ཤོག་ལྷེབ་ ༡ ནས་ ༡༠༠ བར།

---

^{[མ་དཔེ་གཟིགས་ན་འདིར་གནོན།]}

བླ་མ་དགོངས་པ་འདུས་པའི་ཆོ་གའི་རྣམ་བཞག་དང་འབྲེལ་བའི་བསྐྱེད་རྫོགས་ཟུང་འཇུག་གི་སྒྲོམ་མཁྱེན་བརྩེའི་མེ་ལོང་འོད་ཟེར་བརྒྱ་པ་ཞེས་བྱ་བ་བཞུགས། །

---

^{[མ་དཔེ་གཟིགས་ན་འདིར་གནོན།]}

སབྷཝནཾཤུཔྟ྄ཿཔཀལཨཔྲཔཉྩདྷརྨཱཀཱཡཿཔྲཀྲྀཏནིརུདྷཨུཏྟནཾཨཱཤུགཾབྷིརསཾབྷོགཿ
ངོ་བོ་གདོད་ནས་མཐའ་བརྒྱད་སྤྲོས་བྲལ་ཆོས་ཀྱི་སྐུ། །རང་བཞིན་མ་འགགས་གསལ་མྱུར་ཟབ་ཡངས་ལོངས་སྤྱོད་རྫོགས། །

---

^{[མ་དཔེ་གཟིགས་ན་འདིར་གནོན།]}

ཙིཏྟཾབིདྱཻཛཏིལབྱབསསཕརནིརྨཱཀཱཡཿ ཀཡཏྲིཿསམཏྭཥིཏསྱབིདྷཏཏྟྲཾསཱམིཙཱིཿ
ཐུགས་རྗེའི་རིག་མདངས་རྩོལ་མེད་ཁྱབ་གདལ་སྤྲུལ་པའི་སྐུ། །སྐུ་གསུམ་དབྱེར་མེད་གཉུག་མའི་རིག་པ་དེ་ལ་འདུད། །

---

^{[མ་དཔེ་གཟིགས་ན་འདིར་གནོན།]}

སྨྲ་བའི་དབང་ཕྱུག་དཎྜིས། ཆོས་རྣམས་རྒྱན་ཞེས་རབ་ཏུ་བརྗོད། །ཅེས་གསུངས་པ་ལྟར་ལས་སྙན་དངགས་མཁན་གྱི་རྟོག་པས་བཏགས་ཚེ་རྒྱན་དུ་མི་འགྲོ་བ་འགའ་ཡང་མེད་པས་རིག་པའི་བསྟན་བཅོས་ལ་བག་ཆགས་གཞག་པའི་སླད་དུ་རྒྱན་མིང་ངོས་བཟུང་བ་ལ། ཕྱག་བྱ་བའི་སྒོ་དང་པོ། ལྷོ་ཕྱོགས་བཻདྷརྦྷ་འདོད་པའི་མཛེས་པའི་ཡོན་ཏན་གྱི་གཏམ་རྒྱན་དུ་བྱས་པའི་ཆོས་ཀྱི་དབྱིངས་ཅི་ཡང་མ་ཡིན་པའི་གཤིས་ལ་བསྔགས་པ་བརྗོད་པའོ། །ཨཽ་ཌི་ཡ་ནའི་མཚོ་དབུས་པད་སྡོང་རྩེར། །ཕྱག་བྱ་བའི་སྒོ་གཉིས་པ་སྒྲོ་སྐུར་དང་བྲལ་བ་ཡོན་ཏན་རང་བཞིན་བརྗོད་པའི་རྒྱན། སྣང་མཐའི་ཐུགས་བཅུད་དྭངས་མའི་ཡི་གེ་ཧྲཱིཿ། །རྒྱལ་ཀུན་འདུས་པ་མཚོ་སྐྱེས་རྡོ་རྗེའི་སྐུར། །རྒྱུ་རྐྱེན་མེད་པར་ལྷུན་གྱིས་གྲུབ་དེ་མཚར། །བླ་མའི་བྱིན་རླབས་ཐུགས་རྗེའི་ཆུ་འཛིན་ཕྱོགས་རྣམས་ཀུན་ནས་གཡོས་པ་ལས། །ཕྱག་བྱ་བའི་སྒོ་གསུམ་པ་མཚུངས་པར་སྟོན་པ་གསལ་བྱེད་དཔེའི་རྒྱན། ཡི་དམ་དངོས་གྲུབ་བྱིན་རླབས་སྦྲང་ཆར་རྩོལ་བ་མེད་པར་ངང་གིས་འབབ། །མཁའ་འགྲོའི་ཕྲིན་ལས་ལས་བཞིའི་མྱུ་གུ་དགེ་ལེགས་ལོ་འབྲས་གཡུར་ཟ་བ། །རྒྱལ་བའི་ཐུགས་རྗེའི་རྩ་གསུམ་དགོངས་པ་ཡོངས་འདུས་ལྷ་ལ་ཕྱག་འཚལ་ལོ། །ངེས་ལེགས་ཐར་པའི་གླིང་མཆོག་ཉམས་དགའ་བར། །ཕྱག་བྱ་བའི་སྒོ་བཞི་པ་དོནགཞན་བཀོད་པའི་རྒྱན་ལ་རབ་བཏགས་ཀྱིས་རྣམ་པར་སྤུད་པ། འགྲོ་ཀུན་ཡོངས་སུ་འཁྲིད་པའི་ཤིང་རྟ་ཆེ། །བསྐྱེད་རྫོགས་མན་ངག་ཀུན་གྱི་སྲོག་གཅིག་པོ། །དགོངས་འདུས་ཆོ་གའི་རྣམ་གཞག་གསལ་བར་བྱ། །དངོས་བརྒྱུད་བླ་མ་ཆོས་བདག་མཁའ་འགྲོ་དམ་ཅན་གཏེར་བདག་གིང་གི་ཚོགས། །ཕྱག་བྱ་

---

^{[མ་དཔེ་གཟིགས་ན་འདིར་གནོན།]}

བའི་སྒོ་ལྔ་བ་བསམ་པ་རྒྱ་ཆེ་བའི་རྒྱན། གདོད་མའི་ངང་དང་རང་རང་གནས་ནས་ཐུགས་རྗེའི་གཟིགས་པ་ཆེར་དགོངས་ཤིང༌། །ལྷག་བསམ་དག་པས་སེམས་བསྐྱེད་བཞི་ཚན་གྱི་དབྱེ་བ་མདོ་སྡེ་རྒྱན་གྱི་དགོངས་པ་འགྲེལ་སྐབས། ཁོ་བོའི་བླ་མ་ཀུན་མཁྱེན་ཀློང་ཆེན་པས་ཚོགས་སྦྱོར་ན་ཡོད་པ་མོས་པས་དཔྱོད་པའི་སེམས་བསྐྱེད། ས་བདུན་པ་མན་ཆད་དང་པོ་ཡན་ཆོད་ན་ཡོད་པ་ལྷག་བསམ་རྣམ་དག་གི་སེམས་བསྐྱེད། དག་པ་ས་གསུམ་ན་ཡོད་པ་རྣམ་པར་སྨིན་པའི་སེམས་བསྐྱེད། སངས་རྒྱས་ཀྱི་ས་ན་ཡོད་པ་སྒྲིབ་པ་སྤངས་པའི་སེམས་བསྐྱེད་ཅེས་གསུངས་ཀྱང༌། རྡོ་རྗེ་ཐེག་པའི་དགོངས་པའི་སྙིང་པོ་རིག་ཅིང་གཡོ་སྒྱུ་མེད་པ་རྒྱུ་མཚན་དུ་བྱས་པའོ། །སྔ་འགྱུར་བཙས་སུ་རྒྱལ་བའི་དགོངས་པ་ཅུང་ཟད་འགྲེལ། །བཀའ་ཡི་སྣང་བ་ཡངས་པོར་ཕྱེ་ལ་ཉམས་དང་རྟོགས་པའི་རིག་རྩལ་སྤོར། །ཞེས་མཆོད་པ་བརྗོད་པ་དང་གནང་བ་ཞུ་བའི་ཚིག་གིས་གོ་སྐབས་ཡངས་པོར་ཕྱེ་ནས། དེ་ལ་འདིར་དུས་གསུམ་རྒྱལ་བ་ཐམས་ཅད་ཀྱི་དགོངས་པའི་ཞེ་ཕུགས། མྱུར་ལམ་རྡོ་རྗེ་ཐེག་པ་མཐའ་དག་གི་བཅུད་དུམ། སྔ་འགྱུར་འོད་གསལ་རྫོགས་པ་ཆེན་པོའི་སྙིང་ཁྲག །བླ་མ་ལ་སོགས་ཏེ་རྩ་བ་གསུམ་གྱི་དགོངས་པ་གཅིག་ཏུ་འདུས་པའི་ཆོ་གའི་རྣམ་གཞག་མཁྱེན་བརྩེའི་མེ་ལོང་འོད་ཟེར་བརྒྱ་བ་གསལ་བར་བྱེད་པ་ལ་སྤྱི་དོན་རྣམ་པ་གཉིས་ཏེ། གླེང་གཞི་ལས་བརྩམས་ཏེ་ཕྱི་རྒྱ་རླབས་ཀྱིས་གཅོད་པ་དང༌། མན་ངག་ལ་བརྟེན་ནས་ཆོ་ག་དངོས་ཀྱི་དགོངས་པ་འགྲེལ་བའོ། །

---

^{[མ་དཔེ་གཟིགས་ན་འདིར་གནོན།]}

དང་པོ་ལ་བཞི་སྟེ། རྒྱུའི་ཐེག་པའི་རྩ་ཚིག་དང་སྔགས་གསར་མ་ལ་བཞེད་པའི་རྒྱུད་སྡེའི་རྐང་གྲངས། སྔ་དར་ལ་བཞེད་པའི་ཐེག་པ་དང་རྒྱུད་སྡེའི་རྣམ་གཞག །བྱེ་བྲག་ཏུ་ཆེ་བའི་ཆོས་འདིའི་རང་སྐད། ཆོ་ག་ཐམས་ཅད་ལ་མཁོ་བའི་སྤྱི་ཆིངས་རྗེས་འབྲང་དང་བཅས་པའོ། །དང་པོ་ནི། དེ་ཡང་སྤང་བྱ་མ་ལུས་པ་ཡོངས་སུ་སྤངས་ཤིང༌། རྟོག་པའི་དེ་ཁོ་ན་ཉིད་ཀྱི་ཡོན་ཏན་མཐའ་དག་མངོན་དུ་མཛད་པའི་སྟོན་པ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེ་བ་དེ་ཉིད་ཀྱི་རྣམ་པ་ཐམས་ཅད་མཁྱེན་པའི་ངོ་བོ་ཆོས་ཉིད་ནང་གསལ་ལ་ལྟོས་ནས་ཐམས་ཅད་མཁྱེན་ལ། རྣམ་པ་ཆོས་ཅན་ཕྱིར་གསལ་ལ་ལྟོས་ནས་རྣམ་པ་ཐམས་ཅད་མཁྱེན་པའི་ཡེ་ཤེས་སུ་སྣང་བའོ། །ཞེས་ཀུན་མཁྱེན་ཆེན་པོས་བཞེད་དོ། །ཡེ་ཤེས་ཀྱི་དགོངས་པས་གདུལ་བྱ་སེམས་ཅན་ཁམས་གསུམ་དུ་འཁོར་ཞིང་རྒྱུད་དྲུག་ཏུ་འཁྱམས་པ་རྣམས་ཀྱི་དོན་དུ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་མཐའ་དག་རྒྱུ་མཚན་ཉིད་ཀྱི་ཐེག་པའི་སྐབས་སུ་ཆོས་འཁོར་རིམ་པ་གསུམ་དུ་འདུ་སྟེ། གསུམ་གང་ཞེ་ན། གནས་ཝཱ་རཱ་ཎ་སཱིར་བཀའ་དང་པོ་བདེན་པ་བཞིའི་ཆོས་འཁོར་ལྔ་སྡེ་ལ་སོགས་པའི་ཉན་ཐོས་རྣམས་ལ་གསུངས། གནས་བྱ་རྒོད་ཕུང་པོའི་རི་ལ་བཀའ་བར་པ་མཚན་ཉིད་མེད་པའི་ཆོས་འཁོར་ལྷ་ཚངས་པ་ལ་སོགས་ཏེ་འཁོར་ཐེག་པ་ཆེན་པོའི་རིགས་ཤ་སྟག་ལ་གསུངས། གནས་གྲོང་ཁྱེར་ཡངས་པ་ཅན་དུ་བཀའ་ཐ་མ་ངེས་པ་དོན་གྱི་ཆོས་འཁོར་གདུལ་བྱ་རིགས་ཅན་སྣ་ཚོགས་པ་ལ་གསུངས།

---

^{[མ་དཔེ་གཟིགས་ན་འདིར་གནོན།]}

འབྲས་བུ་གསང་སྔགས་ཀྱི་ཐེག་པའི་སྐབས་སུ་རྒྱུད་སྡེ་བཞིར་འདུ་སྟེ། བདེ་མཆོག་རོལ་བའི་རྒྱུད་ལས། བྱ་བ་བྲམ་ཟེ་གཙང་དང་བསྟུན། །སྤྱོད་པ་རྗེའུ་རིགས་དེ་བས་ལྷག །རྣལ་འབྱོར་རྒྱལ་པོའི་འཁོར་ཚོགས་མང༌། །གཞི་དམངས་གདོད་ནས་གྲོལ་བ་སྟེ། །གཞན་དུ་སུ་ལའང་མ་བསྟན་པར། །མཛེས་མ་ཁྱོད་ལ་བསྟན་པ་ཡིན། །ཞེས་མི་རིགས་བཞིར་དགོངས་ནས་རྒྱུད་སྡེ་བཞིར་བསྟན་པ་དང༌། དེའང་ཞིབ་ཏུ་དབྱེ་ན་གང་ཟག་གི་བློ་རིགས། དུས་རྣམ་པ་བཞི་ལ་སོགས་པར་དགོངས་ཚུལ་རྣམ་གྲངས་སོ་སོར་དབྱེ་ཡང་འདིར་ཡི་གེ་མངས་སུ་དོགས། གཉིས་པ་ནི། སྔ་འགྱུར་སྤྱི་ལུགས་ཀྱི་ཐེག་རིམ་དགུ་དང་རྒྱུད་སྡེའི་རྐང་གྲངས་ཀྱི་རྣམ་པར་གཞག་པ་ཅུང་ཟད་འགྲེལ་ན། སྒྱུ་འཕྲུལ་རྩ་རྒྱུད་ལས། འདུལ་བ་མདོ་སྡེ་ཆོས་མངོན་དང༌། །དམ་ཚིག་བསྒྲུབ་དང་གྲུབ་པ་དང༌། །སྐུ་དང་གསུང་དང་ཐུགས་ཀྱི་རྒྱུད། །ཅེས་མདོར་བསྟན་ནས་དབང་པོའི་བྱེ་བྲག་ལ་དགོངས་པ་ཞིབ་ཏུ་དབྱེ་ན། བཀོད་པ་ཆེན་པོ་ལས། ཆུང་ངུ་གསུམ་ལ་བསྟན་པ་ནི། །མཚན་མར་འཛིན་པ་ཉན་ཐོས་ཏེ། །འདུ་ཤེས་ཅན་ལ་རང་རྒྱལ་ཉིད། །རྟོག་འཇུག་ཅན་ལ་བྱང་སེམས་སོ། །འབྲིང་པོ་གསུམ་ལ་བསྟན་པ་ནི། །རབ་ཏུ་དམན་ལ་བྱ་བ་སྟེ། །དམན་པ་རྣམས་ལ་སྤྱོད་པའོ། །རྣམ་ཤེས་ཅན་ལ་རྣལ་འབྱོར་ཉིད། །ཆེན་པོ་གསུམ་ལ་བསྟན་པ་ནི། །སེམས་ཡས་པ་ལ་བསྐྱེད་པ་སྟེ། །སེམས་བཅུད་ཅན་ལ་

---

^{[མ་དཔེ་གཟིགས་ན་འདིར་གནོན།]}

རྫོགས་པ་ཉིད། །མཆོག་གསང་རབ་ལ་རྫོགས་པ་ཆེ། །ཞེས་དབང་པོ་བྱེ་བྲག་ལ་ཕྲ་མོར་ཕྱེ་བའི་ཐེག་པ་རིམ་པ་དགུར་གསུངས་ཤིང་དེ་ལྟ་བུའི་ལྟ་སྤྱོད་དང་ལམ་གྱི་ཁྱད་པར་ཇི་འདྲ་ཞིག་གོ་སྙམ་ན། བདག་ཅག་གི་གཙུག་རྒྱན་གཏེར་ཆེན་ཆོས་ཀྱི་རྒྱལ་པོ་ངེས་པ་དོན་གྱི་ཐམས་ཅད་མཁྱེན་པ་པྲཛྙཱ་རསྨིའི་ཞལ་སྔ་ནས་འདི་སྐད་གསུངས་ཏེ། དང་པོ་ཉན་ཐོས་ཀྱི་ཐེག་པས་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་པས། ཐར་བ་དམ་པའི་ལམ་བདེན་པ་བཞི་ལ་ཞུགས་ནས་རང་དོན་དུ་ཕུང་སོགས་བདག་འཛིན་གྱི་འཆིང་བ་སྤོང་བ་ལ། གང་ཟག་གི་བདག་མེད་བསྒོམས་ནས་འཁོར་བའི་རྒྱུན་བཅད་པས། དགྲ་བཅོམ་མངོན་དུ་བྱེད་པའོ། །ཞེས་གསུངས་པ་ལྟར་བདེན་པ་བཞི་ལས་སྡུག་བསྔལ་ཤེས་པར་བྱས། ཀུན་འབྱུང་སྤང་བར་བྱས། འགོག་པ་མངོན་དུ་བྱས། ལམ་རྒྱུད་ལ་བརྟེན་ནས་ང་མེད་བདག་མེད་ཀྱི་གཞི་རྩ་བཅད་ནས་བསྒོམས་ཏེ་འབྲས་བུ་མངོན་དུ་བྱ་བའོ། །ཡང་སྔ་མའི་འཕྲོ་ལས། གཉིས་པ་རང་རྒྱལ་གྱི་ཐེག་པས་ཕུང་སོགས་རང་བཞིན་མེད་པར་རྟོགས་པའི་སྟེང་དུ་ཕྱི་རོལ་གྱི་གཟུང་བ་ཡུལ་གྱི་ཆོས་རགས་པ་རྣམས་སྣང་ལ་ཞེན་མེད་ཆུ་ཟླ་ལྟ་བུའི་ཚུལ་གྱིས་རྟེན་འབྲེལ་བཅུ་གཉིས་ལུགས་འབྱུང་ལུགས་ལྡོག་ཏུ་བསྒོམས་པས། ཉོན་མོངས་པ་རང་སར་གྲོལ་བས་རང་སངས་རྒྱས་མངོན་དུ་བྱེད་པའོ། །དེ་གཉིས་ཀས་ལྷག་པ་ཚུལ་ཁྲིམས་ཀྱི་བསླབ་པ་དང༌། ཏིང་ངེ་འཛིན་གྱི་ཕུང་པོ་སྦྱོང་ཞིང་གོམས་པར་བྱེད་པས་

---

^{[མ་དཔེ་གཟིགས་ན་འདིར་གནོན།]}

འདུལ་བ་དང་མདོ་སྡེའི་ཐེག་པ་གཉིས་ཀ་བསྟན་པའོ། །ཞེས་གསུངས་པ་ལྟར། རང་སངས་རྒྱས་ལ་བསེ་རུ་ལྟ་བུ་དང༌། ཚོགས་ན་གནས་པ་གཉིས་སུ་ཡོད་ཅིང༌། གཟུང་བ་ཆོས་ཀྱི་བདག་མེད་ཀྱིས་ཕྱི་རོལ་གྱི་ཡུལ་ཐམས་ཅད་རང་བཞིན་མེད་པར་བསྒོམ། འཛིན་པ་ཆོས་ཀྱི་བདག་མེད་ཀྱིས་འཛིན་བྱེད་ཀྱི་ཤེས་པ་སྐྱེ་འགག་གནས་གསུམ་དང་བྲལ་བའི་སྟོང་ཉིད་སྒོམ་པ་སྟེ། གཟུང་འཛིན་གཉིས་ཀྱི་བདག་མེད་སོ་སོའི་འགྲོས་སུ་སྨྲས་པ་ལས་ཕྱི་མ་ནི་ཐེག་པ་ཆེན་པོའི་རྟོགས་པ་ཡིན་ནོ། །གསུམ་པ་བྱང་སེམས་ཀྱི་ཐེག་པ་ནི། སྔ་མའི་འཕྲོ་ལས་ཆོས་ཐམས་ཅད་རང་བཞིན་མེད་པར་རྟོགས་ཤིང༌། སྙིང་རྗེ་ཆེན་པོས་གཞན་དོན་རླབས་པོ་ཆེ་སྤྱོད་པའི་རྒྱུ་དམ་པ་བདེན་གཉིས་ཀྱི་ཚུལ་ཏེ། དེ་ཡང་རྒྱུ་འབྲས་མི་བསླུ་བར་ངེས་པའི་ཆོས་ཅན་མཚན་མར་སྣང་བའི་བློ་ཡི་ཡུལ་དུ་སྣང་རུང་རྣམས་ནི་ཀུན་རྫོབ་ཀྱི་བདེན་པ་སྟེ། རྒྱུད་བླ་མའི་འགྲེལ་པར། ལམ་བདེན་ཐམས་ཅད་ནི་འདུས་བྱས། འདུས་བྱས་ཐམས་ཅད་ཀུན་རྫོབ་སྟེ། ཞེས་དང༌། ཆོས་ཉིད་རང་བཞིན་དུ་གནས་པའི་སྟོང་ཉིད་དང་རྗེས་སུ་མཐུན་པའི་ཤེས་རབ་སྤྲོས་པ་རྣམ་པར་ཞི་བའི་རྣམ་པ་དང་བཅས་པ་ནི་དོན་དམ་པའི་བདེན་པ་སྟེ། བདེན་གཉིས་ལས། སྐྱེ་མེད་སྤྲོས་ཀུན་ཞི་བ་ལ། །དོན་དམ་ཞེས་པའི་བརྡ་མཛད་དོ། །ཞེས་གསུངས་པས་ཆོས་ཀུན་ལྐོག་ཏུ་མ་གྱུར་པར་ཏིང་ངེ་འཛིན་དུ་མ་ལ་དབང་བསྒྱུར་བས་ན་

---

^{[མ་དཔེ་གཟིགས་ན་འདིར་གནོན།]}

མངོན་པའི་སྡེ་སྣོད་དོ་ཞེས་སྙིང་པོར་དྲིལ་ནས་གསུངས་ཤིང༌། གཞུང་བརྟག་པ་ཁ་ཅིག་གིས་རྫོགས་ཆེན་གྱི་ལྟ་བ་འདི་དབུ་མ་སེམས་ཙམ་པའི་ལྟ་བ་དང་ཆོས་མཚུངས་སོ་ཞེས་ཚིག་སྐམ་ཕུབ་ལ་ཁྱེར་ནས་སུན་འབྱིན་པར་བྱེད་མོད། ཅི་ཀ་གྲོགས་པོ་ཁྱོད་ཀྱིས་འོལ་ཚོད་ཀྱི་འཁྱོག་གཏམ་ལ་བརྟེན་ནས་ཐེག་པའི་ཡང་རྩེ་ལ་སྨོད་པར་མ་བྱེད་ཅིག །ཐེག་པ་འོག་མ་ནས་གསུངས་པའི་གྲུབ་མཐའ་སྨྲ་བ་བཞིའི་འདོད་ལུགས་ཀྱང་རྫོགས་ཆེན་གྱི་བསྟན་བཅོས་ཆེན་པོ་རྣམས་སུ་གཏན་ལ་ཕེབས་ཏེ། གཙོ་བོར་ནི་གངས་ཅན་གྱི་ལྗོངས་འདིར་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་དུ་སོན་པས་ཉི་ཟླ་ལྟར་གྲགས་པ་ཀུན་མཁྱེན་དྲི་མེད་འོད་ཟེར་གྱི་བཀའ་འབུམ་ངལ་བསོ་སྐོར་གསུམ་རྩ་བ་སེམས་ཉིད་ངལ་བསོ། འགྲེལ་བ་ཤིང་རྟ་ཆེན་མོ། རྩ་བ་བསམ་གཏན་ངལ་བསོ། འགྲེལ་བ་ཤིང་རྟ་རྣམ་དག །རྩ་བ་སྒྱུ་མ་ངལ་བསོ། འགྲེལ་བ་ཤིང་རྟ་བཟང་པོ་བཅས། རྩ་འགྲེལ་དང་མཛོད་བདུན་ཡིད་བཞིན་མཛོད། མན་ངག །གྲུབ་མཐའ། ཐེག་མཆོག །ཚིག་དོན་ནམ་འོད་གསལ། གནས་ལུགས། ཆོས་ཉིད་རིན་པོ་ཆེའི་མཛོད་དེ་བདུན་ནོ། །ལ་སོགས་པས་ཤེས་ལ། ཀུ་སུ་ལུ་དག་གིས་ཀྱང་བརྟག་ཏུ་ཡོད་དེ། དང་པོ་ཉན་ཐོས་ལ་གཉིས། བྱེ་བྲག་ཏུ་སྨྲ་བ་དང་མདོ་སྡེ་པའོ། །སྔ་མས་ནི། ཕྱི་རོལ་གྱི་སྣང་བ་བདེན་པར་འདོད། ཕྱི་མ་ནི། ཕྱི་རོལ་གྱི་སྣང་བ་ཐམས་ཅད་རྡུལ་ཕྲ་རབ་ལས་གྲུབ་པར་འདོད་དོ། །ཐེག་པ་ཆེན་པོ་ལ་གཉིས་

---

^{[མ་དཔེ་གཟིགས་ན་འདིར་གནོན།]}

སེམས་ཙམ་པ་དང་དབུ་མའོ། །དང་པོ་ལ་གཉིས། སེམས་ཙམ་རྣམ་བདེན་པ་དང༌། སེམས་ཙམ་རྣམ་རྫུན་པའོ། །དེ་ཡང་ལུང་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་པ་ལྟར་སེམས་ཙམ་རྣམ་བདེན་པས་མདོ་སྡེ་བ་ལ་འདི་སྐད་ཅེས་བསྙད་དོ། །ཁྱེད་ཅག་རྣམས་ཕྱི་རོལ་གྱི་སྣང་བ་རྡུལ་ཕྲ་རབ་ལས་གྲུབ་པ་མི་འཐད་དེ། རྡུལ་ཕྲན་ཆ་མེད་ལའང༌། ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅུའི་བར་དུ་ཕྱེ་བས། རྡུལ་ཕྲན་ཆ་མེད་དེ་ཡང་མ་གྲུབ་པར་རྟོགས་སོ། །ཞེས་སྨྲས་ནས། རང་ལུགས་འདི་ལྟར་འཇོག་སྟེ། སྣང་བ་ཐམས་ཅད་སེམས་སུ་བདེན་པར་འདོད་ཅིང༌། ཕྱི་རོལ་གྱི་སྣང་བ་ཐམས་ཅད་སེམས་འཁྲུལ་བའི་སྣང་བ་ལས་ཕྱི་རོལ་ཏུ་མ་གྲུབ་སྟེ་དཔེར་ན་རྨི་ལམ་གྱི་སྣང་བ་མ་གྲུབ་པ་བཞིན་ནོ་ཞེས་སྣང་བ་སེམས་སུ་བདེན་པར་ཁས་བླངས་ནས་སེམས་ཀྱི་གཞི་རྩ་མ་ཆོད་དོ། །སེམས་ཙམ་རྣམ་རྫུན་པས། ཕྱི་རོལ་གྱི་ཡུལ་ཡང་མེད། འཛིན་བྱེད་ཀྱི་ཤེས་པ་ཡང་མེད། གཟུང་འཛིན་གཉིས་མེད་རྟོགས་པའི་ཤེས་པ་རང་རིག་རང་གསལ་འདི་བདེན་པར་འདོད་དེ། འདི་ནི་ཀུན་གཞིའི་རྣམ་ཤེས་ཡིན་ལ། འདིའི་སྟེང་དུ་ལས་འབྲས་ཁས་ལེན་པའོ། །དེ་ནི་གཉེན་པོས་བཅིངས་ཏེ་སྤྲོས་པའི་མཐའ་བཞི་དང་བྲལ་བར་མ་ནུས། འོན་ཀྱང་འདི་ནི་ད་ལྟའི་མོས་སྒོམ་པ་ཕལ་གྱིས་ཐམས་ཅད་སེམས་ཡིན་ཞེས་ཆེད་

---

^{[མ་དཔེ་གཟིགས་ན་འདིར་གནོན།]}

འཛིན་བྱས་པའི་ཤེས་པ་ལ་སྒོམ་དུ་འདོད་པ་དང་མཚུངས་པ་ལྟར་སྣང་བ་ནི་གྲུབ་པའི་མཐའ་མ་ལོན་པའི་དམུན་པོ་ཁོ་ན་ལས། དོན་རྒྱུད་རྟོགས་པའི་མངའ་བདག་རྒྱ་བོད་ཀུན་ཏུ་གྲགས་པ་རྣམས་ཀྱི་ནི་དགོངས་པའི་དྲི་ཙམ་ཡང་མ་ཡིན་དེས་ན་རྫོགས་ཆེན་གྱི་ལྟ་བ་སེམས་ཙམ་པའོ་ཟེར་བ་དང༌། ཕྱག་རྫོགས་ཐུན་མོང་ལ་གྲགས་པའི་ཐ་མལ་གྱི་ཤེས་པ་ལ་སྐུར་བ་དག་ཕྱོགས་ལྷུང་གི་མཁྲིས་པས་འདྲེན་བྱེད་ཀྱི་མདངས་ཕྲོག་ཏེ་དུང་གི་ཁ་དོག་སེར་པོར་སྣང་བ་ལས་ཤེས་བྱེད་ཅི་ཡང་མེད་དོ། །གཉིས་པ་ངེས་དོན་དབུ་མ་ཆེན་པོ་ལ་གཉིས། རང་རྒྱུད་པ་དང་ཐལ་འགྱུར་བའོ། །དང་པོ་ནི། ཡང་དག་པའི་ཀུན་རྫོབ་དང་ལོག་པའི་ཀུན་རྫོབ་ཁྱད་པར་འབྱེད་ལ། དེས་ནི་གཉིས་ཆོས་ཀྱི་དྲི་མ་མ་སྤངས་སོ། །གཉིས་པ་དབུ་མ་ཐལ་འགྱུར་བ་ནི་འདི་སྐད་དུ། ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་གསུངས་ནས་ཆོས་ཐམས་ཅད་ངོ་བོ་ཉིད་མེད་པ་དང༌། ཡུལ་རང་ངོས་ནས་མ་གྲུབ་པ་དང༌། རང་གི་མཚན་ཉིད་ཀྱིས་མ་གྲུབ་པ་དང༌། ཅིའི་ངོ་བོར་ཡང་མ་གྲུབ་པ་སྟེ། དབུ་མ་རྩ་ཤེའི་མཆོད་བརྗོད་ལས། གང་གི་རྟེན་ཅིང་འབྲེལ་བར་འབྱུང༌། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །ཞེས་མཐའ་བརྒྱད་སྤྲོས་བྲལ་དུ་གཏན་ལ་ཕབ་ཅིང༌། བདག་ཅག་གི་སྟོན་པས་བྱང་ཆུབ་བརྙེས་

---

^{[མ་དཔེ་གཟིགས་ན་འདིར་གནོན།]}

པའི་ཚུལ་བསྟན་ཚེའང༌། ཟབ་ཞི་སྤྲོས་བྲལ་འོད་གསལ་འདུས་མ་བྱས། །ཞེས་སོགས་ཚིགས་སུ་བཅད་པ་ཤློ་ཀ་གསུངས་པའི་དགོངས་པ་འདི་ཉིད་ཡིན། རང་ལུགས་ལའང་ཀུན་མཁྱེན་ཆེན་པོས། ལྟ་བའི་གནས་ལུགས་ཐལ་འགྱུར་དང་མཚུངས་གསུངས་པ་ལྟར་ཁ་ནང་དུ་ལོག་ནས་བསྒོམས་ན་བཤད་རྒྱུད་ཀྱི་གོ་ཡུལ་ཙམ་མ་ཡིན་པར་རིག་པ་དྲི་མེད་ཀ་ནས་དག་པ་དེ་ལ་སྤྲོས་བྲལ་གྱི་གནས་ལུགས་ཕྱིན་ཅི་མ་ལོག་པར་གནས་ཤིང༌། དེའི་དབང་གིས་ཆེན་པོ་རྣམ་པ་གསུམ་གྱི་ལྟ་བ་གཏན་ལ་འབེབས་པ་ཆུ་བརྒྱ་ཟམ་འོག་གཅིག་ཏུ་འདུ་བ་ལྟར་འདི་ཉིད་དུ་དགོངས་པ་གཅིག་མོད། འོན་ཀྱང་ཐོས་པའི་ནོར་དང་བྲལ་བས་གྲུབ་མཐའི་གནད་མ་ལོངས་པ་ཁ་ཅིག་གིས་ཞི་གནས་ཀོ་ལེ་བའི་ཉམས་མྱོང་ཆོས་སྐད་དུ་ཆེན་པོ་རྣམ་པ་གསུམ་གྱི་ལྟ་བ་ལ་འདམ་ཀ་མེད་ཅེས་ལོ་ཀའི་ཆོས་ཀླུ་ཡི་གྲངས་ལྡན་གྱི་དབང་དུ་ཁྱད་པར་ཅན་གྱི་གསང་བ་ལ་མན་ངག་མེད་པ་ལྟར་བྱེད་པ་ནི་རྡོ་རྗེ་སྙིང་པོའི་བསྟན་པ་ལ་རྒྱབ་ཀྱིས་ཕྱོགས་པ་སྟེ། དེ་ཅིའི་ཕྱིར་ཞེ་ན། མཐའ་བརྒྱད་སྤྲོས་བྲལ་གྱི་ངང་དུ་ལྟ་བ་ཐམས་ཅད་གཏན་ལ་འབེབས་པ་མཐུན་ཞིང༌། དགོངས་པའི་ཞེ་ཕུགས་ལའང་སྤྲོས་བྲལ་ཁོ་ན་ལས་ལྷག་པའི་ལྟ་བ་ཞིག་མེད་པར་འགྲུབ་ཀྱང༌། མདོ་སྔགས་གཉིས་སྤྲོས་བྲལ་གྱི་དགོངས་པ་ལེན་ཕྱོགས་ཆེས་མི་མཚུངས་པའི་ཁྱད་པར། འདི་ལྟར་ཕར་ཕྱིན་ཐེག་པ་བས་

---

^{[མ་དཔེ་གཟིགས་ན་འདིར་གནོན།]}

ནི་ཡོད་མེད་རྟག་ཆད་ཀྱི་མཐའ་ཤེས་བྱ་ཁོ་ནས་གཏན་ལ་ཕབ་ནས་དབུ་མ་ལ་གནས་པའི་སྟོང་པ་ཉིད་དེ་ཡང༌། ཞི་གནས་ཀྱི་འཇོག་སྒོམ་དང་ལྷག་མཐོང་གི་དཔྱད་སྒོམ་སོ་སོར་རྣམ་གྲངས་ཐ་དད་དུ་འབྱེད་ཅིང་རྣམ་རྟོག་དང་ཉོན་མོངས་པ་སྤངས་བསྒྱུར་ལམ་དུ་ཁྱེར་བ་གསུམ་སོ་སོའི་སྒོ་ནས་ས་ལམ་ཡུན་རིང་པོར་བགྲོད་པས་པཎྜི་ཏའི་དཔྱད་བསྒོམ་ཞེས་ཁ་ཕྱིར་བལྟས་ཀྱི་སྟོང་ཉིད་དུ་ངེས་ལ། སྔགས་ལམ་པས་ནི་རིམ་གཉིས་ཟུང་འཇུག་ལ་གཙོ་བོར་འདོན་ཞིང༌། དེ་ལ་ཡང་ལྟ་བའི་སྙིང་པོ་ནི་གནས་ལུགས་ཡེ་བབས་ཀྱི་གཤིས་ལ་སྤྲོས་བྲལ་ལྷུན་གྲུབ་ཏུ་མཆིས་པའི་གནད་ཀྱི་མྱུར་ལམ་སོར་བཞག་ལ་ཡིད་དཔྱོད་བློས་བཏགས་ཀྱིས་བཟོ་མི་འཆོས་པར་ཀུ་སཱ་ལིའི་འཇོག་སྒོམ་ལ་གཞོལ་བས་ཁྱད་པར་བྱ་སྟེ། འོ་ན་ཕྱག་རྫོགས་གཉིས་ལ་ཁྱད་པར་མེད་པར་ཐལ་ཞེ་ན། ཁ་ཅིག་གིས་དེ་ལྟར་ཁས་བླངས་མོད་ཀྱི་མགོ་རྨོངས་པ་ཙམ་དུ་ཟད་པས་འཇིག་རྟེན་མིག་གཅིག་ཀུན་མཁྱེན་ལྔ་བ་ཆེན་པོས། དགའ་རབ་ཤྲཱི་སིང་པད་འབྱུང་བི་མ་ལ། །བཻ་རོ་སོ་ཟུར་གནུབས་ཉང་ལ་སོགས་པའི། །བཀའ་གཏེར་གནད་ལ་སྦྱངས་དམན་རྙིང་རློམ་འགས། །ཕྱག་རྫོགས་མ་ཕྱེད་བསྲ་བསྲེའི་ཆོས་སྐད་མང༌། །ཞེས་གསུངས། དེས་ན་རགས་པའི་སྒོ་ནས་དབྱེ་ན། ཕྱག་ཆེན་པ་ནི་ཆོས་ཅན་ལ་ཆོས་ཉིད་ཀྱིས་རྒྱས་བཏབ་ནས་སྣང་རིག་ངོས་བཟུང་བྲལ་བའི་གསལ་སྟོང་དུ་བསྐྱེལ་བ་ཤེས་ཆེ་ལ།

---

^{[མ་དཔེ་གཟིགས་ན་འདིར་གནོན།]}

རྫོགས་ཆེན་པ་ནི་ཆོས་ཅན་ཐམས་ཅད་ཆོས་ཉིད་བྱང་ཆུབ་སེམས་ཀྱི་སྣང་ཆར་སྒྱུ་མ་ལྟ་བུའི་རོལ་པར་ཤར་ཡང༌། སྟོང་ཆ་ནས་རང་བཞིན་གྱིས་སྤྲོས་པའི་མཐའ་དང་བྲལ་བ་བྱས་ཆོས་བློ་ལས་འདས་པའི་དབྱིངས་བཅིང་གྲོལ་གཟོད་ནས་དག་པའི་ངང་དུ་ཚུར་རྫོགས་པས་འཁྲུལ་བ་ཀ་ནས་དག་པ་དེ་ཉིད་ལ་བཟོ་མི་འཆོས་པས་ཁྱད་པར་བྱེད་ལ། བོད་ཀྱི་ཀློག་པ་ཐོས་བསམ་པ་ཕལ་གྱི་བློ་ལ་འདི་ལྟའི་བཤད་ཚུལ་མ་བབས་པར་མདོ་སྔགས་གཉིས་ཀྱང་ཐབས་ཀྱིས་ཁྱད་པར་མ་གཏོགས། ཏིང་ངེ་འཛིན་གྱི་སྒོ་ནས་དབྱེ་རྒྱུ་མེད་ཅེས་གསུངས་ཀྱང་དཔལ་འཁོར་ལོ་སྡོམ་པ་གསང་བ་བསམ་གྱིས་མི་ཁྱབ་པའི་རྒྱུད་ལས། ཉན་ཐོས་ལ་སོགས་ཐེག་ཆུང་ལ། །མན་ངག་ཡོད་པ་མ་ཡིན་ཏེ། །ལྟ་བ་སྤྱོད་པ་སེམས་བཟུང་དང༌། །རྒྱུ་དང་ལམ་དང་འབྲས་བུ་ས། །དུས་དང་ལོངས་སྤྱོད་རྣལ་འབྱོར་དང༌། །བདག་གཞན་དོན་དང་དགོས་པ་དང༌། །ངལ་དུབ་མཐའ་སྤང་ཚེགས་ཆུང་དང༌། །ཚོགས་བསགས་པ་ཡི་ཁྱད་པར་དང༌། །ཁྱད་པར་རྣམ་པ་བཅོ་ལྔ་ཡིས། །རིག་འཛིན་ཐེག་པ་ཁྱད་པར་འཕགས། །ཞེས་དང༌། གཞན་ཡང་ཐབས་ཞགས་ལས། གསང་ཚུལ་ཚུལ་ཆེན་ཤིན་ཏུ་རྨད་བྱུང་བ། །ལམ་གྱི་ནང་ནས་ཉེ་ལམ་ཆེན་པོ་སྟེ། །ཐབས་ཀྱི་ཐེག་པའི་ནང་ནས་མ་ནོར་དམ་པ་སྟེ། །ཤེས་རབ་ནང་ནས་ཤེས་རབ་ཁྱད་པར་ཅན། །ཞེས་པ་འདིས་ཐབས་ཤེས་གཉིས་ཀས་འཕགས་པར་བསྙོན་མེད་དུ་གྲུབ། རང་ལུགས་སུ་ཀུན་མཁྱེན་

