བརྟུལ་ཞུགས་རྫོགས་པར་འདོད་པ་ཀུན། །དོན་འདི་གཉེར་བྱར་བགྱིད་ན་སྔ་འགྱུར་བར། །
ཁས་འཆེ་ཡང་དག་ལམ་ལས་ཕྱིར་ཕྱོགས་ཀུན། །རྣམ་ཤེས་ཕ་རོལ་སོང་བའི་སྐྱེས་བུ་ཡིན། །ཚིགས་སུ་བཅད་པ་རྐང་པ་ལྔ་པ་ཞེས་བྱ་བ་མ་རིག་གཉིད་ལས་སློང་བའི་ཕོ་ཉ་རང་བྱུང་རྡོ་རྗེས་སོ། །དཔལ་གྱི་བསམ་ཡས་མཆིམས་བུ་ལ་བསྟོད་པ་རྡོ་རྗེའི་གཱ་མ་ཀ༔ ཨེ་མ་ཧོ། །རང་བྱུང་རྫུས་སྐྱེས་དུས་གསུམ་མཁྱེན་པའི་སྐུ། །མཁའ་འགྲོའི་ཚོགས་རྗེ་རྒྱུད་སྡེ་རྒྱ་མཚོའི་བདག་། །ཐུབ་པའི་རྒྱལ་ཚབ་འཁོར་འདས་ཀུན་གྱི་དཔལ། །ཁོ་བོའི་འདྲེན་མཆོག་ཨོ་རྒྱན་ཆོས་རྗེ་མཆོད། །འཕགས་བོད་ཨོ་རྒྱན་གནས་ཡུལ་ཉེར་བཞིའི་གླིང་། །གནས་ཀྱིས་གང་ཟག་བྱིན་རླབས་དེ་དག་དང་། །རྣམ་དབྱེར་མེད་པ་སྒྲུབ་རིའི་རྒྱལ་པོ་ཆེ། །དབང་ཆེན་རོལ་པ་མཆིམས་ཕུའི་ནགས་ཁྲོད་དེ། །ཡུལ་ལྗོངས་བཀོད་པ་པད་སྡོང་ཁ་ཕྱེའི་ཚུལ། །རྒྱབ་རི་བློན་པོ་བློང་གཤོངས་དགུང་ལ་སྙེག།དེ་ཡི་རྩེ་མོ་གུར་ཆེན་ཕུབ་འདྲ་བའི། །ཨོ་རྒྱན་གཟིམ་ཕུག་རིན་ཆེན་གཏེར་གྱི་མཛོད། །མཐའ་སྐོར་རྗེ་འབངས་ཉེར་ལྔའི་སྒྲུབ་ཕུག་མཛེད། །མཁའ་འགྲོའི་ཚོགས་གཞོང་དབྱར་ཆུའི་ཟིལ་པས་ཁེངས།འདབས་སུ་རི་དྭགས་གཞོན་ནུའི་རྩེད་འཇོ་རོལ། །སྐྱེ་བོའི་སྒྱུ་འགྲུལ་འདུ་འཇིའི་གཟེབ་ཀྱིས་དབེན། །ཀ་དག་རི་གཞལ་མཐོང་བའི་རྣལ་འབྱོར་ཀུན། །ལྷུན་གྲུབ་ཐོད་རྒལ་དབྱིངས་རིག་གཟིར་བའི་གནས། །ཕུང་པོ་གཟན་ལྟར་བསྐྱུར་
བའི་བྱ་བྲལ་ཀུན། །དྭངས་སམ་འོད་སྐུར་སྦྱོང་བའི་གནས་ཀྱི་མཆོག་།རྒྱུད་ནས་གསུངས་པའི་ཡོན་ཏན་འདི་ལ་ཚང་། །གནས་འདིར་སླེབས་པ་ཙམ་གྱིས་སྣང་བས་འགྱུར། །ཚེ་རབས་མང་པོའི་བག་ཆག་མོད་ལ་བྱང་། །གནས་མཆོག་འདི་ནི་འིད་གསལ་ཐོད་རྒལ་གླིང་། །ད་ལྟ་བཞུགས་དང་སླད་ཀྱི་འབྱོན་པ་ཡི། །ཆགས་མེད་ཞེན་པ་བྲལ་བའི་རྣལ་འབྱོར་རྣམས། །དབྱིངས་རིགས་སྲུང་དུ་གཞུག་ལ་བརྩོན་པར་མཛོད། །རིམ་དགུའི་ཐེག་པས་མ་ཐུགས་མན་ངག་སྡེའི། །དགོངས་པའི་མཐར་ཐུག་ལོན་ས་དེ་རུ་གདའ། །ཨེ་མ་ངོ་མཚར་ཆེ་བའི་གནས་མཆོག་ནི། །རང་བྱུང་པདྨས་བྱིན་གྱིས་བརླབས་པའི་མཐུ། །ཚུལ་འདིར་བསམས་ཤིང་ཨོ་རྒྱན་སྙིང་ནས་དྲན། །ཉིན་བསམས་ཉིན་དྲན་མཚན་བསམ་མཚན་མོ་དྲན། །ཞན་འཇིན་ཅན་གྱི་བློ་སྣ་ཆོས་ལ་བསྒྱུར། །དགོས་མེད་ཞེན་ལོག་སྙིང་ནས་དྲན་པ་དང་། །ཆགས་མེད་ཞེན་བ་བྲལ་བའི་བརྟུལ་ཞུགས་ཀྱིས། །འདི་འདྲའི་གནས་སུ་མངོན་སུམ་གཟིར་བའི་མཐུས། །གང་སོང་ཆ་མེད་དང་ནས་ཟག་བཅས་ཀྱི། །ཕུང་པོ་འཇའ་ལྟར་ཡལ་བར་བྱིན་གྱིས་རློབས། །དེ་ཡི་མདུན་ན་སྤང་ལྗོངས་མེ་ཏོག་བཀྲ། །རྫ་དང་ཤིའི་རྩ་འཛོམ་པའི་ཚད་ཚིད་ཁྲོད། །འདབ་ཆགས་ཅང་ཏེའུའི་སྒྲ་སྒྲོགས་ཁྱོ་ཤུག་དང་། །བདག་མེད་རི་དྭགས་ཚོགས་
