ཤོག་ལྷེབ་ ༤༠༡ ནས་ ༥༣༥ བར།
ཞེས་གསུངས་ཤིང༌། འོན་ཀྱང་འདི་ནི་དགོངས་པ་ཅན་གྱི་གསུང་དང༌། བདག་གཞན་བདེ་སྡུག་འཁོར་འདས་ཐམས་ཅད་མཉམ་པ་ཉིད་དུ་རྟོགས་པའི་རྣལ་འབྱོར་དབང་ཕྱུག་ལ་དགོངས་ནས་གསུངས་པ་ཡིན་གྱི། འདི་ལྟ་བུའི་རྣལ་འབྱོར་པ་ད་དུས་འཇིག་རྟེན་གྱི་ཁམས་ན་འཕྱང་མོ་ཉུག་གི་གནས་ཡིན་པས་ལས་འབྲས་བསླུ་མེད་ལ་ཁྱད་དུ་གསོད་ཅིང༌། བག་མེད་པའི་བགྱི་བ་ལ་སྟོང་སྒྲས་འགོམ་པའི་ཕུར་བུ་པའི་བློ་ཅན་མཐའ་གྲོལ་ཀློང་ཡངས་ཆེན་པོའི་རྟོགས་པ་ཀློང་དུ་མ་གྱུར་བཞིན་དུ་གསང་སྔགས་ཀྱི་སྤྱོད་པ་སྒྲ་ཇི་བཞིན་པར་སྤྱོད་པ་འདི་ཆ་ལུགས་མ་འཛོལ་བ་ཙམ་ལས་རྒྱང་ཕན་པ་དང་བསམ་ཡུལ་གཅིག་པར་འདུག་གོ །རྣམས་ཀྱིས་ལུང་འདི་ལ་སྙེག་པ་ནི་ཤིན་ཏུ་ཐལ་ཆེས་པས་རྣམ་སྨིན་གྱི་ཁུར་པོ་གཞན་ལ་སྤོ་རུ་མེད་པ་བསམ་པར་བྱ་དགོས་སོ། །གཉིས་པ་ནི་སྟོབས་བཞི་རྫོགས་པའི་སྒོ་ནས་བཤགས་པས་མཚམས་མེད་པའི་ལས་བྱས་པ་ཡང་བྱང་བར་འགྱུར་ཏེ། ཇི་སྐད་དུ། སྒྲིབ་པ་ཀུན་རྫོབ་ཉིད་ཡིན་ཕྱིར། །སྦྱང་ན་འདག་པར་གདོན་མི་ཟ། །ཞེས་དང༌། འོན་ཏེ་དེ་ལྟ་བུའི་གཉེན་པོ་ཁྱད་པར་ཅན་གྱིས་འཕྲལ་འཕྲལ་མ་བཅོམ་ན་རང་རང་གི་ལས་འཕྲལ་དུ་མ་སྨིན་ཀྱང་ཆུད་ཟོས་སུ་ནམ་ཡང་མི་འགྱུར་ཏེ། མདོ་སྡེ་ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཅེས་
པས་རང་རང་གིས་བསགས་ལ་མ་བྱས་པའམ། བྱས་ལ་བསགས་པའི་ལས་ཕྲ་སྦོམ་གང་ཡིན་ཀྱང་ཆ་ཤས་ཕྲ་མོ་ཚུན་ཆོད་ནས་ལུས་དང་གྲིབ་མ་བཞིན་དུ་འགྲོགས་ཤིང༌། སྐབས་སུ་ནམ་བབས་པ་ན་རང་ཉིད་ཁོ་ནས་མྱོང་དགོས་པར་བསམ་གཞིགས་ཡང་ཡང་གཏོང་ཞིང་བླང་དོར་ཕྱིན་ཅི་མ་ལོག་པར་རྒྱུན་དུ་བསམ་པར་བྱ་ལ། དེ་ཡང་ལས་ཆེན་པོས་དེ་འདྲ་ནུས་ལ་ཆུང་ངུ་དག་ལ་སྒྲིབ་པ་མི་འཁྲིགས་སོ། །སྙམ་པ་ཡང་མི་བྱ་སྟེ། འདུལ་བ་ལུང་ལས། སྡིག་པ་ཆུང་ངུ་དག་ལ་ཡང༌། །མི་གནོད་སྙམ་དུ་བརྙས་མི་བྱ། །མེ་སྟག་ཆུང་དུ་དག་གིས་ཀྱང༌། །རྩྭ་ཕུང་རི་ཙམ་སྲེག་པར་བྱེད། །ཅེས་གསུངས་པས་མི་དགེ་བའི་ལས་ཆ་ཤས་ཕྲ་མོ་དག་ལའང་ཤིན་ཏུ་འཛེམ་པར་བྱ་ཞིང་གལ་ཏེ་ཆེད་དུ་མ་ཡིན་པར་དབང་མེད་དུ་ཤུགས་ཀྱིས་གོས་པ་བྱུང་ན་ཡང༌། སྟོབས་བཞིའི་གནད་ཟབ་མོ་འདི་ལྟ་བུའི་སྒོ་ནས་བཤགས་ཐབས་ཡོད་པའི་ཚེ་དེ་མ་ཐག་ཏུ་བཤགས་པར་བྱའོ། །གསུམ་པ་གཉེན་པོས་དག་པ་ནི། མི་དགེ་བ་ཆུང་ངུའི་གཉེན་པོར་དགེ་བ་ཆེན་པོ་སྤྱད་ན། མི་དགེ་བའི་འབྲས་བུ་བག་ལ་ཞ་ནས་གནོད་པར་མི་ནུས་དེ། དེ་ཡང་དཔེར་མཚོན་ན། ཇོ་བོ་རྗེས་བི་ཀྲ་མ་ཤཱི་ལའི་གཙུག་ལག་གི་གནས་བརྟན་མཛད་དུས། མེ་ཏྲི་པས་ནང་གི་རྫས་ཅུང་ཟད་བརྟེན་པས་དེ་ཉིད་ལ་གནས་དབྱུང་མཛད་པ་ན། དེ་ནུབ་ཇོ་བོའི་མནལ་ལམ་དུ་མེ་ཏྲི་བ་བྱང་སེམས་ཡིན་པ་ལ་
གནས་དབྱུང་བྱས་པའི་རྣམ་སྨིན་ལ་རི་རབ་ལ་ལན་གསུམ་བསྐོར་ཐུབ་པའི་སྦྲུལ་དུ་སྐྱེ་ཞེས་ཟེར་བ་ལ། དེ་ལ་ཅིས་ཕན་དྲི་བ་མཛད་པས། ཉིན་རེ་ལ་ས་ཚྭ་བདུན་རེ་བཏབ་ན་ཕན། བོད་དུ་ཕྱིན་ན་ཕན་ཞེས་བྱུང་བ་གནས་སྐབས་དྲང་བའི་དོན་དུ་བྱང་ཆུབ་སེམས་དཔའ་ཁྱད་པར་ཅན་དེ་ལྟ་བུ་ལའང་ཆུང་ངུའི་སྒྲིབ་པ་རང་འདོད་ཀྱིས་མ་གོས་པ་དག་ལ་གཉེན་པོ་དེ་ཙམ་བརྟེན་ཚུལ་དང༌། འདི་ལྟར་སྟོན་པས་གྲགས་འཛིན་མའི་ལྷུམས་སུ་རབ་ཏུ་བྱུང་ཁར་བྱིན་གྱིས་བརླབས་པའི་སྲས་རྡོ་རྗེ་སེམས་དཔའི་སྤྲུལ་པ་སྒྲ་གཅན་འཛིན་གྱི་སྐུ་ཚེ་སྔོན་མ་ལ། རྒྱལ་པོ་ཞིག་ཏུ་གྱུར་དུས་དྲང་སྲོང་ཞིག་ཞག་དྲུག་གི་བར་ལྟོགས་སུ་བཅུག་པ་དང༌། ཡུམ་གྱི་སྐུ་ཚེ་སྔོན་མ་ལ་དར་བའི་བུམ་པ་བསྐུར་བའི་རྣམ་པར་སྨིན་པ་ཙམ་གྱིས་མངལ་དུ་ལོ་དྲུག་གི་བར་བཞུགས་ཤིང༌། སྟོན་པ་སངས་རྒྱས་པའི་ཚེ་ཟླ་བ་སྒྲ་གཅན་གྱིས་ཟིན་པ་དང་དུས་མཚུངས་པར་མ་གཏོགས་མངལ་གྱི་འདབ་རྒྱ་ལས་མ་གྲོལ་བའི་རྣམ་སྨིན་མྱོང་ཚུལ་བསྟན་པའི་ཕྱིར་ན། རང་ཅག་སོ་སྐྱེ་རྣམས་ཀྱི་ལས་ལ་འཛད་སྐབས་མེད་པ་ལྟ་བུ་ཡིན་ཕྱིར། ལོག་འཚོ་འབའ་ཞིག་དང་འདྲེས་པའི་དགེ་བ་བག་ཙམ་རེ་བགྱིས་པ་དག་ལ་ཧ་མི་ལས་པར་ལུས་ངག་ཡིད་གསུམ་གྱི་སྒོ་ནས་གཉེན་པོ་འབད་པས་བསྟེན་པ་ལ་ནམ་ཡང་བརྩོན་པར་བྱ་དགོས་སོ། །བཞི་པ་ནི། གལ་ཏེ་དེ་གསུམ་གང་དང་ཡང་མི་ལྡན་ན་མྱོང་འགྱུར་གྱི་ལས་
ཏེ། དགེ་སློང་ཐར་པ་ནག་པོས་དམྱལ་བ་རབ་ཏུ་ཚ་བ་དང༌། རབ་ཏུ་སྦྲེབས་པ་དང༌། པདྨ་ལྟར་གས་པ་དང༌། ཡང་སོས་དང༌། ཐིག་ནག་དང༌། བསྡུས་འཇོམས་དང༌། ངུ་འབོད་དང༌། ངུ་འབོད་ཆེན་པོ་དང༌། ཚ་བ་དང༌། རབ་དུ་ཚ་བ་ཆེན་པོ་དང༌། མནར་མེད་པ་ལ་སོགས་པའི་སྡུག་བསྔལ་དང༌། དེ་བཞིན་དུ་ཆུ་བུར་ཅན་དང༌། ཆུ་བུར་རྡོལ་བ་ཅན་ལ་སོགས་པའི་ཚ་གྲང་གི་དམྱལ་བ་བཟོད་མི་ཕོད་པ་བར་བསྐལ་བརྒྱད་ཅུ་ལ་བསྐལ་ཆེན་གཅིག་ཏུ་བརྩིས་པའི། དེ་ལྟ་བུའང་སྟོང་ཕྲག་བཅུ་གཉིས་དང༌། དེ་ལས་ཡི་དྭགས་སུ་བརྒྱུད་དེ་བཀྲེས་སྐོམ་གྱིས་སྡུག་བསྔལ་བསྐལ་པ་ཆེན་པོ་དྲུག་གི་བར་དུ་མྱོང་བ་ལྟ་བུ་སྟེ། གཉེན་པོས་མ་ཆོམས་ན་རང་གཞན་སེམས་ཅན་ཐམས་ཅད་ཀྱི་ལས་མཐའ་དེ་ལས་མི་འདའ་བ་སྟེ་ཤིན་ཏུ་འཇིགས་ཤིང་བག་ཚ་བར་གྱུར་ཀྱང༌། ད་དུས་ཀྱི་གྲོགས་པོ་དག་དགེ་བའི་ལས་སྐད་ཅིག་ཙམ་ཡང་མི་དྲན་ཞིང༌། དཀོན་མཆོག་དང་དགེ་འདུན་གྱི་རྫས། དད་གཤིན་གྱི་དཀོར་ལ་ཉམ་ང་མེད་པར་སྤྱོད་ཅིང༌། གཡོ་སྒྱུ་ལ་སོགས་ཏེ་གྱ་གྱུའི་ཀུན་སྤྱོད་སུ་མཁས་ལ་དཔའ་བོར་བརྩི་ལ། ངོ་ཚ་ཅན་དང་ཆོས་མཐུན་གྱི་སྐྱེས་བུར། ལྐུགས་པ་དང་རྫི་མེད་དུ་ལྟ་བའི་གནས་སྐབས་འདི་ནི། སྙིགས་མ་ལྔའི་མཐུ་ནུས་ཅིག་ཅར་དུ་དར་བ་ལས། རྒྱལ་བ་རྣམས་ཀྱི་ཐུགས་རྗེའི་དཔྱང་ཐག་ཀྱང་ཐུང་ངུར་བྱེད་ཅིང༌། རང་རང་གི་རྣམ་པར་སྨིན་པ་མཐུ་
བདོ་བའི་ཚེ་དང༌། ཚེ་འདི་ཙམ་གྱི་ཁོངས་སུ་ཡང་མི་རིང་པར་ཉེ་འབྲེལ་གྱིས་མཐའ་བསྐོར་ཏེ། དབུགས་ཧད་ཧད་པ་དང༌། མིག་ཀྲེ་ལོག་ལོག་པ་དང༌། དོང་ཁར་ཆུ་ལས་མི་འོང་ཞིང་ཤིན་ཏུ་ཉམ་ཐག་ཅིང་ཅི་དྲག་ལ་གྱ་བའི་གནས་སྐབས་ན་ཤིན་ཏུ་འགྱོད་པ་ཞིག་འོང་སྟེ། འཕྱིས་བར་གྱུར་ནས་རྣམ་པར་ཤེས་པ་བར་དོར་མདའ་འཕངས་པ་བཞིན་འགྲོ་ལ། རྣམ་སྨིན་གྱི་དོས་ཆེན་འདུ་འབྲལ་མེད་པར་འགྲོགས་པའི་སྣང་ཚུལ་དེ། ཨ་ཙ་མ། ཞེས་ཁམས་འདུས་པར་གྱུར་ཏོ། །གསུམ་པ་ནི། དེ་ལྟར་བཤད་མ་ཐག་པའི་བཤགས་ཚུལ་བཞི་ལས། གཞུང་འདིའི་སྐབས་སུ་གཉེན་པོས་འདག་པ་དང༌། བཤགས་པས་འདག་པའི་ཐབས་གཉིས་གཙོ་བོར་གསུངས་པ་ཡིན་ཏེ། སྔ་མ་ནི། གཞུང་ནས། ཕྱི་རོལ་ཁོར་ཡུག་རྡོ་རྗེའི་རྭ་བ་མེ་རིའི་ནང་དུ་ཚུད་པར་གཏོར་མ་དཔལ་བཤོས་བརྒྱ་རྩ་བརྒྱད༔ སྣང་གསལ་ཞུན་མར་གྱི་མར་མེ་བརྒྱ་རྩ་བརྒྱད༔ ཐབས་ཤེས་ཀྱི་ཤ་ཟན་ཚོགས་རྫས་བརྒྱ་རྩ་བརྒྱད་བཤམ༔ ཕྱི་རོལ་དུ་གཞུང་སྤྱི་དང་མཐུན་པའི་ཕྱི་མཆོད༔ ནང་མཆོད༔ གསང་མཆོད༔ སྨན་རག་གཏོར་གསུམ༔ ག་ནའི་རྫས་ཅི་འཛོམས་པ་སོགས་མདོར་ན་འོས་པའི་སྤྱན་གཟིགས༔ དཀྱིལ་འཁོར་གྱི་རྒྱན་དང་བཅས་པ་སྒྲུབ་ཆེན་ལྟར་བཤམ༔ ཟུར་བཞིར་ཁྱད་པར་
རྨད་དུ་བྱུང་བའི་ཐུགས་དམ་བསྐང་བའི་གཏོར་མ་རྩ་གསུམ་ཡོངས་ཁྱབ་ལ་གཅིག་དང་༔ བཞི་སྐོང་བའི་ཆོ་ག་ནས་བྱུང་བ་ལྟར་རྫས་ཀྱིས་བརྒྱན་པ༔ དར་སྣ་ཚོགས་ཀྱིས་བཀླུབས་པར་བཤམ༔ ཞེས་གསུངས་པ་ལྟར་བྱ་དགོས་ཀྱང༌། ད་ལྟ་འགའ་ཞིག་གིས་བཤགས་སྐོང་གི་དཀྱིལ་འཁོར་ཆེན་པོ་འདི་ལྟ་བུ་ཞལ་ཕྱེ་བའི་དུས་སུའང་གཏོར་མ་ཆུང་ངུ་ལ་ཕྲིན་ལས་དྲག་པོར་རེ་བའི་སླ་བཅོས་བག་ལ་ཉལ་གྱིས་གཞུང་ནས་བཤད་ཚོད་ཀྱི་མཆོད་པ་རྣམས་འབྱོར་བས་ཁྱོགས་མིན་ལ་མ་ལྟོས་པར་ཆོ་ག་དཀྱུས་མ་ལྟར་སྨན་རཀ་གཏོར་གསུམ་ཙམ་ལ་བརྟེན་ནས་ཇི་བཞིན་མི་བྱ་བ་ནི་ཤིན་ཏུ་མི་རིགས་ཏེ། རྒྱུ་མཚན་ཅིའི་ཕྱིར་ན། འདི་ནི་ན་རཀ་སྐོང་བཤགས་ཀྱི་ཆོ་ག་ཞེས་སྒྲིབ་སྦྱང་སྤྱི་དང་ཁྱད་པར་གཤིན་པོའི་བསག་སྦྱང་ལ་གཙོ་བོར་བྱ་དགོས་པ་ཡིན་ཚེ། གཤིན་པོ་དེ་ཉིད་ལ་ཕན་གནོད་ཀྱི་ཁྱད་པར་ཤིན་ཏུ་ཆེ་མོད། འདི་ཉིད་ཀྱི་བཤགས་པའི་སྐབས། ཟོལ་ཟོག་ལས་ཀྱིས་ཡི་དྭགས་རྒྱུ་བསགས་པ༔ ཞེས་གསུངས་པའི་ལྟུང་བ་གསོག་པ་དང༌། སྒྲིབ་པ་བཤགས་པ་མགོ་མཉམ་དུ་འབྱུང་བས། དེས་ན་གསང་སྔགས་འདི་ཐབས་ཁྱད་པར་ཅན་གྱིས་ཟིན་པས་སྨན་རཀ་གཏོར་གསུམ་བརྒྱ་རྩ་ཕུལ་བའི་བསོད་ནམས་གཞལ་དུ་མེད་པའི་དགེ་ཚོགས་ཇི་བཞིན་བཤད་པ་ལྟར་ཚེ་འདས་སོགས་སྒྲིབ་པ་སྦྱང་གཞི་དེ་ལ་
ཐོབ་པ་ནི་བྱ་སླ་རླབས་ཆེན་གྱིས་གཉེན་པོ་ཁྱད་པར་ཅན་ཏེ། གནས་སྐབས་སུ་དགེ་བ་བྱེད་པ་པོའི་ལག་རྩ་ནས་རྒྱས་པ་ལ་མཐའ་མེད་ཀྱང༌། ས་བཅད་མ་སྟོངས་ཙམ་བྱ་བ་ལ་རྩམ་བྲེ་བཅུ་དང༌། མར་ཉག་གང་ལས་མི་དྲོན་པ་ཡོན་གྱིས་ཅི་ལ་མི་ལྕོགས། ས་ཏུ་ཤིན་ཏུ་དཀོན་པའི་ལུང་པ་དག་ཏུའང་བརྒྱ་བཞིའི་ཞལ་ཟས་བཞེངས་པ་དང་ཆོས་མཚུངས་བྱས་ནས་ཤིང་སྟེགས་ལྟ་བུའི་ཁར་ཁ་གྲངས་ལོངས་པ་བགྱིས་ཏེ་ཕྱོགས་བཞིར་བཀོད་པ་དང༌། སྨན་རཀ་གཉིས་ཀྱང་སྣོད་ཀྱིས་མ་ཁོམ་ན་གཏོར་མ་དང་རྗེས་མཐུན་གྱི་ཁ་གྲངས་ཟན་གཏོར་ཆུང་ངུའི་རྩེ་མོར་ཀོང་ཀོང་ཟུར་གསུམ་གྱི་དབྱིབས་སུ་བཟོས་པའི་སྨན་སྣོད་ལ་དཀར་རྩི་དང༌། རཀྟའི་སྣོད་ལ་དམར་རྩིས་བྱུགས་ཏེ་སོ་སོའི་ནང་དུ་རྫས་ལྡན་གྱི་སྨན་རཀ་བསག་པའི་ལུགས་མཆིས་པ་དག་ཤིན་ཏུ་ལག་ལེན་གཙང་ཞིང་རྗེས་སུ་ཡི་རང་མོད། དེ་ལས་ལྡོག་པའི་སྐོང་བཤགས་པ་དག་ལྷ་ལ་བསླུ་བའི་བསམ་པས་མཆོད་པ་དང་ཤོམ་འགོད་གཞུང་ནས་བཤད་ཚོད་དག་དོར་ནས། འཇིག་རྟེན་འདིའི་ཁེ་གྲགས་ཀྱི་རྗེས་སུ་འབྲངས་པའི་ཚོགས་གསོག་ཁ་ལེན་ལ་གཙོར་འདོན་བྱེད་པ་ནི་སྦྱོར་བ་གོ་ལྡོག་ཏུ་གྱུར་པ་ཡིན་མོད། འོན་ཀྱང་སློབ་དཔོན་ཆེན་པོའི་གསུངས་ལ་རི་དང་རི་ཟས་ཀྱི་དཔེ་བཞིན་སྐོང་བཤགས་ཀྱི་ཕན་ཡོན་དང་བཅས་ཚུལ་བཞིན་འདོད་ལ་ཡོད་དུ་རེ་ཞིང༌། འདི་ཉིད་ཀྱི་
གཙོ་བོ་མཆོད་པའི་ཤོམ་འགོད་ལ་གཡེས་ཆུང་ངུ་དོར་ནས་ཚད་མར་མི་འཛིན་པ་དག་ལ། འདིར་བསྐྱར་ཟློས་སུ་འགོད་པ་མི་ཁྱུར་མི་འདྲེ་ཞིང་ཐལ་ཆེས་པ་ཙམ་དུ་གྱུར་ཀྱང༌། ཆོ་གའི་དགོངས་འགྲེལ་ལོག་པར་འཆད་པ་དང་ཚུལ་མ་ཡིན་པ་བཏང་སྙོམས་སུ་འཇོག་པར་མི་རིགས་པས་བརྗོད་པ་ཡིན་ལ། དེས་ན་དུས་གསུམ་གྱི་གནས་སྐབས་ཕྱི་ཐག་རིང་ལ་ཅི་ཞིག་ན་གཟུར་གནས་ཀྱི་སྐྱེ་བོ་འགའ་ཡང་མི་འབྱུང་བའི་མཐའ་མ་བཀག་པས་ན། དེ་དག་ན་འཕྲོས་ཞོར་འདི་སྐད་ཀྱང་སྨྲ་སྟེ། ཆོ་ག་འདི་ཉིད་གཤིན་པོའི་རྒྱུན་ཆོག་སོགས་ལ་གཙོར་བཏོན་དུ་བྱ་བའི་ཚེ་ནའང༌། སྔར་བཤད་པ་ལྟར་ཆེ་ཆུང་འབྱོར་བབས་དང་བསྟུན་པའི་ཉིན་ལྟར་གྲངས་ལོངས་མ་ཐུབ་ཀྱང་ཉི་ཤུ་རྩ་གྲངས་རེ་ཕུལ་བའི་བརྒྱ་རྩ་གྲངས་འགྲིག་ཐུབ་པ་བྱུང་ན་ཚེ་འདས་དེ་ཉིད་ཤིན་ཏུ་སྡུག་ཐུག་པའི་གནས་སྐབས་ཡིན་ཕྱིར་ཕན་ཐོགས་ཤིན་ཏུ་ཆེ་བ་ཞིག་འབྱུང་བས་བརྩོན་པས་དོན་གཉེར་བྱ་བ་དང༌། ཁྱད་པར་རྨད་བྱུང་གི་གཏོར་མ་ཞེས་པ་དེ་ནི་ཇི་ལྟ་བུའོ་སྙམ་ན་ཟུར་བཞི་ལ་བཤམ་རྒྱུ་ནི་གཞུང་འདི་ཁ་ནས་གསུངས་པའི་དམིགས་བསལ་གྱི་རྫས་ཀྱིས་བརྒྱན་པ་སྐོང་བའི་སྐབས། བྷནྡྷ་འབར་བའི་གཏོར་གཞོང་དུ༔ ཞེས་གསུངས་པ་ལྟར་དང༌། རྩ་གསུམ་ཡོངས་ཁྱབ་ལ་གཅིག་བཤམ་པར་བཤད་པ་དེ་ནི་སྤྱི་ཁྱབ་ཏུ་གྲགས་པ་ལྟར་ལ་དམིགས་པའི་བྱེད་ལས་ཀྱིས་བསྒྱུར་བར་བཤད་དེ། རིག་འཛིན་
ཆེན་པོས། ཁྱད་པར་རྨད་བྱུང་གི་གཏོར་མ་ཞེས་པ། གཏོར་མ་དེ་དག་བཟོ་དབྱིབས་ཆེ་ཆུང་རྒྱས་བསྡུས་ཅི་ལྟ་བུ་ཡིན་ནའང༌། སྔགས་དང་ཏིང་འཛིན་བྱིན་རླབས་ནུས་པས་རྣམ་པ་གཏོར་མའི་ཚུལ་ཙམ་ལ། ངོ་བོ་ནི་གཟུགས་སྒྲ་དྲི་རོ་རེག་བྱ་སོགས་གཏོར་མགྲོན་མཆོག་དམན་སོ་སོའི་ཡིད་ལ་ཅི་དང་ཅི་འདོད་པའི་དངོས་པོར་འགྱུར་ནུས་པ་དེ་ལ། ཁྱད་པར་རྨད་དུ་བྱུང་བའི་གཏོར་མ་ཞེས་བྱའོ། །ཞེས་གསུངས་པ་ལྟར་ཡིན་ཞིང་འདི་དག་གི་དོན་བློ་ལ་མི་ཆུད་ཀ་མེད་ཡོད་པ་ཡིན་ནོ། །ཕྱི་མ་བཤགས་པས་འདག་པ་ལ་གཉིས། ན་རཀ་གི་སྤྱི་བཤགས་ཆེན་མོ་འདི་བཤགས་པ་གཞན་ལས་ཁྱད་པར་དུ་གྱུར་ཚུལ་དང༌། དམིགས་པ་དང་བཅས་གནད་ལ་བཀར་ནས་ལག་ཐོག་ཏུ་འགེལ་བའོ། །དང་པོ་ནི། གཏེར་ཁ་གཞན་ལས་བྱུང་བའི་ན་རཀ་དོང་སྤྲུགས་ཀྱི་གཞུང་ལེའུ་དང་པོ་ལས། གླེང་གཞིའི་སྐབས་སུ། འདོད་ཁམས་ཀྱི་གནས་རིགས་འདི་ན༔ བྲམ་ཟེ་དུང་གི་ཕྲེང་བ་ཅན་ཞེས་བྱ་བ༔ གོས་སུ་དུང་གི་ཕྲེང་བ་གྱོན་པ་རྫུ་འཕྲུལ་དང་ལྡན་པ་ཞིག་ལ༔ སློབ་མ་རྒྱལ་པོའི་ཕྲུག་གུ་ཞིག་ཡོད་པ་ལ༔ བྲམ་ཟེས་སློབ་སྦྱོང་རྫོགས་པར་བྱས་ཏེ༔ རིག་པའི་གནས་ལྔ་ལ་མཁས་པར་གྱུར་པ་དང་༔ རྒྱལ་པོའི་ཕྲུག་གུས་བསམས་པ་ལ། ངའི་གོང་ན་བྲམ་ཟེ་འདི་ལས་མ་གཏོགས་པ་གཞན་མེད་པས། འདི་ངའི་གོང་དུ་མི་བཏང་ངོ་སྙམ་སྟེ༔ བྲམ་ཟེ་
ལ་རྒུན་ཆང་བླུད་ནས༔ ར་རོ་བ་དང་བརྒྱལ་བ་ལ། མིག་ཁབ་ཀྱིས་གཙེགས༔ ལྕེ་ལྕགས་ཀྱུས་དྲངས་ཏེ་བཅད༔ ལུས་རུས་སྦལ་གྱི་ཁྲག་གིས་བྱུགས༔ བུད་མེད་མང་པོས་ཀྱང་ལུས་བརྫིས༔ སྒྱིད་པ་ཡང་བཅད་དེ་བཞག་པ་ལས༔ ནངས་པར་བྲམ་ཟེ་དྲན་པ་བག་གཅིག་རྙེད་ནས༔ མིག་ཕྱེ་བས་ཀྱང་ལོང་ནས་མེད༔ དྲུང་ན་སུ་འདུག་འབོད་པར་བྱས་པས་ཀྱང་ལྕེ་མེད༔ ལངས་ནས་འགྲོ་བར་བྱས་པས་ཀྱང་སྒྱིད་པ་བཅད་པ་དང༔ བུད་མེད་མང་པོས་ལུས་བརྫིས་པས་ཀྱང་འགུལ་བར་མ་ནུས༔ ལུས་རུས་སྦལ་གྱི་ཁྲག་གིས་བྱུགས་པས་ཀྱང་ཆུ་བུར་དང་རྐོང་པོ་མང་དུ་བྱུང་སྟེ་ལུས་ཀྱང་འཁུམས༔ དྲན་པ་ཡང་ཉམས་པ་བསྙམ་བྱེད་དོ༔ དེ་ནས་བྲམ་ཟེས་བསམས་པ་ལ་བདག་འདི་ལྟར་ཉོན་མོངས་པར་གྱུར་པ༔ ཚེ་རབས་སྔོན་གྱི་ལས་ཀྱི་རྣམ་པར་སྨིན་པ་ཞིག་ཡིན་ནམ། འོན་ཏེ་ཕྲག་དོག་གི་གོང་དུ་ཤོར་བ་ཞིག་གིས་བྱས་སམ་བརྟགས་པས༔ སློབ་མ་རྒྱལ་པོས་ཕྲུག་གུས་བྱས་པར་རིག་ནས༔ བྲམ་ཟེས་དམོད་བོར་བ༔ རྒྱལ་པོའི་ཕྲུག་གུ་ཁྱོད་ངས་སློབ་སྦྱོང་རྫོགས་པར་བྱས་ནས་ང་ལ་འདི་འདྲ་བའི་ལས་ངན་བྱེད་པ༔ ཁྱོད་ཀྱང་སྲོག་གི་ལན་ཆགས་ཞིག་གིས་ཚེ་ཐུང་ལ༔ སེམས་ཅན་ལུས་སྲུལ་པོ་ཞིག་ཏུ་སྐྱེས་ལ༔ དེའི་ལུས་ལ་ཡང་མིག་མེད་པ་དང༔ ལྐུགས་པ་དང༔ མཛེ་དང༔ ཤུ་བ་དང༔ ལུས་ལ་ཤ་ཟ་མོ་སྟོང་གི་ཚང་འཆའ་བ་དང༔ རྐང་པ་ཆད་
པ་དང་༔ ཚེ་འཕོས་ནས་ཀྱང་དམྱལ་ཁམས་བཅུ་དྲུག་གི་ཁ་འཁོར་ནས༔ ཐར་བའི་དུས་མེད་པར་གྱུར་ལ༔ ཚེ་རབས་ཐམས་ཅད་དུ་འཕགས་པའི་ཞལ་ཉི་ཟེར་ཙམ་ཡང་མི་མཐོང་ཞིང༔ བྱང་ཆུབ་ཀྱི་མྱུ་གུ་བསྐམ་པར་གྱུར་ཅིག༔ ཅེས་དམོད་བོར་པས༔ བྲམ་ཟེ་ཉིད་ཀྱིས་ངན་སེམས་ཀྱིས་དམོད་པས༔ དུར་ཁྲོད་ཀྱི་ཤ་ནང་ཁྭ་མགོ་དཀར་པོ་ཞིག་ཏུ་སྐྱེས་སོ༔ དེའི་མོད་ལ་རྒྱལ་པོའི་ཕྲུག་གུ་དེ་ཡང་ཤི་བར་གྱུར་ཏེ༔ བྲམ་ཟེའི་རིགས་ལ་བུ་ལ་དུང་བ་ཞིག་ཏུ་སྐྱེས་སོ༔ བུ་འདོད་པའི་དོན་དུ་མོ་དང་ཕྱ་དང་པྲ་ལ་སོགས་པ་བྱས་ཏེ༔ ལན་ཆགས་ཀྱི་དབང་གིས༔ དུར་ཁྲོད་ཀྱི་ཤ་ནང་ཁྭ་མགོ་དཀར་པོ་ཞིག་ཡོད་ཏེ༔ དེ་ཚེ་འཕོས་ནས་བུར་སྐྱེ་བར་མཐོང་ངོ་༔ ལོ་མང་དུ་ལོན་པ་དང་ཕ་བྱུང་ནས་བྱ་བ་མང་པོ་བསགས་ནས་བསད་པས༔ བུར་སྐྱེས་པ་ལས་བུ་དེའི་མགོ་ལ་ལྕགས་ཀྱི་འཛེར་པ་ཞིག་སྐྱེས་ཏེ༔ སྤྱི་བོ་ནས་མཆེད་པས་ཐོད་པ་ཇི་བཞིན་ཁེབས་ཏེ༔ མདངས་ཡང་ཤོར༔ སྐྱེད་ཡང་མེད་དོ༔ མོ་བདར་བྱས་པས་རིམ་གྲོས་མ་ཕན་ཏེ༔ ཕས་ལན་ཆགས་ཀྱི་དབང་གིས་མ་བཟོད་དེ༔ ལྕེས་བལྡག་པས་ཆུང་ངུ་སོང་དེ༔ མདངས་དང་ཡང་ཤིན་ཏུ་ལྡན༔ སྐྱེད་ཡང་ཤིན་ཏུ་ཆེ་བར་གྱུར་ཏེ༔ བུ་དེའི་མིང་བྲམ་ཟེའི་མི་ཡི་ཐོད་པ་ཅན་ཞེས་གྲགས་སོ༔ དེ་ནས་འཛེར་པ་ཟད་པ་དང་ཕ་ལྕེ་རྡོལ་ཏེ་ཤི་བར་གྱུར་ཏོ༔ རང་གིས་ཉེས་བྱས་དང་
བྲམ་ཟེའི་དམོད་པས༔ སེམས་ཅན་གྱི་ནང་ན་ཡང་ལུས་སྲུལ་པོ་གཅེར་བུ་ཅན་བྱ་བར་སྐྱེས་ནས༔ ལུས་ལ་ནད་སྣ་ཚོགས་དང་༔ ཤ་ཟ་མོ་སྟོང་གི་ཚང་འཆའ་བ་དང་༔ བྱང་ཆུབ་ཀྱི་མྱུ་གུ་སྔོ་བསྐམས་སུ་གྱུར་ཏེ༔ འགྲོ་བ་རིགས་དྲུག་གི་ལུས་དང༔ སྡུག་བསྔལ་དུས་གཅིག་ཏུ་མྱོང་ནས༔ ཤིན་ཏུ་སྡུག་བསྔལ་བར་གྱུར་ཏོ༔ དེ་ནས་ཕྱོགས་བཅུའི་བདེ་བར་གཤེགས་པ་རྣམས་ཀྱི་ཐུགས་ཡེ་ཤེས་ལས་ཐུགས་རྗེ་བྱམས་པས་འགྲོ་བའི་དོན་མཛད་དེ༔ བདེ་བར་གཤེགས་པ་རྣམས་ཀྱི་ཐུགས་ཀྱིས་སྤྲུལ་པ་ལས༔ བཅོམ་ལྡན་འདས་དཔལ་ཀུན་ཏུ་བཟང་པོ་དང་༔ ཀུན་རིག་རྣམ་པར་སྣང་མཛད་གཉིས་སུ་སྤྲུལ་ཏེ༔ ཀུན་ཏུ་བཟང་པོའི་བྱིན་རླབས་ལས་རྡོ་རྗེ་སེམས་དཔར་སྤྲུལ་ཏེ༔ རྣམ་པར་སྣང་མཛད་ཀྱི་བྱིན་རླབས་ལས༔ ཕྱག་ན་རྡོ་རྗེར་སྤྲུལ་ནས༔ ཀུན་ཏུ་བཟང་པོ་དང་ཀུན་རིག་གིས༔ རྡོ་རྗེ་སེམས་དཔའ་དང་ཕྱག་ན་རྡོ་རྗེ་ལ་བཀའ་སྩལ་བ༔ འདོད་ཁམས་ཀྱི་གནས་རིགས་མ་གི་ན༔ སློབ་མས་སློབ་དཔོན་ལ་ཉེས་པ་བྱས་པའི་རྣམ་སྨིན་ནི༔ སེམས་ཅན་ལུས་སྲུལ་པོ་གཅེར་བུ་ཅན་བྱ་བ་ཞིག༔ སྡུག་བསྔལ་སྣ་ཚོགས་ཀྱིས་གདུངས་ནས༔ བྱང་ཆུབ་ཀྱི་མྱུ་གུ་བསྐམས་ཏེ༔ ཚེ་འཕོས་ནས་ཀྱང་དམྱལ་ཁམས་བཅུ་དྲུག་ལས་མི་ཐར་བས༔ དེ་ལས་ཁྱེད་གཉིས་ཀྱིས་ལྡོག་ཅིག༔ དེ་ལས་མ་ལྡོག་ན་ལས་ཀྱི་རྣམ་པར་སྨིན་པ་གཞན་གྱིས་ངན་སོང་དུ་ལྷུང་བ་ནི་སླར་
ཡང་ཐར་སྲིད་ཀྱི༔ སློབ་དཔོན་ལ་སློབ་མས་ཉེས་པ་བྱས་པའི་རྣམ་སྨིན་ནི༔ ཐར་པའི་དུས་མེད་དོ༔ ཞེས་བཀའ་སྩལ་པ་དང་༔ དེ་ནས་རྡོ་རྗེ་སེམས་དཔའ་དང་ལག་ན་རྡོ་རྗེས་གསོལ་བ༔ འདུལ་བའི་དུས་ལ་བབ་ན་བདག་གིས་ལྡོག་པའི་ཐབས་བསྟན་དུ་གསོལ༔ ཞེས་ཞུས་པས༔ ཀུན་ཏུ་བཟང་པོས་རྡོ་རྗེ་སེམས་དཔའ་ལ༔ རིགས་ཀྱི་ཚིག་འདི་ཡི་གེ་པར་མ་ཞིག་ལ་ཡིག་སྐྱོན་ཤོར་ནས་འདུག་པ་འདིར་དཔྱད་པ་གསུམ་གྱི་སྲང་ལ་གཞལ་ཡོད་དོ། །བུ་རྣལ་འབྱོར་གྱི་སྤྱི་ཁྲུས་ན་རཀ་དོང་སྤྲུགས་འགྱོད་ཚངས་ཀྱི་རྒྱལ་པོ་སེམས་ཅན་དེ་ཡི་རྣ་བར་སྒྲོགས་ལ༔ ལུས་ངག་ཡིད་གསུམ་གྱི་སྒོ་ནས་འགྱོད་ཚངས་བྱེད་དུ་ཆུག་ལ་ལྡོག་ཅིག །ཀུན་རིགས་རྣམ་པར་སྣང་མཛད་ཀྱིས་ལག་ན་རྡོ་རྗེ་ལ་རིགས་ཀྱི་བུ་ཕྱི་ནང་གསང་བ་གསུམ་གྱི་དབང་བསྐུར་ལ་ལྡོག་ཅིག །ཅེས་བཀའ་སྩལ་པ་དང༔ དེ་ནས་དཔལ་རྡོ་རྗེ་སེམས་དཔའ་དང་ལག་ན་རྡོ་རྗེས༔ བྲམ་ཟེ་མི་ཡི་ཐོད་པ་ཅན་དང་༔ སེམས་ཅན་ལུས་སྲུལ་པོ་དེ་ཡི་གམ་དུ་བྱོན་ནས༔ རྡོ་རྗེ་སེམས་དཔས་བཀའ་སྩལ་པ༔ བྲམ་ཟེ་མི་ཡི་ཐོད་པ་ཅན་དང་༔ སེམས་ཅན་ལུས་སྲུལ་པོ་ཁྱེད་གཉིས༔ སྔོན་ཚེ་ཡང་སྔ་ལ་སློབ་དཔོན་དང་སློབ་མ་དམ་ཚིག་ཉམས་པ་བསྐལ་པའི་མཐར་སྡུག་བསྔལ་ལས་མི་ཐར་བས༔ བཤགས་ཚངས་གྱིས་ཤིག་ཅེས་བཀའ་སྩལ་བ་དང་༔ བྲམ་ཟེ་མི་ཡི་ཐོད་པ་ཅན་གྱིས༔ བཅོམ་ལྡན་འདས་
དཔལ་རྡོ་རྗེ་སེམས་དཔའ་དང༌། ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ༔ བདག་ཅག་རྣམས་ལ་ཉེས་པ་ལས་བཤགས་ཐབས་བསྟན་དུ་གསོལ༔ ཞེས་གསོལ་བ་དང་༔ ལག་ན་རྡོ་རྗེས་རིམ་པ་བཞིན་དུ་དབང་བསྐུར་བས༔ བྱང་ཆུབ་ཀྱི་མྱུ་གུ་སྔོ་བསྐམས་སླར་གསོས་ཏེ༔ བྲམ་ཟེ་མི་ཡི་ཐོད་པ་ཅན་དང་༔ སེམས་ཅན་ལུས་སྲུལ་པོ་དང་༔ ཕྱོགས་བཅུའི་གསང་སྔགས་ཀྱི་སྒོར་ཞུགས་པའི་རྣལ་འབྱོར་ཕོ་མོ་རྣམས༔ ཀུན་གཞི་བྱང་ཆུབ་སེམས་དང་འཕྲད་པར་བྱས་ཏེ་འབད་པས༔ མཇུག་རིག་འཛིན་རྣམ་པ་ལྔ་རིམ་གྱིས་བགྲོད་པར་གྱུར་ཏོ། །ཞེས་དང༌། འདི་ལྟ་བུའི་བཀའ་གསང་བ་བས་ཀྱང་ཆེས་གསང་བ༔ ཡང་གསང་ཐུགས་ཀྱི་མན་ངག་འདི་ལྟ་བུ་ནི༔ དུས་གསུམ་སངས་རྒྱས་རྣམས་ཀྱིས་གཤེགས་ཤུལ་རིག་འཛིན་ཕོ་མོ་རྣམས་ཀྱི་ལམ༔ རྣལ་འབྱོར་ཕོ་མོ་རྣམས་ཀྱིས་སྐུ་གསུང་ཐུགས་ཀྱི་དངོས་གྲུབ་བསྒྲུབ་པའི་གནས༔ འདི་ལྟ་བུའི་བཀའ་ཟབ་མོ་ཐོས་པའང་དཀའ་ན༔ སྒོམ་ཅིང་སྒྲུབ་པ་དང་རྟོགས་པ་ལྟ་ཅི་སྨོས༔ འདི་ལྟ་བུའི་བཀའ་ཟབ་མོ་ནི་བསྐལ་པ་དཔག་ཏུ་མེད་པའི་སྔོན་རོལ་ནས་སྦྱངས་སྦྱངས་པའི་ལས་འཕྲོ་དང་ལྡན་པའི་སྐལ་ལྡན་འགའ་ཞིག་གི་སྤྱོད་ཡུལ་ཡིན་གྱི༔ གང་རུང་རུང་ཀུན་གྱི་ཐུན་མོང་མ་ཡིན་ནོ༔ ཞེས་གསུངས་པ་ལྟར་རོ། །གཉིས་པ་ལ་གཉིས། བཤགས་པ་དངོས་དང༌། ལྡན་འབྲས་བཤད་པའོ། །དང་པོ་ནི་སྟོབས་བཞི་
ཚང་བའི་སྒོ་ནས་བཤགས་པར་བྱ་སྟེ། དེའི་དམིགས་གནད་ནི། རང་གི་གཡས་གཡོན་དུ་ཕ་མ། མདུན་དུ་བཤགས་བྱ་དམིགས་བསལ། མཐའ་སྐོར་དུ་སེམས་ཅན་ཐམས་ཅད་རང་ཉིད་དང་འདུན་པ་ཆིག་སྒྲིལ་དུ་འཁོད་པར་བསམས་ལ། མཁའ་ཁྱབ་ཀྱི་བདེ་བར་གཤེགས་པ་ཐམས་ཅད་བླ་མ་དགོངས་པ་འདུས་པའི་ཞི་ཁྲོའི་དཀྱིལ་འཁོར་ཉག་གཅིག་ཏུ་ཤར་བ་ལ་ཡིད་ཁྱེད་ཤེས་ཀྱིས་བློ་འགེལ་ཞིང༌། བདག་གཞན་སེམས་ཅན་སྤྱི་དང་བྱེ་བྲག་དམིགས་ཡུལ་དེའི་སྡིག་སྒྲིབ་ཐམས་ཅད་བཤགས་བྱའི་ཡུལ་ལ་འདུན་པ་རྩེ་གཅིག་ཏུ་གཏོད་པ་རྟེན་གྱི་སྟོབས། རང་གཞན་ཀུན་གྱིས་སྔར་བྱས་ཀྱི་སྡིག་པ་ཐམས་ཅད་དང༌། ཁྱད་པར་དུ་སྔགས་ལམ་ལ་ཞུགས་པའི་ཉམས་ཆག་ཕྲ་ཞིང་བསྲུང་དཀའ་བ་ལས་འགལ་བ་ཐམས་ཅད་ཡིད་ལ་དྲན་པར་བྱས་ཏེ་འདི་སྙམ་དུ། བདག་གམ་གཞན་གྱིས་འདི་དང་འདི་ལྟ་བུའི་ལས་མི་དགེ་བ་རླབས་པོ་ཆེ་བསགས་ནས་ངན་སོང་གི་རྒྱུ་འབད་པས་བསྒྲུབས་འདུག་པ་ད་ནི་ཤིན་ཏུ་གནོང་ངོ་འགྱོད་དོ་བཟོད་པར་བཞེས་སུ་གསོལ། སྙམ་པ་སུན་འབྱིན་པའི་སྟོབས། ད་ཕྱིན་ཆད་འཆི་བ་སྲོག་ལ་བབས་ཀྱང་དེ་ལྟ་བུའི་ལས་ངན་དང་སྡིག་པ་བྱེད་རེ་ཤི་སྙམ་པའི་ཞེ་གཅོད་པ་སླན་ཆད་སྡོམ་པའི་སྟོབས། གཞུང་གི་རྡོ་རྗེའི་ཚིག་རྐང་འགྱོད་ཚངས་ཀྱི་བཤགས་པ་དགོངས་གསོལ་མ་རྒྱུད་ལས་རཱུ་ཏྲའི་སྨྲེ་བཤགས་ཞེས་གསུངས་པ་དང་དོན་གཅིག་གོ །
འདོན་ཞིང་ཚིག་དོན་ཡིད་ལ་དྲན་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། རྣམ་པ་བཞི་ལས་མ་གཡོས་པའི་སེམས་ཀྱིས་དཀྱིལ་འཁོར་གྱི་དྲུང་དུ་པུས་བཙུགས་ཐལ་མོ་སྦྱར་ལ་ཤིན་ཏུ་གདུངས་བའི་དབྱངས་དང་བཅས་ཏེ་རྩེ་གཅིག་ཏུ། ཧོ་དགོངས་སུ་གསོལ༔ གསན་དུ་གསོལ༔ གཟིགས་སུ་གསོལ༔ སྟོན་པ་ཀུན་བཟང་ཡབ་ཡུམ་སྲས་དང་འཁོར༔ སོགས་ཀྱིས་བཤགས་པར་བྱ་ཞིང༌། འདིའི་གཞུང་ནས་གསུངས་པའི་དམ་ཚིག་སོ་སོའི་རྣམ་དབྱེ་དང་རྐང་གྲངས་དག་སྔགས་ལམ་ལ་ཞུགས་པའི་གཟུ་བོའི་བློ་ཅན་དག་གིས་ཁོང་དུ་ཆུད་པར་མ་བྱས་ཁ་མེད་ཡོད་ཀྱང་འདིར་ཧ་ཅང་ཡི་གེས་འཇིགས་ཏེ་མ་སྤྲོས་པས། རྫོགས་པ་ཆེན་པོའི་རྒྱུད་སྡེ་རྣམས་ཀྱི་དམ་ཚིག་གི་གནས་ངེས་པའི་སྲུང་མཚམས་བཤགས་ཐབས་སོགས་ཞིབ་མོར་བཀྲལ་བ་ནི་ཐེག་པའི་མཆོག་རིན་པོ་ཆེའི་མཛོད་ཀྱི་རིམ་ཁང་བདུན་པ་ལས་ལྷག་པ་མེད་ཅིང༌། སྤྲོས་པ་ཆུང་བ་རྣམས་གཏེར་གཞུང་རྩ་བའི་དམ་ཚིག་རྣམ་བཤད་རྒྱ་མདུད་སྤྱི་དོན་བཅུ་གཅིག་པ་དང༌། སྔར་བཤད་པའི་ན་རཀ་དོང་སྤྲུགས་ཀྱི་ལེའུ་ཐ་མ་ལ་རྟོགས་པར་བྱའོ། །གཉིས་པ་ལྡན་འབྲས་ནི། སྔ་མའི་འཕྲོ་ལས། དེ་ནས་སྟོན་པ་ཀུན་ཏུ་བཟང་པོས་བཀའ་སྩལ་པ༔ རིག་འཛིན་མི་ཡི་ཐོད་པ་ཅན་རྣམས་འགྱོད་པའི་ལས་རྣམས་བཤགས་པ་ལེགས་ཀྱི༔ ཉོན་མོངས་པའི་སྒྲིབ་པ་དང་༔ ཤེས་བྱའི་སྒྲིབ་པ་འདག་པར་འགྱུར་རོ༔ ཡེ་ཤེས་ཀྱི་ཚོགས་རྫོགས་སོ༔
