སྔ་འགྱུར་རྙིང་མ་ལ་རྒོལ་ངན་ལོག་རྟོག་བཟློག་པའི་བསྟན་བཅོས་ཀུན་མཁྱེན་ངག་གི་དབང་པོས་མཛད་པ།
སྔ་འགྱུར་རྙིང་མ་ལ་རྒོལ་ངན་ལོག་རྟོག་བཟློག་པའི་བསྟན་བཅོས་ཀུན་མཁྱེན་ངག་གི་དབང་པོས་མཛད་པ་བཞུགས། །
ཨོཾ་སྭ་སྟི་པྲ་ཛ་བྷྱ། ལོག་རྟོགས་ངན་པ་བཟློག་པའི་བསྟན་བཅོས་འཁྲུལ་པ་ཐམས་ཅད་རབ་ཏུ་འཇོམས་པ་ཞེས་བྱ་བ། གསུང་གི་རྡོ་རྗེ་ལོངས་སྤྱོད་རྫོགས་པའི་སྐུ་གཞོམ་དུ་མེད་པའི་སྒྲ་དབྱངས་ཅན་མཐའ་ཡས་པ་མཐའ་ཡས་པའི་གསུང་གིས་མཐའ་ཡས་པ་མཐའ་ཡས་པའི་སེམས་ཅན་སྣ་ཚོགས་པ་རྣམས་ལ། མཐའ་ཡས་པ་མཐའ་ཡས་པའི་ཆོས་སྟོན་པར་མཛད་པའི་སྟོན་པ་ཐམས་ཅད་མཁྱེན་པ་ལ་ཕྱག་འཚལ་ལོ། །ཉི་ཚེ་བའི་ཚིག་འབྲུ་ལ་བརྟེན་ནས་ཅིག་ཤོས་སུན་འབྱིན་པས་ཆོས་སྤང་བའི་རྒྱུས་ངན་འགྲོར་ལྟུང་བ་རྣམས་ཐུགས་རྗེས་གཟུང་དུ་གསོལ། ༧ སྣ་ཚོགས་སྐུར་སྟོན་འདི་ནི་ཚངས་སྐུ་མ་ཡིན་སྐུ་ཡི་རྡོ་རྗེ་སྒྱུ་འཕྲུལ་དྲྭ་བ་སྤྲུལ་པའི་སྐུ། །རང་རང་སྐད་
དུ་ལེགས་པར་འདོམས་འདི་དབང་ཕྱུག་མ་ཡིན་གསུང་གི་རྡོ་རྗེ་གཞོམ་མེད་ལོངས་སྤྱོད་རྫོགས། །ཇི་ལྟ་ཇི་སྙེད་མཁྱེན་འདི་ཁྱབ་འཇུག་མ་ཡིན་ཐུགས་ཀྱི་རྡོ་རྗེ་མཁའ་དབྱིངས་ཀུན་ཁྱབ་ཆོས་ཀྱི་སྐུ། །སྐུ་གསུམ་སོ་སོར་སྟོན་ཀྱང་དེ་བཞིན་ཉིད་ལས་མ་གཡོས་ལྷན་ཅིག་སྐྱེས་པ་ངོ་བོ་ཉིད་ཀྱི་སྐུ། །གང་ཡིན་དེ་ལ་དང་པོར་བཏུད་ནས་མ་རྟོགས་ལོག་རྟོགས་ཚིག་ལ་རབ་འཁྲུལ་འཁྲུལ་འཇོམས་བརྗོད་པར་བྱ། །དེ་ལ་འདིར་དོན་ལ་རྟོན་པའི་ཤེས་རབ་དང༌། གཟུ་བོར་གནས་པའི་བློ་དང་ནི་མི་ལྡན། ཕྱོགས་འཛིན་ཡིད་ཀྱི་མུན་སྟུག་གིས་ནི་བསྒྲིབས། ཉི་ཚེ་བའི་སྒྲ་ཚིག་ཡི་གེ་ལ་ནི་རྟོན་ཞིང་མཁས་པ་དང༌། ཤེས་པར་རློམ་པའི་མངོན་པའི་ང་རྒྱལ་ཅན་གྱི་གང་
ཟག་ཁ་ཅིག་གིས། ཐེག་པ་ཐམས་ཅད་ཀྱི་ཡང་རྩེ་དང་སྙིང་པོ་དམ་པར་གྱུར་པའི་དམ་ཆོས་རྫོགས་པ་ཆེན་པོ་དང༌། སྔགས་རྙིང་མའི་མདོ་རྒྱུད་དགོངས་འགྲེལ་གདམས་པ་དང་བཅས་པ་རྣམས་དང༌། དེ་རྣམས་ལ་ཐོས་བསམ་སྒོམ་གསུམ་བྱེད་པའི་རྒྱ་བོད་ཀྱི་མཁས་གྲུབ་རྣམས་ལ་སྐུར་པ་བཏབ་ནས་ཆོས་སྤོང་བའི་ལས་བསགས་པའི་ལོག་རྟོག་གི་ཕྲེང་བ་འདི་ལ་བརྗོད་པར་བྱ་སྟེ། ཕྱོགས་ཞེན་གྱི་དྲི་མས་མ་བསླད་པའི་སྐྱེས་བུ་དམ་པ་རྣམས་ཀྱིས་གཟིགས་པར་ཞུའོ། །དེ་ལ་ལོག་རྟོག་གི་ཕྲེང་བར་འདི་སྐད་ལོ། །དབུ་རུ་སྟོད་ཀྱི་དཔལ་འཛིན་ན་རེ། ༢ འདི་ལྟར་བཅོམ་ལྡན་འདས་ཤཱཀྱའི་རྒྱལ་པོ་དེས་མ་འོངས་པའི་དུས་ན་རང་གི་བསྟན་པ་ལ་བདུད་ཀྱི་ཆོས་ཕྱིན་ཅི་ལོག་འབྱུང་བར་མཁྱེན་ནས་ཆོས་ལ་བརྟག་པའི་ཆོས་འདུལ་བ་དང༌། མདོ་སྡེ་དག་ལས་རྒྱ་ཆེར་བཤད། ཁྱད་པར་དུ་གསང་སྔགས་རྡོ་རྗེ་ཐེག་པ་ལ་མ་བརྟགས་པར་བླུན་དད་ཀྱིས་ཞུགས་ནས་ཆོས་ཕྱིན་ཅི་ལོག་པའི་རྒྱུས་དམྱལ་བར་འགྲོ་བས། ཆོས་དང༌། བླ་མ་དང༌། སློབ་མ་གསུམ་ལ་བརྟགས་ཤིང་དཔྱད་ནས་གསུམ་ཀ་ལ་ཡིད་ཆེས་ནས་གདོད་འཆད་ཉན་བྱ་བར་གསུངས། ཟེར་རོ། ། འདི་ལྟའི་རྟགས་བར་དུ་བཞུགས་པ་རྣམས་ཀུན་མཁྱེན་རང་བྱུང་རྡོ་རྗེས་གསར་བསྣན་ཡིན་ནོ། །༧ འདི་ནི་རང་ཉིད་ལུང་སྟོན་པའི་མེ་ལོང་སྟེ། རང་རྒྱུད་
རྙིང་མ་ཡིན་ཡང་དགེ་སློང་ལྷ་ཆེན་པོ་དང༌། ཀླ་ཀློའི་སྟོན་པ་གཞོན་ནུ་སྡེའི་རྣམ་ཐར་ལ་ཞུགས་ནས་རང་གི་སློབ་དཔོན་དང་འཁོན་པས་རྩ་ལྟུང་དང་པོ་ལ་བདག་གིར་བྱས་ཤིང༌། དེའི་འབྲས་བུའང་མཐོང་ཆོས་སུ་མྱོང་གྱུར་དགེ་སློང་ལྷས་བྱིན་ལྟར། ཆོས་ལ་སྡང་བའི་ཉེས་པས། དབུར་སྟོད་བྱང་གི་ས་ནས་སུ། །རྡོ་རྗེ་དམྱལ་བར་ཨ་ལ་ལ། །ཞེས་ཁྲག་གིས་བྲིས་པའི་རྡོ་ཆར་དང་བཅས་ལུས་རྟེན་དེ་ཉིད་ས་འོག་ཏུ་དིམ་པའི་ཕྱིར་རོ། །དེ་ལ་རྗེ་བཙུན་རིན་པོ་ཆེ་རྒྱ་སྟོན་པ་སངས་རྒྱས་ཡེ་ཤེས་ཀྱི་ཞལ་སྔ་ནས་ལན་དུ། ༈ ཐོག་མར་རང་ཚིག་དང་ཡང་འགལ་ཏེ། རང་གི་བསྟན་པ་ལ་བདུད་ཀྱི་ཆོས་ཕྱིན་ཅི་ལོག་འབྱུང་བར་མཁྱེན་ནས་ཆོས་ལ་བརྟག་པ་བཤད་ན། བོད་ལྟ་བུའི་ཡུལ་ཆུང་རེ་རེར་ཆོས་ལོག་གང་བྱུང་ལུང་སྟོན་གྱིས་མི་ལངས་པ་འགལ་ལོ། །དེ་ལུང་སྟོན་གྱིས་མི་ལངས་ན་ཐམས་ཅད་མཁྱེན་པས་སེམས་ཅན་མོས་པའི་དབང་གིས་ཡུལ་སོ་སོའི་སྐད་ཀྱིས་སེམས་ཅན་སྣ་ཚོགས་པ་རྣམས་ལ་ཆོས་སྣ་ཚོགས་པ་སྟོན་པ་འགལ། ཆོས་སྣ་ཚོགས་པ་མ་བསྟན་ན་ནི་ཐམས་ཅད་མཁྱེན་པ་ཡིན་པར་འགལ་ལོ། །སྤྱིར་ཡང་ཆོས་ལ་བརྟག་པའི་ཆོ་ག་ཡང་སྤྱིར་བཏང་ཙམ་ལ་ཡིན་གྱི། དམིགས་ཀྱིས་བསལ་བ་ལ་དེ་ཙམ་གྱིས་ཆོས་མིན་དུ་མི་འགྲུབ་སྟེ་འོག་ནས་འཆད་དོ། །བརྟག་པ་གསུམ་ནི་ཤིན་ཏུ་ནས་ཀྱང་
བཤད་དེ། སློབ་དཔོན་ཆེན་པོ་པདྨ་སམ་བྷ་ཝས། བླ་མས་སློབ་མ་མ་བརྟགས་སྣོད་མེད་ཆོས་ཀྱི་འབྲེལ། །སློབ་མས་བླ་མ་མ་བརྟགས་བཅུད་མེད་ཆོས་ཀྱིས་འབྲེལ། །གཉིས་ཀས་དམ་ཚིག་མ་བསྲུངས་བེ་སྦྲེལ་གཡང་སར་ལྟུང༌། །དེ་འདྲའི་དཔོན་སློབ་དུས་ཀྱི་མཐའ་ལ་འབྱུང༌། །ཞེས་གསུངས་སོ། །ཞེས་ཆོས་རྗེ་བུ་སྟོན་རིན་པོ་ཆེས་དུས་འཁོར་གྱི་བླ་མའི་མཚན་ཉིད་བརྟག་པའི་སྐབས་སུ་དྲངས་ནས་གསུངས་ཤིང༌། གཞན་ཡང་དཔོན་སློབ་ཀྱི་འབྲེལ་དང༌། སྣོད་བརྟག་པ་ལ་སོགས་པ་བླ་མ་ལྔ་བཅུ་པ་ནས། ལོ་བཅུར་འགྲོགས་པས་བརྟག་ཐུབ་བུ་ལ་སྟོན། ཞེས་སོགས་རིན་ཆེན་གླིང་པ་ཅན་བཤད་པ་ལ་སོགས་ལས་ཀྱང་རྒྱས་པ་ཡོད་པས། བླ་མ་དང་སློབ་མའི་བརྟག་པ་མེད་པའི་ཤེས་བྱེད་ཅི་ཡང་ཁྱོད་ལ་མེད་དོ། །ཆོས་ལ་བརྟག་པ་ལ། རྩོམ་པའི་ཉམས་དང༌། སྒྲ་ཚིག་དང་འགལ་བ་ལྟ་བུ་དང༌། མ་འབྲེལ་བ་དང༌། ཟློས་པ་དང༌། མ་ཚང་བ་ལྟ་བུ་ནི་ཆོས་མིན་དང་བཀའ་མིན་དུ་མི་འགྲུབ་པར་དུས་འཁོར་རྩ་འགྲེལ་དང༌། བདེ་མཆོག་སྟོད་འགྲེལ་སོགས་སེམས་འགྲེལ་རྣམས་དང༌། ནཱ་རོ་འགྲེལ་ཆེན་སོགས་ལས་གསལ་བར་གསུངས་པ་འདི་ཡིན། ཚིག་ལ་མི་རྟོན་དོན་ལ་རྟོན་པའི་དབང་དུ་བྱས་ཏེ་བརྟག་པས་འགྲུབ་ན་ནི། རྒྱ་གར་གྱི་པཎ་ཆེན་དང༌། གྲུབ་ཐོབ་པདྨ་འབྱུང་གནས་དང༌། དགའ་
རབ་རྡོ་རྗེ། འཇམ་དཔལ་བཤེས་གཉེན། ཤྲཱི་སིང་ཧ། ཛྙཱ་ན་སཱུ་ཏྲ། བི་མ་ལ་མི་ཏྲ། ཨིནྡྲ་བྷོ་ཏི། ཀུ་ཀུ་རཱ་ཙ། རྒྱལ་པོ་ཛ། སྲས་མོ་གོ་མ་དྷེ་བི། ཨུ་པ་རཱ་ཙ། སེང་ཧ་རཱ་ཙ། པྲ་བྷ་ཧ་ཏི། སྒེག་པའི་རྡོ་རྗེ། སངས་རྒྱས་གསང་བ། དམ་པ་རྒྱ་གར། པཎ་ཆེན་ཤཱཀྱ་ཤྲཱི་ལ་སོགས་པ་རྣམས་དང༌། བོད་ཀྱི་བཻ་རོ་ཙ་ན། སྐ་ཅོག་གཉིས། རྗེ་འབངས་ཉི་ཤུ་རྩ་ལྔ། ཀུན་གྱི་མཚན་བྲིས། རྨ་རིན་ཆེན་མཆོག ཨ་རོ་ཡེ་ཤེས་འབྱུང་གནས། སོ། ཟུར། གནུབས། རྩག་ལ་སོགས་པའི་མཁས་གྲུབ་རྣམས་དང༌། འཁོན་ཀླུ་དབང་བསྲུངས་པ་ནས་ཆོས་རྗེ་བསོད་ནམས་རྒྱལ་མཚན་ཡན་ཆད་ཀྱི་ས་སྐྱ་པ་རྣམས་དང༌། རྔོག་ལེགས་ཤེས་ལ་སོགས་པའི་བཀའ་གདམས་པ་རྣམས་དང༌། འབྲི་ཕག་མཚུར་སྟག་འཚལ་འབྲུག་ལ་སོགས་དྭགས་པོ་བཀའ་བརྒྱུད་པ་རྣམས་དང༌། ཤངས་པ་བཀའ་བརྒྱུད་པའི་བླ་མ་བོད་ཀྱི་གསེར་སྟེང་པ་ཆོས་འོད། འཕགས་འོད། ཀུན་སྤངས་རྒྱལ་ཡེ། ཡོན་ཏན་རྒྱ་མཚོ། ཅི་སྙེད་ཅིག་གིས་ཐོས་བསམ་སྒོམ་གསུམ་མཛད་པ་འདི་ཁོ་ནས་ཀྱང་ཡིད་ཆེས་པར་འགྲུབ་སྟེ། བློ་ཆུང་སྐལ་མེད་ལོག་རྟོག་ཅན་གྱིས་སྤྱོད་ཡུལ་དུ་མ་གྱུར་པ་འདི་ཞེ་རེ་འགྱོད། ཁྱོད་རང་ལ་ཡང་མཚུངས་སོ། །དེ་ལྟར་བརྟག་པ་གསུམ་དང་ཡིད་ཆེས་གསུམ་གྱིས་འཇུག་པ་ནི་ཤིན་ཏུ་ནས་ཀྱང་ཡོད་ལ། ད་
ལྟ་ཁ་ཅིག་གི་ཐུན་མོང་དུ་མ་གྱུར་པ་ནི་མེད་པར་མི་འགྲུབ་སྟེ། ༢ དེ་ལ་བོད་ཀྱི་ཡུལ་འདིར་དེང་སང་རྫོགས་པ་ཆེན་པོ་ཞེས་བྱ་བའི་རྒྱུད་གཞུང་མཐའ་ཡས་པ་ཞིག་འདུག འདི་ནི་ཀུན་ཏུ་བཟང་པོས་གསུངས། དགའ་རབ་རྡོ་རྗེ་དང༌། འཇམ་དཔལ་བཤེས་གཉེན་དང༌། ཤྲཱི་སིང་ཧ་དང༌། ཀླུ་སྒྲུབ་སྙིང་པོ་དང་། ཀུ་ཀུ་རཱ་ཙ་སོགས་ཨུ་རྒྱན་དང༌། རྒྱ་གར་གྱི་མཁས་གྲུབ་ཐམས་ཅད་ཀྱིས་ཉམས་ལེན་གྱི་གཙོ་བོ་འདི་ཡིན། སློབ་དཔོན་པདྨ་དང༌། བི་མ་ལ་མི་ཏྲ་དང༌། བཻ་རོ་ཙ་ནས་བོད་དུ་ཁྱེར་ཏེ་བྱོན་ནས་སྔོན་གྱི་རྒྱལ་བློན་བྱང་ཆུབ་སེམས་དཔའ་རྣམས་ཀྱི་དུས་སུ་བསྒྱུར་བ་ཡིན་ཟེར་བ་འདུག །ཅེས་པ་འདི་ལ་རྒྱ་བོད་ཀྱི་པཎ་གྲུབ་དེ་རྣམས་ཀྱི་ཉམས་ལེན་མིན་པ་དང༌། རྒྱལ་བློན་དེ་རྣམས་ཀྱི་སྐུ་རིང་ལ་མ་བསྒྱུར་བའི་ཤེས་བྱེད་དང་ལུང་རིག་ཚད་མ་ཅི་ཡང་མེད། བོད་ཀྱི་སྐྱེས་ཆེན་དམ་པ་སྔ་ཕྱིར་བྱོན་པ་ཐམས་ཅད་དང༌། ས་པཎ་དང༌། བུ་དོལ་ལ་སོགས་པ་རྣམས་ཀུ་ཀུ་རཱ་ཙའི་སངས་རྒྱས་མཉམ་སྦྱོར་སྐོར། རིན་ཆེན་རྡོ་རྗེ་མཉམ་སྦྱོར། སྒྱུ་འཕྲུལ་སྐོར་སྔ་འགྱུར་གསང་སྔགས་རྙིང་མ་ཞེས་དང༌། སྔགས་རྙིང་མ་རྣམས་འདི་ལྟར་བཞེད་ཅེས་གསུང་གཅིག་ཏུ་བསྙད་པ་ལ་བསྙོན་དུ་མེད་དོ། །གལ་ཏེ་དེ་རྣམས་ཀྱིས་ཉམས་སུ་མ་བླངས་པ་དང༌། མ་བསྒྱུར་ཡང༌། བོད་བླུན་པོ་རྣམས་ཀྱིས་དེ་རྣམས་ལ་ཁ་འཕངས་
ནས་རང་བཟོར་བྱས་པར་འདོད་ན་ནི་ཧ་ཅང་ཐལ་ཏེ། གོང་དུ་སྨོས་པའི་ས་སྐྱ་པ་ལ་སོགས་རྣམས་ཀྱང་རང་བཟོའི་རྫུན་གྱི་རྗེས་སུ་འབྲངས་ནས་ཆོས་ལོག་སྤྱོད་ཅེས་སྐུར་པ་བཏབ་པར་ཤུགས་ལ་འགྲུབ་པའི་ཕྱིར་རོ། །༢ ཡང་རྩོམ་པའི་ཉམས་ངན་པས་འགལ་བ་དང༌། མ་འབྲེལ་བ་དང་། མ་ཚང་བ་དང༌། ཟློས་པ་དང༌། ནང་རིག་པའི་ཆོས་སྐད་ལ་བླུན་ཚིག་མང་ཚུལ་དང༌། མི་མ་ཡིན་གྱི་མིང་རྒྱ་སྐད་ལ་མེད་པ་མང་པོ་འདུག་སོགས། ངན་སྨྲས་མང་དུ་ཟེར་རོ། །དེ་ལྟར་ན་གསང་སྔགས་གསར་མ་རྣམས་ཀྱང་འགྱུར་བཅོས་མ་བྱས་གོང་ནས་བརྗོད་བྱར་གཙང་པོ་ཡོད་པའི་ངེས་པ་ཅི་ཞིག །སྔོན་ནས་དེ་ལྟར་ཡོད་ན་མདོ་རྒྱུད་རེ་རེའི་གཤམ་དུའང་གང་ཟག་ཆེ་གེ་མོ་དང་ག་གེ་མོས་སླད་ཀྱི་བསྒྱུར་ཞིང་ཞུས་ཏེ་བཅོས་ནས་གཏན་ལ་ཕབ་པའོ་ཟེར་བ་མང་ཤོས་ལ་བཅོ་ལྔ་སྐོར་འདུག་པ་བཅོས་དགོས་པ་དང༌། ཞུས་དགོས་པའི་རྒྱུ་དེ་གང་ཡིན་ལེགས་པར་བསམ་འཚལ། རྙིང་རྒྱུད་རྣམས་ནི་སྔ་འགྱུར་བསྒྱུར་དུས་སྔོན་ཆད་བསྟན་པའི་ལམ་སྲོལ་མེད་པས་ཆོས་སྐད་སྒྲོགས་མ་ཙམ་ལ་ཡང་དཀའ་བའི་གནས་སུ་ཡོད་ན་དམ་པའི་ཆོས་ལ་སྨོས་ཅི་དགོས། ཐ་ན་འཇིག་རྟེན་གྱི་བྱ་བ་དང༌། བཟོ་གནས་ཙམ་ལའང་ཕྱི་ནས་རིམ་གྱིས་རྣམ་རིག་ཇེ་གསལ་ལ་སོང་ནས་སྔ་མ་སྔ་མ་ལས། ཕྱི་མ་ཕྱི་མའི་ལེགས་པ་མངོན་སུམ་ན། དུས་དེར་ཆོས་སྐད་ལ་མ་
འདྲིས་ཤིང་ལོ་པཎ་གཉིས་སྐད་བརྡ་མ་འཕྲོད་པ་དང༌། ཡུལ་སྐད་ཀྱི་ཤན་ཤོར་བ་སོགས་ཡོད་དུ་ཆུག་ཀྱང་སྒྱུར་བྱེད་དེ་དག་སྤྲུལ་པའི་སྐུ་ཡིན་ཞིང་བཅོས་བསླད་གང་ཡང་མ་སོང་བས་བྱིན་རླབས་གཞན་ལས་ཆེ་བ་ནི་རྙིང་རྒྱུད་བཀའ་གཉན་པས་གླེགས་བམ་བྲིས་ན་འཚུབ་ས་ཆེ་ཟེར་བ་དང༌། འཇིག་རྟེན་མི་བདེ་བའི་དམག་འཁྲུག་དང་ནད་མཚོན་བཀྲ་མི་ཤིས་པ་སོགས་བྱུང་ཚེ་འདི་ཉིད་ཀློག་ན་ཕན་པ་ཆེ་ཟེར། ལ་ལས་ལུང་སྟོན། ལ་ལས་དྲིལ་སྒྲོག་པ་འདི་ཆོས་དེ་དག་ངན་ངོན་དུ་གྱུར་པ་ལས་བྱུང་བ་ཡིན་ནམ་ལེགས་པར་སོམས་ཤིག །དེ་ལ་རྩོམ་པའི་ཉམས་ངན་པ་དང༌། འགལ་བ་དང༌། མ་འབྲེལ་བ་དང༌། མ་ཚང་བ་དང༌། ཟློས་པ་སོགས་རྣམས་མེད་པས་སངས་རྒྱས་ཀྱི་བཀའ་ཚད་མ་ཡིན་པར་འདོད་ན་དེ་ནི་ཤིན་ཏུ་ནས་ཀྱང་མི་འཐད་དེ། དེ་ལྟ་ན་ཕྱི་རོལ་མུ་སྟེགས་བྱེད་ཀྱི་གཞུང་རྣམས་རྩོད་པ་དང་བྲལ་བའི་གཞུང་ལུགས་རྣམ་དག་ཏུ་འགྱུར་ཏེ། ཕྱི་རོལ་པའི་སྟོན་པ་དབང་ཕྱུག་དང༌། ཁྱབ་འཇུག་དང༌། སྒྲ་ཚིག་ཡི་གེ་ལ་རྟོན་ཞིང་ལེགས་སྦྱར་གྱི་སྐད་གཅིག་པུས་མཐོ་རིས་སུ་འགྲོ་བར་འདོད་པའི་བྲམ་ཟེ་དང༌། སྒྲ་སྨྲ་བའི་དྲང་སྲོང་རྣམས་ཀྱིས་བྱས་བའི་གཞུང་ལུགས་རྣམས་རྩོམ་པའི་ཉམས་བཟང་བས་འགལ་འདུ་མེད་པ་དང༌། ཚིག་གི་སྡེབ་སྦྱོར་ལེགས་
པས་འབྲེལ་ཆགས་པ་དང༌། ཟློས་པ་རྣམས་མེད་པའི་ཕྱིར་རོ། །དེའི་ཕྱིར་ཐམས་ཅད་མཁྱེན་པ་སངས་རྒྱས་བཅོམ་ལྡན་འདས་རྣམས་ནི་དོན་ལ་རྟོན་པ་ཉིད་ལ་བརྟེན་ནས་ཡུལ་སོ་སོའི་སེམས་ཅན་སྣ་ཚོགས་པ་རྣམས་ལ་རང་རང་གི་ཡུལ་གྱི་སྐད་ཀྱིས་ཆོས་སྣ་ཚོགས་པ་རྣམས་སྟོན་པའི་ཕྱིར་ན་ལྕེ་རྐན་གྱིས་རྩོལ་བས་བསྐྱེད་པའི་ལྷའི་སྐད་གཅིག་པུ་དང༌། སྒྲ་ཚིག་ཡི་གེ་རྣམས་ལ་རྟོན་པ་མ་ཡིན་པས་སོ། །དེས་ན་དུས་ཀྱི་འཁོར་ལོའི་རྒྱས་འགྲེལ་དྲི་མེད་འོད་ལས། སྒྲ་བཟང་པོ་སྨྲ་བ་རྣམས་ཀྱིས་སྒྲ་བཟང་པོ་ལ་ཞེན་པ་སྤང་བའི་སླད་དུ། དོན་ལ་རྟོན་པ་ཉིད་ལ་བརྟེན་ཏེ། ཚིགས་སུ་བཅད་པ་ཁ་ཅིག་ཏུ་སྒྲ་ཉམས་དང༌། ཁ་ཅིག་ཏུ་གཅོད་མཚམས་ཉམས་པ་དང༌། ཁ་ཅིག་རྣམ་དབྱེ་མེད་པའི་ཚིག་དང༌། ཁ་ཅིག་ཏུ་དབྱངས་དང་གསལ་བྱེད་ཕྱིས་པ་དང༌། ཁ་ཅིག་ཏུ་རིང་པོ་ལ་ཐུང་ངུ་དང༌། ཐུང་ངུ་ལ་རིང་པོ་དང༌། ཁ་ཅིག་ཏུ་ལྔ་པའི་དོན་ལ་བདུན་པ་དང༌། བཞི་པའི་དོན་ལ་དྲུག་པ་དང༌། གཞན་གྱི་ཚིག་ལ་བདག་ཉིད་ཀྱི་ཚིག་དང༌། བདག་ཉིད་ཀྱི་ཚིག་ལ་གཞན་གྱི་ཚིག་དང༌། ཁ་གཅིག་ཏུ་གཅིག་གི་ཚིག་ལ་མང་པོའི་ཚིག་དང༌། མང་པོ་ལ་གཅིག་གི་ཚིག་དང༌། ཁ་ཅིག་ལ་ཕོ་ཡི་རྟགས་ཅན་ལ་མ་ནིང་གི་རྟགས་ཅན་དང༌། མ་ནིང་གི་རྟགས་ཅན་ལ་མོའི་རྟགས་ཅན་དང༌། ཁ་ཅིག་ཏུ་ནི་རྐན་ལས་བྱུང་བ་ལ་སོ་དང་
སྤྱི་བོ་ལས་འབྱུང་བ་དང༌། ཁ་ཅིག་ཏུ་སྤྱི་བོ་ལས་འབྱུང་བ་ལ་སོ་དང་རྐན་ལས་བྱུང་བ་དང༌། ཁ་ཅིག་ཏུ་སོ་ལས་བྱུང་བ་ལ་རྐན་དང་སྤྱི་བོ་ལས་བྱུང་བ་སྟེ། དེ་ལྟ་བུ་གཞན་ཡང་རྒྱུད་སྟོན་པ་པོའི་མན་ངག་གི་རྗེས་སུ་འབྲང་བར་བྱའོ། །ཞེས་པ་དང༌། དེ་བཞིན་དུ་འགྲེལ་བཤད་ལའང་སྒྲ་བཟང་པོ་མངོན་པའི་ང་རྒྱལ་ཉམས་པར་བྱ་བའི་སླད་དུ་བདག་གིས་དོན་ལ་རྟོན་པ་ཉིད་ལ་བརྟེན་ཏེ་བྲི་བར་བྱའོ། །ཞེས་གསུངས་ཤིང་བདེ་མཆོག་སྟོད་འགྲེལ་དུ་ཡང༌། འདིར་མ་འོངས་པའི་དུས་ན་བྱིས་པའི་སྐྱེ་བོ་ཚིག་འབྲུ་ལ་རབ་ཏུ་རྟོན་པ་ལ་བརྟེན་པ་རྣམས་ཀྱིས་འདི་སྐད་བདག་གིས་ཐོས་པ་ཞེས་པ་ལ་སོགས་པ་དང༌། བྲལ་བའི་རྒྱུད་ཀྱི་རྒྱལ་པོ་ནི་བཅོམ་ལྡན་འདས་ཀྱིས་གསུངས་པ་མ་ཡིན་ནོ། །ཞེས་གང་ཞིག་སྨྲ་བར་འགྱུར་བ་དེ་ནི་མ་ཡིན་ཏེ། གང་གི་ཕྱིར་བཅོམ་ལྡན་འདས་ཀྱིས་གཞན་དུ་རྟོན་པ་བཞི་གསུངས་པའི་ཕྱིར་རོ། །འདི་ལྟར་ཏེ། དོན་ལ་རྟོན་པར་བྱ་བའི་ཚིག་འབྲུ་ལ་རྟོན་པ་མ་ཡིན་པ་དང༌། ཡེ་ཤེས་ལ་རྟོན་པ་བྱའི་རྣམ་ཤེས་ལ་རྟོན་པར་བྱ་བ་མ་ཡིན་པ་དང༌། ངེས་པའི་དོན་ལ་རྟོན་པར་བྱའི་དྲང་བའི་དོན་ལ་རྟོན་པ་མ་ཡིན་པ་དང༌། ཆོས་ལ་རྟོན་པར་བྱའི་གང་ཟག་ལ་རྟོན་པར་བྱ་བ་མ་ཡིན་པའོ། །བཅོམ་ལྡན་འདས་ཀྱི་གསུང་འདི་ཡི་ཕྱིར་ཚིག་འབྲུ་ལ་རབ་ཏུ་རྟོན་པ་ནི་ཐེག་པ་གང་དུ་ཡང་བཅོམ་ལྡན་འདས་ཀྱིས་མ་
གསུངས་སོ། །ཞེས་དང༌། དུས་འཁོར་རྩ་རྒྱུད་དུ། རང་རང་སྐད་ཀྱི་ཁྱད་པར་རྣམས་ཀྱིས་ནི། །སྲིད་གསུམ་མ་ལུས་ལམ་ལ་ལེགས་བཀོད་ནས། །ཀུན་མཁྱེན་གསུང་འདི་ཞི་བདེའི་འབྲས་བུ་སྟེར། །ལྷ་ཡི་སྐད་ལས་དེ་དག་གང་དུ་འགྱུར། །ཅེས་དང༌། བསྡུས་པའི་རྒྱུད་ཀྱི་རྒྱལ་པོའི་ཡེ་ཤེས་ལེའུ་ལས་ཀྱང༌། དུད་འགྲོ་ཡི་དྭགས་ལྷ་མིན་རྣམས་དང་ལྟོ་འཕྱེ་ལྷ་མི་འཕགས་པ་བོད་ལ་སོགས་རྣམས་ལ། བྱུང་དང་འབྱུང་འགྱུར་ད་ལྟར་བྱུང་བ་རྣམ་པ་གསུམ་དང་རྟག་ཏུ་བདེན་པའི་ཆོས་གསུངས་ཤིང༌། །རང་རང་སྐད་གཞན་རྣམས་ཀྱིས་སྲིད་གསུམ་མ་ཚང་མེད་པ་ལམ་ལ་ཡང་དག་འགོད་བྱེད་པ། །འདི་ནི་བདེ་ཉམས་འབྲས་བུ་སྟེར་བ་ཐམས་ཅད་མཁྱེན་པའི་གསུང་སྟེ་ལྷ་ཡི་སྐད་ཀྱིས་མིན། །ཞེས་དང༌། དྲི་མེད་འོད་ཀྱི་འཇིག་རྟེན་ཁམས་ལེའི་མདོར་བསྡུས་དང་པོར། ཀུན་མཁྱེན་ལམ་དོན་གཉེར་བ་རྣམས་ལ་སྒྲ་དང་སྒྲ་མིན་རྣམ་དཔྱད་ཆེན་པོ་མེད། །སྣ་ཚོགས་ཡུལ་སྐད་ངན་པ་ཡིས་ཀྱང་ཆེན་པོ་རྣམས་ཀྱི་ལམ་ལ་རྟག་ཏུ་འཇུག །སེམས་ཅན་རྣམས་ཀྱིས་མོས་པའི་སེམས་ཀྱི་དབང་གིས་ཐམས་ཅད་མཁྱེན་པའི་གསུང་མཆོག་ལ། །བརྡ་སྤྲོད་པ་ལ་ཀླུས་བཀོད་སྒྲ་བརྩེགས་རྩོད་པ་དོན་གཉེར་རྣམས་ཀྱིས་དེ་ལས་གཞན། །སྒྲ་ཉམས་པ་དང་ཡུལ་གྱི་སྐད་ལས་ཀྱང༌། རྣལ་འབྱོར་ལྡན་པས་དོན་ནི་འཛིན་
བྱེད་དེ། །ཆུ་ལ་འོ་མ་ངེས་པར་ཞུགས་པ་དེ། །ངང་པས་རབ་ཏུ་ཕྱུང་སྟེ་འཐུང་བར་བྱེད། །དོན་དམ་དེ་ཉིད་ཡུལ་ལ་རྟག་ཏུ་ནི། །ཆེན་པོ་དག་རྣམས་ཚིག་ལ་རྟོན་པ་མིན། །ཡུལ་གྱི་སྐད་རྣམས་ཀྱིས་ནི་དོན་ཤེས་ན། །བསྟན་བཅོས་སྒྲ་དག་གིས་ནི་ཅི་ཞིག་བྱ། །གང་ཞིག་ཟུར་ཆག་སྒྲ་དང་སྒྲར་གྱུར་པ། །བརྗོད་པ་དེ་ཉིད་ཡེ་ཤེས་མ་ཡིན་ཞིང༌། །གང་ཞིག་འགྲོ་བ་དག་ལས་ཉི་ཚེ་བ། །དེ་ནི་ཐམས་ཅད་མཁྱེན་པའི་གསུང་མ་ཡིན། །ཞེས་དང༌། མདོར་བསྡུས་བཞི་པར། འདིར་མ་འོངས་པའི་དུས་ན་བྱིས་པའི་སྐྱེ་བོ་མིང་ཚིག་ཡི་གེ་ལ་རྟོན་པ་ལ་བརྟེན་པ་དག་གིས་རྒྱུད་ཐམས་ཅད་དུ་འདི་སྐད་བདག་གིས་ཞེས་སོགས་ཀྱིས་སངས་རྒྱས་ཀྱི་བཞུགས་གནས་ངེས་པར་བསྟན་པར་དེ་བཞིན་གཤེགས་པས་གསུངས་པར་གང་བརྗོད་པ་དེ་ནི་མ་ཡིན་ཏེ། གང་གི་ཕྱིར་ཆོས་སྟོན་པ་པོའི་སངས་རྒྱས་དོན་ལ་རྟོན་པ་ལ་བརྟེན་པ་ཉིད་ཀྱི་ཕྱིར་དང༌། སྡུད་པར་བྱེད་པ་པོ་རྣམས་ཀྱིས་ཀྱང་ཡུལ་སྣ་ཚོགས་ཀྱི་སྐད་གཞན་གྱིས་ཡང་དག་པར་བྱེད་པའི་ཕྱིར་རོ། །འདིར་གལ་ཏེ་འདི་སྐད་བདག་གིས་ཐོས་པ་ལ་སོགས་ལེགས་པར་སྦྱར་བའི་ཚིག་མགྲིན་པ་དང༌། རྐན་ལ་སོགས་པའི་འབད་རྩོལ་གྱིས་བསྐྱེད་པ་ཉི་ཚེ་བས་དེ་བཞིན་བཤེགས་པ་ཆོས་སྟོན་པར་བྱེད་པ་དེ་ལྟར་ན་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དུས་དུ་མར་ཡང་དེ་བཞིན་གཤེགས་
པས་བསྟན་པ་དང། སྡུད་པ་པོས་ཀྱང་བྲི་བར་མི་ནུས་ཏེ། ཉི་ཚེ་བ་ལེགས་པར་སྦྱར་བའི་ཚིག་གཅིག་པུ་མ་ཡིན་པའི་ཕྱིར་རོ། །འདིར་སྤྲུལ་པའི་སྐུ་མཐའ་ཡས་པ་མེད་པའི་ཕྱིར་མཐའ་ཡས་པ་མཐའ་ཡས་པའི་འཇིག་རྟེན་གྱི་ཁམས་རྣམས་སུ་མཐའ་ཡས་པ་མཐའ་ཡས་པའི་སེམས་ཅན་རྣམས་ཀྱི་སྒྲ་དག་གིས་ཅིག་ཆར་དུ་ཆོས་སྟོན་པ་ཡང་མེད་པར་འགྱུར་རོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་པར་བྱེད་པ་མེད་པའི་ཕྱིར། ཐམས་ཅད་མཁྱེན་པ་མ་ཡིན་པར་འགྱུར་ཏེ། དེ་ལྟ་མ་ཡིན་ནོ། །འདིར་སངས་རྒྱས་ཚད་མེད་པ་དང༌། ཆོས་ཚད་མེད་པ་དང༌། དགེ་འདུན་ཚད་མེད་པར་དེ་བཞིན་གཤེགས་པས་གསུངས་པ་འདི་ཡིས་ཕྱིར། ཆོས་སྟོན་པ་པོ་ཐམས་ཅད་མཁྱེན་པ་ནི་གཅིག་མ་ཡིན་ནོ། །ཐམས་ཅད་མཁྱེན་པའི་སྐད་གང་སེམས་ཅན་ཐམས་ཅད་ཀྱི་སྐད་རྣམས་དོན་རྟོགས་པར་བྱེད་པ་གཅིག་མ་ ཡིན་ནོ། །བཞུགས་པའི་གནས་ངེས་པར་བསྟན་པ་གཅིག་མ་ཡིན་ནོ། །དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དང༌། གསོལ་བ་འདེབས་པ་པོ་གཅིག་མ་ཡིན་ནོ། །འདིར་སེམས་ཅན་རྣམས་ཀྱིས་མོས་པ་སྣ་ཚོགས་ཀྱིས་དབང་གིས་ཐམས་ཅད་མཁྱེན་པ་དུ་མ་དང༌། ཐམས་ཅད་མཁྱེན་པའི་སྐད་དུ་མ་དང༌། བཞུགས་པའི་གནས་དུ་མ་དང༌། ཆོས་བསྟན་པ་དུ་མའོ། །
དེའི་ཕྱིར་དེ་བཞིན་གཤེགས་པས། མགྲིན་པ་དང་རྐན་ལ་སོགས་པའི་འབད་རྩོལ་གྱིས་བསྐྱེད་པའི་ལྷའི་སྐད་གཅིག་པུས་རྒྱུད་ཐམས་ཅད་བསྟན་པ་མ་ཡིན་ནོ། །ཞེས་དང༌། ཡང་དེ་ཉིད་དུ། བཅོམ་ལྡན་འདས་མཐའ་ཡས་པའི་ཆོས་སྟོན་པ་པོ་ཡིན་པ་འདིའི་ཕྱིར། འདི་སྐད་བདག་གིས་ཐོས་པ་ལ་སོགས་པའི་རྒྱུད་ཀྱི་རྒྱལ་པོ་ཐམས་ཅད་དུ་བཞུགས་པའི་གནས་ངེས་པར་བསྟན་ཅེས་སངས་རྒྱས་པ་རྣམས་ཀྱིས་བརྗོད་པར་མི་བྱའོ། །སེམས་ཅན་ཐམས་ཅད་ཀྱི་སྐད་ཀྱི་རང་བཞིན་ཐམས་ཅད་མཁྱེན་པའི་སྐད་མེད་པར་ལེགས་པར་སྦྱར་བའི་སྐད་ཉི་ཚེ་བ་གཅིག་པུ་འདི་ཡིས་ཡིན་ན་སངས་རྒྱས་ཀྱང་ཉི་ཚེ་བར་འགྱུར་རོ། །འཕགས་ཡུལ་འདིར་སྒྲ་སྨྲ་བ་པོ་མུ་སྟེགས་པ་མཁས་པ་མངོན་པའི་ང་རྒྱལ་དང་ལྡན་པ་རྣམས་མཐོང་ནས། ཇི་ལྟར་བྲམ་ཟེ་དང༌། ཁྱབ་འཇུག་པ་དང༌། ཞི་བ་པ་ལ་སོགས་པ་རྣམས་ཀྱིས་འདོད་པའི་ལྷ་ཚངས་པ་དང༌། ཁྱབ་འཇུག་དང༌། དྲག་པོ་ལ་སོགས་པ་རྣམས་ལེགས་པར་སྦྱར་བའི་སྨྲ་བ་པོ་ཡིན་པ་དེ་བཞིན་དུ་བདག་ཅག་གི་འདོད་པའི་ལྷ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་ལེགས་པར་སྦྱར་བའི་སྨྲ་བ་པོ་ཡིན་ནོ། །ཞེས་པ་ནི། སངས་རྒྱས་པ་བྱིས་པའི་བློ་ཅན་རྣམས་ཀྱི་བསམ་པ་སྟེ། འདིར་སངས་རྒྱས་དང་བྱང་ཆུབ་སེམས་དཔའ་དེ་དག་ཐམས་ཅད་
ཐམས་ཅད་མཁྱེན་པའི་སྐད་མེད་པར་ལེགས་པར་སྦྱར་བའི་སྐད་ཉི་ཚེ་བ་འདི་ཡིས་མ་ཡིན་ཏེ་སེམས་ཅན་ཐམས་ཅད་ཀྱི་སྐད་ཀྱིས་ཆོས་སྟོན་པར་བྱེད་པ་པོ་དང་ཡང་དག་པར་སྡུད་པར་བྱེད་པ་པོ་ཡིན་ནོ། །དེའི་ཕྱིར་སངས་རྒྱས་དང་བྱང་ཆུབ་སེམས་དཔའ་རྣམས་ནི་ལྷའི་སྐྱེ་བ་དང་འབྲེལ་བ་ཉི་ཚེ་བ་མ་ཡིན་ཏེ། སེམས་ཅན་སྣ་ཚོགས་ཀྱི་སྐད་ཀྱིས་ཆོས་སྟོན་པ་པོ་ཡིན་པའི་ཕྱིར་རོ། །ཞེས་དང༌། ཡང་དེ་ཉིད་ལས། སྒྲ་གཅིག་པུ་ལེགས་པར་སྦྱར་བའི་སྐད་ཀྱིས་མཐོ་རིས་སུ་འདོད་པ་འཇོའོ་ཞེས་པ་ནི་ལོག་པའི་ང་རྒྱལ་གྱི་ཟིལ་གྱིས་གནོན་པ་རྣམས་ཀྱི་བསམ་པ་སྟེ་ཐམས་ཅད་མཁྱེན་པའི་སྐད་མེད་པའི་ཕྱིར་རོ། །ཞེས་དང༌། འདིར་ཁྱབ་འཇུག་དང་དྲག་པོ་ལ་སོགས་པ་རྣམས་ཀྱིས་བསྟན་པའི་ཆོས་ཉི་ཚེ་བ་སེམས་ཅན་ཐམས་ཅད་ལ་བརྩེ་བ་དང་བྲལ་བ། འཁོར་བའི་སྡུག་བསྔལ་སྟེར་བར་བྱེད་པ། ལོག་པའི་ང་རྒྱལ་བསྐྱེད་པར་བྱེད་པ། རིགས་སུ་སྨྲ་བ་མངོན་པར་ཁེངས་པར་བྱེད་པ་དག་ལ་སངས་རྒྱས་པ་རྣམས་ཀྱིས་རྗེས་སུ་ཡི་རང་བར་མི་བྱའོ། །ཞེས་གསུངས་སོ། །སྒྲ་ཚིག་ཡི་གེ་ལ་རྟོན་པ་རྣམས་ལྟར་ན། དེ་རྣམས་ལ་སྙིང་པོ་རབ་མཆོག་དམ་པ་བྱེད་ནས་རྗེས་སུ་ཡི་རང་བར་བྱ་དགོས་པར་འདུག་སྟེ། དེ་རྣམས་དང་རྗེས་སུ་མཐུན་པའི་ཕྱིར་རོ། །གཞན་
ཡང་དེ་ཉིད་དུ། རེ་ཞིག་ཡུལ་གྱི་ཁྱད་པར་གཞན་ལྟ་ཞོག་གི །དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པ་འཕགས་ཡུལ་འདིར། བཅོམ་ལྡན་འདས་ཡོངས་སུ་མྱ་ངན་ལས་འདས་པར་གྱུར་པ་ན། སྡུད་པར་བྱེད་པ་པོ་དག་གིས་ཐེག་པ་གསུམ་གླེགས་བམ་ལ་བྲིས་ཏེ། དེ་བཞིན་གཤེགས་པས་ངེས་པའི་སྡེ་སྣོད་གསུམ་མ་ག་དྷཱའི་སྐད་ཀྱིས་སོ། །མདོ་སྡེ་ནི་སིནྡྷུའི་སྐད་ཀྱིས་སོ། །ཕ་རོལ་ཏུ་ཕྱིན་པའི་ཚུལ་དང༌། སྔགས་ཀྱི་ཚུལ་ནི་ལེགས་སྦྱར་གྱི་སྐད་ཀྱིས་སོ། །རྒྱུད་དང་རྒྱུད་གཞན་ནི་ལེགས་སྦྱར་དང༌། ཐ་མལ་བའི་སྐད་དང༌། ཟུར་ཆག་དང་ལེགས་སྦྱར་མ་ཡིན་པ་རི་ཁྲོད་པ་ལ་སོགས་པ་ཀླ་ཀློའི་སྐད་ཀྱིས་ཏེ། དེ་ལྟ་བུ་ལ་སོགས་པ་ཐམས་ཅད་མཁྱེན་པས་བསྟན་པའི་ཆོས་རྣམས་སྡུད་པར་བྱེད་པ་པོ་དག་གིས་བྲིས་སོ། །དེ་བཞིན་དུ་བོད་ཀྱི་ཡུལ་དུ་ཐེག་པ་གསུམ་བོད་ཀྱི་སྐད་ཀྱིས་བྲིས་ཏེ། རྒྱ་ནག་ཏུ་རྒྱ་ནག་གི་སྐད་ཀྱིས་སོ། །དེ་བཞིན་དུ་རྒྱ་ནག་ཆེན་པོ། པར་སི་ཀ །ཙམ་པ་ཀ །སྤྲེའུ་ཡི་ཡུལ། གསེར་ཞེས་བྱ་བ། ཏུག་མ། བུ་རམ་མའི་ཡུལ་གྱི་སྐད་ཀྱིས་སོ། །དེ་ལྟར་གྲོང་ཁྱེར་བྱེ་བའི་བདག་ཉིད་ཡུལ་དགུ་བཅུ་རྩ་དྲུག་རྣམས་སུ་དགུ་བཅུ་རྩ་དྲུག་གི་སྐད་ཀྱིས་སོ། །དེ་བཞིན་དུ་དུམ་བུ་བཅུ་གཉིས་དང༌། མཐོ་རིས་དང༌། མིའི་ཡུལ་དང༌། ས་འོག་རྣམས་སུ་སེམས་ཅན་སྣ་
ཚོགས་ཀྱི་སྐད་ཀྱིས་སྡུད་པར་བྱེད་པ་པོ་དག་གིས་ཐེག་པ་གསུམ་བྲིས་ཏེ། ཉན་ཐོས་རྣམས་ཀྱིས་ཉན་ཐོས་ཀྱི་ཐེག་པ་དང༌། རང་སངས་རྒྱས་སྣམས་ཀྱིས་རང་སངས་རྒྱས་ཀྱི་ཐེག་པ་དང༌། བྱང་སེམས་རྣམས་ཀྱིས་ཐེག་པ་ཆེན་པོ་ཕར་ཕྱིན་དང༌། ཐེག་པ་ཆེན་པོ་གསང་སྔགས་རྒྱུ་དང་འབྲས་བུ་བཅས་པའི་བདག་ཉིད་དེ། སྡུད་པར་བྱེད་པ་པོ་སྣ་ཚོགས་སེམས་ཅན་རྣམས་གདུལ་བར་བྱ་བའི་དོན་དུའོ། །སྡུད་པར་བྱེད་པ་སྣ་ཚོགས་ཀྱིས་ཡུལ་སྣ་ཚོགས་ཀྱི་སྐད་ཀྱིས་བྲིས་པའི་ལུང་དང་རིག་པ་འདིས། རྣམ་པར་དཔྱད་པས་ན་སངས་རྒྱས་བཅོམ་ལྡན་འདས་ཐམས་ཅད་མཁྱེན་པ་ཐམས་ཅད་མཁྱེན་པའི་སྐད་ཀྱི་ཆོས་སྟོན་པ་པོ་ཡིན་གྱི། ཁྱབ་འཇུག་དང་དྲག་པོ་ལ་སོགས་པ་གཞན་ནི་མ་ཡིན་ནོ། །ཅི་སྟེ་ཁྱབ་འཇུག་དང་དྲག་པོ་ལ་སོགས་པ་རྣམས་ཀྱི་ནང་ན་ཡོན་ཏན་འདི་དག་ཡོངས་སུ་རྫོགས་པ་འགའ་ཞིག་ཡོད་ན། དེ་ཡང་བདག་ཅག་གིས་རྣམ་པ་ཐམས་ཅད་དུ་ཕྱག་བྱ་བ་དང༌། མཆོད་པ་དང༌། བཀུར་བར་བྱ་བ་ཡིན་ནོ། །ཞེས་ལེགས་པར་གསུངས་པས་སོ། །དེར་མ་ཟད་གསང་བ་བསམ་གྱིས་མི་ཁྱབ་པའི་མདོ་ལས་ཀྱང༌། བཅོམ་ལྡན་འདས་སངས་རྒྱས་ནས་མྱ་ངན་ལས་མ་འདས་ཀྱི་བར་དུ་ལྕེ་རྐན་གྱིས་རྩོལ་བ་ལས་བྱུང་བའི་ཐ་ན་ཡིག་འབྲུ་གཅིག་ཀྱང་མ་གསུངས་སོ། །
