གཏམ་གྱི་ཚོགས་ཐེག་པའི་རྒྱ་མཚོ།
གཏམ་ཚོགས་ལེའུ་དང་པོ། གཏམ་ཚོགས་ཡོན་ཏན་རྒྱ་མཚོའི་སྤྱི་དོན་ཐེག་པའི་གྲུ་གཟིངས་ཞེས་བྱ་བ།
གཏམ་གྱི་ཚོགས་ཐེག་པའི་རྒྱ་མཚོ་ཞེས་བྱ་བ་བཞུགས།
གཏམ་ཚོགས་ཡོན་ཏན་རྒྱ་མཚོའི་སྤྱི་དོན་ཐེག་པའི་གྲུ་གཟིངས་ཞེས་བྱ་བ། གཉིས་སུ་མེད་པར་གསུང་བ་སངས་རྒྱས་ལ་ཕྱག་འཚལ་ལོ། །ཕུན་ཚོགས་ནོར་བུའི་ཕྲེང་བ་དོ་ཤལ་དུ། །འཛིན་པ་མཐོ་རིས་དང་པོའི་དགེ་མཚན་གྱི། །འཇིག་རྟེན་དགའ་མགུར་བྱས་པའི་གཏམ་གྱི་རྔས། །སྐྱེ་དགུའི་རྣ་ལུང་གསར་པ་མཛེས་གྱུར་ཅིག །རྨོངས་དང་མ་རིག་ལས་ཀྱི་གཞན་དབང་གིས། །དགེ་བའི་དཀའ་ཐུབ་ཉམས་པར་བྱས་པའི་གཟུགས། །འཁོར་བ་ཆུ་སྲིན་འབྱུང་གནས་མཐའ་དག་ལས། །འགྲོ་བ་གདོན་པའི་སྟོན་མཆོག་ལྗོན་པ་རྒྱལ། །གང་ལ་ཡང་དག་འབྱོར་པ་དམ་པའི་ཆོས། །ལུང་དང་རྟོགས་པའི་གདུགས་དཀར་ཡུ་བ་ལ། །འཇོ་སྒེག་རོལ་པའི་ཁྱུ་མཆོག་རིག་གྲོལ་སྡེས། །གཏམ་
གྱི་གྲགས་པ་མཆོད་ལ་མངོན་ཕྱོགས་ཤིག །དེ་ལ་བདག་ཅག་གི་སྟོན་པས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་མཐའ་དག་གི་དོན། ཀུན་འབྱུང་འདྲེན་པའི་ཐེག་པ་སྡེ་སྣོད་རིན་པོ་ཆེ་རྣམ་པ་གསུམ་དུ་འདུས་པའི་ནང་ཚན་ལས་ཀྱང༌། དམ་པའི་ཆོས་འདུལ་བ་ནི་གྲུབ་མཐའ་ལ་ཐོག་མར་ཞུགས་པ་རྣམས་ཀྱི་སྟོན་པ་དང་བསྟན་པ་གཉིས་ཀ་ཡིན་ལ། མདོ་སྡེ་དང་མངོན་པའི་སྡེ་སྣོད་ནི་བསྟན་པ་གཅིག་པུར་ངེས་པའི་ཚུལ་སློབ་དཔོན་ཆོས་ཀྱི་ཚོང་དཔོན་གྱིས། རྒྱལ་བ་སྟོན་པ་དེ་ཡི་དམ་ཆོས་དག །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །ཉིས་འགྱུར་ཕྱག་བྱས་སངས་རྒྱས་ཁྱོད་ཅིག་ཡིན། །ཞེས་འདུལ་བའི་སྡེ་སྣོད་ལ་བསྔགས་
པའི་ཁྱད་གཞིའང༌། ལྟུང་བ་བསླབ་བྱ་དང་བཅས་པ་སྟོན་པའི་ལྷག་པ་ཚུལ་ཁྲིམས་ཀྱི་བསླབ་པ་ལ་བརྟེན། གནས་སྐབས་སུ་མངོན་པར་མཐོ་བའི་སྲིད་པ་དང༌། མཐར་ཐུག་སྒྲིབ་གཉིས་བག་ཆགས་དང་བཅས་པའི་དགྲ་སྡེའི་ཚོགས་ཐམས་ཅད་བཅོམ་པས་ན། རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཞེས་པས་ཐོབ་བྱའི་སྒྲ་བཤད་ཀྱང་གྲུབ་ལ། དེ་ལྟ་བུའི་ལྷག་པ་ཚུལ་ཁྲིམས་ཀྱི་བསླབ་པའི་མཚན་ཉིད་ཀྱང་སུམ་བརྒྱ་པ་ལས། གང་ཞིག་སྲོག་གཅོག་གཞན་གྱི་ནོར་འཕྲོག་དང༌། །མི་ཚངས་སྤྱོད་རྫུན་བཅོས་པའི་ཆང་ལ་སོགས། །གར་སོགས་ཕྲེང་སོགས་མལ་ཆེན་མཐོ་བ་དང༌། །ཕྱི་དྲོའི་ཁ་ཐས་གསེར་དངུལ་སྤོང་བྱེད་པ། །ཉོན་མོངས་དགྲ་གཡུལ་རྒྱལ་བྱེད་ཚུལ་ཁྲིམས་ཏེ། །དགེ་ཚུལ་བརྟུལ་ཞུགས་ཆུ་ལོན་བརྩིགས་པ་དང༌། །འཆི་བའི་མཆེ་བ་འབྱིན་པར་བྱེད་པའི་ཐབས། །རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། །ཞེས་མཐའ་དག་པའི་ཉོན་མོངས་ཀྱི་ཆུ་ཀླུང་དང་ཁ་ན་མ་ཐོ་བའི་ཚོགས་ལ་མི་སྡུག་པའི་འདུ་ཤེས་དགུ་བསྒོམས་པས་མཚོན། བཅས་པའི་ཁྲིམས་ཀྱི་རྣམ་གྲངས་ཆུ་ལོན་བརྩིགས་པ་ལྟ་བུས་འདུལ་བ་ལ་མཆོག་ཏུ་སྤྲོ་བས་ན་བསྟན་པའི་གཞི་མར་བཞག་ལ། དེ་ལྟར་སོ་སོ་ཐར་པའི་སྡེ་སྣོད་དེ་རྣམ་པར་གྲོལ་བའི་ཐབས་ཀྱི་དང་པོའང་ཡིན་པའི་ཚུལ་འདུལ་བ་སྨན་གྱི་གཞིར། དགེ་
སློང་དག་ཚུལ་ཁྲིམས་གོམས་པར་བྱས་ན་ཏིང་ངེ་འཛིན་ཡུན་རིང་དུ་གནས་པར་འགྱུར་རོ། །ཏིང་ངེ་འཛིན་གོམས་པར་བྱས་ན་ཤེས་རབ་ཡུན་རིང་དུ་གནས་པར་འགྱུར་རོ། །ཤེས་རབ་གོམས་པར་བྱས་ན་འདི་ལྟར་ཏེ། འདོད་ཆགས་དང༌། ཞེ་སྡང་དང༌། གཏི་མུག་ལས་སེམས་ཡང་དག་པ་ཁོ་ནར་རྣམ་པར་གྲོལ་བར་འགྱུར་རོ། །ཞེས་འདུལ་བའི་སྡེ་སྣོད་ཀྱིས་སོ་སོ་ཐར་པའི་སྡོམ་པའི་བསླབ་བྱ་ལ་བསླབས་པས། གདུལ་བྱའི་རྒྱུད་ལ་ཚུལ་ཁྲིམས་ཀྱི་ཕུང་པོས་འདོམས། དེ་ལས་འདའ་བ་མ་ཡིན་པས་འགྱོད་པ་དང་བྲལ། སེམས་རྩེ་གཅིག་པའི་ཏིང་ངེ་འཛིན་འཐོབ། མདོ་སྡེའི་སྡེ་སྣོད་ཀྱི་ཐེག་པ་ཆེ་ཆུང་གཉིས་ཀའི་བསླབ་པ་གསུམ་རྒྱས་པར་དབྱེ་ཞིང་ལྷག་པ་སེམས་ཀྱི་བསླབ་པ་ལ་ཡང་དག་པར་སྦྱོར། ཆོས་མངོན་པའི་སྡེ་སྣོད་ཀྱིས་བརྗོད་བྱའི་མཚན་ཉིད་མ་འཁྲུལ་བར་ཆོས་རབ་ཏུ་འབྱེད་པའི་བློ་གྲོས་ཀྱི་དྲི་མ་སྤངས་པ་བསྒྲུབ་པའི་ཕྱིར་ལྷག་པ་ཤེས་རབ་ཀྱི་བསླབ་པ་ལ་སྦྱོར་བར་དགོངས་པ་ཡིན་ནོ། །དེའི་དོན་འཕགས་པའི་བསྟན་བཅོས་དགོངས་འགྲེལ་དང་བཅས་པས་ཅུང་ཟད་བསྙད་ན། བཤེས་སྤྲིང་ལས། ཐར་པ་བདག་ལ་རག་ལས་འདི་ལ་ནི། །གཞན་གྱིས་གྲོགས་བགྱིར་ཅི་ཡང་མ་མཆིས་ཀྱིས། །ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། །བདེན་པ་རྣམ་པ་བཞི་ལ་འབད་པར་མཛོད།
ལྷག་པའི་ཚུལ་ཁྲིམས་ལྷག་པའི་ཤེས་རབ་དང༌། །ལྷག་པའི་སེམས་ལ་རྟག་ཏུ་བསླབ་པར་བགྱི། །བསླབ་པ་བརྒྱ་རྩ་ལྔ་བཅུ་ལྷག་གཅིག་ཀྱང༌། །གསུམ་པོ་འདི་ནང་ཡང་དག་འདུ་བར་འགྱུར། །ཞེས་གསུངས་པ་བཞིན་ཐར་པ་ནི་གྲོགས་ཀྱིས་བསྟང་བའི་ཁ་ན་རག་ལུས་པ་མ་ཡིན་པར་བདག་འབའ་ཞིག་གི་ལུང་དང༌། རིག་པ་དང༌། གཏན་ཚིགས་དང༌། དཔྱད་བཟོད་པ་དང༌། ལྡན་པ་དང་མཐུན་པའི་མང་དུ་ཐོས་པ། ཉམས་པ། བཅོམ་པ། ལྟུང་བ། ཕམ་པར་གྱུར་པ་མེད་པའི་ཚུལ་ཁྲིམས། ངེས་པར་འབྱེད་པའི་ཆ་དང་མཐུན་པའི་བསམ་གཏན་རྣམས་དང་ལྡན་པས་འཕགས་པའི་བདེན་པ་བཞི་ལ་དམིགས་པར་བྱའོ། །བཞི་གང་ཞེ་ན། སྡུག་བསྔལ་དང༌། ཀུན་འབྱུང་དང༌། འགོག་པ་དང༌། ལམ་གྱི་བདེན་པ་བཞིའོ། །དང་པོ་ནི། ཉེ་བར་ལེན་པའི་ཕུང་པོ་ལྔའི་མཚན་ཉིད་ཀྱི་སྐྱེ་བ་གང་ཡིན་པ་དེ་ནི་སྡུག་བསྔལ་བའི་བདེན་པའོ། །གཉིས་པ་ནི། ཡང་འབྱུང་བའི་སྲེད་པ། དགའ་བའི་འདོད་ཆགས་དང་ལྷན་ཅིག་པ། དེ་དང་དེར་མངོན་པར་དགའ་བ་གང་ཡིན་པ་སྟེ། འདི་ལས་སྡུག་བསྔལ་ཀུན་འབྱུང་བས་ན་ཀུན་འབྱུང་སྟེ་སྡུག་བསྔལ་གྱི་རྒྱུར་བསྟན་ཏོ། །གསུམ་པ་ནི། སྲེད་པ་དེ་ཉིད་གཏན་འགོག་པ་དང་རྣམ་པར་ཞི་བ་གང་་ཡིན་པ་དེ་ནི་ཐར་པའོ། །བཞི་པ་ནི།
མྱ་ངན་ལས་འདས་པ་དེ་འཐོབ་པར་བྱེད་པའི་ལམ་གྱི་བདེན་པ་འཕགས་པའི་ལམ་ཡན་ལག་བརྒྱད་དེ་ཡང་དག་པའི་ལྟ་བ་ནི་ཟག་པ་མེད་པའི་ཤེས་རབ་བོ། །ཡང་དག་པའི་འཚོ་བ་ནི་ཁ་གསགས་ལ་སོགས་པ་ལོག་པའི་འཚོ་བ་ལྔ་སྤངས་པའོ། །ཡང་དག་པའི་རྩོལ་བ་ནི་བརྩོན་འགྲུས་བརྩམ་པའོ། །ཡང་དག་པའི་དྲན་པ་ནི་དམིགས་པ་མ་བརྗེད་པའོ། །ཡང་དག་པའི་ཏིང་ངེ་འཛིན་ནི་བསམ་གཏན་བཞི་པའོ། །ཡང་དག་པའི་ངག་ནི་དགེ་བའི་ལས་ཀྱི་ལམ་བཞིའོ། །ཡང་དག་པའི་ལས་ཀྱི་མཐའ་ནི་ལུས་ཀྱི་མི་དགེ་བའི་ལས་ལམ་སྤོང་བའི་རང་བཞིན་གསུམ་མོ། །ཡང་དག་པའི་རྟོག་པ་ནི་གནོད་སེམས་མེད་པ་དང༌། ངེས་པར་འབྱུང་བའི་རྟོག་པ་ལ་སོགས་པའི་རྟོག་པ་རྣམ་པ་དུ་མའོ། །དེ་བཞིན་དུ་ལྷག་པའི་ཚུལ་ཁྲིམས་ནི་མྱ་ངན་ལས་འདའ་བར་ཡོངས་སུ་བསྔོ་བ་གང་ཡིན་པའོ། །ལྷག་པའི་སེམས་ནི་འཕགས་པའི་ལམ་གྱི་རྟེན་བསམ་གཏན་བཞི་པའོ། །ལྷག་པའི་ཤེས་རབ་ནི་ངེས་པར་འབྱེད་པའི་ཆ་དང་མཐུན་པའོ། །བསླབ་པ་གསུམ་པོ་འདིའི་ནང་དུ་བསླབ་པ་བརྒྱ་ལྔ་བཅུ་ལྷག་གཅིག་འདུ་བ་དེ་ལ་འབད་པས་བསླབ་པར་བྱེད་པ་གང་ཞིག་ལ་འཕགས་པའི་དགེ་འདུན་ཞེས་བྱའོ། །རྟེན་དེ་ཐེག་པ་ཆེན་པོའི་ལམ་ལ་སྦྱར་ན། སོ་སོ་ཐར་པའི་སྡོམ་པ་ནི་གཞན་གནོད་གཞི་བཅས་ལས་
ལྡོག་པ་ཙམ་ཡིན། བྱང་ཆུབ་སེམས་དཔའི་སྡོམ་པ་ནི་དེའི་སྟེང་དུ་ཕན་འདོགས་པ་དང་བཅས་པའི་ཉེས་སྤྱོད་སྡོམ་པའི་ཚུལ་ཁྲིམས། དགེ་བ་མཐའ་དག་ཕ་རོལ་ཏུ་ཕྱིན་པ་དྲུག་ལྡན་དུ་བསྒྲུབ་པས་དགེ་བའི་ཆོས་སྡུད་ཀྱི་ཚུལ་ཁྲིམས། དངོས་སམ་བརྒྱུད་ནས་གཞན་དོན་འབའ་ཞིག་བྱེད་པ་སེམས་ཅན་དོན་བྱེད་ཀྱི་ཚུལ་ཁྲིམས་ཏེ་རྣམ་པ་གསུམ། དེ་བཞིན་དུ་སོ་སོ་ཐར་པ་སྤངས་པ་བདུན་གྱིས་བསྡུས་པ་ལུས་ངག་གཉིས་གཙོ་བོར་བྱེད་ཅིང༌། གཞན་དོན་དུ་བཅས་པ་མི་འདྲལ། བྱང་ཆུབ་སེམས་དཔའ་སྤངས་པ་བཅུ་ཀ་གཙོ་བོར་བྱེད་ཅིང༌། གཞན་དོན་དུ་བཅས་པ་འདྲལ་བས་བསླབ་པ་དང་། བསླབ་བྱ་གཉིས་ཀ་ལ་ཁྱད་པར་ཡོད་དོ། །དེ་བཞིན་དུ་འབྲས་བུའང་ཉན་རང་གཉིས་རྒྱུའི་དུས་ན་ཚོགས་རྒྱ་ཆུང་ངུ་ལས་མི་གསོག་པས་རང་ཉིད་རྣམ་པར་གྲོལ་བའི་ལམ་ཙམ་ལས་མི་ཐོབ། བྱང་ཆུབ་སེམས་དཔའ་ནི་རྒྱུའི་དུས་ན་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་ལ་བརྩོན་པས་འབྲས་བུ་སྐུ་གསུམ་ཐོབ་པ་ན་ནོ། །དེའི་སྟེང་ན་སྔགས་ཀྱི་དབང་བསྐུར་ཐོབ་ནས་སྡོམ་པ་སུམ་ལྡན་དུ་འགྲོ་སྟེ། རྩིག་པ་ལ་ཕ་གུ་དང་པུ་ཤུ་བསྣན་པ་བཞིན། བསླབ་བྱ་དང་ཡོན་ཏན་གཉིས་ཀ་མངལ་ཆེ་བར་སོང་བ་ཡིན་པས། དེ་དག་ནང་འགལ་བྱུང་ན་གོང་མ་གཙོ་བོར་བྱེད་པ་དང༌། འོག་མ་གཙོ་བོར་བྱེད་པའི་
འདོད་པ་གཉིས་ཀའང་གནོད་པ་སྤོང་པ་དང༌། ཕན་འདོགས་པ་དགོས་པ་མཐུན་པའི་དོན་གང་ཟག་རྒྱུད་ལ་ནུས་པ་གང་ཆེ་བའི་ཐོག་ཏུ་བཏང་ནས་འགལ་ན་ནི་གནང་མི་སྲིད། གནང་ན་ནི་འགལ་མི་སྲིད་པའི་དོན་དང་མ་འཛོལ་བ་དགོས་ཏེ། འདི་ལྟར་སྡོམ་པ་གསུམ་པོའི་རྣམ་པར་ངེས་པ་ནི་ལུང་གི་ཆོས་ཀྱིས་བརྟག་ལ། དེ་གནས་འགྱུར་མི་འགྱུར་གང་ཟག་རང་རྒྱུད་ཀྱི་རྟོགས་པའི་ཆོས་ལ་རག་ལུས་པའི་ཕྱིར་རོ། །དོན་ལ་སྡོམ་པ་སུམ་ལྡན་དུ་ཁས་འཆེ་བའི་ལམ་ཞུགས་མོས་པས་དཔྱོད་པ་དང༌། ཆོས་ཉིད་ཇི་བཞིན་པ་ལ་བརྟུལ་ཞུགས་གྲུབ་པའི་རྒྱུད་གཉིས་རྫས་མ་འགལ་ཡང་མཚན་ཉིད་ཤིན་ཏུ་འགལ་བའི་ཁྱད་པར་ཉིད་གཙོ་བོར་བཟུང་ངོ༌། །དེ་ལ་སྤྱིར་དམ་པའི་ཆོས་ཀྱི་མཚན་ཉིད་ནི། བསོད་ནམས་དང༌། ལམ་དང༌། མྱ་ངན་ལས་འདས་པ་གསུམ་བརྗོད་བྱའི་དོན་ཉིད་དུ་ངེས་པར་བྱའོ། །དེ་ལའང་བརྗོད་བྱ་དང་རྗོད་བྱེད་ལ་ལྟོས་ནས་ལུང་དང་རྟོགས་པའི་དམ་ཆོས་གཉིས་སུ་གནས་པའི་ཚུལ་མཛོད་ལས། སྟོན་པའི་དམ་ཆོས་རྣམ་གཉིས་ནི། །ལུང་དང་རྟོགས་པའི་བདག་ཉིད་དོ། །ཞེས་པའི་ལུང་གི་ཆོས་ནི་རྟོགས་པའི་དོན་ལ་འཇུག་པར་བྱེད་པས་བརྗོད་པ་ཕུན་སུམ་ཚོགས་པ་མཐའ་དག་སྟེ། དེ་ལའང་འཇིག་རྟེན་དང་འཇིག་རྟེན་ལས་འདས་པའི་མངོན་
བརྗོད་གཉིས་ལས། སྔ་མ་ནི་བརྟག་པ་བརྒྱད་ལ་སོགས་པའི་གཏམ་འཁོར་བའི་ཆོས་དང་མཐུན་པ་དག་ལ་གྲགས་པའི་ཕྱིར། འདིར་ཡང་འཇིག་རྟེན་དང་མཐུན་པར་འཇུག་པའི་ཕྱིར་སྣོད་བཅུད་བརྟག་པ་ལ་སོགས་པའི་གཏམ་གྱི་རབ་བྱེད་ཐོག་མར་བཀོད་པ་ཡིན་ཏེ། ཤེས་རབ་བརྒྱ་པ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པར་ཐག་མི་རིང༌། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་ཡོད། །ཅེས་པ་ལྟར། དངོས་བསྟན་མངོནཔར་མཐོ་བའི་རྒྱུ་ལས་མ་སྨོས་ཀྱང༌། བརྒྱུད་ནས་རྟོགས་པའི་ཆོས་ལ་འཇུག་པའི་རྐང་སྟེགས་ཡིན་པའི་ཕྱིར་ལྷ་མིའི་ཐེག་པར་བཀྲི་བའི་སླད་དུའོ། །ཕྱི་མ་ནི་རྗོད་བྱེད་ཀྱི་སྒོ་ནས་གསུང་རབ་ཡན་ལག་བཅུ་གཉིས་སུ་བཞག་ཀྱང༌། གཉེན་པོའི་སྒོ་ནས་སྡེ་སྣོད་གསུམ་དུ་ངེས་པ་སྟེ། དེ་ཀུན་ཀྱང་ཆོས་ཉིད་རྟོགས་པར་བྱེད་པའི་རྒྱུ་མཐུན་ནམ། ཆོས་དབྱིངས་རྟོགས་པར་བྱེད་པའི་རྒྱུ་མཐུན་ལས་བྱུང་བས། མྱ་ངན་ལས་འདས་པའི་མདོ་ལས། ཆུ་བོ་ཆེན་པོ་རྒྱ་མཚོར་བབ། འབབ། གཞོལ་བ་དེ་བཞིན་དུ་ཆོས་ཐམས་ཅད་མྱ་ངན་ལས་འདས་པར་བབ། འབབ། གཞོལ་ཞེས་གསུངས་པ་ལྟར། དེ་བཞིན་གཤེགས་པའི་ཆོས་ཁམས་མཐའ་དག་ངེས་པའི་དོན་འབའ་ཞིག་ལ་འབབ་ཅིང་གཞོལ་བར་འགྱུར་བ་ལ་འབྲས་བུ་རྟོགས་པའི་དམ་
པའི་ཆོས་ཞེས་བྱའོ། །དེ་ལའང་གང་ཞིག་འདོད་ཆགས་དང་བྲལ་བར་གྱུར་པ་དང༌། གང་གིས་འདོད་ཆགས་དང་བྲལ་བར་བྱེད་པའི་དབྱེ་བ་གཉིས་སུ་གནས་པའི་ཕྱིར། མགོན་པོ་བྱམས་པས། གང་ཞིག་གང་གིས་ཆགསབྲལ་བ། །བདེན་གཉིས་མཚན་ཉིད་ཅན་དེ་དངོས། །ཆགས་བྲལ་ཉིད་ཀྱི་འགོག་པ་དང༌། ལམ་གྱི་བདེན་པ་དག་གིས་བསྡུས། །ཞེས་འབྲས་བུའི་རང་བཞིན་དུ་གནས་པ་འགོག་པའི་བདེན་པའི་ཆོས་དང༌། བྱ་བའི་རང་བཞིན་དུ་གནས་པ་ལམ་གྱི་བདེན་པའི་ཆོས་གཉིས་སུ་གནས་པའོ། །དེ་ལྟ་ནའང་ཆོས་ཀྱི་དོན་གཞུང་ལུགས་ཀྱིས་རྣམ་པར་ཕྱེ་བ་འདི་ནི་གདུལ་བྱ་བློ་དམན་པ་གྲུབ་མཐའ་ལ་མ་ཞུགས་པ། སྣང་བ་ལ་བདེན་འཛིན་འཐས་པ། ཆོས་ཀྱི་ཚིག་དོན་ལ་རྨོངས་པ། སྐྱེས་བུ་དམ་པས་མ་ཟིན་པ། ཤེས་རབ་དང་སྙིང་རྗེ་འཛོལ་བ། ལམ་གོལ་དམན་པར་འཁྱམས་པ། དབེན་པར་ལྟ་བ་ཉམས་པ། ལུང་དང་རིག་པ་སྤངས་པ། ཆོས་དང་གང་ཟག་འཛོལ་བ་དག་གིས་ཤེས་པར་མི་ནུས་པས། དེ་དག་ལ་གཏམ་རྒྱུད་དང༌། ཡུལ་སྐད་གོ་བདེར་སྦྱར་ནས་ལུང་རིག་གཏན་ཚིགས་ལ་མ་ལྟོས་པར་བཤད་པས་ཕན་པ་རྒྱ་ཆེན་པོ་འགྲུབ་པར་མཐོང་ནས་གཏམ་གྱི་ཚོགས་འདོད་རྒྱལ་རྣམས་ལེའུར་བསྔུས་པ་ཡིན་ཏེ། གང་ཞིག་ཐར་པའི་ལམ་དུ་འཇུག་ཅིང་
འཁོར་བ་སྤོང་པ་ཐམས་ཅད་སྟོན་པ་སངས་རྒྱས་ཀྱི་གྲུབ་པའི་མཐའ་ཡིན་པའི་ཕྱིར་རོ། །དེ་སྐད་དུ་རྒྱུད་བླ་མ་ལས་ཀྱང༌། ཁམས་གསུམ་དག་ན་ཉོན་མོངས་སྤོང་བྱེད་གསུང༌། །ཞི་བའི་ཡོན་ཏན་བརྗོད་པར་མཛད་པ་གང༌། །དེ་ནི་དྲང་སྲོང་གསུང་ཡིན་ལྡོག་པ་གཞན། །ཞེས་གསུངས་སོ། །གཏམ་ཚོགས་ལེའུ་དང་པོའོ།། །།
གཏམ་ཚོགས་ལེའུ་གཉིས་པ། ནམ་མཁའ་བརྟག་པ་གཟའ་དང་རྒྱུ་སྐར་གྱི་གཏམ་གོ་ལའི་རྣ་རྒྱན།
ནམ་མཁའ་བརྟག་པ་གཟའ་དང་རྒྱུ་སྐར་གྱི་གཏམ་གོ་ལའི་རྣ་རྒྱན་ཅེས་བྱ་བ། ན་མ་ཤྲཱི་ཀཱ་ལ་ཙཀྲ་ཡ། དྲང་སྲོང་ཐུབ་པ་ཉིན་བྱེད་ནི། །བསྟན་པ་ཀུན་གྱི་ངོ་བོ་ཉིད། །དཔལ་ལྡན་ཆ་བསགས་གྲོང་ཁྱེར་ན། །དམ་པ་དང་པོའི་སངས་རྒྱས་ཞེས། །ཟླ་བཟང་ལ་སོགས་ཆོས་རྒྱལ་བདུན། །རིགས་ལྡན་ཉེར་པཞི་ཕྱི་མའི་སྲས། །དྲག་པོ་འཁོར་ལོ་ཀླ་ཀློའི་གཤེད། །རྒྱལ་དང་དེ་སྲས་རྣམ་པར་འདུད། །ཕྱི་ནང་གཞན་གསུམ་རྣམ་གཞག་པ། །དཔལ་ལྡན་དུས་ཀྱི་འཁོར་ལོ་སྟེ། །ཕྱི་ལྟར་སྣོད་ཀྱི་འཇིག་རྟེན་དང། །བླ་འོག་ལྟར་གྱུར་གོ་ལ་ནི། །བརྟན་གཡོའི་རླུང་འདུས་འཁོར་ལོའི་དབྱིབས། །སྟེང་ནས་སྟེང་བརྩེགས་རྨོག་བརྩེགས་མ། །ཕྱིར་བསྐྱེད་སྟེང་བསྐྱེད་ལྕགས་སྒྲོག་མ། །གྲུ་ཆགས་མ་ཞེས་ཁྱིམ་དང་ནི། །ཁྱིམ་ཅན་ཞེས་གྲགས་ཐ་སྙད་གཉིས། །རི་རབ་བླ་ལ་གདུགས་ལྟར་ཕུབ། །དབུས་མཐོ་ལྷུན་པོ་ལ་ཉེ་ཞིང༌། །མཐའ་གཞོལ་མེ་ལ་ཉེ་བར་དམའ། །སྒང་གཤོངས་ཚུལ་གྱིས་གཡས་སྐོར་འགྲོ། །གཉའ་ཤིང་འཛིན་
རིའི་བླ་གབ་ལ། །དབང་བྱེད་གཟའ་དང་རྒྱུ་སྐར་གྱི། །གནས་དང་ལོངས་སྤྱོད་ལི་ཁ་ནིས། །རྗེས་དཔག་ཞེས་བྱའི་ཡན་ལག་ལ། །སྐར་མའི་རྩིས་ཞེས་ཡོངས་སུ་གྲགས། །དེ་ལ་བཤད་གཞི་ཁྱིམ་ཡིན་ཏེ། །ལུག་གླང་འཁྲིག་པ་ཀརྐ་ཊ། སེང་གེ་བུ་མོ་སྲང་སྡིག་གཞུ། །ཆུ་སྲིན་བུམ་པ་ཉ་རྣམས་ཀྱི། །ཁྱིམ་རེར་རྒྱུ་སྐར་རྐང་པ་དགུ། །རྒྱུ་སྐར་རེ་ལ་རྐང་པ་བཞི། །རྐང་རེར་ཆུ་ཚོད་བཅོ་ལྔ་རེས། །ཕྱེ་ནས་འདི་ལྟར་གཞལ་བྱ་སྟེ། །ཐ་སྐར་བྲ་ཉེའི་རྐང་བརྒྱད་དང༌། །སྨིན་དྲུག་བཞི་ཆ་ལུག་ཁྱིམ་མཐོ། །སྨིན་དྲུག་རྐང་གསུམ་སྣར་མ་དང། །མགོ་ཡི་ཕྱེད་ཆ་གླང་གི་ཁྱིམ། །མགོ་ཕྱེད་ལག་པ་རིལ་པོ་དང༌། ནབས་སོའི་རྐང་གསུམ་འཁྲིག་པའི་ཁྱིམ། །ནབས་སོའི་རྐང་གཅིག་རྒྱལ་དང་སྐག །གཉིས་བསྡོམས་ཀརྚའི་ཁྱིམ་སྟེ་དམའ། །མཆུ་གྲེ་གཉིས་དང་དབོའི་རྐང་གཅིག །སེང་གེའི་ཁྱིམ་མོ་དབོའི་གསུམ་དང༌། །མེ་བཞི་རིལ་པོ་ནག་པའི་ཕྱེད། །བུ་མོའི་ཁྱིམ་དུ་ཤེས་པར་བྱ། །ནག་པའི་ཕྱེད་དང་ས་རི་ཡོངས། །ས་གའི་རྐང་གསུམ་སྲང་ཁྱིམ་མཐོ། །ས་གའི་རྐང་གཅིག་ལྷ་མཚམས་སྣྲོན། །གཉིས་རྫོགས་སྡིག་པའི་ཁྱིམ་དུ་གྲགས། །སྣྲུབས་དང་ཆུ་སྟོད་གཉིས་བསྡོམས་བརྒྱད། །ཆུ་སྨད་རྐང་གཅིག་གཞུ་ཡི་ཁྱིམ། །ཆུ་སྨད་རྐང་གསུམ་གྲོ་བཞིན་ཡོངས། །མོན་གྲེའི་རྐང་གཉིས་ཆུ་སྲིན་དམའ། །
མོན་གྲེའི་ཕྱེད་དང་མོན་གྲུ་རིལ། །ཁྲུམས་སྟོད་རྐང་གསུམ་བུམ་པའི་ཁྱིམ། །ཁྲུམས་སྟོད་རྐང་གཅིག་ཁྲུམས་སྨད་དང༌། །ནམ་གྲུ་གཉིས་རྫོགས་ཉའི་ཁྱིམ་མོ། །གཟའ་རྣམས་སོ་སོའི་སྐྱེས་ཁྱིམ་ནི། །ཉི་མ་ཀརྐ་ཊ་ཡི་ཁྱིམ། །ནབས་སོའི་རྐང་པ་བཞི་བར་སྐྱེས། །ཟླ་བ་ལུག་ཁྱིམ་ཐ་སྐར་ཐོག །མིག་དམར་སེང་ཁྱིམ་མཆུ་ཕྱེད་སྐྱེས། །ལྷག་པ་སྡིག་ཁྱིམ་ལྷ་མཚམས་དབུས། །ཕུར་བུ་བུ་མོའི་མེ་བཞིའི་ཐོག །པ་སངས་འཁྲིག་ཁྱིམ་ནབས་སོའི་ཐོག །སྤེན་པ་གཞུ་ཁྱིམ་སྣྲུབས་ཐོགས་མ། །སྒྲ་གཅན་གདོང་པ་སྲང་ཁྱིམ་གྱི། །ནག་པའི་ཕྱེད་དང་མཇུག་མ་ནི། །ཉ་ཁྱིམ་ནམ་གྲུའི་མཐའ་ལ་སྐྱེས། །མཇུག་རིང་གཞུ་ཁྱིམ་ཆུ་སྨད་མཐའ། །བུམ་པར་དམའ་ཤོས་རྀ་ཥི་དང༌། །གླང་ལ་མཐོ་ཤོས་བརྟན་པར་སྐྱེས། །དེ་བཞིན་ཁྱིམ་གྱི་མཐོ་ཤོས་ནི། །སྨེ་བདུན་དམའ་བར་སྤེན་པ་གནས། །ཟླ་ལྷག་པ་སངས་མཇུག་རིང་བཞི། །དམར་ཕུར་སྤེན་པ་སྒྲ་གཅན་དྲག །ཞི་བ་དྲག་ཕྲད་གཡོན་ནས་འགྲོ། །ཅིག་ཤོས་དེ་ལས་ལྡོག་པ་སྟེ། །རང་རང་ནང་ཕྲད་ངེས་པ་མེད། །ཀུན་ལ་ཤར་ནུབ་ལྷོ་བྱང་གི །འགྲོས་བཞིའི་ཐ་སྙད་གྲགས་ན་ཡང༌། །ཉི་ཟླའི་རང་འགྲོས་ནུབ་མི་མངོན། །དེ་བཞིན་དུས་བཞི་གཡོན་སྐོར་དུ། །འཁོར་བར་འདོད་ལ་དགག་བསྒྲུབ་དང༌། །དབྱར་དགུན་སྟོན་དཔྱིད་དུས་ཚིགས་
བཞིའི། །སྔ་དྲོ་ཉིན་གུང་ཕྱི་དྲོ་ལ། །ཉི་མ་རིང་ཐུང་ཡོད་པ་སོགས། །མངོན་སུམ་ཉིད་དེ་ཞལ་ལུང་དཔྱད། །དེ་ལ་ལོ་ཡི་དབྱེ་བ་ནི། །ནད་མེད་སྐྱེས་བུ་དར་མ་ཡི། །འབྱུང་འཇུག་གནས་པའི་དབུགས་གཅིག་ལ། །ཁུག་པ་ཞེས་གྲགས་དྲུག་ལ་སྲང༌། །ཆུ་སྲང་དྲུག་ཅུར་ཆུ་ཚོད་དེ། །ཆུ་ཚོད་དྲུག་ཅུར་ཉིན་ཞག་གཅིག །ཞག་རེར་དབུགས་གྲངས་ཉི་ཁྲི་དང༌། །ཆིག་སྟོང་དྲུག་བརྒྱ་འགྱུ་བ་ཡིན། །དེ་ལྟའི་ཞག་ནི་སུམ་ཅུར་ཟླ། །ཟླ་བ་བཅུ་གཉིས་ལོར་བཤད་པ། །རགས་པའི་རྣམ་གཞག་ཡོངས་གྲགས་ཏེ། །ཞིབ་པར་རྒྱུ་སྐར་ཆུ་ཚོད་ནི། །སྟོང་དང་དྲུག་བརྒྱ་ཉི་ཤུའི་གྲངས། །ཉི་མས་ཡོངས་སུ་འཁོར་བ་ནི། །ལོ་གཅིག་ཡིན་ཏེ་ཆོས་ཞག་གིས། །གཞལ་ན་ཞག་གྲངས་སུམ་བརྒྱ་དང༌། །དོན་གཅིག་ཆུ་ཚོད་རིག་བྱེད་དེ། །ཆུ་སྲང་དུས་མེ་དབུགས་མདའ་དང༌། །འདོད་ཆ་ཐུབ་པས་འཁོར་བ་ཡིན། །དེ་ཡང་ཉིན་ཞག་གིས་གཞལ་ན། །ཞག་གྲངས་སུམ་བརྒྱ་རེ་ལྔ་དང༌། །ཆུ་ཚོད་མི་བདག་ཆུ་སྲང་ཡིད། །དབུགས་གཟུགས་འདོད་ཆ་ཉི་མ་དང༌། །རི་མཁའ་རི་ཆ་གཟུགས་ཉི་མས། །ཁྱིམ་ཞག་སུམ་བརྒྱ་དྲུག་ཅུ་འཁོར། །དེ་ནས་ལོ་འགོ་འཛིན་ཚུལ་ནི། །མདོ་རྒྱུད་མངོན་པ་ནག་རྩིས་སོགས། །བཞེད་ཚུལ་མང་ཡང་སྐབས་འདིར་ནི། །དཔལ་ལྡན་འབྲས་སྤུངས་
མཆོད་རྟེན་ཆེར། །ནག་ཉར་དུས་འཁོར་གསུངས་པ་དང༌། །གོ་ལ་གཡས་སྐོར་ལྷོ་གླིང་འདིར། །ཐ་སྐར་ཐོག་མར་འཆར་བའི་ཕྱིར། །ཁྱིམ་ལ་ལྟོས་ནའང་ལུག་གི་ཁྱིམ། །ནག་པ་ནས་བཟུང་ལོ་འགོ་འཛིན། །དུས་བཞི་ཆེན་པོ་རྫོགས་པའི་ཚེ། །ཟད་པ་མེ་སྟག་དབོ་ཟླའི་མཐར། །སྟོང་པར་ཞུགས་པ་ལ་ལྟོས་ནས། །ལོ་ཡི་ཐོག་མར་རབ་བྱུང་བཞག །སྟོང་འགྲེལ་ལས་ཀྱང་དེ་སྐད་དུ། །རབ་བྱུང་རྣམ་བྱུང་དཀར་པོ་དང༌། །རབ་མྱོས་སྐྱེས་བདག་ཨངྒི་ར། །དཔལ་གདོང་དངོས་པོ་ན་ཚོད་ལྡན། །འཛིན་བྱེད་དབང་ཕྱུག་འབྲུ་མང་པོ། །མྱོས་ལྡན་རྣམ་གནོན་ཁྱུ་མཆོག་དང༌། །སྣ་ཚོགས་ཉི་མ་ཉི་སྒྲོལ་བྱེད། །ས་སྐྱོང་མི་ཟད་ཐམས་ཅད་འདུལ། །ཀུན་འཛིན་འགལ་བ་རྣམ་འགྱུར་དང༌། །བོང་བུ་དགའ་བ་རྣམ་རྒྱལ་ཉིད། །རྒྱལ་བ་མྱོས་བྱེད་གདོང་ངན་དང༌། །གསེར་འཕྱང་རྣམ་འཕྱང་སྒྱུར་བྱེད་དང༌། །ཀུན་ལྡན་འཕར་བ་དགེ་བྱེད་དང༌། །མཛེས་བྱེད་ཁྲོ་མོ་སྣ་ཚོགས་དབྱིག །ཟིལ་གནོན་སྤྲེའུ་ཕུར་བུ་དང༌། །ཞི་བ་ཐུན་མོང་འགལ་བྱེད་དང༌། །ཡོངས་འཛིན་བག་ཡོད་ཀུན་དགའ་དང༌། །སྲིན་པོ་མེ་དང་དམར་སེར་ཅན། །དུས་ཀྱི་ཕོ་ཉ་དོན་གྲུབ་དྲག །བློ་ངན་རྔ་ཆེན་ཁྲག་སྐྱུག་པ། །མིག་དམར་ཁྲོ་བོ་ཟད་པའོ། །རྒྱ་ནག་ལུགས་ལ་བྱི་བ་ནས། །ཕོ་ལོ་དྲུག་དང་མོ་ལོ་དྲུག །བསྣོལ་མར་སྤེལ་བའི་
ལོ་བཅུ་གཉིས། །འབྱུང་བའི་ཁམས་ལྔས་ཕྱེ་བ་ལས། །དྲུག་ཅུ་སྐོར་ཞེས་གྲགས་པ་ཡི། །ལོ་འགོར་དཔྱིད་ར་སྟག་མཐུན་ཀྱང༌། །སྟག་གི་ངོས་འཛིན་མི་མཐུན་ཏེ། །གསོ་དཔྱད་ལུགས་ལ་མཆུ་ཟླ་དང༌། །ཧོར་གྱིས་རྒྱལ་ཟླར་ངོས་འཛིན་ཡང༌། །ད་ལྟ་ཡོངས་སུ་གྲགས་པ་ལ། །སྨལ་པོའི་ཟླ་བ་བཅུ་གཅིག་པ། །དཔྱིད་ར་སྟག་གི་ཚེས་གཅིག་སྟག །ནམ་ལངས་ཡོས་ནས་ལོ་འགོ་བཟུང༌། །ས་བདག་ཐམས་ཅད་དེ་ཡིས་བརྟག །གཞན་དུ་དོན་ལ་འགལ་མི་འགྱུར། །ལོ་ཡི་མིང་གི་ཐ་སྙད་ལ། །བགྲང་བྱ་འདོར་བྱེད་དུས་ཚིགས་དང༌། །འགྲོ་འོང་ཟླ་བའི་ཕྲེང་བ་དང༌། །ཟླ་བའི་ཕུང་པོ་དུས་ཀྱི་ཆ། །ཞེས་དང་ཟླ་བའི་ཐ་སྙད་ལ། །ལོ་ཡི་ཡན་ལག་ལོ་ཡི་མཛོད། །དབུགས་སྐྱེས་ཞག་གི་ཕུང་པོར་གྲགས། །ལོ་ཚོགས་བསགས་པ་བསྐལ་པ་སྟེ། །རྫོགས་ལྡན་སུམ་ལྡན་ཉིས་ལྡན་དང༌། །རྩོད་ལྡན་ཞེས་གྲགས་རིམ་པས་དམན། །དེ་བཞིན་ལོ་ཟླའི་ལེགས་སྦྱར་དང༌། །རྒྱ་སྐད་དགའ་བཟང་རྒྱལ་སྟོང་རྫོགས། །དབྱངས་དང་གསལ་བྱེད་ཚེས་ཀྱི་ལྷ། །བྱིས་གཞོན་རྒན་པོ་ལང་ཚོ་སྨིན། །འབྱུང་བ་ལྔ་དང་འདོད་ཡོན་ལྔ། །རྟེན་འབྲེལ་བཅུ་གཉིས་འབྱུང་ལྡོག་སོགས། །བཻཌཱུརྻ་ལ་ཁ་དོག་གིས། །ཁྱད་པར་བྱས་པའི་དཔེས་མཚོན་པའི། །གཏན་ལིས་
གསལ་བ་འདིར་ཡང་དྲན། །རེས་ཀྱི་གཟའ་ནི་རྣམ་པ་བདུན། །ཉི་ཟླ་དམར་ལྷག་ཕུར་སངས་སྤེན། །དེ་དག་མིང་གི་ཐ་སྙད་ནི། །མང་དུ་མཆིས་ཀྱང་མདོར་བསྡུ་ན། །ནམ་མཁའི་ནོར་བུ་ཉིན་མོར་བྱེད། །པདྨའི་གཉེན་དང་ཀུནྡའི་དགྲ། །སྣ་ཚོགས་ཤིང་རྟ་ཚ་ཟེར་ཅན། །མུན་པའི་དགྲ་བོ་མེ་སྦྱིན་སྐྱེས། །བདུན་གྱི་བདུན་པ་ཉི་མའི་མིང༌། །དྲག་པོའི་གཙུག་རྒྱན་རྒྱ་མཚོ་སྐྱེས། །རྡུལ་གྱི་ཐིག་ལེར་རི་དྭགས་ཅན། །རྒྱུ་སྐར་མུ་ཁྱུད་ཁ་བའི་འོད། །ཆགས་བྱེད་འོད་དཀར་ག་པུར་འཛིན། །ཤར་གྱི་ཐིག་ལེ་ཟླ་བའི་མིང༌། །བཀྲ་ཤིས་ས་སྐྱེས་ཡན་ལག་དམར། །འོད་ཟེར་དགུ་པ་པ་སངས་བུ། །རོལ་མཚོ་རྩིབས་ལྡན་དམག་དཔོན་མིང༌། །ཟླ་སྐྱེས་རྒྱལ་བུ་གསལ་ལྡན་དང༌། །སྔོ་སངས་མཁས་པ་ཚིམ་བྱེད་སྐྱེས། །མཛའ་ལྷའི་གྲོགས་པོ་ལུས་གཅིག་པ། །ལྷ་མཚམས་སྐྱེས་རྣམས་ལྷག་པའི་མིང༌། །བློ་ལྡན་སྒྲ་མཁས་དཔྱོད་ལྡན་དང༌། །འཚོ་བྱེད་འབར་ལྡན་མཐོ་རིས་ཐོབ། །རིག་བྱེད་བདག་པོ་མེ་བཞི་སྐྱེས། །ལྷ་ཡི་བླ་མ་ཕུར་བུའི་མིང༌། །ངན་ལས་རྒྱལ་དང་ལྷ་མིན་བདག །བཅུ་དྲུག་འོད་ལྡན་དཀར་པོ་དང༌། །ལྷ་མིན་བླ་མ་སྙན་ངག་མཁན། །ཁུ་བ་སྦྱིན་བྱེད་མཆུ་ལས་སྐྱེས། །དཀར་པོ་མཆུ་སྐྱེས་པ་སངས་མིང༌། །དལ་བར་འགྲོ་དང་ཉི་མའི་བུ། །གཤིན་
རྗེའི་བདག་པོ་མི་བཟད་མིག །འཁྱོག་འགྲོ་གོས་སྔོན་འོད་ཟེར་བདུན། །ཚངས་སྐྱེས་རྗེས་སྐྱེས་སྤེན་པའི་མིང༌། །དེ་བཞིན་སྒྲ་གཅན་གདོང་པ་ལ། །མཐོ་རིས་སྣང་བྱེད་བསོད་ནམས་ལྡན། །མུན་པ་ཅན་དང་ཟླ་བའི་དགྲ། །མགོ་ཟླུམ་སེང་གེ་མོ་ཡི་བུ། །ལམ་ནག་གཟའ་ཡི་རྣ་བ་དང༌། །ཤ་ཟ་འཕར་འགྲོ་སྤྲིན་ལས་རྒྱལ། །སྲིད་གསུམ་རྣམ་རྒྱལ་བྲ་ཉེ་སྐྱེས། །མཇུག་མར་དུས་མེ་སྤྱང་ཀི་དང༌། །སྣ་ཚོགས་མདོག་ཅན་ཉི་ཟླ་ཟ། །མེ་དང་མིག་སྨན་མདོག་ཏུ་གྲགས། །ཀེ་ཏུ་ཕོད་ཅན་གཙུག་ཕུད་ཅན། །སྐག་སྐྱེས་སྦྲུལ་ཅན་སྐྲ་གཉིས་པ། །དུ་བ་མཇུག་རིང་མིང་དུ་གྲགས། །སྒྲོལ་བྱེད་འཕུར་བྱེད་སྐར་མའི་མིང༌། །ཕལ་པའི་སྐར་མ་དུང་ཕྱུར་གཉིས། །བྱེ་བ་བརྒྱད་དང་ས་ཡ་ལྔ། །ཡོད་ཀྱང་ལོངས་སྤྱོད་གཏན་ཕེབས་པ། །རྒྱུ་བའི་སྐར་མ་ཉི་ཤུ་བརྒྱད། །ཐ་སྐར་བྲ་ཉེ་སྨིན་དྲུག་སྣར། །མགོ་ལག་ནབས་སོ་རྒྱལ་དང་སྐག །མཆུ་གྲེ་དབོ་དང་མེ་བཞི་ནག །ས་རི་ས་ག་ལྷ་མཚམས་སྣྲོན། །སྣུབས་དང་ཆུ་སྟོད་ཆུ་སྨད་དང༌། །གྲོ་བཞིན་བྱི་བཞིན་སྐར་ཁོངས་གཅིག །མོན་གྲེ་མོན་གྲུ་ཁྲུམས་སྟོད་སྨད། །ནམ་གྲུ་ཀུན་ལ་སྐར་ཆུང་རེ། །རང་རང་མིང་གི་རྣམ་གྲངས་དང༌། །དབྱིབས་དང་རྟག་པའི་ལོངས་སྤྱོད་ཟས། །རྒྱུད་གྲངས་
རིགས་ཀྱི་ལྷ་དང་དྲུག །གརྒའི་མདོ་སོགས་བརྟག་པར་བྱ། །གཟའ་སྐར་ཕྲད་པའི་འཕྲོད་ཆེན་ནི། །ཀུན་དགའ་དུས་ཀྱི་དབྱིག་པ་དང༌། །དུལ་བ་སྐྱེ་དགུ་གཞོན་བྱ་རོག །རྒྱལ་མཚན་དཔལ་བེའུ་རྡོ་རྗེ་ཐོ། །གདུགས་གྲོགས་ཡིད་འདོད་མགལ་མེ་དང༌། །རྩ་བཏོན་འཆི་བདག་མདའ་གྲུབ་པ། །མདུང་དང་བདུད་རྩི་གཏུན་ཤིང་དང༌། །གླང་པོ་རྟག་མྱོས་ཟད་གཡོ་བརྟན། །འཕེལ་བ་རྣམས་སོ་སྦྱོར་བའི་མིང༌། །སེལ་བ་མཛའ་བོ་ཚེ་ལྡན་དང༌། །བསྐལ་བཟང་བཟང་པོ་ཤིན་ཏུ་སྐྲངས། །ལས་བཟང་འཛིན་པ་གཟེར་འབྲས་འཕེལ། །ངེས་པ་ཀུན་འཇོམས་དགའ་བ་དང༌། །རྡོ་རྗེ་དངོས་གྲུབ་ཀུན་ཏུ་བརྡུང༌། །དཔའ་བོ་ཡོངས་བསྣུན་ཞི་གྲུབ་པ། །བསྒྲུབ་བྱ་དགེ་བ་དཀར་པོ་དང༌། །ཚངས་པ་དབང་པོ་འཁོན་འཛིན་ནོ། །བྱེད་པ་བཅུ་གཅིག་ཞེས་གྲགས་པ། །གདབ་པ་བྱིས་པ་རིག་པ་ཅན། །ཏིལ་བརྡུང་ཁྱིམ་སྐྱེས་ཚོང་བིཥྚི། །ཚེས་གཅིག་ཕྱི་དྲོའི་ཆ་ནས་བཟུང༌། །ཉེར་དགུའི་སྔ་ཆར་འཁོར་བའོ། །ཤངྐུ་དང་ནི་རྐང་བཞི་ཀླུ། །མི་སྡུག་བཞི་པོ་ཉེར་དགུ་ཡི། །ཕྱི་ཆ་ནས་བཟུང་ཚེས་གཅིག་བར། །ཚེས་གྲངས་ཕྱེད་ལ་བདག་པའོ། །གྲངས་ཀྱི་ཐ་སྙད་འདི་ལྟ་སྟེ། །གཅིག་བཅུ་བརྒྱ་སྟོང་ཁྲི་འབུམ་དང༌། །ས་ཡ་བྱེ་བ་དུང་ཕྱུར་རྣམས། །
རྐྱང་པའི་གྲངས་ཡིན་ཐེར་འབུམ་སོགས། །གྲངས་མེད་མཐས་ཐུག་གཞན་ལས་ཤེས། །འདིར་ནི་རི་མོའི་སྦྱོར་བ་ལ། །མཁོ་བའི་གྲངས་ཀྱི་མངོན་བརྗོད་བཤད། །གཟུགས་དང་ཟླ་བ་འོད་དཀར་ཅན། །བསེ་རུ་རི་བོང་གཅིག་གི་མིང༌། །ཐབས་ཤེས་མཚེ་མ་འཁྲིག་བགྲོད་དང༌། །ལག་མིག་ཟུང་རྣམས་གཉིས་ཀྱི་མིང༌། །འཇིག་རྟེན་རྩེ་མོ་ཚ་བ་མེ། །སྲིད་པ་ཡོན་ཏན་གསུམ་གྱི་མིང༌། །ཆུ་བོ་རིག་བྱེད་རྒྱ་མཚོ་དང༌། །སྡེ་པ་ཆུ་གཏེར་བདུད་རྣམས་བཞི། །དབང་པོ་ཉེར་སྤྱོད་འདོད་ཡོན་དང༌། །འབྱུང་བ་མདའ་རྣམས་ལྔ་ཡི་མིང༌། །དུས་མཚམས་རོ་དང་བྲོ་བ་དང༌། །རྒྱན་དང་བཟང་པོ་དྲུག་གི་མིང༌། །ཐུབ་པ་རིན་ཆེན་ས་འཛིན་དང༌། །རྟ་བདུན་རི་བོ་དྲང་སྲོང་བདུན། །ལྷ་ཀླུ་བཀྲ་ཤིས་གདེངས་ཅན་ནོར། །ལྟོ་འགྲོ་སྲིད་པ་བརྒྱད་ཀྱི་མིང༌། །སྲིན་པོ་བུ་ག་རྩ་གཏེར་དགུ། །སྟོབས་དང་འབྱོར་པ་ཕྱོགས་འཇུག་པ། །ཁྲོ་བོ་སོར་མོ་རྣམས་ནི་བཅུ། །དྲག་པོ་དབང་ཕྱུག་བདེ་བྱེད་དང༌། །བདེ་འབྱུང་བྱེད་པ་བཅུ་གཅིག་མིང༌། །རྟེན་འབྲེལ་ཉི་མ་ཁྱིམ་བཅུ་གཉིས། །ལུས་མེད་མྱོས་བྱེད་འདོད་པ་དང༌། །སྣ་ཚོགས་གདུགས་རིམ་བཅུ་གསུམ་མོ། །ཤེད་བུ་མ་ནུ་སྲིད་པ་དང༌། །ཡིད་རྣམས་བཅུ་བཞིའི་མིང་དུ་གྲགས། །ཚེས་དང་ཉིན་ཞག་བཅོ་ལྔའི་མིང༌། །
རྒྱལ་པོ་མི་བདག་བཅུ་དྲུག་གོ །སྐྱོན་དང་ཉེས་པ་ཁམས་བཅོ་བརྒྱད། །ཡུལ་དང་རྒྱལ་བ་ཉེར་བཞིའོ། །དེ་ཉིད་ཅེས་པ་ཉི་ཤུ་ལྔ། །འཁོར་ལོ་སྐར་མ་ཉེར་བདུན་མིང༌། །སོ་དང་གཉིས་སྐྱེས་སུམ་ཅུ་གཉིས། །དབྱུ་གུ་ཞེས་བྱུང་དྲུག་ཅུ་ཐམ། །སྟོང་པ་ནམ་མཁའ་ཐིག་ལེའོ། །རྣམ་དག་གྲུབ་པའི་གཞུང་ལུགས་ལ། །ཇི་ལྟ་བ་ནི་སྟོང་པ་ཉིད། །ཐིག་ལེར་མཚོན་པས་གྲངས་ངེས་ཀྱི། །གྲལ་འགོར་ཐིག་ལེ་འབྱུང་མི་སྲིད། །ཇི་སྙེད་རིག་པས་གཞལ་ནུས་པས། །གྲངས་མཐའ་ཐིག་ལེར་སྟོང་པ་ནི། །འཁྲུལ་པ་མེད་པའི་རྟགས་སུ་གཟུང༌། །ཤེས་བྱར་སྲིད་དོ་ཅོག་གཞལ་ཡང༌། །དགུ་མཐའི་ནང་དུ་མ་འདུས་མེད། །དེ་ཕྱིར་ཐོག་མར་འདི་ཟུང་ཞིག །དགུ་གཅིག་གཅིག་དགུ་དགུ་ཉིད་དེ། །གཅིག་བསྒྱུར་འཕེལ་འགྲིབ་མེད་པའི་ཕྱིར། །དགུ་གཉིས་གཉིས་དགུ་བཅོ་བརྒྱད་ལ། །དགུ་གསུམ་གསུམ་དགུ་ཉི་ཤུ་བདུན། །དགུ་བཞི་བཞི་དགུ་སུམ་ཅུ་དྲུག །དགུ་ལྔ་ལྔ་དགུ་བཞི་བཅུ་ལྔ། །དགུ་དྲུག་དྲུག་དགུ་ལྔ་བཅུ་བཞི། །དུག་བདུད་བདུན་དགུ་དྲུག་ཅུ་གསུམ། །དགུ་བརྒྱད་བརྒྱད་དགུ་བདུན་ཅུ་གཉིས། །དགུ་དགུ་བརྒྱད་ཅུ་རྩ་གཅིག་གོ །ཚིག་དོན་དེ་ཡིས་འགྲེ་བྱས་ནས། །ཨ་ངྐིའི་གྲངས་ལ་འདི་ལྟར་བརྟག །བརྒྱད། ༨༡༡༨༨ ༨༢༢༨༡༦ ༨༣༣༨༢༤ ༨༤༤༨༣༢ ༨༥༥༨༤༠ ༨༦༦༨༤༨ ༨༧༧༨༥༦
༨༨༦༤ བདུན། ༧༡༡༧༧ ༧༢༢༧༡༤ ༧༣༣༧༢༡ ༧༤༤༧༢༨ ༧༥༥༧༣༥ ༧༦༦༧༤༢ ༧༧༤༩ དྲུག ༦༡༡༦༦ ༦༢༢༦༡༢ ༦༣༣༦༡༨ ༦༤༤༦༢༤ ༦༥༥༦༣༠ ༦༦༣༦ ལྔ། ༥༡༡༥༥ ༥༢༢༥༡༠ ༥༣༣༥༡༥ ༥༤༤༥༢༠ ༥༥༢༥ བཞི། ༤༡༡༤༤ ༤༢༢༤༨ ༤༣༣༤༡༢ ༤༤༡༦ གསུམ། ༣༡༡༣༣ ༣༢༢༣༦ ༣༣༩ གཉིས། ༢༡༡༢༢ ༢༢༤ གཅིག ༡༡༡ འབྲི་དང་བགྲང་བ་གཡས་ནས་རིམ། །བསྒྱུར་དང་བགོད་པ་གཡོན་ནས་བརྩམ། །བསྒྱུར་བའི་མངོན་བརྗོད་བསྣུན་དང་སྤེལ། །བསྒྲེས་དང་གསིལ་བ་ཞེས་ཀྱང་གྲགས། །བགོད་ལ་ཕྱེ་དང་བསལ་བ་དང༌། །བཅང་པ་ཞེས་གྲགས་དོན་གཅིག་གོ །སྒྱུར་བྱེད་གྲངས་མཐར་ཐིག་ཡོད་ན། །བསྒྱུར་བྱའི་གྲལ་གྱི་མཐའ་ལ་བཀོད། །བསྒྱུར་བྱ་སྒྱུར་བྱེད་གང་སྟོངས་ཀྱང༌། །འདྲ་སྟེ་ཆོ་གའི་རི་མོ་དབྱི། །འོན་ཀྱང་བགོད་བྱེད་དབུས་མཐའི་ཐིག །རང་གནས་འཛིན་པའི་དགོས་དབང་ཅན། །བགོད་ལ་རྐྱང་བགོད་སྦྲག་བགོད་གཉིས། །རྐྱང་བགོད་ཇི་ལྟར་ཐོབ་པ་དང༌། །སྦྲག་བགོད་འོག་མར་འདེངས་ཚོད་ཁྱེར། །གང་ཐོབ་དེ་ནི་ནོར་ཡིན་ཏེ། །རྙེད་དང་ཐོབ་པ་ཞེས་སུའང་གྲགས། །མ་ཐོབ་ནོར་སྐལ་ཐིག་ལེ་བྲི། །བགོད་དུས་རང་རང་མགོ་ཐོག་ནས། །མ་ལྡང་གོང་ནས་འབབ་དགོས་ན། །རིམ་ཕབ་རང་ཐོབ་གང་ཡིན་
ཁྱེར། །འཕྲོ་རྣམས་རང་གནས་མ་འཆོལ་གཅེས། །གཞན་ཡང་ཆོ་གའི་གནས་སྐབས་སུ། །བསྣོན་འབྲི་བྱེད་པའི་ཐ་སྙད་ལ། །བསྲེ་བ་སྟེར་བ་སྦྱིན་བསྣན་དང༌། །འབུལ་དང་མཁན་པ་བསྣོན་པའི་དོན། །འཕྲོག་དང་དབྲི་དང་འབྲིད་དང་དོར། །ཞུ་དང་ཕྲལ་དམན་སྦྱང་བའི་དོན། །དེ་བཞིན་དབྱི་དང་ཕྱིས་པ་བསུབས། །དོར་བའང་མཐུན་ཏེ་ཕྱི་མ་འདིར། །འཁྲུལ་པ་བསྐྱེད་པའི་གནས་ཡོད་སྲིད། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། སྤྱི་ཆིངས་བཤད་པའི་སརྒ་སྟེ་དང་པོའོ།། །།བསྐལ་པ་གང་ཞིག་སྒྲོན་མེ་རུ། །འགྱུར་བའི་ཁྱད་པར་སྟོན་པ་དང༌། །བསྟན་པ་བྱོན་ལ་རག་ལུས་ཕྱིར། །བསྟན་རྩིས་རྣམ་གཞག་མདོ་ཙམ་བསྟན། །སྤྱིར་ནི་མདོ་དང་རྒྱུད་ལུགས་གཉིས། །དང་པོའི་ཕྱོགས་ལ་བསྐལ་བཟང་དང༌། །འདུལ་ལུང་ཕྲན་ཚེགས་ལོ་སྟོང་གནས། །སྙིང་རྗེ་པདྨ་དཀར་པོ་དང༌། །ཟླ་བའི་སྙིང་པོས་ཞུས་པའི་མདོར། །ཉིས་སྟོང་རྡོ་རྗེ་གཅོད་པའི་འགྲེལ། །ལྔ་བརྒྱ་ཕྲག་ལྔར་བཤད་པ་དང༌། །འབུམ་ཊཱིཀ་ལས་ནི་ལྔ་སྟོང་གསུངས། །དེ་ལ་དང་པོའི་དགོས་པ་ནི། །གྲོལ་བ་ཐོབ་པ་ཤས་ཆེར་དགོངས། །གཉིས་པ་འབྲས་བུ་ལ་ཞུགས་དང༌། །ལུང་ལ་སློབ་པའི་དབང་དུ་མཛད། །གསུམ་པ་ཕལ་ཆེར་ལྟ་བ་དང༌། །
བསྒྲུབ་པ་མཐུན་དགོངས་བླ་མ་བཞེད། །འདིར་ནི་འབུམ་ཊཱིཀ་དབྱིག་གཉེན་ཞབས། །མཐུན་པའི་ལྔ་སྟོང་ཕྱེད་ཕྱེད་དུ། །བཅད་པའི་ལྔ་བརྒྱ་ཕྲག་བཅུ་ལས། །སྐྱེ་དགུའི་བདག་མོ་ལ་སོགས་པའི། །བུད་མེད་རབ་ཏུ་བྱུང་བ་ཡིས། །ལྔ་བརྒྱ་ཐ་མ་རྟགས་ཙམ་འཛིན། །དེ་ལ་དང་པོ་འབྲས་བུའི་དུས། །ལྔ་བརྒྱ་ཕྲག་གསུམ་དང་པོ་ལ། །དགྲ་བཅོམ་པ་དང་ཕྱིར་མི་འོང༌། །མང་ལ་ཕྱིར་འོང་དག་ཀྱང་ཡོད། །གཉིས་པ་ཕྱིར་མི་འོང་མང་ཞིང༌། །ཕྱིར་འོང་དག་ཀྱང་ཡོད་པའོ། །གསུམ་པ་རྒྱུན་ཞུགས་མང་གཞན་ཉུང༌། །ལུང་གི་དུས་གསུམ་དང་པོ་ལ། །མངོན་པ་གཉིས་པར་མདོ་སྡེ་དང༌། །གསུམ་པར་འདུལ་བ་འཛིན་པ་མང༌། །སྒྲུབ་པའི་གསུམ་ནི་དང་པོ་ལ། །ཚུལ་ཁྲིམས་གཉིས་པར་སེམས་དང་ནི། །གསུམ་པར་ཤེས་རབ་གཙོ་བོར་བསྒྲུབ། །གཞན་དུ་ལུང་དང་སྒྲུབ་པ་གཉིས། །སྔ་ཕྱི་བརྗེ་བ་གྲགས་ཆེ་ཡང༌། །སྒྲུབ་དུས་སྐྱོ་ཤས་ཆེ་ལྡན་ཞིང༌། །ཐར་པར་འདུན་པ་ཙམ་མང་བས། །ལུགས་འདི་འཐད་པར་ཀུན་མཁྱེན་བཞེད། །དེ་ཡང་སྟོན་པ་ལྷུམས་ཞུགས་ལོ། །མེ་མོ་ཡོས་ལ་ངོས་བཟུང་ནས། །མེ་མོ་ཕག་ལ་མྱང་འདས་ཚུལ། །མངའ་རིས་རྒྱལ་པོ་ཡོན་མཆོད་ཀྱི། །འདུན་སར་བཤེས་གཉེན་ཀུན་འཛོམ་ནས། །བརྩིས་པའི་རྣམ་གཞག་གཞན་
པ་དང༌། །བྷཾ་ག་ལ་ཡི་པཎྜི་ཏས། །བྱི་ལོ་དབྱར་འབྲིང་ལྷུམས་ཞུགས་ནས། །སྤྲེའུ་ལོ་སྟོན་འབྲིང་ཚེས་བཅོ་ལྔར། །མྱང་འདས་བཤད་པའི་ལུགས་ལ་སོགས། །རྣམ་གྲངས་ཤིན་ཏུ་མི་མཐུན་ཏེ། །ལུགས་འདིར་རྟོག་དཔྱོད་ཞུགས་པ་ཡི། །དཔྱོད་ལྡན་མང་པོས་དུས་གཟེར་གྱི། །གནས་དང་གསུང་རབ་མདོ་བསྟུན་པ། །གང་འདི་ཡིན་ནོ་གྲགས་པའི་ཕྱིར། །ཆུ་མཚོ་འཁོར་ལོའི་ལོ་ཚོགས་ལ༣༧༤༤། །རབ་འདོད་ནང་གི་མཛེས་བྱེད་སོགས། །འདུས་ལོ་བསྲེས་པའི་གྲངས་ངེས་དེ། །དོན་གྲུབ་ས་ལུགས་ཆུ་སྟོད་ཟླའི། །བཅོ་ལྔ་ལྷུམས་ཞུགས་ཕྱིན་གྱི་ལོ། །དེ་ལ་གཟུགས་ཕྲི་ལྕགས་སྤྲེའུ་ལ། །ལུམྦིའི་ཚལ་དུ་བདག་ཅག་གི །སྟོན་པ་མཆོག་གི་སྤྲུལ་སྐུར་༣༧༤༣བཞེངས། །ཀླུ་ལག་གིས་དམན་ས་བྱི་ལ། །རབ་བྱུང་དྲང་སྲོང་རྒྱལ་མཚན་བཟུང་༣༧༡༥། །དུས་ཕྲི་རྒྱལ་བ་ཤིང་ཕོ་རྟར། །རྡོ་རྗེའི་གདན་དུ་མངོན་བྱང་ཆུབ༣༧༠༩། །སྒྲ་གཅན་ཟིན་དང་ཀུན་དགའ་བོའང་བཙས། །གོང་ནས་བདུན་ཕྲག་བདུན་གྱི་མཐའ། །ཆུ་སྟོང་ཟླ་བའི་ཚེས་བཞི་ལ། །ཝཱ་རཱ་ཎ་སཱིར་ལྔ་སྡེ་ལ། །བདེན་བཞིའི་ཆོས་འཁོར་བསྐོར་བའི་ལོ༣༧༠༩། །གཟུགས་མིག་ཕྲི་བའི་ཤིང་ཡོས་ལ། །མུ་སྟེགས་བྱེད་ཀྱི་སྟོན་པ་དྲུག །ཆོ་འཕྲུལ་ཆེན་པོའི་མཛད་པས་༢༦༨༨བཏུལ། །དེ་ལ་དེ་ཉིད་ཕྲི་བ་ཡི། །དཔའ་བོ་ལྕགས་འབྲུག་ནག་པའི་ཉར། །དཔལ་
ལྡན་འབྲས་སྤུངས་མཆོད་རྟེན་ཆེར། །དུས་འཁོར་གསུངས་དང་ལོ་དེ་ཡི། །ས་གའི་ཉ་ཡི་གུང་ཐུན་ལ། །རྩྭ་མཆོག་གྲོང་དུ་མྱ་ངན་༣༦༦༣འདས། །མཆོག་ཟུང་དགྲ་བཅོམ་མང་པོའང་ཞི། །གནས་ཚད་འདས་ལོའི་ཐོག་མར་བཟུང༌། །གཟུགས་དམན་ཁྱུ་མཆོག་ལྕགས་སྦྲུལ་ལ། །མ་སྐྱེས་དགྲ་ཡིས་ཡོན་སྦྱར་ནས། །བཀའ་བསྡུ་དང་པོར་བྱས་པ་དང༌། །ཆོས་རྒྱལ་ཟླ་བ་བཟང་པོ་ཡིས། །རྩ་རྒྱུད་བསྡུས་ཤིང་འགྲེལ་བས་བཀྲལ༢༦༦༢། །ཟུང་ཕྲི་ཉི་མ་ཆུ་ལུག་ལ། །ཟླ་བཟང་ལོངས་སྤྱོད་༢༦༦༠རྫོགས་སྐུར་བཞེངས། །གཟུགས་དམན་ཉི་སྒྲོལ་ཞིང་སྤྲེའུ་ལོར། །ཨུ་རྒྱན་སངས་རྒྱས་གཉིས་པ་༢༦༥༩འཁྲུངས། །ལྷ་དབང་ཉིད་ཀྱང་སྟོན་པར་བྱོན། །རྒྱལ་བས་སྦྱངས་པའི་ས་སྤྲེའུ་ལ། །དམ་པའི་རིགས་ཅན་དྲ་མ་ལྔར། །གསང་འཛིན་དཔའ་བོས་ཆོས་འཁོར་བསྐོར། །ཨིནྟྲའི་བོ་དྷི་བར་པ་ལ། །ཏནྡྲའི་གླེགས་བམ་བབས་ནས་ལོ༢༦༣༥། །མི་བདག་གིས་སྦྱངས་ཤིང་བྱི་ལ། །རི་བོ་རྩེ་ལྔར་འཇམ་དཔལ་འཁྲུངས༢༦༡༩། །དབང་འབྱུང་གིས་སྦྱངས་ས་ལུག་ལོར། །བསྡུ་བ་གཉིས་པའི་སྦྱིན་བདག་ནི། །རྒྱལ་པོ་མྱ་ངན་མེད་པ་བྱུང་༢༥༦༤། །དུས་མཚོ་མིག་སྦྱངས་ཤིང་གླང་ལོར། །ཐེག་མཆོག་སྟོན་པ་དགའ་རབ་འཁྲུངས༢༣༡༨། །འདི་དུས་འབྲས་བུའི་བསྟན་པའི་སྒང༌། །བསྡུ་བ་གསུམ་པའི་དུས་ཙམ་ནས། །ཐེག་པ་
ཆེན་པོའི་ཆོས་དར་ཡང༌། །རྩོད་པ་ཅན་དུ་བགྱིད་པའི་སྐབས། །གྲུབ་ཆེན་ས་ར་ཧ་པ་བྱོན། །གོང་མར་དབང་འབྱུང་གིས་སྦྱངས་པའི། །དྲག་པོ་ལྕགས་སྤྲེར་ཀླུ་སྒྲུབ་འཁྲུངས༢༣༦༣། །ཆུ་མཁའ་མིག་སྦྱངས་ཤིང་སྤྲེའུ་ལོར། །རིགས་ལྡན་གྲགས་པས་བསྡུས་རྒྱུད་བསྟན༢༠༥༩། །བུ་ག་མཁའ་རོས་ཕྲི་ཆུ་སྦྲུལ་ལོར། །ཕོ་བྲང་ཡུམ་བུ་བླ་སྒང་དུ། །ཐོ་རི་གཉན་བཙན་དོན་དགུའི་སྟེང༌། །གཉེན་པོ་གསང་བ་བབས་པའི་ལོ༡༩༥༠། །ཐོ་རི་གཉན་དང་འཕགས་ཡུལ་གྱི། །སློབ་དཔོན་དབྱིག་གཉེན་ཐོག་མཉམ་པས། །ཀླུ་སྒྲུབ་བྱོན་ནས་དབྱིག་གཉེན་པར། །ལོ་གྲངས་བརྒྱད་བརྒྱ་ཐལ་བའི་ཁོངས། །ཀླུ་སྒྲུབ་སློབ་མ་ཤ་ཝ་རི། །འཕགས་པ་ལྷ་དང་དཔའ་པོའི་ཞབས། །ཐོགས་མེད་རིམ་པར་བྱོན་པ་ཡིན། །རྣལ་འབྱོར་བླ་ན་མེད་པ་ནི། །མངོན་ཚན་ཉིད་དུ་མི་སྤྱོད་ཀྱང༌། །གྲུབ་ཐོབ་གྲགས་པ་ཆེ་བ་རྣམས། །ས་ར་ཧ་པ་བྱོན་པ་ནས། །ཐོགས་མེད་ཡན་ལ་རིམ་པར་བྱོན། །བོད་དུ་དམ་ཆོས་དབུ་བརྙེས་དེའི། །ལོ་ལ་རི་ཀླུང་མིག་སྦྱང་པས། །ལྕགས་འབྲུག་འབྲས་བུའི་དུས་གསུམ་རྫོགས། །
ལུང་གི་དུས་ཀྱི་ཐོག་མར་སླེབ༡༡༦༣། །མཚོས་སྦྱང་ཤིང་སྤྲེའུ་བདེ་འབྱུང་གི །ཁྲི་ལ་རྒྱ་མཚོས་རྣམ་རྒྱལ་བཞུགས༡༡༥༩། །མ་གར་སྟེགས་བྱེད་པ་ཞུགས། །མེ་མཁའ་རྒྱ་མཚོའི་ཐོག་མ་ཡིན། །འབྱུང་བས་སྦྱངས་པའི་ས་གླང་ལ། །ཆོས་རྒྱལ་སྲོང་བཙན་སྒམ་པོ་༡༡༥༤འཁྲུངས། །འདི་དང་འཕགས་ཡུལ་སྨྲ་བའི་ཉི། །ཆོས་ཀྱི་གྲགས་པ་ཐོག་མཉམ་པས། །ཐོ་ཐོ་རི་ནས་སྲོང་བཙན་བར། །དབྱིག་གཉེན་སློབ་མ་ཕྱོགས་ཀྱི་གླང༌། །སངས་རྒྱས་བསྐྱངས་དང་ལེགས་ལྡན་འབྱེད། །གཉིས་ཀས་དབུ་མ་ངོ་བོ་ཉིད། །མེད་པར་སྨྲ་བའི་གཞུང་བཙུགས་ཤིང༌། །ཤིང་རྟའི་ལམ་སྲོལ་གཉིས་སུ་བྱེད། །དེ་ནས་ཙནྡྲ་གོ་མི་དང༌། །ཟླ་བ་གྲགས་པ་ཞི་བའི་ལྷ། །དཔལ་ལྡན་ཆོས་ཀྱི་གྲགས་པ་ཡན། །རིམ་པར་བྱོན་པའི་རགས་རྩིས་ལ། །བསླུ་བ་མེད་པས་འཕགས་ཡུལ་དུ། །རྒྱན་དྲུག་གམ་ནི་མཆོག་བརྒྱད་པོ། །ཀླུ་སྒྲུབ་མན་ནས་སྲོང་བཙན་ཡན། །བྱོན་པའི་རྣམ་གཞག་ཤེས་པར་བྱ། །སྲོང་བཙན་འཁྲུངས་པའི་ས་གླང་ལ། །རྒྱལ་བས་ཕྲི་བའི་ཆུ་གླང་ལོར། །ལྷ་ལྡན་སྤྲུལ་པའི་གཙུག་ལག་བཏབ༡༡༣༠། །དེ་ལ་ཐུབ་པ་རིས་སྦྱངས་པའི། །ལྕགས་རྟར་ཁྲི་སྲོང་ལྡེའུ་བཙན་བལྟམས། ༡༠༥༣། བུ་ག་གཟུགས་ཀྱིས་དམན་ས་མོ་གླང༌། །དུས་གསུམ་མཁྱེན་པ་པདྨ་
འབྱུང༌། །བོད་དུ་སྤྱན་དྲངས་བྱོན་པའི་༡༠༣༤ལོ། །མིག་དམན་ལྕགས་ཡོས་བསམ་ཡས་༡༠༣༢བཏབ། །རི་མེས་སྦྱངས་པའི་ས་འབྲུག་ལ། །མངའ་བདག་ཁྲི་སྲོང་ལྡེའུ་བཙན་གཤེགས༩༩༥། །མི་བདག་གིས་དམན་ཤིང་སྤྲེའུ་ལ། །སློབ་དཔོན་ཆེན་པོ་སྲིན་ཡུལ་གཤེགས༩༧༩། །ལག་པས་སྦྱངས་པའི་མེ་ཁྱི་ལ། །བྱེད་པའི་རྩིས་འགོ་ཐོག་མར་ཟུག ༩༧༧ །མཁའ་རོས་སྦྱངས་པའི་མེ་ཁྱི་ལ། །དབོན་སྲས་རལ་པ་ཅན་དེ་འཁྲུངས། །༩༡༧ འབྱུང་མེས་དམན་པའི་ལྕགས་བྱ་ལ། །དར་མས་བསྟན་པ་བསྣུབས་པའི་ལོ། །༨༨༢ བསེ་རུས་དམན་པའི་ཆུ་ཁྱི་ལ། །དཔལ་གྱི་རྡོ་རྗེས་གླང་དར་བསྒྲལ། ༨༨༡། དུས་རིས་སྦྱངས་པའི་ས་སྟག་དེ། །ཕྱི་དར་ཐོག་མར་བཙན་པའི་ལུགས༨༠༥། །བསྟན་པ་སྔ་དར་ཕྱི་དར་གྱི། །བར་སྐབས་སྨྲྀ་ཏིས་བོད་བྱོན་ཡང༌། །ལོ་ཙཱ་མ་རྙེད་ཁམས་སུ་འཁྱམས། །དེ་མ་ཐག་པའི་སྐྱེ་བ་ནི། །སྔོན་གྱི་ལས་སད་པཎྜི་ཏ། །རོང་པ་ཆོས་ཀྱི་བཟང་པོ་དང༌། །ཇོ་བོ་བྱོན་པ་ཐོག་མཉམ་པས། །དེ་ཡི་སྔ་ཕྱི་ཅི་རིགས་པར། །ལྷ་རྗེ་ཟུར་པོ་ཆེ་ཆུང་དང༌། །དམ་པ་སངས་རྒྱས་མར་མི་འབྲོག །ལ་སོགས་མཁས་དང་གྲུབ་པ་མཆོག །མང་ཞིག་བྱོན་པའི་དུས་ཡིན་ཡང༌། །འདུལ་བའི་བསྟན་པ་སྟང་ཞན་པས། །དཱི་པཾ་ཀ་ར་སྤྱན་དྲངས་ཤིང༌། །ཕྱིས་ནས་ཁ་ཆེའི་བསོད་སྙོམས་པས། །
སྡོམ་རྒྱུན་རྣམ་དག་སྤེལ་བའི་དུས། །ལ་སོགས་གཞན་དུ་ཤེས་བྱ་སྟེ། །གཏན་ཚིགས་ཉིད་ནི་གཏན་ཚིགས་དང༌། །བསྟུན་པ་ལས་གཞན་མངོན་ཤེས་ཀྱིས། །དཔྱད་པའི་གནས་སུ་མ་གྱུར་ན། །དེ་དག་ལ་ཡང་ལོ་ཚིགས་དང༌། །ཁམས་ལ་འགལ་བ་སྣ་ཚོགས་འདུ། །དེ་ཕྱིར་གྲགས་པ་བརྟན་པའི་རྗེས། །བསྐྱར་ཟློས་བྱ་བ་འཇིག་རྟེན་ན། །ཡོངས་སུ་གྲགས་པ་ཉིད་དང་བསྟུན། །འོན་ཀྱང་བསྟན་རྩིས་དོན་པོ་ནི། །བསྟན་པའི་གནས་ཚད་བརྟག་པ་ཉིད། །གཙོ་བོར་ངེས་ཕྱིར་ཕྱི་དར་གྱི། །ཐོག་མ་ས་ཕོ་སྟག་གི་ལོར། །ཀླུ་མཚོས་དམན་པའི་མེ་སྟག་ལ། །མེ་མཁའ་རྒྱ་མཚོའི་འདས་ལོ་རྫོགས། ༧༥༧། དེ་ལ་གཟུགས་དམན་མེ་ཡོས་ལ། །དུས་འཁོར་བོད་དུ་གདན་དྲངས་ཤིང༌། །རབ་བྱུང་ཐོག་མའི་བགྲང་གཞི་ཡིན། །མེ་བུག་ཕྲི་བའི་ལྕགས་བྱི་ལ། །མངོན་པའི་དུས་རྫོགས་མདོ་སྡེ་ཡི། །ཐོག་མ་ཉིད་དུ་རིག་པར་བྱ༦༦༣། །དེ་ལ་མཁའ་མཁའ་འབྱུང་བ་ཡིས། །དམན་པ་ལྕགས་སྤྲེའུ་མདོ་སྡེའི་དུས། །རྫོགས་ཤིང་འདུལ་བའི་འགོ་ཚུགས་ནས། །ད་ལྟའི་རབ་འདོད་ཆུ་ཡོས་འདི། །ཡན་ལ་འདུལ་བའི་རང་ཆ་ནས། །བརྒྱ་དང་དྲུག་ཆུ་རེ་གསུམ་འདས། །ལྷག་མ་སུམ་བརྒྱ་སོ་བདུན་པོ། །རབ་བྱུང་བཅུ་དགུ་པའི་ནང་གི །རྣམ་
གནོན་ལྕགས་འབྲུག་ཤར་ཚེ་རྫོགས། །དེ་ནས་བསྒྲུབ་པའི་གསུམ་པོ་ལ། །ལྔ་བརྒྱ་ཕྲག་གསུམ་སྦྱངས་པའི་མཐར། །རྟགས་ཙམ་འཛིན་པའི་ཐོག་མར་སླེབས། །རྟགས་ནི་བསྟན་པར་མི་ཐེའོ། །ཕྱིན་ཆད་བསྟན་པ་རྣལ་མ་ཡི། །ལྷག་མ་ཇི་ཙམ་ཡོད་ཅེ་ན། །རབ་བྱུང་འདོད་པའི་ཆུ་ཡོས་མན། །སྟོང་དང་བརྒྱད་བརྒྱ་སོ་བདུན་ཡོད། །འོན་ཀྱང་བསྟན་པའི་དར་ནུབ་ལ། །གཞིགས་ན་སྔོན་གྱི་མཁན་པོ་ཡིས། །བཤད་པའི་བསྟན་རྩིས་རྣམས་ལ་ཡང༌། །ཀླན་ཀ་རུང་བ་མ་ཡིན་ནོ། །དེ་ཕྱིར་སྐྱེས་བུ་ཤེས་ལྡན་རྣམས། །བསྟན་པ་རིང་པོར་མི་ཐོགས་པར། །ནུབ་པའི་ཚུལ་ལ་ལེགས་བསམས་ནས། །སྐྱོ་ཤས་བསྐྱེད་ལ་དམ་ཆོས་མཛོད། །རྒྱུད་དང་ཟབ་མོའི་མདོ་སྡེ་ལས། །གསུངས་པའི་བསྟན་པའི་གནས་ཚད་ནི། །ངེས་པའི་དོན་ཕྱིར་རབ་བྱུང་གི །རྟགས་དང་ཆོ་གས་མི་མཚོན་པས། །དེ་དག་འདིར་ནི་མ་བརྗོད་དེ། །ཐེག་པ་མཆོག་དང་གྲུབ་པའི་མཐའ། །རིན་ཆེན་མཛོད་དོན་ཁོང་ཆུད་པའི། །སྐྱེས་བུ་དེ་ནི་བློ་གསལ་ཡིན། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། བསྟན་རྩིས་བཤད་པའི་སརྒ་སྟེ་གཉིས་པའོ།། །།ཐབས་ཤེས་གཉིས་སུ་མེད་པའི་རྒྱུད། །དཔལ་ལྡན་དུས་ཀྱི་འཁོར་ལོ་ཡིན། །དེ་ལ་རྩ་རྒྱུད་བསྡུས་རྒྱུད་གཉིས། །དང་
པོ་རྩ་རྒྱུད་རྗེས་འབྲངས་ནས། །གཟའ་དང་རྒྱུ་སྐར་ཆུ་ཚོད་ཀྱི། །ལྐོག་གྱུར་མངོན་སུམ་མི་བསླུ་བ། །དྲང་སྲོང་ཆེན་པོ་རྔ་བོང་བཞིན། །གཎྜ་ཡངས་པའི་སྐྱེད་མོས་ཚལ། །གོ་ལའི་བགྲོད་པ་འཆིང་བ་ལ། །མི་མཇེད་ཞིག་པར་མ་གྱུར་པར། །ཀུན་འབྱུང་རྣམ་རྟོག་གཞན་དབང་གི །ལྷག་མས་ནོངས་པར་མི་འགྱུར་བ། །རྣམ་དག་གྲུབ་པའི་ལྔ་བསྡུས་བཤད། །རབ་བྱུང་འདོད་པའི་མཛེས་བྱེད་སོགས། །འདས་པའི་ལོ་ཚོགས་ཁྱིམ་གྱིས་བསྒྱུར། །འདས་ཟླ་བསྲེས་པ་གནས་གཉིས་གཞག །འོག་མ་ལག་བསྒྲེས་ཆུ་མཚོས་བརྒྱན། །མདའ་རོས་ཐོབ་ནོར་སྟེང་བསྲེས་ལ། །ཟླ་བ་རྣམ་དག་ཅེས་སུ་གྲགས། །ལྷག་མས་ཟླ་བཤོལ་སྒང་དབུགས་དང༌། །ལྡོག་གཉིས་ཕག་ཞག་རྀ་ཥྀ་ཁྱིམ། །དུས་གཟེར་སྟོན་པའི་ས་མཁན་བྱེད། །ཟླ་བ་དག་པ་གནས་ལྔ་བརྩེགས། །སྟེང་ནས་རིམ་པར་ཟླ་བ་དང༌། །གཟུགས་མེ་མཁའ་མདའ་དབུགས་གནས་ཐིག །སྟོང་པ་གདེངས་ཅན་མཚོས་བསྒྱུར་ལ། །སྟེང་རིམ་གཟར་མེ་ཆུ་ཚོད་མཁའ། །ཆུ་སྲང་ཀླུ་མེ་དབུགས་ལ་གཟུགས། །ཆ་གནས་རི་བུག་རྣམས་ཀྱིས་ཕྲི། །འོག་ནས་རིམ་བཞིན་རི་མཁའ་རི། །དུས་དང་མཁའ་རོ་མཁའ་རོ་དང༌། །ཐུབ་པས་དོར་ལྷག་གཟའ་དྷྲཱུའོ། །ཡང་ན་གཟའ་གནས་རྩེ་མོ་དང༌། །ཆུ་ཚོད་གཏེར་དབང་
སྲང་གཟུགས་མིག །དབུགས་མཚོ་ཆ་གནས་ཕྱོགས་དུས་བྱིན། །འཁོར་ལོ་དྲིལ་ཀྱང་སྔར་བཞིན་འཆར། །ཟླ་དག་གནས་གཉིས་གོང་མ་བགྲོད། །འོག་མ་རི་བོང་ཅན་གྱིས་བསྒྱུར། །སྟེང་མ་དུས་དང་འོག་མ་ནི། །མཁའ་ཆུས་སྦྱངས་ལ་དུས་ཉི་མས། །བགོས་ནོར་སྟེང་བསྲེ་ཀླུ་ལག་གིས། །བསྒྲིལ་བས་རིལ་པོ་ཆ་ཤས་གྲུབ། །ཡངན་རིལ་པོར་གཟུགས་མིག་དང༌། །ཆ་ཤས་དུས་ཀླུས་བརྒྱན་པ་ལ། །དུས་ཉིས་ཐོབ་ནོར་སྟེང་དུ་བསྲེ། །ཀླུ་ལག་གིས་བསྒྲིལ་སྔར་བཞིན་འཆར། །ཟླ་དག་གནས་ལྔ་སྟེང་རིམ་བཞིན། །མིག་དང་ཕྱོགས་དང་ཀླུ་དབང་དང༌། །གཟུགས་དང་རི་ཟླས་སོ་སོར་བསྒྱུར། །སྐར་གནས་གཟུགས་དང་དབྱུག་ཀླུ་ལག །སྲང་གནས་བུག་མེ་དབུགས་མིག་དང༌། །ཆ་ཤས་ཀླུ་ལག་དག་གིས་ཕྲི། །འོག་ནས་རིམ་བཞིན་རི་རོ་དང༌། །དུས་དང་མཁའ་རོ་མཁའ་རོ་དང༌། །སྐར་མས་དོར་ལྷག་ཉི་དྷྲཱུའོ། །ཡང་ན་སྐར་གནས་འབྱུག་མིག་དང༌། །དབྱུ་གུར་གཟུགས་མེ་སྲང་མཁའ་མིག །དབུགས་མེ་ཆ་ཤས་བུག་མེས་བརྒྱན། །རང་འཁོར་དྲིལ་བའང་རྣམ་འགྱུར་ཙམ། །སྟོང་འཇུག་འོག་མའི་ཆུ་གཏེར་སྐྱེས། །ངོ་མཚར་དྷྲཱུ་བ་ཞེས་གྲགས་པ། །ཟླ་དག་མཁའ་སྟོང་འབྱུང་ཀླུས་བརྒྱན། །རི་དབང་དུས་ཀླུས་བསྒྱུར་བ་དེ། །
མེ་བུག་འབྱུང་རྩ་མེ་ཡིས་དོར། །ལྷག་མ་རིས་བསྒྱར་བགོད་བྱེད་ཀྱིས། །ཐོབ་པ་གཟའ་སྟེ་ཡང་ལྷག་པ། །མཁའ་རོ་མཁའ་རོ་དང་ནི་དུས། །རི་མཁའ་རིས་བསྒྱུར་བགོད་བྱེད་ཀྱིས། །རིམ་ཐོབ་གཟའ་དྷྲཱུ་སྔར་བཞིན་འཆར། །རིལ་ཆའི་དོན་དུ་ཟླ་དག་གང༌། །ཀླུ་ཟུང་ལག་པ་མིག་གིས་བརྒྱན། །འཇིག་རྟེན་དབང་པོ་ཟུང་གིས་བསྒྱུར། །ལྟོ་འགྲོ་ལག་འབྱུང་མེ་ཡིས་དོར། །ལྷག་མ་ཀླུ་ལག་གིས་བསྒྱུར་ལ། །བགོད་བྱེད་ཀྱིས་ཐོབ་རིལ་པོ་དང༌། །ཡང་ལྷག་དུས་གཉིས་བསྒྱུར་བ་དེ། །བགོད་བྱེད་ཀྱིས་ཐོབ་དུས་ཉིའི་ཚེ། །ཟླ་དག་ཟུང་རྩ་དུས་ཀྱིས་བརྒྱན། །འབྱུང་རོས་བསྒྱུར་ལ་ཆུ་མཁའ་ཀླུས། །དོར་ལྷག་སྐར་བསྒྱུར་བགོད་དབྱེད་ཀྱིས། །ཐོབ་པ་སྐར་མའོ་ཡང་ལྷག་པ། །མཁའ་རོ་མཁའ་རོ་དང་ནི་དུས། །རི་རོས་རིམ་བསྒྱུར་བགོད་བྱེད་ཀྱིས། །ཐོབ་པས་ཉི་དྷྲཱུ་སྔར་བཞིན་འཆར། །དེ་ནས་ཉིན་ཞག་གཅིག་པའི་རྩེས། །གཟའ་དྷྲཱུར་ཆུ་ཚོད་རྩ་དབང་དང༌། །སྲང་མེ་དབུགས་མཚོ་ཆ་མི་བདག །ཉི་དྷྲཱུར་དབྱུག་མཚོ་སྲང་གཟུགས་མིག །དབུགས་དབང་ཆ་ཤས་མེ་མཚོ་རྣམས། །ཚེས་བསྒྱུར་སྟེར་རམ་རེའུ་མིག་བྱིན། །གཟའ་ཉི་བར་པ་ཞེས་སུ་གྲགས། །རིལ་པོར་ཚེས་བསྲེ་སྲིད་པས་བགོ །རྙེད་ནོར་མཉམ་དང་མི་མཉམ་བརྟག །མིག་མཚོ་
སྟོང་པ་མཉམ་པ་སྟེ། །གཟུགས་དང་རྩེ་མོ་མི་མཉམ་མོ། །འོག་ནས་འབྱུང་བའི་ཟླ་རྐང་གི །ལོངས་སྤྱོད་དྲང་སྲོང་བར་པ་ལ། །སྣོན་འབྲིའི་མཚན་མ་ཉིད་དུ་གཟུང༌། །ལྷག་མས་ཟླ་རྐང་འཛིན་བྱ་སྟེ། །གཟུང་བྱའི་རྐང་པ་འདི་ལྟར་རོ། །དབང་འབྱུང་འདོད་ཡོན་མཚོ་རྩེ་མོ། །མིག་དང་བསེ་རུ་སྔ་རྐང་བདུན། །ཕྱི་རྐང་དེ་ལྡོག་གནས་བཅུ་བཞི། །རྐང་མཚམས་སླེབས་ཚེ་ཕྱི་རྐང་བྱ། །དེ་ཡང་གཟུགས་དང་འདོད་པར་འབྱུང༌། །ཟུང་དང་ཉི་མར་ཕྱོགས་སྡོམ་ཞིང༌། །མེ་དང་དྲག་པོར་ཚེས་སྡོམ་ལ། །ཆུ་བོ་ཕྱོགས་ལ་བུ་ག་གཟུགས། །འབྱུང་དང་སྲིན་པོར་ལག་མིག་དང༌། །དུས་དང་ཀླུ་ལ་རྒྱལ་བ་སྟེ། །རི་བོ་ལ་ནི་འབྱུང་མིག་སྡོམ། །སྔ་རྐང་ལ་ནི་སྤྱད་ཟིན་དང༌། །ཕྱི་རྐང་ལ་ནི་སྤྱོད་རྒྱུ་སྡོམ། །རྐང་འཛིན་སྟོངས་ན་རྐང་སྡོམ་དབྱི། །རྐང་བཟུང་མདུན་མས་ཆ་ཤས་བསྒྱུར། །མ་ཟིན་རྐང་པ་ཐོག་མས་ཏེ། །དུས་ཁྱིམ་གྱིས་ཐོབ་ཡང་དག་རྒྱུ། །ལྷག་མ་མཁའ་རོས་བསྒྱུར་བ་ལ། །དུས་ཁྱིམ་གྱིས་ཐོབ་ཆུ་སྲང་སྟེ། །ཡང་ལྷག་རོས་བསྒྱུར་དུས་ཁྱིམ་གྱིས། །ཐོབ་པ་དབུགས་ཏེ་སླར་ལྷག་པ། །རི་མཁའ་རིས་བསྒྱུར་དུས་ཁྱིམ་གྱིས། །ཐོབ་པ་ཆ་སྟེ་ལྷག་མེད་དག །རྐང་འཛིན་སྔ་རྐང་ལ་ཡོད་ན། །ཡང་དག་རྒྱུ་དང་རྐང་སྡོམ་བསྲེ། །ཕྱི་རྐང་ལ་ཡོད་ཡང་དག་རྒྱུས། །
རྐང་སྡོམ་ལ་ཕྲི་སླར་ཡང་གཅིག །ཕོབ་པའི་མཁའ་རོར་སྲང་གིས་སྦྱང༌། །དེ་བཞིན་སླར་ཡང་རིམ་ཕོབ་ལ། །དབུགས་དང་ཆ་ཤས་དག་གིས་སྦྱང༌། །དེ་ཉིད་གཟའ་བར་ལོངས་སྤྱོད་ལ། །ནོར་མཉམ་བསྣན་ལ་མི་མཉམ་ཕྲི། །གཟའ་ཕྱེད་དག་པ་ཞེས་སུ་གྲགས། །དེ་ཡི་ཆ་ཤས་རི་རོས་བསྒྱུར། །རི་མཁའ་རིས་བགོས་ནོར་རི་རོའི། །ཆ་ཤས་དང་བཅས་གནས་དྲུག་སྤེལ། །ཉི་བར་གནས་གཉིས་བཀོད་པ་དེར། །གཅིག་ལ་སྐར་མཚམས་ཆུ་ཚོད་ནས། །ཞེས་ལྔས་སྦྱང་ཞིང་མ་ལྡང་ན། །འཁོར་ལོ་བསྣན་པ་ལག་ལེན་ཡིན། །བཅུ་གསུམ་སུམ་ཅུ་ལྷག་ན་དོར། །དོར་དང་མ་དོར་མཚན་མ་བཟུང༌། །ལྷག་མའི་སྐར་གནས་མཁའ་རོས་བསྒྱུར། །ཆུ་ཚོད་བཅུག་ལ་འབྱུང་ཡོན་ཟླས། །བགོས་ཐོབ་ནོར་གྱིས་ཉི་རྐང་འཛིན། །འཛིན་བྱའི་རྐང་པ་འདི་ལྟ་སྟེ། །དུས་མཚོ་ཟླ་བ་སྔ་རྐང་གསུམ། །ཕྱི་རྐང་དེ་ལྡོག་རྐང་གནས་དྲུག །གཟུགས་དང་འབྱུང་བ་དག་ལ་དུས། །མིག་དང་མཚོ་ལ་ཕྱོགས་སྡོམ་ཞིང༌། །མེ་ལ་དྲག་པོ་སྟོང་ལ་སྟོང༌། །སྔ་ཕྱི་སྤྱད་དང་སྤྱོད་རྒྱུ་སྡོམ། །རྐང་འཛིན་མདུན་མས་ལྷག་རྣམས་བསྒྱུར། །རང་རང་འཁོར་ལོ་སྟེང་དུ་དྲིལ། །དེ་ལ་འབྱུང་ཡོན་ཟླ་བ་ཡིས། །ཐོབ་པ་ཡང་དག་རྒྱུ་བའི་དབྱུག །སླར་ལྷག་མཁའ་རོས་བསྒྱུར་བ་དེར། །རང་ཆ་བསྲེས་ལ་
འབྱུང་ཡོན་ཟླས། །ཐོབ་ནོར་སྲང་ལ་ལྷག་མ་དེ། །དུས་ཀྱིས་བསྒྱུར་ལ་དབུགས་གནས་བཅུག །འབྱུང་ཡོན་ཟླས་ཐོབ་དབུགས་ཡིན་ཏེ། །སླར་ལྷག་རི་རོས་བསྒྱུར་བ་ལ། །ཆ་བཅུག་ཐོབ་པ་ཆ་གས་ཏེ། །དེ་ཡང་རྐང་འཛིན་སྔ་རྐང་ལ། །ཡོད་ཚེ་དབྱུ་གུ་གཉིས་བསྲེ་ཞིང༌། །ཕྱི་རྐང་ཚེ་ན་ཡང་དབྱུག་གི །རྐང་སྡོམ་ལ་ཕྲི་སླར་ཡང་ཕོབ། །རིམ་བཞིན་རང་འཁོར་ལ་སྦྱངས་ལྷག །གཟའ་ཕྱེད་ཉི་བར་ལོངས་སྤྱོད་ལ། །འཁོར་ཕྱེད་དོར་བསྣན་མ་དོར་ཕྲི། །དེ་ཡི་གཟའ་ཉི་རྣམ་པར་དག །སླར་ཡང་ཉི་དག་གནས་གཉིས་གཞག །གཅིག་ལ་སྐར་ཐིག་དབྱུག་མཚོ་དབང༌། །ཚེས་བསྒྱུར་སྟེར་རམ་རྟག་ལོངས་ཀྱི། །རེའུ་མིག་བྱིན་པས་ཚེས་ལ་ནི། །འཁྱུད་པའི་ཟླ་སྐར་ཞེས་སུ་གྲགས། །དེ་ལ་གཟའ་ལོངས་མན་གྱིས་སྦྱངས། །རེས་འགྲོགས་ཟླ་བའི་སྐར་མ་སྟེ། །ཉི་ཟླ་གཉིས་བསྲེས་སྦྱོར་བ་འགྲུབ། །འདི་ཡང་དུས་ཀྱི་ལྷ་ཡིན་ནོ། །བྱེད་པ་ཚེས་གྲངས་མིག་གིས་བསྒྱུར། །གཟུགས་ཕྲི་ཐུབ་པས་དོར་བའི་ལྷག །ཉེར་དགུ་དང་གནས་སྟོང་ལ་རི་མོ་མེད། ཕྱི་མའི་བྱེད་པ་ཡིན་པ་སྟེ། །སྔ་བྱེད་ཤུགས་ལ་རྟོགས་པར་འགྱུར། །དེ་ཡིས་གྲུབ་འབྲས་འདི་ལྟར་བརྟག །གཟའ་ནི་ཉིན་ཞག་བདག་པོ་ཡིན། །ནམ་ལངས་ནས་ནི་ནམ་ལངས་བར། །དེ་ཡི་ཆུ་ཚོད་ཚེས་བདག་སྟེ། །
ནམ་ལངས་ཡན་ལ་འདས་པའི་ལྷག །ནམ་ལངས་ནས་བཟུང་ཟད་པའི་མཐའ། །དེ་ཉིད་ཚེས་རྫོགས་ཕྱི་མ་འཇུག །ཚེས་ལ་རྒྱུ་བའི་ས་བདག་ཀུན། །དེ་དང་རྗེས་སུ་མཐུན་པར་འཇུག །ཟླ་སྐར་ལོངས་སྤྱོད་དེ་ལས་ལྡོག །ནམ་ལངས་ཡན་ལ་འདས་པའི་ཚད། །དེ་ཡིས་མཁའ་རོ་ལ་སྦྱངས་པས། །ནམ་ལངས་ནས་བཟུང་ལྷག་ལུས་རྟོགས། །ཉི་སྐར་སྦྱོར་བ་དེ་དང་མཚུངས། །གཟའ་གནས་ལན་གཉིས་བལྡབས་པའི་ཚེ། །ཆུ་ཚོད་མང་བས་ཚེས་གྲངས་ཆད། །མཆོངས་ན་ཆུ་ཚོད་ཉུང་བ་ལྷག །དོན་ལ་ལྷག་ཆད་ཡོད་མིན་ཏེ། །རྐང་པའི་ལོངས་སྤྱོད་འཕེལ་འགྲིབ་ལས། །ཆད་དང་ལྷག་པ་ལྟ་བུར་སྣང༌། །ལྷག་པ་སྔ་མ་འཆོས་དགོས་ཏེ། །གཟའ་གནས་རང་གིས་རེས་ཉི་མ་ནས་མིག་དམར་ལ་མཆོངས་ན་ཟླ་བ་ལྟ་བུ་བཞིན་ལ། །དབྱུ་གུར་མཁའ་རོ་བཀོད་པར་བྱ། །མཆོངས་པའི་ཚེས་དེའི་ཉི་སྐར་ལ། །ཚེས་འཁྱུད་བརྟག་པའི་ལོངས་སྤྱོད་ནི། །མཚོ་དབང་ལྷག་ཚེས་དེས་བསྒྱུར་བྱིན། །རེས་གཟའི་ལོངས་སྤྱོད་རྣམས་ཀྱིས་སྦྱང༌། །ཟླ་སྐར་ཡིན་ནོ་ཉི་སྐར་དང༌། །དེ་གཉིས་བསྲེས་པས་སྦྱོར་བ་འགྲུབ། །གཟའ་དང་ཚེས་གྲངས་སྐར་མ་དང༌། །སྦྱོར་བ་བྱེད་པ་ཡན་ལག་ལ། །ཚོགས་པས་ལྔ་བསྡུས་ཞེས་སུ་གྲགས། །སྐར་
རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། གྲུབ་མཐའི་ལྔ་བསྡུས་བཤད་པའི་སརྒ་སྟེ་གསུམ་པའོ།། །།བསྡུས་པའི་རྒྱུད་ལ་གྲགས་པ་ཡི། །ལྷག་བཅས་བྱེད་པའི་ལྔ་བསྡུས་བཤད། །རབ་འདོད་ནང་གི་མཛེས་བྱེད་སོགས། །འདས་ལོ་ཉིས་བསྒྱུར་གནས་གཉིས་གཞག །འོག་མ་མིག་བསྒྱུར་ཀླུ་མཚོས་བརྒྱན། །ཟླ་རོས་ཐོབ་ནོར་སྟེང་བསྲེས་པ། །ཟླ་བ་དག་པ་ཉིད་ཡིན་ནོ། །ལྷག་མ་དུས་གཟེར་བརྟག་གཞིར་གཟུང༌། །ཟླ་དག་གནས་གསུམ་སྟེང་རིམ་བཞིན། །གཟུགས་དང་གཟུགས་མེ་མཁའ་མདས་བསྒྱུར། །གཟར་མེ་དབྱུ་གུར་མི་བདག་ཕྲི། །འོག་ནས་མཁའ་རོ་མཁའ་རོ་དང༌། །རི་བོས་སྒྲིལ་བ་གཟའ་དྷྲཱུའོ། །ཟླ་དག་གནས་གཉིས་སྟེང་མིག་དང༌། །འོག་མ་གཟུགས་ཀྱིས་བསྒྱུར་བ་ལ། །སྟེང་དུས་འོག་མ་བྲོ་ལག་སྦྱང༌། །འོག་ནས་དུས་ཉི་ཀླུ་ལག་གིས། །སྒྲིལ་བས་རིལ་ཆའི་དྷྲཱུ་ཝ་འཆར། །ཟླ་དག་གནས་ལྔ་སྟེང་རིམ་བཞིན། །མིག་ཕྱོགས་ཀླུ་དབང་མིག་ཕྱོགས་བསྒྱུར། །སྐར་མཁའ་དབྱུ་གུར་རི་མཚོ་དང༌། །ཆུ་སྲང་མཁའ་འབྱུང་དབུགས་རིག་བྱེད། །ཆ་གནས་ཀླུ་ཡིས་ཕྲི་བ་ལ། །འོག་ནས་འདོད་པ་དུས་མཁའ་རོ། །མཁའ་རོ་འཁོར་ལོས་དྲིལ་བའི་ལྷག །ཉི་མའི་དྷྲཱུ་ཝ་ཉིད་ཡིན་
ནོ། །བྱེད་པའི་སྐྱོན་གྱི་ཆོམ་རྐུན་ནི། །དྲུག་ཅུ་སྐོར་རེར་མ་དབྱུང་ན། །རི་མོ་བསོགས་པའི་རྒྱ་འབྱམས་ནི། །ཐུག་པ་མེད་པས་འདི་ལོངས་ཤིག །བྱེད་པ་ཉིད་ཀྱི་ལོ་རེ་ཡི། །དྷྲཱུ་ཝ་སྤྱི་མཐུན་དེ་ཉིད་ལ། །གཟའ་དྷྲཱུའི་ལོངས་སྤྱོད་འདོད་པས་བརྒྱན། །ཉི་དྷྲཱུའི་ཆུ་ཚོད་དུས་མེ་ཕྲི། །གཟའ་ཉིའི་ངེས་པ་ཞལ་ལུང་ལུགས། །ཕྱི་དྷྲཱུ་རིམ་གྱིས་འཆར་བའི་ཕྱིར། །སྔ་དྷྲཱུར་རང་རང་སྒྱུར་བྱེད་བྱིན། །བྱེད་པའི་ཉིན་རྩིས་ལ་འཇུག་ཕྱིར། །གཟའ་དྷྲཱུར་ཆུ་ཚོད་རྩ་དབང་དང༌། །སྲང་མེ་དབུགས་གནས་རིག་བྱེད་བྱིན། །ཉི་དྷྲཱུར་དབྱུག་མཚོ་སྲང་གཟུགས་མིག །དབུགས་འབྱུང་ཆ་གནས་བུག་པ་རྣམས། །གང་བརྩིའི་ཚེས་བསྒྱུར་བྱིན་པ་ལ། །གཟའ་ཉི་བར་པ་ཞེས་བྱའོ། །ཟླ་ཉིའི་རྐང་ཆོག་སྦྱོར་བྱེད་སོགས། །གྲུབ་མཐའ་བཞིན་ལས་ལོགས་སུ་མེད། །དེ་ལྟ་ན་ཡང་ཆ་ཤས་ཀྱི། །འཁོར་ལོ་འདོད་པས་བྱ་བ་ཁྱད། ༈ །དེ་ནས་སྒྲ་གཅན་ལ་སོགས་པའི། །རྩིས་ཕྲན་འགའ་ཞིག་བཤད་བྱ་བ། །བྱེད་གྲུབ་གང་འདོད་ཟླ་དག་དེ། །དུས་དང་རིག་བྱེད་ལག་པས་བརྒྱན། །མིག་གིས་བསྒྱུར་ལ་ཉ་ལ་གཟུགས། །སྟོང་ལ་མིག་སྦྱིན་མཁའ་དུས་ཆུས། །ཐོབ་པ་དོར་ལ་ལྷག་མ་དེ། །འཁོར་ལོས་བསྒྱུར་ལ་མཁའ་དུས་ཆུས། །ཐོབ་པ་སྐར་མའོ་ཡང་ལྷག་པ། །མཁའ་རོ་
མཁའ་རོ་དུས་དང་ནི། །རྩེ་མོ་ལག་པས་རིམ་བསྒྱུར་ལ། །མཁའ་དུས་ཆུ་བོས་ཐོབ་པའི་ནོར། །དབྱུག་སྲང་དབུགས་དང་མེ་ལག་ཆའི། །གནས་དེ་སྒྲ་གཅན་རྩ་བའོ། །དེ་ཡིས་རང་རང་འཁོར་ལོ་ལ། །རིམ་སྦྱངས་གདོང་གི་སྐར་ལོངས་ཏེ། །གདོང་ལ་འཁོར་ཕྱེད་བསྲེས་པ་འམ། །ཕྲི་བ་དུས་མེའི་སྐར་ལོངས་སོ། །དེ་བཞིན་ཚེས་ཞག་རེ་རེ་ཡི། །སྒྲ་གཅན་བརྟག་ན་ཟླ་དག་དེ། །དུས་དང་རིག་བྱེད་མིག་གིས་བརྒྱན། །མཁའ་མེས་བསྒྱུར་ལ་གང་འདོད་དེའི། །ཚེས་བསྲེ་མཁའ་མཁའ་རྩ་རོས་དོར། །ལྷག་མ་འཁོར་ལོས་བསྒྱུར་བ་ལ། །མཁའ་སྟོང་རྩ་རོས་ཐོབ་པ་སྐར། །ལྷག་མ་མཁའ་རོ་མཁའ་རོ་དང༌། །དུས་དང་མེ་མིག་གིས་བསྒྱུར་ལ། །མཁའ་མཁའ་རྩ་རོས་རིམ་ཐོབ་ནོར། །རྩ་བ་ཡིན་ནོ་གདོང་མཇུག་གི །ཆོ་ག་སྔར་བཞིན་བགྱིས་པ་ཡིས། །ཚེས་ལ་འཕོ་བའི་སྒྲ་གཅན་རྟོགས། །ཟླ་རེའི་སྒྲ་གཅན་རྟོགས་པའི་ཆེད། །ཟླ་དག་དུས་དང་རྒྱལ་བ་ཡིས། །བརྒྱན་ཏེ་མཁའ་མེ་ལག་པས་དོར། །ལྷག་མ་སྐར་མས་བསྒྱུར་བ་སོགས། །རྩ་གདོང་མཇུག་གི་ཆོ་ག་རྣམས། །སྔར་བཞིན་བྱས་པས་ཟླ་བ་རེའི། །སྒྲ་གཅན་བདེ་བླག་རྟོགས་པར་འགྱུར། ༈ །བྱེད་པ་ལོ་ཡི་བདག་པོ་ནི། །ཆོ་གའི་རྣམ་འགྱུར་གསར་པས་སྟོན། །མཛེས་བྱེད་འདས་ལོ་ཡིད་གཟུགས་
བསྒྱུར། །ཆུ་མེ་མཚམས་ཀྱིས་དོར་བའི་ལྷག །རིས་བསྒྱུར་རིག་བྱེད་མེ་མཚམས་ཀྱིས། །ཐོབ་ནོར་གཟའ་གནས་ལྷག་མ་ནི། །མཁའ་རོ་མཁའ་རོ་དུས་དང་ནི། །རི་གཟུགས་རྩེ་མོས་རིམ་བསྒྱུར་ལ། །ཆུ་མེ་མཚམས་ཀྱི་སོ་སོར་བགོས། །ནོར་དེ་དབྱུག་སྲང་དབུགས་དང་ནི། །ཆར་བཅས་ལྷག་མེད་དག་འགྱུར་བའི། །གཟར་མེ་དབྱུ་གུར་མིག་མཚོ་དང༌། །སྲང་སྐྱོན་དབུགས་གཟུགས་ཆ་རི་ཡིས། །ཕྲི་བ་བྱེད་པའི་ལོ་བདག་གོ །དེ་ལས་ཕྱི་ལོ་རྟོགས་འདོད་ན། །གཟར་འབྱུང་དབྱུ་གུར་ཆུ་མཚོ་དང༌། །ཆུ་སྲང་ཀླུ་ལག་དབུགས་རིག་བྱེད། །ཆ་ཤས་དུས་རྩ་གཟུགས་ཀྱིས་ཕྲི། །ཕྱི་མ་ཕྱི་མའི་ལོ་བདག་འཆར། །དེ་ཡང་ལོ་འཕོ་སྐྱོན་བྲལ་ནི། །མཛེས་བྱེད་འདས་ལོ་གནས་བདུན་བཀོད། །སྟེང་ནས་གཟུགས་དང་མི་བདག་ཡིད། །བསེ་རུ་དུས་བུག་མིག་དང་ཕྱོགས། །རྩ་རི་ཟླ་བས་བསྒྱུར་བ་ལ། །གཟར་གཟུགས་དབྱུ་གུར་བུག་མེ་དང༌། །ཆུ་སྲང་མཁའ་མེ་དབུགས་ཟླ་བ། །ཆ་གོང་སྟོང་པ་དེ་ཉིད་དང༌། །འདོད་ཆར་བུག་པ་རི་མཁའ་རིའི། །ཆ་གནས་མཁའ་མིག་མཚོས་ཕྲི་ལ། །འོག་ནས་རི་མཁའ་རི་འདོད་དང༌། །རིག་གཟུགས་མེ་དང་དུས་མཁའ་རོ། །མཁའ་རོ་ཐུབ་པས་དྲིལ་བའི་ལྷག །སྐྱོན་བྲལ་ལོ་འཕོར་ངེས་པར་བྱ། །དེ་
ཡང་སྔ་ལོའི་བདག་པོ་ལ། །སྒྱུར་བྱེད་བྱིན་པས་ཕྱི་མ་འཆར། །ཁྱིམ་གཟའ་བཅུ་གཉིས་བསྒྲུབ་པའི་ཕྱིར། །བྱེད་པ་ལོ་འཕོ་རགས་ཞིབ་གཉིས། །གང་འདོད་གཟའ་དང་དབྱུ་གུའི་གནས། །ཚར་ནི་བཅུ་གཉིས་བཀོད་པ་ལ། །སོ་སོར་ཁྱིམ་རེའི་ཁ་བྱང་གདགས། །ལུག་ཁྱིམ་འབྱུང་བ་རྩེ་མོས་ཕྲི། །གླང་ལ་མིག་དང་རི་ཡིས་སྦྱང༌། །འཁྲིག་པར་འབྱུང་བ་མེ་མཚོས་དམན། །ཀརྜར་མིག་དང་ཐུབ་པས་འཕྲོག །སེང་གེར་དབང་པོ་ཀླུ་མེས་དབྲི། །བུ་མོར་མིག་དང་དུས་མེས་ཞུས། །སྲང་ལ་སྟོང་པ་སྲིན་པོས་དོར། །སྡིག་པར་ཕུང་པོ་རྩེ་ཟླས་འབྲིད། །གཞུ་ལ་ཡོན་ཏན་ཆུ་མཚོས་དམན། །ཆུ་སྲིན་ལག་པ་མེ་མིག་སྤྱང༌། །བུམ་པར་སྟོང་པ་དུས་འབྱུང་དམན། །ཉ་ལ་དུས་དང་ཀླུ་ཡིས་འཕྲོག །ལྷག་རྣམས་བྱེད་པའི་ཟླ་འདི་རྣམས་སྦྱོང་བར་མ་མདངས་ན་འཁོར་ལོ་ཕབ་བདག་གོ །༈ །རྒྱལ་བློན་ཆེད་དུ་འདས་ལོ་དེ། །རྩེ་མོས་བསྒྱུར་ལ་གནས་གཉིས་གཞག །སྟེང་མ་མེས་ཕྲི་གཉིས་ཀ་ཡང༌། །རི་ཡིས་ཐ་དད་དོར་བའི་ལྷག །སྟེང་རྒྱལ་འོག་མ་བློན་པོར་བོས། །ཆུ་ཡིས་ཕྲིའམ་མེས་བརྒྱན་ན། །ཕྱི་ལོའི་རྒྱལ་བློན་བདེ་བླག་རྟོགས། ༈ །ཀ་ར་མྱང་རྩིས་ཞེས་གྲགས་པ། །ནཻ་པ་ལ་ཡི་རྩིས་ཕྲན་ནི། །འབྱུང་མཁའ་རི་གཟུགས་ལོ་ཚོགས་ལ། །མཛེས་བྱེད་འདས་ལོ་བྱིན་པ་དེར། །
ཤ་ཀའི་ལོ་ཞེས་གྲགས་པ་གང༌། །མེས་བསྒྱུར་རིས་ཐོབ་ལྷག་མ་ནི། །ལག་བསྒྲེས་འབྱུང་བ་བརྒྱན་པ་དེས། །ཆར་པ་ཆེ་ཆུང་ལུང་དུ་སྟོན། །སྔོན་ཆད་རི་བོས་ཐོབ་ནོར་དེ། །མེས་བསྒྱུར་རིས་བགོས་ལ་སོགས་པ། །སྔ་མ་བཞིན་དུ་ལན་བརྒྱད་བགྱིད། །འབྲུ་རྩྭ་བསིལ་དྲོད་རླུང་འཕེལ་ཟད། །འཁྲུག་པ་རྣམས་ནི་ཉུང་ཚད་ལྔ། །མང་མཐའ་བཅུ་བདུན་འབྲིང་བཅུ་གཉིས། །ཉིད་ལ་བརྟགས་ནས་ལུང་དུ་སྟོན། །ཤ་ཀའི་ལོ་ནས་དྲག་པོས་སྦྱང༌། །ཆུས་ཐོབ་ལྷག་མར་གཟུགས་ཤར་ན། །རྫིང་བུར་འཇུག་ཅེས་ཆར་པ་ཉུང༌། །ཟུང་ཤར་ཡན་ལག་འཇུག་ཅེས་པ། །ཆར་པ་ཕྱོགས་ལྷུང་ཅན་དུ་འབབ། །མེ་ཤར་ཀུན་འཇུག་ཅེས་བྱ་སྟེ། །ཆར་པ་སྙོམས་པར་འོང་ཞེས་འདོད། །ཐིག་ཤར་ཞོད་ཅེས་ཆར་ཆུ་རྒྱས། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། བྱེད་པ་ལྔ་བསྡུས་དང༌། རྩིས་ཕྲན་རྣམས་བཤད་པའི་སརྒ་སྟེ་བཞི་པའོ།། །།དེ་ནས་ལེགས་ལྡན་གཟའ་ལྔ་པོ། །ཉིན་ཞག་དག་ལ་སྤྱོད་པ་བཤད། །གྲུབ་མཐའི་ཟླ་དག་མཁའ་མེས་བསྒྱུར། །གང་འདོད་ཚེས་བསྲེ་གནས་གསུམ་གཞག །འོག་མ་མཁའ་ནོར་ཆུ་ཡིས་བརྒྱན། །རི་མཁའ་རིས་ཐོབ་བར་པར་བྱིན། །བར་མ་ཆུ་རོས་ཕྱེ་བ་ཡི། །ནོར་གྱིས་སྟེང་སྦྱང་སྤྱི་ཞག་གོ །མི་གསལ་ཞག་ལས་
ཁྱད་གྱུར་པའི། །གསལ་ཞག་བལྟ་ན་སྤྱི་ཞག་དེ། །གནས་གཉིས་གཅིག་ལ་རྩེ་མོ་བྱིན། །རི་ཡིས་བགོས་ལྷག་རེས་གཟའ་དང༌། །མཐུན་ནམ་བརྟགས་ལ་མི་མཐུན་ན། །མང་ན་ཅིག་ཤོས་སྟེང་ནས་འཕྲོག །ཉུང་ན་ཕྲི་བ་གསལ་ཞག་སྟེ། །ཤིན་ཏུ་ཕྲ་བའི་སྒོས་ཆོས་དག །སྟོན་པའི་ཆོ་ག་ཉིད་ཡིན་ཡང༌། །འདིར་ནི་སྤྱི་དང་མཐུན་པར་བརྗོད། །སྤྱི་ཞག་ཚར་ལྔ་བཀོད་པ་ལ། །རང་རང་རྩིས་འཕྲོའི་ངེས་པ་ནི། །མིག་དམར་མིག་དང་དུས་མཚོ་བྱིན། །ཕུར་བུ་མཚོ་འབྱུང་མེ་རྩེས་བརྒྱན། །སྤེན་པ་ལག་མིག་འབྱུང་རི་བསྣན། །ལྷག་པ་མཁའ་མཁའ་གཟུགས་ཀྱིས་བསྒྱུར། །དབང་པོ་རིག་བྱེད་ཀླུ་དབང་བསྲེ། །པ་སངས་ཕྱོགས་བསྒྱུར་སྲིན་ཚེས་བརྒྱན། །དྲག་གསུམ་རྐང་འཛིན་ཞི་གཉིས་ཀྱི། །དལ་བ་བར་པའི་ཆེད་དུ་ནི། །ཉིན་ཞག་ཉི་དྷྲཱུ་འཚོལ་དགོས་ཕྱིར༌། །སྤྱི་ཞག་མིག་ཀླུ་མེ་སྐྱོན་གྱིས། །བསྒྱུར་ལ་དབང་པོ་ཡིད་རི་དང༌། །ཆུ་མེ་བྲོ་བ་བསྲེས་པའམ། །ཡང་ན་མིག་དམར་དེ་ཉིད་ཟུང༌། །ཕུར་བུ་ཀླུ་རི་གཏེར་གྱིས་འཕྲོག །སྤེན་པ་མཚོ་རྒྱལ་རྩེ་མོས་དམན། །ལྷག་པ་མིག་དབང་གཏེར་ལག་ཕྲི། །པ་སངས་ཀླུ་ནོར་མཁའ་མིག་སྦྱང༌། །ཉི་མར་ནམ་མཁའ་དུས་མིག་དང༌། །རི་རོ་མེས་ཕྲི་རང་རང་གི །ཉིན་ཞག་དཀྱིལ་འཁོར་འདི་ལྟ་སྟེ། །མིག་དམར་གྱི་ནི་རི་ཀླུ་རོ། །
ཕུར་བུའི་སོ་མེ་རིག་བྱེད་དང༌། །སྤེན་པའི་རོ་དུས་ཐུབ་པ་ཕྱོགས། །ལྷག་པའི་རི་བུག་རི་བོ་ཀླུ། །པ་སངས་དྲང་སྲོང་རྒྱལ་བ་མིག །ཉི་མའི་འབྱུང་མཁའ་མཚོ་ཡིད་རི། །མཚམས་ཀྱིས་བགོས་པའི་ལྷག་མ་རྣམས། །རང་རང་སྒོས་ཀྱི་ཉིན་ཞག་གོ །སོ་སོའི་སྒོས་ཀྱི་ཞག་པོ་དེ། །སྐར་མས་བསྒྱུར་ལ་རང་རང་གི །དཀྱིལ་འཁོར་གྱིས་ཐོབ་སྐར་མ་སྟེ། །ལྷག་མ་མཁའ་རོ་མཁའ་རོ་དང༌། །དུས་དང་སོ་སོའི་ཆ་ཤས་ནི། །མིག་དམར་སུམ་ཆ་བུག་མིག་ལག །ཕུར་བུའི་ཉི་ཆ་གཟུགས་དུས་མེ། །སྤེན་པའི་གཉིས་ཆ་མེ་ཀླུ་དང༌། །འཇིག་རྟེན་དབང་པོར་ཤེས་པར་བྱ། །ལྷག་པའི་རི་བུག་རི་ཀླུ་སྟེ། །པ་སངས་གསུམ་ཆ་བུག་མཚོ་རི། །ཉི་མའི་བཞི་བཅུ་ཞེ་ལྔའི་ཆ། །བུག་མཁའ་མིག་བུག་ཡིད་རྣམས་ཀྱིས། །རིམ་བསིལ་སྔར་བཤད་དཀྱིལ་འཁོར་གྱི། །ཐོབ་ནོར་དབྱུག་སྲང་དབུགས་ཆར་བརྩེགས། །དེ་ཡིས་དལ་བར་རྐང་འཛིན་འགྲུབ། །ཁྱད་པར་དབུགས་གནས་བཏོན་པའི་ལྷག །སྔར་སྨོས་ཆ་ཤས་ཉུང་བ་དེས། །བགོ་བ་མྱུར་རྩིས་མན་ངག་ཡིན། །གཞན་ཡང་སྒོས་ཞག་སྤངས་པ་ཡི། །ཁྱད་ཆོས་ས་རའི་འོ་མཚོ་ལས། །ལུང་འདི་རྩ་བསྒྲུབ་ལ་བདེ་བ། །བསྒྲུབ་ན་སྤྱི་ཞག་གནས་ལྔ་པ། །ཚར་དྲུག་བཀོད་ལ་དང་པོ་དེ། །སྐར་མཁའ་དབྱུག་མཚོ་སྲང་དུས་མིག །དབུགས་ཐིག་ཆ་ཤས་
དུས་དང་ཚེས། །མེ་བུག་གིས་བསྒྱུར་སྟེང་ནས་རིམ། །སྐར་གཟུགས་དབྱུ་གུར་ཀླུ་ལག་དང༌། །ཆུ་སྲང་དུས་མེ་དབུགས་རྩེ་མོ། །ཆར་བུག་མཁའ་རི་གཟུགས་ཐུབ་ཕྲི། །འོག་རིམ་བུག་མཁའ་མིག་བུག་ཡིད། །མཚམས་དང་མཁའ་རོ་མཁའ་རོ་དང༌། །སྐར་མས་དྲིལ་བ་དྲག་གསུམ་གྱི། །རྐང་འཛིན་ཞི་གཉིས་དལ་བར་རོ། །གཉིས་པ་སྐར་གནས་སྟོང་པ་དང༌། །དབྱུག་མིག་ཆུ་སྲང་གཟུགས་མིག་དང༌། །དབུགས་ཟུང་ཆ་ཤས་གདེངས་ཅན་མཁའ། །མིག་གིས་བསྒྱུར་ལ་སྟེང་ནས་རིམ། །སྐར་ཀླུ་དབྱུ་གུར་མཁའ་དབང་དང༌། །ཆུ་སྲང་མཚོ་མེ་དབུགས་སྟོང་པ། །ཆ་ཤས་མཚོ་ཀླུས་དམན་པ་དེ། །བུག་མིག་ལག་དང་དུས་མཁའ་རོ། །མཁའ་རོ་འཁོར་ལོས་དྲིལ་བའི་ལྷག །མིག་དམར་དལ་བ་བར་པ་ཡིན། །གསུམ་པ་སྐར་སྟོང་དབྱུག་སྐྱོན་དང༌། །སྲང་རྒྱལ་དབུགས་དབང་ཆ་ཤས་གནས། །རི་ཀླུ་དུས་མཚོས་བསྒྱུར་བ་དེར། །སྐར་བུག་དབྱུག་མེ་སྲང་རི་རྩེ། །དབུགས་གཟུགས་ཆར་བུག་ཕྱོགས་རིས་དམན། །རི་བུག་རི་ཀླུ་དུས་མཁའ་རོ། །མཁའ་རོ་སྐར་མས་དྲིལ་བའི་ལྷག །ལྷག་པའི་རྐང་འཛིན་ཉིད་དུ་བཟུང༌། །བཞི་པ་སྐར་དབྱུག་སྟོང་པ་དང༌། །ཆུ་སྲང་ལག་མིག་དབུགས་ཟུང་དང༌། །ཆ་ཤས་དུས་མིག་ལག་གིས་བསྒྱུར། །སྐར་མཚམས་དབྱུག་དབང་སྲང་ཆུ་མཚོ། །དབུགས་
ཐིག་ཆ་ཤས་དུས་བུ་གས། །སྦྱངས་ལ་གཟུགས་དུས་མེ་དང་རོ། །མཁའ་རོ་མཁའ་རོ་སྐར་མས་དྲིལ། །ལྷག་མ་ཕུར་བུའི་དལ་བར་རོ། །ལྔ་པ་སྐར་མཁའ་དབྱུག་རི་དང༌། །སྲང་ཉི་དབུགས་རྩེ་ཆ་ཤས་གནས། །དབང་པོ་རིག་བྱེད་རྩེ་མོས་བསྒྱུར། །སྐར་གནས་དེ་ཉིད་དབྱུག་འབྱུང་བ། །ཆུ་སྲང་ལག་མིག་དབུགས་ནམ་མཁའ། །ཆ་ཤས་མིག་དང་འདོད་པས་འཕྲོག །བུག་མཚོ་རི་དང་དུས་མཁའ་རོ། །མཁའ་རོ་འཁོར་ལོས་དྲིལ་བའི་ལྷག །པ་ཝ་སངས་ཀྱི་རྐང་འཛིན་ནོ། །དྲུག་པ་སྐར་དབྱུག་སྟོང་པ་དང༌། །སྲང་བུག་དབུགས་སྟོང་ཆ་ཤས་གནས། །སྐྱོན་རྩས་བསྒྱུར་ལ་སྐར་ཀླུ་དང༌། །དབྱུག་ནོར་སྲང་སྤྲུལ་དབུགས་ཟླ་བ། །ཆ་གནས་མེ་བུག་དྲག་པོས་པྲི། །མེ་ཀླུ་མེ་འབྱུང་དུས་ཐིག་མཚམས། །མཁའ་དུས་སྐར་མས་དྲིལ་བ་ཡི། །ལྷག་མ་སྤེན་པའི་དལ་བར་རོ། །སྔར་བཤད་རྩིས་འཕྲོའི་ངེས་པ་རྣམས། །གལ་ཏེ་སྦྱངས་པར་མ་ལྡང་ན། །སྟེང་ནས་རང་འཁོར་ཕབ་ལ་སྦྱང༌། །གཞན་ཡང་རི་མོས་རྣམ་གྲངས་ནི། །རང་རང་སྒོས་ཞག་གནས་ལྔར་བརྩེགས། །དྲག་གསུམ་སྔར་བཤད་སྒྱུར་བྱེད་དང༌། །ལྷག་པ་ཐིག་སྟོང་དབང་ཕྱུག་མཁའ། །ཀླུ་བུག་འབྱུང་བ་མིག་གིས་བསྒྱུར། །པ་སངས་མཁའ་སྟོང་མེ་མཚོ་གཟུགས། །བུག་མཁའ་རིག་བྱེད་རྣམས་ཀྱིས་བསྒྱུར། །
རང་རང་འཁོར་ལོས་དྲིལ་བ་ཡི། །རྐང་འཛིན་དལ་བར་སྔར་བཞིན་འཆར། །དེ་བཞིན་ཚེས་གྲངས་མ་བསྲེས་པའི། །སྤྱི་སྒོས་ཞག་ལ་ཉི་དྷྲཱུ་ནི། །བསྒྲུབ་ན་མཁའ་མཚོ་དུས་མིག་སྟོང༌། །ཆ་ཤས་མཚམས་ཚེས་མེ་བུག་རྣམས། །གང་བརྩིའི་ཚེས་བསྒྱུར་སྟེར་བ་ཁྱད། །དེ་ནས་དལ་དག་བསྒྲུབ་པའི་སླད། །རང་རང་དལ་བར་ཚར་གཉིས་བཀོད། །སོ་སོའི་སྐྱེས་ཁྱིམ་འདོར་དགོས་པས། །མིག་དམར་སྲིན་པོ་མཁའ་མེ་དང༌། །ལྷག་པ་མི་བདག་སུམ་ཅུའོ། །ཕུར་བུ་ཁྱིམ་དང་པ་སངས་དུས། །སྤེན་པ་གདེངས་ཅན་ཟླ་བས་སྦྱང༌། །སྦྱངས་ཤུལ་འཁོར་ཕྱེད་ལྷག་ནའང་དོར། །ལྷག་མའི་སྐར་གནས་མཁའ་རོས་བསྒྱུར། །ཆུ་ཚོད་བསྲེས་ལ་འབྱུང་ཡོན་ཟླས། །བགོས་ཐོབ་ནོར་གྱིས་དལ་རྐང་འཛིན། །གཟུང་བྱའི་རྐང་པ་འདི་ལྟ་སྟེ། །མིག་དམར་འབྱུང་མིག་སྐྱོན་དང་རི། །ལྷག་པའི་ཕྱོགས་དང་རི་བོ་མེ། །ཕུར་བུའི་དབང་ཕྱུག་བུ་ག་རྩེ། །པ་སངས་དབང་པོ་རིག་བྱེད་གཟུགས། །སྤེན་པའི་ལག་མིག་ཚེས་དང་མཚམས། །སོ་སོའི་སྔ་རྐང་ཉིད་དུ་བརྟག །ཕྱི་རྐང་དེ་ལས་ལྡོག་པ་སྟེ། །སྔ་ཕྱི་སྤྱད་དང་སྤྱོད་རྒྱུ་སྡོམ། །རྐང་བཟུང་མདུན་མས་ལྷག་རྣམས་བསྒྱུར། །མ་ཟིན་རྐང་པ་དང་པོས་ཏེ། །རང་རང་འཁོར་ལོས་སྟེང་དུ་དྲིལ། །སྟེང་མ་འབྱུང་ཡོན་ཟླས་ཐོབ་པ། །
ཡང་དག་རྒྱུ་འོ་སླར་ལྷག་རྣམས། །རང་ཆར་བཤིགས་ལ་རང་ཆ་བཅུག །དེ་ལ་རིམ་བཞིན་འབྱུང་འདོད་ཀྱིས། །ཐོབ་པ་དལ་བའི་ལོངས་སྤྱོད་དེ། །སྔ་རྐང་དབྱུ་གུར་གཉིས་བསྲེང་ཞིང༌། །ཕྱི་རྐང་ཡང་རྒྱུས་རྐང་སྡོམ་ཕྲི། །དེ་ལས་རིམ་ཕོབ་སྲང་དབུགས་དང༌། །ཆའི་བར་རང་འཁོར་ལ་སྦྱངས་ཏེ། །དལ་བ་བར་པ་ཅིག་ཤོས་ལ། །འཁོར་ཕྱེད་དོར་བསྣན་མ་དོར་ཕྲི། །དེ་ཡིས་དལ་བ་རྣམ་དག་འགྲུབ། །དེ་ནས་མྱུར་བ་དག་པའི་ཚད། །རང་རང་རྐང་འཛིན་ཚར་རེ་དང༌། །དལ་དག་ཚར་རེ་བཀོད་བྱས་ལ། །དྲག་གསུམ་རྐང་འཛིན་ཆ་ཤས་དེ། །གང་འདོད་གཟའ་དེའི་ཆ་ཤས་ཀྱིས། འཁོར་ལོས་མིག་དམར་གྱི་བུག་མིག་ལག་ལྟ་བུ་སྒྱུར་ལ་བུག་མཁའ་དང༌། །མིག་བུག་ཡིད་ཀྱིས་བགོས་ཐོབ་ནོར། །དལ་དག་ཆར་འགྱུར་ལྷག་རང་ཆར། །བཞག་པས་གནས་དྲུག་དག་ཏུ་འགྱུར། །དེ་བཞིན་ཞི་གཉིས་དལ་དག་ལ། །རྐང་འཛིན་ཆ་ཤས་སྔར་བཞིན་སྤེལ། །དལ་བ་དག་པས་རྐང་འཛིན་སྦྱང༌། །སྦྱངས་ཤུལ་འཁོར་ཕྱེད་ལྷག་ན་དོར། །ལྷག་མའི་སྐར་མས་མྱུར་རྐང་གཟུང༌། །འཁོར་ཕྱེད་དོར་ན་རིམ་མིན་དང༌། །མ་དོར་རིམ་པར་ནས་མར་གཟུང༌། །རིམ་མིན་རྐང་འཛིན་སྟོངས་གྱུར་ན། །ཆུ་ཚོད་མཁའ་མེར་ལོངས་པ་ནས། །གཟུང་སྟེ་རིམ་
མིན་མ་རྫོགས་པར། །མཁའ་མེ་བསྣན་ནས་འཛིན་པ་གནད། །གཟུང་བྱའི་མྱུར་རྐང་འདི་ལྟ་སྟེ། །མིག་དམར་རྒྱལ་བ་ཡོན་ཏན་ལག །མེ་མིག་རྩེ་ཟུང་གཟུགས་མིག་དང༌། །གཟུགས་ཟུང་སྐྱོན་དང་ཚེས་དྲག་པོ། །རྩེ་མོ་རྣམས་ནི་རིམ་པའོ། །རིམ་མིན་བདེ་བྱེད་ཀླུ་མེ་དང༌། །སྟོང་པ་གདེངས་ཅན་མེ་དབང་ངོ༌། །ལྷག་པའི་མི་བདག་མི་བདག་ཚེས། །ཡིད་འདོད་བདེ་འབྱུང་རི་དབང་མཁའ། །རིམ་པ་ཉིད་དེ་རིམ་མིན་ནི། །མཚོ་དྲག་མཁའ་མིག་གདེངས་ཅན་ལག །རིག་བྱེད་འཇིག་རྟེན་བཅས་པའོ། །ཕུར་བུར་ཕྱོགས་ཕྱོགས་རྩ་དང་ཀླུ། །དུས་དང་མཚམས་དང་ཟུང་དང་གཟུགས། །རིམ་པ་ཉིད་དེ་རིམ་མིན་ནི། །རྩེ་མོ་རོ་དང་བུག་པ་དྲག །མི་བདག་དྲང་སྲོང་བཅས་པའོ། །པ་སངས་དེ་ཉིད་ལན་གསུམ་དང༌། །རྒྱལ་བ་ལག་མིག་ལག་མིག་དང༌། །སྐྱོན་ཚེས་ཀླུ་རྣམས་རིམ་པའོ། །རིམ་མིན་དུས་དང་མཁའ་མེ་དང༌། །རྩ་དང་བུག་པ་མེ་རིའོ། །སྤེན་པ་དུས་དང་དབང་པོ་འབྱུང༌། །ཆུ་བོ་རིག་བྱེད་ལག་མིག་ཐིག །རིམ་པ་ཉིད་དོ་རིམ་མིན་ནི། །མིག་དང་རིག་བྱེད་དབང་པོ་དང༌། །དུས་དང་གདེངས་ཅན་ཡོན་ཏན་རྣམས། །རིམ་པར་སྤྱད་ཟིན་རིམ་མིན་ལ། །སྤྱོད་བྱ་སྡོམ་ལ་འཛིན་བྱེད་དབྱི། །རྐང་བཟུང་མདུན་མས་ལྷག་རྣམས་བསྒྱུར། །རང་རང་འཁོར་ལོས་ཆུ་ཚོད་ཀྱི། །
གནས་སུ་དྲིལ་བ་མཁའ་རོ་ཡིས། །ཐོབ་ནོར་ཡང་དག་རྒྱུ་བའི་དབྱུག །ཡང་ལྷག་མཁའ་རོས་བསྒྱུར་བ་ལ། །སྲང་བསྲེས་མཁའ་རོས་ཐོབ་ནོར་སྲང༌། །སླར་ལྷག་རོས་བསྒྱུར་དབུགས་བཅུག་པ། །མཁའ་རོས་ཐོབ་པ་དབུགས་ཡིན་ཏེ། །དེ་ལྷག་རང་རང་ཆ་ཤས་ཀྱིས། །བསྒྱུར་ལ་རང་ཆ་བཅུག་པ་དེ། །མཁའ་རོས་ཐོབ་ནོར་རང་ཆ་གོང༌། །དེ་ལྷག་བུག་མཁའ་མིག་བུག་དང༌། །ཡིད་བསྒྱུར་རང་གི་ཆ་བཅུག་ལ། །མཁའ་རོས་བགོས་ཐོབ་ཆ་འོག་མ། །དེ་ཡང་གནད་ཀྱི་ལག་ལེན་ལ། །རིམ་པའི་ཕྱི་རྐང་ཐ་མ་དང༌། །རིམ་མིན་སྔ་རྐང་དང་པོ་ཡི། །ཆུ་ཚོད་སུམ་ཅུ་ཚུན་ཆད་ལ། །རྐང་སྔོན་བབས་ཚེ་མཁའ་མེས་བགོ །ལྷག་སྤེན་གཉིས་ཀྱི་རྐང་པ་ཡིན། །སྟོང་པར་བབས་ན་རྐང་འཛིན་ཕྱི། །ཡང་དག་རྒྱུ་སོགས་རྐང་ལོངས་མེད། །སྤྱི་ལ་ཡང་དག་རྒྱུ་བའི་དབྱུག །སྔ་རྐང་རྐང་སྡོམ་སྟེང་དུ་བསྣན། །ཕྱི་རྐང་རྐང་སྡོམ་ལ་ཕྲི་ཞིང༌། །སླར་ཡང་ཕོབ་ལ་སྲང་དབུགས་དང༌། །ཆ་ཤས་བར་དུ་རང་འཁོར་ལ། །སྦྱངས་དེས་དལ་དག་ཅིག་ཤོས་ལ། །རིམ་པ་བསྣན་ལ་རིམ་མིན་ཕྲི། །དབྲི་བྱ་ཉུང་ན་དེ་ཉིད་ཀྱིས། །དབྲི་བྱེད་ཉིད་ལ་ཕྲི་བ་འམ། །སྐར་མ་བསྣན་ལ་ཕྲི་བ་ཡིས། །ལུགས་འབྱུང་ལུགས་ལྡོག་རི་མོ་འཆར། །རིམ་པའི་སྔ་རྐང་མྱུར་འགྲོས་ཤར། །ཕྱི་རྐང་དལ་འགྲོས་ཉིད་དེ་ལྷོ། །
རིམ་མིན་སྔ་རྐང་འཁྱོག་འགྲོས་ནུབ། །ཕྱི་རྐང་འབྱུང་འགྲོས་བྱང་དུ་བརྩམ། །དེ་ཡིས་མྱུར་བ་རྣམ་པར་དག །གཟའ་རྣམས་སྐར་མ་འཕོ་མཚམས་ལ། །བརྟགས་ན་སྔོན་མའི་མྱུར་དག་གིས། །ཕྱི་མའི་མྱུར་དག་ཕྲི་བའི་ལྷག །སྐར་མ་ནས་བཟུང་ཆ་ཤས་བར། །བཅོ་ལྔས་ཕྱེ་བའི་རྙེད་པ་རྣམས། །རང་གནས་གཞག་ལ་ཞག་རེ་ལ། །སྤྱོད་པའི་ལོངས་སྤྱོད་རགས་པ་དེ། །འཕོས་པའི་གཟའ་དེའི་མྱུར་དག་ལ། །ཉུང་སྟེང་བསྣན་ནམ་མང་སྟེང་ནས། །ཕྲི་བའི་ལན་རེར་ཉ་སྟོང་ནི། །གང་ཡིན་ནས་བཟུང་ཞག་རེར་བགྲང༌། །འཕོས་པའི་སྐར་མ་དང་འགྲིག་ཚེ། །དེ་ཡི་ཉིན་ཞག་ཡིན་པར་རྟོགས། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། ལེགས་ལྡན་གཟའ་ལྔ་ཉིན་ཞག་ལ་སྤྱོད་པ་བཤད་པའི་སརྒ་སྟེ་ལྔ་པའོ།། །།དེ་ནས་ཚེས་སྤྱོད་གཟའ་ལྔ་བཤད། །གྲུབ་མཐའི་ཟླ་དག་གནས་དྲུག་པ། །གཟའ་རེ་ལ་ནི་ཚར་རེ་བཀོད། །དང་པོ་མིག་དམར་དྷྲཱུ་བའི་ཆེད། །སྐར་གཟུགས་དབྱུག་སྲིན་སྲང་ཀླུ་མེ། །དབུགས་སྟོང་ཆ་གོང་མཚོ་རི་གཟུགས། །འོག་མ་ནོར་དང་དྲང་སྲོང་གིས། །བསྒྱུར་ལ་སྐར་ཀླུ་དབྱུག་མཁའ་དབང༌། །ཆུ་སྲང་འབྱུང་མེ་དབུགས་རྩེ་མོ། །ཆ་གོང་དབང་པོ་ཀླུ་དང་ནི། །འོག་མ་དུས་དང་མི་བདག་ཕྲི། །ལྷག་པ་སྐར་བུག་དབྱུག་མེ་
དང༌། །ཆུ་སྲང་ཀླུ་མཚོ་དབུགས་འབྱུང་བ། །ཆ་གོང་མིག་དབང་རི་ཀླུ་དང༌། །འོག་མ་སྲིན་པོ་དུས་ཀྱིས་བསྒྱུར། །སྐར་བུག་དབྱུག་མེ་སྲང་སྲིན་མཚོ། །དབུགས་སྟོང་ཆ་གོང་མིག་བུག་དྲག །འོག་མ་ཕྱོགས་དང་རྩེ་མོས་ཕྲི། །ཕུར་བུ་སྐར་ཐིག་ཆུ་ཚོད་དྲག །སྲང་མིག་དབུགས་མེ་ཆ་ཤས་གོང༌། །དབང་ཕྱུག་ལག་པ་འོག་མའི་ཆ། །དུས་མཚོ་རི་ཡིས་བསྒྱུར་བ་ལ། །སྐར་དུས་དབྱུག་དབང་སྲང་ཆུ་མཚོ། །དབུགས་གཟུགས་ཆ་གོང་མཁའ་དབང་མིག །འོག་མ་མཁའ་བུག་ཐུབ་པས་ཕྲི། །པ་སངས་སྐར་རྩེ་དབྱུག་མིག་མེ། །སྲང་ནི་རིག་བྱེད་དབང་པོ་དང༌། །དབུགས་གཟུགས་ཆ་གོང་མཚམས་དབང་མེ། །འོག་མ་རྩེ་མོ་དྲང་སྲོང་གིས། །བསྒྱུར་ལ་སྐར་གནས་འབྱུང་བ་མིག །དབྱུག་དབང་ཆུ་སྲང་དུས་མིག་དང༌། །དབུགས་མེ་ཆ་གོང་གཟུགས་མེ་དབང༌། །འོག་མ་དུས་དང་རྒྱལ་བས་ཕྲི། །སྤེན་པ་སྐར་ཐིག་དབྱུག་མཚོ་དང༌། །ཆུ་སྲང་དུས་མིག་དབུགས་རྩེ་མོ། །ཆ་གོང་ལག་ཐིག་རི་ཡོན་དང༌། །འོག་མ་རི་དྲག་གིས་བསྒྱུར་ལ། །སྐར་ནོར་དབྱུག་ཀླུ་སྲང་སྦྲུལ་དང༌། །དབུགས་གཟུགས་ཆ་གོང་དུས་ཀླུ་མིག །མཚོ་དང་འོག་མའི་ཆ་གནས་དེ། །སྲིན་པོ་རིག་བྱེད་མིག་གིས་སྦྱང༌། །ཡང་ན་མིག་དམར་སྐར་སྐྱོན་དང༌། །དབྱུག་སྲིན་སྲང་རྒྱལ་དབུགས་ལག་པ། །ཆ་
གོང་མེ་ཡིད་འོག་མ་ནི། །བསྲེ་རུ་རིག་བྱེད་དབང་པོ་སྟེ། །ལྷག་པའི་སྐར་གནས་རི་གཟུགས་དང༌། །དབྱུ་གུར་དུས་འབྱུང་ཆུ་སྲང་ཕྱོགས། །དབུགས་དབང་ཆ་གོང་མཚོ་མཁའ་དུས། །རི་བོའི་འོག་མ་རི་སྲིན་མེ། །བླ་མའི་སྐར་གནས་མཁའ་མིག་དང༌། །དབྱུ་གུར་མཚོ་དབང་ཆུ་སྲང་ཚེས། །དབུགས་མཚོ་ཆ་གོང་ཐིག་ལེ་དྲག །འོག་མ་རིག་བྱེད་མིག་དང་དུས། །པ་སངས་སྐར་གཟུགས་དབྱུག་མཚོ་དབང༌། །སྲང་ལ་མེ་རྩེ་དབུགས་ལ་མིག །ཆ་གོང་རི་གཟུགས་ལག་པ་དང༌། །འོག་མ་གཟུགས་རོ་རིག་བྱེད་དོ། །སྤེན་པའི་སྐར་སྐྱོན་དབྱུག་གཟུགས་འབྱུང༌། །ཆུ་སྲང་གཟུགས་དབང་དབུགས་ཆུ་གཏེར། །ཆ་གོང་དུས་བུག་སྟོང་པ་གཟུགས། །འོག་མར་ཀླུ་དབང་རིག་བྱེད་རྣམས། །བརྒྱན་ལ་འོག་མའི་ཆ་ཤས་ནི། །ཕུར་བུའི་ཁྱད་པར་མ་ནུ་ཡིད། །གཞན་རྣམས་རི་མཁའ་རི་ཆ་ཡིན། །སྟེང་མའི་ཆ་ཤས་ཉིན་ཞག་དང༌། །མཚུངས་ལ་སྐར་མའི་བར་དྲིལ་བའི། །ལྷག་རྣམས་སོ་སོའི་དྷྲཱུ་ཝ་ཀ །དྲག་གསུམ་རྐང་འཛིན་ཞི་གཉིས་ཀྱི། །དལ་བ་བར་པའི་དྷྲཱུ་ཝ་ནི། །གྲུབ་པའི་ལྔ་བསྡུས་ཉི་དྷྲཱུ་ཡིན། །ཡང་ན་ཆོ་གའི་རྣམ་འགྱུར་ཆེད། །གང་བརྩིའི་བཤོལ་འཕྲོ་གནས་ལྔར་བརྩེགས། །མཁའ་མིག་ཐིག་དབང་འབྱུང་མིག་གིས། །བསྒྱུར་ལ་རང་རང་འཁོར་ལོས་དྲིལ། །ལྷག་མས་ཟླ་
བ་སོ་སོ་ཡིས། །ཁྱིམ་གྱི་སླེབ་ཚད་དག་ལ་ཕྲི། །སླར་ཡང་ཆུ་སྲང་དབུགས་དང་ཆས། །རང་རང་འཁོར་ལོར་སྦྱངས་པའི་ལྷག །དེས་ནི་ཉི་དྷྲཱུ་སྔར་བཞིན་སྟོན། །སྔར་དྷྲཱུ་རང་རང་སྒྱུར་བྱེད་བྱིན། །ཕྱི་མ་རིམ་བཞིན་འཆར་བར་འགྱུར། །དེ་རྗེས་རང་རང་དྷྲཱུ་ཝ་ལ། །ཆོས་ཞག་བརྟག་པའི་ལོངས་སྤྱོད་ནི། །དམར་པོར་མཁའ་མིག་བུག་གཟུགས་གཟུགས། །སྟེང་མར་མེ་མཚོ་གཟུགས་འོག་ཆར། །རིག་བྱེད་རྒྱ་མཚོ་རི་བོང་ཅན། །ལྷག་པར་ཐིག་སྐྱོན་རི་ཡོན་ཏན། །ཆ་གོང་དུས་མེ་མཁའ་རི་དང༌། །འོག་མའི་ཆ་གནས་མེ་རིའོ། །ཕུར་བུར་མཁའ་སྟོང་ལག་མིག་ཐིག །ཆ་གོང་རི་པོ་གདེངས་ཅན་གཟུགས། །འོག་མ་རྩ་རི་ཐུབ་པའོ། །པ་སངས་ཐིག་རི་དབང་པོ་ཆུ། །ཆ་གོང་བྲོ་བ་རྩེ་མོ་དུས། །འོག་མ་མཚམས་དང་ལག་པའོ། །སྤེན་པར་མཁའ་ཐིག་གདེངས་ཅན་དབང༌། །ཆ་གོང་ཀླུ་མེ་རི་བོ་གཟུགས། །འོག་མ་མི་བདག་བགྲོད་པའོ། །ཉི་དྷྲཱུ་ཐིག་མཚོ་ཟླ་ཟུང་དབང༌། །ཆ་ཤས་རྩེ་མོ་རིག་བྱེད་རྣམས། །གང་རྩིའི་ཆོས་བསྐྱུར་བྱིན་པ་ཡིས། །དལ་བར་རྐང་འཛིན་བཅས་པ་འགྲུབ། །དལ་དག་མྱུར་བའི་ཆོ་ག་རྣམས། །ཉིན་ཞག་བཞིན་ལས་ཁྱད་པར་ནི། །རྐང་འཛིན་དལ་དག་ཆ་ཤས་རྣམས། །ཤེད་སྙོམས་ཕྱིར་དུ་དྲག་
གསུམ་གྱི། །དལ་དག་རང་ཆ་རི་རོས་བསྒྱུར། །རང་ཆས་བགོས་ནོར་རྐང་འཛིན་ཆ། །དེ་བཞིན་ཞི་གཉིས་རྐང་འཛིན་ལ། །དལ་དག་ཆ་སྤེལ་གནས་བདུན་འགྱུར། །དེ་ཡིས་ཚེས་ཞག་རྣམ་པར་དག །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། དྲང་སྲོང་གཟའ་ལྔ་ཚེས་ཞག་ལ་སྤྱོད་པ་བཤད་པའི་སརྒ་སྟེ་དྲུག་པའོ།། །།དེ་ནས་ཁྱིམ་ཞག་ལ་སྤྱོད་པའི། །གཟའ་ལྔའི་དལ་མྱུར་བསྒྲུབ་ཚུལ་བཤད། །རབ་འདོད་ནང་གི་མཛེས་བྱེད་སོགས། །འདས་ལོ་གནས་དྲུག་ཚར་ལྔ་བཀོད། །དེ་ལ་རང་རང་སྒྱུར་བྱེད་ནི། །དམར་པོ་སྐར་ཡིད་དབྱུག་གཟུགས་མིག །ཆུ་སྲང་མཁའ་མིག་དབུགས་ཟླ་བ། །ཆུ་གོང་ཆུ་རོ་འོག་མའི་གནས། །རི་གཟུགས་བུག་པ་རྩེ་མོ་དང༌། །ལྷག་པའི་སྐར་མཚོ་དབྱུག་དུས་འབྱུང༌། །སྲང་མེ་དབུགས་རྩེ་ཆ་གོང་མ། །རོ་མཚོ་མེ་དུས་འོག་མ་ནི། །རྩེ་མོ་མཚོ་ཀླུ་ཐུབ་པ་དང༌། །ཕུར་བུའི་སྐར་མིག་དབྱུག་མི་བདག །ཆུ་སྲང་འབྱུང་མེ་དབུགས་རིག་བྱེད། །ཆ་གོང་གདེངས་ཅན་རི་རོ་དང༌། །འོག་མ་མཚོ་དབང་ཕུང་པོ་དུས། །པ་སངས་སྐར་གནས་མི་བདག་དང༌། །དབྱུ་གུ་མེ་དབང་སྲང་རི་མིག །དབུགས་མེ་ཆ་གོང་དུས་མིག་མཚོ། །འོག་མ་དུས་མཁའ་རིག་བྱེད་མིག །སྤེན་པའི་སྐར་སྟོང་དབྱུག་མཚོ་དབང༌། །ཆུ་སྲང་རི་འབྱུང་དབུགས་རྒྱ་མཚོ། །
ཆ་གོང་མིག་ཀླུ་ནོར་རིག་བྱེད། །འོག་མ་མཁའ་ཀླུ་ཉི་མ་ཡིས། །བསྒྱུར་ལ་དེ་སྟེང་རྩིས་འཕྲོ་ནི། །དམར་པོར་སྐར་སྐྱོན་དབྱུག་དུས་འབྱུང༌། །སྲང་སོ་དབུགས་མཚོ་ཆ་གོང་མར། །རི་དབང་འོག་མ་བུ་ག་དང༌། །ལག་པ་བྲོ་བ་མཚེ་མའོ། །ཟླ་སྐྱེར་སྐར་གནས་རྒྱལ་བ་དང༌། །དབྱུ་གུར་རིག་བྱེད་ཆུ་སྲང་སྐྱོན། །དབུགས་གཟུགས་ཆ་གོང་སོ་མཁའ་རི། །འོག་མར་འབྱུང་བ་དུས་མཚོ་རི། །བླ་མར་སྐར་གནས་གཟུགས་ལག་པ། །དབྱུག་གཟུགས་སྲང་ལ་མཚོ་རིག་བྱེད། །དབུགས་གཟུགས་ཆ་གོང་སྟོང་མཚོ་རྩེ། །འོག་མར་མཁའ་གཟུགས་བུ་ག་དབང༌། །པ་སངས་སྐར་གནས་རིག་བྱེད་དང༌། །དབྱུག་སྐྱོན་ཆུ་སྲང་ནམ་མཁའ་མཚོ། །དབྱུགས་མེ་ཆ་གོང་འབྱུང་ཀླུ་མིག །འོག་མ་ཀླུ་མཁའ་སྲིན་པོ་རི། །སྤེན་པར་སྐར་གནས་སྐྱོན་དང་ནི། །དབྱུ་གུར་མཚོ་དབང་སྲང་མིག་འབྱུང༌། །དབུགས་གཟུགས་ཆ་གོང་མིག་རི་རྩེ། །འོག་མ་བུག་མེ་འབྱུང་ཀླུ་རྣམས། །བརྒྱན་ནམ་ཡང་ན་མིག་དམར་ནས། །གདེངས་ཅན་མེ་དང་རི་ལག་གཟུགས། །ཆ་གོང་བསེ་རུ་རི་ཟླ་བ། །འོག་མ་མིག་དུས་དབང་པོ་རོ། །ལྷག་པ་མིག་དང་དབང་འབྱུང་དང༌། །གཟུགས་ཆུ་རིག་བྱེད་ཆ་གོང་ནས། །མཚོ་དུས་རི་གཟུགས་འོག་མ་ནས། །དུས་མིག་ཐུབ་པ་བསི་རུ་དང༌། །
བླ་མ་འབྱུང་བ་ཀླུ་དབང་དང༌། །ཚེས་མཚོ་ཆ་གོང་གཟུགས་ཀླུ་མེ། །འོག་མ་བསེ་རུ་ཀླུ་ལག་རྩེ། །པ་སངས་ལག་མིག་གཟུགས་ཆུ་དང༌། །བུག་གཟུགས་ལག་པ་ཆ་གོང་ནས། །རི་བོ་བུ་ག་སྟོང་པ་འབྱུང༌། །འོག་མ་མེ་ཀླུ་ལག་པ་གཟུགས། །སྤེན་པ་གདེངས་ཅན་འབྱུང་བ་དང༌། །ཐུབ་པ་རིག་བྱེད་ཆ་གོང་ནས། །ཐིག་གཟུགས་ཐིག་དབང་འོག་མ་ནས། །མཚེ་མ་དབང་དུས་རྣམས་ཕྲི་ལ། །ཀུན་ཀྱང་འོག་མའི་ཆ་ཤས་ནི། །བསེ་རུ་བུག་པ་གཟུགས་སྲིན་པོ། །སྟེང་ཆ་ཕུར་བུའི་ལག་མིག་རི། །གཞན་རྣམས་ཉིན་ཞག་ཇི་བཞིན་པས། །སྒྲིལ་བས་དྲག་གསུམ་དལ་བར་དང༌། །ཞི་གཉིས་རྐང་འཛིན་དྷྲཱུ་ཝ་འགྲུབ། །སྒྱུར་བྱེད་དེ་རྣམས་ལོ་རེ་ཡི། །ཡུལ་གྱི་རྟག་པའི་ལོངས་སྤྱོད་དོ། །དེ་ཡང་དྲག་གསུམ་རྐང་འཛིན་དང༌། །ཞི་གཉིས་དལ་དྷྲཱུ་ཐུན་མོང་ནི། །ཁྱིམ་ཟླ་སྔ་མའི་རྫོགས་ཚད་ཉིད། །ཕྱི་མའི་ཉི་དྷྲཱུའང་དེ་ཉིད་དོ། །འོན་ཀྱང་ཆོ་གའི་རྣམ་འགྱུར་ནི། །ལུག་ཁྱིམ་ལ་སོགས་འདས་པའི་གྲངས། །འབྱུང་ཡོན་གཟུགས་བསྒྱུར་མཁའ་རོས་བགོས། །རྙེད་ནོར་སྐར་གནས་ལྷག་དབྱུག་གོ །དེ་ནས་དྲག་གསུམ་དལ་དྷྲཱུ་དང༌། །ཞི་གཉིས་རྐང་འཛིན་དྷྲུ་ཝ་དེར། །ཁྱིམ་ཟླ་གཅིག་གི་ལོངས་སྤྱོད་ནི། །མིག་དམར་གཟུགས་དྲག་དུས་མཚེ་ཆུ། །རྒྱལ་བ་
དུས་ཚེས་རྒྱ་མཚོའོ། །ལྷག་པའི་བུ་ག་མཁའ་མིག་སོ། །ཕུང་པོ་དུས་ཉི་རི་བོ་དང༌། །དབང་པོ་གཟུགས་མཁའ་བྲོ་བའོ། །ཕུར་བུའི་མཁའ་དྲག་ལག་མིག་དབང༌། །ཀླུ་དབང་རོ་སྦྲུལ་ཐུབ་མཁའ་མིག །པ་སངས་མེ་དང་བུག་ཡོན་ཏན། །འཁོར་ལོ་བསེ་རུ་རི་བུག་དབང༌། །བྲོ་བ་བུ་ག་རི་མཚོའོ། །ཉི་བུའི་ཐིག་མཚོ་རིག་བྱེད་མེ། །ཆུ་བོ་མིག་བུག་ཀླུ་དང་མཚོ། །ཆུ་མེ་ལག་པ་དུས་རྣམས་ནི། །ལུག་ནས་རིམ་བརྩེགས་ཉའི་བར་སྤེལ། །ཡང་ན་འདས་ལོ་ཉི་མས་བསྒྱུར། །འདས་པའི་ཁྱིམ་གྲངས་བསྲེས་པ་དེ། །གནས་དྲུག་ཚན་པ་ལྔར་གཞག་ལ། །སྔར་བཤད་ཟླ་གཅིག་ཡུལ་ལོངས་ཀྱིས། །བསྒྱུར་ལ་སྔར་བཤད་བརྩིས་འཕྲོད་བྲི། །རང་རང་འཁོར་ལོས་དྲིལ་བ་ཡིས། །སོ་སོའི་ཁྱིམ་ཟླའི་དྷྲཱུ་ཝ་འཆར། །དེ་ནས་ཁྱིམ་གྱི་ཟླ་ཞག་ནི། །གང་གནས་བརྟག་ཕྱིར་འདས་ཟླ་ནས། །གཅིག་ཕོབ་འོག་ཏུ་རི་རོ་ཆར། །བྱས་ལ་གང་བརྩིའི་ཟླ་བཤོལ་འཕྲོས། །སྦྱངས་ཏེ་ལྷག་མ་མཁའ་མེ་གྲུབ་པའི་ཉིབ་རལ་བསྒྲུབ་ཀྱང་ཁྱད་པར་མེད་དང༌། །གང་བརྩིའི་ཚེས་གྲངས་དབང་མཚམས་བསྒྱུར། །དེ་གཉིས་བསྲེས་ལ་རི་རོས་བགོ །རྙེད་ནོར་ཞག་ཡིན་ལྷག་མ་དེ། །མཁའ་རོ་མཁའ་རོ་དུས་རི་རོས། །རིམ་བསྒྱུར་རི་རོས་རྙེད་ནོར་བརྩེག །ཞག་
གནས་མཁའ་མེས་ཐོབ་པའི་ནོར། །སྟེང་བསྲེས་དེ་ཡང་ཁྱིམ་གྱིས་དོར། །སྟེང་ནས་རིམ་བཞིན་འདས་ཁྱིམ་དང༌། །འདས་ཞག་དབྱུག་སྲང་དབུགས་ཆར་བཅས། །དེ་ཡི་འདས་ཁྱིམ་འདས་ཞག་དང༌། །བསྟུན་ནས་རྐང་འཛིན་དལ་དྷྲུ་ལ། །བརྩི་བྱའི་རྟག་ལོངས་སྟེར་བྱ་ནི། །མིག་དམར་མཁའ་ཟུང་མེ་མིག་རྩེ། །ཐུབ་རི་ཆུ་རོ་འདོད་པའོ། །ལྷག་པའི་མཁའ་སྐྱོན་གཟུགས་ཆུ་སྟོང༌། །ལག་ཟུང་མཚེ་མ་དབང་པོ་དང༌། །དུས་རྩ་དྲང་སྲོང་ཆུ་གཏེར་རོ། །སྒྲ་མཁན་མཁའ་སྟོང་ལག་མིག་ཆུ། །གཟུགས་རྩེ་མཚོ་དང་མིག་ཀླུ་དུས། །པ་སངས་མཁའ་རི་སྐྱོན་དབང་པོ། །ཆུ་བོ་རིག་བྱེད་ཡོན་ཏན་དང༌། །བུག་མཚོ་ཆུ་བོ་རྒྱ་མཚོའོ། །སྤེན་པ་མཁའ་སྟོང་བུ་ག་མཁའ། །རི་བོ་གདེངས་ཅན་གཟུགས་ཕུང་པོ། །དུས་མཚོ་ནམ་མཁའ་ལག་པ་སྟེ། །ཉི་མར་ཐིག་མཚོ་མཁའ་ཡོན་རྣམས། །སྔར་གྱི་འདས་ཞག་དང་བསྟུན་ནས། །བརྩི་བྱའི་ཚེས་གྲངས་ཀྱིས་བསྒྱུར་བྱིན། །དེ་ནས་དལ་མྱུར་ཆོ་ག་རྣམས། །ཉིན་ཞག་ཇི་བཞིན་བྱས་པས་འགྲུབ། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། ལེགས་ལྡན་གཟའ་ལྔ་ཁྱིམ་ཞག་ལ་སྤྱོད་པ་བཤད་པའི་སརྒ་སྟེ་བདུན་པའོ།། །།དེ་ལྟར་མཐའ་དག་རི་མོའི་ཁུར། །བསྐལ་ལྀའི་ཤིང་རྟས་དབུགས་འབྱིན་ལ། །
མགྱོགས་རྩིས་བདེ་བླག་གསར་པའི་བཤད། །དུས་གཟེར་རྣ་རྒྱན་གཡོ་བཞིན་འོང༌། །དེ་ལ་གྲུབ་པའི་མགྱོགས་སྟེར་ནི། །བཤོལ་ཡོད་སྔ་ལོའི་དབོ་ཟླའམ། །སྤྱིར་བཏང་ནག་པའི་ཟླ་བཤོལ་འཕྲོ། །མཁའ་མེས་བསྒྱུར་ལ་འབྱུང་རོས་བགོ །ལྷག་ན་ནོར་ལ་ཅིག་བྱིན་པ། །རགས་པ་ཟིན་པའི་ཚེས་གྲངས་ཡིན། །གང་འཛིན་ཉི་མའི་རྟག་ལོངས་དེ། །ཉི་མའི་དྷྲཱུ་ཝ་ལ་བྱིན་པས། །ཞག་གཅིག་རྟག་པའི་ལོངས་སྤྱོད་ལས། །ཉུང་ཤར་ལོ་དོའི་ཉི་རགས་ཡིན། །དེ་མཐུན་གཟར་དྷྲཱུ་ལ་བྱིན་པས། །ལོ་དེའི་གཟའ་ཡི་རགས་པའོ། །སྔ་ལོར་བཤོལ་ཡོད་སྔ་ལོ་ཡི། །དབོ་ཟླའི་གཟའ་ཉིའི་དྷྲུ་ཝར་བསྒྲུབ། །གཟའ་རགས་ཆ་ཤས་རི་བོས་བསྒྱུར། །རི་མཁའ་རིས་བགོས་ནོར་རི་རོའི། །ཆ་དང་ལྷག་མ་བགོད་བྱེད་ཆ། །ཉི་མར་རགས་པ་འབྱུང་ཡོན་མདས། །རིམ་བཞིན་ཆ་ཤས་བར་དུ་བགོ །རྙེད་ནོར་བསེ་རུའི་སྐྱེས་བུ་དེ། །གནས་གསུམ་གཞག་ལ་གཟུགས་མཚོ་རོས། །བསྒྱུར་ལ་རང་རང་འཁོར་ལོས་དྲིལ། །ཉི་མའི་རྐང་འབྲས་གསུམ་པོ་འགྲུབ། །གཟའ་ཉི་རགས་པ་གནས་དྲུག་གཞག །ཁྱིམ་མིང་གཉིས་རེའི་ཁ་བྱང་གདགས། །ལུག་དང་བུ་མོར་གཟུགས་འབྲས་དམན། །ཉ་དང་སྲང་ལ་བྱིན་པར་བྱ། །གླང་དང་སེང་གེར་མཚོ་འབྲས་དབྲི། །
བུམ་དང་སྡིག་པ་གཉིས་ལ་བརྒྱན། །འཁྲིག་དང་ཀརྚར་དུས་འབྲས་སྦྱང༌། །ཆུ་སྲིན་གཞུ་ལ་བསྲེས་པ་ཡི། །ཁྱིམ་དྲུག་སྤྱི་ནོར་རྣམ་པར་དག །དེ་ནས་རེའུ་མིག་འཛིན་པའི་ཚུལ། །ཉི་དྷྲཱུ་ར་གང་བརྩིའི་ཚེས་དེ་ཡི། །རྟག་ལོངས་བྱིན་ལ་ཉི་རགས་ཀྱིས། །ཕྲི་བ་ལྷག་མས་བསྐལ་ལི་ལི། །ཕྱེད་དག་རེའུ་མིག་དང་མཐུན་གཟུང༌། །གཡས་གཡོན་གཟའ་དང་ཉི་མ་ལ། །ཁྱིམ་མཐུན་སྔར་གྱི་སྤྱི་ནོར་བསྲེ། །འོན་ཀྱང་རགས་པ་རྙེད་པ་ཡི། །ཞག་གྲངས་ཕན་ཆད་སྔ་ལོ་ཡི། །ཆོ་ག་ལ་བརྟེན་སྤྱི་ནོར་སྟེར། །དེ་ཡིས་གཟའ་ཕྱེད་ཉི་མ་དག །རིལ་དྷྲཱུར་གང་བརྩིའི་ཚེས་གྲངས་བསྲེ། །སྲིད་པས་བགོས་ནོར་ལོགས་སུ་གཞག །དེ་ལྷག་ཆ་ཤས་དང་བཅས་པས། །རིལ་ཆའི་རེའུ་མིག་གང་ཟིན་གཟར། །ནོར་མཉམ་བསྣན་ལ་མི་མཉམ་ཕྲི། །དེ་ཡིས་གཟའ་ཉིད་རྣམ་པར་དག །ཉི་དག་གནས་གཉིས་གཅིག་ལ་ནི། །སྐར་ཐིག་དབྱུ་གུར་རིག་བྱེད་དབང༌། །ཚེས་བསྒྱུར་སྟེར་རམ་རེའུ་མིག་བྱིན། །དེ་ལ་གཟའ་ལོངས་མན་གྱིས་སྦྱང༌། །རེས་འགྲོགས་ཟླ་བའི་སྐར་མ་སྟེ། །ཉི་ཟླ་གཉིས་བསྲེས་སྦྱོར་བའོ། །བྱེད་པ་ཚེས་ཀྱི་རེའུ་མིག་གཟུང༌། །དེ་ཡིས་གྲུབ་མཐའི་ཡན་ལག་ལྔ། །སྔར་བཤད་བཞིན་དུ་འདིར་ཡང་དྲན། །དེ་ལས་གཞན་པ་བྱེད་པའི་ལུགས། །མགྱོགས་
སྟེར་ཆོ་ག་གྲུབ་མཐའ་དང༌། །མཚུངས་མོད་འོན་ཀྱང་རང་ལུགས་དེའི། །རྟག་ལོངས་དང་ནི་ཆ་ཤས་ཁྱད། །རྣམ་རིག་གསར་པས་འབྱེད་པར་བྱ། །དེ་བཞིན་རགས་པའི་ཐིན་ཚད་ཀྱང༌། །གྲུབ་མཐའ་བཞིན་དུ་ཟླ་བཤོལ་འཕྲོས། །སྟོན་མིན་ཕྱིར་ན་དྷྲཱུ་ཝ་དང༌། །རྟག་ལོངས་ཉེ་ཁྱད་བརྟགས་ལ་སྟེར། །དེ་ཡང་སྔ་ལེའི་བྱེད་གྲུབ་ཀྱི། །རགས་དང་སྤྱི་ནོར་ཡོད་གྱུར་ན། །གྲུབ་མཐའི་ཉི་མ་རགས་པ་ཡི། །ཆུ་སྲང་མཁའ་མིག་ཆར་མཁའ་རོས། །ཕྲི་བ་ཕྱི་མའི་ཉི་རགས་ཏེ། །མ་ལྡང་ཞག་གཅིག་རྟག་ལོངས་གང༌། །བསྣན་ནས་སྦྱང་ངོ་གཟའ་རགས་ལ། །གཟུགས་དྲག་གཟུགས་མཚོ་རིག་བྱེད་དང༌། །དུས་མིག་ཀླུ་རི་རྩེ་མོ་རྣམས། །བྱིན་པས་ཕྱི་ལོའི་རགས་པ་འཆར། །སྤྱི་ནོར་ལ་ནི་སྤྱི་ནོར་གྱི། །རེའུ་མིག་བྱིན་ལས་ཕྱི་ལོ་སྟོན། །བྱེད་པ་ལ་ནི་ཉི་རགས་དེར། །སྲང་ནས་རི་གཟུགས་ཆ་ཤས་ནས། །མིག་ཕྲི་ཕྱི་མའི་རགས་པ་འཆར། །མ་ལྡང་ཞག་གཅིག་རྟག་ལོངས་བསྣན། །གཟའ་ལ་གཟུགས་དྲག་མཁའ་མཚོ་ལག །བྱིན་པ་ཕྱི་མའི་གཟའ་རགས་སོ། །སྔ་ལོའི་ཚེས་ལ་དྲག་པོ་བསྣན། །ཕྱི་མའི་རགས་པ་ཟིན་པ་ཡི། །ཚེས་སྟོན་ཉི་མ་སྟོང་ཞུགས་ལ། །མིག་གཟུགས་སྟེར་བ་ཁྱད་པར་ཡིན། །གྲུབ་མཐའི་རེའུ་མིག་རྒྱས་པ་
གང༌། །འཛིན་ན་ཟླ་དག་མཁའ་མེས་བསྒྱུར། །གང་བརྩིའི་ཚེས་བསྲེ་དེ་སྟེང་ནས། །མཁའ་རོ་ཡོན་ཏན་རྩེ་མོས་ཕྲི། །དེ་ལ་ཆུ་མིག་ཀླུ་མཚོ་ཡིས། །ཐོན་ནོར་གནས་དྲུག་བརྩེགས་པ་ལ། །མིག་དང་གཟུགས་མེ་བྲོ་བ་དང༌། །གཟུགས་དང་དྲག་པོ་མཁའ་རྩེ་མེས། །བསྒྱུར་ལ་ཆུ་བོ་མེ་དབང་དང༌། །ཀླུ་མཚོ་བསེ་རུ་གདེངས་ཅན་མཚོ། །རྩེ་མོ་མཁའ་རིས་བརྒྱན་པ་དེ། །རང་འཁོར་དྲིལ་བས་ལོ་ཡི་གྲངས། །མྱོས་བྱེད་བར་རེའི་གཟའ་རགས་འགྲུབ། །ཡང་ན་ཉི་རགས་སྟོང་ཞུགས་ལོའི། །གཟའ་ཡི་རགས་པ་དེ་ཉིད་གཟུང༌། །ཆུ་མིག་ཀླུ་མཚོས་བགོས་ལྷག་དེས། །རེའུ་མིག་བྱ་ར་གཟུང་བྱས་ལ། །གནས་གསུམ་གཡས་པར་གཟའ་རགས་བྱིན། །དབུས་ཁྱིམ་གཡོན་པ་ཉི་དག་གོ །དེ་ནས་རིལ་ཆའི་རེའུ་མིག །འཛིན་སོགས་ཆོ་ག་སྔར་བཞིན་ནོ། །སྒྲ་གཅན་རེའུ་མིག་གཟུང་བའི་ཚུལ། །ཟླ་དག་སོས་བརྒྱན་མིག་གིས་བསྒྱུར། །ཉར་གཟུགས་སྟོང་ལ་ལག་པ་བྱིན། །མཁའ་དུས་ཆུ་བོས་བགོས་ལྷག་ནི། །འབྲིང་པོའི་བྱ་ར་ཡིན་པར་གཟུང༌། །བསྡུས་པ་འཛིན་ན་ཟླ་དག་དེ། །ཐུབ་པ་བསེ་རུས་བརྒྱན་བྱས་ལ། །མཁའ་མེ་ལག་པས་དོར་བའི་ལྷག །གཉིས་ཀའི་སྟེང་ཉ་འོག་མ་སྟོང༌། །བྱེད་པོ་ལོ་འཕོའི་རེའུ་མིག་ནི། །མཛེས་བྱེད་འདས་ལོར་ཆུ་མེ་
བྱིན། །རི་གཟུགས་མེ་ཡི་དོར་ལྷག་གོ །དེ་ནས་ལེགས་ལྡན་གཟའ་ལྔ་པོ། །ཉིན་ཞག་ལ་སྤྱོད་མགྱོགས་རྩིས་ནི། །ནག་ཉའི་སྤྱི་ཞག་རྩ་སྒྲུབ་དེའི། །ཞག་གནས་ཆུ་རོ་རི་མཁའ་རིའི། །ཆ་བརྩེགས་གསུམ་ཀར་བཅོ་ལྔ་རེ། །བྱིན་པ་ཉ་སྟོང་རེ་མོས་སྤེལ། །རི་མཁའ་རིས་དྲིལ་བར་མེར་བྱིན། །ཆུ་རོས་རྙེད་ནོར་སྟེང་སྦྱོང་ཚེ། །མི་ནོར་མཚན་མ་བཀོད་པར་བྱ། །ནག་པའི་ཉ་ཡི་སྒོས་ཞག་ནི། །རྩ་སྒྲུབ་བཞིན་དུ་དག་པར་བསྒྲུབ། །ཉི་མའི་སྒོས་ཞག་སླར་ཡང་ནི། །མིག་ཀླུ་མེ་སྐྱོན་གྱིས་ཐོབ་པ། །སྒོས་ཞག་གནས་གཞག་ཀུན་ཀྱང་ནི། །དབོ་ཟླའི་སྟོང་བར་བཅོ་ལྔ་རེའམ། །སྤྱི་ཞག་རྟགས་ཅན་ལ་བཅུ་བཞི། །བྱིན་ལ་སྤེལ་ཞིང་ཞི་གཉིས་ལ། །ཚེས་དང་མ་ནུབ་རྒྱ་དང་བཅུས། །བསྒྱུར་ལ་བསྣོན་པ་ཤེས་པར་བྱ། །ཉི་རགས་དོན་དུ་ཉི་མའི་ཞག །མིག་ཀླུ་མེ་སྐྱོན་གྱིས་དོར་ལྷག །སྐར་མ་ནས་བཟུང་ཆ་ཤས་བར། །རིམ་བསིལ་ཉི་མའི་དཀྱིལ་འཁོར་ནི། །མདའ་མཁའ་མཚོ་ཡིད་རི་མཚམས་ཀྱིས། །ཐོབ་དེ་ཉི་རགས་རྣམ་དག་གོ །ཡང་ན་སྔ་ལོའི་རགས་པ་ལ། །དབྱུག་གཟུགས་སྲང་ཁྱིམ་དབུགས་སྟོང་པ། །ཆ་ཤས་ཁྱིམ་དང་ཐུབ་རི་ཟླས། །ཕྲི་ཞིང་མ་ལྡང་རྟག་ལོངས་བསྣན། །ཕྱི་ལོའི་རགས་པ་རྣམ་
དག་འཆར། །དེ་ལྟའི་ཉི་རགས་འབྱུང་ཡོན་ཟླས། །ཆ་ཤས་བར་དུ་ཕྱེ་བའི་ནོར། །རིམ་བཞིན་མ་ནོར་བརྩེགས་པ་ནི། །ཞི་གཉིས་དལ་རྐང་གསུམ་པོ་ ལྷག ༡༠༩༣སངས་པ༥༤༡་ཡིས། །བསིལ་བ་རང་རང་རྐང་འབྲས་ཡིན། །ཉི་རགས་གནས་དྲུག་ཚར་གཉིས་གཞག །སོ་སོའི་རྐང་འབྲས་གསུམ་སྔ་མར། །བསྣན་ཞིང་ཕྱི་མར་ཕྲོགས་པ་དེར། །ནོར་དང་བུ་ལོན་མིང་དུ་གདགས། །དེ་ནི་ཞི་གཉིས་སྤྱི་ནོར་ཡིན། །དེ་ནས་མན་ངག་སྒོས་ཞག་དེས། །ཐུན་མོང་བསྐལ་ལྀའི་རེའུ་མིག་གཟུང༌། །སྟེང་མར་ཉི་མ་རགས་པ་བྱིན། །དྲག་གཟའ་གསུམ་གྱི་རྐང་འཛིན་འགྲུབ། །དེ་འོག་གཉིས་ལ་སྤྱི་བོར་དེ། །ནོར་དང་བུ་ལོན་ཁ་བྱང་བཞིན། །བྱིན་པས་ཞི་གཉིས་དལ་དག་འགྲུབ། །དྲག་གསུམ་དལ་བ་དག་པ་ནི། །རྒྱས་པ་རང་རང་སྒོས་ཞག་དང༌། །མཐུན་པར་བཟུང་བས་འགྲུབ་པའོ། །འབྲིང་པོ་རེའུ་མིག་མཐུན་ན་གཟུང༌། །མི་མཐུན་ཅུང་ཟད་ཉུང་བ་ཡི། །བྱ་རས་སྒོས་ཞག་ལ་སྦྱངས་པའི། །ལྷག་མས་ཞག་རྩིས་རེའུ་མིག །སྔོན་གྱི་སྦྱོང་བྱེད་བྱ་ར་དེའི། །རེའུ་མིག་ནང་གི་ཀ་ཐ་དང༌། །མཐུན་པར་བཟུང་ལ་བསྲེས་པས་འགྲུབ། །ལྷག་པའི་སྒོས་ཞག་བརྒྱ་དང་ནི། །པ་སངས་སྒོས་ཞག་ཕྱོགས་ཀྱིས་བགོས། །
ནོར་གྱིས་རྐང་འཛིན་རེའུ་མིག་དང༌། །ལྷག་མས་སྤྱི་ནོར་རེའུ་མིག །བཟུང་ལ་བསྲེས་པ་རྐང་འཛིན་ནོ། །དེ་ནས་མྱུར་ངག་རེའུ་མིག་ནི། །རང་རང་དལ་བ་དག་པ་དེས། །དྲག་གསུམ་རྐང་འཛིན་ཉི་བར་དང༌། །ཞི་གཉིས་སོ་སོའི་རྐང་འཛིན་ལ། །སྦྱང་ཞིང་མ་ལྡང་འཁོར་ལོ་བསྣན། །སྦྱངས་ཤུལ་འཁོར་ཕྱེད་ལྷག་ན་དོར། །ཆུ་སྲང་གནས་སུ་མཁའ་མེ་ལས། །མང་ན་དབྱུ་གུར་ཟླ་བ་བྱིན། །སྦྱངས་ལྷག་སྐར་གནས་མཁའ་རོས་བསྒྱུར། །དབྱུ་གུར་བསྲེས་པའི་གྲངས་དེ་ཡི། །མྱུར་བའི་རྐང་པའི་རེའུ་མིག་ལས། །འཁོར་ཕྱེད་དོར་ན་རིམ་མིན་དང༌། །མ་དོར་རིམ་པ་ལུགས་འབྱུང་དུ། །བཟུང་བ་རང་རང་དལ་དག་ལ། །རིམ་པ་བསྣན་ལ་རིམ་མིན་སྦྱང༌། །དེ་ཡིས་མྱུར་དག་རི་མོ་འགྲུབ། །འགྲོས་བཞི་རྩ་སྒྲུབ་བཞིན་དུ་དྲན། །དེ་ལས་གཞན་པ་ཁྱིམ་ཚེས་ཀྱང༌། །བྲེང་ཆགས་ཉིད་དུ་བསྒྲུབ་པ་ནི། །བརྩོན་འགྲུས་ཉིད་ཀྱིས་སྨ་བབ་པས། །སྐྱེས་བུའི་མདུན་སར་མི་གནས་པ། །མཐོང་ཆོས་ཉིད་ཕྱིར་འདིར་མ་སྨོས། །འདོད་ནའང་གཞན་དུ་གསལ་བས་ཤེས། །སྤྱིར་ན་མཁའ་ལ་ཁྱིམ་དང་ནི། །ས་ལ་དུས་བཞི་འཁོར་བ་ལས། །ཁྱིམ་གྱི་རྟེན་གཞི་གོ་ལ་ནི། །གཡས་སྐོར་ཆུ་ཚོད་རེའི་ཡུན་ལ། །དཔག་ཚད་དྲུག་སྟོང་ཕྱེད་
སུམ་བརྒྱ། །འགྲོ་བས་ཉིན་ཞག་གཅིག་ལ་ནི། དཔག་ཚད་གསུམ་འབུམ་བདུན་ཁྲི་དང༌། །ལྔ་སྟོང་རེ་བགྲོད་གླིང་བཞི་འཁོར། །དེ་བཞིན་ས་ལ་དུས་བཞི་ཡང༌། །ཉི་མས་སྐར་ཁྱིམ་འཁོར་བ་དང༌། །དུས་བཞིའི་ངེས་པ་རྫོགས་པ་ལ། །ལོ་གཅིག་ཅེས་གྲགས་ཚེས་ཞག་གི །ཞག་མི་ཐུབ་བསགས་ཟླ་བཤོལ་བྱུང༌། །ཞིབ་པ་ཡེ་ཤེས་རླུང་ལས་སོ། །གནས་ཚུལ་གཡོན་དུ་བསྐོར་ན་ཡང༌། །འཁོར་ཚུལ་གཡས་སུ་བསྐོར་བ་སྟེ། །དཔྱིད་དང་དབྱར་དང་སྟོན་དང་དགུན། །ར་བ་དང་ནི་འབྲིང་པོ་དང༌། །ཐ་མའི་རིམ་པ་གསུམ་གྱིས་འཕོ། །ལྷོ་གླིང་དཔྱིད་ཟླ་གསུམ་ཡོད་དུས། །དབུས་མའི་དཔྱིད་འབྲིང་ནུབ་ཏུ་འཕོ། །ཤར་གྱི་དཔྱིད་ཐ་དབུས་འཕོ་སོགས། །དུས་བཞི་གཡས་བསྐོར་ངེས་པ་དང༌། །དུམ་བུ་བཅུ་གཉིས་གང་གང་དེར། །བྱང་བགྲོད་མཐའ་རུ་ཐུག་པའི་ཚེ། །དེ་ནས་བགྲངས་པའི་ཚིགས་བདུན་པར། །ལྷོ་བགྲོད་མཐར་ཐུག་ཡོད་པ་སྟེ། །གང་དུ་དཔྱིད་མཉམ་ཡོད་པ་ནས། །བགྲངས་པའི་བདུན་པར་སྟོན་མཉམ་མོ། །དེ་ཕྱིར་ཟླ་བའི་དབུགས་ཐོབ་དང༌། །སྒང་ཚད་ཁྱིམ་སླེབ་ལྡོག་གཉིས་སོགས། །དུས་གཟེར་ངེས་པ་འདི་ལྟར་བརྟག །དབུགས་ཐོབ་ཟླ་བ་སྔོན་མ་དང༌། །སྒང་ཁྱིམ་བརྩི་བྱ་གང་ཡིན་པ། །དབྱར་ཉིར་འདས་ཟླ་གཉིས་དང་ནི། །དགུན་
ཉིར་བརྒྱད་བསྲེས་བཤོལ་འཕྲོ་རྣམས། །མཁའ་མེས་བསྒྱུར་ནས་དབུགས་ཐོབ་ལ། །རི་བོང་ཅན་དང་རིག་བྱེད་ཚེས། །སྒང་ལ་དུས་མེ་དབང་པོ་དང༌། །ལྡོག་གཉིས་ཕུང་པོ་ཡོན་ཏན་མེ། །བསྲེས་ལ་འབྱུང་རོས་ཐོབ་པའི་ནོར། །རང་རང་ཚེས་གྲངས་བྱ་ར་ཡིན། །མཁའ་མེ་ལས་ལྷག་དོར་བྱས་པ། །དེ་ཚེ་ཕྱི་དྷྲཱུ་ལ་བརྟེན་སྒྲུབ། །འབྱུང་རོས་ཐོབ་པའི་ནོར་དེ་ཡིས། །ཚེས་གྲངས་སྟོན་ལ་ལྷག་མ་ཡིས། །རེ་ལྔ་ཆ་ཡི་རེའུ་མིག་གཟུང༌། །ཡང་ན་ལྷག་དེ་འབྱུང་བས་བགོ །ནོར་གྱིས་བཅུ་གསུམ་ཆ་དང་ནི། །ལྷག་མས་ལྔ་ཆའི་རེའུ་མིག་གཟུང༌། །རང་རང་གང་ཟིན་ཚེས་གྲངས་ཀྱི། །རྟག་ལོངས་གཟའ་ཉི་བར་པར་བསྣན། །རང་རང་ཚད་འཆར་མ་མཐུན་ན། །སྔ་མའི་བཤོལ་འཕྲོས་གཟུང་བར་བྱ། །སྦྱར་ན་ཁྱིམ་སླེབ་གྲུབ་མཐའ་ཡི། །ཉེ་དག་གིས་ནི་སྟོན་ཟེར་ཡང༌། །ཚད་ཁྲ་ཇི་བཞིན་འཆར་ཉུང་བས། །གང་ཉེའི་ལོངས་སྤྱོད་མང་བ་ལ། །ཆོ་ག་བྱེད་པའི་ལུགས་ཡོད་མོད། །དེས་ཀྱང་ཇི་བཞིན་མི་སྟོན་ཕྱིར། །ཉི་རྐང་འཕོ་བའི་མཚམས་ཉིད་ནས། །རིག་པས་ཞིབ་མོ་རྣམ་པར་འཐག །རྀ་ཥི་ཁྲུམས་ཟླའི་དབུགས་ཐོབ་ཀྱིས། །སྟོན་མོད་འཆར་བའི་ཚད་མ་ཡིན། །དྲང་སྲོང་དེ་ཡི་གཞལ་མེད་ཁང༌། །ཉི་མས་གདུངས་
ཤིང་ཟླ་བས་བསིལ། །ཀེ་ཏ་ཀ་ཡིས་རྙོག་མ་བགྲུངས། །དམོད་པའི་མཐུ་ཡིས་ཆུ་ཀླུང་ཀུན། །ཞག་བདུན་ཡན་ལག་བརྒྱད་ལྡན་ཆུར། །འགྱུར་བའི་དུས་ལ་རྣམ་པར་གཞག །ཕག་ཞག་སྣྲོན་ཟླའི་ཟླ་བ་ཤོལ་འཕྲོ། །མཁའ་མེས་བསྒྱུར་ལ་གཏེར་ཡོན་དྲག །བསྲེས་ལ་འབྱུང་རོས་ཐོབ་ནོར་གྱིས། །ཚེས་སྟོན་ཞག་འཁོར་ལོངས་ན་དོར། །དེ་བཞིན་དུམ་བུ་ཅུ་གཉིས་པའི། །ཆ་ལས་རང་གནས་གངས་ཅན་འདིའི། །ལྡོག་གཉིས་འཁྲིག་གཞུའི་ཞག་ལྔ་པས། །རགས་པར་སྟོན་ཞིང་གཞན་ཡང་ནི། །བགྲོད་གཉིས་ཐུར་གྲིབ་ལྷོ་བྱང་དུ། །སོ་སོར་ལོག་པའི་ཤེས་བྱེད་ནི། །བརྒྱུད་འབྲེལ་དང་བསྟུན་དཔྱད་པ་ཡི། །གསལ་སྒྲོན་ལུགས་དང་དུས་འཁོར་ལུགས། །དེང་འདིར་བཤད་ལ་གསང་བ་ཡི། །ཉི་ལྡོག་ཅེས་གྲགས་གང་ཆེ་ཡང༌། །གནད་ཀྱི་ལག་ལེན་ཕྲ་ཞིབ་ནི། །གཟའ་མཐུན་བརྟག་པ་ལ་རྨོངས་ན། །དུས་གཟེར་སྤྱི་དང་ཁྱད་པར་དུ། །བཤོལ་ཟླའི་ལུང་སྟོན་འཛོལ་བ་ཡི། །ཟླ་བའི་ས་བདག་འཆོལ་བས་སྒྲིམས། །བརྩི་བྱའི་གཟའ་ཉིའི་རིལ་ཆའི་དྷྲཱུར། །རྟག་ལོངས་བཅུ་གསུམ་ལྔ་ཆ་བསྣན། །རིལ་བོར་ཚེ་བསྲེས་ཆ་ཤས་ནི། །སྟོང་པ་གདེངས་ཅན་རི་མེས་བགོ །ཡང་དག་རྒྱུའོ་ལྷག་མ་རྣམས། །སྲང་དབུགས་རི་རོ་རི་མཁའ་རིའི། །ཆ་ཤས་བར་
བསྒྱུར་བགོས་ཐོབ་པ། །སྔ་རྐང་ལ་བསྣན་ཕྱི་རྐང་ཕྲི། །དེ་ཡིས་གཟའ་བར་ནོར་མཉམ་བསྣན། །མི་མཉམ་ཕྲི་ལ་དེ་བཞིན་དུ། །ཉི་བར་གནས་གཉིས་བཀོད་པ་ཡང༌། །སྐྱེས་ཁྱིམ་སྐར་དྲུག་ཉེ་ལྔས་སྦྱང༌། །རྐང་པའི་ཆོ་ག་ལྔ་བསྡུས་བཞིན། །རྐང་ལོངས་གཟའ་ཉིའི་ལོངས་སྤྱོད་ལ། །འཁོར་བྱེད་དོར་བསྣན་མ་དོར་ཕྲི། །གཟའ་མཐུན་ཚེས་ཁོངས་དེའི་ལོངས་སྤྱོད། །ཟད་ཚེ་དུས་གཟེར་དེ་དང་དེའི། །ངེས་པ་ཞིབ་སྟོན་མན་ངག་ལུགས། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། མགྱོགས་རྩིས་དུས་གཟེར་དང་བཅས་བཤད་པའི་སྐབས་ཏེ་སརྒ་བརྒྱད་པའོ།། །།འདི་ན་ཉིན་ཞག་ཕྲུགས་རེ་བཞིན། །དུས་སྦྱོར་བཅུ་གཉིས་འཆར་བ་བཤད། །དེ་ལ་ཁྱིམ་གྱི་ཉིན་ཚད་ནི། །ཉ་དང་བུ་མོ་མཁའ་མེར་མཉམ། །ལུག་སེང་དབྱུག་གུ་གཟུགས་མེ་དང༌། །ཆུ་སྲང་ཕྱོགས་ཡིན་གླང་ཀརྚ། །མིག་མེའི་དབྱུག་ལ་མཁའ་མིག་སྲང༌། །འཁྲིག་པ་ཕྱེད་བཅས་མེ་རྩེའི་དབྱུག །བུམ་སྲང་ཆུ་ཚོད་གདེང་ཅན་ལག །མཁའ་དབང་ཆུ་སྲང་སྡིག་སྲིན་གཉིས། །འཁོར་ལོའི་དབྱུག་མཁའ་ཆུ་ཡི་སྲང༌། །གཞུ་དབྱུག་དུས་མིག་ཕྱེད་བཅས་སྲང༌། །སོ་སོས་མཁའ་རོ་ལ་སྦྱངས་པས། །ཕྲི་ལྷག་
རང་རང་མཚན་ཚད་ཡིན། །གང་བརྩིའི་ཚེས་དེའི་གྲུབ་རྩིས་ཀྱི། །ཉི་བར་སྐར་གནས་མཁའ་རོས་བསྒྱུར། །འོག་གི་དབྱུག་བཅུག་འབྱུང་ཡོན་ཟླས། །ཐོབ་པ་འདས་པའི་ཁྱིམ་གྱི་གྲངས། །ལྷག་མ་མཁའ་མེས་བསྒྱུར་བ་ལ། །ཆུ་སྲང་མཚེ་མས་བགོས་ནོར་བསྲེ། །འབྱུང་ཡོན་འདས་ཐོབ་འདས་ཞག་གོ །དོན་གྱི་ཁྱིམ་འཕོ་ཡིན་པར་བརྟག །འདས་ཞག་སྟེང་ནས་ཐུབ་པས་སྦྱངས། །མ་ལྡང་ཁྱིམ་ཕོབ་དེ་ཡང་ནི། །འཁོར་ལོ་རྫོགས་ན་བསྣན་པར་བྱ། །ལྷག་མ་འདས་ཁྱིམ་གྲངས་ཡིན་ཡང༌། །ཆོ་ག་སླ་ཕྱིར་ངོ་ཐོག་ཁྱིམ། །རང་ཁྱིམ་ད་ལྟ་བར་འདོགས་སོ། །ཐུབ་པས་དམན་པའི་ཞག་ལྷག་དེ། །གནས་གཉིས་སྟེང་འོག་མིག་གིས་བསིལ། །དུས་དང་མཁའ་རོས་སྟེང་སྒྲིལ་བའི། །དབྱུ་གུ་སྲང་དང་དབུགས་གསུམ་གྱིས། །བྱེད་སླའི་ངོ་ཐོག་ཁྱིམ་དེ་ཡི། །འཁྲིག་སོགས་ལྷོ་བགྲོད་ཉིན་མོར་དབྲི། །གཞུ་སོགས་བྱང་བགྲོད་ཉིན་མོར་བསྣན། །བརྩི་བའི་ཉིན་དེའི་ཉིན་ཚད་ཡིན། །དེ་ཡིས་མཁའ་རོར་སྦྱངས་པ་མཚན། །དེ་ནས་དུས་སྦྱོར་བཅུ་གཉིས་པོའི། །འཆར་ཡུན་སྲང་ཚད་འདི་ལྟ་སྟེ། །འདོད་ཡོན་མཁའ་མེ་ཉ་བུམ་ཚད། །སྟོང་པ་བུག་མིག་ལུག་ཆུ་སྲིན། །མཁའ་སྟོང་ལག་པ་གླང་དང་གཞུ། །སྟོང་པ་འཁོར་ལོ་འཁྲིག་དང་སྡིག །མཁའ་རོ་རྩེ་མོ་ཀརྚ་
སྲང༌། །འབྱུང་རི་ཡོན་ཏན་སེང་གེ་དང༌། །བུ་མོའི་འཆར་ཚད་སྲང་ཉིད་དོ། །ཐུབ་པས་ཕྲི་བའི་ཞག་ལྷག་དེ། །སོ་སོའི་འཆར་ཡུན་སྲང་གིས་བསྒྱུར། །མཁའ་མེས་བགོས་ནོར་འདས་སྲང་སྟེ། །དེ་ཡིས་རང་རང་སྲང་ཚད་ལ། །སྦྱངས་ལྷག་མ་འོངས་ཆུ་སྲང་ཡིན། །ཐུར་མའི་བགོད་གཞི་རགས་པ་ནི། །ཆུ་སྲང་མཁའ་སྟོང་མཁའ་བུག་ལ། །ལུག་སེང་ཕུང་བོ་ཀླུ་དབང་སྦྱང༌། །གླང་ཀར་ནམ་མཁའ་མཚོ་ཁྱིམ་འཕྲོག །འཁྲིག་པར་འབྱུང་དུས་བུག་གཟུགས་དམན། །ཉ་དང་བུ་མོ་རྣལ་མར་གཞག །བུམ་སྲང་ཚེས་དང་འདོད་ཡོན་བྱིན། །ཆུ་སྲིན་སྡིག་པར་མཁའ་རོ་བུག །གཞུ་ལ་འབྱུང་རྩེ་འདོད་པ་བསྣན། །ཐུར་མའི་རང་གྲིབ་བདུན་བཅས་ཀྱིས། །བགོས་ཐོབ་ནོར་ནི་ཆུ་སྲང་ཡིན། །ལྷག་མ་རོས་བསྒྱུར་ཐོབ་པ་དབུགས། །སྲང་ལ་མཁའ་རོས་ཐོབ་པའི་ནོར། །དབྱུ་གུའི་གནས་སུ་གཞག་པ་ཡིས། །སྔ་དྲོ་འདས་དང་ཕྱི་ལུས་རྟོགས། །དེ་དག་རྣམས་ཀྱི་ཉིན་ཚད་ལ། །སྦྱངས་ལྷག་སྔ་ལུས་ཕྱི་འདས་ཀྱི། །ཆུ་ཚོད་ལ་སོགས་འཁྲུལ་མེད་རྟོགས། །དེ་ནས་ཏཱརྐལ་བརྟག་བྱ་སྟེ། །ཐུར་བཙལ་འདས་དབྱུག་མཁའ་རོས་བསྒྱུར། །འོག་གི་སྲང་བསྣན་དེ་ཉིད་ལ། །རང་རང་ཆུ་སྲང་མ་འོངས་པས། །ཐོག་མ་བྱས་
ནས་རིམ་བཞིན་སྦྱང༌། །ཉ་སོགས་དྲུག་ལ་ལུགས་འབྱུང་འཕྲོག །བུ་མོ་སོགས་ལ་ལྡོག་སྟེ་ཕྲི། །གང་དུ་མ་ལྡངས་ཏཱརྐ་ལ། །སྦྱངས་པའི་ལྷག་མ་མཁའ་མེས་བསིལ། །ཏཱརྐ་ལ་གང་ལ་བབས་པ་ཡི། །སྲང་ཚད་ཀྱིས་ཐོབ་ཆ་ཤས་ཏེ། །ལྷག་རྣམས་མཁའ་རོ་མཁའ་རོ་དང༌། །དུས་ཀྱིས་བསྒྱུར་ཐོབ་རིམ་བརྩེགས་ཏེ། །ཏཱརྐ་ལ་བཀོད་རིམ་པ་བཞིན། །ཏཱརྐ་ལ་དང་དེའི་ཆ་ཤས། །ཆུ་ཚོད་ཆུ་སྲང་དབུགས་རྣམས་ཏེ། །དུས་སྦྱོར་ཉིད་ཀྱི་གནས་ལྔའོ། །དབུགས་ནས་ལྷག་སྲིད་དག་འདོད་ན། །རང་སྲང་ལྔ་ཆས་བསྒྱུར་ཐོབ་ཆ། །དེ་ནས་མི་མཉམ་མཉམ་པ་གཉིས། །དང་པོ་མི་མཉམ་དུམ་དྲུག་ལས། །གཅིག་པ་བརྟག་ཕྱིར་གནས་ལྔའི་སྟེང༌། །ཏཱརྐ་ལ་མཁའ་མེས་བསྒྱུར་བ་ལ། །ཆ་བ་ཅུག་མཁའ་རོས་བསིལ་དབྱུག་བཅུག །སྟོང་པ་ཐིག་ཀླུ་གཟུགས་ཀྱིས་བཅད། །ཐོབ་པ་གཅིག་པའི་ཏརྐ་ལ། །ལྷག་མ་གང་བྱུང་ཕྱེད་པ་ནས། །སུམ་ཅུ་ཆའི་བར་བགོད་གཞིའམ། །སྤྱི་དྷྲུ་ཞེས་སུ་འབོད་པ་སྟེ། །དེ་ལ་ཕྱེད་པ་བརྟག་པའི་ཕྱིར། །བགོད་གཞི་མཁའ་སྟོང་སྲིན་པོས་བགོ །རྙེད་པ་ཡོད་མེད་ཇི་ལྟར་ཡང༌། །འདི་ནས་སུམ་ཅུ་ཆའི་བར་དུ། །ལྷག་མ་བྱུང་ཚེ་བསྭེ་རུ་བསྣན། །རྙེད་པ་གཉིས་ལས་མི་སྲིད་པས། །གཅིག་བདག་ཉི་མ་གཉིས་ཟླ་བ། །སུམ་ཆ་བརྟག་ཕྱིར་བགོད་གཞི་དེ། །ཐིག་ལེ་སྟོང་པ་དུས་ཀྱིས་བཅད། །རྙེད་ནོར་
གསུམ་ལས་མང་མི་སྲིད། །གཅིག་ནི་ཏཱརྐལ་ཞིང་གི་བདག །གཉིས་ནི་ཏཱརྐལ་ནས་བགྲངས་ལྔ། །གསུམ་ནི་ཏཱརྐལ་ནས་བགྲངས་པའི། །དགུ་བའི་ཞིང་བདག་གཟའ་འབྲས་འབྱུང༌། །དགུ་ཆའི་དུས་སྦྱོར་བགོད་གཞི་ལས། །མཁའ་སྟོང་མིག་ཐོབ་དགུ་ཆ་བརྟག །ཏཱརྐལ་གང་ཡིན་ངེས་པར་བྱ། །ལུག་སེང་གཞུ་རྣམས་ལུག་ནས་བགྲངས། །ཆུ་སྲིན་བུ་མོ་གླང་རྣམས་ནི། །ཆུ་སྲིན་ཉིད་ནས་ཐོག་མར་བགྲང༌། །འཁྲིག་བུམ་སྲང་གསུམ་སྲང་ནས་འདྲེན། །ཀརྐ་ཊ་དང་སྡིག་པ་ཉ། །ཀརྚ་ནས་བཟུང་དགུ་པའི་ཆ། །གང་བབས་ཞིང་བདག་གཟའ་འབྲས་བརྟག །བཅུ་གཉིས་ཆ་ལ་བགོད་གཞི་དེ། །མཁའ་ཚེས་ཀྱིས་ཐོབ་ཏཱརྐལ་ནས། །བགྲངས་པའི་ཞིང་བདག་གཟའ་འབྲས་འབྱུང༌། །སུམ་ཅུ་ཆ་ལ་སྤྱི་དྷྲཱུ་དེ། །མཁའ་རོས་བགོས་ལ་དམར་པོ་དང༌། །སྤེན་པ་ཕུར་བུ་ལྷག་སངས་ལྔ། །དབུས་གཞག་དེ་ཡི་གཡས་དང་གཡོན། །འབྱུང་བ་མངའ་ཀླུ་རི་དབང་བཀོད། །ལུག་སོགས་མི་མཉམ་རིམ་པ་གཡས། །གླང་སོགས་མཉམ་པ་རིམ་མིན་གཡོན། །གྲངས་མཐུན་ཐད་ཀའི་གཟའ་འབྲས་སྟོན། །དེ་ལ་གཟའ་འབྲས་འདི་ཡིན་ཏེ། །ཕྱེད་པ་སྲིད་ཆ་གཙོ་ཆེ་སྟེ། །ཉི་མར་བུ་དང་ཟླ་བར་མོ། །གསུམ་ཆ་དོན་ཆ་བརྟག་པ་སྟེ། །གཅིག་བྱུང་རེ་འབྲས་གཉིས་བྱུང་དོགས། །གསུམ་པས་རེ་དོགས་གང་ཡང་མེད། །དགུ་ཆ་རྐུན་པོ་བརྟག་པ་སྟེ། །
དངོས་པོའི་ཁྱད་པར་ཤེས་པ་ཡོད། །བཅུ་གཉིས་ཆ་ཡི་ཚོང་དང་ནད། །དགོས་དོན་ཤེས་འགྱུར་སུམ་ཅུ་ཆས། །དར་གུད་བརྟག་སོགས་གཞན་དུ་ཤེས། །གཉིས་པ་མཉམ་པའི་དུས་སྦྱོར་ནི། །ཉིན་ཞག་གཅིག་ལ་དུས་སྦྱོར་ཡང༌། །ཉིན་དྲུག་མཚན་དྲུག་བཅུ་གཉིས་རྫོགས། །དུམ་བུའི་ལོངས་སྤྱོད་སོ་སོར་བཤད། །ཉིན་ཞག་གཅིག་ལ་དབུགས་ཀྱི་གྲངས། །ཉི་ཁྲི་ཆིག་སྟོང་དྲུག་བརྒྱ་ལས། །ཉི་མས་ཐོབ་ནོར་གཅིག་པའི་ཚད། །ལག་པ་རྩེ་མོ་སྲིན་པོ་དང༌། །ཁྱིམ་དང་མཁའ་མེས་ཐོབ་པའི་ནོར། །རིམ་བཞིན་ཕྱེད་པ་གསུམ་ཆ་དང༌། །དགུ་ཆ་དང་ནི་བརཅུ་གཉིས་ཆ། །སུམ་ཅུ་ཆ་ཡེ་ལོངས་སྤྱོད་དེ། །དུས་དང་མཁའ་རོས་སྟེང་དུ་དྲིལ། །སོ་སོའི་ཆུ་ཚོད་ལ་སོགས་འཆར། །སྤྱིར་ནི་ལྷོ་གླིང་དབུས་མའི་ཡུལ། །གངས་ལྡན་དང་ནི་ཀེ་ལ་ཤ །རྒྱ་ནག་ལི་ཡུལ་བོད་ཡུལ་དང༌། །འཕགས་པའི་ཡུལ་ཏེ་ཡུལ་དྲུག་པོར། །ཀརྚའི་ཁྱིམ་གྱི་ཐོག་མ་ནས། །གཞུ་ཡི་མཐར་ཐུག་སླེབས་པའི་བར། །ཁྱིམ་ཟླ་དྲུག་ལ་གངས་ལྡན་ནས། །རིམ་པར་ཆུ་ཚོད་ལྔ་དང་བཞི། །ཆུ་སྲང་བཅུ་བདུན་བདུན་ཆ་གཅིག །འཕེལ་བའི་གྲིབ་གཟུགས་ལ་ལྟོས་ནས། །ས་འདིར་འོས་པའི་དུས་སྦྱོར་གྱི། །རི་མོ་དྲི་མེད་འོད་བཞིན་དཔྱད། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། ངོ་མཚར་གྱི་ཡོན་ཏན་རྒྱ་ཆེན་པོ་དང་ལྡན་པའི་དུས་སྦྱོར་བཤད་པའི་སརྒ་སྟེ་དགུ་པའོ།། །།
ཉ ༣༠༥ བུམ་པ། ཉིན་ཚད་ ༣ ༢༡ ༣༠ ༣༢ ༢༠ ༣༣ ༣༠ ༣༡ ༡༠ ༣༠ ༠ ༢༨ ༥༠ ༢༧ ༦༠ ༢༦ ༣༠ ༢༧ ༤༠ ༢༨ ༥༠ ཉ ༡༥༢ ༣ བུམ་པ་ལུག ༢༩༠ ཆུ་སྲིན་ ཁྱིམ་གྲངས་ ༡༡ ༠ ༡ ༢ ༣ ༤ ༥ ༦ ༧ ༨ ༩ ༡༠ ལུག་ ༡༤༥ ཆུ་སྲིནགླང་ ༢༠༠ གཞུ་ ཁྱིམ་མིང་ཉ་ ལུག གླང་ འཁྲིག་པ་ ཀརྚ སེང་གེ བུ་མོ་ སྲང་ སྡིག་ གཞུ་ ཆུ་སྲིན་ བུམ་པ་ གླང་ ༡༠༠ གཞུ་འཁྲིག ༣༧༠ སྡིག་པ་ བགོད་གཞིར་རགས་པ་ ༩༠༠༠ ༨༤༡༥ ༧༧༦༠ ༧༠༣༥ ༧༧༦༠ ༨༤༡༥ ༩༠༠༠ ༨༧༡༥ ༩༩༦༠ ༡༠༣༣༥ ༩༩༦༠ ༩༥༡༥ འཁྲིག་པ། ༡༣༥ སྡིག་པ་ཀརྚ ༣༦༠ སྲང་ བདག་པོ་ ཕུར་ མིར་ སངས་ ལྷག་ ཟླ་བ་ ཉི་མ་ ལྷག་ སངས་ མིར་ ཕུར་ སྤེན་ སྤེན་ ཀརྚ་ ༡༨༠ སྲང་སེང་གེ ༣༧༥ བུ་མོ་ མཚན་ཚད་ ༣ཿ ༢༨ ༥༠ ༢༧ ༤༠ ༢༦ ༣༠ ༢༧ ༤༠ ༡༨ ༥༠ ༣ ༣༡ ༡༠ ༣༢ ༢༠ ༣༣ ༣༠ ༣༢ ༢༠ ༣༡ ༡༠ སེང་གེ་ ༡༨༧ ༣ བུ་མོ
དེ་ནས་ཉི་ཟླ་སྒྲ་གཅན་དང༌། །ཕྲད་པའི་ངེས་པ་བཤད་པར་བྱ། །དུས་ཚིགས་ཟླ་བ་དྲུག་རེའི་མཚམས། །ནང་ལྟར་འབྱུང་ལྔ་ཡེ་ཤེས་ཁམས། །ཁྱད་པར་དུས་གསུམ་དཀར་ནག་ཚིགས། །དྷཱུ་ཏིར་རླུང་སེམས་དག་པ་མཚོན། །འོན་ཀྱང་གླིང་གཞན་དེ་དང་དེར། །ཉི་ཟླར་སྒྲ་གཅན་ཞུགས་ན་ཡང༌། །བྱིས་པ་རྣམས་ནི་ཡིད་མི་རྟོན། །དེ་ཕྱིར་མཐོང་ཆོས་གཏན་འབེབས་པ། །རི་མོའི་ལག་ལེན་ཡིན་པར་བརྟག །དེ་ལ་དང་པོ་ཟླ་འཛིན་ནི། །བཅོ་ལྔའི་གྲུབ་མཐའི་ཚེས་འཁྱུད་དང༌། །སྒྲ་གཅན་ཆ་ཤས་ཤེད་མཉམ་འཆོས། །དེ་ལྟའི་ཚེས་འཁྱུད་ཟླ་སྐར་དེའི། །སྐར་གནས་དུས་མིག་དབྱུག་ཀླུ་ལག །སྲང་སྐྱོན་དབུགས་གཟུགས་ཤེད་མཉམ་ཆ། །འདོད་པས་སྦྱངས་པ་དེ་དང་ནི། །གདོང་མཇུག་སྐར་གནས་གཅིག་པའམ། །གཅིག་ཁྱད་འདུག་ཀྱང་བརྟག་བྱ་སྟེ། །གང་ཉེ་མང་ལ་ཉུང་གིས་སྦྱངས། །སྐར་གནས་སྟོང་པ་དབྱུ་གུ་རུ། །ཐིག་དབང་ཚུན་ཆད་ཤར་གྱུར་ནས། །སྤྲིན་ལས་རྣམ་རྒྱལ་ཚེས་བདག་དང༌། །ངེས་པར་ཕྲད་པའི་ཚད་ཡིན་སྒྲིབ། །གཉིས་ཀ་སྟོངས་ན་འཛིན་པ་དཀའ། །སྒྲིབ་ཆ་ཆེ་ཆུང་སྦྱངས་ལྷག་གིས། །ཆུ་ཚོད་འབྱུང་བས་བགོས་ཐོབ་ནོར། །སྟོང་པ་ནས་བཟུང་རིག་བྱེད་པར། །ཤར་ན་དཀྱིལ་འཁོར་རིལ་པོར་སྒྲིབ། །འབྱུང་བ་ཤར་ན་དྲུག་ཆ་ལུས། །བྲོ་བར་གསུམ་
གཉིས་རི་བོར་ཕྱེད། །གདེངས་ཅན་སུམ་ཆ་དགུར་དྲུག་ཆ། །བཅུ་ཐོབ་བརྒྱད་ཆ་ཙམ་སྒྲིབ་ཀྱང༌། །སྤྱི་མཐུན་ཉིད་དུ་མངོན་པར་དཀའ། །སྒྲིབ་ཡུན་ཟླ་བ་བཅུ་དྲུག་ཆ། །བདུན་གྱིས་ཉ་བའི་བདག་ཉིད་ཅན། །དེ་ཡང་གདོང་འཛིན་མཐོང་མྱུར་བས། །རིལ་འཛིན་ཆུ་ཚོད་མི་བདག་དང༌། །མཇུག་འཛིན་ཟིན་མ་ཐག་མི་མངོན། །ཆུ་ཚོད་བཅོ་ལྔར་རིག་པས་བརྟག །དེ་བཞིན་གདོང་གིས་ཕྱེད་འཛིན་ཀླུ། །མཇུག་འཛིན་དེ་བས་གཅིག་དམན་སོགས། །མཐོང་ཆ་ཉིད་དང་བསྟུན་པར་དཔྱད། །ཟླ་བའི་འགྲོས་བཞིའི་ཁྱད་པར་དང༌། །གཟའ་གཉིས་ཐུག་ཕྲད་གཡོན་བསྐོར་དུ། །རིམ་པར་སྒྲིབ་པའི་ངེས་པ་ནི། ཟླ་བས་གདོང་ངམ་མཇུག་མ་ཡིས། །ཟླ་བར་སྦྱོང་ཚེ་ནམ་ཕྱེད་ལ། །དབང་ལྡན་ནམ་སྟོད་བྱང་ལ་ཉེ། །ནམ་སྨད་བྱང་ཤར་ཤར་ཉེར་འཛིན། །གདོང་གིས་ཟླ་བའམ་དེ་ལྡོག་སྦྱངས། །ནམ་ཕྱེད་ཤར་ལྷོ་སྲོད་ཤར་ཉེ། །ཐོ་རེངས་མེ་ལྷ་དབང་ཉེར་འཛིན། །མཉམ་ན་ནམ་ཕྱེད་དབང་པོ་དང༌། །སྲོད་ལ་དབང་ལྡན་ཐོ་རེངས་ནི། །མེ་ལྷར་ཉེ་བའི་ཤར་ནས་འཛིན། །དུས་ནི་དཀར་ཕྱོགས་ཟད་པ་དང༌། །ནག་ཕྱོགས་ཐོག་མའི་མཚམས་ཉིད་ཕྱིར། །གྲུབ་མཐའི་ཟླ་རྐང་ཞལ་ལུང་བཞིན། །ཞིབ་བརྩིས་གྲུབ་བའི་ཚེས་ལོངས་གྲངས། །