ས་ནས་སར་འཕར་ཞིང་སངས་རྒྱས་ཀྱི་འབྲས་བུ་ཡོངས་སུ་རྫོགས་པར་འགྱུར་རོ༔ ཞེས་གསུངས་པ་ལྟར་ཐོབ་ཅིང༌། དེ་ཡང་གཙོ་བོར་སྔར་ཤིན་ཏུ་བཀྲོལ་ནས་བཤད་པ་ལྟར་གྱི་སྟོབས་བཞིའི་དོན་ལ་རྩེ་གཅིག་ཏུ་མ་འདུན་ན། ད་ལྟའི་ཆོ་ག་བ་ཕལ་གྱིས་བྱེད་པ་བཞིན་བཤགས་ཚིག་ཁ་ནས་འདོན་པ་ཙམ་གྱིས་སྒྲིབ་པ་འདག་པ་དང་ཡོན་ཏན་བཤད་ཚོད་རྣམས་ཇི་བཞིན་ཐོབ་ཏུ་རེ་བ་ནི་ནམ་མཁའི་པདྨོར་འགྱུར་ཏེ་རྡོ་རྗེའི་གསུང་ལས། དེ་མིན་ལྟར་སྣང་ངོ་དགའ་དང་༔ གཞན་རྐྱེན་ཉམས་པའི་མིང་མི་འདོད༔ གྲགས་འདོད་རློམ་སེམས་ཡོད་གྱུར་ན༔ གསེར་སྲང་སྟོང་ལ་སྦྱངས་པ་ཡི༔ ཚོགས་འཁོར་བཤམས་ཀྱང་མི་བསྐང་སྟེ༔ སླར་ལ་ཐུར་དུ་བལྟས་ཏེ་ལྟུང་༔ ཞེས་གསུངས་པའི་ཕྱིར་རོ། །ཕུང་པོ་གསུམ་པའི་མདོར་གྲགས་པ་ལྟུང་བཤགས་ཉིད་སྐབས་འདི་ཉིད་དུ་འདོན་པ་ཤིན་ཏུ་འཐད་པ་རིག་པར་བྱའོ། །བཞི་པ་སྨོན་ལམ་གདབ་པ་ལ་གཉིས། དངོས་བསྟན་དང༌། རྒྱས་པར་སྤྲོ་བའོ། །དང་པོ་ལ་དོན་བསྡུ་ན་གཉིས། ནོངས་བཤགས་དང་འབྲེལ་བའི་སྨོན་ལམ་དང༌། བདག་གཞན་ཀུན་གྱི་དོན་ལ་སྨོན་པའོ། །དང་པོ་ནི། འདུས་པའི་འཁོར་ཚོགས་རྣམས་ལག་ཏུ་མེ་ཏོག་གཟུང༌། ཕྱག་རྒྱ་དང་སྟངས་སྟབས་བྱ་ཞིང་དཀྱིལ་འཁོར་ལ་བསྐོར་བ་བྱེད་པ་དང་མཉམ་དུ། ཨེ་མ་ཧོ༔ རང་སྣང་དག་པའི་དཀྱིལ་འཁོར་ལྷ་རྣམས་དང་༔ ཞེས་པ་ནས། ཉམས་ཆག་རྟོགས་སྒྲིབ་ཐམས་
ཅད་བྱང་གྱུར་ཅིག༔ ཅེས་པའི་བར་གྱིས་སོ།། །།གཉིས་པ་ལ་དགུ། བླ་མེད་ཀྱི་སྒོར་ཞུགས་སོ་ཅོག་ལ་སྨོན་པ་དང༌། བྱང་སེམས་ཀྱི་བསླབ་པར་གནས་པ་རྣམས་ལ་སྨོན་པ་དང༌། རང་སངས་རྒྱས་རྣམས་ལ་སྨོན་པ་དང༌། ཉན་ཐོས་པ་རྣམས་ལ་སྨོན་པ་དང༌། ཁམས་གསུམ་གྱི་སེམས་ཅན་ཐམས་ཅད་ལ་སྨོན་པ་དང༌། བསྟན་འཛིན་གྱི་སྐྱེས་བུ་དམ་པ་རྣམས་མྱ་ངན་ལས་མི་འདའ་བར་སྨོན་པ་དང༌། གནས་སྐབས་དང་མཐར་ཐུག་ཐུན་མོང་དུ་སྨོན་པ་དང༌། རྡོ་རྗེ་ཐེག་པ་ལ་དར་རྒྱས་འབྱུང་བར་སྨོན་པ་དང༌། སེམས་ཅན་ཐམས་ཅད་བདེ་ཞིང་སྐྱིད་པར་སྨོན་པ་སྟེ་དགུ་ལས། དང་པོ་ནི། དེ་ལྟར་ཕྱག་འཚལ་མཆོད་པ་འབུལ་བ་དང་༔ ཞེས་ཤློ་ཀ་གཉིས་ཀྱི་སྒོ་ནས་བདག་གཞན་གསང་སྔགས་ཟབ་མོ་བསྐྱེད་རྫོགས་ཀྱི་ལམ་ལ་ཞུགས་པ་རྣམས། སྒོ་གསུམ་གྱི་རྟོག་སྒྲིབ་ཐམས་ཅད་དག་ནས། རྒྱུ་ཤེས་པའི་མཚན་ཉིད་ལྟ་བ་རྟོགས། རྐྱེན་འཇུག་པའི་མཚན་ཉིད་ཏིང་ངེ་འཛིན་སྒོམ། ལྟ་སྒོམ་གཉིས་མགོ་འབྱོར་བས་ཚོགས་གཉིས་མཉམ་རྫོགས་སུ་གྱུར་ནས་མཆོག་གི་དངོས་གྲུབ་སྐྱེ་འཆི་ལ་རང་དབང་མ་ཐོབ་པ་རྣམ་སྨིན་གྱི་རིགས་འཛིན་ཞེས་རྒྱུའི་ཐེག་པའི་མཐོང་ལམ་པ་དང་དགོངས་པ་མཉམ་པ་དང༌། རྒྱུའི་ཐེག་པའི་ས་བརྒྱད་པ་ལ་གནས་པའི་བྱང་སེམས་དང་དགོངས་པ་མཉམ་ཞིང་སྐྱེ་བ་ལ་རང་དབང་ཅན་ཚེ་དབང་གི་རིགས་འཛིན་དང༌། རྒྱུའི་ཐེག་པའི་ཐར་ལམ་པ་དང་
དགོངས་པ་མཉམ་པ་ཕྱག་རྒྱ་ཆེན་པོའི་རིགས་འཛིན་དང༌། རྒྱུའི་མཐར་ཐུག་ཀུན་ཏུ་འོད་དང་དགོངས་པ་མཉམ་པའི་ལྷུན་རིག་འཛིན་འདི་དག་ལ་མིང་གི་རྣམ་གྲངས་རིམ་པ་བཞིན། རྣལ་འབྱོར་དང༌། རྣལ་འབྱོར་ཆེན་པོ་དང༌། འབྱེད་པའི་རྣལ་འབྱོར་དང༌། རྟོགས་པའི་རྣལ་འབྱོར་ཞེས་ཀྱང་གྲགས་སོ། །གྲུབ་ཀྱི་རིགས་འཛིན་ལ་སོགས་ཏེ་རིགས་འཛིན་བཞིའི་ས་ལ་སྨོན་པའོ། །ཤློ་ཀ་གསུམ་པས། བདག་ལ་འབྲེལ་བ་ཐོགས་པ་དང་གདུལ་བྱར་གྱུར་པ་ཐམས་ཅད་སྔགས་ལམ་གྱི་ས་ཁྱད་པར་ཅན་ཡེ་ཤེས་བླ་མའི་ས་ནོན་ཏེ་ཕྱིར་མི་ལྡོག་པར་སྨོན་པའོ། །གཉིས་པ་བདེན་པའི་ས་ལ་གནས་པའི་བྱང་སེམས་ཚུལ་ཁྲིམས་རྣམ་པ་གསུམ་ཡོན་ཏན་གྱི་གཞི་རྟེན་དུ་བྱས་ནས་བདེན་གཉིས་ཟུང་འཇུག་གི་ལམ་ལྔ་ས་བཅུ་བགྲོད་ཅིང༌། བྲལ་བྱའི་དྲི་མ་ནི་ས་བདུན་པ་མན་ཆད་ལ་བུད་མེད་ངན་པའི་མངལ་ན་གནས་པའི་མི་བདག་དང༌། དག་པ་ས་གསུམ་ལ་གནས་པ་འདམ་གྱི་དབུས་ན་གནས་པའི་གསེར་གྱི་དཔེར་རྒྱུད་བླ་མ་ལས་བཤད་པ་ལྟར་དང༌། བྲལ་འབྲས་ནི་དག་པ་གཉིས་ལྡན་གྱི་སངས་རྒྱས་སོ། །རྣམས་ལ་སྨོན་པ་ནི། བྱང་ཆུབ་སེམས་དཔའ་དེ་དག་ལ་ཉོན་མོངས་པའི་སྒྲིབ་པ་མངོན་གྱུར་པ་མེད་ཀྱང༌། ཤེས་བྱའི་སྒྲིབ་པ་ཕྲ་མོ་ཙམ་མཆིས་པ་དག །རྡོ་རྗེ་ལྟ་བུའི་ཏིང་ངེ་འཛིན་གྱི་གཉེན་པོ་གཞུ་བདུངས་པ་ལྟ་བུས་བཅོམ་ནས། ས་
བཅུ་སྤྲོས་བྲལ་གྱི་ངང་དུ་རིམ་གྱིས་རྫོགས་ཏེ་རྒྱུའི་ཐེག་པའི་མཐར་ཐུགས་ཀུན་ཏུ་འོད་ཀྱི་ས་ལ་ཕྱིན་པར་སྨོན་པ་སྟེ། དེ་ལྟར་བདེན་པའི་ས་ཆེན་ལ་གནས་པའི༔ ཞེས་པའི་ཤློ་ཀས་སོ། །གསུམ་པ་ནི། རང་རྒྱལ་རྣམས་ཉན་ཐོས་པའི་གང་ཟག་གི་བདག་མེད་རྟོགས་པའི་སྟེང་དུ། བདག་གི་གཟུང་ཆ་རྡུལ་ཕྲ་རབ་ཀྱང་རང་བཞིན་མེད་པར་རྟོགས་ནས། རྟེན་འབྲེལ་ཡན་ལག་བཅུ་གཉིས་བསེ་རུ་དང་ཚོགས་སྤྱོད་ཆེ་ཆུང་གསུམ་གྱིས་དབྱེ་བས་ཚོགས་བསྐལ་ཆེན་བརྒྱ་ནས་མི་ཚེ་བཅོ་ལྔ་མན་ཆད་ཀྱིས་བསྡུས་པ་བསགས་པའི་རྟེན་དེ་ཉིད་ལ་བྱང་ཆུབ་ཐོབ་པའི་སྐལ་བ་མེད་པར་ཤེས་ནས་ཉན་ཐོས་ཀྱི་སྡེ་སྣོད་ལ་ཐོས་བསམ་མཁས་པར་བྱས་ཏེ། སྨོན་ལམ་རྣམ་པ་གསུམ་བཏབ་པ་ལ་བརྟེན་ནས་སྐྱེ་བ་དེའི་འོག་ཏུ་སངས་རྒྱས་དང་ཉན་ཐོས་མེད་པའི་འཇིག་རྟེན་དུ་སྐྱེས་ཏེ་དུར་ཁྲོད་ཀྱི་རུས་པ་མཐོང་མ་ཐག་ཡིད་བྱུང་ནས། ཀྱེ་མ་རུས་པ་འདི་དག་ཅི་ལས་བྱུང་རྒ་ཤི་ལས་བྱུང༌། རྒ་ཤི་ཅི་ལས་བྱུང་སོགས་རྟེན་འབྲེལ་ལུགས་འབྱུང་དུ་བརྟགས་པའི་མཐར། འདི་ལས་ཇི་ལྟར་ཐར་བར་བྱ་སྙམ་པ་ལས། ཡང་མ་རིག་པ་འགག་ནས་རྒ་ཤིའི་བར་དུ་འགགས་པས་རྟེན་འབྲེལ་ལུགས་ལྡོགས་རྩ་བ་ཆོད། སྦྱོར་ལམ་ལ་སོགས་པའི་ལམ་གྱི་རྟོགས་པ་རང་བྱུང་དུ་རྒྱུད་ལ་སྐྱེ་སྟེ་སྒོམ་ལམ་གྱི་མཐར་ཟད་པ་ཤེས་པ་དང་མི་སྐྱེ་བ་ཤེས་པའི་ཡེ་ཤེས་གཉིས་མངོན་དུ་བྱས་ཏེ་དགྲ་བཅོམ་ཐོབ་པ་ཡིན་ནོ། །ལུགས་འབྱུང་ལུགས་ལྡོག་ཏུ་སྒོམ་ནས་མཐར་ཐུག་གི་འབྲས་བུ་བསེ་རུ་ལྟ་བུ་གཅིག་པུར་གནས་པའམ། ནེ་ཙོ་ལྟ་བུར་ཚོགས་ན་གནས་པ་གཉིས་གང་ཡང་རུང་བའི་སངས་རྒྱས་མངོན་དུ་བྱེད་པར་སྨོན་ཏེ། རང་རྒྱལ་རྣམས་ཀྱང་རྟེན་འབྲེལ་བཅུ་གཉིས་པོ༔ སོགས་
ཤློ་ཀ་བརྗོད། འདི་ལྟར་མ་གོ་བ་རྣམས་ཀྱིས་ནེ་ཙོ་དང་བསེ་རུ་ཞེས་དུད་འགྲོའི་སྐྱེ་བ་ལ་སྨོན་པ་མཐོང་ཞིང་དེ་ནི་ཤིན་ཏུ་རྨོངས་ཏེ། དུད་འགྲོ་ལ་སོགས་པའི་ངན་འགྲོའི་རིགས་ལ་སྨོན་ཡང་མ་དགོས་ཏེ་རང་རང་གིས་སྙིགས་མའི་བརླང་སྤྱོད་ཀྱི་འབྲས་བུས་དེ་དག་ཏུ་རྩོལ་བ་མ་དགོས་པར་འཕེན་པ་སྲིད་དོ། །དེ་ལ་ཅིའི་ཕྱིར་རང་སངས་རྒྱས་བྱ་ཞེ་ན། འདི་ལ་བཤད་ཚུལ་མི་འདྲ་བ་བཞི་ཙམ་ཡོད་ཀྱང་བྱང་ཆུབ་སེམས་དཔའ་ལྟར་སེམས་ཅན་མང་པོའི་དོན་དུ་སེམས་མི་བསྐྱེད་པར། རང་འབའ་ཞིག་ཐར་བར་བྱ་བས་དེ་སྐད་ཅེས་བྱ་བར་འཐད་དོ། །བཞི་པ་ནི། ཉན་ཐོས་པ་རྣམས་བདེན་པ་བཞིའི་ལམ་ལ་ཞུགས་ནས་གང་ཟག་གི་བདག་མེད་བསྒོམས་ནས་འཁོར་བའི་རྒྱུན་བཅད་དེ་དགྲ་བཅོམ་པའི་དཔལ་མགོན་འཕགས་པ་དབྱིག་གཉེན་གྱིས། །ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པ་ལྟར་སོ་སོ་ཐར་པའི་ཚུལ་ཁྲིམས་གཞི་རྟེན་དུ་བྱས་ནས། ཕུང་པོ་དང༌། ཁམས་དང༌། སྐྱེ་མཆེད་དང༌། རྟེན་འབྲེལ་བཅུ་གཉིས། གནས་དང༌། གནས་མ་ཡིན་པ་སོགས་ལ་མཁས་པར་བྱས་ཏེ། བདེན་པ་བཞི་གཙོ་བོར་བཏོན་པའི་ལམ་ཏུ་འཇུག་ཅིང༌། ཚོགས་ལམ་ཆུང་ངུའི་དྲན་པ་ཉེར་
གཞག་ནས་བཟུང་སྟེ་སྒོམ་ལམ་ལ་ཐུག་གི་བར་ལམ་བགྲོད་པའི་རྗེས་ལ་དེ་ཉིད་ཀྱིས། ཟད་དང་མི་སྐྱེས་ཤེས་པ་ཡི། །བྱང་ཆུབ་ཅེས་པ་ལྟར་ཡེ་ཤེས་ཉིས་ལྡན་གྱི་འབྲས་བུ་དགྲ་བཅོམ་མངོན་དུ་བྱེད་ལ། དེ་ལྟར་ཉན་རང་གི་དགྲ་བཅོམ་དེ་དག་ལྷག་མེད་དུ་འདས་ནས། འགོག་པའི་དབྱིངས་ལ་བཞུགས་པ་རང་གི་ལུགས་ལ་རྟག་པར་མི་གཡོ་བར་འདོད་ཀྱང༌། ཐེག་ཆེན་པས་གཞལ་ན། སྔར་ཚོགས་ཇི་ཙམ་བསགས་པའི་ཡུན་དུ་བློའི་འཇུག་པ་ཞི་བར་ཐིམ་ཡང༌། དེ་ནས་བདེ་བ་ཅན་ལ་སོགས་པའི་དག་ཞིང་དུ་སྐྱེ་བ་པདྨོའི་སྦུབས་སུ་བཟུང་ནས་མ་རིག་པའི་བག་ཆགས་དང་ཤེས་བྱའི་སྒྲིབ་པ་ཕྲ་མོའི་མཐུས་ལོ་བདུན་དུ་པདྨོ་ཁ་ཟུམ་ནས་གནས་པའི་དུས། ཞིང་དེའི་སངས་རྒྱས་ཀྱི་ཐུགས་རྗེའི་མཐུས་པདྨོ་ཁ་འབྱེད་ཅིང་ཏིང་ངེ་འཛིན་དེ་ལས་བསླངས་པས། ཐེག་པ་ཆེན་པོ་ལ་འཇུག་པའི་སྤྲོ་བ་སྐྱེས་ཏེ་སེམས་བསྐྱེད་ནས་ལམ་བསྒོམས་པས་སྐུ་ཚེ་དེ་ཉིད་ལ་སངས་རྒྱ་བ་ལངྐར་གཤེགས་པ་དང༌། པདྨ་དཀར་པོ་ལས་བཤད་དོ། །འབྲས་བུ་ཐོབ་པར་སྨོན་པ་སྟེ། ཉན་ཐོས་རྣམས་ཀྱང་བདེན་པ་བཞི་ཡི་དོན༔ མཐར་ཐུག་དགྲ་བཅོམ་འབྲས་བུ་ཐོབ་གྱུར་ཅིག༔ ཅེས་པའོ། །དེ་ལ་གང་གི་ཕྱིར་ཉན་ཐོས་བྱ་ཞེ་ན། འདི་ལ་སྒྲ་དོན་འགྲེལ་ལུགས་ཐ་དད་དུ་སྣང་ཡང་རང་སངས་རྒྱས་ལྟར་དགེ་བའི་བཤེས་གཉེན་གྱི་བཀའ་ལ་མི་བརྟེན་པ་མ་ཡིན་གྱི། འབྲས་བུ་ཐོབ་ཁར་ཡང་སངས་རྒྱས་ཀྱི་ལུང་ལ་བརྟེན་ཅིང་ཉན་པར་བྱེད་པས་ན་པྲ་བ་ཀའམ། ཉན་ཐོས་ཞེས་བྱའོ། །ལྔ་པ་ནི། ཁམས་གསུམ་གྱི་སེམས་ཅན་ཐམས་ཅད་དགེ་བ་བཅུའི་ཆོས་ལ་ཚུལ་བཞིན་དུ་སྤྱོད་པ་དང༌། དེའི་མཐུ་ལས་གནས་སྐབས་ཙམ་གྱི་བདེ་འབྲས་ལྷ་མི་སྟེ་མཐོ་རིས་ཀྱི་གོ་འཕང་ཐོབ་ཅིང༌། དེ་ཡང་ལོག་ལམ་དུ་མི་ཞུགས་པར་ཆོས་སྤྱོད་བཅུའི་བྱ་བ་ལ་བརྩོན་ཞིང་སངས་
རྒྱས་བསྟན་པའི་སྲོག་ཤིང་འཛིན་པར་སྨོན་པ་སྟེ། ཁམས་གསུམ་འགྲོ་བ་མ་ལུས་ཐམས་ཅད་ཀྱང་༔ ཞེས་པ་ནས། སངས་རྒྱས་བསྟན་པའི་སྲོག་ཤིང་འཛིན་གྱུར་ཅིག༔ ཅེས་པ་ཡན་ཆོད། དྲུག་པ་ནི། བསྟན་པ་འཛིན་སྐྱོང་སྤེལ་བའི་སྐྱེས་བུ་དམ་པ་དང༌། དགེ་བའི་བཤེས་གཉེན། རྡོ་རྗེའི་མཆེད་ལྕམ་ལ་སོགས་པ་རྣམས་སྐུ་ཚེ་རིང་ཞིང་ཆབ་སྲིད་བརྟན་པར་སྨོན་པ་སྟེ། བསྟན་པ་འཛིན་སྐྱོང་སྤེལ་བར་མཛད་པ་ཡི༔ ཞེས་ནས། བསྟན་པའི་སྒྲོན་མེ་ཡུན་རིང་གནས་གྱུར་ཅིག༔ ཅེས་པའི་བར་རོ། །བདུན་པ་ནི། བདག་ཅག་དཔོན་སློབ་ཡོན་མཆོད་དང་བཅས་པ་ཐམས་ཅད་འཇིག་རྟེན་འདིར་ཡང་བསམ་པའི་དོན་ཡིད་བཞིན་དུ་འགྲུབ་པ་དང༌། ཚེ་འཕོས་ནས་ཀྱང་སེམས་ཅན་ཐམས་ཅད་སྐྱོབ་པར་ནུས་པའི་བླ་མ་དང་དགེ་བའི་བཤེས་གཉེན་ཁྱད་པར་ཅན་དུ་གྱུར། ཐེག་པ་ཆེན་པོའི་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར་ཞིང༌། སྦྱིན་པ་དང༌། སྙན་པར་སྨྲ་བ་དང༌། དོན་སྤྱོད་པ་དང༌། དོན་མཐུན་པ་སྟེ་བསྡུ་བ་རྣམ་པ་བཞིའི་སྒོ་ནས་འགྲོ་དོན་བྱེད་པར་སྨོན་པའི་ཚིག །བདག་ཅག་དཔོན་སློབ་ཡོན་མཆོད་འཁོར་བཅས་ཀྱིས༔ ཞེས་པ་ནས། བསྡུ་བ་རྣམ་བཞིའི་འགྲོ་དོན་བྱེད་པར་ཤོག༔ ཅེས་པའི་བར་དང༌། བརྒྱད་པ་ནི། རྡོ་རྗེ་ཐེག་པ་བཀའ་བཙན་པ་ཞེས་འཆོལ་པོར་མ་སྤྱད་པའི་སྒོ་ནས་ཕྱོགས་རྣམས་
ཐམས་ཅད་དང༌། དུས་ཐམས་ཅད་དང༌། གནས་སྐབས་ཐམས་ཅད་དུ་ཤིན་ཏུ་དར་རྒྱས་ཆེ་བ་དང༌། དེའི་མཐུ་ལས་ཡུལ་དང་རིས་སུ་མ་ཆོད་པའི་རྒྱལ་ཁམས་ཐམས་ཅད་དུ་བདེ་ལེགས་ཕུན་སུམ་ཚོགས་པར་འབྱུང་བར་སྨོན་པ་སྟེ། རྡོ་རྗེ་ཐེག་པ་བཀའ་བཙན་བྱིན་ཆགས་ཤིང་༔ ཞེས་པ་ནས། བཀྲ་ཤིས་དཔལ་འབྱོར་བདེ་ལེགས་ཕུན་སུམ་ཚོགས༔ ཞེས་པའི་བར་རོ། །དགུ་པ་ནི། ཕྱོགས་དུས་གནས་སྐབས་ཀུན་ཏུ་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་དང༌། དེའི་མཐུ་ལས་སེམས་ཅན་ཐམས་ཅད་ནད་མཚོན་མུ་གེ་དམག་འཁྲུག་ལ་སོགས་པ་རྒྱང་རིང་པོར་དབེན་ཞིང་ཤིན་ཏུ་བདེ་ཞིང་སྐྱིད་པར་སྨོན་ནས་མཇུག་བསྡུ་བ་སྟེ། ཕྱོགས་དང་དུས་དང་གནས་སྐབས་ཐམས་ཅད་དུ༔ སོགས་ནས། བདག་གཞན་དོན་འབྲས་ལྷུན་གྱིས་གྲུབ་པར་ཤོག༔ ཅེས་བརྗོད་དོ། །དེ་ལྟར་སྨོན་ལམ་གྱི་དོན་བཀྲལ་བ་ལ་དགོས་པ་ཅི་ཡོད་ཅེ་ན། ཚིག་དོན་རྣལ་མར་མ་གོ་བ་རྣམས་ཀྱིས་གོ་བ་ཕྱིན་ཅི་ལོག་ལ་བརྟེན་སྨོན་ལམ་གོ་འཛོལ་དུ་འདེབས་པ་ལས་ལྡོག་ཕྱིར་རོ། །གཉིས་པ་ལ་གསུམ། སྨོན་ལམ་གཞན་གྱིས་ཁ་འཕངས་པ་དང༌། སྨོན་ལམ་དེ་དག་ཇི་ཙམ་དུ་འདེབས་པའི་ཚད། ཆོ་ག་དང་སྨོན་ལམ་ཐམས་ཅད་ལ་དམིགས་པ་དང་བསམ་པ་གཙོ་ཆེ་བར་གདམས་པའོ། །དང་པོ་ནི། གཞུང་ལས། ཞེས་པ་རྣམས་དང་གཞན་ཡང་གང་
འོས་ཀྱིས༔ སྨོན་ལམ་རྒྱས་བསྡུས་སྐབས་དང་སྦྱར་ལ་གདབ༔ ཅེས་དངོས་བསྟན་གྱིས་མཇུག་ཏུ་སྨོན་ལམ་རྒྱ་ཆེར་འདེབས་པ་ཞལ་གྱིས་འཕངས་པ་ལྟར། ཕལ་པོ་ཆེའི་མདོ་ལས། དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་བསྐལ་བ་དང་བསྐལ་བར་འབྱམ་ཀླས་པ་ཉིད་དང་འཇིག་རྟེན་གྱི་ཁམས་གཅིག་ཏུ་བརྒྱུད་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་པོ་དེ་དག་བསྣན་ཏེ། མངོན་པར་བརྗོད་པའི་ཕྱིར་ཚིགས་སུ་བཅད་པས་སྨོན་ལམ་བཏབ་པ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །ཞེས་སོགས་གསུངས་པའི་སྨོན་ལམ་གྱི་རྒྱལ་པོ་བཟང་པོ་སྤྱོད་པ་ཞེས་གངས་ཅན་འདིར་ཉི་ཟླ་ལྟར་གྲགས་པ་འདི་ཤིན་ཏུ་རྨད་དུ་བྱུང་བའི་སྨོན་ལམ་ཞིག་སྟེ། རྒྱུ་མཚན་ནི། རང་གཞུང་ལས། ལན་ཅིག་ཙམ་ཡང་དད་པ་སྐྱེས་པ་ནི། །སོགས་གསུངས་པ་ལྟར་དང༌། ལོ་ཆེན་བཻ་རོའི་རྣམ་སྤྲུལ་གཡག་སྡེ་པཎ་ཆེན་ལ་བྱ་བྲལ་བ་ཞིག་གིས། གཞུང་ས་རགས་གོང་རྡོ་རྗེས་གུང་ཐང་མེ་ཏོག་མཆོད་པ་ལན་བཅུ་ཙམ་བསྒྲུབས་གདའ་བ། འདི་ཀུན་བསོད་ནམས་ཆེ་བར་གླེང་གི་འདུག་ལགས་ཞུས་པས། པཎ་ཆེན་གྱིས་གསུངས་ནས། དེ་འདྲའི་བསོད་ནམས་ལས་ཁོ་བོས་བཟང་སྤྱོད་ཚར་གཅིག་བཏོན་ནས་ཉལ་བ་བསོད་ནམས་ཆེ་ཞིང་དཀའ་ལས་ཆུང་གསུངས་པ་ལྟར། བྱ་སླ་དོན་ཆེན་གྱི་
སྨོན་ལམ་ཁྱད་པར་ཅན་འདི་དང༌། བྱང་ཆུབ་བསྒྲུབ་པའི་ཐབས་ལ་ཐེག་པ་བདེ་བ་དང༌། ལམ་བདེ་བ་དང༌། འཇུག་པ་བདེ་བ་ལ་སོགས་ཀྱིས་མཁས་པ་ཨཱརྱ་མཻ་ཏྲིས་བྱང་ཆུབ་ཀྱི་སྤྱོད་པ་ལ་བསླབས་པའི་ཚེ་ཉིན་ལན་གསུམ་དང་མཚན་ལན་གསུམ་དུ་བླ་གོས་ཕྲག་པར་གཟར། པུས་མོ་གཡས་པའི་ལྷ་ང་ས་ལ་བཙུགས་ཏེ་ཕ་མཐའ་མི་དཔོགས་པར་བཏབ་པས་བྱམས་པའི་སྨོན་ལམ་དུ་གྲགས་པ་དང༌། རིག་འཛིན་རྒོད་ལྡེམ་པས་བྲག་རི་དུག་སྦྲུལ་སྤུངས་པ་ནས་ཕྱུང་བའི་དགོངས་པ་ཟང་ཐལ་རྒྱུད་ཀྱི་སྨོན་ལམ་ལ་སོགས་པ་ཅི་འགྲུབ་ཏུ་བྱའོ། །གཉིས་པ་ནི། དེ་ལྟར་སྨོན་ལམ་ཐམས་ཅད་རང་ཉིད་གཅིག་པུ་ཞི་བདེ་ཙམ་གྱི་ཆེད་དང༌། དུས་དང་བསྐལ་པ་ལ་མཐའ་མི་བཀག་པར་རྒྱ་ཆེ་མུ་མེད་ཀྱི་བསམ་པས་འདེབས་པ་ཡིན་ཏེ། བཟང་སྤྱོད་ལས། ནམ་མཁའི་མཐར་ཐུག་གྱུར་པ་ཇི་ཙམ་པར། །སོགས་ཤོ་ལོ་ཀས་གསལ་བར་བསྟན་པ་ལྟར་རོ། །ཁ་ཅིག་དེ་ཙམ་དུ་སྨོན་ལམ་འདེབས་པ་ལ་རྟེན་གྱི་མི་ཁོམ་པར་རྟོག་རིག་འཇུག་སྟེ། དེ་ནི་མ་ཡིན་ཏེ། ཆོས་ཀྱི་དབྱིངས་རྣམ་པར་དག་པའི་མཐུ་དང༌། སངས་རྒྱས་རྣམས་ཀྱི་ཐུགས་རྗེ་ཆེན་པོའི་བྱིན་རླབས་དང། གདུལ་བྱ་རྣམས་ཀྱི་དཀར་པོའི་བག་ཆགས་ཀྱི་ས་བོན་གྱི་དབང་ལས་རྟེན་མེད་ཀྱང་སྨོན་ལམ་རིང་པོའི་མཐར་ཡང་འགྲུབ་སྟེ། དཔེར་ན་དྲང་སྲོང་སྨོན་ལམ་འགྲུབ་པས་མ་འོངས་པའི་དུས་ན་སྨོན་ལམ་བཏབ་པ་དག །དྲང་སྲོང་ཤི་
ནས་ཡུན་རིང་པོ་འདས་ཀྱང་སྨོན་ལམ་འགྲུབ་པར་གྱུར་པ་ལ་རྟེན་མི་དགོས་པ་བཞིན་ནོ། །གསུམ་པ་ནི། སྤྱིར་དགེ་བའི་ཆོས་ཐམས་ཅད་ལ་ལྷན་ཅིག་སྐྱེས་པའི་མ་རིགས་པས་མ་བསླད་པར་བྱ་དགོས་པའི་སྙིང་པོ་ནི་ཤེས་བཞིན་གྱི་དྲན་པ་ཡིན་པས་ཤིན་ཏུ་གལ་ཆེ་མོད། ལྷག་པར་བསྐྱེད་རྫོགས་ཀྱི་ལམ་སྤྱི་དང༌། བྱེ་བྲག་ཏུ་ཚེ་འདས་ཀྱི་རྗེས་འཛིན་ལ་སོགས་པ་འདི་ལྟ་བུའི་སྐབས་སུ་དམིགས་པ་སོགས་གང་ཡང་མེད་པར། ཉོན་མོངས་དང་འདྲེས་པའི་འཕྲོ་རྒོད་ཀྱི་རྟོག་པ་ཕྱིན་ལོག་དང༌། བཏང་སྙོམས་ལུང་མ་བསྟན་གྱི་དབང་དུ་མི་གཏོང་བར། མགོ་ཚུགས་པ་ནས་མཇུག་མ་འཁྲིལ་གྱི་བར་དུ་ཐད་ཀ་ཐད་ཀའི་དོན་ལ་ངེས་ཤེས་འདྲོངས་པ་དང༌། དམིགས་པ་གསལ་ཞིང་སེམས་མ་ཡེངས་པ་ཤིན་ཏུ་གལ་ཆེ་སྟེ། རྒྱལ་བ་ཡང་དགོན་པས། འོད་གསལ་གྱི་ངང་ལ་བར་དོའི་སེམས་ཅན་དངོས་སུ་གཟིགས་པ་དང༌། ཁྱད་པར་སྐུ་སྐྱེ་སྔ་མའི་བར་དོའི་སྣང་ཚུལ་ཇི་ལྟར་བྱུང་བ་ཐུགས་ཀྱི་དགོངས་ནས་འདི་སྐད་གསུངས་ཏེ། བདུན་ཚིགས་ཀྱི་ཆོ་ག་དག་པ་དང༌། དམིགས་པ་གསལ་བ་དང༌། མ་ཡེངས་པ་བྱས་ཙ་ན་ཉམས་དགའ་ཤེས་པ་གསལ། སྡོད་སྙིང་འདོད། རིག་པ་ལྷན་ནེར་ཕེབས་པ་འོང་བར་འདུག །སེམས་ཡེངས་པ་དང༌། ཆོ་ག་མ་དག་པ་ལ་ཤེས་པའི་འཚུབས་ཤིང༌། ཅི་ཞིག་ན་འཇིགས་སྐྲག་གིས་བསྐྱོད་དེ་རང་
དབང་མེད་པར་འགྲོ་བ་འདུག་གོ །བདུན་ཚིགས་ལ་གཤེད་ཕྲལ་བས་མི་ཕན་ལྕགས་འབྲལ་བ་གལ་ཆེའོ། །མིང་བཞིའི་རྣམ་པར་ཤེས་པ་མཆོག་ཏུ་གྱུར་པ་ཡིན་པས་མིང་བྱང་འདྲི་བའི་རྒྱུ་མཚན་ནོ། །གཏི་མུག་ཤས་ཆེ་བའི་གཉེན་པོར་རླུང་ལ་ས་གཏོར་དགོས་པས། གཏི་མུག་ཡེ་ཤེས་ཀྱི་མེས་བསྲེག་པའི་རྟེན་འབྲེལ་དུ་བྱེ་མ་རྔོས་པས་འབྲབ་པ་ཡིན་ནོ། །དེ་ལྟ་བུའི་བདུན་ཚིགས་ཟབ་མོ་བླ་མ་ཐུགས་རྗེ་ཅན་གྱིས་སློབ་མ་དམ་ཚིག་ཅན་གྱི་དོན་དུ་ཆོ་ག་དག་ཅིང༌། ཏིང་ངེ་འཛིན་གསལ་བར་བྱས་ན་བར་དོའི་རྟེན་བཟང་ཞིང་ཤེས་པ་གསལ་བས། བག་ཆགས་བགོ་སླ་བའི་རྟེན་འབྲེལ་གྱི་འཚང་རྒྱ་བར་གསུངས་སོ། །རྡོ་རྗེ་ཐེག་པའི་ཉེ་ལམ་ཐུན་མོང་མ་ཡིན་པ་ཡིན་ལ་གཞན་ཡང་ཡུན་རིང་དུ་ལོན་པའི་རུས་པའང་མིང་ནས་བརྗོད་ཅིང་དབང་བསྐུར། གཟུངས་སྔགས་བཟླས་པས་ལས་ཀྱི་སྒྲིབ་པ་འཛད་ཅིང་ངན་སོང་ལས་ཐར་བར་བཤད་དེ། སྦྱོང་རྒྱུད་ནས། ཀྱེ་ལྷའི་བུ་རྣམས་ངན་སོང་དུ་སྐྱེས་ཟིན་པ་གང་ཡིན་པ་དེ་དག་གི་མིང་ལ་ཡང་དབང་བསྐུར་ཅིག །གང་གཟུགས་བསྙན་ལ་ཡང་དབང་བསྐུར་བར་བྱོས་ཤིག །མཆོད་རྟེན་ལ་ཡང་དབང་བསྐུར་བར་བྱོས་ཤིག །རང་གི་ལྷའི་སྐུ་ལ་ཡང་དབང་བསྐུར་བར་བྱོས་ཤིག །ཆུང་དུ་ན་དེར་རིགས་མཐུན་པ་དང་དེའི་བུ་དང༌། དེའི་རུས་མཐུན་པ་དང༌། དེའི་མིང་འཛིན་པའམ་བྲན་ལ་ཡང་དབང་བསྐུར་ཅིག །
ཞག་བདུན་དུ་དཀྱིལ་འཁོར་དུ་བཅུག་སྟེ་དབང་བསྐུར་ན་གདོན་མི་ཟ་བར་ཞག་བདུན་གྱིས་ངན་སོང་གི་སྒྲིབ་པ་ལས་རྣམ་པར་གྲོལ་བར་འགྱུར་རོ། །ཞེས་གསུངས་ཤིང༌། འདི་ལྟར་མཽངྒལ་གྱི་བུས་མ་དམྱལ་བ་ནས་བཏོན་པ་དང༌། ཨ་ཙར་དཔལ་དབྱངས་ཀྱིས་མ་དམྱལ་བ་ནས་བཏོན་པ་ལྟ་བུའོ། །གཞན་ཡང་དེའི་དོན་དུ་དགེ་བ་བྱས་ཤིང༌། དགེ་བའི་བཤེས་གཉེན་གྱིས་བསྔོ་བ་དང་སྨོན་ལམ་རྣམ་པར་དག་པ་བྱས་ན་བྱེད་མཁན་གྱི་བསམ་པ་རྣམ་པར་དག་པའི་སྟོབས་དང༌། ཆོས་ཀྱི་དབྱིངས་ཅི་ཡང་མ་ཡིན་པ་ལ་ཅིར་ཡང་བྱར་བཏུབ་པའི་བྱིན་རླབས་དང་སངས་རྒྱས་ཀྱི་ཐུགས་རྗེ་དང་སེམས་ཅན་གྱི་ཁམས་དབྱེར་མེད་པའི་ཆོས་སྐུའི་བྱིན་རླབས་དང༌། བསྔོ་བ་དང་སྨོན་ལམ་རྣམ་པར་དག་པའི་བྱིན་རླབས་ཀྱི་སྟོབས་ཀྱིས་རྣམ་སྨིན་གྱི་འབྲས་བུ་མི་བསྐྱེད་ཀྱང༌། སྐྱེས་བུའི་བྱེད་པ་དྲི་མ་མེད་པའི་དབང་འབྲས་འབྱུང་སྟེ། བར་དོའི་སེམས་ཅན་དེ་ངན་འགྲོར་སྐྱེ་ངེས་པ་ཡིན་ཡང་མཐོ་རིས་སུ་འགྲོ་སྟེ། དཔེར་ན་ལམ་དུ་ཞུགས་པའི་གྲོགས་ཀྱིས་བསྒྱུར་བ་བཞིན་ནོ། །དེ་ཡང་ཚེ་འདས་དེ་ལ་ཞག་བདུན་བདུན་གྱི་ཁོངས་སུ་འཆི་བའི་སྡུག་བསྔལ་རེ་རེའང་ཞག་ཞེ་དགུའི་བར་དུ་འབྱུང་ཕྱིར་ད་ལྟ་བདུན་ཚིགས་བྱེད་པ་དེ་ལས་སྐྱོབ་ཕྱིར་ཡིན་མོད། དེས་ན་དམིགས་པ་གསལ་མི་གསལ་དང་བསམ་པ་དག་མ་དག་ཙམ་གྱིས་ཁྱད་ལ་གཤིན་པོ་
དེ་ལ་ཕན་གནོད་ཀྱི་ཁྱད་པར་དེ་ཙམ་འབྱུང་བར་གསུངས་པས་ན། དེ་ཉིད་བར་དོར་སྡུག་ཐུག་པའི་གནས་སྐབས་ཡིན་ཕྱིར་དེ་དག་གི་སྣང་ཚུལ་ལ་བསམས་ནས་སྙིང་རྗེའི་བསམ་པ་དང་གྲགས་པས་ཀུན་ནས་བླངས་ཏེ་ཆོ་ག་དང་དམིགས་པ་ལ་གནད་དུ་བཀར་ནས་དོན་གཉེར་ཆེན་པོ་བྱས་ན། གཤིན་པོ་དེ་ལ་ཕན་ཐོགས་ཤིན་ཏུ་ཆེ་ཞིང་རང་གཞན་གཉིས་ཀ་མ་བསླུས་པ་ཡིན་མོད། ཚུལ་དེ་ལྟ་བུ་དང་མི་ལྡན་ཕྱིན་ཆད། འཇིག་རྟེན་ཚུལ་མཐོང་བྱིས་པའི་སྣང་ངོར་སྣང་རིག་ཇི་ལྟར་བཀྲ་ཡང་དེ་འདྲེའི་ཆོ་ག་དང་ངོ་སྤྲོད་ལ་དགེ་མཚན་ཆེ་བར་མ་མངོན་ཏེ། རྗེ་བཙུན་མི་ལས། མི་ཤི་བའི་རོ་ཡི་མགོ་བོ་ན། །ནོར་འདོད་པའི་བན་བོན་གླུ་དབྱངས་ལེན། །ཞེས་གསུངས་པའང་གནས་སྐབས་སུ་དོན་ལ་གནས་ཤིང༌། མཐར་ཐུག་ནི་བདག་གཞན་གཉིས་ཕུང་ལས་མ་འདས་ཏེ། ཅིའི་ཕྱིར་ན་རེ་ཞིག་ཅིག་ན་དཀོར་དང་ལན་ཆགས་ཀྱི་རྣམ་སྨིན་ཁུར་བས་མི་ཐེག་པ་ཞིག་རང་ཐོག་ཏུ་འབྱུང་སྟེ། རྒོད་ཚང་སྣ་ཚོགས་རང་གྲོལ་གྱི་མནལ་ལམ་དུ་བར་དོར་བྱོན་པའི་ཉམས་སྣང་ལ། གཤེད་མ་བནྡེའི་གཟུགས་ཅན་འཇིགས་སུ་རུང་བ་ཞིག་ན་རེ། དེང་སང་ཁྱེད་ཅག་བླ་མ་མཁན་སློབ་དང༌། །དགེ་འདུན་མིང་བཏགས་ཆོས་པའི་གཟུགས་བཟུང་ནས། །ཤི་གསོན་ཀུན་གྱི་སྐྱབས་ཡུལ་བྱེད་མཁན་ཚོ། །ཕ་མར་གྱུར་པའི་སེམས་ཅན་སྲོག་བཅད་པའི། །
ཤ་ལ་ལྟོ་ཡི་དངས་མ་བྱེད་ནུས་པའི། །སྙིང་སྟོབས་འདི་འདྲའི་ཆེ་ལུགས་ཨ་ལ་ལ། །གློ་བ་ཁྲག་གིས་བརྒྱངས་བའི་ཞིམ་ཤ་དང༌། །མཆིན་པ་འཁྱགས་ལ་བོར་བའི་མཚར་ཟས་དང༌། །གསོན་ཁྲག་ཚོད་མར་བྱས་པའི་བཞེས་སྤྲོ་སོགས། །ཁྱེད་ཅག་བཙུན་པ་རྣམས་ཀྱིས་ཟ་ལུགས་ལ། །ཤ་ཁྲག་ཟས་ལ་གཅན་གཟན་བས་ཀྱང་ཧམ། །ཆང་རག་འཐུང་ལ་སྦུར་གོག་བས་ཀྱང་སྲེད། །དཀོར་ཆས་འཚོལ་ལ་ཡི་དྭགས་བས་ཀྱང་མུག །ད་དུང་དགེ་སློང་ཡིན་པར་ཁས་ལེན་ནམ། །ལྷུང་བཟེད་ཐོགས་བཞིན་ཤ་ཁྲག་ཟ་ལུགས་དང༌། །ཆོས་གོས་ཤམ་ཐབས་ཆང་གིས་སྦང་ལུགས་དང༌། །ཚོང་ཁེ་ནོར་རྫས་བུད་མེད་འཚོལ་ལུགས་ནི། །དཀོན་མཆོག་གསུམ་ལ་ངོ་ཡང་མི་ཚའམ། །སྦྱིན་བདག་རྣམས་ཀྱི་དཀོར་ལ་ཟ་དུས་སུ། །ཤ་ཟ་ཆང་འཐུང་བྱེད་པའི་སྐྱིད་བུ་དེ། །ལས་ཀྱི་ཁྲིམས་ར་འདི་རུ་སླེབས་དུས་སུ། །སྐྱིད་སྡུག་ཅི་འདུག་ལྟོས་དང་དཀོར་ཟན་ཚོ། །མ་གི་ཤ་ཁང་ནག་པོའི་བཙོན་ཁང་ན། །ཁྱེད་རང་རྣམས་ཀྱིས་ཤ་ཡི་ཟ་ལུགས་དང༌། །བྱེད་ལུགས་མཐུན་པའི་བཀོད་པ་དུ་མ་བཅས། །ཁྱེད་རང་བཙུན་པ་ཚོ་ལ་བྱེད་ཀྱིན་ཡོད། །ལ་ལ་བརྩབས་ཡོད་ལ་ལ་བཏུབ་ཀྱིན་ཡོད། །ལ་ལ་འཚོད་ཅིང་ལ་ལ་འཁྱགས་ལ་བོར། །ལ་ལ་ཁྲམ་གཉག་ཚ་བླུགས་སྲེག་གིན་ཡོད། །ཅེས་ཟེར་ཞིང་དེ་དག་ཇི་ལྟ་བར་གཟིགས་པ་དང༌། ཉིད་ཀྱི་ཤུལ་ཟླ་ལ་ཡང་
སྔར་ནས་ཤི་བའི་གཉེར་ལས་བྱེད་དང་གྲྭ་རྒན་གྲོང་ཆོག་འབའ་ཞིག་ལ་འགྲོ་མཁན་མང་བར་འདུག་གསུངས་པ་སོགས་གཞན་དོན་དུ་མིང་བཏགས་ཀྱང་རང་ཉིད་ལ་ནོམ་པ་ཅུང་ཟད་ཙམ་གྱི་ཆེད་དང༌། བསམ་པ་རྣམ་པར་མ་དག་པའི་སྐྱོན་ཁོ་ན་ཡིན་ཕྱིར། དེ་ལྟ་བུའི་མྱོང་འགྱུར་གྱི་འབྲས་བུ། ཇི་སྐད་དུ། ལས་ནི་ས་ལ་མི་སྨིན། རྡོ་ལ་མི་སྨིན། ཟིན་པའི་ཕུང་པོ་འབའ་ཞིག་ལ་སྨིན་ཏེ། ཞེས་པའི་དོན་བསམ་པར་བྱ་བའི་སླད་དུ་འདིར་དམིགས་པའི་བྱེ་བྲག་དང་གཏམ་རྒྱུད་ལྟོ་སྦྱར་ནས་ཡུལ་སྐད་ཀྱི་གོ་བདེ་བར་བྱས་ཏེ་བཤད་པ་ལས། མངོན་པའི་ང་རྒྱལ་དང་བཅས་པའི་སྡང་ཞེན་གྱི་ཚིག་རྩུབ་རྣོན་པོས་གཞན་སྙིང་འབུགས་པའི་རྣམ་ཐར་ཙམ་དུ་དོགས་པར་མི་བྱ་སྟེ། འདི་ལྟར་རྒྱུད་དང་མན་ངག་གི་དགོངས་འགྲེལ་མཐའ་དག་ཆིངས་ཆེན་ལྔ་དང་ཡན་ལག་བཞིའི་སྒོ་ནས་རྩ་བ་ཕིགས་པར་འཆད་དགོས་ལ། དེའི་ཕྱིར་རིག་པ་རང་གྲོལ་ལས། ཁྱུང་ཆེན་མཁའ་ལྡིང་ལྟ་བུའི་བློས། །དོན་གྱི་ཁོག་རྣམས་ཕུབ་སྟེ་བཤད། །སྟག་མོའི་མཆོངས་སྟངས་ཤེས་རབ་ཀྱིས། །དོན་གྱི་ས་ཆེན་བཅད་དེ་བཤད། །རུས་སྦལ་ནུར་འགྲོས་ལྟ་བུའི་བློས། །ཡི་གེའི་འབྲུ་རྣམས་ཆོམས་པར་བཤད། །མུ་ཏིག་སྟར་བརྒྱུས་ལྟ་བུའི་བློས། །མན་ངག་དོན་དུ་བསྡེབས་ཏེ་བཤད། །ཅེས་ཡན་ལག་བཞིས་བཤད་ཚུལ་བསྟན་པ་ལྟར་ཚིག་གིས་དོན་བཀྲལ་བའི་ཕྱིར་རོ། །ཨེ་མ་ཚེ་རབས་
མང་པོའི་བསགས་ཁྱབ་དང༌། །རྩ་བརྒྱུད་བླ་མའི་བྱིན་རླབས་འཛོམ་པ་ལས། །རྣམ་གཡེང་སད་ལ་བསྐུར་བའི་དབེན་མལ་དུ། །སྙིང་པོའི་སྒྲུབ་པ་ལྷུར་ལེན་སྤྲང་པོའི་ལས། །སྡུམ་པར་སྲིད་འདིའི་བགྱི་བ་བསྒྲུབ་པ་ལ། །སྒོ་རྩར་མཚམས་ཐོ་བཞག་པའི་སྙན་གྲགས་རྔ། །བགྲང་བྱའི་དབྱུག་གུས་བརྡུང་བར་མ་ཁོམ་དེས། །ཆོས་བརྒྱད་གད་རྒྱངས་སྒྲོག་པའི་ཁེངས་པ་བསྙལ། །ཀྱེ་ཧོ་རྣལ་མའི་ངག་ལ་ད་དུས་ཀྱི། །ཚུལ་འཆོས་སྐྱེ་བོ་ཕལ་ཆེར་ཁྲེལ་སྲིད་དེ། །ཟང་ཐལ་ཉམས་བཟང་འཕར་བའི་གླུ་ཆུང་ལས། །རྒྱུ་དང་རློམ་སོགས་སྒྲིབ་པར་ཅི་ལ་འགྱུར། །ཅེས་ཀུ་སུ་ལུ་ཉམས་བཟང་འབར་བའི་སྐབས་ཀྱི་གླུའོ།། །།ལྔ་པ་ཐུགས་དམ་བསྐང་བའི་རིམ་པ་ལ་བདུན། ཚོགས་འཁོར་དང་ཚོགས་མཆོད་ཀྱི་རྣམ་དབྱེ། དེ་ཉིད་བཤམ་དགོད། བྱིན་བརླབ། ཕྱི་ནང་གསང་གསུམ་གྱི་བསྐང་བ། ཚོགས་ལྷག་བསྔོ་བ། དེ་ཁོ་ན་ཉིད་ཀྱི་བསྐང་བཤགས། བྱིན་བརླབ་གནས་སྤར་གྱི་རིམ་པའོ། །དང་པོ་ནི། རྡོ་རྗེ་དྲྭ་བ་ལས། བསོད་ནམས་ནང་ན་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང༌། །བགེགས་དང་བར་ཆད་ཞི་བ་དང༌། །ཕྱི་མ་རིག་འཛིན་རྒྱལ་བའི་ཞིང༌། །ཀུན་ཏུ་བཟང་པོ་ཐོབ་པར་འགྱུར། །ཞེས་གསུངས་པ་ལྟར་གནས་སྐབས་སུ་ཚོགས་གསོག་པ་དང་འགལ་རྐྱེན་སེལ་བ། མཐར་ཐུག་ཞིང་ཁམས་རྣམ་