རྣམས་གྱ་གྱུར་རྩེ། །གཡས་རི་བྱ་ཁྱུང་གཤོག་པ་བརྒྱངས་འདྲ་ལ། །ཕོ་རྒྱུད་དཀྱིལ་འཁོར་བྲག་ཅན་ཁྲོ་བོའི་ཞལ། །དབུས་ན་རྡོ་རྗེ་ཕག་མོའི་བཀོད་པ་མཛེས། །ཐུགས་ཀའི་ཀློང་ན་ཡེ་ཤེས་མཁའ་འགྲོའི་གཙོ། །འཚོ་རྒྱལ་ཏིང་འཛིན་གསང་བའི་ཕུག་པ་དེར། །སླེབས་པ་ཙམ་གྱི་ཚེ་འདིའི་སྣང་བ་འགག །ཀ་དག་སྤྲོས་བྲལ་རང་བཞིན་རྒྱུད་ལ་འཆར། །དེ་ཡི་བདེ་སྐྱོང་འཁོར་ལོའི་ཕོ་བྲང་ན། །ལྔ་པའི་ལམ་དུ་དེངས་པའི་གཟུགས་ཕུང་ཀུན། །དངོས་མེད་སྲོག་གཏོར་བྱེད་པའི་དུར་ཁྲོད་འཇིགས། །སོ་སོ་སྐྱེ་བོ་ངེས་འབྱུང་སྐྱེ་བའི་ས། །ལམ་པའི་གང་ཟག་རེ་དོགས་གཅོད་པའི་ཡུལ། །གྲུབ་ཐོབ་རྣལ་འབྱོར་བརྟུལ་ཞུགས་སྤྱོད་པའི་གནས། །འཕགས་བའི་ཡུལ་གྱི་དུར་ཁྲོད་བསིལ་ཚལ་སོགས། །དུར་ཁྲོད་ཆེན་པོ་བརྒྱད་དང་བྱིན་རླབས་མཚུངས། །སྐྱེས་པའི་ཐ་མ་ངེས་པར་འཆི་བ་དང་། །འདུས་པའི་ཐ་མ་འབྲལ་བ་ཆོས་ཉིད་ཡིན། །ས་ཕྱོགས་འདིའམ་གཞན་པའི་སྐྱེ་བོ་རྣམས། །མིང་གི་ལྷག་མར་སོང་བའི་རུས་དུ་མ་འཁྲོལ། །གཏན་དུ་སྡོད་གྲབས་བྱེད་རྣམས་འདི་ལ་སོམས། །ཕུང་པོ་མེ་ལྕེས་བཟའ་བའི་བཞད་སྒྲ་དང་། །བྱ་རྒོད་གཤོག་རླབས་གཡོ་བའི་འགྱིད་འགྲོས་དང་། །ཅེ་སྦྱང་བ་སྤུ་གཟིང་བའི་གནས་སྐབས་སོམས། །རྟག་དུར་ཁྲོད་འདིར་ལྟོས་ངེས་འབྱུང་དང་། །རང་རྒྱལ་བཞིན་དུ་རྟེན་འབྲེལ་
ལུག་ལྡོག་སྒོམས། །མི་རྟག་མི་རྟག་གློ་བུར་ཚེ་མི་རྟག །ནམ་ཟླ་དུས་བཞི་སྔ་དྲོད་གོངས་ཁ་དང་། །དགྲ་གཉེན་འགྱུར་ལྡོག་སྣང་ཚུལ་ཆོས་མི་རྟག །གཞན་དུ་སྐྱེས་ལས་འདིར་ནི་འཆི་བྲོད་ཅེས། །ཡེ་ཤེས་སྐུ་ཅན་པདྨ་ལས་གྲོལ་དང་། །ཨ་ཙར་ས་སྙིང་འཇའ་འོད་ཕུང་པོར་གཤེགས། །དེ་ཕྱིར་ཀུན་ཀྱང་ངེས་འབྱུང་དྲག་པོའི་བློས། །འདི་ལ་སོམས་ནས་དམ་པའི་ལྷ་ཆོས་རེམས། །གཡོན་རི་གླང་ཆེན་ཟས་སུ་འགྱིད་འདྲ་བའི། །རྩེ་ནས་ཉི་ཟླའི་བགྲོད་པ་དལ་གྱིས་འཆར། །མཐོ་ལ་ལྷུན་ཆགས་ནེའུ་མེ་ཏོག་བཀྲ། །ངོས་ལ་བལ་བུའི་ལོ་འདབ་དྲི་དང་ལྡང་། །བར་ན་སཱ་ལའི་ལོན་པ་དྲང་ལ་ལྡེམ། །རྩ་བར་ལྗོན་ཤིང་གེ་ལ་བའི་གྲིབ་བསིལ་ཅན། །རི་རྒྱུད་གསེར་འཕྲུལ་ལྡེམ་པ་བཙུགས་འདྲའི་གམ། །འཆི་མེད་བདུད་རྩིའི་ཚེ་བུ་མ་རང་བྱོན་ནས། །པདྨས་བྱིན་གྱིས་བརླབས་པའི་ཚེ་ཆུ་འབབ། །མྱོང་བ་ཙམ་གྱིས་ཚེ་བསྲིང་སྡིག་སྒྲིབ་དག །འདི་ཉིད་གཅིག་པུའི་ཡོན་ཏན་བསམ་མི་ཁྱབ། །དེ་མཐར་ལྷ་འདྲེས་སྙིལ་བའི་རྫ་ཆེན་གཟིང་། །བདེ་གཤེགས་ཐུགས་སྲོག་ཡི་གེ་ཧཱུྃ་གི་གཟུགས། །རང་བྱུང་པདྨའི་རྫུ་འཕྲུལ་ཕྱག་རྟགས་ཡིན། །གཤམ་དུ་རེག་གྲོལ་ཞབས་རྗེས་གྲངས་མེད་བཞུགས། །རི་རྒྱུད་འདི་ཡི་མེ་ལྷ་གནས་པའི་ཕྱོགས། །རྩི་ཤིང་ནགས་ཚལ་སྟུག་པོའི་ཚང་ཚིང་ཁྲོད། ཇོ་མོའི་གཟིམ་ཕུག་ངོ་མཚར་རིང་མོ་ཅན༑ ༑བར་དུ་ཆོས་