དེའི་རྒྱུ་མཚན་དབུགས་འབྱུང་རྔུབ་མི་མངའ་ཞིང་རྣམ་པར་མི་རྟོགས་པས་སོ། །དེ་ལྟར་ཡིན་ཡང་སེམས་ཅན་གྱི་བསམ་པ་དང་མཐུན་པར་སྐད་མཐའ་ཡས་པས་ཐེག་པ་མ་ལུས་པ་ཐམས་ཅད་སེམས་ཅན་གྱི་སེམས་པ་བཞིན། སྟོན་པའི་སྒྲ་འབྱུང་སྟེ། ནམ་མཁའ་ཇི་སྲིད་ཁྱབ་པར་གསུང་གི་སྒྲས་ཁྱབ་ཅིང་ཆོས་སྟོན་པ་ཡིན་ཏེ། བྱ་རྒོད་ཕུང་པོའི་རི་ལས་བྱམས་པ་ལ་བརྟེན་ནས་དབྱངས་ཀྱི་དཀྱིལ་འཁོར་ཡོངས་སུ་དག་པ་ཞེས་བྱ་བའི་ཆོས་སྟོན་པའི་ཚེ། མོའུ་གལ་གྱི་བུས་གསུང་གི་མཐའ་དཔོག་པར་འདོད་ནས་འཇིག་རྟེན་གྱི་ཁམས་འོད་ཟེར་རྒྱལ་མཚན་དུ་ཕྱིན་པ་ན། དེ་བཞིན་གཤེགས་པ་འོད་ཟེར་རྒྱལ་མཚན་གྱིས་བཀའ་སྩལ་པ། འཇིག་རྟེན་གྱི་ཁམས་གང་གཱའི་ཀླུང་དགུ་བཅུ་རྩ་དགུའི་བྱེ་མ་སྙེད་ནས་ཁྱོན་འདིར་འོངས་སོ། །ནམ་མཁས་ཅི་ཙམ་ཁྱབ་པ་དེ་ཙམ་དུ། དེ་བཞིན་གཤེགས་པའི་གསུང་གིས་ཁྱབ་བོ། །ཞེས་གསུངས་པས་གདུལ་བྱའི་བསམ་པ་དང་མཐུན་པར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མ་ལུས་པར་འཆད་པ་ནི་གསུང་གི་གསང་བ་བསམ་གྱིས་མི་ཁྱབ་པའོ། །ཕལ་པོ་ཆེའི་བྱང་སེམས་ཆེན་པོ་ཀུན་ཏུ་བཟང་པོར་སྤྱོད་པའི་སྨོན་ལམ་ལས་ཀྱང༌། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང༌། །འགྲོ་བ་ཀུན་གྱི་སྒྲ་སྐད་ཅི་ཙམ་པར། །
ཐམས་ཅད་སྐད་དུ་བདག་གིས་ཆོས་སྟོན་ཏོ། །ཞེས་གསུངས་ཤིང༌། རྫོགས་པ་ཆེན་པོ་ལ་སོགས་པའི་རྒྱུད་ཀྱི་ཡི་གེ་དང༌། སྔགས་དང༌། སྒྲ་ཚིག་ཁ་ཅིག་ལེགས་པར་སྦྱར་བ་ལ་སོགས་པའི་རྒྱ་གར་གྱི་སྒྲ་སྐད་ཡི་གེ་དང་མ་མཐུན་ཡང་སྐྱོན་མེད་དོ། །སྤྱོད་འཇུག་ལས། ལུས་ཅན་ཀུན་གྱིས་བྱ་དང་ནི། །ཤིང་དང་འོད་ཟེར་ཐམས་ཅད་དང༌། །ནམ་མཁའ་ལས་ཀྱང་ཆོས་ཀྱི་སྒྲ། །རྒྱུན་མི་འཆད་པར་ཐོས་པར་ཤོག །ཅེས་པ་ལྟར། རང་བྱུང་གི་ཡེ་ཤེས་ཆོས་ཀྱི་སྐུ། ཆོས་ཉིད་དེ་བཞིན་ཉིད་ལས་མ་གཡོས་བཞིན་དུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་གཞོམ་དུ་མེད་པའི་རང་སྒྲ་ཡིན་པས་སཾ་སྐྲྀ་ཏའི་ཡི་གེ་ལ་སོགས་དང་འགལ་བའི་སྐྱོན་ནི་ཐམས་ཅད་མཁྱེན་པས་ཀྱང་མི་ཁེལ་ལོ། །ཁ་ཅིག་ནི་འཇིག་རྟེན་དང་བསྟན་བཅོས་གང་ལ་ཡང་མ་གྲགས་པར་དེ་བཞིན་གཤེགས་པའི་བརྡས་བཏགས་ནས་གསུངས་པ་ཡིན་ཏེ། སྒྲོན་གསལ་དུ། ཀོ་ཌ་ཀྵ་ལ་སོགས་པའི་སྒྲ། །དེ་བཞིན་གཤེགས་པའི་བརྡར་གྱུར་པ། །འཇིག་རྟེན་བསྟན་བཅོས་ལས་མ་གྲགས། །ཞེས་པས་རླུང་བཅུ་པོ་མིང་བཅུའི་བརྡའི་སྒོ་ནས་བཏགས་པ་ལྟ་བུ་ཡིན་པས་ཚིག་ལ་རྟོན་པ་ནི་སྙིང་པོ་མེད་པ་ཁོ་ནའོ། །ཟློས་པ་ལྟ་བུའི་ཚིག་ཁ་ཅིག་ཀྱང༌། དུས་འཁོར་དུ། ཐམས་ཅད་མཁྱེན་པ་
ཡེ་ཤེས་སྐུ་དང༌། ཞེས་པ་རྣམས་ཟློས་པ་གསུངས་པ་ལྟ་བུར་ཏེ། ཁྱབ་འཇུག་ལ་སོགས་པ་ཁ་ཅིག་གིས་ཐམས་ཅད་མཁྱེན་པ་ཉིད་དུ་བཏགས་པ་དང༌། ཉན་རང་དང་རྣམ་ཤེས་སྨྲ་བའི་སངས་རྒྱས་དང༌། ཡེ་ཤེས་ཀྱི་སྐུ་གཟུགས་ཅན་དུ་དགོས་པ་བསལ་བའི་ཕྱིར་དུ། ཐམས་ཅད་མཁྱེན་པ་དང༌། ཡེ་ཤེས་སྐུ་དང༌། ཉིན་མོར་བྱེད་པ་དང༌། པདྨ་འདབ་མ་རྒྱས་པའི་སྤྱན་ཞེས་པའི་སངས་རྒྱས་ཀྱི་མིང་ཟློས་པ་གསུངས་པ་ལྟ་བུ་སྟེ། སྐྱོན་མེད་ཀྱི་ཟློས་པ་ཡོད་པས་ཐམས་ཅད་དུ་སྐྱོན་ཡོད་པས་མ་ཁྱབ་བོ། །མིང་གི་མངོན་བརྗོད་སོགས་ཀྱང༌། དྲི་མེད་འོད་ལས། སྔགས་ཀྱི་ཚུལ་འདི་ལ་ཨེ་ཝཾ་ཉིད་མིང་མ་ཡིན་ཏེ། ངོ་བོ་གཅིག་ལ་མིང་དུ་མའོ། །མིང་མང་པོ་ཉིད་ཀྱི་ཕྱིར་མིང་གཅིག་ཁོ་ན་གཙོ་བོ་ཡིན་ཏེ། མིང་ཐམས་ཅད་ཀྱི་དངོས་པོ་གཅིག་གོ་བར་བྱེད་པའི་ཕྱིར་རོ། །དཔེར་ན་བུད་མེད་དང༌། མི་མོ་དང༌། ན་ཆུང་མ་རྣམས་ལས་བུད་མེད་གཅིག་པུ་གཙོ་བོའི་མིང་མ་ཡིན་ཏེ། ཐམས་ཅད་ཀྱིས་ཀྱང་ནུ་མ་སྐྲར་ལྡན་པའི་དངོས་པོ་གོ་བར་བྱེད་པའི་ཕྱིར་རོ། །ཞེས་གསུངས་པས། གཟའ་སྒྲ་གཅན་ལ་ཁྱབ་འཇུག་དང༌། ལྷ་ཁྱབ་འཇུག་ལ་སྐོས་རྗེ་དྲང་དཀར་དུ་བཏགས་པ་ལ་འགལ་བ་ཅི་ཡང་མེད་ལ། ལྷ་ཀླུ་འབྱུང་པོ་ཐམས་ཅད་ལ། རེ་རེ་ལ་ཡང་མིང་གི་རྣམ་གྲངས་མང་པོར་སྣང་
ཞིང༌། ཁ་ཅིག་ཡུལ་སོ་སོའི་འདོད་རྒྱལ་གྱི་སྒྲས་བཏགས་པ་ཡིན་ཏེ། རྒྱུ་སྐར་ཉེར་བརྒྱད་པོ་ལ་བསྟན་བཅོས་ཀྱི་སྐད་དང༌། ཡུལ་སོ་སོ་པས་བཏགས་པའི་མིང་གི་རྣམ་གྲངས་མང༌། དབང་ཕྱུག་ཆེན་པོ་གཅིག་པུ་ལ་ཡང༌། དབང་ཕྱུག་དང༌། ཕྱུགས་བདག་བདག །མགྲིན་སྔོན་དང༌། ཨུ་མའི་བདག་པོ་དང༌། གུ་ལང་དང༌། བདེ་བྱེད་དང༌། དྲག་པོ་ཆེན་པོ་ལ་སོགས་མང་བས་མིང༌གཅིག་ལ་ཞེན་པ་ནི་འཁྲུལ་ཚབ་ཆེ་ཞིང༌། ལར་ཡང་འདི་འདྲ་བའི་མིང་ཚིག་ལ་རྟོན་པ་ནི་སྙིང་པོ་མེད་པ་ཁོ་ནའོ། །དེ་ལྟར་ན་དོན་ལ་རྟོན་ཞིང་ཚིག་ལ་མི་རྟོན་པ་ནི་ཤེས་ལྡན་རྣམས་ཀྱིས་བསྒྲུབ་བྱའོ། །དེ་ལ་ལེགས་སྦྱར་གྱི་སྐད་ཀྱིས་སྐབས་འགའ་ཞིག་ཏུ་གསུངས་པ་ནི་དགོངས་པ་ཅན་ཏེ། འདི་ལྟར་ལྷ་རྣམས་ཀྱི་ཡུལ་དུ་ནི་ལྷ་རྣམས་ཡོངས་སུ་སྨིན་པར་བྱ་བའི་ཕྱིར་དང༌། འཕགས་པའི་ཡུལ་མ་ག་དྷཱར་ནི་སྒྲ་སྨྲ་བའི་དྲང་སྲོང་ཕྱི་རོལ་པ་རྣམས་ཡོད་པས་དེ་རྣམས་ཀྱི་ལེགས་སྦྱར་གྱིས་སྨྲ་ཞིང་མཁས་པའི་ང་རྒྱལ་དང་ལྡན་པ་རྣམས་འདུལ་བའི་ཕྱིར་དང༌། གཞན་ཡང་ནང་བའི་བྱིས་པ་ཁ་ཅིག་ཀྱང་དེ་རྣམས་ཀྱི་སྨྲ་བའི་རྗེས་སུ་འབྲངས་ནས། བདག་ཅག་གི་སྟོན་པ་སངས་རྒྱས་སྲས་བཅས་ཀྱིས་ཀྱང་ལེགས་སྦྱར་གྱིས་སྨྲ་བར་རིགས་སོ་སྙམ་དུ་རྟོག་པ་རྣམས་ལ་གསུངས་པའོ། །དེ་ལྟར་སངས་
རྒྱས་ཐམས་ཅད་ཀྱིས་ཀྱང་ཡུལ་སོ་སོའི་སེམས་ཅན་རྣམ་པ་སྣ་ཚོགས་པ་སོ་སོའི་སྐད་ཀྱིས་བསྟན་ནས། སྡུད་པ་པོ་རྣམས་ཀྱིས་ཀྱང་ཡུལ་སོ་སོའི་སྐད་དང༌། བརྡ་དང་སྦྱར་ནས་བསྡུས། པདྨ་འབྱུང་གནས་དང་བི་མ་ལ་མི་ཏྲ་ལ་སོགས་པས་ཀྱང་བོད་ལ་སོགས་པའི་ཡུལ་སོ་སོའི་བརྡ་དང༌། སྐད་དང༌། སྒྲ་དང་། མིང་ཚིག་གི་ཡི་གེ་དང་བསྟུན་ནས་བསྒྱུར་ཞིང་བཤད་པས། ཉི་ཚེ་བའི་མིང་ཚིག་ཡི་གེ་ལ་བརྟེན་པའི་ཕྱོགས་ལྷུང་ཐམས་ཅད་ཕྱོགས་མེད་རིས་མེད་ཀྱི་མཁས་པ་རྣམས་ཀྱིས་དོར་ནས་དོན་ལ་རྟོན་པར་བྱང་ཆུབ་སེམས་དཔའི་འགྲེལ་པ་སྐོར་གསུམ་ལ་སོགས་པའི་གསུང་རབ་ཐམས་ཅད་དུ་དགོངས་པ་གཅིག་དང་དབྱངས་གཅིག་གིས་གསུངས་པ་རྣམས་ལ་ལྟོས། ཡང་དཀྱིལ་འཁོར་གྱི་ལྷ་ལ་བོད་ཀྱི་ལྷ་འདྲེ་བཅུག་པ་མི་འཐད་ཟེར་བ་ལ། དཀྱིལ་འཁོར་གྱི་འཁོར་ལ་ལྷ་འདྲེ་རྣམས་བསྒྲིགས་པས་ལོག་པ་ཡིན་ན། དུས་འཁོར་ལ་སོགས་པའི་བླ་མེད་ཀྱི་རྒྱུད་མང་པོ་དང༌། རྣལ་འབྱོར་གྱི་རྒྱུད་དཔལ་མཆོག ། ཆོས་དབྱིངས་གསུང་དབང༌། གནོད་སྦྱིན་ཤིང་རྟ། སྐུའི་རྒྱུད་རྡོ་རྗེ་གཙུག་ཏོར་གཙུག་དགུ་སོགས་མང་པོར་སྲིད་པ་གསུམ་གྱི་ལྷ་འདྲེ་མང་པོ་བཀོད་པར་བཤད་ཅིང༌། སྤྱོད་རྒྱུད་ལས། ཕྱི་ཡི་དཀྱིལ་འཁོར་ཕྱི་རོལ་དུ། །གླིང་བཞི་པོ་ཡང་བྲི་བར་བྱ། །འཛམ་བུ་
གླིང་དུ་ཚངས་པ་བྲི། །བྱང་ཕྱོགས་སུ་ནི་དབང་ཕྱུག་ཆེ། །ཤར་དང་ནུབ་ཀྱི་གླིང་དུ་ནི། །བརྒྱ་བྱིན་གཏོགས་འདོད་ཐམས་ཅད་ཀྱང༌། །འཁོར་དང་བཅས་པ་བྲི་བར་བྱ། །གཞན་དག་ཀྱང་ནི་དེ་བཞིན་ཏེ། །ལྷ་མིན་དྲི་ཟ་ནམ་མཁའ་ལྡིང༌། །གནོད་སྦྱིན་སྲིན་པོ་ལྟོ་འཕྱེ་ཆེ། །འབྱུང་པོ་ཡི་དྭགས་འདྲེ་རྣམས་དང༌། །ཀླུ་དང་སྦལ་སྦྲུལ་རི་རྣམས་དང༌། །རྒྱལ་པོ་བཞི་རྣམས་བྲི་བར་བྱ། །གཟའ་དང་སྐར་མ་རྒྱུ་སྐར་དང༌། །ཁྲོ་བོ་མ་རུངས་འཚེ་བ་ཡི། །བགེགས་དང་བྱི་ན་ཡ་ག་རྣམས། །སེམས་ཅན་ཀུན་ལ་ཕན་བྱེད་པའི། །དྲང་སྲོང་བསྐལ་པ་ཆེན་པོ་རྣམས། །མཁའ་འགྲོ་མ་དང་བུད་མེད་བྲི། །དེ་བཞིན་སྲིང་མོ་རྣལ་འབྱོར་མ། །འབྱུང་བ་བཞི་ཡི་ལྷ་ཆེན་པོ། །ཁྱིམ་དང་རི་ལ་གནས་པ་དང༌། །ཤིང་དང་ཀུན་དགའི་ནགས་ལ་སོགས། །དུར་ཁྲོད་གྲོང་ཁྱེར་གནས་པ་རྣམས། །མིང་དང་བརྡ་འམ་ཡང་ན་ནི། །ཐིག་ལེ་རྣམས་ཀྱང་བྲི་བར་བྱ། །ཞེས་གསུངས་པས། ཐག་བཟང་རིས་ནི་ལྷ་མིན་དང༌། །དྲི་ཟ་ཟུར་ཕུད་ལྔ་པ་དང༌། །ནམ་མཁའ་ལྡིང་གསེར་མིག་ཅན་དང༌། །གནོད་སྦྱིན་ཀུ་བེ་ར། སྲིན་པོ་ལ་མགྲིན་བཅུ་དང༌། ལྟོ་འཕྱེའི་རྒྱལ་པོ་ས་བདག་སྔོན་པོ་དང༌། འབྱུང་པོ་དབང་ལྡན་དང༌། ཡི་དྭགས་དང༌། གཤིན་རྗེ་དང༌། འདྲེ་ནི་དྲུག་སྟེ།
ལོག་འདྲེན་ནག་པོ་དང༌། ཆུ་ལྟར་གཡོ་དང༌། གཉེ་ཐུང་གནས་གནོན། སྤྱིའུ་ཚུགས་ཐུར་ལྟ་སོགས་དྲུག་དང༌། ཁ་ཅིག་གིས་ཡི་དྭགས་ཕྱི་ནང་སྒོ་ཁུད་ཅན་རྣམས་ལ་བཞེད་པ་དང༌། འབྱུང་པོའི་འཁོར་ལ་གདོན་ཆེན་བཅོ་ལྔ་དང༌། ཁྲོ་བོ་མ་རུངས་འཚེ་བ་ནི་དམྱལ་སྲུང་རྣམས་དང༌། བུད་མེད་ནི། འབྲུ་འབྲེལ་རྒན་པོ་སོགས་ནས་ཁ་རག་ཁྱུང་བཙུན་རྡོ་རྗེ་ཡུམ་གཅིག་མ། ཤ་མེད་གངས་དཀར་རྡོ་རྗེ་སྤྱན་གཅིག་མ་སོགས་བདུན་བོད་ཀྱི་ཡུལ་ན་གནས་པ་བཀོད་པ་དང༌། དེ་ལ་སོགས་པའི་འབྱུང་པོ་ལྷ་འདྲེ་མཐའ་ལས་འདས་པ་ཞིག་བསྒྲིགས་པར་འདུག་པ་དང༌། སྤྱོད་རྒྱུད་ཀྱི་འཁོར་ལོས་སྒྱུར་བའི་སྐབས་སུ་ཡང༌། དེ་ཡི་ཕྱི་རོལ་དམྱལ་ཀུན་དང༌། །འདོད་ཆགས་ལ་སོགས་བྱོལ་སོང་བྲི། །ཞེས་གསུངས་པས། ངན་སོང་གསུམ་དང༌། དུག་གསུམ་གྱི་མཚན་མ་རྣམས་དང༌། ཕྱི་རོལ་གྱི་ཕྱོགས་མཚམས་རྣམས་སུ་རིགས་དྲུག་གི་འགྲོ་བ་པ་རྣམས་ཀྱང་བཀོད་པར་གསུངས་ཤིང༌། མཁའ་འགྲོ་རྒྱ་མཚོར་ཡང༌། འཇིག་རྟེན་གྱི་འབྱུང་པོ་མང་པོ་དང༌། དུར་ཁྲོད་བརྒྱད་དུ་དམྱལ་སྲུང་གི་གཤིན་རྗེ་རྣམས་ཀྱང་དགོད་པར་བཤད་པས་རྒྱུད་དེ་རྣམས་དང༌། དེ་དག་གི་ཆོ་ག་རྣམས་ཀྱང་ལོག་པར་འགྱུར་རོ། །དེས་ན་སྲིད་པ་གསུམ་གྱི་འབྱུང་པོ། མ་མོ། མཁའ་འགྲོ། ཤ་ཟ། སྲིན་པོ། གནོད་
སྦྱིན་ལ་སོགས་པའི་སྡེ་བརྒྱད་དང༌། དབང་ཕྱུག་ཆེན་པོ་ལ་སོགས་པའི་འཇིག་རྟེན་གྱི་དྲེགས་པ་ཅན་གྱི་ལྷ་འདྲེ་རྣམས་དཀྱིལ་འཁོར་གྱི་འཁོར་དུ་བཞག་ནས་གཏོར་མ་བྱིན་ཏེ་ལས་ལ་བསྐུལ། བསྟན་པ་བསྲུང་བར་བཀའ་བསྒོ་བ་རྣམས་བྱེད་པ་ལ་སྐྱོན་དུ་བལྟ་ན་ནི། སྔགས་གསར་རྙིང་གཉིས་ཀྱི་རྒྱུད་སྡེ་མཐའ་ཡས་པ་ཅིག་དོར་བ་མིན་ལ་དེ་དག་མ་བཤད་པའི་དཀྱིལ་འཁོར་སྲིད་ཙམ་མོ། །གལ་ཏེ་བོད་འདྲེ་ཡིན་པས་དཀྱིལ་འཁོར་ལ་བཀོད་དུ་མི་རུང་ན་ནི། རྒྱ་འདྲེ་ཡང་བཀོད་དུ་མི་རུང་དགོས་ཏེ། སྲིད་གསུམ་ཁྱབ་པའི་ལྷ་འདྲེ་ལ་རྒྱ་བོད་ཁྱད་མེད་པའི་ཕྱིར་རོ། །བདེ་མཆོག་རྩ་རྒྱུད་དུ། ཐམས་ཅད་བླ་མའི་གནས་ལ་སོགས། །མཁའ་འགྲོ་མས་ནི་ཐམས་ཅད་ཁྱབ། །ཅེས་པས། རླུང་གི་དཀྱིལ་འཁོར་ཚངས་པའི་འཇིག་རྟེན་མན་ཆད་དང༌། ཁྱད་པར་འཛམ་བུ་གླིང་གི་རྒྱ་གར། རྒྱ་ནག ། ལི་ཡུལ། བལ་ཡུལ། ཨོ་རྒྱན། ཏ་ཟིག་བོད་ལ་སོགས་པ་ཐམས་ཅད་དུ་མཁའ་འགྲོ་མ་དང༌། ལྷ་འདྲེས་ཁྱབ་པར་བཤད་པས། ཁྱོད་རང་ལྟར་ན་ནི། བདེ་མཆོག་གི་དཀྱིལ་འཁོར་སྒོམ་པའི་ཚེ་ན། ཧི་མ་ལ་ཡར་ཁ་བའི་རི་ཏི་སེར་གནས་པའི་དཔའ་བོ་མིག་མི་བཟང་དང༌། མཁའ་འགྲོ་མ་བྱ་གདོང་མ་ལ་སོགས་ཀྱང་བསྒོམ་པ་དང་བཀོད་དུ་མི་རུང་དགོས་ཏེ། བོད་དུ་
གནས་པའི་ཕྱིར་རོ། །བོད་འདྲེ་བཀོད་དུ་མི་རུང་ན། སྦྱོང་རྒྱུད་ཀྱི་འདྲེ་དྲུག་དང༌། ཁྱིམ་དང༌། རི་དང༌། གོང་དང༌། དུར་ཁྲོད་དང༌། ནགས་ཚལ་དང༌། འབྱུང་བ་བཞིའི་ལྷ་རྣམས་ཀྱང༌། རྒྱ་གར་གྱི་རི་ཁྱིམ་གྲོང་ལ་གནས་པའི་ལྷ་འདྲེ་རྣམས་མིན་པ་བོད་དུ་གནས་པའི་རི་ཁྱིམ་ལ་གནས་པ་རྣམས་ནི་མི་རུང་བའི་སྒྲུབ་བྱེད་བསྟན་དགོས་སོ། །གཞན་ཡང་བོད་ཀྱི་ཚེ་རིང་མ་དཔོན་གཡོག་དང༌། བསྟན་མ་བཅུ་གཉིས་ལ་སོགས་པ་ཐམས་ཅད་ཀྱང་བོད་དུ་གནས་ཀྱང༌། རྒྱ་གར་དང་ཨོ་རྒྱན་ལ་སོགས་པ་ཐམས་ཅད་དུ་ཁྱབ་པར་རྒྱུ་ཞིང་ཕན་ཚུན་དུ་ཚོགས་འཁོར་བགྲོད་པ་ལ་སོགས་མང་དུ་བཤད་པ་རྒྱ་གར་གྱི་ལྷ་འདྲེ་དཀྱིལ་འཁོར་ལ་བསྒྲིག་ཏུ་རུང་ཞིང༌། བོད་འདྲེ་མི་རུང་བའི་ཤེས་བྱེད་ཅི་ཡང་མེད་དོ། །དེ་ཡང་འཇིག་རྟེན་གྱི་ལྷ་འདྲེ་རྣམས་སྔོན་སངས་རྒྱས་ཀྱིས་དམ་ལ་བཞག་ནས་སྲུང་མར་ཁས་བླངས་པ་དང༌། ཁ་ཅིག་ནི་པདྨ་འབྱུང་གནས་ལ་སོགས་པས་དམ་ལ་བཏགས་ནས་སྲོག་སྙིང་ཕུལ་བས་དམ་ཚིག་བྱིན། དབང་བསྐུར་ནས་སྤངས་རྟོགས་ཀྱི་ཡོན་ཏན་མང་པོ་རྫོགས་ཀྱང་ཆ་ལུགས་དེ་ཉིད་ཀྱིས་བསྟན་པ་སྲུང་བར་མཛད་ཅིང་དཀྱིལ་འཁོར་ལ་བཞག་ནས་སྲུང་མར་བཀའ་བསྒོས་གཉེར་ཏེ། ལས་སྒྲུབ་ཅིང་འཁོར་དུ་གནས་པ་ལ་སྐྱོན་མེད་དོ། །སྤྱིར་ཡང་གདུལ་བྱའི་སྣང་བ་ལ་དཀྱིལ་འཁོར་གྱི་གཙོ་བོ་འཇིག་
རྟེན་ལས་འདས་པ་དང༌། འཁོར་འཇིག་རྟེན་པའི་ལྷ་འདྲེའི་ཆ་ལུགས་སུ་སྣང་བའི་ཚུལ་སྟོན་པ་ལ་སྐྱོན་དུ་བལྟ་ན། རྒྱུད་དང་སྒྲུབ་དཀྱིལ་མཐའ་ཡས་པ་ཅིག་དོར་དགོས་པར་འགྱུར་རོ། །གཞན་ཡང་བོད་འདྲེ་དཀྱིལ་འཁོར་དུ་བཞག་པ་ལ་སྐྱོན་དུ་བྱེད་ན། རྒྱུད་སྡེ་རྣམས་ནས་རྒྱ་བོད་ལ་སོགས་ཡུལ་སོ་སོའི་མི་མ་ཡིན་དང༌། འཇིག་རྟེན་པའི་ལྷ་འདྲེ་རྣམས་ཀྱི་མིང༌། རྡོ་རྗེ་གསུམ་དང་སྭཱ་ཧཱ་ལ་སོགས་པའི་བར་དུ་གཏེམ་ནས་བྱིན་གྱིས་བརླབས་ཏེ། འཇིག་རྟེན་གྱི་དངོས་གྲུབ་སྟེར་བ་སོགས་བཤད་པ་རྣམས་ལའང༌། བོད་ཀྱི་ཡུལ་དུ་གནས་པའི་ལྷ་འདྲེ་རྣམས་ཀྱི་མིང་སྤེལ་ནས་ལས་སྒྲུབ་པ་སོགས་ཀྱང་མི་འཐད་དམ། དེ་མི་འཐད་ན་དུས་འཁོར་རྒྱུད་འགྲེལ་སོགས་རྣམས་ཀྱང་ལོག་པར་འགྱུར་རོ། །དེས་ན་གདུལ་བྱའི་སྣང་བ་ལ་འདུལ་བྱེད་ཀྱི་ལྷ་ཚོགས་ཀྱང༌། གདུལ་བྱ་ལྷ་འདྲེ་དེ་དང་མིང་དང༌། གཟུགས། ཆ་ལུགས་མཐུན་པར་བསྟན་པ་རྣམས་ལ་འགལ་བར་བཟུང་བ་ནི་གཏོལ་མེད་ཀྱི་ཚིག་ཡང་དག་པའོ། །སངས་རྒྱས་ཀྱི་གཟུགས་སྐུ་སྒྱུ་འཕྲུལ་རོལ་པའི་རྣམ་འཕྲུལ་མིག་འཕྲུལ་ལྟ་བུ་གང་ལ་གང་འདུལ་དུ་བསྟན་པ་ལ་སྐུར་པ་བཏབ་པ་ཁོ་ནའོ། །༢ གསང་སྔགས་བསྟན་པའི་སྣོད་མ་ཡིན་པའི་འཕགས་པ་ཉན་ཐོས་དང༌། རང་སངས་རྒྱས་ཐམས་ཅད་ཀྱི་མགོ་བྲེགས་ཤིང༌། གསང་བ་བསྟན་པ་
གཞན་ལ་སྒྲོགས་པས་ས་བཅུའི་བྱང་ཆུབ་སེམས་དཔའ་ཐམས་ཅད་ཀྱི་ཡང་མགོ་བྲེགས་ནས་དཔལ་ཆེན་པོའི་སྐུ་ལ་བརྒྱན་ཟེར་བ་སོགས་དོན་ལ་རྟོན་པའི་མཚན་ཉིད་མི་ཤེས་པ། ཚིག་གི་སྒྲ་ཙམ་སྒྲ་ཇི་བཞིན་པར་འཛིན་པའི་ངན་སྨྲས་བྱེད་ཅིང་བསྐྱེད་རིམ་གྱི་ཆོ་ག་ལོག་པ་མཐའ་ཡས་པ་འདུག །ཅེས་པ་ལ། འདི་རྣམས་ཕལ་ཆེར་རྒྱུད་འདིར་བཤད་ཀྱི་ངེས་པ་ཁུངས་དང་བཅས་པ་ཡང་མི་སྣང་བས། རྙིང་མའི་རྒྱུད་གཞུང་ཁུངས་མ་རྣམས་ནས་བཤད་པའི་ངེས་པ་མེད་ལ། གལ་ཏེ་འདི་འདྲའི་ཚིག་བྱུང་ཡང་བསྐྱེད་རིམ་ནོར་པར་ཇི་ལྟར་འགྱུར་ཏེ། རྒྱུད་ཐམས་ཅད་རྡོ་རྗེའི་ཚིག་གིས་སྦས་ཏེ་དགོངས་པ་ཅན་དུ་གསུངས་པ་དང༌། མདོ་བསྟན་བཅོས་ཕལ་ཆེར་ལྡེམ་པོར་དགོངས་ཏེ་གསུངས་པ་རྣམས་ལ་སྒྲ་ཇི་བཞིན་པར་བཟུང་ནས་ལོག་པར་སྒྲུབ་ན་ཀྱེ་རྡོ་རྗེ་ལས། དེ་བཞིན་གཤེགས་པ་ལྔ་བསྲེག་ཅིང༌། །སྤྱན་ལ་སོགས་པ་ཡང་བསྲེག་སྟེ། །ཞེས་དང༌། དུས་འཁོར་རྩ་རྒྱུད་དུ་ཡང༌། སངས་རྒྱས་ལྷ་མོ་བཅུ་གསད་ནས། །ཞེས་དང༌། ཀྱེ་རྡོ་རྗེ་ལས། ཁྱོད་ཀྱིས་སྲོག་ཆགས་གསད་པར་གྱིས། །མ་བྱིན་པར་ཡང་ཁྱོད་ཀྱིས་ལོངས། །རྫུན་གྱི་ཚིག་ཀྱང་སྨྲ་བར་གྱིས། །ཕ་རོལ་བུད་མེད་བསྟེན་པར་གྱིས། །ཞེས་དང༌། རྡོ་རྗེ་གུར་ལས། རྡོ་རྗེ་སེམས་དཔའ་ཞེ་སྡང་ཆེ། །ཐུབ་པ་རྣམ་པར་སྣང་མཛད་རྨོངས། །འདོད་
ལ་ཞེན་པ་འཇིག་རྟེན་བདག །སེར་སྣ་རྡོ་རྗེ་སྣང་བྱེད་དོ། །ཡོད་ཡོད་སྐྱོན་ནི་ཐམས་ཅད་བྱེད། །འདྲེན་པ་ལྔ་ནི་སྐྱོན་ལྡན་ནོ། །ཞེས་སངས་རྒྱས་རིགས་ལྔ་ནི་ཉོན་མོངས་པ་དུག་ལྔའི་སྐྱོན་དང་ལྡན་པར་བཤད་པ་དང༌། སངས་རྒྱས་དངོས་གྲུབ་འདོད་པ་ཡིས། །སྟོབས་ཀྱིས་སངས་རྒྱས་ཕུར་བུས་གདབ། །ཅེས་དང༌། གལ་ཏེ་དངོས་གྲུབ་མི་སྟེར་ན། །རྡོ་རྗེ་སེམས་དཔའ་གསད་པར་བྱ། །ཞེས་དང༌། ཕྱག་རྒྱ་ཆེན་པོའི་ཐིག་ལེའི་རྒྱུད་ལས། སྲོག་གཅོད་པ་ཡི་མཆོད་སྦྱིན་ནི། །འབད་པས་དེ་རུ་དབུལ་བར་བྱ། །ཞེས་དང༌། སྲོག་གཅོད་པ་ཡི་མཆོད་སྦྱིན་ནི། །མཆོག་གི་མཆོག་ནི་ཡང་དག་རྙེད། །ཅེས་དང༌། མཐར་ཕྱག་རྒྱ་ཆེན་པོའི་རང་བཞིན་བཤད་པ་ཐོས་ནས་འཁོར་མཁའ་འགྲོ་རྣམས་ཀྱིས་བསྐོར་བ་དང་ཕྱག་བྱས་ཏེ། བཅོམ་ལྡན་འདས་ལ་ཁྲག་དྲོན་མོས་མཆོད། ཅེས་སོགས་དང༌། རྒྱུད་གསང་བ་འདུས་པ་ལས། སྲོག་གཅོད་པ་ཡི་སེམས་ཅན་གང༌། །རྫུན་དུ་སྨྲ་ལ་དགའ་བ་དང༌། །གཞན་གྱི་ནོར་ལ་ཆགས་པ་དང༌། །རྟག་ཏུ་འདོད་པ་སྤྱོད་པ་གང༌། །བཤང་ལྕི་ཟས་སུ་ཟ་བ་སྟེ། །དེ་དག་སྒྲུབ་པའི་སྣོད་དུ་འགྱུར། །ཅེས་དང༌། མ་དང་སྲིང་མོ་བུ་མོ་ལ། །འདོད་པ་བས་ནི་མཉེས་བྱས་ན། །ཐེག་ཆེན་མཆོག་གི་ཆོས་ཉིད་ཀྱི། །དངོས་གྲུབ་རྒྱ་
ཆེན་དེས་ཐོབ་བོ། །ཞེས་དང༌། དེ་བཞིན་གཤེགས་པའི་ཚོགས་གསད་ན། །དངོས་གྲུབ་རབ་མཆོག་ཐོབ་པར་འགྱུར། །དེ་བཞིན་གཤེགས་དང་བདག་གི་ལུས། །བླ་མ་བཤང་དང་ལྕི་བས་མཆོད། །ཅེས་དང༌། འདི་ནི་གསུངས་མ་ཐག་ཏུ་ཡང༌། །སངས་རྒྱས་གྲགས་པ་ཆེན་པོ་ཀུན། །བརྒྱལ་ཞིང་རབ་ཏུ་འཇིགས་གྱུར་ནས། །རྡོ་རྗེའི་སྐུ་ནི་རྗེས་སུ་དྲན། །སྔགས་རྣམས་ཀྱིས་ནི་སྦྱོར་བ་དང༌། །རྡོ་རྗེ་བསྐྲད་པའི་ལས་རྣམས་ལ། །སངས་རྒྱས་ཉིད་ཀྱི་གསུང་དག་ཀྱང༌། །ཚུལ་གཞན་བྱས་ན་བསྐྲོད་པར་འགྱུར། །ཅེས་དང༌། སངས་རྒྱས་བྱང་ཆུབ་སེམས་དཔའ་དང༌། །སྐྱེ་བོ་གདུག་པ་གཞན་དག་ཀྱང༌། །སྔགས་འདིས་སྐྲག་པར་བྱས་ནས་ནི། །འཆི་བར་འགྱུར་བའང་གདོན་མི་ཟ། །ཞེས་དང༌། དུས་འཁོར་ལས། ངེས་པར་རྡོ་རྗེའི་རིགས་དག་ལ་ནི་སྲོག་གཅོད་བྱས་ཏེ་རལ་གྲི་ལ་ཡང་བདེན་པ་མིན་པའི་ཚིག །རིན་ཆེན་རིགས་ལ་གཞན་ནོར་འཕྲོག་བྱ་མཆོག་གི་པདྨའི་རིགས་ཉིད་ལ་ཡང་གཞན་གྱི་བུད་མེད་ཕྲོགས། ཞེས་སོགས་ཤིན་ཏུ་མང་བ་དག་རྒྱུད་རྣམས་སུ་རྡོ་རྗེའི་ཚིག་གིས་སྦས་ཏེ་བསྟན་པ་རྣམས་དང༌། མདོ་རྣམས་སུ་ཡང༌། ཕ་དང་མ་གཉིས་གསད་བྱ་ཞིང༌། །རྒྱལ་པོ་ཡུལ་འཁོར་བཅས་བཅོམ་ན། །མི་དེ་དག་པར་འགྱུར་བ་ཡིན། །ཞེས་པ་ལ་སོགས་ཤིན་ཏུ་
མང་བས། ཚིག་དེ་དག་འབྱུང་བའི་རྒྱུད་གཞུང་རྣམས་དང་དེ་དག་ནས་བཤད་པའི་བསྐྱེད་རྫོགས་ཀྱི་ཆོ་ག་རྣམས་ལོག་པར་མི་འགྱུར་རོ། །༢ སོ་སྐྱེ་ལ་འདི་ལྟར་སྣང་བའི་རི་རྭ་བ་ཁྱིམ་ལ་སོགས་པ་ལས་ཀྱི་འཁྲུལ་སྣང་འདི་ཐམས་ཅད་ཆོས་ཉིད་ཆོས་དབྱིངས་དོན་དམ་པའི་བདེན་པ། སངས་རྒྱས་ཀྱི་ཡེ་ཤེས་མཐར་ཐུག་པ་དེ་ཉིད་འདི་ལྟར་སྣང་བ་ཡིན་ཟེར་བ་ལ་སོགས་པ་ལྟ་བའི་ནོར་བ་དང༌། ཞེས་པ་ལ། སྤྱིར་རྫོགས་པ་ཆེན་པོ་ལ་ཡང་སྡེ་གསུམ་སྐོར་བཞི་ལ་སོགས་པའི་རྣམ་གྲངས་མཐའ་ཡས་པ་ཞིག་ཡོད་པ་ལས་གསང་བ་མན་ངག་གི་སྡེ། ཡང་གསང་བླ་མེད་ཀྱི་སྐོར། བི་མ་སྙིང་ཐིག །མཁའ་འགྲོ་སྙིང་ཏིག །སངས་རྒྱས་མཉམ་སྦྱོར་སོགས་རྣམས་ནས་ནི། ཆོས་སྐད་འདི་ལྟ་བུ་རི་བོང་གི་རྭ་འདྲ་ཞིང༌། གཞི་ལྟ་བ་ཀ་དག་དང་ལྷུན་གྲུབ་ཀྱིས་གཤིས་ཀྱི་གནས་ལུགས་གཏན་ལ་དབབ། ལམ་སྒོམ་པ་ཁྲེག་ཆོད་དང་ཐོད་རྒལ་གྱིས་ཉམས་སུ་བླང་པས། མ་དག་པ་སྣོད་བཅུད་ཕུང་ཁམས་སྐྱེ་མཆེད་ཐམས་ཅད་དག་ནས་དྭངས་མ་ཡེ་ཤེས་ཀྱི་སྐུའི་རང་བཞིན་འབྲས་བུ་ཆོས་སྐུ་དང་གཟུགས་སྐུ་གཉིས་ཟུང་འཇུག་མངོན་དུ་མཛད་ནས། དོན་གཉིས་ལྷུན་གྲུབ་ཀྱི་མཛད་པ་ལ་གཞོལ་བ་སོགས་ཤིན་ཏུ་མང་ཡང༌། གསང་བ་བས་ཀྱང་གསང་ཆེན་གྱི་མན་ངག་ཡིན་
པས་གསང་སྒྲོགས་སུ་འགྲོ་བས་ཞིབ་ཏུ་མ་སྤྲོས་སོ། །ཕྱི་སེམས་སྡེ་སྣང་བ་སེམས་སུ་སྟོན་པའི་སྐོར་རྣམས་སུ་གལ་ཏེ་དེ་ལྟར་ཡོད་ན་ཡང་ནོར་བའི་ཁྱབ་པ་མེད་དེ། དེ་ལྟ་བུ་བྱུང་བས་ལྟ་བ་ནོར་ན་རྒྱ་བོད་ཀྱི་ཕྱག་ཆེན་པ་མང་པོ་དང༌། ཤངས་པ་བཀའ་བརྒྱུད། དྭགས་པོ་བཀའ་བརྒྱུད་པ། ཞི་བྱེད་པ་སོགས་ཐམས་ཅད་ཀྱིས་འདི་ལྟར་བཞེད་ཅིང་ཆོས་རྗེ་ཡང་དགོན་པས། འདི་ཀ་སྣང་བ་འདི་ཉིད་སོ་མ་ཉམས། མདོག་མ་བསྒྱུར་བ་འདི་ཀ་ཆོས་ཉིད་ཆོས་ཀྱི་སྐུའི་རོལ་པ་ཡེ་ཤེས་ཀྱི་སྣང་བ། ཞེས་དང༌། འཁྲུལ་ལུགས་ཕྱག་རྒྱ་ཆེན་པོ་ཞེས་གསུངས་ཤིང༌། འཁྲུལ་ལུགས་ཕྱག་རྒྱ་ཆེན་པོ་འདི་ཉིད་རྟོགས་པས་འཁོར་བ་ལ་ཁྱུར་མིད་བརྒྱབ། སངས་རྒྱས་ལ་ཉིང་འགུགས་བྱས། ཞེས་སོགས་མང་དུ་གསུངས་པ་དང༌། ས་སྐྱ་པའི་འཁོར་འདས་དབྱེར་མེད་ཀྱི་ཁྲིད་དང༌། སྦྱོར་དྲུག་པ་ཡང་འགྲོ་བའི་བླ་མ་གོང་མ་རྣམས་ཀྱིས་ཀྱང་ཕྱི་སྣང་བ་སྣ་ཚོགས་དམིགས་པ་དང་བཅས་པའི་སྟོང་གཟུགས་ཕྱག་རྒྱ་ཆེན་པོ་སོགས་མང་དུ་གསུངས་པ་དང༌། གཞན་ཡང་སེམས་ཅན་གྱི་ལས་སྣང་སྣ་ཚོགས་སྟོང་གཟུགས་ཕྱག་རྒྱ་ཆེན་པོ་ཞེས་སོགས་དང༌། དེར་མ་ཟད་རྒྱུད་དུ་ཡང༌། འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཉིད། །འཁོར་བ་སྤངས་ནས་གཞན་དུ་ནི། །
མྱ་ངན་འདས་པ་རྟོགས་མི་འགྱུར། །འཁོར་བ་གཟུགས་དང་སྒྲ་ལ་སོགས། །འཁོར་བ་ཚོར་བ་ལ་སོགས་པ། །འཁོར་བ་དབང་པོ་རྣམ་ཉིད་དེ། །འཁོར་བ་ཞེ་སྡང་ལ་སོགས་པ། །འདི་རྣམས་ཆོས་ནི་མྱ་ངན་འདས། །ཞེས་པ་དང༌། དབུས་མཐར། ཆོས་ཀྱི་དབྱིངས་ལས་མ་གཏོགས་པའི། །འདི་ལྟར་ཆོས་ཡོད་མ་ཡིན་ཏེ། །ཞེས་དང༌། ཤ་ཝ་རིས་ཀྱང༌། གང་གཱ་ལ་སོགས་ཆུ་ཀླུང་སྣ་ཚོགས་པ། །བ་ཚ་ཅན་གྱི་རྒྱ་མཚོར་རོ་གཅིག་ལྟར། །བཏགས་པའི་སེམས་དང་སེམས་བྱུང་སྣ་ཚོགས་ཀུན། །ཆོས་ཀྱི་དབྱིངས་སུ་རོ་གཅིག་ཤེས་པར་བྱོས། །ཞེས་དང༌། གཞན་ཡང་སེམས་སྣང་གཅིག་པུ་འདི་ཉིད་རིགས་དྲུག་གི་སེམས་ཅན་རྣམས་ལ་འཁྲུལ་པའི་སྣང་བ་སོ་སོའི་ལས་སྣང་སྣ་ཚོགས་སུ་མཐོང༌། རྣལ་འབྱོར་པ་རྣམས་ཀྱིས་ཉམས་ཀྱི་སྣང་བ་སྒྱུ་མའི་རྣམ་པ་ལྟ་བུར་གཟིགས། སངས་རྒྱས་བྱང་ཆུབ་སེམས་དཔའ་རྣམས་ཀྱི་དག་པ་ཡེ་ཤེས་ཀྱི་སྣང་བ་འབའ་ཞིག་ཏུ་གཟིགས་པར་བཤད་ཅིང་ཐམས་ཅད་ཆོས་ཀྱི་དབྱིངས་ལས་མ་འདས་པར་བཤད་པས། བཤད་སྒྲུབ་ཀྱི་བརྒྱུད་པ་དེ་རྣམས་དང་གཞུང་དང་གདམས་པ་དེ་རྣམས་ཀྱི་ལུགས་ཀྱི་ལྟ་བ་ཡང་ནོར་བར་མཛད་པ་ནི་ངོ་མཚར་ཆེའོ། །༢ སེམས་གློ་བའི་ནང་ན་གནས་ཤིང་རིག་པ་སྙིང་དང་ཀླད་པའི་ནང་ན། སྐུ་ཡུངས་འབྲུ་ཙམ་ལ་སྤྱན་ཕུལ་ཐག་ཙམ་གྱི་ལྷའི་གཟུགས་
སུ་གནས་པར་འདོད་པ་ལ་སོགས་པ་གཞིའི་ནོར་བ་ཡིན། ཞེས་པ་ལ། སྤྱིར་ལུས་ཅན་ཐམས་ཅད། སྒོས་རྡོ་རྗེ་ཐེག་པའི་རྟེན་དལ་འབྱོར་གྱི་ལུས་སྐྱོན་མེད་མཚན་ཉིད་དང་ལྡན་པ་ཐོབ་པ་ཐམས་ཅད་ལ་དངོས་པོ་གཤིས་ཀྱི་གནས་ལུགས། གཉུག་མ་སེམས་ཀྱི་རང་གདངས། བདེ་གཤེགས་སྙིང་པོའམ། ལྷན་ཅིག་སྐྱེས་པའི་བདེ་བ་ཆེན་པོ་དེ་ཉིད་གདོད་མ་ནས་རྒྱལ་བ་ཞི་ཁྲོའི་ལྷ་ཚོགས་ཀྱི་རང་བཞིན་ལུས་ལ་གནས་པར་འདོད་པ་དེ་གཞིའི་ནོར་བ་ཡིན་ན། དུས་གསང་བདེ་དགྱེས་ལ་སོགས་པའི་རྒྱུད་སྡེ་ནས་བཤད་པའི་གཉུག་མའི་ལྷ་སྔགས་ཐམས་ཅད་དང༌། ཁྱད་པར་དུ་འཁོར་ལོ་སྡོམ་པར་གདོད་མ་ནས་རང་བཞིན་ལྷུན་གྱིས་གྲུབ་པའི་ལུས་ཀྱི་དཀྱིལ་འཁོར་ཕུང་ཁམས་སྐྱེ་མཆེད་རྩ་ཐིག་རླུང་གསུམ་ལྷའི་རང་བཞིན་ཅན་དུ་གདོད་མ་ནས་གྲུབ་པར་བཤད་པ་ཐམས་ཅད་དང༌། བརྟག་གཉིས་ལས། རྟོག་པ་ཐམས་ཅད་རྣམ་པར་སྤངས། །ལུས་ལ་ཡེ་ཤེས་ཆེན་པོ་གནས། །དངོས་པོ་ཀུན་ལ་ཁྱབ་པའོ། །ལུས་ལ་གནས་ཀྱང་ལུས་སྐྱེས་མིན། །ཞེས་དང༌། དུས་འཁོར་ལས་ཀྱང༌། ལུས་ལས་མ་རྟོགས་གང་ཞིག་ཁྱབ་བྱེད་ཐར་པ་སྟེར་བའི་སངས་རྒྱས་འགའ་ཡང་ཡོད་མ་ཡིན། །སེམས་ཅན་རྣམས་ནི་སངས་རྒྱས་ཡིན་ཏེ་སངས་རྒྱས་ཆེན་པོ་གཞན་འདིར་འཇིག་རྟེན་ཁམས་ན་ཡོད་མ་ཡིན། །
ཞེས་དང༌། དྲི་མེད་འོད་ལས། འདིར་སེམས་ཅན་ཐམས་ཅད་ཀྱི་སྙིང་གི་ནང་དུ་གནས་པ་ནི་ཡེ་ཤེས་སོ། །དེ་ཡང་གཞོམ་དུ་མེད་པའི་སྒྲ་སྟེ་ནཱ་དའི་མཚན་ཉིད་དོ། །ཞེས་དང༌། སཾ་བྷུ་ཊི་ལས། སྙིང་གའི་དབུས་གྱུར་པདྨ་ནི། །འདབ་མ་བརྒྱད་ནི་ལྟེ་བ་བཅས། །དེ་ཡི་དབུས་སུ་གྱུར་པའི་རྩ། །མར་མེ་ལྟ་བུའི་གཟུགས་ཅན་དེ། །ཆུ་ཤིང་མེ་ཏོག་ལྟ་བུའི་དབྱིབས། །ཁ་ནི་ཐུར་དུ་བལྟས་ནས་ཀྱང༌། །དེ་ཡི་དབུས་ན་དཔའ་བོ་ནི། །ཡུངས་དཀར་སྦོམ་པོ་ཚད་ཙམ་སྟེ། །ཧཱུྃ་གིས་ས་བོན་མི་ཤིགས་པ། །ཁ་བ་ལྟ་བུར་འཛག་པ་ཡིན། །བྷ་བན་ཏ་ཞེས་བཤད་པ་སྟེ། །ལུས་ཅན་རྣམས་ཀྱི་སྙིང་དགའ་བྱེད། །ཅེས་དང༌། ཤིན་ཏུ་མཛེས་པའི་རྩ་ལ་ནི། །བྱུང་བ་རྡུལ་བྲལ་ཞེས་བྱར་གྲགས། །དྲི་མེད་ཤེལ་དང་མཚུངས་པའི་འོད། །བྱང་ཆུབ་སེམས་ནི་འོད་གསལ་བ། །ཡེ་ཤེས་ལྔ་ཡི་ངོ་བོ་ཉིད། །ཡུངས་དཀར་སྦོམ་པོའི་ཚད་ཙམ་དང༌། །དེ་ཡི་དབུས་ན་གནས་པའི་ལྷ། །མི་གསལ་གསལ་བའི་རང་བཞིན་ཅན། །ཆ་མེད་མཆོག་ཏུ་ཕྲ་བ་སྟེ། །ཐིག་ལེའི་གཟུགས་ཅན་ཡིད་ཀྱི་དངོས། །གཟི་བརྗིད་ཆེན་པོའི་འོད་དང་ལྡན། །རྟག་ཏུ་སྙིང་གི་དབུས་ན་གནས། །ཞེས་དང༌། རྒྱུད་རྣམས་ཀུན་གྱི་རྩ་བ་སྟེ། །གྲུ་གསུམ་ཤིན་ཏུ་ཡངས་པའི་གཟུགས། །སེམས་ཅན་ཀུན་གྱི་ཐུན་