པར་དག་པ་ལ་བགྲོད་པ་སོགས་མདོར་ན་རྡོ་རྗེ་ཐེག་པའི་འཇུག་སྒོའི་ཟབ་གནད་གལ་པོ་ཆེ་ཞིག་འདི་ཉིད་ཡིན་པ་དང༌། དེ་ལ་ཡང་སྤྱིར་ཚོགས་ཀྱི་འཁོར་ལོ་མཚན་ཉིད་ཚང་བ་ཞིག་བྱ་བ་ལ་གནས་དུས་ཡོ་བྱད་ཐམས་ཅད་ཕུན་སུམ་ཚོགས་པ་གཞུང་ནས་བཤད་ཚོད་དང་མཐུན་པ་ཞིག་དང༌། རྣལ་འབྱོར་པ་རྣམས་ཀྱང་དཀྱིལ་འཁོར་སུམ་ལྡན་གྱི་ནུས་པ་ཅན་ཐབས་ཤེས་ཆ་མཉམ་པར་ཚོགས་ཤིང༌། དེ་ཡང་རབ་ཇི་ཙམ་མང་བའི་ཚོམ་བུ། འབྲིང་ལྷ་གྲངས་དང་མཉམ་པ་ཐ་མའང་གཙོ་བོ་ཡབ་ཡུམ་ཙམ་ཚོགས་དགོས་པར་གསུངས་ཤིང༌། ད་ལྟའི་ལག་ལེན་དཀྱུས་མ་པ་འདི་དག་ལ་ཕོ་རྐྱང་ཚོགས་ན་དཔའ་བོའི་སྟོན་མོ། མོ་རྐྱང་ཚོགས་ན་དཔའ་མོའི་སྟོན་མོ་ཞེས་པ་ལས་ཚོགས་འཁོར་མཚན་ཉིད་པ་མི་འབྱུང་མོད། དེ་ཡང་གསང་སྔགས་ཀྱི་ཆོས་ཟབ་མོའི་ཉེ་ལམ་ལ་འདོད་པའི་ཡོན་ཏན་དང་ཉོན་མོངས་པ་མི་སྤང་ཞིང་བཟང་ངན་གཙང་བཙོག་ཐམས་ཅད་རོ་མཉམ་ཆེན་པོར་ལམ་དུ་ཁྱེར་དགོས་པ་ཡིན་ཚེ་དེ་དག་བློར་མི་ཤོང་བའི་ཐེག་དམན་ཉན་རང་དང༌། བྲམ་ཟེ་སྔགས་ལམ་ལ་མ་ཞུགས་པ། དབང་མ་ཐོབ་པ་རྣམས་དང༌། དམ་ཉམས་ལ་སོགས་པ་ཚོགས་གྲལ་དུ་མི་འཇུག །ཅིའི་ཕྱིར་ན་དེའི་ཟས་དང་སྤྱོད་ལམ་སོགས་བློར་ཤོང་ཞིང་ལམ་དུ་ཁྱེར་ནུས་པ་དགོས་ཕྱིར་རོ། །ཚོགས་ཀྱི་ཡོ་བྱད་ནི་ཤ་དགོངས་འདུས་རང་སྐད་སྨན་གཞུང་དུ། གླང་པོ་ཆེ། རྨ་བྱ། སེང་གེ རྟ་དཀར།
ཤང་ཤང་རྣམས་དངོས་སམ་ཚབ་རུང་དམིགས་བསལ་སྐུ་ལྔའི་ཐུགས་དམ་སྐོང་བའི་རྫས་སུ་བཤད་དོ། །ལྔ་དང༌། བདུད་རྩི་ལྔ་དང༌། དེ་ཡང་བདུད་རྩིའི་སྒྲུབ་གཞུང་རྣམས་སུ་དྲི་ཆེན་རྣམ་པར་སྣང་མཛད། བྱང་སེམས་རྡོ་རྗེ་སེམས་དཔའ། མཱཾ་ས་རིན་ཆེན་འབྱུང་ལྡན། རཀྟ་སྣང་བ་མཐའ་ཡས། དྲི་ཆུ་དོན་ཡོད་གྲུབ་པ་ཞེས་བཤད་ནས་རང་རང་གི་རིགས་དང་མཐུན་པའི་དངོས་གྲུབ་ཐོབ་པར་གསུངས་སོ། །ཤ་ཆང༌། སྒོག་གསོ་དཔྱད་ཀྱི་གཞུང་རྣམས་སུ་རིག་བྱེད་ཀྱི་གཏམ་རྒྱུད་དང་སྦྱར་ནས་འདི་ལ་ལྷ་མ་ཡིན་གྱི་ཁྲག་ཅེས་བཤད་ལ། དམེ་བར་བལྟ་བའི་རྒྱུ་མཚན་ཡང་དེ་ལྟར་ཡིན་ནོ། །བཙོང༌། ཉ་ཕག་ལ་སོགས་དམན་པ་དང་བཙོག་པར་བལྟ་དགོས་པ་ཐམས་ཅད་ཚོགས་པ་ཡིན་ཕྱིར། དེའི་དབང་གི་ཞིམ་མངར་གཙང་བཙོག་ཐམས་ཅད་ལ་བཟང་ངན་དང་གཙང་དམེའི་གཉིས་རྟོགས་མེད་པར༌། ཐམས་ཅད་མཉམ་པ་ཉིད་དུ་རྟོགས་ནས་བདུད་རྩིའི་རང་བཞིན་དུ་ལོངས་སྤྱོད་དགོས་པ་སྟེ། བདུད་རྩི་འབྱུང་བའི་རྒྱུད་ལས། ཀླུ་དང་བྲམ་ཟེ་གཙང་མ་ཟ། །དེ་དག་གྲོལ་བར་ངས་མ་བཤད། །ཁྱི་ཕག་གདོལ་བ་མི་གཙང་ཟ། །དེ་དག་གྲོལ་བར་ངས་མ་བཤད། །ཡང་དག་ངེས་པའི་ལུང་འདི་ཉོན། །རྣལ་འབྱོར་ཐབས་ལྡན་རྣམས་ཀྱིས་ནི། །ཆོས་སྐུ་གཅིག་ལ་ཐ་དད་པའི། །རིགས་ལྔའི་རང་བཞིན་འདི་སྤྱོད་དོ། །དེ་ལྟར་རྟོགས་ན་གྲོལ་བར་བཤད། །ཅེས་གསུངས་པ་དང༌། འོ་ན་མཚན་ཉིད་ཚང་བའི་རྣལ་འབྱོར་པའི་ཚད་གང་གིས་བྱེད་ཅེ་ན། རྒྱུ་ཤེས་པའི་མཚན་ཉིད་ལྟ་བའི་གདེང་དང་ལྡན་པས།
རྐྱེན་འཇུག་པའི་མཚན་ཉིད་ཏིང་ངེ་འཛིན་བསྒོམས་པའི་སྟོབས་ཀྱིས། ཉོན་མོངས་པ་སྤྱད་ཀྱང་འཆིང་བར་མི་ནུས་ཤིང་ལམ་གྱི་གྲོགས་སུ་གྱུར་པ་རྨ་བྱས་དུག་ཟོས་པ་ལྟ་བུའི་རྣལ་འབྱོར་པ་ཞིག་དགོས་ཏེ། དེས་ལམ་དུ་ཇི་ལྟར་ཁྱེར་སྙམ་ན། སྐྱེ་བོ་ཐ་མལ་པ་ལྟར་ཉོན་མོངས་པ་དང་གཙང་བཙོག་རང་ཁའི་རྗེས་སུ་མི་འབྲེང༌། ཉན་ཐོས་ལྟར་མི་སྤོང༌། རང་རྒྱལ་ལྟར་མི་འགེགས། བྱང་སེམས་ལྟར་མི་སྤྱོད། སྔགས་ཕྱི་པ་ལྟར་མི་བསྒྱུར་བར། དུག་ལྔ་དང་གཙང་བཙོག་འདོད་ཡོན་ལ་སོགས་པ་གང་ཡིན་ཀྱང་དེའི་རང་བཞིན་གྲ་མ་ཆག །གྲུ་མ་ཉམས་པར་ཉམས་སུ་མྱོང་ལ་ཞེན་པའི་མཐའ་ཏིལ་ཤུན་ཙམ་ཡང་མེད་པ་ལྟ་བའི་རྩིས་ཟིན་པ། རང་རྒྱུད་དུ་མ་ཤོར་བ། སྐམ་སྐྱེས་པ་ལ་ལམ་དུ་ཁྱེར་ནུས་པ་ཞིག་ལ་ཟེར་གྱི། ཧེ་བཛྲ་ལས། དུག་གི་དུམ་བུ་གང་ཉིད་ཀྱིས། །སྐྱེ་བོ་ཐམས་ཅད་འཆིང་བར་འགྱུར། །དུག་གི་དེ་ཉིད་ཤེས་པ་ཡིན། །དུག་གིས་དུག་ནི་འབིགས་པར་བྱེད། །ཅེས་གསུངས་པ་ལྟར་ཡིན་ལ། དེ་ལྟར་མ་ཡིན་པ་ད་ལྟའི་གདོལ་སྤྱོད་མཁན་རྣམས་ཀྱི་སྤྱོད་ཡུལ་དུ་གྱུར་པ་དུག་ལྔ་དང་འདོད་ཡོན་ལ་ཉོན་མོངས་རང་ཁ་མའི་གཤིས་སུ་གསང་སྔགས་ཀྱི་མིང་སྙན་པོའི་གསོབ་ཏུ་ཞུགས་ཏེ། སྦྱོར་བ་ཕྱིན་ཅི་ལོག་གི་ལམ་ལ་འགོམ་པ་དག་གིས་གབ་པའི་གསང་བ་ཇི་བཞིན་མ་རྟོགས་པས་ཏ་ན་ག་ན་ལ་སོགས་པའི་ལམ་སྒྲ་ཇི་བཞིན་པར་སྤྱད་ན།
མནར་མེད་པའི་དམྱལ་བ་ཆེན་པོར་བསྐལ་པ་མང་པོར་སྡུག་བསྔལ་མྱོང་དགོས་པ་གསར་རྙིང་གི་རྒྱུད་སྡེ་དུ་མ་ནས་གསུངས་ལ། རཱུ་ཏྲ་ཐར་པ་ནག་པོ་ཡང་གོལ་བའི་རྒྱུ་རྐྱེན་བཤད་མ་ཐག་པ་ཁོ་ནའི་སྐྱོན་ཡིན་པས་སོ། །དེས་ན་ལམ་འཁྱེར་གྱི་དོན་ཕྱིན་ཅི་མ་ལོག་པར་གོ་རྟོགས་མྱོང་བའི་འདུས་པའི་ཚོམ་བུ་ཐབས་ཤེས་སུ་ཚོགས་པའམ། རྐྱང་པར་ཚོགས་པ་ལ་སྔར་བཤད་པ་ལྟར་དེ་དང་དེའི་སྒྲ་བཤད་བཞག་པའོ། །གཉིས་པ་ཚོགས་ཤོམ་ནི། གཏེར་ཁ་འདི་ཁའི་རང་སྐད་ལས། སྣམ་རས་དྲི་མེད་དར་དཀར་གཙང་མའི་གདན༔ རིན་ཆེན་གས་ཆག་མེད་པའི་སྣོད་ནང་དུ༔ ཐབས་ཤེས་རྫས་ཚོགས་གཡོས་སྦྱོར་བཤོས་གཙང་དང་༔ ཤ་མར་ཐུད་སོགས་བཟའ་བ་སྣ་ཚོགས་དང་༔ ཀ་ར་བུ་རམ་ལ་སོགས་ཁ་མངར་སྐྱུར༔ སྟར་ཁ་རྒུན་འབྲུམ་ཤིང་ཏོག་སྣ་ཚོགས་དང་༔ རི་སྒོག་ཀླུང་སྒོག་ཉ་ཉུང་ལ་ཕུག་དང་༔ བྲ་ཁུར་སྣུམ་ཁུར་ཟས་སྣ་མང་པོ་དང་༔ ཤེས་རབ་རྫས་གྱུར་སྨན་རཀ་སུ་ར་དང་༔ སྦྲང་ཆང་བུར་ཆང་ཞོ་དང་འོ་མར་བཅས༔ ཐག་ཐུག་སྤོས་སྦྱོར་བདུད་རྩི་བཏུང་བའི་རྫས༔ མདོར་ན་ཚོགས་འོས་གྱུར་པ་ཅི་འབྱོར་བཤམ༔ ཁྱེའུ་ཕོ་མོ་ཐབས་ཤེས་རྫས་ལ་སོགས༔ གོ་རིམ་མ་ལོག་གཡས་གཡོན་མཛེས་པར་བཤམ༔ ཞེས་གསུངས་པས་མཚོན་ཏེ་མདོར་ན་སྲིད་པའི་འདོད་ཡོན་ལ་གཏོགས་
སོ་ཅོག་དང༌། བྱང་སེམས་དཀར་དམར་ལ་སོགས་དང་དུ་བླང་བའི་རྫས་མཆོག་ཆེན་དང་མཆོག་ཕྲན་ལ་སོགས་པ་ཐམས་ཅད་བཤམ་པའི་འོས་སུ་གྱུར་པ་སྟེ། དེའི་ནང་ནས་ཀྱང་མེད་དུ་མི་རུང་བའི་རྫས་མཁའ་འགྲོ་གསང་བའི་བརྡ་སྐད་དུ་བཱ་ལ་ཞེས་ཤ་དང༌། མ་དཱ་ན་ཞེས་ཆང་གཉིས་གཙོ་བོར་བཤམ་ཞིང༌། འོན་ཀྱང་ཚོགས་རྫས་དང་དགེ་བའི་ཆེད་དུ་ཡིན་ཞེས་སེམས་ཅན་དམིགས་ཕུད་ནས་གསོད་ཅིང༌། གཞན་དུ་དགོངས་དབང་གིས་གསུངས་པའི་གཏམ་རྒྱུད་དང༌། ལུང་འདྲེན་ལ་རེ་བ་འཆའ་བ་ནི་ཤིན་ཏུ་མི་རིགས་ཏེ། འདི་ནི་ཆོས་ལ་དམིགས་པའི་ཉེས་བྱས་ཞེས་སྡིག་པ་ལྷག་པར་ལྕི་བར་བཤད་པས་མཁས་པས་སྤང་ཞིང་གཞན་ལའང་བགྱིད་དུ་མི་སྩལ་ལོ། །གཞན་ཡང་བསྒྲལ་མཆོད་ཀྱི་ཆེད་དུ་མཆོག་ཕྲན་ཞེས་ཟན་ལིང་བཤམས་པའམ། མེད་ན་འོག་ཏུ་ཚོགས་སྤེལ་བའི་སྐབས་སུ་འཆད་པ་ལྟར་དང༌། དེ་ལྟར་ཚོགས་རྫས་ཐམས་ཅད་ཀྱང་ཐབས་རྫས་ཞེས་བཟའ་བའི་རིགས་གཡས་ཕྱོགས་དང༌། ཤེས་རྫས་ཞེས་བཏུང་བའི་རིགས་གཡོན་ཕྱོགས་སུ་བཤམ། དེ་བཞིན་དུ་སྒྲུབ་པ་པོ་རྣམས་ཀྱང༌། ཇི་སྐད་དུ། དབང་ཕྱུག་དབུས་སུ་ཁྲི་ལ་འཁོད། །ཕོ་རྣམས་གཡས་ལ་མོ་རྣམས་གཡོན། །རྣལ་འབྱོར་རིམ་པས་འདུག་པར་བྱ། །ཞེས་པ་ལྟར་དང༌། ཚོགས་རྫས་རྣམས་ལའང་ཀུན་རྫོབ་ཀྱིས་སྦྱང་བ་
མེ་རླུང་ཆུ་གསུམ་གྱིས་བསྲེགས་གཏོར་བཀྲུ་བ་སོགས་ཕྱག་ལེན་ལྟར་བྱ་ཞིང༌། བདུད་རྩིའི་ཟེགས་མ་འཐོར། སྤྲོ་ན་འདི་ནས་བཟུང་སྟེ་ཚོགས་ལས་མཐར་མ་ཕྱིན་གྱི་བར་དུ། ལས་ཀྱི་རྡོ་རྗེའམ། རྒྱལ་ཐེབས་ཀྱིས་རྡོ་རྗེ་རྒྱལ་པོ་ལ་ཕྱག་སྔོན་དུ་འགྲོ་བའི་ཐད་ཀ་ཐད་ཀའི་སྙན་གསན་ཞུ་བའི་ཚིག་ཆོ་ག་རྒྱས་པའི་སྐབས་སུ། ལས་བྱང་ཚངས་པའི་སྒྲ་དབྱངས་ལས་འབྱུང་བ་ལྟར་རམ། དེ་ཙམ་མ་ནུས་ན་གསང་སྔགས་སྤྱི་ཁྱབ་ཏུ་གྲགས་པ་ལྟར་བྱ་བ་ཡིན་ནོ། །གསུམ་པ་བྱིན་བརླབ་བྱ་བ་དངོས་ནི། སྔར་སྐོང་བཤགས་ཀྱི་དུས་རང་ལུས་ཐ་མལ་པར་འདུ་ཤེས་པ་དེ་ཉིད་སྐད་ཅིག་དྲན་རྫོགས་ཀྱིས་བསྐྱེད་རིམ་སྔ་མ་ལྟར་བཟུང་ལ། ཨཱོྃ་བཛྲ་ཨ་མྲྀ་ཏ་སོགས་བདུད་རྩི་འཁྱིལ་བའི་སྔགས་བརྗོད་ཅིང༌། དེའི་སྔགས་དོན་ནི། ཨཱོྃ་བཛྲ་ནི་མི་འཇིགས་པའི་རྡོ་རྗེ། ཨ་ནི་སྐྱེ་བ་མེད་པ་ཆོས་ཀྱི་དབྱིངས། མྲྀ་ནི་བདུད་རྩི་རྣམ་དག །ཏ་ནི་འཁོར་བ་སྟོང་བྱེད། ཀུཎྜ་ལི་ནི་འཁོར་གསུམ་ཡོངས་དག །ཧ་ན་ཧ་ན་ཧཱུྃ་ཕཊ་ནི་ཉེས་སྐྱོན་ཐམས་ཅད་དག་པའོ། །དེ་ནས། ཞལ་ཟས་ཚོགས་ལ་ཉེས་སྒྲིབ་མ་མཆིས་ཀྱང་༔ ཞེས་སོགས་ཀྱིས་ཀུན་རྫོབ་མཚན་མའི་རྫས་རྣམས་ལ་དམེ་ཡུགས་དང་ཉམས་གྲིབ་ལ་སོགས་པས་གློ་བུར་དུ་སྦགས་པ་རྣམས་ཡེ་ཤེས་ཀྱི་མེ་རླུང་ཆུ་གསུམ་གྱིས་བསྲེག་གཏོར་བཀྲུ་བའི་དམིགས་པ་དང་སྔགས་དོན་ནི་སྔར་མཆོད་པའི་སྐབས་
ནས་བཤད་ཟིན་ཏོ། །དེ་ལ་སྦྱངས་སྤེལ་བསྒྱུར་གསུམ་གྱི་རང་བཞིན་གྱི་མཐུ་ལས་སྣང་སྲིད་སྣོད་བཅུད་ཐམས་ཅད་ཚོགས་ཀྱི་འཁོར་ལོའི་རོལ་པ་འབའ་ཞིག་ཏུ་བལྟས་ནས། ཨཱོྃ་ལས་འོད་འཕྲོས་དབྱིངས་དང་མཉམ་པར་སྤེལ༔ སོགས་མཐར་ཆགས་སུ་བྱ་བ་དང༌། འཇིག་རྟེན་ཁམས་ཀྱི་འདོད་ཡོན་གྱི་བཅུད་ཐམས་ཅད་བདག་གི་འོད་ཟེར་གྱིས་བསྡུས་ནས་ཚོགས་ལ་བསྟིམ་པའི་དམིགས་པ་བྱ་བ་ནི་ཤིན་ཏུ་ཟབ་པ་ཡིན་ནོ། །བཞི་པ་སྐོང་བའི་ཆོ་ག་ལ་གསུམ། ཕྱི་ཐུན་མོང་གི་མཆོད་པས་བསྐང་བ། ནང་ཐུན་མོང་མ་ཡིན་པའི་རྫས་ཀྱིས་བསྐང་བ། གསང་བ་ཁྱད་པར་བླ་མེད་ཚོགས་ཀྱིས་བསྐང་བའོ། །དང་པོ་ནི། དེ་ལ་སྤྱིར་སྐོང་བཤགས་རང་ལ་ཆེད་དུ་དམིགས་ནས་བཤམ་དགོས་པའི་མཆོད་རྫས་ཁྱད་པར་བ་རྣམས་བསྐང་བ་འདིའི་དོན་ཁོ་ན་ཡིན་པ་དང༌། དེའི་ཚུལ་གྱི་སྐོང་ཆོག་འདི་དག་རྣམས་ཀྱང་སྔར་བཤགས་པའི་སྐབས་ལོ་རྒྱུས་བརྗོད་པ་ལྟར་གཉེན་པོའི་སྒོ་ནས་བྱ་བའི་བསགས་སྦྱངས་ཀྱི་གཙོ་བོ་ཡིན་ཕྱིར། འདི་དག་གི་ཆོ་ག་རྣམས་ཡན་ལག་ལྟ་བུར་མ་སོང་བར་ཤིན་ཏུ་སྤྲོས་ནས་དལ་གྱིས་བྱ་ཞིང༌། དམིགས་པ་དང་བཅས་འདོན་སྒོམ་ཟུང་འབྲེལ་དུ་གནད་ལ་བཀར་བའི་ཡུལ་ཡིན་ཀྱང༌། ད་ལྟ་ལག་ལེན་པ་ཕལ་གྱིས་སྐོང་ཅོག་འདི་ཞར་བྱུང་དུ་བཏང་ནས་ཚིག་ཤར་བཏོན་ཚར་བ་ཙམ་གྱིས་རྗེས་སུ་ཡི་རང་བ་བྱེད་ཅིང༌། བར་རྩ་ལག་ཏུ་ཆོས་སྐྱོང་གི་བསྐང་སོ་
སྒྲ་འུར་ཅེ་ཆེ་དང༌། དམིགས་བསལ་མ་ཡིན་པའི་འདོན་འདོན་ཆོས་སྤྱོད་རྒྱ་ཆེ་མུ་མེད་དུ་བྱེད་མོད། ན་རཀ་སྐོང་བཤགས་ལ་དགོས་རྒྱུའི་གཙོ་བོ་འདི་ཞར་བྱུང་གཡེས་མེད་དུ་བག་ལ་ཞ་བ་འདི་ནི་ཅུང་ཟད་འཇིག་རྟེན་སྣང་ཤས་ཀྱི་ཕྱོགས་སུ་ལྷུང་བར་ངེས་སོ། །དེས་ན་དུས་མཐར་འབྱོན་པའི་རྡོ་རྗེའི་སྤུན་གྲོགས་རྣམས་ནས་རང་གཞན་ཕ་མར་གྱུར་པའི་སེམས་ཅན་ཤི་གསོན་ཐམས་ཅད་ཀྱི་དོན་ལ་དགོངས་ནས་འདི་དག་རྣམས་འབད་པ་ཆེན་པོས་དོན་གཉེར་གཟབ་རྒྱས་སུ་མཛད་པར་ཞུ་ཞེས་སྔོན་དུ་གསོལ་ནས། མཆེད་ལྕམ་རྣམས་ཆས་གོས་དང་རྒྱན་ཕྲེང་ལ་སོགས་པས་མཛེས་པར་བྱས། སྔར་མཆོད་པའི་སྐབས་སུ་བཤད་པའི་མཚན་ཉིད་དང་ལྡན་པའི་ཕྱི་མཆོད་རྣམས་ལག་ཏུ་ཐོགས་ནས་དཀྱིལ་འཁོར་ལ་བསྐོར་བ་བྱེད་ཅིང༌། ཀུན་བཟང་མཆོད་སྤྲིན་གྱི་ཏིང་འཛིན་དང་ལྡན་པས་སྙན་པའི་དབྱངས་དང་བཅས། ཧཱུྃ་ཧྲཱིཿ སྟོང་གསུམ་འདིའམ་གཞན་དག་ན༔ སོགས་བརྗོད། གལ་ཏེ་བསྐོར་བ་སོགས་སྤྲོས་པས་མ་ལྕོགས་ན། ལས་ཀྱི་རྡོ་རྗེས་ཕྱི་མཆོད་རྣམས་འབུལ་ཚིག་དང་བསྟུན་ནས་བཏེག་ཅིང་སོ་སོར་འབུལ་བའི་སྟངས་ཀ་བྱ་ཞིང༌། གཞན་ཡང་ལས་གཞུང་ལས་བྱུང་བའི། ཧཱུྃ་ཧྲཱི༔ དངོས་སུ་འབྱོར་བཤམས་ཡིད་ཀྱིས་རྣམ་སྤྲུལ་པའི༔ སོགས་ཀྱང་བརྗོད། གཉིས་པ་ལ་བཞི། བདུད་རྩི་སྨན་གྱིས་བསྐང་བ། དམར་ཆེན་རཀྟས་བསྐང་བ། རྨད་བྱུང་གཏོར་མས་བསྐང་བ། སྣང་གསལ་མར་མེས་བསྐང་བའོ། །དང་པོ་ནི།
བདུད་རྩི་བརྒྱ་རྩའི་སྣོད་རྣམས་སྒྲུབ་པ་པོ་ཀུན་ལ་བཀྱེ་ཞིང་སོ་སོའི་ལག་པ་གཡས་ཀྱིས་བཟུང༌། གཡོན་པའི་སྲིན་ལག་གིས་སྦྲེང་ཞིང་སྔར་གྱི་དམིགས་པ་དྲན་པར་བྱས་ལ། ཧཱུྃ་ཧྲཱི༔ ཀུན་གཞི་ཀློང་ཡངས་བྷན་དྷ་རུ༔ སོགས་བརྗོད་ཅིང་འདིའི་གོང་དུ་བདུད་རྩི་བྱིན་བརླབ་བྱ་བའི་ལུགས་ཤིག་ཡི་གེ་རྙིང་པ་ལ་སྣང་སྟེ། སྔར་ནས་ཐུན་མོང་དུ་སོང་བས་ཧ་ཅང་དགོས་པ་ཡོད་པར་མ་མངོན་པས་བཏང་སྙོམས་སུ་བཞག་གོ །རྒྱས་པར་སྤྲོ་ན་ལས་གཞུང་ལས། ཧྲཱིཿ བྷནྡྷ་ཁོར་ཡུག་ཡངས་པའི་སྣོད་ཆེན་དུ༔ སོགས་ཀྱང་བྱ་ཞིང་གཏོར་མ་ལ་ཡང་སྦྲེང་ངོ༌། །གཉིས་པ་ནི། སྔ་མ་ལྟར་ལས་རཀྟའི་སྣོད་གཡོན་པས་བཟུང་ལ། གཡས་པས་འཕྱར་ཞིང༌། དམིགས་འདིའི་སྨན་རཀྟ་གཉིས་པོ་དོན་དམ་མཚན་མེད་ཀྱི་བསྐང་རྫས་ཡིན་ཞིང༌། དེའི་དམིགས་པའི་ཞིབ་འགྲེལ་ནི་ནོར་བུའི་དོ་ཤལ་ནས་གསུངས་པ་ལྟར་དང༌། འདིར་ནི་རེ་ཞིག་ལས་དང་པོ་བས་དེ་དོན་ཤེས་རྒྱུད་ལ་མི་འབྱོར་བས་སྤྱི་འགྲོ་ལྟར་བཤད་དོ། །པ་ལས་གཞུང་གི་སྐབས་ལྟར་དྲན་པས། ཧཱུྃ་ཧྲཱིཿ སྤྱི་གཙུག་བདེ་ཆེན་འཁོར་ལོའི་བྷནྡྷ་རུ༔ ཞེས་སོགས་དང༌། རྒྱས་སྤྲོས་སུ། ཧྲཱིཿ དུང་ཆེན་སྣོད་དུ་དམར་ཆེན་དབའ་རླབས་འཕྱོ༔ སོགས་ཀྱིས་དབུལ། གསུམ་པ་གཏོར་མས་བསྐང་བ་ནི། འདིར་དམིགས་སུ་མ་བསལ་ཡང་གཅོད་དམིགས་དང་སྦྲེལ་བར་རང་ལུས་ཀྱི་ཕུང་པོ་གཞུང་ཚིག་དང་མཐུན་པའི་བདུད་རྩིའི་རང་བཞིན་དུ་སྦར་ཞིང༌། རང་རིག་ཡེ་ཤེས་ཀྱི་འཁོར་ལོ་ལོགས་སུ་ཕྱེ་ནས་འབུལ་བ་བགྱིས་པའམ། བསྒྲུབ་བྱ་གཞན་ལ་དམིགས་པ་ཁ་བསྒྱུར་
བའང་རུང༌། རང་གཞན་གྱི་དམིགས་བྱའི་ནད་གདོན་སྡིག་སྒྲིབ་ཐམས་ཅད་བཀུག་ནས་ཕུང་པོ་ལ་བསྟིམ། དེ་བདུད་རྩིའི་རང་བཞིན་དུ་སྤར་ནས་འབུལ་བ་ནི་མན་ངག་གི་ཁུངས་དང་འབྲེལ་པ་ཟབ་ཁྱད་ཅན་ཡིན་ནོ། །སྐོང་ཚིག་དངོས་ནི། ཧཱུྃ་ཧྲཱིཿ བྷནྡྷ་འབར་བའི་གཏོར་གཞོང་དུ༔ ཞེས་སོགས་དང་རྒྱས་སྤྲོས་སུ་སྐོང་གཏོར་བཞི་པོ་ཡང་ཐད་ཀར་ཚིག་གོང་མ་ནས་བཏེག་ཅིང༌། ཧཱུྃ་ཧྲཱིཿ དབྱིངས་རིག་མ་བུའི་བྱུར་འདྲེ་རབ་བསྒྲལ་ཏེ༔ སོགས་ཀྱང་བརྗོད། བཞི་པ་ནི། དཔོན་སློབ་ཐམས་ཅད་ལག་པ་གཡས་པ་བསྣོལ་ཐབས་ཀྱིས་སྲིན་ལག་སྦྲེལ་བའམ། ཡང་ན་བགྲང་ཕྲེང་གིས་སྦྲེལ། མར་མེ་རྣམས་སྤར་ཞིང་ལག་གཡོན་དུ་ཐོགས་ལ། ཧཱུྃ་ཧྲཱིཿ བརྡལ་ཁྱབ་པགས་པའི་ཀོང་བུ་རུ༔ སོགས་དང༌། དེའི་རྗེས་འབྲེལ་དུ་མར་མེའི་སྨོན་ལམ་གདབ་པ་ནི། དཀྱིལ་འཁོར་ལ་བསྐོར་བ་བྱ་ཞིང༌། ཧཱུྃ་ཧྲཱི༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ རྗོ་རྗེ་སློབ་དཔོན་གཉེན་གྱིས་དབུ་བཟུང་ནས༔ སོགས་པས་འདུན་པ་རྩེ་གཅིག་ཏུ་སྨོན་ལམ་བཏབ་ན། ཤི་གསོན་གང་ལ་ཡང་ཕན་ཡོན་གྱི་ནུས་པ་ཤིན་ཏུ་ཆེ་བས་སོ། །གསུམ་པ་ཁྱད་པར་བླ་མེད་ཚོགས་ཀྱིས་བསྐང་བ་ལ་གཉིས། ཕྱི་ལྟར་དུ་བསྐང་བ་དང༌། ནང་ལྟར་དུ་བསྐང་བའོ། །དང་པོ་ལ་ལྔ། ཚོགས་ཕུད། བསྒྲལ་མཆོད། ཚོགས་བཤགས། གནམ་ཕུད། གཙང་ལྷག་གོ །དང་པོ་ནི། ཚོགས་ཕུད་ཆ་ལྔར་བཅད་པའི་དང་པོ་ཐུགས་དམ་བསྐང་བའི་སླད་དུ་ཡིན་གྱིས་ཚོགས་རྫས་རྣམས་ཀྱི་ཕུད་ཅི་འཛོམ་ཚོགས་པ།
གཉིས་པ་གཞུང་འདི་ཀའི་སྒོས་ཆོས་ཚོགས་བཤགས་ཀྱི་སྔོན་ལ་བསྒྲལ་བསྟབ་འབྱུང་བ་ཡིན་པས་ཟན་ལིང་མེད་ན་ཚོགས་ཟན་དང་ཤ་དུམ། གསུམ་པ་ཁོན་གཅུགས་སྦྱང་བའི་ཆེད་དུ་ཡིན་པས་ཚོགས་ཟན་དང་ཚོགས་རྫས་ཀུན་འཛོམ། བཞི་པ་གནམ་ཕུད་ཀྱི་ཆེད་དང༌། ལྔ་པ་གཙང་ལྷག་གི་དོད་གོང་འདྲ་རྣམས་བཤམས་ལ། ལས་ཀྱི་རྡོ་རྗེས་ཕུད་དང་པོ་དཀྱིལ་འཁོར་གྱི་མདུན་དུ་མཉྫིའི་ཁར་ཕུལ་ལ་སྨན་རག་བྲན་ཞིང༌། ཚོགས་ཕུད་འདོད་ཡོན་གྱི་གཏེར་ཆེན་པོའི་རང་བཞིན་དུ་གྱུར་པ་དཀྱིལ་འཁོར་བའི་ལྷ་ཚོགས་ཐམས་ཅད་དགྱེས་ཤིང་ཚིམ་ནས་དངོས་གྲུབ་རྣམ་པ་གཉིས་བདེ་བླག་ཏུ་སྩོལ་བར་དམིགས་ལ། ཧཱུྃ་ཧྲཱིཿ དུར་ཁྲོད་གསང་ཆེན་རོལ་པའི་དཀྱིལ་འཁོར་འདིར༔ སོགས་ཀྱིས་དབུལ་ལ་སྔགས་དོན་ནི། ག་ན་ཞེས་པ་ཐབས་ཤེས་ཟུང་འཇུག་གི་ཚོགས་དང༌། ཙཀྲ་ནི་འཁོར་ལོ་སྟེ། བདེ་སྟོང་ཟུང་འཇུག་ཡེ་ཤེས་ཀྱི་འཁོར་ལོས་ཉོན་མོངས་པའི་དྲྭ་བ་གཅོད་པར་མཚོན་པ་དང༌། པཱུ་ཛ་ཧོ༔ ནི་མཆོད་པ་བཞེས་ཤིག་པའོ། །གཉིས་པ་བསྒྲལ་བསྟབ་ལ་གཉིས། རྣམ་པར་མ་དག་པའི་རིང་ལུགས་དགག་པ་དང༌། བསྒྲལ་བསྟབ་ཀྱི་རིམ་པ་དངོས་བསྟན་བཤད་པའོ། །དང་པོ་ནི་གཞུང་འདི་ལ་གབ་སྦས་ཀྱི་དབང་དུ་གདབ་ལས་གསལ་ག་ཅན་མ་གསུངས་པར་བརྟེན་ཆོ་གའི་སྙིང་པོ་མ་ལོན་པ་ཕལ་གྱིས་ཚིག་ཤར་བཀླག་ཐབས་སུ་བསྒྲལ་མཆོད་འབུལ་བ་ནི་ཤིན་ཏུ་མི་རིགས་ཏེ། རིགས་མཐུན་གྱི་གཞུང་ནས་གདབས་ལས་སྦྱོར་དགོས་སོ། །ཅིའི་ཕྱིར་ན་འོག་
ཏུ་འབྱུང་མ་ཐག་གི་བསྟབ་པའི་ཚིག་གིས་གསལ་བར་གོ་ནུས་ལ། གནོད་བྱེད་གཟུགས་ཕུང་ཤ་ཁྲག་ཞལ་དུ་བསྟབ༔ ཅེས་འབྱུང་བས་སོ། །གཏི་མུག་གིས་མདོངས་པ་དག་ཆོ་ག་འགྲེལ་པ་པོའི་བློ་བཟོ་སྟེ། གཞུང་ལ་མ་གསལ་ཞིང་སྔོན་གྱི་མཁས་པ་ག་གེ་མོ་དང༌། སྔགས་འཆང་ཆྒཻ་མོའི་དུས་ནས་འདི་ག་ཡིན་པ་ལ། ཞེས་གོར་མོའི་སྟེང་དུ་ཁབ་འཛུགས་པ་ལྟ་བུའི་རང་གདངས་ལ་ཅིས་བསྙོན། འདི་ལྟར་རྒྱུད་གཞུང་ཐམས་ཅད་ལ་སྣོད་མིན་ལ་གསང་ཕྱིར་གཅུས་དཀྲུགས་གབ་གསུམ་གྱིས་སྦས་པ་ཆེས་མང་བར་འབྱུང་བ་དག །ལུང་དང་རིག་པ་གཉིས་ཀའི་སྒོ་ནས་གཏན་ལ་འབེབས་དགོས་ཕྱིར་སྔ་འགྱུར་གྱི་ཆོ་ག་ཐམས་ཅད་ལ་བརྟགས་པས་གོ་སླ་མོད། དེ་ཡང་མ་ཡིན་ན་རིག་འཛིན་ཆེན་པོའི་དྲི་ལེན་དོགས་གཅོད་དུ། དུར་ཁྲོད་གསང་ཆེན་རོལ་པའི་ཚིག་དེ་ཚོགས་མཆོད་འབུལ་བ་ཡིན། དེ་ནས་ཚོགས་སྣོད་དེ་ཧོམ་ཁུང་དང༌། ཚོགས་རྫས་དགྲ་བགེགས་ཀྱི་གཟུགས་ཕུང་དུ་བསམས་ལ་དགུག་གཞུག་བྱས་ནས། བདག་གཞན་ལྷ་སོགས་དང༌། གནོད་བྱེད་དགྲ་བགེགས་རུ་ཏྲ་བདུད་དཔུང་ལ། སོགས་ཀྱིས་བསྒྲལ་ནས་གཏུབས་ཏེ་སྦྲན་ཞིང༌། ཧཱུྃ་ཧྲཱིཿ བསྟབ་པོ་བསྟབས་པོ་ལྷ་ཚོགས་ཞལ་དུ་བསྟབ༔ སོགས་བྱ་བ་ནི་དགོངས་འདུས་པ་གཞན་ཐམས་ཅད་མཛད་
འདུག་ཀྱང་ངེད་རང་ཚོ་རྩིང་ཆོས་སུ་ཤོར་བར་སྣང་ངོ༌། །ཞེས་གླེང་བསླངས་ནས་སྒྲུབ་བྱེད་གསུངས་པ་དང༌། དཀར་པོ་བྱམས་པ་དགེ་བའི་བློ་གྲོས་ཀྱིས་མེ་ཏོག་ཕྲེང་མཛེས་ལ་འབྲུ་འགྲེལ་མཛད་པའི་ཚོགས་འདིའི་སྐབས་སུ་དེ་ནས་སྐབས་འདིའི་ཚོགས་ལ་དགུག་གཞུག་དང༌། བསྒྲལ་ལས་སོགས་བྱས་ལ་བསྟབ་པ་དངོས་ནི། ཧཱུྃ་ཧྲཱིཿ བསྟབ་པོ་བསྟབས་པོ་ལྷ་ཚོགས་ཞལ་དུ་བསྟབ༔ ཞེས་སོགས་གསུངས་པས་ཀྱང་ཆེས་ཆེར་གསལ་བར་མ་ཟད། བློ་འབྲིང་ཡན་ཆད་ཀྱིས་བརྟགས་ན། ཟན་དང་རྩམ་པ་གཉིས་རྒྱུད་གཅིག་ཀྱང་གཡོས་སྦྱོར་གྱིས་ཁྱད་ལས་ལྡོགས་པ་ཐ་དད་དུ་ཡོད་པ་སུ་ཞིག་གིས་མི་གོ །དེས་ན་གདབ་ལས་ཚུལ་བཞིན་དུ་མ་བྱས་ན་བསྒྲལ་མཆོད་ཀྱི་རྣམ་གཞག་མི་ཚང་བས་ཤེས་ལྡན་དག་རིག་པ་དངས་སྙིགས་འབྱེད་པར་རིགས་སོ།། །།གཉིས་པ་ལ་གཉིས། གདབ་ལས་དང༌། བསྟབ་པའི་ཆོ་གའོ། །དང་པོ་ལ་གསུམ། བཙོན་དམིགས་བསྐྱེད་པ། དགུག་འདྲེན་བྱ་བ། རྫོང་ཕྲང་སྲོག་གསུམ་གྱི་སྒོ་ནས་བསྒྲལ་ལས་བྱ་བའོ། །དང་པོ་ནི། ཟན་གྱི་ཉ་བོ་ཡོད་ན་འཁོར་བ་རུ་ལོག་གི་རྟེན་འབྲེལ་དུ་མགོ་བོ་ལྷོ་ནུབ་དང་རྐང་པ་བྱང་ཤར་དུ་བསྟན་ཏེ། གན་རྐྱལ་དུ་གཞག་པའམ། ཡང་ན་འཁོར་བ་ལ་རྒྱབ་ཀྱིས་ཕྱོགས་པའི་རྟེན་འབྲེལ་དུ་མགོ་བོ་རྒྱབ་ཏུ་བསྟན། མྱང་འདས་ལ་མངོན་པར་ཕྱོགས་པའི་རྟེན་འབྲེལ་དུ་གདོང་པ་རང་ལ་བསྟན་ཏེ་གཞག །
བླ་སྲོག་སྐད་ཅིག་ལ་ཆགས་པའི་རྟེན་འབྲེལ་དུ་འཁོར་བའི་རྒྱུ་རྟེན་འབྲེལ་བཅུ་གཉིས་ཀྱི་རྩ་བ་རཀྟ་བྲན། ཙ་ར་མེད་ན་ཚོགས་ཟན་དང་ཤ་དུམ་ལ་སྔ་མ་ལྟར་དམིགས་རྟེན་བཅས་ལ། ཏིང་ངེ་འཛིན་གྱི་ངར་དང་ལྡན་པས་འདོན་དམིགས་ཟུང་འཇུག་ཏུ། བཀའ་བརྒྱད་བདེ་འདུས་ལས་བྱང་ལས་བྱུང་བའི་ཚིག །ཨེ་ལས་གནམ་ལྕགས་འབར་བའི་ཁང་སྒྲོམ་ནང་༔ ནྲྀ་དང་ཏྲི་ལས་གནོད་བྱེད་དགྲ་བགེགས་རྣམས༔ ཡན་ལག་ལྕགས་སྒྲོག་གིས་བཅིངས་ཉམ་ཐག་པ༔ མངོན་སུམ་ལྟ་བུར་གསལ་བ་ཉིད་དུ་གྱུར༔ ཅེས་པས་ཇི་ལྟ་བ་བཞིན་དུ་བསམ། གཉིས་པ་ནི། ཀུན་མཁྱེན་ཆོས་ཀྱི་རྒྱལ་པོའི་བཞེད་པ་ལྟར། རྡོར་དྲིལ་དང་བཅས་པའི་རྡོ་རྗེ་ཁུ་ཚུར་བསྡམས་པ་ལས། གཡོན་པའི་མཛུབ་མོ་བརྐྱང་བའི་སྟེང་དུ། གཡས་པའི་མཛུབ་མོ་ལྕགས་ཀྱུ་ལྟར་རྩེ་བཀུག་པ་དགུག་པ་ལྕགས་ཀྱུའི་ཕྱག་རྒྱ། དེ་ཉིད་ལས་ཞགས་པ་ལྟར་མཛུབ་མོའི་རྩེ་ཟླུམ་པོར་བཀུག་པ་འཆིང་བ་ཞགས་པའི་ཕྱག་རྒྱ། དེ་ཉིད་ལས་མཐེབ་མཛུབ་གཉིས་ཀྱི་གཅིག་གི་ནང་དུ་གཅིག་པོ་ཨ་ལུང་ལྟར་སྦྲེལ་བ་བསྡམས་པ་ལྕགས་སྒྲོག་གི་ཕྱག་རྒྱ། རྡོ་རྗེ་ཁུ་ཚུར་གཉིས་ཀྱི་མཐེ་བོང་ནང་དུ་བཀུག་ལ་མྱོས་པ་དྲིལ་བུའི་ཕྱག་རྒྱ་སྟེ། ཡང་ན་སྤྱི་འགྲེ་རྡོ་རྗེ་སྙིང་པོ་རྒྱན་གྱི་རྒྱུད་
ལས་གསུངས་པ་ལྟར་བྱས་ལ་བདག་མདུན་གྱི་ཐུགས་ཀའི་འོད་ཟེར་གྱིས་དཀྱིལ་འཁོར་གྱི་ཁྱམས་ལ་གནས་པའི་དྲེགས་སྡེ་སྤྱི་དང༌། ཁྱད་པར་སྲིན་ཕྱོགས་ཀྱི་དཀྱིལ་འཁོར་ཆེན་པོའི་བར་ཁྱམས་ལ་གནས་པའི་བཀའ་སྡོད་འཛིན་གིང་འགུགས་བྱེད་ཀྱི་རྡོ་རྗེ་གིང་མོ་གཉིས་ཀྱི་ཐུགས་རྒྱུད་བསྐུལ་བས་དེ་དག་རྣམས་སྤྲུལ་པའི་ཕོ་ཉ་དཔག་ཏུ་མེད་པ་དང་བཅས་དགུག་པའི་ལས་ལ་བརྔམས་ཤིང༌། རེངས་པས་ཞིང་བཅུ་ཚང་བའི་གཟས་པོའི་བླ་སོགས་འཕྲོག་པར་བལྟས་ལ། སྔ་མའི་འཕྲོ་ལས། ཚིག་ཟུར་བསྒྱུར་བ། ན་མོ་རྩ་བརྒྱུད་བླ་མ་དགོངས་པ་འདུས་པའི་ལྷ། །ཁྱད་པར་དྲེགས་པའི་དེད་དཔོན་ཉེར་གཅིག་སོགས། །ཏིང་འཛིན་སྔགས་དང་ཕྱག་རྒྱའི་ནུས་མཐུ་ཡིས། །དགྲ་བགེགས་ཐམས་ཅད་ཁུག་ཅིག་གཟུགས་ལ་ཕོབ། །ཅེས་པའི་མཐར། ནྲྀ་ཏྲི་རཱུ་ཏྲ་ཨངྐུ་ཤ་ཡ་ཛ༔ རང་རང་གི་ཕྱག་རྒྱ་དང་བཅས། ཛཿཧཱུྃ་བཾ་ཧོཿཞེས་བརྗོད་པས་རཱུ་པ་དང་དབྱེར་མེད་དུ་འདྲེས་པར་བལྟའོ། །གསུམ་པ་བསྒྲལ་བའི་ལས་ལ་རྣམ་པ་གསུམ། དམིགས་པའི་བྱེ་བྲག །ཕུར་བའི་རྣམ་དབྱེ། ཚེ་ཁྲུས་གནས་གསུམ་གྱི་དགོངས་པས་ཚར་གཅོད་པའོ། །དང་པོ་ལ་གསུམ་ཚན་བཞི་སྟེ། གསལ་བ་གསུམ་དང་ལྷ་གསུམ་དང༌། །ལྟ་སྒོམ་སྤྱོད་གསུམ་རྫོང་ཕྲང་སྲོག །ཅེས་བསྡོམས་པ་ལས། དང་པོ་ནི། མི་ལྡོག་པའི་ཕྱིར་དུ་སྒྲོལ་
མཁན་གྱི་རྣལ་འབྱོར་པ་ལྷར་གསལ་བ། མི་རྡུགས་པའི་ཕྱིར་དུ་སྒྲོལ་བྱེད་ཀྱི་ཕུར་པ་ཡཀྴ་ཀ་ལར་གསལ་བ། མི་འབྱམ་པའི་ཕྱིར་དུ་བསྒྲལ་བྱའི་རཱུ་ཏྲ་དངོས་སུ་གསལ་གདབ་པའོ། །གཉིས་པ་ནི། གསང་རྫོགས་རྩ་རྒྱུད་ལས། བདག་ཉིད་ལྟ་སྤྱོད་ཟུང་འཇུག་པས༔ ཕུར་བ་འདྲེལ་ཞིང་དྲགས་སྔགས་བཟླས༔ ཞེས་གསུངས་པ་ལྟར། ལྟ་བའི་གདེང་གིས་ཟིན་པ་སྟོང་ཉིད་གྱད་ཀྱི་ལྷ། བསྐྱེད་རིམ་གྱི་ངར་དང་ལྡན་པ་གཉེན་པོ་ཡེ་ཤེས་ཀྱི་ལྷ། ཟུང་འཇུག་ལས་ཕོ་ཉ་འགྱེད་པ་སྤྱོད་པ་ལས་ཀྱི་ལྷའོ། །གསུམ་པ་ལ་གཉིས། ལྟ་སྒོམ་སྤྱོད་གསུམ་གྱི་རྒྱབ་བརྟེན་དང་ཐུན་མོང་མ་ཡིན་པའི་ཚད་མེད་བཞིའི་དག་སྦྱོར་རོ། །དང་པོ་ནི། རང་བཞིན་གྱིས་སྒྲོལ་བའི་ལྟ་བ། སྙིང་རྗེས་སྒྲོལ་བའི་སྒོམ་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པའོ། །གཉིས་པ་ནི། སྙིང་རྗེ་ཁྲོས་པའི་ཚུལ་གྱིས་གདུག་པ་ཅན་རྗེས་སུ་འཛིན་པའི་བྱམས་པ། ཤིན་ཏུ་བརྩེ་བ་ཆེན་པོས་མྱུར་དུ་སྒྲོལ་བའི་སྙིང་རྗེ། ཤེས་པ་གནས་སྤར་ཞིང་ཕུང་པོ་ཚོགས་སུ་སྟོབ་པ་དགའ་བ། གདུལ་བྱ་ཡལ་བར་མི་འདོར་བའི་བཏང་སྙོམས་ཏེ་ལས་འདི་ལ་བསྔགས་པའི་ཐུན་མིན་གྱི་ཚད་མེད་བཞིའོ། །བཞི་པ་ནི། ལྟ་བ་བློ་འདས་ཀྱི་རྫོང༌། སྒོམ་པ་ཡེང་མེད་ཀྱི་ཕྲང༌། སྤྱོད་པ་ངེས་མེད་ཀྱི་སྲོག་སྟེ་རྫོང་ཕྲང་སྲོག་གསུམ་གྱིས་གཞི་འཛིན་པས་སོ། །གཉིས་པ་