---

^{[མ་དཔེ་གཟིགས་ན་འདིར་གནོན།]}

ཆེན་པོས། ཆོས་ཐམས་ཅད་སྤྲོས་པ་ཉེ་བར་ཞི་བ་ཁས་ལེན་ཐམས་ཅད་དང་བྲལ་བ་ནི་མདོ་ལུགས་ལའང་ཡོད་མོད། ད་ལྟའི་སེམས་འདི་སྤུ་མ་བརྗེས་པར་སངས་རྒྱས་སུ་འགྲུབ་པར་འདོད་པའི་ཤེས་རབ་ཕ་རོལ་ཏུ་ཕྱིན་པ་ལ་ག་ལ་ཡོད། དེས་ན་ཐབས་ཤེས་གཉིས་ཀས་གསང་སྔགས་ཁྱད་པར་འཕགས་ཏེ། དོན་གཅིག་ན་ཡང་མ་རྨོངས་དང༌། །ཞེས་པ་འདི་ཡང་ཕར་ཕྱིན་ལ་རྨོངས་པའི་སྒྲིབ་པ་ཕྱོགས་གཅིག་ཡོད་པར་གསུངས། ཞེས་བཀའ་སྩལ་ཞིང་ཚུལ་གསུམ་སྒྲོན་མེ་ལ་སོགས་པའི་ལུང་འདྲེན་མང་པོ་དང་བཅས་ཁྱད་འབྱེད་ཞིབ་པར་འདོད་ན་གྲུབ་མཐའ་རིན་པོ་ཆེའི་མཛོད་ཀྱི་ལེའུ་ལྔ་པའི་ས་བཅད་དང་པོ་ལ་དཔྱོད་པའི་ཤེས་རབ་ཀྱི་འདྲེན་བྱེད་གཡོས་ཤིག །གནང་བའི་རྗེས་སུ་འབྲང་བ་ཡིན་ལ། ཁྱད་པར་རྫོགས་ཆེན་ཐུན་མོང་མ་ཡིན་པའི་སྐབས་སུ་ནི། རྒྱུད་ལས། ལྟ་བ་རྣམ་པ་གཉིས་ཡིན་ཏེ། །ཆོས་ཅན་ལྟ་དང་ཆོས་ཉིད་ལྟ། །ཨ་ནུ་མན་ཆད་རང་འདོད་པས། །ཆོས་ཅན་ཉིད་ལ་ལྟ་ལྟ་ནས། །ཆོས་ཉིད་དོན་ལ་རྡུལ་རེག་མེད། །ཨ་ཏི་རྣམ་པ་ཁ་ཅིག་གིས། །འདི་ཉིད་ཕྱོགས་ཙམ་མཐོང་བ་མེད། །རྫོགས་པ་ཆེན་པོ་ཐིག་ལེའི་སྐོར། །ཕྱི་དང་ནང་དང་གསང་བས་ཀྱང༌། །འདི་ཉིད་དོན་ལ་རེག་པ་མེད། །དེ་ཕྱིར་གསང་ཆེན་མན་ངག་གི །ལྟ་ཉིད་ཤིན་ཏུ་གསང་བའོ། །ཞེས་གསུངས་པ་འདི་ནི་མན་ངག་ལུས་དང་འདྲ་བའི་ཕྱི་སྐོར། མིག་དང་འདྲ་བའི་ནང་སྐོར། སྙིང་དང་འདྲ་བའི་གསང་སྐོར། ཐམས་ཅད་རྫོགས་པའི་སྐྱེས་བུ་འདྲ་བའི་གསང་བ་བླ་མེད་ཅེས་དཔེ་བརྗོད་དུ་བཞག་ནས་སློབ་དཔོན་བི་མ་ལའི་སྒྲོན་མ་སྣང་བྱེད་ལས་གསུངས་སོ། །སྡེའི་ནང་ནས་ཀྱང་ཡང་གསང་ཁོ་ནའི་བསྔགས་པ་སྟེ། གཞན་ཡང་འོག་མ་འོག་མ་ཀློང་སྡེ། སེམས་སྡེ་སོགས་སོ་སོའི་ཁྱད་འབྱེད་ཟབ་ཁྱད་སོགས་ཀྱི་འགྲེལ་བཤད་ནི།

---

^{[མ་དཔེ་གཟིགས་ན་འདིར་གནོན།]}

ཀུན་མཁྱེན་ཆོས་རྗེའི་ཞབས་དང༌། མངའ་རིས་རིག་འཛིན་ཆེན་པོ་པཎ་ཆེན་པདྨ་དབང་རྒྱལ་སོགས་ལས་དཔྱད་བཟོད་པ་མེད་པས། སྤྲོས་པ་ལ་དགའ་བ་རྣམས་དེ་དག་གི་བཀའ་འབུམ་སྤྱི་དང་ཁྱད་པར་ཀུན་མཁྱེན་རིན་པོ་ཆེའི་ཐེག་མཆོག་མཛོད་རྫོགས་པ་ཆེན་པོའི་རྒྱུད་བཅུ་བདུན་དང༌། མན་ངག་བརྒྱ་བཅུ་དགུའི་དོན་འགྲེལ་ཡིན་པས་མཛོད་བདུན་གྱི་ནང་ཚན་ནས་ཀྱང་བརྗོད་བྱ་རྒྱ་ཆེ་བ་གོ་དོན་ལྷོངས་ཆེ་བ་ཡིན་ནོ། །ཤོག་གྲངས་ལྔ་བརྒྱ་པ་ལ་ཞིབ་མོར་དཔྱད་ན། རྫོགས་ཆེན་གྱི་གྲུབ་མཐའི་སྙིང་པོའི་ངོས་འཛིན་ཐུན་མོང་མ་ཡིན་པའི་མཚང་རིག་ཅིང་རྫོགས་ཆེན་དུ་རློམ་པའི་ཡིག་ཆ་ཕལ་ཆེར་གྱི་ཀླད་པ་འགེམས་བར་གོ་བས་བློ་གྲོས་དང་ལྡན་པ་རྣམས་ཀྱིས་ལྟད་མོ་ཞིབ་མོར་བལྟ་བར་བྱོས་ཤིག །ད་ནི་གསང་སྔགས་ཕྱི་རྒྱུད་རྣམས་ཀྱི་ལྟ་སྒོམ་སྤྱོད་འབྲས་སྟོན་ཏེ། སྔ་མའི་འཕྲོ་ལས། བཞི་པ་ཕྱི་ཐུབ་པ་རྒྱུད་ཀྱི་རྣམ་པར་གཞག་པ་ལ་གསུམ་ལས། ཀྲཱི་ཡ་བྱ་རྒྱུད་ཀྱི་ཐེག་པ་ལ་ཡང་དག་པ་གསུམ་དང་གཙང་སྦྲ་གསུམ་སྤྱོད་པས། བདག་དང་ལྷ་གཉིས་རྗེ་འབངས་ཀྱི་ཚུལ་དུ་བསྒྲུབས་པས་དངོས་གྲུབ་འདོད་པ་སྟེ། ལུས་དག་པས་ལྷའི་སྐུར་བསྒོམ་སྟེ་ཁྲུས་གསུམ་དང་གོས་གསུམ་བརྗེ་བ། དཀར་གསུམ་དང་མངར་གསུམ་བསྟེན་པ། དམིགས་པ་ཡུལ་གྱི་གནད་གསུམ་སྟེ། སྐུ་གཟུགས་བརྙན་ལ་དམིགས་པས་རྣམ་པ་གསལ་བ། གསུང་ཡིག་འབྲུ་ལ་དམིགས་པས་སྒྲ་གྲག་སྔགས་དང༌། ཐུགས་ཕྱག་མཚན་ལ་དམིགས་པས་དྲན་བསམ་ཐམས་ཅད་

---

^{[མ་དཔེ་གཟིགས་ན་འདིར་གནོན།]}

ཏིང་ངེ་འཛིན་གྱི་ལྷར་གསལ་བ། ལྷ་ཡེ་ཤེས་སེམས་དཔའ་དང་བདག་དམ་ཚིག་སེམས་དཔའ་རྗེ་ཁོལ་གྱི་རྣམ་པ། ཐུན་མོང་གི་དངོས་གྲུབ་ལ་ཀུན་རྫོབ་མི་སྤོང༌། མཆོག་གི་དངོས་གྲུབ་ལ་དོན་དམ་སེམས་ཉིད་ལས་གཞན་མི་བསྒྲུབ། ལྷ་མོ་རྣམས་དང་ཕན་ཚུན་བལྟས་པ་ལས་བྱུང་བའི་བདེ་བས་ཚིམ་པའོ། །ལྔ་པ་སྤྱོད་རྒྱུད་ཨུ་པ་ཡའི་ཐེག་པ་ལ་ཡང༌། སྤྱོད་པ་ཀྲཱི་ཡ་ལྟར་སྤྱོད་ལ་ལྟ་བ་ཡོ་ག་ལྟར་འདོད་པ་མ་ནིང་གི་ཐེག་པ་ཞེས་བྱ་སྟེ། དམིགས་པ་མངོན་བྱང་ལྔ་ལ་དམིགས་པའི་དཀྱིལ་འཁོར་རྒྱལ་མཆོག་བསྒྲུབས་ནས་ལམ་མངོན་དུ་བྱེད་པའོ། །དྲུག་པ་ཡོ་ག་རྣལ་འབྱོར་རྒྱུད་ཀྱི་ཐེག་པ་ནི། ལས་རྒྱལ་མཆོག་དང་དཀྱིལ་འཁོར་རྒྱལ་མཆོག་གཉིས་ལས། ལས་འཐོར་བུ་བ་ནི་ཆོ་གའི་ཡན་ལག་གང་ཡང་རུང་བ་ལ་བརྟེན་ནས་བྱང་ཆུབ་འདོད་པ་སྟེ། མཆོད་པ་དང་སྦྱིན་སྲེག་དང་བསྙེན་པ་ལྟ་བུ་ལ་རྒྱུན་དུ་འབད་པའོ། །ལས་རྒྱལ་མཆོག་ནི། དེ་ཐམས་ཅད་དཀྱིལ་འཁོར་སྒྲུབ་པའི་ཡན་ལག་ཏུ་ཉམས་སུ་ལེན་ལ། དཀྱིལ་འཁོར་རྒྱལ་མཆོག་ནི། སའི་ཆོ་ག་ནས་དབང་བསྐུར་བ་དང་བསྡུ་ཆོག་ཡན་ལག་གང་ཟག་གཅིག་གི་ལམ་དུ་བཞག་པའོ། །དེ་ལ་ཡང་ཏིང་ངེ་འཛིན་གཙོ་བོར་བྱེད་པ་ནི། སྦྱོར་བ་དང་པོའི་ཏིང་ངེ་འཛིན་དང༌། ཡོངས་སུ་དག་པའི་ཏིང་ངེ་འཛིན་ལ་བརྟེན་ནས་ལྷ་གཅིག་བསྒོམས་ཀྱང་རུང་སྟེ། ཕྱི་ཕུང་པོ་དང་འབྱུང་བ་རྣམ་པར་དག་པ།

---

^{[མ་དཔེ་གཟིགས་ན་འདིར་གནོན།]}

ནང་ལས་དང་ཉོན་མོངས་པ་རྣམ་པར་དག་པ། གསང་བ་ཡུལ་དང་དབང་པོ་ལྔ་རྣམ་པར་དག་པ་ནས། རིགས་ལྔའི་སངས་རྒྱས་སུ་བདག་ཉིད་གྱུར་པ་ནི། ཡི་དམ་གྱི་ལྷ་དང་བདག་ཉིད་རིགས་གཅིག་གིས་བསྡུས་པའི་སྤུན་ལྟར་བསྒོམས་པས། ལྷ་ལ་བཟང་རྒྱུ་མེད་པར་ཤེས་ཏེ། དངོས་གྲུབ་རང་ལས་བྱུང་བ་དང༌། བདག་ལ་ངན་རྒྱུ་མེད་པར་རྟོགས་པས། དེ་ཉིད་སྒྱུ་ལུས་ལྷའི་སྐུར་གསལ་བར་ནུས་པས་འོག་མ་ལས་ཁྱད་པར་དུ་འཕགས་ཤིང༌། བསྐྱེད་རྒྱུའི་ལྷ་དང་བདག་གཉིས་སུ་མེད་པར་རྟོགས་པས། དོན་དམ་དང་ཀུན་རྫོབ་ཀྱི་མིང་མེད་ཅིང་ཟབ་མོ་རྣལ་འབྱོར་གྱི་ཆ་ལ་སྙོམས་པར་སྤྱོད་ཅིང༌། ཕྱག་རྒྱ་བཞི་པ་ཏིང་ངེ་འཛིན་གྱི་སྒོ་ནས་བདེན་པ་དབྱེར་མེད་ཟབ་གསལ་གཉིས་སུ་མེད་པའི་ཡེ་ཤེས་སྒོམ་ཞིང་ལང་ཚོས་སྙིང་ལ་འགྲོགས་པས་ལག་པ་ཟུང་འབྲེལ་བདེ་བས་ཚིམ་པའོ། །ཞེས་སྔགས་ཕྱི་པའི་རྣམ་གཞག་འགག་ལ་འདྲིལ་བར་གསུངས་ཤིང༌། དེ་ལྟར་སྔགས་ཕྱི་ནང་གི་ཁྱད་པར་གང་གིས་འབྱེད་ཅེ་ན། ལྟ་སྤྱོད་ཏིང་ངེ་འཛིན་གསུམ་དབྱེར་མེད་དུ་འདོད་པ་སྔགས་ནང་པ། མི་འདོད་པ་སྔགས་ཕྱི་པའོ། །ཁ་ཅིག་ན་རེ། དེ་ལྟ་ན་སྔགས་ཕྱི་པ་དང་མཚན་ཉིད་ཀྱི་ཐེག་པ་ལ་ཁྱད་པར་མེད་དམ་སྙམ་ན། ཡོད་དེ། མཚན་ཉིད་ཐེག་པས་ནི་ཀུན་རྫོབ་ལམ་དུ་བྱེད་མི་ནུས་ལ། གསང་སྔགས་ཕྱི་པས་ནི་ཀུན་རྫོབ་ལམ་དུ་བྱེད་ནུས་པས་སོ། །ད་ནི་ལྟ་སྤྱོད་ཏིང་ངེ་འཛིན་

---

^{[མ་དཔེ་གཟིགས་ན་འདིར་གནོན།]}

གསུམ་གྱི་སྒོ་ནས་དབྱེ་བ་ནང་རྒྱུད་གསུམ་གྱི་རྣམ་གཞག་བརྗོད་དེ། སྔ་མའི་འཕྲོ་ལས། ནང་པ་ཐབས་ཀྱི་རྒྱུད་གསུམ་ནི། ཤ་ལྔ་བདུད་རྩི་ལྔ་ལ་སོགས་སྤྱོད་ཅིང༌། རིག་མ་བསྟེན་པ་སོགས་སྤང་བླང་དང་གཙང་དམེ་མེད་པས་ཁྱད་པར་དུ་འཕགས་ཤིང༌། བདུན་པ་རྒྱུད་མ་ཧཱ་ཡོ་གའི་ཐེག་པ་ནི། ལྟ་བ་བདེ་སྟོང་དབྱེར་མེད་ཀྱི་ངང་ནས་ཐབས་བསྐྱེད་པའི་རིམ་པ་གཙོ་བས་ཏིང་ངེ་འཛིན་གསུམ་གྱིས་ཉམས་སུ་ལེན་པ་སྟེ། དེ་བཞིན་ཉིད་ཀྱི་ཏིང་ངེ་འཛིན་ནི། རྟོག་མེད་དུ་སང་ངེ་གསལ་ལེ་བའོ། །ཀུན་ཏུ་སྣང་བའི་ཏིང་ངེ་འཛིན་ནི་ཀུན་ཁྱབ་བྱང་ཆུབ་ཀྱི་སེམས་དོན་དེ་ཉིད་གསལ་བ་འགག་མེད་མ་ཡེངས་པའི་ཚུལ་དུ་སྒོམ་པའོ། །རྒྱུའི་ཏིང་ངེ་འཛིན་ནི་ཧཱུྃ་ལས་སེམས་དཔའ་གསུམ་བརྩེགས་སུ་སྒོམ་པ་སྟེ། བདག་ཉིད་དམ་ཚིག་སེམས་དཔའ་ལ་ཕུན་སུམ་ཚོགས་པ་བཞི་དང་ལྡན་པ། ཡིག་འབྲུའི་ཏིང་འཛིན་སེམས་དཔའ་ལ་གསལ་བ་གསུམ་དང་ལྡན་པ། ཡེ་ཤེས་པ་རྣམ་པ་བཞི་ལ་ཞི་བ་དང་ཁྲོ་བོར་གསལ་བ་ཉིད་དོ། །ཀུན་རྫོབ་ཙམ་དུ་སྦྱང་བྱ་ཕུང་པོ་ཁམས་ལ་སོགས་ལྷ་དང་ལྷ་མོའི་དཀྱིལ་འཁོར་དུ་གནས་ཏེ། ཕུང་པོ་ལྔ་དང༌། འབྱུང་བ་ལྔ་དང༌། ཡུལ་ལྔ་དང༌། ཉོན་མོངས་པ་ལྔ་ལ་སོགས་པ་སྤྱོད་ལ། དོན་ལ་སྦྱང་གཞི་དབྱིངས་དང་རང་བཞིན་རྣམ་པར་དག་པའི་སྟེང་ན། སྦྱང་བྱ་ཕུང་པོ་ཁམས་དང་གཟུང་འཛིན་ལ་སོགས་པ། སྦྱོང་བྱེད་

---

^{[མ་དཔེ་གཟིགས་ན་འདིར་གནོན།]}

བསྐྱེད་རྫོགས་ཐབས་ཀྱི་རིམ་པས། སྦྱངས་འབྲས་སྐུ་དང་ཡེ་ཤེས་སུ་འགྲུབ་པ་མིང་འདོགས་ཀྱི་གཉིས་སྣང་དང་བྲལ་བ་རྟོགས་པ་ཡིན་ནོ། །རང་འདྲའི་རིག་མ་དང་སྙོམས་པར་ཞུགས་པའི་བདེ་བ་ཆེན་པོ་ཉམས་སུ་མྱོང་བའོ། །བརྒྱད་པ་ལུང་ཨ་ནུ་ཡོ་གའི་ཐེག་པ་ནི། དབྱིངས་དང་ཡེ་ཤེས་འདུ་འབྲལ་མེད་པས། སྤྲོས་པའི་མཐའ་གང་དུ་ཡང་མ་དམིགས་པས། རྫོགས་རིམ་ཤེས་རབ་གཙོ་བོའི་སྒོ་ནས་བསྒྲུབ་པ་སྟེ། རྟོགས་པའི་ལྟ་བ་རྒྱུན་ཆད་མེད་པའི་ངང་ནས་ཅིག་ཅར་དུ་འཇུག་པས་ལྷ་རྣམས་ཚིག་གིས་མ་བསྐྱེད་པར་སྙིང་པོ་དྲན་པ་ཙམ་གྱིས་དཀྱིལ་འཁོར་ཡོངས་སུ་རྫོགས་པ་སྟེ། རྫོགས་རིམ་གྱི་ལྷ་སྐུ་ལྷན་སྐྱེས་བདེ་བ་ཆེན་པོ་དང་འབྲལ་བ་མེད་པའོ། །མན་ངག་རྫོགས་པ་ཆེན་པོ་ཨ་ཏི་མཆོག་གི་ཐེག་པ་ནི། ལྷུན་གྲུབ་ཏུ་སྤྱོད་ཙམ་འཛིན་པའི་དབྱིངས་ལ་སྒྱུ་མ་རྣམ་དག་ཕྱོགས་མེད་ཀྱི་ཡེ་ཤེས་སུ་ཤར་ཡང༌། ཐུགས་རྗེ་སྣ་ཚོགས་འགག་མེད་དུ་གྲོལ་བས། གཞི་དབྱིངས་དང་ཡེ་ཤེས་ལ་བྱས་ཆོས་དང་སྩོལ་སྒྲུབ་འཕོ་འགྱུར་དང་བྲལ་བས། ཆོས་ཐམས་ཅད་གཞི་བཞག་ཡེ་གྲོལ་ཆེན་པོར་དབྱིངས་རིག་གཉིས་སུ་མེད་པ་སྟེ། དེ་ལྟར་ཐེག་པ་རྣམ་པ་དགུའི་རིམ་པའོ། །ཞེས་གསུངས་པ་ལྟར་བཤད་མ་ཐག་པའི་ཐེག་དགུའི་རྣམ་གཞག་ཕྱིན་ཅི་མ་ལོག་པ་ཞིབ་མོར་འགྲེལ་བའི་རྣམ་དཔྱོད་ཀྱི་མཐུ་བླ་ན་མ་མཆིས་པར་གྱུར་པ་ནི་ཁྲོན་པའི་

---

^{[མ་དཔེ་གཟིགས་ན་འདིར་གནོན།]}

ལག་འགྲོའི་ལོ་རྒྱུས་ཙམ་མ་ཡིན་པར་དམ་པ་འདི་ཤིན་ཏུ་དཔྱད་བཟོད་པ་ཡིན་ཞིང༌། སྐྱེས་མཆོག་ཁྱད་པར་ཅན་འདི་ནི་ལོ་ཆེན་བཻ་རོ་འཁོར་བའི་རྫུ་ལ་ཞུགས་པའི་སྔོན་གོམས་ཀྱི་མཁྱེན་བརྩེའི་བག་ཆགས་གཉིད་སད་པ་ལྟ་བུར་གྱུར་པ་ཙམ་དུ་ཡང་མ་ཟད། སྐུ་ཚེ་འདིའི་སྟོད་ལ་བརྒལ་བརྟག་རྩོད་པའི་འཁོར་ལོས་སྡེ་སྣོད་གསུམ་དང་རྒྱུད་སྡེ་བཞིའི་མགྲིན་རྔ་ལྡིར་བའི་རིགས་གྲྭ་རྣམས་སུ་གསན་བསམ་མཐར་ཕྱིན་པའི་སྒོ་ནས་དགེ་བའི་བཤེས་གཉེན་དུ་བསྒྲུབས་ལ། ཕྱིན་ཆད་བོད་འགྲེལ་རྣམས་ཀྱིས་ཀྱང་མ་ཚིམ་པར་རྒྱན་དྲུག་མཆོག་གཉིས་ཀྱི་གཞུང་འགྲེལ་ཁོ་ན་ལ་བརྟེན་ནས་ཤིང་རྟ་ཆེན་པོ་པ་རྣམས་ཀྱི་དགོངས་པ་བླངས་ཤིང༌། སྐུ་ཚེའི་སྨད་ལ་ཀུ་སུ་ལུའི་བརྟུལ་ཞུགས་ཀྱིས་སྒྲུབ་པ་ཁོ་ནར་གཞོལ་བས་ཨོ་རྒྱན་ཆེན་པོས་རྒྱལ་ཚབ་ཏུ་དབང་བསྐུར་བ་སོགས་ལམ་གྱི་འཇུག་སྒོ་ཀུན་མཁྱེན་ཆེན་པོ་དང་མཚུངས་པས་རྟོག་གེའི་ཚིག་ལ་ཨ་འཐས་པ་དང་བླུན་སྒོམ་མུ་ཅོར་སྨྲ་བ་གང་གི་ཡང་ཕྱོགས་སུ་མ་ལྷུངས་པས་ངེས་པ་དོན་གྱི་མཁས་གྲུབ་དཔྱིས་ཕྱིན་པ་ཞིག་ཏུ་གྱུར་པའི་སྔགས་དང་ཕར་ཕྱིན་གྱི་ཐེག་པ་གཉིས་ཀ་ལ་འགྲན་གྱི་ཟླ་མེད་དུ་གྱུར་པ་ནི་མདོ་སྔགས་གཉིས་ཀྱི་སྨོན་ལམ་ཙམ་གྱིས་ཀྱང་མཁས་པ་དག་རངས་པར་གྱུར་ནས་ལག་པའི་ཟེའུ་འབྲུ་པདྨ་ཁ་འབུས་པ་ལྟ་བུར་བྱས་ཏེ་རྣམ་པར་འདུད་པའི་བཞིན་རས་སྟོན་པ་ནི་ལྐོག་ཏུ་མ་གྱུར་པ་འདིའོ། །དེ་ཡང་རྒྱུ་མཚན་ཉིད་ཀྱི་ཐེག་པ་དང་འབྲས་

---

^{[མ་དཔེ་གཟིགས་ན་འདིར་གནོན།]}

བུ་གསང་སྔགས་ཀྱི་ཐེག་པའི་ཁྱད་པར་གང་གིས་འབྱེད་ཅེ་ན། སེམས་ཉིད་སངས་རྒྱས་ཀྱི་རྒྱུ་རུ་འདོད་ཅིང་དོན་དམ་བསྒྲུབ་བྱར་བྱས་ནས་ཀུན་རྫོབ་སྤང་བྱར་བྱེད་པ་ནི་མཚན་ཉིད་ཀྱི་ཐེག་པ། སེམས་ཉིད་སངས་རྒྱས་ཀྱི་འབྲས་བུར་འདོད་ཅིང་ཀུན་རྫོབ་མི་སྤོང་བར་ལམ་དུ་འཁྱེར་བ་ནི་འབྲས་བུ་གསང་སྔགས་ཀྱི་ཐེག་པ་ཞེས་འདོད་དོ། །ཐེག་པ་དེ་དག་ཐམས་ཅད་ཀྱི་མཐའ་བརྟེན་གྱི་འབྲས་བུ་ནི། གཏེར་ཆེན་ཐམས་ཅད་མཁྱེན་པས། རྗོད་བྱེད་སྡེ་སྣོད་གསུམ་གྱི་བརྗོད་བྱ་རྣམ་དག་ཚུལ་ཁྲིམས་ཀྱི་བསླབ་པས་འདུལ་བ། མི་གཡོ་ཏིང་འཛིན་གྱི་བསླབ་པས་མདོ་སྡེ། སོ་སོར་རྟོག་པའི་ཤེས་རབ་ཀྱི་བསླབ་པས་མངོན་པ། རྒྱུད་སྡེ་འོག་མ་གསུམ་ལས་བྱ་སྤྱོད་ཀྱི་ལུས་ངག་ཡིད་གསུམ་ལྷ་སྔགས་ཏིང་ངེ་འཛིན་གསུམ་དུ་གསལ་བས་མཁའ་སྤྱོད་ལ་སོགས་པའི་ཐུན་མོང་གི་དངོས་གྲུབ་བརྒྱད་རྡོ་རྗེ་གུར་ལས། མིག་སྨན་དང་ནི་རྐང་མགྱོགས་དང༌། །རལ་གྲི་དང་ནི་ས་འོག་འགྲུབ། །རིལ་བུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱི་ལེན། །ཞེས་གསུངས་པ་ལྟར་རོ། །དང༌། ཡོ་གས་མཆོག་གི་དངོས་གྲུབ་བསྒྲུབས་ཏེ། སྐྱེ་བ་བཅུ་དྲུག་ཚུན་དུ་འབྲས་བུ་ཐོབ་ཏུ་འདོད་པ་དང༌། མ་ཧཱའ་ཨ་ནུ་གཉིས་ཀྱིས་རྡོ་རྗེ་ལུས་ལ་རྩ་ཐིག་རླུང་གསུམ་གྱིས་གནད་དུ་བསྣུན་པས། སྐྱེ་བ་གསུམ་མམ་བདུན་ལས་མི་འདའ་བའི་འབྲས་བུ་མངོན་བྱེད་དང༌། ཁྱད་པར་མཆོག་གི་ཨ་ཏིས་སྣང་བ་བཞི་གཏན་ལ་ཕབ་པས་སྐྱེ་

---

^{[མ་དཔེ་གཟིགས་ན་འདིར་གནོན།]}

ཤི་བར་དོ་གསུམ་གང་རུང་ལ་ངེས་པར་གྲོལ་ཞེས་གསུངས་སོ། །རྙིང་མ་བཀའ་ལུགས་ལ་འདུས་པ་མདོ་དབང་ཞེས་ཐེག་པ་རིམ་པ་དགུའི་དབང་བསྐུར་བ་ཡང་འདི་ཉིད་ཡིན་ཞིང༌། འོན་ཀྱང་རྒྱུའི་ཐེག་པ་ལ་དབང་བསྐུར་གྱི་ཐ་སྙད་གྲགས་པ་ལུགས་སྲོལ་འདིའི་ཁྱད་ཆོས་ཡིན་གཤིས་སྔ་རབས་པ་དག་གིས་དགག་པ་སྣ་ཚོགས་བྱུང་མོད་དེ། བརྟག་གཉིས་ལས། དང་པོར་གསོ་སྦྱོང་སྦྱིན་པར་བྱ། །དེ་རྗེས་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །ཞེས་སོགས་ཀྱི་མཐར། དེ་རྗེས་ཀྱཻ་ཡི་རྡོ་རྗེ་བསྟན། །ཞེས་ཐེག་པ་རིམ་པར་འཇུག་པ་དང་མཐུན་པར་འདིར་སྔགས་ལམ་དུ་ཐེག་པ་ཀུན་གྱི་གཞུང་ལམ་ཚང་བར་བསྟན་པར་མ་ཟད་དབང་བསྐུར་གྱི་བརྗོད་བྱའི་དོན་ལ་མི་འཐད་པ་འགའ་ཡང་མེད་ལ། རྒྱུ་འབྲས་ཀྱི་ཐེག་པ་གཉིས་ལྟ་སྤྱོད་འདྲེས་པའི་སྐྱོན་ཡང་མི་མངའ། དབང་གི་དོན་ནི་ལྷག་གནས་སམ་བྱིན་གྱིས་བརླབ་པ་ཡིན་པས། བྱིན་བརླབ་ནི་འདུལ་བའི་ལས་ཆོག་ལས་ཀྱང༌། བདག་མིང་འདི་ཞེས་བགྱི་བའི་ཆོས་གོས་འདི་སྣམ་སྦྱར་དུ་བྱིན་གྱིས་བརླབས་སོ། །ཞེས་པས་མཚོན་ཏེ་ཤིན་ཏུ་མང༌། ཁྱད་པར་དངོས་བསྟན་ནི། སུམ་བརྒྱ་པ་ལས། ངེས་པར་འབྱུང་བའི་ཚུལ་ཁྲིམས་སྡུག་བསྔལ་སྤོང༌། །འཇིག་ཚོགས་ལྟ་བ་གདོན་གྱི་རྩ་བ་འཇོམས། །དཔལ་འབྱོར་ས་དང་མེ་ཏོག་མདའ་ཅན་འཇོམས། །རྫོགས་

---

^{[མ་དཔེ་གཟིགས་ན་འདིར་གནོན།]}

པའི་བྱང་ཆུབ་དཔལ་ནོད་དབང་བསྐུར་ཡིན། །ཞེས་དགེ་ཚུལ་གྱི་སྡོམ་པ་བྱིན་པ་ལ། བྱང་ཆུབ་རྣམ་པ་གསུམ་གྱི་ཕྱིར་དབང་བསྐུར་བའི་ཐ་སྙད་གསུངས་པ་ཆོས་ཅན། དེ་བཞིན་དུ་ཐོས་གྲོལ་དུ་བསྔགས་པའི་གཎྜི་ལའང༌། ཆོས་ཀྱི་སྐུ་སྐྱེ་འགག་གནས་གསུམ་གྱིས་སྟོང་པས་གདོད་ནས་མ་སྐྱེས་ཤིང་དགེ་བའོ། །ཞེས་མོས་པས་རབ་གནས་བྱེད་པར་བཤད་པ་དང༌། གཎྜིའི་མདོ་ལས་གཎྜི་ལ་བསྔགས་པ་བརྗོད་པ་ལ་བརྟགས་ན་རྟོག་གེ་བ་དག་བཏགས་གྲོལ་ལ་སྐུར་བ་འདེབས་པའི་ཉེས་པའང་ཁེགས་པ་ཡོད་དོ། །ཞེས་ཞར་ལ་སྨྲས་ནས། འདིར་སྔགས་ལམ་གྱིས་རྩིས་མགོ་བསྡུས་ནས་ཐེག་རིམ་དགུ་གང་ཟག་རིམ་གྱིས་པའི་རྣམ་མཁྱེན་གྱི་ལམ་གཅིག་ཏུ་བཞག་པའི་སྐབས། རྡོ་རྗེ་འཆང་ཐབས་ལ་མཁས་ཤིང་ཐམས་ཅད་མཁྱེན་པའི་ཕྱིར་རྫས་སྔགས་ཏིང་འཛིན་ལ་བརྟེན་པའི་བྱིན་རླབས་དབང་གི་ཆོ་ག་ཡང་མཁྱེན་ནས་གསུངས་པའི་ཕྱིར་རོ། །མ་མཁྱེན་ཞིང་ཐབས་ལ་རྨོངས་ན་ཐམས་ཅད་མཁྱེན་པ་ནས་བུད་པར་ཐལ་ཏེ། དེས་ན་དབང་བསྐུར་བྱུང་བ་ལ་དགག་པ་བྱེད་པོ་ཉིད་ངལ་ཞིང་གདོད་མའི་མགོན་པོ་ལ་སྤྱོ་བ་ཙམ་དུ་ཟད་ལ། བརྒྱུད་པའི་ཁྱད་པར་ནི་དེ་དག་ལས་ཤེས་པར་བྱའོ། །དེ་ལྟར་བཤད་མ་ཐག་པའི་སྡེ་སྣོད་གསུམ་སྤངས་པས། རྒྱུད་སྡེ་དྲུག་ཏུ་དབྱེ་བ་ནི་གསར་རྙིང་ཐུན་མོང་གི་རྒྱུད་སྡེ་བཞི་པོའི་སྟེང་དུ་རྙིང་མ་རང་

---

^{[མ་དཔེ་གཟིགས་ན་འདིར་གནོན།]}

ལུགས་ལ་རྗེས་སུ་རྣལ་འབྱོར་ཞེས་པ་ཨ་ནུ་ཡོ་གའི་རྒྱུད་སྡེ་དང༌། ཤིན་ཏུ་རྣལ་འབྱོར་ཞེས་ཨ་ཏི་ཡོ་གའི་རྒྱུད་སྡེ་བསྣན་པས་དྲུག་ཏུ་བྱུང་བ་ཡིན་ལ་རྒྱུད་སྡེའི་རྣམ་གྲངས་ཙམ་ལ་འཕགས་ཡུལ་གྱི་སློབ་དཔོན་ཁ་ཅིག་བདུན་དང་ལྔར་བཞེད་པ་ཡང་གསུངས་ལ། ཨ་ནུ་ཨ་ཏི་གཉིས་པོ་ཐེག་པའི་རྐང་གྲངས་སུ་འདྲེན་པ་སྔགས་རྙིང་མའི་རང་སྐད་ལྟ་བུར་འདུག་པ་ལ་མི་རིགས་སོ། །ཞེས་བརྒལ་བ་ཡང་ཧ་ཅང་ཐལ་ཏེ། སྤྱིར་ཐེག་པའི་གོ་བ་ནི། བཞེད་ཚུལ་ཐ་དད་ཀྱང་འོག་ནས་གོང་དུ་འདེགས་པར་བྱེད་པས་ན་ཐེག་པ་ཞེས་ཡོན་ཏན་རིན་པོ་ཆེ་སྡུད་པ་ལས་གསུངས་པ་ལྟར་ཡིན་ལ། དེ་ཡང་འདི་ལྟ་སྟེ། དང་པོ་ཕྱི་མཚན་ཉིད་ཀྱི་ཐེག་པ་གསུམ་པོས་རིམ་བཞིན་དགྲ་བཅོམ་པ་དང༌། ནེ་ཙོའམ་བསེ་རུ་ལྟ་བུའི་རང་སངས་རྒྱས་དང༌། བཅུ་གཅིག་ཀུན་ཏུ་འོད་ཀྱི་ས་མཐར་འདེགས་པར་བྱེད་པས་ན་ཐེག་པ་དང༌། གཉིས་པ་ཕྱི་ཐུབ་པ་རྒྱུད་ཀྱི་ཐེག་པ་གསུམ་པོས་རིམ་པ་བཞིན་རིགས་གསུམ་རྡོ་རྗེ་འཛིན་པའི་ས་དང༌། རིགས་བཞི་མཁའ་ལ་སྤྱོད་པའི་ས་དང༌། རིགས་ལྔ་སྟུག་པོ་བཀོད་པའི་སར་འདེགས་པར་བྱེད་པས་ན་ཐེག་པ་དང༌། གསུམ་པ་ནང་པ་ཐབས་ཀྱི་རྒྱུད་རྣམ་པ་གསུམ་གྱིས་རིམ་པ་བཞིན་ཡི་གེ་འཁོར་ལོ་ཚོགས་ཆེན་གྱི་ས་དང༌། བདེ་བ་ཆེན་པོའི་ས་དང༌། ཡེ་ཤེས་བླ་མའི་སར་འདེགས་པར་བྱེད་པས་ན་ཐེག་པའི་སྒྲ་བཤད་བཞག་ལ། ཡེ་ཤེས་ཡིན་པས་ཆ་ནས་འདེགས་