མོང་བ། །ལྷ་མིན་ལྷར་བཅས་ཚངས་སོགས་ཀྱི། །གནས་སུ་དེ་ནི་གྱུར་པ་སྟེ། །ཀུན་རྫོབ་ཚུལ་དུ་རང་བཞིན་གྱིས། །དེ་ཉིད་ཤེས་རབ་ཕ་རོལ་ཕྱིན། །དེ་ཉིད་ཡུལ་ལས་འདས་པ་སྟེ། །སྲོག་ཆགས་ཀུན་གྱི་སྙིང་ལ་གནས། །ཞེས་དང༌། གཉིས་མེད་རྣམ་རྒྱལ་ལས། སེམས་ཅན་ཀུན་གྱི་སྙིང་ལ་ནི། །ཐུགས་ཀྱི་གསང་བ་སྙིང་པོ་བཞུགས། །དེ་ཉིད་སྙིང་པོ་གསུམ་ལྡན་པ། །བདེ་གཤེགས་སྙིང་པོ་འཇུག་པ་ཉིད། །ཅེས་སོགས་རྒྱུད་སྡེ་རྣམས་ལ་ཤིན་ཏུ་མང་ཞིང༌། དེ་བཞིན་གཤེགས་པའི་སྙིང་པོའི་མདོར་ཡང༌། དེ་བཞིན་གཤེགས་པའི་སྤྱན་དང་ལྡན་པ། སེམས་ཅན་ཐམས་ཅད་ཀྱི་ལུས་ཀྱི་ནང་ན་ཇི་བཞིན་མི་གཡོ་བར་བཞུགས་སོ། །ཞེས་སོགས། མདོ་རྣམས་སུ་ཡང་མང་ཞིང༌། རྒྱུད་བླ་མ་ལས་ཀྱང༌། སངས་རྒྱས་པད་ངན་སྦྲང་རྩི་སྦྲང་མ་ལས། །སྤུན་པ་སྙིང་པོ་མི་གཙང་ནང་ན་གསེར། །ས་ལས་གསེར་དང་མྱུག་སོགས་འབྲས་ཆུ་དང༌། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང༌། །ས་ནང་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་སོགས་དང༌། དྭགས་པོ་བཀའ་བརྒྱུད་པའི་མན་ངག་ཀུན་ཏུ་ཡང༌། ལྟ་སྟངས་ཀྱིས་རིག་པ་གཅུན་པའི་དགོས་པ་ནི།
རྟོག་པའི་གནད་རླུང་ལ་ཡོད། རླུང་གི་གནད་རྩ་ལ་ཡོད། རྩའི་གནད་མིག་ལ་ཡོད་དེ། མིག་བཙུམ་ན་གློ་སྲོལ་གཉིས་ཀྱི་བར་དུ་བསུབ་ནས་འགྲོ། མིག་ཕྱེ་ཙ་ན་གློ་སྲོལ་གཉིས་ཀྱི་བར་དུ་སྙིང་ཡོད་པ་ཡང་རྗེན་འགྲོ་ལ། རྩ་བྷ་བན་ཏ་ཡང་གྱེན་ལ་ལྟ་ཞིང་ཁ་བྱེ་ནས་ཤེས་པ་གསལ་ལ་རྟོག་པ་མེད་པའི་གཉུག་མ་ཅིག་འོང་བ་ཡིན་ཏེ། དེས་ན་ལྟ་སྟངས་གལ་ཆེ་གསུངས་པའི་དོན་ཡང་གནད་འདི་ལྟ་བུ་ཡོད་པའི་དོན་གྱིས་གསུངས་པས་ན། གཞི་ལ་དེ་ལྟར་མི་གནས་པར་འདོད་པ་རྣམས་ཀྱིས་ནི་གཞི་དངོས་པོའི་གནས་ལུགས་བླ་མེད་རྡོ་རྗེ་ཐེག་པའི་དོན་ལ་རྒྱབ་ཀྱིས་ཕྱོགས་པའི་རྟགས་ཡིན་ནོ། །༢ བསྐལ་པ་གསུམ་དང་མི་ཚེ་བདུན། །ཟླ་དྲུག་ལོ་གཅིག་ཟླ་དྲུག་བཅུ། །རྩོལ་བར་བྱེད་པའི་ཐེག་པ་ཅན། །བྱར་མེད་ངོ་བོ་འདི་བསྟན་པས། །མི་རྩོལ་ལྷུན་གྲུབ་བདེ་ལ་གནས། །ཞེས་མདོ་སྔགས་གཉིས་ཀའི་ལམ་ཐམས་ཅད་ཁྱད་དུ་བསད་ནས་རྫོགས་པ་ཆེན་པོ་ཐོབ་པ་ཙམ་འཚང་རྒྱ་ཟེར་བ་དང༌། ཞེས་པ་ལ། སྤྱིར་ཆོས་ཐམས་ཅད་ཀྱི་རང་གཞུང་ལ་ཆེ་བའི་ཡོན་ཏན་བརྗོད་པ་ལུགས་ཡིན་ཞིང༌། ཞི་བ་ལྷས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་ཤིང་དམ་པ་སངས་རྒྱས་ཀྱི་ཞི་བྱེད་དང༌། ཕྱི་མར་ཡང༌། མཚན་
ཉིད་ཐེག་པ་དང༌། སྔགས་ཀྱི་ལམ་ཐམས་ཅད་ཀྱི་གོང་མ་ཕྱག་ཆེན་ནམ། རྫོགས་པ་ཆེན་པོ་ཡིན་པར་བཤད་པ་དང༌། རྗེ་བཙུན་ཆེན་པོ་ཏེ་ལོ་པས། བློ་ཡི་ཆོས་ཀྱིས་བློ་འདས་དོན་མི་མཐོང༌། །བྱས་པའི་ཆོས་ཀྱིས་བྱར་མེད་དོན་མི་རྟོགས། །བློ་འདས་བྱར་མེད་དོན་དེ་ཐོབ་འདོད་ན། །རང་སེམས་རྩད་ཆོད་རིག་ལ་གཅེར་བུར་ཞོག །རྟོག་པ་དྲི་མའི་ཆུ་དེ་དྭངས་སུ་ཆུག །སྣང་བ་དགག་སྒྲུབ་མ་བྱེད་རང་སར་ཞོག །སྤང་བླང་མེད་ན་ཕྱག་རྒྱ་ཆེན་པོར་གྲོལ། །ཅེས་དང༌། འདུལ་བའི་སྡེ་སྣོད་ལ་སོགས་ཆོས་རྣམས་དང༌། །རང་རང་གཞུང་དང་གྲུབ་པའི་མཐའ་ཡིས་ནི། །འོད་གསལ་ཕྱག་རྒྱ་ཆེན་པོ་མཐོང་མི་འགྱུར། །ཞེ་འདོད་བྱུང་བས་འོད་གསལ་མ་མཐོང་བསྒྲིབས། །རྟོག་པའི་སྲུང་སྡོམ་དམ་ཚིག་དོན་ལ་ཉམས། །ཞེས་དང༌། ཞང་རིན་པོ་ཆེས། ཕྱག་རྒྱ་ཆེན་པོ་ཆིག་ཆོད་ལ། །ས་ལམ་བརྩི་བ་རྨོངས་པ་འཁྲུལ། །ཞེས་གསུངས་པ་རྣམས་ཀྱིས་ཀྱང་མདོ་སྔགས་ཀྱི་ལམ་ཐམས་ཅད་ཁྱད་དུ་གསད་པར་འགྱུར་ཞིང༌། ཐོས་པ་ཙམ་གྱིས་གྲོལ་བ་དང་འཚང་རྒྱ་བ་འགོག་ན། སྔོན་སངས་རྒྱས་ཀྱི་དུས། འཁོར་མཐའ་ཡས་པ་མང་པོས་ཆོས་ཚིག་རེ་ཐོས་པ་ཙམ་གྱིས་བདག་མེད་རྟོགས་པ་དང༌། མི་སྐྱེ་བའི་ཆོས་ལ་བཟོད་པ་ཐོབ་པ་དང༌། བདེན་པ་མཐོང་
བ་དང༌། ཏིང་ངེ་འཛིན་གྱི་སྒོ་བསམ་གྱིས་མི་ཁྱབ་པ་རྒྱུད་ལ་སྐྱེ་བ་ལ་སོགས་ཤིན་ཏུ་མང་ཞིང༌། རྒྱ་གར་དུ་ཡང་བྲམ་ཟེ་ཆེན་པོ་ཡབ་སྲས། ཤ་བ་རི། རྒྱལ་བུ་ས་ཀ་ར་སོགས་མང་པོ་དང༌། བོད་དུ་ཡང་དཔལ་ཕག་མོ་གྲུ་བ། གླིང་རས། ཞང་རིན་པོ་ཆེ། སོ་ཆུང་བ་སོགས་ཅིག་ཆར་བའི་གང་ཟག་མང་པོ་གདམས་པ་ཚིག་རེ་ཐོས་པ་ཙམ་གྱིས་རྟོགས་གྲོལ་དུས་གཅིག་ཏུ་གྱུར་པ་ཀུན་གྱིས་མདོ་སྔགས་ཀྱི་ལམ་ཁྱད་དུ་བསད་ནས་ལམ་ལོག་པའི་གྲུབ་ཐོབ་ཏུ་འགྱུར་རོ། །༢ ཡི་གེ་དང་འཁོར་ལོ་བཏགས་པས་སྐྱེ་བ་འདིའམ་བར་དོ་ཚུན་ཆད་དུ་གྲོལ་ཟེར་བ་དང༌། ཞེས་པ་ལ། ཡི་གེ་དང་འཁོར་ལོ་གཟུངས་སྔགས་བཏགས་པས་གྲོལ་བ་ཐོབ་པ་རྣམས་འགོག་ན་གསུང་རབ་མདོ་སྔགས་ཕལ་ཆེར་ལས་དེ་ལྟར་བཤད་པས། དེ་དག་ཐམས་ཅད་དགག་དགོས་ཏེ། ཀྱེ་རྡོར་དང་སམྦུ་ཊི་ལས། གླེགས་བམ་སོར་ནི་བཅུ་གཉིས་པ། །གྲོ་གར་དམ་ཚིག་ཅན་གྱིས་བྲིས། །བྲིས་སྐུ་དང་ནི་གླེགས་བམ་དག །གལ་ཏེ་སྐལ་མེད་མཐོང་བ་ན། །སྐྱེ་བ་འདིར་ནི་དངོས་གྲུབ་མེད། །ཅེས་དང༌། གླེགས་བམ་ལམ་གྱི་སྤྱོད་ཡུལ་དུ། །སྐྲ་དང་མཆན་ཁུང་ཉིད་དུ་སྦ། །ཞེས་དང༌། སྤྱོད་རྒྱུད་ལས། ལྷའི་དབང་པོ་དེ་བཞིན་གཤེགས་པ་ངན་
སོང་སྦྱོང་བའི་གཟི་བརྗིད་ཀྱི་རྒྱལ་པོའི་གསང་བའི་སྙིང་པོ་འདི་རིགས་ཀྱི་བུ་དང༌། རིགས་ཀྱི་བུ་མོ་གང་ཡང་རུང་བས་མིང་ཙམ་ཡང་ཉན་དེ་བཅང་བདེ་མཆོག་རྩ་རྒྱུད་ཀྱི་ཕན་ཡོན། གསང་འདུས་རྒྱུད་ཕྱི་མ།ངམ། བཀླག་གམ། བྲིས་ནས་ཀྱང་མགོ་བོའི་གཙུག་གམ། དཔུང་པའམ། མགུལ་དུ་བཏགས་ན་ཚེ་འདི་ཉིད་ལ་དུས་མ་ཡིན་པར་འཆི་བ་བརྒྱད་དམ། དུས་མ་ཡིན་པར་འཆི་བ་དང་འབྲེལ་བའི་རྨི་ལམ་གྱི་རྣམ་པའམ། ངན་སོང་དང་འབྲེལ་བའི་མཚན་མ་དེ་དག་རྨི་ལམ་དུ་ཡང་མི་འབྱུང་ངོ༌། །ཞེས་སོགས་མང་པོ་དང༌། ངན་འགྲོ་ཐམས་ཅད་སྦྱོང་བའི་གཙུག་ཏོར་རྣམ་རྒྱལ་ལས། ལྷའི་དབང་པོ་དགེ་སློང་ཕོ་མོའམ། དགེ་བསྙེན་ཕོ་མོའམ། དེ་ལས་གཞན་པ་གང་ལ་ལས། གཟུངས་འདི་བྲིས་ཏེ་རྒྱལ་མཚན་གྱི་རྩེ་མོར་བཞག་པ་མཐོང་ངམ། དེ་དང་ཉེ་བར་གནས་པར་གྱུར་པ། ཐ་ན་དེའི་གྲིབ་མས་ཕོག་གམ། དེའི་རྡུལ་རླུང་གིས་ཁྱེར་བས་འཕོག་ན་ཡང༌། ལྷའི་དབང་པོ་སེམས་ཅན་དེ་དག་ལ་སྡིག་པ་ཐམས་ཅད་དང་ངན་འགྲོར་འགྲོ་བའི་འཇིགས་པ་ཐམས་ཅད་མི་འབྱུང་ངོ༌། །སེམས་ཅན་དམྱལ་བ་དང༌། དུད་འགྲོ་དང༌། གཤིན་རྗེའི་འཇིག་རྟེན་དང༌། ཡི་དྭགས་དང༌། ལྷ་མ་ཡིན་གྱི་རིགས་ཐམས་ཅད་དུ་མི་སྐྱེ་བར་རིག་པར་བྱའོ། །ལྷའི་དབང་པོ་སེམས་ཅན་དེ་དག་ནི། དེ་བཞིན་
གཤེགས་པ་ཐམས་ཅད་ཀྱིས་ལུང་བསྟན་ཅིང་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་རིག་པར་བྱའོ། །ཞེས་དང༌། སོ་སོ་འབྲང་མའི་མདོ་ལས། བྲམ་ཟེ་ཆེན་པོ་གང་ལ་ལ་ཞིག་གིས་རིག་སྔགས་ཀྱི་རྒྱལ་མོ་ཆེན་མོ་སོ་སོར་འབྲང་མ་འདི། ཆོ་ག་བཞིན་དུ་བྲིས་ཏེ་ལག་པའམ། མགུལ་དུ་བཏགས་ན། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་རིག་པར་བྱའོ། །དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བར་རིག་པར་བྱའོ། །རྡོ་རྗེའི་ལུས་ཡིན་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་རིང་བསྲེལ་གྱི་སྙིང་པོ་ཅན་ཡིན་པར་རིག་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་སྤྱན་ཡིན་པར་རིག་པར་བྱའོ། །རྡོ་རྗེའི་ལུས་སུ་རིག་པར་བྱའོ། །དེ་འབར་བའི་འོད་འཕྲོ་བའི་ལུས་དང་ལྡན་པ་དང༌། དེ་མི་ཤིགས་པའི་གོ་ཆ་ཅན་དང༌། དེ་དགྲ་ཐམས་ཅད་རབ་ཏུ་འཇོམས་པ་དང༌། དེ་སྡིག་པ་དང་སྒྲིབ་པ་ཐམས་ཅད་འཇོམས་པར་རིག་པར་བྱའོ། །དེ་སེམས་ཅན་དམྱལ་བའི་འགྲོ་བ་རྣམ་པར་སྦྱོང་བར་རིག་པར་བྱའོ། །ཞེས་སོགས་དང༌། གཞན་ཡང་ཕན་ཡོན་གཏམ་རྒྱུད་དང་བཅས་པ་ཆེས་མང་བ་སྣང་བས། མདོ་རྒྱུད་དེ་རྣམས་ཀྱང་དོར་དགོས་པར་སྣང་ཞིང༌། ཇོ་བོ་རྗེ་ནས།
རྔོག་ལེགས་ཤིས། བློ་ལྡན་ཤེས་རབ་ ༢ གྲོང་ཁྱེར་སྒྲོལ་འཁོར་གྱི་ལུང༌། ནས། ཕྱ་བ་ཆོས་ཀྱི་སེང་གེ་སོགས་ཀྱི་དགེ་བའི་བཤེས་གཉེན་རྣམས་ལས་བརྒྱུད་དེ། གྲོང་ཁྱེར་སྒྲོལ་འཁོར་བྱ་བའི་གདམས་པ་གྲོང་ཁྱེར་གཅིག་ལ་འཁོར་ལོ་གཅིག་ཡོད་ན་དེ་ཐམས་ཅད་འཁོར་བ་ལས་བསྒྲལ་ནས་ཐར་པ་ཐོབ་པར་བཤད་པ་དེ་དག་ཀྱང་དོར་དགོས་སམ། དེ་ལ་སོགས་པ་ཆེས་མང་སྟེ་མཐའ་མེད། སྤྱིར་སངས་རྒྱས་ཐམས་ཅད་མཁྱེན་པ་གང་ཡང་མི་མཁྱེན་པ་མེད་པ་ཡིན་ན་ནི། ཡི་གེ་དང་འཁོར་ལོ་བཏགས་པས་གྲོལ་བ་ཡང་མཁྱེན་དགོས་ཤིང༌། གསང་སྔགས་ཐབས་མང་བ་དང༌། ཐབས་མཁས་པ་དང༌། ཐབས་ཚུལ་གྱི་སྒོ་བསམ་གྱིས་མི་ཁྱབ་པ་ཞིག་ཡིན་ནའང་དེ་ལྟར་དགོས་སོ། །༢ ཉི་མ་དང་ཟླ་བ་དང་མར་མེ་ལ་མིག་ཟིམ་བུར་བལྟས་པས་མཐོང་སྣང་འབྱུང་བ་དང༌། མིག་མཐེབ་འཛུབ་ཀྱིས་བཙིར་བའི་འོད་དཀར་པོ་ལ་བལྟས་ན་ལོ་གསུམ་གྱི་འཁྲུལ་སྣང་འགག་པར་འདོད་པ་དང༌། ཞེས་པ་ལ། དེ་ལྟ་བུ་ཡོད་པ་རྣམས་སྒོམ་པའི་ནོར་བ་ཡིན་ན་སྤྱིར་དེ་ལྟ་བུ་ལ་མཐའ་ཡས་ཤིང༌། འདི་རྣམས་སྒོམ་ཏིང་ངེ་འཛིན་གྱི་ངོ་བོ་ནི་མ་ཡིན་མོད། ཏིང་ངེ་འཛིན་རྒྱུད་ལ་སྐྱེ་བ་དང༌། དེ་ཡང་མྱུར་དུ་སྐྱེ་བ་དང༌། བོགས་འདོན་གྱི་ཐབས་བྱེད་བཅིང་གི་སྦྱོར་བ་ལྟ་བུ་ཡིན་མོད། ཐབས་དེ་ལྟ་བུ་རྣམས་ཡོད་པས་ནོར་ན། སྦྱོར་དྲུག་སྒོམ་
པའི་ཚེ་བསམ་གཏན་གྱི་ཁང་པ་སྒོ་ཁྱོགས་གསུམ་དང་ལྡན་པ། གསེང་སྐར་མེད་པ་དང༌། ལུས་གནད་ལྟ་སྟངས་དང་བྱེད་བཅིང༌། རྡོར་བཟླས། དགང་གཏོར། བུམ་པ་ཅན་སོགས་དང༌། ཀྱེ་རྡོ་རྗེ་ལས། ལོངས་སྤྱོད་ཀྱི་ནི་རླབས་གཉིས་ལས། །རང་གི་གཡས་དང་ལག་གཞན་གྱི། །མཐེ་བོང་དང་ནི་སྲིན་ལག་གིས། །དེ་ནི་རྣལ་འབྱོར་པ་ཡིས་བཙིར། །དེ་ལ་ཡེ་ཤེས་སྐྱེ་བར་འགྱུར། །དེ་ལ་ཅི་ཞིག་སྐྱེ་ཞེ་ན། །གཞོན་ནུའི་དགའ་བ་ཇི་ལྟའམ། །ལྐུགས་པའི་རྨི་ལམ་ཇི་ལྟའོ། །མཆོག་དགའི་དགའ་བ་དགའ་བྲལ་དབུས། །སྟོང་དང་སྟོང་མིན་ཧེ་རུ་ཀ །ཞེས་སོགས། དྲག་རླུང་གི་སྦྱོར་བ་ལ་བརྟེན་ནས་ཉམས་མྱོང་སྐྱེ་བའི་ཐབས་དང༌། སྟོན་པའི་སྦྱོར་དྲུག་བཙན་ཐབས་ཀྱི་ཉམས་ཁྲིད་སྐོར་རྣམས་ཀྱང་འདི་ལྟ་བུའི་ཐབས་ཁོ་ན་ཡིན་པས་འདི་རྣམས་ཐམས་ཅད་ཀྱང་ནོར་བ་ཡིན་མི་ཟེར་རམ། གཞན་ཡང་སྣོད་ཆུས་བཀང་བ་ལ་ལྟ་སྟངས་ཡུན་རིང་དུ་བལྟས་ན་འོད་ཟེར་སྣ་ཚོགས་ཆུ་ནང་དུ་མཐོང་བ་དང༌། དེ་ནས་ནམ་མཁའ་ལ་བལྟས་ན་སྟོང་གཟུགས་གསལ་བའི་ཐབས་དང་མུན་ཁང་གི་རང་གི་ཐད་དུ་བུག་པ་ལྷུང་བཟེད་ལྟར་བྲུས་ནས་རྩི་ནག་པོས་བྱུག་པ་ལ་ཡུན་རིང་བལྟས་པས་སྟོང་གཟུགས་གསལ་བའི་ཐབས་དང་གཞན་ཡང་ཆོས་དྲུག་གཉིས། ལམ་འབྲས་ལམ་སྐོར་དགུ་
དང་བཅས་པ། རིམ་ལྔ་གཉིས་ལ་སོགས་པའི་མན་ངག་ཐམས་ཅད་ནས་སྒོམ་མ་སྐྱེས་པ་བསྐྱེད། སྐྱེས་པ་བོགས་དབྱུང་བ་སོགས་ཀྱི་གདམས་པ། ལུས་གནད་འཁྲུལ་འཁོར་བྱེད་བཅིང་སོགས་ཐབས་དུ་མ་སྣ་ཚོགས་གསུང་པ་རྣམས་དང༌། ཐ་ན་འོག་སྒོ་འབྱེད་འཛུམ་གྱི་ཐབས་དང༌། སྦྱོར་བ་ལ་བརྟེན་ནས་གཏུམ་མོའི་བདེ་དྲོད་སྐྱེ་བ་སོགས་ཀྱི་ཐབས་དང༌། བུད་མེད་བསྟེན་ནས་ལམ་ཉམས་སུ་བླང་བའི་ཐབས་དུ་མ་སྟོན་པའི་རྒྱུད་གཞུང་མན་ངག་ཐམས་ཅད་དང༌། གཞན་ཡང༌། ཐབས་མང་དཀའ་བ་མེད་པ་དང༌། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་པའི་གཞུང་དེ་དག་ཐམས་ཅད་ཀྱང་དོར་དགོས་སོ། །༢ ཀུན་བྱེད་པ་རྣམས་ལུས་གནད་ལྟ་སྟངས་དང༌། སེམས་ནང་དུ་མཉམ་པར་འཇོག་པ་ཐམས་ཅད་བཀག་ནས་སྤྱོད་ལམ་ཐ་མལ་དུ་གནས་པས་སྣང་གྲག་ཆོས་ཉིད་དུ་ཤེས་པར་བྱས་ནས་གྲོལ་བ་ཡིན་ཟེར་བ་ལ་སོགས་པ་བསྒོམ་པའི་ནོར་བ་མཐའ་ཡས་པ་དང༌། ཞེས་པ་ལ། སྤྱིར་གནས་ལུགས་ཀྱི་རྟོག་པ་མཐར་ཐུག་པ་མངོན་དུ་གྱུར་ནས་ཡིད་བྱེད་ཐམས་ཅད་དང་བྲལ་བའི་ལྟ་བ། ཡིད་ལ་མི་བྱེད་པར་རང་གྲོལ་ཀློང་ཡངས་སུ་ལ་བཟླ་བ་ལ་དགོངས་པ་ཡིན་མོད། དེ་ལྟ་མིན་ན། ས་ར་ཧས། ཁ་ཅིག་དབང་བསྐུར་བ་ཡིས་ཡོངས་སུ་གདུང་བར་
བྱེད། །ཁ་ཅིག་ཧཱུྃ་ཕཊ་ཟེར་ཞིང་ཕྲེང་བ་ཡོངས་སུ་བགྲང༌། །ཁ་ཅིག་བཤང་གཅི་ཁུ་བ་ཁྲག་དང་ཤ་རྣམས་ཟ། །ཁ་ཅིག་རྩ་དང་རླུང་གི་རྣལ་འབྱོར་སྒོམ་དེ་ཡོངས་སུ་འཁྲུལ། །ཞེས་དང༌། མི་སྤང་མི་བསྒྲུབ་མི་ཞེན་མི་བསྐྱོད་མི་འགོག་པར། །རང་ལུས་ཅི་བདེར་སྤྱོད་པ་རབ་མཆོག་དམ་པའོ། །ཞེས་དང༌། ཤ་བ་རིས། རླུང་ནི་མི་བཟུང་ཡིད་ནི་མི་བཅིང་པར། །མ་བཅོས་ཤེས་པ་བུ་ཆུང་ལྟ་བུར་ཞོག །ཅེས་དང༌། ཏིལླི་པས། ལུས་ཀྱི་བྱ་བ་ཡོངས་ཐོང་རྣལ་མར་ཞོག །ངག་གི་སྨྲ་བརྗོད་མ་མང་བྲག་ཆ་འདྲ། །ཡིད་ལ་མི་བསམ་ལ་ཟླའི་ཆོས་ལ་ལྟོས། །ཞེས་དང༌། གཞན་ཡང་བྲམ་ཟེ་ཆེན་པོའི་དོ་ཧ་སྐོར་གསུམ་སོགས་རྒྱ་གར་རྒྱུད་གཞུང་མང་པོ་དང༌། བོད་ཀྱི་ཡང་དྭགས་པོ་བཀའ་བརྒྱུད་ལ་སོགས་ཕྱག་ཆེན་གྱི་རྣལ་འབྱོར་པ་རྣམས་དང༌། མ་གཅིག་ལབ་སྒྲོན་སོགས་ཞི་གཅོད་པ་མང་པོས་སྤྱོད་ལམ་མ་བཅོས་ཐ་མལ་རང་ཀ །ཤེས་པ་མ་བཅོས་ཐ་མལ་ཤེས་པ། བློས་བྱས་ཡིད་ཀྱི་བཟོ་བྱ་བའི་ཆོས་དང་བྲལ་བའི་ཆོས་མེད་ཁྲེས་སེ་བ་ཞེས་གསུང་གཅིག་དབྱངས་གཅིག་ཏུ་བསྙད་པ་འདི་རྣམས་ཐམས་ཅད་ཀྱིས་ཀྱང་སྒོམ་ནོར་བར་འགྱུར་རོ། །༢ བེམ་པོ་ལ་རིག་པ་བཅུག་པས་འགུལ་བར་ནུས་པའི་དུས་སུ། མི་སུམ་སྟོང་ལ་རང་གི་རིག་པ་བཅུག་གནས་
བསྒོམས་པས། མི་སུམ་སྟོང་པོ་དེས་ཆོས་བྱ་མི་དགོས་པར་སྐྱེ་བ་འདི་ལ་སངས་རྒྱས་སུ་འགྱུར་ཟེར་བ་དང༌། ཞེས་པ་ལ། རྒྱ་བོད་ཀྱི་གྲུབ་ཐོབ་མང་པོས་སྐུ་ལྡེར་ལ་སོགས་བེམ་པོ་ལ་རིག་པ་གཏད་པ་ཙམ་གྱིས་ལངས་ནས་འགྲོ་བ་དང༌། དམ་པ་ཆུང་བ་ལྷ་སར་བྱོན་ནས་བར་སྣང་གི་དྲིལ་བུ་ལ་རིག་པ་གཏད་པའི་ཚེ་སྒྲ་རང་ཁྲོལ་དུ་བྱུང་བར་སྣང་ཞིང༌། སྔོན་རྒྱལ་པོ་ཨིནྡྲ་བྷོ་དྷི་མཁའ་སྤྱོད་དུ་གཤེགས་པའི་ཚེ། ཨོ་རྒྱན་གྱི་འཁོར་འབངས་ཐམས་ཅད་ཀྱང་དུས་གཅིག་ལ་མཁའ་སྤྱོད་དུ་གཤེགས་པ་དང༌། དམ་པ་སངས་རྒྱས་ཀྱི་བླ་མ་བདག་ཉིད་ཆེན་པོ་དཔལ་ལྡན་སུམ་ཅུ་སོ་དྲུག་པོ་རེ་རེ་མཁའ་སྤྱོད་དུ་གཤེགས་པའི་ཚེ། རྒྱལ་པོ་དྲུག །བཙུན་མོ་དྲུག །བྲམ་ཟེ་དྲུག །དྲང་སྲོང་དྲུག །ཁྱིམ་བདག་དྲུག ། དེད་དཔོན་དྲུག་སྟེ། དྲུག་ཚན་དྲུག་རེ་དུས་གཅིག་ལ་མཁའ་སྤྱོད་དུ་གཤེགས་པ་དང༌། རྗེ་བཙུན་ས་སྐྱ་བའི་ལམ་འབྲས་སུ་ཡང་འཁོར་ཚོམ་བུ་ལྔ་ལྡན་གཅིག་དང་བཅས་ཏེ་སངས་རྒྱ་པར་བཤད་པ། བདག་ཉིད་འཚང་རྒྱ་བའི་ཚེ། རྟེན་འབྲེལ་གྱི་ཆེ་བས་རྒྱུད་གཉིས་ཅིག་ཆར་དུ་གྲོལ་པའི་དུས་ཡིན་པས་རིག་མ་དང༌། བར་ཆད་སེལ་བའི་ཆོས་སྐྱོང་དང༌། དངོས་གྲུབ་སྟེར་བའི་བླ་མ་དང༌། གསོལ་བ་འདེབས་པའི་སློབ་མ་དང་བཞི་སྟེ། ལྔ་ཚན་གཅིག་སངས་རྒྱས་པར་
བཤད་པ་དེ་དག་ཀྱང་སྐྱོན་ཅན་དུ་འགྱུར་རོ། །༢ སྣང་བ་ཐམས་ཅད་ཆོས་ཉིད་དུ་རྟོགས་ན་མི་དགེ་བ་བྱས་ཚད་སངས་རྒྱས་ཀྱི་ལམ་དུ་འགྱུར་ཟེར་བ་ལ་སོགས་སྤྱོད་པའི་ནོར་བ་མཐའ་ཡས་པ་དང༌། ཞེས་པ་ཟེར་མོད་ཀྱང༌། དེ་ལ་སྤྱིར་གནས་ལུགས་ཀྱི་ལྟ་བ་དང་རྟོགས་པ་མཐར་ཐུག་མངོན་དུ་གྱུར་ནས་ཐེ་ཚོམ་མེད་པར་ངེས་ཤེས་སྐྱེས་ནས་བྱང་ཆུབ་ཀྱི་སེམས་ཀྱིས་བསླངས་པའི་བྱམས་སྙིང་རྗེ་དང༌། ཐབས་ཟབ་མོས་ཟིན་པའི་དགེ་མི་དགེ་གང་ཡང་ལམ་གྱི་གྲོགས་སུ་འགྲོ་ལ་ཐབས་ཀྱིས་མ་ཟིན་ན་ནི་དགེ་བ་ལྟར་སྣང་བ་རྣམས་ཀྱང་ལམ་དུ་ཅི་འགྱུར་ཅི་ཆ་སྟེ། དེ་ཡང༌། ཀྱེ་རྡོ་རྗེ་ལས། སྐྱེ་བོ་མི་བཟད་པ་ཡི་ལས། །གང་དང་གང་གིས་འཆིང་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པར་འཆིང་བ་ལས་གྲོལ་འགྱུར། །ཆགས་པས་འཇིག་རྟེན་འཆིང་འགྱུར་བ། །འདོད་ཆགས་ཉིད་ཀྱིས་རྣམ་གྲོལ་འགྱུར། །ལྡོག་པའི་སྒོམ་པ་འདི་ཉིད་ནི། །སངས་རྒྱས་མུ་སྟེགས་ཀྱིས་མི་ཤེས། །ཞེས་དང༌། སམྦུ་ཊིར། དཔེར་ན་ཆུ་ཡིས་གང་བའི་ཀླུང༌། །བརྒལ་འདོད་སྐྱེ་བོ་ཤིང་དང་ནི། །རྩྭ་སོགས་བསྡུས་ཏེ་འཇུས་ནས་སུ། །རྐྱལ་ཏེ་ཕ་རོལ་བརྒལ་བ་ན། །དོར་ནས་བདེ་བར་འགྲོ་བར་འགྱུར། །དེ་བཞིན་ཆོས་དང་ཆོས་མིན་ལ། །བརྟེན་
ནས་འཁོར་བའི་ཕ་རོལ་འགྲོ། །བདེ་བའི་བྱང་ཆུབ་ཐོབ་གྱུར་ནས། །ཆོས་དང་ཆོས་མིན་རབ་ཏུ་སྤོང༌། །ཞེས་དང༌། མཻ་ཏྲི་བས། དགེ་དང་སྡིག་པའི་ལས་རྣམས་ཀུན། །དེ་ཉིད་ཤེས་པས་གྲོལ་བར་འགྱུར། །ཉོན་མོངས་ཡེ་ཤེས་ཆེན་པོ་སྟེ། །ནགས་ལ་མེ་བཞིན་རྣལ་འབྱོར་གྲོགས། །ཞེས་དང༌། འོད་སྲུང་ཀྱིས་ཞུས་པའི་མདོར་ཡང༌། དཔེར་ན་གྲོང་ཁྱེར་སྐྱེ་བོའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔེའི་ཉོན་མོངས་ལུད། །དེས་ནི་སངས་རྒྱས་ཆོས་རྣམས་བསྐྱེད་ལ་ཕན། །ཞེས་དང༌། འོད་སྲུང་འདི་ལྟ་སྟེ་དཔེར་ན། སྔགས་དང་སྨན་གྱིས་ཡོངས་སུ་ཟིན་པའི་དུག་གིས་ནི་ཤི་བར་བྱེད་མི་ནུས་སོ། །འོད་སྲུངས་དེ་བཞིན་དུ་ཤེས་རབ་དང་ཐབས་མཁས་པས་ཡོངས་སུ་ཟིན་པའི་བྱང་ཆུབ་སེམས་དཔའ་དེའི་ཉོན་མོངས་པའི་དུག་གིས་ཀྱང་ལོག་པར་ལྷུང་བར་བྱེད་མི་ནུས་སོ། །ཞེས་དང༌། དཔལ་མཆོག་ལས་ཀྱང༌། འདོད་ཆགས་ཞེ་སྡང་གཏི་མུག་སྟེ། །གསུམ་པོ་འདི་དག་དུག་ཉིད་ལ། །མི་མཉམ་པ་ཡིས་བརྟེན་ན་ནི། །འདི་དག་དུག་ནི་ཉིད་དུ་འགྱུར། །བདུད་རྩི་ཉིད་ཕྱིར་བརྟེན་ན་ནི། །བདུད་རྩི་ཉིད་དུ་འགྱུར་བ་ཡིན། །ཞེས་གསུངས་ཤིང༌། ཤེས་རབ་དང་ཐབས་ཟབ་མོས་ཡོངས་སུ་ཟིན་པའི་ཉོན་མོངས་པར་སྣང་
བ་དེ་ཉིད་བྱང་ཆུབ་ཀྱི་རྒྱུར་གྱུར་པ་ཡིན་ལ། གསང་ཆེན་ཐབས་མཁས་ཀྱི་མདོར། ཚོང་དཔོན་ཐབས་ལ་མཁས་པས་ཚོང་པ་གཡོན་ཅན་མདུང་ཐུང་གིས་བསད་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་པར་བཤད་པ་དང༌། བྲམ་ཟེའི་ཁྱེའུ་སྐར་མས་ཚོང་དཔོན་གྱི་བུ་མོ་ལ་སྤྱད་པས་བསྐལ་པ་མང་པོའི་ཚོགས་འདུམས་པ་སོགས་ཤིན་ཏུ་མང་བས་དེ་རྣམས་ཀྱང༌་སྤྱོད་པའི་ནོར་བར་འགྱུར་རོ། །༢ ཕྱོགས་བཅུའི་སངས་རྒྱས་ཐམས་ཅད་བཀའ་བགྲོས་མཛད་ནས། རཱུ་ཏྲ་ནག་པོ་བཀྲག་མེད་འདུལ་བ་ལ་ཤཱཀྱ་ཐུབ་པ་བཏང་ཚུལ་ནི་རྫུན་གཏམ་འབའ་ཞིག་ཡིན་ཞེས་པ་ལ། འདི་ལྟ་བུའི་ཚིག་རྙིང་མའི་རྒྱུད་གཞུང་ཁུངས་མ་རྣམས་སུ་མེད། གལ་ཏེ་ཡོད་དུ་ཆུག་ཀྱང་ནོར་བར་ཅི་ཤེས་ཤཱཀྱ་ཐུབ་པ་རབ་བྱུང་སྤྲུལ་སྐུའི་ཆ་ལུགས་ཞི་བའི་ཚུལ་ཅན་གྱིས་མི་ཐུལ་བར་བསྟན་པའི་ཚུལ་མཛད་པས་འགལ་བ་ཅི་ཡོད། སྔོན་དེ་བཞིན་གཤེགས་པ་ཤཱཀྱ་ཐུབ་པ་ཉིད་བྱང་ཆུབ་སྙིང་པོ་རྡོ་རྗེའི་གདན་ལ་བཞུགས་ཏེ་བྱང་ཆུབ་བརྙེས་པར་མཛད་པ་ལ་བདུད་སྡེ་དཔུང་དང་བཅས་པས་བྱང་ཆུབ་ལ་བར་ཆད་རྩོམ་པའི་དུས་ན་ཡང་སྐུ་དེ་ཉིད་བཅོམ་ལྡན་འདས་ཕྱག་ན་རྡོ་རྗེ་དང༌། མི་གཡོ་བ་དང༌། གཤིན་རྗེའི་གཤེད་དམར་ནག་རྣམས་སུ་བསྟན་ནས་བདུད་དཔུང་ཐམས་ཅད་བཅོམ་པར་
མཛད་པ་སོགས་རྒྱུད་སྡེ་རྣམས་སུ་གསལ་མོད། གཞན་ཡང་འཇིགས་བྱེད་རྒྱུད་ཀྱི་བཤད་པ་ཁུ་སྐྱོ་གཉོས་གསུམ་གྱི་ལོ་རྒྱུས་རྣམས་སུ་དྲག་པོ་འཇིགས་བྱེད་བྱ་བ་འཁོར་བཅས་ཀྱིས་ལྷ་མ་ཡིན་གྱི་རྒྱལ་པོ་བ་སུ་དྷ་རི་བསད་ནས་ཟོས། དེ་ནས་ཁོའི་བསམ་པ་ལ་འཛམ་བུ་གླིང་ན་ད་ང་བས་དབང་ཆེ་བ་མེད་སྙམ་ནས་དྲག་པོ་འཁོར་བཅས་ཀྱིས་ཡུལ་ལྷོ་ཕྱོགས་ཀྱི་སམ་ཏ་པ་ཀང་ཀའི་མི་ཐམས་ཅད་བསད་ནས་ཤ་ཁྲག་ལ་ལོངས་སྤྱོད་པ་ལས། དེའི་ཚེ་བཅོམ་ལྡན་འདས་ཡུལ་མ་ག་དྷཱའི་གྲོང་ཁྱེར་སེར་སྐྱར་བཞུགས་པས་གཟིགས་ནས་གམ་དུ་བྱོན་ཏེ་བདེན་བཞིའི་ཆོས་བཤད་པས། གཽ་ཏ་མ་ཁྱོད་རང་རིའི་རྩྭ་ལ་ཟོ། ལུང་གི་ཆུ་ལ་འཐུང༌། བྱ་རྒོད་ཀྱི་ཕུང་པོའི་རི་ལ་སོང་ལ་གསོ་སྦྱོང་གྱིས་ཟེར་ནས་མ་ཐུལ་ཏེ་སླར་ལོག །དེ་ནས་སྤྱན་རས་གཟིགས་བྱོན་ནས་ཕ་རོལ་ཕྱིན་བཅུའི་ཆོས་བཤད་པས། མི་དཀར་པོ་ཁྱོད་རང་སོང་ལ་ཡིག་དྲུག་ཟློས་ཟེར་ནས་མ་ཐུལ། དེ་ནས་རྟ་མགྲིན་གྱིས་ཕྱག་རྒྱ་བཞིའི་ཆོས་བསྟན་པས། ཁྱོད་རང་ལོགས་སུ་སོང་ལ་རྟ་སྐད་འཚེར་ཟེར་ནས་མ་ཐུལ་ཟེར་བའི་ལོ་རྒྱུས་མང་དུ་སྣང་བས། རྡོ་རྗེ་འཇིགས་བྱེད་ཀྱི་རྒྱུད་མན་ངག་དང་བཅས་པ་ཐམས་ཅད་ཀྱང་ལོག་པར་མི་བྱེད་དམ། ལེགས་པར་སོམས་ཤིག །གུར་མགོན་གྱི་རྒྱུད་ཀྱི་ལོ་རྒྱུས་བྲམ་ཟེ་མཆོག་སྲེད་ནས་ལོ་ཙཱ་བ་གྱི་ལྗང་
ནས་བརྒྱུད་པའི་ལོ་རྒྱུས་སུ་ཡང༌། དབང་ཕྱུག་གི་བུ་ནག་པོ་ཆེན་པོས་མི་རྣམས་ཐམས་ཅད་ནང་བརྒྱ་ཟ། ནུབ་བརྒྱ་རེ་བཟའ་ཞིང་འཇིག་རྟེན་གྱི་ཁམས་བརླག་ལ་ཁད་པ་དང༌། རྟ་མགྲིན་གྱིས་འདུལ་དུ་ཕྱིན་པས། ནག་པོས་ཞལ་དུ་ཁྱུར་མིད་བྱས་ཏེ་ཕྱིར་ཕྱུང་ནས། ཁྱོད་ལ་ང་འདུལ་བའི་གཉེར་མེད་ཀྱིས་ཁྱོད་རང་རང་གནས་སུ་རྩྭ་ཟོ་ཟེར་ནས་མ་ཐུལ་ཞེས་བཤད་པ་དང༌། དེ་ཉིད་འདུས་པ་དང༌། རྡོ་རྗེ་རྩེ་མོའི་རྒྱུད་དུ། ཧཱུྃ་མཛད་ཀྱིས་རྡོ་རྗེ་ཞགས་པ། ལྕགས་སྒྲོག་སོགས་བཏབ་ནས་ལྷ་ཆེན་པོ་བཀུག་ཅིང་བསྡམས་པ་རྣམས་བྱས་པ་ལ་ཞགས་པ་སོགས་བཅད་ནས་བྲོས་པ་དང༌། རྡོ་རྗེ་ལྕགས་ཀྱུས་བཀུག་པ་ལ་ཧཱུྃ་མཛད་ཀྱིས་བཀའ་ཉན་པར་བསྐུལ་བ་ལ་ལྷ་ཆེན་པོ་ཁྲོས་ཏེ་ཀྱེ་གནོད་སྦྱིན་དང་འཇིག་རྟེན་གསུམ་གྱི་བདག་པོ་ཡིན་ན་ཁྱོད་ཀྱི་ངག་ལ་ང་ཅིའི་ཕྱིར་ན་ཉན། ཁྱོད་དང་ཁྱོད་ཀྱི་གནས་ནི་སྔར་མ་མཐོང་ངོ༌། །ཞེས་སྨྲས་པས། ཧཱུྃ་མཛད་ཀྱིས་ང་ནི་གནོད་སྦྱིན་ཐམས་ཅད་ཟ་བར་བྱེད་པ་སྟེ། ཞེས་དམ་ལ་གནས་པར་བསྐུལ་བས། ལྷ་ཆེན་ན་རེ། གནོད་སྦྱིན་ངས་ངོ་མི་ཤེས་ཏེ། བསྟན་པ་ལ་ཡང་ང་མི་གནས། ང་འཇིག་རྟེན་གསུམ་གྱི་བདག་པོ་ཡིན་པས་མཐུ་སྟོབས་འགྲན་ནོ་ཟེར་ནས་ལྷ་རྣམས་ཀྱིས་རང་རང་གི་མཚོན་ཆ་སྟོང་ཕྲག་རེ་སྤྲུལ་ནས་ཧཱུྃ་
མཛད་ལ་འཐབས་སོ། །དེ་ནས་ཧཱུྃ་མཛད་ཀྱིས་མཚོན་ཆ་རྣམས་དུམ་བུར་བྱས་ཏེ། ཁྱོད་བཀའ་ལ་ཉོན་ཅིག་དེ་ལྟ་མ་ཡིན་ན་ཐལ་བར་གཞོམ་པར་བཀའ་སྩལ་པས། ང་འཇིག་རྟེན་གསུམ་གྱི་བདག་པོ་ཡིན་པས་ཁྱོད་ངའི་བཀའ་ལ་ཉོན་ཟེར་བ་དང༌། དེ་ནས་ཧཱུྃ་མཛད་ཀྱིས་བཅོམ་ལྡན་འདས་ལ་ལྷ་ཆེན་པོ་འདི་རང་གི་སྟོབས་ཀྱིས་དྲེགས་ནས་བསྟན་པ་ལ་འདུད་དུ་མི་བཏུབ་ན་ཇི་ལྟར་བགྱི་ཞུས་པ་སོགས་མང་དུ་མཆིས་པ་སྣང་བས་རྒྱུད་དེ་དག་ཐམས་ཅད་ཀྱང་དོར་དགོས་པར་འགྱུར་རོ། །༢ མི་ཡུལ་ན་ཐུབ་པ་ཟས་གཙང་གི་སྲས་ཡིན་པ་བཞིན་དུ། ལྷ་ལ་བརྒྱ་བྱིན། ལྷ་མ་ཡིན་ལ་ཐགས་བཟང་རིས་དང༌། དུད་འགྲོ་ལ་སེང་གེ་རབ་བརྟན་དང༌། ཡི་དྭགས་ལ་ཁ་ལས་མེ་འབར་དང༌། དམྱལ་བ་ན་ཆོས་ཀྱི་རྒྱལ་པོ་རྣམས་ཀྱིས་མཆོག་གི་སྤྲུལ་པའི་མཛད་པ་བཅུ་གཉིས་སྟོན་པ་ཡིན་ཟེར་བ་ལ་སོགས་པའི་འབྲས་བུའི་ནོར་བ་མཐའ་ཡས་པ་སྣང༌། ཞེས་ཟེར་མོད། དེ་ལ་བརྒྱ་བྱིན་སོགས་ཐུབ་པ་ལྔ་པོ་གཞན་རྣམས་ཀྱང་མཆོག་གི་སྤྲུལ་སྐུ་མཛད་པ་བཅུ་གཉིས་སྟོན་པ་ཅན་ཡིན་ཞེས་པའི་བཤད་པ་མེད། སྤྱིར་གདུལ་བྱ་དེ་ལྟ་བུ་རྣམས་ལ་འདུལ་བྱེད་སྤྲུལ་སྐུ་ཐུབ་པ་དྲུག་ཏུ་བསྟན་པ་ཡིན་པས་འགལ་བ་མེད་ལ། ༈ འགྲོ་བའི་གནས་རིགས་དྲུག་པོར་སངས་རྒྱས་ཀྱི་ཐུགས་རྗེའི་སྤྲུལ་པ་གང་ལ་གང་འདུལ་དུ་སྟོན་པ་
མཚོན་ཕྱིར་དཀྱིལ་འཁོར་གྱི་ལྷའི་རྣམ་པ་བཀོད་པའི་ཚེ་མཚོན་དོན་དེ་ལྟར་དུ་བསྟན་པ་ཡིན་ནོ། །མཆོག་གི་སྤྲུལ་སྐུ་མཛད་པ་བཅུ་གཉིས་སྟོན་པ་ཅན་བཤད་པ་ཡོད་དུ་ཆུག་ཀྱང་འགལ་བར་མ་མཐོང་སྟེ། དུས་འཁོར་གྱི་ཡེ་ཤེས་ལེའུར། ཇི་ལྟར་ཆུ་འཛིན་ལས་ནི་བསིལ་ཞིམ་དྭངས་ཤིང་འཇམ་ལ་ཡང་བའི་ཆུ་བྱུང་བ། །དེ་ནི་ས་གཞིར་རྒྱུ་དང་གནས་ཀྱིས་དབྱེ་བས་རྣམ་པ་མང་པོའི་རོ་ཉིད་འགྱུར། །དེ་བཞིན་ལེགས་ཡངས་ཐུགས་རྗེའི་སྤྲིན་གྱི་སྙིང་པོ་ལས་བྱུང་ཡན་ལག་བརྒྱད་ལྡན་ལ། །རྒྱུད་དང་གནས་ཀྱིས་དབྱེ་བས་སྐྱེ་དགུ་རྣམས་ལ་རྣམ་པ་མང་པོའི་རོ་ཉིད་འགྱུར། །ཅེས་གསུངས་པས། དེའི་ཕྱིར་སེམས་ཅན་གྱི་དོན་གྱི་ངོར་སངས་རྒྱས་དང་བྱང་ཆུབ་སེམས་དཔའ་རྣམས་མངལ་དུ་རབ་ཏུ་འཇུག་པ་རྣམས་དང༌། དམྱལ་བར་གཤེགས་པ་ཡང་བྱིས་པའི་སྐྱེ་བོ་རྣམས་ཀྱིས་བརྟག་པར་ནུས་པ་མ་ཡིན་ཏེ། དཔལ་ཨ་ར་ལིའི་རྒྱུད་ཆེན་པོར། དེ་ནས་བྱང་ཆུབ་སེམས་དཔའ་དེ་རྣམས་རྐང་གཉིས་ཀྱི་མཆོག་ཉིད་ཐོབ་སྟེ། སངས་རྒྱས་ཀྱི་ཟློས་གར་སྟོན་པར་མཛད་དོ། །ཞེས་དང༌། དེ་བཞིན་དུ། ལ་ལར་རྫོགས་པའི་བྱང་ཆུབ་མཛད། །ལ་ལར་དཀའ་བ་སྤྱོད་པ་དང༌། །ལྷ་ལས་བབས་པར་སྤྲུལ་པ་དང༌། །དེ་བཞིན་ཁབ་ནས་ངེས་འབྱུང་