ཟད་པའི་དམར་ཕྱོགས་ཐོག་མར་འཇུག །དེ་ཡང་ཉིན་ཞག་ལོངས་སྤྱོད་ནི། །མཁའ་རོར་ཚེས་ལོངས་སྔ་མས་ཕྲི། །ལྟག་དང་ད་ལྟའི་ལོངས་སྤྱོད་བསྲེས། །དབང་པོ་རོར་སྦྱངས་ལྷག་མ་དེས། །སླར་ཡང་དྲག་པོར་སྦྱང་བར་བྱ། །གང་ལྷག་ནམ་མཁའ་མེ་ཡིས་བསྒྱུར། །མཁའ་རོས་ཐོབ་ནོར་དབྱུ་གུ་དང༌། །ལྷག་མ་ཆུ་སྲང་གནས་སུ་བྱིན། །དེ་ཟད་མཚམས་སུ་ངེས་པར་འཛིན། །འོན་ཀྱང་ལྷོ་བགྲོད་འཆར་བ་བུལ། །ནུབ་པ་དེ་ལྡོག་བྱང་བགྲོད་དུས། །འཆར་ནུར་ནུབ་པ་གོ་ལྡོག་གི །ཁྱད་དང་གདགས་སྲིབས་རིའི་མཐོ་དམན། །ཁོང་དུ་མ་ཆུད་སྐྱེས་བུ་ལ། །འཆར་ནུབ་མཚམས་ན་སྐྱེ་བོ་ཡི། །ཡ་ག་ཉོ་བའི་རིན་ཡོད་སྲིད། །ཁ་དོག་རིལ་འཛིན་ཐོག་མཐའ་དུད། །ཆ་རྫོགས་གདོང་འཛིན་དམར་ནག་དང༌། །མཇུག་འཛིན་ཟངས་ཁ་ཕྱེད་འཛིན་སྔོ། །དུམ་འཛིན་མིག་སྨན་མདོག་ཅན་ནོ། །སུམ་གཉིས་ལས་ལྷག་གདོང་འཛིན་ནི། །ལྕགས་བསྲེགས་མདོག་ལ་མཇུག་འཛིན་ཁམ། །མགོ་ལག་སྟེང་བཟུང་སྒྲ་གཅན་གྱི། །རང་མདོག་བཻཌཱུརྱ་ལྟར་སྣང༌། །གཏོང་ལུགས་རིལ་འཛིན་གང་བཟུང་ཕྱོགས། །ཆ་འཛིན་ལྷག་པའི་ཕྱོགས་ནས་ཏེ། །གང་བཟུང་ཕྱོགས་དེའི་གདོང་ཐད་ནས། །སྒྲ་གཅན་གྲིབ་མ་ཟད་པའི་ཕྱིར། །གཡོན་བསྐོར་རིམ་བཞིན་གཏོང་བ་ཡིན།། །།དེ་ནས་ཉི་
འཛིན་བརྟག་པའི་ཕྱིར། །གྲུབ་མཐའི་གནམ་སྟོང་ཉི་དག་དེའི། །ཆ་ཤས་སྒྲ་གཅན་ཤེད་མཉམ་བཟོ། །སྔར་གྱི་དབྲི་བྱེད་དེས་དམན་པ། །གནས་གཉིས་བཀོད་པའི་ཕྱོགས་གཅིག་དང༌། །སྒྲ་གཅན་རྩ་བའམ་བུལ་བ་བསྲེ། །རྒྱུད་འགྲེལ་ཆོ་ག་མིན་སྲིད་ཀྱང༌། །ཁ་ཆེའི་པཎྜི་ཏ་ཡི་ལུགས། །གཅིག་དང་གདོང་མཇུག་གང་ཉེ་གཉིས། །སྐར་ཁོངས་གཅིག་ཏུ་ཚོགས་པའམ། །གཅིག་ཁྱད་འདུག་ཀྱང་བརྟག་བྱ་སྟེ། །གང་ཉེ་མང་ལ་ཉུང་གིས་སྦྱང༌། །གདོང་གིས་ཉི་མར་ཕྲོགས་པའི་ཚེ། །སྐར་གནས་སྟོང་པ་དབྱུ་གུ་རུ། །མཁའ་དབང་ཚུན་ཆད་ཤར་གྱུར་ན། །ཕྱོགས་གཅིག་ཕྲང་བས་སྒྲིབ་པའི་ཚད། །ཁྱད་པར་དེ་ནི་རང་ཆ་ནས། །འདོད་ཡོན་སྤངས་ན་མན་ངག་ཡིན། །ཉི་མས་གདོང་སྦྱངས་གོ་ལྡོག་ཅེས། །འཛིན་ཚད་ཤར་ཡང་ནེམ་ནུར་ཅན། །ཚད་ནི་ཕུང་པོ་ཚུན་ཆད་དོ། །དུས་མེས་ཉི་མར་སྦྱངས་པའི་ལྷག །སྐར་ཐིག་དབྱུ་གུར་གདེངས་ཅན་ཚུན། །གོ་ལྡོག་ཡིན་ཡང་མཇུག་རིང་པས། །འཛིན་པར་བཤད་མོད་དེ་ལྟ་ནའང༌། །འཇིག་རྟེན་ལས་དམན་བཤུལ་འཛོལ་སྲིད། །ཉི་མས་དུས་མེའི་ཆ་ཕྲོགས་ལྷག །སྐར་ཐིག་དབྱུ་གུར་མཁའ་ཆུ་ཚུན། །འཛིན་པའི་རི་མོ་ཡིན་པ་སྟེ། །ཁྱད་པར་གདོང་འཛིན་སྒྲ་གཅན་ལས། །ཉི་མ་མང་བ་བཙན་པའི་ལུགས། །
མཇུག་འཛིན་ལ་ནི་དེ་ལས་ལྡོག །གང་ཚེའང་ཕན་ཚུན་སྦྱངས་ལྷག་དེས། །སྔར་བཤད་ཉི་བུལ་གཉིས་བསྲེས་དེར། །གདོང་འཛིན་ཡིན་ན་དམན་པར་བྱ། །མཇུག་འཛིན་དེ་ལྡོག་རང་འཁོར་དྲིལ། །འཁོར་ཕྱེད་ལྷག་ནའང་ཀུན་འབྱུང་གི །རི་མོ་ཆོས་ཀྱི་དབྱིངས་སུ་སྦྱང༌། །གནས་ཀུན་སྟོང་པ་ཉིད་ཀྱི་ཆོས། །བཟུང་འཛིན་ལས་རླུང་རོ་རྐྱང་གི །རྒྱུ་བ་དབུ་མ་སྒྲ་གཅན་དབྱིངས། །ཡེ་ཤེས་ཆེན་པོར་རོ་གཅིག་པས། །སྣོད་དུ་ཉི་ཟླ་སྒྲ་གཅན་གྱིས། །ཟིན་དང་ལྷན་ཅིག་བཅུད་ཀྱི་མཆོག །སྟོན་པ་མངོན་པར་སངས་རྒྱས་པའི། །རང་བཞིན་ཤེས་པའི་སྐྱེས་བུ་ཡི། །ཕྱི་ནང་གཞན་གསུམ་རྣམ་གཞག་རིག །འོན་ཀྱང་སྐྱེ་བོ་རྨོངས་པ་རྣམས། །དགེ་ལ་སྦྱོར་ཕྱིར་རིགས་བྱེད་དང༌། །གཏམ་རྒྱུད་ལས་བཤད་དྲང་དོན་གྱི། །ཆོ་ག་ཞིབ་མོས་གཞན་སྣང་བསྒྱུར། །དེ་ལ་སྒྲ་གཅན་མཐོ་དམའ་མེད། །རྟ་བདུན་ལ་ནི་འགྲོས་བཞི་དང༌། །ཁྱིམ་གྱི་བྱེ་བྲག་མཐོ་དམན་དང༌། །གཡོ་བ་འཁྲིག་གཞུའི་ཁྱིམ་གནས་དང༌། །ལྷོ་བགྲོད་ཀརྜའི་ཁྱིམ་ནང་དུ། །འཁྱོག་འགྲོས་དང་པོའི་ཉིན་ཞག་དང༌། །ལྡོག་གཉིས་ཕྱོགས་ལ་ཉེ་བ་དང༌། །ཚེས་གྲངས་ལྷག་ཆད་གཏུགས་པ་དང༌། །ཞི་གཟའ་གཉིས་དང་ལྷག་ཅིག་ཚོགས། །ཉི་ཟླའི་རྣ་ཆ་དག་པ་ཞེས། །འཛིན་པ་དཀའ་ལ་ཀརྚ་དང༌། །ཆུ་སྲིན་ཁྱིམ་ལ་བཟུང་ན་ཡང༌། །
ཆ་ཆུང་དེ་ཡི་ཏཱརྐལ་དང༌། །འགྲིག་ཀྱང་འཛིན་ཆ་ཆུང་བ་ཉིད། །ཤར་ནུབ་གླིང་གཉིས་ཉིན་མཚན་མཉམ། །དེའི་ཚེ་ལྷོ་གླིང་སྔ་དྲོ་དང༌། །ཕྱི་དྲོའི་ཆ་བཙན་དགུང་གི་དུས། །བགྲོད་གཉིས་སྟབས་ལས་ལམ་འཛོལ་སྲིད། །གླིང་འདིར་སྟོན་དཔྱིད་ཉིན་མཚན་མཉམ། །དགུང་ལ་འཛིན་པའི་རི་མོ་བཙན། །ཤར་ནུབ་གཉིས་ཀྱི་བགྲོད་པ་དང༌། །མཉམ་གཉིས་ལམ་དུ་ཕྲད་པ་ཡིན། །སྔ་དགུང་དེ་ལས་ལྡོག་པའོ། །དེ་བཞིན་ཉི་རྐང་རི་བོང་ཅན། །བདག་གིར་བྱེད་པའི་དུས་མི་བསླུ། །མཚོ་ལ་སྣ་ཚོགས་དུས་ལ་དཀའ། །འཛིན་ཆ་ཆེ་ཆུང་རགས་པ་ནི། །སྦྱངས་ལྷག་གདོང་འཛིན་ཉེར་གཉིས་གསུམ། །མཇུག་འཛིན་བཅུ་དགུ་ཉི་ཤུ་ལ། །རིལ་པོར་སྒྲིབ་ཅེས་གྲགས་པ་སྟེ། །ཞིབ་པར་ཉི་མའི་དཀྱིལ་འཁོར་ནི། །བཅུ་གཉིས་ཆ་སྟེ་རྒྱབ་ཀྱིས་ཉ། །སྦྱངས་ལྷག་དབྱུ་གུར་དྲང་སྲོང་ཚུན། །གདོང་འཛིན་ཕྱོགས་དང་དུས་མེར་ཚེས། །སླན་ནོ་ཐུབ་པ་ལས་ཐལ་ན། །གདོང་འཛིན་ཡོན་ཏན་མཇུག་མར་བགྲོད། །བརྒྱན་དེ་སྐབས་བཙལ་ནུར་བྱིན་རྗེས། །གདོང་མཇུག་གཉིས་པོ་གང་ཡང་རུང༌། །སླན་པའི་ཚོགས་དེས་མཁའ་རོས་སྦྱངས། །ལྷག་མ་ཁྱིམ་བསྒྱུར་མཁའ་རོ་ཡིས། །ཐོབ་པ་སྒྲིབ་ཆའི་བྱ་ར་སྟེ། །འཇིག་རྟེན་ལ་ནི་བཞི་ཆ་སྒྲིབ། །བྲོ་བར་ཕྱེད་འཛིན་སྲིན་པོ་ལ། །
གཞི་ཆ་གསུམ་དང་ཁྱིམ་བྱུང་ན། །རིལ་བོར་འཛིན་ཞེས་གྲགས་ན་ཡང༌། །བསླུ་བ་མེད་པའི་ཞིབ་རྩིས་ནི། །མྱོང་བ་ཉིད་ཕྱིར་ངག་ལས་ལོངས། །འཛིན་ཡུན་ཆ་རེར་ཆུ་ཚོད་རེ། །ཕྱོགས་ནི་ཉི་མར་གདོང་མཇུག་སྦྱངས། །ཉི་ཕྱེད་ལྷོ་ནུབ་སྔ་དྲོ་ལྷོར། །ཉེ་དང་ཕྱི་དྲོ་ནུབ་ལ་ཉེ། །ཉི་མས་དུས་མེར་སྦྱངས་པའི་ཚེ། །ཉི་ཕྱེད་ནུབ་བྱང་སྔ་དྲོའི་དུས། །བྱང་ཉེ་ཕྱི་དྲོ་ནུབ་ལ་ཉེ། །མཉམ་ན་ཆུ་ལྷའི་ཕྱོགས་དྲང་པོའོ། །ཁ་དོག་དང་ནི་ལུས་པའི་ཕྱོགས། །གཏོང་ལུགས་ཕལ་ཆེར་ཟླ་བར་མཚུངས། །དུས་ནི་སྤྱི་དང་བྱེ་བྲག་གཉིས། །སྤྱིར་ནི་ཁྱིམ་ཟླ་ལུག་འཁྲིག་སོགས། །མཉམ་པ་མིན་པའི་གནམ་སྟོང་ལ། །སྲེད་དང་སྡང་བ་མུན་པ་ཅན། །ཁམས་རྫོགས་གསུམ་པ་མུན་པའི་དུས། །ཉི་རྐང་རྟེན་འབྲེལ་རེག་པའི་དབུས། །ཞུགས་ལས་འཛིན་དང་ཕྱོགས་གཉིས་ཏེ། །སྔ་ཕྱིའི་ཉ་དེར་དཀར་ཆ་ལའང༌། །སྒྲ་གཅན་འཇུག་པ་ཆོས་ཉིད་དོ། །བྱེ་བྲག་སྟོང་དེའི་འགྲུབ་མཐའ་ཡི། །ཟླ་རྐང་ངེས་པ་ཞལ་ལུང་བཞིན། །ཞིབ་བརྩིས་ཆུ་ཚོད་ཟད་པའི་མཚམས། །དཀར་ཕྱོགས་ཐོག་མ་ཉིད་དུ་འཛིན། །དེ་ཡང་ས་འདིར་མངགས་པ་ཡི། །དུས་སྦྱོར་རྣམ་དག་འཆར་གཞི་ལས། །ཐུར་ཤིང་གིས་བཙལ་ཆུ་ཚོད་ཀྱིས། །གདགས་སྲིབས་རི་བོའི་མཐོ་དམན་དཔྱད། །དེ་བཞིན་ཟླ་གྲིབ་
ཉིད་ལ་ཡང༌། །མྱུར་ཁྱད་རིག་པས་དཔྱད་པ་ཡི། །ཏཱརྐ་ལ་ཡི་མེ་ལོང་ནང༌། །འདས་དང་མ་འོངས་སྲང་གི་བྱད། །ཆོ་ག་ཟབ་མོས་དཔྱད་ཤེས་ན། །དུས་ཀྱི་ངེས་པ་བསླུ་མི་འགྱུར། །བསྡུས་རྒྱུད་བུ་ཡིག་མྱོང་ཤཱཀ་ཤྲཱི། ཤང་དཔང༌། རྩིས། སིདྡྷ་རྦ་ར། ལྷོ་ཕྱག ཀོང་འབུམ། བྷུ་ཏི། འབྲི་དཀོན། གསེར་ཤིང་སོགས་རྩིས་ཀྱིས། །ཁྱད་པར་མང་མོད་འདིར་རེ་ཞིག །བརྗོད་པ་ཉུང་བ་ཉིད་ལ་བསྡུས། །སྐར་རྩིས་ཀྱི་རིག་པ་ལ་འཇུག་པ་གོ་ལའི་རྣ་རྒྱན་ཅེས་བྱ་བ་ལས། ཉི་ཟླར་སྒྲ་གཅན་འཇུག་པ་བཤད་པའི་སྐབས་ཏེ་སརྒ་བཅུ་པ་དོན་དམ་བདེན་པའི་མཚན་ཉིད་ལ་སྦྱར་བས་རེ་ཞིག་རྫོགས་སོ།། །།རི་མོ་སྐྱེ་བའི་ས་བོན་ཏེ། །འདས་ལོ་རྒ་བའི་གཉའ་ཤིང་གིས། །རྩིས་མཁན་ཕྲག་པ་དུབ་བྱས་པ། །དབུགས་འབྱིན་སླད་དུ་དེ་ཙམ་སྨོས། །དེ་ལས་གཞན་པ་ཞག་གསུམ་གྱི། །དཀྱིལ་འཁོར་རྣམ་པར་དབྱེ་བ་ཞེས། །ཉི་མས་དུམ་བུ་བཅུ་གཉིས་པའི། །གླིང་ལ་ཉིན་ནུབ་བྱེད་ཚུལ་གྱི། །ཉིན་ཞག་ཕྲུགས་གཅིག་འཁོར་ལོ་དང༌། །ཟླ་བའི་དཀར་ནག་འཕེལ་འགྲིབ་ནི། །བཅོ་ལྔ་བཅོ་ལྔའི་ཆ་རེ་ཡི། །ཡུན་ལ་བཏགས་པ་ཚེས་ཞག་དང༌། །ཉི་བར་ཁྱིམ་རེ་འཕོ་བའི་ཡུན། །སུམ་ཅུའི་ཆར་བཏགས་ཁྱིམ་ཞག་གསུམ། །རང་རང་རྟག་པའི་ལོངས་
སྤྱོད་ཀྱིས། །རྣམ་པར་གཞལ་བྱེད་ཉི་མ་ཡིས། །སྐར་ཁྱིམ་འཁོར་བའི་ཡུན་ཚད་ལ། །ཞག་གསུམ་ཚད་དེས་གཞལ་བ་ཡི། །དཀྱིལ་འཁོར་གསུམ་དུ་འགྱུར་བ་དང༌། །དུས་མེ་མ་གཏོགས་གཟའ་ཀུན་གྱི། །རང་འཁོར་ཟད་པ་མེ་སྟག་ལོའི། །དབོ་ཟླའི་སྟོང་གི་ཉ་ཁྱིམ་མཐར། །ལྷན་ཅིག་སྟོང་པར་འཇུག་བྱེད་ཅིང༌། །སོ་སོའི་རྐང་པ་དག་ཚུལ་གྱི། །དཀྱིལ་འཁོར་མཚན་ཉིད་དབྱེ་བ་ལ། །སྟོང་འཇུག་ཅེས་གྲགས་རི་མོ་ཡི། །གོ་བ་མཐའ་དག་སློང་བའི་ཐབས། །དཔལ་ལྡན་རྒྱུད་དང་དེའི་འགྲེལ་ཆེན། །བྷོ་ཊའི་པད་དཀར་ཞལ་ལུང་དང༌། །ལྷན་ཐབས་སྒོ་བརྒྱ་འབྱེད་ལྡེ་དང༌། །ཚིག་དོན་རྟོགས་དཀའི་ཟིན་བྲིས་དང༌། །སྤྱི་ནོར་གསལ་བྱེད་སྒྲོན་མེ་དང༌། །བྱེད་གྲུབ་རྣམ་འབྱེད་མུན་སེལ་སྒྲོན། །དེ་ལ་སོགས་པའི་གནད་བསྡུས་པའི། །རྩིས་གཞུང་དག་ཏུ་གསལ་ཕྱིར་དང༌། །དེ་བཞིན་སྦྱོར་དགྲོལ་འབྲས་རྩིས་སོགས། །ལེགས་འདོམས་ཤོག་ཁྲས་གཏན་ཕེབས་ཕྱིར། །འདིར་མང་སྨོས་པ་དགོས་པ་ཅི། །གང་ཞིག་སྐྱེ་བ་ཡོད་ཕྱིན་ཆད། །རྒ་ན་འཆི་འཕོས་འཇིག་རྟེན་ཀུན། །མ་རུངས་བྱས་པའི་འཁྲུལ་འཁོར་འདིར། །སྐྱོ་ནས་དབེན་པར་བསམ་གཏན་པ། །ལམ་འདིའི་ཀུན་རྟོག་ཉེར་ཞི་ནས། །འདོར་བྱེད་སུམ་ཅུའི་གྲངས་སུ་ཐལ། །
དེ་ལྟ་ན་ཡང་དེ་རིང་འདིར། །གསར་བུའི་རིག་པ་བློ་གསལ་བ། །དཔོན་པོ་འོད་ཟེར་ཕྲིན་ལས་ཀྱིས། །བསྐུལ་ཞིང་རི་མོའི་གྲོགས་བགྱིས་ནས། །བྱང་ཆུབ་དམ་པའི་ནགས་ཁྲོད་ནི། །དཔལ་ལྡན་པདྨ་འོད་གླིང་དུ། །རང་བྱུང་རྡོ་རྗེ་མཁྱེན་བརྩེའི་ལྷ། །ཨ་བྷ་ཡ་དྭཱི་པ་དེས་སྦྱར། །ཐ་སྙད་རྟོག་པའི་ས་བོན་ཕྱིར། །གོམས་པ་མ་བརྟས་ནོངས་གྱུར་གང༌། །རྙོག་པའི་ཆ་ཤས་འགྲུངས་བྱེད་པའི། །དྲན་དབང་རྣམས་ལ་གཤུང་བ་མིན། །དགེ་བ་འདི་ཡིས་བདག་དང་འགྲོ། །ཕྱི་ནང་གཉིས་ལས་གཞན་གྱུར་པའི། །ངོ་བོ་ཉིད་མེད་དུས་འཁོར་ལོའི། །གོ་འཕང་ཚེ་འདིར་མངོན་གྱུར་ཤོག །གཏམ་ཚོགས་ལེའུ་གཉིས་པའོ།། །།
གཏམ་ཚོགས་ལེའུ་གསུམ་པ། ལྷོ་ཕྱོགས་རྒྱ་གར་གྱི་གཏམ་བརྟག་པ་བརྒྱད་ཀྱིས་མེ་ལོང་།
ལྷོ་ཕྱོགས་རྒྱ་གར་གྱི་གཏམ་བརྟག་པ་བརྒྱད་ཀྱིས་མེ་ལོང་ཞེས་བྱ་བ། ལྷ་མོ་འོད་ཟེར་ཅན་མ་ལ་ཕྱག་འཚལ་ལོ། །གང་ཞིག་དམ་པ་མ་ཡིན་ཀྱང༌། །ཆོས་ཞེས་བྱ་བའི་ངེས་ཚིག་ནི། །འཇིག་རྟེན་ཉིད་ཀྱི་མངོན་བརྗོད་ལའང༌། །འཇུག་ཅིང་ཁྱད་པར་རི་བོང་ཆལ། །ལ་བརྟེན་བསྟི་གནས་སྤོང་བ་དང༌། །བསམ་གཏན་ཚེར་མ་འབྱིན་པའི་སླད། །བརྟག་པ་བརྒྱད་ཀྱི་མེ་ལོང་བཤད། །དེ་ལ་ལྷོ་འཛམ་བུའི་གླིང་འདི་སོག་ཁའམ་ཤིང་རྟའི་དབྱིབས་སུ་ཡོད་པའི་ཁ་གདངས་ཆེ་བ་རི་རབ་དང༌། ཆུང་བ་རྒྱ་མཚོའི་མུ་ཁྱུད་ལ་བསྟན་
པའི་ཚུལ་མདོ་སྡེ་ཁང་བུ་བརྩེགས་པ་ལས། ཀུན་དགའ་བོ་ཁྱོད་ཀྱིས་འཛམ་བུའི་གླིང་མཐོང་ངམ། ཀྱེ་བཙུན་པ་མཐོང་ལགས་སོ། །འཛམ་བུའི་གླིང་གི་གླིང་ནི་ཞིང་དུ་དཔག་ཚད་བདུན་སྟོང༌། ཆུར་ཡང་དཔག་ཚད་བདུན་སྟོང༌། དེ་ལ་བྱང་གི་ཞིང་ནི་ཆེ། ལྷོ་ནི་ཤིང་རྟའི་དབྱིབས་སོ། །ཞེས་པ་ལས། རྒྱ་གར། ཁ་ཆེ། ཏ་ཟིག་གསུམ་ནི་སོག་པའི་ཡུ་བ། བོད་རྣམས་སོག་པའི་ཏེར་ཏེར་པོ། རྒྱ་ནག འཇང༌། ཧོར་རྣམས་སོག་པའི་ཁ་གདངས། སོག་པའི་ཁ་སྒོར་ལ་མཐའ་འཁོབ་སུམ་ཅུ་རྩ་དྲུག་ཡོད་པ་ལས། རྒྱ་བོད་ཀྱི་མཚམས་ན་ལྷོ་མོན་ཁ་བཞིར་གྲགས་པའི་ལས་སྒོ་ནི། འདི་ལྟ་སྟེ། སྤུངས་ཐང་དབུས་སུ་བྱས་པའི་ཤར་གདུང་བསམ་ཁ། ལྷོ་དཔག་བསམ་ཁ། ནུབ་རྔ་གླིང་ཁ། བྱང་སྟག་རྩེ་ཁ་བཞི་ལས་དང་པོ་གསུམ་ནས་རྒྱ་གར་དུ་བགྲོད་པ་མང་བས། ཤར་གྱི་ཤར་ཨ་མ་ཏཱ་ལ་ནས་ལྷོ་དྲང་པོར་ཕྱིན་པ་ཨ་ཤོང་གི་ས་མཚམས་ན་ཤིང་གྷི་རེ་ཟེར་བའི་གནས་ཕྱི་མཆོད་རྟེན་ལ་ནང་མཚོར་སྣང་བའི་དབུས་ན་སྟོན་པའི་རྡོ་སྐུ་དང་པོ་སྐུ་དངོས་སུ་མཐོང་ཡང༌། དུས་ཕྱིས་མཚོར་ནུབ་པ་ལག་པས་བཙལ་ན་དབུའི་གཙུག་ཏོར་ལ་རེག་པ་དང༌། ཉེ་སྐོར་རྡོ་ལེབ་ཆེན་པོའི་དབུས་སྐྱུ་རུ་རའི་སྡོང་པོ་ཡོད་པ་སྟོན་པའི་དབུ་སྐྲ་ཉག་གཅིག་ལུས་པ་ལས་འཁྲུངས་པ་ཡིན་ཟེར།
དེའི་ཤར་ཕྱོགས་ལ་ཨ་ཤོང་གི་ཡུལ་ཁམས་ལ་རི་ཐང་གཉིས་ཀ་ཡོད་པས། གླང་པོ་ཆེ་དང༌། མ་ཧེ་དང༌། སྦྲུལ་སོགས་ཡོད་ལ། ཁོ་རང་གི་ཁྱད་ནོར་རྒྱ་དར་འཁོར་ལོ་དང༌། གླང་ཆེན་དང༌། མེ་ཏོག་ལ་སོགས་པའི་རི་མོ་ཡོད་པ་དང༌། ལིའི་དཔྱད་པ། ཐ་ལི། གྷ་ཊ། བྷ་ཊ། གཟེད་ཞལ་སྐེད་ཉག །བ་སོ་ལས་གྲུབ་པའི་རེ་ལྡེ་དང༌། བསིལ་ཡབ་གཡའ་ཕྲུག །སྒམ་ཆུང་གླིང་མང༌། གླང་མཆེ་སོགས་རུས་དཔྱད་དང༌། རྨ་བྱའི་གདུགས་དང༌། བསིལ་ཡབ་སོགས་ཐོན། རང་གི་ཡུལ་ནས་གསེར་ཐོན་ཟེར་ཡང༌། བོད་ཀྱི་གསེར་ཐམས་ཅད་ཁོའི་ལས་སྒོ་ལ་འགྲོ་བ་མང༌། མངའ་རིས་ཀྱི་མཐའ་ཚོར་མི་མཇུག་མ་ཅན་དང༌། རྣ་བ་ཆེན་པོ་ཡང་ཡོད། རྟ་མཆོག་ཁ་འབབ་ཀྱི་ལོ་ཧི་ཏ་འདི་ཡང་ཀོང་པོ་རྒྱ་ལ་ནས་ཀློ་ཡུལ་དང༌། པདྨ་བཀོད་ཆེ་ཆུང་ལ་བདར་ཏེ་ཙ་རི་བསྐོར། རྒྱ་དཀར་ནག་གི་མཚམས་ཀློ་ཁ་ཁྲའི་ཡུལ་བརྒྱུད་ཨ་ཤོང་གི་གཞུང་ལ་འབབ་པས། རོང་སྐོར་ལམ་ཕྱོགས་གཅིག་གི་དུས་ཆུ་ཆེན་གྱི་ཕ་རིར་ཨ་ཙ་ར་འགྲོ་ལྡོག་བྱེད་པ་མཐོང་ཟེར། ཨ་ཤོང་གི་ཤར་མཐའ་ཟད་པའི་རི་བྲག་གི་དབར་ན་བུ་ལ་མདུན་མ་བྱེད་པའི་ཚེ་ཆུང་མའི་འབོགས་སུ་མ་མགོ་གཤེར་བའི་ཁ་ཁྲ་དང༌། གྷྲྀ་དྷོ་ཟེར་བའི་ཀློ་ལོངས་སྤྱོད་ཀྱི་
གཙོ་བོ་བ་མེན་ལ་བྱེད་པ་ཡོད། ཐུབ་པས་སྤངས་པ་མིན་པའི་བསྐལ་པར་ཡང༌། མ་ཤ་བཟའ་དང་དུད་འགྲོའི་རྣམ་ཤེས་ཅན། །སངས་རྒྱས་འབྱུང་ལ་མཉེས་པར་མི་བྱེད་པའི། །ལས་འབྲས་ཡིན་ན་བསམ་ཤེས་ཅན་དག་སྨྱོ། །དེ་ལ་གྷྲྀ་དྷོ་ན་རེ། ངེད་ཅག་དང་པོར་སྲིན་པོའི་རིགས་ཡིན་པས། མིའི་ཤ་ཁྲག་ལ་ལོངས་སྤྱོད་དེ་སློབ་དཔོན་གུ་རུས་བཀག་པ་ནས། ངེད་ཀྱི་དཔོན་དང་གུ་རུ་རྫུ་འཕྲུལ་འགྲན་པར་བྱས་པས། བྲག་ལ་མདའ་འཕེན་པ་སོགས་ཁྱད་པར་མ་བྱུང༌། སློབ་དཔོན་གུ་རུ་ནམ་མཁར་གཤེགས་པས་འགྲན་མ་ནུས་ཏེ། ངེད་ཅག་དམ་འོག་ཏུ་བཅུག་པའི་རྟགས་ཡིན་ཟེར། ད་ལྟ་རྐང་ལག་གི་ངར་པ་ཚོར་རྩིད་སྐུད་ཀྱིས་དཀྲིས། མི་ཤ་མི་ཟ་བར་བཀར་བཏགས་ཚེ། བདག་ཅག་གི་ལྟོ་མི་རྙེད་བྱས་པས། སློབ་དཔོན་གུ་རུས་ནམ་མཁའ་ནས་བ་མེན་ཕོ་མོའི་ས་བོན་བཀུག་ནས་འདིའི་འོ་མ་ལ་ལོངས་སྤྱོད་ཅེས་ལྟོ་སྐལ་དུ་བྱིན་པ་ལས། འཕེལ་བ་ཡིན་ཟེར། དེ་ལ་རིན་ཆེན་པོ་བྱིན་ནས་ཤར་ལས་སྒོ་ཚོར་འཕེལ་བ་ལ་རྒྱ་ཚ་ཟེར། ཤིང་གྷྲྀ་རི་ནས་ནུབ་དྲང་པོ་ན་ད་ལྟ་གྲགས་ཚོད་ཀྱི་རྩྭ་མཆོག་གྲོང་དང༌། བྱ་རྒོད་ཕུང་པོ་ཡོད། རྩྭ་མཆོག་གྲོང་ནས་བྱང་དྲང་པོར་ཉིན་ལམ་གསུམ་ཕྱིན་ན་གདུང་བསམ་བདེ་བ་ཐང་ཟེར་བར་སླེབ། ཨ་རུ་རས་མཚོན་པའི་འབྲས་བུ་གསུམ་ཀའི་ནགས་ཚལ།
ཨ་ཀ་རུ་དང༌། དུ་རུ་ཀ །བིལྦ་སོགས་ཡོད། གདུང་བསམ་བདེ་བ་ཐང་ཟེར་བ་ནས། ཨ་ཤོང་གི་ལས་སྒོ་ཆེ་བ་བ་ཤ་ཀའམ། ཀཱ་མ་རཱུ་པ་ཟེར་བ་ཡོད་པའི་བར་ལའང་ལོ་ཧི་ཏའི་ཆུ་ཀླུང་འགྲོ། རྒྱ་མཚམས་དེར། བིལྦ། དོང་ཀ །ཀོ་བྱི་ལ། ཞོ་ཤ་གསུམ། སེ་འབྲུ། བ་ཤ་ཀ །ཁ་ལག་སི། ན་ལེ་ཤམ། པི་པི་ལིང༌། ཀ་ཀོ་ལ། འཁྲི་ཤིང༌། སླེ་ ཏྲེས། སོ་མི། སྦྲུ་མ་སོགས་སྐྱེ། ཨ་ཤོང་བརྒལ་བའི་ལྷོ་ཕྱོགས་རི་བྲག་བཙན་པོ་ཞིག་ན། གྷ་རོག་ཟེར་བའི་རྒྱལ་ཕྲན་ཞིག་ཡོད། ལིའི་སྡེར་དཔྱད་ཆེན་པོ་ཐོ་རིས་གསལ་བ་དེ་ནས་འོང༌། ཁོའི་ཡུལ་མཐའ་ལ་ཆུ་ཀླུང་ཆེན་པོ་ཞིག་ཤར་ནས་ནུབ་བརྒྱུད་འགྲོ་བ་ཀ་ལི་ཀ་ཏར་སླེབས་མཚམས་ནས་ཕེ་རེང་པ་རྣམས་ཀྱིས་གྲུ་གཟིངས་སྒོར་མོ་ལྕགས་གཟེར་གྱི་ཚབ་ཏུ་ཚར་ཟེར་བའི་སྤ་འདོམ་ཉི་ཤུ་ཙམ་ཡོད་པས་བསྡམས་པ་ལ་ཞུགས་ནས་རྒྱ་ནག་ཏུ་ཚོང་ལ་འགྲོ། རྒྱ་ནག་པས་པི་ཅིང་ནང་ལ་མི་གཏོང་ཡང༌། ཚོང་རྒྱག་པའི་ས་ཡུལ་ཅིག་ཁོ་ལ་བྱིན་པར་རྒྱ་དཀར་ནག་གཉིས་ཀ་འཛོམ། དེའི་སྟབས་ཀྱིས་རྒྱ་གར་ལ་ཙི་ནའི་དཔྱད་དངོས་ཐམས་ཅད་ཡོད་ཟེར། ཡང་ཕག་རི་དང་མོན་སྤ་གྲོ་ཉེ་ཞིང༌། སྤ་གྲོ་ནས་ལྷོ་དྲང་པོ་ཉིན་ལམ་ལྔ་དྲུག་གི་ས་ན་དཔག་བསམ་ཁ་ཡོད། དེ་ནས་ལྷོ་དྲང་པོར་ཉིན་ལམ་གཅིག་ན། རྩེ་བཟང་ཁ་སྟོང་
ཟེར་བ་ད་ལྟ་ལྷོ་འབྲུག་གིས་བདག །ཀ་ཙ་རའི་གྲོང་རྡལ་ཡོད། འདི་དག་རྒྱ་གར་ཁ་སྟོད་རི་ཐང་གཉིས་ཀ་ཡོད་པས་སྟག་གཟིག་དང༌། གུང༌། ཕག་རྒོད། མ་ཧེ། ཤ་བ་སོགས་ཀྱང་མོད། སྟག་དང་ཕག་རྒོད་གཉིས་མཐོང་བར་སྔ་ཤོས་དེ་རྒྱལ་ལ། གུང་རྩལ་ཆེ་བས་ལྗོན་ཤིང་སྟེང་ནས་སྟག་ལ་མཆོངས་ཏེ་གསོད་པས། བོད་ན་གུང་གདན་ཆེ་བར་བྱེད་པ་འདི་ལ་རྟོག་པས་བརྟགས། དེ་ནས་ལྷོ་དྲང་པོར་ཉིན་ལམ་གཅིག་ན་བྷེ་ཧར་རམ། གྷ་ཊ་ཀ་ཟེར་བ་དབང་ཕྱུག་གི་བརྒྱུད་པ་ཡིན་ནོ་པའི་རཱ་ཛ་ཆེ་བ་ཞིག་ཡོད་པ་ད་ལྟ་ཕེ་རེང་གིས་བདག །དེ་ནས་ལྷོ་དྲང་བོར་རོང་ཕུའི་ལས་སྒོ་ནས་བྱུ་རུ། སྤོས་ཤེལ། མུ་ཏིག འགོ་སྣམ། ཙན་དན། བཟང་དྲུག །རས་སྲབ་ལ་ཁ་ཞིང་ཆེ་བའི་ཁ་ཤ་ཟེར་བ་རྣམས་ཐོན། རོང་ཕུ་ནས་ཤར་ཕྱོགས་སུ་སོང་ན་ཛོ་ཀི་གྷོབ་ཟེར་བའི་ཡུལ་རི་ཐང་གཉིས་ཀ་ཡོད་པའང་ཨ་ཤོང་གིས་མཚམས་ཡིན། དེ་དང་ཐག་ཉེ་བ་ན་སྤྲེའུའི་ཡུལ་ཁམས་སུ་གྲགས་པ། སྤྲེའུའི་དཔོན་བློན་འཁོར་མང་པོ་དང་བཅས་པའི་ཞལ་ཏ་པ་བྲམ་ཟེ་ཞིག་གིས་བྱེད་པ་ཡོད། སྤྲེའུའི་མངའ་ཞབས་སུ་སྡོད་པའི་མི་རྣམས་ཀྱི་འབྲས་ཞིང་བགོ་བཤའ་བྱས་པའི་ཆ་ནས་འབྲས་གཡོས་སྦྱར་བ་སྤྲེའུ་ལ་བསྟབ་དགོས། གལ་ཏེ་མ་བསྟབས་ན་སྤྲེའུ་ཐམས་ཅད་ཀྱིས་འབྲས་ཞིང་རྙོག་ནས་
སྟོན་ཐོག་བསྡུ་རྒྱུ་མི་ཡོང༌། མངའ་ཞབས་པས་གཡོས་སྦྱར་བ་བྱུང་བའི་ཚེ། བྲམ་ཟེ་ཞལ་ཏ་ཕས་སྤྲེའུའི་རྒྱལ་པོ་བཙུན་མོ་བློན་པོ་ནས་རིམ་པར་སྐལ་བ་བཅད་ཚར་བ་དང༌། རྒྱལ་པོ་ནས་རིམ་པར་འོངས་ཏེ་ལོངས་སྤྱོད། གཡོས་སྟབ་མཁན་ལ་མི་དགེ་བ་འོང་རྒྱུ་ཡིན་ན་སྤྲེའུས་ཟས་མི་ཟ། མི་དེ་རྣམས་བུ་ལོན་ཆགས་པ་སོགས་སྔ་ཕྱི་དགོས་པ་བྱུང་ཡང༌། བྲམ་ཟེ་ལ་བརྡ་སྦྱར་བས། སྤྲེའུའི་རྒྱལ་པོས་ཊཾ་ཁ་ཙམ་དགོས་སྔ་ཕྱི་སྟེར་ཟེར། སྲིད་པ་ལས་ཀྱིས་བསྐོས་པ་འདིར། །བཙན་པོའི་མཐུས་ཀྱང་མི་བརྫི་ན། །གྱ་གྱུའི་སྤྱོད་པ་འབའ་ཞིག་ལ། །རེ་ལྟོས་འཆའ་བ་སྨྱོན་པ་ཡིན། །ཡང་རོང་ཕུའི་ལས་སྒོ་ནས་ལྷོ་ཕྱོགས་ཀྱི་ཡུལ་གྲུ་མང་པོ་བརྒལ་བ་ན། ཌ་ཀ་ཟེར་བའི་རྒྱལ་ཁག་ཆེ་བ་རྒྱ་མཚོ་དང་ཐག་ཉེ་བར་ཡོད་པར་ཡང་ཕེ་རེང་པས་བདག །རོང་ཕུའི་ནུབ་ཕྱོགས་ལ་མོང་གོར་ཟེར་བའི་རྒྱལ་ཕྲན་ཞིག་ཡོད་པ་སྔར་ལྷོ་འབྲུག་གིས་བདག་ཀྱང་གོརྵས་བླངས། ཡུལ་དེའི་ལྷོ་ཕྱོགས་ན་ཁ་གྷ་ར་ཟེར་བའི་ཡུལ་ཕྲན་ན་ཚོང་དཔོན་ཙནྜ་ཕ་ལའི་ཁྱིམ་ཡིན་ཟེར་བའི་ཁང་ཤུལ་ཡོད། མོང་གོར་གྱི་ནུབ་ཕྱོགས་བལ་པོ། ཡམ་བུ། ཡེ་རང༌། ཁོ་ཁོམ་གྱིས་མཚོན་པའི་རྒྱལ་ཕྲན་ཉི་ཤུ་སྐོར་ཡོད་པ་རྒྱལ་བསྟན་ལ་གུས་པ་ཅན་ཡིན་ཡང༌། འཕྱིས་ཨ་སུ་རའི་བརྟུལ་ཞུགས་འཛིན་པ་
གོརྵས་མནན། ད་ལྟ་ཡུལ་དེ་ན་བཞུགས་པའི་མཆོད་རྟེན་བྱ་རུང་ཁ་ཤོར་དང༌། འཕགས་པ་ཤིང་ཀུན་གཉིས་ཀྱང་གཞན་སྣང་ཙམ་དུ་བསྟི་སྟང་ཆུང་བར་བཞུགས། མོང་གོར་གྱིས་བྱང་ཕྱོགས་འབྲས་མོ་ལྗོངས། ཁ་ཆེ་ནི་བལ་པོའི་བྱང་ཕྱོགས་ཡིན། དེ་ན་ཛ་ལནྡྷ་ར་དང༌། ཕུ་ལ་ཧ་རི་ཡོད། ནཱ་རོ་པའི་ཚོགས་ཁང་གྲོང་གི་དབུས་ན་ཡོད་ཀྱང༌། མུ་སྟེགས་ཀྱིས་གནོད་པས་རྡོ་བཅལ་སྦུབ་པ་ལ་ལྷ་མོའི་སྐུ་སྣང་ཟེར། དགོན་པ་དངོས་དེའི་ཕུ་ན་ཡོད་པའང་འུག་པའི་ཚང་བཅས་པའི་ཉམས་གོག་ལ་ཐུག་བཞིན། བོད་འདིར་ཛོ་ཀའི་རྫུན་གཏམ་ལ་ཡིད་རྟོན་པའང་སྣང༌། ཡང་རོང་ཕུ་ནས་ལྷོ་ནུབ་མཚམས་སུ་ཕྱིན་པ་ན་དྷེ་ན་ཕུར་ཟེར་བའི་རྒྱལ་ཁག་ཅིག་ཡོད་པར་རོང་ཕུ་ཇི་ལྟ་བའི་ཚོང་འདུས་ཡོད། དེ་ནས་ལྷོ་ཕྱོགས་སུ་གཙང་ཆུ་ཟེར་བའི་ཆུ་ཆེན་ལ་གྲུ་གཟིངས་བྱས་ནས་འགྲོ་བ་དང༌། བྲང་ཟེར་བའི་ཕྱུགས་ལ་ཁལ་བྱས་ནས་སྐམ་ལ་འགྲོ་བའི་ཚོང་པ་མང༌། དེ་དག་འགྲོ་བའི་ཚོང་འདུས་མང་པོ་བརྒལ་ནས་ཕྱིན་པ་ན། མ་ཧཱ་ནོ་དི་ཟེར་བའི་ཙོང་ཆུད་དང༌། གཙང་ཆུ་གཉིས་འཛོམ་སར་སླེབ། དེ་ནས་ཀྱང་ཚོང་དུས་དང་ཡུལ་ཁམས་མང་པོ་བཅད་ནས་ཕྱིན་པའི་ནུབ་ཕྱོགས་ནས་ཆུ་བོ་གངྒ་ཚན་པ་གཉིས་སུ་གྱེས་པའི་ཆེ་ཤོས་དང་ཕྲད། དེ་ཡང་ཉིན་ལམ་དགུ་བཅུའི་ས་ནས་ཚན་པ་
གཉིས་སུ་གྱེས་པའི་གཅིག་ཤར་ལྷོ་ཌ་ཀིའི་རྒྱལ་ཁབ་དང༌། གཅིག་ལྷོ་དྲང་པོར་འགྲོ་བ་ཤནྟ་པུར་གྲགས་པའི་ཡུལ་ཁམས་སུ་བྷངྒ་ལའི་རྒྱལ་པོའི་ཕོ་བྲང་གི་རྩ་བ་བརྒྱུད་འོངས་པའི་གངྒཱ་དང་འདྲེས། དེ་ལྷོ་ཕྱོགས་ཀ་ལི་ཀ་ཏ་བརྒྱུད་ནས་རྒྱ་མཚོར་འབབ། གངྒཱ་གཉིས་འདྲེས་ས་ནས་ཞག་བཅུ་སྐོར་གྱིས་མ་སླེབ་ཙམ་ནས་ཀ་ལི་ཀ་ཏ་ཟེར་བའི་ཡུལ་གྱི་སྣེ་ཟིན། སྔོན་དེ་ན་ཕྱི་རོལ་པའི་དྲང་སྲོང་ཞིག་ཡོད་པ་ཤི་བའི་ཚེ་ངའི་ཕུང་པོ་འདི་བཟུང་ནས་འདིར་ཡུལ་སྡེ་ཆེན་པོ་ཆགས་ཟེར་བ་བཞིན་བྱས་པས་ཡུལ་གྲུ་ཆེན་པོ་ཆགས་པ་སྔར་བྷངྒ་ལའི་སྡེ་ཡིན། ཁོའི་རོ་ཀ་ལི་ཀ་ཏར་ཀ་ཤི་བྷ་བྷུར་ཟེར་བའི་ཕྱུག་པོ་ཞིག་གི་ཁྱིམ་ན་ཡོད། འཕྱིས་ཡུལ་འདི་ཕེ་རེང་པས་བཟུང་ནས་དཔོན་ཞིག་བཞག་པ་ལ་གྷོ་རོས་ཧེ་བ་དང༌། གྲོས་ལ་དབང་བའི་ལས་དོན་བྱེད་མི་ཆེ་བ་བཞི་ཡོད་སྐད། ཀ་ལི་ཀ་ཏ་འདི་ཡུལ་ལྗོངས་ཆེ་བས་འཛམ་བུའི་གླིང་གི་མི་སྣ་ཕལ་ཆེར་འཛོམ། རྒྱ་གར་བ་ལ་གྱད་དང་རྩལ་པའི་རིགས་གཉིས་ལས་གྱད་སྟོབས་ཆེ། རྩལ་པ་བདེ་བླག་འཛོམ་པས་ཤེད་སྟོབས་གཅིག་པོས་མི་འགྲོ། མི་རིགས་ཤིན་ཏུ་མཚར་སྡུག་དང་ལྡན་པའང་ཡོད་ཅིང༌། མཛེས་མ་གླུ་གར་ལ་མཁས་པ་རྫ་རྔ་དང༌། གླིང་བུ་དང་ལྷན་ཅིག་བརྩེ། ཙུ་ཏའི་ཡུལ་གྱི་མི་རྐང་གཅིག་པས་
ཀྱང་སླེབ། རྐང་གཅིག་པ་དེ་ཁོ་རང་གཅིག་པོས་ཀྱང་གྱོལ་ལེར་འགྲོ་ཤེས་ཏེ། གཉིས་གཉིས་སྦྲེལ་པ་ཤིན་ཏུ་མགྱོགས། ཤ་དཀར་དང་དངུལ་ཆུ་ལ་དངུལ། འཇོན་ལ་གསེར་བཟོ་ཤེས་པའི་ཚོང་པས་ཀྱང་སླེབ། རྡོའི་སྣོད་སྤྱད་དང༌། སྣང་བརྙན། ལི་ཁྲི། རྒྱ་ཚྭའི་རིགས་ཀྱང་བཟོ། ཨ་མྲ། གོ་ཡུ། ཏཱ་ལ། བེ་ཏ་སམ། འཁྲི་ཤིང༌། ཁ་རུ་མུ་ས་རིགས་གཉིས། ག་གོན་ཆེ་ཆུང༌། ཀ་ཀ་རུ་དཀར་སྔོན། འབྲས་བུ་མི་ཁུར་ལོངས་པའི་སྦྲམ་སི་ལ་སོགས་ཤིང་འབྲས་མང༌། ངང་ལག་ཟེར་བ་ཆུ་ཤིང་གི་འབྲས་བུ་དང༌། བུར་ཤིང་ལས་བུ་རམ། བུ་རམ་ལས་བྱེ་དཀར། དེ་ལས་ཤེལ་དཀར་བཟོ། མེ་ཏོག་ལས་བྱུང་བའི་ཆང་དང༌། ཤིང་ལས་བྱུང་བའི་ཆང་ནི་ཛཱ་ཏི་སྲུང་བ་དག་འཐུངས་པས་མྱོས་བྱེད་ཀྱི་རིགས་མིན། མེ་ཏོག་པདྨ་དང༌། ཨུཏྤལ་དང༌། ཀར་ཝཱི་ར་སོགས་དྲི་ཞིམ་པ་དང༌། མདངས་མཚར་པ་གང་ཡང་སྐྱེ། ས་འོག་ཏུ་སྨིན་པའི་ཁ་ཟས་སྐྱེ་པ་དཀར་དམར་ཟེར་བ་ཡོད། རྨ་བྱ་དང༌། གླང་ཆེན། བསེ་རུ། ནེའུ་ལེ་ཆེ་ཆུང་གཉིས། ཤེའུ་ལེ་སྟེ་རྐུན་པོ་ཅེ་སྤྱང་ལ་སོགས་པ་ཡུལ་ལྗོངས་ཕལ་ཆེར་ལ་ཡོད་ཀྱང༌། ནོར་སྣར་རྩི་བའི་གླང་ཆེན་མཆེ་བ་དྲུག་པ་ནི་མངོན་གྱུར་དུ་མེད། མཆེའུ་ཆུང་དང་བཅས་པའི་མཆེ་བ་བཞི་ཡོད་པ་སྲིད་པ་
ཙམ་ཡིན། གླང་ཆེན་ཐལ་ཀར་དཀར་པོའི་རིགས་བྱུང་ན། དེས་གླང་པོའི་ཁྱུ་མཆོག་བྱེད་པས། བྱིངས་རྣམས་དེའི་འགྲོ་སྡོད་ཀྱི་རྗེས་སྙེག །བལ་གྱི་གླང་པོ་ཆེ་སོགས་དག་པའི་ཞིང་ཁམས་ཀྱི་བགྲོས་ཡིན་པ་འདྲ། གླང་པོ་བས་བསེ་རུ་ཆུང་ཡང༌། ཤེད་སྟོབས་ཁོ་ཆེ་བས། འཐབ་མོ་ཆེན་པོ་བྱེད། ཁོའི་མཆན་འོག་གི་དྲོད་དང་རླན་ལ་འབུ་སྦྲང་འཁོར་བ་ཡན་ཆད་ལྕེས་ལྡག་ཟེར། གཅིག་པུར་སྡོད་པ་ལས་ཁྱུས་འཚོ་བ་མ་ཡིན། །ཀྲྀཥྞ་སའམ་ཁྲི་གཉན་ནི་དཀོན་ལ་བྱམས་པའི་སེམས་དང་ལྡན་པས་ཁོ་གཞན་གྱིས་སྲོག་འཕྲོག་པའི་ཆེད་དུ་དེད་ཀྱང་འབྲོས་ལམ་གྱི་སྲོག་ཆགས་ཆུང་ངུ་རྨིག་པས་གཞར་གྱིས་དོགས་ནས་སྣས་བསལ་བ་ཡིན་ཟེར། དེ་ལ་བརྟེན་ནས་བྱང་ཆུབ་ཀྱི་སེམས་འཕེལ་བའི་རྟེན་འབྲེལ་དུ་གྲུབ་ཆེན་རྣམས་ཀྱིས་སྟན་མཛད་ཅིང་རིན་ཐང་ཆེ། གཅུས་ར་དེའི་སྒྲ་ཐོས་པའང་བྱང་ཆུབ་ཀྱི་སེམས་སྐྱེ་བས་འབུད་དུང་ཞིག་ལ་འདི་བཟང་ངོ༌། །དམ་པའི་ལེགས་སྨོན་སྔོན་སོང་ནས། །དུད་འགྲོ་ལ་ཡང་བྱང་ཆུབ་ཀྱི། །རིགས་ཡོད་ཕྱིར་ན་རྣམ་རིག་ཀུན། །སྡིག་ཏོར་སོང་བའི་སྐྱེས་བུས་ཅི། །ཀ་ལི་ཀ་ཏ་དེར་སྔོན་དབང་ཕྱུག་གི་ཆུང་མ་ཙཎྜི་ཤི་བའི་རོ་བསྐྱུར་མ་ཕོད་ནས་ཕང་པར་བཟུང་སྟེ་འཛམ་གླིང་བསྐོར་བའི་ཡན་ལག་རྣམས་
ཡུལ་གླིང་སོ་སོར་བཞག་པའི་མགོ་བོ་ཡིན་ཟེར། ད་ལྟ་རྡོའི་མི་མགོ་ལྕེ་ནར་བའི་ལྷ་ཁང་ཞིག་ཡོད། དེ་ལ་སེམས་ཅན་མང་པོ་སྲོག་བཅད་ནས་དམར་མཆོད་བྱེད། དེ་ནས་ནུབ་ཕྱོགས་ཉིན་ལམ་ལྔ་ནས་སྔོན་རྒྱལ་པོར་མ་ཕ་ལས་སྲིན་པོར་དམག་དྲངས་པའི་ཚེ་ཕྲུ་མ་བཏབ་པ་ཡིན་ཟེར་བའི་ལྷ་ཁང་ཞིག་ན། མཚོན་ཆ་མང་པོ་དང༌། ཉེ་འདབས་སུ་ཙནྡན་དཀར་པོའི་ཤིང་ཡོད་པས་ཕྱོགས་གཞན་ལ་དེའི་ས་བོན་བཏབ་ཀྱང་མི་སྐྱེ། ཁྱོ་བོ་ཤི་ན་ཆུང་མ་ལ་ལ་རོ་དང་མཉམ་བསྲེགས་སུ་འགྲོ་བའི་སྲོལ་ཡང་ཡུལ་འདི་དག་ཕལ་ཆེར་ལ་ཡོད་ཟེར། ལར་འདི་དག་ལྟ་བ་ངན་པ་ལ་ཞུགས་པ་ཡིན་པས་ཤནྟ་པུར་དུའང་སྔོན་ཡུལ་དེའི་རྒྱལ་པོ་བྷ་གི་ར་ཐས། སྔོན་སྐྱབས་སེང་བུས་དགྲ་རྔན་དཔུང་བཅོམ་པ་དམྱལ་བའི་མེ་དཔུང་ནང་སྐྱེས་པ་དམྱལ་བའི་མེ་གསོད་པའི་ཆེད་དུ་ལྷ་ཚངས་པ་མཉེས་པར་བྱས་ནས་གངྒཱའི་རྒྱུན་བྱུང་བ་ཡིན་ཟེར། མཆོད་པའི་གཙོ་བོ་མུག་ཤུ་དྷའི་ཕོ་བྲང་རྩ་བ་བརྒྱུད་ཡོང་བའི་གངྒཱ་དེ་རང་ལ་བྱེད། ལྕགས་བསྲེགས་ས་གཞི་སུ་ཡིས་བྱས། །མེ་ཚོགས་འདི་དག་གང་ལས་བྱུང༌། །དེ་འདྲ་དེ་དག་ཐམས་ཅད་ནི། །སྡིག་སེམས་ལགས་པར་ཐུབ་པས་གསུངས། །ཞེས་རང་རང་གི་སྡིག་སེམས་གོམས་པའི་འབྲས་བུ་རྨི་ལམ་གྱི་སྣང་བ་ལྟ་བུར་སོ་སོའི་ངོ་ཁ་ལ་སྣང་བའི་དམྱལ་
མེ་སྤྱི་མཐུན་གྱི་སྣང་ངོ་ལ་ཤར་བ་འབྱུང་བའི་ཆུས་ག་ལ་གསོད་ཐུབ། མ་རྟོགས་པ་རྣམས་ཤིན་ཏུ་ཡང༌། །སྙིང་རྗེ་ཆེན་པོའི་གནས་ཡིན་ཏེ། །ལོག་པར་རྟོགས་དང་དེའི་རྗེས་སུ། །འབྲེང་འདི་བསོད་ནམས་ཟད་པའི་སྐྱོན། །གོང་དུ་སྨོས་པའི་ཤནྟ་པུར་གྱི་བྱང་ཕྱོགས་ན་བྷངྒ་ལའི་རྒྱལ་ཁབ་དེ་ཚོང་འདུས་ཆེན་པོ་བཞིས་བསྐོར་ནས་ཡོད། ཕོ་བྲང་གསེར་གྱི་རྒྱལ་མཚན་ལ་སོགས་ཇོ་བོའི་རྣམ་ཐར་ན་ཡོད་པ་དེ་ཚོའི་རྟེན་དང་བརྟེན་པ་ཐམས་ཅད་དེངས་ནས་རིང་ཞིག་ལོན་པ་འདྲ། དེང་སང་ནི་རྒྱལ་ས་དེའི་མིང་ལ། མུག་ཤུ་དྷར་ནོ་བབ་ཟེར། སྔར་རྒྱལ་ས་དེ། ཊི་ལིང་བཅས་བདག་པ་ཕྱིས་ཕེ་རེང་པས་འཕྲོགས་ནས་སྔར་གྱི་རྒྱལ་ས་པ་ལ་ཏི་རུབ་འབུམ་བཅུ་དྲུག་རེའི་ཕོགས་སྟེར་སྐད། སྔོན་རྒྱལ་ཁབ་དེ་དར་ཆེ་བའི་སྐབས་སོ་ཕག་གི་ལྕགས་རིས་བསྐོར་བའི་སྐྱེད་མོས་ཚལ་ན་ཁྲུས་ཀྱི་རྫིང་བུ་གཉིས་གཉིས་ཡོད་པ་མུ་ཏིག་རྫིལ་དང༌། ཧི་ར་རྫིལ་གཉིས་ཀྱི་སྟེང་ན་སྤྲོ་ཁང་བརྒྱད་འབབ་སྟེགས་རྡོ་སྐས་དང་བཅས་པའི་ཧི་ར་རྫིལ་དུ་མེ་ཏོག་རྒྱས་པའི་དུས་ནམ་མཁའ་ནས་ལྷ་མོ་ཁྲུས་ལ་འོང་བ་བཟུང་བར་སེམས་པ་ན། ནམ་མཁའ་ལ་འཕུལ་བའི་ཤུལ་དུ་མཆིལ་ལྷམ་ཅིག་ལུས་པ་ཤའུ་དྷེ་ཅིག་གིས་ཏི་རུབ་འབུམ་རི་ཟེར། རྫིང་བུ་དེ་ལས་གཅིག་ལ་ལྷས་
དམོད་བོར་པས་ཁྲག་མདོག་ཏུ་སྣང་ཞིང་ད་ལྟ་ཁྲུས་དང་བཏུང་བ་མི་བྱེད་སྐད། བྷངྒ་ལའི་ནུབ་ཕྱོགས་པ་ཊ་ན་ཟེར་བའི་རྒྱལ་ཁབ་ཆེ་བ་ཞིག་ཡོད་པའི་མི་རིགས་ལ་མོ་གོལ་ཟེར། ཀ་ལི་ཀ་ཏ་ནས་རྒྱ་མཚོར་འགྲོ་བའི་ལམ་བར་ན་བ་ཚྭ་དང་བཅས་པའི་བྱེ་མ་བཙོས་ནས་ལན་ཚ་བཟོ་བ་ཡོད། ལར་ཡུལ་འདི་དག་ལྷ་ཡུལ་ལྟར་གྱ་ནོམ་ཞིང༌། ཉམས་བདེ། གྲོང་ཁྱེར་མང༌། ལམ་ཐམས་ཅད་ཀྱང་རྫ་ཕག་ལས་བྱས་པས་དངོས་གཙང་ཞིང༌། བགྲོད་བདེ་ཡང་ཐར་པའི་ལམ་མེད་པས་བླུན་པོ་རྟག་འཛིན་ཅན་ཚོའི་སྤྱོད་ཡུལ་ལ་བདེ་བ་ཙམ་ཞིག་གོ །དེའི་ནུབ་བྱང་མཚམས་ན་ཝཱ་རཱ་ཎ་སཱི་དགོན་པའི་ཚུལ་དང༌། ཀ་ཤི་གྲོང་རྡལ་གྱི་ཚུལ་དུ་ཡོད། ཀ་ཤི་ཀའི་རས་དངོས་འདི་ནས་ཐོན་ཞིང་རས་ཡུག་ཤིན་ཏུ་རིང༌། སྲབ་པའི་ཚད་ཕྱི་ནང་སྒྲིབ་མེད་དུ་གསལ་བས་ནེའུ་གསེང་གི་ཁར་བཞག་ཀྱང་རྩྭ་ལྗང་གི་མདོག་མི་བསྒྲིབ། དེ་ནས་ལྷོ་ཕྱོགས་སུ་ཕྱིན་པ་ན་གྷ་ཡ་ཟེར་བའི་གནས་སྟོབས་ཆེན་བྲམ་ཟེའི་གླིང་དུ་ཡོད་པ་ལ་གསོན་གཤིན་གཉིས་ཀའི་སྦྱིན་པ་གཏོང་ས་བྱེད། ཁོར་ཡུག་ལྕགས་རིས་བསྐོར་བའི་ནང་ན་རྡོའི་མཆོད་རྟེན་གཅིག །སྤྱན་རས་གཟིགས་ཀྱི་རྡོ་སྐུ། སྟོན་པའི་ཞབས་རྗེས་ཡིན་ཟེར་བ་ལ་མཆོད་ཅིང༌། རང་རང་གི་ཕ་མེས་ཀྱི་མིང་ནས་བོས་ན་ངན་སོང་ནས་ཐར་ཟེར། འདི་མ་གྷ་དྷཱ་ཡིན་ནམ་
ཟེར་བའི་ཕོ་ཚོད་ཙམ་ལས་ཡོངས་གྲགས་སུ་སྟངས་ཆོད་པ་མེད། མུ་སྟེགས་ཀྱི་དཀའ་ཐུབ་པ་ཤོ་ན་བྷྲཾ། བྷེ་རཾ་གི །ཛོ་ཀི་སོགས་སུ་འབོད་ཅིང༌། ལག་པ་གཉིས་སྤྱི་བོར་བཀན་པ་དང༌། ཐལ་མོ་སྦྱར་བ་དང༌། ཅིག་ཤོས་གདེངས་བཞིན་དུ་རེངས་པ་ལ་ལའི་ཟེར་ལུགས། གྷ་ཡ་ནས་ནུབ་ཕྱོགས་ཟླ་ལམ་གསུམ་གྱི་ས་ན་རྡོ་རྗེ་གདན་གྱི་ངོ་བོ་ཙམ་ཡོད། ལྕགས་རི་སོགས་ཉམས་ནས་མེད་ཟེར། ལར་སློབ་དཔོན་དཔའ་བོ་བྱོན་པའི་ཡང་ཕྱི་ནས་རྒྱལ་པོ་དྷརྨ་པཱ་ལས་རྒྱལ་སྲིད་བྱེད་ཚེ། ཏུ་རུཥྐའི་དམག་གིས་མ་གྷ་དྷཱ་པ་བཅོམ། ན་ལེནྡྲར་ཡང་གནོད་པ་ཆེན་པོ་བྱུང༌། དེའི་ཕྱི་ནས་རྒྱལ་པོ་སངས་རྒྱས་ཕྱོགས་ཀྱིས་ཏ་ཟིག་གི་རྒྱལ་པོ་ཏུ་རུཥྐ་ཕམ་པར་བྱས། ཆོས་གཞི་མང་པོ་སོར་ཆུད་པར་བྱས་ཀྱང་མུ་སྟེགས་ཅན་གཉིས་ཀྱིས་ཉི་མའི་རིག་སྔགས་བསྒྲུབས་པས་སངས་རྒྱས་པའི་ཆོས་གཞི་བརྟེན་པའི་ལྷ་ཁང་བརྒྱད་ཅུ་སྐོར་མེ་ལ་བསྲེགས། དེ་བཞིན་དུ་བྲམ་ཟེ་རྒྱལ་བཤེས་ལ་སོགས་པའི་མུ་སྟེགས་ཅན་རྣམས་ཀྱིས་ཀྱང་ཡུལ་དབུས་ཛ་ལནྡྷ་རའི་བར་གྱི་གཙུག་ལག་ཁང་མང་པོ་ཞུགས་ལ་སྦྱངས་པས་རྡོ་རྗེ་གདན་གྱི་བཀོད་པ་མཐོང་དཀའ་བའི་གནས་ལ་སྐྱོ་བ་སྐྱེས་ནས། མེས་དབོན་གྱི་གཙུག་ལག་ཁང་རྣམས་ལ་བསྟི་སྟང་བསྐྱེད་པར་རིགས། གྷ་ཡ་དེ་ཡུལ་དབུས་སུ་བྱས་
པའི་ནུབ་ཕྱོགས་ཟླ་ལམ་གསུམ་གྱི་ས་ཎ་ཊི་ལིང་པ་ཅ་ཁོ་ལ་ཕེ་རེང་པས་འབུལ་སྣ་རེ་བྱེད་ཟེར། གྷ་ཡ་ནས་ལྷོ་ཕྱོགས་སུ་ལོ་བཞི་ལྔ་སྐོར་བགྲོད་པ་ན་སྔ་མ་ལས་སྟོབས་ཆེ་བ་རུམ་པ་ཅ། འདིས་འཛམ་བུའི་གླིང་གི་མཐའ་དཔལ་ལྡན་འབྲས་སྤུངས་ལ་བདག་བྱེད། ཁོང་གཉིས་འཛམ་བུའི་གླིང་གི་རྒྱལ་ཁབ་ཆེ་ཤོས་ཡིན་ཡང༌། ཊི་ལིང་པ་ཅའི་མངའ་རིས་རྣམས་རྒྱལ་པོའི་ལུང་འོག་ཏུ་སྡོད་མི་སྡོད་སྣ་ཚོགས་པས་སྙིགས་མ་རྩོད་ལྡན་ལ་རང་སྲིད་ཀྱང་རྣལ་དུ་མི་ཕེབས་ན་གྲིབ་མ་ཤ་ཟར་དོགས་པའི་རེ་དོགས་སྤངས་ལ་རང་གི་དལ་རྟེན་ལ་དགའ་བ་བསྒོམས་ནས་ཆོས་ལ་བརྩོན་པ་བསྐྱེད་ཅིག །པ་ཅ་འདི་གཉིས་ཀ་ཀླ་ཀློའི་ཆོས་ལུགས་འཛིན་ཞིང་གཞན་དག་ཀྱང་དེ་ལ་འཛུད་གང་ཐུབ་བྱེད་པས་རྒྱ་གར་པ་ཕལ་ཆེར་ཀྱང་ཀླ་ཀློའི་ཆོས་ལུགས་མང༌། དེ་སྐད་དུ་རབ་དབྱེར། སྙིགས་མའི་དུས་སུ་འཕགས་པའི་ཡུལ། །ཀླ་ཀློའི་ཆོས་ཀྱིས་གང་བར་འགྱུར། །དེ་ནས་ཀླ་ཀློའི་རྫུ་འཕྲུལ་གྱིས། །ཤམ་བྷ་ལ་རུ་དམག་འདྲེན་འགྱུར། །དེ་ཚེ་ཕྱག་ན་རྡོ་རྗེ་ཡིས། །སྤྲུལ་པ་དྲག་པོ་ཞེས་བྱ་ཡི། །རྒྱལ་པོས་ཀླ་ཀློ་ཀུན་བཅོམ་ནས། །འཕགས་པའི་ཡུལ་གྱི་བར་དུ་ཡང༌། །སངས་རྒྱས་བསྟན་པ་སྤེལ་བར་གསུངས། །ཞེས་སོ། །ཀླ་ཀློའི་ཁུངས་ནི། སློབ་དཔོན་ཀླུ་སྒྲུབ་ལྷོ་ཕྱོགས་ཀྱི།
རྒྱུད་ན་བཞུགས་པའི་ཚེ། སྡེ་སྣོད་འཛིན་པ་གཞོན་ནུ་སྡེ་ཞེས་བྱ་བ་བདུད་སྡིག་ཅན་གྱིས་བཀབ་ནས། འཚེ་བ་ཆོས་སུ་སྨྲ་བ་ཀླ་ཀློའི་གྲུབ་མཐའ་བརྩམས་པ་ཡིན། དེའི་ཚུལ་ནི་གསང་ཚིག་ལས། ངེས་པར་བརྩེ་མེད་དཔའ་བོ་ཡིས། །གཡུལ་ངོར་འབྲོས་པ་མེད་པར་ནི། །གཡུལ་ལ་མངོན་པར་ཕྱོགས་གྱུར་ན། །ཤི་ནས་མཐོ་རིས་འགྲོ་བར་འགྱུར། །ཞེས་པ་དང་མཐུན་པར་གླེང་ངོ༌། །མུ་སྟེགས་ཀྱི་སྡེ་ཚན་གཅིག་ལས་འབྲས་ལ་གུས་པ་དང༌། ལྟ་བ་ནང་པ་དང་ཉེ་བའང་ཡོད་པ་དེ་འདྲའི་རིགས་ཐལ་འགྱུར་རྣམ་དག་གིས་ཚར་གཅོད་ནུས་པ་བྱུང་ན། སློབ་དཔོན་དཔའ་བོ་ལ་སོགས་པ་ལྟར་གདུལ་དུ་རུང་བ་སྐྱེས་བུའི་མཚན་ཉིད་ལ་གནས་པ་ཡིན། བྷོ་ཊའི་ཡུལ་འདིར་དགེ་སྦྱོང་ཡིན་ནོ་བར་བསྙེམས་ནས་ལས་འབྲས་ལ་ཅི་ཡང་མི་སེམས་པར་གཞན་གནོད་གཞི་བཅས་ལྷུར་ལེན་པའི་ཁྱིམ་པ་སུན་འབྱིན་གྱིས་ནི་བསྟན་པ་ལ་མོས་པ་ལྡོག་ཅིང༌། མེས་དབོན་རྣམ་གསུམ་གྱིས་དབང་དགེ་འདུན་ལ་བསྐུར་བའི་ཕྲིན་ལས་ཆུད་སོན་པར་བྱེད་ན། དོན་གྱི་ཀླ་ཀློའི་ཆོས་ལུགས་ལ་ཉེ་བས་བསྟན་པ་ནུབ་པའི་སྔོན་འགྲོར་འོང་བའི་ཚུལ། བཟོད་པ་དཀའ་ཐུབ་བཟོད་པ་དམ་པ་ནི། །སོགས་པའི་ཤློ་ཀས་བསྟན། རུམ་པ་ཅའི་རུས་ལ་ཏ་ཟིག་ཏུ་རུཥྐ་ཟེར་
ཞིང༌། དེ་ཡང་རུས་ལས་ཏུ་རུབ་དང༌། ཆོས་ལུགས་ལས་ཀླ་ཀློར་བཏགས་ཀྱང༌། ཁོའི་སྔུན་དུ་མིང་དེ་བརྗོད་ན་མི་དགའ་བས། མུ་སུར་མན་ཟེར་སྐད། ཁོའི་རྟ་དེ་རྟ་གཞན་ལས་ཉིས་འགྱུར་རམ་འབུན་གྱིས་ཆེ་བས་མིང་ལ་ཏ་ཟིག་དུརྐི་ཟེར། ཊི་ལིང་པ་ཅའི་ལྷོ་ཕྱོགས་ན་བྷོ་རོང་གྷི་ཟེར་བའི་རྒྱལ་ཁབ་ཅིག་ཡོད་པ་དེའི་མི་དང་རྟ་གཉིས་ཀ་རྩལ་ཆེ། ཁོ་ལ་མཚོ་རྟའི་བརྒྱུད་ཡིན་ཟེར་ཤ་གཟུགས་གྲིམས་ཤིང་ཆུའི་གཏིང་ལའང་ཞོན་ནས་འགྲོ་ཐུབ་པས། རྟ་གཞན་གྱིས་ཉིན་ལམ་གསུམ་དེ་ཉིན་གཅིག་ལ་ཆོད་ཟེར་ཡང༌། རྟ་ཐམས་ཅད་དེ་འདྲ་ཡིན་པ་དཀའ། བོད་འདིར་སྟོད་ཧོར་དང༌། དེའི་རྟ་སོགས་རི་བོང་གི་ཆལ་བྲག་ཅ་ལྟ་བུར་སྒྲོག་ཅིང༌། ལུང་བསྟན་མཁན་པོ་རྣམས་ཀྱིས་ཀྱང་དེ་དང་མཐུན་པར་སྒྲོག་པ་འདི་དག་མ་ཕྱེད་པའི་སྒྲ་འགྲོགས་པ་འདྲ། གཏེར་ཁ་གོང་འོག་དང༌། ཡར་རྗེ་ཨོ་རྒྱན་པ་སོགས་རྩོད་མེད་ཀྱི་ལུང་བསྟན་རྣམས་ནི་སྔར་རྒྱལ་པོ་སེ་ཆེན་གན་གྱི་ཕུ་བོ། ཧུ་ལ་ཧུས་རྒྱལ་ས་མ་ཐོབ་ནས་སྐལ་པར་དམག་འབུམ་ཚོ་གཅིག་བྱིན་པ་ཁྲིད་ནས་སྟོད་དུ་གཞི་ཆགས་པ་ལ་སྟོད་ཧོར་དང༌། ཙི་ན་ལ་སྨད་ཧོར་དུ་གྲགས། གཞི་ཆགས་ནས་རིང་པོར་མ་ལོན་པར་ས་འབྲི་གཉིས་བྱ་འུག་གི་བརྟུལ་ཞུགས་འཛིན་པའི་ཚེ་འབྲི་གུང་དབོན་པོས་ས་སྐྱའི་སྟེང་དུ་
ཧོར་དམགས་དྲངས་པས། ཙི་ནའི་དམག་དཔོན་ཐི་མུར་བྷོ་ཁ་དང༌། དཔོན་ཆེན་ཨང་ལན་གྱིས་བོད་ཁྲི་སྐོར་བཅུ་གསུམ་གྱི་དམག་ཁྲིད་ནས་དཔལ་མོ་དཔལ་ཐང་དུ་སྟོད་ཧོར་ལ་ཇུས་ཉེས་བཏང༌། རྣ་བ་ཡ་གཅིག་གཞུར་བ་དྲེལ་རྒྱབ་གཉིས་དང༌། གཙོ་བོ་ཁ་ཤས་ཀྱི་མགོ་ལག་དྲངས། ཧུ་ལ་ཧུའི་རྒྱལ་བུ་རིན་ཆེན་དང༌། འབྲི་གུང་དཔོན་པོ་བཙོན་དུ་བཟུང་ནས་ས་སྐྱར་ཁྲིད་སླར་ཙི་ན་པ་ཅའི་ལུང་དང་བསྟུན་ནས་ཧུ་ལ་ཧུའི་བུ་གློད། སྒོམ་པ་དཔོན་པོ་དཔོན་པོ་རའི་རྒྱབ་ཏུ་སྙིང་རྒྱབ་ནས་བཏོན་ཏེ་ཁྲག་སྦྱོར་བྱས་པས་མི་ཁྱད་དང་རྟ་ཁྱད་ཤོར་བའི་བགྲོས་མེད། དེའི་བརྒྱུད་པ་རྒྱ་གར་ན་སྟངས་མི་ཆོད་ཀྱང་སྒོར་ཐོག་དང་ཉེ་བའི་ཁ་ཆུ་ལ་དེ་ཡིན་ནི་ཟེར། ཨོ་རྒྱན་པ་རང་བྱུང་དཔལ་གྱི་ལམ་ཡིག་ན། ཏེ་ས་ནས་རིང་ཙམ་ཐལ་བ་ན། ཡུལ་ཉེར་བཞིའི་ཆ་ལག་ཀུ་ལུ་ཏ་དང༌། མཱ་རུ་ཏི། དེ་ནས་རི་བོ་ཆེན་པོ་གཎྜ་ལ། དེ་ནས་ཛ་ལནྡྷ་ར། དེ་ནས་ཞག་ཉི་ཤུ་ན་ཙན་དྷ་བྷ་ག །དེ་ཡན་ཆོད་ལ་ཧིནྟུ་ཞེས་རྒྱ་གར་དང་མུ་སུར་མན་ཞེས་སོག་པོ་གཉིས་འདྲེས་མར་ཡོད། དེ་ནས་ཁ་ཆེའི་ཆུ་མཇུག་གཙང་པོར་ཐལ་བ་ནས་ཧོ་ར་ཞེས་པའི་གྲོང་ཁྱེར་འབུམ་ཕྲག་བདུན་ཡོད། དེ་ནས་ཉིན་ཞག་རེ་རེ་འདས་པ་ན་སྨན་ཚྭའི་རི་དང༌། བྷ་ཊོ་ལ་དང༌། མ་ལ་ཀོ་ཏྲེ། མུ་ཏིག་འབྱུང་བའི་རྒྱ་
མཚོའི་སྒོར་སླེབ། དེར་རྒྱལ་པོ་ཧུ་ལ་ཧུའི་ལྷ་ཁང་བཞེང་ཞིང་འདུག །དེ་ནས་ཞག་ལྔ་ན་རུ་ཀ་ལ་ཞེས་པའི་གྲོང་ཁྱེར་དང༌། དེ་ནས་ཞག་བཞི་པ་ལ་ར་ཛ་ཧུར་སླེབ། དེར་ཨོ་རྒྱན་གྱི་སྒོ་བཞི་ལས་ཡ་གྱལ་གཅིག་ཡིན་སྐད་ཟེར་བ་ལ་དཔགས་ན་ལམ་ཕྱོགས་ལྷོ་ནུབ་སོ་སོའི་ཁྱད་ལས་མ་ལ་ཀོ་ཊི་དེ་སྟོད་ཧོར་གྱི་གནས་སུ་མངོན། ལྔ་པ་རིན་པོ་ཆེའི་དུས་སོག་པོ་དགའ་ལྡན་གྱིས་ལ་དྭགས་བཅོམ། ལ་དྭགས་པས་ཡུལ་ན་བབས་ཀྱི་ཆ་ལས་བརྒྱུད་དེ་པ་ཅའི་རྒྱལ་པོ་བརྔན་ཏེ་དམག་རོགས་ལ་ཁྲིད་པ་དེ་ཡང་བཅོམ་ཟེར་བ་འདུག་ཀྱང༌། རུ་མ་དང་ཊི་ལིང་ནི་མིན། བྷོ་རོང་ནི་ཐག་རིང༌། ཀླ་ཀློ་རྣམས་རྒྱལ་ཁག་ཆེ་བ་ལ་པ་ཅ་ཟེར་ཏེ་རྒྱལ་པོའི་མིང་ཡིན་ནས་སྟོད་ཧོར་དང་པ་ཅ་ཡང་མ་ཕྱེད་པས་དེའི་ཧོར་ལ་རྒྱུ་མཚན་མེད། ཀུན་ལ་ངེས་པ་འབྱུང་བ་འཆི་བ་ཡིན། །འཆི་བ་སྦས་ཡུལ་གྱིས་ཀྱང་ག་ལ་ཐུབ། །བསྟན་པ་ནུབ་ན་ཐར་བའི་ལམ་འགགས་པས། །འཁྲུག་རྩོད་རང་སར་སྤངས་ལ་ཆོས་ལ་འབུངས། །དེ་ལྟར་བྷོ་རོང་གྷི་དེ་འཕྲུལ་ཆེ་བས་སྔོན་གྱི་ཚེ་ཊི་ལིང་པ་ཅས་ཀྱང་ཁོ་གནོན་མ་ཐུབ་པས་བྷངྒ་ལ་རང་འོག་ཏུ་ཡོད་པའི་ཚེ་དཔྱ་ཁྲལ་གྱི་དོད་ཏི་རུབ་རེ་ནས་བརྒྱད་ཆ་རེ་བྷོ་རོང་ལ་སྦྱིན་ནས་དགྲ་ཇག་མི་བྱེད་པའི་ཆད་བྱས། འཕྱིས་བྷངྒ་ལ་པ་ཕེ་རེང་པས་བླངས་རྗེས་བྷོ་རོང་ལ་གང་ཡང་མ་བྱིན་པས་
ལོ་མང་ཞིག་ལོན་པ་དང་དགོས་ཟེར་རྩོད། དེར་ཕེ་རེང་པས་ཁོའི་སྟེང་དུ་དཔུང་ཆེན་པོ་བཏང་བས་ཐང་ཆེན་པོའི་དཀྱིལ་ན་བྲག་རི་ཡོད་པའི་སྟེང༌། ཛི་ཏ་ར་ཞེས་པའི་བཙན་རྫོང་ལ་འཕྲས་ནས་དགྲ་ཡ་མི་བྱེད་པས་ཕེ་རེང་རྣམས་ཐང་དཀྱིལ་དུ་བག་ཕབ་ནས་ཉལ་བའི་ནུབ་མོ་གང་ནས་འོངས་ཆ་མེད་པའི་ཆུ་ཀླུང་ཆེན་པོས་དམག་རྣམས་ཆུ་ལ་སྦྱངས་སྐད། ཀ་ལི་ཀ་ཏར་ཡང་དམག་གཏང་རྒྱུ་ཡིན་ཟེར་བས་ཕེ་རེང་པ་འཁུམས་ཏེ་གསེར་གླང་པོ་ཆེའི་རྒྱབ་ཁལ་མང་པོ་བྱིན་ཏེ་འདུམས་ནས་ད་ལྟ་ས་བྱ་ཕན་ལ་ལོ་སྐོར་གཅིག་ཙམ་ལས་མ་སོང༌། ཀ་ལི་ཀ་ཏ་ནས་ལྷོ་ནུབ་ཕྱོགས་ལ་ཉིན་ལམ་བཅོ་ལྔ་སྐོར་ཕྱིན་པ་ན། ཛོ་ཀ་ན་ཟེར་བའི་མཆོད་རྟེན་ཆེན་པོ་ཉིན་ལམ་གསུམ་ནས་མཐོང་བ་ཞིག་ཡོད། དེ་ལ་མཆོད་པའི་གཙོ་བོ་ཚོགས་འཁོར་ལ་བྱེད་ཀྱང༌། ཕེ་རེང་དང་ཏུ་རུབ་ལ་སོགས་པ་རུས་ངན་མི་གཅིག་ཟེར་ནས་མཆོད་དུ་མི་འཇུག །བྷོ་ཊ་དང་ངེད་ཅག་རུས་གཅིག་ཟེར་ནས་མི་བཀག་པ་ལ་དཔགས་ན། རྒྱལ་པོ་རུ་པ་ཏའི་གཏམ་རྒྱུད་དང་མཐུན་ནམ་སྙམ། ཚོགས་གཡོས་བྱེད་དུས་ཁོག་མ་བདུན་བརྩེགས་བྱས་པའི་སྟེང་མ་སྔ་ཤོས་དང༌། དེ་ནས་རིམ་པར་ཚོས་ཟེར། ཚོགས་ལ་རོལ་དུས་བཟང་ངན་མེད་པར་བསྲེས་ནས་མ་ཟོས་ན་ཞིང་སྐྱོང་གི་ཆད་པས་དེ་མ་ཐག་སྣ་ཁྲག་ཟགས་ནས་ཤི་ཟེར་བ་
སྔགས་ཀྱི་བརྟུལ་ཞུགས་འདྲ་བ་དང༌། གཞན་ཡང་ཧིནྟུ་ཟེར་བའི་རིགས་གཅིག་མཆོད་པ། སྦྱིན་སྲེག འཕོ་བ། གཅོད་སོགས་ནང་པ་དང་ཆ་འདྲ་བས། ཆོས་ལུགས་གཅིག་ཟེར་བ་དང༌། ཛཱ་ཏི་སྲུང་བ་ཟེར་ཆང་མི་འཐུང༌། ཕག་དང་ཁྱིམ་བྱའི་ཤ་མི་ཟ། ནོར་གྱི་འོ་མ་བཏུངས་པས་ཨ་མ་དང་འདྲ་ཟེར་དེའི་ཤ་མི་ཟ། ཨ་མ་ལ་ཨ་ཡི་ཟེར། དེ་གཙོ་བོར་བྱས་ནས་ཕ་མ་བཀུར། ལོག་གཡེམ་ལྟ་ཅི་དགག་བྱ་མེད་པའང་རིན་མ་བྱིན་པ་སྲུང༌། ནང་པ་དང་ཆོས་ལུགས་གཅིག་ཟེར་ཡང༌། སྤྱོད་ལམ་འདྲ་བ་བྲམ་ཟེའི་ཁྲོད་ནའང་ཡོད་ཅིང༌། དེ་བཞིན་དུ་ཕྱི་རོལ་པའི་འཇུག་པ་བཅུའི་སྡེ་ཚན་ན་སྟོན་པ་དང་བྱང་སེམས་ཀྱི་སྐུ་འདྲ་བའང་ཡོད་པས་གང་ཡིན་དཔྱད་དཀའ། རྒྱ་གར་གྱི་ཛོ་ཀི་རྣམས་ཡན་ལག་ལ་དཔུང་པ་ནས་རིམ་པར་གསེར་དངུལ་ཟངས་མ་དང༌། ཐ་ན་སྤའི་ལྕུག་མ་ཡན་ཆད་ཀྱིས་ཚིགས་རྒྱན་མང་པོ་བྱེད་པའི་རིན་པོ་ཆེའི་རིགས་ཚོ་ལ་གཟུགས་བརྙན་དེ་འདྲ་ཡོད་པས་སོ། །དེ་སྐད་དུ་ལོ་མ་ཅན་གྱི་གསང་ཚིག་ཏུ། ཉ་དང་རུས་སྦལ་ཕག་རྒོད་དང༌། །ར་མ་ཎ་གཉིས་ནག་པ་དང༌། །མི་ཡི་སེང་གེ་མི་ཐུང་དང༌། །སངས་རྒྱས་ངང་པ་ཅན་དེ་བཅུ། །ཞེས་སོ། །མཆོད་རྟེན་དེ་ལ་ཟླ་བ་དང་པོའི་ཚེས་བཅོ་ལྔའི་མཚན་མོ་སྲིན་པོ་རྣམས་
མཆོད་པ་ལ་འོང་བས། དེའི་ཚེ་མི་རྣམས་རྒྱང་རིང་པོར་འབྲོས། མཆོད་རྫས་ལ་ཛཱ་ཏི་ལི་ཤི་མང་པོ་ཕུལ་རྗེས་དེ་ཐམས་ཅད་རྒྱ་མཚོ་ལ་གཏོར་བས་ཚོང་པ་རྒྱུས་ཅན་གྱི་གྲུ་གཟིངས་བཏང་བས་རས་ཀྱི་ཁུད་དུ་བཟུང་བ་ལས་རིམ་པར་ཚོང་དུས་འགྲིམ་པ་ཡིན། གཞན་ལི་ཤི་ནི་སྡོང་པོའི་ཁུངས་ཀྱང་མི་ཆོད། ཛཱ་ཏིའི་སྡོང་པོ་ཨོ་ལོན་བྷེ་ཟེར་བའི་རྒྱ་མཚོའི་གླིང་དབར་ཞིག་ན་ཡོད་ཟེར། ཛཱ་ཏི་ལ་སྟར་སྐོགས་ལྟ་བུའི་ཤུན་ལྤགས་འཇམ་པོ་སྲ་བ་ཞིག་འོང་བས་ཆུ་ནང་དུ་ཡུན་རིང་ལོན་ཡང་ཆུད་མི་འཛའ་བ་མཐོང་ཆོས་ཅན་ཡིན། ལྗིད་ཡང་བའི་ཕྱིར་ཤུན་པ་དོར་བར་སྣང༌། ཡུལ་དེའི་གཏམ་རྒྱུད་ལ་མཆོད་རྟེན་མཆོད་པའི་སྔོན་རྒྱ་མཚོར་ཁྲུས་ལ་ཞུགས་པ་དང༌། རྒྱ་མཚོའི་ནང་གི་གདོན་ཞིག་གིས་ཆོ་འཕྲུལ་བྱས་པའི་སྐུད་པ་ཤིན་ཏུ་ཕྲ་བ་ཞིག་མིའི་ལྟེ་བ་ལ་ཟུག །སྐུད་པ་དེ་གང་གིས་ཀྱང་མི་ཆོད་པས་མཚན་མོ་མི་འཐེན་ནས་སྲོག་གཅོད་ཟེར། སྔོན་དེ་འདྲ་བྱུང་བའི་མི་ཞིག་གིས་མཆོད་རྟེན་དེ་ལ་ལན་མང་བསྐོར་བ་བྱས་པས། སྐུད་པ་དེ་མཆོད་རྟེན་ལ་འཁྲི་ལ་སྟབས། ཆུ་འདྲེས་སྐུད་པ་འཐེན་པས་མཆོད་རྟེན་འགུལ་བསྐྱོད་ཀྱི་རྐྱེན་ལས་མཆོད་རྟེན་གྱི་རྩེ་མོ་ན་ཡོད་པའི་ལྕགས་ཀྱི་འཁོར་ལོ་ལྷུངས་ནས་སྐུད་པ་ཆད་དེ་ཐར་བ་ཡིན། ད་ལྟ་དེའི་ཤུལ་ན་ཆུ་མིག་ཅིག་ཡོད་སྐད། སྲིན་པོ་དང་འཛམ་བུའི་གླིང་པ་ཚོང་བྱེད་ནའང་མིག་གིས་བརྡ་འཕྲོད་པའི་ཚོད་ཀྱིས་གྲུ་གཟིངས་ལ་ཞུགས། ཚོང་ཟོང་གི་
རིན་ཐང་སྲིན་པོའི་ཡི་གེ་ལ་བྲིས་ནས་བཞག །མེ་མདས་བརྡ་སྦྱར་ནས་ཕྱིར་ལོག་ཙ་ན་སྲིན་པོའི་རྒྱལ་པོས་སྲིན་པོ་རྣམས་ཀྱི་ཐད་ནས་མི་འགྲོ་བ་སོགས་མི་ལ་མི་གནོད་པའི་དམ་ལ་བཞག་ནས་ཚོང་ལ་འོང༌། ཆད་བཙན་པས་དགོས་ཚོད་ཀྱི་དངོས་པོ་ཁྱེར་ནས་རིན་འཇོག་པ་ཡིན་ཟེར། ཤང་ཤང་དང་ཚོང་བྱེད་ལུགས་ཀྱང་འདི་འདྲ་བ་ཞིག་སྣང༌། ལར་མཐའ་འཁོབ་པ་རྣམས་ནི་སངས་རྒྱས་མི་ཤེས། ཆོས་མི་ཤེས་པ་ཡིན་པས། སྔོན་རྒྱལ་པོ་ར་མ་ཎས་སྲིན་པོའི་རྒྱལ་པོ་བསད། ཁོང་གི་ནུ་བོ་རྒྱལ་པོ་ལ་བསྐོས་ནས་འཛམ་བུའི་གླིང་དུ་སྲིན་པོ་བསྲུངས་བཅུག་པ་ཙམ་ལས་རཀྵ་ཐོད་ཕྲེང་རྩལ་གྱི་མཚན་ཉིད་མི་ཤེས། ཀ་ལི་ཀ་ཏ་ནས་གངྒཱ་རྒྱལ་མཚོར་འབབ་པ་དེ་ལ་གངྒཱ་ཤ་ཀ་གྷོར་ཟེར། ལྷ་མོ་དབྱངས་ཅན་མ་ཡང་དེར་འཁྲུངས་པའི་ལོ་རྒྱུས་སྨྲ། གངྒཱ་དང་རྒྱ་མཚོ་རང་བཞིན་འདྲེས་ནས་མི་སྡོད་པར་གངྒཱའི་ཀླུང་དཀར་པོར་སྣང་བ་དེ་རྒྱ་མཚོའི་གཏིང་ལ་ཐུག་པར་འགྲོ་བདེ་ལ་མུ་སྟེགས་པ་འགའ་ཞིག་ལྕེབ་པར་བྱེད་པ་ནི། རྒྱལ་བྱེད་ལས། དགུན་གྱི་དུས་སུ་ཆུ་ཡི་ནང་དུ་གནས། །ཚ་བའི་དུས་སུ་གདུང་བ་ལྔ་བསྟེན་བྱ། །དབྱར་གྱི་དུས་སུ་བླ་གབ་མེད་པར་གནས། །བྲམ་ཟེ་དེ་དག་དཀའ་ཐུབ་དྲག་པོར་སྤྱོད། །ཅེས་པའི་སྡེ་ཚན་ཡིན་ལ། གཞན་ཡང་མགོ་བྲེགས་ཏེ་ཙནྚི་ཀ་ལ་འབུལ་བ་དང༌། ཏྲི་ཤུ་ལའི་རྩེ་ལ་མཆོད་པ་དང༌། རྐང་པ་ཡ་གཅིག་སྒྲེང་ཞིང་ཉི་མ་ལ་བལྟས་པས་འཕྱིས་སྡུག་བསྔལ་མྱོང་འགྱུར་རྣམས་སྐྱེ་བ་འདིར་ཟད་ནས་ཡང་སྲིད་མི་ལེན་པར་འདོད།
འདི་དག་ལ་མི་དགེ་བཅུ་སྤོང་གི་སྡོམ་པ་ཡོད་དོ། །རྒྱ་མཚོའི་དུས་རླབས་ཉིན་ཞག་རེ་ལ་ཚར་རེ་ལྡང་བས་ཆུ་བོ་གངྒཱ་གྱེན་དུ་ལྡོག་པ་ནས་ས་གཞི་ཐམས་ཅད་འུར་སྒྲས་འབིར་ཞིང༌། འབྲུག་སྟོང་བསྒྲགས་པ་ལྟ་བུའི་ཟིལ་དང་བཅས། རྒྱ་མཚོའི་རླབས་ཀྱིས་གངྒཱ་དེད་ནས་གྱེན་དུ་སློག་པའི་དབའ་རླབས་ཐོག་སོ་ལྔ་དྲུག་ཙམ་དུ་ལྡང་བ་ལ་ལྟད་མོ་དང་འཇིགས་ཟིལ་གཉིས་ཀ་ཡོད། ཀ་ལི་ཀ་ཏ་བརྒལ་ནས་ཞག་བདུན་བརྒྱད་སར་སླེབས་པ་ནས་མར་ལོག་དུས་འཇམ་ཉལ་གྱི་འགྲོ། ཁོ་རང་ཚོས་དུས་རླབས་ཉིན་མཚན་གྱི་ཆ་གང་ལ་ཡོང་ཤེས་པས་དེའི་གོང་ནས་གྲུ་ལ་སོགས་པ་བསྡུ་ཞིང་འགྲིམ་འགྲུལ་གཅོད། ལར་དུང་ལ་སོགས་པའི་རྒྱ་མཚོའི་ནོར་སྣ་འགའ་ཞིག་ཀྱང་རྒྱ་མཚོའི་འགྲམ་དུ་དོང་བྲུས་ཏེ་བཞག་པ་ན། དུས་རླབས་འོང་སྐབས་དེའི་ནང་དུ་ཆུད་པ་ལས་འོང༌། ཀ་ལི་ཀ་ཏ་ཟད་མཚམས་ནས་རྒྱ་མཚོར་གཟིངས་ལ་ཞུགས། ནུབ་ལ་གཏད་ནས་ཕྱིན་པས་ཟླ་བ་དྲུག་ལ་ཕེ་རེང་པའི་ཡུལ་ངོ་ཐོག་བྷི་ལ་ཏིར་སླེབ་ཟེར། དེར་འགོ་སྣམ་དང་གོས་ཆེན་གཉིས་ཀ་འཐག །རྒྱ་མཚོའི་གླིང་དབར་ཡིན་པས་ནོར་སྣ་མང་པོ་འཐོན། ལོ་རྒྱུས་གཞན་དུ་རིན་པོ་ཆེའི་རིས་རྒྱ་མཚོའི་ཁ་དོག་འགྱུར་བ་ཡོད་པར་གྲགས་ཀྱང༌། ཁོང་ཚོས་ཕྱིན་པའི་རྒྱ་མཚོར་ནི་རིའི་གསེབ་ནས་རིན་པོ་ཆེ་མང་པོ་
ཐོན་པ་ལས། རིན་པོ་ཆེའི་རི་དངོས་སྣང་མེད་ཟེར་སྐད། བཟོ་གནས་ལ་ཤེས་མིག་ཆེ་ཆུང་དང༌། དཀར་ཡོལ། ཤེལ་བུམ་ལ་སོགས་པའི་ཤེལ་སྤྱད་ཀྱང་སྤུས་ཤིན་ཏུ་དག །ཆུ་ཚོད་ཆེ་ཆུང་དང༌། སྤྲ་བ་དང་སྦི་ཐི་མི་དགོས་པའི་མེ་མདའ་ཁྱད་མཚར། གྲི་ཆེ་ཆུང་སོགས་མཚོན་ཆ་རྣོ་ངར་ཅན། ཁྱད་པར་བཟོ་རྩེད་ལ་མཁས་པས་སྒམ་ནང་དུ་ཤ་དཀར་གྱི་དོང་བུ་ཆེ་ཆུང་མང་པོ་ལས་སྐད་སྦོམ་ཕྲ། འགྱུར་དང་ཁུགས་དགོས་སར་བཟོ་དབྱིབས་སྣ་ཚོགས་པའི་སྤུག་ཀྱོང་རྣམ་གྲངས་མང་པོ། ཚིག་གི་སྒྲ་དགོས་སར་གཟེར་བུའི་འཁྲུལ་འཁོར་མང་པོ་བྱས་པ་མུ་སྦྲེལ་གྱི་ནང་རླུང་ཁོར་ཡུག་ཏུ་འགྲོས་ཡོད་པར་བྱས་པ་ལ། སྒམ་གྱི་ཕྱི་ནས་གཅུས་ཕུར་བསྒྲིམས་པས་ནང་དུ་པགས་པ་མཉེན་པོའི་རྦུད་པ་ལས་རླུང་བྱུང་ནས་སྐྱེས་བུའི་ངག་ནས་བཏོན་པ་ལྟ་བུའི་གླུ་དབྱངས་ཤིན་ཏུ་སྙན་པར་སྒྲོག་པ་ལ་ཏི་རུབ་སྟོང་ཕྲག་རི་བ་ནས་རིམ་པར་གོང་ཐང་ཆེ་ཆུང་གིས་བཅད་པ་དང༌། ཡང་སྒམ་གྱི་སྟེང་དུ་ཤེལ་སྒོ་བསླངས་པ་ལ་ཕྱིའི་ཡུལ་ལྗོངས་གསལ་བ་གང་ཞིག་གི་གཟུགས་བརྙན་མེ་ལོང་ནང་མ་བསྙལ་བ་ལ་གསལ་བའི་འཕྲུལ་གྱིས་ཡུལ་ལྗོངས་ཆེན་པོའི་བཀོད་པ་བདེ་བླག་ཏུ་འབྲི་ཐུབ་པ་དང༌། འཛམ་བུའི་གླིང་བུའི་གླིང་གི་ཡུལ་བཀོད་བྱང་བུ་ཆུང་ཆུང་སྣ་ཚོགས་ལ་བྲིས་པ་ཤེལ་སྒོའི་ནང་དུ་ཤིན་ཏུ་ཆེ་བར་འཆར་བ་སོགས་བཟོ་གནས་ངོ་
མཚར་བ་མང་པོ་ཐོན་ཡང༌། བསྟན་པ་དང་སེམས་ཅན་གྱི་བདེ་སྐྱིད་ལ་སྨན་པ་མ་ཡིན་པས་བཟོ་གནས་སྤྲུལ་པའི་སྐུར་མི་རུང་ཞིང༌། ནོར་སྲེད་ཆེ་བས་གླ་སྤྲད་ན་དམག་མི་ཡང་གང་དགོས་འབྱོར་བའི་མིང་ལ་ཤི་བར་ཟེར་བ་ཡིན། འདུ་ཤེས་གསུམ་དང་སྙོམས་འཇུག་གི་ངང་དུ་ཁྱབ་པ་འདུ་བྱེད་ཀྱི་སྡུག་བསྔལ་བསྒྲུབ་པའི་ལོག་ཤེས་ཙམ་མོ། །དེ་ལ་འདི་སྐད་ཅེས། བཟའ་དང་ཉལ་དང་འཆག་པ་གསུམ། །དུད་འགྲོ་རྣམས་དང་ཐུན་མོང་སྟེ། །སྨད་འཚོང་བཀུར་དང་ཕ་རོལ་གྱི། །སྲོག་དང་ནོར་དང་འགྱེད་ལ་དགའ། །དམག་དང་ཆོམ་རྐུན་འདུ་འཛིས་གཡེངས། །སྲོག་ལ་འབེམ་བཅས་རྒྱ་མཚོར་བགྲོད། །དེ་ཙམ་དེ་ཡིས་མཐོ་རིས་ཀྱི། །ཁྱད་པར་ཡིན་པ་མཁྱེན་པར་མཛོད། །ལར་ཤང་ཤང་དང༌། ཁྲུང་ཁྲུང་དང༌། ཀུ་ཤའི་གླིང་ལ་སོགས་པ་དུས་ཀྱི་འཁོར་ལོ་ལ་སོགས་ཏེ་བཀའ་བསྟན་བཅོས་དག་ལས་བཤད་པ་དང༌། དེར་མ་ལྟོས་པའང་གཟིངས་ཀྱིས་ཟླ་བ་ཙམ་པ་དང༌། ཟླ་བ་ཕྱེད་ཙམ་ལ་སོགས་པས་བགྲོད་པའི་གླིང་ཕྲན་མང༌། རྒྱ་མཚོ་ཆེན་པོ་ལ་བགྲོད་པའི་གཟིངས་ཆེ་ཤོས་ལ་ཛ་ཧ་ཟེར། ཆེ་ཆུང་ཁང་པ་ཀ་བརྒྱད་མ་ཙམ་ལ་ཐོག་རིམ་བཞི་པ་གནམ་སྒོ་ཅན། ཆུས་མིང་འཇིག་པའི་རྩིས་བསྡམས་ཤིང༌། འགྲོ་ས་གནམ་སྒོ་དང༌། གཞན་གློ་སྐར་
མང༌། གཟིངས་ཀྱི་སྟེང་དུ་རས་ཀྱི་གུར་དང༌། རླུང་གིས་འགྲོ་ལུགས་དང་མཐུན་པར་ཕན་འདོགས་པའི་དར་པོ་ཆེ་བཟོ་དབྱིབས་ཐང་ཀ་ལྟ་བུ་ཏེར་ཏེར་པོར་སྡོད་པ་དང༌། ཟུར་གཉིས་སྤྲད་པའི་རླུང་ཚང་སྦུ་གུའི་ཚུལ་དུ་དོད་པ་སོགས་བཟོ་དབྱིབས་སྣ་ཚོགས་བརྒྱད་ཙམ་ཡོད་པས་རླུང་འགྲོ་ཕྱོགས་ལས་གོ་ལྡོག་ནའང༌། གཟིངས་རླུང་ཕྱོགས་སུ་མི་ཁྱེར་ཞིང༌། ཙུག་གི་འང་སྡོད་མི་དགོས་པའི་ཐབས་ལ་མཁས་པ་ཡོད། དེ་ཡང་དབུས་སུ་ཤིང་རིང་པོ་འདོམས་པ་བརྒྱད་ཙམ་གསུམ་བཞི་སྐོར་བཙུགས་པའི་རྩེར། རླུང་དང་སྤྲིན་གྱི་འགྲོ་ཕྱོགས་ཀྱིས་མཚོན་དགེ་སྐྱོན་བརྟག་པའི་དེད་དཔོན་འདུག་ཏུ་རུང་བ་དང༌། དེ་ལ་ཡན་མན་དུ་བགྲོད་པའི་ཐག་སྐས་བྱས། དར་པོ་ཆེ་དེ་སྟོབས་ཆེས་པས་གཟིངས་མི་ལྡོག་པའི་ཐབས་སུ། གཟིངས་ཀྱི་འོག་ཁང་དུ་ཚ་ལ་སོགས་པ་འཇོག །གཟིངས་སྡོད་པའི་ཐབས་ལ་ལྕགས་ཀྱི་ལངྐ་ཏེ་གཏིང་རྡོ་ཆེན་པོ་སྔ་ཕྱི་གཉིས་བྱས་པ། འཇུག་ལྡོག་གཅུས་ཕུར་ལྟ་བུའི་འཁོར་ལོས་བྱེད། ཡང་གྲུ་བོ་ཆེ་འདྲང་པའི་གྲུ་ཆུང་ན་ཧོ་ཟེར་བ་མི་བདུན་བརྒྱད་ཙམ་ཤོང་བ་མང་པོས་སྡོན་ལ་འདྲད། སོང་ན་ཐར་ས་མེད་པའི་རྒྱ་མཚོའི་ཀློང་དང༌། ཆུ་སྲིན། ཆུ་སྲིན་གྱི་དབྱིབས་འདྲ་བའི་གཟིངས་ལ་གནོད་པ་ཅན་ཀུ་མི་ར། ཉིན་ལམ་ཙམ་ཁྱབ་པའི་ཉ་བོ་ཆེ། ཆུའི་སྡིག་སྲིན་
སོགས་གནོད་པ་མང་བས་གཟིངས་ཀྱི་ཕྱོགས་བཞིར་གནམ་ལྕགས་བསྒྲགས། རྒྱང་ལ་ཤེལ་མིག་གིས་བལྟ། ཆུ་ཕྲན་ལ་བགྲོད་པའི་གྲུ་ཤར་གྱི་མིང་ལ་བྷོ་སོར་ཟེར་ཏེ་དར་ཆེན་གཉིས་དང་གཅིག་མ་ངེས་པས་ཆོག །དེ་ལ་སོགས་ཏེ་རྒྱ་མཚོ་བརྟག་པའི་རབ་བྱེད་སྐྱེས་པ་རབས་ཀྱི་རྒྱུད་དང༌། དེད་དཔོན་ཚོའི་གཏམ་རྒྱུད་ཀྱིས་མཚོན་པས། འདི་ནི་མཐོང་ཆོས་གཏན་ལ་ཕབ་པའི་གཏམ་མོ། །ལར་ཀ་ལི་ཀ་ཏ་དེ་འཛམ་བུའི་གླིང་ནས་རྒྱ་མཚོར་འགྲོ་བའི་འགྲོ་ལམ་ཉེ་བ་ཞག་གསུམ་ན་སླེབ་པ་ཞིག་ཡིན་ལ། གཟིངས་ལ་ཞུགས་ནས་ཕེ་རེང་པའི་ཡུལ་ལ་ནུབ་བཅད་འགྲོ་བའི་འགྱངས་ཁ་ཡོད་པ་ཞིག་ན། འཛམ་བུའི་གླིང་ལ་ཉེ་བའི་རྒྱ་མཚོའི་གླིང་དབར་སིངྒ་ལར་གྲགས་པའི་ཡུལ་གླིང་ཆེན་པོ་ཞིག་ཡོད། རིན་པོ་ཆེའི་རིགས་དང་ཁྱད་པར་མུ་ཏིག་མང་པོ་ཐོན། མུ་ཏིག་ལེན་པའི་ཚེ་མགོ་ལ་ཤེལ་གྱི་ཡོལ་གོ་གྱོན། སྐེད་པ་ལ་ལྕགས་ཐག་བཏགས་ནས་རྒྱ་མཚོ་ལ་འཛུལ་བའི་གླ་ཏི་རུབ་སྟོང་ཕྲག་རེ་སྤྲོད། ལར་སེར་བ་བབས་མ་ཐག་ལ་རྫས་སྦྱོར་བྱས་པའི་མུ་ཏིག་ཀྱང་ཡོད་སྐད། ཁྲ་ནི་ཤ་བདའ་བའི་དོན་དུ་ཡིན་ཟེར་བ་དོན་ལ་གནས། མི་རྣམས་ཀྱང་འབྱོར་པ་ཆེ། གཟུགས་བྱད་མཚར། སློབ་དཔོན་ཙནྡྲ་གོ་མིས་བཞུགས་
པའི་ཙནྡྲ་དཱི་པ་ནི་ཡིན་མིན་ཆ་མི་ཕྱེད། ལི་རྡོ་རང་བཞུས་བྱུང་བའི་རི་ཡོད་མིན་ཡང་མ་འཚལ། ཡུལ་དེར་ཤིང་ཚྭ་གཞན་ཚོ་ལས་རོ་བཟང་ཞི་ལི་ཤི་དང་དབྱིབས་མཚུངས་པའི་འབྲས་བུ་ཆགས་པ་ཞིག་ཡོད་པ་ལ་རིན་ཆེ། དེར་འཛམ་བུའི་གླིང་པའི་མེ་སླེབས་ན་དགའ་ཚོར་ཆེན་པོ་བྱེད་ཅིང་ནོར་མང་པོ་སྟེར། ཁྱད་པར་ཕོབས་མོ་མང༌། བུད་མེད་དེ་ཚོས་ངེད་ཚོའི་ནོར་ལོངས་སྤྱོད་ཀྱི་བདག་པོ་གྱིས་ལ་སྡོད་ཟེར། སྡོད་མཁན་ཡང་ཡོད་ཟེར། དེ་ཙམ་ནི་ཀ་ལི་ཀ་ཏར་ལོ་གསུམ་བསྡད་ནས། རྒྱ་མཚོ་ལ་ཐུག་གི་བར་ཕྱིན་པའི་ཁོ་བོ་ཅག་གི་སློབ་མ་གདུང་བསམ་པ་བྱང་ཆུབ་རྒྱལ་མཚན་གྱིས་རང་ལོ་བདུན་ཅུ་དོན་གསུམ་པའི་ཁར་བསྙད་པ་ལ། དཔྱད་པ་གསུམ་གྱིས་བརྟགས་ཤིང་བགྲོས་གཞན་དང་ཡང་བསྟུན་ནས་བཤད་པ་སྟེ། གཞན་དུ་ན་རྒྱ་གར་གྱི་ཡུལ་ཤིན་ཏུ་རྒྱ་ཆེ་བའི་གཏམ། སངས་རྒྱས་འཕགས་པའི་སྤྱན་གྱིས་གཟིགས་ནས་སམ། རྫུ་འཕྲུལ་ཐོབ་པས་བསྐོར་བའི་རྒྱུད་འཆད་པ་ལས་རྔོ་ཐོགས་པ་མ་ཡིན་ནོ། །འདི་ནི་བརྟག་པ་བརྒྱད་ཀ་དང༌། །མཐུན་པའི་དཔེར་བརྗོད་ལ་བརྟེན་ནས། །ཕ་རོལ་གྱི་ནི་གནས་ཤེས་སླ། །བརྗོད་པས་དགོས་པའི་གནས་མཁྱེན་མཛོད། །གཏམ་ཚོགས་ལེའུ་གསུམ་པའོ།། །།
གཏམ་ཚོགས་ལེའུ་བཞི་པ། རིན་པོ་ཆེ་བརྟག་པའི་གཏམ་ཙིནྟ་མ་ཎིའི་མཛོད་ཁང་།
རིན་པོ་ཆེ་བརྟག་པའི་གཏམ། ཙིནྟ་མ་ཎིའི་མཛོད་ཁང་ཞེས་བྱ་བ། སངས་རྒྱས་ལ་ཕྱག་འཚལ་ལོ། །རྒྱལ་བ་བྱོན་ནས་ཀླུ་ཡི་དབང་པོའི་བར། །ཀློག་དང་སྒྲུབ་པའི་འཁོར་ལོས་མ་བསྙེངས་བཞིན། །གཙུག་ལག་ཁང་དང་སྐུ་གསུང་ཐུགས་རྟེན་གྱི། །བྱ་བའི་འཁོར་ལོའང་ཡར་ངོའི་གང་བ་བཞིན། །གངས་རིའི་ཁྲོད་འདིར་སེམས་སྟོབས་ཆེན་པོའི་ལྷ། །མེས་དབོན་གསུམ་གྱི་རྒྱལ་བའི་ལུང་རྟོགས་དང༌། །བསྟི་གནས་ཆོས་འཁོར་རིན་ཆེན་རྣམ་གསུམ་གྱིས། །གཏམས་པའི་རྣམ་ཐར་སྒོ་གཏན་སུས་ཁུར་བཟོད། །གང་ཞིག་ས་འདི་རིན་ཆེན་འབྱུང་གནས་དང༌། །བཟོ་གནས་སྤྲུལ་པའི་རྣམ་རིག་ཐབས་ཤེས་སུ། །རྟེན་ཅིང་འབྲེལ་བར་འབྱུང་བའི་ཆོས་ཉིད་ལ། །རྟོན་ནས་ཡིད་བཞིན་ནོར་བུའི་མཛོད་ཁང་བཤད། །འདི་ལ་གཉིས། རིན་པོ་ཆེའི་རྣམ་གཞག་སྤྱིར་བཤད་པ་དང༌། བྱེ་བྲག་ཏུ་སྨོས་པའོ། །དང་པོ་ནི། མདོ་སྡེ་དང་རྒྱུད་སྡེ་རིན་པོ་ཆེ་ལ་སོགས་པའི་བཀའ་དངོས་དང༌། པཎ་གྲུབ་རྣམས་ཀྱི་བསྟན་བཅོས་ལས་རིན་པོ་ཆེའི་རྣམ་གྲངས་ལྔ་དང༌། བདུན་དང༌། བཅུ་དང༌། བཅོ་ལྔ་དང༌། བཅུ་དགུ་ལ་སོགས་མཆོག་འབྲིང་དམན་པར་ཕྱེ་བ་རྣམས་ཀྱང་རིགས་ཀྱི་སྒོ་ནས་ལྷ་དང་མི་དང་བྱང་ཆུབ་སེམས་དཔའི་ནོར་བུ་གསུམ་དུ་འདུ་བའི་ཚུལ། སློབ་དཔོན་ཀླུ་སྒྲུབ་ཀྱིས། རིན་པོ་ཆེ་རིགས་གསུམ་གྱི་དམན་པ་མིའི་ནོར་བུ་ནི་མཐུ་ཆུང་བ་སྟེ། དེ་ཡང་ཡོངས་སུ་དག་པའི་ཁ་དོག་དང་ལྡན་
པས་ཀྱང༌། དུག་དང༌། གདོན་དང༌། མུན་པ་དང༌། སྐྲངས་པ་དང༌། ཚ་བ་ལ་སོགས་པའི་སྡུག་བསྔལ་སེལ་བར་བྱེད་པས་ནི་ཡོན་ཏན་གྱི་ཁྱད་པར་བདུན་དང་ལྡན་ལ། ལྷའི་ནོར་བུ་རིན་པོ་ཆེ་ལ་ཡོན་ཏན་སྔ་མ་དེ་བདུན་གྱི་སྟེང་དུ། རྟག་པར་ལྷའི་ལུས་ཀྱི་རྗེས་སུ་འབྲང་བ་དང༌། ཡང་དག་པ་དང༌། སྨྲ་བར་རུང་བ་དང༌། ཡང་ཞིང་མི་ལྕི་བ་སྟེ་ཡོན་ཏན་བཅུ་གཅིག་དང་ལྡན་ཞིང༌། བྱང་ཆུབ་སེམས་དཔའི་ནོར་བུ་རིན་པོ་ཆེ་ནི་སྔ་མའི་ཡོན་ཏན་བཅུ་གཅིག་གི་སྟེང་དུ་སེམས་ཅན་ཐམས་ཅད་ཀྱི་འཆི་འཕོ་བརྟག་པ་དང༌། སྐྱེ་བའི་མཐའ་ཤེས་པ་དང༌། ཆོས་ཀྱི་སྒྲ་སྐད་སྣ་ཚོགས་པ་འབྱུང་བ་སྟེ་ཡོན་ཏན་གྱི་ཁྱད་པར་བཅུ་བཞི་དང་ལྡན་པའོ། །ཞེས་སོ། །དེ་ལ་བྱང་ཆུབ་སེམས་དཔའི་ནོར་བུ་ནི། ལོངས་སྤྱོད་རྫོགས་པ་རྣམས་ཀྱི་སྐུ་གསུང་ཐུགས་ཀྱི་རྒྱན་དང༌། མངོན་པར་དགའ་བ་ལ་སོགས་པའི་ཞིང་ཁམས་དང་གཞལ་མེད་ཁང་གི་རྒྱན་དང༌། གཞི་དང༌། ལྗོན་པས་ལ་སོགས་པ་དཔེར་ན་འོད་དཔག་མེད་པའི་ཞིང་གི་བཀོད་པ་ལས་བཤད་པ་ལྟར་རོ། །ལྷའི་ནོར་བུ་ནི་དབང་པོའི་རིན་པོ་ཆེ་ཨིནྡ་རྙིལ་དང༌། མཐོན་ཁ་ཆེན་པོ་དང༌། སཱ་རཱ་ཛ་ཏིའོ། །ལྷ་མ་ཡིན་གྱི་རིན་པོ་ཆེ་ཛམྦུ་ཀ་དང༌། ཀླུའི་རྒྱལ་པོ་དག་གི་གཙུག་ནོར་བཻཌཱུརྱ་སྔོ་སྐྱ་ཟུར་བརྒྱད་པ་ལ་སོགས་པ་སྡེ་ཚན་མཐུན་པར་བསྡུས་ཀྱང་རུང་སྟེ་ལྷ་མ་ཡིན་ནི་གནས་རིགས་སྣ་ཚོགས་པ་ཅན་གྱི་ཕྱིར་རོ། །དེ་ལས་མིའི་རིན་པོ་ཆེ་ནི་རྣམ་པ་ལྔར་འདུ་སྟེ། སློབ་
དཔོན་ཀླུས། གསེར་དང༌། དངུལ་དང༌། མུ་ཏིག་དམར་པོ་དང༌། བཻཌཱུརྱ་དང༌། ཙིནྟ་མ་ཎི་སྟེ་ལྔར་བཤད་དོ། །ཞེས་སོ། །འདིར་གཞན་པ་རྣམས་ནི་འོག་ཏུ་འགོད་པར་བྱེད་ལ། ཁྱད་པར་དུ་གྱུར་པ་ཙིནྟ་མ་ཎིའམ། ཡིད་བཞིན་ནོར་བུ་ལ་མཆོག་དམན་གཉིས་ལས། དང་པོ་ནི། དེ་བཞིན་གཤེགས་པའི་རིང་བསྲེལ་རྣམ་པ་ལྔ་དང༌། ཁྱད་པར་ཉུང་འབྲུ་ལྟ་བུའི་རིང་བསྲེལ་ཏེ། མདོ་སྡེ་བསྐལ་བཟང་ལས་ཀྱང༌། སྐུ་གདུང་ནི་རྒྱས་པར་འགྱུར་རོ། །ཞེས་པ་ལྟར་འདྲེན་པ་བཞི་པའི་བསྟན་པ་འདི་ལ་རྒྱ་གར་གྱི་མཆོད་རྟེན་པདྨའི་སྙིང་པོ་ཅན་ནས་བླངས་པ་བསམ་ཡས་མཆོད་རྟེན་དཀར་པོ་ན་བཞུགས་པ་ལས་ཀྱང་འཕེལ་བ་བཞིན་ནོ། །དེ་ལྟ་བུའི་རིང་བསྲེལ་ནི་མི་འབའ་ཞིག་པ་ལས་བདེ་འགྲོ་གཞན་པས་མི་ཐོབ་ཅེས་གྲགས་པ་ནི་དགོངས་གཞི་ཅན་དུ་མ་ཤེས་ན་སྐུ་གདུང་ཆ་བརྒྱད་དུ་བགོས་པའང་དོན་མེད་ལ། འོན་ཀྱང་ཀླུ་སྒྲུབ་ཞབས་ཀྱིས། མིའི་ཡིད་བཞིན་གྱི་ནོར་བུ་རིན་པོ་ཆེ་ནི་དེ་བཞིན་གཤེགས་པའི་རིང་བསྲེལ་ལས་འབྱུང་སྟེ། དམ་པའི་ཆོས་མ་ནུབ་ཀྱི་བར་དུ་ཡུལ་དེའི་གདུལ་བྱ་སྐྱོང་ལ། དམ་པའི་ཆོས་ནམ་ནུབ་པར་གྱུར་པ་ནི་རིང་བསྲེལ་རྣམས་རྒྱ་མཚོ་ཆེན་པོའི་ནང་དུ་ནོར་བུའི་གཟུགས་སུ་འགྱུར་རོ། །དཔེར་ན་ལོ་སྟོང་ལོན་པའི་ཆབ་རོམ་རིན་པོ་ཆེ་སྤུག་ཏུ་གྱུར་པ་བཞིན་ནོ། །
ཞེས་པའི་དོན་ནི་བསྟན་པ་ནུབ་པ་ན་རིང་བསྲེལ་གྱི་ཡོན་ཏན་ཤེས་པར་མི་ནུས་པས་རིང་བསྲེལ་རྣམས་རྒྱ་མཚོ་ཆེན་པོའི་ནང་དུ་ནོར་བུར་གནས་གྱུར་ནས་ཀླུ་རྣམས་ཀྱི་དོན་བྱེད་པ་ལ་དགོངས་པའོ། །གཉིས་པ་ནི། གསོལ་བ་བཏབ་ན་འདོད་དགུ་འབྱུང་བའི་ཡིད་བཞིན་གྱི་ནོར་བུ་སྟེ། རིང་བསྲེལ་ལས་སླར་གྱུར་པའི་མཆོག་ཀླུ་དབང་རྣམས་ཀྱིས་དེ་བཞིན་གཤེགས་པ་རྣམས་དང༌། ལྷ་དང་དྲང་སྲོང་རྣམས་ལ་ཕུལ་བས་འཇིག་རྟེན་གྱི་བསོད་ནམས་སུ་གྱུར་པ་ཉིད་ཀྱང༌། རིན་ཐང་འཛམ་བུའི་གླིང་དང་མཉམ་པས་སྐྱེ་བོ་ཕལ་པ་རྣམས་ཀྱི་ལག་ཏུ་མི་འབྱུང་ངོ༌། །དེ་ལ་ཙིནྟ་མ་ཎིའི་མཚན་ཉིད་ནི། ཁ་དོག་ནམ་མཁའ་ཞུན་མ་ལྟ་བུ་ལ་སེར་མདངས་ཅུང་ཟད་མངོན་པ། རྨ་བྱའི་མདོངས་ལྟ་བུའི་རི་མོ་བདུན་གྱིས་ཤིན་ཏུ་མཛེས་པར་བྱས་ཤིང༌། ཆེ་ཤོས་བྱ་གག་གི་ངར་སྒོང་ཙམ་ལ་ཟུར་མང་ཉུང་དུ་མངོན་པ། ནམ་མཁར་བཏེག་ན་དེ་དང་འགྲེ་ཞིང་མིག་ལ་བཀབ་པས་ཉིན་མོའི་འོད་ཀྱང་ཟིལ་གྱིས་ནོན་པ་ལྟར་སྐར་ཚོགས་ཐམས་ཅད་མཚན་མོ་ལྟར་མཐོང་བ། དགོས་འདོད་འབྱུང་བའི་རྟགས་སུ་ངོ་བོ་ཉིད་ལ་ཀ་ཤི་ཀའི་རས་བརྩེགས་མར་བཀབ་ནས་བདེན་པའི་སྟོབས་བརྗོད་ན། དེའི་མོད་ལ་བླ་འོག་བརྗེ་བ་ཁྱད་པར་གྱིས་ཆོས་སོ། །གཉིས་པ་ལ་བཞི། རྟེན་ཁྱད་པར་ཅན་འགྲུབ་པའི་རྒྱུ་བཞུ་བའི་ཁམས་ཀྱི་
རིན་པོ་ཆེའི་མཚན་ཉིད། དེ་ལ་བརྒྱན་པར་འོས་པ་མི་བཞུ་བའི་ཁམས་ཀྱི་རིན་པོ་ཆེའི་རྣམ་དབྱེ། གང་ཞིག་གྲུབ་པའི་འབྲས་བུ་རྟེན་གྱི་ངོ་བོ་ལ་དཔྱད་པ། གང་ལ་རིམ་གྲོ་བསྐྱེད་པའི་ཕན་ཡོན་བཤད་པའོ། །དང་པོ་ནི། དེ་ལ་བཞུ་བའི་ཁམས་ཀྱི་རིན་ཆེན་བཤད། རྒྱ་གར་ཕྲལ་སྐད་སཽན་ཞེས་བྱ་སྟེ། འཁོར་ལོས་སྒྱུར་བའི་ལྕགས་ཀྱི་དང་པོ་གསེར། །འདི་ལ་རིགས་ཕྲན་མང་ཡང་རིགས་ཆེན་གཉིས། །ཁ་དོག་གིས་བརྟག་དམར་སེར་གཉིས་སུ་ཡོད། །མཆོག་ཏུ་གྱུར་པ་གསེར་དམར་ཉིད་ཡིན་ཏེ། །མ་དྲོས་མཚོ་ནང་འཛམ་བུ་བྲྀཀྵའི་འབྲས། །ཀླུ་མཆོག་རྣམས་ཀྱིས་རིན་ཆེན་སྣ་བདུན་དང༌། །བསྲེས་ནས་ཟོས་པའི་ངོ་བོ་གསེར་དམར་ཏེ། །རྟེན་འབྲེལ་ཚོགས་པའི་རང་བྱུང་ཛྷཻཀྵིཾ་ཡིན། །རླབས་ཀྱིས་དེད་པས་སིནྡུའི་འགྲམ་དུ་ཆགས། །དེ་ཉིད་མེ་ཟན་ཞེས་བྱའི་འདབ་ཆགས་ཀྱིས། །ཟོས་པས་ཚེ་རིང་བྱར་གྱུར་དེའི་དྲོད་ཀྱིས། །བཞུ་བཏུལ་སྦྱངས་པས་བཙོ་མ་ལྟ་བུར་གྱུར། །ཇིང་གིར་དང་ནི་ཧོར་གྱི་ཡུལ་དུ་མོད། །ཟངས་དམར་མཚུར་གྱིས་མདོག་འདོན་བྱས་པ་འདྲ། །སེར་པོ་མཆོག་དམན་གཉིས་ལས་ས་ལེ་སྦྲམ། །མཆོག་སྟེ་ངོ་བོ་བྲྀཀྵའི་འབྲས་བུ་ནི། །ཉ་ཡིས་ཟོས་བྱུང་དམར་སེར་གུར་གུམ་མདོག །འོད་ཟེར་སྣུབ་བག་གཉིས་ཀ་ལྡན་པ་ཡོད། །ཕལ་པ་
རི་རྡོ་བྱེ་མ་ཟངས་ལས་བྱུང༌། །སེར་ལ་དམར་མདངས་ཆགས་པ་རབ་ཡིན་ལ། །སྟོད་གསེར་སྔོ་ཞིང་མཉེན་ལ་བོད་གསེར་གྱོང༌། །སྔོ་དང་སྐྱ་དང་ནག་ངམས་རིམ་པས་དམན། །རྒྱ་བོད་ཐོ་གར་ལི་ཡུལ་ཀུན་ནས་ཐོན། །ར་གན་བསྲེས་དང་གསེར་འགྱུར་བྱས་པ་ཡིས། །གསེར་མེན་དག་དང་མ་འཁྲུལ་གཅེས་པའོ། །ནུས་པས་ཚེ་རིང་རྒས་སྲ་དབྱིག་དུག་སེལ། །རུ་པཱཾ་དངུལ་ནི་ས་རྡོ་ཤིང་ལས་བྱུང༌། །མཆོག་ཏུ་གྱུར་པ་གླིང་ཕྲན་ཨ་ལ་ཡིར། །ས་གཤོར་བྲུས་པའི་ནང་དུ་ཆར་པའི་ཆུ། །བབས་པའི་རྐྱེན་ལས་ཆབ་རོམ་ལྟ་བུར་ཆགས། །རྡོ་ལས་བྱུང་བ་དངུལ་རྡོ་འོད་ཕྲོམ་པ། །དབྱེ་ན་རྡོ་ཡི་བྱེ་བྲག་ལྔ་ལས་བྱུང༌། །དང་པོ་ལྕགས་སམ་གཤའ་དང་ཞ་ཉེ་དང༌། །ཟངས་འབབ་དེ་ནས་སླར་བཞུ་དངུལ་འབྱུང་བའི། །རིགས་བཞིར་ངེས་ཀྱང་བོད་དུ་རྡོ་དངུལ་ཉིད། །དེ་ཡང་ར་དངུལ་སྔོ་ལ་ལུག་དངུལ་དཀར། །འཁར་བ་སུམ་ཆ་འདྲེས་པ་ཧ་ཡང་ཧོ། །གུ་ལང་ཤིང་ཀུན་གར་ལོག་དངུལ་མདོག་བཟང༌། །ཉིས་བཞུས་ལྕགས་དངུལ་སྔོ་ལ་གཤའ་དངུལ་དཀར། །ཞ་དངུལ་ཁམ་ལ་ཟངས་དངུལ་དམར་ཞེས་གྲགས། །ཤིང་ལས་བྱུང་པ་ཁྭ་ར་ས་ན་ནས། །རུ་པ་ད་རུ་ཞེས་བྱའི་ཤིང་བསྲེགས་ཞུན། །བབས་པ་དེ་ལས་ཆགས་པ་དཀོན་པར་སྣང༌། །ཆུ་སེར་རྣག་ཁྲག་སྐེམ་པར་བྱེད་པ་ཡིན། །རྔལ་
ཆུ་རྒྱ་མཚལ་ཕ་ཝང་ལོང་བུ་དང༌། །རྡུལ་དྲེག་ཆགས་པའི་གོས་དང་རེ་བ་དང༌། །ཕྱུགས་ལྷས་སྔོ་སྣེའུ་ཕུག་རོན་སྡིག་པ་ནག །རྡོ་ལས་འབྱུང་བ་དཀར་ཞིང་གཡོ་བ་བཟང༌། །སྔོ་ལ་བུལ་བ་ངན་ཅིང་འདར་འཁྲིག་ཅན། །ཟངས་ནི་མཆོག་དང་ཕལ་པ་གཉིས་སུ་འདུ། །མཆོག་ནི་ཟངས་རྡོ་སྤང་མ་དག་གི་ལྟེབས། །འབྱར་དང་རང་བྱུང་ཐིགས་པོ་ས་ལས་འབྱུང༌། །ཕལ་པ་གཉིས་ནི་ཟངས་རྡོ་བཞུས་པ་ལས། །ཕོ་ཟངས་དམར་ནག་གྱོང་ལ་སྐད་ཐག་ཐུང༌། །མོ་ཟངས་མཉེན་ཞིང་དམར་ལ་སྐད་ཐག་རིང༌། །གསེར་བཙོད་ལོ་ལྕགས་ཟངས་བཞིར་དབྱེ་བའང་གྲགས། །ལྕགས་ནི་རྡོ་ཡི་སྙིང་པོ་ཉིད་ཡིན་ཏེ། །སྲོག་ཆགས་དག་ལས་བྱུང་དང་གནས་ལྕགས་སོགས། །ངེས་པ་མེད་ཀྱང་མཐིང་རྡོ་ལྕགས་རྡོ་དང༌། །ཁབ་ལེན་མདུང་རྩེ་སོགས་ལས་བྱུང་བ་ལ། །འབྱུང་བ་ལྔ་ཡི་མིང་འདོགས་གྲགས་ན་ཡང༌། །ཕོ་མོ་མ་ནིང་རྗེས་སུག་སྣ་འདུས་ལྔ། །དཀར་ལ་གྱོང་ཞིང་ངར་ཐོགས་གནག་པ་པོ། །གནག་པ་མཉེན་ཞིང་ངར་ཐོགས་དཀར་བ་མོ། །སྔོ་སྐྱ་མ་ནིང་རྗེས་སུ་ག་སྔོ་ལ་དམར། །སྣ་འདུས་རི་མོ་ཅན་དུ་འདོད་པ་ཡིན། །ཀུན་ལ་རྣོ་ཁྱད་འདོན་པ་ངར་གྱི་འཕྲུལ། །ངར་ལ་ཚ་ངར་གྲང་ངར་རྣམ་གཉིས་ལས། །ཕོ་མོ་སྣ་འདུ་མ་འདྲེས་
བཞི་པོ་ལ། །རིམ་བཞིན་ཆུ་སྣ་ཚྭ་སྣ་དུག་སྣ་དང༌། །སྨན་སྣས་ཚ་ངར་འདོན་པ་ཁྱད་པར་ཡིན། །མ་ནིང་གྲང་ཆུ་རྗེས་སུག་ཚ་འོ་ཡིས། །སྦྲུས་པའི་འཇིམ་པ་གཡོགས་པས་གྲང་ངར་འདོན། །ལྕགས་ལ་ངར་གྱིས་བརྒྱན་པ་ཞེས་སུ་གྲགས། །མགར་ལ་མཁས་པ་སོག་པོ་ཐུབ་རྒྱལ་དང༌། །བུད་མེད་གྲི་ལ་བཟོ་བ་ཞང་བཟའ་མོ། །ཧ་གེ་ཧོར་དང་གྲི་བཀུམ་བཙན་པོའི་དུས། །ལི་བྲི་སྤུན་དགུ་འཇའ་ཡུལ་ཐལ་མགོ་སོགས། །བཟོ་ཁྱད་ཆུབ་པས་བྱས་པའི་རལ་གྲི་ནི། །ཆོད་ཚད་ཕལ་པའི་བརྒྱ་འགྱུར་ལ་སོགས་ཡོད། །ཁྱད་པར་ཁབ་ལེན་ལྕགས་ནི་རིགས་བཞི་ལ། །འགུགས་དང་གཅོད་དང་འབིགས་དང་སྐོར་བྱེད་བཞི། །དང་པོས་ས་ལས་རྒྱ་ཁབ་ལེན་པ་ཡིན། །གཉིས་པས་ལྕགས་གཞན་གཅོད་ལ་གསུམ་པས་འབིགས། །སྐོར་བྱེད་ལྷུན་པོའི་ངོས་ལ་ཁབ་ལེན་གྱི། །བྲག་རི་ཡོད་པས་ལྕགས་གཞན་རང་ཕྱོགས་ལ། །བསྐོར་ཚུལ་ཙི་ནའི་ཕྱོགས་བརྟན་འཁོར་ལོས་མཚོན། །དེ་བཞིན་རྒྱལ་ཁབ་དེ་ཡི་ལྕགས་རི་ལ། །ལྕགས་ཀྱི་ཕྱག་རྡོར་བར་སྣང་ལྡིང་བ་ཆག་ལོའི་ལམ་ཡིག་ལས་གསལ་ཡང༌། །ཁབ་ལེན་ལས་བྱས་ལྕགས་རིའི་འཕྲུལ་དུ་སྨྲ། །དུག་ལྕགས་རྡོ་སོལ་ལས་གཞན་བཞུ་མི་ནུས། །གནམ་ལྕགས་རིགས་ལྔར་འབྱུང་ཞིང་སྒྲ་དབྱངས་རིང༌། །སྣུམ་ཞག་ཆེ་ལ་ངམས་
ནག་དངས་ཆ་ཆུང༌། །གདོན་བགེགས་འཇོམས་པའི་གཉེན་པོ་ཡིན་པས་ན། །གཏེར་ཕུར་རྩོད་མེད་འདི་དང་འགུགས་བྱེད་མང༌། །ཐོག་ལྕགས་ལི་འདྲ་ས་རུམ་བསྐལ་པ་རུ། །གནས་ཀྱང་བཙའ་ཡིས་མི་འཇིག་གཟུགས་བརྙན་ཅན། །ཁ་དོག་དཀར་སེར་དམར་ནག་མང་བ་ཡིན། །གཤའ་འམ་ཀླུ་ནི་གཤའ་རྡོ་བཞུས་ལས་འབྱུང༌། །རྒྱ་གར་རྒྱ་ནག་ལས་བྱུང་དཀར་ལ་མཉེན། །བོད་ཀྱི་གཤའ་དཀར་འབྲིང་ལ་གཤའ་ནག་ངན། །ཚ་བ་རོང་ནས་དོན་པའི་གཤའ་དཀར་དང༌། །འཇུས་ནས་ཐོན་པའི་གཤར་ནག་གཉིས་སུ་སྲིད། །རྨ་གསོ་གདོན་འཇོམས་སྤུ་ནག་དངུལ་ཆུ་འཆིང༌། །ཏི་ཚ་སྔོ་དམར་རྡོ་རིགས་གཉིས་ལས་ཏེ། །དངུལ་བས་སྔོ་མདངས་ཆེས་ཆེ་སོ་བར་གསེག །སྟོད་ནས་ཐོན་པ་མོ་རིགས་ལྟེབ་མོ་བཟང༌། །སྨད་ནས་བཅག་འཕྲོ་ལྟ་བུ་ཕོ་རིགས་ངན། །གང་ཡང་སོལ་མེར་བསྲེགས་ན་དུད་པར་ཡལ། །མིག་ནད་སྤྱི་དང་ལིང་ཏོག་འཇོམས་པའི་མཆོག །ཟི་ལ་རྒྱ་ནག་གནས་འོང་གཤའ་དཀར་འདྲ། །དེ་ལས་སྲ་ཞིང་སོ་བར་བལྡད་མི་སེག །ཟངས་རག་ལ་བསྲེས་ཏོང་དཀར་ཏོང་དམར་འབྱུང༌། །བཏུལ་མས་རེག་དུག་ནད་ལ་ཕན་པའོ། །ཁྲོ་ནི་རྡོ་བཞུས་ལས་བྱུང་བརྡུང་དུ་མེད། །གདོན་གཟེར་འབུ་སྲིན་ལ་སྦྱར་དུག་ནད་སེལ། །ཞ་
ཉེ་དངུལ་རྡོ་འདྲ་བའི་རྡོ་ལས་སམ། །དངུལ་གྱི་ཐལ་གདན་ལས་དང་ས་འོག་ནས། །འབྱུང་བའི་རྡོ་བ་ལྗང་སར་ལྕི་ལྡན་གསུམ། །བཞུ་བའི་ཁུ་བ་དཀར་དམར་གཉིས་སུ་འབྱུང༌། །དུག་ནད་ཤ་རོ་འཇོམས་པའི་ནུས་པར་ལྡན། །དེ་ལྟར་འཇུ་བའི་ཁམས་ཅན་བཅོ་ལྔ་ལས། །ཟངས་ལ་སྟོད་གཤའ་བརྒྱད་དང་དྲུག་སྐོར་བསྲེས། །དེ་ལས་འཁར་བ་དཀར་དམར་འབྱུང་བ་ཡང༌། །ནེ་པ་ལ་ལས་ཨར་ལི་དངོས་རྒྱུད་དག །ར་གན་ལ་ནི་རྒྱ་རག་བོད་རག་གཉིས། །ཕོ་རག་སྐྱ་ལ་མོ་རག་ལྗང་སེར་ཏེ། །རག་རྡོ་དང་ནི་ཏི་ཚ་བསྲེ་ལུགས་ཁྱད། །སེར་མདངས་ཤིན་ཏུ་ཐོན་པ་གར་ནག་རག །ལི་ལ་རང་བྱུང་བཅོས་བུ་གཉིས་སུ་ཡོད། །རང་བྱུང་སིངྒ་ལའམ་ལི་ཡུལ་གྱི། །རི་བོ་རྒྱལ་བས་བྱིན་བརླབས་ལི་རྡོའི་ཞུན། །བཅོས་བུ་བོད་ལ་སོགས་པར་བྱུང་བ་སྟེ། །གསེར་དངུལ་ཟངས་ལྕགས་གཤའ་དང་ཏི་ཚ་དང༌། །ཟི་ལ་ཁྲོ་དང་ཞ་ཉེ་རྣམ་པ་དགུ། །ཀུན་ནས་འདུས་སམ་གཙོ་ལ་འཁོར་དུ་ལྡན། །དམན་པ་བསྲིངས་ལས་བཟང་ངན་ཁྱད་པར་ཆེ། །དེ་ཡང་མདོག་ལི་སྐད་ལི་གཉིས་སུ་ཡོད། །མདོག་ལི་སྐུ་གསུང་ཐུགས་རྟེན་གསུམ་ཀར་གཅེས། །གཤའ་རིགས་དྲུག་ལ་ཟངས་ཀྱི་སྐོར་ཐང་དང༌། །ཏི་ཚ་གསེར་དངུལ་བསྲེས་པ་མདོག་ལི་སྟེ། །བསྲེ་ལུགས་ལག་རྒྱུན་མཁས་པས་ལི་
དཀར་དང༌། །ལི་དམར་ལི་སྨུག་ལི་ནག་འབོལ་ཞག་ཅན། །སྐད་ལི་ལ་ནི་ཟི་ལ་བསྲེ་བ་གནད། །དེང་སང་ཁ་ཆུར་ཡུལ་ནས་དོན་པའི་རྡིག །སྐུ་རྒྱུར་བསྲེས་ནས་ཁྱད་པར་འཕགས་པའི་རྒྱུ། །དེ་དག་ཀླ་ཀློའི་ཆོས་ལུགས་འཛིན་པའི་ཕྱིར། །སྔོན་བྱུང་སྐུ་གསུང་ཐུགས་རྟེན་ཁྱད་པར་ཅན། །སྦྱངས་ནས་དཔྱད་པ་བཟོ་ན་མི་ཁོམ་པའི། །གནས་ངན་ལེན་ལའང་སྐྱོ་བ་བསྐུལ་བྱས་ནས། །ཇི་ལྟར་བཤད་པའི་དགོས་པ་རིན་པོ་ཆེ། །རྙེད་ན་བསོད་ནམས་དམ་པའི་ཟོང་ཉོས་ཤིག །དེ་སྐད་དུ་ནི་དཔའ་བོ་ཡིས། །ཁྱོད་ཀྱིས་མཐོ་རིས་བྱང་གྲོལ་གྱི། །ཐེམ་སྐས་མི་མཉམ་མཉམ་པའི་ཕྱིར། །བསོད་ནམས་ལས་བྱུང་བཟོ་རིག་ཆེ། །རྟག་ཏུ་ལྷ་ཁང་དག་ཏུ་བསོགས། །ཞེས་སོ།། །།གཉིས་པ་དེ་ལ་བརྒྱན་པར་འོས་པ་ཡི། །རིན་པོ་ཆེ་ཡི་རྣམ་དབྱེ་བཤད་ཀྱིས་ཉོན། །འཇིག་རྟེན་གང་ན་སྙིང་པོས་བཏང་བའི་ལུས། །སོ་བྱས་ཉ་ལ་བཞིན་དུ་འཆི་བདག་གིས། །བདེ་བླག་ཉིད་དུ་སྒྲེན་མོར་བྱེད་པ་ལ། །ནོར་བུའི་དོ་ཤལ་དཔྱང་བ་ཤིན་ཏུ་བླུན། །དེ་ཕྱིར་རིན་ཆེན་རྙེད་ཙམ་བསོད་ནམས་མིན། །བྲམ་ཟེ་དགེ་བས་བཛྲ་ཨ་ས་ནའི། །མ་ཧཱ་བོ་དྷི་བཞེངས་ཚེ་ག་ཤེད་ནས། །ཨཏྨ་གརྦྷ་རྙེད་པ་སྤྱན་འབྲས་དང༌། །ཨིནྡྲ་ནཱི་ལ་མཛོད་སྤུར་ཕུལ་བ་ལས། །
མཚན་མོའང་ནོར་བུའི་འོད་ཀྱིས་གསལ་བ་ལྟར། །རྒྱལ་དང་དེ་སྲས་རྣམས་ལ་རྒྱན་མཆོག་གིས། །མངོན་པར་བརྒྱན་པར་བྱ་ཕྱིར་དོན་འདི་བཤད། །དེ་ལ་བཞུ་བ་མ་ཡིན་རིན་པོ་ཆེའི། །དང་པོ་བཻཌཱུརྱ་ལ་རིགས་གསུམ་གྱི། །མཆོག་ནི་བྱི་ལ་མིག་སྟེ་སེར་ཞིང་བཀྲག །གསོན་པའི་མིག་འདྲ་མཚན་མོ་འོད་ཟེར་འབར། །དེ་བཞིན་མེ་ལ་བཅུག་ན་བཀྲག་མདངས་ཆེ། །ཁོང་དངས་གསེར་སྐུད་ལྟ་བུའི་ཟེར་གདངས་མང༌། །རིན་ཐང་གླིང་བཞི་དང་མཉམ་སྦྲུལ་དུག་བསྲུང༌། །མཉྫུ་བཻཌཱུརྱ་ཞེས་གྲགས་པ་ཡིན། །སུ་ག་ཏ་ནི་ཁ་དོག་ལྗང་གུ་ལ། །མཚན་ཕྱེད་འོད་ཟེར་འབར་བས་མུན་པ་འཕྲོག །དཀར་ལ་འོད་ཟེར་མེད་པ་ལ་ནུ་སྟེ། །རིམ་པས་དམན་ལ་གསེར་སྐུད་ལྟ་བུ་ཡང༌། །སྔ་མ་སྔ་མའི་སུམ་ཆ་ཙམ་གྱིས་ཉུང༌། །འདི་དག་ས་འོག་སྲན་ཆུང་ཙམ་གནས་ཀྱང༌། །ནམ་མཁའ་འོད་ཀྱིས་གང་ཞེས་རྒྱུད་ལས་བཤད། །བཅངས་དང་འོད་ཟེར་འཕོག་པས་ནད་ཀུན་སེལ། །ཨིནྡྲ་ནི་ལ་ཁ་དོག་ལས་སྨོས་ཏེ། །རིགས་ཅན་གསུམ་ལས་མཆོག་ནི་སྟོན་གནམ་འདྲ། །སྟེང་དུ་དར་རས་བཞག་ན་རང་གི་འོད། །དེ་ལ་གདུགས་ལྟར་འཁོར་ཏེ་སྔོན་པོར་འགྱུར། །ནཱི་མ་ལ་ནི་སྔ་མ་ལྟ་བུ་ལས། །བཀྲག་མདངས་དེ་ཡི་སུམ་ཆ་ཙམ་ལས་མེད། །ཀ་ཀ་ནཱི་ལ་སྔ་མ་
གཉིས་ལས་ནག །རང་འོད་ཉི་མ་གང་ཡོད་ཕྱོགས་ལ་སྦྲེལ། །ཟུར་ཆག་སྒྲ་ལས་ཨནྡ་རྙིལ་ཞེས་གྲགས། །དབང་པོའི་རྒྱན་ཡིན་རིན་ཐང་རིམ་པ་ལྟར། །གསེར་དང་སྟོད་སྐོར་བརྒྱ་དང་བཅུ་ཕྲག་གོ །ནད་དོ་ཅོག་རྣམས་སེལ་བའི་སྨན་མཆོག་ཡིན། །དེ་བཞིན་རྡོ་ཡི་སྙིང་པོ་མ་རྒད་ལ། །མ་ར་ཀ་ཏི་ཞེས་ཀྱང་གྲགས་པ་སྟེ། །ཁ་དོག་སྔོ་ལ་དྭངས་པ་རབ་ཡིན་ལ། །སྔོ་སྐྱ་འབྲིང་པོ་དཀར་ལ་དམར་མདངས་ཞེར། །ཁ་དོག་ལྗང་སྔོན་དག་ཀྱང་བཤད་པ་ཡོད། །ཀུན་ཀྱང་དངས་ལ་ཚེ་ཚད་སྟར་ཁ་ཙམ། །ནད་ལ་ཕན་པ་ལགྨན་སིངྒར་འབྱུང༌། །པདྨ་རཱ་ག་ལ་ནི་རིགས་དགུ་སྟེ། །དུར་དམར་དྭངས་པ་པདྨ་རཀྟ་སྟེ། །སོར་གསུམ་ཙམ་དུ་རང་འོད་གསལ་བ་ཡིན། །དམར་སྨུག་དྭངས་པ་ཧ་རི་གོ་རི་སྟེ། །ཟེར་གདངས་དམར་སེར་གཉིས་ཀ་ཡོད་པ་ལེགས། །པུ་ཥྤ་དམར་སྨུག་རང་གི་བདུན་འགྱུར་འོད། །ཛ་ཏི་མཚམས་སྤྲིན་མདངས་ལ་འོད་ཁྲུ་གང༌། །ལ་ལ་སོལ་མེ་ལྟར་བཀྲག་འོད་སོར་གསུམ། །མུ་ལ་སེ་འབྲུ་སྨིན་འདྲ་འོད་ཟེར་དམར། །སྦུག་ནི་དམར་ལ་འོད་ཟེར་སོར་དོ་ཙམ། །རྣམ་རྒྱལ་མེ་འདྲ་འོད་ཟེར་སོར་མོ་གང༌། །གོ་མོ་ད་ནི་ཕྱི་བལྟས་མཆིན་ཁ་ལ། །ནང་ནི་མེ་འདྲ་མཁའ་ལ་བཏེག་ན་ཟེར། །ཀུན་ཀྱང་འོད་ཟེར་ཕྱོགས་གཅིག་འཕྲོ་བ་ཡིན། །
ཆེ་ཚད་མཐེབ་མཛུབ་ཙམ་ནས་ཙུ་ཏའི་འབྲུ། །ཙམ་པའི་བར་ལ་ངེས་པ་མེད་པ་ཡིན། །སིངྒ་ལར་འབྱུང་ནད་གདོན་གཉིས་ཀར་ཕན། །འདི་དག་ཕལ་ཆེར་རིན་ཐང་ཅན་དུ་འདོད། །ཆུ་ཤེལ་ལམ་ནི་ཙནྡྲ་ཀནྟི་ནི། །དཀར་ལ་སྔོ་དྭངས་ཅུང་ཟད་ལྡན་པ་སྟེ། །བཅོ་ལྔའི་ཟླ་པ་ཉ་དང་ཟེར་འདྲེས་པས། །ཆུ་ཐིགས་གྲང་མོར་འབབ་པ་ས་ཤེལ་རིགས། །བཅངས་ནས་ཙད་སེལ་བ་ཁ་ཆེ་དང༌། །མ་ལ་ཝར་འབྱུང་བོད་དུའང་མངོན་རྟོགས་སྲིད། །ཀརྟི་ཀའམ་ཀེ་ཀེ་རུ་ལྗང་སེར། །ཆུ་ཡི་ནོར་བུ་གངས་སམ་ཆབ་རོམ་ལོ། །སྟོང་ཕྲག་ལོན་པ་ཁ་དོག་ལྗང་སེར་རམ། །ཁྲ་བོར་བཤད་པའི་ཕྱོགས་གཉིས་ངོ་བོ་སྤུག །རཱ་གའི་སྤུག་དང་མ་ནོར་ཚད་པ་སེལ། །གངས་ལྡན་བྲག་འགར་ཆུ་ཐིགས་འབབ་མ་རག །རྡོ་བ་སྔོ་ཟར་འདྲ་བ་ཆགས་པ་ཡང༌། །པུ་ཤ་ལོ་གྲངས་མ་རྫོགས་ཉིད་དུ་ངེས། །མེ་ཡི་འཇིགས་པ་སྐྱོབ་པའི་ཆུ་སྙིང་ནི། །ཁ་དོག་དཀར་ལ་སྔོ་བ་ཤེལ་ལྟར་དྭངས། །ཆུ་ནང་བཅུག་ན་འདྲེས་པ་ཀླུང་ལ་བརྟག །མེ་སྟེང་བཞག་ན་མེ་ཡང་མོད་ལ་འཆི། །སྲན་སྦོས་ཙམ་པ་ཕྱུར་བུའི་དབྱིབས་སུ་འོང༌། །ངོ་བོ་ཆུང་ཡང་གསེར་སྲང་རི་བ་ཡིན། །ནི་ལ་ཚ་ནི་མེ་ཡིས་མི་འཇིག་སྟེ། །སྔོན་བས་ཆེས་ཆེ་རྒྱ་གར་ཕལ་ནས་འབྱུང༌། །ཙུ་ཏ་མ་ནི་ཁ་དོག་སེར་པོ་ལ། །གང་བལྟས་ཕྱོགས་
ལ་མིག་གི་རི་མོ་མངོན། །འོད་ཟེར་མི་འཕྲོ་གྲིབ་གདོན་རྨི་ངན་བསྲུང༌། །སི་རཀ་ཞེས་བྱ་སེར་དྭངས་དོ་ཀེར་འོད། །སོར་གསུམ་འཕྲོ་དང་གཉིས་ཀ་མེས་མི་འཇིག །འདི་དག་ཧོ་རྨུ་ཙ་དང་ཀ་ལིངྐ། །མུ་རྩེ་ར་ཏ་ཞེས་པའི་ཡུལ་ལས་འོང༌། །ཁྱད་པར་ཆུ་ཡི་སྙིང་པོ་རིན་ཐང་ཅན། །ནི་ཙུ་ལ་ནི་ཁ་དོག་སེར་པོ་ལ། །ཀུན་ནས་མིག་རིས་གསལ་ཞིང་ཉི་མའི་སར། །ལག་མཐིལ་དུ་བཞག་མོད་ལ་ཆུ་འབྱུང་ཞིང༌། །ཁ་ནང་བཅུག་ན་སིམ་པ་ཐོབ་པ་སྙམ། །འདི་ནི་གནམ་ཐོག་འབབ་སར་ཐོག་ལྕགས་ལས། །བྱས་པའི་ཡོལ་གོ་ཆུས་བཀང་དེ་ཡི་ནང༌། །འཁར་གཞོང་བཟེད་པས་ནོར་བུ་དེ་རུ་འབབ། །འཁར་གཞོང་བཤིག་ཀྱང་ནོར་བུ་ཆུ་ནང་ལས། །གཞན་དུ་མི་འཕོ་ཐོག་གི་འཇིགས་པ་བསྲུང༌། །ཨཏྨ་གརྦྷ་ལ་ནི་རིགས་གཉིས་ཏེ། །ངོ་བོ་གནག་སྣུམ་དམར་མདངས་ཆགས་པ་ལས། །ཅུང་ཟད་གསལ་དྭངས་ཆེ་ལ་དྲུ་མར་གྲགས། །ཆུ་ནང་རྡོ་ལས་སྐྱེས་པས་རྡོ་སྙིང་སྟེ། །མཆིན་དུག་སེལ་ལ་མཆོག་ཏུ་བསྔགས་པ་ཡིན། །ཏོ་ར་མ་ཎི་ཞེས་བྱ་རིགས་གསུམ་སྟེ། །ཁ་དོག་ལྗང་གུ་འོད་སོར་དོ་པ་དང༌། །ཤཀྐ་མདོག་ནག་མིག་འབྲས་འདྲ་བ་རང༌། །ཀ་ན་ཀ་ནི་གསེར་གྱི་འོད་ཅན་ནོ། །པུ་གནྟི་ལ་རིགས་གཉིས་རཀྟ་ནི། །ཟངས་ཀྱི་མདོག་ལ་འོད་སོར་ཕྱེད་པ་སྟེ། །ནཱི་ལ་སྔོ་
ནག་འོད་སོར་གསུམ་པ་ལེགས། །ཟུར་གསུམ་རང་བྱུང་མ་ག་ངྷཱ་ནས་ཐོན། །ཛ་ཏི་རུ་པ་རིགས་གཉིས་སྔོ་སྐྱ་དང༌། དམར་སྐྱས་དབྱེ་སྟེ་གཉིས་ཀ་བླང་བའི་དུས། །རྡུལ་ཆུ་བཞིན་དུ་འགྲོས་སྐྱེན་ཁ་ཆེར་ཡོད། །སྲིད་སྤེལ་བྱིས་གདོན་ཐུབ་པས་ཞོ་བརྒྱ་རི། །པཱ་ནའམ་རྨ་བྱའི་མགྲིན་འདྲ་སྔོན་པོ་ལ། །རི་མོ་ནག་པོ་ཕྲ་མོ་མངོན་ཙམ་པ། །དེ་ཝི་ཀོ་ཊ་ནས་འབྱུང་ཚ་བར་ཕན། །ནལ་ནི་མཆིན་མདོག་དྭངས་ཤས་ཆེ་བ་ལ། །དུང་གི་སྟེང་བཞག་དེ་ལ་དམར་མདངས་འཕོ། །ཆེ་ཤོས་མཐེབ་ཙམ་གྲུ་བཞིར་ཡོད་པ་མང༌། །སྨུག་པོས་དུག་དང་དམར་པོས་མཆིན་ཁྲག་སེལ། །བྷཻ་རོ་ལ་ལ་དྷ་ལ་སིངྒ་གཉིས། །དྷ་ལ་མདོག་སེར་མཐེ་བོང་ལྡབ་འགྱུར་ཙམ། །སེར་གདངས་བཞི་འཕྲོ་སིངྒ་ལར་འབྱུང་བཟང༌། །གཡུ་སྦྲང་མདོག་འདྲ་ཟེར་མེད་ཆུང་བ་ངན། །ཤངྐ་ཤི་ལ་མེ་ཤེལ་དཀར་པོ་སྟེ། །ཉི་འོད་དྭངས་ལ་མེ་འབྱུང་ཁ་ཆེ་དང༌། །མཎྜ་ལར་འོད་གྲང་ནད་གཟའ་གདོན་བསྔགས། །རྒྱ་ཡི་འདྲ་ཅོག་ཝུ་བ་ཅན་དུ་ཡོད། །ཁྱུང་གིས་རྒྱ་མཚོར་ནོར་བུ་མིད་སྐྱུགས་པས། །ཁྱུང་སྐྱུགས་ཞེས་གྲགས་གཞི་གདན་ལྗང་སྐྱ་མང༌། །གཞན་དུ་ཁ་དོག་རིགས་ལྔས་གྲ་རིགས་དབྱེ། །ཁྱད་པར་ཅན་ནི་མཁའ་ལྡིང་རྫུས་སྐྱེས་ཀྱིས། །དུག་སྦྲུལ་ཟོས་པས་སྐྱུག་ཅིང་འཆི་བའི་ཚེ། །ལུས་ནི་ཞུགས་སྦྱངས་དོན་སྙིང་བཻཌཱུརྱའི། །
ངོ་བོར་གྱུར་པ་བརླ་ཙམ་ཤིན་དུ་སྔོ། །དབང་པོས་ཐོབ་ན་གཙུག་ནོར་བྱེད་ཟེར་ཡང༌། །ཁང་བཟང་རྣམ་པར་རྒྱལ་བའི་ཀ་བ་ནི། །བརྒྱད་ཁྲི་བཞི་སྟོང་ལྷ་ཡི་བཻ་ཌཱུརྱ། །སྔོན་པོར་མདོ་ལས་གསུངས་པ་མ་མཐོང་ཉམས། །འཁོར་ལོས་སྒྱུར་ཐོབ་ཁྱད་ནོར་བྱེད་པས་དཀོན། །ཕལ་པ་གཡུ་རྙིང་འདྲའོ་མཐིང་མདངས་ཅན། །མཁའ་ལ་བཏེག་ན་ཕྱི་ནང་བསྒྲིབ་མེད་གསལ། །དམའ་སར་འབོལ་ཉམས་ཤེལ་ལྟར་དྭངས་པ་རབ། །ཀོང་ཡུལ་ནད་རྡོ་ལྗང་སེར་འདྲ་ཅོག་ཙམ། །གཞི་ལྡན་དཀར་ལ་སྔོ་དམར་ལྗང་སེར་འདྲེས། །ཤང་ཤང་གིས་འཁྱོངས་དཀར་གྱི་ཕྲ་མེན་གྲགས། །སྦྲུལ་གྱི་ཁ་ནས་བྱུང་བའི་ནོར་བུ་ནི། །ཁ་དོག་སེར་པོ་ཆུ་ལ་མི་བྱིང་དངོས། །དུག་ནད་བསྲུང་བ་ཙི་ནའི་ཡུལ་ནས་འོང༌། །ཏར་མི་དཀར་སྨུག་ཁྲ་དང་ཞུ་ཧུ་རྫིང༌། །མཆིང་བུའི་རིགས་རྣམས་དངས་ཆ་ཆུང་བ་ཡིན། །ཀྲིཥྞའི་རྭ་ནི་གཅུས་ཤིང་ཁྲུ་གང་ཙམ། བསེ་རུ་སྣ་གོང་ལ་ཡོད་འཆི་བའི་ཚེ། །སྒྲ་བཅས་ཡར་བས་གཟུགས་དང་ལྷན་ཅིག་མིན། །སྡེར་ཆགས་སྟག་གི་རྭ་ཅོ་ནག་གོ་སོར་གང་ཙམ། །བྱུ་རུའི་མདོག་ཅན་དེ་བཞིན་ཅེ་སྤྱང་རྭ། །ཤ་བ་ཡུ་མོའི་རྭ་ཅོ་མཐེ་བོང་ཙམ། །རྟ་ཡི་རྭ་ཅོ་རྣ་བའི་ནང་དུ་འོང༌། །ཆ་བདུན་ལ་འོས་གླང་པོའི་མཆེ་བ་ནི། །ག་ཛ་དནྟ་ཞེས་གྲགས་ཐལ་ཀར་ཆེ། ནག་པོ། །རབ་
ཏུ་གྱུར་ལ་མཆེ་བ་དྲུག་ཡོད་པ། །གང་ལས་ཐམས་ཅད་ནོར་སྣར་འདོད་པ་འཁྲུལ། །རྡོ་བ་ཆར་འབེབས་རྐྱང་ལས་འབྱུང་བ་མང༌། །ཀླད་རྡོ་ཞེས་གྲགས་སྲོག་ཆགས་མ་ངེས་པའི། །ཀླད་པའི་སྙིང་པོ་རྡོ་བར་གྱུར་པ་ནི། །ངང་སྐྱ་ཀླད་པ་དངོས་དང་འདྲ་བ་ཡིན། །དེ་ཉིད་ཆུར་བཅུག་ཆར་པ་འབེབས་ལ་བསྔགས། །ཆར་དབབ་ཆུ་གནས་སྲོག་ཆགས་ལས་བྱུང་བཟང༌། །དབང་པོའི་རིལ་བུ་རྒྱལ་རིགས་ལ་སོགས་པ། །རིགས་ཅན་བཞིར་བཤད་དཀར་པོ་མཆོག་ཡིན་ལ། །དེ་བཞིན་དམར་དང་ངང་སེར་སྔོན་པོ་སྟེ། །གླ་བ་གླང་ཆེན་རྨ་བྱ་ར་རྒོད་སྦྲུལ། །ཕོ་ལོང་གྲོད་པའི་ནང་བྱུང་སྦྱར་དུག་སེལ། །སྔོན་བྱུང་བདུད་རྩིའི་ཟེགས་མ་འཐོར་བའི་རྒྱུན། །སྲོག་ཆགས་ཁར་སོང་དེ་ལས་ཆགས་པ་ཡིན། །ནང་ན་ཆུ་ཐིགས་བྱུང་ན་བདུད་རྩི་དངོས། །ལྕིད་ལ་ཙནྡན་ལྟར་གྲང་སོ་མི་སེག །ཐུན་པ་རིམ་ཅན་འབོལ་ཞག་ཆེ་བ་ཡིན། །ཉམས་མེད་རྣམས་ལ་སྐྲན་དང་འཛོལ་ས་ཡོད། །དེ་བཞིན་གླ་བའི་རྩི་རིལ་འོད་ཅན་ནག །སྦྲུལ་དུག་བསྲུང་བ་དང་ཡང་ཕྱེད་པ་གཅེས། །མུ་ཏིག་མིང་ཅན་དྲུག་ལས་དང་པོ་ནི། །ངོ་བོ་ཉིད་ཀྱི་དམར་བས་རཀྟ་སྟེ། །རྒྱ་མཚོར་གནས་པའི་སྲོག་ཆགས་དམར་པོ་ཡིས། །བདུད་རྩིས་མཚུངས་པའི་ཆར་ཆུ་འཐུངས་པ་ལས། །གྱུར་པ་མཆོག་སྟེ་གསེར་
དང་བཅུ་སྐོར་ཐང༌། །ག་ཛ་མུ་ཏིག་གླང་པོ་ཕལ་པ་རྣམས། །ཟིལ་གྱིས་གནོན་པའི་གླང་མཆོག་སྤྱི་བོའམ། །མཆེ་བའི་ནང་འབྱུང་འཇམ་འབྲས་ཙམ་པ་ལ། །དཀར་ལ་བཀྲག་ཆེ་གསེར་གྱི་བཅུ་སྡེ་བྱེད། །སརྦ་མུ་ཏིག་སེ་འབྲུ་རློན་པ་འདྲ། །སྦྲུལ་གྱི་ཀླད་པ་ལས་བྱུང་གསེར་དང་བརྗེ། །ཤི་སམ་མུ་ཏིག་ཉ་ཕྱིས་ཆ་ཡང་རྩེ། །ཆར་ཆུ་འཐུངས་འབྱུངས་དཀར་ལ་འཇའ་མདངས་ཅན། །གསེར་དང་འདབ་འཕར་བ་ཡུ་མུ་ཏིག་ནི། །རྒྱ་གར་ལྷོ་ཕྱོགས་དུ་ཡའི་ལྗོན་ཤིང་གི །འདབ་མར་ཆར་ཆུའི་རྐྱེན་གྱིས་ཆགས་པ་ཡོད། །རཾ་པ་མུ་ཏིག་ཤར་ཕྱོགས་གླིང་ཕྲན་དུ། །ཀེ་ལའི་འདབ་མར་ཆགས་ཚུལ་གོང་དང་འདྲ། །རིམ་པས་གསེར་འབུན་ཞོ་གང་བཞི་ཆ་རི། །ཕལ་པ་བཞི་ཡི་ནང་ན་ནག་པོ་མཆོག །རྒྱ་ཏིག་དཀར་ལ་ཨ་མདོ་སྔོ་བ་ཡིན། །སྦྱར་ཏིག་སོབ་ལ་ཤུན་པ་ཅན་དུ་འབྱུང༌། །ཀླད་པ་འཛག་གཅོད་དུག་ནད་ཞི་བའི་སྨན། །ཉ་སྐྱོགས་དང་ནི་པ་ཏྲ་ཞེས་བྱ་བ། །འབུ་སྐྱོགས་རིགས་ཡིན་ནུས་པ་མུ་ཏིག་མཚུངས། །རྡོ་ཡི་རྒྱལ་པོ་གཡུ་ལ་འཕགས་ཡུལ་དུ། །རིགས་བཞིར་དབྱེ་ཡང་བོད་དུ་གཡུ་རྙིང་གསུམ། །བར་གཡུ་གཉིས་དང་གཡུ་གསར་གསུམ་དུ་གྲགས། །དང་པོ་གསུམ་ནི་མཆོག་ཏུ་གྱུར་པ་སྟེ། །སྔོ་གདངས་དཀར་ལ་མུན་པར་བཀྲག་པ་
དང༌། །དམར་དམས་སྣུམ་ལ་དྲུག་དཀར་དྲུག་དམར་བཏགས། །གང་དང་བསྒྲིགས་ཀྱང་མི་འདྲེ་ཆེས་བཀྲག་ཅིང༌། །གཉི་ག་ཟིལ་གནོན་གཡུ་སྤྱང་ཞེས་སུ་གྲགས། །བཀྲག་པའི་ཚད་ལ་སེམས་ཡོད་འགུལ་བ་སྙམ། །བར་གཡུ་གཉིས་ནི་གོང་ལས་བཀྲག་ཞག་ཆུང༌། །དམར་ངམས་བར་དམར་འོ་ཁ་ཅན་གཡུ་སྔོན། །གཡུ་གསར་བརྟག་སླ་འཇིག་རྟེན་གཡུ་དང་ཆེ། །མ་དྲོས་ལས་འོད་རྒྱ་ནག་ཞང་ཞུང་དང༌། །གངས་ཅན་གསུམ་ལས་རྒྱ་གར་ལས་མི་འབྱུང༌། །བྱེ་རུ་ལ་ནི་དམར་ནག་དཀར་པོ་གསུམ། །རྒྱ་མཚོའི་འགྲམ་དང་གྲུ་གུའི་ཡུལ་གྱི་མཐའ། །བྲག་སེར་ཆུ་དང་བྱེ་མ་འཐབ་སར་སྐྱེ། །རྒྱལ་མོ་ལག་གཡས་ལ་སོགས་ཤིང་གི་དབྱིབས། །དེ་ཡང་རླན་གཤེར་ཆེ་སར་སྐྱེས་ན་དམར། །སྐམ་སར་ཚད་པས་གདུངས་པས་སྐྱ་བ་ཡིན། །ནག་པོ་སོ་ཀི་དྷ་རིའི་གླིང་ནས་འབྱུང༌། །དཀར་པོ་དུང་དང་འདྲ་ཡང་ནོར་མིག་ཡོད། །བྱེ་རུ་ཡང་ཞིང་གཞན་དག་ལྕི་བས་ཤེས། །སྤོས་ཤེལ་ལ་ཡང་རང་བྱུང་བཅོས་བུ་གཉིས། །རང་བྱུང་ཐང་ཆུ་རྒྱ་མཚོར་ལྷུང་ལས་བྱུང༌། །ཁ་ཆེ་ཤིང་ཏོག་སྨིན་འདྲ་སེར་ལ་ལུམ། །དམར་ལ་དངས་ཆ་ཆུང་བ་སྟོད་ཧོར་ཏེ། །དཀར་སྐྱ་སྤྲིན་རིས་ཆེ་བ་སོག་པོའི་ཡིན། །བཅོས་བུ་ཐང་ཆུ་ཁ་ཆེ་ག་པུར་གསུམ། །བསྲེས་པས་ལྤུ་བ་ཤར་དང་འགའ་
ཞིག་ལ། །སྲོག་ཆགས་ཚུད་དང་ཚུད་ཤུལ་ཡོད་པ་ཡིན། །སྦུར་མ་ལེན་པས་སྦུར་ལེན་ཞེས་ཀྱང་གྲགས། །འདོད་ཚུལ་གཅིག་ཏུ་ནི་མ་རི་པ་ཏ། །ཞེས་པའི་རྡོ་དཀར་ན་རི་ཀེ་ལའི་ཆུས། །སྦྲུས་ལ་མཚལ་དང་ཡུང་བ་མཉམ་བསྲེས་པ། །ཤེལ་དང་སྦ་སྣོད་བསྙལ་ནས་ཆགས་ཞེས་ཟེར། །མིག་འགྲིབས་འབྱེད་པ་སྤོས་ཤེལ་རྙིང་མར་འདོད། །མུ་མེན་རིགས་གསུམ་གསེར་ཐིག་ཡོད་པ་དང༌། །སྔོ་ནག་བསླད་མེད་མཐིང་ཤུན་འདྲ་བ་དང༌། །སྔོ་སྐྱ་ཁྲ་ཐིག་ལྡན་ལ་རིམ་པ་བཞིན། །གསེར་མཐིང་གཡུ་ཡི་མུ་མེན་བརྡ་ཆད་བཏགས། །གཟི་ལ་སྟག་ལོག་རྐང་རིང་ཁྲ་ཆུང་གསུམ། །དང་པོ་དབྱིབས་ཟླུམ་བར་བ་འགྱུར་དགུ་འདི། །མིག་ལ་ཕྱེས་དང་ཆུ་ནང་ཞག་བཞག་ནས། །ཆུ་ལྕག་བརྡེག་དང་བཏུངས་པས་ཁྲག་གཟེར་དང༌། །གཟའ་ནད་ལ་ཕན་ལྡེའུར་སྦྱར་བྱས་ནས། །བྱ་གདོན་གཟིར་དང་སྟེང་གདོན་བསྲུང་ཞེས་བཤད། །ཁ་དོག་འདྲེས་དང་གཟི་དཀར་འབའ་ཞིག་ཡོད། །ཕྱི་ནང་བསྒྲིབ་པ་མེད་ལ་མཆོང་དུ་གྲགས། །དངོས་མིན་དཀར་ལ་དམར་དངས་མ་ན་ཧུཾ། །རྟ་ཡི་ཀླད་པ་འདྲ་བ་གཡང་ཏྲེའུ། །ལུག་ཀླད་དང་འདྲ་དཀར་ཤས་ཆེ་བ་ཡིན། །འདི་དག་སྡེ་བརྒྱད་གནོད་པ་སྲུང་ལ་བསྔགས། །དེ་དག་ཀུན་གྱི་ནང་ནས་
དབང་ཆེ་བ། །རྡོ་རྗེ་རིན་ཆེན་ཕ་ལམ་ཉིད་ཡིན་ཏེ། །ཆོས་ཉིད་རང་བཞིན་རྣམ་པ་ཀུན་གྱི་མཆོག །གཞོམ་གཞིག་བྲལ་བའི་དོན་ལ་གནས་པ་ལྟར། །ཆོས་ཅན་རྫས་ཀྱི་རྡོ་རྗེ་ཕལ་ལམ་གྱིས། །རིན་པོ་ཆེ་ཡི་རིགས་སུ་གྱུར་ཏོ་ཅོག །བརྡར་དང་འབུགས་དང་གཅོད་དང་བཟོ་ཡི་དཔྱད། །ཐམས་ཅད་གདོན་ཅིང་ཚུར་ལ་གང་གིས་ཀྱང༌། །གླགས་བལྟ་མི་ནུས་བརྫ་ཧི་ར་སྟེ། །རི་རབ་ཁོང་ན་བདེན་ཚིག་འགྲུབ་པའི་ལྷ། །དྲང་སྲོང་ཞོ་འཐུང་འཕོས་པའི་རུས་པ་ནི། །ཕ་ལམ་རྡོ་རྗེའི་ངོ་བོར་གྱུར་པ་ལས། །རྐང་རུས་ལས་ནི་དབང་པོའི་རྩེ་བརྒྱ་པ། །རྩིབ་མ་ལས་ནི་དབང་ཕྱུག་མདུང་ཐུང་དང༌། །སོག་པའི་ཆ་ལས་ཁྱབ་འཇུག་འཁོར་ལོ་བཟོས། །སྡང་ལ་རྒྱབ་དང་རྒྱབ་ཚད་ཕོག་པ་དང༌། །ཕོག་ཚད་མཐར་བྱེད་ཤི་ཚད་འདྲེན་པ་ཡིས། །དམ་བཅའ་བཞི་དང་ལྡན་པའི་མཚོན་ཆར་གྲགས། །དེ་དག་བཟོས་པའི་ཕྱེ་མ་འཐོར་བ་གང༌། །འཛམ་བུའི་གླིང་དབུས་བབས་པས་རྡོ་རྗེའི་གདན། །བསྐལ་པ་ཞིག་ཀྱང་འཇིག་ཏུ་མེད་པ་ཆགས། །གཞན་ཡང་རྡུལ་ཕྲན་གང་དུ་འཆགས་པ་ལས། །རྒྱལ་དང་བྲམ་ཟེ་རྗེའུ་དམངས་རིགས་བཞིའི། །རྡོ་རྗེ་རིན་པོ་ཆེར་གྲུབ་དེ་ཡང་ནི། །རྒྱལ་རིགས་ས་ལས་འབྱུང་སྟེ་མེས་མི་འཇིག །བརྡུངས་པས་མི་འཇིག་གཅད་པས་མི་ཆོད་ལ། །བརྡར་བས་མི་འཇིག་
རྡོ་རྗེ་ཆེན་པོ་སྟེ། །དམར་ཞིང་སྨུག་ལ་ཤིན་ཏུ་དྭངས་པར་ཡོད། །གསེར་དང་ཉི་ཤུ་རྩ་ལྔའི་སྐོར་ཐང་རི། །རྡོ་ལས་བྱུང་བ་བྲམ་ཟེའི་རིགས་སུ་འདོད། །མེ་ཡིས་འཇིག་ཅིང་གལ་ཏེ་འཆག་ན་ཡང༌། །སྲིད་དུ་དུམ་བུ་གསུམ་པ་ཁོ་ནར་འཆག །སྔོན་བས་ཚེས་དམར་རྡོ་རྗེ་ཆུང་བ་ཟེར། །རིན་ཐང་སྔོན་ལས་ལྔ་སྐོར་ཙམ་གྱིས་དམན། །འདི་གཉིས་ཡུལ་དབུས་དང་ནི་ལྷོ་ཕྱོགས་པ། །བྷི་ཏ་བྷི་རའི་ཡུལ་ནས་འཐོན་པའི་ཁུངས། །རྗེའུ་རིགས་ནི་དམར་སྨུག་དྭངས་ཆ་ཅན། །རིན་ཆེན་གཞན་ལ་མི་ཐོགས་སྟོད་ནས་འཐོན། །དམངས་རིགས་རྡོ་པ་ཀོ་རཉྫ་ནི་སྨུག །ཡར་ལྷ་ཤམ་པོའི་མདུན་ནའང་ཤིན་ཏུ་མོད། །གང་ཡང་གཞན་ལ་ཐོགས་ན་ཕ་ལམ་མིན། །དུང་ལ་རིགས་ལྔ་མཆོག་ཏུ་གྱུར་པ་ནི། །སྐྱེ་བ་ལྔ་ཕྲག་བསྟུད་པས་གཡས་འཁྱིལ་ཏེ། །འཁྱིལ་ངོས་དུང་མཇུག་ཡིན་པས་དེ་ལྟར་གྲགས། །བཀྲ་ཤིས་རྫས་མཆོག་གསེར་དང་མཉམ་བརྗེ་བྱེད། །ཆུང་ངུ་ཅུང་ཟད་མོད་ཀྱང་བོད་ན་དཀོན། །རི་མོ་ཅན་ལ་གཟི་དུང་ཞེས་སུ་བརྗོད། །རང་མདོག་སེར་ཁྲ་སྙོང་ལ་སྟོད་སྨད་རིང༌། །གཡས་འཁྱིལ་མཆོག་ལ་གཟི་དུང་རབ་ཏུ་ངེས། །འབྲིང་རྣམས་བཅག་ལ་དམར་མདངས་ཡོད་པ་བཟང༌། །ཚེར་མ་ཅན་ཞེས་རྭ་མང་སྐྱེས་པའང་ཡོད། །དུང་དམར་ཞེས་གྲགས་
དམར་སེར་རིམ་པས་དམན། །མཱ་ར་ཤ་ཏི་སི་ཀོ་ངྷ་ར་དང༌། །རྡོ་བ་རི་ཀ་སོགས་པའི་རྒྱ་མཚོར་འབྱུང༌། །དེ་དག་རྒྱན་དང་མཆོད་སྤྲིན་ལ་འོས་པའི། །རིན་པོ་ཆེ་ཡི་རྣམ་དབྱེར་ཤེས་པར་བྱ།། །།སྤྱི་དོན་གསུམ་པ་སྐུ་གསུང་ཐུགས་ཀྱི་རྟེན། །རྒྱུ་དང་རིགས་དང་ངོ་བོའི་སྒོ་ནས་དཔྱད། །རྒྱུ་ལ་འཕགས་པའི་ཡུལ་ན་ཛྷཻཀྵིཾ་རིགས། །གཉིས་དང་གསུམ་དང་འདོད་པའི་ཕྱོགས་གཉིས་ལས། །ཅིག་ཤོས་གསེར་དམར་ཡིན་པར་རྩོད་པ་མེད། །བཅོས་བུ་བི་ཤྭ་ཀརྨའི་སྤྱོད་ཡུལ་ཏེ། །རིན་ཆེན་སྣ་བརྒྱད་བཞུ་བཏུལ་བྱས་པ་ལས། །ཨཥྚདྷ་རུའམ་ནི་ལི་ཁྲར་འབོད། །ལི་དཀར་ལས་དམར་ལི་སྨུག་གིས་མི་མཚོན། །སྣ་ཚོགས་འདུས་པའི་བྱེ་ཁ་མངོན་པ་ལ། །སྣང་མུན་མཚམས་སུ་འཇའ་མདངས་གསལ་བ་ནི། །སྟོན་པའི་ཞལ་སྐྱིན་ཤཱཀྱ་མུ་ནེ་མཚོན། །ལི་སྨུག་ཁ་དོག་མཆིན་ཁ་སྔོ་ཞག་ཅན། །སྣང་བས་མདངས་བསྒྱུར་བྱ་ལ་དྭངས་མ་རྙོག་ལས། །ད་དུང་མངོན་རྟོགས་གཞན་དུ་སྣང་བ་ཡིན། །ལི་དཀར་ལི་མདངས་སེར་ཞག་ཆེ་བ་དང༌། །འདི་གཉིས་སིངྒའི་གླིང་གི་རི་བོ་ལ། །དེ་བཞིན་གཤེགས་པ་དྲུག་གིས་བྱིན་བརླབས་སམ། །ལི་ཡུལ་རི་ལ་ཐུབ་དབང་བཞིས་བརླབས་ཟེར། །ལི་དམར་ཕལ་པ་རང་བྱུང་ལྗོན་ཉིད་དེ། །དམར་མདངས་ཉིད་ལ་ཅུང་ཟད་སེར་བ་ཡིན། །འདི་ལྟར་མ་ཕྱེད་གསེར་དམར་གཅིག་ཉིད་ལ། །མིག་
དང་ཁ་དོག་གཉིས་སུ་འདོད་པ་འཁྲུལ། །རིགས་ཀྱི་སྒོ་ནས་དཔྱད་ན་སངས་རྒྱས་ཀྱི། །བསྟན་པ་གང་ཡོད་དེ་ན་སྐྱེས་བུ་ཡིས། །རྣམ་རིག་བཟོ་གནས་སྤྲུལ་པར་བྱིན་རློབ་པས། །སྐུ་གསུང་ཐུགས་རྟེན་བསྐྲུན་པའི་བཟོ་བོ་མཁས། །མུ་སྟེགས་ཀླ་ཀློ་དར་ཚེ་དེ་དག་ནུབ། །དེ་ལ་སྟོན་པ་འཚོ་ཞིང་གཞེས་པའི་དུས། །རི་མོ་མཁན་གྱི་སྤྱོད་ཡུལ་ལས་འདས་པའི། །སྣང་བརྙན་རས་ལ་བཀོད་དེ་སིངྒ་ལར། །སྤྲིངས་པས་མུ་ཏིག་འཁྲི་ཤིང་བདེན་པར་བཀོད། །དེ་བཞིན་གཟུགས་ཅན་སྙིང་པོའི་སྐྱེས་ལན་དང༌། །ཨུ་ཊ་ཡ་ནའི་ཙནྡན་ཇོ་བོ་ལྟར། །སྟོན་མཆོག་མྱ་ངན་འདས་ནས་ལྷའི་བཟོ་བོ། །མི་རུ་སྤྲུལ་པས་བཛྲ་ཨ་སཱ་ནའི། །གནྡྷོ་ལ་ཡི་བྱང་ཆུབ་ཆེན་པོ་དང༌། །དེ་ཡི་ཤར་ངོས་ཆུ་གནོད་བཟློག་པའི་ཕྱིར། །ཀླུ་སྒྲུབ་ཞབས་ཀྱིས་ཕ་ཝང་བདུན་དག་ལ། །སྣང་བརྙན་བརྐོར་སྩལ་ཐུབ་པ་ཆུ་ལོན་མ། །དེ་བཞིན་ཀླུ་ཡི་བཟོ་བོས་མང་དག་བྱས། །མ་ག་དྷཱ་ཡི་འཇམ་དཔལ་རྔ་སྒྲ་དང༌། །མྱ་ངན་མེད་དུས་གནས་བརྒྱད་མཆོད་རྟེན་སོགས། །གནོད་སྦྱིན་གྱི་ནི་བཟོ་བོས་བཞེངས་པ་ཀུན། །བཟོ་གནས་ཁྱད་འཕགས་དངོས་དང་འཁྲུལ་པ་བསྐྱེད། །དེ་ཡི་ཕྱི་ནས་བཟོ་རྒྱུད་མང་དག་ལས། །སངས་རྒྱས་ཕྱོགས་དུས་བི་མ་པ་ས་ར། །ལྷ་དང་མཐུན་པའི་དབུས་ཀྱི་བཟོ་བོར་གྲགས། །
རྒྱལ་པོ་ངང་ཚུལ་དུས་ན་མ་རུའི་ཡུལ། །སྲི་ག་དྷ་རི་ཞེས་པའི་བཟོ་བོ་བྱུང༌། །གནོད་སྦྱིན་དང་མཐུན་ནུབ་ཕྱོགས་རྙིང་མའི་ལུགས། །བལ་པ་རྙིང་མའི་བཟོ་རྒྱུན་འདི་དང་གཅིག །རྒྱལ་པོ་ལྷ་སྐྱོང་དང་ནི་ཆོས་སྐྱོང་དུས། །བ་རེནྟ་རུ་དྷཱི་མཱ་ན་དང་ནི། །དེ་ཡི་བུ་བེ་ཏྭ་ལོ་བྱ་བ་གཉིས། །ཀླུ་དང་མཐུན་པའི་བཟོ་རྒྱུན་ཡིན་པ་ལས། །བུ་ནི་བྷཾ་ག་ལར་སོང་དེའི་ཤུགས་ཀྱིས། །གཉིས་པོའི་རྗེས་སུ་འབྲང་བ་ཡིན་ཕྱིན་ཆད། །བཟོ་བོའི་སྐྱེ་ཡུལ་བཟོ་བོའི་གནས་ཡུལ་སོགས། །ཇི་འདྲའང་རུང་སྟེ་ལུགས་སུ་བྱས་ཀུན་ལ། །ཤར་ཕྱོགས་པ་ཡི་ལྷ་ཞེས་དཔྱོད་ལྡན་སྨྲ། །བལ་པོ་བར་རྙིང་རྣམས་ཀྱང་དེ་དང་འདྲ། །འོན་ཀྱང་རི་མོ་མཁན་ནི་ཕ་རྗེས་སུ། །འབྲང་ལ་ཤར་བྲིས་བུ་ཡི་རྗེས་འབྲང་ལ། །དབུས་ཀྱི་རི་མོའི་རྒྱུན་ཞེས་གྲགས་པ་བརྟན། །དུས་ཚོད་དེ་ཡི་ཀ་སྨི་ར་པ་ཀུན། །བཟོ་རྒྱུན་དབུས་དང་ནུབ་གཉིས་ཡིན་པ་ལས། །ཕྱི་ནས་བྲིས་འབུར་གཉིས་ཀར་བྱང་ཆུབ་པ། །ཧ་སུ་ར་ཛ་ཞེས་བྱའི་བཟོ་རྒྱུན་ལ། །ཁ་ཆེ་མ་ཞེས་མཁས་པ་རྣམས་ལ་གྲགས། །དེ་དག་ཀུན་ཀྱང་བྲིས་འབུར་བརྐོས་ལ་སོགས། །བལ་ལ་བློ་གྲོས་བཟོ་བོ་ཉིད་ཡིན་ཀྱང༌། །ཨཱརྱ་པཱ་ལོའི་གླིང་གྲུབ་དངོས་མེད་དུ། །ཡལ་བའི་སྤྲུལ་པའི་བཟོ་བོའི་ཆར་མི་ཉེ། །གང་དག་སོ་སོ་སྐྱེ་བོའི་རྣམ་རིག་ནི། །ཤིན་ཏུ་ཐ་དད་ཕྱིར་ན་བཟོ་གནས་ཀྱི། །
རྣམ་འགྱུར་དཔྱད་ཀྱང་དེ་ཡི་རྗེས་སོན་ཡང༌། །བོད་འདིར་རང་ཉམས་བདེན་པར་སྨྲ་བའི་ཁ། །ཡི་གེའི་ཞལ་ལྕེས་འགོག་པའང་སངས་རྒྱས་མཐུ། །དེ་ལ་ངོ་བོའི་སྒོ་ནས་དབུས་འགྱུར་འཆང༌། །ཝཱ་རཱ་ཎ་སཱིའི་ལྷ་ཡི་ཁྱད་པར་ནི། །ལི་སྨུག་དབུས་ཀྱི་ལྷ་རིགས་འདྲ་བ་ལ། །འཛམ་བུ་ཆུ་བོའི་ཚ་གསེར་གྱིས་བྱུགས་པ། །རྒྱུ་ཚོགས་ཁྱད་དུ་འཕགས་པ་ཁོ་ན་སྟེ། །སངས་རྒྱས་ཕྱོགས་དེ་བསྟན་ལས་ཆེས་དད་པས། །རྒྱ་ནག་ཡུལ་དུའང་མདོ་སྡེ་སྨྲ་བ་བརྫངས། །ཧོར་གྱི་རྒྱལ་པོས་དྲིན་ལན་བསབ་པའི་ཕྱིར། །གསེར་རྐྱང་མི་ཁུར་བརྒྱ་སོགས་བསྐུར་བས་ན། །ཛྷཻ་ཀྵིཾ་དངོས་དང་གསེར་གྱིས་བྱུག་པ་མོད། །ཆོས་རྒྱལ་དེ་ཡི་བཙུན་མོ་དང་བློན་པོ། །བསྟན་ལ་དད་པས་གཙུག་ལག་རྟེན་གསུམ་མང༌། །དབུས་ལྷ་བྱིངས་རྣམས་ལི་དཀར་ལི་དམར་ལ། །སྐུ་ཤ་འཚམ་ཞིང་གཙུག་ཏོར་མཐོ་ལ་དྲང༌། །ཤངས་རྩེ་རྣོ་བའི་རྒྱུན་ལས་ཤངས་རྒྱུད་གཟར། །སྤྱན་དབར་ཤངས་སྟོད་འཛོམ་སར་མཛོད་སྤུ་འབུར། །ནུ་མ་དེར་མཚུངས་སྲིད་ཚད་ཤངས་རྩེ་མ། །ན་མཟའ་ཤ་མི་བསྒྲིབ་ཀྱང་བླ་གོས་ནི། །ཕྲག་པར་གཟར་བའི་གོན་རྒྱུད་ཤིན་ཏུ་དོད། །སྒྲོས་གཙང་རྣམས་ཀྱི་མདུན་ན་རྡོར་གདན་དང༌། །ཕྱག་ཞབས་འཁོར་ལོས་མཚན་པ་དག་ཀྱང་ཡོད། །བཟོ་སྒྲོས་མཛེས་དང་ཅིག་ཤོས་མ་ངེས་ཀྱང༌། །ཚུགས་བཟང་བལྟས་
ཀྱིན་བྱིན་ཆགས་ཁྱད་ཆོས་ཡིན། །པདྨ་ཉིས་བརྩེགས་འགྲིག་པའི་ནང་མ་འབུར། །པད་ཁ་རྒྱས་ཞུམ་འཚམ་ཞིག་ཡས་མས་ལ། །མུ་ཏིག་ཡོད་མེད་གཉིས་ཅར་སྲིད་པ་ཡིན། །ཁྱད་པར་ཚུགས་བཟང་ཞལ་ཁྱིམ་གྲུ་སྟངས་ལ། །དཀྱུས་རིང་ཕྱག་ཞབས་མཉེན་དང་ཞབས་མཐིལ་སྟུབ། །གོས་འཁྱུད་ཞིབ་སྙོམས་དལ་འགྲོའི་ཤམ་བུ་བཞིན། །ལི་མཆོག་གཉིས་ལ་གསེར་དངུལ་ཟངས་སོགས་པས། །ཁྲ་བསྒྲིགས་བྱས་པ་སྟོད་ཧོར་ལི་མ་རུ། །འཁྲུལ་གཞི་ཆེ་བས་ཁྱད་པར་ཕྱེད་པ་གཅེས། །ཟངས་ཐང་མ་ནི་སྐུ་ཤ་ན་བཟའ་གཉིས། །ལི་དཀར་ལི་དམར་ཐ་དད་བྱས་ལ་བཏགས། །ཐུབ་དབང་སྐུ་མང་ཕྱི་ནས་བྱང་སེམས་སྐུ། །འགྱིང་ཉམས་རྒྱན་ཅན་ནོར་བུ་གཉིས་པའང་སྲིད། །དེ་བཞིན་ཁྲོ་བོའི་སྐུ་ནི་འགྱིང་བག་འཚམ། །སྔ་ཕྱིའི་རྒྱུ་མཚན་ཐེག་པ་ཆེན་པོ་གཉིས། །སྦས་དང་གྲགས་པའི་རྣམ་དབྱེས་གསལ་བ་ཡིན། །གདན་ཆུང་མར་གྲགས་རྡོ་རྗེ་གདན་པས་བཞེངས། །ལི་དཀར་དབུ་ཆུང་མཁུར་ཚོས་རྒྱས་པ་ཡིན། །དེ་ཡང་ཝཱ་རཱ་ཎ་སཱིར་ཆོས་འཁོར་མ། །མ་གྡཱ་རུ་ཐུབ་དབང་བདུད་འདུལ་དར། །དབུས་འགྱུར་འཆང་གི་ནང་གསེས་ཤར་གྱི་ལྷ། །དཔྲལ་མཚམས་དབྱེས་ཆེ་སྐུ་སྟོད་ཅུང་ཟད་རྒྱས། །ཕྱག་སོར་འབྲེལ་ཞིང་གཙུག་ཏོར་རྒྱབ་ཏུ་ཉེ། །ཤར་ཕྱོགས་པ་ལ་ལི་དཀར་ཤས་ཆེ་སྟེ། །ལུགས་གཙང་ཞལ་
སྒོ་མཛེས་ལ་སྤྱན་དབར་དོག །ཤངས་འདལ་དེ་ཡང་ཤངས་སྨད་ཅུང་ཟད་མཐོ། །སྐེམ་ཞིང་ཚུགས་བཟང་གཙུག་ཏོར་རྒྱབ་ལ་ཉེ། །གོས་འཁྱུད་འཁྲིལ་ཞིང་པད་འདབ་ཉིས་བརྩེགས་ཞུམ། །པདྨ་ཡས་མས་འགྲིག་པར་མ་ངེས་ཤིང༌། །མུ་ཏིག་གོང་མ་ཞིབ་ལ་འོག་མ་རགས། །ཁྲི་རྒྱབ་ལ་སོགས་དབུས་ཀྱི་ལྷ་དང་མཐུན། །འོན་ཀྱང་པཱ་ལ་རྣམ་གཉིས་དུས་བྱུང་བས། །ཕ་བུ་གཉིས་ཀྱིས་བཟོ་རྒྱུན་ཁྱབ་ཆེ་ཞིང༌། །ཁྱད་པར་དེ་ཝ་པཱ་ལ་ཀླུ་ཡི་བུར། །གྲགས་པས་བཟོ་རྒྱུན་དེར་བྱུང་བཟོ་ཡུལ་ཀྱང༌། །ངེས་པ་མེད་པས་གཅིག་ཏུ་སྟངས་གཅོད་དཀའ། །དྷརྨ་པཱ་ལ་ཐེག་ཆེན་རྣམ་གཉིས་ལ། །ལྷག་པར་དད་པས་བྱང་ཆུབ་སེམས་དཔའ་དང༌། །སྔགས་སྐུ་དག་ཀྱང་འདི་ལ་མང་ངམ་སྙམ། །ཡུལ་དེའི་བྱེ་བྲག་བྷཾ་ག་ལ་ཡི་ལྷ། །ལི་དཀར་ཞལ་སྤྱན་སོགས་ལ་གསེར་དངུལ་ཟངས། །ཕྲ་བྱེད་བཟོ་ཁྱད་བཏོན་དང་ཕྲ་ཁུང་དུ། །རིན་ཆེན་རྒྱན་སྤྲས་ཡི་གར་འོང་བ་ཡིན། །ནུབ་ཕྱོགས་ཀསྨི་ར་བ་རིགས་གཉིས་ལས། །ནུབ་རྙིང་ལི་དམར་ལི་དཀར་སེར་ཞག་ཆེ། །ཞལ་དཀྱུས་མཛངས་སམ་སོག་ཀ་མགུལ་བ་ཕྲ། །སྤྱན་དབར་དོག་ལ་ཤངས་རྒྱུད་རིང་ཞིང་ཟླུམ། །ཞལ་དང་སྤྱན་ལ་དངུལ་ཟངས་ལྷན་ཐབས་ཅན། །ཚུགས་གྱོང་ལྷུ་ཚིགས་ཐུང་ལ་ན་བཟའ་འཁྲིལ། །གོས་
འཁྱུད་རིང་སྙོམས་གཙུག་ཏོར་ནོར་བུ་ནུབ། །པདྨ་འདབ་ཆེ་རྐྱང་སྦྱར་གཉིས་ཀ་སྲིད། །མི་ཏིག་ལ་སོགས་རྒྱན་གྱིས་སྤྲས་པའང་ཡོད། །བཟོ་བོ་དེ་ཡིས་སྟོད་ཧོར་ནས་བསྒྲུབས་པ། །ཁྲོ་ལི་དམར་སྨུག་ནག་པོ་རིགས་གསུམ་ལ། །ཞལ་རས་སྒོང་གཟུགས་དཀྱུས་ཐུང་གོས་འཁྱུད་རིང༌། །ཆུ་གཉེར་དང་མཚུངས་མེ་ཏོག་དག་གིས་བརྒྱན། །པདྨ་སྐེད་ཉག་འདབ་མ་སྦུབ་ཉམས་ཅན། །ཁྲི་གདན་གྲུ་བཞིའམ་ཟླུམ་པོ་ཀླུས་བརྒྱན་དང༌། །རྒྱབ་ཡོལ་ཅན་ལ་ཚ་གསེར་ཡོད་མེད་གཉིས། །བྲག་གདན་དག་ཀྱང་རེ་རེ་སྲིད་པའོ། །ཡོན་ཏན་འོད་ཀྱི་སྐུ་ཚེའི་སྨད་བྱུང་བའི། །རྒྱལ་པོ་ངང་ཚུལ་དུས་ལ་ནུབ་རྙིང་ཟེར། །ཧུ་ལ་ཧུ་ནས་སྟོད་ཧོར་ཞེས་སུ་གྲགས། །དེ་ཚེ་ཡུལ་དེར་རྒྱ་ནག་རྙིང་མའི་བཟོ། །ཁྲོ་ལི་སྨུག་པོ་ཚུགས་གླེན་ཞལ་སྒོ་གྱོང༌། །སྤྱན་དང་མཆུ་སྒྲོ་མི་འདོད་གོས་འཁྱུད་མང༌། །ཁྲི་སྟན་རྒྱ་རྟགས་གཟོང་རིས་བྱས་པའང་འབྱུང༌། །ཡུལ་དེའི་བྱེ་བྲག་ཡུ་གུར་ཞེས་བྱའི་ལྷ། །ལི་དཀར་དངུལ་བསྲེས་ཆེ་དང་ཁྲོ་ལི་སྨུག །བཟོ་ཡི་ཁྱད་པར་ཤངས་འདལ་སྐྲ་ཚགས་སྟུག །གོས་འཁྱུད་ཉུང་ལ་ཕྱག་ཞབས་སྒྲོས་མི་གཙང༌། །རྒྱན་ཉུང་དབྱིག་ཉམས་པད་གདན་མེད་པ་མང༌། །དེ་བཞིན་ལི་ཡུལ་ཁ་ཤ་ཞེས་བྱའི་ལྷ། །ཁྲ་འབྲུག་གིས་མཚོན་ཆོས་ལི་སྔ་མ་འདྲ། །སྨད་ཧོར་ཞེས་གྲགས་རྒྱལ་པོ་གོ་དན་ནས། །རྒྱལ་རྩབས་
དྲུག་གི་བར་དུ་ཅོང་ལི་དང༌། །ལི་དམར་ཅི་རིགས་ཞལ་རས་སྟོད་ཆ་ཆུང༌། །སྤྱན་དང་མཆུ་སྒྲོས་མི་དོད་ཞལ་ཁུང་ལྟེམ། །ཕྱག་ཞབས་གཞོན་ཤ་ཆགས་ལ་ཉིང་ལག་ཐུང༌། །ཚ་གསེར་གྱིས་བྱུག་བཟོ་ཁྱད་དམིགས་བསལ་རྣམས། །མ་གཏོགས་ཧོར་རིགས་བཞི་པོ་འདྲ་ཤས་ཆེ། །ལྷོ་ཕྱོགས་པ་ལ་རིགས་གཉིས་སྤྱི་ཚན་དུ། །ལི་དམར་ཚ་གསེར་སྟུག་ལ་ཤ་ཉམས་ལྷོད། །ཞལ་རས་དཀྱུས་ཐུང་ཨོལ་ཀོ་བཅུམ་པ་དང༌། །ཤངས་དམའ་ཤངས་གོང་ཉག་ལ་སྤྱན་དབར་ཡངས། །མཆུ་ཙོང་ཞལ་ཁུང་ཀྱོང་ལ་དཔྲལ་དབྱེས་ཆུང༌། །ན་བཟའ་འཁྲིལ་ཞིང་གཟོང་རིས་མེད་པ་ལ། །ཁྲི་ཡངས་པདྨ་རྐྱང་སྦྱར་གཉིས་སྲིད་པའི། །པད་མགོ་ཞུམ་ལ་ཟེ་འབྲུ་ཡོད་མེད་གཉིས། །འདི་ལ་ལྡེམ་སྐུ་མང་རྣམས་བདེ་ཉམས་ཆེ། །བྱེ་བྲག་ལྷོ་ཕྱོགས་བེ་ཏར་བསྐྲུན་པ་རྣམས། །ཞལ་རས་སོག་ཀ་གོང་ལས་ཆུང་བ་ལ། །ན་བཟའ་གཟོང་རིས་ཡོད་པའི་ཁྱད་པར་རོ། །བྱང་ཕྱོགས་པ་ནི་ལི་དཀར་ར་གན་དང༌། །བསྲེས་པས་སྐྱ་ཉམས་ཞག་ཁ་ཆུང་བ་སྟེ། །ལི་དམར་སོགས་ནི་སྲིད་མཐའ་མ་བཀག་ཙམ། །ཤ་ཚུགས་མཉེན་ལ་འགྱིང་དང་བདེ་ཉམས་ལྡན། །ཞལ་ཁྱིམ་དཀྱུས་ཐུང་ལྷོ་ཕྱོགས་འདྲ་ལས་གཙང༌། །ཤངས་བཟང་སྤྱན་དབར་དོག་ལ་ཁྲི་རྒྱན་མཛེས། །འདི་ཡང་གྲོང་ཁྱེར་མ་སོགས་ལྡེམ་སྐུ་མང༌། །ཡུལ་དེའི་བྱེ་བྲག་བལ་པོ་
རྙིང་མའི་བཟོ། །ནུབ་རྙིང་དང་མཐུན་པར་རྙིང་ཤར་ཕྱོགས་པ། །གསར་པ་རྟོགས་སླ་དེང་སང་ཙནྡན་མང༌། །དེ་བཞིན་འཕགས་པའི་ཡུལ་ན་བྱང་ཆུབ་ལྗོན། །དང་ཞིང་འབོལ་བ་རྡོ་རྗེའི་འདག་པའམ། །ཀླུ་སྒྲུབ་ལ་ཕུལ་ཀླུ་འབྱིན་ཞེས་སུ་གྲགས། །དཀར་ཞིང་བཅག་པ་ཀ་མ་རུ་པའི་རྡོ། །ནག་ཅིང་སྣུམ་པ་བསིལ་ཚལ་རྡོ་ནག་ལས། །གྲུབ་པའི་སངས་རྒྱས་བྱང་སེམས་སྐུ་ཡང་སྣང༌། །རྒྱ་ནག་གསར་རྙིང་གཉིས་ལས་རྙིང་མ་ནི། །ཐང་ཅིའི་རབས་ཏི་རྒྱུ་ནི་ཁྲོ་ལི་སྨུག །ཤ་ཚུགས་སྦེག་ཅིང་ཤངས་ལེབ་མཆུ་སྒྲོས་དོད། །ཞལ་དཀྱུས་མཛངས་ལ་སྤྱན་ཕྲ་གོས་འཁྱུད་གཙང༌། །ཕྱག་དཀྱུས་ཐུང་ལ་སོར་མོ་དོད་པ་མང༌། །རྒྱ་ནག་གསར་མ་ཧཱ་མིང་རྒྱལ་པོའི་རབས། །ལྗང་སེར་མང་སྟེ་རག་སྐྱ་དག་ཀྱང་སྲིད། །དེ་ལ་ཐུགས་དམ་མ་དང་སྐུ་རིམ་མ། །དང་པོ་ཚུགས་དང་བྲད་བརྡར་གོས་འཁྱུད་ལེགས། །ཞལ་རས་མཛངས་ལ་གྲུ་སྟངས་ཅུང་ཟད་དོད། །སྤྱན་དཀྱུས་རིང་ཞིང་པདྨ་ཁ་སྦྱར་གཙང༌། །མུ་ཏིག་ཕྲ་ལ་སྙོམས་སམ་མེད་པའང་སྣང༌། །ཚ་གསེར་སྟུག་ལ་མདོག་ལེགས་རྒྱབ་མདུན་གཙང༌། །ཞབས་སྡོམ་རྒྱ་གྲམ་ཇོ་རྩིའམ་ལ་མཚལ་བྱུགས། །ཐུགས་དམ་མར་གྲགས་རྒྱ་རྟགས་བྱས་པའང་ཡོད། །གཙང་ཤ་ཆུང་དང་རག་སྐྱ་མང་བ་ལ། །སྐུ་རིམ་མར་གྲགས་གཟུངས་ཞུགས་གཞན་མེད་པར། །གོས་
དར་ལས་བྱས་དོན་ལྔ་བཅུག་ཅེས་གྲགས། །བོད་ལ་ཆོས་རྒྱལ་ལི་མ་སྔ་ཕྱི་གསུམ། །མེས་པོ་བདག་ཉིད་སྲོང་བཙན་སྒམ་པོའི་དུས། །ལི་དམར་ཤས་ཆེ་དེ་བཞིན་ལི་དཀར་དང༌། །དཀར་དམར་ཤོ་བསྒྲིགས་གསེར་དངུལ་རྡོ་སྐུ་སོགས། །མཐའ་འདུལ་ཡང་འདུལ་བཞེངས་ཚེ་འཕེལ་བ་སྟེ། །ཞལ་ཁྱིམ་འབུར་ཀྱོང་ཆུང་བས་ཤ་ཉམས་འབོལ། །ཨོལ་ཀོ་རྒྱས་པས་ཞལ་དཀྱུས་རིང་བར་མངོན། །ཤངས་བཟང་སྤྱན་དཀྱུས་རིང་ལ་མཆུ་སྒྲོས་གཙང༌། །གོས་འཁྱུད་ཉུང་ལ་ཐལ་མོ་ཉམས་འགྱུར་དོད། །པདྨ་རྐྱང་སྦྱར་རི་རིགས་པད་མགོ་མཉེན། །ཁྱད་པར་གཙུག་ལག་ཁང་གི་ལྷ་ཆེན་རྣམས། །ཞབས་ལ་ཕྱགས་དང་བེར་སོགས་ཁྱིམ་པའི་ཆས། །དབུ་རྒྱན་གསུམ་པ་རྩེ་མོ་ནང་དུ་ཉེ། །ལུགས་མ་རྣམས་ལ་གཟོང་རིས་བྱས་པ་མང༌། །པད་གདན་མེད་དང་འབོལ་ལ་བཞུགས་པའང་སྲིད། །ཚ་གསེར་བྱིབ་བྱུགས་མཆོག་ཏུ་བྱིན་ཆགས་ཤིང༌། །སེམས་དཔའི་རིགས་རྣམས་ཤིན་ཏུ་མཛེས་པ་དང༌། །ཁྲོ་བོ་ཞི་ཉམས་བཞད་ཞལ་ཁོ་ནར་འོང༌། །ཆོས་རྒྱལ་རང་གི་འདྲ་སྐུ་ཚ་གསེར་དང༌། །ཇོ་རྩིས་བྱུག་སམ་མ་བྱུགས་ཅི་རིགས་ཡོད། །འདྲ་ཅོག་རྣམས་ནི་སྐུ་རྒྱུ་ངན་པ་ཡིན། །བར་པ་ལྷ་སྲས་ཁྲི་སྲོང་ལྡེའུ་བཙན་དུས། །མེས་ཀྱི་ལྷ་ལས་སྐུ་རྒྱུ་
ཅུང་ཟད་སྨུག །ཞལ་རས་ཟླུམ་ལ་སོར་མོ་བྲད་བརྡར་ཆུང༌། །ལུགས་ཁ་ཅུང་ཟད་འདལ་བའི་ཁྱད་པར་དང༌། །ཇོ་རྩེ་འཐུག་པོ་བྱུགས་སམ་ཚོན་ཁྲ་བཀྱེ། །བཙན་པོའི་འདྲ་སྐུ་ལ་ཐོད་མེད་པ་ལ། །ལན་བུ་གཡས་གཡོན་འཕྱང་དང་དབུ་རྒྱན་ཡང༌། །རྩེ་བྲན་གསུམ་པ་གྲང་གསེར་བྱུགས་པའང་ཡོད། །ཕྱི་མ་མངའ་བདག་རལ་པ་ཅན་གྱི་དུས། །ལི་དཀར་མང་ལ་བཟོ་བོའང་འཕགས་ཡུལ་བ། །ཡིན་པས་དབུས་འགྱུར་འཆང་དང་རིགས་འདྲ་ལ། །དེ་བས་ཤ་ཉམས་རྒྱས་ཤིང་འགྱིང་བག་ཆེ། །དངུལ་ཟངས་སྤྱན་འབྱེད་རྒྱས་དང་ཟངས་ཐང་མ། །ཟངས་མཆུ་དངུལ་སྤྱན་ལ་སོགས་ཅིར་ཡང་འབྱུང༌། །འདྲ་ཅོག་ར་གན་ལས་གྲུབ་སྒྲོས་མི་གཙང༌། །ཆོས་ལི་ཕྱི་མར་ཚ་གསེར་བྱུགས་པ་མང༌། །བྱང་སེམས་ཁྲོ་བོའི་སྐུ་རྣམས་སྔོན་དང་འདྲ། །ལི་དམར་རྣམས་ལ་ཟངས་བསྲེས་ཡོད་པས་སྨུག །གཞན་ཡང་བཀའ་གདམས་རག་སྐུ་ལྷོ་བྲག་དང༌། །གཉལ་ལོར་ཡར་མོ་ནུབ་ནས་ཆོས་ལིའི་འདྲ། །མང་བ་སྔོན་བྱུང་རྒྱ་ལི་དངོས་བསྟན་དང༌། །ཞག་རྩིའི་རྣམ་པ་ཀུན་ནས་འགལ་བས་དཔྱད། །རྒྱུས་ལ་འདྲིས་དང་མཐོང་མྱོང་ཆེས་ཆེ་བའི། །སྤྱོད་ཡུལ་ལས་གཞན་རང་དགར་སྟངས་མི་ཆོད། །འོན་ཀྱང་ལྷ་བཙུན་ཁུ་དབོན་རྣམ་གཉིས་དུས། །འཇོན་ལ་རྒྱུ་བཟང་འདྲེས་པའི་ལི་སྨུག་དང༌། །ལི་
ཁྲ་དག་ལ་ཛྷཻ་ཀྵིཾ་ཞེས་བཏགས་པ། །རྒྱ་ལི་དང་ཡང་འཁྲུལ་པ་བསྐྱེད་ལ་ཁད། །ཚུགས་ཉམས་ཆོས་ལི་དང་མཚུངས་མང་མཐོང་བ། །འདི་དག་རྣམས་ཀྱང་རྒྱུ་ཚུགས་བཟང་བ་ཡིན། །དེ་བཞིན་རྒྱ་ནག་གསར་མར་འཁྲུལ་བྱེད་པ། །ཚུགས་བཟང་ཞལ་རས་མཚར་ལ་སྐྱིལ་ཀྲུང་ལྷོད། །པད་འཁོར་ཉིས་བརྩེགས་གཉེན་ལ་སྐེད་ཉག་ཐོན། །སྒྲོས་གཙང་ཚ་གསེར་འཐུག་པ་སླེའུ་ཆུང༌། །དེ་ལས་བྲད་བརྡར་ཅུང་ཆུང་ཚ་གསེར་སྲབ། །ན་བཟའ་མེ་ཏོག་རིས་བཀྲ་བདེ་ཉམས་ཆེ། །ཨོལ་ཀོ་ཅུང་ཟད་བཅུམ་པ་པདྨ་མཁར། །ཁྱད་པར་རིན་པོ་ཆེ་ཡི་གཏམ་འདི་ཡི། །དུས་ན་སྟོན་པའི་ཞལ་སྐྱིན་མཆེད་ཀྱི་མདུན། །ལྷ་ཡུལ་ལྡན་གྱི་བཟོ་སྒྲོས་རྩེ་མོ་ནི། །རྒྱ་ནག་གསར་མར་མཚུངས་ཀྱང་པྲ་བཟོ་ཡིས། །བྱོན་ལས་འགྱུར་ཚུགས་རྣམ་པ་ཐ་དད་ཅིང༌། །རྒྱུ་ལ་ཁ་ཆུར་འདྲེས་རྣམས་ཆོས་ལི་དང༌། །མཚུངས་ཤིང་ཟངས་ཐང་མ་ལ་སྐུད་ཚག་གིས། །བལྟ་ན་སྡུག་བྱས་སྦྱར་ལིའི་མདངས་གདོན་ལ། །བཟོ་བས་ཛྷཻ་ཀྵིཾ་དང་ཡང་འཁྲུལ་པ་བསྐྱེད། །དེ་བཞིན་ལི་དཀར་འདྲ་ལ་སེར་ཞག་ཆེ། །ལི་དམར་བཅོས་བུ་ཚ་གསེར་གྱིས་བྱུགས་ནས། །དབྱི་བའི་རྫུ་འཕྲུལ་བྱས་པས་རློམ་ལྡན་ཡང༌། །རྒྱ་ལི་རྙིང་མར་འདུ་ཤེས་རྨོངས་པ་ཡོད། །འཕགས་པའི་ཡུལ་ན་ཐེག་དམན་གྲགས་ཆེ་ཞིང༌། །ཐེག་ཆེན་
དར་བ་ནས་ཀྱང་གསང་སྔགས་ནི། །ཤིན་ཏུ་གསང་བ་སྲུང་བ་ཉིད་ཀྱི་ཕྱིར། །སྔགས་སྐུ་ཉུང་བས་ཕལ་ཆེར་རྒྱ་ཧོར་བོད། །སྤུངས་སྐུ་རྒྱ་གར་ཤར་དང་རྒྱ་ནག་མང༌། །གསུང་རྟེན་དྲིལ་བུ་ཧོར་དང་རྒྱ་གར་ནག །བོད་ཆེན་རིགས་བཞི་ལས་ནི་རྒྱུའི་སྒོ་ནས། །ཧོར་དྲིལ་གཉིས་ལས་ཤིང་ཀུན་མཆོག་ཏུ་གྲགས། །རྒྱུ་ནི་ལི་དཀར་དངུལ་མདངས་བཀྲག་ཞག་ཆེ། །དྲིལ་བུའི་སྟོད་ཞུམ་པ་ལང་ཁ་ཁེབས་ལ། །ལུགས་གཙང་བརྡར་གད་མ་བྱས་ལི་རྒྱུ་འཇམ། །ནང་ནི་ཞོ་ཁ་ཞེས་པ་འོ་སྤྲིས་འདྲ། །དྲྭ་ཕྱེད་འབུར་ལ་བར་སྟོང་འཇམ་སང་མང༌། །དཔུང་པའི་པད་འདབ་རིགས་ཀྱི་ཕྱག་མཚན་སྤྲས། །དྲིལ་བུའི་དཔུང་ཟུར་པད་མཐའ་གཅིག་ཏུ་འདྲེས། །སྐད་སྙན་སྦོམ་ལ་རྒྱང་གྲགས་ལྷག་པར་ཆེ། །དབུ་རྡོར་ཅོང་ལི་མང་ལ་དངུལ་དཀར་དང༌། །ཛྷཻ་ཀྵིཾ་དག་ཀྱང་ཉུང་ཟད་སྲིད་པ་ཡིན། །རྩེ་ལྔ་པ་མང་ཆུ་སྲིན་ནང་ལ་བལྟ། །འཁོར་ལོའི་རྒྱན་ལྡན་རྩེ་དགུ་ཉུང་བ་ཡིན། །རྒྱུ་དང་གསུང་ལ་དོ་ཟླ་མེད་ན་ཡང༌། །བཟོ་སྒྲོས་ཕྱིལ་བས་ཉམས་མེད་ཕལ་གྱིས་དོར། །དངོས་བསྟན་ཉུང་ལ་འདྲ་ཅོག་མང་བ་ཡིན། །ཕལ་པ་ལུགས་ཁ་དམ་ལ་གཙང་ཤ་ཆུང༌། །ནང་ལ་བྲད་བརྡར་སོང་བས་ཞོ་ཁ་མེད། །རབ་འབྲིང་ཐ་མའི་ཁྱད་པར་ཆེ་བ་སྣང༌། །རྒྱ་གར་དྲིལ་བུ་ཆ་ཚད་ཁྲུུ་ལ་ཉེ། །ཆུང་བ་དག་ཀྱང་གཞན་ལས་ཆེ་བ་ལ། །པད་སྤུངས་དབྱིབས་ཅན་བྲད་བརྡར་གཙང་ཤ་མེད། །ཉུང་ཟད་
སྣང་བ་ལི་དམར་ཁོ་ནར་མཐོང༌། །དྲིལ་བུའི་རྣམ་གཞག་རྒྱུད་སྡེ་ལས་གསུངས་པའི། །ཐ་སྙད་དང་ཡང་མཚུངས་པར་མ་ངེས་པ། །འཕགས་ཡུལ་དམ་ཚིག་སྲུང་ལ་སྒམ་པའི་ཕྱིར། །ཁྱབ་གདལ་མ་དར་བཟོ་ལ་འདྲིས་པ་ཆུང༌། །གངས་ཅན་ན་ནི་ཁྱིམ་པའི་འཆོར་ཆས་བྱེད། །བླ་མེད་སྔགས་སྐུ་བཞད་གད་གནས་ལྟུང་ན། །དམ་ཚིག་དྲིལ་བུ་དམིགས་པའི་དབྱིངས་ལ་བཞུགས། །རྒྱ་ནག་ཁྱད་དྲིལ་ཕལ་པ་ཏཱ་མིང་གསུམ། །ཁྱད་དྲིལ་སྐྱེ་མཆེད་བྲད་བརྡར་འགྲན་ཟླ་མེད། །དཀྱུས་ལས་ཅུང་ཆེ་བ་ལང་ཁ་སྤུབ་འཐུག །རི་མོ་དོད་ཀྱང་ཧྲོབ་ཉམས་གཏན་ནས་མེད། །རྩེ་ལྔ་པ་རྣམས་ཆུ་སྲིན་ནང་ལ་བལྟ། །འཁོར་ལོའི་རྒྱན་དང་རྩེ་དགུ་ཡིན་ནོ་ཅོག །རྩི་པར་དྲྭ་ཕྱེད་ཁོང་ན་ཕྱག་མཚན་ཅན། །མུ་ཏིག་སྐེ་རགས་ཞིབ་ལ་སྐད་སྙན་འཁྲོལ། །མགོ་རྡོར་གསེར་དང་གསེར་དམར་ལས་གྲུབ་སྲིད། །རྒྱ་རག་ཚ་གསེར་འཐུག་པ་ཀུན་ལ་ཡོད། །ཕལ་པ་སྐྱེ་མཆེད་ཅུང་ཟད་གཙང་ཤ་ཆུང༌། །དབྱིབས་ཀྱང་ཙོང་ལ་སྐད་ངར་གཉིས་སུ་འཚེར། །དྲ་ཕྱེད་སོགས་དང་པད་འདབ་ལྷོངས་ལ་འཇམ། །ས་བོན་ལཉྫར་ཡོད་པ་ཏཱ་མིང་མང༌། །ཐེག་ཆེན་གན་དྲིལ་ལྷག་པར་ཆེ་བ་ལ། །ཁྱད་དྲིལ་མིང་དུ་གྲགས་པ་མེད་ན་ཡང༌། །བཟང་ངན་ཁྱད་པར་ཆེ་བ་ཡོད་པའོ། །དགའ་ལྡན་གན་དྲིལ་དེ་བས་ཅུང་ཐང་ཞེལ། །དྲིལ་བུའི་སྟོད་ཞུམ་
མགོ་རྡོར་རྩེ་དགུ་མང༌། །བོད་དྲིལ་རྙིང་མ་མདོ་ཁམས་རྩི་ཡུལ་དུ། །ཆེ་ཆུང་གཉིས་བཟོས་བྱི་བྱད་རྒྱ་འདྲ་བས། །ཉམས་མེད་རྣམས་ཀྱིས་རྒྱ་རུ་ངོས་འཛིན་ཡང༌། །རི་མོ་མི་གཙང་དཔུང་མགོ་ཧོར་འདྲ་ལ། །བ་ལང་ཁ་ནི་རྒྱ་ཧོར་གཉིས་ཀ་དང༌། །འགལ་ཞིང་ནང་ལ་སུལ་གྱི་རྣམ་པ་མང༌། །བོད་དྲིལ་གསར་མ་ཟལ་མོ་སྒང་དུ་དར། །རི་མོ་ཧྲོབ་ལ་སྐད་ངར་རིང་དུ་བསྲིང༌། །ཁྱད་དྲིལ་རྣམས་ནི་སྐྱེ་མཆེད་གཙང་ཤ་ཆེ། །དེ་ལས་གཞན་པ་འཇངས་འབའ་ལོ་གྲོ་སོགས། །དྲིལ་བུའི་གཟུགས་བརྙན་བརྟག་པར་སླ་བས་སོ། ༈ །ཏིང་ཏིང་ཤག་ལ་ཧོར་དང་རྒྱ་བལ་བོད། །ཧོར་ལ་རིགས་གསུམ་ཛ་ལནྡྷ་ར་མཆོག །ཤིང་ཀུན་འབྲིང་ལ་ཕལ་པ་ཐ་མ་སྟེ། །ཛ་ལན་དྷ་ར་གླིང་ཕྲན་ལས་འོངས་པའི། །ཤང་ཤང་ལས་བྱུང་ཐོད་པ་སྦུབ་ལ་ཟླུམ། །ལོ་མ་ཆུང་ཤོས་མཐེའུ་ཆུང་གི་རྒྱ། །ཁ་སྒོར་མཐུག་ཅིང་གཞན་ལས་ཆུང་བ་ལ། །སྐད་སྙན་རྒྱང་གྲགས་མཆོག་ཏུ་གྱུར་པ་ཡིན། །ཤིང་ཀུན་ཐོད་པ་དཔངས་མཐོ་རྩེ་མོ་ཕྱུར། །མཐའ་སྐོར་ཁ་སྦུབ་མཐུག་ལ་བར་སྐབས་སྲབ། །རྒྱང་སྐད་ཆེ་ལ་དབུགས་ཐག་རིང་བ་ཡིན། །ཕལ་པ་བརྡར་གད་ཅུང་དོད་ཐོད་པ་དམའ། །ལི་ལ་ཁྲོ་ཉམས་ཡོད་པས་གྲུམས་པའང་སྲིད། །རྒྱ་ཏིང་ཐོད་པ་ཟླུམ་ལ་ཁ་ཕྱར་ཐེག །ལོ་ཐོད་མཚམས་སུ་དཀྲི་ཁ་ཁོར་མོ་ལ། །ནག་གམ་སེར་མདངས་གཡའ་སྟུག་སྐད་གཤིས་འབོལ། །
བལ་པོ་ཧོར་ཕལ་ལས་ཆེ་ཐོད་པ་ཕྱུར། །སེར་སྐྱ་སྲབ་ཅིང་སྙན་ཆ་ཆུང་བ་ཡིན། །སྙེ་ཤང་ལ་སོགས་བོད་རྙིང་ཁ་དོག་ནག །སྐད་གཟེངས་མཐོ་ལ་སྙན་ཆ་ཆེ་བའོ། །ཟལ་མོ་སྒང་པ་ཐོད་པ་ཆུང་ལ་འདལ། །ལོ་མ་ཆེས་ཆེ་མཚམས་སུ་དཀྲི་ཁ་ཅན། །རྒྱུ་ཚོགས་ཆེ་ལ་སྐད་འབོལ་རྒྱང་གྲགས་ཆེ། ༈ །སིལ་སྙན་ལའང་ཧོར་རྒྱ་བལ་བོད་བཞི། །ཧོར་ལ་རིགས་གསུམ་ཛ་ལནྡྷར་དང༌། །ཤིང་ཀུན་མ་དང་སྤྱི་བོ་མཁར་པ་ལས། །ཛ་ལནྡྷ་ར་ཐོད་ཆེ་འཁོར་རྒྱ་ཆུང༌། །རྒྱུ་ཚོགས་ཆེ་ལ་སྐད་སྙན་རྒྱང་གྲགས་ཆེ། །སྤྲེལ་ཐོད་སྦལ་ཐོད་ཇི་ལྟའང་གཞན་པས་ཆུང༌། །ཤང་ཤང་ཧེའུ་རེག་པའི་དུག་ཅན་ཕྱིར། །ཡི་གེའི་བརྡ་ལས་རིན་ཐང་གཞལ་ཞེས་ཟེར། །དཀོན་པའི་ཕྱིར་ན་ནོར་སྣར་གྲགས་པ་ཡིན། །ཤིང་ཀུན་འཁོར་རྒྱར་དཔག་པའི་ཐོད་པ་ཆུང༌། །ཐོད་དབྱིབས་གོང་འདྲ་སྐད་འབོལ་སེར་མདངས་ཆེ། །སྤྱི་བོ་མཁར་ལ་ཐོད་དབྱིབས་གསུམ་དུ་ཡོད། །ར་ཐོད་ཙོང་ལ་སྦལ་ཐོད་ཐོད་ཟུར་ཆག །སྤྲེལ་ཐོད་ཟླུམ་ལ་རྩ་བ་ཉག་པ་སྟེ། །འཁོར་རྒྱ་ཆེ་ཆུང་རན་ལ་འཁྲོལ་ཆ་ཆུང༌། །གསེར་ངམས་ཟིལ་པ་ཆགས་པ་ཚེ་འབྲུམ་ཅན། །ནང་ལ་ཐོ་རིས་གསལ་ཞིང་སྲུབས་རིས་མེད། །ཐོད་པའི་རྩ་ནས་ལོ་མ་ཐུར་སེགས་སུ། །སྦོལ་སོང་མཚམས་ཤང་ཁ་གྱེ་ན་ལངས་ཀྱི། །ཁ་
སྦྱར་བར་མཐའ་མ་རེག་ཙམ་དུ་ཡོད། །རྒྱ་ནག་ཆེ་ཆུང་འཚམས་ལ་ཆུ་ཞིང་གབ། །ཤང་ཁ་བཙན་ཚུགས་ཡོད་པས་འཁྲོལ་བ་དཀའ། །མཐའ་ལ་ཆ་ག་ནང་ལ་ཐོ་རྗེས་གསལ། །སེར་ནག་སྐད་སིལ་ཧོར་ལས་སྙན་ཆ་ཆུང༌། །སྦལ་ཐོད་མ་ཎི་ལནྫར་ཡོང་བ་ཡིན། །བལ་སིལ་སྲབ་དང་བོད་སིལ་རྒྱུ་ཚོགས་ཅན། །རྒྱ་ཧོར་གཉིས་དང་འགལ་བས་རྟོགས་པར་སླ། །དེ་ལས་བོད་སིལ་སྙན་ཆ་ཆེ་བ་ཡིན། ༈ །སྦུབ་ཆོལ་གསུང་རབ་དག་ལས་ཡོངས་མ་གྲགས། །ཕེག་རྡོབ་ལ་དཔགས་རིག་པས་བསྐྲུན་ནམ་སྙམ། །དེ་ཉིད་ལ་ཡང་ཧོར་རྒྱ་བལ་བོད་བཞི། །ཧོར་རིགས་གསུམ་ལས་མཆོག་ཏུ་གྱུར་པ་ནི། །ཛ་ལནྡྷ་ར་ཐོད་ཁྱིམ་ཆེ་ལ་ཕྱུར། །འཁོར་རྒྱ་ཆུང་ལ་ཐོ་རྗེས་ཤིན་ཏུ་གསལ། །གཡའ་ངམས་སེར་ནག་སྐད་སྙན་རྒྱང་གྲགས་ཆེ། །ངོ་བོ་ཆུང་ལ་རྒྱུ་ཚོགས་སྟུག་པ་དང༌། །ཁ་སྒོར་ཟ་ར་ཚགས་སུ་མངོན་པ་ཡིན། །ཤིན་ཀུན་མ་ནི་ཐོད་པ་ཟླུམ་པ་ལ། །ལོ་ཐོད་བར་ཉག་འཁོར་རྒྱ་སྔོན་བས་ཆེ། །རྒྱུ་ཚོགས་ཆེ་ལ་དར་བས་གཞན་དག་གནོན། །སྤྱི་བོ་མཁར་པ་ཐོད་པ་ཆུང་བ་ལ། །ལོ་མ་རན་ཞིང་སྔོན་པས་ཁ་དོག་སྔོ། །མཚན་ཉིད་གཞན་རྣམས་མཚུངས་ཤིང་རྒྱ་གསར་ཀྲོག །བལ་པོ་ཧོར་དུ་བརྫུས་དང་མ་འཛོལ་ན། །ཧོར་གྱི་མཇུག་དང་རྒྱ་ཡི་ཐོག་མ་རུ། །བྱུང་
བའི་རོལ་མོ་ཁྱད་གཞིས་འཕགས་པ་སྟེ། །སྐྱེ་མཆེད་དོད་ལ་ཐོད་ལོ་མཆུ་ཞིང་གབ། །ཐོད་ཁྱིམ་ཟད་མཚམས་རྩ་རིས་བྱེ་ཁ་མངོན། །གཡའ་མདངས་གསེར་ཞག་ཅན་དང་སྔོ་ནག་སོགས། །སྣུམ་བག་གཞན་བས་བལྟ་ན་སྡུག་པ་ལ། །སྐད་སྙན་འཁྲོལ་ཞིང་རྒྱང་གྲགས་ཆེ་བ་ཡོད། །རྒྱ་སིལ་ལེགས་དང་དྲིལ་བུ་ཁྱད་འཕགས་དུས། །སྤུབ་ཆོལ་ཉུང་བས་ཕལ་རྣམས་ཕྱི་ནས་བྱུང༌། །ཤིན་ཏུ་གསར་པ་ཁ་དོག་སྐྱའམ་གནག །རྒྱུ་ཚོགས་ལྡན་ཞིང་སྐད་སིང་སྙན་ཆ་ལྡན། །བལ་ཆོལ་སྦལ་མགོ་མ་དང་སྤྲེལ་ཐོད་མང༌། །ཐོད་པ་ཅུང་ཆུང་དེ་ཡང་ཅིག་ཤོས་སུ། །ཅིག་ཤོས་ཤོང་ཞེས་ཟེར་ཡང་ཆེ་ཆུང་དུ། །མངོན་པ་ཀུན་ལ་ཡོད་པས་མ་ངེས་ལ། །སྲུབས་རིས་གསལ་ཞིང་ལི་མདངས་སེར་སྐྱར་སྣང༌། །བོད་ནི་གྲ་སྦུག་ཉིད་དང་དེ་བཞིན་དུ། ལྷོ་མོན་དག་ནས་གསར་བྱུང་བལ་རྒྱུད་བཟོ། །རྒྱ་གསར་དག་དང་འཁྲུལ་པ་བསྐྱེད་པ་དང༌། །སྔོན་རབས་འཇང་སྦུབ་སོགས་ནི་རྟོགས་བང་སླ། །གང་ཡང་རྒྱུ་ལ་རྒོད་གཡུང་བྱེ་བྲག་གིས། །ཡས་སྦུབ་མས་སྦུབ་ཁྱད་པར་ཆེ་བ་ཡིན། ༈ །ཐུགས་རྟེན་རྒྱ་གར་རྒྱ་ནག་བོད་གསུམ་ལ། །འཕགས་པའི་ཡུལ་ན་པདྨ་སྤུངས་པ་ནས། །མྱང་འདས་བར་གྱི་རྣམ་གྲངས་བརྒྱད་བཤད་ལས། །བོད་དུ་བྱོན་པ་ལྷ་བབས་རྣམ་རྒྱལ་གཉིས། །