---

^{[མ་དཔེ་གཟིགས་ན་འདིར་གནོན།]}

བྱར་མི་འཐད་ཅེས་བརྒལ་བ་ཡང་ནོངས་ཏེ། ཡེ་ཤེས་ཡིན་ཡང་མངོན་དུ་གྱུར་པར་བྱ་རུ་ཡོད་པའི་ཆ་ནས་དེ་སྐད་ཅེས་བཏགས་པ་སྟེ། དེ་ལྟ་ན་སྤྲོས་བྲལ་གྱི་ལྟ་བའང་ཡེ་ཤེས་ཡིན་ཏེ། ལམ་གྱི་རྣམ་བཞག་བྱུང་བས་འགལ་བ་སྲིད་པའི་སྐྱོན་དུ་མ་ཡོད་ལ། རྒྱུད་བླ་མ་ལས། གཟུགས་ཀྱི་རྣམ་པར་དམན་པ་དང༌། །བར་མ་མཆོག་ལ་ནམ་མཁའ་བཞིན། །ཞེས་རྫ་ཤིང་རིན་པོ་ཆེའི་སྣོད་ལ་བཟང་ངན་ཡོད་ཀྱང་དེའི་ནང་གི་ནམ་མཁའ་ལ་བཟང་ངན་མེད་པའི་དཔེས་དྲི་མ་ལས་གྲོལ་སྟབས་ཆེ་ཆུང་གི་ཁྱད་པར་ཕྱེ་བ་ལྟར་ཡེ་ཤེས་དེ་མངོན་དུ་གྱུར་པར་བྱ་རུ་ཡོད་པས་ཡཱ་ན་སྟེ། བརྗོད་བྱ་དོན་གྱི་དབང་དུ་ནི་ཐེག་པ་ལ་མུ་དང་མཐའ་བཀག་པ་མི་བཟོད་དེ། ལང་ཀར་གཤེགས་པ་ལས། ཇི་སྲིད་འདུ་ཤེས་མེད་ཀྱི་བར། །ཐེག་པའི་སྒོ་ཡང་དེ་ལས་མེད། །ཇི་སྲིད་འདུ་ཤེས་གནས་མ་ཐག །ཐེག་པའི་སྒོ་ཡང་བསམ་མི་ཁྱབ། །ཅེས་ཐེག་པ་བསམ་གྱིས་མི་ཁྱབ་པར་གསུངས་པའི་ཕྱིར་འདི་ལ་ཀླན་ཀ་འཇུག་པའི་ཡུལ་སྐྲ་རྩེ་ཙམ་ཡང་མེད། ཅིས་ཀྱང་རང་གདངས་སུ་སྨྲ་བ་དག་ནི་ཀུན་མཁྱེན་བསམ་ཡས་པས། བློ་ཆུང་ཞིང་ཤེས་རབ་ཀྱི་མིག་རྒྱང་ཐུང་བ་དག །ཐེག་པའི་གྲངས་དང༌། གྲུབ་མཐའི་རྣམ་གྲངས་བསམ་གྱིས་མི་ཁྱབ་པའི་རྣམ་བཞག་ལ་དངངས་ཤིང་མི་བདེན་ཏོ་ཞེས་སྨྲ་བ་ནི། བ་གླང་ལ་སོགས་པ་མ་ཧེ་དག་བདག་ཅག་དུད་འགྲོ་རྣམས་ནི་རྭ་དང་བཅས་པའི་ཕྱིར། མི་དང་

---

^{[མ་དཔེ་གཟིགས་ན་འདིར་གནོན།]}

ལྷ་རྣམས་ཀྱང་རྭ་ཅན་ཁོ་ནའོ་ཞེས་འཛིན་པ་བཞིན་ནོ། །ཞེས་ཐོག་ཏུ་བབ་ལ་གཞན་ཡང་རྟོག་པ་རགས་པ་ཕྱི་རོལ་པའི་བསྟན་བཅོས་ལྟར་དགོས་འབྲེལ་མེད་པའི་རྩོད་པ་ལྷུར་ལེན་ཙམ་གྱི་རྗེས་སུ་ཕྱོགས་པའི་ཐ་རམ་དག་འཕགས་པའི་ཡུལ་དུ་གསང་སྔགས་རྙིང་མའི་རྒྱུད་སྡེ་སྤྱི་དང་ཁྱད་པར་འོད་གསལ་སྙིང་པོའི་དོན་རྒྱུད་རྣམས་རིག་འཛིན་རྣམས་ཀྱིས་ཤིན་ཏུ་གསང་བའི་ཚུལ་དུ་ཐུགས་ཉམས་སུ་བསྟར་ཏེ་ཟག་མེད་འོད་སྐུར་ཡལ་བ་ཤ་སྟག་བྱུང་བ་ལ་ཡིད་མ་བརྟན། འོ་སྐོལ་བོད་ཀྱིས་ལྟར་གསང་ཆེན་ཟབ་མོ་ཟང་ཟིང་འཚོལ་བའི་ཟོང་དུ་མ་འཛད་ཅིང༌། མཆོག་གི་གདུལ་བྱ་དབང་པོ་ཡང་རབ་ཏུ་གྱུར་པ་དག་ལ་སྙན་བརྒྱུད་ཀྱི་ཚུལ་དུ་བཤད་ཅིང་ཁྱབ་གདལ་དུ་མ་སྤེལ་བའི་གནད་མ་གོ །ཕྱིས་ལྟ་སྤྱོད་ཡ་བྲལ་དུ་གྱུར་པའི་གང་ཟག་ཐ་སྙད་ལ་ཞེན་པ་དག་ལ་གསང་ཆེན་ཅལ་སྒྲོག་ཏུ་མི་གཏོང་བའི་ཕྱིར་ཆོས་ཀྱི་རྣམ་གྲངས་དེ་དག་རྡོ་རྗེ་གདན་དུ་གཏེར་ལ་སྦས་པས་རྒྱ་གར་བ་རྣམས་ལ་ཡོངས་སུ་གྲགས་ཀུན་མཁྱེན་སངས་རྒྱས་གཉིས་པས། དེའང་རྒྱ་གར་གྱི་རྒྱུད་རྣམས་ཀྱང་ཨོ་རྒྱན་དང༌། ཤམྦྷ་ལ་དང༌། མ་ལ་ཡ་སོགས་པའི་ཡུལ་ནས་གྲུབ་ཐོབ་ཆེན་པོ་རྣམས་ཀྱིས་སྤྱན་དྲངས་ཏེ། རྒྱུད་ཐམས་ཅད་ནི་རྒྱ་གར་ནའང་བཞུགས་

---

^{[མ་དཔེ་གཟིགས་ན་འདིར་གནོན།]}

པ་མ་ཡིན་ཏེ། གལ་ཏེ་བཞུགས་སུ་བཅུག་ཀྱང་ཁྱེད་ཀྱིས་ལན་རེ་ཙམ་ཕྱིན་པས་དེ་ཐམས་ཅད་མཐོང་བར་མི་ནུས་ལ། གཙུག་ལག་ཁང་ཆུང་རེ་ན་བཞུགས་པའི་མདོ་རྒྱུད་ཀྱི་མིང་བྱང་དུ་མ་འདུས་པས་གཞན་རྣམས་མིན་པར་མི་འགྱུར་བའི་ཕྱིར་སྔོན་གྱི་ལམ་སྟོན་ཆེན་པོ་རྣམས་ལ་སྨད་པར་མི་བྱའོ། །ཞེས་གསུངས་བའི་དོན་དེ་མ་གོ་བར་སྣང་ངོ༌། །པ་མེད་ཅིང༌། བསྟན་པ་སྔ་དར་གྱི་ཚེ་སངས་རྒྱས་དངོས་དང་ཞལ་མི་གཉིས་པའི་ལོ་པཎ་དེ་དག་གིས་རིག་འཛིན་རྣམས་ཀྱི་ཐུགས་ཀྱི་གསང་མཛོད་བརྟོལ་ནས་ད་ལྟ་བོད་དུ་དར་བ་ལ་ཡ་མཚན་མི་བྱེད། རང་གིས་མ་མཐོང་བ་རྒྱུ་མཚན་དུ་བྱས་ནས་འོད་གསལ་གྱི་རྒྱུད་སྡེ་རྣམས་འཕགས་ཡུལ་དུ་ཡེ་ནས་མི་གྲག་པར་འདོད་ཅིང་སྟོན་པ་སྐུ་གསུམ་གྱི་བརྒྱུད་ཚུལ་གྱི་ཁྱད་པར་མི་ཤེས་པས་ཨ་འཐས་ཕྱོགས་ལྷུང་གི་ལོག་རྟོག་ཆེན་པོས་རང་གཞན་རྗེས་འབྲང་དང་བཅས་པ་ཕྱིན་ཅི་ལོག་གི་གཡང་སར་སྐྱུར་བར་བྱེད་པ་དག་མི་བསྲུན་པའི་ལུང་བསྟན་དུས་ལ་བབ་པ་ནི། སྟོབས་བཅུ་མངའ་བ་ཉིད་ཀྱིས། ཉོན་མོངས་རྒྱུད་དྲག་ནུས་མཐུ་ཞན། །ལས་ཀྱི་ཚེ་ཐུང་བཀའ་དོན་སྟོར། །བསྟན་རྙིང་གྲུབ་མཐའ་ངན་པས་བསྒྱུར། །གཉན་པོས་མི་ནོན་བསྒྲུབ་ཚུལ་ཞན། །ཞེས་གསུངས་པ་སྟེ། དེའི་ཕྱིར་ན་དབུ་མ་ལ་གནས་པའི་གདུལ་བྱ་རྣམས་རྗེས་སུ་གཟུང་བ་དང༌། གཟུ་བོའི་ཡིད་ཅན་རྣམས་མགུ་བ་བསྐྱེད་པའི་ཕྱིར་སྔ་འགྱུར་ཡོ་ག་གསུམ་གྱི་རྒྱུད་ཚུལ་ཐ་དད་དུ་ཕྱེ་ནས་བཤད་པ་དང༌། རྣམ་པ་ཐམས་ཅད་མཁྱེན་པའི་ཡེ་ཤེས་ལ་བག་ཆགས་གཞག་པའི་སླད་དུ་ཐེག་རྩེ་ཤིན་ཏུ་རྣལ་འབྱོར་གྱི་གཞི་ལམ་འབྲས་བུའི་རྣམ་གཞག་མདོར་བསྟན་ནས་བཤད་པའོ། །དང་པོ་ནི། དམ་ཆོས་པད་དཀར་ལས། བསྐལ་པ་བྱེ་སྟོང་བསམ་

---

^{[མ་དཔེ་གཟིགས་ན་འདིར་གནོན།]}

གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་དེ་ནི་ངས་ཐོབ་སྟེ། །ང་ནི་རྟག་ཏུ་ཆོས་ཀྱང་རབ་འཆད་དོ། །ཞེས་དང༌། རིགས་ཀྱི་བུ། ང་ནི་བསྐལ་བ་བྱེ་བ་ཁྲག་ཁྲིག་བརྒྱ་སྟོང་མང་པོའི་གོང་རོལ་ཏུ་མངོན་པར་རྫོགས་པ་སངས་རྒྱས་སོ། །ཞེས་གསུངས་པ་ལྟར་སྔགས་ལམ་སྤྱིར་བཏང་བས་ཀུན་གཞིའི་ཀུན་གཞིའི་ངོས་འཛིན་དཔྱད་ཤིན་ཏུ་དཀའ་བས། ཐུན་མོང་ཁ་ཅིག་ལྟར་ཆོས་སྐུ་དང་རྣམ་དབྱེ་མེད་པར་སྨྲ་བའི་རྫོགས་ཆེན་པ་དག་ནི་ཤིན་ཏུ་རྨོངས་པར་ཟད་ལ། དེས་ན་འདི་གཉིས་ཀྱི་ཁྱད་པར་ཤེས་པར་འདོད་ན་ཀུན་མཁྱེན་ཀློང་ཆེན་པའི་ཐེག་མཆོག་མཛོད་ཀྱི་རིམ་ཁང་བཅུ་བཞི་པ་ལ་དཔྱད་པར་བྱའོ། །གནས་ལུགས་འོད་གསལ་གྱི་རླུང་སེམས་རྫོགས་པ་ཆེན་པོའི་རང་སྐད་དུ་འཁོར་འདས་ཀྱི་གཉིས་ཆོས་ལས་འདས་པའི་དུས་བཞི་མཉམ་པ་ཉིད་ཀྱི་ཀློང་ན་གདོད་མ་གཞིའི་གནས་ལུགས་བློ་ལས་འདས་པ་དེ་ཉིད་ཀྱིས་ཤེས་རབ་སྲོག་ཏུ་ཤར་བའི་རླུང་ཡན་ལག་བཞིས་རྟ་བྱས་ཏེ། ནང་གསལ་བུམ་སྐུའི་ཡེ་ཤེས་སྐྱོད་བྱེད་དུ་གཡོས་པ་ལས། རང་སྣང་རང་བཞིན་མེད་པར་ཤེས་ཏེ་ཀ་དག་བཅིང་གྲོལ་མེད་པའི་ངང་ལས་ལྷུན་གྲུབ་རིན་པོ་ཆེའི་སྣང་བ་ཤར་གྲོལ་དུས་མཉམ་པའི་ཚུལ་གྱིས་སྐུ་དང་ཡེ་ཤེས་འདུ་འབྲལ་མེད་པའི་ངོ་བོ་གདོད་མའི་སངས་རྒྱས་ཀུན་ཏུ་བཟང་པོ་ཞལ་ཕྱག་རྒྱུད་ལས། ཐོག་མའི་སངས་རྒྱས་ཀུན་ཏུ་བཟང༌། །མཚན་དང་དཔེ་བྱད་ལྡན་པར་ཡོད། །སྟོན་པ་འོད་མི་འགྱུར་བ་ནི། །སྟོང་གསལ་འོད་ཀྱི་ཕུང་པོར་བཞུགས། །ཐུགས་ཀྱི་མཁྱེན་པ་མ་འགགས་གསལ། །ཞེས་པས་ཆོས་ཉིད་ནང་

---

^{[མ་དཔེ་གཟིགས་ན་འདིར་གནོན།]}

གསལ་དང༌། ཆོས་ཅན་ཕྱིར་གསལ་གྱི་གནད་གོ་བར་བྱའོ། །གི་རྣམ་པར་སངས་རྒྱས་པ་ལ་བསྐལ་བ་བསམ་གྱིས་མི་ཁྱབ་པ་ནས་བྱང་ཆུབ་མཆོག་གི་དགོངས་པ་མངོན་དུ་མཛད་པར་དངོས་ཅག་འདོད་ལ། ཐེག་པ་ཐུན་མོང་བའི་སྣང་ངོར་ནི། དེ་བཞིན་གཤེགས་པ་འདི་རྒྱུའི་དུས་ན་སོ་སོའི་སྐྱེ་བོ་འཆིང་བ་མཐའ་དག་གིས་བཅིངས་པ་ཞིག་ཡིན་ལ། ཤིང་རྟ་འདྲེན་པའི་དམྱལ་བར་གྱད་འབག་ཤི་ཏ་ཞེས་བྱ་བར་འཁྲུངས་ཚེ་རང་འདྲའི་གྲོགས་པོ་ལ་སྙིང་རྗེའི་སེམས་བསྐྱེད་བླ་ན་མེད་པས་བདེ་སྡུག་བརྗེ་བའི་བྱང་ཆུབ་ཀྱི་སྤྱོད་པ་ནས་བརྩམས་པའམ། བཤད་ཚུལ་གཞན་དུ་རྫ་མཁན་གྱི་ཁྱེའུར་འཁྲུངས་ཚེ་སངས་རྒྱས་ཤཱཀྱ་ཐུབ་པ་ཆེན་པོར་གུས་པས་ཕུ་དུད་བགྱིས་ཏེ་བྱང་ཆུབ་ཀྱི་ས་བོན་བཙུགས་པ་ནས་བརྩམས་པའང་ཡོད་དེ། ཇི་ལྟར་ཡང་བསྐལ་བ་གྲངས་མེད་གསུམ་གྱི་གྲངས་མེད་དང་པོ་ལ་ཚོགས་སྦྱོར་གཉིས་སུ་སོ་སོའི་སྐྱེ་བོའི་སས་བསྡུས་པའི་ཚོགས་གཉིས་དང༌། གྲངས་མེད་གཉིས་པ་ལ་མཐོང་ལམ་སྟེ་ས་དང་པོ་ནས་བདུན་པའི་བར་དང༌། གྲངས་མེད་གསུམ་པ་ལ་འཕགས་པ་སྒོམ་ལམ་གྱིས་བསྡུས་པའི་དག་པའི་ས་གསུམ་གྱི་ཚོགས་གཉིས་པའི་མཐར་འོག་མིན་དུ་སངས་རྒྱས་ཏེ། སླར་ཡང་གདུལ་བྱའི་དོན་དུ་སྤྲུལ་པས་འཛམ་བུ་གླིང་དུ་གཤེགས་ཏེ་མཛད་པ་བཅུ་གཉིས་བསྟན་པའི་མཐར་ཆོས་འཁོར་རིམ་པ་གསུམ་དུ་བསྐོར་ནས་དགུང་ལོ་བརྒྱད་ཅུ་ལ་མྱ་ངན་

---

^{[མ་དཔེ་གཟིགས་ན་འདིར་གནོན།]}

ལས་འདས་ཏེ་ད་ལྟ་ལྷག་མ་མེད་པའི་དབྱིངས་ན་བཞུགས་པར་ཁས་ལེན་པའོ། །ཞེས་ཐེག་པ་ཐུན་མོང་བའི་ལུགས་ཀྱང་འཕྲོས་ཞོར་དུ་ཟློས་ནས། སྔར་བཤད་མ་ཐག་པའི་གདོད་མའི་མགོན་པོ་དེ་ཉིད་ཆོས་སྐུའི་གནས་སྐབས་ན་ཀུན་ཏུ་བཟང་པོ་ལས། ལོངས་སྐུའི་གནས་སྐབས་ན་རིགས་ལྔའི་སངས་རྒྱས་སུ་བཞེངས་ཏེ། སྤྲུལ་སྐུའི་གནས་སྐབས་ན་གདུལ་བྱའི་དབང་གིས་འོག་མིན་ཁང་བུ་བརྩེགས་པ་སྟེ་གཙང་མའི་རིགས་ཀྱི་གནས་སུ་རྡོ་རྗེ་འཆང་ཆེན་པོ་དང་འགྲོ་དྲུག་རང་རང་གི་གནས་སུ་ཤཱཀྱ་ཐུབ་པ་ལ་སོགས་ཏེ་རིགས་པའི་སྐྱེས་བུ་ཐུབ་པ་དྲུག་ཏུ་སྣང་བ་གྲངས་མེད་པས་གདུལ་བྱའི་མོས་པ་དང་རྗེས་སུ་མཐུན་པའི་ཆོས་འཁོར་དཔག་ཏུ་མེད་པ་བསྐོར་བ་དང༌། ཁྱད་པར་རྡོ་རྗེ་འཆང་ཆེན་པོའི་རོལ་པ་ཚད་མེད་པས་གནས་ཐ་དད་པར་གསང་སྔགས་དོན་གྱི་འཁོར་ལོ་བསྐོར་བར་བཞེད་ཅིང༌། སྐུ་གསུམ་གྱི་སྟོན་པ་དེ་དག་ལའང་ཞིང་ཁམས་གསུམ་དང༌། བསྟན་པ་གསུམ་དང༌། འཁོར་གསུམ་ལ་སོགས་པར་ལྡོག་ཆས་དབྱེ་བ་ལས། དང་པོ་སྔ་འགྱུར་རང་སྐད་ལ་ཐེག་པ་རིམ་པ་དགུར་གྲགས་པའི་རྩེ་རྒྱལ་ཡང་གསང་རྨད་དུ་བྱུང་བ་འོད་གསལ་རྡོ་རྗེ་སྙིང་པོ་བཀའ་ཆེན་རྫོགས་པ་ཆེན་པོ་ལ་མདོ་སྒྱུ་སེམས་གསུམ་དུ་ཡོད་པ་ལས། སེམས་ཕྱོགས་རྫོགས་པ་ཆེན་པོའི་ལུགས་བཤད་པ་ནི། དེ་ཡང་ལུགས་སྲོལ་འདི་ལ་བཀའ་བབས་སུམ་ལྡན་ཡོད་པའི་རྒྱལ་བ་

---

^{[མ་དཔེ་གཟིགས་ན་འདིར་གནོན།]}

དགོངས་པས་བརྒྱུད་པ་སྟོན་པ་ངོ་བོ་ཉིད་ཀྱི་སྐུས་རང་གསལ་ངོ་བོ་ཉིད་ཀྱིས་གསུངས་པ། ཆོས་སྐུའི་བྱིན་རླབས་ཀྱིས་རང་གྲོལ་མངོན་སུམ་དུ་གསུངས་པ། ལོངས་སྐུའི་བྱིན་རླབས་ཀྱིས་རང་གི་ངོ་བོས་གསུངས་པ། གསང་བ་རྡོ་རྗེའི་སྐུས་བདེ་ཆེན་ཐབས་ཀྱིས་གསུངས་པ་ལས། གསང་བའི་བདག་པོས་གང་གི་ཡེ་ཤེས་ཀྱི་རྩལ་ལས་སྤྲུལ་པའི་སྐུ་དགའ་རབ་རྡོ་རྗེ་བསྟན་པ་འདིའི་བདག་པོར་དབང་བསྐུར་ནས། ཤན་འབྱེད། ལ་བཟླ། རང་གྲོལ་མངོན་སུམ་དུ་སྟོན་པ་ཨ་ཏིའི་བསྟན་པ་ལྷ་མིའི་ཡུལ་དུ་གྲགས་པ་སྟེ་དེ་ཡང་སུམ་ཅུ་རྩ་གསུམ་གྱི་ལྷ་དེ་ཝ་བཟང་སྐྱོང་གི་བུ་སེམས་ལྷག་ཅན་ལ་རྨི་ལྟས་ཁྱད་པར་ཅན་བཞི་བྱུང་བ་དང་རྗེས་སུ་མཐུན་པར་ཕྱོགས་བཅུ་དུས་བཞིའི་སྒྱུ་འཕྲུལ་གསང་བ་སྙིང་པོའི་ལུགས་བདེ་བར་གཤེགས་པ་ཐམས་ཅད་དང༌། རིགས་ལྔའི་སངས་རྒྱས་ཀུན་གྱིས་རྡོ་རྗེ་སེམས་དཔའ་བྱིན་གྱིས་བརླབས་པ་ལ་བརྟེན་ནས། རྡོར་སེམས་ཀྱིས་ལྷའི་བུ་སེམས་ལྷག་ཅན་ལ་རྒྱལ་ཐབས་སྤྱི་བླུགས་ཀྱི་དབང་བསྐུར་ནས་མན་ངག་བྱིན་ཏེ་ལྷའི་གནས་སུ་དར། དེ་ནས་ཞིང་འདིར་འགྲོ་བའི་བླ་མ་ཤཱཀྱ་སེང་གེས་སྐུ་དང་གསུང་གི་གདུལ་བྱ་རྣམས་བཏུལ་ཏེ་ཐུགས་ཀྱིས་གདུལ་བ་ལ་བབ་པ་ན། ཐལ་འགྱུར་ལས། ང་ནི་མྱ་ངན་འདས་འོག་ཏུ། །ནུབ་ཕྱོགས་ཨོ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་དེ་བཛྲ་ཧེ། །འདིས་ནི་

---

^{[མ་དཔེ་གཟིགས་ན་འདིར་གནོན།]}

དམ་པའི་བསྟན་པ་འཛིན། །ཞེས་ལུང་བསྟན་པ་ལྟར། ཨོ་རྒྱན་གྱི་ཡུལ་ན་རྒྱལ་པོ་དྷརྨ་ཨ་ཤོཡུམ་སྣང་གསལ་འོད་ལྡན་མ་གཉིས་ལ་སྲས་མོ་པྲ་ཧ་རི་ནི་ཞེས་འབོད་པའི་དགེ་སློང་མ་ཞིག་ཡོད་པར། དེ་ཉིད་གསེར་གྱི་བྱེ་མ་བརྡལ་བའི་རྒྱ་མཚོའི་འགྲམ་ན་འཇག་མའི་སྤྱིལ་བུ་ཕུབ་ནས་རྣལ་འབྱོར་ལ་གནས་པའི་ཚེ། རྨི་ལམ་ན་རིན་ཆེན་ཤེལ་ལས་གྲུབ་པའི་མི་གཟུགས་ལག་ཏུ་ཤེལ་བུམ་ཡིག་འབྲུས་མཚན་པ་ཐོགས་པས་དབང་བསྐུར་བ་རྨིས། དེ་ནས་དགེ་སློང་མ་ལུས་མ་བདེ་ནས་ཤིན་ཏུ་སྡུག་བསྔལ་བར་གྱུར། ཟླ་དགུ་ངོ་བཅུ་ལ་རྩིབ་ལོགས་གཡས་ནས་སྲས་གཅིག་བཙས། དགེ་སློང་མས་ཕ་མེད་བུ་འདི་འདྲེ་ལས་གཞན་པ་སུ་སོགས་སྨྲེ་སྔགས་ཚིགས་བཅད་ཅན་བཏོན་ནས་ཐལ་ཁུང་དུ་བོར་ནས་ཞག་གསུམ་ལོན་དུས་བལྟས་པས་ཁྱེའུ་མ་ཉམས་པར་མདངས་དང་ལྡན་པར་འདུག་པ་སླར་སྤོས་ཆུ་དང་འོ་མ་སོགས་ཀྱིས་ཁྲུས་བྱས། དར་དཀར་གྱི་སྟེང་དུ་བླངས་པ་ན་ནམ་མཁའ་ནས་ལྷ་རྣམས་ཀྱིས་བཀྲ་ཤིས་དང་མེ་ཏོག་གཏོར། དེ་ནས་ཁྱེའུ་གཞན་ལས་སྐྱེད་དང་ལྡན་པ་བྱུང༌། ལོ་བདུན་ལོན་དུས་པཎྜི་ཏ་རྣམས་དང་ཆོས་གཏམ་བྱ་བར་གནང་བ་དགོས་གསུངས་པས་ཡུམ་ན་རེ། བུ་སོ་མ་བརྗེས་པར་ཁྱོད་ཀྱིས་ཆོས་གཏམ་ག་ནས་འོང་གསུངས་ཏེ་གནང་བ་མ་སྦྱིན་པས་དེས་ནན་གྱིས་གསོལ་ལོ། །དེར་རྒྱལ་པོ་ཨུ་པ་རཱ་ཛ་ལ་པཎྜི་ཏ་ལྔ་བརྒྱ་ཡོད་པའི་དྲུང་དུ་གཏུགས་སུ་བཏང་བས།

---

^{[མ་དཔེ་གཟིགས་ན་འདིར་གནོན།]}

པཎྜི་ཏ་དེ་དག་རེ་རེ་བཞིན་ལ་ཕྱག་དང་ཞེ་སའི་ངོས་རྩོད་པས་དེ་རྣམས་ཀྱིས་ལན་འདེབས་མ་ནུས། ཁྱེའུ་དེར་གང་དྲིས་ཀྱང་ལན་ཐོགས་མེད་འདེབས་ནུས་པར་བྱུང་བས་པཎྜི་ཏ་རྣམས་ཤིན་ཏུ་ངོ་མཚར་སྐྱེས་ཏེ་ཞབས་སྤྱི་བོར་བླངས། རྒྱལ་པོ་རབ་ཏུ་དགའ་བས་སློབ་དཔོན་དགའ་རབ་རྡོ་རྗེ་ཞེས་བྱ་བར་མཚན་གསོལ། སངས་རྒྱས་ཐམས་ཅད་ཀྱིས་བྱིན་གྱིས་བརླབས། གསང་བདག་རྡོ་རྗེ་སེམས་དཔའ་ཞལ་བསྟན་ཏེ། རྫོགས་པ་ཆེན་པོ་སེམས་མད་བཅོ་བརྒྱད་དང༌། ཀློང་ཆེན་བམ་པོ་ཉི་ཁྲི་སོགས་ཀྱི་རྒྱུད་གཏད། རྒྱལ་ཐབས་སྤྱི་བླུགས་ཀྱི་དབང་བསྐུར་བས་རྫོགས་ཆེན་དབང་ཆུ་བཞིའི་བཀའ་བབ་འཆད་པའི་དུས་འདི་ལ་ཡི་དམ་ལྷའི་དབང་བསྐུར་ཐོབ་པ་ཞེས་ཀྱང་གྲགས། དེ་ནས་མ་ལ་ཡའི་རྩེར་རྡོ་རྗེ་དབྱིངས་ཀྱི་མཁའ་འགྲོ་མ་དང༌། ཡོན་ཏན་མཐའ་ཡས་པའི་མཁའ་འགྲོ་མ་ལ་སོགས་པས་གླེགས་བམ་དུ་བཀོད། མཁའ་འགྲོ་མ་སེམས་ལྡན་མཆོད་པ་བོར་རྗེས་སུ་གནང་སྟེ་ཌཱཀྐི་སྔོན་བྱུང་གི་ཕུག་ཏུ་བཞུགས། དེ་ནས་བསིལ་བ་ཚལ་དུ་ཁྱབ་འཇུག་གི་བུ་མོ་གཅེར་བུ་ལ་ཆིབས་ཏེ་བྱོན་ནས་དབུས་ཀྱི་མཆོད་རྟེན་རྩར་ཌཱཀྐི་རྣམས་ལ་ཆོས་སྟོན་ཏོ། །སློབ་དཔོན་དེ་ལ་ཐུགས་སྲས་ཀྱི་གཙོ་བོ་འཇམ་དཔལ་བཤེས་གཉེན་ཐེ་བའི་གསུམ་བརྒྱུད། བདུན་བརྒྱུད། ཉི་ཤུ་རྩ་གཅིག་བརྒྱུད་ལ་སོགས་ཇི་སྙེད་ཅིག་འདི་དག་ལ་སོགས་ཏེ་སྔ་འགྱུར་ཐུན་མོང་མ་ཡིན་པའི་ཆོས་འབྱུང་ནི། གཡུ་སྒྲ་དང༌། གཉའ་ན་ཞེས་རྒྱ་གར་ཁ་ཆེ་བའི་

---

^{[མ་དཔེ་གཟིགས་ན་འདིར་གནོན།]}

སྐད་དུ་འབོད་པ་དང༌། མངའ་བདག་རལ་བ་ཅན་ལ་སོགས་པས་ཞུས་པའི་ངོར་སྩལ་བའི་བཻ་རོ་འདྲ་འབག་ཆེན་མོ་ཞེས་དོན་ལ་བཻ་རོ་དངོས་མཇལ་བ་དང་འདྲ་བར་དབུགས་དབྱུང་བའི་བསྟན་བཅོས་ལས་ཤེས་སོ། །ཡོད་པ་ལས་འཇམ་དཔལ་བཤེས་གཉེན་ནི། ཐལ་འགྱུར་ནས་དགའ་རབ་རྡོ་རྗེ་ལུང་བསྟན་པའི་རྗེས། དེ་ཡི་རྗེས་འཛིན་ནུབ་ཀྱི་ཕྱོགས། །བྲམ་ཟེའི་ཕྲུག་གུ་སྐལ་ལྡན་པ། །མཉྫུ་ཤྲཱི་པ་ཏི་ཞེས། །ལོ་ནི་བདུན་ཅུ་རྩ་ལྔར་འཛིན། །ཞེས་གསུངས་པ་ལྟར། སིངྒ་ལའི་རྒྱལ་པོ་གཞོན་ནུ་དཔལ་གྱི་སྲས་སུ་འཁྲུངས། འཇམ་དཔལ་རྣོན་པོས་ལུང་བསྟན་ཏེ། སློབ་དཔོན་དགའ་རབ་རྡོ་རྗེའི་དྲུང་དུ་ལྷག་པ་ལས་སློབ་དཔོན་གྱིས་རྗེས་སུ་བཟུང་ནས་བརྡ་བསྟན་པ་ཙམ་གྱིས་སྐད་ཅིག་ལ་རྟོགས་གྲོལ་དུས་མཉམ་བྱུང་ཡང་བསྟན་པ་ཡོངས་སུ་རྫོགས་པར་བྱ་ཕྱིར་དབང་བསྐུར་ཞིང་རྒྱུད་མན་ངག་རྣམས་གཏད། སླར་ཆུ་བོ་ལྡན་ཏིའི་མགོར་དགའ་རབ་རྡོ་རྗེ་འོད་ཕུང་དུ་ཡལ་བའི་ཚེ་འཇམ་དཔལ་བཤེས་གཉེན་གྱིས་གསོལ་བ་བཏབ་པ་ལས་འོད་ཀྱི་དཀྱིལ་ནས་འདས་རྗེས་ཀྱི་གླེགས་བམ་བབ་པ་གཟིགས་པ་ཙམ་གྱིས་ཁོང་དུ་ཆུད་དེ་དགའ་རབ་རྡོ་རྗེ་དང་རྟོགས་པ་མཉམ་པར་གྱུར་ཏེ་རྫོགས་ཆེན་གྱི་རྒྱུད་འབུམ་ཕྲག་དྲུག་ཅུ་རྩ་བཞི་བཏུས་ནས། གནས་པ་སེམས་ཀྱི་སྡེ། བྱ་བྲལ་ཀློང་གི་སྡེ། ཟབ་པ་མན་ངག་གི་སྡེ་དང་གསུམ་དུ་ཕྱེ་ཞིང༌། གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་རྣར་རྒྱུད་གཉིས་སུ་ཕྱེ་ནས་རྣར་རྒྱུད་

---

^{[མ་དཔེ་གཟིགས་ན་འདིར་གནོན།]}

མཆན་དུ་བཏབ། བཤད་རྒྱུད་སྙིང་གི་ཐིག་ལེ་སྤེལ་བར་ཕངས་ནས་རྡོ་རྗེ་གདན་དུ་གཏེར་ལ་སྦས། འདི་ལ་སློབ་མ་པཎ་ཆེན་ཉི་ཤུ་རྩ་ལྔ་བྱུང་བའི་ཡ་གྱལ་གཅིག་འཕགས་པ་ཀླུ་སྒྲུབ་ཡིན། ཀླུ་སྒྲུབ་ཀྱིས་ཨཱརྱ་དེ་ཝ་ལ་གནང་བས་ཨཱརྱ་དེ་ཝ་འཇའ་ལུས་འགྲུབ་པ་ཡང་རྫོགས་པ་ཆེན་པོ་ཐུགས་ཉམས་སུ་བསྟར་བ་ལས་བྱུང༌། སློབ་དཔོན་དེ་ཉིད་དུར་ཁྲོད་སོ་ས་གླིང་དུ་ལོ་བརྒྱ་དང་རྩ་དགུར་བཞུགས་ཚེ། ཇི་སྐད་དུ་ཐལ་འགྱུར་ལས། སོ་ས་གླིང་ཞེས་བྱ་བ་རུ། །ཁྱིམ་བདག་རིགས་སྐྱེས་ཤྲཱི་སིདྷ། །ཞེས་བྱ་བ་ཡིས་འཛིན་པར་འགྱུར། །ཞེས་ལུང་བསྟན་པ་ལྟར། རྒྱ་ནག་ཡུལ་གྱི་སློབ་དཔོན་ཤྲཱི་སིདྷ་སྤྱན་རས་གཟིགས་ཀྱིས་ལུང་བསྟན་ཏེ་འཇམ་དཔལ་བཤེས་གཉེན་གྱི་དྲུང་དུ་ཕེབས་ནས་ལོ་ཉེར་ལྔའི་བར་དུ་ཆོས་གསན། དེ་ནས་སློབ་དཔོན་འོད་ཕུང་དུ་ཡལ་ཏེ་འདས་རྗེས་ཤྲཱི་སིདྷའི་ཕྱག་ཏུ་བབས་པས་རྟོགས་པ་མཉམ་པར་གྱུར། དེ་ནས་ལོ་བརྒྱ་ཉེར་ལྔ་ན་འཇམ་དཔལ་བཤེས་གཉེན་ཉིད་ནུབ་ཕྱོགས་སུ་པདྨའི་སྡོང་པོ་ལས་རྫུས་ཏེ་འཁྲུངས་པས་འདི་ལ་འཇམ་དཔལ་བཤེས་གཉེན་ཕྱི་མར་གྲགས་དགོངས་འདུས་སྙིང་པོ་གསེར་གྱི་ཡང་ཞུན་སོགས་ལས་གསལ་བོར་བཤད་མོད་དེ། འདི་གཉིས་མཚན་དོན་གཅིག་པའི་སོ་མཚམས་མ་ཕྱེད་པ་ཁ་ཅིག་འཁྱོག་འགྲོས་སྣ་ཚོགས་སྨྲ་བ་འང་སྣང་ངོ༌། །འཇམ་

---

^{[མ་དཔེ་གཟིགས་ན་འདིར་གནོན།]}

དཔལ་བཤེས་གཉེན་འདིས་ཨོ་རྒྱན་ཆེན་པོ་པདྨ་འབྱུང་གནས་ལ་གསང་སྔགས་མཐའ་དག་བསྟན་ཞིང༌། འཆད་ཚུལ་གཅིག་ཏུ་འདི་ཉིད་ཀྱིས་ཨཱརྱ་དེ་ཝ་ལ་གདམས་པ་སྙིང་ཏིག་བསྟན་ནས་འོད་ཕུང་དུ་ཡལ་ལོ་ཞེས་གྲགས། འདིས་སངས་རྒྱས་ཡེ་ཤེས་ཞབས་རྗེས་སུ་བཟུང་སྟེ་སྔགས་གསར་མ་ལ་གྲགས་ཆེ་བའི་འཇམ་དཔལ་ཞལ་ལུང་ཞེས་དོན་རྫོགས་པ་ཆེན་པོ་དང་ཐ་མི་དད་པ་ཡང་བསྟན་ནོ། །སླར་ཤྲཱི་སིདྷས་མན་ངག་གི་དཔེ་ཕྱུང་ནས་ཐིག་ལེ་སྐོར་ལ་ཕྱི་སྐོར། ནང་སྐོར། གསང་སྐོར། བླ་མེད་ཀྱི་སྐོར་ཏེ་བཞིར་ཕྱེ་ནས་སྔ་མ་གསུམ་གཏེར་ལ་སྦས། གསང་བ་བླ་ན་མེད་པའི་སྐོར་ཐུགས་ལ་གབ་པ་ལས་སླར་མཁའ་འགྲོས་ལུང་བསྟན་ཏེ། དེ་ཉིད་སྦས་ནས་སློབ་དཔོན་ཉིད་བསིལ་སྦྱིན་དུར་ཁྲོད་དུ་བཞུགས་སོ། །དེའི་ཚེ་ཇི་སྐད་དུ་ཐལ་འགྱུར་གྱི་ལུང་སྔ་མའི་འཕྲོར། དེ་རྗེས་འཛིན་པ་གདོལ་པའི་རིགས། །ཛྙཱ་ན་སཱུ་ཏྲས་འདི་ཉིད་འཛིན། །ཞེས་ཛྙཱ་ན་སཱུ་ཏྲ་བསྟན་ལ། དེ་རྗེས་འཛིན་པ་ཁྱིམ་བདག་རིགས། །ཕྱག་རྒྱ་རྒྱ་ཆེན་དག་གིས་འཛིན། །ཞེས་པ་ལ་ལེགས་སྦྱར་གྱི་སྐད་ཤན་སྦྱར་ནས། བི་མ་ལ་རྒྱ་ཆེན་དང༌། མུ་ཏྲ་ཕྱག་རྒྱ་སྟེ་བི་མ་ལ་མུ་ཏྲ་ཡིན་པར་བཞེད། བི་མ་ལ་དང་ཛྙཱ་ན་སཱུ་ཏྲར་རྡོ་རྗེ་སེམས་དཔས་ལུང་བསྟན་པ་ལྟར་སྔོན་ལ་བི་མ་ལ་བྱོན། རྣར་རྒྱུད་ཕྱི་ནང་གསང་གསུམ་གྱི་མན་ངག་ཙམ་གྱིས་ཚིམ་སྟེ་ལོག །རྗེས་སུ་ཛྙཱ་ན་སཱུ་དྲས་བྱོན་ཏེ་རྣར་བརྒྱུད་ཕྱི་ནང་