དང༌། །ཆོས་ཀྱི་འཁོར་ལོ་བསྐོར་བ་སྟེ། །ལ་ལར་རབ་ཏུ་འབྱུང་བར་མཛད། །འདུལ་བ་སྟོན་མཛད་དེ་བཞིན་དུ། །བསམ་གྱིས་མི་ཁྱབ་མངོན་པའི་ཆོས། །ལ་ལར་སྔགས་ཀྱི་ཚུལ་འཆད་མཛད། །ལ་ལར་ཕ་རོལ་ཕྱིན་པའི་ཚུལ། །ལ་ལར་བྱེ་བྲག་སྨྲ་བའི་ལམ། །ལ་ལར་མདོ་སྡེ་སྟོན་པ་སྟེ། །ལ་ལར་རྣམ་ཤེས་སྨྲ་བ་དང༌། །ལ་ལར་དེ་བཞིན་དབུ་མའོ། །ལ་ལར་དམྱལ་བར་གཤེགས་པ་དང༌། །ལ་ལར་སེམས་ཅན་རྗེས་བཟུང་བ། །སེམས་ཅན་གདུལ་བ་རྒྱུར་བཅས་ནས། །སྙིང་རྗེའི་བསམ་པས་གར་མཛད་དོ། །ཞེས་དང༌། མཚན་བརྗོད་ལས། སྤྲུལ་པའི་སྐུ་སྟེ་སྐུ་ཡི་མཆོག །སངས་རྒྱས་སྤྲུལ་པའི་རྒྱུད་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་དང༌། གསང་བ་བསམ་གྱིས་མི་ཁྱབ་པའི་མདོར་ཡང༌། ནམ་མཁས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །ཅེས་གསུངས་པས། སྤྲུལ་པའི་སྐུ་ནི་གདུལ་བྱ་མཐའ་ཡས་པའི་བསམ་པ་དང་མཐུན་པར། སྒྱུ་འཕྲུལ་རོལ་བའི་རྣམ་འཕྲུལ་སྣ་ཚོགས་པས་སེམས་ཅན་གྱི་དོན་རྒྱུན་ཆད་མེད་པར་མཛད་པ་སྟེ། མངོན་རྟོགས་རྒྱན་ལས། གང་གི་སྲིད་པ་ཇི་སྲིད་བར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་
མི་འཆད། །ཅེས་པ་ལྟར་ཡིན་པས། རིགས་དྲུག་སོ་སོ་དང་མཐུན་པའི་སྤྲུལ་སྐུ་ཐུབ་དྲུག་འགོག་པ་ནི་སངས་རྒྱས་སྐུའི་གསང་བ་བསམ་གྱིས་མི་ཁྱབ་པ་དང༌། སྐུ་རྣམ་པ་སྣ་ཚོགས་དང༌། སྐུ་མི་ཟད་པ་རྒྱན་གྱི་འཁོར་ལོ་རྣམས་དང་གཞན་ཡང་སེམས་ཅན་གྱི་ལས་ཚུལ་བསམ་གྱིས་མི་ཁྱབ་པ་དང༌། རྟེན་འབྲེལ་གྱི་ནུས་པ་བསམ་གྱིས་མི་ཁྱབ་པ་དང༌། སངས་རྒྱས་ཀྱི་མཛད་པ་ཕྲིན་ལས་བསམ་གྱིས་མི་ཁྱབ་པ་རྣམས་འགོག་པ་སྟེ། གཏོལ་མེད་ཀྱི་ཚིག་ཡང་དག་པའོ། །༢ མདོར་ན་བླ་མའི་བརྒྱུད་ཚུལ། ཐེག་པའི་རྣམ་དབྱེ༌། རྒྱུད་སྡེའི་དབྱེ་བ། བསྐྱེད་རིམ། མཆོད་ཕྲེང༌། སྦྱིན་སྲེག །གཏོར་ཆོག་རྣམས་དང༌། ཁྱད་པར་དབང་བཞིའི་བསྐུར་ཚུལ། ཁྲིད་རིམ། རྩ་བ་དང་ཡན་ལག་གི་དམ་ཚིག་ཐམས་ཅད་ཀྱང་རྣལ་འབྱོར་བླ་མེད་ཀྱི་རྒྱུད་གཞུང་ཁུངས་མ་གང་དང་ཡང་མི་མཐུན་པའི་ཆོས་སྐད། ཆོ་གའི་གོ་རིམ་ནོར་བ་དང༌། ཆོ་ག་ཕྱིན་ཅི་ལོག་འབའ་ཞིག་སྣང༌། ཟེར་བ་ནི། ༈ རང་ཉིད་མོས་པ་ཐོབ་པ་ཁུངས་མ་ཡིན་ལ་གཞན་ནི་སྡིག་ལྟའོ་སྙམ་པའི་ལོག་རྟོག་སྨྱོན་པའི་གཏམ་ལྟ་བུ་སྟེ་གཞན་དུ་ན་རང་ལུགས། ༈ བླ་མ་བརྒྱུད་པའི་ལོ་རྒྱུས་བརྒྱུད་ཚུལ་ལ་སོགས་ནི་རྫོགས་ཆེན་སོགས་སུ་ཡང་ཤེས་བྱེད་ཀྱི་ལུང་དང་བཅས་པ་ཤིན་ཏུ་ནས་ཀྱང་ཡོད་དེ། ལོ་རྒྱུས་དོན་གྱིས་མ་བཤད་ན། །གསང་
ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཅེས་གསུངས་ནས། རྒྱལ་བ་སྐུ་གསུམ་ནས་རང་གི་བླ་མའི་བར་དུ་བརྒྱུད་པའི་རིམ་པ་ལོ་རྒྱུས་དང་བཅས་པ་ནི་ཤིན་ཏུ་མང་བས་འདི་ལ་སྐྱོན་འགལ་འདུ་ཐམས་ཅད་མཁྱེན་པས་ཀྱང་མི་རྙེད་མོད། གལ་ཏེ་ལོ་རྒྱུས་སོ་སོར་མི་འདྲ་བས་སྐྱོན་ཆེ་ན། སྔགས་གསར་མའི་ལོ་རྒྱུས་བརྒྱུད་ཚུལ་རྣམས་ལ་ཡང་མི་འདྲ་བ་མཐའ་ཡས་ཏེ། དུས་འཁོར་གྱི་རྒྱུད་འགྲེལ་དབང་ཁྲིད་དང་བཅས་པ་ལ། རྭ་འབྲོ་རྩ་མི་སོགས་ཀྱིས་བརྒྱུད་ཚུལ་ལོ་རྒྱུས་མི་འདྲ་བ་འདི་ཙམ་ཞིག་སྣང་བ་དང༌། གཞན་ཡང་བདེ་དགྱེས་གསང་འདུས་གཤེད་སྐོར་སོགས་ཀྱི་ལོ་རྒྱུས་བརྒྱུད་ཚུལ་ལ། མར་རྔོག་ས་སྐྱ་པ་སོགས་ཁ་མི་འཆམ་པར་སོ་སོ་ན་མི་འདྲ་བ་མཐའ་ཡས་པ་སྣང་བ་དང༌། བསྟན་པ་ཕྱི་དར་གྱི་འདུལ་བ་སྨད་དར་གྱི་མཁན་བརྒྱུད་གཅིག་པུར་རང་ལ་འདོད་ཚུལ་མི་མཐུན་པ་མཐའ་ཡས་པ་ཞིག་འདུག་པས། རང་གི་ཆོས་དང་བླ་མ་བརྒྱུད་པ་དང་བཅས་པ་ལ་སྐུར་པ་འདེབས་པ་འདི་ཡང་འཐད་དམ་སོམས་ཤིག །ཐེག་པ་དང་རྒྱུད་སྡེའི་དབྱེ་བ་རྣམས་ཀྱང༌། ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཞེས་པའི་མཚན་ཉིད་ཅན་མ་ཡིན་པས། ཐེག་པ་དགུར་བྱས་པ་ལ་འགལ་བ་ཅི་ཡང་མེད། ཐེག་པ་དགུ་ཕག་མོ་གྲུ་པའི་མདོ་ལུང་འདྲེན། ལང་གཤེགས་ལུང༌།
གསུམ་དང༌། ཐེག་པ་གཅིག་ལ་སོགས་པ་མཐའ་ཡས་པ་ཞིག་གདུལ་བྱའི་ཁམས་དང་མཐུན་པར་སྣང་བས། འདི་ནི་བདེན་གྱི་གཞན་ནི་གཏི་མུག་གོ །།ཞེས་མ་སྨྲ་ཞིག །སྔགས་གསར་མར་ཡང༌། རྒྱུད་སྡེ་བཞི་རང་ལ་ཡང་གྲངས་ངེས་གོ་རིམ་དབྱེ་བསྡུ་མཐའ་ཡས་པ་ཡོད་པ་འདི་ཉིད་རང་ཡང་མ་མཐོང་ངམ་བརྫུ་བ་ལགས། དེ་ལྟར་མིན་ན་སྤྱིར་ཐེག་པ་དགུ་ཞེས་མ་བརྗོད་པ་མ་གཏོགས་དོན་ལ་ཁྱད་མེད་དེ། རྒྱུ་མཚན་ཉིད་ཀྱི་ཐེག་པ་ལ་གསུམ། རྒྱུད་སྡེ་བཞི་ལ་བྱ་སྤྱོད་རྣལ་འབྱོར་གསུམ་ལ་ཕྱིའི་རྒྱུད་སྡེ་གསུམ། བླ་མེད་ལ་ཐབས་ཤེས་རབ་གཉིས་མེད་དང་གསུམ་ལ། ནང་རྒྱུད་སྡེ་གསུམ་དུ་གྲགས་མོད། རྒྱུད་སྡེ་བཞིར་རང་ལ་ཡང་དབྱེ་བསྡུ་དཔག་ཏུ་མེད་པ་ཞིག་རྒྱུད་དང་འགྲེལ་བ་རྒྱ་བོད་ཀྱི་སློབ་དཔོན་སོ་སོའི་བཞེད་ཚུལ་འདི་ཙམ་དུ་སྣང་བས་ཕྱོགས་གཅིག་ཏུ་ཀེར་ལང་བྱེད་པ་ནི་ཟུ་བོར་གནས་པའི་བློ་ལྡན་རྣམས་ཀྱིས་བཞད་བགད་ཀྱི་གནས་སོ། །དེ་ཡང་སམྦུ་ཊི་སོགས་ཁ་ཅིག་ཏུ། ཕྱི་ནང་གསང་བ་ཐེག་པ་གསུམ། །ཞེས་པས། རྒྱུད་སྡེ་བཞི་པོ་ཕྱི་ནང་གསང་བ་གསུམ་དུ་ཕྱེ་བ་དང༌། འཇིག་རྟེན་གསུམ་རྒྱལ་གྱི་རྟོགས་པའི་འགྲེལ་བ་དང༌། རྡོ་རྗེ་བདུད་རྩིའི་རྒྱུད་འགྲེལ་གཉིས་སུ་རྒྱུད་སྡེ་གསུམ་དུ་དབྱེ་བ་དང༌། སངས་རྒྱས་གསང་པས་ཀྱང༌། རྣལ་འབྱོར་སྤྱོད་དང་བྱ་དབྱེ་བས། །ཞེས་
གསུམ་དུ་དབྱེ་བ་དང༌། སྔགས་དོན་རྣམ་གཟིགས་ལས་ཀྱང༌། རྣལ་འབྱོར་སྤྱོད་དང་བྱ་བའི་རྒྱུད། །དེ་བཞིན་ཕ་རོལ་ཕྱིན་པའི་ཚུལ། །ཞེས་གསུམ་དུ་དབྱེ་བ་དང༌། བཞིར་དབྱེ་བ་ནི་ཡོངས་སུ་གྲགས་ལ། ཡེ་ཤེས་རྡོ་རྗེ་ཀུན་ལས་བཏུས། རྡོ་རྗེ་འཕྲེང་བའི་འགྲེལ་པ་ཨ་ལང་ཀ་དེ་བས་མཛད་པ། ཤཱནྟི་པ། རྒྱ་གར་ཕྱག་ན། རབ་ཏུ་སྒྲོན་གསལ། ཨ་བྷ་ཡ་ཀཱ་ར། པཎྜི་ཏ་གཞན་ཡང་མང་པོས་རྒྱུད་ཐམས་ཅད་ལྔར་དབྱེ་བ་དང༌། བདེ་མཆོག་ཉུང་ངུའི་རྒྱུད་དུ། ཇི་སྲིད་མདོ་བྱ་སྤྱོད་པ་དང༌། །རྣལ་འབྱོར་གསང་མཐའི་དབྱེ་བ་ལས། །སེམས་ཅན་མོས་པ་སྣ་ཚོགས་པ། །དེ་དང་དེ་ལ་དགའ་བ་ཡིན། །ཞེས་པ་ལ། ལ་བ་པ་ལ་སོགས་པས་དྲུག་ཏུ་དབྱེ་བ་གསུངས་ཤིང་ཇོ་བོ་རྗེ་ལམ་སྒྲོན་འགྲེལ་པར་བདུན་དུ་དབྱེ་བ་ཡང་གསུངས་པས། ཐེག་པ་དང་རྒྱུད་ཀྱི་དབྱེ་བ་ལ་རྩོལ་པ་ཡང༌། བློ་ཆུང་ཁྲོན་པའི་སྦལ་བ་ཡིས། །རྒྱ་མཚོའི་གཏིང་ཚོལ་མི་མཚུངས་སམ། །བསྐྱེད་རིམ་སོགས་ལ་ཡང༌། གསར་མ་ལ་ཡང་ལྷའི་བསྐྱེད་ཆོག་མཆོད་བསྟོད་གཏོར་ཆོག་སྤྱིན་སྲེག་རྣམས་ལ་མཐའ་ཡས་པ་མི་འདྲ་བ་སོ་སོའི་བརྒྱུད་པ་རེས་མཛད་སྲོལ་ལ་འདི་ལྟར་མཐའ་ཡས་པ་རྣམས་ཀྱང་ལོག་པ་ཡིན་ནམ། དབང་བཞི་བསྐུར་བའི་ཚུལ་ཡང༌། དུས་འཁོར་ལ་སོགས་པའི་སེམས་འགྲེལ་སྐོར་གསུམ་པོ་དང༌།
རྩ་རྒྱུད་རྗེས་འབྲངས་དང་བཅས་པ་ཐམས་ཅད་ཀྱི་དབང་བསྐུར་ཚུལ་དང༌། གཞན་ཐམས་ཅད་ཀྱི་བསྐུར་ཚུལ་ཐམས་ཅད་མི་མཚུངས་པས། ཡང་ན་དུས་འཁོར་སོགས་རྩ་རྒྱུད་རྗེས་འབྲངས་དང་བཅས་པ་ལོག་པ་ཡིན་ནམ། ཡང་ན་ཐམས་ཅད་ཆོས་ལོག་ཡིན། གཞན་བསྡུས་བརྒྱུད་པ་ཐམས་ཅད་ལ་ཡང་རྒྱ་བོད་སོ་སོའི་བླ་མ་རྣམས་ཀྱིས་ཕྱག་བཞེས་མི་འདྲ་བ་འདི་ཙམ་ཞིག་ཡོད་པ་ལ། ཡང་ན་ཐམས་ཅད་ནོར་རམ། ཡང་ན་དེ་རྣམས་ཀྱི་ནང་ནས་གང་གང་ནོར་བ་ཡིན་བསྟན་དགོས། དམ་པ་སངས་རྒྱས་ཀྱི་ཞི་བྱེད་བརྒྱུད་པ་ཕྱི་མའི་ལམ་ལྔ་གསུམ་སོགས་ཀྱི་དབང་ཐམས་ཅད་ཀྱང་ལོག་པར་འགྱུར་ཏེ། གཞན་གང་དང་ཡང་མི་མཐུན་པའི་ཕྱིར་རོ། །ཁྲིད་རིམ་ལ་ཡང་རྒྱ་བོད་ཀྱི་བླ་མ་སོ་སོས་བཞེད་སྲོལ་རྒྱུད་འགྲེལ་མདོ་བསྟན་བཅོས་ཀྱི་འཁྲིད་ལུགས་མི་འདྲ་བ་ཐམས་ཅད་མཚུངས་དགོས་པར་གྲུབ་པ་ཡང་ངོ་མཚར་ཆེ། རྩ་བ་ཡན་ལག་གི་དམ་ཚིག་སྲུང་མཚམས་ཐམས་ཅད་ལ་ཡང་སོ་སོའི་བཞེད་དགོངས་མཐའ་ཡས་ཤིང༌། དོན་ལ་རྟོན་ན་ནི། བཟའ་བསྲུང་མི་འབྲལ་སྒྲུབ་པའི་དམ་ཚིག་ཐམས་ཅད་དོན་གནས་ལ་ནི་འདྲ། ཚིག་གི་ཆ་ཙམ་ལ་མི་འདྲ་བས་ལོག་པ་ཡིན་ན། གསར་མ་རང་ལ་ཡང༌། དུས་འཁོར་གཤིན་རྗེའི་གཤེད་དམར་ནག །གུར་མགོན་
སོགས་ནས་བཤད་པ་རྣམས་དང༌། རྩ་ལྟུང་གི་རྒྱ་བོད་ཀྱི་འགྲེལ་པ་རྣམས་ཀྱང་ཐམས་ཅད་མི་མཐུན་པ་མང་བར་སྣང་ཞིང༌། དུས་འཁོར་ནས་བཤད་པའི་རྩ་ལྟུང་རྣམས་དང༌། རྒྱུད་དང་བསྟན་བཅོས་གཞན་ནས་བཤད་པ་ཐམས་ཅད་ཀྱང་མི་འདྲ་ལ། གང་ཕྱོགས་དེ་ཆོས་ལོག་ཡིན་སྟོན་ཅིག ། ༢ མདོས་ཀྱི་ཆོ་ག་དང༌། སྐོང་གསོ་དང༌། མདངས་སྐོང་དང༌། སྐོང་མདོས་དང༌། གཏོང་མདོས་བྱ་བ་ལ་སོགས་པ་མདོ་རྒྱུད་གང་དང་ཡང་མི་མཐུན་པ་འདུག ། ༈ ཟེར་བ་ནི་ར་སྤུའི་འུར་རྡོའི་དཔེ་ལྟ་བུ་སྟེ། ད་ནི་ཁྱོད་ཀྱི་མདོ་རྒྱུད་རྣམ་པར་དག་པ་དེ་རིམ་པས་ཇེ་ཉུང་ལ་འགྲོ་བའི་ཚུལ་མདོས་ཆོག་ཡོད་པས་རྣམ་དག་མིན་ན། །༈ གཙུག་ཏོར་གདུགས་དཀར་གྱི་སྐོར་ལ། དྷིརི་ཝརྨ་ལ་སོགས་པས་མཛད་པའི་བཟློག་མདོས་ཟོར་མདོས་ལ་སོགས་ཆེས་མང་བ་དང༌། མགོན་པོ་ཕྱག་བཞི་བའི་ཆོས་སྐོར་རྣམས་ལ་སྐོང་གསོ། སྐོང་མདོས། རྩང་མདོས་ལ་སོགས་མང་པོ་རྒྱ་བོད་ཀྱི་བླ་མ་མང་པོས་མཛད་པ་དང༌། དེ་བཞིན་དུ་གུར་མགོན། ཕྱག་དྲུག་པ། ཏྲག་ཤད་གཉོས་ལུགས་ལ་སོགས་པ་དང༌། རྣམ་སྲས་ཞི་དྲག་རྣམས་དང༌། མདུང་དམར་ཅན་ལ་སོགས་མང་པོ་ལ་རྒྱ་བོད་ཀྱི་མཁས་གྲུབ་མང་པོས་མཛད་ཟིན་པ་རྣམས་དང༌། དེ་དག་འཁོར་བཅས་ཐམས་ཅད་ཀྱང་ཆོས་ལོག་ཏུ་འགྱུར་མོད།
༢ དཔེར་ན་གཤེན་དགུར་ཀླུ་དགའ་ནས་བརྩམས་ཏེ་དེང་སང་གི་བར་དུ་བོན་པོ་དེ་དག་གིས་ཆོས་ཀྱི་མིང་ལ་བོན་དུ་བཏགས་པའི་མདོ་རྒྱུད་དང་བསྟན་བཅོས་རང་བཟོར་བྱས་པ་འདི་རྣམས་དམ་པའི་ཆོས་དང་འདྲ་ལ་མི་མཐུན་པར་གནས་པ། དེ་བཞིན་དུ་རྫོགས་ཆེན་གྱི་རྒྱུད་རྣམས་ཀྱང་ཕྱག་རྒྱ་ཆེན་པོའི་མིང་ལ་རྫོགས་ཆེན་དུ་བཏགས་ནས་རྣལ་འབྱོར་བླ་མེད་ཀྱི་རྒྱུད་དང༌། བསྟན་བཅོས་ཁུངས་མ་རྣམས་དང་འདྲ་ལ་མི་མཐུན་པ་བོན་གྱི་གཞུང་རྣམས་དང་མཐུན་ཤས་ཆེ་བ་ཕྱིན་ཅི་ལོག་འགའ་ཞིག་ཏུ་འདུག ། ཅེས་པ་ལ། གལ་ཏེ་ཕྱག་ཆེན་ལ་རྫོགས་ཆེན་དུ་བཏགས་པས་སྐྱོན་ཆེ་ན། ཕྱག་ཆེན་ལ་རྣལ་འབྱོར་ཡན་ལག་དྲུག་རིམ་ལྔ་ལ་སོགས་པའི་ཟབ་ལམ་དུ་བཏགས་པ་དེ་དག་ཀྱང་བོན་དང་འདྲའམ། དེ་ལྟ་མིན་ན་ནི་ཟབ་ལམ་གྱི་ཆོས་ཐམས་ཅད་ལ་ཕྱག་རྒྱ་ཆེན་པོར་གྲགས་བདོ་བས། ཕྱག་ཆེན་ལ་རྫོགས་ཆེན་དང༌། རྫོགས་ཆེན་ལ་ཕྱག་ཆེན་དུ་བཏགས་པས་སྐྱོན་ཅི་ཡང་མ་མཐོང་ངོ༌། །༢ གལ་ཏེ་འདི་རྣམས་རྒྱུད་གཞུང་རྣམ་དག་ཡིན་ན། གསང་འདུས་ལ་སོགས་པ་ཚིག་དོན་ལ་ནོར་བ་མེད་པ། རྩོམ་པའི་ཆ་ལུགས་བརླིང་བ། ཟབ་ཅིང་རྒྱ་ཆེ་བ་ཆོས་སྐད་རིགས་མཐུན་པའི་རྒྱུད་སྡེ་ཁུངས་མ་རྣམས་ཡང་དག་མིན་དགོས་པར་སྣང་ཟེར། སྔགས་རྙིང་མ་རྫོགས་ཆེན་དང་བཅས་པ་ཐམས་ཅད་དང༌། གསང་འདུས་ལ་སོགས་པའི་རྒྱུད་སྡེ་གཞན་ཡང་དོན་ལ་ཤིན་ཏུ་
ནས་ཀྱང་མཐུན། བརྗོད་བྱ་ཚིག་གི་ཟུར་ལ་མཐུན་པར་སྣང་བས་གང་ཡིན་ཅིག་ཡང་དག་དང༌། ཅིག་ཤོས་ཡང་དག་མིན་པར་སྨྲ་བ་ནི། དོན་ལ་རྟོན་པའི་བློ་དང་བྲལ་བའི་ཚིག་ཡིན་ནོ། །རྩོམ་པའི་ཆ་ལུགས་བརླིང་བ་ལ་སོགས་པས་རྒྱུད་རྣམ་དག་ཡིན་པར་མི་འགྲུབ་སྟེ། དུས་འཁོར་རྒྱུད་འགྲེལ་ལ་སོགས་སེམས་འགྲེལ་རྣམས་སུ་ཡང་སྒྲ་བཟང་པོ་དང་ལེགས་སྦྱར་གྱི་སྐད་གཅིག་པུ་དང༌། ཚིག་གི་བརྗོད་པ་ལེགས་པས་རྒྱུད་རྣམ་དག་ཡིན་པར་མ་བཤད་ཅིང༌། སངས་རྒྱས་ཐམས་ཅད་མཁྱེན་པས་ནི་སེམས་ཅན་གདུལ་བྱའི་དབང་གིས་ཐམས་ཅད་མཁྱེན་པའི་སྐད་ཀྱིས་ཆོས་སྟོན་པ་ཡིན་གྱིས་ཁྱབ་འཇུག་དང་དྲག་པོ་ལ་སོགས་པ་གཞན་གྱིས་ནི་མ་ཡིན་ནོ། །ཅི་སྟེ་ཁྱབ་འཇུག་སོགས་ཀྱི་ནང་དུ་ཡོན་ཏན་འདི་དག་ཡོངས་སུ་རྫོགས་པ་འགའ་ཞིག་ཡོད་ན། དེ་ཡང་བདག་ཅག་གིས་རྣམ་པ་ཐམས་ཅད་དུ་ཕྱག་མཆོད་བསྙེན་བཀུར་བ་བྱ་བ་ཡིན་ནོ། །གསུངས་པས་ཚིག་གི་ཆ་དང་སྡེབ་སྦྱོར་སོགས་མི་ལྡན་ཡང་དོན་ལ་རྟོན་པ་གཅིག་པུས་ཆོག་མོད། གལ་ཏེ་དེས་མི་ཆོག་ན་ཕྱི་རོལ་པའི་གཞུང་ལུགས་རྣམས་རྒྱུད་རྣམ་དག་རྩོད་མེད་དུ་འགྱུར་ཏེ། རྩོམ་ཚུལ་བཟང་ཞིང་ལེགས་པའི་ཕྱིར་རོ། །༢ འདི་རྣམས་རྒྱུད་སྡེ་ཁུངས་མ་གང་དུ་ཡང་མིང་ཙམ་ཡང་མ་གྲགས་འདུག་ཅིང༌། རྒྱ་གར་དང་ཨོ་རྒྱན་ལ་སོགས་པའི་མཁས་གྲུབ་ཀྱི་གཞུང་
ཁུངས་མ་གང་དུ་ཡང་མ་གྲགས་འདུག་པས་མཁས་གྲུབ་དེ་རྣམས་ཀྱིས་དཔང་དུ་མཛད་པའི་རྒྱུད་སྡེ་ཁུངས་མ་མིན་ངེས་པར་འདུག་གོ །།༈ དེ་ལ་མིང་ཙམ་མ་གྲགས་ན་སངས་རྒྱས་ཡེ་ཤེས་ཞབས་ཀྱི་འགྲོལ་པའི་ཐིག་ལེར། རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། །ཞེས་དང༌། ༈ གཞུང་གཅིག་གི་ནང་དུ་ཅིག་ཤོས་མ་གྲགས་པའི་རྒྱུ་མཚན་གྱིས་རྫུན་མ་ཡིན་ན། མཚན་ཉིད་ཐེག་པ་གསུམ་གྱི་ཡང་ཐེག་པ་འོག་མར་ཐེག་ཆེན་གྱི་མིང་ཙམ་ཡང་མ་གྲགས་པའི་ཕྱིར་ཐམས་ཅད་རྫུན་ཡིན་ནམ། རྒྱུད་སྡེ་བཞིའི་འོག་མ་གསུམ་གྱི་ནང་དུ་བླ་མེད་ཀྱི་གསང་བ་ཟབ་མོ་རྣམས་ཀྱི་མིང་ཙམ་ཡང་མེད་པའི་ཕྱིར། རྣལ་འབྱོར་བླ་མེད་ཀྱི་རྒྱུད་ཐམས་ཅད་རྫུན་དུ་བྱེད་དམ། རྒྱུད་གཞུང་ཁ་ཅིག་ཏུ་མ་གྲགས་པས་རྫུན་ཆོས་སུ་བྱེད་ན་དམ་པ་སངས་རྒྱས་ཀྱི་ཞི་བྱེད་སྐོར་གསུམ་གཅོད་ཡུལ་དུ་གྲགས་པ་རྣམས་ཀྱི་ཡང་མིང་ཙམ་ཡང་ཁུངས་མར་འདོད་པ་དེ་རྣམས་སུ་མ་གྲགས་པའི་ཕྱིར། ཁྱོད་ཀྱི་དབང་དུ་བྱེད་པར་ཁས་བླངས་པའི་ཞི་བྱེད་ཀྱི་མདོ་རྒྱུད་མན་ངག་དབང་ཁྲིད་རྣམས་ཀྱང་ལོག་པའི་ལམ་གྱི་ཆོས་སུ་འགྱུར་རོ། །༢ ཀྲི་ཡ་ས་མུཉྪ་དང་རྡོ་རྗེ་ཕྲེང་བ་ལ་སོགས་པ། དབང་ཆོག་ཕྱོགས་གཅིག་ཏུ་བསྡེབས་པ་དང༌། ཁ་ཡར་ཐམས་ཅད་དང༌། རྣལ་འབྱོར་རྫོགས་ཕྲེང་དང༌། སྒྲུབ་ཐབས་རྒྱ་མཚོ་ལ་སོགས་པ་ཕྱོགས་གཅིག་ཏུ་བསྡེབས་པ་དང༌།
ཁ་ཡར་བ་དང༌། རྣལ་འབྱོར་ཡན་ལག་དྲུག་པ་དང༌། རིམ་ལྔ་གཞི་ཐིག་རིམ་བཞི་གྲུབ་པ་སྡེ་བདུན། ལྕམ་དཔལ་མོའི་མིང་སྲིང་གི་ལྷན་སྐྱེས་གྲུབ་རྩ་འགྲེལ་ལ་སོགས་པ་རྫོགས་རིམ་གྱི་རྒྱ་གཞུང་གང་དུ་ཡང༌། བཀའ་བརྒྱད་དང༌། བདེ་འདུས་ལ་སོགས་པའི་རྫོགས་ཆེན་རྗེས་འབྲང་དང་བཅས་པའི་དབང་དང་སྒྲུབ་ཐབས་ཁྲིད་ཡིག་རྣམས་ཀྱི་མིང་ཙམ་ཡང་མ་གྲགས་འདུག་ཅིང་ཚིག་དོན་གྱི་ནོར་བ་ཆོ་ག་ལོག་པ་མཐའ་ཡས་པ་འདུག་པས་རྫོགས་ཆེན་འདི་ཨོ་རྒྱན་པདྨ་དང༌། བི་མ་ལ་སོགས་པའི་མཁས་གྲུབ་རྣམས་ཀྱིས་མཛད་པའི་གཞུང་མིན་ངེས་སུ་འདུག་སྐད། ༈ དེ་ལྟར་ན་ཀྲི་ཡ་ས་མུཉྪ་ལ་སོགས་པའི་དབང་ཆོག་དེ་དག་སློབ་དཔོན་པདྨ་དང༌། བི་མ་ལ་སོགས་ཀྱིས་མཛད་དམ། ཡིན་མིན་གྱི་དཔང་པོ་དེ་ལ་བཅོལ་བའི་ཕྱིར་རོ། ། ༈ བསྐྱེད་རྫོགས་དབང་ཆོག་དང་བཅས་པ་དེ་རྣམས་སུ་རྫོགས་ཆེན་སོགས་ཀྱི་མིང་མ་གྲགས་ནས་ཆོས་མིན་དུ་སྒྲུབ་པ་ནི་ཆེར་མ་འོས་སོ། །དེར་གྲགས་པས་རྣམ་དག་ཏུ་སྒྲུབ་ན་བོན་དང་མུ་སྟེགས་བྱེད་ཀྱི་གཞུང་ལུགས་རྣམས་ཆོས་རྣམ་དག་ཏུ་འགྱུར་ཏེ། སངས་རྒྱས་པའི་གཞུང་རྣམ་དག་ཐམས་ཅད་དུ་དེ་རྣམས་ཀྱི་གཞུང་དང་གྲུབ་མཐའི་རྣམ་གཞག་མང་དུ་དྲང་ཞིང་གྲགས་པའི་ཕྱིར་རོ། །དབང་སྒྲུབ་མན་ངག་དེ་དག་རྣམས་ཀྱང་གཞན་དུ་མ་གྲགས་པས་ཁུངས་མ་མིན་པར་ཡང་འགྱུར་ཅིང༌། སྤྱིར་འདི་རྣམས་སུ་མ་གྲགས་པས་ཆོས་མིན་ཡིན་ན་ནི། འདི་རྣམས་ཀྱི་ནང་དུ་རྫོགས་
ཆེན་ལས་གཞན་པའི་མར་པ། མི་ལ་སོགས་ཀྱི་ཟབ་ཆོས་བདེ་མཆོག་སྙན་བརྒྱུད་སོགས་མང་པོ་དང༌། ཤངས་པའི་གསེར་ཆོས་བཞི་སོགས་མང་པོ་དང༌། དམ་པའི་ཞི་གཅོད་སྐོར་སོགས་མང་པོ་རྣམས་ཀྱི་ཡང་མིང་ཙམ་ཡང་མ་གྲགས་པས་དེ་རྣམས་ཕན་ཚུན་དུ་གང་ལོག་པ་ཡིན། བཀའ་བརྒྱད་དང་བདེ་གཤེགས་འདུས་པ་བཞེས་སོགས་ཀྱི་རྒྱུ་མཚན་གྱི་མིང་གི་ཆ་ཙམ་ཡང་ཡིད་ལ་མ་ངེས་བཞིན་དུ་དགག་པ་ལྟར་སྣང་བ་ཁ་ནས་མཐོ་ཚད་བྱེད་པའི་རྫུན་དང་བསྙོན་བརྟོལ་བྱེད་པ་འདི་རིགས་སམ་ཤེས་བརྫུ་ཅན་དག །ཨོ་རྒྱན་པདྨ་དང་བི་མ་ལ་སོགས་ཀྱིས་མཛད་པའི་གཞུང་མིན་ན་དེ་རྣམས་ཀྱི་བོད་དུ་ས་སྐྱ་པའི་འཁོན་ཀླུ་དབང་བསྲུངས་པ་སོགས་མང་པོ་དང༌། རྗེ་བཙུན་པ་སོགས་ལ་བཤད་ཅིང་གདམས་པའི་ཆོས་དེ་གང་ཡིན་ད་གཟོད་ཁྱོད་ཀྱིས་བསྟན་དགོས་སོ། ། ༢ སྔོན་གྱི་དཀར་ཆག་ལྡན་དཀར་མ་དང༌། འཕང་ཐང་མ་དང༌། སྦ་བཞེད། བླ་བཞེད་གང་དུ་ཡང་མིང་ཙམ་ཡང་མ་གྲགས་འདུག་པས་སྔོན་གྱི་རྒྱལ་བློན་དེ་རྣམས་ཀྱི་རིང་ལ་འགྱུར་བའི་རྙིང་མའི་རྒྱུད་ཡང་དག་མིན་ངེས་སུ་འདུག །ཅེས་ཟེར་མོད། དཀར་ཆག་དེ་རྣམས་སུ་གལ་ཏེ་མ་ཐེབས་པས་རྒྱལ་བློན་དེ་རྣམས་ཀྱི་རིང་ལ་མ་འགྱུར་བ་དང་མ་གསུངས་བའི་ཤེས་བྱེད་ཅི་ཡང་མེད་ཅིང་དཀར་ཆག་དེ་དག་ཐམས་ཅད་ལ་ཡང་འདྲ་མིན་སྔ་ཕྱི་གོ་རིམ་ཆད་
ལྷག ། ༈ མདོ་སྔགས་སོ་སོའི་ཕྱོགས་འཛིན། ༈ སོགས་འདོད་པ་མི་འཐུན་པ་སྣ་ཚོགས་ཡོད་པས། དེ་རྣམས་སུ་མེད་པ་ཁ་ཡར་གྱིས་སྔ་འགྱུར་མིན་པར་མི་འགྲུབ་བོ། །གལ་ཏེ་དེར་མེད་དུ་ཆུག་ཀྱང་དཀར་ཆག་དེ་དག་ནི་བཀའ་བསྟན་བཅོས་ཐུན་མོང་གི་སྤྱོད་ཡུལ་དུ་གྱུར་པ་རྣམས་ཡིན་པས། གསང་ཆེན་གྱི་རྒྱུད་དང་མན་ངག་ཐུན་མོང་མ་ཡིན་པ་རྣམས་དཀར་ཆག་དེ་རྣམས་སུ་མ་གྲགས་མོད། དེས་ན་དཀར་ཆག་གསུམ་དུ་མ་གྲགས་པས་ཆོས་མིན་དུ་སྒྲུབ་པ་ནི། རྒྱལ་བ་ནས་རྒྱལ་ཚབ་མཁས་གྲུབ་ཐམས་ཅད་ཀྱི་མན་ངག་ཐུན་མོང་ མ་ཡིན་པ་སྙན་ནས་སྙན་དུ་བརྒྱུད་པའི་ཆོས་ཟབ་ཐམས་ཅད་ཆོས་མིན་དུ་གཏོང་སྙིང་འདོད་པའི་སྔ་ལྟས་སོ། །༢ ནཱ་རོ་པ་དང༌། ཤཱནྟི་པ་དང༌། མཻ་ཏྲི་བ་དང༌། དམ་པ་རྒྱ་གར། ཨ་ཏི་ཤ།།ག་ཡ་དྷ་ར། རིན་ཆེན་བཟང་པོ། འབྲོག་མི། འགོས། མར་པ་ལོ་ཙཱ། རྔོག་ལོ་ལ་སོགས་དུས་ཕྱིས་ཀྱི་མཁས་གྲུབ་དེ་རྣམས་ཀྱི་རྫོགས་པ་ཆེན་པོའི་གཞུང་ཤླཽཀ་གཅིག་ཏུ་ལངས་པ་ཡང་བསྒྱུར་རྒྱུ་མ་རྙེད་སྣང་བས་ཨོ་རྒྱན་དང༌། རྒྱ་གར་དུ་དར་བའི་ཆོས་མིན་ངེས་པར་འདུག །ཅེས་ཟེར་མོད། ༈ བདེན་པ་ནི་མ་ཡིན་ཏེ། དེ་ལྟར་ན་གྲུབ་ཐོབ་ཨོ་རྒྱན་པས། ཐད་བཻ་ཧ་རའི་གཙུག་ལག་ཁང་ན་རྙིང་མའི་རྒྱུད་ཀྱི་མཚན་ཐོ་རང་ཡང་པོད་ཆེན་དུ་ལངས་པ་འདུག་ཅེས་རྣམ་ཐར་དུ་ཐེབས་པ་ཁྱོད་ཀྱིས་ཕྱིས་ཤིག །
ཁྱད་པར་ཇོ་བོས་ཨ་རོའི་ཐེག་ཆེན་རྣལ་འབྱོར་ལ་བསྔགས་བརྗོད་ཤིན་ཏུ་ཆེ་བ་དང༌། དམ་པས་རྫོགས་ཆེན་གྱི་གྲུབ་མཐའ་འཛིན་པ་དང༌། རྔོག་ལོས་བསམ་ཡས་ཀྱི་རྒྱ་དཔེ་ལ་བསྔགས་པ་སོགས་མ་མཐོང་བའི་རྫུན་གཏམ་མོ། །༈ ཕྱིས་ཀྱི་ལོ་པཎ་དེ་དག་གིས་རྙིང་མ་དང་རྫོགས་ཆེན་གྱི་གཞུང་ཅུང་ཟད་ཀྱང་མ་བསྒྱུར་ཞིང་བསྒྱུར་རྒྱུ་འཕགས་ཡུལ་ནས་མ་རྙེད་པའི་ཤེས་བྱེད་ཅི་ཡང་མེད༌། ཨོ་རྒྱན་དང་རྒྱ་གར་གཉིས་མིན་པ་གཞན་དུ་དར་བའི་ཆོས་ཐམས་ཅད་ཆོས་མིན་ཡིན་ནམ། དེ་ལྟ་ན་རྩ་བརྒྱུད་ཆེན་པོ་རྣམས་འཕགས་ཡུལ་དུ་མེད་ཅིང་དར་བྱེད་ཀྱི་གླིང་དང༌། ཤམ་བྷ་ལ་ལ་སོགས་པ་རྣམས་སུ་དར་བར་བཤད་ཅིང་རྩ་རྒྱུད་དེ་རྣམས་ལོ་པཎ་དེ་དག་གིས་མ་རྙེད་པས་ཆོས་མིན་ཡིན་ནམ། འཕགས་ཡུལ་དུ་ཡོད་པ་ལ་དུས་འཁོར་རྒྱུད་འགྲེལ་ལ་སོགས་སེམས་འགྲེལ་སྐོར་གསུམ་རྣམས། ག་ཡ་དྷ་ར། འབྲོག་མི། མར་འགོས་རྣམས་ཀྱིས་ཅུང་ཟད་ཀྱང་མ་བསྒྱུར་བས་ཆོས་མིན་དུ་བྱེད་དམ། ལོ་པཎ་དེ་དག་རེ་རེས་མ་རྙེད་པ་དང༌། མ་བསྒྱུར་བས་ཆོས་མིན་ཡིན་ན། ལོ་ཆེན་རིན་བཟང་གིས་སློབ་དཔོན་ཀུན་སྙིང་གིས་མཛད་པའི་དེ་ཉིད་འདུས་པའི་རྒྱུད་འགྲེལ་དེ་ཉིད་སྣང་བ་དང༌། སྦྱོང་རྒྱུད་ཀྱི་འགྲེལ་པ། ཆོ་ག་སོགས་རྣམས་ཀྱང་རྒྱ་གར་དུ་མ་
རྙེད་པར་སྣང་བས་འགྲེལ་བ་དེ་དག་ཀྱང་ཆོས་མིན་ཡིན་ནམ། རྒྱ་གར་འཕགས་པའི་ཡུལ་དུ་བར་སྐབས་སུ་ནུབ་པའི་མདོ་རྒྱུད་དཔག་ཏུ་མེད་པ་ཅིག་བཤད་པས་ལོ་པཎ་དེ་དག་གིས་དེ་རྣམས་ཀྱང་མ་མཐོང་མོད། དེ་དག་ཀྱང་ཆོས་མིན་དུ་བྱེད་དམ་རྒྱ་གར་ནས་འགྱུར་ངེས་པའི་མདོ་རྒྱུད་ཕལ་ཆེར་ཞིག་ལོ་པཎ་དེ་དག་གི་དུས་རྒྱ་གར་དུ་མེད་པར་བཤད་པས་དེ་དག་ཀྱང་ཆོས་མིན་དུ་བྱེད་དམ། གཞན་ཡང་ལོ་པཎ་དེ་དག་གིས་རྫོགས་ཆེན་རྒྱ་གར་ནས་མ་རྙེད་པ་མ་གཏོགས། རྒྱལ་བའི་གསུངས་རབ་དགོངས་འགྲེལ་དང་བཅས་པ་རྒྱ་གར་དུ་གང་བཞུགས་ཐམས་ཅད་ལོ་པཎ་རེ་རེས་ཀྱང་རྫོགས་པར་བསྒྱུར་བ་ཡིན་ནམ། ཡང་ན་ཕྱོགས་རེ་བ་དང་ཁ་ཡར་ཙམ་ལས་མ་བསྒྱུར་བ་ཡིན། ཕྱོགས་རེ་བ་ལས་ཐམས་ཅད་མ་བསྒྱུར་ན་ནི། དེ་རྣམས་ཀྱིས་རྫོགས་ཆེན་མ་བསྒྱུར་བར་ཟད་དོ། །དེ་ལས་གཞན་པའི་པདྨ་སམ་བྷ་ཝ། སངས་རྒྱས་གསང་བ། བི་མ་ལ་སོགས་སྔ་ཕྱིར་བྱོན་པའི་ལོ་པཎ་ཆེས་མང་བ་རྣམས་ཀྱིས་བསྒྱུར་ཅིང་གཏན་ལ་ཕབ་པས་ཆོག་མོད། ཇོ་བོ་རྗེ་བོད་དུ་བྱོན་ནས་བསམ་ཡས་སུ་ཕྱགས་ཕེབས་པའི་དུས་ཇོ་བོས་བེ་ཀར་དཀོར་མཛོད་ནས་རྒྱ་དཔེ་མང་པོ་གཟིགས་པས། ཇོ་བོས་གསན་གཟིགས་མ་མཛད་པའི་རྒྱུད་སྡེ་མང་པོ་བཞུགས་གདའ་བ་དང༌། ཇོ་བོའི་ཞལ་ནས།
མི་ཡུལ་ན་ཐེག་ཆུང་གི་འདུལ་བ་ཉུང༌། དེ་ལས་ཐེག་པ་ཆུང་ངུའི་མདོ་སྡེ་མང༌། དེ་ཚོ་བས་ཐེག་ཆེན་གྱི་མདོ་སྡེ་མང༌། དེ་བས་ཐེག་ཆེན་གྱི་མངོན་པ་མང༌། དེ་ཐམས་ཅད་པས་ཀྲི་ཡ་མང༌། དེ་ཐམས་ཅད་པས་ཡོ་ག་མང༌། དེ་ཐམས་ཅད་པས་ཕ་རྒྱུད་མང༌། དེ་ཐམས་ཅད་པས་མ་རྒྱུད་མང་སྟེ། མི་ཡུལ་མ་གཏོགས་ལྷ་མ་སྲིན་སྡེ་བརྒྱད་ཀྱི་གནས་ན་ཡང་བསམ་གྱིས་མི་ཁྱབ་པ་ཞིག་བཞུགས་ཤིང་འགྲོ་བ་མཐོ་དམན་མ་ལུས་པའི་དོན་ཡང་འདི་ཡི་སྒོ་ནས་མཛད་པ་མང་གསུངས་ཤིང༌། མི་ཡུལ་ན་བཞུགས་པའི་གསང་སྔགས་འདི་ལ་ང་ལས་མཁས་པ་མེད་སྙམ། མཁའ་འགྲོ་མ་རྣམས་ཀྱིས་ནམ་མཁའ་ནས་གཞལ་ཡས་ཁང་གི་སྒོ་ཕྱེ་ནས་རྒྱུད་མང་པོ་བསྟན་པ་ཡིན་ཡང་འདི་རྣམས་མི་གདའ། ཐེག་པ་ཆེན་པོ་གསང་སྔགས་འདི་ལ་མཐའ་མངོན་རྒྱུ་ཡོད་ཡོད་མི་འདུག་གསུངས་ནས་ཐུགས་རྒྱལ་ཆག །བོད་ཀྱི་རྒྱལ་པོ་ལ་རྗེས་སུ་ཡི་རང་མཛད་ནས། བོད་ཀྱི་བསྟན་པ་དར་དུས་དེ་འདྲ་བ་རྒྱ་གར་ཏུ་ཡང་མ་བྱུང་འདུག་གསུངས། རྒྱ་གར་དུ་མེས་དགྲ་ལན་མང་དུ་བྱུང་བས་ཚིག་པ་འདྲ། རྒྱ་གར་ན་མེད་པའི་རྒྱུད་མང་པོ་འདིར་སྣང་གསུངས་ནས་ཕལ་ཆེར་བཞེངས་ནས་རྒྱ་གར་དུ་བསྐུར་བར་བཤད་མོད། པཎ་ཆེན་ཤཱཀྱ་ཤྲཱིས་ཀྱང་ཁོ་བོ་ལ་སྔར་མ་གྲགས་པའི་གདམས་
པ་བཞི་ཡོད་གསུངས་ནས་དེའི་ནང་ནས་ཡ་གྱལ་གཅིག །ཡང་དག་མེ་གཅིག་ཐོད་གཅིག་དང༌། དེ་ལ་བརྟེན་པའི་གཏུམ་མོའི་གདམས་པ་སོགས་རྣམས་ཀྱང་སྔགས་རྙིང་མ་ཡིན་མོད། དམ་པ་རྒྱ་གར་གྱི་བླ་མ་གྲུབ་ཐོབ་ཕོ་མོ་ལྔ་བཅུ་རྩ་བཞིའི་ནང་ནས་ནམ་མཁའ་ལྟ་བུའི་སྐུ་ཐོབ་པའི་བླ་མ་བཞི་ཡིས་སློབ་དཔོན་པདྨ་འབྱུང་གནས་ལས་རྡོ་རྗེ་ཕུར་བའི་དབང་བརྒྱུད་མན་ངག་ཐམས་ཅད་དང༌། རྫོགས་པ་ཆེན་པོ་ལ་སོགས་པ་མང་དུ་གསན། དམ་པས་བོད་དུ་སྐུ་ཚེ་འདི་ལ་ལན་གསུམ་དུ་བྱོན་པའི་དང་པོ་ལ་སློབ་དཔོན་པདྨ་འབྱུང་གནས་དང་སྟབས་གཅིག་ཏུ་མངའ་རིས་སྟོད་ནས་བྱོན། གངས་ཏི་སེར་གད་པ་གསེར་གྱི་བྱ་སྐྱིབས་སུ་ཞག་གསུམ་བཞུགས། བྱང་ལམ་ནས་བརྒྱུད་དེ་བསམ་ཡས་སུ་བྱོན་ནས་སློབ་དཔོན་ཆེན་པོ་པདྨས་མི་དབང་ཁྲི་སྲོང་ལྡེའུ་བཙན་སྲས་དང་བཙུན་མོར་བཅས་པ་ལ་ཕུར་བའི་དབང་སྐུར་དུས་ཁོ་བོས་ལས་སློབ་བྱས། དེ་དུས་ཁོ་བོ་ལ་ཀ་མ་ལ་ཤཱི་ལར་གྲགས་ནས། ཧཱ་ཤང་གི་ལྟ་བ་སུན་ཕྱུང༌། མཚན་མོའི་དུས་སུ་སློབ་དཔོན་པདྨས་བསམ་ཡས་ཀྱི་དབུ་རྩེར་རྒྱལ་པོ་ཉིད་དང༌། མཁན་པོ་ཧཱ་ཤང་ལ་སོགས་ལ་སྙིང་པོ་བླ་ན་མེད་པ་རྫོགས་པ་ཆེན་པོ་གསུངས། ཁོ་བོས་ཉིན་པར་དབུ་མ་སྣང་བ་སྒོམ་རིམ་གསུམ་ལ་སོགས་པ་མཚན་ཉིད་ཀྱི་ཆོས་མང་དུ་བཤད་ཅེས་གསུངས་