ཀྱི་རྒྱལ་པོ་ཀློང་ཆེན་བར། །རྩ་གསུམ་རྒྱ་མཚོས་ཞལ་བསྟན་སྙིང་ཐིག་གི། །དགོངས་གཏེར་བྱིན་རླབས་བབས་པའི་གནས་མཆོག་ཡིན། །མཐོང་སྣང་འོད་ཀྱི་དྲྭ་བའི་གཞལ་མེད་ཁང་། །རྩོད་དུས་འདི་ན་གསང་ཆེན་སྙིང་པོའི་བསྟན། །བཤད་སྒྲུབ་ཟུང་གིས་འཛིན་པ་ཁྱོད་ལས་སུ། །ལྷ་གཅིག་པདྨ་གསལ་གྱི་སྨོན་ལམ་དང་། །རི་དབང་རྒྱལ་མཚན་བི་མ་བཻ་རོ་སོགས། །པཎ་གྲུབ་ཀུན་གྱི་སྤྲུལ་པའི་སྒྱུ་འཕྲུལ་ཕྱིར། །གྲུབ་མཐའ་བསླངས་པའི་བཀའ་དྲིན་བསམ་མི་ཁྱབ། །ཆོས་དྲིན་སོམས་ལ་གསོལ་བ་སྙིང་ནས་ཐོབ། །མཛོད་དང་སྙིང་ཐིག་རྣམས་ཀྱི་དགོངས་པ་ཡོད༑ ༑དེ་དང་འབྲེལ་མཚུངས་འོད་གསལ་ལྷུན་གྲུབ་སྒང་། །རི་རྒྱུད་རུ་མཚོན་གནམ་དུ་སྒྲེང་བ་འདྲ། །རྣམ་རྟོག་བག་ཆགས་ཟང་ཐལ་འཕགས་པའི་བརྡ། །ཁྲེགས་ཆོད་ཨ་ཏི་སྒོམ་པའི་གནས་སུ་འདུག །གང་ཤར་རང་གྲོལ་ཆེན་པོའི་རྟོགས་པ་སྐྱེ། །ཇོ་བོས་ཞབས་བཅགས་ཉེ་ངས་རྣལ་འབྱོར་ལ། །སྔགས་ཀྱི་ཐབས་ལམ་ཟབ་མོ་ཚིག་བརྒྱུད་བསྟན། །རྒྱ་བརྩོན་ནག་ཚོ་གཉིས་ཀྱིས་སྒྲུབ་གནས་མཛད། །དབུས་ཕྱོགས་གནས་ཀྱི་ལྟེ་བ་བྲག་དམར་རྫོང་། །དགེའུ་གོང་རི་བོ་རྒྱལ་མཚན་སྒྲེང་བའི་མགུལ། །སྤྲུལ་པའི་ཞིང་མཆོག་བྲག་དམར་ཀེའུ་ཚང་། །ཐོས་པ་ཙམ་གྱིས་དད་པའི་བ་སྤུ་གཡོ། །མཐོང་བ་ཙམ་གྱིས་རགས་པའི་རྣམ་རྟོག་འགག །མཇལ་བ་ཙམ་གྱིས་ཚེ་རབས་ལས་སྒྲིབ་བྱང་། །
འདས་དུས་དེ་ཡི་གནས་སྐབས་བཟང་པོའི་ཚེ། །དུས་གསུམ་ཀུན་མཁྱེན་པདྨ་འབྱུང་གནས་ཀྱིས། །ལྷ་གཅིག་ཚངས་བ་ལྷ་ཡི་མེ་ཏོག་སོགས། །ས་ཐོབ་ལས་ཆེན་གྲུབ་ཆེན་བརྒྱད་པོ་ལ། །མ་ཧཱ་ཡོ་གའི་རྒྱུད་སྡེ་ཀུན་བཅུད། །བདེ་གཤེགས་འདུས་པའི་དཀྱིལ་འཁོར་ཞལ་ཕྱེས་ནས། །སྨིན་གྲོལ་ཆོས་ཀྱི་འཁོར་ལོ་བསྐོར་བའི་གནས། །རིག་འཛིན་རྣམ་བཞིའི་དངོས་གྲུབ་བརྙེས་པའི་ས། །དཔའ་བོ་མཁའ་འགྲོ་མང་པོ་སྤྲིན་ལྟར་གཏིབས། །ལྷུན་གྲུབ་རང་བྱོན་བཀོད་པ་བསམ་མི་ཁྱབ། །རིན་ཆེན་གཏེར་གྱི་བང་མཛོད་ཆེན་པོ་ཡིན། །བྲག་ལ་ཡེ་ཤེས་འཁོར་ལོ་དངོས་སུ་བཞུགས། །ཆུ་ནུར་མཚན་མའི་མིག་གིས་སྤྱོད་ཡུལ་མིན། །དག་པའི་སེམས་དཔའ་རྣམས་ཀྱིས་དངོས་སུ་གཟིགས། །རྣམ་སྣང་མཛད་དང་མཐའ་མགོན་བརྩོན་གྱིས། །ཐུགས་བསྐྱེད་སོར་མོའི་རྩལ་ལས་བྱོན་པ་ཡི། །གུ་རུའི་སྐུ་ཚབ་ཇོ་མོ་གཉིས་དང་བཅས། །ཉིད་ཀྱིས་ལྷག་པའི་འཁོར་ལོ་བཅུག་པའི་ཡིས། །བཟོ་བཀོད་བྱིན་རླབས་ཐམས་ཅད་ཁྱད་བར་འཕགས། །རྟེན་འདི་པད་འབྱུང་དངོས་དང་ཁྱད་པར་མེད། །ཟངས་མདོག་དཔལ་རིའི་ཞལ་སྐྱིན་མངོན་སུམ་སྟེ། །འོག་མིན་བདེ་བ་ཆེན་པོའི་ཞིང་མཁས་དངོས། །འདི་ཉིད་སུ་ཡིས་མཇལ་བ་དོན་དང་ལྡན། །ཚོགས་འཁོར་བྱས་ཚད་བསོད་ནམས་དཔག་ཏུ་མེད། །སྨོན་ལམ་ཐེ་བས་ཚད་ངན་སོང་