---

^{[མ་དཔེ་གཟིགས་ན་འདིར་གནོན།]}

གསང་གསུམ་སྤྲོས་མེད་ཀྱི་དབང་རུ་ཤན་འབྱེད་པའི་སྤྱོད་པ་ཤིན་ཏུ་སྤྲོས་མེད་ཀྱི་དབང༌། རབ་ཏུ་སྤྲོས་མེད་ཀྱི་དབང་རྫོགས་པར་ནོད་དེ་བརྟན་པ་ཐོབ། སློབ་དཔོན་ཤྲཱིངྷ་མྱ་ངན་ལས་འདའ་ཁར་གསོལ་བ་བཏབ་པས་ཞལ་ཆེམས་གཟེར་བུ་བདུན་པ་གསང་བའི་མན་ངག་དང་བཅས་པ་ཡང་གནང༌། དེའི་ཚེ་བི་མ་ལར་མཁའ་འགྲོས་ལུང་བསྟན་ཏེ་སྔ་མ་ལས་ཆེས་ཟབ་པ་གསང་བ་སྙིང་ཐིག་གི་མན་ངག་ཡོད་པ་ལོངས་ཞེས་པ་བྱུང་བ་ལྟར་བི་མས་ཛྙཱ་ན་སཱུ་ཏྲར་ཞེས་པས་གདམས་པ་ཡོངས་སུ་རྫོགས། ཛྙཱ་ན་སཱུ་ཏྲ་ཟག་བཅས་ཀྱི་སྐུ་མི་སྣང་བར་འོད་དུ་ཡལ་རྗེས་སུ། འདས་རྗེས་ཀྱི་གླེགས་བམ་བི་མའི་ཕྱག་ཏུ་བབས་པས་སློབ་དཔོན་དང་དགོངས་པ་མཉམ། འདི་ཡན་ཆད་ནི་ཕུང་པོ་ལྷག་མེད་དུ་ཡལ་བའི་མཆོག་གི་དངོས་གྲུབ་བརྙེས་པའི་རིག་འཛིན་བརྡ་བརྒྱུད་དུ་གྲགས། དེ་ལས་སྙིང་ཐིག་བོད་དུ་བྱོན་ཚུལ་ནི། པཎྜི་ཏའི་དབང་བསྐུར་ཐོབ་པ་སློབ་དཔོན་བི་མ་ལ་མི་ཏྲ་དེ་ཉིད་རྒྱ་གར་ཆོས་ཀྱི་རྒྱལ་པོའི་པཎྜི་ཏ་ལྔ་བརྒྱའི་སྤྱི་ཕུད་དུ་གྱུར་ཚེ་ཆོས་རྒྱལ་ཁྲི་སྲོང་གིས་གཉགས་བན་ཀུ་མཱ་ར། ཅོག་རོ་ཀླུའི་རྒྱལ་མཚན། རིན་ཆེན་མཆོག་དང་གསུམ་ལ་གསེར་ཡིག་དང་སྐྱེས་སུ་གསེར་ཕྱེ་རླིད་བུ་གང་བཅས་བསྐུར་ཏེ་ཆོས་རྒྱལ་ཁྱོད་ལ་བླ་མཆོད་མཁས་པ་པཎྜི་ཏ་ལྔ་བརྒྱ་བཞུགས་སྐད་པ། དེའི་ནང་ནས་བདག་ལ་སྐྱེས་ལན་དུ་པཎྜི་

---

^{[མ་དཔེ་གཟིགས་ན་འདིར་གནོན།]}

ཏ་སྤྱིར་ཐེག་པ་མཐའ་དག་ལ་མཁས་ཤིང༌། སྒོས་རྡོ་རྗེ་ཐེག་པ་ལ་མཁས་པ་ཞིག་དགོས་ཞེས་བསྔགས་པས། ལོ་ཙཱ་བ་གསུམ་པོས་རྒྱ་གར་དུ་རྟོལ་ཏེ་བཀའ་ཤོག་དང་གསེར་ཕྱེ་གཏད་ཅིང་ཞུ་བ་བྱས་པས། རྒྱལ་པོས་ནང་པར་ཚ་གྲལ་དུ་གསེར་ཕྱེ་རྣམས་པཎྜི་ཏ་བླ་མཆོད་རྣམས་ལ་ཕུལ། བོད་ཆོས་རྒྱལ་གྱི་ཆབ་ཤོག་གི་དོན་བསྙད་ནས། ཁྱེད་རྣམས་ཀྱི་ནང་ནས་མཁས་པ་གཅིག་བོད་ཀྱི་རྒྱལ་པོའི་སྤྱན་སྔར་བཞུད་པར་ཞུ་ཞེས་གསུངས་པས། པཎ་ཆེན་ལྔ་བརྒྱའི་གྲལ་དབུས་ན་བི་མ་ལ་མི་ཏྲ་བཞུགས་པ་ལ། ཡར་མར་གྱི་གྲལ་རིམ་ཀུན་སྤྱན་ཅེ་རེ་གཟིགས་ཤིང་ཅང་མི་གསུངས་པས། སློབ་དཔོན་ཉིད་ཀྱིས་བཞུད་ཅིག་པའི་བརྡ་ཡིན་པར་དགོངས། དེར་སློབ་དཔོན་གྱིས་ཕོ་ཉ་བ་རྣམས་ལ། བོ་དྷི་ས་ཏྭ་དྷ་ཐིམ། ཞེས་ལན་གསུམ་གསུངས་པས། ལོ་ཙཱ་བ་གསུམ་ལ་གོ་ལུགས་ཐ་དད་པར་སྣང༌། དེ་ནས་བོད་ཡུལ་དུ་འབྱོན་པར་ཞལ་གྱིས་བཞེས་ནས་གདན་འདྲེན་གསུམ་དང་བཅས་ཏེ་བསམ་ཡས་མཐིལ་དུ་ཕྱགས་ཕེབས། རྒྱལ་བློན་འཁོར་དང་བཅས་པས་ཕུ་དུད་མཛད། རྒྱལ་པོའི་རྟོག་ངན་བཟློག་པའི་གྲུབ་རྟགས་དང་རྫུ་འཕྲུལ་དཔག་ཏུ་མེད་པ་བསྟན་ནས་བསྐྱེད་རྫོགས་ཀྱི་མན་ངག་རྒྱ་ཆེར་གྱིས་སྨིན་གྲོལ་ལ་བཀོད། ཁྱད་པར་རྫོགས་ཆེན་སྙིང་ཐིག་གི་གདམས་པ་རྒྱ་ཆེར་སྤེལ་བའི་སྐལ་ལྡན་དུ་གྱུར་པ་ནི། ཐལ་འགྱུར་ལས་སྔ་

---

^{[མ་དཔེ་གཟིགས་ན་འདིར་གནོན།]}

མའི་མུར། དེ་ཡི་རྗེས་ལ་རྒྱལ་པོའི་རིགས། །སྤྲུལ་པ་ཕྱག་བརྙན་བཅས་པས་འཛིན། །ཞེས་ཆོས་རྒྱལ་ཁྲི་སྲོང༌། ཉང་བན་ཏིང་འཛིན། གཡུ་སྒྲ་སྙིང་པོ་ལ་སོགས་དང༌། དེ་ཡི་རྗེས་ལ་དགེ་སློང་གཟུགས། །ལྷུན་གྱི་རྒྱལ་མཚན་དག་གིས་འཛིན། །ཞེས་ལྡང་མ་ལྷུན་རྒྱལ། དེ་རྗེས་སིདྷ་ཤྭ་རས་འཛིན། །ཞེས་པས་ལྕེ་བཙུན་སེངྒེ་དབང་ཕྱུག་སོགས་རིམ་པར་ལུང་བསྟན་ཞིང་འདི་དག་གི་ཆོས་བརྒྱུད་འཛིན་པ་ཕལ་ཆེར་ཀྱང་ཕུང་པོ་འོད་སྐུར་གྲོལ་བ་ཤ་སྟག་བྱུང་ངོ༌། །དེ་ཡང་ལུང་སྔ་མའི་འཕྲོར། དེ་འོག་སྒྲ་མཁས་དཔལ་འཛིན་ནོ། །ཞེས་པ་ཀུན་མཁྱེན་ཀློང་ཆེན་པར་ངོས་འཛིན་པར་གྲགས་ཀྱང༌། ཐེག་མཆོག་མཛོད་དུ་དགེ་སློང་དཔལ་ལྡན་ཞེས་པ་ཀུ་མཱ་རཱ་ཛར་ངོས་འཛིན་མཛད་པའི་གོ་རིམ་དང་མཚན་སྒྲ་སོགས་ལ་གཞིག་ན་རྒྱུད་ལུང་སྔ་མའི་འཕྲོར། དེ་འོག་དགེ་སློང་དཔལ་དང་ལྡན། །དེ་ནས་བློ་གྲོས་མཆོག་གིས་འཛིན། །ཞེས་གསུངས་པས་ཀུན་མཁྱེན་ཆེན་པོའི་མཚན་ལ་ཚུལ་ཁྲིམས་བློ་གྲོས་སུ་བློ་གྲོས་མཆོག་ལྡན་ཡང་གྲགས་ཡོད་པ་བཅས་བཤད་མ་ཐག་པ་འཐད་པར་སེམས་ལ། ཇི་ལྟར་ཡང་རྩོད་པ་བྱ་མ་དགོས་ཤིང་དོན་ལ་རིག་འཛིན་གྱི་སྤྲུལ་པར་བཀའ་གཏེར་མང་པོ་ནས་ལུང་བསྟན་པ་ལྟར་ལུགས་སྲོལ་འདིའི་བསྟན་པ་ལ་དམ་པ་འདི་ལས་བཀའ་དྲིན་ཆེ་བ་ཡང་མེད་ཅིང་སྤྱིར་སངས་རྒྱས་ཀྱི་བསྟན་པ། སྒོས་སྙིང་ཐིག་བཀའ་གཏེར་ཟུང་འཇུག་གི་སྒོ་ནས་བསྟན་པའི་སྲོག་རྩ་འཛིན་པའི་བསྟན་བཅོས་ཀྱང་

---

^{[མ་དཔེ་གཟིགས་ན་འདིར་གནོན།]}

བསམ་གྱིས་མི་ཁྱབ་པ་ནི་ཁྱབ་གདལ་དུ་གྲགས། ཆོས་རྒྱལ་རྗེ་བློན་ནས་བཟུང་ལམ་ལ་དབང་བའི་གང་ཟག་ལ་གནས་པ་དང་མོས་པས་སྤྱོད་པའི་སྐལ་ལྡན་གྱི་སྒྲུབ་པ་པོ་གཅིག་ནས་གཅིག་གི་སྙན་ཁུང་དུ་ཟམ་མ་ཆད་པའི་བརྒྱུད་པ་ད་ལྟའི་བར་དུ་བཞུགས་པ་ལ་གང་ཟག་སྙན་བརྒྱུད་དུ་གྲགས་སོ། །དེ་ལ་ཤེས་བྱེད་རྒྱུད་སྡེའི་རྣམ་གྲངས་ལ་བོད་དུ་འགྱུར་བའི་སེམས་མད་བཅོ་བརྒྱད་དུ་གྲགས་པ་ལ་རིག་པའི་ཁུ་བྱུག །རྩལ་ཆེན་སྤྲུགས། ཁྱུང་ཆེན་ལྡིང༌། རྡོ་ལ་གསེར་ཞུན། མི་ནུབ་རྒྱལ་མཚན་ཏེ་ལྔ་བཻ་རོ་ཙ་ནས་བསྒྱུར། རྩེ་མོ་བྱུང་རྒྱལ། ནམ་མཁའི་རྒྱལ་པོ། བདེ་བ་འཕྲུལ་བཀོད། རྫོགས་པ་སྤྱི་ཆིངས། བྱང་ཆུབ་སེམས་རིག །བདེ་བ་རབ་འབྱམས། སྲོག་གི་འཁོར་ལོ། ཐིག་ལེ་དྲུག་པ། རྫོགས་པ་སྤྱི་གཅོད། ཡིད་བཞིན་ནོར་བུ། ཀུན་འདུས་རིག་པ། རྗེ་བཙུན་དམ་པ། སྒོམ་པ་དོན་གྲུབ་དང་བཅུ་གསུམ། བི་མ་ལ་དང༌། ཀུ་མཱ་ར། གཡུ་སྒྲ་རྣམས་ཀྱིས་བསྒྱུར་བའི་སེམས་མད་བཅོ་བརྒྱད་དང༌། དེ་སྟེང་བཻ་རོས། སྔ་འགྱུར་ཀུན་བྱེད་རྒྱལ་པོ། རྨད་བྱུང་རྒྱལ་པོ། མདོ་བཅུ་གསུམ་བཅས་སེམས་སྡེ་ཉེར་གཅིག །ལུང་བམ་པོ་བཅོ་བརྒྱད་མིང་གི་རྣམ་གྲངས་ལ་མི་འདྲ་ཞིང་ལ་ལ་འདྲ་ཡང་སྔ་ཕྱི་དང་བསྒྱུར་མཁན་མི་འདྲ་ཞེས་གྲུབ་པའི་མཐའ་རིན་པོ་ཆེའི་མཛོད་དུ་གསུངས་ལ། ཀློང་སྡེའི་རྒྱུད་ལ། འཁོར་

---

^{[མ་དཔེ་གཟིགས་ན་འདིར་གནོན།]}

བ་དོང་སྤྲུགས། རིན་ཆེན་གསང་བ། བྱ་བྲལ་མེད་པ། ནམ་མཁའི་ཀློང་ཡངས་རྒྱུད་ལ་སོགས་པ་འབུམ་ཕྲག་བཅུ་གཅིག་དང༌། མན་ངག་གི་རྒྱུད་ལ། པདྨ་ཀློང་གསལ། པདྨ་དབང་རྒྱལ། ཡིད་བཞིན་ཏོག་གི་རྒྱུད་ལ་སོགས་པ་ཁྲི་ཕྲག་ལྔ་དང་སྟོང་ཕྲག་གཅིག །དེའི་ནང་ནས་ཁྱད་པར་ནི་སངས་རྒྱས་མཉམ་སྦྱོར་ལ་སོགས་པའོ། །ཐིག་ལེའི་སྐོར་གྱི་རྒྱུད་ལྔ་སྟོང་སུམ་བརྒྱ། སྒྲ་ཐལ་འགྱུར་ལ་སོགས་པའི་གསང་ཆེན་ངེས་པའི་རྒྱུད་བཅུ་བདུན། ཁྲོས་མ་དང་བཅས་བཅོ་བརྒྱད། གསང་བ་ཅོད་པན་གྱི་རྒྱུད་ལས་འཕྲོས་ཏེ་བྱོན་པ་རྣམས་སོ། །རྫོགས་ཆེན་སྤྱི་རྒྱུད་དམ་རྩ་བའི་རྒྱུད་ཉི་ཤུ་རྩ་ལྔ་དང༌། བཤད་པའི་རྒྱུད་ལ་སོགས་པའི་རྐང་གྲངས་ནི་ཀུན་མཁྱེན་ཀློང་ཆེན་པའི་ངལ་བསོ་སྐོར་གསུམ་གྱི་སྤྱི་དོན་ལེགས་བཤད་རྒྱ་མཚོར་གྲགས་པའི་ནང་དུ་རྣམ་ངེས་ཤིན་ཏུ་གསལ་བ་ལྟར་དང༌། བྱེ་བྲག་གི་སྐོར་རྣམས་ནི་གྲུབ་མཐའ་རིན་པོ་ཆེའི་མཛོད་དུ་ཤེས་ལ། དེ་དག་གི་རྒྱུད་དོན་ལས་ཁྱད་པར་དུ་ཕྱེ་བ་སྙིང་ཐིག་གི་སྐོར་ལས་ཟབ་པ་པུསྟ་ཀ་བཞི་ཡོད་པ། གསེར་ཡིག་ཅན་དང༌། གཡུ་ཡིག་ཅན། དུང་ཡིག་ཅན་དང་གསུམ། ཟངས་ཡིག་ཅན་དང་ཕྲ་ཡིག་ཅན་བསྡོམས་ནས་གཅིག་སྟེ། འདི་དག་རྒྱལ་བློན་རྗེ་འབངས་ལའང་མ་གནང་བར་མཆིམས་ཕུར་གཏེར་དུ་སྦས། དེ་ཡང་འདི་ནི་རེ་ཞིག་རྫོགས་ཆེན་

---

^{[མ་དཔེ་གཟིགས་ན་འདིར་གནོན།]}

རྒྱུད་སྡེའི་རྗེས་སུ་འབྲངས་ནས་སྙིང་ཐིག་གི་བསྟན་པ་བི་མས་རྒྱས་པར་མཛད་པའི་ལུགས་སུ་བཤད་མོད། གཏེར་རྒྱུད་ཨོ་རྒྱན་ཆེན་པོ་ལས་གཙོ་བོར་བརྒྱུད་པ་ལྟར་ན། སྔར་བཤད་པ་ལྟར་ཤྲཱི་སིངྷས་ཨོ་རྒྱན་ཆེན་པོར་བསྟན། དེས་གཞི་སྟོད་ཏི་སྒྲོར་མཁར་ཆེན་བཟའ་མཚོ་རྒྱལ་ལ་ལྐོག་ཆོས་སུ་གདམས། འདིའི་ལུགས་ལ་རྒྱུད་ཀློང་གསལ་གྱི་དགོངས་པ་གཙོ་བོར་འདོན་པས་བཀའ་གཙིགས་ཀྱང་ཆེ། སླར་མངའ་བདག་གི་སྲས་མོ་ལྷ་ལྕམ་པདྨ་གསལ་ལ་མཚོན་བྱ་དོན་གྱི་ཡེ་ཤེས་སྨོན་ལམ་དབང་བསྐུར་གྱི་རྒྱས་བཏབ། མཚོན་བྱེད་བརྡ་ཡི་ཚིག་བརྒྱུད་ཡི་གེར་བཀོད་དེ་མཁའ་འགྲོ་གཏེར་བདག་རྣམས་ལ་གཉེར་ནས་དྭགས་ལུང་ཕྲ་མོ་བྲག་ལ་སྦས་པ། དུས་ཕྱིས་ལྔ་བཅུ་ཁ་རལ་གྱི་ཚེ་པདྨ་ལས་འབྲེལ་རྩལ་ལམ། ཐང་ཡིག་ཏུ་རིན་ཆེན་ཚུལ་རྡོར་ཞེས་ལུང་བསྟན་པ་དེས་གཏེར་ནས་བཏོན་པའི་མཁའ་འགྲོ་སྙིང་ཐིག་ཏུ་གྲགས་པ་ཡོངས་གྲགས་སུ་ཁྱབ་ཆེ་ལ། གཞན་དུ་གཏེར་ཁ་གསར་རྙིང་ཇི་སྙེད་ནས་སྙིང་ཐིག་གི་ཆོས་སྐོར་རྒྱས་བསྡུས་ཅི་ཡང་འབྱུང་མོད། དེ་ཡང་སྤྱིར་རྫོགས་ཆེན་གྱི་སྡེར་གཏོགས་ཚད་ལམ་བྱ་རྩོལ་ལས་འདས་པ་གཙོ་བོར་འདོན་ཞིང༌། དེ་ལས་སེམས་ཀློང་མན་ངག་གི་སྡེའི་ཁྱད་པར་ཆེ་བས་ཡུལ་དང་ཡུལ་ཅན་གྱི་སྒོ་ནས་རིག་པའི་ཡེ་ཤེས་གཏན་ལ་འབེབས་པའི་ཁྱད་པར་ཆེ་བའང་ཡོད་དོ། །འདིར་སྨྲས་པ། ལང་ཚོའི་མཛེས་པ་རླུང་

---

^{[མ་དཔེ་གཟིགས་ན་འདིར་གནོན།]}

ལ་མ་བསྐུར་ཞིང༌། །རྒྱ་གར་ཁ་སྤུ་ཅན་ཡུལ་མ་བགྲོད་པར། །ཨ་ཏིའི་ཆོས་འབྱུང་སྨྲ་བར་སྤོབས་པ་འདི། །པདྨའི་ཐུགས་རྗེས་མིན་ན་གཞན་དུ་ཅི། །ཕྱོགས་ལྷུང་ནད་ཀྱིས་གདུངས་པའི་ཡིད་སྲུབས་སྡེ། །མདའ་ལྔའི་བརྩོན་པ་བསྒྲུབ་ལ་ཀུན་ཏུ་བྲེལ། །ལུགས་འདི་ཤེས་པར་རློམ་པའི་བྱིས་པ་རྣམས། །ནང་རྒྱུད་འཆོལ་བར་བསྲེ་བའི་རྩེད་མོས་གཡེངས། །ཚུལ་འདི་བསམ་བཞིན་ཀུན་མཁྱེན་ཆོས་རྗེ་དང༌། །འཇིག་རྟེན་མིག་གཅིག་ལྔ་བ་ཆེན་པོའི་ཞབས། །འཁོར་ལོའི་མགོན་པོ་སྣ་ཚོགས་རང་གྲོལ་གསུམ། །རྒྱལ་བ་འབྲི་གུང་བ། མངའ་རིས་པཎ་ཆེན། ཤནྟ་པུ་རི། གདོད་མར་གཟིམས་ལ་འཕངས་པའི་དུཿཁས་མནར། །ཞེས་བར་སྐབས་ཀྱི་ཚིགས་བཅད་དོ། །༈ །།ནང་ལུང་ཨ་ནུ་ཡོ་ག་ནི། བུ་རམ་ཤིང་པ་ཐ་མའི་གཟིམས་ཁྲི་ལ་མནལ་ནས་སྣོད་བཅུད་ཐམས་ཅད་ཉམས་པའི་ཚེ། གཅེར་བུ་པ་རྣམས་ཀྱིས་གཽ་ཏ་མའི་བསྟན་པ་ནི་མེ་ཤི་བའི་དུད་པ་བཞིན་དུ་སོང་ཞེས་ངན་སྨྲས་ཀྱིས་སྤྱོ་བར་བྱས་པའི་ཚེ། དམ་པའི་རིགས་ཅན་དྲ་མ་མི་དང་མི་མ་ཡིན་ལྔ་ཟབ་མོ་ཏིང་ངེ་འཛིན་ལ་བཞུགས་པ་ལས། བགྲང་བྱ་རྒྱུ་སྐར་གྱི་འཁོར་ལོའི་གྲངས་ལ་སླེབ་པ་ན་ཏིང་ངེ་འཛིན་ལས་ལངས་པས་ཉེས་བྱས་རྣམས་ཚོར་བས་མ་བཟོད་ནས། རི་བོ་མ་ལ་ཡ་གནམ་ལྕགས་ཡོད་པའི་རྩེར་མ་བཟོད་པའི་གདུང་ཚིག་ཉི་ཤུ་རྩ་གསུམ་

---

^{[མ་དཔེ་གཟིགས་ན་འདིར་གནོན།]}

བཏོན་པས། དུས་གསུམ་གྱི་བདེ་གཤེགས་ཐམས་ཅད་ལྕང་ལོ་ཅན་དུ་འདུས་ཏེ། དཔལ་གསང་བའི་བདག་པོ་ལ་སེམས་ཅན་གྱི་གདུང་བ་སེལ་བར་བསྐུལ་བ་ལ་བརྟེན་གནམ་ལྕགས་འབར་བའི་རྩེར་གསང་བའི་བདག་པོས་དམ་པའི་རིགས་ཅན་དྲ་མ་ལྔ་ལ་མདོ་དགོངས་པ་འདུས་པ་སོགས་དང་ལུང་གི་ཆོས་སྡེ་རྣམས་བཤད་དེ་རིམ་པར་དར། དེ་ལ་རྒྱུད་སྡེའི་ཤེས་བྱེད་ནི་མདོ་དྲུག་ལ། མདོ་སྒྱུ་འཕྲུལ་རྔམ་པ་གློག་གི་འཁོར་ལོ། ཕུར་བ་ཐལ་བྱེད། དུར་ཁྲོད་ཁུ་བྱུག་གི་རོལ་བ། ཀུན་འདུས་རིག་པ། དགོངས་པ་འདུས་པ། ཡི་གེ་རྣམ་དག་གི་མདོ་རྣམས་སོ། །རྩ་བའི་རྒྱུད་ལ། ཐིག་ལེ་འདུས་པའི་རྒྱུད། སྒྱུ་མ་ཆེན་པོའི་རྒྱུད། ཟླ་གསང་ཐིག་ལེའི་རྒྱུད། རྡོ་རྗེ་གདན་བཞིའི་རྒྱུད་རྣམས་དང༌། མན་ངག་གི་རྒྱུད་ལ། སྐུའི་རྒྱུད་མེ་ལྟར་འབར་བ། གསུང་གི་རྒྱུད་དབང་ཆེན་འདུས་པ། ཐུགས་ཀྱི་རྒྱུད་པུཎྜ་རི་ཀ ཡོན་ཏན་གྱི་རྒྱུད་ལྷ་མོ་གསང་བ། ཕྲིན་ལས་ཀྱི་རྒྱུད་རིག་འཛིན་འདུས་པ། རིགས་ལྔའི་སྤྱིའི་སྒྲུབ་པ་ཧེ་རུ་ཀའི་ཏནྟྲ་རྣམས་སོ། །བྱེ་བྲག་གི་སྒྲུབ་རྒྱུད་རྣམས་ནི་ཀུན་མཁྱེན་ཆེན་པོས་ལེགས་བཤད་རྒྱ་མཚོ་ནས་བཤད་པ་ལྟར་དང༌། སྤྱི་མདོ་དགོངས་པ་འདུས་པ་ལ་སློབ་དཔོན་དཔའ་བོས་འགྲེལ་པ་མཛད་ཅིང༌། མདོ་གཞན་རྣམས་ལ་ཡང་འགྲེལ་བ་རྒྱ་ཆེར་ཡོད་པར་གྲགས། འདིའི་ལུགས་ལ་དབྱིངས་ཡེ་གདོད་ནས་མཉམ་སྦྱོར་གྱི་དགོངས་པས་བསྐྱེད་རྫོགས་ཟུང་

---

^{[མ་དཔེ་གཟིགས་ན་འདིར་གནོན།]}

འབྲེལ་ལས་དཀྱིལ་འཁོར་ལུས་ལ་བསྟེན་ཅིང་རྫོགས་རིམ་ཤེས་རབ་ཀྱི་རྟོགས་པ་གཙོ་བོར་བཏོན་ནས་ལམ་སྦྱང༌། ཞིང་ཁམས་བདེ་བ་ཆེན་པོ་ཕྲ་མོའི་རྣལ་འབྱོར་ལས་དངོས་གྲུབ་འདོད་པའོ། །༈ །།ཕྱི་བསྐྱེད་པ་མ་ཧཱ་ཡོ་ག་མདོ་སྒྱུ་འཕྲུལ་སྐོར་ནི། གདོད་མའི་མགོན་པོ་དཔལ་ཀུན་ཏུ་བཟང་པོས་ཉིད་དང་དགོངས་པ་མཉམ་པའི་རང་སྣང་རྣམ་པར་དག་པའི་འཁོར་ལོངས་སྤྱོད་རྫོགས་པའི་སྐུ་རིགས་ལྔའི་སངས་རྒྱས་ལ་རང་སྣང་འོག་མིན་སྟུག་པོ་བཀོད་པའི་ཞིང་ཁམས་ཞིང་ཁམས་འདི་ཕལ་གྱིས་ངོས་ཟིན་པ་ཉུང་སྟེ། གྲུབ་མཐའ་རིན་པོ་ཆེའི་མཛོད་དུ། དེའང་ཁམས་གསུམ་ལས་འདུས་པའི་གནས་སྟུག་པོ་བཀོད་པ་ན་སངས་རྒྱས་སོ། །དེ་ཕྱོགས་གང་ན་ཡོད་ཅེ་ན། རྨི་ལམ་ཉིད་གང་དུ་སོང་བ་དེར་འོང་གི་འདི་ཁོ་ནར་ཡོད་དོ་ཞེས་མ་འཆད་པ་ལྟར་གང་དུ་སྒྲུབ་པ་མཐའ་དག་དང་བྲལ་ནས་དབྱིངས་དང་ཡེ་ཤེས་དབྱེར་མེད་དུ་འདྲེས་པ་དེ་ན་ཡོད་དོ། །ཞེས་གསུངས་སོ། །རྒྱ་ཆད་ཕྱོགས་ལྷུང་དང་བྲལ་བར་བསྟན་པ་ཚིག་གིས་མ་མཚོན་པར་དགོངས་པས་བྱིན་གྱིས་བརླབས་པ་ལས་བརྒྱུད་དེ་རྒྱལ་སྲས་རྡོ་རྗེ་སེམས་དཔའ་སོགས་ལ་ཡེ་ཤེས་འཕོས་པས་འདི་ཡན་ཆད་ལ་རྒྱལ་བ་དགོངས་པའི་བརྒྱུད་ཁུངས་ཞེས་གྲགས་ལ། དེ་ནས་རིག་འཛིན་བརྡ་བརྒྱུད་ནི་རྒྱལ་སྲས་རིགས་གསུམ་མགོན་ལས་མཆེད་པ་སྟེ། འཇམ་དཔལ་གཞོན་ནུར་གྱུར་པས་ལྷ་རྣམས་ཀྱི་ལུས་དང་བསམ་པ་དང་མཐུན་པར་ཆོས་བསྟན་ཏེ་འཇམ་དཔལ་རྡོ་རྗེ་རྣོན་པོས་ལྷ་གྲགས་ལྡན་

---

^{[མ་དཔེ་གཟིགས་ན་འདིར་གནོན།]}

ཕྱོགས་སྐྱོང་ལ་བཤད། དེས་རིན་ཆེན་འོད་འབར། དེས་ཚངས་པའི་རྒྱལ་པོ། དེས་ཚངས་པ་ཀུན་གྲོལ། དེས་ཚངས་པ་གཙུག་ཕུད་འཛིན། དེས་ལྷ་དབང་བརྒྱ་བྱིན། དེས་ཚོམ་བུ་འབུམ་སྡེ་ལ་བཤད་པས་ཐམས་ཅད་གྲོལ་ལོ། །སྤྱན་རས་གཟིགས་བདུད་རྩི་སྨན་དང་ལྡན་པ་དེས་ཀླུ་གདུག་པ་ཅན་གྱི་ལུས་དང་བསམ་པ་དང་མཐུན་པར་ཀླུ་རྒྱལ་གྷྲི་ན་ནག་པོ་ལ་བཤད། དེས་ཀླུ་མོ་ཁ་འདུལ་ལ། དེས་ཀླུ་ཡིད་འོང་དགའ་ལ། དེས་ཀླུ་རྒྱལ་འཇོག་པོ། དེས་ཚོམ་བུ་འབུམ་སྡེ་ལ་བཤད་པས། ཀླུ་དེ་རྣམས་ཀྱང་བྱང་སེམས་ཀྱི་རིགས་འཛིན་ཅིང༌། རྒྱལ་བའི་གདུང་བསབས། ཕྱག་ན་རྡོ་རྗེའི་ཁྲོ་བོའི་རྣལ་འབྱོར་ཅན་དེས་གནོད་སྦྱིན་གྱི་ལུས་དང་བསམ་པ་དང་མཐུན་པར་གནོད་སྦྱིན་གྲགས་ལྡན་མཆོག་སྐྱོང་ལ་བཤད། དེས་གནོད་སྦྱིན་ཀུན་ཏུ་བཟང་པོ་ལ། དེས་གནོད་སྦྱིན་ལག་ན་རྡོ་རྗེ་ལ། དེས་གནོད་སྦྱིན་སྐར་མདའ་གདོང་ལ། དེས་ཚོམ་བུ་འབུམ་སྡེ་ལ་བཤད་པས་ཐམས་ཅད་གྲོལ་ཏེ་རྒྱལ་བའི་གདུང་བསབས། དེ་ཡང་རིག་འཛིན་ཡོངས་འདུས་ལས། གནས་མཆོག་ལྕང་ལོ་ཅན་གྱི་ཕོ་བྲང་དུ༔ སངས་རྒྱས་ཐུགས་ཀྱི་སྤྲུལ་བ་རྡོ་རྗེ་འཛིན༔ སྟེང་འོག་ཕྱོགས་བཞིར་ཐུགས་ཀྱིས་འགྲོ་དོན་མཛད༔ ཅེས་བཤད་པ་ལྟར་གསང་བའི་བདག་པོས་གནས་ངེས་མེད་དུ་འགྲོ་དོན་མཛད་ཅིང༌། ལྷ་ཀླུ་གནོད་སྦྱིན་སྲིན་པོ་ལངྐ་རྣམས་ལས་མི་མ་

---

^{[མ་དཔེ་གཟིགས་ན་འདིར་གནོན།]}

ཡིན་དང་ལི་ཙ་བྱི། དྲི་མེད་གྲགས་པ་སོགས་མིའི་རིག་འཛིན་དུ་གྲགས་པ་ལ་རི་མ་ལ་ཡའི་རྩེ་མོར་རྒྱུད་སྡེ་ཇི་སྙེད་བཤད། བློ་གྲོས་ཐབས་ལྡན་གྱིས་རིན་པོ་ཆེའི་གླེགས་བམ་དུ་བྱས་པས་རྒྱུད་འདི་དག་ཡི་གེར་འཁོད་པའི་སྔ་མ་ཡིན་པར་ཡང་འདོད་ལ། དེའི་ཚེ་གླེགས་བམ་གྱི་དབང་བསྐུར་ཐོབ་པར་གྲགས་པ་ནི། ཨིནྡྲ་བྷོ་དྷིའམ། རྒྱལ་པོ་ཛ་ལ་བྱང་ཆུབ་དབང་པོ་དང༌། སྲས་ལ་འབྱོར་བའི་དབང་པོ་སྟེ་ཨིནྡྲ་ཙམ་དུ་མཚུངས་ནའང་བྷོ་དྷི་དང་བུ་ཏིའི་ཁྱད་པར་ཤེས་དགོས་སོ། །རྒྱལ་པོ་ཛར་གྲགས་པ་ཡིན་ཏེ། མདོ་ལས། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ནས། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་ལྷོའི་ཕྱོགས་མཚམས་སུ། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛ་ཞེས་བྱ་བ་འབྱུང༌། །སྔོན་དུ་ལྟས་རྣམས་འབྱུང་འགྱུར་ཏེ། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་ཅན་དམན་པའི་ལུས། །ལངྐའི་བདག་པོ་ལ་སོགས་པ། །ལག་ན་རྡོ་རྗེས་སྟོན་པར་འགྱུར། །ཅེས་དང༌། གསང་བའི་སྙིང་པོ་རྒྱུད་ཕྱི་མ་ལས། རེ་ཞིག་སྣོད་དང་ལྡན་པའི་མི། །དེ་མིང་རྒྱལ་བོ་ཛ་ཞེས་བྱ། །ཕྱག་ན་རྡོ་རྗེའི་མཐུས་སྣང་འགྱུར། །ཞེས་ལུང་བསྟན་པ་ལྟར་ཨོ་རྒྱན་གྱི་རྒྱལ་པོ་ཨིནྡྲ་བྷོ་དྷི་ཆེ་བའི་སྲས་འབྲིང་པོའི་ཡབ་དུ་བཤད་པ་རྒྱལ་པོ་ཛས་རྒྱ་གར་ཤར་ཕྱོགས་བྷངྒ་ལའམ་ཟ་ཧོར་གྱི་རྒྱལ་པོ་མཛད། སྟོན་པ་མྱ་ངན་ལས་འདས་ནས་

---

^{[མ་དཔེ་གཟིགས་ན་འདིར་གནོན།]}

ལོ་བརྒྱ་དང་བཅུ་ཕྲག་གཉིས་ཉག་མ་བརྒྱད་ལོན་པའི་ཆོ་འཕྲུལ་ཟླ་བའི་རྒྱལ་གྱི་ཉ་བའི་ཉིན་ངོ་མཚར་གྱི་ལྟས་སྣ་ཚོགས་འབྱུང་བས་རྒྱལ་པོ་འཁོར་བཅས་ཀྱིས་མཆོད་པ་བཤམས་པས་དེའི་ནུབ་རྒྱལ་པོའི་ཕོ་བྲང་གྲོང་ཁྱེར་རི་བོ་དང་བཅས་འོད་ཀྱིས་གང་བར་གྱུར་ཏོ། །དེ་ནས་ཨ་སུ་རའི་བྲག་ཕུག་ཏུ་སྒྲུབ་པ་མཛད་པའི་ཚེ་རྨི་ལྟས་ཁྱད་པར་ཅན་བདུན་ཤར་བར་གྲགས་པ་འདི་ལྟ་སྟེ། སྲོད་ཐུན་དང་པོ་ལ་རི་མ་ལ་ཡའི་རྩེར་གསང་བའི་བདག་པོ་བྱོན་ཏེ་སྐུ་ལས་འོད་ཟེར་འཕྲོས་གདུལ་བྱའི་སྒྲིབ་པ་སྦྱང༌། གསུང་ལས་ཐེག་པའི་རང་སྒྲ་འབྲུག་སྟོང་ལྡིར། ཐུགས་ལས་རྡོ་རྗེ་འོད་འཕྲོ་བ་ཞིག་བྱུང་ནས་རྒྱལ་པོའི་ཐུགས་ཀར་ཐིམ། ཉི་མའི་འོད་སྤྱི་བོ་དང༌། ཟླ་བའི་འོད་རྐང་པར་ཐིམ། སྣང་སྲིད་ཐམས་ཅད་ལྟོ་བར་འཕྱོ་བ་ཞིག་རྨིས་སོ། །གཉིས་པ་ལ། དེ་བཞིན་གཤེགས་པ་ཐམས་ཅད་བཀའ་བགྲོ་ཞིང༌། ཉི་ཟླ་ཞོན་ནས་གསེར་གྱི་འཁོར་ལོ་བསྐོར། སྲིད་གསུམ་ཁ་ལོ་གྱེན་ལ་བསྒྱུར་བ་ཞིག་རྨིས་སོ། །གསུམ་པ་ལ། ཡང་ནམ་མཁའི་གཏོས་ལས་སྤྲིན་གསེར་གྱི་མདོག་ཅན་ནི་འཐིབས། ཆོ་འཕྲུལ་གྱི་འབྲུག་སྒྲ་ཆོས་ཀྱི་སྒྲ་རུ་ནི་གྲགས། རིན་པོ་ཆེའི་ཆར་ནི་བབས། བཻ་ཌཱུརྱའི་འོད་ནི་ལྷུང་བ་ཞིག་རྨིས་སོ། །བཞི་པ་ལ། ཡང་འཇིག་རྟེན་གྱི་གཏོས་ནི་འགྱུར། རིན་པོ་ཆེ་འབར་བས་སྣང་སྲིད་ཀྱི་མུན་པ་བསལ། བདུད་རྩི་སྨན་གྱི་ཆུ་རྒྱུན་འབྱུང་བས་འགྲོ་བ་མིའི་གཅོང་སྙིང་སྦྱངས། སེམས་

---

^{[མ་དཔེ་གཟིགས་ན་འདིར་གནོན།]}

ཅན་ཐམས་ཅད་རྡོ་རྗེ་རྣལ་འབྱོར་ཅེས་པའི་སྒྲ་དི་རི་རི་སྒྲོགས་པ་ཞིག་རྨིས་སོ། །ལྔ་པ་ནི། ཡང་སྤྲིན་གྱི་ནང་ན་ཉི་མའི་དཀྱིལ་འཁོར་རིན་པོ་ཆེ་སྣ་ཚོགས་ཀྱི་འོད་ཟེར་ཤར་བའི་ནང་རིན་པོ་ཆེའི་དཔལ་བེའུ་སྒྲོམ་འོད་དང་བཅས་པ་ཕྱི་ནང་ཐམས་ཅད་གསལ་བའི་ནང་ནས་གསེར་གྱི་གླེགས་བམ་མང་པོ་སྐར་མདའ་ལྟར་ས་ལ་ལྷུང་བ་ཞིག་རྨིས་སོ། །དྲུག་པ་ལ། གླེགས་བམ་དེ་དག་ལ་བྱང་ཆུབ་སེམས་དཔའ་དང༌། རིག་འཛིན་ལྷ་དང་བཅས་པ་མང་པོས་ཀློག་འདོན་བྱེད་པ་རྨིས་སོ། །བདུན་པ་ལ། ནམ་མཁའི་སྤྲིན་གསེབ་ནས་ལུང་བསྟན་པའི་སྒྲ་བྱུང་བ་ནི། ལས་དང་སྐལ་བར་ལྡན་པ་ཡི། །བསོད་ནམས་ཆེན་པོ་དྲ་མ་ཁྱོད། །སྤྲུལ་པས་ཇི་ལྟར་ལུང་བསྟན་བཞིན། །ད་ལྟ་དུས་འདིར་མངོན་ཤར་གྱི། །འཁོར་བ་སྙིང་པོ་བྱ་བའི་ཕྱིར། །ང་ཡི་བྱིན་རླབས་ཆོ་འཕྲུལ་གྱིས། །བསྟན་པའི་སྙིང་པོ་དམ་པ་ཞིག །སྐལ་ལྡན་ཁྱོད་ལ་བསྟན་པའི་ཕྱིར། །ཞེས་སྒྲོགས་པར་རྨིས་སོ། །དེ་ནས་སྔོན་ལ་ཕྱག་ན་རྡོ་རྗེའི་སྒྲུབ་པ་མཛད་ནས་གླེགས་བམ་བབས་ཚུལ་སོགས་བཤད་ཚུལ་གཞན་ཡང་ཡོད་དེ་གཏེར་ཁ་འདི་ཁའི་རང་སྐད་ལས། འཇམ་དཔལ་རྡོ་རྗེ་ཆོས་དང་ནི༔ གྲུབ་ཐོབ་རིག་འཛིན་ཐམས་ཅད་ཀྱིས༔ རྒྱལ་པོ་ཛ་ཞེས་བྱ་བ་དག༔ ཆོས་ལ་ལས་འཕྲོ་ཡོད་གཟིགས་ནས༔ གླེགས་བམ་རྒྱུད་སྡེ་ཆེན་པོ་དག༔ མཁའ་ལ་རང་བབས་ཚུལ་དུ་ནི༔