དེ་ཡང་པད་སྤུངས་དབུས་དང་ཤར་ནས་དར། །པདྨ་ཁ་སྦྱར་ཞུམ་ལ་བུམ་སྨད་རྒྱས། །རིམ་པས་སྙོང་ལ་བྲེ་ཡང་ཀྲོང་བ་ལ། །ཡ་མཐའ་བྱིལ་མོ་རྩེ་གདུགས་ཐེག་མོའི་སྟེང༌། །ནོར་བུ་པདྨའི་འབུས་ནས་འཐོན་པ་འམ། །ཉི་ཟླས་སྤྲས་པ་ཕལ་ཆེར་ལི་དཀར་མོད། །བྱང་ཆུབ་ཤིང་དང་ཀ་མ་རུ་པའི་རྡོར། །རྡོ་རྗེ་གདན་གྱི་བཀོད་པའི་གནྡྷོ་ལ། །དེ་ཡི་འདྲ་ཅོག་བོད་དུ་བྱས་པའང་སྲིད། །རྒྱ་ནག་པ་ནི་རྒྱ་རག་ཚ་གསེར་ཅན། །བོད་རྙིང་པདྨ་རྐྱང་སྦྱར་གཉིས་པ་མང༌། །མས་མཐར་མུ་ཏིག་སྤྲས་དང་བུམ་སྟོད་རྒྱས། །བྲེ་དཔངས་དམའ་ལ་མ་མཐར་ཟེ་པྲོག་ཅན། །ཆོས་འཁོར་སྲིད་ཐུབ་སྦོམ་ལ་ཆར་ཁེབས་སྦུབ། །རྩེ་མོ་པད་འབུས་ཏོག་གམ་ཉི་ཟླས་སྤྲས། །དབུས་ན་ལྕགས་མངོན་ལྕགས་ལྟེ་མ་རུ་གྲགས། །ཞབས་བགགས་མེ་ལོང་ཅན་ལ་མེ་ཞབས་མ། །ལ་མཚལ་མ་ནི་རྒྱ་གྲམ་དེ་ཡིས་བྱུགས། །བྲེ་ངོས་སྤྱན་སོགས་མདུན་རྟགས་བྱས་པའང་ཡོད། །རྙིང་པ་རྣམས་ལ་ནང་བཞུགས་རིང་བསྲེལ་དང༌། །ཇོ་བོས་རབ་གནས་འཐོར་བ་གཉིས་སུ་ཡོད། །འདྲ་ཅོག་གསེར་མ་བཀའ་གདམས་རག་སྐུར་མཚུངས། །དེ་ལྟར་སྐུ་གསུང་ཐུགས་ཀྱི་རྟེན་རྣམས་ནི། །ལི་ཡི་ཞག་དང་སྐྱེ་མཆེད་ཁོ་ན་ལས། །འདྲིས་ཅན་རྣམས་ལ་རང་བཞིན་ལྷན་སྐྱེས་སུ། །རྣམ་པར་
དཔྱོད་པའི་རྩལ་གསུམ་རྫོགས་མོད་དེ། །དེ་དུས་རྒྱུ་ཡང་འདུ་ཤེས་གཞུངས་པ་དང༌། །དཔྱོད་པ་ཆེ་ཞིང་རྒྱུས་ལ་གོམས་པ་དང༌། །མིག་སྔར་མང་མཐོང་ནན་ཏན་འདྲིས་པ་ལས། །འབྱུང་གིས་དཔྱད་སྟོན་མཐོང་བ་ཙམ་གྱིས་མིན། །འཇིག་རྟེན་དག་ན་ཟོང་གིས་སྤངས་པ་ལས། །ཉམས་ཀྱིས་སྤངས་པ་གོད་ཁ་ཆེ་བའི་ཕྱིར། །རྣམ་པར་དཔྱོད་པའི་མཐུ་ལ་གོམས་པར་མཛོད།། །།བཞི་པ་ཕན་ཡོན་གྱི་སྒོ་ནས་དེ་ལྟ་བུའི་རིན་པོ་ཆེས་སྐུ་གསུང་ཐུགས་རྟེན་འབའ་ཞིག་ལ་རིམ་གྲོ་བསྐྱེད་པའི་ལུང་སྟོན་པ་ནི་འཕགས་པ་སྒྲ་ཆེན་པོ་ལས། ཀུན་དགའ་བོ་གང་ཞིག་གིས་ཁང་པ་བརྩེགས་པ་དེ་ལྟ་བུ་ཞིག་བྱས་ནས་ཕྱོགས་བཞིའི་དགེ་སློང་གི་དགེ་འདུན་ལ་དབུལ་བར་བྱེད་པ་ལས། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁབ་ཙམ་བཙུགས་ནས་གདུགས་རྒྱ་ཤུག་གི་ལོ་མ་ཙམ་འདོགས་པར་བྱེད་པའམ། དེ་བཞིན་གཤེགས་པའི་སྐུ་གཟུགས་མཚོན་གང་ཙམ་ཞིག་བྱེད་ན། ཀུན་དགའ་བོ་བསོད་ནམས་དེ་ལ་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང༌། འབུམ་གྱི་ཆ་དང༌། གྲངས་དང༌། ཆ་དང༌། དཔེ་དང༌། རྒྱར་ཡང་ཉེ་བར་མི་འགྲོའོ། །དེ་ཅིའི་ཕྱིར་
ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཆོས་འདི་ལྟ་བུ་དང་ལྡན་ཏེ། ཚུལ་ཁྲིམས་དཔག་ཏུ་མེད་པ་དང༌། ཏིང་ངེ་འཛིན་དཔག་ཏུ་མེད་པ་དང༌། ཤེས་རབ་དཔག་ཏུ་མེད་པ་དང༌། རྣམ་པར་གྲོལ་བ་དཔག་ཏུ་མེད་པ་དང༌། རྣམ་པར་གྲོལ་བའི་ཡེ་ཤེས་དཔག་ཏུ་མེད་པ་དང་ལྡན་པའི་ཕྱིར་རོ། །ཞེས་དང༌། ཀུན་དགའ་བོ་ལུས་འཕགས་མོའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་ཕ་རྒྱུན་དུ་ཞུགས་པ་བསད་ནས་དེ་བཞིན་གཤེགས་པའི་སྐུ་གདུང་ལ་མཆོད་པ་བྱ་བའི་ཕྱིར་སྐུ་གདུང་གི་བརྒྱད་ཆ་ལ་བཀུར་སྟིར་བྱ་བ་དང༌། བླ་མར་བྱ་བ་དང༌། རི་མོར་བྱ་བ་དང༌། མཆོད་པར་བྱ་བ་དང༌། བརྗེད་པར་བྱ་བ་དང༌། གསོལ་བར་བྱ་བ་ལ་བརྩོན་པར་འགྱུར་རོ། །ཞེས་སངས་རྒྱས་ཀྱིས་བསྔགས་པའི་ལས་དེ་དེས་བྱས་པས་སེམས་ཅན་དམྱལ་བར་ལན་ཅིག་སོང་ནས་ལས་དེ་ཉིད་དང་དགེ་བའི་རྩ་བ་དེ་ཉིད་དང༌། སྔོན་ལེགས་པར་སྤྱད་པ་དེ་ཉིད་ཀྱིས་དེ་ནས་ཐར་ནས་བསྐལ་པ་ཉི་ཤུར་ལོག་པར་ལྟུང་བར་མི་འགྱུར་ལ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། ཡང་དག་པར་ཁྱིམ་ནས་ཁྱིམས་མེད་པར་རབ་ཏུ་བྱུང་ནས་རང་བྱང་ཆུབ་མངོན་དུ་བྱེད་པར་འགྱུར་ཏེ། རང་
སངས་རྒྱས་རྣམ་པར་རྒྱལ་བའི་སྡེ་ཞེས་བྱ་བར་འགྱུར་རོ། །ཞེས་པ་ལ་སོགས་པས་མཚོན་ཟད་མི་ཤེས་པ་ཡོད་དོ། །རྙེད་ལ་ཁེངས་ཤིང་འབྱོར་ན་བརྐམ་པ་སྡུག་བསྔལ་བདེན་པའི་ས་བོན་ཏེ། །བྱིས་པ་རྣམས་ཀྱིས་སྦྱིན་འབྲས་སྔོན་སོང་དེ་ཡང་གློག་སྤྲིན་ཟློས་གར་ལས། །དཔེར་བྱ་གཉིས་པ་ཡོད་མིན་རིག་པ་འཕགས་པ་རྣམས་ཀྱི་རྗེས་ཐོབ་ནི། །གསེར་དང་བོང་བ་རིན་ཐང་མཉམ་པ་འཁོར་གསུམ་ཡང་དག་ཕྱོགས་སུ་ལྷུང༌། །ཆོག་ཤེས་དམ་པའི་གན་མཛོད་ལ་དབང་རྣམས། །རྙེད་ལ་དགའ་མགུར་མི་ལྡང་མི་རྩོལ་ཡང༌། །གནས་མ་ཡིན་པར་དེངས་སུ་མི་འཇུག་པ། །རྣམ་སྨིན་ཟླ་ཞུན་ཁམས་སུ་བསྐྲུན་ཕྱིར་ཡིན། །བརྒྱ་ཕྲག་ལྔ་ཡི་གླང་པོའི་ཐུར་སྲང་གིས། །བཏེག་པའི་དངུལ་དཀར་ཞུན་མའི་མཆོད་སྡོང་ནི། །བཙོ་སྦྱངས་རིན་ཆེན་མང་པོས་ཁུར་བཟོད་པའི། །ནོར་བུའི་རྣ་ཆ་གཡོ་བའི་དུས་ཀྱི་གཏམ། །ཞེས་པའང་རྫོགས་ཆེན་པ་རང་བྱུང་རྡོ་རྗེས་རྒྱལ་བསྟན་ཡུན་དུ་གནས་པ་དང༌། འགྲོ་བའི་བདེ་སྐྱིད་སྤེལ་བའི་སླད། དངུལ་སྲང་ལྔ་བརྒྱའི་རྒྱུ་ཚོགས་ལས་བྱང་ཆེན་མཆོད་སྡོང་གསར་དུ་བསྐྲུན་ནས་རྒྱལ་དབང་པདྨའི་ལུང་བསྟན་བཞིན་བསམ་ཡས་བར་ཁང་དུ་བཞུགས་སུ་གསོལ་བའི་ཚེ་སྦྱར་བའོ། །གཏམ་ཚོགས་ལེའུ་བཞི་པའོ།། །།
གཏམ་ཚོགས་ལེའུ་ལྔ་པ། སྙན་ངག་གི་གཏམ་རིན་པོ་ཆེའི་གཏེར།
སྙན་ངག་གི་གཏམ་རིན་པོ་ཆེའི་གཏེར་ཞེས་བྱ་བ། །རྒྱ་གར་སྐད་དུ། ཀ་བེཿཤཱ་སྟྲ་རཏྣ་ནི་དྷི་ནཱམ། བོད་སྐད་དུ། སྙན་ངག་གི་གཏམ་རིན་པོ་ཆེའི་གཏེར་ཞེས་བྱ་བ། སྨྲ་བའི་སེང་གེ་ལ་ཕྱག་འཚལ་ལོ། །ཚངས་པའི་བུ་མོ་ལུས་མཛེས་མ། །ངག་གིས་སེམས་ཅན་ཀུན་ཡིད་འཕྲོག །དབྱངས་ཅན་མ་ཀྱི་དེ་རིང་འདིར། །བདག་གི་མགྲིན་པའི་དཔལ་དུ་བཞུགས། །ཞེས་བརྗོད་ནས་སྣང་བ་ཚིག་ཏུ་ཤར་བའི་རྟེན་འབྲེལ་གྱི་སྒོ་ནས་དཔལ་ལྡན་དཎྜིའི་སྙན་དངགས་ཀྱི་ལེའུ་གཉིས་པར་སྔོན་གྱི་མཁས་པའི་ལུགས་སུ་ས་བཅད་བསྡུས་པའི་དོན་རྒྱན་སོ་ལྔའི་དཔེ་བརྗོད་བློ་གསལ་རིག་པ་ལ་དགའ་བའི་ལས་དང་པོ་པ་དག་སྤྲོ་བར་བྱེད་པའི་ཕྱིར། ཤིན་ཏུ་གོ་བདེ་བར་བརྗོད་པར་བྱ་བ་ལ། དང་པོ་ཡོན་ཏན་རང་བཞིན་བརྗོད་པའི་རྒྱན་ནི་སྒྲོ་མ་བཏགས། སྐུར་པ་མ་བཏབ་པར་བརྗོད་པ་ལ་ཟེར་གྱིས། དཔེ་ནི། དེ་རིང་ཀ་བ་མིག་ལམ་དུ་མངོན་པས་རྐྱེན་སྦྱར་ནོར་འཛིན་ཡངས་པའི་ལྟོ་བ་ན། ལྗོན་པ་ཡན་ལག་རྨྱང་བ་ཡང༌། །འདི་ན་ཁང་བུ་བརྩེགས་པ་བརྒྱའི། །སྲོག་གི་ཟུངས་སུ་ཆས་ལ་ལྟོས། །ཞེས་སོ། །གཉིས་པ་དཔེའི་རྒྱན་ནི། དཔེ་དོན་གཉིས་འདྲ་ཡུལ་དང་འདྲ་ཆོས་མཚུངས་པ་ལ་སྦྱོར་བ་དཔེར་ན་སྨྱུག་མ་མཐོང་བས་མཚམས་སྦྱོར། ཆུ་ཤིང་བཞིན་དུ་ཀུན་ནས་དྲང༌། །དཱུར་ཝ་ལྟ་བུའི་ཚོགས་པ་དཀོན། །མརྒད་གསར་པའི་འདབ་མ་ཅན། །
སྨྱུག་མ་ཁོ་ནའི་ཁྱད་པར་རོ། །ཞེས་པ་ལྟ་བུའམ། ཡང་ན། རྐང་པས་འཐུང་བའི་ལང་ཚོ་ནི། །པདྨོ་གཞོན་ནུར་ཤིན་ཏུ་མཚོན། །འདབ་མ་ཨུཏྤལ་སྔོན་པོར་མཚུངས། །ཚིགས་པ་མཛེས་མའི་གདུ་བུ་བཞིན། །ཞེས་པ་ལྟ་བུ་སྟེ་གོང་མ་དངོས་པོའི་དཔེ་དང༌། འོག་མ་ཆོས་དཔེར་སྦྱར་རོ། །གསུམ་པ་གཟུགས་ཅན་གྱི་རྒྱན་ནི། དཔེ་དོན་གཉིས་སྔ་མ་ལྟར་འདྲ་ཡུལ་འདྲ་ཆོས་མཚུངས་པའི་འདྲ་དཔེ་ཙམ་དུ་མ་བཀོད་པར་དོན་དེ་ཀ་དཔེའི་གཟུགས་སུ་བཀོད་པ་སྟེ་འདི་ལྟར། ཐུབ་དབང་ཁྱོད་ཀྱི་ལུང་རྟོགས་གདོང་ལྔ་པས། །སྣ་ཚོགས་ཐེག་པའི་གཡུ་རལ་སྤྲུགས་པ་ན། །འཇིག་ཚོགས་སུམ་བརྒྱར་སྨྲ་བའི་རི་དྭགས་ཀུན། །རྟག་ཆད་ཚང་ཚིང་སྟུག་པོའི་ནགས་སུ་བྲོས། །ཞེས་པ་ལྟ་བུའོ། །བཞི་པ་གསལ་བྱེད་ཀྱི་རྒྱན་ནི། གང་བརྗོད་པར་བྱ་བའི་གཙོ་བོའི་ཁྱད་གཞི་དེ་ཁྱད་ཆོས་དེའི་གནས་སྐབས་ཀྱི་བརྗོད་དོན་ཐམས་ཅད་དང་འབྲེལ་བར་སྦྱར་ཞིང༌། དེའང་ཐོག་མཐའ་བར་གསུམ་གང་དུ་ཡོད་པ་དེ་ལ་དེ་དང་དེའི་གསལ་བྱེད་ཀྱི་མིང་བཏགས་པ་སྟེ། དཔེར་ན། རྒྱལ་པོའི་མདུན་སར་བཙུན་མོ་གཞོན་ནུ་དང༌། རྨ་བྱའི་མགྲིན་པར་སྤུ་སྡུག་འཇའ་ཚོན་རིས། །སྐྱེད་མོས་ཚལ་དུ་པད་དཀར་འཛུམ་པ་རྣམས། །སྲེད་ལྡན་ཀུན་གྱི་ཡིད་ལ་ཆོམ་རྐུན་བྱེད། །ཅེས་པ་ལྟ་
བུའོ། །ལྔ་པ་བསྐོར་བ་ཅན་ནི། རྐང་པ་བཞིའི་ཐོག་མཐའ་བར་གསུམ་ཅི་རིགས་པར། བརྗོད་བྱའི་དོན་འདྲ་བའི་རྗོད་བྱེད་ཀྱིས་བསྐོར་བ་སྟེ། དཔེར་མཚོན་ན། རྡོས་བཅས་ལུས་ཀྱི་འབྱུང་བ་དག་པས་དབང་པོའི་གཞུ་ཡང་འདི་ལས་གང༌། །འགྲོ་འོང་རླུང་གི་རྟེན་འབྲེལ་འགགས་པས་སྒྲ་དང་བྲག་ཅའི་ངག་མ་ཡིན། །སྣ་ཚོགས་རྟོག་པའི་དྲི་མས་ཡོངས་བཏང་དེ་ཡི་ཐུགས་ལ་གསལ་འགྲིབ་བྲལ། །མཚོ་ལས་འཁྲུངས་པའི་རྡོ་རྗེ་གཞོན་ནུའི་རྣམ་ཐར་དབང་པོའི་རྡོ་རྗེས་མིན། །ཞེས་པ་ལྟ་བུའོ། །དྲུག་པ་འགོག་པའི་རྒྱན་ནི། དགག་པའི་ཆོས་རང་བཞིན་གྱི་ཡོན་ཏན་ལྟ་བུ་ཞིག་སྔོན་དུ་བཞག་ནས་དམིགས་བསལ་དེ་ཉིད་སྐྱོན་གྱི་རྣམ་པར་འགོག་པ་སྟེ། དཔེར་ན། འཛུམ་པའི་ཞལ་གྱིས་གཞན་ཡིད་འཕྲོག་ན་བཅོས་མའི་ཟུར་མིག་ལྟ་ངེས་ཅི། །རང་བཞིན་མཛེས་པའི་སྐེད་པ་ཕྲ་ན་སྣ་ཚོགས་རྒྱན་གྱིས་ཅི་ཞིག་བྱ། །ཨུཏྤལ་ཡི་དྲི་བསུང་འཐུལ་ན་བུར་ཆུས་བཀྲུས་ལ་དོན་ཡོད་མིན། །དེ་ལ་འཁྱུད་རྒྱའི་ཞགས་པས་མི་འཆིང་ཕྱིན་ཆད་རྙིངས་པའི་ཁུར་མི་བཟོད། །ཅེས་པ་ལྟ་བུའོ། །བདུན་པ་དོན་གཞན་བཀོད་པ་ནི། བསྒྲུབ་བྱའི་དངོས་པོ་ཕྱོགས་མཚུངས་པ་ཞིག་སྔོན་ལ་སྣང་མེད་དུ་བཀོད་ནས། དེ་ནས་སྒྲུབ་བྱེད་ཀྱི་རང་བཞིན་ནུས་པ་ཆེ་བ་ཞིག་བརྗོད་པ་སྟེ། དཔེར་
ན། འཇིག་རྟེན་མེས་པོ་ཚངས་པ་ཡང༌། །ལས་ཀྱི་ཕྱི་བཞིན་གཞན་དུ་སོང༌། །སྐྱེས་མཐའ་འཆི་བར་ངེས་པ་འདིར། །བྲོས་ཀྱང་ཐར་བ་མ་ཡིན་ནོ། །ཞེས་པ་ལྟ་བུའོ། །བརྒྱད་པ་ལྡོག་པ་ཅན་ནི། དང་པོའི་ཚིག་ལ་དཔེ་དོན་ཆོས་ཉིད་མཚུངས་པར་བསྟན་ནས། དོན་ལ་མི་མཚུངས་པའི་ཁྱད་ཆོས་ཀྱིས་བསྒྲུབ་ཕྱིར་གང་ཞིག་འཇིག་རྟེན་ན་གྲགས་ཆེ་བའི་རྒྱུ་འགའ་ཟློས་ནས། དེའི་རང་བཞིན་གསལ་བར་སྟོན་པ་སྟེ། དཔེར་ན། མཛེས་མའི་བཞིན་དང་ཀུན་དའི་འཛུམ། །ཤིན་ཏུ་མཛེས་པར་མཚུངས་མོད་དེ། །ཀུནྡ་ཉི་མའི་འོད་ཀྱིས་ཟུམ། །མཛེས་མ་དེ་ཚེ་ལྷག་པར་རྔོམ། །ཞེས་པ་ལྟ་བུའོ། །དགུ་པ་སྲིད་པ་ཅན་གྱི་རྒྱན་ནི། རྒྱུ་མེད་པར་ཡང་འབྲས་བུ་སྲིད་པར་སྟོན་ཕྱིར་འཇིག་རྟེན་ན་དེ་དང་ཆོས་མཚུངས་པའི་དཔེ་འགའ་ཞིག་ཟློས་ནས་བརྗོད་པ་སྟེ། འདི་སྐད་དུ། འདུ་ཤེས་མེད་པའི་གླིང་བུའི་སྒྲ་ཡིས་རི་དྭགས་རྣམས་ཀྱང་མགོ་བོ་སྐོར། །སེམས་མེད་བེམ་པོའི་པི་ཝང་དེ་ནི་གཏམ་གྱི་རྗོད་པ་སྙན་པར་སྒྲོག །སུས་ཀྱང་མ་བྲིས་རྨ་བྱའི་རི་མོས་ཚོན་རྣམས་ཀུན་གྱི་བཀྲག་མདངས་འཕྲོག །དྲི་ཟའི་ན་ཆུང་ཤིན་ཏུ་མཛེས་པ་མ་བཀུག་པར་ཡང་འདིར་བྱུང་ངོ༌། །ཞེས་པ་ལྟ་བུའོ། །བཅུ་པ་བསྡུས་པ་བརྗོད་པ་ནི།
བརྗོད་དོན་གང་ཡིན་ལས་ཕྱིར་ཕྱོགས་པ་ཞིག་ཞེ་འདོད་དུ་སྦས་ནས། ངག་གིས་དངོས་པོ་དེ་ལྟར་མ་ཡིན་པ་ཞིག་གཡོ་སྒྱུའི་ཚུལ་དུ་འགོད་པ། གང་ཚེ་ཟླ་བ་བག་ལ་ཞ། །ཀུནྡའི་ཚལ་ཀྱང་ཟུམ་གྱུར་པས། །དེ་དག་དགའ་བར་མི་བྱེད་ཀྱང༌། །མཁའ་ལ་རྟ་བདུན་རྒྱལ་པོ་མཛེས། །ཞེས་སོ། །བཅུ་གཅིག་པ་ཕུལ་བྱུང་ནི། གང་ཞིག་བརྗོད་བྱར་གྱུར་པ་དེ་འཇིག་རྟེན་ན་ཡོད་པའི་དཔེ་དེ་དག་གིས་མཚོན་པར་མི་ནུས་པས། ཤིན་ཏུ་ཁྱད་པར་དུ་འཕགས་པའི་རང་བཞིན་དུ་བརྗོད་པ་སྟེ། དཔེར་ན། སྲིད་ན་ཟླ་བ་རྣམས་མཛེས་པ། །དེས་ཀྱང་ཁྱོད་ཞལ་མི་མཚོན་ཏེ། །ཁྱོད་ཀྱི་བཞིན་རས་འཛུམ་པ་དེར། །ཆགས་ནས་ཚངས་པའང་གདོང་བཞིར་གྱུར། །ཅེས་པ་ལྟ་བུའོ། །བཅུ་གཉིས་པ་རབ་རྟོག་གམ་རབ་བཏགས་ནི། དཔེར་ན་འཇིག་རྟེན་ན་བདག་པོ་དགའ་བར་བྱ་བའི་སླད་དུ་བོང་བུ་ལའང་དྲེའུའི་མིང་དུ་བརྗོད་པ་ལྟར་རྟོག་པས་རྣམ་པར་སྒྲོ་བཏགས་ནས་དོན་ལ་མི་གནས་པའི་བསྔགས་པ་བརྗོད་པ་སྟེ། དཔེ་ནི། གང་སྐུ་མཛེས་ཤིང་ཡོན་ཏན་རྨད་བྱུང་གཏམ་གྱི་ངང་ཚུལ་གསར་པ་དེ། །གླིང་བཞིའི་སྣང་བྱེད་ཉི་ཟླ་ཟུང་དང་སྤྱན་སྐྱེས་བདུད་རྩིའི་ཟས་ཅན་གྱིས། །སྲིད་པ་སུམ་ཅུ་རྩ་གཅིག་ཀུན་ཏུ་ཅ་ཅོའི་ངག་གིས་བསྒྲགས་པ་ལས། །ཚངས་པའི་བུ་མོ་དབྱངས་ཅན་མ་ཡང་འཁུན་པའི་ཞུ་བ་འབུལ་བ་བཞིན། །ཞེས་སོ། །བཅུ་
གསུམ་པ་རྒྱུའི་རྒྱན་ནི། ཤེས་བྱེད་ཀྱི་རྒྱུ་ལས་བསྒྲུབ་བྱའམ། སྐྱེད་བྱེད་ཀྱི་རྒྱུ་ལས་འབྲས་བུ་དེ་འདྲ་བ་འགྲུབ་པར་སྟོན་པ་སྟེ། དཔེར་མཚོན་ན། ཁྱོད་ཞལ་མཛེས་པའི་ཟུར་མིག་ལས། །དགའ་བའི་མྱུ་གུ་གསར་པ་དང༌། །ཆུ་སྐྱེས་གཞོན་ནུའི་གེ་སར་ལས། །སྦྲང་རྩིའི་དགའ་སྟོན་ཅིར་ཡང་སྤྱིན། །ཞེས་པ་ལྟ་བུའོ། །བཅུ་བཞི་པ་ཕྲ་མོའི་དཔེ་རྒྱན་ནི། སྔོན་དུ་བློ་བཏང་བའམ། མ་གཏང་ཀྱང་རུང་སྟེ། ཐབས་ཀྱི་རྟེན་འབྲེལ་དེ་བརྡ་དང་རྣམ་འགྱུར་ཁྱད་པར་ཅན་གྱི་སྒོ་ནས་དོན་གཞན་གོ་བར་སྟོན་པའི་ངག་སྟེ། འདི་ལྟར། མཚར་སྡུག་མིག་གི་བདུད་རྩི་ཅན། །ཚངས་པའི་བུ་མོ་ལུས་མཛེས་མས། །ངག་གི་འདོད་ལ་འཇོ་བའི་ཚུལ། །རྒྱུད་མངས་ཟོལ་གྱིས་དོན་དུ་གཉེར། །ཞེས་སོ། །བཅོ་ལྔ་པ་ཆའི་རྒྱན་ནི། གང་ཞིག་བརྗོད་བྱའི་དངོས་པོ་གསལ་པོར་མི་བརྗོད་པར་ཟོལ་གྱིས་བསྒྲིབས་པའི་ངག་གིས་སྦྱོར་བ་སྟེ། དཔེར་ན། གཡོན་ཅན་ཟླ་བས་རང་གི་བཞིན། །འཛད་པའི་ཆོས་ལ་ཡིད་ཞུམ་པ། །མཛེས་པའི་ཟོལ་གྱིས་བསྒྲིབ་པའི་ཕྱིར། །གསར་དུ་ཉ་བའི་རྣམ་འགྱུར་སྟོན། །ཅེས་པ་ལྟ་བུའོ། །བཅུ་དྲུག་པ་རིམ་ཅན་གྱི་རྒྱན་ནི། རྗོད་བྱེད་སྔ་མ་སྔ་མས་གོ་ཕྱེ་ནས་ཕྱི་མ་རྣམས་རིམ་པ་བཞིན་དུ་གསལ་བར་བྱས་ནས་གོ་བར་བྱེད་པ་སྟེ། དཔེར་
ན། མཛེས་མའི་གདོང་ལ་ཨུཏྤལ་མིག །མཁུར་ཚོས་ལི་ཁྲིའི་ཐིག་ལེ་ཅན། །དེ་ཡི་བཞིན་དཔལ་ཁོ་ན་ཡིས། །དཔའ་བོ་ཀུན་གྱི་བསྙེམས་པའང་འཕྲོགས། །ཞེས་པ་ལྟ་བུའོ། །བཅུ་བདུན་པ་དགའ་བའི་རྒྱན་ནི། བརྗོད་བྱ་དེའི་ངག་ཐོས་པ་ཙམ་གྱིས་ཡིད་ལ་དགའ་བ་ལྷང་གིས་འཆར་བའི་ཚིག་ཏུ་སྟོན་པ་སྟེ། དཔེར་ན། སྐྱེད་མོས་ཚལ་ན་རྨ་བྱ་གཞོན་ནུའི་གྲོགས་བྱས་ཤིང༌། །ལང་ཚོས་མྱོས་པའི་སྨིན་ལེགས་ལག་པའི་གདུ་བུ་འཁྲོལ། །ཤིན་ཏུ་ཆགས་པའི་ཟུར་མིག་གཡོ་བའི་ཞགས་པ་དེས། །འཇིག་རྟེན་མེས་པོའི་དཔའ་བའི་ངང་ཚུལ་འཕྲོགས་པ་སྙམ། །ཞེས་པ་ལྟ་བུའོ། །བཅོ་བརྒྱད་པ་ཉམས་ལྡན་གྱི་རྒྱན་ནི། གང་ཞིག་སྨྲ་བར་མཛེས་པའི་ངག་དེས་བསྙད་པ་དང་མཚུངས་པར་ཉན་པ་པོའི་བློ་ཡུལ་དུ། སྒེག་ཆོས་དང༌། དཔའ་ཉམས་དང་། དགོད་བྲོ་བ་ལ་སོགས་པའི་ཉམས་འཆར་ནུས་པ་ཞིག་སྟེ། དཔེར་ན། སྨྱོ་ཕྱེད་ཆང་གིས་སྤྲོ་བ་བསྐྱེད་པའི་བཞིན་བཟང་གིས། །དཔའ་བའི་ངང་ཚུལ་ཇི་ལྟར་བསྟན་ཀྱང་བསྙེམས་མི་དགོས། །རང་མཚང་སྟོན་པའི་མེ་ལོང་ཉིད་དུ་དེ་གྱུར་པས། །བབ་ཅོལ་གནས་ལ་རིངས་པར་ཆས་པ་བཞིན། །ཞེས་པ་ལྟ་བུའོ། །བཅུ་དགུ་པ་གཟི་བརྗིད་ཅན་གྱི་རྒྱན་ནི། རྗོད་བྱེད་ཀྱི་ངག་དེ་ཐོས་པ་
དང༌། སྨྲ་བ་པོའི་གཟི་བརྗིད་ཁྱད་པར་ཅན་དུ་གོ་བར་བྱེད་པའི་གཏམ་གྱིས་སྦྱོར་བ་སྟེ། དམར་སེར་ལི་ཁྲིའི་ཚོན་གྱིས་བསྐུས་པའི་ལང་ཚོ་བདོ་དེའི་དཔལ་གྱི་མགུར། །ཇི་སྙེད་མཁྱེན་པའི་རྫ་རྔ་བརྡུང་ཞིང་རྨོངས་པའི་དྲྭ་བ་གཅོད་པའི་བརྡར། །ཤེས་རབ་རལ་གྲིའི་ཕྱག་རྒྱ་གདེངས་པ་མཐོང་བའི་མོད་ལ་དེ་ཡི་བྱིན། །བློ་གསལ་སྙིང་ལ་ཞུགས་པའི་གཟི་བྱིན་མ་བཟོད་ནག་མོའི་ཡུལ་ལྷོ་ཕྱོགས་པའི་པཎྜི་ཏ་ཁོལ་ཀྱང་བྲོས། །ཞེས་པ་ལྟ་བུའོ། །ཉི་ཤུ་པ་རྣམ་གྲངས་བརྗོད་པའི་རྒྱན་ནི། ཡིད་ལ་བསམ་པ་དེ་མངོན་གྱུར་དུ་མ་བརྗོད་པའི་སྒོ་ནས་དོན་ཡིད་ཐོག་ཏུ་འབབ་པར་བྱ་བའི་ཐབས་སུ། རྣམ་པ་གཞན་ལ་ཁ། གཡར་བ་ལྟ་བུའི་ཟོལ་གྱིས་སྒྱུ་ཐབས་སུ་སྨྲ་བའི་ངག་སྟེ། དཔེར་ན། རྟ་ལྗང་ཆུ་ལྷའི་བུ་མོ་དང༌། །དགའ་མགུར་སྤྱོད་ཕྱིར་ཕྱོགས་དེར་སོང༌། །བདག་ཀྱང་དེ་རིང་གཉིད་བྲོ་བས། །རེ་ཞིག་མལ་དུ་མནལ་བར་བྱེད། །ཅེས་པའོ། །ཉེར་གཅིག་པ་ཀུན་ཏུ་ཕན་པའི་རྒྱན་ནི། བྱ་བའི་ལས་འགའ་ཞིག་བརྩམ་པ་ལ་བསོད་ནམས་ཀྱི་མཐུའམ། །སྟོབས་ཀྱིས་འབད་པ་མེད་པར་སྒྲུབ་བྱེད་ཇི་བཞིན་པར་ཚོགས་པར་སྟོན་པའི་ངག་སྟེ། དཔེ་ནི། བསོད་ནམས་འདི་ཡི་ནུས་མཐུ་ནི། །རྩོལ་བའི་གྲོགས་ཀྱིས་མ་བྱས་ཏེ། །ཞིང་པ་གདུང་བས་ཉེན་པའི་ཚེ། །སྤྲིན་གྱི་གསེབ་ནས་ཆུ་རྒྱུན་བྱུང༌། །ཞེས་པའོ། །ཉེར་གཉིས་པ་རྒྱ་ཆེ་བའི་རྒྱན་ནི། ལྷག་པའི་བསམ་པའམ། །འབྱོར་པ་སྟོབས་ཆེ་
བའི་རང་བཞིན་སྟོན་པ་སྟེ། དཔེར་ན། ཆོས་དང་འདོད་ནོར་ཐར་པ་སྟེ། །རྣམ་བཞིས་གཞན་ལ་ཕན་པའི་སེམས། །ནམ་མཁའི་ཁྱོན་ལ་འགྲན་པ་དེས། །མཐོ་རིས་བུ་མོའི་སྐས་ལ་འཛེགས། །ཞེས་པ་ལྟ་བུའོ། །ཉེར་གསུམ་པ་བསྙོན་དོར་ནི། བརྗོད་བྱའི་ངོ་བོ་དེ་འདི་ལས་མ་ཡིན་ནོ་ཞེས་པའི་ངག་གིས་བསྙོན་ནས། །དེ་ལས་ཆོས་ཉིད་གཞན་དུ་དོར་ནས་སྟོན་པ་སྟེ། དཔེར་ན། མཚན་དཔེས་འཁྱུད་པའི་ལང་ཚོ་མཛེས་པ་སངས་རྒྱས་མ་ཡིན་ཚོགས་གཉིས་རྫོགས་པའི་འབྲས་བུ་སྟེ། །རྩྭ་མཆོག་གྲོང་དུ་མྱ་ངན་འདས་པ་འགྲོངས་པ་མ་ཡིན་དགོངས་པ་དབྱིངས་སུ་འཁྱིལ་པའི་ཚུལ། །སྡེ་སྣོད་གསུང་རབ་རྒྱ་མཚོ་བཞག་པ་ཞལ་ཆེམས་མ་ཡིན་ལུང་དང་རྟོགས་པའི་བསྟན་པ་ཡིན། །ཚིག་གིས་སྦྱོར་བ་ཟབ་མོ་འདི་ནི་དྲང་དོན་མ་ཡིན་ངེས་དོན་རྟོགས་པའི་ངག་གིས་བསྔགས། །ཞེས་སོ། །ཉེར་བཞི་པ་སྦྱར་བའི་རྒྱན་ནི། རྐང་པ་གཅིག་ཉིད་ལའང་བསྟན་བྱའི་དོན་གཉིས་གཉིས་སོགས་ཡོད་པའི་ངག་སྟེ། དཔེར་ན། གང་ཚེ་མུན་པའི་དགྲ་བོ་འཇོམས་ཤིང་པདྨའི་ཚལ་ཀྱང་རབ་ཏུ་དགའ། །སྐྱེ་རྒུ་ཀུན་ལ་བལྟ་བའི་མིག་སྦྱིན་གྲང་བའི་རེག་བྱ་དེ་ཡང་བཤུས། །ཤར་ནུབ་གཉིས་ཀྱི་བྱེ་བྲག་ཕྱེ་ཞིང་ནམ་མཁའ་ལ་ཡང་རྒྱན་དུ་བྱས། །གླིང་བཞི་ཀུན་གྱི་བདག་གིར་བྱེད་པའི་སྣང་བྱེད་དྲང་སྲོང་བདུན་གྱིའང་གཙོ། །ཞེས་པའོ། །ཉེར་ལྔ་པ་ཁྱད་པར་བརྗོད་པའི་རྒྱན་ནི། རྒྱུ་འགའ་ཞིག་རྨད་དུ་བྱུང་བར་བསྟན་པའི་ཕྱིར།
རྒྱུའི་ཁྱད་པར་གྱིས་ཆོས་དང༌། ཡོན་ཏན་དང༌། བྱ་བའི་རང་བཞིན་འགའ་མ་ཚང་ཡང་འབྲས་བུ་སྐྱེད་པར་སྟོན་པའི་ངག་སྟེ། འདི་ལྟར། ལུས་མེད་རྣམས་ཀྱིས་བསྔགས་པ་བརྗོད་པའི་བཞིན་བཟང་མར། ཞགས་པ་མེད་ཀྱང་ཟུར་མིག་གཡོ་བའི་ལྕགས་ཀྱུ་དེས། །འདོད་སྲེད་ཅན་གྱི་ཡིད་ལ་རྣམ་པར་བཏབ་པ་ཡི། །ནུས་པའི་ཁྱད་པར་དེ་ལ་སུས་ཀྱང་འགོངས་པ་མེད། ཅེས་པ་ལྟ་བུའོ། །ཉེར་དྲུག་པ་མཚུངས་པར་སྦྱོང་བའི་རྒྱན་ནི། གང་བརྗོད་པར་བྱ་བའི་དོན་དེ་ལས་ཆེས་འཕགས་པ་ཞིག་དང༌། མ་ཡིན་བཞིན་དུ་མཚུངས་པར་སྦྱོར་བའི་རང་བཞིན་ཏེ། །དཔེར་ན། ཁྱོད་ཐུགས་ཀློང༷་ཆེན༷་མེ་ལོང་ངོགས། །ཤེས་བྱ་རབ༷་འབྱམ༷ས་ཀུན་རྫོགས་པས། །འཛམ་གླིང་མཛེས་པའི་རྒྱན་དྲུག་དང༌། །ཁྱད་པར་འགའ་ཡང་ཡོད་མ་ཡིན། །ཞེས་པ་ལྟ་བུའོ། །ཉེར་བདུན་པ་འགལ་བའི་རྒྱན་ནི། ངོ་བོའམ། རྫས་ཀྱི་ཆོས་འགལ་བ་གཉིས་རྣམ་པ་གཅིག་ལ་མི་འགལ་བར་སྟོན་པ་སྟེ། དཔེར་ནི། ལུས་ཀྱི་རྣམ་འགྱུར་མདའ་ལྟར་དྲང་ཡང་ཡིད་ཀྱི་རྣམ་རྟོག་གཞུ་ལྟར་འཁྱོག །བཞིན་རས་ཟླ་བའི་རྗེས་སུ་འགྲོ་ཡང་སྨིན་མ་བུང་བ་བཞིན་དུ་གནག །གཡོ་སྒྱུ་སུམ་ཅུ་རྩ་གཉིས་ཤེས་ཀྱང་སྒྱུ་རྩལ་དྲུག་ཅུ་ཀུན་ལ་རྨོངས། །བདུད་ཀྱི་བུ་མོས་ཐམས་ཅད་བསླུས་ཀྱང་ཟས་གཙང་སྲས་ལ་ནུས་པ་རྡུགས། །ཞེས་པ་ལྟ་
བུའོ། །ཉེར་བརྒྱད་པ་སྐབས་མིན་བསྟོད་པའི་རྒྱན་ནི། ཆོས་ཉིད་ཇི་བཞིན་པས་བསྟོད་པའི་སྐབས་མ་ཡིན་ཡང་རང་བཞིན་བསྒྱུར་ནས་བསྟོད་པ་སྟེ། དཔེ་ནི། གང་ཚེ་ཟླ་བ་གཟས་ཟིན་པ། །དེ་ཚེ་སྣང་བྱེད་གཞན་མེད་པས། །ཀུན་གྱིས་ཟླ་བའི་ཡོན་ཏན་མཐོང༌། །ཁྱོད་ལ་སྒྲ་གཅན་དྲིན་དུ་ཆེ། །ཞེས་པས་མཚོན་ནོ། །ཉེར་དགུ་པ་ཟོལ་བསྟོད་ནི། བརྗོད་བྱའི་དངོས་པོ་ལ་བསྟོད་པའི་གནས་སྐབས་ཇི་བཞིན་པ་མ་མཆིས་ཀྱང་སྐྱོན་ཡོན་ཏན་དུ་བསྒྱུར་ནས་བསྟོད་པའི་ངག་སྟེ། དཔེར་ན། ཤིན་ཏུ་མྱོས་པའི་གླང་ཆེན་མི། །དཔའ་ཡང་དེས་པ་ཡོན་མིན་ཏེ། །གཡུལ་ངོར་དགྲ་བོ་འཇོམས་པ་ལ། །ཁྱོད་ལ་འགྲན་ཟླ་འགའ་ཡང་མེད། །ཅེས་སོ། །སུམ་ཅུ་པ་ངེས་པར་བསྟན་པའི་རྒྱན་ནི། བསྟན་པར་བྱ་བའི་དོན་དེ་ལས་ངང་ཚུལ་ལྡོག་པ་ཞིག་བསྟན་ཡང༌། དེ་དང་མཚུངས་པའི་བདག་ཉིད་ཅན་དུ་གོ་བའི་ངག་སྟེ། དཔེར་ན། བུང་བ་པདྨ་ལ་དགའ་བས། སྦྲང་རྩིའི་འབྱུང་གནས་ཡིན་པར་ཤེས། །རྔོན་པ་མིན་ཡང་རི་དྭགས་གསོད། །གླ་རྩི་འདོད་པའི་རྣམ་འགྱུར་ཡིན། །ཞེས་པ་ལྟ་བུའོ། །སོ་གཅིག་པ་ལྷན་ཅིག་བརྗོད་པའི་རྒྱན་ནི། ཆོས་ཐ་དད་པ་གཉིས་ཡོན་ཏན་ནམ། ནུས་པ་ལྷན་ཅིག་ཏུ་སྨིན་པའི་ངག་སྟེ། དཔེར་ན། རིག་པ་བདག་གིས་ཤེས་པ་དང༌། །མཁས་
པ་གཞན་ལའང་མོས་པ་སྐྱེ། །དམུས་ལོང་མངལ་ལས་གྲོལ་བ་དང༌། །ལྷན་ཅིག་མུན་པའི་སྣང་བ་འཆར། །ཞེས་པའོ། །སོ་གཉིས་པ་ཡོངས་བརྗེས་ཀྱི་རྒྱན་ནི། བརྗོད་པ་དང་། རང་བཞིན་དང༌། བྱ་བ་ལ་སོགས་ཕན་ཚུན་བསྣོལ་མའི་ཚུལ་དུ་བརྗོད་པའི་ངག་སྟེ། དཔེར་ན། བློ་ལྡན་ཕུར་བུས་ལྷ་དགའ་ཕྱིར། །རྒྱུ་འབྲས་མེད་པའི་བསྟན་བཅོས་བརྩམས། །རེ་ཞིག་ལྷ་ལ་ཕན་ན་ཡང༌། །མཐར་ཐུག་བདེན་གཉིས་ཆོས་ལ་གནོད། །ཅེས་པ་ལྟ་བུའོ། །སོ་གསུམ་པ་ཤིས་པ་བརྗོད་པའི་རྒྱན་ནི། བརྗོད་བྱ་རྨད་དུ་བྱུང་ཞིང་རྗོད་བྱེད་རང་བཞིན་བརླིང་བའི་ངང་ཚུལ་ལ་སྨོན་པའི་ཚིག་སྟེ། རྐང་པ་ལྔ་པར་བྱས་ན། དྲེགས་ལྡན་མི་སྡུག་ཉམས་ཀྱིས་བཞིན་རས་གསར་པའི་འཛུམ་གྱིས་བསུས་མ་ཡིན། །སྨིན་མ་ཡོན་པོའི་ལྟ་སྟངས་འཁྱོག་པོའི་གཡོ་སྒྱུའི་ཟོལ་གྱིས་བསླུས་པའང་མིན། །དཔུང་ཚོགས་ཡན་ལག་བཞི་པའི་གཡུལ་ངོས་གཞན་སྡེ་ཟིལ་གྱིས་གནོན་མིན་པར། །མཐོང་ན་མི་མཐུན་མེད་པའི་ཐུགས་རྗེས་བདུད་ཀྱི་དཔུང་ཡང་སྐྲག་བྱེད་པའི། །འགྲོ་བའི་བླ་མ་ཤཱཀྱ་སེང་གེས་ཁྱོད་ལ་བདེ་ལེགས་མཛད་པར་གྱུར། །ཅེས་སོ། །སོ་བཞི་པ་རབ་སྤེལ་གྱི་རྒྱན་ནི། ཚིགས་སུ་བཅད་པ་གཅིག་ལའང་རྒྱན་ཐ་དད་མང་པོ་ཚང་པ་སྟེ། དཔལ་ལྡན་དཎྜིས། སྙན་དངགས་མཛེས་པར་བྱེད་པ་ཡིས། །ཆོས་
རྣམས་རྒྱན་ཅེས་རབ་ཏུ་བརྗོད། །དེ་ནི་ད་ལྟའང་རྣམ་རྟོག་སྟེ། །དེ་དག་མ་ལུས་སུས་འཆད་ནུས། །འོན་ཀྱང་རྣམ་རྟོག་ས་བོན་ནི། །སྔོན་གྱི་སློབ་དཔོན་རྣམས་ཀྱིས་བསྟན། །ཞེས་གསུངས་པ་ལྟར། འཁོར་འདས་ལམ་གསུམ་གྱི་ཆོས་ཐམས་ཅད་རྟོག་པས་རྣམ་པར་སྒྲོ་བཏགས་པ་ཙམ་མོ། །དེའི་ཕྱིར་སྐབས་འདིར་སྙན་དངགས་མཁན་གྱིས་རྣམ་པར་རྟོག་པས་སྒྲོ་བཏགས་ན་ཚིག་གི་སྦྱོར་བ་གང་ལའང་རྒྱན་དུ་མི་འགྱུར་བ་མེད་ཕྱིར་དམིགས་བསལ་མ་དགོས་ཀྱང༌། དང་པོའི་མགོན་པོའི་འདྲ་འབག་བཞེང་བའི་སླད་དུ་འདི་ལྟར། རང་བཞིན་རྣམ་དག་ལྟ་བའི་ངང་ཚུལ་ཤིན་ཏུ་རྨད་བྱུང་དཔེ་ལས་འདས། །འད༵ས་པ་མ་ཡིན་སྒོམ་པའི་རྒྱལ་པོ་དུས་གསུམ་ཀུན་ཏུ་ཁྲི་ལ་བཞུ༵གས། །བཞུ༵གས་ཀྱང་སྣང་བ་ཟིལ་གྱིས་གནོན་པའི་སྤྱོད་པའི་འཕྲུལ་གྱིས་འཁོར་འདས་ཀུ༵ན། །ཀུ༵ན་ཏུ་བཟང་པོའི་དབྱིངས་ལ་བཞག་ཚེ་བརྟན་གཡོའི་དངོས་པོ་རང་སར་ཞིག །ཅེས་སྨྲས་སོ། །སོ་ལྔ་པ་དགོངས་པ་ཅན་གྱི་རྒྱན་ནི། སྙན་དངགས་མཁན་གྱིས་ཇི་ལྟར་བསམ་པའི་ཡུལ་གྱི་ཡོན་ཏན་ལ་སྦྱོར་བར་ནུས་པས་དེ་ཉིད་ཀྱི་དགོངས་པ་འགྲུབ་པའི་ངག་རྒྱུན་ཡིན་པ་དོན་ལ་གནས་ཕྱིར་དཔེར་བརྗོད་ལོགས་སུ་མི་དགོས་ཏེ། མེ་ལོང་ལས་ཀྱང༌། སྙན་དངགས་མཁན་
བསམ་དགོངས་པ་སྟེ། །སྙན་དངགས་འགྲུབ་པར་གང་གནས་པ། །རབ་སྦྱོར་ཡུལ་གྱིས་ཡོན་ཏན་ཅན། །དེ་ནི་དགོངས་པ་ཅན་ཞེས་བརྗོད། །ཅེས་བཤད་པའི་ཕྱིར་རོ། །མྱུར་པོར་ཕ་རོལ་འགྲོ་བའི་ཚེ། །རང་རིག་བཙན་ས་མ་ཟིན་ན། །བཅོས་མས་བྱས་པའི་སྒྲ་དོན་རྒྱན། །འདི་ལ་སྙིང་པོ་འགའ་ཡོད་མིན། །འོན་ཀྱང་ཤེས་བྱར་སྲིད་ཚད་དངོས་ནས་མ་ཡིན་ཀྱང་བརྒྱུད་ནས་སོ་ཀྱིས། །བསྟན་ལ་བྱ་བ་བྱེད་དོ་ཞེས། །དམ་པས་ཀུན་ཏུ་བསྔགས་མཐོང་ཞིང༌། །མཁས་པ་རྣམས་ལའང་རབ་ཏུ་གྲགས། །དེ་ཕྱིར་བདེན་པ་གཟིགས་པ་ཡི། །པཎ་གྲུབ་མང་པོས་འདི་ཉིད་ཀྱི། །བསྟན་བཅོས་གང་ཞིག་མཛེས་བྱས་ཤིང་། །བློ་གསལ་དགའ་བར་བྱས་པའི་ཚུལ། །མཐོང་ནས་བདག་གིས་འདི་བྱས་སོ། །སྙན་དངགས་ཀྱི་གཏམ་རིན་པོ་ཆེའི་གཏེར་ཞེས་བྱ་བ་འདབ་ལྡན་གཡུང་དྲུང་འཁྱིལ་བའི་ཚལ་ནས་སེན་ཀ་ཨ་ནནྟས་བསྐུལ་པ་ལྟར་དབྱངས་ཅན་མགྲིན་པར་ཆགས་པའི་རྣལ་འབྱོར་པ་མཁྱེན་བརྩེའི་འོད་ཟེར་གྱིས་འོད་གསལ་གཉུག་མའི་ཕོ་བྲང་པདྨ་འོད་གླིང་དུ་རྗེས་ཐོབ་ཀྱིས་སྣང་ཆ་རྟོག་པའི་དྲྭ་བར་བཀོད་པ་རྫོགས་སོ། །གཏམ་ཚོགས་ལེའུ་ལྔ་པའོ།། །།
གཏམ་ཚོགས་ལེའུ་དྲུག་པ། རྒྱལ་པོ་དང་དམངས་ལ་སྤྲིང་བའི་གཏམ་རབ་ཏུ་བྱེད་པའི་འཇིག་རྟེན་གསོ་བའི་སྨན།
རྒྱལ་པོ་དང་དམངས་ལ་སྤྲིང་བའི་གཏམ། རབ་ཏུ་བྱེད་པའི་འཇིག་རྟེན་གསོ་བའི་སྨན་ཞེས་བྱ་བ། ལྷ་མོ་དབྱངས་ཅན་མ་ལ་ཕྱག་འཚལ་ལོ། །
མདོ་ལས་ཆོས་ལྡན་རྒྱལ་པོ་ལ། །ཡན་ལག་རྣམ་པ་བཅུ་བཤད་དེ། །མང་པོའི་དབུས་ནས་བཀྲབས་པ་དང༌། །བློན་དང་བློ་གྲོས་གཡོན་ཅན་གྱིས། །དེ་ཡི་བརྟུལ་ཞུགས་མི་བརྫི་ཞིང༌། །འབངས་ལ་གནོད་པ་མེད་པ་དེར། །གནམ་གྱིས་བསྐོས་པ་ཞེས་སུ་གྲགས། །བྱ་བ་ཀུན་ལ་བརྟགས་མཁས་ཤིང༌། །རིགས་པའམ་མ་ཡིན་རྣམ་པར་ཕྱེད། །གཟུ་ལུམས་འཁོར་དུ་མི་ལྡན་ན། །འབངས་དང་གློ་བ་ཉེ་བར་འགྱུར། །བསམ་པ་མཆོག་ཏུ་དགེ་ན་ཡང༌། །ཐབས་མཁས་ཤེས་རབ་མཐུ་མེད་ན། །སྐྱེ་དགུ་བདེ་བར་སྐྱོང་མི་ནུས། །དེ་ཕྱིར་ལུགས་ཀྱི་བསྟན་བཅོས་བསླབ། །བྱ་བ་དང་ནི་མ་ཡིན་པའི། །གནས་ལ་དེ་མ་ཐག་མི་ཁྲོ། །ཐེག་པ་ཆེ་ན་དགྲ་ཟླ་ཉུང༌། །བདེ་བར་གནས་ན་བང་མཛོད་སྤེལ། །རྟག་ཏུ་བསོད་ནམས་འཕེལ་བའི་ཕྱིར། །རྒྱལ་སྲིད་ཆོས་ཀྱི་ལུགས་སུ་བསྐྱང༌། །ཧ་ཅང་མི་བསྲུན་ཚེར་མ་ལྟའི། །སྐྱེས་བུ་འཕེལ་ན་ཁྲིམས་ཀྱིས་གཞར། །དེ་ལྟ་མོད་ཀྱི་ཁྱུ་མཆོག་དང༌། །གླ་བ་སྲོག་དང་བྲལ་གྱུར་ཀྱང༌། །གི་ཝང་གླ་རྩི་ཡོད་པའི་དཔེས། །ངུར་སྨིག་གཟུགས་གནས་ཁྲིམས་འཆལ་ཡང༌། །ལྕགས་དང་དབྱུག་པས་གཞུས་པ་དང༌། །བཙོན་རར་འཆིང་དང་ཡན་ལག་གཏུབ། །སྟོན་པ་ཉིད་ཀྱིས་མ་གནང་ན། །ཚུལ་ཁྲིམས་ལྡན་ལ་སྨོས་ཅི་དགོས། །
བྱ་བ་རྩོམ་ལ་དཀྱིལ་ཆེ་ཡང༌། །ལས་མཐའ་རིང་ན་དེ་དང་དེ། །འགྲུབ་བམ་ཅིག་ཤོས་ཐེ་ཚོམ་ཕྱིར། །མྱུར་དུ་རྫོགས་ན་མཁས་པ་ཡིན། །སྤྱོད་པ་བརླང་པོས་ཡུལ་འཁོར་འབྲོས། །འཇིག་རྟེན་ན་ནི་ངེས་པ་དང༌། །བྱམས་པར་གྱུར་པ་ཆོས་རྒྱལ་ཞེས། །གུས་པ་ཁྱོད་ཀྱིས་མ་ཐོས་སམ། །སྐྱེ་དགུ་བདེ་བར་སྐྱོང་བ་ལ། །དེ་ཡི་ཀུན་སྤྱོད་རིག་པ་དགོས། །གནས་དང་གནས་མིན་མི་ཤེས་ན། །ཆོ་རིགས་བཙུན་ཡང་ལྐུགས་པ་ཡིན། །བྱ་བ་བདག་གིས་ལེགས་ཤེས་ཀྱང༌། །འགྱོད་པ་སྤངས་ཕྱིར་གྲོས་ཀྱིས་བསྒྲུབ། །དེ་ལྟར་བསྒྲུབས་ནས་སྡུག་བསྔལ་ཡང༌། །མི་འཇིགས་པ་དེ་བློ་ཆེན་ཡིན། །ཇི་ཙམ་རྒུད་པའི་མཐར་ལྷུང་ཡང༌། །དཀོན་མཆོག་རྣམ་གསུམ་མི་སྤང་ཞིང༌། །བཤེས་གཉེན་དམ་པའི་ངག་མཉན་པ། །དེ་ལ་ཆོས་ལྡན་རྒྱལ་པོར་གྲགས། །གལ་ཏེ་དེ་ལས་དགྲས་གཙེས་ཀྱང༌། །ཐབས་ལ་མཁས་པའི་ནན་ཏན་གསུམ། །ཐོག་མཐའ་བར་དུ་ཉམས་བསྟར་ལ། །འཐབ་མོ་ཞི་བའི་བརྟུལ་ཞུགས་བླང༌། །ཕྱི་དུས་འདི་ན་རྒྱལ་པོའམ། །བློན་པོ་དང་ནི་གཙོ་བོ་དག །མི་མཁས་གཏི་མུག་རང་བཞིན་ཕྱིར། །མཛའ་བའི་ཐབས་ལ་ནན་ཏན་བྱ། །དྲེགས་ལྡན་ཉིད་ཀྱང་ནོར་ལ་སྲེད། །གཡུལ་གྱི་ཕྱིར་ན་དེ་བཏང་སྟེ། །གྲོང་
ཁྱེར་ཕྱིར་དུ་གྲོང་ཡང་བཏང༌། །ནན་ཏན་བྱ་བ་གཉིས་པ་ཡིན། །སྐྱེས་རབས་ལས་ཀྱང་དེ་སྐད་དུ། །ཁྱིམ་གྱི་ཕྱིར་ན་གཅིག་བཏང་སྟེ། །སྲོག་གི་ཕྱིར་ན་ཁྱིམ་བཏང་ངོ༌། །ལྗོངས་ཀྱི་ཕྱིར་ན་གྲོང་ཁྱེར་ཏེ། །བདག་གི་དོན་ལ་མ་བཏང་བཤད། །དེས་ཀྱང་ཉེ་བར་མ་ཞི་ན། །དཔུང་གི་གཟི་བྱིན་མཐུ་བསྐྱེད་དེ། །ཕྱོགས་ནི་མང་པོ་ཉེ་བར་བཟུང༌། །དགྲ་ཟླ་འཇིགས་པའི་བརྟུལ་ཞུགས་རྔོམ། །ནན་ཏན་གསུམ་གྱིས་མ་ལྡོག་ན། །བདག་ནི་གཡུལ་ལ་སྤྲོ་བའང་མེད། །སྐྱེ་དགུ་ཕུང་བར་མི་འགྱུར་གྲང༌། །གྱུར་པ་ལས་ཀྱང་སླར་ལྡོག་གོ །སྡིག་པའི་ཕྱོགས་ལས་མ་རྒྱལ་ན། །སྲོག་ཀྱང་གཟུང་བར་ཡོང་མི་ནུས། །བསྟན་པ་ཉིད་ཀྱང་ཉམ་ཉེས་འགྱུར། །སྙམ་དུ་དྲན་པ་ཉེ་བར་གཞག །གཡུལ་གྱི་ཕྲུ་མ་ལ་གནས་པའི། །དཔའ་བོ་རབ་འབྲིང་ཐ་གསུམ་ལས། །ཐ་མ་ཉིད་ནི་ཐོག་མར་བཤམ། །རྟ་པའི་ཚོགས་ནི་རྒྱབ་ནས་སོ། །དེ་དག་བདེ་བར་བརྒལ་བ་དང༌། །བརྟུལ་ཞུགས་བརྟན་པར་འགྱུར་བ་དང༌། །བྱས་པ་གཟོ་བའི་གནས་སྟོན་ཕྱིར། །མི་དབང་ཉིད་ནི་ཕྱི་བཞིན་འབྲང༌། །དེ་ལྟར་ཐབས་ལ་མཁས་པ་ཡིས། །ཕ་རོལ་གྱི་ནི་དཔུང་བཀུམ་མམ། །རྨ་བྱུང་ན་ཡང་རྒྱལ་པོ་ལ། །ཁ་ན་མ་ཐོ་ཉུང་བར་འགྱུར། །
དེ་བཞིན་འདུ་ཤེས་བརྒྱད་ལ་བསླབ། །ཡུལ་འཁོར་ལ་ནི་བུ་བཞིན་དེ། །བྱམས་པའི་སེམས་ཀྱིས་མཐུན་པར་བལྟ། །སྤྱོད་པ་ཡུལ་ལ་ཁྲོ་བ་སྤང༌། །འཕྲལ་དུ་ཟས་དང་དབྱིག་གིས་བརྔན། །ཡུན་དུ་ཕན་དང་བདེ་བའི་ཕྱིར། །ཡན་ལག་བརྒྱད་དང་དགེ་བཅུའི་ཁྲིམས། །འཆའ་ཞིང་རི་རྒྱ་ཀླུང་རྒྱ་བསྡམ། །དཔྱ་ཁྲལ་རིགས་པར་བསྡུ་མོད་ཀྱི། །ལོ་ཏོག་ལ་ནི་སེར་བའམ། །དུས་ཀྱི་ཆད་པས་ཉམས་པའི་ཚེ། །འབངས་ལ་སྣུམ་ལྟར་འཚིར་བ་སྤང༌། །གལ་ཏེ་མི་བསྲུན་ཚར་གཅོད་ཀྱང༌། །དེ་ལ་ཁྲོ་བ་འགོད་པ་མིན། །སྨན་པས་ནད་ལ་གཏར་བསྲེགས་བཞིན། །སྐྱོན་བསལ་ཆོ་ག་ཡང་དག་བསམ། །འབངས་ལས་ཕྲོགས་པའི་ལོངས་སྤྱོད་ནི། །ཆེན་པོའི་རྒྱན་དུ་མཛེས་མ་ཡིན། །མཚོན་ཆའི་ཐབས་ལ་མཁས་གྱུར་ཀྱང༌། །རྔོན་པ་དཔའ་བོར་སུ་ཞིག་སྒོམ། །འཇིག་རྟེན་ན་ནི་དགྲ་འབྱུང་བའི། །ལེ་ལན་འཁོན་སེམས་ཉིད་ལ་གནས། །འཁོན་དང་ཁྲོ་བ་ཚར་བཅད་ན། །དགྲ་ཡང་མཛའ་བཤེས་འགྱུར་བ་སླ། །ཉེ་བ་ལྔ་ཡི་ཆར་གཏོགས་པས། །ཁྲིམས་ལྡན་མ་ལ་གཡེམ་མི་བགྱིད། །མེ་ལོང་གདོང་གི་གཏམ་རྒྱུད་བཞིན། །ཞལ་ལྕེ་ཉེ་འཁོན་མེད་པར་བཅད། །བདག་ཉིད་བསྲུང་བ་ཡིན་པའི་ཕྱིར། །
འཛའ་བཤེས་རྣམས་ལ་ཕྱི་ཕྱིར་བལྟ། །ཀུན་དང་བཤེས་པའི་རྟེན་འབྲེལ་འདིས། །དགྲ་བོ་མོད་ལ་མེད་པར་འགྱུར། །འཇིག་རྟེན་ཕ་རོལ་འགྲོ་བའི་ཚེ། །རྒྱལ་སྲིད་ལོངས་སྤྱོད་རྗེས་མི་འབྲང༌། །ནན་ཏན་ཆོས་ལ་བགྱི་བ་འདི། །བརྟུལ་ཞུགས་ཀུན་གྱི་ནང་ན་མཆོག །རྒྱལ་པོ་ལ་གདམས་པའི་རབ་ཏུ་བྱེད་པ་སྟེ་དང་པོའོ། །གཉིད་དང་རྨུགས་ལ་བརྐམ་པ་ཡི། །སྐྱེས་བུས་ལེགས་ཚོགས་ཐོབ་པ་མེད། །གལ་ཏེ་ཐོབ་ན་ལེ་ལོ་ཡི། །ཉེས་པ་བཤད་པ་བརྫུན་དུ་འགྱུར། །གང་ཞིག་སེར་སྣ་ལ་གནས་པས། །ལོངས་སྤྱོད་ཕུན་ཚོགས་ཐོབ་གྱུར་ཀྱང༌། །འཆི་ཚེ་ངན་འགྲོའི་གྲོང་ཁྱེར་དུ། །ལག་པ་སྟོང་པར་སོང་ཞེས་ཐོས། །འགྲོ་བ་གཞན་གྱི་སྲོག་གཅོད་པ། །དེ་ནི་བདག་ཉིད་གསོད་པ་ཡིན། །ཕ་རོལ་ཉམས་པ་སྨོས་ཅི་དགོས། །འཇིག་རྟེན་འདིར་ཡང་ཚེ་ཐུང་འགྱུར། །ཆང་ལ་དགའ་བའི་སྐྱེས་བུ་་ཡིས། །རིགས་དང་ཡོན་ཏན་བསྲུང་བ་མེད། །ཆེན་པོའི་གནས་དང་འབྱོར་པའི་དཔལ། །མཁས་པའི་སྨད་དང་ལྷན་ཅིག་ཉམས། །ལེ་ལོས་དོན་རྣམས་ཉམས་འགྱུར་ན། །གསར་པ་ཐོབ་པ་ག་ལ་ཞིག །སྙིང་སྟོབས་ཕུན་སུམ་ཚོགས་པའང༌། །བསྒྲིམ་པ་མེད་པས་མ་རུངས་བྱས། །གཞན་གྱི་ནོར་དང་ལོངས་སྤྱོད་ལ། །བརྣབ་སེམས་ཕྲག་དོག་
བསྐྱེད་པ་ནི། །མཛའ་བཤེས་འབྲོས་ཤིང་ཁྱིམ་ཐབས་ལ། །འདུ་བ་གཅོད་པའི་སྒོ་ཡིན་སྤང༌། །ཤིན་ཏུ་གཟུ་ལུམས་གཏུམ་པའི་མིར། །ཕ་མ་དག་ཀྱང་འབྲོས་བྱེད་ན། །སྐྱེ་བོ་གཞན་ལྟ་སྨོས་ཅི་དགོས། །ཁྲོ་བ་ཐུལ་ལ་འཁོར་འདབ་མང༌། །མང་དུ་ཟ་བ་མཁས་པ་མིན། །ཟས་ཀྱི་བུ་ལོན་ལྟ་ཞོག་གི །ལུས་ལྕི་དགེ་བ་ཉམས་འགྱུར་ལ། །མ་འཇུས་སྲོག་ལ་རྒོལ་བའང་ཡོད། །རྒོད་ཅིང་ཅ་ཅོ་ལ་དགའ་བ། །འགྱོད་པ་མང་པོའི་སྣོད་ཡིན་ཏེ། །དེ་ནི་ཆོས་ཀྱི་ལམ་གནས་ཀྱང༌། །བདེན་པ་གཉིས་ལ་རིང་དུ་གནས། །ཁ་ནི་སྡིག་པའི་སྒོ་ཡིན་པས། །མང་པོའི་གསེག་ཏུ་བསྒྲིམས་ཏེ་སྨྲ། །ཚིག་ངན་རྦབ་ཏུ་ལྷུང་བ་འདི། །གནོད་པ་མང་ལ་ལྡོག་པར་དཀའ། །ངེས་པར་བདེན་པའི་ཚིག་ཉིད་ཀྱང༌། །སྨྲའམ་ཅིག་ཤོས་མཁས་པས་བསྒྲིམ། །བདེན་སྨྲས་རང་ལ་གནོད་པའི་ཚུལ། །གཏུམ་པོ་རབ་སྣང་གཏམ་རྒྱུད་བཞིན། །མ་བསྡམས་སྐྱེ་བོ་བྱི་ལ་དགའ། །དེ་ལ་དེ་ཡི་ཁྱིམ་བདག་དང༌། །རང་གི་ཆུང་མའང་དགྲར་གྱུར་ནས། །འདི་ཕྱིར་སྡུག་བསྔལ་མང་པོ་མྱོང༌། །ཕྱུག་པོ་འདོད་ནས་མ་བྱིན་ལེན། །དབུལ་པོ་རིན་གྱིས་ཉོ་བ་སྟེ། །གྲགས་པ་ཤིན་ཏུ་ཉམས་པའི་མཐར། །ལུས་དང་ལོངས་སྤྱོད་གཞན་གྱིས་འཕྲོག །རྫུན་
དང་ཕྲ་མས་བྱ་བ་འགའ། །རེ་ཞིག་གྲུབ་ཀྱང་ཐ་མར་མིན། །སྲིན་བྱའི་རྫུན་གྱིས་བདག་ཉིད་ནི། །ལྟས་ངན་གནས་སུ་གྱུར་པ་བཞིན། །བསམ་ངན་བསྐྱེད་པའི་གང་ཟག་ལ། །བསོད་ནམས་རི་ཙམ་ཡོད་གྱུར་ཀྱང༌། །དེ་མ་ཐག་ཏུ་ཉམས་འགྱུར་ཏེ། །རྒྱལ་པོ་ང་ལས་ནུ་ལ་ལྟོས། །ལོག་ལྟས་རང་གི་དཔལ་ཉམས་པ། །འདི་ནི་གཞན་གྱིས་མི་ཤེས་ཏེ། །མ་སྐྱེས་དགྲ་ལ་རྒྱལ་ཕྲན་གྱིས། །གཡུལ་གྱི་ཕྲུ་མ་བཏབ་པ་བཞིན། །སྐྱེ་བོ་ཆོས་ལ་མི་གནས་ཀྱང༌། །ཕ་མ་ལ་ནི་བསྙེན་བཀུར་བྱ། །མཐོ་རིས་བགྲོད་པའི་ཐེམ་སྐས་གཅིག །དེ་ཉིད་ཡིན་པར་ཐུབ་པས་གསུངས། །སློང་བ་སྐྱེང་དུ་མི་འཇུག་གོ །བཅུག་ན་གཏན་གྱི་མཛོད་ཆུད་གསན། །སྤྱིན་པས་ཕྱི་མར་ཕན་པ་ཙམ། །གཏེར་དུ་སྦས་ཀྱང་འབྱུང་བ་མིན། །གལ་ཏེ་སློང་བའི་རེས་བབ་ན། །ངང་ཐུང་བསམ་སྤོབས་པའི་བློ་གྲོས་ཀྱིས་སངས་རྒྱས་ལ་བསྙེན་བཀུར་བའི་ཚེ་དབུལ་པོའི་རེ་བ་མ་ཐོབ་པས་སྟོན་པ་ལ་ཁོང་འཁྲུགས་ཤིང་བདག་རྒྱལ་པོར་གྱུར་ན་འདི་དག་གི་མགོ་བཅད་དོ་སྙམ་པ་སྐྱེས་པས་རང་ཉིད་ཀྱི་མགོ་ཤིང་རྟའི་འཁོར་ལོས་ཆད་པ་བཞིན་ངན་མི་བགྱི་སྟེ། །ཡིད་ནི་དུག་ཅན་ཉིད་ཀྱི་ཕྱིར། །གནོད་སེམས་རང་གི་ཐོག་ཏུ་འབྱུང༌། །ངེས་པར་འབབས་པོའི་དཔྱ་དང་ཁྲལ། །སྟོབ་པར་ནུས་བཞིན་མ་བསྟབས་ན། །
རྒྱལ་པོའི་བང་མཛོད་ཉམས་པའི་ཕྱིར། །ལ་ཡོགས་རྣམ་སྨིན་ཉིད་ལ་འཛེམ། །མི་ཡིས་འབད་ཀྱང་མི་ཐོབ་པའི། །ལོངས་སྤྱོད་ལྷ་ཡུལ་བསམས་པས་འབྱུང༌། །དེ་ནི་བསོད་ནམས་མཐུ་ཡིན་ཏེ། །རིགས་ངན་རྒྱལ་པོར་གྱུར་ལ་ལྟོས། །དེ་ཕྱིར་བསམ་པ་དགེ་བ་ལས། །བསོད་ནམས་ཐམས་ཅད་འདུ་བྱེད་དེ། །ལོ་བརྒྱར་འབད་ནས་ངལ་བྱེད་ལས། །ཉིན་གཅིག་བསོད་ནམས་བསགས་པ་མཆོག །དམངས་ལ་གདམས་པའི་རབ་ཏུ་བྱེད་པ་སྟེ་ལེའུ་གཉིས་པའི་བདག་ཉིད་ཅན་རྒྱལ་བའི་མྱུ་གུ་མཁྱེན་བརྩེའི་ལྷས་དཔལ་ལྡན་པདྨ་འོད་གླིང་དུ་སྦྱར་བའོ། །གཏམ་ཚོགས་ལེའུ་དྲུག་པའོ།། །།
གཏམ་ཚོགས་ལེའུ་བདུན་པ། ས་སྐྱོང་སྡེ་དགེ་ལ་སྤྲིང་བའི་གཏམ་ས་ལ་སྤྱོད་པའི་རྣ་རྒྱན།
ས་སྐྱོང་སྡེ་དགེ་ལ་སྤྲིང་བའི་གཏམ་ས་ལ་སྤྱོད་པའི་རྣ་རྒྱན་ཅེས་བྱ་བ། རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །གང་གིས་འགྲོ་བ་ཐམས་ཅད་ལ། །གཉེན་དང་འདྲ་བར་སེམས་བསྐྱེད་ཀྱང༌། །དད་དང་ལས་འབྲེལ་ཅན་དག་ལ། །ཉེ་འཁོན་ཕོ་ཉར་འོང་བ་བཞིན། ༡ །དེ་ལྟ་ན་ཡང་རྒྱལ་ཁབ་དེར། །སྤྱོན་ལ་བསྐུལ་བའི་ལུས་ཕྲ་མར། །བརྙས་དང་མ་གུས་མ་ལགས་པའི། །སྤྲིང་ཡིག་གསར་བའི་རྣ་ཆས་འཛུམ། ༢ །བགྲེས་རྒུད་མེད་པའི་རྣམ་རིག་ནི། །མི་བདག་བཞེད་པའི་དོན་བསྒྲུབ་པར། །
ཉིན་མོའི་དཔལ་གྱི་རྟ་བདུན་བཞིན། །གཡོ་ལ་དལ་ཁོམ་མ་མཆིས་ཀྱང༌། ༣ །འབྱུང་བཞིས་བཟུང་བའི་ལང་ཚོ་ནི། །ཞག་དང་ཟླ་བས་སྤུངས་པ་ཡི། །རྒ་བའི་ལྕིད་ཀྱིས་མངོན་སུམ་ནོན། །སྙོམས་ལྡན་མིན་པའི་འདུ་བས་དཀྲུགས། ༤ །ཀུན་ལ་ལྐོག་ཏུ་གྱུར་པ་ནི། །རང་གི་རང་བཞིན་ལག་མོད་དེ། །ཡུལ་གྲུ་གསར་དང་དེ་ཡི་ཆུས། །སྔོན་ཡང་གནོད་པ་སྣ་ཚོགས་བསྟན། ༥ །གང་ཞིག་རྐྱེན་གྱིས་ཚར་བཅད་པའི། །འདུ་བས་རང་མཚན་མི་འཛིན་ན། །གནོད་པ་མངོན་སུམ་ཐོབ་པའི་ཚེ། །ཁྱེད་ལའང་ཕན་པ་ཅི་ལྟར་བསྒྲུབ། ༦ །དེ་ བས་ས་ལ་སྤྱོད་པ་ཁྱེད། །མཛའ་བཤེས་བཞིན་དུ་བདག་གི་ཚིག །བསླུ་བའི་གནོད་པ་མ་མཆིས་པ། །འདི་ནི་རྣ་བའི་རྒྱན་དུ་མཛོད། ༧ །འདི་ལྟར་འཁོར་བ་མ་རུངས་པ། །ཆུ་སྲིན་ལྟ་བུའི་ལྟོ་བ་ནས། །བདེ་འགྲོ་ལས་ཀྱང་མཐོ་རིས་ཀྱི། །ཡོན་ཏན་བདུན་པོ་ཕལ་མོ་ཆེས། ༨ །ཁྱོད་ལ་མཛའ་བར་བྱས་ཟིན་ན། །ད་ནི་འཚོ་བ་བསྲིང་བའི་ཐབས། །སྲོག་ལ་ཆད་པ་མི་སྦྱིན་པ། །ཡ་རབས་རྣམས་ཀྱི་ཚེ་སྒྲུབ་ལགས། ༩ །འཁོར་བར་སྲོག་ལ་མི་ཕངས་པ། །དམྱལ་བ་པ་ལས་ཡོད་མིན་ན། །མཐར་གྱི་འཆི་བའི་ཆོས་ཉིད་ལ། །ཀུན་ཀྱང་སྐྲགས་ནས་བརྟབ་པ་བཞིན། ༡༠ །ཁྱད་པར་བྱ་དང་རི་དྭགས་ཕྱུགས། །མགོན་
མེད་ལོག་པར་ལྟུང་བ་རྣམས། །རྣམ་ཀུན་སྡུག་བསྔལ་མེས་གདུངས་ན། །འཚིག་པ་སླར་བསྲེག་མགར་ལས་སུ། ༡༡ །གཞན་སྲོག་འཕྲོག་ལས་ཕྱིར་ཕྱོགས་པས། །རྒྱལ་སྲིད་ཉམས་པར་གྱུར་པ་མེད། །མཚོན་ཆའི་ཐབས་ལ་མཁས་པ་རྣམས། །གཡུལ་ངོར་རྨ་སྲོལ་བཏོད་པ་མང༌། ༡༢ །གང་ཞིག་གནོད་པ་ཅན་ལ་འབྲོས། །གནོད་མི་བགྱིད་པ་ཚར་གཅོད་ན། །བདེ་སྐྱིད་ཁྱོད་ལ་རེ་བ་རྣམས། །སུ་ལ་སྐྱབས་སུ་མཆི་བར་དགོངས། ༡༣ །མཐོ་རིས་ཡོན་ཏན་བདུན་ཀུན་གྱི། །གཙོ་བོ་ཚེ་རིང་པ་ཉིད་ན། །དེ་ཡི་བྱེད་པ་རྒྱུ་མཐུན་ནི། །འབད་ནས་བསྒྲུབ་པ་ཅང་ཤེས་ཡིན། ༡༤ །བློ་གྲོས་ཉམ་ཆུང་གྱུར་པ་དང༌། །ཆོས་ཀྱི་བསྟན་བཅོས་མི་ཤེས་པ། །དེ་ནི་གདོན་མི་ཟ་བ་རུ། །རང་གཞན་གཉིས་ཀ་བསྲེག་ལ་བརྩོན། ༡༥ །དེ་བས་ཡ་རབས་རིགས་བཟང་ཁྱོད། །དཀྱིལ་ཆེ་སྙིང་རྗེའི་བདག་ཉིད་ནི། །རྟག་ཏུ་ཉོན་མོངས་མེད་པ་ཅན། །གཟུགས་ཅན་སྙིང་པོའི་སྤུན་ཟླར་མཛོད། ༡༦ །གང་དག་ཕ་དང་མ་ལ་དེ་དང་དེར། །ཤེས་ནས་མཆོད་པ་བྲམ་ཟེ་ལ་ཡང་ཡོད། །དེས་ཀྱང་བསོད་ནམས་མ་ཡིན་ཕྱོགས་བསྲུངས་ཤིང༌། །བདག་ལ་རིམ་གྲོ་ཐོབ་པ་མཁས་པའི་ལུགས། ༡༧ །རིགས་གཟུགས་དབང་ཐང་ཆེ་ལ་རྒྱགས་པ་
དང༌། །མངོན་པའི་ང་རྒྱལ་འཇུངས་དང་གཡོ་སྒྱུས་འཚོ། །འདི་དག་བག་ཡོད་འཇིགས་པའི་ཆོམ་རྐུན་ཏེ། །སྡིག་སྤྱོད་རྣམས་ཀྱི་རྣམ་པར་ཐར་ཕྱིར་སྲིངས། ༡༨ །དགེ་བའི་ལས་ལམ་བཅུ་དང་བསྙེན་བྱེད་པ། །འདི་ནི་ཚུལ་ཁྲིམས་རྣམས་ཀྱི་ཕྱི་མོ་དང༌། །རྣམ་ཤེས་བརྒྱད་དང་འབྲེལ་བའི་ལུས་ངག་ལས། །དཀར་པོ་རྣམ་པར་འཕེལ་བའི་ས་བོན་ཡིན། ༡༩ །དགྲ་བཅོམ་གཏན་ཁྲིམས་བྲར་ལམ་ཡན་ལག་ནི། །རྣམ་པ་བརྒྱད་དུ་བཅས་པའི་དུས་ཀྱི་ཁྲིམས། །དུས་ཆེན་བཞི་དང་ཉ་སྟོང་བརྒྱད་གསུམ་ལ། །བདག་ཉིད་ལྷུར་བཞེས་འབངས་ལའང་སྩལ་བར་བགྱི། ༢༠ །ཆགས་དང་ཁོང་ཁྲོ་ང་རྒྱལ་མ་རིག་པ། །འཇིག་ཚོགས་ལ་བལྟ་ཐེ་ཚོམ་རྣམ་པ་དྲུག །རྩ་བའི་ཉོན་མོངས་སྒྲ་གཅན་གདོང་པ་ཅན། །དགེ་བའི་ཉིན་བྱེད་ལ་སྡང་མཁྱེན་པར་མཛོད། ༢༡ །བླ་ན་མེད་པའི་ཞིང་ས་དཀོན་མཆོག་གསུམ། །གང་ལ་མཆོད་དང་ཕན་འདོགས་བསམ་པས་གཏོང༌། །མི་དགེ་སྤང་བ་ཡང་དག་ལེན་པའི་ཁྲིམས། །ལྷ་རྗེས་དྲན་པ་དྲུག་ལ་གོམས་པར་བགྱི། ༢༢ །རྒྱལ་བ་ཐུགས་རྗེའི་བདག་ཉིད་ཅན་དེ་ཡིས། །གྲངས་མེད་གསུམ་དུ་དགོངས་ཤིང་དཔྱད་པས་ཀྱང༌། །བྱང་ཆུབ་སེམས་ལས་གཞན་པའི་ཆོས་མ་གཟིགས། །དེ་ཕྱིར་འདི་ནི་སྲོག་ལས་གཅེས་པར་ཟུང༌། ༢༣ །
རིན་ཆེན་སེམས་ལ་སྨོན་འཇུག་རྣམ་གཉིས་ལས། །འཇིག་པའི་བསླབ་བྱ་རྒྱལ་སྲིད་ལ་བསྲིང་ན། །སྤྱིན་ཚུལ་བཟོད་པ་གསུམ་ལ་བསྙེན་ནས་ཀྱང༌། །སྤྱོད་ལམ་རྣམ་བཞིར་སྨོན་སེམས་བཏང་མི་འཚལ། ༢༤ །བསམ་པ་བཟང་པོ་རང་དབང་གྱུར་པའི་སེམས། །ཁ་ན་མ་ཐོ་གཞན་དབང་མ་ཡིན་པས། །རྒྱལ་པོའི་སྲིད་ཀྱང་མི་ཉམས་བྱང་ཆུབ་ཆོས། །རྫོགས་པར་འགྱུར་ཞེས་བདེན་པར་སྨྲ་བས་གསུངས། ༢༥ །འདི་ལྟར་རང་སེམས་དགེ་བ་ཙམ་ཞིག་གིས། །མངའ་རིས་བདེ་ལ་འགོད་པར་ཡོངས་མི་ནུས། །ཁ་གསགས་གཏུམ་པོ་མི་བཟོད་གཟུ་ལུམས་ཅན། །རྒྱལ་པོའི་འཁོར་ན་མང་པ་མཁྱེན་འཚལ་ལོ། ༢༦ །མང་པོས་བཀུར་ལ་བྱས་པ་གཟོ་བ་ཡི། །དྲུག་ཆུའི་དཔྱ་ཐང་འཚལ་བ་ནས་བཟང་སྟེ། །གནའ་བོའི་དུས་ནས་བཞག་པའི་ཡབ་མེས་ཀྱི། །བཞག་པ་གང་ལས་གསར་པའི་སྐབས་མི་དབྱེ། ༢༧ །སྐྱེ་བོ་རྣམས་ནི་འཇུངས་པ་ཁོ་ནའི་ཕྱིར། །གཏོང་ལ་སྤྲོ་བའི་གོ་སྐབས་དབྱེ་དཀའ་ན། །ཐུབ་ཆོད་མཐུས་ལེན་གཞན་གྱི་སེམས་བསྲེག་ཅིང༌། །དངོས་ལའང་གཤིན་རྗེའི་འཇིག་རྟེན་ཐོབ་འདི་སྤངས། ༢༨ །རྟག་ཏུ་སོ་སོའི་སྐྱེ་བོ་དང༌། །དམ་པའི་ཁྱད་པར་མཁྱེན་འཚལ་ནས། །མི་ཆོས་གཙང་མ་བཅུ་དྲུག་དང༌། །དམ་པའི་རྣམ་ཐར་སྒྲུབ་འདི་གཅེས། ༢༩ །
གྱ་ཚོམ་ལ་སྤྱོད་སྡིག་ལ་འབད། །རིག་པའམ་མ་ཡིན་བཏང་སྙོམས་ཅན། །བྱས་པ་གཟོ་མིན་མགུ་བར་དཀའ། །སོ་སྐྱེའི་རྣམ་ཐར་བརྗོད་མི་ལྡང༌། ༣༠ །ལས་འབྲས་ལ་གུས་ངོ་ཚ་ཤེས། །སྙིང་རྗེའི་བདག་ཉིད་ཉམས་ལེན་བཟོད། །སྙིང་ཉེ་མཐུ་ཆེ་བརྟུལ་ཕོད་པ། །མཛའ་བཤེས་ཉིད་དུ་བཟུང་བར་འོས། ༣༡ །དུས་དང་དུས་སུ་མ་ཡིན་པར། །རྣམ་ཀུན་རང་དགར་སྤྱོད་པ་དང༌། །ཆང་དང་རྒྱན་པོས་དུས་འདའ་བ། །དེས་ནི་ཆོས་ལུགས་གཉིས་ཀ་ཉམས། ༣༢ །མི་སྙན་ན་ཡང་ཕན་པ་དང༌། །ངེས་པ་མིན་ཡངབདེན་པའི་ཚིག །ཐུགས་ལ་བཞག་པའི་གནས་ཡིན་ན། །དེ་ལས་ལྡོག་པ་སྤང་བར་མཛོད། ༣༣ །རང་དོན་གཉེར་བའི་ངོ་བསྟོད་དང༌། །ཆོས་ལམ་མིན་པའི་ལེགས་སྨོན་ནི། །ཆེན་པོས་བཟུང་བའི་རྣ་ཆ་མིན། །སྙན་ཁུང་སྲ་བ་མི་དབང་རྒྱན། ༣༤ །ངང་པ་མཚོ་ལ་དགའ་བ་བཞིན། །དམ་པ་རྣམས་ཀྱིས་བསྙེན་སླ་དང༌། །ཆུ་སྐྱར་ནགས་ལས་འབྲོས་པ་བཞིན། །དམ་པ་མིན་པས་བསྙེན་དཀར་མཛོད། ༣༥ །མ་ཡིས་བུ་ལ་དགའ་བ་བཞིན། །ཁྱོད་ཀྱིས་འབངས་ལ་བྱམས་བགྱིས་ན། །བུ་ཡིས་མ་ལ་བསྙེན་པ་བཞིན། །འབངས་རྣམས་གུས་པས་ཅིས་མི་བལྟ། ༣༦ །ལུགས་ཀྱི་བསྟན་བཅོས་མི་མཁས་ན། །འཇིག་རྟེན་སྐྱོང་པའི་རྣམ་རིག་སྙོགས། །
ཆོས་ཀྱི་བསྟན་བཅོས་ལས་ཕྱོགས་ན། །ཕུན་སུམ་ཚོགས་ཀྱང་ཕྱི་མར་ཉམས། ༣༧ །སྡིག་པའི་གྲོགས་ཀྱི་དབང་བྱས་པས། །བྲམ་ཟེ་ཁྱེའུའང་སོར་ཕྲེང་འཛིན། །དགེ་བའི་གྲོགས་ཀྱིས་ཟིན་པ་ལས། །མྱ་ངན་མེད་པའང་ཆོས་རྒྱལ་གྱུར། ༣༨ །ཁྱོད་ལ་འབྱོར་པས་མི་རྡུག་གིས། །ཡོན་ཏན་ཁོ་ན་དོན་དུ་གཉེར། །ཡོན་ཏན་མེད་པའི་རྒྱལ་པོ་ནི། །དཔའ་ཡང་གནོད་སྦྱིན་སྡེ་དཔོན་ཡིན། ༣༩ །ལོངས་སྤྱོད་གཡོ་བ་ཤེས་ན་ཡང༌། །དཀར་པོའི་ཕྱོགས་ལ་སྦྱར་བ་ཉུང༌། །སྦྱར་ཀྱང་སྡིག་པས་བསྒྲུབ་པ་ནི། །ག་པུར་སྒོག་སྐྱས་བགོས་དང་མཚུངས། ༤༠ །ཁྱུ་མཆོག་འགྲོ་བའི་ཕྱི་བཞིན་དུ། །བ་ལང་དོགས་པ་མེད་རྒྱུ་ན། །ཁྱོད་ནི་དམ་པའི་སྤྱོད་པ་ལ། །ཞུགས་དང་མངའ་རིས་རྣམས་ཀྱང་འབྲང༌། ༤༡ །ཇི་ལྟར་བདག་ཉིད་སྲུང་བ་དེས། །ཤུགས་ལ་གཞན་དག་བསྲུང་ནུས་ན། །མེས་དབོན་དྲང་སྲོང་ཆེན་པོའི་ལུགས། །བསྐྱང་ཞིང་ཉམས་པའང་བཅོས་སུ་གསོལ། ༤༢ །འདི་ལྟར་སྲོང་བཙན་ཡུལ་བཟུང་གི །རིགས་སུ་སོན་ནས་བྱང་གྲོལ་གྱི། །ཐེམ་སྐས་འཛེགས་ལ་སྤྲོ་བའི་ཕྱིར། །རྗེ་དང་ཡབ་མེས་ཆོས་ལུགས་སྐྱོངས། ༤༣ །འོན་ཏང་ཁྲིམས་ལ་སྐྱོན་ཆགས་དང༌། །མི་མཁས་བླུན་པོའི་གཟུ་ལུམས་ཀྱིས། །རྙོག་མར་བྱས་
པོའི་སྡིག་ཏོ་ནི། །གནའ་ནས་མཆིས་ཀྱང་བསལ་དུ་རུང༌། ༤༤ །དཀའ་ཐུབ་ཅན་ལ་བརྙས་པ་དང༌། །བཀྲེས་ལ་ཤིན་ཏུ་མནར་བ་དང༌། །ཧ་ཅང་ཚར་གཅད་གནས་ཐོབ་པའི། །ཆད་པས་སུ་ལའང་གཅད་མི་བགྱི། །༤༥ །དཀོན་མཆོག་རྫས་ལས་འཕྲོག་པ་དང༌། །དམ་པའི་ཆོས་ནི་སྤོང་བ་དང༌། །རྟགས་ཙམ་འཛིན་པའང་མནར་བ་དང༌། །མཚམས་མེད་ལྔ་པོར་གཏོགས་པ་དང༌། །མི་དགེའི་ལས་ལམ་འཛིན་པ་ལྔས། ༤༦ །རྒྱལ་པོ་རྒྱལ་རིགས་སྤྱི་བོ་ནས། །དབང་བསྐུར་རྣམས་ཀྱི་དགེ་བའི་རྒྱུན། །གདོན་མི་ཟ་བར་མེ་བཞིན་ཏུ། །སྲེག་པར་བྱེད་ཅིང་ཕས་ཕམ་པས། །ཕྱི་ནས་ལྷ་མིའི་བདེ་འབྲས་གཅོད། ༤༧ །དེ་བཞིན་བློན་པོ་རྣམས་ལ་ནི། །ལོག་པར་ལྟ་བའི་གནས་མལ་དུ། །གྲོང་དང་གྲོང་ཁྱེར་འཇོམས་པ་སྟེ། །རྒྱལ་བློན་སོ་སོར་ངེས་པ་ལྔ། ༤༨ །རྩ་ལྟུང་བཅུར་ནི་ནམ་སྙིང་གི །མདོ་ལས་བཀྲལ་ཏེ་གསུངས་པའི་ཕྱིར། །བདག་ཉིད་བསྲུང་བའི་དོན་འདི་ལ། །གཞན་གྱིས་ཐལ་མོ་སྦྱོར་མི་འཚལ། ༤༩ །སྦྱིན་ལས་གཉེན་གྱུར་ཕ་རོལ་མེད། །མགོན་མེད་ཟས་སྦྱིན་ལ་དགའ་དང༌། །བཟོད་མཚུངས་དཀའ་ཐུབ་མ་མཆིས་པས། །སྦྱོས་དང་བཏགས་པའང་ལྷག་པར་སྲུངས། ༥༠ །ས་འདི་རིན་ཆེན་འབྱུང་གནས་ཕྱིར། །དེ་བཞིན་གཤེགས་
རྣམས་ཐུགས་རྗེའི་སྤྲུལ། །སྐྱེས་བུའི་རྣམ་རིག་ལ་སྤོས་པའི། །བཟོ་གནས་སྐུ་གསུང་ཐུགས་སུ་མཛོད། ༥༡ །ད་རེས་ཁོམ་ལྡན་མེད་པའི་རྟེན་བརྒྱད་ནས། །འདབ་ཆགས་རྙི་ལས་གྲོལ་བ་ལྟར་གྱུར་དུས། །རང་བཞིན་འབྱོར་པའི་ཡན་ལག་ཉམས་སམ་མིན། །དཔྱད་ནས་དེ་ལས་མྱུར་དུ་སོར་ཆུད་འཚལ། ༥༢ །འདི་ལྟར་སྐྱེ་བའི་རང་བཞིན་མཐུ་ཆེ་ཡང༌། །དམ་ཆོས་སྒྲུབ་ལ་ཁོམ་ལྡན་དཀོན་པའི་ཚུལ། །ལུས་འཕགས་པོ་ནས་སྒྲ་མི་སྙན་པའི་བར། །རིམ་བཞིན་འཁོར་ལོས་སྒྱུར་བའི་རྒྱལ་པོ་དང༌། ༥༣ །ཚངས་དབང་འཇིག་རྟེན་སྐྱོང་བའི་མཐུ་དཔལ་ཅན། །དབང་ཕྱུག་ལང་ཚོས་དྲེགས་པ་དེ་དག་ཀྱང༌། །ལས་མཐའ་ལོག་དང་གཞན་འབྱོར་ཕལ་མོ་ཆེས། །སྤངས་ནས་སླར་ཡང་འཁོར་བའི་ཡང་བྲན་ལྟུང༌། ༥༤ །ལྟུང་བ་གང་ཞིག་མཉམ་དང་མི་མཉམ་པའི། །གནས་རིགས་དྲུག་ཏུ་དབང་མེད་འགྲོ་བའི་ཚུལ། །གླང་ཆེན་མྱོས་པ་ལྕགས་ཀྱུས་བཏང་བ་བཞིན། །ལམ་མང་རྒྱུན་ལྡན་ཉིད་དུ་འགྲོ་བ་མང༌། ༥༥ །ཁྱད་པར་གཤིན་རྗེའི་ཞགས་པས་བཏགས་པ་རྣམས། །བཟོད་དཀའ་དམྱལ་མེའི་དབལ་དང་ལྕགས་སྲེག་གཞིར། །མཚོན་རྣོན་གྱིས་འབུགས་འཐོར་རླུང་བུ་ཡུག་གིས། །ལུས་སྦྲེབས་ཆུ་བུར་རྡོལ་ལས་རྐང་ཞག་འཛག ༥༦ །
དཔག་ཚད་མང་པོའི་ལྟོ་བ་བཟའ་བས་ཉམ་ཐག་ཅིང༌། །བཏུང་བའི་ཕྱོགས་ཙམ་མི་ཉེ་དེ་ལ་རྒྱ་མཚོའི་ཆུ། །འཐུང་བའི་རང་དབང་འཚལ་ན་མགྲིན་པ་འཚིར་བའི་བར། །མོད་ལ་བསྐམ་པར་འགྱུར་ཞེས་ཕྱིན་ཅི་ལོག་བཞིས་འཇིགས། ༥༧ །རྨོངས་དང་མགོན་སྐྱབས་སྤངས་པའི་ཆད་པས་ཟིལ་གནོན་བཞིན། །ཕན་ཚུན་གཅིག་ལ་གཅིག་བཟས་ཅུང་ཟད་རྣལ་མི་ཕེབས། །རྔོན་དང་གདོལ་པས་གཞུར་ནས་དམ་ལ་བཞག་པའི་མཐར། །ལུས་སྲོག་གཉིས་ཀར་མནར་གཅོད་མི་འདོད་བཞིན་དུ་མྱོང༌། ༥༨ །ཕྲག་དོག་མེ་ལྕེ་རྣོན་པོས་ཀུན་ཏུ་ཚིག་པའི་སེམས། །གཡུལ་ངོར་གདུང་བ་བཞིན་དུ་ཕྱོགས་པ་དེ་ཡི་མགོ །དགྲ་ཟླའི་མཚོན་གྱིས་བཀས་པ་ཆུང་མས་མཐོང་བའི་མོད། །འོ་དོད་འབོད་པའི་ཚུལ་ལ་སྒྲ་གཅན་དངངས་པ་བཞིན། ༥༩ །དུག་དང་མཚུངས་པའི་ཡུལ་ལ་རྣམ་ཀུན་སྤྱད་བྱས་ཀྱང༌། །སྐྱེ་རྒ་ན་འཆིའི་དུག་གིས་ད་དུང་ཕ་རོལ་འཁྲིད། །སྨན་དང་སྔགས་ཀྱིས་མི་གསོས་དུག་གི་རྣམ་སྨིན་ནི། །ཚེ་རབས་གཞན་ལའང་འཐག་གཅོད་དུག་ལས་ནུས་པ་ཆེ། ༦༠ །དེ་ཕྱིར་ལས་དང་དེ་འབྲས་མཁྱེན་འཚལ་ནས། །ཆུ་དང་ས་དང་རྡོ་བའི་རི་མོ་བཞིན། །ཉོན་མོངས་ཅན་ལ་དང་པོ་དགེ་ཆོས་ལ། །ཐ་མ་ཉིད་དུ་བློ་ཡི་བཟོ་བོས་སྒྲུབས། ༦༡ །རིན་ཆེན་གསུམ་དང་ཡང་དག་བལྟ་ལ་དད། །མི་དགེ་བཅུ་ཡི་ལས་ལམ་སྤངས་པའི་
ཁྲིམས། །མཆོད་དང་ཕན་འདོགས་ཞིང་ལ་ཟང་ཟིང་གཏོང༌། །ཐར་པ་དང་ནི་རྣམ་མཁྱེན་ཆོས་ལ་མཉན། ༦༢ །བདག་གི་དབང་དུ་བྱས་པའི་ངོ་ཚ་དང༌། །གཞན་གྱི་དབང་དུ་བྱས་པའི་ཁྲེལ་ཡོད་པ། །ཆོས་དོན་རྣམ་པར་འབྱེད་པའི་ཤེས་རབ་སྟེ། །འཕགས་པའི་ཁྱད་ནོར་བདུན་པོ་འབད་པས་སྒྲུབས། ༦༣། མཐོ་རིས་རྟེན་ལ་མྱ་ངན་འདའ་བའི་སླད། །ཤེས་དང་ཚུལ་ཁྲིམས་ལྡན་པའི་བླ་མ་ལས། །ཚུལ་བཞིན་ཡིད་ལ་བགྱིད་དང་བགྱིད་བྲལ་བའི། །ཡང་དག་ལྟ་བ་གཉིས་ཀྱི་གནད་མཁྱེན་མཛོད། ༦༤ །གང་དག་དབང་པོ་དྲུག་ཡུལ་གྱུར་པའི་སེམས། །རྣམ་ཤེས་བརྒྱད་ཀྱི་གཞན་དབང་ཅན་ཡིན་ན། །ཉེ་བའི་ཉོན་མོངས་ཉི་ཤུའི་གཡུལ་ངོ་ལས། །རྒྱལ་བའི་དགྲ་ཐབས་དྲན་པའི་རུ་མཚོན་ཕྱོར། ༦༥ །རང་ཉིད་ཐར་ཙམ་ཉན་རང་ལ་ཡང་ཡོད། །རྣམ་མཁྱེན་སྒྲུབ་པ་སྐྱེས་བུ་ཆེན་པོའི་ལུགས། །དྲན་པ་ཉེ་བར་གཞག་པ་ནས་བཟུང་སྟེ། །བྱང་ཆུབ་ཕྱོགས་ཆོས་ཚད་མེད་མཁྱེན་པར་མཛོད། ༦༦ །ལྡན་མིན་འདུ་བྱེད་བཏགས་ཡོད་ཙམ་གྱི་ཆོས། །ཉོན་ཤེས་སྒྲིབ་པ་མཐོང་སྤོང་སྒོམ་སྤོང་ཅན། །རང་བཞིན་མེད་པའི་ངང་དུ་ཞི་བ་ན། །བདེ་གཤེགས་སྙིང་པོའི་ཆོས་ཉིད་མཐོང་བར་འགྱུར། ༦༧། དེ་ལྟར་མཐོང་ནས་གནོད་པ་དུ་མའི་སྣོད། །སྐྱེ་བའི་འབྱུང་གནས་རྟེན་ཅིང་འབྲེལ་འབྱུང་ཆོས། །ཀུན་འབྱུང་ལུང་མ་བསྟན་པ་བཅུ་བཞིར་བཅས། །འཕགས་ལམ་ཡན་
ལག་བརྒྱད་ཀྱིས་འགོག་པ་ཐོབ། ༦༨ །དེ་ཡི་རང་བཞིན་ཉོན་མོངས་ཆུ་བོ་ཡི། །ཕ་རོལ་སོན་པ་ཉིད་ན་བདག་ཉིད་ཀྱིས། །གདུལ་བའི་ཞིང་ལ་ཡོན་ཏན་རིན་ཆེན་མཛོད། །བསྟན་པ་ཡོངས་རྫོགས་སྒྲོན་མ་ཕྱོགས་དེར་སྤྱོན། ༦༩ །ཆོས་དོན་མངོན་པར་སྤྲིང་བའི་བསྟི་གནས་སུ། །དད་པའི་པད་ཚལ་མ་རྙིང་བསོད་ནམས་བྱིན། །མྱ་ངན་མེད་པའི་སྤུན་ཟླར་གྱུར་པ་དེས། །ཁྱེད་ཀྱང་དགེ་བའི་དབང་པོའི་སྲས་སུ་གྱུར། ༧༠ །གང་ལ་ཟླ་བའི་དབང་པོ་ཞེས་བོས་ནས། །དེ་ཡི་མངའ་རིས་བདག་གི་སེམས་བསྐྱེད་དང༌། །སྨོན་པས་བྱམས་པའི་སྟོབས་བཞིན་ལེགས་བསྲུངས་པས། །རྒྱལ་སྲིད་མངོན་པར་མཐོ་བའི་བཀྲ་ཤིས་ཤོག ༦༡ །ས་སྐྱོང་སྡེ་དགེ་ལ་སྤྲིང་བའི་གཏམ་ས་ལ་སྤྱོད་པའི་རྣ་རྒྱན་ཞེས་བྱ་བ། དཔལ་ཨུ་རྒྱན་གྱི་སློབ་དཔོན་ཆེན་པོ་པདྨ་སམ་བྷ་བས་བྱིན་གྱིས་བརླབས་པའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་རམ། རིག་པ་འཛིན་པ་འཇིགས་མེད་གླིང་པས་དཔལ་ལྡན་པདྨ་འོད་གླིང་ཞེས་བྱ་བའི་གཙུག་ལག་ཁང་ནས་ཕུལ་བ་སརྦ་ཛ་ག་ཏཾ། །གཏམ་ཚོགས་ལེའུ་བདུན་པའོ།། །།
གཏམ་ཚོགས་ལེའུ་བརྒྱད་པ། རྒྱལ་བུ་ལ་སྤྲིང་བའི་གཏམ་ཆར་སྤྲིན་གྱི་རོལ་མོ།
རྒྱལ་བུ་ལ་སྤྲིང་བའི་གཏམ་ཆར་སྤྲིན་གྱི་རོལ་མོ་ཞེས་བྱ་བ། བཅོམ་ལྡན་འདས་ཤིན་ཏུ་རྣམ་པར་ངེས་པ་གཟི་བརྗིད་ཀྱི་རྒྱལ་བོ་ལ་ཕྱག་འཚལ་ལོ། །ཤིན་ཏུ་ཞི་བ་དམ་པའི་དམ་པ་ཆོས་ཀྱི་དབྱིངས། །ཁ་སྦྱོར་བདུན་གྱི་ལོངས་སྤྱོད་མཐའ་ཡས་འཇིག་རྟེན་གྱི། །བཀོད་
པར་བཀྲམ་ཡང་སྡུག་བསྔལ་བདེན་པའི་མཚན་ཉིད་དང༌། །མཛའ་བ་མ་ཡིན་བདེ་ལྡན་ཞིང་གི་མགོན་དེས་སྲུངས། ༡ །དཀར་པོའི་ཆོས་རབ་ནོར་བུའི་གླིང་ནས་མཐོ་རིས་ཀྱི། །ཡོན་ཏན་བདུན་པའི་ཙིནྟ་མ་ཎི་བོད་ཆེན་པོའི། །མདོ་སྡེ་རྒྱལ་ཁབ་དགེ་བཅུས་སྐྱོང་པའི་ཕོ་བྲང་ཆེར། །སྲོང་བཙན་ཡུལ་བཟུང་མྱུ་གུ་གསར་པའི་འཁྲི་ཤིང་རྒྱལ། ༢ །མངའ་རིས་འཛིན་གྱི་སྐྱེད་ཚལ་ན། །སྡིག་ལྟའི་ཚང་ཚིང་ལ་ཆགས་པའི། །རྒྱལ་ཕྲན་གེལ་པ་མང་མོད་ཀྱི། །འཇིག་རྟེན་ཡང་དག་བལྟ་ལ་རིང༌། ༣ །ཐུབ་བསྟན་ས་ཟླའི་མུ་ཁྱུད་རྩིབས་སྟོང་གི །རྗེས་སུ་དཔུང་ཚོགས་ཡན་ལག་བཞི་འགྲོ་བའི། །མྱུ་གུ་གསར་པའི་གསར་པ་དེའི་རྣ་ལུང༌། །ཕུལ་བྱུང་གཏམ་གྱི་རོལ་མོས་སྙན་པར་བྱེད། ༤ །ཚུ་རོལ་མཛེས་པས་མ་བཀབ་མཐུན་པའི་ཡུལ། །དམ་པའི་མགོན་དང་བཤེས་པ་ལེགས་སྨོན་གཟུགས། །ལེགས་སྤྱད་བསོད་ནམས་རྣམ་འཕྲུལ་རྒྱལ་ཐབས་ཏེ། །འཁོར་ལོ་ཆེན་པོ་བཞི་ཡི་བདག་ཉིད་ཁྱོད། ༥ །སྐྱེ་མཆེད་ཟླ་བ་ཉ་བའི་དེ་མ་ཐག །རིན་ཆེན་གསུམ་ལ་འདུས་ཏེ་རེག་པའི་སྤྱན། །ཆོས་རབ་སྣང་བའི་སྒོ་བརྒྱ་དད་པ་ཡི། །འདུ་ཤེས་རོལ་རྩེད་གཟུགས་ལ་རྔོམ་དེ་མཚར། ༦ །ཉམ་ཆུང་ཞོ་ཤས་བརྟེན་པའི་སྲོག་ཅན་ལ། །སྙིང་རྗེ་གཞན་དབང་བཙའ་བའི་
རྣམ་རིག་ཅན། །གདུལ་དུ་རུང་བ་སྐྱེས་བུའི་མཚན་ཉིད་ཕྱིར། །བདེན་པར་སྨྲ་བ་འདི་ནི་ཆོས་ཀྱི་གཏམ། ༧ །མཐའ་ཡས་ཤེས་དང་ཤེས་བྱའི་མི་བརྗེད་གཟུང༌། །ཡི་གེའི་མིང་གཟུགས་ཕུང་པོ་གང་ཞིག་ནི། །རིག་བྱེད་ཚོར་དང་ཚིག་དོན་ཉིང་མཚམས་སྦྱོར། །འདུ་ཤེས་དེར་གཞུངས་བླང་དོར་ལས་འདུ་བྱེད། །སྐྱེ་བས་རྣམ་པར་རིག་བྱེད་འདྲི་ཀློག་བརྩོན། ༨ །མངོན་པར་མཐོ་དང་ངེས་ལེགས་དམ་པའི་སྒོ། །ཤེས་བྱ་ཤེས་བྱེད་རྒྱུ་རྐྱེན་ལས་འབྱུང་ན། །དགེ་བའི་བཤེས་དང་དགེ་བའི་གྲོགས་པོ་ཡི། །ཡོན་ཏན་རྫོགས་པ་ཉེ་བའི་འདུ་བར་བརྟེན། ༩ །ཆོས་ལྟར་བཅོས་ཀྱང་རྣམ་རིག་སྡིག་ཏོས་བཀབ། །ཚུ་རོལ་ལས་གཞན་ཕ་རོལ་ཆད་པར་བལྟ། །སྐྱེས་བུ་གསུམ་ཀའི་གདུལ་བྱ་མ་ཡིན་པ། །ཁྱིམ་པའམ་དྲང་སྲོང་རྒྱལ་མཚན་བཟུང་ཡང་སྲིངས། ༡༠ །ཁྱིམ་བདག་རིན་ཆེན་ལྟ་བུའི་མདུན་ན་འདོན། །རྩོད་པའི་དུས་ཀྱི་སྤོངས་པ་ལྟར་གྱུར་ཀྱང༌། །དྲང་ལ་དཀྱིལ་ཆེ་ཡིད་གཞུངས་བློ་གྲོས་ཅན། །དེ་ལྟ་བུ་ལ་བློན་པོའི་གནང་བ་བྱིན། ༡༡ །དུས་དང་དུས་ཀྱི་རོལ་རྩེད་མ་བཀག་ཀྱང༌། །བྱིས་དང་སྡིག་གྲོགས་སྙོམ་ལས་གསུམ་གྱིས་དུས། །གྲོན་པ་མེད་པར་ཕྱི་ནང་གཙུག་ལག་ལ། །རྣམ་རིག་གསལ་བའི་སྤོབས་པ་ཐོབ་ཀྱང་འཚལ། ༡༢ །
དགེ་བ་མ་ཡིན་བཅུ་དང་མྱོས་བྱེད་ཆང༌། །མུན་ནས་མུན་པའི་སྒོ་ལ་རྒྱབ་ཕྱོགས་ཏེ། །འཚོ་བ་བཟང་དང་རྣམ་སྨིན་ཚེ་སྦྱིན་སོགས། །མི་ཆོས་བཅུ་དྲུག་སྣང་ནས་སྣང་བའི་སྒོ། ༡༣ །མི་ཡི་ཆོས་ལུགས་ལེགས་པར་སྤྱད་པ་ནི། །སྟོན་པ་འཇིག་རྟེན་མཁྱེན་དང་བློ་གྲོས་་ཀྱི། །དབང་ཕྱུག་དྲང་སྲོང་རྣམས་ལ་གྲགས་པའི་ཕྱིར། །ལུགས་ཀྱི་བསྟན་བཅོས་རྣམས་ལ་འདྲིས་པར་སློབས། ༡༤ །རྒྱལ་རྣམས་ཆོས་ཁམས་རྒྱ་མཚོའི་རྡུལ་སྙེད་ལས། །དམ་བཅའ་སྙིང་པོ་བྱང་ཆུབ་སེམས་ཀྱི་དངོས། །གང་ལ་ཁྱིམ་གྱིས་བར་དུ་མི་གཅོད་པར། །དྲི་མ་མེད་པ་གྲགས་པའི་རྣམ་ཐར་སྐྱོངས། ༡༥ །དེ་ཡི་བློ་གྲོས་འཇམ་དཔལ་གཞོན་ནུས་ཀྱང༌། །དགབ་པར་མི་ནུས་སྨོན་དང་འཇུག་པའི་སེམས། །སྐྱེས་པ་རབས་དང་ཐེག་པ་ཆེན་པོ་ཡི། །སྡེ་སྣོད་དག་ལས་རང་སྟོབས་མཐུས་ཀྱང་བསྐྱེད། ༡༦ །ཐོག་མར་ཚངས་གནས་བཞི་ཡི་བློ་བཅོས་ནས། །ཀུན་ལ་སེམས་སྙོམས་ཕ་མའི་འདུ་ཤེས་ཀྱིས། །ཕན་པར་སྟོན་དང་བྱང་ཆུབ་འཇུག་པ་ནི། །ཐེག་པ་ཆེན་པོར་འཇུག་པའི་ལམ་གྱི་སྒོ། ༡༧ །ཁབ་ཀྱི་འབྱོར་པ་མངའ་རིས་ལས་གྱུར་ན། །དྲུག་ཆའི་དཔྱ་ཐང་ཅུང་ཟད་རྨ་བབ་ཀྱང༌། །བཟོད་པར་མཛོད་དང་སྦྱིན་ལས་གཞན་པའི་གཉེན། །མ་མཆིས་དེ་ནི་ཐུབ་པ་ཆེན་པོའི་བཀའ། ༡༨ །འཆལ་བའི་ཚུལ་ཁྲིམས་
མི་དགེའི་གཟུགས་ཉིད་ཀྱང༌། །རྒྱལ་སྲས་རྣམས་ཀྱི་ཐབས་ལ་མཁས་པ་ནི། །སྟོང་ཉིད་སྙིང་རྗེའི་མཐུས་ཡིན་དེ་ལྟ་ནའང༌། །དུས་ཁྲིམས་ཡན་ལག་བརྒྱད་ལ་གུས་པར་མཛོད། ༡༩ །ལེགས་ཉེས་སྟངས་འཛིན་ཁྲིམས་ཀྱི་རྗེས་འགྲོ་བ། །རྒྱལ་པོ་རང་སའི་ཆོས་ལུགས་ཡིན་མཆི་ཡང༌། །རྨོངས་དང་འདོད་པས་གཟིར་བའི་ནག་ཅན་གྱི། །སྲོག་ལ་ཆད་པ་མ་སྦྱིན་བཟོད་ཀྱང་འཚལ། ༢༠ །དེ་ལྟར་གསུམ་གྱི་བྱང་ཆུབ་འཇུག་པའི་ཆོས། །སྡོམ་མིན་རྒྱུན་ལྡན་ཉིད་དུ་མི་འཁྱམས་ཤིང༌། །རྒྱལ་པོའི་སྲིད་ཀྱང་ཉམས་པར་མི་འགྱུར་ཞེས། །གསལ་རྒྱལ་ཉིད་ལ་གདམས་པའི་མདོ་ལས་བཤད། ༢༡ །ཡིད་དང་ཆོས་སུ་རྟོགས་པའི་བྱ་བྱེད་ནི། །རྒྱལ་པོའི་སྲིད་ལ་མུ་ཁྱུད་ལྟར་བསྐོར་ཡང༌། །བརྩོན་དང་བསམ་ཤེས་དབང་རྣོན་མ་བསྲིངས་ཏེ། །རྒྱལ་པོ་ཛཿདང་དགེ་དབང་ཡབ་སྲས་བཞིན། ༢༢ །དེ་ཕྱིར་ཆོས་སྤྱོད་བཅུ་ལ་སྐབས་བཙལ་ཞིང༌། །ནང་ནུབ་རྡོ་རྗེའི་ལམ་ལ་རྣལ་འབྱོར་པའི། །བརྩོན་འགྲུས་མཆོག་དང་བསམ་གཏན་ལ་བརྟེན་པས། །ཤེས་རབ་ཕ་རོལ་ཕྱིན་ལ་རེག་པར་འགྱུར། ༢༣ །དེ་ཡི་འགལ་ཟླ་ལྟུང་བྱེད་ཆེན་པོའི་གཡང༌། །མཆོད་རྟེན་རྫས་དང་དགེ་འདུན་འདུ་སྒོ་འཕྲོག །ལུང་དང་རྟོགས་པའི་དམ་ཆོས་སྤོང་བ་དང༌། །ཁྲིམས་
ལྡན་ལྟ་ཅི་རྟགས་ཙམ་འཛིན་ལ་ཡང༌། ༢༤ །ངུར་སྨྲིག་འཕྲོག་དང་ཁྱིམ་ན་གནས་སུ་འཇུག །བརྡེག་ཅིང་ནོར་འཕྲོག་བརྩོན་རར་གཞུག་དང་གསོད། །ཕ་མ་དགྲ་བཅོམ་གསོད་དང་དགེ་འདུན་དབྱེ། །མཚམས་མེད་ལྔ་ལས་གང་རུང་བྱེད་པ་དང༌། ༢༥ །ཕ་རོལ་མེད་པར་ལྟ་བའི་ལོག་ལྟ་ཡིས། །དགེ་བ་མ་ཡིན་ལས་ལམ་བཅུ་པོ་ལ། །བདག་ཉིད་འཇུག་དང་གཞན་དག་འཛུད་པ་ནི། །རྒྱལ་པོར་གདམས་པའི་རྩ་ལྟུང་ལྔ་ཡིན་པས། ༢༦། སྲོག་འདི་གཏོང་ཡང་སླ་ཡིས་དེ་སྤོང་ཞིང༌། །དེ་བཞིན་གྲོང་དང་གྲོང་ཁྱེར་ཡུལ་འཁོར་གཞོམ། །ལ་སོགས་བློན་པོར་ངེས་པའི་རྩ་ལྟུང་ལྔ། །གཞོམ་སྟེ་བསྒོ་བའི་ཕྱོགས་ལ་ཉེ་བས་སྤོངས། ༢༧ །ཁ་ན་མ་ཐོའི་ལམ་དང་ཀུན་དཀྲིས་སྒོ། །མཐའ་དག་སེམས་དང་སེམས་བྱུང་ལས་སྐྱེ་ན། །འཇིག་རྟེན་ཡང་དག་བལྟ་དང་དྲན་ཤེས་ལ། །གུས་པས་དཀར་པོའི་ཆོས་རབ་འཕེལ་བར་འགྱུར། ༢༨ །མཐོང་ཆོས་སུ་ཡང་མངོན་པར་མཐོ་བ་ཡི། །རྒྱལ་སྲིད་འབྱོར་དང་རྒྱས་ཤིང་ལོ་ལེགས་ལ། །ཕས་ཀྱི་རྒོལ་བས་མི་བརྫི་བསོད་ནམས་སྟོབས། །མང་པོས་བཏུད་པའི་རྒྱལ་སར་བཞག་པ་བཞིན། ༢༩ །ལེགས་སྨོན་ལམ་དེའི་རྟེན་ཅིང་འབྲེལ་འབྱུང་ལས། །མཐར་ཐུག་ངེས་པར་ལེགས་པའི་
ཆོས་ཁམས་ཀྱང༌། །བདེ་ལྡན་ཞིང་ཁམས་བཀོད་པའི་ཐེམ་སྐས་རྩེར། །གངས་ཆེན་མཚོ་ཡི་རྒྱལ་སྲིད་ལ་གནས་ཤོག ༣༠ །རྒྱལ་བུ་ལ་སྤྲིང་བའི་གཏམ་ཆར་སྤྲིན་གྱི་རོལ་མོ་ཞེས་བྱ་བ། རིག་འཛིན་འཇིགས་མེད་གླིང་པས་གདམས་པ་རྫོགས། །གཏམ་ཚོགས་ལེའུ་བརྒྱད་པའོ།། །།
གཏམ་ཚོགས་ལེའུ་དགུ་པ། བཙུན་མོ་ལ་སྤྲིང་བའི་གཏམ་དམ་པའི་གན་མཛོད།
བཙུན་མོ་ལ་སྤྲིང་བའི་གཏམ་དམ་པའི་གན་མཛོད་ཅེས་བྱ་བ། རྗེ་བཙུན་སྒྲོལ་མ་ལ་ཕྱག་འཚལ་ལོ། །གང་མཚན་དཔྱངས་བའི་རྣ་ལུང་བཻཌཱུརྱས། །རིན་ཐང་མཉམ་པར་བསྐྲུན་པ་རབ་བཏགས་མིན། །གྲོང་ཁྱེར་རྩྭ་ཅན་གཟིམས་པའི་དེ་མ་ཐག །པདྨའི་གེ་སར་ལས་སྤྲུལ་དེས་བྱིན་རློབས། ༡ །འཁོར་བ་ཆུ་སྲིན་འབྱུང་གནས་ཀྱིས་བཟུང་ཡང༌། །ཁོམ་ལྡན་མིན་པའི་རྟེན་གྱིས་ཁྱོད་སྤོངས་ཏེ། །དལ་དང་འབྱོར་པའི་རིན་ཆེན་གླིང་ཕྱིན་ནས། །མཐོ་རིས་ཡོན་ཏན་བདུན་ལ་བསྙེན་དེ་རྨད། ༢ །རྒྱལ་བསྟན་རིན་ཆེན་འབྱུང་ལྡན་སྙིགས་མ་ལྔའི། །ཞགས་པས་དམ་དུ་བཅིངས་པའི་གནས་སྐབས་འདིར། །རྒྱལ་པོའི་ཁབ་ལ་བསྟེན་ཀྱང་ངེས་འབྱུང་གི །སེམས་དེ་སོ་སོར་ཐར་པའི་ས་བོན་དངོས། ༣ །ཀུ༵ན་འབྱུ༵ང་རི་མོ་མཁན་གྱིས་འཁོར་བ་འདིའི། །སྡུ༵ག་བསྔ༵ལ་གཟུགས་བརྙན་ལ་སྦྱར་རྒྱུ་འབྲས་ཆོས། །བསླུ་བ་མ་མཆིས་ལྐོག་གྱུར་མངོན་མཐོང་ནས། །དེ་འགོག༵་ལ༵མ་
དེ་རྒྱལ་བའི་བསྟན་པ་ཡིན། ༤ །རྟགས་ཙམ་འཛིན་པའི་སྔོན་འགྲོས་དགེ་སྦྱོང་ཡང༌། །ཉམས་དང་བཅོམ་ལྟུང་ཕམ་པར་སྦྱར་མང་ན། །དུས་ཁྲིམས་ཡན་ལག་བརྒྱད་དང་གཏན་གྱི་ཁྲིམས། །ཕྱོགས་གཅིག་ལྡན་པ་ཁྱིམ་ནའང་གཟུང་དུ་མཆིས། ༥ །གང་ཕྱིར་ཉ་སྟོང་ལ་སོགས་བཟང་ལྡན་དུས། །གྱི་ནར་མ་འཕྱན་མཐོ་རིས་ཐར་པའི་ལམ། །རྩ་བཞི་མྱོས་དང་གར་ཕྲེང་སྟན་མཐོན་པོ། །ཕྱི་དྲོའི་ཟས་སྤོང་ཡན་ལག་བརྒྱད་པ་སྟེ། ༦ །ཚུལ་ཁྲིམས་དེ་འདྲ་ལགས་ན་གནའ་དུས་ཀྱི། །ས་དབང་གཟུགས་ཅན་སྙིང་པོ་རྒྱལ་ཁབ་ནས། །དགྲ་བཅོམ་གོ་འཕང་བརྙེས་པའི་དཔེ་ཟླ་ལ། །ཕྱག་རྒྱས་བཏབ་པ་མེད་ཀྱི་ཅིས་མི་བརྩོན། ༧ །ཁྱད་པར་བྱང་ཆུབ་སེམས་ཀྱི་རྟ་བདུན་པས། །ཉེར་དྲངས་ཐེག་པ་ཆེན་པོའི་སྡེ་སྣོད་ཀྱི། །བསླབ་པའི་ངོ་བོ་གཟུགས་ཅན་མ་ཡིན་ན། །སྨོན་འཇུག་སྣང་བ་ཆེན་པོས་ས་ཆེན་སྐྱོངས། ༨ །གཞན་ཕན་སྙིང་རྗེ་ཆེན་པོའི་ཤིང་རྟ་ཡི། །ཁུར་དུ་བཟོད་ཙམ་ཉན་ཐོས་གླང་པོར་མིན། །འགྲོ་བའི་དཔལ་མོ་གར་ལ་བརྩེ་བ་ཡི། །སྒྱུ་མ་ཇི་བཞིན་འབངས་ལ་བྱམས་པར་མཛོད། ༩ །དྲག་ཤུལ་ཅན་ཞུས་མདོ་ལས་སྐྱེ་བ་ཡི། །ཕམ་ལ་ལྷག་བཅས་བཅུ་ཕྲག་དྲུག་
གི་སྐྱོན། །གསུང་དེ་རིགས་ཅན་ལྔ་ཡི་རྩའི་རྟེན་འབྱུང༌། །ཙམ་ཕྱིར་རང་བཞིན་བཟང་ལ་དེ་ཡོད་མིན། ༡༠ །ཞིང་སྐྱེས་རྣམས་ནི་མངོན་པར་འབྱུང་བའི་མདོར། །རིན་ཆེན་བདུན་གྱི་གཏམ་གྱི་རྗེས་བསྔགས་ནས། །བཙུན་མོ་རིན་ཆེན་མི་མཐུན་ཕྱོགས་ལྔ་དང༌། །བྲལ་ནས་ཡོན་ཏན་བརྒྱད་ལ་བསྙེན་དེ་མཚར། ༡༡ །ཐབས་ལས་ཐབས་མྱུར་སྔགས་ཀྱི་སྡེ་སྣོད་ནས། །སྒྱུ་མ་ཀུན་གྱི་དེ་ཉིད་རྨོངས་བྱེད་པའི། །སྒྱུ་མའི་དཔལ་མོ་བདེ་སྟོང་ཡེ་ཤེས་ཀྱི། །མཛོད་ཁང་དམ་པར་བསྔགས་དེས་ཁྱོད་ཅིག་བརྒྱན། ༡༢ །ཤེས་རབ་ཕ་རོལ་ཕྱིན་པའི་རིགས་སྔགས་ཀྱང༌། །དབང་གསུམ་སྒྱུ་མའི་རྟེན་ཅིང་འབྲེལ་འབྱུང་ཆོས། །བཞི་ཚན་བཞི་པའི་ལྷན་ཅིག་སྐྱེས་པ་ལ། །དགའ་བའི་སྒྲས་བརྗོད་ཡེ་ཤེས་བདག་པོའང་ཉིད། ༡༣ །གང་ཁྱོད་ཤེས་རབ་དམ་པའི་རང་བཞིན་དུ། །གདོད་ནས་གྲུབ་པའི་རྣམ་པ་གང་ཡིན་པ། །རྐྱེན་གྱིས་སད་བྱེད་སྨིན་གྲོལ་བདུད་རྩིའི་ཆར། །ཁྱེད་ལ་གདམས་ན་རིམ་གཉིས་ལམ་ལ་བརྩོན། ༡༤ །ཆོས་ཀྱི་དབྱིངས་ཞེས་རྒྱལ་བ་ཀུན་གྱི་ཡུམ། །དེ་ཡི་རང་བཞིན་དྲན་པའི་དབང་པོ་སྟེ། །དྲན་པ་ཁོ་ནས་མྱ་ངན་འདའ་བ་ལ། །བཅོས་སུ་མེད་འདི་རྫོགས་པ་ཆེན་པོ་ཡིན། ༡༥ དེ་ཕྱིར་དེ་ཡི་
ཆོས་ཉིད་གོམས་བྱས་ན། །རྒྱལ་པོའི་ཁབ་ཏུའང་སེམས་དབེན་ཐོབ་གྱུར་ནས། །གདོད་མའི་ཞིང་དུ་རོ་གཅིག་མཛའ་བ་ཡི། །རྟེན་འབྲེལ་སྨོན་ལམ་ཁྱེད་ལ་དགེ་གྱུར་ཅིག ༡༦ །ས་སྐྱོང་སྡེ་དགེའི་བཙུན་མོ་དམ་པ་ངང་ཚུལ་བྱང་ཆུབ་རྒྱལ་མོ་ལ་རྫོགས་ཆེན་པ་རང་བྱུང་རྡོ་རྗེས་གདམས་པ་རྫོགས་སོ།། །།༈ སྤྲིང་ཡིག་གི་དོན། སློབ་དཔོན་རིན་པོ་ཆེའི་མཚན་རྣ་བར་ཐོས་པ་དེའི་རྣ་བ་དང་གཞན་གྱི་རྣ་བ་མི་འདྲ་བས་རིན་ཐང་བཻཌཱུརྱ་དང་མཉམ། དེའི་རྒྱུའང་སྙན་དངགས་ཀྱི་རབ་བཏགས་རྫུན་གཏམ་མིན། སངས་རྒྱས་རྩ་མཆོག་གྲོར་དུ་གཤེགས་འཕྲལ་པདྨ་ལ་བརྫུས་ཏེ་བྱོན་ཟེར་བའི་དོན་ནོ། །དེ་ནས་རྐང་པ་གཉིས་པའི་དོན། འཁོར་བ་ལ་གནས་ཀྱང་མི་ཁོམ་པ་བརྒྱད་དང་བྲལ་བའི་ལུས་རྟེན་དལ་འབྱོར་བཅོ་བརྒྱད་ཚང་བ་ཐོབ་ནས། ཚེ་རིང་བ་ལ་སོགས་མཐོ་རིས་ཀྱི་ཡོན་ཏན་བདུན་མཛོད་འགྲེལ་ན་ཡོད་པ་དེ་དང་ལྡན་པའི་དོན། གསུམ་པ། དེང་སང་རྒྱལ་བསྟན་དར་ཀྱང་མ་སྨིན་པས་སྙིགས་མ་ལྔ་སྟེ། ལྟ་བའི་སྙིགས་མ་ལ་སོགས་པ་ལྔས་བཅིངས་སྐབས་རྒྱལ་ཁབ་ན་གནས་ཀྱང་འཁོར་བ་ལ་ངེས་འབྱུང་གི་བློ་ཡོད་ན། སོ་སོར་ཐར་པའི་སྡོམ་པ་དངོས་དེ་ངེས་འབྱུང་རྒྱུད་ལ་སྐྱེས་པ་དང་ཡོད་ཟེར་བའི་དོན། བཞི་པ། ཀུན་
འབྱུང་ནི་ཉོན་མོངས་པ། སྡུག་བསྔལ་ནི་དེའི་འབྲས་བུ། དེ་འདྲའི་རྒྱུ་འབྲས་ལ་ཡིད་ཆེས་ནས་ལམ་ཉམས་སུ་ལེན་སྡིག་སྤང་དགེ་བསྒྲུབ་ལ་འབད་ནས་སླར་སྐྱེ་བ་འགོག་པའི་ཐབས་ནི་འདུལ་བའི་བསྟན་པ་ངོ་ཐོག་ཡིན་ནོ། །ལྔ་པ་ནི། ད་ནི་རྟགས་ཙམ་འཛིན་པ་ལ་ཉེ་ལ་དགེ་སྦྱོང་རྣམས་ཀྱང་བསླབ་པ་དང་འགལ་བ་ཉམས་བཅོམ་ལྟུང་གསུམ་དང༌། སྡོམ་པ་རྩ་བ་ནས་ཞིག་པ་ཕམ་པ་ལ་སྦྱོར་དུས་འདིར། དུས་ཁྲིམས་ཏེ་ཉ་སྟོང་བརྒྱད་སོགས་ལ་ཡན་ལག་བརྒྱད་ཀྱི་རྣམ་གྲངས་མཛོད་ལས་གསལ་བ་ལྟར་བསྙེན་གནས་བསྒྲུབ་པ་དང༌། ཕྱོགས་གཅིག་སྤོང་པ་སྟེ་སྲོག་གཅོད་དམ་རྫུན་ལྟ་བུས་མཚོན་གང་ཡང་རུང་བ་གཏན་དུ་སྤོང་བའི་ཚུལ་ཁྲིམས་ནི་ཁྱིམ་པས་ཀྱང་བྱར་བཏུབ་པས་ན། ཞེས་མཚམས་སྦྱོར་ནས། རྐང་པ་དྲུག་པས། ཉ་སྟོང་ལ་སོགས་པའི་དུས་བཟང་པོ་དེ་རྣམས་ལ་གཏང་སྙོམས་སུ་མ་ལུས་པར་ཕྱི་མ་མཐོ་རིས་ངེས་པར་ཐོབ་པའི་རྒྱུ་ཡན་ལག་བརྒྱད་པ་སྲུངས་ཤིག་ཅེས་གདམས་པའོ། །བདུན་པའི་དོན། དེ་ལྟར་ཁྱིམ་པའི་ཕྱོགས་ལའང་ཚུལ་ཁྲིམས་དང་དུ་བླང་ཚུལ་དེ་འདྲ་ཡོད་པས་སྟོན་པ་འཚོ་ཞིང་གཞེས་པའི་དུས་རྒྱལ་པོ་གཟུགས་ཅན་སྙིང་པོ་དགྲ་བཅོམ་པའི་གོ་འཕང་ཁྱིམ་ན་གནས་བཞིན་དུ་ཐོབ་པ་ལ་དགོངས་ནས་བརྩོན་ཅིག་ཅེས་པའོ། །
བརྒྱད་པ། ཁྱད་པར་ཐེག་པ་ཆེན་པོ་ནི་བྱང་ཆུབ་ཀྱི་སེམས་ལ་རག་ལུས་པ་ཡིན་ཞིང༌། སྡོམ་པ་ཡང་ཉན་ཐོས་ལྟར་ལུས་ངག་གི་ཁྲིམས་གཟུགས་ཅན་ལྟར་སྣང་བ་ཙམ་མ་ཡིན་པ། རྣམ་པར་རིག་པ་སེམས་བཟང་པ་ལ་རག་ལས་པས་སྨོན་འཇུག་གི་སེམས་བསྐྱེད་ཁོ་ནས་ས་ཆེན་པོ་སྐྱོངས་ཤིག་ཅེས་པའོ། །དགུ་པ། བྱང་ཆུབ་སེམས་དང་ལྡན་པས་གཞན་ཕན་བྱེད་པ་ཙམ། ཉན་ཐོས་ཀྱི་སྡེ་སྣོད་ཀྱི་མ་ཡིན་པས་ཁུར་ཐེག་ཆེ་ཆུང་གླང་པོ་དང་ཤིང་རྟ་ལ་སྦྱར་ནས། སངས་རྒྱས་ཀྱི་འཁྲུངས་རབས་བརྒྱ་པར་གར་མཁན་འགྲོ་བའི་དཔལ་མོ་ཞེས་པའི་བུ་མོར་སྐྱེས་ནས་གར་མཛད་ནས་སེམས་ཅན་ལ་ཕན་བཏགས་པ་ལྟར་སྐྱེ་བ་དམན་པས་མི་སྟོབས་འབངས་ལ་བྱམས་སྐྱོང་མཛོད་ཅིག་ཅེས་པའོ། །བཅུ་པ། ཁྱིམ་བདག་དྲག་ཤུལ་ཅན་གྱིས་ཞུས་པ་ལས། བུད་མེད་ལ་སྐྱོན་དྲུག་ཅུ་ལྷག་བཅས་གསུངས་པ་དེ། གསང་སྔགས་ཀྱི་གཞུང་ནས་བུད་མེད་ལ་རྩ་རིགས་ཅན་ལྔས་ལྷག་པའི་རྟེན་འབྲེལ་ཙམ་ཡིན་ན། རང་བཞིན་ངང་རྒྱུད་བཟང་པོ་ལ་དེ་མེད་པས་ལུས་རྟེན་དམན་ཀྱང་ཐེག་པ་ཆེན་པོའི་ཆོས་ཉམས་སུ་ལེན་པ་ལ་མི་སྟོ་བའི་དོན་དང༌། བཅུ་གཅིག་པའི་དོན་ནི། ཞིང་སྐྱེས་ཀྱི་ཌཱཀྐི་མ་རྣམས་ནི་མངོན་འབྱུང་གི་མདོར་རྒྱལ་སྲིད་སྣ་
བདུན་བཤད་པའི་སྐབས་བུད་མེད་ཀྱི་སྐྱོན་ལྔ་དང་བྲལ་ཞིང༌། ཡོན་ཏན་བརྒྱད་དང་ལྡན་པ་ལ་བཙུན་མོ་རིན་ཆེན་གྲགས་པ་དེ་ཁྱོད་ལ་རང་བཞིན་གྱིས་མངའ་ཞེས་བརྗོད་པའོ། །དེ་མན་ཆད་ཀྱི་ཚིག་རྐང་གསུམ་ནི། ཁྱད་པར་སྔགས་ཀྱི་སྡེ་སྣོད་ནི་ཐབས་ལས་ཐབས་མཆོག་ཏུ་གྱུར་པ་ཡིན་པས་དབང་གོང་མ་གསུམ་པོ་ཤེས་རབ་མའི་སྒྱུ་རྩལ་ལ་མ་བསྟེན་པར་བསྐུར་དུ་མེད་པས་དེ་ཉིད་ཀྱི་བདག་པོ་ཁྱོད་གཅིག་ཡིན་ན། དེའི་སྤངས་རྟོགས་ཡོད་པར་བྱེད་པའི་རྟེན་འབྲེལ་སྨིན་བྱེད་ཀྱི་དབང་དང་གྲོལ་བྱེད་ཀྱི་ཁྲིད་ཁྱེད་ལ་གདམས་ཟིན་པས་བསྐྱེད་དང་རྫོགས་པའི་ལམ་རིམ་པ་གཉིས་ལ་བརྩོན་ཅིག་པའོ། །ཚིག་རྐང་བཅོ་ལྔ་པ་ནི། སེམས་ངོ་འཕྲོད་ནས་དྲན་པ་བསྐྱང་བ་དེ་རྫོགས་པ་ཆེན་པོ་ཡིན་ཚུལ་དང༌། བཅུ་དྲུག་པས། དྲན་པ་གོམས་ན་རྒྱལ་ཁབ་འདུ་ལོང་ཅན་དུའང་སེམས་དབེན་པས་རྣམ་རྟོག་གི་རྣམ་གཡེང་ལམ་དུ་འཁྱེར་ཤེས་ནས་གནས་ལུགས་མཐོང་བ་ལ་ཚེགས་མེད་པས་གདོད་མའི་སངས་རྒྱས་ཀྱི་རང་ཞལ་མཇལ་བར་སྨོན་ལམ་དང་ཤིས་པ་བརྗོད་པའོ། །གཏམ་ཚོགས་ལེའུ་དགུ་པའོ།། །།
གཏམ་ཚོགས་ལེའུ་བཅུ་པ། དམངས་ལ་སྤྲིང་བའི་གཏམ་དཔེ་དོན་འབྲེལ་བ།
དམངས་ལ་སྤྲིང་བའི་གཏམ་དཔེ་དོན་འབྲེལ་བ་ཞེས་བྱ་བ། འཇིག་རྟེན་གྱི་ངེས་བརྗོད་ལ་བརྟེན་ནས་དམ་པའི་གནས་ལུགས་སྟོན་པ། མཚོ་བྱུང་ལྷ་མོ་ལ་ན་མ། །པ་
སངས་ཤར་རིའི་རྩེ་ལ་ཆས་གྱུར་ཅིང༌། །ཟླ་བ་སྒྲ་གཅན་ཁ་ནས་ཐར་ན་ཡང༌། །ཉི་མ་མེད་ན་འཇིག་རྟེན་ལོང་བར་འགྱུར། །དེ་ཕྱིར་མིག་ཀྱང་ཉིན་མོའི་གཞན་དབང་ཅན། །ཆེན་པོའི་རིགས་གཟུགས་ལང་ཚོས་སྒེག་བྱས་ཤིང༌། །དབང་ཕྱུག་ལ་སོགས་རྒྱན་གྱིས་འབྱོར་ན་ཡང༌། །ཡོན་ཏན་མེད་ན་ནམ་མཁའི་གླང་ཆེན་ཏེ། །འགྲོ་ལྡིང་བརྗིད་ལ་འདི་ཕྱིའི་དོན་རབ་ཉམས། །འཇིག་རྟེན་འདི་ན་ནོར་བུའི་རིན་ཐང་ཙམ། །རྙེད་པ་མིན་པས་ཞོ་འཐུང་རྡོ་རྗེའི་རྡུལ། །ཚངས་དང་དབང་པོའི་རྣ་རྒྱན་ལ་དཔྱངས་ཀྱང༌། །མང་དུ་ཐོས་པའི་རྒྱན་ལ་བསྐྲུན་མི་ནུས། །ཡིད་བཞིན་ནོར་ལས་དགོས་འདོད་འབྱུང་བ་ཡང༌། །ཤེས་རབ་མཐུས་བྱེད་བེམ་པོའི་རང་བཞིན་ནི། །རྟོག་པ་མེད་ལ་འདོད་པ་འཇོ་བ་དེ། །སྐྱེས་བུའི་རྣམ་རིག་ལ་རག་མཁྱེན་པར་མཛོད། །ཡོན་ཏན་ཡོད་ཀྱང་ཀུན་ཏུ་འཕྱར་བྱེད་ཅིང༌། །བདག་ཉིད་བསྟོད་ནས་གཞན་མཚང་འདྲུ་བྱེད་ན། །བརྒྱ་བྱིན་ཡིན་ཡང་ལྷ་ཡི་དམོད་འདོར་པས། །ང་རྒྱལ་འདྲ་བའི་གནོད་པ་གཞན་ན་མེད། །ཡོན་ཏན་མེད་ལ་བརྙས་དང་དཔྱས་གདགས་ཤིང༌། །ཡོན་ཏན་ཅན་ལ་ཁྲོས་པའི་རྣམ་འགྱུར་སྟོན། །རང་ལ་དགོས་ཀྱི་གཞན་ལ་མི་རུང་བའི། །སྡུག་བསྔལ་ཅན་དེ་ལྷ་མིན་སྡེ་ཚན་གཅིག །ཡོན་ཏན་ལ་
བརྟེན་མཁས་པའི་གནས་ཐོབ་ཀྱང༌། །རང་ཕྱོགས་འཕྱར་བ་འབའ་ཞིག་གཟེངས་བསྟོད་ནས། །བསྟན་པ་དཀྲུག་ཅིང་གཞན་གྱི་ཁུར་འགྲོ་ན། །ཆུ་ཀླུང་གནོད་པ་ཅན་ལ་བསྙེན་དང་མཚུངས། །དེ་ཕྱིར་དབང་པོ་ཉེ་བར་ཞི་བ་ཡི། །ཚད་མས་ཐོག་མར་རང་ཉིད་གཞལ་བྱས་ན། །གདོད་ཀྱིས་ཕ་རོལ་གཞལ་བའི་གཏན་ཚིགས་ཀྱང༌། །དྲང་སྲོང་ངག་གི་རྗེས་སུ་སོན་པར་འགྱུར། །གླེང་གཞིའི་རབ་བྱེད་དོ། །མཁས་པ་ཚིག་ལ་རོ་མྱོང་གིས། །ཕལ་པ་ཟས་སྐོམ་ཙམ་གྱིས་ཚིམ། །མུ་ཏིག་མེད་པའི་ཉ་གསོད་པ། །གདོལ་པ་རྣམས་ཀྱི་སྤྱོད་ཚུལ་ཡིན། །དམ་པ་གྲོགས་སུ་བསྟེན་པ་ལས། །འདི་ཕྱིའི་ལེགས་སྨོན་ཐམས་ཅད་འགྲུབ། །ཤཱཀྱ་བཟང་ལྡན་ལ་བསྟེན་ནས། །འདྲེག་མཁན་འདུལ་བ་འཛིན་པར་འགྱུར། །ནགས་ཚལ་ཕལ་པ་མང་མོད་ཀྱི། །ཙན་དན་ཡོད་པ་མ་ལ་ཡ། །ཀུན་ཏུ་སྐྱེ་བོས་གང་གྱུར་ཀྱང༌། །དགེ་བའི་གྲོགས་པོ་ལ་ལ་ཙམ། །རང་བཞིན་ངན་པ་ལ་བསྟེན་ན། །དམ་པ་མཐོང་ཡང་ཐེ་ཚོམ་སྐྱེ། །ཁྱི་ཡིས་ཕུག་པའི་བྱིས་པ་དག །ནེའུ་ལེ་མཐོང་ནའང་སྐྲག་ཅིང་བརྒྱལ། །གཡོ་ཅན་རྣམས་ཀྱིས་རང་ཉིད་ལ། །སྨ་འབེབས་བྱས་པ་མ་ཤེས་པས། །དྲང་ཞིང་བདེན་པར་སྨྲ་བ་ལ། །ལྐུགས་པ་ཡིན་ཞེས་བླ་དྭགས་འདོགས། །ཡོན་ཏན་
ལྡན་པའི་སྐྱེས་བུ་ནི། །ས་ཕྱོགས་གཞན་ལ་ཕྱིན་ན་བྲིན། །ཁུ་བྱུག་མོན་དུ་སྐྱེས་ན་ཡང༌། །ཅ་ཅོ་བྷོ་ཊའི་དབུས་ན་སྙན། །གཞོན་ནུའི་དུས་ན་བསམ་མེད་ཀྱི། །དབང་དུ་གྱུར་པ་ཐལ་ཟིན་ཀྱང༌། །ད་ནི་ལང་ཚོར་གྱུར་པའི་དུས། །འཆལ་དང་ཆུང་མའི་དབང་མ་གཏོང༌། །རྒས་པ་ཤི་བའི་སྔོན་འགྲོ་ལ། །ངེས་འབྱུང་སྐྱེ་བ་ལྟ་ཞོག་གི །བུ་ལ་ཁྱིམ་ཐབ་ཕོགས་ཟེར་ནས། །ད་དུང་སོས་དལ་བྱེད་པ་བླུན། །འཇིག་རྟེན་དག་ན་དགྲ་མང་ཡང༌། །འཆི་བདག་ལྟ་བུའི་འཇིགས་པ་མེད། །གཤིན་རྗེའི་ཁ་རུ་ཆུད་ཟིན་པ། །བསམས་ནས་ཆོས་ལ་གུས་པར་གྱིས། །ངོ་ཚ་དཔང་པོར་མི་བྱེད་ཅིང༌། །ཁེ་ཉེན་ཅུང་ཟད་མི་བལྟ་ན། །ཟས་གོས་སྒྲུབ་ལ་ཐབས་མཁས་ཀྱང༌། །ཉ་པ་རྣམས་དང་ཁྱད་པར་ཅི། །ངན་པ་ཇི་ཙམ་ཉམ་ཆུང་བ། །དེ་ཡི་བར་དུ་དུལ་ཞིང་འཇམ། །ཅུང་ཟད་རྒྱགས་པར་གྱུར་པའི་ཚེ། །གླང་པོའི་ཀོ་བ་སྐམས་དང་མཚུངས། །སྒོག་སྐྱ་ག་པུར་གྱིས་བྱུགས་ཀྱང༌། །རང་གི་མཚན་ཉིད་མི་འདོར་ལྟར། །ཅུང་ཟད་རྐྱེན་གྱིས་མཐོ་དམན་ཅན། །སྲང་མདའ་ལྟ་བུའི་སྐྱེ་བོ་སྤང༌། །རྒྱལ་པོ་སྙན་ཁུང་སྲབ་པ་དང༌། །བློན་པོ་གཟུ་བོར་མི་གནས་པ། །བཙུན་མོ་ཕྲ་མར་དགའ་བ་གསུམ། །
རྒྱལ་སྲིད་དཀྲུག་པའི་སྲུབ་ཤིང་ཡིན། །སེངྒེ་རི་དྭགས་ཤ་ཟ་ཡང༌། །ལོ་གཅིག་འདོད་པ་ལན་ཅིག་སྤྱོད། །འབངས་རྣམས་རྒྱལ་པོའི་དཔལ་ཡིན་ཡང༌། །དཔྱ་ཐང་ཡང་ཡང་སྡུད་ན་ཉམས། །བོང་བུ་བཞིན་དུ་འདོད་པ་ལ། །ཆོག་ཤེས་མེད་པའི་འཁོར་ངན་གྱི། །ལྐོག་ཏུ་མི་ལྟོགས་མནར་བྱེད་པའི། །འཚིར་དཔྱད་འགར་བ་ལ་ཡང་མེད། །དྲུག་ཆའི་དཔྱང་ཐང་ཐོབ་པའི་གནས། །མང་པོས་བཀུར་བ་ཁོ་ན་སྟེ། །དེ་ཡི་ཁྲིམས་ལུགས་མི་སྲོང་ན། །བུ་ལོན་འབངས་ལ་བླངས་པ་ཡིན། །རི་བོ་ས་ཡི་ཁུར་ཡིན་ཀྱང༌། །ཐེག་པ་དམན་པའི་རྣམ་འགྱུར་མེད། །གང་དག་བྱས་པ་མི་གཟོའི་ཁུར། །དབང་ཆེན་ས་གཞིས་ག་ལ་ཐེག །སྐྱེ་བོ་ཉོ་ཆང་ལ་དགའ་དང༌། །བུད་མེད་ལྐོག་ཟས་བྱེད་པ་གཉིས། །ཁྱིམ་ཐབ་བརླག་ལ་མཚུངས་པ་ཡི། །དབང་པོ་སྲང་རྡོ་ཁོ་ན་ཡིན། །གཞན་དག་འབྱོར་པ་མཐོང་ནས་ནི། །ཤིན་ཏུ་འཁྲུགས་པའི་སེམས་བསྐྱེད་ཀྱང༌། །དེ་ལས་ཅུང་ཟད་མི་རྙེད་སྟེང༌། །རང་གི་བསོད་ནམས་ལྷག་མེད་འཇོམས། །ནོར་ལྡན་སེར་སྣས་བསྡམས་པ་རྣམས། །མཆོད་སྦྱིན་ཡུལ་ལ་འཁོན་པའི་རྒྱུས། །སྒྲ་ལྔ་འདོན་པའི་ཡི་དྭགས་ཀྱི། །རྒྱུ་མཐུན་ད་ལྟ་སླེབ་པ་མང༌། །མི་བསྲུན་ཁ་ནས་དོན་པ་ཡི། །ཚིག་ངན་
སྦྲུལ་གྱི་ལྕེ་རྐྱོང་ན། །ཕ་རོལ་སྙིང་ལ་ཟིན་པའི་ནད། །རྒྱུན་ཤེས་བུས་ཀྱང་བཅོས་པར་དཀའ། །བདག་ལ་གནོད་པ་དེ་བྱུང་ན། །བཟོད་པའི་སྨན་ལ་བསྟེན་བྱ་སྟེ། །ལང་ཚོ་རྒུད་པར་མི་འགྱུར་བའི། །དཀའ་ཐུབ་ནང་ན་དེ་ཉིད་མཆོག །ཁྱིམ་པ་ཡོན་ཏན་མི་ལྡན་ཀྱང༌། །བསམ་པ་བཟང་པོར་ནན་གྱིས་སློབ། །མེ་ཡི་གྲོགས་སུ་རླུང་བཞིན་དུ། །དགེ་བའི་ཆོས་རྣམས་སྡུད་པའི་ཕྱིར། །སློང་བ་དང་འདྲའི་མཛའ་བཤེས་དཀོན། །མ་སྦྱིན་ཁ་ནས་མ་འདོན་ཅིག །གཏོང་བ་དང་འདྲའི་བང་མཛོད་ནི། །མགོན་མེད་ཟས་སྦྱིན་ལ་ཡང་མེད། །ཁྱིམ་ཐབ་རྙེད་པ་སླ་མོད་ཀྱི། །ཕ་མ་རྙེད་པ་ཤིན་ཏུ་དཀོན། །དེ་ཉིད་བཀུར་བའི་བསོད་ནམས་ཁྱད། །ཤས་ན་ལོག་ལྟའི་གཡང་ལས་གྲོལ། །གཞན་ལ་གནོད་པ་ལྷུར་བྱེད་ན། །དེ་ནི་ཚངས་པར་སྤྱོད་ཀྱང་ཅི། །སྤུ་གྲིས་བཟུང་བའི་སྦྲང་རྩི་ཡིས། །རྨས་པ་ཉིད་ལས་གསོས་པ་མེད། །དགྲ་བོ་ཐུལ་བའི་མཐའ་འཚོལ་ལ། །ཚེ་ཡི་གཏུགས་པར་འགྱུར་བ་སྟེ། །དེ་ལ་ཉེ་བར་ལེན་པའི་སེམས། །བཅུལ་ན་རང་ཉིད་བདེ་བ་ཐོབ། །ཇི་སྲིད་ཆོག་ཤེས་མ་ཐོབ་པ། །དེ་སྲིད་ནོར་གྱིས་ཕོངས་པ་སྟེ། །བྱི་བས་འབད་ནས་བསགས་པའི་མཐར། །ལྟོགས་གྲིར་ཤི་བ་མ་ཐོས་སམ། །
དྲང་པོ་རེ་ཞིག་མཐུ་ཆུང་ཡང༌། །དེ་ཡི་རང་བཞིན་ཉམས་པ་མེད། །ཉི་མ་སྤྲིན་གྱིས་སྒྲིབ་ན་ཡང༌། །དེ་མ་ཐག་ཏུ་ལྷག་པར་གསལ། །དགྲ་བཅོམ་རྣམས་ཀྱི་ཚུལ་ཁྲིམས་ནི། །ཁྱིམ་ནས་རྙེད་པར་མི་འགྱུར་ཀྱང༌། །དུས་ཁྲིམས་ཡན་ལག་བརྒྱད་པ་དང༌། །དགེ་བསྙེན་གནས་ལ་གུས་པར་གྱིས། །དགེ་སྦྱོང་གཞན་སྡེ་འཐག་པ་དང༌། །སྔགས་པ་མཐུ་གཏད་བྱེད་པ་ལས། །ཁྱིམ་པ་གཟུ་བོར་གནས་པ་རྣམས། །ཕ་རོལ་ལེགས་པ་མངོན་སུམ་ཡིན། །སྡོམ་པ་ལན་ཅིག་དྲལ་གྱུར་ཀྱང༌། །འཆབ་སེམས་མེད་ན་གསོར་ཡོད་ཀྱི། །རྟག་ཏུ་བསམ་པ་ཉམས་པ་རྣམས། །འགྲོ་ས་ངན་སོང་གསུམ་ལས་མེད། །སྡེ་སྣོད་ཤེས་པས་མི་ཆོག་གིས། །བསླབ་པའི་གནས་ལ་གུས་པ་གཅེས། །ལྷས་བྱིན་གྱི་ནི་བརྟུལ་ཞུགས་ལྔས། །མེ་ལྕེར་དྲངས་པ་མ་ཐོས་སམ། །དམ་པ་རེ་ཞིག་ཉམས་གྱུར་ཀྱང༌། །དེ་ལས་ལྡང་བའི་ཐབས་བྱེད་དེ། །ཟླ་བ་ཉ་བ་གཟས་ཟིན་ཀྱང༌། །ད་དུང་གླིང་བཞི་བསྐོར་ལ་བརྩོན། །དགོན་པར་བསྡད་པས་མི་ཆོག་གིས། །དགེ་སྦྱོང་གི་ནི་ཆོས་བཞི་བརྟག །འབྲོག་གནས་དབེན་པ་སྤྱང་ཀི་དང༌། །ཝ་མོས་བཟུང་བ་མ་མཐོང་ངམ། །གང་ལ་སྙིང་རྗེ་ཡོད་པ་དེར། །ངེས་པར་ཐར་པའི་ས་བོན་ཡོད། །ཀུན་ཏུ་རིགས་ཅན་དེ་ཡིན་གྱི། །ཆོ་འབྲང་བཙུན་པ་ལྟར་
སྣང་ཙམ། །རིན་ཆེན་སྣ་བདུན་ལྡན་ན་ཡང༌། །འཆི་བའི་ཚེ་ན་རྗེས་མི་འབྲང༌། །འཕགས་པའི་ནོར་བདུན་བསྙེན་པ་རྣམས། །དབང་ཕྱུག་བརྒྱད་དུ་འགྲོ་བ་མང༌། །ཆོས་བཞིན་སྤྱོད་དང་དབང་པོ་ཐུལ། །དེ་ལ་དགྲ་བཅོམ་ཐག་མི་རིང༌། །ཚོས་ཀྱིས་བཙོས་ཀྱང་སྡིག་པས་བཀབ། །དེ་འདྲ་ཐར་པའི་རྒྱལ་མཚན་མིན། །རྫས་ལས་འཕེལ་བའི་བསོད་ནམས་བདུན། །སྒྲུབ་པ་ཐུབ་པའི་ལུགས་ཡིན་གྱིས། །དམ་པར་བཏགས་ནས་དཀོར་རྫས་ལ། །གཟི་བྱིན་བསྒྲུབ་ན་ཤིན་ཏུ་ཉམས། །སོ་སོ་སྐྱེ་བོའི་རང་ཉམས་ཀྱིས། །འཕགས་པ་འཇལ་བར་མི་བྱ་སྟེ། །ཁྲོན་པའི་སྦལ་པ་རྒན་པོ་ཡིས། །རུས་སྦལ་བཞད་གད་སློང་མིན་ནམ། །བྱ་བ་ཀུན་ལ་མ་བརྟགས་ན། །འགྱིང་ཚུལ་སྟོན་ཡང་དཔའ་བོ་མིན། །བྱི་ལ་སྦོས་པའི་ཟུངས་ཁྲག་དེ། །ཁྱི་རྒན་གོམ་པ་འཁྱོར་བས་ལྡག །གལ་ཏེ་ནོར་ལ་སྲེད་ན་ཡང༌། །དྲང་པོའི་སྤྱོད་པས་བང་མཛོད་དགང༌། །བཀང་ནས་ལེགས་པར་སྤྱོད་ཤེས་ན། །རང་གཞན་སྲུང་བའི་དཔལ་ཐོབ་འགྱུར། །ཇི་སྲིད་ཕ་རོལ་མཐོང་བ་སྟེ། །དེ་སྲིད་གཞན་ལ་ཕན་པ་གྱིས། །གཡོ་སྒྱུ་མེད་པའི་བསམ་སྦྱོར་འདིས། །རང་དོན་ཚགས་སུ་ཚུད་པ་ཡིན། །རྒྱལ་པོ་ཡུལ་འཁོར་མི་བསྲུང་དང༌། །བློན་པོ་ཐབས་ལ་མི་མཁས་པས། །
རྒྱལ་སྲིད་འཕེལ་ལྟ་ག་ལ་ཞིག །རང་གི་སྲོག་ཀྱང་བསྲུང་མི་ནུས། །མི་མཁས་ང་རྒྱལ་ཆེ་བ་དང༌། །གཙོ་བོ་འདོད་དང་ཞལ་ཏ་མང༌། །བསམ་པ་མི་མཐུན་འུར་རྡོ་ཡིས། །རང་སྲིད་ཆམ་ལ་ཕབ་པ་མང༌། །བྱི་བས་ལྡེ་མིག་འཛིན་པ་དང༌། །བྱ་རོག་ཕྱག་ཚང་བྱེད་པ་ནི། །བང་མཛོད་མྱ་ངན་འདའ་བ་ཡི། །སྔ་ལྟས་ཡིན་པ་སུས་མི་ཤེས། །དེ་ཕྱིར་རྒྱལ་བློན་འབངས་བཅས་ཀུན། །ལྗོན་ཤིང་ལ་ནི་འཁྲི་ཤིང་ལྟར། །ཕན་ཚུན་ལྟོས་གྲུབ་གཟུ་བོའི་བློས། །རང་སའི་བྱ་བ་དྲང་པོར་སྲོངས། །བཟའ་ཤིང་བཏུ་བར་བྱ་མོད་ཀྱིས། །སོལ་བ་མཁན་གྱི་ལུགས་མི་སྐྱོང༌། །དཔྱ་ཁྲལ་ཡན་ལག་མ་རྫོགས་ཀྱང༌། །ཞོ་ཤའི་དྲིན་ལ་ལེགས་པར་སོམས། །སྦྲང་རྩི་དང་ནི་ཐི་བྱའི་ཚང༌། །ཟླ་བ་ཆོས་དང་རྒྱལ་པོའི་ནོར། །ཅུང་ཟད་བསགས་པས་འཕེལ་བའི་ཕྱིར། །ཆུ་ཐིགས་ལྟ་བུའི་རྣམ་འགྱུར་སྤོངས། །མི་དགེ་བཅུ་ལ་ལོག་ལྟ་ཐུ། །དེ་ལས་སྲོག་གཅོད་འབྱུང་བས་ན། །ཕྱི་རོལ་ཉམས་པ་མི་བསམ་ཀྱང༌། །ཚེ་ཐུང་གྱུར་ལ་སྐྲག་པར་བྱ། །རྨ་བྱ་ཚད་པས་གདུངས་གྱུར་ཀྱང༌། །རྫིང་བུ་སྙོག་མར་འཇུག་མི་བྱེད། །ཡ་རབས་ཤིན་ཏུ་ཉམ་ཐག་ཀྱང༌། །མ་བྱིན་ལེན་ལ་སྤྲོ་བ་ཞན། །ལོག་གཡེམ་རྣམ་པ་མང་མོད་ཀྱི། །སྡོམ་པ་འཇིག་པར་བྱེད་པ་ནི། །ཁ་ན་མ་ཐོ་ཆེན་པོའི་གནས། །དེ་བཞིན་གཞན་སེམས་བསྲེག་ལས་བྱོལ། །ཁྱིམ་པ་ལ་
ཡང་རྫུན་བཀག་ན། །ཕ་རོལ་བསླུ་བའི་དགེ་སྦྱོང་དང༌། །དགེ་འདུན་ལྷག་མར་ལྟུང་བཞིན་དུ། །ཡང་དག་འབུལ་བ་མཚང་རེ་ཆེ། །དེ་བཞིན་ཕྲ་མ་ལ་སོགས་པ། །བསམ་པའི་ལྷག་མ་གསུམ་པོ་དང༌། །སེམས་པ་ཡིད་ཀྱི་རྣམ་གསུམ་པོའི། །རྒྱུ་འབྲས་ཤེས་པའང་མཁས་པ་ཡིན། །དུག་སྦྲུལ་སྲོག་ཆགས་གསོད་པ་དང༌། །གླང་པོ་རྩྭ་མཆོག་ཟ་བ་གཉིས། །སྐེམ་སྦེག་ཁྱད་པར་ཆེ་བ་བཞིན། །ཁྲེལ་དང་ངོ་ཚ་ཟས་ཀྱི་མཆོག །ངེས་པར་བརྫུན་པ་མེད་པའི་ཚིག །སྨྲ་བའི་ཁ་ནི་ཡི་གེ་སྟེ། །དེ་ལས་གཞན་དུ་ལྕེ་བདེ་ཡང༌། །ནེ་ཙོ་བཞིན་དུ་སྙིང་པོ་མེད། །ལོང་བར་ཟ་འོག་སྟོན་པ་དང༌། །ཕྱུགས་ཀྱི་མགྲིན་པར་མུ་ཏིག་འདོགས། །དད་པ་མེད་ལ་ཆོས་འཆད་གསུམ། །དུས་ཚོད་གྲོན་པའི་རྒྱུ་རུ་ཟད། །སྒྲ་པ་དོན་འགྱུར་ལ་རྨོངས་དང༌། །ཚད་མ་རྫས་ལྡོག་མི་ཕྱེད་དང༌། །བཟོ་གནས་ཆ་ཚད་མི་ལྡན་དང༌། །གསོ་རིག་ཞུ་རྗེས་མི་ཤེས་དང༌། །སྡེ་སྣོད་ལ་རྨོངས་ནང་རིག་པ། །རིག་གནས་ཡིན་ཀྱང་གཟུགས་བརྙན་ཙམ། །རང་སྡེ་ཤིན་ཏུ་སྲུང་མཁས་པ། །མུ་སྟེགས་ཀླ་ཀློའི་ཁྲོད་ནའང་ཡོད། །འདོད་པར་བགོ་བཤའ་བྱེད་ནུས་པའི། །སྐྱེས་བུ་དེ་ནི་དྲང་སྲོང་ཡིན། །ཤིན་ཏུ་འདོད་པས་གདུངས་ན་ཡང༌། །ཁྲེལ་དང་ངོ་ཚའི་གོས་མི་འཕུད། །དེ་ལ་ཡ་རབས་
ཞེས་བྱ་སྟེ། །འབྱོར་ལྡན་གཡུང་པོའི་ཁྲོད་ནའང་མང༌། །གཡུལ་ངོར་ཞུགས་ན་བརྟུལ་ཕོད་ཀྱང༌། །ཡུལ་གྱི་མི་ལ་དེས་ཤིང་འཇམ། །དམན་པ་རྣམས་ལ་སྙིང་རྗེ་བ། །དེ་ལ་དཔའ་བོ་ཞེས་སུ་བརྗོད། །དམ་པ་རྣམས་ལ་མི་སྙན་སྒྲོགས། །བྱིས་པའི་གྲོགས་ལ་ཤིན་ཏུ་གདུང༌། །ཆུང་མའི་འོག་ནས་མི་ལྷོངས་པ། །སྐྱེས་པ་འདྲ་བའི་བུད་མེད་ཡིན། །ལུགས་གཉིས་སྒྲུབ་པའི་མཐུ་ཆུང་ཞིང༌། །ཕན་དང་གནོད་པའི་མཐའ་མི་ཤེས། །ལྟོ་བ་འགེངས་པ་གཙོར་བྱེད་པ། །ཆུ་དང་ནགས་མའི་མི་ཆུང་དངོས། །ཡོན་ཏན་མེད་པའི་སློབ་དཔོན་དང༌། །སེམས་བསྐྱེད་མེད་པའི་སྨན་པ་དང༌། །སྤྱི་ཚིག་མེད་པའི་གྲོས་པ་གསུམ། །ཕན་ལས་གནོད་པ་ཆེ་བའི་རྒྱུ། །མཁས་པ་ང་རྒྱལ་ཆེ་བ་དང༌། །ཆེན་པོ་དྲེགས་པས་རྒྱགས་པ་དང༌། །ཕྱུགས་པོ་སེར་སྣས་བསྡམས་པ་གསུམ། །དུག་སྦྲུལ་གདེངས་ཀའི་བསིལ་ཡབ་ཡིན། །སློང་ལ་ངོ་ཚ་མེད་མོད་ཀྱིས། །མི་སྟེར་ཟེར་ན་དེ་བས་དམན། །སྦྱིན་ནོ་ཟེར་བ་དམ་པའི་ཚིག །མི་འདོད་ཟེར་ན་དེ་བས་འཕགས། །རང་ཉིད་བསྲུང་བ་དེ་ཙམ་དུ། །གཞན་ལའང་ཕན་པ་འབའ་ཞིག་སྒྲུབས། །ངུར་པ་གཅིག་གིས་ཅིག་ཤོས་ལ། །བསྟི་སྟང་ཇི་ལྟར་བྱེད་མཐོང་ངམ། །རྗེ་བོ་ངན་ལ་བསྟེན་པ་དང༌། །
གྲུ་གཟིང་གོག་པོར་འཇུག་པ་དང༌། །རྒྱ་མཚོའི་ཆུ་ལ་འཐུང་བ་གསུམ། །སྲོག་ལ་འཇིགས་པ་བསྐྱེད་པའི་རྒྱུ། །ངན་པ་ཆེ་སར་སླེབ་པ་དང༌། །དབང་ཡོད་ངོ་ཚ་མེད་པ་དང༌། །ཕུག་རོན་ལྷ་ཁང་ཞུགས་པ་གསུམ། །གྲིབ་གནོན་བཞིན་དུ་གནོད་པ་མང༌། །ཟིལ་པའི་ཆུ་དང་རྩྭ་ཡི་མེ། །སྤྲིན་གྱི་གྲིབ་མ་འཇག་མའི་སྐྱབས། །སྐྱེ་བོ་ངན་པའི་མཛའ་བཤེས་ལྔ། །དགོས་པའི་དུས་སུ་བསླུ་བར་མཚུངས། །གྲོ་གའི་ཕྱིར་དུ་གསོད་ཅིང་འཚེ། །ཐབས་ཀྱིས་རྐུ་དང་ལོག་པར་གཡེམ། །ཁེ་ཕྱིར་རྫུན་སོགས་མི་དགེའི་རྒྱུན། །རྒྱ་བའི་ལག་ན་ཡོད་ཟེར་ན། །དེ་ཡི་སྟེང་དུ་ཡུལ་ངན་དང༌། །ཆོམ་རྐུན་འཇིགས་ལའང་མི་འཛེམ་པའི། །དགེ་སྦྱོང་ཤོ་སྣ་ཁྲིད་བྱས་ནས། །བསླབ་པ་ཚོང་བ་བདུད་ཀྱི་ལས། །ས་ཞིང་རེངས་དང་ཁེ་མེད་ཚོང༌། །མ་དུལ་རྟ་དང་རྐུན་པོའི་བྲན། །སྐོག་གྱུར་བྱེད་པའི་བུད་མེད་ལྔ། །ཁྱིམ་ཐབ་བཤིག་པའི་ཐན་ཆེན་ཡིན། །རྒྱལ་པོ་སྡིག་སྤྱོད་བྱེད་པ་དང༌། །བློན་པོ་ལྐོག་བརྔན་ཟ་བ་དང༌། །ཧོར་འདྲ་ཡུལ་འཁོར་འཐག་པ་གསུམ། །མངའ་ཞབས་འཇིག་པའི་ཐོ་བར་མཚུངས། །དམག་དཔོན་སྙིང་སྟོབས་མེད་པ་དང༌། །དམག་མི་གོ་མཚོན་བྲལ་བ་དང༌། །དཔུང་གི་འགྲོ་ལྡོག་མི་ཤེས་དེས། །རུ་པ་ཏི་ཡི་བརྟུལ་ཞུགས་འཛིན། །ཞལ་
ལྕེ་འཁྱོག་པོར་སྤྱོད་པ་དང༌། །རྟོག་དཔྱོད་མེད་པའི་ཕྲ་མ་དང༌། ཁྲིམ་རྐུན་རེངས་སུ་འཇུག་པ་གསུམ། །རྒྱལ་ཁྲིམས་ཞིག་པའི་སྔོན་འགྲོར་འོང། །གཙུག་ལག་ཁང་དང་བླ་མའི་དཀོར། །མཁན་སློབ་དགེ་འདུན་ལས་བྱེད་དང༌། །ཀུན་སློང་ངན་པའི་དགེ་བ་གསུམ། །ངན་འགྲོར་འགྲོ་བའི་ས་མཁན་ཡིན། །དཔོན་ལ་རྒོལ་དང་བག་མེད་ཆང༌། །ཕོ་བས་མི་ཆུན་བཟའ་བཏུང་སྲེད། །ཉིན་ཕྱེད་གཉིད་དང་ནམ་ཕྱེད་ཟ། །འདི་ལྔ་འགྱུར་བའི་སྡུག་བསྔལ་རྒྱུ། །སློང་མོས་འཚོ་ཞིང་ཁེངས་ཚིག་སྨྲ། །ཟ་བའི་ཡུལ་ལ་འབར་ཞིང་འཁུན། །ཕ་མའི་དྲིན་ལན་མི་བསམ་པ། །འདི་གསུམ་ཤེས་ལྡན་ཁྲེལ་བའི་རྒྱུ། །དུས་ལ་མ་བབས་འགྲོ་དོན་དང༌། །ཉམས་རྟོགས་མེད་པའི་ཐོ་ཅོ་དང༌། །བདུད་ཀྱིས་བརླབས་པའི་ལུང་བསྟན་གསུམ། །བླུན་པོ་རྣམས་ལ་མཛེས་པ་ཡིན། །མི་ལུས་ཐོབ་པ་ད་རེས་ཙམ། །དལ་འབྱོར་ཚང་བ་ལན་རེ་ལ། །བཤེས་གཉེན་འབད་ནས་མི་བསྟེན་ཅིང༌། །གལ་ཅུང་ཆོས་ལ་བྱེད་པ་འཁྲུལ། །འཕགས་པ་མཐོང་བ་ལན་ཅིག་དང༌། །དབང་བཞི་ཐོབ་པ་རེས་འགའ་ལ། །དམ་ཚིག་ཡལ་བར་འདོར་བ་ཡི། །སྐྱེས་བུ་དེ་ནི་སྨྱོན་པ་དངོས། །འབྱོར་པ་ཆུ་ཡི་ལྤུ་བར་མཚུངས། །སྲོག་ནི་གཤིན་རྗེའི་གཞན་དབང་ཅན། །
དེ་ཕྱིར་མཆོག་གི་སྨན་པ་ལ། །བསྙེན་ནས་དམ་ཆོས་བདུད་རྩི་འཐུང༌། །གསོ་དཔྱད་ཕལ་པ་འདི་འདྲས་ནི། །རྣམ་པ་ཀུན་ཏུ་ག་ལ་སྐྱོབ། །ནད་དོ་ཅོག་གི་རྩ་བ་ནི། །མ་རིག་འཛིན་པ་ཡིན་པའི་ཕྱིར། །དེ་ལྟ་ན་ཡང་རྨོངས་ཆེན་རྣམས། །སྨན་ལས་དུག་ལ་རིན་ཐང་ཆེ། །ཀུན་གྱི་ཕྱག་མཆོད་བྱེད་པ་ཡི། །མཆོད་རྟེན་ཁྭ་ཏས་བརྙས་ལ་ལྟོས། །གང་ཞིག་ནོར་བུའི་འབྱུང་གནས་ནི། །རིན་པོ་ཆེ་ཡི་གླིང་ཡིན་བཞིན། །ཆོས་དང་ནོར་དང་འདོད་པ་དང༌། །ཐར་པའི་འབྱུང་གནས་ཤེས་རབ་ཡིན། །དེ་དེ་དགེ་བའི་བཤེས་གཉེན་དང༌། །ཐོས་པ་མང་པོ་ལས་འབྱུང་ན། །རིགས་གཟུགས་ལང་ཚོས་སྒེག་གྱུར་ཀྱང༌། །དེ་ཉིད་བསྲིང་ན་ཉམས་པའི་རྟགས། །འདི་ན་ནམ་མཁའ་ས་གཞིའི་བར། །རིང་བ་ལས་ཀྱང་ཕལ་པ་དག །དམ་པའི་ཆོས་ལས་རིང་གྱུར་པས། །མཁས་ལས་སྤྲེལ་རྒན་ངོ་མཚར་ཆེ། །དེ་བཞིན་རྒྱ་མཚོའི་ཕ་རོལ་དང༌། །ཚུ་རོལ་ཡན་མན་དེ་སྲིད་ལས། །ཕལ་དང་དམ་པའི་ཆོས་རིང་བས། །ལེགས་པར་བཤད་ལ་སུ་ཡིད་གཏོད། །དེ་ལྟར་ཡང་ཀེ་ཏ་ཀས། །ཆུ་དང་རྙོག་མ་དབྱེ་བ་བཞིན། །རིགས་པ་དང་ནི་མ་ཡིན་པའི། །མཚན་ཉིད་བཤད་ལ་ཉེས་པ་མེད། །ཅི་ཕྱིར་ཞེ་ན་རྨོངས་པ་དང༌། །
འདྲ་བའི་མུན་པ་ཡོད་མ་ཡིན། །ལེགས་བཤད་འདྲ་བའི་སྐྱེས་མེད་པས། །དམ་པའི་དོན་ལྡན་གཏམ་འདི་བྱས། །ངེས་པ་ཁོ་ནར་འབྱུང་འགྱུར་བའི། །འཆི་བ་ལ་ཕན་དམ་པའི་ཆོས། །དེ་ཉིད་ཤེས་པའི་སྔོན་འགྲོར་ནི། །འཇིག་རྟེན་གྱི་ནི་ཆོས་ལུགས་བརྟག །ལྷ་དང་མི་ཡི་ཐེམ་སྐས་ལ། །བརྟེན་ནས་ཐར་པ་བསྒྲུབ་པའི་ཕྱིར། །རིག་དང་ཞབས་སུ་ལྡན་པའི་ཟླར། །འཇིག་རྟེན་མཁྱེན་པ་བསྔགས་མིན་ནམ། །ཉི་མའི་སྔ་དྲོ་ཕྱི་དྲོ་དང༌། །ནོར་དང་ལང་ཚོ་མི་བརྟན་ཀྱང༌། །ཆོས་དང་བདེན་པ་བརྟན་པའི་མཐུས། །འདིས་ཀྱང་གཞན་ལ་ཕན་པར་ཤོག །དམངས་ལ་སྤྲིང་བའི་གཏམ་དཔེ་དོན་འབྲེལ་བ་ཞེས་བྱ་བ་རྒྱལ་བའི་མྱུ་གུ་ཨ་བྷ་ཡ་དྭཱི་པས་རྒྱ་གར་ཀཱ་མ་རཱུ་པའི་གནས་དང་ཉེ་ཞིང༌། བྱ་རྒོད་ཕུང་པོའི་རི་བོ་བལྟར་ཡོད་པའི་ཨ་ཙ་ར་ཁ་སྤུ་ཅན་གྱིས་སྟོང་དཔོན་བྱང་ཆུབ་རྒྱལ་མཚན་ལ་གདམས་པ་རྫོགས་སོ། །གཏམ་ཚོགས་ལེའུ་བཅུ་པའོ།། །།
གཏམ་ཚོགས་ལེའུ་བཅུ་གཅིག་པ། བྷོ་ཊའི་སྲིད་སྐྱོང་ལ་སྤྲིང་བའི་གཏམ།
བྷོ་ཊའི་སྲིད་སྐྱོང་ལ་སྤྲིང་བའི་གཏམ། བཀྲ་ཤིས་རི་མོ་གཡས་སུ་འཁྱིལ་བའི་དུང༌། །རིན་ཆེན་གསུམ་གྱི་གྲགས་པའི་བ་དན་ཅན། །རྣ་ལུང་དཔྱངས་པའི་མདོ་ལ་སྲིད་བཅས་ཀྱི། །སྡུག་བསྔལ་བདེན་པ་མཐར་བྱེད་གང་ཞིག་རྒྱལ། །ཕྲ་རབ་རྡུལ་གྱི་ཞིང་ཁམས་རྡུལ་སྙེད་ཀྱང༌། །མི་
མཇེད་འདི་ཡི་སྒྲོན་མའི་སྣང་བྱེད་ལ། །སྐྲག་ནས་ཀུན་འབྱུང་མུན་པར་བྲོས་པའི་ཚུལ། །ངེས་པར་འབྱུང་བའི་རབ་བྱེད་དང་པོ་ལགས། །དེ་འགོག་ལམ་ནི་ཐར་པ་དམ་པ་སྟེ། །ཁྲིམས་ཀྱི་རྟེན་ལ་བདེན་བཞིའི་མངོན་རྟོགས་ཅན། །འཁོར་ལོ་དང་པོའི་མཛོད་ཁང་གངས་རིའི་ཁྲོད། །གནས་སམ་ཅིག་ཤོས་ཤེས་རབ་གསུམ་ལ་རག །རྒྱལ་བ་སྟོན་པ་དེ་ཡི་དམ་པའི་ཆོས། །ལུང་དང་རྟོགས་པའི་སྙིང་པོ་མདོ་སྡེ་དང༌། །ཆོས་མངོན་རྒྱ་མཚོའི་བསྡུ་བ་བྱང་ཆུབ་སེམས། །རྣམ་པ་གཉིས་ལས་གཞན་དུ་ཅི་ཞིག་མཆིས། །དེ་ཕྱིར་སེམས་ཅན་མོས་པ་ཐ་དད་པའི། །ཆོས་ཁམས་སོ་སོའི་རྣམ་པར་རིག་པ་དང༌། །མཐུན་པར་འཆར་འདི་རྒྱལ་བའི་ཕྲིན་ལས་ཕྱིར། །དགག་བསྒྲུབ་སྤངས་པའི་རྣམ་ཐར་མཆོག་ལ་རངས། །རྒྱུད་ལྔར་འཕྱན་པའི་འགྲོ་བ་འདི་དག་གི །སྡུག་བསྔལ་བདེན་པའི་མངོན་རྟོགས་འགོག་པ་ལ། །དམ་པའི་ནང་ནས་དམ་པར་གྱུར་པའི་དོན། །གང་ལ་མཆིས་དེ་འཁོར་བ་མཐའ་ཅན་ཉིད། །ཕུང་པོ་ལྔ་ཡི་མངོན་ཞེན་མ་ལྡོག་ན། །འཇིག་ཚོགས་ལ་བལྟའི་རི་བོའི་ཁུར་གྱིས་ནོན། །སྟོང་པར་བལྟ་དང་གནས་ཡིད་དཔྱོད་ཀྱི་ལྟ་སྒོམ་འགྱུར་སྒོམ་པ་ཡང༌། །ལམ་བདེན་ཉིད་དེ་སློབ་པ་མིན་སྒོམ་མེད་རྫོགས་ཆེན་དེ་རྨད། །དེ་ལྟ་མོད་
ཀྱི་གནས་སྐབས་འཇིག་རྟེན་གྱི། །བདེ་སྡུག་རྒྱལ་པོའི་ཕྱི་ན་སོན་པའི་ཕྱིར། །བྱམས་པའི་སྟོབས་ཀྱིས་གནོད་སྦྱིན་སྤུན་ལྔ་ལས། །མངའ་རིས་སྨོན་འཇུག་སེམས་ཀྱིས་བསྲུངས་ལྟར་སྐྱོབས། །ཁྱུ་མཆོག་བགྲོད་པ་དྲང་ངམ་གཡོ་བའི་རྗེས། །གཞན་དག་དོགས་པ་མེད་པར་རྒྱུ་བྱེད་ན། །བསྡུ་བ་བཞི་ཡི་ཕྲིན་ལས་མེས་དབོན་དང༌། །ཟ་ཧོར་གདུང་གི་རྣམ་ཐར་བདག་གིར་བཞེས། །སེམས་ཅན་ལས་ཀྱི་རྗེས་སུ་འགྲོ་བའི་ཕྱིར། །བདག་ཉིད་ཁོ་ནས་བསྲུང་བའི་མཐུ་མེད་ཀྱང༌། །རྫོགས་ལྡན་གསར་དུ་དབྱེ་བའི་ཐུགས་བསྐྱེད་ལ། །དཀར་ཕྱོགས་ལྷས་ཀྱང་བསྙེན་ལ་སོམ་ཉི་བྲལ། །མི་ཡི་ཆོས་ལུགས་ལེགས་པར་མི་ཤེས་ཤིང༌། །རྫུ་འཕྲུལ་དག་དང་ཀུན་སྤྱོད་བརླང་པོ་ཡིས། །རང་སྲུང་ཕ་རོལ་གནོན་པ་ལྷུར་བྱེད་པ། །རྒྱལ་པོའི་ཁབ་ན་མོད་ལ་གཞུངས་ཀྱང་འཚལ། །བསམ་གཏན་ཐོབ་པའི་མངོན་པར་ཤེས་པ་ནི། །རང་ཉིད་ལ་མེད་གཞན་ལའང་དེ་བཞིན་པས། །གཡོན་ཕྱོགས་ལྷ་ཡི་གྱ་ཚོམ་ཚིགས་བཅད་ལ། །རེ་དང་དོགས་པའི་ཆོམ་རྐུན་ཟིལ་གྱིས་གནོན། །ལྐོག་གྱུར་མངོན་པར་གསལ་བའི་མཐུ་མེད་ཀྱང༌། །དབེན་པར་ཆོས་ཉིད་སྒོམ་པའི་རྒྱུ་མཐུན་ལས། །བྱང་ཆུབ་སེམས་གཉིས་ལམ་ལ་བསྙེན་དེའི་ཕྱིར། །བཞེད་དོན་འགྲུབ་པའི་སྨོན་པ་ཡང་དག་ཞུ། །གཏམ་ཚོགས་ལེའུ་བཅུ་གཅིག་པའོ།། །།
གཏམ་ཚོགས་ལེའུ་བཅུ་གཉིས་པ། དམ་པ་ལ་སྤྲིང་བའི་གཏམ།
དམ་པ་ལ་སྤྲིང་བའི་གཏམ། ཨོ་རྒྱན་རྡོ་རྗེ་འཆང་ལ་ཕྱག་འཚལ་ལོ། །གང་དུ་སྤྲིང་ན་དེ་ཉིད་ལ། །སྟ་ཟུར་ཁ་ཊྭཱྃ་གས་མཚན་དེའི། །བྱིན་གྱིས་ཆར་རྒྱུན་མི་ཟད་པའི། །རྟེན་ཅིང་འབྲེལ་འབྱུང་ཡང་འདིའོ། །གང་ཞིག་དམ་པའི་ངག་སློབ་པ། །དེ་ཡང་དམ་པའི་རང་བཞིན་ཏེ། །བདག་ཉིད་བསྟོད་ཀྱིས་ཤེས་པ་རྣམས། །རྙེད་བཀུར་གྲགས་པས་མ་རུངས་བྱས། །འཁོར་བ་ཆུ་སྲིན་གྲོང་ཁྱེར་ན། །འཁོར་གསུམ་རྗེས་མཐུན་ཡོན་ཏན་དང༌། །འཁོར་ལོ་གསུམ་ལ་དད་ཁྱོད་ཅིག །འཁོར་འདས་རུ་ཤན་དེང་འབྱེད་འཚལ། །དཔལ་དང་མིང་དོན་ཐ་དད་པའི། །ཏི་མུག་གླང་པོའི་གོམ་ཚུགས་ཅན། །སྙིང་པོ་བྲལ་བའི་མྱ་ངམ་ཐང༌། །འཁྱམས་ལས་ཕྱིར་ཕྱོགས་ངོ་མཚར་གནས། །རྒྱལ་བསྟན་རིན་ཆེན་འབྱུང་ལྡན་ནི། །སྡེ་སྣོད་གསུམ་དང་སྔགས་རྒྱུད་ཀྱི། །སྤྲོ་དང་གསང་ཚིག་མཐའ་ཡས་ཀྱང༌། །གཟུགས་བརྙན་མགྲོན་དུ་གཉེར་བས་སྐྱོ། །དེ་ཕྱིར་གཞི་གསུམ་ཆོ་ག་ཡིས། །དགེ་འདུན་མཛེས་པར་བྱས་ནས་ཀྱང༌། །བསླབ་པ་གསུམ་གྱི་མངོན་རྟོགས་ལ། །ཐེམ་སྐས་བཞིན་དུ་འཛེགས་དང་ཀྱེ། །ལྔ་བརྒྱ་ཕྲག་བཅུར་གནས་ཚད་ཀྱིས། །མི་གཏུགས་ཉོན་མོངས་དགྲ་སྡེ་ལས། །རང་དབང་གྱུར་པའི་ཐེག་ཆེན་ལམ། །དོན་གཉེར་མགྲོན་པོའང་བྱང་ཆུབ་སེམས། །ཁྱད་
པར་དབང་དང་བསྐྱེད་རྫོགས་རྫོགས་པ་ཆེ། །ཐབས་ཤེས་འབྲེལ་པ་ཤིང་རྟའི་སྒྱུ་ཐབས་ལ། །བརྟེན་ནས་ཚེ་གཅིག་རྡོ་རྗེ་འཆང་འགྲོ་བའི། །རྒྱུད་སྡེ་དྲུག་གི་གནས་ལ་མཁས་པར་མཛོད། །དེ་ཡང་ལྷ་སྲས་ཁྲི་སྲོང་ལྡེའུ་བཙན་དུས། །རྒྱལ་བའི་ཞལ་སྐྱིན་ལོ་པཎ་མཁས་རྣམས་ཀྱིས། །བསྒྱུར་ཞིང་ཐུགས་ཉམས་བསྟར་བའི་མདོ་སྒྱུ་སེམས། །ཕྱོགས་དེར་གསལ་མཛད་ཁྱོད་ལ་ལྷག་པར་རངས། །དེ་ལ་ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པ་རྣམ་གསུམ་ཞལ། །རིམ་པ་དགུར་རྫོགས་རྒྱལ་བསྟན་ཡོངས་རྫོགས་དོན། །སྔགས་སུ་སྟོན་པ་ཚོགས་ཆེན་འདུས་པ་ཡིན། །བཤད་གཞི་དེ་ལས་བཤད་བྱ་མ་འཁྲུལ་བ། །རྒྱུད་ཀྱི་དངོས་པོ་བཅུ་དང་ཐབས་གྲོལ་ལམ། །ཟུང་དུ་འཇུག་པར་མཐའ་དྲུག་ཚུལ་བཞི་ཡིས། །རིག་འཛིན་བཞི་ཡི་ལམ་བགྲོད་སྒྱུ་འཕྲུལ་ལུགས། །མདོར་ན་རྡོ་རྗེའི་ལམ་གྱི་ལུས་ཡོངས་རྫོགས། །རིམ་པ་དབང་གི་དེ་ཉིད་རིག་པ་ལས། །མེ་ལོང་ནང་དུ་གཟུགས་བརྙན་རྫོགས་པ་ལྟར། །གསལ་བའི་ངེས་འབྱེད་རྣམ་མཁྱེན་ཤིང་རྟས་མཁྱེན། །མདོ་སྡགས་ཆོ་ག་འགལ་བ་མ་ཡིན་པས། །སྡོམ་པ་གསུམ་དང་ཕྱིན་དྲུག་ལམ་སྲོལ་ཀུན། །དབྱིངས་དང་ཡེ་ཤེས་རིམ་འཇུག་ཅིག་ཅར་ཅན། །བསྐྱེད་དང་རྫོགས་པའི་སྐྱ་རེངས་གཅིག་པས་
དྲངས། །དམ་པའི་སྐྱེས་བུ་མཆོག་ལ་བསྙེན་བྱས་ནས། །བསོད་ནམས་ཚོགས་དང་ཐོས་བསམ་ལ་བརྩོན་པ། །དྲན་པ་ཉེར་གཞག་ཚོགས་ཀྱི་ལམ་མཆོག་སྟེ། །རྫུ་འཕྲུལ་རྐང་པའི་ཡོན་ཏན་ངང་གིས་ཐོབ། །བསླབ་པ་ནོད་དང་རིམ་པའི་ཆོ་གས་སྨིན། །སྦྱང་གཞི་སྦྱོང་བྱེད་ཚང་བའི་བསྐྱེད་རིམ་ལ། །ཕྱིན་དྲུག་གཞན་དུ་བསྐལ་པར་མི་བལྟ་ན། །དྲོད་རྩེ་ལ་སོགས་སྦྱོར་བའི་ཡོན་ཏན་རྫོགས། །མཆོད་དང་སྦྱིན་དང་ཕྱག་རྒྱའི་དམ་ཚིག་བཞི། །སྐྱོ་ངལ་བཟོད་དང་འགལ་ཟླ་ལེ་ལོ་བསྲུང༌། །མཚན་དཔེ་ལྟར་སྣང་ལྟ་བུའི་རྩིས་ཟིན་ལ། །བྱང་ཆུབ་ཡན་ལག་བདུན་རྫོགས་མཐོང་ལམ་ཐོབ། །དེ་ལྟར་མཐོང་ཟིན་གོམས་པར་བྱས་པ་ལས། །བལྟར་མི་མངོན་པའི་ཤེས་སྒྲིབ་ཆེས་ཕྲ་བ། །ཐབས་ལས་ཐབས་གྱུར་གསུམ་པའི་དཔེས་སྦྱངས་ནས། །སྒོམ་ལམ་འཕགས་པའི་ཡེ་ཤེས་ཆེན་པོར་རྫོགས། །སློབ་བྱའི་མཐར་ཐུག་སྐུ་ལྔ་ཡེ་ཤེས་ལྔ། །གྲངས་མེད་གསུམ་གྱི་གདུངས་པས་མ་ཐུག་པར། །ཚེ་གཅིག་ལུས་གཅིག་མངོན་སངས་རྒྱ་བ་ཡི། །སྐལ་བ་ཆེན་པོ་ལྡན་པའི་བཀྲ་ཤིས་ཤོག །དམ་པ་ལ་སྤྲིང་བའི་གཏམ་ཞེས་བྱ་བ། མདོ་སྨད་རྫོགས་ཆེན་སྤྲུལ་སྐུ་ལ། རྫོགས་ཆེན་པ་རང་བྱུང་རྡོ་རྗེས་སྤྲིང་བ་རྫོགས་སོ། །གཏམ་ཚོགས་ལེའུ་བཅུ་གཉིས་པའོ།། །།
གཏམ་ཚོགས་ལེའུ་བཅུ་གསུམ་པ། སྟོན་ཆེན་དབེན་པ་ལ་བསྐུལ་པའི་གཏམ།
སྟོན་ཆེན་དབེན་པ་ལ་བསྐུལ་པའི་གཏམ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཁྱེད་མཚན་ཨུཏྤལ་ཡི་ཀེ་ས་ར། །རྣ་ལུང་དཔྱངས་པའི་མོད་ལ་སྙིང་དབུས་སུ། །ཤེས་དང་ཤེས་བྱའི་རི་དྭགས་བཀྲག་བརྟས་པ། །གཞོན་ནུ་སྨྲ་བའི་ཉི་མ་གང་ལ་འདུད། །ལེགས་སྨོན་ཁྲིམས་སུ་རློམ་པས་མ་བཅིངས་ཤིང༌། །ཐོས་དང་བསམ་པའི་དྲེགས་པས་རྒྱགས་མིན་པར། །རྣམ་གྲོལ་དོན་དུ་གཉེར་བའི་སྐྱེས་བུ་ལ། །དྲང་སྲོང་ངག་གི་བདེན་གཏམ་སྨྲ་བའི་རིགས། །ཁོམ་ལྡན་ཙམ་གྱི་ལུས་རྟེན་མང་ལགས་ཏེ། །རང་གཞན་འབྱོར་པའི་ཐ་མ་གཉིས་གཉིས་ཀྱི། །མིག་འཕྲུལ་ལྟ་བུར་འདུ་འབྲལ་བགྱི་བརྟགས་ན། །སྲིད་ན་དཀོན་པ་མི་ལུས་རིན་ཆེན་ཡིན། །དེ་ཡང་སྐྱེ་རྒ་ན་འཆིའི་འཁྲུལ་འཁོར་གྱིས། །འདུས་པ་འབྲལ་བའི་ཆོས་ཅན་ལ་སྦྱོར་བ། །འདི་ལ་སྐྲག་ནས་ཤཱཀྱའི་སྲས་པོ་ཡང༌། །རྒྱལ་པོའི་ཁབ་ནས་བྲོས་ན་འོ་སྐོལ་ལ། །ཆགས་རིན་ཆོག་པའི་དཔལ་འབྱོར་འདུག་གམ་སོམས། །གངས་རིའི་ཁྲོད་འདིར་འཆི་ལ་འཇིགས་ལྟའི་ཆོས། །ཕལ་ཆེར་ཆོས་ཀྱང་མ་ཡིན་འཇིག་རྟེན་མིན། །ཆགས་སྡང་ལྟོ་གོས་གཏམ་གྱི་འདུ་འཛིའི་ངང༌། །འཇིག་རྟེན་ཕ་རོལ་ལག་སྟོང་འགྲོ་བ་མང༌། །དགང་བར་དཀའ་བ་འདོད་པའི་ཉེས་དམིགས་
ནི། །ཇི་ཙམ་འབྱོར་ཀྱང་ཆོག་ཤེས་མི་སྐྱེ་ལ། །གསོག་དང་སྲུང་དང་སྤེལ་བས་སྡུག་བསྔལ་བའི། །རྒྱུ་དང་འབྲས་བུའི་གནས་ལ་སྐྱོ་བར་མཛོད། །འཁོར་བར་དགའ་ཞིང་བདག་གཞན་ཕྱོགས་རིས་ཆེ། །བྱས་པ་མི་གཟོ་ཕན་གནོད་རྟག་མི་ཐུབ། །འདུ་འཛི་ལ་དགའ་བྱིས་དང་སྡིག་གྲོགས་ལས། །རི་དྭགས་རྒྱ་ནས་ཤོར་བ་ལྟ་བུར་བྱོལ། །ཚེ་འདི་ཡིད་ལ་བགྱིད་པའི་ཐོས་བསམ་དང༌། །སྐྱོ་ཤས་བྲལ་བའི་ཁྲིམས་ཀྱི་གཟུགས་བརྙན་གྱིས། །ཐར་པའི་ལམ་དུ་ཕྱིན་པ་མ་མཆིས་པས། །དབེན་པའི་གནས་སུ་དེ་རིང་ཉིད་ནས་དེངས། །ཐོས་པའི་མཐའ་ལ་འདི་ཞེས་ཐུག་པ་མེད། །ཇི་ཙམ་བསམས་བཞིན་འཁོར་བར་མི་སྐྱོ་ན། །དེ་ལས་བྱུང་བའི་དྲེགས་དང་འདུ་འཛི་ཡིས། །ངན་འགྲོའི་ས་མཁན་བྱེད་པ་གཟིགས་ལགས་ལམ། །ཁྱད་པར་འཕགས་པའི་ཡུལ་གྱི་དགེ་སྦྱོང་ནི། །སྦྱངས་པའི་ཡོན་ཏན་བཅུ་གཉིས་ལྷུར་བྱེད་ཀྱང༌། །གངས་རིའི་ཁྲོད་པས་སྤངས་པ་ལྟར་གྱུར་པས། །ཁྱིམ་ཆུང་སྤངས་པའི་ཁྱིམ་ཆེན་བྱ་བ་མང༌། །རྒྱལ་བས་བསྔགས་པའི་ནགས་ཁྲོད་བས་མཐའ་ན། །འདུ་འཛི་ལས་སྐྱེས་ལོ་ཀའི་ཆོས་བརྒྱད་དང༌། །ཚོང་དང་སོ་ནམ་བྱིས་དང་སྡིག་གྲོགས་མེད། །བྱ་དང་རི་དྭགས་འགྲོགས་ན་བདེ་བས་གང༌། །བྲག་རིའི་ཕུག་དང་
ལོ་མའི་ཁང་བཟངས་དང༌། །འདུལ་བ་དང་མཐུན་བྲང་ཁང་ཆུང་ངུ་ནི། །བསྒྲུབ་པར་སླ་ཞིང་ཐིག་ཚགས་རྣམ་གཡེང་ཉུང༌། །དེ་ལ་ཆགས་ཞེན་མེད་པས་འགྲོ་སྡོད་བདེ། །ལྗོན་ཤིང་རླུང་གིས་བསྐྱོད་པའི་གཡོ་བ་དང༌། །འབབ་ཆུ་ལྷུང་ལྷུང་འགྲོ་བའི་སྒྲ་སྐད་ལ། །ལུས་ངག་ལས་སྐྱེད་མི་དགེའི་ས་བོན་མེད། །དེ་ལ་བརྟེན་ནས་སྐྱོ་ཤས་ངེས་འབྱུང་འཕེལ། །ཚེ་རབས་ཀུན་ཏུ་ཕུང་ཀྲོལ་བསྐྱེད་པ་ཡི། །ཡུལ་གྱི་ཉེས་དམིགས་དུག་ལས་ཐུ་བ་ཡང༌། །དབེན་པའི་གནས་ན་ཆེས་ཆེར་ཉུང་བས་ན། །ཡིད་ལ་བརྟེན་པའི་ལས་ལམ་དག་ཀྱང་དཀོན། །ཁྱད་དང་སྡེ་དང་སྟོབས་དང་དབང་ཕྱུག་དང༌། །ཕན་ཚུན་འགྲན་དང་གཟི་བྱིན་རྔོམ་པ་དང༌། །འཁྲུགས་དང་བསྲེ་བ་ལས་གྱུར་འདུ་འཛིའི་སྒོ། །བརྒྱ་ཕྲག་འབྱེད་པའི་གནས་ལས་རིང་གྱུར་པས། །དབུ་བ་རབ་བརྩེགས་ཕུང་པོའི་ཟག་པ་འདི། །རི་མཆོག་ལྟ་བུར་འཁྲུལ་བར་མི་འགྱུར་ལ། །གནོད་པ་མང་ཞིང་རླུང་གི་དབུས་གནས་པའི། །མར་མེ་ལྟ་བུའི་ཚེ་ལའང་སྐྱོ་བར་འགྱུར། །དེ་ལྟར་སྐྱོ་ན་སྡེ་སྣོད་ཤེས་པ་རྣམས། །ཕྱི་སའི་གནས་རིགས་རང་དབང་ཅན་མིན་པའི། །གནས་ལ་སྐྲག་ནས་བླང་དོར་མི་འཛོལ་ཞིང༌། །ཚེ་འདི་བསྒྲུབ་པའི་བསམ་སྦྱོར་རིང་དུ་སྲིངས། །དེ་ཚེ་ཁྱོད་ཀྱིས་བདེན་པ་རྣམ་བཞི་དང༌། །
གྲུབ་མཐའ་སྨྲ་བ་བཞི་ཡི་ལུང་རིག་དང༌། །ཐོས་དང་བསམ་པས་གོམས་པར་བྱས་པ་ཡི། །རྣམ་གྲངས་པ་ཡི་དོན་དམ་ངེས་དོན་འགྱུར། །འཁོར་བའི་ས་བོན་དྲུངས་ནས་འབྱིན་པ་ནི། །སྟོང་པ་ཉིད་དེ་དེ་ཡི་བཞུགས་ཚུལ་ལ། །རྟོག་གེས་རྣམ་པར་བརྟག་ཏུ་མི་བཟོད་པས། །གཤིས་ཀྱི་གནས་ལུགས་སེམས་ཀྱི་ཐོག་ཏུ་དཔྱད། །དེ་ལྟར་དཔྱད་ན་ཐུན་མོང་མ་ཡིན་པའི། །བསམ་བྱུང་ཤེས་རབ་ཁྱད་པར་འཕགས་པ་ཡི། །ཁ་ཕྱིར་ཕྱོགས་པའི་ཐོས་བསམ་དང་འགལ་བའི། །སྒོམ་བྱུང་ཤེས་རབ་རྣམ་པར་དག་པ་སྐྱེ། །འདི་ལྟར་རྟེན་ཅིང་འབྲེལ་འབྱུང་དམ་པའི་དོན། །སྐྱེ་བ་མེད་པས་རྟག་པའི་མཐའ་བསལ་ལ། །འགག་པ་མེད་པས་ཆད་པའི་མཐའ་བསལ་བའི། །སྤྲོས་བྲལ་ལྟ་བ་དབུ་མ་ཆེན་པོ་ཡིན། །དེ་ལྟའི་ལྟ་བ་སྒོམ་པས་ཉམས་བླང་ཕྱིར། །འགྲོ་འོང་སྨོན་འཇུག་ལས་འདས་བྱང་ཆུབ་སེམས། །གཅིག་དང་དུ་མར་འགལ་བའི་བློ་འདས་དོན། །དྲན་པ་ཉེ་བར་གཞག་པས་རྟག་དུ་སྐྱོངས། །གང་ཚེ་བློ་ཡིས་སྤྱོད་ཡུལ་མ་ཡིན་པའི། །དོན་དམ་ཞི་བ་འདུས་མ་བྱས་པ་ལ། །རྟོག་དཔྱོད་ཚེར་མ་རྣོན་པོས་གཞར་བྱས་ན། །རྟག་ཆད་མཐར་ལྟའི་གཡང་དུ་ལྷུང་ཉེན་ཆེ། །ཅི་ཕྱིར་ཞེ་ན་དོན་དམ་བདེན་པ་ནི། །བསམ་མི་ཁྱབ་ཅིང་འདུས་མ་བྱས་པ་ཡིན། །རྟོག་དཔྱོད་ཡུལ་ནི་སེམས་དང་བཅས་པའི་ཕྱིར། །དབྱིངས་ལ་དགག་
གཞག་ནམ་མཁའི་མེ་ཏོག་འདྲ༌། །དོན་འདི་རྒྱལ་བའི་གསུང་རབ་མཐའ་དག་དང༌། །ཁྱད་པར་སྡུད་པ་ཚིགས་སུ་བཅད་ལ་དྲིས། །ངའི་འདི་ཡིན་གྱིས་གཞན་དག་ནོར་རོ་ཞེས། །འཆད་པ་གངས་རིའི་ཁྲོད་ན་མང་མོད་ཀྱང༌། །ཡིན་པ་དེ་གས་རང་ལྟ་མཆོག་འཛིན་དང༌། །ནོར་སྙམ་དེ་ཀ་རྟག་ཆད་མཐར་ལྟའི་གཡང༌། །ཉིད་དེ་མཉམ་གཞག་ངང་ན་དེ་ཡོད་མིན། །དེ་སྐད་བརྗོད་པ་ཀུན་སློང་མ་རུངས་པའི། །ལྟ་བ་ཡིད་ལ་བཞག་པས་མ་ཡིན་ཏེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །རྟག་པར་ཡིད་ལ་འདྲིས་པའི་ཆ་རྒྱུས་ཡིན། །མདོར་ན་དེ་ལས་མང་དུ་སྨོས་ཅི་དགོས། །སྤྱོད་པ་བྱང་ཆུབ་སེམས་དཔའི་ཕྱོགས་ལ་བརྟེན། །ལྟ་བ་མངོན་པ་སྒོམ་པ་གསང་སྔགས་ཀྱི། །ལམ་ལ་མཆོག་གི་དངོས་གྲུབ་བརྙེས་པར་མཛོད། །འདི་ནི་རྟ་མཆོག་རོལ་པ་ཡང་གསང་དང༌། །འཕྲོག་བྱེད་བཏུལ་བའི་ཕུར་བ་བཞུགས་པའི་གནས། །སེར་སྨད་སྐུ་སྐྱེས་སྨོན་ལམ་རབ་འབྱམས་པའི། །གསུང་ངོར་དུས་མཐའི་རང་བྱུང་རྡོ་རྗེས་སོ། །གཏམ་ཚོགས་ལེའུ་བཅུ་གསུམ་པའོ།། །།
གཏམ་ཚོགས་ལེའུ་བཅུ་བཞི་པ། སློབ་མ་ལ་སྤྲིང་བའི་གཏམ་མདུན་ན་འདོན་གྱི་རྒྱན།
སློབ་མ་ལ་སྤྲིང་བའི་གཏམ་མདུན་ན་འདོན་གྱི་རྒྱན་ཅེས་བྱ་བ། སྟོན་པ་གཟི་བརྗིད་མཐའ་ཡས་ལ་ཕྱག་འཚལ་ལོ། །གཙུག་ལག་སྣ་ཚོགས་སྣོད་གྱུར་ཁྱོད་ལགས་ཏེ། །བཀུག་ཀྱང་མ་མཆིས་གང་ལ་དེ་སྒྲོག་ན། །སྐལ་དང་མཚུངས་པའི་བརྗོད་བྱར་དང་སྲིད་དེ། །རྒ་བའི་སྤྲིན་
གྱིས་སྤྲོས་པའི་བཞིན་རས་བཀབ། ༡ །ལྷུན་པོའི་ཤར་ནུབ་རེ་ཁཱ་དྲལ་ལྟའི་གོས། །གསེར་རིའི་རྡུལ་ཕྲན་ཞོར་ཆགས་ལ་སྟེགས་པའི། །དབྱངས་ཀྱི་ངེས་པ་བདུན་ལྡན་ནཱ་དའི་སྒྲ། །ཡི་གེའི་གཟུགས་སུ་འཕོས་པས་ཞལ་ཏ་བྱས། ༢ །ཁོམ་པ་བརྒྱད་ལ་འབྱོར་པའི་ཚོན་རིས་ཀྱི། །འདུ་འབྲལ་བགྱིད་ལ་སྐྱོ་བའི་སྐབས་དབྱེ་ནས། །མཛའ་གཅུགས་ཐགས་སུ་བཏགས་ལ་བདེན་གཏམ་གྱི། །ཚངས་ཐིག་དཎྜིའི་རྒྱུད་མངས་འཁྲོལ་བ་ཁྱོད། ༣ །སྐྱེས་བུའི་ཚེ་ནི་གློག་གི་ཟློས་གར་བཞིན། །མུན་པའི་འཚོ་བར་བསྐལ་པས་གཏུགས་པ་ཡི། །བདེ་དང་སྡུག་བསྔལ་ཁྱད་པར་མཁྱེན་འཚལ་ནས། །མངོན་ནས་མངོན་མཐོའི་འཁྲི་ཤིང་ལ་སྙེག་མཛོད། ༤ །དེ་ཡི་རྒྱུ་ནི་སྲོག་ལ་འཚེ་བ་སོགས། །ལུས་ངག་ཡིད་ཀྱི་ལས་ལམ་རྣམ་པ་བཅུ། །སྤུ་གྲིའི་སོར་ཆགས་སྦྲང་རྩི་ཇི་བཞིན་དུ། །གཟིགས་ནས་འཇིག་རྟེན་ཡང་དག་བལྟ་ལ་བརྩོན། ༥ །འབྱོར་པའི་རྒྱུ་ནི་ཆགས་དང་སེར་སྣ་སྟེ། །དེ་ལས་དེ་བྱུང་རི་དབང་ལྟར་སོང་ཡང༌། །གཡོ་དང་འཇིག་དང་ཆོམ་རྐུན་ཐུན་མོང་ཕྱིར། །མཆོད་སྦྱིན་བརྒྱ་པའི་རྗེས་སུ་འཇུག་པར་མཛོད། ༦ །འཁོར་ལོ་དང་པོའི་ཁྲིམས་ཀྱི་སྣོད་གྱུར་ནི། །སྙིགས་མའི་མཚོན་གྱིས་ཕུག་པ་ལྟར་གྱུར་ཀྱང༌། །ཡོན་ཏན་དམ་པའི་གཞི་རྟེན་བྱང་ཆུབ་སེམས། །ཉིན་མཚན་
ཐུན་དྲུག་ཀུན་ཏུ་བསྒྲུབ་པར་བགྱི། ༧ །དབང་པོ་ཚར་བཅད་གདུང་བའི་དཀའ་ཐུབ་ལས། །ཞེ་སྡང་དགྲ་ཟླ་བཟོད་པའི་དཀའ་ཐུབ་ནི། །མྱ་ངན་འདའ་བའི་ལམ་ལ་ཆེས་ཉེ་བས། །གཞན་གནོད་གཞི་བཅས་སྤོང་བ་རབ་བྱུང་རྒྱན། ༨ །རྒྱལ་པོའི་ཁབ་དང་ལེ་ལོའི་གྲོང་ཁྱེར་ན། །དམ་པའི་བརྩོན་འགྲུས་བག་ལ་ཉལ་གཟིགས་ནས། །དགེ་བའི་འཁྲི་ཤིང་སློང་བའི་ལྕགས་ཀྱུ་ཡིས། །ཁ་ན་མ་ཐོའི་གཉིས་འཐུང་དཀྲི་བར་བགྱི། ༩། སྡུག་བསྔལ་བདེན་པའི་འབྱུང་གནས་ཀུན་འབྱུང་གི། རྩ་བ་འགོག་པའི་ཐར་པ་ཤེས་པའི་ཕྱིར། །བསམ་གཏན་དོན་ལ་སེམས་དང་ཤེས་རབ་ཀྱི། །བསླབ་པ་བསྒྲུབ་པའི་དམ་བཅའ་ཁོ་ནར་བརྩོན། ༡༠ །རིགས་གཟུགས་ཐོས་དང་ལང་ཚོས་དྲེགས་པ་དང༌། །དབང་ཐང་ཆེན་པོས་རྒྱགས་པའི་གདོད་ལྔ་ནི། །བསོད་ནམས་མ་ཡིན་ཁྲོན་པའི་དཔྱང་ཐག་གི །རྗེས་སུ་ཕྱོགས་ནས་རང་གིས་རང་ཉིད་བཟའ། ༡༡ །བདག་དང་གཞན་དུ་ཕྱོགས་རིས་ཆེར་བལྟས་ཏེ། །བཏགས་དང་སྤྱོས་དང་ཕམ་པའི་ཁོན་འཛིན་གྱིས། །རང་གི་སེམས་ལ་འཁྲུགས་པ་ཆེར་སྟེར་བས། །བདེ་བའི་མལ་དུ་རྟོག་དཔྱོད་སྤང་བར་བགྱི། ༡༢ །སྐྱེ་བོ་རྣམས་ནེ་ཨ་མྲའི་འབྲས་བུ་བཞིན། །མངོན་རྟོགས་ཕྱི་ནང་མཉམ་པ་མ་ཡིན་པས། །བདེན་དང་སྙིང་ལ་འབབ་པའི་ཚིག་
ཚོན་པོས། །བདག་གཞན་གཉིས་ཀ་སྲུང་ཞིང་གནོད་པ་ཉུང༌། ༡༣ །སེམས་དང་སེམས་བྱུང་བརྒྱ་ཕྲག་སྒོ་བྱེ་ཡང༌། །ཕུང་ཀྲོལ་བསྐྱེད་ལ་འདོད་པ་ལྟ་བུ་མེད། །དེ་ཡི་གཞན་དབང་གྱུར་པའི་ལུས་ཅན་རྣམས། །མེ་དང་ཆུ་དང་གཡུལ་ངོར་སོང་བ་མང༌། ༡༤ །ཆོག་མི་ཤེས་དང་དགང་བར་དཀའ་བ་དང༌། །གཏོང་ལ་འཇུངས་ཤིང་སྲུང་ལ་བྱི་བ་བཞིན། །བདག་བསྟོད་གཞན་སྨོད་འཁོར་བར་དགའ་བ་ཅན། །བྱིས་དང་སྡིག་པའི་གྲོགས་ལས་འབྲོས་པར་མཛོད། ༡༥ །བདེན་པ་གཟིགས་པ་གང་ཞིག་མ་གཏོགས་པ། །རྙེད་དང་མ་རྙེད་ལ་སོགས་ཆོས་བརྒྱད་ཀྱི། །དགེ་སྦྱོང་བྲམ་ཟེ་བླ་མར་བཏགས་པ་ཀུན། །དཀྲིས་ཤིང་དམ་ལ་མ་བཞག་ཡོད་མ་ཡིན། ༡༦ །སྡིག་པའི་ལྟ་བ་ཅན་དང་མངོན་སུམ་སྤྱོད། །གཞན་གྱི་དོན་དུ་ཡིན་ཡང་དེའི་འབྲས་བུས། །བདག་ཉིད་འཐག་གཅོད་དབད་པའི་འཁྲུལ་འཁོར་གྱིས། །གཏུགས་ཚེ་བགོ་སྐལ་གཞན་ལ་དཔོད་དུ་མེད། ༡༧ །སྐྱེས་བུ་བཞིན་མཛེས་རྒྱན་གྱིས་སྤུད་པའི་གྲལ། །བསམ་སྦྱོར་མཐུན་པ་བཞིན་དུ་གནས་ན་ཡང༌། །བསམ་པ་སྣ་ཚོགས་དགེ་སྡིག་ཐ་དད་ཕྱིར། །འཇིག་རྟེན་ཕ་རོལ་གནས་རིས་སོ་སོར་འགྲོ། ༡༨ །ལེ་ལོ་ཅན་ཡང་སྡིག་པའི་གྲོགས་དང་
ཆང༌། །མཐོང་ན་མཚན་མོ་རྒྱུ་དང་ཆོམ་རྐུན་དང༌། །ཤ་ཟའི་གདོན་ལའང་ཇི་མི་སྙམ་པའི་བློས། །གྲགས་པ་ཉམས་པའི་བརྩོན་འགྲུས་རྩོམ་ལ་གཟིགས། ༡༩ །དེ་ལྟའི་བྱ་བ་ངན་ཞེན་ཤེས་འཆལ་གྱི། །ཕྱོགས་ལ་བསྒྲིམས་ཤིང་བསྲུང་བའི་བློ་བཀོད་ནས། །དད་གཏོང་ཚུལ་ཁྲིམས་ཁྲེལ་ཡོད་ངོ་ཚ་ཤེས། །མང་དུ་ཐོས་དང་ཤེས་རབ་ནོར་བདུན་བསྙེན། ༢༠ །དེ་ཡི་དྲན་པ་ཉེར་གཞག་ལ་སོགས་པའི། །བྱང་ཆུབ་ཕྱོགས་ཀྱི་ཆོས་ལམ་ལ་འཇུག་ཅིང༌། །སློབ་ལམ་བཞི་དང་སློབ་པ་མིན་པའི་ལམ། །མཐར་ཕྱིན་མྱ་ངན་འདས་ལ་སྙེག་པར་འགྱུར། ༢༡ །མདོར་ན་དེ་ལས་མང་དུ་སྨོས་ཅི་དགོས། །ཤེས་རབ་ལྡན་པ་ལོག་པའི་ལམ་ཞུགས་ཀྱང༌། །ཤེས་རབ་ཉིད་ཀྱིས་གང་ལས་ཅིག་ཤོས་ཀྱི། །ལམ་ལ་རང་སྟོབས་ཁོ་ནས་འཇུག་པའི་ཕྱིར། །༢༢ །འདི་ལྟར་དུས་ཀྱི་རྒུད་པ་སྣ་ཚོགས་དང༌། །དུས་བཞིའི་འགྱུར་ལྡོག་སྐྱེ་རྒ་ན་འཆི་ཡིས། །ངེས་འབྱུང་སྤྲིང་ཡིག་འགྲེམས་པ་ལ་གཟིགས་ནས། །ཐར་པ་བསྒྲུབ་པའི་དོན་ལ་འབད་པར་མཛོད། ༢༣ །ཐར་པ་དེ་ཡང་ལུང་མ་བསྟན་པའི་སེམས། །ཉེ་བར་ཞི་བའི་ཆོས་ལ་སྡང་བ་དེས། །རྟེན་འབྲེལ་ལུགས་འབྱུང་རྩ་བ་མི་ཆོད་པས། །སྐྱེ་བ་མེད་པའི་ཆོས་ལ་བསྙེན་པར་མཛོད། ༢༤ །དེ་ལྟར་བསྙེན་
ན་རྣམ་ཐར་སྒོ་གསུམ་གྱི། །དབྱིངས་ལ་གོམས་པའི་བདེ་གཤེགས་སྙིང་པོའི་བྱང༌། །སྤངས་རྟོགས་མཐར་ཕྱིན་རིག་པ་གསུམ་བསྐྱེད་དེ། །སྐུ་གསུམ་གྲོང་དུ་བདེ་བླག་འཇུག་པར་འགྱུར། ༢༥ །དེ་སྐད་གང་ལ་སྤྲིང་བའང་ལྷག་པའི་སེམས། །ཉ་རྒྱས་ཟླ་བ་གསར་པ་ལ་ཆགས་པའི། །རི་དྭགས་དྲང་སྲོང་རྒན་པོའི་བདེན་གཏམ་གྱིས། །དྲན་པའི་དབང་པོས་ཁྱོད་ལ་ཤིས་གྱུར་ཅིག ༢༦ །གཏམ་ཚོགས་ལེའུ་བཅུ་བཞི་པའོ།། །།
གཏམ་ཚོགས་ལེའུ་བཅོ་ལྔ་པ། བཤེས་གཉེན་བུདྡྷ་ལ་སྤྲིང་བའི་གཏམ།
བཤེས་གཉེན་བུདྡྷ་ལ་སྤྲིང་བའི་གཏམ། ཞི་བ་དམ་པའི་ཡོན་ཏན་གང་ཆེན་མཚོ། །བདེན་གཉིས་ལྷ་ཡི་རྔ་སྒྲ་བསྟན་པའི་དངོས། །རིག་གྲོལ་སྤོབས་པ་ལྷུན་ཆགས་ཚུལ་ཁྲིམས་སྣོད། །རྟག་ཏུ་བསྙེན་དང་རྫོགས་པའི་ཆོས་གཅིག་གོ །སྔོན་ཆད་འཕགས་པའི་ཡུལ་ཞེས་བསྔགས་འོས་ཀྱང༌། །ད་ནི་སྡིག་སྤྱོད་ཀླ་ཀློས་ཉེར་བཀབ་ཅིང༌། །བྷོ་ཊའི་ཡུལ་ཡང་ལྔ་ཕྲག་ཐ་མ་ཡིས། །ཆོམ་པོས་མ་རུངས་བྱས་པ་གཟིགས་ལགས་སམ། །ཁྲིམས་ཀྱི་བསླབ་པའི་དང་པོ་ངེས་འབྱུང་གི །སྤངས་པ་གང་དག་དགེ་སྦྱོང་ལྟ་ཅི་སྨོས། །རང་གཞན་འབྱོར་པའི་རྫས་ཀྱི་ཡན་ལག་ཀྱང༌། །ཉམས་ནས་དམན་པར་ལྟུང་ལ་སྐྱོ་བར་མཛོད། །གནས་ཀྱི་སློབ་དཔོན་བསྙེན་དང་ཁྱུས་འཚོ་བ། །སྟོན་པས་བཅས་
པའི་བསླབ་པ་ཡིན་མོད་ཀྱང༌། །གངས་ཅན་འདི་ན་ཁྱིམ་ཆུང་སྤངས་པ་ཡིས། །ཁྱིམ་ཆེན་མང་བས་དབེན་པར་བསྟི་ཡང་འཚལ། །སྤང་བྱའི་རང་བཞིན་ཉིས་བརྒྱ་ལྔ་བཅུ་དང༌། །བླང་བྱ་བཅུ་བདུན་འཇུག་པའི་ཚུལ་ཁྲིམས་ཀྱི། །སྙིགས་མ་ལྔ་བདོའི་གདུལ་དཀའ་སྦྱང་དཀའ་འདིར། །རྣམ་པར་ཤེས་པ་ལྐོག་གྱུར་ཅན་གྱིས་མིན། །གང་ཕྱིར་དལ་འགྲོ་མ་མཆིས་ཁྲོན་པ་དང༌། །རི་མོ་མཁན་གྱི་ནཱ་དའི་ཆོས་བཞིན་དུ། །ཡོན་ཏན་སྣོད་མ་གྱུར་ལ་བརྟགས་བྱས་ནས། །སྐྱོ་བའི་སེམས་ཀྱིས་ནགས་ཁྲོད་དམ་པར་བྱོན། །མང་དུ་ཐོས་པ་ནགས་ཀྱི་ནང་སོང་ན། །བསམ་དང་སྒོམ་པའི་ཡོན་ཏན་ཤུགས་ལ་འབྱུང༌། །ཡུལ་ལས་བྱུང་བའི་ཉོན་མོངས་བརྒྱ་ཕྲག་གིས། །བརྫི་བར་མི་ནུས་སྡིག་པའི་གྲོགས་པོས་སྤང༌། །ལོག་འཚོའི་ཡོན་གྱིས་ཀུན་འབྱུང་མི་བསྐྱེད་ཅིང༌། །འཁོར་བའི་རང་བཞིན་སྡུག་བསྔལ་བདེན་པ་རུ། །ཡང་དག་མཐོང་བར་ངེས་པར་འབྱུང་བའི་བློ། །ཤུགས་ལ་སྐྱེས་ན་སོ་སོར་ཐར་པ་ཡིན། །ཁྱད་པར་དྲན་པ་ཉམས་པ་མི་མངའ་བའི། །སྟོན་པ་མཆོག་དེས་བསྐལ་པ་གྲངས་མེད་གསུམ། །དགོངས་ཤིང་དཔྱད་ཀྱང་བྱང་ཆུབ་སེམས་མཆོག་ལས། །བསྟན་པའི་ཆོས་གཞན་གང་ཡང་མ་གཟིགས་ན། །ཐེག་དམན་ལམ་ལྟར་རྒྱུ་