སྐྱེ་སྒོ་ཁེགས། །མཉམ་འགྲོགས་བྱེད་ཚད་བདུད་ཀྱི་མངག་གཞུག་ཡིན། །བསྙེན་སྒྲུབ་ཡན་ལག་བཞི་ཡི་ཁོག་ཕུབ་བའི། །སྒྲུབ་ཆེན་མཛད་པའི་གནམས་སུ་འདི་ཉིད་བཟང་། །སྣང་གྲག་ལྷ་སྔགས་ཆོས་ཉིད་ཆེན་པོའི་དང་། །རྣམ་བཞིའི་རིག་འཛིན་བརྙེས་ལ་སོམ་ཉི་མེད། །གསང་སྔགས་འབྲས་བུའི་བསྟན་པའི་ཆུ་འགོ་སྟེ། །འདི་ལས་འཕགས་པའི་སྒྲུབ་གནས་བོད་ན་མེད། །པདྨས་བྱིན་བརླབས་གནས་གསུམ་མཁའ་འགྲོ་འདུ། །འདི་ཉིད་གཅིག་བུའི་བཀའ་དྲིན་དྲན་པས་ཀྱང་། །པདྨའི་ཐུགས་རྗེ་བསྐལ་བརྒྱར་འཁོར་ཐབས་མེད། །འདྲེན་པའི་དེང་དཔོན་པདྨ་འབྱུང་གནས་དེ། །ད་ལྟ་མངོན་སུམ་བཞུགས་ན་དགའ་བ་ལ། །དག་པའི་འཁོར་སློབ་རྗེ་འབངས་རྒྱ་མཚོ་དེ། །དང་སང་ལྷན་ཅིག་འཛོམ་ན་སྐྱིད་པ་ལ། །ད་དུང་ཁོ་བོའི་བློ་སྣ་ཆོས་ལ་བསྒྱུར། །ཆོས་བརྒྱད་གཏིང་ནས་ཞིག་པར་བྱིན་གྱིས་རློབས། །གཡོན་ཕྱོགས་འཛིན་དུང་དཀར་འདྲ་བའི་ཐོད། །གྲུབ་པའི་བསྟི་གནས་ཁྱད་འཕགས་ཨོ་རྒྱན་རྩེ། །ཕྲིན་ལས་གྲུབ་པ་རོགས་དང་ཟུར་ཤཱཀྱ་འབྱུང་༑ ༑ཉད་སྒོམ་ཤ་བ་ཅན་སོགས་བཞུགས་གནས་ཏེ། །རྩ་བ་རྣམ་པར་རྟན་བ་རྡོ་རྗེའི་བྲག །རྩེ་མོ་རྣམ་དག་དབྱིངས་སྒྲོལ་གཞལ་མེད་ཁང་། །ཐིག་ལེ་སྟོང་པའི་སྒྲོན་མ་ལྷུག་པར་མངོན། །ཤེས་རབ་རང་བྱུང་སྒྲོན་མའི་
བཞིན་རས་རྔོམ། །ཀློང་གསལ་མན་དག་སྡེ་ཡི་གནད་བསྒོམ་པའི། །སྔོན་བྱོན་ཞིག་པོ་རྣམས་ཀྱིས་བསྒྲུབས་རི་ཡིན། །གང་ཞིག་འདི་རུ་སུ་ཡིས་འོད་གསལ་སྒོམ། །དེ་ཉིད་ལྕེ་བཙུན་ཆེན་པོ་ལྟ་བུར་འགྱུར། །དུང་གི་སྡེབས་ལ་མདོ་སྔགས་ཟུང་འཇུག་གི། །བསྟན་པ་བཤད་སྒྲུབ་གཉིས་ཀྱིས་འཛིན་པ་དང་། །ཁྱད་པར་ཐམས་ཅད་མཁྱེན་གཟིགས་འགྲོ་འདུལ་གླིང་། །པྲཛྙཱ་རསྨིའི་ཐུགས་སྨོན་པའི་མཐུས། །གྲུབ་ཐོབ་རྒྱུན་མི་འཆད་པ་ཕྱི་མཐའི་བར། །ངེས་པར་འབྱོན་པའི་འདུས་སྡེ་རྣམ་པར་བཀྲ། །རི་སུལ་ཀུན་ཏུ་དལ་འགྲོའི་ཆུ་རྒྱུན་འབེབས། །གོ་མཚམས་མེད་པར་ནགས་ཚལ་དྲ་བས་མཛེས། །རྣམ་པ་དུ་མའི་བྱ་ཚོགས་གླུ་དབྱངས་ལེན། །རྐང་དྲུག་བུང་བའི་ཚོགས་རྣམས་འཕུར་ལྡིང་གཡོ། །དབྱར་དུས་སྦྲང་ཆར་ཟིམ་བུས་ས་བཅུད་གསོ། །ས་གཞི་ཐམས་ཅན་མ་རྒད་ཞུན་མ་མཁར་འདྲ། །སྟོན་དུས་སྒྲུབ་རིའི་རྩེ་མོས་ལ་ཐོད་འཆིང་། །རྩི་ཤིང་ནགས་ཚལ་ཟོ་འག་བཀྲམ་བ་འདྲ། །ལྗོན་པའི་ཤིང་དང་སྔོ་སྨན་དྲི་བཟང་འཐུལ། །དགུན་དུས་ཤིང་རྩི་ཁ་བའི་ལ་ཐོད་འཆིང་༑ ༑ཕན་ཚུན་ཡལ་ག་འདུད་ཅིང་མགོ་ལྕོགས་ལྡེམ། །རྟ་ལྗང་ཟེར་གྱིས་ལ་ཐོད་འཇུ་བའི་ཚེ། །བ་དན་རུ་མཚོན་ནམ་མཁར་སྒྲེང་བ་འདྲ། །རང་བྱུང་ལྷུན་གྲུབ་མཐུན་རྫས་ཁྱད་འཕགས་འདིས། །དམ་