---

^{[མ་དཔེ་གཟིགས་ན་འདིར་གནོན།]}

སྤྱན་དྲངས་རྒྱལ་པོའི་ཐོག་ཁར་བབས༔ དེ་ནུབ་རྒྱལ་པོའི་རྨི་ལམ་དུ༔ བཻ་ཌཱུར་ཞུན་མའི་གླེགས་བམ་ནི༔ ཕོ་བྲང་ཐོག་ཏུ་ཆར་བབས་རྨིས༔ ནངས་པར་གཟིགས་པས་དེ་བཞིན་སྣང་༔ ཞལ་ཕྱེ་གཟིགས་པས་ཤེས་མ་གྱུར༔ ཀུ་ཀུ་ཛ་རཱ་ཞེས་བྱ་བའི༔ པཎྜི་ཏ་ལ་བསྟན་གྱུར་ཀྱང་༔ བརྡ་ཙམ་ཞིག་ཀྱང་མ་ཤེས་ནས༔ མཁྱེན་པ་ཙམ་གྱིས་ཚུར་བརྫངས་པ༔ བདག་གིས་ཤེས་པར་མ་གྱུར་ཏེ༔ ཉིད་རང་ལས་དང་སྐལ་བར་ལྡན༔ དགོངས་པས་དཔག་པར་གསོལ་ཞེས་སྐད༔ དེ་ནས་ཨིནྡྲ་བྷོ་དྷི་ཡིས༔ གསེར་གྱི་གླེགས་བམ་སྤྱི་བོར་བཞུགས༔ ཞག་བདུན་གདུང་བསྐྱེད་བ་སྤུ་གཟིང་༔ མཆི་མ་བླགས་ཤིང་དགོངས་པ་མཛད༔ ཞག་བདུན་ནངས་པར་ཞལ་ཕྱེ་ནས༔ རྡོ་རྗེ་སེམས་མཇལ་ལེའུ་མཁྱེན༔ སླར་ཡང་ཉེར་གཅིག་མཉམ་བཞག་པས༔ རྒྱུད་སྡེ་བཅོ་བརྒྱད་ཁོང་དུ་ཆུད༔ གསང་སྔགས་དོན་ལ་མཁས་གྱུར་པས༔ ཕྱི་ནང་གསང་བའི་དོན་དབང་ཐོབ༔ རྒྱལ་པོ་འཁོར་དང་བཅས་པ་རྣམས༔ རྡོ་རྗེ་ལྟ་བུའི་ལུས་གྱུར་ནས༔ ཀུན་གྱིས་མཐོང་བར་མངོན་སངས་རྒྱས༔ ཞེས་གསུངས་པ་ལ་ཤེས་བྱེད་རྒྱུད་སྡེའི་རྣམ་ངེས་ནི། སངས་རྒྱས་མཉམ་སྦྱོར། གླང་པོ་རབ་འབོག །གླང་པོ་ཆེ་ཆུར་འཇུག་སྟེ་སྐུ་ཡི་རྒྱུད་གསུམ། ཟླ་གསང་ཐིག་ལེ། གཅིག་ལས་འཕྲོས་པ། དུ་མ་ལས་འཕྲོས་པ་སྟེ་གསུང་

---

^{[མ་དཔེ་གཟིགས་ན་འདིར་གནོན།]}

གི་རྒྱུད་གསུམ། གསང་བ་འདུས་པ། རི་བོ་བརྩེགས་པ། རྩེ་གཅིག་འདུས་པ་སྟེ་ཐུགས་ཀྱི་རྒྱུད་གསུམ། དཔལ་མཆོག་དང་པོ། བདུད་རྩི་མཆོག་དང་པོ། ཡིད་བཞིན་ནོར་བུ་སྟེ་ཡོན་ཏན་གྱི་རྒྱུད་གསུམ། ཀརྨཱ་མཱ་ལེ། སྒྲོན་མ་འབར་བ། ཀཱི་ལ་ཡ་ཡིག་འབྲུ་བཅུ་གཉིས་ཀྱི་རྒྱུད་དེ་ཕྲིན་ལས་ཀྱི་རྒྱུད་གསུམ། དེ་ཐམས་ཅད་ཀྱི་སྤྱི་རྒྱུད་སྒྱུ་འཕྲུལ་དྲྭ་བའི་རྒྱུད། དམ་ཚིག་ས་མ་ཡ་འབུམ་སྡེ་བཀོད་པའི་རྒྱུད། རྡོ་རྗེ་ཐབས་ཀྱི་ཞགས་པའི་རྒྱུད་དེ་ཏནྡྲ་སྡེ་བཅོ་བརྒྱད་དུ་གྲགས་ལ། འདི་ནས་རིམ་པར་བརྒྱུད་པ་ལ་གང་ཟག་སྙན་ཁུང་དུ་གྲགས་པའི་བརྒྱུད་པའི་ཁྱད་པར་ནི། ཨིནྡྲས་ཨུ་པ་རཱ་ཙ་ལ། དེས་ཐོར་ཅོག་ཅན་ལ། དེས་སིདྷ་རཱ་ཙ་ལ། དེས་ཨིནྡྲ་བྷོ་དྷི་ཕྱི་མ་ལ། དེས་ཁ་ཆེའི་རྒྱལ་པོ་ལ། དེས་སློབ་དཔོན་ཧཱུྃ་ཀཱ་ར་ལ་བསྐུར་ཏེ་འདི་རྣམས་ཚོགས་སྒྲུབ་ཀྱི་དཀྱིལ་འཁོར་ལ་བརྟེན་ནས་བསྒྲུབས་པས་ཚོམ་བུ་ལྔ་བརྒྱ་དང་བཅས་མཆོག་གི་དངོས་གྲུབ་ཐོབ། ཁ་ཆེ་མ་ཧཱ་རཱའ་ཛཱས་པཎ་ཆེན་བི་མ་ལ་མི་ཏྲ་ལ་ཡང་བཤད་དོ། །ཧཱུྃ་ཀཱ་རས་ནམ་མཁའི་སྙིང་པོ་ལ་བཤད། དེས་བོད་དུ་ཆོས་རྒྱལ་ཁྲི་སྲོང་དང༌། གཉགས་བན་ཛྙཱ་ན་ཀུ་མཱ་ར་ལ་བཤད་དེ་རིམ་པར་དར། དེ་ཡང་སྔ་རབས་པ་ཁ་ཅིག་གིས། གསང་སྔགས་རང་ཉིད་ལེན་པ་ནི། །ལུས་ཅན་དམྱལ་བ་འབའ་ཞིག་རྒྱུ། །ཞེས་པ་ཙམ་ལ་ཁ་གཡར་ནས་གླེགས་བམ་གྱི་

---

^{[མ་དཔེ་གཟིགས་ན་འདིར་གནོན།]}

དབང་བསྐུར་ཐོབ་པའི་ལོ་རྒྱུས་ལ། སྒྲོ་སྐུར་མི་བཟད་པ་བྱུང་མོད། དེ་ནི་གྱི་ན་སྟེ། གང་ཟག་ཐ་མལ་པ་གཅིག་ལ་ལྟོས་ན་ལུང་དེ་ཡང་འཐད་པ་ཡིན་ཏེ། སེམས་དཔའ་ཆེན་པོ་རྣམས་འཆིང་བ་དང་ལྡན་པའི་གང་ཟག་གི་ཚུལ་དུ་གདུལ་བྱ་འདུལ་བ་ལ་བར་མའི་གདུལ་བྱ་ལ་དགོངས་པའི་ལུང་ལ་མི་ལྟོས་མོད་ཀྱི། དེར་མ་ཟད་གླེགས་བམ་གྱི་བརྡ་དབང་མི་ཐོབ་པར་བརྩི་བའི་གང་ཟག་དེ་ལ་གླེགས་བམ་གྱི་ཆར་པ་ཁང་སྟེང་དུའང་མི་འབབ་པའི་ཕྱིར་དང༌། སྟོབས་བཅུ་མངའ་བ་ཉིད་ཀྱི་ཞལ་ནས་འབྱུང་འགྱུར་གྱི་ལུང་ཡང་མི་སྟོན་པའི་ཕྱིར་དང༌། ཅི་སྟེ་གླེགས་བམ་མཐོང་བ་ཙམ་གྱིས་རྒྱུད་དོན་ཡང་ཁོང་དུ་མི་ཆུད་ཅིང་བསྒྲུབས་འབྲས་ཀྱང་མངོན་དུ་མི་འབྱིན་པའི་ཕྱིར་ཏེ་བཤེས་གཉེན་དུ་རློམ་ཡང་མདའ་ལྔའི་ནུས་པས་སྙིང་ག་ཕུག་པར་ཟད་དོ། །གཞན་ཡང་ནང་རྒྱུད་འདི་དག་དགོངས་འགྲེལ་དང་བཅས་པ་གངས་ཅན་པའི་སྐད་དུ་འགྱུར་རོ་འཚལ་གྱི་བཀའ་དང་བསྟན་བཅོས་ཀྱི་དབུས་ན་མི་བཞུགས་པ་ཤས་ཆེ་བ་དག་ལའང་ཀླན་ཀ་མི་བྱ་སྟེ། དེ་ཅིའི་ཕྱིར་ན། བསྟན་པ་སྔ་དར་གྱི་ཚེ་བཙད་པོ་ཁྲི་སྲོང་ལྡེའུ་བཙན་གྱི་དུས་ན་སྤྲུལ་པའི་ལོ་པཎ་ཆེན་པོ་རྣམས་ཀྱིས་གངས་ཅན་འདིར་མདོ་སྔགས་ཀྱི་ཆོས་ཇི་སྙེད་སྤྱན་དྲངས་ནས་བསྒྱུར་ཞིང་དར་རྒྱས་སུའང་མཛད་མོད་དེ། ནང་རྒྱུད་ཁྱད་པར་བ་རྣམས་ཤིན་ཏུ་ཟབ་ཅིང་བཀའ་གཉན་པ་དང་གདུལ་བྱ་དུས་ལ་མ་བབས་པའི་ཕྱིར་རེ་ཞིག་ཡོངས་

---

^{[མ་དཔེ་གཟིགས་ན་འདིར་གནོན།]}

གྲགས་སུ་མ་བསྒྱུར་བར་ལྐོག་ཆོས་སུ་ཉམས་ལེན་མཛད་པའི་ཕྱིར་ཏེ། ཇི་སྐད་དུ་ཕ་ཝང་ཁ་བས་ཀྱང༌། འོན་ཀྱང་རྒྱལ་པོ་ཁྲི་སྲོང་ལྡེའུ་བཙན་གྱིས། །གསང་སྔགས་བླ་མེད་སྙན་བརྒྱུད་ལྐོག་ཆོས་ལས། །ཡོངས་གྲགས་བསྒྱུར་བ་རེ་ཞིག་བཀག་པ་ཡིས། །ཕྱི་ནས་ཡང་དག་རྣམ་གསུམ་རྙིང་མ་རྣམས། །རྒྱ་འགྱུར་མིན་ཞེས་རྩོད་པ་ཅན་དུ་གྱུར། །ཞེས་གསུངས། བོད་དུ་བཀའ་དང་དགོངས་འགྲེལ་ཕྱོགས་གཅིག་ཏུ་བསྒྲིགས་པའི་ཐོག་མ་ཡིད་རྟོན་པའི་གནས་སུ་བྱ་བ་ནི། ཆོས་ལྡན་གྱི་རྒྱལ་པོ་སད་ན་ལེགས་འཇིང་ཡོན་གྱི་སྐུ་རིང་ལ་སྐད་གཉིས་སྨྲ་བའི་དབང་པོ་བནྡེ་དཔལ་བརྩེགས་རཀྵི་ཏ་དང༌། དེ་ཝེནྡྲ་དང༌། དཔལ་གྱི་ལྷུན་པོ་ལ་སོགས་པས་འཕང་ཐང་ཀ་མེད་ཀྱི་གཙུག་ལག་ཁང་ན་བཞུགས་པའི་གསུང་རབས་རྣམས་ལ། ཚེག་བར་བརྒྱད་ལ་རྐང་པ་གཅིག་ཏུ་བྱས་པའི་རྐང་པ་བཞི་ཚོགས་ལ་ཤློ་ཀ་དང༌། དེ་སུམ་བརྒྱ་ལ་སོགས་པ་བམ་པོའི་ཚད་དུ་བྱས་ཏེ། གཞུང་ཚད་དེ་ཉིད་ཀྱིས་ལེགས་པར་གཞལ་བའི་ཐེམ་བྱང་མ་འཁྲུལ་བར་ཆོས་ཚན་འདི་དང་འདི་ལ་རྣམ་གྲངས་འདི་དང་འདི་བཀོད་པ་ལ་དཀར་ཆག་འཕང་ཐང་མར་གྲགས་ལ། དེའི་རྗེས་སུ་སྒྲ་བསྒྱུར་གྱི་བནྡེ་དཔལ་བརྩེགས་དང༌། འཁོན་ཀླུའི་དབང་པོ་བསྲུངས་པ་ལ་སོགས་པས་སྟོང་ཐང་ལྡན་དཀར་གྱི་ཕོ་བྲང་ཆེན་པོ་ན་བཞུགས་པའི་གསུང་རབས་དང་བསྟན་བཅོས་ལྗོངས་འདིར་

---

^{[མ་དཔེ་གཟིགས་ན་འདིར་གནོན།]}

འགྱུར་རོ་འཚལ་བམ་པོ་དང་ཤློ་ཀའི་གྲངས་སུ་འདི་དང་འདི་མཆིས་ཞེས་ངེས་པར་གཏན་ལ་ཕབ་གྲུབ་པ་རྣམས་ཀྱི་མཚན་བྱང་དཀར་ཆག་ཏུ་བཏབ་པ་ལ་དཀར་ཆག་ལྡན་དཀར་མར་གྲགས་ལ། དེ་གཉིས་ཀར་ནང་རྒྱུད་ཁྱད་པར་བ་འདི་དག་མ་བཀོད་པ་ནི། གསང་སྔགས་ནང་གི་རྒྱུད་རྣམས་ཆེས་ཆེར་བཀའ་གཉན་པས་འགོད་པར་མ་ནུས་ཞེས་བཤད་པ་ལས། ཕྱི་རབས་ཁ་ཅིག་པ་ལྟར་བསྟན་པ་རྣམ་དག་སུན་ཕྱུང་ནས་མ་བཀོད་རྡོ་རྗེ་ཐེག་པ་དང་དགྲ་གཤེད་དུ་གྱུར་པ་རྣམས་ཀྱི་བཀའ་དྲིན་ལ་རྙིང་མའི་གསང་སྔགས་རྒྱུད་འབུམ་བཀའི་ཁྲོད་ན་མ་བཞུགས་པས་དཔེ་རྒྱུན་ཙམ་ཡང་དཀོན་པར་གྱུར་མོད། དེའི་ཕྱིར་ན་བོད་དུ་འགྱུར་བ་ལ་ལྟོས་གླེགས་བམ་བཞི་བཅུ་པ་དང༌། སུམ་ཅུ་པ་དང་ཉི་ཤུ་ལྔ་པ་ལ་སོགས་ཏེ་གཏེར་རྒྱུད་བསྣན་མིན་དང་གླེགས་བམ་བཞུགས་ཚོགས་ཀྱི་ཁྱད་ལས་མཐའ་གཅིག་ཏུ་མ་ངེས་པའོ། །པ་མ་ཡིན་ཏེ། འཇིག་རྟེན་མིག་གཅིག་ཐམས་ཅད་མཁྱེན་གཟིགས་ལྔ་བ་ཆེན་པོས། དཀར་ཆག་འཕང་ཐང་མ་དང་ལྡན་དཀར་དུ། །གསང་སྔགས་ནང་གི་རྒྱུད་རྣམས་ཆེས་གཉན་པས། །འགོད་པར་མ་ནུས་ཞེས་པ་སྔ་འགྱུར་གྱི། །རྒྱུད་ལས་ངོས་འཛིན་གཞན་པ་བྱ་རྒྱུས་དབུལ། །ཞེས་གསུངས་ཤིང༌། བསྟན་སྐྱོང་ཆེན་པོ་འདིའི་ཞབས་བརྟན་ལ་དམིགས་ནས་རྩོད་པའི་དུས་ཀྱི་པཎྜི་ཏ་ཆེན་པོ་མི་དབང་སངས་རྒྱས་རྒྱ་མཚོས་ཞ་ལུ་གསེར་ཁང་གི་བསྟན་བཅོས་འགྱུར་རོ་འཚལ་ལ་ཕྱི་མོ་བགྱིས་ནས་བཞེངས་པའི་བུ་དཔེ་དག་པ་རྣམས་སྒོ་བསྟུན་ནས་ཕྱི་མོར་བཟུང༌།

---

^{[མ་དཔེ་གཟིགས་ན་འདིར་གནོན།]}

དེར་མ་བཞུགས་པའི་མདོ་སྔགས་ཀྱི་བསྟན་བཅོས་ཇི་སྙེད་ཅིག་བསྣན་ཏེ་བཞེངས་ནས། དེ་ཉིད་ཀྱི་དཀར་ཆག་འཇིག་རྟེན་གསུམ་གྱི་བདེ་སྐྱིད་པད་ཚལ་བཞད་པའི་ཉིད་བྱེད་ཅེས་བྱ་བ་རྒྱལ་དབང་ལྔ་པ་རང་གིས་མཛད་པར་ནང་རྒྱུད་དེ་དག་གི་འགྲེལ་བ་རྒྱ་བོད་ཀྱི་མཁས་པ་རྣམས་ཀྱིས་མཛད་པ་ཇི་སྙེད་བཞུགས་སུ་རུང་བར་ཞལ་གྱིས་འཕངས་པ་བཞིན། སྙིགས་དུས་ཀྱི་གྲགས་པ་དོན་ལྡན་བསྟན་པ་ཡོངས་སུ་རྫོགས་པ་ཐམས་ཅད་ཀྱིས་སི་ཏུ་ཐམས་ཅད་མཁྱེན་པ་དགེ་བའི་བློ་གྲོས་ཀྱི་ཚལ་པ་མ་དང་རྗེས་སུ་མཐུན་པ་འདི་ཁོ་ནའི་རྗེས་སུ་མཐུན་འགྱུར་མཛད་མོད། ཕྱོགས་རེ་ཙམ་གྱིས་ཤེས་བྱའི་དྲེགས་པའི་མུ་ཅོར་སྨྲ་བའམ། འོན་ཏེ་ཐ་སྙད་ལ་མང་དུ་ཐོས་ཀྱང་དེ་ཁོ་ན་ཉིད་དང་རྒྱང་རིང་ཞིང་པྲ་ཎི་དྷ་ལུགས་ལས་ལྡོག་པའི་གནམ་རུ་ལ་མདའ་ལྔའི་ནུས་པ་བཀང་བའི་མི་བསྲུན་པ་གང་ཞིག་ལུང་འབྲེལ་གང་ཟག་གྲུབ་ཆེན་ཨུ་རྒྱན་པས། ཆག་ལོའི་གདན་སར་བྱོན་པའི་ཚེ། སྔགས་རྙིང་མ་ཆོས་མིན་བྱ་བ་འདུག་ཟེར་ཏེ་མཐོང་རྒྱ་ཆུང་བ་ཡིན། ཐང་བྷེ་ཧ་རེན་རྙིང་མའི་རྒྱ་དཔེ་བཞུགས་པའི་མིང་རྐྱང་ཡང་བྲིས་ན་འབུམ་གྱི་པོ་ཏི་གཅིག་ཙམ་ཅིས་ཀྱང་འོང༌། མི་རིག་པ་ཡི་གཟུགས་ལའང་མི་རིག་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །ཞེས་པས་ཆོས་སྤོང་མ་བྱེད་གསུངས་

---

^{[མ་དཔེ་གཟིགས་ན་འདིར་གནོན།]}

གིས་དབང་པོ་དང་ལྡན་པའི་གསང་རྒྱུད་ཆེན་པོ་འདི་དག་ལ་སྒྲོ་སྐུར་གྱི་མགྲིན་པ་འདེགས་པ་དག་ནི་སྙིང་ཁམས་ཕྱར་གཡེང་བ་ཙམ་དུ་ཟད་ལ། འདི་ལྟར་སྔ་རབས་ཀྱི་ལོ་ཙཱ་བ་ཁ་ཅིག་གིས་ནང་རྒྱུད་ཁྱད་པར་བ་རྣམས་ཀྱི་རྒྱ་དཔེ་མ་རྙེད་པས་ཀུན་མཁྱེན་གྱིས། བོད་འདིར་རྒྱ་གར་ན་ཡོད་པ་དང༌། མེད་པའི་མདོ་དང་རྒྱུད་མང་པོ་བཞུགས་ཏེ། སྔོན་གྱི་སློབ་དཔོན་པདྨ་ལ་སོགས་པས་ཨོ་རྒྱན་ལ་སོགས་པ་མཁའ་འགྲོའི་གླིང་རྣམས་ནས་རྒྱུད་སྡེ་མང་དུ་བསྣམས་ནས་བྱོན་ཏེ་བསྒྱུར་ཞིང༌། མདོ་ཡང་ཉི་མ་དངོས་གྲུབ་ཀྱི་མེས་མ་ཚིག་གོང་དུ་རྒྱ་ནག་ཏུ་འགྱུར་བའི་མདོ་རྣམས་ལས། ཕལ་བོ་ཆེ་དང། མྱ་ངན་ལས་འདས་པ་དང༌། འདུལ་བ་ལུང་ལ་སོགས་པ་མང་པོ་ཞིག་རྒྱ་ནག་གི་པཎྜི་ཏ་ཧ་ཤང་མ་ཧཱ་ཡཱ་ནའི་བློ་ལས་བཻ་རོ་ཙཱ་ན་དང་འབའ་སངས་ཤིས་ལོ་ཙཱ་བྱས་ཏེ་བསྒྱུར་བ་ཡིན་ནོ། །དེའི་ཕྱིར་ཆོས་དང་གང་ཟག་གི་ཚད་ནི་ཐམས་ཅད་མཁྱེན་པ་ལས་གཞན་གྱིས་བཟུང་བར་མི་ནུས་ཏེ། དཀོན་མཆོག་བརྩེགས་པ་ལས། འོད་སྲུངས་ངའམ་དང་ང་འདྲ་བས་ཆོས་དང་གང་ཟག་གི་ཚོད་བཟུང་བར་རུང་གིས། གཞན་དག་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ། །ཞེས་དང༌། སྔོན་གྱི་དུས་སུ་བྱུང་བ་དག་བཅོས་མ་ཡིན་ན། བརྩམ་གཞི་གང་ཞིག་ལ་བྱས། དེ་ལྟར་ན་ཕྱིས་འབྱུང་བ་རྣམས་བཅོས་མར་འགྱུར་ཏེ། དོན་སྔོན་བས་ལྷག་ཏུ་མ་བྱུང༌། ྤཚིག་ཅུང་ཟད་མི་འདྲ་བ་དང༌། མང་ཉུང་བྱུང་བ་ལས་མེད་པའི་ཕྱིར་རོ། །ཞེས་གསུངས་སོ། །ནོངས་ཏེ་འདི་དག་བོད་མ་ཡིན་ཞེས་དྲིལ་བསྒྲགས་པས་ཆོས་ཀྱི་མིག་དང་བྲལ་བས་སྐྱེ་བོ་མང་པོ་སོམ་ཉིའི་གོམ་པ་འདེགས་སུ་བཅུག་གོ །དེའི་ཚེ་མ་བྱོན་སངས་རྒྱས་གསུམ་པར་གྲགས་པ་ཀསྨི་རེའི་པཎྜི་ཏ་ཆེན་པོ་ཤཱཀྱ་ཤྲཱི་དང༌། མཁས་པའི་དབང་ཕྱུག་བཅོམ་ལྡན་རིག་པའི་རལ་གྲི་དང༌། ཤ་གད་ལོ་ཙཱ་བ་ཤེས་རབ་བཟང་པོ། སྐད་གཉིས་སྨྲ་བ་ཐམས་ཅད་ཀྱི་གཙུག་ན་མངོན་པར་མཐོ་བ་ཐར་པ་ལོ་ཙཱ་བ་ཆེན་པོ་སོགས་ཀྱིས་རྒྱ་དཔེ་

---

^{[མ་དཔེ་གཟིགས་ན་འདིར་གནོན།]}

རྙེད་ནས་བསྟན་པ་ལ་བྱ་བ་ཆེན་པོ་མཛད་ནས་རྨ་མེད་པར་བྱས་པའི་རྣམ་ཐར་ནི་ཨད་བྷུ་ཏར་ངེས་ལ། ལོ་ཙཱ་བ་ཆེན་པོ་དེ་ཉིད་ཀྱིས་གསང་བ་སྙིང་པོའི་འགྱུར་བྱང་ལས་ཀྱང༌། རྟོག་དཔྱོད་མི་ལྡན་ཁ་ཅིག་འདི་སྐད་དུ། །འདི་ལ་སྔོན་ཆད་སྒྲོ་སྐུར་བྱུང་བས་ན། །ད་ལྟ་རྒྱ་དཔེ་ཡོད་དམ་མེད་ཀྱང་རུང༌། །སྙིགས་དུས་སྐྱེ་བོ་སོམ་ཉི་སེལ་དཀའ་བས། །གསར་འགྱུར་འབད་པའང་ངལ་བ་དོན་མེད་དེ། །འདི་ལ་འཆད་ཉན་སྐྱོང་བའང་མི་འབྱུང་ལ། །གཞན་ཡང་སྔ་འགྱུར་གཞུང་གི་ཚིག་འདི་ལ། །འདི་ལྟར་བསྒྱུར་ཞེས་ག་ཞ་བྱེད་པའང་སྲིད། །དེ་དག་ཕལ་ཆེར་གང་ཟག་རྗེས་འབྲང་ཞིང༌། །ཐོས་པའི་ནོར་བྲལ་ཆགས་སྡང་ཚེར་མ་ཡིས། །བློ་མིག་ལྐུགས་པས་ངེས་དོན་ཤེས་བྱའི་གསུང༌། །ཇི་བཞིན་ལྟ་བར་མི་ནུས་ཁོ་ནར་ཟད། །ཅེས་པ་ལ་སོགས་བསྒྲུབ་དང་སུན་འབྱིན་གྱི་ཉི་མས་ལོག་སྨྲའི་མུན་པ་ཕ་མཐར་བསྐྲད་དེ་བསྔགས་བརྗོད་ཀྱི་ཏམ་བུ་ར་ཀིཧྣ་རའི་ལུགས་སུ་སྦྲེངས་པ་ཡིན་ནོ། །དཔེ་འདི་ཁས་མཚོན་ཏེ་སྔ་འགྱུར་གྱི་རྒྱུད་རྣམས་རྒྱ་གར་ན་མ་བཞུགས་ཟེར་བའི་རྫུན་ཁུང་རྡིབ་པར་ཤེས་ཤིང༌། སྤྱིར་ཡང་ནང་རྒྱུད་འདི་དག་གི་དགོངས་པ་རྒྱུད་གཞན་དང་མི་མཚུངས་ཙམ་ལ་སྤྱོ་བར་བྱེད་ཅིང་ཐེ་ཚོམ་ཟ་བའི་གནས་སུ་བྱེད་ན་ནི། དཔལ་དུས་ཀྱི་འཁོར་ལོའི་རྒྱུད་ཀྱང་རྒྱུད་སྡེ་གཞན་དང་ལྡོག་པ་ཆེན་པོ་ཡོད་པའི་ཕྱིར་དང༌། དེ་དག་གི་མདོ་དོན་ནི། ཇི་སྐད་དུ། ཀུན་དང་འདྲ་ན་ཁྱད་

---

^{[མ་དཔེ་གཟིགས་ན་འདིར་གནོན།]}

ཆོས་རྫུན་པ་ཉིད། །ཀུན་དང་འགལ་ན་གསང་སྔགས་ལོག་པའི་ཆོས། །ཞེས་གསུངས་པ་ལྟར་སྤྱི་ལས་ཁྱད་པར་དུ་འཕགས་པའི་ཕྱིར་ཟབ་པའི་མཐར་ཐུག་ཏུ་རིག་པར་བྱས་ནས་མན་ངག་གི་སྙིང་པོ་ལེན་པ་ལ་བརྩོན་པར་མ་བྱས་པར་ལེགས་བཤད་དུ་བཏགས་པའི་འཁྱོགས་བཤད་ཀྱི་ཕྱི་ལ་འབྲང་ན་འབྲས་བུ་ཕྱིན་ཅི་ལོག་ཏུ་འཕེན་པར་བྱེད་དེ། གནས་གསར་པས་ཀྱང༌། དཔེ་རུལ་འགའ་ཡིས་མི་དགེའི་བཤེས་བྱས་ཤིང༌། །སྔགས་རུལ་འགའ་ཡིས་སྤྱོད་ལ་སེམས་ཁྲེལ་བས། །མི་རུལ་ཁོ་བོས་ལས་ངན་ཚབས་ཆེན་བསགས། །བུ་རལ་བདག་ཉིད་དམྱལ་བའི་ལམ་དུ་ཆས། །ཞེས་བསྟན་པ་རྣམ་དག་ལ་སྐུར་པ་འཐལ་བའི་ཚུལ་བསྟན་གྱི་རྗེས་སུ་ཐུགས་ལས་ཆེན་པོའི་གསུང་གཅོང་ཤོར་ཚུལ་བསྟན་པ་ཡང་དཔྱོད་ལྡན་གྱི་བློར་འདོམས་པར་བྱ་ལ། དེ་ལྟ་བུའི་ཚུལ་ནི་སྙིགས་མའི་དུས་ཀྱི་ཐམས་ཅད་མཁྱེན་པ་ཆེན་པོར་གྱུར་པ། གྲུབ་པའི་མཐའ་རིས་སུ་མ་ཆད་པའི་བསྟན་པའི་བདག་པོ་ཆེན་པོ། གངས་ཅན་ལྷ་གཅིག་ཕྱག་ན་པདྨ་འཇིག་རྟེན་གསུམ་གྱི་མགོན་པོ་མཚན་བརྗོད་པར་དཀའ་བ་ཟིལ་གནོན་བཞད་པ་རྩལ་གྱིས་གསན་ཡིག་ཆེན་མོ་དང༌། ལྷ་སྲས་མུ་ནེ་བཙན་པོའི་ཡང་སྲིད་འཇམ་དཔལ་དབྱངས་ས་རའི་མཚན་ཅན་གྱི་བསྟན་བཅོས་ཀྱི་དྲིས་ལེན་གཡའ་སེལ་སོགས་ལ་ཚད་མར་བཟུང་ནས་དཔྱད་པར་བྱ་ཞིང༌། འོན་ཀྱང་དེ་དག་ཏུ་ཀར་

---

^{[མ་དཔེ་གཟིགས་ན་འདིར་གནོན།]}

འབྲུག་སོགས་ལ་དགག་པའི་རྣམ་པ་ཡོད་པ་དག་ཀྱང་ངེས་དོན་དུ་ཁས་བླང་མི་དགོས་ཀྱི། དུས་དེར་བསྟན་ཇུས་ཀྱི་དབང་གིས་མི་མཛད་ཀ་མེད་ལས་སྨྲེ་བར་སྙེམ་པ་ཅན་འདྲི་འགོས་ལ་སོགས་པ་ལྟར་གཞན་སྡེ་ཆོམ་ལ་དབབ་པའི་དགོངས་པའི་མཐིལ་བསྟན་པ་ནི་མ་ཡིན་པས་སོ། །དེ་ལྟར་རྣམ་ངེས་བཤད་པའི་རྒྱུད་སྡེ་དེ་དག་གི་བཤད་སྲོལ་ཇི་བཞིན་པ་ཐམས་ཅད་ནི་བསྟན་པ་འཕེལ་འགྲིབ་དབང་གིས་དེང་སང་མི་སྣང་བ་ཤས་ཆེ་མོད། དེ་འོན་ཀྱང་སྤྱིར་སངས་རྒྱས་ཀྱི་ཞིང་གྲངས་མེད་པ་ན་མདོ་བསྟན་པའི་སྟོན་པ་རེ་དང་སྔགས་སྟོན་པའི་སློབ་དཔོན་རེ་སྤྲུལ་པ་ཡང་སྤྲུལ་དང་བཅས་བྱུང་ཚུལ་རྒྱས་པར་བཤད་པ་བཞིན་སྐལ་བཟང་འདི་ལ་ཇི་ལྟར་བྱུང་བ་ནི། མདོ་སྡེ་མྱང་འདས་ལས། ཤིང་སཱ་ལའི་གྲོང་རྩྭ་མཆོག་གཉིས་ཀྱི་བར་ན་བཅོམ་ལྡན་འདས་ལ་འོད་སྲུངས་དང༌། གཅུང་དགའ་བོ་མ་གཏོགས་པ་དགེ་སློང་གི་དགེ་འདུན་བརྒྱ་ཕྲག་བཅུས་བསྐོར་ནས་ཉེ་གནས་ཆེན་པོ་ཀཱ་དྱཱ་ཡཱ་ན་དང་ཙུན་དྷ་དང་མ་འགགས་པ་དང་ཀུན་དགའ་བོ་རྣམས་ལ་བཀའ་སྩལ་པ། ང་ནི་ཡོངས་སུ་མྱ་ངན་ལས་འདའོ། །ཁྱེད་རྣམས་མྱ་ངན་མ་བྱེད་ཅིག །མདངས་ལྡན་དྲི་མེད་མཚོ་དཀྱིལ་ནས། །ང་ལས་ལྷག་པའི་སྐྱེས་བུ་འབྱུང༌། །ཞེས་དང༌། དབུས་འགྱུར་འཆང་ལུང་བསྟན་པའི་མདོ་སྡེ་ལས། ང་ནི་འདི་ནས་མི་སྣང་ནས། །ལོ་ནི་བཞི་གཉིས་ལོན་པ་ན། །ཨོ་རྒྱན་ཡུལ་

---

^{[མ་དཔེ་གཟིགས་ན་འདིར་གནོན།]}

གྱི་ནུབ་བྱང་མཚམས། །དྷ་ན་ཀོ་ཤའི་མཚོ་གླིང་དུ། །ཀུན་ལས་ལྷག་པའི་སྐྱེས་བུ་འབྱུང༌། །ཞེས་དང༌། བླ་མེད་དོན་རྫོགས་འདུས་པའི་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཅུ་རུ་གཉིས་ཆད་ནས། །འཇིག་རྟེན་ཀུན་ལས་རྒྱལ་བ་མཆོག །ཨོ་རྒྱན་ཡུལ་དུ་པད་འབྱུང་ཞེས། །པདྨ་ལས་ནི་འབྱུང་བར་འགྱུར། །གསང་སྔགས་སྟོན་པར་ངས་ལུང་བསྟན། །ཞེས་དང༌། མདོ་སྡེ་གསེར་འོད་དམ་པ་ནས། པདྨ་འབྱུང་གནས་འདིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མངོན་པར་བསྟོད་ཅེས་རྡོ་རྗེའི་ལུང་གིས་བསྔགས་པ་ལྟར། ཨོ་རྒྱན་ཡུལ་གྱི་ཤར་ལྷོ་དྷ་ན་ཀོ་ཤའམ། འོ་མ་ཅན་གྱི་མཚོར་འབོད་པ་སིནྡྷུ་རྒྱ་མཚོའི་ཀླུ་རྒྱལ་འཇོག་པོའི་ཕོ་བྲང་གི་སྟེང་པདྨའི་སྡོང་པོ་རྒྱས་པའི་ཟེའུ་འབྲུ་ནས་སྟོན་པ་མྱ་ངན་ལས་འདས་ནས་ལོ་བཞི་གཉིས་ཏེ་བགྲོད་པ་ལོར་བརྩིས་པ་བརྒྱད་སོང་བ་ཤིང་སྤྲེའུ་སྣྲོན་ཟླའི་ཚེས་བཅུ་ལ་མཚན་དཔེའི་འོད་སྐུ་བལྟམས་པའི་ཚུལ་བསྟན་ཞིང་མཚན་དོན་ཐ་དད་པས་སྒོ་ནས་མཛད་པ་གཙོ་ཆེ་བ་རྣམ་གྲངས་བརྒྱད་དུ་བསྟན། དུར་ཁྲོད་བརྒྱད་དུ་བརྟུལ་ཞུགས་ཀྱི་སྤྱོད་པ་བསྐྱངས། ཐེག་རྩེ་ཤིན་ཏུ་རྣལ་འབྱོར་གྱི་སྒོ་ནས་རིག་པ་རྩལ་གྱི་དབང་ཐོབ་པའི་སངས་རྒྱས་གཉིས་པ་དེ་ཉིད་ཀྱི་ཆེ་བའི་རྣམ་ཐར་རྒྱས་པ་ནི། བཀའ་ཐང་སྡེ་ལྔ། སྦ་བཞེད། ཉང་གི་ཟངས་གླིང་མ། སངས་རྒྱས་

---

^{[མ་དཔེ་གཟིགས་ན་འདིར་གནོན།]}

གླིང་པ། རྡོ་རྗེ་གླིང་པ་སོགས་ཀྱི་གཏེར་བྱོན་རྣམ་ཐར། སོག་བཟློག་པ་བློ་གྲོས་རྒྱལ་མཚན། ཀུན་མཁྱེན་དྲི་མེད་འོད་ཟེར། ཇོ་ནང་པ་ཏཱ་ར་ནཱ་ཐ་ལ་སོགས་ཀྱིས་མཛད་པའི་རྣམ་ཐར་ཐ་དད་ཀྱིས་ཤེས་ལ། དེ་ཡང་མངལ་སྐྱེས་སུ་ཁས་ལེན་པ་ལྟ་བུ་ནི། ཕུར་པ་བཀའ་མ་ལུགས་དང༌། བ་མཁལ་སྨུག་པོའི་གཏེར་བྱོན་སོགས་སུ་ཆོས་སྲས་དང་རིགས་སྲས་ཁྱད་པར་འབྱེད་པའི་དབང་གིས་སྲས་ཞེས་གསུངས་པ་ལ་འཁྲུལ་ནས་ཡབ་ཡུམ་ཅན་དུ་སོང་བ་ལ་འཇམ་དཔལ་དབྱངས་ས་རའི་ཞབས་ཀྱིས་ཀྱང་དགག་པ་མཛད་པ་ལྟར་དོན་ལ་གནས་མོད། དེ་ལས་གཞན་པའི་མཛད་པ་མཐའ་དག་དང་ལོ་ཚིགས་ཀྱི་རྣམ་ངེས་སོགས་ལ་ཅུང་ཟད་མཐུན་མི་མཐུན་དང་སྔ་ཕྱི་ཁ་བགམ་པ་ལྟ་བུ་ལ་རྟོག་གེ་པས་དགག་སྒྲུབ་བྱེད་པ་དག་ནི་འཆིང་བ་ཆེན་པོར་བས་ཏེ། ཁམས་གསུམ་ཟིལ་གནོན་ཆེ་མཆོག་འདུས་པ་རྩལ་གྱིས། སྐད་ཅིག་བསྐལ་བ་བསྐལ་པ་སྐད་ཅིག་ཏུ། །བསྒྱུར་ནུས་འགྲོ་རེའི་སྣང་ངོར་མཛད་པ་རེ། །སྟོན་ལ་མཁས་གྲུབ་ཕལ་གྱི་རྣམ་ཐར་བཞིན། །ལོ་ཟླ་དུས་ཀྱི་ངེས་ཚོལ་བཞད་གད་གནས། །ཞེས་དང༌། འདིར་ཇི་སྐད་དུ། ཤེས་པས་སྲིད་ལ་མི་གནས་ཤིང༌། །སྙིང་རྗེ་ཞི་ལ་མ་གནས་པ། །མྱ་ངན་འདས་དང་འཁོར་མི་གནས། །ཞེས་པ་ལྟར་སྲིད་ཞི་གཉིས་ཀ་ལ་མི་གནས་པའི་ཟུང་འཇུག་ཨ་ཝ་དྷུ་ཏི་དྭངས་མ་འཇའ་ལུས་ཀྱི་སྐུ་ཅན་ཐུགས་རྗེ་དང་རྫུ་འཕྲུལ་བསམ་གྱིས་