འབྲས་གཅིག་མིན་པའི། །བྱང་ཆུབ་སེམས་ཀྱི་ལྗོན་པ་བལྟ་ན་སྡུག །ཚད་མེད་བཞི་པའི་རྒྱུན་གྱིས་བསྐྱེད་བསྲིངས་ནས། །སྨོན་འཇུག་འབྲས་བུའི་སྙེ་མ་གཡུར་ཟ་མཛོད། །དེ་ཡིས་སྤྱོད་པ་ཕ་རོལ་ཕྱིན་དྲུག་ཀྱང༌། །གསོག་དང་སྲུང་དང་སྤེལ་བའི་བློ་བྲལ་ཞིང༌། །གཏོང་སེམས་གོམས་པ་སྦྱིན་པའི་དངོས་པོ་དང༌། །བསྲུང་སེམས་བརྟན་པ་ཚུལ་ཁྲིམས་ཕ་རོལ་ཕྱིན། །ལོག་སྒྲུབ་དང་ནི་ཆོས་ཕྱིར་སྐྱོ་ངལ་བཟོད། །གོ་ཆ་ཆེ་ཞིང་ལེ་ལོས་ཟིལ་མི་ནོན། །དམིགས་པ་མེད་པ་དྲན་པའི་བསམ་གཏན་ཏེ། །སོ་སོར་རྟོག་པའི་ཤེས་རབ་དེ་ཉིད་དོན། །ཁྱད་པར་བདེ་གཤེགས་སྙིང་པོའི་རང་བཞིན་ནི། །མ་ནོར་མངོན་སུམ་སྟོན་པ་དབང་བཞིའི་ལམ། །གྲོལ་བྱེད་རྩ་ཐིག་རླུང་གི་ཐབས་མཆོག་ལས། །ཞུགས་གནས་ཐིམ་གསུམ་རྫོགས་པའི་དོན་ལ་བསྙེན། །སྲིད་པའི་རྩ་ལག་གཟུང་འཛིན་རོ་རྐྱང་མདུད། །རྣམ་གྲོལ་སྤྲོས་པ་ཉེར་ཞིའི་ཧེ་རུ་ཀ །ཁ་སྦྱོར་ཡན་ལག་བདུན་གྱི་བདག་ཉིད་ཅན། །གང་ལ་སངས་རྒྱས་བཟང་པོ་རེག་གྱུར་ཅིག །གཏམ་ཚོགས་ལེའུ་བཅོ་ལྔ་པའོ།། །།
གཏམ་ཚོགས་ལེའུ་བཅུ་དྲུག་པ། དགའ་ལྡན་བྱང་རྩེ་བ་བཤེས་གཉེན་ཕྲིན་ལས་ཐོགས་མེད་ལ་སྤྲིང་བའི་གཏམ།
དགའ་ལྡན་བྱང་རྩེ་བ་བཤེས་གཉེན་ཕྲིན་ལས་ཐོགས་མེད་ལ་སྤྲིང་བའི་གཏམ། རྒྱལ་བ་སྟོན་མཆོག་དེ་ཡི་ཐུགས་གསུང་སྐུའི། །ཕྲིན་ལས་གང་ཆེན་མཚོ་ཡི་དབྱིངས་ཁྱབ་ཀྱང༌། །ལུང་དང་རྟོགས་
པའི་དམ་ཆོས་འཛམ་བུའི་གླིང༌། །གསལ་མཛད་ཀླུ་སྒྲུབ་ཐོགས་མེད་རིག་གྲོལ་ལྡན། །ཤིང་རྟ་གཉིས་ཀྱི་ལམ་སྲོལ་གངས་ལྡན་རིར། །ཐོས་དང་བསམ་པའི་གྲང་རེག་ལ་གདུང་ཡང༌། །མཐོང་སྤངས་སྲོད་ཀྱིས་མ་སྨིན་སྒོམ་སྤངས་ལམ། །འཕགས་ལམ་ཡན་ལག་བརྒྱད་དུ་བསྲིང་བ་བཞིན། །བདེན་པ་བཞི་ཡི་མུ་ཁྱུད་ལ་བསྐོར་ནས། །དབུ་མའི་གཏན་ཚིགས་ཆེན་པོ་རྣམ་པ་བཞིའི། །དམ་བཅའི་བང་རིམ་རྩེ་ལ་འཛེམས་བྱས་ཀྱང༌། །འོག་མིན་རྣམ་མཛེས་ཆེན་པོའི་གྲོང་ལ་རིང་། །དེ་ཡི་རྒྱུ་ནི་ཀུན་ཏུ་བརྟགས་པ་ཡིས། །རྣམ་པར་རིག་པའི་གཞན་དབང་ལས་གྱུར་ན། །ནགས་ཁྲོད་དབེན་པར་ཞི་བར་གནས་བྱས་ཏེ། །ལྷག་མཐོང་གསལ་བའི་དེ་ཉིད་གཟིགས་པར་མཛོད། །ཚུལ་ཁྲིམས་ལས་ནི་བསམ་གཏན་འདུ་བྱེད་པ། །ཉན་ཐོས་རང་སའི་གྲུབ་མཐའ་ཡིན་མཆི་ལ། །འཁོར་ལོ་གསུམ་ཀའི་སྦས་དོན་མཐར་ཐུག་པ། །སྔགས་ཀྱི་དེ་ཉིད་བླ་མའི་དྲིན་གྱིས་མཐོང༌། །སྲུང་དམ་བཅས་ཕུལ། གཏམ་ཚོགས་ལེའུ་བཅུ་དྲུག་པའོ།། །།
གཏམ་ཚོགས་ལེའུ་བཅུ་བདུན་པ། བླ་མ་ལ་སྤྲིང་བའི་གཏམ།
བླ་མ་ལ་སྤྲིང་བའི་གཏམ། གང་དུ་བསྟི་བ་ཙམ་ནས་མངོན་མཐོ་དང༌། །ངེས་ལེགས་དམ་པའི་དཔལ་གྱི་བདུད་རྩི་ཡིས། །གཡོན་ཕྱོགས་ལྷ་ལ་འཁྲུགས་པ་སྟེར་བ་དེའི། །འཕགས་པའི་བདེན་པས་ཁྱོད་ལ་སྲུངས་ཤིག་ཀྱེ། །རྒྱུད་དྲུག་སྲིད་པའི་ཕ་
མཐའ་འགྲིམ་པ་ལ། །གཅིག་ཏུ་ཆགས་པ་མ་ཡིན་ལེགས་བྱས་ཀྱི། །བྱེད་པ་རྒྱུ་མཐུན་རཏྣའི་ཟ་མ་ཏོག །སྐྱེ་བའི་རང་ཞལ་ངོམས་པ་རྣམ་པ་གཉིས། །འཚོ་གཞེས་ལྗོན་པའི་ཡ་ལད་བླར་འཕགས་ཤིང༌། །བྱང་ཆུབ་བཀྲག་ཏུ་བརྟས་པའི་ཀྲྀཥྞ་ས། །སྨན་སེམས་གཞན་ལ་སྤོ་བའི་གོམ་སྟབས་ཀྱིས། །བགྲོད་པ་མི་འགོག་ངང་ཚུལ་བསྟན་པ་ནས། །ངེས་པ་བདུན་ལྡན་དབྱངས་ཀྱི་རྗེས་འགྲོའི་མཆིད། །ལྷ་ཡི་རྔ་སྒྲ་ལྟ་བུའི་རོལ་མོ་དང༌། །ས་ཟླ་ཞོར་ཆགས་བསམ་ཡས་ཆོས་འཁོར་ཆེར། །མངོན་སུན་འཕྲོད་པས་མངོན་སུམ་མཐོང་བ་བཞིན། །ས་འདིར་ཉིན་མོའི་བགྲོད་པ་བདུན་ཕྲག་བརྩེགས། །རྟེན་དང་བརྟེན་པར་ལྷག་གནས་མེ་ཏོག་གིས། །ཆར་བསིལ་དབབ་དང་སྣང་སྲིད་ར་ས་ཡར། །སྦྱང་བའི་རྟེན་འབྲེལ་དགེ་མཚན་འབུམ་དུ་འབར། །འདི་ན་སྡུག་བསྔལ་བདེན་པའི་མངོན་རྟོགས་ནི། །བགྲང་བྱའི་ཁུར་གྱིས་དབང་པོ་ལྡོངས་པ་ལས། །རང་བཞིན་ཡོངས་གྲུབ་བྱང་ཆུབ་སེམས་གཉིས་དང༌། །དོན་གཉིས་སྒྲུབ་ལ་གཡེལ་བ་མེད་པར་འདུན། །ཆེས་དཀར་སྨོན་པའི་ཞགས་པས་ཤུལ་རིང་ལམ། །བཅིངས་ཏེ་དངོས་དཀྱིལ་མཇལ་བའི་གནས་ཐོབ་ཀྱང༌། །རྒ་བའི་ཆད་པས་ནོན་པའི་འདྲེན་བྱེད་ཀྱིས། །རེ་བའི་ཤིང་རྟ་གཞན་དུ་ཕྱོགས་ཀྱིས་དོགས། །དེ་ལྟ་མོད་ཀྱི་
མངོན་སུམ་བདུད་རྩིའི་དོན། །མགུར་གྱི་དཔལ་བེའུ་ལས་བྱུང་འབབ་སྟེགས་ནི། །ལེགས་པར་མཉན་དང་ཡིད་ལ་བཟུང་བ་ལ། །རག་ཕྱིར་དམ་ཆོས་བུམ་པ་གང་བྱོར་གཏད། །མོས་གུས་སྣོད་ཡིན་དགོངས་གཏད་གདམས་པ་དངོས། །ཐོབ་བློ་དབང་དང་སྡོམ་པའི་རྫས་ཡིན་ན། །ཐུགས་གཏེར་བཀའ་འབུམ་བཅས་པ་ཁྱོད་ཉིད་ལ། །སྦྱིན་ཏོ་གཞན་ཕན་རྒྱ་ཆེན་བསྒྲུབ་འཚལ་ལོ། །གློག་གི་དམ་བཅའ་འཛིན་པའི་སྐྱེས་བུའི་ཚེར། །དེས་ཀྱང་བགྲང་བྱ་རྩེ་མོའི་མུ་ཁྱུད་ནང༌། །ངེས་པར་མཇལ་བའི་རྟེན་འབྲེལ་སྲོག་བསླུ་དང༌། །སྒྲོལ་དཀར་སྐུ་གཟུགས་འབུམ་ཐེར་དང་དུ་བཞེས། །གདོད་ཀྱི་ཆར་ཡང་བྱང་ཆུབ་སེམས་གཉིས་དང༌། །ཕྱིན་དྲུག་ཉམས་སུ་བསྟར་བའི་ཆོ་ག་ལ། །གཡེལ་བ་མེད་པའི་རིང་ནས་མངོན་སུམ་དུ། །མཇལ་བའི་དགེ་མཚན་སྨོན་པས་ཤིས་གྱུར་ཅིག །དམ་པ་རྣམས་ལ་སྐྱེས་བུ་བསྔགས་པའི་རྩེ། །འཁོར་ལོ་དང་པོའི་མཛོད་ཁང་འདུལ་བའི་གཏམ། །ཟུང་དང་དམ་མདུད་རྟེན་འབྲེལ་སྐྱེས་དང་བཅས། །ཨཱརྱ་པ་ལོའི་གླིང་ནས་དཔྱིད་ཟླར་དགེ། །རྒྱ་རོང་སྐུ་སྐྱེ་རྣམ་གཉིས་ཀྱི་ཆབ་ཤོག་ལན་དུ་ཕུལ་བ། གཏམ་ཚོགས་ལེའུ་བཅུ་བདུན་པའོ།། །།
གཏམ་ཚོགས་ལེའུ་བཅོ་བརྒྱད་པ། ལྷོ་བྲག་གསུང་སྤྲུལ་ལ་སྤྲིང་པའི་གཏམ་ཚངས་པའི་རྣ་རྒྱན།
ལྷོ་བྲག་གསུང་སྤྲུལ་ལ་སྤྲིང་པའི་གཏམ་ཚངས་པའི་རྣ་རྒྱན་ཅེས་བྱ་བ། གསུང་གི་རྡོ་རྗེ་ལ་ཕྱག་འཚལ་ལོ། །སྲིད་ཞིར་མི་གནས་པདྨའི་
ཀེ་ས་རར། །འོད་མཚན་ཉིད་བྱེད་འབར་བའི་ཐུགས་གསུང་སྐུར། །མངོན་བྱང་ལྔས་ཆུབ་སངས་རྒྱས་པདྨ་སྐྱེས། །ལྷུན་གྲུབ་རིགས་འཛིན་མཆོག་དེས་ཁྱོད་ལ་སྲུངས། ༡ །འབྱུང་ཆེན་རྒྱུ་ལས་སྲིད་པའི་རྟེན་འབྲེལ་དང༌། །མ་རིག་ཞགས་པས་འདུ་བྱེད་དབང་བྱས་ཏེ། །རྒ་ཤིའི་བར་དུ་འབྲེལ་བའི་རྟེན་འབྱུང་འདིས། །བདག་ཅག་འཁོར་བར་བཅིངས་པ་མཁྱེན་ལགས་སམ། ༢ །དེ་ཉིད་ལྡོག་བྱེད་ལམ་དང་འབྲས་བུའི་ཆོས། །སྡུག་བསྔལ་ཤེས་བྱས་ཀུན་འབྱུང་སྤོང་བ་དང༌། །འགོག་པ་མངོན་གྱུར་ལམ་མཆོག་མཐོང་བའི་ཕྱིར། །སྡེ་སྣོད་རྒྱ་མཚོའི་གནས་ལ་འཇུག་པར་འཚལ། ༣ །དེ་ཡང་འཁོར་ལོ་དང་པོའི་མཛོད་ཁང་གིས། །སྡུག་བསྔལ་བདེན་པའི་ཆོས་ཉིད་ཤེས་བྱས་ནས། །འཁོར་བ་འདི་ལ་སྙིང་ནས་སྐྱོ་བ་ཡི། །ངེས་འབྱུང་ལྷག་པའི་ཚུལ་ཁྲིམས་གོམས་འཚལ་ལོ། ༤ །ངེས་འབྱུང་སྤངས་པའི་ལྟར་སྣང་བསླབ་གཞི་ནི། །མངོན་པར་མཐོ་ལས་ཐར་པའི་ལམ་མིན་པར། །དགའ་བོའི་མདོ་ལས་འདོམས་དེ་ཤེས་བྱས་ནས། །རྟག་ཏུ་སྲིད་པའི་ཁམས་ལ་སྐྱོ་བར་མཛོད༌། ༥ །དེ་ལྟར་སྐྱོ་ན་འདུས་པ་འབྲལ་བ་དང༌། །སྣང་ནས་མུན་པ་མུན་ལས་སྣང་སོགས་བཞིར། །ཉིང་མཚམས་སྦྱོར་བ་ལས་དང་འབྲས་བུ་ཡི། །རྣམ་སྨིན་བསླུུ་བ་མེད་ལ་ངེས་ཤེས་སྐྱེ། ༦ །ཇི་སྲིད་རྣམ་པར་
རྟོག་པ་མ་ཟད་བར། །དེ་སྲིད་དེ་ཡི་ལས་འབྲས་རྗེས་འབྲང་ན། །དབྱིངས་ལ་གོ་བས་དཔྱད་པའི་སྙམ་བྱེད་དང༌། །སྡིག་པས་བསྒྲུབས་པའི་དགེ་རྩ་ཀླ་ཀློའི་ཆོས། ༧ །དེ་ཕྱིར་མཐོང་བས་སྤང་བྱའི་ཉོན་མོངས་ནི། །ཀུན་འབྱུང་རྒྱ་མཚོའི་བདག་ཉིད་ཡིན་པས་ན། །རྟག་ཏུ་རྣམ་པར་རྟོག་པ་བརྟགས་བྱས་ཏེ། །ཀུན་སློང་ཆོས་དང་འདྲིས་ན་དམ་པ་ཡིན། ༨ །དགའ་བར་བགྱིད་པའི་ཡུལ་ལ་ཆགས་པ་དང༌། །རྒྱགས་པར་བགྱིད་པའི་སྡེ་ལ་སྲེད་པ་ཡང༌། །བལྟར་མི་མངོན་པའི་ཕུང་དཀྲོལ་ཆེན་པོའི་གནས། །ཡིན་གྱི་རྟག་མི་ཐུབ་པ་མཁྱེན་ཡང་འཚལ། ༩ །ཟླ་བ་སྒྲོན་མའི་མདོ་སྡེ་ལ་སོགས་ནས། །ནགས་ཀྱི་ཡོན་ཏན་མངོན་པར་བཤད་པའི་ཚེ། །ལྗོན་ཤིང་མེ་ཏོག་བྲག་རིའི་ཁང་བཟང་དང༌། །བྱ་དང་རི་དྭགས་རྣམ་ཐར་བཤད་པ་ཡང༌། ༡༠ །བདུད་ཀྱི་བཙོན་ར་ཁྱིམ་དང་འདུ་འཛི་ལ། །མངོན་པར་ཞེན་རྣམས་ཐབས་ཀྱིས་འབྲིད་ཕྱིར་ལས། །གཞན་དུ་ཆགས་སེམས་སྐྱེ་ན་ཡུལ་གང་ཡང༌། །གསེར་དང་ཐག་སྒྲོག་འཆིང་བར་མཉམ་ལ་ལྟོས། ༡༡ །མདོར་ན་སེམས་ལས་སེམས་བྱུང་སྐྱེ་བའི་ཕྱིར། །འཁོར་དང་མྱ་ངན་འདས་པའི་ལམ་བདེན་ཀུན། །རྒྱལ་བའི་གཞུང་ལམ་ཐེག་པ་ཆེན་པོའི་སྒོར། །བྱང་ཆུབ་སེམས་གཉིས་དོན་ལ་བསྡུ་བར་བྱ། ༡༢ །གྲངས་མེད་གསུམ་གྱི་ཚོགས་གཉིས་བདག་པོ་དེས། །
གྲངས་མེད་གསུམ་དུ་དགོངས་ཤིང་དཔྱད་པས་ཀྱང༌། །བྱང་ཆུབ་སེམས་ལས་གཞན་དུ་མ་གཟིགས་པས། །བྱང་ཆུབ་སེམས་ཀྱི་དེ་ཉིད་མངོན་དུ་མཛད། ༡༣ །སྡིག་པའི་གྲོགས་ཀྱིས་སྤངས་པ་མཐུན་པའི་ཡུལ། །དགེ་བའི་བཤེས་དང་དགེ་བའི་གྲོགས་པོ་བསྙེན། །སློབ་པར་གུས་ཤིང་ཚོགས་གཉིས་ལ་བརྩོན་པའི། །འཁོར་ལོ་ཆེན་པོ་བཞི་ཡི་ཤིང་རྟར་འཇོགས། ༡༤ །དམ་ཆོས་སྣང་བའི་སྒོ་ནི་དད་པ་སྟེ། །གང་དང་བྲལ་ལ་དམ་པའི་རྩི་མི་འགོ །སྡེ་སྣོད་ཀློག་དང་ཆགས་སྡང་ལས་བརྒལ་བའི། །བྱང་ཆུང་སེམས་དཔའ་རྣམས་ཀྱི་རྣམ་ཐར་གཟིགས། ༡༥ །ཁྱིམ་ཆུང་ནང་ནས་བསྟན་པའི་སྒོར་ཞུགས་ཀྱང༌། །ཁྱིམ་ཆེན་གཟུང་ནས་བྱ་བ་མཐའ་ཡས་ཤིང༌། །གསོག་དང་སྲུང་དང་སྤེལ་བས་འཁྲུགས་པ་ཡང༌། །སྣང་ནས་མུན་པའི་སྒོ་རུ་མཁྱེན་འཚལ་ལོ། ༡༦ །དེ་ལྟར་མཁྱེན་ནས་སྣང་ནས་སྣང་བའི་སྒོ། །གསུམ་ལ་སྐྱབས་ཀྱི་དམ་པར་འཛིན་པ་དང༌། །རིགས་ལས་ཉམས་ཤིང་ལུང་མ་བསྟན་པ་ཡི། །སེམས་འདི་ཐེག་པ་ཆེན་པོར་སད་པར་བྱ། ༡༧ །དེ་ཡི་ས་མཁན་ཚད་མེད་བཞི་ཡིན་ཏེ། །བྱམས་པའི་སེམས་དང་སྙིང་རྗེའི་གཞན་དབང་ཅན། །ཀུན་ལ་ལེགས་སྨོན་བྱམས་སྡང་འབྲལ་བ་རྣམས། །བསྡུ་བའི་དངོས་པོ་རྣམ་བཞིའི་ཁུར་གྱིས་བརྟེན། ༡༨ །ཞི་
བདེའི་ལྟ་བ་ངན་པ་ཉམས་བྱེད་པའི། །རླབས་ཆེན་བྱང་ཆུབ་སེམས་ཀྱི་རིན་ཐང་ལ། །བདག་གི་སྲོག་ཀྱང་ལྟོས་མེད་གཏོང་བྱས་ནས། །ཕྱིན་དྲུག་ལམ་དུ་དགེ་བའི་ཆོས་རྣམ་སྡུད། ༡༩ །བདག་ལ་བདོག་པ་གཞན་གྱི་རྫས་ཡིན་ཏེ། །དགྲ་དང་ཆོས་རྐུན་རྒྱལ་པོས་ཕྲོགས་ལ་ལྟོས། །ལུས་དང་སྲོག་ལའང་གཏོང་སེམས་གོམས་པའི་ཚེ། །ཆོས་མིག་རྡུལ་བྲལ་ཐོབ་ལའང་ཐག་མི་རིང༌། ༢༠། མངོན་མཐོའི་རྟེན་གྱུར་ཡན་ལག་བརྒྱད་པ་ནས། །ཡོན་ཏན་སྣོད་མཆོག་བསྙེན་པར་རྫོགས་པའི་བར། །བདེན་པ་བཞི་ཡི་ལམ་དང་འབྲེལ་གྱུར་ན། །དགྲ་བཅོམ་གོ་འཕང་མཐོང་བའི་་ཆོས་ལ་གནས། ༢༡ །ཞེ་སྡང་ལས་ནི་དམྱལ་བའི་རྒྱུ་འབྲས་གྲུབ། །བཟོད་པ་ལྟ་བུའི་དཀའ་ཐུབ་ཡོད་མིན་ན། །ལྟར་སྣང་བསླབ་པས་བཅིངས་པའི་ཚུལ་འཆོས་ལས། །མི་མཇེད་བཟོད་པའི་རྩ་བ་བརྟན་པ་མཆོག ༢༢ །གཉིད་རྨུགས་ལ་སོགས་སྒྲིབ་པ་ལྔ་ཡི་རྒྱར། །དགེ་བའི་རི་དྭགས་འཛུད་པའི་སྐྱེས་བུ་དེ། །སྙོམ་ལས་གནས་སམ་རྣམ་པར་གཡེང་ཡང་རུང༌། །བརྩོན་འགྲུས་སྙོག་པའི་ལམ་མིན་རྒྱུན་ལྡན་ཡིན། ༢༣ །ཕུང་པོ་ལྔ་ལ་ཉེ་བར་ལེན་པའི་སེམས། །མིག་གི་འདུས་ཏེ་རེག་པ་ལ་སོགས་པ། །ཚོགས་དྲུག་དག་པའི་བསམ་གཏན་མ་སྐྱེས་ན། །ཞི་བར་གནས་ཙམ་དུད་འགྲོ་ལ་ཡང་ཡོད། ༢༤ །
དེ་ཕྱིར་ཐོས་བསམ་སྒོམ་པའི་ཤེས་རབ་མཐའ། །ཤེས་བྱའི་ཚུ་རོལ་མ་ལུས་རྫོགས་པ་ཆེ། །རང་བཞིན་མེད་པའི་དེ་ཉིད་རྟོགས་གྱུར་ན། །ཀློང་ཆེན་རབ་འབྱམས་ནམ་མཁའི་རྣལ་འབྱོར་ལགས། ༢༥ །དེང་སང་འདི་ན་ཐུན་མོང་ལམ་གྱི་གནད། །སྤངས་ཏེ་སྔགས་ཀྱི་ལྟ་སྤྱོད་ལ་སྙེགས་ཏེ། །འཁྲུལ་སྣང་བསྐྱེད་པའི་རིམ་པར་འདོད་པ་དང༌། །གཏི་མུག་རྫོགས་པའི་རིམ་པར་འཁྲུལ་པ་རྣམས། ༢༦ །སྐྱེ་གནས་བཞི་ཡི་བག་ཆགས་སྦྱོང་ཚུལ་དང༌། །མངོན་བྱང་ལྔ་དང་རྡོ་རྗེའི་ཆོ་ག་གསུམ། །ཕྱག་རྒྱ་བཞི་ཡི་ཆིངས་ཀྱིས་བཅིངས་པའི་མཐར། །ཡོངས་གྲུབ་ལམ་ནས་མྱ་ངན་འདའ་བར་མཛོད། ༢༧ །གང་ཡང་ཕ་རོལ་ཕྱིན་པའི་ལམ་ལྔ་ཡི། །བརྟག་པ་དང་སྦྱར་སྔ་འགྱུར་རྒྱུད་སྡེའི་སྲོལ། །རྣམ་སྨིན་ཚེ་དབང་ཕྱག་རྒྱ་ལྷུན་གྲུབ་ཆེའི། །གྲུབ་མཐའ་མ་འདྲེས་ཡོངས་རྫོགས་བསྐྱེད་རིམ་ལམ། ༢༨ །དེ་བཞིན་རྫོགས་པའི་རིམ་པ་ཉིད་ལ་ཡང༌། །སྲིད་པའི་བདག་པོ་གཟུང་འཛིན་རོ་རྐྱང་གི །ལས་རླུང་དབུ་མར་ཞུགས་གནས་ཐིམ་གསུམ་ལས། །རྩ་མདུད་གྲོལ་ཞིང་དུལ་སྦྱོར་རླུང་དག་པས། ༢༩ །འདུན་པ་སེམས་དང་རིགས་ཆེན་འབྱེད་པ་དང༌། །དབུགས་ཆེན་འབྱིན་དང་ལུང་ཆེན་ཐོབ་པ་དང༌། །རྩལ་ཆེན་རྫོགས་པའི་གོ་འཕང་ལ་སོན་ན། །དང་པོའི་སངས་རྒྱས་མངོན་སུམ་
ཉིད་དུ་མཐོང༌། ༣༠ །བདག་ཏུ་མི་འཛིན་གཞན་ལ་དམིགས་པ་བྲལ། །བདག་གཞན་གཉིས་ཀར་མི་དམིགས་རྫོགས་པ་ཆེ། །འཁོར་གསུམ་ཡོངས་དག་རང་བྱུང་རྡོ་རྗེའི་ཞལ། །འདི་ཉིད་ཡིན་ནོ་ཐུགས་ཀྱི་ཐིགས་ལེར་བསྟིམ། ༣༡ །གཏམ་ཚོགས་ལེའུ་བཅོ་བརྒྱད་པའོ།། །།
གཏམ་ཚོགས་ལེའུ་བཅུ་དགུ་པ། སྒོམ་པ་ལ་སྤྲིང་བའི་གཏམ།
སྒོམ་པ་ལ་སྤྲིང་བའི་གཏམ། ཆོས་བཞིན་སྤྱོད་པར་བརྩོན་པ་ཁྱོད་ཅག་གི །ཕྲིན་ཡིག་གསེར་སྲང་གང་གི་ཕྱག་རྟེན་འཕྲོད། །འདི་ན་མཆོག་གསུམ་ཐུགས་རྗེས་བསྐྱངས་པའི་མཐུར། །གཞན་ཕན་བྱང་ཆུབ་སེམས་དང་འབྲེལ་བཞིན་གནས། །དལ་རྟེན་ལན་ཅིག་རྙེད་པ་དོན་ལྡན་དུ། །སྒྲུབ་རྣམས་དབང་པོ་ཐུལ་ལ་བརྩོན་པའི་ཕྱིར། །འཆིང་བ་ཀུན་གྱི་ནང་ནས་མཐུ་བདོ་ཞིང༌། །ཕུང་ཀྲོལ་བསྐྱེད་པའི་ནོར་རྫས་གཏོང་སེམས་ལ། །གོམས་པའི་གནས་ཚུལ་ཐོས་པས་ལྷག་པར་རངས། །ད་ནི་ནམ་འཆི་ཆ་མེད་ཞེན་ལོག་གིས། །རིན་ཆེན་བདུན་ལས་ལྷག་པའི་མི་ལུས་འདི། །འདུ་འཛིའི་ཉེས་དམིགས་གྲོལ་བའི་དབེན་གནས་སུ། །ཚེ་དང་སྒྲུབ་པ་མཉམ་པའི་བརྟུལ་ཞུགས་ཀྱང༌། །འགྲོ་ལ་སྙིང་རྗེ་དམ་པར་མོས་གུས་དང༌། །སྣང་ཆ་ལྷར་སྒོམ་སྟོང་ཆ་སྤྲོས་བྲལ་གྱི། །གཤིས་ལུགས་བཅོས་མེད་དྲན་པའི་སོ་པས་སྐྱོངས། །མོས་གུས་ཐོབ་ན་བླ་མའི་ཞལ་སྐྱིན་མཇལ། །གཟུགས་
བརྙན་མ་མཐོང་སྙམ་པའི་རེ་དོགས་ཆོད། །ཐུགས་ཡིད་འདྲེས་ན་སྐྱེ་དང་ཚེ་རབས་འབྲེལ། །ཐུགས་རྗེའི་ཡུལ་ནི་དད་དང་མོས་གུས་ཕྱིར། །ང་དང་ཁྱོད་ལ་འདུ་འབྲལ་སྐད་ཅིག་མེད། །ཞལ་གདམས་དེ་ཡིན་འཕྲིན་ཡིག་ལན་ཀྱང་འདི། །བརྩེ་བའི་སེམས་དང་ལྷན་ཅིག་དམ་མདུད་དང༌། །སྐྲ་སེན་དང་བཅས་བསམ་ཡས་ཆོས་འཁོར་ནས། །ངྷརྨ་བྷ་དྲའི་ལག་ཏུ་སྤྲིང་བཞིན་དེངས། །སྲིད་པའི་མཚོ་ལས་སྒྲོལ་བའི་བཀྲ་ཤིས་ཤོག །གཏམ་ཚོགས་ལེའུ་བཅུ་དགུ་པའོ།། །།
གཏམ་ཚོགས་ལེའུ་ཉི་ཤུ་པ། སྤོང་བ་བསམ་གཏན་པ་ལ་སྤྲིང་བའི་གཏམ་དོན་རབ་འབྱེད་པའི་རྒྱན།
སྤོང་བ་བསམ་གཏན་པ་ལ་སྤྲིང་བའི་གཏམ་དོན་རབ་འབྱེད་པའི་རྒྱན་ཅེས་བྱ་བ། དོན་གཉིས་མཐར་སོན་རྒྱལ་བ་གཉིས་པའི་ཞབས། །ཚོགས་བརྒྱད་རང་གྲོལ་ཡང་དག་དྲན་པའི་ཞལ། །དུས་གསུམ་དུས་མེད་ཆེན་པོར་སངས་རྒྱས་པ། །སེམས་ལས་འདས་པའི་རིག་པ་མཁྱེན་ལགས་སམ། །སྨྲ་བསམ་བརྗོད་མེད་བློ་ཡིས་འཇལ་བྱེད་པ། །རྟོག་གེའི་ལུགས་ཡིན་སོ་སྐྱེའི་འོལ་ཚོད་ཀྱིས། །དགག་བསྒྲུབ་འབྲས་བུ་དབུ་མར་འཁྲུལ་པ་བཞིན། །བཀྲུས་བཞིན་བཀྲུས་བཞིན་སླར་ཡང་དག་བྱ་འཕེལ། །སྒོམ་ཆེན་རྣམས་ཀྱང་སྐྱེ་འགག་སྟོང་པ་རུ། །ཤེས་པའི་རྒྱུན་ལ་འགྱུ་དྲན་ཀུན་དཀྲིས་ཀྱིས། །གོ་མྱོང་རྟོག་པ་ལྟ་བར་འཁྲུལ་གྱུར་ནས། །ཆད་པར་ལྟ་ལ་འབད་པས་འཇུག་
པ་མཐོང། །དེ་ཕྱིར་སེམས་ལས་འདས་པའི་རིག་པ་ནི། །བཅོས་སུ་མེད་པའི་ལྷུན་འབྱམས་རྒྱ་ཡན་ལ། །ཡེང་དུ་མེད་དེ་འདུ་བྱེད་དྲན་པས་སྟོང༌། །ཕུང་པོ་ལྔ་བྲལ་མཉམ་གཞག་མཁྱེན་པར་མཛོད། །སེམས་ནི་འདུས་བྱས་རིག་པ་ཅིག་ཤོས་ཏེ། །སེམས་རིག་ཆུ་དང་རྙོག་མ་ལྟར་གྱུར་པའི། །དྭངས་གསལ་དྲི་མེད་ཀུན་ཏུ་བཟང་པོའི་ཞལ། །མངོན་སུམ་མཐོང་ན་ལམ་བདེན་སྤོང་བའི་དུས། །རྟོགས་སོ་སྙམ་དང་སྙམ་བྱེད་མེད་ཟེར་རྣམས། །གོལ་སར་འཕྱན་ནམ་འཕྱན་ནམ་མ་འཕྱན་རེ་དོགས་ཀྱི། །ཕྲང་ལ་གོམ་པ་འཁྱོར་བ་མི་སྲིད་པས། །ཡོངས་གྲུབ་ལྟ་བ་ལྷུམས་སུ་ཞུགས་པར་མཛོད། །སྒྲ་ཆེ་མིང་མང་ཆོས་ཀྱི་དབྱིངས་ཆེན་ནི། །བླ་མའི་དྲིན་གྱིས་རྟོགས་པར་གྱུར་པའི་ཚེ། །ཤེས་རབ་ལ་སོགས་འཕགས་པའི་ནོར་བདུན་པོ། །རང་བཞིན་རྒྱུད་ལ་སྐྱེ་བ་ལམ་རྟགས་ཡིན། །དེ་ཕྱིར་བསྒྲུབ་པའི་དམ་བཅར་རྗེས་ཡི་རངས། །དངོས་ཞལ་མཇལ་ལས་རྣལ་འབྱོར་སྒོམ་པ་ཟབ། །བླ་མའི་མདུན་སར་མཉམ་འགྲོགས་བདུད་ཞུགས་ན། །ཡོན་ཏན་མི་མཐོང་བྱིན་རླབས་རིང་དུ་བྱེད། །དེ་ཡི་རྒྱུ་མཚན་རྒྱུད་སྡེ་རྒྱ་མཚོ་ནས། །ཕ་བུ་དང་ནི་ཕུ་ནུ་ཉེ་དུ་ཡི། །དཔོན་སློབ་བཀག་པ་མིག་འདྲིས་ཁྱེར་བ་ཡིས། །དངོས་གྲུབ་སྣོད་ལ་རིང་དུ་བྱེད་ལ་དགོངས། །
དེ་ཕྱིར་དངོས་ཉིད་དྲན་པ་ངའི་ཞལ་སྐྱིན། །དགོངས་གཏེར་བསྟན་བཅོས་རྟོགས་པའི་འདྲ་འབག་ཡིན། །མ་ཡེངས་མི་སྒོམ་ངང་ན་ང་དང་ཁྱོད། །འདུ་འབྲལ་མེད་དོ་བླ་མ་ཆོས་སྐུའི་ཞལ། །མངོན་སུམ་རྗེན་པར་མཐོང་བའི་བཀྲ་ཤིས་ཤོག །ཅེས་པའང་མདོ་ཁམས་རྒྱ་རོང་རི་ཁྲོད་པ་ཀརྨ་བསམ་འགྲུབ་བམ། འཇིགས་མེད་བསྟན་དར་གྱི་ནན་གྱིས་བསྐུལ་ངོར། ཀློང་ཆེན་ནམ་མཁའི་རྣལ་འབྱོར་གྱིས་རྟ་མགྲིན་གླིང་དུ་བྲིས་པའོ། །གཏམ་ཚོགས་ལེའུ་ཉི་ཤུ་པའོ།། །།
གཏམ་ཚོགས་ལེའུ་ཉེར་གཅིག་པ། དགེ་སློང་ལ་སྤྲིང་བའི་གཏམ་སྦྱངས་པའི་ཡོན་ཏན་གྱི་རབ་བྱེད།
དགེ་སློང་ལ་སྤྲིང་བའི་གཏམ་སྦྱངས་པའི་ཡོན་ཏན་གྱི་རབ་བྱེད་ཅེས་བྱ་བ། སྟོན་པ་བླ་ན་མེད་པ་ལ་ཕྱག་འཚལ་ལོ། །བདེན་པ་བཞི་ལ་བལྟ་དང་ཁྲིམས་ཀྱིས་དགེ། །དེ་དག་སློང་དང་ཟས་སློང་ཉེར་ཞི་ལ། །ཆགས་པ་སྤོང་དང་ལེགས་འཚོ་ལམ་ཞུགས་ཕྱིར། །དགེ་སློང་ཞེས་བྱ་སྒྲ་དོན་འབྲེལ་འཚལ་ལོ། །བསམ་པ་ཐག་པས་མྱ་ངན་འདའ་བ་ནི། །རྫོགས་པའི་དོན་ཏེ་གནོད་པ་ཀུན་བྲལ་ལ། །བསྙེན་པའི་དགེ་ཚུལ་དགེ་བསྙེན་གང་དག་ལའང༌། །བསྙེན་པར་རྫོགས་པའི་ཐ་སྙད་ཊཱི་ཀས་བཤད། །ཚིག་ལ་རྟོན་དང་དོན་ལ་རྟོན་པ་ཡིས། །མདོ་སྔགས་ཆོ་ག་འགལ་བ་སྡུད་ཤེས་ན། །སྔགས་སྡོམ་ལྡན་པས་དབང་བཞི་ཐོབ་པའི་ཚེ། །དགེ་སློང་ཉིད་དུ་བཤད་པའི་དོན་ཡང་རིག །རིག་པ་རྗེས་སུ་བསྒྲུབ་པའི་ཆོ་ག་ཡིས། །རྒྱུ་ཚོགས་ཚང་ན་ཚིགས་ལ་མ་ལྟོས་པར། །རང་སའི་སྡོམ་པ་ཁོལ་བུར་ཕོག་ན་ཡང༌། །ཆགས་པ་ཡིན་ཏེ་ཉེས་བྱས་དང་བཅས་སོ། །དེ་ཕྱིར་
ཉེས་མེད་ཕུན་ཚོགས་སྡོམ་པ་ནི། །མུ་སྟེགས་བྱེད་དང་ཟླ་བ་བཞིར་དགེ་བསྙེན་ལ་གནས་དགོས་ཤིང༌། དགེ་ཚུལ་མའི་རྗེས་ཐོག་ཏུ་བསྙེན་རྫོགས་ཀྱང་ཚིགས་འདས་ཀྱི་ཉེས་དམིགས་སུ་ཡོད་བུད་མེད་ལས་གཞན་པ། །ཤཱཀྱ་དང་ནི་མེ་བ་རལ་ཅན་སོགས། །དགག་བྱ་མེད་ལ་བསླབ་ཚིགས་སྦྲེལ་བའང་བསྟན། །མིང་ཆེན་མདོ་ལས་སྐྱབས་གསུམ་འཛིན་པ་དང༌། །དུས་ཁྲིམས་ཡན་ལག་བརྒྱད་པ་དགེ་བསྙེན་དུ། །བཏགས་པ་ལྟར་མིན་སི་ཀའི་སྒྲ་ལས་དགེ། །ཨུ་པ་བསྙེན་དེ་དགེ་བསྙེན་རིགས་བདུན་ནོ། །སྣ་གཅིག་སྲུང་དང་ཕྱོགས་གཅིག་ལྡན་པ་སོགས། །མདོ་སྡེ་པའི་ལུགས་བྱེ་བྲག་སྨྲ་བ་ནི། །ཡན་ལག་ངེས་ལ་སྡོམ་པ་མི་སྐྱེ་ཞེས། །ཡོངས་རྫོགས་དགེ་བསྙེན་ཉམས་པའི་ཆ་ལ་འདོད། །གང་ཡང་དགེ་བསྙེན་ནས་བཟུང་བསླབ་ཚིགས་གསུམ། །བྱིན་ནས་བླངས་པའི་ཚུལ་གྱིས་ཐོབ་འདོད་ལ། །འབོགས་པ་པོའི་དེ་ཟད་པའི་གནོད་བྱེད་འབབ། །དེ་ཕྱིར་རྗེས་ཟློས་ཚུལ་གྱིས་ཐོབ་པར་གཟུང༌། །དེ་ཡི་མཚན་ཉིད་སྡོམ་པ་ཁུར་དང་ནི། །གང་ཟག་ཁུར་འཁྱེར་ཐོབ་བློ་སྡོམ་པའི་རྫས། །ལྡན་མིན་འདུ་བྱེད་ནན་ཐག་ལྟ་བུ་དེས། །བསླབ་པའི་ཁུར་ལ་གཏོང་གནས་གཉིས་སུ་བྱེད། །བསླབ་ཚིགས་གསུམ་ཀ་རྫོགས་པའི་གནས་ཚུལ་ཡང༌། །གནས་འགྱུར་འདོད་ན་དགེ་སློང་ཕུལ་བའི་ཞར། །གཞན་གཉིས་འཇིག་པའི་གནོད་བྱེད་ཡོད་པའི་ཕྱིར། །སྡོམ་རྫས་ཐ་དད་གནས་པ་བྱེ་སྨྲའི་ལུགས། །འོན་ཀྱང་སྲོག་གཅོད་ལ་སོགས་གཞི་གཅིག་ལ། །ལས་ཀྱི་
དངོས་གཞི་གཉིས་སུ་འདྲེན་པ་ནི། །ཉི་ཟླ་སྐར་གསུམ་ཚོགས་པའི་གནས་སྐབས་སུ། །ཟླ་སྐར་གཉིས་ལའང་གྲིབ་མ་འཚོལ་བཞིན་ནོ། །དེ་ལྟར་ན་ཡང་ལྔ་བརྒྱའི་ཐ་མ་འདིར། །འཇིགས་སྐྱོབ་དང་ནི་ལེགས་སྨོན་གཞན་དབང་གིས། །མྱ་ངན་འདས་པའི་བསམ་པ་ཆུད་གཟོན་པས། །སོ་སོ་ཐར་པ་ཙམ་བོར་ལུས་པ་མང༌། །འདུལ་བ་ལུང་བཞིའི་དགོངས་པའི་མཐར་ཐུག་ནི། །ཆོས་རྣམས་སྔོན་དུ་ཡིད་འགྲོ་ཡིད་གཙོ་ཡིན། །གསུང་ན་མིང་དང་ཁས་འཆེ་སློང་བ་སོགས། །བཏགས་པ་ཙམ་མིན་དོན་གྱི་དགེ་སློང་མཛོད། །དེ་ཡི་རྒྱུ་ནི་ངེས་འབྱུང་ཁོ་ན་སྟེ། །གཞོན་ནུ་དོན་གྲུབ་ཁབ་ནས་འབྱུང་བའི་རྐྱེན། །ཀུན་ཏུ་མཁྱེན་པར་མཛོད་ཅིག་དེ་མཁྱེན་ན། །གཞི་གསུམ་ཆོ་ག་གཟུགས་བརྙན་འདའ་བར་འགྱུར། །སོ་ཐར་ཙམ་པོ་དོན་ལ་གནས་འགྱུར་བ། །ཨ་ནནྟ་ཡི་ཉེ་དུ་གཉིས་དང་ནི། །དགའ་བོ་འཆར་ཀ་ཉེ་སྡེ་ཇི་བཞིན་དུ། །དགེ་སྦྱོང་འབྲས་བུ་བཞི་ལ་གནས་པ་ལགས། །ངེས་འབྱུང་གི་ནི་ཡོན་ཏན་ཕ་མཐའ་ཡས། །རང་བཞིན་ངང་རྒྱུད་ངན་པ་འདི་ཡིས་སྤོང༌། །ཁྱིམ་པ་སུན་འབྱིན་གནས་ལ་སྤྲོ་བ་ཞེན། །གཤེ་ཡང་སླར་ལ་མིག་གཤེ་ལ་སོགས་པའི། །དགེ་སྦྱོང་གི་ནི་ཆོས་བཞི་བརྟག་པར་འགྱུར། །ངེས་འབྱུང་གིས་ནི་སྡུག་བསྔལ་ཤེས་པ་དང༌། །ཀུན་འབྱུང་སྤོང་ཞིང་འགོག་པ་མངོན་དུ་བྱེད། །དྲན་པ་ཉེ་བར་གཞག་པ་དང་ལྡན་པས། །ལམ་རྒྱུད་ལ་བརྟེན་
ཟག་མེད་སྡོམ་པ་ཐོབ། །ངེས་འབྱུང་གིས་ནི་མཁན་སློབ་གདམས་ངག་དང༌། །སྤོང་བ་བདུན་སོགས་བསླབ་པའི་གནས་ལ་གུས། །ཁྱིམ་དང་འབྲེལ་བའི་བྱ་བ་མཐའ་དག་སྤོང༌། །བྱ་བྲལ་རྣམས་ཀྱི་མཆོག་ཏུ་གྱུར་པ་ལགས། །དེ་ཡི་རང་བཞིན་སྦྱངས་ཡོན་བཅུ་གཉིས་ཏེ། །བསོད་སྙོམས་པ་དང་སྟན་གཅིག་ཕྱིས་མི་ལེན། །ཆོས་གོས་གསུམ་དང་ཕྱིང་བ་ཕྱག་དར་ཁྲོད། །དགོན་པ་པ་དང་ཤིང་དྲུང་བླ་གབ་མེད། །དུར་ཁྲོད་པ་དང་ཙོག་པུ་གཞི་ཇི་བཞིན། །བཅུ་གཉིས་ཞིབ་པར་ཕྱེ་བས་ཉི་ཤུའོ། །དེ་ལས་བསོད་སྙོམས་པ་ལ་རྣམ་པ་གཉིས། །རྙེད་པས་ཆོག་པ་འདྲིས་པའི་ཁྱིམ་ནས་ཟ། །མཐར་གྱིས་སློང་བ་ཁྱིམ་རྣམས་བརྒྱུད་པ་ལས། །ཅི་ཐོབ་བཟའ་ཡིས་དེ་ཡི་འགལ་ཟླ་ནི། །བཟའ་ཆེར་དམིགས་ནས་མགོ་འཕང་བསྟོད་དེ་འགྲོ། །ཤྭ་ནས་ཟ་བའི་གནས་ཀྱང་དབྲོག་པ་མིན། །དེང་སང་ཐོབ་ཀྱིས་འཇལ་ཞིང་འཕྲོག་བཅོམ་བྱེད། །ཐུབ་པའི་ལུགས་མིན་ཀླ་ཀློའི་ཆོས་ལུགས་ཀྱིས། །ཁྱིམ་པ་སུན་འབྱིན་བསྟན་ལ་མོས་པ་ལྡོག །ལོག་འཚོའི་ནང་ནའང་འདི་ཉིད་མཐུ་ཆེའོ། །སྟན་གཅིག་པ་ལ་གསུམ་སྟེ་སྟན་གྱི་མཐའི། །སྟན་གཅིག་པ་ནི་ཟས་གང་བཟའ་བ་ཡི། །སྟན་དེ་ལས་ལངས་ཉིན་ཞག་དེ་ཉིད་ལ། །དུས་སུ་རུང་བའི་ཟས་མི་ཟ་བའོ། །ཆུའི་མཐའི་སྟན་གཅིག་ཟས་ཟོས་ཁ་བཤལ་བའི། །ལག་ཆུ་བླངས་རྗེས་སྟན་ལས་མ་ལངས་ཀྱང༌། །ཉིན་ཞག་དེ་ལ་དུས་རུང་ཟས་མི་བཟའ། །ཟས་མཐའི་སྟན་གཅིག་ཁམ་གྱི་ཐ་མ་མིད། །ཟ་འཕྲོ་བཅད་ནས་སྟན་ལས་
མ་ལངས་ཤིང༌། །ལག་ཆུ་བླངས་པ་མིན་ཡང་སྔ་མ་བཞིན། །ཟས་ཕྱིས་མི་ལེན་པ་ནི་ཇི་ཙམ་གྱིས། །བདག་ཉིད་འཚོ་བར་གྱུར་པ་མ་ལྡང་བར། །ཟ་བར་མི་བྱེད་ལྡང་ནས་ཟོས་པ་ཡི། །ཕྱི་ནས་ཅུང་ཟད་ཙམ་ཡང་བླང་བྱ་མིན། །དབྱེ་ན་དུས་གཅིག་པ་དང་གསོག་བུ་པ། །གཉིས་ལས་དང་པོ་བཟའ་བ་བྱེད་པའི་གོང༌། །བཏུང་བའང་རུང་གིས་བྱིན་ལེན་ལན་ཅིག་ཉིད། །གཉིས་པའི་དོན་ནི་འབྲས་ཆན་ཚོད་མ་དང༌། །ཞོ་སོགས་སྔ་ཕྱི་རིམ་གྱིས་སྦྱིན་ལེན་མཐར། །ཟོས་ནས་ཟ་འཕྲོ་བཅད་རྗེས་ཕྱིས་མི་ལེན། །ཆོས་གོས་གསུམ་ནི་སྣམ་སྦྱར་བླ་གོས་དང༌། །མཐང་གོས་གསུམ་སྟེ་དེ་བས་ལྷག་པའམ། །མཁོ་བའི་ཡོ་བྱེད་འདྲ་བར་དམ་བཅས་ཀྱང༌། །གདིང་བ་དང་ནི་གཡན་པ་དགབ་པ་དང༌། །གདོང་ཕྱིས་དབྱར་གྱི་རས་ཆེན་བླངས་པ་ཡྀས། །ཆོས་གོས་གསུམ་པ་ཉམས་པར་མི་འགྱུར་ཞེས། །སྦྱངས་པའི་ཡོན་ཏན་བསྟན་པ་ལས་བཤད་དོ། །ཕྱིང་པ་བ་ནི་ལུག་གི་བལ་མ་གཏོགས། །དར་རས་སོགས་ལ་གོས་ཀྱི་རྒྱུར་མི་རུང༌། །ཕྱག་དར་ཁྲོད་པ་གཉིས་ལས་བོར་བ་ནི། །སྲང་མདོ་ནས་རྙེད་གོས་ཀྱི་དུམ་བུ་སོགས། །བཀྲུས་ཤིང་དྲུབས་ལ་ཁ་དོག་བསྒྱུར་ཏེ་འཆང༌། །དུས་ཚིགས་གཅོད་པའི་ཕྱག་དར་ཁྲོད་པ་ནི། །ཟླ་བ་བཞི་ཡན་གཞན་གྱིས་ལོངས་སྤྱད་ནས། །དམན་པར་གྱུར་ལ་སྔ་མ་བཞིན་བྱས་བགོ །དགོན་པ་བ་ནི་གྲོང་ལས་རྒྱང་གྲགས་ཏེ། །གཞུ་འདོམ་ལྔ་བརྒྱ་
ཡན་གྱིས་བསྲིངས་པ་ཡི། །དབེན་པར་བདེན་བཞིའི་དོན་ལ་བསམ་པའོ། །ཤིང་དྲུང་པ་ནི་ཆོས་ཀྱི་གྲགས་པ་བཞིན། །ལྷགས་སྐྱོབ་ཙམ་གྱི་ཤིང་ལ་བརྟེན་པའོ། །བླ་གབ་མེད་པ་བླ་ནི་ནམ་མཁའ་སྟེ། །གབ་མེད་སྒྲ་ལས་ཐོག་དང་བྲལ་བའོ། །དུར་ཁྲོད་པ་ལ་རྣམ་པ་གཉིས་ཡིན་ཏེ། །ཐམས་ཅད་དུར་ཁྲོད་ལྡན་པ་ཞེས་བྱ་ནི། །གནས་མལ་ཟས་གོས་སྣོད་དཔྱད་ཐམས་ཅད་ཀུན། །དུར་ཁྲོད་རྫས་ལ་བརྟེན་པ་ཉིད་ཡིན་ནོ། །ཕྱོགས་འགའ་དུར་ཁྲོད་ལྡན་པ་ཞེས་བྱ་ནི། །ཤི་བའི་ཟས་ལྔ་དུར་ཁྲོད་དོར་བའམ། །རོ་གོས་བཀྲུས་ཏེ་རུང་བར་བྱས་པའམ། །རྗེའུའི་ཁ་གཞོགས་ལྷུང་བཟེད་བྱས་པའམ། །དུར་ཁྲོད་ཉིད་དུ་རྟེན་མེད་གནས་པ་སོགས། །གང་ཡང་རུང་བའི་ཆ་ཤས་སྤྱོད་པའོ། །ཙོག་པུ་པ་ལ་ཆེ་འབྲིང་ཆུང་གསུམ་ལས། །དང་པོ་ཆོས་གོས་ཆུད་མི་འཛའ་བའི་ཕྱིར། །ཅུང་ཟད་དགུ་ལས་མདུན་རྒྱབ་གཡས་གཡོན་སོགས། །བརྟེན་པ་མེད་པས་ཙོག་པུར་གནས་པའོ། །འབྲིང་པོ་རྩིག་པ་སོགས་ལ་རྒྱབ་བརྟེན་ཡང༌། །གཡས་གཡོན་སོགས་ལ་བརྟེན་པ་སྤང་བའོ། །ཆུང་ངུ་གློ་སོགས་ཅུང་ཟད་བརྟེན་ན་ཡང༌། །མགོ་བོ་སྔས་ལ་འཇོགས་པ་ནམ་ཡང་མིན། །གཞི་ཇི་བཞིན་པ་རྩྭའམ་ལོ་མའི་སྟན། །
བཏིངས་པའི་སྟེང་དུ་གནས་མལ་འཆའ་དེ་ཡང༌། །ལན་ཅིག་བཏིངས་ལས་ཡང་ཡང་བརྗེ་བ་སོགས། །གནས་མལ་བརྐམ་ཆགས་སྤང་བའི་ཐབས་ལ་འབད། །དེ་ལྟར་ཟས་ལ་བརྟེན་པ་རྣམ་གསུམ་དང༌། །དེ་བཞིན་གོས་ལ་བརྟེན་པ་རྣམ་པ་གསུམ། །སྤྱོད་ལམ་ལ་བརྟེན་གཅིག་དང་གནས་མལ་ལ། །བརྟེན་པ་ལྔ་ཡི་སྦྱངས་ཡོན་བཅུ་གཉིས་པོས། །འདོད་སྲེད་ཞེན་པ་སྤོང་ཞིང་ཚངས་སྤྱོད་ལ། །གནས་དང་སེམས་མཉེན་ལས་སུ་རུང་བྱེད་པས། །སྦྱངས་པའི་ཡོན་ཏན་ཞེས་སུ་གྲགས་པ་ཡིན། །མདོར་ན་བསྙེན་པར་རྫོགས་ནས་བརྒྱ་ཕྲག་ལོ། །ལོན་དང་གསར་དུ་རྫོགས་པའི་དགེ་སློང་གཉིས། །ཚུལ་ཁྲིམས་རྒྱུ་མཚན་མཉམ་པ་ཉིད་བསྒྲུབ་ཕྱིར། །མཁན་པོ་དང་ནི་གནས་ཀྱི་སློབ་དཔོན་གཉིས། །བཙུན་དང་བརྟན་མཁས་ཕན་འདོགས་ཡན་ལག་བཞི། །ལྡན་ལ་བསྙེན་བྱས་ཞུས་ཏེ་བྱ་བ་བསྒྲུབ། །དེ་ལ་བཙུན་པའི་ཡན་ལག་འདི་ཡིན་ཏེ། །ཕམ་པས་མ་གོས་འཆལ་བའི་ཚུལ་ཁྲིམས་གཟུགས། །ཁ་ན་མ་ཐོའི་མི་དགེས་མ་གོས་དང༌། །བརྟན་པའི་ཡན་ལག་བསྙེན་པར་རྫོགས་ནས་ལོ། །བཅུ་ཕྲག་ལོན་པས་སྡོམ་པ་བརྟན་པའོ། །མཁས་པའི་ཡན་ལག་འདུལ་བའི་སྡེ་སྣོད་ཤེས། །དེ་གསུམ་ཚང་ན་མཁན་སློབ་བྱར་རུང་ཞིང༌། །རང་
དབང་ཅན་དུ་འདུག་ཏུ་རུང་བ་ཡི། །ཡོན་ཏན་གསུམ་བཤད་ཕན་འདོགས་ཡན་ལག་ནི། །སྙིང་རྗེ་བཟོད་ལྡན་ནང་འཁོར་དག་པ་དང༌། །ཕན་འདོགས་གཉིས་ཆོས་དང་ཟང་ཟིང༌བརྩོན་མཚན་མཐུན་ལྟ་བ་དང༌། །སྨྲ་ཤེས་དོན་གོ་ཤེས་པ་རང་བཞིན་གནས། །ཐ་མས་ལུས་གནས་པ་ནི་རང་བཞིན་གནས། །དེ་ལྟར་བཅུ་གཉིས་ཕལ་ཆེར་གོ་སླ་ཡང༌། །ཤེས་པ་རང་བཞིན་མི་གནས་སྨྱོན་པ་སྟེ། །དེ་འདྲས་མཁན་པོ་བྱས་ན་བསྒྲུབ་བྱ་ལ། །ཉེས་བྱས་བསྐྱེད་ཅིང་དེ་བཞིན་ལུས་ཐ་མལ། །དོན་ནི་བལ་འཁུར་ལ་སོགས་ལྟུང་བ་བསྐྱེད། །དེ་བཞིན་ས་གཞན་གནས་ན་མཁན་པོ་སོགས། །ཁྱད་པར་ཅན་་གྱི་སྤྱོད་པ་སྤོང་བ་ཡིན། །གང་དག་བསྙེན་པར་རྫོགས་ནས་ལོ་གྲངས་བཅུ། །ལོན་ཀྱང་འདུལ་བའི་སྡེ་སྣོད་མི་ཤེས་ན། །གནས་ཀྱི་བླ་མ་ཉིད་ལ་མ་བརྟེན་པར། །འདུག་ཏུ་མི་རུང་གཞན་དབང་ཅན་ཡིན་ཏེ། །འདི་ལྟར་འདུལ་བ་གླིང་གཞིས་འཆད་པའི་དོན། །དགག་བཅས་གསུམ་ལ་རྗེས་བཅས་དགག་བསྒྲུབ་གནང༌། །བསྒྲུབ་བཅས་གསུམ་ལ་རྗེས་བཅས་བསྒྲུབ་དགག་གནང༌། །གནང་བཅས་གསུམ་ལ་རྗེས་བཅས་གནང་དགག་བསྒྲུབ། །བཅས་རྐྱང་ལ་སོགས་བསླབ་པའི་གཞི་རྣམས་ལས། །སྤང་བའི་ཚུལ་ཁྲིམས་ཉིས་བརྒྱ་ལྔ་བཅུ་དང༌། །བླང་བྱ་འཇུག་པའི་ཚུས་ཁྲིམས་བཅུ་བདུན་གཉིས། །མཁན་སློབ་ལ་བརྟེན་
ཇི་སྲིད་འཚོ་ཡི་བར། །ཚུལ་གནས་ཐོས་དང་བསམ་གཏན་ལ་བརྩོན་ནས། །སྤང་བླང་བགྱིད་ན་ལྟུང་བ་འབྱུང་བའི་སྒོ། །བཞི་ཡི་དང་པོ་མི་ཤེས་སྒོ་བཅད་ནས། །སོ་སོ་ཐར་པ་དོན་ལྡན་ཉིད་དུ་འགྱུར། །མདོར་ན་ཚུལ་ཁྲིམས་ལྡན་དང་ཅིག་ཤོས་ཁྱད། །ཕམ་པས་མ་གོས་སྟེང་དུ་བཅས་པ་ཡི། །ཡན་ལག་ཕྲ་མོ་ལས་ཀྱང་རང་བཞིན་གྱི། །སྡིག་པའི་གཟིགས་ཅན་ཁ་ན་མ་ཐོ་བས། །ཉམས་པ་མཐུ་ཆེ་མཛད་ལས་དེ་སྐད་དུ། །འཆལ་བའི་ཚུལ་ཁྲིམས་མི་དགེའི་གཟུགས་ཞེས་བཤད། །དེ་ཕྱིར་བཅས་པའི་ཡན་ལག་ཕྲ་མོ་ལས། །རང་བཞིན་གྱིས་ནི་ཁ་ན་ཐོ་བ། །གཞན་གནོད་གཞི་བཅས་ངོ་བོར་གནས་མང་ལ། །ཇི་མི་སྙམ་སྤང་ཁྲིམས་འཆལ་རྒྱུ་འབྲས་འགོག །དེ་ལྟར་ན་ཡང་ལྔ་བརྒྱའི་ཐ་མ་འདིར། །བསྟན་པ་རིན་ཆེན་རྟགས་ལ་ཉེ་བ་ཡི། །ཆབ་དང་བྱིན་ལེན་མཆིལ་ལྷམ་བསལ་ཙམ་གྱིས། །ཀྲྀ་ཀིའི་རྨིས་ལྟས་ལུང་སྟོན་ཉམས་སུ་མྱོང༌། །དེ་འདྲའི་དུས་ན་སྦྱངས་ཡོན་བཅུ་གཉིས་པོ། །གངས་རིའི་ཁྲོད་པས་སྤངས་པ་ལྟར་གྱུར་ཀྱང༌། །སྐྱེ་ཤིས་འཇིགས་པའི་ངེས་འབྱུང་ཅན་གང་དག །དབེན་པའི་གནས་ལ་བསྐུལ་ཕྱིར་འདི་སྐད་གསོལ། །སྟོན་པས་བླ་གབ་མེད་སོགས་གནས་ཀྱི་ལྔ། །གསུངས་ལས་ཕྱོགས་བླ་གབ་ཆེ་ལ་གཉེར། །དེ་ནི་ཁྱིམ་ཆུང་སྤངས་པའི་ཁྱིམ་ཆེན་
ཕྱིར། །འདུ་འཛིས་རྣམ་པར་གཡེངས་ཤིང་ཆོས་ལས་ཉམས། །དུག་དང་འདྲ་བའི་ཡུལ་གྱི་ཉེས་དམིགས་ནི། །དགྲ་གཉེན་ཆགས་སྡང་ཕྱོགས་རིས་ཁོན་གཅུགས་ཀྱིས། །བསམ་སྦྱོར་ལྷུར་ལེན་རྙེད་དང་མི་རྙེད་སོགས། །ལོ་ཀའི་ཆོས་བརྒྱད་ཞགས་པའི་གཞན་དབང་གིས། །ངེས་འབྱུང་རི་དྭགས་ཆོས་མིན་མཐའ་ལ་གཅུར། །མང་པོ་ཚོགས་པའི་དབུས་སུ་ལོག་འཚོའི་རྫས། །མྱོང་བཞིན་མྱོང་བཞིན་རང་རྒྱུད་ཆུད་སོན་པའི། །ངང་ལ་འཚོ་བའི་འདུ་བྱེད་སྐབས་ཡོལ་ཏེ། །དགེ་སྦྱོང་གཟུགས་ཀྱིས་ངན་འགྲོའི་ས་མཁན་བྱེད། །འདི་ལྟར་བསམས་ནས་ཟླ་བ་སྒྲོན་མའི་མདོར། །དབེན་པའི་ཡོན་ཏན་བསྔགས་པ་དྲན་བྱས་ནས། །ཚོང་དང་སོ་ནམ་འདུ་འཛིས་དབེན་པའི་གནས། །བས་མཐའི་ནགས་སུ་མྱུར་བ་མྱུར་བར་སྤྱོན། །དེ་ན་བྱ་དང་རི་དྭགས་བུང་བ་རྣམས། །འཁོན་དང་རྩོད་པ་མེད་པས་རང་རྒྱུད་འཇམ། །ཤིང་དྲུང་བླ་གབ་མེད་དང་དུར་ཁྲོད་སོགས། །གནས་མལ་རྣམས་ཀྱི་དགོས་པ་དོན་གྱིས་ཚང༌། །དེ་བཞིན་མྱུ་གུ་དང་ནི་ལྡུམ་བུའི་ཟས། །ཅོང་ཞི་མེ་ཏོག་ལ་སོགས་དཀའ་ཐུབ་རྫས། །འཚོ་བ་རང་བཞིན་ཉུང་བའང་དུས་ཚིགས་སྤྱོད། །ཡང་ཡང་བཟའ་མིན་བསོད་སྙོམས་འགལ་ཟླ་སྤོང༌། །མང་པོའི་དབུས་ན་སྤྲོས་པ་མེད་ན་ཡང༌། །ཀུན་སྤྱོད་མཐུན་པའི་གོས་ཀྱི་རྩོལ་བསྒྲུབ་འབབ། །བས་མཐའ་
ངན་ངོན་ཙམ་གྱིས་ཆོག་ཤེས་པས། །གོས་ཀྱི་གསུམ་སོགས་དོན་དང་འགལ་མི་འགྱུར། །དབེན་པར་གནས་པའི་གང་ཟག་བུ་ཆུང་བཞིན། །གཅེར་བུར་གློ་ཕབ་ཉལ་བ་མ་ཡིན་ཞིང༌། །རྣམ་པར་སྣང་མཛད་ཆོས་བདུན་ལ་བརྟེན་པས། །སྤྱོད་ལམ་གྱི་ནི་གཅིག་ལ་ལྷག་པར་གནས། །བྱ་བ་བཏང་བའི་གང་ཟག་གང་ཞིག་ལ། །ནང་ཚང་ཅན་གྱི་སྟན་སོགས་མི་འབྱོར་ཞིང༌། །འབྱོར་ཡང་སྤྲོ་བ་ཞན་པས་ལོ་མའམ། །རྩྭ་ཡི་སྟན་གནས་སྒོམ་པ་ཉམས་སུ་མྱོང༌། །ཇི་ལྟར་སྒོམ་ན་ལྷག་པའི་ཚུལ་ཁྲིམས་མཆོག །ཡོན་ཏན་ཀུན་གྱི་རྟེན་དུ་ངེས་བྱས་ནས། །ལྷག་པའི་སེམས་ཏེ་བསམ་གཏན་རྣམ་པ་བཞི། །ལྷག་པའི་ཤེས་རབ་རྟོགས་པའི་སླད་དུ་སྒོམ། །བསླབ་པའི་འདི་གསུམ་མུ་སྟེགས་བྱེད་སོགས་དང༌། །ཐུན་མོང་མིན་པས་ལྷག་པའི་སྒྲ་ཞུགས་ཞིང༌། །མྱ་ངན་འདས་པ་དབང་དུ་བྱེད་པས་ན། །ཉོན་མོངས་སྤོང་ཞིང་ཞི་བ་དམ་པའི་མཛོད། །དེ་ཕྱིར་དབེན་པའི་ཡོན་ཏན་བསམ་མི་ཁྱབ། །གནས་ལ་བརྟེན་ནས་ལུས་དབེན་ཐོབ་འགྱུར་ལ། །ལུས་ལ་བརྟེན་ནས་ངག་དང་སེམས་དབེན་ཐོབ། །སེམས་དབེན་ཐོབ་པས་མྱུར་དུ་མྱ་ངན་འདའ། །དེ་ཉིད་སློབ་བྱའི་དྲན་པ་ཉེར་གཞག་ལས། །རྒྱུན་དུ་ཞུགས་དང་ལན་ཅིག་ཕྱིར་འོང་དང༌། །ཕྱིར་མི་འོང་ལ་འབྲས་ཞུགས་འབྲས་གནས་གཉིས། །དགྲ་བཅོམ་འབྲས་བཅས་སློབ་པའི་གང་ཟག་བདུན། ཟག་མེད་ཚུལ་
ཁྲིམས་ཏིང་འཛིན་ཤེས་རབ་དང༌། །ཉོན་མོངས་ཅི་རིགས་ལས་གྲོལ་རྣམ་གྲོལ་གཟུགས། །རྣམ་པར་ངེས་གྲོལ་ཤེས་དང་མཐོང་བ་ལྔ། །འཕགས་པ་སློབ་པའི་ཆོས་ལྔར་ངེསའཚལ་ལོ། །དེ་ཡང་དགྲ་བཅོམ་རྒྱན་མེད་ཤེས་རབ་ཀྱི། །ཆ་ལས་རྣམ་གྲོལ་ཉོན་སྒྲིབ་གྲོལ་བ་ཙམ། །ཡིན་གྱིས་སྙོམས་འཇུག་སྒྲིབ་པ་དང་བཅས་པས། །རྣམ་གྲོལ་ཕུན་སུམ་ཚོགས་པ་མ་ཡིན་ལ། །རྒྱན་ཅན་ཉོན་མོངས་དང་ནི་སྙོམས་འཇུག་སྟེ། །གཉིས་ཀའི་ཆ་ལས་རྣམ་པར་གྲོལ་བའི་ཕྱིར། །སྤངས་པའི་རྣམ་གྲོལ་ཕུན་སུམ་ཚོགས་པའི་ཁྱད། །ཉོན་མོངས་ཟད་དང་སྡུག་བསྔལ་མི་སྐྱེ་ཤེས། །དེ་ཡང་ཤེས་བཟོད་སྐད་ཅིག་བཅུ་དྲུག་གིས། །སློབ་པ་མིན་པའི་ལྟ་བ་མངོན་མཐོང་བ། །དགྲ་བཅོམ་འབྲས་གནས་རྣམ་པར་གྲོལ་བ་ཡི། །གོ་འཕང་མཆོག་ལ་གནས་པའི་བཀྲ་ཤིས་ཤོག །གང་འདི་རང་བྱུང་རྡོ་རྗེ་མཁྱེན་བརྩེའི་ལྷས། །དཔལ་ལྡན་ས་སྐྱའི་མཁན་ཆེན་ཁྲི་ཐོག་པ། །བརྟན་མཁས་ཡོན་ཏན་རྫོགས་པའི་ཨ་ནནྟ། །ཕ་ལ་ཤྲཱིར་སྐྱེས་ཀྱི་མཆོག་ཏུ་བསྔགས། །གང་ལ་དེ་སྐད་སྤྲིང་པའང་ལེགས་སྨོན་གྱི། །རྙོག་པ་དྭངས་པའི་ངེས་འབྱུང་གསེར་འགྱུར་རྩིས། །ལྷག་པའི་ཚུལ་ཁྲིམས་མྱ་ངན་འདའ་ཕྱིར་ཡང༌། །བདག་དང་གང་ཟག་ཅན་དུ་བལྟ་ལ་ཅི། །དེ་ལྟ་མོད་ཀྱིས་འདི་ཡིས་སྐབས་དབྱེ་ནས། །དྲང་སྲོང་རྒྱལ་མཚན་འཛིན་པ་བརྒྱ་ཕྲག་བརྒྱ། །ངེས་
འབྱུང་བསེར་བུས་བསྐྱོད་པའི་ཚུལ་ཁྲིམས་ཀྱི། །བསུང་ཞིམ་ཙནྡན་དྲི་ངད་ཐུལ་གྱུར་ཅིག །གཏམ་ཚོགས་ལེའུ་ཉེར་གཅིག་པའོ།། །།
གཏམ་ཚོགས་ལེའུ་ཉེར་གཉིས་པ། རབ་བྱུང་ལ་སྤྲིང་པའི་གཏམ་པྲ་ཏི་མོ་ཀྵ་གརྦྷ།
རབ་བྱུང་ལ་སྤྲིང་པའི་གཏམ་པྲ་ཏི་མོ་ཀྵ་གརྦྷ་ཞེས་བྱ་བ། རྒྱལ་བ་བུ་རམ་ཤིང་པ་ལ་ཕྱག་འཚལ་ལོ། །གང་ཞིག་དེ་ཡི་ཚུལ་ཁྲིམས་ཕུང་པོ་ཡེ་ཤེས་དམ་པའི་སྙིང་པོ་ཅན། །སློབ་པ་མིན་པའི་ས་ལ་བཞུགས་སོ་ཅོག་གིས་ཀྱང་ནི་བགྲང་དཀའ་བ། །ཐེག་གསུམ་ལམ་གྱི་སྤངས་རྟོགས་གཟུགས་ལས་ཐོས་སྒྲོག་ཞི་བའི་དགྲ་བཅོམ་མིན། །གང་ཕྱིར་ལྷ་དང་ཀླུ་དབང་མཁའ་ལྡིང་དྲང་སྲོང་རིག་འཛིན་གཙུག་ཏོར་ཡིན། །བདེན་པ་གཉིས་ལ་མ་བརྟེན་དམ་ཆོས་དང༌། །ཆོས་ཉིད་ལ་སྡང་འཇིག་ལྟའི་རི་བོ་ལ། །བསྙེན་བསྲིང་བཤེས་པར་མ་གྱུར་དེ་སྲིད་དུ། །ཀུན་རྫོབ་བདེན་པའི་གནས་ལ་གུས་པར་མཛོད། །བལྟ་ན་སྡུག་པའི་དྲང་སྲོང་རྒྱལ་མཚན་གྱིས། །གངས་རིའི་ཁྲོད་འདི་མཛེས་པར་བྱས་ན་ཡང༌། །འཚོ་བའི་དོན་དང་སྒྲོ་སྐུར་ཆད་པས་འཇིགས། །རྙེད་དང་སྲིད་འབྱོར་ལ་ཆགས་ལེགས་སྨོན་མང༌། །གང་ཕྱིར་བྱང་ཆུབ་ཡན་ལག་རྗེས་མཐུན་པའི། །ཡང་དག་ལྟ་བ་ཅན་ལ་གུས་རྣམས་ཀྱང༌། །ལྔ་ཕྲག་ཐ་མའི་ཆོམ་པོས་བདེན་བཞིའི་དབུགས། །ཕྲལ་བས་ངེས་འབྱུང་ཚུལ་ཁྲིམས་བསླབ་པ་དཀོན། །རྒྱལ་བའི་ལུང་རྟོགས་བསྟན་པ་མདོ་སྡེ་དང༌། །ཆོས་
མངོན་སྡེ་སྣོད་གཉིས་ལ་ལེགས་གནས་ཀྱང༌། །ཕམ་ལྟུང་བསླབ་བྱར་བཅས་པའི་སྟོན་པ་ནི། །འདུལ་བའི་སྡེ་སྣོད་ཡིན་གྱིས་གུས་པར་མཛོད། །དེ་ཡི་ངོ་བོ་སྤང་སེམས་དགེ་བ་དང༌། །དགེ་བ་ས་བོན་བཅས་ལ་འདོད་པ་གཉིས། །འགོག་སྙོམས་ཞུགས་དང་གཉིད་མཐུག་དུས་འགལ་བས། །མདོ་སེམས་ལུགས་གཉིས་རྣམ་རིག་ཙམ་དུ་བཞག །དྲང་ལ་དྲང་དོན་བྱེ་བྲག་སྨྲ་བ་ཡིས། །དབང་པོ་ལྔ་དང་དོན་ལྔའི་རྡུལ་ཕྲན་ནང༌། །རིག་བྱེད་མིན་གཟུགས་བསྟན་མེད་ཐོགས་མེད་ཀྱི། །སྡོམ་པ་གཟུགས་ཅན་ཉིད་དུ་མཛོད་ལས་བཤད། །དེ་ཡང་རེག་པས་གཟུགས་སུ་ཡོད་པ་དང༌། །ཡུལ་དང་དཔྱད་པས་གཟུགས་སུ་ཡོད་པ་ལས། །རིག་བྱེད་མ་ཡིན་མཚན་ཉིད་ལྡན་པ་ཡི། །སོ་ཐར་བརྟུལ་ཞུགས་ཆུ་ལོན་ལྟ་བུར་མཛོད། །སྡོམ་དངོས་འབྱུང་བ་གཞན་དང་རྒྱུར་བྱས་པའི། །རྣམ་པར་རིག་བྱེད་ལས་འདས་ལུས་ཀྱི་གསུམ། །ངག་གི་བཞི་སྟེ་སྤོང་བདུན་གཙོ་བོ་ལ། །མྱོས་བྱེད་ལ་སོགས་ཁ་ན་མ་ཐོའི་འཁོར། །ཨ་མྲའི་ཚལ་དང་སྨྱིག་ཚལ་བཞིན་དུ་སྲུངས། །ཉོན་མོངས་གཡུལ་དང་མེ་ཏོག་མདའ་ཅན་ལས། །རྒྱལ་ནས་ཀུན་འབྱུང་རྒྱུ་དང་དེའི་འབྲས་བུ། །སྡུག་བསྔལ་སྤང་ཞིང་མངོན་མཐོའི་བདེ་འབྲས་དང༌། །རྫོགས་པའི་བྱང་ཆུབ་ཐོབ་བྱའི་བྱེད་ལས་ལགས། །གང་ཞིག་སྤང་བྱ་སྤོང་བའི་མི་མཐུན་ཕྱོགས། །ཕམ་པ་བྱུང་དང་དེ་ལ་
འཆབ་སེམས་སྐྱེས། །སྡོམ་པའི་དགོས་པ་དྲུག་དང་བྲལ་གྱུར་ན། །རྣམ་པར་གྲོལ་དང་མཐོ་རིས་རིང་དུ་བྱེད། །དགོས་པ་དྲུག་ནི་བྱང་ཆུབ་མཐོ་རིས་དང༌། །བླངས་ན་སྐྱེ་དང་ཆོས་ཀྱི་ལོངས་སྤྱོད་དང༌། །ཟང་ཟིང་ལོངས་སྤྱོད་ཚངས་པར་མཚུངས་སྤྱོད་མཚུངས། །ཕྱིར་བཅོས་རུང་བ་འཆབ་མེད་བྱེད་ལས་ཡིན། །དེ་ལྟའི་སོ་ཐར་སྡོམ་པ་འདུས་བྱས་ནི། །དགེ་བར་ལུང་བསྟན་འབྲས་བུ་བདེ་བའི་ཕྱིར། །ལུང་མ་བསྟན་པའི་རྣམ་སྨིན་འབྲས་བུ་དང༌། །ལམ་བདེན་བྲལ་འབྲས་འགོག་བདེན་གཉིས་ཀ་མིན། །རྒྱུ་དང་དུས་མཉམ་མམ་ནི་ཕྱི་ནས་བྱུང༌། །བྱེད་རྒྱུ་ལས་སྐྱེས་བདག་པོའི་འབྲས་བུ་དང༌། །གང་ཞིག་གོམས་པའི་རྒྱུ་མཐུན་གོང་འཕེལ་ལམ། །སྐལ་མཉམ་རྒྱུས་བསྐྱེད་རྒྱུ་མཐུན་འབྲས་བུའང་དེ། །རྔ་སྒྲ་ལྟ་བུར་ལྷན་ཅིག་འབྱུང་རྒྱུ་ལས། །སྐྱེས་བུ་བྱེད་པའི་འབྲས་བུ་གསུམ་ཡིན་པར། །ཤིས་ནས་གཞི་གསུམ་རྩ་བ་བརྟན་གྱུར་ཅིང༌། །བདེན་པ་བཞི་ཡི་ལམ་ལ་རབ་གནས་འཚལ། །མདོར་ན་ཉེས་སྤྱོད་ལས་ལོག་ཚུལ་ཁྲིམས་ནི། །གཞན་གནོད་གཞི་བཅས་སྤང་དང་དགེ་སྦྱོང་གི །ཆོས་བཞི་བརྟེན་ལ་གོམས་པར་མ་བྱས་ན། །སོ་སོ་ཐར་པ་སྡིག་པ་ཅི་ཡང་མི་བྱ་ཞིང༌། སོགས་དང་། །རབ་ཏུ་བྱུང་བ་གཞན་
ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་སོ། །ལམ་མིན་འཁྱམས་པར་འགྱུར། །ཁྱད་པར་རྒྱལ་པོའི་བྲན་དང་མངགག་ཞུག་པ། །ཞལ་ལྕེ་གཅོད་དང་ཤོ་གམ་ཡུལ་ལྗོངས་བསྲུང༌། །གྱི་ནར་འཕྱན་ལས་ཁྱིམ་པ་སུན་འབྱིན་པའི། །ལས་མཐའ་ལོག་ལ་ངེས་འབྱུང་ཡོད་མ་ཡིན། །ངེས་འབྱུང་བྲལ་བའི་དྲང་སྲོང་རྒྱལ་མཚན་ནི། །མཚམས་ཀྱི་སྤྲིན་པས་རྔོན་ལ་བགོས་པ་བཞིན། །ཁྲིམས་ཀྱི་གཟུགས་བརྙན་ལྟུང་བྱེད་ཆེན་པོའི་གཡང༌། །ཐར་པ་འདོད་པའི་སེམས་ཀྱིས་ཉེ་བར་སྲུངས། །སྐྱེས་བུའི་ཤེས་དང་ལང་ཚོ་གཡོ་བའི་ཆོས། །སྲོག་ནི་ཆུ་བུར་བཞིན་དུ་ཡ་མ་བརླ། །བསྟན་པ་རིན་ཆེན་རྟགས་ལ་ཉེ་བ་ཡི། །དམིགས་པ་འདི་གསུམ་ཆོས་ཀྱི་བསྐུལ་མར་འཚལ། །དེ་ལྟར་བསྐུལ་ནས་ཐོས་པའི་ཤེས་རབ་ལ། །གཅིག་ཏུ་གྲིམས་པའི་བྱང་ཆུབ་སེམས་དཔའ་ནི། །རྒྱལ་པོར་གྱུར་ཀྱང་འདོད་པའི་ཡོན་ཏན་གྱིས། །བསླུ་བར་མི་ཚུགས་ལེ་ལོས་ཟིལ་མི་ནོན། །རྒྱུ་དང་འབྲས་བུ་བསླུ་བ་མེད་པ་ལ། །ངེས་པ་རྙེད་ཅིང་ཆོས་དང་ཆོས་མིན་ཤེས། །ཐུབ་པ་མཆོག་དང་དེ་ཡི་སྡེ་སྣོད་ཀྱི། །ཡོན་ཏན་ཤེས་ནས་དགེ་བའི་བཤེས་གཉེན་མཐོང༌། །སྙིང་པོ་མེད་པའི་འཇིག་རྟེན་ཙམ་ལ་ཡང༌། །བཟོ་ཡི་གནས་དང་སྒྱུ་རྩལ་བདག་ཉིད་བསྲུང༌། །གཙུག་ལག་སྣ་ཚོགས་ཟས་ནོར་བསྒྲུབ་པ་དང༌། །གཞན་ལ་ཕན་འདོགས་ཤེས་རབ་མཐུ་ལས་འབྱུང༌། །ཤེས་རབ་མེད་ན་རྣམ་པར་གྲོལ་བའི་ལམ། །ཤེས་པ་ལྟ་ཅི་སྦྱིན་དང་ཚུལ་ཁྲིམས་སོགས། །ཕ་རོལ་ཕྱིན་པ་དྲུག་ལ་རྩོལ་བྱས་
ཀྱང༌། །ཐར་ལམ་བྲལ་བའི་རྙོག་པ་ཅན་དུ་འགྱུར། །དེ་ཕྱིར་རང་རྒྱུད་ལྡན་གྱི་གང་ཟག་ནི། །རྨོངས་དང་སྡིག་གྲོགས་ལེ་ལོ་སྙོམ་ལས་དང༌། །རྒོད་དང་གཉིད་དང་འདོད་ལ་འདུན་པ་དང༌། །མངོན་པའི་ང་རྒྱལ་ལོག་ལྟའི་གཞན་དབང་ཅན། །ཀུན་ལ་དེ་ལྟར་འཚལ་བའི་ངེས་ཤེས་ཀྱིས། །ཐོས་པའི་ཉེར་ལེན་དགེ་བའི་བཤེས་གཉེན་མཆོག །བསྙེན་ནས་བསྲིང་བར་མི་བྱ་བསམ་སྒོམ་ཀུན། །ཐེག་ཆེན་ལམ་ནས་མྱ་ངན་འདའ་བར་བརྩོན། །ད་རེས་སེམས་ཀྱི་སྟོབས་ཆེན་དམ་པའི་རྟེན། །དལ་རྟེན་ཡིད་བཞིན་ནོར་འདྲ་རྙེད་དུས་འདིར། །རྒྱགས་དང་དྲེགས་པས་རྣམ་བྱང་འཇོམས་པ་ཡི། །ཁ་ན་མ་ཐོའི་གཡུལ་ལས་རྒྱལ་བར་མཛོད། །ཁྱོད་ལ་དེ་སྐད་སྤྲིང་བའི་དོན་བཟང་པོ། །ཐར་པའི་རྒྱལ་མཚན་ཆོས་གོས་རྣམ་གསུམ་གྱིས། །མཛེས་པར་བྱས་པའི་སྙན་དུའང་དོང་གྱུར་ནས། །རྒྱལ་བསྟན་ཡུན་རིང་གནས་པའི་བཀྲ་ཤིས་ཤོག །དགེ་བའི་བཤེས་གཉེན་ཆེན་པོ་འབྲས་སྤུངས་བདེ་ཡངས་བླ་མ་ལ་རྒྱལ་བའི་མྱུ་གུ་ཨ་བྷ་ཡ་དྭཱི་པས་དཔལ་ལྡན་ཚེ་རིང་ལྗོངས་ཞེས་བྱ་བའི་གཙུག་ལག་ཁང་ནས་གདམས་པ་རྫོགས་སོ། །གཏམ་ཚོགས་ལེའུ་ཉེར་གཉིས་པའོ།། །།
གཏམ་ཚོགས་ལེའུ་ཉེར་གསུམ་པ། སྔགས་པ་ལ་སྤྲིང་པའི་གཏམ་བཤགས་ལེ་བཞི་པའི་ཊཱིཀ་དམ་ཚིག་རྒྱ་མཚོའི་གསལ་བྱེད།
སྔགས་པ་ལ་སྤྲིང་པའི་གཏམ་བཤགས་ལེ་བཞི་པའི་ཊཱིཀ་དམ་ཚིག་རྒྱ་མཚོའི་གསལ་བྱེད་ཅེས་བྱ་བ། དཔལ་རྡོ་རྗེ་ཅན་ལ་ཕྱག་འཚལ་ལོ། །དབྱིངས་ཀྱི་རྟག་པ་རྡོ་རྗེའི་སྐུ། །ཀུན་ནས་ཀུན་ཏུ་བཟང་པོའི་ཞལ། །ངོ་བོ་ཉིད་མེད་
ཡེ་ཤེས་སྐུ། །བདེ་ཆེན་བྱང་ཆུབ་སེམས་ལ་འདུད། །འདིར་ཆོས་རྒྱལ་ལུང་བསྟན་རྡོ་རྗེའི་ཆོས་ཆར་ཏནྟྲ་ཆེན་པོ་སྡེ་བཅོ་བརྒྱད་དུ་གྲགས་པའི་ནང་ཚན་གླང་པོ་ཆེ་རབ་ཏུ་འབོག་པ་སྟེ། སྐྱེས་བུ་རྣམས་ཀྱི་སྲོག་རྩར་རླུང་ཞུགས་ཏེ་སྨྱོ་བའི་ཕྱི་ནས་དབུ་མར་རླུང་སེམས་འདུས་པའི་ཆོས་ཉིད་ངོ་མ་འཕྲོད་པ་ལ་བོག་པར་འདོགས་པ་ལྟར། འདིར་བླ་ན་མེད་པའི་རྒྱུད་སྡེ་རིན་པོ་ཆེ་ཀུན་རྫོབ་ཀྱི་ཚིག་ཙམ་ལ་མི་རྟོན་པར་ཆོས་ཉིད་ཀྱི་དོན་རྣམ་པར་མི་རྟོག་པ་ལ་གཙོ་བོར་རྟོན་པའི་ཆོས་ཀྱི་རབ་ཏུ་བྱེད་པ་ལས། བཤགས་པའི་རྒྱུད་ཀྱི་ལེའུ་བཞི་པའི་དོན་བརྗོད་མེད་དོན་བཤགས་ཀྱི་ཊཱི་ཀས་གསལ་བར་བསྟན་པ་ལ། །ཨོཾ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང༌། །ཐུགས་རྗེའི་ཉི་གསལ་འོད་བཞིན་སྙོམས་མཛད་པ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །ཞེས་པ་ནི། སངས་རྒྱས་ཆོས་ཀྱི་སྐུ་རྟག་ཏུ་སྤྲོས་པ་ཐམས་ཅད་དང་བྲལ་བའི་དབྱིངས་ནས་ཡེ་ཤེས་ཀྱི་འཁོར་ལོ་སད་པར་བྱས་ཏེ་ཚོགས་ཞིང་དྲང་བའི་དོན་ཏེ། ཡུལ་དང་ཡུལ་ཅན་གྱི་རྟོག་དཔྱོད་ལ་མི་འཇུག་ཅིང༌། བདེ་བར་གཤེགས་པའི་ཁམས་ཀྱི་ཡེ་ཤེས་རང་གསལ་བའི་ཆོས་ཉིད་ནི་གཟུགས་ཀྱི་སྐུ་ལས་འདས་པས་ཆོས་ཀྱི་སྐུའི་མཆོག་སྟེ་སུས་ཀྱང་མ་བཅོས་པར་རང་བཞིན་གྱི་དཀྱིལ་འཁོར་ཆེན་པོའི་བདག་ཉིད་ནི་ཟླ་བའི་དཀྱིལ་འཁོར་འོད་སྣང་
ཕྱིར་གསལ་དུ་རྒྱས་པ་བཞིན་དུ་རྟོག་པ་སྣ་ཚོགས་ཀྱི་སྤྲོས་པ་མི་མངའ་ཡང་ཕྱོགས་རིས་བྲལ་བའི་ཐུགས་རྗེའི་རང་གཟུགས་ཉི་མ་ལྟར་གསལ་ཞིང་བྱམས་པའི་འོད་ཟེར་སེམས་ཅན་ལ་བུ་བཞིན་དུ་སྙོམས་པར་འཇུག་པར་མཛད་པ་གང་ཞིག་གཟུགས་ཀྱི་སྐུ་རྣམ་པ་ཐམས་ཅད་པའི་བདག་ཉིད་ཅན་དུ་དེང་འདིར་གཤེགས་ནས་བདག་ཅག་ལ་སོགས་པ་ཐམས་ཅད་ལ་དགོངས་ཤིང་བཞུགས་སུ་གསོལ། ཞེས་སོ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེར་རོལ་པ་ཡི། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །ཞེས་པ་ནི། ཡོད་མེད་རྟག་ཆད་ཀྱི་དོན་ལ་བརྗོད་དུ་མེད་པའི་ངོ་བོ་ཉིད་ཀྱི་ཤེས་རབ་ཀུན་ནས་མི་གཡོ་མི་འགྱུར་བ་ཆོས་ཀྱི་སྐུ་རྣམ་པ་ཐམས་ཅད་པ་གང་ཞིག །སྡུག་བསྔལ་བ་དང༌། ཀུན་འབྱུང་བ་ལ་སོགས་ཏེ་ཟག་པ་ཐམས་ཅད་དང་བྲལ་བའི་བདེ་བ་ཆེན་པོའི་རང་བཞིན་ལ་ངེས་པ་ལྔ་ལྡན་དུ་ལོངས་སྤྱོད་ཅིང་ཡོན་ཏན་ཐམས་ཅད་རྫོགས་པའི་སྐུ་དེ་བཞིན་གཤེགས་པ་རིགས་ལྔའི་བདག་ཉིད་ནི་གཙོ་བོ་སྟེ། གང་གི་ཐུགས་རྗེ་ཆེན་པོ་དང་ཐབས་ལ་མཁས་པས་གདན་གསུམ་ཚང་བའི་དཀྱིལ་འཁོར་གྱི་རྣམ་པ་རྒྱ་ཆེར་རོལ་པའི་སྐུར་སྟོན་པ་ནི་ཞི་བ་བཞི་བཅུ་རྩ་གཉིས་དང༌། ཁྲོ་བོ་ལྔ་བཅུ་རྩ་བརྒྱད་དེ་སྤྲུལ་པའི་སྐུ་དཀྱིལ་འཁོར་གྱི་བདག་ཉིད་ཅན་རྣམས་ལ་ཕྱག་འཚལ་ལོ་ཞེས་པའི་དོན་ཏོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱི། །
མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཅེས་པ་ནི། བླ་ན་ཡོད་པ་དངོས་སུ་འབྱོར་པ་དང༌། བླ་ན་མེད་པ་ཡིད་ཀྱིས་རྣམ་པ་སྤྲུལ་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་རྣམ་པ་ཐམས་ཅད་པས་བླ་ན་མེད་པར་སྤྲུལ་པའི་མཆོད་སྤྲིན་གྱིས་རྣམ་ཐར་གསུམ་དང་ལྡན་པའི་ཀུན་ཏུ་བཟང་མོའི་མཁའ་དབྱིངས་ཆོས་ཉིད་ཀྱི་ནམ་མཁའ་རྣམ་པར་དག་པའི་ཁྱོན་ཐམས་ཅད་རྒྱ་ཆེར་ཡོངས་སུ་བཀོད་དེ། དབང་པོས་ཡུལ་ལ་སྤྱོད་པ་ཕྱིའི་མཆོད་པ་དང༌། དབང་ཤེས་ཀྱིས་བདེ་སྟོང་དུ་སྤྱོད་པ་ནང་གི་མཆོད་པ་དང༌། དེ་དག་གི་ངོ་བོ་མཆོད་བྱ་མཆོད་བྱེད་ལས་འདས་པར་རྟོགས་པ་དེ་ཁོ་ན་ཉིད་གསང་བའི་མཆོད་པ་དེ་དག་ཐམས་ཅད་ཀྱང་རྣམ་པ་རྒྱ་ཆེ་ལ་དོན་དབྱིངས་ཟབ་པའི་ཆ་ནས་རྒྱ་མཚོས་མཆོད་ཅེས་སྨོས་པའོ། །ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་མ་ལུས་རབ་འབྱམས་ཀུན། །འདུ་འབྲལ་མེད་པའི་ངང་དུ་རོ་གཅིག་པས། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །ཅེས་པ་ནི། མཆོད་པའི་ཕྱག་རྒྱ་ཆེན་པོ་སྟེ། དེ་ལ་ཀུན་རྫོབ་དང་དོན་དམ་གཉིས་ལས། དང་པོ་ནི། རྣམ་བཅས་ལྷ་མོ་ལ་བརྟེན་ནས་ཀུན་ཏུའམ་དུས་གསུམ་གྱི་རྟོག་པ་འགགས་པར་བྱེད་པས་ན་བཟང་མོ་སྟེ། དེ་ཉན་ཐོས་ཀྱི་ཐེག་པ་ཅན་ལ་སོགས་པ་སྐལ་མེད་ལ་གསང་བའི་དོན། རྣམ་ཐར་སུམ་ལྡན་གྱི་བདག་ཉིད་ཅན་དུ་མཚོན་པའི་བྷ་གའི་དབྱིངས་ག་ལ་བར་རྒྱལ་བའི་དཀྱིལ་འཁོར་མ་ལུས་ཤིང་ལུས་པ་མེད་པ་རབ་ཏུ་
འབྱམས་ཀླས་པ་ཀུན་གདན་གསུམ་འདུ་འབྲལ་མེད་པའི་ངང་དུ་རོ་གཅིག་པས་བཞུགས་པ་ལ། ཞུ་བ་དེས་དྲངས་པའི་ཡབ་ཡུམ་གཉིས་སུ་མེད་པའི་བྱང་ཆུབ་སེམས་ཀྱི་དམ་པས་མཉེས་པར་གྱུར་ཅིག་སྟེ་ལྷན་སྐྱེས་ཀྱི་བདེ་ཆེན་དང་མཇལ་བའི་དོན་ཏོ། །གཉིས་པ་ལྟར་ན། དུས་གསུམ་ཀུན་ཏུ་རྟོག་པ་དང་བྲལ་བས་ན་བཟང་མོ་སྟེ། དེ་ཉིད་སོ་སོ་སྐྱེ་བོ་རྣམས་ལ་རང་བཞིན་གྱིས་གབ་པས་ན་གབ་པའི་གསང་བ་དང༌། དབང་བསྐུར་མ་ཐོབ་པ་དང༌། སྐལ་མེད་ལ་སྦ་བའི་ཕྱིར་ན་སྦས་ཏེ་གསང་བའི་དོན་སྟོང་པ་ཉིད་དང༌། མཚན་མ་མེད་པ། སྨོན་པ་མེད་པའི་དབྱིངས་རྡོ་རྗེ་བཙུན་མོའི་བྷ་ག་ལ་རྒྱལ་བའི་དཀྱིལ་འཁོར་མ་ལུས་ཤིང་རབ་ཏུ་འབྱམས་ཀླས་པ་ཀུན་ཆོས་ཉིད་བརྗོད་པ་དང་བྲལ་བའི་ཀློང་ཆེན་པོར་དུས་གསུམ་འདུ་འབྲལ་མེད་པའི་ངང་དུ་ཆོས་མཉམ་པར་རོ་གཅིག་པས་ན། གཉིས་སུ་མེད་པ་དོན་དམ་པའི་བྱང་ཆུབ་སེམས་ཀྱི་རྟོགས་པ་ཁྱད་པར་ཅན་གྱིས་མཉེས་པར་གྱུར་ཅིག་ཅེས་པའོ། །སེམས་ཀྱི་རང་བཞིན་ཆོས་ཉིད་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང༌། །རྣལ་འབྱོར་ཉིད་དབྱིངས་སྨྲ་བསམ་བརྗོད་ལས་འདས། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཅེས་པ་ནི། བསྟོད་པའི་ཕྱག་རྒྱ་ཆེན་པོ་སྟེ། སེམས་ཀྱི་རང་བཞིན་ནམ་མཚན་ཉིད་ནི་མཚོན་བྱེད་དཔེའི་ནམ་མཁའ་སྟོང་ལ་གོ་འབྱེད་པ་ཙམ་མ་ཡིན་པར། མཚོན་བྱ་ཆོས་ཉིད་ཀྱི་
ནམ་མཁའ་ཆེན་པོ། ཀུན་རྫོབ་དང་མཚན་མའི་ཆོས་ཅན་རྣམས་རྣམ་པར་དག་པའི་ཆོས་ཉིད་ཡེ་ནས་རང་བཞིན་གྱི་འོད་གསལ་ཞིང་ཞི་བ་ཆེན་པོའི་བདག་ཉིད་ཅན་དེ་ཁོ་ན་ཉིད་ལ་རྣལ་དུ་འབྱོར་པའི་སྟོང་པ་ཉིད་ཀྱི་དབྱིངས་ཚིག་ཏུ་སྨྲ་བ་དང༌། བློས་བསམ་པ་དང༌། རྗོད་བྱེད་ཀྱིས་མཚོན་པའི་ཡུལ་ལས་འདས་པ་སྟེ། འཁོར་འདས་རོ་མཉམ་གྱི་ཆོས་ཉིད་དོན་དམ་པའི་བྱང་ཆུབ་ཀྱི་སེམས་ལ་དྲན་པ་ཉེ་བར་གཞག་པས་རྟག་ཏུ་འདུད་ཅེས་པའི་དོན་ཏོ། །ཀུན་བཟང་རྫོགས་ཆེན་ཡེ་ནས་གདལ་བ་ལ། །ཕྱི་ནང་གསང་བའི་དཀྱིལ་འཁོར་བཀོད་པ་ནི། །ཞེས་པ་ནི། དུས་གསུམ་གྱི་རྟོག་པ་དང་བྲལ་བ་དུས་མེད་ཀུན་ཏུ་བཟང་པོ། རང་བཞིན་རྫོགས་པ་ཆེན་པོ་ཡེ་ནས་ཀུན་ཁྱབ་ཏུ་གདལ་བ་ལ། ཕྱི་བུམ་དབང་གི་དམ་ཚིག་དང་འབྲེལ་བའི་བསྐྱེད་རིམ། །ནང་གསང་དབང་དང་གསུམ་པའི་དམ་ཚིག་དང་འབྲེལ་བ་རྫོགས་རིམ། གསང་བ་བཞི་པ་ཚིག་དབང་དང་འབྲེལ་བ་ལྷན་ཅིག་སྐྱེས་པའི་ཡེ་ཤེས་ཏེ། དཀྱིལ་འཁོར་གསུམ་གྱི་བདག་ཉིད་ཅན་སྟོན་པའི་བཀོད་པ་ནི། སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །ཞེས་པས་ཕྱིའི་དཀྱིལ་འཁོར་བསྟན་ཏེ། དེ་ཡང་རྒྱལ་བའི་ཁམས་ལ་སྣང་སྲིད་སྣོད་བཅུད་དུ་འཛིན་པའི་རྟོག་པ་རང་ཚན་པ་མེད་ཅིང༌། མ་དག་པ་དང་ཅུང་ཟད་དག་པ་ལ་སོགས་
པའི་ཆ་ལས་འདས་པ་དག་པ་རབ་འབྱམས་ཆེན་པོའི་ཆོས་ཉིད་དུ་རྣམ་པར་དག་པས་ཞིང་ཁམས་རྒྱ་མཚོ་ལྷ་དང་ལྷ་་མོའི་དཀྱིལ་འཁོར་དུ་ཡེ་ནས་སངས་རྒྱས་པའི་དབྱིངས། ཕུང་པོ་ལྔ་དང༌། འབྱུང་བ་ལྔ་ནི་གཤེགས་པ་གཤེགས་མ་དབང་པོ་དང་དབང་ཤེས། ཡུལ་དུས་སྐྱེ་མཆེད་རྣམས་ནི་རྒྱལ་སྲས་སངས་རྒྱས་འཕགས་པའི་རྣམ་པ་ཅན་དུ་གདོད་ནས་དག་པ་ལས་གནས་འགྱུར་གྱི་ཚུལ་དུ་མ་ཡིན་པས་ན་བྱུང་བ་དང༌། འཁོར་བའི་ཁམས་ཀྱང་བདེ་གཤེགས་སྙིང་པོའི་རང་བཞིན་ཅན་ཡིན་པས་གདོད་ཀྱི་གདན་གསུམ་ཚང་བའི་དཀྱིལ་འཁོར་དུ་གནས་འགྱུར་གྱི་ཚུལ་དུ་འཚང་རྒྱ་བའི་ཕྱིར་ན་འབྱུང་འགྱུར་ཏེ། དེ་ཐམས་ཅད་ཀྱང་སྣང་སྟོང་ཐབས་ཤེས་ཟུང་དུ་འཇུག་པས་ཡབ་ཡུམ་གྱི་ཚུལ་ཏུ་ལྷུན་གྱིས་རྫོགས་པ་རྣམས་སོ། །གསང་ཆེན་རབ་དགྱེས་གཟུངས་ཆེན་བདག་ཉིད་མའི། །མཁའ་དབྱིངས་ཀློང་ཡངས་པདྨོར་འཁྱིལ་བ་ལ། །གཉིས་མེད་ཐིག་ལེ་ཆེན་པོར་འོད་གསལ་ཞིང༌། །ཞེས་པས་ནང་གི་དཀྱིལ་འཁོར་བསྟན་ཏེ། གསང་བ་ཆེན་པོ་མཆོག་ཏུ་མི་འགྱུར་བའི་བདེ་ཆེན་ལ་རབ་ཏུ་དགྱེས་ཤིང་དགའ་བ་བཞིའི་ཡེ་ཤེས་དམ་པའི་གཟུངས་ཅན་ཀུན་ཏུ་བཟང་མོའི་བདག་ཉིད་མའི། རྡོ་རྗེ་བཙུན་མོའི་མཁའ་ནམ་མཁའི་དབྱིངས་ལྟར་ཀློང་ཡངས་ཤིང༌། པདྨ་ལྟར་འཁོར་བའི་འདམ་རྫབ་ཀྱིས་མ་གོས་པར་རྣམ་ཐར་སུམ་ལྡན་གྱི་རང་བཞིན་ཉིད་དུ་འཁྱིལ་བ་ལ། དེ་
བཞིན་གཤེགས་པ་རྣམས་ཀྱང་བདེ་སྟོང་གཉིས་སུ་མེད་པའི་ཡེ་ཤེས་ཀྱི་ཐིག་ལེ་ཆེན་པོར་ཐར་པ་བརྟེན་པར་མཛད་ཅིང་ཆོས་ཉིད་བསམ་གྱིས་མི་ཁྱབ་པའི་ངང་དུ་འོད་གསལ་ཞིང་ཞི་བ་ནི་ནང་གི་དཀྱིལ་འཁོར་རོ། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །ཞེས་པས་གསང་བའི་དཀྱིལ་འཁོར་བསྟན་ཏེ། དེ་ཁོ་ན་ཉིད་ཀྱི་དོན་རྟོག་གེའི་བློས་མ་བཅོས་ཤིང༌། རྟག་ཆད་ཀྱི་སྤྲོས་པ་དང་སྐྱེ་འགག་གཉིས་སུ་མེད་པ་ནི་བྱང་ཆུབ་སྙིང་པོའི་སྐུ་སྟེ། ནམ་མཁའ་སྟོངས་པ་ལས་ཆོ་འཕྲུལ་སྣ་ཚོགས་སུ་ཤར་བ་ལྟར། ཆོས་ཉིད་དེའི་རང་བཞིན་ཅིར་ཡང་སྣང་ཞིང་ཀུན་ཏུ་འགྲོ་བ་ཅན་ཡིན་ཡང༌། ངོ་བོའི་ཆ་ནས་མཆོག་ཏུ་མི་འགྱུར་བ་བདེ་བ་ཆེན་པོའི་བདག་ཉིད་རྣམ་པ་ཐམས་ཅད་པའི་མཆོག་ལྡན་ལ་གཡུང་དྲུང་གི་ལྷའི་སྒྲས་གཞོམ་གཞིག་འཕོ་འགྱུར་དང་བྲལ་བ་ནི་གསང་བ་དེ་བཞིན་ཉིད་ཀྱི་དཀྱིལ་འཁོར་རོ། །འདི་ནས་མར་ཚིག་དོན་གོ་སླ་བས་གཞུང་འགྲེལ་སྟབས་གཅིག་ཏུ་བཤད་པར་བྱ་སྟེ། དེ་ལྟར་དཀྱིལ་འཁོར་གྱི་ཐ་སྙད་གསུམ་དུ་བཞག་པའང་ངོ་བོ་ཉིད་ཀྱི་ཀློང་ན་འདུ་འབྲལ་མེད་ཅིང་ཆོས་མཉམ་པ་ཉིད་ཀྱང་བསོད་ནམས་དམན་པ་རྣམས་ལ་གབ་པ་ལྟར་བཞུགས་པས་གསང་བའི་དཀྱིལ་འཁོར་ནི་ཞེས་སྨོས་པ་སྟེ། སྤྲུལ་གཞི་བདག་ཉིད་ཆེན་པོ་ཀུན་བཟང་ཡབ་ཡུམ་དང༌། མཛད་པ་ཡོངས་སུ་རྫོགས་པའི་རིགས་ལྔ་ཡབ་ཡུམ་དང༌། བྱང་ཆུབ་ལྕམ་དྲལ་ཏེ་རང་དོན་གྱི་མཛད་པ་བརྟུལ་ནས་གཞན་དོན་གྱི་མཛད་
པ་ལ་ཞུགས་པའི་བྱང་ཆུབ་སེམས་དཔའ་ཡབ་ཡུམ་བརྒྱད་ཚན་གཉིས་དང༌། དེ་བཞིན་དུ་ཁྲོ་བོ་དང་ཁྲོ་མོ་ཡབ་ཡུམ་བཅུའི་ཚོགས། རྡོ་རྗེ་ལྷ་མོ་སྟེ་རིགས་མ་བཅུ་དྲུག་དང༌། ཚོགས་རྗེ་ཚོགས་ཀྱི་བདག་པོ་སྟེ་རིགས་ལྔ་དང་ལྡན་པའི་སྤྱི་དཔལ་ཆེན་པོ་དང༌། མི་དགེ་བཅུ་གནས་དག་པའི་ཁྲོ་རྒྱལ་ཡབ་ཡུམ་བཅུ། ཕྱི་ལྟར་དུ་གནས་སུམ་ཅུ་རྩ་གཉིས་དང༌། ཡུལ་ཉེར་བཞིའི་དཔའ་བོ་རྣམས་ལ་རང་རང་གི་རིགས་ཀྱི་ཡུམ། རྣལ་འབྱོར་མ་མིང་ཅན་རེ་ཡོད་པ་རྣམས་ནི་ལས་ཀྱི་ཕྱག་རྒྱའི་བདག་ཉིད་ཅན་དང༌། དེ་ཡང་ནང་ལྟར་དུ་སྤྱི་བོ་ཛ་ལནྡྷ་ར་སོགས་རྡོ་རྗེ་ལུས་ཀྱི་གྲོང་ཁྱེར་ཆེན་པོའི་རྩ་ཡོངས་སུ་གྱུར་པ་ལས་དཔའ་བོ་དང༌། ཁམས་ཡོངས་སུ་གྱུར་པ་ལས་རྣལ་འབྱོར་མ་སྟེ། སྣང་སྟོང་ཐབས་ཤེས་ཟུང་དུ་འབྲེལ་བའི་སྟོང་གཟུགས་ནི་ལྟར་སྣང་ཕྱག་རྒྱ་ཆེན་པོ་དང༌། གསང་བ་ལྟར་ན་དེ་དག་ཀྱང་ཧེ་རུ་ཀའི་གནས་བཅུར་བསྡུས་ནས་ས་བཅུའི་ངོ་བོ་ཉིད་དུ་མཚོན་པ་ནི་ཆོས་ཀྱི་ཕྱག་རྒྱ་དང༌། དཀྱིལ་འཁོར་ཡོངས་རྫོགས་ཀྱི་ཐུགས་རྗེ་ཡུལ་ལ་འཇུག་པའི་སྒོ་ན་ཚད་མེད་བཞི་དང༌། དེའི་བདག་ཉིད་ཕྲིན་ལས་རྣམ་པ་བཞི་ཡིན་པས་ན་དམ་ཚིག་གི་ཕྱག་རྒྱ་ཅན་སྒོ་མ་བཞི། གཞན་ཡང་ཡེ་ཤེས་ལས་སྤྲུལ་པའི་ལྷ་ཚོགས་མང་པོ་ཀུན་ཀྱང་དམ་ཚིག་ཅན་དང་དམ་ཚིག་གི་རྗེས་སུ་ཞུགས་པ་རྣམས་ལ་མ་ལྟར་བྱམས་ཤིང་སྲིང་ལྟར་དུང་བ་ལ་སོགས། ལེགས་ཉེས་བདེན་ཤན་གྱི་སྟངས་འཛིན་ཅིང་དམ་ཚིག་གི་རྗེས་གཅོད་པའི་ཕྱི་
གནས་ཡུལ་ཁྱད་པར་ཅན་ལ་ཡུལ་དང་ཡུལ་ཅན་གཉིས་མེད་དུ་སྤྱོད་ཅིང༌། ནང་རྡོ་རྗེ་ལུས་ཀྱི་རྩ་གནས་སོ་སོའི་ཁམས་དང་རོ་གཅིག་ཏུ་འདུ་བའི་དཔའ་བོ་དང་མཁའ་འགྲོ་རྣལ་འབྱོར་མའི་ཚོགས་ལ་སོགས། མདོར་ན་ཀུན་ཏུ་ཐོགས་མེད་ཀྱི་སྤྱན་དང་ལྡན་པས་དབང་གྱུར་ཚད་མ་རྡོ་རྗེའི་དམ་ཚིག་ཅན་རྣམས་ཀྱི་ཐུགས་རྗེའི་ཡུལ་ལ་འཇུག་པའི་ཕྱིར་དགོངས་སུ་གསོལ་ཞེས་སྨོས་ནས། སངས་རྒྱས་རྣམས་ཀྱི་ཐུགས་རྗེའི་ཕྲིན་ལས་རྒྱུན་མི་འཆད་པའི་གདུང་འཚོབ་ཅིང༌། མེ་ཏོག་གང་ལ་འཕོག་པའི་ལྷ་སོ་སོའི་རིགས་ཀྱི་བདག་ཉིད་འཛིན་པ་བདག་ཅག་གིས། འགྲོ་བ་ཀུན་ལ་ཕན་པའི་དོན་དུ་ཀུན་རྫོབ་སྨོན་འཇུག་གཉིས་དང༌། སྔགས་ཀྱི་དོན་དམ་པའི་རྡོ་རྗེའི་རྣལ་འབྱོར་བྱང་ཆུབ་ཏུ་སེམས་བསྐྱེད་དེ། བསྟན་པ་ལ་རིམ་གྱིས་ཞུགས་ཀྱང་ཐོབ་བྱའི་འབྲས་བུ་བླ་ན་མེད་པའི་བྱང་ཆུབ་ཆེན་པོའི་གོ་འཕང་བགྲོད་པར་བྱ་བའི་ཕྱིར་བསྟན་པ་རྒྱ་མཚོ་སྟེ། ཀུན་འབྱུང་འདྲེན་པའི་ཐེག་པ་སྡེ་སྣོད་གསུམ་ལས། འཁོར་ལོ་དང་པོའི་དགོངས་པ་སོ་སོ་ཐར་པའི་ཚུལ་ཁྲིམས་ཀྱི་སློབ་པ་ལ་བརྟེན་ནས་རང་རྒྱུད་ཀྱི་ཉེས་སྤྱོད་སྡོམ་ཞིང་བདེན་པ་བཞིའི་ལམ་ལ་བསྙེན་པ་དང༌། འཁོར་ལོ་བར་མཐའི་དགོངས་པ་དེའི་སྟེང་དུ་དགེ་བ་ཆོས་སྡུད་དང༌། སེམས་ཅན་དོན་བྱེད་ཀྱི་ཚུལ་ཁྲིམས་བསྣན་ནས་སྨོན་འཇུག་གི་བྱང་སེམས་དང༌། ལྷག་པ་ཏིང་ངེ་འཛིན་དང་ཤེས་རབ་ཀྱི་བསླབ་པའི་གནས་ལ་སློབ་པ་སྟེ་སློབ་པ་གསུམ།
དེ་བཞིན་དུ་དཀའ་ཐུབ་རིགས་བྱེད་ཀྱི་ཐེག་པ། བྱ་རྒྱུད་སྤྱོད་རྒྱུད་རྣལ་འབྱོར་ཏེ་གསང་སྔགས་ཕྱི་པ་གསུམ་གྱིས་ཁྲུས་དང་གཙང་སྦྲ་ལ་སོགས་ཏེ་རང་རང་གི་དམ་ཚིག་དང་སྡོམ་པའི་གནས། ཁྱད་པར་དབང་སྒྱུར་ཐབས་ཀྱི་ཐེག་པ། རྣལ་འབྱོར་བླ་མེད་ཕྱི་བསྐྱེད་པ་མ་ཧཱ་ཡོ་ག །ནང་ལུང་ཨ་ནུ་ཡོ་ག །གསང་བ་རྫོགས་ཆེན་ཨ་ཏི་ཡོ་ག་གསུམ་གྱིས་བསྐྱེད་རྫོགས་རྫོགས་ཆེན་གྱི་དོན་ལ་འཇུག་ཅིང༌། དེ་ཀུན་ཀྱང་ཉན་ཐོས་ཀྱིས་སྤོང༌། བྱང་སེམས་ཀྱིས་བསྒྱུར། སྔགས་ཀྱིས་ལམ་དུ་སློང་བ་གསུམ་གྱིས་ཉོན་མོངས་པའི་ཚོགས་འདུལ་བས་ན་འདུལ་ཁྲིམས་དང༌། དེ་ཐམས་ཅད་ཀྱང་མཐར་ཐུག་རྡོ་རྗེ་ཐེག་པ་ཐུན་མོང་མ་ཡིན་པའི་སྡོམ་པའི་རང་བཞིན་དངོས་པོ་གནས་འགྱུར། ཡོན་ཏན་ཡར་འཕེལ། དགག་དགོས་ཡོངས་རྫོགས་ཀྱང༌། སྐུ་ཕྱག་རྒྱ་ཆེན་པོ། གསུང་བརྗོད་མེད་ནཱ་ད། ཐུགས་ཟབ་ཞི་སྤྲོས་བྲལ་གྱི་ངང་དུ་མཉམ་པར་སྦྱོར་བས་ན་སྡོམ་པའི་མཆོག་སྟེ། གསང་བ་སྔགས་ཀྱི་ལས་ཐམས་ཅད་ནི་གཞོམ་གཞིག་དང་བྲལ་ཞིང་ཁྱད་ཆོས་བདུན་ལྡན་ཡིན་པས་རྡོ་རྗེ་དང༌། དེའི་རང་བཞིན་ནི་སྡོམ་པ་ལྟར་བྱ་བ་དང་མི་བྱ་བའི་ངེས་པ་ཅན་མ་ཡིན་པར་ནམ་དུའང་དེ་ལས་འདའ་བར་དཀའ་བའི་ཕྱིར་ན་དམ་ཚིག་སྟེ། དུས་གཏན་གྱི་དོན་དུ་གཉེར་བྱ་ཡིན་ལ། དེ་ཡང་ལེའུ་ལྔ་པ་དང་དྲུག་པས་གསལ་བར་བསྟན་པའི་དམ་ཚིག་ཉི་ཤུ་རྩ་ལྔ་ལ་སོགས་མདོར་བསྡུ་ན་
རིགས་ལྔ་དང་རྩ་ལྷུང་བཅུ་བཞིས་མཚོན་སྤྱི་དང་ཁྱད་པར་ལྷག་པའི་དམ་ཚིག་ཅེས་འགག་བསྡམས་པ་རྣམས། དུས་སྔ་མའི་ཚེའམ་ཕྱི་ཕྱིར་ནོས་ཤིང་གཉེར་དུ་སྨྲས་སོ་འཚལ་རྣམས་ལོ་ཟླ་ཞག་དུས་ཀྱི་ངེས་པས་ཉམས་པ་དང༌། འགལ་བ་དང༌། རལ་པ་ལ་སོགས་པའི་ཡུན་དུ་མི་གཏོང་ཞིང་གསོར་མི་རུང་བའི་གནས་སུ་འདའ་བར་མི་བགྱིད་པའི་དམ་བཅས་པ་ལ། བདུད་ཀྱིས་ཕྱོགས་བསླད་པའི་དབང་དུ་སོང་ནས་དོན་ལས་གོལ་ཞིང་གཏན་ནས་ལྡོག་པའི་སེམས་མ་མཆིས་ཀྱང༌། གདོད་བྱ་སྟེ་སླན་ཆད་ལ་བཤོལ་ཞིང་ལོང་ཡོད་སྙམ་པའི་ལེ་ལོའི་དབང་དུ་གྱུར་ནས། ཀློང་དུ་མ་གྱུར་པ་དང༌། རྩལ་ཤུགས་དང་ནུས་པ་ཆུང་བ་དང༌། ཤེས་བཞིན་གྱི་དྲན་པ་མི་ལྡན་པ་དང༌། ཆང་དང་གཉིད་ལ་སོགས་པའི་བག་མེད་པའི་དབང་དུ་གྱུར་ཏེ། བྱང་ཆུབ་ཀྱི་སེམས་དང་བསྐྱེད་རྫོགས་སྒོམ་པ་ལ་མི་བརྩོན་ཞིང༌། བསྙེན་པའི་དམ་ཚིག་རལ་བ་དང༌། སྒྲུབ་པ་གཡེལ་བ་ལ་སོགས་ཏེ། ཚོར་བ་དང་ཞེས་པས་ཉོན་མོངས་པའི་གཞན་དབང་དུ་གྱུར་པ་དང༌། མ་ཚོར་བ་སྟེ་མ་རིག་པའི་གཞན་དབང་གིས་ན། སྟོན་པའི་བཀའ་བདེ་གཤེགས་བཀའ་འདས་ཀྱི་རྩ་ལྟུང་དང༌། རྡོ་རྗེ་སློབ་དཔོན་གྱིས་བསྒྲགས་པའི་དམ་ཚིག་ལས་འགལ་བར་གྱུར་པ་སྟེ། འདི་ལྟར་རྣལ་འབྱོར་སྒོམ་པ་གང་ཞིག་རྡོ་རྗེའི་བླ་མ་ལ་བརྙས་པ་ལ་སོགས་རྩ་བའི་ལྟུང་བ་རྣམས་ལ་ཀུན་དཀྲིས་ཚང་བའི་ཕམ་པར་གྱུར་ནས་དམ་
ཚིག་ཉམས་པ་དག་དང་སྐད་ཅིག་ཙམ་དུ་ཡང་ཕྲད་པར་མི་བྱ་ལ། ལུང་པ་གཅིག་གི་ཆུ་ལའང་མི་བཏུང་ངོ་ཞེས་རྒྱལ་བའི་བཀའ་ཚད་མ་ལས་བྱུང་ཞིང་དེ་ལྟར་གྱི་ཉེས་དམིགས་རྣམས་མ་རྟོགས་ཏེ། དམ་ཚིག་མེད་པ་དག་གི་མདུན་དུ་སྤྱིར་གསང་བཞི་དང༌། བར་གསང་བཞི་ལ་སོགས་གསང་བར་འོས་པ་དང༌། ཁྱད་པར་གཉེར་དུ་གཏད་པའི་གསང་སྒོ་འཆོལ་པར་གྱུར་པས་དབྱེ་བསལ་དཀའ་བ་སྟེ། དམ་ཚིག་རྒྱ་མཚོའི་གཞུང་བཤིག་པ་དང༌། སྤྱན་དང་མངོན་ཤེས་སོ་སོ་རིག་པ་རྣམས་མེད་པས་དངོས་སམ་བརྒྱུད་ནས་སྐྱོན་ཅན་དུ་གྱུར་པའི་ཚུལ་རྣམས་མ་རྟོགས་ཏེ་དམ་ཚིག་ཉམས་པ་དག་དང་ཚོགས་ཀྱི་འཁོར་ལོ་འདྲེས་ཤིང༌། ཉམས་པ་གང་ཞིག་ལས་ལྡོག་སེམས་ཀྱི་བློ་མེད་པ་རྣམས་བསྐང་བ་དང༌། སྔོན་ཆད་བླ་མར་གྱུར་པའི་གནས་དག་ལ་དམ་ཚིག་ཉམས་བཞིན་པ་སོར་མ་ཆུད་པ་དང༌། རྒྱུད་སྡེ་རྣམས་ནས་སྣོད་མིན་དུ་བཤད་པ་རྣམས་ལ་གསང་སྔགས་ཟབ་མོའི་ཆོས་བཤད་པ་དང༌། མདོར་ན་ཉམས་པ་ལ་མི་འཛེམ་ཞིང་ཉམས་པའི་སྐྱོན་དང་འགྲོགས་བཞིན་པ་ལ་སོགས། དམ་ཚིག་ཉམས་པའི་གང་ཟག་དང་འགྲོགས་ཤིང་ཉམས་པ་དེ་དག་གི་སྐྱོན་ནམ། གྲིབ་མ་ལྔའི་ནང་ན་ཐུ་བ་ཉམས་སྒྲིབ་ཀྱི་སྐྱོན་ཆེན་པོས་གོས་པར་གྱུར་ཏོ་འཚལ་ལ་བརྟེན་ཚེ་འདིའི་བདེ་ལེགས་དང༌། ཡོན་ཏན་འགྲིབ་ཅིང་འཚོ་བ་ཐུང་ལ། ནད་མང་པ་
ལ་སོགས་པའི་སྐྱོན་དང་ཡུན་གྱི་སྒྲིབ་པ། གྲུབ་པ་ཆེན་པོ་བརྒྱད་དང༌། མཆོག་གི་དངོས་གྲུབ་དམ་པའི་གེགས་སུ་འགྱུར་བ་རྣམས་རབ་ཏུ་ནོངས་ཤིང་འགྱོད་པ་དྲག་པོའི་སེམས་ཀྱིས་མཐོལ་ཞིང་བཤགས་པར་བགྱིད་ན། ཐུགས་བྱམས་པ་ཆེན་པོ་དང་ལྡན་པའི་ངང་ལ་བསྙེན་བསྲིང་མི་མངའ་བའི་ཐུགས་རྗེས་བདག་ཅག་ལ་དགོངས་པར་གྱུར་ནས་ཀྱང༌། འདི་ལྟར་རང་བཞིན་རྫོགས་པ་ཆེན་པོའི་དམ་ཚིག་ལ་སྲུང་ཉམས་གཉིས་སུ་མེད་པས་ན་མེད་པ་དང༌། དེའང་དབྱིངས་ལས་གཞན་དུ་མི་འཕོ་ཞིང་མི་འགྱུར་བ་གཅིག་པུའི་དམ་ཚིག་ལ་བདག་ཅག་ཀྱང་བཀོད་དེ། དེའི་ཆོས་ཉིད་ཅིར་ཡང་མི་དམིགས་པ་ནི་ཕྱལ་བའི་དམ་ཚིག་གི་ངོ་བོ་ཉིད་དང༌། ཕྱོགས་དང་རིས་ཆད་མེད་པས་བཏང་སྙོམས་སམ། ཡེ་བསྲུངས་ལྷུན་གྲུབ་ཆེན་པོའི་ངང་དུ་དུས་གསུམ་སངས་རྒྱས་རྣམས་ཀྱང་རྟག་པ་རྒྱུན་གྱི་འཁོར་ལོ་མི་གཡོ་བ་བཞིན་དུ་བདག་ཅག་ལ་སོགས་པ་བདེ་གཤེགས་སྙིང་པོའི་ཆོས་ཉིད་ཅན་རྣམས་འདྲེས་ཤིང་བཞུགས་པར་གྱུར་ནས་ཀྱང༌། བདེན་པ་གཉིས་མེད་ཆེན་པོའི་དོན་གྱི་ཚངས་པ་སྒྲིབ་བྲལ་ནི་སངས་རྒྱས་ཆོས་ཀྱི་སྐུ་ཡིན་པས་དེའི་རང་བཞིན་བདག་ལ་སྩལ་དུ་གསོལ། ཞེས་སོ། །དེ་ལྟར་ལམ་བདེན་འདུས་བྱས་པ་རྣམས་ལ་དམ་ཚིག་གི་རྣམ་པར་བཞག་པའང་དོན་དམ་པར་སྨྲ་བསམ་བརྗོད་མེད་སྤྲོས་པ་ཐམས་ཅད་ལས་འདས་པ་གང་ཞིག་ལ། ཀུན་ཏུ་བརྟགས་པའི་བློ་ཅན་གྱི་རྣམ་པར་རྟོག་པའི་ཆོས་གང་ཡང་དམིགས་པར་མ་གྱུར་པའི་ཕྱིར་ན་
ཉམས་དང་བཤགས་པར་བྱ་བ་གཉིས་སུ་མེད་ཀྱང༌། ཀུན་རྫོབ་ཏུ་རྨི་ལམ་དང༌། སྒྱུ་མ་མཁན་གྱིས་སྤྲུལ་པ་བྱས་པ་ལྟ་བུའི་དབང་གིས་ན། ནོངས་པར་མཆིས་ན་རབ་ཏུ་གནོང་ཞིང་འགྱོད་པ་བགྱིད་པས་བཟོད་པར་གསོལ། ཞེས་སོ། །འདི་ལ་སྔོན་ཆད་གཉན་འགྲེལ་འགྲེལ་པ་མ་མཐོང་ཡང༌། །བརྗོད་དོན་དབྱིངས་ཆེ་དོན་ཟབ་ཚིག་བརླིང་བས། །མཐའ་ཡས་ཐེག་པའི་སྒོ་ཡིན་དེ་ཡི་ཕྱིར། །ཚིག་དོན་འགལ་བ་མཐོང་ལའང་དཔྱད་པ་བྱས། །དེང་སང་འདི་ན་སྔགས་ཀྱི་བསྟན་པ་ནི། །གཟུགས་བརྙན་ཙམ་དུ་བས་འདིའི་རྙོག་པའི་ཆ། བགྲུངས་ཕྱིར་རྒྱལ་བའི་དགོངས་པ་ལས་བརྒྱུད་པ། །ཇི་བཞིན་དུས་མཐའི་སྔགས་པ་རྣམས་ལ་སྤྲིང༌། །དགེ་བ་དེ་ཡིས་ཏནྟྲ་རྣམ་གསུམ་གྱི། །རྣམ་པར་རིག་པ་ཅན་དང་མ་ཡིན་པའི། །ཆོས་ཁམས་སྐྱ་རེངས་གསར་བས་དྲངས་པ་ཡི། །འོད་གསལ་སྣང་བྱེད་ཆེན་པོ་ལ་རེག་ཤོག །ཅེས་པའང་རྭ་ལོའི་བརྒྱུད་འཛིན་ཡང་སྟེངས་པས་ནན་བཏུད་ཆེན་པོའི་ངོར་རྫོགས་ཆེན་པ་རང་བྱུང་རྡོ་རྗེས་ངག་ཐོག་ནས་དཔོད་པའོ། །གཏམ་ཚོགས་ལེའུ་ཉེར་གསུམ་པའོ།། །།
གཏམ་ཚོགས་ལེའུ་ཉེར་བཞི་པ། སྡེ་བརྒྱད་ལ་སྤྲིང་པའི་གཏམ་གནོད་སྦྱིན་གྱི་རྣ་ཆ།
སྡེ་བརྒྱད་ལ་སྤྲིང་པའི་གཏམ་གནོད་སྦྱིན་གྱི་རྣ་ཆ་ཞེས་བྱ་བ། གཞི་མ་འཁྲུལ་བའི་སངས་རྒྱས་རྫོགས་པ་ཆེན་པོའི་བཀའ། །ལམ་མ་ནོར་བའི་དམ་ཆོས་དབུ་མ་ཆེན་པོའི་ལུང༌། །འབྲས་བུ་མ་བཅོས་པའི་རིག་གྲོལ་ཕྱག་རྒྱ་ཆེན་པོའི་གཏམ། །ཡོངས་གྲུབ་རིག་པ་བདེ་གཤེགས་སྙིང༌། །མ་རིག་ལས་
གྱུར་ཀུན་བརྟགས་ཀྱིས། །གཞན་དབང་གདོན་དུ་ཤར་རྣམས་ཉོན། །ལས་ཀྱིས་སྤྲུལ་པའི་འཁོར་བ་ན། །ཕ་མ་མཛའ་བཤེས་བྱམས་སྡང་གི །ལན་ཆགས་འབྲེལ་བས་མ་བསྡུས་མེད། །རང་གི་ལུས་ལ་དཔེ་ལོང་ལ། །གཞན་ལ་གནོད་པའི་བསམ་སྦྱོར་སྤོངས། །ཞི་བ་བྱང་ཆུབ་སེམས་མཆོག་བསྐྱེད། །ཁྱད་པར་རིག་འཛིན་བདག་ཅག་གིས། །སྨོན་འཇུག་སེམས་ཀྱི་སྐྱབས་འོག་ཏུ། །བཅུག་ཅིང་བསྲུངས་པ་འདི་དག་ལ། །མི་ཕྱུགས་ནད་རིམས་སད་སེར་ཐན། །ལོ་ཉེས་མུ་གེ་འཁྲུག་རྩོད་དང༌། །རི་རུད་ཤྭ་ལོག་ཐན་ལྟས་ངན། །སྡེ་བརྒྱད་ཁྲོས་པའི་གནོད་དོ་ཅོག །སྤོངས་ལ་གྲོགས་དན་མགོན་སྐྱབས་ཀྱིས། །བདེན་པའི་ཚིག་ལ་མི་ཉན་ཞིང༌། །དམ་ཚིག་ཕྱག་རྒྱར་འདའ་བྱེད་ན། །ཡུལ་གསུམ་གྱད་དུ་གྱུར་པའི་ལྷ། །འཇིགས་བྱེད་འཇིགས་མཛད་ཧེ་རུ་ཀའི། །སྡང་མིག་ཉི་ཟླར་འབར་བས་བསྲེག །འགུགས་འཆིང་སྡོམ་མྱོས་ཕྱག་རྒྱ་བཞིས། །དྲག་པོ་ཨེ་ཡི་བཙོན་རར་འཛུད། །ལྕགས་སྡིག་ཁྲོ་བོའི་ཚྭ་ཚྭ་དང༌། །རྡོ་རྗེའི་མེ་ཆར་རྩུབ་མོ་ཡིས། །ཚོགས་བརྒྱད་འདུས་པའི་གདོན་གཟུགས་ཀྱི། །མགོ་བོ་བཀས་ཤིང་མིང་གཟུགས་བསྲེགས། །རྣམ་ཤེས་ཆོས་ཀྱི་དབྱིངས་སུ་ཕཊ། །སྲིད་གསུམ་འདི་ན་རང་རྒྱུད་ཅན། །ཀུན་ཀྱང་སྲོག་ལ་མི་གཅེས་མེད། །དེ་ཕྱིར་དྲག་ཤུལ་མངོན་སྤྱོད་ལ། །སྦྱོར་བའི་ཆད་ཐོ་དྲན་པར་གྱིས། །རཀྴ་སྲིན་པོའི་རྒྱལ་ཁབ་ནས། །སྡེ་བརྒྱད་འབྱུང་པོའི་ཚོགས་ལ་སྤྲིངས། །ས་མ་ཡ། ཨི་དན་ན་རཀྐནཿ གཏམ་ཚོགས་ལེའུ་ཉེར་བཞི་པའོ།། །།
གཏམ་ཚོགས་ལེའུ་ཉེར་ལྔ་པ། ཕྱོགས་བཅུའི་གདོན་ཚོགས་ལ་སྤྲིང་པའི་གཏམ་ལྷ་མ་ཡིན་གྱི་གཙུན་ཏོར།
ཕྱོགས་བཅུའི་གདོན་ཚོགས་ལ་སྤྲིང་པའི་གཏམ། ལྷ་མ་ཡིན་གྱི་གཙུན་ཏོར་ཞེས་བྱ་བ། དཔལ་རྟ་མཆོག་རོལ་པ་ལ་ཕྱག་འཚལ་ལོ། །ཀ་དག་ངང་ལས་སྙིང་རྗེ་ཁྲོས་པའི་ཉམས། །ཁ་དོག་དམར་ནག་གར་དགུའི་ཕྱག་རྒྱ་ཆེ། །ག་ལ་བ་དེར་དམིགས་པའི་ལོག་འདྲེན་གཤེད། །ང་རྒྱལ་འཇོམས་བྱེད་རྡོ་རྗེ་སྲིན་པོའི་གཏམ། །ཅ་ཅོ་སྒྲོག་ཀྱང་བལྟར་མི་མངོན་པའི་གཟུགས། །ཆ་བྱད་མི་སྡུག་གནོད་སྦྱིན་གདུག་པ་ཅན། །ཇ་ཡི་མདངས་འཕྲོག་ཆང་གི་བཅུད་ལེན་ཞིང༌། །ཉྭ་བཞི་རེངས་པའི་གདུག་རྩུབ་ཅན་རྣམས་ཉོན། །ཏཱ་ལའི་ཞིང་མགོན་སྤྱན་རས་གཟིགས་དབང་དང༌། །ཐ་དད་མ་ཡིན་དྲག་དམར་རྟ་ཁྱུང་ཞལ། །ད་ལྟ་ལྷོ་ནུབ་སྲིན་པོའི་གཉའ་གནོན་ཡང༌། །ན་མ་རེ་བཞིན་བོད་ལ་དགོངས་པའི་ཕྱིར། །པ་སངས་ལྟ་བུའི་སེམས་ཀྱི་འགལ་ཟླ་ཡིས། །ཕ་རོལ་གནོན་པ་ཁྱོད་ལ་ཆེར་ཁྲོས་ནས། །བ་མོ་ཉི་མས་བཅོམ་པ་ཇི་བཞིན་དུ། །མཱ་ར་ཡ་ཡིས་མངོན་སྤྱོད་རྩུབ་མོས་བསྡིགས། །ཙ་ར་ལ་དགའ་གྲིབ་གདོན་སྨྱོ་བརྗེད་དང༌། །ཚ་གྲང་བདག་པོ་མེ་ཆུ་རླུང་ལྷའི་གདོན། །ཛ་དྲག་སྲིན་པོ་དྲི་ཟ་གྲུལ་བུམ་སོགས། །ཝ་དང་བྱ་ཁྱིའི་གཟུགས་ཅན་ཕྱོགས་བཅུའི་གདོན། །ཞ་རེང་ས་བདག་པོ་གཟའ་ཀླུས་བདག་གཉན། །ཟ་ཁ་གཏད་ཁྲམ་གཉེར་བྱེད་སྡེ་བརྒྱད་བྱད། །འ་འུར་གློ་བུར་ལྷགས་པའི་འདྲེ་རྒོད་རིགས། །ཡ་མཱནྟ་ཀའི་གྲོང་དུ་གནས་བྱས་
ནས། །རྭ་ལྟར་རེངས་པའི་བསམ་སྦྱོར་རྩུབ་མོའི་ཚོགས། །ལ་ཀླུངས་ཉུལ་ཞིང་ཉེས་མེད་སེམས་ཅན་གྱི། །ཤ་ཁྲག་སྲོག་ལ་རྔམས་ཐའི་ནད་དལ་དང༌། །ས་ཞིང་ལོ་འབྲས་བཅུད་ལ་འཚེ་བ་སྤོངས། །ཧ་ལ་ལྟ་བུའི་བསམ་སྦྱོར་མི་གཏང་ན། །ཨ་ལ་ལ་ཞེས་བཞད་པ་བརྒྱད་ལྡན་སྤྲས། །མིང་གཟུགས་འདུས་པའི་ཕུང་པོ་རྡུལ་དུ་བརླག །བདེ་གཤེགས་སྙིང་པོའི་བདག་ཉིད་ང་ཡིན་པས། །གཟུང་འཛིན་ཚོགས་བརྒྱད་ལས་གྱུར་གདོན་ཁྱོད་ཀྱི། །རྣམ་པར་ཤེས་པ་ཆོས་ཉིད་ཀློང་དུ་བསྒྲལ། །རྒྱུད་དྲུག་རྩད་ནས་གཅོད་པར་གདོན་མི་ཟ། །སྣང་སྲིད་རྣམ་དག་པདྨ་འོད་གླིང་ནས། །དོན་དམ་བདེན་པ་རཀྴ་ཐོད་ཕྲེང་གིས། །མ་རིག་ལས་གྱུར་ཀུན་རྫོབ་གདོན་ལ་སྤྲིངས། །གཏམ་ཚོགས་ལེའུ་ཉེར་ལྔ་པའོ།། །།
གཏམ་ཚོགས་ལེའུ་ཉེར་དྲུག་པ། འབྱུང་པོའི་སྡེ་ལ་སྤྲིང་པའི་གཏམ་པདྨའི་ཞལ་ལུང་།
འབྱུང་པོའི་སྡེ་ལ་སྤྲིང་པའི་གཏམ། པདྨའི་ཞལ་ལུང་ཞེས་བྱ་བ། རིག་པ་བདེ་གཤེགས་སྙིང་པོའི་ཁྱབ་བྱེད་ལ་ཁྱབ་བྱ་རྣམ་པར་ཤེས་པའི་ཚོགས་བརྒྱད་ཀྱི་གཞན་དབང་ལས། འཁྲུལ་སྣང་རང་རྒྱུད་དུ། ཤར་བའི་སྡེ་བརྒྱད་འབྱུང་པོའི་ཚོགས་སྤྱི་དང༌། བྱེ་བྲག་སྟོན་པ་སངས་རྒྱས་ཀྱི་ཞལ་མ་མཐོང༌། སློབ་དཔོན་སངས་རྒྱས་གཉིས་པའི་དམ་འོག་ཏུ་མ་ཆུད། དཀར་ཕྱོགས་དགེ་བསྙེན་གྱི་བླང་འདས་མི་ཤེས་པའི་འབྱུང་པོ་གཏུམ་པོ་གཟུ་ལུམས་ཅན་གྱི་རིགས་དང༌། གློ་བུར་ལྷགས་པའི་རྒྱ་འདྲེ། འཚེ་བ་ཆོས་སུ་རློམ་པའི་ཀླ་ཀློའི་ཆོས་ལུགས་ལ་བག་ཆགས་བརྟས་པའི་རིགས་དང༌། ཤི་འདྲེ་གསོན་འདྲེ་འཁྱམས་པོ་དག་ལ་སྤྲིངས་པ།
རྒྱུ་འབྲས་བག་ཆགས་འཁྲུལ་འཁོར་ངེས་པ་དང༌། མ་ངེས་པའི་ལམ་ཁམས་གསུམ་དང༌། རྒྱུད་དྲུག་ཏུ་འཁོར་བའི་སེམས་ཅན་ཐམས་ཅད་ཕན་ཚུན་ཕ་མ་གཉེན་བཤེས། བྱམས་སྡང་གིས་མ་འབྲེལ་བ་གཅིག་ཀྱང་མེད་ན། ཕ་མ་དང་ཉེ་དུ་ལ་ཕན་ལན་གནོད་པས་འཇལ་བ། སྟོན་པ་སངས་རྒྱས་ཀྱིས་སྐྱེས་བུ་ཆུང་འབྲིང་གཉིས་ཀ་ནས་བཀག །ཁྱད་པར་སྐྱེས་བུ་ཆེན་པོའི་ལམ་བྱང་ཆུབ་སེམས་དཔའི་སྡེ་སྣོད་ནས་སེམས་ཅན་ཐམས་ཅད་ཕ་མའི་རང་བཞིན་དུ་ཤེས་ནས་དགྲ་ཟུན་གྱི་ཕྱོགས་རིས་མི་འབྱེད་ཅིང༌། དེའི་ངོ་བོ་བྱང་ཆུབ་ཀྱི་སེམས་གཉིས་སྒོམ་པ་དང༌། བྱེ་བྲག་ཏུ་རྡོ་རྗེ་ཐེག་པའི་འདུལ་བ་ནི་སྣང་སྲིད་ལྷ་དང་ལྷ་མོར་བལྟ་བ་ཡིན་པས། རིག་འཛིན་བདག་ཅག་གིས་སྨོན་འཇུག་དམ་པའི་སྲུང་འཁོར་གྱིས་བསྲུངས་ཤིང་དད་གུས་ཀྱི་ཐུགས་ཡིད་འདྲེས་པ། ས་སྐྱོང་སྡེ་དགེ་མི་ནོར་ཡུལ་གཞི་ས་མངའ་རིས་རྫོང་སྡེ་དང་བཅས་པ་ལ་བསམ་ངན་སྦྱོར་རྩུབ། ཚེ་རྐུ་མདངས་འཕྲོག །ཟ་ཐང་དབང་ཐང་ལ་འཚེ་བ། ནད་དལ་རིམས་ཡམས། རི་རུད་ཤྭ་ལོག །འབྱུང་བ་སྒང་གཤོངས་ཀྱིས་སྣ་འདྲེན། སད་སེར་བཙའ་ཐན། ཀི་ཀང་གནམ་ཐོག །གཟའ་ཀླུའི་གདོང་ཐུག །ཁ་སྨྲས་འཁྲུག་རྩོད། སྲིའུ་སྲིས་རྐུན། འདྲེ་དམག་རྡོ་ཆར། སྲིད་སྡེར་ཁོན་གཅུགས། ཕན་ཚུན་གཡུལ་འགྱེད། ཕྱུགས་ལ་གོད་ཁ་སོགས་བསམ་ངན་བློ་བསྒྱུར་
གྱི་རིགས་སྤོངས་ལ་ཞི་བ་བྱང་ཆུབ་ཀྱི་སེམས་དང་ལྡན་པར་གྱིས་ཤིག །མི་དགེ་བཅུའི་ལས་ལམ་ལ་འཛེམ་པ་དང༌། །ཁམས་བཅོ་བརྒྱད་ཀྱི་ཆོས་ལ་དྲན་པ་ཉེ་བར་ཞོག་ཅིག །འཁོར་འདས་ཀྱི་ཆོས་ཐམས་ཅད་རྟེན་ཅིང་འབྲེལ་འབྱུང་གིས་བསྐྱེད་པའི་རྩ་བ་མ་རིག་པ་ལུགས་ལས་ལྡོག་པའི་ཆོས་ཉིད་རིག་པར་གྱིས་ལ། གཞན་གནོད་གཞི་དང་བཅས་པས་རང་ཉིད་འཁོར་བར་ལྟུང་ཞིང་ཐར་པའི་གོ་སྐབས་མེད་པ་ལ་བསམས་ནས། དཀར་པོ་རྣམ་པར་འཕེལ་བའི་ཕྱོགས་ལ་བརྩོན་པར་བྱ་ཞིང༌། སེམས་ཅན་ཐམས་ཅད་ཕ་མའི་རང་བཞིན་དུ་ཤེས་པར་གྱིས་ལ་གནོད་འཚེའི་བསམ་སྦྱོར་ངན་པ་སྤོངས་ཤིག །གལ་ཏེ་རྒྱལ་བའི་བཀའ་དང་བདེན་པའི་ལུང་ལ་མི་ཉན་ན། ཆོས་སྐུ་མཉམ་པ་ཆེན་པོའི་ངང་ནས་ལོངས་སྤྱོད་རྫོགས་པའི་སྐུ་རྟ་གདོང་འབར་བའི་སྐུར་བཞེངས་ནས། རྡོ་རྗེའི་མེ་ཆར་དྲག་པོས་མིང་བཞི་འདུས་པའི་ཕུང་པོ་བསྲེག་པར་གདོན་མི་ཟ་བས། རྣམ་ཤེས་ཆོས་ཀྱི་དབྱིངས་སུ་ས་མ་ཡ་ཧོ། ཞེས་ལངྐ་མགྲིན་བཅུའི་རྒྱལ་ཁབ་ནས་སྤྲིངས། གཏམ་ཚོགས་ལེའུ་ཉེར་དྲུག་པའོ།། །།
གཏམ་ཚོགས་ལེའུ་ཉེར་བདུན་པ། ཨར་ཇག་ལ་སྤྲིང་བའི་གཏམ་དཀོན་མཆོག་གསུམ་གྱི་གྲིབ་བསིལ།
ཨར་ཇག་ལ་སྤྲིང་བའི་གཏམ། དཀོན་མཆོག་གསུམ་གྱི་གྲིབ་བསིལ་ཞེས་བྱ་བ། སྐྱོབ་པ་སངས་རྒྱས་ལ་ཕྱག་འཚལ་ལོ། །རི་ཁ་བ་ཅན་གྱི་རྒྱལ་ཁམས་འདིར་རིགས་གསུམ་རྣམ་འཕྲུལ་ཆོས་རྒྱལ་མེས་དབོན་རྣམ་གསུམ་གྱི་ཐུགས་བསྐྱེད་ལས་བོད་དང་བོད་
ཆེན་པོའི་རྒྱལ་ཁམས་ཀྱི་སྐྱེ་བོ་མཐའ་དག་དཀོན་མཆོག་གསུམ་ལ་བླ་མར་མི་བྱེད་པ་འགའ་ཡང་མེད་པས། ལ་ཆུ་ཕྲང་གསུམ་གྱི་བཀག་པོ་དང༌། འབྲོག་གནས་བྱང་སྟོངས་ལ་འཁྱམས་ཏེ། ཞོ་ཤའི་སྟོབས་ཀྱིས་རྙེད་པ་འཚོལ་ཞིང་ཕ་རོལ་གནོན་པ་རྣམས་ཀྱིས་ཀྱང་བདེན་པའི་ཚིག་ལ་དགོངས་ཤིག །སྤྱིར་སེམས་ཅན་ཐམས་ཅད་ཕ་མར་མ་གྱུར་པ་མེད་ཅིང༌། དཀར་ནག་གི་ལས་དང་ལས་ཀྱི་འབྲས་བུ་འདི་ཡང་རང་གི་ཕྱི་བཞིན་དུ་འབྲང་བ་ལ་བསམས་ན། ཕ་མའི་རང་བཞིན་སེམས་ཅན་གྱི་སྲོག་ལ་གནོད་པ་བྱས་ན་རང་ཉིད་སྐྱེ་བ་ཕྱི་མ་ངན་སོང་གསུམ་ལས་འགྲོ་ས་མེད་པ་ལ་བསམ་ཞིང༌། ཁྱད་པར་བོད་ལྗོངས་སུ་ཇོ་བོ་ཤཱཀྱ་མུ་ནེའི་ཞལ་བལྟ་ཞིང༌། ཕྱག་སྐོར་སྒྲིབ་སྦྱོང་དང༌། ས་གསུམ་མཁྱེན་པ་ཨོ་རྒྱན་སངས་རྒྱས་གཉིས་པའི་སློབ་མར་གྱུར་པ་རྫོགས་ཆེན་པ་འཇིགས་མེད་གླིང་པའི་དྲུང་དུ། འཆི་བ་ལ་འཇིགས་ནས་དམ་ཆོས་ཉན་པ་ལ་འོངས་པ་འདི་དག་ལ་འཕྲོག་བཅོམ། ངན་སྐྱེལ། བསམ་ངན་སྦྱོར་རྩུབ་ཀྱི་རིགས་མེད་པར་བདེ་འཇམ་མགོ་ཐོན་དུ་འགྲོ་འཇུག་པར་གསོལ་བའི་ལག་རྟགས་འདི་བཞིན་བསྐུར་བ་ལ་གནོད་འགལ་མེད་པར་མཛད་ན། ཁྱེད་རྣམས་ཀྱི་ལས་ངན་ཟད་ནས། བདེ་འགྲོ་མཐོ་རིས་སུ་འགྲོ་བའི་སྨོན་ལམ་ཡང་དག་བྱེད་པ་ཡིན་པས། བསམ་བཟང་པོ་ལ་སྦྱོར་འཚལ། ཞེས་རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་ཉེར་བདུན་པའོ།། །།
གཏམ་ཚོགས་ལེའུ་ཉེར་བརྒྱད་པ། གནས་བསྐོར་བ་ལ་སྤྲིང་བའི་གཏམ་ལྷག་བསམ་གྱི་ཆུན་པོ།
གནས་བསྐོར་བ་ལ་སྤྲིང་བའི་གཏམ། ལྷག་བསམ་གྱི་ཆུན་པོ་ཞེས་བྱ་བ། སྲིད་པའི་ཟུག་རྔུ་དྲུངས་འབྱིན་པའི། །མཆོག་གི་སྨན་པ་ཐམས་ཅད་མཁྱེན། །དེས་གསུངས་འགོག་ལ་མ་དམ་པའི་ཆོས། །རིག་གྲོལ་ཉིས་ལྡན་ཚོགས་ལ་འདུད། །ཁྱེད་ཁམས་སྒོམ་གནས་སྐོར་ལ་གདུང་བ་ཆེ། །ཡུལ་རྐྱེན་གྱིས་དགེ་སྦྱོར་བཅོམ་ཏ་རེ། །ལས་ངན་གྱི་རླུང་འཚུབས་ལངས་ནས་ཡོང༌། །གནས་མཐོང་བས་སངས་རྒྱས་ཐོབ་གྱུར་ན། །དུས་ད་ལྟ་རྒྱ་གར་རྡོ་རྗེ་གདན། །མུ་སྟེགས་དང་ཀླ་ཀློས་བཟུང་སྟེ་མཆི། །དེ་དག་ལ་མོས་པ་མེད་ཟེར་ན། །ཇོ་ཤཱཀ་རྣམ་གཉིས་ཀྱི་སྐུ་མདུན་ན། །གནས་བཤད་དང་རྟེན་བཤད་འདོན་པ་རྣམས། །ཡི་དྭགས་སུ་སྐྱེས་པ་མ་མཐོང་ངམ། །དེ་བསམ་པ་དང་སྦྱོར་བ་མ་མཐུན་པས་ལན། །གནས་ལ་སྙིང་ནས་དད་པ་དང༌། །ལྟད་མོའི་འདུ་ཤེས་ཀྱང་ནོར་ཉེན་ཆེ། །འབངས་ལ་ལོངས་སྤྱོད་བྱེད་རྣམས་ནི། །གནས་སྐོར་མ་ཡིན་སྡིག་སྐོར་ཡིན། །ཁྱད་པར་ཨ་ཁུ་ཁམས་པ་དང༌། སྒོམ་ཆེན་ས་མཐའ་འགྲིམ་པ་རྣམས། །ཤུལ་རིང་ལམ་དུ་ཞུགས་ཙ་ན། །རྐང་འོག་ཏུ་བསད་པས་མ་ཆོག་པར། །གྲོ་ཀའི་དོན་དུ་སེམས་ཅན་གསོད། །ཨར་ཇག་དང་གཡུལ་སྤྲོད་ཞེ་སྡང་འབར། བཟོད་པའི་གོ་ཆ་རླུང་ལ་བསྐུར། །རྐུ་འཕྲོག་དང་གཞོགས་སློང་མ་བྱིན་ལེན། །སྦྱིན་པའི་མི་མཐུན་ཕྱོགས་ལ་བསྙེན། །ལམ་གྲོགས་སྣ་ཚོགས་པས་སྲུང་སྡོམ་སྒྱེལ། །ཚུལ་
ཁྲིམས་ཐལ་བ་བཞིན་དུ་གཏོང༌། །ལུས་ཀྱི་ལས་གསུམ་པང་དུ་བླངས། །ཕྱག་དང་སྐོར་བའི་རྒྱུན་ལམ་གཅོད། །རྙེད་པ་འཚོལ་ཕྱིར་རྫུན་ཚིག་སྨྲ། །ཤོ་སྣ་སྔ་ཕྱིར་ཕྲ་མ་འཛུད། །ལམ་འཕྲང་ཡངས་དོག་ལ་ཚིག་རྩུབ་འཕེལ། །ཤུལ་རིང་གི་ངལ་དུབ་ངག་འཁྱལ་གྱིས་བསྒྲིབ། །ངག་གི་ལས་ལམ་བཞིར་བསྙེན་སྒྲུབ་བྱེད། །བཟླས་བརྗོད་དང་ཆོས་སྤྱོད་འབག་འབུག་ཆག །བརྩོན་འགྲུས་ལོག་ལམ་གྱི་ཕྱོགས་ལ་འཁྱོག །ལྷ་ཁང་དང་རྟེན་གསུམ་མཐོང་ཙ་ན། །ཕྲ་རྒྱན་དང་མཆོད་རྫས་ལ་བརྣབ་སེམས་དང༌། །དཀོན་གཉེར་གྱི་ཚིག་རྩུབ་ལ་གནོད་སེམས་འཕེལ། །བགྲོད་ལམ་གྱི་ཁ་ཆར་བུ་ཡུག་དང༌། །དགྲ་གྱོད་དང་ནད་གདོན་ཆོམ་རྐུན་སོགས། །ལས་ངན་གྱི་རླུང་འཚུབས་ལངས་ཙ་ན། །དཀོན་མཆོག་དང་ཆོས་སྐྱོང་ལ་ཡི་ཆད་དང༌། །ལོག་ལྟའི་གཡང་སར་གོམ་པ་འཇོག །ཡིད་ཀྱི་ལས་ལམ་རྣམ་པ་གསུམ། །ལ་སོགས་རྣམ་རྟོག་གི་ཆོམ་རྐུན་རྣམས། །བསམ་གཏན་དང་ཤེས་རབ་ཀྱི་འགལ་ཟླར་སླེབས། །དེ་ལྟར་ཕྱིན་དྲུག་སྨ་འབེབས་ཤིང༌། །མི་དགེའི་ལས་ལམ་རྣམ་པ་བཅུ། །བལྟར་མི་མངོན་པར་འདུ་བྱེད་པ། །སྡོམ་མིན་རྒྱུན་ལྡན་གྱི་རྒྱལ་བློན་དང༌། །ཁེ་འདོད་ཀྱི་ཚོང་པ་གཡོན་ཅན་དང༌། །ཁམས་པ་གནས་སྐོར་ལ་གདུང་བ་དང༌། །སྒོམ་ཆེན་སྒྲུབ་ཚུགས་མ་ཟིན་པ། །ཐམས་ཅད་ཀུན་གྱིས་འབུག་པ་ཡིན། །གཉན་ས་འགྲིམ་པ་སྐད་རྣམས་ཀྱང༌། །
སྔོན་འགྲོས་རང་རྒྱུད་མ་སྦྱངས་ཤིང༌། །བསྐྱེད་དང་རྫོགས་པའི་གཞུང་ལམ་ལ། །གཡོ་ཐོབ་གོམས་བརྟན་མཐར་ཕྱིན་ལྔའི། །དྲོད་རྟགས་ཀྱི་སྣེ་ཡང་མ་ཟིན་པར། །བཟའ་བཏུང་རྐང་གླིང་དང་ཌ་རུས་འཚོལ། །ཐོགས་བཅས་བདུད་ལ་སྐྲག་ཅིང་འདར། །ཐོགས་མེད་བདུད་ཀྱིས་ཀུན་ནས་དཀྲིས། །དགའ་བྲོད་བདུད་ལ་མངོན་པར་རློམ། །སྙེངས་བྱེད་བདུད་ལ་འཁུམས་བཞིན་དུ། །ཆང་དང་ལམ་ཟན་འཚོལ་བཞིན་པར། །ཤ་ཁྱེར་ཁྲག་ཁྱེད་ཟེར་བ་མཚར། །ཞི་གནས་ཀྱི་མྱོང་བ་མཐར་ཕྱིན་ནས། །ལྷག་མཐོང་ལ་ཉམས་སད་བྱེད་པ་དང༌། །རོ་སྙོམས་ཀྱི་འཕྲང་ལ་བ་ཤར་ནུས་པའི། །གཅོད་མཁན་དེང་སང་ཡོད་མི་འདྲ། །དུར་ཁྲོད་དུ་ཉལ་བས་སངས་རྒྱ་ན། །མི་ཚེར་རི་སྟོངས་སུ་ཉལ་བྱེད་པའི། །རྫི་བོ་རྣམས་འཇའ་ལུས་འགྲུབ་ལ་ཉེ། །དེ་ཀུན་གླེན་པའི་བརྟུལ་ཞུགས་ཡིན། །གདོན་བགེགས་རང་གི་སེམས་ལ་ཚང༌། །དུར་ཁྲོད་མལ་ས་ལས་གཉན་པ་མེད། །འཇིག་རྟེན་ཆོས་བརྒྱད་ཀྱི་རོ་ལངས་དང༌། །འདུ་འབྲལ་མེད་པ་མ་ཤེས་སམ། །འདི་ཉིད་ལ་གཅོད་ན་གཅོད་མཁན་ཡིན། །བརྟུལ་ཞུགས་གྲུབ་པའི་ནང་ན་མཆོག །དེ་བས་གནས་སྐོར་དང་ས་སྐོར་ལ། །རྒྱུ་མ་རྣམས་བག་ཡོད་ཀྱིས་དྲན་པ་བརྟན། །ཁྱ་པར་ཆོས་ལྡན་གྱི་གང་ཟག་དང༌། སྒོམ་ཆེན་གནས་སྐོར་ལ་འགྲོ་བའི་མཚམས། །བྱང་ཆུབ་སེམས་གཉིས་ལ་རང་དབང་ཐོབ། །རོ་སྙོམས་ཀྱི་སྐྱིད་སྡུག་ལ་འདམ་ག་བྲལ། །བཟོད་པའི་གོ་ཆས་ཡུལ་རྐྱེན་ཐུབ། །ཉིད་གཅིག་ལ་བརྡུངས་བཏགས་
བརྒྱ་བྱུང་ཡང༌། །འབྱུང་བཞི་ལ་དབྱུག་པས་བསྣུན་པ་ལྟར། །ཅི་མི་སྙམ་པའི་བརྟུལ་ཞུགས་ཀྱི། །སྤོབས་པ་གདེང་དུ་གྱུར་པའི་ཚེ། །ཡུལ་ཆེན་ཉི་ཤུ་རྩ་བཞི་སོགས། །བགྲོད་པར་སྔགས་ཀྱི་གཞུང་ནས་བཤད། །ཚོགས་ལམ་གྱི་སྣེ་ཡང་མ་ཟིན་ཅིང༌། །སྤྲེའུ་ལས་བཟོད་བསྲན་ཆུང་བ་ཡི། །དགེ་སློང་རྡོ་རྗེ་འཛིན་པ་དང༌། །སྨྱོ་སྤྱོད་ལ་གྲུབ་ཐོབ་ཏུ་རློམ་པ་ཡི། །ངོ་ཚའི་གདོང་པགས་རལ་བ་རྣམས། །གནས་སྐོར་གྱིས་ངན་སོང་སྒྲུབ་ཉེན་ཆེ། །བར་དོར་ཟུང་འཇུག་ཐོབ་ངེས་པའི། །ནག་པོ་སྤྱོད་པ་ལྟ་བུ་ཡང༌། །གནས་སྐོར་གྱིས་སྐུ་སྲོག་བསྐྱལ་གྱུར་ན། །ཕྱོགས་ལས་རྣམ་རྒྱལ་དང་ཁ་འགྱངས་པས། །ཁྱེད་ཅག་གི་རྒྱུད་ཚོད་རིག་སྟེ་མཆི། །ཟས་གོས་ཀྱི་ཞེན་པ་མ་ཆོད་པས། །ཁལ་མ་དང་ཚོང་ཟོག་ལམ་ཡིག་ལ་གདུང༌། །བརྟུལ་ཞུགས་ཀྱི་སྤྱོད་པས་གནས་ཉུལ་བ། །ཨོ་རྒྱན་པ་རང་བྱུང་དཔལ་སོགས་ཡིན། །དེ་དག་གིས་དེ་འདྲ་ཨེ་མཛད་ལྟོས། །བྱིས་པས་ཉེར་སྤྱོད་ཀྱི་བསམ་གཏན་ལ། །རླུང་རྐྱེན་དང་མངོན་ཤེས་གྱལ་གྱོལ་སོགས། །ལྷའི་བུ་བདུད་ཀྱི་འཕྲང་དམ་པས། །ཀུན་ཏུ་བཟང་པོའི་སྤྱོད་པ་ལྟར། །བག་ཡོད་བརྟེན་ན་མི་ལེགས་སམ། །དེ་ལ་དག་པ་ལྔ་ཡོད་དེ། །གནས་དག་དགོན་པ་བས་མཐའ་བཟུང༌། །ལོག་འཚོས་མ་གོས་འཚོ་བ་དག །གྲོགས་དག་ཚངས་པར་མཚུངས་སྤྱོད་ལྡན། །སྡོམ་པ་དག་པ་བྱང་སེམས་དང༌། །རིག་
འཛིན་ཟུང་དུ་སྦྲེལ་བ་བསྲུང༌། །ཆོས་དག་སྦྱང་གཞི་སྦྱོང་བྱེད་ཀྱི། །གནད་དོན་གོ་བའི་བསྐྱེད་རིམ་དང༌། །ས་བཅུའི་སྤངས་རྟོགས་ལ་རེག་པའི། །རྫོགས་རིམ་ཟུང་དུ་འགྲེལ་འགྱུར་ན། །སངས་རྒྱས་རང་ལ་ཡོད་པའི་ཕྱིར། །བྱང་ཆུབ་མལ་གྱི་ནང་ནས་ཐོབ། །འདི་ལྟར་མི་ཤེས་རྨོངས་ཆེན་རྣམས། །འཁོར་བའི་རྒྱུ་འབྲས་མིང་གཟུགས་ལ། །ཆགས་ནས་གཟུང་འཛིན་ཡུལ་ལ་བགྲོད། །ཡུལ་ནི་གཟུགས་ཡིན་གནས་ཀྱང་དེ། །མིང་ནི་རྣམ་ཤེས་ལ་སོགས་བཞི། །གནས་ཀྱི་མིང་ཐོས་ཚོར་བ་སྟེ། །འགྲོ་བར་འདོད་པ་འདུ་ཤེས་དང༌། །རྒྱུ་འབྲས་སྣ་ཚོགས་འདུ་བྱེད་དེ། །རྣམ་ཤེས་ལས་སུ་མི་རུང་བའི། །བློ་ལྷག་གནས་སྐོར་བདུད་ཀྱི་ལས། །ཅིས་ཀྱང་སྡོད་དུ་མ་ཚུགས་ན། །གནས་ཆེན་གསུམ་དང་མཐའ་ཡང་འདུལ། །རུ་གནོན་གཙུག་ལག་ཁང་རྣམས་ལ། །ཕྱག་སྐོར་སྨོན་ལམ་རྒྱ་ཆེན་མཛོད། །ལམ་མ་ཞུགས་ཀྱི་སྐྱེ་བོ་ལའང༌། །བག་ཡོད་ཤུགས་ལ་བརྟེན་དགོས་པའི། །ཚོགས་གསོག་སྒྲིབ་སྦྱོང་འདི་ཉིད་ཟབ། །དགེ་བའི་ཆོས་རྣམས་སྡུད་པ་ལ། །ཡན་ལག་བདུན་དང་ཕར་ཕྱིན་དྲུག །ཆོས་སྤྱོད་བཅུ་སོགས་གསུངས་པ་ལས། །གཅན་གཟན་དང་ནི་ཆོམ་རྐུན་གྱི། །བརྟུལ་ཞུགས་བསྟན་པ་མེད་པའི་ཕྱིར། །ཕན་པའི་སེམས་ཀྱིས་སྨྲས་པ་ཡིན། །ཞེས་ཀཿསྒོམ་རྩྭ་མཆོག་གྲོང་ལ་འགྲོ་ཟེར་བ་ལ་གདམས་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་ཉེར་བརྒྱད་པའོ།། །།
གཏམ་ཚོགས་ལེའུ་ཉེར་དགུ་པ། བསམ་ཡས་གཙུག་ལག་ཁང་གི་གཏམ་འདོད་པ་ཁམས་ཀྱི་རྣ་རྒྱན།
བསམ་ཡས་གཙུག་ལག་ཁང་གི་གཏམ་འདོད་པ་ཁམས་ཀྱི་རྣ་རྒྱན་ཅེས་བྱ་བ། བྱང་ཆུབ་ཆེན་པོ་ཕྱག་འཚལ་ལོ། །བསྟན་པ་རིན་ཆེན་མཛོད་ཁང་གངས་རིའི་ཁྲོད། །ཐུགས་བསྐྱེད་ཤིང་རྟས་འདྲེན་པ་མེས་དབོན་གསུམ། །མཁན་སློབ་ལོ་པཎ་རྣམས་ཀྱི་བཀའ་དྲིན་ལ། །དད་པའི་མེ་ཏོག་མ་རྙིང་མཆོད་སྤྲིན་འབུལ། །དེ་ལ་བདག་ཅག་གི་སྟོན་པ་འཚོ་ཞིང་གཞེས་པའི་དུས་ན། མ་འོངས་པ་ན་མཐའ་ཁོབ་གདོང་དམར་ཁ་བ་ཅན་གྱི་ཡུལ་དེར་དམ་པའི་ཆོས་ཉི་མ་ཤར་བ་ལྟ་བུ་ཞིག་རྒྱས་པར་འགྱུར་རོ། །མཐའ་ཁོབ་དེ་འདུལ་བའི་གཉེན་པོ་ནི་འཕགས་པ་སྤྱན་རས་གཟིགས་ཡིན་ནོ། །ཞེས་ལུང་བསྟན་པ་ལྟར། འཇིག་རྟེན་བླུན་པོ་རྣམས་ཀྱང་རྒྱལ་པོ་ལ་གཙོ་བོར་འཛིན་པས་ལྷ་ཐོ་ཐོ་རི་གཉན་བཙན་གྱི་རིང་ལ། གཉེན་པོ་གསང་བ་ལ་སོགས་པ་ཕོ་བྲང་ཡུལ་བུ་གླ་སྒང་དུ་བབས་པས་དམ་པ་ཆོས་ཀྱི་དབུ་བརྙེས། རྒྱལ་རབས་ལྔ་ནས་འདིའི་དོན་ཤེས་པ་འབྱུང་ངོ་ཞེས་པ་ལྟར་ཨ་མི་དེ་ཝའི་ཞལ་སྐྱིན་སྲོང་བཙན་གྱི་རིང་ལ། ཇོ་བོ་ཤཱཀ་རྣམ་གཉིས་སྤྱན་དྲངས། ལྷ་ས་དང་ཁྲ་འབྲུག་ལ་སོགས་པ་མཐའ་འདུལ་དང་ཡང་འདུལ་རུ་གནོན་གྱི་གཙུག་ལག་ཁང་བཞེངས། ཡི་གེ་དང་དམ་པའི་ཆོས་ཀྱི་སྲོལ་བཏོད། དེ་ནས་རྒྱལ་རབས་ལྔ་ན་དཔོན་སྲས་ཁྲི་ལྡེ་གཙུག་བརྟན་གྱིས་མེས་སྲོང་
བཙན་གྱི་བཀའ་ཆེམས་ལ། ངའི་དཔོན་སྲས་རྒྱལ་པོ་ལྡེ་ཞེས་བྱ་བའི་རིང་ལ་དམ་པའི་ལྷ་ཆོས་འབྱུང་ཞེས་པ་ལ་སོགས་གཟིགས་པས་རང་ཉིད་ཡིན་ནོ་སྙམ་ནས་བྲན་ཀ་དང་གཉགས་གཉིས་རྒྱ་གར་དུ་ཆོས་འཚོལ་དུ་བཏང་བས་པནྚི་ཏ་སངས་རྒྱས་གསང་བ་དང༌། སངས་རྒྱས་ཞི་བ་གཉིས་གངས་ཏི་སེ་ལ་བཞུགས་པ་དང་མཇལ་ཀྱང་ལུང་བསྟན་གྱི་དོན་ལྷ་སྲས་ཁྲི་སྲོང་ཡིན་པས་གདན་མ་འདྲོངས། མདོ་སྡེ་ལས་རྣམ་འབྱེད་དང༌། གསེར་འོད་དམ་པ་གཉིས་ཐུགས་ལས་སྤྱན་དྲངས་ནས་དེའི་བཞུགས་ཁང་དུ་བྲག་དམར་མགྲིན་བཟང༌། མཆིམས་ཕུ་ན་ར། ཀ་ཆུ་དཔལ་འབྱུང༌། ལྷ་ས་མཁར་བྲག །ག་པ་གོང་སྟེ་གཙུག་ལག་ཁང་ལྔ་བཞེངས། དེ་ལ་ཞང་བློན་རྣམས་མི་དགའ་ཡང་རྒྱལ་པོའི་ཐུགས་སྨོན་ལས་ཕོ་བྲང་ཕང་ཐང་དུ་ལྷ་སྲས་ཁྲི་སྲོང་ལྡེའུ་བཙན་འཁྲུངས། རེ་ཞིག་རྒྱལ་བུ་སྐུ་ནར་མ་སོན་རིང་བོད་བློན་ངན་པས་ཁྲིམས་བུ་ཆུང་བཅས་ནས་ཡབ་མེས་ཀྱི་ཆོས་དང༌། བྲག་དམར་སོགས་ལ་གནོད་པ་ཆེར་བསྐྱལ། དགུང་ལོ་བཅུ་གསུམ་པའི་ཚེ་ཡབ་མེས་ཀྱི་ཡིག་ཚངས་གཟིགས་པས་སྔོན་གྱི་ལས་སད་དེ་ཆོས་ལ་དད་པ་ཆེན་པོ་ཐོབ་ཀྱང༌། མ་ཞང་ཁྲོམ་པ་སྐྱེས་ཀྱིས་ཡབ་མེས་སྐུ་ཚེ་ཐུང་བ་ཆོས་བྱས་པས་ལན། སྐྱེ་བ་ཕྱི་མ་ཡོད་པ་རྫུན་ཡིན། ཆོས་བྱས་པས་བཀྲ་མི་ཤེས་པ་ཡོང་ཟེར་ནས་ལྷ་སའི་ཇོ་ཤཱཀ་བྱེ་སྟོངས་སུ་སྤས་པ་སོགས་བར་ཆད་ཆེན་པོ་བྱས་པས། སློབ་དཔོན་ཧ་ཤང་གིས་ཚེ་སྔ་ཕྱི་དང་ཆོས་
བདེན་པའི་ཡིད་ཆེས་བྱས་པའི་ཁར་བཙན་པོས་དགེ་བ་བཅུའི་མདོ་བཀླགས་པས་སྤྱོད་པ་དག་པར་གོ །རྡོ་རྗེ་གཅོད་པ་བཀླགས་པས་ལྟ་བ་དག་པར་གོ །སཱ་ལུ་ལྗང་པ་བཀླགས་པས་འབྲས་བུ་དག་པར་ཡིད་ཆེས། དེའི་གྲོགས་སྤ་གསལ་སྣང་གིས་བྱས། ཆོས་བློན་ཁྲི་བཟང་གིས་ཐབས་བསམས་ནས་ལྟས་མཁན་རྣམས་བྲིད་ཅིང་བརྔན། དེའི་གྲོགས་བློན་པོ་འགོས་ཀྱིས་བྱས་ཏེ་མ་ཞང་སྟོད་ལུང་དུ་གསོན་དུར་ལ་བཅུག །སྤ་གསལ་སྣང་ཕོ་ཉར་མངགས་ཏེ་མཁན་པོ་ཞི་བ་འཚོ་སྤྱན་དྲངས། ཁ་ཆེ་ཨ་ནནྟས་ལོ་ཙཱ་བ་གྱིས་ཏེ་རྒྱུའི་ཐེག་པ་བཤད་པས། འདྲེ་སྲིན་རྣམས་ཁྲོས་ཏེ། ཤམ་པོས་ཕོ་བྲང་ཕང་ཐང་ཆུ་ལ་བསྐུར། ཐང་ལྷས་དམར་པོ་རི་ལ་ཐོག་ཕབ། མི་ནད་དང་ལོ་ཉེས་ཆེན་པོ་བྱུང་བས་འདི་བཙན་པོས་ཆོས་བྱས་པས་ལན། ཨ་ཙ་ར་ངན་སྔགས་ཅན་ཕར་སྤྱུགས་ཤིག་ཟེར། བོད་འབངས་ཀུན་ཁ་ལོག་ནས་ཆོས་བྱར་མ་བཏུབ་པས། མཁན་པོའི་ཞལ་ནས། བོད་ཀྱི་གནོད་སྦྱིན་གདུག་པ་སངས་རྒྱས་ཀྱི་དམ་འོག་ཏུ་མ་ཆུད་པས་ཆོས་ལ་སྡང༌། ད་འཛམ་བུའི་གླིང་ན་ཆེ་བའི་དགེ་སློང་པདྨ་སམྦྷ་ཝ་ཞེས་བྱ་བ་ཡོད་ཀྱིས་དེ་སྤྱན་དྲོངས་ཞེས་ལུང་བསྟན། མཁན་པོ་བསྐྲད་པ་ལྟར་བྱས་ནས་བཞུད། གསལ་སྣང་ཆོས་ཀྱི་སྤྱན་པ་བར་བསྐོས་པ་དེས། སླར་ཡང་ལྷོ་བལ་དུ་རྟོལ་ནས་སློབ་དཔོན་
སངས་རྒྱས་གཉིས་པ་སྤྱན་དྲངས། ལམ་དུ་ལྷ་སྲིན་གདུག་པ་ཅན་འདུལ་བཞིན་བྱོན། མང་ཡུལ་གྱི་རི་བོ་དཔལ་འབར་གཡས་གཡོན་བརྗེས། སྟོད་ལུང་མདར་མྱ་ངམ་གྱི་ཐང་ལ་གསེག་ཤང་རྒྱབ་ནས་གྲུབ་ཆུ་ཆེན་པོ་བཏོན། བཙན་པོས་སློབ་དཔོན་གྱི་ཕྱག་བཞེས་སུ་འཆའ་བ་ལ། རབ་ཏུ་བྱུང་བའི་ཕྱག་མི་ཐུབ་གསུངས་ནས་ཕ་ཝང་ལ་ལྟ་སྟངས་མཛད་པ་དེ་ཕྱེད་ཚལ་དུ་གས། དེའི་སྒྲིབ་སྦྱོང་དུ་དམིགས་ནས་ཟུང་མཁར་ཕྲང་ལ་རྡོའི་མཆོད་རྟེན་ལྔ་མཛད། ཤམྦྷོས་སློབ་དཔོན་གྱི་ཐོག་ཏུ་ཆུ་ཆེན་པོ་དྲངས་པ་ལ་རྡོ་རྗེ་གདེངས་པས་ཆུ་གྱེན་དུ་བྲོས། སླར་ལྟ་སྟངས་མཛད་པས་གངས་རི་ཞུ་ནས་རི་ནག་ཉིལ་སོང་བས་ཁོ་སྐྲག་སྟེ་བཀའ་ལ་ཉན་པར་བྱས། དེ་བཞིན་དུ་བོད་ཀྱི་ལྷ་འདྲེ་ཐམས་ཅད་ཀྱིས་ཐོབ་ཙམས་པ་རྫུ་འཕྲུལ་གྱིས་སྤ་བཀོང་སྟེ་དམ་པའི་ཆོས་དར་དུ་བཏུབ་པ་མཛད། ཐུགས་རྗེ་དང་རྫུ་འཕྲུལ་བསམ་གྱིས་མི་ཁྱབ་པས་བོད་འབངས་ལ་ཕན་གདགས་པར་བཞེད་ནས་ཛམྦྷ་ལ་ལས་ནོར་བླངས་ནས་དབུལ་བ་བསལ། ངམ་ཤོད་ནེ་ཐང་དུ་བསྒྱུར། གྲམ་པ་རྣམས་ཞིང་དུ་བཏང༌། རྒྱ་གར་དུ་ཆུ་འདི་བས་ཆེ་བ་ཞིག་ས་འོག་བཅུག་གསུང་ནས་གཙང་པོ་ས་འོག་ཏུ་འཇུག་པར་མཛད་རྒྱུ་ལ། ཞིང་བློན་ངན་པས་དབྱེན་བཅོས་ནས་ཞིང་ཡར་ཀླུངས་ཀྱིས་ཆོག་ཟེར་བ་སོགས་རྟེན་འབྲེལ་ཕྱིན་ཅི་ལོག་ཏུ་སྦྱར་གས་མ་གྲུབ། དེ་ནས་མཁན་སློབ་གདན་འཛོམ་སྟེ་ཨཱརྱ་པ་ལོའི་གླིང་འབྱོངས་ནས་བཙན་པོ་
དགུང་ལོ་བཅུ་གསུམ་པའི་ཚེ་ཨོ་ཏནྟ་པུ་རིའི་གཙུག་ལག་ཁང་ལ་དཔེ་བྱས་ནས་དབུ་རྩེ་རིགས་གསུམ་གླིང་བཞི་གླིང་ཕྲན་དང་བཅས་པའི་རྨང་བཏིང༌། ས་རྣམས་ཡར་ཀླུངས་གད་པ་ཐོག་དང༌། རྡོ་ཧས་པོ་རི་ནས་ཤིང་རྟ་ལ་དྲངས། ཤིང་ཤུག་པ་ལ་བྱས། སློབ་དཔོན་ཆེན་པོས་ལྷ་འདྲེ་དམ་འོག་ཏུ་བཙུད་དེ་ལས་ལ་བཀོལ་བས་ཉིན་པར་མིས་བརྩིགས་པ་ལས་མཚན་མོ་ལྷ་འདྲེས་བརྩིགས་པ་ཚར་ཆེ་བའི་ལོ་རྒྱུས་ལ་ཕྱིས་ཞིག་གསོའི་དུས་ཀྱང་དཔར་ནས་མི་མ་ཡིན་གྱི་རྐང་རྗེས་ཁྲུ་གང་པ་ཐོན་པ་སོགས་ངེས་པ་འདྲོངས། ལྷ་ཁང་འབྱོངས་ནས་བཙན་པོའི་མན་ལ་ལམ་དུ་མི་དཀང་པོ་གཅིག་གིས་ས་གཞི་འདི་ཇོ་མོ་སྒྲོལ་མས་བྱིན་གྱིས་བརླབས་པ་ཡིན། ཧས་པོ་རིའི་རྩེ་ན་བཅོམ་ལྡན་འདས་ཀྱིས་བྱིན་གྱིས་བརླབས་པའི་ཤཱཀྱ་ཐུབ་པ་གཙོ་འཁོར་བཅུ་གསུམ་ཡོད་ཅེས་ལུང་བསྟན་པ་ལྟར། ནངས་པར་བློན་པོ་ཁམས་པ་གོ་ཆ་ཁྲིད་དེ་བལྟར་བྱོན་པས་བྱེ་མའི་འཔོལ་ནས་རྡོ་སྐུ་རང་བྱུང་ཐེའུའི་རྗེས་མེད་པ་སྤྱན་བཀྲ་ཧྲིག་གེ་བའི་ཇོ་བོ་བྱང་ཆུབ་ཆེན་པོ་རྙེད། དེ་ཤིང་རྟ་ལ་སྤྱན་དྲངས་པས་གཙུག་ལག་ཁང་གི་ཤར་སྒོར་བྱོན་པ་དང་ས་གཡོས། དྲི་གཙང་ཁང་དུ་བྱོན་པ་དང་ཆེར་གཡོས། ཁྲི་ལ་བཞུགས་སུ་གསོལ་བ་ན་ཕྱྭ་མཁན་ན་རེ། བཙན་པོའི་ལྷ་ཁང་ལ་དཔགས་ན་ལྷ་སྐུ་ཚད་ཆུང་མཆི་ཟེར་བས། སྤྲུལ་པའི་བཟོ་བོས་འཇག་མ་དང་དར་རས་ཀྱིས་གཡོགས། གསེར་ལ་སོགས་རིན་པོ་ཆེ་འབའ་ཞིག་བསྲེས་པའི་འཇིམ་ལས་བཟོ་གནས་བོད་ཀྱི་ལུགས་སུ་བྱས་
པས་མཐོང་ན་མི་མཐུན་པ་མེད་པའི་སྐུ་རྒྱལ་བ་མངོན་སུམ་པའི་མཚན་དཔེ་རྫོགས་པར་བྱོན། དེ་ཡང་རྩིག་ལུགས་འདུལ་བ་དང་མཐུན། རྒྱུད་རིས་མདོ་སྡེ་དང་མཐུན། ལྷ་ཚོགས་གསང་སྔགས་དང་མཐུན་པས་ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཞེས་གྲགས་ལ། བཟོ་གནས་ཀྱང་རྒྱ་གར། རྒྱ་ནག །ལི་ལུལ་ཐ་དད་པའི་ལུགས་སུ་བྱས་པས་ཤིང་བསྒྲིགས་དང་བཀོད་པའི་རྣམ་ཆ་ཡང་བློ་ཡུལ་དུ་འདོམས་པར་མི་ནུས་པས་ན་བཀའ་ཆེམས་ལས་ཀྱང༌། ཁྲི་གདུགས་འོག་ན་འགྲན་ཟླ་མ་མཆིས་པའི། །རྒྱ་གར་རྡོ་རྗེ་གདན་མཚུངས་བསམ་ཡས་འདི། །མིག་གིས་མཐོང་ཚད་ངན་སོང་སྐྱེ་སྒོ་གཅོད། །གང་དག་འདི་ལ་སྐོར་བ་སུས་བསྐོར་བ། །ཤན་པ་ཡིན་ཀྱང་མཐོ་རིས་གནས་སུ་སྐྱེ། །གང་ཞིག་བསམ་ཡས་འདི་ལ་ཕྱག་འཚལ་བ། །ཐུན་མོང་ཁྱད་པར་ཆེས་ཆེར་རྒྱལ་པོར་འགྱུར། །གང་ཞིག་བསམ་ཡས་རྣམ་ཐར་སུས་བརྗོད་པ། །གང་གིས་ཐོས་པས་ལས་རྣམས་ཀུན་ལས་གྲོལ། །ཅེས་པས་མཚོན་ན་སངས་རྒྱས་འབྱུང་བ་ལ་མཉེས་པར་མི་བགྱིད་པའི་ལས་མཐའ་ལོག་པ་རྣམས་ལ་བསམས་ནས་ཆོས་སྣང་བའི་སྒོ་དད་པ་བླ་ལྷག་ཏུ་བསྐྱེད་འཚལ། གཏམ་ཚོགས་ལེའུ་ཉེར་དགུ་པའོ།། །།
གཏམ་ཚོགས་ལེའུ་སུམ་ཅུ་པ། ཨཱརྱ་པ་ལོའི་གླིང་གི་གཏམ་བདེན་པའི་རྣ་རྒྱན།
ཨཱརྱ་པ་ལོའི་གླིང་གི་གཏམ་བདེན་པའི་རྣ་རྒྱན་ཅེས་བྱ་བ། འདུལ་འཛིན་བསྟན་པའི་ཆུ་འགོ་ཞི་བ་འཚོ། །སངས་རྒྱས་གཉིས་པར་རྩོད་མེད་ཨོ་རྒྱན་རྗེ། །རྒྱལ་བསྟན་མགྲོན་པོར་འབོད་པ་ལྷའི་མེ་ཏོག །བསྟན་པ་རྒྱ་མཚོའི་རྩ་ལག་གསུམ་ལ་འདུད། །
དེ་ལ་འཇམ་དཔལ་དབྱངས་དངོས་ཁྲི་སྲོང་ལྡེའུ་བཙན་གྱིས་ཡབ་མེས་ཀྱི་ཞལ་ཆེམས་གཟིགས་པས། གངས་རིའི་ལྗོངས་སུ་སངས་རྒྱས་ཀྱི་བསྟན་པ་དར་བའི་བྱེད་པོ་རང་ཉིད་དུ་ལུང་བསྟན་པར་ཡིད་ཆེས་ཤིང༌། སློབ་དཔོན་ཧྭ་ཤང་ཆེན་པོའི་ལུང་བཞིན་དགེ་བ་བཅུའི་མདོ་དང༌། རྡོ་རྗེ་གཅོད་པ། སཱ་ལུ་ལྗང་པ་གསུམ་གཟིགས་པས་དམ་པའི་ཆོས་ཀྱི་ལྟ་སྤྱོད་འབྲས་བུ་གསུམ་ཀ་ལ་ལྷག་པར་དད་ཀྱང༌། མ་ཞང་ལ་སོགས་པའི་བདུད་བློན་རྣམས་ཀྱི་གཞན་དབང་གིས་བཀབ་པ་སྙིང་སྟོབས་ཀྱི་གོ་ཆ་དང༌། སྦྱོར་བ་དང་ཆོག་མི་ཤེས་པའི་བརྩོན་འགྲུས་ཀྱིས་ནག་པོའི་རྩ་ལག་མཐའ་དག་ཚར་བཅད་དེ། མཁན་པོ་ཤཱནྟ་རཀྵི་ཏ་སྤྱན་དྲངས། དགེ་བ་བཅུ་དང་ཁམས་བཅོ་བརྒྱད་དང༌། རྟེན་འབྲེལ་བཅུ་གཉིས་ཀྱི་ཆོས་བཤད་པས། བོད་ཀྱི་འདྲེ་སྲིན་གདུག་པས་བར་གཅོད་བརྩམས་ནས་བཀྲ་མི་ཤིས་པ་ཆེན་པོ་བཏང༌། དེང་མཁན་པོས་ལུང་བསྟན་ཏེ། སངས་རྒྱས་གཉིས་པ་སློབ་དཔོན་ཆེན་པོ་སྤྱན་དྲངས། ལྷ་སྲིན་དམ་ལ་བཞག །བྲག་དམར་མགྲིན་བཟང་ལ་མངའ་གསོལ་མཛད་པས་ལྷ་རྣམས་ཕྱི་རོལ་དུ་འཐོན་ནས་སླར་ནང་དུ་ལོག །བོད་ཡུལ་བཟང་པོར་གཏང་ཕྱིར་ངམ་ཤོད་ནེ་ཐང་དུ་བསྒྱུར། གཙང་པོ་སྦུབས་སུ་འཇུག་ནུས་པ་ཤེས་ཕྱིར། ཀླུ་རྫིང་དང་ཟུང་མཁར་ནས་ཕུ་རྒྱ་བཏོན། གསེག་མ་ནེ་ཐང་དུ་བཏང་བས་བདུད་བློན་རྣམས་རྫུ་འཕྲུལ་ལ་སྐྲག་ནས། ཨ་ཙ་ར་འདིས་བོད་
ཡུལ་བཟང་པོར་བཏང་རྗེས་རྒྱལ་སྲིད་རྒྱ་གར་ལ་སྤྲོད་དོ་ཞེས་དབྱེན་བཅོས་ནས་སློབ་དཔོན་བཞུད་པར་ཞུ་བ་ཕུལ་པས། བཙན་པོ་མ་མཉེས་ཀྱང་མ་དག་པའི་སྣང་ངོར་གཤེགས་པ་ལྟར་མཛད་དེ་སྒྲུབ་གནས་དང་གངས་བྲག་རྣམས་བྱིན་གྱིས་བརླབས། སླར་མཁན་སློབ་གཉིས་ཀ་གདན་འཛོམ་སྟེ་སའི་དཔྱད་གཟིགས་ནས་མཚོ་མོ་མགུལ་དང༌། ཧས་པོ་རིའི་བར་ན་ས་གཞི་འཇག་སྐྱ་སྐྱ་ཆད་དེ་བ། ཕང་ཕུང་སྣ་ཚོགས་འདུག་པ་དེ་འཁར་གཞོང་མར་ཁུས་བཀང་བ་འདྲ་བས་སའི་དཔྱད་ལེགས་པར་བསྟན་ནས་ཕྱག་འཁར་གྱིས་ས་རིས་བཅད། བོད་འབངས་ཁ་ལོག་གིས་དོགས་ནས་ཐབས་ལ་མཁས་པས་ཝ་ལུང་གྲོགས་པོ་གསེར་ཕྱེས་འགེངས་པ་དང༌། གཙང་པོ་ཟངས་ཀྱི་སྦུབས་སུ་འཇུག་པ་ལ་སོགས་པའི་གདམ་ང་མི་གཅིག་པ་ལྔ་བསྐུར་བས་ལྷ་ཁང་བརྩིག་པར་ཁ་འཆམ་ཀྱང༌། ཏ་ར་ཀླུ་གོང་ཚེས་ལ་གནག་ཅིང་བོན་གྱི་ཕྱོགས་འཛིན་པས་ལྷ་ཁང་བཞེངས་པ་ལ་གེགས་བྱེད་པ་མཐའ་ལ་སྤྱུགས། དེས་བོད་འབངས་ཀུན་བྲེད་དེ་ཁ་རོག་པར་འདུག་པའི་སྐབས། གཙུག་ལག་ཁང་གི་ཆོ་ག་མཛད་པས་ས་པྲ་ལེགས་ཤིང་ས་ཞག་དཀར་པོ་དང༌། ནས་འབྲས་ཕུལ་དོ་རེ་བྱུང༌། དེ་ནས་མཆོད་རྟེན་བཞིའི་ཕུར་པ་བཏབ་རྗེས། བཙན་པོས་ལྷ་ཁང་བརྩིག་པའི་ཞུ་བ་མཛད་པས། སློབ་དཔོན་གྱི་ཞལ་ནས། བཙན་པོ་ཉིད་དང་པོ་བྱང་ཆུབ་ཏུ་ཐུགས་བསྐྱེད་པ་ཡང་ཇོ་མོ་སྒྲོལ་མ་ཡིན། མཐར་སངས་རྒྱས་ནས་ཆོས་ཀྱི་
འཁོར་ལོ་བསྐོར་བ་ཡང་ཇོ་མོ་སྒྲོལ་མས་གསོལ་བ་འདེབས་པ་ཡིན་པས་ཐོག་མར་ཇོ་མོའི་ལྷ་ཁང་རྩིགས་ཤིག་ཅེས་ལུང་བསྟན་པས། ལྷོ་ངོས་སུ་ཨཱརྱ་པ་ལོའི་གཙུག་ལག་ཁང་འདི་བརྩིགས་པ་ཡིན་ཏེ། དེའི་ཚེ་སེ་ཕུང་ལ་གནས་པའི་ཀླུས་སེ་ཕུང་གཅོད་པར་ཤེས་ནས་མ་བཟོད་དེ་མ་ལ་གྲོ་གཟི་ཅན་ལ་སོགས་པ་ཐམས་ཅད་སྦྲན་པས་ཉིན་པར་མིས་བརྩིགས་པ་མཚན་མོ་ལྷ་འདྲེས་བཤིག་ནས་ས་རྡོ་རང་གནས་སུ་བསྐྱལ་བས། སློབ་དཔོན་པདྨས་དྲག་པོའི་སྦྱིན་བསྲེག་ལན་གཉིས་དང༌། མཆིམས་ཕུར་ཀླུ་འདུལ་གྱི་དགོངས་པ་ལ་བཞུགས་ནས་ཀླུ་ལ་སོགས་པའི་འདྲེ་སྲིན་དམ་འོག་ཏུ་བཙུད་ཅིང་ཚར་གཅོད་ལོག་གནོན་གྱི་ཚུལ་དུ་སེ་ཕུང་འཁྱུད་མོས་བསྡམས་པ་ལ་སྲོག་ཤིང་བྱས་ནས་འཕགས་པ་སེངྒེ་སྒྲའི་སྐུ་བཞེངས་པ་ད་ལྟ་གློ་འབུར་གཡོན་ལོགས་ན་བཞུགས། དེ་ནས་ལྷ་ཁང་གེགས་མེད་དུ་གྲུབ་པ་དང་བཙན་པོ་ན་རེ། ད་ནི་ལྷ་ཁང་ཚར་ལེགས་ཏེ་ལྷ་ཇི་ལྟར་བགྱི་ཞུས་པས། ཡོ་བྱད་བསྡོགས་ཤིག ལྷའི་བཟོ་པོ་འོང་གི་གསུངས། དེར་རྒྱ་མཚན་མ་ཅན་བྱ་བ་སྤྲུལ་པའི་བཟོ་བོ་པིར་ཕྱག་པ་གང་དང༌། ཚོན་རྩིའི་ཀོང་བུ་ཀོང་ཟེ་གང་ཁྱེར་བ་ཞིག་བྱུང་བ་ན་རེ། འཇིམ་གཟུགས་དང་རི་མོ་བྱེད་པ་ལ་འཛམ་བུའི་གླིང་ན་ང་མཁས། ལྷ་རྒྱ་གར་དང་རྒྱ་ནག་གང་གི་ལུགས་སུ་བྱ་ཟེར། སློབ་དཔོན་གྱི་ཞལ་ནས། སྟོན་པ་རྒྱ་གར་དུ་བྱོན་པ་ཡིན་
པས་དེའི་ལུགས་སུ་བྱའོ་གསུངས། དེ་ལ་བཙན་པོས། བོད་ནག་པོ་ལ་དགའ་བ་རྣམས་དད་དུ་རེ་བ་ལགས་པས། ལྷའི་གཟུགས་བརྙན་བོད་དང་མཐུན་པར་འཚལ་ཞུས་པས། སློབ་དཔོན་གྱིས། འོ་ན་བོད་འབངས་ཀུན་སྡུས་ཤིག་གསུངས་པ་ལྟར་བྱས་ནས། ཕོ་ལ་མཚར་བ་ཁུ་སྟག་ཚབ་ལ་དཔེ་བྱས་རྟེན་གྱི་གཙོ་བོ་སེམས་ཉིད་ངལ་བསོ་བཞེངས། མོ་ལ་མཚར་བ་ཅོག་རོ་བཟའ་བུ་ཆུང་ལ་དཔེ་བྱས་འོད་ཟེར་ཅན་མ་ཕྱག་བཞི་པ་བཞེངས། དེ་བཞིན་དུ་ཅོག་རོ་བཟའ་བུ་སྨན་ལ་དཔེ་བྱས་རྗེ་བཙུན་སྒྲོལ་མ་ཞབས་ལ་ཕྱག་གསོལ་བ་བཞེངས། ཐང་བཟང་སྟག་ལོ་ལ་དཔེ་བྱས་ཏེ་སྤྱན་རས་གཟིགས་ཡི་གེ་དྲུག་པ། རྨ་གཡས་སྐོར་ལ་དཔེ་བྱས་ནས་རྟ་མགྲིན་ཞབས་བཞི་ཕྱག་བརྒྱད་པ་སྒྱུ་འཕྲུལ་གྱི་ལུགས་ལྟར་བཞེངས་ནས་སྒོ་སྲུང་གི་ཚུལ་དུ་བྱས། དེ་རྣམས་གྲུབ་ཕྲལ་བཙན་པོས་བཟོ་བོ་ལ་བྱ་དགའ་གཏང་བའི་སྟ་གོན་བྱས་པ་ན། བཟོ་བོ་གར་སོང་མ་བྱུང་བས་སྤྲུལ་པ་ཡིན་པར་རྩོད་པ་བྲལ། དེའི་ཚེ་སློབ་དཔོན་གྱིས་མངའ་གསོལ་མཛད་པའི་ནུབ་མོ་ཨཱརྱ་པ་ལོའི་ཡང་ཐོག་ཏུ་འོད་ཟེར་ཉི་མ་ཤར་བ་ལྟར་བྱུང་བ། དེ་ཅི་ཡིན་ཞུས་པས། དེ་ནི་བོད་ལ་ཨ་མི་དེ་ཝས་དགོངས་པའི་རྟགས་ཡིན་པས། ཡང་ཐོག་ཏུ་ལྷ་ཁང་བྱ་དགོས་པར་ལུང་བསྟན་པས་སྟེང་དུ་སྣང་བ་མཐའ་ཡས་གཙོ་འཁོར་ལྔ་བཞེངས། དེ་བཞིན་དུ་ནུབ་ཀྱི་གློ་འབུར་འཇམ་
དཔལ་སྨྲ་སེང་གཙོ་བོར་བཞུགས་པའི་རིགས་གསུམ་མགོན་པོ་དང༌། མེས་དབོན་རྣམ་གསུམ། བཙན་པོའི་སྐུ་རུས་ལ་ཙནྡན། གུ་གུལ་གྱི་ཤ །དངུལ་གྱི་པགས་པས་གཡོགས་ཟེར་བ་སྣང༌། སྒོ་རྒྱ་ཅན་དུ་ཕྲ་མེན་མཆོད་རྟེན། བཙན་པོས་སློབ་དཔོན་ཆེན་པོར་རྟ་མགྲིན་སྒྲུབ་པའི་ལུང་ཞུས་ནས་བསྒྲུབས་པས། ཟླ་བ་ཕྱེད་ན་རྟ་མགྲིན་གྱི་རྟ་སྐད་ལན་གསུམ་བཏོན་པ་འཛམ་བུའི་གླིང་སུམ་གཉིས་སུ་ཐོས་ཏེ། རྒྱལ་པོའི་ཆབ་སྲིད་ཀྱང་དེ་ཙམ་མོ་གསུངས་པ་ལྟར། གོ་ནས་སྐབས་ཀྱི་རྟེན་འབྲེལ་མཆོད་རྟེན་དཀར་པོ་གཙོ་བོར་གྱུར་པའི་ནང་གཟུངས་ལ་དམིགས་ཏེ་རྒྱ་གར་གྱི་མཆོད་རྟེན་པདྨའི་སྙིང་པོ་ཅན་ནས་དེ་བཞིན་གཤེགས་པའི་རིང་བསྲེལ་སྤྱན་དྲངས་པའི་ཕྱིར་སྤྲུལ་པའི་དམག་བྱེ་བ་ཕྲག་བཅུ་བཞི་བཏང་ནས་ཆུ་བོ་གངྒཱ་ཚུན་ཆད་དབང་དུ་བསྡུས་ནས་རྡོ་རིང་བསླངས་པས་བཙན་པོས་སྤྲུལ་པར་ཡིད་ཆེས། ཕྱི་ནས་དད་པ་དང་བསོད་ནམས་ལ་མངོན་པར་འདུན་པ་དག་གིས་གསར་དུ་བཞེངས་པ་རྣམས་ནི་རང་རང་གི་མངོན་རྟོགས་ཀྱིས་གསལ་ལ། སྔགས་ཀྱི་སྡེ་སྣོད་ནི་རྣམ་པར་འཁྱམས་བཞིན་དུ་བླ་མེད་ཀྱི་སྔགས་སྐུ་རྣམ་པར་ཤེས་པའི་ལྐོག་ཏུ་གྱུར་པའི་གསལ་འདེབས་ཙམ་འཚལ་ན་བདུད་རྩི་སྨན་སྒྲུབ་ཀྱི་བརྟེན་པའི་འཁོར་ལོ། བདུད་རྩི་རང་བྱུང༌། ཕྱོགས་བཅུ་ཁྲོ་བོ། རྟ་མགྲིན་དབང༌། སྐུ་གདུང་འབར་བ། མཁའ་མཉམ་ཀློང༌། ཆེ་མཆོག་རྩ་བ། འཆི་
མེད་རྡོ་རྗེ་སྟེ་དཀྱིལ་འཁོར་བདུན་དང༌། སྦྱོར་བ་བརྒྱད་ཀྱི་ངེས་པ་རྫོགས་པའི་ཕོ་བྲང་ཉིད་དུ་བརྟག་ཅིང༌། དེའི་རྟེན་གཞལ་ཡས་ཁང་བློས་བླང་གི་ཚུལ་དང་ཉེ་བར་རྟ་མགྲིན་ལྕགས་རལ་ཅན། ཕྱག་རྡོར་དྲག་པོ་སུམ་སྒྲིལ་གཡོན་ངོས་སུ་རྟ་མགྲིན་ཡང་གསང་རྣམས་བཞུགས་པ་ལ་ཆོས་སྣང་བའི་སྒོ་དད་པ་བླ་ལྷག་ཏུ་བསྐྱེད་ནས། བྱང་ཆུབ་ཏུ་སེམས་བསྐྱེད་པ་དང༌། མཎྜལ་དང་ཡན་ལག་བདུན་པ། བསྔོ་བ་སྨོན་ལམ་ཁྱད་པར་ཅན་སོགས་རང་རང་གི་དགེ་ཚོགས་ཐར་པ་ཆ་མཐུན་དུ་འགྱུར་བའི་བསག་སྦྱང་ལ་འབད་འཚལ། ཕྱག་འཚལ་བ་དང་མཆོད་ཅིང་བཤགས་པ་དང༌། །སོགས་དང༌། བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །སོགས་བརྗོད། སྐུ་གཉེར་བློ་གསལ་གྱི་ངོར་མ་ཧཱ་སནྡྷི་པ་ཨ་བྷ་ཡ་དྭཱི་པས་སོ། །གཏམ་ཚོགས་ལེའུ་སུམ་ཅུ་པའོ།། །།
གཏམ་ཚོགས་ལེའུ་སོ་གཅིག་པ། དཔལ་གྱི་བསམ་ཡས་མཆིམས་ཕུའི་གཏམ་ཀ་ལ་པིང་ཀའི་རོལ་མོ།
དཔལ་གྱི་བསམ་ཡས་མཆིམས་ཕུའི་གཏམ་ཀ་ལ་པིང་ཀའི་རོལ་མོ་ཞེས་བྱ་བ། མ་ཧཱ་གུ་རུ་ལ་ཕྱག་འཚལ་ལོ། །ཐུབ་པའི་མཛད་པ་མཐའ་མ་ནི། །རྫུས་སྐྱེས་སྟོན་པའི་སྔ་རོལ་ཏེ། །ཀུན་མཁྱེན་སངས་རྒྱས་པདྨ་སྐྱེས། །རྒྱ་གར་པཎ་ཆེན་ཞབས་ལ་འདུད། །དེ་ལ་དཔལ་གྱི་བསམ་ཡས་མཆིམས་ཕུའི་ལོ་རྒྱུས་ཅུང་ཟད་བརྗོད་ན། སྤྱིར་དད་པ་ནི་ཆོས་སྣང་བའི་སྒོ་ཡིན་ཏེ། ཇི་སྐད་དུ། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་
སྒྲོལ། །དད་པ་བདེ་ལེགས་གྲོང་ཁྱེར་མཚོན་བྱེད་ཡིན། །དད་པ་རྙོག་པ་མེད་ཅིང་སེམས་དང་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་པ་ལྟར། དད་པ་མེད་ན་དཀར་པོའི་ཆོས་རྣམས་འཕེལ་བར་མི་འགྱུར་ཞིང༌། གནས་ལ་ངེས་ཤེས་མི་སྐྱེ་བས་བྱིན་རླབས་མི་འཇུག་པའི་ཕྱིར་དད་པ་བླ་ལྷག་ཏུ་བསྐྱེད་འཚལ། དེ་ལ་ལྷོ་འཛམ་བུའི་གླིང་འདིར་དཔའ་བོ་མཁའ་འགྲོ་འདུ་བའི་ཡུལ་ཆེན་ཉི་ཤུ་རྩ་བཞི་དང༌། གནས་སུམ་ཅུ་རྩ་གཉིས་ལ་སོགས་པ་བསམ་གྱིས་མི་ཁྱབ་པ་ཡོད་པའང་རྣམ་སྣང་གང་ཆེན་མཚོའི་ཐུགས་བསྐྱེད་ལས་གདོད་ནས་རང་བྱུང་དུ་གྲུབ་པ་སྟེ། དེ་ཡང་ས་ཚིགས་ཀྱི་ལྟེ་བ་བོད་གངས་ཅན་གྱི་ལྗོངས་འདིར་རིགས་གསུམ་སྒྱུ་འཕྲུལ་མེས་དབོན་རྣམ་གསུམ་གྱི་ཐུགས་བསྐྱེད་ལས་འགྲན་ཟླ་མེད་པའི་གཙུག་ལག་ཁང་ཆེན་པོ་གསུམ་ལ་གོས་དང་གོང་བའི་ཚུལ་དུ་འབྲེལ་པའི་སྒྲུབ་གནས་ཁྱད་པར་ཅན་རེ་རེ་ཡོད་པ་ལས། འདིར་གསུང་གི་དབེན་གནས་དཔལ་གྱི་བསམ་ཡས་མཆིམས་ཕུའི་ཡུལ་ལྗོངས་ཀྱི་བཀོད་པ་ནི། བཀའ་ཐང་ལས། མཆིམས་ཕུའི་ལུང་པ་པདྨ་ཁ་ཕྱེ་འདྲཿ ཞེས་པ་ལྟར་ཕྱི་ལྟར་དུ་པདྨའི་འདབ་མ་ཁ་བྱེ་བའི་དབྱིབས། ནང་ལྟར་དུ་རྡོ་རྗེ་ཕག་མོའི་ཆོས་འབྱུང་རྣམ་ཐར་སུམ་ལྡན། གསང་བ་རྡོ་རྗེ་བཙུན་མོའི་བྷ་གའི་དབྱིངས་སུ་བཞུགས་པའི་གནས་ཀྱི་ལྟེ་བ་རི་བོ་རྒྱལ་
མཚན་འདྲ་བའི་མགུལ་དུ་བྲག་དམར་ཀེའུ་ཚང་འདི་ཉིད་བཞུགས་པ་ཡིན་ཏེ། ཇི་སྐད་དུ། བསམ་ཡས་མཆིམས་ཕུའི་བྲག་དམར་ཀེའུ་ཚད་དུ༔ སྒྲུབ་ཆེན་བཀའ་བརྒྱད་གསང་སྔགས་དཀྱིལ་འཁོར་དུ༔ ལས་ཅན་རྒྱལ་པོ་རྗེ་འབངས་སྨིན་པར་མཛད༔ གསང་སྔགས་འབྲས་བུའི་ཐེག་པ་རྒྱས་པར་མཛད༔ ཅེས་པ་ལྟར་མངའ་བདག་ཚངས་པ་ལྷའི་མེ་ཏོག་ལ་སོགས་རྗེ་འབངས་ལས་ཅན་བརྒྱད་ལ་སངས་རྒྱས་གཉིས་པ་སློབ་དཔོན་ཆེན་པོས་བདེ་གཤེགས་འདུས་པའི་དཀྱིལ་འཁོར་ཞལ་ཕྱེ་ནས་སྨིན་བྱེད་ཀྱི་དབང་སྐུར་ཟབ་མོ་མཛད་པའི་ཚེ། རྗེས་འབངས་སོ་སོས་གསེར་སྲང་རེ་རེའི་མེ་ཏོག་དོར་བས་དབུས་ཆེ་མཆོག་ལ་མངའ་བདག་རྒྱལ་པོའི་མེ་ཏོག་བབས་ཤིང་ལྷག་པའི་ལྷར་བཟུང་ནས་བསྒྲུབས་པས་ས་ལམ་མཐོན་པོའི་ཏིང་ངེ་འཛིན་ཅིག་ཅར་དུ་བརྙེས། བཀའ་ཡང་དག་པའི་མཚན་མ་ཞེས་བྱ་བའི་བསྟན་བཅོས་ཀྱང་མཛད། གྲུབ་ཆེན་གཞན་སོ་སོས་ཀྱང་དངོས་གྲུབ་ཁྱད་པར་ཅན་ཐོབ་ཅིང་རྫུ་འཕྲུལ་ཡ་མ་ཟུང་ལ་མངའ་བརྙེས། ཡེ་ཤེས་ཕབ་པའི་ཚེ་ས་རྡོ་རི་བྲག་ཐམས་ཅད་འགུལ་ཞིང་བྲག་ཅན་ཁྲོ་བོ་ཞེས་པ། ཆེ་མཆོག་གི་རང་བྱོན་དུ་གྱུར། ཡེ་ཤེས་ཀྱི་འཁོར་ལོ་སྟེང་གི་བྲག་ལོགས་ལ་བསྟིམས་པས་རྡོས་བཅས་སྤྲུལ་པའི་སྐུ་རང་བྱོན་གྱི་རྣམ་པ་དཔག་ཏུ་མེད་པ་བྱོན། རྗེ་འབངས་ལས་ཅན་རྣམས་ལ་གནས་མཆོག་ཁྱད་པར་ཅན་འདིར་ཕྱེད་ལོ་གསུམ་གྱི་བར་ཆོས་ཀྱི་འཁོར་ལོ་བསྐོར་བའི་ཚེ། རྒྱལ་པོའི་སྲས་མོ་ལྷ་ལྕམ་པདྨ་གསལ་
སྲིན་ཕོ་ལངས་ཀྱིས་གཤེགས་པའི་ཕུང་པོ་ལ་རྣམ་ཤེས་མངོན་སུམ་པར་བཀུག་ནས་མཁའ་འགྲོ་སྙིག་ཏིག་གི་དབང་སྐུར་གཏད་རྒྱ་དང་བཅས་མཛད་པས་ཕྱི་རབས་ཀྱི་འགྲོ་བ་ལ་ཕན་པ་ཤིན་ཏུ་ཆེ། ཕུང་པོ་བཞག་སའི་རྡོ་ཆོས་འབྱུང་འདྲ་བར་རྗེས་ཤུལ་ལམ་མེ་བ་འདི་ཡང་བྱུང༌། མ་འོངས་པའི་སེམས་ཅན་བསོད་ནམས་གསོག་པའི་ཞིང་དུ་དགོངས་ནས་རྒྱ་མཚོའི་གླིང་གི་རིན་པོ་ཆེ་ལྟ་བུའི་བྱེ་མ་ཨ་གྲོང་ལ་བཻ་རོ་ཙ་ན་དང༌། ཐ་མི་མགོན་བརྩོན་གྱིས་ཕྱག་བཟོ་མཛད་པའི་སྐུ་ཚབ་རིན་པོ་ཆེ་མཐོང་བ་དོན་ལྡན་གཙོ་འཁོར་གསུམ་བཟོ་བཀོད་དང་གཟི་བྱིན་དཔེ་ཟླས་བསྐྲུན་དུ་མེད་པར་ཡེ་ཤེས་ཀྱི་འཁོར་ལོར་བཅུག་ནས་མཐོང་གྲོལ་ཆེན་པོར་མཛད། བྱིན་རླབས་ཤིན་ཏུ་ཆེ་བས་གནས་གསུམ་མཁའ་འགྲོ་འདུ་ཞིང་རྒྱུན་པར་མི་མ་ཡིན་དང་མཁའ་འགྲོ་སྡེ་ལྔས་བསྐོར་བ་བྱེད་ཅིང་མ་མཱ་ཥ་ཥཱ་ཤཾ་ཤཱཾ་ཞེས་པའི་བརྡའ་སྐད་མངོན་སུམ་དུ་སྒྲོག་པ་ལས་ཅན་གྱིས་མཐོང༌། དུས་དེའི་ཚེ་བོད་ཀྱི་ལྷ་སྲིན་རྣམས་ནག་ཕྱོགས་པར་ཡོད་པས་སློབ་དཔོན་ཆེན་པོའི་སྐུ་ལ་ཐོབ་ཙམ་པའི་ཕྱིར་རྫ་རི་ཆེན་པོ་བསྙིལ་བ་ལ་ལྟ་སྟངས་མཛད་ཅིང་ཧཱུྃ་སྒྲས་གྱེན་དུ་གཟིར་བས་རྫ་རྣམས་ཉིལ་འཕྲོ་བསྡད་ཅིང་ཡི་གེ་ཧཱུྃ་གི་རྣམ་པར་གྱུར། ཕ་ཝང་ལ་འདམ་ལྟར་བརྫིས་པས་ཞབས་རྗེས་གྲངས་མེད་པ་བྱུང༌། དེ་དང་ཉེ་བར་བྲག་ཅན་ལ་ཚེ་བུམ་རང་བྱུང་དུ་འཁྲུངས་པ་ནས་ཚེ་ཆུའི་རྒྱུན་འབེབ་པར་མཛད། ཀླུ་འདུལ་ཕུག་པར་བྱ་ཁྱུང་དུ་སྤྲུལ་ནས་བོད་ལ་གནོད་པའི་ས་བདག་
གདུག་པ་ཅན་རྣམས་བརྟུལ། བློན་པོ་མགུལ་དུ་ཟླ་བ་གསུམ་བཞུགས་པས་རྗེ་འབངས་ཉེར་ལྔའི་སྒྲུབ་ཕུག་ཀྱང་ཡོད། དགེའུ་འོག་ཏུ་རྫུ་འཕྲུལ་གྱིས་ཞབས་རྗེས་འདོམ་དོ་ཙམ་དང་དབུ་དང་ཕྱག་འཁར་གྱི་རྗེས་འདབ་ལ་རྒྱབ་པ་ལྟར་བཞག་ཅིང་ལྷ་སྲས་རྗེ་འབངས་ལ་བླ་མ་དགོངས་འདུས་གསུངས། གཏེར་ཁ་ཆེན་པོ་གྲངས་མེད་པ་རྒྱས་བཏབ་ཅིང་གནས་རི་ཐམས་ཅད་རང་བྱོན་གྱི་བཀོད་པ་འབའ་ཞིག་ཏུ་བྱིན་གྱིས་བརླབས། དེ་བཞིན་དུ་རྨ་བན་རིན་ཆེན་མཆོག་གིས་ཕ་ཝང་ཟན་ལྟར་བཅད་པ་དང༌། ཤུད་བུས་ཆུ་བོའི་རྒྱུན་གྱེན་དུ་དྲངས་པའི་རྗེས་ཤུལ། ཉང་བན་གྱི་སྒྲུབ་ཕུག་དང་དེའི་འོག་ཏུ་ཆོས་རྒྱལ་གྱི་ཕུག་པ། གཡས་རིའི་རྒྱུད་ལ་རྡོ་རྗེ་ཕག་མོ་རང་བྱོན་གྱི་ཐུགས་ཀར་འཚོ་རྒྱལ་གྱིས་ལོ་བཅུ་གཉིས་སྒྲུབ་པ་མཛད་པའི་གཟིམ་ཕུག་དང༌། གསང་གནས་ན་བསིལ་བའི་ཚལ་དང་མཚུངས་པའི་དུར་ཁྲོད་ཆེན་པོ་སྟེ་ཕུང་པོ་ཚོགས་སུ་སྦྱངས་པ་རྣམས་ངན་སོང་གི་སྐྱེ་སྒོ་ཁེགས་པའི་ཚུལ་ཡང༌། ཞིང་སྐྱོང་དུར་ཁྲོད་བདག་པོས་ནངས་པ་ཡོད་པའི་བམ་རོ་འཁྱེར་བ་མངོན་སུམ་དུ་མཐོང་བས་ཤིན་ཏུ་གཉན་ཞིང་དཀྱིལ་འཁོར་མུ་རན་སྐྱོང་བ་རྣམས་ཀྱིས་ཚོགས་འཁོར་དུ་ལོངས་སྤྱོད་པར་གདོན་མི་ཟ་ལ། དབེན་རྩར་མཆོག་དབྱངས་ཀྱིས་རྟ་མགྲིན་གྲུབ་པའི་གཟིམ་ཕུག་དང༌། གཡོན་གྱི་རི་རྒྱུད་ལ་ཇོ་མོ་འཚོ་རྒྱལ་གྱི་གཟིམ་ཕུག་རིང་མོ་ཕུག་ཅེས་བྱ་བ་དང༌། དེའི་གཤམ་དུ་རྒྱལ་བ་གཉིས་པ་ཀུན་མཁྱེན་ངག་གི་
དབང་པོས་ལོ་གསུམ་སྒྲུབ་པ་མཛད་ཅིང་དེར་རྩ་གསུམ་གྱི་ལྷ་ཚོགས་ཏིལ་གྱི་གོང་བུ་ཁ་བྱེ་བ་ལྟར་ཞལ་གཟིགས་ནས་སྙིང་ཐིག་གི་གདམས་པ་མངོན་སུམ་བསྩལ་བའི་བྲག་དམར་རིང་མོ་ཅན་དང༌། སླན་ཆད་མཛད་པ་བརྟུལ་བའི་ཚེ་ཡང་གནས་གཞན་དུ་སྐྱེ་བ་ལེན་པ་ལས་འདིར་འཆི་བ་དགའ་བ་ཡིན་ཞེས་ས་ཆེན་པོ་འདི་གཡོ་བ་དང་བཅས་གཟུགས་སྐུའི་བཀོད་པ་བསྡུས་ལ་དེ་བཞིན་དུ་ཨ་ཙ་ར་ས་སྙིང་ཀྱང་གནས་འདིར་གཤེགས་པས་བི་མ་ལ་གྲོངས་པར་དོགས་པ་ཙམ་གྱི་རྟགས་མཚན་ཁྱད་པར་ཅན་བྱུང་ངོ༌། །མདོར་བསྡུ་ན་མཆོག་གཟིགས་ཀྱི་པཎ་གྲུབ་དུ་མས་ཉི་ཤུ་རྩ་བཞིའི་ཡུལ་དང་མཚུངས་པར་བསྔགས་པ་བརྗོད་ནས་ཞབས་ཀྱིས་བཅགས་པའི་ཚུལ་ཡང༌། བི་མ་ལ་དང་བེ་རོ། སྐ་ཅོག་ཞང་གསུམ། རྨ་གཉགས་གནུབས་གསུམ་ལ་སོགས་པ་དང༌། བསྟན་པ་ཕྱི་དར་གྱི་མགོར་ཇོ་བོ་ཨ་ཏི་ཤས་ཀྱང་རེ་ཞིག་བཞུགས་ཤིང་ཉེ་གནས་རྣལ་འབྱོར་པ་ལ་གསང་སྔགས་ཀྱི་ཐབས་ལམ་ཟབ་མོ་ལྐོག་ཆོས་སུ་བསྟན། ལོ་ཙཱ་བ་རྒྱ་བརྩོན་སེང་དང༌། ནག་ཚོ་ལོ་ཙཱ་བ། རོག་ཤཱཀྱ་འབྱུང་གནས། ལྷ་རྗེ་ཟུར་པོ་ཆེ། ཉང་ཤ་བ་ཅན་ལ་སོགས་མཆོག་གཟིགས་དུ་མས་སྒྲུབ་པའི་རྒྱལ་མཚན་བཙུགས། རྒྱལ་བ་ཀློང་ཆེན་རབ་འབྱམས། ཀརྨ་པ་རང་བྱུང་རྡོ་རྗེ། མངའ་རིས་པ་པདྨ་དབང་རྒྱལ། ཀུན་མཁྱེན་པྲཛྙཱ་རསྨི་སྟེ། མཐོང་ལམ་བརྙེས་ཤིང་རང་གཞན་གྱི་གྲུབ་མཐའ་རྒྱ་
མཚོའི་ཕ་རོལ་ཏུ་སོན་པ་རྣམས་ཀྱིས་ཀྱང་ཆོས་གཏེར་དང་རྫས་གཏེར་རྩོད་མེད་དུ་སྤྱན་དྲངས། ཡུལ་ཆེན་ཉི་ཤུ་རྩ་བཞིའི་ངོ་བོ་ཉིད་ཡིན་པས་ན། བཀའ་ཐང་ལས། བསམ་ཡས་མཆིམས་ཕུ་ཡར་ཀླུངས་ཤེལ་གྱི་བྲག༔ ཡེར་པ་ཟླ་བ་ཕུག་གི་གནས་འདི་གསུམ༔ བསམ་ཡས་ཁྲ་འབྲུག་ར་སའི་གཙུག་ལག་དང་༔ ཟུང་དུ་འབྲེལ་བའི་གནས་ཆེན་སྒྲུབ་པའི་གནས༔ ཞིང་མཆོག་དམ་པ་ཀུན་ལའང་དེ་ལས་མེད༔ འདི་གསུམ་གནས་ན་མཆོག་ཐུན་གང་བསྒྲུབ་པ༔ སྒྲུབ་པ་བྱས་ན་མི་འགྲུབ་གང་ཡང་མེད༔ གནས་འབྲེལ་ཙམ་ཡང་རིག་འཛིན་གྲལ་ལ་ཚུད༔ ཕུང་པོ་བོར་ནས་མཁའ་སྤྱོད་གནས་སུ་འགྲོ༔ ཞེས་གསུངས་པ་ལྟར་གནས་འདིར་བསྒྲུབ་པ་བྱས་ན་མཆོག་གི་དངོས་གྲུབ་བརྙེས་པ་གདོན་མི་ཟ་ཞིང༌། གནས་འབྲེལ་དང་ཕྱག་བསྐོར་ཚོགས་སྐོང་དང་མཆོད་འབུལ། ཐ་ན་ཕུང་པོ་བོར་བ་ལ་ཡང་ཡོན་ཏན་བསམ་གྱིས་མི་ཁྱབ་པ་དང་ལྡན་པས་སྒོ་དུ་མ་ནས་ཚོགས་གསོག་སྒྲིབ་སྦྱོང་དང་འབྲེལ་བར་བསྔོ་བ་སྨོན་ལམ་གྱིས་རྒྱས་འདེབས་ཡང་དག་མཛད་འཚལ། ཕྱག་འཚལ་བ་དང་མཆོད་ཅིང་སོགས་དང༌། ལྷ་ཡང་དུས་སུ་ཆར་འབེབས་ཤིང་སོགས་བརྗོད། ཅེས་པའང་ཚེའི་རིག་བྱེད་པ་ཆུ་སྐྱེས་མིང་ཅན་གྱི་ངོར་རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་སོ་གཅིག་པའོ།། །།
གཏམ་ཚོགས་ལེའུ་སོ་གཉིས་པ། བསམ་ཡས་གཙུག་ལག་ཁང་ལ་བརྟན་བཞུགས་གསོལ་བའི་གཏམ་འཕྲུལ་དགའི་རྣ་རྒྱན།