ཕུར་བའི་རྣམ་དབྱེ་ལ་གསུམ། ཚད་མེད་སྙིང་རྗེའི་ཕུར་བ། བྱང་ཆུབ་སེམས་ཀྱི་ཕུར་བ། མཚན་མ་རྫས་ཀྱི་ཕུར་བའོ། །དང་པོ་ནི། རྩ་རྒྱུད་སྔ་མའི་འཕྲོར། ལོག་ལྟ་རྣམས་ལ་སྙིང་རྗེ་བསྐྱེད༔ གཉིས་མེད་སྒྲོལ་བའི་སྙིང་རྗེ་སྒོམ༔ དེ་ནི་སྙིང་རྗེའི་ཕུར་བ་སྟེ༔ ཞེས་གསུངས་པ་ལྟར། ཞིང་བཅུ་ཚང་བའི་དགྲ་བོ་དེ་ཉིད་ཐབས་ཁྱད་པར་ཅན་གྱིས་འཕྲལ་དུ་མ་བསྒྲལ་ན། ལས་ངན་ཚབས་ཆེན་པོ་བསགས་པའི་འབྲས་བུ་ངན་སོང་དུ་ལྟུང་སྟེ། བཟོད་མི་ཕོད་པའི་སྡུག་བསྔལ་དོས་དྲག་ལ་ཡུན་རིང་བ་མྱོང་དགོས་པ་ལ་སྙིང་རྗེའི་བསམ་པས་མ་བཟོད་པར་བསྒྲལ་བའི་ལས་བརྩམ་པའི་ཀུན་སློང་དང་ལྡན་དགོས་པའོ། །གཉིས་པ་ནི། སྔ་མའི་འཕྲོར། རང་ཉིད་ལྷར་གསལ་ཕྱག་གཡས་གཡོན༔ རིགས་ལྔ་ཁྲག་འཐུང་ཡབ་ཡུམ་བསྐྱེད༔ ཕུར་པ་བྱང་ཆུབ་སེམས་སུ་འདྲིལ༔ འདི་ནི་བྱང་སེམས་ཕུར་བ་ཡིན༔ ཞེས་གསུངས་པ་ལྟར་བསྒྲལ་བྱ་སྒྲོལ་བྱེད་ཀྱི་ང་བདག་ཀ་ནས་དག་པའི་གསལ་མདངས་སྒྱུ་མ་ལྟ་བུའི་རྣམ་རོལ་དུ་རང་ཉིད་ལྷར་གསལ་བའི་ཕྱག་གཡས་གཡོན་རིགས་ལྔ་ཡབ་ཡུམ་དུ་མོས་ནས་སྐྱེ་འགག་གཉིས་མེད་ལྷུན་གྲུབ་སྙིང་རྗེའི་ཕུར་བ་འདྲིལ་བ་ཡིན་ཏེ། མན་ངག་སྙིང་གཟེར་ནག་པོ་ལས། སྐྱེ་མེད་བྱང་ལ་འགག་མེད་ཆུབ༔ གཉིས་སུ་མེད་པའི་སེམས་ཞེས་བྱ༔ ཞེས་གསུངས་པའི་དགོངས་དོན་ནོ། །
གསུམ་པ་ནི། རྩ་རྒྱུད་སྔ་མའི་འཕྲོ་ལས། ཕུར་པ་དེ་ལ་ཡུངས་ཀར་འདྲིལ༔ གུ་གུལ་བདུག་ཅིང་དུག་ཁྲག་བྱུགས༔ འབར་བ་ཨེ་ཡི་གདན་ལ་བཞུགས༔ མཚན་མ་རྫས་ཀྱི་ཕུར་པ་ཡིན༔ ཞེས་གསུངས་པ་ལྟར་མཚན་ཉིད་དང་ལྡན་པའི་ཕུར་བ་ལ་བྱུག་བདུག་བྲབ་གསུམ་གྱིས་གཟི་བྱིན་བསྐྱེད་ཅིང༌། ཟུར་གསུམ་ཤིན་ཏུ་རྣོ་ཞིང་མགར་གྱི་སོ་མལ་ནས་ཕྱུང་མ་ཐག་པ་ལྟ་བུ་ལ་མེའི་ཚ་ཚྭ་འཕྲོ་བར་བསམས་ནས་ལག་ཏུ་ཐོགས་པའོ། །གསུམ་པ་དགོངས་པ་གསུམ་གྱི་སྒོ་ནས་ཚར་བཅད་པ་ལ་གསུམ། ཚེ་ལུང་གི་དགོངས་པ། ཁྲུས་ལུང་གི་དགོངས་པ། གནས་ལུང་གི་དགོངས་པའོ། །དང་པོ་ནི། རྒྱུད་ལས་ཁོ་ཡི་རྣམ་ཤེས་སྲོག་དངོས་པོ༔ སྙིང་ནང་ཁྲག་དྭངས་བྱི་མགོ་ཙམ༔ དེ་དབུས་ཨ་འོད་ཐིག་ལེའི་ནང་༔ ནྲྀ་ལྗང་གཅིག་ཡོད་གདབ་པའི་ཡུལ༔ དེ་ནས་ཕུར་རྩེ་ཧཱུྃ་གསུམ་དང་༔ རྩེ་སྒབ་དག་ཏུ་ཕཊ་གསུམ་བསམ༔ ངག་ཏུ་དྲག་སྔགས་དགུ་བཟླས་ཤིང་༔ འདྲིལ་ཞིང་འདྲིལ་ཞིང་སྒོ་ལ་གདབ༔ ནྲྀ་དང་ཨ་བཅས་ཕུར་རྩེ་ཡི༔ ཧཱུྃ་ལ་བསྡུས་ནས་ཨ་དཀར་གསལ༔ རང་ལ་བསྟན་པས་དེ་ཚུར་འདུས༔ དེ་ནི་ཚེ་ལུང་དགོངས་པ་ཡིན༔ ཞེས་འདི་ལ་ཅུང་ཟད་གབ་དཀྲུགས་ཀྱི་རྣམ་པར་གསུངས་པ་མན་ངག་ཚད་ལྡན་དང་བསྟུན་ནས་ཞིབ་མོར་འཆད་ན། ཕུར་བུ་བསྒྲིལ་ཞིང་དེ་ལས་བྱུང་བའི་འོད་ཀྱིས་ཕྱོགས་བཅུའི་རྒྱལ་བ་
སྲས་བཅས་ཀྱི་བྱིན་རླབས་ནུས་མཐུ་ཐམས་ཅད་བཀུག་ནས་ཕུར་བུ་ལ་ཐིམ་པས་སྲིད་པ་གསུམ་ཡང་བརླག་པར་ནུས་པའི་མཐུ་ལྡན་དུ་བསམས་ལ། བླ་གནས་དང་བསྟུན་ནས་དབང་པོའི་སྒོ་རྣམས་སུ་རིམ་པར་གདབ་རྗེས། སྙིང་གར་བསྣུན་པས་ཁོའི་སྙིང་ནང་ན་ཁྲག་གི་དངས་མ་བྱིའུ་ལེན་པའི་མགོ་ཙམ་ཞིག་གི་དཀྱིལ་ན་བཀྲག་མདངས་གཟི་བརྗིད་ཀྱི་ལྷག་མ་ཚེ་རྟེན་འོད་ལས་གྲུབ་པའི་ཡི་གེ་ཨ་དཀར་གྱི་རྣམ་པར་གནས་པ་ཕུར་རྩེའི་ཧཱུྃ་གསུམ་གྱིས་རྩེན་གྱིས་བླངས་ནས་རང་ཉིད་ལ་ཕྱོགས་པས། རྡོ་ཁབ་ལེན་གྱིས་ལྕགས་ཕྱེ་བླངས་པ་བཞིན་དུ་འུབ་ཀྱིས་བྱུང་ནས་རང་ཉིད་ཀྱི་ཐུགས་སྲོག་དང་འདྲེས་པས་ཚེའི་བསྣོན་པར་ཐོབ་བཀྲག་མདངས་འབར་ཏེ་རྡོ་རྗེའི་སྲོག་ལ་དབང་ཐོབ་པར་བསམས་པ་ནི་ཚེ་ལུང་ངོ༌། །གཉིས་པ་ནི། དགྲ་བོའི་རྣམ་ཤེས་ཀུན་གཞིའི་ཉོན་ཡིད་ནྲྀ་ཡིག་ལྗང་གུའི་རྣམ་པར་ཁྲག་གི་དངས་མའི་ནང་ན་གནས་པ་དེའི་སྟེང་དུ་ཕུར་བ་བསྒྲིལ་བས་ནག་ཐུམ་གྱིས་སོངས་ནས་དྲན་པ་ཉམས། བྱུང་ཚོར་གྱི་སྒོ་འགགས། ཉོན་མོངས་པའི་བག་ཆགས་རྩད་ནས་ཆོད་དེ་སྐུ་གསུམ་གྱི་རང་བཞིན་དུ་གོ་འཕོས་ཏེ་ཕུར་རྩེའི་ཧཱུྃ་ཡིག་གསུམ་དང་དབྱེར་མེད་དུ་འདྲེས་པར་བལྟ་བ་ནི་ཁྲུས་ལུང་གི་དགོངས་པའོ། །གསུམ་པ་ནི། རྒྱུད་ལས། དེ་ནས་དགྲ་སྲོག་དུག་གསུམ་གྱི༔ ངོ་བོ་ཧཱུྃ་གསུམ་གནས་པ་དེ༔ ཟུར་གྱི་ཕཊ་གསུམ་གྱིས་
འཕངས་ཏེ༔ འོག་མིན་དཔལ་གྱི་ཐུགས་ཀར་སྤྲོས༔ ཧཱུྃ་ཉིད་འོད་ཞུ་མགྲིན་པ་ཡི༔ ཨཱཿལ་ཐིམ་ནས་ཨཱཿདེ་ཞུ༔ དུང་ཁང་ཨཱོྃ་ཐིམ་ཨཱོྃ་འོད་ཞུ༔ སྒལ་ཚིགས་རྟ་བརྒྱུད་ཡུམ་མཁར་བབས༔ རྒྱལ་བའི་སྲས་སུ་བྱས་པ་ནི༔ གནས་སྤར་ཟབ་མོ་ཁྲུས་ལུང་ཡིན༔ ཞེས་གབ་དཀྲུགས་དང་བཅས་གསུངས་པ་སྔར་ནས་བཀྲལ་བ་ལྟར་ཕུར་རྩེ་ནམ་མཁའ་ལ་དེང་ཙམ་བྱས་ལ་ཕཊ་སྒྲ་དྲགས་པོ་གསུམ་གྱིས་བསྐུལ་བས། ཁོའི་རྣམ་ཤེས་ཀྱི་ངོ་བོ་གཞི་ཀུན་གྲོལ་ཡངས་པའི་རྒྱུད་ལས། གདོད་ནས་དོན་དམ་གྱི་ཀུན་གཞི་ནི་ངོ་བོ་ཉིད་ཀྱི་སྐུ་ཡིན་ནོ། །སྦྱོར་བ་རྐྱེན་གྱི་ཀུན་གཞི་ནི་མ་རིག་པའི་མུན་པའོ། །ཞེས་གསུངས་པ་ལྟར་ཚོགས་པ་གཅིག་གི་སྟེང་ནས་སྒྲིབ་པ་སྤངས་མ་སྤངས་ཀྱི་བྱེ་བྲག་ལས་གཞི་འབྲས་སུ་དབྱེ་བ་ཁོ་བོའི་འདོད་པའོ། །དུས་ན་ཉོན་མོངས་དུག་གསུམ། འབྲས་དུས་ན་སྐུ་གསུམ་གྱི་རང་བཞིན་དུ་གོ་འཕོས་པ་དེ་ཉིད་ཧཱུྃ་ཡིག་གསུམ་གྱི་རྣམ་པར་གནས་པ་ཟུར་གྱི་ཕཊ་གསུམ་པོས་མེ་སྟག་ཡར་བ་ལྟར་འཕངས་ལ་འོག་མིན་གྱི་ཞིང་དུ་མགོན་པོ་འོད་དཔག་མེད་ཀྱི་ཐུགས་ཀར་སྤྲོས་པས་ཐུགས་སྲོག་གི་ཡི་གེ་ཧཱུྃ་གི་རྣམ་པ་ཅན་དང་དབྱེར་མེད་དུ་བསྲེས། དེའི་རྐྱེན་གྱིས་བདེ་སྟོང་གཉིས་སུ་མེད་པའི་ཡེ་ཤེས་ཁྱད་པར་ཅན་སྐད་ཅིག་ལ་འཁྲུངས་པས་བདེ་བ་ཆེན་པོའི་རྗེས་ཆགས་ཀྱི་ཧཱུྃ་ཡིག་ཀྱང་འོད་དུ་ཞུ་ནས་ཡར་མགྲིན་པར་འཕགས་ཏེ་གསུང་གི་ངོ་བོ་ཨཱཿ
ཡིག་ལ་ཐིམ། ཨཱཿདེ་ཉིད་ཀྱང་འོད་དུ་ཞུ་ནས་ཀླད་པ་དུང་ཁང་གི་འཁོར་ལོར་འཕགས་ཏེ་སྐུའི་ས་བོན་ཨཱོྃ་ཡིག་ལ་ཐིམ། ཨཱོྃ་དེ་ཡང་འོད་དུ་ཞུ་ནས་ཨ་བ་དྷཱུ་ཏི་ལས་བརྒྱུད་དགའ་བ་བཞིའི་འགྲོས་ཀྱིས་བབས་ནས་ཡུམ་གྱི་མཁའ་ནང་དུ་བབས་པས་གཟས་པ་པོ་རྒྱལ་བའི་སྲས་སུ་འཁྲུངས་པར་བསམ་པ་ནི་སྦྱོར་སྒྲོལ་ཟུང་འཇུག་གི་མཆོད་པའི་མན་ངག་ཁྱད་པར་ཅན་ཡིན་ཞིང༌། དེ་ཡང་རྒྱུད་འགྲེལ་གསལ་བྱེད་མེ་ལོང་ལས། ཤེས་པ་ཆོས་ཉིད་དུ་བསྒྲལ་བ། ཤེས་པ་འོག་མིན་དུ་བསྒྲལ་བ། ཕུང་པོ་དུར་ཁྲོད་དུ་བསྒྲལ་བ། ཞེས་བསྒྲལ་ལུགས་རྣམ་པ་ལྔར་གསུངས་པ་ཡང་འདི་ལ་ཚང་ཞིང༌། དེ་ལྟར་བཤད་མ་ཐག་པའི་དམིགས་གནད་རྣམས་ལ་རང་བྱན་ཆུད་པའི་རྣལ་འབྱོར་པས་ཕུར་བུ་ཐོགས་ལ། ཧཱུྃ༔ ང་ནི་རིག་པ་དཔལ་ཆེན་ཧེ་རུ་ཀ༔ འཁོར་འདས་རོ་གཅིག་ལྟ་བའི་ཕུར་བུ་ཡིས༔ མ་རིག་གཉིས་འཛིན་བདུད་དང་དགྲ་བགེགས་རྣམས༔ སྙིང་རྗེས་བསྒྲལ་ཞིང་གཏུབ་བོ་ཀི་ལཱ་ཡ༔ ཀ་དག་མངོན་རྫོགས་སངས་རྒྱས་ཕྱིར་མ་ལྡོག༔ ཨཱོྃ་དྷརྨ་དྷཱརྟུ་ཀི་ལཱ་ཡ་རཱུ་ཏྲ་ཡ་མ་དུ་ན་མྱོག་ཐུཾ་རྦད༔ ཅེས་བརྗོད་ཅིང་ཕུར་བའི་ལས་སྦྱོར་རྣམས་ཟིན་མཐར། དཀྱིལ་འཁོར་གྱི་ཁྱམས་ལ་གནས་པའི་བཀའ་སྡོད་སྒྲོལ་གིང་གསོད་བྱེད་རིན་ཆེན་རིགས་ཀྱི་གིང་མོ་སྤྲུལ་པ་ཡང་སྤྲུལ་དང་བཅས་པས་སྲོག་ལས་བྱེད་
པར་བལྟ་ཞིང༌། རལ་གྲི་འཇམ་དཔལ་རྣོན་པོར་གསལ་ལ། རྔམ་གློག་ལས། ཕོ་ནི་རྐང་པ་གཡས་ནས་གཏུབ། །མོ་ནི་རྐང་པ་གཡོན་ནས་གཏུབ། །ཅེས་གསུངས་པ་ལྟར་གཏུབ་ཅིང་སྤྲོ་ན། ཧཱུྃ་ཧྲཱི༔ གནོད་བྱེད་དགྲ་བགེགས་རཱུ་ཏྲ་བདུད་དཔུང་ལ༔ ཞེས་སོགས་ཚངས་པའི་སྒྲ་དབྱངས་ལྟར་བརྗོད། དེ་ཡང་ཕུར་བུ་དེ་རྣམས་ཀྱི་ཐེབས་ཚད་དང་གྲུབ་མཐའ་ནི། དེ་ཉིད་ལས། ཕུར་བུ་ཐེབས་ཚད་འབྲས་བུ་ནི༔ བདག་ཕུར་འབེན་གསུམ་གྲུབ་མཐའ་གཅིག༔ ཐམས་ཅད་ཆོས་དབྱིངས་སྟོང་པར་བསྒྲལ༔ རིག་པ་ཡེ་ཤེས་ཕུར་པ་དེ༔ ཆོས་དབྱིངས་ཐེབས་པ་ཆོས་ཀྱི་སྐུ༔ ཚད་མེད་སྙིང་རྗེའི་ཕུར་པ་དེ༔ འགྲོ་དྲུག་ལ་བཏབ་སྤྲུལ་སྐུ་ཐོབ༔ བྱང་ཆུབ་སེམས་ཀྱི་ཕུར་པ་དེ༔ ཡུམ་མཁར་ཐེབས་པས་ལོངས་སྐུ་ཐོབ༔ མཚན་མ་རྫས་ཀྱི་ཕུར་པ་དེ༔ དགྲ་བགེགས་ལ་བཏབ་བསྟན་པ་ཚུགས༔ ཞེས་གསུངས་ཤིང་བསྒྲལ་ལུགས་དེ་ལྟར་དུ་ཤེས་པ་ལ་འཚེངས་པ་རྣམ་པ་ལྔ་འབྱུང་སྟེ། ཚེ་ལུང་གི་དགོངས་པས་སྒྲོལ་མཁན་གྱི་རྣལ་འབྱོར་པ་འཚེངས་པ། ཁྲུས་ལུང་གི་དགོངས་པས་བསྒྲལ་བྱའི་གཟས་པ་པོ་འཚེངས་པ། གནས་ལུང་གི་དགོངས་པས་འོག་མིན་དུ་སྦྱོར་མཆོད་ཀྱིས་འཚེངས་པ། སྙིགས་མའི་ཤ་ཁྲག་གིས་དཀྱིལ་འཁོར་བའི་ལྷ་ཚོགས་འཚེངས་པ། གནོད་བྱེད་དང་བྲལ་བས་བསྟན་པ་
རིན་པོ་ཆེ་འཚེངས་པ་སྟེ། མདོར་ན་བདག་ལ་སྒྲིབ་པ་མི་གསོག་ཅིང༌། གཞན་སྡུག་བསྔལ་མི་བསྐྱེད་པའི་ཐབས་དེ་ལྟ་བུས་གནས་ངན་གྱི་འགྲོ་བའི་རྒྱུ་བསྟན་པའི་སྤྱི་དགྲ་ལ་སོགས་པ་ཞིང་བཅུ་ཚང་པ་དང༌། ངན་སོང་དུ་འཁྱམས་པའི་སེམས་ཅན་རྣམས་བསྒྲལ་གཞི་ཡིན་པ་ལས། རང་ཉིད་ཀྱི་ཟས་ཕོར་གང་ཙམ་གྱི་ཆེད་དུ་ཆགས་སྡང་གི་བསམ་ངན་སྒོམ་པ་དང༌། མཐུ་གཏད་ལ་བརྟུལ་ཞུགས་སུ་བསླབ་པའི་ལས་འབྲས་མི་དྲན་པ་དག་གིས་གྱ་གྱུའི་སྦྱོར་བ་ལྐོག་གྱུར་དུ་བརྩམ་ནའང༌། དཀོན་མཆོག་རིན་པོ་ཆེས་དུས་གསུམ་བསྒྲིབ་མེད་དུ་གཟིགས་པས་འདི་ཕྱིའི་མདུན་མ་གཏན་བརླག་ཏུ་སོང་བ་སྟེ། དེ་ཅིའི་ཕྱིར་སྙམ་ན། རྡོ་རྗེའི་ཐེག་པ་ལ་སྦྱོར་སྒྲོལ་གྱི་ལམ་བསྟན་པའང་ཐེག་པ་འོག་མ་ལས་ཁྱད་ཆོས་དུ་མས་འཕགས་པའི་ཕྱིར་འདི་ལྟར་སྒྲོལ་བ་ལ་མཚོན་ན། རྟོགས་པས་བདག་སྔོན་དུ་བསྒྲལ་ནས། དེའི་རྗེས་ཐོབ་ཏུ་ཐུགས་རྗེས་གཞན་སྒྲོལ་བ་ཡིན་ཏེ། འོན་ཀྱང་ཟན་ལ་ཕུར་བ་འདེབས་ཚད་ཀྱིས་སྡང་ཞེན་གྱི་ནུས་པ་མངོན་དུ་མི་འབྱིན་ཡང༌། སྲོག་གཅོད་ཀྱི་མི་དགེ་བའི་བསམ་པ་སྦྱོར་བ་མཐར་ཐུག་གསུམ་ལས་བསམ་སྦྱོར་གཉིས་ཚང་བའི་རྣམ་སྨིན་མྱོང་དགོས་པའི་ཕྱིར་རོ། །དེས་ན་རང་གིས་རང་ཉིད་མི་བསླུ་བར་གཉེན་པོས་ཟིན་པ་བྱ་དགོས་སོ། །གཉིས་པ་བསྟབ་པ་ནི། ལིང་རོ་རྣམས་མཆོད་གྲལ་དུ་བསྒྲིག །ཆ་ཤས་
ལྷག་གཏོར་ལའང་བསྲེ་ཞིང༌། ཚོགས་ཞིང་རྣམས་ཞལ་ཧོམ་ཁུང་ལྟ་བུར་གདངས་པའི་ནང་དུ་བསྟབ་གིང་ཟ་བྱེད་པདྨའི་གིང་མོ་སྤྲུལ་པ་ཡང་སྤྲུལ་དང་བཅས་པ་རྣམས་ཀྱིས་བསྒྲལ་མཆོད་རྣམས་སྟངས་སྟབས་ཀྱི་གར་དང་བཅས་བཏེག་ནས་བསྟབ་ཅིང་དགྱེས་པ་བསྐྱེད་པར་བལྟས་ལ། ཧཱུྃ་ཧྲཱིཿ བསྟབ་པོ་བསྟབ་པོ་ལྷ་ཚོགས་ཞལ་དུ་བསྟབ༔ སོགས་ཀྱིས་འབུལ། ལ་ལར་ལྷ་ཚོགས་རྣམས་ཀྱི་ཡ་རྐན་ཁྲོ་བོ་དང་མ་རྐན་ཁྲོ་མོར་གསལ་བའི་སྦྱོར་མཚམས་སུ་དགྲ་བགེགས་ཀྱི་ཤ་ཁྲག་རུས་པ་དུག་གསུམ་གྱི་ཕུང་པོ་དང་བཅས་བསྟབས་པས་གསོལ་བར་བསམ་པ་ལ་སྦྱོར་སྒྲོལ་ཟུང་འཇུག་གི་སྒོ་ནས་མཆོད་པའི་དམིགས་གནད་ཟབ་མོ་ཡིན་པར་ཡང་བཤད་དོ། །སྔགས་དོན་ནི་གོང་མ་དང་ཆ་འདྲའོ། །ཚུལ་དེ་ལྟ་བུ་ལ་བསྒྲལ་མཆོད་ཀྱི་རྣམ་གཞག་ཚང་སྟེ། རྒྱུད་ལས། བདུད་རྩི་དམིགས་བྱའི། ལྔའམ་ཟས་ལྔ་ལ། ཉ་ཤ་བུ་རམ་སྦྲང་རྩི་ཏིལ་ཤའོ། །མཚན་མ་མིང་དུ་བཅས་པ་བྱ། །བཀུག་ནས་རྡོ་རྗེ་ཕུར་བུས་བརྡབ། །རྡུལ་དུ་བྱས་ནས་ཚོགས་ལ་དབུལ། །ཞེས་གསུངས་པ་སྟེ། ཕྲ་མ་སྔ་བཙན་གྱི་ཕྱི་ལ་འབྲངས་པའི་བླུན་པོ་དག་ད་དུང་ལས་གཞུང་ནས་མ་གསལ་སྙམ་ནས་ཐེ་ཚོམ་པར་སྲིད་ཀྱང་མ་ཡིན་ཏེ། ཚུལ་འདི་ལྟ་བུ་འཆད་པའི་སྐབས་སུ་འབྲེལ་བ་བཞི་དང་ལྡན་པ་ཞེས། རྒྱུད་སྒྲུབ་ཐབས་དང་འབྲེལ་བ། སྒྲུབ་ཐབས་ཆོག་ཁྲིགས་
དང་འབྲེལ་བ། ཆོག་ཁྲིགས་ཕྱག་བཞེས་དང་འབྲེལ་བ། ཕྱག་བཞེས་བླ་མ་བརྒྱུད་པའི་གདམས་ངག་དང་འབྲེལ་བའོ། །ཞེས་གསུངས་པའི་དོན་གོ་བར་བྱ་ཞིང༌། འོན་ཀྱང་ཕྱག་བཞེས་དང་ཆོག་ཁྲིགས་ལ་རྣམ་པ་མང་བས་རྒྱུད་ལུང་རྣམ་དག་ལ་ཡིད་བརྟན་འཆའ་བ་ཡིན་ནོ། །གསུམ་པ་ནི། སྔར་གྱི་ཚོགས་བཤགས་ཀྱི་དོད་ཆ་གསུམ་པ་དམ་ཚིག་རྫས་སུ་མོས་ཏེ་སྨན་རག་དང་བཅས་གཏོར་མར་བྲན་ལ། དོན་དམ་ནམ་མཁའ་ལྟ་བུའི་ཀློང་ནས་ཀུན་རྫོབ་གློ་བུར་གྱི་བག་ཆགས་དྲི་མ་དང་བཅས་པ་སྟོབས་བཞི་ཚངས་པའི་སྒོ་ནས་བཤགས་པས་འཁོར་གསུམ་ཡོངས་དག་གི་རྣམ་རོལ་དུ་དག་པར་བསམས་ལ། ཧོཿ བདག་སོགས་མ་རིག་ལུས་དང་ངག་སེམས་ཀྱི༔ སོགས་དང་ག་ན་ཙཀྲའི་ཡིག་བརྒྱ་བརྗོད། བཞི་པ་ནི། སྔ་མ་ཇི་ལྟ་བར་སྨན་རཀ་བྲན་ནས་གནམ་ཕུད་ཅེས་ནམ་མཁའ་གང་བའི་ལྷ་ཚོགས་ལ་ཕུལ་ནས་ཀུན་རྫོབ་དང་དོན་དམ་ཟུང་འཇུག་ཏུ་བསྐང་བ་ཡིན་ཕྱིར་ཐོག་སྟེང་གཙང་སར་གཤེགས་ལ། ཧཱུྃ་ཧྲཱིཿ སྐོང་ངོ་གསོལ་ལོ་མཆོད་དོ་ཐུགས་དམ་སྐོང་༔ སོགས་བརྗོད་པ་ཡིན་ཏེ་ད་ལྟ་ལག་ལེན་ཕལ་ལ་ཆོ་ག་གཞན་གྱི་རྗེས་སུ་འབྲངས་ནས་གནམ་ཕུད་འདི་ཚིག་ཤར་ཙམ་ལས་འབུལ་རྫས་དངོས་ཆད་པ་མང་ངོ༌། །གཉིས་པ་ནང་ལྟར་དུ་མཆོད་པ་ལ་གཉིས། རང་ལུས་ཨ་ནུའི་ཚོགས་མཆོད་ལ་བརྟེན་ནས་རྡོ་རྗེ་
རྒྱལ་པོ་མཆོད་པ་དང༌། དེ་བཞིན་དུ་འདུས་པའི་ཚོགས་ལ་འགྲིམ་པའོ། །དང་པོ་ལ་གཉིས། ལས་ཀྱི་རྡོ་རྗེས་སློབ་དཔོན་ལ་འབུལ་བ་དང༌། རྡོ་རྗེ་སློབ་དཔོན་གྱིས་དེ་ལ་ལན་གདབ་པའོ། །དང་པོ་ནི། ཚོགས་འཁོར་མཚན་ཉིད་པའི་ཚེ་རྡོ་རྗེ་གཟུངས་མའམ། སྤྱི་ཁྱབ་ཏུ་ལས་ཀྱི་རྡོ་རྗེས་འདུས་པའི་གཙོ་བོ་ལ་ཕྱག་སྔོན་དུ་བཏང་ནས། མཚན་ཉིད་དང་ལྡན་པའི་ཀ་པཱ་ལ་མ་དཱ་ནས་བཀང་བ་ལག་གཉིས་པད་སྐོར་གྱི་ཕྱག་རྒྱ་བྱས་པའི་གཡོན་པའི་སྟེང་དུ་ཐོགས། གཡས་པས་རྩེ་གསུམ་གྱི་ཕྱག་རྒྱ་བསྟན་ལ། རྡོ་རྗེ་སློབ་དཔོན་ཀུན་ཏུ་བཟང་པོར་འདུ་ཤེས་པའི་མོས་གུས་བསྐྱེད་ཅིང༌། དེའི་རྗེས་འབྲེལ་དུ་ཐབས་རྫས་རྣམས་ཐོགས་ལ་དབྱངས་དང་བཅས། ཧོ་རྡོ་རྗེ་རྒྱལ་པོ་ཡབ་ཡུམ་དགོངས་སུ་གསོལ༔ ཞེས་པའི་མཐར། ག་ན་ཙཀྲ་པཱུ་ཛ་ཧོཿ ཞེས་དབུལ། གཉིས་པ་དེ་ལ་ལན་གདབ་པ་ནི་སློབ་དཔོན་གྱིས་པད་སྐོར་དང་བཅས་རྩེ་གསུམ་གྱི་ཕྱག་རྒྱས་བླངས་ལ། ཨེ་མ་ཧོ། གདོད་ནས་རྣམ་དག་ཟག་མེད་བདུད་རྩིའི་བཅུད༔ ཅེས་སོགས་ཀྱི་མཐར། གསང་སྔགས་བླ་མེད་ཀྱི་རྫས་ཁྱད་པར་ཅན་དེ་ལ་ཤིན་ཏུ་ངོ་མཚར་བའི་སྒྲ། ཨ་ཧོཿ མ་ཧཱ་སུ་ཁ༔ ཞེས་བརྗོད་ཅིང་བདེ་སྟོང་གི་ངང་ནས་མཐེབ་སྲིན་གྱི་གའུས་བཅུས་ཏེ་རོལ། སྔགས་དོན་ནི། ཨ་སྐྱེ་མེད། ཧོ་ནི་དགྱེས་པ།
མ་ཧཱ་ནི་ཆེན་པོ། སུ་ཁ་ནི་བདེ་བའོ། །ལུགས་གཞན་དུ་སྙིང་ག་ནུ་མ་གཡས་གཡོན། དབུས་ལ་སོགས་པར་པད་སྐོར་བྱ་བ་ནི་རྣམ་ལྔ་འདོད་པའི་ཕྱོགས་སུ་བསྐོར་བ་ཞེས་པའི་དོན་ནོ། །གཉིས་པ་ལ་གཉིས། ལས་ཀྱི་རྡོ་རྗེས་འདུས་པའི་ཚོགས་ལ་དྲངས་པ་དང༌། འདུས་པ་རྒྱ་མཚོས་དེ་ལ་ལན་གདབ་པའོ། །དང་པོ་ནི། ཕྱག་ཐ་དད་དུ་མ་འགྲུབ་ན་སྤྱི་ཕྱག་སྔོན་དུ་འགྲོ་བས་བཟའ་བ་རྣམས་གཡས་གྲལ་ནས་སྔོན་དང༌། བཏུང་བ་རྣམས་གཡོན་གྲལ་ནས་སྔོན་ལ་འགྲིམས་ཤིང༌། འདུས་པ་ཆེན་པོའི་ཚེ་གྲལ་གཤོམ་ནས་མཆེད་ལྕམ་རྣམས་དཀྱིལ་འཁོར་བའི་འཁོར་ཚོགས་སུ་མོས་པའི་དག་སྣང་དང་བཅས་དབྱངས་སྙན་པོས། ཧོ། དགོངས་ཤིག་རོལ་ཅིག་མཆེད་ལྕམ་རྣལ་འབྱོར་རྣམས༔ ཞེས་དྲངས་པའི་བརྡས་བསྐུལ་ལོ། །གཉིས་པ་ལ་གཉིས། ལན་གདམ་པ་དངོས་དང༌། རོལ་པའི་རྣལ་འབྱོར་གྱི་ཚུལ་སྤྲོས་ནས་བཤད་པའོ། །དང་པོ་ནི། འདུས་པའི་ཚོགས་ཀྱིས་འདོད་ཡོན་གྱི་སྣང་བ་དེ་དག་སྒྱུ་མ་ལྟ་བུའི་ངང་ནས་དངོས་གྲུབ་ཀྱི་རྫས་སུ་བལྟས་ལ། ཨེ་མ་ཧོ། སྐྱེ་འགག་གནས་གསུམ་མཐའ་བྲལ་དོན་གྱི་དབྱིངས༔ སོགས་བརྗོད་ཅིང་སྔགས་དོན་ནི། གུཧྱ་གསང་བ། སིདྡྷི་དངོས་གྲུབ་ཨ་ལ་ལ་ཧོ་ནི། བཟའ་བྱ་ཟ་བྱེད་ཀྱི་གཉིས་ཆོས་དང་བྲལ་བའི་མཐའ་བྲལ་ཆེན་པོའི་ཚུལ་དུ་ལོངས་སྤྱོད་པ་ལ་ངོ་མཚར་བའི་སྒྲའོ། །གཉིས་པ་ནི།
དེ་ལྟ་བུའི་ངང་ལས་བཟའ་བཏུང་རྣམས་དཀྱིལ་འཁོར་སུམ་ལྡན་གྱི་ངང་ལས་དང་དུ་བླང་དགོས་ཏེ། སློབ་དཔོན་ཆེན་པོས། བསྐྱེད་རྫོགས་དང་བྲལ་བཟའ་བ་ཟ་བ་རྣམས༔ ཁྱི་ཕག་ཟས་ལ་སྤྱོད་དང་ཁྱད་པམེད་པས༔ ཞེས་གསུངས་པས་འདི་ནི་ཤིན་ཏུ་གལ་ཆེ་བ་ཡིན་ཞིང༌། དེ་ཡང་བུམ་དབང་གི་བཟའ་བའི་དམ་ཚིག་དང་བསྟུན་ནས་ཤ་ལྔ་བདུད་རྩི་ལྔའི་རང་བཞིན་དུ་ཤེས་པ། གསང་དབང་གི་བཟའ་བའི་དམ་ཚིག་དང་བསྟུན་ནས་བྱང་སེམས་དཀར་དམར་གྱི་རང་བཞིན་དུ་ཤེས་པ། དབང་གསུམ་པ་དང་བསྟུན་ཏེ་ཐབས་ཤེས་ཟུང་འཇུག་གི་རྣམ་རོལ་དུ་ཤེས་པ། བཞི་པ་ཚིག་དབང་དང་བསྟུན་ནས་སྟོང་ཉིད་གསལ་ཁྱབ་ཅན་དུ་ཤེས་པའི་ངང་ནས་དང་དུ་བླང་བ་སྟེ། དེ་ཡང་ལས་དང་པོ་པ་དེ་ཙམ་མི་གོ་བ་ཡིན་ན། ལུང་ཨ་ནུ་ཡོ་གའི་ལུགས་སུ་རང་ལུས་ཕུང་ཁམས་སྐྱེད་མཆེད་ཞི་ཁྲོའི་དཀྱིལ་འཁོར་གྱི་རྣམ་པར་མ་བསྐྱེད་ཡེ་རྫོགས་སུ་ཡོད་ཕྱིར། དེ་ལ་ངེས་ཤེས་འདྲོངས་ཤིང་དག་པ་དྲན་བཞིན་པའི་ངང་ནས་ནང་གི་སྦྱིན་སྲེག་མན་ངག་གི་ལུགས་སྒྲ་ཇི་བཞིན་པའམ། དེ་ཡང་མ་ནུས་ན་ལྷ་ཚོགས་དེ་དག་ལ་མཆོད་པ་འབུལ་བའི་བསམ་པ་ཁོ་ནས་ཐ་མལ་གྱི་སྣང་ཞེན་སྦྱངས་ནས་ཟོས་པས། བདག་ལ་ཁ་ཟས་ཀྱི་བུ་ལོན་དུ་མི་འགྱུར་ཞིང༌། གཞན་སྦྱིན་པའི་བདག་པོ་ལ་བསོད་
ནམས་ཁྱད་པར་ཅན་ཐོབ་པའི་དགོས་པ་ཡོད་དོ། །སློབ་དཔོན་ཆེན་པོས། རང་ལུས་ཨ་ནུ་ཡོ་གའི་བསྐྱེད་རིམ་ལས༔ མ་གཡོས་བཞིན་དུ་ཁ་ཟས་སྤྱོད་གྱུར་ན༔ དཀོན་མཆོག་གླུད་དང་དགེ་འདུན་དཀོར་ལ་སོགས༔ ལོག་པའི་ཟས་ཀྱི་འཇིགས་པ་ཀུན་ལས་གྲོལ༔ ཞེས་གསུངས་པ་ལྟར་ཡིན་མོད། ཚུལ་དེ་ལྟ་བུ་མི་གོ་བར་གྲུབ་མཐའ་དང་ཆ་ལུགས་ཙམ་གྱིས་དད་གཤིན་གྱི་དཀོར་ལ་ནོར་སྐྱོང་ཟན་གོང་ལ་འཇབས་པ་ལྟར་སྤྱད་ནས་ཚངས་སྤྱོད་ཡལ་བར་མི་བྱ་སྟེ། ཀུན་མཁྱེན་ལྔ་པ་ཆེན་པོས། རྡོར་དཀར་དུ་ཚུལ་འཆོས་པའི་སྒྲིབ་ཤིང༌། ཤ་ཆང་ཕུང་པོར་སྤུངས་པའི་ཚེས་བཅུ་མཁན་པོ། ཆེར་རློམ་སྟོང་འུར་ཅན་རྣམས་ཀྱིས་སྤྱོད་ཡུལ་མ་ཡིན་ནོ། །ཞེས་གསུངས་པ་ལྟར་ཡིན་ཞིང༌། དེ་ཡང་མཚན་ཉིད་ཚང་བའི་བླ་མ་དམ་པ་ལས་ཉམས་ཁྲིད་ལེགས་པར་ཐོབ་ཅིང༌། དགེ་སྦྱོར་མཚན་བཅས་པ་རྣམས་རྣལ་འབྱོར་གྱི་ཁྲིགས་རིམ་གྱིས་གཏན་ལ་འབེབས་པ་དག་ལ་འགལ་འདུ་མི་འོང་མོད་ཀྱང༌། ཆོ་ག་ཀློག་འཛིན་ཐུབ་པ་ཙམ་གྱིས་གསང་སྔགས་ཀྱི་རྣལ་འབྱོར་པར་རློམ་པས་རྫོགས་པ་ཆེན་པོ་བྱ་རྩོལ་ལས་འདས་པ་ཡིན་ཞེས་རྒྱས་འདེབས་ཀྱི་སྨྲ་བས་བླ་མ་དང་ཆོས་ལུགས་ཀྱི་ཞབས་སྡུད་པ་དག་ལ་བསམས་པའོ།། །།ལྔ་པ་ལྷག་མའི་ཆོ་ག་ནི། གཞུང་ལས། ཚོགས་ལྷག་ཡོངས་
བསྡུས་གཙོ་བོའི་ཞལ་ཆབ་བྲན༔ བདུད་རྩིར་བྱིན་བརླབས་འདི་སྐད་ཕུལ་ཏེ་གཤེགས༔ ཞེས་གསུངས་པ་ལྟར་ཚོགས་ལྷག་ཐམས་ཅད་གསོག་འཇོག་མེད་པར་བསྡུས། སྔར་ཚོགས་ལྷག་ཏུ་བཅད་དེ་བཞག་པའི་གཙང་ལྷག་ཆ་ལྔ་པ་ཡང་བསྣན། སྒྲུབ་ཆེན་ལྟ་བུའི་ཚེ་ནི་གཞུང་འདི་ཉིད་ཀྱི་སྒོས་ཆོས་ལྷག་གཏོར་ཞེས་དམར་གཏོར་ཤ་ཁྲག་དང་ཡུངས་ཀར་གྱིས་བརྒྱན་པ་ཡང་མཉམ་དུ་བསྔོ་བར་བཤད། གང་ལྟར་ཡང་སློབ་དཔོན་ལྟ་དགོངས་དང་ལྡན་ན་གཙོ་བོའི་ང་རྒྱལ་ལ་གནས་པས་ཡ་རྐན་རྟ་མགྲིན་དང་མ་རྐན་རྣལ་འབྱོར་མར་གསལ་བའི་སྦྱོར་མཚམས་ནས་བྱང་སེམས་ཀྱི་བདུད་རྩི་བབས་པས་ལྷག་གཏོར་བྱིན་གྱིས་བརླབས་པར་བལྟས་ལ། སོར་མོ་རྣམས་ཕན་ཚུན་དུ་བཅིངས་བ་ལས། མཐེ་བོང་གཉིས་དང་མཛུབ་མོ་གཉིས་རྩེ་སོ་སོར་སྤྲད། མཐེའུ་ཆུང་བརྐྱངས་ཏེ་རྩེ་སྤྲད་པའི་ནང་དུ། ཨོཾ་ཨཱཿཧཱུྃ། སརྦ་པཉྩ་ཨ་མྲྀ་ཏ་ཧ་ཧོ་ཧྲཱིཿ ཞེས་བརྗོད་པའི་ཁ་ཕྲུས་བཏབ་པའམ། གཙང་དམེའི་གཉིས་རྟོག་མ་དག་ན་དེ་ལྟར་མི་བྱ་བས་གསང་སྔགས་མོས་སྤྱོད་ཀྱི་ཕྱག་བཞེས་དཀྱུས་མ་ཚོགས་ལྷག་ལ་བདུད་རྩིའི་ཟེག་མ་རཀྟ་དང་བཅས་པ་འཐོར་ལ། ཨ་ཀཱ་རོས་བརླབ། དཀྱིལ་འཁོར་གྱི་བྱང་ཤར་རམ། ལྷོ་ནུབ་ཏུ་ཞིང་ལྤགས་སམ། མ་ཏྲཾ་བྲིས་པའི་སྟེང་དུ་མཉྫིའི་ཁར་ཚོགས་ལྷག་འགོད་པའི་
ལུགས་ཡོད་ཀྱང༌། རྒྱུན་དུ་མ་འགྲུབ་ན་སྒྲུབ་ཆེན་སོགས་ལྷག་མ་བཙོན་དུ་འཛིན་པའི་ཚེ་དེ་ལྟར་བྱ། མཚན་མོ་ཡིན་ན་དུས་མཚན་གྱི་གདོང་ཐུག་བསྲུང་ཕྱིར་དཔལ་འབར་དང༌། ཉིན་མོ་སྤོས་མེ་བཙུགས་ལ། ལྷག་གཏོར་ལ་དབང་པའི་བཀའི་ཕོ་ཉ་དབང་མོ་ཉེར་བརྒྱད། མཁའ་འགྲོ་སོ་གཉིས། གིང་ཆེན་བཅོ་བརྒྱད། ལངྒ་ཚར་གསུམ། དབང་གི་མ་མོ་བདུན། སྲིང་མོ་བཞི། འབར་མ་བརྒྱད། ཕོ་ཉ་སུམ་ཅུ་རྩ་དྲུག་ལ་སོགས་པ་རྣམས་ལ། ནམ་མཁའ་མཛོད་ཀྱི་རང་བཞིན་བདུད་རྩིའི་ངོ་བོར་སྤར་ནས་བསྔོས་པས། དེ་དག་རྣམས་ཤིན་ཏུ་དགྱེས་ཤིང་དམ་ཚིག་དྲན་པས་ཅི་བཅོལ་གྱི་ལས་རྣམས་བསྒྲུབ་པར་མོས་ལ། ཧཱུྃ་ཧྲཱིཿ དུར་ཁྲོད་གསང་ཆེན་རོལ་པའི་དཀྱིལ་འཁོར་དུ༔ སོགས་བརྗོད། སྔགས་དོན་ནི། ཨུ་ཙི་ཊ་ལྷག་མའི། བ་ལིཾ་ཏ་གཏོར་མ། བྷཀྵ་སི་སྭཱ་ཧཱ༔ ཚིམ་པར་གྱུར་ཅིག །ཅེས་པ་སྟེ། ལས་ཀྱི་རྡོ་རྗེས་ཞྭ་གསང་སྔགས་ཐབས་ཀྱིས་ཆེ་བའི་རྟེན་འབྲེལ་དམ་ཚིག་གི་རྫས། ཞྭའི་ངོ་བོ་ངེས་ཚིག་དགོས་ཆེད་ལ་སོགས་པ་ནི་གཏེར་ཁ་འདི་ཉིད་ཀྱི་ཞྭ་ཆོས་རིན་ཆེས་སྤུངས་པ་ལྟ་བུའི་དོན་ཁོང་དུ་ཆུད་པར་བྱའོ། །དང་ལྷྭམ་གྱོན་ནས་པད་སྐོར་དང་བཅས་ནམ་མཁའ་ལྡིང་གི་ཕྱག་རྒྱས་ལྷག་མ་བཏེག་ལ་སྒོ་དྲུང་གི་བར་གྱེར་ཚིག་དང་བསྟུན་ནས་ཕྱི་ནུར་གྱིས་འགྲོ་ཞིང༌། དེ་ལས་སྒྲུབ་ཁང་གི་ཕྱི་རོལ་གོམ་པ་བདུན་ཅུའི་སར་སྲིན་མོའི་ཟ་ལམ་ཡིན་པས་དེར་འདོར་རྗེས། སྣོད་ཀྱང་བཤལ་ནས་
བསྔོ་བར་བཤད་དོ། །སྒྲུབ་ཆེན་ལྟ་བུའི་ཚེ་ལྷག་མ་བཙོན་དུ་བཟུང་བ་ཡིན་ཚེ་གྲོལ་རྒྱུའི་ནུབ་ཐ་མར་ལྷག་མ་དང་མཉམ་དུ་གད་རོ་རྣམས་ཀྱང་འདོར་རོ། །སྐབས་འདིར་ཛབ྄་བསྙེན་བྱ་བར་བཤད་པ་ནི་བདག་བསྐྱེད་རྐྱང་པ་འདི་ཡིན་གྱི་ས་བཅད་བཟུང་ལ། དེ་ལས་སྒྲུབ་ཆེན་པྲ་ཁྲིད་ཀྱི་ཁོག་ཕུབ་ནས་སྒྲུབ་གཞུང་ཆེན་མོ་གང་ཡིན་ལ་འཇུག་པའི་དགོངས་པ་ཡིན་ཏེ། སྐབས་འདི་ཉིད་ཀྱི་བསམ་བྱ་ལས། ལྷ་བསྙེན་ལ་སོགས་རང་རང་གཞུང་བཞིན་བཟླས༔ དམིགས་པ་སྤྲོ་བསྡུ་གང་རིགས་ཁ་བསྒྱུར་འབད༔ ཅེས་གསུངས་པ་སྟེ། དཔེར་ན་དབང་སྒྲུབ་ལྟ་བུའི་ཚེ་ནའང་འདིར་བཤད་པའི་བཤགས་སྐོང་གི་ལེ་ལག་གང་ཡིན་བོར་ལ། སྲུང་འཁོར་ལ་སོགས་འདི་ག་ཇི་བཞིན་གྱི་མཇུག་མེ་ཏོག་ཕྲེང་མཛེས་རྐྱང་པས་བདག་བསྐྱེད་འདི་ཡན་ཆད་བསྒྲུབས་རྗེས། མདུན་བསྐྱེད་ཀྱི་སྒྲུབ་ཁོག་ཆེན་མོ་ལ་འཇུག་པ་གཏེར་གཞུང་གི་དགོངས་པ་སོར་བཞག་ཡིན་པའོ།། །།དྲུག་པ་དེ་ཁོ་ན་ཉིད་ཀྱི་སྐོང་བཤགས་ནི། ཕྱི་ཀུན་རྫོབ་སྒྱུ་མ་ལྟ་བུའི་རྣམ་རོལ་ལས་ལུས་ཀྱི་སྒོ་ནས་ཕྱག་རྒྱ་གར་སྟབས། ནང་རིག་པ་སྐྱེ་འགག་གནས་གསུམ་དང་བྲལ་བ་སྤྲོས་བྲལ་བདེ་བ་ཆེན་པོའི་ངང་ལ་མ་བཅོས་པར་གཞག །གསང་བ་ངག་གྲག་སྟོང་སྐྱེ་མེད་ཀྱི་གདངས་ལས་ཀུན་རྫོབ་ཀྱི་སྦྱང་བྱ་ཐམས་ཅད་འཁོར་གསུམ་ཡོངས་དག་ཆེན་པོའི་ཀློང་དུ་བསྐང་ཞིང༌། ཧཱུྃ་ཧྲཱིཿ དངོས་