ཅན་ཆོས་སྐྱོང་རང་བཞིན་དགྱེས་བ་སྐོང་། །དཔྱོད་སོས་ས་གཞི་སྨུག་ལ་བྱ་དབང་སྒྲོག །དུས་ཀྱི་རྒྱལ་མོས་བསྔགས་པའི་བྱ་མ་རྟ། །བྱ་རྒྱལ་ཁུ་བྱུག་སྔོན་མོས་རྒྱངས་གླུ་ལེན། །སོ་སྐྱེ་ཀུན་གྱི་རྣ་བའི་བཅུད་དུ་མཛེས། །རྣལ་འབྱོར་རྟོགས་ལྡན་རྣམས་ལ་ཉམས་བཟང་གཡོ། །དེ་འདྲའི་གནས་མཆོག་པདྨ་ཁ་ཕྱེ་ལྟའི། །དབུས་བཅུད་ཟེའུ་འབྲུ་ལྟ་བུའི་དགེའུ་འོག །མིང་ལས་དོན་དུ་བརྟགས་ནན་འོག་མིན་དངོས། །རི་དབྱིབས་གསེར་གྱི་རྡོ་རྗེ་གནམ་སློང་འདྲ། །བྲག་ལ་རང་བྱོན་བཀོད་པ་བརྗོད་མི་ལྡང་། །པད་འབྱུང་རྫུ་འཕྲུལ་ཕྱག་རྒྱའི་སོར་མོའི་རྩེས། །འགྲོ་བའི་བསོད་ནམས་གསོག་པའི་མཆོད་སྡོང་དུ། །རི་མོར་མཛད་པའི་སྐུ་གསུང་ཐུགས་ཀྱི་རྟེན། མཐོང་གྲོལ་རེག་པས་འཚེངས་པ་གྲངས་མེད་བཞུགས། །འདི་དག་སངས་རྒྱས་དངོས་ཀྱིས་བྱིན་བརླབས་པས། །སོ་སྐྱེ་རབ་གནས་བེམ་པོའི་གཟུགས་བརྙན་ལ། །གསེར་གྱིས་བྱུགས་པ་བདག་ལྟའི་རིན་ཐང་རྒྱན། །འབྱོར་སྟོབས་དཔལ་དུ་སྒོམ་དང་ཆོས་མི་མཚུངས། །ཡེ་ཤེས་བདུན་དང་ལྡན་པའི་བདག་ཉིད་ཅན། །སུ་ཡིས་མཐོང་རེག་སྨོན་ལམ་འདེབས་པ་དེ། །ངན་སོང་སྐྱེ་སྒོ་ཆོད་ལ་སེམ་ཉི་མེད། །འོན་ཀྱང་དབུལ་པོའི་ཁྱིམ་གྱི་གཏེར་ཁ་བཞིན། །ཡོན་ཏན་ཡོད་ལ་ཡོད་པར་མ་ཤེས་པར། །ཆུ་བུར་མིག་གི་ལྟད་
མོའི་ཚུལ་ཙམ་དུ། །མཇལ་ལ་དེ་དང་མཚུངས་པའི་བྱིན་རླབས་ལས། །མི་འབྱུང་དེ་ཕྱིར་ཡོན་ཏན་དྲན་བའི་མོད། །དང་མོས་དྲིལ་ནས་གསོལ་འདེབས་སྨོན་ལམ་རེམས། །གནས་རྟེན་འདི་དག་འབྲེལ་ཚད་དོན་ལྡན་ཡིན། །ཟབ་རྒྱའི་བརྡ་རྟགས་རྫས་གཏེར་དུ་མས་གང་། །མཁའ་འགྲོའི་ཚོགས་ཁང་རིན་ཆེན་གསང་བའི་ཕུག །བསྐལ་པར་གནས་བའི་སྣང་གསལ་སྒྲོན་མེ་སོགས། །སྒྲུབ་རིའི་རྒྱལ་པོ་འདི་ཡི་ནང་དུ་བཞུགས། །དུས་བཟང་ཀུན་ལ་མཁའ་འགྲོས་ཚོགས་འཁོར་བསྐོར། །རོལ་མོའི་སྒྲ་དང་ཆོས་རྡ་ལྡི་ར་བ་ཐོས། །རྒྱུན་དུ་མི་མ་ཡིན་གྱིས་བསྐོར་བ་བྱེད། །དེ་ཕྱིར་སླད་ཀྱི་གང་ཟག་སྐལ་ལྡན་རྣམས། །འདི་ཡི་ཡོན་ཏམ་སོམས་ལ་ཕྱག་བསྐོར་རེམས། །ལན་ཅིག་འབད་པའི་བསོད་ནམས་ཕ་མཐའ་ཡས། །འདས་དང་མ་འོངས་གཏེར་རྒྱ་གྲངས་མེད་གསལ། །ཤུད་བུས་བྱང་སེམས་བྱེན་ལ་འདྲོངས་པ་ཡི། །གྲུབ་རྟགས་ཆུ་བོ་གྱེན་ལ་དྲངས་པ་དང་། །རྔ་ཡལ་གླིང་དུ་འབྱོན་ཁའི་དབུ་རྗེས་དང་། །ཕྱག་མཁར་རྗེས་སོགས་འདམ་ལ་བརྒྱབ་ལྟར་གསལ། །ཤར་དུ་འཆོད་འབྱུང་འདྲ་བའི་ཀེའུ་ཚང་། །ནང་ན་གུ་རུའི་ཞབས་རྗེས་ཆུང་ཡོད། །ཏིང་འཛིན་བཟང་པོ་གྲུབ་པ་བརྙེས་བའི་ཕུག །ཨ་བུ་ཡོ་གའི་རྫོགས་རིམ་སྒོམ་པའི་གནས། །བདེ་སྟོང་འབར་འཛག་ཡེ་ཤེས་སྐྱེ་བའི་ཡུལ། །འདི་འདྲའི་