བསམ་ཡས་གཙུག་ལག་ཁང་ལ་དངུལ་དཀར་ཞུན་མ་ཐུར་སྲང་བརྒྱ་ཕྲག་ལྔ་དང་གསེར་རྡོ་ཚད་གཉིས་ལས་བསྐྲུན་པའི་མཆོད་སྡོང་ཕུལ་ནས་བརྟན་བཞུགས་གསོལ་བའི་གཏམ་འཕྲུལ་དགའི་རྣ་རྒྱན་ཅེས་བྱ་བ། གང་ཞིག་སྟོབས་བཅུ་མངའ་རྣམས་ཀྱི། །མཚན་གྱི་གདེངས་ཀ་རྣ་ལུང་དུ༌། །དཔྱངས་པའི་རིན་ཐང་མི་བསྐྱེད་ན། །བསྟི་སྟང་བསོད་ནམས་གང་གིས་བགྲང༌། །བསྐལ་བཟང་རྣམ་འདྲེན་ཡོངས་ཀྱི་ཐུགས་རྗེའི་རང་གཟུགས་ལྷ་སྲས་ཁྲི་སྲོང་ལྡེའུ་བཙན་གྱི་སྟོང་ཉིད་སྙིང་རྗེ་ནོར་བུའི་ཏོག་རི་ཁ་བ་ཅན་གྱི་གཙུག་ཏོར་དུ་མངོན་པར་གསལ་བར་དཔལ་བསམ་ཡས་ལྷུན་གྱིས་གྲུབ་པའི་རྟེན་གསུམ་དག་གི་ཡེ་ཤེས་སེམས་དཔའི་རང་བཞིན་ནི། ཐོག་མ་མེད་པའི་དུས་ནས་མངོན་པར་བྱང་ཆུབ་ཀྱང་སྤྲུལ་པའི་སྐུ་སྒྱུ་མ་ལྟ་བུས་སེམས་ཅན་གྱི་ཁམས་རྒྱ་མཚོ་ལམ་བདེན་འདུས་བྱས་པ་ལ་བཀྲིས་ནས་འབྲས་བུའི་ངོ་བོ་ཉིད་དུ་མཛད་པའི་ཕྱིར། སློབ་པ་ལམ་གྱི་མངོན་པར་རྟོགས་པ་ལ་ཆེ་ཐང་དུ་མཛད་ནས་བསྡུ་བའི་དངོས་པོ་བཞི་དང༌། ཕྱིན་དྲུག་གི་ལང་ཚོ་དུས་ལས་ཡོལ་བ་མེད་པའི་ཚུལ་སྟོན་ཅིང༌། འདོད་པའི་བསོད་ནམས་དང༌། སོ་སོར་སྐྱེ་བའི་ཉོན་མོངས་པའི་མཐའ་གཉིས་ལས་བརྒལ། མངོན་པར་ཤེས་པ་དང༌། ཡེ་ཤེས་དང༌། རིག་པའི་བདག་ཉིད་དུ་མྱ་ངན་ལས་འདའ་བའི་མིག་དང་ཡེ་ཤེས་མངོན་དུ་བསྐྱེད་ནས་འཇིག་ཚོགས་ལ་བལྟ་བའི་རིའི་རྩེ་མོ་ནི་བཤིག །ཆོས་ཀྱི་མིག་རྡུལ་བྲལ་འཕགས་པའི་ལམ་ཡན་ལག་བརྒྱད་ལ་བརྟེན་གོམས་རྟག་ཏུ་མཛད་
ནས་རྡོ་རྗེ་གདན་དོག་པོར་བྱེད་པའི་སངས་རྒྱས་རྣམས་ཀྱི་ངོ་བོ་ཉིད་ལས་གཞན་དུ་མི་འགྱུར་བས། ཕུང་པོ་ལྔའི་ཉེར་ལེན་དང༌། སྡུག་བསྔལ་བདེན་པའི་ཆོས་ཉིད་ཀྱིས་བརྗི་བ་མ་ཡིན་ཀྱང༌། གཟུགས་ཀྱི་སྐུ་རྣམ་པ་ཐམས་ཅད་པའི་བདག་ཉིད་ཅན། མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་གིས་གཞན་རྒྱུད་ལ་བསོད་ནམས་ཀྱི་ཚོགས་རྒྱ་ཆེན་པོ་འདུ་བར་མཛད་པའི་ཐབས་ལ་མཁས་པའི་ཕྲིན་ལས་དང་དུ་བཞེས་པ་ནི། རྒྱལ་དང་རྒྱལ་སྲས་དམ་པའི་ཆོས་ཉིད་ཡིན་ན། ཞིང་གི་མཆོག་དཀོན་མཆོག་གསུམ་གྱི་ངོ་བོ་ཉིད་ལུས་ཅན་ཀུན་གྱི་མཐུན་སྣང་དུ་གྲུབ་པའི་སྐུ་མཆོག་མཐོང་ན་མི་མཐུན་པ་མེད་པ་གང་ཞིག་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པའི་འཇིག་རྟེན་དང༌། དགེ་སྦྱོང་བྲམ་ཟེ་དང་བཅས་པའི་སྐྱེ་དགུའི་མཆོད་སྡོང་གཅིག་ཏུ་ལྷམ་མེ། ལྷན་ནེ། ལྷང་ངེར་འཚོ་ཞིང་གཞེས་པའི་རྟེན་ཅིང་འབྲེལ་འབྱུང་གསར་བའི་སྒོ་ནི་འདི་ལྟ་སྟེ། རིགས་ལྔ་གང་ཆེན་མཚོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡེ་ཤེས་ཀྱི་རོལ་པ་ལས་སྤྲུལ་པས་འདུལ་བའི་གནས་འཛམ་བུའི་གླིང་འདིར་སྐུ་གསུང་ཐུགས་ཀྱི་སྤྲུལ་པ་ཆེན་པོ་གསུམ་དུ་སྣང་བས་འགྲོ་བ་ལ་ཕན་པ་མཛད་པ་ནི་ཆོས་ཉིད་རྫོགས་པ་ཆེན་པོའི་བྱིན་རླབས་ལས་རང་བྱུང་བའི་རྡོ་རྗེ་རིན་པོ་ཆེ་སྐྱེས་བུ་རྣམས་ཀྱི་ཕྱག་གང་བ་དང༌། བསྟན་པ་བུ་གཅིག་བྱིན་རླབས་ལས་རང་བྱུང་བའི་གླེགས་བམ་སོར་བཞི་པ་ཆོས་ཀྱི་རང་སྒྲ་སྒྲོགས་པ་དང༌།
གྲགས་ཆེན་གྱི་སྟོན་པ་བཅུ་གཉིས་པོའི་བྱིན་རླབས་ལས་རང་བྱུང་བའི་སྐུ་གཟུགས་ལུས་ཚད་དང་མཉམ་པ་སྟེ། གསུམ་ཀའང་རིན་པོ་ཆེ་བརྒྱ་རྩ་གཅིག་གི་རྒྱུ་ལས་སུས་ཀྱང་མ་བྱས་པར་རང་བྱུང་བས་གང་གིས་ཀྱང་མི་འཇིག་ཅིང༌། གནས་དུས་སོ་སོའི་སྐྱེས་བུའི་ལུས་ཚད་ཀྱི་ཆས་གཞལ་རུང་དུ་འཕེལ་འགྲིབ་བྱེད་པའི་རྫུ་འཕྲུལ་དང་ཡོན་ཏན་དཔག་ཏུ་མེད་པ་དེ་ཡང་སྐུ་དེ་གང་དང་འཕྲད་པས་ལུས་འོད་གསལ་དུ་གྲོལ་ཅིང༌། གསུང་རྟེན་གྱི་སྒྲ་ཐོས་པས་ངག་ལ་བྱིན་རླབས་འཇུག་པ། ཐུགས་རྟེན་གྱིས་ནད་ཞི་བ་ལ་སོགས་པའི་འདོད་པ་སྒྲུབ་ཅིང་ཐར་པ་ལ་སྦྱོར་བའི་ཕྲིན་ལས་ཅན། སྐུ་གསུང་ཐུགས་ཀྱི་བསྟན་པ་སོ་སོའི་དུས་སྐབས་དང་མཐུན་པར་གནས་འཕོ་བ་ལས། ད་ལྟ་ཐུགས་ཀྱི་བསྟན་པའི་དུས་རྡོ་རྗེ་ནི་རྡོ་རྗེ་གདན་གྱི་ནམ་མཁའ་དང༌། གླེགས་བམ་ནི་རབ་ཏུ་ཁྲོས་པ་དྲང་སྲོང་གི་ཕུག །སྐུ་ནི་སུམ་ཅུ་རྩ་གསུམ་པའི་ལྷའི་གཞལ་མེད་ཁང་པ་ལས་ལག་ན་རྡོ་རྗེའི་ཁང་པ་བརྩེགས་པའི་ཡང་ཐོག་ན་གནས་པས་བསྟན་པའི་བཙས་བྱེད་ཅིང༌། ལྷ་དང་མིའི་འདུ་བ་ཁྱད་པར་ཅན་གྱི་མཆོད་པའི་ཞིང་དང༌། སྤྲུལ་གཞི་བྱེད་པའི་རྟེན་འབྲེལ་གྱི་ཆོས་ཉིད་ལས་རང་བྱུང་བ་དཔལ་བསམ་ཡས་ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་བར་ཁང་གཡུ་གཅལ་འབར་བར་རིན་པོ་ཆེ་དངུལ་དཀར་ཞུན་མ་ཐུར་སྲང་བརྒྱ་ཕྲག་ལྔ་དང༌། ས་སྙིང་ཞོ་འཁོར་བརྒྱའི་གྲངས་ཀྱི་གཉིས་འཐུང་དབང་པོས་ཁུར་དུ་
བཟོད་པ་ལ་ནོར་བུའི་བྱེ་བྲག་རྣམ་པ་སྣ་ཚོགས་ཀྱིས་ཀུན་ནས་ཀུན་ཏུ་ཡོངས་སུ་སྤུད་པ་དེ་བཞིན་གཤེགས་པ་ཐམས་ཅད་ཀྱི་རྣམ་པ་ཐམས་ཅད་རྫོགས་པའི་མཆོད་སྡོང་ཟབ་ཞི་སྤྲོས་བྲལ་རྣམ་པ་ཀུན་གྱི་མཆོག་དང་ལྡན་པའི་རྟེན་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་བདག་ཉིད་ཅན། དེ་བཞིན་གཤེགས་པ་སྲས་དང་བཅས་པ་རྣམས་ཀྱི་རིང་བསྲེལ་རྣམ་པ་བཞིའི་བརྟེན་པས་ཕྱུར་བུར་གཏམས་པ་གང་ཞིག །སྟོབས་བཅུའི་མངའ་བདག་རང་གི་རིགས་ལས་འཁྲུངས་པ་དང་བཅས་པ་རྣམས་ཞིང་ཁམས་གཞན་དུ་གཟིགས་པ་ཡོལ་ཏེ། རི་ཁ་བ་ཅན་ན་གནས་པའི་རྒྱལ་བའི་བསྟན་པ་དང་སེམས་ཅན་གྱི་ཉེར་འཚོ་ཁོ་ནར་མོས་པ་མ་བྱོན་གྱི་བར་དུ་ལྷག་པར་གནས་པའི་དམ་བཅའི་རི་མོ་འདོད་པའི་ལྷ་སྡེ་དང་བཅས་པས་ཀྱང་བསུབ་ཏུ་མེད་པའི་རྟེན་ཅིང་འབྲེལ་འབྱུང་ཆེན་པོ་རྡོ་རྗེའི་ཆོས་བདུན་གྱི་རྣམ་པར་འཕྲུལ་པ་ཅན་དུ། ལྷམ་མེ། ལྷན་ནེར་བཞུགས་སུ་གསོལ་བའི་གོ་སྐབས་ཡངས་པར། དེང་ཕན་ཆད་མཆོད་པ་སྣ་ལྔ་ཁྲི་ཚར་གཅིག་དང༌། ཚོགས་ཀྱི་འཁོར་ལོ་དེ་སྙེད་ཀྱིས་ཐོག་དྲངས་པའི་བྱས་དང་བྱེད་འགྱུར་གྱི་དགེ་བའི་རྩ་བ་དང་བཅས་པ་གཅིག་ཏུ་བསྡོམས་ཏེ། མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་བསྔོ་ཞིང་དབུལ་བའི་ལྷག་བསམ་རྣམ་དག་གིས་ཐོག་དྲངས། སྒྲིབ་པ་ལྔ་དང༌། དགེ་རྩ་ཟད་པའི་རྒྱུ་བཞི་ལ་སོགས་ཀྱི་ཁ་ན་མ་ཐོ་བ་དང་མཛའ་བ་མ་ཡིན་པས། ཐབས་ཀྱི་
རྣམ་པར་ཆེ་བ་རིག་པ་འཛིན་པའི་སྡེ་སྣོད་ལ་དྲན་པ་ཉེ་བར་བཞག་ནས་དངོས་སྟ་ཉིན་གཉིས་པའི་ལྷག་གནས་ཆོ་གར་ལྡན་པ་ཉིན་ཞག་བདུན་གྱི་སྲིད་དུ་ཡེ་ཤེས་སེམས་དཔའ་དགུག་གཞུག་བཅིང་བ་བཅས་པའི་ཏིང་ངེ་འཛིན་གྱི་རྣམ་པར་འཕྲུལ་པས་སྣང་གྲག་རིག་པ་རྒྱལ་བ་འོད་མཚན་སྟོང་དུ་འབར་བའི་སྐུའི་དེ་ཁོ་ན་ཉིད་དང༌། དབྱངས་ཀྱི་དེ་ཁོ་ན་ཉིད་དང༌། ཡེ་ཤེས་ཀྱི་དེ་ཁོ་ན་ཉིད་ལ་གཅིག་ཏུ་བསམ་གཏན་པས་ཉེ་བར་བསྙེན་ཅིང་བསྒྲུབས་པའི་གཏོར་བླུགས་ཀྱི་ཆུ་རྒྱུན་རྗེས་འབྲང་རིག་པའི་དབང་ལྔ་དང༌། མཆོག་ཏུ་གསང་བ་ཆེན་པོའི་བྱང་ཆུབ་སེམས་ཀྱི་བདུད་རྩི། རྡོ་རྗེའི་དམ་ཚིག་ཆེན་པོ་གསུམ་པའི་དབང་རིན་པོ་ཆེ་རྣམ་བཅས་རྣམ་མེད་ཀྱི་དཔེའི་ཡེ་ཤེས་བཞི་ཚན་བཞིའི་ཕྱི་ལོགས་པ་སྲིད་པ་ངོ་བོ་ཉིད་ཀྱི་རྣམ་པར་དག་པ་དེ་ཁོ་ན་ཉིད་ཀྱི་དབང་དང་བཅས་པའི་མཆོད་པའི་སྤྲིན་ཆེན་པོའི་ཁྱད་པར་ཡང༌། དད་པ་དང༌། འདུན་པ་དང༌། སྨོན་ལམ་དང༌། བྱང་ཆུབ་ཀྱི་སེམས་རིན་པོ་ཆེ་ཕ་རོལ་ཏུ་ཕྱིན་པ་དྲུག་གི་འཇུག་པ་ཅན། རྟེན་ཅིང་འབྲེལ་འབྱུང་གི་དངོས་པོའི་ཆོས་ཉིད་དུ་འབུལ་བ་དངོས་གཞིའི་ཆོ་གར་བྱས་ནས། ཇི་ལྟར་མངའ་གསོལ་བ་དང༌། ཇི་ལྟར་བཞུགས་སུ་གསོལ་བ་བཏབ་པའི་དོན་གང་ཡིན་པ་ལུས་ཅན་རྣམས་ལ་རྗེས་སུ་བརྩེ་བས་རང་གིར་མཛད་དུ་ཟིན་ན། བསོད་ནམས་མ་ཡིན་པས་གློ་བུར་དུ་བོས་པའི་བྱིན་ཟ་ལ་
སོགས་པའི་འབྱུང་བཞིའི་བྱེད་ལས་གཏུམ་པོའང་སྟོབས་བཅུའི་མངའ་བདག་རྣམས་ཀྱི་རང་དབང་དུ་གྱུར་པ་ཡིན་པས་མི་འཇིགས་པ་བཞིའི་ཕྲིན་ལས་ལ་སྙེལ་བ་སྤངས་པའི་བརྟུལ་ཞུགས་ཆེན་པོས་གཟུགས་ཀྱི་སྐུ་མཐོང་ན་མི་མཐུན་པ་མེད་ཅིང༌། དད་པས་མོས་པ་རྣམས་ལ་མངོན་པར་དགའ་བ། གང་ཞིག་རྡོ་རྗེའི་ཆོས་བདུན་གྱི་རང་བཞིན་ལས་གཞན་དུ་མ་གྱུར་པར་རྟག་པ་རྒྱུན་གྱི་འཁོར་ལོར་བརྟན་ནས། ལས་དང་ཉོན་མོངས་པ་ཁོ་ནའི་གཞན་དབང་དུ་གྱུར་ནས་གྲོང་ཁྱེར་ཆེན་པོ་བཞིའི་མུ་ཁྱུད་ལ་ཕྲུ་མ་བཏབ་པ་ལྟ་བུར་བཅགས་ཤིང་འཐས་པའི་འཇིག་རྟེན་གྱི་རྒུད་པ་མཐའ་དག་དྲུངས་ནས་ཕྱུང་སྟེ། རང་བཞིན་དུ་འབྱོར་པ་རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། དེ་དག་ཀྱང་འགྱེད་པ་དང་རྩོད་པ་མེད་པ། ནད་ཡམས་དང་མུ་གེ་མེད་པ། ཁོན་འཛིན་དང་ཕྲག་དོག་མེད་པ། རང་དབང་གི་དཔལ་གྱིས་ངོམས་པས་རྫོགས་ལྡན་གྱི་བསྐལ་པ་ལ་སྤྱོད་པའི་སྐབས་དབྱེ་བར་གསོལ་བ་འདེབས་ན་དེ་དེ་བཞིན་དུ་འགྲུབ་པར་མཛད་དུ་གསོལ། བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། སེམས་ཅན་རྣམས་ལ་དེ་འབྱུང་ཤོག །གཏམ་ཚོགས་ལེའུ་སོ་གཉིས་པའོ།། །།
གཏམ་ཚོགས་ལེའུ་སོ་གསུམ་པ། གུ་རུ་མཚོ་སྐྱེས་རྡོ་རྗེ་དང་ཞབས་རྗེས་རིན་པོ་ཆེའི་གཏམ།
གུ་རུ་མཚོ་སྐྱེས་རྡོ་རྗེ་དང་ཞབས་རྗེས་རིན་པོ་ཆེའི་གཏམ། ཐུབ་བསྟན་སྡེ་སྣོད་ཤིང་རྟ་ཞི་བ་འཚོ། །རྒྱལ་ཀུན་བརྟུལ་ཞུགས་གྲུབ་པ་པདྨ་འབྱུང༌། །བསྟན་གཉིས་མགྲོན་པོར་འབོད་པ་ཁྲི་སྲོང་རྗེ། །ལོ་པཎ་མཁས་གྲུབ་རྣམས་ལ་ཕྱག་འཚལ་ལོ། །དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ན་གྲགས་པའི་བ་དན་གྱི་མངོན་པར་མཐོ་བ་གུ་རུ་མཚོ་སྐྱེས་རྡོ་རྗེར་གྲགས་པའི་སྐུ་ཚབ་རིན་པོ་ཆེ་འདི་ཉིད་ཀྱི་ལོ་རྒྱུས་ནི། ལྷོ་རྒྱལ་འཛམ་བུའི་གླིང་ལ་ཡུལ་གླིང་ཆེན་པོ་ལྔ་ཡོད་པའི་ལྷོ་ཕྱོགས་རྒྱ་གར་ལ་གླིང་དགུ་ཡོད་དེ། ཤར་ན་བྷ་ལའི་གླིང༌། ལྷོ་ན་བྷེ་ཏའི་གླིང༌། ནུབ་ན་ཨོ་རྒྱན་གླིང༌། བྱང་ན་ཁ་ཆེའི་གླིང༌། ཤར་ལྷོ་ན་ཁང་བུའི་གླིང༌། ལྷོ་ནུབ་ན་ཟངས་གླིང༌། ནུབ་བྱང་ན་རླུང་གླིང༌། བྱང་ཤར་ན་ཀཱ་མ་རཱུ་པའི་གླིང༌། དབུས་ན་རྡོ་རྗེ་གདན་རྣམས་ལས་ནུབ་ཕྱོགས་ཨོ་རྒྱན་དྷཱུ་མ་ཐཱ་ལའམ། འཕུར་འགྲོའི་རྒྱལ་ཁམས་ལ་དབང་བྱེད་པའི་རྒྱལ་པོ་ཨིནྡྲ་བྷོ་དྷི་ལ་སྲས་མེད་ནས་རྒྱལ་བུ་འབྱུང་བའི་སླད་དུ་དཀོར་མཛོད་ཐམས་ཅད་སྦྱིན་པར་བཏང༌། དེའི་བདེན་པས་རྒྱ་མཚོར་བགྲོད་པའི་རྟོག་པ་སྐྱེས་ནས་གཟིངས་ཀྱི་ཡོ་བྱད་རྔོ་ཐོགས་པར་བྱས། བློན་པོ་ཏྲིག་ན་འཛིན་དང་ལྷན་ཅིག་སོང་བ་ལས། ཡིད་བཞིན་གྱི་ནོར་བུ་རིན་པོ་ཆེས་སྔོན་བསུས་ནས། བུ་སྐལ་གྱི་མཆོག་ཏུ་སངས་རྒྱས་སྣང་བ་མཐའ་ཡས་མངོན་སུམ་པ་གུ་རུ་མཚོ་སྐྱེས་རྡོ་རྗེ་པདྨའི་གེ་སར་ལ་བྱོན་པ་སྙེད་ནས་ཕོ་བྲང་དུ་སྤྱན་དྲངས་ཏེ་རྒྱལ་ཐབས་ལ་བཞག རྒྱལ་པོ་ཙནྡྲ་ཀུ་མ་ཤིའི་བུ་མོ་འོད་འཆང་མ་དང་
ལྷན་ཅིག་དགའ་མགུར་སྤྱོད་པ་ལས། རྡོ་རྗེ་སེམས་དཔའི་ལུང་གིས་རྒྱལ་སྲིད་ལ་སྙིང་པོ་མེད་པར་བསྐུལ་བས་ངེས་འབྱུང་ཆེན་པོ་སྐྱེས་ཏེ་འདོད་པའི་ཡོན་ཏན་ལ་སྤྲོ་བ་ལྷོད་པོར་སོང༌། རྒྱུ་དེས་སྤྱོད་པ་བརླང་པོའི་ཟོལ་གྱིས་རྒྱལ་ཁྲིམས་བཤིག་པས་བློན་པོའི་ཚོགས་ཀྱིས་ཡུལ་གྲུ་ཐ་དད་པར་སྤྱུག་པར་བགྲོས་པའི་ཚེ། ཨིནྡྲ་བོ་དྷི་མྱ་ངན་ཆེན་པོས་ནོན་ཀྱང་མི་སྤྱུག་པའི་རང་དབང་མེད་ནས་ཡིད་བཞིན་གྱི་ནོར་བུ་དབུལ་ཕོངས་སེལ་བའི་སླད་དུ་བསྐུར། དེའི་ཚེ་སྲས་ཀྱི་ཞལ་ནས། ཡབ་ཀྱི་ནོར་བུས་བདག་ལ་ཅི་ཞིག་བྱཿ འདི་ལ་ནོར་བུའི་ཟླ་བོ་མཛོད་ཅིག་གསུངས༔ ལྗགས་ཀྱི་མཆིལ་མ་རྒྱལ་པོའི་ཕྱག་ཏུ་བསྐུར༔ དེ་ཉིད་ཡིད་བཞིན་ནོར་བུ་བསམ་འཕེལ་གྱུརཿ ཅེས་སོ། །དེ་བཞིན་དུ། བཙུན་མོ་འོད་འཆང་མ་ནི་ཕྱི་ལ་འབྲེངསཿ དྲི་མེད་དྲི་བྲལ་ཁྱོད་ནི་གར་བཞུད་པཿ བདག་ཀྱང་ཁྱེད་དང་ལྷན་ཅིག་འགྲོ་བར་བགྱི༔ ཞེས་སྨྲེ་སྔགས་ཕྱུང་པས། རྒྱལ་ཆེན་སྡེ་བཞིས་ཕུལ་བའི་ལྷ་ཀླུ་མི་གསུམ་གྱི་ནོར་བུ་རིན་པོ་ཆེ་འདུས་པའི་ཕུང་པོ་ལ་ལྗགས་ཆབ་བྲན་པས་སྐུ་ཚབ་རིན་པོ་ཆེ་འདི་ཉིད་རང་བྱུང་དུ་བྱོན་པ་འོད་འཆང་མའི་དད་རྟེན་དུ་སྩལ་ནས་ཕོ་བྲང་ཐོར་ཅོག་དགུ་ལྡན་གྱི་རྟེན་གཙོར་བཞུགས། རེ་ཞིག་ནས་མཁའ་འགྲོ་མ་བྱེ་བ་ཕྲག་བརྒྱས་ཨཽ་ཌི་ཡ་ན་སྤྲིན་ནག་འདུ་བའི་དུར་ཁྲོད་དུ་སྤྱན་དྲངས་ནས་བསྟི་སྟང་དང༌། ཚོགས་ཀྱི་འཁོར་ལོའི་རྟེན་བྱེད་པ་ལས། རྗེ་བཙུན་འཇམ་དཔལ་
དབྱངས་ཀྱི་རྣམ་འཕྲུལ་ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན་གྱིས་ལུགས་གསུམ་མི་འགྱུར་བའི་རྡོ་རྗེ་གདན་དཔལ་བསམ་ཡས་ཆོས་འཁོར་ཆེན་པོ་བཞེང་བར་རྩོམ་པ་ན། དམར་པོ་རི་ལ་ཐང་ལྷས་ཐོག་ཕབ། ཤམ་པོས་ཕོ་བྲང་འཕང་ཐང་ཆུ་ལ་བསྐུར། ལྷ་སྲིན་རྣམས་ཀྱིས་མི་ངས་དང་རྩུབ་འགྱུར་ཆེན་པོ་བཏང་བས་བོད་རྨོངས་པ་རྣམས་འདི་ཆོས་བྱས་པས་ལན་ཟེར། གཙུག་ལག་ཁང་ཡང་བརྩིག་ཏུ་མ་སྟེར་བ་ལ། གནོད་སྦྱིན་མ་རུངས་པའི་གཉེན་པོར་སངས་རྒྱས་གཉིས་པ་སློབ་དཔོན་ཆེན་པོ་སྤྱན་དྲངས་པ་ལས། འབྱོན་ལམ་ནས་རིམ་པར་ལྷ་སྲིན་དམ་ལ་བཞག །མང་ཡུལ་གྱི་རི་བོ་དཔལ་འབར་ཕན་ཚུན་བརྗེས། ཁ་རག་གི་རིའི་དཀྱིལ་བཤགས། བསམ་ཡས་ཀྱི་ནེའུ་ཐང་དང་ནགས་ཚལ་ཕན་ཚུན་སྤོས། གསེག་མ་ནེའུ་གསེང་དུ་འགྱུར། ཕུ་ཆུའི་རྒྱུན་ཆེན་པོ་བཏོན། ལྷ་སྲིན་གདུག་པ་ཅན་འདའ་བར་མི་ནུས་པའི་དམ་འོག་ཏུ་བཞག །གཙུག་ལག་ཁང་གེགས་མེད་དུ་འབྱོངས། རབ་གནས་དང་མངའ་གསོལ་མཛད། གངས་རིའི་ཁྲོད་འདིར་རྒྱལ་བའི་བསྟན་པ་རིན་པོ་ཆེ་ཉི་ཟླ་ལྟར་གསལ་བའི་བདག་རྐྱེན་གཅིག་ཏུ་གྱུར་པས། ཕྱིས་ཨ་ཏི་ཤས་དཀོར་མཛོད་གླིང་གི་རྒྱ་དཔེ་གཟིགས་པ་ན། སྔོན་ཆད་བོད་དུ་བསྟན་པ་དར་བ་ཙམ་རྒྱ་གར་དུའང་མ་བྱུང༌། ཐེག་པ་ཆེན་པོའི་སྡེ་སྣོད་ལ་ཁོ་བོ་
ལས་མཁས་པ་མེད་སྙམ་སྟེ། རྒྱ་གར་ན་མ་གྲགས་པའི་དམ་ཆོས་བོད་དུ་སྣང་བས་སློབ་དཔོན་པདྨས་མཁའ་འགྲོའི་གསང་མཛོད་ནས་བླངས་པ་ཡིན་མཆི། ཐེག་པ་ཆེན་པོའི་གསང་སྔགས་འདི་ལ་མཐའ་ཡོད་ཡོད་མི་འདྲ་གསུང་ནས་ཐུགས་རྒྱལ་ཆག །བོད་ཀྱི་ཆོས་རྒྱལ་རྣམས་ལ་རྗེས་སུ་ཡི་རང་བ་ཕུལ། དེ་ལ་སློབ་དཔོན་ཆེན་པོ་བདུད་བློན་སོགས་མ་དག་པའི་སྣང་ངོར་རིང་པོར་མ་ཐོགས་པར་གཤེགས་པའི་ཚུལ་བསྟན་ཡང༌། དོན་གྱི་ཡུན་རིང་པོའི་བར་དུ་བྲག་ཕུག་ཆེན་པོ་བརྒྱད་དང༌། གངས་ཆེན་བཞི་ལ་སོགས་དབེན་པའི་གནས་མང་པོར་བཞུགས་ནས་སྒྲུབ་གནས་རྟེན་གསུམ་མང་པོ་བྱིན་གྱིས་བརླབས། གཏེར་ཁ་གྲངས་མེད་སྦས། བུམ་ཐང་དང་བྲག་ལོ་ཕྲང་སོགས་ལྷོ་མོན་ཕྱོགས་ལ་སྐུ་རྗེས་བརྒྱད་དང་བརྒྱད། ཕྱོགས་བཞིའི་བྲག་ལ་ཞབས་རྗེས། མཚོ་ཆེན་བཞི་ལ་ཕྱག་རྗེས་སོགས་རྫུ་འཕྲུལ་གྱི་བཀོད་པ་བགྲངས་པ་ལས་འདས་པ་བསྟན། མཐར་ལྷོ་ནུབ་སྲིན་ཡུལ་དུ་གཤེགས་ཁར་ཁྲ་འབྲུག་བྱམས་པ་མི་འགྱུར་གྱི་གཙུག་ལག་ཁང་དུ་ལྷ་སྲས་མུ་ཏིག་བཙན་པོ་དང༌། མཁའ་འགྲོ་ཡེ་ཤེས་འཚོ་རྒྱལ། བཙུན་མོ་དང་ཚུལ་མ་ལ་སོགས་པར་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་ཞལ་ཕྱེ་ནས་སྨིན་ཅིང་གྲོལ་བར་མཛད་པའི་ཚེ་དེ་དག་གིས་གསོལ་བ། ཉིད་ལྷོ་ནུབ་སྲིན་ཡུལ་དུ་གཤེགས་པ་ནི་བདག་ཅག་རྣམས་ཀྱིས་བཤོལ་དུ་མ་སྤོབས། ད་ནི་བདག་ཅག་
རྣམས་དང་མ་འོངས་པའི་དད་ལྡན་རྣམས་ལ་རྗེས་སུ་དགོངས་ནས་གུ་རུ་ཉིད་དང་དབྱེར་མ་མཆིས་པའི་སྐུ་ཚབ་ཀྱི་རྟེན་ཅིག་དགོས་ཞེས་ཞུས་པས། སྤྲིན་ནག་འདུ་བའི་དུར་ཁྲོད་ལ་སྡིགས་མཛུབ་གཏད་ནས་ཛ་ཧཱུྃ་ཧཱུྃ་གསུངས་པས་ལྷ་ལྕམ་མནྡཱ་ར་བ་མངོན་སུམ་དུ་བྱོན་ནས་སྐུ་ཚབ་རིན་པོ་ཆེ་འདི་ཉིད་ཕྱག་ཏུ་ཕུལ་བའི་ཚེ། ཉོན་ཅིག་ལྷ་མོའི་གཟུགས་ཅན་ཡིད་འོང་མ། ང་དང་མ་ཕྲད་མ་འོངས་སེམས་ཅན་རྣམས། མ་རིག་མུན་པའི་སྒྲོན་མེ་སྐུ་འདྲས་བྱེདཿ དེ་ལ་འདུན་ཞིང་མོས་གུས་སུས་བྱེད་པཿ འདོད་པ་ཀུན་ཚོགས་རིན་ཆེན་ཕུང་པོ་འདྲཿ ཞེས་སོགས་གསུངས་ནས་ཁྲ་འབྲུག་གི་ཁྱམས་སུ་སློབ་དཔོན་ང་འདྲ་མ་བཞེངས། ལྷ་སྲས་ལ་ཐུགས་ཤིན་ཏུ་བརྩེ་བས་རང་བྱུང་གི་སྤྲུལ་པའི་སྐུ་ཡིད་བཞིན་གྱི་ནོར་བུ་རིན་པོ་ཆེའི་རིན་ཐང་གི་དཔེ་བྱ་བར་མི་བཟོད་པའི་སྐུ་ཚབ་རིན་པོ་ཆེ་འདི་ཉིད་སྩལ། སླར་ལྷ་སྲས་ཉིད་ལ་ཡུམ་གྱིས་ཟས་ངན་སྦྱར་བའི་ཚེ་སྟེང་ཁང་སྙིང་མཛོད་སྨུག་པོར་སྦས་པ་སྤྲུལ་པའི་སྐུ་ཉང་ཉི་མ་འོད་ཟེར་གྱིས་གསང་གཏེར་དུ་སྤྱན་དྲངས། སྔོན་གྱི་སྨོན་ལམ་གྱི་དབང་ལས་མངའ་བདག་རྩེ་ལྡེའི་གདུང་རབས་རྣམས་ཀྱིས་རྟེན་སྐལ་དུ་ཐོབ་པ་ནས་བཟུང་རྒྱལ་བརྒྱུད་རིམ་པའི་འབྲལ་སྤང་རྟེན་དུ་བཞུགས་པ་དེ་ཆོས་རྗེ་དཀར་པོ་བ་སྣ་ཚོགས་རང་གྲོལ་གྱི་དུས་བསམ་ཡས་གཙུག་ལག་ཁང་གི་ཞབས་ཏོག་དང༌། ཞིག་གསོའི་བསྟི་སྟང་མ་ཐོབ་ལ་མངའ་རིས་གུང་ཐང་རྒྱལ་པོ་རྗེས་སུ་ཡི་རང་བ་ཐོབ་ནས། གནས་
རྟེན་གཉིས་ཡ་མི་བྲལ་བའི་ཐུགས་བསྐྱེད་རླབས་པོ་ཆེས་མངའ་རིས་ཁྱུང་རྫོང་དཀར་པོར་བཀའ་བརྒྱད་ཀྱི་དབང་ཡོན་དུ་ཕུལ། བཞུགས་ཁང་པདྨ་སྤུངས་པ་འདི་ཉིད་སྤྲུལ་པའི་བཟོ་བོའི་རྣམ་རིག་གིས་བསྐྲུན་པའི་ངོ་མཚར་གྱི་བྱེད་པ་དང་མཐུན་པའི་རྐྱེན་ལས། གནས་ཡུལ་འདིར་གུ་རུ་མཚོ་སྐྱེས་རྡོ་རྗེ་ཞེས་གྲགས་ལ། དེའང་རྣམ་པ་ཙམ་དུ་འབྱོན་བཞུད་ཀྱི་རྟེན་འབྲེལ་དལ་འགྲོའི་ཆབ་རྒྱུན་གྱིས་བྱེད་པ་ལྟར་སྣང་ཡང༌། ལས་ཅན་ལ་དལ་འགྲོའི་ཆབ་རྒྱུན་ཉུང་ཟད་ཙམ་གྱིས་གདན་འདྲོངས་པར་སླ་ཞིང༌། ཞལ་ཕྱོགས་ཀྱང་དེ་ཉིད་དུ་སྟོན་པ་ཞག་གྲངས་མང་པོར་བཞུགས་སུ་རུང་བ་མངོན་སུམ་ལ། སྡིག་ཏོ་ཅན་ལ་དེ་ལས་ལྡོག་པའི་མངོན་སུམ་ཚད་མས་བཟོ་གནས་སྤྲུལ་པའི་སྐུའི་དགེ་མཚན་གཏན་ལ་ཕེབས་པ་ཉིད་ཀྱང༌། སོ་སོའི་སྐྱེ་བོའི་རྣམ་རིག་གིས་བཟོ་རྩེད་ཀྱི་རྣམ་འཕྲུལ་དཔགས་པར་སེམས་པའི་གཟུ་ལུམས་ཅན་སྣེའུ་གདོང་པ་སོགས་ཀྱིས་བལ་པོའི་བཟོ་བོ་གསུམ་བཞུགས་ཁང་གི་འདྲ་ཅོག་ལེན་པར་མངགས་པ་ན། བུམ་ལྡིར་གྱི་གཟེར་གསུམ་བཀྲལ་མ་ཐག་སྣ་ཁྲག་གཟགས་ཏེ་འཇིག་རྟེན་ཕ་རོལ་ཏུ་སོང་བ་ནི་འདིའི་སྲུང་མ་ཁྱབ་འཇུག་རོག་ཏིའི་མཐུར་ངེས་པས་ཤིན་ཏུ་གཉན་པའང་ཡིན་ལ། དེ་ལྟ་བུའི་སྐུ་ཚབ་རིན་པོ་ཆེ་དང་འབྲེལ་མཚུངས་སུ་བཞུགས་པའི་ཞབས་རྗེས་རིན་པོ་ཆེ་འདི་ཉིད་ནི། སློབ་དཔོན་ཆེན་པོ་ཉིད་སྐུ་དངོས་ཀྱིས་བོད་འབངས་འདུལ་བའི་རྟེན་འབྲེལ་རྫོགས་
པ་དང༌། རྒྱལ་སྲས་མུ་ཏིག་བཙན་པོས་དབུ་མཛད་པའི་སྣ་བོ་ཆེ་ཐམས་ཅད་གུང་ཐང་ལ་ཁར་གཤེགས་སྐྱེལ་ལ་བྱོན་པའི་ཚེ། ལྷ་སྲས་ཉིད་ཀྱི་བཀའ་ཆེམས་ལས། བདག་གི་ཡབ་ཅིག་ཁྲི་སྲོང་ལྡེའུ་བཙན་དེ༔ སྲོང་བཙན་སྒམ་པོ་ལྟ་བུར་མ་གྱུར་པས༔ རྒྱལ་པོའི་དབང་ཕྱེད་བློན་པོའི་ལག་ཏུ་ཤོར༔ གོ་མ་ཆོད་ཀྱིས་ནོར་བ་བག་རེ་བྱུང་༔ ཐལ་ཟིན་ལྡོག་ཏུ་མེད་པའི་འགྱོད་པས་སླེབ༔ ད་ནི་གུ་རུ་གཤེགས་པའི་དུས་ཀྱང་བྱུང་༔ ཞེས་པ་ལ་སོགས་པའི་སྨྲེ་སྔགས་དང༌། སྤྱན་ཆབ་མང་པོ་ཟགས་ཤིང༌། ཕྱག་ལས་འཇུས་ནས་ཕྱག་སེན་ཞོག་ཅིག་ཞུས། །ཞབས་ལ་འཇུས་ནས་ཞབས་སེན་ཞོག་ཅིག་ཞུས། ཞེས་ཧ་ཅང་གདུང་བའི་ཚོར་བ་དྲག་པོ་ཉམས་སུ་མྱོང་བས་རྣམ་པར་ཤེས་པའི་ཚོགས་ཀྱང་རང་གི་མཚན་ཉིད་མི་འཛིན་པའི་ངང་དུ་བརྒྱལ་བ་ན། སློབ་དཔོན་ཆེན་པོས་ལྗགས་ཀྱི་མཆིལ་མ་གཏོར་ཏེ་དབང་པོ་ཡུལ་ལ་སད་པར་མཛད་པའི་མོད། གོར་མོའི་རྡོ་ལ་ཞབས་རྗེས་ཟུང་ཅིག་ལྷམ་མེར་བཞག་པ་ལས། ཅིག་ཤོས་དམར་པོ་རིར་ལོ་ཀི་ཤཱ་རའི་མདུན་ན་བཞུགས་ཤིང༌། ཤེས་རབ་ཞབས་ཀྱི་ཆ་འདིར་མིག་གི་དགའ་སྟོན་དུ་མངོན་སུམ་པ་ལ་དད་གུས་ཆེན་པོ་བསྐྱེད་པར་མཛད་ནས་ལུས་ལོངས་སྤྱོད་དགེ་བའི་ས་བོན་དང་བཅས་པའི་མཆོད་སྤྲིན་དངོས་སུ་ཅི་འབྱོར་དང༌། ཡིད་སྤྲུལ་ཀུན་ཏུ་བཟང་པོའི་མཆོད་པས་སྣ་དྲངས་ཏེ་ཡན་ལག་བདུན་པའི་ཚིག དོན་ལ་དྲན་པ་ཉེ་བར་གཞག་ནས་རང་རང་གི་
རྒྱུད་ལ་དགེ་བའི་ས་བོན་ཆེན་པོ་འདུ་བྱེད་ཅིང༌། སེམས་ཅན་གཞན་གྱི་དོན་དུ་སྨོན་ལམ་རྒྱ་ཆེན་པོ་མཛད་པར་ཞུ། ཕྱག་འཚལ་བ་དང་མཆོད་ཅིང་བཤགས་པ་དང༌། །སོགས་དང༌། ཕན་བདེ་འབྱུང་བའི་གནས་གཅིག་པུ། །སོགས་བརྗོད་པར་བྱའོ། །ཞེས་པའང་གཏམ་རྒྱུས་འདོད་རྒྱལ་བས་རྙོག་པ་ལུང་རིག་གཏན་ཚིགས་གསུམ་གྱིས་ལེགས་པར་བསལ་ཞིང༌། ངོ་མཚར་གྱི་གསལ་སྣང་གླེང་དུ་ཡོད་པའང་བསྣན་ནས་སངས་རྒྱས་གཉིས་པ་དེ་ཉིད་ཀྱི་བྱིན་རླབས་སྙིང་ལ་ཞུགས་པའི་རྗེས་འཇུག་རྫོགས་ཆེན་པ་རང་བྱུང་རྡོ་རྗེས་སྒྲ་བསྒྱུར་རྒྱ་གར་གླིང་དུ་ཡུད་ཙམ་ལ་སྨྲས་པའོ། །གཏམ་ཚོགས་ལེའུ་སོ་གསུམ་པའོ།། །།
གཏམ་ཚོགས་ལེའུ་སོ་བཞི་པ། གཞུ་སྟོད་གཏེར་སྒྲོམ་གྱི་གཏམ་མཁའ་འགྲོའི་གླུ་གར།
གཞུ་སྟོད་གཏེར་སྒྲོམ་གྱི་གཏམ་མཁའ་འགྲོའི་གླུ་གར་ཞེས་བྱ་བ། རང་བཞིན་རྣམ་པར་དག་པ་ཆོས་ཀྱི་དབྱིངས། །ཁ་སྦྱོར་ཡན་ལག་བདུན་ལྡན་ལོངས་སྤྱོད་རྫོགས། །མཛད་པ་བཅུ་གཉིས་སྟོན་པ་མཆོག་སྤྲུལ་ཡིན། །དེ་ལས་སྐྱེ་དང་བཟོ་དང་རང་བྱོན་དང༌། །གྲུ་གཟིངས་ཟམ་པ་རྡོས་བཅས་སྤྲུལ་པ་སྟེ། །འཛམ་བུའི་གླིང་འདིར་མཁའ་འགྲོ་འདུ་ངེས་པའི། །ཉེར་བཞིའི་ཡུལ་དང་གནས་ཆེན་སོ་གཉིས་སོགས། །གངས་བྲག་མཚོ་གླིང་ལྗོན་ཤིང་རྣམ་པ་ཅན། །རྡོས་བཅས་གཟུགས་ཀྱིས་ཡེ་ཤེས་བརྟེན་པ་ལས། །སངས་རྒྱས་གཉིས་པ་པདྨས་བྱིན་བརླབས་ཤིང༌། །མཁའ་འགྲོའི་གཙོ་མོ་ཡེ་ཤེས་འཚོ་རྒྱལ་ལ། །མན་ངག་མཁའ་འགྲོའི་སྙིང་ཏིག་
གསུངས་བའི་གནས། །གཞུ་སྟོད་གཏེར་སྒྲོམ་མཁའ་འགྲོའི་ཚོགས་ཁང་ནི། །ཕྱི་ལྟར་བྲག་རི་རྡོ་རྗེ་གནམ་སློང་དབྱིབས། །དངུལ་དཀར་མདངས་ཅན་རང་བྱོན་བསམ་མི་ཁྱབ། །ནང་ལྟར་ཡུལ་ཆེན་ཉེར་བཞིའི་བཀོད་པ་ཚང༌། །དཔའ་བོ་མཁའ་འགྲོའི་འདུ་བ་རྒྱུན་མི་འཆད། །ཆུ་བུར་མིག་གིས་སྤྱོད་ཡུལ་མ་ཡིན་ཡང༌། །ཀུན་བརྟགས་བྲག་རིའི་ཁང་བཟངས་ཡངས་པའི་ནང༌། །དག་པ་རབ་འབྱམས་གཞན་དབང་གཞལ་མེད་ཁང༌། །ཡོངས་གྲུབ་དཔའ་བོ་མཁའ་འགྲོའི་ཕྱག་རྒྱས་མཛེས། །དེ་དག་རྣམས་ཀྱིས་རྡོ་རྗེའི་གླུ་གར་ནི། །རང་སྣང་དག་པའི་རྩལ་ལ་འདི་ལྟར་ཤར། །ཨེ་མ་ཧོ། གང་ཟག་གིས་བློ་དང་གཏེར་སྒྲོམ་གྱི་བྲག །རང་རྒྱུད་ཅན་དུ་མཚུངས་དེ་སྲིད། །དད་པས་ཕྱག་དང་བསྐོར་བ་གྱིས། །ཚོགས་དག་མེ་མཆོད་ཀྱིས་ཐུགས་དམ་བསྐངས། །གསོལ་བ་བཏབ་ན་བྱིན་རླབས་འབྱུང༌། །དབང་བཞི་བླངས་ན་ཉམས་རྟོགས་སྐྱེ། །སྒྲུབ་པ་བྱས་ན་དངོས་གྲུབ་ཐོབ། །མ་མོ་དང་ཞིང་སྐྱོང་གནས་ངེས་པའི། །དུར་ཁྲོད་དུ་ཕུང་པོ་ཚོགས་སུ་ཕུལ། །བྱ་རྒོད་རྣམས་མཁའ་འགྲོའི་སྤྲུལ་པ་ཡིན། །ཚོགས་དཔོན་དུ་དུར་བྱ་ཀང་ཀའང་འབྱོན། །པདྨའི་བྱིན་རླབས་དང་རྫུ་འཕྲུལ་གྱི། །རྡོ་རྗེས་བདུད་སྡེའི་སྙིང་ཕུག་ཅིང༌། །རྣམ་པར་སྤྲུལ་པའི་ཆུ་ཚན་ལ། །ཁྲུས་ཚོག་བྱས་ན་སྡིག་སྒྲིབ་འདག །འདུ་བ་རྣམ་བཞིའི་ནད་རྣམས་བྱང༌། །དེ་ཀུན་རྫོབ་བདེན་པ་
བསླུ་མེད་ཡིན། །ད་དོན་དམ་བདེན་པ་བཤད་ཀྱིས་ཉོན། །ཕྱི་རོལ་ས་རྡོ་རི་བྲག་དང༌། །ཆུ་ཀླུང་ནགས་ཚལ་གནས་དང་ལྗོངས། །འགྲོ་བ་རིགས་དྲུག་དགྲ་དང་གཉེན། །ཕར་བལྟས་ཡུལ་དུ་སྣང་བ་ཀུན། །མིང་དང་གཟུགས་ཀྱི་ཕུང་པོ་ཡིན། །དེ་བཞིན་རྣ་བས་སྒྲ་ཐོས་ཤིང༌། །སྣ་ཡིས་དྲི་མྱོང་ལྕེ་ཡིས་རོ། །ལུས་ཀྱིས་རེག་བྱ་ལ་སོགས་པ། །དབང་ཤེས་ཡུལ་དང་ཡུལ་ཅན་གཉིས། །འདུས་ཏེ་རེག་པའི་རྐྱེན་དག་ལས། །དགའ་སྡུག་ཆགས་སྡང་བར་མ་ཡི། །ཚོར་བའི་ཕུང་པོ་སྐྱེ་བ་འདི། །སྒོམ་ཆེན་རྣམས་ཀྱིས་མཁྱེན་པར་མཛོད། །དེ་ལ་བརྟག་དཔྱད་བསམ་གཞིགས་དང༌། །སྤོང་ལེན་དགག་བསྒྲུབ་བློ་སྐྱེས་ལ། །འདུ་ཤེས་ཕུང་པོ་ཞེས་སུ་གྲགས། །དེ་ལ་དགེ་དང་མི་དགེ་ཡི། །ལས་ལམ་བག་ཆགས་འདུ་བྱེད་པས། །འདུ་བྱེད་ཕུང་པོ་ཞེས་སུ་གྲགས། །དེ་དག་ཀུན་གྱི་བདག་པོ་ནི། །རྣམ་པར་ཤེས་པ་ཉིད་ཡིན་པས། །རྣམ་ཤེས་ལས་འདས་ཡེ་ཤེས་ཀྱི། །མཉམ་གཞག་ཕུང་པོ་ལྔ་བྲལ་འདི། །ལྟ་བ་ཡིན་པ་མཁྱེན་པར་མཛོད། །དེ་ཉིད་ངང་དུ་ཚོགས་དྲུག་གི །རང་མདངས་མི་འགག་རྟོག་དཔྱོད་བྲལ། །སྤྱན་དང་མངོན་པར་ཤེས་པའི་རྒྱུ། །ཡང་དག་དྲན་པ་ཉེར་གཞག་ནི། །རྣམ་བྱང་སྐྱེ་བ་འཕགས་པའི་ལམ། །སྒོམ་པ་ཡིན་པ་མཁྱེན་པར་མཛོད། །མཉམ་གཞག་རྗེས་ཐོབ་གང་ལ་ཡང༌། །
གྲུབ་མཐའི་ཞེན་པས་མ་བཅིངས་པར། །བླང་དོར་མེད་པའི་རྒྱས་ཐེབས་ན། །ཚུལ་འཆོས་བྲལ་བའི་སྤྱོད་པ་ཡིན། །ཁྱད་པར་རྡོ་རྗེ་ཐེག་པའི་དོན། །དབང་བཞིའི་ལམ་དང་མ་འབྲེལ་ན། །མཐོང་ལམ་སྐྱེ་བ་མི་སྲིད་པས། །བདེན་པ་གཟིགས་པའི་བླ་མ་ཡིས། །མོས་གུས་ལྡན་པའི་སློབ་མ་དེ། །སྨིན་པའི་མཚན་ཉིད་འདི་ཡིན་ནོ། །དང་པོ་བུམ་པའི་དབང་བསྐུར་གྱིས། །རྣམ་ཤེས་རྡོ་རྗེ་མི་བསྐྱོད་པར། །སྨིན་ན་སེམས་རིག་ལ་ཤན་ཕྱེད། །གཉིས་པ་དབུ་རྒྱན་དབང་བསྐུར་གྱིས། །ཚོར་བ་རིན་ཆེན་འབྱུང་ལྡན་དུ། །སྨིན་ན་སྲེད་ལེན་རིག་པ་སྦྱོང༌། །གསུམ་པ་རྡོ་རྗེའི་དབང་བསྐུར་གྱིས། །འདུ་ཤེས་སྣང་བ་མཐའ་ཡས་སུ། །སྨིན་ན་ཀུན་འབྱུང་མ་རིག་གཅོད། །བཞི་པ་དྲིལ་བུའི་དབངབསྐུར་གྱིས། །འདུ་བྱེད་དོན་ཡོད་གྲུབ་པ་རུ། །སྨིན་ན་སྐྱེ་དང་སྲིད་པ་དག །ལྔ་པ་རྡོ་རྗེ་མིང་དབང་གིས། །མིང་གཟུགས་རྣམ་པར་སྣང་མཛད་དུ། །སྨིན་ན་རྒ་ཤིའི་འཁྲུལ་འཁོར་འཇོམས། །དེ་ལྟར་རིག་པའི་དབང་བསྐུར་ལྔ། །བསྐུར་ནས་ཐོབ་པར་གྱུར་པའི་ཚེ། །ཕུང་པོ་ལྔ་བྲལ་ཉམ་བཞག་དེ། །རྒྱུད་ལ་སྐྱེ་བར་མཁྱེན་པར་མཛོད། །དེ་བཞིན་ཁམས་ལྔ་ཡུམ་ལྔར་དག །སྐྱེ་མཆེད་སེམས་དཔའ་སེམས་མར་སྦྱོང་། །ཚངས་པའི་གནས་པ་བཞི་པོ་ནི། །ལས་དབང་ཁྲོ་བོ་ཁྲོ་མོར་སྨིན། །འདི་ལྟར་
གདན་གསུམ་ཚང་བའི་ལྷ། །ཁམས་དྲུག་ལྡན་པ་རྡོ་རྗེའི་ལུས། །ཀུན་ལ་ཡོངས་གྲུབ་ཆེན་པོ་རུ། །གནས་པ་རྡོ་རྗེའི་སློབ་དཔོན་གྱི། །བདག་པོའི་རྐྱེན་ཇོ་བོས། བོད་ན་སློབ་མ་སྣོད་ལྡན་རེ་ཙམ་འདུག་སྟེ། དབང་བསྐུར་ནུས་པའི་བླ་མ་མི་འདུག་གསུང་བ་དེ་དོན་འདིར་དགོངས། གྱིས་སད་དགོས་པས། །ངེས་པར་མཐོང་ལས་ཐོབ་པ་ཡི། །བླ་མ་བསྙེན་ཅིག་རིགས་ཀྱི་བུ། །དེ་ལས་མཆོག་དབང་གོང་མ་ནི། །ཤེས་སྒྲིབ་སྦྱོང་ཐབས་གཙོར་བྱེད་པས། །ཐབས་ལས་ཐབས་གྱུར་ཕོ་ཉའི་ལམ། །རྒྱལ་བ་རྡོ་རྗེ་འཆང་གིས་ཀྱང༌། །གསང་སྔགས་ཕྱི་པ་མན་ཆད་དུ། །སྦས་ཏེ་མངོན་དུ་མ་གསུངས་ན། །འདིར་ནི་བརྗོད་པའི་གནས་ཅི་ཞིག །ཁྱོད་ལ་མཁའ་འགྲོ་སྡེ་ལྔ་ཡི། །གཙོ་མོས་རྣམ་ཐར་སུམ་ལྡན་གྱི། །དཀྱིལ་འཁོར་ཟབ་མོར་ལྐོག་གྱུར་དུ། །དབང་བསྐུར་ཚེ་ན་གཟུང་འཛིན་གྱི། །མགོ་བོ་བཅད་དེ་རྦབ་ལ་སྒྲིལ། །མཁའ་འགྲོའི་བརྡ་ཡིག་དངོས་སུ་ཐོབ། །མངོན་སུམ་ཉིད་དུ་ས་གཡོས་དེ། །བྱང་ཆུབ་སེམས་དཔའ་ས་ནས་སར། །འཕར་པའི་མངོན་རྟོགས་ཡིན་སྲིད་ཀྱང༌། །འཇིག་རྟེན་རྨོངས་པས་ག་ལ་རིག །གཞུ་སྟོད་གཏེར་སྒྲོམ་ཕོ་བྲང་དུ། །དཔའ་བོ་དང་ནི་མཁའ་འགྲོའི་ཚོགས། །མེ་ཚོགས་སྟོང་རྩས་མཉེས་བྱས་པའི། །གདབ་ལན་རྡོ་རྗེའི་གླུ་གར་འདི། །རང་ལས་བྱུང་ཞིང་རང་ལ་ཤར། །སྣང་བ་དཔེ་ཆར་ཤར་བའི་གཏམ། །རྒྱལ་
སྲས་པདྨའི་བུ་བརྒྱུད་ཀྱི། །ཁྱད་ཆོས་ཡིན་ནོ་ཨེ་མ་ཧོ། །དད་ལྡན་གྱི་སློབ་བུ་དགེ་དོན་འཇིགས་མེད་འབངས་ཀྱི་ངོར་དགོངས་བརྒྱུད་ལས་ཡི་གེར་སྤེལ་ཞིང༌། རིགས་ཀྱི་བུ་རྒྱལ་སྲས་ཉིན་བྱེད་འོད་ཟེར་རིག་འཛིན་མཐུ་སྟོབས་གྲུབ་པའི་སྡེའི་ཆོས་སྐལ་དུ་རིག་འཛིན་འཇིགས་མེད་གླིང་པས་སོ། །གཏམ་ཚོགས་ལེའུ་སོ་བཞི་པའོ།། །།
གཏམ་ཚོགས་ལེའུ་སོ་ལྔ་པ། དབུ་རུ་ཞྭ་ལྷ་ཁང་གི་གཏམ་ཆོས་འབྱུང་གི་མེ་ཏོག
དབུ་རུ་ཞྭ་ལྷ་ཁང་གི་གཏམ་ཆོས་འབྱུང་གི་མེ་ཏོག་ཅེས་བྱ་བ། བསམ་གྱིས་མི་ཁྱབ་རྒྱལ་བའི་ཕྲིན་ལས་ཏེ། །སེམས་ཅན་ཁམས་ཀྱང་དེ་དང་མཚུངས་པར་ལྡན། །དེ་སྙེད་གདུལ་ལ་གཞན་དྲིན་མི་འཇོག་པ། །ཀུན་མཁྱེན་རྒྱལ་དང་དེ་སྲས་རྣམས་ལ་འདུད། །དེ་ལ་དབུ་རུ་ཞྭ་ལྷ་ཁང་གི་ལོ་རྒྱུས་ཅུང་ཟད་བརྗོད་ན། སྤྱིར་ཀུན་གཞིའི་ཁམས་ལ་རྟེན་འབྲེལ་བཅུ་གཉིས་སུ་ཤར་བ་ནི་སེམ་ཅན་གྱི་ལས་སྣང༌། དེ་ཉིད་གདུལ་ཕྱིར་རྣམ་པར་སྣང་མཛད་གང་ཆེན་མཚོའི་ཞིང་ཁམས་བཀོད་པ་ལས་སྟོང་གསུམ་མི་མཇེད་བྱེ་བ་ཕྲག་བརྒྱའི་ནང་ཚན་རང་ཅག་གནས་པའི་ལྷོ་གླིང་འདིའི་ཡུལ་དབུས་མ་ག་དྷཱ་རྡོ་རྗེའི་གདན་གྱི་བྱང་ཕྱོགས། རི་ཁ་བ་ཅན་ལ་སྟོད་མངའ་རིས་སྐོར་གསུམ། བར་དབུས་གཙང་རི་བཞི། སྨད་མདོ་ཁམས་སྒང་དྲུག་ཏུ་གྲགས་པ་ལས། གཙང་ལ་གཡས་རུ་དང་རུ་ལག །དབུས་ལ་གཡོ་རུ་དང་དབུས་རུ་གཉིས་ལས་མཐའ་འདུལ་གྱི་གཙུག་ལག་ཀ་ཚལ་དང་ཧ་ཅང་མི་རིང་བ་དབུར་སྟོད་ཞྭ་ལྷ་ཁང་ཞེས་བྱ་བ་
འདི་ནི། ལྷ་བཙན་པོ་ཁྲི་སྲོང་ལྡེའུ་བཙན་གྱིས་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས་ཤིང༌། མཁན་སློབ་ཆོས་གསུམ་གདན་འཛོམ་ནས་རྒྱལ་བའི་བསྟན་པའི་རིན་པོ་ཆེ་ལ་བསྟི་སྟང་བླ་ལྷག་ཏུ་མཛད་པའི་སྐབས་ཤིག་ན་ཆོས་རྒྱལ་ཉིད་ཀྱི་བླའི་མཆོད་གནས་སུ་གྱུར་པ་ཉང་ཏིང་འཛིན་བཟང་པོ་ཞེས་བྱ་བ། ཞི་གནས་ཀྱི་ཏིང་འཛིན་ལོ་བདུན་དུ་མི་འཆོར་ཞིང༌། ཤའི་སྤྱན་གྱིས་གླིང་བཞི་དུས་གཅིག་ཏུ་གཟིགས་པ་དེས་བཙན་པོ་ལ་ལུང་བསྟན་ནས་མཁས་ཤིང་གྲུབ་པ་བརྙེས་པའི་སློབ་དཔོན་ཆེན་པོ་བི་མ་ལ་མི་ཏྲ་རྒྱ་གར་ནས་སྤྱན་དྲངས། བཙན་པོ་ཡིད་ཆེས་པའི་ཕྱིར་དབུ་ཚལ་སྟེང་ཁང་གི་ལྡེར་ཚོ་ལ་ཕྱག་མཛད་པས་ཐལ་ཕུང་དུ་སོང༌། ཐེ་ཚོམ་སྐྱེས་པ་ན་སླར་ཐལ་ཕུང་ལས་རྣམ་སྣང་རང་བྱོན་དུ་གྲུབ་པའི་རྫུ་འཕྲུལ་དང༌། ནམ་མཁའ་ལ་རྡོ་རྗེ་དབྱིངས་ཀྱི་དཀྱིལ་འཁོར་སྤྲུལ་ནས་རྒྱལ་བློན་རྣམས་ལ་མངོན་སུམ་དུ་བསྟན། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལ་སོགས་གསང་སྔགས་ཕྱི་ནང་དང༌། སོ་སོ་ཐར་པའི་རྒྱ་ཆེར་འགྲེལ་པ་ལ་སོགས་མཚན་ཉིད་ཀྱི་ཆོས་ཀྱང་མང་དུ་བསྒྱུར་ཞིང་བཤད། ཁྱད་པར་དུ་མཚན་མོ་དབུ་རྩེའི་བར་ཁང་དུ་བཙན་པོ་ཡབ་སྲས་དང་ཉང་བན། སྐ་ཅོག་སྟེ་ལྔ་ལ་གསང་བ་སྙིང་ཐིག་རྒྱུད་ལུང་མན་ངག་ལྐོག་ཆོས་སུ་གསུངས། ཟབ་པ་པོད་བཞི་མཆིམས་ཕུ་བྲག་དམར་དུ་གཏེར་དུ་སྦས། རྒྱ་ནག་རི་བོ་རྩེ་ལྔ་ན་ད་ལྟའི་བར་དུ་
བཞུགས་ཏེ་ལོ་བརྒྱ་བརྒྱ་ན་བོད་དུ་སྤྲུལ་པ་རེ་འབྱོན། དེ་ལྟར་བི་མ་ལའི་དངོས་སློབ་ཉང་ཏིང་འཛིན་བཟང་པོས་རྡོ་རྗེ་ལེགས་པ་བྲན་དུ་བཀོལ་ནས། གཙུག་ལག་ཁང་བཞེང་པར་རྩོམ་པ་ན། རྡོར་ལེགས་ཀྱིས་མདོ་ཁམས་སུ་སེར་བ་ཕམ་སྟེ་འབྲུ་རྔ་བོང་གི་རྒྱབ་ཁལ་ལྔ་བརྒྱ་ལོངས་པ་དྲངས། འཛམ་བུའི་གླིང་གི་དངོས་གྲུབ་བཅུད་ཐམས་ཅད་བསྡུས་པའི་དངོས་གྲུབ་ལོངས་ཤིག་ཟེར་བ་ན། ཉང་བ་ན་ཆེན་པོས་རྫུ་འཕྲུལ་གྱི་ཞྭ་མོ་ནམ་མཁའ་ལ་གཟེད་པས་རྡོར་ལེགས་ཀྱིས་ལན་གསུམ་བཀང་ཡང་མ་ཁེངས་པས་ཡུལ་འདིའི་ལོངས་སྤྱོད་ཀྱི་རྟེན་འབྲེལ་ལ་ཅུང་ཟད་གཞར་ཟེར། སྣོད་ཀྱི་མིང་ལས་ཞྭ་ལྷ་ཁང་དུ་གྲགས་ཀྱང༌། དོན་ལ་དེ་བཞིན་གཤེགས་པ་ཉིད་ཀྱིས་གླང་རི་ལུང་བསྟན་ལས། བྱང་ཕྱོགས་སུ་ཡུལ་ཤེ་སྣ་ཞྭ་ཞེས་བྱ་བ་ནས་ས་འོག་ནས་དེ་བཞིན་གཤེགས་པའི་གཟུགས་བརྙན་བྱུང་ནས་ཡུལ་གྱིས་མཚམས་བསྲུང་བར་བྱེད་དོ། །ཞེས་ལུང་བསྟན་པ་ལྟར། ཡུལ་འདིའི་ཉེ་ལོགས་ཤེ་སྣ་ཞེས་པ་ནས་ཉང་བན་ཉིད་ཀྱིས་ཐུབ་དབང་བྱང་ཆུབ་ཤིང་དྲུང་མ་གཏེར་ནས་བཞེས་པ་སྟེང་ཁང་གི་ནང་རྟེན་དུ་བཞུགས། ས་མཚམས་བསྲུང་བ་ཞེས་པ་ནི་དབུར་སྟོད་འདི་དབུས་གཙང་རུ་བཞིའི་ཟད་མཐའ་ལ་ཉེ་བ་ཡིན་པས་སོ། །དེ་ལ་བརྟེན་པའི་ལྷ་ཚོགས་ཇི་ལྟར་བཞུགས་པ་ནི། གཙང་ཁང་དབུ་མར་རྟེན་གཙོ་རྣམ་པར་སྣང་མཛད། ཉེ་
བའི་སྲས་བརྒྱད། རྒྱ་སྐད་དུ་ཀི་ཀང་སྟེ་སྒོ་སྲུང་ཁྲོ་བོ་གཉིས། གཙང་ཁང་ལྷོར་སློབ་དཔོན་ཆེན་པོ། གཡས་གཡོན་དུ་པཎ་ཆེན་བི་མ་ལ་དང༌། ཉང་ཏིང་འཛིན་བཟང་པོ། ཆོས་རྒྱལ་ཁྲི་སྲོང༌། བེ་རོ་ཙ་ན། གཙང་ཁང་བྱང་དུ་རྟེན་གཙོ་ཐུབ་དབང་ཆོས་འཆད་མ། བྱམས་མགོན་འཇམ་དབྱངས། ཚངས་པ་དང༌། བརྒྱ་བྱིན། ཁྱད་པར་ཡུལ་ཕྱོགས་འདི་མལ་གྲོ་གཟི་ཅན་གྱི་དབང་དུ་བྱས་ཤིང༌། བོད་ཁམས་སྤྱི་ལ་གནོད་གདུག་ཆེ་བས། དེའི་ཁ་གནོན་དུ་གཟི་ཅན་གནས་པའི་མཚོ་གཉན་གྱི་སྟེང་དུ། ཕྲ་མེན་མཆོད་རྟེན་དྲག་ཤུལ་མངོན་སྤྱོད་ཀྱི་བཅའ་ག་ཅན་ཤིན་ཏུ་བཀའ་གཉན་པ་བཞེངས། ཆོས་སྐྱོང་མ་གཟའ་རྡོར་གསུམ་དངོས་སུ་བཞུགས་ཀྱང་ཆུ་བུར་གྱི་མིག་ཅན་ལ་ལྡེར་སོ་ཙམ་ལས་མི་མངོན་པའི་མགོན་ཁང་ཤིན་ཏུ་གཉན་པ་དང། ཕྱི་རོལ་ལྷོ་ཕྱོགས་སུ་ས་རྡོ་ལས་བང་སོའི་རྣམ་པ་ཅན་འདིར་རྫུ་འཕྲུལ་གྱི་ཞྭ་དེ་ཉིད་བཞུགས་པས། བསྐོར་བ་བྱས་པ་དག་ལའང་སྟེང་གདོན་གྱིས་གནོད་པ་མི་འབྱུང་བའི་བྱིན་རླབས་ཅན་རྣམས་གནས་རྙིང་དངོས་བསྟན་ཡིན་ལ། དེ་ལྟ་བུའི་བདག་པོའི་རྐྱེན་དུ་གྱུར་པ་ཉང་ཏིང་འཛིན་བཟང་པོ་དེ་ཉིད་ཀྱིས་བསྟན་པ་ལ་བྱ་བ་རྒྱ་ཆེན་པོ་དང༌། བོད་འབངས་བདེ་བའི་ཐབས་མཛད་དེ་ལྷ་ས་བྲག་ལྷའི་ཕུག་ཏུ་འཇའ་ལུས་སུ་གཤེགས། ཕྱིས་བྱུང་ཐོག་ཤིན་ཏུ་སྔ་པ་ལ། མགོན་ཁང་སྟེང་ན་ནང་རྟེན་ཁྱད་པར་ཅན། ཐུབ་དབང་ལི་
དམར། ཉང་བན། འཇིགས་བྱེད། མགོན་པོ་ཕྱག་དྲུག་པ། ཚེ་དཔག་མེད། མི་གཡོ་བ། རྟ་མགྲིན་ལྕགས་རལ། ཁྱད་པར་རྒྱལ་བ་ཀློང་ཆེན་པའི་ཐུགས་དམ་རྟེན་གུར་མགོན་བྱིན་རླབས་ཆེ་བ་དང་གྲི་གུག །བིང༌། ལྷ་མོ་འདོད་ཁམས་མ། རྣམ་སྲས་གསེར་ཆེན་རྣམས་དང༌། ཕྱིས་བྱུང་འདུ་ཁང་དུ་བཙོང་ཁ་བ་ཆེན་པོའི་སྐུ་དང༌། ཇོ་འབྲོམ་གཉིས། གནས་བཅུ་ལ་སོགས་པ་མངོན་སུམ་མིག་གི་དགའ་སྟོན་ལ་བཞུགས། ཉང་བན་གཤེགས་ནས་ལོ་བརྒྱ་སོང་བ་ན་ཞྭའི་གནས་བརྟན་ལྡང་མ་ལྷུན་རྒྱལ་ལ་རྡོ་རྗེ་ལེགས་པས་ལུངབསྟན་ནས་གཏེར་ཕྱུང༌། རིམ་བཞིན་བགྲང་བྱའི་ཁུར་བརྩེགས་པས་གཙུག་ལག་ཁང་ཉམས་ཞིག་ཆེན་པོར་གྱུར་པ་ན་སློབ་དཔོན་བི་མ་ལའི་དངོས་གྲུབ་གངས་རིའི་ཁྲོད་ཙམ་ན་རང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་སོན་པ་རྒྱལ་བ་ཀློང་ཆེན་རབ་འབྱམས་གངས་རི་ཐོད་དཀར་དུ་བཞུགས་དུས། བི་མ་ལས་ཞལ་གཟིགས་ཏེ་དབུ་རུ་ཞྭའི་ལྷ་ཁང་འདི་ཉིད་ལ་ཞིག་གསོས་དགོས་པར་ལུང་བསྟན་པ་བཞིན་མཛད་པའི་ཚེ། རྡོ་རིངས་གཉིས་འགྱེལ་ཞིང༌། དེའི་འོག་གི་དམ་སྲིའི་མནན་ཐོད་ཀྱང་ནམ་མཁའ་ལ་ཡར་བ་ལྟ་སྟངས་ཀྱིས་བཀུག་སྟེ་དེ་ཉིད་དུ་མནན། རྡོ་རིངས་འགྱེལ་བ་ཐབས་གང་གིས་ཀྱང་སློང་མ་ཐུབ་པའི་ཚེ་ཐུགས་འུར་བའི་ཚུལ་གྱིས་སྐུ་ཆོས་བརྡབས། ལྟ་བ་བསམ་གྱིས་མི་ཁྱབ་པའི་བརྟུལ་ཞུགས་སྐྱེད་པའི་
ཚེ། ཐུབ་དབང་བྱམས་པ། འཇམ་དབྱངས་སོགས། སངས་རྒྱས་དང་བྱང་ཆུབ་སེམས་དཔའ་མང་པོས་ཞལ་གཟིགས། ཁྱོད་དེ་བཞིན་གཤེགས་པ་རི་རབ་མར་མེའི་རྒྱལ་མཚན་ཞེས་བྱ་བར་འཚང་རྒྱ་བར་ལུང་བསྟན་པའི་མོད་ལ་རྡོ་རིངས་གཉིས་ཀྱང་དཀའ་བ་མེད་པར་བསླངས། དབུ་རྩེའི་རྒྱབ་ན་གསེར་མང་པོ་སྣང་བ་ལས་འགུ་རྩེ་གང་བཅུས་ཏེ་ལྷ་ཚོགས་རྣམས་ལ་གསེར་གསོལ་དང༌། རབ་གནས་མཐའ་རྒྱས་དང་བཅས་ལེགས་པར་མཛད། མདོར་ན་སངས་རྒྱས་དངོས་ཀྱིས་ལུང་བསྟན་ཞིང༌། དེ་དང་མཚུངས་པའི་སྐྱེས་བུ་དམ་པ་ཤ་སྟག་གིས་རང་གིར་མཛད་ཅིང་བྱིན་གྱིས་བརླབས་པའི་ཁྱད་པར་ལས། མ་གཟའ་རྡོར་གསུམ་ལ་སོགས་པའི་སྲུང་མ་ཁྱད་པར་ཅན་དངོས་སུ་བཞུགས་ཤིང༌། ཚར་གཅོད་རྗེས་འཛིན་གྱི་ཕྲིན་ལས་མྱུར་བས་བོད་ཁམས་བསྟན་འགྲོའི་རྩ་ལག་གཅིག་ཏུ་གནས་པ་ལ་སྲི་ཞུ་དང་བསྟི་སྟང་ཕྱག་མཆོད་སྨོན་ལམ་རྒྱ་ཆེན་པོ་མཛད་པར་ཞུ། ཞེས་པའང་འབྲས་སྤུངས་སྒོ་མངས་པ་བསྐལ་བཟང་དོན་འགྲུབ་དང་ཞྭ་པའི་གྲྭ་ཚོགས་རྣམས་ཀྱིས་བསྐུལ་ངོར། རྫོགས་ཆེན་པ་རང་བྱུང་རྡོ་རྗེས་འབྲི་གུང་རྫོང་གསར་དུ་ཤར་མར་བྲིས་པའོ།། །།གཏམ་ཚོགས་ལེའུ་སོ་ལྔ་པའོ།། །།
གཏམ་ཚོགས་ལེའུ་སོ་དྲུག་པ། ལྷོ་མོན་དཀར་པོ་ཟངས་ཀྱི་གཏམ།
ལྷོ་མོན་དཀར་པོ་ཟངས་ཀྱི་གཏམ། རྒྱལ་བ་རྣམས་ཀྱི་སྤངས་རྟོགས་ཡོན་ཏན་ནི། །མཉམ་པ་ཅན་དེ་གངས་ཅན་འགྲོ་བ་ལ། །སངས་རྒྱས་
གཞན་ལས་ཐུགས་རྗེ་རྨད་བྱུང་བའི། །མཚོ་སྐྱེས་རྡོ་རྗེ་གཙུག་གཏོར་ནོར་བུར་བསྟེན། །དེ་ཡང་རྟོགས་པ་རྣམས་ཀྱི་ཡེ་ཤེས་རོལ་པའི་ཁང་བཟངས་ན་སྣོད་ཀྱི་འཇིག་རྟེན་འདི་ཉིད་རང་དེ་བཞིན་གཤེགས་པའི་མཆོད་སྡོང་ཆེན་པོར་ཡོད་དེ་རྒྱུད་ལས། འདོད་ཁམས་དབང་གི་རི་བོ་ལ། །གཟུགས་ཁམས་བང་རིམ་ཁྲི་འཕང་ཅན། །གཟུགས་མེད་བུམ་རྟེན་བུམ་པར་བཅས། །སྐུ་གདུང་ཆེན་པོ་དེ་ལྟར་གནས། །ཞེས་སོ། །དེ་ལ་རྣམ་པར་སྣང་མཛད་གང་ཆེན་མཚོའི་ཕྱག་མཐིལ་གྱི་སྤོས་ཆུའི་རྒྱུན་ལས་འཁྲུངས་པའི་ཐུགས་ཀ་དཔལ་གྱི་བེའུའི་ཐད་ཀྱི་ཡུལ་ག་བཅུ་གསུམ་པར་མི་མཇེད་ཀྱི་འཇིག་རྟེན་འདི་ཉིད་གནས་པའི་ནང་ཚན་ལྷོ་རྒྱལ་འཛམ་བུའི་གླིང་འདིར་མཁའ་འགྲོ་རང་བཞིན་གྱིས་འདུ་བའི་གནས་གྲངས་ཅན་དང༌། ངེས་པ་མེད་པར་གསུངས་པ་ལས་རྒྱུད་སྡེ་རིན་པོ་ཆེ་རྣམས་ནས་ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། དུར་ཁྲོད་ཆེན་པོ་བརྒྱད་ལ་སོགས་པ་རྣམས་ནི་ཕྱི་ལྟར་དུ་ཡུལ་གྱི་རྣམ་པ་དང་བཀོད་པའི་བྱེ་བྲག་ཐ་དད་པའི་ཚུལ་དུ་གནས་ཤིང༌། ནང་ལྟར་དུ་རྡོ་རྗེའི་ལུས་ཀྱི་ཆ་ཤས་སོ་སོར་རྩ་རླུང་ཐིག་ལེའི་རྟེན་ཅིང་འབྲེལ་བར་འབྱུང་བའི་འདུ་བ་དང་བཅས་རང་བཞིན་ལྷུན་གྱིས་གྲུབ་པའི་ངང་དུ་བཞུགས་པ་ཡིན་ནོ། །དེ་ལ་གངས་རིའི་ཁྲོད་འདིར་སངས་རྒྱས་གཉིས་པ་སློབ་དཔོན་
ཆེན་པོས་ཞབས་ཀྱི་བཅགས་ཤིང་སྒྲུབ་གནས་སུ་བྱིན་གྱིས་བརླབས་པའི་གནས་ཆེན་ཇི་སྙེད་ཅིག་ཡོད་པས་ལས། ལྷོ་ཕྱོགས་མོན་གྱི་ཡུལ་གྲུ་འདིར་ཤར་ན་སྐུའི་གནས་དོམ་ཚང༌། ལྷོ་ན་ཡོན་ཏན་གྱི་གནས་སྒོམ་པ་ཕུག །ནུབ་ན་ཐུགས་ཀྱི་གནས་གཟིག་ཚང༌། བྱང་ན་གསུང་གི་གནས་སྤྱང་ཚང༌། དབུས་ན་ཕྲིན་ལས་ཀྱི་གནས་དཀར་པོ་ཟངས་ཞེས་བྱ་སྟེ་བྲག་རི་ཐམས་ཅད་དམ་པ་རིགས་བརྒྱའི་དཀྱིལ་འཁོར་དུ་གནས་པ། དབུས་ན་གཡུ་མཚོ་གནམ་སྨན་དཀར་མོ་ཞེས་བྱ་བ་ཕྱི་ལྟར་དུ་ཀླུ་དབང་གཙུག་ན་རིན་ཆེན་གྱི་གྲོང་ཁྱེར། ནང་ལྟར་དུ་མཚོ་ལྷ་སྨན་བཙུན་མཆེད་ལྔའི་ཕོ་བྲང༌། གསང་བ་ལྟར་དུ་རྒྱལ་ཡུམ་རྡོ་རྗེ་རྣལ་འབྱོར་མའི་བླ་མཚོ་ལ་ལས་ཅན་གྱི་སྣང་ངོར་ལྷ་དང་གཞལ་ཡས་ཁང་གི་རྣམ་པ་དང༌། གུ་རུའི་ཕྱག་རྗེས་རྣམ་འགྱུར་དང་ཆེ་ཆུང་མ་ངེས་པ་གསལ་འགྲིབ་བྱེད་ལ། དཔའ་བོ་དང་རྣལ་འབྱོར་མའི་ཚོགས་འདུ་བ་དང༌། ཉེ་བའི་འདུ་བ་ལ་དུས་དང་དུས་མ་ཡིན་པར་ག་ན་ཙཀྲའི་ལོངས་སྤྱོད་ལ་རོལ་བས་རོལ་མོའི་སྒྲ་སྣ་ཚོགས་པ་མངོན་སུམ་པར་ཐོས་ཤིང༌། རང་བྱོན་གྱི་བཀོད་པ་བསམ་གྱིས་མི་ཁྱབ་པར་ཡོད་པའི་གནས་ཀྱི་ལྟེ་བ་ཇི་སྐད་དུ་བཀའ་ཐང་ལས། མོན་ཁ་ནེ་རིང་ཟླ་བ་གསུམ༔ སྤ་གྲོ་སྟག་ཚང་ཟླ་བ་བཞི༔ ཆུ་མོ་ཕུག་ཏུ་ཟླ་བ་གཉིས༔ དོམ་ཚང་རོང་དུ་ཞག་ལྔ་བཞུགས༔ སྟག་ཚང་རོང་དུ་ཞག་
བདུན་ནོ༔ གཟིག་ཚང་རོང་དུ་ཞག་དགུ་བཞུགསཿ སྤྱང་ཚང་རོང་དུ་ཞག་དྲུག་གོཿ ཤ་འུག་སྟག་སྒོར་ལོ་གཅིག་བཞུགས༔ ཞེས་ལྷོ་མོན་གྱི་ཕྱོགས་ལ་བཞུགས་ཡུན་རིང་ཞིང་བྱིན་ཟིལ་ཆེ་བའི་གནས། ཉེ་འདབས་ན་ཕ་ཝང་སྟག་ཉལ་འདྲ་བ་ཡོད་པ་ལ་སོགས་ལས་དེ་སྐད་དུ་གྲགས་ཤིང༌། གཟིམ་ཕུག་གཡས་ལོགས་ལ་སྐྱེ་མེད་ཀྱི་ཡི་གེ་ཨའི་རང་བྱོན། འཆི་མེད་ཀྱི་ཆུ་རྒྱུན་ལྷུང་ལྷུང་དུ་འབབ་ཅིང༌། རང་བྱུང་གི་བླ་བྲེས་བར་སྣང་ལ་དཔྱངས་པ་ལྟ་བུའི་ངོ་མཚར་གྱི་གཟིམ་ཕུག་འདིའི་རྟེན་གྱི་གཙོ་བོ་གུ་རུའི་སྐུ་ཚབ་པདྨ་མཐོང་གྲོལ། གཡས་ན་གང་གི་མཚན་ཐོས་པའང་འཁོར་བ་དང་ངན་སོང་གི་སྡུག་བསྔལ་ལས་སྐྱོབ་པར་ཐུགས་བསྐྱེད་པའི་སངས་རྒྱས་བཅོམ་ལྡན་འདས་རྡོ་རྗེ་སེམས་དཔའ། གཡོན་ན་ཕྱོགས་བཅུ་དུས་གསུམ་གྱི་སངས་རྒྱས་མ་ལུས་པའི་སྤྲུལ་གཞི་འཕགས་པ་སྤྱན་རས་གཟིགས་སེམས་ཉིད་ངལ་བསོ་རྣམས་པདྨས་རྗེས་བཟུང་རྫོགས་ཆེན་པ་རང་བྱུང་རྡོ་རྗེ་འཇིགས་མེད་གླིང་པས་བཟོ་གནས་ཀྱི་བཀོད་པ་འདོམས་ཤིང་རྒྱུད་སྡེ་རིན་པོ་ཆེ་ནས་ལེགས་པར་གསུངས་པའི་གཟུངས་འབུལ་དང་རབ་གནས་ཀྱི་ཆོ་ག་ཤིན་ཏུ་དག་པ་དང༌། རང་གི་རྟོགས་པའི་ཆོས་ཉིད་དང་རོ་མཉམ་པའི་ཡེ་ཤེས་རྡོ་རྗེས་ལྷག་པར་གནས་པས་ཡེ་ཤེས་སེམས་དཔའ་མངོན་སུམ་པར་བཞུགས་པར་
མཛད་པའི་སྤྱན་སྔར། ཕྱག་མཆོད། བཀུར་སྟི། བསོད་ནམས་བགྱིས་པའི་ཕན་ཡོན་ནི་གཡོ་རུའི་ཁྲ་འབྲུག་ཏུ་རྒྱལ་སྲས་ལྷ་རྗེ་ལ་བཀའ་འདུས་ཆོས་ཀྱི་རྒྱ་མཚོའི་ཆོས་འཁོར་བསྐོར་བའི་ཚེ། ལྷ་ལྕམ་མནྡཱ་ར་བའི་ཞུ་ལན་དུ། ཉོན་ཅིག་ལྷ་མོའི་གཟུགས་ཅན་ཡིད་འོད་མ༔ ང་དང་མ་འཕྲད་མ་འོངས་སེམས་ཅན་རྣམས། །མ་རིག་མུན་པའི་སྒྲོན་མེ་སྐུ་འདྲས་བྱེད༔ པད་འབྱུང་སྐུ་ཚབ་མཆོད་པའི་རྟེན་བཞེང་ལ༔ སྐུ་གསུམ་དོན་ལྡན་བསྟན་པའི་རྒྱལ་མཚན་འཛུགས༔ དེ་ལ་འདུན་ཅིང་མོས་གུས་སུས་བྱེད་པ༔ འདོད་པ་ཀུན་ཚོགས་རིན་ཆེན་ཕུང་པོ་འདྲ༔ སྙིང་པོ་རྒྱུན་དུ་བཟླ་བར་གང་བྱེད་པའི༔ མི་རྣམས་སྨིན་ལམ་ཇི་ལྟར་བཏབ་པ་བཞིན༔ ལེགས་པར་ཀུན་འབྱུང་ཨེ་མ་ངོ་མཚར་ཆེ༔ པད་འབྱུང་སྐུ་ཚབ་དཀོན་གཉེར་སུས་བྱེད་པ༔ ངན་སོང་གསུམ་ལས་རྟག་ཏུ་ཐར་བ་དང་༔ ཕུན་སུམ་ཚོགས་པའི་ཡོན་ཏན་ཐོབ་པར་འགྱུར༔ པད་འབྱུང་སྐུ་ཚབ་གཞལ་ཡས་ཁང་བཞེངས་པ༔ ལྷ་ཡི་ཕོ་བྲང་ནང་དུ་སྐྱེ་བར་འགྱུར༔ པད་འབྱུང་སྐུ་འདྲར་ན་བཟའ་སུས་ཕུལ་བ༔ ཡེ་ཤེས་རྒྱན་ལྡན་རང་ཆས་ཐོབ་པར་འགྱུར༔ པད་འབྱུང་སྐུ་འདྲར་རྡུལ་ཕྱིས་སུས་བྱས་པ༔ གཟུགས་བཟང་ཆས་ལེགས་མདོག་སྡུག་ཐོབ་པར་འགྱུར༔ པད་འབྱུང་སྐུ་འདྲར་མཆོད་ཡོན་སུས་ཕུལ་བ༔ རྫུ་འཕྲུལ་རྐང་པའི་མྱུར་མགྱོགས་
ཐོབ་པར་འགྱུར༔ པད་འབྱུང་སྐུ་འདྲར་མར་མེ་སུས་ཕུལ་བ༔ མུན་པ་མེད་ཅིང་བློ་རིག་གསལ་བར་འགྱུར༔ པད་འབྱུང་སྐུ་འདྲ་སྤྱན་གཟིགས་སུས་ཕུལ་བ། བསོད་ནམས་ལོངས་སྤྱོད་ཡོ་བྱད་འཕེལ་བར་འགྱུར༔ པད་འབྱུང་སྐུ་འདྲར་གསེར་ཆབ་སུས་གསོལ་བ༔ རྒྱལ་པོ་རིན་ཆེན་ལྟ་བུར་ཐོབ་པར་འགྱུརཿ ཅེས་སོགས་དང༌། སྐྱེ་དགུའི་ཚེ་འཕེལ་པད་འབྱུང་སྐུ་འདྲ་འདིཿ ང་ཡི་ཐུགས་ལས་ཡེ་ཤེས་འོད་འཕྲོས་ནསཿ མ་འོངས་མོས་པའི་རྟེན་དུ་གཏད་པ་ཡིནཿ འདོད་དགུ་འབྱུང་བའི་ཡིད་བཞིན་ནོར་བུ་འདྲཿ དམངས་པོ་བུ་མེད་ང་ལ་གསོལ་བ་ཐོབཿ ལུས་སེམས་དཔང་ཚུགས་རྐང་པས་བསྐོར་བ་གྱིསཿ ལོག་འདྲེན་བར་གཅོད་དཔག་ཚད་རྒྱང་གྲགས་འབྲོསཿ དབུལ་པོ་ནོར་མེད་ང་ལ་གསོལ་བ་ཐོབཿ འཇིག་རྟེན་ཟང་ཟིང་ནོར་གྱིས་ལག་མི་འབོརཿ དོན་དང་མི་ལྡན་ང་ལ་གསོལ་བ་ཐོབཿ སྨོན་ལམ་གང་བཏབ་དེ་ཡིས་ཐོབ་པར་བྱེདཿ གསོལ་བཏབ་པད་འབྱུང་ང་ལས་དགོས་འདོད་འབྱུངཿ ཞེས་གསུངས་པས་ཡིད་བཞིན་གྱི་ནོར་བུའི་ཡོན་ཏན་བརྒྱ་ཕྲག་དུ་མས་བརྒྱ་དང་སྟོང་གི་ཆར་ཡང་མི་ཕོད་པའི་རྟེན་མཆོག་འདི་ལ་བཀུར་སྟི་ཞབས་ཏོག་དང་ཕྱག་མཆོད་སྨོན་ལམ་བགྱིས་ན་བརྒྱུད་ནས་རྣམ་པ་ཐམས་ཅད་མཁྱེན་པའི་ཉེ་རྒྱུར་འགྱུར་བ་ནི་སྨོས་མ་དགོས། གནས་སྐབས་ཚེ་འདིའི་ཕུན་སུམ་ཚོགས་པ་ཐམས་ཅད་
ཀྱང་ཡིད་ལ་འདོད་པ་བཞིན་དུ་འགྲུབ་པར་གུ་རུ་ཉིད་ཀྱི་ཞལ་གྱིས་བཞེས་པ་ཡིན་པས། རང་གཞན་མཁའ་ཁྱབ་ཀྱི་སེམས་ཅན་ཐམས་ཅད་ཀྱི་དོན་དུ་ཐེག་པ་ཆེན་པོའི་བློ་གྲོས་དང་ལྡན་པས་ཕྱག་མཆོད་སྨོན་ལམ་ཡང་དག་མཛད་པར་ཞུ། གཟིམ་ཕུག་རྟེན་དང་བརྟེན་པར་བཅས་པ་འདི་ཉིད་གུ་རུ་རིན་པོ་ཆེ་ཉིད་ཀྱི་ཐུགས་རྗེ་དང་གནས་སྲུང་གི་མཐུ་ལས་གྲུབ་པའི་ཚུལ་ཁོ་བོ་ཅག་དཔལ་གྱི་བསམ་ཡས་མཆིམས་ཕུར་ལོ་གསུམ་དམ་པོ་ལ་གནས་པའི་ཆུ་ཕོ་རྟའི་ལོར་སྨན་བཙུན་ཆེན་མོ་མོན་མོ་ལང་ཚོ་དར་བབས་ཀྱི་རྣམ་པ་ཅན་ལན་གཉིས་སུ་འོངས་ནས་ལྷོ་རྒྱུད་ཀྱི་འགྲོ་དོན་ལ་བསྐུལ། དེས་ཇི་ལྟར་བསྟན་པའི་ལུང་བཞིན་དེ་ནས་ལོ་བཅུ་དྲུག་པ་མེ་མོ་བྱའི་ལོར་གནས་དུས་ཀྱི་རྟེན་འབྲེལ་འགྲིག་པའི་ཚེ། ཁོ་བོ་ཅག་གི་ཁྱུང་རི་སྒྲུབ་ཕུག་ཏུ་གུ་རུའི་སྐུ་ཚབ་བཞེངས་པས་རྐྱེན་བྱས། ཡོན་གྱི་བདག་པོའི་སྨོན་ལམ་དང་ལས་འཕྲོ་རྣམ་པར་དག་པ་སད་དེ། ཤར་ཕྱོགས་ཀོང་ཡུལ་བ་སྦས་ཡུལ་སྐྱིད་མོ་ལྗོངས་སུ་ཕྲུ་མ་བཏབ་པའི་མིང་བཀྲ་ཤིས་སྐྱེད་ཚལ་བ་པུཎྱཻ་ཤྲཱི་བྷུ་ཏིའི་མིང་ཅན་ལ་འདི་ལྟ་བུ་བསྒྲུབ་པའི་བློ་སྟོབས་སྐྱེས་ནས་དངོས་ཅག་ལའང་གསོལ་བ་བཏབ་པ་བཞིན་ལེགས་སྤེལ་གྱི་རྟེན་འབྲེལ་བསྒྲིགས་ནས་གཡས་གཡོན་གྱི་བྱང་སེམས་གཉིས་པོའི་ཞབས་ཏོག་ཀྱང་བསྒྲུབས། དེ་ཕྱིན་ཁོང་ནས་ལྷག་བསམ་རྣམ་པར་དག་པས་སྐྱོ་དུབ་དང་ངལ་བ་ཁྱད་དུ་བསད་ནས་བསྒྲུབས་པའི་ཚེ་གནས་ཡིག་ཅིག་ཀྱང་དགོས།
ཞེས་བསྐུལ་མ་བྱུང་བ་བློ་གྲོས་བླུན་པོའི་གཏམ་གྱི་རྗེས་སུ་མ་ཕྱོགས་པར་གནས་ཚུལ་དང་མཐུན་པ་ཉིད་ལ་དག་པའི་སྣང་བ་ཅུང་ཟད་ཤར་བ་བཞིན་མ་སྦས་པར་བཀོད་པའོ།། །།གཏམ་ཚོགས་ལེའུ་སོ་དྲུག་པའོ།། །།
གཏམ་ཚོགས་ལེའུ་སོ་བདུན་པ། བཀྲ་ཤིས་སྲོང་བཙན་བང་སོའི་གཏམ་ལོ་རྒྱུས་ཀྱི་མཛོད་ཁང།
བཀྲ་ཤིས་སྲོང་བཙན་བང་སོའི་གཏམ། ལོ་རྒྱུས་ཀྱི་མཛོད་ཁང་ཞེས་བྱ་བ། བཅོམ་ལྡན་འདས་དཔལ་སྣང་བ་མཐའ་ཡས་ལ་ཕྱག་འཚལ་ལོ། །མཆོག་ཏུ་མི་འགྱུར་དག་བྱེད་ཕུང་པོར་བདེ་ཆེན་ཆུ་སྐྱེས་ཁང་བཟངས་དབུས། །བདེ་གཤེགས་ཀུན་གྱི་སྨོན་པའི་རོལ་རྩེད་བྱང་ཆུབ་སྙིང་པོའི་ནི་རྨ་ཀཿ །སྲིད་ཞིའི་ཕ་མཐས་བརྟག་ཏུ་བཟོད་མིན་རྣམ་ཀུན་མཆོག་ལྡན་རྡོ་རྗེའི་དངོས། །འོད་མཚན་སྟོང་འབར་ཕྱག་ན་པདྨོ་མིག་མི་འཛུམས་པ་གཙུག་ན་བསྙེན། །རྟག་ཆད་སྨྲ་ལ་ལྷག་པར་སྡང་བའི་རྡོ་རྗེའི་སྐུ་ནི་རིག་གྲོལ་ཉིས་ལྡན་དགེ་འདུན་ཏེ། །སྒྲ་དང་བྲག་ཅར་ཡོང་ཡེ་མ་བཟུང་གདུལ་བྱའི་བློ་དང་འཚམ་པའི་གསུང་ནི་དམ་པའི་ཆོས། །ཟབ་ཞི་སྤྲོས་བྲལ་རྟོག་པའི་ཆོས་དང་མཛའ་བ་མ་ཡིན་སོ་སོ་ཡང་དག་རིག་པའི་ཐུགས། །སྟོབས་བཅུ་མི་འཇིགས་རྣམ་བཞིར་རྩལ་རྫོགས་དོན་གྱི་སངས་རྒྱས་སྙིང་གི་དབུས་ན་བསྒྲུབ་བྱ་ཉིད། །སྣ་ཚོགས་གདུལ་བྱའི་ཁམས་ཀྱི་དྭངས་ཤེལ་དུ། །ཐུགས་རྗེའི་གཟུགས་སྣང་སྒྱུ་མའི་རོལ་རྩེད་མཁན། །བདེ་བླག་འཆར་བའི་མོད་ལ་འདོད་པའི་ལྷ། །མྱ་ངན་
ཁུང་བུར་འཛུད་ལ་ཆུ་སྐྱེས་ཞལ། །བྱང་ཆུབ་སེམས་དཔའ་ས་དབང་རྣམ་རོལ་སྙིང་སྟོབས་ཡན་ལག་བཞི་པའི་དཔུང༌། །དགྲ་སྟའི་དུམ་བུའི་གཡུལ་ལས་རྣམ་རྒྱལ་མེས་དབོན་གསུམ་གྱིས་ཁུར་བཟོད་པའི། །ཐུགས་བསྐྱེད་ཕྲིན་ལས་གཟུགས་སུ་གྱུར་ན་འོད་སྲུངས་བྱིན་གྱི་བུ་མོ་ཡང༌། །ཐེག་པར་དཀའ་བའི་དོགས་པས་སྐྲག་ནས་རྣམ་པ་དྲུག་ཏུ་འདར་བར་བྱེད། །ལོག་རྟོག་ཚང་ཚིང་འཁྲིགས་པ་ཆུ་སྲིན་གྱི། །རྒྱལ་མཚན་མེ་ལྕེས་བསྲེགས་དང་ཆབ་གཅིག་པར། །རྒྱལ་བསྟན་མགྲོན་པོར་འབོད་ལ་དྲི་མེད་འོད། །པདྨའི་ངང་ཚུལ་གསར་པའི་ཟོལ་གྱིས་འོངས། །ཞེས་སྒྲ་དབྱང་ལྷ་མོའི་ཕྱག་གི་པི་ཝང་ལ་ཅུང་ཟད་རེག་སྟེ་བསྔགས་པར་བྱ་བའི་ཡུལ་ལ་ཚིག་གི་སྦྱོར་བས་བསྟི་སྟང་དུ་བྱས་ནས། དཔལ་མགོན་ཆེན་པོ་ཀླུ་སྒྲུབ་ཀྱིས། འདི་ལྟར་ཆོས་རྣམས་ཐམས་ཅད་ཀྱི། །རྩ་བ་མོས་པ་ལགས་པར་གསུངས། །ཞེས་བསྙད་པར་བྱ་བའི་རང་བཞིན་ལ་ཡོན་ཏན་བརྗོད་པས་དད་པ་འཕེལ་བར་གསུངས་པ་བཞིན་འདིར་དགེ་བ་བཅུའི་ཡོན་ཏན་མ་ཚང་བ་མེད་པའི་དཔལ་གྱིས་ཕྱུག་པའི་ཡུལ་གཡོར་པོའི་གཞུང༌། བཀྲ་ཤིས་སྲོང་བཙན་བང་སོའི་རྟོགས་པ་བརྗོད་ན། སྤྱིར་སྟོན་པ་རྡོ་རྗེ་འཆང་ཡོན་ཏན་མཐའ་དག་རྫོགས་པའི་རང་བཞིན་དུ་བྱང་ཆུབ་ནས་ཆོས་ཀྱི་སྐུ་ལས་གཡོ་བ་མེད་བཞིན། ལོངས་སྤྱོད་རྫོགས་པ་རིགས་ལྔའི་
སྐུ་ལས་ཞིང་ཁམས་བསམ་གྱིས་མི་ཁྱབ་པར་བཀོད་པ་ལས། དབུས་མ་རྣམ་པར་སྣང་མཛད་གང་ཆེན་མཚོའི་ཕྱག་གི་པདྨའི་ཕྲུམ་ཕྲུམ་ལས་སྐུ་གསུང་ཐུགས་ཡོན་ཏན་ཕྲིན་ལས་རྣམ་པ་ལྔའི་ཞིང་ཁམས་གཞི་དང་སྙིང་པོ་མེ་ཏོག་གིས་བརྒྱན་པ་ཞེས་བྱ་བ་ལྔ་ཚན་ལྔ་ལས། བཅུ་གསུམ་པ་ཐུགས་ཀ་དཔལ་གྱི་བེའུའི་ཐད་དྲང་པོར། རྡོ་རྗེ་ཐེག་པའི་ཞིང་ཁམས་མི་མཇེད་ཀྱི་འཇིག་རྟེན་བྱེ་བ་ཕྲག་བརྒྱའི་ནང་ཚན་དེ་བགྲང་པའི་གཞི་གླིང་བཞི་རི་རབ་ལྷ་གནས་དང་བཅས་པའི་རྭ་བ་གཅིག་གི་ནང་ཁོངས་སྡོམ་འབྱུང་ལས། འཛམ་བུ་གླིང་པའི་གཙོ་བོ་མཆོག །ཡུལ་དབུས་སུ་ནི་སྐྱེས་པ་སྟེ། ཞེས་བྲིཀྴའི་ལྗོན་པ་ཚར་དུ་དངར་བ་ལས་སྨྲ་དེས་བསྙད་པ་ལྷོ་ཕྱོགས་འཛམ་བུའི་གླིང་ལས་ཀྱི་ས་པའི་ཡུལ་དབུས་མ་ག་དྷཱ་རྡོ་རྗེའི་གདན་དུ་བདག་ཅག་གི་སྟོན་པ་ཐེག་དམན་དང་མཐུན་པར་སངས་རྒྱས། གཟུགས་བདག་ཡིན་པ་ལ་སོགས་འཇིག་ཚོགས་ལ་མངོན་པར་བལྟ་བའི་རིའི་རྩེ་མོ་ཉི་ཤུ་ཡེ་ཤེས་ཀྱི་རྡོ་རྗེས་མངོན་དུ་བཅོམ་ནས་རྟོག་གེ་པ་དྲུག་གསུམ་བཅོ་བརྒྱད་ཀྱི་གྲུབ་པའི་མཐའ་སུན་ཕྱུང༌། ཐར་པ་དང་ཐམས་ཅད་མཁྱེན་པའི་ཆོས་ཀྱི་བདུད་རྩིས་ཐུན་མོང་གི་འཁོར་རྣམ་པ་བཞི་དང༌། ཐུན་མོང་མ་ཡིན་པའི་འཁོར་བྱང་ཆུབ་སེམས་དཔའ་མཐའ་དག་སྲིད་པ་མཐའ་ཅན་དུ་མཛད། ཤར་
ཕྱོགས་སུ་རྒྱ་ནག་རི་བོ་རྩེ་ལྔ་འཇམ་དཔལ་རྡོ་རྗེ་གཙོ་འཁོར་ལྔའི་ཕོ་བྲང་དུ་བསྟན་ནས་མ་ཧཱ་ཙི་ན་གྱི་མ་ཤང་དང་བཟོ་གནས་ཀྱི་རིག་པས་བཏུལ། ལྷོ་ཕྱོགས་སུ་དཔལ་ལྡན་འབྲས་སྤུངས་སྤྲུལ་ཏེ་གཉིས་མེད་དུས་འཁོར་གསུངས། ནུབ་ཕྱོགས་སུ་ཨོ་རྒྱན་རྡོ་རྗེ་འཆང་ཆེན་པོའི་ཕོ་བྲང་ཧེ་རུ་ཀ་རང་བྱུང་གི་གཙུག་ལག་ཁང་དུ་བསྟན་ནས་རྒྱུད་སྡེ་རྒྱ་མཚོའི་གསང་མཛོད་དུ་བྱིན་གྱིས་བརླབས། བྱང་ཕྱོགས་སུ་ཆོས་རྒྱལ་རིགས་ལྡན་གྱི་གནས་ཤམ་བྷ་ལ་སྤྲུལ་ནས་དང་པོའི་སངས་རྒྱས་ཀྱི་ཆོས་འཁོར་བསྐོར། གངས་ཅན་བྷོ་ཊའི་ཡུལ་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་པདྨའི་གདུལ་ཞིང་དུ་དམ་པའི་ཆོས་པདྨ་དཀར་པོ་དང༌། འཇམ་དཔལ་རྩ་བའི་རྒྱུད་སོགས་ནས་ལུང་བསྟན་གྱི་བདེན་པའི་རྔ་བོ་ཆེ་བསྒྲགས་པ་བཞིན་རྒྱ་གར་ན་ཤཱཀྱ་ཆེན་པོ་དང༌། རི་བྲག་པ་དང༌། ལི་ཙ་བྱིའི་རིགས་གསུམ་ལས་ཕྱི་མའི་རྒྱུད་དུ་བྱུང་བའི་ཆོས་རྒྱལ་བྱང་ཆུབ་སེམས་དཔའི་གདུང་ལྷ་ཐོ་ཐོ་རིག་གཉན་བཙན་གྱི་རིང་ལ་པཎྜི་ཏ་བློ་སེམས་འཚོས་ཀྱང་གླེགས་བམ་ཙམ་བསྐྱལ་བས་དམ་པ་ཆོས་ཀྱི་དབུ་བརྙེས། བོད་བླུན་པོ་རྒྱལ་པོ་ཙམ་ལ་ཡིད་རྟོན་པར་བྱེད་པ་རྒྱུ་མཚན་དུ་བྱས་ནས་ས་བཅུའི་དབང་ཕྱུག་སྲིད་པ་ལ་མངོན་པར་སྤྲོ་བའི་མི་དབང་གི་སྒྱུ་མ་ལ་བསྙེམས་པ་སྲོང་བཙན་གྱི་རིང་ལ་ཉིད་སྤྲུལ་པའི་སྐུ་ཡིན་པའི་རང་སྟོབས་ཀྱིས་དཀོན་ཅོག་གསུམ་ལ་བླ་མར་བྱ་བའི་སྲོལ་བཏོད། ར་སའི་གཙུག་
ལག་ཁང་མཐའ་འདུལ་ཡང་འདུལ་དང་བཅས་པ་བཞེངས། ཁྲི་སྲོང་གི་དུས་ན་སྤྲུལ་པའི་དམག་གིས་ཆུ་བོ་གདྒཱ་ཚུན་ཆད་དབང་དུ་བསྡུས་ཤིང༌། མཁན་སློབ་རྣམ་གཉིས་སྤྱན་དྲངས་ནས་རྒྱ་གར་ཏུའང་མ་བྱུང་བའི་བསྟན་པ་དར་རྒྱས་སུ་མཛད། དེ་དུས་རྒྱ་ནག་ཏུ་ཆོས་བྱུང་ནས་ལོ་སྟོང་དང་ཉིས་བརྒྱ་སོང་ཟེར། རལ་པ་ཅན་གྱི་དུས་གསུང་རབ་རྣམས་ལ་སྐད་གསར་བཅད་ཀྱིས་དག་ཐེར་མཛད་ཅིང་དཀོན་མཆོག་ལ་མཆོག་ཏུ་གུས་པར་མཛད། དེ་ལྟ་མོད་ཀྱི་གླང་དར་མ་འུ་དུམ་བཙན་གྱི་བསོད་ནམས་མ་ཡིན་པས་ལྕགས་མོ་བྱའི་ལོ་དམ་པའི་ཆོས་འདུལ་བའི་བསྟན་པ་ལ་རྨ་སྲོལ་ཆེན་པོ་བཏོད་ནས་ལོ་བདུན་ཅུ་རྩ་བརྒྱད་ཀྱི་བར་དུ་སྡེ་སྣོད་འཛིན་པའི་གཟུགས་བརྙན་ཙམ་མེད་ཀྱང༌། འོད་སྲུངས་དང་དཔལ་འཁོར་བཙན་རྗེ་འབངས་ཐམས་ཅད་ཀྱིས་དཀོན་ཅོག་ལ་གུས་པ་མ་གཏང་བས་ཆོས་འཁོར་ཆེན་པོ་གསུམ་ལ་སོགས་པའི་གཙུག་ལག་ཁང་རྣམས་ཀྱང་མ་ཞིག །ཁྱིམ་དང་རི་སུལ་ན་གནས་པའི་རྡོ་རྗེ་འཛིན་པ་དག་གིས་བཀའ་དང་བསྟན་བཅོས་ཀྱི་གླེགས་བམ་རྣམས་ཀྱང་གུས་པར་བསྲུངས་པས་ས་ཕོ་སྟག་ལ་མདོ་སྨད་ནས། བླ་ཆེན་སྡོམ་རྒྱུན་ལས་བསྟན་པ་ཕྱི་དར་བྱུང་མ་ཐག་ལོངས་སྤྱོད་དུ་བྱུང༌། དེ་བཞིན་དུ་པཎྜི་ཏ་དྷརྨ་པཱ་ལ་ལས་སྟོད་འདུལ་དང༌། ཀླུ་མེས་ལ་སོགས་པས་ཀྱང་གཙུག་ལག་ཁང་བརྩིགས་ཤིང་བསྟན་པའི་ཕྱག་བཞེས་རྒྱ་ཆེན་པོར་
མཛད། དེ་དག་ལས་སྡེ་སྣོད་འཛིན་པའི་བསྟན་པའི་རྒྱུན་དབྱར་གྱི་ཆུ་ཀླུང་བཞིན་དུ་རྒྱས་པས་གངས་ཅན་གྱི་ཡུལ་དང་ཡུལ་ཕྲན་ཀུན་གནས་གཞི་དང༌། གཙུག་ལག་ཁང་དང༌། དགེ་འདུན་གྱིས་གང་བ་ལས་བསྟན་པ་ཡུན་དུ་གནས་པའི་རྟེན་ཅིང་འབྲེལ་འབྱུང་ཆེན་པོར་གྱུར་པའི་ཕྱིར་ན་འདིར་ཆེད་དུ་བརྗོད་པའི་གཏམ་གྱིས་སྐབས་འཚོལ་བ་ལ། ས་ཚིགས་ཀྱི་ཡུལ་དབུས་འགྱུར་འཆང་ཆེན་པོ་མ་ག་དྷཱ་རྡོ་རྗེའི་གདན་བསྐལ་པ་འཇིག་པའི་གནོད་པས་ཀྱང་བདོ་བར་མི་ནུས་ཤིང༌། དུས་གསུམ་གྱི་སངས་རྒྱས་མ་ལུས་པ་མངོན་པར་འཚང་རྒྱ་བའི་མཛད་པ་སྟོན་པའི་གནས་ནས། བྱང་ཕྱོགས་ཀྱི་རི་བོའི་རྒྱུད་དུ་དཔག་ཚད་བརྒྱ་ཕྲག་ལྷག་བཅས་ཐལ་བའི་ས་ན། ཆོས་ཚིགས་ཀྱི་ཡུལ་དབུས། འབྱོར་པ། རྒྱས་པ། བདེ་བ། ལོ་ལེགས་པ། གྲོང་ཁྱེར་དང༌། གྲོང་རྡལ་དང༌། སྐྱེ་བོ་མང་པོས་གང་བ་ན་ར་ས་འཕྲུལ་སྣང་གི་གཙུག་ལག་ཁང་ཆེན་པོ་ཞེས་བྱ་བ། རྒྱལ་བུ་རྒྱལ་བྱེད་ཀྱི་ཚུལ། ཁྱིམ་བདག་མགོན་མེད་ཟས་སྦྱིན་གྱི་ཀུན་དགའ་ར་བ་ཡང་མོག་མོག་པོར་བྱེད་པ་དག་ཡོད་དོ། །དེ་ན་རྫོགས་པའི་སངས་རྒྱས་ཤཱཀྱ་མུ་ནེ། སེམས་ཅན་རྣམས་ཀྱིས་གསོལ་བ་འདེབས་པ་ལ་ཞལ་ནས་ཅང་མི་གསུང་པའི་ལན་བཏབ་ནས་སོ་སོའི་རེ་བ་ཡིད་བཞིན་དུ་སྐོང་བ་དང༌། སྤྱོད་ལམ་རྣམ་པ་བཞི་མི་མཛད་པར་རྟག་ཏུ་མཉམ་པར་བཞག་
པ་དང༌། འོད་འདོམ་གང་བའང་སོ་སོ་སྐྱེ་བོ་རྣམས་ཀྱིས་བལྟར་མི་མངོན་པར་མཛད་ནས་སྤྲོས་པ་ཉེ་བར་ཞི་བ་གང་ལ་བྱང་ཆུབ་སེམས་དཔའ་དང་ཉན་ཐོས་ཀྱི་དགེ་འདུན་ཁྲི་ཕྲག་མང་པོས་བསྐོར་ནས་མཆོད་པར་བྱེད། རི་མོར་བྱེད། བསྟི་སྟང་དུ་བྱེད། རྗེད་པར་བྱེད། བྱང་ཆུབ་མཆོག་ཏུ་སེམས་བསྐྱེད་པར་བྱེད། སྨོན་ལམ་རྒྱ་ཆེན་པོ་འདེབས་པར་བྱེད་པའི་རྟེན་དུ་སྨོས་ཅི་དགོས། སློབ་དཔོན་དཔའ་བོས། དགའ་བར་བགྱིད་པའི་ཡུལ་རྣམས་དང༌། རྒྱགས་པར་བགྱིད་པའི་ལང་ཚོ་དང༌། །བདག་ཉིད་རང་དགར་སྤྱོད་པ་དེ། །ཀུན་ཏུ་དོན་མེད་བགྱིད་པའི་སྒོ། །ཞེས་གསུངས་པ་ལྟར། རང་བཞིན་གྱིས་མི་ཁོམ་པའི་ཀུན་དཀྲིས་ཅན། རང་འབྱོར་གྱི་ཡན་ལག་ཉམས་པ། ངེས་འབྱུང་གི་དམ་ལ་མ་བཞག་པ་འཚེ་བ་ལོངས་སྤྱོད་དུ་ཐོབ་པ་རིགས་དང༌། གཟུགས་དང༌། དབང་ཐང་དང༌། ལང་ཚོས་དྲེགས་པ་མ་ཧཱ་ཙི་ན་དང༌། ཧོར་དང༌། ཡུ་གུར་དང༌། ཁལ་ཁ་དང༌། ཐོར་གོད་དང༌། འོར་དུ་སུབ་དང༌། སྤོ་རོད་དང༌། ཨོ་རོད་དང༌། སྤྲེལ་སླག་ཅན་ལ་སོགས་པ་མོ་གོལ་གྱི་ཀླ་ཀློ་ཏུ་རུ་ཥྐའི་ཕྱོགས་སུ་ཉེ་བ་རྣམས་དང༌། རྒྱ་གར། ཁ་ཆེ། ནཻ་པ་ལ། ཡེར་ཁི་ན། ཁ་ཆུར། ཕི་ལིང༌། བར་དང་བར་གྱི་རི་བྲག་པའི་རྒྱལ་ཕྲན་རྣམས་ཀྱིས་ཀྱང༌། སྤྱི་བོས་བཏུད་པར་བྱེད་ཅིང༌། ཆོས་དང༌། ནོར་
དང༌། འདོད་པ་དང༌། ཐར་པ་སྟེ་སྡེ་བཞིའི་སྒོ་འཕར་རང་བཞིན་གྱིས་བྱེ་བ་ཞིག་མཆིས་སོ། །གང་ལས་ལྷོ་ཕྱོགས་སུ་གདུགས་གཉིས་ཀྱིས་བདེ་བར་ཕྱིན་པའི་ས་ན། ཨོ་ཏནྟ་པུ་རིའི་གཙུག་ལག་ཁང་བྷོ་ཊའི་ཡུལ་དུ་ཆས་པ་ལ་གཟི་བྱིན་གསར་བ་བརྒྱ་ཕྲག་གིས་འཆོར་ཆེན་པོས་བ་གོས་ཏེ། ཕྱི་མངོན་པ། ནང་འདུལ་བ། གཞན་གསང་སྔགས་དང་མཐུན་པའི་ལུགས་གསུམ་ཟན་གཡང་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ངམ། ཆོས་འཁོར་དཔལ་གྱི་བསམ་ཡས་སུ་མིང་སྤོས་ནས་ཕྲུ་མ་བཏབ་པ་ལ་ངོམས་མི་ཤེས་པར་བལྟས་ནས་སླར་ཡང་ལྷོ་ཕྱོགས་ནས་ལྷོ་ཕྱོགས་སུ་ཉིན་ལམ་གཅིག་པའི་ས་ན། དབུས་གཙང་རུ་བཞིའི་ཆ་ལ་ནམ་མཁའི་བླ་བྲེ་དཔྱངས་པའི་འོག་ན་ཡུལ་གྱི་དགེ་མཚན་རྣམ་པ་བཅུ་མ་ལུས་པ་ཚང་ཞིང༌། རི་བོ་འབྲས་ཀྱི་སྙེ་མ་དཔལ་དུ་འབར་བ་ལྟ་བུས་སའི་དཔྱད་བཀྲ་ཤིས་པར་ཡང་བཟུང་ལ། དམ་པ་ཆོས་ཀྱི་དབུ་བརྙེས་པ་ཕོ་བྲང་དུ་ཡུམ་བུ་གླ་སྒང་དང༌། ཁྲ་འབྲུག་བྱམས་པ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གཉིས། ངང་དུར་ཁྱོ་ཤུག་ཡན་མན་མཛའ་གཅུགས་ཀྱི་དམ་བཅའ་སྙེག་པའི་ཆོ་ག་གསར་དུ་རྩོམ་པ་དང༌། བཙུན་མོ་ངང་ཚུལ་མའི་ཐུགས་དམ་རྟེན་བཅན་ཐང་གི་གཙུག་ལག་ཁང་རྨ་བྱའི་བུ་མོ་སྐྱེད་མོས་ཚལ་དུ་ཕྱིན་པ་ལྟ་བུའི་དགེ་མཚན་བརྒྱ་ཕྲག་གིས་བཟུང་བ་ཡོད་དོ། །དེ་དང་ཉེ་
བར་ལོ་ཙཱ་བ་ཆེན་པོ་ཅོག་རོ་ཀླུའི་རྒྱལ་མཚན་གྱིས་རྒྱལ་པོ་ལ་ཤེལ་སྐུ་འདྲ་ཅོག་པ་བསྟན་ཏེ་རྒྱ་གར་ནས་བྱོན་པའི་ཆུ་ཤེལ་གྱི་འཕགས་པའི་སྐུ་དངོས་བསྟན་ཡུལ་ཞེན་གྱིས་མཆོད་རྟེན་ནང་རྫོངས་ལ་བཅུག་པར་གྲགས་པའི་ཚེ་ཆུ་འབུམ་པ། བྱ་སའི་བཙན་པོ་ལྷ་ཆེན་པོས་བཞེངས་པའི་རྟེན་དང་བརྟེན་པ་རྙིང་མ་ལ་ཇོ་བོ་ཨ་ཏི་ཤས་ཕྱག་ནས་འཐོར་བ་དང༌། བཀའ་གདམས་པ་སྣེའུ་ཟུར་པའི་ཡང་སློབ་སྐོར་ཆེན་པོས་བཞེངས་པའི་སྟག་ཅན་འབུམ་མོ་ཆེ། ཡུལ་ཡར་ཀླུངས་ལ་གསེར་པ་དང་གཡུ་པ་ཞེས་གྲགས་པའི་བར་མཚམས་ན་མངའ་བདག་ལྷ་སྡེའི་དུས་ཙམ་ན་དཀོན་ཐང་གྲ་མིག་ཐང་བྱ་བའི་དགོན་གནས་ཤིན་ཏུ་དར་བ་རེ་ཞིག་ནས་ཉམས་པའི་ཁྱིམ་བཙུན་ཨ་རོ་དར་མ་ཞེས་བྱ་བ་ལ་སྒྲོལ་མའི་སྤྲུལ་པ་ནེ་ཙོ་སྨྲ་ཤེས་ཤིག་ཡོད། དེས་ཚོང་རྒྱལ་འཕམ། ལམ་འཕྲང་བདེ་དོག་ལ་སོགས་པའི་མངོན་ཤེས་འཆད་པས་ཁོ་དང་ཕལ་ཆེར་འགྲོགས། ནེ་ཙོ་ཡུལ་དུ་བཞག་པའི་རེས་གཅིག་ལ། ཁོའི་བླ་གཡུ་ཆེན་པོ་ཁྱིམ་ལ་སྦས་ཏེ་ནེ་ཙོ་ལ་བཅོལ་པའི་ཤུལ་དུ་ནེ་ཙོ་ནད་ཀྱིས་བཏབ་པས་གཡུ་ལ་གབ་ནས་ཁ་ཆེམས་སུ་བདག་པོ་མ་སླེབ་བར་དུ་རོ་མ་སྒུལ་ཅིག་ཟེར། དེར་ཁོ་སླེབས་པ་དང་ལས་ཀྱི་འབྲེལ་བ་ཅན་དུ་ཤེས་ནས་ནེ་ཙོའི་རོ་དང་གཡུ་གཉིས་ཀ་ནང་དུ་བཞག་པའི་མཆོད་རྟེན་ཆུང་ངུ་ཞིག་བཞེངས། སྨྲྀ་ཏིས་ཕྱག་ནས་མཛད་པས་བྱིན་
རླབས་ཆེ། ནེ་ཙོ་མཆོད་རྟེན་དུ་གྲགས་ནས་ཐམས་ཅད་དད་པས་བསྐོར་བའི་སྐབས། གཅིག་གིས་གཡུ་འདོན་པར་བརྩམས་པ་དེ་གཞན་གྱིས་རིག་ནས་མཆོད་རྟེན་ལ་ཕྱི་ཐུམས་བྱའམ། ལྕགས་རིས་བསྐོར་བགྲོ་བའི་སྐབས། གསེར་པ་དང༌། གཡུ་པ་གཉིས་འཐབ་མོ་ཆེན་པོས་མི་གསད་མང་པོ་བྱེད་པ་ལ། སྦ་གཡུ་དྲུང་གིས་བསྐུལ་ནས་མདོ་སྨད་རོག་དམར་ཞུར་བས་འདུམས་མཛད། ཁོང་རྣམས་ཀྱང་དད་པས་གསེར་པས་ཤར་དང༌། གཡུ་པས་ནུབ་ཀྱི་ལས་མི་བྱས་ནས་ཕྱི་ཐུམས་ཀྱི་སྐུ་འབུམ་ཆེན་པོ་བྱས་པ་ལ་འཁོན་བསྡུམས་སམ། སྲི་ཆོད་འབུམ་པར་ཡང་གྲགས་པ་གནམ་གྱི་ཕྲུ་མ་བཏབ་པ་ལྟ་བུར་གྱུར་པའི་ཡུལ་ལྗོངས་ཆེན་པོ་སྤྱི་བོ་གཉིས་པ་ལ་ཡར་མོ་ཤར་ནུབ་ཅེས་གྲགས་པ་ལས། གཡུ་པའི་ལ་ཐོད་ཡར་མོ་ནུབ་ཅེས་བྱ་བའི་ཡུལ། དཀར་ཆག་འཕང་ཐར་མ་དང༌། ལྡན་དཀར་མའི་ཕྱི་ནས་བོད་དུ་རྒྱལ་བའི་བཀའ་འགྱུར་རོ་ཅོག་ཕྱོགས་སུ་སྡེབ་པའི་སྤོབས་པ་ཐོག་མར་ཐོབ་པ་བཅོམ་ལྡན་རིག་པའི་རལ་གྲི། སངས་རྒྱས་མྱ་ངན་ལས་འདས་ནས་ལོ་བརྒྱ་དང་སུམ་ཅུ་རྩ་བདུན་ན་བདུད་ཀྱི་ཕྱོགས་སུ་གྱུར་པའི་དགེ་སློང་གཉིས་ཀྱིས་གཞི་ལྔ་བསྔགས་པར་བྱས་པའི་རྐྱེན་ལས་རིམ་བཞིན་ཀྲྀ་ཀིའི་རྨིས་ལྟས་ལ་མངོན་དུ་སྤྱོད་པའི་ཉན་ཐོས་སྡེ་པ་བཅོ་བརྒྱད་དུ་བྱེ་ཞིང༌། དྲུག་ཅུ་རྩ་གསུམ་གྱི་བར་དུ་རང་སྡེ་མཆོག་འཛིན་གྱི་དབྱེན་
ཆེན་པོར་གྱུར་པ་གནས་བརྟན་གནས་མའི་བུས་རྣམ་པར་གྲོལ་བའི་རས་ཡུག་མ་ཉམས་པའི་བཀར་བསྡུས་པའི་བློ་གྲོས་དཔེ་ཟླར་རུང་བ། གངས་རིའི་ཁྲོད་འདིར་རྒྱལ་བའི་ཕྲིན་ལས་དང༌། གདུལ་ཚུལ་བསམ་གྱིས་མི་ཁྱབ་པས་བསྟན་པའི་ཆུ་མགོ་ཐ་དད་དུ་གྱུར་པ་ལ་རྩ་ལྟུང་དྲུག་པ་རིན་གྱིས་ཉོ་བའི་ཕྱོགས་རིས་ཉེ་འཁོན་མེད་པའི་གཏན་ཚིགས་ལ་དགོད་པར་བློ་གྲོས་དང་ཐུགས་བསྐྱེད་མཚུངས་ཟླ་མ་མཆིས་པ་མཁས་པ་ཆེན་པོ་འགོས་ལོ་གཞོན་ནུ་དཔལ། བོད་རྒྱལ་ཕྲན་བསིལ་མའི་ཉམས་འོག་ཏུ་ཆུད་པས་རྒྱལ་བའི་བསྟན་པ་དང༌། སེམས་ཅན་གྱི་བདེ་སྐྱིད་རྣལ་དུ་མི་གནས་པ་འཕགས་པའི་ལམ་སྲོལ་ཆོས་ཁྲིམས་གཅིག་གི་གདུགས་དཀར་འོག་ཏུ་བདེ་བར་བྱེད་པའི་ཐུགས་བསྐྱེད་མངོན་དུ་བདོ་བ་ངག་དབང་བློ་བཟང་རྒྱ་མཚོའི་སྡེ། སངས་རྒྱས་གྲགས་ཀྱིས་རང་ཡུལ་དུ་རྡོ་ཐོག་ཐིལ་བཏབ་ནས་རྗུ་འཕྲུལ་གྱི་ནུས་པས་སེ་ཆེན་རྒྱལ་པོའི་འཇའ་ས་དང་དར་རིངས་ཆེན་པོ་བླངས་པ་རྣལ་འབྱོར་གྱི་དབང་ཕྱུག་སྐྱི་ཆོས་ཀྱི་སེང་གེ་དཔོན་སློབ་ལ་སོགས་སྐྱེས་བུ་ཆེན་པོ་དུ་མ་ཞིག་སྐྱེ་བའི་འཁྲི་ཤིང་བཟུང་བའི་ཡུལ། སྤྲུལ་པའི་རྒྱལ་པོ་སྲོང་བཙན་སྒམ་པོས་གཟུགས་སྐུའི་སྣང་བ་སྤྲུལ་གཞིར་བསྡུས་པ་དང་འཇིག་རྟེན་མཐུན་པར་འཇུག་པའི་ལུགས་གཉིས་ལས། རེ་ཞིག་གི་ཚེ་དབང་པོའི་རྡོ་རྗེས་འགྲོ་ལྡོག་གིས་དུབ་
པའི་ས་འཛིན་རྣམས་ལ་ངལ་བསོའི་དབུགས་འབྱིན་བྱིན་པའི་རི། བརྒྱ་བྱིན་གྱི་གླང་པོ་ཆེ་རབ་བརྟན་གཡུལ་ངོ་ལ་ཆས་པ་ལྟར་ཚོར་བ་མི་ལྷོད་པ། བག་ཕེབས་པ། གཟི་བརྗིད་ཀྱིས་རྒྱགས་པ། བལྟ་ན་སྡུག་པ། དཔའ་བ་དང་དེས་པའི་ངང་ཚུལ་བལྟར་མི་བཟོད་པའི་སྤྱི་བོས་ཀྱང་ཆབ་མི་འཚལ་བར་འདུད་པ་འཕྱིང་དབར་བ་སོ་དམར་པོ་ཞེས་ནོར་གཏེར་དང༌། ཆོས་གཏེར་མཐའ་ཡས་པའི་གན་མཛོད་ཆེན་པོ། འགྲོ་བའི་མགོན་པོ་མངའ་བདག་ཉང་ཉི་མ་འོད་ཟེར་གྱིས་ཀྱང་གཏེར་སྒྲོམ་སྨུག་པོའི་ནང་ནས་བྱང་ཆུབ་ལྗོན་ཤིང་ལས་གྲུབ་པའི་བླ་མ་རྡོ་རྗེ་འཆང་ཆེན་པོའི་སྣང་བརྙན་སྤྱན་དྲངས་པའི་དབེན་གནས་ཆེན་པོ་དང་ཡན་མན་མཛའ་བ་ལྷར་འབྲེལ་བའི་སའི་ཐིག་ལེ་འཕྱིང་ཡུལ་ངར་མོའི་ཐང་དང་ཉེ་བར་གནའ་བོའི་དུས་སུ་བང་སོ་རྨུ་ལུགས་སུ་བརྩིགས་པ་ལ་གནམ་གྱི་ཁྲི་བདུན། སའི་ལེགས་དྲུག །བར་གྱི་སྟེང་གཉིས། ལྡེ་བརྒྱད། བཙན་ལྔ་ལ་སོགས་པ་གཡུང་དྲུང་བོན་གྱི་རྗེས་སུ་འབྲངས་པ་ལས། ཆོས་ཀྱི་རྒྱལ་པོ་སྲོང་བཙན་སྒམ་པོའི་རིང་ལ་རྒྱལ་བའི་རིང་ལུགས་དང་འབྲེལ་ཞིང་ཐར་པ་དང་ཐམས་ཅད་མཁྱེན་པའི་ཉི་རྒྱུ་དྲང་པོའི་དགོས་པ་དང་ལྡན་པས་ཡབ་ཡུམ་གསུམ་རང་བྱོན་བཅུ་གཅིག་ཞལ་གྱི་ཐུགས་ཀར་ཐིམ་པ་སྒྲོ་སྐུར་དང་དཔྱ་བ་བསལ་ཕྱིར་གསང་རྒྱས་བཏབ་སྟེ། འཕན་ཡུལ་ཟལ་མོའི་སྒང་དུ་འདས་པ་
ཡིན་ནོ། །ཞེས་དྲིལ་བསྒྲགས་ནས་བང་སོ་ནང་རྒྱན་ཅན་དུ་བརྩིགས་པའི་ཁྱད་ཆོས་ནི། ཡིག་ཚང་རྙིང་པ་ལས། བང་སོ་གྲུ་བཞི་དཀྱིལ་དུ་རེའུ་མིག་བྱས། །དར་དང་ཤུ་གུ་བསྲེས་པའི་འཇིམ་པ་ལ། །དེ་ལ་ཆོས་རྒྱལ་ཆེན་པོའི་སྐུ་བཞེངས་ནས། །ཤིང་རྟར་སྤྱན་དྲངས་རོལ་མོར་བཅས་ནས་ནི། །སྐུ་དེ་བང་སོའི་ནང་དུ་བཞུགས་པར་མཛད། །ནང་གི་རེའུ་མིག་ཐམས་ཅད་ནོར་གྱིས་བཀང༌། །བང་སོ་གྲུ་བཞིར་བརྩིག་པ་དེ་ནས་བྱུང༌། །ཞེས་མདོར་བསྟན་དང༌། རང་བཞིན་རྒྱས་པར་བརྗོད་པ་ནི། ཆོས་བློན་ཆེན་པོ་འགར་གྱིས་མཛད་པའི་དཀར་ཆག་ཏུ། དེར་ཡང་ཁྲི་བདུན་དུར་བཏབ་གནམ་ལ་བཏབ། །ལྷ་ལུས་རོ་མེད་འཇའ་ལྟར་ཡལ་ལོ་ཞེས། །སྟེང་གཉིས་བང་སོ་གཡའ་དང་རྫ་ལ་བཏབ། །ཡལ་དཔོན་རུ་ལུས་སྐྱེས་ཀྱིས་བྱས་སོ་ཟེར། །ལེགས་དྲུག་བང་སོ་གཡའ་སྤང་མཚམས་སུ་བཏབ། །སྡེ་བརྒྱད་བང་སོ་ཆུ་བོའི་གཞུང་ལ་བརྩིགས། །དེ་ཉིད་མཚོ་ལ་ཁ་བ་བབས་པ་ལྟར། །ཟིན་ལྔ་མན་ཆོད་བང་སོ་ཡུལ་ལ་བཏབ། །དེ་ནི་རྗེ་འབངས་གཉིས་པོ་འཐབས་པའི་ས། །ཡུལ་གྱི་མིང་ནི་འཕྱིང་ཡུལ་དར་མོའི་ཐང༌། །བང་སོ་ཡོད་མེད་ས་ཕུང་བརྡལ་འདྲ་ཡོད། །ཁྲི་གཉན་བང་སོ་དོན་མཁར་མདའ་རུ་བརྩིགས། །དེ་ཡང་ཡོད་མེད་ས་ཕུང་བརྡལ་འདྲ་ཡོད། །འབྲོང་གཉན་ལྡེ་རུའི་བང་སོ་ཞང་མདར་བརྩིགས། །རྗེ་འབངས་གསུམ་ཙམ་
གསོན་པོར་དུར་དུ་སྤས། །མིང་ནི་གསོན་བཅད་ལྡེམ་པོར་ཞེས་སུ་གྲགས། །སྟག་རི་གཉན་གཟིགས་དོན་མཁར་མདའ་རུ་བརྩིགས། །གྲལ་ནི་ཁྲི་གཉན་བང་སོའི་གཡས་ན་ཡོད། །བང་སོ་རྨུ་ལུགས་བརྩིགས་པ་ཡིན་ནོ་ཟེར། །གནམ་རི་སྲོང་བཙན་དོན་མཁར་མདའ་རུ་བརྩིགས། །འཕྲུལ་སྐྱེས་བརྩེགས་པའི་སྲོག་མཁར་ཡོད་དོ་ཟེར། །གྲལ་ནི་ཁྲི་གཉན་བཟུང་བཙན་གཡོན་ན་ཡོད། །མིང་ནི་གུང་རི་སོག་པ་ལེགས་སོ་ཟེར། །སྲོང་བཙན་བང་སོ་འཕྱོང་བུའི་མདའ་རུ་ཡོད། །ཆེ་ཆུང་ཚད་ནི་དཔག་ཆེན་མདའ་རྒྱང་གང༌། །ཞིང་གི་ཚད་ནི་ཉང་གི་རྡོ་རྒྱང་གང༌། །ནང་ན་ལྷ་ཁང་ལྔ་ཡང་བཞུགས་སུ་གསོལ། །བང་སོ་ནང་རྒྱན་ཅན་དུ་གྲགས་པ་ཡིན། །གསང་བའི་མཚན་ནི་རྨུ་རི་སྨུག་པོ་ཞེས། །འཛམ་བུའི་གླིང་གི་ནོར་ཕུད་ལན་གསུམ་བསྡུས། །ལྷ་ཡི་རིན་ཆེན་སྣ་ལྔ་དང༌། །ཀླུ་ཡི་རིན་ཆེན་སྣ་ལྔ་དང༌། །མི་ཡི་རིན་ཆེན་སྣ་ལྔ་སོགས། །ས་བཅུད་གསོ་ཞིང་སྐྱེ་འགྲོའི་བདེ་ཐབས་བསྒྲུན། །དེ་དུས་ས་ནི་འབྲིང་གི་རི་ནས་སྙེད། །དམ་གྱི་ས་ནི་གཉན་གྱི་ཆུ་ནས་བླངས། །སྒོ་ནི་ནུབ་ཕྱོགས་བལ་པོའི་ཡུལ་དུ་བསྟེན། །ནང་གི་ཆ་ནི་རྣམ་པ་ལྔ་རུ་བཀོད། །དབུས་སུ་རྡོ་རྗེ་གཙུག་གི་དམ་སྲི་མནན། །དེ་ཡི་སྟེང་དུ་ཙན་དན་ས་མཆོག་གི །ཀ་བ་ཁོར་ཡུག་ཁྲུ་ཚད་བཅོ་བརྒྱད་པ། །ལྟེ་བ་དེ་རུ་རྒྱལ་པོའི་ན་བཟའ་དང༌། །ནོར་བུའི་རིགས་བྱེད་བསམ་གྱིས་མི་ཁྱབ་ཅིང༌། །རིན་པོ་ཆེ་ཡི་པྲོག་ཞུ་བྱེ་བ་ཡོད། །དེ་ཡི་སྟེང་དུ་ཙན་
དན་སྦྲུལ་སྙིང་གི །གདུགས་ནི་ཀུན་ལ་ཁྱབ་པར་ཕུབ་ནས་ཡོད། །རྒྱ་གར་རྒྱལ་པོའི་ནོར་གྱི་སྙིང་ཐོབ་པ། །ཨུ་ཊ་ཡ་ནའི་ཁྲབ་ཀྱི་རྒྱལ་པོ་གཅིག །བྱང་བུ་རེ་ལ་གསེར་སྲང་བྱེ་བ་རི། །དེ་ནི་ནུབ་ཀྱི་ཕྱོགས་ན་ཚས་བཟང་བ། །རིན་ཆེན་ཟངས་ཀྱིས་བསྒྲིལ་ཏེ་སྦས་ནས་ཡོད། །རི་རྒྱལ་ལྷུན་པོའི་ཕྱོགས་ནས་རྙེད་པ་ཡི། །རྒྱ་ནག་རྒྱལ་པོའི་ནོར་གྱི་སྙིང་ཐོབ་པ། །རིན་ཆེན་བྱུ་རུའི་རྒྱལ་མོ་ལག་གཡས་པ། །ཁྲུ་བརྒྱད་ཡོད་པའི་འོད་ཟེར་འབར་བ་ཞིག །མར་མེའི་ཚུལ་བྱས་བྱང་གི་ཕྱོགས་ན་ཡོད། །རྒྱལ་པོ་རང་གི་ནོར་གྱི་སྙིང་ཐོབ་པའི། །ནོར་བུ་འཕྱིང་བུའི་ཕུང་པོ་ཁྲུ་གང་བ། །དེ་ནི་དབུས་ཀྱི་ཕྱོགས་སུ་ཚས་བཟང་བ། །ཟ་འོག་དག་གིས་བསྒྲིལ་ཏེ་སྦས་ནས་ཡོད། །ཧོར་གྱི་རྒྱལ་པོའི་ནོར་གྱི་སྙིང་ཐོབ་པའི། །གསེར་མི་རྟའི་གཟུགས་སུ་བྱས་པ་དག །ལེབ་རྒན་འབར་བའི་དར་སྣས་གྲིལ་ཏེ་ཡོད། །མི་རྟའི་གཟུགས་དང་མཉམ་པའི་འཁྲུལ་འཁོར་ཅན། །དེ་ནི་ཤར་གྱི་ཕྱོགས་ན་སྦས་ནས་ཡོད། །ཡ་རྩེ་རྒྱལ་པོའི་ཕྱག་ནས་བླངས་པ་ཡི། །མུ་ཏིག་ཁལ་དུ་གཞལ་བའི་སུམ་གཉིས་དག །ཤ་ཕྲུག་རླིད་བུར་བཅུག་ནས་ལྷོ་ཕྱོགས་སྦས། །གཞན་ཡང་ནོར་ནི་རྣམ་པ་སྣ་ཚོགས་པ། །རིན་པོ་ཆེ་ཡི་གདུང་ལ་བཀལ་ནས་ཡོད། །ནང་ན་ལྷ་ཁང་ལྔ་ཡང་བཞུགས་ཚུལ་ནི། །ཐམས་ཅད་རྡོ་ལ་བྱས་པའི་མཎྜལ་སྟེང༌། །བཞུགས་པའི་ལྷ་ཚོགས་རྣམས་ཀྱི་གཙོ་བོ་མཆོག །དཀྱིལ་ཀྱི་ཀ་བ་དེ་ལ་སྐུ་རྒྱབ་བརྟེན། །
སངས་རྒྱས་མ་ཆགས་པདྨ་ཅན་ལ་ནི། །བྱིན་རླབས་ལྡན་པའི་སེམས་དཔའ་གཉིས་ཀྱིས་བསྐོར། །ཤར་ན་རྗེ་བཙུན་སྒྲོལ་མ་ལ་སོགས་པའི། །གྲུབ་པ་བརྙེས་པའི་ལྷ་བརྒྱད་ཅེས་བྱ་བཞུགས། །ལྷོ་ཡི་ཕྱོགས་ནས་སངས་རྒྱས་སྨན་པ་ཡི། །རྒྱལ་པོ་ལ་ནི་འཁོར་གྱི་མཆོག་གྱུར་པ། །ཉི་མ་ཟླ་བ་ལ་སོགས་སྣང་བྱེད་བསྐོར། །ནུབ་ཀྱི་ཕྱོགས་ན་སངས་རྒྱས་དགའ་བ་ཡི། །དཔལ་ལ་ཉེ་བའི་སྲས་བརྒྱད་བསྐོར་ནས་ཡོད། །བྱང་གི་ཕྱོགས་ན་གནོད་སྦྱིན་ཛམ་བྷ་ལར། །རྟ་བདག་བརྒྱད་ཀྱིས་བསྐོར་བའི་གཙོ་འཁོར་བཞུགས། །དབུས་ཀྱི་ཀ་བའི་སྟེང་ན་སྐུ་རྟེན་པ། །ཐུགས་རྗེ་ཆེན་པོ་སྤྱན་རས་གཟིགས་ཀྱི་སྐུ། །ཚད་དང་ལྡན་པའི་གཙོ་བོ་དེ་ལ་ནི། །བུདྡྷ་ལྷ་འཁོར་དྲུག་ཅུ་ཁྲུ་གང་པས། །བསྐོར་བ་དེ་དག་རིན་པོ་ཆེ་ལས་གྲུབ། །མཆོད་པའི་རྣམ་གྲངས་ལྷ་དང་མཉམ་པ་ཡོད། །དེ་དུས་འདི་ཡི་སྟེང་ཁ་གཅོད་པའི་ཚེ། །སྒོ་ཡི་ཐད་དུ་འཕྲུལ་གྱི་མི་ཆེན་བཞི། །དེ་ཡི་གཡས་གཡོན་འཁྲུལ་འཁོར་དཔག་ཆེན་བཞི། །གཞན་ཡང་འཇིགས་པའི་རྣམ་གྲངས་དུ་མ་ཡོད། །མེ་ནི་མ་ཚུགས་པར་ཡང་བཞུགས་པ་སོགས། །ནམ་མཁའ་འཕུར་འདྲ་བར་སྣང་འཕྱང་འདྲ་ཡོད། །དེ་ཚེ་འདི་ཉིད་སྟེང་ཁ་བཅད་པར་འགྱུར། །ཅེས་སོ། །འདི་ལྟར་གྱི་བྱ་བ་ལས་ཀྱི་འཁོར་ལོ་ལ་རབ་ཏུ་གནས་པའང་ཕྱོགས་བཅུའི་སངས་རྒྱས་སྲས་དང་བཅས་པས་མངའ་གསོལ་བ་སོགས་སྦྱོར་དངོས་མཐའ་རྒྱས་དང་
བཅས་པ་ལེགས་པར་ཚགས་སུ་བཙུད་པས་བསོད་ནམས་ཆ་མཐུན་གྱི་དགེ་ཚོགས་རིན་པོ་ཆེའི་ཡན་ལག་ཕ་མཐར་བརྐྱང་ནས་འགྲོ་བའི་བསོད་ནམས་ཀྱི་ཉེར་འཚོ་ཕུལ་དུ་གྱུར་པ་ཉིད་དུ་བསྒྲུབས་པའི་ཚུལ་གཏན་ཚིགས་ཀྱི་ཡི་གེ་རྙིང་པར། ཕྱོགས་བཅུའི་སངས་རྒྱས་རྣམས་དང་ཉན་ཐོས་དང༌། །བྱང་ཆུབ་སེམས་དཔའ་དམ་ཅན་ཆོས་སྐྱོང་རྣམས། །གནས་དེར་ལྷགས་ནས་བང་སོ་དེ་ལ་ནི། །བཀྲ་ཤིས་རབ་ཏུ་གནས་པའི་ཕྲིན་ལས་མཛད། །དཔོན་སྲས་མང་སྲོང་བཙན་དེ་ལ་སོགས་པའི། །བློན་པོ་བོད་འབངས་འཁོར་དང་བཅས་པ་རྣམས། །མཆོད་པའི་ཡོ་བྱད་བསམ་གྱིས་མི་ཁྱབ་པ། །གནས་དེར་ཁྱེར་ནས་ཕྱག་དང་མཆོད་པ་འབུལ། །དེ་ལྟར་འགྲན་མེད་རྒྱལ་པོའི་བང་སོ་དེ། །ཡུལ་དེའི་ལྷ་སྲུང་རྣམས་ལ་བཅོལ་དམ་མཛད། །གསོལ་བ་བཏབ་ནས་སླར་ཡང་ཡུལ་དུ་བྱོན། །ཞེས་སོ། །གནས་ཚུལ་དེ་ལྟ་བུས་བཀྲ་ཤིས་སྲོང་བཙན་བང་སོའི་རྟོགས་པ་བརྗོད་པའི་ཞར་ལ་བློ་གསལ་དབང་པོ་དྭངས་པ་རྣམས་ལོ་རྒྱུས་ལ་འདྲིས་པར་བྱ་བའི་སླད་དུ་དབོན་སྲས་གཞན་རྣམས་ཀྱི་བང་སོ་དག་གཙོ་དང་འཁོར་གྱི་ཚོམ་བུའི་ཚུལ་དུ་ཉེ་བར་གནས་པའི་གཏམ་གྱི་སྦྱོར་བ་གླེང་བ་ལ་འདི་སྐད་ཅེས་ཞུགས་སོ། །གུང་རི་གུང་བཙན་བང་སོ་དོན་མདར་བརྩིགས། །གྲལ་ནི་གནས་རི་སྲོང་བཙན་གཡོན་ན་བཞུགས། །མིང་ནི་གུང་རི་གུང་རྗེ་ཞེས་བྱར་གྲགས། །མང་སྲོང་བང་སོ་སྲོང་བཙན་
གཡོན་ན་ཡོད། །བང་སོ་དེ་ཡང་རིན་ཆེན་ནོར་གྱིས་བཀང༌། །མིང་ནི་མདོ་གཞེར་ཧྲལ་པོ་ཟེར་བ་ཡིན། །འཕྲུལ་རྒྱལ་བང་སོ་མང་སྲོང་གཡོན་ན་ཡོད། །བང་སོ་ལྷ་རི་ཅན་ཞེས་གྲགས་པར་འགྱུར། །ཁྲི་ལྡེ་གཙུག་བརྟན་མེ་ཡིས་ཨག་ཚོམ་གྱི། །བང་སོ་མུ་ལ་རི་ལ་བརྩིགས་པ་ཡི། །གྲལ་ནི་འཕྲུལ་གྱི་རྒྱལ་པོའི་གཡོན་ན་ཡོད། །མིང་ནི་ལྷ་རི་གཙུག་ནམ་བྱ་བ་ལགས། །ལྗང་ཚ་ལྷ་དཔོན་བང་སོ་མེས་ཀྱི་མདུན། །ཟླུམ་པོར་བརྩིགས་ནས་གཏེར་མང་སྦས་སོ་སྐད། །ཁྲི་སོང་བང་སོ་མུ་ལ་རི་ལ་བརྩིགས། །གྲལ་ནི་ཡབ་ཀྱི་རྒྱབ་ངོས་གཡས་ན་ཡོད། །དེ་ནི་མ་གྲོངས་པ་ནས་ཉིད་ཀྱིས་བརྩིགས། །མིང་ནི་འཕྲུལ་རི་གཙུག་སྣང་བྱ་བ་ལགས། །དེ་ཡི་རྩ་ན་རྡོ་རིངས་གཅིག་ཀྱང་ཡོད། །བང་སོ་ཕྱི་རྒྱན་ཅན་ཞེས་གྲགས་པར་འགྱུར། །འདི་མུ་ལ་རི་རྒྱུད་དོན་མཁར་གྱི་མདའ་འབྱེས་ཀྱི་གཡོན་ཟུར་ན་ཡོད་ཅིང༌། རྡོ་རིངས་དེང་སང་མི་སྣང་བ་ཞིང་པའི་སྙག་གིས་ནོན་ནས་ཆེར་མ་སོང༌། གཏན་ཚིགས་སུ་མུ་ལ་རི་ཞེས་བྲིས་པ་ནི་རི་རྒྱུད་དེ་ཀ་ཡིན་པས་དོན་གྱི་ཐོབ་པ་ལ་བཏགས་པ་སྟེ། དོན་ལ་མི་འགྱུར་བའི་གཟེར་རྡོ་རིངས་སོ། །ལྷ་སྲས་མུ་ནེ་བཙན་པོའི་བང་སོ་ནི། །ཨག་ཚོམ་བང་སོའི་གཡས་ངོས་མདུན་ན་ཡོད། །མིང་ནི་ལྷ་རི་ལྡེམ་པོ་ཟར་རོ་སྐད། །འབྲིང་པོ་མུ་རུབ་བང་སོ་དོན་མདར་བརྩིགས། །མིང་ནི་གྱང་རི་གྱང་ལྡེམ་བྱ་བར་གྲགས། །ཐ་ཆུང་སད་ན་ལེགས་ཀྱང་དེ་ཡི་ཕྱོགས། །ལ་ལ་
འཕྲུལ་རྒྱལ་མདུན་ན་ཡོད་པར་སྨྲ། །ཁྲི་ལྡེ་སྲོང་བཙན་གྲལ་ནི་འཕྲུལ་རྒྱལ་མདུན། །ཡུམ་གྱི་ཆབ་གང་དགོངས་པས་གནས་ཀྱི་མཐོང། །དེ་ཡང་མ་གྲོངས་གོང་དུ་རང་གིས་བརྩིགས། །མིང་ནི་རྒྱལ་ཆེན་འཕྲུལ་གཞིར་བྱ་བ་ལ། །དེ་ཡི་མདུན་ལ་རྩིས་ཀྱི་རྡོ་རིང་ལ། །རྒྱལ་ཁམས་བདེ་ལ་བཀོད་པའི་དཀར་ཆག་བྲིས། །བང་སོའི་ནང་ལ་རྒྱལ་པོའི་པུར་བཞུགས་ཚེ། །ཟངས་ཆེན་ཁ་སྦྱོར་ནང་དུ་གདན་ལ་བཞུགས། །གཏན་ཚིགས་གཞན་དུ་རྒྱལ་ཆེན་བང་སོ་སད་ན་ལེགས་ཀྱི་སྲས་ལྡེང་ཁྲི་བྱ་བའི་ཡིན་པར་བཤད་ཀྱང་ལོ་རྒྱུས་འདི་བཀའ་མི་བཙན། སྔོན་གྱི་ཡི་གེ་རྙིང་པ་ལ་འདི་ལྟར་བཤད་པ་དཔྱད་བཟོད་ཅིང༌། ཁྲི་ལྡེ་སྲོང་བཙན་ཅེས་པ་ནི་མངའ་བདག་ཁྲི་རལ་ཡིན་པར་སྒྲ་སྦྱོར་བམ་པོ་གཉིས་པས་བསྟན་ནོ། །འདི་ལྟར་དབོན་སྲས་རལ་པ་གཉའ་ཁྲི་བཙན་པོ་ནས། རལ་པ་ཅན་ཡན་ལ། སྐྱིད་པའི་གདུང་རབས་ཕྱེད་དང་བཅུ་གསུམ་དང༌། །ཤིན་དུ་སྐྱིད་པའི་གདུང་རབས་ལྔ་ཞེས་གྲགས། །གདུང་རབས་མནྡཱ་ར་བའི་ཕྲེང་བ་ལ། །ཀ་ར་ཝཱི་རའི་ཆུན་འཕྱང་གླང་དར་གྱི། །བང་སོ་འཕྲུལ་དང་རྒྱལ་ཆེན་བར་བརྩིགས་པ། །འཕྲོ་ཆན་ཉིད་དུ་ལུས་མོད་འོད་སྲུངས་པར། །འཕྲུལ་གྱི་རྒྱལ་པོའི་རྒྱབ་ན་བརྩེགས་པ་སྟེ། །དེ་ཕྱིན་བང་སོ་རྩིག་པའི་སྲོལ་ནུབ་ནས། །བོད་འབངས་བསིལ་བུར་འཐོར་བའི་མགོ་བརྩམས་སོ། །ཡུལ་བརྟན་དང་འོད་སྲུངས་ནས། ཞེས་གཏན་ཚིགས་
མི་མཐུན་པ་དུ་ལ་མ་གཞིག་འགྲེལ་གྱིས་དཔྱད་པ་གསུམ་དྲང་པོར་བསྲངས་ནས་འདིར་མཐོང་བའི་ཆོས་སུ་གྱུར་པའི་རྟེན་བརྟེན་པའི་ངེས་བརྗོད་ནི། ཇི་སྐད་དུ། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྤྱོད་པའི་དོན་བྱེད་དོ། །ཞེས་གསུངས་པ་ལྟར། །པཎྜི་ཏ་སྒྲའི་ཚེར་མ་བོད་དུ་བྱོན་ནས་རེ་ཞིག་འདས་ཤིང་བསྟན་པ་ཕྱི་དར་ནས་དྲུག་ཅུ་རྩ་ལྔ་པ་ཆུ་བོ་རྟ་ལ་ཇོ་བོ་ཨ་ཏི་ཤ་བྱོན་ནས་ལྷ་ཆོས་བདུན་ལྡན་གྱི་བསྟན་པའི་སྣང་བས་གངས་རིའི་ཁྲོད་ཀྱི་མུན་པ་བསལ། །སྡེ་སྣོད་འཛིན་པ་སྤྱོད་པ་ལྷོད་པ་དག་གི་གཉེན་པོར་བྱང་ཆུབ་ལམ་གྱི་སྒྲོན་མ་མཛད་ཅིང༌། །དགེ་འདུན་རྣམས་སྦྱངས་པའི་ཡོན་ཏན་བཅུ་གཉིས་ལ་བཀོད། རིམ་བཞིན་ཁ་ཆེའི་བསོད་སྙོམས་པ་ཆེན་པོའི་སྡོམ་རྒྱུན་རྣམ་པར་དག་པས་བླ་ཆེན་སྡོམ་རྒྱུན་ཆག་གཏོར་མ་དང༌། དེར་བསམ་ལ་སོགས་པ་ལ་བྱི་དོར་བྱས་པའང་འཕེལ། བསྟན་པའི་ཕྱག་བཞེས་གཞི་གསུམ་གྱི་ཆོ་གའང་ཇེ་རྒྱས་སུ་གྱུར། ཕུལ་དུ་བྱུང་བའི་མཁས་པ་ཆེན་པོ་རོང་པ་ཆོས་ཀྱི་བཟང་པོ། དཔལ་ཆེན་ཟུར་པ། མར་འབྲོག་མི་གསུམ་ལ་སོགས་པས་རྡོ་རྗེ་ཐེག་པའི་བཤད་སྒྲུབ་ཀྱི་རྒྱལ་མཚན་བླ་ན་ཕྱར། །རྔོག་ལོ་ཆེན་པོ་བློ་ལྡན་ཤེས་རབ། །པ་ཚབ་ལོ་ཙཱ་དང་བཅས་པས་སྡེ་སྣོད་གསུམ་གྱི་གངས་ལྡན་ལ་དབུ་ཚད་བྱམས་ཆོས་ལ་སོགས་པའི་
ཐལ་འགྱུར་གྱི་གད་རྒྱངས་བསྒྲགས་པས་རིགས་པ་མ་ཡིན་པའི་ཅེ་སྤྱང་རྣམས་བརྒལ་བརྟག་རྩོད་པའི་འཁོར་ལོའི་དཔལ་ལ་མ་ཆགས་པར་རིང་དུ་བྲོས། དུས་དེའི་ཚེ་ཟུར་གསང་བདག་སྒྲོ་ཕུག་པ་ཆེན་པོའི་ཡང་སློབ་རྒྱ་སྨན་རྡོ་ཐོགས་པ་སངས་རྒྱས་གྲགས་ཀྱི་སློབ་མ་སྐྱི་ཆོས་ཀྱི་སེང་གེ་ཞེས་མཐུ་སྟོབས་དང་རྫུ་འཕྲུལ་གྱི་ནུས་པས་གོང་མ་སེ་ཆེན་རྒྱལ་པོའང་ངོ་མཚར་གྱིས་གནས་ལ་བཀོད་པའི་གྲུབ་པའི་རིག་འཛིན་གྱི་སློབ་བརྒྱུད་ཉང་སྟོན་ཡབ་སྲས་ཀྱི་རིང་ལ་བང་སོའི་སྟེང་དུ་གཙང་ཁང་དམར་པོ་འདི་ཆགས་ཤིང༌། རིམ་གྱིས་ཕྱི་ཁྱམས་ལས་གཙུག་ལག་ཁང་གི་གཞི་མོར་གྱུར་པ་འདི་ཉིད་འགྲོ་བའི་བསོད་ནམས་ཀྱི་ཉེར་འཚོར་དེ་བཞིན་གཤེགས་པའི་ཐུགས་རྗེས་བཀོད་པ་ནི་ཆོ་འཕྲུལ་རྣམ་པར་བསྟན་པ་ལས། རིགས་ཀྱི་བུ་ལེགས་སོ་ལེགས་སོ། །ཀྱེ་རྒྱལ་བའི་བུ་དག་དེ་བཞིན་གཤེགས་པའི་ཐབས་མཁས་པ་དང༌། སེམས་ཅན་ཡོངས་སུ་སྨིན་པར་བྱ་བ་ནི་མང་པོ། །ཞེས་པའི་འཕྲོར་ཁ་ཅིག་ནི་སྐུ་གཟུགས་བྱེད་དུ་གཞུག་པ་དང༌། རི་མོ་དང༌། གསེར་དང༌། དངུལ་དང༌། ར་གན་གྱི་སྐུ་གཟུགས་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཞེས་གསུངས་པ་བཞིན། བརྟེན་པའི་གཙོ་བོར་ད་ལྟ་དགའ་ལྡན་ན་བྱང་ཆུབ་སེམས་དཔའི་ངང་ཚུལ་ཅན། མ་འོངས་པའི་
ཚེ་ན་བསྟན་པའི་བདག་པོ་ཉིད་དུ་བཞེངས་པར་འགྱུར་བ་རྒྱལ་བ་མ་རྒྱལ་བ་ལས་རྒྱལ་བས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་ཕམ་མགོན་པོ། གཡས་སུ་འདས་པའི་སངས་རྒྱས་ཐམས་ཅད་ཀྱི་ངོ་བོ་མར་མེ་མཛད། གཡོན་དུ་ད་ལྟར་བའི་བསྟན་པའི་བདག་པོ་བསྐལ་པ་བཟང་པོའི་སངས་རྒྱས་སྟོང་རྩ་གཉིས་ཀྱི་ནང་ཚན་ལས་ཀྱང་པད་དཀར་ལྟར་བསྔགས་པ་རྒྱལ་བ་ཤཱཀྱ་སེང་གེ དེ་བཞིན་གཤེགས་པའི་གསུང་གི་གསང་བ་འཛིན་པ་ལ་མི་བརྗེད་པའི་གཟུངས་དང༌། སྤོབས་པའི་གཏེར་གྲོལ་བ་མཐུ་སྟོབས་ཀྱི་དབང་ཕྱུག་ན་རྡོ་རྗེ། དེ་དག་གི་ནང་ཚན་ལས་ཀྱང་ཡེ་ཤེས་ཀྱི་འཇུག་པ་མངོན་དུ་གྱུར་པའི་གཟི་བྱིན་དང༌། མཐུ་དབང་བ་ལྟར་མི་བཟོད་པའི་བརྟུལ་ཞུགས་ཀྱིས་ཁྱད་པར་དུ་བྱས་པ་བཅོམ་ལྡན་འདས་རྟ་མཆོག་རོལ་པའི་སྣང་བརྙན་འདི་རྟོག་ཚོགས་ལྷ་སྐུར་ཤར་བ། རྒྱལ་སྲས་བསྟན་པའི་ཉི་མའི་ཕྱག་བཟོས་བསྐྲུན་ཞིང་མཐུན་སྣང་གྲུབ་པར་ཞལ་རས་ལ་རྡུལ་མི་བཞེས། ཐུགས་ཀ་ན་དྲོད་རྟ་རྔ་ཙམ་ཁོར་ཡུག་ཏུ་བཞུགས་པ་ཡོངས་ལ་གྲགས་པས། འདི་ལ་གསོལ་བ་བཏབ་པའམ། རེག་པ་ཙམ་གྱིས་གནོད་སྦྱིན་མ་རུངས་པ་དང༌། གྲིབ་གནོན། གནོན་པོ། སྨྱོ་བརྗེད་ལ་སོགས། ཤ་ཟའི་གདོན། གདུག་པ་ཅན་གཟའ་ཀླུའི་ནད་ལས་གྲོལ་བ་སོགས་ཡིད་བཞིན་གྱི་ནོར་བུ་ལས་ཀྱང་དགོས་
དགུ་རྩོལ་བའི་ཡོན་ཏན་གྱི་ཁྱད་པར་དུ་བྱས་པའང༌། འདི་ལྟར་ཟ་ཧོར་གྱི་རྒྱལ་རིགས་ཤིང་སཱ་ལ་བ་ལྟ་བུའི་ཆོ་རིགས་བཙུན་པོའི་བདྨོའི་གེ་སར་ལས་གྲོལ་ཅིང༌། ལྷ་དང་བཅས་པའི་གཙུག་གི་ནོར་བུ། ཐམས་ཅད་གཟིགས་པའི་ཡེ་ཤེས་ལ་མངའ་དབང་ཆུབ་པ། གནས་ལྔ་རིག་པའི་པཎྜི་ཏ། ཆོས་ཀྱི་འཁོར་ལོས་སྒྱུར་བའི་རྒྱལ་པོ། ཐེག་པ་མཐའ་ཡས་པའི་ཁྱད་ནོར་རིན་པོ་ཆེ་སྣ་བདུན་གྱིས་བསྲུངས་པས་ལྗོངས་འདིར་རྒྱལ་བའི་བསྟན་པ་མཐའ་དག་ཉེ་འཁོན་མེད་པའི་གནས་ལ་སྦྱར་ཞིང༌། ཤིང་རྟ་ཆེན་པོ་གཉིས་ཀྱི་རིང་ལུགས་འཇམ་པའི་དབྱངས་ཀྱི་ཞལ་ལུང་དུ་སྒྲོག་པ་ལ་རྒྱ་གར་གྱི་ཆུ་བོ་གངྒཱ་ཚུན་ཆད་ན་གྲགས་པའི་དཔལ་གྱིས་མཐོ་བ་གོང་མ་ལྔ་པ་ཆེན་པོ་ཞབས་འབམ་གྱིས་བསྙུན་པའི་ཚེ་རྟ་མགྲིན་འདིའི་ཞབས་ལ་ཞིག་གསོ་དང་མཆོད་འབུལ་མཛད་པས་སྙུན་དྭངས། གནས་འདིར་ཞབས་པད་བསྐྱོད་པའི་ཚེ་ཡང་སྤྲུལ་པའི་གུ་རུ་མཚན་བརྒྱད་ཞལ་གཟིགས། ཕྱི་ནང་གཞན་གསུམ་རྟེན་འབྲེལ་གཅིག་པའི་ངོ་མཚར་གྱི་བཀོད་པ་མཐོངབའི་ཆོས་ལ་གནས། བོད་ཀྱི་སྲིད་སྐྱོང་ཀུན་གྱིས་སྲི་ཞུ་བླ་ན་མེད་པ་མཛད། བསིལ་བའི་ཚལ་དང་མཉམ་པའི་མགོན་ཁང་འདིར་སྤྲུལ་པའི་སྐུའི་བྱི་བྱད་ཀྱིས་བཞུགས་པའི་སངས་རྒྱས་ལྔ། རྗེ་བཙུན་སྒྲོལ་མ་དང༌། སྣ་ཚོགས་ཡུམ་རིགས་གཅིག །མགོན་པོ་ཕྱག་དྲུག་པ། ཆོས་རྒྱལ་
སྲོང་བཙན་དང་བཙུན་མོའི་དམ་པ་གཉིས། སྤྲུལ་པའི་བློན་པོ་གཉིས་དང་བཅས་པ་གནའ་བོའི་བཟོ་བཀོད་ཡེ་ཤེས་ཀྱི་སྲོག་དང་ལྡན་པའི་འདུན་སར་དུག་གསུམ་རཱུ་ཏྲའི་གཤེད་པོ་དཔལ་ཡེ་ཤེས་ཀྱི་མགོན་པོ་མ་ནིང་ནག་པོ་སྤྲུལ་འཁོར་དགྱེས་སྡེ་དང་བཅས་པ་གཏེར་སྟོན་ཆེན་པོ་གུ་རུ་ཆོས་ཀྱི་དབང་ཕྱུག་གི་ཤངས་མཚལ་ལས། དེའི་སློབ་བརྒྱུད་སྐལ་ལྡན་ཡར་ཀླུངས་སྤྲུལ་སྐུ་རྒྱལ་བ་རིགས་ལྔར་གྲགས་པའི་ནང་ཚན་ཆོས་ལྡན་པ་དང་དུར་ཁྲོད་པའི་སྲས་སུ་གྱུར་པ་སྨན་ལུང་བ་ཤཱཀྱ་གཞོན་ནུས་ཕྱག་བྲིས་སུ་མཛད། ཡེ་ཤེས་སེམས་དཔའ་མངོན་སུམ་པར་བཅུག་པས་ཕྲིན་ལས་རྣམ་བཞི་བདེ་བླག་ཏུ་འགྲུབ་པ་ལ་རྩོད་པ་མེད་པས་དམ་པའི་ཚོགས་ཀྱང་ཞལ་དབྱེ་བར་བག་འཁུམས་ལ། ལྔ་པ་ཆེན་པོ་ནས་བཟུང་ཆོས་སྲིད་ཁྲིམས་ཀྱི་ཁ་ལོ་བ་ཀུན་ནས་ཀྱང་སྐོང་བ་དང་བསྟི་སྟང་བླ་ན་མེད་པ་མཛད་པའོ། །གོང་མ་ལྔ་པའི་རྣམ་ཐར་ན་སྨན་ལུང་པའི་ཤངས་མཚལ་དུ་ཐེབས་པ་རྒྱུས་ལ་མི་མཁས་པས་སྣང་ལ་མ་ངེས་པའི་སྙན་སྒྲོན་བྱས་པ་དོན་ལ་མི་གནས་པ་ཉིད་དོ། །དེ་དག་གི་རྟེན་གསུམ་རྙིང་མའི་ལོ་རྒྱུས་རགས་རིམ་སྔོན་དུ་བསྙད་ནས་ཕྱིས་དད་པ་དང་བསོན་ནམས་ཀྱིས་མངོན་པར་མཐོ་བ་ཐ་དད་པ་ནས་རང་རང་གི་དཀར་པོ་རྣམ་པར་འཕེལ་བའི་སླད་དུ་གསར་བཞེངས་རྣམས་མངོན་སུམ་མིག་གི་དགའ་སྟོན་ལ་བཞུགས་ཤིང༌། གཡོན་ཕྱོགས་ཀྱི་སྟེགས་བུ་འདི་ནི་ལྷ་བཙན་པོ་ཁྲི་སྲོང་ལྡེའུ་བཙན་གྱི་སྲས་གསུམ་
གྱི་འབྲིང་པོ་མུ་རུབ་བཙན་པོའི་སྤྲུལ་པའི་ཟློས་གར་སངས་རྒྱས་གླིང་པས་ཤར་ཕྱོགས་ཤིང་ལོའི་ཚལ་དུ་བདུད་རྩིའི་སྒྲུབ་ཆེན་མཛད་པའི་ཚེ། འབྱུང་པོ་མི་བསྲུན་པས་གླགས་བལྟས་ནས་སྨན་རྣམས་སྔིག་པའི་གོང་བུར་བསྒྱུར། ཞལ་ནས་འདི་བར་ཆད་དུ་འདུག་པས་དངོས་གྲུབ་ལེན་ལུགས་ཤེས་དགོས་གསུངས་པ་ན། དཔལ་ཆེན་རྡོ་རྗེ་ཕུར་པའི་རྣལ་འབྱོར་པ་བཛྲ་ཀུ་མཱ་རས། བཀའ་བཞིན་བསྒྲུབ་པར་བདག་འཚལ་ལགས། ཞེས་ཡུལ་གསུམ་གྱད་དུ་གྱུར་པའི་གཉེན་པོ་སྟོབས་ཀྱི་ལྷར་བསྙེམས་ཏེ་སྡིག་གཟུགས་ཞལ་དུ་བསྟབས་པས་ཆོས་འཕྲུལ་མི་བསྲུན་པ་རང་སར་དེངས། ཕྱོགས་ཐམས་ཅད་སྨན་དྲིས་ཁྱབ། སླར་སྡིག་པའི་ཁོག་པ་དེ་སྟེགས་བུ་འདིའི་སྟེང་དུ་བཏུལ་ནས་སྨན་དུ་བྱས་པ་ཆོས་ཉིད་འགྱུར་བ་མེད་པའི་ཁ་དོག་ཏུ་ཤར་བས་སླན་ནག་ཏུ་གྲགས་པ་བྱིན་རླབས་ཤིན་ཏུ་ཆེ་བ་བྱུང༌། སྟེགས་བུ་འདིར་སྨན་སྒྲུབ་མཛད་པ་པོ་གུ་རུ་ཆོས་དབང་ཡིན་ཟེར་བ་སོགས་ལོ་རྒྱུས་ཕན་ཚུན་འཆོལ་བར་སྨྲ་བ་ནི་རྒན་པོའི་ངག་འགྲོས་ལ་ཡིད་བརྟན་འཆའ་བ་རྣམས་ཀྱིས་གཏན་ཚིགས་སོ། །འདི་ལྟར་རྒྱ་གར་དུ་མཻ་ཏྲི་པས་མཆོད་རྟེན་གྱི་སེར་ཁའི་འོད་ལ་གཟིགས་པས། རྒྱུད་བླ་མ་དང་ཆོས་ཉིད་རྣམ་འབྱེད་གཉིས་ཀྱི་དཔེ་བྱུང༌། དེ་བཞིན་དུ་མཛངས་བླུན་ན་ཀུན་ཏུ་རྒྱུས་ཚུལ་ཁྲིམས་བསྲུངས་པའི་ལེའུར་ཡང་ཁྱིམ་གྱི་ཀ་བ་ནས་རྟེན་འབྲེལ་བཅུ་གཉིས་ཀྱི་མདོ་དང༌། ཉིན་ཞག་གཅིག་པའི་ཁྲིམས་བརྒྱད་ཀྱི་དཔེ་བྱུང་བའི་གཏམ་རྒྱུད་ཡོད་པ་བཞིན་ཕྱིས་རབ་བྱུང་བཅུ་གཉིས་པའི་ནང་དུ་རྒྱལ་སྲས་ལྷ་རྗེ་སྤྲུལ་པའི་སྒྱུ་འཕྲུལ་ལ་ཆགས་པ་
འཛམ་གླིང་རྡོ་རྗེས་རྒྱལ་དབང་པདྨའི་ཕོ་ཉ་ཡེ་ཤེས་དག་པའི་མཁའ་འགྲོ་མས་དུས་གསུམ་དུས་མེད་ཆེན་པོར་རྒྱས་བཏབ་པ་འཕུར་འགྲོའི་ཐེག་པའི་ཡང་བཅུད་དང་ཤྲཱི་སིངྷ་དང་ཨོ་རྒྱན་ཆེན་པོའི་དབུ་ལོའང་སྤྱན་དྲངས་པ་སོགས་ངོ་མཚར་བྱིན་རླབས་ཅན་གྱི་སྟེགས་བུར་གྱུར་པའི་སྟེང༌། བརྟེན་པ་བླ་ན་མེད་པ་གངས་ཅན་པ་རྣམས་ཀྱི་དཔུང་གཉེན་གཅིག་པུ་པ་དཔལ་ཨོ་རྒྱན་སངས་རྒྱས་གཉིས་པ་གཙོ་འཁོར་གསུམ་གྱི་སྣང་བརྙན་དང༌། དབང་ཤེས་གནས་སུ་དག་པ་ཉེ་བའི་སྲས་བརྒྱད། མདོ་མང་པོ་ཏི་ཉི་ཤུ་ཐམ་པ་རྣམས་རྫོགས་ཆེན་པ་རང་བྱུང་རྡོ་རྗེས་བསྟན་འགྲོའི་ཉེར་འཚོར་འདུ་བྱས་ཤིང༌། ཡོན་གྱི་བདག་པོས་བཞེངས་པའི་རྗེ་བཙུན་སྒྲོལ་མའི་སྣང་བརྙན་དང་བཅས་པ་ལ་རབ་ཏུ་གནས་པ་མཐོང་བའི་ཆོས་ལ་གཟི་བྱིན་གྱི་དཔལ་དུ་འབར་རོ། །བང་སོ་འདིར་ལོ་རྒྱུས་རྙིང་བ་ཁ་ཅིག་ཏུ། ཁེངས་ལོག་ནས་ལོ་དགུ་པ་ལ་ཤུད་པུ་སྟག་རྩེ་སོགས་བཞིས་བགྲོས་ཏེ་བང་སོ་རྣམས་བགོ་བཤའ་བྱས། གཉགས་ཀྱིས་དོན་མཁར་མདའ། ཚེ་སྤོང་ཞང་གིས་རྒྱལ་ཆེན། ཤུད་པུས་སེང་གེ་ཅན། འཕྲུལ་རྒྱལ་གྲོང་འཕྱོས་རྣམས་ཀྱིས་བྲུས་ཤིང༌། མདོ་ཞེར་སྙི་པས་ཏེ་འདྲུ་འཕྲོར་ལུས། སྲོང་བཙན་འགྲོ་ལྡོག་ཟུང་གིས་ཐོབ་སྟེ་ལུས་ཞེས་ཀྱང་བཤད་མོད། ཡོངས་སུ་སྒྲོག་པར། བང་སོའི་དབྱིངས་ལ་ཆུ་བུར་གྱི་མིག་ལ་བལྟར་མི་མངོན་པའི་རླུང་སྤུ་གྲི་རེག་གཅོད་འཕྲུལ་གྱི་འཁོར་ལོའི་རྣོ་དབང་དང༌། གནོད་སྦྱིན་དཀར་པོའི་ཕྱོགས་ལ་དགའ་
བ། མི་མ་ཡིན་གྱི་ཚོགས་རྣམས་ཀྱིས་རྟག་ཏུ་སྲི་ཞུ་དང་སྲུང་བར་བྱེད་པས་ནག་པོའི་རྩ་ལག་གླང་དར་མ་འུ་དུམ་བཙན་གྱིས་ཀྱང་བང་སོ་གཞན་རྣམས་ཉམས་དམས་པར་བྱས་པའི་ཚེ་འདི་ལ་སྨ་དབབ་པར་མ་ནུས་པ་ནི་ཁྱད་གཞི་ཚད་མར་གྱུར་པའོ། །འདི་ལྟར་ཞིང་གི་ཕུལ་དང་རབ་མཆོག་དམ་པར་གྱུར་པའི་ཡུལ་ལ་འདུན་པ་དང༌། ཞེ་སྡང་དང༌། གཏི་མུག་གི་འགྲོ་བ་ཙམ་མ་ཡིན་པར་ནང་པ་སངས་རྒྱས་པའི་ཁྱད་ཆོས་གནས་སྐབས་དང་མཐར་ཐུག་ཀུན་ཏུ་མི་བསླུ་བར་ཤེས་པས་སྐྱབས་སུ་འགྲོ་བ་དང༌། སེམས་སྦྱང་བ་དང༌། ཕྱག་དང༌། བསྐོར་བ་དང༌། བསྟི་སྟང་དང༌། སྲི་ཞུའི་གནས་སུ་མེད་པས་སྒོ་གསུམ་དགེ་བའི་ལས་ལ་སྦྱར་བ་ནི་གྲུབ་པའི་མཐའ་རྒྱ་མཚོ་ལྟ་བུ་གང་གི་སྒོ་ནས་ཀྱང་བློ་མ་བཅོས་པའི་འགྲོ་བ་དང་པའི་རྗེས་སུ་འབྲང་བ་ཀུན་དང་ཐུན་མོང་གི་བྱ་བ་ཡིན་ལ། འདི་ལྟར་མཐོང་ན་མི་མཐུན་པ་མེད་པའི་རྟེན་གྱི་གཟི་བྱིན་ལས་དད་པ་ཉི་ཚེ་བ་ཙམ་ཐོབ་ཀྱང་བསོད་ནམས་དམ་པའི་ཡུལ་ལ་བསྔགས་པའི་ཚུལ་ཕལ་པོ་ཆེ་ལས། ལན་ཅིག་ཙམ་ཡང་དད་པ་སྐྱེས་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་གསུངས་པའི་ཕྱིར་རོ། །དེ་ལས་གཞན་དུ་གང་ཟག་གི་བློའི་ནུས་པའི་དབང་ལས། གནས་སྐབས་ཀྱི་སྡུག་བསྔལ་བརྣག་པར་དཀའ་བ་ལས་གྲོལ་ཅིང༌། ཕྱི་མའི་འཇིག་
རྟེན་མངོན་པར་མཐོ་བའི་དཔལ་དང་ཡོན་ཏན་ཙམ་དོན་དུ་གཉེར་བ་སྐྱེས་བུ་ཆུང་ངུའི་ཚོགས། མངོན་མཐོའི་འབྲས་བུ་དེ་དག་ཀྱང༌། ཀླུ་སྒྲུབ་ཞབས་ཀྱིས་བཤེས་སྤྲིང་དུ་གདམས་པ་བཞིན། བདེ་སྡུག་གི་འཁོར་ལོ་རེས་འཇོག་ཏུ་སྤྱོད་པ་ཙམ་ལས། ཆུ་ཤིང་གི་འབྲས་བུ་ལྟར་སྙིང་པོ་མེད་པར་ཤེས་ནས་འཁོར་བ་ཟོ་ཆུའི་འཁྱུད་མོ་ལྟ་བུའི་གནས་ལས་ངེས་པར་ཞི་བདེ་ཐར་པའི་གོ་འཕང་དོན་དུ་གཉེར་བའི་སྐྱེས་བུ་འབྲིང་གི་བློ་ཅན་མན་ཆད་དག་ཀྱང་ལམ་ཉི་ཚེ་བ་གཉིས་ལས་ལྡོག་ཏེ་བླ་ན་མེད་པའི་སེམས་བསྐྱེད་དང་བཅས་པས་རྣམ་པ་ཐམས་ཅད་མཁྱེན་པའི་གོ་འཕང་དོན་དུ་གཉེར་བ་ནི་སྐྱེས་བུ་ཆེན་པོའི་ལམ་གྱིས་འཇུག་ངོགས་ཏེ། དེའི་ཕྱིར་བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། གསོ་དཔྱད་ཕལ་པ་འདི་འདྲ་བ། །སྨན་པ་མཆོག་གིས་མ་མཛད་དེ། །ཆོ་ག་ཤིན་ཏུ་འཇམ་པོ་ཡིས། །ནད་ཆེན་དཔག་མེད་གསོ་བར་མཛད། །ཅེས་གསུངས་པ་བཞིན་ཐེག་པ་ཆེན་པོའི་ཆོས་ཁམས་རྒྱ་མཚོ་ལྟ་བུའི་ལམ་གྱི་སྦྱོར་བའི་ཆོས་བྱང་ཆུབ་ཆེན་པོར་སེམས་བསྐྱེད་པའི་སྔོན་དུ། འདི་ལྟར་ཐར་པའི་ལམ་དང་འབྲེལ་བའི་ཚངས་པའི་གནས་པ་བཞིའི་མི་མཐུན་ཕྱོགས་ལས་གྲོལ་བའི་ཚད་མེད་བཞིའི་བསམ་པས་ཀུན་ནས་བསླབས། སྦྱིན་པ་དང༌། སྙན་པར་སྨྲ་བ་དང༌། དོན་སྤྱོད་པ་དང༌། དོན་མཐུན་པ་སྟེ་བསྡུ་བའི་དངོས་པོ་བཞི་དང་ལྡན་པས་རྒྱལ་བའི་
སྲས་ཀྱི་སྤྱོད་པ་རྒྱ་མཚོའི་སྙིང་པོར་ཕྱིན་པར་སྨོན་པ་དང་དངོས་སུ་འཇུག་པའི་ཁྱད་པར་ལས་སྨོན་འཇུག་གི་རྣམ་པར་ཤར་བའང༌། བྱ་བའི་སྒོ་ནས་བསོད་ནམས་རྒྱུན་ཆགས་སུ་འཕེལ་བ་འཇུག་པའི་ལམ་ལ་སློབ་མོད་ཀྱི། གང་ཟག་ལས་དང་པོ་པས་སྨོན་པའི་སྒོ་ནས་འབྲས་བུ་ལ་དམ་བཅས་ན། ཐེག་དམན་གྱི་སྡོམ་པའང་བསམ་པ་བྱང་ཆུབ་སེམས་ཀྱིས་ཀུན་ནས་བསླང་བ་ཇོ་བོ་ཆེན་པོ་བཞེད་པའི་རྗེས་སུ་འགྲོ་ལ། འདིར་ཉིན་ཞག་གཅིག་པའི་ཁྲིམས་ལ་འདྲ་ཅོག་དུས་རེས་འགའ་བ་ཡིན་པས་ཡོན་ཏན་གྱི་རྟེན་མ་ཡིན་པས་སོ། །བརྩི་ན་ཡན་ལག་བརྒྱད་པའི་ཁྲིམས་ནོད་པ་ལ་སོགས་ཉེས་སྤྱོད་སྡོམ་པ། སྙུང་བར་གནས་པ་ལ་སོགས་པ་དགེ་བའི་ཆོས་སྡུད། འཆི་བར་ངེས་པའི་སྲོག་སྐྱོབ་པ་ལ་སོགས་སེམས་ཅན་དོན་བྱེད་དེ་བྱང་ཆུབ་སེམས་དཔའི་ཚུལ་ཁྲིམས་ཀྱི་རྗེས་མཐུན་ཁྱིམ་པའི་ཕྱོགས་ནས་ཀྱང་སྐབས་ཐོབ་ལ་སྦྱང་དུ་ཡོད་པའི་ཕྱིར། ཉ་སྟོང་བརྒྱད་གསུམ་དང༌། ཡར་མར་གྱི་ཚེས་བཅུ་རྣམ་གཉིས་སོགས་ལ་རྩེད་འཇོ་དང་གྱི་ནའི་དབང་གིས་མ་ཡིན་པར་གཙུག་ལག་ཁང་འདིར་འདུ་བར་འོས་པ་ཡིན་ནོ། །དེ་ལྟར་འདུས་ནས་ཀྱང་མགོན་པོ་ཞི་བ་ལྷས། ཚོད་མ་ལ་སོགས་སྦྱིན་པ་ལའང༌། །འདྲེན་པས་ཐོག་མར་སྦྱོར་བར་མཛད། །དེ་ལ་གོམས་ནས་ཕྱི་ནས་ནི། །རིམ་གྱིས་རང་གི་ཤ་ཡང་
གཏོང༌། །གང་གིས་རང་གི་ལུས་ལ་ནི། །ཚོད་སོགས་ལྟ་བུའི་བློ་སྐྱེས་པ། །དེ་ཚེ་ཤ་ལ་སོགས་གཏོང་བ། །དེ་ལ་དཀའ་བ་ཅི་ཞིག་ཡོད། །ཅེས་གསུངས་པ་ལྟར་གཏོང་བ་ཕུན་སུམ་ཚོགས་པའི་བསམ་སྦྱོར་མཆོག་ཏུ་དག་པས་སྣ་དྲངས་ལུས་ལོངས་སྤྱོད་དང་བཅས་པ་དཀོན་ཅོག་གསུམ་ལ་ཕུལ་བས་སྲེད་པ་དང་བཅས་པའི་བདག་ལྟའི་ས་བོན་དྲུངས་ནས་འབྱིན། བླ་ན་ཡོད་པའི་མཆོད་པ་བདག་པོས་ཡོངས་སུ་མ་བཟུང་བ་རིན་པོ་ཆེའི་རི་དང༌། ནགས་མའི་ཚལ། སྨན་གྱི་ལྗོངས། སྐྱེད་མོས་ཚལ་གྱི་བཀོད་པའི་ཚོགས། བློས་མཆོག་ཏུ་སྤྲུལ་པ་ཁྲུས་ཀྱི་ཁང་པ་ལ་སོགས་པའི་ཉེར་སྤྱོད། བླ་ན་མེད་པའི་མཆོད་པ་ཀུན་ཏུ་བཟང་པོ་དང༌། འཇམ་དཔལ་དབྱངས་ལ་སོགས་པ་སེམས་དཔའ་ཆེན་པོ་རྣམས་ཀྱི་སྤྱོད་ཡུལ་གསར་པས་བློ་གྲོས་ཀྱི་འདུན་ཁང་མཛེས་པར་བྱས་ཏེ། ཞིང་ཁམས་ཀྱི་མཆོད་སྤྲིན་སྤྲོ་བ་དང༌། ནང་པ་སངས་རྒྱས་པའི་ཆོས་དང༌། ཁྱད་པར་ཐེག་པ་བདེ་བ་དང༌། ལམ་བདེ་བ་དང༌། འཇུག་པ་བདེ་བའི་ཁྱད་པར་གྱིས་བསྐལ་ཆེན་གསུམ་གྱི་ཚོགས་ཀྱང་སྐད་ཅིག་ལ་འདུམས་པ་བསོད་ནམས་དམ་པའི་འཇུག་ངོགས་ཡན་ལག་བདུན་པ་འབུལ་བ་དང་རྗེས་འབྲེལ་དུ། བྱང་ཆུབ་སེམས་དཔའ་རྣམས་ཀྱི་རྗེས་ཐོབ་ཀྱི་ཚོགས་ནི་དམིགས་པ་དང་བྲལ་བའི་སྨོན་ལམ་བཙན་པོས་སེམས་ཅན་གྱི་ཁམས་ལ་ཕན་གདགས་
པ་ཉིད་དེ། ཡིད་བཞིན་ནོར་བུ་དཔག་བསམ་ཤིང༌། །ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱ་སྨོན་ལམ་གྱི། །དབང་ལས་རྒྱལ་བའི་སྐུར་སྣང་ངོ༌། །ཞེས་པས་དབང་རྣོན་ཆོས་རྗེས་འབྲང་བས་བསྟན་པ་དང་སེམས་ཅན་ཐུགས་ལ་ལྷག་པར་ཡང་བཅངས་པའི་སྨོན་ལམ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་འགྲན་པ་ཉིད་དུ་བསྐུལ་ལོ། །དེའང་ཤེས་རབ་ནམ་མཁའ་ལྟ་བུའི་ཐབས་ཀྱིས་ཟིན་པའི་རྟེན་ཅིང་འབྲེལ་འབྱུང་ཆེན་པོའི་བྱེད་པ་པོ་བསྔོ་བ་དམ་པའི་ཞགས་པས་བཟུང་བའི་དགེ་བ་གང་ཡིན་པ་ཐར་པའི་ལམ་མ་ནོར་བ་ཡིན་ཏེ། ཁྲི་བརྒྱད་སྟོང་པ་ལས། ཕ་རོལ་ཏུ་ཕྱིན་པ་ལྔ་པོའང་ནམ་ཤེས་རབ་ཀྱི་ཕ་རོལ་ཏུ་ཕྱིན་པས་ཟིན་པ་དེའི་ཚེ་རྣམ་པ་ཐམས་ཅད་མཁྱེན་པ་ཉིད་ཀྱི་གྲོང་ཁྱེར་ཆེན་པོར་འཇུག་པར་འགྱུར་རོ། །ཞེས་སོ། །དེའི་ཕྱིར་གཞོན་ནུ་ནོར་བཟང་གིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་སྨོན་ལམ་དུ་བཏབ་པའི་རྗེས་སུ་ཡིད་གཞུངས་ཏེ་ཐར་པ་དོན་དང་ལྡན་པ་མཛད་པར་ཞུ། ཞེས་པའང་སྡོམ་བརྩོན་རྣལ་དུ་འབྱོར་བའི་རིམ་པ་ལ་མོས་པ་ཨཽ་ཌི་ཡས་ཆེད་དུ་གཉེར་བའི་ཕྱིར་མ་འདྲེས་ཡོངས་སུ་རྫོགས་པའི་ཤིང་རྟ་ཆེན་པོ་པ་རྣམས་ཀྱི་གྲུབ་པའི་མཐའ་ལ་དད་ཅིང༌། རང་བཞིན་ཐེག་མཆོག་སྙིང་པོའི་རིང་ལུགས་
པ་ཀློང་ཆེན་ནམ་མཁའི་རྣལ་འབྱོར་གྱིས་སྔོན་གྱི་ཡི་གེ་དང༌། ངག་འགྲོས་གྱི་ནའི་རིགས་ལས་ཚད་མར་རིག་པའི་ལོ་རྒྱུས་ལ་གཞིག་འབྲེལ་སྔོན་དུ་འགྲོ་བའི་བྱི་དོར་དང་བཅས་སླར་ཡང་ཕྲི་བསྣན་ཅུང་ཟད་དང༌། མཆན་བུ་དཀྱུས་སུ་སྡེབ་པ་སོགས་དག་ཐེར་བགྱིས་པ་འདི་ཉིད་བཀའ་བཙན་པར་བྱའོ། །གཏམ་ཚོགས་ལེའུ་སོ་བདུན་པའོ།། །།
གཏམ་ཚོགས་ལེའུ་སོ་བརྒྱད་པ། བཀྲ་ཤིས་སྲོང་བཙན་བང་སོའི་དཀར་ཆག་འབྲིང་པོར་བྱས་པ་ནྱ་གྲོདྷའི་ཆུན་འཕྱང་།
བཀྲ་ཤིས་སྲོང་བཙན་བང་སོའི་དཀར་ཆག་འབྲིང་པོར་བྱས་པ་ནྱ་གྲོདྷའི་ཆུན་འཕྱང་ཞེས་བྱ་བ་བཞུགས། ཤྲཱི་མངྒ་ལ་སྭ་སྟི། གང་དུ་གཤེགས་ན་བྱང་ཆུབ་ཀྱི། །སྙིང་པོར་གྱུར་པས་བདུད་ཀྱི་སྡེ། །སྤ་བཀོང་ས་ཡང་འདར་གྱུར་པས། །ཁྱེད་ལ་བདེ་ལེགས་མཛད་པར་གྱུར། །དེ་ལ་དགེ་བཅུའི་ཡོན་ཏན་གྱི་དཔལ་དང་འགྲོགས་པའི་ཡུལ་ན། བཀྲ་ཤིས་སྲོང་བཙན་བང་སོ་ཞེས་སྙན་པའི་བ་དན་གྱིས་ས་བླ་དོག་པོར་བྱས་པའི་རྟོགས་བརྗོད་ཀྱི་མཆོད་སྤྲིན་ཅུང་ཟད་འབུལ་ན། སྡོམ་འབྱུང་ལས། འཛམ་བུ་གླིང་པའི་གཙོ་བོ་མཆོག །ཡུལ་དབུས་སུ་ནི་སྐྱེས་པ་སྟེ། །ཞེས་ཐོག་མའི་ཆོས་ཚིགས་དང་ས་ཚིགས་གཉིས་ཀའི་དབང་ལས་ཡུལ་གྱི་དབུས་དམ་པར་གྱུར་པ། འབྱོར་པ། རྒྱས་པ། བདེ་བ། ལོ་ལེགས་པ། གྲོང་ཁྱེར་དང༌། སྐྱེ་བོ་མང་པོས་གང་ཞིང་དེ་བཞིན་གཤེགས་པའི་བསྟན་པ་དང་གཙུག་ལག་རྒྱ་མཚོ་འབྱུང་བའི་གནས། མ་ག་དྷཱ་རྡོ་རྗེའི་གདན། ཤར་ཕྱོགས་ན་
གཟོ་གནས་རིག་འབྱུང་གི་ཡུལ་གྲུ་རྒྱ་ནག་རི་བོ་རྩེ་ལྔ་འཕགས་པ་ལག་ན་རལ་གྲིའི་གཞལ་མེད་ཁང༌། ལྷོ་ཕྱོགས་ན་གཉིས་མེད་རྒྱུད་རྒྱལ་གསུངས་པའི་གནས་དཔལ་ལྡན་འབྲས་སྤུངས་པའི་མཆོད་སྟོང༌། ནུབ་ཕྱོགས་ན་འཕུར་འགྲོའི་ཐེག་པ་འབྱུང་གནས་ཨོ་རྒྱན་སྤྲུལ་པའི་ཞིང་ཁམས་དཔལ་ཧེ་རུ་ཀ་རང་བྱུང་གི་གཙུག་ལག་ཁང༌། བྱང་ཕྱོགས་ན་ཕྱི་ནང་གཞན་གསུམ་གྱི་ཆོས་འཁོར་ཆོས་རྒྱལ་རིགས་ལྡན་གྱི་གནས་ཤམྦྷ་ལ་སྟེ་ཤིང་བྲྀཀྵིའི་འབྲས་བུ་ལས་འཛམ་བུ་གླིང་གི་སྒྲར་ཆགས་པའི་ཡུལ་དབུས་སུ་བདག་ཅག་གི་སྟོན་པ་བླ་ན་མཚུངས་པ་མེད་པ་དེས། ལམ་མ་ཡིན་པ་ལ་ལམ། འབྲས་བུ་མ་ཡིན་པ་ལ་འབྲས་བུར་འཁྲུལ་པའི་རྟོག་གེ་པ་དྲུག་གི་གྲུབ་པའི་མཐའ་སུན་ཕྱུང་ནས་འཁོར་ལོ་གསུམ་གྱི་ཆོས་ཀྱི་རྔ་བོ་ཆེ་ནི་བརྡུངས། འཐའ་འཁོབ་བོད་ཀྱི་ཡུལ་འཕགས་པ་སྤྱན་རས་གཟིགས་ཀྱིས་གདུལ་ཞིང་དུ་དབུགས་ཕྱུང་བས། གངས་ཅན་པ་བླུན་པོ་རྣམས་རྒྱལ་པོ་ཙམ་ལ་ཡིད་བརྟན་པར་བྱེད་པས། དེ་ཉིད་ཀྱིས་གདུལ་བའི་ཕྱིར། མང་པོས་བཀུར་བའི་རྒྱལ་རྒྱུད་ཤིང་སཱ་ལ་པ་ལྟ་བུའི་རིགས་སུ་སྤྲུལ་པའི་མྱུ་གུ་བཟུང་ནས། ལྷ་ཐོ་ཐོ་རི་གཉན་བཙན་གྱི་རིང་ལ་དམ་པ་ཆོས་ཀྱི་དབུ་བརྙེས། སྲོང་བཙན་གྱི་རིང་ལ་སྲོལ་གཏོད། ཁྲི་སྲོང་གི་རིང་ལ་མཁན་སློབ་རྣམ་གཉིས་སྤྱན་དྲངས་ཏེ་ཤིན་ཏུ་དར་རྒྱས་སུ་མཛད་པ་ལ། སྤྲུལ་པའི་རྒྱལ་པོ་
སྲོང་བཙན་སྒམ་པོ་དེ་ཉིད་ཀྱིས་བོད་འབངས་ཉིད་དཀོན་མཆོག་གསུམ་ལ་བླ་མར་བྱ་བའི་སྲོལ་བཏོད། དགེ་བ་བཅུའི་ཁྲིམས་ཀྱིས་ངན་འགྲོའི་ལམ་ལས་ལྡོག །མཐའ་འདུལ་ཡང་འདུལ་རུ་གནོན་གྱི་གཙུག་ལག་ཁང་བཞེངས་ནས་དངོས་ཉིད་རང་བྱོན་བཅུ་གཅིག་ཞལ་གྱི་ཐུགས་ཀར་ཐིམ་པའང་འཇིག་རྟེན་གྱི་སྒྲོ་སྐུར་དང་དཔྱ་བ་བསལ་ཕྱིར་གསང་རྒྱས་བཏབ། འཕན་ཡུལ་ཟལ་མོ་སྒང་དུ་འདས་པ་ཡིན་ནོ་ཞེས་དྲིལ་བསྒྲགས་ནས་སྲོང་བཙན་བང་སོར་གདུང་གཞུག་པའི་ཚུལ་བསྟན། ཡབ་མེས་གནམ་གྱི་ཁྲི་བདུན། སའི་ལེགས་དྲུག །བར་གྱི་སྟེང་གཉིས། ལྡེ་བརྒྱད། བཙན་ལྔ་ལ་སོགས་པ་གཡུང་དྲུང་བོན་གྱི་རྗེས་སུ་འབྲངས་ནས་བང་སོ་རྨུ་ལུགས་སུ་བརྩིགས་པ་ལ། ཆོས་ཀྱི་རྒྱལ་པོ་སྲོང་བཙན་སྒམ་པོའི་རིང་ལ་རྒྱལ་བའི་རིང་ལུགས་དང་འབྲེལ་བས་བང་སོ་ནང་རྒྱན་ཅན་དུ་བརྩིགས་པའི་ཁྱད་ཆོས་ནི། མགར་གྱི་ཡིག་ཚངས་ལས། སྲོང་བཙན་བང་སོ་འཕྱོང་བུའི་མདའ་རུ་བརྩིགས། །ཆེ་ཆུང་ཚད་ནི་དཔག་ཆེན་མདའ་རྒྱང་གང༌། །ཞིང་གི་ཚད་ནི་ཉང་གི་རྡོ་རྒྱང་གང༌། །སོགས་ཡིག་ཚངས་རྙིང་པ་ལ་དག་ཐེར་ཅུང་ཟད་ཀྱི་སྟེང་ལ་ཆོས་ཀྱི་རྒྱལ་པོ་མེས་དབོན་བྱང་ཆུབ་སེམས་དཔའ་རྣམས་ཀྱི་ཐུགས་བསྐྱེད་ལས་རིམ་བཞིན་ལྷུན་གྱིས་གྲུབ་པའི་གཙུག་ལག་ཁང་རྟེན་དང་བརྟེན་པར་བཅས་པའང༌། བསྟན་པ་ཕྱི་དར་གྱི་ཐོག་མ་ཉིད་ནས་ཧ་ཅང་མི་རིང་བ་ན་པཎྜི་ཏ་དཱི་པཾ་ཀ་
རས་ལྷ་ཆོས་བདུན་ལྡན་གྱི་བསྟན་པའི་སྣང་བས་དགེ་འདུན་རྣམས་སྦྱངས་པའི་ཡོན་ཏན་བཅུ་གཉིས་དང༌། གཞི་གསུམ་གྱི་ཆོ་ག་དག་པས་ཚུལ་ཁྲིམས་རྣམ་པར་དག་པ་ལ་བཀོད། ཁ་ཆེའི་བསོད་སྙོམས་པ་ཆེན་པོའི་སྡོམ་པའི་རྒྱུན་རྣམ་པར་དག་པའང་འཕེལ། ལི་ཙ་བྱི་དྲི་མེད་གྲགས་པ་གངས་རིའི་ཁྲོད་དུ་བྱོན་པའི་མཁས་པ་ཆེན་པོ་རོང་པ་ཆོས་ཀྱི་བཟང་པོ། ཟུར་མེས་དབོན་རྣམ་གསུམ། མར་འབྲོག་མི་གསུམ་ལ་སོགས་གསད་གསོ་ནུས་པའི་གྲུབ་ཐོབ་རྣམས་ཀྱིས་རྡོ་རྗེ་ཐེག་པའི་བཤད་སྒྲུབ་ཀྱི་རྒྱལ་མཚན་བླ་ན་བསྒྲེངས། རྔོག་ལོ་ཆེན་པོ་བློ་ལྡན་ཤེས་རབ་ཀྱི་ཐལ་འགྱུར་གྱི་རིག་པ་སེང་གེའི་ང་རོར་བསྒྲགས་པས། གངས་རིའི་ཁྲོད་འདི་མཁས་པའི་འབྱུང་གནས་སུ་སོང༌། དུས་དེ་ཙམ་ན་གསང་བདག་སྒྲོ་ཕུག་པ་ཆེན་པོའི་ཡང་སློབ་རྒྱ་སྨན་རྡོ་ཐོག་པ་སངས་རྒྱས་གྲགས་ཀྱི་སློབ་མ་སྐྱི་ཆོས་ཀྱི་སེང་གེ་ཞེས་པ་ལ་གོང་མ་སེ་ཆེན་གྱིས་ཐུབ་ཆོད་མཛད་དེ། མཆོད་རྟེན་གྱི་རུམ་དུ་བཅུག་པ་ལོ་དུས་ན་བལྟས་པས། རྡོ་རྗེ་ཕུར་པའི་སྐུར་གྱུར་པས་དད་དེ་རྡོ་ཐོག་པ་ལ་དར་རིང་དང་འཇའ་ས་བྱིན། དེའི་སློབ་བརྒྱུད་ཉང་སྟོན་ཡབ་སྲས་ཀྱི་རིང་ལ་བང་སོའི་སྟེང་དུ་གཙང་ཁང་དམར་པོ་འདི་ཆགས། ནང་གི་རྟེན་ལ་སངས་རྒྱས་སྤྲུལ་པའི་སྐུའི་ཆ་བྱད་ལྔ། གཡས་ཕྱོགས་ན་རྗེ་བཙུན་སྒྲོལ་མ་དང་སྒྲོལ་མ་རྣལ་འབྱོར་གྱི་རིགས་གཅིག །མགོན་པོ་ཕྱག་དྲུག་པ། གཡོན་ན་སྲོང་བཙན་སྒམ་པོ་
གཙོ་འཁོར་གསུམ་དང༌། བློན་པོའི་དམ་པ་གཉིས། ཁྱད་པར་གྱང་རིས་ལ་དུག་གསུམ་རུ་ཏྲའི་གཤེད་པོ་དཔལ་ལྡན་ཡེ་ཤེས་ཀྱི་མགོན་པོ་མ་ནིང་ནག་པོ་སྤྲུལ་འཁོར་དང་བཅས་པ། འཕགས་པ་སྤྱན་རས་གཟིགས་གོས་དཀར་ལྕང་ལོའི་ལན་བུ་ཅན་གུ་རུ་ཆོས་དབང་གི་ཤངས་མཚལ་ལས། སྨན་པ་ཤཱཀྱ་གཞོན་ནུས་ཕྱག་བྲིས་སུ་མཛད་པས། ཡེ་ཤེས་སེམས་དཔའ་མངོན་སུམ་པར་བཞུགས་ཤིང་ཤིན་ཏུ་བཀའ་གཉན་པས་ལྷ་འདྲེ་མི་གསུམ་གྱི་འདུ་བ་རྒྱུན་མི་འཆད་ལ། རྒྱལ་བ་ལྔ་པ་ནས་བཟུང་རིམ་བྱོན་དང༌། བོད་ཀྱི་སྲིད་སྐྱོང་ཀུན་གྱི་བསྟི་སྟང་བླ་ན་མེད་པ་མཛད། དེ་ལས་ཡུལ་དུས་ཅུང་ཟད་བྲི་བ་ན། ད་ལྟ་གཙུག་ལག་ཁང་གི་གཞི་མོར་གྱུར་པ་འདི་ཆགས་ཤིང༌། རྟེན་གྱི་གཙོ་བོར་དུས་གསུམ་སངས་རྒྱས་དང༌། ཁྲོ་བོ་གཉིས་ལས་ཁྱད་པར་བཅོམ་ལྡན་རྟ་མཆོག་རོལ་པའི་སྣང་བརྙན་འདི་ཡུལ་གསུམ་གྱད་དུ་གྱུར་པ་རྒྱལ་སྲས་བསྟན་པའི་ཉི་མ་ཞེས་བྱ་བའི་ཕྱག་བཟོ་ལས་གྲུབ་ཅིང༌། ཡེ་ཤེས་སེམས་དཔའ་མངོན་སུམ་པར་བཞུགས་པའི་གཟི་བྱིན་བལྟར་མི་བཟོད། ཞལ་རས་ལ་རྡུལ་མི་བཞེས། ཐུགས་ཀ་ན་དྲོང་བྱི་བའི་ཁ་རླངས་ཙམ་འཁོར་ཡུག་ཏུ་བཞུགས་པས། བྱིན་རླབས་ཤིན་ཏུ་ཆེ་བར་ཡུལ་དུས་ཀུན་ཏུ་གྲགས་ཤིང༌། གསོལ་བ་བཏབ་པའམ། སྤྱི་བོས་བཏུད་པ་ཙམ་གྱིས་གཟའ་ཀླུ་གནོད་སྦྱིན་གྱི་གདོན་ལས་གྲོལ་བ་དཔག་ཏུ་མེད་
ཅིང༌། ཁྱད་པར་རྒྱལ་དབང་ལྔ་པ་ཆེན་པོ་ཞབས་འབམ་གྱིས་བསྟུན་པའི་ཚེ་འདིའི་ཞབས་ལ་ཞིག་གསོ་དང་མཆོད་འབུལ་མཛད་པས་སྙུན་དངས། ས་འདིར་ཞབས་པད་བསྐྱོད་པའི་ཚེ་ཡང་འཇའ་སྤྲིན་བཀྲ་ཤིས་རྟགས་བརྒྱད་ཀྱི་རྣམ་པ་སླར་ཡོངས་སུ་གྱུར་པ་ལས་སྤྲུལ་པའི་གུ་རུ་མཚན་བརྒྱད་དུ་གྱུར་པ་གཟིགས། ཕྱི་ནས་གོང་ས་རིམ་བྱོན་གྱི་ཞབས་ཀྱིས་བཅགས་ཤིང༌། སྲིད་སྐྱོང་རིམ་ཅན་དང་བཅས་པས་སྲིད་ཞུ་བླ་ན་མེད་པ་མཛད། གཡོན་ཕྱོགས་ཀྱི་སྟེགས་བུ་འདི་གཏེར་སྟོན་སངས་རྒྱས་གླིང་པས་ཤར་ཕྱོགས་ཀོང་པོའི་ཡུལ་དུ་སྨན་སྒྲུབ་མཛད་པ་བར་གཅོད་ཀྱིས་སྨན་རྣམས་སྡིག་པའི་གོང་བུར་གྱུར་པ་ལ་དངོས་གྲུབ་ལེན་ལུགས་ཤེས་དགོས་གསུངས་ནས་དམ་ཚིག་གི་རྫས་སུ་བདག་གིར་མཛད་པ་ཉིད་སླར་སྟེགས་བུ་འདིའི་སྟེང་དུ་བཏུལ་ནས་སྒྲུབ་ཆེན་མཛད་པས་ཕྱོགས་ཐམས་ཅད་ན་སྨན་ནག་ཏུ་གྲགས་པའི་བྱིན་རླབས་ཤིན་ཏུ་ཆེ་བར་བྱུང་བས་སྟེགས་བུའང་གཉུག་མར་གནས་དགོས་པ་བྱུང་ལ། དེའི་སྟེང་ན་དཔལ་ཨོ་རྒྱན་སངས་རྒྱས་གཉིས་པ་གཙོ་འཁོར་གྱི་སྣང་བརྙན་རྫོགས་ཆེན་པ་རང་བྱུང་རྡོ་རྗེས་སྟོད་ཧོར་གྱི་ཁ་གནོན་ལ་བསྐྲུན། གུ་རུ་ཉིད་བོད་འབངས་ལ་ལྷག་པར་ཐུགས་བརྩེ་བས་ཡེ་ཤེས་སེམས་དཔའ་རང་བཞིན་གྱིས་བཞུགས་ནས་རྗེས་སུ་དགོངས་པས་བྱིན་རླབས་གཟི་བྱིན་གྱི་དཔལ་དུ་འབར་བ་སོགས། ཕྱིས་དད་པ་དང་བསོད་ནམས་
ལ་འདུན་པ་དག་གིས་བཞེངས་པ་རྟེན་གསུམ་དང་བཅས་པའི་སྤྱན་སྔར་སྐྱབས་སུ་འགྲོ་བ་དང༌། བྱང་སྡོམ་བླང་བ་དང༌། ཡན་ལག་བདུན་པ་ལ་སོགས་པའི་ཕན་ཡོན་ནི། སངས་རྒྱས་དངོས་སུ་བཞུགས་པ་ལ་བསྟི་སྟང་བྱས་པ་དང་ཁྱད་པར་མ་མཆིས་སོ། །དྲང་སྲོང་རྒྱས་པས་ཞུས་པ་ལས། དྲང་སྲོང་ཆེན་པོ་གང་ལ་ལ་ཞིག །བཅོམ་ལྡན་འདས་ཡོངས་སུ་མྱ་ངན་འདས་པ་དང༌། ད་ལྟ་བཞུགས་པ་ལ་མཆོད་པ་བྱེད་པ་དེའི་ཕན་ཡོན་རྣམས་ནི་མཚུངས། མཉམ་ཤིང་འདྲའོ་ཞེས་པ་འཆད་དོ། །དེ་ཅིའི་ཕྱིར་ཞེན། དེ་བཞིན་གཤེགས་པ་རྣམས་ནི་ཆོས་ཀྱི་སྐུམ་རབ་ཏུ་ཆེ་བ་ཡིན་གྱི་གཟུགས་ཀྱི་སྐུས་རབ་ཏུ་ཆེ་བ་མ་ཡིན་པའི་ཕྱིར་རོ། །ཞེས་དང་བཀའ་སྩལ་པ། ང་ཡི་འཁོར་ནི་རྣམ་བཞི་ཡིས། །ད་ལྟ་ང་ལ་མཆོད་བྱས་དང༌། །མ་འོངས་པ་ན་དད་པ་ཡིས། །གཟུགས་བརྙན་རྣམས་ནི་མཆོད་པ་ལ། །ཁྱད་པར་ཅུང་ཟད་ཡོད་མ་ཡིན། །བསོད་ནམས་མཉམ་ཞིང་རྣམ་སྨིན་མཉམ། །ཅི་སྟེ་སངས་རྒྱས་བྱིན་རླབས་ཏེ། །སོ་སོ་སྐྱེ་བོས་ཤེས་མི་འགྱུར། །དེ་ཕྱིར་སངས་རྒྱས་མ་བྱོན་པའི། །ཞིང་ན་སྐུ་གཟུགས་ཡོད་མིན་ཞིང༌། །མཐའ་ཁོབ་ཀླ་ཀློ་རྣམས་ན་མེད། །བསྟན་པ་ནུབ་ན་ཡོད་མིན་ཞིང༌། །མུ་སྟེགས་བྱོལ་སོང་སོགས་མི་མཐོང༌། །དེ་ཕྱིར་སྐུ་གཟུགས་སྤྲུལ་པ་ཡིན། །
ཞེས་གསུངས་པས་ཡོན་གྱི་གནས་ཕུལ་དུ་ཕྱིན་པ་བླ་ན་མཚུངས་པ་མེད་པ་ཉིད་ཀྱི་ཕྱིར། བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་ལྟ་བུའི་ཕ་རོལ་ཏུ་སོན་པར་འདོད་པས་རྒྱུ་མཚན་ཤེས་ནས་བླ་མར་བྱ་བ་དང༌། རི་མོར་བགྱིད་པའི་བློས་ཐལ་མོ་སྦྱར་བ་དང༌། ཕྱག་འཚལ་བ་དང༌། ཕྱག་དར་བགྱིད་པ་དང༌། གདུགས་ཕུལ་བ་དང༌། དྲིལ་བུ་དང༌། བ་དན་དང༌། ན་བཟའ་དང༌། མེ་ཏོག་དང༌། ཕྲེང་བ་དང༌། མར་མེ་དང༌། སྤོས་དང༌། སིལ་སྙན་ཕུལ་བ་སོགས་རེ་རེ་ལའང་ཕན་ཡོན་བཅུ་ཚན་རེ་རེའི་བདག་ཉིད་ཅན་དུ་ཐོབ་པ་ལས་རྣམ་པར་འབྱེད་པའི་མདོ་ལས་གསུངས་ན། ཚོགས་བསག་པའི་སྒོ་མཐའ་ཡས་པ་རྣམས་ཀྱི་ནང་ནས་ཁྱད་པར་དུ་གྱུར་པ་ཞིང་ཁམས་ཀྱི་མཆོད་སྤྲིན་སྤྲོ་བ་དང༌། ཡན་ལག་བདུན་པའི་དགེ་ཚོགས་རིན་པོ་ཆེའི་ཕུང་པོས་ཐོག་དྲངས། བསྟན་པ་དང་སེམས་ཅན་ཡོངས་ལ་སྨན་པའི་ཐུགས་སྨོན་རྒྱ་ཆེན་པོ་ལ་འཇུག་པར་ཞུ། ཞེས་པའང་སྐུ་གཉེར་རྡོ་རྗེ་ཆོས་འབྱོར་གྱིས་བསྐུལ་བ་ལ་རྫོགས་ཆེན་པ་མཁྱེན་བརྩེའི་ལྷས་སོ། །གཏམ་ཚོགས་ལེའུ་སོ་བརྒྱད་པའོ།། །།
གཏམ་ཚོགས་ལེའུ་སོ་དགུ་པ། དཔལ་རི་ཐེག་པ་ཆེན་པོའི་གླིང་གི་གཏམ་རྡོ་རྗེ་སྒྲ་མའི་རྒྱུད་མངས།
དཔལ་རི་ཐེག་པ་ཆེན་པོའི་གླིང་གི་གཏམ། རྡོ་རྗེ་སྒྲ་མའི་རྒྱུད་མངས་ཞེས་བྱ་བ། བཅོམ་ལྡན་འདས་དཔལ་སྣང་བ་མཐའ་ཡས་ལ་ཕྱག་འཚལ་ལོ། །འཆི་མེད་འོད་མཚན་སྟོང་དུ་འབར་བའི་བྱིན། །མཚོ་དབུས་པདྨའི་གེ་སར་
ལས་གྲོལ་བས། །སྣང་སྲིད་ཟིལ་གྱིས་གནོན་པ་སྤྲུལ་པའི་སྐུ། །བྱང་ཆུབ་སྙིང་པོའི་བར་དུ་གཙུག་ན་མཛེས། །ཡང་སྲིད་མང་པོར་བྱང་ཆུབ་མཆོག་གི་སྤྱོད་པར་གོམས་པའི་ལུས་མེད་ལམ། །མཐའ་ཡས་ཐེག་པའི་ཁྱད་ནོར་གྱིས་བསྲུངས་རིན་ཆེན་བདུན་གྱི་ཤིང་རྟ་ཅན། །ལུང་རྟོགས་ཡོན་ཏན་དྲི་མེད་འོད་ཟེར་སྟོང་དུ་འབར་བའི་གཟི་བྱིན་གྱིས། །འཛམ་གླིང་མཛེས་པའི་རྒྱན་དྲུག་མཆོག་ཀྱང་བསྙེམས་པ་མེད་པའི་གནས་ལ་སྦྱར། །ཚོགས་གཉིས་རླུང་གི་ཤིང་རྟས་རབ་དྲངས་སྟོབས་བཅུའི་དཔུང་ཚོགས་ཡན་ལག་བཞི་ཡིས་འདོད་ལྷ་སྡེར་བཅས་གཡུལ་ལས་རྒྱལ། །མི་འཇིགས་རྣམ་བཞིའི་མཆེ་སྡེར་རྣོན་པོས་རྟག་ཆད་སྨྲ་བའི་རྒོལ་ངན་གླང་པོའི་གླང་པ་འཐུང་དང་ཆབ་གཅིག་པར། །ཇི་ལྟ་བ་དང་ཇི་སྙེད་མཁྱེན་པའི་གངས་རིར་གནས་བཅས་སྒྲིབ་གཉིས་མུན་པ་དྲུངས་ནས་འབྱིན་པའི་བརྟུལ་ཞུགས་གཟིས། །བརྒྱ་ཕྲག་བཅུ་ཡི་འཁོར་ལོའི་དབུས་ན་མངོན་པར་མཐོ་བ་མི་ཡི་སེང་གེ་དོན་ཀུན་གྲུབ་པས་ཤིས་པ་སྩོལ། །རྗོད་བྱེད་གསུང་རབ་ཡན་ལག་བཅུ་གཉིས་དཔལ་གྱི་མགུར་ནས་སྐྱུགས་པ་ལ། །བརྗོད་བྱའི་དོན་གྱི་དྲི་བསུང་དངར་པོས་མཐའ་མེད་སྲིད་ལས་ངེས་པར་འབྱིན། །འཁོར་ལོ་གསམ་གྱི་བང་རིམ་རྨད་བྱུང་འགོག་ལམ་བདེན་པའི་རང་གཟུགས་ཅན། །དམ་པའི་ཆོས་ཀྱིས་སེམས་ཅན་ཡོངས་ཀྱི་སྙིང་ལ་འཁྱུད་
པའི་དགའ་སྟོན་སྩོལ། །ངེས་འབྱུང་བློ་ཡི་དག་བྱེད་ཕུང་པོར་ཐེག་གསུམ་ཆོས་ཀྱི་ལང་ཚོ་རྔོམ། །ལྡན་དང་གྲོལ་བའི་ཁྱད་པར་ལྷུར་བྱེད་ལུང་རྟོགས་སྙན་པའི་མགྲིན་རྔ་འཁྲོལ། །རྣམ་བྱང་མཁའ་ལ་རིག་གྲོལ་བདེན་པས་ཡོངས་སུ་འཕུར་བའི་ཚོགས་ཀྱི་མཆོག །པད་རག་བྱེ་བའི་མདངས་ལ་ཅོ་འདྲི་འཕགས་པའི་དགེ་འདུན་ཕྱག་གི་གནས། །རིམ་གསུམ་རྒྱུད་སྡེའི་ནོར་གྱིས་ཡོངས་ཕྱུག་ཅིང༌། །སྔ་འགྱུར་བསྟན་པའི་རྩ་ལག་གཅིག་པུ་ལས། །གཉིས་སུ་མ་ཡིན་ཤནྟ་པུ་རི་བར། །ངེས་པ་རྙེད་འདི་རྒྱལ་དབང་པདྨའི་མཐུ། །བསྟན་འགྲོར་སྨན་པའི་ཐུགས་བསྐྱེད་སྨོན་ལམ་གཞར་ཡང་ཉམས་པ་མེད་པ་དེའི། །སྙིང་སྟོབས་བཙན་པོས་གངས་རིའི་ལྗོངས་འདིར་རྒྱལ་བའི་བསྟན་པ་དྲངས་པའི་ཁུར། །འདེགས་ལ་དབང་ཆེན་གསེར་གྱི་ས་གཞི་དོགས་པས་སྐྲག་ནས་འདར་བའི་ཚུལ། །མེས་དབོན་གསུམ་གྱི་བཀའ་དྲིན་ཉིད་དོ་དྲན་པའི་མོད་ལ་བ་སྤུ་ཟིང༌། །སྟོང་ཉིད་སྙིང་རྗེར་ཁྲོས་པའི་འཇོ་སྒེག་གིས། །མེ་ཏོག་གཞུ་ཅན་བསྙེམས་པ་བཅག་པའི་མོད། །གར་དགུའི་ཉམས་ཀྱིས་དཔའ་བའི་ཧེ་རུ་ཀ །ཡི་དམ་ཆོས་སྲུང་རྒྱ་མཚོས་ཡོངས་སུ་སྲུངས། །འཛམ་བུ་ཆུ་བོའི་ཀླུང་གིས་སུ་ཝརྞ། །བཞུ་བའི་རྡུལ་གྱིས་ལན་བརྒྱར་བྱུགས་པའི་གཟི། །དབང་པོའི་མཚོན་ཆས་བཀྲ་བའི་ལང་ཚོ་ཅན། །
ངལ་བསོས་བུ་ཡིས་དགོས་འདོད་ཆར་དུ་སྙིལ། །ཞེས་ཤིས་པ་བརྗོད་པའི་དབྱངས་གནྡྷ་རྦའི་གླིང་བུའི་གདངས་སུ་ཉེ་བར་བསྒྱུར་བས་ལམ་ཡངས་པར་བྱས་ཏེ་གླེང་བར་བྱ་བ་ནི། བློ་གྲོས་དང་དབང་པོ་གསལ་ཞིང་མོས་པས་དགེ་བ་རྣམས་ཀྱི་སྙན་དུ་རྟེན་དང་བརྟེན་པ་འདི་དག་གི་གཏམ་གྱི་སྦྱོར་བ་ཉུང་ཟད་གསོལ་ན། བདག་ཅག་གི་སྟོན་པས་ཐེག་དམན་དང་རྗེས་སུ་མཐུན་པར་འཛམ་བུའི་གླིང་དུ་མཛད་པ་བཅུ་གཉིས་བསྟན་ཏེ་སངས་རྒྱས་ནས་བསྟན་པའི་སྣང་བ་རྒྱ་མཚོ་ལྟ་བུས་འཇིག་རྟེན་གྱི་མུན་པ་བསལ་བར་མཛད་པ་ཡང་ལྔ་བརྒྱའི་ཐ་མ་ལ་བྱང་ཕྱོགས་ནས་བྱང་ཕྱོགས་སུ་དར་བར་ལུང་བསྟན་པ་བཞིན། རྒྱ་གར་འཕགས་པའི་ཕྱོགས་ལས་ལྷོ་དབུས་ཟ་ཧོར་གྱི་ཡུལ་དུ་ཆོས་རྒྱལ་ལུང་བསྟན་རྡོ་རྗེའི་ཕོ་བྲང་ཆེན་པོར་ཏནྟྲ་སྡེ་བཅོ་བརྒྱད་ཀྱི་གླེགས་བམ་ཆར་དུ་བབ་པ་དང་དུས་མཚུངས་པར་ལྷ་ཐོ་ཐོ་རི་གཉན་བཙན་གྱི་སྐུ་རིང་ལ་ཟ་མ་ཏོག་བཀོད་པའི་མདོ་ལ་སོགས་པ་ཕོ་བྲང་ཡུམ་བུ་གླ་སྒང་དུ་བྱུང་སྟེ་བསྟན་པའི་དབུ་བརྙེས། རྒྱལ་སྲས་ཕྱག་ན་པདྨས་བོད་བླུན་པོ་རྒྱལ་པོས་གདུལ་བ་ལ་སྤྲུལ་པའི་རྒྱལ་པོ་སྲོང་བཙན་སྒམ་པོར་བསྟན་ནས་དམ་པ་ཆོས་ཀྱི་སྲོལ་བཏོད། བརྟན་པའི་འཁོར་ལོའི་ཟུར་ཕུད་ལ་ཐོད་ཀྱིས་བསྒྲིབས་པ་ལྷ་བཙན་པོ་ཁྲི་སྲོང་ལྡེའུ་བཙན་གྱིས་བཤད་སྒྲུབ་ཀྱི་བསྟན་པ་རྒྱས་པར་མཛད་པས་མཐའ་འཁོབ་མུན་པའི་གླིང་ཆོས་ཚིགས་ཀྱི་ཡུལ་དབུས་