པོ་ཆོས་ཉིད་ཡངས་པའི་ཀློང་དུ་སྐོང་༔ སོགས་བརྗོད་ཅིང་དེ་ཡང༌། སྐྱེ་བ་མེད་པས་བྱང༌། འགག་པ་མེད་པས་ཆུབ། གཉིས་སུ་མེད་པས་སེམས་ཞེས་བཏགས་པ་དེ། དེ་ལྟ་བུའི་བྱང་ཆུབ་སེམས་ཀྱི་ཀློང་དུ་ཉམས་ཆག་དང་རྟོག་སྒྲིབ་ཐམས་ཅད་བསྐང་བར་བྱའོ། །དེ་ནས་ཚོགས་སྐོང་དེ་རྣམས་ཐམས་ཅད་ཀྱི་མཇུག་བསྔོ་བས་བསྡུ་བ་ནི། ལུགས་གཞན་དུ་ཚོགས་ལ་རོལ་རྗེས་བྱ་བ་ལྟར། ཧེ་རུ་ཀ་དཔལ་མས་བསྔོ་བ་བྱ་བའང་ཕུན་སུམ་ཚོགས་པའི་ཡན་ལག་གོ །བདུན་པ་བྱིན་རླབས་གནས་སྤར་གྱི་རིམ་པ་ལ་གཉིས། དམིགས་པའི་མན་ངག་ཁྱད་པར་ཅན་བཤད་པ་དང༌། བྱིན་རླབས་གནས་སྤར་གྱི་རིམ་པ་དངོས་སོ། །དང་པོ་ནི། རྡོ་རྗེ་སློབ་དཔོན་གྱིས་སློབ་མ་རྗེས་སུ་བཟུང་ཚེ་གཞུང་ནས་བཤད་པའི་བསམ་བྱ་ཁོ་ནས་འགྲུབ་ཀྱང༌། བདག་འཇུག་གི་ཚེ་དམིགས་པའི་ཁྱད་པར་ནི། རང་གི་རིག་པ་རྣམ་དག་ཡེ་ཤེས་ཀྱི་འཁོར་ལོར་རྫོགས་པ་བླ་མ་དང་དཀྱིལ་འཁོར་བདག་པོར་དབྱེར་མེད་དུ་གྲུབ་པ་དེ་ཉིད་དབང་ལེན་བྱའི་ཡུལ་ལ། གློ་བུར་འཁྲུལ་རྟོག་རྣམ་སྨིན་བག་ཆགས་ཀྱི་རྟེན་སློབ་བུའི་ཚུལ་དུ་བྱས་ནས་བྱིན་རླབས་གནས་སྤར་བྱ་བ་སྟེ་བདག་འཇུག་གི་རིགས་ཐམས་ཅད་ལ་ཁྱད་དུ་འཕགས་པའི་དམིགས་གནད་དེ། ཐམས་ཅད་མཁྱེན་པ་པྲཛྙཱ་རསྨི་དང་འགྲོ་འདུལ་གཏེར་བདག་གླིང་པ་བཞེད་དོ། །
དེ་ཡང་འདི་ནི་གཤིན་པོའི་རིགས་ཁོ་ན་ལ་ཆེད་དུ་བསྔགས་ཕྱིར། དམིགས་བྱ་དེ་ཉིད་ཏིང་ངེ་འཛིན་གྱི་མཐུས་སྐད་ཅིག་ཉིད་ལ་མདུན་དུ་བཀུག་རྗེས། རང་ཉིད་ཀྱིས་སློབ་དཔོན་དང་ཚེ་འདས་ཀྱིས་སློབ་མའི་བྱ་བ་བྱས་པར་མོས་ལ། བྱིན་རླབས་གནས་སྤར་གྱི་རིམ་པ་ཚུལ་བཞིན་དུ་བྱས་ན་དམིགས་བྱ་དེ་ལ་ཕན་ཐོགས་ཤིན་ཏུ་ཆེ་བས་སྙིང་རྗེ་ཅན་གྱིས་དང་དུ་བླང་བར་རིགས་སོ། །གཉིས་པ་ལ་སྦྱོར་དངོས་རྗེས་གསུམ་ལས། དང་པོ་སྦྱོར་བ་ལ་ཡང་གསུམ། མཎྜལ་དབུལ་བ། གསོལ་བ་གདབ་པ། དཀྱིལ་འཁོར་དུ་འཇུག་པའོ། །དང་པོ་ནི། རྡོ་རྗེ་སློབ་དཔོན་ཁྲི་ལ་འཁོད་པ་ལ་སློབ་མ་རྣམས་ཀྱིས་ཕྱག་བྱས་ལ་སྙིམ་པ་མེ་ཏོག་དང་བཅས་བྱིན་རླབས་གནས་སྤར་གྱི་དབང་ཟབ་མོ་ཞུ་བའི་ཡོན་དུ། ས་གཞི་སྤོས་ཆུས་སོགས་པས་མཎྜལ་དབུལ་ལོ། །གཉིས་པ་ནི། སློབ་མ་རྣམས་གུས་པས་ཐལ་མོ་སྦྱར་ཞིང་མགྲིན་གཅིག་ཏུ། ཨེ་མ༔ མགོན་པོ་ཐུགས་རྗེ་ཅན༔ སོགས་ཤློ་ཀ་གསུམ་གྱིས་གསོལ་བ་བཏབ། གསུམ་པ་ནི། རྡོ་རྗེ་སློབ་དཔོན་གྱིས་འདི་སྐད་དུ། ཨེ་མ་འདུས་པའི་མཆེད་ལྕམ་སྐལ་ལྡན་ལས་ཅན་རྣམས༔ སོགས་བརྗོད་ཅིང་དལ་ལ་བསྐོར་བ་ལན་གསུམ་བྱེད་དུ་བཅུག་ལ་དཀྱིལ་འཁོར་དུ་གཞུག་པར་བྱའོ། །གཉིས་པ་དངོས་གཞི་ལ་གསུམ་ལས། དང་
པོ་བླ་མ་རྡོ་རྗེ་སེམས་དཔའི་སྒོ་ནས་རྣམ་རྒྱལ་བུམ་པས་བྱིན་གྱིས་བརླབ་ཅིང༌། དམྱལ་བའི་གནས་ནས་སྤར། རིག་འཛིན་གྱི་གྲལ་དུ་དགོད་པ་ནི༔ རྣམ་རྒྱལ་གྱི་བུམ་པར་བླ་མ་རྡོ་རྗེ་སེམས་དཔའི་དཀྱིལ་འཁོར་གསལ་བཏབ་ཅིང་སློབ་མའི་སྤྱི་བོར་བཞག་ལ༔ ཧཱུྃ་ཧྲཱིཿ སངས་རྒྱས་ཀུན་གྱི་རང་བཞིན་གཙོ༔ སོགས་ཀྱིས་བསྐུར་ལ་དག་པ་བརྗོད་པ་ནིཿ སྐལ་ལྡན་ཁྱོད་ལ་ཡེ་ཤེས་རྣམ་དག་བདུད་རྩི་བུམ་པས་དབང་བསྐུར་བ་ལ་བརྟེན་ནས་སོགས་བརྗོད་ཅིང་བུམ་ཆུ་བྱིན་ལ་སློབ་མས་ཀྱང་འཐུང་བ་དང་ལུས་བཀྲུ་བ་སོགས་བྱའོ། །གཉིས་པ་ཡི་དམ་ཞི་ཁྲོའི་རང་གསལ་གྱི་སྒོ་ནས་ཤེལ་དང་མེ་ལོང་གིས་བྱིན་བརླབ་བྱ་ཞིང༌། དུད་འགྲོའི་གནས་ལས་སྤར། རིག་འཛིན་གྱི་གྲལ་དུ་དགོད་པ་ནི། མེ་ལོང་གི་སྟེང་དུ་ཤེལ་དངས་པའི་ནང་དུ་ཡི་དམ་ཞི་ཁྲོའི་དཀྱིལ་འཁོར་གསལ་བཏབ་ཅིང་སློབ་མའི་མགྲིན་པར་བཞག་ལ། ཧཱུྃ་ཧྲཱིཿ ཞི་ཁྲོ་རང་གསལ་དཀྱིལ་འཁོར་གཙོ༔ སོགས་དང་རྗེས་འབྲེལ་དུ་དག་པ་བརྗོད་པ་ནི། སྐལ་ལྡན་ཁྱོད་ལ་ཞི་ཁྲོ་རང་གསལ་འོད་ཀྱི་ཕོ་བྲང་རིན་པོ་ཆེ་ཤེལ་དང་མེ་ལོང་གི་རྫས་མཆོག་འདིའི་དབང་བསྐུར་བ་ལ་བརྟེན་ནས་སོགས་བརྗོད་ཅིང་ཤེལ་དང་མེ་ལོང་གི་ངོས་ལ་དལ་གྱི་ལྷ་ཚོགས་སྣང་ལ་རང་བཞིན་མ་གྲུབ་པར་ངོ་སྤྲད་པར་བྱའོ། །གསུམ་པ་ཌཱཀྐི་དམ་ཅན་རྒྱ་
མཚོའི་སྒོ་ནས། བདུད་རྩི་རྫས་མཆོག་གཏོར་མས་བྱིན་གྱིས་བརླབ་ཅིང༌། ཡི་དྭགས་ཀྱི་གནས་ལས་སྤར། རིག་འཛིན་གྱི་གྲལ་དུ་དགོད་པ་ནི། མཁའ་འགྲོའི་གཏོར་མ་ཌཱཀྐི་དམ་ཅན་རྒྱ་མཚོའི་དལ་དུ་གསལ་བཏབ་པ་སློབ་བུའི་ལག་ཏུ་གཏད་ལ། ཧཱུྃ་ཧྲཱིཿ བ་ལིང་བཅུད་ལྡན་ཕོ་བྲང་དུ༔ སོགས་ཀྱིས་བསྐུར་ལ་དག་པ་བརྗོད་པ་ནི། སྐལ་ལྡན་ཁྱོད་ལ་ཌཱཀྐི་གསང་བའི་ཕོ་བྲང་བྱིན་རླབས་རྨད་བྱུང་གཏོར་མའི་དབང་བསྐུར་བ་ལ་བརྟེན་ནས། སོགས་བརྗོད་ཅིང་གཏོར་མའི་རས་མ་ནས་ཅུང་ཟད་ཀྱང་བྱིན་ནོ། །གསུམ་པ་རྗེས་ལ་གཏང་རག་གི་མཆོད་པ་ནི། རྡོ་རྗེ་སློབ་དཔོན་ལ་ཡོན་དང་མཎྜལ་དབུལ་ཞིང་ཕྱག་འཚལ། དཀྱིལ་འཁོར་ལྷ་ཚོགས་ལ་སྨན་རག་གཏོར་མཆོད་དབུལ་ཞིང་བསྟོད་པ་བྱ། མཆེད་ལྕམ་རྣམས་ཀྱང་གཅིག་གིས་གཅིག་ལ་བསྙེན་བཀུར་བྱ་ཞིང་དག་སྣང་སྦྱང༌། རྡོ་རྗེ་སློབ་དཔོན་གྱི་སྣང་བ་ཐོབ་ན་རྡོ་རྗེའི་གླུ་གར་ལ་སོགས་པ་ཡང་བྱ་ཞིང༌། ཉམས་བྱུང་རྒྱལ་དུ་བསྐྱང༌། དེ་ལ་རྡོ་རྗེའི་གླུ་གར་ནི། ཆོག་ཁྲིགས་དང་རྣམ་བཤད་ཕལ་ཆེར་དུ་ཁ་འཕངས་ཙམ་ལས་ཇི་བཞིན་བཤད་པ་ཆེར་མི་སྣང་བས་འདི་ཉིད་ཕུན་སུམ་ཚོགས་པའི་ཡན་ལག་ཡིན་པས་སྐབས་འདིར་ཆུ་བབས་སུ་བཤད་པ་ལ་གསུམ། གླུ་གར་འདི་བྱ་བའི་དུས། གླུ་གར་དངོས། གླུ་གར་བྱས་པའི་ཕན་
ཡོན་ནོ། །དང་པོ་ནི། རྫོགས་པ་ཆེན་པོའི་རྒྱུད་མུ་ཏིག་ཕྲེང་བའི་རྒྱུད་ཀྱི་རྣམ་བཤད་སྟོན་པའི་སྐབས། ཡེ་ཤེས་གཡུལ་བཟློག་རྒྱུད་ཤེས་ན། ཕྱོགས་བཞིར་སྐར་ཁུང་བཏོད་པ་འདྲ། །ཞེས་གསུངས་པ་ནི་ཉི་ཟླ་ཁ་སྦྱོར་རྒྱུད་ཡིན་ཏེ། དེ་ཉིད་ལས། རྣལ་འབྱོར་གང་ཞིག་སྐལ་ལྡན་པ། །དུར་ཁྲོད་རྣམས་སུ་རྒྱུ་བའི་ཚེ། །རྡོ་རྗེའི་གླུ་ནི་གང་ཡང་བླང༌། །མི་རྟོག་བསམ་གཏན་བསྟན་པའི་གྲོགས། །སྤྱོད་པ་ཀུན་གྱི་སྔོན་དུ་འགྲོ། །དེ་ཕྱིར་རྡོ་རྗེའི་གླུ་ཉིད་བླང༌། །ཚོགས་དང་དབང་བསྐུར་དཀྱིལ་འཁོར་འཇུག །དེ་ནས་གླུ་ལ་བརྩོན་པར་བྱ། །མི་རྟག་རྒྱུད་ལ་བརྟེན་དུས་སུ། །འདི་ཉིད་སྐབས་སུ་བླང་བར་བྱ། །ཞེས་གསུངས་པས། བརྟུལ་ཞུགས་ཀྱི་སྤྱོད་པ་བསྐྱང་བ་དང༌། འཁོར་འདས་རུ་ཤན་འབྱེད་པ་དང༌། ཚོགས་འཁོར་དང༌། དབང་བསྐུར་དང༌། དཀྱིལ་འཁོར་སྒྲུབ་པའི་དུས་དང༌། ཏིང་ངེ་འཛིན་གོང་དུ་སྤེལ་བ་ལ་སོགས་ཀྱི་ཚེ་སྐྱེ་བོ་ཐ་མལ་པས་མ་ཚོར་བར་གསང་ནས་བྱ་བ་ཡིན་པའི་ཕྱིར་རོ། །གཉིས་པ་གླུ་གར་དངོས་ལ་གསུམ། ལུས་ཀྱི་རྣམ་འགྱུར་ངག་གི་བཟླས་བརྗོད། སེམས་ཀྱི་ཏིང་འཛིན་ནོ། དང་པོ་ལ་གཉིས། ཆས་དང་བྲོ་གར་དངོས་སོ། །དང་པོ་ནི། ཚོགས་དང་དཀྱིལ་འཁོར་ལ་འཇུག་པ་དང་ཏིང་ངེ་འཛིན་སྤེལ་དུས། ཞི་ཁྲོ་གང་རུང་གི་
ཆས་སོ། །ཞི་བ་ནི་དར་དང་རིན་པོའི་རྒྱན་ཆས་སྤྲས་ཏེ། གོས་ཀྱི་ལྷབ་ལྷུབ་དང༌། ཞི་བའི་དབུ་རྒྱན་དང༌། རྡོར་དྲིལ་འཛིན་པའོ། །ཁྲོ་བོའི་ཆས་ནི། རུས་པའི་རྒྱན་དྲུག །ཐལ་ཆེན་གྱི་བྱུག་པ། ཞག་གི་ཟོ་རིས། བྷནྡྷ་དང་ཕུར་པ་འཛིན་པའོ། །གཉིས་པ་བྲོ་གར་ནི། ལྷའི་ཕྱག་རྒྱ་མ་ནོར་བར་འཆའ་བའོ། །གཉིས་པ་ངག་བཟླས་ནི་འོག་ཏུ་འཆད་དོ། །གསུམ་པ་སེམས་ཀྱི་ཏིང་ངེ་འཛིན་ནི། ལྷའི་སྐུ་ཞི་དྲག་གང་ཡིན་གྱི་བསྐྱེད་རིམ་ལ་གནས་པའོ། །ཁྱད་པར་འཁོར་འདས་རུ་ཤན་འབྱེད་པ་དང༌། ཉམས་གོང་དུ་སྤེལ་བའི་ཚེ་བྱ་ལུགས་གཞན་དུ་ཤེས་ལ། འདིར་ཚོགས་ཀྱི་དུས་རྣལ་འབྱོར་པ་ཐམས་ཅད་བསམ་གཏན་གྱི་ངང་ལས་ལངས་ཏེ། ཞི་བའི་ཉམས་དགུ་དང༌། ཁྲོ་བོའི་གར་དགུ་སོ་སོའི་ངེས་པས་སྒོ་གསུམ་གྱི་བྱ་བ་ཕྲུགས་གཅིག་ཏུ་བྱ་ཞིང༌། ཁྱད་པར་སྣང་སྟོང་གཉིས་སུ་མེད་པ་ཀུན་ཏུ་བཟང་པོ་ཡབ་ཡུམ་གྱི་དགོངས་པའི་ཀློང་ནས་ཆོས་ཉིད་ཀྱི་གླུ་འདི་ལྟར་བླང་ངོ༌། །ཨ་དཱི་ཀ་དཱི། རིང་པོ་དང་ཐུང་ངུ་དང༌། འཁྱོག་པོར་གདངས་སྙན་པོས་བརྗོད། ཨཱོྃ་དང༌། ཨེ་དང༌། ཧཱུྃ་དང༌། ཧེ་དང༌། ལྱཱཻ་ཤག་ལ་སོགས་པས་སྣ་དྲངས་ནས། མཆོག་གསང་བླ་ན་མེད་པ་རྡོ་རྗེའི་ཚིག །ཨེ་མ་ཀི་རི་ཀཱི་རཱི། མསྟ་བཱ་ལི་བཱ་ལི། ས་མི་ཏ་སུ་རུ་སུ་རུ། ཀུ་ཏ་ལི། མ་
སུ་མ་སུ། ཨེ་ཀ་རཱ་སུ་ལི་བྷ་ཏ་ཡཱེ། ཙི་ཀི་ར་བྷུ་ལི་བ་ལ་ཡཱེ། ས་མུནྟ་ཙརྱ་སུ་གྷ་ཡ། བྷི་ཏ་ས་ན་བྷྱ་ཀུ་ལེ་ཡཱེ། ས་ཀ་རི་དྷཱུ་ཀ་ན། མ་ཏ་རི་བཱཻ་ཏ་ན། བ་ར་ལི་ཧི་སཱ་ན། མ་ཁརྟ་ཀཱེ་ལ་ནཱཾ། སཾ་བྷུ་ར་ར་མེ་ཀ་ཙ་དྷི་པ། སུརྱ་བྷ་ཏ་ར་ཨི་པ་ཤ་ན་པ། ར་ན་བྷི་ཏི་ས་གྷུ་ར་ལཱ་པ། མ་སྨིན་ས་གུ་ལི་ཏ་ཡ་བ། འགུ་ར་འགུ་རཱ་ས་ག་ཁ་ར་ན་སཱཾ། ན་ར་ན་རཱ། ཨི་ཐ་ར་པ་ཊཱ་ལཾ། སིར་ཎ་སིར་ཎ། བྷེ་ས་རས་པ་ལཾ། བྷུནྡྷ་བུནྡྷ། ཚི་ཥ་ས་ཀེ་ལཾ། ས་སཱ། རི་རཱི། ལེ་ལཱེ། ཨི་ཨཱི། མི་མཱི། ར་ར་རཱ། མ་སྐྱེས་པས་ན་མི་འགག་ཅིང༌། །འགྲོ་དང་འོང་མེད་ཀུན་ཏུ་ཁྱབ། །བདེ་ཆེན་ཆོས་མཆོག་མི་གཡོ་བར། །མཁའ་མཉམ་རྣམ་གྲོལ་གོས་པ་མེད། །རྩ་བ་མེད་ཅིང་རྟེན་མེད་ལ། །གནས་མེད་ལེན་མེད་ཆོས་ཆེན་པོ། །ཡེ་གྲོལ་ལྷུན་མཉམ་ཡངས་པ་ཆེ། །བཅིང་མེད་རྣམ་པར་བཀྲོལ་མེད་པ། །ཁྱབ་གདལ་ཁང་བཟང་ཡེ་ཡོད་ཉིད། །ཁྱབ་མཉམ་པ་ལས་རྣམ་འདས་པ། །ཡངས་སོ་ཆེའོ་ནམ་མཁའི་དབྱིངས། །ཆོས་ཆེན་འབར་བ་ཉི་ཟླའི་དཀྱིལ། །ལྷུན་གྱིས་གྲུབ་དང་མངོན་སུམ་པ། །རྡོ་རྗེ་རི་བོ་པདྨ་ཆེ། །ཉི་མ་སེང་གེ་ཡེ་ཤེས་གླུ། །སྒྲ་ཆེན་རོལ་མོ་མཚུངས་པ་མེད། །ནམ་མཁའི་མཐའ་ལ་ལོངས་སྤྱོད་པ། །སངས་རྒྱས་སངས་རྒྱས་ཀུན་མཉམ་ཞིང༌། །ཀུན་བཟང་ཡངས་པ་ཆོས་ཀྱི་རྩེ། །མཁའ་དབྱིངས་བཟང་མོའི་དབྱིངས་རུམ་དུ། །ཀློང་
གསལ་ལྷུན་གྲུབ་ཡེ་རྫོགས་ཆེ། །ཞེས་པའི་དོན་ཏེ་རིག་པ་ཁྱབ་གདལ་ཡངས་པའི་ངང་ནས་བླང་ངོ༌། །གསུམ་པ་ཕན་ཡོན་ནི། ཉི་ཟླ་ཁ་སྦྱོར་གྱི་རྒྱུད་ལས། དེ་ཡང་རྣལ་འབྱོར་ཐབས་ཀྱི་གཙོ། །ཟག་པ་མེད་པ་རྡོ་རྗེའི་གླུས། །སངས་རྒྱས་ཀུན་གྱི་ཡིད་ཀྱང་ཚིམ། །རྣལ་འབྱོར་པ་ཡི་ཉམས་ཀྱི་གྲོགས། །མཁའ་འགྲོ་མ་ཡི་ཡིད་རྣམས་འཕྲོག །རིགས་དྲུག་འཁོར་བའི་ཞེན་པ་ལྡོག །སྐལ་དང་ལྡན་པའི་ངང་འདུའི་གནས། །སེམས་གྱི་རྒྱུད་ཀུན་རང་དལ་མཐོང༌། །རང་རིག་བདེ་བའི་གསལ་རྣམས་འདེབས། །ཤེས་པ་གཅིག་པའི་དཔུང་རྣམས་འབྱེད། །ཡིད་ཅན་རྣམས་ཀྱི་སྐྱོན་རྣམས་སེལ། །ལུས་ཅན་ཀུན་གྱི་སྒྲིབ་པ་སྦྱོང༌། །དབང་དང་དམ་ཚིག་བདེ་བ་སྟེར། །མ་རིག་པ་དག་ཅི་རལ་གནོན། །ཐེག་པ་རྣམས་ཀྱི་ངལ་བསོའི་ས། །ལྟ་དང་སྒོམ་པའི་བྲལ་བའི་མཚམས། །སྙིང་པོ་རྣམས་ཀྱིས་གདུལ་བྱའི་ཞིང༌། །མི་བསྐྱེད་སྣང་བ་རང་སྐྱེད་ནས། །རྡོ་རྗེ་སེམས་དཔའི་སྐུ་ཡང་འཛིན། །ཞེས་དང༌། རྡོ་རྗེ་གསང་བའི་གླུ་ཡིས་ནི། དགོངས་པས་ངན་སོང་སྒོ་དགག་ཕྱིར། །སངས་རྒྱས་ཉིད་ཀྱི་མཛད་སྤྱོད་ཡིན། ཞེས་གསུངས་པས་འདི་ནི་རྡོ་རྗེ་ཐེག་པའི་གསང་ཚིག་བླ་ན་མེད་པ་ཡིན་ཞིང༌། ཕན་ཡོན་བསམ་གྱིས་མི་ཁྱབ་པའི་ཕྱིར་ཚོགས་
དང༌། དཀྱིལ་འཁོར་མཆོད་པའི་ཚེ་ན་བརྟུལ་ཞུགས་ཅན་གྱི་རྣལ་འབྱོར་པས་ཤིན་ཏུ་གསང་ནས་ཉམས་སུ་ལེན་པར་བྱའོ། །དེ་ནས་རྡོ་རྗེ་སློབ་དཔོན་གྱིས་ཀྱང་ལོང་ཁྱབ་དང་བསྟུན་པའི་གསང་སྔགས་ཀྱི་ཆེ་བ་དང་དམ་ཚིག་གི་རྣམ་དབྱེ་བཤད། དེ་རྗེས་སློབ་བུ་རྣམས་མགྲིན་གཅིག་ཏུ། ཐལ་མོ་སྦྱར་ལ། ཨེ་མ་རྒྱལ་བའི་གདུང་ཚབ་བཀའ་དྲིན་ཆེན་པོའི་དཔལ༔ ཞེས་པ་ལན་གསུམ་བརྗོད་རྗེས་ཕྱག་འཚལ། གཏོར་མཆོད་ཁ་གསོ་ཞིང་སྨན་རཀ་བྲན། གཞུང་ནས་གསུངས་པའི་གཏོར་བསྔོ་དང༌། བསྟོད་འབུམ་ཆེན་མོ་ཡང་སྐབས་འདིར་བྱ་བར་གསུངས་ཀྱང་མ་འགྲུབ་པའི་ཚེ་རྒྱས་བསྡུས་སྐབས་དང་བསྟུན་ཆོག་པའི་ཞལ་འཕངས་བྱུང་གཤིས། ས་བཅད་མི་སྟོང་པའི་ཆེད་དུ། ཡེ་ཤེས་ལྷ་ཚོགས་སྤྱན་འདྲེན་གཤེགས། །སོགས་བརྗོད་ཅིང་རོལ་མོ་བསྒྲག །སླར་ཡང་སློབ་དཔོན་དང་དཀྱིལ་འཁོར་གྱི་གཙོ་བོ་ཐ་མི་དད་པའི་སྤྱན་སྔར། སྐུ་དྲིན་གཏང་རག་གི་ཡོན་དུ། ས་གཞི་སྤོས་ཆུས་སོགས་བརྗོད་ཅིང་མཎྜལ་དབུལ། གཉིས་ཀ་མེད་དུ་མི་རུང་བ་གཞུང་གི་དགོངས་པ་དངོས་བསྟན་ཡིན་ནོ། །དངོས་གཞིའི་ཁོག་འབུབས་ནམ་མཁའ་ལྡིང་འགྲོས་དང༌། །མན་ངག་གནད་གསང་རུས་སྦལ་ནུར་འགྲོས་ཀྱིས། །པད་འབྱུང་དགོངས་གསང་གོ་ལའི་ཁྱོན་ཡངས་པོར། །གཞལ་ཚེ་བྷྲ་མ་ར་ཡི་ཁེངས་པ་བསྙིལ། །གཞུང་
ལུགས་མང་དུ་མ་ཐོས་བློ་དམན་ཡང༌། །རྩ་བརྒྱུད་བླ་མའི་ཡེ་ཤེས་གཟིགས་པ་ཡིས། །ཐུགས་རྗེའི་ཆུ་རྒྱུན་སྙིང་ལ་ཞུགས་དེའི་མཐུས། །ལོངས་སྤྱོད་འཁོར་ལོའི་མཛོད་ནས་འདི་སྐྱུགས་སོ། །འོན་ཏེ་ཐང་ཁྲོམ་ཟ་བའི་རྒན་མོ་ཡི། །མིག་ལ་སྐྲ་ཤད་འཛག་པ་རབ་རིབ་སྐྱོན། །དག་སྣང་ཅན་གྱི་རྡོ་རྗེ་སྤུན་གྲོགས་རྣམས། །བསྲེགས་བཅད་བརྡར་བའི་རྒྱན་འདི་མགུལ་བར་ལོངས། །ཞེས་པའང་བར་སྐབས་ཀྱི་ཉམས་དགའི་གླུའོ།། །།སྤྱི་དོན་གསུམ་པ་རྗེས་ཀྱི་བྱ་བ་ལ་རྣམ་གྲངས་བཅུ་སྟེ། ཐུགས་དམ་བསྐུལ་བ། ཆད་ཐོ་གྱེར་བ། བསྟན་མ་སྐྱོང་བ། རྟ་བྲོ་བརྡུང་བ། དངོས་གྲུབ་བླང་བ། བཤགས་པ་བྱ་བ། ཤིས་པ་བརྗོད་པ། དཀྱིལ་འཁོར་བསྡུ་བ། བསྔོ་བ་བྱ་བ། སྨོན་ལམ་གདབ་པའོ། །དང་པོ་ནི། གཞུང་ལས། གཏོར་མར་སྨན་རཀ་བྲན་ཞིང་གཟི་བྱིན་བསྐྱེད༔ རོལ་མོ་དང་བཅས་ལྷ་རྣམས་འདི་ལྟར་བསྐུལ༔ ཞེས་གསུངས་པས། གཏོར་མ་རྣམས་ལ་སྨན་རཀ་བྲན། དཀྱིལ་འཁོར་གྱི་ལྷ་ཚོགས་ཐམས་ཅད་ཐུགས་ཟབ་ཞི་སྤྲོས་བྲལ་གྱི་ཀློང་ནས་འགྲོ་བའི་དོན་དུ་གང་འདུལ་གྱི་ཁམས་དང་འཚམ་པའི་གཟུགས་སྐུར་བཞེངས་ཏེ། ཁམས་གསུམ་དང་དུག་གསུམ་གྱིས་བསྡུས་པའི་ཆོས་ཐམས་ཅད་སྐུ་གསུམ་འདུ་འབྲལ་མེད་པའི་ཀློང་དུ་རྒྱས་གདབ་པའི་ཆེད་དུ་བདག་མདུན་ཐམས་ཅད་གཟི་བྱིན་
བསྐྱེད་ལ། རྐང་གླིང་དང་ཅང་ཏེའུ་ཀུ་ཤའི་གླུ་དང་སྦྱར་ནས། ཧཱུྃ་ཧྲཱིཿ ཆོས་སྐུ་སྐྱེ་མེད་ཞི་བའི་ངང་ཉིད་ལས༔ སོགས་ཀྱིས་བསྐུལ་ལ་རྣལ་འབྱོར་པ་མཆེད་ལྕམ་རྣམས་ཀྱང་བྲོ་གར་ས་འདུལ་བ་ནས་བཟུང་སྟེ་ལས་མཐར་མ་ཕྱིན་གྱི་ལམ་སོ་སོར་རྒྱུད་སྡེ་ཐ་དད་པའི་དགོངས་པས་སྟངས་སྟབས་ལ་སོགས་པ་ཅིར་ཡང་སྣང་སྟེ། སྐབས་འདིར་ནི་གཞུང་འདི་ཉིད་གར་འཆམ་འཕྲུལ་གྱི་པ་ཏྲ་ལྟར་སྦྱར་བ་ལས། ཕྱི་རབས་ཀྱི་གང་ཟག་བླུན་པོ་རྣམས་ཆང་གིས་མྱོས་པའི་འབག་འཆམས་ལ་བརྟུལ་ཞུགས་ཀྱི་མིང་འདོགས་པའི་གྱ་ཚོམ་དེ་དང་མ་ནོར་བ་བྱའོ། །ལ་སོགས་པའི་རོལ་རྩེད་སྣ་ཚོགས་དང༌། རྡོ་རྗེའི་གླུ་ལ་སོགས་པས་བརྟུལ་ཞུགས་ཀྱི་སྤྱོད་པ་བྱུང་རྒྱལ་དུ་བསྐྱང་ཞིང་ཡེང་བ་ལ་ཐོག་བརྫིས་བྱ། གཞན་ཡང་ཞི་རྒྱས་དབང་དྲག་ལ་སོགས་པའི་ཕྲིན་ལས་ཀྱི་ཁ་བསྒྱུར་གང་འདོད་གཞུང་རང་རང་གི་ཁོག་ཕུབ་ནས་སྐབས་འདིར་བརྩམ་པར་གསུངས་སོ། །གཉིས་པ་ཆད་ཐོ་གྱེར་བ་ལ་གཉིས། རྗོད་བྱེད་ཀྱི་མིང་ལ་སྒྲ་བཤད་བཞག་པ་དང༌། བརྗོད་བྱའི་དོན་ལ་སྟོང་ཐུན་བརྗོད་པའོ། །དང་པོ་ནི། ཆད་ཅེས་པ་ནི་སྔོན་ནས་ཁས་བླངས་པའི་དོན་དང༌། ཐོ་ཞེས་པ་ནི་ལས་འདི་ཙམ་ཞིག་གྱིས། འདི་ཙམ་ཞིག་མ་བྱེད་ཅེས་བླང་དོར་གྱི་སྒོ་ནས་མཚམས་བཟུང་བ་སྔོན་དཔལ་ཆེན་པོ་ནས་རིམ་བཞིན་དུ་བརྒྱུད་དེ་གྲུབ་པའི་རིག་འཛིན་རྣམས་ཀྱི་སྤྱན་སྔར་ཁས་བླངས་པའི་ཐ་ཚིག་རྣམས་རིམ་པར་དྲན་གསོས་བཏབ་ནས་བསྒྲག་པ་སྟེ། དེས་
ནི་སྔོན་གྱི་དམ་བཅའ་དང་བྲོ་བོར་བ་དག་དྲན་ནས་ལས་ལ་མྱུར་དུ་འཇུག་པའི་དགོས་པ་ཡོད་པ་དང༌། དེ་ཕྱིར་ཆད་ཐོའི་གཏོར་མ་དང་སྒྲུབ་མཇུག་ལྟ་བུའམ་སྤྲོས་བཅས་ཉིན་ཆོག་པའི་ཚེ་ཆོས་སྲུང་གི་གཏོར་མ་རྣམས་ཀྱང་གྲལ་ལས་ཅུང་ཟད་བསྐྱོད་དེ་སྨན་རཀ་བྲན། ལག་ལེན་དུ་བསྟན་མ་ལ་བཤོས་བུ་བཟོ་བ་ཤས་ཆེ་བས་དེ་ལྟར་དུ་བསྐོས་སུ་ཡོད་ན་ཆད་ཐོ་དང་སྔ་ཕྱི་འགྲོ་ཕྱོགས་མཐུན་པར་བྱས་ལ་སྟེགས་ཀྱི་ཁར་གཞག་གོ །གཉིས་པ་ནི། ཚིག་རྐང་དང་པོར་འབྲུ་འགྲེལ་གྱི་དབང་དུ་བྱས་ན། ཧཱུྃ་ནི་རྡོ་རྗེ་གསུམ་གྱི་ས་བོན། བྷྱོཿནི་སྣང་སྲིད་མ་མོའི་སྲོག་ཡིག་སྟེ་འདིར་སྣང་སྟོང་དབྱེར་མེད་དམ། ཀུན་བཟང་ཡབ་ཡུམ་ལ་སྦྱར་ནས། སྔོན་ཚེ་འདས་པ་ལ་སོགས་དུས་གསུམ་གྱི་རྣམ་གཞག་དང་བྲལ་བ་ནི་གདོད་མའི་གཞི་ཡིན་ཞིང༌། །དེ་ཉིད་བསྐལ་པ་དང་པོ་ལ་དཔེ་བརྗོད་དུ་བཞག་ནས། གཞིའི་ཀ་དག་གི་གནས་ལུགས་བརྗོད་དུ་མེད་པ་དེའི་ངང་ནས་རང་བཞིན་གྱིས་གསལ་བའི་རིག་མདངས་ཤར་བ་ན་ལྷུན་གྲུབ་ཀྱི་སྣང་བ་ཤར་གྲོལ་དུས་ཚོད་མཉམ་པའི་ཚུལ་དུ་ཆོས་ཀྱི་དབྱིངས་མུ་མཐའ་མེད་པའི་ཕོ་བྲང་དུ། ཐོག་མའི་མགོན་པོ་སྟོན་པ་ཀུན་ཏུ་བཟང་པོ་ཡེ་སངས་རྒྱས་ནས། རང་གིས་རང་བྱུང་འོད་ལྔའི་དཀྱིལ་འཁོར་ཆེན་པོ་ཞལ་ཕྱེ་བའི་ཚེ་ན།
ཐུགས་རྗེ་ལས་སྤྲུལ་པའི་ཚོགས་དྲུག་གི་སྣང་བ་ཌཱཀྐི་དང་ཤུགས་འགྲོ་མ་ཡིས། སོ་སོའི་ཡུལ་དང་ཡུལ་ཅན་གྱི་སྣང་བའི་རང་གཟུགས་གཉིས་མེད་མཐའ་བྲལ་ཆེན་པོའི་ཀློང་དུ་བསྟན་ནས་ཀྱང༌། ཅིར་སྣང་ལམ་དུ་ཁྱེར་བའི་གཏོར་མ་ལེན་པར་མ་ཆད་དམ། རིག་པ་འགྱུར་མེད་ཀྱི་བསྟན་པ་བསྲུང་བར་མ་ཆད་དམ། ཉོན་མོངས་པ་དུག་ལྔའི་དགྲ་བགེགས་ཐམས་ཅད་ཡེ་ཤེས་ལྔའི་རྣམ་རོལ་དུ་འདུལ་བར་མ་ཆད་དམ། སྔོན་གྱི་ཚེ་དེ་ལྟར་ཞལ་གྱིས་བཞེས་པའི་གཡར་དམ་ལས་མ་འདའ་བར་ཡེ་ནས་རང་བཞིན་གྱི་རྣམ་པར་དག་པའི་གཏོར་མ་དབུལ་བྱ་དང་འབུལ་བྱེད་ཀྱི་གཉིས་ཆོས་ཀྱིས་དབེན་པ་འདི་བཞེས་ལ། ཐུགས་དམ་དེ་ལྟ་བུའི་ཐུགས་རྒྱུད་བསྐུལ་བས་བཅོལ་པའི་ཕྲིན་ལས་མཚན་མའི་ཡུལ་ལས་བརྒལ་བ་དེ་མཛོད་ཅིག །ཅེས་པ་སྟེ། དེས་འགྲེ་བར་ཚིག་རྐང་ཕྱི་མ་རྣམས་ལའང་ཆད་ཐོ་དཀྱུས་མ་དང་མི་འདྲ་བའི་ངེས་པའི་དེ་ཁོ་ན་ཉིད་ལ་སྦྱོར་རྒྱུའི་དག་སྦྱོར་ཤ་སྟག་ཏུ་མཆིས་ཀྱང་མཁས་དང་འཕགས་ཆེན་རྣམས་ལ་ནི་འགྲེལ་པ་མ་དགོས་ཤིང༌། གང་ཟག་ཐུན་མོང་པ་རྣམས་ཀྱི་ནི་སྤྱོད་ཡུལ་དུ་མ་གྱུར་པས་མ་སྤྲོས་སོ། །དེ་ཡང་སྤྱི་ཁྱབ་ཀྱི་དམིགས་པར་རྫོགས་པ་ཆེན་པོའི་བཀའ་སྲུང་སྤྱི་དང༌། ཁྱད་པར་བླ་མ་དགོངས་པ་འདུས་པའི་བཀའ་གཏེར་གྱི་སྲུང་མ་ཐམས་ཅད་རང་རང་སོ་སོའི་གནས་ནས་སྐད་ཅིག་དེ་ཉིད་ལ་
འདུས་པར་བསམ་ལ་མཆོད་གཏོར་གྱིས་མཉེས་པར་བྱས། སྔོན་གྱི་ཐུགས་དམ་རྗེས་སུ་བསྐུལ་བས་ཐ་ཚིག་གཉན་པོ་ལས་མི་འདའ་བར་དགེ་བ་ཅན་གྱི་སྡོང་གྲོགས་བྱེད་པར་བལྟས་ལ། ཚིག་རྐང་འོག་མ་རྣམས་མཐར་ཆགས་སུ་གྱེར་ཞིང༌། གཏོར་མ་རྣམས་རྡོ་རྗེ་སློབ་དཔོན་གྱི་ལག་པས་བཏེག་པའི་བརྡ་བྱ་ཞིང་མེ་ཏོག་འཐོར་ནས་སྒྲུབ་ཁང་གི་ཡང་ཐོག་ཏུ་ཞལ་ནང་བསྟན་གྱིས་དབུལ་བར་བྱའོ། །མངོན་སྤྱོད་གློ་བུར་བའི་རིགས་ལ་ཚོགས་ཐ་མ་དང་རྗེས་སུ་འབྲེལ་བར་ཆད་ཐོ་ཟོར་དུ་འཕངས་བའི་ལུགས་ཀྱང་ཡོད་དེ་མན་ངག་གི་གནད་ལ་བརྟེན་དགོས་པ་གཅེས་སོ། །གསུམ་པ་བསྟན་མ་སྐྱོང་བ་ལ་གཉིས། སྟོང་ཐུན་བརྗོད་པ་དང༌། གཏོར་མ་བསྔོ་བའོ། །དང་པོ་ནི། སྤྱིར་གསང་སྔགས་སྔ་འགྱུར་གྱི་ཆོ་ག་ཐམས་ཅད་ལ་བསྟན་མ་བསྐྱང་བའི་རྣམ་གཞག་འབྱུང་མོད། ལྷག་པར་ལྷ་བསང་སོགས་ཀྱི་སྐབས་སུ་མེད་དུ་མི་རུང་བར་བྱ་དགོས་པ་འདི་ནི། སློབ་དཔོན་ཆེན་པོའི་ཐུན་མོང་མ་ཡིན་པའི་བཀའི་ཕོ་ཉ་ཡིན་པ་དང༌། དེ་ཡང་བོད་གངས་ཅན་སྤྱིའི་ཡུལ་ལྷར་མངའ་གསོལ་མཛད་ཅིང་ཕྱིན་ལོག་མུ་སྟེགས་ཀྱི་རྒོལ་བ་བསྲུང་བ་ལ་བསྔགས་ཤིང་བཀའ་བསྒོས་པའི་གཡར་དམ་ལས་ནམ་ཡང་མི་འདའ་བ་ནི། ད་ལྟ་གངས་ཅན་འདིར་མུ་སྟེགས་ཀྱིས་དངོས་སུ་བགྲོད་མི་ནུས་པ་ཡང༌། སྔོན་
ཆོས་རྗེ་ས་པཎ་གྱིས་ཕྱི་རོལ་མུ་སྟེགས་ཀྱི་སྟོན་པ་འཕྲོག་བྱེད་དང་རྩོད་པ་མཛད་ནས་དེ་དག་གི་ལུགས་ཕམ་པར་བྱས། སླར་གངས་ཅན་པ་རྣམས་ལ་སྟོན་པའི་ཆེད་དུ་འཕྲོག་བྱེད་དགའ་བོ་ཁྲིད་དེ་བྱོན་པས། རྒྱ་བོད་ཀྱི་མཚམས་སུ་མུ་སྟེགས་དེ་རྐྱེན་མེད་པར་ཁ་ནས་ཁྲག་སྐྱུགས་ཏེ་ཤི་བ་ཡང་བསྟན་མ་བཅུ་གཉིས་ཀྱི་བཀའ་ཆད་ཡིན་ལ། དེའི་ཚུལ་གྱི་འདི་དག་རྣམས་གངས་ཅན་བོད་ཀྱི་སྲུང་མ་ཁྱད་པར་ཅན་ཡིན་ཕྱིར་སྒོས་སུ་བསྐང་དགོས་པའི་རྒྱུ་མཚན་དེ་ལྟར་ཡིན་མོད། དེ་ཡང་ངེས་པའི་དོན་དུ་ན་འདི་དག་རྣམས་ཡེ་ཤེས་ཀྱི་དབྱིངས་ལ་བཞུགས་པའི་མཁན་འགྲོ་མ་ཤ་སྟག་ཡིན་ཏེ། རྟེན་འབྲེལ་ཡན་ལག་བཅུ་གཉིས་ལུགས་ལས་ལྡོག་སྟེ་བདེན་དོན་རྣམ་པ་བཅུ་གཉིས་ཀྱི་ངོ་བོར་དག་པའི་སྣང་ཆར་སྒོ་མཚམས་མ་བརྒྱད་དང༌། སྙིང་པོའི་རྣལ་འབྱོར་མ་རིག་བྱེད་ཀྱི་གྲངས་སུ་ཤར་བ་ལས་བོད་སྐྱོང་བསྟན་མ་བཅུ་གཉིས་སུ་གྲུབ་སྟེ། དེ་ལ་ཡང་ཞིབ་ཏུ་དབྱེ་ན། བདུད་མོ་བཞི། གནོད་སྦྱིན་མོ་བཞི། སྨན་བཙུན་མ་བཞི་སྟེ་ཚན་གསུམ་དུ་ཡོད་པ་ལས། བདུད་མོ་བཞི་ནི། བལ་བོད་མཚམས་སུ་རྡོ་རྗེ་ཀུན་གྲགས་མ་ཞེས་བྱང་གི་གནམ་མཚོ་ཕྱུག་མོ་ཡང་འདི་ཉིད་ཡིན། གསང་མཚན་དུ་མགོ་ཡུལ་ཇོ་མོ་ལྷ་རི་ཞེས་པ་དང༌། ཡོངས་གྲགས་སུ་ལ་སྟོད་བྱང་གི་དཔལ་ལྡན་ཧ་རི་རྡོ་རྗེ་གཡའ་སྐྱོང་ཞེས་དང༌། གཙང་ཉང་
སྟོད་ཀྱི་གནོད་སྦྱིན་གངས་བཟང་གི་ཡུམ་རྡོ་རྗེ་ཀུན་བཟང་མ་ཞེས་རྗེ་བཙུན་མི་ལས་ཕྱག་རྒྱར་བཞེས་པའི་བྲིན་གྱི་བཀྲ་ཤིས་ཚེ་རིང་མ་དང་ངོ་བོ་གཅིག་པ་དང༌། ཡར་འབྲོག་ཡོན་པོ་དོ་ལ་གནས་པའི་འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ་དང་བཞིའོ། །གནོད་སྦྱིན་མོ་བཞི་ནི། གཙང་རོང་ནང་གི་རྒྱབ་རི་ཇོ་མོ་གངས་ལ་གནས་པའི་གངས་དཀར་ཤ་མེད་རྡོ་རྗེ་སྤྱན་གཅིག་མའམ་མིང་གཞན་ལྷ་བུ་གངས་དཀར་མ་དང༌། དབུས་གཙང་གི་མཚམས་ཇོ་བོ་ཁ་རག་གི་གངས་ལ་རྡོ་རྗེ་ཁྱུང་བཙུན་མའམ། རྡོ་རྗེ་དཔལ་གྱི་ཡུམ་དང༌། བྱང་ལམ་རྒྱུད་ལ་གསེར་ཆེན་མཁའ་ལྡིང་རྡོ་རྗེ་ཀླུ་མོ་རྒྱལ་ལམ། གསང་མཚན་དུ་བྱང་སྟོད་དམར་གྱི་མཚོ་བདག་ཅེས་པ་དང༌། ཁམས་རྨ་ཆེན་སྤོམ་རའི་གངས་ལ་རྨ་རི་རབ་འབྱམས་རྡོ་རྗེ་དྲག་མོ་རྒྱལ་ལམ། རྨ་ཆེན་སྦོམ་རའི་སྲིང་གཅིག་ཅེས་གསང་མཚན་དུ་གྲགས་པ་སྟེ་བཞིའོ། །སྨན་བཙུན་མ་བཞི་ནི། ཀོང་ཡུལ་དྲི་ལྷ་གངས་ལ་ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་དང༌། འབྲོག་སྒང་གི་བཙན་ཡུལ་དུ་བཙན་ལ་ལ་རོ་རྡོ་རྗེ་སྨན་གཅིག་མའམ། གསང་མཚན་ཨེ་ཉམས་ར་མདོའི་སྤེན་ཞེས་པ་དང༌། གཙང་གི་ཇོ་མོ་ནགས་རྒྱལ་ལམ། སྨན་བཙུན་ཨུག་ཆོས་རྡོ་རྗེ་གཡའ་མོ་བསིལ་ཞེས་པ་དང༌། དབུས་རེ་སྦུས་རྒྱུད་ལ་གནས་པའི་གཡུ་ཡི་དྲིལ་བུ་རྡོ་རྗེ་
ཟུ་ལེ་སྨན་ནམ། གསང་མཚན་དུ་བུད་ཏི་ཇོ་མོ་གཡུ་ཏིང་ཞེས་པ་བཞི་སྟེ་ཀུན་དྲིལ་བས་བཅུ་གཉིས་སོ། །དེ་ཡང་གསང་མཚན་རྣམས་ནི་སློབ་དཔོན་ཆེན་པོས་དམ་ལ་བཞག་དུས་བཏགས་པ་དང༌། སྤྱི་སྐད་དུ་མིང་དེ་ལྟར་དུ་ཡིག་ཆ་ཕལ་ཆེར་ལ་གྲགས་ཤིང༌། དེ་ཡང་དཔེ་ཆ་དང་མི་མཐུན་པ་ནི་ཡུལ་རང་རང་གི་མི་ཕལ་རྣམས་ཀྱིས་སོ་སོའི་ཡུལ་ལ་གྲགས་ཚོད་ཀྱི་མིང་འབོད་པ་ཡིན་ལ། ངོ་བོ་ནི་དེ་ལས་མི་འདའ་བ་ཆོས་དབང་གི་གཏེར་བྱོན་དང༌། ཕུར་པའི་གཏེར་ཁ་ལས་གསུངས་པ་གུང་འགྲིག་ཏུ་གྱུར་པ་ལྟར་བཀོད་མོད། ཁ་ཅིག་འདིར་མངོན་རྟོགས་འཆད་པ་སྐབས་སུ་མ་འབྲེལ་སྙམ་ན། འབྲེལ་ཏེ། གཏོར་མ་འབུལ་བ་ལ་དབུལ་བྱའི་ཡུལ་ངོ་མ་ཤེས་ན་འཇིག་རྟེན་གཏམ་དཔེར་འདྲེ་ཤར་དང༌། གཏོར་མ་ནུབ་ཏུ་གྲགས་པ་ལས་མ་འདས་མོད། དེ་ཡང་ནང་ལྟར་ན་གཞི་དུས་ཀྱི་རྟེན་འབྲེལ་བཅུ་གཉིས་དང༌། ལོ་ཟླ་ཞག་དུས་ཀྱི་སྦྱོར་བ་བཅུ་གཉིས་དག་པར་བྱས་ནས། ལམ་དུས་སུ་དམར་ཆ་འབབ་པའི་ཆ་ལས་དགའ་བ་བཅུ་གཉིས་ཀྱི་འབར་འཛག་སྦོར་ཞིང༌། དུས་སྦྱོར་བཅུ་གཉིས་ཀྱི་རླུང་དག་པའི་རྫོགས་རིམ་རྒྱུད་ལ་སྨིན་པར་བྱེད་པའི་ནུས་པ་རྫོགས་པའི་ཚུལ་དང་སྦྱོར་བར་མཁས་པ་དག་བཞེད་དོ། །གཉིས་པ་ནི། གཏོར་མ་ཟླུམ་པོ་འདབ་མ་བཅུ་གཅིག་པ་བསྐོས་སུ་ཡོད་ན་བཤལ་ཆུས་བྲན་