ཤིང༌། གཞན་ཡང་དམ་པ་ལ་ཀུན་དགས་ཞུས་པ། དམ་པ་རྫོགས་པ་ཆེན་པོ་འདི་ལྟ་བ་མཐོ་བ་ལགས་སམ་ཞུས་པས་རྫོགས་པ་ཆེན་པོ་ནམ་མཁའ་དང་འདྲ་གསུངས། སེམས་འཛིན་ཡང་མང་ལགས་སམ་ཞུས་པས། ནམ་མཁའ་ཁབ་མིག་ཏུ་འོང་བ་ཡང་ཤེས་གསུངས་སོ། །ཕ་རྒྱུད་གཡོ་བ་རླུང་གི་བླ་མ་རྣམས་ཀྱི་ནང་ནས་ཡོ་གའི་མཁས་པ་གསུམ་ལས་སངས་རྒྱས་གསང་བ་ཡང་དམ་པའི་བླ་མ་ཡིན་ཞིང༌། དེ་ལས་གསང་སྙིང་ལ་སོགས་སྒྱུ་འཕྲུལ་གྱི་གདམས་པ་རྣམས་གསན་པ་ཡིན་ཏེ། དེ་ཡང་སྤྱིར་སྔགས་ཀྱི་རྒྱུད་སྡེ་རྣམས་ལས། བྱ་སྤྱོད་ཡོ་ག་གསུམ་ནས་དབང་ནི་བུམ་དབང༌། ལམ་ནི་གཞི་དམ་རྒྱ་བསྐྱེད་རིམ་གཙོ་ཆེ། རྣལ་འབྱོར་བླ་མེད་ཟླ་གསང་ཐིག་ལེ་སོགས་ཕ་རྒྱུད་རྣམས་ནས་དབང་ནི་གསང་དབང༌། ལམ་ནི་དོན་ཆོས་རྒྱ། རྫོགས་རིམ་རླུང་གཙོ་བར་བྱེད། མ་རྒྱུད་ནས་དབང་ནི་གསུམ་པ། ལམ་ནི་དེའི་ལས་ཀྱི་ཕྱག་རྒྱ། རྫོགས་རིམ་ཐིག་ལེ་གཙོ་ཆེ། སྙིང་པོ་དོན་གྱི་རྒྱུད་འགྲེལ་དཔལ་རྙོག་མེད་ལ་སོགས་ནས་དབང་ནི་བཞི་པ། ལམ་ནི་ཕྱག་རྒྱ་ཆེན་པོའམ། རྫོགས་པ་ཆེན་པོ་གཙོ་བོར་བྱེད་ཅེས་དང༌། དེ་ལྟར་བཞི་པོ་དེ་ཐེག་པ་མཆོག་དམན་དང༌། ཟབ་མི་ཟབ་ཀྱི་སྒོ་ནས་གོང་འོག་ཏུ་ཕྱེ་བ་ཡིན་ནོ། །ཞེས་གསུངས་སོ། །དེ་ལ་རྡོ་རྗེ་སེམས་དཔའ་སྒྱུ་
འཕྲུལ་དྲྭ་བ་འདི་ལ་རྩ་རྒྱུད་གསང་བ་སྙིང་པོ་ལ་སོགས་པའི་རྒྱུད་འགྲེལ་གདམས་པ་ལག་ལེན་དང་བཅས་པ་དཔག་མེད་ཅིག་བཞུགས་ཀྱང༌། ཉམས་སུ་ལེན་པ་ལ་ཚིག་གསུམ་པོ་འདིས་ཆོག་སྟེ། དག་སྣང་ཡིད་ལ་བྱས་པས་དངོས་འཛིན་ཡིད་ཀྱི་སྤུ་རིས་སུབས་ནས། སྣང་བ་སྤྲུལ་སྐུར་འཆང་བ་འདི་ནི། བུདྡྷ་གུ་ཧྱའི་གདམས་པ་ཡིན། ཞེས་གསུངས་ནས་འདིའི་ཉམས་སུ་ལེན་ལུགས་སངས་རྒྱས་གསང་བའི་རྣམ་ཐར་དང་བཅས་པ་གསུངས་ཤིང༌། སངས་རྒྱས་གསང་བ་འདིས་བོད་དུ་ཡང་གངས་ཏི་སེར་བྱོན་ནས་དེར་བཞུགས་པ་ལ། རྒྱལ་པོ་ཁྲི་སྲོང་ལྡེའུ་བཙན་གྱིས་གདན་འདྲེན་དུ་བཏང་བ་ལ། ང་དེར་ཡོང་ན་སྲོག་གི་བར་ཆད་དུ་འགྲོ་བས་མི་ཡོང་གསུངས་ནས། བསམ་གཏན་ཕྱི་མའི་རིམ་པ་དང༌། དཔུང་བཟང༌། ལེགས་གྲུབ་རྣམས་ཀྱི་བསྡུས་འགྲེལ་རེ་མཛད་ནས་བསྐུར། དེ་ལ་རྒྱལ་པོ་དགྱེས་ནས་འབུལ་བ་མང་པོ་བསྐུར་བས། སློབ་དཔོན་ཡང་མཉེས་ནས། སྒྱུ་འཕྲུལ་གསང་སྙིང་གི་འགྲེལ་བ་དང༌། སྒྱུ་འཕྲུལ་ཞི་ཁྲོའི་སྒྲུབ་དཀྱིལ་རྡོ་རྗེ་ལས་རིམ། དཀྱིལ་འཁོར་ཆོས་དོན་བྱ་བ་གཞན་ཡས་ཁང་གི་གསལ་བྱེད། རྣམ་སྣང་མངོན་བྱང་བསམ་གཏན་ཕྱི་མ་རྣམས་ལ་ཚིག་འགྲེལ་མཛད་པ་དང༌། རྒྱལ་པོ། བཙུན་མོ། བློན་པོ། འབངས། བོད་ཀྱི་རབ་
བྱུང་སོགས་རྣམས་ལ་ཞལ་ཏའི་སྤྲིང་ཡིག་དང་བཅས་པ་བསྐུར་བས་རྒྱལ་པོ་ཡང་ཤིན་ཏུ་དགྱེས་སོ། །གཞན་ཡང་སྒེག་པའི་རྡོ་རྗེ། ཧཱུྃ་ཀཱ་ར། བྷ་སུ་དྷ་ར། པདྨ་བཛྲ་རྣམས་ལ་སྔགས་རྙིང་མར་གྲགས་པ་རྣམས་ཀྱི་རྒྱུད་གཞུང་དབང་གདམས་ངག་ཐམས་ཅད་དམ་པས་གསན་པར་བཤད་ཅིང༌། ལོ་རྒྱུས་ལ་སོགས་ཤིན་ཏུ་མང་བས་དམ་པ་རྒྱ་གར་ཀྱིས་ཀྱང་རྫོགས་ཆེན་དང་རྙིང་མའི་ཆོས་སྐོར་མ་བསྒྱུར་བ་དང་མ་བཤད་པའི་ཤེས་བྱེད་ཡང་དག་པ་རྙེད་ན་སྟོན་ཅིག །དེ་ལྟར་མིན་ན་དམ་པ་རྒྱ་གར་གྱིས་མཛད་པའི་ཞི་བྱེད་ཅེས་ཡོངས་སུ་གྲགས་པའི་བཀའ་བབས་སྙན་བརྒྱུད་བཞིའི་གདམས་པ་ལ་ཐུན་མོང་གི་གདམས་པ་གྲུབ་ཐོབ་ཕོ་མོ་ལྔ་བཅུའི་གདམས་པ། གཞུང་གི་གནད་བསྡུས་པ་ལམ་དངུལ་སྒོང་དག་པ། ངོ་སྤྲོད་ཀྱི་གནད་བསྡུས་པ་ལམ་དྲི་མེད་གསེར་སྒོང་དག་པ། གདམས་པའི་གནད་བསྡུས་པ་ལམ་དྲི་མེད་ཤེལ་སྒོང་དག་པ་རྣམས་ཀྱི་ཕལ་ཆེ་བ་ཞིག་རྫོགས་ཆེན་སོགས་རྙིང་མའི་བླ་མ་པདྨ་འབྱུང་གནས། སངས་རྒྱས་གསང་བ། སྒེག་པའི་རྡོ་རྗེ། པདྨ་བཛྲ། ངག་དབང་གྲགས་པ། ཀོ་ཤ་པ་བལ་པོ་བ་སུ་དྷ་ར་རྣམས་ལས་གསན་པའི་རྫོགས་ཆེན་དང་རྙིང་མ་རྣམས་ཀྱི་གདམས་པ་ཡིན་པས་ཡང་ན་དམ་པ་དང༌། ཆོས་ཞི་བྱེད་རྣམས་ཆོས་ལོག་ཡིན་ནམ།
ཡང་ན་དེའི་ནང་གི་རྫོགས་ཆེན་སོགས་རྣམས་ལོག་པ་ཡིན་པ་སྟོན་ཅིག །དེས་ན་དམ་པ་རྒྱ་གར་གྱིས་རྫོགས་ཆེན་མ་བསྒྱུར་བ་ལ་སོགས་པའི་ཚིག་འདིས་མ་བྱོན་པའི་སངས་རྒྱས་གཉིས་པར་ཞལ་གྱིས་བཞེས་པའི་དམ་པ་སངས་རྒྱས་ཀྱང་སྐྱོན་ཅན་དུ་མ་བཏང་ཞིག ། ༢ སྔོན་གྱི་རྒྱལ་བློན་བྱང་ཆུབ་སེམས་དཔའི་སྐུ་རིང་ལ་བསྒྱུར་བའི་ཆོས་མིན་པས། རྫོགས་ཆེན་འདི་གསང་སྔགས་རྙིང་མའང་མ་ཡིན། དུས་ཕྱིས་ལོ་པཎ་མཁས་གྲུབ་རྣམས་ཀྱིས་མ་བསྒྱུར་བས་གསང་སྔགས་གསར་མ་ཡང་མ་ཡིན། ཁོ་རང་ལ་སྒོས་ཀྱི་རྒྱུད་དང་རྒྱ་གཞུང་མཐའ་ཡས་པ་ཡོད་པར་འདོད་པས་ནཱ་རོ་དང་ནི་གུ་ཆོས་དྲུག་ལྟ་བུ་རྒྱུད་སྡེའི་དགོངས་པ་བླ་མའི་མན་ངག་ཏུ་བསྡེབས་པ་དེ་ཡང་མ་ཡིན། ཞེས་ཟེར་མོད། དེ་ལྟ་ན་རྒྱལ་བློན་དེ་རྣམས་ཀྱི་དུས་སུ་རྫོགས་ཆེན་སོགས་རྣམས་ནི་མ་བསྒྱུར། ཀྱེ་རྡོ་རྗེ་ལ་སོགས་དེ་བས་ཀྱང་མེད་པས་དེ་དུས་ཀྱི་རྒྱལ་བློན་རྣམས་ཐམས་ཅད་རྡོ་རྗེ་ཐེག་པའི་སྐལ་བ་དང་མི་ལྡན་པའི་སྐལ་ཆད་ཡིན་ནམ། དེ་ལྟར་མིན་ན་དེ་དུས་ཀྱི་པདྨ་འབྱུང་གནས། སངས་རྒྱས་གསང་བ། བི་མ་ལ་རྣམས་ཀྱིས་གསུངས་པའི་གསང་སྔགས་བླ་མེད་ཀྱི་ལམ་དེ་གང་ཡིན་སྟོན་ཅིག །གཞན་ཡང་སྔོན་གྱི་ལོ་པཎ་འདི་རྣམས་ཀྱིས་གསང་སྔགས་བླ་མེད་ཀྱི་གསར་མ་རྣམས་དེ་དུས་མ་བསྒྱུར་བ་དེ། དེ་ཀུན་གྱིས་ཀྱང་རྒྱ་གར་ནས་མ་རྙེད་ནས་མ་བསྒྱུར་བ་ཡིན་ནམ། ཡོད་ཀྱང་མ་བསྒྱུར་བ་ཡིན།
དེ་ལྟ་ནི་གཞན་ལའང་མཚུངས་སོ། །ཡང་དེའི་དུས་སུ་སློབ་དཔོན་པདྨ་ལ་སོགས་པས་བསྒྱུར་བའི་གསང་ཆེན་བླ་མེད་ཀྱི་མན་ངག་རྣམས་ཀུན་དང་ཐུན་མོང་མ་ཡིན་པའི་དོན་གྱིས་ཀུན་གྱིས་སྤྱོད་ཡུལ་དུ་མ་གྱུར་པས་ཐམས་ཅད་ཀྱིས་མངོན་དུ་མི་སྣང་མོད། རྒྱུད་གཞུང་ཁ་ཅིག་ནི་མངོན་དུ་ཡང་སྣང་སྟེ། བཅོམ་ལྡན་རལ་གྲིས། གསང་སྔགས་བླ་མེད་ཀྱང་དེ་དུས་སྒྱུ་འཕྲུལ་གསང་སྙིང་ལ་སོགས་སྒྱུ་འཕྲུལ་སྡེ་བརྒྱད་གསང་སྙིང་གི་འགྲེལ་བ་ཉི་འོད་སེང་གེས་མཛད་པ་རྣམས་པདྨ་རུ་རྩེས་བསྒྱུར་ཞིང༌། ཡང་གསང་སྙིང་དང་དའི་འགྲེལ་པ་སངས་རྒྱས་གསང་བས་མཛད་པ་གཉིས་བཻ་རོ་ཙ་ནས་བསྒྱུར་བར་འཕང་ཐང་སོགས་སུ་བཤད་ཅེས་གསུངས་ཤིང༌། སྐུའི་རྒྱུད་སངས་རྒྱས་མཉམ་སྦྱོར། གསུང་གི་རྒྱུད་ཟླ་གསང་ཐིག་ལེ། ཐུགས་ཀྱི་རྒྱུད་གསང་བ་འདུས་པ། སྒྱུ་འཕྲུལ་དྲྭ་བ་རྣམས་ལྕེ་བཀྲ་ཤིས་ཀྱིས་བསྒྱུར་བར་དཀར་ཆག་འཕང་ཐང་དང༌། ལྡན་དཀར་གཉིས་སུ་བཤད་ཅེས་རིག་རལ་གྱིས་གསུངས་མོད། འདི་རྣམས་ཐམས་ཅད་ནི་ཆོས་སྐད་རྫོགས་ཆེན་གྱི་རྗེས་འབྲངས་རྙིང་མ་ཡིན་ཞིང༌། ཁྱད་པར་སངས་རྒྱས་མཉམ་སྦྱོར་གྱི་བླ་མ་བརྒྱུད་པ་སོགས་ཀྱང་སྙིང་ལ་སོགས་དང་ཁྱད་མེད་དོ། །གཞན་ཡང་དེ་དུས་སངས་རྒྱས་གསང་བས་བྲན་ཀ་མུ་ར་ཏི་དང༌།
སྦས་མཉྫུ་ཤྲཱི། བཻ་རོ་ཙ་ན་གསུམ་ལ་བཤད་ཅིང་བསྒྱུར་བ་ལ་སྔ་དར་ཟེར། དེ་ནས་པདྨ་འབྱུང་གནས་ཀྱིས་གཉགས་ཛྙཱ་ན་ཀུ་མཱ་ར། ངན་ལམ་རྒྱལ་བ་མཆོག་དབྱངས་རྣམས་ལ་བཤད་ཅིང་བསྒྱུར་བ་ལ་བར་དར་ཟེར། བི་མ་ལས་གཉགས་དང་རྨ་རིན་ཆེན་མཆོག་ལ་བཤད་ཅིང་བསྒྱུར་པ་ལ་ཕྱི་དར་ཟེར། དེ་དག་ནི་སྔགས་རྙིང་མ་རྫོགས་ཆེན་གྱི་རྗེས་འབྲང་ཡིན་ནོ། །ཕྱིས་ཀྱི་ལོ་པན་རྣམས་ཀྱིས་མ་བསྒྱུར་བའི་ཤེས་བྱེད་མེད་དེ། གོང་དུ་བསྟན་པ་ལྟར། དམ་པ་དང༌། པཎ་ཆེན་ཤཱཀྱ་ཤྲཱི་དང༌། སྨྲྀ་ཏི་དང༌། ལོ་ཆེན་རིན་བཟང་རྣམས་ཀྱིས་རྫོགས་ཆེན་དང༌། ཡང་དག་མེ་གཅིག་གི་འགྲེལ་པ་ཀུན་སྙིང་གིས་མཛད་པ་རྣམས་བསྒྱུར་བར་བཅོམ་ལྡན་རལ་གྲིས་བཤད་པ་རྣམས་ཅི་ཡིན། ཁོ་རང་ལ་སྒོས་རྒྱུད་ཡོད་པས་ཅི་ཉེས་ཏེ། དམ་པའི་ཞི་བྱེད་ལའང་ཁོ་རང་གི་སྒོས་རྒྱུད་ད་ལྟའི་རྒྱུད་གཞན་ཀུན་དང་ཆོས་སྐད་མི་མཐུན་པའི་ཨཱ་ལི་ཀཱ་ལི། ཆུ་ཀླུང་རོལ་བའི་གསང་རྒྱུད་ཆེ་ཆུང༌། བདག་མེད་མའི་བརྡ་རྒྱུད་རྣམས་དང༌། ཕྱག་ཆེན་བརྡ་རྩལ་ཁོ་རང་གི་སྒོས་རྒྱུད། བརྡ་རྒྱུད་ལེའུ་ལྔ་བཅུ་རྩ་ལྔ་ཡོད་པར་བཤད་པས་སྒོས་རྒྱུད་ཡོད་པས་ཅི་ཉེས། སྦྱོར་དྲུག་རིམ་ལྔ། ལམ་འབྲས་སོགས་རྣམས་ལ་ཡང་དུས་འཁོར་འདུས་པ་བརྟག་གཉིས་སོགས་རྣམས་སྒོས་རྒྱུད་ཡིན་པ་
དང་འདྲ་མོད། ཆོས་དྲུག་ལྟ་བུ་རྒྱུད་སྡེར་མེད་ན་ནི་བླ་མས་སྡེབ་རྒྱུ་ཅང་ཡོད་དམ། ཐམས་ཅད་འདྲ་བ་ཞིག་དགོས་ན་ནི་རྡོ་རྗེ་ཐེག་པའི་དབྱེ་བ་མང་པོ་ཅི་བྱེད་གཏོལ་མེད་ཀྱི་ཚིག་གོ །།༢ གླང་དར་མས་བསྟན་པ་བསྣུབས་པའི་རྗེས་སུ་རྫུན་རྒྱུད་བརྩམས་པ་དེ་ནས། དར་རྗེ་དཔལ་གྲགས། གནུབས་ཨ་རོ་ཏྲང་ཤག་རྣམས་ཀྱིས་ཀུན་འདུས་ཀུན་བྱེད་སོགས་བརྩམས། ལྕེ་བཙུན་གྱིས་བི་མ་ལའི་སྙིང་ཐིག །ལས་འབྲེལ་རྩལ་གྱིས་མཁའ་འགྲོ་སྙིང་ཐིག །རྡོ་རྗེ་གླིང་པས་རྡོར་སེམས་སྙིང་ཐིག །གནུབས་དང་ཉང་རལ་སོགས་ཀྱིས་བཀའ་བརྒྱད་དང་བདེ་འདུས་ལ་སོགས་པ་མཐའ་ཡས་པ་བྱས་ཏེ། བོད་བླུན་པོས་རང་བཟོ་བྱས་པས་རྒྱུད་མིན་རྒྱུད་དུ་བརྫུས་ནས། བསྟན་པ་ཆུ་རྙོགས་མ་ཅན་ལྟ་བུར་བྱས་པའི་ཆོས་ལོག་ཡིན། རྒྱུ་མཚན་འདི་རྣམས་ལ་དགོངས་ནས། ལོ་ཙྪ་བ་རིན་ཆེན་བཟང་པོ་དང༌། ལྷ་བླ་མ་ཡེ་ཤེས་འོད། ཕོ་བྲང་ཞི་བ་འོད་རྣམས་ཀྱིས། ད་ལྟ་ལས་ཟད་རྒྱལ་པོའི་ཁྲིམས་ཉམས་པས། །རྫོགས་ཆེན་མིང་བཏགས་སྔགས་ལོག་བོད་དུ་དར། །དེ་ཡིས་རྒྱལ་ཁམས་ཕུང་སྟེ་འདི་འདྲར་གྱུར། །ཅེས་སོགས་ཀྱི་འབྱམ་ཡིག་བཏང༌། ཞེས་ཟེར་མོད། ༈ གང་ཟག་བླུན་པོས་ཆོས་ལོག་དེ་ཙམ་བརྩམས་ཐུབ་ན་བླུན་པོའི་ཐ་སྙད་གང་ལ་འཇོག ། ཆོས་དེ་རྣམས་ལས་དངོས་གྲུབ་བརྙེས་པ་མང་དུ་བྱུང་བས་གལ་ཏེ་བརྩམས་པ་ཡིན་དུ་ཆུག་ཀྱང་སངས་རྒྱས་དངོས་དང་མཚུངས་པའི་རིག་འཛིན་ཡིན་པས་ཆོས་ཀྱིས་གོ་ཆོད། དེའི་རྒྱུ་མཚན་སྡུད་པ་ལས། རྒྱལ་བའི་
ཉན་ཐོས་གང་ཞིག་ཆོས་འཆད་ཅིང༌། །ཞེས་པ་ལ་སོགས་ནས། དེ་དག་ཀུན་ཀྱང་དེ་བཞིན་གཤེགས་པ་སྐྱེས་བུའི་མཐུ། ཞེས་པའི་དོན་མི་ཤེས་པ་སྙིང་རེ་རྗེ། ༈ གླང་དར་མས་བསྟན་པ་བསྣུབས་ཕྱིན་ཆད་དེ་རྣམས་ཁྱོད་རང་གི་འདོད་དབང་ཙམ་དུ་ཆོས་ལོག་ཡིན་དུ་ཆུག །དེ་ཕན་ཆད་དུ་པདྨ་སམ་བྷ་ཝ་དང༌། བི་མ་ལ། སངས་རྒྱས་གསང་བ་རྣམས་ཀྱིས་རྒྱལ་པོ་ཁྲི་སྲོང་ལྡེའུ་བཙན་དང༌། ས་སྐྱའི་འཁོན་ཀླུ་དབང་བསྲུངས་བ་རྡོ་རྗེ་རིན་ཆེན་སོགས་རྣམས་ལ་གནང་བའི་རྫོགས་ཆེན་དང༌། ཡང་ཕུར་རྣམས་ཀྱང་ལོག་པ་ཡིན་ནམ། དེ་ལྟ་ནི་ཀླུ་དབང་བསྲུངས་སོགས་ས་སྐྱ་བ་རྗེས་འབྲངས་དང་བཅས་པ་རྣམས་ཀྱིས་ཀྱང་སྔགས་ལོག་བརྩམས་ནས་རང་གཞན་ཐམས་ཅད་ལོག་པའི་ལམ་དུ་འཁྲིད་པ་ནི་ས་སྐྱ་པ་ཐམས་ཅད་འཇམ་པའི་དབྱངས་ཀྱི་རྣམ་འཕྲུལ་དུ་གྲགས་ཀྱང་ཆེར་མ་འོས་སོ། །གཞན་ཡང༌། དར་རྗེ་དཔལ་གྲགས། གནུབས་ཨ་རོ། ཏྲང་ལྕེ་བཙུན་རྣམས་ཀྱིས་དུས་ལ། ལོ་ཆེན། ལྷ་བླ་མ་སོགས་ཀྱི་དེ་རྣམས་ཀྱི་སྔགས་ལོག་བརྩམས་པ་དགོངས་ནས་སུན་འབྱིན་གྱི་འབྱམ་ཡིག་བཏང་དུ་ཆུག་སྟེ་ཕལ་ཆེར་དུས་མཚུངས་ཡིན་ནམ། ལས་འབྲེལ་རྩལ། རྡོ་རྗེ་གླིང་པ། ཉང་རལ་སོགས་རྣམས་ཕྱིས་རང་བྱུང་རྡོ་རྗེ་སོགས་དང་དུས་མཚུངས་ཙམ་ཡིན་པས་དེ་ལ་དགོངས་ནས་ཞེས་པ་འདི་གཏོལ་མེད་དོ། །ཕྱིས་འདི་རྣམས་འོང་བར་དགོངས་
ནས་གསུངས་པ་ཡིན་ན་ནི། ལོ་རིན་སོགས་ཤཱཀྱ་ཐུབ་པ་ལས་ཀྱང་ཆེས་ལྷག་པར་འགྱུར་ཏེ། ཤཱཀྱ་ཐུབ་པས་ནི་བོད་ལྟ་བུའི་ཆོས་ལོག་རྣམས་ལུང་སྟོན་གྱིས་མི་ལང་ཞེས་ཟེར་བ་མ་ཡིན་ནམ། འདི་རྣམས་ཁ་ཅིག་ནི་མ་ངེས་བཞིན་དུ་སྨྲ་བ་སྟེ། བཀའ་བརྒྱད་དང་བདེར་འདུས་ཞེས་པའི་མིང་ཙམ་གྱི་ཆ་ཡང་མ་ངེས་པར་སྨྲ་བའོ། །འབྱམ་ཡིག་ཏུ་ཡང༌། རྫོགས་ཆེན་མིང་བཏགས་ཆོས་ལོག་ཅེས་པས། རྫོགས་ཆེན་གྱི་མིང་གིས་བཏགས་པའི་སྔགས་ལོག་མང་པོ་དར་བས། དེས་རྒྱལ་ཁམས་ཕུང་ཟེར་བ་ཡིན་གྱི། རྫོགས་ཆེན་དར་བ་ཟེར་བ་མ་ཡིན་མོད། དེས་ན་དེའི་དུས་ཨ་ཙ་ར་དམར་པོ་ལ་སོགས་པས་ཆགས་ལམ་གྱི་གདམས་པ་བྱ་བའི་ལམ་བསྟན་ནས་སྤྱོད་རྩིང་སྣ་ཚོགས་པ་དང༌། སེར་ཁྱིམ་ཟེར་ནས་རབ་བྱུང་གིས་བུད་མེད་བསྟེན་པ་སོགས་རྣམས་བྱུང་བས་དེ་རྣམས་དགག་པའི་ཕྱིར་དུ་ཡིན་གྱི་རྫོགས་ཆེན་དགག་པ་མ་ཡིན་པར་ངེས་ཤིང༌། དེ་ལྟ་མིན་ན་དེ་དུས་གསང་སྔགས་གསར་མའི་ཀྱེ་རྡོར་ཆ་མཐུན་གྱི་རྒྱུད་ཕྱག་རྒྱ་ཆེན་པོ་ཐིག་ལེའི་རྒྱུད། ཡེ་ཤེས་སྙིང་པོ། ཡེ་ཤེས་ཐིག་ལེ་རྣམས་ཨ་ཙ་ར་དམར་ཞབས་ཀྱིས་བྱས་པར་འདོད་པ་སོགས་རྒྱུད་མང་དུ་དགག་ཟིན་པ་རྣམས་ཕྱིས་ཀྱི་མཁས་གྲུབ་མང་པོས་དཔང་དུ་བྱེད་པར་སྣང་མོད། ༢ འགོས་ཀྱིས་དང་པོར་རྫོགས་ཆེན་ལ་སློབ་གཉེར་མཛད།
ལོཙྪ་སྦྱངས་ནས་རྒྱ་གར་དུ་རྫོགས་ཆེན་ཞུར་སོང༌། སྔ་ཕྱི་རྒྱ་གར་དུ་ལན་བཅུ་གཉིས་སུ་ཕྱིན་ཚུལ་ལས་བརྩམས་ཏེ་རྒྱ་གར་ན་རྫོགས་ཆེན་མེད་པའི་ངན་སྨྲས། ༈ དེ་ནི་རྐུན་རྒྱབ་བརྫུན་བསྣོན་ཏེ་ཟུར་བའི་སར། ༈ སྒྱུ་འཕྲུལ་གསང་སྙིང་ཞུར་སོང་བ་ལ་མ་གནང་ནས་དེ་ལ་ཞེ་འཁོན་དུ་བཟུང་སྟེ། སྔར་ཁ་ཆེ་ན་ནང་པའི་པཎྜི་ཏ་ཞིག་བསླབ་པ་འཆལ་ནས་གནས་དབྱུང་བྱེད་པར་རྩོམ་པ་ལ་དེ་ལྟར་མ་བྱེད་མཁར་རྔ་མ་བརྡུངས་དང་ང་རང་འགྲོ་ཟེར་བ་ལ་མ་ཉན་པར་དེ་ལྟར་བྱས་པ་ལ་སྙིང་ནད་དུ་བཟུང་ནས་བསྟན་པ་ལ་འགྲན་བཙུགས་པའི་གྲུབ་མཐའ་ཅིག་བརྩམ་སྙམ་ནས་ར་ཧྨ་ན་བསྒྲུབས་ནས་སོག་པོའི་ལོག་ཆོས་བརྩམས་ཞེས་པ་ལྟར་དུ། སྒྱུ་འཕྲུལ་གསང་བ་སྙིང་པོ་སོགས་རྣམས་ལ་སྐྱོན་བཙལ་ནས་སྨད་པའི་ཕྱིར་དུ་ཡིན་གྱི་རྒྱ་གར་ནས་རྫོགས་ཆེན་མིན་པ་མདོ་རྒྱུད་བསྟན་བཅོས་ཐམས་ཅད་ཁོང་གིས་རྙེད་ནས་བསྒྱུར་བ་ནི་མ་ཡིན་མོད། འགོས་ཀྱིས་ཀྱང་རྒྱ་གར་ནས་རྒྱལ་བུ་སྤྲིན་གྱི་ཤུགས་ཅན་ལས་གཤིན་རྗེ་འཆར་ཀའི་རྒྱུད་སྒྲུབ་ཐབས་མདོས་སོགས་རྣམས་དང༌། གསང་བ་འདུས་བ་སོགས་ལྷན་དུ་ཞུས་ནས་བསྒྱུར་ཏེ། འཆར་ཀ་འགོས་ལུགས་ཞེས་གྲགས་པ་ལ་སུས་བསྙོན་ཆོས་ལ་སྐྱོན་བཏགས་པའི་ཉེས་པས་ཁོང་རང་ལ་ཡང་སྐྱོན་མང་པོ་བྱུང་བའི་ལོ་རྒྱུས་ཀྱང་བརྗོད་པར་སྣང་མོད། རྗེ་མར་པ་ལོ་ཙཱ་ཡང་འགོས་ཀྱི་
སློབ་མ་ཡིན་ཞིང་རྒྱུད་རྣམས་ཀྱང་འགོས་འགྱུར་ལ་ཐུགས་གཙིགས་མཛད་ཅིང་བཤད་པ་ཡང་མཛད་གསུངས་མོད། འགྱུར་ལ་གཙིགས་མཛད་པ་སྲིད་མོད། སློབ་མ་ཡིན་ཡང་འགོས་ནས་མར་པ་ལ་བརྒྱུད་ནས། དེའི་སློབ་མ་མེས་རྔོག་མཚུར་གསུམ་མི་ལ་སོགས་སུ་བརྒྱུད་པའི་ཆོས་སྲོལ་ཨེ་ཡོད་ཐེ་ཚོམ་ཟ་མོད། དེང་སང་བོད་ན་འདུག་པའི་བཤད་སྲོལ་གང་ཡོད་འགོས་ཀྱི་ཆོས་རྒྱུད་དུ་མ་གྱུར་པ་མེད་ཅེས་པའང་བརྫུན་ཟེར་བར་མ་གྱུར་ཅིག །དེ་མིན་པ་གསང་འདུས་འཕགས་ལུགས་ལ་མཁས་པ་པཎྜི་ཏའི་ལུགས་ཀྱི་བརྒྱུད་པ་དང༌། གྲུབ་ཐོབ་ཉམས་ཀྱི་བརྒྱུད་པ་དང༌། མན་ངག་རིམ་ལྔ་དང་བཅས་པ་རྣམས་མཁས་པ་ཡེ་ཤེས་སྙིང་པོ་དང༌། ནཱ་རོ་པཎ་ཆེན་ནས་མར་པ་ལ་བརྒྱུད་པ་གསང་འདུས་མར་ལུགས་སུ་གྲགས་པ་ཐམས་ཅད་དང༌། གསང་འདས་འཕགས་ལུགས་དང་ཡེ་ཤེས་ཞབས་ལུགས་ཀྱི་དབང་བརྒྱུད་མན་ངག་དང་བཅས་པ་གསེར་གླིང་པ་དང༌། ཀུ་སུ་ལུ་ལ་སོགས་ནས་ཇོ་བོ་རྗེ། དེ་ནས་རོང་པ་འགར་དགེ། ལྷ་བྱང་ཆུབ་འོད་སོགས་ལ་བརྒྱུད་པ་རྣམས་ཏེ། ཇོ་བོ་ལུགས་དང༌། གསང་འདུས་འཕགས་ལུགས་ཡེ་ཤེས་ཞབས་ལུགས་གཉིས་ཀྱི་དབང་བཀའ་བཤད་བཀའ་མན་ངག་རྣམས། རེ་ཝན་ཏྲ་བ་སོགས་ནས་ཆགས་ལོ་ཙཱ་བ་ལ་བརྒྱུད་པ་ཆག་ལུགས་
སྐོར་དང་ཡེ་ཤེས་ཞབས་ལུགས་གཉོས་ལོ་ནས་བརྒྱུད་པ་གཉོས་ལུགས་དང༌། ཡེ་ཤེས་ཞབས་ལུགས་གཉན་ཆུང་ལོ་ཙཱ་ནས་ས་སྐྱ་པ་ལ་བརྒྱུད་པ་རྣམས་དང༌། འཕགས་ལུགས་ཀྱི་དབང་བཤད་མན་ངག་དང་བཅས་པ་པཎ་ཆེན་ཤཱཀྱ་ཤྲཱི་ནས་ས་སྐྱ་པ་ལ་བརྒྱུད་པ་ས་ལུགས་རྣམས་ཐམས་ཅད་ལ་འགོས་ནས་བརྒྱུད་པ་འདེད་པ་གཅིག་ཀྱང་མ་མཐོང་ངོ༌། །རྒྱ་གར་པའི་བླ་མ་རྣམས་ཀྱིས་ངེད་རྒྱ་གར་དུ་རྫོགས་ཆེན་བྱ་བ་མེད་ཅེས་ཟེར་བ་སོགས་རྣམས་ཀྱང་བརྫུན་པོ་ཆེ་ལ་རྫུན་རྟགས་མང་ཞེས་པ་ལྟར་གྱི་བླ་མ་དེ་རྣམས་སྤང་བར་མ་གྱུར་ཅིག །ས་སྐྱ་པཎ་ཆེན་གྱིས་འགོས་ཀྱི་འབྱམ་ཡིག་ཡི་རང་ཕུལ་ཟེར་ཡང༌། རྫོགས་ཆེན་སོགས་ལ་སྨད་པ་ལ་ཕུལ་བ་མ་ཡིན་ཏེ། སྡོམ་གསུམ་རབ་དབྱེར་གསང་སྔགས་སྔ་འགྱུར་བ་རྣམས་འདི་བཞེད། ཕྱི་འགྱུར་བ་རྣམས་འདི་བཞེད་ཅེས་གསུངས་ཤིང་རྫོགས་ཆེན་བཀག་པ་མེད། ལྷ་བཙས་ཞེས་བྱའི་ལོ་ཙཱ་བས། དེས་ཀྱང་ཆོས་ལོག་སུན་འབྱིན་པ། །ཞེས་བྱའི་བསྟན་བཅོས་མཛད་ནས་ནི། །ཆོས་དང་ཆོས་མིན་རྣམ་པར་ཕྱེ། །ཞེས་པའི་རྗེས་སུ་ཆོས་ལོག་ངོས་བཟུང་བ་ནི། དེ་ནས་ཆོས་རྗེ་ས་སྐྱ་པ། །ཆེན་པོ་བཞུགས་པ་ཡན་ཆད་དུ། །ཆོས་ལོག་སྤྱོད་པ་ཉུང་ཞེས་ཐོས། །ཕྱིས་ནས་ཕག་མོའི་བྱིན་རླབས་དང༌། །སེམས་བསྐྱེད་རྨི་ལམ་མ་ལ་སོགས། །ཡི་དམ་སྒོམ་པ་དཀྲོང་བསྐྱེད་དང༌། །
དཀར་པོ་ཆིག་ཐུབ་ལ་སོགས་པ། །སངས་རྒྱས་བསྟན་དང་འགལ་བ་ཡི། །ཆོས་ལོག་དུ་མ་དེང་སང་འཕེལ། །ཞེས་གསུངས་ནས་བཀའ་གདམས་པ། དྭགས་པོ་བཀའ་བརྒྱུད་ཀྱིས་འབྲི་སྟག་མཚལ་འབྲུག་པ་རྣམས་ཀྱི་ཆོས་ལུགས་རྣམས་བཀག་པ་མ་གཏོགས་པ་རྫོགས་ཆེན་བཀག་པ་ཡོད་མེད་དེའི་གསུང་རབ་རྣམས་གཟིགས་པས་གསལ་ལོ། །གཞན་ཡང་སྡོམ་གསུམ་རབ་དབྱེར་ས་སྐྱ་པཎ་ཆེན་གྱི་ཞལ་ནས། གཞན་ཡང་གསང་སྔགས་གསར་རྙིང་ལ། །བོད་ཀྱིས་སྦྱར་བའི་རྒྱུད་སྡེ་མང༌། །དེ་འདྲའི་རང་བཟོའི་མདོ་རྒྱུད་ལ། །མཁས་པས་ཡིད་རྟོན་མི་བྱའོ། །ཞེས་གསར་རྙིང་གཉིས་ཀ་ལ་རང་བཟོའི་མདོ་རྒྱུད་ཡོད་གསུང་པ་མིན་པ་སྒོས་སུ་རྫོགས་ཆེན་བཀག་པ་སོགས་བསྟན་བཅོས་དེར་མ་མཐོང་ཞིང༌། ཁྱད་པར་ཁོང་རང་གིས་བོད་དུ་བསྒྱུར་བའི་ཆོས་ཐམས་ཅད་ཕལ་ཆེར་གསན་པའི་རྣམ་གྲངས་མཛད་པའི་སྐབས་སུ། སྡེ་སྣོད་གསུམ་དང་རྒྱུད་སྡེ་བཞི། །ཉན་བཤད་ཡོད་པ་ཕལ་ཆེར་ཐོས། །ཐོས་པ་དེ་དག་ཐམས་ཅད་ཀྱང༌། །མིང་རྐྱང་ཙམ་དུ་མ་གཞག་གོ །།བྱེ་བྲག་སྨྲ་དང་མདོ་སྡེ་པ། །སེམས་ཙམ་པ་དང་དབུ་མ་ཡི། །གདམས་ངག་ཅི་སྙེད་ཕལ་ཆེར་ཐོས། །དེང་སང་བོད་ལ་གྲགས་པ་ཡི། །ཞི་བྱེད་རྫོགས་ཆེན་གཅོད་ལ་སོགས། །ཞེས་སོགས་ནས། གཞན་ཡང་བོད་དང་རྒྱ་གར་ལ། །
དེང་སང་གྲགས་པ་ཕལ་མོ་ཆེ། །བདག་གིས་ལེགས་པར་འབད་དེ་ཉན། །བསླབས་པ་དེ་དག་མིང་རྐྱང་མིན། །དེས་ན་བདག་ལ་ཕྱོགས་ལྷུང་མེད། །ཅེས་གསུངས་མོད། རྙིང་མ་རྫོགས་ཆེན་དགག་པ་ཡོད་མེད་ཐམས་ཅད་ཀྱིས་དགོངས་པ་ལྟར་ཡིན་ནོ། །༢ ཆོས་རྗེ་ས་སྐྱ་པ་ཁུ་དབོན་རྣམས་སྔར་རྫོགས་ཆེན་པའི་བརྒྱུད་པ་ཡིན་ནའང༌། ཕྱིས་ཆོས་ལོག་ཡིན་པར་རིག་ནས་རྒྱབ་ཏུ་བསྐྱུར། ཞེས་ཟེར། བདེན་པ་ནི་མ་ཡིན་ཏེ། ༈ དེ་ལྟ་ན་ཁྱོད་ཀྱིས་སྔར་ཆོས་ལོག་དྲི་མ་ཅན་དུ་སྨོས་པའི་མངའ་བདག་ཉང་གི་གཏེར་ཆོས་ཀྱིས་མཚོན་བཀའ་གཏེར་གྱི་ཆོས་སྐོར་གོང་མ་ལྔའི་གསན་ཡིག་ན་ཡོད་པ་དེ་མ་མཐོང་ནས་ས་སྐྱ་པ་ཡང་ལོག་རྟོག་གི་ར་མདར་སྦྲན་ནས་ཡབ་མེས་ཀྱི་ཆོས་ལ་དམོད་པའི་དམ་ཉམས་ཀྱི་བཞུགས་གྲལ་དུ་མ་བསྒྲིག་ཅིག ། ༈ པདྨ་སམ་བྷ་ཝའི་དངོས་སློབ་འཁོན་ཀླུ་དབང་བསྲུངས་པ་དང༌། ཚེ་འཛིན་གྱི་སྲས་པོ་རྡོ་རྗེ་རིན་ཆེན་ནས་བཟུང་སྟེ། དེའི་སྲས་ཤེས་རབ་ཡོན་ཏན། དེའི་སྲས་ཡོན་ཏན་འབྱུང་གནས། དའི་སྲས་ཚུལ་ཁྲིམས་རྒྱལ་པོ། དེ་བཞིན་དུ་རྡོ་རྗེ་གཙུག་ཏོར། དགེ་སྐྱབས། དགེ་མཐོང༌། བལ་པོ། དེའི་སྲས་ཤཱཀྱ་བློ་གྲོས་ཞེས་བྱ་བ་ཐམས་ཅད་ཀྱང་ཕ་རོལ་ཏུ་ཕྱིན་པ་དང༌། རྡོ་རྗེ་ཐེག་པའི་གཞུང་ལུགས་བསླབས་ཤིང་ཁྱད་པར་དུ་སྔགས་རྙིང་མའི་རྡོ་རྗེ་ཐེག་པའི་གསང་བ་སྡེ་དྲུག་ལེ་ལག་བདུན།
ཕྲ་མོ་ཉེར་གཅིག་གཙོ་བོར་བཟུང་ནས། སྤྱོད་པ་ལ་སོགས་ཀྱི་ཆོས་དྲུག་ཅེས་བྱ་བའི་མན་ངག་དང་ལྡན་ཞིང༌། ཡང་དག་གྲུབ་པ་ཧེ་རུ་ཀ་ལྷ་དགུ་དང༌། རྡོ་རྗེ་ཕུར་པའི་ཡི་དམ་གྱི་སྒོ་ནས་དངོས་གྲུབ་ཐོབ་པ་ཤ་སྟག་ཡིན། ཤཱཀྱ་བློ་གྲོས་ཀྱི་སྲས་གཉིས་ལ་གཅེན་པོ་ཤེས་རབ་ཚུལ་ཁྲིམས་ཀྱིས་ཡབ་མེས་ཀྱི་ཆོས་ཐམས་ཅད་ལ་སྦྱངས་ཤིང༌། རྡོ་རྗེ་ཕུར་བའི་སྒོ་ནས་དངོས་གྲུབ་བརྙེས་ཏེ། མཐུ་དང་རྫུ་འཕྲུལ་ཆོ་འཕྲུལ་བསམ་གྱིས་མི་ཁྱབ་ཅིང༌། ཚངས་པར་སྤྱོད་པས་མཛེས་པར་བྱས་པ་ཡིན་ནོ། །དེའི་གཅུང་པོ་འཁོན་དཀོན་མཆོག་རྒྱལ་པོས་ཡབ་མེས་ཀྱི་ཆོས་ཐམས་ཅད་ཕལ་ཆེར་བ་ཞིག་གིས་ཚིམས་པར་མཛད་ནས། སྔགས་ཕྱི་འགྱུར་དར་བྱུང་བ་དང༌། དེ་ལ་སྤྲོ་ཞིང་གཅེན་གྱིས་ཀྱང་བསྐུལ་ཏེ། ཚུལ་ཁྲིམས་དང༌། འབྲོག་མི་སོགས་ལ་ཀྱེ་ རྡོ་རྗེ་ལ་སོགས་ཀྱི་རྒྱུད་འགྲེལ་མན་ངག་ཐམས་ཅད་ལ་སྦྱངས་སོ། །དེའི་སྲས་ས་ཆེན། དེའི་སྲས་བསོད་རྩེ། རྗེ་བཙུན་གྲགས་པ། དཔལ་ཆེན་འོད་པོ་རྣམས་དང༌། དེའི་སྲས་ས་པཎ། བསོད་ནམས་རྒྱལ་མཚན་གཉིས། བསོད་ནམས་རྒྱལ་མཚན་གྱི་སྲས་འགྲོ་མགོན་འཕགས་པ། དེ་ཐམས་ཅད་ཀྱིས་ཀྱང་སྔགས་གསར་རྙིང་གཉིས་ལ་དུས་སྐབས་ཀྱི་དབང་གིས་དར་རྒྱས་ཆེ་ཆུང་ཙམ་མ་གཏོགས་པ། ཐོག་མར་ཡབ་མེས་ཀྱི་
ཆོས་སྔགས་རྙིང་མ་ལ་སྦྱངས་ནས་གྲུབ་པ་བརྙེས་པར་མཛད་ཅིང༌། སྔགས་གསར་མ་ལ་ཐུགས་སྦྱོང་མཛད་པ་འབའ་ཞིག་ཡིན་ནོ། །ས་ཆེན། བསོད་རྩེ། རྗེ་བཙུན་གྲགས་པ་ཡབ་སྲས་རྣམས་ཀྱིས་ཀྱང་ཡང་ཕུར་སོགས་རྣམས་ལ་ཡིག་སྣ་མང་དུ་མཛད། ཆོས་རྗེ་ས་པཎ་གྱིས་རྡོ་རྗེ་ཕུར་པའི་རྩ་རྒྱུད་ཀྱི་དུམ་བུ་ལ་པདྨ་འབྱུང་གནས་ཀྱིས་རྒྱ་དཔེ་དང་མཐུན་པའི་གཞི་འགྱུར་མཛད། མདོར་ན་པདྨ་འབྱུང་གནས་ནས། ཆོས་རྗེ་འཇམ་པའི་དབྱངས་ཆེན་པོ་བསོད་ནམས་རྒྱལ་མཚན་ཡན་ཆད་ཀྱི་ས་སྐྱ་འཁོན་གྱི་གདུང་རབས་ཐམས་ཅད་ཀྱང་སྔགས་རྙིང་མ་ཡང་ཕུར་གྱི་གྲུབ་པ་བརྙེས་པ་ཤ་སྟག་ཡིན་པ་ལ་སུས་བསྙོན་དུ་ཡོད། དེ་ནས་ཆོས་རྗེ་བསོད་ནམས་རྒྱལ་མཚན་དཔལ་བཟང་པོས་ཡབ་མེས་ཀྱི་ཆོས་རྣམས་ནུབ་ཀྱིས་དོགས་ནས། མཁས་པ་དཔལ་ལྡན་སེང་གེ་དང༌། གནུབས་རིན་ཆེན་རྒྱལ་མཚན་རྣམས་ལས་ཡབ་མེས་ཀྱི་ཡང་དག་ཕུར་པ་རྣམས་ཀྱི་དབང་བཀའ་བཤད་བཀའ་རྣམས་གསན་ཞིང༌། རྒྱུན་གྱི་ཐུགས་དམ་གྱི་རྩ་བར་མཛད་པ་དང༌། རྒྱུད་ཀྱི་བསྡུས་དོན། སྒྲུབ་ཐབས་རྒྱས་བསྡུས་འབྲིང་གསུམ། དཀྱིལ་ཆོག་ལ་སོགས་ཡིག་སྣ་མང་དུ་མཛད་ཅིང༌། དབུས་གཙང་གི་གདན་ས་རྣམས་དང༌། ཆོས་རྫོང༌། ལྷ་ས། བསམ་ཡས་སོགས་རྣམས་སུ་ཕུར་པའི་སྒྲུབ་མཆོད་ཀྱི་སྲོལ་ཆེན་པོ་བཙུགས་ནས་ད་ལྟ་
ཡང་མ་ཆག་པར་ལོ་དུས་བཞིན་སྒྲུབ་པ་ལ་སུས་བསྙོན། དེ་ནས་ཕྱིས་རྒྱབ་ཏུ་བསྐྱུར་ཞེས་ས་སྐྱ་པ་ལ་ཡར་སྐུར་འདེབས་ངན་པ་དེ་ལྟ་བུ་བྱས་ནས་ས་སྐྱ་པ་རྣམས་དྲི་མ་ཅན་དུ་མ་བསྒྱུར་ཅིག ། ༢ རྗེ་བཙུན་མི་ལ། ཕག་མོ་གྲུ་པ། རྒྱལ་བ་འབྲི་གུང་བ་ལ་སོགས་པ་རྣམས་དང་པོར་མ་བརྟགས་པར་རྫོགས་ཆེན་རེ་གསན་ཡང༌། ཕྱིས་མཁས་གྲུབ་ཏུ་གྱུར་ནས་ཆོས་ལོག་ཡིན་པར་མཁྱེན་ཅིང་ངན་སྐྱུགས་ལྟར་དོར་ཏེ་སུ་ལ་ཡང་མ་གསུངས་པས་ད་ལྟ་ཡང་དེ་རྣམས་ནས་བརྒྱུད་པའི་བཤད་སྲོལ་མེད་ལོ། །༈ བཤད་སྲོལ་དངོས་མེད་ཀྱང་དེ་དག་ཐམས་ཅད་ཀྱི་ལྟ་བའི་ཞེ་ཕུགས་རྫོགས་པ་ཆེན་པོ་ཁོ་ན་ལ་སྒང་དྲིལ་བར་མཛད་པའི་དགོངས་པ། ཁ་ཕྱིར་བལྟས་པ་ཁྱོད་ཀྱིས་ག་ལ་གོ །།༈ དེ་ལ་རྗེ་བཙུན་མི་ལས་དང་པོར་ཞུས་ནས། ཕྱིས་དོར་བའི་ལོ་རྒྱས་མ་ཚོར་ཞིང༌། མགུར་མཛད་པ་རྣམས་སུ། རྫོགས་པ་ཆེན་པོས་མདུན་ནས་གཟེར། །ཕྱག་རྒྱ་ཆེན་པོས་རྒྱབ་ནས་གཟེར། །ཁ་ནས་གདམས་ངག་ཁྲག་ལྟར་སྐྱུགས། །ཞེས་སོགས་དང༌། རྗེ་བཙུན་གྱི་མཛད་པའི་བདེ་མཆོག་སྙན་བརྒྱུད་ཀྱི་ཕྱག་རྒྱ་ཆེན་པོ་ཡེ་ཤེས་གསལ་བྱེད་དུ་སེམས་གསལ་སྟོང་རྟོགས་བྲལ་ཕྱག་རྒྱ་ཆེན་པོ་དེ་ལ། ཕྱག་ཆེན་པས་རྟོག་བྲལ་ཟེར། རྫོགས་ཆེན་པས་ཆོས་ཉིད་ཟེར། ཕར་ཕྱིན་པས་སྟོང་ཉིད་ཟེར་ཞེས་སོགས་གསུང་པ་མིན་པ་བསྐྱུར་བར་གསུངས་པ་མི་
སྣང༌། ཕག་མོ་གྲུ་པས་ཀྱང་དང་པོ་གསན་ནས་ཕྱིས་དོར་བའི་གཏམ་ཁོང་རང་གི་གསུངས་པ་རྣམས་སུ་ནི་མི་སྣང༌། ཁྱད་པར་ཉིད་ཀྱིས་གསུངས་རྣམས་སུ། གསར་མའི་རྒྱུད་བཞི། རྙིང་མའི་ཐེག་པ་དགུ། ཞེས་སོགས་དེ་གཉིས་མཚུངས་པའི་རྒྱུ་མཚན་དང་བཅས་པ་མང་དུ་སྣང་བ་ལ་ཡང་བསྙོན་དུ་མེད་དོ། །རྒྱལ་བ་འབྲི་གུང་པས། ཁམས་ན་བཞུགས་པའི་དུས་ཆུང་ངུ་ནས་རྫོགས་ཆེན་དང༌། ཕུར་པ། འཇིགས་བྱེད་རྣམས་ལ་ཐུགས་དམ་མཛད། དུས་ཕྱིས་ཉིད་ཀྱི་བསྟན་བཅོས་སྡོམ་གསུམ་གནད་གཅིག་དང༌། དགོངས་གཅིག་ལ་སོགས་པ་རྣམས་སུ་ཤེས་བྱེད་ལུང་དང་བཅས་པ་དཔག་མེད་དུ་མེད་པ་གསུངས་ཏེ། སྤྱི་བོ་ལ་སོགས་པའི་རྩ་འཁོར་ལོ་བཞིར་ཉོན་མོངས་བཞི་དག་པའི་བྲལ་འབྲས་ལ། སྔགས་རྙིང་མ་ལ་མཚོན་ན་སྤྱི་བོར་འཇམ་དཔལ་སྐུའི་ལྷ་ཚོགས་ལྟ་བུར་སངས་རྒྱས་མགྲིན་པར་པད་མ་གསུང་གི། སྙིང་གར་ཡང་དག་ཐུགས། ལྟེ་བར་མ་མོ་རྦོད་གཏོང་གི་ལྷ་ཚོགས་ལྟ་བུར་སངས་རྒྱས། ཞེས་སོགས་དང༌། གཞན་ཡང་རྫོགས་ཆེན་གྱི་རྒྱུད་ཀྱི་ལུང་འདྲེན་སོགས་མཐའ་ཡས་ཤིང༌། ད་ལྟ་དེ་རྣམས་ནས་བརྒྱུད་པ་དེད་པ་མེད་པའི་དོན་ནི་ཆོས་ལོག་ཏུ་རིག་ནས་ཕྱིས་དོར་བའི་དོན་གྱིས་སོ་ཞེས་པ་ནི་གཏོལ་མེད་དེ། དྭགས་པོ་ལྷ་རྗེས་ཀྱང་སྔར་བཀའ་གདམས་པའི་གདམས་པ་ཞུས་པ་རྣམས་ཆོས་