---

^{[མ་དཔེ་གཟིགས་ན་འདིར་གནོན།]}

མི་ཁྱབ་པ་དེ་ལྟ་བུའི་རྣམ་པར་ཐར་བ་བྱིས་པ་སོ་སོ་སྐྱེ་བོའི་བློས་དཔག་པར་མི་ནུས་པའི་ཕྱིར་དང༌། དཔེར་ན་སྒྱུ་མ་མཁན་བཟང་པོས་མ་གྷ་དྷཱའི་སྐྱེ་བོ་ཕར་ཆེར་སྒྱུ་མའི་མིག་འཕྲུལ་གྱིས་བསླུས་ནས་དེ་བཞིན་གཤེགས་པ་ལའང་བགམ་པའི་ཕྱིར་དུ་སྒྱུ་མའི་ཞབས་ཏོག་ཆེན་པོའི་བཀོད་པ་བཤམས་པའི་ཚེ་མཁྱེན་བཞིན་དུ་གདུགས་ཚོད་གསོལ་བར་ཞལ་གྱིས་བཞེས་ནས་སྒྱུ་མ་བཤིག་ཏུ་མེད་པར་བྱིན་གྱིས་བརླབས་ཏེ་བཟང་པོའི་ཁེངས་པ་ཕྲོགས། ད་དུང་བཟང་པོ་གདུལ་བའི་ཆེད་དུ་དེ་བཞིན་གཤེགས་པས་ཁྱིམ་བདག་གསུམ་དང༌། བརྒྱ་བྱིན་རིམ་པ་བཞིན་སྤྲུལ་ཏེ། བཟང་པོའི་ཐད་དུ་འོངས་ནས། བཟང་པོ་ཅི་བྱེད་སྨྲས་པས། དེ་བཞིན་གཤེགས་པ་ལ་གདུགས་ཚོད་གསོལ་བ་བྱེད་དོ་ཟེར། དེར་བཟང་པོ་མཐོང་དེ་སྐད་མ་ཟེར། བཅོམ་ལྡན་འདས་ནི་མ་སྐྱེས་དགྲའི་ཁྱིམ་ན་ཆོས་སྟོན་གསོལ་ལོ། །ཀུན་ཏུ་རྒྱུའི་སྲང་ན་བསོད་སྙོམས་བྱེད་དོ། །འཚོ་བྱེད་ཀྱི་ཚལ་ན་འཁོར་རྣམ་པ་བཞི་ལ་ཆོས་སྟོན་ཏོ། །སུམ་ཅུ་རྩ་གསུམ་གྱི་ཤིང་ཡོངས་འདུ་ས་བརྟོལ་ན་ལྷ་རྣམས་ལ་ཆོས་སྟོན་ཏོ། །ཞེས་སྨྲས་པས་བཟང་པོས་ཀྱང་དེ་ཁོ་ནར་མཐོང་ངོ༌། །གཞན་ཡང་རྒྱལ་པོའི་ཁབ་ཀྱི་ཁྱིམ་དང༌། རྩིག་པ་དང༌། ལོགས་དང༌། སྲང་དང༌། བཀོད་པ་གསུམ་པོའི་ཁྲི་དང༌། ཤིང་ལྗོན་པ་རྣམས་དང༌། མེ་ཏོག་ལ་སོགས་ཅིར་སྣང་ཐམས་ཅད་

---

^{[མ་དཔེ་གཟིགས་ན་འདིར་གནོན།]}

ནས་སངས་རྒྱས་འཁོར་བཅས་སྣང་བར་བསྟན་པ་བཞིན་དུ་བཟང་པོས་མཐོང་བ་དཀོན་མཆོག་བརྩེགས་པ་ལས་བཤད་པ་ལྟར་དུས་གཅིག་ཏུ་སྤྲུལ་པ་དང་རྫུ་འཕྲུལ་བསམ་གྱིས་མི་ཁྱབ་པ་འགྱེད་ནུས་པའི་ཕྱིར་རྟག་བརྟན་ཐེར་ཟུག་ཏུ་སྨྲ་བ་དག་བ་གླང་རྫི་བོའི་གཏམ་དང་མཚུངས་པའི་ཕྱིར་དང༌། འོན་ཏེ་དྲང་ངེས་ལྡེམ་དགོངས་སོགས་ཀྱིས་དགོས་པའི་དབང་གིས་བཤད་པ་ཁ་ཅིག་འགལ་འདུར་མཐོང་ན་མོའུ་འགལ་གྱི་བུས་དགྲ་བཅོམ་པ་ཐོབ་པ་ཀུན་ཏུ་རྒྱུས་བཀྲོངས་པར་བཤད་པ་ཡང་མི་འཐད་པའི་ཕྱིར་དང༌། ལོ་ཚིགས་ཙམ་ལ་གདུལ་བྱ་ངོར་སྣང་གི་རྗེས་སུ་འབྲང་དུ་ཟིན་ཀྱང་དུས་ཀྱི་འཁོར་ལོའི་ཞག་གསུམ་རྣམ་གཞག་གི་དགོངས་པས་ཞིབ་ཏུ་ཕྱེ་བའི་བགྲོད་པ་གཉིས་ཀྱི་ལོ་བརྩི་ཕྱོགས་ལྡོག་ཆས་ཕྱེ་ནས་སྒྲུབ་བྱེད་ཁྱད་པར་ཅན་པཎྜི་ཏ་ས་རའི་ཞབས་ཀྱིས་མཛད་པའི་ཕྱིར་དང༌། དོན་དམ་པར་ནི་སངས་རྒྱས་རྣམས་ཀྱི་རྣམ་པར་ཐར་པ་ཇི་ལྟ་བ་འཕགས་པ་ཤཱ་རིའི་བུས་ཀྱང་བརྗོད་པར་མི་ནུས་པའི་ཕྱིར་ན་སོ་སོ་སྐྱེ་བོའི་སྤྱོད་ཡུལ་དུ་ལྟ་ག་ལ་ཞིག་སྟེ་སྐུར་བ་མི་བཟད་པས་རང་ཉིད་ངན་འགྲོའི་གཡང་སར་འཕེན་པའི་རྒྱུ་ཁོ་ན་ལས་དོན་ཕྲན་བུ་ཙམ་ཡང་མ་མཆིས་པ་རིག་པར་བྱོས་ཤིག །ཞེས་འདོམས་ནས་ཆེ་བའི་ཡོན་ཏན་བསམ་གྱིས་མི་ཁྱབ་པ་མངའ་བའི་ཨཽ་ཌི་ཡ་ནའི་ཨཱའ་ཙཱརྱ་ཆེན་པོ་དེ་ཉིད་ཀྱིས་ཐེག་རྩེ་ཤིན་ཏུ་རྣལ་འབྱོར་གྱི་སྒོ་ནས་རིག་པའི་

---

^{[མ་དཔེ་གཟིགས་ན་འདིར་གནོན།]}

རྩལ་དབང་ཐོབ་སྟེ་སངས་རྒྱས་ཐམས་ཅད་དང་ཞལ་མི་གཉིས་པ་ལྟ་བུར་གྱུར་ཀྱང༌། བསྟན་པ་ལ་རང་དགར་འཇུག་པ་དགག་པའི་ཕྱིར་དུ་གྲུབ་བརྙེས་ཀྱི་བཤེས་གཉེན་དམ་པ་བསམ་གྱིས་མི་ཁྱབ་པ་བསྟེན། ཐེག་པ་རིམ་པ་དགུ་ལ་ཚུལ་ཇི་བཞིན་པར་མངའ་དབང་བསྒྱུར། གདོད་མའི་སངས་རྒྱས་ཐམས་ཅད་ཀྱིས་ཀྱང་དགོངས་པའི་ཀློང་ནས་བྱིན་གྱིས་བརླབས་པས་བརྒྱུད་པའི་ཆུ་མགོ་ཐམས་ཅད་གཅིག་ཏུ་འདྲིལ། དེའི་ཕྱིར་ན་སངས་རྒྱས་ཀུན་འདུས་ཉིད་ཀྱི་གསུང་ལས་ཀྱང༌། རང་བྱུང་པདྨ་ཞེས་བྱར་གྲགས་པ་ང་༔ སངས་རྒྱས་སྣང་བ་མཐའ་ཡས་ཐུགས་ལས་རྡོལ༔ ཐུགས་རྗེ་སྤྱན་རས་གཟིགས་དབང་གསུང་ལས་སྤྲུལ༔ མཁའ་འགྲོ་ཡོངས་ཀྱི་མིང་པོ་དཔའ་བོའི་རྒྱལ༔ མཉམ་མེད་ཀུན་བཟང་རྡོ་རྗེ་འཆང་ཆེན་པོ༔ སྤྲུལ་པའི་སྐུར་སྣང་ཐུགས་རྗེ་ཆེན་པོར་ལྡན༔ ཞེས་ཞལ་གྱིས་བཞེས་རྒྱུད་སྡེ་སྤྱི་དང་ཁྱད་པར་ཡོ་ག་རྣམ་པ་གསུམ་གྱི་རྒྱུད་སྡེའི་ངེས་གསང་ཐམས་ཅད་ཐུགས་ཀྱི་དཔལ་བེའུར་འཁྱིལ། སྒྲུབ་ཐབས་དང་མན་ངག་གི་ངེས་པ་ཐམས་ཅད་དྭངས་བཅུད་དུ་འདྲིལ་ཏེ་མ་འོངས་པའི་གདུལ་བྱ་ལ་རྗེས་སུ་དགོངས་ནས་ཟད་མེད་གཏེར་གྱི་བསྟན་པ་དར་བར་མཛད། དེའི་དགོས་པ་ནི། འདི་ཉིད་ཀྱི་ལུང་བསྟན་བཀའ་རྒྱ་མ་ནས། དེ་ཡང་བཀའ་མ་རྣམས་ཚོང་དུས་ཀྱི་འོ་མ་བཞིན་འཆལ་ཞིང་ནུབ་ལ་ཉེ་བའི་དུས་དར་བར་འགྱུར་བ་ཡང་༔ གཏེར་དུ་

---

^{[མ་དཔེ་གཟིགས་ན་འདིར་གནོན།]}

བཞུགས་པའི་བཀའ་ལ་ལྷད་དང་སེལ་མ་ཞུགས་པས་སྒྲུབ་ཐག་ཉེ༔ བྱིན་རླབས་ཆེ༔ གྲུབ་པ་ཐོབ་པ་མྱུར་བ་ལ་སོགས་པའི་ཡོན་ཏན་དཔག་ཏུ་མེད་པ་ཡོད། ཅེས་གསུངས་ཁྱད་ཆོས་དེ་ལྟ་བུས་ཆེས་མཆོག་ཏུ་འཕགས་པའི་ཕྱིར་གཏེར་ཆོས་ལ་བཀའ་གཙིགས་སུ་བྱས་པ་ཡིན། དེ་ལ་ཡང་དག་དང་ལྟར་སྣང་བ་ཇི་སྙེད་ཅིག་འབྱུང་བར་ལུང་བསྟན་པའི་ཕྱི་མས་ལུགས་སྲོལ་འདིའི་བསྟན་པ་ལ་རྨ་འབྱིན་སུ་ཝརྞ་དང་ར་གན་འཁྲུལ་བའི་ཉེ་ཞོ་ཡང་མཆིས་པ་དག་དཔྱོད་ལྡན་གྱིས་ནང་རྒྱུད་ཡོ་ག་རྣམ་གསུམ་གྱི་དགོངས་པ་ཁོ་ནས་མཚང་བརྟགས་པས་འཁྲུལ་བ་མི་འབྱུང་བར་རིག །དེ་ལྟ་བའི་གཏན་ལ་ལེགས་པར་ཕབ་པའི་གཏེར་ཆོས་ཐམས་ཅད་ལ་དགོངས་བརྡ་སྙན་བརྒྱུད་གསུམ། སྨོན་ལམ་དབང་བསྐུར། གཏད་རྒྱ་ལུང་བསྟན། ཤོག་སེར་ཚིག་བརྒྱུད་དེ་བརྒྱུད་པའི་ཁྱད་པར་དྲུག་གིས་འཕགས་ལ། དེ་ལ་དགོངས་བརྡ་སྙན་གསུམ་ནི། སྔར་ནས་ཡང་ཡང་བཤད་པའི་རིག་པས་གོ་སླ། སྨོན་ལམ་དབང་བསྐུར་ནི། གཏེར་ཁ་དེ་ཉིད་ལ་དབང་བའི་གང་ཟག་དེས་ཐོན་པར་ཤོག་ཅེས་པ་དང༌། གཏད་རྒྱ་ལུང་བསྟན་ནི། གཏེར་འབྱིན་གྱི་སྐྱེས་བུ་ལ་མཚོན་བྱ་དོན་གྱི་ཡེ་ཤེས་རྒྱས་བཏབ་ཅིང་དགོངས་པའི་མཐིལ་གཏད་ནས་འབྱུང་འགྱུར་གྱི་ལུང་བསྟན་དང་བཅས་དབུགས་དབྱུང་བ་ལ་བྱ། ཤོག་སེར་ཚིག་བརྒྱུད་ནི། མཚོན་བྱེད་བརྡའི་ཡི་གེ་ཚིག་

---

^{[མ་དཔེ་གཟིགས་ན་འདིར་གནོན།]}

བརྒྱུད་དུ་བཀོད་ནས་རྡོ་རྗེའི་བྲག །གཡང་ཞག་གི་མཚོ། མི་འགྱུར་བའི་སྒྲོམ་ལ་སོགས་པར་གཏེར་བདག་སོ་སོ་ལ་གཉེར་བྱང་གཏད་ནས་མི་སྣང་བར་རྒྱས་བཏབ་པ་སླར་ལུང་བསྟན་དུས་ལ་བབ་པ་ན། སྨོན་ལམ་གྱི་མཐུ་སྨིན། ལས་ཀྱི་འཕྲོ་སད། གཏེར་བདག་གིས་བསྐུལ་མ་བྱས། ཁ་བྱང་ཡོད་པ་དང་མེད་པ་ཇི་སྙེད་ཅིག་ཡོད་པའི་ཟབ་གཏེར་གྱི་སྒྲོམ་བུ་ཇི་བཞིན་པ་གཏེར་སྟོན་ཉིད་ཀྱི་ཕྱག་ཏུ་སོན་པར་འགྱུར་བའི་བླ་རྫོགས་ཐུགས་གསུམ་ཡོངས་རྫོགས་དང་བཅས་ཚང་བར་གཏེར་ཆེན་དང༌། མ་ཚང་བར་གཏེར་ཕྲན་དུ་བརྡ་འདོགས་ཤིང་དེ་གཉིས་ཀ་བྱིན་རླབས་ཀྱི་ཚན་ཁ་ཆེ་ཆུང་ལ་ཁྱད་པར་རྡུལ་ཙམ་ཡང་མེད། ལག་ལེན་གྱི་བཤད་རྒྱུན་ཕྱིན་ཅི་མ་ལོག་པར་ལྟོས་དགོས་པ་ནི་གཏེར་ཁ་འདི་ཉིད་ལས་ཀྱང་རྒྱུད་ཀྱི་ཆིངས་ལྔ། ལུང་གི་ལྡེབ་ལྔ། སྒྲུབས་ཐབས་ཀྱི་སྦྱོར་བ་ལྔ་ཞེས་བཤད་པའི་དང་པོ་ལྔ་ནི། ཁོག་འབུབ་སྟོང་ཐུན་གྱི་ཆིངས། ས་གཅོད་རྣམ་འབྱེད་ཀྱི་ཆིངས། འདྲེན་པ་རང་གཉེར་གྱི་ཆིངས། ཊཱི་ཀ་བསྡུས་དོན་གྱི་ཆིངས། ལག་ལེན་མན་ངག་གི་ཆིངས། གཉིས་པ་ནི། རྒྱུད་ལུང་དང་སྡེབ། ལུང་སྒྲུབ་ཐབས་དང་སྡེབ། སྒྲུབ་ཐབས་ཕྲིན་ལས་དང་སྡེབ། ཕྲིན་ལས་ལག་ལེན་དང་སྡེབ། ལག་ལེན་ཉམས་མྱོང་དང་སྡེབ། གསུམ་པ་ནི། རྩ་བ་སྒྲུབ་ཐབས་དང་སྦྱོར། སྒྲུབ་ཐབས་ཕྲིན་ལས་དང་སྦྱོར། ཕྲིན་ལས་སྒོམ་ཁོག་དང་

---

^{[མ་དཔེ་གཟིགས་ན་འདིར་གནོན།]}

སྦྱོར། སྒོམ་ཁོག་ཏིང་ངེ་འཛིན་དང་སྦྱོར། ཏིང་ངེ་འཛིན་མན་ངག་དང་སྦྱོར་བ་སྟེ། གསང་སྔགས་སྔ་འགྱུར་རང་གི་བསྟན་པ་རང་རྐང་ཚུགས་པར་ཉམས་སུ་ལེན་པ་དག་བཀའ་མས་ཁོག་ཕུབ་གཏེར་མ་མན་ངག་ཏུ་བཟུང་བ་སྤྱིའི་ལག་ལེན་གལ་བོ་ཆེ་དང་འབྱོར་ཏེ་ཆོས་རྒྱལ་རིན་ཆེན་ཕུན་ཚོགས་ཀྱིས། ཁོ་བོའི་རྡོ་རྗེ་སློབ་དཔོན་མངའ་རིས་པཎ་ཆེན་དེའི་མཁྱེན་རབ་ལ་མཐའ་མེད། དེའི་བཀའ་ལས་རྙིང་མ་ལ་ལུགས་མཐུན་ཞིག་བྱེད་ན་གསང་སྔགས་སྔ་འགྱུར་རང་གི་བསྟན་པའི་བབས་ལ། བཀའ་གཏེར་ཟུང་གཅིག་ཡིན་པས། བཀའ་མ་ནི་མདོ་སྒྱུ་སེམས་གསུམ་ལ་སྔ་འགྱུར་བཀའ་བབས་ཀྱི་ཆུ་བོ་བཞིའི་དབང༌། བསྐྱེད་རིམ། རྫོགས་རིམ། བཤད་པ། སྒོ་ནས་བཤད་རྒྱུན་རྣམ་པར་དག་པ་བཞིན་བཤད་པ་ལག་ལེན་དང་བཅས་པ་བཀའ་མ་ལྟར་བྱེད་དགོས། ཆོས་ཀྱི་ཟབ་གནད་རྣམས་ནི་བརྒྱུད་པ་དང་ཆོས་ལ་སེལ་མེད་ཅིང༌། མཁའ་འགྲོའི་ཁ་རླངས་ཆིལ་བ་དེ་གཏེར་མ་ཡིན་པས་གཏེར་ཆོས་ཚད་ལྡན་ལྟར་བྱེད་དགོས། དེ་ལྟར་བྱས་ན་རྙིང་མ་ལུགས་དང་མཐུན་པ་ཞིག་ཡོང་ཕེབས་བྱུང༌། ཞེས་དང༌། ལྔ་བ་ཆེན་པོས་ཀྱང་འདི་ཁོ་ནའི་རྗེས་སུ་འབྲངས་པར་མཛད་ནས་བདེ་འདུས་ལས་བྱང་ལྗགས་བསྒྲིགས་མའི་སྦྱར་བྱང་སྐབས་ཇི་ལྟར་གསུངས་པ་དཔྱོད་ལྡན་དག་གིས་གཙུག་ཏུ་བརྟེན་པར་རིགས་ཤིང༌། དེ་ལས་གཞན་པའི་ལག་ལེན་བསྲ་

---

^{[མ་དཔེ་གཟིགས་ན་འདིར་གནོན།]}

བསྲེ་བློ་བཟོའི་ཁྱད་ཆོས་ལ་མཚར་དུ་བརྩི་བ་དག་ནི་གྲུབ་མཐའ་རང་རྐང་མ་ཚུགས་པར་ཟད་ལ་བློ་གྲོས་དང་ལྡན་པ་རྣམས་དཔྱད་པར་བྱ་བའི་གནས་དམ་པའོ། །འདི་ལྟར་ཡོ་ག་རྣམ་པ་གསུམ་གྱི་རྒྱུད་སྡེ་དེ་དག་གི་རྒྱུད་ལུང་མན་ངག་བཀའ་བབས་ཀྱི་ངེས་པ་དང་བཅས་པ་ཟབ་མོ་གཏེར་གྱི་ཆོས་ལ་ཚང༌། ཚང་བས་མི་ཆོག་པར་བརྒྱུད་ཐག་ཉེ་གང་ཟག་གིས་བཅོས་སླད་དང་མི་དབར་ཁྱིས་ཆོད་ཀྱི་སེལ་མ་ཞུགས། རྒྱུད་སྡེ་ཐམས་ཅད་ཀྱི་དྭངས་བཅུད་འདྲིལ་བ་སོགས་ཀྱིས་ཁྱད་པར་འཕགས་པའི་གནད། བརྒྱུད་སྲོལ་དེ་ལྟ་བུ་ལས་འོངས་པའི་གཏེར་ཁ་དངོས་ལ་ཤར་གཏེར། ལྷོ་གཏེར། ནུབ་གཏེར། བྱང་གཏེར། དབུས་གཏེར་ཏེ་ལྔར་བསྡུ་ལ། དེ་ལའང་ཕྱི་ནང་གསང་བ་ཡང་གསང་མ་ནིང་གི་གཏེར་ལ་སོགས་ཏེ་རྣམ་གྲངས་བཅོ་བརྒྱད་དུ་འབྱེད་པ་ཇི་སྙེད་ཅིག་བཞུགས་པ་གནས་དུས་སྐལ་བ་དང་འཚམ་པར་འགྲོ་བའི་བསོད་ནམས་ཀྱི་ཉེར་འཚོར་ཇི་སྲིད་སངས་རྒྱས་ཀྱི་བསྟན་པ་མ་རྫོགས་བར་དུ་ཟད་པ་མི་མངའ་བར་རྡོལ་བ་སྟེ། གཏེར་ཁ་འདི་ཉིད་ལས། ཇི་སྲིད་སངས་རྒྱས་བསྟན་པ་མ་རྫོགས་པར༔ དེ་སྲིད་གཏེར་གྱིས་འགྲོ་བ་དཔག་མེད་འདྲེན༔ དེ་ཕྱིར་གཏེར་ལ་དད་དང་གུས་པར་གྱིས༔ ཞེས་གསུངས། ཤིན་ཏུ་རྨོངས་པའི་གཏམ་དང་ཕྱོགས་ལྷུང་གི་ཚིག་དགག་པར་ཡང་མི་ལྡང་མོད། ཁ་ཅིག་གཏེར་ཆོས་ཟེར་བ་མི་འཐད་པར་འདོད་པ་ནི་ཤིན་ཏུ་སྙིང་རྗེ་བའི་གནས། མདོའི་

---

^{[མ་དཔེ་གཟིགས་ན་འདིར་གནོན།]}

ཕྱོགས་ནས་ཀྱང་གང་ཟག་ས་མཐོན་པོ་ལ་གནས་པ་ཆོས་ཀྱི་གཏེར་རྙེད་པར་བཤད་པའི་ཕྱིར་དང༌། ཆོས་ཡང་དག་པ་སྡུད་པའི་མདོ་ལས་ཀྱང༌། ཀུན་དགའ་བོ། གང་གི་ཆོས་ཡོངས་སུ་གནས་པ་བྱ་བའི་ཕྱིར་ཆོས་ཀྱི་རྣམ་གྲངས་འདི་དག་གླེགས་བམ་ལ་བྲིས་ཏེ་གཏེར་དུ་སྦས་ནས་མཆོད་ན། དེའི་དེ་ཉིད་ཐོབ་པ་བཅུ་ཐོབ་སྟེ། གང་ཞེ་ན། སངས་རྒྱས་ཀྱི་སྤྱན་རབ་ཏུ་ཐོབ་པས་སངས་རྒྱས་མཐོང་བའི་གཏེར་དང༌། ལྷའི་རྣ་བ་རབ་ཏུ་ཐོབ་པས་ཆོས་ཉན་པའི་གཏེར་དང༌། ཕྱིར་མི་ལྡོག་པའི་དགེ་འདུན་རབ་ཏུ་ཐོབ་པས་དགེ་འདུན་མཐོང་བའི་གཏེར་དང༌། རིན་པོ་ཆེའི་ལག་པ་རབ་ཏུ་ཐོབ་པས་ཟད་མི་ཤེས་པའི་གཏེར་དང༌། མཚན་དང་དཔེ་བྱད་ཡོངས་སུ་རྫོགས་པའི་གཟུགས་ཀྱི་གཏེར་དང༌། གཡོག་མི་ཕྱེད་པས་གཡོག་གི་གཏེར་དང༌། སྤོབས་པ་རབ་ཏུ་ཐོབ་པས་དམ་པའི་གཏེར་དང༌། ཕལ་གྱིས་རྒོལ་བ་ཚར་གཅོད་པ་མི་འཇིགས་པའི་གཏེར་དང༌། སེམས་ཅན་རྣམས་ཉེ་བར་འཚོ་བས་འཚོ་བ་བསོད་ནམས་ཀྱི་གཏེར་དང༌། ཞེས་སོགས་དང༌། ཆུ་ཀླུང་རོལ་པའི་མདོ་ལས། ང་ཡི་བསྟན་པའི་ཆོས་ཀྱི་གཞུང༌། །ཐུགས་ནས་ཐུགས་ཀྱི་གཏེར་དུ་སྦོས། །ཡང་ན་ས་ཡི་སྙིང་བོར་བྱ། །ཅི་ཕྱིར་མུ་སྟེགས་ཅན་མགོ་རྒོད། །ངེས་དོན་དཀྲུགས་པར་གྱུར་ཏ་རེ། །དེ་ཕྱིར་ཆུ་ཀླུང་རྒྱུན་མི་གཅོད། །ཅེས་དང༌། དཔལ་མཆོག་ལས། རྒྱུད་དང་རྒྱུད་ཀྱི་རྒྱལ་པོ་གང༌། །ཕྱག་ན་རྡོ་རྗེ་ཁྱོད་

---

^{[མ་དཔེ་གཟིགས་ན་འདིར་གནོན།]}

ཉིད་ཀྱིས། གཏེར་ནས་གཏེར་དུ་ཕྱུངས་ཏེ་སྩལ། །ཞེས་དང༌། ཡེ་ཤེས་གསང་བའི་རྒྱུད་ལས། བསྟན་པའི་བཅུད་བསྡུས་གསང་བའི་ཐབས། །གསང་མཛོད་རིག་པ་ཐུགས་ཀྱི་བཅུད། །བསྟན་པའི་སྤྱི་འགྲེལ་གསང་རྒྱུད་ཅེས། །གུ་ལང་ལུང་གི་གསེར་བཟོ་རུ། །སེང་གེའི་འོ་མ་བླུགས་པ་བཞིན། །སྙིང་གི་དཀྱིལ་དུ་སྦ་བར་བྱ། །བསྟན་པའི་ཡང་སྙིང་སྙིང་ལྟར་དུངས། །གནས་ནི་བྲག་དང་ཆུ་ལ་བཞུགས། །ཞེས་མདོ་རྒྱུད་མང་པོ་ནས་བསྔགས་པའི་ཕྱིར་དང༌། ལྔ་བརྒྱ་པ་རྣམས་ཀྱི་གཙུག་གི་ནོར་བུ་ཇོ་བོ་ཨ་ཏི་ཤས་ཀྱང་སྨྱོན་མར་བརྩི་བའི་མཁའ་འགྲོ་མས་ལུང་བསྟན་ནས་ར་སའི་ཀ་བ་བུམ་པ་ཅན་ནས་དཀར་ཆག་བཏོན་ནས་ཡང་གཏེར་ལ་སྦས་པའི་ཕྱིར་ཏེ་བསམ་པར་རིགས་སོ། །ཞེས་མཛངས་པ་ལྕེ་རྡུམ་དུ་འགྱུར་བའི་གེགས་སྐྱོན་སེལ་ཕྱིར་རྟོག་གེ་དང་ཐེ་ཚོམ་གྱི་རྒོལ་བ་ཚར་བཅད་དེ་འདོམས་པར་བྱས་སོ། །དེ་ལྟར་བཤད་པའང་ཚིག་རོ་དང་བཤད་ཡམས་ལྟ་བུའི་དགོས་པ་མེད་པ་མ་ཡིན་ཏེ། ཕྱིན་ཅི་ལོག་གི་ཀླན་ཀ་ཁྱི་ཟུག་པ་ལྟ་བུས་གང་ཟག་བློ་ཆུང་བ་དག་མགོ་འཁོར་ཞིང་ཐེ་ཚོམ་ཟ་བ་ལས་ལྡོག་སྟེ་ངེས་པའི་དོན་ལ་ཡིད་ཆེས་སྐྱེ་བའི་ཕྱིར་བསོད་ནམས་ཀྱང་དཔག་ཏུ་མེད་དེ། ཡེ་ཤེས་གྲུབ་པའི་རྒྱུད་ལས། ཆོས་ལ་སྡང་བ་ངེས་གསལ་བ། །བསོད་ནམས་འབྲས་བུ་གཏིང་དཔག་མེད། །ཅེས་གསུངས་པ་ལྟར་རོ། །འདིར་སྨྲས་པ། ཆོས་སྐུའི་སྟོན་པ་ཀུན་

---

^{[མ་དཔེ་གཟིགས་ན་འདིར་གནོན།]}

ཏུ་བཟང་པོ་ཡིས། །དགོངས་བརྒྱུད་བརྡ་ལས་འོངས་པའི་བདུད་རྩིའི་ཆོས། །སྔ་འགྱུར་ཡོ་ག་གསུམ་གྱི་རྒྱུད་རྒྱལ་འདི། །བྱིས་པ་སོ་སོའི་སྐྱེ་བོའི་སྤྱོད་ཡུལ་མིན། ༡ །སྙིགས་མ་ལྔ་ཡི་གདོན་གྱིས་མ་གཙེས་ཤིང༌། །ཡིད་སྲུབས་མདའ་ཡིས་སྙིང་ག་ཕུག་མིན་པར། །སྔོན་དགེའི་ལས་འཕྲོ་ཟླ་ཞུན་འཁྱིལ་བ་རྣམས། །མྱུར་ལམ་ཟབ་མོ་འདི་ལ་ཅིས་མི་འཇུག ༢ །ནང་རྒྱུད་རྣམ་གསུམ་ན་ཀྲའི་གྲོང་ཁྱེར་ནས། །ཡང་དག་ལྟར་སྣང་འབྱེད་པའི་མ་ཎི་ཀཿ། བླངས་ཚེ་སྙིང་པོས་དབེན་པའི་མཆིང་བུ་དག །སྐྱེངས་ཏེ་ས་ཡི་ཕག་ཏུ་ཡིབས་མིན་ནམ། ༣ །སྣོད་བཅུད་གཟོད་ནས་ལྷ་སྐུར་ཡོངས་དག་རྣལ་འབྱོར་ཆེ། །རྡོ་རྗེའི་ལུས་ལ་དཀྱིལ་འཁོར་ཡོངས་གྲུབ་ཨ་ནུའི་རྒྱུད། །རིག་པ་ཡེ་གྲོལ་བློ་ལས་འདས་པའི་ཨ་ཏི་ཆེ། །བསྐྱེད་རྫོགས་གསུམ་གྱིས་འཁོར་བའི་ལས་ལམ་བགགས་ཏེ་མཚར། ༤ །བཀའ་ལ་གཟུ་ལུམས་རས་ཆོད་མི་བྱ་བ། །ལུགས་འདིའི་ཁྱད་ནོར་ཡིན་པར་ངེས་པ་དག །ཡོ་ག་གསུམ་གྱི་ས་མཚམས་མ་ཕྱེད་པར། །འཐད་ལེགས་ཚིག་གི་ན་ཡའི་ཁེངས་པ་ཐོང༌། ༥ །སྔ་འགྱུར་གཞུང་གི་རྒྱུད་སྡེའི་དགོངས་པའི་རྩེ་སྒྲོས་རྒྱས། །མྱུར་པོའི་མན་ངག་ཟབ་མོའི་གཏེར་གྱི་བྱ་རུ་རྣོ། །བརྒྱུད་པའི་ཕྱག་བཞེས་ཡིད་བཞིན་དབང་རྒྱལ་གཙུག་ན་མཛེས། །ཀ་རུ་ཎ་དེ་ལྷགས་པ་ཙམ་གྱིས་བསྟན་ལ་བྱ་བ་རབ་ཏུ་བྱས། ༦ །ཞེས་པའང་

---

^{[མ་དཔེ་གཟིགས་ན་འདིར་གནོན།]}

བར་སྐབས་ཀྱི་ཚིགས་སུ་བཅད་པའོ། །གཉིས་པ་ཐེག་པ་དེ་དག་ཐམས་ཅད་ཀྱི་མཐར་ཐུག་གི་སྐྱེལ་སོ་རང་བཞིན་འོད་གསལ་རྫོགས་པ་ཆེན་པོའི་གཞི་ལམ་འབྲས་བུ་གསུམ་གྱི་རྣམ་གཞག་ཅུང་ཟད་བཤད་པ་ལ་གསུམ། གཞི་བཤད་པ། ལམ་བཤད་པ། འབྲས་བུ་བཤད་པའོ། །དང་པོ་ལ་གཉིས། གཞི་ངོས་བཟུང་བ་དང༌། དེ་ལ་ལྷུན་གྲུབ་ཀྱི་ཡོན་ཏན་ཅི་ལྟར་ཚང་བའི་ཚུལ་ལོ། །དང་པོ་ནི། སྤྱིར་ཆོས་དབྱིངས་དེ་བཞིན་ཉིད་ལ་གཞིར་འདོད་པ་དང༌། བདེན་གཉིས་ཟུང་འཇུག་ལ་གཞིར་འདོད་པ་སོགས་རིགས་མང་ཡང་འདོད་ལུགས་བདུན་ལས་མི་འདའ་བར་གཏན་ལ་ཕབ་སྟེ་གཞི་དྲུག་སྐྱོན་ཅན་དུ་ངོས་བཟུང་ནས་སུན་ཕྱུང་བའི་རྣམ་བཞག་ནི་འདིར་ཡི་གེས་འཇིགས་ལ། དེའི་ནང་ནས་ཀ་དག་གི་ཡེ་གཞི་སྐྱོན་མེད་དུ་ཁས་ལེན་པ་ནི་ཀློང་དྲུག་པ་ལས། སྤྲོས་བྲལ་ཆོས་ཉིད་ཀ་དག་ནི། །རང་ངོ་རྣམ་དག་སྙིང་པོ་གཞི། །དེ་ལ་ཚིག་དང་ཡི་གེ་བྲལ། །བརྗོད་པས་གཏན་ལ་དབབ་ཏུ་མེད། །སྒྲོ་འདོགས་ཐ་སྙད་ཀུན་བྲལ་ཏེ། །གཟུང་དང་འཛིན་པའི་རྣམ་རྟོག་མེད། །སངས་རྒྱས་སེམས་ཅན་ཡང་མེད་དེ། །ཆོས་མེད་ཆོས་ཀྱི་འདུ་ཤེས་མེད། །གང་མེད་ཅི་མེད་ཅི་ཡང་མེད། །དེ་ལྟར་མེད་པའི་སྙིང་པོ་ལ། །རེ་ཞིག་ཚིག་གིས་གཏན་ཕབ་ནས། །ངོ་བོ་ཉིད་ལ་ཀ་དག་ནི། །རང་བཞིན་དུ་ནི་ལྷུན་གྲུབ་བོ། །མཚོན་བྱ་ཉིད་ལ་དེ་

---

^{[མ་དཔེ་གཟིགས་ན་འདིར་གནོན།]}

ལྟར་གནས། །ཞེས་གྲུབ་མཐའ་རྗེས་སུ་འཛིན་པའི་འདོད་པ་མདོར་བསྟན་ནས་གནས་ལུགས་དངོས་གནས་ནི། རྡོར་སེམས་སྙིང་གི་མེ་ལོང་གི་རྒྱུད་ལས། ཁམས་གསུམ་གྱི་སེམས་ཅན་འདི་དག་ཐམས་ཅད་ནི། དང་པོ་གཞི་ཅི་ཡང་མ་ཡིན་པ་ལས་འཁྲུལ་ལོ། །གཞི་དེའི་ངོ་བོ་སྟོང་པ། རང་བཞིན་གསལ་བ། ཐུགས་རྗེ་སེམས་ཅན་ལ་སྣང་ནུས་པའོ། །ཞེས་དང༌། ཀློང་གསལ་ལས། ཆོས་རྣམས་མ་ལུས་ཐམས་ཅད་ཀུན། །རྩ་བ་ཐིག་ལེ་གཅིག་ལས་གྱེས། །ཞེས་འཁོར་འདས་ཐམས་ཅད་ཀྱི་འཆར་གཞིའམ་ཡེ་གཞི་འདི་ཉིད་ཡིན་ལ། དེ་ལས་འཁྲུལ་གྲོལ་གྱི་སོ་མཚམས་ནི་རྒྱས་བཤད་ཇི་ཙམ་ཞིག་བཤད་ཀྱང་མདོ་ཧྲིལ་གྱིས་བསྡུ་ན་རིག་མ་རིག་གཉིས་ལས་མི་འདའ་སྟེ། ཀུན་བཟང་སྨོན་ལམ་ལས། སྣང་སྲིད་འཁོར་འདས་ཐམས་ཅད་ཀུན༔ གཞི་གཅིག་ལམ་གཉིས་འབྲས་བུ་གཉིས༔ རིག་དང་མ་རིག་ཆོ་འཕྲུལ་ཏེ༔ ཞེས་པའི་གཞི་གཅིག་ནི་གདོད་མའི་ཡེ་གཞི་འཁོར་འདས་གཉིས་ཀར་ལུང་མ་བསྟན་པའི་སྐབས་ཡིན་ལ། ལམ་གཉིས་ནི་གྲོལ་བ་དང་འཁྲུལ་པ་གཉིས་ལས་སྔ་མ་ནི་ཤེས་རབ་སྲོག་ཏུ་ཤར་བའི་རླུང་གིས་རྟ་བྱས་ཏེ་གཅོད་བྱེད་ཀྱི་སྣང་བ་ཤར་བ་ན་རང་སྣང་རང་བཞིན་མེད་པར་ཤེས་པས་ཀུན་ཏུ་བཟང་པོས་ཀུན་རྫོབ་ཟག་བཅས་ཀྱི་དགེ་བ་རྡུལ་ཙམ་འདི་ནི་བཤད་ཚུལ་སྤྱིར་བཏང་དུ་བྱས་