པ་དང༌། མེད་ན་ཆད་ཐོའི་བཤལ་ཆུ་དང་སྨན་ཕུད་ལ་འབྲུ་གསུམ་གྱིས་བདུད་རྩིའི་རྒྱ་མཚོར་བརླབ། རང་གི་ཐུགས་ཀའི་འོད་ཟེར་གྱིས་བོད་སྐྱོང་བསྟན་མ་བཅུ་གཉིས་གཡོག་འཁོར་དང་བཅས་པ་རང་རང་གི་གནས་ནས་སྐད་ཅིག་ལ་བཀུག་སྟེ་གཏོར་གཞོང་གི་ཁ་ཁྱེར་ལ་འཁོད་པར་བསམས་ལ། མཐུན་རྫས་ཀྱིས་མཉེས་པར་བྱས་པས་བསམ་དོན་སྤྱི་དང་བྱེ་བྲག་ཏུ་སོ་སོའི་ལས་སྐལ་གྱི་སྒོ་ཕྲང་བསྲུང་ཞིང༌། བོད་ཁམས་བདེ་ཐབས་ཀྱི་ཕྲིན་ལས་གཞོལ་བའི་ཐ་ཚིག་དྲན་པར་མོས་ལ། བྷྱོ༔ བསྟན་མ་སྐྱོང་མཛད་མ་སྲིང་རྒྱ་མཚོའི་ཚོགས༔ ཞེས་གཞུང་ཚིག་གིས་གྱེར་རྗེས་གཏོར་མ་གཙང་སར་གཤེགས་ལ་གནས་སུ་གཏང་ངོ༌། །བཞི་པ་རྟ་བྲོ་བརྡུང་བ་ནི། གཞུང་ལས། གནོད་བྱེད་དགུག་གཞུག་བྱ་སྟེ་གཏོར་གཞོང་སྦུབ༔ གཏོར་གཞོང་རི་རབ་མནན་དམིགས་རྟ་བྲོ་བརྡུང་༔ ཞེས་གསུངས་པ་ལྟར་སྣོད་ཀྱི་འཇིག་རྟེན་ཨེའི་བཙོན་ཁང་དུ་གསལ་ཞིང་སྤྲོས་བཅས་དང་འབྲེལ་བ་གཏོར་མནན་ལྟ་བུའི་ཚེ་ནི་ས་ལ་ཆོས་འབྱུང་གི་རི་མོ་སུམ་བརྩེགས་སུ་བྲིས་པའི་ནང་དུ་ཟུར་ངོས་ལ་ཡིག་མགོ་ཕྱོགས་པའི་དགྲ་འདྲེའི་ས་བོན་བྲིས་ལ་དགུག་གཞུག་དྲག་ཏུ་བྱ་ཞིང༌། ཇི་ལྟར་ཡང་གཏོར་གཞོང་རི་རབ་ཏུ་གསལ་བའི་ཞབས་སུ་རྡོ་རྗེ་རྒྱ་གྲམ་བསམས་ལ། ཁ་སྦུབ་པའི་འོག་ཏུ་
དགྲ་འདྲེ་ཐམས་ཅད་ནོན་ཅིང་དེའི་སྟེང་དུ་བཅུད་ཀྱིས་སེམས་ཅན་ཐམས་ཅད་རྟ་མཆོག་ཧེ་རུ་ཀའི་རང་བཞིན་དུ་བསམ་ལ་སྲིད་པ་སྤྱི་གནོན་གྱི་དགོངས་པར་ལྡན་པའི་ངང་ནས་རྟ་བྲོ་བརྡུངས་པས། གཉིས་འཛིན་ལས་ཤར་བའི་དགྲ་བགེགས་ཐམས་ཅད་ཡེ་ཤེས་ལྔའི་ཀློང་ལས་ནམ་ཡང་ལྡང་མེད་ཀྱི་རྒྱས་བཏབ་པར་མོས་ཤིང༌། སྤྲོས་བཅས་ཀྱི་ཚེ་མཆེད་ལྕམ་རྣམས་ལག་པ་ཕན་ཚུན་བསྣོལ་བའི་ཞི་བ་ལ་མཛུམ་མོ་སྦྲེལ་ཞིང་བྲོ་ར་ཟླུམ་པོ། རྒྱས་པ་ལ་གུང་མོ་སྦྲེལ་ཞིང་བྲོ་ར་གྲུ་བཞི། དབང་ལ་སྲིན་ལག་སྦྲེལ་ཞིང་བྲོ་ར་ཟླ་གམ། དྲག་པོ་ལ་མཐེའུ་ཆུང་རྣམས་ལུ་གུ་རྒྱུད་དུ་སྦྲེལ་ཞིང་བྲོ་ར་གྲུ་གསུམ་དུ་བཅས་པའམ། རྒྱུན་དུ་དམིགས་པ་སྔ་མས་འགྲུབ་ལ། ཧཱུྃ་ཧྲཱིཿ བླ་མའི་བྱིན་རླབས་ཡི་དམ་ཏིང་འཛིན་ལྷཿ སོགས་དང༌། སྔགས་དོན་ནི། ཨཱོྃ་ཨཱཿཧཱུྃ་ནི་སྐུ་གསུང་ཐུགས་ཀྱི་ཀློང་དུ། སྟམ་བྷ་ཡ་ནི་གནོན་པ་དང༌། མཱ་ར་ཡ་ནི་དམིགས་པ་མེད་པར་གསད་ཅིང་གནོན་པའོ། །དེ་ལྟར་རྟ་བྲོ་བརྡུངས་པ་ལ་དགོས་པ་ཅི་ཡོད་ཅེ་ན། རྒྱུད་ལས། ཨེ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །བཅིངས་འགྱུར་བསྐྱོད་ནས་ཕྱོགས་བཅུར་གཡོ། །མྱོས་ནས་གས་ཏེ་འཚིག་པར་འགྱུར། །ཞེས་དང༌། སྔགས་སྡེབ་ལས། མི་མཐུན་གླུ་སྣ་བླང་བ་ནི༔ ལས་མཇུག་བྲོ་ཡིས་བསྡུ་བ་ཡིན༔
ཞེས་གསུངས་པས། ལས་དེ་དག་བྱས་ཟིན་ནས་རྡོ་རྗེ་ཁྲོ་བོས་མནན་པའི་ལས་བྱས་པས་དེ་ཉིད་གསོར་མི་བཏུབ་ཅིང་ལས་རྣམས་ཐོགས་མེད་དུ་འགྲུབ་པའི་དགོས་པ་ཁྱད་པར་ཅན་ཡོད་ཕྱིར་མངོན་སྤྱོད་ཀྱི་མཇུག་སྡོམ་ཀུན་ལ་བྱུང་བ་ཡིན་ནོ། །དེ་ཡན་གྱིས་ཚོགས་ཀྱི་འཁོར་ལོ་ཚུལ་བཞིན་དུ་བགྱིས་པས་ཚིམ་པ་དྲུག་ལྡན་དུ་འགྱུར་ཏེ་ཚོགས་ཞིང་རྣམས་མཆོད་པས་ཚིམ་པ། རྣལ་འབྱོར་པ་རྣམས་རྡོ་རྗེའི་བཟའ་བཏུང་གིས་ཚིམ་པ། ཡེ་ཤེས་ཀྱི་འཁོར་ལོ་བདུད་རྩིའི་དངས་མས་ཚིམ་པ། ལུས་དཀྱིལ་གྱི་ལྷ་རྣམས་བདེ་སྟོང་ཡེ་ཤེས་ཀྱིས་ཚིམ་པ། ཕྱི་ནང་གི་མཁའ་འགྲོ་མ་རྣམས་གླུ་དབྱངས་ཀྱིས་ཚིམ་པ། དྲེགས་པ་ལས་བྱེད་ཀྱི་འབྱུང་པོ་རྣམས་གཏོར་མས་ཚིམ་པ་ཞེས་སྔོན་གྱི་བླ་མ་དག་བཞེད་དོ། །ལྔ་པ་དངོས་གྲུབ་བླང་བའི་ཆོ་ག་ལ་གཉིས། སྒྲུབ་བསྙེན་ལ་སོགས་ཀྱི་ཁོག་འབུབས་མན་ངག་བཤད་པ་དང༌། ཆོ་ག་དངོས་སོ། །དང་པོ་ལ་དྲུག་སྟེ། དངོས་གྲུབ་ཀྱི་རྫས་བཤམ་པ། བར་ཆད་ཀྱི་བགེགས་བསྐྲད་པ། དཀྱིལ་འཁོར་ལ་བྱིན་འབེབས་པ། ཛབ་བསྐུལ་བྱ་ཞིང་ཤམ་བུ་འདོགས་པ། མཆོད་པ་འབུལ་བ། ཁོན་གཅུགས་སྦྱང་པའོ། །དང་པོ་ནི། སྨིན་སློབ་ཀྱི་སྒྲུབ་པ་གྲོལ་
རྒྱུའི་ཐུན་ཐ་མ་དང༌། ཚེས་བཅུ་ལ་སོགས་པས་མཚོན་ཏེ་སྤྲོས་བཅས་ཀྱི་ཆོ་གའི་ཚེ། དངོས་གྲུབ་ཞུ་བའི་རྫས་ཁྱད་པར་ཅན། ཟླ་ཕྲོམ། ཟླ་རྒྱས། འཇམ་དེས། སྤང་ན་སྐྱེས། ཀུན་ཏུ་རྒྱུ། སི་ཐོག །ཛ་གད། འཛག་ཏི། ཤེལ་སྒོང༌། ཐང་པ། ཚོམ་པོ། ཙི། ཚེ། གལ། མཱཾ་ས། བ་སུ་ཏ་ལ་སོགས་པ་བཟང་དགུའི་ཡོ་བྱད་དང༌། ཚེ་རིལ། ཚེ་ཆང་ལ་སོགས་པའི་རིམ་པ་ཡང་འདུ་བྱས་ལ་བཀོད་ལེགས་སུ་བཤམ་མོ། །གཉིས་པ་ནི། དེ་དག་རྣམས་ལ་གུ་གུལ་གྱིས་བདུག་ཅིང་ལས་གཞུང་ནས་འབྱུང་བ་ལྟར་གྱི་བགེགས་བསྐྲད་ཚ་ངར་དང་ལྡན་པ་ཡང་བྱའོ། །གསུམ་པ་ནི། སྤོས་རོལ་དང་རྐང་གླིང་བཤུག་པའི་སྒྲ་དང༌། ཅང་ཏེའུ་ལ་སོགས་པའི་རོལ་ཆ་ཡང་སྒྲོག་ཅིང༌། དར་ཚོན་སྣ་ལྔའི་གཡབ་མོ་དང་བཅས་གདུང་དབྱངས་སྙན་པོས་གཞུང་ནས་བྱུང་བའི་བྱིན་འབེབས་སམ། མ་བདེན་ཏི་སྒྲོ་བྲག་གི་གཏེར་བྱོན། ཧཱུྃ་ཧཱུྃ་ཧཱུྃ༔ རྗེ་བཙུན་ཆེན་པོ་པདྨ་ཐོད་འཕྲེང་རྩལ༔ འགྲོ་བ་ཡོངས་ཀྱི་སྐྱབས་གནས་རིན་པོ་ཆེ༔ སོགས་དང་ལེའུ་བདུན་མའི་བཞེངས་བསྐུལ་མས་དབབ་ཅིང༌། རྩ་སྔགས་ཀྱི་ཛབ྄་དབྱངས་ལན་མང་དུ་བརྗོད་པས་རྟེན་དང་བརྟེན་པ་ཐམས་ཅད་གཟི་བྱིན་སྔར་ལས་ཀྱང་ཆེས་ཆེར་འབར་བར་བལྟའོ། །བཞི་པ་ཛབ྄་
བསྐུལ་ནི། རང་གཞུང་ཛབ྄་དགོངས་དམིགས་པའི་འཁྲུལ་འཁོར་ལས་བྱུང་བ་འདི་ལྟར། ཧཱུྃ་ཧྲཱིཿ བསྐུལ་ལོ་བསྐུལ་ལོ་ཐུགས་དམ་གནད་ནས་བསྐུལ༔ ཞེས་པ་ནས། ཡེ་ཤེས་ལྷ་ཚོགས་འགྲུབ་པར་མཛད་དུ་གསོལ༔ ཞེས་པའི་བར་གྱིས་བསྐུལ་ཞིང་ལྡེའུ་གདགས་པའི་སྔགས་མན་ངག་ལྟར་བཟླའོ། །ལྔ་པ་དངོས་གྲུབ་ཀྱི་རྫས་རྣམས་ཀྱིས་མཆོད་པ་ནི། གསང་འདུས་ལས་བྱང་ནས་བྱུང་བ། ཧཱུྃ༔ སྣང་བ་སྣོད་ཀྱི་འཇིག་རྟེན་གཏོར་གཞོང་དུ༔ སྲིད་པ་བཅུད་ཀྱི་སེམས་ཅན་གཏོར་མར་སྦྱར༔ ཞེས་པ་ནས། གུ་རུ་དེ་ཝ་ཌཱཀྐི་ནི་མ་ཧཱ་བ་ལིཾ་ཏ་ཁཱ་ཧི༔ ཞེས་པའི་བར་གྱིས་མཆོད་ཅིང་འདི་ལ་འཐད་ཕྱོགས་རྣམ་དག་ཡོད་པའི་ཕྱིར་རོ། །དྲུག་པ་འཁོན་གཅུགས་སྦྱང་བ་ནི། གསང་རྫོགས་རྩ་རྒྱུད་ལས། དངོས་གྲུབ་ལེན་ཁར་བྲོ་བཤགས་བྱ། །ཞེས་ཤིན་ཏུ་གནད་ཆེ་བར་གསུངས་པས་ཡེ་ཤེས་སྐུ་མཆོག་མའི་བཤགས་པ་དང༌། སྔགས་སྡེབ་ལས་བཤད་པ་ལྟར་ཡི་གེ་བརྒྱ་བའི་མགོར། བཛྲ་ས་མཱ་ཛཿས་བརྒྱན་པའི་ཡིག་བརྒྱ་ཅི་འགྲུབ་སྟོབས་བཞི་ཚང་བའི་སྒོ་ནས་དག་པར་བཟླའོ། །གཉིས་པ་ནི། དངོས་གྲུབ་ལེན་པ་དང༌། གཏང་རག་གི་ཆོ་གའོ། །དང་པོ་ནི། སྒྲུབ་ཆེན་སོགས་སྤྲོས་བཅས་ཚོགས་སྒྲུབ་ཀྱི་སྐབས་
སུ། གཞུང་ནས་གསུངས་པ་ལྟར་དངོས་གྲུབ་ཀྱི་རྫས་རྣམས་ལག་ཏུ་ཐོགས། དཀྱིལ་འཁོར་ལ་བསྐོར་བ་བྱ་ཞིང་མདུན་བསྐྱེད་ཀྱི་ལྷ་ཚོགས་རྣམས་རྗེས་ཆགས་ཀྱིས་སྦྱོར་བ་མཛད་པའི་བདེ་བའི་སྒྲས་བསྐུལ་བས། མཁའ་དབྱིངས་གང་བའི་རྒྱལ་བ་ཐམས་ཅད་འདུས་ཏེ་བྱང་ཆུབ་སེམས་ཀྱི་ངོ་བོར་ཞུ་ནས་ཆར་བཞིན་བབས་ཏེ་སྐུའི་ཆ་ཤས་ཀུན་ཏུ་མཚོ་ལྟར་འཁྱིལ་བའི་གནས་སོ་སོ་ནས་མཆོག་དང་ཐུན་མོང་གི་དངོས་གྲུབ་ཐམས་ཅད་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པ་དང༌། ཟག་མེད་བདེ་བ་ཆེན་པོའི་རང་བཞིན་བྱང་ཆུབ་ཀྱི་སེམས་འཇའ་འོད་ཁ་དོག་ལྔ་ལྡན་གྱི་རྣམ་པར་བུན་ལང་ལོང་བྱོན་ནས། བདག་བསྐྱེད་ཀྱི་གནས་བཞིར་ཐིམ་པས་མཆོག་དང་ཐུན་མོང་གི་དངོས་གྲུབ་མ་ལུས་པ་ཐོབ་སྟེ། བསྒྲུབ་བྱ་དང་སྒྲུབ་བྱེད་དབྱེར་མེད་ཀྱི་ངོ་བོར་ལྷུན་གྱིས་གྲུབ་པར་བལྟས་ལ། ཧཱུྃ་ཧྲཱི༔ བདེ་ཆེན་ཡངས་པ་ཆེན་པོའི་ཕོ་བྲང་ནས༔ སོགས་བརྗོད་ཅིང་སྔགས་དོན་ནི། ཨཱོྃ་ཨཱཿཧཱུྃ་ནི་རྒྱལ་བའི་སྐུ་གསུང་ཐུགས་ཀྱི་བྱིན་རླབས། ཀཱ་ཡ་ནི་བདག་ལ་ཞུགས་ཏེ་ལུས་སྤྲུལ་སྐུ། ཝཱཀྐ་ནི་ངག་ལོངས་སྐུ། ཙིཏྟ་ནི་སེམས་ཆོས་སྐུ། སརྦ་ནི་ཐམས་ཅད་འདུས་པའི་ངོ་བོ་ཉིད་སྐུ། སིདྡྷི་ནི་དངོས་གྲུབ། ཕ་ལ་ནི་བཟང་པོ། ཨ་ལ་ལ་ནི་ངོ་མཚར་ཅན། ཧོཿ ནི་སྤྲོས་པ་མེད་པའི་དབྱིངས་སུ་ཐོབ་པར་བྱས་པའི་དོན་ནོ། །དེ་
ནས་དཀྱིལ་འཁོར་གྱི་བདུད་རྩི་མྱང་བ་ལ་སོགས་དངོས་གྲུབ་ཀྱི་རྫས་རྣམས་རང་གི་ལོངས་སྤྱོད་པ་ལས་དམ་ཚིག་མི་གཙང་བ་དང༌། ཁྱི་ཕག་བོང་བུ་སོགས་ལ་བྱིན་ན་ཤིན་ཏུ་ཉམས་པར་བཤད་དེ། འདི་ཉིད་ལས། དངོས་གྲུབ་བླང་བའི་གཏོར་མ་ནི༔ རང་དང་དམ་ཚིག་མི་གཅིག་པ༔ དུད་འགྲོ་ཕག་དང་བོང་བུ་ལ༔ བྱིན་ན་དངོས་གྲུབ་ཡལ་ཞེས་བཤད༔ ཅེས་གསུངས་པ་ལྟར་བླང་དོར་ཕྱིན་ཅི་ལོག་ཏུ་མ་སོང་བར་བྱ་དགོས་ཤིང༌། དེ་ཡང་སྤྱིར་བསྙེན་སྒྲུབ་ཀྱི་སྐབས་ལྟ་བུའི་ཚེ། སང་ཞོགས་སྒྲུབ་པ་གྲོལ་རྒྱུའི་དགོངས་ཐུན་ཐ་མར་དངོས་གྲུབ་བསྐུལ་བའི་སྔགས་ལྡེ་བསྡེབས་པ་མན་ངག་གི་དགོངས་པ་ལྟར་གྱིས་སྙན་གསན་དབབ་པའི་ཚུལ་དུ་བག་ཙམ་བཟླ། ཡང་མདུན་བསྐྱེད་དམིགས་བསལ་མེད་པ་བསྙེན་པ་ལྟ་བུའི་བདག་བསྐྱེད་རྐྱང་པའི་ཚེ་ན་དམིགས་གནད་ཇི་ལྟར་བྱ་བ་ནི། བཤད་མ་ཐག་པའི་དངོས་གྲུབ་ལེན་ཆོག་གི་ཚེ་གཏོར་མ་ཤེས་པ་རྣམ་གསུམ་ལས་སྐབས་འདིར་ཡེ་ཤེས་ཀྱི་འཁོར་ལོ་ལོགས་སུ་དབྱེ་ནས་གཏོར་མ་དང་དབྱེར་མེད་དུ་བྱས་ཏེ་ལྷར་ཤེས་པ་དེ་ཉིད་དབང་ལེན་བྱའི་ཡུལ་དུ་བྱས་ལ། རང་ཉིད་དམ་ཚིག་གི་འཁོར་ལོས་དབང་ལེན་པ་སྟེ། ཀུན་མཁྱེན་ཟིལ་གནོན་བཞད་པ་རྩལ་ལ་སོགས་པ་རིག་འཛིན་བརྒྱུད་པའི་མན་ངག་ཡིན་ཏེ། དམིགས་པ་སྐབས་ཕྱེད་ཅིང་གཞན་
ལས་ཁྱད་པར་དུ་གྱུར་པ་ཞིག་གོ །མི་ཤེས་པ་དག་ནི་འདི་ལྟར་དངོས་གྲུབ་ལེན་པའི་ཆོ་ག་གཞུང་ལ་མི་གསལ་བའི་གསར་སྤྲོས་མི་འཐད་སྙམ་ན་མ་ཡིན་ཏེ། འདི་ནི་སྒྲུབ་ཆེན་གྱི་ཁོག་འབུབས་དང༌། འདིས་མཚོན་ཏེ་བསྙེན་སྒྲུབ་ཀྱི་རིགས་མཐའ་དག་གི་མཇུག་ཆོག་གི་དངོས་གྲུབ་ལེན་ཚུལ་ལ་ཕན་པར་བསམས་ཏེ་མན་ངག་གི་གནད་ལ་སྦྱར་ནས་བཤད་པ་ཡིན་པ་བླ་མ་གོང་མའི་ཕྱག་ལེན་ལ་བརྟགས་པས་ཤེས་པར་མ་ཟད། འདོན་ཚིག་རྣམས་ཀྱང་གསར་རྙིང་གཅིག་ཅེས་བརྒྱུད་ཁུངས་དང་རིགས་ཡེ་ཐ་དད་པ་རྣམས་ཆུ་དང་འོ་མ་ལྟ་བུར་ཆམ་གཅིག་ཏུ་བསྲེས་པ་ཡང་མང༌། བཀའ་ཆད་དང་དམ་སེལ་གྱིས་བསླད་པ་ལ་སོགས་པས་མཚོན་ཏེ་གཏེར་གྱི་མིང་ཐོགས་ཚད་འབྱོལ་ཉོག་ཏུ་བསྲེས་པའང་མེད་དེ་ཆོས་ཀྱི་སྤྱན་ལྡན་དག་གིས་དཔྱད་བཟོད་པ་ཡིན་ནོ། །གཉིས་པ་གཏང་རག་གི་མཆོད་པ་ནི། དངོས་གྲུབ་སྩལ་བའི་དྲིན་ལན་བསབ་ཕྱིར་རང་ཉིད་ལས་སྤྲོས་པའི་མཆོད་པའི་ལྷ་མོ་མཛེས་ཤིང་ཡིད་དུ་འོང་བ་དཔག་ཏུ་མེད་པ་དག་གིས་མདུན་བསྐྱེད་ཀྱི་འཁོར་ལོ་ལ་མཆོད་སྤྲིན་དཔག་མེད་སྤྲོ་ཞིང༌། ཐོས་པ་ཙམ་གྱིས་བདེ་སྟོང་གི་ཡེ་ཤེས་རྩོལ་མེད་དུ་འཆར་བར་ནུས་པའི་འགྱུར་དབྱངས་ཀྱིས་བསྟོད་པར་བསམས་ལ། ཕྱི་ནང་གི་མཆོད་པ་ཞལ་གསོ་ཞིང་སྨན་རཀ་བྲན་ལ། ཨཱོྃ་ཨཱཿཧཱུྃ༔ ཕྱོགས་བཅུའི་
ཞིང་ཁམས་རབ་འབྱམས་རྒྱ་མཚོ་མཐའ་ཡས་ཀྱི༔ སོགས་ལས་གཞུང་ལས་བྱུང་བ་ལྟར་གྱིས་མཆོད་དོ། །དྲུག་པ་ཁྱད་པར་གྱི་ནོངས་བཤགས་ནི། སྟོབས་བཞིའི་དག་པ་དྲན་པའི་ངང་ནས་ཐལ་མོ་སྙིང་གར་སྦྱར་ལ། ཀྱེ་དུས་གསུམ་བླ་མ་ཡི་དམ་མཁའ་འགྲོའི་ཚོགས༔ སོགས་དང་དབྱངས་གསལ་ལ་ཡི་གེ་བརྒྱ་པ་སྤྱི་འགྲེའམ། པདྨའི་རིགས་ཀྱི་ཡིག་བརྒྱ་བཏགས་པ་གསལ་དག་ཐོན་པར་བཟླ། བདུན་པ་ཤིས་བརྗོད་ནི། འཁོར་གསུམ་རྣམ་པར་དག་པའི་གདེང་གིས་ཟིན་པའི་ངང་ལས། མཁའ་དབྱིངས་གང་བའི་རིག་འཛིན་བླ་མ་རྒྱལ་བ་རྒྱ་མཚོའི་ཚོགས་དང་བཅས་པས་བཀྲ་ཤིས་ཀྱི་བདེན་ཚིག་འགོག་པ་མེད་པའི་སྒྲ་དབྱངས་འབྲུག་སྟོང་དུས་གཅིག་ལ་ལྡིར་བ་ལྟར་སྒྲོག་ཅིང༌། དེ་དང་ཆབས་གཅིག་པར་ཕུན་སུམ་ཚོགས་པ་མནྡ་ར་བའི་མེ་ཏོག་གི་ཆར་ཆེན་པོས་གནམ་ས་བར་སྣང་ཁྱབ་པར་ཕབ་པས། སྣོད་བཅུད་ཀུན་གྱི་བཀྲག་མདངས་ཉམས་པ་ཐམས་ཅད་སྐད་ཅིག་ལ་གསོས་ཏེ་དགེ་ལེགས་ཀྱི་གཟི་བྱིན་མཆོག་ཏུ་འབར་བར་བལྟས་ལ། འཐོར་ནས་དང་བཅས། ཧཱུྃ་ཧྲཱིཿ རྒྱལ་བའི་སྐུ་ནི་རི་རྒྱལ་ལྷུན་པོར་ལྟར༔ སོགས་བརྗོད། བརྒྱད་པ་དཀྱིལ་འཁོར་བསྡུ་བ་ལ་གཉིས། མདུན་བསྐྱེད་ཀྱི་ཡེ་ཤེས་པ་གཤེགས་གསོལ་
བྱ་བ་དང༌། རྫོགས་རིམ་བསྡུས་ཏེ་སྤྲོས་བྲལ་གྱི་གནས་ལུགས་ལ་གཞོལ་བའོ། །དང་པོ་ནི། མངོན་རྟོགས་ཆེན་མོ་ནས་གསུངས་པ་ལྟར། ཨཱོྃ་སྔར་ཤིན་ཏུ་བསྡུས་པའི་མདུན་བསྐྱེད་བཅུག་ནས་ཆོ་ག་ཆ་ལག་ཚང་ཙམ་བྱས་པའི་དབང་དུའོ། །ལུགས་གཞན་ལྟར་ན་བསྡུ་བའི་གནས་མེད་པར་འདི་ཅི་བྱ། ཁྱེད་ཀྱིས་སེམས་ཅན་དོན་ཀུན་མཛོད༔ རྗེས་སུ་མཐུན་པའི་དངོས་གྲུབ་ཞུ༔ སངས་རྒྱས་ཡུལ་དུ་གཤེགས་སུ་གསོལ༔ སངས་རྒྱས་ཡུལ་དུ་གཤེགས་ནས་ཀྱང་༔ ཁྱེད་ཀྱི་བརྩེ་བའི་ཐུགས་རྗེ་ཡིས༔ སེམས་ཅན་རྣམས་ལ་དགོངས་ནས་ཀྱང་༔ སླར་ཡང་འབྱོན་པར་མཛད་དུ་གསོལ༔ འགྲོ་རྣམས་བདེ་ལ་བཀོད་དུ་གསོལ༔ ཨཱོྃ་ཨཱཿཧཱུྃ༔ བཛྲ་མུཾཿ ཞེས་པས་མདུན་བསྐྱེད་ཀྱི་ཡེ་ཤེས་པ་གདོད་མའི་འཁོར་ལོར་བསྲེས། གཉིས་པ་ནི། ཕྱི་སྣོད་བཅུད་ཀྱི་སྣང་བ་རགས་པ་ཐམས་ཅད་སྲུང་གུར་ལ་བསྡུ། སྲུང་གུར་ཁྲོ་བཅུ་དང་བཅས་པ་རྣམས་གཙུག་ཏོར་འཁོར་ལོས་སྒྱུར་བ་ལ་བསྡུ། འཁོར་ལོས་སྒྱུར་བ་གཞལ་ཡས་ཁང་ལ་བསྡུ། དེ་ལྷ་ཚོགས་རྣམས་ལ། ལྷ་དེ་དག་ཐམས་ཅད་ཀྱང་གཙོ་བོ་ཡབ་ཡུམ་ལ། ཡུམ་ཡབ་ལ། ཡབ་ཀྱང་སྔགས་ཕྲེང་ལ། དེ་ཡེ་ཤེས་སེམས་དཔའ་ལ། དེ་ཐུགས་སྲོག་ཧྲཱིཿཡིག་ལ། ཧྲཱིཿཡིག་ལུས་དཀྱིལ་གྱི་ཐུགས་ཀར། ལུས་དཀྱིལ་ཀྱང་མཐའ་ནས་རིམ་པར་སྔ་མ་བཞིན་དུ་
རིམ་གྱིས་ཐུགས་སྲོག་ལ་བསྡུ། ཐུགས་སྲོག་དེ་ཉིད་ཀྱང་བར་སྣང་ལ་འཇའ་ཡལ་བའམ། ནམ་མཁའ་ལ་སྤྲིན་དངས་པ་ལྟ་བུར་དངོས་མེད་དུ་ཡལ་ནས་སྔར་ཏིང་འཛིན་རྣམ་གསུམ་གྱི་བསྐྱེད་གཞི་དེ་བཞིན་ཉིད་ཀྱི་ཏིང་ངེ་འཛིན་སྤྲོས་པའི་མཐའ་བཞིའམ་བརྒྱད་དང་བྲལ་བའི་རང་བཞིན་སྤྲོས་བྲལ་གྱི་གནས་ལུགས་རྫོགས་པ་ཆེན་པོའི་ངང་ལ་བཅོས་བསླད་མེད་པར་མཉམ་པར་འཇོག་ཅིང༌། སྣོད་བཅུད་སྐྱེ་འགྲོ་ལྷ་དང་བཅས་པ་རྣམས༔ སོགས་བརྗོད་འདི་ལ་ཁ་ཅིག་ན་རེ། ཆོ་ག་གཞན་དུ་རྟག་ལྟ་གཞིག་པའི་ཕྱིར་དུ་མཉམ་གཞག་གི་ངང་ལ་རྫོགས་རིམ་བསྡུས། ཆད་ལྟ་གཞིག་པའི་ཕྱིར་དུ་རྗེས་ཐོབ་སྟོང་གཟུགས་ཀྱི་ལྷ་སྐུར་ལྡང་བ་ཡིན་པ་ལ། འདི་ཕྱི་མ་མ་བྱུང་བས་ལུང་གཞན་གྱིས་གནོད་དོ་ཞེ་ན། མི་གནོད་དེ། གཞུང་འདི་ལུང་ཨ་ནུའི་ཐེག་པ་དབྱིངས་དང་ཡེ་ཤེས་དབྱེར་མེད་རྫོགས་རིམ་གཙོ་བོར་བཏོན་པའི་དབང་གིས་དོན་དམ་ལྷན་སྐྱེས་འོད་གསལ་བྱར་མེད་ཀ་དག་བདེ་བ་ཆེན་པོའི་ཀློང་དུ་སྒོམ་མེད་ཡེང་མེད་ཀྱི་གནས་ལུགས་སྐུ་གསུམ་རང་ཆས་ཀྱི་ངང་ནས་ཆོས་ཉིད་ཟད་སར་བསྐྱེལ་བ་ལ་དགོངས་པ་སྟེ། འདི་ཉིད་ལས། རང་དགར་རང་གཞག་བཅོས་བསླད་མི་བྱ་བར། ཆ་མེད་རྒྱ་ཡན་ཅོག་གཞག་ལྷུག་པར་བོར༔ རང་ལུགས་བབས་ནས་
དབྱིངས་རིག་མ་བུ་འདྲེས༔ གདོད་མའི་སངས་རྒྱས་ཉིད་དང་མཇལ་བར་འགྱུར༔ ཞེས་གསུངས་པ་སྟེ། ཁ་ཅིག་སྔགས་ལམ་ལ་བསྐྱེད་རིམ་མེད་ན་སངས་རྒྱས་ལ་སྐུ་དང་ཡེ་ཤེས་མེད་པར་འདོད་པའི་ལོག་རྟོག་ཅན་དུ་འགྱུར་བས་མི་འཐད་དོ་ཟེར་བའང་རིགས་པ་མ་ཡིན་ཏེ་རྒྱུད་སྡེ་འོག་མའི་སྐབས་སུ་གང་ཟག་གི་ཤེས་རྒྱུད་དང་བསྟུན་ནས་ཐ་མལ་གྱི་ཞེན་པ་དགག་པའི་ཕྱིར་རིག་པའི་གསལ་ཆ་ལྷ་སྐུར་ལྟ་བས་ལམ་བགྲོད་པ་ཡིན་མོད། འདི་ནི་དེ་བས་ཀྱང་དབང་པོ་ཆེས་ཆེར་རྣོ་བའི་རྣལ་འབྱོར་པ་ལ་དགོངས་ནས་རྫོགས་རིམ་གཙོ་བོར་འདོན་པའི་ལུགས་ཡིན་པའི་ཕྱིར་རོ། །བློ་ཆུང་ཞིང་ཐེག་པ་འདི་ལ་འཇུག་པའི་སྐལ་པ་ཕྲ་བ་དག་ནི་འདི་སྐད་དུ། རྒྱུད་སྡེ་བཞི་ཐམས་ཅད་ནས་བསྐྱེད་རྫོགས་ཟུང་འབྲེལ་ཤ་སྟག་གིས་ལམ་བགྲོད་པར་གསུངས་པས་བསྐྱེད་རིམ་གྱི་གསལ་ཆ་སྟོར་ན་ཆད་ལྟར་འགྱུར་རོ། །ཞེས་ཟེར་བ་ཡོད་དེ། ལྷའི་ཞལ་ཕྱག་ལ་ལྟ་བའི་འཛིན་པ་མ་ཟད་ན་ས་བཅུའི་བྱང་ཆུབ་སེམས་དཔའི་ཤེས་སྒྲིབ་ཏུ་འགྱུར་བ་ལ་དགོངས་ནས་ལུགས་འདི་ལ་སྤྲོས་བྲལ་གྱི་རིག་པ་དྲི་མེད་དེ་ཀ་ལ་བསྐྱེད་རྫོགས་དབྱེར་མེད་དུ་གྲུབ་པའི་སྒྲ་བཤད་ཁྱད་དུ་འཕགས་པ་འདི་ཉིད་ཀྱི་ལམ་འབྲས་སྐོར་ལས། ལྷ་བསྐྱེད་པ་ཡང་སེམས་ཀྱིས་ཆོ་འཕྲུལ་རིག་པ་ཡེ་ཤེས་ཀྱི་རོལ་རྩལ་མ་འགགས་པ་སྟེ༔ སྒྲིབ་གཡོགས་དང་བྲལ་བ་
རྗེན་པ་ལྷང་གིས་མཐོང་བ་དེ་ཀ་ཡིན་པས༔ དེ་ལ་བཅོས་བསླད་མེད་པར་གསལ་ལམ་མེར་འཇོག་པ་བསྐྱེད་རིམ༔ དེའི་རང་བཞིན་མ་གྲུབ་གྲུབ་པ་མེད་པ་རྫོགས་རིམ༔ དེའི་ངོ་བོ་གསལ་སྟོང་གི་ངང་དུ་གཡོ་བ་མེད་པར་འཇོག་པ་བོགས་དབྱུང་བར་བྱེད་པ་སྟེ༔ ཞེས་བསྐྱེད་རིམ་ལ་རྫོགས་རིམ་གྱིས་རྒྱས་ཐེབས་པའི་དབང་དུ་གསུངས་པ་སྟེ། སྐུ་དང་ཡེ་ཤེས་ཡིན་ཕྱིན་ཆད་གཟུགས་སྐུ་ཁོ་ན་ལ་ལྟོས་དགོས་པ་མ་ཡིན་མོད། ཆོས་སྐུ་སྟོང་པ་ཉིད་ཀྱི་ངང་ལས་གསལ་ཆའི་རིག་མདངས་ཡེ་ཤེས་སུ་འཆར་བ་དེ་ནི་དོན་དམ་པའི་སྐུ་དང་ཡེ་ཤེས་ཅིའི་ཕྱིར་མ་ཡིན། རྡོ་རྗེ་ཐེག་པ་ཐུན་མོང་མ་ཡིན་པའི་ལུང་ལ་སྐྲག་པར་གྱུར་ན། ཐེག་ཆེན་ཐུན་མོང་གི་མདོ་སྡེ་ལས། གང་དག་ང་ལ་གཟུགས་སུ་མཐོང༌། །གང་དག་ང་ལ་སྒྲར་ཤེས་པ། །ལོག་པའི་ལམ་ལ་ཞུགས་པ་སྟེ། །སྐྱེ་བོ་དེ་དག་ང་མི་མཐོང༌། །སངས་རྒྱས་རྣམས་ནི་ཆོས་ཉིད་བལྟ། །འདྲེན་པ་རྣམས་ནི་ཆོས་ཀྱི་སྐུ། །ཞེས་པས་གོ་ལ། འོན་ཏེ་བསྐྱེད་རྫོགས་ཟུང་འཇུག་སྒོམ་ནས་དེའི་འབྲས་བུར་ཐོབ་བྱའི་མཐར་ཐུག་ཀྱང་དེ་ལྟ་བུའི་སྐུ་ཞིག་ཡོད་པར་འདོད་ན་ནི་རཱུ་ཏྲ་ཡང་གོལ་ས་མ་ཡིན་པར་ཐལ་ཏེ། དེས་ན་ཚུལ་འདི་ལྟ་བུ་ཁོང་དུ་ཆུད་པའང་གདོད་མའི་མགོན་པོའི་བྱིན་རླབས་སོ། །འདི་ལྟར་ལས་དང་པོ་པས་རྫོགས་རིམ་ལ་
བསྐྱེད་རིམ་གྱིས་རྒྱས་འདེབས་པ་གཙོ་ཆེ་བས་སྣང་ཆ་ལྷར་གསལ་བ་ཉིད་མི་འདོད་པར་ཁས་བླངས་པ་མ་ཡིན་ཏེ། འདི་ཉིད་ལས། །སྣང་བ་དང་སྟོང་པ་ཟུང་འཇུག༔ བསྐྱེད་པ་དང་རྫོགས་པ་ཟུང་འཇུག༔ རྣལ་འབྱོར་པ་དང་རྣལ་འབྱོར་པའི་སེམས་ཟུང་འཇུག༔ ལྷ་དང་ལྷའི་དགོངས་པ་ཟུང་འཇུག༔ ཕྱག་རྒྱ་དང་ཆེན་པོ་ཟུང་འཇུག༔ ཉོན་མོངས་དང་ཡེ་ཤེས་ཟུང་འཇུག༔ ཐབས་དང་ཤེས་རབ་ཟུང་འཇུག༔ དབྱིངས་དང་རིག་པ་ཟུང་འཇུག༔ གཞི་དང་གཞིར་ཤེས་ཟུང་འཇུག༔ ལམ་དང་ལམ་སྣང་ཟུང་འཇུག༔ ལས་དང་འབྲས་བུ་ཟུང་འཇུག༔ དེ་ལྟར་ཟུང་འཇུག་ཐམས་ཅད་གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ༔ ཞེས་གསུངས་པ་ལྟར་གང་ཟག་གི་བློ་མཐུ་དང་བསྟུན་ནས་ལམ་པ་བྱིངས་ལ་འདི་ལ་ཡང་མན་ངག་གི་དགོངས་པས་རྫོགས་རིམ་གྱི་རྗེས་ཐོབ་ལྷ་སྐུར་ལྡང་བར་གསུངས་ཏེ། སྣ་ཚོགས་རང་གྲོལ་གྱིས་མཛད་པའི་དཀྱིལ་ཆོག་ཁོག་འབུབས་རགས་བསྡུས་ལས། བཤད་མ་ཐག་པའི་རྫོགས་རིམ་གྱི་མཇུག་ཏུ་སླར་སྣོད་བཅུད་རང་གི་སྒོ་གསུམ་ལྷའི་སྐུ་གསུང་ཐུགས་སུ་ཤེས་པའི་གདེང་དང་མ་བྲལ་བར་བྱའོ། །ཞེས་གསུངས་པས་ད་ལྟ་བྱིངས་ཀྱི་ཉམས་ལེན་དེ་ཁོ་ན་ལྟར་བྱ་དགོས་པ་ཡིན་ཞིང༌། དེ་ལྟར་ནང་རྒྱུད་ཁྱད་པར་ཅན་འདི་དག་ལ་དབང་པོ་རྣོ་རྟུལ་གྱི་གནད་ཟབ་མོས་ཟིན་པའི་ཚོད་འདི་ལྟ་
བུ་ཡོད་པ་མ་རྟོགས་བཞིན་དུ་རྫོགས་པ་ཆེན་པོ་ལྷ་མེད་འདྲེ་མེད་ཅེས་དམོད་པ་སོགས་མནར་མེད་པའི་དམྱལ་བ་ཁོ་ནའི་ས་བོན་ལས་མ་འདས་པ་བློ་གྲོས་དང་ལྡན་པ་རྣམས་ཀྱིས་འདོར་བར་བྱ་ལ། འདི་ལྟར་གྲུབ་ཐོབ་ཆེན་པོ་ས་ར་ཧས་ཀྱང་ཆོས་ཐམས་ཅད་རང་བཞིན་མེད་པར་རྟོགས་ནས་སྤྲོས་བྲལ་དོ་ཧའི་རྒྱང་གླུ་བླངས་པ་དང༌། སྤྲུལ་པའི་རྒྱལ་པོ་སྲོང་བཙན་སྒམ་པོ་མི་བདེན་པ་དྲུག་ཏུ་ལ་བཟླ་བ་ལྟར། རྫོགས་ཆེན་རང་གིས་ལྷུན་གྲུབ་ཀྱི་ལམ་ལ་ཞུགས་སྐབས་ལྟ་བུར་ནི་ལྷ་མེད་འདྲེ་མེད་ཁས་ཀྱང་བླང་པས་ཆོག་སྟེ། དེ་ཉིད་ཀྱི་སྣང་བ་བཞི་མཐར་སོན་ནས་ཕུང་པོ་འཇའ་སྐུར་གྲོལ་བ་འཕགས་ཡུལ་དུ་དགའ་རབ་འཇམ་དཔལ་བཤེས་གཉེན་ལ་སོགས་པ་དང༌། བོད་དུ་གྲུབ་ཆེན་མེ་ལོང་རྡོ་རྗེ་ལ་སོགས་ཏེ་མང་སྔ་རབས་སུ་ཉིང་ཏིང་འཛིན་བཟང་པོ་དང༌། ལྕེ་བཙུན་སེང་གེ་དབང་ཕྱུག་རྒྱུད་ཉི་ཟླ་ཁ་སྦྱོར་ལས་གསུངས་པ་ལྟར་ཉང་ལྷས་བྲག་ལྷའི་ཕུག་དང༌། ལྕེ་བཙུན་འོ་ཡུག་ཕྱི་གོང་གི་རྫའི་ཐད་ཀྱི་ནམ་མཁའ་ལ་འོད་ཕུང་དུ་གཤེགས་པས་མཚོན་ཏེ་གྲགས་པ་དང་སྦས་པ་བསམ་གྱིས་མི་ཁྱབ་ལ། གཞན་ཡང་ཀུན་སྤངས་རྡོ་རིང་བ་ཆེན་པོས་རྙིང་མ་བ་འཇའ་ལུས་སུ་སོང་བ་བདུན་གཟིགས་པའི་ལོ་རྒྱུས་དང༌། དེ་ལྟར་སྔོན་ཆད་བྱུང་གི་ཕྱིས་མ་བྱུང་བའང་མིན་ཏེ། ད་ལྟའི་རབ་བྱུང་བཅུ་གསུམ་པ་ཤར་མ་ཐག་གི་གོང་ཙམ་དུའང་གཙང་སྟོད་དུ་སྣང་བཞི་མཐར་ཕྱིན་པའི་ལྷག་མེད་གཅིག་དང་ཉི་འོག་ལྗོན་པའི་ཚལ་དུ་གཅིག་བཅས་འཇའ་ལུས་སུ་གཤེགས་མ་རག་པ་
ཡིན་ཕྱིར་ཐེག་པ་འདིའི་དགོངས་པ་བསམ་གྱིས་མི་ཁྱབ་པ་ཤེས་པར་བྱའོ། །ཟད་ཅིག །ལྷ་མེད་འདྲེ་མེད་ཀྱི་ལྟ་བས་སངས་རྒྱས་པ་ཡིན་ཕྱིར་མི་ཤེས་པའི་ཀླན་ཀ་ལ་བརྒལ་བརྟག་བྱེད་པ་ལས་གསོག་པ་ཙམ་ལས་མ་འདས་ཕྱིར་ཁ་ནང་དུ་ལོག་ནས་སྙིང་པོ་ལེན་པ་ལ་བརྩོན་པར་བྱའོ། །དགུ་པ་བསྔོ་བའི་ཡན་ལག་ལ་གཉིས། བསྔོ་བ་དང་སྨོན་ལམ་གྱི་ཁྱད་པར་དབྱེ་བ། བསྔོ་བའི་རྣམ་གཞག་རགས་བསྡུས་བརྗོད་པའོ། །དང་པོ་ནི། བཟང་སྤྱོད་ཀྱི་འགྲེལ་པ་ཕྱོགས་གླང་གི་གཞུང་ལ་མ་འཚལ་ཡང་བོད་ཊཱིཀ་ཁ་ཅིག་ཏུ། མཁས་པ་ཕལ་ཆེ་བ་དག་སྨོན་ལམ་སྤྱི་དང་བྱེ་བྲག་ཁྱད་ཡོད་དེ། སྨོན་ལམ་ལ་རྒྱུ་དགེ་བ་ལྟ་བུ་ཞིག་གཞིར་བྱས་ནས་སྨོན་དགོས་པས་མ་ཁྱབ་ལ། བསྔོ་བ་ནི་རྒྱུ་དགེ་བ་ལྟ་བུ་ཞིག་གཞིར་བྱས་ནས་བསྔོ་བ་ཡིན་ནོ། །ཞེས་གསུངས་མོད་ཀྱི་དཔྱད་དགོས་པ་ཞིག་གོ །ཞེས་ལུང་མ་བསྟན་གྱིས་འཐད་དཀའ་བར་བསྒྲུབས་པ་ལྟར་རྟོག་རིག་གིས་གཞིགས་ན། རྒྱལ་པོ་བྱམས་པའི་སྟོབས་ཀྱིས་སྐུ་ལུས་བྱིན་པའི་དགེ་རྩར་བརྟེན་ནས་སྨོན་པ་ལྟ་བུས་མཚོན་ཏེ་རྒྱུ་མི་དགོས་པས་མ་ཁྱབ་ཀྱང༌། ཕལ་ཆེར་དུ་དེ་ལྟར་མི་སྟོན་པས་གཙོ་ཆུང་བར་བཞག་ལ། དེ་བཞིན་དུ་བསྔོ་བ་ཁོ་ན་ལའང༌། དུས་གསུམ་ཀའི་དགེ་ཚོགས་བསྔོ་གཞིར་རུང་བར་བཤད་པ་ཡང་སྣང་སྟེ། དོན་ལ་ཞིང་བསམ་དངོས་པོར་རྣམ་
དག་རྟེན་དུ་བྱུང་བས་རང་ལུགས་ལ་སྔ་མའི་ལུང་བཞིན་ཁས་ལེན་པ་སྟེ། གཏེར་ཆོས་འདི་ཉིད་ཀྱི་རང་སྐད་ལས། དེ་ལྟར་ཞིང་དང་དངོས་པོ་བསམ་པ་གསུམ་འཛོམ་པས་ཚོགས་བསགས་པ་རྣམས་བསྔོ་རྒྱུའི་དགེ་བ་ཡིན་ཞིང་༔ ཞེས་པ་དང༌། ཀུན་མཁྱེན་ཆོས་ཀྱི་རྒྱལ་པོས། རྒྱུ་དགེ་བ་སྔོན་དུ་སོང་ནས་ཚིག་དང་སྨོན་པ་བསྡོམས་པ་ནི་བསྔོ་བ། རྒྱུ་དགེ་རྩ་མ་སོང་བར་སྨོན་པ་ནི་སྨོན་ལམ་མོ། །ཞེས་གསུངས་པ་ལྟར་རོ། །གཉིས་པ་ལ་བཞི། བསྔོ་རྒྱུའི་དགེ་རྩ། བསྔོ་བྱའི་ཞིང༌། སྔོ་བྱེད་ཀྱི་མཁན་པོ། བསྔོ་བའི་ཚུལ་ལོ། །དང་པོ་ལ་གཉིས། བསྔོར་རུང་བ་དང་མི་རུང་བའོ། །དང་པོ་ནི། གཏེར་ཁ་འདི་ཉིད་ཀྱི་བསྔོ་བ་ནོར་བུ་བསམ་འཕེལ་ལས། དངོས་པོ་རྣམ་པར་དག་པ་རྣམས་བསམ་པ་རྣམ་པར་དག་པས༔ ཡུལ་གོང་མ་ལ་དད་པ་དང་༔ འོག་མ་ལ་སྙིང་རྗེ༔ ཐུན་མོང་དུ་བྱང་ཆུབ་སེམས་ཀྱི་ཀུན་ནས་བསླང་བར་བྱ་སྟེ༔ ཞེས་གསུངས་པས་དངོས་པོ་རྣམ་པར་དག་པ་ནི་འོག་ཏུ་འཆད་མ་རག་པའི་སྐྱོན་གྱིས་མ་གོས་པ་དང༌། བསམ་པ་རྣམ་པར་དག་པ་ནི་གཡོ་རྒྱུ་དང་ཁེ་གྲགས་ཀྱི་དྲི་མས་མ་གོས་པ་ཞིག་དགོས་པར་གསུངས་སོ། །གཉིས་པ་ནི། མདོ་ལས། དངོས་པོ་བརྐུས་འཕྲོག་དཀོར་རྫས་དང༌། །གཞན་ལ་གནོད་པ་མ་ཡིན་པ། །རབ་
ཏུ་གཅེས་དང་ཡིད་འོང་རྫས། །མཁོ་བར་གྱུར་ན་མཆོད་སྦྱིན་ནོ། །ཞེས་དང༌། སྡིག་དང་དུག་སོགས་ལོག་འཚོའི་རྫས། །མཚོན་ཆ་ལ་སོགས་མ་འདྲེས་པར། །སྦྱིན་པ་རྣམ་པ་བཞི་དང་ནི། །འདོད་ཡོན་མཐུན་རྐྱེན་སྣ་ཚོགས་ཀྱིས། །དབུལ་ཕོངས་མ་ནུས་པ་ལ་སྐྱོང༌། །ཞེས་གསུངས་པ་ལྟར་མདོར་ན་གཞན་གྱི་ལག་ནས་དབང་མེད་དུ་ཕྲོགས་པ་དང་བརྐུས་པ། དགེ་བའི་ཆེད་ཅེས་སེམས་ཅན་གྱི་སྲོག་བཅད་པའམ། ཁྲག་འབྱིན་པ་ལ་སོགས་ཏེ་འཚེ་བ་བགྱིས་པས་མཚོན་ཏེ་ལོག་འཚོའི་རྫས་ཀྱི་རིགས་བསྔོ་བར་མི་རུང་བར་གསུངས་སོ། །གཉིས་པ་བསྔོ་བྱའི་ཞིང་ལ་གསུམ་སྟེ། མདོ་ལས་བཤད་ཚུལ་དང༌། སྔགས་ལས་བཤད་ཚུལ་དང༌། ཐུན་མོང་དུ་བཤད་ཚུལ་ལོ། །དང་པོ་ནི། མདོ་སྡེ་རྒྱན་ལས། ཆོས་རྣམས་ཀུན་གྱི་གཏེར་ཡིན་ཕྱིར། །རྣམ་པའི་སྒོ་ནི་རྣམ་འབྱེད་པ། །དགེ་འདུན་ཞེས་ནི་བྱ་བ་སྟེ། །དགེ་འདུན་ལ་ནི་ཀུན་གྱིས་བྱིན། །ཞེས་གསུངས་པ་ལྟར་བསླབ་པ་གསུམ་ལྡན་གྱི་དགེ་འདུན་ཉིད་ལ་ཚོགས་ཞིང་གི་གཙོ་བོར་གསུངས་པའོ། །གཉིས་པ་ནི། དཔལ་གསང་བ་འདུས་པ་ལས། མཆོད་པ་ཀུན་གྱི་ཐོག་མ་ལ། །མཆོད་པ་ཐམས་ཅད་རབ་སྤངས་ཏེ། །བླ་མ་མཆོད་པ་རབ་ཏུ་བརྩམ། །དེ་མཉེས་པ་ལས་དངོས་གྲུབ་ནི། །ཀུན་མཁྱེན་དམ་པ་ཐོབ་པར་འགྱུར། །ཞེས་གསང་སྔགས་པ་ལ་བླ་མ་ཉིད་ལས་ལྷག་པའི་ཚོགས་