ལོག་ཏུ་རིག་ནས་ཕྱིས་དོར་བ་ཡིན་ནམ་སྟེ། བཀའ་གདམས་པའི་ཆོས་དྭགས་པོ་ལྷ་རྗེ་ནས་འདེད་པ་ཉུང་ཞིང༌། མི་ལ་རས་པའི་ཆོས་བརྒྱུད་དེད་པ་ཤིན་ཏུ་ནས་དར་བའི་ཕྱིར་རོ། །ཕག་མོ་གྲུ་པས་ཀྱང་དྭགས་པོ་ལྷ་རྗེ་དང་མཇལ་ཕྱིན་ཆད་ས་སྐྱ་པའི་རྒྱུད་གསུམ་མན་ངག་དང་བཅས་པ་རྣམས་ཆོས་ལོག་ཏུ་རིག་ནས་དོར་བར་འགྱུར་ཏེ། ད་ལྟ་ཁོང་ནས་བརྒྱུད་པ་མི་སྣང་བའི་ཕྱིར་རོ། །ཆོས་རྗེ་འཇིག་རྟེན་མགོན་པོ་འབྲི་གུང་པས་ཀྱང་སྔར་ཐུགས་དམ་མཛད་པའི་རྡོ་རྗེ་འཇིགས་བྱེད་ཀྱང་ཆོས་ལོག་ཏུ་རྟོགས་ནས་དོར་བར་འགྱུར་ཏེ། ད་ལྟ་ཁོང་ནས་བརྒྱུད་པ་མི་སྣང་བའི་ཕྱིར་རོ། །དྭགས་པོ་བཀའ་བརྒྱུད་པའི་རྒྱལ་བ་ཡང་དགོན་པས་རྫོགས་ཆེན་དང་རྙིང་མའི་བླ་མ་མང་པོ་བསྟེན་ནས་སྔགས་རྙིང་མའི་བཀའ་གཏེར་མང་དུ་གསན། རྫོགས་ཆེན་བརྒྱུད་མཐའ་སོགས་ལ་ཡིག་སྣ་མང་དུ་མཛད། ཉམས་རྟོགས་ཀྱི་ཡོན་ཏན་ཕུལ་དུ་ཕྱིན་པ་མངའ་ཞིང༌། གསུང་མགུར་རྣམས་སུ་ཡང༌། ཆོས་ཐམས་ཅད་ནས་ཐམས་ཅད་དུ་བདེན་མོད་ཀྱང༌། རྫོགས་ཆེན་ཞེས་པའི་སྒྲ་བོ་ཆེ། སྤྲང་གོ་བ་ལེན་ཕྱོགས་ཀྱང་དེ་ལ་བགྱིས། ཆིག་ཆར་གྱི་རྟོགས་པ་ཡང་དེ་ལས་འཁྲུངས། ཞེས་པ་དང༌། གནས་ལུགས་ཉམས་སུ་ལེན་པའི་ཕྱག་རྒྱ་ཆེན་པོ་དང་གཅིག །ལམ་ཁྱེར་རྐྱེན་ལས་བྱེད་པའི་ཕ་རོལ་ཕྱིན་པ་དང་
གཉིས། སྣང་རྐྱེན་ལམ་དུ་སློང་བའི་སྡུག་བསྔལ་ཞི་བྱེད་གསུམ། མཐར་ཐུག་ཟད་སར་སྐྱེལ་བའི་རྫོགས་པ་ཆེན་པོ་དང་བཞི། འདི་བཞི་རྣལ་འབྱོར་བདག་གི་དམ་ཆོས་ལགས་པས། ཆོས་གཞན་གང་ལའང་འགྲམ་ཆུ་མི་ལྡང་བ་ལགས་སོ། །ཞེས་གསུངས་ནས་ཚད་མར་མཛད། དེས་ན་འཕྱོན་མ་རོག་བཙལ་ཞེས་པའི་གདམས་པ་ལྟར། བཀའ་བརྒྱུད་དེ་རྣམས་ཀྱང་དྲི་མ་ཅན་དུ་མ་སྦྱོར་ཅིག །རྗེ་དུས་གསུམ་མཁྱེན་པ་སོགས་ཀརྨ་པ་རྗེས་འབྲངས་དང་བཅས་པ་ཐམས་ཅད་ཀྱི་སྔགས་རྙིང་མ་རྫོགས་ཆེན་དང་བཅས་པ་ལ་ཐོས་བསམ་སྒོམ་གསུམ་གྱི་སྒོ་ནས་ཐུགས་དམ་མཛད་པ་འབའ་ཞིག་ཡིན་ཏེ། རྗེ་དུས་གསུམ་མཁྱེན་པས་ཀྱང་བཀའ་གདམས་པ་སྤོ་ཏོ་བའི་སློབ་མ། བླ་མ་བྲག་དཀར་པ་ལ་རྫོགས་ཆེན་ཨ་རོ་སོགས་རྫོགས་ཆེན་མང་པོ་གསན་ཞིང་ཐུགས་ཉམས་སུ་བཞེས། གྲུབ་ཆེན་ཀརྨ་པ་ཀྴིས་རྙིང་མའི་བླ་མ་ཁམས་ཀྱི་ཀཿཐོག་པ་བྱམས་པ་འབུམ་པ་ལ་བསྙེན་རྫོགས་དང༌། རྫོགས་ཆེན་དང་རྙིང་མའི་མ་ཕུར་སོགས་རྣམས་ཞུས་ནས་ཐུགས་ཉམས་སུ་བཞེས། དེ་རྗེས་སྤྲུལ་སྐུ་ཐམས་ཅད་མཁྱེན་པ་རང་བྱུང་རྡོ་རྗེས་སྔགས་འཆང་ངོ་ནག་པ། དབུ་རྩེ་བ། མཁས་གྲུབ་ཨོ་རྒྱན་པ། སྙེ་མདོ་བ་ཀུན་དགའ་དོན་གྲུབ། གཉན་རས། གནམ་ཐོག་པ་གཞོན་ནུ་འབུམ། ཀུ་མཱ་རཱ་ཛ་རྣམས་ལ་སྔགས་རྙིང་
མའི་དབང་རྒྱུད་སྒྲུབ་དཀྱིལ་མན་ངག་མཐའ་ཡས་པའི་བཀའ་གཏེར་རྣམས་གསན་ནས་མཁས་ཤིང་ཐུགས་དམ་གྱི་སྙིང་པོར་མཛད་དེ། སྙིང་ཐིག་ཆེན་མོའི་ཡིག་ཆ་དང༌། གཞན་ཡང་ཡིག་སྣ་སྒྲུབ་སྐོར་མང་དུ་མཛད་ཅིང༌། ཉིད་ཀྱིས་མཛད་པའི་ཟབ་མོ་ནང་དོན། དམ་ཚིག་རྒྱ་མཚོ་ལ་སོགས་པའི་བསྟན་བཅོས་རྣམས་ཀྱང་དབང་དུ་མཛད་ནས་ལུང་དྲངས་ཏེ་ཟབ་མོ་ནང་དོན་གྱི་རྩ་དབུ་མ་ཆོས་ལྔ་ལྡན་ངོས་འཛིན་པའི་སྐབས་སུ། སྔགས་རྙིང་མའི་གཞུང་ལས། སྙིང་གར་དངས་མ་ལྔ་འདུས་ཀྱི་སེམས་ཞེས་གསུངས་པ་ཡང་འདི་ཁོ་ན་སྟེ། ཤའི་དྭངས་མ་རྩ་དབུ་མ་ལ། ཁྲག་གི་དྭངས་མ་ཨ་ཐུང༌། རུས་པའི་དྭངས་མ་ཧཾ། རླུང་གི་དྭངས་མ་སྲོག་རླུང༌། དྭངས་མའི་དྭངས་མ་ནི་ཀུན་གཞིའི་རྣམ་ ཤེས་སོ། །ཞེས་གསུངས་ཤིང༌། རྩ་བ་ཐིག་ལེ་འཆད་པའི་སྐབས་སུ། ཐིག་ལེའི་དོན་ནི་ཐིག་ཅེས་པ་ཏི་ལ་ཀ་བདེ་བ་ཆེན་པོའི་སྙིང་པོའི་དོན་ཏེ། ལེ་ནི་སྣང་བ་དུ་མ་བརྡལ་བ་ཡིན་ནོ། །ཞེས་བི་མ་ལས་གསུངས་སོ། །ཞེས་དང༌། ཐ་མལ་གྱི་དུས་ཀྱི་ཤེས་པའི་གནས་སྐབས་བཤད་པའི་སྐབས་སུ། དེ་ཡང༌། ཐོག་མའི་ཀ་དག་འཁྲུལ་མེད་ལས། །ངེས་པ་མེད་པའི་ལྷུན་གྲུབ་གསལ། །འཁྲུལ་པ་མེད་པའི་སྤག་སྤོག་དེ། །མ་རིག་པ་ནི་གསུམ་དག་ལ། །ཤེས་པ་གསལ་
གསལ་རིག་རིག་དེ། །ཡུད་ཙམ་ཕྱིར་འགྱུས་སྣང་ཆ་ལས། །ཡུལ་ལ་བདག་ཏུ་གཟུང་པའི་བློས། །རྐྱེན་བཞིའི་དམིགས་པ་མ་དག་པས། །ཡུལ་དྲུག་སོ་སོའི་སྣང་བ་ཤར། །ཉོན་མོངས་དྲུག་གིས་བདག་ཏུ་བཟུང༌། །དེ་ནས་རིམ་གྱི་སྣོད་བཅུད་ཀྱི། །སྣང་བ་དུ་མའི་གཟུགས་འདུས་པའོ། །འདི་ཉིད་མི་ཤེས་བྱིས་པ་རྣམས། །ཟོ་ཆུན་བཞིན་དུ་རྒྱུན་མར་གནས། །སོ་སོའི་ལུས་དང་ཆད་ལེན་པའོ། །ཞེས་མཁས་པ་ཆེན་པོའི་བི་མ་ལས་རྫོགས་པ་ཆེན་པོའི་དོན་བསྡུས་པའི་སྐབས་སུ་གསུངས་སོ། །ཞེས་དང༌། ལུས་ཀྱི་རྩ་འཁོར་རྣམས་ལས་ལྷ་སྤྲོ་བའི་སྐབས་སུ། སྦྱི་བོ་ནས་འཇམ་དཔལ་ལ་སོགས་པ་སྐུའི་དཀྱིལ་འཁོར་རྣམས་འབྱུང་བ་དང༌། མགྲིན་པ་ནས་རྟ་མགྲིན་ལ་སོགས་གསུང་གི་དཀྱིལ་འཁོར་དང༌། སྙིང་ག་ནས་མི་བསྐྱོད་པ་དང་ཡང་དག་ལ་སོགས་ཐུགས་ཀྱི་དཀྱིལ་འཁོར་དང༌། ལྟེ་བ་ནས་རིན་པོ་ཆེ་དང་བདུད་རྩི་ཡོན་ཏན་གྱི་དཀྱིལ་འཁོར་དང༌། གསང་གནས་ནས་དོན་གྲུབ་དང་ཕུར་བ་ཕྲིན་ལས་ཀྱི་དཀྱིལ་འཁོར་དང༌། ཡན་ལག་དང་སྒལ་ཚིགས་ལས་མ་མོའི་དཀྱིལ་འཁོར་དང༌། དེའི་ཡན་ལག་ཏུ་འཇིག་རྟེན་པ་དང་དྲག་སྔགས་པ་ལ་སོགས་ཐམས་ཅད་ཀྱང་ལུས་ཀྱི་རྩ་རླུང་བྱང་ཆུབ་སེམས་ཀྱི་ཡན་ལག་ཏུ་རྒྱུད་མན་ངག་རྣམས་ནས་གསུངས་སོ། །ཞེས་དང༌། གཞན་ཡང་ཉིད་ཀྱིས་
མཛད་པའི་བསྟན་བཅོས་མང་པོར་རྙིང་མའི་ལུང་མང་དུ་དྲངས་ཏེ་ལེགས་པར་བཤད་པ་ཡིན་ནོ། །གཞན་ཡང་རྟ་མགྲིན་དྲེགས་པ་ཀུན་སྒྲོལ་སོགས་བསྐྱེད་རིམ་སྐོར་དང༌། ལན་ཅིག་གི་ཚེ་ཀརྨར་བཞུགས་པའི་ཚེ་ན་བི་མ་ལ་དང་མཇལ་ནས་རྫོགས་པ་ཆེན་པོའི་ཚིག་དོན་ཐམས་ཅད་བློའི་སྣང་བ་རྒྱས་ནས་སྙིང་ཐིག་གི་ཁྲིད་ཡིག་ལ་སོགས་བསྐྱེད་རྫོགས་ཀྱི་ཡིག་སྣ་མང་དུ་མཛད་ཅིང༌། རྫོགས་ཆེན་སྙིང་ཐིག་འདི་ལ་པདྨ་འབྱུང་གནས་ནས་བརྒྱུད་པ་ཞིག་ཡོད་འཐད་པ་ལ་དགོངས་པ་བྱུང་བ་ལ། ཕྱིས་པདྨ་ལས་འབྲེལ་རྩལ་གྱིས་གཏེར་ནས་བཏོན་ནས། དེའི་སློབ་མ་ལོ་སྟོན། སྤྲུལ་སྐུ་ལས་འབྲེལ་རྩལ་རྣམས་ཙ་རིའི་བོད་ཀླུང་དུ་སྤྱན་དྲངས་ནས་བཀའ་ལུང་ཞུས་ཤིང༌། ཆོས་རྗེ་རང་བྱུང་ཉིད་ཀྱིས་ཨོ་རྒྱན་ལ་ཟླ་བ་གསུམ་གྱི་བར་དུ་གསོལ་བ་བཏབ་པས་དངོས་སུ་མཇལ་ནས་གནང་བས་ཨོ་རྒྱན་དང་ང་གཉིས་ཀྱི་བར་དུ་བརྒྱུད་པ་གཞན་ནས་འདེད་མི་དགོས་གསུངས་ནས། སྤྲེའུ་ལོ་ཟླ་བ་བཅུ་གཉིས་པའི་ཉེར་བརྒྱད་ལ་བདེ་ཆེན་སྟེང་དུ། རྟོགས་ལྡན་ཡེ་ཤེས་རྒྱལ་མཚན། སོག་པོ་ཡེ་ཤེས་རྒྱལ་མཚན། སློབ་དཔོན་རྒྱལ་མཚན། གཡུང་སྟོན་རྡོ་རྗེ་དཔལ། སྨན་ལུང་གི་སྤྲུལ་སྐུ་ཤཱཀ་གཞོན། འཇལ་དཔལ་བརྩོན་འགྲུས་སེང་གེ་རྣམས་ལ་གནང་ནས། འདི་ལྟ་བུའི་ཆོས་ནུབ་པར་ཕངས་པས་སློབ་དཔོན་རྡོ་རྗེ་
དཔལ་གྱིས་གཙང་ཕྱོགས་སུ་དར་བར་གྱིས། སློབ་དཔོན་རྒྱལ་མཚན་པས་རུ་མཚམས་སུ་དར་བར་གྱིས། ཡེ་ཤེས་རྒྱལ་པས་ཀོང་པོ་དང་ཁམས་སུ་དར་བར་གྱིས། ཡེ་ཤེས་རྒྱལ་མཚན་པས་ཧོར་དང་རྒྱ་ནག་ལ་དར་བར་གྱིས། སྤྲུལ་སྐུ་པས་དབུས་སུ་དར་བར་གྱིས། འཇམ་དཔལ་བརྩོན་འགྲུས་སེང་གེས་གཞན་ཕན་མི་ཡོང་བས་ཁྱོད་རང་གསོལ་བ་ཐོབ་ལ་ཉམས་སུ་ལོངས་གསུངས་ནས། དེ་ཙམ་པའི་ཐུགས་གཙིགས་མཛད་ནས། ཐུགས་དམ་གྱི་ཡང་གཙོ་བོ་དང་རབ་མཆོག་མཛད་པ་ལ་ལོག་ཤེས་ཅན་མིན་པ་བསྙོམ་དུ་མེད་དོ། །༢ འདི་ནས་རང་བྱུང་རྡོ་རྗེས་ཀྱང་རྫོགས་ཆེན་པ་རྣམས་ཀྱི་སེམས་བསྲུང་བའི་ཕྱིར་དུ་ཟོལ་གྱི་ཁ་འཛིན་བྱས། ཞེས་སོ། །འཛམ་གླིང་རྒྱན་གཅིག་རང་བྱུང་རྡོ་རྗེ་དྲི་མ་ཅན་དུ་བྱེད་པ་ནི་མི་འཚམས་པའི་གཏམ་མོ། །དེས་ནས་རྫོགས་ཆེན་ཆོས་མིན་ཡིན་པའི་གཏན་ཚིགས་ཀྱིས་ཡིན་ན། རང་བྱུང་རྡོ་རྗེས་བོན་པོ་རྣམས་ཀྱི་སེམས་འཛིན་པའི་ཕྱིར་བོན་དང༌། མི་དགེ་བ་ཐམས་ཅད་ཀྱི་སེམས་འཛིན་པའི་ཕྱིར། མི་དགེ་བ་ཐམས་ཅད་ཀྱང་བྱེད་དགོས་པར་འགྱུར་རོ། །དེ་རྗེས་ཆོས་རྗེ་རོལ་བའི་རྡོ་རྗེ་འཛམ་གླིང་ཆོས་ཀྱི་གྲགས་པས་ཀྱང༌། གཡུང་སྟོན་ ཆོས་རྗེ། ཡེ་རྒྱལ་བ་ལ་སོགས་པ་རྣམས་བསྟེན་ནས་མདོ། སྒྱུ་འཕྲུལ། སེམས་ཕྱོགས་སོགས་སྔགས་རྙིང་མ་བཀའ་གཏེར་དང༌། རྫོགས་ཆེན་གྱི་ཆོས་སྐོར་ཆེས་མཐའ་
ཡས་པ་རྣམས་ལ་ཐོས་བསམ་སྒོམ་གསུམ་གྱིས་ཐུགས་དམ་གྱི་ཡང་གཙོ་བོར་མཛད་ཅིང༌། ཀརྨར་བཞུགས་པའི་དུས་ཀྱི་ཚེ་བཅོམ་ལྡན་འདས་ཀུན་ཏུ་བཟང་པོའི་དགོངས་པ་མཐར་ཐུག་པ་རྫོགས་པ་ཆེན་པོ་ཐོད་རྒལ་གྱི་རྟོགས་པ་མངོན་དུ་གྱུར་ཏེ་མགུར་གསུངས་པ། རང་སེམས་སྙིང་པོ་སྟོང་གསལ་ཀུན་ཏུ་བཟང༌། །གདོན་ནས་དག་པ་རྫོགས་པ་ཆེན་པོའི་དབྱིངས། །གཞི་ལྔའི་གདངས་ལ་རང་གསལ་ཀུན་ཏུ་ཁྱབ། །འོད་ལྔའི་གདངས་ལ་རང་གསལ་མཉམ་པར་གཞག །གཉིས་འཛིན་རྟོག་བྲལ་མ་འཁྲུལ་དྭངས་མའི་སེམས། །ཕྱི་ནང་སྣང་བར་རང་གྲོལ་ཆོས་ཀྱི་སྐུ། །གནས་ལུགས་རྟོགས་པ་འབྲས་བུ་ཀུན་ཏུ་བཟང༌། །མ་རྟོགས་སེམས་ཅན་འཁོར་བའི་རྒྱ་མཚོར་འཁྱམས། །ཞེས་སོགས་དང༌། རྒྱ་ཡུལ་དུ་བྱོན་དུས་རྒྱུད་ཀྱི་རྒྱལ་པོ་སྒྱུ་འཕྲུལ་གསང་བ་སྙིང་པོ་འདི་ནུབ་པར་ཕངས་པས་གསུངས་ནས་རྒྱུད་འགྲེལ་རྒྱལ་བ་གཡུང་སྟོན་གྱིས་མཛད་པ་ལ་ཆ་ལག་དང་བཅས་པ་པར་དུ་བརྐོས་ཏེ་སྟོང་ཕྲག་གཅིག་བཏབ་ནས་རྒྱ་ཧོར་བོད་ཀྱི་མདོ་དབུས་ཀུན་ཏུ་ཆོས་སྦྱིན་མཛད་ནས་ཐམས་ཅད་གྱི་གཤམ་དུ། ན་མ་ཤྲཱི་བཛྲ་ས་ཏྭ་ཡ། རྒྱལ་བ་གང་ཞིག་རྣམ་གསུམ་སྲིད་པའི་རྟེན་འབྲེལ་ལས་འདས་རྣམ་འཕྲུལ་རྒྱ་མཚོའི་དཔལ་ལྡན་མཁའ་ཁྱབ་ཀུན་ཏུ་སྣང་བའི་སྐུ། ཞེས་སོགས་སྐུ་གསུང་ཐུགས་ཀྱི་སྒོ་ནས་
བསྟོད་པ་དང༌། དཔལ་ལྡན་མཆོག་ཏུ་གསང་བ་བླ་མེད་རྡོ་རྗེ་ཐེག་པའི་རྒྱུད་སྡེ་རྒྱ་མཚོའི་ཟབ་དོན་མཐར་ཐུག་གྱུར་པ་གསང་བ་སྙིང་པོའི་རྒྱུད། །ཇི་བཞིན་གསལ་བྱེད་དགོངས་འགྲེལ་དུ་མའི་དོན་སྟོན་རྣམ་བཤད་ཡོན་ཏན་རྒྱ་མཚོ་མངའ་བ་བཛྲ་ཤྲཱི་ཡིས་རབ་གསལ་མཛད་པ་འདི། །ཚད་མེད་ཀུན་ཏུ་འགྲོ་ལ་ཕན་པར་བྱ་ཕྱིར་ཕུན་ཚོགས་བསོད་ནམས་རྒྱ་མཚོའི་དཔལ་འབར་མི་དབང་སྲས་པོ་ཨ་སུ་ཏ་ར་ཡིས། །རྨད་བྱུང་ལྷག་བསམ་མཐུ་ཡིས་པར་དུ་ལེགས་བསྒྲུབ་ཆོས་སྦྱིན་དགེ་བ་རྒྱ་མཚོ་དེ་ཡིས་མཁའ་མཉམ་འགྲོ་ཀུན་མྱུར་དུ་བྱང་ཆུབ་ཤོག །ཅེས་སོགས་མཛད་ཅིང༌། རྡོ་རྗེ་ཐེག་པ་ཐམས་ཅད་ཀྱི་མཐར་ཐུག་མཛད་པའོ། །དེས་ན་དྭགས་པོ་བཀའ་བརྒྱུད་པ་ཡང་ཐམས་ཅད་ཀྱིས་དཔང་དང་ཚད་མར་མཛད་པ་ལ་ཕྱོགས་ཞེན་དང་ལོག་རྟོགས་ངན་པའི་དབང་གིས་ཁ་གཡར་ནས་དམ་པའི་ཆོས་དང༌། དྭགས་པོ་བཀའ་བརྒྱུད་པ་ལ་སོགས་པའི་གང་ཟག་ཆེན་པོ་ཐམས་ཅད་ཀྱང་དྲི་མ་ཅན་དུ་བྱས་པའི་གཏོལ་མེད་ཀྱི་ཚིག་ལ་རྒྱུས་མེད་པའི་བློ་ཆུང་རྣམས་ཀྱང་མགོ་འཁོར་ནས་བདེན་འཛིན་བྱེད་པ་ནི་སྙིང་རྗེའི་གནས་ཡང་དག་པའོ། །ཤངས་པ་བཀའ་བརྒྱུད་པ་ཡང༌། མཁས་གྲུབ་ཁྱུང་པོ་ནས་བརྩམས་ཏེ། སངས་རྒྱས་སྟོན་པ། མཁས་གྲུབ་ཆོས་རྗེ། ཤངས་སྟོན། ཨ་སེང་ལ་སོགས་པ་ཐམས་ཅད་ཀྱིས་
ཀྱང་རྫོགས་ཆེན་དང༌། རྙིང་མ་ལ་ཐོས་བསམ་སྒོམ་གསུམ་མཛད་པ་འབའ་ཞིག་ཡིན་པ་ནི་སོ་སོའི་རྣམ་ཐར་ལོ་རྒྱུས་རྣམས་ལ་ཆེས་གསལ་ལོ། །བཀའ་གདམས་པའི་བླ་མ་རྣམས་ཀྱང་རྫོགས་ཆེན་སྙན་བརྒྱུད་ལ་ཐུགས་དམ་མཛད་པ་ཆེས་མང་སྟེ། ཨ་རོ་ཡེ་ཤེས་འབྱུང་གནས་ཞེས་བྱ་བ་མདོ་སྡེ་དཀོན་མཆོག་སྤྲིན་ནས་དགེ་སློང་མཐའ་གྲོལ་གཞོན་ནུ་ཞེས་ལུང་བསྟན་པའི་སྐྱེས་ཆེན་དེ་ལ་ཐུགས་ཀྱི་སྲས་བཞི་ཡོད་པའི་གཅིག་ཅོག་རོ་བཟང་དཀར་མཛོད་ཁུར། དེས་རྔོག་ལེགས་པའི་ཤེས་རབ། དེས་དགེ་སློང་ཆོས་ཀྱི་ཤེས་རབ། གཞན་ཡང་བཀའ་གདམས་པའི་སྤོ་ཏོ་བ། དེའི་སློབ་མ་གྲ་པ་བྲག་དཀར་བ་ལ་སོགས་པ་ཆེས་མང་བ་རྣམས་ཀྱིས་རྫོགས་ཆེན་སྙན་བརྒྱུད་ལ་ཐོས་བསམ་སྒོམ་གསུམ་མཛད་པ་འབའ་ཞིག་ཡིན་ཞིང༌། ཇོ་བོ་རྗེ་ལ་སྙེ་ཐང་དུ་བོང་སྟོན་རྣམས་ཀྱིས་དང་པོ་བོད་དུ་བརྩམས་པའི་བསྟན་བཅོས་འགའ་གཟིགས་ཕུལ་བས་གཞན་ལ་མཉེས་ཚོར་མ་མཛད། ཨ་རོ་ཡེ་ཤེས་འབྱུང་གནས་ཀྱིས་མཛད་པའི་ཐེག་ཆེན་རྣལ་འབྱོར་བྱ་བའི་བསྟན་བཅོས་ལ་མཉེས་ཏེ། ཚིག་སྙན་དང་གདམས་ངག་ཆེ། ལས་འབྲས་ཞིབ་དོན་ཟབ་ལ་རྒྱ་ཆེ་བ་འདུག་གསུངས་སོ། །དེས་ན་བཀའ་གདམས་པའི་དམ་པ་རྣམས་ཀྱང་དྲི་མ་ཅན་དུ་མ་བསྒྱུར་ཅིག །མ་གཅིག་
ལབ་སྒྲོན་སོགས་གཅོད་ཀྱི་བཀའ་བརྒྱུད་རྣམས་ཀྱིས་ཀྱང་རྫོགས་ཆེན་ལ་ཐོས་བསམ་སྒོམ་གསུམ་མཛད་པ་འབའ་ཞིག་ཡིན་ཏེ། མ་གཅིག་གིས་ལྷུར་མཁར་གྱི་དགེ་བཤེས་སྤྱན་སྟོན། བླ་མ་ཡང་རྩེ་བ། སྐྱོ་སྟོན་བླ་མ་རྣམས་ལས་མདོ་སྒྱུ་འཕྲུལ། རྫོགས་ཆེན་སེམས་སྡེའི་སྐོར་རྣམས་གསན། ཁྱད་པར་དུ་སྐྱོ་སྟོན་ཤཱཀ་ཡེའི་སློབ་མ་མ་གཅིག་ཉིད་ཀྱི་ཨ་ནེ་མོ་ཁེར་སྒོམ་ཞིག་མོ་བྱ་བ་ལ་མཁས་པ་ཉེར་ལྔའི་གདམས་པ་རྫོགས་པ་ཆེན་པོ་ཉོན་མོངས་ཆིག་ཆོད་བྱ་བ་ལ་གཙོ་བོར་ཉམས་ལེན་མཛད་ནས། ཉིད་ཀྱི་བསྟན་བཅོས་རྣམས་སུ་ཡང༌། ཕྱག་ཆེན་བློ་ལས་འདས་པར་རིག ། རྫོགས་ཆེན་ཡེ་དག་ཆེན་པོར་རིག །ཅེས་དང༌། སྲས་ཀྱིས་ཡུམ་ལ་བསྟོད་པར། མ་རྟག་ཆད་ཀྱི་མཐའ་ལ་མི་འཇིགས་པའི། །བཀའ་རྫོགས་པ་ཆེན་པོའི་སྒོ་རུ་ཞུགས། །ཐེག་དམན་ལོག་ལྟ་ཟིལ་གྱིས་གནོན། །ཆོས་ལྟ་བའི་ཕུ་ཐག་ཆོད་པའི་མ། །ཞེས་སོགས་མང་བས་བཀའ་བརྒྱུད་དེ་རྣམས་ཀྱང་དྲི་མ་ཅན་དུ་མ་སྦྱོར་ཅིག ། ༢ མཁས་པའི་དབང་པོ་བཅོམ་ལྡན་རལ་གྲི་དང༌། དབུས་པ་བློ་གསལ་དང༌། ཆོས་ཀྱི་རྗེ་ཀུན་མཁྱེན་ཆེན་པོ་ཡབ་སྲས་རྣམས་དང་ཆོས་རྗེས་བུ་སྟོན་ཡབ་སྲས་དང༌། ཆོས་རྗེ་བསོད་ནམས་རྒྱལ་མཚན་ལ་སོགས་པས་བོད་དུ་འགྱུར་རོ་ཅོག་གི་བཀའ་བསྟན་བཅོས་རྣམས་བསྡུས་ནས་དག་མ་དག་ཕྱེ་བའི་དཀར་ཆག་རྣམས་ནས་རྫོགས་ཆེན་གྱི་རྒྱུད་གཞུང་ཐམས་
ཅད་མི་གྲལ་ནས་ཁྱི་ཕྱུང་བ་ལྟར་ཕུད་པས་རྒྱུད་རྣམས་རྒྱུད་འབུམ་དུ་མ་ཚུད། མདོར་ན་བཀའ་བསྟན་བཅོས་གང་ཡང་བསྟན་འགྱུར་དུ་མ་ཚུད་པས་ཆོས་མ་ཡིན་པའི་གྲངས་ལ་བཏང་སྙོམས་སུ་བཞག །བསྟན་པའི་བདག་པོ་ཉ་ཀུན་དགའ་དཔལ་གྱིས་ཀྱང་འབྱམ་ཡིག་བཏང་ལོ། །༈ ལར་འབྱམ་ཡིག་ཙམ་ལ་རྒྱུ་མཚན་མེད་དེ། ཆོས་སྤྱོད་མངོན་པར་རྟོགས་པའི་རྒྱུད་བོད་མ་ཡིན་སྨྲས་པ་རྒྱ་གར་དུ་ནི་ཀ་མ་ཤཱི་ལའི་དགེ་འདུན་རྣམས་ཀྱིས་ངག་འདོན་བྱེད་པ་དང༌། པོ་ཏིའི་ཆར་བརྫུན་ཡིན་ཟེར་བ་མཁས་པར་གྲགས་པ་ཐམས་ཅད་ཀྱི་གཞུང་ལ་ཐལ་འགྱུར་འགོད་པ་བོ་དོང་བས་དེའི་ཁུངས་བསྒྲགས་པ་དང༌། རྒྱ་དཔེ་མེད་ཟེར་བ་ལ་རྒྱ་དཔེ་རྙེད་ནས་རྫུན་ཁུངས་བརྟོལ་བཤད་ཀྱིས་མི་ལྡང་བ་ཡོད་དོ། །༈ དེ་ལ་བརྗོད་པར་བྱ་སྟེ། བཅོམ་ལྡན་རལ་གྲིས་རྙིང་མའི་རྒྱུད་ཕུད་པའི་བཤད་པ་བསྟན་རྒྱན་ཆེ་ཆུང་གར་ཡང་མི་སྣང་ཞིང་ཁྱད་པར་དུ་རྒྱུད་རྒྱལ་ཟབ་མོ་དཔལ་གསང་བ་སྙིང་པོ་ལ། འགོས་ལྷ་བཙས་ལ་སོགས་པས་སྒྲོ་སྐུར་བྱས་པ་དེ་སྤང་བར་བྱ་སྟེ། འདི་རྒྱུད་ཡང་དག་ཡིན་པའི་རྒྱུ་མཚན་ནི། དཔལ་གསང་བ་འདུས་པའི་འགྲེལ་ཆེན་སློབ་དཔོན་བི་ཤཱ་མི་ཏྲས་མཛད་པར་གསང་སྙིང་གི་ལུང་རྣམས་དྲངས་པ་དང༌། ལོག་པའི་སྐྱོན་བཞི་ལ་སོགས་འགལ་སྤོང་རྣམས་མཛད་ནས་ཚད་མར་བསྒྲུབས་པ་ལ་སུས་ཀྱང་བསྙོམ་དུ་མེད་དོ། །
གུད་དུ་ཕུད་པས་སྐྱོན་ཆེ་ན། དུས་འཁོར་འགྲེལ་ཆེན་རྣམས་ཕྱི་ནང་གང་ཡིན་མ་ངེས་པས་པུ་སྟི་གུད་དུ་བྱས་ཞེས་གསུངས་མོད། དབུས་པ་བློ་གསལ་གྱིས་བཀའ་བསྟན་འགྱུར་གཉིས་ཀའི་དཀར་ཆག་ཏུ། རྙིང་མའི་རྒྱུད་འགྲེལ་རྣམས་ཕུད་པའི་བཤད་པ་མེད། ཁྱད་པར་དུ་རྒྱུད་འབུམ་དུ་སྒྱུ་འཕྲུལ་སྡེ་བརྒྱད། མདོ་དགོངས་འདུས། རྔམ་གློག །ཀུན་འདུས། ཀུན་བྱེད་རྒྱལ་པོའི་རྒྱུད་སྔ་ཕྱི་གསུམ་དང་བཅས་པ་སོགས་རྣམས་འགྱུར་བྱང་དང་བཅས་ཏེ་བཞེངས་ནས་དྲི་མ་མེད་པའི་དཀར་ཆག་མཛད་དོ། །རྒྱུད་ཚད་མ་ཡིན་མིན་སོགས་ཀྱི་དབྱེ་བ་ཕོ་བྲང་ཞི་བ་འོད་གསལ་ཀྱིས་མཛད་ཟིན་ཀྱང༌། ཁོ་བོ་ནི་ཆོས་ཀྱི་མཚན་ཉིད་གང་ལ་ཡོད་མེད་དག །མི་ཤེས་མཐོང་བ་མེད་ཕྱིར་རྒྱུ་བཞིའི་ཡིས། །རྣམ་དབྱེ་སྨྲ་བའི་ཁ་ནི་བདུད་ཀྱིས་ཕྱེས། །ཆོས་ལ་ཉེས་སྨོད་ཐུབ་པའི་གཞུང་ལས་བཀག །ཅེས་འབྱུང་བའི་དོན་ལ་བསམས་ནས་དབྱེ་བ་མ་གསུངས་སོ། །དེ་ནས་སྐྱེས་བུ་དམ་པ་དེ་སློབ་དཔོན་ཀྱང་འཕྱོན་མའི་གྲོགས་ལྟར་མ་སྦྲན་ཅིག །ཆོས་རྗེ་ཀུན་མཁྱེན་ཆེན་པོས་ཐོག་མར་བླ་མ་བྱང་ཆུབ་སེང་གེ་དང༌། སྲས་ཀྱི་ཐུ་བོ་སྟག་གཤམ་པ་ཚུལ་ཁྲིམས་བཟང་པོའི་དྲུང་དུ། དཔལ་ཡང་དག་ཧེ་རུ་ཀ །རྡོ་རྗེ་ཕུར་པ་ལ་སོགས་པའི་སྔགས་རྙིང་མའི་དབང་རྒྱུད་སྒྲུབ་བསྐོར་མང་དུ་གསན་ནས་ཐུགས་སུ་ཆུད། དུས་ཕྱིས་རས་པ་ཤཱཀ་
འབུམ། མཁན་ཆེན་འཛིམ་པ། ཆོས་རྗེ་ཡོན་ཏན་རྒྱ་མཚོ། བྱང་སེམས་རྒྱལ་ཡེ། མཁས་མཆོག་སྐྱི་སྟོན་འཇམ་དབྱངས་རྣམས་ལས་སྔགས་རྙིང་མ་བཀའ་གཏེར་གྱི་སྒྲུབ་སྐོར། རྫོགས་ཆེན་གྱི་སྐོར་ལ་མཐའ་ཡས་པ་ཞིག་གསན་ནས་མཁས་པར་མཁྱེན། ཐུགས་ཉམས་སུ་བཞེས། མཁས་མཆོག་སྐྱི་སྟོན་ལ། གྲུབ་ཐོབ་འདར་ཕྱར་གྱིས་གཏེར་ནས་བཏོན་པའི་རྟ་མགྲིན་ཡང་གསང་ཁྲོས་པ་གསན་ནས་ཐུགས་དམ་མཛད་པས་རྟ་མགྲིན་དང་ཨོ་རྒྱན་གུ་རུ་གཉིས་ཀྱི་ཞལ་གཟིགས་ཏེ། སྐུ་འབུམ་འཛམ་གླིང་རྒྱན་གྱི་སྲོག་ཤིང་ཨོ་རྒྱན་གྱིས་བཙུགས་པར་གཟིགས། སྐུ་འབུམ་གྱི་ལྷ་ཁང་བརྒྱ་རྩ་བརྒྱད་ཀྱི་ལྷ་ཁང་གཅིག་གུ་རུའི་ལྷ་ཁང་དང༌། གཅིག་རྟ་མགྲིན་ཞལ་གཟིགས་ཀྱི་ལྷ་ཁང་མཛད། རྟ་མགྲིན་དེ་ཉིད་བུ་ཆེན་གཞན་ལའང་སྤེལ་ཏེ། ཕྱོགས་ལས་རྣམ་རྒྱལ། མཁན་ཆེན་རིན་ཚུལ། ཆོས་རྗེ་བྱང་སེང༌། ཇོ་ནང་ལོ་ཙཱ། ཞང་སྟོན་བསོད་ནམས་གྲགས། ཉ་ཀུན་དགའ་རྣམས་ཀྱིས་ཀྱང་ཐུགས་དམ་མཛད་ཅིང༌། སྒྲུབ་དཀྱིལ་གྱི་ཡིག་སྣ་མང་པོ་མཛད། མངའ་བདག་ཉང་དང་གུ་རུ་ཆོས་དབང་གཉིས་ཀྱི་གཏེར་ཁ་གོང་འོག་ཅེས་གསུངས་ཤིང༌། ཁྱད་པར་གུ་རུ་ཆོས་དབང་ནི་གྲུབ་པ་བརྙེས་པའི་སྐྱེས་ཆེན་དམ་པ་ཞེས་བསྟོད་བསྐུར་བསྔགས་པ་ཆེན་པོ་མཛད་པ་རྣམས་ཉིད་ཀྱི་
བཀའ་འབུམ་རྣམས་སུ་གསལ་མོད། དེས་ན་ཆོས་རྗེ་ཀུན་མཁྱེན་ཆེན་པོས་བཀའ་བསྟན་འགྱུར་གཉིས་བཞེངས་པའི་གཏམ་ཡང་མི་སྣང་བས་ཕུད་པ་སོགས་ཀྱི་གཏམ་ནི་འཕྱོན་མའི་གྲོགས་དང་འདྲ་བ་མ་ཡིན་ནམ། དེའི་སློབ་མ་ཇོ་ནང་ལོ་ཙཱས་རྒྱུད་འབུམ་ཅིག་བཞེངས་འདུག་པའི་ནང་དུ་ནི། རྙིང་མ་ཕུད་པའི་གཏམ་མི་སྣང་ལ། ཁྱད་པར་ཕུར་བའི་རྒྱུད་ནང་དུ་བཞེངས་པར་སྣང༌། གསར་མའི་ཕྱག་རྡོར་གྱི་སྐོར་མང་པོ་དང༌། ཀྱེ་རྡོར་གྱི་གསང་བ་མཛོད། བདེ་མཆོག་ར་ལི་ཉེར་བཞི་པོ་ཐམས་ཅད་རྒྱུད་རྫུན་མ་ཡིན་ཞེས་ཐམས་ཅད་ཕུད་དོ། །ཆོས་རྗེས་ཕྱོགས་རྒྱལ། ཆོས་རྗེ་བྱང་སེང་བ། མ་ཏི་པཎ་ཆེན། ཇོ་ནང་ལོ་ཙཱ། ཞང་སྟོན་བསོད་གྲགས་སོགས་བུ་ཆེན་རྣམས་ཀྱིས་ཀྱང་རྫོགས་ཆེན་དང་རྙིང་མ་རྣམས་ལ་ཐོས་བསམ་སྒོམ་གསུམ་མཛད་པ་མིན་པ། དེ་བས་ཕུད་པ་ལ་སོགས་རྣམས་ནི་ལྷོ་ནུབ་བདེན་བྲལ་གྱི་ཚིག་གོ །།དེས་ན་ཀུན་མཁྱེན་ཡབ་སྲས་ཀྱིས་ཀྱང་ཆོས་གྲལ་ནས་ཕུད་ཅེས་དེ་ཡབ་སྲས་ཀྱང་འཕྱོན་མའི་གྲོགས་ལྟར་མ་སྦྲན་ཅིག །ཆོས་རྗེ་བུ་སྟོན་གྱིས་ཀྱང་ཉིད་ཀྱི་མེས་པོ་ལ་རྫོགས་ཆེན་སེམས་ཀློང་སྐོར་དང༌། མདོ་རྒྱུ་འཕྲུལ་ལ་སོགས་བཀའ་གཏེར་མང་པོ་གསན་ནས་བསྙེན་སྒྲུབ་ཀྱང་མང་དུ་མཛད་ཅིང༌། ༈ ནུས་པ་ཐོན་ནས་མེས་པོའི་ཚབ་མཛད་ཚུལ་དང༌། པད་སྡོང་གི་སྟེང་
ན་གུ་རུ་ཤཱཀྱ་སེང་གེ་གཙོ་བོར་གྱུར་པའི་མཚན་བརྒྱད་ཞལ་གཟིགས་ཚུལ་དང༌། རྙིང་མའི་ཕྱོགས་ལ་པཎྜི་ཏ་གསུམ་པར་གྲགས་པ་རོང་གནུབས་ཁུ་ལུང་པ་ནས་བརྒྱུད་པ་མ་ལུས་པ་གསན་ཞེས་སྒྲ་ཚད་པས་རྣམ་ཐར་དུ་བྲིས་ན་ཁ་ཅིག་བཏང་སྙོམས་སུ་བཞག་ཚུལ་གཞན་ངོ་སྲུང་བ་ཙམ་སྟེ། ཁོ་བོའི་བླ་མ་ཐར་པ་ལོ་ཙཱ་བ་དང༌། ༈ རིག་རལ་ལ་སོགས་པས་བལ་ཡུལ་དང༌། བསམ་ཡས་སོགས་ནས་རྒྱ་དཔེ་རྙེད་པས་རྒྱུད་ལེགས་ཞེས་གསུངས། དེ་ལས་གཞན་པའི་རྙིང་མ་ལ་སྐྱོན་ཅན་དུ་གཟིགས་ནས་བཀའ་བསྟན་འགྱུར་གཉིས་ནས་ཕུད་པའི་གཏམ་གུད་དུ་མི་སྣང༌། གསར་མའི་རྒྱུད་མང་པོ་ལ་ཐེ་ཚོམ་གྱི་གཞི་དང་རྒྱུད་བརྫུན་མར་བྱས་ནས་ཕུད་པ་མང་བདོ་ཞིང་རྡོ་རྗེ་ཕུར་བའི་རྒྱུད་ནི་ཁྱད་པར་ནང་དུ་བཞེངས་ཤིང༌། འདི་ལྟ་བུའི་ངན་བརྗོད་བྱས་པ་མ་མཐོང་ཞིང་མ་ཚོར་བས་དེ་ཡང་དྲི་མ་ཅན་དུ་མ་བསྒྱུར་ཅིག །ཆོས་རྗེ་བསོད་ནམས་རྒྱལ་མཚན་གྱིས་བསྟན་འགྱུར་བཞེངས་ཀྱང་དེའི་ནང་ནས་རྙིང་མའི་བསྟན་བཅོས་རྣམས་ཕུད་པའི་གཏམ་མི་སྣང་བས་གོང་དུ་བརྗོད་པ་ལྟར་ཆོས་རྗེ་བ་ཡང་འཕྱོན་མའི་གྲོགས་ལྟར་མ་སྦྲན་ཅིག །བསྟན་པའི་བདག་པོ་ཉ་ཀུན་དགས་ཀྱང་བསྟན་ལ་དགོངས་ཤིང་འབྱམ་ཡིག་བཏང་བ་ངོ་མཚར་ཆེ་སྟེ། དེ་བས་ཀྱང་དུས་
འཁོར་ལ་སོགས་པ་སེམས་འགྲེལ་སྐོར་གསུམ་པོ་ཐམས་ཅད་བཀའ་མིན་དང་ཆོས་མིན་དུ་སྒྲུབ་པ་འདི་ལ་འབྱམ་ཡིག་ཅིག་བཏང་ནས་དག་མ་དག་གི་ཤན་མི་དབྱེ་བ་ཅི་ལགས་སྙམ་ནས་ཡིད་གཉིས་སུ་གྱུར་པ་དགོངས་མཛོད་ཅིག །ད་ལྟ་བོད་འདིར་བསྒྲིགས་པའི་རྒྱུད་འབུམ་དང་བསྟན་འགྱུར་རྣམས་ནི་ཕལ་ཆེར་ཕྱོགས་ཞེན་ཅན་ཁ་ཅིག་གིས་ནི་ཕྱོགས་རེ་བ་རེ་བྲིས་པ་ཡིན། ཁ་ཅིག་གིས་སོ་སོར་གུད་དུ་བྲིས་ཕྱོགས་མེད་རིས་མེད་ཀྱི་དད་པ་ཅན་ཤེས་རབ་གཟུ་བོར་གནས་པ་ཐམས་ཅད་དང༌། གཞན་ཡང་ས་སྐྱ་པ་ཡབ་སྲས་རྣམས་དང༌། སྔོན་གྱི་བཀའ་གདམས་པ་རྣམས་དང༌། འབྲི་སྟག་མཚུར་གསུམ་མཚལ་བ་ལ་སོགས་དྭགས་པོ་བཀའ་བརྒྱུད་པ་རྣམས་དང༌། མཆིམས་པ། ཁྲོ་ཕུ་བ། རིག་རལ། དབུས་པ་བློ་གསལ་ལ་སོགས་རྣམས་ཀྱིས་རྙིང་མའི་བཀའ་བསྟན་བཅོས་རྣམས་ཁྱད་པར་གསེར་དངུལ་གྱིས་བཞེངས་པ་མང་མོད། གཞན་ཡང་ཕྱོགས་ཞེན་ཅན་གྱིས་བསྒྲིགས་པའི་རྒྱུད་འབུམ་དང༌། དཀར་ཆག་རྣམས་སུ་མེད་པ་ཅིག་ཤོས་སུན་འབྱིན་པ་ནི་གཏོལ་མེད་པའི་ཚིག་གོ །།ཕྱོགས་ཞེན་ཅན་རྣམས་ཀྱིས་རྒྱུད་འབུམ་ཁ་ཅིག་ཏུ་མ་ཚུད་ཅིང་ཕུད་པ་སོགས་རྣམས་ཆོས་མིན་དུ་བྱེད་ན། དུས་འཁོར་རྒྱུད་འགྲེལ་རྒྱུད་ཕྱི་མ་དང་བཅས་པ། ཡོན་ཏན་ཡོངས་བཟུང༌།
ཅེ་སྤྱང་ཚོགས་རོལ། རྡོ་རྗེ་གླུ་གར། བདེ་མཆོག་ནམ་མཁའ་དང་མཉམ་པ། བདེ་མཆོག་གི་བཤད་རྒྱུད་ར་ལི་ཉི་ཤུ་རྩ་བཞི། ཕག་མོ་མངོན་འབྱུང༌། ཀྱེ་རྡོ་རྗེའི་གསང་བ་མཛོད་རྒྱུད་གསང་འདུས་བཤད་རྒྱུད། གཉིས་མེད་རྣམ་རྒྱལ། གཤིན་རྗེ་པྲ་ཁོག་རྩ་སྣང་བ། ཧེ་རུ་ཀ་རོལ་པ། ཕྱག་རྡོར་གྱི་རྒྱུད་གསང་བསྟན། དྲག་པོ་མེ་ལྕེ། རྡོ་རྗེ་སྙིང་པོ་ལྕེ་འབབ། བདེ་ཁྲོས། རྡོ་རྗེ་བེ་ཅོན། གཏུམ་པོ་ཐུགས་རྒྱུད། ཕྱི་མའི་ཕྱི་མ་དང་བཅས་པ་སོགས་གཞན་ཡང་ཆེས་མང་བ་དང༌། ཞི་བྱེད་ཀྱི་མདོ་རྒྱུད་རྣམས་དང༌། གཞན་ཡང་བསྟན་འགྱུར་ཁ་ཅིག་ཏུ་གསེར་ཆོས་བཞི་ལ་སོགས་ཤངས་པ་བཀའ་བརྒྱུད་ཀྱི་གདམས་པ་རྣམས་ཐམས་ཅད་དང༌། བཀའ་བབས་སྙན་བརྒྱུད་བཞི་ལ་སོགས་པ་དམ་པའི་ཞི་བྱེད་ཀྱི་གཞུང་ཐམས་ཅད་དང༌། མར་པ་ལོ་ཙཱའི་བདེ་མཆོག་སྙན་བརྒྱུད་ཀྱི་སྐོར་ཐམས་ཅད་དང༌། གཞན་ཡང་ཆེས་མང་བ་མང་པོ་ཡང་མ་ཚུད། གཞན་ཡང་རྒྱུད་གཞུང་དེ་དག་ཐམས་ཅད་ཀྱང་ཁ་ཅིག་གིས་ཡང་དག་ཏུ་བྱེད། ཁ་ཅིག་གིས་བསླད་ཅན་དུ་བྱེད། ཁ་ཅིག་གིས་རྫུན་མར་བྱེད། ཁ་ཅིག་གིས་ཐེ་ཚོམ་གྱི་གཞིར་མཛད་པས་དེ་རྣམས་གང་བདེན་པ་ཡིན། ཁྱུང་པོའི་གསེར་ཆོས་བཞིའི་གཞུང་རྣམས་དང༌། ཞི་བྱེད་དང་སྙན་
བརྒྱུད་ཀྱི་གཞུང་རྣམས་ཀྱང་ཆོས་ལོག་ཏུ་བྱེད་དམ་ལེགས་པར་སོམས་ཤིག །གཞན་ཡང་གྲུབ་ཆེན་གསེར་སྟེང་པ། ཆོས་སྐུ་འོད་ཟེར། ཀུན་མཁྱེན་འཕགས་འོད་རྣམས་ཀྱིས་རྫོགས་ཆེན་ལ་ཐུགས་དམ་མཛད་པ་འབའ་ཞིག་ཡིན་ཞིང༌། ཁྱད་པར་ཀུན་མཁྱེན་འཕགས་འོད་ཀྱིས། ཟབ་མོ་ལྟ་བ། ཉམས་ལེན་སྒོམ་པ། རྒྱ་ཆེན་སྤྱོད་པ། འབྲས་བུ་རྫོགས་ཆེན་རྒྱལ་ཐབས་སྤྱི་བླུགས། སྙན་བརྒྱུད་ཀྱི་འཕྲང་བསལ་བ་རྫོགས་ཆེན་གསང་སྐོར་སོགས་བརྒྱུད་པ་སྡེ་བཞིའི་སྐོར་རྣམས་གསན་ནས་ཐུགས་ཉམས་སུ་བཞེས་ཞེས་གསུངས་སོ། །ཆོས་རྗེ་ཀུན་སྤངས་ཆེན་པོས་སྔགས་རྙིང་མ་ཡང་ཕུར་ལ་སོགས་ཀྱི་དབང་བརྒྱུད་མན་ངག་མཐའ་ཡས་པ་དང༌། ཁྱད་པར་རྫོགས་ཆེན་གྱི་སྐོར་ལ་མཐའ་ཡས་པ་ཞིག་ལ་ཐུགས་སྦྱོང་མཛད་ནས་མཁས་པར་མཁྱེན་ཅིང༌། དེ་ནས་གྲུབ་ཆེན་ཡོལ་མོའི་སྲས་མོ་མ་གཅིག་ཇོ་འབུམ་ལས་རྒྱལ་ཐབས་སྤྱི་བླུགས་ཀྱི་དབང་ཞུས། རྫོགས་ཆེན་སེམས་ཀློང་གི་སྐོར་མཐའ་ཡས་པའི་རྒྱུད་གཞུང་མན་ངག་མཐའ་ཡས་པ་གསན་ནས་ཐུགས་ཉམས་སུ་བཞེས། དེ་རྗེས་ཇོ་ནང་པ་རིམ་པར་བྱོན་པ་བྱང་སེམས་རྒྱལ་ཡེ། ཡོན་ཏན་རྒྱ་མཚོ། ཤེས་རབ་འབུམ་པ། སྐལ་བཟང་བ། ཀུན་མཁྱེན་ཆེན་པོ་ཡབ་སྲས་རྣམས་དང༌། མཁན་ཆེན་འཛིམ་པ། ཀུན་མཁྱེན་གངས་པ་ལ་སོགས་པ་ཐམས་