---

^{[མ་དཔེ་གཟིགས་ན་འདིར་གནོན།]}

ཀྱི། ཀུན་མཁྱེན་ཀློང་ཆེན་པའི་ཐུན་མོང་མ་ཡིན་པའི་བཞེད་པ་ལ་རང་ངོ་རིག་པ་དེ་ཟག་མེད་རང་བྱུང་གི་དགེ་བ་རྒྱ་མཚོ་ལྟ་བུར་བྱས་ནས་ཐུན་མོང་མ་ཡིན་པའི་བཤད་སྲོལ་ཡོད་དོ། །མ་བྱས་པར་སངས་རྒྱས་ཏེ། ཐལ་འགྱུར་ལས། དེ་ལྟར་འཁོར་འདས་ཐོག་མཐའ་ལས། །སངས་རྒྱས་འཁྲུལ་བར་མ་གྱུར་པས། །གཞི་ནས་འཕགས་པའི་དབང་པོ་ཡིས། །རང་སྣང་རང་བཞིན་མེད་པར་ཤེས། །རྟོག་དཔྱོད་ཡིད་རྣམས་ཕྱིར་མ་ཤོར། །འགྱུ་བ་རང་ཐག་ཆོད་པའོ། །ཞེས་པས་བསྟན་ལ། ཕྱི་མ་ནི་ཁམས་གསུམ་སེམས་ཅན་གྱིས་སྡིག་པ་སྤུ་ཙམ་མ་བྱས་པར་འཁོར་བར་ལྷུང་བ་ནི་རང་སྣང་རང་བཞིན་མེད་པར་མ་ཤེས་པ་ལས་འཁྲུལ་ཏེ། དེ་ལ་གཞི་དང་གཞི་ཤེས་ཀྱི་ཁྱད་པར་ཕྱེ་ནས་འཁྲུལ་ཚུལ་གསུམ་དུ་བཤད་ཀྱང་རྟེན་འབྲེལ་བཅུ་གཉིས་ཀྱི་རྩ་བ་མ་རིག་པ་ལས་མི་འདའ་ཞིང་རྣམ་པ་གསུམ་གྱིས་འཁྲུལ་ཚུལ་ནི། ཐལ་འགྱུར་ལས། འཁྲུལ་བའི་རྒྱུ་ནི་མ་རིག་པ། །མ་རིག་པ་ནི་རྣམ་པ་གསུམ། །བདག་ཉིད་གཅིག་ལས་འཁྲུལ་རྩ་བྱས། །ལྷན་ཅིག་སྐྱེས་པའི་རྟོག་པ་གཉིས། །ཀུན་ཏུ་བརྟགས་པས་ཡུལ་དུ་གྱུར། །ཞེས་པས་ངོ་བོ་མ་རིག་པས་རྒྱུ་བྱས་གཞིའི་རིག་པ་རྟོག་དཔྱོད་ལས་འདས་ཤིང་ལུང་མ་བསྟན་གྱི་ཤེས་པ་གཟུང་ཆ་ཕྲ་བའི་ཕྲ་བར་གནས་པ་དེ་ལ་རྒྱུ་བདག་ཉིད་གཅིག་པའི་མ་རིག་པ་ཞེས་བྱ་སྟེ། ཐལ་འགྱུར་ལས། རྒྱུ་གཅིག་འབྱེད་མེད་རྩ་བ་སྟེ། །རང་ངོ་ཡིན་པར་མ་ཤེས་པས། །འདི་ཡང་

---

^{[མ་དཔེ་གཟིགས་ན་འདིར་གནོན།]}

འཁོར་བའི་ཐོག་མ་སྟེ། །ཞེས་དང༌། དེ་ལས་རིག་པ་གཞི་ནས་བསྐྱོད་པའི་འགྱུ་ཆ་ལས་རླུང་གིས་ཅུང་ཟད་གཡོས་པས། རང་བཞིན་གྱི་མ་རིག་པས་རྐྱེན་བྱས། འཕེན་པ་ལས་ཀྱི་རླུང་གིས་ཁ་དོག་ཏུ་གསལ་ཏེ་འོད་ཁྱིམ་དུ་སྣང་བ་ལ། ལྷན་ཅིག་སྐྱེས་པས་མ་རིག་པ་ཞེས་བྱ་བ་གཉིས་སྣང་གི་ཆ་ལས་ཤེས་པ་འཁྲུལ་ཏེ་ཡུལ་དང་ཡུལ་ཅན་གཉིས་སུ་གྱུར་པ་སྟེ། ཐལ་འགྱུར་ལས། དེ་ལས་ལྷན་ཅིག་སྐྱེས་པ་སྟེ། །དོན་དམ་ཀུན་རྫོབ་སྣང་བཏགས་པའི། །བདེན་པ་གཉིས་ཆའི་ཡུལ་ལས་ནི། །སོགས་ཀྱིས་བསྟན་ནོ། །ཐུགས་རྗེའི་རྩལ་གྱིས་ཡེ་ཤེས་ཀྱི་སྣང་བ་ལ་བརྟགས་པའི་རྟོག་པས་བདག་གཞན་གཉིས་སུ་བཟུང་བ་ལ་ཀུན་ཏུ་བརྟགས་པའི་མ་རིག་པ་ཞེས་བྱ་སྟེ། ཐལ་འགྱུར་ལས། དེ་ཡུལ་སྣང་ཆའི་བྱེ་བྲག་ལས། །ཀུན་ཏུ་བརྟགས་པ་རྐྱེན་བཞིའི་ཆ། །ཞེས་གསུངས་ཤིང༌། གདོད་མའི་གཞི་རང་གི་ངོ་བོ་ལ་མིང་དང་བརྗོད་བྱས་གཏན་ལ་ཕེབས་པའི་སྐབས་མེད་དེ། མུ་ཏིག་ཕྲེང་བ་ལས། ཐོག་མ་ཉིད་ཀྱི་ཀ་དག་ལ། །འཁྲུལ་ཞེས་ཙམ་དུ་བརྗོད་དུ་མེད། །དེ་བཞིན་མ་འཁྲུལ་བ་ཡང་ཅི། །དེ་ཕྱིར་འཁྲུལ་པ་གདོད་ནས་དག །ཅེས་དང༌། ཀུན་མཁྱེན་ཀློང་ཆེན་པས། དེ་ཡང་ངོ་བོ་ལ་མ་རིག་པ་ཡོད་མ་མྱོང་བས། རིག་པ་ཙམ་དུ་གྲུབ་པ་མེད། རིག་མ་རིག་གི་ཐ་སྙད་ལས་འདས་པས་འཁྲུལ་མ་འཁྲུལ་ཞེས་བྱ་བ་ཙམ་དུ་གྲུབ་

---

^{[མ་དཔེ་གཟིགས་ན་འདིར་གནོན།]}

པ་མེད་དོ་གསུངས། ཁ་ཅིག་ན་རེ། འོ་ན་གྲོལ་སའི་ཀ་དག་གི་སྐབས་སུ། ངོ་བོ་སྐུ། རང་བཞིན་འོད། ཐུགས་རྗེ་ཡེ་ཤེས་ཞེས་བཤད་པས་དོན་དམ་པར་སངས་རྒྱས་ལ་ཡེ་ཤེས་མེད་པར་འདོད་པ་དང༌། ཡོད་པར་འདོད་པའི་འགལ་བ་ཇི་ལྟར་སྤོང་ཞེ་ན། སངས་རྒྱས་ཀྱི་ས་ན་ཤེས་བྱ་དང་ཤེས་བྱེད་དུ་གྱུར་པའི་རང་རྒྱུད་ཀྱི་སྟེང་ནས་བཞག་པའི་ཡེ་ཤེས་མེད་པས་ལམ་མེད་ཡེ་ཤེས་མེད་ཆོས་མེད་སོགས་བསྟན་ལ་ཕྱི་མ་ལྟར་ན་སངས་རྒྱས་ནི་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་དུ་གྱུར་པ་སྟེ། མཚན་བརྗོད་ལས། ཡེ་ཤེས་ལུས་ཅན་དེ་བཞིན་གཤེགས། །ཞེས་པ་ལྟར་སངས་རྒྱས་ཀྱི་ཆོས་ཐམས་ཅད་ཡེ་ཤེས་ཆེན་པོ་ལས་ནམ་ཡང་མི་འདའ་བས་དེ་གཉིས་ཀ་ལྡོག་ཆས་ལེགས་པར་ཕྱེ་ནས་ཁས་བླང་དུ་བཏུབ་པའི་ཕྱིར་རོ། །དེ་བཞིན་དུ་དོན་དམ་པར་སངས་རྒྱས་ཐོབ་ཏུ་མེད་པ་དང༌། ཐོབ་ཏུ་རེ་ནས་ལམ་དུ་ཞུགས་པ་ཡང་མི་འགལ་ཏེ། སྔ་མ་ལྟར་ན་རང་རིག་པའི་ཡེ་ཤེས་ལས་ལོགས་སུ་རྡུལ་ཙམ་མེད་པ་ལ་དགོངས་པ་ཡིན། ཕྱི་མ་ནི་དེ་ཉིད་མངོན་དུ་གྱུར་པར་བྱ་རུ་ཡོད་པར་དགོངས་ཀྱི། ངོ་བོ་རང་བཞིན་ཐུགས་རྗེ་ཞེས་ཚོགས་པ་གཅིག་གི་སྟེང་ནས་ཕྱེ་བའི་གདོད་མའི་གནས་ལུགས་དེ་ཉིད་ལ་སྐུ་གསུང་ཐུགས་ཀྱི་སྒྲ་བཤད་བཞག་ཀྱང་ཞལ་ཕྱག་གི་རྣམ་པའི་སྐུ་དང་འོད་ཟེར་སོགས་ཡོད་པར་འདོད་པ་ནི་ནོར་ས་རྔམ་པོ་ཆེ་ཡིན་ཏེ། རིག་པ་རང་ཤར་ལས། ཆོས་སྐུ་རྣམ་

---

^{[མ་དཔེ་གཟིགས་ན་འདིར་གནོན།]}

དག་ཆེན་པོ་ལ། །དངོས་པོ་གཟུང་དུ་མེད་པའི་ཕྱིར། །མཚན་མ་ཅན་དུ་བཏགས་པ་མེད། །གལ་ཏེ་མཚན་མ་ཡོད་གྱུར་ན། །ཆོས་སྐུ་བཟུང་དུ་ཡོད་པར་འགྱུར། །ཞེས་དང༌། ཀུན་མཁྱེན་བླ་མས། འོད་ལ་ཁ་ཅིག་གིས་ཤེས་རབ་དང༌། ཡེ་ཤེས་དང༌། འོད་ཀྱི་ཁ་མིག་རྣ་བ་ཅན་ལ་སོགས་པར་བྱས་ནས་འདུག་སྟེ་མ་ཧཱ་ཡོ་གའི་གོལ་ས་སྤོང་བར་མི་ནུས་སོ། །གལ་ཏེ་ཁ་མིག་དང་རྣ་བ་ཡོད་ན་ནི་དབང་པོ་གཟུགས་ཅན་དུ་ཡོད་དམ། དབང་པོ་ཡིད་ཙམ་དུ་ཡོད་དམ། གཟུགས་ཅན་དུ་ཡོད་ན་ནི་འགྲོ་དྲུག་ཕལ་བ་དང་ཁྱད་པར་མེད་དོ། །ཡིད་ཙམ་དུ་ཡོད་ན་ནི་སྐྱེ་མཆེད་མུ་བཞིའི་ལྷ་དང༌། ཡི་དྭགས་རྣམས་དང་ཁྱད་པར་མེད་དོ། །དེ་ཡང་རང་བཞིན་གྱི་ངོས་ནས་འོད་དུ་གནས་ཏེ། ཁ་དོག་རིགས་ཅན་དུ་གྲུབ་པ་མེད་དོ། །འདི་ལ་ཁ་ཅིག་འོད་ལྔའི་མཚན་ཉིད་དང་ཁ་དོག་བཤད་པ་འདུག་སྟེ། འདི་ནི་ཤིན་ཏུ་མི་འཐད་དེ་གཟུགས་སྐུ་དང་ཆོས་སྐུ་གཉིས་ཁྱད་པར་མེད་པར་འགྱུར་བའི་སྐྱོན་སྤང་བར་མི་ནུས་སོ། །ཆོས་ཐམས་ཅད་ཀྱི་ནང་ནས་སྟོང་པ་ཉིད་དོ་ཞེས་བྱ་བར་བཤད་པ་རྣམས་དང་ཡང་འགལ་ལོ། །ཐུགས་རྗེའི་ཆ་ནས་འཆར་གཞི་འགག་མེད་དུ་གནས་པས་ཀུན་ལ་ཁྱབ་པའི་ཡེ་ཤེས་སོ། །འདི་ནི་ལ་ལས་ཡེ་ཤེས་རྒྱུན་ཆད་ཡིན་བྱ་བར་བཤད་པ་འདུག་སྟེ་ཡེ་ཤེས་ཀྱི་འཆར་གཞི་མེད་ན་ནི་སངས་རྒྱས་ཀྱི་མཁྱེན་པའི་ཆ་མེད་པས་ཡང་ན་

---

^{[མ་དཔེ་གཟིགས་ན་འདིར་གནོན།]}

ཕྱང་ཆད་པའམ། ཡང་ན་བེམ་པོ་ལ་སོགས་པའི་ཆ་ནི་སྤང་བར་མི་ནུས་སོ། །ཞེས་གསུངས་པ་ནི་ཤིན་ཏུ་མད་སྟེ་འཕགས་པ་སྡུད་པ་ལས། ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །ཞེས་དང༌། ཀློང་དྲུག་པ་ལས། ཉི་མ་ལས་ནི་འོད་བཞིན་དུ། །རང་གིས་བྱས་པ་མ་ཡིན་ཏེ། །རང་གི་རང་བཞིན་དེ་ལྟར་སྣང༌། །ཤེས་བྱའི་ཡེ་ཤེས་གཉིས་མེད་ན། །བེམ་པོ་རྣམས་དང་ཁྱད་ཅི་ཡོད། །ཡང་ན་སྟོང་པ་ཕྱང་ཆད་དུ། །འདི་ཉིད་འགྱུར་བ་ཁོ་ནའོ། །དེ་ཕྱིར་ཐམས་ཅད་མཁྱེན་པ་ཡི། །ཡེ་ཤེས་ཐུགས་རྗེའི་ཆ་ལ་སྣང༌། །ཞེས་སོ། །འོ་ན་གོང་དུ་རང་ཉིད་ཀྱིས་ཡེ་ཤེས་མེད་པར་ཁས་མ་བླངས་སམ་ཞེ་ན། བཤད་དུ་ཡོད་དེ། གོང་དུ་བསྟན་པའི་ཡེ་ཤེས་མེད་པའི་བསྒྲུབ་གཞི་ནི་ཤེས་བྱ་དང་ཤེས་བྱེད་ཀྱི་སྒོ་ནས་ལྡོག་ཆས་ཕྱེ་ནས་འགལ་བ་མེད་པ་གོང་དུ་བཤད་མ་ཐག་པ་དང༌། འདིར་དགག་པ་ནི་ཟུང་འཇུག་རབ་ཏུ་མི་གནས་པའི་དགོངས་པ་མི་ཤེས་པར་རྒྱུན་ཆད་པ་ཞེས་པས་ཆད་པའི་མཐའ་ལྟ་བ་ལ་དགོངས་པའི་ཕྱིར་རོ། །དེ་ལྟར་ངོ་བོ་རང་བཞིན་ཐུགས་རྗེ་གསུམ་གྱི་རྣམ་རོལ་ཆེན་པོར་བཞུགས་པའི་བདག་ཉིད་བདེ་བར་གཤེགས་པའི་སྙིང་པོ་འཁོར་འདས་ཐམས་ཅད་ཀྱི་སྤྱི་གཞིར་གྱུར་པ་དེ་ཉིད་ད་ལྟ་རང་བཞིན་གནས་པའི་བར་དོར་སེམས་ཅན་ཐམས་

---

^{[མ་དཔེ་གཟིགས་ན་འདིར་གནོན།]}

ཅད་ལ་སྙིང་གི་དབུས་ན་གཞོན་ནུ་བུམ་སྐུའི་བདག་ཉིད་ཅན་དུ་བཞུགས་པ་སྟེ། ནོར་བུ་ཕྲ་བཀོད་ལས། ཨེ་མ་རིག་པའི་གནས་ལུགས་ནི། །རང་རང་ཙིཏྟའི་དཀྱིལ་ན་གནས། །ཡབ་ཡུམ་གཉིས་ཀྱི་ཚུལ་ཏུ་གནས། །ཡབ་ཀྱི་ཆ་འཛིན་ཐབས་ཀྱི་སྐུ། །ཡུམ་གྱི་ཆ་འཛིན་ཤེས་རབ་སྐུ། །འོད་དང་འོད་ཟེར་ཚུལ་ཏུ་གནས། །དབྱིངས་དང་རིག་པས་རབ་བརྒྱན་ཏེ། །ལྷུན་རྫོགས་ཐིག་ལེ་ཆེན་པོར་གནས། །དེ་ནི་ཞི་བའི་བཞུགས་ཚུལ་ལོ། །རང་རང་མགོ་ལ་ཁྲོ་བོར་གནས། །ཡབ་དང་ཡུམ་དུ་མངོན་པར་སྣང༌། །ཁྲོ་དང་ཁྲོ་མོའི་ཚུལ་འཆང་ཞིང༌། །ཡེ་ཤེས་ལྔ་ལྔ་དག་དང་ལྡན། །སྐུ་ཡི་ཡེ་ཤེས་རེ་རེ་ལ། །དབུ་ཡི་ཡེ་ཤེས་ལྔ་ལྔའོ། །རང་བཞིན་འོད་ཀྱི་ཐིག་ལེ་ནི། །རྩ་རྣམས་ནང་ན་ཐིག་ལེའི་སྐུ་ལྟར་སྣང༌། །ཆེ་བ་ནམ་མཁའི་སྐུ་ལྟར་སྣང༌། །ཆུང་བའི་ཚད་ནི་རྟ་རྔ་བཅུར་གཤགས་ཙམ། །གསལ་བའི་ཚད་ནི་ཉི་ཟླའི་དཀྱིལ་འཁོར་འདྲ། །དེ་ཡང་གསལ་འཚེར་གཟི་བརྗིད་ལྡན། །འགྲོ་དང་འོང་དང་བཅས་པའོ། །ཞེས་གསུངས་པ་ལྟར་གདོད་མའི་གནས་ལུགས་དོན་དམ་པའི་བདེན་པ་དེ་ཉིད་སེམས་ཅན་ཀུན་གྱི་རྒྱུད་ལ་གསལ་སྟོང་ཟུང་འཇུག་གི་རྣམ་རོལ་དུ་བཞུགས་པ་སྟེ། འདི་ལ་མཁས་རློམ་ཁ་ཅིག་མུ་སྟེགས་རྟག་ལྟ་རྣམས་སྙིང་གི་དཀྱིལ་དུ་སེམས་ཀྱི་དངོས་པོ་ཐིག་ལེ་བྱ་སྒོང་འདྲ་བ་སྲ་འཐས་མི་འཇིག་པ་ལུས་ཆེ་ཆུང་གི་ཁྱད་པར་དང་འཚམ་

---

^{[མ་དཔེ་གཟིགས་ན་འདིར་གནོན།]}

པར་ཡོད་པར་འདོད་པ་དང་གཅིག་གོ་ཞེས་སྨྲ་བ་ནི་མ་བརྟགས་པའི་གཏམ་སྟེ། བསྐྱེད་རྫོགས་ཐམས་ཅད་ཀྱི་ལམ་དང་འབྲས་བུའི་གནད་དོན་འདི་ལ་ཐུག་པའི་རྒྱུ་མཚན་འོག་ཏུ་འཆད་ལ། སྔ་འགྱུར་ཁོ་ནའི་རྒྱུད་ཀྱི་ཟུར་སྐད་དོ་སྙམ་ན་ནི། སཾ་བུ་ཊི་ལས། དྲི་མེད་ཤེལ་དང་མཚུངས་པའི་འོད། །བྱང་ཆུབ་སེམས་ནི་འོད་གསལ་བ། །ཡེ་ཤེས་ལྔ་ཡི་དངོས་དེ་ཉིད། །ཉུངས་དཀར་སྦོམ་པའི་ཚད་ཙམ་དག །དེ་ཡི་དབུས་ན་གནས་པའི་ལྷ། །མི་གསལ་གསལ་བའི་རང་བཞིན་ཅན། །ཆ་ཕྱེད་མཆོག་ཏུ་ཕྲ་བས་ཏེ། །ཐིག་ལེའི་གཟུགས་ཅན་ཡིད་ཀྱི་དངོས། །གཟི་བརྗིད་ཆེན་པོའི་འོད་དང་ལྡན། །རྟག་ཏུ་སྙིང་གའི་དབུས་ན་གསལ། །ཞེས་དང༌། རིམ་ལྔ་ལས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེས་བུ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་དང༌། མདའ་བསྣུན་རྗེས། མཁས་པ་ཐམས་ཅད་བསྟན་བཅོས་འཆད་པ་ན། །ལུས་ལ་ཡེ་ཤེས་ཡོད་པར་མ་རྟོགས་སོ། །ཞེས་གསུངས་པ་སོགས་མན་ངག་གི་གཞུང་འགྲེལ་མང་པོ་ནས་བསྟན་པའི་ཕྱིར་ཁྱེད་ཅག་གི་རྡོ་རྗེའི་ལུས་ཀྱི་གནས་ལུགས་ཐུན་མོང་བ་ཙམ་ལས་སྦས་དོན་གྱི་གནད་ལ་རྨོངས་པར་གྱུར་པའི་ཕྱིར་ཏེ་ལན་གདབ་ཏུ་མེད་དོ། །མདོར་ན་གནས་པ་རྩ། གཡོ་བ་རླུང༌། བཀོད་པ་བྱང་ཆུབ་ཀྱི་སེམས་རིན་པོ་ཆེའི་རྟེན་འབྲེལ་ལ་བརྟེན་ནས། བསྐྱེད་རིམ་

---

^{[མ་དཔེ་གཟིགས་ན་འདིར་གནོན།]}

གྱི་ཚེ་ལྷའི་རྣལ་འབྱོར་ཐམས་ཅད་ཀྱང་སེམས་དཔའ་སུམ་བརྩེགས་དང་སྔགས་ཕྲེང་འགོད་པ། འོད་ཟེར་སྤྲོ་བསྡུ་སོགས་ཀྱང་སྙིང་ག་ཆོས་ཀྱི་འཁོར་ལོ་ལ་བྱེད་པ་དང༌། མཚན་བཅས་ཀྱི་རྫོགས་རིམ་དྷུ་ཏིའི་རྣལ་འབྱོར་ལ་བརྟེན་ནས་རླུང་དབུ་མར་ཞུགས་གནས་ཐིམ་གསུམ་གྱི་ངེས་པ་ཡང་འདི་ཁོ་ནའི་ཡོན་ཏན་ལས་བྱུང་བ་དང༌། མཐར་འཆི་བའམ་གཉིད་ཀྱི་འོད་གསལ་རྗེས་མཐུན་པའི་ཚེ་ཡང་འབྱུང་བའི་ཐིམ་རིམ་གྱི་རྗེས། སྣང་མཆེད་ཐོབ་གསུམ་སྟོང་པ་བཞི་ལ་སོགས་པའང་རླུང་སེམས་ཐིག་ལེ་དང་བཅས་པ་སྙིང་གར་ཕྲད་པའི་རྐྱེན་གྱིས་གཞི་གནས་ཀྱི་འོད་གསལ་འཇག་མའི་སྲིན་བུ་ཡན་ཆད་ལ་འཆར་བས་ཉམས་ལེན་ལ་བརྟན་པ་ཐོབ་པ་རྣམས་གྲོལ་བའི་གནད་ཀྱང་འདི་ཡིན་པའི་ཕྱིར་ཏེ། གཏེར་ཆེན་ཐམས་ཅད་མཁྱེན་པས་ཀྱང༌། ཁམས་དྲུག་ལྡན་པའི་མི་རྣམས་ཕུང་ཁམས་སོགས། །རིམ་གྱིས་ཐིམ་ནས་འཆི་བའི་རིམ་པའམ། །ཇི་ལྟར་མཚན་མོ་གཉིད་དུ་སོང་བའི་ཚེ། །ཡུལ་ལྔའི་ཤེས་པ་རིམ་གྱིས་ཡིད་དུ་ཐིམ། །དེ་ཡང་ཀུན་གཞིར་ཐིམ་པས་མི་རྟོག་པ། །རྩེ་གཅིག་སྣང་ཡུལ་མེད་པས་ངང་དེ་ཉིད། །ཆོས་དབྱིངས་ཐིམ་པས་རང་བཞིན་སྤྲོས་དང་བྲལ། །ཐུན་བར་ལྷག་མོས་འོད་གསལ་དུ་འཇུག་པའི། །བར་འདིར་ཆོས་སྐུའི་རྣལ་འབྱོར་ལ་གནས་ཤིང༌། །གཉིད་དང་འཆི་བའི་འོད་

---

^{[མ་དཔེ་གཟིགས་ན་འདིར་གནོན།]}

གསལ་ལུགས་ལྡོག་ཏུ། །སླར་ཡང་མཆེད་པས་ཀུན་གཞིའི་རྣམ་ཤེས་ལས། །ཡིད་ཉིད་གཅིག་པར་ལངས་བས་རྨི་ལམ་སེམས། །དབང་པོ་ཀུན་ཚང་ཡིད་ཀྱི་ལུས་གྲུབ་པ། །དེ་མཚུངས་སྐད་ཅིག་མངོན་བྱང་ལྔ་ལས་ནི། །དང་པོའི་མགོན་པོ་ལེགས་པར་བསྐྱེད་པའི་ཚུལ། །བར་དོ་སྒྱུ་ལུས་ལོངས་སྐུར་ལྡང་བར་ཤོག །ཅེས་དང༌། རྒོད་ཚང་པ་སྣ་ཚོགས་རང་གྲོལ་གྱིས། ལར་གསང་སྔགས་མཐར་ཕྱིན་ཚེ་ན་རང་སྣང་དོན་གྱི་འོག་མིན་དུ་ལོངས་སྤྱོད་རྫོགས་སྐུར་འཚང་རྒྱ་བར་བདེ་ཀྱེ་གསང་གསུམ་དུས་འཁོར་སོགས་ནས་གསུངས་པ་དང༌། རྫོགས་ཆེན་ནས་སྙིང་གར་ལོངས་སྐུའི་དཀྱིལ་འཁོར་བཞུགས་ཚུལ་དང་ཆོས་ཉིད་བར་དོ་འཆར་ལུགས། གྲོལ་ལུགས་སོགས་གསུངས་པ་ཐམས་ཅད་ཀྱི་དགོངས་པ་ལ་ཁྱད་པར་མི་འདུག་ཅིང༌། ཕྱི་ནང་གཞན་གསུམ་གནད་གཅིག་པའི་རྟེན་འབྲེལ་ལས། བསྐལ་བཟང་གི་སངས་རྒྱས་སྟོང་རྣམས་མངོན་པར་རྫོགས་པར་སངས་རྒྱས་པའི་གནས་ཀྱང་འཛམ་གླིང་གི་སྙིང་པོ་རྡོ་རྗེ་གདན་དུ་མཛད་པ་ན། ཕྱི་ནང་གི་རྟེན་འབྲེལ་གནད་གཅིག་པའི་རྟགས་ཡིན་པར་གསུངས་སོ། །ཞེས་སོ། །དེ་ལྟར་གདོད་མའི་ཁམས་འགྲོ་བའི་རྒྱུད་ལ་ཞུགས་ཚུལ་དེ་ཉིད་ལས་མཐར་འཆི་བའི་ཚེ་ཡང་རྫོགས་ཆེན་རང་སྐད་ལ་སྐྱེ་འཆི་བར་དོ་གསུམ་གང་རུང་ལ་གྲོལ་བར་བཤད་པའི་སྔ་མ་ནི་སྣང་བ་བཞི་མཐར་སོན་ནས་འོད་

---

^{[མ་དཔེ་གཟིགས་ན་འདིར་གནོན།]}

སྐུར་གྲོལ་བ་ཡིན་ཏེ་ཐིམརིམ་གྱི་ངེས་པ་བཤད་དུ་མེད་ལ། བར་མ་ནི་འཆི་བ་འོད་གསལ་ཞེས་ཕྲ་རགས་ཀྱི་སྣང་བ་ཀུན་འགགས་པའི་ཟང་ཐལ་ཆེན་པོ་སྟོན་དུས་ཀྱི་ཐོ་རངས་ནམ་མཁའ་གཡའ་དག་པ་ལྟ་བུའི་འོད་གསལ་ཤར་བ་དང་ཆོས་ཉིད་ཀྱི་བར་དོ་ཤར་བ་དུས་མཉམ། དེ་ངོས་ཟིན་ན་དྲན་པ་ཁྱབ་གདལ་དུ་གནས། ལྷུན་གྲུབ་བར་དོའི་སྣང་བ་སྒྲ་འོད་ཟེར་གསུམ་སོགས་འཆར་མི་དགོས་པར་གདོད་མའི་གཞི་ལ་སྐད་ཅིག་གིས་གྲོལ་བ་སྟེ། རྫོགས་པ་ཆེན་པོའི་རྒྱུད་སྡེའི་བཅུད་ཕུར་མཁའ་འགྲོ་སྙིང་ཐིག་ལས། རིག་པ་ཆོས་ཉིད་བར་དོ་ལ་སླེབས་པའི་དུས་ན༔ ནམ་མཁའ་འོད་གསལ་ལ་ཐིམ་པ་ཞེས་བྱ་སྟེ༔ དབྱར་མ་སྟོན་གྱི་ནམ་མཁའ་སྤྲིན་དང་བྲལ་བ་ལྟ་བུ་ཞིག་འབྱུང་སྟེ༔ དེ་ངོས་ཟིན་ན་ཀ་དག་གི་གཞི་ལ་རང་གྲོལ་བའོ༔ ཞེས་གསུངས། ཐ་མ་ནི་གལ་ཏེ་དེ་ལ་མ་གྲོལ་ན་འོད་གསལ་ཟུང་འཇུག་ལ་ཐིམ་པ་ཞེས་ལྷུན་གྲུབ་ཀྱི་སྣང་བ་ཞི་ཁྲོའི་སྐུ་ལ་སོགས་པ་ཇི་བཞིན་པར་གནས་ཚུལ་དང་མཐུན་པར་འཆར་ཏེ། ཀློང་གསལ་ལས། དེ་ཚེ་སྒྲ་འོད་ཟེར་དུ་འཁྲིགས། །སྐུ་ཡི་སྣང་བས་སྐྲག་པར་བྱེད། །ཅེས་དེ་དག་རང་སྣང་དུ་ངོ་ཤེས་ན་དེ་ཉིད་དུ་རང་གྲོལ་ལོ། །ངོ་མ་ཤེས་ན་ཟུང་འཇུག་ཡེ་ཤེས་ལ་ཐིམ་པ། ཡེ་ཤེས་ལྷུན་གྲུབ་ལ་ཐིམ་པ། ལྷུན་གྲུབ་སྒོ་བརྒྱད་ཀྱི་སྣང་བ་ལ་སོགས་འཆར་བར་གསུངས་ཏེ་འདིར་ཡི་

---

^{[མ་དཔེ་གཟིགས་ན་འདིར་གནོན།]}

གེས་འཇིགས་སོ། །དེ་ཡང་སྤྱིར་ཆོས་གང་ཉམས་སུ་ལེན་ཡང་འབྲས་བུའི་གྲོལ་ས་ངོ་ཤེས་དགོས་པར་གསུངས་པས་འདི་དག་ནི་ལམ་དུ་ཞུགས་པའི་རྣལ་འབྱོར་ལ་མི་དགོས་ཁ་མེད་ཡིན་ཏེ། ཀུན་མཁྱེན་ཀློང་ཆེན་པའི་མཁའ་འགྲོ་ཡང་ཏིག་གི་ཟབ་དོན་རྒྱ་མཚོའི་སྤྲིན་ཕུང་ལས་ཀྱང༌། གདོད་མའི་གཞི་ཡེ་ཤེས་ནང་གསལ་གསུམ་ནམ་མཁའ་འོད་གསལ་ལ་ཐིམ་དུས་འཆར། ལྷུན་གྲུབ་ཀྱི་ཞག་བཞི་རིམ་པ་བཞིན་ཟུང་འཇུག་དང་ཡེ་ཤེས་བཞི་སྦྱོར། ལྷུན་གྲུབ་རིན་པོ་ཆེ་སྟེ་བསམ་གཏན་གྱི་ཞག་ལྔ་ལ་འཆར་བ་དེས་ཤེས་སོ། །དེ་ལྟར་རང་བཞིན་ལྷུན་གྲུབ་ཀྱི་སྣང་བ་བཞི་པོ་འདི་རྒྱུད་ལུང་མན་ངག་ཆེན་པོ་རྣམས་ནས་ལེགས་པར་གསུངས་ཀྱང༌། གདོད་མའི་གཞི་སྣང་ཆེན་པོ་ངོ་བོ་ཀ་དག་གི་སྣང་བ་ནང་གསལ་དེར་འཁྲུལ་ནས་དེང་སང་ནི་གདོད་མའི་གཞི་དང་འགྲོ་དྲུག་ཏུ་འཁྲུལ་པའི་བར་ན་ཡེཤེས་འོད་གསལ་གྱི་སྦུབས་རང་བཞིན་ལྷུན་གྲུབ་ཀྱི་སྣང་བ་འདི་ཡོད་པར་མི་ཤེས་པ་རྫོགས་པ་ཆེན་པོར་རློམ་པ་རྣམས་ཀྱང་ཤིན་ཏུ་རྨོངས་པར་མཐོང་ངོ༌། །ཁོ་བོས་ནི་སྣང་བ་འདི་ཀུན་རང་བྱུང་པདྨ་ཡབ་ཡུམ་གྱིས་བྱིན་གྱིས་བརླབས་པ་ལས་མཐོང་ཞིང༌། རང་ཤར་གྱི་ལུང་དང་ཡང་ཤིན་ཏུ་འབྲེལ་བར་སྣང་ངོ༌། །འདི་ལྟར་མཐོང་ནས་ཕྱི་རབས་ཀྱི་དོན་དུ་བཀོད་པ་ལ་རིག་འཛིན་གྱི་བླ་མ་དམ་པ་རྣམས་དགྱེས་ཏེ་ཨ་ལ་ལ་ཞེས་གསུང་བར་ཐེ་ཚོམ་མི་ཟའོ། །ཞེས་གསུངས་པས་

---

^{[མ་དཔེ་གཟིགས་ན་འདིར་གནོན།]}

གསལ་བོར་གོ་ནུས་སོ། །དེ་ལྟར་བཤད་མ་ཐག་པའི་ཡེ་གཞིའི་ཀ་དག་ནི་གྲོལ་ས་ཡང་ཡིན་ལ། དེ་ལས་འོད་སྣང་དུ་ཤར་བའི་གཞི་སྣང་འདི་གྲོལ་གཞི་ཡིན་པས་རྣམ་འབྱེད་ཤེས་དགོས་ཏེ། ཀུན་མཁྱེན་ཆེན་པོས། གཞི་སྣང་འདི་གྲོལ་གཞི་ཡིན་ལ། ཀ་དག་ནི་གྲོལ་ས་ཡིན་པས་འདི་གཉིས་ཀྱི་བྱེ་བྲག་བྱེད་པ་ཡང་ཤིན་ཏུ་གལ་ཆེ་སྟེ། ལེགས་པར་ཕྱེད་པ་ཤིན་ཏུ་ཉུང་ངོ༌། །ཞེས་གསུངས། འོ་ན་དེ་གཉིས་ཀྱི་ཁྱད་པར་གང་གིས་འབྱེད་ཅེ་ན། ཀུན་མཁྱེན་ཆེན་པོས། རིག་པ་གཞི་ལས་འཕགས་ཏེ་གཞི་སྣང་དུ་ཤར་བའི་དུས་ནི་ད་ལྟ་ལུས་ལ་གནས་པའི་དུས་དང༌། ཆོས་ཉིད་བར་དོའི་དུས་ན་འོད་ཀྱི་ཁང་པ་ན་གནས་པ་ཡིན་ཏེ་རང་རིག་གཞི་ནས་ནི་འཕགས་མཐར་ཐུག་གིས་མ་ཟིན་པའི་བར་དེར་གཞི་སྣང་ལ་གནས་པས་མར་མེ་རང་འོད་ཀྱི་དབུས་སུ་འདུག་པའམ། ཤེལ་ཉི་ཟེར་དང་འཕྲད་པའི་སྣང་བ་བཞིན་ནོ། །ཞེས་གསུངས་པས་གོ་ལ་དེ་ལའང་དབྱིངས་ཀྱི་གཞི་དང་གནས་སྐབས་ཀྱི་གཞི་ཞེས་ལྡོག་པ་གཉིས་སུ་བྱེད་དེ། ཀུན་མཁྱེན་ཆེན་པོས། དབྱིངས་ཀྱི་གཞི་དང་གནས་སྐབས་ཀྱི་གཞི་གཉིས་ཀྱང་ཕྱེད་པ་གལ་ཆེ་ལ། འོད་ཀྱི་ཁང་བུ་དངོས་ལ་འདུག་པ་དང་མི་འདུག་པའི་དུས་འདི་གཉིས་གནད་གལ་པོ་ཆེའོ་ཞེས་གསུངས་པས་གནས་སྐབས་ཀྱི་གཞི་ནི་ད་ལྟ་ལུས་ལ་གནས་དུས་ཀྱི་སྙིང་ནང་གཞོན་ནུ་བུམ་སྐུ་དང༌། ཆོས་ཉིད་བར་དོའི་དུས་

---

^{[མ་དཔེ་གཟིགས་ན་འདིར་གནོན།]}

འོད་ཀྱི་ཁང་པར་གནས་པ་གཉིས་ཡིན་ལ། དབྱིངས་ཀྱི་གཞི་ནི་ཐོག་མའི་ཡེ་གཞི་ཁོ་ན་ལ་འཇོག་པའི་ཁྱད་པར་རོ། །དེ་ལྟར་ཆོས་ཉིད་གཞི་གཤིས་ཀྱི་གནས་ལུགས་ཁོ་ནར་འཁྲུལ་གྲོལ་གྱི་མཚང་ལྟོ་སྦྱར་ནས་འཆད་དགོས་པའི་ཕྱིར་གཞི་ལམ་འབྲས་བུའི་རྩ་ཚིག་གསུམ་ཀ་རགས་པ་ཙམ་ཚང་མོད། བར་དོའི་སྐབས་སུ་ཆོས་ཉིད་ཀྱི་སྣང་བ་འཆར་བའི་རྒྱུ་མཚན་ནམ་གནད་ཀ་ཡང་གློ་བུར་གྱི་རྐྱེན་གྱིས་གསར་དུ་གཞན་ནས་བྱུང་བ་ནི་མ་ཡིན་ཏེ། ཆོས་ཉིད་ལ་གཞི་ནས་མཆིས་པའི་གནད་ཀྱིས་ལུས་རྒྱའི་འཆིང་བ་དང་བྲལ་བའི་སྐབས་དེར་མངོན་དུ་འགྱུར་བའི་ཕྱིར་གཞི་དང་གཞི་སྣང་གི་བྱེ་བྲག་རྣམས་ལ་སྒྲོ་འདོགས་ལྷག་པར་ཆོད་དགོས་པའི་ཕྱིར་རོ། །ཁ་ཅིག་རྫོགས་པ་ཆེན་པོའི་རང་བཞིན་ལྷུན་གྲུབ་ཀྱི་སྣང་བ་འཆར་ཚུལ་འདི་དག་ལ་ཐེ་ཚོམ་ཟ་བའི་འཁྱོག་འགྲོས་སྨྲ་ཡང་ད་ལྟ་ལམ་གྱི་གནས་སྐབས་ན་དབང་པོས་མངོན་སུམ་དུ་བལྟ་རུ་ཡོད་མོད་ཀྱི། འོན་ཀྱང་དེ་ལྟ་བུ་ལ་ནི་དགོངས་བརྒྱུད་ཀྱི་བླ་མའི་བྱིན་རླབས་ཀྱི་ཕ་ཕོགས་ཐོབ་པ་དང༌། རང་ཉིད་ཀྱི་མྱུར་ལམ་རྣལ་མར་སྤྱད་པའི་ལམ་རྟགས་ཀྱི་ཡོན་ཏན་ནང་ནས་འཆར་བ་ཞིག་དགོས་ཕྱིར་ཚིག་ཙམ་གྱི་རྗེས་སུ་འབྲངས་པ་དག་ངེས་པའི་ཤེས་པ་མི་སྐྱེ་ཡང་གནས་སྐབས་སུ་ཐུན་མོང་ལ་མཆིས་པའི་སྒྲ་འོད་ཟེར་གསུམ་གྱི་ངེས་པ་རང་ཆས་སུ་ཡོད་ཚུལ་ནི་མིག་མཛུབ་མོས་བཙིར་བ་དང༌།

---

^{[མ་དཔེ་གཟིགས་ན་འདིར་གནོན།]}

རྣ་བ་ལག་པས་བཀབ་པ་ཙམ་གྱིས་རྐྱེན་ཕྲ་མོས་ཀྱང་ཡིད་ཆེས་སྐྱེ་བའི་ཕྱིར་ཏེ། དེས་ན་རང་གར་སྨྲ་བ་དག་སྨྱོན་ཚིག་ཏུ་ཤེས་པར་བྱོས་ཤིག །གཉིས་པ་དེ་ལ་ལྷུན་གྲུབ་ཀྱི་ཡོན་ཏན་ཇི་ལྟར་ཚང་བའི་ཚུལ་ནི། རིག་པའི་ངོ་བོ་ལ་མ་རིག་པ་ལྡན་མི་ལྡན་གྱི་བརྒལ་བརྟག་ཙམ་གྱིས་འཐད་པ་སྒྲུབ་སྐབས་ཀ་དག་རྣམ་པ་གསུམ། ལྷུན་གྲུབ་རྣམ་པ་གསུམ། དེ་རེ་ལའང་གོ་བདེར་དབྱེ་བ། སྐྱོན་བརྗོད། ལ་བཟླ་དང་བཞི་བཞིའི་སྒོ་ནས་གཏན་ལ་དབབ་པའི་བཤད་པ་ནི་དཔལ་གསང་བ་སྙིང་པོའི་འགྲེལ་བ་གཡུང་སྟོན་པའི་ལུགས་སུ་གསལ་བ་ལས་ཤེས་ཤིང༌། སྙིང་ཏིག་ཐུན་མོང་མ་ཡིན་པའི་སྐབས་སུ་ནི་སྒྲོན་མ་རྣམས་བཀོད་ལས། ཀ་དག་ལྷུན་གྲུབ་གདོད་ནས་རྣམ་པར་དག །ཅེས་དང༌། ཀུན་མཁྱེན་ཀློང་ཆེན་པའི་རིན་ཆེན་ཤོག་སྐྱའི་སྐོར་ཟབ་དོན་རྒྱ་མཚོའི་སྤྲིན་ཕུང་དུ། ངོ་བོ་ཀ་ནས་དག་པ་ལ་ཡོན་ཏན་ལྷུན་གྱིས་གྲུབ་པ་ཡིན་ཏེ། ཞེས་གསུངས་པ་ལྟར་ངོ་བོའི་སྒོ་ནས་དབྱེ་རུ་མེད་ཀྱང་རྣམ་པའི་སྒོ་ནས་དབྱེ་ན། གཞི་འབྲས་ལ་མ་རིག་པ་མི་ལྡན་པའི་ཆ་ནས་ཀ་དག །གཞི་འབྲས་ཀྱི་མ་རིག་པ་མ་སྤངས་པའི་ཆ་ནས་ལྷུན་གྲུབ་ཏུ་བརྟགས་པ་ཙམ་དུ་ཟད་ཀྱི། དོན་ལ་གཞི་འབྲས་གཉིས་མ་རིག་པ་མ་སྤངས་ལ་མི་ལྡན་པར་ལྟ་བ་དགོངས་པ་མཐུན་མོད། དེ་ཡང་ཕར་ཕྱིན་ཐེག་པ་བ་དང་

---

^{[མ་དཔེ་གཟིགས་ན་འདིར་གནོན།]}

གསང་སྔགས་བླ་མེད་པ་ཐུན་མོང་བ་ནས་བཤད་པའི་མི་ཤིགས་པའི་ཐིག་ལེ་དང་བདེ་གཤེགས་སྙིང་པོ་ལ་དེ་བཞིན་གཤེགས་པའི་སྐུ་དང་ཞིང་ཁམས་ཀྱི་ཡོན་ཏན་ཐམས་ཅད་འབྱིན་པའི་ནུས་པ་ལྷུན་གྲུབ་ཏུ་མཆིས་པ་ངོ་བོ་ཆོས་སྐུའི་སྒྲུབ་གཞི། རང་བཞིན་ལོངས་སྐུའི་སྒྲུབ་གཞི། ཐུགས་རྗེ་སྤྲུལ་སྐུའི་སྒྲུབ་གཞི། ཡེ་ཤེས་ལྔ། སྟོབས་བཅུ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པའི་ཡོན་ཏན་དངོས་གནས་པ་ཡོད་པར་མི་བཞེད་པ་གཞོན་ནུ་བུམ་སྐུའི་ཁྱད་ཆོས་ཡིན་ཀྱང་རྗེས་མཐུན་གྱི་དག་པ་ཁྱད་པར་ཅན་བརྗོད་དུ་ཡོད་ལ། རིན་ཆེན་སྤུངས་པའི་རྒྱུད་ལས། ལྷུན་གྲུབ་འཆར་བྱེད་མ་འགགས་པས། །སྣ་ཚོགས་སྣང་བའི་རང་བཞིན་ནི། །ཡོན་ཏན་ཆེན་པོ་རྣམས་སུ་སྣང༌། །འཆར་བྱེད་སྒོ་རྣམས་བརྒྱད་ལས་ཀྱང༌། །ཡོན་ཏན་བརྒྱད་ཀྱི་ཚུལ་ཏུ་ཤར། །རིགས་དྲུག་འབྲོས་ཁུངས་རང་བཅད་ནས། །འཁོར་པར་དཔྱང་ཐག་ཆད་པ་རྣམས། །སྙིང་རྗེའི་ཞགས་པས་གཟུང་བའི་ཕྱིར། །སྐྱེ་ཤིའི་གཟུགས་ཀྱི་སེམས་ཅན་ལ། །ཐུགས་རྗེ་ཆེན་པོ་ཉིད་དུ་སྣང༌། །འཁོར་འདས་རང་འབྲེལ་ཡོན་ཏན་དུ། །གཉིས་ཆ་འདྲེས་པའི་ཚུལ་དུ་སྣང༌། །འདི་མེད་འཁོར་འདས་ལྟོ་ཆད་པས། །རྟོག་པ་མེད་པའི་སྐྱོན་འགྱུར་བས། །ཡོན་ཏན་འབྱུང་ཚུལ་འདི་ཙམ་མོ། །སངས་རྒྱས་ཀུན་གྱི་རང་ཡུལ་ལ། །ལུས་དང་གྲིབ་མ་ཇི་བཞིན་དུ། །སྣང་བའི་འོད་ལྔས་ཁྱབ་པའི་ཕྱིར། །

---

^{[མ་དཔེ་གཟིགས་ན་འདིར་གནོན།]}

ནང་གི་སྣང་ཆ་རང་གསལ་བས། །འོད་ལྔའི་ཚུལ་གྱིས་འཆར་སྒོ་ལས། །ཡོན་ཏན་གསལ་བྱེད་ཕྱིར་མ་ཤོར། །འདི་མེད་སེམས་ཅན་རང་འོད་དང༌། །རྒྱ་ཆད་གུད་དུ་གཅད་པར་འགྱུར། །ཟུང་འཇུག་འཆར་བྱེད་འབྲེལ་བའི་ཕྱིར། །རང་སྣང་ཡོན་ཏན་ཆེན་པོར་འགྱུར། །ལུས་ཀུན་གཅིག་ཏུ་དྲིལ་བའི་ཕྱིར། །སྐུ་གསུམ་གཅིག་ཏུ་གནས་པས་ན། །ངོ་བོ་སྐུ་ཡི་རང་བཞིན་དུ། །རང་སྣང་གང་དུ་མི་འབྱེད་པས། །ངོ་བོ་གསལ་བྱེད་སྐུ་ལྟར་ཤར། །འདི་མེད་ངོ་བོ་མི་རྙེད་པས། །ལུས་ཀུན་རྫོགས་པའི་སྐུ་ལྟར་སྣང༌། །དེ་ཀུན་ཐ་དད་མ་ཡིན་པར། །གཉིས་མེད་མཉམ་པར་གནས་པས་ན། །འབྱེད་མེད་གཉིས་སུ་མེད་པ་ཡི། །སྣང་བས་ཕྱི་དང་ནང་ཀུན་ཏུ། །ཁྱབ་བྱེད་ཆེན་པོའི་ཚུལ་ཏུ་ཤར། །འདི་མེད་རང་ངོ་ཐ་དད་པས། །འཁོར་འདས་འདྲེས་པའི་མཚམས་མི་སྦྱོར། །རང་ས་ཉིད་ལས་མི་གྲོལ་བས། །སྒྱུར་ལྡོག་མེད་པའི་སྐྱོན་འགྱུར་བས། །སྣང་བྱེད་ཡོན་ཏན་ཚུལ་ཏུ་ཤར། །ཤེས་བྱ་ཀུན་ལ་རང་ཁྱབ་པས། །བཞི་སྦྱོར་ཆེན་པོའི་སྣང་བར་ནི། །འཁོར་འདས་འབྲེལ་བའི་ལམ་དུ་སྣང༌། །འདི་མེད་གཞི་ལམ་མི་འབྱོར་བས། །ཡེ་ཤེས་བཞི་ཡི་ལམ་ཉིད་དུ། །སེམས་ཅན་རྣམས་ཀྱི་གསང་ལམ་དུ། །སྣང་བ་བཞི་ཡི་ཚུལ་ཏུ་ཡང༌། །ཅིག་ཅར་བ་དང་རིམ་གྱིས་སུ། །དཔང་པོའི་སྒོ་རྣམས་ཡོད་བཞིན་

---

^{[མ་དཔེ་གཟིགས་ན་འདིར་གནོན།]}

སྣང༌། །མཐའ་བཞི་དྲི་མ་ལས་འདས་པའི། །འཆར་བྱེད་ཡོན་ཏན་མ་འགགས་པར། །མཐའ་གྲོལ་ཆེན་པོའི་སྣང་ཚུལ་དུ། །ལྷུན་གྲུབ་རང་རྫོགས་ཆེན་པོ་ལས། །ངེས་པའི་ཀ་དག་ལས་སྦྱོར་ཕྱིར། །མཐའ་དང་བྲལ་བས་ཡེ་ཤེས་སུ། །འདི་ཉིད་རང་བྱུང་རང་ཤར་ལས། །མཐའ་ལས་གྲོལ་བར་སྣང་བ་ནི། །ངོ་བོ་ཉིད་དང་འབྲེལ་བར་སྣང༌། །འདི་མེད་ངེས་པ་མི་ཐོབ་པས། །རྒྱུ་འབྲས་ལྡོག་པའི་སྐྱོན་འགྱུར་བས། །མཐའ་གྲོལ་ཉིད་དུ་ཡང་དག་སྣང༌། །ཡོན་ཏན་འཆར་ཚུལ་མ་འགགས་པས། །འཁོར་བ་བསྐྱེད་པའི་བྱུང་ཁུངས་སུ། །མ་དག་པ་ཡི་འཆར་སྒོ་ལྟར། །བྱུང་ཚུལ་འགག་པ་མེད་པར་ཤར། །འདི་མེད་འཁྲུལ་པ་མིང་མེད་པས། །དེ་ཕྱིར་མ་དག་འཁོར་བའི་སྒོ། །སྲིད་པ་རྣམས་ཀྱི་རྒྱུ་སྲང་དུ། །སྣང་བ་འགག་མེད་ཚུལ་དུ་ཤར། །འདི་མེད་འཁྲུལ་བ་མིང་མེད་པས། །མ་དག་འཁོར་བའི་སྒོ་ཞེས་བརྟན། །ཐོད་རྒལ་ཡེ་ཤེས་ཡོད་པས་ན། །དག་པ་ཉིད་ཀྱིས་དག་པ་མཚོན། །འཆར་བྱེད་སྣང་བ་སོ་སོའི་ལམ། །དག་པ་ཡེ་ཤེས་ཆེན་པོའི་སྒོ། །ཟང་ཐལ་རྣམ་པ་གསུམ་དུ་ཤར། །འདི་མེད་རང་རྩལ་མི་རྫོགས་པས། །དག་པ་ཡེ་ཤེས་ཆེན་པོའི་སྒོར། །ངོ་བོ་ཀ་དག་རྟོགས་ཕྱིར་ཤར། །ཞེས་གསུངས་པས་རྒྱུ་དུས་ན་འབྲས་བུ་ཡོད་པ་དང༌། སེམས་ཅན་གྱི་དུས་ན་སངས་རྒྱས་ཀྱི་ཡོན་ཏན་དངོས་གནས་ཡོད་པར་ཡང་ཁས་མི་ལེན། གསང་སྔགས་བླ་

---

^{[མ་དཔེ་གཟིགས་ན་འདིར་གནོན།]}

མེད་པ་སྤྱི་ལྟར་འོད་གསལ་གྱི་སེམས་ཉིད་ལ་དེ་བཞིན་གཤེགས་པའི་ས་བོན་ཡོད་ཚུལ་འོ་མ་ལས་མར་དང༌། ཏིལ་ལས་ཏིལ་མར་ཁྱབ་ཙམ་ལས་སྐུ་དང་ཞིང་ཁམས་ཀྱི་སྣང་བ་མེད་པར་ཡང་ཁས་མི་ལེན་པའི་སྒོ་ནས་རིག་པའི་གཞི་ལ་འཁོར་འདས་གཉིས་ཀའི་སྒོ་ཡོད་པས། འཁོར་འདས་འབྲེལ་ལ་མ་འབྲེལ་བར་སྣང་བའི་ཟབ་གནད་ཁྱད་པར་ཅན་རྫོགས་པ་ཆེན་པོའི་རྒྱུད་ཚིག་འདིས་བསྟན་པའི་ཕྱིར་དང༌། མདོར་ན་ཐུགས་རྗེ་ཕྱིར་གསལ་དུ་སྣང་བ་ལོངས་སྐུ་ངེས་པ་ལྔ་ལྡན་གྱི་ཚེ་ན་ཡེ་ཤེས་རྣམ་པ་ལྔའི་ཡོན་ཏན་དང༌། སྟོབས་བཅུ་མི་འཇིགས་པ་རྣམ་པ་བཞི་ལ་སོགས་པའི་རྩལ་ཆེན་རྫོགས་པ་སངས་རྒྱས་སྤྲུལ་པ་སྐུའི་ཚེ་ན་མཁྱེན་པ་གཉིས་ཀྱི་ཡོན་ཏན་ཇི་ལྟ་བའི་ཡེ་ཤེས་རང་བཞིན་གྱི་བདེན་པ་དབྱེར་མེད་བློའི་སྤྱོད་ཡུལ་ལས་འདས་པ་དང༌། ཇི་སྙེད་པའི་ཡེ་ཤེས། ཚེར་མ་རྣོ་བ། སྲན་མ་ཟླུམ་པ། ཕ་ཝང་ལོང་བུ་གྲུ་བཞི་པ་ལྟ་བུ་སྟེ་མ་འདྲེས་སོ་སོར་འབྱེད་པའི་ཟུང་འཇུག་མཁྱེན་པའི་ཡེ་ཤེས་ཐམས་ཅད་ཀྱི་འཆར་གཞིར་ཐོག་མ་མེད་པ་ནས་ལྷུན་གྱིས་གྲུབ་པ། འཁོར་འདས་ཐམས་ཅད་སྤྲོ་བསྡུའི་བྱེད་པོ། རྟོག་གེའི་བློས་མ་ཆོད་པའི་རྫུ་འཕྲུལ་ཅན་ཐ་སྙད་ཀྱི་རིག་པས་མི་ཤིགས་པ། གནས་ལུགས་ཇི་ལྟ་བ་བཞིན་དུ་བདེན་པ། སྐལ་བ་དམན་པ་རྣམས་ཀྱིས་རྟོགས་པར་དཀའ་བས་སྲ་བ། ངོ་བོ་ལ་འཕོ་འགྱུར་མེད་པས་བརྟན་པ། འཁོར་འདས་ཐམས་ཅད་ལ་ཁྱབ་

---

^{[མ་དཔེ་གཟིགས་ན་འདིར་གནོན།]}

ཅིང་འཇུག་པས་ཐོགས་པ་མེད་པ། གང་གིས་ཀྱང་བརྫི་བར་མི་ནུས་པས་མ་ཕམ་པ་སྟེ། རྡོ་རྗེ་ཆོས་བདུན་དང་ལྡན་པ་དེའི་ཡོན་ཏན་ཇི་བཞིན་པ་ནི་འཕགས་ཆེན་དམ་པ་རྣམས་ཀྱིས་ཀྱང་བརྗོད་ཀྱིས་མི་ལང་ལ། གནས་ཚུལ་ཇི་བཞིན་པར་གཟིགས་པ་ཐམས་ཅད་ཀྱིས་ཀྱང་ཚིག་གི་ལམ་དུ་གསུང་བར་མི་སྤོབས་ན་བྱིས་པ་སོ་སོའི་སྐྱེ་བོས་ལྟ་ག་ལ་ཞིག་སྟེ། མགོན་པོ་བྱམས་པས། སངས་རྒྱས་ཁམས་དང་སངས་རྒྱས་བྱང་ཆུབ་དང༌། །སངས་རྒྱས་ཆོས་དང་སངས་རྒྱས་ཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་འདྲེན་པ་རྣམས་ཀྱི་སྤྱོད་ཡུལ་ཡིན། །ཞེས་གསུངས་པ་བཞིན་ནོ། །གཉིས་པ་ལམ་དུ་འཇུག་པའི་རྣམ་པར་གཞག་པ་ནི། དེ་ལ་གང་ཟག་ཅིག་ཆར་བ་ཤེས་རབ་ཅན་གྱི་ལམ་འབད་རྩོལ་དང་བྲལ་བའི་ངང་ལ་མ་བསྒོམ་པར་བཞག་ནས་ཁྲེགས་ཆོད་ཀྱི་ལྟ་བས་བློ་ཟད་ཆོས་ཟད་དུ་ལ་བཟླ་བ་དང༌། བརྩོན་འགྲུས་ཅན་གྱིས་བྱ་བ་དགུ་ཕྲུགས་སུ་བཏང་ནས་རིག་པའི་སྣང་ཆ་ཨར་ལ་གཏད་དེ་བསྒོམས་པས་གྲོལ་བ་ལྷུན་གྲུབ་རིན་པོ་ཆེའི་སྣང་བ་བཞི་ཟད་སར་སྐྱེལ་བའོ། །དང་པོ་ནི། མུ་ཏིག་ཕྲེང་བ་ལས། ཡོངས་ལ་ཁྱབ་པའི་སེམས་གཅིག་པུ། །རང་བཞིན་གཉུག་མའི་ངང་ལ་གནས། །སོ་མ་ཉིད་ཡིན་གཉུག་མའི་ངང༌། །མ་བཅོས་མཆོག་ཡིན་རྣམ་པར་བཞུགས། །འཁྲུལ་པ་གདོད་ནས་མེད་པ་སྟེ། །རང་གི་རང་བཞིན་

---

^{[མ་དཔེ་གཟིགས་ན་འདིར་གནོན།]}

རྣམ་པར་དག །ཅེས་དང༌། རིན་ཆེན་སྤུངས་པའི་རྒྱུད་ལས། རང་བཞིན་རྫོགས་པ་ཆེན་པོ་གནད་ཀྱིས་ཆེ་བའི་རྡོ་རྗེའི་གད་མོ་ཆེན་པོ་བཅུ་གཉིས་ཡོད་པའི་ནང་ཚན་ནས། ཀྱེ་གསུང་གི་རྡོ་རྗེ། དངོས་པོ་གཤིས་ཀྱི་འདུག་ཚུལ་ལ་ལྟོས་དང༌། སྣང་བ་འདི་སྤུ་མ་བརྗེས་མདོག་མ་བསྒྱུར་བ་ངོ་མཚར། བདེ་སྡུག་ཇི་ལྟར་བསམས་ཀྱང༌། དོན་ལ་འགྱུར་བ་མེད་པ་ཧ་ཧ། ཞེས་དང༌། གཏེར་ཆེན་ཐམས་ཅད་མཁྱེན་པས། ཁྱད་པར་འོད་གསལ་རྡོ་རྗེ་སྙིང་པོའི་དོན། །རང་བཞིན་བབས་ཡིན་སྟོང་བས་ཕན་ཅི་ཡོད། །སོ་མ་ངང་བཞག་མ་བཅོས་རང་ཁ་མ། །ཐ་མལ་ཤེས་པ་རང་གྲོལ་རྒྱལ་བའི་ལམ། །རང་གིས་རང་གྲོལ་གཉེན་པོས་བཅོས་མི་དགོས། །ཡེ་གྲོལ་བསྐྱར་གཞི་མེད་དེ་གདོད་མའི་ངང༌། །ཅེར་གྲོལ་ངོ་བོ་མེད་དེ་བདེན་པས་སྟོང༌། །འགྱུ་གྲོལ་རང་སར་དག་སྟེ་སྐད་ཅིག་མ། །ཤར་གྲོལ་དུས་མཉམ་ཡིན་ཏེ་སྔ་ཕྱི་མེད། །མ་བཅོས་རང་བཞག་རང་བབས་ཀ་དག་ཀློང༌། །ཞེས་གསུངས་པ་ལྟར་བྱས་ཆོས་དང་བློས་བཏགས་ཀྱི་འཆིང་བས་རང་ངོ་བཅིངས་པ་སྦྲུལ་མདུད་དང་སྲིན་བུའི་ཁ་ཆུ་ལྟ་བུ་མ་ཡིན་པ། ཕུང་པོ་ལྔ་དང་ཚོགས་བརྒྱད་ཀྱི་དྲི་མས་སྦགས་པ་རྟོག་གེ་པའི་བློས་སྒོམ་ལྟ་བུ་མ་ཡིན་པ། ཚོགས་དྲུག་གི་འཆར་སྒོ་འགགས་པ་འགོག་པའི་སྙོམས་འཇུག་ལྟ་བུ་མ་ཡིན་པར་ཡེ་གྲོལ་གྱི་ཤེས་པ་བཅོས་སླད་དང་ཞེན་པས་མ་བསླད་པའི་ངང་

---

^{[མ་དཔེ་གཟིགས་ན་འདིར་གནོན།]}

ལ་སྡོད་པ་ནི་ཀ་དག་གི་གནས་ལུགས་ཕྱིན་ཅི་མ་ལོག་པ་ཡིན་གྱི། དེ་ལས་རྟོག་པ་ལམ་ཁྱེར་དང༌། མཉམ་རྗེས་ཀྱི་སོ་མཚམས། གྲོལ་ཚད་ཀྱི་ཉམས་རྟགས་སོགས་ནི་བླ་མ་དམ་པའི་ཞལ་ལས་ཤེས་འདི་དག་གི་གཅེས་གནད་ཉམས་མྱོང་དང་རྟོགས་པ་རྡོ་རུས་སུ་གཏུགས་ནས་མཛོད་ཆེན་བདུན་གྱི་དགོངས་པ་ཇི་ལྟར་ལངས་པ་བཤད་འབྱམས་རྒྱ་ཆེར་མ་སོང་བ་ཤིན་ཏུ་གོ་བདེ་བ་ཚིག་ཉུང་ངུས་བསྟན་པ་ནི་ཁོ་བོས་ཀུན་མཁྱེན་ཆེན་པོ་ཞལ་མཇལ་བར་བརྟེན་ནས་བགྱིས་པའི་མན་ངག་གི་ཡི་གེ་ཀུན་མཁྱེན་ཞལ་ལུང་དང་པདྨ་དཀར་པོར་གསལ་ལོ། །དགོས་པའི་ཕྱིར་རོ། །གཉིས་པ་ནི། རིག་པ་རང་ཤར་ལས། ཡང་དག་སངས་རྒྱས་དགོངས་པ་ནི། །སེམས་ཅན་ཀུན་གྱི་རང་རྒྱུད་ལ། །སྐུ་དང་ཡེ་ཤེས་ཚུལ་ཏུ་གནས། །དེ་ཡང་ཙིཏྟའི་དཀྱིལ་དུ་གནས། །ཡུངས་འབྲུ་འམ་ནི་ཏིལ་འབྲུ་ཙམ། །མ་བསྐྱེད་རྫོགས་པའི་ཚུལ་ཏུ་གནས། །ཙིཏྟ་སྒོ་བཞི་མ་འགགས་གསལ། །རྣམ་པར་འཆར་བར་བྱེད་པ་དང༌། །རྣམ་པར་ནུབ་པར་བྱེད་པ་དང༌། །སྐད་ཅིག་འཆར་བར་བྱེད་པ་དང༌། །སྐད་ཅིག་ནུབ་པར་བྱེད་པའོ། །དེ་ཡང་མཚན་བརྗོད་འདི་ལྟ་སྟེ། །ཀ་ཏི་ཤེལ་གྱི་རྩ་ཆེན་ཏེ། །ཤེལ་གྱི་སྦུ་གུ་ཁོག་པ་སྟོང༌། །དར་དཀར་སྣལ་མ་ཕྲ་ལ་འཁྲིལ། །སྟོང་པ་རང་གྲོལ་རྩ་ཆེན་པོ། །དེ་ཡང་སྒོ་བཞིའི་རང་སྣང་རྩ། །དེ་ལས་ལམ་བྱུང་དྷུ་ཏིར་ཐིམ། །དྷུ་ཏིའི་ནང་ནས་འོད་འཕྲོས་ཏེ། །སྒལ་ཚིགས་གཡས་ནས་ལམ་བྱུང་ནས། །རྩེ་ཆུང་གཡས་ནས་དུང་ཁང་ཐིམ། །དེ་ནས་འོད་འཕྲོས་སྒྲོན་མ་བཞི། །མ་འགགས་ནམ་མཁའ་སྟོང་

---

^{[མ་དཔེ་གཟིགས་ན་འདིར་གནོན།]}

པ་ལ། །སང་ངེ་གསལ་ལེ་འོད་ཀྱི་སྐུ། །ལུ་གུ་རྒྱུད་ཀྱི་ཚུལ་དུ་གནས། །སྒྲོན་མ་རྣམ་བཞི་འདི་ལྟ་སྟེ། །ཐིག་ལེ་སྟོང་པའི་སྒྲོན་མ་དང༌། །རིག་པ་དབྱིངས་ཀྱི་སྒྲོན་མ་དང༌། །ཤེས་རབ་རང་བྱུང་སྒྲོན་མ་དང༌། །རྒྱང་ཞགས་ཆུ་ཡི་སྒྲོན་མ་རྣམས། །སེམས་ཅན་ཀུན་ལ་གནས་པའོ། །ཞེས་དང༌། གཏེར་ཆེན་ཐམས་ཅད་མཁྱེན་པས། ཤེས་རབ་རང་བྱུང་སྒྲོན་མེའི་དབྱིངས་རུམ་ནས། །རྒྱང་ཞགས་སྒྲོན་མས་རིག་མདངས་སྒོ་ཕྱེ་སྟེ། །དག་དབྱིངས་སྒྲོན་མས་སྣ་ཚོགས་རྒྱན་བཀྲམ་ནས། །ཐིག་ལེ་སྟོང་སྒྲོན་ཞི་ཁྲོའི་དཀྱིལ་འཁོར་རྫོགས། །དང་པོ་རྒྱུ་ཡིས་མ་བསྐྱེད་དབྱིངས་ལྔ་ཤར། །བར་དུ་རྐྱེན་གྱིས་མ་བསྐྱེད་ཚོམ་བུར་གྲུབ། །ཐ་མ་ལྟ་བུའི་གནས་དག་དབྱིངས་རིག་འདྲེས། །ཞེས་གསུངས། ལམ་དེ་ཇི་ལྟར་སྒོམ་པའི་ཚུལ་དངོས་གནས་རྒྱས་པར་བཤད་པ་ནི། ཐེག་པ་ཐུན་མོང་པ་ནས་བཟུང་ཐུན་མོང་མ་ཡིན་པའི་སྔོན་འགྲོའི་བར་གྱིས་ཤེས་རྒྱུད་ལེགས་པར་སྦྱངས། གསང་སྔགས་ཀྱི་སྣོད་རུང་དུ་གྱུར་པ་ན། རྣལ་འབྱོར་བླ་ན་མེད་པའི་དབང་བཞི་རྣམ་པར་དག་པ་ནོས། ཡོ་ག་འོག་མ་གཉིས་ཀྱི་བསྐྱེད་རྫོགས་ཀྱི་གནད་ལ་གཡོ་ཐོབ་གོམས་བརྟན་གྱི་ངེས་པ་རྙེད་པ་ཙམ་གྱིས་ཀ་དག་གི་ཡིན་ལུགས་ཅུང་ཟད་གཏན་ལ་ཕེབས་ཚེ་རིག་པའི་རྩལ་དབང་བསྐུར་ནས་ལམ་འདི་ལ་འཇུག་པ་ཡིན་ཏེ། འདས་རྗེས་ལས། གནས་བརྟན་གྲོལ་བའི་གདེང་ཐོབ་ནས། །ཕྱི་ནང་བྱ་བ་ཀུན་

---

^{[མ་དཔེ་གཟིགས་ན་འདིར་གནོན།]}

བཏང་སྟེ། །ཞེས་གསུངས་ལ། དེ་ལ་འོད་གསལ་རྡོ་རྗེ་སྙིང་པོའི་སྔོན་འགྲོ་ཁྱད་པར་བ་ཆོས་ལོངས་སྤྲུལ་གསུམ་གཙོ་བོར་གྱུར་པའི་འདུག་སྟངས་ཀྱི་རྣམས་གྲངས་ལུས་གནད་བྱེད་བཅིངས། མི་འགུལ་བ་གསུམ་གྱི་གཞི་བཅའ་བ། སྒོ་ཡུལ་རླུང་གསུམ་བསྟུན་པའི་གནད་འགགརིག་པ་བཙོན་དུ་འཛིན་པའི་མན་ངག །སྣང་བཞིའི་སོ་མཚམས་འབྱེད་པའི་ཁྱད་པར། ཐོབ་པ་གསུམ་དང་གདེང་བཞིའི་ས་མཚམས་ལ་སོགས་པ་མཐའ་དག་བྱིན་རླབས་ཀྱི་བརྒྱུད་པ་ཟམ་མ་ཆད་པའི་བླ་མ་དམ་པ་མཚན་ཉིད་ངེས་པར་ཚང་བས་རྒྱུད་དང་སྒྲུབ་ཐབས་གང་ལ་བརྟེན་པ་དེའི་ལུགས་སུ་ལམ་གྱི་རྣམ་བཞག་རིམ་པར་སྟོན་པ་ལས་ཁྱབ་གདལ་དུ་འདྲི་བར་མི་བྱེད་པ་ཁོ་བོ་ཅག་གི་སྙིང་ལ་བརྣག་པའི་ཕྱིར་ཏེ། ཇི་སྐད་དུ་ཨུ་རྒྱན་ཆེན་པོས། སྣོད་མིན་རྣམས་ལ་རླུང་ཕྱོགས་ཙམ༔ འཆལ་ན་སློབ་དཔོན་བར་ཆད་རྒྱུ༔ བཀའ་འདི་མཁའ་འགྲོས་དབང་བྱས་པས༔ དེ་མ་ཐག་ཏུ་དྲལ་ཏེ་བཤགས༔ འདི་ཉིད་ལྟ་བའི་དུས་སུ་ཡང་༔ ཚོགས་དང་གཏོར་མ་རྒྱ་ཆེར་བྱ༔ ལྟ་གྲུབ་དམན་ལ་མཆོག་ཏུ་གསང་༔ འཆོལ་བའི་གང་ཟག་སྣོད་མེད་ལ༔ སུས་བསྟན་ཉམས་པས་དམྱལ་བར་བསྲེག༔ ཅེས་དང༌། གཞན་གྱིས་མཐོང་ལ་ལྟ་ཅི་སྨོས༔ ལག་ཏུ་སོང་ཡང་མི་རུང་ངོ་༔ ཞེས་བཀའ་གཙིགས་ཀྱི་ཕྱག་རྒྱས་བཏབ་པའི་ཕྱིར་རོ། །ཁྱད་པར་དུ་མཆོག་གཏེར་འདི་ཉིད་ཀྱི་རྫོགས་པ་ཆེན་པོ་

---

^{[མ་དཔེ་གཟིགས་ན་འདིར་གནོན།]}

སྙིང་པོ་གསེར་གྱི་ཡང་ཞུན་གྱི་ཟབ་ཁྲིད་འཆད་པ་ཕྱི་རབས་པ་དག་ཆོས་ཚན་རེ་གཉིས་ཙམ་གྱི་གཞུང་ལ་བློ་རྩེ་གཏད་པའི་མོས་པ་ལམ་བྱེད་ཙམ་ལས་གཞུང་གི་དགོངས་པ་ཇི་བཞིན་སློང་ནུས་པར་མ་མངོན་པས། བརྒྱུད་པའི་ཕྱག་ལེན་རང་སྟོབས་ཀྱི་བློས་དཔྱོད་པར་མི་ནུས་པ་དག །ཡིན་ལོའི་དག་སྣང་སྦྱོར་བ་ཙམ་ལ་མི་རེ་བར་རྗེ་རྒོད་ཚང་པས་རིག་འཛིན་བརྒྱུད་པའི་སྙན་རྒྱུད་ཟམ་མ་ཆད་པའི་ཕྱག་བཞེས་ཟིན་ཐོར་བཏབ་ཅིང་མཆན་བུས་གསལ་བར་བྱས་པ་ས་དཔྱད་ནོར་བུའི་ལྡེ་མིག་གསལ་བའི་མེ་ལོང་དུ་གྲགས་པ་ལྟར་བྱ་བ་གལ་ཆེན་པོ་ཡིན་ནོ།། །།གསུམ་པ་དེ་ལྟ་བུའི་ལམ་ལ་སྦྱངས་གོམས་མཐར་ཕྱིན་པའི་མཐར་ཐུག་འབྲས་བུའི་རྣམ་གཞག་ལ་གཉིས། རྒྱུ་འབྲས་ཀྱི་ཐེག་པ་ཐུན་མོང་ནས་བཤད་པའི་ས་ལམ་གྱི་རྣམ་བཞག་བདེན་པ་མཐོང་བའི་གང་ཟག་གཅིག་ལ་གཞི་རྫོགས་སུ་ཡོད་ཚུལ་བཤད་པ་དང༌། འོད་གསལ་རྡོ་རྗེ་སྙིང་པོའི་མན་ངག་ཐུན་མོང་མ་ཡིན་པའི་ས་རྫོགས་ཚུལ་ལོ། །དང་པོ་ནི། པདྨ་ཀློང་གསལ་ལས། བདེན་པ་མཐོང་བའི་གང་ཟག་གི །དང་པོ་ས་ནས་བཅུ་དྲུག་བར། །རིམ་པས་ཉམས་སུ་བླངས་པས་འབྱུང༌། །གཞན་དང་སྒོ་བསྟུན་གནས་སྐབས་ཀྱི། །ཡོན་ཏན་འབྲས་བུ་ཐོབ་ཚུལ་ལོ། །ཞེས་དང༌། རང་ཤར་ལས། ས་ཞེས་བྱ་བ་གུད་ན་ཡོད་པ་མ་ཡིན་ཏེ། བདེན་པ་མཐོང་བའི་གང་ཟག་གཅིག་ལ་ས་རྣམས་རྫོགས་ནས་ཡོད་

---

^{[མ་དཔེ་གཟིགས་ན་འདིར་གནོན།]}

དོ། །དེ་ཡང་ངོ་སྤྲོད་བསྟན་པའི་གང་ཟག་དེ་དང་པོ་བདེན་པ་མཐོང་བའི་དུས་ན་དེ་ཡང་དགའ་བ་སྐྱེས་པ་དེ་ནི་ས་དང་པོ་རབ་ཏུ་དགའ་བའོ། །དེ་ཡང་རང་གི་སྣང་བ་ཡིན་པར་ཤེས་པ་དེ་ནི་ས་གཉིས་པ་དྲི་མ་མེད་པ་ཡིན་ནོ། །དེ་ནས་དེ་ལ་གོམས་པ་ནི་ས་གསུམ་པ་འོད་བྱེད་པ་ཐོབ་པ་ཡིན་ནོ། །དེ་ནས་དེ་ལ་གོམས་ནས་འོད་ཀྱི་སྣང་བ་མཐོང་བ་དེ་ནི་ས་བཞི་བ་འོད་འཕྲོ་བའི་ས་ནོན་པའོ། །དེའི་ཡེ་ཤེས་ཀྱི་སྣང་བ་མཐོང་བ་དེ་ནི་གོམས་ནས་ཉོན་མོངས་པ་ཐམསཅད་རང་བཞིན་གྱིས་སྦྱངས་ནས་ཡེ་ཤེས་མཐོང་བ་དེ་ནི་ས་ལྔ་པ་སྦྱངས་དཀའ་བའི་ས་ནོན་པའོ། །དེ་ནས་འོད་ལས་ཐལ་བའི་སྐུ་མཐོང་བའི་ཚེ་ས་དྲུག་པ་མངོན་དུ་གྱུར་པའི་ས་ནོན་པའོ། །དེ་ནས་གོམས་པ་མཐར་ཕྱིན་ནས་ཉོན་མོངས་པ་རིང་དུ་སྤངས་པའི་ཚེ་ས་བདུན་པ་རིང་དུ་སོང་བའི་ས་ནོན་པའོ། །དེ་ནས་དེའི་ངང་ལ་ཡོན་ཏན་རྫོགས་པ་ནི་ས་བརྒྱད་པ་མི་གཡོ་བའི་ས་ནོན་པའོ། །དེ་ནས་གོམས་པ་མཐར་ཕྱིན་ནས་ཡོན་ཏན་དེ་ལས་མི་གཡོ་བར་གནས་པ་ནི་ས་དགུ་པ་ལེགས་པའི་བློ་གྲོས་ཀྱི་ས་ནོན་པའོ། །དེ་ནས་ཡེ་ཤེས་ཀྱི་སྣང་བ་ལ་ཤེས་པ་ཟིན་ནས་སྣང་བ་ལྷུག་པར་ཤར་བ་ནི་ཆོས་ཀྱི་སྤྲིན་གྱུར་མཐོང་ན་ས་བཅུ་པ་ཆོས་ཀྱི་སྤྲིན་གྱི་ས་ནོན་པའོ། །དེ་ནི་གང་ཟག་བདེན་པ་མཐོང་བ་དབུགས་འདི་ཉིད་མ་བོར་བ་ལ་ས་ནོན་པའོ། །གང་ཟག་དབུགས་བོར་བ་རྣམས་ལ་འདི་ལྟར་ས་ནོན་པ་ཡིན། འཁྲུལ་སྣང་འགགས་ནས་ཚོམ་བུའི་སྣང་བ་ཤར་བའི་ཚེ་བཅུ་