གནས་ཀྱི་ཡོན་ཏན་བརྗོད་མི་ལྔ། །ཕྱི་ནས་འདོད་ཡོན་འདི་འཇིའི་རྣམ་གཡེང་མེད། །ནང་ན་རྣམ་རྟོག་གྱ་གྱུའི་སྒྱུ་འཕྲུལ་མེད། །བར་ན་ཞི་གནས་སྟེངས་པོའི་སེམས་འཛིན་མེད། །སྐུ་གསུམ་བཞུགས་སྟངས་གནད་ལ་ཕེབས་པའི་དང་། །སྐུ་གསུམ་ལུས་ཀྱི་གཞལ་མེད་ཁང་ཆེན་ནང་།་སྐུ་གསུམ་མཚོན་པའི་རྩ་གསུམ་མཉམ་པར་སྦྱོར། །སྐུ་གསུམ་ཕོ་མོ་མ་ནིང་རླུང་གསུམ་གྱི། །སྲོག་རྩོལ་གནད་དུ་ཆུད་པའི་རྟེན་འབྲེལ་ལས། །འདུ་བྱེད་རྟོག་ཚོགས་འགྱུར་པའི་ལམ་སྲང་འགག །མ་བཅོས་རིག་པའི་རྒྱལ་པོ་ལྷོད་དེ་བཞུགས། །ཤེས་ཉམས་ཟ་ཟུའི་རྣམ་རྟོག་བག་ལ་ཞ། །སྣང་ཉམས་མངོན་སུམ་རིག་པ་གནད་ལ་ཕེབས། །སྣང་སྨེས་དབྱེར་མེད་ཟང་ཐལ་ཁྲལ་ཁྲོལ་ལ། །ཆོས་མེད་ཆོས་ཀྱི་འདུ་ཤེས་དེ་ཡང་མེད། །དམིགས་མེད་གཏད་མེད་བྱར་མེད་ལྟ་སྤྱོད་མེད། །ཆོས་ཉིད་ཅིག་ཅར་ཟད་པའི་རྟེན་འབྲེལ་གནས། །རྟོག་གེས་བརྟགས་ན་སྙིང་རྗེ་གད་མོ་བྲོ། རྟོགས་པ་ཅན་རྣམས་བློ་བྲལ་གུ་རེ་ཡངས། །རྒྱལ་པས་གཟིགས་ན་ཐུགས་རྗེའི་ཡེ་ཤེས་འཇུག །རྩོལ་མེད་ཉམས་རྟོགས་ལྷུག་པའི་མེ་ཆེན་འབར། །ཉོན་མོངས་རྣམ་རྟོག་བག་ཆགས་ཐུལ་གྱིས་བསྲེག །འཁོར་བར་ཕྱི་ཕྱག་འཚལ་བའི་གནས་སུ་འདུག །ད་ལྟ་བཞུགས་དང་སླད་གྱི་འབྱོན་པ་ཡི། །འཁོར་འདས་པར་ལག་གཅོད་པའི་རྣལ་འབྱོར་རྣམས། །
འདུ་འཛིའི་མཁར་གོག་པོ་རོ་ལྟར་བསྒྱུར། །འདི་འདྲའི་གནས་སུ་རིག་པའི་བཙན་ས་ཟུངས། །ཀེའུ་ཚང་འདི་ཡི་ཡོན་ཏན་བསམ་མི་ཁྱབ། །དྲན་ནོ་དྲན་ནོ་ཏིང་འཛིན་བཟང་པོ་དྲན། །ད་དུང་ཞེན་འཛིན་རྩ་དག་དར་ཆོད་པ་དང་། །མངོས་སུམ་རིག་བ་བཅུད་དུ་སྨིན་པ་དང་། །ཉིད་མཚན་དབྱེར་མེད་འོད་གསའ་འབྱོངས་པ་རུ། །བྱིན་གྱིས་རློབས་ཤིག་གསོལ་བ་སྙིང་ནས་འདེབས། །འདི་ཡི་འོག་ན་ཆོས་རྒྱལ་ཕུག་པ་ཡོད། །ཉང་བན་ཏིང་འཛིང་གུབ་པས་ཉང་ཕུག་འོག །འདི་ལ་སྔོན་ཆད་བདག་ཏུ་གཟུང་བ་མེད། །མེ་ཏོག་ཕུག་པ་ཞེས་ནི་རབ་ཏུ་བརྗོད། །འོག་མིན་འདི་ཡི་རྒྱབ་ཀྱི་རླུང་ལྷའི་ཕྱོགས། །རྟ་མཆོག་གསང་བའི་ཕུག་པ་རེ་ཆགས། །རྒྱབ་ན་རྫུ་འཕྲུལ་ཞབས་རྗེས་འདོ་མདོ་ཙམ། །འདི་དང་མང་ཡུལ་རི་བོ་ཕན་ཚུན་བརྗེས། །བསམ་ཡས་ནེའུ་ཐང་ནགས་ཚལ་སྤོས་པ་སོགས། །ཕྱོགས་མཚུངས་སྣང་སེམས་འདྲེས་པའི་གྲུབ་རྟགས་ཡིན། །ལོག་ལྟ་ཅན་འཕྲལ་དུ་སྣང་བ་འགྱུར། །མཐིལ་ན་རྨ་བན་མཆོག་གིས་ཕ་ལྦང་ཆེ། །ཟན་གྱི་ཕུད་ལྟར་བཅད་པ་གྲུབ་པའི་མཚན། །ངོ་མཚར་ཁྱད་འཕགས་འདི་ལ་སུ་མི་དད། །འདི་ནས་ཤིན་ཏུ་ཉེ་བའི་སའི་ཐིག་ལེར། །བོད་ཀྱི་ལྷ་གཅིག་ཁྲི་སྲོང་ཡབ་སྲས་སོགས། །རྗེ་འབངས་གྲོགས་གསུམ་འདུས་པའི་ཚེམ་བུ་ཡིས། །རིང་ཐང་བྲལ་བའི་ཟང་ཟིང་དངོས་པོ་