ཅད་ཀྱིས་ཀྱང་ཐུགས་ཉམས་སུ་བཞེས། སྙིང་པོར་མཛད་པ་ལ་སུས་བསྙོན་དུ་ཡོད། ༢ ད་ལྟ་རྫོགས་ཆེན་གྱི་རྒྱུད་གཞུང་འདི་ཐམས་ཅད་ཀྱི་ནང་ནས་རྩོམ་པའི་ཡོང་ཚུལ་དང༌། ཚིག་དོན་གྱི་རྣམ་གཞག་མཁས་པ་གང་གིས་མཐོང་ཡང་ཡིད་ཆེས་པའི་རྒྱུད་གཞུང་གཅིག་ཀྱང་མེད་ལོ། །༈ འོ་ན་རྒྱལ་སྲས་ཐོགས་མེད་པ་སྡེ་སྣོད་ལ་སྤྱོད་པ་ཞིབ་པ་དེས་ཀྱང་གཟུངས་འབུལ་གྱི་དཀར་ཆག་ཏུ་ཟུར་པ་ནས་བརྒྱུད་པའི་རྫོགས་ཆེན་ཞེས་བཀའ་འབུམ་དུ་འཁོད་པ་དེ་ཁོང་སྨྱོའམ་རྫོགས་ཆེན་གྱི་ཆོས་སྐད་ལ་ཡིད་མ་ཆེས་ན་བཀའ་གདམས་ཐིག་ལེ་བཅུ་དྲུག་གི་ཆོས་སྐད་ཀྱང་དེ་དང་འདྲ་བར་ཡོད་པས་བཞད་གད་ཀྱི་གནས་སོ། །༈ དེ་ལ་གོང་དུ་བཤད་པ་ལྟར། ས་སྐྱ་པ་ཡབ་སྲས་རྣམས་དང་བཀའ་གདམས་པ། དྭགས་པོ་བཀའ་བརྒྱུད་པ། ཤངས་པ། ཞི་གཅོད་པའི་བཀའ་བརྒྱུད་པའི་མཁས་གྲུབ་རྣམས་ལས་ལྷག་པའི་ཚིག་དོན་གྱི་རྣམ་གཞག་མཁས་པ་ད་ལྟ་རྙེད་ལས་ཆེ། ༢ འོན་ཀྱང་ངན་སར་མི་སྡོད་པར་ཆོས་ཐམས་ཅད་ཀྱི་ཟབ་ཤོས་རྫོགས་ཆེན་ཡིན། གཞན་གསང་འདུས། ཀྱེ་རྡོར་འཁོར་ལོ་སྡོམ་པ། དུས་འཁོར་སོགས་བླ་མེད་ཀྱི་རྒྱུད་དང༌། དེ་དག་གི་སྙིང་པོའི་དོན་ཕྱག་རྒྱ་ཆེན་པོ་སྦྱོར་དྲུག །རིམ་ལྔ་སོགས་ཐམས་ཅད་བསྐྱེད་པ་མ་ཧཱ་ཡོ་ག་བྱ་བ་ཐེག་པ་དམན་པ་ཡིན། དེ་རྣམས་ཀྱི་གོང་ན་ལུང་ཨ་ནུ་ཡོ་ག་བྱ་བ་སྒྲུབ་པ་བཀའ་བརྒྱད་དང༌། བདེ་གཤེགས་འདུས་པ་དང༌།
དགོངས་འདུས་ལ་སོགས་པ་མདོ་བཅུ་བཞི་རྣམས་ཡོད། དེ་ཐམས་ཅད་ཀྱི་གོང་དུ་ཐེག་པ་རིམ་པ་དགུའི་ཡང་རྩེ་རྫོགས་པ་ཆེན་པོ་ཨ་ཏི་ཡོ་ག་འདི་ཡོད་པ་ཡིན། འདིའི་ཐད་ན་གསང་འདུས་ལ་སོགས་པ་ཕྱག་རྒྱ་ཆེན་པོའི་ཆོས་སྐོར་ཐམས་ཅད་གཞོབ་རྡོག་པས་བརྫིས་པ་དང་འདྲ་སྟེ་སྙིང་པོ་མེད་ཟེར་ནས། སངས་རྒྱས་ཀྱི་བསྟན་པའི་སྙིང་པོ་དམ་པ་དང་རབ་ཕུལ་དུ་གྱུར་པ་རྣལ་འབྱོར་བླ་ན་མེད་པའི་རྒྱུད་སྡེ་ཕྱག་རྒྱ་ཆེན་པོའི་ལམ་ཐམས་ཅད་ཁྱད་དུ་གསོད། ཐེག་ཆེན་གྱི་མདོ་སྡེ་ཐམས་ཅད་ཀྱང་ལྟ་བ་རྫོགས་ཆེན་ལ་མ་སླེབ་པས་ལྟ་བ་དམན་ཟེར་ནས་ཁྱད་དུ་གསོད་ལོ། །དེ་ལ་བརྗོད་པར་བྱ་སྟེ། སྤྱིར་འདི་ལྟ་བུའི་རྣམ་དབྱེ་དང་བརྗོད་ཚུལ་བྱེད་པ་རྫོགས་ཆེན་པའི་ཁྲོད་ནས་བྱུང་ཞིང༌། རྫོགས་ཆེན་ལ་བརྗོད་འདོད་ཀྱི་དབང་གིས་རང་ཉིད་ཀྱིས་ཅི་དྲན་བྲིས་པ་མ་ཡིན་ན་ཤིན་ཏུ་ནས་ཀྱང་བདེན་དེ། རྫོགས་ཆེན་རྙིང་མའི་ཆོས་ཚུལ་རྣམས་ལ་ལོག་པར་རྟོག་པའི་མཁས་རློམ་ཅན་གྱི་བླུན་པོ་སྨྲ་ཁམས་ཅན་དང་མཚུངས་སོ། །སྤྱིར་དུ་ཐེག་པ་དམན་པ་དང་མ་རྫོགས་པ་རྣམས་ཀྱིས་ཀྱང་ཁྱེད་ལྟར་ངེད་ཐམས་ཅད་ཐེག་པ་དམན་པ་ཡིན་པས་ངན་སར་སྡོད་པ་ཡིན་ཟེར་བ་མ་ལགས་སམ། དེ་ལྟ་མིན་ན་ཐེག་པ་ཐམས་ཅད་ཀྱིས་རང་རང་གི་ཆེ་བའི་ཡོན་ཏན་བརྗོད་པ་ལུགས་ཡིན་པས་ཨ་ཏི་ཡོ་ག་ཐེག་པ་ཐམས་ཅད་ཀྱི་ཡང་རྩེ་ཡིན་པར་བརྗོད་པ་ལ་སྐྱོན་ཅི་མཐོང༌། རྫོགས་ཆེན་པ་དང་རྙིང་མ་པ་དོན་མཐུན་རྣམས་ཀྱིས་ནི། བསྐྱེད་དང་རྫོགས་དང་
རྫོགས་ཆེན་གསུམ། །གང་ཟག་དབང་པོ་རབ་ལ་དགོངས། །ཞེས་གསུངས་པས། གསང་བ་འདུས་པ་སོགས་བསྐྱེད་པ་མ་ཧཱ་ཡོ་ག་བྱ་བ་ཐེག་པ་དམན་པ་ཡིན་ཞེས་ཟེར་བའི་རྫོགས་ཆེན་པ་ཞིག་བྱུང་མ་བྱུང་ཐེ་ཚོམ་ཟ་བས་དེ་ཡང་བརྫུན་ཟེར་བར་ནི་མ་གྱུར་ཅིག སྔགས་གསར་མར་ཡང་རྣལ་འབྱོར་ཆེན་པོ་ལ་ཕ་རྒྱུད་མ་རྒྱུད་གཉིས་མེད་དང་གསུམ་དུ་དབྱེ་མོད། དེས་ན་འདིར་ཡང་བླ་མེད་ལ་བསྐྱེད་དང་རྫོགས་དང་རྫོགས་ཆེན་གསུམ་དུ་ཕྱེ་བ་ལ་འགལ་བ་སུས་འཚོལ། དྲི་མེད་འོད་ལས། གང་གིས་མཆོག་གི་དང་པོའི་སངས་རྒྱས་མི་ཤེས་པ་དེས་མཚན་ཡང་དག་པར་བརྗོད་པར་མི་ཤེས་སོ། །དེ་མི་ཤེས་པ་དེས་རྡོ་རྗེ་འཛིན་པའི་ཡེ་ཤེས་ཀྱི་སྐུ་མི་ཤེས་སོ། །དེ་མི་ཤེས་པ་དེས་སྔགས་ཀྱི་ཐེག་པ་མི་ཤེས་སོ། །སྔགས་ཀྱི་ཐེག་པ་མི་ཤེས་པ་དེ་ཐམས་ཅད་འཁོར་བ་པ་སྟེ་རྡོ་རྗེ་འཛིན་པའི་ལམ་དང་བྲལ་བའོ། །ཞེས་གསུངས་མོད། དེས་ན་རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་ཤིང༌། ཡིན་ལུགས་ཀྱི་དོན་ལ་ཁྱད་མེད་ཀྱང༌། ཆོས་སོ་སོའི་ཆེ་བའི་རང་སྐད་བརྗོད་པ་ལ་སྐྱོན་མ་མཐོང་སྟེ། དམ་པ་རྒྱ་གར་ལ་སོགས་པས་ཀྱང་ཨ་ཏི་ཡོ་ག་ཐེག་པའི་ཡང་རྩེ་ཡིན་པར་གསུངས་པ་གོང་དུ་བརྗོད་པ་ལྟར་རོ། །ལུང་ཨ་ནུ་ཡོ་ག་བྱ་བ་
བཀའ་བརྒྱད་དང༌། བདེ་གཤེགས་འདུས་པ་སོགས་ཡིན་ཟེར་བའི་རྫོགས་ཆེན་པ་སྣང་ན་ནི། དེ་ནི་མ་ངེས་བཞིན་དུ་སྨྲ་བ་སྟེ། རྫོགས་ཆེན་བཀག་པའི་མཁས་རློམ་ཅན་ཚིག་གི་བརྗོད་ཚུལ་ཙམ་ལའང་རྨོངས་པའི་གང་ཟག་དེ་རྣམས་དང་གཉིས་སུ་མེད་ཅིང་ཐ་མི་དད་དོ། །གསང་འདུས་སོགས་ཕྱག་ཆེན་གཞོབ་རྡོག་པས་བརྫིས་པ་དང་འདྲ་ཟེར་ནས་བསྟན་པའི་སྙིང་པོ་རྣལ་འབྱོར་བླ་མེད་ཀྱི་རྒྱུད་སྡེ་དང་ཕྱག་ཆེན་གྱི་ལམ་ཁྱད་དུ་གསོད་པའི་རྫོགས་ཆེན་པ་དེ་ཡང་རྫོགས་པ་ཆེན་པོ་ཆོས་མིན་དུ་བསྒྲུབས་པ་རྣམས་དང་ཁྱད་མེད་དོ། །སྤྱིར་ཡང་འདི་དག་རྣམས་རང་རང་གིས་བརྗོད་འདོད་ཀྱི་དབང་གིས་བརྫུན་དང་བསྙོན་བརྟོལ་བྱེད་པ་མིན་ན། རྫོགས་ཆེན་གྱི་གཞུང་ཁུངས་མ་གང་ནས་བཤད་བསྟན་དུ་གསོལ། ༢ གསང་སྔགས་ལ་ཞུགས་ནས་སོ་ཐར་ལ་གཙིགས་སུ་བྱས་ན་ཐེག་དམན་དུ་ལྷུང་བ་ཡིན་ཟེར་བ་དང༌། ཞེས་པ་ལ། ༈ དེའང་དཔྱད་དགོས་ཤིང་དེའི་དོན་ལ་སྐྱོན་ཡོད་ན་རྩ་ལྟུང་བརྒྱད་པ་དང༌། བཅུ་གསུམ་པ་དང༌། བཅུ་བཞི་པ་དང༌། སྦོམ་པོ་བརྒྱད་ཀྱི། ཉན་ཐོས་ནང་དུ་ཞག་བདུན་འདས། ཞེས་པ་ལ་སོགས་པའང་སྐྱོན་ཅན་ཏེ་སྦྱར། ༈ དེ་ལྟ་བུ་དང་མཐུན་པའི་ཚིག་བྱུང་བས་ཉེས་ན་གདུལ་བྱའི་སྐྱེ་བོ་ངེས་པ་དང་བྲལ་བ་རྣམས་ལ་རང་གི་སེམས་ཀྱི་བསམ་པས་སྐྱེ་བ་འདི་ཉིད་ལ་སངས་རྒྱས་ཉིད་ཀྱི་
འབྲས་བུ་སྟེར་བ་ཞེས་དང༌། ངེས་པ་དང་བྲལ་བ་ནི་ཉན་ཐོས་པའི་མཆོག་གི་སྡོམ་པ་འདོད་པ་སྤྱོད་པ་སྤངས་ཏེ་དེའི་ངེས་པ་དང་བྲལ་བ་སེམས་ཀྱི་བསམ་པ་འདོད་པ་ལ་སྤྱོད་པར་འདོད་པའོ། །ཞེས་དྲི་མེད་འོད་ལས་གསུངས་ཤིང༌། གཞན་ཡང་བིར་ཝ་བས་དམ་པ་ལ་གདམས་པ་གནང་ཞིང༌། འདུལ་བ་བསྲུངས་པས་མི་གྲོལ་གསུངས་པ་དང༌། བྲམ་ཟེ་ཆེན་པོ་དང་མཻ་ཏྲི་པ་ལ་སོགས་ཀྱིས་ཀྱང་དེ་ལྟར་གསུངས་ཤིང༌། ཏཻ་ལོ་པས་ཀྱང༌། འདུལ་བའི་སྡེ་སྣོད་ལ་སོགས་ཆོས་རྣམས་དང༌། །རང་རང་གཞུང་དང་གྲུབ་པའི་མཐའ་ཡིས་ནི། །འོད་གསལ་ཕྱག་རྒྱ་ཆེན་པོ་མཐོང་མི་འགྱུར། །ཞེ་འདོད་བྱུང་བས་འོད་གསལ་མ་མཐོང་བསྒྲིབས། །རྟོག་པའི་སྲུང་སྡོམ་དམ་ཚིག་དོན་ལས་ཉམས། །ཞེས་གསུངས་པ་དེ་རྣམས་ཀྱིས་ཀྱང་སྡེ་སྣོད་གསུམ་གྱི་ལམ་ཁྱད་དུ་གསད་པར་འགྱུར་རོ། །དེས་ན་ལྟ་སྒོམ་སྤྱོད་གསུམ་མ་ནོར་བའི་གསུངས་རྣམས་ཆོས་མིན་དུ་སྒྲུབ་པ་ནི་ཆེས་ཆེར་རྣམ་པར་འཁྱམས་པའོ། །༢ ཁུངས་ས་རྡོ་ཤིང་བྲག་ལས་བྱུང་བ་ཤས་ཆེ་ཞིང་སྒྲུབ་བརྒྱུད་དང་སྙན་བརྒྱུད་གཉིས་ཀ་ཆད། ཅེས་ཟེར་མོད། ༈ དེ་ལྟ་ན་རྒྱུད་བླ་མ་དང་ཆོས་ཉིད་རྣམ་འབྱེད་མཆོད་རྟེན་གྱི་སེར་ཁ་ནས་བྱུང་བའང་བཤད་པས་བརྫུན་མའི་གྲས་སུ་དབྱུང་ཞིག ། ༈ ཆོས་དང་མན་ངག་གཏེར་དུ་སྦས་ནས་བྱུང་
པས་སྙན་བརྒྱུད་ལ་སོགས་ཆད་པར་འདོད་ན། མར་རྔོག་ལ་སོགས་པའི་བརྒྱུད་པ་དང་བཅས་པ་རྣམས་ཀྱི་རྒྱུད་རྣམས་རྡོ་རྗེ་སྙིང་པོས་བསྡུས་ཏེ་གླེགས་བམ་དུ་བྱས་ནས་ཨོ་རྒྱན་དུ་མཁའ་འགྲོ་མ་རྣམས་ལ་གཏད་དེ་རྒྱ་རིམ་པ་བདུན་གྱིས་བཏབ་ནས་སྦས་ཏེ་བཞུགས་པ་ལ། ཀླུ་སྒྲུབ་ལྐུགས་པར་བརྫུས་ཏེ་ཀེའུ་ཚང་གི་ཕྱི་རོལ་ཤིང་གདུག་པའི་ཚལ་གྱི་ནང་རོལ་དུ་མཎྜལ་ཕུལ་ཞིང་བསྡད་པས་མཁའ་འགྲོ་མ་རྣམས་ན་རེ། འདི་གུས་པ་ཆེ་བ་ཞིག་འདུག་པས་ནང་དུ་མཆོད་པ་བྱེད་དུ་ཆུག་ཟེར་ནས་ནང་དུ་བཏང་བས་སློབ་དཔོན་གྱིས་མཆོད་པ་བྱས་སོ། །དེ་ནས་དུས་གཞན་ཞིག་གི་ཚེ་མཁའ་འགྲོ་མ་རྣམས་ཡེངས་པ་དང༌། ཧེ་བཛྲ་གུར། གདན་བཞི་སོགས་རྣམས་ཕྱུང་སྟེ་སྨྱུག་དོང་དུ་བཅུག་ནས་གློ་སྐར་ནས་ཕྱི་རོལ་དུ་འཕངས་པས་སྒོ་དང་རོལ་མོ་རྣམས་སྒྲ་བྱུང་བས་མཁའ་འགྲོ་མ་རྣམས་འདུས་ནས་ལྐུགས་པས་ཆོས་བརྐུས་སོ་ཟེར་ནས་བཙལ་བས་མ་རྙེད། དེ་ནས་དུས་གཞན་ཞིག་ན་སློབ་དཔོན་གྱིས་སྨྱུག་དོང་ཁྱེར་ནས་བྲོས་པས། མཁའ་འགྲོ་མ་རྣམས་ཀྱིས་བདས་ཀྱང་མ་ཟིན་ཏེ། ཁྱོད་ཀླུ་སྒྲུབ་ཡིན་ཏེ་འོང་བས་སྐལ་ལྡན་རྣམས་ལ་བྱིན་ཞིག་ཟེར་ནས། སློབ་དཔོན་གྱིས་དར་བར་མཛད་པ་དང༌། ཁ་ཅིག་གིས་ལྭ་བ་པ་དང༌། ཙརྱ་པ་དང༌། རྟ་མཆོག་བི་ན་ས་རྣམས་ཀྱིས་ཕྱུང་བར་འདོད་པ་དང༌། མ་ཧཱ་མ་ཡའི་རྒྱུད་
ཀུ་ཀུ་རི་པས་ཨོ་རྒྱན་ནས་གཏེར་ནས་ཕྱུང་སྟེ། བརྐུས་ནས་བྲོས་འོང་བ་ལ་ཡེ་ཤེས་དང་འཇིག་རྟེན་གྱི་མཁའ་འགྲོ་མ་རྣམས་ཀྱིས་དེད་པར་བཤད་པ་དང༌། གཞན་ཡང་གཏེར་ནས་ཕྱུང་བར་བཤད་པའི་ཆོས་མཐའ་ཡས་པ་ཞིག་བཤད་པས་རང་རང་གི་ཆོས་དང་བླ་མ་བརྒྱུད་པ་ལ་སྐུར་པ་འདེབས་པའི་ཚིག་ཏུ་མི་འགྲོའམ་སོམས་ཤིག །དམ་པ་སངས་རྒྱས་ཀྱིས་ཞི་བྱེད་ཀྱི་ཆུ་ཀླུང་རོལ་བའི་མདོ་རྒྱུད་རྣམས་དང༌། ཆུ་ཀླུང་ཆེན་པོའི་གསང་རྒྱུད། མཁའ་འགྲོ་མའི་གསང་རྒྱུད་སོགས་རྣམས་དུར་ཁྲོད་དཔལ་གྱི་རྒྱུ་སྐར་རོལ་པ་ན་མཁའ་འགྲོ་མའི་གསང་མཛོད་སྒོ་ཉིས་རིམ་བཅད་པའི་ནང་ན་ལྕགས་ཀྱི་སྒྲོམ་བུ་དགུ་གླིང་ནས་བཏོན། ཡི་གེར་བཏབ་པར་བཞེད་ཅིང༌། ད་ལྟ་བོད་དུ་ཡང་ཞི་བྱེད་ཀྱི་མདོ་རྒྱུད་ཕལ་ཆེ་བ་རྣམས་ལྷོ་བྲག་བན་པ་ན་གཏེར་དུ་སྦས་ནས་ཡོད་པར་ཞི་བྱེད་པ་ཆེན་པོ་རྣམས་གསུངས་པས་དེ་དག་ཀྱང་སྒྲུབ་བརྒྱུད་ཆད་དམ། གཞན་ཡང་ཕྱག་རྒྱ་ཆེན་པོའི་སེམས་ཁྲིད་དྭགས་པོ་ལྷ་རྗེས་གཏེར་དུ་སྦས་ནས་དུང་མཚོ་རས་པས་བཏོན་པ་དང༌། རྗེ་བཙུན་རས་ཆུང་པས་ནཱ་རོ་པཎ་ཆེན་གྱི་རོ་སྙོམས་སྐོར་དྲུག་རྣམས་ལྷོ་བྲག་མཁར་ཆུར་བྲག་རྒན་མོ་འཛུམ་ཤོར་བ་འདྲ་བའི་ནང་ན་གནུབས་ནམ་མཁའི་སྙིང་པོའི་ཞབས་རྗེས་ཀྱི་བྱང་ཤར་མཚམས་སུ་སྦས་ནས་ཕྱིས་གཙང་བ་རྒྱ་རས་ཀྱིས་
གཏེར་ནས་བཏོན་ནས་དར་བར་མཛད་མོད་ཅིང༌། ཏི་པུ་པའི་ཞལ་ནས། རྒྱ་གར་འོ་མའི་རྒྱ་མཚོ་ནས། །གདམས་ངག་མར་གྱི་སྙིང་པོ་འདི། །རྒྱུད་སྡེ་རྣམས་ན་གབ་ནས་ཡོད། །པཎྜི་ཏ་ཡིས་ལོང་གཏམ་བྱས། །གྲུབ་ཐོབ་རྣམས་ཀྱི་ཁོང་སྙིང་ཡིན། །དུར་ཁྲོད་འགྲིམ་པའི་གོ་ཆ་ཡིན། །ཀུ་སུ་ལུ་ཡི་སྨན་སྦྱོར་ཡིན། །ནཱ་རོ་པཎ་ཆེན་གྱི་རྟོགས་པ་ཡིན། །པཎྜི་ཏ་དང་ཀུ་སུ་ལུ། །གཞན་ལ་འདི་འདྲ་མེད་པ་སྟེ། །སྣོད་ལྡན་ཁྱོད་ལ་བསྟན་པ་ཡིན། །གདམས་ངག་བཤད་ལ་དུས་ཚོད་དགོས། །ད་ལྟ་བསྟན་པའི་དུས་མིན་པས། །མཁའ་འགྲོ་ལྷ་འདྲེ་ཐམས་ཅད་ལ། །གཏད་གཉེར་གྱིས་ལ་གཏེར་དུ་སྦོས། །སྐྱེ་བ་གསུམ་གྱི་འོག་རོལ་དུ། །བློ་ལྡན་གང་ཟག་ལེན་དུ་འོང༌། །དེ་ཡི་ལག་ཏུ་གཏོད་ཅིག་གིས། །སྨོན་ལམ་ཐོབ་ལས་སྦོས་ཤིག་གསུངས། །ཞེས་རས་ཆུང་པ་ལ་ལུང་བསྟན་པར་མཛད་དོ། །དེས་ན་རོ་སྙོམས་སྐོར་དྲུག་རྣམས་ཀྱང་སྒྲུབ་བརྒྱུད་སྙན་བརྒྱུད་ཆད་པར་སྨྲའམ། དེ་སོགས་གཞན་ཡང་ཤིན་ཏུ་མང་ཡང་མ་སྤྲོས་སོ། །དེས་ན་རིག་འཛིན་གྱི་ས་ལ་གནས་པའི་གྲུབ་ཆེན་སངས་རྒྱས་གཉིས་པ་ལྟ་བུའི་པདྨ་འབྱུང་གནས་ཀྱིས་དུས་གསུམ་ཆགས་ཐོགས་མེད་པར་མཁྱེན་ནས། ཆོས་དང་གདམས་པ་ཚོང་འདུས་ཀྱི་འོ་མ་ལྟར་འཆལ་གྱིས་དོགས་པ་དང༌། གནས་དུས་ཁ་ཅིག་གི་ཚེ་སྟོན་པའི་སྣོད་མེད་པ་དང༌།
ཕྱི་མའི་དུས་ཁ་ཅིག་གི་ཚེ་བསྟན་དུ་རུང་བར་དགོངས་པ་དང༌། །ཁ་ཅིག་ཆོས་ལ་གསར་ངས་ཆེ་བའི་ཕྱིར་དུ་ཕྱིས་གསར་དུ་བྱུང་བ་ན་ནན་ཏན་གྱིས་འཇུག་པ་དག་འབྱུང་བས་དེ་ལྟ་བུ་རྣམས་ལ་དགོངས་ནས་གཏེར་དུ་སྦས་ཤིང༌། དེ་ཉིད་འདོན་པའི་གང་ཟག་ཀྱང་ཕྱི་རབས་ཀྱི་སྐྱེས་བུ་དམ་པ་ལས་དང་སྐལ་བར་ལྡན་པའི་མངའ་བདག་ལྟ་བུ་རྣམས་ལུང་བསྟན་སྨོན་ལམ་དང་བཅས་ཏེ་སྦས་པ་རྣམས། ཕྱིས་ལས་དང་སྐལ་བར་ལྡན་པའི་གང་ཟག་དེ་ལྟ་བུས་གཏེར་ནས་ཕྱུང་སྟེ། འགྲོ་དོན་མཛད་པས་བསྟན་པ་ཡུན་རིང་དུ་གནས་ཤིང་རྒྱུན་མི་འཆད་པའོ། །ཁྱད་པར་དུ་མངའ་བདག་ཉང་དང་གུ་རུ་ཆོས་དབང་ལས་འབྲེལ་རྩལ་ལྟ་བུ་རྣམས་ནི་སྐྱེ་བ་མང་པོར་པདྨ་འབྱུང་གནས་ཀྱིས་རྗེས་སུ་བཟུང་སྟེ། ལས་དང་སྐལ་བ་ལྡན་པའི་རིགས་ལྡན་ཡིན་ཞིང༌། སྐྱེ་བ་འདི་ལ་ཡང༌། སློབ་དཔོན་པདྨ་འབྱུང་གནས་དང་ཡང་ཡང་དངོས་དང་རྨི་ལམ་འོད་གསལ་གྱི་ངང་ནས་མཇལ་ཞིང་དབང་བཀའ་ལུང་རྗེས་གནང་དང་བཅས་པ་ལེགས་པར་ནོད་པ་ཡིན་པས་སྒྲུབ་བརྒྱུད་དང་སྙན་བརྒྱུད་ཆད་སོགས་ཀྱི་སྐུར་པ་གདབ་པ་ནི་རང་གི་བླ་མ་དང་ཆོས་ལ་ཡང་སྐུར་པ་འདེབས་པའི་སྔ་ལྟས་ཡིན་ནོ། །ཆུ་ཀླུང་རོལ་བའི་མདོ་ལས་ཀྱང༌། ང་ཡི་བསྟན་པ་ཆོས་ཀྱི་གཞུང༌། །ཐུགས་ནས་ཐུགས་ཀྱི་གཏེར་དུ་སྦ། །ཡང་ན་
ས་ཡི་སྙིང་པོར་བྱ། །ཅི་ཕྱིར་མུ་སྟེགས་ཅན་མགོ་རྒོད། །ངེས་དོན་དཀྲུགས་པར་གྱུར་ཏ་རེ། །དེ་ཕྱིར་ཆུ་ཀླུང་རྒྱུན་མི་གཅོད། །ཅེས་པ་དང༌། དཔལ་མཆོག་ལས། རྒྱུད་དང་རྒྱུད་ཀྱི་རྒྱལ་པོ་གང༌། །ཕྱག་ན་རྡོ་རྗེ་ཁྱོད་ཉིད་ཀྱིས། །གཏེར་ནས་གཏེར་དུ་ཕྱུང་སྟེ་སྩལ། །ཅེས་གསུངས་པས་ས་རྡོ་ལས་ཁུངས་བྱུང་ཞེས་མ་བརྗོད་ཅིག ། ༢ རྫོགས་ཆེན་ལའང་ཐོག་མར་སྐྱབས་འགྲོ་སེམས་བསྐྱེད། བར་དུ་སྟོང་ཉིད་སྙིང་རྗེའི་ཉམས་ལེན། ཐ་མར་སངས་རྒྱས་སུ་བསྔོ་བ་སྨོན་ལམ་གྱི་རྒྱས་གདབ་པ་ཡོད་པས་ཆོས་ཡང་དག་ཏུ་མི་འགྲུབ་ཅེས་ཟེར་ཞིང་སངས་རྒྱས་པའི་རྒྱུད་དུ་བཅོས་པས་དེ་རྣམས་ལྟ་ལོས་བྲི་ཟེར་རོ། །༈ དེ་ལྟར་ན་གསར་མའི་རྒྱུད་རྣམས་ཀྱང་དེ་ལྟར་དུ་བཅོས་པར་འགྲོ་སྟེ། གཞི་ལམ་འབྲས་གསུམ་གྱི་རྒྱུད་དོན་བཅར་ཕོག་ཏུ་བཤད་པ་ལས། ཐོག་མར་སྐྱབས་འགྲོ་ནས་བརྩམས་བཏོན་ཆོག་མེད་དེ་བཤད་པའི་དབྱིངས་ནས་གཞལ་ན་རྫོགས་ཆེན་ལའང་ཚུལ་ཁྲིམས་ལ་སོགས་ཕ་རོལ་ཕྱིན་ལམ་སྤྱོད་པ་རྒྱ་མཚོའི་གཞིར་གྱུར་པ་ཞེས་བཤད་དོ། །གལ་ཏེ་མེད་ནའང༌། ༈ དེ་ནི་ཤིན་ཏུ་ནས་འགྲུབ་སྟེ། དུས་འཁོར་དུ། ཡོན་ཏན་གྱི་ཆོས་དང་ལྡན་པ་ཕྱི་རོལ་བའི་ནང་དུ་སྣང་ཡང་བདག་ཅག་གིས་བསྙེན་བཀུར་བར་བྱའོ། །ཞེས་གསུངས་ཤིང༌། ཡུལ་གྱི་སྒྲ་ཡིས་དོན་ཤེས་ན། །བསྟན་བཅོས་སྒྲ་ཡིས་ཅི་ཞིག་བྱ། །
ཞེས་གསུངས་པས། དོན་ལ་རྟོན་ན་ཐོག་མཐའ་བར་གསུམ་དུ་དགེ་བའི་ཆོས་དེ་ལས་ལྷག་པ་རྒྱུད་རྣམས་དག་ཏུ་འདོད་པ་ལ་ཡང་ཅང་ཡོད་དམ། ༢ རྫོགས་ཆེན་ལ་ཆོས་ལོག་ཡིན་པར་ལུང་བསྟན་མེད་ཟེར་གི་འདུག་སྟེ། དེ་མེད་པས་རྣམ་དག་ཏུ་འགྲུབ་ན། བོན་གྱི་མདོ་རྒྱུད་འདི་ཙམ་ཞིག་གྲགས་པ་ལའང་ལུང་བསྟན་མི་རྙེད། སྤྱིར་རང་རེས་མ་རྙེད་པས་མེད་པར་ཡང་མི་འགྲུབ། ཟེར་མོད། དེ་ལ་མ་རྙེད་པས་མེད་པར་མི་འགྲུབ་ཟེར་བ་ནི་ཤིན་ཏུ་ནས་མད་དེ། དེའི་རྒྱུ་མཚན་མེད་ཏིང་ངེ་འཛིན་མཆོག་དམ་པ་ནས། མ་འོངས་པ་ན་འབྱུང་བའི་ཆོས་མིན་གྱི་བྱ་བ་རྣམས་ལུང་བསྟན་པའི་སྐབས་སུ་མ་འོངས་བའི་དུས་ན་ངའི་དགེ་སློང་ཐམས་ཅད་ཀྱིས་བྱ་བ་མ་ཡིན་པ། བོན་དང༌། གླུ་སྒྲུང་དང༌། རྒྱན་པོ་དང༌། ཤོ་དང་ཁ་ན་མ་ཐོ་བ་ཐམས་ཅད་ལ་བརྩོན་པས་ཉམས་ཏེ་ཅེས་སོགས་དང༌། ཇོ་བོའི་བླ་མ་དྷརྨ་རཀྵི་ཏས་ཀྱང༌། དམ་ཆོས་གཙུག་ལག་ཞུས་ནས་མོ་བོན་སྐྱོང༌། ཞེས་སོགས་སྣང་བས། ཐམས་ཅད་མཁྱེན་པ་ཤེས་བྱ་ཐམས་ཅད་གཟིགས་པ་ཡིན་ན་ནི། རྫོགས་ཆེན་ཆོས་ལོག་ཡིན་པ་ཡང་ལུང་བསྟན་པར་འཐད་དོ། །༢ གལ་ཏེ་མེད་དུ་ཆུག་ཀྱང༌། བོད་ལྟ་བུ་ཡུལ་རེ་རེའི་ཆོས་ལོག་རེ་རེ་ནས་ལུང་སྟོན་གྱིས་ག་ན་ལང༌། ཆོས་ལ་བརྟག་པར་གསུངས་པ་འདིས་ཆོག །ཟེར་མོད། ༈ འོ་ན་བརྟག་ལུགས་དེ་ཕྲ་མ་
སྔ་བཙན་ལ་ཡིད་རྟོན་པ་ཁོ་ནས་བྱེད་དམ་རྒྱལ་བའི་བཀའ་ལ་དཔང་པོ་བཙུགས་ནས་ཚིག་དོན་གྱི་དབྱིངས་གཞལ་བས་བྱེད། དང་པོ་ལྟར་ན་ཕྱི་རོལ་པས་ནང་པ་ཆོས་ལོག་ཏུ་བལྟ། ཉན་ཐོས་པས་ཐེག་ཆེན་ཆོས་ལོག །མངའ་བདག་ལྷ་བླ་མ་ལྟ་བུས་ཀྱང༌། འདུལ་བ་བདེན་ན་སྔགས་ཆོས་ལོག །སྔགས་བདེན་ན་ཅིག་ཤོས་ཆོས་ལོག་འདྲ་གསུངས་ཤིང་ཕྱག་ཆེན་ཐིག་ལེའི་རྒྱུད་སོགས་བརྫུན་མར་འཛིན་པས་འབྱམ་ཡིག་དང༌། ཕྱོགས་འཛིན་གྱི་ཁ་སྨྲས་མ་ཐེབས་པའི་ཆོས་ལུགས་བོད་དུ་མེད་དོ། །གཉིས་པ་ལྟར་ན་མདོ་རྒྱུད་གང་ནས་ཀྱང་རྫོགས་པ་ཆེན་པོའི་མིང་ཙམ་མ་བསྟན་ཟེར་བ་འཕགས་པ་འཇིག་རྟེན་འཛིན་གྱིས་དྲིས་པ་ལས། ནམ་མཁའ་ལྟར་བསམ་གྱིས་མི་ཁྱབ་པའི་ཆོས་སྟོན་པ་ནི་ཤིན་ཏུ་ཆེན་པོའོ། །ཞེས་པས་བསམ་གྱིས་མི་ཁྱབ་པ་ནི་རྫོགས་ཆེན་གྱི་དོན་ཡིན་ལ་ཤིན་ཏུ་ནི་ཨ་ཏི་དང་ཆེན་པོ་ནི་དེའི་གོང་ན་གཞན་མེད་པར་སྟོན་པའི་དགོངས་པ་འདི་ལ་ཅེར་ལོང་དུ་སོང་བ་ཡིན། ༈ དེ་ལ་སངས་རྒྱས་ཐམས་ཅད་མཁྱེན་པ་ཤེས་བྱ་ཐམས་ཅད་ལ་ཆགས་ཐོགས་མེད་པར་མཁྱེན་པ་ཡིན་ན་ནི་བོད་ལྟ་བུའི་ཡུལ་རེ་རེའི་ཆོས་ལོག་ལུང་སྟོན་གྱིས་མི་ལང་བའི་དཀའ་ལས་སངས་རྒྱས་ལ་ཡོད་པ་དེ་ཡང་ཆེར་མ་འོས། བོད་ལྟ་བུའི་ཡུལ་རེ་རེའི་ཆོས་ལོག་ལུང་བསྟན་པས་ཆོག་མོད། ཡུལ་
ཐམས་ཅད་དུ་ཆོས་ལོག་རྫོགས་ཆེན་ལྟ་བུ་ཨེ་ཅི་ཡོད། དེ་ཐམས་ཅད་དུ་ཡོད་ན་ནི་བོད་དུ་ཆོས་ལོག་རྫོགས་ཆེན་བརྩམས་པའི་ངེས་པ་འདི་འཐད་དམ་སོམས་ཤིག །འཇིག་རྟེན་གྱི་ཁམས་ཐམས་ཅད་དུ་ཆོས་ལོག་ཡོད་ཀྱང་སངས་རྒྱས་སྤོབས་པ་ཟད་ན་མ་གཏོགས་པ་དེ་ཐམས་ཅད་ལུང་བསྟན་པའང་ཆོགས་ཅི་ཡོད། དེས་ན་མཁས་མཁས་འདྲ་བའི་ཚིག་འདི་རྣམས་ཀྱང་བླུན་ཚིག་ཙམ་དུ་ཟད་དོ། །ཞེས་བརྗོད་ན་ཡང་ཅི་མ་རུང༌། ༢ ཅིས་ཀྱང་ཆོས་ལོག་ཡིན་པ་ལ་ལུང་བསྟན་དགོས་ན། རྫོགས་ཆེན་དགག་པའི་འབྱམ་ཡིག་འདི་རྙེད་ཅིག་འཇིག་རྟེན་དུ་གྲགས་ཏེ་དེ་ལ་ལུང་བསྟན་མི་སྣང་བས་ཆོས་ཡང་དག་ཏུ་གྲུབ་མོད། ཅེས་ཟེར་རོ། །འབྱམ་ཡིག་ཏུ་དགག་པ་ཐམས་ཅད་དོན་གནས་ཡིན་ཞིང་བདེན་ན། འབྱམ་ཡིག་ཁ་ཅིག་ཏུ་གསར་མའི་རྒྱུད་གཞུང་ཆེས་མང་བ་དགག་པ་རྣམས་ཕྱིས་ཀྱི་མཁས་གྲུབ་མང་པོས་ཚད་མར་བྱས་མོད། ཅིས་ཀྱང་འབྱམ་ཡིག་རྣམས་བདེན་ན། དུས་འཁོར་རྒྱུད་འགྲེལ་ལ་སོགས་སེམས་འགྲེལ་སྐོར་གསུམ་ཐམས་ཅད་ཁྱོད་ཀྱིས་ཀྱང་ཆོས་མིན་དུ་མཛོད་ཅིག་སྟེ། དེ་རྣམས་ཀྱང་ཁ་ཅིག་གིས་དགག་པའི་ཕྱིར་རོ། །༢ རྫོགས་ཆེན་འདི་ཟབ་མོར་བརྫུས་ནས་སངས་རྒྱས་ཀྱི་བསྟན་པ་དང༌། ཕྱག་རྒྱ་ཆེན་པོའི་ལམ་ལ་བར་དུ་གཅོད་ལོ། །༈ དེ་ལྟ་ན་མདོ་སྡེ་པས་བྱེ་བྲག་སྨྲ་བ་དང༌། ཐལ་འགྱུར་བས་སེམས་ཙམ་པ། སྔགས་ཀྱིས་ཐབས་མདོ་ལམ་ལ་བར་
དུ་གཅོད་པའི་བདུད་ཡིན་པས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་པ་འདི་ཡང་ཕྱིས་ཤིག ། ༈ རྫོགས་ཆེན་གྱིས་ཕྱག་རྒྱ་ཆེན་པོའི་ལམ་བར་དུ་ཨེ་གཅོད་མི་ཤེས་ཏེ། རྫོགས་པ་ཆེན་པོ་སྤངས་ནས་ཆོས་མིན་དུ་སྒྲུབ་ཅིང་སྤངས་པས་ཕྱག་རྒྱ་ཆེན་པོའི་ལམ་ལ་བར་དུ་གཅོད་པར་མ་གྱུར་ཅིག ། ༢ དཔལ་ལྡན་ས་སྐྱ་པའི་ཆོས་བརྒྱུད་རྣམས་ཀྱང་ལམ་འབྲས་བུ་བཅས་པ་ལ་སོགས་པ་ཕྱག་རྒྱ་ཆེན་པོའི་ཁྲིད་རྣམས་ཀྱིས་ཚིམས་པར་མཛད་པ་དང༌། དྭགས་པོ་བཀའ་བརྒྱུད་པ་རྣམས་ཀྱང་གདམས་ངག་ནཱ་རོའི་ཆོས་དྲུག །དམ་ཆོས་ཕྱག་རྒྱ་ཆེན་པོ། ཡི་དམ་འཁོར་ལོ་སྡོམ་པས་ཚིམས་པར་མཛད་པ་དང༌། བཀའ་གདམས་པ་རྣམས་ཀྱང་ཨ་ཏི་ཤའི་ཆོས་ཚུལ་དྲི་མ་མེད་པ་རྣམས་ཀྱིས་ཚིམས་པར་མཛད་པ་དང༌། ཞི་བྱེད་དང་གཅོད་ཡུལ་བ་རྣམས་ཀྱང་དམ་པའི་ཞི་བྱེད་སྔ་ཕྱི་བར་གསུམ་རྣམས་ཀྱིས་ཚིམས་པར་མཛད་པ་དང༌། ཐེག་མཆོག་སྙིང་པོའི་ལམ་ཕྱག་རྒྱ་ཆེན་པོའི་མན་ངག་སངས་རྒྱས་ཉིད་ཀླུ་སྒྲུབ་ཡབ་སྲས་སོགས་ཀྱིས་བསྒྲིགས་པའི་འཁྲིད་རྣལ་འབྱོར་ཡན་ལག་དྲུག །རིམ་ལྔ། གྲུབ་པ་སྡེ་བདུན་སོགས་ཞུས་ཤིང་ཉམས་སུ་ལེན་པ་དང༌། མདོར་ན་རང་གི་བཀའ་བརྒྱུད་གོང་མ་དེ་རྣམས་ཀྱིས་བསྒྲུབས་པའི་ཆོས། སངས་རྒྱས་ཀྱིས་གསུངས། མཁས་གྲུབ་ཀྱིས་མཛད། ལོ་པཎ་གྱིས་བསྒྱུར་ངོ་ཤེས་པ་དེ་ཉམས་སུ་བླང་ན་ཆོག །གལ་ཏེ་གསར་དུ་ཞུ་ཡང་དྲི་མེད་ཀྱི་ཆོས་རྣམ་དག་ཁུངས་བཙུན་པ།
བརྒྱུད་པ་བཟང་བ་ཡིད་ཆེས་པ་མང་པོ་འདུག་པས་རྫོགས་ཆེན་གྱི་རྫུན་ཆོས་ལ་མ་བརྟགས་པར་འཇུག་པ་དེ་ཡེ་མི་འཐད་ཟེར་མོད། ཁྱོད་ཀྱིས་ཚད་མར་ཁས་བླངས་པའི་རང་རང་གི་བཀའ་བརྒྱུད་གོང་མས་བསྒྲུབས་པའི་ཆོས་དཔང་དུ་བྱེད་པ་དེ་རྣམས་ལ་སྐྱོན་བརྒྱབ་པ་དང༌། ཆོས་རྣམ་དག་མིན་པར་ཁ་བརྒྱབ་པ་ཙམ་གྱིས་ཆོས་ལོག་འོང་ན་ནི་ཤིན་ཏུ་ནས་ཀྱང་མང་བ། རྟོག་གེ་བ་ཁ་ཅིག་གིས། སྲིད་པ་མ་མོའི་རྒྱུད་ལ་བརྟེན་ནས་ནི། །ལམ་འབྲས་རྒྱུད་ཀྱི་རྡོ་རྗེའི་ཚིག་རྐང་བྱས། །ཞེས་དང༌། ཁ་ཅིག་གིས་བླ་མ་གོང་མའི་གསུང་སྒྲོས་སྙན་སྙན་རྣམས་བསྡུས་པ་ཞེས་སོགས་ལམ་འབྲས་བཀག་པས། ས་སྐྱ་པ་རྣམས་ཀྱིས་བརྒྱུད་པ་རྣམས་ཀྱང་ཆོས་དེས་ཚིམས་ཀྱང་དགོས་པ་ཅི་ཡོད་པ་ཡིན། དེ་བཞིན་དུ་དྭགས་པོ་བཀའ་བརྒྱུད་པ་རྣམས་ཀྱི་ཕྱག་རྒྱ་ཆེན་པོ་ཡང༌། ས་སྐྱ་པ་སོགས་ཀྱིས་བཀག་པ་མ་ཤེས་སམ། བཀའ་བརྒྱུད་པའི་ཕྱག་ཆེན་ནི་བླ་མེད་ཀྱི་རྒྱུད་ནས་བཤད་པའི་ཕྱག་ཆེན་མིན་ལ། རྣལ་འབྱོར་བཞིའི་རིམ་པ་དང་སྦྱར་བ་ད་ལྟ་འདི་རྣམ་སེམས་ཙམ་རྣམས་བདེན་པའི་ལུགས་ཡིན་པས་དེ་ལ་ཕྱག་ཆེན་དུ་བཏགས་ནས་ཉམས་སུ་ལེན་པ་ནི་ཆེས་ཆེར་འཁྲུལ་པའོ། །གསུངས་ཤིང༌། ཕྱག་རྒྱ་ཆེན་པོ་ཆིག་ཆོད་ལ། །ས་ལམ་རྩི་བ་རྨོངས་པ་འཁྲུལ། །ཞེས་སོགས་ཚིག་རྣམས་སྨྲ་བ་ནི། །བདུད་ཚིག་ཡིན་པས་རྣ་བ་
དགབ། །ཅེས་སོགས་མཐའ་ཡས་ཤིང༌། ས་སྐྱ་པཎ་ཆེན་ལ། ནམ་མཁའ་འབུམ་གྱིས་ཞུས་པར། ཚིག་འདི་རྣམས་ཁྱེད་ཀྱིས་གཞན་ལ་མ་འཕེལ་བ་གྱིས། གླེན་གཏམ་དུ་སོང་ན། འབྲི་སྟག་དང་ཕྱག་རྒྱ་བའི་ཆོས་ལུགས་འདི། རྒྱུད་སྡེ་བཞི། སྡེ་སྣོད་གསུམ་གང་དང་ཡང་མི་མཐུན་པར་སྣང་བ་ཡང་དག་པའི་ལམ་མ་ལགས་སྙམ། གསུངས་མོད། དེས་ན་དེས་ཚིམས་པར་བྱས་པ་ལ་ཡང་དགོས་པ་ཅི་ཡོད། གཞན་ཡང་མང་སྟེ་དེ་ཙམ་གྱིས་ཆོག་མོད། བཀའ་གདམས་པའི་ཆོས་ཚུལ་རྣམས་ཀྱང་ཕལ་ཆེར་ཞིག་ས་པཎ་གྱིས་དགག་པ་སྡོམ་གསུམ་རབ་དབྱེར་གསལ་མོད་ཅིང་དམ་པའི་ཞལ་ནས་ཀྱང་བཀའ་གདམས་པ་ལ་བཀྱོན་པ་ཤིན་ཏུ་མང་བདོ་ཞིང༌། རྗེ་བཙུན་མི་ལས་ཀྱང་དྭགས་པོ་ལྷ་རྗེས་བཀའ་གདམས་པའི་རྣམ་ཐར་བསྐྱངས་པ་རྣམས་ལ་བཀྱོན་པས། དེས་ཚིམས་ཀྱང་ཡོན་ཏན་ཅི་ཡོད་པ་ཡིན། དམ་པ་སངས་རྒྱས་ཀྱི་ཞི་བྱེད་དང་གཅོད་ཡུལ་རྣམས་ཀྱང་ཆག་ལོ་སོགས་ཀྱིས་བཀག་སྟེ། ཆུ་ཀླུང་རོལ་པའི་སྐད་དོད་མི་ཤེས་པའི་ཚུལ་དང༌། ཨཱ་ལི་ཀཱ་ལིའི་དབང་བསྐུར་རྣམས་ལ་ལྷ་མེད་པའི་དབང་དེ་རྒྱུད་སྡེའི་དོན་དང་འགལ་བ་ཡིན་ནོ། །ཞེས་སོགས་དང༌། ཞི་བྱེད་ཐམས་ཅད་ཇོ་སྲས་རྟེན་འབྲེལ་དང༌། ཞིག་པོ་ཉི་སེང་གིས་བྱས་ཤིང་ཕལ་ཆེར་ཆོས་
ལོག་ཡིན་ཞེས་གསུངས་ཤིང༌། སྒྲོན་གསལ་ཆག་འགྱུར་གྱི་གཤམ་དུ་ཡང༌། ཁ་ཅིག་རྙིང་མ་གཏེར་མ་ཞི་བྱེད་དང༌། །ཞེས་ལོག་པ་ཡིན་གསུངས་མོད། གཅོད་ཡུལ་ལ་ཡང་རྟོག་སོགས་ཁ་ཅིག་གིས། མ་ཇོ་སྨྱོན་མའི་རྒྱོ་ཆོས་ཡིན་ཞེས་དང༌། གཅོད་དང་ཞི་བྱེད་ཐམས་ཅད་རྣམས། །རྒྱུད་སྡེ་རྣམས་ལས་བཤད་རེ་ཀན། །ཞེས་གསུངས་ནས་བཀག་པས་དེ་རྣམས་ཀྱིས་ཚིམས་པར་བྱས་པ་ཡང་དགོས་པ་ཅི་མཐོང་བ་ལགས། རྣལ་འབྱོར་ཡན་ལག་དྲུག་པ་ཡང༌། མཁས་པ་ཁ་ཅིག་གིས། རྩ་བའི་རྒྱུད་ལ་ཨེ་ཝཾ་གཉིས་ཡིག་མེད། །བསྡུས་པའི་རྒྱུད་ལ་འགལ་བ་དུ་མ་མཐོང༌། །གང་ནས་བླངས་པའི་ཁུངས་ཀྱང་མི་སྣང་ན། །འཕྱོན་མའི་བུ་བཞིན་འདི་ལ་སུ་ཡིད་རྟོན། །ཞེས་དང༌། ཁྱེད་ཀྱིས་འདི་ལ་ལེན་བྱེད་ཚད་མ་མེད། །ཆེན་པོ་རྣམས་ལ་ཚད་མར་མ་གྲགས་ཕྱིར། །དུས་ཞབས་ལ་སོགས་ཚད་མའི་སྐྱེས་བུ་མིན། །ཞེས་སོགས་དང༌། སྦྱོར་བ་ཡན་ལག་དྲུག་གི་ཁྲིད་རིམ་ཡང༌། །གསང་བ་འདུས་པའི་རྒྱུད་དང་འགལ་བར་སྣང༌། །དེ་དོན་ཉམས་སུ་བླངས་པས་སུ་ཞིག་གྲོལ། །ཅེས་སོགས་གསུངས་ནས། དུས་འཁོར་ལ་སོགས་སེམས་འགྲེལ་སྐོར་གསུམ་སྦྱོར་དྲུག་དང་བཅས་པ་བཀག་པས། དེས་ཚིམས་པར་བྱས་པ་ལ་ཡང་