སུ་རང་དབང་ཉིད་དུ་བྱས་པ་ལས། རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་ཕྲིན་ལས་ཀྱི་དབང་གིས་རྣམ་པ་ཐ་དད་དུ་ཤར་བ་ནམ་མཁའི་སྐར་ཚོགས་ལྟ་བུ་ལས་ལྷོ་རྒྱུད་གཡོར་པོའི་གཞུང་འདིར་ངེས་གསང་རྡོ་རྗེ་ཐེག་པའི་རིང་ལུགས་འཛིན་པའི་དགེ་འདུན་གྱི་སྡེ་ཆགས་པ་ལ་སྔ་བར་དཔལ་རི་ཐེག་ཆེན་གླིང་ངེས་དོན་དགའ་བའི་ཚལ་གྱི་གཙུག་ལག་ཁང་ཆེན་པོ་འདི་ཉིད་དུས་གསུམ་མཁྱེན་པ་སློབ་དཔོན་ཆེན་པོས། འཕྱོང་རྒྱས་ནང་དུ་ང་སྤྲུལ་དོན་བྱེད་འོང་༔ སུ་ཡིན་མི་ཤེས་ཅིག་ཅར་སྨྲ་བ་འབྱུང་༔ འཕྱི་བ་མདོའམ་བང་སོ་མར་པོའི་ལྷོར༔ ལྷ་བབས་མཆོད་རྟེན་སྡེ་དགོན་འཆའ་ཡང་སྲིད༔ རྟེན་འབྲེལ་གཅིག་ཏུ་པདྨ་ང་ཉིད་ཀྱི༔ སྐུ་རྟེན་གཙུག་ལག་གསོལ་བ་ཐེབས་པ་ན༔ རྒྱལ་བརྒྱུད་བསྟན་པ་ལྷོ་ནས་ལྷོ་རུ་དརཿ ཞེས་དང༌། ལྷ་ཁང་རྟེན་གཙོར་པདྨ་ང་ཡི་སྐུ། །རྒྱུ་རྐྱེན་ཕུན་སུམ་ཚོགས་པ་བཞེང་པ་གཅེས། །ཞེས་འཕུར་འགྲོའི་ཡུལ་གྱི་ཐེག་པ་འཆང་བའི་དགེ་འདུན་གྱི་སྡེ་འདི་ཉིད་ཆགས་པའི་རྟེན་འབྲེལ་གྱི་ཕོ་ཉར་ལྷ་བབས་མཆོད་རྟེན་སྔོན་དུ་ཆགས་ཤིང༌། མ་སྦྱངས་ཅིག་ཅར་སྨྲ་བའི་གང་ཟག་ཐོད་རྒལ་པའང་སྔ་ཕྱིར་འགའ་ཙམ་བྱུང་ལ། དེ་ནས་ཇི་ཞིག་ན་འདི་སྐད་དུ་དཀོན་མཆོག་ཏ་ལའི་ཞུ་ལན་ལས། བང་སོ་དམར་པོའི་ཤར་མ་ལྷོ་ཡི་ཕྱོགས། །པདྨའི་སྐུ་ཚབ་བདུད་འདུལ་ཆ་ལུགས་དང༌། །
ལྷ་ལས་བབས་པའི་མཆོད་རྟེན་ཞིག་ཀྱང་འབྱུང༌། །དགེ་འདུན་སྡེ་ཚུགས་རྟེན་འབྲེལ་ལེགས་འགྲིག་ན། །རྒྱལ་བརྒྱུད་བསྟན་པ་ལྷོ་ནས་ལྷོ་རུ་རྒྱས། །ཞེས་པའི་ལུང་བསྟན་གྱི་བདེན་པའི་རྔ་བོ་ཆེ་བརྡུང་བ་ལ་བསོད་ནམས་ཀྱི་དཔུང་བ་བླ་ན་མཐོ་བའི་བདག་པོའི་རྐྱེན་དུ་གྱུར་པ་ནི་ལུང་བསྟན་གབ་རྒྱ་ཅན་ལས། ད་ལྟའི་ལྷ་སྲས་དཔལ་གྱི་འབྱུང་གནས་ནི། །ཟ་ཧོར་དབོན་བརྒྱུད་བང་སོའི་ཕོ་བྲང་དུ། །བསོད་ནམས་མིང་ལྡན་དད་པའི་བློ་གྲོས་ཅན། །པདྨ་ང་དང་སྨོན་ལམ་དུ་མར་འབྲེལ། །རྩེ་གཅིག་གུས་པས་ང་ཡི་ཟབ་གཏེར་ལ། །རྒྱུན་དུ་སྤྱོད་པས་ལས་ལྡན་སྐལ་བ་བཟང༌། །ཞེས་ལྷ་སྲས་དཔལ་གྱི་མཆོད་གནས་ཟ་ཧོར་གྱི་རྒྱལ་རིགས་ཤིང་སཱའ་ལ་པ་ཆེན་པོ་ལྟ་བུའི་རིགས་སུ་བལྟམས་པ་ཧོར་བསོད་ནམས་དར་རྒྱས་ཀྱི་ཐུགས་བསྐྱེད་དང་སྨོན་པའི་རི་མོ་དགྲ་སྟའི་དུམ་བུས་ཀྱང་གཅད་དུ་མེད་པའི་འཕྲུལ་གྱི་ཤིང་རྟས་རྣམ་པར་སྣང་མཛད་གང་ཆེན་མཚོ་རིག་གྲོལ་གྱི་སྤྲུལ་པའི་སྒྱུ་འཕྲུལ་ལ་ཆགས་པ་ལོ་ཆེན་བཻ་རོ་ཙ་ན། རྔོག་ལོ་ཆེན་པོ་བློ་ལྡན་ཤེས་རབ་གཡུ་བྲག་པ་བདེ་བའི་རྡོ་རྗེ། པཎྜི་ཏ་འབུམ་ཕྲག་གསུམ་པ་ལ་སོགས་སྐྱེས་རབས་ཀྱི་ཕྲེང་བ་ཚར་དུ་དངར་བའི་མཐར་དཔལ་ཨོ་རྒྱན་ཆོས་ཀྱི་རྒྱལ་པོའི་ངེས་པ་དོན་གྱི་རྒྱལ་ཚབ་ཏུ་བཞེངས་པ་ཀུན་མཁྱེན་འགྲོ་འདུལ་གླིང་པ་པྲཛྙཱ་ར་སྨི་གཙུག་གི་ནོར་བུར་བཀུར་ནས་རང་གི་སྲས་ལ་ཀུན་ཏུ་དོན་ཡོད་པའི་བྱ་བ་ལས་ཀྱི་འཁོར་ལོ་ཅོད་པན་བཅིངས་
པ་བཞིན། ཧོར་མི་དབང་བསོད་ནམས་སྟོབས་ཀྱི་རྒྱལ་པོས་འཁོར་ལོ་གསུམ་ལ་ལྷུར་བྱེད་པའི་དགེ་འདུན་གྱི་སྡེ་འདི་ཉིད་བཙུགས། རྟེན་གཙོར་སངས་རྒྱས་གཉིས་པ་སློབ་དཔོན་ཆེན་པོའི་སྐུ་ཚབ་བདྨ་བདུད་འདུལ་དུ་གྲགས་པ་དང༌། རྒྱ་གར་གྱི་ཤིང་རྟ་ཆེན་པོ་པ་རྣམས་ཀྱི་དགོངས་འགྲེལ་གྱི་གཞུང་བསྲངས་ནས་ཆོས་ཐམས་ཅད་མན་ངག་རྫོགས་པ་ཆེན་པོའི་འབྲས་བུར་སྟོན་པའི་གཞུང་ལུགས་ཤིང་རྟ་ཆེན་མོ་རྩ་འགྲེལ་ཆོས་སྦྱིན་མི་ཟད་པའི་ཕྱི་མོར་བསྒྲུབས་པས་མཚོན་སྐུ་གསུང་ཐུགས་རྟེན་བསམ་གྱིས་མི་ཁྱབ་པ་ཞིག་གསར་དུ་བསྒྲུབས་པ་ལ་མཁས་པ་ཆེན་པོ་ཀརྨ་པ་མི་བསྐྱོད་རྡོ་རྗེ་དང༌། བྱེ་བྲག་ཏུ་ཆོས་ཀྱི་རྒྱལ་པོ་འགྲོ་འདུལ་གླིང་བ་ཐམས་ཅད་མཁྱེན་པ་པྲཛྙཱའི་ཞབས་ཀྱིས་ས་གཞི་ལྷག་པར་གནས་ཤིང་མངའ་གསོལ་བསྟན་པའི་ངོ་བོ་ལུང་གི་ཆོས་གསུང་རབ་ཡན་ལག་བཅུ་གཉིས་ཀྱི་གཞི་མ་དམ་པའི་ཆོས་འདུལ་བ་ལ་ལེགས་པར་བསླབ་པའི་ཚུལ་དཔལ་མགོན་འཕགས་པ་དབྱིག་གཉེན་གྱི་མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམས་པ་ནི་རབ་ཏུ་སྦྱོར། །ཞེས་གསུངས་པ་ལྟར་ཚུལ་ཁྲིམས་རྣམ་པ་གསུམ་གྱི་གོ་ཆས་བག་ཡོད་པར་བསྲུངས་ཤིང༌། སྤྱངས་པའི་ཡོན་ཏན་བཅུ་གཉིས་རྒྱུད་ལ་བརྟེན་པ་དངཆབ་གཅིག་པར་གཞི་གསུམ་གྱི་ཆོ་གའི་ལག་ལེན་ལ་བརྩོན་པ་དང་བརྟན་མཁས་ཀྱི་ཡོན་ཏན་ལ་བྱང་ཆུབ་པར་བསླབས་
ཤིང་སྤྱོད་ཡུལ་རྣམ་པར་དག་པའི་ངོས་ནང་དུ་གསང་སྔགས་རྡོ་རྗེ་ཐེག་པའི་རིམ་པ་གཉིས་ཀྱི་རྣལ་འབྱོར་ལ་ལམ་དུ་བྱེད་པས་རྟོགས་པའི་ཆོས་ཤེས་རྒྱུད་ལ་ལྐོག་ཏུ་མ་གྱུར་པར་མངོན་དུ་བསྒྲུབ་པའི་དགེ་འདུན་གྱི་སྡེ་ཇེ་འཕེལ་དུ་གྱུར་པའི་སྐབས་ཤིག །འདོད་པའི་ལྷས་སྙིང་ལ་ཤིན་ཏུ་གནས་མལ་བཅས་པའི་ནག་པོའི་རྩ་ལག་ཇུན་གར་པས་རང་དང་རང་འདྲའི་བསྟན་པ་དེ་འཛིན་དང་བཅས་པ་ཉམས་དམས་པར་བྱས་པས་སྔོན་གྱི་དུས་ཇི་ལྟར་བསྒྲུབས་པའི་རྟེན་དང་བརྟེན་པའི་དངོས་པོ་མིང་གི་ལྷག་མ་ཙམ་དུ་ཕམ་པར་བྱས་ནའང༌། དེང་གི་གནས་སྐབས་ན་མཐོང་བའི་ཆོས་སུ་གྱུར་པ་ནི། རྒྱལ་བ་སྲས་བཅས་རྣམས་ཀྱིས་དབྱིངས་ནས་དགོངས་པའི་ཐུགས་རྗེ་དང༌། རྡོ་རྗེ་གདན་གྱི་དཔག་ཚད་ལྔ་བརྒྱ་ལ་སོགས་པའི་ནམ་མཁའ་ལ་འཕྱང་བའི་བསྟན་པའི་བཙས་གསུམ་གྱི་བྱིན་རླབས། ཁྱད་པར་དུ་སློབ་དཔོན་ཆེན་པོ་པདྨ་འབྱུང་གནས་ཀྱི་ཐུགས་རྗེ་དང་ནུས་པའི་རྩལ་ཤུགས་ཤིང་རྟའི་འཕང་ལོ་ལས་ཀྱང་དང་དྲགས་པས་དུས་ཀྱི་རྒུད་པ་བཅིལ་ཏེ་ཡུལ་ཁམས་བདེ་འབྱམས་སུ་གྱུར་པ་ལས། ཚ་ཟེར་གྱིས་གདུངས་པའི་པདྨོ་སླར་ཡང་དག་བྱེད་ཀྱི་སིམ་པས་སོར་ཆུད་དེ་བལྟ་ན་སྡུག་པའི་ལང་ཚོ་མཆོག་ཏུ་བརྟས་པ་ལྟར། གཙུག་ལག་ཁང་རྟེན་དང་བརྟེན་པར་བཅས་པ་འགྲོ་བའི་བསོད་ནམས་ཀྱི་ཞིང་ས་དམ་པར་སོར་ཆུད། དེའང་ཆོ་འཕྲུལ་རྣམ་
པར་བསྟན་པ་ལས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་ཐབས་ལ་མཁས་པ་དང༌། སེམས་ཅན་ཡོངས་སུ་སྨིན་པར་བྱ་བ་ནི་མང་ངོ། །སེམས་ཅན་རྣམས་ཀྱི་བསམ་པ་ཇི་ལྟ་བུ། ཇི་ལྟར་འདུལ་བ་དང༌། དགེ་བའི་རྩ་བ་ཇི་ལྟ་བུ་དང༌། སེམས་ཅན་རྣམས་ཀྱིས་མོས་པ་སྣ་ཚོགས་ཀྱི་སྤྱོད་པ་མཁྱེན་ནས་ཆོས་སྟོན་ཏེ། སེམས་ཅན་ཁ་ཅིག་ནི་བྱང་ཆུབ་སེམས་དཔའ་འདུལ། ཁ་ཆིག་ནི་ཉན་ཐོས་ཀྱིས་འདུལ། ཁ་ཅིག་ནི་རང་སངས་རྒྱས་ཀྱིས་འདུལ། ཁ་ཅིག་ནི་ལྷས་འདུལ། ཁ་ཅིག་ནི་བརྒྱ་བྱིན་གྱིས་འདུལ། ཁ་ཅིག་ནི་ཚངས་པས་འདུལ། ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་ཉན་པས་འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་ངན་ལས་འདས་པས་འདུལ། ཁ་ཅིག་ནི་རིང་བསྲེལ་གྱིས་འདུལ། ཁ་ཅིག་ནི་མཆོད་རྟེན་བྱེད་དུ་འཇུག །གཙུག་ལག་ཁང་དང༌། སྐྱེད་མོས་ཚལ་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་སྐུ་གཟུགས་བྱེད་དུ་གཞུག་པ་དང༌། རི་མོ་དང༌།
གསེར་དང༌། དངུལ་དང༌། ར་གན་གྱིས་སྐུ་གཟུགས་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་དགེ་སློང་གི་དགེ་འདུན་ལ་མཆོད་པ་དང་བཀུར་སྟི་བྱ་བའི་དགེ་བའི་རྩ་བར་སྤྲོ་བ་བསྐྱེད་པས་འདུལ། ཁ་ཅིག་ནི་མདོ་སྡེ་འདྲི་བ་དང༌། འདྲིར་གཞུག་པ་དང༌། བཀླག་པ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་མར་མེ་དང༌། སྤོས་དང༌། མེ་ཏོག་དང༌། དྲི་དང༌། ཕྲེང་བ་དང༌། དོ་ཤལ་ལ་སོགས་པས་བརྒྱན་པ་ལ་སྤྲོ་བ་བསྐྱེད་པས་འདུལ་བ་ཡིན་ཏེ་དོན་དམ་པ་མཁས་པའི་ཆོས་དང་ལྡན་པ་དང༌། མྱ་ངན་ལས་འདས་པའི་ཆོས་དང་ལྡན་པ་ནི་མ་ཡིན་ནོ། །ཞེས་གསུངས་པ་ལྟར། མདུན་གཙོར་བཞུགས་པའི་བཅོམ་ལྡན་འདས་གཟུགས་ཀྱི་རྒྱལ་པོ་རྣམ་པར་སྣང་མཛད་སྐུ་རྒྱུ་ཆོས་རྒྱལ་ལི་མ་ལས་གྲུབ་པ་འདི་སྔོན་གྱི་ཚེའུ་ཤང་རྡོའི་ལྷ་ཁང་གི་རྟེན་གཙོ་ལས་གྱུར་པ་བར་སྐབས་སུ་གཙང་རོང་ཚ་མིག་གི་གཙུག་ལག་ཁང་དུ་བཞུགས་པའི་བྱིན་རླབས་ཤིན་ཏུ་ཆེ་བར་གྲགས་པ་ལས། འཇིག་རྟེན་གྱི་འབྱོར་རྒུད་སྲང་མདའི་མཐོ་དམན་ལྟ་བུར་རྟག་ཏུ་མི་བཟོད་པ་དང༌། བསྟན་པའི་གནས་ཚུལ་ཡང་ལ་ལན་འགྲིབ་པ། ལ་ལན་འཕེལ་བའི་ཆོས་ཉིད་ཅན་དུ་ངེས་ཕྱིང་ཡུལ་དབུས་ཀྱི་སའི་ཆར་རིམ་པར་སྤྱན་དྲངས་ཏེ་བཞུགས་སུ་གསོལ་ནས་བདག་ཏུ་ལྟ་བ་ལ་གོམས་ཤུགས་ཤིན་ཏུ་བརྟས་པའི་བྱིས་པ་སོ་སོ་སྐྱེ་བོའི་སྡེ་ཚན་རྒྱ་དམན་ལྡན་མ་པ། གྱིས་རང་
དབང་དུ་བྱེད་པའི་གཉེར་ཀ་དང༌། དེ་བཞིན་དུ་ཙཱ་རིའི་ཞིང་སྐྱོང་ཀུན་དགའ་གཞོན་ནུ་དང་རྒྱུད་གཅིག་པར་གྲགས་པའི་འཇིག་རྟེན་གྱི་དྲེགས་པ་ནག་པོ་ཁྲག་རལ། མཐུ་བོ་ཆེས་མེལ་ཚེ་བྱེད་བཞིན་པར་བཞུགས་པའི་གནས་སྐབས་ཤིག་ན་ཁོ་བོའི་འགྲོ་དོན་དཔལ་གྱི་རི་བོར་ཆེ། ཞེས་པའི་གསུང་ལན་མང་དུ་བྱོན་པ་ལ་རྟེན་གནས་གཞི་འདིར་གདན་དྲངས་པ་ནི་དཔྱོད་ལྡན་རྣམས་ཀྱིས་འདི་ལྟར་རྟོགས་པར་གྱིས་ཤིག །གནས་དགོན་འདི་གང་ལ་བརྟེན་ནས་ཆགས་ན་སྤྲུལ་པའི་གཏེར་སྟོན་ཆེན་པོ་ཐམས་ཅད་མཁྱེན་པ་འགྲོ་འདུལ་གླིང་པ་ཞེས་གྲགས་པ་དོན་དང་ལྡན་པའི་སྐྱེས་བུ་དེ་ཉིད་ཀྱི་ཐུགས་བསྐྱེད་དང་སྨོན་པའི་མཐུ་གཅིག་པུ་ཉིད་ལས་གཞན་དུ་མ་ཡིན་ལ། བདག་ཉིད་ཆེན་པོ་འདི་ནི་ལོ་ཙཱ་བ་ཆེན་པོ་བཻ་རོ་ཙ་ནའི་སྤྲུལ་པར་བསྙོན་དུ་མེད་པས་ན། བཻ་རོའི་སྦྲུལ་གཞི་རྣམ་སྣང་གང་ཆེན་མཚོ་ར་ངེས་པའི་ཕྱིར་གང་ལ་བརྟེན་ནས་དེའི་བསྟན་པ་དང་འབྲེལ་བའི་རྟེན་འབྲེལ་གྱི་སྒོ་བླ་ན་མེད་པ་ཉིད་ཀྱིས་སྟོན་པ་ཕུན་སུམ་ཚོགས་པའི་ངོ་བོར་བྱོན་པ་ཡིན་ལ། རྒྱུ་མཚན་དེས་ནག་པོའི་རྩ་ལག་ཇུན་གར་བས་གནས་གཞི་འདི་མ་རུངས་པར་བྱས་པའི་ཚེ་འཕྱིང་དབར་ལྟག་རྩེར་གདན་དྲངས་པ་ནའང་སྤྱན་ལས་མཆི་མ་ཐོན་ཞིང་ཁྱོགས་ལ་ཤིན་ཏུ་འདེགས་དཀའ་བ་སོགས་བྱུང༌། ཕྱིན་ཆད་དགོན་སྡེ་ཚུགས་ནས་གཙང་ཁང་འདིར་སྤྱན་
པའི་ཚེ་ཤ་ཐང་པའི་ངལ་བ་ལ་མ་ལྟོས་པར་བདེ་བླག་དུ་བྱོན་བདེ་བ་སོགས་མདོར་ན་རྒྱུ་དངོས་ཡེ་ཤེས་ཀྱི་གཟི་བྱིན་མཐའ་ཡས་པའི་སྒོ་ནས་ཁྱད་དུ་འཕགས་པས་གཙུག་ལག་ཁང་འདིའི་ཡིད་བཞིན་ནོར་བུ་གཅིག་ཏུ་བཞུགས་པའི་གཡས་གཡོན་དུ་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་ལྷས་སྔ་འགྱུར་བསྟན་པའི་རྩ་ལག་ཏུ་བསྐྲུན་པ་རྒྱུད་འབུམ་རིན་པོ་ཆེ་པོད་ཉི་ཤུ་རྩ་ལྔ་དང༌། རྟེན་གཙོ་རྣམ་སྣང་ལ་དངུལ་སྲང་བརྒྱ་ཕྲག་གི་རྒྱུ་ཚོགས་ལས་གསེར་ཟངས་ཀྱི་པྲོག་ཞུ་ཕྲ་ཕུལ་ལེགས་པ། རྒྱལ་བའི་བཀའ་འགྱུར་རོ་ཅོག་དབུ་ཤོག་གསེར་བྲིས་བཟང་གོས་ཀྱི་ཞལ་ཁེབས་དང་བཅས་པ། སྐུ་རྟེན་ཕྱོགས་བཅུའི་སངས་རྒྱས་ལྡེམ་སྐུ་འདུས་པ་མདོའི་དཀྱིལ་འཁོར་ཆེན་པོར་རབ་ཏུ་གནས་པ་བྱིན་རླབས་ཅན། བསྐལ་པ་བཟང་པོའི་སྒྲོན་མེ་བཞི་པ། ཨོ་རྒྱན་སངས་རྒྱས་གཉིས་པའི་སྣང་བརྙན། ཀུན་མཁྱེན་པྲ་ཛྙཱའི་ཞབས་ཀྱི་ཟངས་སྐུ་བྱིན་ཅན་འདི་གསུམ་དགོན་སྡེ་དང་པོར་ཆགས་པའི་རྟེན་སྐལ་གྱི་ཚུལ་འཕྱོང་རྒྱས་ཞབས་དྲུང་ནས་བཞེངས་པས་མཚོན་རིང་མོ་ཉིད་ནས་ནང་རྟེན་དུ་བཞུགས་པའི་སངས་རྒྱས་བྱང་སེམས་ཡི་དམ་ཞི་ཁྲོའི་སྣང་བསྙན་ལི་མ་དང་གསེར་ཟངས་ཀྱི་གྲལ་རིམ། སྤྱིར་དོན་གྱི་སླད་དུ་མཚན་ནས་སྨོས་པ་རྗེ་བཙུན་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གླིང་བའི་བསྟན་པ་ལ་རབ་ཏུ་བྱུང་ཞིང་གསུང་གི་རྒྱུད་ལས་སྐྱེས་པ་སྔ་ཕྱིར་བྱོན་པ་རྣམས་ཀྱི་ཐུགས་
བསྐྱེད་དང་སྨོན་ལམ། སྔོན་གོམས་ཀྱི་ལས་འཕྲོ་བཟང་པོས་སྡེ་འདི་ཉིད་སོར་ཆུད་པར་མཛད་པ་ལས། རིག་འཛིན་ཐུགས་མཆོད་རྡོ་རྗེ་ཞེས་དགེ་སློང་ནམ་མཁའི་སྙིང་པོ་དང༌། ལྡན་མ་རྩེ་མང་ཟུང་འཇུག་གི་སྤྲུལ་པའི་ཟློས་གར་དུ་ལུང་གིས་ཟིན་ཅིང༌། དཔལ་ཨོ་རྒྱན་རྡོ་རྗེ་འཆང་གི་ཟབ་རྒྱའི་གསང་མཛོད་འཛིན་པའི་སྐྱེས་བུ་དེས་ཡོན་སྦྱར་ཏེ་རྟེན་གྱི་གཙོ་བོ་སྐུ་ཚབ་རིན་པོ་ཆེ་ངོ་བོ་སྐུ་གསུམ་རིགས་ཀུན་འདུས་པའི་བདག་ཉིད་པདྨ་གུ་རུ་ལ་གནས་དུས་ཀྱི་དབང་ལས་ཨོ་རྒྱན་ནོར་ལྷ་ཁྲོ་འཛུམ་སྒེག་པའི་རྣམ་པར་བརྗིད་པས་འཇིག་རྟེན་ཐམས་ཅད་ཀྱི་རྒུད་པ་སེལ་བའི་ཡོན་ཏན་གྱིས་བྱུག་ཅིང་མཐོང་ན་མི་མཐུན་པ་མེད་པ་བཟོ་སྒྲོས་སུ་བྱོན་པ་ལ་རིག་འཛིན་བླ་མ་གྲུབ་པའི་ཁྱུ་མཆོག་ཆེན་པོ་དེ་ཉིད་ཀྱི་སྲོག་ཤིང་ལ་སོགས་པའི་གཟུངས་ཀྱི་བྱ་བ་ཐམས་ཅད་ཁ་ན་མཐོ་བའི་རྐྱེན་གྱིས་བརྫི་བ་མེད་པར་ཕྱག་བསྟར་མཛད། ཐུབ་པའི་དབང་པོ་དང༌། གསེར་ཐུབ་ཀྱི་འཕེལ་གདུང་བཅུ་ཕྲག་རེ་རེ། སྔ་ཕྱིར་བྱོན་པའི་གཏེར་བྱོན་གྱི་དམ་རྫས་བགྲངབར་དཀའ་བ་ངང༌། ཁྱད་པར་དུ་གུ་རུ་རིན་པོ་ཆེའི་ཟབ་ཕོད། དབུ་ལོ། བྱང་སེམས་དཀར་དམར་གྱི་ཆ་ཤས་བདེ་སྟོང་ཡེ་ཤེས་ཀྱི་རིལ་བུ་ཨ་ཐམ་མ་དང༌། ཧྲཱིཿརྒྱ། རྒྱ་བོད་ཀྱི་པཎ་གྲུབ་སྐྱེས་ཆེན་དམ་པ་རིས་སུ་མ་ཆད་པའི་གདུང་དང་སྐུ་བལ་གྱི་རིང་བསྲེལ་ཤིན་ཏུ་
མང་བ་དང་ཆབ་གཅིག་པར། ཐེག་པ་གསུམ་དང་རྒྱུད་སྡེ་དྲུག་གི་ཆོས་སྐུའི་རིང་བསྲེལ་བསམ་གྱིས་མི་ཁྱབ་པས་ཕྱུར་བུར་གཏམས་ཤིང༌། གཡས་གཡོན་གྱི་གྱང་ལ་ལོགས་ལ་འཇའ་སྤྲིན་འོད་ཀྱི་འཁོར་ལོའི་ནང་ཁོངས་སུ་དེ་བཞིན་གཤེགས་པ་སུམ་ཅུ་སོ་ལྔས་མཚོན་པའི། བསྟན་གཙོའི་སྣང་བརྙན་སོ་སོར་སངས་རྒྱས་གསེར་ཐུབ་ཀྱི་འཕེལ་གདུང་རེའི་ནང་གཟུངས་དང་བཅས་པ་བཞུགས་སུ་གསོལ་བ་ལ། ཡེ་ཤེས་གཟིགས་པའི་སྐྱེས་བུ་དམ་པ་རྣམས་ཀྱིས་བྱ་བ་ལས་ཀྱི་འཁོར་ལོས་བསྐྱེས་བསྲིངས་པའི་རྟེན་ལ་རབ་གནས་རང་བཞིན་གྱིས་ཆགས་པ་ཆོས་ཉིད་ཡིན་པའི་སྟེང༌། བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མི་བསྐྱོད་པ་དང༌། རྟག་པ་ཧེ་རུ་ཀ་ལ་སོགས་པ་རིགས་ཀྱི་རྒྱལ་པོ་ཡོངས་རྫོགས་འདུས་པ་རྒྱལ་བ་ཞི་ཁྲོའི་དཀྱིལ་འཁོར་ཆེན་པོར་རབ་ཏུ་གནས་པས་བལྟར་མི་བཟོད་པའི་གཟི་བྱིན་གྱི་དཔལ་དུ་འབར་ཞིང་འགྲོ་བ་ལྷ་དང་བཅས་པའི་ཉེར་འཚོ་དམ་པར་ལྷུན་ཆགས་པའོ། །དེ་ནས་རིང་པོ་མ་ལོན་པའི་གནས་སྐབས་ན་དམ་པ་དེ་ཉིད་ཞི་བ་ཆེན་པོའི་གྲོང་ཁྱེར་དུ་གཟིམས་པའི་དགོངས་རྫོགས་སུ་དངོས་ཅག་དང་སློབ་མར་གྱུར་པ་རྣམས་ནས་སྒོ་གསུམ་གྱིས་བརྩོན་པ་ཆེན་པོའི་སྲི་ཞུ་མི་ལྷོད་པས་ཀུན་ནས་བླངས་ཤིང༌། ཁྱད་པར་དུ་སྐུ་གསུམ་ཐུགས་ཀྱི་རྟེན་བཞེངས་ཀུན་གྱི་མདོ་དོན་གཟུངས་འབུལ་
དང་རབ་གནས་ཀྱི་བྱ་བ་ཁོ་ན་ལ་རག་ལུས་པ་ཉིད་དུ་ངེས་ན། དེའི་གནས་ལ་བློ་གྲོས་ཀྱི་སྣང་བ་མུན་པའི་གཟེབ་ལས་གྲོལ་བའི་རྫོགས་ཆེན་པ་རང་བྱུང་རྡོ་རྗེ་འཇིགས་མེད་གླིང་པས་སྲོག་ཤིང་གིས་མཚོན་གཟུངས་ཀྱི་བྱ་བ་དང་བྱེད་པ་ཐམས་ཅད་སློབ་དཔོན་ཆེན་པོ་ཀླུ་སྒྲུབ་ཞབས་དང༌། ཛེ་ཏ་རོའི་རྒྱ་གཞུང་ལ་བརྟེན་ནས་ཁུར་དུ་བཟོད་པར་མཛད་ཅིང་དེའི་ཡན་ལག་ཏུ་དགེ་འདུན་འདུ་བ་དང༌། སྔགས་སྡེ་སྤེལ་བའི་བཅའ་གཡང་ཉམས་སུ་བསྟར་བའི་རྟེན་འབྲེལ་མངོན་དུ་གྱུར་པའི་གཟུགས་སྐུའི་སྣང་བ་ཇི་ལྟར་བྱོན་པ་ནི། གཡས་ཕྱོགས་ན་གངས་རིའི་ཁྲོད་དུ་དམ་པའི་ཆོས་འདུལ་བའི་བསྟན་པ་རིན་པོ་ཆེ་འབྱུང་བའི་རྩ་ལག་དམ་པར་གྱུར་ཅིང་དབུ་མ་རང་རྒྱུད་པའི་མཎྜི་ཏ་ཆེན་པོ་མཁན་ཆེན་ཞི་བ་འཚོ། གཡོན་ཕྱོགས་ན་ལྗོངས་འདིར་རྒྱལ་བའི་བསྟན་པ་རིན་པོ་ཆེ་མགྲོན་པོར་འབོད་པ་ལ་ཆོས་རྒྱལ་མྱ་ངན་མེད་ཀྱི་བརྟུལ་ཞུགས་འཛིན་པ་ལྷ་བཙན་པོ་ཁྲི་སྲོང་ལྡེའུ་བཙན། གཡས་གཡོན་དུ་དབང་པོ་བཞི་གནས་སུ་དག་པའི་ངོ་བོ་བྱང་ཆུབ་སེམས་དཔལ་བྱམས་པ། སྒྲིབ་པ་རྣམ་སེལ་འཇམ་དཔལ། ཕྱག་ན་རྡོ་རྗེ་སྟེ་ཕྱིའི་སེམས་དཔའ་བཞི། རྣམ་པར་ཤེས་པ་བཞི་གནས་སུ་དག་པའི་ངོ་བོ་ནམ་མཁའི་སྙིང་པོ། ས་སྙིང༌། སྤྱན་རས་གཟིགས། ཀུན་ཏུ་བཟང་པོ་སྟེ་ནང་གི་སེམས་དཔའ་བཞི་རྣམས་ལས་ཉེ་བའི་སྲས་བརྒྱད། གང་གིས་བྱང་ཆུབ་ཆེན་པོར་ཐུགས་
བསྐྱེད་པའི་ཚེ་རང་གི་མཚན་ཙམ་ཐོས་པས་ཀྱང་ལས་དང་སྒྲིབ་པ་ཟད་པར་སྨོན་ལམ་བཏབ་པའི་བཅོམ་ལྡན་འདས་དཔའ་རྡོ་རྗེ་སེམས་དཔའ་རྣམས་ཏེ་འདི་རྣམས་ཀྱི་ནང་བཞུགས་ཀྱི་གཙོ་བོར་རིང་བསྲེལ་རྣམ་པ་བཞི་ལས་ཆོས་སྐུའི་རིང་བསྲེལ་རྣམས་སྲོག་ཤིང་གི་ངོས་ལ་ཐེག་པ་དང་རྒྱུད་སྡེའི་གོ་རིམ་མ་འཆོལ་བར་བཞུགས་སུ་གསོལ། ཀུན་ལ་དེ་བཞིན་གཤེགས་པའི་འཕེལ་གདུང་དང་ཐབས་ཤེས་བདེ་སྟོང་གི་རིལ་བུ་ཨ་རྒྱ་ཅན་རེ་རེ། གཞན་རྒྱ་བོད་ཀྱི་སྐྱེས་ཆེན་པཎ་གྲུབ་མང་པོའི་གདུད་དང་སྐུ་བལ་གྱི་རིང་བསྲེལ་ཟློས་ཀྱིས་མི་ལང་བས་ཕྱུར་བུར་གཏམས། ཁྱད་པར་བརྟེན་པའི་རང་བཞིན་འདི་དག་གང་གིས་ཐུགས་བསྐྱེད་ལས་གྲུབ་པའི་བདག་པོའི་རྐྱེན་དུ་གྱུར་པ་གྲུབ་དབང་བླ་མ་མཆོག་གི་སྣང་བརྙན་འདིའི་ཐུགས་ཀ་ན་སློབ་དཔོན་ཆེན་པོའི་སྐུ་ཚབ་སྲིན་ཐོད་མ་ཁྱད་པར་ཅན་ཞིག་བཞུགས་ཡོད་པས་བྱིན་རླབས་མཆོག་ཏུ་ཆེ་བ་ཡིན་ནོ། །རྟེན་བཞེངས་གྲུབ་པའི་དེ་མ་ཐག་པར་ཕྱི་ནང་གཞན་གསུམ་རྟེན་འབྲེལ་གནད་གཅིག་པའི་ཉེ་རྒྱུ་ལས། སྣང་བ་དང་སྲིད་པའི་ཆོས་སུ་གྱུར་ཏོ་ཅོག་གཟུང་འཛིན་ཟ་བྱེད་དབུ་མའི་གྲོང་ཁྱེར་གཅིག་ཏུ་ཤར་བའི་ལྟོ་བར་བྱང་ཆུབ་ཀྱི་སེམས་རིན་པོ་ཆེ་རྣམ་པར་དག་པ་ནི་རྡོ་རྗེ་ཐེག་པའི་ཉེ་ལམ་རྣམས་ཀྱིའང་བསྒྲུབ་བྱའི་མཐར་ཐུག་པ་ཡིན་ལ། དེའི་ངང་ཚུལ་བླ་ན་མེད་པ་ནི་འདིའོ་ཞེས་འཇིག་རྟེན་ཡོངས་ལ་མཚོན་པར་བྱ་བའི་བྱེད་པ་པོ་ཟླ་བ་ལ་དུས་མེ་འཇུག་པའི་སྦྱོར་བ་རྩོམ་པ་དང་ཆབ་
གཅིག་པར་ལྷག་པ་ཡེ་ཤེས་ཀྱི་འཁོར་ལོ་དམ་ཚིག་སེམས་དཔའི་ཐུགས་ཀར་བཅུག་པས་རབ་གནས་རང་བཞིན་གྱིས་ཆགས་པའི་རྟེན་འབྲེལ་དུ་གྱུར་ཏོ། །གཞན་ཡང་ལྷ་བཙུན་ནམ་མཁའ་འཇིགས་མེད་ཉེ་རྒྱུའི་སྤྱོད་པ་ལ་གཤེགས་སྐབས་ཀྱི་དམ་ཚིག་གི་ཁ་ཊྭཱཾ་ཀ །གནས་བརྟན་འདུལ་བ་འཛིན་པ་ཀུན་བཟང་འོད་ཟེར་གྱི་གཤེགས་རྟེན་ལ་བཞེངས་པའི་དུས་གསུམ་སངས་རྒྱས་རྣམས་དང༌། གཙུག་ལག་ཁང་ལྟེ་བར་གྱང་རིས་ཀྱི་ཚུལ་དུ་བཞུགས་པ་ནི། དགོན་སྡེ་འདི་ཉིད་ཀྱི་མེ་ཏོག་ཕོག་པའི་ལྷ་སྐལ་དུ་གྱུར་པ་གྲོལ་ཐིག་རིག་འཛིན་གྱི་ལྷ་ཚོགས་དང༌། གཏེར་ཁ་གོང་འོག་གཉིས་སུ་མེད་པའི་ཁྱད་གཏེར་ཆེན་པོ་བླ་མ་གསང་བ་འདུས་པ་གཙོར་གྱུར་ལ་འདོད་ལྷ་སྣ་ཚོགས་མགྲོན་ཐབས་སུ་བཀོད་པ་གུང་གི་ཆ་ལ་བཞུགས་ཤིང༌། མགོན་ཁང་སྒོ་གདོང་ན་རྡོ་རྗེ་གཤོག་རྒོད་མའི་སྣང་བརྙན། གཡས་ཕྱོགས་ལ་བསྒྲུབ་ཆེན་བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་གྱི་འཁོར་ལོ་ཆོས་སྐྱོང་སྲུང་མའི་མགྲོན་ཐབས་དང་བཅས་པ། གཡོན་ཕྱོགས་ན་བླ་མ་དགོང་པ་འདུས་པ་ཞི་ཁྲོ་ཡོངས་རྫོགས་ཀྱི་སྣང་བརྙན། ཡས་གཟིགས་རྣམས་ལ་འཇམ་དཔལ་དུས་དགྲའི་དབང་པོ་ནག་པོ་སུམ་སྒྲིལ་གྱི་ལྷ་ཚོགས་དང༌། བཅོམ་ལྡན་འདས་དཔལ་རྡོ་རྗེ་ཕུར་པའི་དཀྱིལ་འཁོར་རྣམ་པ་གསུམ་གྱི་འཆར་གཞི་དང་བཅས་པ་རྣམས་རང་བཞིན་སྤྲུལ་པའི་ཞིང་དང༌། ཁྱད་པར་དབུས་ཕྱོགས་མེ་རི་འབར་བའི་
ངོ་མཚར་གྱི་བཀོད་པ་ཆུ་བུར་དང་བཅས་པའི་མིག་གི་གྲོང་ཁྱེར་ག་ལ་བར་བདེ་བླག་ཏུ་འཇུག་པའི་བྱེད་པ་པོར་གྲུབ་བོ། །སྒོ་གདོང་ན་དགེ་བསྙེན་ཆེན་པོ་རྡོ་རྗེ་ལེགས་པ་ཞེས་མཐུ་སྟོབས་ཀྱི་རུ་མཚོན་དུས་ཀྱི་མེ་ལྕེ་ལས་ཀྱང་ཤུགས་དྲག་པ་དེ་ཉིད་དགོན་གནས་སྡེ་དང་བཅས་པའི་མེལ་ཚེ་ལ་རིངས་པའི་ཚུལ་གྱིས་བཞུགས་ཤིང༌། སྒོ་ཁང་གཡས་གཡོན་འཇིག་རྟེན་སྐྱོང་བ་སྡེ་དང་བཅས་པས་ལེགས་པར་བསྲུང་བའི་ནང་ཁོངས་སུ་གནས་བརྟན་འདུལ་བ་འཛིན་པ་ས་མནྟ་བྷ་དྲ་རྣམ་གཉིས་ཀྱི་དད་བརྩོན་དང་སྙིང་སྟོབས་རྨད་དུ་བྱུང་བས་བསྒྲུབས་པའི་ཆོས་དཀོན་མཆོག་ཡི་གེའི་རྣམ་ཆར་ཤར་བ་སྟོན་པ་བདེ་བར་གཤེགས་པའི་ལུང་གི་ཆོས་འཁོར་ལོ་གསུམ་དང་རྒྱུད་སྡེ་བཞིའི་ངེས་འབྱེད་འགོག་ལམ་གྱི་བདེན་པའི་ངོ་བོར་རྣམ་པ་ཉི་ཤུས་བྱང་ཆུབ་པའི་བདག་ཉིད་ཅན་བཀའ་འགྱུར་རིན་པོ་ཆེ་ཚལ་པ་མའི་རྗེས་སུ་འབྲངས་པ་དང༌། དེའི་གནས། ཟབ་པ། བརླིང་བ། དཀྱིལ་ཆེ་བ། གཅིག་ལས་དུམ་དང༌། དུ་མ་ལས་གཅིག་ཏུ་འཆར་བཟོད་པའི་དཀའ་བའི་གནས་རྣམས་སེམས་ཅན་གྱི་མོས་པ་དང་འཚམས་པར་འཛམ་བུའི་གླིང་མཛེས་པར་བྱེད་པའི་རྒྱན་དྲུག་གམ་མཆོག་བརྒྱད་ལ་སོགས་པའི་པཎ་གྲུབ་རྣམས་ཀྱིས་དོན་བཟང་པོ། ཚིག་འབྲུ་བཟང་པོ། མ་འདྲེས་པ་ལ་སོགས་མདོར་ན་འཆོས་སྐྱོབ་གཉིས་ཀྱི་ཡོན་ཏན་དང་ལྡན་པར་བཀྲལ་བའི་བསྟན་འགྱུར་རིན་པོ་ཆེ། དགེ་འདུན་འདུས་པའི་དབུས་ན་ལྷམ་མེར་མཛེས་པ་ཡིན་ལ། སེང་ག་ཡབས་
གུང་གི་ཆའི་ལྡེབས་བྲིས་ལ་བཅོམ་ལྡན་ཐུབ་པའི་དབང་པོ་ལ་གཡས་གཡོན་དུ་སངས་རྒྱས་སུམ་ཅུ་སོ་ལྔ་པ་མཛེས་པ། ཕན་ཚུན་གཉིས་ལ་ཤཱཀྱ་ཐུབ་པའི་བསྟན་པ་ལ་བསྐལ་པའི་བར་དུ་བྱ་བ་ལྷག་པར་བྱས་པ་འཕགས་པའི་གནས་བརྟན་ཆེན་པོ་བཅུ་དྲུག །ལྷ་མགྲོན་དུ་དགོན་སྡེ་འདི་ཉིད་རིགས་ཀྱི་ཅོད་པན་སྤྲུལ་པའི་གཏེར་སྟོན་ཆེན་པོ་པྲཛྙཱའི་ཞབས་གདུང་རབས་བརྒྱུད་མར་བཀའ་དྲིན་གཞལ་གྱིས་མི་ལང་བའི་བསྟན་པའི་སྦྱིན་བདག་ཆེན་པོ་ཟ་ཧོར་རིགས་ཀྱི་མྱུ་གུ་གསར་པ་རྒྱལ་དབང་ལྔ་པ་ཆེན་པོ་དང༌། གང་གི་ཡབ་མེས་འཕྱོང་རྒྱས་ཞབས་དྲུང་ཧོར་བསོད་ནམས་དར་ཞིང་རྒྱས་པའི་ཉིན་བྱེད། སྔགས་རྒོད་ལོག་ཧྲི་པཱ་ལ། རྟ་མགྲིན་དྲེགས་པ་ཟིལ་གནོན། དེ་དག་དང་ཤིན་ཏུ་ཉེ་བར་གྲུབ་བརྒྱ་ལྷ་ཁང་གྱང་རིས་རྣམ་འགྱུར་བདེ་བ་དང་བཅས་པས་མཛེས་པར་བྱས་སོ། །གཙུག་ལག་ཁང་གི་སྟེང་ན་སྤྲུལ་པའི་སྐུ་ངག་དབང་བློ་བཟང་པདྨའི་དགོངས་རྫོགས་སུ་བཞེངས་པའི་བླ་མ་ལྷ་ཁང་གི་རྟེན་གཙོར་དཔལ་ཨོ་རྒྱན་ཆོས་ཀྱི་རྒྱལ་པོའི་སྣང་བརྙན། གཡས་གཡོན་དུ་རྒྱུད་ལུང་མན་ངག་གསུམ་གྱི་བསྟན་པའི་འབྱུང་ཁུངས་རྒྱ་གར་གྱི་རིག་འཛིན་བརྒྱད། སྤྲུལ་སྐུ་རིན་པོ་དེ་ཉིད་ཀྱི་སྣང་བརྙན་དང་བཅས་པ་རིང་བསྲེལ་རྣམ་པ་བཞིས་ཕྱུར་བུར་གཏམས་ཤིང༌། བྱེ་བྲག་ཏུ་རྟེན་གཙོའི་ནང་གཟུངས་ཀྱི་གཙོ་བོར་རྒྱུད་སྡེ་རབ་འབྱམས་ཀྱི་གསང་བ་འཛིན་པ་ཆེན་པོ་བྱང་ཆུབ་
སེམས་དཔའ་རྡོ་རྗེ་ཆོས་ཀྱི་སྣང་བརྙན་རྡོ་རྗེའི་འདག་པ་ཀླུ་འཇིམ་ལས་གྲུབ་པ་ཁྱད་པར་ཅན་བཞུགས་པས་བྱིན་རླབས་མཆོག་ཏུ་ཆེ་བ་ཡིན་ལ། གྱང་རིས་གུང་གི་ཆ་ལ་རྒྱལ་བ་རིགས་ལྔ། གཡས་ཕྱོགས་སུ་གུང་ཐང་ལ་ཁར་ལྷ་སྲས་རྗེ་འབངས་ལ་སྩལ་བའི་བསམ་པ་ལྷུན་གྲུབ་མ་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་དང༌། གཡོན་ཕྱོགས་ན་དཔལ་ཨོ་རྒྱན་ཆེན་པོའི་རྣམ་པར་བསྡུས་པ་སིནྡྷུ་རྒྱ་མཚོ་མའི་ཞིང་བཀོད། སྒོ་གདོང་གཡས་གཡོན་ན་སངས་རྒྱས་སུམ་ཅུ་སོ་ལྔ་མཚན་དང་དཔེ་བྱད་རྒྱ་མཚོའི་དཔལ་དུ་འབར་ཞིང༌། དེ་ལྟ་བུའི་རྟེན་དང་བརྟེན་པའི་རང་བཞིན་སྡེ་རིས་དཀོར་ཆ་དང་བཅས་པ་བསྲུང་ཤིང་ཚར་གཅོད་རྗེས་འཛིན་གྱི་ཕྲིན་ལས་ལ་མངའ་བརྙེས་པའི་དམ་ཅན་ཆོས་སྐྱོང་རྣམས་ཀྱི་ཕོ་བྲང་རབ་ཏུ་བརྔམས་པས་རླུང་ལྷའི་ཕྱོགས་མཛེས་པར་བྱས་པའི་དབུས་སུ་དྲེགས་པའི་སྟོང་སྲོག་རྣལ་དུ་དབབ་པ་དང༌། འབོད་རྦད་གསད་པའི་བརྟུལ་ཞུགས་ལ་རང་བྱན་ཆུད་པའི་སྔགས་འཆང་ཆེན་པོ་ཧཱུྃ་ཆེན་ཀཱ་ལས་བླ་རྡོ་སྲོག་འཁོར་དང་བཅས་པ་ཕྱག་བལྟར་གྱིས་བསྐྲུན་ཞིང༌། དགའ་ཆགས་པ་དཔྱོད་ལྡན་དྲན་པའི་དབང་པོས་ཡོན་སྦྱར་ཏེ་གྱ་ཚོམ་གྱི་སྦྱོར་བ་ལ་གོམ་པ་འདོར་བའི་སྐབས་བཅད་ནས་དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་རྟེན་མདོས་སྒྲོས་གཙང་བ་དང༌། ཤ་རུ་དར་འཕྱར་ལ་བརྟེན་པའི་བཙན་རྒོད་འབར་བའི་བླ་རྡོ་མན་ངག་གི་གནད་དང་ལྡན་པ། གཞན་
ཡང་དྲེགས་པ་རང་བཞིན་གྱིས་ཆགས་པའི་དམ་ཚིག་གིས་བྲིས་སྐུ་དང༌། ཞལ་བརྙན། ཕྱག་མཚན་ལ་སོགས་པའི་སྐུ་གསུང་ཐུགས་ཀྱི་དབྱིག་ཏུ་རྡོ་རྗེའི་ཆོས་སྐྱོང་རྣམས་འདུ་འབྲལ་མེད་པར་བཞུགས་ནས་ཕྲིན་ལས་རྣམ་པ་བཞི་བདེ་བླག་ཏུ་འགྲུབ་པ་ཡིན་ནོ། །དེ་ལྟར་ཐེག་མཆོག་དཔལ་གྱི་རི་བོའི་གཙུག་ལག་ཁང་རྟེན་དང་བརྟེན་པར་བཅས་པ་འདི་དག་རྒྱལ་བའི་བསྟན་པ་རིན་པོ་ཆེ་སྤྱི་དང་བྱེ་བྲག་ཐེག་མཆོག་འོད་གསལ་སྙིང་པོའི་སྒྲུབ་བརྒྱུད་ཀྱི་རིང་ལུགས་བླ་ན་མེད་པ་ཉམས་པ་མེད་ཅིང་འགྲོ་བ་ལྷ་དང་བཅས་པའི་ཕན་པ་དང་བདེ་བའི་འཇུག་ངོགས་གཅིག་ཏུ་ལྷན་ནེ་ལྷམ་མེར་གསལ་བ་ལ། ཁྱད་གཞི་དུ་མའི་སྒོ་ནས་ཁྱད་ཆོས་ཉིད་དུ་བསྔགས་པར་འོས་པའི་ཚུལ་ཡང་ལྷ་བཙུན་སྒྱུ་མའི་རྣལ་འབྱོར་གྱིས། རྒྱལ་བ་ཀུན་འདུས་པདྨས་ལུང་བསྟན་པའི། །བསིལ་ལྗོངས་འཁོར་ལོ་ལྔ་ལྡན་པདྨོའི་ཞིང༌། །ཟ་ཧོར་རིགས་ཀྱི་རྒྱལ་ཁབ་མངོན་མཐོའི་དཔལ། །ཚངས་དང་བརྒྱ་བྱིན་འབྱོར་བས་མངོན་ཕྱུག་པའི། །མཆོད་པའི་ཞིང་མཆོག་དམ་པ་པདྨ་རི། །ཞེས་དང༌། ངོ་མཚར་རྣམ་བཀྲའི་འོད་ཟེར་བརྒྱ་ཕྲག་གིས། །བཻ་ཌྷཱུར་ཁང་བཟངས་མོག་པོར་སྐྱེངས་བྱེད་པའི། །གཙུག་ལག་དེ་ན་གཞུང་ལུགས་རྒྱ་མཚོའི་གཏེར། །དམར་སེར་རལ་གྲི་འཛིན་དངོས་མཁས་པའི་དབང༌། །བརྒྱ་ཕྲག་བྱེ་བ་འདུ་བའི་ཁང་བཟང་འདི། །རྒྱ་བོད་སྐད་གཉིས་སྨྲ་བའི་དབང་
པོ་མཆོག །རྣམ་པར་སྣང་མཛད་མཆོག་སྤྲུལ་པྲཛྙཱའི་མཚན། །གྲུབ་བརྙེས་པདྨ་དངོས་དེས་བྱིན་བརླབས་ཤིང༌། །རྣམ་མང་ཐེག་པའི་རྩེ་ན་འོད་གསལ་བ། །རྡོ་རྗེ་སྙིང་པོ་མཆོག་གསང་སྙིང་པོའི་བསྟན། །བླ་མེད་སྙིང་པོ་དོན་གྱི་ཆོས་དབྱིངས་མཛོད། །འཆད་ཉན་སྒོམ་དང་སྨིན་གྲོལ་གྲུབ་ཐོབ་གླིང༌། །ཉི་འོག་འཇིག་རྟེན་འདི་ན་འགྲན་བྲལ་བའི། །དྲི་མེད་འོད་ཟེར་བཟང་པོའི་ལེགས་བཤད་བསྟན། །ཚིག་གཅིག་ལན་བརྒྱར་ཐོས་ཀྱང་མི་ངོམས་པའི། །གཞུང་ལུགས་བརྒྱ་ཕྲག་འཛིན་པའི་པཎ་ཆེན་གླིང༌། །ལྷ་ཡི་དྲང་སྲོང་མཆོག་ལ་ཅོ་འདྲི་བ། །གྲུབ་རི་འདི་ནི་རབ་འབྱམས་མཁས་པའི་གླིང༌། །རྒྱུ་ཆོས་རྒྱུ་འབྲས་ཐེག་པར་ལུས་ངག་སྦྱངས། །འབྲས་བུ་གསང་ཆེན་སྒོར་ཞུགས་བསྐྱེད་རྫོགས་སྒོམ། །རང་རིག་གདོད་མའི་གཞིར་གཟིམས་ཆོས་ཉིད་ཟད། །ཕོ་བྲང་འདི་ནི་ཆོས་ཟད་བློ་འདས་གླིང༌། །རྩ་དག་དབུ་མའི་དབྱིངས་ནས་སྣང་བཞི་རྫོགས། །རླུང་དག་ཆོས་དབྱིངས་ངང་ནས་སྨྲ་བརྗོད་དག །ཐིག་ལེ་གདོད་མའི་གཞི་ལ་འཕོ་འགྱུར་བྲལ། །གྲུབ་རི་འདི་ནི་འཇའ་ལུས་འོད་གསལ་གླིང༌། །གར་དབྱངས་ཐིག་དང་རིག་པའི་གནས་ལྔ་སོགས། །མི་ཟད་ཤེས་བྱའི་དཀྱིལ་འཁོར་ཉ་རྒྱས་ཤིང༌། །དྲག་སྔགས་མཐུ་སྟོབས་ཟེར་གྱིས་རྒོལ་ངན་འཇོམས། །གྲུབ་རི་འདི་ནི་སྔགས་ནག་མཐུ་རྩལ་གླིང༌། །འདི་ན་དྲི་བཟང་སྤོས་སྤྲིན་འཁྱིལ་བའི་
དབུས། །འཇའ་ཟེར་མདངས་ནང་དཔའ་བོ་མཁའ་འགྲོ་དང༌། །རིག་འཛིན་པདྨའི་དག་སྣང་རྒྱུན་མི་འཆད། །གྲུབ་རི་འདི་ནི་དག་པ་མཁའ་སྤྱོད་གླིང༌། །ཞེས་རྡོ་རྗེའི་གླུས་ཆེད་དུ་བརྗོད་པའི་གནས་ལ་སྤྲོ་བ་དང༌། མོས་གུས་ཀྱི་ལང་ཚོ་མ་རྙིངས་ཤིང༌། བསྟི་སྟང་དང་རི་མོར་བྱ་བའི་གེ་སར་མཆོག་ཏུ་འཛུམ་པས་དགེ་ཚོགས་རིན་པོ་ཆེའི་གྲོང་ཁྱེར་དམ་པ་རྨད་དུ་བྱུང་བར་འཇུག་པ་དང་ཆབ་གཅིག །ཚོགས་གཉིས་སྤྲིན་གྱི་དུམ་བུ་བསྔོ་བ་དམ་པའི་ཞགས་པས་འཆིང་བ་ལ་སུ་ཞིག་སྤྲོ་བ་བརྟས་པ་དེ་ནི་བཤེས་གཉེན་དམ་པས་ཟིན་པའི་ཁྱད་པར་གྱི་ཆོས་བླ་ན་མེད་པ་ལགས། ཞེས་པ་འདི་ནི་ཆོས་ཁྲིམས་པ་བློ་གསལ་དབང་པོ་པདྨ་ཀུན་གསལ་དང༌། དཀོན་གཉེར་ཕྲིན་ལས་དཔལ་འབྱོར་ཟུང་གིས་ལྷ་རྫས་ཀྱི་མེ་ཏོག་དང་བཅས་ཏེ་འབད་པ་ཆེན་པོས་བསྐུལ་བའི་ངོར། དཔལ་གྱི་རི་བོའི་ས་འཛིན་གྱི་སྤོ་ལ་འདུས་པའི་ཚོམ་བུ་འདི་ཉིད་ཆགས་ནས་ཟླ་བའི་ཕུང་པོ་དྲང་སྲོང་བཀྲ་ཤིས་འོད་དཀར་ཅན་དུ་སླེབ་པའི་རོ་དྷའི་ལོ་ལེགས་བྲིས་ཀྱི་བདེན་ཚིག་གྲུབ་པའི་དྲང་སྲོང་ཆེན་པོ་རྀ་ཥི་ས་མཱ་མ་ཀཱིའི་ཀླུང་ཐམས་ཅད་ལ་ཡན་ལག་བརྒྱད་ལྡན་གྱི་ནུས་པ་སྟེར་བ་ལ་མངོན་དུ་ཕྱོགས་པའི་ཚེ། དཔལ་ཨོ་རྒྱན་ཆོས་ཀྱི་རྒྱལ་པོ་ཡབ་ཡུམ་གྱིས་རྗེས་སུ་བཟུང་བའི་རྫོགས་ཆེན་པ་མཁྱེན་བརྩེའི་འོད་ཟེར་གྱིས་ཀུན་མཁྱེན་ཤནྟ་པུ་རི་པ་ལ་མི་བསླུ་བར་ངེས་པའི་
དད་པ་བརྟན་པོས་ཀུན་ནས་བསླངས་ཏེ་པདྨ་འོད་གསལ་ཐེག་མཆོག་གླིང་དུ་སྦྱར་བའི་ཡི་གེ་པ་ནི་འཇིགས་སྐྱོབ་དང་ལེགས་སྨོན་ཙམ་མ་ཡིན་པར་ངེས་པར་འབྱུང་བའི་བློས་ཤཱཀྱའི་བསྟན་པ་ལ་རབ་ཏུ་བྱུང་བའི་སྐལ་པ་ཅན་ཟུར་རྡོ་རྗེ་སྙིང་པོས་སོ། །གཏམ་ཚོགས་ལེའུ་སོ་དགུ་པའོ།། །།
གཏམ་ཚོགས་ལེའུ་བཞི་བཅུ་པ། པདྨ་འོད་གསལ་ཐེག་མཆོག་གླིང་རྟེན་དང་བརྟེན་པར་བཅས་པའི་གཏམ་ནོར་བུའི་དོ་ཤལ།
པདྨ་འོད་གསལ་ཐེག་མཆོག་གླིང་རྟེན་དང་བརྟེན་པར་བཅས་པའི་གཏམ། ནོར་བུའི་དོ་ཤལ་ཞེས་བྱ་བ། ཀུན་བཟང་ཡབ་ཡུབ་གཉིས་མེད་མཉམ་སྦྱོར་སྣང་སྟོང་བདེ་ཆེན་འཁོར་ལོའི་སྐུ། །ཧེ་རུ་ཀཿདཔལ་ཆེ་མཆོག་བླ་མེད་འཁོར་འདས་མཉམ་ཉིད་སྐུར་རྗོགས་པ། །དུག་གསུམ་མ་རིག་དྲྭ་བ་གཅོད་མཛད་ཆོས་དབྱིངས་མཆོག་གི་འཁོར་ལོ་ཅན། །ཞི་ཁྲོ་རབ་འབྱམས་རྒྱལ་བའི་སྤྱི་གཟུགས་གར་དགུའི་ཉམས་ལྡན་དེར་ཕྱག་འཚལ། །སངས་རྒྱས་ཀུན་དང་གཉིས་སུ་མེད་པའི་ཡེ་ཤེས་རྡོ་རྗེ་གདོད་མའི་སྲོག །ཐུགས་རྗེའི་ཆུ་ཀླུང་ཤིན་ཏུ་ཤུགས་དྲག་གཞི་དབྱིངས་རང་བྱུང་ཀོ་ཤའི་མཚོར། །ལྷུན་གྲུབ་མཚན་དཔེའི་འཁོར་ལོ་རྣམ་བྱང་རྩ་བའི་བླ་མ་ཨོ་རྒྱན་རྗེ། །ཞི་ཁྲོ་རབ་འབྱམས་མཁའ་འགྲོར་བཅས་པས་སྐུ་གསུམ་འབྲས་བུ་གཡུར་ཟ་མཛོད། །དྲན་པ་ཉེ་བར་གཞག་པ་ལ་སོགས་བྱང་ཆུབ་ཆོས་ལ་མངའ་མཛད་ཅིང༌། །སྟོབས་བཅུའི་རྩལ་གྱི་བདུད་ལས་རྣམ་རྒྱལ་བརྒྱ་ཕྲག་བཅུ་ཡི་སངས་རྒྱས་དང༌། །ཞི་གྱུར་འགོག་ལམ་བདེན་པའི་མཐུ་ཅན་ཡན་ལག་བཅུ་གཉིས་ལུང་གི་ཆོས། །རིག་འཛིན་
བྱང་ཆུབ་སེམས་དཔའི་དགེ་འདུན་འདི་ན་དང་བའི་ཡིད་ཀྱིས་བསྟེན། །ལོག་འདྲེན་གཤེད་དུ་དྲག་པོའི་རྐན་སྒྲས་སྲིད་གསུམ་མཐར་བྱེད་དཔལ་མགོན་བདུན་ཅུ་རྩ་ལྔའི་སྡེ། །བྱེ་བྲག་འོག་མིན་ཡེ་ཤེས་འཁོར་ལོའི་སྒྱུ་འཕྲུལ་རོལ་པ་པདྨ་འོད་གསལ་ཐེག་མཆོག་གླིང༌། །འབྱོན་འགྱུར་སངས་རྒྱས་མོས་པའི་བར་དུ་ཉམས་པ་མེད་པར་བསྐྱང་ལ་དམ་བཅའ་བཙན་པོའི་ཁུར། །རང་གིར་མཛད་པ་སྔགས་སྲུང་གཟའ་དང་རྡོ་རྗེ་ལེགས་པས་སྡེ་བཞིའི་སྒོ་འཕར་དེང་ཕྱི་ཞིག །ཅེས་རྒྱལ་བ་སྲས་དང་བཅས་པ་ལ་མཆོད་པར་བརྗོད་པའི་ཚིག་གིས་ལམ་ཡངས་པར་བྱས་ནས་གངས་རིའི་ཁྲོད་ཀྱི་དབེན་གནས་ཚེ་རིང་ལྗོངས་བྱང་ཆུབ་ཤིང་གི་ནགས་ཁྲོད་ན་མངོན་པར་མཛེས་པའི་ཚནྡྷོ་ཧ་ཆེན་པོ་པདྨ་འོད་གསལ་ཐེག་མཆོག་གླིང་རྟེན་དང་བརྟེན་པར་བཅས་པའི་རྟོགས་བརྗོད་ནོར་བུའི་དོ་ཤལ་གླེང་བར་བྱ་བ་ལ། འདི་ལྟར་སངས་རྒྱས་ཐམས་ཅད་ཀྱི་གཉིས་སུ་མེད་པའི་ཡེ་ཤེས་རང་བཞིན་རྒྱ་ཆེ་ལ་ངོ་བོ་གཏིང་ཟབ་པ་ཐུགས་རྗེ་ཚད་མེད་ཀྱང་རྣམ་པར་རྟོག་པའི་སྤྲོས་པ་མཐའ་ཡས་པ་དང་བྲལ་བ། གདོད་མའི་སངས་རྒྱས་ཆོས་ཀྱི་སྐུའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཆོ་འཕྲུལ་ཆེན་པོ་ཟད་མི་ཤེས་པའི་རྩལ་ལ་རྣམ་པར་སྣང་མཛད་གང་ཆེན་མཚོའི་ཞིང་ཁམས་བཀོད་དེ་ཕྱག་གི་པདྨོའི་དབུས་ནས་བྱུང་བའི་ཕྲུམ་ཕྲུམ་རྣམས་ཀྱི་སྟེང་ན་ཞིང་ཁམས་ཉི་ཤུ་རྩ་ལྔ་བརྩེགས་
མར་གནས་པའི་བཅུ་གསུམ་པ། ཐུགས་ཀ་དཔའ་གྱི་བེའུའི་ཐད་དྲང་ན་གཞི་དང་སྙིང་པོ་མེ་ཏོག་གིས་བརྒྱན་པ་གསང་སྔགས་རྡོ་རྗེ་ཐེག་པའི་ཞིང་ཁམས་མི་མཇེད་ཀྱི་འཇིག་རྟེན་འདི་ཉིད་འཁོད་པའི་ནང་ཚན་ལས་འཛམ་བུའི་གླིང་ལས་ཀྱི་ས་པའི་ཡུལ་དབུས་མ་ག་དྷཱ་རྡོ་རྗེའི་གདན་བྱང་ཆུབ་འབྱུང་བའི་གནས་ནས་རྨུགས་འཛིན་གྱི་དབང་པོས་བདག་གིར་བྱས་པའི་ཕྱོགས་ནི་མདོ་སྡེ་པདྨ་དཀར་པོ་ལས། རིགས་ཀྱི་བུ་དུས་གསུམ་གྱི་སངས་རྒྱས་གང་གིས་ཀྱང་གདུལ་བྱར་མ་གྱུར་པའི་གནས། འདྲེ་སྲིན་དུ་མས་གང་བའི་མཐའ་འཁོབ་ཁ་བ་ཅན་གྱི་རྒྱལ་ཁམས་དེར། མ་འོངས་པའི་དུས་ན་དམ་པའི་ཆོས་ཉི་མ་ཤར་བ་ལྟ་བུ་ཞིག་རྒྱས་པར་འདུག་སྟེ། སེམས་ཅན་ཐམས་ཅད་ཀྱང་ཐར་པ་བྱང་ཆུབ་ཀྱི་ལམ་ལ་འགོད་པར་འགྱུར་རོ། །མཐའ་འཁོབ་དེ་འདུལ་བའི་གཉེན་པོ་ནི་འཕགས་པ་སྤྱན་རས་གཟིགས་ཡིན་ནོ། །ཞེས་ལུང་བསྟན་གྱི་བདེན་པའི་རྔ་བོ་ཆེ་བརྡུངས་པ་ལྟར་རྒྱལ་སྲས་ཕྱག་ན་པདྨས་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ཐར་པ་དམ་པའི་མགྲོན་དུ་སྤྱིར་བཟུང་བ་བོད་གངས་ཅན་ལ་སྤུ་རོང༌། མང་ཡུལ། ཟངས་དཀར་ཏེ་སྐོར་གཅིག །ལི་དང༌། བྲུ་ཤ་དང༌། སྦལ་ཏེ་དེ་སྐོར་གཅིག །ཞང་ཞུང་དང༌། བྲི་སྟེ་དང༌། སྟོད་སྨད་གསུམ་སྐོར་གཅིག་སྟེ་སྟོད་མངའ་རིས་སྐོར་གསུམ། དབུས་ན་དབུ་རུ་དང༌། གཡོ་རུ་གཉིས། གཙང་ན་གཡས་རུ་དང༌། རུ་ལག་གཉིས་ཏེ་
བར་དབུས་གཙང་རུ་བཞི། སྨད་ན་དངུལ་རྫ་ཟལ་མོ་སྒང༌། ཚ་བ་སྒང༌། སྨར་ཁམས་སྒང༌། སྤོ་འབོར་སྒང༌། སྨར་རྫ་སྒང༌། མི་ཉག་རག་སྒང་སྟེ་སྨད་མདོ་ཁམས་སྒང་དྲུག་གི་སྒྲས་བསྙད་པ་སྤྱིར་བོད་ཆེན་པོའི་རྒྱལ་ཁམས་སུ་གྲགས་པོའི་ནང་ཚན་ལས། གཡོ་རུའི་ཆ་དགེ་བཅུ་ཚང་བའི་ཡུལ་ཡར་མོ་ཀླུངས། ཕོ་བྲང་ཡུམ་བུ་གླ་སྒང་དུ་ལྷ་ཐོ་ཐོ་རི་གཉན་བཙན་གྱི་སྐུ་རིང་ལ་དམ་པ་ཆོས་ཀྱི་དབུ་བརྙེས། དབུ་རུ་སྐྱིད་ཤོད་ཀྱི་འཛིན་མར་སྤྲུལ་པའི་རྒྱལ་པོ་སྲོང་བཙན་སྒམ་པོས་སའི་དཔྱད་གཟིགས་པ་ན། བོད་ཡུལ་སྲིན་མོ་གན་རྐྱལ་གྱི་རྣམ་པར་འདུག་པའི་སྙིང་གར་གཙུག་ལག་ཁང་བཞེང་པར་རྩོམ་ཚེ་གནས་དེ་དག་བྱེད་ཀྱི་ཕུང་པོར་གྱུར་པ་ལ་རས་ས་བསྐྱལ་ཏེ་བརྡལ་པ་ལ་ལྟ་ཁང་བརྩིགས་ཤིང་བཟོ་ཁྱད་ལས་འཕྲུལ་ལྟར་སྣང་བས་ར་ས་འཕྲུལ་སྣང་དུ་གྲགས་ཤིང༌། སྟོན་པའི་ཞལ་སྐྱིན་ཇོ་ཤཱཀ་རྣམ་གཉིས་འགྲོ་བའི་བསོད་ནམས་ཀྱིས་མགྲོན་དུ་སྤྱན་དྲངས། གཡོ་རུའི་ཁྲ་འབྲུག་ལ་སོགས་མཐའ་འདུལ་ཡང་འདུལ་གྱི་གཙུག་ལག་ཁང་ཁྱད་དུ་འཕགས་པ་བཞེངས་ཏེ་དམ་པའི་ཆོས་ཀྱི་སྲོལ་རྒྱ་ཆེར་བཏོད། དེ་ནས་གདུང་རབས་ལྡན་མེས་ཀྱི་ལུང་བསྟན་ལྟར་བརྟན་པའི་འཁོར་ལོའི་སྒྱུ་འཕྲུལ་ལྷ་བཙན་པོ་ཁྲི་སྲོང་ལྡེའུ་བཙན་གྱིས་མཁན་སློབ་རྣམ་གཉིས་གངས་ལྗོངས་ཕན་བདེའི་མཆོད་སྡོང་དུ་བཀུག་ནས་སྤུས་རི་ནག་པོའི་ལྗོངས་ཆུ་བོ་གསེར་ལྡན་གྱི་འགྲམ་དུ་སྔོན་མུ་སྟེགས་ཀྱི་
རིགས་འཛིན་ཞིག་གིས་རོ་བསྒྲུབས་པའི་གྲོགས་དབུས་འགྱུར་འཆང་གི་དགེ་ཚུལ་གྱིས་བྱས་པའི་གཏང་རག་གི་དངོས་པོ་ལས་བཞེངས་པའི་ཨོ་ཏནྟ་བུ་རིའི་གཙུག་ལག་ཁང་ལ་དཔེ་བྱས་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་རྟེན་དང་བརྟེན་པར་བཅས་པ་བཞེངས་ཤིང་མདོ་སྔགས་ཀྱི་བསྟན་པ་ནམ་མཁའ་ལ་ཉི་མ་ཤར་བ་བཞིན་དར་རྒྱས་སུ་མཛད་པ་ཡིན་ནོ། །དེ་ལྟ་བུའི་ཐུགས་བསྐྱེད་དང་ཕྲིན་ལས་རླབས་པོ་ཆེའི་རྗེས་སུ་བདག་ཉིད་བརྒྱུད་པར་བཅས་པའང་འཇུག་ཅིང༌། སྔོན་གྱི་རྒྱལ་སྲས་རྣམས་ཀྱི་ཕྲིན་ལས་ཆུད་མི་གསན་པ་དང༌། དཀར་པོ་རྣམ་པར་འཕེལ་བའི་ས་བོན་རང་འབྱོར་གྱིས་ཇི་ཙམ་ནུས་པ་དེ་སྲིད་དུ་བསྒྲུབ་པའི་དམ་བཅའ་བརྟན་པོ་ལ་རང་གིར་བྱེད་པའི་བདག་པོའི་རྐྱེན་དུ་གྱུར་པ་ནི་འདི་ལྟ་སྟེ། གཡོ་རུའི་གོ་ཙམ་ན་བཀྲེན་པའི་རྒུད་པ་སེལ་བ་ལ་དཔྱད་ལེགས་པའི་རི་འབྲས་ཀྱི་ལྗང་པ་དཔལ་དུ་འབར་བ་ལྟ་བུའི་ས་འཛིན་ཡར་ཀླུངས་མེ་སྣའི་རི་རྒྱུད་ཤར་ནུབ་དབྱེ་བའི་བྱེད་པོར་བསྒོས་པ་ལྟ་བུའི་རྐྱེན་ལས་ཡུལ་ཡར་མོ་ནུབ་ཏུ་གྲགས་པའི་དབང་པོའི་ཕྱོགས་གནས་བོའི་དུས་ན་ཆོས་ལྡན་གྱི་སྤྲུལ་པའི་རྒྱལ་པོ་རྣམས་རྨུ་ལུགས་ཀྱིས་སྐུ་མཁར་བརྩིགས་པའི་གནས། པདྨའི་ངང་ཚུལ་སྲོང་བཙན་གྱི་བང་སོ་ལ་ཉི་མ་དང་ཟླ་བའི་བགྲོད་པས་བཏུད་པར་བྱེད་པའི་ལམ་པོ་ཆེ་ལྟར་རང་བཞིན་ལྷུན་གྱིས་གྲུབ་པའི་ཡུལ་ཆོས་དང་སྲིད་ཀྱི་དོན་གཉིས་གྲུབ་པའི་མཁར་དུ་ཆགས་
པ་ན། ཟ་ཧོར་རྒྱལ་པོ་དྷརྨ་པཱ་ལའི་རྒྱལ་བརྒྱུད་དྲི་མ་མེད་པ་ཧོར་བདུད་འདུལ་རབ་བརྟན་གྱི་སྤྱན་རས་ཀྱིས་བསྐྱངས་པའི་མདུན་ན་འདོན། ཡ་རབས་དྲ་མའི་ངང་ཚུལ་ཅན་འདབ་ལྡན་གཡུང་དྲུང་འཁྱིལ་བའི་མིང་གིས་སྙན་པའི་ཁབ་ཏུ་དཔལ་སྔགས་ཀྱི་བདག་མོའི་སྨོན་ལམ་གྱི་རོལ་པ་རྣམ་པར་བཀོད་པའི་རྟེན་ཅིང་འབྲེལ་བར་འབྱུང་བ་ལས། རྒྱལ་ཁམས་ཕལ་ཆེར་སྡུག་བསྔལ་དང་སྡིག་པས་ཁེབས་ཤིང་ཕ་དང་བུ་མི་མཛའ་བའི་གནས་སྐབས་འདིར་ཡང༌། ཆོས་བཞིན་སྤྱོད་པའི་བགྱི་བ་ལ་སྟངས་དཔྱལ་རྣམས་ཤིན་ཏུ་མཐུན་པར་སྤྱོད་ཅིང༌། བསམ་སྦྱོར་གཅིག་ཏུ་དག་པས་གར་དབང་འཇིགས་མེད་གླིང་པ་རིགས་ཀྱི་བདག་པོར་བསྙེན་ནས། གང་གི་བྱང་ཆུབ་སེམས་ཀྱི་ཉེ་བར་ལེན་པའི་རྐྱེན་ལས་རང་དབང་གི་རི་ལ་རི་རྒྱ་བསྡམས་པ་དང༌། སེམས་ཅན་གྱི་སྲོག་གཅོད་པ་སོགས་འཚོ་བ་ཆོས་སུ་འདུ་ཤེས་པའི་བསམ་སྦྱོར་ངན་པ་མཐའ་དག་རིང་དུ་སྤངས་པས་ཉེས་པ་མེད་པའི་རི་དྭགས་དང༌། སྒོ་ཕྱུགས་ཡན་ཆད་བདེ་བར་འཚོ་བའི་བཟང་པོའི་བསྐལ་པ་གསར་དུ་ཕྱེ། དེའི་ཚེ་རྒྱལ་བའི་བསྟན་པ་རིན་པོ་ཆེ་སྤྱི་དང་བྱེ་བྲག་ཏུ་གསང་མཆོག་འོད་གསལ་རྡོ་རྗེ་སྙིང་པོའི་བསྟན་པ་ལ་གཅིག་ཏུ་གུས་པས་ཆོས་རྒྱལ་མྱ་ངན་མེད་ཀྱི་རྣམ་པར་ཐར་པའི་རྗེས་སུ་ཕྱོགས་ནས་གཏོང་ཕོད་ཀྱི་ཕྱག་རིང་པོར་བརྐྱང་སྟེ་ཆོས་དང༌། ནོར་དང༌། འདོད་པ་དང༌། ཐར་པ་སྟེ་སྡེ་བཞིའི་སྒོ་
འཕར་གསར་དུ་དབྱེ་བའི་སླད་དུ་ཆུ་ཕོ་རྟའི་ལོ་ལ་ཚེ་རིང་ལྗོངས་པདྨ་འོད་གསལ་ཐེག་མཆོག་གླིང་གི་རྟེན་གཞལ་ཡས་ཁང་གི་བཀོད་པ་ཀ་བ་ཉི་ཤུའི་ས་བཀོད་ལེགས་པར་མངོན་སུམ་དུ་འདུ་བྱས་སོ། །དེ་ཡང་དཀར་པོ་རྣམ་པར་འཕེལ་བའི་ཆོས་ལ་བདུད་དངབདུད་ཀྱི་སྡེ་ཚོགས་བློ་ཤིན་ཏུ་མི་བདེ་ཞིང་ཡིད་མྱ་ངན་གྱི་ཁུང་བུར་ཆུད་པ་ནི། སྔོན་ཆོས་རྒྱལ་རྣམས་ཀྱིས་རྟེན་གསུམ་བཞེངས་པའི་དཀར་ཆག་ནའང་གསལ་བ་ལྟར། གཞི་དེར་ས་བདག་གདུག་པ་ཅན་གནས་པའི་ཅལ་སྒྲོག་ལ་རྟེན་ཕྱི་ནང་གི་སྐྱི་བོ་མ་བརྟགས་པར་འཇུག་པ་རྣམས་ཀྱི་ངག་ལ་འདོད་ཁམས་ཀྱི་ལྷས་བྱིན་གྱིས་བརླབས་པས་དོན་ལ་མི་གནས་པའི་རི་བོང་གི་ཆལ་བྲག་ཅ་ལྟར་སྒྲོགས་པས་སྒྱུ་མ་ལྟ་བུའི་བློ་དང་མི་ལྡན་པ་དག་སེམས་འཁུ་འཕྲིག་གི་གནས་ལ་བཀོད་ཀྱང༌། ཟླ་བ་སྒྲོན་མའི་མདོ་ལས། རབ་ཏུ་བྱུང་ནས་ཆོས་སྤྱོད་ཅི་འདྲ་བར། །ཟས་དང་སྐོམ་དང་དེ་བཞིན་གོས་རྣམས་དང༌། །མེ་ཏོག་སྤོས་དང་ཕྲེང་བ་རྣམས་ཀྱིས་ནི། །ཁྱུ་མཆོག་རྒྱལ་བ་བསྙེན་བསྐུར་བྱས་མི་འགྱུར། །གང་ཞིག་བྱང་ཆུབ་རབ་ཏུ་འདོད་བྱེད་ཀྱི། །འདུས་བྱས་ངན་པས་ཡིད་འབྱུང་སེམས་ཅན་གྱི། །དོན་དུ་དགོན་པར་ཕྱོགས་ཏེ་གོམ་བདུན་བོར། །འདི་ནི་དེ་བས་བསོད་ནམས་ཁྱད་པར་འཕགས། །ཞེས་འབྲོག་དགོན་བས་མཐའི་ཕྱོགས་སུ་གོམ་བདུན་བོར་བས་ཀྱང་བསོད་ནམས་ཁྱད་པར་ཅན་
ཐོབ་པར་བསྔགས་པའི་རྟེན་གཞི་འཆོས་ཤིང༌། མདའ་རུ་དགེ་འདུན་གྱི་ཀུན་དགའ་ར་བ་བཞེངས་པ་ལས་ཕུ་རུ་བསམ་གཏན་གྱི་མཁར་པོ་བྲེ་ཙམ་བརྩིགས་པ་ཆེས་མཆོག་ཏུ་འདོད་པའི་རྒྱུའང་སྡེ་སྣོད་ལེགས་པར་ཤེས་པ་རྣམས་ནི། ཉེས་སྤྱོད་ཀྱིས་ཀུན་ནས་དཀྲིས་པའི་འཇིགས་སྐྱོབ་དང་ལེགས་སྨོན་སོ་སོ་ཐར་པར་མི་སྒོམ་ལ། ལས་བརྒྱ་རྩ་གཅིག་གི་ཆོ་གའི་དོན་པོའང་བསྟན་པའི་གནས་ཚད་ཀྱིས་བསྡུ་བར་ཉེ་བའི་རང་བཞིན་ཤེས་ནས་དབེན་པར་ཡིད་ཕྱོགས་པས། ད་ནི་སྙིགས་མའི་དུས་ན་དབང་པོ་དང་ཉོན་མོངས་པའི་ཚོགས་གཅིག་ཏུ་བསྡམ་པ་ལ་བས་མཐའི་དགོན་གནས་ཁོ་ན་ཁྱད་པར་དུ་གྱུར་པའི་ཚུལ་ནི་སྐྱེས་བུ་ངེས་འབྱུང་གི་བློ་དང་ལྡན་པ་རྣམས་ཀྱིས་ཡང་དག་པར་རིག་པར་འགྱུར་ལ། བདག་ཅག་གིས་ཀྱང་སེམས་ཅན་ལ་ཕན་པའི་བྱ་བ་བསྒྲུབ་པ་ལ་ཆོས་པར་རློམ་པ་དག་གིས་མི་མཐུན་པར་བལྟ་བའི་ལོག་བསྒྲུབ་བཟོད་པའི་སྙིང་སྟོབས་བསྐྱེད་ཅིང༌། ཁྱད་པར་རྫོང་ཕྲང་སྲོག་གསུམ་དང་ལྡན་པའི་ལྷའི་རྣལ་འབྱོར་གྱི་ཆོ་ག་ཞིབ་མོས་ལ་ཆུས་བརྒལ་བའི་ས་ནས་ཀྱང་ས་དམིགས་གཉན་པོ་སྦྱངས་ཤིང་གཞི་བདག་ཟིལ་གྱིས་མནན་པའི་ཚེ། ཆོས་རྗེ་རྒོད་ཚང་པས་གནས་ལ་ཞལ་བསྟན། མ་མགོན་ལྕམ་དྲལ་མོན་པ་ཕོ་མོ་དང་སྐྱེས་བུ་གོ་ཞུབ་ཅན་དུ་བསྟན་ནས་གཙུག་
ལག་ཁང་བརྩིག་པའི་ཕྲིན་ལས་བསྒྲུབས། མདོ་སྒྱུ་སེམས་གསུམ་ལ་སོགས་རྡོ་རྗེ་ཐེག་པའི་ཆོས་སྒོ་རབ་འབྱམས་ལ་བཤད་སྒྲུབ་དང་སྨིན་གྲོལ་གྱི་སྒོ་འཕར་ཕྱེ། རྒྱུ་འབྲས་བསླུ་བ་མེད་པའི་བདེན་པས་མཐོང་བའི་ཆོས་ལ་བསོད་ནམས་འཕེལ་ནས་བསྟེན་པའི་སྦྱིན་བདག་གིས་ཆབ་སྲིད་ཀྱང་ཅིག་ཅར་དུ་རྒྱས། སྒྲུབ་སྡེའི་ས་བོན་ཐེབས་ཏེ་རྒྱགས་པ་དང་དྲེགས་པ་བཅོམ་ནས་དཀའ་ཐུབ་འབའ་ཞིག་པས་རི་ཚུགས་ཟིན་ཅིང་འདག་སྦྱར་དང་བཅས་ཞི་བའི་ཏིང་འཛིན་སྒོམ་པའི་དྲང་སྲོང་དུ་མས་གང་བ་དག་ལའང་རང་རང་གི་སྐལ་པ་དང་རྗེས་སུ་མཐུན་པའི་ངོས་འབྱུང་གི་སེམས། སྡོམ་པ་གསུམ་གྱི་ཚུལ་ཁྲིམས། བསྐྱེད་རྫོགས་ཟབ་མོའི་རྣལ་འབྱོར། མང་དུ་ཐོས་པའི་ལུང༌། ཇི་ལྟ་བའི་ཆོས་ཉིད་ལ་གོ་མྱོང་རྣལ་མར་ཆགས་པ་མང་དུ་ཐོན། ཡུལ་ཕྱོགས་དང་སྐད་ལུགས་མི་གཅིག་པའི་ས་ནས་ཀྱང་ལས་འཕྲོ་དང་སྐལ་པ་ཅན་མང་དག །ནག་པོའི་དོན་མཁར་ལུང་པ་བསྙེན་པའི་ཚེ་སྣོད་བཅུད་གཉིས་ཀ་གྱི་ན་བར་བལྟ་བའི་ཡུལ་ཡར་མོ་ནུབ་ཀྱི་སྐྱེ་བོ་ཅེ་རེ་ལོང་རྣམས་ནི་ཡ་ཆ་བར་བྱེད་དེ། སངས་རྒྱས་འབྱུང་བ་ལ་མཉེས་པར་མི་བགྱིད་པའི་སྐྱེ་བོ་བླུན་པོ་རྣམས་ནི་དེ་བས་ཀྱང་ཡ་ཆ་སྟེ། སྤྱིར་སངས་རྒྱས་ཀྱི་ཕྲིན་ལས་དང༌། བྱང་ཆུབ་སེམས་དཔའ་རྣམས་ཀྱིས་ཐུགས་བསྐྱེད་དང༌། སྨོན་ལམ་གྱི་མཐའ་ཀུན་
ནས་ཉོན་མོངས་པའི་བྱིས་པ་སོ་སོ་སྐྱེ་བོ་རྣམས་ཀྱིས་ཤེས་པ་མ་ཡིན་ནོ། །ད་ནི་རྟེན་གཞིའི་གཙུག་ལག་ཁང་གང་དུ་སྒྱུ་མ་མཁན་བཟང་པོ་ལྟ་བུའི་རི་མོ་མཁན་གྱི་ཆོ་འཕྲུལ་རྟག་ཏུ་མི་བཟོད་པའི་འདུ་བྱེད་ཀྱིས་སྡེབས་བྲིས་ཀྱི་རིམ་པ་ཇི་ལྟར་བྲིས་པ་ནི། དྲི་གཙང་ཁང་ཀ་བ་བཅུ་གཉིས་པའི་སེང་གཡེངས་འཕང་ཐོག་ཅན་གྱི་གུང་གི་ཆ་ལ་བསྟན་པའི་བདག་པོ་རྒྱལ་བ་ཤཱཀྱ་སེང་གེའི་སྣང་བརྙན་འཁོར་ཉན་ཐོས་མཆོག་གཉིས་ཀྱིས་བརྟན་པའི་མཐའ་སྐོར་དུ་རྫོགས་པའི་སངས་རྒྱས་དེ་ཡི་རྟོགས་བརྗོད་མཛད་པ་བཅུ་གཉིས་པོ་གསེར་བྱི་བ་བྱུགས་ཀྱིས་རྩིས་མགོ་བསྡུས་པ་ལ། ཁྱད་པར་གྱི་ཆོས་གཞོན་ནུ་རོལ་རྩེད་མཛད་པ་ནས་མྱ་ངན་ལས་འདས་པའི་བར་དེ་སྲིད་རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་དང་རྗེས་མཐུན་པའི་གཡས་གཡོན་དུ་བསྟན་པའི་རྩ་ལག་ཆོས་རྒྱལ་སྲོང་བཙན་དང༌། དབོན་སྲས་ཁྲི་སྲོང་ལྡེའུ་བཙན་གཉིས་ལ་རང་རང་གི་བཙུན་མོའི་འཁོར་མདུན་ན་འདོན་གཉིས་གཉིས་དང་བཅས་པ། འཁོར་ས་ནུབ་ལྟ་ལ་དབུས་སུ་ཟངས་མདོག་དཔལ་རིའི་ཞིང་བཀོད་བསྡུས་པའི་གཙོ་བོ་གུ་རུ་ཟ་ཧོར་མ་ཡབ་ཡུམ་གཉིས་དང་བཅས་ཤིང༌། མཐའ་སྐོར་སངས་རྒྱས་གཉིས་པ་དེའི་རྣམ་པར་ཐར་པ་གདུལ་བྱའི་དོར་སྣང་ལྟར་བསྟན་པ་སིནྡྷུ་མས་ས་བཅད་བསྡུས་པའི་བཀོད་པ་པདྨ་བཀའི་ཐང་ཡིག་ལྟར་བཀྲལ་བ་སྒྱུ་མ་མཁན་གྱི་
ཆོ་འཕྲུལ་ལྟར་འབར་བས་བྱིས་པ་སོ་སོ་སྐྱེ་བོ་རྣམས་ཀྱི་མིག་སྤྲིད་པར་བྱེད་དོ། །བྱང་ལྟ་ལ་མ་བྱོན་པའི་སངས་རྒྱས་མ་ཕམ་མགོན་པོ་ཐེག་པ་མཆོག་གི་སྟོན་པར་བཞེངས་པ་དགའ་རབ་རྡོ་རྗེ་རིགས་བདག་གདོད་མའི་མགོན་པོ་དང་བཅས་པ་ལ། འཁོར་རྒྱ་གར་གྱི་རིག་འཛིན་བརྒྱད་རྣམ་བཞིའི་ཕྲིན་ལས་ལ་མངའ་དབང་བསྒྱུར་བའི་ཕྱག་རྒྱ་ཅན་བྲིས་སོ། །ཡས་གཟིགས་ཀྱི་ལྡེབས་ལ་འབྱོན་འགྱུར་གྱི་སངས་རྒྱས་མ་ཕམ་མགོན་པོ་གཙོ་བོར་གྱུར་པ་ལ། ཡུམ་ཆེན་མོ། རི་ཁྲོད་མ། པཎ་ཆེན་དྲི་མེད་བཤེས་གཉེན། ཚེ་དཔག་མེད་སྐུ་གསུམ་འདུས་པ། སྒྲོལ་དཀར་ཡིད་བཞིན་འཁོར་ལོ་རྣམས་སྐུ་ཚད་ཆེ་བར་བཞུགས་པའི་སྟེང་གི་ཆ་ཁོར་མོར་རྡོ་རྗེ་ཐེག་པའི་ལམ་ནས་མཆོག་གི་དངོས་གྲུབ་བརྙེས་པའི་རྣལ་འབྱོར་དབང་ཕྱུག་བརྒྱད་ཅུ་རྩ་བཞི་པོའི་སྟེང༌། སྨྲ་བའི་སེང་གེ་ཕྱོགས་ཀྱི་གླང་པོ་དང༌། དབྱིག་གཉེན་གཉིས་བསྣན་ནས་འཛམ་བུའི་གླིང་མཛེས་པར་བྱེད་པའི་རྒྱན་དྲུག་དང་མཆོག་གཉིས་ཀྱང་ཚང་བར་བགྱིས་པ་གང་ཞིག་གི་གཙོ་བོ་དང་པོའི་སངས་རྒྱས་རྡོ་རྗེ་འཆང་གིས་བྱས་པ་རྣམས་བྲི་ཆའི་རུས་དང༌། ཚུགས་དང༌། རྣམ་འགྱུར་མི་ཉམས་པའི་བདག་ཉིད་ཅན་དུ་མཐོང་བའི་ཆོས་ལ་གནས་པའོ། །དེ་དང་རྒྱ་འབྲེལ་གཟིམ་ཆུང་དཔལ་ཡོན་ཅན་དང༌། དཔེ་ཁང་གྲུ་འཛིན་གྱི་དབར་དུ་མགོན་ཁང་ཨུ་ཙ་ལར་རྡོ་རྗེ་ཐེག་པའི་བསྟན་སྲུང་ཀུན་གྱི་གཙོ་
བོར་གྱུར་ཅིང༌། ཁྱད་པར་སྒྲུབ་གནས་རྟེན་གསུམ་དང་བཅས་པ་བསྐལ་པའི་བར་དུ་བསྐྱང་བའི་དམ་བཅའི་རི་མོ་འོད་གསལ་གྱི་སྣང་ཆ་གསར་པའི་ངོས་སུ་བྲིས་ཤིང༌། ལེགས་ཉེས་སྟངས་འཛིན་གྱི་བྱེད་པོར་ཞལ་གྱིས་བཞེས་པ་དཔལ་སྔགས་ཀྱི་སྲུང་མ། གཟའ་དགེ་བསྙེན་ཆེན་པོ་རཱ་ཧུ་ལ། དམ་ཅན་རྡོ་རྗེ་ལེགས་པ་རྣམས་དང་ཁྱད་པར་སྒྲུབ་སྡེ་འདིའི་དཀོར་ཆ་ལོངས་སྤྱོད་དང་བཅས་པ་གཉེར་དུ་གཏད་ཅིང༌། མེལ་ཚེ་ལ་གཡེལ་བ་མེད་པའི་གཡར་དམ་གཉེན་པོ་དང་དུ་ལེན་པ་ལ་ནོར་འཕྲེང་འཁྲེན་ཅན་ལྟར་པའི་ཕྲིན་ལས་ཀྱིས་མངོན་དུ་སྤྱོད་པ་ཞིང་སྐྱོང་དུར་ཁྲོད་ཀྱི་བདག་མོ་རྣམས་ཀྱི་སྣང་བརྙན་དམ་ཚིག་གཅིག་ཏུ་བསྲེ་ཕྱིར་ཀློང་ཆེན་སྒྱུ་མའི་རྣལ་འབྱོར་གྱི་རོ་མ་ལས་བྱུང་བའི་ཁྲག་ཆེན་གྱིས་བྲིས་ཤིང༌། ཆོ་འཕྲུལ་ཆེན་པོ་ཟད་མི་ཤེས་པའི་རང་བཞིན་དུ་བཞུགས་སོ། །སྒོ་ཁང་གི་ཕྱི་རོལ་དུ་རྟ་མགྲིན་དྲེགས་པ་ཀུན་འདུལ་དང་སྤྱན་རས་གཟིགས་སེང་གེ་སྒྲ། འཇིག་རྟེན་སྐྱོང་བ་ཆེན་པོ་བཞི། ནང་ངོས་སུ་གནས་རྟེན་འདི་ཁོ་ན་ལ་ཆེད་དུ་བརྗོད་པའི་ཀུན་བཟང་འཁོར་ལོ་མཆོད་རྟེན་གྱི་རྣམ་པ་ཅན་རྣམས་བྲིས་ཤིང་དེ་ཀུན་ཀྱང་མོས་པ་མ་བྱོན་གྱི་བར་དུ་བརྟན་པའི་ཆེད་དུ་སྲ་རྩིས་ལེགས་པར་མནན་ནས་དེ་མ་ཐག་པའི་བྱ་བ་ལ་སྒྲུབ་ཆེན་བཀའ་བརྒྱད་བདེ་གཤེགས་འདུས་པ་དང༌། སླད་ནས་ཚོགས་ཆེན་འདུས་པའི་དཀྱིལ་
འཁོར་ཞལ་ཕྱེས་ནས་དངོས་གཞི་དང༌། སྟ་གོན་ཉིན་ཐ་དད་པའི་རབ་གནས་ལན་གསུམ་གྱིས་མངའ་གསོལ་ནས་རྟེན་སྣང་མཛད་གཞལ་ཡས་ཁང་གི་རང་བཞིན་དུ་བསྒྲུབས་པའི་གཙུག་ཏོར་ནོར་བུའི་ཏོག་དངུལ་སྲང་བརྒྱ་ཕྲག་ཐལ་ངེས་ཀྱི་རྒྱུ་ཚོགས་གསེར་འཕྲུའི་རྣམ་པར་འབར་རོ། །དེ་ལྟར་རྟེན་གཞིའི་གཙུག་ལག་ཁང་གི་རྟོགས་པ་བརྗོད་ནས། ད་ནི་བརྟེན་པ་སྐུ་གསུང་ཐུགས་ཀྱི་རང་བཞིན་ཇི་ལྟར་བསྒྲུབས་པ་ནི། དམ་པའིཆོས་པདྨ་དཀར་པོ་ལས། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྤྱོད་པའི་དོན་བྱེད་དོ། །ཞེས་གསུངས་པ་ལྟར། དེ་བཞིན་གཤེགས་པ་སྲས་དང་བཅས་པ་རྣམས་ཀྱི་ཡོན་ཏན་ནི། འཇིག་རྟེན་གྱི་མངོན་སྤྱོད་ལས་འཕགས་པ། །བསོད་ནམས་དང་ཡེ་ཤེས་དམ་པའི་་ཚོགས་ཀྱི་ཕ་རོལ་ཏུ་ཕྱིན་པས། ཡོན་གྱི་གནས་སུ་བསླུ་བ་མེད་པ། བླ་ན་མ་མཆིས་པ། མཉམ་ཞིང་མཚུངས་པ་མེད་པའི་ཕྱིར། སྐུ་གསུང་ཐུགས་ཀྱི་རྟེན་གསར་དུ་བཞེངས་པའམ། སྲིད་ཞུས་ཉམ་ཆུང་བར་བཞུགས་པ་ལ་བསྟི་སྟང་དང་རིམ་གྲོར་བགྱིས་པའི་་ཕན་ཡོན་ནི་དམ་པའི་ཆོས་པདྨ་དཀར་པོ། སའི་སྙིང་པོ་འཁོར་ལོ་བཅུ་པ། ལས་རྣམ་པར་འབྱེད་པའི་མདོ། ཡོངས་སུ་མྱ་ངན་ལས་འདས་པ་ཆེན་པོ་དང༌། འཕགས་པ་དཀོན་མཆོག་སྤྲིན། ཡོངས་སུ་བསྔོ་བའི་མདོ་ལ་སོགས་པ་
ནས་རྒྱ་ཆེར་གསུངས་ཤིང༌། དེ་སྐད་དུ་སྙིང་རྗེ་པདྨདཀར་པོའི་མདོ་ལས། ཀུན་དགའ་བོ་ང་ལྟ་བུ་གནས། ང་ལྟ་བུ་བསྟེན་ཏེ་ཡོན་ཕུལ་ན་དེའི་བསོད་ནམས་ཀྱི་དཔེ་བྱ་བར་ཡང་སླ་བ་མ་ཡིན་ནོ། །ཞེས་གསུངས་པ་ལྟར། དེ་བཞིན་གཤེགས་པའི་སྐུ་གཟུགས་ཀྱི་ལེའུར་ཡང༌། སའམ། རྡོ་ཐལ་ལམ། ཤིང་ངམ། རྡོའམ། ར་གན་ནམ། ལྕགས་སམ། གསེར་རམ། དངུལ་ལམ། བཻཌཱུརྱ་འམ། ཤེལ་ལམ། མུ་ཏིག་དམར་པོའམ། རྡོའི་སྙིང་པོའམ། སྤུག་གམ། དུང་ངམ། མན་ཤེལ་ལམ། སྤོས་སམ། རས་སམ། ཤིང་ལེབ་བམ། རྩིག་ངོས་ལ་དེ་བཞིན་གཤེགས་པའི་སྐུ་གཟུགས་བཞེང་བར་བྱ། དྲལ་བ་གསོ་བར་བྱ་བ་དང༌། གྲུམས་པ་བཅོས་པར་བྱས་ཏེ། དེ་བཞིན་གཤེགས་པའི་སྐུ་གཟུགས་བྱས་ན། རིགས་དམའ་བ་ཐམས་ཅད་དང༌། སྡིག་པ་བྱེད་པའི་རིགས་རྣམས་དང༌། ལོག་པར་ལྟ་བའི་རིགས་སུ་མི་སྐྱེ། ཡན་ལག་གང་ཡང་མཚང་བར་མི་འགྱུར་རོ། །གལ་ཏེ་མཚམས་མེད་པ་ལྔ་བྱས་སུ་ཟིན་ཀྱང༌། དེ་བཞིན་གཤེགས་པ་ལ་དད་པ་རྙེད་དེ་སྐུ་གཟུགས་བྱས་ན། ལས་དེས་སེམས་ཅན་དམྱལ་བ་མྱོང་བ་ཆུང་ངུ་མྱོང་སྟེ། ཐེག་པ་གསུམ་གང་ཡང་རུང་བས་ངེས་པར་འབྱུང་བར་འགྱུར་རོ། །དཔེར་ན་མི་ཞིག་མི་གཙང་བས་རེག་པ་ལ་རབ་ཏུ་དག་པར་བཀྲུས་
ཏེ། སྤོས་ཀྱིས་བྱུགས་ན་དྲི་མི་ཞིམ་པ་དེ་མེད་པར་འགྱུར་རོ། །དེ་བཞིན་དུ་མཚམས་མེད་པ་བྱས་པ་དེའི་སྡིག་པ་ཡང་མེད་པར་འགྱུར་རོ། །མི་དགེ་བ་བཅུའི་ལས་ཀྱི་ལམ་དང་ལྡན་པ་ཡང༌། དེ་བཞིན་གཤེགས་པ་ལ་དད་པ་རྙེད་དེ། དེའི་སྐུ་གཟུགས་བྱས་ན་དེའི་སྡིག་པ་དེ་ཇི་ལྟར་མེའི་ཕུང་པོས་མར་འཚིག་སྟེ། དུ་བ་ཡང་མི་མངོན་པ་བཞིན་དུ་དེའི་སྡིག་པ་དེ་ཡང་མི་སྣང་བར་འགྱུར་རོ། །ཞེས་སོ། །དེ་ཡང་གདན་གསུམ་ཚང་བའི་དཀྱིལ་འཁོར་གྱི་འཁོར་ལོས་བསྡུས་པའི་གཙོ་འཁོར་རྣམས་ནི། སྟོན་འཁོར་དགོངས་པ་མཉམ་པས་བསོད་ནམས་ཀྱི་ཞིང་དམ་པར་མཆོག་དམན་ཡོད་པ་མ་ཡིན་ཡང༌། གང་ལ་གང་འདུལ་གྱི་རྟེན་ཅིང་འབྲེལ་འབྱུང་གི་རྣམ་པའི་ཆོས་ཇི་ལྟར་འོས་པ་ཡིད་ཀྱིས་ཆོ་གར་བྱ་བའི་ཚེ། ཡེ་ཤེས་འཚོ་རྒྱལ་གྱི་ལུང་བསྟན་རྨི་ལམ་གྱི་ཁང་མཛེས་ཤེལ་ལྟར་དྭངས་པའི་ནང་དུ་ཇི་ལྟར་གསལ་བ་ནི། དབྱངས་ཡིག་དྲག་པོའི་སྒྲས་བསྡུས་པའི་ཡུལ་རིག་པའི་འབྱུང་གནས་ན་བཟོའི་གནས་ལ་ཤིན་ཏུ་བྱང་ཆུབ་པ་ཡིན་ཟེར་བའི་སྐྱེས་བུ་བགོ་བ་དཀར་པོ་དང་ལྡན་པ་གཉིས་བདག་གི་མདུན་དུ་ཁྲོང་གིས་བྱུང་ནས་འདི་སྐད་ཟེར་རོ། །བུམ་ཐང་ཤེས་རབ་ཡུམ་ཆེན་མོས། །འདི་ན་རྗེ་བཙུན་སྒྲོལ་མའི་སྐུ། །བཞེང་བར་བདག་ཟུང་མངགས་པ་ལགས། །ཞེས་ཟེར་བས་སྐད་ཅིག་མའི་རྟོག་པར། །དེང་སང་གནམ་
གྲང༌། སྟ་གོན་གང་ཡང་མ་བྱས་བསམ་པའི་ཐོག་ཡང་སྣང་བ་དེ་འགགས། བུད་མེད་ཤས་ཆེ་བའི་སྐྱེ་བོ་མང་པོ་ཁྲོམ་ཚོགས་པ་ལྟར་སྣང་བ་རྣམས་ཀྱི་ཅ་ཅོའི་སྒྲ་ལ། ལྷ་ཁང་བཞེང་པ་ངོ་མཚར་ཆེ། ལྷ་ལྡེམ་བཞེངས་པ་ལས་ནི་བཞུགས་པ་ལེགས། །འགྲོ་བ་སེམས་ཅན་དོན་དུ་ལེགས། །ཞེས་པ་ལ་སོགས་ཚིག་མ་ངེས་པའི་གཏམ་ཅོ་དིར་གྱིས་སྒྲོག་པ་སོགས་ལུང་བསྟན་སྔ་ཕྱིའི་བརྡ་དོན་ནི། སྔོན་གྱི་བསྐབ་པ་ལ་འཇིག་རྟེན་གྱི་ཁམས་སྣ་ཚོགས་པའི་འོད་ཅེས་བྱ་བར་སངས་རྒྱས་རྔ་སྒྲའི་བསྟན་པ་ལ་མཆོག་ཏུ་གུས་པའི་རྒྱལ་པོའི་བུ་མོ་ཡེ་ཤེས་ཟླ་བ་ཞེས་བྱ་བ་ཞིག་ཡོད་དེ། དེས་ཤིན་ཏུ་དད་པའི་སྟོབས་ཀྱི་སྟོན་འཁོར་རྣམས་ལ་མཆོད་པར་བྱས་ནས་བྱང་ཆུབ་ཏུ་སེམས་བསྐྱེད་པའི་ཚེ། འདི་སྐད་དུ། འདི་ན་སྐྱེས་པ་མེད་ཅིང་བུ་མེད་མེད། །བདག་མེད་གང་ཟག་མེད་ཅིང་རྣམ་རིག་མེད། །ཕོ་མོར་བཏགས་པ་འདི་ནི་ཡ་མ་བརླ། །འཇིག་རྟེན་བློ་ངན་རྣམ་པར་འཁྲུལ་བར་འགྱུར། །ཅེས་བྱ་བ་ལ་སོགས་ཆེད་དུ་བརྗོད་དེ། སྐྱེས་པའི་རྟེན་ལ་བྱང་ཆུབ་འདོད་པ་ནི་མང་གི་བུད་མེད་ཀྱི་ལུས་ཀྱིས་འགྲོ་བའི་དོན་སྤྱོད་པ་ནི་འགའ་ཡང་མེད་དོ། །དེ་བས་ན་འཁོར་བ་མ་སྟོངས་ཀྱི་བར་དུ་བུད་མེད་ཀྱི་གཟུགས་ཀྱིས་འགྲོ་བའི་དོན་བྱའོ། །ཞེས་དམ་བཅས་སོ། །དེ་ནས་ལོ་བྱེ་བ་བརྒྱ་སྟོང་གི་བར་དུ་
དེ་རྒྱལ་པོའི་ཕོ་བྲང་དུ་གནས་ཤིང༌། འདོད་པའི་ཡོན་ཏན་ལྔ་ལ་ཐབས་མཁས་པས་སྤྱོད་བཞིན་དུ་ཏིང་ངེ་འཛིན་བསྒོམས་པས། མི་སྐྱེ་བའི་ཆོས་ལ་བཟོད་པ་ཐོབ་ཅིང༌། འགྲོ་བ་ཐམས་ཅད་སྒྲལ་བ་ཞེས་བྱ་བའི་ཏིང་ངེ་འཛིན་གྲུབ་བོ། །དེ་ནས་ཉིན་རེ་བཞིན་སྔ་དྲོའི་དུས་ཀྱི་ཚེ་སེམས་ཅན་བྱེ་བ་བརྒྱ་སྟོང་རེ་འཇིག་རྟེན་པའི་སེམས་ལས་བསྒྲལ་ཏེ་བཟོད་པ་ལ་མ་བཀོད་ཀྱི་བར་དུ་ཟས་ཟ་བར་མི་བྱེད་དོ། །ཉི་མ་ཕྱི་དྲོའི་ཚེ་ཡང་དེ་ཙམ་རེ་འགོད་པར་བྱེད་དོ། །དེ་ནས་སྔར་གྱི་མིང་དེ་འགྱུར་ནས་སྒྲོལ་མ་ཞེས་བྱ་བར་གྱུར་ཏོ། །དེ་ལྟར་གྱུར་པ་ལས་སངས་རྒྱས་མང་པོའི་བསྟན་པ་ལ་བྱ་བ་བྱས་ཤིང༌། ད་ལྟ་རྩོད་ལྡན་གྱི་བསྐལ་པའི་མཐར་ཐུག་པར་སེམས་ཅན་ཐམས་ཅད་བསྲུང་ཞིང་འཚེ་བ་མི་བཟད་པ་བཟློག་པ་ལ་ཞི་བའི་མཐུ་དང་ཡང་དག་ལྡན་པས་བཅོམ་ལྡན་འདས་རྣམ་པར་སྣང་མཛད་ཀྱིས་ཀྱང་བསྟོད་པ་ཉི་ཤུ་རྩ་གཅིག་གིས་ཆེད་དུ་བསྔགས་ལ། དེ་བཞིན་གཤེགས་པ་ཐུབ་པའི་དབང་པོ་སངས་རྒྱས་པའི་མཛད་པ་སྟོན་པའི་ཚེ་བདུད་ཀྱི་དམག་དཔུང་བསམ་གྱིས་མི་ཁྱབ་པ་ལྷགས་པ་ན་སྒྲོལ་མས་བཞད་པ་བརྒྱད་ཀྱིས་བཞད་པར་མཛད་པས་བདུད་རྣམས་མ་ལུས་པ་འགྱེལ་ཞིང་བརྒྱལ་བར་གྱུར་ཅེས་གྲགས་སོ། །རྒྱུ་དེས་བཙན་པོ་ཁྲི་སྲོང་ལྡེའུ་བཙན་གྱིས་བྱང་ཆུབ་ཏུ་ཐུགས་བསྐྱེད་པའི་ལྷ་ཡང་རྗེ་བཙུན་སྒྲོལ་མ་ཡིན་ནོ། །དེས་ན་དེང་སང་
སྙིགས་མའི་དུས་ན་གདོན་དང༌། རོ་ལངས་དང༌། འབྱུང་པོ་དང༌། གནོད་སྦྱིན་མ་རུངས་པའི་གཉེན་པོར་འགྱུར་ཅིང༌། བདུད་དང་འཇིག་རྟེན་མ་ལུས་པ་དབང་དུ་བྱེད་པ་ལ་སོགས་མདོར་ན་རྟེན་འབྲེལ་གྱི་སྒོ་ཆེན་པོར་ལུང་བསྟན་གྱི་བདེན་པས་དབུགས་དབྱུང་ནས་རྗེ་བཙུན་སྒྲོལ་མའི་སྣང་བརྙན་ཐོག་མར་བཞེང་དགོས་པར་རིག་གོ །དེ་ནས་མི་རིང་བའི་ཆར་སྤྱིར་རྡོ་རྗེ་གདན་གྱི་ནམ་མཁའ་ལ་སོགས་པར་རང་བཞིན་གྱིས་བཞུགས་པའི་བསྟན་པའི་བཙས་གསུམ་གྱི་བྱིན་རླབས་དང༌། བདག་ཅག་གི་ལྷག་པའི་བསམ་པ་རྣམ་དག་གི་མཐུ་དང༌། བྱེ་བྲག་མཁའ་འགྲོ་ཆོས་སྐྱོང་གི་ཕྲིན་ལས་གསར་པའི་ལྕགས་ཀྱུས་བཟོ་བོ་མཁས་པ་ཐལ་མོ་དང༌། གདོང་པས་གཞལ་བའི་ཆ་ཚད་ལ་འདྲིས་ཤིང༌། རྣམ་འགྱུར་གྱི་བཟོ་སྒྲོས་བསྒོས་པ་ལ་ཉན་པའི་རྟེན་འབྲེལ་རང་བྱུང་དུ་འགྲིག་པས་མཚན་དཔེའི་སྣང་བརྙན་བསྒྲུབ་པའི་བྱ་བ་ལ་ཇི་ལྟར་ཞུགས་པ་ནི། དཔལ་མགོན་ཀླུ་སྒྲུབ་ཀྱིས། སེམས་བསྐྱེད་སྡོམ་ལྡན་དམ་ཚིག་གཙང༌། །དད་ལྡན་དབང་ཐོབ་ཤེས་རྒྱུད་འབྱོངས། །ལག་གི་འདུ་བྱེད་མཁས་པ་སྟེ། །དེ་བདུན་ལྡན་པས་སྐུ་གཟུགས་བཞེངས། །ཞེས་གསུངས་པ་ལྟར་བཟོ་གནས་རིག་པ་ལ་གོམས་པའི་སྐྱེ་བོ་བཀུག་པའང་རང་བཞིན་གྱིས་དུལ་བ། དགེ་ཚོགས་རིན་
པོ་ཆེའི་རྟེན་གཞི་དགེ་བསྙེན་གྱི་སྡོམ་པའི་ཆ་ཤས་ལ་བདག་གིར་བྱེད་པར་ཞིག་འདུག་པ། སླར་ཡང་བདག་ཉིད་ཀྱི་དམ་པའི་ཆོས་ཀྱི་གླིང་མོས་སྤྲོ་བ་བསྐྱེད་པས་བློ་ཤིན་ཏུ་ལས་སུ་རུང་བར་གྱུར་པ་ལ། ཐུན་མོང་དུ་གྲགས་པའི་བཟོ་བོ་དང་ལག་ཆ་བྱིན་བརླབས་སྔོན་འགྲོའི་ཆོས་སུ་བྱས་ཞིང་བྱེ་བྲག་རྡོ་རྗེ་ཐེག་པའི་རྟེན་ཁྱད་པར་ཅན་གྱི་བྱ་བ་ལ་འཇུག་ཕྱིར་སེམས་ཅན་དེ་དག་གི་མོས་པ་དང་རྗེས་སུ་མཐུན་པའི་དཀྱིལ་འཁོར་དུ་བུམ་དབང་གི་ཆོ་གས་རྒྱུད་སྨིན་པར་བྱས་ཤིང་བཀྲ་ཤིས་པའི་ཚིག་དང་ལྷའི་རེག་བྱ་བཟང་པོས་ཞལ་བསྲོས་ནས་ཡིད་རབ་ཏུ་དད་བའི་ངང་ནས་ལག་གི་འདུ་བྱེད་སྒྱུ་མ་ལྟ་བུའི་ཆོ་འཕྲུལ་ལ་ཞུགས་སོ། །དེ་ལྟར་ཞུགས་པའི་རྒྱུ་ལ་འབྲས་བུའི་ཆོས་ཉིད་ཇི་ལྟར་གྲུབ་པ་ནི། སྤྱིར་དེ་བཞིན་གཤེགས་པ་རྣམས་ནི་སྤངས་རྟོགས་ཕུན་སུམ་ཚོགས་པར་མཉམ་ཞིང་མཚུངས་པའི་ཕྱིར་ན་བསོད་ནམས་ཀྱི་ཞིང་ལ་མཆོག་དམན་དུ་བལྟ་བའི་གནས་ཡོད་པ་མ་ཡིན་ཡང༌། ད་ནི་སྙིགས་པ་ལྔའི་རྣམ་འགྱུར་ཤིན་ཏུ་བདོ་བས་རྒྱལ་བའི་བསྟན་པ་རིན་པོ་ཆེ་ཡང་ལྔ་བརྒྱ་ཕྲག་བཅུའི་མཐར་ལྷུང་དུ་ཉེ་བའི་ཚུལ་བྱམས་པའི་མདོར། སྒྲུབས་ལ་གནས་པ་ནུབ་པར་འགྱུར་བ་གང་ཞེ་ན། བརྩོན་འགྲུས་ཀྱིས་མཐོང་ལམ་གྱི་འབྲས་བུ་བསྒྲུབ་མི་ནུས་ཤིང༌། ཚུལ་ཁྲིམས་ཀྱི་རྩབ་བཞི་སོ་སོར་དག་པ་སྲུང་བ་ཙམ་ཉམས་སུ་ལེན་ཏེ། དེ་ནས་རིམ་པ་རིམ་
པའི་དུས་སོང་ནས་ཚུལ་ཁྲིམས་ཀྱི་རྩ་བ་བཞི་ཙམ་སྲུང་སྟེ། སྡོམ་པའི་རྩ་བ་བཞི་ཙམ་སྲུང་བའི་དགེ་སློང་སྟོང་ཕྲག་གཅིག་གམ། བརྒྱ་ཕྲག་གཅིག་ཙམ་ཡོད་ན་ཡང་སྒྲུབ་པ་ལ་གནས་པ་ནུབ་པར་གྱུར་པ་མ་ཡིན་ནོ། །དེའི་རྗེས་ལ་དགེ་སློང་གཅིག་ཙམ་ལུས་པ་ཡང་སྡོམ་པ་བཏང་བའམ། ཚེའི་དུས་བྱས་པར་གྱུར་ན་སྒྲུབ་པ་ལ་གནས་པ་ནུབ་པར་གྱུར་པ་ཡིན་ནོ། །ཞེས་པ་མཐོང་ཆོས་སུ་གྱུར་ཅིང༌། རིམ་པས་ལུང་གི་དམ་ཆོས་ཀྱང་ནུབ་པའི་ཚུལ། སྔ་མ་ལས་རྩོད་པའི་དུས་ཀྱི་རྒྱལ་པོ་རྣམས་ཀྱང་ཆོས་ལ་མི་དད། བློན་པོ་རྣམས་ཀྱང་ཆོས་ལ་མི་དད། ཡུལ་འཁོར་དང༌། ལྗོངས་དང༌། ཡུལ་གྱི་མི་རྣམས་ཀྱང་དེའི་རྗེས་སུ་འབྲངས་ནས། མི་རྣམས་ལ་ཆོས་དད་པ་མེད་པར་གྱུར་པས་ལྷ་ཡང་ཆར་ལེགས་པར་མི་འབེབས། འབྲུ་རྣམས་ཀྱང་ལེགས་པར་མི་སྨིན། འབྲུ་རྣམས་ཉུང་བར་གྱུར་ནས་སྤྱིན་པ་པོ་རྣམས་ཀྱང་དགེ་སློང་གི་དགེ་འདུན་རྣམས་ལ་སྦྱིན་པ་བྱེད་མི་ནུས་ཤིང༌། དགེ་སློང་རྣམས་ལ་སྦྱིན་པ་བྱེད་པ་མེད་པས་ཉེ་བར་འཁོར་བ་རྣམས་དང༌། སློབ་མ་རྣམས་འཛིན་མི་ནུས་སོ། །དེ་ནས་རིམ་པ་རིམ་པའི་དུས་སོང་ནས་ལུང་གི་ཆོས་རྣམས་ཉུང་ངུར་འགྱུར་རོ། །ཞེས་པ་ལ་སོགས་པའི་དུས་ཀྱི་རྒུད་པ་ལ་བཤོལ་གདབ་པའི་གང་ཟག་ཆེས་ཆེར་ཉུང་ཞིང༌། སེམས་ཅན་ཐམས་ཅད་ནི་ལས་ཀྱི་ཕྱི་བཞིན་དུ་སོན་པ། ལས་ཀྱི་
གཞན་དབང་ཅན་ཁོ་ནར་གྱུར་པས་མཐར་གྱི་སེར་སྣའི་རྒྱུ་ལས་མུ་གེའི་བསྐལ་པ་དང༌། གཏི་མུག་གི་རྒྱུ་ལས་ནད་ཀྱི་བསྐལ་པ་དང༌། ཞེ་སྡང་གི་རྒྱུ་ལས་མཚོན་གྱི་བསྐལ་པ་སྟེ་བར་བསྐལ་གསུམ་གྱི་མཐར། གདོན་མི་ཟ་བར་འཇིག་རྟེན་གྱི་སྒྲོལ་མར་འབྱོན་པར་འགྱུར་བའི་དེ་བཞིན་གཤེགས་པ་བྱམས་པ་ལེགས་པའི་མཆོག་ཅེས་བྱ་བའི་སངས་རྒྱས་གང་ཞིག་དང་སེམས་ཅན་ཐམས་ཅད་མཇལ་ནས་འབྲས་བུ་ཐོབ་པའི་རྟེན་འབྲེལ་གྱི་སྒོ་འཕར་ཕྱེ་བའི་ཚུལ་སྔ་མ་ལས། མཚོན་གྱི་བསྐལ་པ་ཞག་བདུན་འདས་ནས་དེའི་ཚེ་མི་རིའི་ཕུག་ལ་སོགས་པར་བྲོས་ཏེ། གབ་པ་རྣམས་ཕྱིར་འོངས་ནས་གཅིག་ལ་གཅིག་འཁྱུད་དེ་ངུ་ཞིང་ཕན་པར་སེམས་པས་ཆོས་ཡིད་ལ་བྱེད་ཅིང་སྡོམ་པ་ལྔ་ལེགས་པར་སྲུང་བར་བྱེད་དོ། །དེ་ནས་ལོ་བཅུ་པའི་མི་ལ་བུ་ལོ་ཉི་ཤུ་པ་འབྱུང་བ་ཡིན་ནོ། །དེ་ནས་མི་རྣམས་ཆོས་ལ་ཤིན་ཏུ་ལེགས་པར་དད་དེ་རིམ་གྱིས་ཚེ་རིང་པོར་འཕེལ་ཞིང་ཚེ་ལོ་གྲངས་མེད་པར་འགྱུར་རོ། །དེའི་དུས་སུ་སེམས་ཅན་རྣམས་ལ་རྒས་པ་དང་ཤི་བ་མི་མཐོང་སྟེ། དེར་སེམས་ཅན་རྣམས་ཀྱང་ཆོས་ལ་དད་པ་མེད་པར་གྱུར་ནས་དམྱལ་བའི་སྡུག་བསྔལ་གང་ཡིན་པ་ཡང་མ་ཤེས་ཏེ། ཚེ་ལོ་གྲངས་མེད་པ་ཐུང་ངུར་འགྱུར་ཅིང་རིམ་གྱིས་མར་ལ་འགྲིབས་ཏེ་ཚེ་ལོ་བརྒྱད་ཁྲི་བར་འགྱུར་བ་ཡིན་ནོ། །ཞེས་དང༌། དེའི་དུས་ན་བྱང་ཆུབ་སེམས་དཔའ་བྱམས་
པ་འདི་གྲངས་མེད་པའི་བསྐལ་པ་འབུམ་ཕྲག་གཅིག་དང་བཅུ་དྲུག་ཏུ་སྤྱན་པའི་ཕ་རོལ་ཏུ་ཕྱིན་པ་ལ་སོགས་པ་ཕ་རོལ་ཏུ་ཕྱིན་པ་ཐམས་ཅད་རྫོགས་ནས་ཐམས་ཅད་སྒྲོལ་བའི་ཚུལ་གྱིས་ཐ་མ་ཉིད་དུ་སྦྱན་པ་ཆེན་པོ་སྟེ། ཕ་རོལ་ཏུ་ཕྱིན་པའི་ཚོགས་ཐམས་ཅད་མཐར་ཕྱིན་ཅིང་འདི་ནས་དགའ་ལྡན་དུ་མངོན་པར་སྐྱེས་ཏེ། དེའི་དུས་ན་འཇིག་རྟེན་གྱི་ཁམས་སྟོང་ཕྲག་བཅུའི་ལྷ་ཐམས་ཅད་འོངས་ཏེ་སངས་རྒྱས་འཇིག་རྟེན་དུ་འབྱུང་བར་འགྱུར་རོ་ཞེས་སྒྲ་དབྱངས་སྙན་པ་ཆེན་པོ་འབྱིན་ཞིང་མངོན་པར་རྫོགས་པར་འཚང་རྒྱ་བར་གསོལ་ཞེས་བསྐུལ་བར་བྱེད་དོ། །དེ་ནས་གཟིགས་པ་རྣམ་པ་ལྔ་ལ་མངོན་པར་གཟིགས་ཏེ། དགའ་ལྡན་གྱི་ལྷའི་འཁོར་ནས་འོངས་ཏེ་རྒྱལ་པོ་དུང་གི་གྲོང་ཁྱེར་རྒྱལ་མཚན་བློ་གྲོས་སུ་བྲམ་ཟེ་མདུན་ན་འདོན་ཚངས་རབ་ཅེས་བྱ་བའི་བཙུན་མོ་ཚངས་ལྡན་མ་ཞེས་བྱ་བའི་ལྷུམས་སུ་འཇུག་སྟེ། འཇིག་རྟེན་གྱི་ཁམས་སྟོང་ཕྲག་བཅུ་འདར་ཞིང་གཡོ་བར་འགྱུར་རོ། །དེར་ཟླ་བ་བཅུ་སོང་ནས་དྲང་སྲོང་ལྷུང་བའི་རི་དྭགས་རྒྱུ་བའི་གནས་སུ་ཡུམ་ལས་འཁྲུངས་ཏེ། རིམ་གྱིས་ནར་སོན་ནས་རང་གི་བསོད་ནམས་ཀྱི་མཐུ་ལས་ས་འོག་ནས་ནོར་བུ་རིན་པོ་ཆེ་བདུན་ལས་གྲུབ་པའི་ཁང་བཟངས་བཞི་བྱུང་བའི་ནང་དུ་རང་ཉིད་ལྷ་བཞིན་དུ་ལྷ་མོ་ཟླ་བའི་གདོང་ཅན་དང༌། གཞན་ཡང་ལྷ་མོ་ལྟ་བུའི་བུད་མེད་
མང་པོ་དང་ལྷན་ཅིག་ཏུ་ལོ་སྟོང་ཕྲག་གཅིག་ཏུ་ལྷའི་ལོངས་སྤྱོད་ལྟ་བུ་བ་བདེ་བར་སྤྱོད་དེ། དེ་ནས་ཐ་མའི་ཞག་ལ་བཙུན་པའི་གཟུགས་ཤིག་མཐོང་ནས་གསེར་གྱི་ཁང་བུར་སེང་གེའི་རྒྱལ་པོ་མི་དགའ་བ་བཞིན་དུ་རིན་པོ་ཆེའི་ཁང་བཟངས་དཔལ་མང་པོ་ཡོད་པ་ལ་མི་དགའ་ཞིང་ངེས་པར་འབྱུང་བ་ཆེན་པོའི་སེམས་བྱུང་སྟེ་འཇིག་རྟེན་འཁོར་ལོ་སྟོང་ཕྲག་བཅུ་ཐམས་ཅད་ཀྱི་ལྷ་རྣམས་ལྷའི་མེ་ཏོག་ལག་ཏུ་ཁྱེར་ནས་འཇིག་རྟེན་གྱི་འཁོར་ལོ་འདིར་འོངས་ཏེ་འཁོད་པར་བྱེད་དོ། །རྒྱལ་པོ་དུང་དང་བཅས་པའི་མི་མང་པོ་ཡང་མེ་ཏོག་དང༌། དྲི་དང༌། སྤོས་ཁྱེར་ཏེ་ཁང་བཟངས་ལ་བསྐོར་ནས་འཁོད་པར་བྱེད་དོ། །ནམ་མཁའི་ལྷ་རྣམས་ཀྱང་ལྷའི་མེ་ཏོག་ལག་ཏུ་ཁྱེར་ནས་ལེགས་སོ་ལེགས་སོ། །ཞེས་འོག་མིན་གྱི་བར་དུ་སྒྲ་ཆེར་སྒྲོག་ཅིང་འཁོད་པར་བྱེད་དོ། །དེ་ནས་རིན་པོ་ཆེའི་ཁང་བཟངས་རྫ་མཁན་གྱི་འཁོར་ལོ་བཞིན་དུ་འཁོར་ཞིང་ནམ་མཁའ་ལ་སོང་ནས་བཅོ་ལྔའི་ཟླ་བ་སྐར་མའི་ཚོགས་ཀྱིས་ཡོངས་སུ་བསྐོར་བ་བཞིན་དུ་བྱང་ཆུབ་སེམས་དཔའ་ནི་ཟླ་བའི་གདོང་ཅན་མ་དང༌། གཞན་ཡང་བཙུན་མོའི་ཚོགས་དང་བཅས་པ་ནམ་མཁའ་ལ་འགྲོ་བར་བྱེད་དེ། སེམས་དཔའ་ཆེན་པོ་དེ་དང་ཐབས་ཅིག་ཏུ་འགྲོ་བའི་སེམས་ཡོད་པ་ཐམས་ཅད་ཀྱང་ནམ་མཁའ་ལ་འགྲོ་བར་བྱེད་དོ། །དེ་ནས་ཚངས་པ་ཆེན་པོས་ནི་དཔག་ཚད་གསུམ་ཙམ་ཡོད་པའི་གདུགས་དཀར་པོ་འཛིན་ཞིང་ལྷའི་དབང་པོའི་རྒྱལ་པོས་དུང་འབུད་པར་བྱེད་དོ། །འདི་ལྟར་བསོད་ནམས་ཀྱི་དཔལ་ཆེན་
པོའི་ལྷ་དང་མིས་བསྐོར་བའི་ཁང་བཟངས་དང་བཅས་པས་བྱང་ཆུབ་ཀྱི་ཤིང་གི་དྲུང་དུ་ཉེ་བར་འོངས་ཏེ། དེ་ཇི་ལྟར་ཞེ་ན། ཤིང་སྡོང་ཁྲུ་བརྒྱ་ཉི་ཤུ་སྟེ། །ཡལ་གའང་ཁྲུ་བརྒྱ་ཉི་ཤུའི་སྲིད། །རླུང་གིས་དལ་བུར་བསྐྱོད་པ་ན། །རྨ་བྱའི་གར་གྱིས་གདུགས་ལྟར་སྣང༌། །དུས་ཀུན་ལྷ་ཡི་མེ་ཏོག་ནི། །ཤིན་ཏུ་ལེགས་པར་རྒྱས་པ་ཡང༌། །འཁོར་ལོ་ཙམ་གྱི་ལྟེ་བ་ལ། །གེ་སར་དྲི་བཟང་བྲེ་གང་ཙམ། །རླུང་གིས་ཕྱོགས་བཅུར་བསྐྱོད་པ་ན། །དཔག་ཚང་བཅུ་ནི་དྲི་ཡིས་ཁྱབ། །མེ་ཏོག་ས་ལ་འབབས་པ་ཡང༌། །བྱང་ཆུབ་ཤིང་དྲུང་ཉིད་དུ་གནས། །དེའི་དུས་སུ་ནམ་མཁའ་ལ་འགྲོ་བའི་བྱའི་རིགས་མང་པོ་སྐད་སྙན་པོས་མཆོད་པ་བྱེད་ཅིང་འགྲོ་བར་བྱེད་དོ། །དེ་ལྟར་བྱང་ཆུབ་ཀྱི་ཤིང་ཀླུ་ཤིང་ཉེ་འཁོར་དུ་འོངས་ཏེ་ནམ་མཁའ་ལས་བབས་ནས་ཁང་བཟངས་དེའི་ཉེ་འཁོར་ཡིད་དུ་འཐད་པའི་སྟེང་དེ་ཉིད་དུ་འཁོད་པར་བྱེད་དོ། །དེར་དཔལ་གྱི་ཁང་བཟངས་ཀྱི་ནང་དུ་ཞག་བདུན་དུ་དཀའ་ཐུབ་བྱེད་དོ། །དེ་ནས་ཚངས་པ་ཆེན་པོས་ཕུལ་བ་མཁོ་བའི་ཡོ་བྱད་བླངས་ཏེ་རབ་ཏུ་བྱུང་བར་བྱེད་དོ། །འཁོར་ཐམས་ཅད་ཀྱང་རབ་ཏུ་འབྱུང་བར་འགྱུར་རོ། །འདི་ལྟ་སྟེ། བརྒྱད་ཁྲི་བཞི་སྟོང་གྲངས་སྙེད་ཀྱི། །བྲམ་ཟེ་རིག་བྱེད་རབ་མཁས་པ། །ང་ཡི་རྗེས་སུ་རབ་ཏུ་འབྱུང༌། །འཁོར་རྣམས་ཀུན་ཀྱང་རབ་ཏུ་འབྱུང༌། །དེ་ལྟར་རབ་ཏུ་བྱུང་ནས་ལྷ་མོ་ཟླ་བའི་གདོང་
ཅན་མས་ཕུལ་བའི་འོ་ཐུག་རོ་སྣ་ཚོགས་དང་ལྡན་པ་གསོལ་བར་བྱེད་དོ། །དེའི་དགོངས་ཐུན་ལ་བྱང་ཆུབ་ཀྱི་ཤིང་དྲུང་དུ་ཉེ་བར་འོངས་ཏེ་རྣམ་པར་རྒྱལ་བའི་ཁང་བཟངས་སུ་ཁྲི་བཤམས་པ་ལ་ཤར་གྱི་འཇིག་རྟེན་ལ་མངོན་པར་གཟིགས་ཏེ་བཞུགས་པར་མཛད་དོ། །དེ་ནས་རིམ་གྱིས་ཉི་མའི་སྐྱ་རེངས་ཤར་བའི་དུས་ན་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་མཛོད་དུ་མཛད་དེ་འདི་སྐད་གསུང་བར་འགྱུར་རོ། །འཁོར་བའི་སྐྱེ་བོ་མང་པོར་ནི། །དུག་མེད་པ་ཡི་དོན་གྱི་ཕྱིར། །གནས་བཟང་ཀུན་ཏུ་བཙལ་བྱས་ཀྱང༌། །ཡང་ཡང་སྐྱེ་བའི་སྡུག་བསྔལ་བྱུང༌། །ད་ནི་གནས་བཟང་མཆོག་ཐོབ་པས། །ད་གཟོད་གནས་གཞན་མི་འགྲོ་སྟེ། །དུག་ཁྱིམ་སྡུག་བསྔལ་ཐམས་ཅད་བཅས། །རབ་བཅོམ་ཐོ་བས་བཤིག་པ་ཡིན། །ཉོན་མོངས་དུག་བཅས་འདོད་པ་ཡི། །ཡིད་ནི་རྣམ་པར་དག་པར་བྱས། །འདི་སྐད་ཅེས་གསུངས་ནས་བྱང་ཆུབ་ཀྱི་ཤིང་ལ་ཉེ་བར་གནས་ཏེ་ཞག་བདུན་ཕྲག་བདུན་སོང་བ་དང༌། ཚངས་པས་གསོལ་བ་འདེབས་པ་གསན་ནས་དྲང་སྲོང་ལྷུང་བའི་གནས་སུ་ཕྱིན་ཏེ་ཆོས་ཀྱི་འཁོར་ལོ་བསྐོར་བ་ལ་གཤེགས་པའི་ཚེ། ཞབས་ནི་བསྐྱོད་མིན་བསྐྱོད་པ་ཡང༌། །ཤིན་ཏུ་རྒྱས་པའི་པད་སྟེངས་གཤེགས། །འདབ་མ་ཁྲུ་ནི་སུམ་ཅུར་བཅས། །བར་གྱི་འདབ་མ་ཉི་ཤུ་ལྔ། །གེ་སར་ཉི་ཤུའི་ཁྲུ་དང་
ལྡན། །ཟེའུ་འབྲུ་ལ་ནི་བཅུ་དྲུག་སྟེ། །གེ་སར་ཁ་དོག་ཤིན་ཏུ་དམར། །མེ་ཏོག་པདྨོ་ཆེན་པོ་འབྱུང༌། །སྟོབས་བཅུ་མངའ་བའི་འོད་ཟེར་རབ་ཏུ་འབར་ཞིང་གསལ་ཏེ་ཉི་མའི་འོད་མི་གསལ་ཞིང་ཉིན་མཚན་བྱེ་བྲག་མེད་པར་འགྱུར་རོ། །དེའི་ཚེ་སྔ་དྲོ་དགོངས་མོ་བྱའི་སྒྲས་ཤེས་པར་བྱེད་པ་དང༌། མེ་ཏོག་རྒྱས་པས་ཀྱང་འཇིག་རྟེན་པ་རྣམས་གོ་བར་བྱེད་དོ། །གང་དང་གང་ན་ཆོས་འཆད་པ་ཡོད་པ་དེ་དང་དེར་ཆོས་ཀྱི་སྒྲ་ཐམས་ཅད་ལ་རབ་ཏུ་གྲགས་ཤིང་འཆད་པར་བྱེད་དོ། །དེའི་ཚེ་བྲམ་ཟེ་བརྒྱད་ཁྲི་བཞི་སྟོང་དང༌། ཚངས་པ་ས་ཡ་ཕྲག་བཅོ་བརྒྱད་ཀྱིས་ཐོག་མར་ཆོས་ཀྱི་བདུད་རྩི་འཐུངས་ཏེ། འདི་ལྟར་བཅོམ་ལྡན་བསོད་ནམས་དང་བྱིན་རླབས་བརྒྱ་ཕྲག་མང་པོ་དང་ལྡན་པ་འོད་ཟེར་ཁ་དོག་སྣ་ཚོགས་པ་འགྱེད་ཅིང༌། བརྒྱ་ཕྲག་མང་པོའི་མཚན་ཅན་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བརྒྱད་ཅུ་མཉམ་པར་ལྡན་ཞིང་ངོ་མཚར་མང་པོ་མངའ་བ། བརྒྱ་ཕྲག་མང་པོའི་འོད་དེའི་སྐུ་ལས་འབྱུང་བ་ཡིན་ནོ། །ཞེས་དང༌། དེ་ལྟ་བུའི་སངས་རྒྱས་དེ་ནི་དཔེ་མེད་པའི་དཔལ་དང་སངས་རྒྱས་ཀྱི་ཡོན་ཏན་མཐའ་མེད་པ་དང་ལྡན་ཞིང༌། འཇིག་རྟེན་འཁོར་ལོ་སྟོང་ཕྲག་བཅུ་པོ་ཐམས་ཅད་ཀྱི་ལྷ་དང་མིའི་དབུས་སུ་བཞུགས་ནས་ཆོས་ཀྱི་འཁོར་ལོ་སྐོར་ཞིང་སྟོན་པར་མཛད་པ་ཡིན་ནོ། །དེའི་རྗེས་སུ་ས་ཡ་
འབུམ་ཕྲག་གཅིག་གི་ལྷ་དང་མི་རྣམས་འཛིན་པ་མེད་པར་དང་པོ་ཉིད་དུ་ཆོས་ཀྱི་མཆོག་གིས་རྣམ་པར་གྲོལ་བ་ཐོབ་པར་འགྱུར་རོ། །རྣམ་པར་གྲོལ་བ་མ་ཐོབ་པ་རྣམས་ལྷའི་ཡུལ་དུ་སྐྱེ་བར་འགྱུར་རོ། །འདི་ལྟར་བྱམས་པ་ལེགས་པའི་མཆོག་ཆེན་པོ་དེ་གང་གིས་མི་མཐོང་ཞེ་ན། མ་བསད་པ་དང༌། ཕ་བསད་པ་དང༌། དགྲ་བཅོམ་པ་བསད་པ་དང༌། དགེ་སློང་མ་སུན་ཕྱུང་བ་དང༌། སེར་སྣ་ཆེ་བ་དང༌། རྟག་ཆད་དུ་ངེས་པར་བལྟ་བའི་མུ་སྟེགས་དང༌། འཕགས་པ་རྣམས་ལ་སྨོད་པ་དང༌། གཅེར་བུ་བའི་རིགས་ཅན་རྣམས་ཀྱིས་མི་མཐོང་བ་ཡིན་ནོ། །ཚིགས་སུ་བཅད་པ་སྟོང་ཕྲག་གཅིག་གི་རྒྱན་ཡོད་པའི་ཐམས་ཅད་སྒྲོལ་བའི་སྐྱེས་རབས་ཆེན་པོ་སྟོང་ཕྲག་གསུམ་པ་ཞག་གཅིག་ལ་འཆད་ཅིང་ཉན་པར་བྱེད་པའི་མི་དང༌། མར་མེ་སྟོང་ཕྲག་གཅིག་འབུལ་བ་དང༌། དྲི་བཟང་པོ་མེད་ན་ཡང་མེ་ཏོག་སྟོང་ཕྲག་གཅིག་ཙམ་འབུལ་བ་དང༌། ཨུཏྤལ་སྔོན་པོ་སྟོང་ཕྲག་གཅིག་ཙམ་འབུལ་བ་དང༌། སངས་རྒྱས་ཀྱི་རིང་བསྲེལ་ཡོད་པའི་མཆོད་རྟེན་དང༌། སངས་རྒྱས་ཀྱི་སྐུ་ལ་མཆོད་པ་བྱེད་པ་ཐམས་ཅད་ནི་སངས་རྒྱས་བྱམས་པ་དེ་ཆོས་འཆད་པའི་དུས་སུ་དེའི་དྲུང་དུ་ཆོས་ཀྱི་མཆོག་གིས་རྣམ་པར་གྲོལ་བ་ཐོབ་པ་དང༌། མཐོང་བར་འགྱུར། དེ་མ་ཡིན་པ་སེམས་ཅན་སྤྱིན་པ་གཏོང་བ་དང༌། སྡོམ་པ་
བསྲུང་བ་དང༌། ལྷ་ཁང་བྱེད་པ་དང༌། བྱང་ཆུབ་ཤིང་གི་ས་བོན་བསྐྱེད་པ་དང༌། རིང་བསྲེལ་གྱི་མཆོད་རྟེན་བྱེད་པ་དང༌། བྱང་ཆུབ་ཀྱི་ཤིང་དང་མཆོད་རྟེན་ལ་ཞབས་ཏོག་བྱེད་པ་དང༌། སེམས་ཅན་ལ་ཕན་པའི་ཚལ་བྱེད་པ་དང༌། ཟམ་པ་བྱེད་པ་དང༌། ལམ་འཆོས་པ་དང༌། འགྲོན་པོའི་གནས་ཁང་བྱེད་པ་དང༌། ཆུ་མིག་བྱེད་པ་དང༌། སངས་རྒྱས་ཀྱི་བསྟན་པ་ལ་དད་པར་བྱེད་པ་དང༌། སངས་རྒྱས་ཀྱི་ཆོས་འདི་དག་ལ་འཆང་བ་ལ་དྲི་དང་མེ་ཏོག་ལ་སོགས་པའི་མཆོད་པ་བྱེད་པ་དང༌། ཁྲི་ལ་བྱི་དོར་བྱེད་ཅིང་ལེགས་པར་ཆོས་ཉན་པ་དང༌། དགེ་འདུན་ལ་བསྙེན་བསྐུར་དམ་པ་བྱེད་པ་དང༌། མ་དང་ཕའི་ཞབས་ཏོག་བྱེད་པ་དང༌། རིགས་ཀྱིས་ཆེ་བ་ལ་གུས་པར་བྱེད་པ་དང༌། སྡོམ་པ་སྲུང་བའི་དུས་སུ་དགེ་འདུན་ལ་བསྙེན་བཀུར་བྱེད་པ་དང༌། ལྷུང་བཟེད་འབུལ་བ་བྱེད་པ་དང༌། སྟན་སྟེར་བར་བྱེད་པ་ཐམས་ཅད་ཀྱིས་ཡང་དག་པར་རྫོགས་པའི་སངས་རྒྱས་བྱམས་པ་མཐོང་ཞིང་མཇལ་བ་ཡིན་ནོ། །དེ་ལྟ་བུའི་བསོད་ནམས་མང་པོ་མི་ནུས་ན་ཡང་མེ་ཏོག་སྤར་མོ་རེ་ཙམ་དང༌། མར་མེ་གཅིག་ཙམ་འབུལ་བར་བྱེད་པ་དང༌། གཞན་གྱི་བསོད་ནམས་ལ་རྗེས་སུ་ཡི་རང་བའི་དགེ་བ་བྱེད་པའི་ལྷ་དང་མི་རྣམས་ཀྱིས་དེའི་དུས་ན་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བ་ཡིན་ནོ། །ཡང་དག་པར་རྫོགས་པའི་
སངས་རྒྱས་བྱམས་པ་དེ་མཐོང་བར་འདོད་པའི་དད་པ་ཡོད་ཅིང་སྦྱིན་པ་གཏོང་བ་དང༌། ཚུལ་ཁྲིམས་སྲུང་བ་དང༌། བསྙེན་གནས་སྒྲུབ་པ་དང༌། དོན་ཡང་དག་པར་སྒོམ་པ་དང༌། དགེ་བའི་ལས་ཤིན་ཏུ་ལེགས་པར་བྱེད་པ་རྣམས་ཀྱིས་ཤིན་ཏུ་ལེགས་པར་མཐོང་བ་ཡིན་ནོ། །ཞེས་བཀའ་སྩལ་ན་བསྐལ་བཟང་གི་འདྲེན་པ་བཞི་པའི་བསྟན་པ་འདིའི་འབྲས་བུའི་དུས་ཀྱི་ལྔ་བརྒྱ་ཕྲག་གསུམ་ལ་ཉན་ཐོས་རང་ལམ་ནས་དགེ་སྦྱོང་གི་འབྲས་བུ་བཞི་ཡང་མངོན་དུ་མ་བྱས་ལ། ལུང་དང་སྒྲུབ་པའི་དུས་སོ་སོའི་རང་སྐལ་ལྔ་བརྒྱ་ཕྲག་དྲུག་པོར་ཡང་འདུལ་བ་དང༌། མདོ་སྡེ་དང༌། མ་མོའི་སྡེ་སྣོད་ཀྱི་དོན་ལ་ཚུལ་བཞིན་དུ་སྤྱོད་པར་མི་ནུས་ཤིང༌། ཚུལ་ཁྲིམས་ཀྱི་ཕུང་པོ་ལས་ཀྱང་ཉམས་པ། བཅོམ་པ། ལྟུང་བ། ཕམ་པར་གྱུར་པས་ལམ་གྱི་བར་ཆད་དུ་གྱུར་པ་རྣམས་བྱང་གྲོལ་གྱི་ལམ་ལ་བདེ་བར་འགོད་ཅིང༌། ཐར་པའི་གོ་འཕང་ལ་སྐལ་པ་ཆུང་བ་རྣམས་ཀྱང་ལྷའི་འཇིག་རྟེན་དུ་དབུགས་འབྱིན་པ་ལ་མཉམ་ཞིང་མཚུངས་པ་མེད་པའི་སྟོན་པ་ཆེན་པོ་རྗེ་བཙུན་བྱམས་པ་མགོན་པོ་བཞེངས་ཀ་མའམ། བཟང་པོའི་འདུག་སྟངས་ཀྱི་སྣང་བརྙན་སྐྱེས་བུ་དར་ལ་བབ་བའི་ཁྲུ་དང་མཉམ་པའི་ཞལ་ཚད་དེ་སྙེད་ཀྱི་སྲིད་དུ་མངོན་པར་འཕགས་པ་རྟེན་གྱི་གཙོ་བོར་བཞུགས་པ་གང་ཞིག་ཀྱང༌། སྤྲུལ་པའི་སྐུའི་མཚན་བཟང་པོ་
སུམ་ཅུ་རྩ་གཉིས་དང་དཔེ་བྱད་བརྒྱད་ཅུའི་བདག་ཉིད་ཅན་གྱི་ཕྱིར། མཐོང་ན་མི་མཐུན་པ་མེད་ཅིང༌། དད་པས་མོས་པ་རྣམས་ལ་མངོན་པར་དགའ་བའི་ཞལ་སྐྱིན་ཅན་བལྟ་བས་ཆོག་མི་ཤེས་པའི་བཟོ་སྒྲོས་ཅན་དུ་བྱོན་ཏོ། །དེའི་གཡས་སུ་བདེ་ལྡན་ཞིང་གི་མགོན་པོ་རྒྱལ་བ་འོད་མཚན་སྟོང་འབར་སྤྲུལ་པ་སྐུའི་བདག་ཉིད་ཅན་དང༌། གཡོན་དུ་སྤྱན་རས་གཟིགས་སེམས་ཉིད་ངལ་བསོ་གཉིས་ཐོག་ཚད་མ། བར་སྟོངས་གཉིས་སུ་ཐུབ་པ་གྲོང་ཁྱེར་མ་དང༌། འཕགས་པ་མིག་མི་འཛུམས་པ་ཁ་སར་པཱ་ཎིའི་བྱི་བྱད་ཅན་གཞོན་ནུ་ལོ་བཅུ་གཉིས་པའི་ལུས་ཚད། ཁྱད་པར་སངས་རྒྱས་ཐམས་ཅད་ཀྱི་ངོ་བོ་བླ་མ་ཡིན་པར་ངེས་པའི་མོས་གུས་ཀྱི་ལྕགས་ཀྱུས་ཡེ་ཤེས་སེམས་དཔའ་མངོན་སུམ་དུ་བཀུག་པས་བྱིན་རླབས་ཀྱི་གཟི་བྱིན་མཚུངས་པ་མེད་པའི་ངང་ཚུལ་དབང་པོའི་སྤྱོད་ཡུལ་དུ་བལྟར་མངོན་པའི་རྟེན་ཁྱད་པར་ཅན་གཉིས་ནི། གངས་ཅན་པ་རྣམས་ཀྱི་སྐྱབས་དང༌། རྟེན་དང༌། གླིང་དང༌། མགོན་དང༌། དཔུང་གཉེན་གཅིག་པུ་བར་གྱུར་པ་དཔལ་སངས་རྒྱས་གཉིས་པ་སློབ་དཔོན་ཆེན་པོའི་སྐུ་ཚབ་རིན་པོ་ཆེ་སྣང་སྲིད་ཟིལ་གནོན་བདུད་དཔུང་འདུལ་བའི་བདག་ཉིད་ཅན་སྐྱེས་བུའི་ལུས་ཚད་ཉིས་འགྱུར་དུ་དཔགས་པ་དང༌། རྒྱལ་བ་སྲས་དང་བཅས་པ་རྣམས་ཀྱི་ཡེ་ཤེས་དམ་པའི་རང་གཟུགས་ཡིན་པའི་མངོན་རྟོགས་མཐོང་
ཆོས་སུ་རྔོམ་པ་ལ་འཛམ་བུའི་གླིང་མཛེས་པར་བྱེད་པའི་རྒྱན་དྲུག་གམ། མཆོག་བརྒྱད་ཀྱི་དོ་ཟླར་སྤོབས་པས་སྤྲུལ་གཞི་ཕུན་སུམ་ཚོགས་པའི་སྒྲོ་བཏགས་ཙམ་ལ་ལྟོས་མི་འཆའ་ཞིང༌། མ་འོངས་པ་ན་དེ་བཞིན་གཤེགས་པ་རི་རབ་མར་མེའི་རྒྱལ་མཚན་དུ་འཚང་རྒྱ་བའི་ལུང་བསྟན་ཐོབ་པས་སོ་སོ་ཡང་དག་རིག་པ་བཞི་ལ་སྤོབས་པའི་གཏེར་མཛོད་གྲོལ་ནས་དེ་བཞིན་གཤེགས་པའི་གསུང་གི་གསང་བ་རབ་འབྱམས་མཐའ་དག་པ་དང༌། ལམ་བདེན་འདུས་བྱས་པའི་ཕ་རོལ་ཏུ་སོན་པའི་དེ་ཁོ་ན་ཉིད་རང་བཞིན་རྫོགས་པ་ཆེན་པོའི་ཆོས་འཁོར་བསྐོར་བ་ལ་གདོད་མའི་སངས་རྒྱས་མངོན་སུམ་པའི་ཞལ་སྐྱིན་རྒྱལ་བ་གཉིས་པ་ཀློང་ཆེན་རབ་འབྱམས་སམ། དཔལ་བསམ་ཡས་པ་ཀུན་མཁྱེན་ངག་གི་དབང་པོ་གཉིས་སོ། །ངེས་པ་ལྔ་ལྡན་འོག་མིན་སྟུག་པོ་བཀོད་པའི་ཞིང་ཁམས་ཀུན་གྱི་མོས་པའི་རྟེན་དུ་འཚོ་བའི་ཕྱིར་དུ། ཆོས་དབྱིངས་ཡེ་ཤེས་ཀྱི་འཁོར་འདས་གཉིས་སུ་མེད་པ་ལ་ལོངས་སྤྱོད་པ་བཅོམ་ལྡན་འདས་རྣམ་པར་སྣང་མཛད། མེ་ལོང་ལྟ་བུའི་ཡེ་ཤེས་ཀྱི་དཔེ་ལ་ལོངས་སྤྱོད་པ་བཅོམ་ལྡན་འདས་རྡོ་རྗེ་མི་བསྐྱོད་པ། མཉམ་པ་ཉིད་ཀྱི་ཡེ་ཤེས་ཀྱི་དོན་ལ་ལོངས་སྤྱོད་པ་བཅོམ་ལྡན་འདས་རིན་ཆེན་འབྱུང་ལྡན། སོ་སོར་རྟོག་པའི་ཡེ་ཤེས་ཀྱི་དབང་པོ་ལ་ལོངས་སྤྱོད་པ་བཅོམ་ལྡན་འདས་སྣང་བ་
མཐའ་ཡས། བྱ་བ་གྲུབ་པའི་ཡེ་ཤེས་ཀྱི་ཆོས་དང་བྲལ་བ་ལ་ལོངས་སྤྱོད་པ་བཅོམ་ལྡན་འདས་དོན་ཡོད་གྲུབ་པ་རྣམས་དང་རྗེ་བཙུན་སྒྲོལ་མ་བཅས་སྤྱིར་ཉན་ཐོས་སྐྱེས་བུའི་ལུས་ཚད་དང༌། དེ་བཞིན་གཤེགས་པ་རྣམས་དེ་ལས་ལྡོག་པ་ཉིད་ཀྱང༌། རྣམ་པར་རང་ཉིད་སྐྱིལ་མོ་ཀྲུང་བཅས་པའི་སྲིད་དང་མཉམ་པའོ། །དེ་རྣམས་ལ་སྐུ་རབ་ཏུ་བྱེད་པའི་གཟུགས་ཀྱི་ཁྱད་པར་ཇི་ལྟར་བཞུགས་པ་ནི། རྟེན་གཙོ་བྱམས་མགོན་དང་བཅས་པའི་དབུས་མ་གསུམ་གྱི་སྲོག་ཤིང་ལ་ཟབ་མོ་ལྟ་བ་དང༌། རྒྱ་ཆེན་སྤྱོད་པའི་བླ་མ་བརྒྱུད་པ་རྣམས་ཀྱི་མཚན་སྔགས། རང་ལུགས་ཤིང་རྟ་རིན་པོ་ཆེ་རྣམ་པ་གསུམ་གྱི་བརྒྱུད་པ་ཇི་བཞིན་ལས་ཀུན་མཁྱེན་ཆེན་པོ་ལ་ཐུག་གི་བར་སྨོས་ནས་རྒྱལ་བསྟན་རིས་མེད་དུ་དར་བ་དང་འཇིག་རྟེན་བདེ་བའི་སྨོན་ལམ་ཤིས་བརྗོད་དང་བཅས་པ། སློབ་དཔོན་སངས་རྒྱས་གཉིས་པའི་སྲོག་ཤིང་ལ་རབ་བཞིན་ཐེག་མཆོག་རྒྱལ་པོའི་རྩ་བརྒྱུད་ཀྱི་བླ་མ་རྣམས་ཀྱི་མཚན་སྔགས་དང༌། གསང་སྔགས་རབ་འབྱམས་ཀྱི་བཀའི་སྡུད་པ་པོ་རིག་འཛིན་རྡོ་རྗེ་ཆོས་ཀྱི་ལྷ་ཚོགས། ཞི་བ་རྡོ་རྗེ་དབྱིངས་དང་ཧེ་རུ་ཀ་དགུ་ཀློང་འབར་བ་དཔལ་ཆེ་མཆོག་བདུད་རྩི་ཡོན་ཏན་གྱི་དཀྱིལ་འཁོར་རྒྱ་མཚོའི་སྙིང་པོ་ཡོངས་སུ་རྫོགས་པར་བྲིས་སོ། །ཚུལ་དེས་མཚོན་ནས་རྡོ་རྗེ་མི་བསྐྱོད་པར་ཞི་ཁྲོ་སྒྱུ་འཕྲུལ་དང་ཡང་དག་ཐུགས། རིན་ཆེན་འབྱུང་ལྡན་ལ་འཇམ་དཔལ་ཞི་
ཁྲོ། སྣང་བ་མཐའ་ཡས་ལ་པདྨ་གསུང༌། དོན་ཡོད་གྲུབ་པ་ལ་ཕུར་པ་ཕྲིན་ལས། རྣམ་པར་སྣང་མཛད་ལ་རིགས་གཞན་གསུམ་བཀོད་པའི་བདུན་བརྒྱ་ཉེར་ལྔའི་ལྷ་ཚོགས་མ་ཚང་བ་མེད་པའི་སྙིང་པོ་གཙོ་བོར་བཞུགས་པ་དང༌། རྗེ་བཙུན་མ་སྒྲོལ་མ་ལ་རང་གིས་དམ་བཅས་པའི་གཟུངས་ལེ་ཚན། སྤྱན་རས་གཟིགས་སེང་གེའི་སྒྲ། ལྷ་མོ་འོད་ཟེར་ཅན། རྒྱལ་མཚན་རྩེ་མོའི་གཟུངས་ལ་སོགས་པ་གཙོ་བོར་གྱུར་པའི་རིགས་མང་པོ་ལག་བྲིས་སུ་བསྟར་ཞིང་མྱོང་གྲོལ་ཁྱད་པར་ཅན་དང་དྲི་བཟང་པོས་བསྐུས་པས་དོན་དམ་པར་ཞི་ཁྲོ་རབ་འབྱམས་མ་ལུས་ཤིང་ལུས་པ་མེད་པའི་བདག་ཉིད་ཅན་དུ་བསྒྲུབ་པ་ཡིན་ནོ། །དེ་ལས་ཆོས་སྐུའི་རིང་བསྲེལ་ཇི་ལྟར་བཞུགས་པ་ནི་གཙུག་ཏོར། མཛོད་སྤུ་མགྲིན་པ་ལ་སོགས་པའི་གཟུངས་ཀྱིས་མཚོན་སྐྱེ་མཆེད་བྱིན་གྱིས་བརླབས་པའི་གཟུངས་རྣམས་དམིགས་བསལ་ལྟར་ལས། ཁྱད་པར་གྱི་རྣམ་གྲངས་ནི། རྟེན་གཙོར་བྱམས་པས་དམ་བཅས་པའི་གཟུངས་འབུམ་ཐེར་ལྷག་བཅས། འཇམ་དཔལ་རྩ་རྒྱུད་ལས་ལས་གསུངས་པའི་ཚེ་གཟུངས་འབུམ་ཐེར། ཡིག་དྲུག་འབུམ་ཐེར་གཅིག་དང་ཆིག་ཁྲི། མགོན་པོ་ཚེ་མཐའ་ཡས་པའི་གཟུངས་ཀྱི་རྣམ་གྲངས་བདུན་ཅུ་སྐོར། སྲོག་ཤིང་བརྟན་པ་ཁྲི་ཚར། དྲི་མེད་འོད་ཀྱི་མཆོད་རྟེན་གཟུངས་ཆིག་སྟོང་ལྷག་བཅས། གཟུངས་ཆེན་སྡེ་ལྔ་སོ་སོ་ནས་ཆིག་སྟོང༌། དེ་དག་
གི་རྩ་སྔགས་དང་ཉེ་སྙིང་གཟུངས་ཐུང་སོགས་བརྒྱ་དང་གསུམ། གུ་རུའི་སྙིང་པོ་འབུམ་ཐེར་གཅིག་དང་སུམ་ཁྲི་ཉིས་སྟོང་ལྔ་བརྒྱ་སྐོར། གསང་བ་འདུས་པ་ལ་སོགས་པའི་རྒྱུད་ཀྱི་རྣམ་གྲངས་སོ་སོ་ནས་ཚར་བཅུ་སྐོར་རོ། །འཁོར་ལོ་སྡོམ་པ་ལ་སོགས་པའི་མ་རྒྱུད་དེ་མཚུངས། ཀུན་རིག་ལ་སོགས་པའི་རྣལ་འབྱོར་རྒྱུད་བཅུ་དྲུག་སྐོར། བྱ་སྤྱོད་གཉིས་ཉི་ཤུ་རྩ་གཅིག་རེ། ཇོ་བོའི་ཐུགས་དམ་ལྷ་བཞི་བརྒྱ་ཕྲག་གཅིག་ལྷག་བཅས། ཐུགས་རྗེ་ཆེན་པོ་ཞལ་བཅུ་གཅིག་པའི་གཟུངས་བརྒྱ་ཕྲག་གཅིག་དང་བཅུ་གསུམ་སྐོར། ཡིག་བརྒྱ་ཁྲི་ཚོ་གཅིག །མི་འཁྲུགས་པའི་གཟུངས། རྟེན་འབྲེལ་སྙིང་པོ། འགྱུར་སྔགས་དང་མདོ་གཟུངས། སུ་པྲ་ཏིཥྛ། སྔགས་མ་དག་པ་དང་གཟུངས་གོང་འོག་འཆོལ་བ་ལ་སོགས་པའི་ཉེས་སྐྱོན་སེལ་ཕྱིར་སྟོད་སྨད་བར་གསུམ་ཀུན་ཏུ་རྒྱུ་བ་རིག་པ་ཕུག་རོན་གྱི་གཟུངས་རྣམས་ཆིག་སྟོང་རེ་དང་ནོར་ལྷ་ཆོས་སྐྱོང་གི་གཟུངས་བརྒྱ་ཕྲག་ལྷག་བཅས་རེ། ཕུན་སུམ་ཚོགས་པ་ལ་སོགས་པའི་བཀྲ་ཤིས་ཀྱི་གཟུངས་རྣམས་འབུལ་ཚུལ་གྱི་ངེས་པ་སློབ་དཔོན་ཀླུ་སྒྲུབ་སྙིང་པོའི་གཞུང་པཎ་ཆེན་བི་མ་ལ་དང༌། ལོ་ཙཱ་བ་ཅོག་རོ་ཀཱུའི་རྒྱལ་མཚན་གྱིས་བསྒྱུར་བ་དང༌། སློབ་དཔོན་ཛེ་ཏ་རིའི་གཟུངས་འབུལ་གྱི་དཀར་ཆག་གཙོ་བོར་བཟུང༌། མན་ངག་གི་ངེས་པ་གཞན་དག་གིས་ཀྱང་ལེགས་པར་བརྒྱན་ནས་
གོ་རིམ་འཆོལ་པ་མེད་པ་དང༌། རྟེན་སོ་སོའི་དབུ་གཙུག་ཏུ་དེ་བཞིན་གཤེགས་པ་གསེར་ཐུབ་ཀྱི་རིང་བསྲེལ་ཡུངས་འབྲུ་ལྟ་བུ་རེ་རེ་དང༌། རྟེན་གཙོར་ཨོ་རྒྱན་ཡབ་ཡུམ་གྱི་བྱང་སེམས་དཀར་དམར་གཙོ་བོར་བཞུགས་པའི་གཏེར་བྱོན་གྱི་ཨ་ཐམ་མ་ཁུངས་ལྡན། སྤྱིར་ཆ་མཉམ་གྱི་ཨུ་རྒྱན་ཆེན་པོའི་སྐུ་བེར་བྱི་རུ་སྲུངས་པར་གྲགས་པའི་དུམ་བུ་ཆོས་དབང་རིན་པོ་ཆེའི་གཏེར་བྱོན་ངོ་མཚར་ཅན་གྱིས་གཙོས་པའི་རྒྱ་བོད་ཀྱི་སྐྱེས་བུ་དམ་པ་རྣམས་ཀྱི་ན་བཟའ། བྲམ་ཟེ་དུང་རྣ་དང་རྒྱལ་སྲས་ལྷ་རྗེའི་སྐུ་རུས་ཀྱིས་མཚོན་པའི་གདུང་དང་སྐུ་བལ་གྱི་རིང་བསྲེལ་རྩོད་མེད་ཚོགས་ཆེ་བ་དང༌། པད་གཟུངས་གནོད་སྦྱིན་བང་མཛོད་ཆོ་ག་བཞིན་དུ་འདུ་བྱས་པ་ལ་རབ་གནས་རང་བཞིན་གྱིས་ཆགས་པའི་རྟེན་འབྲེལ་དུ་རྒྱ་བལ་བོད་གསུམ་གྱི་གནས་ཆེན་མཐའ་ཡས་པའི་ས་རྡོ་ཆུ་ཤིང་དང༌། གྲུབ་ཆེན་ཐང་སྟོང་པས་འཛམ་གླིང་ལན་གསུམ་བསྐོར་བའི་ས་སྣ་རྡོ་སྣ་ལ་སོགས་པ་ཡང་འདྲེས་ཤིང་ཆུབ་པར་བྱས་པས་ཤིན་ཏུ་བཀྲ་ཤིས་པ་ཡིན་ནོ། །དེ་ལ་རྒྱལ་བ་སྲས་དང་བཅས་པ་དེ་དག་ནི་རང་བཞིན་གྱིས་མཛེས་པའི་མཚན་དཔེའི་རྒྱན་དང་བཅས་པའི་ཕྱིར་ན། འཇིག་རྟེན་ན་རིན་ཐང་དང་བཅས་པའི་རྒྱན་ཕལ་པ་ལ་ལྟོས་པ་མ་ཡིན་ཡང་གདུལ་བྱའི་ངོས་ནས་བསོད་ནམས་གསོག་པའི་སླད་ཕྲ་རྒྱན་གྱི་མེ་ཏོག་དང་བླ་བྲེ་དཔྱངས་ཤིང་ན་བཟའི་ཁྱད་པར་ཇི་ལྟར་མནབས་པ་ནི། རྟེན་གཙོ་རྗེ་བཙུན་
བྱམས་པ་མགོན་པོའི་དབུ་ཐོག་ཏུ་བུམ་གདན་མ་དམར་པོ་རིན་ཐང་ཅན་གྱི་བླ་བྲེ་ཤམ་ལྡན་དང༌། ལྕམ་གླིང་གཡས་གཡོན་བརྒྱན་བཞི་སྐྱེད་ཁྲ་དུར་ཁའི་གནམ་རྒྱན་འཇའ་ལྡན་གྱིས་བྱེ་བ་ཁེབས། ལིང་དུར་སྨྲིག་གི་སྐུ་ཆོས་དང༌། མཐོངས་བྷུ་ཏ་ལྗང་གུའི་མཐའ་རྡོ་རྗེ་ས་ལམ་དམར་པོས་བྱས་པའི་སྟོད་ལེ། བཟང་གོས་ཚོན་སྤེལ་གྱི་སྐུ་པང་དང་བཅས་པ། སྣང་བ་མཐའ་ཡས་ཀྱི་མཛོད་སྤུར་གྲུ་གཡུ་སྤུས་ལེགས་སྲན་མ་ཙམ་སྟོད་ལེ་གོང་འདྲ་ལས་མཐའ་འཇའ་སྒྲིན་ས་ལམ་དམར་པོའི་ཁྱད་པར། ལིང་དུར་གྱི་སྣམ་སྦྱར་ཚད་ལྡན། སྤྱན་རས་གཟིགས་སེམས་ཉིད་ངལ་གསོའི་མཛོད་སྤུར་གྲུ་དམར་སྤུས་དག་དང༌། དབུ་རྒྱན་སྐྲ་ལྡེམ་ལ་གཙུག་གཡུ་གཅིག །གཡུ་དཀྱུས་ཆེ་ཆུང་བརྒྱད། ནོར་བུ་ཞུམ་མིག་སེན་གང་བ་གཉིས། མུ་ཏིག་བསྟར་བརྒྱུས་དགུ་བཅུ་གོ་བཞི། བྱི་རུ་སྲན་སྤོས་ཙམ་བཞི་བཅུ་ཞེ་གཅིག །དེ་བས་ཆུང་བ་བཅུ་བཞི། ཐུགས་ཀ་ནས་དཔྲལ་གཡུ་ཆེ་བ་དང༌། སྤོས་ཤེལ་ཆུང་ངུ་གཅིག །སྟོད་ལེ་མཐོང་རྒྱན་བཞི་དམར་པོའི་མཐའ་སྨྱུག་ཁ་ཆུ་བྲག་ལས་བྱས་པ་དང༌། ཚོས་ཉིས་མ་སྔོན་པོ་རྒྱ་བྱ་རིས་ཀྱི་སྐུ་པང༌། ལྡེམ་སྐུ་གཉིས་ཀྱི་མཛོད་སྤུ་ཞུམ་མིག་སྲན་སྤོས་ཙམ་རེ། གྲོང་ཁྱེར་མར་བཟང་གོས་སྤྲིན་རིས་མའི་སྐུ་ཆོས། ཁ་སར་པཱ་ཎིར་བཟང་གོས་ཉིས་སྤེལ་གྱི་སྟོད་ལེ་རང་འགྲིག་དང༌། ཊཾ་ག་མ་སེར་
པོའི་སྨད་གཡོགས། སློབ་དཔོན་ཆེན་པོར་དངུལ་དཀར་ལས་གྲུབ་པའི་རྒོད་ལྡེམ་དང༌། སྟེགས་བྱི་རུ་ཆེ་ཆུང་ཁམ་བུ་ཙམ། ཐུགས་ཀ་ན་དཔྲལ་གཡུ། མཛོད་སྤུར་གྲུ་གཡུ་ལེགས་ངེས་སྲན་སྤོས་ཙམ། སྐྱིན་ཁབ་མཚལ་ཁའི་སྐུ་བེར་གོང་བ་སྐྱིན་ཁབ་རྒྱ་ཁ་སྟོང་སྐུད་ཀྱི་འཇའ་ལྡན་དང༌། མགུལ་རྒྱན་བྱི་རུས་བསྐོར་བ། རིགས་ལྔའི་སྐྲ་ལྡེམ་སྤྱིར་བྱི་རུ་སྣ་ཚོགས་བརྒྱ་དང་ཉི་ཤུ་རྩ་བརྒྱད། གཡུ་སྣ་ཚོགས་རོ་བཅོ་ལྔ། རིགས་ལྔ་རྣམས་ཀྱི་མཛོད་སྤུར་མུ་ཏིག་སྲན་མ་ཙམ་རེས་མཚོན། མུ་ཏིག་ཆེ་ཆུང་བཅུ་གསུམ། གཡང་ཏྲིའུ་དང༌། ཉ་ལྕིབས་ཀྱི་ཕྲེང་བ་བརྒྱ་རྩ་བརྒྱད༌། གཞན་མ་ན་ཧོ། མུ་མེན། གཡང་ཏྲིའུ། གཙོ་བོ་གཉིས་ལ་མེ་ཤེལ་རེའི་ནོར་བུ་ཏོག་གིས་མཚོན་པའི་ཤེལ་རིགས་སྣ་ཚོགས་ཚོན་སྤེལ་གྱི་རྒྱ་གདུགས། རིགས་ལྔ་སྒྲོལ་མ་དང་བཅས་པས་སྟོད་ལེ་སྨད་ཤམ་ཅོད་པན་ཆ། ཀུན་མཁྱེན་ཆེན་པོར་མཛོད་གོས་སྤྲིན་རིས་མ་སེར་པོའི་སྐུ་བེར་གོང་ལྡན་དང་སྣམ་སྦྱར། རྒྱལ་ཡོལ་བཟང་གོས་དམར་པོ་ཇུས་ལྗང་གི་མཐའ་འཇའ་ཅན། ཁ་དཀར་བཀྲ་ཤིས་ཁ་བཏགས་དང་བཅས་པའོ། །སྐུ་རྒྱུའི་ཁྱད་པར་དང་གཏོང་བ་ཆེན་པོའི་བསམ་སྦྱོར་ཕུན་སུམ་ཚོགས་པས་བསྒྲུབས་པའི་རྟེན་ནི་དྲི་གཙང་ཁང་གི་གཡས་ལོགས་ཀ་སྟར་གསུམ་གྱི་ཆར་དངུལ་སྲང་བདུན་ཅུ་རྩ་ལྔའི་ཡོན་གྱིས་གསར་དུ་བསྐྲུན་པའི་
དེ་བཞིན་གཤེགས་པའི་སྣང་བརྙན་ཐུབ་པ་གྲོང་ཁྱེར་མར་གྲགས་པ་སློབ་པ་ལམ་གྱི་གནས་སྐབས་ན་ཕ་རོལ་ཏུ་ཕྱིན་པ་དྲུག་གམ་བཅུའི་བདག་ཉིད་ལ་རྟག་པར་བསྟེན་གོམས་མཛད་པའི་རྟེན་ཅིང་འབྲེལ་བར་འབྱུང་བ་གང་ཞིག་འབྲས་བུའི་གནས་སྐབས་ན་ཁྲི་དྲུག་མགྱོགས་ལྟར་མངོན་པ་དང་བཅས་པའི་སྐུའི་ངོ་བོ་སྟོད་ཧོར་ལི་ཁྲ་དང༌། ཁྲི་རྒྱབ་རྣམས་ལི་དམར་ཕལ་པ་ལས་གྲུབ་པ་ཐམས་ཅད་ཀྱི་སྲིད་དུ་མདའ་ཚད་ལངས་སུ་ཆ་ཞིང་བཟོ་སྒྲོས་ཤིན་ཏུ་གཙང་བའི་གནྡྷོ་ལ་དང་བཅས་པ་གཡས་གཡོན་དུ་དེ་བཞིན་གཤེགས་པའི་གསུང་ལྗོངས་འདིར་འགྱུར་རོ་འཚལ་གངས་ཅན་པ་རྣམས་ཀྱིས་བཀའ་འགྱུར་རིན་པོ་ཆེའི་སྒྲས་བཏགས་པ་པོད་ཆེན་བརྒྱ་ཕྲག་གཅིག་བཞུགས་ཁང་ཀུན་དགའ་ར་བ་དང་རང་འགྲིག་གདོང་ཅོག་ལྔ་དང་བཅས་པ། སྣང་བརྙན་རིན་པོ་ཆེའི་མཛོད་སྤུར་མུ་ཏིག་ནས་རྡོག་ཙམ་པ་རྒྱབ་ཡོལ་གཞི་དཀར་ཚོན་ཁྲ་མ། དབུ་ཐོག་ཏུ་མཐོངས་རྒྱ་གར་ཁ་ཐི་བྱས་པའི་མཐའ་བཟང་གོས་དམར་སེར་སྔོ་ནག་འཇའ་སྤེལ་གྱི་བླ་བྲེ་གཤམ་ལྡན། གཡས་གཡོན་སོ་སོར་མཐོངས་མཛོད་གོས་སྔོ་སྐྱ་འཁོར་བརྒྱད་མ་ལ་བཟང་གོས་དམར་སེར་འཇའ་སྤེལ་གྱི་གནམ་རྒྱན་བྱི་བ་ཁེབས། ལྕམ་གླིང་བར་མ་ལ་མཐོངས་མཛོད་གོས་རྒྱ་ཡིག་མ་སེར་པོ་ཡུག་གི་མཐའ་བཟང་གོས་དམར་པོ་ཡུག་གསུམ་བསྒྲིགས་ཀྱིས་བྱི་བ་ཁེབས་དང༌།
གཞན་སེང་གཡེངས་ཀྱིས་མཚོན་པའི་ལྕམ་གླིང་ཐམས་ཅད་ཀ་ཤི་ཀའི་རས་ལ་རི་མོ་མཁན་གྱིས་ཚོན་རིས་མངོན་པར་བཀྲ་བས་བཅོས་བུར་བྱས་པ་ཤ་སྟག་གོ །མགོན་ཁང་ཨུ་ཙ་ལར་བདག་ཉིད་ལྷའི་གསལ་སྣང་དང་ཆོས་ཉིད་མཉམ་པ་ཆེན་པོའི་ངང་ནས་བསྐྲུན་པའི་མ་མགོན་ལྕམ་དྲལ་གྱི་སྐུ་གཟུགས་སོ་སོའི་བླ་རྡོ་སྲོག་འཁོར་གྱི་ནང་གཟུངས་ཁྱད་པར་ཅན་དང་ལྡན་པ་དང༌། གསུང་རྟེན་ནག་མོ་ཁྲོས་མའི་རྒྱུད་ཆ་ཚང༌། གཏེར་མགོན་གྱི་པོད། ཐུགས་རྟེན་རྟེན་མདོས་མཚན་ཉིད་ཚང་བ། ཡོན་ཏན་ཕྲིན་ལས་ཀྱི་རྟེན་སྦ་དཀར་དངུལ་གྱི་ཟེ་པྲོག་ཅན་ལ་དར་མཚོན་དཔྱངས་པ། ཐོད་རྔ་ལྟག་སྤྲོད། རྐང་གླིང་ཟངས་ཆིངས་ཅན། ཤིང་གི་ཞལ་བསྙན་ལྔ་དང་དམ་ཅན་པར་ཚར་ཞུ། ཧོར་སྦུབ་ཁ་སྒོར་རྒྱུག་ཐོག་ལྟག་བཅས་སྐྱོན་མེད་གཅིག །གསེར་རྔ་མགུལ་བཅས་མེ་མདའ་དམ་ཅན་བླ་ཆགས་མ། སག་ཐག་སྐོར་ཆ་འགྲིག །སྙན་ཤལ་ནང་མཛོད་བསྐང་རྫས་རིས་ཀྱིས་གཙོས་ཁྱོན། རུ་མཚོན་དར་བཅས་གཉིས། ཁ་བཏགས་ཀྱི་བསངས་དར་ཆ། ལྕགས་ཀྱུ། ཏིང་ལྔ་ཚར། ཕྱིའི་གནས་བདག་ནི་སློབ་དཔོན་ཆེན་པོའི་བཀའ་སྡོད་གངས་ཅན་བོད་ཀྱི་ཡུལ་ལྷ་ཆེན་མོ་བཀྲ་ཤིས་ཚེ་རིང་མ་ཞེས་སྒྲུབ་བརྒྱུད་ཀྱི་བསྟན་པ་ལ་གཅིག་ཏུ་མེལ་ཚེ་ཆེ་བའི་མཁའ་འགྲོ་ཆེན་མོ་ལྔས་རང་གིས་མཛད་པའི་མཚན་མ་མཐོང་བ་བཞིན། བླ་རྡོ་སྲོག་འཁོར་
གྱི་བཅའ་ག་མན་ངག་ལྟར་དུ་ལྡན་པའི་སྐུ་མཁར་གཙོ་འཁོར་ལྔ་དང་བཅས་པའང༌། བསྐྲུན་ནས་དམ་ཡེ་གཉིས་མེད་དུ་བརྟན་པར་བྱས་པ་ཡིན་ནོ། །ད་ནི་གང་གིས་མཐོང་ཐོས་དྲན་རེག་མཐའ་དག་ལ་ཐར་པའི་ས་བོན་ཁྱད་པར་ཅན་འཇོག་པའི་ཕྱིར་ལམ་གྱི་གཞི་མདོར་ཡང་བསྒྲུབས་པར་བྱ་བའི་རྟེན་གྱི་མཆོག་ནི་མཆོད་རྟེན་ཡིན་པའི་ཚུལ་ངན་སོང་སྦྱོང་བའི་རྒྱུད་ལ་སོགས་པ་ཐེག་པ་ཆེ་ཆུང་མང་དག་ནས་བཤད་ཅིང༌། འདུལ་བ་ལུང་ལས། སྔོན་འཕགས་ཤཱ་རིའི་བུའི་རིང་བསྲེལ་རྣམས་ཁྱིམ་བདག་མགོན་མེད་ཟས་སྦྱིན་གྱིས་ཁྱེར་ཏེ། རང་གི་ཁྱིམ་གྱི་ནང་གི་མཆོག་མཐོན་པོ་ཞིག་ཏུ་བཞག་སྟེ། དེ་ལ་མཆོད་པ་དང་སྐྱེ་བོའི་ཚོགས་ཆེན་པོ་གཞན་རྣམས་ཀྱིས་ཀྱང་དེར་སོང་སྟེ་མཆོད་དོ། །དུས་རེ་ཞིག་ཁྱིམ་བདག་རི་བོར་ཞིག་ཏུ་བྱ་བ་ཅུང་ཟད་གཅིག་ལ་སྒོ་བཅད་དེ་སོང་བ་དང༌། སྐྱེ་བོའི་ཚོགས་རྣམས་ཀྱིས་མཆོད་པ་བྱ་བ་མ་བྱུང་བར་བདག་ཅག་གི་བསོད་ནམས་ཀྱི་བར་ཆད་བྱས་སོ། །ཞེས་འཕྱ་བ་དེ་ཁྱིམ་བདག་གིས་ཐོས་ནས་བཅོམ་ལྡན་འདས་བདག་གིས་ཤཱ་རིའི་བུའི་མཆོད་རྟེན་ཕྱོགས་སྣ་སྤེལ་ཅན་ཞིག་ཏུ་བགྱིས་ལ་མཆོད་པ་བགྱིད་དུ་སྩོལ་ཅིག །བཀའ་སྩལ་པ་གནང་གི་གྱིས་ཤིག །ཅེས་པ་ལྟར་རོ། །དེའི་དགོས་པའང་འདི་ལྟར་སངས་རྒྱས་ཐམས་ཅད་ཀྱིས་གཉིས་སུ་མེད་པའི་ཡེ་ཤེས་ཆོས་སྐུའི་རང་བཞིན་ནི་ཐུགས་རྡོ་རྗེའི་གསང་བ་བསམ་གྱིས་མི་ཁྱབ་པ་ཁོ་ན་ཡིན་ལ། དེ་ཉིད་རྟགས་དང་བརྡའི་མཚོན་དཔེས་འགྲོ་བ་ཀུན་གྱི་མིག་སྔ་ན་སྣང་བར་བྱས་པས་བསོད་ནམས་ཀྱི་ཚོགས་རླབས་པོ་ཆེའི་གཞི་རྟེན་དུ་འགྱུར་བ་དང༌། དེ་ལ་བརྟེན་ནས་དགེ་ཚོགས་རིན་པོ་ཆེའི་ཡོན་ཏན་ཐམས་ཅད་
འབད་མེད་དུ་འབྱུང་བ་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་གང་ན་བཞུགས་པའི་ས་ཕྱོགས་སུ་སྲིད་ཞིའི་དཔལ་འབྱོར་ཐམས་ཅད་བདེ་བླག་ཏུ་འདུ་བ་ཆོས་ཉིད་ཡིན་པ་ལྟར་སངས་རྒྱས་རྣམས་ཀྱི་ཁྱད་པར་གྱི་ཆོས་གང་གིས་མཐོང་བ་དང༌། རེག་པ་དང༌། ཐ་ན་རླུང་གི་རྫི་ཕྱོགས་ཕོག་པ་ཙམ་གྱིས་ཀྱང་འཁོར་བ་མཐའ་ཅན་དུ་བསྙིལ་ཞིང་གནས་སྐབས་ཙམ་དུའང་འཇིག་རྟེན་གྱི་རྒུད་པ་སེལ་བ་དང་བཀྲ་ཤིས་པའི་དགེ་མཚན་མངོན་པར་འདུ་ཞིང་ས་དགྲ་དང་གནོད་སྦྱིན་གདུག་པའི་ཁ་གནོན་དུའང་བསྔགས་པས་ནོར་བུའི་ནང་ནས་དབང་གི་རྒྱལ་པོ་ལྟ་བུར་གྱུར་པ་ནི་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རང་གཟུགས་རྒྱལ་བའི་མཆོད་རྟེན་ཆེན་པོ་ཡིན་པའི་ཚུལ་གསང་བ་འདུས་པ་ལས། མཆོད་རྟེན་སངས་རྒྱས་ཐམས་ཅད་ཀྱི། །བཞུགས་གནས་ཕོ་བྲང་ཡིན་པར་བཤད། །ཅེས་སོ། །དེའི་ཕྱིར་མཆོད་རྟེན་བྱང་ཆུབ་མཐོང་གྲོལ་ལམ་བཀྲ་ཤིས་རྣམ་རྒྱལ་དགེ་འཕེལ་ཇི་ལྟར་བཞེངས་པ་ནི། སློབ་དཔོན་ཀླུ་གྲུབ་སྙིང་པོས། མཆོད་རྟེན་གཟུངས་རྣམས་མས་ཡར་གཞུག །ཅེས་གསུངས་པ་ལྟར་དང་པོར་གཟུངས་ཀྱི་བྱ་བ་རྣམས་ཉེར་བསྡོགས་སྔོན་དུ་གྲུབ་དགོས་པའི་ཕྱིར། ནང་བཞུགས་ཀྱི་སྙིང་པོར་རྒྱལ་བ་འོད་མཚན་སྟོང་འབར་གྱི་སྣང་བརྙན་འཕྲུལ་ཆེན་པར་གྱི་སྒྱུ་འཕྲུལ་ལས་བསྒྲུབ་ཕྱིར། བཟོ་བོ་དང་སྐུ་རྒྱུ་བྱིན་བརླབས་ལ་ཞིབ་མོ་རྣམ་པར་འཐག་པའི་བརྩོན་འགྲུས་
རང་ཉིད་ཀྱི་ལག་ཏུ་བསྟར་ཞིང༌། བདུད་རྩི་སྨན་གྱི་ཕབས་ཀྱིས་བྲན་པའི་འཇིམ་པ་རིན་པོ་ཆེའི་ངོ་བོར་བསྒྲུབས་པ་ལ། སྡོམ་པའི་ཚུལ་ཁྲིམས་ལ་ལེགས་པར་གནས་ཤིང་བསྐྱེད་རྫོགས་ལ་མོས་པས་དཔྱོད་པའི་གང་ཟག་གསུམ་གྱིས་ཟླ་བ་གཉིས་སུ་ཉེ་བའི་ཁོངས་སུ་སྐུ་རྐྱང་པ་འབུམ་ཐེར་གཅིག་དང་ལྔ་སྟོང་བརྒལ་བ་གྲུབ་བོ། །དེ་ལྟར་གྲུབ་པ་ལ་སྦྱངས་ཁྲུས་སྔོན་དུ་འགྲོ་བས་མགོན་པོ་ཚེ་མཐའ་ཡས་པའི་ཕྲིན་ལས་ཀྱི་གཞུང་བསྲངས་ཏེ་ཆོ་ག་ཉུང་ངུ་ལ་བརྟེན་པའི་རབ་ཏུ་གནས་པ་ཡང་བགྱིས་སོ། །དེའང་མཆོད་རྟེན་གྱི་ནང་གཟུངས་ཀྱི་གཙོ་བོ་སྲོག་ཤིང་དང་ཡུངས་འབྲུ་ལྟ་བུའི་རིང་བསྲེས་ཡིན་པའི་ཚུལ་འཕགས་པ་རྨད་དུ་བྱུང་བའི་མདོར། ཀུན་དགའ་བོ་འཛམ་བུའི་གླིང་ཡང་ལྟ་ཞོག །ཤར་གྱི་ལུས་འཕགས་གླིང་ཡང་ལྟ་ཞོག །ནུབ་ཀྱི་བ་གླང་སྤྱོད་ཀྱང་ལྟ་ཞོག །བྱང་གི་སྒྲ་མི་སྙན་ཡང་ལྟ་ཞོག །ལྷའི་དབང་པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བྱེད་ཅེས་བྱ་བ་ཡང་ལྟ་ཞོག །ཀུན་དགའ་བོ། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཡོད་དེ། དེ་རིགས་ཀྱི་བུའམ། རིགས་ཀྱི་བུ་མོ་དད་པ་གང་ལ་ལ་ཞིག་གིས་རིན་པོ་ཆེ་སྣ་བདུན་གྱི་རང་བཞིན་དུ་བྱས་ཏེ། རྒྱུན་དུ་ཞུགས་པ་རྣམས་དང༌། ལན་ཅིག་ཕྱིར་འོང་བ་རྣམས་དང༌། ཕྱིར་མི་འོང་བ་རྣམས་དང༌། དགྲ་བཅོམ་པ་རྣམས་དང༌། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་བས་
གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་སྐྱུ་རུ་རའི་འབྲུ་ཙམ་དུ་བྱས་ལ། ཁབ་ཙམ་གྱི་སྲོག་ཤིང་བཙུགས་ཏོ། །རྒྱ་ཤུག་གི་ལོ་མ་ཙམ་གྱིས་གདུགས་གསོལ་ནས། ནས་ཀྱི་འབྲུ་ཙམ་གྱི་སྐུ་གཟུགས་བྱས་ལ། ཡུངས་འབྲུ་ཙམ་གྱི་རིང་བསྲེལ་བཅུག་ན་དེ་ནི་དེ་བས་བསོད་ནམས་ཆེའོ། །ཞེས་སོ། །དེའི་ཕྱིར་སྲོག་ཤིང་བརྟན་པར་བྱ་བ་དང༌། ཆོས་སྐུའི་རིང་བསྲེལ་གཟུངས་སྔགས་རྣམས་ཀྱི་ངོ་བོ་ཆོས་དཀོན་མཆོག་གི་རང་བཞིན་ནི་ཡི་གེའི་སྦྱོར་བ་ལ་རག་ལུས་པ་སྙན་གྱི་གོང་རྒྱན་དུ། ལྔ་བརྒྱ་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པར་བགྱི། །ཞེས་བསྔགས་པའི་ཕྱིར་དེའི་རྣམ་པར་འགྱུར་བ་ལ། འཇམ་པའི་དབྱངས་ཐུ་མི་སཾ་བྷོ་ཊའི་བཞེད་པས་མཚོན་བྱ་དོན་གྱི་ཚིག་ལ་སུམ་རྟགས་ལ་སོགས་པའི་ངེས་པས་བརྡ་དག་སྡེབ་སྦྱོར་གྱི་རང་བཞིན་ཕྲ་ཞིབ་དང༌། མཚོན་བྱེད་དཔེའི་ཡི་གེ་ལ་མཚན་ཉིད་གདོན་པ་བཅུ། གཅེས་སོ་བརྒྱད། མགོ་དང༌། དཔུང་པ་དང༌། ཟག་མཆུ་དང༌། ཡར་འཐེན་དང༌། མར་འཐེན་དང༌། མིག་བུ་སྟེ། རེ་རེ་ལའང་གསུམ་ཚན་གསུམ་གྱིས་བྱེ་བྲག་ཕྱེ་བའི་ཆོས་ཉི་ཤུ་རྩ་གཅིག་དང༌། རྣ་རུའི་ཆོས་གསུམ། འགྲེང་བུའི་ཆོས་གསུམ།
གི་གུའི་ཆོས་གསུམ། ར་བཏགས་ཀྱི་ཆོས་གཉིས། ཡ་བཏགས་ཀྱི་ཆོས་གསུམ་སྟེ་བུ་ཆོས་བཅུ་དྲུག་དང༌། སྤྱིའི་ཆོས་གསུམ་སྦོ་དང་བཅས་པ་སྟེ་རགས་པར་ཆོས་བཞི་བཅུའི་མཚན་ཉིད་ཅན་དང་ཞིབ་པར་ཐིག་གི་ཆས་ཕྲ་མོར་བྱས་པའི་ཚུལ་སྔོན་གྱི་ལོ་ཙཱ་བ་ཆེན་པོ་སྐ་བ་དཔལ་བརྩེགས་ཀྱི་རྒྱུན་ཕྱི་མཐར་བྱཉྫནའི་རིང་ལུགས་འཛིན་པ་རྣམས་ཀྱི་ཕུལ་དུ་གྱུར་པ་ཁྱུང་པོ་གཡུ་ཁྲིས་ཐིག་རིས་སུ་བཏབ་པ་ལ། མཁས་མཆོག་རོང་པོས་ལྷན་ཐབས་ཀྱི་དག་སྦྱོར་མཛད་པའི་ལེགས་པར་བཤད་པ་གང་གི་གཞུང་ལུགས་ལ་རང་བཞིན་གྱི་བག་ཆགས་དཀར་བ་རང་ཉིད་ཀྱིས་སྲོག་ཤིང་རྣམས་ཀྱི་གཙོ་བྱས། གནོད་སྦྱིན་བང་མཛོད་ཀྱི་རྒྱབ་བརྟེན་དུ་བླ་མ་དགོངས་པ་འདུས་པ་དང༌། རྟ་མཆོག་རོལ་པ་ལྟོ་སྦྱར་བའི་ཁྱད་པར་གྱི་མན་ངག །དགེ་འདུན་གྱི་སྡེ་གསོ་བ། གསང་སྔགས་ཀྱི་ཐེག་པ་སྤེལ་བ། རྒྱལ་པོའི་མངའ་ཐང་བསྐྱེད་པ། སྐྱེ་བོའི་འདུ་ཚོགས་རྒྱས་པ། ཡ་རབས་ཀྱི་རིགས་བརྒྱུད་སྤེལ་བ། ཟབ་མོའི་ཆོས་བརྒྱུད་སྤེལ་བ། ཚེ་དང་ཡེ་ཤེས་རྒྱས་པ། ནོར་དང་ལོངས་སྤྱོད་སྤེལ་བ། དགྲ་ལྷའི་མཐུ་རྩལ་གསོ་བ་ལྷ་ཀླུའི་འཁོན་སེལ་བ། སྙན་ཅིང་གྲགས་པ་སྤེལ་བ། སའི་བཅུད་གསོ་བ། ཡུལ་གྱི་ནད་ཡམས་གཅོད་པ། དུས་ཀྱི་འཁྲུག་པ་ཞི་བ། གཞན་གྱི་བྱད་ཁ་བསྡམ་པ། རྦོད་གཏོང་དམིགས་ཁ་བསྒྱུར་བ། ཤི་སྒབ་གཅོད་པ། སྲི་ཀེག་སྒྲོལ་བ། སྡིག་
ཅན་ལོག་ཤེས་བསྒྱུར་བ། ཡུལ་གྱི་ཀླུ་བྲན་གསོ་བ། སྤྱི་ཆིངས་འབྱུང་བ་དཔལ་བསྐྱེད་དེ། སྣོད་བཅུད་ཀྱི་ལེགས་ཚོགས་སྤེལ་བའི་འཁོར་ལོ་ཉི་ཤུ་རྩ་གཅིག་མན་ངག་གི་གནད་དང་ལྡན་པའི་རྩིབས་དང་མུ་ཁྱུད་ཀྱི་ཟ་མ་ཏོག་ཏུ་འཕྲུལ་ཡིག་གསེར་གྱི་པ་ཏྲའི་ཕྲ་ཚོམ་བཀོད་པའི་སྦྱོར་བ་ལ་ཞུགས་སོ། །གང་གི་ཚེ་གྲོགས་ཉེ་བར་འཁོད་པ་རྣམས་ལ་རྣམ་པར་ཤེས་པ་ལས་སུ་མི་རུང་བ་སོ་སོའི་སྐྱེ་བོའི་མཚན་ཉིད་ཡིན་ཕྱིར་ཡིད་གཞུངས་པར་ནན་ཏན་གྱིས་བསྐུལ་ནས་དངོས་གཞིའི་གཟུངས་ཀྱི་བྱ་བ་རྣམས་ཤོག་བུ་བཅུ་ལྟེབ་བརྒྱ་ཕྲག་གཉིས་ལ་འཕྲུལ་ཆེན་བར་གྱི་ཆོ་འཕྲུལ་ལས་ལེགས་པར་བསྒྲུབས་ནས་དྲི་བཟང་བསྐུ་བ་དང༌། མུ་འཐུད་པ་དང་བསྒྲིལ་བ་ཡན་ཆད་ལོ་བཏུབ་ཏུ་མ་སོང་བ་གཟུངས་འབུལ་གྱི་གཞུང་ལྟར་ཉེ་བར་བསྡོགས་སོ། །དེ་ནས་དངོས་གཞི་ཇི་ལྟར་བརྩམས་པའི་དུས་ངེས་པ་ནི། རྒྱལ་བ་བུ་རམ་ཤིང་པའི་འཁྲུངས་ལོ་དང་གཤེགས་ལོ་སོགས་ལ་རྒྱ་བལ་ཁ་ཆེའི་པཎྜི་ཏ་མང་པོ་ཞལ་མི་འཆམ་པ་འདུག་ཀྱང༌། དེ་ཐམས་ཅད་དཔལ་དུས་ཀྱི་འཁོར་ལོའི་ཞག་གསུམ་རྣམ་གཞག་གི་ཆོ་གར་བརྟེན་པའི་དུས་ཚིགས་རྟག་པའི་འགྲོས་ཅན་གྱི་གཏན་ཚིགས་དང༌། རྒྱལ་བའི་གསུང་རབ་ཀྱི་ལུང་དོན་རྒྱ་མཚོ་ལྟོ་སྦྱར་བའི་དཔྱད་པ་གསུམ་གྱི་སྲང་ལ་ལེགས་པར་བཏེག་པའི་ལམ་དྲང་པོ་ནས་ཕྱིན་པར། བདག་ཅག་གི་སྟོན་
པ་དྲག་པོ་ལྕགས་སྤྲེའུ་ས་ག་ཟླ་བའི་བཟང་པོ་གཉིས་པའི་ཚེས་བདུན་གྱི་ཟླ་སྐར་རྒྱལ་ལ་བབ་པའི་དུས་ན་མངལ་གྱི་སྒྲིབ་པ་དང་བྲལ་བར་སྐུ་བལྟམས་ནས་ཟླ་བའི་ཕུང་པོ་དུས་མིག་༢༧༢༦འཁོར་ལོའི་ནར་སོན་པ། ཤར་ཕྱོགས་ཏང་ཀུན་རྒྱལ་པོའི་ཁབ་ཏུ་ཡི་ཡིའུ། སྲོག་གི་ཟུངས་གནམ་ལྕགས་ཞུན་མའི་རང་བཞིན་དུ་ལྕི་ཞིང་འཐས་ལ། ལུས་ལ་དལ་འགྲོའི་ཁམས་ཀྱིས་བརླན་པ། དབང་ཐང་ལྗོན་པའི་ཡ་ལད་གོས་སུ་མནབས་ཤིང༌། རླུང་རྟ་ཚངས་པའི་རལ་ཀླུང་སྐ་རགས་སུ་བཅིངས་ནས་ནམ་མཁའ་ལྡིང་གི་བཞིན་རས་རྔམ་པས་གངས་ཅན་པ་རྣམས་ཤིང་མོ་བྱ་ལོར་གླེང་ཞིང་བདག་ཉིད་སུམ་ཅུ་རྩ་བདུན་པའི་ལོ། འབྱུང་རྩིས་གླིང་དགུའི་དབུས་ན་གཅིག་དཀར་འཚོ་ཞིང་འབྱུང་བ་སུམ་ལྡན་ཁ་རལ་གྱི་ལོ་དྲང་སྲོང་ལྷའི་བླ་མའི་ཀླུངས་སུ་གྱུར་པ་ལས། ཉིན་མོར་བྱེད་པ་ངལ་བསོས་བུས་ཉེ་བར་བསྲུངས་པའི་ཕྱོགས་ག་ལ་བ་དེར་མངོན་པར་རྒྱུ་བས་དཀར་པོའི་ཕྱོགས་ཀྱི་བྱ་བ་ལས་ཀྱི་འཁོར་ལོ་དགེ་ལེགས་སྟེར་བའི་གནས་སྐབས་ཞག་གི་ཕུང་པོ་བཅུ་གཉིས་ལས་ས་གས་ཉ་བའི་ཟླ་བ། དུས་བཞིའི་འཁོར་ལོ་དཔྱིད་ཟླ་ཐ་ཆུང་ལ་བབས་པ། ཡར་ངོ་སྔོན་འགྲོ་ཉིན་བྱེད་དབང་པོ་གླང་གི་ཁྱིམ་ན་སྤྱོད་པའི་དུས། གཙུག་ན་ཟླ་བ་དང་དུས་ཀྱི་འཁོར་ལོ་སོ་སོའི་ལུགས་ཀྱི་ཚེས་ལ་འཆར་བའི་དབྱངས་དང་གསལ་བྱེད། འབྱུང་བ་ལྔ། ཚེས་གྲངས་དར་གུད།
འདོད་པའི་ཡོན་ཏན། སྤར་སྨེ། གཟའ་སྐར་འཕྲོད་ཆེ་ཆུང༌། དུས་སྦྱོར་གྱི་ཏཱརྐ་ལ། བྱེད་པ་མཐའ་དག་དགེ་ལེགས་ཀྱི་སྦྱོར་བ་ལ་གཅིག་ཏུ་རྩེ་ཞིང༌། འདྲེན་པ་ཟས་གཙང་སྲས་པོ་ཡུམ་སྒྱུ་འཕྲུལ་མའི་ལྷུམས་ཀྱི་པདྨོ་ལས་རྣམ་པར་གྲོལ་བའི་བཟང་པོའི་དུས་ཆེན་གྱི་ཉིན། མདུན་ངོས་ས་གཞི་ལག་མཐིལ་ལྟར་མཉམ་པའི་ངོས་ཡངས་པར་ས་བརྟག་པ་དང༌། བླང་བ་དང༌། སྦྱང་བ་དང༌། གཟུང་བ་དང༌། བསྲུང་བ་ལ་སོགས་པ་སའི་ཆོ་ག་རྣམས་སྔོན་དུ་བཏང་ཞིང་ཞི་བའི་སྦྱིན་བསྲེག་གིས་ས་གཞི་ལས་སུ་རུང་བར་བྱས་ནས་རང་ལུགས་ཀྱི་ཐིག་རྩ་སོར་བཞག་སྟེ་མཆོད་རྟེན་བྱང་ཆུབ་མཐོང་གྲོལ་བཞེང་བའི་བྱ་བ་ལ་ཞུགས་སོ། །སྤྱིར་མངའ་རིས་ལ་དབང་བ་ཕལ་ཆེད་རང་ཞབས་པ་རྣམས་འཚོ་བའི་ཟས་སྐོམ་ཚུན་ཆོད་རྒྱགས་ཕྱེ་རང་ཁུར་གྱི་ཁྲལ་ལ་བརྟེན་པའི་འུ་ལག་གི་སྦྱོར་བས་རྒྱུ་སོང་གི་འབྲས་བུ་ལ་བརྟག་ཏུ་མེད་པར་ས་རྡོའི་ཕུང་པོས་ཇི་མི་སྙམ་པའི་ལམ་སྲོལ་གྱིས་བསྒྲུབས་པ་ནི། རྣམ་པར་དགེ་བའི་ལས་ལྟར་སྣང་ཡང་གཞན་རྒྱུད་མནར་སྤྱོད་ཀྱི་སྡུག་བསྔལ་ལ་སྤྱོད་ཅིང་རྒྱུ་དེས་རང་རང་གི་དགེ་ཚོགས་ཀྱང་ལས་དཀར་ལ་རྣམ་སྨིན་གནག་པ་འདི་ནི་ཤིན་ཏུའང་བག་ཚ་བའི་གནས་སུ་མཐོང་ངོ༌། །དེའི་ཕྱིར་དཀོན་མཆོག་གསུམ་རྗེས་སུ་དྲན་པ་ལས། དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་
དགེ་བ། ཞེས་པས་མཚོན་ཏེ་ནང་པ་སངས་རྒྱས་པའི་བྱ་བ་ལ་ཆོས་བརྒྱད་བྱ་བའི་སྒྲ་མི་འཇུག་པའི་ཕྱིར་སྔར་གནས་རྟེན་གྱི་གཞི་བཟུང་བ་ཚུན་ཆོད་ནས་རིགས་པ་མ་ཡིན་པའི་གནས་ལ་ཞིབ་མོར་དཔྱད་ནས་གང་གིས་དང་བ་སྟོན་པ་དེ་དག་བཟའ་བཏུང་གི་འཚོ་བ་གྱ་ནོམ་པས་ཡིད་རབ་ཏུ་དགའ་བར་བྱས་རྗེས། བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། གཞན་ལ་གཞན་བསྐུལ་འདེབས་མཁས་ཤིང༌། །མ་བཅོལ་ཕན་པར་བྱེད་པའི་ངག །གུས་པས་སྤྱི་བོར་བླང་བྱ་སྟེ། །རྟག་ཏུ་ཀུན་གྱི་སྒྲོན་མེར་འགྱུར། །ཞེས་པ་ལྟར་བརྩམ་པར་བྱ་བའི་ལས་གང་ཡིན་པ་གཞན་གྱི་ཁུར་དུ་མི་འགྲོ་བའི་རྒྱུ་ནི་སྐྱེ་བོ་ཞོ་ཤས་འཚོ་བ་རྣམས་ཀྱི་གཉའ་བ་ན་ཁུར་དུ་ལྕི་བའི་ས་རྡོའི་ལས་མཐའ་ཡུན་ཐུང་ངུ་ལ་ལྟོས་པའི་ཕྱིར་དང༌། བདག་ཅག་ནི་མངའ་རིས་རྒྱ་ཆེན་པོ་ལ་བཙན་པོའི་ལུང་གིས་རང་གིར་བགྱིད་པ་ཡང་མ་ཡིན་ལ། གཏོང་བ་ཉམ་ཆུང་ལ་གྲུབ་འབྲས་ཆེན་པོ་ཐོབ་པའི་རློམ་སེམས་དགེ་བར་སྒོམ་པ་ཡང་མ་ཡིན་པས། ནང་གཟུངས་ཚོགས་ཆེ་ཞིང་ཁྱད་པར་འཕགས་པས་ཕྱུར་བུ་དགང་ཐུབ་པ་དང༌། གཞིའི་གོ་ཡུལ་ལ་དཔགས་པའི་རྒྱ་ཁྱོན་འཚམས་པ་ཡིད་ལ་གཞག་ཅིང༌། དེ་ཡང་མཉེན་ཞིང་ཡི་གར་འཇུག་པའི་ལུང་འཇམ་པོས་ཐོག་མཐའ་བར་གསུམ་གྱི་ལས་བྱེད་པ་རྣམས་ཡི་རངས་
པར་བགྱིས་པས་གླུ་གར་དང་རྩེད་འཇོའི་ངང་ལས་དོན་དུ་གཉེར་བ་གང་ཞིག་མིག་འཕྲུལ་ལྟར་གྲུབ་བོ། །དེ་ལྟར་གྲུབ་ནས་ཀྱང་དེ་མ་ཐག་པའི་ཚེས་བཅོ་ལྔའི་དུས་ཆེན་གསུམ་འཛོམ་ཉིན་དམིགས་བསལ་མཆོད་རྟེན་གྱི་རབ་གནས་རིན་པོ་ཆེའི་དྲྭ་བ་ལ་བརྟེན་ནས་རབ་ཏུ་གནས་བྱའི་ཡེ་ཤེས་ཀྱི་ངོ་བོ་བདག་ཉིད་ཀྱིས་ཇི་ལྟར་རྟོགས་པ་བཞིན་བཞུགས་པ་ཡིན་ནོ། །གཟུངས་ཀྱི་ངེས་པ་ཇི་ལྟར་བཞུགས་པ་ནི། སེང་ཁྲིའི་ཆར་གནོད་སྦྱིན་བང་མཛོད་སྲིད་པའི་ཕུན་ཚོགས་ཀྱི་དཀོར་ཆས་གཏམས་པའི་གཏེར་བུམ་ལྔ་དང༌། དེའི་རྒྱབ་བརྟེན་ཡིད་བཞིན་ནོར་བུ་ལྟ་བུའི་འཁོར་ལོ་ཉི་ཤུ་རྩ་གཅིག་གོ་རིམ་མ་འཆོལ་བར་རྟེན་འབྲེལ་གྱི་བཅའ་གའི་གནད་དང་བཅས་འདུ་བགྱིས་ཤིང༌། སྲོག་ཤིང་ལ་ཐེག་མཆོག་རྫོགས་པ་ཆེན་པོའི་རིག་འཛིན་བརྒྱུད་པའི་མཚན་སྔགས་དང་སངས་རྒྱས་སྲས་གཅིག རྒྱུད་སྡེ་སྒྱུ་འཕྲུལ་དང་མདོ་སེམས། སྒྲུབ་སྡེ་བཀའ་བརྒྱད་ཀྱིས་མཚོན་པའི་ཡི་དམ་ཞི་ཁྲོའི་སྙིང་པོ་དང༌། ཡི་དམ་ཆོས་སྐྱོང་གི་གཟུངས་དང་བཅས་པའི་བར་མཚམས་ཀུན་ཏུ་དམིགས་བསལ་སྲོག་ཤིང་བརྟན་པའི་སྔགས་ཅི་མང་འདོད་གསོལ་དང་བཅས་པ་བྲིས་ཤིང༌། དམ་རྫས་ཁྱད་པར་ཅན་གྱིས་བྱུགས་པ་ལ་མདོ་སྒྱུ་སེམས་གསུམ་ལ་སོགས་པའི་སྔ་འགྱུར་གྱི་རྒྱུད་སྡེ་རབ་འབྱམས། བདེ་ཀྱེ་གསང་གསུམ་དང་དུས་ཀྱི་འཁོར་
ལོས་མཚོན་ཕྱིན་ཆད་བོད་དུ་གསང་སྔགས་འགྱུར་རོ་འཚལ་གྱི་རྩ་སྔགས་དང་ཉེ་སྙིང༌། གཟུངས་ཆེན་སྡེ་ལྔས་མཚོན་མདོ་གཟུངས་ཀྱི་རིགས་གཏོས་ཆེ་བ། ཡིག་དྲུག་དང་རྡོ་རྗེའི་བླ་མའི་སྙིང་པོ་ཁྲི་ཕྲག་ཏུ་ལངས་པ། རྩེར་དེ་བཞེན་གཤེགས་པའི་ཡུངས་འབྲུ་ལྟ་བུའི་རིང་བསྲེལ། བྲེ་མགུལ་དུ་བདེ་སྟོང་ཆེན་པོའི་རིལ་བུ་ཨ་རྒྱ་ཅན། བུམ་པའི་ནང་དུ་སྐུ་རྟེན་ལྗོན་དམར་ལས་གྲུབ་པའི་རྗེ་བཙུན་འཇམ་དཔལ་དབྱངས། ལྷོ་ལི་ལས་གྲུབ་པའི་ཨོ་རྒྱན་ཆེན་པོ། སྨན་འདམ་གྱི་ཇོ་བོ་རྗེདང༌། ཀུན་མཁྱེན་ཆེན་པོ། གསུང་རྟེན་རྡོ་རྗེ་གཅོད་པ། གཏེར་བྱོན་གྱི་ཤོག་སེར་ངོ་མཚར་ཅན་རྣམས་གྲངས་བདུན། ཐུགས་རྟེན་བྱང་ཆེན་མཆོད་རྟེན། ཡོན་ཏན་གྱི་རྟེན་རིས་སུ་མ་ཆད་པའི་སྐྱེས་ཆེན་དམ་པ་རྣམས་ཀྱི་ན་བཟའ་དང༌། སྐུ་བལ་གྱི་རིང་བསྲེལ་རིན་པོ་ཆེའི་ཟ་མ་ཏོག་ཏུ་གཏམས་པ། ཕྲིན་ལས་ཀྱི་རྟེན་ཕུར་པ་བྱིན་ཅན་རྣམས་མཆོད་རྟེན་གྱི་གཟུངས་གཞུག་བྱ་བའི་རིམ་པ་སློབ་དཔོན་ཛེ་ཏ་རིའི་རྒྱ་གཞུང་སོར་བཞག་ནས་སྲོག་ཤིང་གི་ངོས་ལ་སྟེང་འོག་མ་འཆོལ་བར་དཔྱངས་པ་གང་ཞིག །དགེ་བཅུའི་སྟེང་ནས་དྲང་པོར་བསྲངས་ཏེ་དྲི་མེད་རྣམ་གཉིས་ཀྱི་སྒོ་ནས་སྲོག་ཤིང་བརྟན་པའི་ཆོ་ག་མཁན་པོ་ཞི་བ་འཚོའི་ལུགས་ལྟར་མངའ་གསོལ་བའི་ཚེ། མེ་ཏོག་གི་ཆར་བཟུང་དུ་བཏུབ་པ་ཁོལ་བུར་བབས་ཤིང༌། སྣང་སྲིད་མ་ལུས་
པ་དེ་བཞིན་གཤེགས་པའི་རྣམ་པ་ཐམས་ཅད་པའི་མཆོད་སྡོང་ཉག་གཅིག་ཏུ་རྫོགས་པའི་དག་པ་རབ་འབྱམས་ཀྱི་སྣང་བ་ལའང་སྤྱོད་དོ། །དེ་དག་གི་སྟེང་འོག་བར་མཚམས་མ་ལུས་ཤིང་ལུས་པ་མེད་པ་ཐམས་ཅད་མགོན་པོ་ཚེ་མཐའ་ཡས་པའི་སྣང་བརྙན་འབུམ་ཐེར་ལྷག་བཅས་ཀྱི་འཕྱུར་བུར་གཏམས་ཤིང༌། རྟེན་འབྲེལ་དེ་དག་ལས་འགྲོ་བ་སུ་ཞིག་བསྟི་སྟང་དང་རིམ་གྲོ། བསྐོར་བ་བྱས་པ་རྣམས་གནས་སྐབས་སུ་ཚེ་རིང་ཞིང༌། ཡོན་དུ་སྦྱོར་བའི་ཆབ་སྲིད་བརྟན་པ་དང༌། མཐར་ཐུག་བདེ་བ་ཅན་གྱི་ཞིང་ཁམས་བླ་ན་མེད་པར་དབུགས་དབྱུང་བའི་ལུང་བསྟན་ཐོབ་པ་ཡིན་ལ། ཁྱད་པར་དུ་ཕྱི་ནང་གི་རྟེན་བཞེང་པའི་བྱ་བ་ལ་སྒོ་གསུམ་གྱི་འབྲེལ་བ་ཐོགས་པ་ཡན་ཆོད་དོན་ཆེན་པོ་དང་ལྡན་པའི་ཚུལ་ལས་རྣམ་པར་འབྱེད་པའི་མདོར། བྲམ་ཟེ་ཁྱེའུ་ནེ་ཙོ་ལ་བཀའ་སྩལ་པ། དེ་བཞིན་གཤེགས་པའི་མཆོད་རྟེན་བཞེངས་པའི་ཕན་ཡོན་བཅོ་བརྒྱད་ཡོད་དེ། བཅོ་བརྒྱད་པོ་གང་ཞེ་ན། རྒྱལ་པོའི་ཁྱིམ་དུ་སྐྱེ་བ་དང༌། གཟུགས་བཟང་བ་དང༌། མཛེས་ཤིང་མིག་ཏུ་སྡུག་པར་འགྱུར་བ་དང༌། རྟེན་དུ་འགྱུར་བ་དང༌། ཕྱོགས་བཅུར་བརྗོད་པ་དང༌། སྒྲ་དང་ཚིགས་སུ་བཅད་པ་རྒྱ་ཆེན་པོར་མངོན་དུ་འབྱུང་བར་འདོད་པ་དང༌། ལྷ་དང་མིས་མཆོད་པར་འགྱུར་བ་དང༌། ནོར་མང་པོ་དང་ལྡན་པར་འགྱུར་བ་དང༌། ཚེ་དང་ལྡན་པར་འགྱུར་བ་དང༌། ལུས་རྡོ་རྗེའི་ཚོགས་ལྟར་འགྱུར་བ་དང༌།
ལུས་མཚན་དང་དཔེ་བྱད་ཀྱིས་བརྒྱན་པར་འགྱུར་བ་དང༌། མཐོ་རིས་སུ་སྐྱེ་བར་འགྱུར་བ་དང༌། མྱུར་དུ་ཡོངས་སུ་མྱ་ངན་ལས་འདའ་བར་འགྱུར་བ་སྟེ། བཅོ་བརྒྱད་པོ་དེ་དག་ནི་དེ་བཞིན་གཤེགས་པའི་མཆོད་རྟེན་བཞེངས་པའི་ཕན་ཡོན་ཡིན་ནོ། །ཞེས་སོ། །མདོར་ན་གངས་རིའི་ཁྲོད་འདི་སྔོན་ཆད་མི་ཁོམ་པའི་གནས་རིགས་ཆེན་པོར་གྱུར་ལས་ཆོས་རྒྱལ་མེས་དབོན་རྣམ་གསུམ་གྱི་བཀའ་དྲིན་ལ་སངས་རྒྱས་ཀྱི་བསྟན་པ་དར་བའི་མཐུས་ཆོས་དང་ཆོས་ཀྱི་གང་ཟག་ཡོད་ཅིང་བླུན་པོ་བ་ལང་རྫི་བོ་ལྟ་བུས་ཀྱང་དགེ་སྡིག་གི་གཏམ་ཅོལ་ཙམ་སྒྲོག་པར་ཤེས་ན། འཁོར་བ་དང་ངན་སོང་གི་འཇིག་པས་སྐྲག་ནས་རེ་བའི་ཡུལ་དཀོན་མཆོག་ཏུ་ཤེས་པ་རྣམས་ཀྱིས་གནས་རྟེན་འདི་དག་ལ་རིམ་གྲོ་བསྐྱེད་ནས་བདེ་ལེགས་ཐམས་ཅད་ཀྱི་འབྱུང་གནས་སུ་ཤེས་པར་བྱའོ། །བླ་མར་བྱའོ། །རི་མོར་བྱའོ། །མཆོད་པར་བྱའོ། །དེ་ལྟར་བྱས་པ་ལ་བསོད་ནམས་ཀྱི་ཁྱད་པར་ཇི་ལྟ་བུ་ཐོབ་ན་རྒྱལ་བ་དངོས་ལ་བསྙེན་བཀུར་བྱས་པ་དང་མཉམ་པའི་ཚུལ་དྲང་སྲོང་རྒྱས་པས་ཞུས་པ་ལས། དྲང་སྲོང་ཆེན་པོ་གང་ལ་ལ་ཞིག །བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང༌། ད་ལྟ་བཞུགས་པ་ལ་མཆོད་པ་བྱེད་པ་དེའི་ཕན་ཡོན་རྣམས་ནི་མཚུངས། མཉམ་ཞིང་འདྲའོ། །ཞེས་ང་འཆད་དོ། །དེ་ཅིའི་ཕྱིར་ན། དེ་བཞིན་གཤེགས་པ་
རྣམས་ནི་ཆོས་ཀྱི་སྐུས་རབ་ཏུ་ཆེ་བ་མིན་གྱི། གཟུགས་ཀྱི་སྐུས་རབ་ཏུ་ཆེ་བ་ཡིན་པའི་ཕྱིར་རོ། །གང་ལ་ལ་ཞིག་ང་འདུག་པའམ། ཡོངས་སུ་མྱ་ངན་ལས་འདས་པ་ལ་མཆོད་ན་སེམས་མཚུངས་པའི་ཕྱིར་འདི་གཉིས་ལ་བསོད་ནམས་ཀྱི་ཁྱད་པར་ཅུང་ཟད་ཀྱང་མེད་དོ། །ཞེས་སོ། །དེ་ལྟ་བུའི་དགེ་ཚོགས་རིན་པོ་ཆེའི་ཕུང་པོ་སྒྲུབ་པའི་བྱ་བ་མཐར་མ་ཕྱིན་པ་དེ་སྲིད་དུ་ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པས་དབྱིངས་ནས་དགྱེས་པའི་ཡེ་ཤེས་ཀྱི་སྤྱན་རས་འགོག་ཏུ་མེད་པ་གཟིགས་པས། གཞན་འཕྲུལ་དབང་བྱེད་ཀྱི་བདག་པོ་སྤྲུལ་པ་དང་བཅས་པ་ལེགས་པའི་དཔལ་ལ་སྡང་བ་ཐམས་ཅད་བསླུ་བྲིད་ཀྱི་གོམ་པ་གྱ་གྱུར་འདོར་ཞིང་རྒྱུ་བའི་སྐབས་བཅད་པས་ཞི་བ་དང་བདེ་ལེགས་ཆེན་པོའི་ངང་ནས་རྩོམ་པའི་བྱ་བ་གང་ཡིན་པ་མཐར་ཕྱིན་ཏོ། །དེ་ལྟར་མཐར་ཕྱིན་ནས་ཀྱང་རྒྱུད་ལས། ཆོ་ག་དང་ནི་ནུས་པ་ཡི། །བརྟག་པ་ལས་གསུངས་ཚུལ་ལེགས་པ། །དེས་བྱས་བསོད་ནམས་ཆེ་བ་ཡིན། །ཞེས་དང༌། སློབ་དཔོན་ཆེན་པོས། ཕྱི་རབས་རྟེན་གསུམ་བཞེང་པ་རྣམས། །གྲུབ་དང་རབ་གནས་དུས་མཉམ་བྱ། །ཞེས་གསུངས་པ་ལྟར་དེ་མ་ཐག་པའི་གནས་སྐབས་སུ་བླ་མ་རིག་འཛིན་ཀུན་འདུས། སྒྲུབ་ཆེན་བཀའ་བརྒྱད་བདེ་གཤེགས་ཡོངས་རྫོགས་འདུས་པའི་དཀྱིལ་འཁོར་ཆེན་པོ་ཞལ་ཕྱེ་ནས་དངོས་སྟ་ཉིན་གཉིས་མའི་
རབ་གནས་དང༌། སླད་མའི་ཆར་ཕྱི་ནང་གི་རྟེན་གསུམ་ཡོངས་རྫོགས་ཚར་ཕྱིན་པ་ན་ལྷག་གནས་ནན་ཏན་ནི་རྟེན་བཞེངས་ཀྱི་དོན་པོ་ཡིན་པས་རབ་ཏུ་གནས་པའི་བྱ་བ་ལ་དགེ་ལེགས་ཀྱི་འབྲས་བུ་སྟེར་བའི་གཟའ་སྐར་བྱེད་སྦྱོར་ཕུན་སུམ་ཚོགས་པའི་ཉིན་རབ་གནས་ཀྱི་ཆོ་གའི་ཡན་ལག་མ་ཚང་བ་མེད་པ་བཀྲ་ཤིས་རྒྱ་མཚོ་ལ་བརྟེན་ནས་སྟ་གོན་གྱི་ཆོས་ཡོངས་སུ་རྫོགས་པས་ཡེ་ཤེས་ཀྱི་འཁོར་ལོ་མདུན་གྱི་ནམ་མཁའ་ལ་བཞུགས་སུ་གསོལ་བ་ལ། དམ་ཚིག་གི་རྟེན་གཙུག་ཏོར་འཁོར་ལོས་སྒྱུར་བའི་དབྱིངས་སུ་བསྲུང་པའི་ཀུན་རྫོབ་དཔེའི་ཆོས་དར་སེར་དགབ་པའི་ཆོ་ག་ཡན་ཆད་ཚང་བར་བགྱིས་ཤིང༌། སང་ནངས་པར་མཆོད་པའི་སྤྲིན་རྒྱ་ཆེན་པོ་དང་བཅས་ཏེ་བཅོམ་ལྡན་འདས་ཐུབ་པའི་དབང་པོས་སུམ་ཅུ་རྩ་གསུམ་དུ་དབྱར་གནས་ཤིང་ཡུམ་གྱི་དྲིན་ལེན་བསབས་ནས་གྲོང་ཁྱེར་གསལ་ལྡན་དུ་ལྷ་ལས་བབས་པའི་དུས་ཀྱི་འགྱུར་བ་ཁྱད་པར་ཅན་དང༌། རྟེན་འབྲེལ་གྱི་ཆོས་ཉིད་མཆོག་ཏུ་དགེ་བའི་དུས་ཚོད་ལ་བབ་པ་ན་གཞི་ཀུན་ཁྱབ་ཆེན་པོ། ལམ་བསྐྱེད་རྫོགས་ཟུང་འཇུག འབྲས་བུ་ལྷུན་གྲུབ་ཆེན་པོའི་གནད་གསུམ་གྱི་མཚན་ཉིད་རྫོགས་པའི་ཆོ་གའི་སྦྱོར་བས་བརྟེན་པ་ཡེ་ཤེས་ཀྱི་འཁོར་ལོ་རྟེན་དམ་ཚིག་གི་གཟུགས་བརྙན་ལ་གཉིས་སུ་མེད་པར་བསྟིམ་པའི་ཚེ། སངས་རྒྱས་ཐམས་ཅད་མངོན་སུམ་པར་