དང་། །ལུས་སྲོག་ལྟོས་པ་མེད་པར་མཎྚལ་དུ། །ཕུལ་ནས་གུས་པས་གསོལ་བ་བཏབ་བའི་དོར། །ཉིད་ཀྱི་དགོངས་པའི་གསང་མཛོད་ཆེན་པོ་ནས། །རྒྱུད་སྡེའི་བཅུད་ཕུར་ཡོ་ག་གསུམ་གྱི་སྲོག །མཁའ་འགྲོའི་སྙིང་ཁྲག་ས་འོག་གཏེར་ཅིག་མ། །ཀུན་ལ་ཡོངས་གྲགས་ཡང་ཟབ་གདམས་པའི་མཐིལ། །དགོངས་འདུས་གསེར་ཆོས་གསུངས་པའི་གནས་མཆོག་ཡིན། །རང་བྱུང་རྡོ་ཡི་བཞུགས་ཁྲི་ཆུ་ཞེང་གབ། །འདི་ཡི་ནང་ན་ཆོས་གཏེར་མང་པོ་བཞུགས། །སངས་རྒྱས་གཉིས་པ་པདྨ་འབྱུང་གནས་དེས། །ཆོས་ཀྱི་འཁོར་ལོ་བསྐོར་བའི་གནས་ཡིན་བས། །རྡོ་རྗེ་གདན་གྱི་ཡོན་ཏན་ཕྱོགས་མཚུངས་འགོ་།འོག་མིན་གསང་ཆེན་རོལ་བ་མ་ལ་ཡའི། །གནས་ཆེན་རྣམས་དང་ཀྱད་པར་འདི་ལ་མེད། །དད་བརྩོན་ཤེས་རབ་ཅན་གྱི་སྐྱེ་འགྲོ་རྣམས། །ཚོགས་འཁོར་བསྐོར་བའི་གནས་སུ་འདི་ཉིད་བཟང་། །དམ་ཚིག་ཉམས་ཆག་བསྐང་ཞིང་དངོས་གྲུབ་ཐོབ། །མཐའ་རྟེན་བསྔོན་སྨོན་བཟང་པོའི་རྒྱ་ཡིས་ཐོག །དགོངས་འདུས་གསུངས་པའི་ཡོན་ཏན་བརྗོད་མི་ལང་། །འདི་ཡི་ལུང་བསྟན་བཀའ་བརྒྱའི་ནང་དུ་ལྟོས། །མཐོང་བ་ཙམ་གྱིས་དད་པའི་བ་སྤུ་གཡོ། །མཁན་སློབ་རྗེ་འབངས་དྲན་པས་མཆི་མ་ཤོར། །ད་ནི་དེ་དག་མེད་པས་སེམས་པ་སྐྱོ། །ཤུལ་དུ་གནས་བཤད་བྱས་པས་མི་རྟག་དྲན། །འདི་ཡི་ཚུལ་ལ་སོམས་
ཤོག་ཕྱི་རབས་རྣམས། །འདབས་ན་གནས་སྲུང་ཌཱཀྐིའི་རྟེན་མཁར་བརྗིད། །རྩི་ཤིང་ནགས་ཚལ་མཚོན་ཆ་གཟིང་བ་འདྲ། །ཤིང་སྐམ་ཤ་བའི་རྭ་ལྟར་གནམ་ལ་འཕྱོ། །འཇིགས་པའི་གཅན་གཟན་དུ་མས་ལ་ཡིབས། །ཤིང་རྩིའི་ཁ་དོག་དུ་རླངས་འཇའ་ཚོན་འཁྱིལ། །སྣང་བ་ཡུལ་ཕྱིར་འབྲེང་བའི་ཡུས་ཅན་ཀུན། །ཉིན་མོའི་སྣང་བྱེད་ལྡན་ཡང་སྐྱི་གཡའི་གནས། །འདི་ཡི་གནས་བདག་ཤ་ཟར་ལ་གཅིག་མ། །སྔོན་ཚེ་རྟ་མཆོག་རོལ་པའི་ཕོ་ཉ་ཡིན། །མཚན་དུ་དུར་ཁྲོད་ཤ་ཟ་ཁ་མོ་ཆེ། །དགོངས་འདུས་དཀྱིལ་འཁོར་ཆེན་པོ་ཞལ་ཕྱེ་ཚེ། །ཏིག་འཛིན་ཧཱུྃ་ཀཱའི་སྲས་མོ་སྔགས་སྐྱེས་རིགས། །བུམ་འཛིན་ལྷ་མོ་འཛོམ་པ་སྐྱིད་དུ་གྲགས། །དགོངས་འདུས་སྨོན་ལམ་གཏད་རྒྱ་འབེབས་པའི་ཚེ། །བསྟན་པའི་གཉེན་གཏད་འོས་བ་སུ་ཞིག་ཅེས། །པད་འབྱུང་རྡོ་རྗེའི་གསུང་གསང་བབས་པ་ལས། །འདི་ཡིས་འདུས་པའི་དཀྱིལ་འཁོར་གྲལ་ལས་ལངས། །རང་གི་ན་བཟའ་ཕུད་ཅིང་རྒྱན་ཆས་བཀྲོལ། །ཕྱག་དང་བཅས་ཏེ་པད་འབྱུང་རྗེ་ལ་ཕུལ། །དགོངས་འདུས་བསྟན་པ་སྲུང་པའི་བྱེད་པོ་རུ། །ཁས་བླངས་བྲོ་བོར་སློབ་དཔོན་དགོངས་པ་བསྒྲུབས། །ཀླུ་ཡི་རྒྱལ་པོས་ཕུལ་བའི་མ་ཎི་ཀ རྗེ་ཡིས་མགུལ་ཁུག་ནང་བཏོན་སྐྱེས་སུ་སྩལ། །མངའ་གསོལ་གཟེངས་བསྟོད་མེ་ཏོག་ཆར་པ་ཕབ། །དཀྱིལ་འཁོར་འདུས་པའི་
ཚོམ་བུས་ཤིས་པ་བརྗོད། །རྡོ་རྗེ་སློབ་དཔོན་དགྱེས་བ་བསྐངས་པའི་རྗེས། །དཀྱིལ་འཁོར་དྲུང་དུ་ཚེ་ཡི་འདུ་བྱེད་བཏང་། །ནམ་མཁའ་འཇའ་དང་མེ་ཏོག་ཆར་གྱིས་ཁེངས། །སྔོན་གྱི་ཐུགས་བསྐྱེད་སྨོན་ལམ་འཚམས་སྦྱོར་གྱིས། །མི་མངོན་དབྱིངས་སུ་སྤྲུལ་པའི་ཟློས་གར་བསྒྱུར། །ཁྱོད་ཀྱི་སྤྲུལ་པས་གནམ་ས་བར་སྣང་ཁྱབ། །ལུས་དང་ལུས་མེད་སྣ་ཚོགས་ཅིར་ཡང་སྟོན། །རྣལ་འབྱོར་སྒྲུབ་བོ་ཀུན་གྱི་སྟོང་གྲོགས་བྱེད། །འདི་ཡི་མཐུ་དང་རྫུ་འཕྲུལ་བསམ་མི་ཁྱབ། །རྣམ་བཞིའི་ཕྲིན་ལས་ཀུན་ལ་ཐོགས་རྡུགས་མེད། །སྔ་འགྱུར་སྤྱི་དང་ཁྱབ་པར་དགོངས་འདུས་ཀྱི། །བསྟན་འཛིན་ཀུན་ལ་བུ་གཅིག་མ་ལྟར་བརྩེ། །བསྟན་བཤིག་རྣམས་ཀྱི་སྲོག་ལ་ཧབ་ལེན་བྱེད། །སྲུང་མ་མང་ཡང་ཕལ་ཆེར་ཟས་ཕྱིར་འབྲང་། །འདི་ཉིད་དམ་ཚིག་གཉན་ལ་འདའ་མི་མཛད། །རང་བཞིན་སྙིང་ཉེ་འཁུ་ལྡོག་བགས་ཀྱིས་ཆུང་། །གནས་འདིའི་སྲུང་མ་བརྗོད་ཀྱིས་མི་ལང་ཡང་། །ཁྱད་པར་གྱུར་པ་ལྷ་མཆོག་འདི་ཉིད་དོ། །གཤམ་དུ་མཆོག་དབྱངས་རྟ་མགྲིན་གྲུབ་ཕུག་དང་། །དཔེན་རྩ་ནཱ་རའི་གཙུག་ཤུལ་ཕབ་མོའི་མཁའ། །སྒྲུབ་གནས་འདི་ཉི་རྔ་ཡབ་དཔལ་རིལ། །ལྷུན་གྲུབ་ཤེལ་དཀར་ལངྐའི་ཕོ་བྲང་ཚུལ། །ཞབས་རྗེས་ཡན་ཆད་གནས་ཀྱི་ལ་ཆག་ཡིན། །ས་རྡོ་ཤིང་རྩི་ནགས་ཚལ་
ཐམས་ཅད་ལ། །པདྨས་བྱིན་བརླབས་རབ་གནས་ཤུགས་ཀྱིས་ཆགས། །ཐ་མལ་རང་གར་མི་ལྟ་མོས་པ་བསྐྱེད། །བྱིན་རླབས་རང་རང་བློ་ནུས་འཚམས་པར་འཇུག །འདི་འདྲའི་གནས་ཀྱི་ཡོན་ཏན་བརྗོད་མི་ལྡང་། །དབྱར་དུས་ན་བུན་སྟུག་པོས་འཐུམས་ཤིང་རྨུགས། །དེས་ནི་འཁོར་འདས་གཞི་ཡི་གནས་ལུགས་སྟོན། །རི་ལ་གནས་ཀྱི་བཀོད་བ་ཚད་ན་ཡང་། །མངོན་པར་མི་གསལ་རིག་པའི་གནས་ལུགས་ལ། །འཁོར་འདས་གཉིས་ཀའི་འཆར་གཞི་ཚང་པའི་བརྡ། །རེས་འགའ་གཡས་གཡོན་དབུས་ཀྱི་རེ་སྐེད་ལ། །བ་བུན་མཐིང་གོས་བཞིན་དུ་དཀྲི་བར་བྱེད། །ལམ་ལ་ཞུགས་པའི་གང་ཟག་ཐམས་ཅད་ལ། །སྒྲིབ་གཉིས་བག་ཆགས་ཤུགས་ལ་ཡོད་པའི་བརྡ། །རེས་འགའ་ནམ་མཁའ་དྭངས་ཤིང་བསེར་བུ་གཡོ། །གནས་ཀྱི་བཀོད་པ་ལག་མཐིལ་བཞིན་དུ་བཀྲ། ཇི་ལྟ་ཇི་སྙེད་མཁྱེན་པའི་རྩལ་རྫོགས་ཏེ། །འབྲས་བུ་སྐུ་གསུམ་རང་རྩལ་རྫོགས་པའི་བརྡ། །ཆོས་རྣམས་ཐམས་ཅད་ཐབས་ཤེས་རྟེན་འབྲེལ་ཏེ། །དངོས་མཚན་རང་གར་གྲུབ་བ་རྡུལ་ཙམ་མེད། །ཐམས་ཅད་རང་སེམས་གཅིག་བུའི་ཆོ་འཕྲུལ་ལ། །རྟག་བརྟན་ཐེར་ཟུག་སྒོམ་བ་རྨོངས་བ་སྟེ། །དེ་ཕྱིར་འདི་ཡང་གདུལ་བྱ་དྲང་བའི་སླད། །ཡིན་གྱི་ངེས་པའི་དོན་དུ་ཐ་སྙད་ཙམ། །རང་རིག་ཕྱོགས་ཡན་ཆེན་པོར་གློད་ཤེས་པས། །
དངོས་འཛིན་ཨ་འཐས་འཇུར་གེགས་རང་སར་གྲོལ། །ཀློང་ཆེན་དགོངས་པའི་གསང་མཛོད་བརྡོལ་བ་ལས། །ཕྱི་ཡི་ཡུལ་སྣང་བརྡ་དང་དཔེ་ཆར་ཤར། །ཁས་ལེན་གཏད་སོ་བྲལ་བའི་རིག་པ་དེ། །སྣང་བ་ཡུལ་ཕྱིར་འབྲང་བ་མ་ལགས་ཏེ། །རྗེས་ཐོ་བསྒྱུ་མའི་རོལ་པར་བཞེངས་པའི་གཏམ། །གནས་བསྟོད་རྡོ་རྗེའི་ཐོལ་གླུ་གསར་བར་ཤར། །དགེ་བས་སྲིད་པར་ཞེན་བའི་ཡིད་ཅན་ཀུན། །ཐབས་མཁས་རྒྱ་གར་རྗེའི་མཛད་པ་རྨད་བྱུང་བས། །རྣམ་མཁྱེན་ཐར་པའི་གླིང་མཆོག་ཉམས་དགའ་བར། །ཁྲིད་དེ་ཁམས་གསུམ་འཁོར་བ་སྟོངས་གྱུར་ཅིག །ཅེས་སོ།