དགོས་པ་ཅི་མཐོང་བ་ཡིན། གཞན་ཡང་ཁ་ཅིག་གིས། ཞི་ཕྱག་རྫོགས་གསུམ་རྫུན་དང་བཞི་བསྲེས་ཀྱིས། །ལ་སྟོད་དམར་པོས་ཐུགས་ཀྱི་ཉིང་ཁུ་བྱས། །ཞེས་གསུངས་ནས་ཐུགས་རྗེ་ཆེན་པོ་དམར་པོ་ལུགས་བཀག །གཞན་ཡང་མར་པའི་བདེ་མཆོག་སྙན་བརྒྱུད་སོགས་ཀྱང་བཀག་ཅིང༌། ཉ་ཀུན་དགའ་སོགས་ཀྱིས་དྭགས་པོའི་ཕྱག་ཆེན་སེམས་ཁྲིད་དང༌། མཚལ་བའི་གཏུམ་མོ་རྣམས་དང༌། གཞན་ཡང་གདམས་པ་ཕལ་མོ་ཆེ་ཐམས་ཅད་བཀག་པས་བོད་ཀྱི་གདམས་པ་རྣམས་ཆོས་ལོག་ཏུ་མ་གྱུར་པ་བརྒྱ་ལམ་ན་རེས་འགའ་སྲིད་ཙམ་མོ། །གཞན་ཡང་ར་ལི་ཉེར་བཞི་པོ་བཀག་པའི་ཤུགས་ལས་ས་སྐྱ་པའི་བརྟག་གཉིས་ཀྱི་བཤད་སྲོལ་ཡང་ཁེགས་ཏེ། ས་སྐྱ་པས་ར་ལིའི་ནམ་མཁའ་མཉམ་རྒྱུད་ནས་རྒྱུད་ཀྱི་བཤད་ཐབས་ཚུལ་བཞི་སོགས་དྲངས་ནས་དཔང་དུ་བྱེད་པའི་ཕྱིར་རོ། །དེས་ན་ཁྱོད་ཀྱིས་ལྟར་ན་བཀའ་བརྒྱུད་གོང་མ་དེ་རྣམས་ཀྱི་ཆོས་ལུགས་ཐམས་ཅད་ཀྱང་ཆོས་ལོག་ཡིན་ཏེ། དེ་རྣམས་གང་ལ་ཡང་སྐྱོན་མ་བརྒྱབ་པ་མི་སྣང་བའི་ཕྱིར་རོ། །གསར་དུ་ཞུས་ཀྱང་དེ་རྣམས་ལྷག་པའི་སྐྱོན་མེད་དེ། བོད་གངས་ཅན་གྱི་ཁྲོད་ན་ནི་རྙེད་པར་ཅི་ལྟར་འགྱུར་ཏེ་མི་འགྱུར་རོ། །༢ བོད་དུ་ཆོས་ཡང་དག་ཡིན་པར་ཡིད་ཆེས་པ་ལ། སངས་རྒྱས་ཀྱིས་གསུངས་ངོ་ཤེས་པ་ཤམ་བྷ་ལ།
ཨོ་རྒྱན། རྒྱ་གར་ལ་སོགས་པའི་མཁས་གྲུབ་སངས་རྒྱས་གྱི་ལུང་བསྟན་ཐོབ་པས་མཛད་ངོ་ཤེས་པ། ལོ་པཎ་གྱིས་བསྒྱུར་ངོ་ཤེས་པ། ཚིག་དོན་ལ་མཁས་པས་དཔྱད་བཟོད་པ་ཞིག་དགོས། ཟེར་མོད། དེ་ལ་ཁྱབ་པ་ཅུང་ཟད་ཀྱང་མེད་དོ། །འོ་ན་དུས་འཁོར་སོགས་སེམས་འགྲེལ་རྩ་འགྲེལ་རྣམས་སངས་རྒྱས་ཀྱིས་མ་གསུངས་པར་ངོ་ཤེས་སམ། ཤམ་བྷ་ལ་ལ་སོགས་པའི་མཁས་གྲུབ་སངས་རྒྱས་ཀྱིས་ལུང་བསྟན་ཐོབ་པས་མཛད་ངོ་ཤེས་པ་མ་ཡིན་ནམ། ལོ་པཎ་དམ་པས་བསྒྱུར་ངོ་ཤེས་པ་མ་ཡིན་ནམ། ཚིག་དོན་ལ་མཁས་པས་དཔྱད་མི་བཟོད་པ་ཞིག་བྱུང་བ་ཡིན་ནམ་སྟེ། བཀའ་མིན་དང་ཆོས་མིན་དུ་བསྒྲུབས་པ་གསན་པར་མ་གྱུར་ཏམ། ༢ ཁ་ཅིག་བླུན་དད་ཀྱིས་ཆོག་ཟེར་བ་འདུག་སྟེ། རྒྱུ་འབྲས་ཀྱི་རྟེན་འབྲེལ་ལོག་ན་བླུན་དད་འབའ་ཞིག་གིས་འགྲུབ་པ་མི་སྲིད། ཅེས་ཟེར་མོད། རྒྱུ་འབྲས་ཀྱི་རྟེན་འབྲེལ་མ་ལོག་ན་བླུན་དད་དུ་ཅི་ལྟར་འགྲོ་སྟེ། གཤིན་རྗེ་གཤེད་ཀྱི་རྒྱུད་དུ། ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་སྤྱོད་པའི་རྟོག་གེ་བ། །དེ་ལ་སྦྱོར་བའི་དངོས་གྲུབ་རིང༌། །མན་ངག་དམ་པ་བསྟན་བྱས་ཀྱང༌། །སློབ་མ་ཡིད་གཉིས་ཡོད་གྱུར་ན། །དེ་ལ་དངོས་གྲུབ་རིང་བར་བཤད། །བླ་མས་
མན་ངག་སྦས་བྱས་ཀྱང༌། །བླ་མ་དམ་པའི་མན་ངག་ཅེས། །གཅེས་པར་བྱས་ན་འགྲུབ་པར་ངེས། །ཞེས་གསུངས་པས། རྒྱུ་འབྲས་རྟེན་འབྲེལ་མ་ཤེས་ཀྱང་བླུན་དད་བརྟན་ན་འགྲུབ་པར་གསུངས་མོད། སྤོ་ཏོ་བའི་དཔེ་ཆོས་ཀྱི་གཏམ་རྒྱུད་ལས་ཀྱང༌། བླ་མ་ཅིག་དང་བྲེལ་བའི་དུས་སུ་སློབ་མ་ཅིག་གིས་གདམས་པ་ཞུས་པས་ཕྱག་སྐྱོག་པ་ཅིག་མཛད་ནས། མ་ར་ན་ཛ་ཧ་གསུངས་པས། སློབ་མས་ཕྱག་སྐྱོག་མཛད་པ་དེ་ཕྱག་རྒྱ། མ་ར་ན་ཛ་ཧ་ཞེས་པ་དེ་སྔགས་ཡིན་སྙམ་ནས་བསྒྲུབས་པས་ཕྲིན་ལས་བཞི་གྲུབ་པ་ཞིག་བྱུང་བར་བཤད་པས། བླུན་དད་བྱེད་པ་རྣམས་ལ་ཆོས་སྤོང་གི་ལས་དང༌། ཆོས་ལ་དབང་ཟ་བའི་ཉེས་པ་དེས་མི་ཕོག་པར་སྣང་བས་ཤིན་ཏུ་ནས་ཀྱང་ལེགས་སོ། །བློ་གྲོས་ཅན་དུ་འདོད་པ་ཁ་ཅིག་ནི། བློ་ཐེ་ཚོམ་གྱི་སྒྲོག་ཏུ་བཅུག་ནས་ཆོས་དང་གང་ཟག་དམ་པ་རྣམས་ལ་སྤུ་རིས་འབྱེད་པ་འདིས། ཡག་སྟེ་ཡག་ས་ན་བསྟན་པ་ལ་ཕན་ཞིང༌། ཉེས་ཏེ་ཉེས་ན་ངན་སོང་གི་རྒྱུ་སྒྲུབ་པར་མ་གྱུར་ཅིག །སྤྱིར་འདི་དག་ཕལ་ཆེར་ཞིག་ནི་གང་ཟག་ཐམས་ཅད་ཕན་ཚུན་སྡང་ཞུགས་ཀྱི་དབང་གིས་ཆོས་ལ་ཡང་སྨོད་པ་དེ་བྱུང་བ་ཡིན་ཞིང༌། ཆོས་ལ་སྨོད་ཅིང་སྐྱོན་བརྗོད་པས་ཆོས་སྤོང་གི་ལས་ཆེན་པོ་རྣམས་བསགས་པར་འགྱུར་རོ། །འཕགས་པ་རྣམ་པར་འཐག་པ་ལས། འཇམ་དཔལ་དམ་པའི་ཆོས་སྤོང་བའི་ལས་ཀྱི་སྒྲིབ་པ་ནི་འདི་འདྲའོ། །འཇམ་དཔལ་གང་
ལ་ལ་དེ་བཞིན་གཤེགས་པས་གསུངས་པའི་ཆོས་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་ཤེས་ན་དམ་པའི་ཆོས་སྤོང་བའོ། །དམ་པའི་ཆོས་སྤངས་བས་དེ་བཞིན་གཤེགས་པ་ལ་སྐུར་པ་འདེབས་པ་ཡིན་ནོ། །དགེ་འདུན་ལ་ངན་དུ་བརྗོད་པ་ཡིན་ནོ། །འདི་ནི་རིགས་པའོ། །འདི་ནི་མི་རིགས་པའོ། །ཞེས་ཟེར་ན་དམ་པའི་ཆོས་སྤོང་བའོ། །ཞེས་དང༌། ཆོས་ནི་ཆོས་མ་ཡིན་པར་སྟོན་པའོ། །ཞེས་ཟེར་ན། ཆོས་སྤོང་བ་ཡིན་ནོ། །ཞེས་དང༌། སྤོབས་པས་གོ་བ་མི་བྱེད་དོ་ཟེར་ན། ཆོས་སྤོང་བ་ཡིན་ནོ། །ཆོས་ཀྱི་སྣང་བ་ལེགས་པར་མ་བཤད་དོ། །ཟེར་ན་ཆོས་སྤོང་བ་ཡིན་ནོ། །ཁོང་དུ་མ་ཆུད་པས་ཚིག་ཏུ་འགལ་བ་བྱས་སོ་ཟེར་ན་ཆོས་སྤོང་བ་ཡིན་ནོ། །ཡི་གེའི་མིང་ལ་དེ་བཞིན་གཤེགས་པའི་བཀའ་ལ་འཇུག་གོ་ཟེར་ན་ཆོས་སྤོང་བ་ཡིན་ནོ། །མདོ་སྡེ་དང་མདོ་སྡེར་འགལ་བར་བྱས་སོ་ཟེར་ན་ཆོས་སྤོང་བ་ཡིན་ནོ། །ཚིགས་སུ་བཅད་པ་དང་ཚིགས་སུ་བཅད་པ་འགལ་བ་བྱས་སོ་ཞེས་ཟེར་ན་ཆོས་སྤོང་བ་ཡིན་ནོ། །འདི་ནི་ལེགས་པར་གསུངས་པ་དོན་ལ་མོས་ཤིང་ལ་ལ་མ་མོས་སོ་ཞེས་ཟེར་ན་ཆོས་སྤོང་པ་ཡིན་ནོ། །ཞེས་དང༌། དཀྲུག་མ་བྱེད་ན་ཆོས་སྤོང་བ་ཡིན་ནོ། །ཀུན་ཏུ་རྟོག་པས་སྨྲ་ན་ཆོས་སྤོང་བ་ཡིན་ནོ། །འདི་ལ་དཔྱད་འདི་ལ་མི་དཔྱད་ཟེར་ན་ཆོས་སྤོང་བ་ཡིན། འདི་ནི་ལེགས་པར་གསུངས་
པ། འདི་ནི་ལེགས་པར་གསུངས་པ་མ་ཡིན་ནོ་ཞེས་ཟེར་ན་ཆོས་སྤོང་བ་ཡིན་ནོ། །ཞེས་སོགས་དང༌། རྒྱུད་བླ་མར་ཡང༌། ཉོན་མོངས་རྨོངས་བདག་རྣམས་ཀྱིས་འཕགས་པར་སྐུར་པ་དང༌། །དེས་གསུངས་ཆོས་ལ་བརྙས་གང་དེ་ཀུན་ཞེན་ལྟས་བྱས། །དེས་ན་ཞེན་ལྟའི་དྲི་ཅན་དེ་ལ་བློ་མི་སྦྱར། གོས་གཙང་ཚོན་གྱིས་རྣམ་བསྒྱུར་སྣུམ་གྱིས་གོས་པ་མིན། །བློ་དམན་ཕྱིར་དང་དཀར་པོའི་ཆོས་བྲལ་ལོག་པའི་ང་རྒྱལ་ལ་བརྟེན་ཕྱིར། །དམ་ཆོས་སྤངས་པའི་སྒྲིབ་པ་འདག་ཕྱིར་དྲང་དོན་དེ་ཉིད་ངོས་འཛིན་ཕྱིར། །རྙེད་ལ་བརྐམ་ཕྱིར་ལྟ་བའི་དབང་ཕྱིར་ཆོས་སུན་འབྱིན་པ་བསྟེན་པའི་ཕྱིར། །ཆོས་འཛིན་བསྲིང་ཕྱིར་མོས་པ་དམན་ཕྱིར་དགྲ་བཅོམ་རྣམས་ཀྱིས་ཆོས་སྤོང་བྱེད། །ཅེས་གསུངས་པས། སྔགས་ཀྱི་ཚུལ་ཟབ་མོ་དགོངས་པ་དང་དགོངས་པའི་ཚིག་དོན་མ་རྟོགས་པར་སྒྲ་ཇི་བཞིན་པར་བཟུང་ནས་སངས་རྒྱས་ཀྱི་བཀའ་མ་ཡིན་ནོ། །ཞེས་སྐུར་བ་འདེབས་པས་ནི་རང་ཉིད་ཉམས་པར་བྱེད་དེ། རྣམ་སྣང་མངོན་བྱང་གི་རྒྱུད་ཕྱི་མ་ལས། བདག་གི་སེམས་ཀྱི་གནས་གཏན་ལ་མ་ཕེབས་པར་འཁྲུལ་ནས་འདི་སྐད་དུ། འདི་ནི་སངས་རྒྱས་ཀྱིས་གསུངས་པ་མ་ཡིན་གྱིས། འདི་དག་ནི་རང་བཟོ་ཅན་གྱིས་བྱས་པ་ཡིན་ནོ། །ཞེས་ཟེར་བ་དག་འབྱུང་བར་འགྱུར་རོ། །གསང་བའི་བདག་པོ་མི་བླུན་པོ་དེ་དག་ནི་འགྲོ་བ་གཉིས་སུ་
འགྲོ་བར་རིག་པར་བྱ་སྟེ། གཉིས་གང་ཞེ་ན་འདི་ལྟ་སྟེ། སེམས་ཅན་དམྱལ་བ་དང༌། དུད་འགྲོའོ། །ཞེས་དང་འཇམ་དཔལ་རྩལ་རྒྱུད་ལས་ཀྱང༌། གང་ཞིག་ཆོས་མཆོག་གཙོ་བོ་འདི། །རྒྱལ་བས་མཆོད་པའི་ཆོས་ཀྱི་མཛོད། །ས་སྟེང་མི་ཡིས་སྤོང་བྱེད་པ། །དེ་ནི་མནར་མེད་དམྱལ་བར་འགྲོ། །ཞེས་དང༌། བདེ་མཆོག་ཉུང་ངུའི་རྒྱུད་ལས་ཀྱང༌། མོས་པ་དུ་མའི་སེམས་ཅན་ལ། །སྤྱོད་པ་སྣ་ཚོགས་སྟོན་མཛད་དེ། །སྣ་ཚོགས་ཚུལ་གྱིས་གདུལ་བྱ་ལ། །ཐབས་ནི་སྣ་ཚོགས་སྟོན་པ་ཡིན། །ཟབ་མོའི་ཆོས་ནི་སྟོན་པ་ལ། །གལ་ཏེ་མོས་པར་མ་གྱུར་ཀྱང༌། །སྨད་པ་དག་ཏུ་མི་བྱ་སྟེ། །ཆོས་ཉིད་བསམ་མི་ཁྱབ་དྲན་བྱ། །ཞེས་གསུངས་ཤིང༌། རྒྱུད་བླ་མར་ཡང༌། ཇི་ལྟར་ཟབ་མོའི་ཆོས་ཉམས་དེ་བཞིན་མཁས་པ་རྣམས་ཀྱིས་མེ་དང་ནི། །མི་བཟད་སྦྲུལ་གདུག་གཤེད་མ་དང་ནི་ཐོག་ལའང་ཤིན་ཏུ་འཇིགས་མི་བྱ། མེ་སྦྲུལ་དགྲ་དང་རྡོ་རྗེའི་མེས་ནི་སྲོག་དང་བྲལ་བ་ཙམ་བྱེད་ཀྱི། །དེ་ལས་མནར་མེད་རྣམས་ཀྱི་འགྲོ་བ་ཤིན་ཏུ་འཇིགས་པར་འགྲོ་མི་འགྱུར། །གང་ཞིག་ཡང་ཡང་སྡིག་གྲོགས་བརྟེན་པས་སངས་རྒྱས་ངན་སེམས་ལྡན་གྱུར་དང༌། །གང་ཞིག་ཕ་མ་དགྲ་བཅོམ་གསོད་དང་མཆོག་ཚོགས་འབྱེད་པའི་མི་དེ་ཡང༌། །ཆོས་ཉིད་ངེས་པར་བསམ་ན་མྱུར་དུ་ཐར་འགྱུར་གྱི། །གང་ཞིག་ཡིད་ནི་ཆོས་
ལ་སྡང་བ་དེ་ལ་ཐར་བ་ག་ལ་ཡོད། །ཅེས་དང༌། ཡུམ་རྒྱས་མར་ཡང༌། ཤེས་རབ་འཆལ་བར་གྱུར་པའི་ལས་བྱས་ཤིང་བསགས་པ་དེ་དག་གིས་ཤེས་ཕྱིན་དང་ཆོས་སྤོང་པར་འགྱུར་ཏེ་དེ་དག་གིས་ཆོས་སྤོང་བས་དུས་གསུམ་གྱི་སངས་རྒྱས་བཅོམ་ལྡན་འདས་རྣམས་ཀྱི་རྣམ་པ་ཐམས་ཅད་མཁྱེན་པ་ཉིད་སྤངས་པར་འགྱུར་ཏེ། རྣམ་མཁྱེན་སྤངས་པས་ཆོས་བརླག་པར་འགྱུར་ཅིང༌། དེའི་ལས་ཀྱིས་ལོ་བྱེ་བ་ཁྲག་ཁྲིག་མང་པོར་སེམས་ཅན་དམྱལ་བར་བསྲེག་པར་འགྱུར་རོ། །དེ་སེམས་ཅན་དམྱལ་བ་དེ་ནས་ཐར་ཡང་ཕྱོགས་བཅུའི་འཇིག་རྟེན་གྱི་ཁམས་བསམ་གྱིས་མི་ཁྱབ་པ་རྣམས་སུ་སྐྱེ་ལ། དམྱལ་བ་དེ་དག་ཞིག་ཀྱང་འཇིག་རྟེན་གྱི་ཁམས་གཞན་གྱི་དམྱལ་བ་རྣམས་སུ་འཕོ་ཞིང་བསྲེག་གོ །དེ་ནས་ཀྱང་བྱོལ་སོང་གི་གནས་སུ་སྐྱེ་ཞིང༌། དེ་དག་གི་ལས་ཟད་ནས་བརྒྱ་ལ་མིར་སྐྱེས་ཀྱང་ཆོས་སྤོང་བའི་ལས་བྱས་པ་དང༌། བསགས་པ་དང༌། བསྒྲུབས་པ་དང༌། ཚང་བ་དང༌། རྫོགས་པའི་རྣམ་སྨིན་གྱིས། མིའི་སྐྱེ་བ་གང་དུ་ཡང༌། དམུས་ལོང་དང༌། ཕྱག་དར་དང༌། གདོལ་པ་དང༌། སྨྱིག་མ་མཁན་གྱི་རིགས་དང༌། ཞར་བ་དང༌། སྣ་དང༌། ལྕེ་དང༌། རྐང་ལག་མེད་པ་དང༌། མཛེ་བཀྲ་ཅན་དང༌། སྒུར་པོ་དང༌། དཀོན་མཆོག་གསུམ་གྱི་སྒྲ་མེད་པར་སྐྱེ་བ་དང༌། ཞེས་དང༌། མཚམས་མེད་ལྔས་
ནི་ཆོས་སྤངས་པར་འགྱུར་བ་འདི་ཡི་གཟུགས་བརྙན་ཙམ་དུ་ཡང་མི་སྤྱོད་དོ། །ཤཱ་རིའི་བུ། ཆོས་སྤོང་བའི་བསམ་པས་འདི་སྐད་དུ། འདི་ལ་ཁྱེད་དང་བདག་ཅག་གིས་བསླབ་པར་མི་བྱ་སྟེ། འདི་ནི་ཆོས་མ་ཡིན་ནོ། །འདུལ་བ་མ་ཡིན་ནོ། །འདི་ནི་སྟོན་པའི་བསྟན་པ་མ་ཡིན་ནོ། །འདི་ནི་དེ་བཞིན་གཤེགས་པས་གསུངས་པ་མ་ཡིན་ནོ། །ཞེས་ཟེར་ཞིང༌། དེ་བདག་ཉིད་ཀྱང་སྤོང་ལ། གཞན་ལ་མོས་པ་མེད་པར་བྱེད་ཅིང༌། བདག་གཞན་གྱི་བསམ་པ་ཉམས་པར་བྱེད་པ། བདག་གཞན་ཆུད་གསན་པར་དགའ་བ། བདག་ཉིད་ཀྱང་ཕྱིར་སྤང་བར་འདོད་ལ་གཞན་ཡང་སྤང་དུ་འཇུག་པ་ཆོས་འཇིག་པའི་ལས་བསགས་པ་དེའི་གཟུགས་བརྙན་དུ་ཡང་འགྱུར་རེ་ཀན། ཤཱ་རིའི་བུ། ངས་ནི་གང་ཟག་དེ་ལྟ་བུར་ཐོབ་པར་ཡང་བྱ་བར་མ་གནང་ན། འཕྲད་པ་དང་འགྲོགས་པ་ལྟ་སྨོས་ཀྱང་ཅི་སྨོས་སོ། །ཞེས་གསུངས་ཤིང༌། མདོར་ན་རྡོ་རྗེ་ཐེག་པའི་ཟབ་མོ་མཐར་ཐུག་པ་རྣམས་ལ་སྐྱོན་བཏགས་ནས་སྨད་པས་ཆོས་སྤོང་བའི་ལས་བསགས་ཤིང༌། དེའི་ཉེས་པ་གོང་དུ་སྨོས་པ་རྣམས་དང༌། ཁྱད་པར་ཚེ་འདིར་ཡང་ལྷ་མི་ཀུན་གྱིས་སྤངས་ཤིང་ཡིད་དུ་མི་འོང་བ་དང༌། བསྙེན་སྒྲུབ་བཟླས་པ་སོགས་ལ་འབད་ཀྱང་ངག་གི་ནུས་པ་མི་ཡོང་བ་དང༌། ཆོས་བདག་མཁའ་འགྲོ་
ཆོས་སྐྱོང་རྣམས་ཀྱིས་ཀྱང་གློ་བུར་དུ་སྲོག་འཕྲོག་པ་དང༌། མི་འདོད་པ་སྣ་ཚོགས་སྟེང་དུ་འབབས་ཤིང༌། རྩ་ལྟུང་གཉིས་པ་དང༌། དྲུག་པས་ཀྱང་འཕོག་སྟེ། དེའི་རྐྱེན་གྱིས་རྡོ་རྗེའི་དམྱལ་བར་ཡང་འོ་བརྒྱལ་མྱོང་བར་འགྱུར་རོ། །དེས་ཉོན་མོངས་ཀྱིས་ཀུན་ནས་བསླངས་ཏེ་ཆོས་ལ་སྐྱོན་བརྗོད་པས་ཆོས་སྤོང་བའི་ལས་ཆེན་པོ་བསགས་པའི་ཚིག་འདི་དག་གི་རྗེས་སུ། ཁ་ཕྱིར་བལྟས་ཀྱི་བློ་མིག་ཅན་གཞན་ཁ་ཅིག་ཀྱང་རིང་བོང་ཅལ་ལྟར་རྫོགས་པ་ཆེན་པོ་ལ་སོགས་པ་རྡོ་རྗེ་ཐེག་པའི་ཆོས་ཟབ་རྒྱས་ཅན་རྣམས་ལ་སྨོད་པ་ནི་ཤིན་ཏུ་ཡང་རིག་པ་མ་ཡིན་དེ་གོང་དུ་བརྗོད་པ་རྣམས་ལ་རྟོགས་པར་བྱའོ། །གཞན་ཡང་རྫོགས་ཆེན་སོགས་སྔགས་རྙིང་མ་ལ་ཁྱད་པར་འཕགས་པའི་ཆེ་བ་དྲུག་ཡོད་པར་གསུངས་ཏེ། དང་པོ་སྤྱན་འདྲེན་པ་པོ་ཡོན་བདག་གི་ཁྱད་པར་ནི། མངའ་བདག་མེས་དབོན་གསུམ་འཕགས་པ་རིགས་གསུམ་མགོན་པོའི་སྤྲུལ་པས་སྤྱན་དྲངས་པ་ཡིན་པ། ད་ལྟ་གང་ཟག་སྐྱ་སེར་རེས་ཡོན་བདག་བྱས་ནས་བསྒྱུར་བ་དང་མི་འདྲ། ཕྱག་བཞེས་གཙུག་ལག་གི་ཁྱད་པར་ནི། སྔོན་དཔལ་གྱི་བསམ་ཡས་དང་ཆོས་འཁོར་སྟོད་སྨད་དུ་གཏན་ལ་ཕབ་པ་ཡིན་ལ། ད་ལྟའི་དགོན་ཕུག་ཅག་ཅོག་རེ་དང་མི་འདྲ། འགྱུར་བྱེད་ལོ་ཙཱའི་ཁྱད་པར་ནི། སྔོན་སྤ་གོར་བཻ་རོ་ཙ་ན་དང༌། སྐ་ཅོག་གཉིས་ལ་སོགས་པ་སྤྲུལ་པའི་ལོ་ཙཱ་བས་
བསྒྱུར་བའི་ཆོས་ཡིན་ལ། ད་ལྟའི་ལོ་ཙཱ་བ་དགུན་བལ་ཡུལ་དུ་བསྡད། དབྱར་མང་ཡུལ་དུ་དོན་ནས་སྔོན་མཁས་པའི་འགྱུར་ལ་རང་བཟོས་བཅོས་སྣ་ཚོགས་བྱེད་པ་དང་མི་འདྲ། པཎྜི་ཏའི་ཁྱད་པར་ནི། སྔོན་གྱི་པཎྜི་ཏ་པདྨ་འབྱུང་གནས། བྷོ་དྷི་ས་ཏྭ། སངས་རྒྱས་གསང་བ། བི་མ་ལ་མི་ཏྲ་ལ་སོགས་རིག་འཛིན་གྱི་ས་ལ་གནས་པའི་བྱང་ཆུབ་སེམས་དཔས་སྤྱན་དྲངས་པའི་ཆོས་ཡིན་ལ། ད་ལྟའི་པཎྜི་ཏ་ལྟོ་མ་ཕྱིད་པ་བོད་དུ་གསེར་ཚོལ་དུ་ཡོང་བའི་བཟང་སྤྲང་ཚོ་གཅིག་དང་མི་འདྲ། ཞུ་རྟེན་མེ་ཏོག་གི་ཁྱད་པར་ནི། སྔོན་གསེར་ཕྱེ་བྲེ་ལ་འཇལ། གསེར་ཤ་བའི་རླིད་བུ་བཀང་ནས་ཕུལ། གསེར་རྟ་ཁལ་དང༌། དྲེའུ་ཁལ་དུ་ཕུལ་ནས་ཞུས་པའི་ཆོས་ཡིན། ད་ལྟ་མཆན་ནས་གསེར་ཞོ་རེ་རེ་གཉིས་གཉིས་ཉུག་ཉུག་བྱས་ནས་ཞུས་པ་དང་མི་འདྲ། བརྗོད་བྱ་ཆོས་ཀྱི་ཁྱད་པར་ནི། སྔོན་སངས་རྒྱས་ཀྱི་བསྟན་པ་གྲ་མ་ཉམས་པའི་དུས་སུ་སྤྲུལ་པའི་ལོ་ཙཱ་བས་བཀའ་འགྱུར་བ་མེད་པ་གཏན་ལ་ཕབ་པས་ཤེས་བྱ་དངོས་པོའི་འདུག་ཚུལ་གཏན་ལ་འབེབས་ཤིང་དེ་རྟོགས་པར་བྱེད་པའི་ཐབས་དུ་མས་བརྒྱུན་པའི་ཆོས་དང༌། དུས་ད་ལྟའི་ལོ་ཙཱ་བ་བརྫུན་པོ་ཆེས་སྔོན་མཁས་པའི་འགྱུར་ལ་བཅོས་མ་སྣ་ཚོགས་བྱེད། སངས་རྒྱས་ཀྱི་
གསུང་དང་བླ་མའི་བཀའ་ལ་ངས་གཅོད་བྱས་ནས་མི་རེའི་ཆོས་རེ་བཅོས་ནས་གཅིག་སྐྱོན་གཅིག་ལ་འགེལ། ཕ་དཔེ་ལ་བུ་མི་བཏུབ་པའི་ཆོས་དང་མི་འདྲ་སྟེ་ཁྱད་པར་ཆེ་ཞེས་རོང་པ་ཆོས་བཟང་གིས་གསུངས་སོ། །དེས་ན་རྒྱ་བོད་གཉིས་ཀར་བྱོན་པའི་མཁས་གྲུབ་ས་སྐྱ་པ་ལ་སོགས་ཆེས་མང་བ་འདི་ཙམ་ཞིག་གིས་དཔང་དང་ཚད་མར་བྱེད་པའི་སྔགས་རྙིང་མ་རྫོགས་ཆེན་དང་བཅས་པ་རྣམས་སུན་འབྱིན་པ་ཆོས་སྤོང་བའི་ལས་བསགས་པའི་ཉེས་པ་དང་རྣམ་སྨིན་ནི་གོང་དུ་བརྗོད་པ་ལྟར་མཐའ་ཡས་པས། ཟབ་མོའི་ཆོས་ནི་སྟོན་པ་ལ། །གལ་ཏེ་མོས་པར་མ་གྱུར་ཀྱང༌། །སྨད་པ་དག་ཏུ་མི་བྱ་སྟེ། །ཞེས་པའི་དོན་དྲན་པར་བྱས་ནས་ཆོས་སྤོང་བའི་ལས་བག་ཡོད་པར་བྱོས་ཤིག །གཞན་ཡང༌། རང་བྱུང་ཉིད་ཀྱི་དོན་དམ་སྟེ། །དད་པ་ཉིད་ཀྱིས་རྟོགས་བྱ་བ། །ཞེས་པ་ལྟར། རྒྱལ་བའི་གསུང་རབ་མཐའ་ཡས་པ་རྣམས་ལ་ཕྱོགས་ཞེན་དང༌། ཞེན་ལྟའི་དྲི་མ་སྤངས་ཏེ་གཟུ་བོར་གནས་པའི་བློས་ཕྱོགས་མེད་རིས་མེད་ཀྱི་སྒོ་ནས་ཉམས་སུ་བླངས་ཤིང་ཉམས་སུ་ལེན་པ་མི་ལྕོགས་ཀྱང༌། ཐམས་ཅད་ལ་ཕྱོགས་རིས་སྤངས་པའི་དད་པ་ཆེན་པོ་བསྐྱེད་ན་ཐབས་མཁས་པ་ཆེན་པོར་འགྱུར་རོ། །དེ་ལྟ་མིན་ན་བོད་ཡུལ་དུ་དར་བའི་དམ་པའི་ཆོས་ཕལ་ཆེར་ལ་སྐྱོན་མ་བཀལ་བ་དང༌། སུན་མ་ཕྱུང་བ་མི་སྣང་ཞིང༌། ཕན་ཚུན་
རྫ་བརྡབས་པ་ལྟར་བྱས་པར་སྣང་བས་དོན་ལ་རྟོན་པའི་བློ་གྲོས་དང་ལྡན་པར་བྱས་ནས་ཡིད་ཆོས་ལ་སྡང་བ་ལས་ཕྱིར་ཕྱོགས་པར་བྱའོ། །ཀྱེ་མ་དེང་སང་སྙིགས་དུས་འདིར། །མཁས་པར་ཁས་འཆེ་ཕལ་ཆེར་ཡང༌། །དོན་ལ་མི་རྟོན་ཚིག་ཕྱིར་འབྲང༌། །ཕྱོགས་རེའི་ཆ་བཟུང་ཅིག་ཤོས་སྨད། །སྡང་ཞུགས་ལོག་རྟོག་ཞེན་ལྟ་ཡི། །དྲི་མས་རབ་བསླད་དམ་ཆོས་དོར། །ཉོན་མོངས་ཀུན་ནས་དཀྲིས་དབང་གིས། །དམ་པའི་ཆོས་སྤོང་དེ་ཡི་རྒྱུས། །ཚེ་འདིར་མི་འདོད་སྣ་ཚོགས་དང༌། །ཕྱི་མ་མནར་མེད་དམྱལ་གཏིང་དུ། །བསྐྱབ་མེད་གྱུར་པ་སྤྱིའུ་ཚུགས་ལྟུང༌། །དམན་པ་བསོད་ནམས་དམན་པ་ལ། །བཅོལ་ལྡན་འདས་ཀྱིས་ཅི་བགྱིར་མཆི། །དེས་ན་དམ་ཆོས་སྤོང་བ་ཡི། །ལས་ཀྱི་རྣམ་སྨིན་འཇིགས་པས་ན། །སྐལ་མེད་ལོག་རྟོག་ཅན་མ་གཏོགས། །ཤེས་ལྡན་སུ་ཡིད་འདི་ལ་རྟོན། །སྟོན་པ་སངས་རྒྱས་བཅོམ་ལྡན་གྱིས། །ཟབ་མོའི་ཆོས་ལ་མི་མོས་ཀྱང༌། །སྐུར་པ་གདབ་པར་མི་བྱ་སྟེ། །ཆོས་ཉིད་བསམ་གྱིས་མི་ཁྱབ་པའི། །དོན་ཉིད་དྲན་གྱིས་མ་གསུངས་སམ། །དེས་ན་རྒྱལ་བ་སྲས་བཅས་ཀྱི། །གསུང་རབ་མ་ལུས་ཐམས་ཅད་ལ། །དད་པས་དེ་རྗེས་འབྲང་བ་ལེགས། །བོད་ཀྱི་སློབ་དཔོན་ཕྱོགས་ཞེན་ཅན། །གཟུ་བོར་མི་གནས་ཁ་ཅིག་གིས། །དོན་ལ་མི་རྟོན་ཚིག་ཕྱིར་འབྲངས། །ཚིག་གི་ན་ཡམ་འགྲིག་འགྲིག་གི །
རྗེས་འབྲངས་ཁ་ཅིག་སྐུར་འདེབས་མོད། །དེ་ལྟ་མིན་ན་རྒྱ་བོད་ཀྱི། །མཁས་གྲུབ་སྐྱེས་མཆོག་ཐམས་ཅད་དང༌། །བོད་དུ་སྔ་ཕྱིར་བྱོན་པ་ཡི། །ལོ་པཎ་མཁས་གྲུབ་མང་པོ་ཡིས། །དཔང་དང་ཚད་མར་བྱས་པས་ན། །དེ་རྗེས་འབྲང་བ་ཅི་མ་རུང༌། །རྒྱ་བོད་མཁས་གྲུབ་ཐམས་ཅད་ཀྱིས། །བཤད་བསྒྱུར་མཛད་པ་མ་ཡིན་ཞིང༌། །བོད་ཀྱི་རང་བཟོ་བྱས་ཟེར་བ། །དངོས་སུ་བསྙོན་བརྟོལ་བྱེད་པར་ཟད། །དེས་ན་པདྨ་འབྱུང་གནས་སོགས། །རྒྱ་བོད་མཁས་གྲུབ་ཐམས་ཅད་ཀྱིས། །བཤད་སྒྲུབ་བསྒྱུར་བ་མ་ཡིན་ཞེས། །ངེས་པར་སྨྲ་བ་འདི་མི་རིགས། །ཡང་ན་དེང་སང་ཁ་ཅིག་གིས། །དུས་ཀྱི་འཁོར་ལོ་ལ་སོགས་པའི། །སེམས་འགྲེལ་སྐོར་གསུམ་ཐམས་ཅད་ལ། །འཁྲུལ་པ་ནང་འགལ་སྣ་ཚོགས་བྱས། །རྒྱུད་འགྲེལ་དེ་རྣམས་ཐམས་ཅད་ལ། །ལེན་བྱེད་ཚད་མ་མེད་དོ་ལོ། །དུས་འཁོར་ཞབས་ལ་སོགས་པ་ནི། །ཆེན་པོ་རྣམས་ལ་མ་གྲགས་ཕྱིར། །ཚད་མའི་སྐྱེས་བུ་མ་ཡིན་ལོ། །ཁྱོད་ཀྱང་ཚུལ་འདི་སྨྲ་ན་སྨྲོས། །དེ་ལས་གཞན་པ་པདྨ་འབྱུང༌། །སངས་རྒྱས་གསང་བ་བི་མ་ལ། །བཻ་རོ་ཙ་ན་ལ་སོགས་ཀྱི། །མ་བསྒྱུར་མ་མཛད་ཐག་ཆོད་ཅེས། །ཚུལ་མིན་དྲན་ཚད་སྨྲ་བ་ཡི། །ཁ་དེ་བདུད་ཀྱིས་མ་ཕྱེའམ། །སྤྱིར་གྱི་གསར་རྙིང་ཁ་ཡར་ལ། །བསླད་སོགས་ཡོད་པར་སྨྲ་མོད་ཀྱི། །རྙིང་མ་
རྫོགས་ཆེན་རྗེས་འབྲངས་བཅས། །ཚིག་འབྲུ་གཅིག་ཀྱང་མི་དག་ལ། །བོད་ཀྱིས་བརྩམས་པའི་ཆོས་ལོག་ཅེས། །སྐུར་འདེབས་བྱེད་པ་ཞེ་རེ་འཇིགས། །དེས་ན་མཁས་པ་བློ་གྲོས་ལྡན། །དབང་རྣོན་ཆོས་རྗེས་འབྲངས་ན་ཡང༌། །ཚིག་ལ་མི་རྟོན་དོན་ལ་རྟོན། །ཡང་ན་བླུན་པོ་མོས་པ་བརྟན། །དབང་རྟུལ་དད་རྗེས་འབྲངས་ན་ཡང༌། །རྒྱ་བོད་མཁས་གྲུབ་འདི་སྙེད་ཀྱི། །རྗེས་སུ་འབྲངས་ལ་འགྱོད་པ་མེད། །འཕགས་པའི་ཡུལ་གྱི་མཁས་གྲུབ་མཆོག །པད་འབྱུང་དྲི་མེད་བཤེས་གཉེན་དང༌། །སངས་རྒྱས་གསང་བ་ཧཱུྃ་ཀཱ་ར། །སྒེག་པ་རྡོ་རྗེ་དམ་པ་སོགས། །རྒྱ་གར་མཁས་གྲུབ་ལྟ་ཅི་སྨོས། །བོད་དུ་སྔ་ཕྱིར་བྱོན་པ་ཡི། །སྐྱེས་ཆེན་དམ་པ་ཐུགས་རྗེ་ཅན། །བཻ་རོ་ཙ་ན་སྐ་ཅོག་སོགས། །རྗེ་འབངས་ཉི་ཤུ་རྩ་ལྔ་དང༌། །སད་མི་མི་བདུན་ལ་སོགས་པའི། །སྔར་བྱོན་ལོ་པན་ཐམས་ཅད་དང༌། །ཕྱིས་ཀྱི་རྔོག་བཙུན་ལེགས་ཤེས་སོགས། །བཀའ་གདམས་པ་ཡི་སྐྱེས་ཆེན་དང༌། །མཉམ་མེད་དཔལ་ལྡན་ས་སྐྱ་པ། །ཀླུ་དབང་བསྲུངས་པ་ལ་སོགས་ནས། །ཆོས་རྗེ་བསོད་རྒྱལ་ཡན་ཆད་ཀྱི། །སྐྱེས་ཆེན་དམ་པ་ཐམས་ཅད་དང༌། །མི་ལ་དྭགས་པོ་ཕག་མོ་གྲུ། །འབྲི་སྟག་མཚལ་འབྲུག་ཐམས་ཅད་དང༌། །དུས་གསུམ་མཁྱེན་པ་ཀརྨ་པ། །རང་བྱུང་རྡོ་རྗེ་ཆོས་ཀྱི་གྲགས། །སྤྲུལ་སྐུ་ཆོས་དཔལ་
བཟང་པོ་ཡན། །སྐྱེས་ཆེན་ཀརྨ་པ་རྣམས་སོགས། །དྭགས་པོ་བཀའ་བརྒྱུད་ཐམས་ཅད་དང༌། །བཀའ་བབས་སྐོར་གསུམ་བརྒྱུད་པ་དང༌། །མ་གཅིག་ལབ་སྒྲོན་ ལ་སོགས་པའི། །ཞི་གཅོད་བཀའ་བརྒྱུད་ཐམས་ཅད་དང༌། །མཉམ་མེད་ཤངས་པ་བཀའ་བརྒྱུད་སོགས། །བོད་ཀྱི་བཀའ་བརྒྱུད་དེ་རྣམས་དང༌། །དུས་ཕྱིས་གྲུབ་ཆེན་གསེར་སྟེངས་པ། །མ་གཅིག་ ཇོ་འབུམ་ཆོས་སྐུ་འོད། །མཁས་གྲུབ་ཨོ་རྒྱན་གཉན་རས་དང༌། །ཀུན་སྤངས་ཀུན་མཁྱེན་འཕགས་པ་འོད། །རྒྱལ་ཡེ་ཡོན་ཏན་རྒྱ་མཚོ་དང༌། །དབང་རྒྱལ་ཤེར་འབུམ་བསྐལ་བ་བཟང༌། །མཁན་ཆེན་འཛིམ་པ་སྤང་སྒང་བ། །ཀུན་མཁྱེན་ཆོས་རྗེ་ཡབ་སྲས་དང༌། །འཇམ་དབྱངས་བརྡ་སྟོན་རྒྱལ་བ་གཡུང༌། །མཁས་གྲུབ་གཡག་སྡེ་པན་ཆེན་སོགས། །བཀའ་བརྒྱུད་སོ་སོའི་སྲོལ་འཛིན་པའི། །སྡོམ་བརྩོན་རིག་པ་འཛིན་པ་ཡི། །མཁས་གྲུབ་ཕལ་མོ་ཆེ་རྣམས་ཀྱིས། །རྫོགས་ཆེན་ལ་སོགས་རྙིང་མ་ལ། །ཐུགས་དམ་སྙིང་པོ་བྱེད་པ་མང༌། །མཁས་གྲུབ་དེ་དག་ཐམས་ཅད་ལས། །ལོག་རྟོག་ཅན་གྱི་གང་ཟག་ཕལ། །ལྷག་པ་ཡིན་ནམ་ཤེས་ལྡན་དག །གང་ཟག་ཚིག་ལ་རབ་རྟོན་ཞིང༌། །རྟོག་གེ་ངན་ལ་རབ་ཏུ་ཞེན། །ཕྱོགས་ཞེན་ཆགས་སྡང་གིས་དཀྲུགས་པའི། །མཁས་པར་རློམ་པ་ཁ་ཅིག་དང༌། །སྨྲ་ཁམས་ཅན་གྱི་སྐྱེ་བོ་ཡི། །
རྗེས་སུ་འབྲངས་ནས་ཆོས་སྤངས་ན། །རང་གཞན་གཉིས་ཀ་ཉམས་འགྱུར་པས། །དོན་མེད་ཆོས་སྤོང་བསགས་པ་ཡི། །རྗེས་སུ་མ་འབྲངས་ཤེས་ལྡན་དག །གང་ལ་ཕྱོགས་ལྷུང་རབ་ཏུ་སྤོངས། །མཁས་གྲུབ་ཕྱོགས་རིས་མེད་པ་ཡི། །རྗེས་སུ་འབྲངས་ཤིག་ཤེས་ལྡན་དག །བཀའ་བརྒྱུད་གོང་མ་དེ་དག་ལས། །ད་ལྟའི་གང་ཟག་ཕལ་མོ་ཆེ། །མཁས་ལྟར་སྣང་ཡང་སྣང་ཙམ་ཡིན། །མངོན་ཤེས་ཉམས་རྟོགས་ཆོས་སྤྱན་མེད། །ཀུན་རྟོག་ངན་པས་དཔྱད་པ་ཡི། །ལོག་རྟོག་ངན་པ་འབའ་ཞིག་ཡིན། །བཀའ་བརྒྱུད་གོང་མ་ཐམས་ཅད་ཀྱིས། །ཞི་ཕྱག་རྫོགས་གསུམ་ཐམས་ཅད་ལ། །སྙིང་པོར་བྱེད་པ་མང་སྣང་བས། །དད་པས་དེ་རྗེས་འབྲང་བ་ལེགས། །གལ་ཏེ་དེ་རྣམས་ཀྱིས་ ནོར་ན། །གཞན་གྱིས་ནོར་བ་རབ་ཏུ་བཟོད། །ནོར་ཡང་ནོར་ས་མ་ནོར་མོད། །ལོག་པར་རྟོགས་ལ་ཅི་ཆ་ཡོད། །རྐུན་པོ་རྣམས་ཀྱིས་ཁྱིར་བཏགས་པས། །ར་སྐྱེས་ཁུར་བས་བྲམ་ཟེར་བོར། །ལོག་རྟོག་ཅན་གྱི་སྐྱེ་བོ་འགའ། །ཆོས་དང་འཕགས་ལ་སྐུར་འདེབས་པའི། །མཚམས་མེད་ལས་ལྕིའི་ཆོས་སྤོང་ བའི། །རྗེས་སུ་ཤེས་ལྡན་ཁ་ཅིག་ཀྱང༌། །ཞུགས་ནས་མི་ཟད་སྡིག་པའི་ལས། །བྱེད་པས་ཕྱེ་ལེབ་ མེར་མཆོངས་མཚུངས། །གལ་ཏེ་གང་ཟག་རེ་རེ་ཡི། །རྗེས་སུ་འབྲངས་ནས་རྫོགས་ཆེན་སོགས། །རྡོ་རྗེ་
ཐེག་པ་སུན་འབྱིན་པའི། །མི་ཟད་སྡིག་ཏོའི་ལས་བྱེད་ན། །གངས་ཅན་ཁྲོད་ཀྱི་ཆོས་རྣམས་ལ། །ཉམས་སུ་བླང་རུང་ཉིན་སྐར་ཙམ། །དེ་ཡི་རྒྱུ་མཚན་འདི་ལྟ་སྟེ། །ཞི་ཕྱག་གཅོད་དང་རོ་སྙོམས་དང༌། །ལམ་འབྲས་རྡོ་རྗེའི་ཚིག་རྐང་དང༌། །བདེ་མཆོག་སྙན་བརྒྱུད་སེམས་ཁྲིད་དང༌། །ཐབས་ལམ་གཏུམ་མོ་ཞག་བདུན་དང༌། །དཔལ་ལྡན་དུས་ཀྱི་འཁོར་ལོ་སོགས། །སེམས་འགྲེལ་སྐོར་གསུམ་མན་ངག་བཅས། །གསང་འདུས་གཉིས་མེད་རྣམ་རྒྱལ་དང༌། །བདེ་མཆོག་ར་ལིའི་སྐོར་ལ་སོགས། །རྒྱུད་སྡེ་ཕལ་མོ་ཆེ་རྣམས་ཀུན། །བཀའ་དང་ཆོས་མིན་མ་བསྒྲུབས་སམ། །ལེགས་པར་དཔྱོད་དང་ཤེས་ལྡན་དག །བདག་ནི་ཚེ་རབས་ཐམས་ཅད་དུ། །དལ་ཐོབ་མཐོ་རིས་ཡོན་ཏན་ལྡན། །བཤེས་གཉེན་མཆོག་ལ་སོགས་པ་ཡི། །དམ་ཆོས་བསྒྲུབ་པའི་མཐུན་རྐྱེན་རྣམས། །མ་ཚང་མེད་པར་འབྱོར་གྱུར་ནས། །རྒྱལ་བའི་བསྟན་པ་ཐམས་ཅད་ལ། །ཕྱོགས་རིས་མེད་པའི་དད་ཐོབ་ནས། །ཚུལ་བཞིན་ཉམས་སུ་ལེན་པར་ཤོག །ཚུལ་བཞིན་ཉམས་ལེན་མ་ནུས་ནའང༌། །རྒྱལ་བའི་གསུང་རབ་ཐམས་ཅད་ལ། །ཕྱོགས་མེད་དད་པ་བྱེད་པར་ཤོག །ཅེས་རྫོགས་པ་ཆེན་པོ་ལ་སོགས་སྔགས་རྙིང་མ་རྗེས་འབྲངས་དང་བཅས་པའི་ཚིག་དོན་ལ་ལོག་པར་རྟོགས་པའི་འཁྲུལ་པ་
ངན་པ་འཇོམས་པའི་བསྟན་བཅོས་འཁྲུལ་འཇོམས་ཞེས་བྱ་བ་འདི་ནི་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་དཔྱིད་ཟླ་ར་བའི་བཅོམ་ལྡན་འདས་ཀྱིས་ཆོ་འཕྲུལ་ཆེན་པོས་མུ་སྟེགས་པ་རྣམས་ཕམ་པར་མཛད་པའི་དུས་ཀྱི་ཟླ་བའི་དཀར་ཕྱོགས་ཀྱི་ཚེས་བཅུའི་ཉིན་པར་རྫོགས་པར་བྲིས་པ་འདིས། ལོག་པར་རྟོགས་པ་རྣམས་ཀྱི་འཁྲུལ་པ་ཐམས་ཅད་བཅོམ་ནས། ཕྱིས་ནས་རྫོགས་པ་ཆེན་པོ་སྐྱབས་ཀྱི་དམ་པ་མཆོག་ཏུ་གྱུར་ཅིག།། །། ༈ རྒྱལ་བས་ཆོ་འཕྲུལ་ཆེན་པོའི་མཛད་པ་དང༌། །ནམ་མཁའ་ལྡིང་གིས་ཀླུ་ལ་བྱ་བ་བཞིན། །ཕ་ལམ་རྡོ་རྗེ་ལྟ་བུའི་མཚོན་ཆ་ལ། །རྣོ་དབལ་ཚེར་མ་རང་བྱུང་རྡོ་རྗེས་བསྣན། །དགེ་བས་བསྟན་ལ་ཕྱོགས་ལྷུང་ཞིག་གྱུར་ཅིག། །དགེའོ། །དགེའོ། །དགེའོ།། །