ཞིང་གཞན་དུ་མ་གྱུར་པ་འདིས་མཚུངས་པར་ཆེས་ཆེར་མང་བར་གསུངས་སོ། །གསུམ་པ་ནི། ཇི་སྐད་དུ། སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་སྐྱོབ་པ་མེད། །དགེ་འདུན་འདྲ་བའི་ཞིང་ས་མེད། །དེ་ཕྱིར་དཀོན་མཆོག་གསུམ་ལ་དབུལ། །ཞེས་ཐུན་མོང་དུ་ནི་དཀོན་མཆོག་གསུམ་ལས་ལྷག་པའི་ཞིང་ས་གཞན་མ་མཆིས་སོ། །དེ་ཡང་སྤྱི་ཁྱབ་ཏུ་ཐེག་པ་འོག་མ་དང་སོ་སོ་སྐྱེ་བོ་ལ་སོགས་པས་ཞིང་ས་རྣམ་པར་དག་པ་ལ་རྒྱུའི་དངོས་པོ་ཕུན་སུམ་ཚོགས་པས་བཀུར་སྟི་དང་ཞབས་ཏོག་ཁོ་ན་ལ་བརྩོན་ཞིང༌། མ་འབྱོར་པ་རྣམས་ཀྱིས་ཡིད་སྤྲུལ་ཀུན་ཏུ་བཟང་པོའི་མཆོད་པས་རྒྱལ་བ་མཉེས་པའི་ཐབས་ལ་བརྩོན་པར་བྱ། དེ་ནི་ཞིང་བཟང་ལ་ས་བོན་ལེགས་པ་བཏབ་ནས་འབྲས་བུ་ཡར་ལྡན་དུ་འཕེལ་བ་ལྟར་བསོད་ནམས་ལྷག་པར་སྐྱེ་བར་གསུངས་མོད། ཐེག་པ་ཆེན་པོ་པ་རྣམས་ཀྱིས་ཡུལ་འོག་མ་ལ་གཅེས་པར་འཛིན་ཅིང་གཞན་དོན་འབའ་ཞིག་ལྷུར་ལེན་དགོས་པར། ལུང་ལས། གང་ལ་རེ་དང་བཤེས་མེད་དང༌། །ནད་པ་དང་ནི་མ་ནུས་པ། །རྒས་ཤིང་འཁོགས་པ་དབང་པོ་ཉམས། །དབུལ་ཕོངས་བཀྲེས་དང་མུ་ཏོ་བ། །བྱང་ཆུབ་སེམས་ལྡན་རྣམས་ཀྱིས་ནི། །མགོན་མེད་དེ་དག་དང་དུ་བླང༌། །ཞེས་གསུངས་པ་ལྟར་བདག་བས་གཞན་གཅེས་ཀྱི་བསམ་པ་བཟང་པོས་བྱང་ཆུབ་སེམས་དཔའི་སྤྱོད་པ་ཚུལ་
བཞིན་དུ་བསླབ་པ་ལ་བརྩོན་པར་བྱའོ། །གསུམ་པ་ལ་གཉིས། སྔོ་བྱེད་ཀྱི་མཁན་པོ་དང༌། བསྔོ་བའི་དུས་ཚོད་དོ། །དང་པོ་ནི། སློབ་དཔོན་མཚོ་སྐྱེས་ཀྱི་ཞལ་ནས། ལྟ་བ་གནས་ལུགས་དོན་རྟོགས་ཤིང༌། །སྒོམ་པ་ཏིང་འཛིན་ལས་སུ་རུང༌། །སྙིང་རྗེ་བྱང་ཆུབ་སེམས་སུ་ལྡན། །མཚན་ཉིད་ཐམས་ཅད་ཡོངས་རྫོགས་པའི། །བཤེས་གཉེན་དམ་པ་རྣམས་ཀྱིས་ནི། །ཡོན་རྣམས་བསྔོ་བའི་སློབ་དཔོན་མཆོག །ཅེས་གསུངས་པའི་མཚན་ཉིད་ཚང་ལ་ཡེ་ཤེས་གཟིགས་པའི་འཕགས་ཆེན་བདེན་ཚིག་འགྲུབ་པ་འཛོམ་ན་རབ། མ་འཛོམ་ན་འདི་ཉིད་ལས། གང་གིས་དད་པས་འདུན་བྱས་པས། །བླ་མ་དེ་ནི་སྟོན་པ་དངོས། །ཞེས་གསུངས་པ་ལྟར་བསླབ་པ་གསུམ་དང་ལྡན་ཞིང་ཚངས་པར་མཚུངས་སྤྱོད་ཀྱི་བཤེས་གཉེན་ཚུལ་ལྡན་ལ་ཡོན་གྱི་བདག་པོས་ཀྱང་དད་འདུན་ཚུལ་བཞིན་དུ་ནུས་ན་རྒྱུ་འབྲས་རྟེན་འབྲེལ་མི་བསླུ་བའི་བདེན་པ་ཆེན་པོའི་མཐུ་ལས་ཇི་བཞིན་འགྲུབ་པར་བཤད་ཅིང༌། གལ་ཏེ་དེ་ཡང་དཀའ་ན། འདི་ཉིད་ལས། རང་གི་དད་པ་ཐོབ་པ་དང་༔ དཀོན་མཆོག་དྲུང་དུའང་རུང་བར་བཤད༔ ཅེས་གསུངས་པས། རང་ཉིད་ཀྱིས་ཀྱང་རྟེན་གསུམ་ཁྱད་འཕགས་ཀྱི་དྲུང་དུ་ཤིན་ཏུ་དད་པའི་སྒོ་ནས་བསྔོར་རུང་བར་གསུངས་སོ། །གཉིས་པ་ནི། སྔ་མའི་འཕྲོ་ལས། ཉ་སྟོང་བརྒྱད་གསུམ་ལ་སོགས་དུས༔ དགེ་རྩ་
དཀོན་མཆོག་དྲུང་དུ་བསྔོ༔ ཞེས་པས་བྱུང་ངོ་ཅོག་སྤྱིར་བཏང་གི་དུས་ཆེན་ཁྱད་པར་ཅན་ཉ་ཞེས་བདེ་འབྱུང་གི་གཙུག་རྒྱན་ཆ་ཤས་རིལ་པོར་གང་བ་ལ་སྒྲ་བཤད་བཞག་པ་ཚེས་བཅོ་ལྔ་སྟེ་སངས་རྒྱས་སྣང་བ་མཐའ་ཡས་ཀྱི་དུས་བཟང་དང༌། དེ་བཞིན་དུ་སྟོང་ཞེས་ཉི་ཟླ་སྐར་ཁོངས་གཅིག་ཏུ་ཚོགས་པས་མཚན་མོའི་སྣང་བྱེད་མེད་པ་ལ་སྟོང་གི་སྒྲ་བཤད་བཞག་པ་སྟེ་ཚེས་གནམ་གང་ནི་བཅོམ་ལྡན་འདས་ཐུབ་དབང་གི་དུས་ཆེན་དང༌། ཚེས་བརྒྱད་ནི་སངས་རྒྱས་སྨན་རྒྱལ་གྱི་དུས་ཆེན་དུ་གསུངས་པ་འདི་རྣམས་ཀྱི་དུས་ཁྱད་པར་ཅན་ལ་དགེ་བའི་ལས་མཐའ་དག་བརྩི་ཞིང་བསྔོ་བར་བྱ་བའི་དུས་ཚོད་དུ་གསུངས་པ་ནི་འཕེལ་འགྱུར་གྱི་སྟོབས་ལ་དགོངས་པའོ། །བཞི་པ་བསྔོ་བའི་ཚུལ་ལ་གསུམ། འབྲས་བུ་ཅི་ལྟ་བུའི་རྒྱུར་བསྔོ་བ་དང༌། ཚོགས་ཞིང་ལ་དཔང་པོ་འཚོལ་བ། བསྔོ་བ་དངོས་སོ། །དང་པོ་ལ་གཉིས། བསྔོ་བའི་ས་དང་གང་གི་ཆེད་དུ་བྱ་བའོ། །དང་པོ་ནི། ཡུམ་བར་མ་ལས། རབ་འབྱོར་དགེ་བའི་རྩ་བ་འདི་ནི་སངས་རྒྱས་ཀྱི་ས་ཁོ་ནར་བསྔོ་བར་བྱའོ། །ཉན་ཐོས་དང་རང་སངས་རྒྱས་དང་དེ་གཞན་གྱི་སར་བསྔོ་བར་མི་བྱ་སྟེ། ཞེས་གསུངས་པ་ལྟར་རྣམ་པ་ཐམས་ཅད་མཁྱེན་པའི་ས་ཁོ་ན་མ་གཏོགས། ཚེ་འདིའི་ཕུན་སུམ་ཚོགས་པ་ཙམ་དང་ཐེག་དམན་གྱི་བློས་བསྔོ་བར་མི་བྱའོ། །གཉིས་པ་ནི། དེ་ཡང་
སེམས་ཅན་ཐམས་ཅད་ཀྱི་ཕྱིར་བསྔོ་ཡི། རང་ཡོངས་སུ་ཐོབ་པ་ཙམ་གྱི་དོན་དུ་ནི་མ་ཡིན་ཏེ། ཉན་ཐོས་དང་རང་སངས་རྒྱས་ཀྱི་སར་ལྟུང་བར་འགྱུར་བའི་ཕྱིར་རོ། །ཞེས་གསུངས་པ་ལྟར་སེམས་ཅན་ཐམས་ཅད་ཀྱི་དོན་དུ་ལྷག་པའི་བསམ་པ་དཀར་པོས་བསྔོ་བ་ལས། རང་ཉིད་གཅིག་པུ་ཞི་བདེའི་ཆེད་དུ་བསྔོ་བ་བྱ་ན། བྱང་སེམས་ཀྱི་བསླབ་པ་ཉམས་པར་བཤད་པས་ཚུལ་བཞིན་དུ་བྱའོ། །གཉིས་པ་ཚོགས་ཞིང་གསལ་འདེབས་པ་ལ་གཉིས། སྤྱི་དང་བྱེ་བྲག་གོ །དང་པོ་ནི། དུས་ངེས་མེད་ལྟ་བུའི་ཚེ་བསྔོ་བ་བྱ་ན། ཚོགས་ཞིང་གི་དཔང་པོ་གལ་ཆེ་བར་བཤད་པས་བདེ་གཤེགས་རྒྱལ་བ་རྒྱ་མཚོའི་ཚོགས་དང་བཅས་པ་མཁའ་ཁྱབ་ཏུ་གསལ་འདེབས་པའམ། ཡང་ན་རྟེན་གསུམ་བྱིན་རླབས་ཅན་ཡོད་ཚེ་དེ་དག་གི་སྤྱན་སྔར་བྱེད་པའོ། །གཉིས་པ་བྱེ་བྲག་གི་གནས་སྐབས་སྒྲུབ་དཀྱིལ་ཞལ་ཕྱེ་བ་ལ་སོགས་ཏེ་འདི་ལྟ་བུའི་གནས་སྐབས་ན། ཕྱོགས་བཅུའི་དེ་བཞིན་གཤེགས་པ་ཐམས་ཅད་མདུན་བསྐྱེད་ཚོམ་བུའི་དཀྱིལ་འཁོར་གྱི་ལྷག་པའི་འཁོར་ལོར་ཤར་བ་ལ་དཔང་པོ་གསོལ་བས་འཐུས་ཀྱང༌། ཁ་ཅིག་ཨ་འཐས་ཀྱི་བློས་རྣམ་པར་སྒྲོ་བཏགས་ནས་ཚོགས་ཞིང་གསལ་འདེབས་ཀྱི་སྟོང་མཐུན་བརྗོད་པ་ནི། མདུན་དུ་དཀྱིལ་འཁོར་ཡོད་པ་ཐུགས་ཀྱིས་གཡེངས་བའམ། ཡང་ན་དཀྱིལ་
འཁོར་དེ་ཉིད་ཀྱིས་ཚོགས་ཞིང་གི་གོ་མ་ཆོད་པར་མངོན་ནོ། །ཁ་ཅིག་ན་རེ། ཆོ་གའི་ས་བཅད་ལ་གཞིགས་ནས་བསྡུ་ཆོག་སྔོན་དུ་གྲུབ་པས་སོ་ཞེ་ན། སྒྲུབ་མཇུག་ལྟ་བུའི་ཐུན་ཐ་མ་ལ་དེ་བཞིན་འཐད་ཀྱང༌། སྒྲུབ་པའི་ཐུན་མཚམས་ཐམས་ཅད་ལ་བསྔོ་བས་རྒྱས་འདེབས་དགོས་པར་མ་ཟད། སྒྲུབ་པ་ཚུགས་ནས་མ་གྲོལ་གྱི་ཁོངས་སུ་ཡོན་བདག་ཐ་དད་པས་བསྙེན་བཀུར་པ་ལྟ་བུའི་ཚེ་བསྔོ་བ་བྱ་སྐབས་བསྡུ་ཆོག་མ་ཟིན་ནོ། །གསུམ་པ་ནི། བསྔོ་བ་དངོས་བསྟན་དང༌། འཁོར་གསུམ་ཡོངས་དག་གི་རྒྱས་འབེབས་པའོ། །དང་པོ་ལ་གཉིས། གཞུང་འདིའི་སྒོས་ཆོས་ཀྱི་དམིགས་གནད་ཁྱད་པར་ཅན་བཤད་པ་དང༌། མཚམས་སྦྱོར་དངོས་གཞིའོ། །དང་པོ་ནི། རྡོ་རྗེ་སློབ་དཔོན་མཚན་ཉིད་དང་ལྡན་པ་དེས་གཞན་དོན་དུ་བསྔོ་བ་བྱེད་པའི་ཚེ། ཡོན་བདག་གསོན་པོ་ཡིན་ཚེ་སྔར་གྱི་སྟོང་མཐུན་རྣམས་ཁོའི་རྣ་བར་ཐེབས་པར་གདབ་ལ་ཚོགས་སྒྲུབ་ལྟ་བུའི་སྐབས་གྲལ་གཤམ་དུ་བཞག་ལ་རྗེས་ཟློས་བྱར་བཅུག །ཚེ་འདས་ཀྱི་དོན་དུ་ཡིན་ན་ཏིང་ངེ་འཛིན་གྱིས་རྣམ་པར་ཤེས་པ་བཀུག་ལ་སྔ་མ་ལྟར་རྗེས་ཟློས་བྱེད་པར་བསམ་མོ། །དེ་ལྟར་རྗེས་ཟློས་བྱ་ཚུལ་འདི་ལ་ནོར་ས་ཡོད་དེ། མཐུན་འགྱུར་ནི་མ་ཡིན་ཏེ། ཀུན་མཁྱེན་ཆེས་པོས། དེ་ཡང་བསྔོ་བ་སྦྱིན་བདག་གི་སེམས་
ཀྱི་འདུན་པ་ཚིག་གི་ནུས་པས་བྱང་ཆུབ་ལ་སོགས་པར་བསྒྱུར་བ་ཡིན་ནོ། །དེ་ཡང་སློབ་དཔོན་རྣམས་ཀྱི་བྱེད་པ་ནི་དེས་མི་ཤེས་པའི་དབང་དུ་བྱས་ཏེ་གཞན་དུ་ན་དཔང་པོ་ཡིན་པས་བླ་མ་དང་དགེ་འདུན་རྣམས་ཀྱིས་ཁོའི་ཚིག་གི་རྗེས་སུ་སེམས་ཕྱོགས་པས། འགྲུབ་པར་གྱུར་ཅིག་པའི་མཐུན་འགྱུར་བརྗོད་པ་ཡིན་ནོ། །ཞེས་གསུངས་པ་ལྟར་རོ། །གཉིས་པ་ནི། སྔར་བཤད་པ་ལྟར་དུས་མ་ཡིན་པའི་ཚེ་གཞུང་ནས་གསུངས་པ་ལྟར་མདུན་གྱི་ནམ་མཁར་ཚོགས་ཞིང་གསལ་འདེབས་བྱ་ཞིང༌། ཡན་ལག་བདུན་པས་མཆོད་ཅིང་བརྡ་སྦྱོར་སྤྱི་ལྟར་བྱེད། གནས་སྐབས་འདི་ཉིད་དུ་ནི་བསྔོ་བའི་དཔང་པོ་དཀྱིལ་འཁོར་རྒྱ་མཚོའི་ལྷ་ཚོགས་འདི་ལྟ་བུ་བཞུགས་པ་ལ་སྔར་གྱི་འདུན་པ་རྩེ་གཅིག་ཏུ་གཏོད་ཅེས་བརྡ་སྦྱར་ལ་རང་ཡང་དེ་ལྟར་དུ་བསམ་ཞིང༌། མཉམ་གཞག་ནམ་མཁའ་ལྟ་བུར་གཡོ་མེད་ཀྱི་ངང་ལས། རྗེས་ཐོབ་སྙིང་རྗེའི་གསལ་སྣང་སྒྱུ་མ་ལྟ་བུའི་རང་བཞིན་དུ། བསྔོ་གཞུང་ནས་བྱུང་བ་ལྟར། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་སོགས་བརྗོད་ཅིང༌། འདུས་པ་རྒྱ་མཚོ་དང་བཅས་པས་མཐུན་འགྱུར་བྱེད། བསྔོ་མཁན་རང་ཉིད་ལས་དགོངས་པ་ལྷག་པའི་སྐྱེས་བུ་ཁྱད་པར་ཅན་གྱི་དགོངས་རྫོགས་ལྟ་བུའི་ཚེ་ན་དེ་ཉིད་
དགོངས་གསོལ་གྱི་དཔང་པོར་བྱས་ནས། དགེ་རྩ་སེམས་ཅན་ཐམས་ཅད་ཀྱི་དོན་དུ་བསྔོ་ཞིང་དེས་མཚོན་པའི་བསྔོ་ཚིག་དང་སྨོན་ལམ་ལ་མཐའ་བསྒྱུར་བྱ་བར་གསུངས་ལ། དེ་བཞིན་དུ་ཤི་གསོན་གྱི་བསྔོ་བ་ཡང་འགག་ཕྱེད་པར་བྱ། གང་གི་ཚེ་ཡང་མཐར་སློབ་དཔོན་གྱིས་བསྐུལ་ལ་འདུས་པ་རྒྱ་མཚོས་ཀྱང་ཆབས་གཅིག་པས། དེ་ལས་བྱུང་དང་གཞན་ཡང་དགེ་བའི་རྒྱུན༔ སོགས་ནས། བླ་མེད་ཐེག་པ་ཆེན་པོར་བསྔོ་བར་བགྱི༔ ཞེས་པའི་བར་བརྗོད་རྗེས་དཀྱིལ་འཁོར་རམ། བསྔོ་བའི་དཔང་པོ་དམིགས་བསལ་གང་ཡིན་དེའི་ཐུགས་ཀ་ནས་འོད་ཟེར་གྱི་སྣང་བ་དཀར་ལ་དངས་པ་ཞིག་ཡེར་གྱིས་བྱུང་ནས། གང་གི་དོན་དུ་བསྔོ་བའི་འགྲོ་བ་དེ་དག་གི་སྒོ་གསུམ་ལ་ཕོག་པས། སྡིག་སྒྲིབ་ཉེས་ལྟུང་ཐམས་ཅད་ཉི་མས་བ་མོ་བཞུ་བ་ལྟར་སངས་ཀྱིས་དག །ལུས་འོད་ཀྱི་གོང་བུར་གྱུར་ནས་དམིགས་ཡུལ་གསོན་པོ་ཡིན་ཚེ་རིག་འཛིན་གྱི་གྲལ་དུ་འཁོད་པར་བསམ། གཤིན་པོ་ཡིན་ཚེ་འོད་གོང་དེ་ཡང་རིག་པའི་ངོ་བོ་ཨཱཿདཀར་པོ་ཞིག་ཏུ་དངས་མར་འདྲིལ་ཏེ་མེ་སྟག་ཡར་བ་ལྟར་སོང་ནས་དཀྱིལ་འཁོར་ལྷག་པའི་གཙོ་མཆོག་གི་ཡེ་ཤེས་སེམས་དཔའི་ཐུགས་སྲོག་དང་འདྲེས་པར་བལྟ་བའམ། ཚོགས་ཞིང་གསལ་པ་ཡིན་ཚེ་བཅོམ་ལྡན་འདས་ཀྱི་ཐུགས་ཀར་ཐིམ།
བཅོམ་ལྡན་འདས་བདེ་བར་གཤེགས་པ་འཁོར་བཅས་ཀྱང་ནམ་མཁའ་ལ་འཇའ་སྤྲིན་དེངས་པ་ལྟར་མི་མངོན་ཆོས་ཀྱི་དབྱིངས་སུ་གཤེགས་པར་བསམ་མོ། །དམིགས་པ་འདི་ནི་གཞུང་འདི་ཉིད་ཀྱི་ཁྱད་ཆོས་བླ་ན་མེད་པ་ཞིག་ཡིན་ཞིང༌། དེས་ན་བསྔོ་བའི་རིགས་མཐའ་དག་ལ་སྦྱར་དུ་ཡོད་ལ། ཤི་གསོན་གྱི་དབྱེ་བ་འབྱེད་པ་གཞུང་ལ་ཧ་ཅང་མི་གསལ་ཡང་ལུང་རིག་གཉིས་ཀའི་སྒོ་ནས་འཐད་ཕྱོགས་བསྒྲུབ་རྒྱུ་ཡོད་དོ། །གཉིས་པ་ལ་གཉིས། འཁོར་གསུམ་མི་དམིགས་པའི་ཀློང་དུ་རྒྱས་གདབ་པ་དང༌། ལྡན་འབྲས་ཀྱི་ཕན་ཡོན་བཤད་པའོ། །དང་པོ་ནི། ལུང་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ཏེ། །དེ་ཡང་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་དང༌། ཡུམ་བར་མ་ལས། རབ་འབྱོར་ཆོས་ཐམས་ཅད་རྨི་ལམ་ལྟ་བུ། སྒྱུ་མ་ལྟ་བུ། དགེ་བ་ཡང་རྨི་ལམ་ལྟ་བུ། སྒྱུ་མ་ལྟ་བུའི་ཚུལ་གྱིས་ཡོངས་སུ་བསྔོ་བར་བྱ་སྟེ། ཞེས་དང༌། ཀུན་མཁྱེན་གྱིས། དམིགས་པའམ་ཞེན་པས་དགེ་རྩ་བདེན་བདེན་པོར་ཤེས་པ་ནི་མི་བཟང་སྟེ་ཞེས་པའི་རྗེས་ལ་མདོ་སྡུད་པའི་ལུང་འདྲེན་མཛད་པ་དང༌། ད་དེ་དག་གི་དོན་སྙིང་པོར་ཧྲིལ་གྱིས་དྲིས་ནས་གོ་བདེ་བར་བརྗོད་ན། དགེ་བ་རྨི་ལམ་ལྟ་བུ། གསོག་པ་པོ་རྨི་ལམ་ལྟ་བུ། ལེན་པ་པོ་རྨི་ལམ་ལྟ་བུ།
སྣང་ཚུལ་མ་འགགས་ལ་དོན་དུ་བདེན་པར་མི་འཛིན་པ་དག་ལ་འཁོར་གསུམ་ཡོངས་དག་གི་བསྔོ་བ་ཟེར་གྱི། ལ་ལས་འདི་དོན་མ་གོ་བར་ཅི་ཡང་མེད་པར་སྒོམ་པ་ནི་མུ་སྟེགས་ཆད་པར་ལྟ་བ་རྣམས་དང་ཁྱད་པར་མེད་པས་འདིའི་དོན་ལ་ཐོས་པ་དང་བསམ་པ་གཉིས་ཀས་སྒྲོ་འདོགས་ཆོད་པར་བྱ་སྟེ། དེ་ཡང་ཀུན་མཁྱེན་རིན་པོ་ཆེས། སྤྱིར་དགེ་བ་གང་བྱེད་ཀྱང་སྦྱོར་བ་བྱང་ཆུབ་སེམས་ཀྱིས་ཟིན་པ། དངོས་གཞི་ལ་དམིགས་པ་དང་མཚན་མ་མེད་པའི་ཤེས་རབ་ཀྱིས་ཟིན་པ། རྗེས་སྒྱུ་མ་རྨི་ལམ་ལྟ་བུའི་བསྔོ་བ་དམ་པས་ཟིན་པ་སྟེ། དམ་པ་གསུམ་དང་འབྲེལ་ན་ཐར་པ་ཆ་མཐུན་གྱི་དགེ་བ་ཞེས་བྱ་ལ། སངས་རྒྱས་ཀྱི་ལམ་མམ་རྒྱུ་བྱེད་པ་ཡིན། ཞེས་གསུངས་ཤིང༌། དེ་ལྟ་བུའི་གནད་ཀྱིས་མ་ཟིན་པ་སོགས་ལ་འཛད་པའི་རྒྱུ་བཞི་གསུངས་ཏེ། ལུང་ལས། དགེ་བའི་རྩ་བ་བསགས་ནས་ནི། །མ་བསྔོས་ཡང་ན་ལོག་པར་བསྔོས། །གཞན་ལ་བསྒྲགས་དང་འདོད་པ་སྐྱེས། །དེ་ནི་ཟད་པའི་རྒྱུ་བཞི་ཡིན། །ཞེས་གསུངས་པ་ལྟར་འདུས་བྱས་ཀྱི་དགེ་བ་མཐའ་དག་མ་བསྔོས་པར་ལུང་མ་བསྟན་དུ་ལུས་པ་དང༌། བསྔོས་ཀྱང་འབྲས་བུ་ཕྱིན་ཅི་ལོག་ཏུ་བསྔོས་པ་དང༌། བདག་གིས་དགེ་བ་འདི་ལྟ་བུ་བྱས་སོ་ཞེས་ང་རྒྱལ་གྱི་བསམ་པས་གཞན་ལ་བསྒྲགས་པ་དང༌། འདོད་པའི་དབང་གིས་འགྱོད་སེམས་དང་སེར་སྣ་སྐྱེས་
པ་སོགས་ལ་བསོད་ནམས་ཆ་མཐུན་གྱི་འབྲས་བུ་ལན་ཅིག་ཐོབ་ནས་སླར་འཛད་པར་འགྱུར་ཏེ། ཀུན་མཁྱེན་གྱིས་སྔ་མའི་འཕྲོར། དེས་མ་ཟིན་ན་བསོད་ནམས་ཆ་མཐུན་ཞེས་བྱ་སྟེ། རང་རང་གི་དགེ་འབྲས་ལན་ཅིག་བྱུང་ནས་ཟད་པར་འགྱུར་བ་ཉིད་དུ་ཤེས་པར་བྱའོ། །ཞེས་གསུངས་པ་སོགས་འདི་ནི་ཤིན་ཏུ་ཁག་ཆེའོ། །གཉིས་པ་དེ་ལྟར་ཚུལ་བཞིན་དུ་བགྱིས་པའི་ཕན་ཡོན་ནི། བློ་གྲོས་མི་ཟད་པས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང༌། །རྒྱ་མཚོ་མ་བསྐམས་བར་དུ་དེ་མི་ཟད། །དེ་བཞིན་བྱང་ཆུབ་སེམས་བསྔོས་དགེ་བ་ཡང༌། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་རྒྱ་མཚོ་ཆེན་པོའི་ནང་དུ་ཆུ་ཐིགས་པ་གཅིག་སོང་ཡང༌། རྒྱ་མཚོ་མ་བསྐམས་ཀྱི་བར་དུ་ཐིགས་པ་དེ་ཟད་པར་མི་ནུས་པ་བཞིན་དུ། འདི་ལྟར་དགེ་བའི་རྩ་བ་རྣམས་འཁོར་གསུམ་ཡོངས་དག་ཆེན་པོའི་ཀློང་དུ་བསྔོས་པ་དག་བྱང་ཆུབ་མ་ཐོབ་ཀྱི་བར་དུ་འཛད་པ་མེད་ཅིང་ལམ་གྱི་སྟེགས་ཁྱད་པར་ཅན་དུ་འགྱུར་བར་གསུངས་སོ། །བཅུ་པ་ལ་གཉིས། སྨོན་ལམ་གདབ་པ་དང༌། རྗེས་ཆོག་བྱ་བའོ། །དང་པོ་ནི། ལས་གཞུང་ལས། ལྷའམ་བླ་མ་ལ་སོགས་པ༔ དཀོན་མཆོག་གསུམ་གྱི་རྟེན་དྲུང་དུ༔ བསམ་འདུན་དག་པས་ཚོགས་བསགས་ཤིང་༔ སྨོན་ལམ་རྒྱ་ཆེར་གདབ་པར་བྱ༔ དེ་ཡི་ཡོན་ཏན་
བརྗོད་ལས་འདས༔ ཞེས་གསུངས་པ་ལྟར་སྤྱིར་བོད་གངས་ཅན་གྱི་སའི་ཐིག་ལེ་གཙུག་ལག་ཁང་རྣམ་པ་གསུམ་དང་སྒྲུབ་གནས་རྣམས་སུ་དུས་རྟག་པར་འདོད་པ་དང་བྲལ་བའི་སྨོན་ལམ་རྒྱ་ཆེན་པོ་བཏབ་ན་འགྲུབ་པར་གདོན་མི་ཟ་སྟེ། སློབ་དཔོན་ཆེན་པོས། ལྷ་ས་བསམ་ཡས་ཁྲ་འབྲུག་གནས་རྣམས་སུ༔ རང་འདོད་སྤངས་པའི་སྨོན་ལམ་གང་བཏབ་འགྲུབ༔ ཅེས་གསུངས་པ་དང༌། གཞན་ཡང་དཀྱིལ་འཁོར་ཞལ་ཕྱེ་བ་དང་བླ་མ་དཀོན་མཆོག་ལ་སོགས་པའི་དྲུང་དུ་གང་གི་ཚེ་ཡང་སྨོན་ལམ་རྒྱ་ཆེན་པོ་གདབ་ཅིང༌། དེ་ཡང་ཚེ་འདི་རྨི་ལམ་ཙམ་ཡིན་ཞིང་ཕྱི་མ་ཤུལ་ཐག་རིང་པར་ཤེས་པར་བྱས་ལ། སྨོན་ལམ་ཕྱིན་ལོག་གི་རིགས་དང༌། ཚེ་འདིའི་ཁེ་གྲགས་དཔལ་འབྱོར་སོགས་ཀྱི་སྨོན་ལམ་མི་གདབ་པར། སྔོན་རྒྱལ་པོ་བྱམས་པའི་སྟོབས་ཀྱིས་གནོད་སྦྱིན་སྤུན་ལྔ་ལ་སྐུ་ལུས་སྦྱིན་པར་བཏང་ནས། བསོད་ནམས་འདི་ཡིས་ཐམས་ཅད་གཟིགས་པ་ཉིད། །སོགས་པའི་ཤློ་ཀ་གསུངས་པ་ལྟར་འགྲོ་བ་ཐམས་ཅད་ཕ་མར་མ་གྱུར་པ་མེད་ཅིང༌། ཚུལ་དེ་ལྟ་བུའི་དྲིན་ལན་བསབ་པའི་སླད་དུ་བདག་གིས་བསོད་ནམས་དང་ཡེ་ཤེས་ཀྱི་ཚོགས་རྣམ་པ་དུ་མའི་སྒོ་ནས་བསགས་ཏེ་དོན་གཉིས་ལྷུན་གྲུབ་ཏུ་གྱུར་ནས། ཁམས་གསུམ་འཁོར་བ་དོང་ནས་སྤྲུག་ནུས་པའི་མཐུ་ཅན་དུ་གྱུར་ཅིག་སྙམ་པ་ཞེ་
ཐག་པ་ནས་བསམ་ཞིང་ཐལ་མོ་སྙིང་གར་སྦྱར་ལ། བདག་དང་མཐའ་ཡས་འགྲོ་བ་མ་ལུས་ཀུན༔ སོགས་བརྗོད་ཅིང་གཞུང་ལས། ཞེས་པ་ལ་སོགས་བསྔོ་བ་སྨོན་ལམ་རིགས༔ ཇི་ལྟར་འདོད་བཞིན་མཆེད་ལྕམ་རྣམས་ཀྱིས་བྱ༔ ཞེས་གསུངས་པ་ལྟར་ཅི་ལྟར་རིགས་པའི་སྨོན་ལམ་རྒྱ་ཆེར་གདབ་པར་བྱ་བའོ། །གཉིས་པ་ལ་གཉིས། ལས་མཇུག་བསྡུ་བ་དང༌། ཐུན་མཚམས་ཀྱི་རྣལ་འབྱོར་རོ། །དང་པོ་ནི། གཞུང་ལས། གཞན་ཡང་རྗེས་ཀྱི་བྱ་བ་སྤྱི་མཐུན་བྱ༔ ཞེས་གསུངས་པ་ལྟར་སྒྲུབ་པ་དང་སྒྲུབ་ཆེན་ལྟ་བུའི་ཚེ་དང༌། ཁྱད་པར་མངོན་སྤྱོད་ལ་མན་ངག་སྙིང་གཟེར་ནག་པོ་ལས། ཆ་གསུམ་དག་ཏུ་བགོ་བ་ནི༔ གནོན་བསྲེག་འཕངས་པའི་ལས་གསུམ་ཡིན༔ ཞེས་གསུངས་པ་ལྟར་གབ་ཚིག་ཏུ་རྒྱ་མཚོར་སྦ་བ། རླུང་ལ་བསྐུར་བ། བུད་ཤིང་བྱ་བ་སྟེ་གསུམ་དང༌། སྤྱིར་བུམ་གཏེར་སྦ་བ། ཁ་བསྐང་གི་བསྲེག་བླུགས། ཡི་དམ་དང་ཆོས་སྲུང་ལ་གཏང་རག །སྐོང་བཤགས། ཐོ་བཀྲོལ། གནས་བསྲུང༌། དགའ་སྟོན་ལ་སོགས་མཐའ་རྒྱས་ཀྱི་ལས་རྣམས་སོ་སོའི་མཚམས་སུ་བྱ་ཚུལ་སྒྲུབ་ཁོག་གི་ཡི་གེ་དང་མན་ངག་གི་གནད་ལ་བརྟེན་པར་བྱ་ཞིང་གཤིན་ཆོག་ལ་སོགས་པའི་སྐབས་ན་ལས་རྗེས་མི་མངོན་པར་ཅིག་ཆར་དུ་བསྡུ་བར་བྱའོ། །གཉིས་པ་ལ་གཉིས། ཐུན་མཚམས་ཀྱི་བྱ་བ་
བཤད་པ་དང༌། བརྩམས་པ་དོན་ལྡན་དུ་བྱ་བའོ། །དང་པོ་ནི། དེ་ལྟར་བསྐྱེད་རྫོགས་ཀྱི་ལམ་ལ་ཞུགས་ཕྱིན་ཆད་ཐུན་མཚམས་ཐམས་ཅད་དུ་ཅིར་སྣང་ལྷ་སྐུ་སྒྱུ་མའི་རྣམ་རོལ་སྒྲར་གྲག་སྔགས་ཀྱི་རང་སྒྲ། དྲན་རིག་ཡེ་ཤེས་ཀྱི་འཁོར་ལོར་རྒྱས་གདབ་ཅིང༌། བླ་མ་ལ་སངས་རྒྱས་སུ་མཐོང་བ། གདམས་ངག་ལ་བདུད་རྩིར་མཐོང་བ། དམ་ཚིག་ལ་སྲོག་ཏུ་མཐོང་བ་སྟེ། མཐོང་བ་རྣམ་གསུམ་ལ་མི་གཡོ་བར་བྱེད་ཅིང༌། དེ་ལྟར་མ་ཡིན་པར་དབང་བསྐུར་དང་ལུང་ཁྲིད་ལ་ཐོབ་གྲངས་གཙོ་བོར་བྱས་ཀྱང་སྐྱོན་ལས་ཡོན་ཏན་ཅི་ལ་སྲིད་དེ། གྲུབ་ཐོབ་གོང་མས། དམ་ཚིག་མེད་ན་དབང་མང་དུ་ཐོབ་ཀྱང་དམྱལ་བར་ཡུན་རིང་རོགས་བྱེད་གསུངས་པ་ལྟར་བླང་དོར་གོ་མ་འཛོལ་བར་བྱེད་ཅིང༌། དུས་རྟག་པར་གང་དུ་འདུག་པའི་གནས་ཀྱང་པདྨ་འོད་ལ་སོགས་དག་པའི་ཞིང་ཁམས་འབའ་ཞིག་ཡིན་ནོ་སྙམ་པ་ལས་ཐ་མལ་དུ་མི་བལྟ། དེ་ལྟར་བགྱིས་ན་མཐར་ཐུག་ཞིང་ཁམས་རྣམ་པར་དག་པ་ལ་དབང་བར་གསུངས། ཟླ་གྲོགས་ཉེ་འཁོར་ལ་སོགས་པས་མཚོན་ཏེ་བཅུད་ཀྱི་སེམས་ཅན་རྣམས་ཀྱང་ལྷ་དང་ལྷ་མོའི་རང་བཞིན་དུ་བསམས་ནས་དག་སྣང་སྦྱང༌། བཟའ་བཏུང་ལ་རོལ་པའི་ཚེ་ཡང་སྔར་བཤད་པ་ལྟར་བཟའ་བའི་རྣལ་འབྱོར་ཁོ་ན་ལ་བརྟེན་ནས་ལོངས་སྤྱོད་
འདི་ལྟར་ཚོགས་ཀྱི་དབུས་ན་གསང་སྔགས་མོས་སྤྱོད་ཙམ་ལས་སྣང་སེམས་བདེན་མེད་དུ་མ་རྟོགས་ཤིང་ཉོན་མོངས་པ་ལམ་དུ་སློང་བའི་ནུས་པ་དམན་པའི་ཚངས་སྤྱོད་ཀྱི་ཁྲིམས་ལ་གནས་པ་དག །བྱང་ཆུབ་སེམས་དཔའི་སྡེ་སྣོད་ལས་གསུངས་པའི་འདོད་ཆགས་ལ་མི་གཙང་བའི་འདུ་ཤེས་དགུ། ཞེ་སྡང་ལ་སྐྱེས་བུ་ཆེན་པོའི་རྣམ་རྟོག་བརྒྱད། གཏི་མུག་ལ་སྤྱོད་ཡུལ་ཡོངས་སུ་དག་པའི་གཉེན་པོ་བརྟེན་པ་ལ་སོགས་པས་སྒོ་གསུམ་ཐ་མལ་དུ་སྐད་ཅིག་ཀྱང་མ་གོལ་བ་ལ་བསླབ་པ་མདོ་སྡེ་དང་མཐུན་པའི་སྤྱོད་ལམ་ཡིན་ལ། སྐབས་སུ་སྣང་སྲིད་སྣོད་བཅུད་ཐམས་ཅད་རྩ་བའི་བླ་མར་གསལ་ནས་གསོལ་བ་ཕུར་ཚུགས་སུ་འདེབས། ཉལ་བའི་ཚེ་ཉམས་ལེན་ལ་བརྟན་པ་ཆེར་ཐོབ་པའི་རྣལ་འབྱོར་པ་ཡིན་ཚེ་རྫོགས་རིམ་གྱི་ཉེར་བསྡུའི་ངང་ལས་གཉིད་འོད་གསལ་དུ་འཇུག །འདིའི་འོད་གསལ་གྱི་འཆར་ཚུལ་ཡང་རྒྱུད་ལུང་མན་ངག་གསུམ་གྱི་བསྟན་པའི་བདག་པོ་ཀུན་མཁྱེན་ཀློང་ཆེན་པ་ཚད་མར་གྱུར་ལ། དེའི་རྒྱུ་མཚན་ནི་འོད་གསལ་རང་རྒྱུད་ལ་ཤར་བའི་རྣམ་འབྱོར་དབང་ཕྱུག་ཆེན་པོ་ཞིག་གིས་སྤྱད་ན་མཁའ་འགྲོ་ཡང་ཏིག་གི་མཐོང་སྣང་རིན་ཆེན་འོད་ཀྱི་དྲྭ་བ་དང༌། འོད་གསལ་སྦུབས་འཇུག་སོགས་ཀྱིས་ཡིད་ཆེས་སྐྱེ་བར་འགྱུར་ལ། ཚིག་ཙམ་ལ་ཞེན་པའམ། རྨོངས་པ་མངོན་པའི་ང་རྒྱལ་གྱི་མཐུ་བརྟས་པས་
ནི་དཔྱད་ཀྱང་ཉམས་མྱོང་གི་རྩི་དང་བྲལ་བའི་ཕྱིར་ཕྱོགས་འཛོལ་བའི་གོ་བ་སྐྱེས་པས་ཆུ་ཤིང་གི་སྙིང་པོ་ལྟ་བུར་ཟད་ལ། སྤྱིར་འོད་གསལ་ལ་དགོངས་འདུས་རང་སྐད་ལའང་ཉམས་ཀྱི་འོད་གསལ། རྟོགས་པའི་འོད་གསལ། དུམ་བུའི་འོད་གསལ། མཆོག་གི་འོད་གསལ་ཞེས་གང་ཟག་གི་རྩ་གཟུགས་དང་ཉམས་ལེན་གྱི་སྟོབས་ཆེ་ཆུང་ལ་ཇི་སྙེད་ཅིག་འཆར་བར་གསུངས་ཀྱང༌། གཞུང་ཆེན་རྣམས་སུ་བཤད་པའི་དགོངས་པ་མྱོང་བ་ཚད་མས་དཔག་པར་མ་ནུས་པའི་བསམ་གཏན་པ་ལ་ལའི་ཡིག་ཆ་དང༌། ད་དུས་ཀྱི་གང་ཟག་ལ་ལས་འོད་གསལ་གྱི་ཡིན་ལུགས་བཤད་པ་དག་ནི་མི་རྟོག་པའི་གཞི་གནས་ཀྱི་འོད་གསལ་ཡུལ་ལྔའི་གཟུང་ཡུལ་ནུབ་པ་དེ་ཉིད། ལྷག་མཐོང་གསལ་བའི་འོད་གསལ་གྱིས་སད་པར་མ་བྱས་པས་གཟུགས་མེད་དུ་འཁོར་བའི་རྒྱུ་དང༌། ལ་ལ་ནི་གསལ་བའི་འོད་གསལ་ལ་ཞེན་ཅིང་མཐའ་གྲོལ་ཀློང་ཡངས་ཆེན་པོའི་རྩིས་མ་ཟིན་པས་གཟུགས་ཁམས་སུ་སྐྱེ་བའི་ས་བོན་དུ་བཤད་ཅིང༌། སྒོམ་ཉིན་མཚན་འདྲེས་པའི་ལོ་རྒྱུས་སྨྲ་བ་ཁ་ཅིག་ནི་རྩེ་གཅིག་ཆེན་པོའི་བག་ཆགས་ཉིན་མཚན་བརྟས་པ་ལ་མགོ་འཁོར་བས་འོད་གསལ་གྱི་དྲི་མས་གོས་པར་མ་གྱུར་ལ། ཀྱེ་མ་སྙིགས་དུས་ཀྱི་སེམས་ཅན་སོམ་ཉི་དང་ལོག་
ལྟའི་འདུ་ཤེས་རགས་ཤིང་རང་རྩིས་ཁོ་ན་ལྷུར་ལེན་པས་ཤེས་རབ་གསུམ་ལ་ཡིད་མི་རྟོན། ཀུན་ཏུ་ཉོན་མོངས་པའི་གཏི་མུག་གི་ར་བར་སྲིད་པའི་སྟོབས་འབྱོར་གྱི་ལང་ཚོ་བསྒྱིངས་ཤིང་རྣོ་མཐོང་དང་གྱེར་ཆོག་ཕྲ་མོས་གློ་བ་ཁེངས་ནས་གདོད་མའི་མགོན་པོའི་ཞལ་ཚབ་ཏུ་ཁས་འཆེ་བ་ལ་ཚམ་ཚོམ་མེད་པའི་མུན་སྤྲུལ་བརྟུན་ངས་ཀྱི་བདག་པོ་དག །རྒྱལ་བའི་བཀའ་ཚད་མ་དང་འབྲེལ་བའི་བླ་མའི་མན་ངག་ཚད་མ། དེ་རང་གིས་མྱོང་བ་དང་འབྲེལ་བའི་ཚད་མ་གསུམ་གྱིས་གཏན་ལ་ཕབ་པ་དག་ལ་དེ་ནི་ཚིག་གོ་ཞེས་སུན་འབྱིན་དང༌། ག་ཞར་སྨྲ་ཞིང༌། གསང་རྒྱུད་རྒྱ་མཚོ་ལྟ་བུའི་གྲུབ་པའི་མཐའ་སློང་ནུས་པའི་དུས་གསུམ་གྱི་བསྟན་པའི་རྒྱལ་ཚབ་རྣམས་ལ་དགྲ་ལྟར་གཤེ་ཞིང་ཆུ་སྲིན་རྒྱལ་མཚན་གྱི་གནས་མལ་སྙིང་ལ་བཅས་པའི་གང་ཟག་དགྲ་སྟའི་དུམ་བུ་རྣམས་ཀྱི་རྣམ་པར་ཐར་པ་ལ་དཔྱད་ན་མཚར་ཆེ་སྟེ། ཀྱི་ཧུད། ཕྱི་མཐའི་དུས་འདིར་སྙིང་ཐིག་མོས་པས་སྤྱོད་པའི་ལུང་བསྟན་མངོན་དུ་གྱུར་པས་ཡིད་ཁོང་དུ་ཆུད་པར་གྱུར་ཏོ། །དེ་ལྟ་ནའང་རྙིང་བསྟན་འཇུག་པ་བཅུ་པའི་ཐུགས་ཀར་རྒྱས་བཏབ་སྟེ་བསྐལ་པའི་བར་དུ་བསུབ་ཏུ་མེད་པར་བྱིན་གྱིས་བརླབས་པའི་བདག་པོའི་རྐྱེན་རྡོ་རྗེ་གདན་གྱི་ནམ་མཁའ་ལ་སོགས་པར་མཁའ་འགྲོ་མས་བཟུང་སྟེ་གནས་པའི་བསྟན་པའི་བཙས་གསུམ་གྱི་རང་བཞིན་གྱི་ནུས་མཐུ་དང༌། རྒྱལ་སྲས་
པད་འབྱུང་ཡབ་ཡུམ། ཆོས་ཀྱི་རྒྱལ་པོ་ཀློང་ཆེན་པའི་བཀའ་དྲིན་ལ་རྡོ་རྗེ་ཐེག་པའི་དགོངས་པའི་ཞེ་ཕུགས་ཀྱི་ལྟད་མོ་ཅུང་ཟད་མཐོང་བས་རྣལ་འབྱོར་པ་ཉམས་མྱོང་ཅན་དང་མཇལ་ན་ངོ་མཚར་གཏམ་གྱི་མཆོད་སྤྲིན་སྤྲོ་རྒྱུར་ཡོད་དོ། །དེས་ན་འདིར་རེ་ཞིག་དེ་ཙམ་གྱིས་མཐའ་བསྡུས་ནས། བྱིངས་རྣམས་ནི་འོད་གསལ་དང་རྨི་ལམ་འཛིན་པའི་མན་ངག་རང་རང་གི་ལུགས་དང་ཡང་ན་ཡི་དམ་གང་ལ་བྱེད་པའི་ལྷ་དེ་ཉིད་ཀྱི་ཐུགས་སྲོག་ལ་རིགས་པ་གཏད་དེ་སྔགས་བཟླ་བཞིན་པར་གཉིད་ལོག་པར་བྱ། སང་ཞོགས་ལྡང་བའི་ཚེ་ན་ཡང་ནམ་མཁའ་ལས་གྲག་སྟོང་གི་སྔགས་སྒྲ་ཅང་ཏེའུ་དཀྲོལ་བ་ལྟ་བུའི་སྒྲས་བསྐུལ་ཏེ་ཆུ་ལས་ཉ་འཕར་བ་ལྟ་བུར་སྟོང་གཟུགས་ཀྱི་ལྷ་སྐུར་ལངས་ཏེ་ལས་གནད་དྲང་པོར་བསྲང༌། རང་གི་སྣ་སྒོར་ཡེ་ཤེས་ཀྱི་མེ་གསལ་ལ་ངར་ལྡན་བྱ་སྒོང་ཙམ་ཞིག་གསལ་བཏབ། རླུང་རོ་དགུ་ཕྲུགས་སུ་བུས་པས་ནད་གདོན་སྡིག་སྒྲིབ་བག་ཆགས་རྟོག་ཚོགས་དང་བཅས་པ་སྡིག་པ་རྭ་ཅན་གྱི་རྣམ་པར་འཐོན་ནས་གཞོབ་ཐུལ་གྱིས་ཚིག་པར་བསམ་ལ་དྲན་དང་ཤེས་བཞིན་གྱི་རང་མདངས་སོ་སོའི་རྒྱུད་ཚོད་ལ་དཔགས་པ་སྐྱོང་ཞིང་དགེ་སྦྱོར་བསྒྲིགས་མ་ལ་འཇུག །དེ་ཡང་འདི་ཉིད་ཀྱི་གཏེར་སྟོན་ལ་བསླབ་བྱའི་སྐབས། ཕྱི་ལྟར་ལག་ལེན་མདོ་སྡེའི་ལུགས་སུ་སྤྱད༔ གདུལ་བྱ་ལམ་ལ་ཞུགས་པའི་དགོས་པ་ཡོད༔ ནང་