བྱོན་ནོ་སྙམ་པའི་མོས་གུས་ཀྱི་གདུང་བ་དྲག་པོ་དང༌། དེ་དག་ཀྱང་རང་གདངས་འགག་པ་མེད་པའི་རྩལ་དུ་ཤར་བས་དཔའ་བར་འགྲོ་བའི་ཏིང་ངེ་འཛིན་དང༌། སྒྱུ་མ་ལྟ་བུའི་རྩལ་སྣང་མིག་འཕྲུལ་ལྟར་གཡོ་བ་གསུམ་ཕྲུགས་གཅིག་ཏུ་ཚོགས་པའི་དག་པ་རབ་འབྱམས་ཀྱི་སྣང་བས་འོག་མིན་ཆེན་པོའི་ཞིང་ཁམས་ཕྲ་རབ་ཀྱི་རྡུལ་དང་མཉམ་པ་ཡང་བློ་མཚོའི་སྤྱོད་ཡུལ་དུ་སྣང་བ་སྙམ་བྱེད་པའི་རང་སྣང་ལ་རང་གིར་སྤྱོད་དོ། །དེ་ལྟར་དུ་གྱུར་པའི་སྐད་ཅིག་མ་གཉིས་པ་ལ་རབ་ཏུ་གནས་བྱ་གནས་བྱེད་ཀྱི་རྟོག་ཚོགས་མ་ལུས་པ་ཆོས་ཉིད་བསམ་གྱིས་མི་ཁྱབ་པའི་དགོངས་པ་དང་རོ་གཅིག་པ་ནི་དོན་དམ་པའི་རབ་གནས་ཡིན་ཏེ། རྒྱུད་ལས། བསྙེན་རྫོགས་རྟགས་ལྡན་རྣལ་འབྱོར་པས། །གཟིགས་པས་རབ་ཏུ་གནས་པ་ཆགས། །ཕྱི་ནང་སྣང་སྲིད་སྣོད་བཅུད་ཀུན། །ཡེ་ནས་ཆོས་སྐུའི་ངོ་བོར་གནས། །དེར་གཤེགས་དབྱིངས་ལས་མ་གཡོས་ན། །རྣམ་དག་རྟེན་མཆོག་བླ་ན་མེད། །ཅེས་བཤད་པའི་ཕྱིར་རོ། །འདི་ལྟ་བུའི་རབ་གནས་ཕན་ཡོན་གྱི་ངེས་པ་ཡང་རྒྱུད་ལས། རྟེན་དེ་གང་དུ་བཞུགས་ཀྱང་ནི། །འཁོར་དང་ལོངས་སྤྱོད་སྤྲིན་བཞིན་འདུ། །བུ་ཚ་རིགས་བརྒྱུད་ཤིན་ཏུ་འཕེལ། །སྙན་དང་གྲགས་པ་མཁའ་ལྟར་ཁྱབ། །བསམ་གཏན་ཏིང་འཛིན་འཕེལ་བ་དང༌། །འགྲོ་དོན་མང་པོར་བྱེད་པར་ནུས། །བདེ་གཤེགས་
ཉིད་དུ་སྤྱོད་ཡུལ་གཅིག །ཅེས་འདོམས་སོ། །དེའི་ཚེ་མཐའ་རྒྱས་ཀྱི་རིམ་པ་ཡང་རབ་ཏུ་གནས་པའི་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནས་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་བཟོ་གནས་རིག་པ་ལ་གོམས་པ་དག་ནི་མདུན་འཇོག་གྱ་ནོམས་པས་ཚིམ་པར་བྱ་དགོས་པའི་ཡུལ་དུ་གསུངས་པ་ལྟར༌། ལས་འདི་སྒྲུབ་པའི་རིང་ལ་བཟའ་བཏུང་ཕུན་སུམ་ཚོགས་པ་དང་སྟོན་མོའི་བྱེ་བྲག་གིས་ཚིམ་པར་བྱས་ཤིང་མཐར་བྱས་པ་དྲིན་དུ་གཟོ་བའི་ཕྱིར་ཡོན་གྱི་རྣམ་གྲངས་ཤིན་ཏུ་རྒྱས་ཤིང་སྨར་བ་དག་གིས་མགུ་བར་བགྱིས་ལ། རྒྱུད་ལས། དེ་རྗེས་བུ་སློབ་ཡོན་བདག་ལ། །བུམ་དབང་བཀྲ་ཤིས་རྫས་བཞི་དང༌། །སྣ་བདུན་རྫས་བརྒྱད་དབང་བསྐུར་བྱ། །ཚོགས་འཁོར་བཟང་པོས་ཞལ་ཡང་བསྲོ། །བཀྲ་ཤིས་སྐྱིད་པའི་ལྷ་བྲོ་བྱ། །ཞེས་པ་ལྟར་ཡོན་བདག་བསྐོ་བཞག་དང་རྗེས་སུ་འབྲེལ་བར་མཆོད་པ་དང་སྣང་གསལ་གྱི་རྒྱུན་བར་མི་འཆད་དུ་འཛུགས་པས་མཚོན་དགེ་ཚོགས་མཐའ་རྒྱས་ཀྱི་ཕྲིན་ལས་རྣམས་གཏོང་བ་ཕུལ་དུ་ཕྱིན་པའི་སྙིང་སྟོབས་ལ་བདག་གིར་བྱས་ཏེ་སྟོབས་བཅུ་མངའ་བའི་བསྟན་པ་རིན་པོ་ཆེ་ཡུན་དུ་གནས་པ་དང༌། འཇིག་རྟེན་གྱི་ཁམས་སུ་བདེ་ལེགས་ཀྱི་མཛའ་ན་མོ་
མགྲོན་དུ་འགུགས་པའི་ཕོ་ཉར་མངགས་པ་ཡིན་ནོ། །དེ་ལ་འདི་སྐད་ཅེས། རི་དབང་རྩེ་ན་སྲིད་པའི་ཟློས་གར་མ་བསྒྱུར་ཞིང༌། །དྲང་སྲོང་ཁྲོས་པའི་དམོད་པའི་བདེན་པས་བཏབ་མིན་པར། །བསྟན་ལ་སྲི་ཞུའི་མིག་སྟོང་བགྲད་པའི་སྙིང་སྟོབས་དང༌། །རྣམ་ཐར་འདི་ཀོ་དམ་པའི་ཚལ་ན་ཤིན་ཏུ་སྙན། །དཀར་པོའི་ལས་འདི་དོན་ལྡན་ཕ་རོལ་ཏུ། །ཕྱིན་པའི་སྣང་ཚུལ་མིག་འཕྲུལ་ལྟ་བུ་ལ། །མེ་ཏོག་མདའ་ཅན་དེ་ཡང་མགོ་རྨོངས་ནས། །ཚུལ་མིན་བརྩམས་པའི་བགྱི་བ་རིང་དུ་བཏང༌། །རྒྱ་ཆེའི་གཏོང་བ་ཚེ་འདིའི་སོ་ནམས་ཆེད་དུ་མིན། །སྙིང་སྟོབས་བསྐྱེད་པ་ཁྱིམ་གྱི་བདེ་འབྱོར་དོན་དུ་མིན། །བསྟན་དང་སྟོན་པའི་ཡོན་ཏན་དྲན་ནས་རི་མོར་བྱས། །དེ་ཕྱིར་འདི་ ན་རངས་པར་མི་འགྱུར་འགའ་ཡང་མེད། །འོན་ཀྱང་ལྔ་བརྒྱ་ཐ་མའི་སེམས་ཅན་བློ་ནི་ཤིན་ཏུ་མི་བསྲུན་པས། །འདི་ཡི་གནས་རྟེན་དཀོར་ཆའི་ཚོགས་དང་མཆོད་པའི་རྟེན་གྱུར་ཕྲ་མོ་ལའང༌། །ལོག་པར་བསྒྲུབ་ཅིང་ཁ་ན་མ་ཐོའི་བློ་ངན་འཆང་བ་གང་ཡིན་པ། །དེ་ཡི་སྙིང་ཁྲག་ཁྱབ་འཇུག་ཆེན་པོས་ཐང་ལ་འཕོ་ཞིག་ས་མ་ཡ།། །།གཏམ་ཚོགས་ལེའུ་བཞི་བཅུ་པའོ།། །།
གཏམ་ཚོགས་ལེའུ་ཞེ་གཅིག་པ། གཙང་རུ་ལག་རྒྱལ་བྱེད་ཚལ་ལམ་གསང་སྔགས་ཐེག་མཆོག་གླིང་གི་གཏམ་དད་པའི་གེ་སར།
གཙང་རུ་ལག་རྒྱལ་བྱེད་ཚལ་ལམ་གསང་སྔགས་ཐེག་མཆོག་གླིང་གི་གཏམ། དད་པའི་གེ་སར་ཞེས་བྱ་བ། སློབ་དཔོན་དགའ་རབ་རྡོ་རྗེ་ལ་ཕྱག་འཚལ་ལོ། །རིན་ཆེན་གསུམ་ཡང་ཐ་དད་མིན་ཞེས་པདྨའི་གེ་སར་ལ་ཆས་པ། །རྩ་ཅན་གྲོང་ནས་མངོན་པར་གཤེགས་དེའི་དེ་མ་ཐག་པའི་སྒྱུ་འཕྲུལ་ནི། །རྣམ་བྱང་ཡོངས་རྫོགས་ལྷུན་གྲུབ་རིག་འཛིན་འཇའ་ལུས་རྡོ་རྗེའི་ཞལ་སྐྱིན་ཅན། །དུས་གསུམ་སངས་རྒྱས་པདྨ་སྐྱེས་དེར་དངོས་པོ་ཀུན་གྱི་ཕྱག་གིས་བཏུད། །དེ་ལ་དབྱིངས་གདོད་མའི་ངང་ནས་སངས་རྒྱས་ཆོས་ཀྱི་སྐུའི་ཕྲིན་ལས་ཚད་མེད་པས་ལོངས་སྤྱོད་རྫོགས་པའི་སྐུ་རིགས་ལྔ་གང་ཆེན་མཚོའི་ཞིང་ཁམས་རྒྱ་མཚོའི་བཀོད་པ་ལས། རྣམ་པར་སྣང་མཛད་ཆེན་པོའི་ཕྱག་གི་པདྨའི་ཕྲུམ་ཕྲུམ་ལ་ཞིང་ཁམས་ཉི་ཤུ་རྩ་ལྔ་བརྩེགས་པའི་ཐུགས་ཀའི་ཐད་དྲང་བཅུ་གསུམ་པ་མི་མཇེད་འཇིག་རྟེན་གྱི་ནང་ཚན་ལྷོ་རྒྱལ་འཛམ་བུའི་གླིང་འདིར་བསྐལ་བཟང་རྣམ་འདྲེན་བཞི་པ་དམ་པ་ཏོག་དཀར་པོའི་རྣམ་འཕྲུལ་ལས་བདག་ཅག་གི་སྟོན་པར་གཟིགས་པ་ལྔས་བཞེས་ཏེ། ལྟ་སྤྱོད་ཕྱིན་ཅི་ལོག་ཏུ་སྨྲ་བའི་མུ་སྟེགས་ཀྱི་སྟོན་པ་དྲུག་གསུམ་བཅོ་བརྒྱད་ཚར་བཅད། མཛད་པ་བཅུ་གཉིས་ཀྱི་ཁོངས་སུ་ཆོས་ཀྱི་འཁོར་ལོ་རིམ་པ་གསུམ་དུ་བསྐོར། ཁྱད་པར་འོག་མིན་དང༌། ཨོ་རྒྱན། ཤམྦྷ་ལ། ལྷ་གནས་གསུམ་ལ་སོགས་པར་རྡོ་རྗེ་ཐེག་པའི་རྒྱུད་སྡེ་གྲངས་ཀྱིས་མི་ཐུག་པར་གསུངས་
ཤིང་། མདོ་སྔགས་ཀྱི་བསྟན་པ་དེ་དག་ཀྱང་གཏད་རབས་བདུན་དང༌། རྒྱུན་དྲུག །མཆོག་བརྒྱད། སློབ་དཔོན་དགའ་རབ་རྡོ་རྗེ། རིག་འཛིན་རྣམ་བརྒྱད། གྲུབ་ཐོབ་བརྒྱད་ཅུ་ལ་སོགས་པས་ཆེས་ཆེར་བལྟར་མངོན་པ་དང་མི་མངོན་པའི་ཚུལ་གཉིས་ཀྱིས་བསྐྱངས་པ་ལས། རྡོ་རྗེ་གདན་གྱི་ནམ་མཁའ་ལ་སོགས་པར་བཞུགས་པའི་བསྟན་པའི་བཙས་གསུམ་གྱི་བྱིན་རླབས་ལས། གངས་རིའི་ཁྲོད་འདིར་རྒྱལ་བའི་ཕྲིན་ལས་དར་བའི་དུས་ལ་བབས་པ་ན། བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་འཕྲུལ། ལྷ་ཐོ་ཐོ་རི་གཉན་བཙན་གྱི་རིང་ལ་རྒྱལ་པོ་ཛའི་ཆོས་ཆར་དང་ཐོག་མཉམ་པར་སྤང་སྐོང་ཕྱག་བརྒྱ་པ་ལ་སོགས་པ་བབས་ཏེ་དམ་པའི་ཆོས་ཀྱི་དབུ་བརྙེས། མདོ་སྡེ་པདྨ་དཀར་པོ་ནས་ལུང་བསྟན་གྱི་བདེན་པའི་རྔ་བོ་ཆེ་བསྒྲགས་པ་བཞིན་འཕགས་པ་མིག་མི་འཛུམས་པའི་ཐོར་ཚུགས་ལ་ཐོད་ཀྱིས་བསྒྲིབས་པ་སྤྲུལ་པའི་རྒྱལ་པོ་སྲོང་བཙན་སྒམ་པོའི་རིང་ལ་བསྟན་པ་དམ་པའི་ཆོས་ཀྱི་སྲོལ་བཏོད། མཐའ་འདུལ་ཡང་འདུལ་རུ་གནོན་གྱི་གཙུག་ལག་ཁང་བཞེངས་ནས་ས་གཞི་བཀྲ་ཤིས་པར་མཛད། རྗེ་བཙུན་འཇམ་དཔལ་དབྱངས་སྟོབས་ཀྱི་འཁོར་ལོས་སྒྱུར་བའི་རྒྱལ་པོའི་ཆོ་འཕྲུལ་དུ་བཞུགས་པ་ལྷ་བཙན་པོ་ཁྲི་སྲོང་ལྡེའུ་བཙན་གྱི་སྐུ་རིང་ལ་མཁན་སློབ་རྣམ་གཉིས་སྤྱན་དྲངས་ཏེ། སའི་
ཆོ་ག་མཛད། དཔལ་ཨཽཌི་ཡ་ནའི་སློབ་དཔོན་ཆེན་པོས་འབྱོན་ལམ་དུ་མང་ཡུལ་གྱི་རི་བོ་དཔལ་འབར་ཕན་ཚུན་བརྗེས་པ་སོགས་རྫུ་འཕྲུལ་བསམ་གྱིས་མི་ཁྱབ་པ་བསྟན། བོད་ཀྱི་འདྲེ་སྲིན་གདུག་པའི་བརླང་སྤྱོད་རྩུབ་མོ་སྤ་བཀོངས་ནས་ཕྱག་རྒྱ་གཉེན་པོའི་ཟིལ་འོག་ཏུ་མནན། བསམ་ཡས་ཀྱི་གསེག་མ་ནེ་སེང་དུ་བསྒྱུར། ཟུང་མཁར་ནས་ཕུ་ཆུའི་རྒྱུན་ཆེན་པོ་བཏོན། ལྷ་སྲིན་རྣམས་ལས་ལ་བཀོལ་ཏེ། ཨོ་ཏནྟ་པུ་རི་གངས་རིའི་ཁྲོད་དུ་ཕྲུ་མ་བཏབ་པ་ལྟ་བུ་ལ་འོག་མིན་རྣམ་མཛེས་ཆེན་པོའི་གཟི་བྱིན་ཡང་བསྣན་ཏེ། དཔལ་བསམ་ཡས་ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས། འཕགས་པའི་ཡུལ་ནས་པཎྜིཏ་བརྒྱ་རྩ་བརྒྱད་དང༌། ཐུན་མོང་དང་ཐུན་མོངས་མ་ཡིན་པའི་དམ་ཆོས་སྣང་བའི་སྒོ་བསམ་གྱིས་མི་ཁྱབ་པ་སྤྱན་དྲངས། བཻ་རོ་ཅེན་དང༌། སྐ་ཅོག་ཞང་གསུམ། རྨ་གཉགས་གནུབས་གསུམ་ལ་སོགས་པས་ལོ་ཙཱ་བ་མཛད་དེ། མདོ་སྡགས་ཀྱི་ཆོས་ཚུལ་རྒྱ་མཚོ་ལྟ་བུར་བསྒྱུར། མཁན་ཆེན་ལ་སད་མི་བདུན་གྱིས་རབ་ཏུ་བྱུང་སྟེ་དམ་པའི་ཆོས་འདུལ་བ་དང༌། བཤད་གྲ་སྒོམ་གྲའི་བསྟན་པ་བཙུགས། སློབ་དཔོན་ཆེན་པོ་དང༌། བི་མ་ལ་མི་ཏྲ་དང༌། སངས་རྒྱས་གསང་བ་ལ་སོགས་པས། ཨོ་རྒྱན་དང༌། ཤམྦྷ་ལ་དང༌། འགྲོ་ལྡིང་གི་ཡུལ་ལ་སོགས་པ་ནས། རིག་པ་འཛིན་
པའི་སྡེ་སྣོད་ཀྱི་ཉིང་ཁུར་གྱུར་པ་མང་དག་སྤྱན་དྲངས་ཤིང་དར་བར་མཛད་པས། ཕྱིས་ཇོ་བོ་ཨ་ཏི་ཤས་ཀྱང་སྔོན་ཆད་བོད་དུ་བྱུང་བའི་བསྟན་པ་ཙམ་རྒྱ་གར་དུའང་མ་དར། ཞེས་དང༌། དཀོར་མཛོད་ཀྱི་རྒྱ་དཔེ་གཟིགས་ནས་མདོ་སྔགས་ཀྱི་ཆོས་ལ་ཁོ་བོས་མི་ཤེས་བྱ་བ་མེད། རྒྱ་གར་དུ་ནམ་མཁའ་ནས་མཁའ་འགྲོ་མས་བསྟན་པའང་བསམ་གྱིས་མི་ཁྱབ་སྟེ། སྔར་མ་མཐོང་མ་ཐོས་པའི་རྒྱ་དཔེ་མང་པོ་འདི་ན་སྣང་བ་སློབ་དཔོན་པདྨས་མཁའ་འགྲོའི་གསང་མཛོད་ནས་བླངས་པ་ཡིན་མཆི་གསུངས་ནས་ཐུགས་རྒྱལ་ཆག །བོད་ཀྱི་རྒྱལ་པོ་ལ་རྗེས་སུ་ཡི་རང་བ་ཕུལ། གསང་བའི་བདག་པོའི་སྒྱུ་འཕྲུལ་མངའ་བདག་རལ་པ་ཅན་གྱི་རིང་ལ་གསུང་རབ་རྣམས་ལ་སྐད་གསར་བཅད་ཀྱིས་དག་ཐེར་མཛད་ཅིང་སྐར་ཆུང་རྡོ་རྗེ་དབྱིངས་དང༌། འོན་ཅང་རྡོའི་གཙུག་ལག་ཁང་བཞེངས། དགེ་འདུན་རེ་ལ་མི་ཁྱིམ་བདུན་བདུན་ཕུལ་ཞིང་བསྟན་པ་དར་རྒྱས་སུ་མཛད་པ་སོགས་ཆོས་ཀྱི་རྒྱལ་པོ་མེས་དབོན་གསུམ་གྱི་ཐུགས་བསྐྱེད་ལས། གངས་རིའི་ཁྲོད་འདིར་རྒྱལ་བསྟན་གྱི་སྣང་བྱེད་ཆེན་པོས་ཁྱབ་པར་མཛད་པ་ལ་ལྷ་མ་ཡིན་གྱི་འཇུག་པ་ཅན་གླང་དར་མ་འུ་དུམ་བཙན་གྱི་བྱེད་པ་ལས་དམ་པའི་ཆོས་འདུལ་བའི་བསྟན་པ་ལ་བར་ཆོད་ཆེན་པོ་བྱུང་ཡང༌། རིག་པ་འཛིན་པའི་སྡེ་སྣོད་རྣམས་ཁྱིམ་དང༌། རི་སུལ་ན་གནས་པའི་རིག་སྔགས་འཆང་བ་རྣམས་ཀྱིས་བཟུང་ཞིང༌། དཀོན་མཆོག་
གསུམ་གྱི་རྟེན་ལ་བསྟི་སྟང་དང་གཅེས་སྤྲས་ཀྱིས་བསྲུངས་པས་དར་ནུབ་ཆེར་མ་བྱུང་ལ། མི་རིང་བར་པཎྜིཏ་སྨྲྀ་ཏི། དཔལ་མར་མེ་མཛད་དང༌། མ་བྱོན་སངས་རྒྱས་གསུམ་པ་ཁ་ཆེའི་བསོད་སྙོམས་པ་ཆེན་པོ་སོགས་རིམ་པར་བྱོན་ཅིང༌། སངས་རྒྱས་ཀྱི་ཕྲིན་ལས་ཚད་མེད་པས་བོད་འདིར་ཡང་མཁས་པ་དང་གྲུབ་པའི་སྐྱེས་བུ་དམ་པ་མང་དུ་བྱུང་བས་མདོ་སྡགས་རར་སའི་བསྟན་པ་ལ་ཕྲིན་ལས་རྒྱ་ཆེན་བྱུང་ཞིང་དེ་ཐམས་ཅད་ཀྱང་རང་ས་རང་ས་ན་བདེན་པ། དངོས་དང་བརྒྱུད་ནས་བསྟན་པ་དང་སེམས་ཅན་ལ་ཕན་པ་ཤ་སྟག་པས་འདོར་ལེན་བྱ་བའི་གནས་མ་ཡིན་ཡང༌། སེམས་ཅན་གྱི་ལས་སྣང་ནི་བསམ་གྱིས་མི་ཁྱབ་པས་ཀུན་འབྱུང་བ་ཅན་གྱི་ཉེར་ལེན་ལས། རྟོག་གེས་དྲེགས་པ་དང༌། བདེན་ཞེན་ཕྱོགས་གཅིག་པ་དང༌། ཆོས་མིག་རྡུལ་བྲལ་གྱིས་གཏིང་མ་ཕྱིན་པས། སྔོན་ཆད་བསྟན་པའི་སྣང་བྱེད་དང༌། ཆོས་ཀྱི་ལམ་སྲོལ་ལ་འདྲིས་ཆུང་བས་ལོ་པཎ་སྐད་བརྡ་ལ་བྱང་ཆུབ་མ་ཆུབ་ཀྱིས་བྱེ་བྲག་ལ་མ་དམིགས་པང་ཕྱིས་འགྱུར་བཅོས་ཤིང་བཅོས་པ་དག་ལ་གསར་ངས་ཀྱིས་དང་འགྱུར་རང་སར་གནས་པ་ལ་རྙོག་མ་ཅན་དུ་དབྱེན་འཆོས་པའི་བདེན་བྲལ་གྱི་རིག་པ་འཛིན་པའི་གཉེན་པོར། རྒྱལ་བའི་ཕྲིན་ལས་བསམ་གྱིས་མི་ཁྱབ་པའི་བསྟན་པའི་སྣང་བྱེད་ཆེན་པོ་གསར་དུ་བྱོན་པ་ལ་འདི་སྐད་ཅེས། འཛམ་གླིང་མཛེས་པའི་
རྒྱན་དྲུག་མཆོག་གཉིས་དང༌། །ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང༌། །ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས། །འཁོར་འདས་ཆོས་སྐུར་རྫོགས་པའི་ཀློང་ཆེན་པ། །དྲི་མེད་འདོ་ཟེར་སྟོན་པ་གཉིས་པ་ཡིན། །གངས་ཁྲོད་ལྟ་བ་མཐའ་དག་གཞན་དབང་དུ། །ཐལ་འགྱུར་མཚོན་ཆ་རྣོན་པོས་སྨ་དབབ་པའི། །ཕས་རྒོལ་རང་ཉིད་རྟག་ཆད་གྲུབ་མཐའ་རུ། །འགོད་བྱེད་བསྟན་པའི་ཉི་མ་མ་ཤར་ན། །སྔོན་བྱོན་མཆོག་གཟིགས་མང་པོས་བསྐལ་ངན་བྱས། །འཁོར་ལོ་བར་མཐའི་ལྡེམ་དགོངས་གཉིས་འཐུང་སྣས། །རྣམ་པར་དཀྲུགས་པའི་གྲུབ་མཐའ་གསར་བུའི་ཡིད། །རྟོག་གེའི་གཞན་དབང་གྱུར་པ་འཇིག་རྟེན་ན། །རྣམ་པར་རིག་ཅིང་ལྡན་པ་སངས་རྒྱས་ཀྱི། །ཡེ་ཤེས་མངོན་སུམ་མཐོང་བ་ཁྱོད་ཀྱིས་བཀྲལ། །ཚིག་ཚོགས་དབུ་བའི་ཐ་སྙད་སྲུང་བས་ཀྱང༌། །ཁྱོད་གསུང་ཡོན་ཏན་རྫོགས་པའི་དཔལ་མཐོང་ནས། །མ་ནོར་ལམ་མཆོག་དགག་པ་རྩུབ་མོའི་ངག །ཁ་ཡི་སྲང་མདོར་འཁྱམས་ལ་སྐྲག་གྱུར་ཏེ། །འགྱོད་པའི་རྣལ་འཕྲུལ་སློང་བ་མཐོང་བའི་ཆོས། །གང་ལས་ཐུབ་བསྟན་སྐབས་གསུམ་དབང་པོའི་གྲོང༌། །ཀློག་པའི་བརྟུལ་ཞུགས་འཛིན་པར་འདོད་པ་ཀུན། །དོན་འདི་གཉེར་བྱར་བགྱིད་ན་སྔ་འགྱུར་བར། །ཁས་འཆེ་ཡང་དག་ལམ་ལས་ཕྱིར་ཕྱོགས་ཀུན། །རྣམ་ཤེས་ཕ་རོལ་སོང་
བའི་སྐྱེས་བུ་ཡིན། །ཞེས་སོ། །དེ་བཞིན་དུ་གངས་རིའི་ཁྲོད་འདིར་རྒྱལ་བསྟན་མགྲོན་པོར་འབོད་པའི་རྩ་ལག་ནི་ཐོག་མཐའ་བར་གསུམ་དུ། ཆོས་ཀྱི་རྒྱལ་པོ་མེས་དབོན་རྣམ་གསུམ་གྱི་ཐུགས་བསྐྱེད་དང༌། སྨོན་པའི་སྟོབས་ཤུགས་ཁོ་ན་ལ་རག་ལས་པའི་ཕྱིར་ན། ལྷ་བཙན་པོ་ཁྲི་སྲོང་ལྡེའུ་བཙན་སླར་ཡང་ངུར་སྨྲིག་འཆང་བའི་ཚུལ་གྱིས་བོད་ཆེན་པོའི་རྒྱལ་ཐབས་ཀྱི་ཁྲི་ལ་འཛེགས་པ་ངག་དབང་བློ་བཟང་རྒྱ་མཚོའི་སྡེས་གསར་རྙིང་གི་བསྟན་པ་ཉེ་འཁོར་མེད་པའི་གནས་ལ་སྦྱར་བའི་དགོངས་པ་རྫོགས་ཕྱིར། གང་གིས་སྲས་ཀྱི་ཐུ་བོ་ལྷ་སྲས་མུ་ནེ་བཙན་པོའི་སྐྱེ་བ་བཅུ་བདུན་པ་པཎྜི་ཏ་སངས་རྒྱས་རྒྱ་མཚོས་རབ་ཉི་མེ་བྱི་ལོ་འོག་མིན་གསང་སྔགས་ཐེག་མཆོག་གླིང་གི་འདུས་པའི་སྡེ་འདི་གསར་དུ་བཙུགས། དགེ་འདུན་བརྒྱ་དང་སུམ་ཅུ་སྐོར་འཚོ་བས་མི་བྲེལ་བའི་མཆོད་གཞིས་དང་སྒྲུབ་མཆོད་ཀྱི་ཆ་རྐྱེན་སོགས་བླ་ནས་སྦྱར་ཏེ་དམ་པའི་ཆོས་འདུལ་བའི་བསླབ་ཁྲིམས་རྣམ་པར་དག་པ་དང༌། རྡོ་རྗེ་ཐེག་པའི་བསྐྱེད་རྫོགས་ཀྱི་གཞུང་ལམ་ཉམས་སུ་ལེན་ཞིང༌། བསྟན་སྲིད་དང་སེམས་ཅན་བདེ་ཐབས་ཀྱི་ཕྲིན་ལས་རབ་འབྱམས་ཀྱི་ཕྱག་བཞེས། ཚེས་བཅུའི་གར་འཆམས། རྡོ་རྗེ་གཞོན་ནུའི་རྩ་འཆམས་སོགས་གོང་མ་ལྔ་པའི་དགོངས་བཞེད་བཞིན་བཙུགས། མཁན་པོར་ཕན་བདེ་
ལེགས་བཤད་གླིང་པ་རིག་པའི་རྒྱ་མཚོ་བསྐོས། ཆོས་སྤྱོད་བཅུ་དང་ལྷག་པའི་ལྷའི་བསྙེན་སྒྲུབ། དུས་དང་དུས་སུ་ཐེག་པ་ཆེན་པོའི་གསོ་སྦྱོང་སོགས་ཚོགས་གཉིས་ཀྱི་ཡོན་ཏན་ཡར་འཕེལ་དུ་གྱུར་པའི་སྐབས་ཤིག །བདུད་སྡིག་ཏོ་ཅན་ཀླ་ཀློའི་བརྟུལ་ཞུགས་ལ་ཞེན་པ་ཇུན་གརྟི་པས་བོད་ཀྱི་མངའ་རིས་ལ་མཐོ་བཙམས་ཤིང༌། རྡོ་རྗེ་ཐེག་པའི་རིང་ལུགས་ཕྲ་མེན་གྱི་རིག་པས་བཅོམ་ནས་བལྟར་མི་མངོན་པའི་གནས་སུ་སྦྱར་ཡང༌། དབང་ཕྱོགས་གོང་མའི་དཔུང་ཆེན་གྱིས་དགྲ་སྟའི་དུམ་བུའི་ཚེར་མ་མིང་གི་ལྷག་མར་བྱས་པས་གོང་མ་ལྔ་པའི་ཐུགས་བསྐྱེད་སྟོབས་སུ་གྱུར་ཏེ་རིང་ལུགས་ཉམས་པ་སོར་ཆུད། དགོན་འདི་གའི་གྲ་རིགས་པེ་ཅིང་ནང་སོ་བློ་བསམ་གྱིས་ལྷག་བསམ་དང་རྒྱུ་ཚོགས་ཆུད་མི་འཛའ་བའི་བདག་པོའི་རྐྱེན་རྒྱལ་བསྟན་ལ་གུས་པ་ཅན་ཇུན་ཝང་བསོད་ནམས་སྟོབས་རྒྱས་ཀྱིས་མཛད་དེ་གཙུག་ལག་ཁང་མ་ལག་དང་བཅས་སྔར་བཞིན་འབྱོངས། རིམ་པས་མཁན་པོ་དགེ་འདུན་བཀྲ་ཤིས་ཀྱིས་ལི་མ་ལྷ་ཁང་རྟེན་དང་བརྟེན་པར་བཅས་པ། མཁན་པོ་ནམ་མཁའ་བསྟན་སྐྱོང་གིས་ཁུར་མཛད་དེ་གསེར་ཟངས་ཀྱི་རྒྱལ་མཚན་བཞི་དང༌། རྣམ་བཅུ་རི་དྭགས་ཆོས་འཁོར། སྤེན་བད་ཞིག་གསོས། མེ་སྲོང་གནས་ཀྱི་གསེར་འཕྲུ། དེ་རྗེས་མཁན་པོ་ཨོ་རྒྱན་དཔལ་མགོན་གྱི་ལས་ཐོག་སྐབས་སྡེ་
འདི་ཉིད་ལ་བཀའ་དྲིན་ཆེ་བ་ལྷ་སྲས་སངས་རྒྱས་རྒྱ་མཚོ་ནས་མཁན་ཐོག་རིམ་བྱོན་ཀུན་དགའ་དཔལ་བཟང་ཡན་གྱིས་སྒྲིབ་གཉིས་སྦྱང་ཕྱིར་སེང་གཡེང་ཀ་རིང་གཉིས་ཀྱི་ཐོག་བཤུབ་འབུབས་ཀྱི་ཞིག་གསོ་དང༌། གསེང་གཡེང་ཕྱི་ནང་གི་ལྡེབས་བྲིས་ཤིང་རྩི། བཟང་གོས་ཀྱི་གནས་རྒྱན་སོགས་སྤྱིར་རྒྱུ་སོང་དངུལ་ཐོག་ཏུ་ཕབ་པར་དངུལ་སྲང་བརྒྱ་ཕྲག་བཞི་དང་བརྒྱད་ཅུ་ཐམ་པ། མཁན་པོ་རང་ཉིད་དང༌། སྡེ་རྙིང་བྱམས་པ་བསྟན་འཛིན་ཅན་གྱིས་ལག་འདོན་དང་བཅས་བྱ་བ་ལེགས་པ་ཚར་ཕྱིན་པའི་དེ་མ་ཐག་པར༌། མཁན་པོ་འདི་ཉིད་ནས་ལྷག་བསམ་རྣམ་དག་གིས་དགེ་འདུན་བྱིངས་ལ་ཁུར་དུ་འགྲོ་བའི་རིགས་གཏན་ནས་མེད་པས་རིག་འཛིན་འཇིགས་མེད་གླིང་པ་སྤྱན་དྲངས་ཏེ། ཐོག་མར་གཙུག་ལག་ཁང་ཕྱི་ནང་གི་རྟེན་བརྟེན་པ་ཐམས་ཅད་བཀའ་བརྒྱད་བདེ་གཤེགས་འདུས་པའི་སྒོ་ནས་སྟ་གོན་དང་དངོས་གཞི་ཉིན་གཉིས་པ་རབ་ཏུ་གནས་པའི་ཆོ་ག་ཤིན་ཏུ་རྒྱས་པ་བཀྲ་ཤིས་རྒྱ་མཚོའི་གཞུང་བཞིན་དང༌། དེ་ནས་ཚོགས་པ་བྱིངས་སྨིན་གྲོལ་གྱི་གདམས་པས་རྒྱུད་གྲོལ་བར་མཛད་པའི་ཐོག་མར། ཚེ་དཔག་མེད་སྐུ་གསུམ་འདུས་པ་དང༌། དྭངས་མ་བཅུད་འདྲེན་གྱི་དབང་གིས་སྒོ་ཕྱེ་སྟེ། བཀའ་བརྒྱད་བདེ་གསང་གཉིས་དང༌། ཕུར་
པ་རྒྱུད་ལུགས། སྙིང་ཐིག་ཡ་བཞི། བཀའ་མ་སྒྱུ་འཕྲུལ་རྒྱ་ཅན་བྱིངས་ཆེ། བླ་མ་གསང་འདུས། ཐུགས་སྒྲུབ། དབྱིངས་སྒྲོལ། ཚེ་བདག །ལོག་ཏྲི། ཉང་གཏེར་ཁྲོས་ནག་དཔལ་ལྡན་དམག་ཟོར་མ་སོགས་དབང་ཀ་ཉི་ཤུ་སྐོར་དང༌། ཁྱད་པར་རྫོགས་པ་ཆེན་པོ་ཀློང་ཆེན་སྙིང་ཐིག་བླ་རྫོགས་ཐུགས་གསུམ་གྱི་དབང་ཀ་ཡོངས་རྫོགས་ཀྱིས་རྒྱུད་སྨིན་པར་བྱས་ཏེ། སྙིང་ཐིག་ཡ་བཞི་དང༌། རྒྱལ་བ་གཉིས་པའི་མཛོད་བདུན་གྱི་དགོངས་པ་གཅིག་ཏུ་བསྡུས་པའི་ཁྲིད་གཞུང་མ་བུ་གསུམ་གྱིས་གྲོལ་བྱེད་ཀྱི་གདམས་པའི་སྔོན་འགྲོའི་ཁོངས་སུ། འཕགས་ཡུལ་གྱི་ཤིང་རྟ་ཆེན་པོ་གཉིས་ཀྱི་གཞུང་ལུགས་ཟུང་དུ་འཇུག་པའི་སྨོན་འཇུག་གི་སེམས་བསྐྱེད་ལ་བརྟེན་པའི་བྱང་སྡོམ་འབོག་ཆོག་གི་དུས་དཀོན་མཆོག་ལ་མཆོད་པ་རྒྱས་པ་དང༌། ལུག་སུམ་ཅུ་སོ་གསུམ་གྱི་སྲོག་བསླུ། དངོས་གཞིའི་ཐོག་མར། བཀའ་མ་སྒྱུ་འཕྲུལ་ཞི་ཁྲོ་དང༌། ཕུར་པ་རྒྱུད་ལུགས། གཏེར་མ་བཀའ་བརྒྱད་བདེ་གསང་གཉིས་ཀྱི་གཞུང་ལུགས་ལ་བརྟེན་པའི་སྐྱེ་གནས་རྣམ་པ་བཞིའི་བག་ཆགས་སྤྱོང་ཞིང༌། དག་རྫོགས་སྨིན་གསུམ་གྱི་སྦྱང་གཞི་སྦྱོང་བྱེད་ཚང་བས། རིགས་འཛིན་བཞིའི་གྲུབ་མཐའ་སྙོག་ཚུལ་བསྐྱེད་རིམ་གྱི་བཤད་པ་རྒྱས་པ་དང༌། མཚན་བཅས་མཚན་མེད་ཀྱི་རྫོགས་རིམ་སྤྱི་དང། ཁྱད་པར་འོད་གསལ་རྫོགས་པ་ཆེན་པོ་ཁྲེགས་ཆོད།
ཐོད་རྒལ། བར་དོ། འབྲས་བུ་དང་བཅས་བའི་སྨིན་ཁྲིད་རྒྱས་པ། རྒྱབ་རྟེན་རྒྱུད་བཅུ་བདུན་གྱི་ལུང་དང༌། རྒྱུད་འབུམ་ཡོངས་རྫོགས་ཀྱི་བཀའ་གཏད་སོགས་ལུང་གི་ཆོས་འཁོར་ཟླ་བ་གསུམ་ལ་ཉེ་བ་བསྐོར། སྔ་འགྱུར་བཀའ་མའི་བསྟན་པ་ཉམས་པ་གསོ་ཕྱིར་རྒྱུད་ཐམས་ཅད་ཀྱི་རྒྱལ་པོ་སྒྱུ་འཕྲུལ་གསང་བ་སྙིང་པོ་ཞི་བ་དང༌། ཁྲོ་བོའི་དཀྱིལ་འཁོར་གྱི་ཆོ་ག་པཎ་ཆེན་བི་མ་ལ་དང༌། སངས་རྒྱས་གསང་བའི་རྒྱ་གཞུང་སོར་གནས་ལ་ལྷན་ཐབས་སྦྱར་བ་དང༌། ཕུར་པ་རྒྱུད་ལུགས་ཀྱི་སྒྲུབ་མཆོད་ཀྱི་རྒྱུན་བདག་ཉིང་ནས་བཙུགས་ཤིང༌། དེའི་མཆོད་ཐེབས་སུ་དངུལ་སྲང་བརྒྱ་དང་ལྔ་བཅུ་སྦྱར་བ་སོགས་མདོར་ན་བདག་ཅག་དཔོན་སློབ་ཐམས་ཅད་ནས་བསྟན་པའི་བྱ་བ་ཁུར་དུ་བླངས་པ་འདི་དག་གི་རྒྱུན་མི་ནུབ་པའི་བྱ་བ་ལས་ཀྱི་འཁོར་ལོ་ཕྱིན་ཆད་པ་རྣམས་ཀྱིས་ཀྱང་བདག་གིར་མཛད་པ་དང༌། དེ་ལྟར་གྱི་དགེ་བའི་རྩ་བ་ཡང་གནས་སྐབས་སུ་བསྟན་པ་དར་ཞིང་སེམས་ཅན་གྱི་བདེ་སྐྱིད་ལ་ཕན་པ་དང༌། མཐར་ཐུག་ཕ་མ་འགྲོ་དྲུག་གི་སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་བྱང་གྲོལ་བདེ་ཆེན་གྱི་ས་ལ་འཁོད་པའི་རྒྱུར་བསྔོ་བའི་མཐུན་འགྱུར་རྒྱལ་བ་སྲས་དང་བཅས་པ་རྣམས་ལ་གསོལ་བ་ཡིན་ནོ། །གཏམ་ཚོགས་ལེའུ་ཞེ་གཅིག་པའོ།། །།
གཏམ་ཚོགས་ལེའུ་ཞེ་གཉིས་པ། མཆོ་སྣར་རྒྱུད་འབུམ་བཞེངས་པའི་གཏམ་ཀ་ལནྟ་ཀའི་རྒྱན།
མཆོ་སྣར་རྒྱུད་འབུམ་བཞེངས་པའི་གཏམ་ཀ་ལནྟ་ཀའི་རྒྱན་ཅེས་བྱ་བ། འཇམ་དཔལ་དཀར་པོ་ལ་ཕྱག་འཚལ་ལོ། །རི་མོ་གཡས་སུ་འཁྱིལ་བའི་བཀྲ་ཤིས་དུང༌། །ལེགས་བྱས་སྤུངས་པ་ཟླུམ་པའི་ངོ་མཚར་དབྱངས། །སྐྱེ་བ་ལྔ་པའི་མཆུ་སྒྲོས་ལ་ཆགས་པའི། །གཏམ་གྱི་ངང་ཚུལ་གསར་པ་འདི་ལོངས་ཤིག །དེ་ལ་གྲོང་ཁྱེར་ཆེན་པོ་མ་ག་དྷཱ་རྡོ་རྗེའི་གདན་ནས་བྱང་ཕྱོགས་སུ་དཔག་ཚད་མང་པོར་ཐལ་པ་རི་ཁ་བ་ཅན་གྱི་མུ་ཁྱུད་བུམ་ཐང་དགེ་གནས་སྐྱེར་ཆུའི་གཙུག་ལག་ཁང་དང་རིང་པོ་མ་ཡིན་པ་ན། དཔལ་སངས་རྒྱས་གཉིས་པ་ཨོ་རྒྱན་ཆེན་པོས་བྱིན་གྱིས་བརླབས་པའི་སྐུ་རྗེས་བྲག་སོགས་རྟེན་དང་བརྟེན་པའི་དགེ་མཚན་གྱིས་ཤིས་པར་ཡང་བྱས་ལ། འཕགས་ཡུལ་གྱི་པཎྜི་ཏ་ནགས་ཀྱི་རིན་ཆེན་དང༌། གངས་ཅན་མཁས་པའི་དབང་པོ་རྒྱལ་སྲས་དྲི་མེད་འོད་ཟེར་ལ་སོགས་སྐྱེས་བུ་དམ་པ་དུ་མས་སྐལ་བ་མཆོག་རྣམས་གདུལ་བྱར་མཛད་པ་ལྷོ་མོན་ཁ་བཞིའམ། ལྷོ་ཕྱོགས་རི་བྲག་པའི་གྲོང་ཁྱེར་ན་ཡུལ་དབུས་གཙང་རུ་བཞིའི་ཆ་དང༌། གྲུ་གུའི་ཡུལ་ལ་སོགས་པ་རིས་ཐ་དད་པའི་སྐྱེ་དགུ་མང་པོ་རང་གིར་འཚོ་བ་ལས། ཟུར་དགོན་བླ་མར་གྲགས་པའི་སྡེ་ཚན་གཅིག་པ་ཞིག་ཆོས་ཀྱི་རྒྱལ་པོ་མེས་དབོན་རྣམ་གསུམ་གྱིས་རིང་དུ་བསྐྱངས་པའི་མངའ་རིས་ལ་སྐྱབས་སུ་དོང་ནས་ཉང་སྟོད་རྩེ་དགུའི་གྲོང་ཁྱེར་ན་དཔྱ་དང་ཁྲལ་གྱིས་འཚོ་བའི་རྗེའུ་རིགས་ཀྱི་བརྟུལ་ཞུགས་ལ་གནས་པའི་ཆོ་འབྲང་ཅན། སེ་ན་
ཀ་བ་ཇོ་ལྷ་ཁང་པ་གཅེན་པདྨ་བསྟན་སྐྱོང་དང༌། གཅུང་རྗེ་དྲུང་རྡོ་རྗེ་སྙིང་པོས་རྒྱལ་བསྟན་སྤྱི་དང་བྱེ་བྲག་སྔ་འགྱུར་རྡོ་རྗེ་ཐེག་པའི་བསྟན་པའི་བཙས་དང་རང་རང་གི་ཚོགས་གསོག་སྒྲིབ་སྦྱོང་ལ་དམིགས། ཁ་བའི་ལྗོངས་འདི་སྔོན་མ་སངས་སྤུན་དགུས་བཟུང་བའི་དུས་ཡུལ་ན་བུན་གྱིས་གཏིབས་པ་མཚོ་དང་འཁྲུལ་པ་སྐྱེས་ཤིང༌། གང་དང་ཉེ་བའི་སར་བྲག་རིའི་བ་གམ་བརྩེགས་པའི་སྣ་ཞིག་མཐོང་བ་ལས་མཚོ་སྣར་གྲགས་པའམ། བྱང་ན་ནེ་ར་གཡུ་མཚོ། ལྷོ་ན་སྐྱེར་ཆེན་གཡུ་མཚོ་གཉིས་ཀྱི་སྣེ་མོར་གྱུར་པས་དེའི་སྐད་དུ་གྲགས་པའི་ཡུལ་མོན་བོད་ཀྱི་མཚམས། སྦས་ཡུལ་སྐྱེད་མོ་ལྗོངས་སམ། ཤར་ལ་འགོ་ཡུལ་གསུམ་ས་གཞི་གསེར་གྱི་ཡོལ་གོ་འདྲ་བའི་བྱང་ཕྱོགས་ན་རྫོགས་པའི་སངས་རྒྱས་མཚོ་སྐྱེས་རྡོ་རྗེའི་སྐུའི་གནས་དོམ་ཚང༌། ཤར་ན་གསུང་གི་གནས་གཟིག་ཚང། ལྷོ་ནུབ་ན་ཐུགས་ཀྱི་གནས་སྟག་ཚང༌། ལྷོ་ན་ཡོན་ཏན་གྱི་གནས་སྒོམ་པ་ཕུག །ཆུ་མགོ་ན་ཕྲིན་ལས་ཀྱི་གནས་དཀར་པོ་ཟངས་རྣམས་མངའ་རིས་སུ་འབྲེལ་བའི་ལྗོངས། འཕགས་པ་ལག་ན་མྱུ་གུ་རེ་ཞིག་ན་གསང་བ་སྔགས་ཀྱི་རྡོ་རྗེའི་བརྟུལ་ཞུགས་ལ་རྩེན་པས་སྐུའི་སྐྱོ་སངས་སེམས་དཔའ་སེམས་མའི་ཚོགས་དང་བཅས་པའི་མཛད་པའི་སྒྱུ་འཕྲུལ་ལ་ཆགས་པའི་ཚེ། ལྷ་བུ་མི་གྲིབ་ཀྱིས་མྱོས་པའི་རིགས་སུ་བལྟམས་པ་བློ་བཟང་
རིན་ཆེན་ཚངས་དབྱངས་རྒྱ་མཚོ་གཞོན་ནུ་རོལ་རྩེད་ལ་རྩེན་པའི་གནས་སུ། མཚམས་ཀྱི་སྤྲིན་པ་བླ་གོས་སུ་དཔྱངས་པ་གཉིས་སྐྱེས་དབང་པོའི་ལོར་ཇི་སྐད་དུ་མདོ་དགོངས་འདུ་ལས། ལང་ཀའི་བདག་པོ་གཟུགས་བརྙན་གྱི་སྤྲུལ་པ་ནི་ཐ་དད་དེ། གསུང་གི་གཟུགས་བརྙན་ནི་ཡི་གེར་སྣང་བ་ཡིན་ལ། ཡི་གེའི་སྤྲུལ་པ་ནི་འདི་ལྟ་སྟེ། མིང་དང༌། བྱུང་ཚུལ་དང༌། གཟུགས་དང༌། རང་བཞིན་དང༌། སྒྲ་དང༌། ལས་དང༌། སྒོ་དང༌། རྣམ་གྲངས་དང༌། ཡི་གེའི་གཞི་རྣམས་ཀྱིས་དེ་ཁོ་ན་ཉིད་གསང་བ་དམ་པ་དེ་མཐོང་ཞིང་ཤེས་པར་གྱུར་ཏོ། །དེས་ཆོས་ཐམས་ཅད་ལ་མཁས་ཤིང་གྲོལ་བར་འགྱུར་རོ། །ཞེས་གསུངས་པ་ལྟར་བདག་ཅག་གི་སྟོན་པ་བླ་ན་མཚུངས་པ་མེད་པ་དེའི་གྲུབ་པའི་མཐའི་དོན་གྱི་སྙིང་པོ་ནི་ཟབ་མོ་ངེས་པའི་དོན་འབའ་ཞིག་ལ་གཞོལ་བར་བྱེད། འབབ་པར་བྱེད་པས་སེམས་ཅན་མང་པོ་རྣམ་པ་ཐམས་ཅད་མཁྱེན་པའི་གྲོང་ཁྱེར་ཆེན་པོར་བདེ་བླག་ཉིད་དུ་སོན་པར་བྱེད་པ་ནི་གསང་བ་སྔགས་ཀྱི་རྒྱུད་སྡེ་རིན་པོ་ཆེ་ཁོ་ནའི་ཁྱད་ཆོས་ཡིན་ལ། དེའི་ནང་ཚན་ལས་ཀྱང་སྐལ་པ་མཆོག་གི་གདུལ་བྱ་གང་ཡིན་པ་རྣམས་དུས་རིང་པོ་ལ་ཡིད་སྨོན་བྲལ་པས་མིག་འཕུལ་ལྟར་གདོད་མའི་མགོན་པོའི་གོ་འཕང་ལ་སྦྱོར་བ་ནང་རྒྱུད་སྡེ་གསུམ་མམ། ཡོ་ག་གསུམ་དུ་གྲགས་པའི་ངེས་འབྱེད་ཀྱིས་བསྡུས་པའི་རྒྱུད་
འབུམ་རིན་པོ་ཆེ་པོ་ཏི་ཉི་ཤུ་རྩ་ལྔ་དཀར་ཆག་དང་བཅས་པ། གངས་ཅན་འདི་ན་སྟོན་པ་རྫོགས་པའི་སངས་རྒྱས་ཀྱི་གྲུབ་པའི་མཐའ་དོན་བཟང་པོ། ཚིག་འབྲུ་བཟང་པོ། རྫོགས་པའི་བྱང་ཆུབ་ཏུ་འགྲོ་བར་བྱེད་པའི་ལམ་བཟང་པོ་གང་ཡིན་པ་སྨྲ་བའི་གནས་ལ་འཇམ་པའི་གཞོན་ནུའི་བློ་གྲོས་ཐོབ་ནས། འཇིག་ཚོགས་ལ་བལྟ་བའི་རི་བོ་ཉི་ཤུ་པོ་ལུང་དང་རིག་པའི་ཞོ་འཐུང་རུས་པའི་རྡོ་རྗེས་རྣམ་པར་འཇོམས་པས་གངས་ཅན་མཁས་པའི་དབང་པོ་དཔལ་བསམ་ཡས་པ་ཞེས་སྨྲ་བའི་ཉི་མ་ཐམས་ཅད་ཀྱི་འདུན་སར་གྲགས་ལ། སྐྱེས་བུ་དམ་པ་འདིའི་གསུང་རབ་ཀྱི་བརྗོད་བྱ་དང་རྗོད་བྱེད་གཉིས་ཀས་ཟབ་པ་དང་རྒྱ་ཆེ་བའི་གནས་ལ་གཞན་དྲིང་མི་འཇོག་པ་སྨོས་ཅི་འཚལ་གྱི། བསྟན་བཅོས་གཞན་དག་ཐ་སྙད་ཀྱི་རིག་པའི་མཐའ་གཅིག་གི་སྒོར་ལྷུང་བའམ། མཐའ་དྲུག་ཚུལ་བཞིའི་གོ་པ་འཇོག་བཞིན་དུ། མིང་དང༌། ཚིག་དང༌། ཡི་གེའི་བརྗོད་པའི་གནས་ལ་ལྟོས་གྲུབ་ཀྱི་གྲུབ་མཐའ་རང་རྒྱུད་པར་ཁས་བླངས་ནས་སངས་རྒྱས་ཀྱི་ཕྲིན་ལས་ཚད་མེད་པས་གདུལ་བྱ་ཐབས་ཀྱིས་འདུལ་བའི་བཀའ་གསང་གི་ངེས་པ་ཟབ་པ་དང་རྒྱ་ཆེ་བའི་གནས་འགའ་དང་འགའ་ལ་བཟང་པོར་འདུ་ཤེས། འགའ་དང་འགའ་ལ་ངན་པར་འདུ་ཤེས་པའི་འགལ་འབྲེལ་གྱི་ཐལ་འགྱུར་མངོན་སུམ་པར་བཀོད་པས་ཆོས་སྤོང་
བ་ལ་སྤྲོ་བཞིན་དུ་འཇུག་པ་དག་ལས་འཕགས་པའི་བློ་གྲོས་དཀྱིལ་པོ་ཆེས་ཐ་གྲུ་ཡངས་པས་སོ་སོ་ཡང་དག་རིག་པ་བཞིའི་གྲོང་ཁྱེར་ག་ལ་བར་བདེ་བླག་ཉིད་དུ་སོན་པའི་ཚུལ་ཡང་བླ་ན་མེད་པའི་རྒྱུད་སྡེ་རིན་པོ་ཆེ་ནས། གསང་སྔགས་ཀྱི་ངོ་བོ་དེ་ནི་གང་གི་བློ་ཞིབ་པ། ཆེས་ཞིབ་པ། ཤིན་ཏུ་ཟབ་པ། ཆེས་ཟབ་པས་བལྟ་བར་བྱའོ། །ཞེས་དང༌། ཆེས་ཟབ་པ་ནི་གང་ཞེ་ན། གང་ལ་ལ་དག །ཆོས་ཐམས་ཅད་ལ་མུ་དང༌། གཏིང་དང༌། མཐའ་དང༌། དབུས་འཚོལ་བ་དག་ཡོད་དེ། དེ་དག་ནི་བློ་ཟབ་པ་ཆེས་ཟབ་པ་ཞེས་མི་བྱ་ཡི། ཐུག་པ་ཉིད་དུ་ཐུག་པ་ཞེས་བྱའོ། །གང་འཁྲུལ་པ་དག་སྨིག་རྒྱུ་ལ་ཆུར་འདུ་ཤེས་ཏེ་སྙེག་པའམ། ལྗོངས་པ་དག་ནམ་མཁའི་མཐའ་འཚོལ་བ་བཞིན། ཆོས་ཐམས་ཅད་ཀྱི་མུ་དང༌། གཏེང་དང༌། མཐའ་དང༌། དབུས་བཙལ་བས་ཀྱང་མི་རྙེད་ལ་དབྱེ་བར་ཡང་མེད་དོ། །ལངྐའི་བདག་པོ་འོན་ཏང་ཆོས་ཐམས་ཅད་ལ་མུ་དང་གཏིང་མེད་ལ། མཐའ་དང་དབུས་མེད་པར་ཆུབ་པ་གང་ཡིན་པ་དེ་ནི་བློ་ཟབ་པ། ཆེས་ཟབ་པ་ཞེས་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཐམས་ཅད་ཀྱི་དགོངས་པ་ནི་རྟོག་དཔྱོད་དང་བྲལ་བའོ། །ཞེས་བསམ་གྱིས་མི་ཁྱབ་པ་འཕགས་པའི་བློ་གྲོས་ཀྱི་མཐུས་གངས་ཁྲོད་འདི་ན་གྲུབ་མཐའ་སྨྲ་བ་ཐམས་ཅད་ཀྱི་གཙུག་ཏོར་གྱི་རྩེ་མོར་འགོངས་པ་རྒྱལ་བ་གཉིས་པ་ཀུན་མཁྱེན་ངག་གི་དབང་པོའི་གསུང་རབ་ངལ་བསོ་སྐོར་གསུམ་རྩ་འགྲེལ་སྡེ་ཚན་བཅོ་ལྔ་དང༌། མཛོད་བདུན་མ་བུ་ཆ་ལག་དང་བཅས་པ་དཔལ་གསང་བའི་སྙིང་པོའི་རྒྱ་བོད་ཀྱི་
འགྲེལ་པ་མཐའ་ཡས་པའི་དབུས་ན་དོ་ཟླར་འོས་པ་སྤངས་པ་ཕྱོགས་བཅུ་མུན་སེལ་ཉི་ཟླའི་སྤྲིན་གྱི་སྣང་བ་དང་བཅས་པ་པོ་ཏི་བརྒྱད། གཏེར་ཆོས་ཀུན་གྱི་རྒྱལ་པོ་མངའ་བདག་ཉང་ཉི་མ་འོད་ཟེར་གྱིས་ཁོ་མཐིང་ལྷ་ཁང་ནས་སྤྱན་དྲངས་པ་བཀའ་བརྒྱད་བདེ་འདུས་པོ་ཏི་བདུན་བཅས་ཁྱོན་ཀུན་ར་གཅིག་གི་གྲོང་ཁྱེར་ལ་པོ་ཏི་གྲ་མཚུངས་བཞི་བཅུ་ཐམ་པ། མཆོད་ཐེབས་དངུལ་སྲང་ལྔ་བཅུ། འབྲུ་རུའི་ཁལ་བཞི་བརྒྱ་བཅས་ཀྱི་བེད་ཐོག་དང༌། རུ་གཉིས་བརྒྱ་སྐོར་གྱི་དཀར་ཕུད་ནས་འབུལ་རྒྱུ་རང་རེ་མི་མུ་བརྒྱུད་པ་དང་བཅས་པའི་བསོད་ནམས་དམ་པའི་རྟེན་དུ་དམ་བཅའ་བ་ཡིན་ནོ་གསུངས་ནས། ཁོ་བོ་ཅག་ལ་རབ་གནས་ཀྱི་རྗེས་འབྲེལ་དུ་བསྔོ་སྨོན་གྱི་མཐུན་འགྱུར་བྱེད་པར་བསྐུལ་མ་མཛད་པ་ཡིན་པས། རྗེས་འཇུག་ཕྱི་རབས་པ་རྣམས་ནས་ཀྱང༌། སྔོན་གྱི་ཆོས་རྒྱལ་མེས་དབོན་རྣམ་གསུམ་གྱི་སྲས་བརྒྱུད་རྣམས་ཀྱིས་ཡབ་མེས་དམ་པའི་རྣམ་ཐར་བཟང་པོ་ལ་དྲན་པ་ཉེ་བར་བཞག་ནས་རྒྱལ་བའི་བསྟན་པ་རིན་པོ་ཆེ་དེ་འཛིན་དང་བཅས་པ་ལ་ཤིན་ཏུ་གུས་ཤིང་སྲི་ཞུ་བླ་ལྷག་ཏུ་ནི་སྐྱེད། འཇིག་རྟེན་གྱི་འཕྲལ་ཡུན་མ་ལུས་པའི་རྒུད་པ་སེལ་བ་ལ་གཅིག་ཏུ་བརྩོན་པའི་སྙིང་སྟོབས་མ་སྨད་པ་བཞིན། ཡ་རབས་དྲ་མའི་ངང་ཚུལ་བཟང་པོས་བསྡུ་བའི་
དངོས་པོ་བཞི་ལ་ཡོངས་སུ་སྤྱད་ནས་བསོད་ནམས་དམ་པའི་ཡུལ་ལ་ཤིན་ཏུ་འདུན་ཞིང༌། བདག་ཉིད་ལ་བྱང་ཆུབ་མི་ཟད་པའི་ས་བོན་བསྐྲུན་པའི་རྣམ་པར་དཀར་བ་འདི་ལྟ་བུ་རྗེས་སུ་ཡི་རང་བ་བསྒོམས་ཤིང་མཆོད་པའི་རྒྱུན་དང་སྲི་ཞུ་མི་ལྷོད་པ་དམ་ཚིག་ཏུ་བལྟས་ནས་རང་རང་ཡང་བསོད་ནམས་དམ་པའི་ཡུལ་ལ་མཆོག་ཏུ་འདུན་པ་དང༌། དེ་ལྟ་བུའི་དགེ་བའི་རྩ་བ་ཡང་འཕགས་པ་ལག་ན་རལ་གྲི་དང༌། སེམས་དཔའ་ཀུན་ཏུ་བཟང་པོའི་དམ་པ་གསུམ་དང༌། བཟང་པོ་བཞི་ལྡན་གྱི་བསྔོ་བ་དམ་པའི་ལམ་སྲོལ་མ་སྨད་པའི་ཤིང་རྟ་མཆོག་ལ་བཞོན་པའི་རྗེས་འབྲེལ་དུ་བྱང་ཆུབ་སེམས་དཔའ་རྣམས་ཀྱི་འཇུག་པའི་བསླབ་བྱ་ཕ་རོལ་ཏུ་ཕྱིན་པ་བཅུ་ཕྲག་བཅུའི་དངོས་པོ་ལ་ལོངས་སྤྱོད་པའི་སྨོན་ལམ་གྱི་རིམ་པ་ནི། ཞེས་པ་ནས་སྐྱེས་རབས་བརྒྱ་པའི་སྨོན་ལམ་མུ་མཐུད་པ་དཀར་ཆག་ཆེན་མོའི་གཤམ་ལ་བྲིས་སོ། །གཏམ་ཚོགས་ལེའུ་ཞེ་གཉིས་པའོ།། །།
གཏམ་ཚོགས་ལེའུ་ཞེ་གསུམ་པ། ས་སྐྱོང་སྡེ་དགེའི་རྒྱལ་ཁབ་ཏུ་སྔ་འགྱུར་རྒྱུད་འབུམ་རིན་པོ་ཆེ་པར་དུ་བཞེངས་པའི་དུས་ཞུ་ཆེན་པ་རྣམ་གཉིས་ལ་སྐབས་དབྱེ་བའི་གཏམ་དྲང་སྲོང་གི་རྔ་སྒྲ།
ས་སྐྱོང་སྡེ་དགེའི་རྒྱལ་ཁབ་ཏུ་སྔ་འགྱུར་རྒྱུད་འབུམ་རིན་པོ་ཆེ་པར་དུ་བཞེངས་པའི་དུས་ཞུ་ཆེན་པ་རྣམ་གཉིས་ལ་སྐབས་དབྱེ་བའི་གཏམ་དྲང་སྲོང་གི་རྔ་སྒྲ་ཞེས་བྱ་བ། འཇམ་དཔལ་སྨྲ་བའི་སེང་གེ་ལ་ཕྱག་འཚལ་ལོ། །རྣམ་པ་ཐམས་ཅད་མཁྱེན་ཡང་རྣམ་མི་རྟོག །སྒྲ་ཚིག་བརྗོད་པ་བྲལ་བཞིན་བདེན་གཉིས་གསུང༌། །རྣམ་སྣང་གང་ཆེན་
མཚོ་ཡི་ཐུགས་གསུང་སྐུའི། །མི་ཟད་རྒྱན་གྱི་འཁོར་ལོ་ཆེན་པོར་འདུད། །དེ་ལ་ལྷ་བཙད་པོ་ཁྲི་སྲོང་ལྡེའུ་བཙན་གྱི་དུས་རྒྱལ་བའི་བསྟན་པ་རིན་པོ་ཆེ་ལ་བསྟི་སྟང་བླ་ལྷག་ཏུ་མཛད་ནས་མདོ་སྔགས་བཤད་སྒྲུབ་ཀྱི་བསྟན་པ་དར་རྒྱས་སུ་མཛད་པ་ལས། གསང་སྔགས་ནང་གི་རྒྱུད་རྣམས་ནི་གཞུང་རང་ངོ་ནས་གསང་བ་ཡིན་པས་ལྐོག་ཆོས་འབའ་ཞིག་ཏུ་བསྒྱུར། སྤྲུལ་པའི་རྒྱལ་པོ་གསང་བ་སྲུང་བ་ལ་ཐུགས་སྒམ་པས་ཁྱབ་གདལ་དུ་མི་སྒྲོག་པའི་བཀས་བཅད་དེ། རིང་དུ་སྦས་པའི་ངང་ལ་སྒྲ་སྦྱོར་བམ་པོ་གཉིས་པས་སྐབས་དབྱེ་བའི་སྐད་གསར་བཅད་ཀྱིས་དག་ཐེར་ཀྱང་མ་ཕོག །འདི་ལྟར་འཇིག་རྟེན་གྱི་བཟོ་གནས་ཙམ་ལའང་སྔ་མ་སྔ་མ་ལས་ཕྱི་མ་ཕྱི་མ་རྣམ་རིག་བཟོ་བ་ཆོས་ཉིད་ཡིན་པས། གསར་མ་རྣམས་ནི་ཆོས་ཀྱི་ལམ་སྲོལ་ཆེས་དར་ནས་དཔྱད་ཞུས་ལ་རང་བྱན་ཆུད་པའི་དུས་བསྒྱུར་ཞིང༌། རིམ་གྱིས་བརྡ་དག་སྡེབ་སྦྱོར་གྱི་གནས་དང༌། ཚིག་ལ་གྲིམས་པ་དག་གིས་ཡང་ནས་ཡང་དུ་བཅོས་ཤིང་བཅོས་པ་དང་མི་འདྲ་ཡང༌། དུས་འཁོར་ལས། ཡུལ་གྱི་སྐད་ཀྱིས་ཆོས་གོ་ན། །བསྟན་བཅོས་སྐད་ཀྱིས་ཅི་ཞིག་བྱ། །ཞེས་པའི་དོན་ལ་མི་སེམས་པ་དག་གིས། །རྒྱ་གར་དུ་ཉན་ཐོས་པ་རྣམས་ཀྱི་སྤྱིར་ཐེག་པ་ཆེན་པོ་
ཆོས་ལོག་དང༌། སྒོས་གསང་སྔགས་བཀའ་མ་ཡིན་ཟེར་བ་ལྟར། ཚིག་གི་ཆ་ལ་དཔྱད་བཟོད་མི་བཟོད་ཙམ་དང༌། རང་ཉིད་ཀྱི་རྟོག་གེ་ལས་ལྐོག་ཏུ་གྱུར་པའི་རྡོ་རྗེའི་གནས་ཆེན་པོ་རྣམས་ལ་བསྟིང་ཚིག་འབྱམ་ཡིག་སོགས་ཀྱིས་རྒྱལ་བའི་བསྟན་པ་ལ་དབྱེན་བཅོས་མོད་དེ། སྔོན་གྱི་ལོ་ཙཱ་བ་རྣམས་བཙན་པོ་ཁྲི་སྲོང་ལྡེའུ་བཙན་གྱིས་བསྟན་པའི་ལམ་སྲོལ་བཏོད་པའི་ཚེ་སྨོན་ལམ་གྱི་མཐུས་སྤྲུལ་པ་འབའ་ཞིག་ཡིན་པས་བྱིན་རླབས་ཀྱི་ཚན་ཁ་གཞན་དང་མི་མཉམ་པས་རྙིང་རྒྱུད་བཀའ་གཉན། འཚུབས་ཆེ་ཟེར་ཞིང༌། དམག་འཁྲུག་དང་ནད་ཡམས་སོགས་འཇིག་རྟེན་གྱི་རྒུད་པ་ཆེན་པོ་སྟོབས་སུ་གྱུར་པའི་ཚེ་ཕྲ་མ་སྔ་བཙན་ཆོས་ཀྱི་དབྱིངས་སུ་དེངས་ནས་ཀློག་ཁྲོལ་དང་བསྟི་སྟང་གིས་སྐབས་དབྱེ་བ་མཐོང་ཆོས་སུ་གྱུར་པ་ནི་བྱིན་རླབས་མ་ཉམས་པའི་རང་རྟགས་ཡིན་ནོ། །དེའི་རྒྱུའང་བཤད་སྒྲུབ་བྱེད་པའི་ཆོས་དེ་བཀའ་རྩོད་མེད་ཡིན་དུ་ཟིན་ཀྱང༌། དེ་ཡུལ་སྣ་ཚོགས་པའི་སྐད་དང་མཐུན་པར་བསྒྱུར་ཞིང་བཅོས་དགོས་པས། སྒྱུར་བྱེད་གང་ཞིག་དོན་འགྱུར་གྱི་དབྱིངས་འཇལ་བ་ལ་རྨོངས་ནས། དཔེར་ན་ཐང་སྟོང་རྒྱལ་པོ་ལ་ཐང་ཁུག་སྟོང་པའི་སྐད་ཤན་སྦྱར་བ་ལྟ་བུ་དང༌། ཁྱད་པར་བྱང་ཆུབ་ཀྱི་སེམས་གཉིས་དང༌། བསྐྱེད་རྫོགས་ལ་རྣལ་དུ་མ་འབྱོར་པས་
ངག་ལ་བདེན་ཚིག་མ་གྲུབ་པ་དང༌། དམ་ཉམས་འདྲེས་ཁྱེར་གྱིས་སེལ་ཞུགས་པ་དང༌། བདེན་པ་མ་མཐོང་བའི་སོ་སོ་སྐྱེ་བོས་བཅོས་ཤིང་བཅོས་པ་དག་ནི་རེ་ཞིག་ཚིག་གི་ཆ་ལ་དཔྱད་བཟོད་པ་བྱུང་ཡང༌། དོན་གྱི་བྱིན་རླབས་ཞུད་པའི་ཕྱིར་རོ། །དེ་ལྟ་ནའང་རྣམ་པར་ཤེས་པ་ལས་སུ་མི་རུང་བ་སེམས་ཅན་གྱི་ཆོས་ཉིད་ཡིན་པས་ཡི་གེ་བའི་བསླད་སྐྱོན་དང༌། ཞུས་དག་ཧོལ་རྒྱུགས། ཁྱད་པར་དཔེ་རྙིང་རྣམས་ཐོག་སྔས་པས་བརྡ་དག་གྱ་ཚོམ་མང་དུ་སྣང་བ་ལ་ནི་ད་ལམ་ཞུ་ཆེན་པ་རྣམས་གཉིས་སྒྲ་རིག་དང༌། སུམ་རྟགས་ལ་འདྲིས་པས་སྔོན་འཇུག་དང་ས་མཐའ་ཐལ་བ་དང༌། ཧོལ་རྒྱུགས་འགའ་ཤས་ལས་གཞན་མ་སྔོན་མ་རྣམས་ལས་དག་ངེས་བྱུང་འདུག་པས་རྗེས་སུ་ཡི་རང༌། གོ་དཀའ་བའི་ཆ་ནས་ཐེ་ཚོམ་གྱིས་ཁྲམ་རྟགས་ཕོག་པ་རྣམས་ལ་དཔེར་ན། ཁ་པའི་ཤོག་གྲངས། ༢༥༦ལྟ་བ་གཞུང་མེད་ཚིག་ལས་འདས། །ཞེས་པའི་གཞུང་སྒྲ་ནི་ངོ་བོ་ཉིད་མེད་པའི་དོན་ཡིན་པས་མཚོན་རང་སར་བཞག་ཆོག་པ་ཡང་རེ་མང་དང༌། ཡི་གེ་ནོར་བ་དག་ནི་བཅོས་པའི་ཤོག་ཁྲ་ཟུར་གསལ་ལྟར་རོ། །དེ་ཡང་ཐོག་སྔས་པས་ལོ་པཎ་གཉིས་སྐད་བརྡ་མ་འཕྲོད་པ་དང༌། གནའ་སྐད་དང༌། ཡུལ་སྐད་སྣ་ཚོགས་དང༌། བྲིས་ནོར་རྒྱུན་འབྱམས་དང༌། རིང་ལུགས་སྔོན་དར་གྱི་ཤན་ཤོར་བ་སོགས་དཔྱོད་མི་བཟོད་པའི་
རིགས་ལ་ནི་སྔ་ཕྱི་ཐམས་ཅད་ཀྱི་ཚིག་འགྲོས་ལ་ཞིབ་མོར་དཔྱད་པའི་དོན་ཞུས་དགོས་གྲས་ཡིན་འདུག་ཀྱང༌། ད་ནི་རང་ཉིད་འདྲེན་བྱེད་ལྡོངས་པས་དེར་ཟད་དོ། །དེ་ལས་གཞན་པའི་རྒྱུད་དཀྲུགས། ལུང་གཅུས། མན་ངག་གབ་པའི་གནས་ནི། ཕུང་ཁམས་སྐྱེ་མཆེད་ཀྱི་རྒྱུ་འབྲས་གོ་ལྡོག་ནས་དགོངས་པ་ལུང་སྟོན་ལྟར་བཤད་པ་ལ་དཔལ་འཛིན་གྱིས་དངོས་བསྟན་དུ་གོ་བའི་ལོག་རྟོགས་ལྟ་བུའོ། །རྒྱུ་འབྲས་ལ་ཟློ་བའི་རྡོ་རྗེའི་གསང་ཚིག་ཆེན་པོ་རྣམས་ནི་མཐའ་དྲུག་དང་ཚུལ་བཞིས་དཔྱོད་པའི་གནས་དང༌། སྔགས་ལའང་ལེགས་སྦྱར་གྱི་ཁྲོད་དུ་ར་མ་ལུག་འདྲེས་པའི་ཡིག་སྐྱོན་འདུག་ན་མ་གཏོགས། གཞན་མི་མ་ཡིན་དང༌། འགྲོ་ལྡིང་དང༌། ཀླ་ཀློ་ལ་སོགས་པའི་བརྡ་སྐད་འདྲེས་པ་ནི་དཔྱད་དཀའ་ཡང༌། ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་བདལ་སྣང༌། །ཞེས་བ་ལྟར་སངས་རྒྱས་ཀྱི་གསུང་ནི་རྣམ་པ་ཐམས་ཅད་ལ། སྒྲ་སྙན་གྱི་ཚིག་བཞིན་དུ་ཉན་པ་པོའི་རྣམ་རིག་དང༌། མཐུན་པར་འཆར་བས་གསང་སྔགས་མོས་པས་འགྲུབ་པའི་ཚུལ་ཡང་ས་པཎ་དང་འདར་ཕྱར་པའི་གཏམ་རྒྱུད་ཀྱིས་ཤེས་ལ། མདོར་ན་གསུང་རབ་ཀྱི་དོན་རྟོན་པ་བཞི་ལྡན་གྱིས་འཇལ་བའི་དེ་ཁོ་ན་ཉིད་ལྷོངས་སུ་མ་གྱུར་ན། རྟོག་གེའི་རིག་པ་ནི་རྣམ་པར་འཁྱམ་པའི་ཆོས་ཅན་ཏེ། དེ་སྐད་དུ་
རྒྱུད་སྡེ་རིན་པོ་ཆེ་ནས། གསང་སྔགས་ཀྱི་ངོ་བོ་དེ་ནི་གང་གི་བློ་ཞིབ་པ། ཆེས་ཞིབ་པ། ཤིན་ཏུ་ཟབ་པ། ཆེས་ཟབ་པས་བལྟ་བར་བྱའོ། །གང་ལ་ལ་དག་ཆོས་ཐམས་ཅད་ལ། མུ་དང་གཏིང་དང༌། མཐའ་དང་དབུས་འཚོལ་བ་ཡོད་དེ། དེ་དག་ནི་བློ་ཟབ་པ་ཆེས་ཟབ་པ་ཞེས་མི་བྱ་ཡི། ཐུག་པ་ཉིད་དུ་ཐུག་པ་ཞེས་བྱའོ། །ཞེས་གསུངས་པས་ན་ཐོག་མར་སྒྲ་ཚད་ལ་སོགས་པ་རྟོག་གེའི་རིག་པས་བསྲེགས་བཅད་བརྡར་བའི་གསེར་བཞིན་དུ་ཞིབ་པ་དང༌། ཆེས་ཞིབ་པར་བརྟགས་ལ། མཐར་གྱི་དེ་བཞིན་གཤེགས་པའི་བསྟན་པ་ནི་ཆོས་ཉིད་དང་མི་འགལ་བ་ཆོས་སུ་གཟུང་བར་རྗེས་སུ་འདོམས་པ་ཡིན་པས་ཤིན་ཏུ་ཟབ་པའི་བློས། དྲང་དོན་ལ་མི་རྟོན་ངེས་དོན་ལ་རྟོན། །རྣམ་ཤེས་ལ་མི་རྟོན་ཡེ་ཤེས་ལ་རྟོན་པའི་ཕྱོགས་གཟུང་བར་བྱའོ། །ཞེས་པའང་རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་ཞེ་གསུམ་པའོ།། །།
གཏམ་ཚོགས་ལེའུ་ཞེ་བཞི་པ། མཆོད་རྟེན་བཀྲ་ཤིས་འོད་འབར་གྱི་གཏམ། རྙོག་མ་བགྲུངས་པའི་ཀེ་ཏ་ཀ
མཆོད་རྟེན་བཀྲ་ཤིས་འོད་འབར་གྱི་གཏམ། རྙོག་མ་བགྲུངས་པའི་ཀེ་ཏ་ཀ་ཞེས་བྱ་བ། བཞད་པ་བརྒྱད་ལྡན་ལ་ན་མོ། །རྒྱལ་བ་རྣམས་ཀྱི་ཕྲིན་ལས་ཚད་མེད་པ། །སྐྱེས་བུ་དམ་པའི་ཐུགས་དང་རོ་གཅིག་ལ། །གཞན་ཕན་རྒྱ་མཚོ་བཟོ་གནས་སྤྲུལ་པའི་སྐུ། །འགྲོ་བའི་དོན་མཛད་མཆོད་སྡོང་ཆེན་པོར་འདུད། །དེ་ལ་དཔལ་བསམ་ཡས་མི་
འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོའི་ཤར་ཕྱོགས། གློ་དོན་སྟེངས་མཆོད་རྟེན་ཞེས་གྲགས་པའི་ལོ་རྒྱུས་ཅུང་ཟད་བརྗོད་ན། བོད་ཁ་བ་ཅན་འདི་རིགས་གསུམ་མགོན་པོས་འདུལ་ཞིང་ཡིན་པས་འཕགས་པ་སྤྱན་རས་གཟིགས་རྒྱལ་པོའི་ཚུལ་དུ་བསྟན་པ་སྤྲུལ་པའི་རྒྱལ་པོ་སྲོང་བཙན་སྒམ་པོས་སངས་རྒྱས་ཀྱི་བསྟན་པའི་སྲོལ་བཏོད། འཇམ་དཔལ་དབྱངས་ཁྲི་སྲོང་ལྡེའུ་བཙན་གྱིས་རིང་ལ་ཤིན་ཏུའང་དར་རྒྱས་སུ་མཛད། གསང་བའི་བདག་པོའི་རྣམ་འཕྲུལ་མངའ་བདག་རལ་པ་ཅན་གྱི་རིང་ལ་གསུང་རབ་ལ་དག་ཐེར་གྱིས་ཞབས་ཏོག་བསྒྲུབས། དེ་ནས་བསྟན་པ་ཕྱི་དར་ལས་ཇོ་བོའི་སློབ་བརྒྱུད་བཀའ་གདམས་ཀྱི་བསྟན་པ་དར་བའི་དུས་རེ་ཞིག་ན། དགེ་བཤེས་སྟོན་པའི་སློབ་མ་སྤྱན་སྔ་ཚུལ་ཁྲིམས་འབར་ཞེས་བྱ་བ་སྔོན་གྱི་བག་ཆགས་ལས་གཞོན་ནུ་ནས་སཾ་སྐྲྀ་ཏའི་སྐད་ལ་བྱང་ཞིང༌། བོད་དུ་སྔ་ཕྱིར་འགྱུར་བའི་གསང་སྔགས་ཀྱི་ཆོས་ལ་འདི་མི་མཁྱེན་བྱ་བ་མེད་པས། སློབ་དཔོན་ཀླུ་སྒྲུབ་ཀྱི་རིམ་ལྔ་ལ་བརྟེན་ནས་ཆོས་ཉིད་ཀྱི་བདེན་པ་གཟིགས་པས་ཆོས་སྐྱོང་བྲན་དུ་འཁོལ་བ་ཞིག་བྱུང༌། རྒྱ་མ་འཁྲི་སྒང་བཟིང་མོ་དགོན་ཀྱང་འདིས་བཏབ་ཟེར། ཁོང་གིས་ཇོ་བོའི་པད་སྤུངས་ལ་དཔེ་མཛད་ནས་རིན་པོ་ཆེ་ལས་གྲུབ་པའི་པད་སྤུངས་ཤིན་ཏུ་མང་བ་བཞེངས་པའི་ནང་ནས་
ཆེས་མཆོག་ཏུ་གྱུར་པ་ནི་དཔལ་གློ་དོན་སྟེངས་ཀྱི་མཆོད་རྟེན་བཀྲ་ཤིས་འོད་འབར་འདི་ཡིན་ཏེ། དེ་ཡང་ལྷ་མོ་དབྱངས་ཅན་མ་དང༌། རྗེ་བཙུན་མ་སྒྲོལ་མས་ལུང་བསྟན་ནས་རྒྱ་གར་དུའང་བྱོན། བླ་མ་རྡོ་རྗེ་གདན་པ་དང་མཇལ། དེས་ཀྱང་ཡི་དམ་གྱི་ལྷ་ཡིན་པར་ལུང་བསྟན་ཞིང་དབྱངས་ཅན་མའི་རྗེས་གནང་མཛད། འདི་སྒྲུབས་ཤིག་པར་ལུང་བསྟན། སླར་བོད་དུ་བྱོན་ནས་དབྱངས་ཅན་མ་བསྒྲུབས་པས། ཨ་ཙ་ར་ལྔ་བྱུང་བ་རྣམས་ཀྱིས་རིན་པོ་ཆེའི་ཕུང་པོ་ཕུལ། དེ་ལ་མཆོད་རྟེན་བཞེང་བར་དགོངས་པ་གཏད་པའི་ཚེ་མ་ཇོ་ཆོས་དཔོན་སོགས་ཀྱིས་ཞབས་ཏོག་དང་སྦྱིན་བདག་བྱས། མཆོད་རྟེན་བཞེང་བའི་ཁུར་དགེ་སློང་རྩ་ནང་པ་ལ་ཕོག་ནས་ས་དཔྱད་གཟིགས་ཏེ་ཀླུ་དགའ་བོ་གནས་པའི་རྡོ་རུས་སྦལ་འདྲ་བའི་སྟེང་དུ་བཞེངས་ཤིག་པར་ལུང་བསྟན་ནས་ས་འདུལ་དང་རབ་གནས་བླ་མ་ཉིད་ནས་མཛད། དེར་ལྷ་ཁང་རི་རབ་འདྲ་བ་ཞིག་བཞེངས། མཆོད་རྟེན་ལུགས་ས་མཁང་བོ་ཤོངས་ཀྱི་སྒོར་མོ་ཀླུངས་སུ་བྱས། བཟོ་བོ་ཡང་མཚོན་བྱེད་ཙམ་དང༌། མཆོད་རྟེན་ཡང་ཞག་བདུན་ལ་བཞེངས་ཚར་བས་རང་བྱོན་ཡིན་པར་གྲགས་ཤིང༌། དུས་དེར་ས་གཡོས་ཐེངས་ལྔ་བྱུང༌། ཕྱག་རྡོར་གཏུམ་པོའི་སྐུ་ལུགས་གཅིག་མ་ཁྲུ་གང་པ་དང༌། སངས་རྒྱས་ཀྱི་རིང་བསྲེལ་ཕུལ་གང༌། འབྲོམ་གྱི་དབུ་སྐྲ། ཁམས་
པ་ཆོས་ཉིད་རྒྱ་མཚོའི་རིང་བསྲེལ་སྲན་དཀར་ཙམ་པ་བརྒྱད། ཆོས་གོས་ཉི་ཟེར་མ། ཆོས་སྐུའི་རིང་བསྲེལ་མང་པོ་དང་བཅས་པ་ནང་གཟུངས་སུ་བཞུགས། གཙུག་ལག་ཁང་དུ་མཆོད་རྟེན་གདན་འདྲེན་པའི་ཚེ་ཡོན་བདག་གི་གྲལ་ན་དབྱངས་ཅན་མའི་སྤྲུལ་པ་ཁམས་མོ་ཞིག་ལ་བུ་གསུམ་ཡོད་པའི་ཆེ་བ་ལ་བཀྲ་ཤིས། འབྲིང་པོ་ལ་འོད་འབར། ཆུང་བ་ལ་དོན་ལྡན་ཟེར་བ། བླ་མའི་ཞལ་ནས་ཨ་མ་ཁྱོད་མགོ་ཡོན་ཡོན་དུ་མ་སྡོད་པར་བཀྲ་ཤིས། འོད་འབར། དོན་ལྡན་ཁྲིད་ཤོག་གསུངས་པས་མཁའ་འགྲོ་སྡེ་ལྔས་འཇའ་ལས་ལ་གདན་དྲངས་ཏེ་ལྷ་ཁང་དུ་ཚེགས་མེད་དུ་གདན་འདྲོངས། མིང་ཡང་བཀྲ་ཤིས་འོད་འབར་དུ་གྲགས། རབ་གནས་ཀྱི་ཚེ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་ཐིམ། ཨོ་རྒྱན་གྱི་བསྒྲུབས་གནས་ནས་འཇའ་ཟུག་པ་དང༌། མཆོད་རྟེན་ལ་དབུ་ཐོག་ཏུ་འཇའ་གུར་ཕུབ་པ་ཀུན་གྱིས་མཐོང༌། ཡེ་ཤེས་བཞུགས་པའི་རྟགས་སུ་བདེ་དྲོད་རྒྱུན་མ་ཆད་པར་བཞུགས། སྟེང་ནས་མཆོད་པའི་ལྷ་མོས་མཆོད། རྒྱལ་ཆེན་སྡེ་བཞི་དང༌། དཔལ་ལྡན་ལྷ་མོས་གཉེར་ཁ་བྱེད་པས་ཡུལ་དེར་སྡེ་བརྒྱད་ཀྱི་གནོད་པ་ཉུང་ཞིང་སུ་ཞིག་གིས་མཇལ་བ་དང་ཕྱག་བསྐོར་བྱས་པས་བྱིན་རླབས་འཇུག་ཅིང་གཟའ་ཀླུ་སྡེ་བརྒྱད་ཀྱི་གནོད་པས་མི་ཚུགས། ཕྱོགས་བཞི་ན་མི་འགྱུར་བའི་གཟེར་བཞི་ཡོད་པའི་རྟེན་འབྲེལ་གྱིས་ཧོར་དམག་གི་གནོད་པས་ཀྱང་མི་
ཚུགས། མདུན་ན་མཆོད་རྟེན་པདྨ་སྤུངས་པའི་ནང་གཟུགས་རིན་པོ་ཆེའི་ཏོག་དང༌། ཀླུ་འབུམ་བརྒྱ་རྩ། རིན་ཆེན་སྣ། རྒྱ་གར་གྱི་ས་སྣ་ཆུ་སྣ། ཧོར་བཟློག་གི་འཁོར་ལོ་བཅས་བཞུགས་པས་བྱིན་རླབས་ཆེ། དེ་ལྟར་སྐུ་གསུང་ཐུགས་ཀྱི་རྟེན་འདི་དག་ནི་སངས་རྒྱས་རྣམས་ཀྱི་ཕྲིན་ལས་ཚད་མེད་པ་ལས་སེམས་ཅན་གྱི་དོན་དུ་སྣང་ཞིང་སྤྲུལ་པས། གཞན་དོན་རླབས་པོ་ཆེ་མཛད་པས་མཐོང་ཐོས་དྲན་རེག་ཐམས་ཅད་ལ་དངོས་དང་བརྒྱུད་ནས་བྱང་གྲོལ་གྱི་ས་བོན་འཇོག་པའི་འབྲེལ་ཚད་དོན་ལྡན་ཡིན་པའི་ཕྱིར། འདི་དག་ལ་བསྟི་སྟང་དང༌། བསྙེན་བཀུར་བགྱིས་ན་སངས་རྒྱས་དངོས་ལ་མཆོད་པ་དང་ཕན་ཡོན་མཚུངས་པའི་ཚུལ་སྟོན་པས་འཕགས་པ་འཇམ་དཔལ་ལ་བཀའ་སྩལ་པ། ད་ལྟ་ང་ལ་མཆོད་པ་དང༌། །མ་འོངས་གཟུགས་བརྙན་མཆོད་པ་གཉིས། །ཁྱད་པར་ཅུང་ཟད་ཡོད་མ་ཡིན། །བསོད་ནམས་མཉམ་ཞིང་རྣམ་སྨིན་མཉམ། །ཞེས་གསུངས་པ་ལ་ངེས་ཤེས་ཁྱད་པར་ཅན་དང༌། ཆོས་སྣང་བའི་སྒོ་དད་པ་བླ་ལྷག་ཏུ་བསྐྱེད་ནས་ཕ་མར་གྱུར་པའི་སེམས་ཅན་རྣམས་ཀྱི་དོན་དུ་དམིགས་ནས་ཡན་ལག་བདུན་པས་སྣ་དྲངས་ཏེ། ཕྱག་མཆོད་དང༌། བསྐོར་བ་སྨོན་ལམ་གྱི་རིམ་པ་རྒྱ་ཆེན་པོ་མཛད་འཚལ། ཞེས་པའང་རབ་བྱུང་གྲྭ་ཚང་གི་མཁན་པོ་རིན་ཆེན་བསམ་འགྲུབ་ཀྱི་གསུང་ངོར་གནས་ཡིག་ཧྲུལ་པོའི་ངག་བགྲོས་འདོད་
རྒྱལ་བ་རྣམས་ལ་སྔོན་གྱི་དེབ་ཐེར། རྩོད་མེད་ནས་བྱི་དོར་བྱས་ཏེ་རྫོགས་ཆེན་པ་རང་བྱུང་རྡོ་རྗེས་དངུལ་དཀར་གྱི་འཕགས་པ་རིན་པོ་ཆེ་བསམ་ཡས་སུ་མངའ་གསོལ་དང་ཆབ་གཅིག་རབ་གནས་ལ་ལྷགས་པའི་ཚེ། གོང་མའི་གདན་ས་དགོན་པས་ཕུག་ཏུ་བྲིས་པའོ། །གཏམ་ཚོགས་ལེའུ་ཞེ་བཞི་པའོ།། །།
གཏམ་ཚོགས་ལེའུ་ཞེ་ལྔ་པ། བདེ་བར་གཤེགས་པའི་མཆོད་རྟེན་བརྒྱད་ཀྱི་ཐིག་གི་གཏམ་བྱང་ཆུབ་ལྗོན་ཤིང་།
བདེ་བར་གཤེགས་པའི་མཆོད་རྟེན་བརྒྱད་ཀྱི་ཐིག་གི་གཏམ། བྱང་ཆུབ་ལྗོན་ཤིང་ཞེས་བྱ་བ། བདུད་བཞི་གཡུལ་ལས་རྣམ་རྒྱལ་རྒྱལ་བ་དེའི། །སྤངས་རྟོགས་ནམ་མཁའི་མཐས་ཀྱང་མི་ཐུག་པ། །རྟགས་དང་བརྡ་ཡིས་མཚོན་དཔེས་ཆོས་སྐུའི་གཟུགས། །འགྲོ་འདིའི་བསོད་ནམས་ཤིང་རྟས་འདྲེན་ཕྱིར་བཀོད། །དེ་ལ་སྤྱིར་དེ་བཞིན་གཤེགས་པའི་རིང་བསྲེལ་དང་སྐུ་གདུང་གི་སྣོད་དུ་གྱུར་པ་ནི་བསམ་གྱིས་མི་ཁྱབ་ཅིང༌། འཕགས་པའི་ཡུལ་དུ་ཤིང་རྟ་ཆེན་པོ་ཀླུ་སྒྲུབ་སོགས་ཀྱིས་མཆོད་རྟེན་ཆེན་པོ་བརྒྱད་དུ་གསུངས་ཤིང་བསྟོད་པ་མཛད་པ་རྣམས་མདོ་རྐྱུད་གང་ལས་གསུངས་ན། ཤེར་ཕྱིན་གྱི་མདོ་ལས། རིན་ཆེན་སྣ་བདུན་ལས་བྱས་པའི་མཆོད་རྟེན་བརྒྱད་རྒྱར་ནི་དཔག་ཚད་ཕྱེད། འཕང་དུ་ནི་དཔག་ཚད་ཙམ་པ་ཤ་སྟག་གོ །ཞེས་དང༌། དེ་བཞིན་དུ་དམ་པའི་ཆོས་པདྨ་དཀར་པོ། སྙིང་རྗེ་པད་དཀར་སོགས་ནས་ཀྱང་རྒྱ་ཁྱོན་དེ་དང་ཕྱོགས་མཚུངས་པར་བཤད་ཅིང༌། མདོ་
མངས་སོགས་ལས་རྣམ་པ་དུ་མ་གསུངས་པས་མཐའ་གཅིག་ཏུའང་མི་འཛིན་ཏེ། གནས་ནི་ཐུན་མོང་ཡོངས་སུ་གྲགས་པའི་གྲོང་ཁྱེར་སེར་སྐྱར་སྐུ་བལྟམས་པའི་ཚེ་པདྨ་སྤུངས་པ་ནས་བཟུང་རིམ་པར་ཤཱཀྱ་ཐུབ་པའི་མཆོད་རྟེན་བརྒྱད་དུ་གྲགས་པ་དང༌། གཞན་ཡང་། དངོས་གྲུབ་འབྱུང་བ་ཞེས་བདུད་རྩི་མཆོག་གི་རྒྱུད་ལས། རོ་ཡི་སྲུང་མ་ཆེན་མོ་ནི། །མ་མོ་ཆེན་མོ་བརྒྱད་བཞག་གོ །མཆོད་རྟེན་བརྒྱད་དུ་རྣམ་པར་བཞག །དེ་དག་བརྟེན་གནས་ཆེན་པོ་ཡང༌། །མཆོད་རྟེན་བརྒྱད་དུ་རྣམ་པར་བཞག །ཅེས་སྔོན་གྱི་ཚེ་དཔལ་ཆེན་པོས་དྲགས་པོ་བཏུལ་བའི་ཚེ་ཡུལ་བརྒྱད་ཀྱི་རོ་གླིང་དུ། མ་མོ་བརྒྱད་ཀྱི་རྟེན་གནས་དངོས་གྲུབ་འབྱུང་བའི་མཆོད་རྟེན་བརྒྱད་དུ་གྲུབ་པ་ནི། མ་ག་དྷཱར་བདེ་བྱེད། སིངྒ་ལར་ཏ་ལ་ལ། བལ་པོར་བྱ་ཁྲི་ཁ་ཤོར། སེང་གེ་གླིང་དུ་དགེའུ་དོན། ལི་ཡུལ་དུ་གོམ་ས་ལ་གནྡྷཱ། ཁ་ཆེར་ཀན་ཀ །ཟ་ཧོར་དུ་བདེ་སྤྱོད་གཞོན་ནུའི་མཆོད་རྟེན་ཏེ་རྣམ་པ་བརྒྱད་དུ་བསྟན་ཞིང༌། སྐུ་ལུས་ཀྱི་ཚད་ལྟར་བཤད་པ་ནི་དུས་འཁོར་ལས། གསང་བའི་ཆུ་སྐྱེས་མཛོད་སྤུའི་མཐའ་ཡིས་མཆོག་གི་རྒྱལ་བའི་བདག་པོའི་མཆོད་རྟེན་དཔངས་ཀྱི་ཚད། །དེ་ཡི་ཕྱེད་ཀྱི་གདན་གྱི་རྒྱ་སྟེ་ས་གཞི་ཤིན་ཏུ་མཉམ་པ་དེ་ཡི་སུམ་ཆས་ཕྱོགས་
ཆ་རྣམས། །ཕྱེད་དང་གཉིས་མཐར་ཕྱིར་འབུར་ཆུ་སྐྱེས་ཐུགས་ཀར་གནས་པའི་ཁོར་ཡུག་གདན་གྱི་ཚད་ཀྱི་ཟླུམ་པོའོ། །གཞི་དང་མཉམ་པའི་པདྨའི་མཐའ་ཡིས་ཆེས་དམན་ཁོག་པ་དེའི་ཕྱོགས་ཆ་ཡིས་ཀྱང་མགྲིན་པའོ། །གདན་ཕྱེད་ཆ་ཡིས་གདོང་སྟེགས་ས་གཞི་ཤིན་ཏུ་མཉམ་པ་དེ་ཡི་སུམ་ཆས་ཕྱོགས་ཆའོ་གསང་བ་ཡི། །ཆུ་སྐྱེས་དག་ལས་ཕྱེད་ཆས་ཉི་མས་གདན་གྱི་དཔངས་ཀྱི་ཚད་དེ་ཤིན་ཏུ་མཉམ་པར་ཡང་འདི་འགྱུར། །གདན་ནས་པདྨའི་མངོན་མཚམས་ཐུགས་ཀར་གནས་པའི་ཁོར་ཡུག་མཐའ་དང་དེ་ནས་མགྲིན་པའི་རྩ་བའོ། །དེ་ནས་གདོང་གི་མཐར་ནི་དེ་བཞིན་ཆུ་གཏེར་ཕྱེད་ཆས་དུས་དང་རིག་བྱེད་རྣམས་ཀྱི་དུམ་བུ་གསུམ། །གདན་ལས་རིག་བྱེད་ཀྱི་ནི་པདྨ་ཐུགས་ཀར་གནས་པའི་ཁོར་ཡུག་མགྲིན་པའི་ཚད་ཀྱང་དེ་བཞིན་ཏེ། །ཕྱེད་བཅས་བརྒྱད་ཀྱི་གདོང་པའི་ཚད་དང་དེ་ཡི་སྟེང་དུ་གདུགས་ཀྱི་ཕྲེང་བར་འགྱུར་རོ་མི་ཡི་དབང༌། །མཛོད་སྤུ་མཚམས་ནས་དཔྲལ་བ་དག་དང་སྤྱི་བོ་དེ་ནས་འདིར་ནི་གཙུག་ཏོར་དག་གི་མཐར་ཐུག་འདི། །དེ་ལྟར་ངེས་པར་འཇིག་རྟེན་ཁམས་འདི་མཐའ་དག་རྒྱལ་བའི་སྐུ་སྟེ་འཁོར་ལོ་མཆོད་རྟེན་རང་བཞིན་ནོ། །ཞེས་གསང་གནས་ནས་གཙུག་ཏོར་གྱི་བར་དང༌། མཆོད་རྟེན་གྱི་བུམ་གདན་པདྨ་ཡན་ཆད་ནས་ཆར་ཁེབས་མན་ཆད་འཇིག་རྟེན་གྱི་ཁམས་དཔག་ཚད་
འབུམ་ཕྲག་བཞི་པ་རྣམས་ཕྱི་ནང་གཞན་གསུམ་གྱི་རྣམ་བཞག་དང་ཆོས་མཚུངས་པར་དག་པ་སྦྱོར་ཞིང༌། དེ་ཡང་པདྨ་ཡན་གྱི་དཔངས་ཕྱེད་ཆ་ལ་རྒྱའི་ཚད་དུ་གསུངས་སོ། །རང་བཞིན་ལྷུན་གྱིས་གྲུབ་པ་ལྟར་ན། རྡོ་རྗེ་བཀོད་པའི་རྒྱུད་ལས། འདོད་ཁམས་དབང་གི་རི་བོ་ལ། །གཟུགས་ཁམས་བང་རིམ་ཁྲི་འཕང་ཅན། །གཟུགས་མེད་བུམ་རྟེན་བུམ་པར་བཅས། །སྐུ་གདུང་ཆེན་པོར་རྒྱུན་དུ་གནས། །ཞེས་སོ། །ད་ནི་མཆོད་རྟེན་དངོས་ཀྱི་སྐུ་ཚད་ལ་དུས་འཁོར་ནས་བཤད་པའི་མགུལ་པ་ཐུང་བ་དང༌། །དྲི་མེད་འགྲེལ་པ་ནས་བཤད་པའི་མགྲིན་རིང་གཉིས་ལས། ཕྱི་མ་བྱད་ལེགས་ཤིང་མཁས་པ་བུ་སྟོན་སོགས་ཀྱང་དེ་ལྟར་འཆད་ལ། འོན་ཀྱང་མི་དབང་སངས་རྒྱས་རྒྱ་མཚོས་བུ་སྟོན་རིན་པོ་ཆེ་དང༌། སྟག་ལོ་སྤྲུལ་སྐུ། ཕྲང་ཁབ་སོགས་ཀྱིས་མཛད་པར་ཡང་མཛེས་ཆ་བཙལ་བས་ཅུང་ཟད་སྐྱོན་རེ་མཐོང༌། ཞེས་གསུངས་པའང་མད་པར་གདའ་སྟེ། བུ་ལུགས་རི་མོས་བྲིས་ན་ཤིན་ཏུ་སྦྱང་ཞིང་བྱད་ལེགས་པ་འདྲ་བ་ལ། འབུར་དུ་གྲུབ་ཚེ་ཅུང་ཟད་ཀྲོང་བ་ཞིག་དང༌། གཞན་རྣམས་ལའང་སྔ་མའི་འཕྲོར་བྲག་ནག་པ་སོགས་མཁས་པ་ཇི་སྙེད་ཀྱི་རང་རང་གིས་བཞེད་པ་རིགས་མི་འདྲ་ཞིང་དེང་སང་ཤས་ཆེ་བ་སྤྲུལ་སྐུ་ང་ལ་གཟིགས་དང༌། སྟག་ཚང་ལོ་ཙ་བའི་ཐིག་ཆ་འབེབས་པ་
མང་ནའང་མཛེས་བཙལ་བ་ལས་བཤད་ཁུངས་དང་སྦྱོར་རྒྱུ་རང་དཀའ་ཞིང་སྟག་ལོའི་དེར་བྲེ་སྟན་ཞེང་ཆུང་ལ་ཆོས་འཁོར་བཅུ་གསུམ་དཔངས་དམས་ཤིང་ཞེང་ཆེས་པ་དང༌། བདེ་ཆེན་དཔངས་མཐོ་ཞིང་དཀྱུས་ཐུང་བ་དང༌། བད་ཆུང་དེ་བས་ཀྱང་ཐུང་ཞིང་དགེ་བཅུ་དང་བང་རིམ་ཐུང་བས་ཀྲོང་བ་འདྲ་བ། བྲང་ཁ་བའི་དེར་ནི་ཆོས་འཁོར་བཅུ་གསུམ་ཞིང་ཆེ་ཞིང་དཔངས་མཐོས་པ་དགེ་བཅུ་ནས་བང་རིམ་གསུམ་ཞིང་ཆུང་ཞིང་ས་འཛིན་རྒྱ་ཆེས་པ་ནས་ཅུང་ཟད་བསྐུམ་པ་བཅས་སྐྱོན་ཀུན་སྤངས་པའི་ཁུལ་གྱིས་འདི་བཞིན་དུ་བཏབ་ལ། ཞེས་གསུངས་པའི་མཆོད་རྟེན་གྱི་བྱད་དབྱིབས་ལ་ཞིབ་མོར་དཔྱད། གཙུག་ལག་ཕྲེང་བའི་ལུགས་བཞིན་སྣ་ཚོགས་རང་གྲོལ་གྱིས་མཛད་པའི་ཐིག་ཆ་ཧ་ཅང་ཞེང་ཆེས་པ་སོགས་ཀྱི་རྣམ་གཞག་ལས་ལྡོག་པར་བྱས། རང་ངོར་དགེ་བཅུ་ཡན་ནས་ཆོས་འཁོར་མན་ལ་སྐུ་གཟུགས་ཀྱི་ཚད་རགས་པ་མཚོན་པ་དོན་ལ་གནས་པ། ཆུ་ཞིང་གབ་པའི་ངོས་ནས་རང་གི་སྣང་ཆའི་རྟེན་འབྲེལ་གྱི་འཆར་སྒོ་དང་ཡང་བསྟུན་གྱིན་བཤད་པར་བྱ་བ་ནི། དང་པོ་ཁོད་སྙོམས་ས་གཞིའི་སྟེང༌། །ཚངས་ཐིག་དྲང་པོ་ཉིད་དུ་བཏབ། །བྱ་རྗེས་ཀྱིས་བཙལ་བསྣོལ་ཐིག་དང༌། །ཟུར་ཐིག་གཉིས་པོ་ལེགས་པར་གདབ། །མཆོད་རྟེན་སྐུ་ཚད་ལ་དཔགས་པའི། །རེ་ཁཱ་གྲུ་བཞི་ཁམ་འཆུས་པར། །ཆ་
ཆེན་བཅུ་རུ་བགོས་པ་ཡི། །རེ་རེའང་ཆ་ཕྲན་བཞི་བཞིར་དབྱེ། །ཆ་ཕྲན་བཞི་བཅུ་ཐམ་པ་འབྱུང༌། །བུམ་པ་མན་གྱི་ཐིག་ཡིན་ནོ། །དེ་སྟེང་བྲེ་ཆོས་ཏོག་ལ་སོགས། །བྱ་ཕྱིར་ཚངས་པའི་གཡས་དང་གཡོན། །ཆ་ཆེན་རེ་རེ་བསྐྱེད་པ་ཡི། །དཔངས་སུ་ཆ་ཆེན་ཕྱེད་དང་བདུན། །ཀུན་ཀྱང་ཆ་ཕྲན་བཞི་བཞིར་དབྱེ། །དེ་ནས་བྲི་ཐིག་ལ་མཚོན་ན། །རེ་ཁཱས་དབྱེ་བ་འདི་ལྟ་སྟེ། །དང་པོ་ས་འཛིན་དཔངས་ལ་གསུམ། །ཞིང་དུ་ཚངས་ཐིག་གཡས་གཡོན་དུ། །ཆ་ཕྲན་ཉི་ཤུ་ཉི་ཤུའོ། །ཐེམ་སྐས་གཉིས་ལ་དཔངས་རེ་རེ། །ཞིང་དུ་བཅུ་བདུན་བཅོ་ལྔ་དོར། །སེང་ཁྲི་དཔངས་བརྒྱད་ཞིང་བཅུ་གསུམ། །བ་གམ་འཛིན་བྱེད་གཉིས་པོ་ནི། །དཔངས་སུ་ཆ་ཕྲན་རེ་རེ་ལ། །ཞིང་ཕྱེད་བཅུ་བཞི་བཅུ་བཞིའོ། །བ་གམ་དཔངས་གཉིས་ཞིང་བཅོ་ལྔ། །དགེ་བཅུ་དཔངས་གཅིག་ཞིང་བཅུ་གསུམ། །བང་རིམ་བཞི་པོ་མས་ཡར་རིམ། །དཔངས་སུ་ཆ་ཕྲན་གཉིས་གཉིས་ལ། །ཞིང་དུ་ཉི་མ་དྲག་པོ་དང༌། །ཕྱོགས་དང་སྲིན་པོ་ཕྱེད་ཆའི་ཚད། །བུམ་གདན་དཔངས་གཅིག་ཞིང་ཕྱེད་དགུ། །མཛེས་ཆའི་དབང་གིས་པདྨའི་དབྱིབས། །བྱེད་ན་ལྟག་སྤྲོད་ཚུལ་དུ་བྱ། །བུམ་དཔངས་ཆ་ཕྲན་བཅུ་གསུམ་ལ། །རྩ་བའི་ཞིང་ལ་ཆ་ཆུང་བརྒྱད། །གྱེན་དུ་ཇེ་འཕེལ་ཆ་ཕྲན་བཅུའི། །མཚམས་བུམ་པའི་སྨད་ནས་ཡར་ཇེ་འཕེལ་དང་ཞིང་ཆེས་ནས་ཞུམ་པ་གཉིས་ཀྱི་མཚམས་ཐིག་གིས་བཅད་པ་ལྟ་བུའི་ཟུར་ཐོན་པའི་བཙན་ཐབས་རང་མི་བྱེད་པར། ཚ་གྲང་འགྲིགས་པ་ལ་ཅུང་ཟད་ལྡིར་སྟབས་སུ་བྱས་པས་བུམ་དབྱིབས་
ལེགས་པར་འོང༌། ནས་ལྡིར་གྱི་ཞིང་ཚད་ལ། །ཆ་ཕྲན་བཅུ་ཐམ་བཅུ་ཐམ་མོ། །བུམ་སྟོང་གྱེན་ཞུམ་ཆ་ཕྲན་གསུམ། །བུམ་པའི་སྟེང་རྒྱ་ཆ་ཕྲན་བརྒྱད། །དེ་ནས་བྲེ་མགུལ་དཔངས་ཚད་ལ། །ཆ་ཆུང་ཕྱེད་གཉིས་ཞེང་ལ་གཉིས། །བྲེ་སྟན་དཔངས་ལ་ཆ་ཕྲན་ཕྱེད། །ཞིང་དུ་ཕྱེད་དང་གསུམ་ཡིན་ལ། །བྲེ་དངོས་དཔངས་ལ་ཆ་ཕྲན་གཉིས། །ཞེང་དུ་ཆ་ཕྲན་གསུམ་གསུམ་མོ། །གདུགས་འདེགས་དཔངས་ལ་ཆ་ཆུང་གཅིག །ཞིང་དུ་རྩ་བར་ཆ་ཆུང་ངོ། །རྩེ་མོར་ཆ་ཆུང་ཕྱེད་དང་གསུམ། །པདྨའི་དབྱིབས་དོད་མཛེས་པར་བྱ། །དེ་སྟེང་ཆོས་ཀྱི་འཁོར་ལོ་ནི། །འོག་གཞི་གདུགས་འདེགས་པདྨའི་སྟེང༌། །ཚངས་ཐིག་གཡས་གཡོན་ཆ་ཕྲན་གསུམ། །དཔངས་ལ་ཆ་ཕྲན་བཅུ་གསུམ་པའི། །རྩེ་མོའི་ཞིང་ཚད་ཆ་ཕྲན་རེའི། །མཚམས་སུ་ཡས་མས་ཐིག་བཟུང་ནས། །བཏབ་པས་ཆོས་འཁོར་ཕྱི་དབྱིབས་འགྲུབ། །དེ་ལས་ཆ་ཕྲན་བཞི་ཆ་གཅིག །ནང་དུ་སྟོད་སྨད་མཉམ་པར་བསྐུམ། །བཏབ་པས་མོ་འཁོར་བར་ཉག་རྟོགས། །དེ་ནས་ཆོས་འཁོར་དང་ངས་ཚད་ནི། །བཅུ་གསུམ་རེ་རེའི་སྟེང་དུ་ཡང༌། །རང་རང་བཞི་ཆའི་སྒོས་ཐིག་གདབ། །ཆ་གསུམ་གདུགས་སམ་ཕོ་འཁོར་དང༌། །ཆ་གཅིག་མོ་འཁོར་དག་ཏུ་བཞེད། །དེ་སྟེང་ཐུགས་རྗེ་མདོ་གཟུངས་ནི། །རྩ་བའི་ཞེང་ནི་གཡས་གཡོན་དུ། །གསུམ་ཆས་དམན་པའི་ཆ་ཕྲན་རེ། །དཔངས་སུ་ཆ་ཕྲན་གཅིག་གཡེལ་བའི། །སྟེང་རྒྱ་ཆ་ཕྲན་རེ་རེ་ནི། །ཚངས་པའི་གཡས་གཡོན་དག་ཏུའོ། །དབྱིབས་ནི་ཨུཏྤལ་
ཁ་ཕྱེ་བཞིན། །བརྒྱད་དང་བཅུ་དྲུག་སུལ་ལྡན་བྱ། །གདུགས་དཔངས་ཆ་ཆུང་ཕྱེད་གྱེན་འཕགས། །འབྲེལ་བའི་ཤམ་བུའམ་ཟ་ར་ཚགས། །ཆ་ཕྲན་གཅིག་སྟེ་ཁྱོན་ཕྱེད་གཉིས། །སྟེང་རྒྱ་ཆ་ལྟག་སྤྲོད་མཚོན། ཕྲན་ཕྱེད་གཉིས་ལ། །ཟུར་དུ་འཕྱང་བའི་ཤང་ཁའི་རྒྱ། །ཆ་ཕྲན་བཞི་རེ་དྲ་བ་དང༌། །དྲ་ཕྱེད་སོགས་ཀྱིས་མཛེས་པར་བྱ། །གདུགས་ཁེབས་ཆ་ཕྲན་གཅིག་གི་དཔངས། །རྩ་བ་གདུགས་དང་ལྟགསྤྲོད་མཉམ། །སྟེང་རྒྱ་ཆ་ཕྲན་གསུམ་དུ་གཡེལ། །ཟླ་ཕྱེད་དཔངས་ལ་ཆ་ཕྱེད་གཉིས། །རྩེ་གཉིས་བགྲོད་པ་ཚངས་ཐིག་ནས། །གཡས་གཡོན་ཆ་ཕྲན་གཉིས་སུ་དོར། །ཉི་མ་ཟླུམ་འཁོར་ཆ་ཕྱེད་གསུམ། །ཏོག་རྒྱ་ཆ་ཕྲན་གཅིག་ཉིད་ལ། །དཔངས་སུ་ཕྱེད་གཉིས་ཕྱུར་བུར་བྱ། །ཀུན་ལ་ཚོན་ཐོབ་བཤད་ན་ཡང༌། །མཆན་གྱིས་རྣམ་པར་གསལ་བར་བསྟན། །དེ་ལྟར་བྱང་ཆུབ་ཆེན་པོའམ། །བདུད་འདུལ་མཆོད་རྟེན་ཞེས་གྲགས་པ། །གཟུགས་ཅན་སྙིང་པོ་ལ་སོགས་པས། །ཐུབ་དབང་བྱང་ཆུབ་ཤིང་དྲུང་དེར། །མངོན་པར་སངས་རྒྱས་དུས་སུ་བཞེངས། །ཆ་ཚད་འདི་ཡིས་གཞི་བཟུང་ལ། །གཞན་རྣམས་བདུན་པོའི་རྣམ་འགྱུར་ནི། ༈ །པདྨ་སྤུངས་པར་གྲགས་པའམ། །བདེ་གཤེགས་འབྱུང་བའི་མཆོད་རྟེན་ནི། །བང་རིམ་བཞི་པོ་ཟླུམ་པོ་ལ། །བདྨ་དང་ནི་འཁོར་ལོས་སྤྲས། །སེར་སྐྱར་བཀྲ་ཤིས་ལུམྦིའི་ཚལ། །བལྟམས་ཚེ་ཟས་གཙང་སོགས་ཀྱིས་བཞེངས། ༈ །ཆོས་འཁོར་བཀྲ་ཤིས་སྒོ་མང་ནི། །བང་རིམ་བཞི་
པའི་དབུས་དག་ཏུ། །རང་རང་སུམ་ཆའི་གློ་འབུར་ལ། །ཕྱོགས་རེ་སྒོ་ནི་བཞི་བཞི་འམ། །བརྒྱད་དང་བཅུ་གཉིས་བཅུ་དྲུག་ཏུ། །བྱེད་པ་བདེན་བཞི་རྣམ་ཐར་བརྒྱད། །རྟེན་འབྲེལ་བཅུ་གཉིས་སྟོང་པ་ཉིད། །བཅུ་དྲུག་མཚོན་པ་ལྔ་སྡེ་ཡིས། །གྲོང་ཁྱེར་ཝཱའ་རཱ་ན་སི་དེར། །ཐུབ་པས་ཆོས་འཁོར་བསྐོར་ཚེ་བཞེངས། ༈ །ཆོ་འཕྲུལ་ཆེན་པོའི་མཆོད་རྟེན་ནི། །བང་རིམ་བཞི་པོ་རང་རང་གི །སུམ་ཆའི་དབུས་མ་འབུར་དུ་དོད། །མུ་སྟེགས་ཕམ་པར་མཛད་པའི་ཚེ། །གཉེན་ཡོད་ཛཱེ་ཏའི་ཚལ་ཆེན་པོར། །ལི་ཙཱ་བྱི་ཡིས་བཞེངས་པའོ། ༈ །ལྷ་བབ་མཆོད་རྟེན་ཞེས་གྲགས་པར། །བང་རིམ་བཞི་པོ་རང་རང་གི །སུམ་ཆ་གློ་འབུར་གྱིས་བརྒྱན་པའི། །དབུས་ན་ཐེམ་སྐས་བྱས་པའོ། །ལྷ་གནས་ཡུམ་ལ་ཆོས་གསུངས་ཤིང༌། །དབྱར་གནས་སྔ་དྲོ་དགག་དབྱེ་མཛད། །ཕྱི་དྲོ་མི་ཡུལ་གསལ་ལྡན་དུ། །བབས་ཚེ་དེ་དག་རྣམས་ཀྱིས་བཞེངས། ༈ །དགེ་འདུན་དབྱེན་འདུམས་མཆོད་རྟེན་ནི། །བང་རིམ་བཞི་པོའི་ཟུར་བཞི་ནས། །མཉམ་པར་བཅད་པས་ཟུར་བརྒྱད་དང༌། །ལོག་བརྒྱད་མཛེས་པ་ལྷས་སྦྱིན་གྱིས། །དགེ་འདུན་དབྱེན་བྱས་མཆོག་ཟུང་གིས། །བསྡུམས་ཚེ་འོད་མའི་ཚལ་གྱི་གྲོང༌། །མ་གཱ་དྷཱ་པས་བཞེངས་པར་གྲགས། ༈ །མྱ་ངན་འདས་པའི་མཆོད་རྟེན་ནི། །སྤྲོས་པ་དབྱིངས་སུ་ཞི་བའི་བརྡར། །
བང་རིམ་བཞི་པོ་སྤངས་བྱས་ཏེ། །རྨང་དགེའི་སྟེང་དུ་བུམ་གདན་བཞག །འོན་ཀྱང་བང་རིམ་བཞི་པོའི་དཔངས། །བུམ་པ་དང་ནི་ཆོས་འཁོར་དེ་བཞིན་གཤེགས་པའི་རྣམ་པའི་མཆོད་རྟེན་ལ་ཆོས་འཁོར་ཉུང་མཐའ་བཅུ་གསུམ་དུ་བཞགས་པ་ཡིན་གྱི། གཞན་ནི་ཅི་མང་བ་ཐོབ་བར་བཤད་པ་བཞིན། མི་འགྱུར་ལྷུན་གྱིས་གྲུབ་པའི་ཕྱོགས་བཞིའི་མཆོད་རྟེན་ལའང་དེ་ལྟར་དུ་སྣང་བ། བྱེ་བྲག་ཏུ་འདིར་ནི་འདུལ་བ་ལུང་གི་དོན་འོག་ཏུ་འཆད་མ་ཐག་པའི་ལུང་གིས་མི་གནོད་པར་ཞིང་འདིའི་མཛད་པ་བརྟུལ་བ་ལྟར་སྣང་ཡང་དོན་ལ་ཞིང་ཁམས་དཔག་ཏུ་མེད་པ་ཉིད་དུ། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ཞེས་པ་ལྟར་ཆོས་ཀྱི་འཁོར་ལོ་བསམ་ཀྱིས་མི་ཁྱབ་པ་བསྐོར་བའི་དུས་ཡིན་པའི་བརྡ་སྟོན་ཕྱིར་སྟོང་པ་ཉིད་བཅུ་དྲུག་མཚོན་པའི་ཆོས་ཀྱི་འཁོར་ལོ་བྱའོ། །ལ། །ན་སྤར་ལུས་ཚད་མཉམ་བྱས་ན། །དཔྱད་བཟོད་དོན་དུ་མི་འགལ་བར། །ཀློང་ཆེན་ནམ་མཁའི་རྣལ་འབྱོར་སྨྲ། །གྱད་ཡུལ་གྲོང་ཁྱེར་རྩ་ཅན་དུ། །མྱ་ངན་འདས་ཚེ་གྱད་ཀྱིས་བཞེངས། ༈ །སྐུ་ཚེ་བྱིན་བརླབས་མཆོད་རྟེན་ནི། །རྨང་རྟེན་ཟླུམ་མོར་བྱས་པའི་སྟེང༌། །བང་རིམ་བཞི་པོ་གསུམ་ལ་བཟླུམ། །ཀུན་ཀྱང་ཟླུམ་པོར་བྱས་པ་ལ། །རང་རང་སུམ་ཆའི་ཁ་བད་མཛེས། །བུམ་ནང་གཙུག་ཏོར་རྣམ་རྒྱལ་བཞུགས། །རྣམ་རྒྱལ་མཆོད་རྟེན་ཞེས་ཀྱང་གྲགས། །ཡངས་པ་ཅན་དུ་ཙུནྡའི་ངོར། །སྐུ་ཚེ་ཟླ་བ་གསུམ་
བསྲིངས་ཚེ། །གྲོང་ཁྱེར་དེའམ་ཁ་ཅིག་ཏུ། །ལྷ་ཡིས་བརྩིགས་པ་དག་ཏུ་འདོད། །དེ་ལྟར་མཆོད་རྟེན་རྣམ་གཞག་ལ། །ཟླུམ་པོའི་དབྱིབས་སུ་བྱས་པ་ཀུན། །སྤྲོས་པའི་མཚན་མ་ཉེར་ཞིའི་དོན། །གྲུ་བཞིའི་དབྱིབས་སུ་བྱས་པ་ནི། །སྤངས་རྟོགས་ཡོན་ཏན་རྫོགས་པའི་བརྡ། །དགེ་བཅུ་ཐར་པའི་རྨང་རྟེན་ཡིན། །བང་རིམ་བཞི་པོ་རིམ་པ་བཞིན། །དྲན་པ་ཉེར་གཞག་ཡང་དག་སྤོང༌། །རྫུ་འཕྲུལ་རྐང་པ་དབང་པོ་ལྔ། །བུམ་ལྡན་སྟོབས་ལྔ་བུམ་པ་ནི། །བྱང་ཆུབ་ཡན་ལག་བདུན་དུ་མཚོན། །བྲེ་ནི་འཕགས་ལམ་ཡན་ལག་བརྒྱད། །ཤེས་བཅུ་སྟོབས་བཅུ་མ་འདྲེས་པའི། །དྲན་པ་ཉེར་གཞག་གསུམ་རིམ་བཞིན། །སྲོག་ཤིང་འཁོར་ལོ་བཅུ་གསུམ་མཚོན། །ཐུགས་རྗེས་སྐྱོབ་པ་ཆར་ཁེབས་གདུགས། །ཉི་ཟླ་འཇིག་རྟེན་མུན་སེལ་འོད། །ཏོག་ནི་འགྲན་ཟླ་བྲལ་བའི་རྟགས། །བརྡ་དོན་མཚུངས་པར་མདོ་རྒྱུད་ནས། །གསུངས་པ་བཞིན་དུ་མཁས་པས་དཔྱད། །རྒྱུ་ནི་རབ་ལ་རིན་པོ་ཆེ། །འབྲིང་དུ་སྨན་སྤོས་ཤིང་ལ་སོགས། །ཐ་མ་ས་རྡོ་ཇི་ལྟར་ཡང༌། །ཆེ་བ་དཔག་ཚད་རྒྱང་གྲགས་ནས། །ཆུང་ཚད་སྐྱུ་རུ་ར་ཙམ་པར། །སྡིག་དང་མ་འདྲེས་བརྩོན་པས་བཞེངས། །ཆ་ཚད་གཟུངས་དང་རབ་གནས་སོགས། །ནན་ཏན་འབད་པའི་བསོད་ནམས་ནི། །མདོ་སྙིང་རྗེ་པད་དཀར་སོགས་
རྒྱུད་ཀུན་ནས་རྒྱ་ཆེར་གསུངས། །དེ་ལྟར་བདེ་བར་གཤེགས་པའི་རྣམ་པ་ཐམས་ཅད་པའི་མཆོད་རྟེན་བཤད་ནས་ཞར་ལ་ཐེག་པ་སོ་སོའི་གང་ཟག་དང་བསྟུན་པའི་མཆོད་རྟེན་གྱི་རང་བཞིན་བསྟན་ནས་བླང་དོར་གྱི་གནས་གསལ་བར་བྱ་བ་ནི། འདུལ་པ་ལུང་ལས། སྔོན་འཕགས་པ་ཤཱ་རིའི་བུའི་རིང་བསྲེལ་རྣམས་ཁྱིམ་བདག་མགོན་མེད་ཟས་སྦྱིན་གྱིས་ཁྱེར་ཏེ། རང་གི་ཁྱིམ་གྱི་ནང་གི་མཆོག་མཐོན་པོ་ཞིག་ཏུ་བཞག་སྟེ། དེ་ལ་མཆོད་པ་དང༌། སྐྱེ་བོའི་ཚོགས་ཆེན་པོ་གཞན་རྣམས་ཀྱིས་ཀྱང་དེར་སོང་སྟེ་མཆོད་དོ། །དུས་རེ་ཞིག་ཁྱིམ་བདག་རི་བོར་ཞིག་ཏུ་བྱ་བ་ཅུང་ཟད་ཅིག་ལ་སྒོ་བཅད་དེ་སོང་བ་དང༌། སྐྱེ་བོའི་ཚོགས་རྣམས་ཀྱིས་མཆོད་པ་བྱ་བ་མ་བྱུང་བར་བདག་ཅག་གི་བསོད་ནམས་ཀྱི་བར་ཆད་བྱས་སོ་ཞེས་འཕྱ་བ་དེ་ཁྱིམ་བདག་གིས་ཐོས་ནས་བཅོམ་ལྡན་འདས་ལ་བདག་གིས་ཤཱ་རིའི་བུའི་མཆོད་རྟེན་ཕྱོགས་སྣ་སྤེལ་ཅན་ཞིག་ཏུ་བགྱིས་ལ་མཆོད་པ་བགྱིད་དུ་སྩོལ་ཅིག །བཀའ་སྩལ་པ། གནང་གིས་གྱིས་ཤིག །ཇི་ལྟར་བྱ་བ་མི་ཤེས་ནས་ཞུས་པ། བཀའ་སྩལ་པ། རིམ་གྱིས་བང་རིམ་བཞི་བྱས་ལ་དེ་ནས་བུམ་རྟེན་བྱའོ། །དེ་ནས་བུམ་པ་དང༌། བྲེ་དང༌། སྲོག་ཤིང་དང༌། གདུགས་གཅིག་དང་
གཉིས་དང༌། གསུམ་དང༌། བཞི་བྱ་བ་ནས་བཅུ་གསུམ་གྱི་བར་བྱ་ཞིང་ཆར་ཁེབས་དག་ཀྱང་གཞག་པར་བྱའོ། །བཅོམ་ལྡན་འདས་ཀྱི་མཆོད་རྟེན་དེ་ལྟ་བུ་བྱའོ་གསུངས་པ་དང༌། དེས་ཅི་འཕགས་པ་ཤཱ་རིའི་བུ་འབའ་ཞིག་ལ་མཆོད་རྟེན་དེ་ལྟ་བུ་བྱའམ། འོན་ཏེ་འཕགས་པ་ཐམས་ཅད་ལ་བྱ་མི་ཤེས་ནས། སྐབས་དེར་བཅོམ་ལྡན་འདས་ལ་དགེ་སློང་དེ་དག་གིས་གསོལ་པ། བཀའ་སྩལ་པ། ཁྱིམ་བདག་རེ་ཞིག་དེ་བཞིན་གཤེགས་པའི་མཆོད་རྟེན་ནི་རྣམ་པ་ཐམས་ཅད་རྫོགས་པར་བྱའོ། །རང་སངས་རྒྱས་ཀྱི་ནི་ཆར་ཁེབས་མི་གཞག་པར་བྱའོ། །དགྲ་བཅོམ་པ་ནི་གདུགས་བཞིའོ། །ཕྱིར་མི་འོང་བ་ནི་གདུགས་གསུམ་མོ། །ཕྱིར་འོང་བ་ནི་གཉིས་སོ། །རྒྱུན་དུ་ཞུགས་པ་ནི་གཅིག་གོ །སོ་སོ་སྐྱེ་བོ་དགེ་བ་རྣམས་ནི་བྱི་བོར་བྱའོ། །ཞེས་ཆོས་འཁོར་ལ་གདུགས་དང༌། གདུགས་ལ་ཆར་ཁེབས་སུ་བཏགས་ནས་མཆོག་དམན་གྱི་རྣམ་པར་བཞག་པའང་ཤེས་དགོས་ལ། གཞན་ཡང་ཉན་ཐོས་ལ་ཆོས་གོས་བཞི་ལྟབ་ཀྱི་སྟེང་དུ་ལྷུང་བཟེད་ཁ་སྦུབ་པ་ལ་འཁར་གསིལ་བཙུགས་པ་ལྟ་བུ་དང༌། རང་རྒྱལ་ལ་རྨང་གྲུ་བཞིའི་སྟེང་དུ་ངོས་གྲུ་བཞི་བང་རིམ་ཟླུམ་པོ། བང་རིམ་བཅུ་གཉིས་པ་འཁོར་ལོ་རྩིབས་བརྒྱད་པ་ཅན་དང༌། བྱང་ཆུབ་སེམས་དཔའ་ལ་དཔལ་མགོན་ཀླུ་སྒྲུབ་ཀྱིས། ལྷུང་བཟེད་ཁ་སྦུབ་པ་ལྟ་བུ་བུམ་
པའི་ཟླུམ་པོ་དང༌། ཁང་བུ་ལྟ་བུ་དང༌། རྒྱལ་མཚན་ལྟ་བུའི་མཆོད་རྟེན་བརྒྱད་ལ་སོགས་པའི་རྣམ་གཞག་ཡོད་དེ། དེང་སང་སྙིགས་མའི་དུས་འདིར་སྤངས་རྟོགས་ཀྱི་རྒྱུད་ཚོད་དང་སྦྱར་བའི་བྱེ་བྲག་མི་ཕྱེད་བཞིན་དུ་འཇིག་རྟེན་གྲགས་རྗེས་འབྲང་བའི་མཆོག་དང༌། ཕུལ་དུ་བསོད་ནམས་ཀྱི་མཐུས་རློམ་པ་མཐའ་དག་གིས་གསེར་དངུལ་ལ་སོགས་འབྱོར་སྟོབས་ཀྱི་གྱ་ནོམ་པས་དེ་བཞིན་གཤེགས་པའི་རྣམ་པ་ཐམས་ཅད་རྫོགས་པའི་མཆོད་རྟེན་དུ་བྱས་ནས་ཐལ་སོལ་དུས་པ་དང་བཅས་པའི་སྣོད་དུ་བྱེད་པ་ནི་འོད་སྲུངས་རྫོགས་བྱེད་ཀྱི་གཏམ་རྒྱུད་དང་རྗེས་སུ་མཐུན་པར་གང་ལ་དམིགས་པ་དེའི་བསོད་ནམས་དང་དགེ་བའི་གེགས་རླབས་པོ་ཆེར་འགྱུར་བའང་ཤེས་པར་བྱའོ། །འོ་ན་གསང་སྔགས་ལྟར་ན་རྡོ་རྗེ་སློབ་དཔོན་ནི་དཀྱིལ་འཁོར་ཐམས་ཅད་ཀྱི་ངོ་བོ་ཡིན་པས་སོ་ཞེ་ན། རང་ངོའི་གདུལ་བྱ་འདུལ་བྱེད་ལ་ལྟོས་ན་དེ་ལྟར་ཡིན་པས་གསོལ་བ་ཡང་དེ་ཁོ་ན་ལྟར་འདེབས་དགོས་ལ། རྣམ་པ་ཐམས་ཅད་དུ་དེའི་རྒྱུད་ལ་ཡོད་པའི་སྤངས་རྟོགས་ཀྱི་ན་ཚོད་ལ་དཔྱད་དུ་མེད་ན། འོད་སྲུངས་རྫོགས་བྱེད་ཀྱང་མུ་སྟེགས་རང་ངོན་ཁོ་པའི་ལུགས་ཀྱི་སྤགས་རྟོགས་མཐར་ཕྱིན་པ་ཞིག་ཡིན་པ་ལ་ཅིས་བསྙོན། དེ་ཡང་ཁ་ཅིག་དེ་ལྟ་ན་རྒྱུད་བླ་མ་ལ་སོགས་ནས་ལམ་ལྔའི་ཡོན་ཏན་གྱི་ལམ་
རྟགས་བཤད་པའི་ས་དང་པོའི་ཡོན་ཏན་མངོན་དུ་གྱུར་ཡང་སྲིད་མཐའ་ཙམ་ན་དེང་སང་གི་དུས་ན་འདི་ལྟ་བུ་གནས་མ་ཡིན་ནོ་སྙམས་དུ་དོགས་པ་ཡང་མི་བྱ་སྟེ། བླ་ན་མེད་པའི་ཐེག་པའི་རང་ངོ་ནས་གཞལ་ན་ཐུན་མོང་གི་སྣང་བའི་ལམ་རྟགས་དྲང་དོན་གྱི་བཤད་པ་ཙམ་ཡིན་གྱི། ཏིང་ངེ་འཛིན་གྱི་ངོས་ནས་སྒོམ་ལམ་ནོན་པའི་གང་ཟག་གཅིག་ལ་སྣང་བའི་རྟགས་ངོས་ནས་གཞིག་ཚེ་ཚོགས་ལམ་ཆེན་པོ་ཡང་ནོན་པར་མི་འདུག་ནའང་སོ་སོར་རྟོག་པའི་ཤེས་རབ་ཀྱིས་འཁོར་འདས་ཀུན་གྱི་མཚང་རིག་ཅིང༌། དབྱིངས་ཀྱི་ཡོན་ཏན་མཐར་ཕྱིན་པ་ལས་ལྷག་པའི་སངས་རྒྱས་གུད་ན་མེད་པས་དེ་ལྟ་བུའི་སྤངས་རྟོགས་ལ་ཚད་གཞག་པར་བྱ་སྟེ། དཔེར་ན་འཛམ་བུའི་གླིང་གི་རྒྱན་དྲུག་མཆོག་གཉིས་དང༌། བོད་ཡུལ་གྱི་ཤིང་རྟ་ཆེན་པོ་ཀློང་ཆེན་རབ་འབྱམས་རྒྱལ་བ་གཉིས་པར་གཞག་པ་ལྟ་བུའོ་ཞེས་འདོམས་སོ། །དེ་ལྟར་རྒྱལ་བ་ཀུན་གྱི་ཆོས་སྐུའི་རྟེན་ཆེན་པོའི་བསྒྲུབ་ཚུལ་རྣམ་པར་གཞག་པ་དང་བཅས་པ་རང་གཞན་གྱི་བསོད་ནམས་གསོག་པའི་སླད་དུ་ཚེ་རིང་ལྗོངས་བྱང་ཆུབ་ལྗོན་པའི་ཚལ་དུ་རྒྱལ་བ་འོད་མཚན་སྟོང་འབར་གྱི་སྣང་བརྙན་འབུམ་ཐེར་གཅིག་དང་ལྔ་སྟོང་རྒལ་བས་མཚོན་བླ་ན་མེད་པའི་ནང་གཟུགས་ཀྱིས་ཕྱུར་བུར་བལྟམས་པའི་མཆོད་རྟེན་བྱང་ཆུབ་མཐོང་གྲོལ་བཞེངས་པའི་ཚེ་རྫོགས་ཆེན་པ་མཁྱེན་བརྩེའི་འོད་ཟེར་གྱིས་པདྨ་འོད་གླིང་འཁོར་ལོ་ཚོགས་ཆེན་གྱི་གནས་སུ་སྦྱར་བའོ། །གཏམ་ཚོགས་ལེའུ་ཞེ་ལྔ་པའོ།། །།
གཏམ་ཚོགས་ལེའུ་ཞེ་དྲུག་པ། མཆོད་སྦྱིན་གྱི་གཏམ་འཕྲུལ་དགའི་རོལ་མོ།
མཆོད་སྦྱིན་གྱི་གཏམ་འཕྲུལ་དགའི་རོལ་མོ་ཞེས་བྱ་བ། བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ལ་གནས་སྐབས་སུ་མངོན་པར་མཐོ་བ་དང༌། མཐར་ཐུག་ངེས་པར་ལེགས་པའི་ཡོན་ཏན་ཐོབ་པའི་རྒྱུ་ནི་བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་ལས་གཞན་མེད་པས་བདག་ཅག་གི་སྟོན་པས་ཀྱང་བསྐལ་པ་གྲངས་མེད་གསུམ་དུ་ཚོགས་རྣམ་པ་གཉིས་ལ་བརྟེན་གོམས་མཛད་པ་ཡིན་ནོ། །དེ་ལ་འདིར་བསོད་ནམས་ཀྱི་གཏམ་ཅུང་ཟད་བརྗོད་ན། རྒྱུ་འབྲས་སྔ་ཕྱིར་སྨིན་པའི་ལམ་ལ་བསོད་ནམས་ཀྱི་ཚོགས་ཁོ་ནས་ཆོད་ཆེ་བས། ཚོགས་བསག་པའི་སྒོ་ཐམས་ཅད་ཀྱང་ཡན་ལག་བདུན་དུ་བསྡུས་པའི་ཕྱིར་ན་སེམས་སྟོབས་ཆེན་པོས་དེ་དག་ལ་རྒྱུན་ཆགས་སུ་བསླབས་པས་བསྐལ་པ་གྲངས་མེད་ཀྱི་ཚོགས་ཀྱང་མྱུར་བོར་འདུམས་པ་ཡོད་དེ། བྱང་ཆུབ་སེམས་དཔའ་ཀུན་ཏུ་བཟང་པོ་བཞིན་ནོ། །དེའི་ནང་གསེས་ཡན་ལག་གཉིས་པ་མཆོད་པའི་གཏམ་ཅུང་ཟད་བརྗོད་ན། འཇུག་པའི་སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་ཀྱིའང་ལྷག་པར་དུ་བསླབ་པའི་སྒོ་དང་པོ་སྦྱིན་པའི་ཕ་རོལ་ཏུ་ཕྱིན་པ་སྟེ། དེ་ལ་གཏོང་བ་དང༌།
གཏོད་པ་ཆེན་པོ་དང༌། ཤིན་ཏུ་གཏོང་བ་གསུམ་ལས། གསུམ་ཀའི་མཐར་ཐུག་གཏོང་སེམས་གོམས་པ་ལ་ལྟོས་པས་ལུས་ལོངས་སྤྱོད་དགེ་བའི་རྩ་བ་དང་བཅས་པ་དཀོན་མཆོག་གི་ཕྱོགས་སུ་བསྔོ་བ་ནི་མཆོད་པའི་ཁྱད་པར་དམ་པ་ཡིན་ནོ། །དེ་ལ་བླ་ན་ཡོད་པའི་མཆོད་པ་དང༌། བླ་ན་མེད་པའི་མཆོད་པ་གཉིས་ལས། དང་པོ་ནི། སེར་སྣ་དང་འཇུར་བུས་མ་བཅིངས་པར་སྙིང་ཐག་པ་ནས་གཏོང་སེམས་ལ་སྤྲོ་བ་འཇུག་པའི་བློས་མཆོད་པའི་རྒྱུ་ཚོགས་གཙང་ཞིང་དག་པ་སྟེ། རྩམ་པ་བཟང་ཤོས་དང༌། མར་ཁ་འཇམ་ལྟ་བུ་རང་ཉིད་ཡིད་དུ་འོང་བའི་མཐར་ཐུག་པ་དེ་དཀོན་མཆོག་ལ་འབུལ་བ་ལས། དེང་སང་མཆོད་ཡུལ་བསླུ་བའི་བསམ་པ་ཅན་དག་གིས་ངན་ངོན་དཀོན་མཆོག་ལ་འབུལ་ཞིང༌། དེ་ཡང་མར་བཅུད་རང་གི་འཐུངས་ནས་ཇ་ཞག་དཀར་མེ་ལ་འབུལ་བ་ལྟ་བུ་མི་བྱའོ། །འོན་ཀྱང་དབང་ཐང་ཆུང་ངུར་གྱུར་པ་དག་གིས་རང་དབང་གིས་མཆོད་པའི་རྫས་རྔོ་མ་ཐོགས་ནས་གཞན་གྱིས་རང་ལ་བྱིན་པ་ལྟ་བུ་ནས་དེ་ལྟར་བགྱིས་ན་མི་རུང་བའང་མ་ཡིན་ཏེ། དགེ་སྡིག་ནི་ཀུན་སློང་བཟང་ངན་གྱི་རྗེས་སུ་འགྲོ་བའི་ཕྱིར་རོ། །དེ་བཞིན་དུ་གཡོས་བྱ་དུས་ཀྱང་བཤོས་བུ་འཆོས་སླ་བའི་བསམ་པས་མཆོད་ཟན་སླ་མོ་མི་བྱ་སྟེ། ཇོ་བོས། བོད་རྣམས་ཕྱུག་པོ་མི་ཡོང། གཏོར་ཟན་སླ་མོར་བྱེད་པ་འདུག་གསུངས་
པས་མཚོན་རང་ཉིད་བཟར་རུང་ཙམ་བྱ། དཀོན་མཆོག་གསུམ་ལ་བསྔོས་ཀྱང་རོ་མ་རང་དབང་ཅན་ཡིན་སྙམ་པ་སྦྱིན་པ་འཇུར་གོས་ཅན་མ་ཡིན་པ་དང༌། གང་ལ་བརྟེན་ནས་ཕྱིན་ཆད་རྒྱུན་ཆད་པའི་དགག་བྱ་མེད་ན་མཆོད་རོ་ཡང་ངན་སློང་ལ་སྟེར་བ་ཁོ་ན་ལེགས་ཏེ། བདག་ནི་ཡོངས་སུ་མ་གཏང་ན། །སྡུག་བསྔལ་སྤང་བར་མི་ནུས་ཏེ། །ཇི་ལྟར་མེ་ནི་མ་གཏང་ན། །བསྲེག་པ་སྤང་བར་ཡོངས་མི་ནུས། །ཞེས་གསུངས་པའི་ཕྱིར་རོ། །དེས་ན་སྔོན་གྱི་བླ་མ་དམ་པ་ཁ་ཅིག་གིས་རྩམ་ཁལ་སྟོང་ཕྲག་ལངས་པའི་བཤོས་བུ་རི་ངོགས་སུ་དོར་བའི་རྣམ་ཐར་དྲན་པར་བྱས་ནས་བརྐམ་ཆགས་འཇིག་པ་ལ་བསླབ་བོ། །དེ་ཡང་ཡུལ་གཉེན་པོ་ལ་འབུལ་བའི་འདུ་ཤེས་ཀྱིས་གཙང་ཞིང་དངོས་དག་ལ་བཀོད་པས་ཁྱད་པར་འཕགས་པར་བཞེངས་ནས་བཤམ་ཚུལ་ཡང་དེ་ལྟར་བྱེད་པ་ནི། བཀོད་པས་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི་ཞེས་པ་ལྟར་རོ། །དེ་ཡང་བཀོད་པ་ཞེས་པའི་སྒྲ་ནི། ཀླུ་སྒྲུབ་དང་རྒྱན་བཟང་པོས། འདིར་བཀོད་པའི་སྒྲ་ནི་ཚོགས་པའི་རྣམ་གྲངས་ཡིན་ཏེ། ལྷ་དང་མི་རྣམས་ཀྱི་ལྷ་རྫས་རྣམ་པ་ཐམས་ཅད་ཀྱི་མཆོག་དང་ལྡན་པ་རྣམས་ཀྱིས་རྒྱལ་བ་ཐམས་ཅད་ལ་མཆོད་པར་བགྱིའོ་ཞེས་འབྱུང་ངོ། །ཡང་རྣམ་པ་
གཅིག་ཏུ་ན་ཤཱཀྱ་བཤེས་གཉེན་གྱིས། བཀོད་པ་ནི། ཁང་བཟངས་དང༌། ཡང་ཐོག་དང༌། ལྷ་ཁང་དང༌། ལྷ་ཁང་བུམ་པ་ཅན་དང༌། གཙང་ཁང་ཕྱུར་བུའི་བྱེ་བྲག་ལ་སོགས་པ་སྟེ། ཙན་དན་ལ་སོགས་པ་ལ་བྱས་པ་ནས་སོ་ཕག་ལ་སོགས་པ་ལས་བྱས་པའི་བར་རྣམ་པ་དེ་དག་ཐམས་ཅད་ཀྱིས་སོ་ཞེས་པ་ལྟར་རོ། །དེ་ཡང་བཤམ་ཚུལ་གྱི་སྒོ་ནས་བཀོད་པའི་ཁྱད་པར་བརྗོད་ན། མཆོད་སྟེགས་རིམ་པ་བཞི་པའམ་ལྔ་པ་བྱས་ལ་ཡར་ཐོག་ནས་རིམ་པར་མཆོད་ཡོན་སོགས་བཤམས་ལ། འོན་ཀྱང་སྣང་གསལ་ནི་ཞུགས་ཀྱིས་གནོད་པ་ཆེ་བས་ཡང་ཐོག་གམ་ཞལ་ཟས་དང་ཉེ་བ་མ་ཡིན་པའི་དམའ་སར་བཤམ་པ་ལེགས་ལ། དེ་ཡང་སྟོང་མཆོད་ལྟ་བུར་མཆོད་པ་ལྔ་ཚར་བརྒྱ་ཕྲག་རེ་ཤོང་བའི་མཆོད་སྟེགས་བཅུ་ཐམ་པ་འདུ་བྱས་ནས་བཤམས་པ་ལེགས་སོ། །ཡང་དཀྱིལ་འཁོར་ལ་སྐོར་མཆོད་ཀྱིས་མཚོན་སྔགས་ལུགས་ཀྱི་ཆོ་གའི་མཆོད་མགོ་བལྟ་ཕྱོགས་ལ་ཟེར་སྒྲོས་ཙམ་དུ་ཕ་རྒྱུད་མ་རྒྱུད་དང༌། སྔགས་གསར་རྙིང་དང༌། ཆོས་བོན་གྱི་རྣམ་དབྱེར་བཏགས་པ་སྣ་ཚོགས་འདུག་ཀྱང༌། རྟོག་བཟོ་ཙམ་ལས་རྒྱུ་མཚན་ཆེར་མི་སྣང་ལ། ཕར་ཕྱིན་དྲུག་གིས་མཚོན། ཐེག་པ་ཆེན་པོའི་ཆོས་ཐམས་ཅད་ཐབས་དང་ཤེས་རབ་ཟུང་དུ་འཇུག་པའི་ངོ་བོ་ཉིད་དུ་གནས་པའི་དོན་དང་སྦྱར་ན། མཆོད་པའི་རྫས་རྣམས་ནི་ཐབས་དང༌། སྣང་བ་དང༌།
བདེ་བའི་ཆ་སྟེ་བླ་ན་ཡོད་པའི་མཆོད་པ་ཡིན་ལ། འབུལ་བའི་ཡུལ་སངས་རྒྱས་དང་བྱང་ཆུབ་སེམས་དཔའ་རྣམས་ནི་ཟག་པ་ཟད་པ། རྣམ་པར་གྲོལ་བ། མི་སྐྱེ་བའི་ཆོས་ལ་བཟོད་པ་ཐོབ་པའི་ཤེས་རབ་ཀྱི་ཆར་བཞུགས་པ་ལ། བླ་ན་ཡོད་པའི་མཆོད་པ་དེ་ཡང་ཆོས་ཀྱི་ཕྱག་རྒྱ་ཆེན་པོའི་ཕྱོགས་སུ་བསྔོ་བའི་རྟེན་ཅིང་འབྲེལ་བར་འབྱུང་བའི་སྒོར་གཡོན་ཕྱོགས་ཤེས་རབ་ཀྱི་ཕྱོགས་ལ་མཆོད་མགོ་བཏོད་པ་ལེགས་པ་ཡིན་ནོ་ཞེས་རྒྱལ་བའི་དགོངས་བརྒྱུད་ལས་འབྱུང་ངོ། །དེ་ལ་དངོས་བསྟན་ཉེར་སྤྱོད་ལྔ་ལས་མེད་ཀྱང་ཡིད་ཀྱིས་སྤྲུལ་པའི་ཆ་ནས་ཕལ་པོ་ཆེའི་ཡན་ལག་བདུན་པ་ལས། མེ་ཏོག་དམ་པ་ཕྲེང་བ་དམ་པ་དང༌། །ཞེས་པའི་ཤློ་ཀ་གཉིས་དང༌། གཞན་ཡང་དབང་པོ་དྲུག་ལ་འདོད་པའི་ཡོན་ཏན་དུ་འཆར་བའི་བརྟན་གཡོའི་དངོས་པོ་མཐའ་དག་བློས་བླངས་ཏེ་འབུལ་ཚུལ་ནི་སྤྱོད་འཇུག་དང༌། སྒྱུ་འཕྲུལ་དྲ་བ་སོགས་ནས་བཤད་པ་བཞིན་ནོ། །གཉིས་པ་བླ་ན་མེད་པའི་མཆོད་པ་ནི། གཟུངས་དང་ཏིང་ངེ་འཛིན་གྱི་སྒོ་མང་པོ་ལ་དབང་ཐོབ་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་རོལ་པ་ལས་བྱུང་བའི་མཆོད་པའི་ཕྱག་རྒྱ་ཆེན་པོ་སྟེ། དེ་ལས་གོང་དུ་གྱུར་པའི་མཆོད་པ་མེད་པས་བླ་ན་མེད་པ་ཞེས་བྱ་སྟེ། ཆོས་ཀྱི་མཆོད་པ་གོང་ན་མེད་པའོ། །དེ་སྐད་དུ་དཀོན་བརྩེགས་ལས།
སྐྱེས་བུ་དམ་པ་ཆོས་ཀྱི་མཆོད་པ་ནི་མཆོད་པ་ཐམས་ཅད་ཀྱི་ནང་ན་མཆོག་གོ །ཞེས་དང། རིགས་ཀྱི་བུ་ཆོས་ཀྱི་མཆོད་པ་ནི་གང་དེ་བཞིན་གཤེགས་པས་གསུངས་པའི་མདོ་སྡེ་ཟབ་མོ་ཟབ་མོར་སྣང་བ་འཇིག་རྟེན་ཐམས་ཅད་དང་མི་མཐུན་པ། རྟོགས་པར་དཀའ་བ། མངོན་པར་དཀའ་བ། ཁོང་དུ་ཆུད་པར་དཀའ་བ། ཕྲ་བ། ཞིབ་པ། མི་དམིགས་པ། བྱང་ཆུབ་སེམས་དཔའི་སྡེ་སྣོད་ཀྱི་ནང་དུ་གཏོགས་པ། གཟུངས་དང་མདོ་སྡེའི་རྒྱལ་པོའི་ཕྱག་རྒྱས་བཏབ་པ་ཕྱིར་མི་ལྡོག་པའི་འཁོར་ལོ་སྟོན་པ། ཕ་རོལ་ཏུ་ཕྱིན་པ་དྲུག་ལས་བྱུང་བ། འཛིན་པ་རྣམས་ཡོངས་སུ་མ་གཟུང་བ། བྱང་ཆུབ་ཀྱི་ཕྱོགས་ཀྱི་ཆོས་དང་ལྡན་པ། བྱང་ཆུབ་ཀྱི་ཡན་ལག་སྒྲུབ་པར་གཏོགས་པ། སེམས་ཅན་ལ་སྙིང་རྗེ་ཆེན་པོ་འཇུག་པ། བྱམས་པ་ཆེན་པོ་སྟོན་པ། བདུད་ཀྱི་ལྟ་བར་གྱུར་པ་ཐམས་ཅད་མེད་པ། རྟེན་ཅིང་འབྲེལ་བར་འབྱུང་བ་བསྟན་པ། བདག་མེད་པ། སེམས་ཅན་མེད་པ། སྲོག་མེད་པ། གང་ཟག་མེད་པ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་མི་བྱེད་པ་དང༌། མ་སྐྱེས་པ་དང༌། མ་བྱུང་བ་དང་ལྡན་པ། བྱང་ཆུབ་ཀྱི་སྙིང་པོ་སྒྲུབ་པ། ཆོས་ཀྱི་འཁོར་ལོ་རབ་ཏུ་བསྐོར་བ། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་
དང་། མིའམ་ཅི་དང༌། ལྟོ་འཕྱེ་ཆེན་པོའི་དབང་པོ་རྣམས་ཀྱིས་རབ་ཏུ་བསྟོད་ཅིང་བསྔགས་པ། དམ་པའི་ཆོས་ཀྱི་རིགས་རྒྱུན་མི་གཅོད་པ། ཆོས་ཀྱི་མཛོད་འཛིན་པ། ཆོས་ཀྱི་མཆོད་པའི་མཆོག་ལ་ཞུགས་པ། འཕགས་པའི་སྐྱེ་བོ་ཐམས་ཅད་ཀྱིས་ཡོངས་སུ་བཟུང་བ། བྱང་ཆུབ་སེམས་དཔའི་སྤྱོད་པ་ཐམས་ཅད་ཡང་དག་པར་སྟོན་པ། ཡང་དག་པའི་དོན་གྱི་ཆོས་སོ་སོར་ཡང་དག་པར་རིག་པ་ལ་འཇུག་པ། ཆོས་ཀྱི་མདོ་མི་རྟག་པ་དང༌། སྡུག་བསྔལ་བ་དང༌། བདག་མེད་པ་དང༌། ཞི་བ་ལས་ངེས་པར་འབྱུང་བ། སེར་སྣ་ཅན་དང༌། ཚུལ་ཁྲིམས་འཆལ་བ་དང༌། གནོད་སེམས་ཅན་དང༌། ལེ་ལོ་ཅན་དང༌། བརྗེད་ངས་པ་དང༌། ཤེས་རབ་འཆལ་བ། སྤ་འགོང་བ། ཕས་ཀྱི་རྒོལ་བ་དང༌། ལྟ་བ་ངན་པ་དང༌། དམིགས་པ་ལ་མངོན་པར་ཞེན་པ་ཐམས་ཅད་སྤོང་བར་བྱེད་པ། སངས་རྒྱས་ཐམས་ཅད་ཀྱིས་བསྟོད་པ། འཁོར་བའི་ཕྱོགས་ཀྱི་གཉེན་པོ། མྱ་ངན་ལས་འདས་པའི་བདེ་བ་ཡང་དག་པར་སྟོན་པ། དེ་ལྟ་བུའི་མདོ་སྡེ་རྣམས་ཡང་དག་པར་སྟོན་པ་དང༌། འཆང་བ་དང༌། སོ་སོར་རྟོག་པ་དང། དམ་པའི་ཆོས་ཀུན་སྡུད་པ་དེ་ནི་ཆོས་ཀྱི་མཆོད་པ་ཞེས་བྱའོ། །ཞེས་དང༌། ལྷའི་དབང་
པོ་དེ་ལྟ་བས་ན་ང་ལ་ཟང་ཟིང་གིས་མ་མཆོད་པར་ཆོས་ཀྱི་མཆོད་པས་མཆོད་ཅིག ང་ལ་ཟང་ཟིང་གིས་བསྟི་སྟང་མ་བྱེད་པར་ཆོས་ཀྱི་བསྟི་སྟང་གིས་རི་མོར་གྱིས་ཤིག ཅེས་སོ། །དེ་ལྟ་མོད་ཀྱིས་ཚོགས་སྦྱོར་གྱི་ལམ་པའི་བྱང་ཆུབ་སེམས་དཔའ་དང་སོ་སོ་སྐྱེ་བོས་ནི་ཆོས་ཀྱི་མཆོད་པ་བསྒྲུབ་པར་མི་ནུས་པས་ཟང་ཟིང་གི་མཆོད་པ་ཁོ་ན་ལ་བརྩོན་པར་བྱ་ཞིང༌། དེ་ལྟར་བརྩོན་པའི་ཚེ་ཡང་མཆོད་པའི་སྤྲིན་གྱི་གཟུངས་འདོན་པ་དང་ཕན་ཡོན་ཤེས་པར་བྱ་བ་ནི། རྒྱ་གར་སྐད་དུ། པཱུ་ཛ་མེ་གྷ་ནཱ་མ་དྷཱ་ར་ཎི། བོད་སྐད་དུ། མཆོད་པའི་སྤྲིན་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། ན་མོརཏྣ་ཏྲ་ཡཱ་ཡ། ན་མོ་བྷ་ག་བ་ཏེ། བཛྲ་སཱ་ར་པྲ་མརྡ་ནེ། ཏ་ཐཱ་ག་ཏ་ཡ། ཡརྷ་ཏེ་སམྱ་ཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ་མ་ཧཱ་ཏེ་ཛོ་བཛྲེ། མ་ཧཱ་ཎྚོདྱ་སྭཱ་ཧཱ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོདྷི་མནྚོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨ་བ་ར་ཎ། བི་ཤྭ་དྷ་ན་བཛྲེ་སྭཱ་ཧཱ། གཟུངས་སྔགས་འདིའི་ཆོ་ག་ནི་འདི་ཡིན་ཏེ། དྲན་པ་ཙམ་གྱི་མོད་ལ་ཕྱོགས་བཅུ་དག་ན་བཞུགས་པའི་སངས་རྒྱས་གང་གཱའི་རྡུལ་ཕྲ་རབ་སྙེད་ལ་མཆོད་པ་བྱས་པར་འགྱུར་ཅིང་ཞབས་ལ་ཕྱག་བྱས་པར་འགྱུར་རོ། །མེ་ཏོག་དང༌། བདུག་པ་དང༌། སྤོས་དང༌། མེ་ཏོག་ཕྲེང་བ་དང༌། བྱུག་པ་དང༌།
ཕྱེ་མ་དང༌། ཆོས་གོས་དང༌། གདུགས་དང༌། རྒྱལ་མཚན་དང༌། བ་དན་ཐམས་ཅད་དང༌། གདན་དང༌། གདིང་བ་དང༌། ན་བཟའ་དང༌། སྤྱན་གཟིགས་དང༌། བཤོས་གཙང་ལ་སོགས་པ་དང༌། རྒྱན་དང༌། ལྷབ་ལྷུབ་ཐམས་ཅད་ཀྱིས་མཆོད་པ་བྱས་པར་འགྱུར་རོ། །སྡིག་པ་ཐམས་ཅད་དང་བྲལ་བར་འགྱུར་ཅིང༌། །དགེ་བའི་རྩ་བ་ཐམས་ཅད་དང་ལྡན་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཐོང་བས་ཡང་དག་པར་དབུགས་འབྱིན་པར་འགྱུར་རོ། །ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང་། ལྟོ་འཕྱེ་ཆེན་པོ་ཐམས་ཅད་དང༌། ལག་ན་རྡོ་རྗེ་ལ་སོགས་པ་གསང་བའི་བདག་པོ་དང་བཅས་པ་རྣམས་དང༌། རྒྱལ་པོ་ཆེན་པོ་བཞི་རྣམས་ཕྱི་བཞིན་ཡང་དག་པར་འབྲང་ཞིང༌། བསྲུང་བ་དང༌། བསྐྱབ་པ་དང༌། སྦེད་པར་བྱེད་དོ། །འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། ཡོན་ཏན་གྱི་ཁྱད་པར་འདི་དག་ནི་མ་བསྒྲུབས་པར་ལན་ཅིག་དྲན་པ་ཙམ་གྱིས་ཐོབ་པར་འགྱུར་རོ། །མཆོད་པའི་སྤྲིན་ཞེས་བྱ་བའི་གཟུངས་རྫོགས་སོ། །ཞེས་པས་མཚོན་ལ། རྒྱས་པར་ཟབ་མོའི་མདོ་སྡེ་རྣམས་དང་སྐྱེས་རབས་དག་ལས་ཤེས་པར་བྱའོ། །ཞེས་པའང་མདོ་ཁམས་རྫོགས་ཆེན་སྤྲུལ་པའི་སྐུ་རིན་པོ་ཆེའི་གསུང་ངོར་རིག་འཛིན་འཇིགས་མེད་གླིང་པས་སོ། །གཏམ་ཚོགས་ལེའུ་ཞེ་དྲུག་པའོ།། །།
གཏམ་ཚོགས་ལེའུ་ཞེ་བདུན་པ། མཎྜལ་གྱི་གཏམ་བསོན་ནམས་སྤྲིན་ཕུང་།
མཎྜལ་གྱི་གཏམ་བསོན་ནམས་སྤྲིན་ཕུང་ཞེས་བྱ་བ། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །བྱང་ཆུབ་སེམས་ཀྱི་ངོ་བོ་སྟོང་པ་ཉིད། །སྟོང་ཉིད་རྣམ་ཀུན་མཆོག་ལྡན་གདོད་མའི་དངོས། །ཟུང་འཇུག་བློ་འདས་ཆེན་པོར་ཕྱག་བགྱོའོ། །དེ་ཡང་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱིས་གཤེགས་ཤུལ་ལམ་ལྔར་གྲགས་པ་ལས། ཐོས་བསམ་དང་བསོད་ནམས་ཀྱི་ཚོགས་ལ་རྒྱ་ཆེར་སྤྱོད་པས་ཚོགས་ལམ་གྱི་རྣམ་གྲངས་སུ་འདུ་བའི་མཎྜལ་གྱི་རྣམ་པར་གཞག་པ་ཅུང་ཟད་ཅིག་བརྗོད་ན། སྤྱིར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གཞི་ལམ་འབྲས་གསུམ་གྱི་ངོ་བོར་བཞུགས་པ་ལས། གཞི་ནི་སེམས་ཅན་གྱི་ཁམས་བདེ་བར་གཤེགས་པའི་སྙིང་པོ་ལ་འཁོར་འདས་ལམ་གསུམ་གྱི་འཆར་གཞིར་གྲུབ་ཅིང༌། དེ་ཉིད་ཚོགས་གཉིས་ཀྱི་འཕེན་པས་བསྐྱེད་བསྲིངས་ཏེ་སྤངས་རྟོགས་ཀྱི་ཕྲིན་ལས་མཐར་ཕྱིན་པ་ལ་མངོན་པར་སངས་རྒྱས་པའི་མིང་དུ་འགྲུབ་སྟེ། རྒྱན་སྟུག་པོ་བཀོད་པའི་མདོ་ལས། ཀུན་གཞི་དྲི་མེད་བསོད་ནམས་ཀྱིས། །དེ་བཞིན་གཤེགས་པར་འགྱུར་བ་ཡིན། །དེ་ཉིད་རྟོགས་ནས་མཐོང་བ་ནི། །རྣལ་འབྱོར་འཇིགས་མེད་རྣལ་འབྱོར་རོ། །ཞེས་སོ། །
དེའི་ཕྱིར་འབྲས་བུ་དག་པ་ཉིས་ལྡན་གྱི་གོ་འཕང་མངོན་དུ་བྱེད་པ་ལ་ལམ་གྱི་དུས་བསོད་ནམས་དང་ཡེ་ཤེས་ཀྱི་ཚོགས་ཟུང་འབྲེལ་དུ་བསག་པ་ཐབས་ཀྱི་མཐར་ཕྱིན་པ་ཡིན་ཏེ། དཔལ་མགོན་དབྱིག་གཉེན་གྱི་ཚོགས་ཀྱི་གཏམ་ལས། དེ་ལྟར་བསོད་ནམས་ཡེ་ཤེས་ཀྱི། །རང་བཞིན་ཆུ་བོས་འགེངས་པ་དག །འགྲོ་བའི་ཐར་ལམ་གཅིག་ཏུ་མཁས། །བྱང་ཆུབ་ལག་པའི་མཐིལ་ན་གནས། །ཞེས་སོ། །དེ་ཡང་འདི་ལྟར་བསོད་ནམས་ཀྱི་ཚོགས་བསག་པ་མཐའ་དག་ཡན་ལག་བདུན་གྱི་ཁོངས་སུ་བསྡུ་བ་ལས། ཐུན་མོང་མ་ཡིན་པའི་ལམ་གྱི་སྟེགས་སུ་གྱུར་པ་ནི་ཞིང་ཁམས་ཀྱི་མཆོད་སྤྲིན་ཡིན་ལ། རྒྱུན་ལས། སངས་རྒྱས་ཞིང་ཁམས་ཐམས་ཅད་ལ། །སྟོང་གསུམ་ཞིང་ཁམས་མ་ལུས་པ། །འདོད་པའི་ཡོན་ཏན་བརྒྱན་པ་ཡིས། །མཆོད་ན་སངས་རྒྱས་ཡེ་ཤེས་རྫོགས། །ཞེས་སོ། །དེ་ཡང་སྤྱིར་དགེ་བ་བསོད་ནམས་ཀྱི་ལས་མཐའ་དག་ལ་སྦྱོར་བ་བྱང་ཆུབ་ཀྱི་སེམས། དངོས་གཞི་དམིགས་པ་མེད་པ། མཇུག་བྱང་ཆུབ་ཏུ་བསྔོ་བ་སྟེ། དམ་པ་གསུམ་གྱིས་ཟིན་པ་གཞི་རྟེན་དུ་བྱས་ནས་མཎྜལ་གྱི་ཆོ་ག་དངོས་ལ། སྒྲ་དོན་འགྲེལ་བ། དག་པ་སྦྱོར་བ། ཚུལ་ལམ་རྣམ་པ་བརྗོད་པ་དང་གསུམ་དུ་ངེས་པ་ལས། སྒྲ་དོན་ནི། ཕྱི་མཚན་ཉིད་ཀྱི་ཐེག་པ་ལྟར་ན། མཎྜ་སྟེ་སྙིང་པོའམ་
དཀྱིལ་འཁོར། ལ་ནི་ལེན་ཞིང་འཛིན་པ་སྟེ། འགོག་ལམ་གྱི་བདེན་པ་དམ་པ་ཆོས་ཀྱི་རྒྱལ་སྲིད་བསྒྲུབ་པའི་སྙིང་པོའམ། གཞི་འཛིན་པའི་སླད་དུ་བསོད་ནམས་ཀྱི་བགྱི་བ་རླབས་པོ་ཆེ་བསགས་ཏེ་མངོན་མཐོའི་དཔལ་ཡོན་སྦྱིན་པའི་ཉེ་རྒྱུར་འགྱུར་བས་དེ་སྐད་དུ་གྲགས་ལ། ནང་གསང་སྡགས་འབྲས་བུའི་ཐེག་པ་ལྟར་བརྗོད་ན། ཡེ་ཤེས་ཐིག་ལེ་ལས། མ་ཡི་ཡིག་འབྲུ་འདབ་མར་བརྗོད། །ཎ་ཡི་ཡིག་འབྲུ་ལྟེ་བར་དྲན། །ཌ་ཡི་ཡིག་འབྲུ་གེ་སར་དག །ལ་ཡི་ཡིག་འབྲུ་དེ་དེ་ལྟ། །ཞེས་ཕྱི་ལྟར་དུ་ཆུ་སྐྱེས་ཀྱི་གེ་སར། ནང་ལྟར་དུ་རྡོ་རྗེ་བཙུན་མོའི་མཁའ་ཀློང༌། གསང་བ་ལྟར་དུ་ཡུལ་དེ་ལ་རྣམ་པ་ཀུན་གྱི་མཆོག་དང་ལྡན་པའི་རྡོ་རྗེས་རོལ་པས། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་ཏེ། སྤྲོས་པ་ཐམས་ཅད་དང་བྲལ་བའི་འོད་གསལ་དབུ་མ་ཆེན་པོའི་སྦུབས་སུ། གཟུང་འཛིན་རོ་རྐྱང་གི་ལས་རླུང་དབང་དུ་བསྡུས་པས། འཆིང་བྱེད་རྩའི་མདུད་པ་ཉི་ཤུ་རྩ་གཅིག་ལ་སོགས་པ་བཙན་ཐབས་སུ་བཀྲོལ་ནས། ས་བཅུ་དང༌། ལམ་ལྔའི་ཡོན་ཏན་མངོན་དུ་གྱུར་ཏེ་སྡུག་བསྔལ་མཐའ་དག་དབྱིངས་སུ་ཟད་པའི་བདེ་བ་ཆེན་པོའི་ཡེ་ཤེས་ལ་སྦྱོར་བས་དཀྱིལ་འཁོར་དུ་གདགས་པ་ཡིན་ཏེ། དེ་སྐད་དུ་རྒྱུད་ལས། བསོད་ནམས་ཡེ་ཤེས་ཚོགས་རྫོགས་ཤིང༌། །རང་རིག་མཐའ་དབུས་མེད་
པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཞེས་སོ། །དག་སྦྱོར་ནི་སྤྱིར་ཕ་རོལ་ཏུ་ཕྱིན་པ་དྲུག་གི་རང་བཞིན་ནི་ཆོས་ཐམས་ཅད་ཀྱི་གཞིའམ་དངོས་པོ། ས་དང་ལམ་གྱི་ཡོན་ཏན་ཐམས་ཅད་ཀྱི་རྟེན་གཞི་ཡིན་པས། རྒྱལ་སྲས་རྣམས་ཀྱི་སྤྱོད་པའི་མཆོག་དམ་པར་བསྟན་ཏེ་བཤེས་སྤྲིང་ལས། སྦྱིན་དང་ཚུལ་ཁྲིམས་བཟོད་བརྩོན་བསམ་གཏན་དང༌། །དེ་བཞིན་ཤེས་རབ་གཞལ་མེད་ཕ་རོལ་ཕྱིན། །འདི་དག་རྒྱལ་མཛོད་སྲིད་པའི་རྒྱ་མཚོ་ཡི། །ཕ་རོལ་ཕྱིན་པ་རྒྱལ་བའི་དབང་པོ་མཛོད། །ཅེས་འདི་ལྟར་ཆོས་དང༌། ཟང་ཟིང༌། མི་འཇིགས་པ་སྟེ། སྦྱིན་པ་རྣམ་པ་གསུམ། ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅད་དོན་བྱེད་དེ་ཚུལ་ཁྲིམས་རྣམ་པ་གསུམ། གནོད་པ་ལ་ཇི་སྙམ་པ་མི་མཇེད་པའི་བཟོད་པ། ཆོས་ཕྱིར་དཀའ་བའི་ལས་མཐའ་དག་བཟོད་པ། སྟོང་ཉིད་ཟབ་མོ་ལ་མི་སྐྲག་པ་སྟེ་བཟོད་པ་རྣམ་པ་གསུམ། ཕུལ་བྱུང་གི་བསམ་པ་བརྟན་པ་གོ་ཆའི་བརྩོན་འགྲུས། གཞན་དོན་ལ་སྐྱོ་དུབ་མེད་པ་སྦྱོར་བའི་བརྩོན་འགྲུས། དེ་ལས་མི་ལྡོག །མི་ངལ། ཆོག་པར་མི་འཛིན་མངོན་པར་སྤྲོ་བའི་བརྩོན་འགྲུས་ཏེ་བརྩོན་འགྲུས་རྣམ་པ་གསུམ། བསམ་གཏན་གྱི་གཟུགས་མེད་དང་ཆ་མཐུན་བྱིས་པ་ཉེར་སྤྱོད་ཀྱི་བསམ་གཏན། ཚོགས་སྦྱོར་གྱི་ཏིང་ངེ་
འཛིན་ལམ་དུ་བྱེད་པ་དོན་རབ་འབྱེད་པའི་བསམ་གཏན། ཟག་མེད་ཀྱི་ཆོས་ཉིད་ལ་འཇུག་པ་དེ་བཞིན་ཉིད་དམིགས་ཀྱི་བསམ་གཏན་རྣམ་པ་གསུམ། མང་དུ་ཐོས་པ་ལུང་གི་ཡོན་ཏན། ལུང་དོན་རིག་པས་འབྱེད་པའི་བསམ་པ། ཡིན་ཚུལ་སེམས་ཐོག་ཏུ་འབེབས་པའི་སྒོམ་པ་སྟེ་ཤེས་རབ་རྣམ་པ་གསུམ། དེ་དག་སོ་སོའི་མི་མཐུན་ཕྱོགས་ཀྱི་སྐྱོན་དང་བྲལ་བའི་ཕ་རོལ་ཏུ་ཕྱིན་པ་དྲུག་གི་རང་བཞིན་ནི། འདི་མཎྜལ་གྱི་དྲིའི་ཐིག་ལེ་བསྐུ་བ་ནས་བཟུང་སྟེ་ཚོམ་བུ་ཡོངས་སུ་རྫོགས་པའི་བར་ལ་ཚང་བ་ཡིན་ཏེ་མཎྜལ་གྱི་མདོ་ལས། བ་ལྕི་ཆུར་བཅས་སྦྱིན་པ་སྟེ། །བྱི་དོར་བྱས་པ་ཚུལ་ཁྲིམས་ཡིན། །སྲོག་ཆགས་བསལ་བ་བཟོད་པ་སྟེ། །བརྩོན་འགྲུས་བྱ་བ་བྱེད་ལ་བརྩོན། །བསམ་གཏན་དེར་སེམས་སྐད་ཅིག་མ། །རི་མོ་ལེགས་འབར་ཤེས་རབ་བོ། །ཞེས་གསུངས་པ་ལྟར་རོ། །ཚུལ་ལམ་རྣམ་པ་ནི། མངོན་པ་མཛོད་ལས། གླིང་བཞི་དང་ནི་ཉི་ཟླ་དང༌། །རི་རབ་དང་ནི་འདོད་ལྷར་བཅས། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་སྟེ། །མཉམ་དུ་འཇིག་ཅིང་འབྱུང་བ་ཡིན། །ཞེས་གསུངས་པ་ལྟར་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་
ཁམས་ཀྱི་ནང་ཚན་སྟོང་གསུམ་མི་མཇེད་ཀྱི་ཁམས་བྱེ་བ་ཕྲག་བརྒྱ་ཡོངས་སུ་རྫོགས་པའི་ས་གཞི་ཐམས་ཅན་དན་ལ་སོགས་དྲི་བཟང་པོའི་བདུག་པས་བྱུགས་ཤིང༌། མེ་ཏོག་སིལ་མ་དང་རིན་པོ་ཆེས་རྣམ་པར་བཀྲམ་པའི་གོ་མཚམས་རྣམས་སུ། རིན་པོ་ཆེའི་རི་བོ་ལ་སོགས་པ་བཞི། འཁོར་ལོས་སྒྱུར་བའི་རྒྱལ་པོའི་སྲིད་ལ་འོས་པའི་རིན་པོ་ཆེ་རྣམ་པ་བདུན། སྒེག་སོགས་བརྒྱད། ཉི་ཟླའི་སྣང་བྱེད། རིན་པོ་ཆེའི་གདུགས། ཕྱོགས་མཐའ་དག་ལས་རྒྱལ་བའི་རྒྱལ་མཚན། དེ་དག་ཀྱང་རྒྱ་ཆེར་རོལ་པ་དང༌། དྲན་པ་ཉེར་གཞག །མངོན་པར་འབྱུང་བའི་མདོ་སོགས་ནས་བཤད་པའི་ཡོན་ཏན་གྱི་ཕུང་པོས་རྣམ་པར་དཀྲིགས་ཤིང༌། རང་རང་ལ་མངའ་བའི་ཡོན་ཏན་ཆ་མཐུན་གྱི་ལོངས་སྤྱོད་ཉི་ཟེར་ལ་རྡུལ་ཕྲན་འཁྲིགས་པ་ལྟར་འཕྲོ་བའི་རྡུལ་ཕྲ་རབ་རེ་རེའི་ཁོངས་སུའང༌། ཇི་ལྟ་བའི་མཎྜལ་རྡུལ་སྙེད་དུ་འཕྲོ་བས་ནམ་མཁའི་ཁམས་ཡོངས་སུ་བཀང་བ་ཀུན་ཏུ་བཟང་པོའི་མཆོད་པའི་རྣམ་རོལ་ཆེན་པོར་བསྟབས་པ་ཐུན་མོང་ཕྱིའི་མཎྜལ། ནང་ལྟར་དུ་ཚོགས་དྲུག་ཡུལ་གྱི་འཆར་སྒོ་ལ་རྟོགས་པ་ཐམས་ཅད་གསེར་གྱི་ས་གཞི། ས་གཞིས་ཡུལ་ཁང་སོགས་མདོར་ནས་སྲིད་པའི་ཕུན་ཚོགས་བདག་གིར་བཟུང་བ་མཐའ་དག་རི་རབ་གླིང་བཞི།
དེ་དག་གི་སྐར་ཁུང་སོགས་སྣང་བའི་ཆ་ཐམས་ཅད་ཉི་ཟླ། དེའི་ཁོངས་སུ་གནས་པའི་ཕ་མ། བུ་ཚ། མཛའ་གྲོགས། འཁོར་གཡོགས་སོགས་མདོར་ན་ཡིད་ཀྱིས་གཅེས་དགུར་བཟུང་བ་ཐམས་ཅད་འདོད་པའི་ཡོན་ཏན་ལྔའི་རང་བཞིན་དུ་བརྒྱན་ནས་ཆགས་མེད་ཞེན་བྲལ་དུ་བསྟབས་པ་དང༌། གསང་བ་ལྟར་དུ་བདག་ལུས་འབྱུང་བཞི་འདུས་པའི་ཕོ་བྲང་ཁམས་དྲུག་ལྡན་གྱི་རྡོ་རྗེ་ཕུང་པོའི་གྲོང་ཁྱེར་དབང་ལྡ་དང་རྣམ་ཤེས་ཚོགས་བརྒྱད་རྟེན་དང་བརྟེན་པར་བཅས་པ་མཐའ་དག་ཕྱི་ལྟར་དུ་གླིང་བཞི་རི་རབ་ཀྱི་བཀོད་པ། ནང་ལྟར་དུ་མ་བཅོས་ལྷུན་གྲུབ་ཀྱི་དཀྱིལ་འཁོར་ཆེན་པོའི་རྣམ་རོལ་དུ་བསྟབས་པ་དང༌། གཞན་ཡང་སྤྲུལ་སྐུའི་མཎྜལ་ཚངས་ཆེན་གྱི་ཞིང་ཁམས་རྣམ་པར་སྣང་མཛད་རིགས་ལྔ་གང་ཆེན་མཚོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ། ལོངས་སྐུའི་མཎྜལ་འོག་མིན་སྟུག་པོ་བཀོད་པའི་ཞིང་ཁམས་ཡེ་ཤེས་ལྔའི་རྣམ་རོལ། ཆོས་སྐུའི་མཎྜལ་སྐྱེ་འགག་གནས་གསུམ་གྱི་ངོ་བོས་སྟོང་པའི་སྤྲོས་བྲལ་རང་བྱུང་གི་ཡེ་ཤེས་ལ་འཁོར་འདས་ལམ་གསུམ་གྱི་རྟོག་ཚོགས་དུ་མ་རོ་གཅིག་གི་ཚོམ་བུར་བཀོད་པ། དེ་ཁོ་ན་ཉིད་ཀྱི་མཎྜལ་གདོད་མ་ཉིད་ནས་སྤྲོས་པའི་མཐའ་ལ་མི་གནས་པ་ཡེ་གྲོལ་བློ་འདས་
འོད་གསལ་རྫོགས་པ་ཆེན་པོའི་རྣམ་རོལ་དུ་ཤར་བ་སྟེ། མདོར་ན་ཚུལ་དེ་ལྟ་བུའི་རང་བཞིན་དང་བྱེ་བྲག་ཕྱེད་པས་དབུལ་བ་སྟེ་དེའི་ཕྱིར་མཚོ་སྐྱེས་རྡོ་རྗེས། ལྷ་དང་བླ་མ་ནམ་དྲན་དུས་ཉིད་དང༌། །ཚོགས་པ་རྒྱ་མཚོའི་དབུས་དང་ཆོས་འཕེལ་ཚེ། །ཆོས་སྤྱོད་ཀུན་གྱི་སྙིང་པོ་མཎྜལ་དབུལ། །ཞེས་གསུངས་པ་ལྟར། འབུལ་ཡུལ་དམིགས་བསལ་ལ་བསྒྱུར་ཁ་འདི་ནས་བྱེད། ཞིང་ཁམས་འབུལ་བ་ཞུ། ཨོཾ་བཛྲ་བྷུ་མི་ཨཱཿཧཱུྃ། སོགས་བརྗོད། ཚོམ་བུ་འགོད་ལུགས་ནི་བླ་མ་དགོངས་འདུས་ཀྱི་ཆོ་གའི་རྣམ་བཤད་དུ་གསལ་བར་བྲིས་ཡོད་དོ། །འདིར་སྨྲས་པ། འཆད་དང་རྩོམ་པའི་བརྟུལ་ཞུགས་ཉི་མའི་གཟིས། །རྨོངས་དང་མ་རིག་མུན་པ་སངས་གྱུར་ཀྱང༌། །ལྔ་བརྒྱ་ཐ་མའི་མཁའ་ཀློང་འཁྲིགས་པའི་ཚེ། །རང་དོན་ཞི་པའི་ཏིང་འཛིན་སྒོམ་ལ་དགའ། །དེ་ལྟ་ན་ཡང་དཔལ་གྱི་རི་བོའི་སྤོར། །སྔ་འགྱུར་བསྟན་པ་འཛིན་པའི་མཆོག་སྤྲུལ་དེའི། །བཀའ་མཆིད་གནྡྷ་རྦ་ཡི་གླིང་བུའི་སྒྲས། །སྒྱུ་མའི་རྣལ་འབྱོར་སྒྱུ་མར་གཡེངས་སུ་བཅུག །གལ་ཆུང་ཆོས་ལ་བྱེད་པའི་ཡུལ་དུས་དེར། །ལུང་དང་རྟོགས་པའི་གཟི་བྱིན་ཉམས་ན་ཡང༌། །འཆོས་སྐྱོབ་དོན་དང་ལྡན་པའི་བསྟན་བཅོས་ཀུན། །
བརྩམས་ལ་འབྲས་བུ་མེད་པར་མ་ཡིན་ནོ། །ཞེས་པའང་རི་སུལ་མྱུལ་པའི་རྣལ་འབྱོར་པ་མཁྱེན་བརྩེའི་འོད་ཟེར་གྱིས་གྲུབ་པའི་བསྟི་གནས་ཚེ་རིང་ལྗོངས་ཀྱི་གནས་ཁང་པདྨ་འོད་གླིང་དུ་སྦྱར་བའོ། །གཏམ་ཚོགས་ལེའུ་ཞེ་བདུན་པའོ།། །།
གཏམ་ཚོགས་ལེའུ་ཞེ་བརྒྱད་པ། དགེ་རྩ་བྱང་ཆུབ་ཏུ་བསྔོ་བའི་གཏམ་རྣམ་མཁྱེན་ལམ་བཟང་།
དགེ་རྩ་བྱང་ཆུབ་ཏུ་བསྔོ་བའི་གཏམ་རྣམ་མཁྱེན་ལམ་བཟང་ཞེས་བྱ་བ། ཚོགས་གཉིས་རྒྱ་མཚོའི་སྤྲིན་ལས་ལེགས་འོང་ཞིང༌། །རྣམ་གྲོལ་ཐུགས་རྗེའི་ཆར་གྱི་སྙིང་པོ་ཅན། །རྨད་བྱུང་སངས་རྒྱས་སྟོང་གི་རྒྱུ་སྐར་དབུས། །ཉི་ཟླ་ལྟར་མཛེས་ཤཱཀྱའི་རྒྱལ་དེ་མཆོད། །སྲིད་མཚོར་དུབ་པའི་བརྟུལ་ཞུགས་སྤངས་ན་ཡང༌། །ཞིབ་ཕྱོགས་གཅིག་མྱ་ངན་འདའ་མིན་པ། །ཟུང་འཇུག་ཨ་ཝ་དྡཱུ་ཏི་འོད་ཀྱི་སྐུ། །མཚོ་སྐྱེས་རྡོ་རྗེའི་རྣམ་ཐར་བསམས་ཀྱིས་དད། །ཐོས་བསམ་རྟོག་པའི་དྲྭ་པར་འཐུམས་མིན་ཡང༌། །ཡེ་གྲོལ་རྣམ་ཀུན་མཆོག་ལྡན་སྟོང་ཉིད་རྩལ། །འཆད་རྩོད་རྩོམ་པའི་འཁོར་ལོར་ལྷུན་རྫོགས་པས། །ཡོན་བཤད་རྣམ་མཁྱེན་ལམ་བཟང་འདི་ན་སྤེལ། །འགའ་ཞིག་གིས་རྒྱུ་དངོས་ཕུན་སུམ་ཚོགས་པ་བསྟབས་ཏེ་བསྔོ་བ་ཞིག་ཐུགས་ལ་འདོགས་པ་ཞུ་ཞེས་གསོལ་བ་བཏབ་པའི་ཚེ་འདི་སྐད་ཅེས་བརྗོད་པར་བྱའོ། །ཐམས་ཅད་མཁྱེན་པ་ལ་ཕྱག་འཚལ་ལོ། །སྡིག་པ་ཅི་ཡང་མི་བྱ་ཞིང༌། །དགེ་བ་ཕུན་སུམ་
ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཞེས་པ་ལས། ཡོན་གྱི་བདག་པོ་རྣམས་ཀྱིས་དགེ་བ་བསོད་ནམས་ཀྱི་ལས་འདི་ལྟར་དུ་བསགས་པ་ལ་སྤྲོ་བ་བསྐྱེད་པའི་ཕྱིར་བསྔོ་བའི་ཡོན་བཤད་ཅུང་ཟད་ཅིག་སྙན་དུ་གསོལ་ན། འགྲོ་བའི་བླ་མ་ཤཱཀྱ་སེང་གེས། སྦྱིན་པ་པོས་ལེགས་པར་སྦྱིན། ལེན་པ་པོས་ལེགས་པར་བླངས། ཡོན་བཤད་བསྔོ་བ་བྱས། ཞེས་གསུངས་པ་ལྟར་ཡོན་གྱི་བདག་པོས་ཀྱང་མ་དག་པའི་དྲི་མ་བརྒྱད་སྤང་དགོས་ཏེ། དེ་ཉིད་མདོར་བསྡུ་ན། རང་དོན་ལ་རྟོག་པ་འཇིག་རྟེན་ཆོས་བརྒྱད་ཀྱི་བསམ་པ་རྒྱང་བསྲིངས་ནས་གཞན་དོན་སྙིང་ལ་བཅངས་པ་ཞིག་གལ་ཆེ་བར་སྣང་ལ། ཚུལ་དེ་ལྟ་བུ་ལ་ནི་སེམས་བསྐྱེད་ཀྱི་འཕེན་པས་རང་དོན་ཤུགས་ཀྱིས་འགྲུབ་པ་ཆོས་ཉིད་བསམ་གྱིས་མི་ཁྱབ་པའི་ནུས་མཐུ་ཡིན་ཏེ། ཚངས་པ་ཁྱད་པར་སེམས་ཀྱི་མདོ་ལས། ལི་ཙྪ་བཱི་དྲ་བ་ཅན་གྱི་འོད་སྟོན་པས་བྱང་ཆུབ་ཏུ་ལུང་བསྟན་པ་ན། དེས་བདག་བྱང་ཆུབ་ཏུ་མི་རྟོག་འཚང་རྒྱ་བར་འདོད་པ་མེད་ན་ཅིའི་སླད་དུ་ལུང་སྟོན། བཀའ་བསྩལ་པ། དཔེར་ན་མི་ཞིག་གིས་མེ་ཆེན་པོ་སྦར་ཏེ། རྩྭ་དང་ཤིང་དང་སྦར་སྦུར་དག་འཛུད་པར་བྱེད་ཅིང་འཛིག་པར་མ་གྱུར་ཅིག་ཅེས་ཟེར་ན་འཚིག་
པར་མི་འགྱུར་རམ། གསོལ་བ། དེ་ནི་མ་ལགས་ཏེ་འཚིག་པར་འགྱུར་རོ། །བཀའ་བསྩལ་པ། དེ་བཞིན་དུ་དགེ་བའི་རྩ་བ་རྒྱ་ཆེར་བསགས་ཏེ་བྱང་ཆུབ་མི་དམིགས་མི་འདོད་ན་ཡང་བྱང་ཆུབ་དམ་པ་ཐོབ་པར་འགྱུར་རོ། །ཞེས་གསུངས་པ་ལྟར་རོ། །དེའི་ཕྱིར་འདི་ལྟར་སྦྱིན་དང་བདེ་གཤེགས་མཆོད་པ་ལ་སོགས་དགེ་བའི་རྩ་བ་བགྱིས་པ་དེ་དག་ཡུལ་གཉན་པོ་ལ་ཁོང་ཁྲོ་ལ་སོགས་པའི་ནུས་པས་བར་མ་དོར་ཆུད་ཟ་བ་ལས་ལྡོག་ཅིང་རྒྱ་ཆེར་འཕེལ་བར་བྱ་བའི་ཕྱིར་བླ་ན་མེད་པའི་བྱང་ཆུབ་ཆེན་པོར་བསྔོ་བ་འདི་ནི་ནང་པ་སངས་རྒྱས་པའི་ཁྱད་ཆོས་ཁོ་ན་ལས། ཕྱི་རོལ་མུ་སྟེགས་བྱེད་སོགས་ལ་མིང་ཙམ་ཡང་མ་གྲགས་པའི་ཕྱིར། བསོད་ནམས་བྱ་བའི་ཚོགས་ཆེན་གང༌། །སེམས་ཅན་རྣམས་ལ་ཡོངས་བསྔོ་བ། །ཐུབ་དབང་ཁྱོད་ཀྱིས་གང་གསུངས་པ། །དེ་བཞིན་བསྟན་བཅོས་ལས་མ་བཤད། །ཅེས་བཅོམ་ལྡན་འདས་ལ་ཁྱད་པར་དུ་འཕགས་པའི་སྒོ་ནས་བསྟོད་པའི་རྣམ་གྲངས་སུའང་བསྔགས་པ་ཡིན་ནོ། །དེ་ཡང་འདི་ལྟར་སེམས་ཅན་ཐམས་ཅད་ལ་རང་བཞིན་གྱི་དགེ་བ་ཞེས་གདོད་མ་ནས་ལྷུན་གྱིས་གྲུབ་པའི་ཚུལ་ནི་སེམས་ཀྱི་རང་བཞིན་རྣམ་པར་ཐར་པའི་སྒོ་གསུམ་ལྡན་གྱི་རྣམ་རོལ་ཆེན་པོར་ཡེ་བཞུགས་དེ་ཉིད་བྲལ་བྱའི་དྲི་མ་ལས་གྲོལ་ཏེ་ཡིན་ཚུལ་ཇི་བཞིན་པ་མངོན་དུ་གྱུར་པ་ལས་སངས་རྒྱས་པའི་
ཐ་སྙད་འཇོག་པའི་ཕྱིར། དེ་ཉིད་འདུས་མ་བྱས་ཀྱི་དགེ་བ་འཁོར་གསུམ་ཡོངས་དག་ཡིན་ཏེ་དེ་སྐད་དུ། ཆུ་དང་མེ་ཤེལ་ནོར་བུ་དག །ཡོངས་སུ་དག་པའི་མཚན་ཉིད་ཅན། །ཉི་ཟླའི་ཟེར་གྱིས་འཕོག་པ་ན། །དེ་དག་རང་གི་ཡོན་ཏན་འབྱིན། །དེ་བཞིན་ཀུན་གཞིའི་རྣམ་ཤེས་ནི། །བདེ་གཤེགས་སྙིང་པོའི་ཁམས་དགེ་བ། །ཟག་མེད་ཡོན་ཏན་ལྡན་པ་དེ། །རྟོགས་པར་གྱུར་ན་ཡོན་ཏན་འབྱིན། །ཞེས་སོ། །དེའི་ཕྱིར་ལམ་གྱི་གནས་སྐབས་སུ་བསྔོ་བ་འདི་ནི་བྱང་ཆུབ་སེམས་དཔའ་རྣམས་ཀྱི་རྗེས་ཐོབ་བསོད་ནམས་ཀྱི་ཚོགས་མཐའ་དག་གི་གཙོ་བོ་ཡིན་ཞིང༌། དེ་ལ་མཉམ་བཞག་དང་འབྲེལ་མ་འབྲེལ་གྱི་སྒོ་ནས་མཆོག་དམན་གྱི་ཁྱད་པར་བཞག་པ་སེམས་ཅན་ལ་དམིགས་ནས་ཡོངས་སུ་བསྡོ་བ་དང༌། ཆོས་ཙམ་ལ་དམིགས་ནས་ཡོངས་སུ་བསྔོ་བ་དང༌། དམིགས་པ་མེད་པའི་ངང་ནས་ཡོངས་སུ་བསྔོ་བ་སྟེ་གསུམ་དུ་གྲགས་པ་ལས། ཆེས་མཆོག་ཏུ་གྱུར་པ་ནི་འཁོར་གསུམ་ཡོངས་དག་གི་བསྔོ་བ་ཡིན་ཏེ། མངོན་རྟོགས་རྒྱུན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡིས་བྱེད་པ་མཆོག་ཡིན་ཏེ། །དེ་ནི་དམིགས་མེད་རྣམ་པ་ཅན། །ཞེས་གསུངས་ལ། དེ་ཡང་སོ་སོ་སྐྱེ་བོ་རྣམས་དང༌། བྱང་ཆུབ་སེམས་དཔའ་ཚོགས་སྦྱོར་གྱི་ལམ་ལ་གནས་པ་རྣམས་
ཀྱི་དགེ་བའི་རྩ་བ་རྣམས་ནི་དམིགས་ཡུལ་སེམས་ཅན་དང༌། བདག་འཛིན་པ་དང་བཅས་ཏེ་བསྔོ་ལ། བྱང་སེམས་འཕགས་པ་རྣམས་ཀྱི་རྗེས་ཐོབ་ཀྱི་གནས་སྐབས་སུ་སྒྱུ་མ་དང་རྨི་ལམ་ལྟ་བུའི་ངང་ནས་བསྔོ་བ་དང༌། དེ་དག་གི་མཉམ་གཞག་དང་རྫོགས་པའི་སངས་རྒྱས་རྣམས་ཀྱི་ངོར་ཆོས་དབྱིངས་འདུས་མ་བྱས་པའི་ངང་དུ་བསྔོ་བར་བྱེད་པ་ལས། མདོར་བསྡུ་ན། སྦྱོར་བ་སེམས་བསྐྱེད། དངོས་གཞི་དམིགས་མེད། མཇུག་རྣམ་མཁྱེན་རྫོགས་བྱང་དུ་བསྔོ་བ་སྟེ་དམ་པ་གསུམ་གྱིས་ཟིན་དགོས་པ་ནི་དགེ་རྩ་ཐམས་ཅད་ཀྱི་ཕྱི་མོར་གྲུབ་ལ། དེ་ལས་བསྔོ་བ་ཞེས་པའི་སྒྲ་དོན་ནི་དངོས་གྲུབ་གནས་སྐབས་སྒྱུར་བ་ལ་བརྗོད་པ་ཡིན་ཞིང༌། དབྱེ་ན་གང་དུ་བསྔོ་བའི་ཡུལ། གང་ཞིག་བསྔོ་བའི་དངོས་པོ་འམ་རྒྱུ། གང་གི་ཆེད་དུ་བྱ་བ། བསྔོ་དགོས་ཚུལ་ཕན་ཡོན་དང་བཅས་བཞི་ཡོད་པ་ལས། དང་པོ་ཡུལ་ནི། དམིགས་པ་མེད་པའི་སེམས་བསྐྱེད་ཀྱི་རྩིས་མ་ཟིན་ཅིང༌། རང་དོན་ཞི་བ་དེ་ཙམ་དོན་དུ་གཉེར་བ་ཐེག་དམན་ཉན་རང་གི་སར་མ་ཡིན་ཏེ། ཤེར་ཕྱིན་ཡུམ་ལས། དགེ་བའི་རྩ་བ་ཐམས་ཅད་ཀྱང་རྣམ་པ་ཐམས་ཅད་མཁྱེན་པ་ཉིད་མ་གཏོགས་ཉན་ཐོས་ཀྱི་སའམ་རང་སངས་རྒྱས་ཀྱི་སར་བསྔོར་མི་འཇུག་པའོ། །ཞེས་དང༌། དེ་བཞིན་དུ་ཚངས་དབང་
བརྒྱ་བྱིན་འཁོར་ལོས་སྒྱུར་པའི་རྒྱལ་པོ་དང༌། ཁམས་ཀྱི་རྒྱལ་ཕྲན། འཁོར་དང་ལོངས་སྤྱོད་ཁེ་གྲགས་ལ་སོགས་སྲིད་པའི་ཕུན་ཚོགས་ཀྱི་སླད་དུ་ནི་དེ་བས་ཀྱང་མ་ཡིན་ཏེ། རྒྱལ་བ་བུ་རམ་ཤིང་པས་བྱང་ཆུབ་ཀྱི་སྤྱོད་པ་ལ་བསླབས་པའི་ཚེ་རྒྱལ་སྲིད་ཡུལ་ཁམས་ལུས་དང་ལོངས་སྤྱོད་ལ་སོགས་གཅེས་དགུ་མཐའ་དག་ཕངས་མེད་དུ་སྦྱིན་པའི་ཚེ་ཡང༌། སྦྱིན་པ་འདི་ཡིས་བདག་ནི་ནམ་དུ་ཡང༌། །མཐོ་རིས་འདོད་དང་རྒྱལ་སྲིད་ཕྱིར་མ་ཡིན། །འགྲན་ཕྱིར་མ་ཡིན་གྲགས་པ་བསྒྲུབ་ཕྱིར་མིན། །བླ་མེད་བྱང་ཆུབ་ཁོ་ནའི་ཕྱིར་བགྱིའོ། །ཞེས་བྱང་ཆུབ་ཆེན་པོའི་བསྔོ་རྒྱུར་མཛད་པའི་རྗེས་སུ་འཇུག་པར་བྱ་ལ། དེ་ཡང་ཚུལ་འདིར་བསྔོ་བ་དང༌། སེམས་བསྐྱེད་སྨོན་ལམ་རྣམས་ངོ་བོ་གཅིག་པར་ལ་བཟླ་བ་དང༌། ཡིན་མིན་མུ་བཞིར་དབྱེ་བ་སོགས་རྣམ་གྲངས་ཐ་དད་དེ། ཀུན་གྱི་རྩ་བ་བྱང་ཆུབ་ཀྱི་སེམས་རིན་པོ་ཆེའི་རྩིས་ཟིན་པ་ཞིག་གཅེས་ཏེ། ཇི་སྐད་དུ། རྒྱལ་བ་སྲས་བཅས་ཡོན་ཏན་ཅི་མཆིས་པ། །དེ་ཀུན་བྱང་ཆུབ་སེམས་ཀྱི་མཐུར་ལྟོས་ཤིག །སེམས་བསྐྱེད་རིན་ཆེན་ཐོགས་པའི་རྒྱལ་བའི་སྲས། །ཁམས་གསུམ་ཀུན་ཏུ་འགྲོ་ཡང་ཉམ་ང་མེད། །ཡིད་བཞིན་རྒྱལ་པོ་ལྟ་བུར་འདོད་དགུ་འབྱུང༌། །ཞེས་གསུངས་
པ་ལྟར་རོ། །གཉིས་པ་བསྔོ་རྒྱུ་ནི། ཡུལ་གོང་མ་ལ་མཆོད་པ། འོག་མ་ལ་སྦྱིན་པ་སོགས་མདོར་ན་བསྡུ་བའི་དངོས་པོ་བཞི། ཕ་རོལ་ཏུ་ཕྱིན་པ་བཅུ་ལ་སོགས་བསོད་ནམས་དང་ཡེ་ཤེས་ཀྱི་སྒོ་ནས་ཚོགས་གཉིས་བསགས་པ་མཐའ་དག་ཡིན་ལ། དེ་ལའང་ཞིང༌། བསམ་པ། དངོས་པོ་སྟེ་གསུམ་ཀ་རྣམ་པར་དག་པ་ཕུན་སུམ་ཚོགས་པའི་དགེ་ཆེན་དུ་གླེང་བ་ལས། ཞིང་གི་ཁྱད་པར་ཅུང་ཟད་དབྱེ་ན། ཡོན་ཏན་གྱི་ཞིང་དང༌། ཕན་ཡོན་གྱི་ཞིང་སྟེ་རྣམ་གྲངས་གཉིས་སུ་འདུ་བ་ལས། ཐེག་དམན་ནས་ཡུལ་གོང་མ་གཙོ་ཆེ་བར་བཤད་ཅིང་དེ་ཡང་མཆོག་ཏུ་གྱུར་པ་ནི་དཀོན་མཆོག་གསུམ་སྟེ་མདོ་ལས། སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་སྐྱོབ་པ་མེད། །དགེ་འདུན་འདྲ་བའི་ཞིང་ས་མེད། །དེ་ཕྱིར་གསུམ་ལ་དབུལ་བར་བྱ། །ཞེས་གསུངས་ཤིང་དེ་དག་གི་ནང་ཚན་ལས་ཀྱང་དངོས་སུ་ལོངས་སྤྱོད་པའི་ཁྱད་པར་གྱི་དགེ་འདུན་ཁོ་ན་ཁྱད་པར་དུ་བསྟན་ཏེ་མདོ་དགེ་རྒྱས་ལས། ཆོས་རྣམས་ཀུན་གྱི་གཏེར་ཡིན་ཕྱིར། །རྣམ་པའི་སྒོ་ནི་རྣམ་འབྱེད་པ། །དགེ་འདུན་ཞེས་ནི་བྱ་བ་སྟེ། །དགེ་འདུན་ལ་ནི་ཀུན་གྱིས་བྱིན། །ཞེས་སོ། །འདིར་ཐེག་པ་ཆེན་པོའི་ལུགས་ཀྱིས་ཡུལ་བཟང་བ་ལས་དམན་པ་ཉིད་གཅེས་པར་འཛིན་ཏེ་
མདོ་ལས། །རང་ལ་རེ་དང་བཤེས་མེད་དང༌། །ནད་པ་དང་ནི་མ་ནུས་པ། །རྒས་ཤིང་འཁོགས་དང་དབང་པོ་ཉམས། །དབུལ་ཕོངས་བཀྲེས་དང་མུ་ཏོ་བ། །བྱང་ཆུབ་སེམས་ལྡན་རྣམས་ཀྱིས་ནི། །མགོན་མེད་དེ་དག་དང་དུ་བླང༌། །ཞེས་གཞན་གྱིས་སྤངས་ཤིང་བཤེས་དང་བྲལ་བ་རྣམས་དང་དུ་བླང་བར་གསུངས་མོད། ཐེག་པ་དེ་དག་གིས་ཕྱོགས་ཙམ་མི་མཚོན་པ་ཚེ་གཅིག་ལུས་གཅིག་ལ་སངས་རྒྱ་བའི་སྒོ་ནས་ཁྱད་པར་དུ་གྱུར་པ་གསང་ཆེན་རྡོ་རྗེའི་ཐེག་པ་ནས་ནི་ཞིང་གི་མཆོག་རྡོ་རྗེ་སློབ་དཔོན་དུ་གསུངས་ཏེ། དཔལ་གསང་བའི་སྙིང་པོ་ལས། བུ་དང་ཆུང་མ་ནོར་གྱི་དབྱིག །དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཞེས་སོ། །བསམ་པ་ནི། བྱང་ཆུབ་སེམས་དཔའི་ས་ལས། བྱང་ཆུབ་སེམས་དཔའ་ནི་གྲགས་པ་དང་ཚིགས་སུ་བཅད་པའི་ཕྱིར་སྦྱིན་པར་མི་བྱེད། གཞན་དང་འགྲན་པའི་ཕྱིར་སྦྱིན་པར་མི་བྱེད། དབུལ་པོར་འགྱུར་དུ་དོགས་པའི་འཇིགས་པས་སྦྱིན་པར་མི་བྱེད། བརྒྱ་བྱིན་དང་འཁོར་ལོས་སྒྱུར་བ་ཉིད་དང༌། དབང་ཕྱུག་ལ་བརྟེན་ཞིང་སྦྱིན་པ་བྱིན་པར་མི་བྱེད་དོ། །འབྲས་བུ་ལ་བལྟ་ཞིང་སྦྱིན་པ་བྱིན་པར་མི་བྱེད་དོ། །སྦྱིན་པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཁོ་ན་ཉིད་དུ་བསྔོ་བར་བྱེད་དོ། །ཞེས་གསུངས་པས་མཚོན་ཏེ་དགེ་བའི་རྩ་བ་ཐམས་ཅད་ལ་རང་ཉིད་བླ་ན་མེད་པའི་བྱང་ཆུབ་
ཐོབ་ནས་སེམས་ཅན་གཞན་དག་ཀྱང་བྱང་ཆུབ་ལ་འགོད་པར་འདོད་པ་རྒྱལ་པོ་ལྟ་བུའི་སེམས་བསྐྱེད་དང༌། རང་དང་སེམས་ཅན་ལྷན་ཅིག་པར་ཐར་པ་འདོད་པ་མཉན་པ་ལྟ་བུའི་སེམས་བསྐྱེད་དང༌། རང་དོན་ལ་རྟོག་པ་མེད་པར་སེམས་ཅན་གཞན་ཁོ་ནའི་དོན་བསྒྲུབ་པ་རྫི་བོ་ལྟ་བུའི་སེམས་བསྐྱེད་སོགས་ཀྱིས་ཟིན་པར་གཅེས་པ་ཡིན་ནོ། །དེ་བཞིན་དུ་དངོས་པོའང་དངོས་དང་བརྒྱུད་ནས་གཞན་ལ་གནོད་པའི་རྒྱུར་འགྲོ་བ་སྲོག་གཅོད་དང་མ་སྦྱིན་ལེན་སོགས་མི་དགེ་བས་བསྒྲུབས་པ་མཐའ་དག་ནི་སྤང་བྱ་ཡིན་ཏེ། མདོ་ལས། དངོས་པོ་བརྐུས་འཕྲོགས་དཀོར་ཟས་དང༌། །གཞན་ལ་གནོད་པ་མ་ཡིན་པ། །རབ་ཏུ་གཅེས་དང་ཡིད་འོང་རྫས། །མཁོ་བར་གྱུར་ན་མཆོག་ཡིན་ནོ། །ཞེས་དང༌། སྡིག་དང་དུག་དང་ལོག་འཚོའི་རྫས། །མཚོན་ཆ་ལ་སོགས་མ་འདྲེས་པ། །ཞེས་གསུངས་པའི་སྐྱོན་ཐམས་ཅད་དང་བྲལ་ཞིང༌། ཆོས་དང་ཟང་ཟིང་མི་འཇིགས་པའི་སྦྱིན་པ་སྟེ་སྦྱིན་པ་རྣམ་པ་གསུམ་གྱིས་ཐོག་དྲངས་པའི་ཕ་རོལ་ཏུ་ཕྱིན་པ་དྲུག །དེ་དག་སོ་སོའི་ལྡོག་ཕྱོགས་དང་བྲལ་བ་ཞིག་དགོས་པ་ལགས། གསུམ་པ་གང་གི་ཆེད་དུ་བྱ་བ་ནི། སྤྱོད་འཇུག་ལས། དངོས་སམ་ཡང་ན་བརྒྱུད་ཀྱང་རུང༌། །སེམས་ཅན་དོན་ལས་གཞན་མི་སྤྱད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་བསྔོའོ། །ཞེས་གསུངས་པ་ལྟར་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱིས་ཐོག་མ་མེད་པ་ནས་ད་ལྟའི་བར་དུ་
མ་བྱས་པའི་དྲིན་ཆེན་ཤ་སྟག་ཡིན་པས་དེ་ཐམས་ཅད་ལ་བརྩེ་བ་ཆེན་པོ་བསྐྱེད་དེ། ཀུན་གྱི་དོན་དུ་ཉེ་རིང་མེད་པར་བསྔོ་ལ། དེ་ལྟར་བསྔོས་པས་སེམས་ཅན་གྱི་ཁམས་ལ་ཚད་མེད་པས་བསོད་ནམས་ཀྱང་ཚད་མེད་པར་འགྱུར་ཏེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །ཞེས་གསུངས་སོ། །བཞི་པ་བསྔོ་དགོས་ཚུལ་ཕན་ཡོན་དང་བཅས་པ་བསྟན་ནས་བསྔོ་བ་དངོས་ལ་འཇུག་པ་ནི། འདི་ལྟར་ཟག་པ་དང་བཅས་པའི་དགེ་བའི་རྩ་བ་རྒྱ་མཚོ་ལྟ་བུ་ཡོད་ཀྱང་དེ་ཉིད་བསྔོ་བ་རྣམ་དག་གིས་རྒྱས་མ་ཐེབས་ན་ཡུལ་གཉན་པོ་ལ་ཁོང་ཁྲོ་སྐྱེས་པའམ། འཛད་པའི་རྒྱུ་བཞི་སོགས་ཀྱི་བསོད་ནམས་ཆ་མཐུན་གྱི་དགེ་འབྲས་ལན་ཅིག་སྨིན་ནས་ཟད་པར་འགྱུར་བའི་ཆོས་ཅན་དུ་གསུང་རབ་མང་པོ་ནས་བཤད་ཅིང་དེ་སྐད་དུ་པཎ་ཆེན་བི་མ་ལས་ཀྱང༌། འདུས་བྱས་དངོས་པོའི་ནོར་རྫས་ལ། །འཕགས་མཆོག་བསྔོ་བས་མ་ཟིན་ན། །བསགས་པའི་ཐ་མ་འཛད་པར་ངེས། །ཞེས་གསུངས་ལ་བསྔོ་བ་དམ་པས་ཟིན་པ་ནི་ནམ་ཡང་ཆུད་ཟོས་པར་མི་འགྱུར་ཏེ། བློ་གྲོས་རྒྱ་མཚོའི་མདོར། འདི་ལྟ་སྟེ་དཔེར་ན། རི་སུལ་ཆེན་པོ་ཞིག་ན་ཤིང་ཞིག་སྐྱེས་པར་གྱུར་པ་ལ་མི་ཞིག་གིས་རྩ་བ་ནས་གཅད་པར་བརྩམས་ན་ས་ཆོད་མ་ཐག་ཏུ་གང་དུ་ཡོ་བའི་ཕྱོགས་
དེར་འགྱེལ་བ་ལས་གཞན་དུ་མི་སྲིད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཡུན་རིང་པོ་ནས་རྣམ་པ་ཐམས་ཅད་མཁྱེན་པ་ཉིད་ལ་གཞོལ་ཞིང༌། དགེ་བའི་རྩ་བ་ཐམས་ཅད་མཁྱེན་པ་ཉིད་དུ་བསྔོས་པས། ཐེག་པ་གཞན་དུ་མི་ལྟུང་ཞིང༌། མཉམ་པར་བཞག་ཀྱང་རུང་མ་གཞག་ཀྱང་རུང་སྟེ། བྱང་ཆུབ་ཀྱི་ལམ་རྣམས་ཡོངས་སུ་རྫོགས་ཤིང་ཐམས་ཅད་མཁྱེན་པ་ཉིད་མྱུར་དུ་མི་ཐོབ་མི་འགྱུར་བར་མི་སྲིད་དོ། །ཞེས་དང༌། སློབ་དཔོན་དགའ་རབ་རྡོ་རྗེས། དངོས་པོ་རྫས་དང་ཡོ་བྱད་ལ། །ཡང་དག་བསྔོ་བས་རྒྱས་ཐེབས་ན། །འགྲོ་ཀུན་ཐར་པའི་ལམ་མཆོག་སྟོན། །ཞེས་སོ། །ད་ནི་ཇི་ལྟར་བསྔོ་བའི་ཐབས་སམ། བདེན་ཚིག་གི་ནུས་པས་བསྒྱུར་བའི་ཚུལ་ནི། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ། བྱང་ཆུབ་སེམས་དཔའ་མཁས་པ་ནི་སྦྱིན་པ་ཉུང་དུ་ཡང་མང་པོར་བྱེད་དེ། ཡེ་ཤེས་ཀྱི་སྟོབས་ཀྱིས་ལྷག་པར་བྱེད་དོ། །ཤེས་རབ་ཀྱི་སྟོབས་ཀྱིས་རྒྱས་པར་བྱེད་དོ། །བསྔོ་བའི་སྟོབས་ཀྱིས་དཔག་ཏུ་མེད་པར་བྱེད་དོ། །ཞེས་གསུངས་པས། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བཞིན་རྫོགས་པ་ཆེན་པོའི་གནས་ལུགས་བྲི་གང་འཕོ་འགྱུར་དང་བྲལ་བའི་མཉམ་གཞག་ནམ་མཁའ་ལྟ་བུའི་ཡེ་ཤེས་ཀྱི་ངོ་བོར་བསྔོ་བྱ་སྔོ་བྱེད་ལ་སོགས་པའི་སྤྲོས་པའི་མཚན་མ་མི་
དམིགས་ཀྱང༌། རྗེས་ཐོབ་ཤེས་རབ་ཀྱི་སྣང་ཆར་སྒྱུ་མ་དང་ཆུ་ཟླའི་རྣམ་རོལ་གྱི་ཆོས་ཐམས་ཅད་སྣང་ལ་རང་བཞིན་མེད་པར་ཤེས་པའི་ཚུལ་གྱིས་བསྔོ་བའི་མཐུན་འགྱུར་ཞིག་ཐུགས་ལ་འདོགས་པར་ཞུ། འདི་ནས་བསྔོ་བའི་དཔང་པོ་གསལ་ཚུལ་བྱེ་བྲག་བྱེད་པར་བྱ་ཞིང་བསྔོ་བ་དངོས་ལ་འཇུག་གོ །མཇུག་ཏུ། འཇམ་དཔལ་དཔའ་བོས་ཇི་ལྟར་མཁྱེན་པ་དང༌། །ཞེས་སོགས་ཤཱོ་ཀ་གཅིག་པོ་ངེས་པར་བརྗོད་པ་ལ་དོན་ཆེན་པོ་ཡོད་དེ། དེ་ལྟ་བུའི་བསྔོ་བའི་ཚུལ་རྒྱས་པར་མི་ཤེས་པ་རྣམས་སྔོན་གྱི་བྱང་ཆུབ་སེམས་དཔའ་རྣམས་ཀྱི་རྗེས་སུ་མོས་པས་བསླབས་པས་དོན་ལྡན་དུ་འགྱུར་ཏེ། སྔོན་དེ་བཞིན་གཤེགས་པ་བརྩོན་འགྲུས་མཐས་ཡས་ཆོས་ཐམས་ཅད་ལ་ངེས་པར་སྟོན་པའི་ཏིང་ངེ་འཛིན་སྟོན་པའི་ཚེ། རྒྱལ་པོ་བསོད་ནམས་མེ་ཏོག་བུ་དང་བཙུན་མོ་དང་བཅས་པ་རྣམས་ཀྱིས་བདག་ཅག་གིས་ཚུལ་འདི་མི་ཤེས་མོད་ཀྱི་འོན་ཀྱང་རྗེས་སུ་ཡི་རང་བར་བྱའོ་ཞེས། དགེ་བ་ལ་རྗེས་སུ་ཡི་རང་བར་བྱས་པས་བསོད་ནམས་དཔག་མེད་ཐོབ་པའི་ལོ་རྒྱུས་ལྟར་རོ། །དེ་ཡང་རྒྱ་གར་འཕགས་པའི་ཡུལ་སོགས་སུ་ནི་བསྔོ་བ་སྦྱིན་བདག་གིས་བགྱིད་ཅིང༌། ཡུལ་བླ་མའམ་དགེ་འདུན་ལ་སོགས་པས་དཔང་པོའི་ཚུལ་གྱིས་དེ་བཞིན་དུ་འགྲུབ་པའི་མཐུན་འགྱུར་མཛད་པ་ཡིན་མོད་ཀྱང༌། དེང་སང་སྦྱིན་བདག་གིས་མི་ཤེས་པའི་དབང་དུ་བྱས་ནས་མཁན་སློབ་རྣམས་ཀྱིས་བསྔོ་བ་བྱེད་པ་འདི་
ལྟ་བུ་བོད་དུ་དར་བ་ཡིན་ནོ། །དེ་ལྟར་བསྔོ་བའི་ཡོན་བཤད་ཉུང་དུར་བསྡུས་པ་རྣམ་མཁྱེན་ལམ་བཟང་ཞེས་བྱ་བ་འདི་ནི་རྒྱལ་དབང་པདྨའི་དོན་གྱི་རྒྱལ་ཚབ་ཐེག་པ་མཐའ་དག་ལ་གཞན་དྲིང་མི་འཇོག་པའི་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་ཐམས་ཅད་མཁྱེན་པ་པྲཛྙཱར་སྨིའི་ཞབས་སེན་ཟླ་རིས་གསར་བས་བྱིན་གྱིས་བརླབས་པའི་སེང་གེའི་ཁྲི་ལ་རྣམ་པར་འགྱིང་བའི་སྤྲུལ་པའི་སྐུ་པདྨ་ཆོས་འབྱོར་རྒྱ་མཚོའི་བཀས་བསྐུལ་པ་ལས། རང་བཞིན་རྫོགས་པ་ཆེན་པོའི་རྣལ་འབྱོར་པ་མཁྱེན་བརྩེའི་འོད་ཟེར་གྱིས་འོད་གསལ་གཉུག་མའི་ཕོ་བྲང་པདྨ་འོད་གླིང་དུ་སྦྱར་བའོ། །གཏམ་ཚོགས་ལེའུ་ཞེ་བརྒྱད་པའོ།། །།
གཏམ་ཚོགས་ལེའུ་ཞེ་དགུ་པ། ནགས་ཚལ་གྱི་གཏམ་ཨུ་དུམ་ཝཱ་རའི་ཆུན་པོ།
ནགས་ཚལ་གྱི་གཏམ་ཨུ་དུམ་ཝཱ་རའི་ཆུན་པོ་ཞེས་བྱ་བ། རྫོགས་པའི་སངས་རྒྱས་པདྨ་ལས་གྲོལ་ལ་ཕྱག་འཚལ་ལོ། །འདི་ན་ཕྲ་རབ་རྡུལ་གྱི་བ་གམ་ནི། །སྲ་བརྟན་རྡོ་རྗེའི་ཁམས་སུ་གནས་གྱུར་ནས། །སྣ་ཚོགས་ལྗོན་པའི་ཡ་ལད་གཡོ་བ་ཅན། །དེ་ལ་ནགས་ཁྲོད་དབེན་པར་རབ་ཏུ་གྲགས། །སྲིད་དང་ཞི་བ་གཉིས་སུ་རིས་ཆད་པ། །འདི་ནི་སེམས་ཅན་ཀུན་གྱི་ལས་སྣང་སྟེ། །དེ་དེའི་ཆོས་ཉིད་རྣལ་མར་སྦྱོར་འདོད་རྣམས། །ནགས་ཀྱི་གཏམ་མཆོག་འདི་ལ་གུས་པས་ཉོན། །སྣ་ཚོགས་སྡུག་བསྔལ་བསྐྱེད་པའི་གཅོང་རོང་དུ། །ཉོན་མོངས་ལྔ་ཡི་ཆུ་བོའི་རླབས་ཕྲེང་དང༌། །འདི་ཙམ་དུས་མེད་འགྲོགས་པའི་རྣམ་རྟོག་འདིའི། །ཉེ་བར་ལེན་པའི་བྱེད་པོ་མ་རིག་ཡིན། །དེ་ལས་སྲིད་པ་ནས་བཟུང་རྒ་ཤིའི་བར། །རྟེན་འབྲེལ་བཅུ་གཉིས་