ལྟར་གསང་སྔགས་སྤྱི་ཡི་ལུགས་སུ་སྤྱད༔ ལུང་རིག་རྒྱབ་དང་འབྲེལ་བའི་དགོས་ཆེད་ཡོད༔ གསང་བ་ཨོ་རྒྱན་བཀའ་སྲོལ་ལུགས་སུ་སྤྱད༔ ཟབ་གཏེར་བསྟན་པ་ཚུགས་པར་དགོས་ཆེད་ཡོད༔ ཡང་གསང་དགོངས་པ་འདུས་པའི་ལུགས་སུ་སྤྱོད༔ ཚེ་གཅིག་སངས་རྒྱས་འགྲུབ་པའི་དགོས་ཆེད་ཡོད༔ ཅེས་དང༌། ཉིན་དང་མཚན་མེད་ཆོས་ལ་འབད་པར་བྱ༔ ཐ་མ་རང་དགར་མི་ལུས་དགོས་ཆེད་ཡོད༔ འཇིག་རྟེན་འཁྲུལ་ཕྱིར་མི་འབྲེང་བློ་ཐག་བཅད༔ རྒྱལ་བའི་དགོངས་པ་ལོན་པའི་དགོས་ཆེད་ཡོད༔ ཅེས་གསུངས་པ་ལྟར་ཕྱི་འདུལ་བ་དང་མཐུན་ཞིང་ཞི་དུལ་གྱི་སྤྱོད་པས་ལས་འབྲས་ལ་རྩིས་སུ་བྱ། ནང་གསང་སྔགས་པ་སྤྱི་དང་མཐུན་པར་བསྐྱེད་རྫོགས་ཟུང་འབྲེལ་གྱི་དོན་ལ་རྩལ་སྦྱང༌། གསང་བ་རྫོགས་ཆེན་པོའི་ལུགས་སུ་གཟུང་འཛིན་ལ་ཐོག་བརྫིས་བྱ་ཞིང་གནས་ལུགས་ཀྱི་རྟོགས་པ་རྒྱ་ཡན་ཅོག་བཞག་བཅིངས་གྲོལ་གཉིས་ཀའི་མཐའ་དང་བྲལ་བ་དེ་ཉིད་ལ་བློ་བཟོ་མི་འཆོས་པར་གཞག །མདོར་ན་དུས་དང་རྣམས་པ་ཐམས་ཅད་དུ་ཐ་མལ་རང་དགར་མི་སྡོད་པར་དལ་འབྱོར་གྱི་སྙིང་པོ་ལེན་པའི་ཐབས་ཁོ་ན་ལ་འབད་དགོས་ཏེ། སློབ་དཔོན་ཆེན་པོས། ད་ཁྱོད་ཆགས་སྡང་དགོས་པ་མེད༔ བཟོད་ཀའི་ངན་སོང་ཐར་མེད་དུ༔ རང་ཉིད་བསྐྱུར་བར་མ་བྱེད་ཅིག༔ དོན་དུ་བཙན་ས་མ་ཟིན་ན༔ ཚེ་འདིའི་
མདུན་མ་ཀུན་གྱིས་བསླུ༔ དེ་དོན་ཚེ་འདིའི་དགྲ་གཉེན་གྱི༔ མཐར་ཡང་རང་ཉིད་བརླག་པར་བྱེད༔ ཆགས་མེད་ཞེན་པ་དང་བྲལ་བས༔ དགའ་དང་སྤྲོ་བའི་སེམས་ཀྱིས་ཀྱང་༔ རྒྱུན་དུ་དམ་པའི་ཆོས་ལ་སོམས༔ གལ་ཏེ་ན་ཚ་སྡུག་བསྔལ་གྱིས༔ སེམས་ཉིད་བཀོལ་དུ་མ་ཐུབ་ན༔ ལས་ངག་སྒྲིབ་པའི་བུད་ཤིང་དུ༔ བསམ་ལ་ཟད་པའི་དགའ་བ་སྒོམས༔ ཉམས་དང་རྟོག་པ་ཅི་བྱུང་ཡང་༔ ཀུ་སཱ་ལ་ཡིས་དུས་འདའ་བྱ༔ འདི་རྣམས་ལམ་གྱི་གེགས་སེལ་དང་༔ བོགས་འདོན་གནད་ཀྱི་གདམས་ངག་གོ༔ ཞེས་གསུངས་པ་ལྟར་ལ་གནད་ཐམས་ཅད་འདུ་ཞིང༌། དེ་ལས་ཕྱིན་ཅི་ལོག་ཏུ་འགོམས་པའི་རྫོགས་པ་ཆེན་པོ་སྤང་བླང་དང་བྲལ་བ། བྱ་རྩོལ་ལས་འདས་པ། སྒྱུ་མ་དང་རྨི་ལམ་ཡིན་ཞེས་གྱ་ཚོམས་ཀྱི་སྤྱོད་པས་བླ་མ་དང་དམ་ཆོས་ཀྱི་ཞབས་མི་སྡུད། ད་ཧྲིལ་གྱིས་དྲིལ་ན། རྒོད་ཚང་རིན་པོ་ཆེས། དེང་སང་གི་ཆོས་པ་དང་སྒོམ་ཆེན་པར་རློམ་ཡང༌། ཉིན་པར་ཚེ་འདིའི་བྱ་བ་དང་འཇིག་རྟེན་འཁྲུལ་འབྱམས་ལ་གཡེངས། ཅུང་ཟད་དལ་བའི་དུས་ཀྱང་ལོང་གཏམ་ཟ་འཐུང་རྩེད་མོ་སོགས་མི་ཚེ་ཟད་ཐབས་ལ་སྐྱིད་པོ་ཡིན་པར་བརྩི། མཚན་མོ་ནི་གཏི་མུག་གི་ངང་ལ་རོ་དང་ཁྱད་མེད་པས་ཚེ་ཕྱེད་ཟད། ནངས་པར་གཉིད་སད་པ་དང་འཁྲུལ་བ་ཨ་འཐས་ཀྱི་རྣམ་རྟོག་སླེབས་པ་དུས་
མཉམ་དུ་བྱེད་ཅིང༌། ཆོས་ཞུས་ཞུས་དང་ཐོབ་ཐོབ་འདྲེན་ཀྱང་ལག་ལེན་ཚེ་འདི་དོན་འབའ་ཞིག་ལ་དྲིལ་མཁན་ཚོས། བློ་ཆོས་མཐུན་ལ་ལྷུག་པ་རྫི་མེད་དུ་བརྩི་ཞིང༌། གཡོ་སྒྱུ་ཟོལ་ཟོག་སུ་ཆེ་ལ་ཕེར་ཡོད་གྲུང་པོར་བརྩི་བའི་དུས་འདི་འདྲར་རང་མགོ་རང་གིས་འདོན་པ་ལ་འབད་པར་བྱའོ། །ཞེས་བཀའ་སྩལ་པ་ཤིན་ཏུ་དགོངས་མད་པར་སྣང་ཞིང༌། དེས་ན་དག་སྣང་ཕྱོགས་མེད་དུ་འབྱོངས་པའི་སྐལ་མཉམ་གྱི་གྲོགས་པོ་དག་ཚེ་ཐར་ལ་འགྲོ་བའི་ཐུགས་བསམ་མི་བཞེས་པར་འཇུག་བསྡོམས་ཀྱི་ཚུལ་སྙིང་པོར་དྲིལ་བ་འདི་དོན་ལ་དཔྱད་པར་འཚལ་ལོ། །དེས་ནི་ཆོ་གའི་དགོངས་འགྲེལ་ལེ་ལག་དང་བཅས་པ་ལྷག་མ་མ་ལུས་པར་རང་གི་བློ་ནུས་དང་འཚམས་པར་བཤད་ཟིན་ཏོ། །གཉིས་པ་ནི། དེ་ལྟར་བཤད་པ་རྣམས་དོན་ཡོད་པར་བྱ་བའི་སླད་དུ་ངལ་བའི་དགེ་བ་གང་དག་སེམས་ཅན་ཐམས་ཅད་ཀྱི་དོན་དུ་བསྔོ་བར་བྱ་སྟེ། ཨ་ཧོ། རྒྱུ་རློམ་སྒྲིབ་པའི་བློ་ཡིས་མ་གོས་ཤིང༌། །ཁེ་དང་གྲགས་པའི་ཆེད་དུ་མ་ཡིན་པར། །སྙིགས་དུས་བསྟན་པའི་བཙས་སུ་སྨོན་བཙུགས་ནས། །འདི་བརྩམས་ངལ་བའི་དགེ་བ་བསྔོ་བྱའི་གཞི། ༡ །དེ་ཡང་སྲིད་པའི་ཕུན་ཚོགས་སླད་དང་ཉན་རང་ཞི་བདེའི་ཆེད་དུ་མིན། །དམིགས་པ་ཅན་དང་དམིགས་མེད་སྟོང་པའི་ཕྱོགས་སུའང་མིན། །ཀུན་ཏུ་བཟང་དང་འཇམ་དཔལ་གཞོན་ནུའི་ཡོངས་བསྔོ་བཞིན། །
འཁོར་གསུམ་ཡོངས་དག་གདོད་མའི་མགོན་པོའི་གྲོང་ཁྱེར་དུ། ན༢ །རྒྱལ་བའི་བཀའ་ལུང་ཀཻ་ལ་ཤ་རིར་གནས་བཅས་ཤིང༌། །བླ་མའི་མན་ངག་གཡུ་རལ་སྔོན་མོའི་རྒྱན་བཏགས་ནས། །འཆོལ་པོའི་ལག་ལེན་ཅེ་སྤྱང་དྲེགས་པའི་སྲོག་བཅད་པས། །དེ་ཡི་དགེ་བ་མ་རྒན་འགྲོ་བའི་དོན་ཕྱིར་བསྔོ། ༣ །བདག་གི་སྒོ་གསུམ་སྒྲིབ་ཚོགས་མ་ལུས་དང༌། །ངག་འཁྱལ་ཅ་ཅོ་ལ་བརྟེན་མི་དགེའི་ལས། །སྐྱེ་དང་སྐྱེ་བར་བསགས་པ་འདིས་བྱང་ནས། །སློབ་དཔོན་དཔའ་བོའི་རྣམ་ཐར་ཐོབ་པར་ཤོག །༤ །།ཅེས་སྨྲས་ནས། ད་ནི་ས་བཅད་ཡོངས་སུ་རྫོགས་པའི་གནས་སྐབས་ན་བསྟན་བཅོས་ཀྱི་མཚན་ཉིད་རྣམས་ཚིག་གིས་ལེགས་པར་བཀྲལ་ཏེ་རངས་པའི་གནས་སུ་བྱ་བ་ལ། དེ་ཡང་སྤྱིར་བྱཉྫ་ན་འདི་ཉིད་ཀྱི་མགོ་མཇུག་ཚང་མར་དགག་བསྒྲུབ་དང་སྐྱོན་ཡོན་གྱི་གླེང་སློང༌། ཡིན་མིན་གྱི་གཤགས་འགྱེད་སོགས་ཅི་རིགས་པར་སྣང་བ་དག་ལ། རང་འདོད་དང་ང་རྒྱལ་ཤེས་རློམ། དམིགས་པ་དང་བཅས་པའི་སུན་འབྱིན་དུ་དོགས་པར་མི་བྱ་སྟེ། མགོན་པོ་ཀླུ་སྒྲུབ་ཀྱིས། གཞན་གྱི་སྐྱོན་ནི་བརྗོད་མི་བྱ། །གཞན་གྱི་སྐྱོན་ནི་སུས་བརྗོད་པ། །དེ་བཞིན་བདག་ལའང་ཡོད་པ་སྟེ། །དཔེར་ན་ཝ་དང་བུད་མེད་བཞིན། །ཞེས་དང༌། བདག་ལ་ཕུན་སུམ་ཚོགས་ཡོད་ཀྱང༌། །
གཞན་ལ་བརྙས་པར་མི་བྱ་སྟེ། །ཞུན་མར་ལྟ་བུའི་སེམས་ཀྱིས་སུ། །ཡོན་ཏན་མཐའ་དག་ཁོང་དུ་སྦ། །ཞེས་གསུངས་ལྟར་ལ་ནནྟིའི་རང་མདངས་ལུང་མ་བསྟན་གྱི་སྡང་ཞེན་གྱི་ནའི་དབང་དུ་སོང་བ་ནི་མ་ཡིན་ལ། འདི་ལྟར་གྲུབ་མཐའི་ཀོ་ལོང་གིས་བསྟན་པ་གཞན་ལ་སུན་ཕྱུང་བ་དང༌། རང་ཉིན་ཁོ་ནའི་ཕ་ཕོར་དངོས་གཙང་གཙོར་འདོན་དུ་མ་བྱས་པའི་རྗེས་ལ་སྐྱོན་ངོས་བཟུང་ཞིང༌། མཚང་ཡུལ་ནས་མ་ཕུད་ན་ཆོས་དང་ཆོས་མ་ཡིན་པ་ཤན་མི་ཕྱེད་ཅིང་སྤང་བླང་མི་ཤེས་པའི་སྐྱོན་ཡོད་ལ། དེའི་ཕྱིར་ཡང་དག་པའི་ཐོས་པས་དྲང་དོན་དང་ཕྱོགས་ཞེན་གྱི་ཚིག་ལ་འཆེལ་བ་དག་ཚར་གཅོད་པ་ཡིན་ཏེ། ཇི་སྐད་དུ་མདོ་ལས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །ཞེས་གསུངས་པས་མུན་སྤྲུལ་དང་གཟུ་ལུམ་ཐམས་ཅད་གཅིག་ཏུ་མི་བསྲེ་བར་ལུང་རིག་གི་སྒོ་ནས་བྱི་དོར་བྱས་པ་ལ་ཉེས་པས་མི་གོས་ཤིང༌། ཡོན་ཏན་མངོན་གྱུར་དུ་མཐོང་ནས་ཉེས་སྐྱོན་རང་ཞིག་ལ་འགྲོ་བའི་གནད་འགག་ཡོད་ཅིང་བསྟན་བཅོས་ཀྱི་མཚན་ཉིད་ཀྱང་ཡིན་ཏེ། རྣམ་བཤད་རིག་པ་ལས། དགོངས་པ་འདུས་པའི་དོན་བཅས་དང༌། །བརྒལ་ལན་བཅས་དང་མཚམས་སྦྱར་བཅས། །ཚིག་དོན་བཅས་ཏེ་བསྙད་པར་བྱ། །
ཞེས་གསུངས་ཤིང་དེ་ཡང་ཉོན་མོངས་པའི་དགྲ་རྣམས་འཆོས་པ་དང༌། ངན་འགྲོའི་སྲིད་ལས་སྐྱོབ་པ་སྟེ་འཆོས་སྐྱོབ་གཉིས་དང༌། ནང་པའི་ཚུལ་གསུམ་དང་ལྡན་ཞིང༌། ཕྱི་རོལ་པའི་ངན་པ་དྲུག་དང་བྲལ་བས་གནས་སྐབས་བདེ་ཞིང་དྲང་ངེས་ལྡེམ་དགོངས་ཀྱིས་གབ་པ་དང་མངོན་དུ་ཕྱུང་བས་མཐར་ཐུག་གྲོལ་བ་འགྲུབ་པའི་དོན་ཆེན་པོ་དང་ལྡན་པ་ཡིན་ལ། འདི་ལྟར་མི་ཤེས་པའི་རྨོངས་པ་མངོན་པའི་ང་རྒྱལ་ཅན་ནམ། སྣང་བ་གདོང་འདེད་ཙམ་གྱིས་ལ་བཟླ་ཞིང༌། བློ་གྲོས་ཀྱི་མིག་ཟུམ་པ་དག་གིས་གསལ་སྣང་གི་དབང་དུ་ཕྱར་ཀ་དང་སྤྱོ་བ་རུ་མི་འགྱུར་པའི་ཐབས་ནི་སུས་ཀྱང་བྱ་རུ་མེད་ཅིང༌། སེམས་ཅན་རང་རང་གིས་ལས་དབང་གིས་མནར་དགོས་པ་དག་ལ་སངས་རྒྱས་དང་བྱང་སེམས་ཀྱང་ལོག་པ་ཅན་དུ་མཐོང་བ་སེར་སྐྱ་ལ་སོགས་པ་དང༌། མཁན་སློབ་ཆོས་གསུམ་གྱིས་དུས་བོན་དང་སྡིག་བློན་ལྟ་བུས་མཚོན་པ་དང༌། དེ་བཞིན་དུ། དཔེར་ན་ལྷའི་རྒྱལ་པོ་དབང་བསྒྱུར་གྱི་གནས་མན་ཆད་ནས། འཛམ་བུའི་གླིང་ཡན་ཆད་མཐོ་རིས་ཀྱི་གནས་རྣམས་སུ་འདོད་པའི་ཡོན་ཏན་གྱི་རྐྱེན་ཆར་སོ་སོར་འབབ་པ་ཡང༌། རྒྱ་མཚོའི་ལྷའི་དབང་དང༌། གནས་སོ་སོའི་ནམ་མཁའི་དབང་དང༌། འགྲོ་བ་སོ་སོའི་ལས་ཀྱི་རྒྱུད་ལས། ཆར་སོ་སོར་འབབ་པར་འགྲུབ་པ་ཡིན་ཡང༌། རྒྱ་མཚོའི་
ལྷ་ཡང་འདི་སྙམ་དུ། བདག་གིས་ནི་གནས་འདི་རྣམས་སུ་སོ་སོའི་ལས་དང་སྐལ་བ་དང་འཚམ་པར་སྤྲིན་འདི་ལྟ་བུ་བསྡུ་བར་བྱའོ། །གློག་འདི་ལྟ་བུར་དབྱུང་བར་བྱའོ། །འབྲུག་འདི་ལྟ་བུ་བསྒྲག་པར་བྱའོ། །ཆར་འདི་ལྟ་བུ་དབབ་པར་བྱའོ་སྙམ་དུ་མི་རྟོག །རྣམ་པར་མི་རྟོག །མངོན་པར་མི་རྩོལ་བཞིན་དུ་སོ་སོའི་ལས་དང་སྐལ་བ་དང་འཚམ་པའི་འབྲུག་གློག་དང༌། ཆར་ཡང་རིན་པོ་ཆེ་སྣ་ཚོགས་ཀྱི་ཆར་དང༌། མཚོན་ཆའི་ཆར་དང༌། ཆུ་དང་སའི་ཆར་གྱི་བར་དུ་འབྱུང་བ་བཞིན་དུ། འདིར་ཡང་གྲུབ་པའི་རིག་འཛིན་དང་ལུང་གིས་ཕྱུག་པ་དང༌། སྨྲ་བར་མཁས་པ་དང༌། བསྟན་ལ་དད་པ་དང༌། དཔྱད་བཟོད་པ་དང༌། བར་མ་དང༌། ཀུན་ནས་ཉོན་མོངས་པ་དག་རང་རང་གི་ངོ་ཁ་ལ་ཐ་དད་དུ་སྣང་བ་སྟེ། དོན་ལ་སངས་རྒྱས་གཉིས་པ་སློབ་དཔོན་ཆེན་པོའི་བསྟན་པ་ལ་སྲི་ཞུ་དང་རྡོ་རྗེ་ཐེག་པའི་གྲུབ་པའི་མཐའ་ཅུང་ཟད་སློང་ནུས་པ་ཡིན་པས་བསྟན་འཛིན་གྱི་སྐྱེས་བུ་དམ་པ་རྣམས་ཨ་ལ་ལ་ཧོ་གསུང་བར་གདོན་མི་ཟའོ། །སླར་སྨྲས་པ། སངས་རྒྱས་གཉིས་པ་ཐོས་པ་ལྷུན་ལེན་པའི་བསྟན་བཅོས་མ་ཡིན་པའི་དནྜའི་འཁྱོག་ཚིག་གི་སྤྲོས་
པ་ཉེ་བར་ཞི་བས་ཤེས་པ་རྟོག་མེད་ཀྱི་ངང་ནས་འབོལ་རྩོམ་བྱུང་རྒྱལ་དུ་སྨྲས་པ། པདྨཱ་ཀཱ་ར་ཡི། །ཐུགས་ཀྱི་ཐིག་ལེ་ས་འོག་གཏེར་གཅིག་མ། །དགོངས་འདུས་གསེར་ཆོས་མཐའ་བྲལ་ནམ་མཁའི་ཁྱོན། །རྐང་པ་དྲུག་པའི་སྤྱོད་ཡུལ་མ་ལགས་སོ། ༡ །བློ་གྲོས་ན་ཚོད་ཕྲ་བས་བྱིས་པ་འགས། །རློམས་སེམས་ཁྲོན་པའི་ལག་འགྲོའི་བརྟུལ་ཞུགས་ཀྱིས། །གསང་སྔགས་རྩེད་མོར་བྱེད་ལ་ཡིད་འཕམ་ནས། །ཤ་ཝ་ར་པས་རུས་སྦལ་བློ་ལྡན་བྱས། ༢ །ཀ་ཡེ་ཚུར་ཤོག་ཤེས་ལྡན་གྲོགས་པོ་དག །ཕྱོགས་ལྷུང་མྱོས་བྱེད་རོ་ལ་མ་ཆགས་པར། །དཀའ་གནད་བཞིན་སྟོན་མཁྱེན་བརྩེའི་མེ་ལོང་ལ། །འདྲེན་བྱེད་ཅུང་ཟད་གཡོས་ལ་ལྟད་མོ་བྱོས། ༣ །འོན་ཏེ་མ་རིག་གདོན་ཞུགས་འབྱུང་པོའི་བྱ། །ལེགས་བཤད་འོད་ཟེར་བརྒྱ་པའི་མདངས་ཤར་ཚེ། །གནག་དཀའ་མུན་པའི་སྨག་རུམ་བྱུང་སྙམ་ནས། །ལོག་རྟོག་ས་ཕག་ཡིབས་ལ་འདི་མ་འཚལ། ༤ །དགེ་སློང་ལྷས་བྱིན་སྨོན་ལམ་མ་དག་པས། །བདེ་གཤེགས་ལ་ཡང་ནནྟིའི་གོང་བུར་མཐོང༌། །བླུན་པོ་དྲུག་སྟོན་ལ་ཡང་འདུད་བྱེད་ན། །ཀུན་ཡིད་མགུ་བའི་ནུས་པ་བདག་ལའང་དམན། ༥ །དེ་ཕྱིར་མི་གཙང་རོལ་པའི་ཁྭ་ཏ་ཡིས། །འགྱུར་བྱེད་མཆུ་སྒྲོས་བཏེག་ནས་འབྲེལ་མེད་ཀྱི། །ཅལ་སྒྲོག་བྱེད་པ་སྙིང་རྗེའི་ཡུལ་ཡིན་པས། །གང་ལ་དེ་ཡིས་སྒྲིབ་པར་མ་གྱུར་ཅིག ༦ །ཡུལ་དུས་གང་ཟག་བསོད་ནམས་དམན་པ་བདག་འདྲ་ཡིས། །རྡོ་རྗེའི་ཚིག་ལ་འགྲེལ་བཤད་གཉེར་བ་ག་ལ་རིགས། །གནོང་བ་བཀུར་རོ་ནོངས་པའི་ཆ་རུ་གྱུར་ཏོ་
འཚལ། །མཁས་དང་འཕགས་ཆེན་དམ་པའི་སྤྱན་སྔར་སྙིང་ནས་འཆགས། ༧ །ཁེངས་དང་རློམ་སེམས་དྲེགས་པ་ཐག་ཁྲའི་གཟུགས། །དྲན་དབང་ལྟོ་འགྲོའི་གོ་སར་ཞུགས་མིན་ཡང༌། །གཞན་གྱིས་བསྐུལ་བའི་བཞིན་རས་མཚར་སྡུག་མས། །ཡིད་ཀྱི་ཆོམ་རྐུན་བྱས་ཏེ་གླུ་འདི་བླངས། ༨ །ཀྱེ་ཧོ་འདམ་བུའི་ཁྲོད་ནས་པདྨ་བཞིན། །མང་པོར་བཤད་པའི་སྙིང་པོ་ནི་ཏཱརྠ། །ལ་འབབ་དགོངས་འགྲེལ་མཁྱེན་བརྩེའི་མེ་ལོང་གི །འོད་ཟེར་བརྒྱ་པ་ནོར་འཛིན་རྒྱན་དུ་ལོངས། ༩ །སྲིད་འདིར་བཤེས་གཉེན་མ་བསྟེན་འཁྲུལ་ཡང་སྲིད། །དགོངས་པའི་གསང་མཛོད་རྡོལ་བས་མ་འཁྲུལ་སྲིད། །འཁྲུལ་ན་ལྷ་དང་བླ་མའི་སྤྱན་སྔར་བཤགས། །མ་འཁྲུལ་གྱུར་ན་བསྟན་པའི་བཙས་སུ་སྨོན། ༡༠ །ཁོ་བོའི་རྣམ་རྟོག་དུག་ལྔའི་རི་མོ་མཁན། །པདྨའི་ཐུགས་རྗེས་བྱིན་གྱིས་བརླབས་དེའི་མཐུས། །འདྲི་བར་སྤོབས་པ་ཐོབ་སོ་ཅོག་རྣམས་ཀྱིས། །ནམ་ཞིག་གཞན་ཕན་རྒྱ་ཆེར་འགྲུབ་པར་ཤོག ༡༡ །ཐོས་དང་ཤེས་རློམ་དྲེགས་པའི་མཆེ་སྡེར་ཅན། །ལྟ་གྲུབ་ཕྱོགས་ལྷུང་ནགས་སུ་མི་ཡན་པར། །ཆོས་ཀུན་ཤྭ་མོའི་སུལ་ལྟར་དབྱེ་ནུས་ལ། །ཤྭ་མོའི་ཡུ་ལྟར་གཅིག་ཏུ་གཟུང་ནུས་ཤོག ༡༢ །སྲིད་འདིའི་ཕུན་ཚོགས་ཨེ་རན་ཌི་ཤིང་ལྟར། །སྙིང་པོ་མེད་པར་གོ་བའི་ངེས་འབྱུང་གིས། །གྱོང་
པོའི་རང་རྒྱུད་སྦྱངས་ནས་རི་སུལ་དང༌། །གངས་སྟོང་འགྲིམ་པའི་སྙིང་སྟོབས་སྐྱེ་བར་ཤོག ༡༣ །འཇིག་རྟེན་སྐྱེ་བོས་བརྙས་ཀྱང་དམ་པས་མིན། །སྙན་གྲགས་བྲག་ཅའི་སྒྲ་རུ་རབ་གོ་ཞིང༌། །འདོན་ཡོན་བདུད་ཀྱི་ཞགས་པས་མི་བསླུ་བར། །སྤྲང་པོའི་སྤྱོད་པས་མི་ཚེ་འདའ་བར་ཤོག ༡༤ །རྩ་བརྒྱུད་བླ་མའི་ཡེ་ཤེས་གཟིགས་པ་ཡི། །བརྩེ་བ་ཆེན་པོས་རྗེས་སུ་བསྐྱངས་པའི་མུར། །བཟོད་ཀའི་རྐྱེན་ངན་དང་དུ་ལེན་པ་དང༌། །འཁོར་བར་ཕྱི་ཕྱག་འཚལ་ལ་བརྩོན་པར་ཤོག ༡༥ །ཨེ་མ་ཁས་ལེན་བྲལ་བ་ལྟ་བའི་རྫོང༌། །རིག་སྟོང་ཡིད་ལ་བྱར་མེད་སྒོམ་པའི་ཕྲང༌། །ཆུ་ལ་རལ་གྲི་བསྣུན་འདྲ་སྤྱོད་པའི་སྲོག །ལྡོམ་བུ་བདག་གི་སྙིང་ལ་གནས་པར་ཤོག ༡༦ །རང་བཞིན་འོད་གསལ་རྫོགས་པ་ཆེན་པོའི་དོན། །རྒྱས་འདེབས་མཛུབ་རིས་ཙམ་དུ་མི་ལུས་པར། །ཅིར་སྣང་ལམ་དུ་ལྷོངས་པའི་དྲན་རིག་དང༌། །མཉམ་རྗེས་གཉིས་ཀྱི་སྤུ་རིས་དག་པར་ཤོག །༡༧ །ཚོགས་དྲུག་སྣང་བ་གྲ་ཆགས་གྲུ་མ་ཉམས། །སེམས་ཀྱི་རང་བཞིན་གཞི་རྩ་ཆོད་པ་དང༌། །རྨི་ལམ་འཁྲུལ་པ་གཞོན་ནུ་བུམ་སྐུའི་ཀློང༌། །ཐུམ་ནས་འོད་གསལ་ངང་ལ་གནས་པར་ཤོག ༡༨ །རྩེ་གཅིག་ཀློང་དུ་རང་རྒྱུད་དབུ་མ་ཆམ་ལ་ཕེབས། །སྤྲོས་བྲལ་ཀློང་དུ་ཁས་ལེན་མེད་པའི་ཐལ་འགྱུར་མཇལ། །
རོ་གཅིག་ཀློང་དུ་འཁོར་འདས་ཕྱག་རྒྱ་ཆེན་པོ་དག །སྒོམ་མེད་ཀློང་དུ་རྫོགས་ཆེན་སྣང་བཞི་ཟད་པར་ཤོག ༡༩ །བདག་གི་དོན་དུ་སྤངས་རྟོགས་ཡོན་ཏན་མཐར་ཕྱིན་ནས། །གཞན་གྱི་དོན་དུ་འགག་མེད་སྙིང་རྗེའི་བརྟུལ་ཞུགས་ཀྱིས། །སྔོན་གྱི་རྒྱལ་བས་ཐུགས་བསྐྱེད་སྨོན་ལམ་མཛད་པ་ལྟར། །མ་རྒན་འགྲོ་རྣམས་བདག་ཉིད་གཅིག་པུས་འདྲོངས་པར་ཤོག ༢༠ །ཐུབ་བསྟན་སྤྱི་དང་ཁྱད་པར་རྡོ་རྗེ་སྙིང་པོ་ཡི། །བསྟན་པ་རིན་ཆེན་མི་ཉམས་དབྱར་མཚོ་ལྟར་འཕེལ་ཞིང༌། །དེ་འདྲའི་མཐུ་ལས་གངས་རིས་བསྐོར་བའི་རྒྱལ་ཁམས་འདིར། །དུས་འཁྲུག་ནད་མཚོན་མུ་གེའི་དུཿཁ་ཞི་བར་ཤོག ༢༡ །བདག་དང་གཞན་གྱིས་བསམ་གཏན་སྒོམ་པའི་དགེ་བ་ཡིས། །འགྲོ་ཀུན་འོད་གསལ་རྡོ་རྗེ་སྙིང་པོའི་གྲུར་ཆུད་དེ། །ཤིན་ཏུ་བརྒལ་དཀའ་འཁོར་བའི་རྒྱ་མཚོ་རབ་སྒྲོལ་ནས། །རྒྱལ་བའི་གོ་འཕང་རིན་ཆེན་གླིང་དུ་ཕྱིན་པར་ཤོག ༢༢ །འདི་བརྩམས་དགེ་བས་བསྐྱེད་རྫོགས་མན་ངག་ལ། །ལྟ་བའི་རབ་རིབ་མིག་གི་དྲི་ཕྱིས་ནས། །སྐད་ཅིག་ཡུད་ལ་བརྩོན་པ་མ་དགོས་པར། །ཆོ་ག་ཀུན་གྱི་སྙིང་པོ་མཐོང་བར་ཤོག ༢༣ །ཁྱད་པར་ཉམ་ཐག་བར་དོའི་སེམས་ཅན་གྱི། །སྐྱབས་གཅིག་འདི་ལས་གཞན་དུ་མ་དམིགས་པས། །བདག་གི་ལྷག་བསམ་དག་པའི་དགེ་འབྲས་ཀྱིས། །འདི་
དོན་གནད་ལ་ཀུན་གྱིས་རྟོགས་པར་ཤོག །༢༤ །དེ་མཐུས་མ་གཅིག་ཡེ་ཤེས་མཚོ་རྒྱལ་གྱིས། །ལྕགས་ཁང་དྲུང་དུ་དོང་སྤྲུགས་མཛད་པ་ལྟར། །ངན་སོང་སེམས་ཅན་ཕ་མའི་རང་བཞིན་ཀུན། །ཆོ་ག་འདི་ཡི་སྒོ་ནས་འདྲོངས་པར་ཤོག ༢༥ །དགོངས་ཤིག་མཁའ་ཁྱབ་རིག་འཛིན་རྒྱ་མཚོས་དགོངས། །རློབས་ཤིག་སྨོན་ལམ་འགྲུབ་པར་བྱིན་གྱིས་རློབས། །མཛོད་ཅིག་བདེན་ཚིག་འགྲུབ་པའི་མཐུན་འགྱུར་མཛོད། །སྲུངས་ཤིག་ཤ་ཟ་ཌཱིཀྐིས་བྱིན་གྱིས་བརླབས་བཀའ་འདི་སྲུངས། ༢༦ །བདག་གིས་བསྐལ་བར་བསགས་པའི་སྡིག་སྒྲིབ་ཀུན། །བདག་གི་སྨོན་ལམ་རྣམ་དག་འདིས་བྱང་ནས། །བདག་གིས་ཀུན་བཟང་ས་ལ་ཕྱིན་ནས་ཀྱང༌། །བདག་གིས་འཁོར་བ་དོང་ནས་སྤྲུག་ནུས་ཤོག ༢༧ །དེ་ལྟར་བླ་མ་དགོངས་པ་འདུས་པའི་ན་རཀ་སྐོང་བཤགས་གཙོར་བཏོན་གྱི་ཆོ་གའི་རྣམ་གཞག་དང་འབྲེལ་བའི་བསྐྱེད་རྫོགས་ཟུང་འཇུག་གི་སྒྲོམ་ཁོག་མཁྱེན་བརྩེའི་མེ་ལོང་འོད་ཟེར་བརྒྱ་པ་ཞེས་བྱ་བ་འདི་ནི། སྔ་ལོའི་དུས་ནས་བླ་མ་གྲོལ་མཆོག་ལགས་ཀྱིས་ངོས་དང་གསུང་ཤོག་གི་ལམ་ནས་ཉམས་ལེན་གྱི་གནད་ཁྲོལ་བ་ཞིག་ཅིས་ཀྱང་འབྲི་དགོས་ཞེས་བསྐུལ་འདེབས་གནང་རིགས་བྱུང་ཡང༌། གནས་སྐབས་
ཀྱི་སྣང་ཚུལ་ལ་འཕྲོ་རྒོད་སྣ་ཚོགས་ཤར་ཏེ་རིམ་འགྱངས་སུ་སོང་ཐོག །ཉེ་ཆར་འདི་ལོར་སྐུ་ཚེ་བློས་བཏང་གིས་སྙིང་པོའི་སྒྲུབ་པ་ལྷུར་ལེན་ལ་བརྩོན་པའི་དོན་ལྡན་གྱི་སྙིང་སྟོབས་ཅན་སྒོམ་ཆེན་དྷརྨའི་མཚན་ཅན་གྱིས་དྲི་མེད་ཀྱི་ལྷ་རྫས་གངས་རིའི་མདངས་ལྡན་བཅས་སྐུ་དངོས་དང་གསུང་ཤོག་གི་ལམ་ནས་ནན་ཏན་ཆེན་པོས་བསྐུལ་འདེབས། ཤིན་ཏུ་ཉེ་བའི་གམ་དུ་འཁོད་པའི་ཡིད་བཞིན་རེ་སྐོང་གི་རྡོ་རྗེའི་སྤུན་གྲོགས་དག་པའི་སྣང་བ་ཅན་སྨན་མཁྱེན་གཉིས་ཀྱི་རིང་ལུགས་ལ་བཟང་པོའི་བག་ཆགས་སད་པ་ཝ་གིནྡྲའི་མཚན་ཅན་གྱིས་ཡིག་འཕྲིན་གྱི་ལམ་ནས་དོ་གལ་ཆེན་པོས་བསྐུལ་འདེབས་པ་དང༌། ཤོག་ལས་སོགས་མཐུན་རྐྱེན་ཚུལ་བཞིན་དུ་སྦྱར་བ་རྣམས་འཛོམ་པ་ལས། རང་བློར་ཡང་གཏེར་ཆོས་འདི་ཉིད་ཁྱབ་གདལ་དུ་གྲགས་ཆེ་བས་ལག་ལེན་བཟང་ངན་གྱི་སྤུ་རིས་ཅི་ལ་ཕྱེད་ཀྱང༌། ཅུང་ཟད་མཐོང་བ་དག་ཆོ་ག་རང་རང་གི་ཐད་ཀར་དགག་སྒྲུབ་ཀྱི་གླེང་སློང་བ་ལྟར་ཅི་རིགས་པར་མཐོང་བས་སྙིགས་དུས་སུ་བསྟན་པ་རིན་པོ་ཆེའི་བཙས་སུ་སྨོན་པ་བཙུགས་ནས་ལྷག་པའི་ལྷ་དང་དམ་ཅན་གཏེར་བདག་རྣམས་ལ་གནང་བ་ཞུས་པ་ལས་བགྱིར་རུང་བའི་ལྟས་ཁྱད་པར་ཅན་མཐོང་བ་ལ་བརྟེན། བདག་ཅག་གི་སྟོན་པ་དྲག་པོ་ཞེས་པ་ལྕགས་ཕོ་སྤྲེའུའི་ལོ།
སྐར་མ་ས་གའི་ཉ་བའི་དཀར་ཕྱོགས་ཀྱི་བཟང་པོ་གཉིས་སྟོན་པ་འཁྲུངས་པའི་ལོ་ཟླ་ལ་རྒྱ་བལ་ཁ་ཆེའི་པཎྜི་ཏ་མང་པོ་ཞལ་མ་འཆམས་པའི་འདོད་ཕྱོགས་ཐ་དད་ཡོད་ཀྱང་འདི་ནི་དཔལ་དུས་ཀྱི་འཁོར་ལོའི་སྐར་རྩིས་དྷྲཱུ་ཝ་ཡར་ཀློག་གི་དུས་ཚིགས་བརྟག་པའི་བགྲོས་ཅན་དང་སྒོ་བསྟན་རྣམ་པར་དཔྱད་པའི་རྗེས་སུ་འབྲངས་པའི་ལེགས་བཤད་བཻཌཱུར་དཀར་པོ་ཞེས་པད་དཀར་ཞལ་ལུང་ལ་ཅོ་འདྲི་བ་དང༌། འཇིག་རྟེན་མིག་གཅིག་ལྔ་བ་ཆེན་པོའི་བསྟན་བཅོས་རྒྱལ་རབས་དཔྱིད་ཀྱི་རྒྱལ་མོ་སོགས་ཀྱིས་རྗེས་སུ་འབྲངས་པའི་མན་ངག་རྣམ་དག་ཡིན་ནོ། །པའི་ཚེས་ཀྱི་མཚན་མོའི་དགུང་ཐུན་གྱི་ཆ་ན་སྐྱེ་དགུའི་བསོད་ནམས་ཀྱི་དཔལ་ཡོན་དུ་ཐོབ་པ་ནས་ལོ་ཚིགས་ཀྱི་བགྲོད་པ་ཟུང་ལྡན་སྐྱོན་དང་རྒྱུ་སྐར་གྱི་འཁོར་ལོའི་གྲངས་སུ་སླེབས་ཤིང༌། སངས་རྒྱས་གཉིས་པ་པདྨཱ་ཀཱ་ར་བསིལ་ལྡན་ཕན་བདེའི་བྱེད་པོར་ཕེབས་ནས་བགྲང་བྱའི་འཁོར་ལོ་དུས་མེ་བུ་གའི་ཐོག་ཏུ་སླེབ་པ། འཕགས་པའི་ཡུལ་དུ་ཨི་ཤྭ་ར་ཞེས་འབོད་ཅིང་སྟོད་འགྲེལ་ལས་གངས་ཅན་པའི་སྐད་དུ་དབང་ཕྱུག་ཅེས་པ་དང༌། ཤར་ཕྱོགས་རྒྱ་ནག་ཏང་འཁུན་གྱི་གྲོང་ཁྱེར་དུ་དིང་ཚིའུ། འབྱུང་རྩིས་པས་དབང་ཐང་དང་བསྟུན་ནས་མེ་གླང་དུ་འཛམ་གླིང་ཆུང་ངུ་འདིའི་ཡུལ་ཆེན་དྲུག་གི་ནང་ཚན་ཆ་བསགས་ཀྱི་གྲོང་ཁྱེར་ཆེན་པོར་ས་བཅུའི་བྱང་ཆུབ་སེམས་དཔའ་སའི་དབང་ཕྱུག་གི་རྣམ་པས་ལོ་བརྒྱ་བརྒྱར་ཆོས་སྟོན་པ་འབྲས་ཐོབ་ཆོས་རྒྱལ་བདུན་དང་རིགས་ལྡན་ཉི་ཤུ་རྩ་ལྔ་ལས།
རིགས་ལྡན་རྒྱལ་མཚོ་རྣམ་རྒྱལ་མིག་ཀླུ་རི་བོང་༡༨༢ཅན་དང༌། རྒྱལ་དཀའ་གཟུགས་༢༢༡མིག་ཧསྟིའི་གྲངས་གཉིས་བསྡོམས་པས་མེ་མཁའ༤༠༣རྒྱ་མཚོའི་བགྲང་བྱར་གྲུབ་པ་ཟད་པ་མེ་སྟག་ལ་རྫོགས་པའི་མེ་ཡོས་ལོར་ག་ལ་ཙཀྲ་བོད་དུ་ཐོག་མར་ཕེབས་པར་རབ་བྱུང་དང་པོར་ཟུང་སྟེ་རིམ་པར་བགྲང་བའི་ལོ་རྒན་དྲུག་ཅུ་བཅུ་གཉིས་ཕུད་པའི་རབ་བྱུང་བཅུ་གསུམ་པའི་ནང་ཚན་ཡིན་ལ། གཎྜ་ལ་རི་མོ་གཉེར་བའི་གཏི་མུག་ཅན་ཁ་ཅིག་གིས་བགྲང་གཞིའི་རྩ་བ་མ་ཕིགས་པས་རབ་བྱུང་བཅུ་གསུམ་ཟེར་བ་འོང་མི་ཐང་ཟེར་བ་མུས་སྤྲུལ་ལོ། །འབོད་ཅིང༌། བདུན་པ་ཆེན་པོ་རི་བོ་ཏ་ལར་ཞལ་གཟིགས་པའི་ལོ། རང་ལོ་ཉེར་དགུ་པ་སྟེ་བགྲང་བྱའི་འཁོར་ལོ་རྩེ་མོའི་གྲངས་མཉམ་ལ་བསྐྱེད་རྫོགས་ཀྱི་དམ་བཅས་མི་གཡེལ་བའི་གནས་སྐབས། དཔྱིད་འབྲིང་ས་ག་ཟླ་བའི་དཀར་ཕྱོགས། ཉིན་བྱེད་དབང་པོ་གླང་གི་ཁྱིམ་ན་དགའ་མགུར་རོལ་པའི་དུས། ཚེས་ལ་འཆར་བའི་དབྱངས་ཡིག་མ། གསལ་བྱེད་ཛྫུ། རྟེན་འབྲེལ་ལེན་པ། དར་གུད་སྨིན་པ། རྣམ་དག་གྲུབ་པའི་རེས་གཟའ་བུ་དྷྱཿ རེས་འགྲོགས་ཀྱི་ཟླ་སྐར་ཨ་ནུ་ར་དྷྱ་དང་དགའ་མགུར་སྤྱོད་པའི་ཉིན་ནས་མགོ་བརྩམས་ཏེ་གུང་ཐུན་གྱི་བསྲུབས་སུ་ཟེ་གསོག་བྲིས་པ་ལས། ལོ་དེ་ཉིད་ཀྱི་དབྱར་སྨད་སྐྱེ་བོ་རྣམས་རང་རང་གི་ལོ་ཏོག་གི་འབྲས་བུ་གཡུར་དུ་ཟ་བའི་ཕྱོགས་ལ་ཉེ་ཞིང༌། རྒྱལ་མོ་བཞི་ལས་སྟོན་གྱི་བྱེད་པ་
པོ་ཁུ་ཚུར་ན་ཤིང་འབྲས་ཐོགས་ནས་རྣམ་པར་དགོད་པའི་བཞིན་རས་སྟོན་པའི་གནས་སྐབས། ཉིན་བྱེད་དབང་པོ་ན་ཆུང་མའི་ཁྱིམ་ན་རླུང་ཁམས་ཨུཏྟར་ཕལྐུ་ནའི་དགའ་མ་དང་རོལ་ཞིང༌། ལེགས་བྲིས་ཀྱི་བདེན་ཚིག་གྲུབ་པའི་དྲང་སོང་ཆེན་པོ་རྀ་ཥྀའི་འོད་ཟེར་གྱིས། ཉལ་འགྲོ་མའི་རྒྱུན་ཐམས་ཅད་ཡན་ལག་བརྒྱད་ལྡན་གྱི་བདུད་རྩིའི་ནུས་པ་བྱིན་པས་སྐྱེ་བོ་ཐམས་ཅད་མཱ་མ་ཀཱིའི་མཁའ་དབྱིངས་སུ་སྦྱོར་ཞིང༌། ཚེས་ཀྱི་འཁོར་ལོ་འདོད་པའི་གྲངས་ལ་སླེབ་པའི་ཉིན་རྣམ་དག་གྲུབ་པའི་རེས་གཟའ་ཁྱུང་སྔོན་སྐྱེས་དང༌། ཟླ་སྐར་མོན་གྲུ་ལྷན་ཅིག་ཏུ་ཚོགས་ཤིང༌། ལེགས་ལྡན་གཟའ་ལྔའི་སྤྱོད་འགྲོས་དལ་མྱུར་འབྱུང་འཁྱོག་ཅི་རིགས་པར་རྩོམ་པ་དང༌། མཁའ་ལ་ན་ཀྲའི་ཏརྐ་ལ་འཆར་ཞིང་ཐུར་གྲིབ་རང་ཆ་དང་བཅས་བཅོ་ལྔ་འཆར་བའི་ཚེ་ན་ཡོངས་སུ་གྲུབ་པ་སྟེ། འདི་ལ་ཉེས་པ་བཤད་གང་བདག་གི་སྐྱོན། །ཡོན་ཏན་ཅུང་ཟད་མཆིས་ན་བླ་མའི་དྲིན། །ཅི་ཕྱིར་ཞེ་ན་པདྨཱ་ཀ་ར་ཡི། །མཁྱེན་བརྩེ་ནུས་པའི་མཐུ་ཡིན་བདག་འདྲས་མིན། ༡ །འོད་གསལ་དབུ་མའི་རྒྱལ་ཁབ་ཆེན་པོ་ལ། །གཟུང་འཛིན་རྣམ་རྟོག་ཀུན་གྱིས་ཕྱག་
བྱས་པས། །དཔལ་རི་གསང་སྔགས་ཐེག་ཆེན་གླིང་མཆོག་གི །སྒོམ་མལ་འོད་གསལ་ཀློང་ནས་འདི་བྱུང་ངོ༌། ༢ །ཐུགས་ཀྱིས་བྱིན་གྱིས་བརླབས་པས་ཤཱ་རིའི་བུ་དང་སྤྱན་རས་གཟིགས་ཀྱིས་འདྲི་བ་དང་ལན་ལྡོན་པའི་ཚུལ་དུ་ཤེས་རབ་སྙིང་པོ་བྱུང་བ་ལྟ་བུ། དགའ་བར་བྱོས་ཤིག་ཤ་ཟ་རལ་གཅིག་མ། །མགུ་བར་བྱོས་ཤིག་རྡོ་རྗེ་སྤུན་གྲོགས་ཚོ། །མཉམ་གཞག་དྲན་པ་ནམ་མཁའི་ངང་སྒོམ་ནས། །རྗེས་ཐོབ་སྒྱུ་མའི་རྩལ་གྱིས་འདི་བྲིས་སོ། ༣། ད་ནི་རྨི་ལམ་ཙམ་གྱི་མི་ཚེ་འདིར། །རྣམ་གཡེང་ཆོས་སུ་མིང་བཏགས་དེས་ཅི་བྱ། །ཀུན་བརྟགས་རྟོག་དཔྱོད་རྣོན་པོ་ཅི་དགར་ཐོང༌། །རིག་པ་འོད་གསལ་ཀློང་དུ་ངལ་བསོས་ཤིག །༤། འདི་ནི་གངས་རིའི་ཁྲོད་ཀྱི་བསྒྲུབ་པ་པོ། །སྲོག་རྩོལ་དབུ་མར་ཡན་པའི་གྲོང་ཁྱེར་ནས། །སྣང་བཞིའི་ལྟད་མོར་གཡེངས་པའི་རྣལ་འབྱོར་བ། །པདྨ་དབང་ཆེན་མཁྱེན་བརྩེའི་འོད་ཀྱིས་སྦྱར། ༥ །གཞི་ཡི་རིག་པ་ནང་གསལ་ཆོས་དབྱིངས་འཁོར་འདས་ཀུན་གྱི་བྱེད་པ་པོ། །ལམ་གྱི་རིག་པ་གཞི་སྣང་ཆེན་པོ་གཞོན་ནུ་བུམ་སྐུའི་སྤྲོས་བྲལ་ངང༌། །གཉུག་མའི་གཤིས་ལ་གོམས་པ་མཐར་ཕྱིན་ས་
ལམ་ཡོན་ཏན་རང་ངོར་རྫོགས། །གཞི་ལམ་འབྲས་གསུམ་རྣམ་དབྱེར་མེད་པ་གདོད་མའི་ངང་དུ་གྲོལ་གྱུར་ཅིག ། ༦ །།དགེའོ། །