ཟོ་ཆུའི་ཁྱུད་མོ་ལ། །ཡང་ནས་ཡང་འཁོར་ཕ་མཐའ་མི་ཐུག་པ། །འདི་ནི་མ་དག་གཞན་དབང་རྒྱུ་འབྲས་ལགས། །དེ་ན་ཁྱིམ་གྱི་བཙོན་དོང་གཏིང་རིང་པོར། །སྐྱེ་རྒ་ན་འཆིའི་ཞགས་པ་དམ་པོས་བཅིངས། །ལས་དང་སྡུག་བསྔལ་མང་པོས་རབ་གཟིར་བའི། །ཁྲི་མུན་འདི་ལས་མྱུར་དུ་འབྲོས་འཚལ་ལོ། །གང་དུ་ཕྱིན་ན་འབད་པ་དོན་ཡོད་ཅིང༌། །ཆོས་ལ་སེམས་པའི་གོམ་པ་བདུན་གྱི་རིན། །གསེར་སྲང་ལྔ་བརྒྱའི་ལྕིད་ཀྱིས་མི་ནོན་པའི། །གཏམ་འདི་འཕགས་པ་རྣམས་ཀྱིས་རབ་ཏུ་བསྔགས། །དེ་ན་ཚོང་དང་སོ་ནམ་ཡོད་མ་ཡིན། །བྱིས་པའི་གྲོགས་དང་འདུ་འཛིའི་རྣམ་གཡེང་བྲལ། །བྱ་དང་རི་དྭགས་མང་པོ་གར་བྱེད་ཅིང༌། །བུང་བ་མྱོས་པའི་གླུ་དབྱངས་རྣ་བར་སྙན། །ཕྲ་རབ་རྡུལ་རྣམས་སྲིད་པའི་གར་སྦྱིན་གྱིས། །ཤིན་ཏུ་འཐས་པར་སྦྱར་ལྟའི་བྲག་རིའི་ཚོགས། །རིན་ཆེན་རིན་ཐང་སྤངས་པས་རབ་ཕྱུག་ཀྱང༌། །དེ་ལ་ཁེངས་དང་འཇུངས་པའི་རྣམ་རྟོག་སྤངས། །སྣ་ཚོགས་ལས་ཀྱི་འདུ་འགོད་བརྒྱ་ཕྲག་གིས། །སྲིད་པར་ཀུན་ཏུ་སྦྱོར་བའི་ཁང་ཁྱིམ་དང༌། །དོ་ཟླ་མ་ཡིན་རང་བྱུང་བྲག་གི་སྐྱིབས། །མཐོང་བའི་མོད་ལ་ཚེ་འདིའི་སྣང་བ་འགག །ཕྱོགས་དང་ཕྱོགས་སུ་བལྟར་མི་མངོན་པ་ཡི། །སྒང་དང་གཤོངས་བུའི་བྱེ་བྲག་ཐ་དད་པས། །སྐྱོ་བ་སེང་བའི་གོ་སྐབས་རབ་ཕྱེ་ནས། །ཞི་གནས་ལྷག་མཐོང་འགྲོན་པོར་འབོད་པ་བཞིན། །དེ་ན་སྐྱེ་བོའི་ཅ་ཅོ་ཡོད་མིན་ན། །ཆགས་སྡང་ཚིག་གི་ཚེར་མ་ལྟ་
ཅི་སྨོས། །འབབ་ཆུ་དལ་གྱིས་འགྲོ་བའི་ལྷང་ལྷང་སྒྲས། །འཆི་བ་མྱུར་དུ་འོང་ཞེས་བསྐུལ་མའང་བྱེད། །ཀུན་ནས་ཁྲོ་བ་སྤངས་པའི་སྨན་ལྗོངས་རྣམས། །སྨྱུ་གུ་སྔོན་པོའི་བཞིན་རས་རབ་མཛེས་པས། །དཀའ་ཐུབ་འདོད་པ་རྣམས་ལ་སླར་བོས་ནས། །མ་རྨོས་ལོ་ཏོག་འབྱུང་ཁུངས་སྟོན་ལ་བྲེལ། །ཨུཏྤལ་སྔོན་པོའི་འདབ་མ་བརྩེགས་པའི་རྡུལ། །སྣ་ཚོགས་མེ་ཏོག་འབྲས་བུས་དུབ་བྱས་པ། །ལྗོན་པ་མཆོག་གི་ཡལ་གའི་བསྟི་སྟང་ནི། །དྲང་སྲོང་རྣམས་ལ་བསིལ་ཡབ་སྒྲེང་བ་བཞིན། །མཉེན་ལྕུགས་ལས་ཀྱི་འཁྲི་ཤིང་གཞོན་ནུའི་ཐོད། །བྱི་རུའི་འདྲེན་བྱེད་སར་བ་འདར་བ་ལྟའི། །འདབ་ཆགས་ཁུ་བྱུག་སྔོན་མོའི་རྒྱང་གླུ་ཡིས། །སྔོན་མེད་སྐྱོ་བ་གསར་བ་རབ་ཏུ་བསྐུལ། །དགའ་མ་ལང་ཚོ་དར་བབས་ཁེངས་པས་ཀྱང༌། །དེ་ཡི་མཛེས་པ་འཕྲོག་པར་མ་ནུས་ནས། །མཁུར་ཚོས་ལི་ཁྲིའི་ཐིག་ལེ་བསྐུ་བའི་ཟོལ། །དབང་པོའི་བྱ་ཚོགས་འདི་དག་མཐོང་ལས་བྱུང༌། །ཆུ་སྐྱེས་གཞོན་ནུའི་གེ་སར་ལ་ཆགས་པའི། །རབ་མྱོས་བུང་བ་འདི་དག་གཅིག་ལ་གཅིག །འཚེ་བ་མ་ཡིན་ཕན་ཚུན་གཉེན་གཤིམ་པས། །བདག་ལའང་བྱང་ཆུབ་སེམས་ཀྱི་ཡོན་ཏན་འགོ །དེ་ན་བྱིས་པའི་གྲོགས་པོ་ཡོད་མིན་པས། རང་བཞིན་ངན་པའི་རྣམ་ཐར་མི་རྙེད་དེ། །གཅན་གཟན་རྣམས་ཀྱང་བདག་ལ་རབ་བྱོལ་ནས། །ཁྲོ་བའི་བརྟན་པ་ཉམས་པའི་
ཚུལ་གྱིས་འགྲོ། །གཞན་གྱིས་མངའ་ཐང་འཕྲི་དང་སྲོག་ལ་གཙོས། །སྣ་ཚོགས་གཡོ་སྒྱུས་གཡོས་སུ་སྦྱར་བ་ཡི། །ཟས་དང་སྐོམ་ལ་མི་བརྟེན་རི་དྭགས་ཁྱུ། །བག་ཕེབས་དུལ་བའི་ངང་ཚུལ་ལྷུར་བྱེད་པ། །བདག་གི་སེམས་ཀྱང་འཇམ་ཞིང་དེས་པར་དུལ། །དབང་པོའི་དཔུང་གིས་བརྫི་བར་མི་ནུས་པའི། །འཆི་བདག་རྣམས་ཀྱང་ནགས་ན་གནས་པ་ཡི། །དྲང་སྲོང་དེ་ལ་ཐལ་མོ་སྦྱོར་བྱེད་ན། །སུ་ཞིག་དབེན་པའི་ནགས་ལ་སྤྲོ་མི་བྱེད། །དེ་ལྟར་དབེན་པར་སོང་བའི་དགོས་པ་ཡང༌། །ཡུལ་གྱི་སྣང་བས་བསླུ་བར་མི་ཚུགས་སླད། །ཡིན་གྱིས་ཡུལ་དང་འཛིན་པའི་སེམས་དང་ནི། །ཕུན་ཚུན་རྟེན་དང་བརྟེན་པའི་རང་བཞིན་ཕྱིར། །སྙིང་སྟོབས་གོ་བགོ་བཟོད་པའི་དམ་བཅའ་བརྟན། །བག་ཡོད་ལ་བརྟེན་བརྩོན་འགྲུས་བསྟར་ལ་རྒྱུས། །འདོད་དང་ཁྲོ་ཆགས་འཇུངས་པའི་རྣམ་རྟོག་ལ། །གློ་བུར་ཐོག་བརྫིས་ཡུལ་མེད་རྩ་བྲལ་གཅེས། །དེ་ལ་སྙིང་སྟོབས་གོ་ཆ་མ་བགོས་ན། །སྣང་བ་སྣ་ཚོགས་རྐྱེན་གྱིས་བསླུར་བྲིད་ནི། །སྤྲེའུ་ཟློས་གར་བསྒྱུར་བའི་བདེ་བླག་ལས། །ཆོ་འཕྲུལ་ལྷག་པར་མྱུར་བས་བསླུ་བ་ཡིན། །གཞན་གྱི་ལོག་སྒྲུབ་བཟོད་པའི་སྙིང་སྟོབས་དང༌། །ཆོས་ཕྱིར་དཀའ་སྤྱད་བཟོད་པའི་དམ་བཅའ་ལ། །དང་པོའི་ལས་ཅན་བརྟུན་པ་མ་བསྐྱེད་ན། །ཟབ་མོའི་དོན་ལ་མི་མཇེད་
ཇི་ལྟར་སྐྱེ། །དེ་ཕྱིར་གནོད་པ་ཇི་ཙམ་འཕེལ་དེ་སྲིད། །གནོད་བྱའི་རྒྱུ་འབྲས་རང་ལས་བྱུང་བའི་མཚང༌། །ལེགས་པར་བརྟགས་ཤིང་དཔྱད་ནས་བཟོད་པའི་ཁེ། །ཇི་ཙམ་ཐོབ་པ་དེ་ལ་དགའ་བ་བསྒོམ། །འདུ་འཛིའི་གདོན་དང་སྡིག་པའི་བཤེས་གཉེན་དང༌། །བྱིས་པའི་གྲོགས་དང་འགྲོགས་པའི་ཉེས་སྤྱོད་འདིས། །ཚུལ་ཁྲིམས་འཆལ་ཞིང་དམ་བཅའ་མང་པོ་འཇིག །ཆོས་ཚུལ་རབ་ཉམས་སྐྱེ་བོས་སྨད་པའི་ཕྱིར། །བསྒྲིམས་ཏེ་རྨ་ཡི་བག་ཟོན་བྱེད་པ་ལྟར། །རང་གིས་རང་ལ་ངོ་ཚའི་ཁུལ་བཀལ་ཞིང༌། བཀྱལ་དང་འཕྱར་ཀའི་ཚིག་ལའང་འཇིགས་བཞིན་པས། །བག་ཡོད་བསྲུང་བ་འདི་ལ་གོམས་པར་མཛོད། །དབེན་པར་གནས་ཀྱང་གཉིད་དང་སྙོམ་ལས་ཀྱིས། །དམ་བཅའ་ཁྲལ་འཇལ་ལ་ཁའི་ཐོ་ཡོར་བཞིན། །རང་རྫུན་རང་ལ་གཏོང་བའི་ལེ་ལོའི་གདོན། །ཡུད་ཙམ་མི་དལ་བརྩོན་འགྲུས་མཐུ་ཡིས་བསྲུང༌། །འདོད་པ་རྣམས་ནི་ཕུང་ཀྲོལ་ཆེན་པོ་སྟེ། །བུང་བ་ལྟ་བུར་བསགས་པས་རང་ཉིད་དབུལ། །ཡི་དྭགས་གཏེར་མཛོད་བཞིན་དུ་བསྲུངས་པས་ངལ། །གཡོ་སྒྱུས་རབ་ཏུ་སྤེལ་བས་རྐུན་པོར་འགྱུར། །མཛའ་དང་འཁོན་ཞིང་ཆེན་པོའི་དཔལ་ལས་ཉམས། །ངོ་ཚའི་གདོང་པ་ཡུད་ལ་ཉམ་ཉེས་པས། །གྲགས་པ་ངན་པའི་གཡང་
སར་འཁྱམས་གྱུར་དེའི། །རང་བཞིན་ལེགས་པར་བརྟགས་ནས་ཆོག་ཤེས་འཚོལ། །དེ་བཞིན་ཁྲོ་བའི་ཉེས་དམིགས་ཚད་མེད་དེ། །བཞིན་རས་མཛེས་པའི་མདངས་ཀྱང་ཉམས་འགྱུར་ལ། །སྙིང་ནས་བརྩེ་བ་དག་ཀྱང་ཕྱི་ཕྱིར་འབྲོས། །ཚིག་རྩུབ་ཚེར་མ་རྣོན་པོས་དགྲ་བོ་འགུགས། །ཕན་ཚུན་འཆིང་ཞིང་བརྡེག་པའི་སྒྱུ་ཐབས་འདིས། །རྒྱལ་པོའི་སྲིད་ཀྱང་མོད་ལ་བརླག་ནུས་ན། །བལྟར་མི་མངོན་པ་དགེ་བའི་ལྗོན་ཤིང་ནི། །ཡུད་ལ་བསྲེགས་འགྱུར་མེ་ཚོགས་དེ་ལས་བྱོལ། །གང་ལ་ཆགས་པ་ཙམ་གྱིས་ཐར་པའི་སྲོག །རབ་ཏུ་འཕྲོག་པར་བྱེད་པའི་ཁྱིམ་ཐབ་དང༌། །ཆགས་སྡང་འཕེལ་བའི་སྡེ་དགོན་ཡུལ་གཞིས་ནོར། །ཕ་མ་ཉེ་འབྲེལ་ལ་ཡང་ཆེས་གདུང་ན། །གང་དང་འགྲོགས་པས་དགེ་བའི་ཚོགས་འགྲིབ་ཅིང༌། །ངན་འགྲོའི་ས་བོན་མངོན་དུ་འདུ་ཕྱེད་པས། །དེ་ལས་དགྲར་གྱུར་གཞན་དུ་ཅི་ཞིག་ཡོད། །གསེར་དང་ཐག་སྒྲོག་འཆིང་བར་མཚུངས་ལ་ལྟོས། །རྟག་ཏུ་སེར་སྣ་འཕེལ་ཞིང་རྩོད་པ་ཅན། །རྐུན་པོ་ལ་སོགས་གཞན་དང་ཐུན་མོང་བའི། །ནོར་ལ་སྙིང་པོ་མེད་པ་མངོན་སུམ་སྟེ། །རང་གིས་བསགས་པ་གཞན་གྱིས་སྤྱོད་མཐོང་ངམ། །འདི་ན་གཏོང་ལ་གོམས་
པའི་ཡོན་ཏན་ནི། །ཇི་ཙམ་གཏང་བ་དེ་སྲིད་རང་ཉིད་ཀྱི། །ཕྱི་བཞིན་འབྲང་བས་ནམ་ཡང་ཆུད་མི་ཟ། །ཇི་ཙམ་འཇུངས་པ་དེ་སྲིད་བསོད་ནམས་མིན། །དེ་ཕྱིར་འཁོར་བར་འཆིང་ཞིང་གྲོལ་བའི་རྒྱུའི། །བྱེད་པོ་གཞན་ན་ཡོད་པ་མ་ལགས་པས། །སྡིག་པའི་གྲོགས་དང་འདུ་འཛིའི་ཉེས་དམིགས་ལ། །རབ་ཏུ་འཇིགས་པས་དབེན་པའི་གནས་སུ་སོང༌། །ནགས་ན་གནས་པའི་གཅན་གཟན་ཁྲོ་བོ་ཡང༌། །གང་ཞིག་བྱང་ཆུབ་སེམས་ཀྱི་མཐུ་མཐོང་ནས། །འཇམ་ཞིང་དུལ་བའི་ངང་ཚུལ་ལྷུར་ལེན་ན། །འགྲོ་བ་གཞན་དག་དབུགས་འབྱིན་སྨོས་ཅི་དགོས། །གང་ཕྱིར་བྱང་ཆུབ་སེམས་དཔའི་སྙིང་སྟོབས་དང༌། །ཡོན་ཏན་ཕལ་ཡང་ནགས་ཁྲོད་དམ་པར་བརྙེས། །རྟག་ཏུ་ངུ་དང་ནོར་བཟང་སྤྱོད་པ་ལ། འཇུག་པའི་སྨོན་ལམ་བཟང་པོའི་ས་བོན་བསྐྲུན། །ཡང་ཡང་རྙེད་དཀའི་དལ་འབྱོར་རིན་ཆེན་ནི། །ནགས་ཀྱི་གཏམ་འདི་མཐོང་བས་དོན་ཡོད་ཅིང༌། །སྲོག་དང་བཅས་པའི་ལུས་འདི་གཡོ་བཞིན་དུ། །ཞི་བའི་གྲོང་ཁྱེར་མཆོག་ལ་གནས་པར་ཤོག །ནགས་ཚལ་གྱི་གཏམ་ཨུ་དུམ་ཝཱ་རའི་ཆུན་པོ་ཞེས་བྱ་བ། མཆིམས་ཕུ་དཔལ་གྱི་ནགས་ཁྲོད་དཔལ་རྒྱལ་བའི་དབང་པོ་དྲི་མེད་འོད་ཟེར་གྱིས་དངོས་གྲུབ་བརྙེས་པའི་ས། མཁའ་
འགྲོ་རང་བཞིན་གྱིས་འདུ་བའི་བྲག་རིའི་བ་གམ་ཆེན་པོ་རིང་མོ་ཅན་ཞེས་བྱ་བའི་གནས་སུ། རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱིས། ནགས་ཚལ་དང་ཁ་བའི་རྡུལ་རོ་གཅིག་ཏུ་འདྲེས་པའི་ཁྲོད་དུ་ལེགས་པར་སྦྱར་བ་རྫོགས་སོ།། །།གཏམ་ཚོགས་ལེའུ་ཞེ་དགུ་པའོ།། །།
གཏམ་ཚོགས་ལེའུ་ལྔ་བཅུ་པ། འདབ་ཆགས་ཀྱི་གཏམ་མི་ཁོམ་པའི་གནས་ལ་སྐྱོ་བ་བསྐུལ་བ།
འདབ་ཆགས་ཀྱི་གཏམ། མི་ཁོམ་པའི་གནས་ལ་སྐྱོ་བ་བསྐུལ་བ་ཞེས་བྱ་བ། བླ་མ་ལ་ཕྱག་འཚལ་ལོ། །ཡུལ་སྣང་བརྡ་རུ་ཤར་བ་ཡི། །ཀློང་ཆེན་ནམ་མཁའི་རྣལ་འབྱོར་པ། །འོག་མིན་དཔལ་གྱི་མཆིམས་ཕུ་ཡི། །ཚངས་པ་ལྷ་ཡི་མེ་ཏོག་ཕུག །སྙིང་པོའི་སྒྲུབ་པ་ལྷུར་ལེན་ཚེ། །ཡུལ་སྣང་ཕྲད་པའི་གཏམ་ཞིག་མཆི། །དེ་ཡང་འདི་ལྟ་སྟེ། དུས་དེའི་ཚེ་བྱ་དབང་དང་འཇོལ་མོ་ལ་སོགས་པའི་འདབ་ཆགས་བསམ་མེད་ཤིན་ཏུ་རྨོངས་པ་རྣམས། སྙིང་རྗེ་ཆེན་པོའི་རྩལ་གྱིས་རང་དབང་དུ་གྱུར་ནས། འཇིགས་པ་དང༌། བག་ཚ་བ་དང༌། ཤིན་ཏུ་སྔར་བ་ལ་སོགས་པའི་དོགས་པ་མཐའ་དག་ཡོངས་སུ་བཏང་ནས། བྱིས་པ་ཆུང་ངུ་མའི་དྲུང་ན་འདུག་པ་བཞིན་ཤིན་ཏུ་བག་ཕེབས་པའི་ཚུལ་དུ་ཟས་ཀྱི་བྱ་བ་ལ་ཡིད་གཏོད། གཏི་མུག་གི་རང་བཞིན་ལ་ཤུགས་ཀྱི་གོམས་པའི་རྣམ་འགྱུར་འགོག་ཏུ་མེད་པས་མིག་མ་ལྕིབས་
ཀྱིས་འགེབས་ཤིང་བདག་ཉིད་ལ་མེལ་ཚེའི་འདུ་ཤེས་བཞག་ནས་ཉལ་བ་ལ་སོགས་བྱེད་དོ། །རེ་ཞིག་གི་ཚེ་ཆུ་གཏོར་གྱི་རྗེས་ལ་དྲན་རིག་ཀུན་ཏུ་བཟང་པོ་རྣམ་ཀུན་མཆོག་ལྡན་གྱི་སྟོང་ཉིད་ལ་ཆགས་ནས་སྲིད་ཞི་མཉམ་པ་ཉིད་ཀྱི་ངང་དུ་གནས་པ་ན། གཟུགས་མཛེས་པ་དང༌། ཚོར་བ་ཅང་བ་དང༌། འདུ་ཤེས་གྲུང་བ་དང༌། འདུ་བྱེད་སྙོམས་པ་དང༌། རྣམ་ཤེས་གསལ་བ་སྟེ་མིང་ཐ་དད་དུ་བཏགས་པའི་བྱ་དབང་ལྔ་གཏོར་ཟན་ལེན་པ་ལ་འོངས་ནས་སླར་ལོག །དེའི་ནང་ནས་རྣམ་ཤེས་གསལ་བ་དེ་ད་དུང་མ་ཕྱིན་པར་མདུན་དྲང་པོར་ལྷགས་ནས་ངེད་ཀྱི་གདོང་ལ་སྒེག་མོ་མེ་ལོང་ལ་ཐུག་པ་བཞིན་དུ་ལྟ་ཞིང༌། མིག་མ་ལྕིབས་ཀྱིས་འགེབས་པ་དང་སྦྲགས་ཤིན་ཏུ་འདྲིས་ཤིང་ཡིད་གཏོད་པའི་ཚུལ་དུ་ཇ་ཡུན་ཅིག་ཏུ་ཉེ་བར་ཙུག་གེ་བསྡད་སོང་ངོ༌། །དེར་རྣམ་འགྱུར་འཇམ་པའི་སེམས་ཅན་དེ་ལ་སྙིང་རྗེ་བཟོད་བླག་མེད་པ་ཞིག་སྐྱེས། བུ་ཆུང་མ་དང་བྲལ་བ་བཞིན་དབང་མེད་དུ་མཆི་མ་མི་ཐུབ་པ་ཙམ་དུ་ཤོར་བར། ཁོ་ཡང་ངེད་ཀྱི་གདོང་ལྟ་ཞིང་མཆི་མ་བཀུ་བ་སྙམ་བྱེད་དོ། །དེར་རང་ཉིད་ཀྱང་སྐྱོ་ཤས་ཤིན་ཏུ་ཆེ་བ་འཕེལ་ནས་འདི་སྐད་ཅེས་སྨྲས་སོ། །ཀྱེ་ཧོ། །ཁྱོད་ལུས་ངན་གྱི་སེམས་ཅན་སྙིང་རེ་རྗེ། །སྤྱིར་ཁམས་གསུམ་འཁོར་བའི་སེམས་
ཅན་ཀུན། །རྒྱུ་མ་རིག་གསུམ་གྱིས་བསྒྲིབས་པའི་ནང༌། །རྐྱེན་ཀུན་ཏུ་བརྟགས་པའི་མཚམས་སྦྱོར་ཅན། །སྒོས་དུད་འགྲོའི་རིགས་རྣམས་སྙིང་རེ་རྗེ། །བཀོལ་ཞིང་སྤྱོད་པའི་སྡུག་བསྔལ་དང༌། །ཁྱད་པར་སྡིག་ཅན་ཤན་པའི་རིགས། །རྔོན་དང་ཉ་པ་བྱ་བ་སོགས། །ཁྲེལ་དང་ངོ་ཚའི་གོས་བྲལ་བས། །གསོད་པའི་རྣམ་འགྱུར་མཐོང་ན་ལྟ། །ལྟ་ཅི་ཡིད་ལ་དྲན་པས་ཀྱང༌། །རང་དབང་མེད་པར་སྙིང་རྩ་འདར། །མིག་ནས་མཆི་མའི་ཆར་རྒྱུན་བཀུ། །ཁྱོད་སྤུ་སྡུག་རྨ་བྱའི་ལང་ཚོ་ཅན། །མགུ་པ་པད་དཀར་ཆུན་པོས་མཛེས། །མཇུག་སྒྲོ་ལྔ་ལྡན་འཇའ་རིས་འཁྱིལ། །ཡན་ལག་པདྨའི་རྣལ་མ་འདྲ། །ངག་སྙན་པའི་སྒྲ་གདངས་རྣ་བར་འཇམ། །དེ་འོན་ཀྱང་བླང་དོར་གནས་ལ་རྨོངས། །གཏམ་གླེང་མོས་བརྗོད་པ་འཕྲོད་པ་མེད། །ཡི་མུག་གི་དུད་འགྲོ་སྙིང་རེ་རྗེ། །ཁྱོད་གཟུགས་སྡུག་སྤུ་མདངས་མཚར་ཆེ་ཡང༌། །ཁོང་གཅན་གཟན་གདུག་པའི་ཁ་ཟས་ཡིན། །ཚེ་དོ་ནུབ་ཙམ་མི་རྟག་ཡ་མ་བརླ། །ལས་རྒྱུ་འབྲས་བཤད་པས་གོ་བ་མེད། །ཆོས་ངེས་དོན་ཉན་པའི་སྐལ་པ་ཆད། །མི་ཁོམ་པའི་སྐྱེ་གནས་ཡི་རེ་མུག །དབྱིངས་རིག་པ་ཀུན་བཟང་བཟོ་མེད་ཀློང༌། །ཕྱི་ཡུལ་སྣང་གི་ཞེན་འཛིན་བཀྲག་མེད་ཞིག །གདངས་སྙིང་རྗེར་ཤར་བའི་གསལ་ཆ་ཡིས། །
ཁྱོད་དུད་འགྲོའི་སེམས་དང་རྣལ་འབྱོར་ངའི། །གནས་ལུགས་ཀྱི་རང་མདངས་གཅིག་ཏུ་བསྲེ། །ངག་གྲག་སྟོང་སྐྱེ་འགག་མེད་པའི་གདངས། །ཐབས་མྱུར་ལམ་ཟབ་མོའི་གཟུངས་སྔགས་དང༌། །ཐོས་གྲོལ་གྱི་སྨོན་པས་མཚམས་སྦྱོར་རེམ། །སྤྱིར་འཇིག་རྟེན་གྱི་མི་རྣམས་གདུག་སེམས་ཆེ། །དེས་ཁྱེད་ཅག་གི་སྣང་བ་དོགས་པར་འཆར། །གཏད་མེད་ཡོངས་གྲོལ་གྱི་དགོངས་པའི་ཀློང༌། །བྱ་ཁྱོད་ཀྱི་ཀུན་གཞིའི་བག་ཆགས་འབྲས། །བློ་བག་ཕེབས་སུ་སྡོད་པ་སྙིང་རེ་རྗེ། །སྤྱིར་སེམས་ཅན་ཐམས་ཅད་ཕ་མ་ཡིན། །སྒོས་ཁྱོད་ཀྱང་ང་དང་ལས་འབྲེལ་ཅན། །དེ་འོན་ཀྱང་དྲིན་ལན་གཞལ་ཐབས་མེད། །ཕྲལ་གཏོར་ཟན་ཆུང་ངུའི་སྦྱིན་པ་ཡིས། །ཁྱོད་འཁོར་བའི་གྲོང་ལས་དབུགས་མི་ཕྱིན། །གཞི་བདེ་གཤེགས་སྙིང་པོའི་དགོངས་པ་ལ། །ཡུལ་ཐུགས་རྗེས་འདུལ་བའི་མན་ངག་ཡོད། །དེང་གནས་ལུགས་གཞི་མེད་རྩ་བྲལ་ལ། །ཁྱོད་བློ་རྩེ་ཐོད་ནས་ལྷོད་དེར་སྡོད། །ཅེས་བརྗོད་ནས་ཁོའི་སེམས་དང་རང་གི་རིག་པ་གཉིས་སུ་མེད་པར་བསྲེས་ཏེ་གནས་ལུགས་གཞི་གྲོལ་གྱི་ངང་དུ་ཡུན་རིང་པོའི་བར་དུ་མཉམ་པར་བཞག་པས། ཁོ་ད་དུང་མིག་མ་ལྕིབས་ཀྱིས་འགེབས་ཤིང་གཡོ་འགུལ་མེད་པར་ཙུག་གེ་བསྡད་ནས་སྙིང་རྗེ་བའི་སྐད་དང་རྣམ་འགྱུར་ཅིར་ཡང་སྟོན་གྱིན་འདུག་པས་བྱང་ཆུབ་སེམས་ཀྱི་རྒྱུས་
མིག་མཆི་མས་བརླན་ནས་དབུགས་མི་ཐོན་པ་ཙམ་དུ་བརྣངས་ཤིང་སྙིང་ལྷག་པར་རྗེ་བས་འདི་སྙམ་དུ། དུད་འགྲོ་འདི་ལྟ་བུས་ཀྱང་བསམ་པ་དགེ་མི་དགེའི་རང་བཞིན་ནས་དག་པའི་སྣང་བ་སྦྱོང་ཞིང་བློ་གཏོད་པ་འདི་ངོ་མཚར་ཆེ། འདི་ལ་དཔགས་ན་སྨྲ་ཤེས་དོན་གོ་བའི་མི་ཁོམ་པ་རྣམས་སུའི་གདུལ་བྱ་ཡིན། ཀུན་མཁྱེན་ཆེན་པོས། འཆིང་བ་དམ་ལྡན་ཀུན་སྤྱོད་ཤིན་ཏུ་ངན། །འཁོར་བར་མི་སྐྱོ་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་བྲལ། །སྡོམ་དང་དམ་ཚིག་འཆལ་བ་ཞེས་བྱ་སྟེ། །རིས་ཆད་བློ་ཡིས་མི་ཁོམ་རྣམ་པ་བརྒྱད། །ཅེས་པའི་གྲལ་རིགས་ལ་བཞུགས་པ་རྣམས་སྡིག་པའི་ལས་ལ་ནི་བརྟུལ་ཞུགས་ཤིན་ཏུ་མྱུར། མི་ལུས་ཐོབ་ཚད་ལ་ཡ་མཚན་ཆེ་རྒྱུ་མི་འདུག །ད་ནི་འདི་ལྟ་བུའི་དུད་འགྲོ་ལ་དག་པའི་བློ་ཡོད་ཀྱང་གཏམ་གྱིས་བརྗོད་པ་གླེང་དུ་མེད་པས་དམ་པ་ཆོས་ཀྱི་བདེན་པས་ཕན་གདགས་པའི་གོ་སྐབས་མ་རྙེད། དེ་ཡང་འདི་སྐད་དུ། ད་ནི་ཁྱོད་གཞན་ཅི་ཡང་མ་ཤེས་ཀྱང་སླ་ཡི། ཨོཾ་མ་ཎི་པདྨེ་ཧཱུྃ། ཞེས་ལན་གཅིག་བརྗོད་དང༌། དེ་ཁོ་ནས་ཁྱོད་རྫོགས་པའི་སངས་རྒྱས་སུ་གྱུར་ཏེ་གཙུག་ཏོར་རོང་ངེར་འགྱུར་རོ་ཞེས་སྨྲས་ཀྱང༌། ཁོ་ལ་དེ་དེ་བཞིན་དུ་སྨྲ་བའི་ནུས་པ་མི་འདུག་པས་སྙིང་རེ་རྗེ། ཨ་ཙ་མ། སྔར་བོད་མུན་པའི་གླིང་དུ་རྒྱལ་
སྲས་རིགས་གསུམ་མགོན་པོའི་སྤྲུལ་པའི་རྒྱལ་བློན་ལོ་པཎ་དང་བཅས་པས་དམ་པའི་ཆོས་བསྒྱུར་བ་ལ་དཀའ་ལས་དེ་ཙམ་ཞིག་བྱས་ཏེ་དེང་སང་ཆོས་དོན་དུ་གཉེར་བ་མི་འདུག་པས་འདི་ལྟ་བུའི་ལུས་རྟེན་ལ་རེ་དུས་ཇི་ལྟར་བྱེད། ད་ནི་སློབ་དཔོན་དབྱིག་གཉེན་གྱིས་དམ་པའི་ཆོས་ཞལ་འདོན་དུ་མཛད་པ་འདབ་ཆགས་ཕུག་རོན་གྱིས་ཐོས་པས་སྐྱེ་བ་འཕོས་ཏེ་སློབ་དཔོན་བློ་གྲོས་བརྟན་པར་གྱུར་པའི་ལོ་རྒྱུས་ཀྱང་ཡོད་ན། ཟབ་མོའི་མན་ངག་མགུར་གྱི་ཚུལ་དུ་འདིའི་རྣ་བར་གདབ་པར་བྱའོ་སྙམ་ནས་ངེས་དོན་གྱི་ཚིག་ཟབ་མོའི་ལས་འབྲེལ་བཞག་པ་ནི། ཀྱེ་ཁྱོད་འདྲའི་འདབ་ཆགས་སྙིང་རེ་རྗེ། །མི་བདག་གི་ཕ་མ་སྙིང་རེ་རྗེ། །སྒོས་སེམས་ཅན་ཐམས་ཅད་སྙིང་རེ་རྗེ། །ཁོང་ཀུན་ཏུ་བཟང་པོ་སྐད་པ་དང༌། །ཁྱོད་སྲིད་པའི་བློ་ཅན་ཇི་སྙེད་ཀུན། །རིག་མ་རིག་གིས་ཁྱད་པར་བྱས་པ་ལས། །སེམས་ཀུན་གཞིའི་ཁྱད་ལ་རྡུལ་ཙམ་མེད། །འཁོར་འདས་གཉིས་ལག་པའི་ལྟོ་རྒྱབ་འདྲ། །ཨེ་མ་ཧོ་སྲིད་ཞིའི་འགལ་འདུ་ལ། །རྒྱུ་བདག་ཉིད་གཅིག་པའི་མ་རིག་པ། །སེམས་ཅན་ཐམས་ཅད་ཀྱི་འཁྲུལ་གཞི་ཡིན། །རྐྱེན་ཀུན་ཏུ་བརྟགས་པའི་མ་རིག་པ། །གར་མཁན་གྱིས་བྱིས་བློ་འདྲིད་པ་འདྲ། །ལྷན་སྐྱེས་ཀྱི་མ་རིག་གཡོ་འཁྲུལ་པོས། །ད་དུང་མཐའ་མེད་འཁོར་བ་བཟོས། །
གཞི་ལུང་མ་བསྟན་གྱི་གྲོང་ཁྱེར་ནས། །གདོད་མའི་མགོན་པོས་ཁྱད་པར་གྱི། །ཆོས་ཉིད་དྲུག་བདག་གིར་མཛད་པའི་མོད། །མིག་འཕྲུལ་པ་ལྟ་བུར་མངོན་སངས་རྒྱས། །དུས་དེང་སང་ཆོས་སྐུའི་རྒྱལ་ས་ཟིན། །སྤྲུལ་པ་བྱེ་བ་ཕྲག་བརྒྱ་འགྱེད། །སྒོམ་ཡུལ་མེད་སྣང་རིག་ཆམ་བརྡལ་འདི། །ཡེ་གདོད་མ་དོན་གྱི་སངས་རྒྱས་ཡིན། །སེམས་མི་འགྱུ་དགུ་འགྱུའི་རྣམ་རྟོག་ལ། །འཁོར་བ་མཐའ་མེད་ཀྱི་རྟེན་འབྲེལ་རྫོགས། །ཆོས་རྫོགས་པ་ཆེན་པོས་རང་བཞག་ལ། །སྤང་གཉེན་དང་གྲུབ་མཐའི་ཞེན་པ་མེད། །བློས་བྱས་ཀྱི་ལྷོ་སྤྲིན་དབྱིངས་སུ་ཡལ། །ཤེས་སྒྲིབ་ཀྱི་མུན་པ་བག་ལ་ཞ། །ལྟར་མེད་ལ་ལྟ་བའི་རྒྱལ་པོར་གྲགས། །ངེད་རྣལ་འབྱོར་གྱི་ལྟ་བའི་སྐལ་པར་བབས། །ལྟའོ་སྙམ་པའི་བློ་ཐག་ཆོད། །ལྟ་རྒྱུ་མེད་ཀྱང་རང་ངོ་གསལ། །དབྱིངས་རྣམ་དག་ནམ་མཁའ་གོ་འབྱེད་ཀློང༌། །དངོས་མེད་ཀྱི་རིག་པ་མངོན་སུམ་གདངས། །རྡོ་རྗེ་ལུ་གུ་རྒྱུད་དུ་མཐོང༌། །འདི་རྣལ་འབྱོར་སྒོམ་པའི་གྲོགས་སུ་ཤར། །སྒོམ་བློའི་ཤུན་པ་དེ་རུ་དག །སྒོམ་རྒྱུ་ཡེ་ཟད་ངོ་མཚར་ཆེ། །ལས་བྱ་བྱེད་བཟང་ངན་དྲན་རྟོག་ཀུན། །སྲིད་ཞི་དབྱེར་མེད་ཀྱི་མཉམ་རྗེས་འདྲེས། །སྤང་བླང་དང་བྲལ་བ་སྤྱོད་པར་བབས། །སྤྱོད་པའི་ཚུལ་འཆོས་རང་སར་ཞིག །
གཏད་སོ་མེད་པ་འདི་ཉམས་རེ་དགའ། །རང་རིག་འདི་ཅེར་ཡན་དུ་གློད་ཙ་ན། །དུས་གསུམ་གྱི་རྣམ་རྟོག་དབྱིངས་སུ་ཞི། །བསམ་གྱིས་མི་ཁྱབ་པའི་དུས་ཤིག་ཤར། །ངེད་རྣལ་འབྱོར་གྱི་འབྲས་བུའི་སྐལ་བར་བབས། །འབྲས་བུའི་ཞེ་འདོད་རྨང་ནས་སྟོངས། །རེ་དོགས་མེད་པ་རྒྱན་དུ་ཆེ། །འཛིན་མེད་ཀྱི་རིག་པ་ཀློང་ཆེན་འདི། །དངོས་པོར་མེད་ལ་ནུས་པ་ཆེ། །ལྷོད་ཀྱིས་གློད་པའི་གནས་སྐབས་ན། །ཕྱི་ཡུལ་གྱི་སྣང་བ་དབང་དུ་འདུ། །ཁྱོད་དུད་འགྲོའི་སེམས་ཀྱང་བསྒྱུར་དུ་བཏུབ། །བག་ཆགས་སྲིད་པའི་ཤ་གཟུགས་ཅན། །བར་དོའི་རྣམ་ཤེས་ཀྱང་འདྲེན་པར་ནུས། །ཁྱེད་དུངས་སེམས་ཅན་གྱི་བྱ་དབང་ལ། །མི་ཁོ་བོའི་རིག་པ་བློ་འདས་དང༌། །འཁོར་འདས་བཟང་ངན་མེད་པར་བསྲེ། །མཉམ་གཞག་ནམ་མཁའ་ལྟ་བུའི་ངང༌། །རྗེས་ཐོབ་བསྔོ་སྨོན་གྱི་རྒྱ་ཡིས་འདེབས། །བདག་དང་དབྱེར་མེད་སངས་རྒྱས་ཤོག །ཅེས་སྨྲས་པས་བྱ་དབང་དེ་ཉིད་ཤིན་ཏུ་དགའ་བའི་རྣམ་འགྱུར་དང་བཅས་རང་གནས་སུ་སོང་བར་གྱུར་ཀྱང་རིང་པོར་མ་ཐོགས་པར་ཨོ་དཀར་གྱིས་མ་སྲིན་པ་བཅད་དེ་མི་སྣང་བར་གྱུར་ཏོ། །གང་ཞིག་འཇིག་རྟེན་ན་སངས་རྒྱས་འབྱུང་བ་ལ་མཉེས་པར་མི་བགྱིད་པའི་སྐྱེས་བུ་བླུན་པོ་རྣམས་ལ་འཕྲིན་འདི་སྒྲོགས་ཤིག་གུ། གཏམ་ཚོགས་ལེའུ་ལྔ་བཅུ་པའོ།། །།
གཏམ་ཚོགས་ལེའུ་ང་གཅིག་པ། རི་དྭགས་ཀྱི་གཏམ་ངེས་འབྱུང་གི་ཕོ་ཉ།
རི་དྭགས་ཀྱི་གཏམ་ངེས་འབྱུང་གི་ཕོ་ཉ་ཞེས་བྱ་བ། རང་བྱུང་རིག་པའི་ལྷ་ལ་ཕྱག་འཚལ་ལོ། །དེ་ཡང་འདི་ལྟ་སྟེ། བག་ཆགས་སྲིད་པའི་གྲོང་ཁྱེར་ཞེས་བྱ་བའི་ཡུལ་ལྗོངས་ན་རི་དྭགས་ཀྱི་དེད་དཔོན་རིག་པའི་ཟླ་བ་ཞེས་བྱ་བ་ལ་འཁོར་རི་དྭགས་ཀྱི་ཚོགས་ཤིན་ཏུ་མང་པོས་བསྐོར་ནས་ལྗོངས་དཔག་ཏུ་མེད་པར་རྒྱུ་ཞིང་རྩེ་བ་ལས། དུས་རེ་ཞིག་གི་ཚེ་དེད་དཔོན་ཟླ་བས་སྨྲས་པ། ཀྱེ་མ་རི་དྭགས་ཀྱི་ཚོགས་རྣམས་ཁོ་བོའི་ངག་ལ་ཉོན་དང༌། འོ་སྐོལ་རྣམས་ལ་རྩ་ཆུ་བཟང་པོ་དོན་དུ་གཉེར་བ་དང༌། རྩེ་ཞིང་དགའ་མགུར་སྤྱོད་པ་ཙམ་ལས་གཞན་ལས་ཀྱི་སྙིང་པོ་ཅི་ཡང་མི་གདའ། དེ་ལྟ་ནའང་བུང་བ་རྣམས་བཅུད་ལ་ཧ་ཅང་ཆགས་པས་སྲོག་འདོར་བ་བཞིན་རང་ཅག་རྣམས་ཀྱང་སྤང་ལྗོངས་དང༌། ནེའུ་གསེང་གི་བཅུད་ལ་ཆགས་ན་རིགས་ངན་གྱི་རྔོན་པ་ངོ་ཚ་དང་ཁྲེལ་གྱི་གོས་དང་བྲལ་བ་འགའ་ཞིག་དང་ཕྲད་ནས་ཚེ་སྲོག་གློ་བུར་དུ་འདོར་བའི་ཉེན་ཡོད་པས་རྩྭ་ཆུའི་འཚོ་བས་བརྟེན་ཐུབ་ཙམ་པའི་རྫ་ཁྲོད་དབེན་པར་བྲོས་ཏེ་བཙན་ས་འཛིན་པར་འཐད་དོ། །ཞེས་སྨྲས་པ་ན། དེའི་ཁྲོད་ན་རི་དྭགས་འདོད་པའི་ཁྱུ་མཆོག་ཅེས་བྱ་བ་སྒྱུ་རྩལ་དང་མིག་འཕྲུལ་ལ་ཆགས་པ་ཞིག་ཡོད་པ་དེས་འདི་སྐད་དུ། ཀྱེ་ཧོ། རི་དྭགས་ཀྱི་དེད་དཔོན་ཆེན་པོ་ཚུར་གསོན་དང༌། །འཁོར་བ་
སྡུག་བསྔལ་གྱི་རྒྱ་མཚོ་ཆེན་པོ་ན། །ལྟོ་འགྲངས་གོས་ཕྱིད་ཀྱི་འཚོ་བ་ཙམ་ཞིག་ལ། །བདག་ཅག་རི་དྭགས་ལས་སྐྱིད་ཟོས་བདེ་བ་མེད། །རྔོན་པ་བྱུང་ནའང་འབྲོས་པའི་བིང་ནི་ཡོད། །བྲག་མཐའ་ཆེན་པོ་ལ་གབ་པའི་སྐྱིབས་ནི་ཡོད། །མེལ་ཚེ་བྱེད་པ་ལ་རླུང་གི་རྫི་ནི་ཡོད། །རིང་པོར་བལྟ་བ་ལ་དབང་པོའི་མིག་ནི་ཡོད། །ཉེ་བོར་ཉན་པ་ལ་རྣ་བའི་བུ་ག་ཡོད། །རྫ་རི་མཐོན་པོ་ལ་སྐྱིད་པའི་གོ་སྐབས་མེད། །ཁུ་རླངས་ན་བུན་གྱིས་དབྱར་ནི་རྨུགས་ཤིང་འཐིབས། །ཁ་རླུང་མི་བཟད་པས་དགུན་ནི་གྲང་ཞིང་བསིལ། །སྐྱི་སེར་རླུང་པོ་ཡི་རེག་བྱ་ལྕགས་ལས་ངར། །རྩྭ་ཆུ་བཟང་པོ་དང་རྒྱུན་རྐྱེན་འཛོམ་པ་དཀའ། །དེ་འདྲའི་གནས་ངན་ལ་ཐུགས་རྩེ་མ་གཏོད་པར། །ཤེལ་གྱི་རི་བོ་ལ་མར་གང་བྱུགས་པ་ལྟའི། །སྤང་ལྗོངས་བཟང་པོ་ལ་རང་གིར་བྱེད་བཞིན་དུ། །དགའ་མགུར་སྤྱོད་པ་ཙམ་འདོད་ལྷའི་གནས་ནའང་མེད། །གར་སྐྱིད་ཕ་ཡུལ་ལ་སྐུ་ཚེ་བསྐྱེལ་བ་འཐད། །གྲོས་བཟང་བློན་ཁ་ལ་ཉན་དུ་ཇུས་ཀྱི་རྩེ། །ཞེས་ཟེར་རོ། །དེར་དེད་དཔོན་རིག་པའི་ཟླ་བས་ཅུང་ཞིག་བསམས་ནས་འདི་སྐད་ཟེར་རོ། །ཨེ་མ་ཨེ་མ་འདོད་པའི་ཁྱུ་མཆོག་ཉོན། །ཁེ་ཆེན་འོག་ན་གྱོང་ཆེན་སྦས་ནས་ཡོད། །དུག་སྦྲུལ་མགོ་ལ་ཡིད་བཞིན་
ནོར་བུ་མཆིས། །བདེ་བའི་མཛོད་ན་སྡུག་བསྔལ་མུན་པ་གནག །ཉི་ཟླའི་མདུན་ན་སྒྲ་གཅན་མིག་རྩ་གྲུང༌། །རྒྱལ་པོའི་མགུལ་ན་མཚོན་ཆའི་འཁོར་ལོ་གཉན། །བདག་ཅག་རྣམས་ལ་ཁྱི་དང་རྔོན་པ་སྡང༌། །ད་ལྟ་བྲོས་ན་རང་ལ་དབང་ཡོད་དེ། །ནམ་ཞིག་འབྲོས་ཚེ་ཐར་པ་སྲིད་མཐའ་ཙམ། །གྲོས་ཁུང་དཔོན་ལ་བཅོལ་ན་མདུན་མ་བཟང༌། །ད་རེས་ཁོ་བོའི་ངག་ལ་ཉན་པ་འཐད། །ཅེས་སྨྲས་པས་འདོད་པའི་ཁྱུ་མཆོག་ཁྲོས་ཏེ་འདི་སྐད་ཅེས་སྨྲས་སོ། །ཧེ་ཧེ། བསོད་ནམས་དབང་གིས་དཔོན་དུ་ཁྱོད་བསྐོས་ཀྱང༌། །བྱ་བའི་ལས་ལ་འདོད་པའི་ཁྱུ་མཆོག་མཁས། །ཕྲལ་གྱི་བདེ་སྐྱིད་འཚོ་ཐབས་མི་ཤེས་པའི། །གྲོས་ངན་འདོན་པ་བདེ་སྐྱིད་འཇོམས་པའི་དགྲ། །ཤིན་ཏུ་བློ་ཆུང་བྱིས་པའི་རྣམ་རྟོག་ལ། །སྣང་བ་ཐམས་ཅད་དགྲ་དང་དོགས་པར་འཆར། །དེ་འདྲའི་བློ་ཕུགས་བུང་བའི་གཤོག་རླབས་དངོས། །གང་ནའང་མེད་པའི་ཉེན་གྱི་རྣམ་གྲང་གོ །འཁོས་ཆུང་གྲོས་དང་བྱེ་མའི་ཆངས་པ་འདྲ། །དེ་ལ་ཉན་ན་རི་དྭགས་སྡེ་ཚོགས་འཕུང༌། །ཁྱེད་རང་འབྲོས་ན་རྫ་རི་མཐོན་པོར་བྲོས། །རི་དྭགས་དེད་དཔོན་ཁོ་བོས་བྱས་པས་ཆོག །ཅེས་ཚིག་ཐུང་བསྐྱུར་བས། རིག་པའི་ཟླ་བ་སྙིང་རྗེ་བཟོད་བླག་མེད་པ་སྐྱེས་ཤིང་ཡི་མུག་པའི་སེམས་ཀྱིས་འདི་སྐད་ཅེས་ཟེར་རོ། །
ཀྱེ་མ་ཀྱི་ཧུད་འཁོར་བའི་རྒྱ་མཚོ་ན། །ངོ་མཚར་ཅན་གྱི་ལྟད་མོ་ཅིར་ཡང་སྣང༌། །ལྟད་མོ་མཐོང་ན་དགའ་སྟེ་སྙིང་རླུང་ལྡང༌། །ངན་པའི་གཏམ་ལན་གཞལ་ན་ཡི་མུག་སྐྱེ། །རྒྱབ་ན་རི་བོ་ཐུབ་པར་མི་མངོན་པར། །མདུན་གྱི་ཡུར་བའི་ཆུ་ལ་རགས་རྒྱབ་མཁན། །ཁྱོད་འདྲའི་སེམས་ཅན་མང་པོས་ས་སྟེང་གང༌། །ཁོ་བོས་ཕན་པར་སྨྲས་ཀྱང་ལོག་པར་གོ །ལས་ཀྱིས་བདས་པའི་སེམས་ཅན་སྙིང་རེ་རྗེ། །ནམ་ཞིག་ཤིན་ཏུ་འགྱོད་པའི་དུས་ཤིག་འོང༌། །རང་ལ་ཡིད་ཆད་གདུང་ལས་བྱ་ཐབས་བྲལ། །དེད་དཔོན་རྨི་ལམ་ལོག་ནས་རིང་ཞིག་ཐལ། །ཚོད་ཡོད་རི་དྭགས་ཡོད་ན་ང་ཕྱིར་ཤོག །རང་རྩིས་ང་རྒྱལ་ཅན་ཚོ་འདི་རུ་བཞུགས། །དོགས་པས་ཤི་བར་གྱུར་ཀྱང་རང་ཤི་ཡིན། །རེ་བས་བསླུས་པ་མང་ཕྱིར་གཞན་གྱིས་གསོད། །ང་ནི་དུད་འགྲོའི་ལུས་ལ་བྱང་ཆུབ་སེམས། །བདག་པས་གཞན་གཅེས་སེམས་བསྐྱེད་བསྒོམ་དུ་འགྲོ། །དྲང་པོར་བསླབས་ལ་ལོག་པར་མཐོང་བ་ཡིས། །ལ་ཡོགས་སྒུག་པའི་དུད་འགྲོ་ཁྱུ་ཆེན་རྣམས། །ཕྱི་མ་ང་ཡིས་གདུལ་བྱར་སྐྱེ་བར་ཤོག །ཅེས་ཟེར་ཞིང་མཆི་མ་ཁྲམ་གྱིས་བྱུང་ནས་རྫ་རི་མཐོན་པོ་ཞིག་གི་རྩེར་རྣ་བ་ཀྲོང་ངེར་ལང་སོང་ངོ༌། །རི་དྭགས་ཀྱི་གཏམ་ངེས་འབྱུང་གི་ཕོ་ཉ་ཞེས་བྱ་བ་ལས། དགེ་བའི་གཤེས་གཉེན་གྱིས།
འཁོར་བ་ལ་སྐྱོ་བར་བརྡས་བསྐུལ་བའི་ལེའུ་སྟེ་དང་པོའོ།། །།དེ་ནས་རི་དྭགས་ཀྱི་གཙོ་བོ་འདོད་པའི་ཁྱུ་མཆོག་གིས་བགྱིས་ཏེ་རི་དྭགས་ཐམས་ཅད་ཁོའི་རྗེས་ལ་འབྲེང་བཞིན་པར་སྤང་ལྗོངས་གཡུའི་མཎྜལ་བཀོད་པ་འདྲ་བའི་ངོས་ཡངས་པར་རྒྱུ་བཞིན་པར་འདོད་པའི་རོ་ལ་རྩེ་ཞིང་དགའ་མགུར་སྤྱོད་པའི་ཚེ། དམྱལ་བ་མནར་མེད་པའི་གྲོང་ཁྱེར་ཆེན་པོར་ནི་འདུན་ཁང་བརྩིགས། དེར་བགྲོད་པ་ལ་ཤིན་ཏུ་རིངས་ཀྱང་ལས་ཀྱི་ལྷག་མ་ཅུང་ཟད་ཀྱིས་བཤོལ་བཏབ་པའི་རྔོན་པ་རྒན་པོ། སྐྱེ་བ་མང་པོ་ལ་ཁྲ་སྤྱང་གི་སྲིད་པ་རྒྱུད་མར་བཟུང་བའི་བག་ཆགས་བརྟས་པ་ལས། བསོད་ནམས་མ་ཡིན་པའི་བྱ་བ་ལ་ཤིན་ཏུ་དཔའ་ཞིང་འཆིང་བ་རྣམ་པ་ལྔའི་སྐ་རགས་ཀྱིས་དམ་དུ་བཅིངས་པ་ཞིག་ཡོད་པ་དེ་གཉིད་དུ་སོང་བའི་རྨི་ལམ་ན། སྤང་ལྗོངས་གསེར་གྱི་ཕྱེ་མ་བརྡལ་བ་འདྲ་བ་ལ། རི་དྭགས་དཔག་ཏུ་མེད་པ་རྩེ་ཞིང་དགའ་མགུར་སྤྱོད་པའི་དབུས་སུ་རྔོན་པ་རང་ཉིད་སྡུག་བསྔལ་གསུམ་གྱི་གླུ་ལ་སྦྱར་བའི་གླིང་བུ་འབུད་ཀྱིན་འདུག་པ་ལ། རི་དྭགས་རྣམས་གླིང་བུའི་སྒྲ་དེ་ཉན་དུ་ལྷགས་ནས་ཇེ་ཉེར་སོང་བ་ཞིག་རྨིས་སོ། །དེར་ཁོ་གཉིད་ལས་སད་པའི་ཤེས་པ་སྐད་ཅིག་མར་ད་ཅིའི་རྨི་ལམ་དྲན་ནས། འཁོར་བའི་ས་བོན་བློ་མང་གྱ་གྱུའི་འདུ་ཤེས་གྲུང་
པོས་ཉོན་མོངས་པའི་ཡིད་བསྐུལ་ཏེ། མལ་ནས་ནི་ལངས། མདའ་གཞུ་ཞགས་པ་ལ་སོགས་པའི་མཚོན་ཆ་སྣ་ཚོགས་སྟ་གོན་དུ་བྱས། རང་དང་ལས་མཐུན་པའི་ཤ་ཁྱི་མི་སྡུག་པའི་གཟུགས་བརྙན་དུག་གི་མཆེ་བ་དང་ལྡན་པ་མང་དག་ཞིག་ཁྲིད་ནས་ལྗོངས་རྒྱུ་བཞིན་པར་ལུང་བའི་ཕུ་ན་ཡར་སོང་བ་ལས། རྨི་ལམ་གྱི་བཀོད་པ་ཇི་ལྟ་བ་བཞིན་སྤང་གཤོངས་གསེར་གྱི་ཕྱེ་བ་བརྡལ་བ་འདྲ་བ་ལ་རི་དྭགས་སྡུག་དགུ་མང་པོ་གྱ་གྱུར་རྩེ་ཞིང་བག་ཕེབས་པའི་ཚུལ་གྱིས་འདུག་པ་མཐོང་ངོ༌། །དེར་ཁོས་ཤ་ཁྱི་དང་ལག་ཆ་རྣམས་རི་སུལ་དུ་སྦས། ཕྱུགས་རྫི་རྒན་པོ་ཕྱུགས་སྟོར་བ་འཚོལ་དུ་ཕྱིན་པ་ལས། མ་རྙེད་པར་འཁྱགས་ལྟོགས་སྐོམ་གསུམ་འཛོམ་པའི་རྣམ་འགྱུར་ཅན་ཞིག་ཏུ་བརྫུས་ནས་རི་དྭགས་རྣམས་དང་ཇེ་ཉེར་སོང་བ་ན། རི་དྭགས་ཀྱི་གཙོ་བོར་འདོད་པའི་ཁྱུ་མཆོག་གིས་མཐོང་ནས་སྨྲས་པ། ཀྱེ་མ་རི་དྭགས་ཀྱི་ཚོགས་རྣམས་སྙན་གསོན་ཅིག །ཐོ་ཡོར་གཟུགས་ལ་གོམ་པའི་འདེགས་འཇོག་ཅན། །མི་མིན་འདྲེ་མིན་ཐེ་ཚོམ་ཅན་གྱི་གཟུགས། །འདི་འདྲ་མཐོང་བས་ཁོ་བོའི་སེམས་མ་དགའ། །འོན་ཏེ་རྔོན་པ་ཡིན་པར་མི་སྲིད་དེ། །རྔོན་པ་ཡིན་ན་གནམ་རུའི་བ་དན་དང༌། །ཉག་ཕྲན་མདའ་ཡི་དོང་ཆུང་ཁྲ་བོ་དང༌། །སྲོག་གཤེད་ཤ་ཡི་ཅེ་སྤྱང་ཨ་ལུང་གཟུགས། །རོལ་
དུ་ཁྲིད་མཆི་གང་ཡང་མི་འདུག་པས། །རང་ཅག་སྔོན་མོའི་ཆུ་ལ་འཐུང་དུ་འགྲོ། །ཞེས་རི་དྭགས་ཟླ་བོ་རྣམས་ཁྲིད་དེ་ཆུ་རོང་ཞིག་ཏུ་སོང་ངོ༌། །དེར་རྔོན་པ་དེས་རི་སུལ་དུ་བསྐུངས་པའི་ཤ་ཁྱི་རྣམས་ཁྲིད། ལག་ཆ་རྣམས་ཁྱེར་ནས་བྲག་གསེབ་ཅིག་ཏུ་འབྱར་ཏེ་གླིང་བུ་འབུད་ཀྱིན་བསྡད་ཙ་ན། །འདོད་པའི་ཁྱུ་མཆོག་གླིང་བུའི་སྒྲ་ལ་ཡིད་ཆགས་ནས་འདི་སྐད་དུ། ཨེ་མ། ཚོར་བ་བདེ་སྡུག་བྱེད་པོ་ཡུལ་གྱིས་བྱས། །དེ་རིང་སྔོན་ཆད་མགོའི་སྒྲ་ཞིག་ཐོས། །འདི་ནི་གཟུགས་ཅན་མི་ཡིས་མ་ཡིན་ཏེ། །ནམ་མཁའི་དབྱིངས་ནས་དྲི་ཟའི་བུ་མོའམ། །ཡང་ན་ས་ཡི་ལྷ་མོས་བྱས་པར་མཆི། །འདི་འདྲའི་སྒྲ་སྐད་རྣ་བའི་བཅུད་དུ་སྙན། །རང་ཅག་རྣམས་ཀྱིས་ཕྱིན་ཆད་ཐོས་པར་དཀའ། །བློ་ལྡན་རི་དྭགས་ཐམས་ཅད་ང་ཕྱིར་ཤོག །ཅེས་སྨྲས་ཏེ་རི་དྭགས་རྣམས་ཁྲིད་ནས་གླིང་བུའི་སྒྲ་ལ་སྙོགས་པ་ན། ཡིད་ལ་མེད་པ་ཞིག་ལ་བྲག་གསེབ་ནས་ཤ་ཁྱི་ཤིན་ཏུ་མ་རུངས་པ་མགྱོགས་པ་ལ་ནམ་མཁའི་བྱ་ལྟ་བུ། འཁྱུག་པ་ལ་ཆུ་བོའི་ཉ་ལྟ་བུ། ཞེ་སྡང་མི་བཟོད་པའི་མཆེ་བ་གཙིགས་ཤིང༌། གཤིན་རྗེའི་ལས་མཁན་མངོན་སུམ་པ་མཐོང་བ་ཙམ་གྱིས་སྙིང་ཤུབས་ནས་འཐོན་ནུས་པ་བཅུ་གཉིས་རྟེན་འབྲེལ་བཅུ་གཉིས། དོན་ནས་རི་དྭགས་རྣམས་བདས་
པ་ལས། ཧ་ཅང་ཚོར་བའི་ཡུལ་ལ་ཞེན་ཆེས་པའི་གཙོ་བོ་འདོད་པའི་ཁྱུ་མཆོག་ལས་ཀྱི་དབང་གིས་ཁྱུ་ནས་ཡར་ཏེ་ལ་རོད་ལུང་རོད་རྣམ་པ་བཞི་སྐྱེ་རྒས་ན་འཆི། བཅད་ནས་དབུགས་ཀྱི་རྒྱུ་བ་ཆད་ལ་ཁད་པ་གསུམ་སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ། གྱི་བར་དུ་གཏུགས་པ་ལས། ཅི་ཞིག་ན་བྲག་མཐའ་ཆེན་པོ་གཅོང་རོང་གི་ཟབས་བློས་མི་འཁྱུད་པ་ཞིག་ཏུ་བཀར་ནས། ཤ་ཁྱི་རྣམས་ཀྱིས་བསྐོར་ཏེ་ཟུག་པ་དང༌། མཆེ་བ་གཉེར་བ་བྱེད་དོ། །དེའི་ཚེ་རི་དྭགས་དེ་འདི་སྙམ་དུ་ཀྱི་ཧུད་བདག་གིས་རི་དྭགས་ཀྱི་དེད་དཔོན་ཆེན་པོ་རིག་པའི་ཟླ་བ་ལ་མ་ཉན་པས་འདི་ལྟ་བུའི་སྡུག་བསྔལ་དང་འཇིགས་སྐྲག་མི་བཟད་པ་མངོན་སུམ་དུ་མྱོང༌། ད་ནི་ཁྱི་འདིའི་རྗེས་ལ་མི་ལུས་གཤིན་རྗེའི་མགོ་ཅན་དམྱལ་བའི་གཏིང་རྡོ་ནག་པོ་དེ་ངེས་པར་སླེབ་ཡོང་བས་ངའི་ཚེ་ནམ་མཁའི་གློག་ལས་ཀྱང་མི་རྟག་པ་ཉིད་དུ་གྱུར་ཟིན་སྙམ་ནས་མཆི་མ་ཁྲམ་ཁྲམ། སུག་པོ་ཐབ་ཐབ། སྐྱི་བུང་བུང༌། དབུགས་ལྷེང་ལྷེང༌། འདར་ཧྲིལ་ལི་ལི་བྱེད་ཀྱིན་འདུག་པའི་ཚེ། བདུད་སྡིག་ཅན་རྔོན་པའི་ཆ་བྱད་ཅན་ཤིན་ཏུ་མ་རུངས་པ་དེས་ཞགས་པ་གཅིག་ཕྲག་ལ་གཟར། མདང་གཞུ་ཞིག་ལག་པར་ཁྱེར་ཏེ་ཁྲོང་གིས་བྱུང་ནས་བཞིན་གཉེར་བ་དང་སྤྲགས་ཞེ་སྡང་མི་བཟད་པའི་སྡང་མིག་ལྟ་བ་ལ། ཤིན་ཏུ་ཉམ་ཐག་ལ་སྙིང་
རྗེ་བའི་རི་དྭགས་དེ་སྲོག་གི་འཇིགས་པས་སྐྲག་སྟེ་རྔོན་པ་ལ་ཕྱག་འཚལ་བའི་སྟངས་ཀ་དང་བཅས་མཆི་མའི་དབའ་ལོང་འཁྲུགས་བཞིན་དུ་ངུ་སྐད་ཐོན་ཚད་ཀྱི་ངང་ནས་འདི་སྐད་ཅེས་ཞུ་གསོལ་བྱེད་པ་མཐོང་ངོ༌། །ཀྱེ་མ་ཀྱེ་ཧུད་ང་རེ་འཇིགས། །དྲང་པོར་བསླབས་པའི་དེད་དཔོན་ལ། །ལོག་པར་མཐོང་བའི་བསམ་བརླག་པོ། །འདོད་པའི་ཁྱུ་མཆོག་ང་ལས་སུ། །ཁྱེད་དང་པོར་རྫི་བོའི་རྣམ་འགྱུར་ཅན། །བར་དུ་གླིང་བུའི་སྒྲ་སྐད་ཅན། །ད་ལྟ་གཤིན་རྗེའི་ལས་མཁན་པ། །མཐོང་བས་འདུ་ཤེས་བྱུང་ཚོར་འགགས། །འཇིགས་པ་ལ་བསམས་ན་དྲན་པ་འཐོར། །བ་སྤུའི་བུ་ག་རེ་རེ་ནས། རྔུལ་ཆུ་ཡང་ཁྲག་དང་རྣག་ཏུ་འཛག །ཤ་ཁྱིའི་ལུས་ལ་སྤྱང་ཀིའི་ཁ། །གཅིག་ཉལ་གཅིག་ལངས་ཀྱིས་བདས་ཙ་ན། །དབུགས་ཆད་ལ་ཁད་པ་ལན་གསུམ་བྱུང༌། །ང་འབྲོས་བཞིན་འབྲོས་བཞིན་ཤི་སོང་སྙམ། །རྨིག་པ་བྲག་རིའི་གསེབ་ལ་འཐོར། །ང་ལངས་ཀྱིན་ལངས་ཀྱིན་བསད་སོང་སྙམ། །རུས་ཚིགས་ཐམས་ཅད་འཆུས་ཤིང་བྲལ། །ང་གསོན་པོར་རྗེན་ཟས་བགྱིས་སོང་སྙམ། །དུས་དེ་རིང་གི་ཉི་མ་ཤར་བ་ལས། །འཇིགས་སྐྲག་དང་ཧས་པ་ཡོང་མ་མྱོང༌། །ད་གསོན་པའི་རེ་བ་མ་མཆིས་ཏེ། །མདའ་མཚོན་གྱི་དུཿཁས་མ་མནར་བར། །རང་བབས་སུ་འཆི་ཟོས་བདེ་རུ་ཆུག །ཤི་ཕྲལ་
དུ་ཤ་ཁྲག་སྒྱུ་མའི་ལུས། །ཁྱེད་རང་ལ་དབང་བས་ཅི་དགར་མཛོད། །ཅེས་ཟེར་ཞིང་སྡང་བའི་དགྲས་མཐོང་ཡང་སྙིང་རྗེ་བ་ཞིག་འདུག་པ་དེ་བྲག་གསེབ་དེའི་དྲང་སྲོང་ཆེན་པོ་མཐོང་ན་དགའ་ཞེས་བྱ་བ་དེས་ཚོར་ནས་སྲོག་སྐྱོབ་པའི་ཕྱིར་འདི་སྐད་ཅེས་སྨྲའོ། །ཀྱེ་མ། གདོལ་པའི་ལུས་ལ་ཤན་པའི་སེམས། །ཁྲེལ་དང་ངོ་ཚའི་གོས་དང་བྲལ། །ལས་དང་རྒྱུ་འབྲས་མི་སེམས་པར། །ལྟོ་འགྲངས་འབའ་ཞིག་དོན་གཉེར་ཞིང༌། །མནར་མེད་དམྱལ་བའི་གྲོང་ཁྱེར་ལ། །དོ་ཆད་རྒྱག་པའི་ལས་ངན་ཁྱོད། །དར་ཅིག་དྲང་སྲོང་ངག་ལ་ཉོན། །འཁོར་བ་སྡུག་བསྔལ་རྒྱ་མཚོ་ལ། །གནས་པའི་སེམས་ཅན་མ་ལུས་ཀུན། །ཕ་མ་བུ་ཚ་རེ་མོས་ཡིན། །ཚེ་འདིའི་ཕ་མ་སྤུན་གྲོགས་ལ། །བརྩེ་དུང་ཞེན་པས་བཅིངས་བཞིན་དུ། །སྐྱེ་བ་སྔོན་མའི་ཕ་མ་རྣམས། །དེང་སང་དུད་འགྲོ་ཟེར་བའི་ལུས། །མགོ་དང་སུག་པར་རྭ་ཙེ་ཅན། །སྨྲ་བ་མི་ཤེས་དོན་མི་གོ །སྤང་བླང་བྱ་བའི་རང་བཞིན་ལ། །ཤོན་ཏུ་རྨོངས་པའི་ངང་ཚུལ་ཅན། །འདི་འདྲའི་གཟུགས་སུ་འཕོས་པ་དེ། །ཁྱེད་ཀྱིས་མ་གོ་མ་རིག་པས། །ཁྲེལ་མེད་འདི་འདྲའི་སྤྱོད་པ་བྱེད། །ཁྱད་པར་ད་ལྟའི་སེམས་ཅན་འདི། །ཁྱོད་ཀྱི་ལུས་འདི་བསྐྱེད་པའི་མ། །ཚེ་འཕོས་རི་དྭགས་ལུས་
སུ་བླངས། །དེ་ཕྱིར་མ་ཤ་བུས་ཟ་བ། །དེ་ལ་ངོ་ཚ་ཆུང་བ་མེད། །དེ་ལས་ཁོང་སྙིང་གྲང་བ་མེད། །ཁྱོད་ལ་མནར་མེད་དམྱལ་བ་ཡི། །སྡུག་བསྔལ་བྱུང་ན་ཅི་ཚུགས་བྱེད། །དེ་ཕྱིར་དྲང་སྲོང་ངག་ལ་ཉོན། །མ་འདི་གོམ་གསུམ་འབྲོས་སུ་ཆུག །མ་འདི་གོམ་གསུམ་འཕག་ཏུ་ཆུག །འདི་ཡི་ཚབ་ཏུ་བདག་གི་ལུས། །ཁྱོད་ལ་ཕངས་པ་མེད་པ་སྟེར། །ཤ་ཁྲག་རུས་པ་ཅི་དགར་མཛོད། །ཅེས་སྨྲས་པས་རྔོན་པ་ཁྲོས་ཏེ་འདི་སྐད་ཅེས་ཟེར་རོ། །ཡུལ་མ་ཟིན་པ་ཁ་བཤད་མཁས། །ལྟོ་མ་ཕྱིད་པ་སྐྱིད་ཟོས་མཁས། །ལས་མ་ནུས་པ་བྱ་བཏང་མཁས། །འདུག་སས་ཕོངས་ནས་བྲག་ལ་ཡིབས། །འགྲོས་ས་ཕོངས་ནས་ལུང་སྟོངས་འཚོལ། །ཁྱོད་འདྲས་བདག་ལ་དེ་འདྲའི་གཏམ། །སྨྲ་བའི་ཁ་ན་ཡོད་མ་ཡིན། །ལས་འབྲས་ཟེར་བ་ཁ་གཏམ་ཡིན། །དེ་ལ་བརྩི་བ་སུ་ཞིག་ཡོད། །གསོད་པ་རྔོན་པ་ངས་གསོད་ཀྱང༌། །ཟ་བ་དགེ་སྦྱོང་རྣམས་ཀྱིས་ཟ། །ཟ་དང་གསོད་པའི་སྡིག་པ་ལ། །ཁྱད་པར་ཡོད་ན་གད་མོ་བྲོ། །ཁྱེད་ཅག་ཁྱིམ་པའི་རྟགས་སྤངས་ཤིང༌། །དམར་སེར་གོས་ཀྱིས་གདོང་གཡོགས་ཀུན། །ཤན་པ་སྲོག་ལས་བྱེད་ས་དང༌། །ཁྱིམ་པ་མདུན་གྲོས་བསྡུར་ས་དང༌། །
བྲེ་ལོག་སྲང་ལོག་འཛུགས་ས་དང༌། །གདུག་འདྲེ་ར་མགོ་བསྲེག་ས་ཚུན། །སླེབས་ལ་ལས་འབྲས་མེད་ལགས་སམ། །ད་ནངས་སྐྱ་རེངས་ཤར་ཤར་ནས། །ད་ལྟ་ཉི་མ་རྒས་རྒས་ཚུན། །དང་ཁར་ལྟོ་ལས་ཆུ་མ་མྱོང༌། །ལྟོགས་ཀྱང་མི་ཤ་ངས་མི་ཟ། །སྙིང་ལ་མདའ་མོ་མ་གཟེར་གོང༌། །རང་གི་གནས་སུ་ཕྱིན་ན་དྲག །ཅེས་ཁྲོ་གཏུམ་གྱིས་སྨྲས་ནས་མདའ་གཞུ་མེར་གྱིས་བཀང་བྱུང་བ་ན། དྲང་སྲོང་གིས་སྨྲས་པ། །རྔོན་པ་དྲག་ཤུལ་ཆེ་ན་ཡང༌། །དྲང་སྲོང་སྲོག་ལ་ཕངས་པ་མེད། །ཁྱོད་ཀྱིས་སྔོན་ལ་མ་བསད་ན། །གཞན་གྱིས་གསོན་པོར་ག་ལ་ཟ། །ཚུལ་མིན་སྤྱོད་པའི་དགེ་སྦྱོང་དང༌། །འདུལ་ཁྲིམས་སྲུང་བའི་ཉན་ཐོས་ཀྱི། །ཉིས་བརྒྱ་ལྔ་བཅུའི་ཁྲིམས་རྩ་ལ། །ལས་ཀྱིས་བདའ་འདེད་འཕྱུགས་པ་མེད། །མ་གི་དམྱལ་ཁམས་བཅོ་བརྒྱད་ནས། །ཡ་གི་སྲིད་རྩེའི་ལས་སྣང་ཀུན། །ལས་དང་ལས་ཀྱི་འབྲས་བུ་ཡིན། །དེ་ཕྱིར་དེ་འདྲའི་ཡིན་ལུགས་ལ། །ཁྱོད་ལས་དྲང་སྲོང་ང་རང་མཁས། །རྨོངས་པས་ཆོས་སྐད་སྒྲོགས་པ་དེ། །ངན་པའི་ནང་ནས་ཐ་ཤལ་ཡིན། །ད་རེས་ཉམ་ཐག་སྙིང་རྗེའི་ཡུལ། །ཉེས་མེད་རི་དྭགས་འདི་གོ་ཡི། །སྲོག་འདི་དྲང་སྲོང་ང་ལ་སློང༌། །ང་སྲོག་རྔོན་པ་ཁྱོད་ལ་གཏོད། །
ཅེས་རི་དྭགས་ལ་སྙིང་ཤིན་ཏུ་རྗེ་ནས་དྲང་སྲོང་དེས་མཆི་མ་འཕྲུལ་གྱི་བཏོན། རི་དྭགས་ཀྱི་སྲོག་བསྐྱབ་པའི་དོན་དུ་རང་གི་ལུས་ལྟོས་མེད་དུ་བཞག་ནས་རྔོན་པ་ལ་ཕྱག་གྱང་འགྱེལ་བ་ལྟ་བུར་བཙལ་བས་ཀྱང་ཁོའི་སྣང་བ་འགྱུར་དུ་མ་འདོད་པར། དུག་མདའ་ཤིན་ཏུ་མ་རུངས་པ་ཞིག་རི་དྭགས་ཤི་ལ་ཁད་དེ་ལ་བརྒྱབ་པས་སེམས་ཅན་དེ་བྲག་ཁ་ནས་རྣ་བ་ཀྲོང་ངེ་གཅོང་རོང་ཆེན་པོར་ལྷུང་ངོ༌། །དེ་མ་ཐག་རྔོན་པ་ཁྱི་དང་བཅས་པ་བཏབ་སྒྲ་དི་རིར་རྒྱུགས་ནས་ཤི་འདྲད་ལིང་ལིང་བྱེད་པའི་སྲོག་ཆགས་ཤིན་ཏུའང་སྙིང་རྗེའི་ཡུལ་དུ་གྱུར་པ་དེ་བརྩེ་བ་མེད་པའི་སེམས་ཀྱིས་སྐད་ཅིག་ལ་བསད་སོང་བས། དྲང་སྲོང་སྙིང་རྗེས་མ་བཟོད་པར་བརྒྱལ་ནས་དྲན་པ་འཐོར་བར་གྱུར་ཏོ། །རི་དྭགས་ཀྱི་གཏམ་ངེས་འབྱུང་གི་ཕོ་ཉ་ཞེས་བྱ་བ་ལས། ཆོས་མ་དྲན་པར་སྲིད་པའི་བདེ་འབྱོར་ལ་ཆགས་པ་གང་ཞིག་སྡུག་བསྔལ་གྱི་ཕྲང་ལས་ཐར་བ་མེད་ཅིང༌། དེ་གའི་ངང་ལ་འཆི་བ་བཙན་ཐབས་སུ་བྱུང་སྟེ་དེ་ལ་ཐབས་གང་གིས་ཀྱང་བསླུ་རུ་མེད་པ་རི་དྭགས་མཐའ་ལ་གཅུར་བ་ལྟ་བུའི་བརྡས་བསྟན་པའི་སྐབས་ཏེ་ལེའུ་གཉིས་པའོ།། །།དེའི་ཚེ་དྲང་སྲོང་ཆེན་པོ་དེ་འདི་སྙམ་དུ། བདག་གིས་དགེ་བའི་ཕན་ཡོན་དང་སྡིག་པའི་ཉེས་དམིགས་དེ་ཙམ་ཞིག་བཤད་ཅིང༌། བྱམས་པ་ཆེན་པོའི་སེམས་ཅན་ཀྱིས་རང་གི་སྲོག་དང་བརྗེ་
བར་བསྐུལ་ནས་ཀྱང་རི་དྭགས་ཀྱི་སྲོག་བློས་མི་གཏང་བར་ངན་པའི་སྤྱོད་པ་མཐར་སྐྱེལ་བྱེད་པ་དེ་ནི་ཤིན་ཏུ་མི་རིགས། དེད་དཔོན་སྙིང་རྗེ་ཆེན་པོས་མི་ནག་མདུང་ཐུང་ཅན་བསད་པ་ལྟར། བརྒྱ་ལ་ཕན་པའི་གཅིག་སྲོག་ཅེས་པ་དེ་ངེས་པར་བདེན། དེས་ན་སྡིག་ཅན་ཚེ་རིང་བར་གྱུར་ན་སེམས་ཅན་མང་པོ་སྡུག་ལ་སྦྱོར་བ་འདུག་དགོངས་ནས་འོད་གསལ་སྟོང་པ་ཉིད་ཀྱི་ངང་ནས་སྙིང་རྗེ་ཁྲོས་པའི་ཞེ་སྡང་ཆེན་པོས་གསོས་བཏབ་སྟེ་དྲང་སྲོང་གི་དམོད་པ་ལྡོག་ཏུ་མེད་པ་ཉི་ཤུ་རྩ་གཅིག་བཏབ་པས། ཤིན་ཏུ་བཙན་པའི་དམོད་པའི་བདེན་མཐུ་དང༌། དཀོན་མཆོག་གི་བཀའ་ཆད་དྲག་པོས་རྔོན་པ་ཤ་ཁྱི་དང་བཅས་པ་གད་རྡིབ་ཀྱི་འོག་ཏུ་ནོན་ནས་ཤི་བར་གྱུར་ཏོ། །དེར་ཁོང་ཅག་གི་བསོད་ནམས་མ་ཡིན་པའི་ལས་ཀྱི་རྩལ་རྫོགས་ནས་སྨྱུག་དོང་དུ་སྦྲུལ་བཅུག་པ་ལྟར་དབུགས་ཆད་མ་ཁད་དུ་མར་གྱི་ཟང་ཐལ་ཆེན་པོ་དམྱལ་བ་མནར་མེད་པར་སྐྱེ་བ་བླངས་སོ། །དེར་དྲང་སྲོང་གིས་མངོན་ཤེས་ཀྱིས་བརྟགས་པས། ཁོང་ཅག་རྣམས་དམྱལ་བའི་ནང་ཚན་ལས་ཀྱང་ཤིན་ཏུ་སྡུག་བསྔལ་བ་མནར་མེད་པའི་དམྱལ་བ་ཞེས་ཕྱོགས་བཞི་མཚམས་བརྒྱད་ཐམས་ཅད་མེའི་ཕུང་པོ་གཅིག་ཏུ་གྱུར་པའི་དབུས་ན། སྡུག་བསྔལ་མི་བཟོད་པ་མྱོང་བའི་རྟེན་མིང་བཞིའི་ཕུང་པོ་བག་ཆགས་དང་བཅས་པ་ངུ་སྐད་ལྷང་ལྷང་འདོན་པ་དང༌། ཡང་རེས་འགའ་རྒྱུ་མཐུན་གྱི་འབྲས་བུར་
ལུས་ཀྱི་དངོས་པོ་སྣང་བའི་ཚེ། ཁོང་ཅག་རྣམས་ཀྱི་དབུས་དེ་དང་ལས་མཐུན་པར་བསགས་པའི་སྡེ་དཔོན་ནག་པོ་རྩེད་མོའི་ཞོར་ཙམ་དུའང་གཞན་སྲོག་ལ་གནོད་པ་བྱེད་པ་སོགས་མདོར་ན་སྲོག་གཅོད་ཀྱི་ལས་ཀྱིས་ཁྲིད་པ་མང་པོ་ཞིག་ལྕགས་བསྲེགས་ཀྱི་ས་གཞི་ལ་གནམ་ལྕགས་ཞུན་མར་ཁོལ་བའི་སོ་མོངས་ཀྱིས་གོ་མཚམས་མེད་པར་གཟེངས་པའི་ཐང་ལ། གཤིན་རྗེའི་ལས་མཁན་ལྕགས་ཀྱི་ཅེ་སྤྱང་མགོ་དགུ་ཡན་ལག་དང་ལྡན་ཞིང༌། ཤིན་ཏུ་འཇིགས་སུ་རུང་བས། བསྡད་དབང་སྐད་ཅིག་ཀྱང་མེད་པར་འདེད་ཅིང་ཡང་ཤི་ཡང་སོས་ཀྱིས་སྡུག་བསྔལ་དོས་དྲག་ལ་སྙུགས་རིང་བ་ལས་ཐར་པའི་དུས་སྐབས་མེད་པ་མཐོང་ནས། དྲང་སྲོང་གིས་སྨྲས་པ། ཀྱེ་མ་ཀྱི་ཧུད་དཀོན་མཆོག་ཐུགས་རྗེ་ཅན། །རྙེད་དཀའི་དལ་འབྱོར་རིན་ཆེན་ཐོབ་གྱུར་ཀྱང༌། །དགེ་བཅུ་ཐར་བའི་ལས་དང་ཞེ་འགྲས་ཤིང༌། །མི་དགེའི་སོ་ནམ་བྱེད་པའི་སྡིག་ཅན་ལ། །དེ་འདྲའི་འབྲས་བུ་སྨིན་པ་ཀྱེ་མ་ཧུད། །སྤྱིར་གྱི་ཁམས་གསུམ་འཁོར་བའི་གྲོང་ཁྱེར་ན། །བདེ་དང་སྡུག་བསྔལ་ལས་ལ་སྤྱོད་པ་ཀུན། །ལས་དང་དེ་ཡི་འབྲས་བུ་ཡིན་པར་མཆི། །ཁྱད་པར་སྲོག་གཅོད་ལ་སོགས་མི་དགེ་བཅུའི། །རྣམས་སྨིན་འབྲས་བུ་ངན་སོང་གསུམ་གྱི་ལུས། །མྱོང་ན་ལྟ་ཅི་མིག་གིས་མཐོང་ན་ཡང༌། །
འབྱུང་འཇུག་དབུགས་ཀྱི་རྒྱུ་བ་ཆད་ལ་ཁད། །འདི་འདྲ་མཐོང་བས་གང་ཞིག་འཇིག་རྟེན་ན། །མི་དགེ་སྡིག་པའི་ལས་ལ་དཔའ་བ་དེ། །གདོན་གྱིས་བརླབས་སམ་འོན་ཏེ་ལས་ཀྱི་མཐུ། །དེ་ཕྱིར་གཟུར་གནས་འགྲོ་བ་ཐམས་ཅད་ལ། །བདག་གིས་སྙིང་ནས་བརྩེ་བས་མ་བཟོད་པར། །ཤ་ཚའི་སྙིང་གཏམ་ཚིག་གསུམ་བཤད་ཀྱིས་ཉོན། །རྨི་ལམ་གློག་ལས་ཡ་མ་བརླར་གྱུར་པའི། །ཚེ་འདིའི་ལྟོ་གོས་གཏམ་གྱི་དོན་ཆེད་དུ། །མི་དགེའི་ས་བོན་བཏབ་པའི་ཞིང་ས་ལ། །སྡུག་བསྔལ་གསུམ་གྱི་འབྲས་བུ་ལས་གཞན་ཅི། །དེ་ཕྱིར་སྐྱོ་བའི་འདུ་ཤེས་གྲུང་པོ་ཡིས། །ཚེ་འདིའི་ལེགས་ཉེས་སྐྱིད་སྡུག་བཟང་ངན་ཀུན། །རང་སོར་ཞོག་ལ་དབེན་པའི་ནགས་ཁྲོད་སྙོགས། །ཁྱད་པར་སེམས་ཅན་ཐམས་ཅད་ཕ་དང་མར། །ཕན་ཚུན་རེ་མོས་ཡིན་ལ་ཐེ་ཚོམ་མེད། །དེ་ཕྱིར་ད་ལྟའི་ཕ་མར་ཆགས་བཞིན་དུ། །ཚེ་རབས་སྔ་མའི་ཕ་མ་གསོད་པ་འདི། །སྨྲ་ཤེས་དོན་གོ་མི་ཡི་རྣམ་ཐར་དུ། །འདུག་པས་བློ་སེམས་ནང་དུ་ཁུག་ལ་སོམས། །དེ་ཡང་འཕགས་པ་ཀཱཏྱ་ཡཱ་ན་ཡིས། །གྲོང་དུ་བསོད་སྙོམས་མཛད་པས་ཁྱིམ་བདག་ཅིག །ཉ་ཤ་ཟ་ཞིང་བུ་ཆུང་པང་དུ་འཁུར། །ཁྱི་མོས་རུས་པ་འཆའ་ལ་བརྡེག་པ་གཟིགས། །འཕགས་པས་མངོན་ཤེས་སྤྱན་གྱིས་བརྟགས་པ་ལས། །
ཉ་དེ་ཕ་ལ་ཁྱི་མོ་ཚེ་འདིའི་མ། །བུ་ཆུང་རང་གི་དགྲ་བོར་འདུག་པ་བཞིན། །དགྲ་གཉེན་གང་ཡང་མི་རྟག་སྒྱུ་མའི་དཔེ། །ཁྱད་པར་ཚེ་འདིའི་ཕ་མ་སྔོན་འདས་པ། །སེམས་མ་གྱུར་ཀྱང་ལུས་པོ་བརྗེས་པའི་ཚུལ། །མ་རིག་རྔོན་པས་རི་དྭགས་མང་བསད་མཐར། །རང་གི་མ་བསད་དམྱལ་བར་ལྷུང་བ་བཞིན། །དེ་ལྟའི་ཚུལ་གྱིས་ཕ་མ་གསོད་པ་དང༌། །གཞན་དག་གསོད་ལ་ཁྱད་པར་འགའ་མེད་པས། །མནར་མེད་དམྱལ་བའི་སྡུག་བསྔལ་དྲན་པར་བྱོས། །སྲོག་ལ་བབས་ཀྱང་གཞན་སྲོག་མ་གཅོད་ཅིག །དྲེགས་པས་རྒྱགས་པའི་མི་དཔོན་སྡིག་ཅན་དང༌། །ལས་ཀྱིས་བདས་པའི་རིགས་ངན་རྔོན་པ་ལ། །ཕན་པར་སྨྲས་ཀྱང་ལོག་པར་མཐོང་སྲིད་ཀྱི། །བྱང་ཆུབ་སེམས་དཔའི་སྡོམ་ལ་གནས་པ་དང། །ཁྲེལ་དང་ངོ་ཚའི་བག་དང་ལྡན་པ་རྣམས། །རང་གི་མངའ་རིས་དགེ་བཅུས་འཚོ་བ་དང༌། །ཉེས་མེད་སྲོག་ཆགས་ཨར་ལ་མི་གཏོད་དང༌། །རང་དབང་རི་ལ་རི་རྒྱ་བསྡམ་པ་དང༌། །སྡིག་ཅན་ལིངས་པ་ཆབ་འོག་མི་འཛུད་སོགས། །བཀྲ་ཤིས་དགེ་ལེགས་ཆེན་པོས་འཚོ་བར་མཛོད། །དེ་ལྟར་བགྱིས་པས་ཡུལ་ཕྱོགས་ཁོལ་བུར་བདེ། །ལོ་ལེགས་སྐྱ་རྒྱལ་སད་སེར་བཙའ་ཐན་དཀོན། །འབྱུང་བ་སྒང་གཤོངས་བཀྲ་མི་ཤིས་པ་དང༌། །ནད་མུག་འཁྲུག་རྩོད་དུས་ཀྱི་རྒུད་པ་
ཞི། །ཡུལ་བདག་མཉེས་པས་ཆར་ཆུ་དུས་སུ་འབེབས། །དཀོན་མཆོག་མ་ཁྲེལ་བསམ་པའི་དོན་ཀུན་འགྲུབ། །ཆོས་ཁྲིམས་བསྡམས་པས་ས་རྣམས་བཅུད་དང་ལྡན། །རྒྱལ་པོའི་མངའ་ཐང་ཁྱིམ་པའི་ཟས་ནོར་འཕེལ། །ཚེ་འདིར་སྐྱིད་ལ་ཕྱི་མའང་དཔལ་དང་ལྡན། །དགེ་བཅུ་སྤྱད་པས་བདེ་སྐྱིད་འབྱུང་བ་འདི། །ནང་པ་སངས་རྒྱས་གྲུབ་མཐའི་ཁྱད་ཆོས་ཡི། །དྲང་སྲོང་ངས་ནི་མི་དགེའི་ལས་སྤངས་ཤིང༌། །ཀུ་ས་ལི་ཡི་བརྟུལ་ཞུགས་ལ་གཞོལ་བས། །རེ་དོགས་གཉིས་མེད་ཆོས་སྐུའི་རྒྱལ་ས་ཟིན། །སངས་རྒྱས་ཀུན་གྱི་དགོངས་པ་རང་ལ་ཤར། །སྔར་ཡང་སྤྲོས་བྲལ་གདོད་མའི་ཀློང་ནས་འོངས། །ད་ཡང་རང་བྱུང་སྐྱེ་མེད་ངང་དུ་ཨཿ། །ཞེས་གསུངས་ནས་བྲག་གསེབ་དེ་ཉིད་དུ་མིག་འཕྲུལ་ལྟ་བུར་ཐིམ་པར་གྱུར་ཏོ། །རི་དྭགས་ཀྱི་གཏམ་ངེས་འབྱུང་གི་ཕོ་ཉ་ཞེས་བྱ་བ་ལས་ཀྱི་འབྲས་བུ་ཆུད་མི་ཟ་བར་བསྟན་ནས་དགེ་བ་ལ་བསྐུལ་པ་སྟེ་ལེའུ་གསུམ་པའི་བདག་ཉིད་ཅན་གྱིས་རྫོགས་སོ།། །།ཨེ་མ། བྱ་བྲལ་ཀློང་ཆེན་སྒྱུ་མའི་རྣལ་འབྱོར་པ། །གཏད་མེད་ཟང་ཐལ་མ་བཅོས་ལྷུག་པའི་ངང༌། །བྱང་ཆུབ་ཤིང་གི་ནགས་ཁྲོད་ཚེ་རིང་ལྗོངས། །ཤིན་ཏུ་དབེན་པའི་གནས་སུ་བག་ཕེབ་ནས། །སྒྱུ་འཕྲུལ་ལུས་ཀྱི་བཀོད་པ་འཆགས་པའི་ཚེ། །སྡིག་ཅན་རྔོན་པས་རི་
དྭགས་བསད་པའི་ཤ །ཁྱེར་ནས་གནས་སུ་ལྡོག་པ་མཐོང་བ་ལས། །བཟོད་མེད་སྙིང་རྗེ་ཆེན་པོས་རྒྱུད་བསྐུལ་ཞིང༌། །མིག་ནས་མཆི་མའི་དབའ་རླབས་གཡོ་བ་དང༌། །སྐྱོ་ཤས་ངེས་འབྱུང་དྲག་པོས་ཉེར་བསྐུལ་བས། །ཐུགས་གཏེར་ནམ་མཁའ་མཛོད་ཀྱི་སྒོ་ཕྱེ་སྟེ། །ཉམས་ཆོས་བརྡ་ཡི་རི་མོས་ཇི་བཞིན་བཀོད། །དགེ་དེས་སྲོག་གི་འཇིགས་པས་ཉེར་སྐྲག་པའི། །སེམས་ཅན་མང་པོ་དུཿཁ་ལས་གྲོལ་ཅིང༌། །ཡི་གེ་འདི་ཉིད་མཐོང་དང་ཐོས་ཀུན་གྱིས། །རིགས་ངན་རྔོན་པའི་ལས་ཐབས་བཤོལ་བར་ཤོག །གཏམ་ཚོགས་ལེའུ་ང་གཅིག་པའོ།། །།
གཏམ་ཚོགས་ལེའུ་ང་གཉིས་པ། རི་བོང་ཤིན་ཏུ་བརྟན་པའི་གཏམ་བྲག་རིའི་མགུལ་རྒྱན།
རི་བོང་ཤིན་ཏུ་བརྟན་པའི་གཏམ་བྲག་རིའི་མགུལ་རྒྱན་ཅེས་བྱ་བ། བྱང་ཆུབ་སེམས་དཔའི་སྤྱོད་པ་རྨད་དུ་བྱུང་བ་ལ་ཕྱག་འཚལ་ལོ། །ནགས་ཚལ་དྲ་བས་བརྒྱན་པ་བྱ་བ་ན། །རྒྱུད་ལ་བྱང་ཆུབ་སེམས་མཆོག་རྨད་བྱུང་བའི། །རི་བོང་ཁྱོ་ཤུག་ཟུང་ཞིག་ཡོད་པར་གྱུར། །དེ་དང་ཉེ་བར་སྤྱོད་པ་རྗེས་མཐུན་པའི། །ལྷའི་བྱ་དྲིལ་བུའི་སྒྲ་ཅན་ཁྱུ་ཞིག་གནས། །དེ་དག་རིགས་དང་རིགས་མིན་འདྲེས་གྱུར་ཀྱང༌། །ཕན་ཚུན་གཅིག་ལ་གཅིག་གནོད་སེམས་བྲལ་ཞིང༌། །དམ་པའི་མཛའ་གཅུགས་བཞིན་དུ་བརྩེ་བར་བྱེད། །རེ་ཞིག་ན་ཆར་སྤྲིན་ཤིན་ཏུ་སྟུག་པོས་སྨན་ལྗོངས་དེ་ཉམས་མི་དགའ་
ཞིང་མུན་སྲོས་པ་ལྟར་གྱུར་པ་ན། གསའ་གདུག་པ་ཅན་ཞིག་ཕ་ཝང་གི་རྩ་བ་ལ་འཁྲིལ་ཞིང་ཆོམ་རྐུན་གྱི་བརྟུལ་ཞུགས་ལ་རབ་ཏུ་གོམས་པས། རི་བོང་ཅིག་ཤོས་དེ་ཉམ་ཉེས་པར་བྱས་སོ། །དེའི་མདོ་ལ་ལྷའི་བྱ་ཚོགས་རྣམས་ཀྱང་ཤིན་ཏུ་འདྲོགས་པར་གྱུར་ཏེ། ཁྱུས་འཚོ་བའི་བརྟན་པ་ནི་རབ་ཏུ་བྲལ་ནས་ཡུད་ཙམ་ཉིད་ལ་ཕྱོགས་དང་ཕྱོགས་སུ་བྱེར་ཏོ། །རྒྱུ་དེས་ནགས་ཚལ་དེ་ལ་གནས་པའི་འདབ་ཆགས་ཐམས་ཅད་ཀྱང་ཡིད་མི་བདེ་བར་གྱུར་ནས་ཅ་ཅོའི་སྒྲ་ཆེན་པོ་བསྒྲགས་པས། བྲག་རི་དེའི་བ་གམ་མཐོན་པོ་ལ་གནས་པའི་བྱ་རྒོད་ཞི་བའི་དབང་པོ་ཞེས་བྱ་བ་ཡང་བོས་པ་ལྟར་སོང་ནས་རི་བོང་བྱ་ཆུབ་སེམས་དཔའ་ཤིན་ཏུ་བརྟན་པའི་མདུན་སར་འོངས་ནས་དེའི་རྒྱུ་དྲིས་སོ། །དེས་དེ་ལ་སྔོན་གྱི་ལོ་རྒྱུས་བསྙད་པས་ཞི་བའི་དབང་པོ་དེ་ཡང་སྙིང་རྗེ་ཆེན་པོ་དང་ལྡན་པ་ཡིན་པས་སྨྲས་པ། ཀྱེ་མ་མ་ལ་སྙིང་རྗེ་བ། །རི་དྭགས་བརྒྱ་ཚོགས་སྟོང་ཚོགས་ཀྱང༌། །རི་བོང་ཁྱོད་ལས་ཉམས་ཆུང་བ། །མྱུར་དུ་འབྲོས་པའི་མཐུ་ཡང་མེད། །མཐའ་ལ་བགྲོད་པའི་རྩལ་ཡང་མེད། །ཡིད་དུ་གཅུགས་པའི་མཆིས་འབྲང་ལ། །གཅན་གཟན་གདུག་པས་སྐབས་བཙལ་བས། །སྡུག་བསྔལ་ཞགས་པས་མ་བཅིངས་སམ། །ཟུག་རྔུའི་ཚེར་མས་མ་བསྣད་དམ། །གལ་ཏེ་བདག་གི་
མཐུས་ནུས་ན། །ཁྱོད་ལུས་ཁུར་དུ་བཟོད་པ་ཡིས། །དམ་བཅའ་རབ་ཏུ་བརྟན་བྱས་ནས། །བྲག་རིའི་བ་གམ་མཐོན་པོ་ལ། །སྐད་ཅིག་ཡུད་ལ་གཤེགས་ནུས་ཀྱི། །འཚེ་བ་བྲལ་བའི་སྐྱབས་སྦྱིན་ནོ། །སྤྲོའམ་མི་སྤྲོ་ཁྱོད་ཅིག་སོམས། །ཞེས་སྨྲས་ནས་གཤོགས་པ་ས་ལ་འབྱར་བ་བཞིན་དུ་འདུག་གོ །དེ་ལ་རི་བོང་ཤིན་ཏུ་བརྟན་པས་སྨྲས་པ། །འདབ་ཆགས་བརྒྱ་ཚོགས་སྟོང་ཚོགས་ཀྱང༌། །སྲོག་ལ་མི་འཚེའི་ལྷག་བསམ་ཅན། །ཁྱོད་ལས་མེད་པར་ངེས་རྙེད་པས། །སྐྱབས་སུ་རུང་བར་ཡིད་ཆེས་ཀྱང༌། །སྲིད་པ་ལས་ཀྱིས་བསྐོས་པ་ཡི། །ཡུལ་ལ་བདག་གིར་མ་བཟུང་ན། །བྲག་རི་མཐོ་ཡང་གཡངས་ས་འཇིགས། །འཚེ་བ་མེད་ཀྱང་ཟས་ཀྱིས་ཕོངས། །ཞེས་སྨྲས་ནས་ཞི་བའི་དབང་པོ་ཡང་ཤེས་རབ་ཀྱིས་མ་ཟིན་པའི་སྙིང་རྗེས་གཞན་ལ་མི་ཕན་པར་རྟོགས་ནས་ལྗོན་ཤིང་གེལ་བ་ས་ལས་འཕར་བ་ལྟ་བུའི་སྟབས་ཀྱིས་རང་གནས་སུ་དེངས་སོ། །དེར་རེ་ཞིག་ན་ལྷའི་བྱ་ཚོགས་དག་ཀྱང་འདུས་པར་གྱུར་ནས་སྨྲས་པ། །གྲོགས་པོ་ཉམ་ཉེས་གྱུར་པའི་ཚེ། །བདག་ཅག་རྣམས་ཀྱང་གཏོལ་མེད་པས། །སེམས་ལ་བཀལ་བའི་ཁུར་གྱི་མཐུ། །ལུས་ཀྱི་ནུས་པས་མ་ཐེག་གོ །ཀྱེ་མ་མ་ལ་བདག་ཅག་རྣམས། །གླང་ཆེན་
དག་ཀྱང་ཐལ་མོ་ཡིས། །བསྣུན་པའི་སེང་གེ་ཡིན་ན་རུང༌། །གཅན་གཟན་ཕལ་ཡང་སྐྲག་འགྱུར་བའི། །ནགས་ཀྱི་སྟག་མོ་ཡིན་ན་རུང༌། །ཀུན་གྱི་མཐུ་སྟོབས་རབ་གནོན་པའི། །ནམ་མཁའ་ལྡིང་དབང་ཡིན་ན་རུང༌། །ངེས་པར་བདག་ཅག་ཉམ་ཆུང་བས། །དགྲ་ལ་རྒོལ་བའི་མཐུ་མེད་དོ། །ཞེས་རང་ཅག་མཐུ་ཆུང་བ་ལ་ཀུན་ནས་ཞུམ་པའི་ཆོ་ངེ་འདོན་པར་གྱུར་པ་ལ། རི་བོར་ཤིན་ཏུ་བརྟན་པས་སྨྲས་པ། གསོན་དང་གྲོགས་ཀྱི་དམ་པ་རྣམས། །ཤེས་རབ་མཐུ་ཡིས་མ་ཟིན་ན། །སྙིང་རྗེ་ཆེ་ཡང་གཞན་ཕན་དཀའ། །ཞེ་བའི་དབང་པོའི་ངང་ཚུལ་སོམས། །བཟོད་པ་དགྲ་ལ་མ་བསྒོམས་ན། །གཞན་དུ་བཟོད་པའི་ཡུལ་མེད་ཅིང༌། །དཔའ་ཞིང་རྟུལ་ཕོད་ལྡན་པས་ཀྱང༌། །བདག་གཞན་གཉིས་ལ་ལྷན་ཅིག་འཛོམས། །དེ་ཀུན་བདག་མེད་རྟོགས་པ་ཡི། །ལྟ་བའི་རྩི་ཡིས་མ་ཟིན་ན། །འགྲོ་བའི་སྡུག་བསྔལ་ཐུབ་རྣམས་ཀྱི། །ཕྱག་གིས་བསལ་ཡང་མི་སེལ་ཏོ། །ཞེས་སྨྲས་པས་ལྷའི་བྱ་དེ་དག་ལ་ལ་ནི་འདུན་པའི་དད་པ་ཐོབ། ལ་ལ་ནི་དང་བའི་དད་པ་ཐོབ་ཅིང༌། རི་བོང་དེ་བྱང་ཆུབ་སེམས་དཔའ་བློ་གྲོས་དང་ལྡན་པར་རྟོགས་ནས་སླར་དྲིས་པ། ཤེས་རབ་དང་ནི་སྙིང་རྗེ་དང༌། །བདག་མེད་རྟོགས་པའི་ཁྱད་པར་གང༌། །དེ་དང་དེ་ཡི་ཡོན་ཏན་
རྣམས། །བདག་ཅག་རྣམས་ལ་བཤད་དུ་གསོལ། །ཞེས་གསོལ་བས། རི་བོང་བྱང་ཆུབ་སེམས་དཔའ་ན་རེ། ཀྱེ་གྲོགས་པོ་དག་དགོངས་ཤིག །ཀུན་དཀྲིས་ཞེས་བྱ་བའི་གྲོང་ཁྱེར་ཆེན་པོ་ཞིག་ན་ཕྱུག་པོ་བཟའ་བསྡོངས་གཉིས་ལ་བུ་རབ་རྨོངས་དང༌། རབ་དྲེད་དང༌། རབ་གསལ་ཞེས་བྱ་བ་གསུམ་ཡོད་པ་ལས། དང་པོ་ནི་ཤིན་ཏུ་བླུན་པའོ། །བར་པ་ནི་རྒོད་ཅིང་གཏུམ་པའོ། །ཐ་ཆུང་ནི་དབང་པོ་གསལ་བའོ། །དེ་གསུམ་ཀ་ལ་རིགས་ཀྱི་ཆོ་ག་མཐུན་པའི་ཁྱིམ་ཐབ་བཅོས་ཏེ་གནས་པ་ལས། ཕུ་བོ་བླུན་པོ་ནི་རང་བཞིན་གྱིས་ཁོལ་པོར་གྱུར་ཏོ། །ཆུང་བ་གཉིས་ཁྱིམ་གྱི་འདུ་འཛི་ལ་བགྲོ་བ་ན་བློ་གྲོས་ཤིན་ཏུ་ཐ་དད་པས་མི་མཛའ་བར་གྱུར་པ་ལ་རབ་དྲེད་ཀྱིས་བསམས་པ། བདག་གིས་གཞོན་ནུ་རབ་གསལ་འདི་དྲག་ཤུལ་གྱི་ཆོ་གས་ཁྱིམ་ནས་བསྐྲད་པར་ནུས་ཀྱིས། དེ་ལྟར་བསྐྲད་ན་ཕུ་བོ་ནི་བླུན། གཞན་དོ་ཟླར་གྱུར་པ་ནི་འགའ་ཡང་མེད་པས་བདག་ཉིད་རང་དབང་ཅན་དུ་འགྱུར་རོ་སྙམ་ནས་རྒོལ་བའི་སྟ་གོན་སྣ་ཚོགས་རྩོམ་མོ། །བུ་ཐ་ཆུང་གིས་ཀྱང་དེའི་སེམས་ཤེས་ནས་ཇོ་ཇོ་བདག་ལ་མི་དགྱེས་པར་མ་མཛད་ཅིག །བདག་ནི་ངེས་པར་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། བཟོད་པའི་དཀའ་ཐུབ་བསྟེན་པར་བྱའོ། །ཞེས་སྨྲས་པས་ཁོ་ཤིན་ཏུ་དགའ་སྟེ་ཅི་བདེར་
བཏང་ངོ༌། །དེ་ནས་རབ་གསལ་འཐོན་པའི་ལམ་ཀ་ན་རང་གི་ཕུ་བོ་བླུན་པོ་ནི་ནགས་ཚལ་ཆེན་པོ་ཞིག་གི་མཐའ་ནས་མེ་སྦར། བདག་ཉིད་ནགས་ཀྱི་དབུས་ན་མགོ་གཏུམས་ཏེ་མེའི་དྲོད་ལ་ཆགས་པའི་ཚུལ་གྱིས་གནས་པ་མཐོང་ངོ༌། །མཐོང་ནས་ཀྱང་དེས་སྨྲས་པ། ཀྱེ་མ་འཇིག་རྟེན་བླུན་པོ་རྣམས། །ཡུན་དུ་ཕུང་བར་མི་ཤེས་པར། །ཕྲལ་གྱི་བདེ་བ་ལྷུར་ལེན་པ། །ལྐུགས་པས་ནགས་ལ་མེ་སྦར་འདྲ། །ཞེས་སྨྲས་པས་རབ་རྨོངས་ལངས་ཏེ་ཕྱོགས་ཀུན་ཏུ་བལྟས་ནས་ད་དུང་རབ་གསལ་ལ་ཁྲེལ་དགོད་བྱེད་དོ། །མི་མཁས་མཁས་པར་རློམ་པ་རྣམས། །ཆོས་དང་མཐུན་པའི་བྱ་བ་ལ། །བྱ་བ་མིན་ཞེས་རབ་བསྒྲགས་ནས། །བདག་ཉིད་ལོག་པའི་ལམ་དུ་འཇུག །དེ་ནས་རབ་གསལ་འབྲོག་དགོན་པ་ཆེན་པོ་ན་གནས་པའི་དྲང་སྲོང་ཡང་དག་སྡོམ་ལ་ཚངས་པར་སྤྱད་ནས་གང་ཟག་གི་བདག་མེད་ནི་ཡང་དག་པར་ཁོང་དུ་ཆུད། ཆོས་ཀྱི་བདག་མེད་ལའང་བློ་གྲོས་ཀྱིས་འཇུག་པ་ཤིན་ཏུ་གསལ་བར་གྱུར་པའི་ཚེ། རབ་དྲེད་ཀྱི་སྤྱོད་པ་ནི་བྱ་བ་མང་བ། ལོག་པའི་བློ་གྲོས་ཤིན་ཏུ་ཐལ་ལ་རྒོད་ཅིང་གཏུམ་པས་རང་གི་ཁྱིམ་ཤིན་ཏུ་ཕྱུག་པ་དེ་ཡང་སྤྲང་པོའི་བྲང་ཁང་དུ་ཡུད་ཙམ་ལ་གནས་གྱུར་ཏོ། །དེར་ཁོ་ཀུན་ནས་ཀུན་ཏུ་ཡོངས་སུ་འཁྱམས་པ་ལས་ཅི་ཞིག་ན་
གཅུང་རབ་གསལ་གྱིས་མཐོང་ནས་སྨྲས་པ། ལྐུགས་པས་ནགས་ལ་མེ་སྦར་བའི། །བླང་དོར་མཐོང་ཆོས་ལ་གནས་ཀྱང༌། །ད་དུང་གཏན་ཚིགས་མ་ཡིན་འཛིན། །ཕ་ཁྱིམ་སྤྲང་པོར་སོང་བའི་མིས། །ད་ཙམ་ཁེ་དང་ཉེས་དམིགས་ཀྱི། །སྐྱོན་ཡོན་བྱེ་བྲག་ཆ་ཕྱེད་ཀྱང༌། །ད་དུང་ཐལ་ཟིན་ལྡོག་ཏུ་མེད། །འདི་ཡང་ཤེས་རབ་འཆལ་བ་སྟེ། །འཇིག་རྟེན་འདིའམ་གཞན་དག་ན། །བློ་གྲོས་ཆེན་པོར་བསྙེམས་པ་རྣམས། །སྤྱོན་པའི་ངང་ཚུལ་མི་འཛིན་ཏེ། །ང་དང་ཁྱོད་ཀྱིས་ཁྱད་པར་ལྟོས། །ཞེས་སྨྲས་པས་ཁོ་ཁྲོས་ཏེ་སླར་ཡང་སྤྲང་པོའི་བརྟུལ་ཞུགས་ཉིད་ལས་རྔོན་པའི་ལས་ཐབས་འཛིན་པས་འཆི་ཁར་བསྡུས་འཇོམས་ཀྱི་སྣང་བ་མངོན་སུམ་དུ་ཤར་བ་ཞིག་བྱུང་ངོ༌། །ཤེས་རབ་ལོག་པའི་ལམ་ཞུགས་ན། །ནགས་ཚལ་མེ་ཡིས་ཚིག་པ་བཞིན། །རྣམ་རྟོག་རླུང་གི་བཞོན་པ་ཅན། །དེ་ཡང་དེ་ཡི་བདུད་དུ་འགྱུར། །ཀྱེ་ལྷའི་བྱ་ཚོགས། བུ་ལྐུགས་པ་ནི་མི་ལུས་ཙམ་པོ་བའོ། །བར་པ་རབ་དྲེད་ནི་མི་ལུས་བྱུར་པོ་ཆེའོ། ཐ་ཆུང་རབ་གསལ་ནི་མི་ལུས་རིན་པོ་ཆེའོ། །དོན་འདིས་འཇིག་རྟེན་ཐམས་ཅད་ཀྱི་རྣམ་འབྱེད་དང་ཤེས་རབ་ཀྱི་ཁྱད་པར་ལེགས་པར་ཤེས་སོ། །ཞེས་སྨྲས་པས་ལྷའི་བྱ་ཚོགས་དེ་དག་ཀྱང་བདག་ཅག་དང་བཅས་པའི་འཇིག་རྟེན་ཕལ་མོ་ཆེ་བླང་དོར་གྱི་གནས་ལ་ཤིན་དུ་ལྡོངས་པའི་
ལོང་བ་ཤ་སྟག་གོ་སྙམ་ནས་གསོལ་པ། ཀྱེ་ཧོ། །བྱང་ཆུབ་སེམས་དཔའ་རི་བོང་ནི། །བློ་གྲོས་མཆོག་གི་གཏེར་གྲོལ་པའི། །གྲགས་པ་འཇིག་རྟེན་ལ་གསལ་ཕྱིར། །གཟུགས་བརྙན་ཟླ་བའི་ཁོང་ན་འདྲ་གསལ། །སྤོབས་པ་བསམ་གྱིས་མི་ཁྱབ་པས། །རྣ་བའི་གདེངས་ཀ་ཀུན་ཏུ་མཐོ། །ངན་འགྲོའི་ལམ་ངན་རབ་བཅད་པས། །ཐུར་ལ་འགྲོ་བ་མཁས་མ་ཡིན། །ས་ལམ་གོང་ནས་གོང་སྤྱོད་པས། །རི་དབང་རྩེར་བགྲོད་བརྟུལ་ཞུགས་མྱུར། །ད་ནི་སྟོང་ཉིད་སྙིང་རྗེ་ལས། །བརྩམས་པའི་ཆོས་མཆོག་བསྟན་དུ་གསོལ། །དེ་སྐད་ཞུས་པས་རི་བོང་ནི། །ཆོས་སྐུའི་འདུག་སྟངས་ལ་གོམས་པའི། །སྟབས་ལས་གཡོ་བ་མེད་བཞིན་དུ། །ཀྱེ་ཉོན་བདག་ཅག་ནགས་ཁྲོད་དུ། །གནས་པ་གཅིག་པུའི་བསོད་ནམས་ཀྱང༌། །བསམ་གྱིས་མི་ཁྱབ་བརྗོད་མི་ལང༌། །ནགས་ནི་རྒྱལ་བས་རབ་ཏུ་བསྔགས། །ནགས་ན་ཚོང་དང་སོ་ནམ་མེད། །དེ་བཞིན་འདུ་འཛིའི་རྣམ་གཡེང་མེད། །སྡིག་པའི་གྲོགས་ཀྱང་ཡོད་མ་ཡིན། །བྱིས་པའི་ཚོགས་ནི་ཤིན་དུ་ཉུང༌། །མཐོང་ན་དགའ་བའི་ལྗཽན་ཤིང་དང༌། །རིག་ན་འཇམ་པའི་ཤིང་བལ་དང༌། །ཟོས་ན་བདའ་བའི་མྱུ་གུ་སོགས། རྩོལ་དང་འཐབ་ལ་མ་ལྟོས་པའི། །འདོད་པའི་ཡོན་ཏན་དཔག་དུ་མེད། །དེ་ན་འདུ་འཛི་རགས་
པ་ཡི། །སྤྱོད་པ་སྣ་ཚོགས་ཡོད་མིན་ན། །འཐབ་དང་རྩོད་པ་ག་ལ་ཞིག །བཏང་སྙོམས་ཆེན་པོར་ངང་གིས་གནས། །རིགས་མཐུན་ཕན་ཚུན་མི་འཚེ་བ། །བྱམས་པ་ཉིད་དེ་ཅིག་ཤོས་ལ། །འགལ་རྐྱེན་བྱུང་ན་ལྷག་པར་དུ། །གདུང་བ་དེ་ནི་སྙིང་རྗེ་སྟེ། །སུ་དག་ཕུན་སུམ་ཚོགས་གྱུར་ཀྱང༌། །ཕྲག་དོག་མེད་པས་དགའ་བའོ། །འདི་ལྟར་ཚངས་པའི་གནས་པ་བཞིས། །རང་བཞིན་དུལ་བ་དེ་དག་ཀྱང༌། །ངོ་བོ་སྡོང་པ་ཉིད་དང་ནི། །ངང་མདངས་སྙིང་རྗེ་ཆེན་པོ་གཉིས། །ཟུང་དུ་ཆུད་པར་མ་གྱུར་ན། །བྱང་ཆུབ་ལམ་དུ་ཅི་ཕྱིར་འགྲོ། མོས་པས་སྤྱོད་པའི་སེམས་བསྐྱེད་ཀྱི། །གཙོ་བོ་ཕྱོགས་རིས་བྲལ་བ་ཡིན། །སྦྱོར་བ་དེ་ཡི་རྗེས་འབྲེལ་དུ། །གདོང་དང་ཡོངས་སུ་གཏོང་བ་དང༌། །ཤིན་ཏུ་གདོང་བ་ཆེན་པོ་སྟེ། །དང་པོས་ཟས་དང་ལོངས་སྤྱོད་གདོང༌། །གཉིས་པས་བུ་དང་ཆུང་མའང་གཏོང༌། གསུམ་པས་ལུས་སྲོག་གཏོང་བ་སྟེ། །སྦྱིན་པས་ཕ་རོལ་ཕྱིན་ལ་བསླབ། །རང་ཉིད་ཉེས་སྤྱོད་སྡོམ་བྱེད་ཅིང༌། །གཞན་དག་ཀྱང་ནི་དེ་ལ་སྦྱོར། །དགེ་ཆོས་རྒྱ་མཚོ་ལྟ་བུར་སྡུད། །སེམས་ཅན་དོན་ལ་རྣམ་པ་ཀུན། །ལྷག་པར་སེམས་པ་ཚུལ་ཁྲིམས་ཡིན། །གཞན་གྱི་གནོད་པ་ཟོད་བྱ་ཞིང༌། །ཆོས་ཕྱིར་
དཀའ་སྤྱད་བཟོད་པ་དང༌། །ཟབ་མོའི་དོན་ལ་མི་སྐྲག་པའི། །བཟོད་པའི་གོ་ཆ་བརྟན་པར་བགོ །བསམ་དང་སྦྱོར་བ་ཐམས་ཅད་ནས། །དགེ་ཚོགས་རྒྱ་མཚོར་འཇུག་པ་ལ། །ཞུམ་དང་ཆོག་ཤེས་མེད་པ་ཡི། །བརྩོན་འགྲུས་སྟོབས་ཀྱིས་རང་ལ་བསྐུལ། །ནགས་ཁྲོད་དབེན་པར་བདེར་གནས་ཤིང༌། །སྤྱན་དང་མངོན་ཤེས་ལ་སོགས་པའི། ཡོན་ཏན་ཁྱད་པར་ཅན་གྱི་མཛོད། བསམ་གཏན་དོན་ལ་རྩེ་གཅིག་གཞོལ། ཀུན་རྫོབ་དང་ནི་དོན་དམ་གྱི། བདེན་གཉིས་ཚུལ་བཞིན་མ་ཕྱེད་ན། གཞན་དོན་བསྒྲུབ་པར་མི་ནུས་པས། ཐོད་བསམ་སྒོམ་པའི་ཤེས་རབ་བསྐྱེད། ལྷག་བསམ་དག་པའི་སེམས་བསྐྱེད་ལ། མཐོང་ལམ་རྣམ་པར་མི་རྟོག་པའི། ཡེ་ཤེས་ཡོངས་སུ་རྫོགས་པས་ན། གང་ཟག་རྫོགས་པ་ཆེན་པོ་ཞེས། རང་བྱུང་རྡོ་རྗེའི་གྲུབ་པའི་མཐའ། སྒྲིབ་པ་སྤངས་པའི་སེམས་བསྐྱེད་ནི། ས་བཅུ་ལམ་ལྔའི་ཡོན་ཏན་ཏེ། མི་སློབ་ལམ་གྱི་ངོ་བོ་ཡིན། བློ་ཟད་ཆོས་ཟད་ཆེན་པོའི་དབྱིངས། མྱ་ངན་འདས་པའི་འབྲས་བུའོ། །ཞེས་སྨྲས་པས་དེ་དག་གི་ནང་ནས་ལྷའི་བྱ་ཐོད་པའི་རྔ་སྒྲ་ཅན་ཞེས་བྱ་བ་ཡིད་ཆོས་ཀྱི་དད་པ་ཐོབ་ནས་དྲིས་པ། དད་པ་ཐོབ་པ་མང་ལགས་ཏེ། ཡིད་ཆེས་ཐོབ་པ་ཤིན་ཏུ་ཉུང༌།
ལུས་སྟོབས་ཆེ་བ་མང་ལགས་ཏེ། རི་བོང་ལྟ་བུའི་སྐྱེ་བུ་ཉུང༌། །འབྱོར་བ་ཆེ་བ་མང་ལགས་ཏེ། །འཕགས་པའི་ནོར་བདུན་ཤིན་ཏུ་ཉུང༌། རྐང་སྟེགས་མཐོ་བ་མང་ལགས་ཏེ། །རྟོགས་པ་མཐོ་བ་ཤིན་ཏུ་ཉུང༌། །སྒྲུང་དང་གཏམ་རྒྱུད་མང་ལགས་ཏེ། །ཆོས་ཀྱི་དོན་ཡོད་ཤོན་ཏུ་ཉུང༌། །ད་ནི་ལྷ་ཡི་བྱ་ཚོགས་ལ། །དོན་གྱི་ཞལ་ལུང་དེས་འཚལ་གྱི། །སྣང་བ་རྐྱེན་གྱིས་བསྒྱུར་བ་ལས། །ལྡོག་ཐབས་རེ་ཞིག་བཤད་དུ་གསོལ། །དེ་སྐད་ཞུས་པས་སླར་སྨྲས་པ། ཀྱེ་ཧོ་འདི་ན་སྒྱུ་མ་མཁན། །བཟང་པོ་ལས་ཀྱང་ལྷག་པར་དུ། །མིག་འཕྲུལ་མཁས་པའི་སྒྱུ་མ་ནི། །དབང་པོ་དྲུག་གི་རྣམ་ཤེས་དང། །ཡུལ་རྣམས་ཕན་ཚུན་ཕྲད་ལས་བསླུ། །སྐྱེ་བོ་ཕལ་ལ་སྨོས་ཅི་འཚལ། །དེ་དག་ཤིན་ཏུ་སྙིང་རྗེའི་ཡུལ། །གྲུབ་པའི་མཐའ་ཡིས་བློ་བསྒྱུར་བའི། །སྐྱེས་བུ་རྣམས་ཀྱིས་འདི་མཁྱེན་འཚལ། །དང་པོ་ཁྱིམ་ཆུང་ནས་བྱུང་སྟེ། །གཙུག་ལག་ཁང་ལ་ཁྱིམ་ཆེན་གྱི། །འདུ་ཤེས་ཞུགས་པ་དེ་དག་ནི། །སྡེ་སྣོད་ལེགས་པར་ཤས་ན་ཡང༌། །འདོད་པའི་གདོན་ཆེན་མ་རུངས་པ། སེར་སྣའི་སྡང་མིག་གཡོ་བ་ཅན། །ང་རྒྱལ་དཔུང་ཚོགས་ཁྲིད་པ་དེས། །རབ་ཏུ་བཅོམ་ནས་དམྱལ་བར་འགྲོ། །དེ་བཞིན་ནགས་
ན་གནས་གྱུར་ཀྱང༌། །དེ་ལ་བརྟེན་ནས་ཐོབ་པ་ཡི། །རྙེད་པས་ང་རྒྱལ་འཕེལ་གྱུར་ན། །བཀུར་སྟིས་རབ་ཏུ་རྒྱག་བྱས་ནས། །ཉམས་དང་རྟོགས་པའི་ཡོན་ཏན་རྣམས། །ན་བུན་བཞིན་དུ་སླར་ལ་དེངས། །སྤངས་རྟོགས་ཡོན་ཏན་མཐར་ཕྱིན་ནས། །འགྲོ་དོན་དུས་ལ་བབ་པ་ཡི། །དམ་པ་རྣམས་ཀྱི་བསོད་ནམས་དང༌། །ཁྱིམ་བདག་ཆེན་པོའི་འབྱོར་པ་ལ། །དོ་ཟླའི་སྤོབས་ངན་རྙེད་གྱུར་ནས། །གསོག་དང་བསྲུང་དང་གཟི་བརྗིད་ཀྱི། བྱ་བ་མང་པོས་རྣམ་པར་འཁྱམ། །གང་ན་སྐྱེས་བུ་མཆོག་རྣམས་ཀྱིས། །རྒོལ་ངན་འཇོམས་པའི་ཐོས་པ་དང༌། །ཆོས་དང་ཆོས་མིན་རབ་འབྱེད་པའི། །བསམ་བྱུང་ཤེས་རབ་རལ་གྲི་དང༌། །དངུལ་ཆུ་ས་ལ་འདྲིལ་བའམ། །རྨ་བྱས་བཙན་དུག་རོ་མྱོང་ལྟར། །འདོད་ཡོན་ལྔ་ལ་རབ་སྤྱད་ཀྱང༌། །རྣམ་ཤེས་ལས་འདས་ཡེ་ཤེས་ནི། །དེ་ཡིས་འཆིང་བར་མི་ནུས་པའི། །སྒོམ་པའི་ཤེས་རབ་རྣམ་པ་གསུམ། །རང་གི་རྒྱུད་ལ་གནས་མི་གནས། །ཁྱད་པར་ཁྱིམ་གྱི་འབྱོར་པ་ནི། །བསོད་ནམས་མ་ཡིན་ལས་གྲུབ་ཅིང༌། །དེབས་བདག་ཀྱང་ཁྱིམ་པའམ། །དེ་ལས་ལྡོག་པ་གང་ཡིན་པའི། །རྟོག་དཔྱོད་མེད་ན་ལྟར་སྣང་གི །མངོན་པའི་ང་རྒྱལ་དམ་པོས་འཆིང༌། །དེ་བཞིན་སྔོན་གྱི་དམ་པ་ཡི། །མངའ་
ཐང་དང་ནི་གདན་ཁྲི་ལ། །སྦྱིན་སོགས་འབྲས་བུ་གནས་སྲིད་པ། །དེ་ལ་བརྟག་དཔྱད་བྲལ་བའི་བློས། །སྤྱོད་ཡུལ་མཉམ་པ་ཉིད་སྤྱོད་ན། །དེ་ཡང་ཤིན་ཏུ་ཉམས་འགྱུར་ཏེ། །འབུམ་ཕྲག་རི་བའི་གོས་བཟང་དང༌། །ཁང་བུ་བརྩེགས་པ་ལྔ་བརྒྱ་རྣམས། །ལྡན་གྲོལ་བརྟུལ་ཞུགས་ཅན་རྣམས་ལས། །གཞན་དུ་རྒྱལ་བས་གནང་བ་མེད། །དེ་ཕྱིར་གང་ལས་གང་བྱུང་བའི། །རྟེན་ཅིང་འབྲེལ་འབྱུང་ཆོས་རྣམས་དང༌། །རྒྱུ་འབྲས་བསླུ་བ་མེད་པ་ལ། །ངེས་པ་ཤིན་ཏུ་བརྟན་པར་བྱ། །ཉེས་རྣམས་ཀུན་གྱི་འབྱུང་གནས་ཆེ། །ཁྱིམ་ལས་རྟག་ཏུ་བྱོལ་བར་བྱ། །བླང་དོར་ཤིན་ཏུ་ལོག་པ་ཡི། །བྱིས་པའི་གྲོགས་ལས་འབྲོས་པར་བྱ། །ཆོས་ཀྱིས་དྲེད་པའི་སྐྱེ་བོ་ནི། །སྡིག་གྲོགས་ཡིན་པས་འཇིགས་པར་བྱ། །འདུ་འཛིའི་ཉེས་དམིགས་བསམ་བྱས་ནས། ནགས་ཁྲོད་དམ་པར་འགྲོ་བར་བྱ། འགྲོགས་པ་ཙམ་གྱིས་དོན་ཡོད་པའི། དགེ་བའི་བཤེས་གཉེན་བསྟེན་པར་བྱ། །སྡིག་པ་ཆེན་པོའི་སྒོ་ཡིན་པས། །ལོང་གཏམ་ཟིལ་གྱིས་གནོན་པར་བྱ། །བསོད་ནམས་ཕྱགས་མས་འདེད་པ་ཡི། །བསམ་ངན་རྒྱ་ཡིས་འདེབས་པར་བྱ། །ཡུད་ལ་སྨྱོན་པར་འགྱུར་པ་ཡི། །ཆང་ནི་རྟག་ཏུ་སྤང་
བར་བྱ། །དགེ་དང་ཉམས་རྟོགས་འགྲིབ་གྱུར་པའི། །ལོག་འཚོ་ལྔ་ལ་བདར་བར་བྱ། །ཤ་ནི་སྡིག་པའི་ཟས་ཡིན་པས། །གསད་པའི་འཇིགས་པ་དྲན་པར་བྱ། །མདོར་ན་མང་དུ་སྨོས་ཅི་དགོས། །རྟག་ཏུ་འཆི་བ་དྲན་བྱ་ཞིང༌། །དུག་ལྔའི་རྣམ་རྟོག་ཅི་ཤར་ཡང༌། །ཤེས་བཞིན་དྲན་པས་ཁྲེལ་འདེབས་ཤིང༌། །ལུང་མ་བསྟན་གྱི་རྣམ་རྟོག་ཀུན། །ལྷག་མཐོང་རིག་པས་སྤ་བཀོང་ན། །སྟོང་ཉིད་སྙིད་རྗེའི་སྙིང་པོ་ཅན། །ཡེ་ཤེས་ཆེན་པོར་སྟོབས་འབར་བས། །ཐམས་ཅད་མཁྱེན་པའི་གྲོང་ཁྱེར་དུ། །འགྲོ་འགྱུར་འདི་ལ་ཐེ་ཚོམ་མེད། །དེ་སྐད་སྨྲས་པས་ལྷའི་བྱ་ཚོགས། །ཁྱིམ་གྱིས་སྤྲོ་བ་རབ་ཏུ་ཉམས། །ཐུབ་ཆོད་ནུས་པ་མན་ཆད་ནས། །འཇག་མའི་སྲིན་བུ་ཡན་ཆོད་དུ། །ཀུན་ལ་འཚེ་བའི་བློ་སྤངས་ནས། །དམ་པའི་དཀའ་ཐུབ་མཆོག་ལ་སྤྱོད། །བྱམས་དང་སྙིང་རྗེ་ཆེ་བ་དང༌། །མཁས་ཤིང་ནུས་པ་བརྟན་པ་ནི། །བྱང་ཆུབ་སེམས་དཔའི་ཁྱད་ཆོས་ཏེ། །གང་ལས་ཆོས་ནི་རྣམ་ཤེས་པ། །དེ་ལ་བྱས་པ་ཤེས་པའི་དྲིན། །ཡང་ནས་ཡང་དུ་གཟོ་བ་ནི། ཡ་རབས་རྣམས་ཀྱི་ཡོན་ཏན་ཡིན། དེ་སྐད་ཟེར་ནས་ལྷའི་བྱ་ཚོགས། །ནགས་ཁྲོད་མཆོག་ལ་དེངས་པར་གྱུར། །རི་བོང་ཤིན་ཏུ་བརྟན་པའི་རྟོགས་པ་བརྗོད་པ་བྲག་རིའི་མགུལ་
རྒྱན་ཞེས་བྱ་བ། དཔལ་གྱི་བསམ་ཡས་མཆིམས་ཕུའི་བྲག་དམར་རིང་མོ་ཅན་གྱི་ནགས་ཁྲོད་དུ། རྒྱལ་བའི་དབང་པོ་དྲི་མེད་འོད་ཟེར་གྱི་བྱིན་རླབས་ལས་སྣང་སྲིད་བརྡ་རྒྱུད་ཆེན་བོར་ཤར་བའི་རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་ང་གཉིས་པའོ།། །།
གཏམ་ཚོགས་ལེའུ་ང་གསུམ་པ། འདུ་འཛི་ལ་སྐྱོ་བའི་གཏམ་ཏོག་གི་བློ་གྲོས།
འདུ་འཛི་ལ་སྐྱོ་བའི་གཏམ། ཏོག་གི་བློ་གྲོས་ཞེས་བྱ་བ། ཞི་བ་དམ་པའི་དབྱིངས་ལ་ཕྱག་འཚལ་ལོ། །བདག་ཅག་གི་སྟོན་ཤཱཀ་ཐུབ་དེ། །གཙུག་ཏོར་སྤངས་ནས་སིནྡྷཱུའི་མཚོར། །འཁོར་ལོས་སྒྱུར་བའི་རྣམ་ཐར་ཅན། །སྙིང་གི་དབུས་ན་འདུ་འབྲལ་མེད། མི་ལུས་ཐོབ་བ་དགའ་ལགས་ཏེ། བྱིས་པའི་དུས་ན་བསམ་མེད་འབྱམས། ལང་ཚོའི་དུས་ན་འཁྲུལ་པས་བྲིད། །ངེས་འབྱུང་སྐྱེ་བ་ཕྱིས་ལ་ཁད། །བསྟན་ལ་ཞུགས་ཀྱང་ལས་མཐའ་ལོག །རྟགས་ཙམ་འཛིན་པའི་བཞུགས་གྲལ་ཆུད། །འཇིགས་སྐྱོབ་ལེགས་སྨོན་ཆོས་སུ་འཁྲུལ། ད་གཟོད་བསམ་ཚེ་སྐྱོ་བ་ལ། །དགེ་བའི་བཤེས་ཀྱིས་མ་ཟིན་པས། སྡེ་སྣོད་རྒྱ་མཚོའི་གཞུང་ལ་རྨོངས། ལྟར་སྣང་གདམས་ཕྲན་ཆོས་སུ་འཁྲུལ། ཀུན་མཁྱེན་མཇལ་བ་ཕྱིས་ལ་ཁད། གྲ་ས་འགྲིམ་པའི་སྒེག་ཆོས་ཀྱིས། །འཆམས་དབྱངས་རོལ་མོ་གཏོར་རྒྱག་དང༌། །གྲོང་ཆོག་རྙེད་འཚོལ་ཆགས་སྡང་ལ། བཙུན་པར་རློམ་པའི་འཁྲུལ་ལུགས་ཨང༌། །
རི་ཁྲོད་དབེན་པ་བརྟེན་ན་ཡང༌། །སྡིག་ཅན་རྣམས་ཀྱི་དཀོར་ལ་ཟོས། །ལོག་འཚོལ་ལྔ་ལ་བག་མེད་སྤྱད། །རང་རྒྱུད་རེངས་པ་མ་ཚོར་སྐྱོ། །ལོ་ཤས་མཚམས་ལ་བསྡད་པའི་དོན། །བླུན་པོའི་དད་པས་ཟོག་པོར་བཏང༌། །རང་རྒྱུད་ཐ་མལ་ཡིན་བཞིན་དུ། །བླ་ཚུགས་འཛིན་པ་ཡ་མཚན་གནས། །སྡོམ་པ་གསུམ་གྱི་གནང་བཀག་དང༌། །བསྐྱེད་རྫོགས་གནད་ལ་རྨོངས་བཞིན་དུ། །སྟོང་ལྟས་རྒྱུ་འབྲས་ཁྱད་དུ་གསད། །གྲུབ་ཐོབ་ལད་མོ་བྱེད་པ་མཚར། །སྟོང་ཉིད་རྟོགས་ན་སྙིང་རྗེ་མེད་མི་སྲིད། །སྙིང་རྗེ་ལྡན་ན་གཞན་དོན་ཤུགས་ལ་འོང༌། །དམིགས་པ་མེད་པའི་བྱང་ཆུབ་དམ་པའི་སེམས། །བདེན་པ་གཟིགས་པའི་གྲུབ་ཐོབ་ལས་གཞན་མེད། །སྟོན་པ་མཆོག་དང་རྒྱན་དྲུག་མཆོག་གཉིས་སོགས། །སྦྱངས་པའི་ཡོན་ཏན་བཅུ་གཉིས་ལྷུར་མཛད་ན། །བདག་ཅག་རྣམས་ཀྱིས་འཇིག་རྟེན་ཆོས་བརྒྱད་འདིར། །གཞན་དོན་རློམ་ཡང་རང་དོན་འབའ་ཞིག་ལགས། །སློབ་དཔོན་ཆེན་པོར་རྟ་དང་སྒ་འཁོར་མེད། །བཞུགས་གནས་དག་ཀྱང་བྲག་ཕུག་མཐོང་ཙ་ན། །དགོན་གནས་ལ་ཆགས་ཁྱིམ་དུ་འདུ་ཤེས་ནས། །གསེར་དངུལ་སྤེལ་བའི་མཆོད་རྟེན་དབང་ཆས་ཀྱང༌། །འབྱུང་པོར་སྐྱེ་བའི་རྒྱུ་རུ་ད་གདོད་མཐོང༌། །གཡོ་སྒྱུ་རྙེད་པ་བཙལ་བའི་གནོང་མེད་ཀྱང༌། །
གྲགས་སྐམ་ལ་བརྟེན་དཀོར་རྫས་འདུས་པ་རྣམས། །ཆུད་མི་འཛའ་བར་བགྱིད་པའི་ཆོ་ག་འདིས། །མཉམ་པར་བཞག་ལ་གནོད་པ་བྱས་ཀྱིས་དོགས། །བཀའ་དོན་མི་བསྒྲུབ་བཤད་ཀྱང་མི་གོ་བའི། །དཔོན་སློབ་ཟོལ་འགྲོགས་འཆད་ཉན་བྱེད་པ་ལས། །ཁ་འཛིན་ཆགས་སྡང་མེད་པའི་རི་སུལ་དུ། །རྣམ་ཐར་སྒོ་གསུམ་སྐྱོང་བ་མདུན་མའི་རྩེ། །ཕུང་པོ་ལྔ་དང་བྲལ་བའི་མཉམ་གཞག་ལ། །ཚོགས་བརྒྱད་དག་པའི་ལྷག་མཐོང་མ་ཤར་ན། །སེམས་གནས་ཐོབ་ཙམ་བྱིས་པ་ཉེར་སྤྱོད་དུ། །འདུག་པས་འཕགས་པའི་བདེན་པ་མ་རེ་ཨང༌། །སྒྲ་ཚད་ལ་སོགས་རིག་པའི་གནས་རྣམས་དང༌། །མདོ་རྒྱུད་རྒྱ་མཚོའི་དེ་ཉིད་མཐོང་ན་ཡང༌། །རང་སེམས་དེ་བཞིན་ཉིད་དབྱིངས་མ་རྟོགས་ན། །གཟུང་འཛིན་ཞགས་པས་པནྚི་ཏ་ཡང་འཆིང༌། །དེ་ཕྱིར་བདག་གིས་གསུང་རབ་ཟབ་མོའི་དོན། །ཅུང་ཟད་རྟོགས་ལ་ང་རྒྱལ་རང་མཐོང་དང༌། །ཁེངས་སེམས་རྡུལ་ཙམ་མཆི་བ་མ་ལགས་ཀྱང༌། །འདི་ལ་བརྟེན་ནས་རྣམ་གཡེང་འཕེལ་བས་སྐྱོ། །མཆིམས་ཕུ་ནགས་ཀྱི་དུར་ཁྲོད་གནས་ཕན་ཆད། །དཀོར་དང་སློབ་མའི་འདུ་བ་བག་ལ་ཉལ། །གཉིད་ཀྱང་འོད་གསལ་ཆེན་པོར་ལ་བཟླ་ཡང༌། །བྱ་བ་ལས་ཀྱི་འཁོར་ལོས་ལས་རླུང་འཕེལ། །
དེ་ཡི་རྒྱུ་ཡང་རང་འདོད་བྲལ་བའི་ཚེ། །གཞན་དོན་སྤངས་ན་སྨོན་འཇུག་སེམས་ཉམས་ཤིང༌། །རིགས་ལྔའི་དམ་ཚིག་འདོར་བར་འགྱུར་རོ་ཞེས། །རྒྱལ་དང་རྒྱལ་སྲས་རྣམས་ཀྱིས་བསྒྲགས་ན་ཡང༌། །ལམ་བདེན་ཐམས་ཅད་དྲང་དོན་ཚིག་ལ་རྟོན། །ངེས་དོན་དོན་ལ་རྟོན་དེར་མཉམ་གཞག་ན། །སེམས་ཅན་གདོད་ནས་མེད་པར་རྟོགས་གྱུར་པས། །འགྲོ་དོན་འཁོར་བ་དོང་སྤྲུགས་ཨེ་མ་ཧོ། །མཉམ་གཞག་ཆོས་ཀྱི་དབྱིངས་དང་རོ་གཅིག་ཀྱང༌། །རྗེས་སློབ་ལས་ཀྱི་རླུང་དང་ལྷན་ཅིག་པས། །ཕུང་པོ་ལྔ་ཡི་ཟག་པ་མ་ཟད་པར། །གཞན་དོན་བློ་ཡིས་མ་སྤངས་ཞར་གྱིས་འགྲུབ། །འཕགས་ལམ་ཡང་དག་དྲན་པ་མ་མཐོང་ན། །རྣམ་བྱང་དང་པོའི་དྲན་པ་ཉེར་བཞག་ཀྱང༌། །སློབ་པ་མིན་པའི་དོན་ལ་ཆེས་རིང་བར། །མཐོང་འདི་རྫོགས་པ་ཆེན་པོའི་བཀའ་དྲིན་ཡིན། །ཆོས་ཅན་སྟོང་པར་བལྟ་བའི་མཉམ་གཞག་དང༌། །རྣམ་པར་རིག་པ་ཅན་གྱི་ལྷག་མཐོང་གཉིས། །འཛིན་སྟངས་བློ་ཡིས་ཟུང་དུ་འཇུག་ཟེར་ནས། །ཐལ་འགྱུར་དམ་བཅའ་གསར་བ་འཆོས་པ་མཚར། །ད་ནི་མི་སྒོམ་བསྒོམས་པས་ལས་རླུང་འཕར། །ད་ནི་མི་བྱེད་བྱས་པས་ཡིད་ཆོས་ལངས། །ཡིད་དང་ཆོས་ཀྱིས་བཟོས་པའི་གྲུབ་མཐའ་འདིས། །ངོ་བོ་ཉིད་མེད་ཞི་བའི་དབྱིངས་ལས་དཀྲོགས། །
བདེ་གཤེགས་སྙིང་པོ་རང་བཞིན་མེད་པ་ཡང༌། །ཕུང་པོ་ལྔ་ལ་ཉེ་བར་ལེན་པའི་གཞི། །གཞན་ཕན་བསོད་ནམས་ཚོགས་ཀྱང་འདུ་འཛིའི་ཁོལ། །སློབ་མ་ཕལ་ཀྱང་བྱིས་དང་སྡིག་པའི་གྲོགས། །དེ་ཕྱིར་མིག་གི་འདུས་ཏེ་རིག་པ་སོགས། །འདུས་མ་བྱས་པ་ཆོས་ཀྱི་དབྱིངས་ཞི་ནས། །མཉམ་པར་མ་བཞག་མེད་པ་ལ་སོགས་པ། །རྒྱལ་བའི་ཆོས་ཁམས་རྒྱ་མཚོར་ལྷུན་གྲུབ་ཤོག །འདུ་འཛི་ལ་སྐྱོ་བའི་གཏམ། ཏོག་གི་བློ་གྲོས་ཞེས་བྱ་བ། རྡོར་བྲག་སྤྲུལ་སྐུ་རིན་པོ་ཆེའི་ངོར། རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་ང་གསུམ་པའོ།། །།
གཏམ་ཚོགས་ལེའུ་ང་བཞི་པ། བློ་ལྡན་བྷྲ་མ་རའི་གཏམ་ཚིག་ལ་མི་རྟོན་དོན་ལ་རྟོན་པ།
བློ་ལྡན་བྷྲ་མ་རའི་གཏམ་ཚིག་ལ་མི་རྟོན་དོན་ལ་རྟོན་པ་ཞེས་བྱ་བ། རྫོགས་པ་ཆེན་པོ་ལ་ཕྱག་འཚལ་ལོ། །དེ་ཡང་འདི་ལྟ་སྟེ། འདས་པ་ལ་མ་ཆགས། མ་འོངས་པ་མ་བསྒྲུབས། ད་ལྟའི་དུས་ཀྱི་རང་ཤེས་རིག་པའི་ཁྱེའུ་ཆུང་རྣམ་རྟོག་གི་གོས་དང་བྲལ་བ། གཤིས་ལུགས་ལྷུག་པར་སྟོན་པ། བཏང་འགྲོ་བཞག་སྡོད། ཕྱོགས་སུ་མ་ལྷུང་བ་དེ་ཀུན་གཞིའི་སྟེང་ན་ལྷོད་དེ་གནས་པ་ན། ཤིན་ཏུ་ཉེ་བའི་ཆར་རྒྱ་བལ་གྱི་ཕྱོགས་ནས་ཡོང་བའི་མེ་ཏོག་རིགས་གཟུགས་དར་ལ་བབ་པ་ཞིག་ཡོད་དོ། །དེའི་མདུན་ན་སྐད་ཅིག་མ་དེར་ཀུན་ཏུ་བརྟགས་པའི་བུང་བ་ཤིན་ཏུ་གཞོན་ཤ་
ཆགས་པ། གསེར་གྱི་མདངས་དང་ལྡན་པ། གཡུའི་གཤོག་པ་སྐྱེས་པ། གསུང་གླིང་བུ་ལས་སྙན་པ། གཤོག་རྩལ་རླུང་ལས་སྐྱེན་པ་ཞིག་འོངས་ཏེ། མེ་ཏོག་དེ་འདབ་མ་ཆེར་རྒྱས་པ་ལས་གེ་སར་མ་བྱེ་བ་འདུག་པ་དེའི་རྩར་འོང་ལ་ཁད་འབེབས་ལ་ཁད་བྱས་ནས་ཡང་རྒྱང་བསྲིངས་ཏེ་འདི་སྐད་ཟེར་བའི་གླུ་བླངས་སོ། །ཀྱེ་མ་ཀྱེ་མ་ལས་ཀྱིས་སྦྲེལ་བ་ཡི། །འདབ་ལྡན་ཡིད་འོང་དྲི་ཞིམ་ངད་པ་ཅན། །གླུ་ཕྲེང་འདི་ལ་ཅུང་ཟད་གསན་པར་ཞུ། །ཉམ་ཆུང་བུང་བའི་བུ་མོ་འདི་སྐད་ལོ། །མེ་ཏོག་ཁྱེད་ཀྱི་མཛེས་པ་མ་མཐོང་ཡང༌། །དྲི་ངད་རྒྱང་ནས་ཚོར་ཏེ་བྱང་ཆུབ་ཀྱི་སེམས་དང་བསྡུ་བའི་དངོས་པོ་བཞི་ལ་བརྟེན་ནས་སློབ་མ་འདུ་བ་འདི་རུ་འོངས། །ཁྱེད་ཅིག་སྐྱེས་པའི་ཡུལ་ལ་ཇི་སྐད་ཟེར། །རིགས་སམ་རུས་སམ་ཆོ་འབྲང་གང་དུ་གཏོགས། །དོན་གྱི་ཟེའུ་འབྲུའི་གེ་སར་ཙ་ན་འབྱེད། །མཛེས་སྡུག་མཚར་བའི་མཆོད་པ་སུ་ལ་འབུལ། །འབྲས་བུ་སྨིན་པའི་དུས་ན་ཇི་ལྟར་ལགས། །བདག་ནི་ཁྱེད་ལ་གདུང་ཞིང་ཡིད་ཆགས་པས། །ཅིས་ཀྱང་བྱམས་པའི་སེམས་ཀྱིས་བཤད་དུ་གསོལ། །ཞེས་ཟེར་ཞིང་བར་སྣང་ལ་ལྡིང་ངོ༌། །དེར་མེ་ཏོག་སྣང་འཛིན་པ་བདག་པའི་བརྡ་མེད་དེ་ན་རེ། །ཨེ་མ་ཨེ་མ་ལས་དབང་ཤིན་ཏུ་བཙན། །ཁྱོད་ཀྱི་གསུང་སྙན་ཐོས་པས་བ་སྤུ་གཡོ། །གསེར་
གྱི་མདོག་ལ་གཡུ་ཡི་འདབ་གཤོག་ཅན། །དྲི་ཟའི་བུ་མོ་ལྟ་བུར་གླུ་བླངས་སྙན། །འགྱིང་དང་གར་གྱི་རྣམ་རོལ་ཤིན་ཏུ་མཁས། །ཚིག་གི་དྲི་མོལ་བྱེད་པ་ཁ་དྲི་ཞིམ། །དེ་འདྲས་བདག་གི་སྣང་བ་དབང་མེད་ཕྲོགས། །ང་ཡི་ལོ་རྒྱུས་དྲང་པོར་བཤད་ཀྱིས་གསོན། །སྐྱེས་པའི་སྐྱེ་ས་དོག་མོའི་ས་ནས་ཡིན། །ངེས་པ་བརྗོད་ན་ཨོ་རྒྱན་མཁའ་འགྲོའི་གླིང་རྒྱུད་སྡེའི་འབྱུང་ཁུངས་གླིང༌། །ཆོ་འབྲང་རྩིས་ན་སེམས་ཆོས་ཀྱི་ངེས་འབྱེད་ཀློང་མན་ངག་སྡེ། །ཟེའུ་འབྲུའི་ཐིག་ལེ་དབྱར་སོས་སྟོན་ལ་མན་ངག་སྡེའི་སྣང་བ་བཞི་འཆར་བའི་དུས་བཞད། །མཆོད་པ་འབུལ་ས་དཀོན་མཆོག་རྣམ་པ་སྔགས་ལུགས་བཞི། །འབྲས་བུ་སྨིན་དུས་གཞོན་ནུ་བུམ་པའི་གྲོལ་ས་སྐུ། །ཁྱེད་ལ་བདག་ཀྱང་ལྷག་པར་སེམས་ཆགས་པས། །ཁྱེད་ཀྱི་གནས་ལུགས་དྲང་པོ་ང་ལ་ཤོད། །ཅེས་ཟེར་ནས་ལྡེམ་མེ་བསྡད་སོང་ངོ༌། །དེར་བུང་བ་དེ་ན་རེ། ཀྱེ་མ་གསོན་དང་མ་འདྲིས་མཛའ་ན་མོ། །ཁྱོད་གསུང་ཐོས་པ་ཙམ་གྱིས་སེམས་པ་དགའ། །བདག་གི་ཡུལ་ནི་འཁོར་བའི་གཅོང་རོང་ཆེ། །ཕ་དང་མ་ནི་ལས་ངན་སྦྲང་མའི་བུ། །སྐྱེ་བོ་རྣམས་རྣམ་རིག་གསལ་ཡང་དུད་འགྲོ་དང་མཚུངས་པའི་དཔེ། སྡོད་སའི་གནས་ནི་དུག་ལྔའི་ཚེར་ནགས་ཉོན་མོངས་པས་གཟེར་བ་ཁྲོད། བྱེད་པའི་ལས་ནི་སེར་སྣའི་
གསོག་འཇོག་ཆེ། །ཕུགས་ཀྱི་ལས་འཕྲོ་དེ་ལ་གཞན་གྱིས་སྤྱོད། །སླར་ཡང་འགྲོ་ས་ངན་སོང་གསུམ་པོ་ཡིན། །ཁྱེད་ཀྱི་བཅུད་ལ་ཆགས་ནས་འདི་རུ་ཡོང༌། །སྔོན་ནས་སྨོན་ལམ་གཅིག་པས་མཇལ་ལགས་ན། །མེ་ཏོག་ལང་ཚོ་མ་དར་ཞལ་རེ་བསྐྱངས། །དར་ཅིག་ཕ་ཡུལ་ཚེར་མའི་ནགས་ཉོན་མོངས་པའི་ཟུག་རྔུ་དང་རྟག་ཏུ་འགྲོགས་པ་ལ་འགྲོ། །སད་དང་སེར་བའི་གནོད་པས་འཇིག་རྟེན་རྒུད་པ་སྣ་ཚོགས་མི་བརྡུང་བར། །མགྱོགས་ནས་མྱུར་དུ་མཇལ་བའི་སྨོན་ལམ་ཞུ། །ཞེས་ཟེར་ནས་འགྲོ་ལ་ཁད་ཁད་སེམས་ཅན་རྣམས་ཆོས་ཕྱིར་ངང་ཐུང་བ་བྱེད་དོ། །དེར་མེ་ཏོག་དེས་ཤིན་ཏུ་རིངས་ལས་འཕྲོ་ཅན་ཡལ་བར་མི་འདོར་བ་པའི་ཚུལ་གྱིས་འདི་སྐད་ཟེར་ཏོ། །ཀྱེ་མ་ཀྱི་ཧུད་ལས་གཡུ་བློ་སར་པ་ཚིག་འཇམ་པོས་བྲིད་དགོས་པའི་ཚུལ་ཀྱིས་བསྐོས་པའི་གྲོགས། །ཁྱོད་ཀྱི་གཏམ་དེ་ཐོས་པས་སེམས་མ་དགའ། །འདོད་ཡོན་ལ་ཞེན་པ་ལྡོག་པ། གསེར་གྱི་ས་ལེ་སྦྲམ་ལྟར་སྐུ་མཚར་ཞིང༌། །གཡུ་ཡི་ཁེངས་པ་འཕྲོག་པའི་འདབ་གཤོག་དང༌། །དྲི་ཟའི་བུ་མོ་ལྟ་བུར་གསུང་སྙན་ཡང༌། །གཏམ་གྱི་ཕུ་ཐག་གཏུགས་ན་ཅུང་ཞིག་སྐྱོ། །འཁོར་བའི་གྲོང་ལ་བདག་ཀྱང་སེམས་ཅན་གྱི་ཁམས་ལ་བདེར་སྙིང་རང་བཞིན་དུ་ཡོད་པ་གནས་བཅས་ཏེ། །སྡོད་པའི་ཕ་གཞིས་དབེན་གསུམ་རང་ངོ་ཤེས་ན་སྐྱོན་གྱིས་མ་གོས་པ་ལ་
བས་མཐར་ཡིན། །བྱེད་པའི་ལས་ལ་གཏད་སོ་མེད་གྱུར་ཀྱང༌། །ལྟ་བའི་གཤིས། །དོག་མོའི་ས་ནས་དཀོན་འཁོར་བ་དང་འབྲེལ་བཅད་པ་མཆོག་དྲུང་དུ་འཕགས། །ཕྱི་མའི་འགྲོ་ས་གོ་འཕང་ལ་རིམ་བཞིན་བཀྲི་བའི་དོན་རང་བཞིན་སྤྲུལ་སྐུའི་ཞིང༌། །ལས་འཕྲོ་མཐུན་ཡང་སྨོན་ལམ་ཅུང་མ་མཐུན། །བདག་གི་དྭངས་མའི་བཅུད་ལ་ཆོས་ཀྱི་བདུད་རྩི་ཁྱོད་དགའ་ན། །སྙིང་གཏམ་ཚིག་གསུམ་བཤད་ཀྱིས་མི་ཉན་ནམ། །ཞེས་ཟེར་རོ། །དེར་བུང་བ་དེ་བློ་ཅུང་ཟད་འགྱུར་ཏེ་མེ་ཏོག་ལ་བསྐོར་བ་ལིང་ལིང་བྱེད་པ་དང་སྦྲགས་འདི་སྐད་ཟེར་རོ། །ཡ་མཚན་ཆེའོ་མཐོང་བས་ཡིད་འཕྲོག་པ། །རྒྱ་ཁྱོན་ཆུང་ཡང་དྲི་མས་ཀུན་ཏུ་ཆོས་ཁམས་རྒྱ་མཚོའི་ཡོན་ཏན་ཁྱབ། །བཞིན་ལག་སྣང་དོན་དམ་བདེན་པ། བ་མེད་ཀྱང་གསུང་ཀུན་རྫོབས་བདེན་པ་མི་འགོག་གླུ་སྙན། ཁྱེད་ཀྱི་གཏམ་དེ་ཐོས་པ་ཐེ་ཚོམ་ཟ། །སྙིང་གཏམ་ཡོད་ན་ཅིས་ཀྱང་བཤོད་པར་འཚལ། །བདག་ལ་མདང་སུམ་ཉལ་བའི་རྨི་ལམ་མཚར། །སྣ་ཚོགས་རྨིས་ཏེ་བཟང་ངན་དཔྱོད་མ་ཤེས། །ཁྱོད་ནི་དཀོན་མཆོག་གསུམ་གྱིས་བསྐྱངས་པའི་བུ། །ང་ནི་དུད་འགྲོའི་རིགས་ཅན་ལས་འཕྲོ་ངན། །སྙིང་གཏམ་ཕར་ཤོད་ཚུར་ཤོད་མི་བྱེད་རེ། །ཞེས་ཟེར་ནས་བག་ཕེབས་པའི་ཚུལ་གྱིས་
ལྡིང་ངོ༌། །དེར་མེ་ཏོག་དེ་ན་རེ། ཨེ་མ་ཚུར་ལ་གསོན་དང་བྷྲ་མ་ར། །སྙིང་གཏམ་བཤད་པར་སྤྲོ་སྟེ་ཉན་པར་དཀའ། །ད་དུས་སྙིགས་མ་ལྔ་བདོའི་མར་ཞབས་ལ། །ཕ་ཡི་གཏམ་ལ་བུ་ཡིད་མི་ཆེས་དུས། །བདག་གིས་དྲང་གཏམ་བཤད་ཀྱང་ཡིད་ཆེས་དཀའ། །དེ་བས་ཁྱོད་རང་ཟེར་བའི་རྨི་ལྟས་དེ། །བདག་ལ་ཕྲི་བསྣན་མེད་པར་དྲང་པོར་ཤོད། །རྨི་ལམ་བག་ཆགས་ཡིན་པས་མི་བདེན་ཡང༌། །ཀུན་རྫོབ་རྟེན་འབྲེལ་ནམ་ཡང་མི་བསླུ་ཕྱིར། །དེ་ལ་བརྟག་དཔྱད་བྱས་ནས་ལན་ཅིག་འདེབས། །དེ་དོན་ཐུགས་ལ་ཆུད་དམ་སྙིང་གི་གྲོགས། །ཞེས་ཟེར་རོ། །དེར་བུང་བ་དེ་ན་རེ། ཀྱི་མ་ཀྱི་ཧུད་ལས་ཀྱིས་འབྲེལ་བའི་གྲོགས། །རྨི་ལམ་སྦ་གསང་མེད་པར་ཁྱོད་ལ་བཤད། །དེ་ལ་དྲང་པོར་བརྟགས་ནས་ལན་ཅིག་མཛོད། །མདང་སུམ་ཚང་དུ་ཉལ་བའི་རྨི་ལམ་ན། །ཆུ་ཤིང་ནགས་ཚལ་ཤིན་ཏུ་སྐྱིད་པའི་ཁྲོད། །གཡུ་མཚོ་སྔོན་མོ་དྭངས་ཤིང་མེར་བའི་མཐའ། །མེ་ཏོག་ཤིན་ཏུ་བཀྲ་བས་རབ་ཏུ་གང༌། །དེ་ནང་བདག་དང་བདག་འདྲའི་བུང་བ་ནི། །གྲངས་ཀྱིས་མི་ལང་དགའ་བའི་གར་རྩེ་ཞིང༌། །སྙན་པའི་གླུ་ལེན་ཞིམ་པའི་རྩི་བཅུད་ལེན། །ཕུན་ཚོགས་དཔལ་ལ་ཆགས་པའི་གནས་སྐབས་ན། །ལྷོ་སྲིན་སྨུག་པོས་ནམ་མཁའི་སྐུ་མདོག་གཏུམས། །
གཡུ་འབྲུག་སྔོན་མོས་སྡེ་བརྒྱད་བྲན་དུ་བཀོལ། །ཤིན་ཏུ་སྟོང་པ་ནམ་མཁའི་ཀློང་དཀྱིལ་ནས། །མི་སྲིད་སྲིད་པའི་ཆུ་འཁྱམས་རིལ་བུ་བྲུལ། །མེ་ཏོག་ཆེ་པ་རྣམས་ཀྱི་འདབ་མ་བཅག །ཆུང་བ་རྣམས་ཀྱི་སྡོང་བོ་རྨང་ནས་སྒྱེལ། །སྙིང་གྲོགས་བུང་བའི་ཚོགས་རྣམས་ས་མཐའ་འཁྱར། །བདག་དང་མཇལ་ལན་བྱེད་པའི་གོ་སྐབས་ཕྲོགས། །ང་རང་བར་མ་དོ་རུ་གཅིག་པུར་ལུས། །དེ་འདྲའི་ངང་ལ་གཉིད་ལས་སད་པ་རྨིས། །དེ་ལ་གཏམ་ལན་ཤོད་ཅིག་སྙིང་གི་གྲོགས། །ཞེས་ཟེར་རོ། །དེར་མེ་ཏོག་ན་རེ། ཀྱེ་མ་ཀྱི་ཧུད་ཉམ་ཆུང་སྦྲང་མའི་བུ། །ཁྱེད་ཀྱི་རྨི་ལམ་དེ་ནི་ངོ་མཚར་ཆེ། །རྩ་རླུང་སེམས་གསུམ་འཁྲུགས་པའི་ཆོ་འཕྲུལ་ཡིན། །དེ་ཡི་གནས་ཚུལ་བཤད་ཀྱི་རྣ་བ་ལྷོགས། །རྣམ་དཔྱོད་བློ་གྲོས་ལྡན་ན་བརྡ་དོན་ལ། །བརྟགས་པས་འཁོར་འདས་གཉིས་ཀྱི་མཚང་ཡང་ཤེས། །རྨོངས་པ་བ་གླང་རྫི་ཡི་བྱིས་པ་རྣམས། །བོང་བུ་ཞོན་ནས་བོང་བུ་འཚོལ་ལ་རྒྱུག །དེ་ཕྱིར་མཁས་བླུན་བྱེ་བྲག་ཤིན་ཏུ་ཆེ། །ཆུ་ཤིང་ནགས་ཚལ་ཤིན་ཏུ་སྐྱིད་པ་དེ། །འཁོར་བ་ཆུ་ཤིང་ལྟ་བུར་སྙིང་པོ་མེད། །རང་དབང་ཡོད་དུས་བཙན་ས་འཛིན་དགོས་བརྡ། །གཡུ་མཚོ་སྔོན་མོ་དྭངས་ཤིང་མེར་བ་དེ། །རིགས་དྲུག་རྒྱ་མཚོའི་ཀློང་ལས་ཟབ་པའི་བརྡ། །མེ་ཏོག་བཀྲ་བས་ཡོངས་སུ་གང་བ་དེ། །དེ་ལ་ཆགས་ནས་ངན་སོང་བསྒྲུབ་པའི་བརྡ། །རང་དང་རིགས་
འགྲེའི་བུང་བས་གང་བ་དེ། །འཁོར་བའི་སེམས་ཅན་བསམ་གྱིས་མི་ཁྱབ་བརྡ། །སྙན་པའི་གླུ་ལེན་བཅུད་ཀྱིས་མྱོས་པ་ནི། །སྡུག་བསྔལ་བདེ་བར་མཐོང་ནས་བསླུ་བའི་བརྡ། །ལྷོ་སྤྲིན་སྨུག་པས་ནམ་མཁའ་ཁེངས་པ་དེ། །ལས་ཀྱི་མུན་པས་རྒྱབ་ནས་འདེད་པའི་བརྡ། །གཡུ་འབྲུག་སྔོན་མོ་ངར་སྐད་འབྱིན་པ་དེ། །གཤིན་རྗེའི་ཕོ་ཉ་གད་རྒྱངས་སྒྲོག་པའི་བརྡ། །ནམ་མཁའི་ཀློང་ནས་སེར་བ་འབབ་པ་དེ། །བཞི་བརྒྱ་རྩ་གཞིའི་ནད་ཀྱིས་འཚེ་བའི་བརྡ། །མེ་ཏོག་རྣམས་ཀྱིས་འདབ་མ་བཅག་པ་དེ། །སྒྱུ་མའི་ལུས་དང་སེམས་གཉིས་འབྲལ་བའི་བརྡ། །སྙིང་གྲོགས་ཐམས་ཅད་ས་མཐར་འཁྱར་བ་དེ། །འགྲོགས་པའི་མཐའ་མ་ངེས་པར་འབྲལ་བའི་བརྡ། །བར་མ་དོ་རུ་གཅིག་པུར་ལུས་པ་དེ། །བར་དོའི་གནས་ལ་རེ་ལྟོས་མེད་པའི་བརྡ། །ཀྱི་མ་ཀྱི་ཧུད་རྨི་ལམ་ཡ་མཚན་ཆེ། །ངེས་པའི་དོན་དུ་ཆོས་རྣམས་སྤྲོས་བྲལ་ཡིན། །སྐྱེ་འཆིའི་མིང་དང་འཁོར་འདས་ཀ་ནས་དག །དྲང་བའི་དོན་དུ་དེ་ནི་ཤིན་ཏུ་བདེན། །འཁོར་བ་སྡུག་བསྔལ་ཆེ་ལ་སྙིང་པོས་དབེན། །ཚེ་སྲོག་རྩ་ཁའི་ཟིལ་པ་ཆེས་མི་རྟག །གཤིན་རྗེ་ཆོས་རྒྱལ་ཁོང་ལ་སྙིང་རྗེ་མེད། །བསགས་པའི་དཀར་ནག་ལས་འབྲས་ཕྱི་ཐག་རིང༌། །བྱི་དོར་བྱས་ཀྱང་རྗེས་ལ་འགྲོགས་ནས་
ཡོང༌། །ཨེ་མ་ཨེ་མ་འཇིགས་ལ་ང་རེ་འཇིགས། །ཤི་བས་མི་ཆོག་ངན་འགྲོའི་སྡུག་བསྔལ་འཇིགས། །དེ་འདྲ་བཤད་པ་ཙམ་གྱིས་སྙིང་འདར་ན། །དངོས་སུ་མྱོང་ཚེ་ཅི་དྲག་ཨ་ཙ་མ། །གྲོགས་པོའི་མདུན་མ་ནོར་བ་སྙིང་རེ་རྗེ། །ཁྱོད་འདྲའི་སེམས་ཅན་མང་པོས་ས་སྟེང་གང༌། །དྲང་གཏམ་རྗེན་པར་བཤད་ན་ལོག་པར་གོ །ཆང་ལན་ཆུ་ཡིས་གཞལ་བའི་སེམས་ཅན་ཚོར། །རྫོགས་པའི་སངས་རྒྱས་བྱོན་ཀྱང་མཛད་པ་རྡུགས། །འདི་འདྲ་བསམས་ན་སྙིང་རླུང་དབང་མེད་ལངས། །ཨ་ཙ་མ་ན་ལས་ངན་སེམས་ཅན་ཚོགས། །ཞེས་ཟེར་ནས་མེ་ཏོག་དེ་མཆི་མ་ཁྲམ་ཁྲམ་བྱེད་ཅིང་མགོ་ཁུག་གེ་བསྡད་སོང་ངོ༌། །དེར་བུང་བ་དེ་བློ་ཆེས་ཆེར་འགྱུར་ནས་མཉམ་དུ་མཆི་མ་འདོན་པ་དང་སྦྲགས་ངུ་མ་དབྱངས་ཀྱིས་འདི་སྐད་ཟེར་རོ། །ཀྱེ་མ་ཀྱི་ཧུད་ལས་ཀྱིས་བསྐོས་པའི་གྲོགས། །བདག་གི་རྨི་ལམ་དཔྱད་པ་རྟགས་མ་ལེགས། །ཁྱོད་ཀྱིས་གསུངས་པའི་གཏམ་དེ་ཆེས་མ་སྙན། །ཚེ་ལ་སྐྱེ་འཆི་ཡོད་པ་འཆི་བར་འཇིགས་ནས་རིམ་གྲོ་བྱེད་ཀྱང༌་རས་གོ་ཡང༌། །ལས་ལ་དཀར་ནག་ཡོད་རྣམ་སྨིན་ལ་མི་འཛེམ་པར་གྱ་ཆོམ་སྤྱོད་པ་པ་སུ་ཡིས་རིག །བདག་གི་མདུན་མ་ནོར་བས་ཨ་རེ་འཇིགས། །གཤིན་རྗེ་ཆོས་རྒྱལ་ཟེར་བའི་འ་རྫི་བར། །འཇིག་
རྟེན་ཁེ་གྲགས་ཅན་ཚེ་འདིའི་རིགས་གཟུགས་དཔལ་འབྱོར་གྱིས་དྲེགས་པ་གྱི་བཀའ་ཤོག་དང༌། །འདྲེན་པ་མངའ་ཐང་ཅན་གྱི་སྤངས་རྟོགས་ཀྱི་ཡོན་ཏན་མེད་ན་ཚེ་གཅིག་ལ་གྲོལ་བའི་ལམ་སྟོན་མི་བཏུག་ཐུགས་རྗེ་དང༌། །དངོས་པོ་རིན་ཐང་ཅན་སྡིག་པའི་གཡོ་བཀོལ་གྱིས་བསྒྲུབས་པའི་དགེ་སྟོབས་ཆེན་གྱིས་ཀྱང་མི་ཕན་གྱི་བརྔན་པ་དང༌། །མོ་བཙུན་མཚར་སྡུག་མཛངས་མའི་བསླུ་བྲིད་སྡོམ་གསུམ་གྱི་གནང་བཀག་མི་ཤེས་ཤིང་རྟོགས་པས་རྒྱུད་མ་གྲོལ་ན་ཆོ་རིགས་དང་སྔགས་ལམ་ལ་བསྙད་པའི་ཆུང་མས་འཆིང༌སོགས། །འགྲོ་ས་ཡོད་དམ་མེད་པ་ཁྱོད་ཀྱིས་ཤོད། །ཡོད་ན་བདག་ཀྱང་དེ་ལ༌ཐབས་ཀྱིས་འཚོལ། །མེད་ན་དེ་ལ་ཕན་པའི་ཐབས་ཤིག་བགྱི། །རན་ནོ་རན་ནོ་ད་ནི་ཕྱིས་ལ་ཁད། །དལ་པོའི་ལོང་མེད་ལ་འུ་ལ་འུར་ལས་སད་པའི་གང་ཟག་ལ་ངེས་འབྱུང་གློ་བུར་དུ་སྐྱེ་བ་སྨོས། །ཞེས་ཟེར་རོ། །དེར་མེ་ཏོག་ན་རེ། ཨེ་མ་གསོན་དང་སྙིང་མེད་གཟུགས་བཟང་མ། །མདུན་མ་ནོར་བར་གོ་ན་བདག་ལ་ཉོན། །ལས་ལ་དཀར་ནག་མེད་ན་མུ་སྟེགས་ཡིན། །གཤིན་རྗེ་ཆོས་རྒྱལ་ཟེར་བའི་དྲག་ཤུལ་ཅན། །སྙིང་རྗེ་རྩྭ་ཙམ་མེད་པ་དེ་འདྲ་ལ། །ཁ་གྲགས་ཅན་དང་ལྟར་སྣང་ཐུགས་རྗེ་དང༌། །དངོས་པོའི་བརྔན་སྦྱིན་མཛེས་མའི་བསླུ་བྲིད་སོགས། །ལས་སྒོ་དེ་ལ་ཡུད་ཙམ་འགྲིམ་ས་མེད། །དེ་ལས་ཨེ་ཕན་དགོངས་ན་འདི་ལྟར་མཛོད། །སྐྱབས་ལ་དཀོན་
མཆོག་གསུམ་ལས་བཟང་བ་གཞི་སྐྱབས་འགྲོ་མེད། །མགོན་ལ་རྩ་བ་ལམ་གྱི་སྐྱབས་འགྲོ་གསུམ་ལས་ལྷག་པ་མེད། །དཔུང་གཉེན་རང་ངོ་ཤེས་ལས་འབྲས་བུའི་སྐྱབས་འགྲོ་ཀ་དག་ལེགས་པ་མེད། །བླ་མ་སྤྱི་བོར་བསྒོམས་ན་གཟུགས་སྐུ༌སྐྱབས་ས་ཡོད། །ཡི་དམ་རང་ངོ་ཟན་པ་ཤེས་ན་བརྟེན་ས་ཡོད། །མཁའ་འགྲོ་རིག་པར་ཤེས་ན་ལྷུན་གྲུབ་དངོས་གྲུབ་ཡོད། །མ་ཎི་པདྨེ་འདྲེན་ན་དལ་མེད་དུ་དགེ་སྦྱོར་དང་སྤྱོད་ལམ་བསྲེ་བའི་དཔེ་ཐུགས་རྗེ་ཡོད། །དག་སྣང་ཕྱོགས་མེད་སྦྱངས་ཚད་མེད་པ་བཞི་ན་ཐར་པ་ཡོད། །མཐོང་ཚད་བླ་མར་ཤར་ལམ་དུ་ལོངས་པའི་ཚད་མན་མོས་གུས་ཡོད། །སྣང་སྟོང་སྒྱུ་མར་གོ་ན་བསྐྱེད་བུམ་དབང་གི་ལམ་རིམ་ཡོད། །གསལ་སྟོང་ལོངས་སྐུར་གསང་དབང་འཆར་ན་ཞིང་ཁམས་ཡོད། །རིག་སྟོང་ཆོས་སྐུར་རྟོགས་ན་རྫོགས་ཤེར་དབང་རིམ་ཡོད། །རང་རིག་བླ་མར་ཤེས་ན་མཚོན་བྱ་དོན་གྱི་ཡེ་ཤེས་ཚིག་དབང་གི་ལམ་ཉམས་ལེན་ཡོད། །ཆོས་བརྒྱད་འགྲོ་ཕྱོགས་བཞག་ན་བྱ་བ་བཏང་བའི་རྟགས་དམ་ཆོས་ཡོད། །གཞན་ཕན་ལྷག་སྨོན་པ་བསམ་བསྐྱེད་ན་བྱང་སེམས་འཇུག་པ་ཡོད། །མི་ཚེ་ཆོས་རྩེ་གཅིག་ལ་དྲིལ་ན་དལ་འབྱོར་ཡོད། །རི་འཁྲོད་དབེན་པར་ཕྱིན་ན་སངས་རྒྱས་སྤྲོས་བྲལ་ཡོད། །དབྱིངས་རིག་གཅིག་རོ་གཅིག་ཏུ་འདྲེས་ན་ཉམས་རྟོགས་ཡོད། །གཅིག་པུར་སྒྲུབ་ཚུགས་བཟུང་
ན་རྟོགས་ཚད་སྒོམ་མེད་ཡོད། །ལམ་རྟགས་ཡོན་ཏན་ཤར་ན་མཆོག་གི་དངོས་གྲུབ་ཡོད། དེ་ལ་ཡོད་པ་རྣམ་པ་བཅུ་བདུན་མཛོད། །ཚེ་འདིས་རྣམ་པར་བྲིད་འཁོར་བར་མི་སྐྱོ་ལ་ཕྱི་མ་མེད། །སྤོམ་ཡོར་ཇོ་རྫུ་ཅན་ལ་ཆོས་ལྟར་བཅོས་པ་ཏིག་པོ་མེད། །མི་ཤེས་ཁེངས་པ་མཐོ་ལ་བླུན་རྨོངས་འདི་ཡིན་མེད། །རང་མཐོང་ང་རྒྱལ་ཆེ་ལ་ནང་ཡོན་ཀུན་སྤྱོད་ཤིན་ཏུ་ངན་པ་མེད། །ལོག་ལྟས་དད་པ་ཅུང་ཟད་ཀྱང་མེད་པ་རང་སེམས་གནད་ལ་ལས་འཕྲོ་མེད༌། །ཕྱོགས་འཛིན་གཞན་དབང་དུ་སོང་བ་འཆིང་བ་ཅན་ལ་སྐལ་བ་ལས་ངན་གྱི་མཚོ་ཆེན་བརྡོལ་བ་མེད། །མི་ཚེ་སྡིག་ལ་སྒྲིལ་མི་དགེ་སྡིག་སྤྱོད་ལ་མཐོ་རིས་མེད། །དམ་ཚིག་རས་སྡོམ་དང་དམ་ཚིག་འཆལ་བ་སུ་བོར་ལ་དངོས་གྲུབ་མེད། །གསོག་འཇོག་སེར་སྣས་བཅིངས་ལ་འཆིང་བ་དམ་ལྡན་ལོངས་སྤྱོད་མེད། །ཞེ་སྡང་མཚོན་ཆ་ཚིག་རྐང་ལྔས་དུག་ལྔ་འཁྲུག་པ་སྟོན་ཅིང། ལྔ་ཀ་ཚོགས་ན་བདུད་ཀྱིས་ཟིན་པ་ལའང་སྦྱར་དུ་རུང་བརྡར་ལ་ཚེ་རིང་མེད། །ཕྲག་དོག་གོས་སུ་གྱོན་ལ་བདེ་བ་མེད། །འདོད་ཆགས་ཟས་སུ་ཟ་ལ་མི་ལུས་མེད། །གཏི་མུག་སྐོམ་དུ་འཐུང་ལ་ཡེ་ཤེས་མེད། །ང་རྒྱལ་ནོར་དུ་བཅང་ལ་དགེ་སེམས་མེད། །དཀོན་མཆོག་དཀོར་ལ་ལྡན་གྲོལ་གཉིས་ཀ་དང་མི་ལྡན་ཞིང་ཆོས་ལ་མི་སེམས་བཞིན་དུ་འབགས་ལ་བསོད་ནམས་མེད། །ལོག་འཚོའི་ལོག་འཚོ་ལ་ལྔ་སྟེ། ངེད་ཆོས་བཞིན་བགྱི་བ་ལ་བཟའ་བཏུང་མེད་ཟེར་བ་ལྟ་བུའི་གཞོགས་སློང། རྙེད་པས་རྙེད་པ་
ཚོལ་ཕྱིར་གཞན་ངོ་སྟེར་བྱིན་གྱིས་བསྲུང་བ། གཞན་སྔུན་དུ་བཙུན་ཚུགས་དང་ཞི་དེས་ལ་སོགས་པའི་ཚུལ་འཆོས། རང་གི་དཀའ་ཐུབ་དང་སྤོང་བག་བྱས་ཚུལ་གྱིས་ཁ་གསགས། ཡོན་བདག་ཆེ་གེ་མོས་བདག་ལ་འདི་ཙམ་བྱིན་བྱིན་པའང་བདག་ཚུལ་ཁྲིམས་དང། ཐོས་པ་དང། རྟོགས་པ་ཕུན་སུམ་ཚོགས་པའི་རྒྱུས་སོ་ཟེར་བའམ། གཞན་ཡང་མི་ལྟེར་བཞིན་དུ་སྤོང༌། ཉུང་བ་ལ་ཁྲོ། ངོ་མ་ཆོག་བར་ལྟེར་དུ་འཇུག ཐོབ་ཐང་བརྩི་ནས་ལེན་པ་སོགས་སོ། །ཟས་ལ་བརྔམས་རང་སྡོམ་འཇིགས་སྐྱོབས་ཚམ་ལ་ཡོན་གནས་སུ་རློམ་ནས་ས་ལ་ཐར་པ་མེད། །མི་ཆོས་གཡེང་བ་ཆེ་ལ་ཆོས་ཕྱིར་ལེ་ལོ་ཅན་དམ་ཆོས་མེད། །དེ་ལ་མེད་པ་རྣམ་པ་བཅུ་བདུན་མཛོད། །ཨེ་མ་འཁོར་བའི་རྒྱ་མཚོ་གཏིང་རེ་འཇིགས། །ཁྱོད་ཀྱང་མདུན་མ་ཡོད་པ་མི་བྱེད་དམ། །ཞེས་ཟེར་རོ། །ནང་གི་རྩ་མདུད་གྲོལ་བའི་རྟེན་འབྲེལ་ལས་ཆོས་འབྱུང་བའི་བརྡ་ཆོས་དང་པོ་འདི་ཡུད་ཙམ་ལ་བབས་ཤིང། དུས་དེར་ཐོས་པ་དང་ན་ཚོད་གཉིས་ཀ་གཞོན་ནུར་གྱུར་པས་ཡིད་བཞིན་མཛོད་སོགས་མ་མཇལ་ཡང་། །དེ་ལ་བཤད་པའི་ཕྲལ་བྱུང་རྐྱེན་གྱིས་མི་ཁོམ་པ་བརྒྱདད་ང། རིས་ཆད་བློས་མི་ཁོམ་པ་བརྒྱད་ཀྱི་རྐང་གྲངས་འདིར་རང་ཤར་བ་སླན་ཆད་མཆན་བུ་གསལ་བར་བགྱིས་ཤིང། གོ་རིམ་ངེས་པ་སྤངས་པ་བསྒྲིག་བཅོས་མ་བགྱིས་པར་སོར་བཞག་གོ །དེར་བུང་བ་དེ་ན་རེ། ཨེ་མ་གསོན་དང་སྙིང་གི་གྲོགས། །
ཁྱོད་དང་ཕྲད་པ་བསོད་ནམས་བསགས། །གལ་ཏེ་ཁྱོད་དང་མ་མཇལ་ན། །བདག་གི་མདུན་མ་དེའུ་ནོར་བྱས། །ད་ནི་དཀར་ནག་ལས་ལ་འཇིགས། །ད་ནི་ལ་འུར་ཆོས་ལ་འགྲོ། །བླ་མ་བཟང་པོ་གང་ན་ཡོད། །ཆོས་ཀྱི་འཇུག་སྒོ་ཇི་ལྟར་ཟབ། །ཡི་དམ་བྱིན་རླབས་ཅི་ཞིག་ཆེ། །མཁའ་འགྲོ་དངོས་གྲུབ་སུ་ཞིག་མྱུར། །ཉམས་ལེན་ལག་བཅང་གང་ལ་བྱེད། །སྡོད་པའི་གནས་སུ་ཇི་ལྟར་ལེགས། །འགྲོགས་པའི་གྲོགས་སུ་སུ་རང་བཟང། །ཕུགས་ཀྱི་བློ་གཏད་སུ་ལ་ཞུ། །དེ་འདྲ་དྲང་པོར་ང་ལ་གསུང། །ཞེས་ཟེར་རོ། །དེར་མེ་ཏོག་ན་རེ། སྔོན་ནས་ལས་འཕྲོས་འབྲེལ་པ་དེ། །ངོ་མཚར་ཆེ་བའི་ཚད་དུ་བདོག །བསླབས་པའི་ཁ་ལ་བླ་མས་ཅི་གསུང་ཚད་མར་འཛིན་པས་ཉན་པ་དེ། །ངོ་མཚར་ཆེ་བའི་ཚད་དུ་གོ །མདུན་མ་ནོར་རང་སྐྱོན་མཐོང་བ་ཤེས་པ་དེ། །སྤྱང་པོ་ཡིན་པའི་ཚད་དུ་གོ །ལས་འབྲས་ངེས་ཤེས་ནང་ནས་སྐྱེས་པ་བདེན་པར་བརྩི་བ་དེ། །གྲུང་པོ་ཡིན་པའི་རྟགས་སུ་གོ །མ་ཡེངས་ཉོན་དང་སྙིང་གི་གྲོགས། །བླ་མ་བཟང་པོས་ལུང་པ་ཁེངས། །ཆོས་བརྒྱད་མཁན་དང་བསྡུ་དངོས་བཞི་དང་ཕྱིན་དྲུག་གི་སྤྱོད་པ་ལམ་ཞུགས་པ་ནོར་ས་ཡོད། །ཞིབ་མོར་བརྟག་པ་མདོ་རྒྱུད་ནས་གསུངས་པ་མན་ངག་ཡིན། །ཆོས་གྱི་འཇུག་སྒོ་མི་ཟབ་མེད། །ཐེག་པ་ཆེ་ཆུང་སེམས་བསྐྱེད་
བྲལ་བཞིན་དུ་ཐེག་པ་ཆེན་པོར་ཁེ་འཆེ་བ་ནོར་ས་ཡོད། །མདོ་སྔགས་སྟན་མདོའི་སྤྱོད་པ་དང་སྔགས་ཀྱི་ཐབས་ཐོག་གཅིག་ཏུ་དྲིལ། །ཡི་དམ་ལྷ་ལ་བཟང་ངན་མེད། །ལྷ་རྟགས་རྨི་ལམ་དང་མངོན་ཞེན་ལ་འཐས་པ་འདྲེ་རྟགས་ནོར་ས་ཡོད། །རེ་དོགས་མེད་པ་ཡང་རྩེ་ཡིན། །དངོས་གྲུབ་མཁའ་འགྲོ་ཀུན་གྱིས་འབྱུང། །ལྷ་བདུད་གཉིས་པོ་ནོར་ས་ཡོད། །འཁྲུལ་པར་དག་སྣང་འཇིག་རྟེན་གྱི་མཁའ་འགྲོ་མས་ཉམས་བལྟས་ནས། ལུང་སྟོན་པ་ལ་བདེན་འཛིན་རང་རྒྱུད་དུ་ཤར་བ་མ་ཟེར་ཅིག །ཉམས་ལེན་རང་རིག་བློ་བྲལ་རྗེན་པ་བཟང། །བདེ་གསལ་ཉམས་དང་ནོར་ས་ཡོད། །ཉམས་བདེ་གསལ་མི་རྟོག་ལ་བལྟ་བར་མ་འཛིན་ཅིག །སྡོད་པའི་གནས་སུ་བས་མཐའ་ལེགས། །སྐྱིད་ཆོས་རྟོགས་རྫུ་ཡེངས་མ་ལམ་དང། ལེགས་སྨོན་གྱི་སྤྱོད་པ་ཚུལ་ཁྲིམས་སུ་རློམ་པ་ཟོལ་དང་ནོར་ས་ཡོད། །ཕྱུགས་དང་འདུ་ལོངས་མ་བསག་ཅིག །འགྲོགས་པའི་གྲོགས་སུ་རང་རིག་བཟང། །དྲན་པས་བཟུང་དང་བྱིས་པ་ཉེར་སྤྱོད་ཀྱི་བསམ་གཏན་ནོར་ས་ཡོད། །ཁྱབ་གདལ་ལྷིང་བའི་ཤེས་པ་སྐྱོངས། །ཕུགས་ཀྱི་བློ་གཏད་འབྲས་བུ་གྲོལ་ས་ངོ་ཤེས་པ་སྐུ་གསུམ་བཟང། །བཅོས་ཡིད་སྨོན་གྱི་འབྲས་བུ་ལ་རེ་བ་མའི་ཆོས་དང་ནོར་ས་ཡོད། །ཡེ་ནས་འདུ་འབྲལ་མེད་པ་དགོས། །བསླབ་བྱ་དེ་ལས་མ་བྲལ་ན། །འཁོར་བའི་གྲོང་ལ་ཕྱི་ཕྱག་འཚོལ། །འཁོར་
འདས་གཉིས་ལ་རྩིས་སྤང་བླང་མེད་པའི་དོན་ལ་ལ་བཟླ་བ་གྲུབ་སྤོངས། །འཁོར་བ་རྫུན་གྱི་ཟོ་རིས་ལ། །རྟག་པར་འཛིན་པའི་ངེས་ཤེས་སྤོངས། །ཡོད་པའི་ཕྱོགས་འཛིན་པ་དང། མྱང་འདས་མེད་པར་ངེས་ཤེས་སྐྱེས་པ་གཉིས་ཀས་བསླུ་བ་ཡིན་རྟོགས་པའི་འཁོར་ལོ་ལ། །ཡིད་ཆེས་སྐྱེས་པའི་ཞེན་ཆགས་ཐོང༌། །འཁོར་འདས་གཉིས་མེད་ཆོས་སྐུ་ལ། །སྤྲོས་པའི་མཐའ་དོན་རྣལ་མ་ཡིས་ཀུན་ནས་དབེན། །བཅིང་གྲོལ་མེད་པའི་རིག་པ་ལ། །རྫོགས་པ་ཆེན་པོ་དགོངས་པ་ཡོད། །ཡུལ་དང་གཟུང་བའི་ཆ་ཡུལ་ཅན་འཛིན་པའིསེམས་དབྱེར་མེད་ལ། །མ་བཅོས་རང་ཁའི་ཀ་ནས་དག་པ་གནས་ལུགས་རྫོགས། །སྒོ་གསུམ་བྱ་རྩོལ་དགུ་ཕྲུགས་ཐོང༌། །ལས་རླུང་ཟད་པའི་རྟེན་འབྲེལ་ཡོད། །དེ་ཟད་རགས་ལུས་གཞའ་སྐུར་གྲོལ། །སེམས་དྭངས་མའི་རིག་པ་དབྱིངས་དང་འདྲིས། །ཡེ་གདོད་མའི་རྒྱལ་ས་ཟིན་པར་ངེས། །དེ་གོའམ་སྙིང་གྲོགས་ལས་འཕྲོ་ཅན། །ཞེས་སྨྲས་པས་བུང་བ་དེ་ཅུང་ཟད་བློ་འགྱུར་ནས་འཛུམ་མདངས་སྟོན་པ་དང་མཉམ་དུ་འདི་སྐད་ཟེར་རོ། །ཨེ་མ་ཨེ་མ་སྐལ་བཟང་བུང་བ་ང༌། །མེ་ཏོག་ཁྱོད་དང་མཇལ་བས་བསོད་ནམས་བསགས། །ད་ནི་འཁོར་བའི་ལས་ལ་ཞེན་པ་ལོག །དབེན་གནས་རི་ཁྲོད་འགྲིམ་པའི་བསམ་པ་དུང༌། །ཚེ་གང་ཆོས་ལ་བསྒྲིལ་བའི་དམ་བཅའ་
འབུལ། །ཚེ་གཅིག་འཇའ་ལུས་འགྲུབ་པའི་གདམས་ངག་ཞུ། །ད་ཕན་གྲོགས་པར་བལྟས་པ་བཟོད་པར་སོ་སོ་སྐྱེ་བོས་བླ་མ་མི་རུ་མཐོང༌གསོལ། །ཁྱོད་ནི་རྟོག་མེད་འོད་གསལ་དགོངས་པ་ཅན། །ཡེ་ཤེས་ཐུགས་རྗེའི་ལོ་འདབ་རབ་ཏུ་རྒྱས། །སྨྲས་ཚད་ཆོས་དགེ་བའི་བཤེས་གཉེན་གྱི་ཡོན་ཏན་མཐོང་ཙ་ན་ཅི་གསུང་ཆོས་སུ་ཡོད་སྒྲར་ཡོང་བ་ངོ་མཚར་ཆེ། །མ་རིག་རྨོངས་པའི་སེམས་ཅན་བདག་འདྲ་ལ། །སྙིང་རྗེའི་ཞགས་པས་འདེབས་པའི་དུས་ལ་བབས། །ཐུགས་རྗེའི་ལྕགས་ཀྱུས་འཛིན་པའི་དུས་ལ་བབས། །སྨིན་གྲོལ་གདམས་ངག་སྟོན་པའི་དུས་ལ་བབས། །རེ་ས་གཞན་ན་མེད་དོ་ཐུགས་རྗེས་ཟུང༌། །ཞེས་ཟེར་ཞིང་ཐལ་མོ་ཁ་སྦྱར་ནས་ཤིན་ཏུ་གུས་པའི་ཚུལ་གྱིས་བསྡད་སོང་ངོ༌། །དེར་མེ་ཏོག་ན་རེ། །དུད་འགྲོའི་ལུས་ལ་དགེ་བའི་བློ་གྲོས་ཅན། །བློ་གསལ་རིག་པ་ཧུར་ལ་སྨྲ་བ་མཁས། །ལས་འཕྲོ་བག་ཆགས་སད་པའི་ཉམ་ཆུང་ཁྱོད། །མེ་ཏོག་ང་འཕྲད་པ་བསོད་ནམས་བསགས། །ཐོབ་འཚེངས་རང་གྲོལ་ཆེན་པོའི་ཆོས་ཤིག་བཤད། །རྒྱས་བཤད་ཚིག་གི་སྤུན་པས་དོན་མི་ཤེས་བྱའི་རྣམ་གྲངས་མང་པོས་ཆོས་ཉིད་རྣལ་མའི་མཐོང༌། །སྙིགས་དུས་ཚེ་ལ་དལ་ཁོམ་ཡོད་མ་ཡིན། །མི་རྟག་འཆི་བ་རྣམ་པ་ཀུན་ཏུ་ང་སང་འཆིའམ་སྡོད་སྙམ་པའི་ཐེ་ཚོམ་ལོག་གེ་བ་དགོས་དྲན་པ་
རྒྱུན་དུ་གཅེས། །ཆོས་ལ་ཤུགས་ཀྱིས་འཇུག་པའི་བརྩོན་འགྲུས་བསྐྱེད། །འཁོར་བ་ཞེན་པ་ལྡོག་པའི་དགོས་བྱེད་ཡོད། །སྐྱབས་གནས་བསླུ་མེད་དཀོན་མཆོག་རྣམ་གསུམ་ལ། །བློ་སྙིང་བྲང་གསུམ་ཐོད་ལ་སྐྱབས་དཀོན་མཆོག་ལ་བློ་ཁེལ་བ་ལ་སྐྱབས་འགྲོ་གྱིས། །འགྲོ་ཀུན་ཕ་མར་སྒོམ་ནས་བྱང་སེམས་ཕྱོགས་རིས་མེད་པ་འབྱོངས་ལས་ཀུ་ཅོ་མཐོང་ཡང་སྙིང་རྗེ་དབང་མེད་དུ་སྐྱེ་བསྐྱེད། །སྡིག་སྒྲིབ་ཡི་གེ་བརྒྱ་པས་སྡིག་པ་མ་དག་ན་ཡོན་ཏན་མི་སྐྱེ་མཐའ་འདེད་ཐོང༌། །ཡན་ལག་བདུན་དང་ཚོགས་མ་རྫོགས་ན་སངས་རྒྱས་མི་ཐོབ་མཎྜལ་གནད་དུ་བསྣུན། །གྲངས་མེད་གསུམ་གྱི་ཚོགས་ལམ་དེ་ཡིས་བཟླུམས། །བླ་མའི་རྣལ་འབྱོར་བླ་མ་དང་ཐུགས་ཡིད་མ་འདྲེས་ན་བྱིན་རླབས་མི་འཇུག་སྒོམ་ལ་གསོལ་འདེབས་འབུངས། །ལམ་དབང་རྟག་པར་ནོས་ནས་བྱིན་རླབས་འཇུག་ཅིང་ཉམས་ཆག་འདུག་བྱིན་རླབས་ཞུས། །ཨ་འཐས་སྤྲོས་བཅས་དྲན་པས་མི་ཟིན་པའི་གནས་བསྐོར་དང་ལམ་འཕྲང་བཟོ་བ་སོགས་དགེ་བ་དུཿཁའི་རྒྱུ། །རིག་པ་ཀ་དག་ཆེན་པོའི་ཆོས་ཉིད་མ་འཁྲུལ་བ་ངང་ལ་ཞོག །སྒོམ་བློའི་རྩོལ་བསྒྲུབ་མི་སྒྲིམ་དུར་པོ་སྐྱུར་ལ་ཐོང༌། །བཏང་སྙོམས་ཡེངས་མ་ལམ་དང་བརྗེད་འབྱམས་མ་ཚོར་བའི་ལུང་མ་བསྟན་གྱི་སྐྱོན་མཚང་བརྟོལ། །དྲན་རིག་དྲན་པས་སྒོམ་གྱི་ངོ་ཏི་བྱེད་རང་ཁའི་བསྒྱུར་སྤོངས། །གོལ་ཤོར་གེགས་ཀྱི་མཚན་མ་གདོད་ནས་དག །ལྷག་མཐོང་ཡེ་གདངས་རྡོ་རྗེ་ལུག་རྒྱུད་གཟིར། །དབྱིངས་རིག་སྨིན་མཚམས་གྲོལ་ནས་ལུ་གུ་རྒྱུད་ལ་གཟིར།
རིག་པ་བཅུད་དུ་སྨིན་ནས་འཇའ་སྐུར་སྣང་བ་བཞི་ཚད་དུ་ཕྱིན་པ་གྲོལ། །སྐྱེ་འཆི་གཉིས་ཀྱི་མིང་འདོགས་རང་སར་དག །འཁོར་འདས་རང་གྲོལ་གདོད་མའི་རྒྱལ་ས་ཟིན། །སྙིང་གཏམ་ལག་བཅངས་ཡིན་ནོ་སེམས་ལ་ཕུར། །གོང་མའི་གདམས་ངག་ཡིན་ནོ་སྙིང་ལ་བསྟིམ། །རྒྱུད་སྡེའི་རྒྱུད་བཅུ་བདུན་བཅུད་ཕུར་ཡིན་ནོ་མགུ་བ་བསྐྱེད། །ཀུན་ཏུ་བཟང་པོ་བྱོན་ཡང་འདི་ལས་མེད། །དགའ་རབ་རྡོ་རྗེ་མཇལ་ཡང་ཅི་མི་གསུང༌། །པད་འབྱུང་སྙིང་ཏིག་ཡ་བཞི། ཆ་གཉིས་བི་མ་ལ་ཡི་དགོངས་པའི་མཐིལ། །འདི་འདྲ་བཤད་པར་ཕངས་ཀྱང་ཁྱོད་ལ་ཐལ། །རེམས་ཤིག་ཕྱི་དུས་མ་གཞོག་ད་ལྟ་འབུངས། །འབུངས་ནས་འབྲས་བུ་མ་བྱུང་ང་ཡིས་བསླུས། །ཨེ་མ་རྒྱལ་བའི་དགོངས་པ་ཨ་ལ་ལ། །ཞེས་སྨྲས་པས། བུང་བ་དེ་སྙིང་ལ་མདའ་འཕོག་པ་ལྟ་བུར་གདམས་པ་བློ་ལ་ཤར་ནས་དེ་ཉིད་དུ་སྒོམ་པས་དཀར་པོའི་བག་ཆགས་སད་དེ་རྟོགས་འབུལ་འདི་ལྟར་བྱས་སོང་ངོ༌། །ཨེ་མ་ཨེ་མ་སྣང་མེད་སྤྲོས་པ་བྲལ། །དྲིན་ཅན་པདྨའི་སྡོང་པོ་ཚུར་གསོན་དང༌། །བདག་གིས་བྱ་རྩོལ་བཏང་ནས་བསྒོམས་བསྒོམས་པས། །སྣང་སྟོང་ཉིད་ཀྱི་བར་ནས་ཉམས་ཤིག་རྙེད། །གསལ་སྟོང་བརྗོད་པ་བྲལ་ཕྱག་ཆེན་པའི་ཆོས་སྐད་སེམས་སྡེ་བའི་ཉམས་རིམ་བཞི་དང་མཐུན་པ་རྩེ་གཅིག་ཆུང་ངུ༌། འཇིག་རྟེན་པའི་ལམ་བའི་རང་
ངོ་ལ། །གཉིས་ཆོས་མཚན་མའི་དྲི་མ་རབ་དབེན་ཀྱང༌། །ཐོལ་བྱུང་རྣམ་རྟོག་འོག་འགྱུའི་རྐུན་པོ་འདིས། །ཡུལ་དང་ཡུལ་ཅན་སོ་སོར་བྱས་པས་ནོངས། །མ་བཅོས་ཡེ་གྲོལ་ཆོས་སྐུ་རང་གཤིས་སུ། །ངེས་པ་རྙེད་ཀྱང་ངེས་ཤེས་རྩེ་གཅིག་འབྲིང་པོ་སྒྲོག་གིས་བཅིངས། །མཐའ་བརྒྱད་སྤྲོས་བྲལ་དངོས་པོ་ཅན་དུ་སོང༌། །སེམས་ཙམ་དབུ་མའི་ལྟ་བར་གོལ་བས་ནོངས། །རྫོགས་པ་ཆེན་པོ་བྱ་རྩོལ་བློ་འདས་ལ། །དྲན་པའི་སྒྲོག་གིས་གཉུག་མའི་རྩེ་གཅིག་ཆེན་པོ་གནས་ལུགས་བཅིངས། །ཡིད་དཔྱོད་སོ་སོར་རྟོག་པས་རང་ངོ་བསྒྲིགས། །བློས་བྱས་རྟོག་གེའི་གྲུབ་མཐའ་བཟུང་བས་ནོངས། །ནོངས་པ་གསུམ་གྱི་རྟོགས་འབུལ་སོ་མ་ལ། །གོལ་ས་གཅོད་པའི་བཀའ་སྩོལ་ད་རུང་ཞུ། །ཞེས་ཟེར་ནས་མེ་ཏོག་གི་བཅུད་ལེན་ནོ། །དེར་མེ་ཏོག་ན་རེ། ཀྱེ་མ་ཚུར་ལ་གསོན་དང་ལས་འཕྲོ་ཅན། །རྫོགས་ཆེན་ཐོས་པ་མང་སྟེ་རྟོགས་པ་ཉུང༌། །གསལ་སྟོང་རྟོགས་མེད་ཙམ་གྱིས་སངས་མི་རྒྱ། །སྐུ་གསུམ་རིག་པ་འདུ་འབྲལ་མེད་པ་དགོས། །སྟོང་པར་གནས་པ་ངོ་བོ་ཆོས་སྐུ་ཡིན། །གསལ་ཆ་འགགས་ན་ཆད་པའི་མཐའ་རུ་གོལ། །ཤུགས་འབྱུང་གསལ་བར་རང་བཞིན་ལོངས་སྐུ་ཡིན། །ཞེན་པ་ཡོད་ན་རྟག་པའི་མཐའ་ལ་གོལ། །ཅིར་ཡང་འཆར་བ་ཐུགས་རྗེ་སྤྲུལ་སྐུ་ཡིན། །དགག་བསྒྲུབ་བྱས་ན་ཚད་མའི་ལམ་
ལ་གོལ། །བདེ་གསལ་མི་རྟོག་སྐུ་གསུམ་བསྒྲུབ་གཞི་ཡིན། །དེ་ལ་ཞེན་ན་ཁམས་གསུམ་འཁོར་བའི་རྒྱུ། །ཐོལ་བྱུང་རྟོག་པ་སྤྲུལ་སྐུའི་ཐུགས་རྗེ་ཡིན། །བཅོས་བསྒྱུར་ཞེན་འཛིན་ཐོང་དང་རང་ཡལ་འགྲོ། །ཡུལ་དང་ཡུལ་ཅན་གཉིས་འཛིན་མཐའ་ལས་གྲོལ། །སྤྲོས་བྲལ་དངོས་པོར་གོལ་མཁན་ཤེས་སྒྲིབ་ཡིན། །བཟང་ཞེན་ཉམས་དང་ངེས་ཤེས་དྲི་མ་ཕུད། །དྲན་པ་སྒོམ་གྱི་རྩ་བ་ལགས་མོད་ཀྱང༌། །འཇུར་དྲན་དུར་པོས་སྒོམ་ཆེན་ཕལ་ཆེར་བསྐུ། །མ་བསྒོམས་ངང་ནས་ཡེངས་པ་མེད་པ་གནད། །ལས་རླུང་ཡེ་ཤེས་རླུང་དུ་མ་གྱུར་པར། །གཉུག་མའི་ཡིན་ལུགས་སུས་ཀྱང་མཐོང་བ་མེད། །གཉུག་མའི་རང་ངོ་རྗེན་པ་སྤྲོས་བྲལ་ཆུང་ངུ་ཐོབ་ལམ་མ་ཟིན་པ་ར་མཐོང་བའི་ཚེ། །ཚིག་དང་དཔེ་ཡིས་མཚོན་པ་བཞད་གད་གནས། །རྟོགས་ཚད་ནང་ནས་ཤར་སྤྲོས་བྲལ་འབྲིང་པོ་བའི་མེ་ཏོག་ང༌། །རྟོག་གེའི་རྩོད་པ་བྱུང་ཡང་ཉམ་ང་མེད། །རྒྱལ་བའི་དགོངས་པ་སྤྲོས་བྲལ་ཆེན་པོ་ལོན་པའི་མེ་ཏོག །ཉམ་ཆུང་གྱི་ན་ཟེར་ཡང་ཉམ་ང་མེད། །དཀོན་མཆོག་དྲུང་ན་འདུག་པའི་དག་པའི་ས་གསུམ་མེ་ཏོག་ང༌། །འཇིག་རྟེན་མ་ཕེར་ཟེར་ཡང་ཉམ་ང་མེད། །སྒོམ་བློའི་སྤྲོས་པ་ཟད་པའི་མེ་ཏོག་དུ་མ་རོ་གཅིག་ཏུ་ཤར་ནས་སྒོམ་ལམ་ཟིན་པ་ང༌། །སྒོམ་རྒྱུ་མི་འདུག་ཟེར་ཡང་ཉམ་ང་མེད། །
རྟོག་མེད་གཉུག་མར་འབྱམས་པའི་མེ་ཏོག་རོ་གཅིག་ཏུ་དུ་མར་ཤར་བ་ང༌། །འདུ་ལོང་མི་འདུག་ཟེར་ཡང་ཉམ་ང་མེད། །སྒྲ་མེད་གཏམ་ཟུངས་ཟད་པའི་མེ་ཏོག་ང༌། །ལབ་རྒྱུ་མི་འདུག་ཐ་སྙད་ཟད་པའི་འོ་གཅིག་ཟེར་ཡང་ཉམ་ང་མེད། །ཆ་སྒོམ་མེད་ཆུང་ངུ༌ལུགས་ཅི་དགར་སྤྱོད་པའི་མེ་ཏོག་ང༌། །ལྟ་སྟངས་མི་འདུགར་ཡང་ཉ་ཟེམ་ང་མེད། །བྱ་རྩོལ་ཞེན་འཛིན་དག་སྒོམ་མེད་འབྲིང་པོ་པའི་མེ་ཏོག་ང༌། །སེམས་མེད་བེམ་པོ་ཟེར་ཡང་ཉམ་ང་མེད། །ཡེ་ཤེས་སྒོམ་མེད་ཆེན་པོ་མི་སློབ་ལམ་ཁོང་ནས་རྒྱས་པའི་མེ་ཏོག་ང༌། །བཏང་འགྲོ་བཞག་སྡོད་ཟེར་ཡང་ཉམ་ང་མེད། །གེགས་སེལ་རྡོ་རུས་ཐུག་པའི་སྙིང་གཏམ་འདི། །ལས་འཕྲོ་ཅན་གྱི་གྲོགས་པོ་ཁྱོད་ལ་གདམས། །ཉམས་དང་རྟོགས་པ་གཉིས་ལ་ནོར་ས་ཆེ། །གཞི་རྩ་ཁོང་ནས་བཅད་ཀྱིན་ད་རུང་དྲིས། །ཇི་སྲིད་འདུ་ཤེས་ཟད་ཡིད་དཔྱོད་ཀྱི་ལྟ་སྒོམ་པར་མ་གྱུར་པར། །དེ་སྲིད་རྒྱལ་བའི་དགོངས་པ་ལོན་པ་མེད། །རྟོགས་པས་སྤུ་རིས་ཕྱེ་བའི་རྫོགས་ཆེན་རང་ལམ་དུ་རྩེ་གཅིག་ལ་སོགས་པའི་ཉམས་བཞི་པོའང་གཤིས་ཐོག་ཏུ་མི་ཕེབས་ཏེ་གདུལ་བྱ་སྤྲོ་བ་བསྐྱེད་པ་དང་ཉོན་སྒྲིབ་དང་ཤེས་སྒྲིབ་དག་སྟོབས་ཆེ་ཆུང་ལ་ལྟོས་ནས་ཆ་
ལ་བཏགས་པ་ཙམ་དུ་ཤེས་པར་བྱའོ། །གནས་ལུགས་དེ། །ཇི་ཙམ་ཟབ་ཟབ་འདྲ་ཡང་རྣམ་རྟོག་ཡིན། །ཉམས་རྩེ་གཅིག་ལ་རྟོགས་པར་མ་ཞེན་གཤིས་ལུགས་སྐྱོངས། །རྟོགས་ནས་ཉམས་སྤྲོས་བྲལ་ལ་མ་ཞེན་ལྷོད་དེ་སྡོད། །དབྱིངས་རིག་གདོད་ནས་དག་པ་གཉུག་རོ་གཅིག་མའི་གཤིས། །དྲན་པ་རང་སྟོང་ཤེས་པ་སྒོམ་མེད་གདོད་མའི་ཞལ། །ས་ལམ་གཞི་ལ་དག་པ་བཞི་པོའང་རྟོག་ཆོས་ཡིན་པས་རྫོགས་ཆེན་གྱི་ཁྱད་ཆོས་ཚིག་ལ་མི་གནས་པའོ། །རྫོགས་ཆེན་དོན། །གཞོན་ནུ་བུམ་སྐུའི་འོད་གསལ་གྲོལ་བའི་གནས། །ཐིག་ལེ་ཉག་གཅིག་མི་གཡོ་དགོངས་པའི་གཟེར། །དེ་ལས་གཞན་དུ་འདུག་ན་ན་རཀྐན། །ཞེས་ཟེར་ནས་ལྡེམ་མེ་བསྡད་སོང་ངོ༌། །དེར་བུང་བ་དེས་བྱ་བ་དགུ་ཕྲུགས་སུ་བཏང་ནས་རིག་པ་རྡོ་རྗེ་ལུ་གུ་རྒྱུད་ཀྱི་དབྱིངས་ལ་གཟིར་བས་རིག་པ་ཚད་ཕེབས་ཀྱི་རྟོགས་པ་རྒྱུད་ལ་སྐྱེས་ནས་འདི་སྐད་ཟེར་རོ། །ཨ་ལ་ལ་ཧོ། རང་བྱུང་རིག་པའི་ཆོ་འཕྲུལ་ལས། །འཁོར་འདས་གཉིས་ཀྱི་རྣལ་དབྱེ་དོད། །རིག་དང་མ་རིག་སོ་མཚམས་ལས། །སླང་གཉེན་གཉིས་སུ་འདུག་རེ་ཤི། །བཀའ་དྲིན་ཅན་གྱི་མེ་ཏོག་ཁྱོད། །བདག་གི་ཡོངས་འཛིན་ལགས་མོད་ཀྱང༌། །ཁྱོད་ཐུགས་བདག་གི་རིག་པར་འདྲེས། །ད་ནི་གསོལ་བ་སུ་ལ་འདེབས། །མ་བཅོས་རང་གར་སྡོད་པ་དེ། །རྒྱལ་བའི་དགོངས་པ་ཡིན་འདུག་ཀྱང༌། །རེ་དོགས་རྣམ་རྟོག་བདུད་པོ་ཡིས། །སྒོམ་བློ་བྱས་པ་ཤ་ཐང་ཆད། །སངས་རྒྱས་རང་སེམས་ཡིན་པ་ལ། །ས་ལམ་
རྩིས་པས་བུལ་དུ་སོང༌། །རང་སར་བསྡད་པས་ས་རྒྱ་ཟིན། །ད་ནི་སྣང་ཉམས་ཅི་ལས་བདེ། །ལས་རླུང་དབུ་མར་དག་པ་ཡིས། །མཉམ་རྗེས་གཉིས་ཀྱི་སྤུ་རིས་ཡལ། །མངོན་སུམ་རིག་པ་གཟིར་བ་ཡིས། །གོང་འཕེལ་ཉམས་སྣང་རྗེན་པར་མཐོང༌། །ལོངས་སྐུའི་སྒྲོ་འདོགས་ལམ་ལ་ཆོད། །ཚད་ཕེབས་སྒོ་ཉལ་བྱས་ནས་གདའ། །བསམ་བརྗོད་བྲལ་བའི་རིག་པ་ལ། །བག་ཆགས་ཉེར་ལེན་ག་ལ་ཡོད། །སྣང་སེམས་དབྱེར་མེད་འདྲེས་པ་ཡིས། །གཉིས་འཛིན་མ་སྤངས་མཐོང་སར་ཡལ། །ཆས་ཤོག་བདག་ལ་འགྲན་པ་ཡི། །འཁོར་བའི་སེམས་ཅན་སྡུག་སེམས་ཅན། །གདོད་མའི་ས་ལ་མཉམ་པོར་ཤོག །ལས་འཕྲོ་ཅན་གྱི་སྐྱེ་འགྲོ་དང༌། །ཉམ་ཐག་བར་དོའི་སེམས་ཅན་ལ། །ང་ཡི་རིག་པ་ཅིས་མི་འཇུག །ལས་ལ་བཟང་ངན་མེད་པའི་ཕྱིར། །ཐམས་ཅད་ཆོས་ཀྱི་དབྱིངས་སུ་བསྐྱལ། །ཟུང་འཇུག་ཨ་ཝ་དྷུ་ཏིའི་སྐུ། །པད་འབྱུང་བི་མ་ལ་ལྟ་བུར། །བྱའམ་ཡང་ན་ཆོས་ཟད་ཀློང༌། །རགས་ལུས་འཇའ་སྐུར་དེངས་ནས་ཀྱང༌། །ཀ་དག་བྱ་རྩོལ་བྲལ་བའི་དབྱིངས། །རིག་པ་གཞི་ལ་ཐིམ་ནས་འགྲོ། །ཇི་སྲིད་འཁོར་བ་མ་ཟད་པར། །ལྷུན་གྲུབ་རྩལ་གྱིས་འགྲོ་དོན་བྱེད། །འདི་ནི་ཚིག་གི་མཐའ་མ་ཡིན། །གཏམ་ཟུངས་ཟད་པའི་རྣལ་འབྱོར་ལ། །
གླེང་མོ་བྱས་ཀྱང་བྲག་ཅ་འདྲ། །ཨེ་མ་ངོ་མཚར་ཨ་ལ་ལ། །གཞི་ལས་འཕགས་པའི་རིག་པ་དེ། །ཡེ་གཞིའི་ཀློང་དུ་བཛྲ་མུཿ། །འཁོར་བ་དོང་ནས་སྤྲུགས་པ་ཡིན། །མ་མ་ཀོ་ལིང་ས་མནྟཿ ཞེས་ཟེར་ནས་དར་ཅིག་སོང་ཙ་ན་བུང་བ་དེ་ཉིད་འཕོ་བ་ཆེན་པོའི་སྐུ་བརྙེས་ནས་འཇའ་ལྟར་ཡལ་སོང་ངོ༌། །གཏམ་ཚོགས་ལེའུ་ང་བཞི་པའོ།། །།
གཏམ་ཚོགས་ལེའུ་ང་ལྔ་པ། ཆོས་སྤྱོད་བཅུའི་གཏམ་དགེ་བའི་ལྗོན་ཤིང་།
ཆོས་སྤྱོད་བཅུའི་གཏམ་དགེ་བའི་ལྗོན་ཤིང་ཞེས་བྱ་བ། འཕགས་པ་སྒྲིབ་པ་རྣམ་པར་སེལ་བ་ལ་ཕྱག་འཚལ་ལོ། །སྐྱེས་བུའི་ལུས་རྟེན་ཐོབ་པ་རྣམས་སྙོམས་ལས་ཀྱི་གཉིད་ལས་སློང་བའི་ཆོས་སྤྱོད་བཅུ་ལ་འབད་པར་བྱ་སྟེ། ཇི་སྐད་དུ། ཡི་གེ་འབྲི་མཆོད་སྦྱིན་པ་དང༌། །ཉན་དང་ཀློག་དང་འཛིན་པ་དང༌། །འཆད་དང་ཁ་ཏོན་བྱེད་པ་དང༌། །དེ་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་པས་མི་ལུས་ལན་ཅིག་ཐོབ་པ་འདི་སྟོང་ཟད་དུ་མི་གཏོང་བར་ཆོས་སྤྱོད་བཅུའི་བྱ་བ་ལ་འབད་དགོས། དེ་ལ་དང་པོར་ཡི་གེ་འབྲི་བ་ནི་འདུལ་བ་ལུང་ལས་ཀྱང༌། དང་པོར་ཡི་གེ་བསླབས་ཏེ། དེ་ནས་བརྟག་པ་བརྒྱད་ལ་མཁས་པར་བྱའོ། །ཞེས་གསུངས་པས་སྐྱེས་བུའི་ལུས་རྟེན་ཐོབ་པ་ཙམ་ནས་བསླབ་བྱའི་ཐོག་མ་
ནི་ཡི་གེ་ཉིད་ཡིན་ཏེ། གཞོན་ནུ་དོན་གྲུབ་ཀྱིས་ཀྱང་ཡིག་མཁན་ཀུན་གྱི་བཤེས་གཉེན་དང༌། སྲིན་བུ་གོ་ཆ་ལས་ཡི་གེ་བསླབས་པར་མཛད་དོ། །ཡི་གེ་ཤེས་པ་ལས་ལུགས་གཉིས་ཀྱི་བྱ་བ་ཆེ་ཕྲ་ཐམས་ཅད་ལ་འཇུག་པའི་སྒོ་དོད། བརྗེད་ངས་དང་དྲན་པ་ཉམས་པ་ཐམས་ཅད་ལ་མི་བརྗེད་པའི་གཟུངས་བྱེད། བྲན་གཡོག་དང་ཕོ་ཉ་ལ་སྙིང་གཏམ་འཆད་མི་དགོས། དྲང་སྲོང་ཆེན་པོ་རྒྱས་པ་དང༌། གྲོག་མཁར་བ་སོགས་འཇིག་རྟེན་གྱི་མེས་པོ་རྣམས་ཀྱི་བློ་གྲོས་ཤེས་པས་ལུགས་ཀྱི་བསྟན་བཅོས་ལ་འཇུག་པའི་སྤོབས་པ་ཐོབ། སྒྲུང་དང་ལྡེའུ། གནའ་རྒྱུས། དེབ་ཐེར་ལ་སོགས་པར་རང་སྟོབས་ཀྱིས་ཤེས་པས་མི་ལུས་སྐྱེས་བུའི་རྣམ་ཤེས་ཅན་དུ་འགྲོ། ཡི་གེ་ཤེས་མི་ཤེས་གཉིས་མི་དང་དུད་འགྲོའི་ཁྱད་ཡོད། ལྷག་པར་ཆོས་ལམ་ལ་འཇུག་པའི་རྟེན་འབྲེལ་གྱི་སྒོ་དང་པོའང་ཡི་གེ་ཡིན། ཚེ་སྔ་ཕྱི་དང་ལས་རྒྱུ་འབྲས་ཀྱི་མཚང་རིག །རང་གི་བྱ་བྱེད་ནོར་པ་དང༌། བླང་དོར་འཛོལ་བའི་གནས་ཤེས། རྒྱལ་བའི་གསུང་རབ་དང་དམ་པའི་རྣམ་ཐར་ལ་བརྟེན་ནས་སྐྱོ་ཤས་དང་ངེས་འབྱུང་སྐྱེ། འཁོར་བ་ལ་སྙིང་པོ་མེད་པའི་མཚང་རིག །གནས་སྐབས་སུ་འབྲི་ཀློག་ཤེས་པས་མི་ཐམས་ཅད་ལྟོ་གོས་ཕྱིད་སླ་བ་ཙམ་ལའང་ལྟོས། དེ་ལ་དང་པོར་ཀློག་བྱེད་
བར་གཅེས་ཤིང་ཀློག་མ་བྱང་བར་འབྲི་བ་ནི་ཡི་གེའི་ཉིང་མཚམས་སྦྱོར་བ་ཙམ་ལའང་རྨོངས་པས་ཡི་གེའི་ནང་དུ་དུད་འགྲོའི་སྒྲ་སྐད་འདྲེན་པའང་མཐོང་ལ། ཀློག་བྱང་ནས་ཀྱང་སུམ་ཅུ་པ་དང་རྟགས་འཇུག །བརྡ་གསར་རྙིང་གི་རྣམ་གཞག་ལ་བསླབས་ནས་བརྡ་དག་ལ་འདྲིས་པར་མ་བྱས་ན། བཀའ་དང་བསྟན་བཅོས་ལ་སོགས་པའི་ཚིག་དོན་ཕྱོགས་འཛོལ་བ་དཔེར་ན་ཀ་གཅིག་པོའང་རྒྱལ་བའི་བཀའ་དང༌། ཀ་བ་དང༌། ཞིང་གི་རྐ་དང༌། ངལ་དུབ་ཀྱི་དཀའ་དང༌། སྐ་རག་མ་དང༌། རྐ་བློ་དང༌། སྒྲའི་སྐད། རོ་བསྐ་བ་ལ་སོགས་འཕུལ་བྱེད་དང༌། མགོ་འདོགས་ཀྱི་ཁྱད་པར་ལས་ཚིག་དོན་ཤིན་ཏུ་འཆོལ་བའི་ཕྱིར་རོ། །དེ་ནས་ཡི་གེ་འབྲི་བ་ལ་བསླབ་པར་བྱ་སྟེ་འདི་ལྟར་ཡི་གེ་ནི་སངས་རྒྱས་ཀྱི་སྤྲུལ་པ་ཡིན་པས་དེའི་གཟུགས་བརྙན་བསླབས་པ་ལ་ཕན་ཡོན་ཚད་མེད་དེ། །མདོ་དགོངས་འདུས་ལས། ལངྐའི་བདག་པོ་གཟུགས་བརྙན་གྱི་སྤྲུལ་པ་ནི་ཐ་དད་དེ། གསུང་གི་གཟུགས་བརྙན་ནི་ཡི་གེར་སྣང་བ་ཡིན་ལ། ཡི་གེའི་སྤྲུལ་པ་ནི་འདི་ལྟ་སྟེ། མིང་དང༌། བྱུང་ཚུལ་དང༌། གཟུགས་དང་། རང་བཞིན་དང༌། སྒྲ་དང་། ལས་དང་། སྒོ་དང༌། རྣམ་གྲངས་དང༌། ཡི་གེའི་གཞི་རྣམས་ཀྱི་དེ་ཁོ་ན་ཉིད་གསང་བ་དམ་པ་དེ་དག་མཐོང་ཞིང་ཤེས་པར་འགྱུར་རོ། །དེས་ཆོས་
ཐམས་ཅད་ལ་མཁས་ཤིང་གྲོལ་བར་འགྱུར་རོ་ཞེས་གསུངས་ལ། དེའི་གཟུགས་བརྙན་དང་རྣམ་པའི་ཆ་ལ་མཚན་ཉིད་གདོན་པ་བཅུ། གཅེས་སོ་བརྒྱད། མགོ་དང༌། དཔུང་བ་དང༌། ཟགས་མཆུ་དང༌། ཡར་འཐེན་དང༌། མར་འཐེན་དང༌། མིག་པུ་སྟེ། རེ་རེ་ལའང་གསུམ་མཚན་གསུམ་གྱི་བྱེ་བྲག་ཅན་ཆོས་ཉི་ཤུ་རྩ་གཅིག་དང༌། རྣ་རུ་ལ་གསུམ། གུ་གུ་ལ་གསུམ། ར་བཏགས་ལ་གཉིས། ཡ་བཏགས་ལ་གསུམ་སྟེ་བུ་ཆོས་བཅུ་དྲུག །སྤྱིའི་ཆོས་གསུམ་སྤོ་དང་བཅས་པར་རགས་པར་ཆོས་བཞི་བཅུའི་མཚན་ཉིད་ལ་ལོ་ཙཱ་བ་ཆེན་པོ་སྐ་བ་དཔལ་བརྩེགས་ཀྱི་རྒྱུན་ལས་ཁྱུང་པོ་གཡུ་ཁྲིས་ཐིག་གི་ཆ་ཕྲ་མོས་ཞིབ་མོར་ཕྱེ་བ་ལ་མཁས་པར་རོས་པོས་ལྷན་ཐབས་དག་སྦྱོར་མཛད་པའི་གནས་རྣམས་ལ་བྱང་བར་བྱ་ཞིང་དེ་ཙམ་བློར་མ་ཆུད་ཀྱང་གཟུགས་བརྙན་རང་གི་ངོ་བོའི་སྒོ་ནས་མགོ་རི་དྭགས་ལྟར་མ་དཔྱངས་པ། དཔུང་བ་གྲུ་ཟུར་འཚམ་པ། ཟགས་མཆུ་མ་ལྷུང་བ། ཡར་འཐེན་གཞུང་འདྲོངས་པ། མར་འཐེན་ཕྲ་རྒྱས་ཕྱེད་པ། མིག་བུ་ཟུར་མ་དོད་པ། འདོགས་མགོ་ལུས་མཚུངས་པ་རྣམས་ལ་རིག་པ་གཞུར་བས་ཡི་གེ་ནི་བཟོ་གནས་སྤྲུལ་བའི་སྐུ་ཡིན་ཕྱིར་དེའི་བྱིན་རླབས་ཞུགས་ནས་མཁས་པའི་ཕུལ་དུ་ཕྱིན་པའི་གཏམ་རྒྱུད་ཀྱང་ཡོད་དེ་སྔོན་རིག་འབྱུང་གི་ཡུལ་གྲུར་གསུང་རབ་བཞེངས་པའི་སློབ་དཔོན་ཞིག་
ཡི་གེའི་འདུ་བྱེད་སྦྱོང་ཞིང་ཐོག་སྟེངས་ན་ཉལ་བའི་ཚེ། ཟླ་བ་ཉ་གང་བའི་དབུས་ནས་དབྱངས་གསལ་གྱི་ཡིག་འབྲུ་རྣམས་ཏ་ལ་ལ་ཐོན་ནས་རང་ལ་ཐིམ་པར་མཐོང་བས་ཡི་གེའི་ཆོས་ལ་ཤིན་ཏུ་མཁས་པར་གྱུར་པ་བཞིན་ནོ། །འདི་ལྟར་གཟབ་ཆེན་ལ་མཁས་པར་གྱུར་ན་སྨྱིག་གུའི་བདེ་བླག་ཀྱང་བྱང་བར་འགྱུར་བས། ལཙྪ་དང༌། ཝ་རྟུལ་དང༌། ཟངས་གླིང་དང༌། མ་རྐོ་ལ་དང༌། ཀསྨི་ར་ལ་སོགས་པའི་ཡིག་གཟུགས་རྣམ་པ་ཐ་དད་པ་ལའང་བློ་གསལ་བར་འགྱུར་བ་ཡིན་ནོ། །དེ་ལྟར་གྱུར་ནས་ཆོས་བཞིན་སྤྱོད་པའི་ཡན་ལག་ནངས་མ་རེ་བཞིན་མ་མཐང་བཀའ་བསྟན་བཅོས་ཀྱི་གཞུང་ཤོག་ལྡེབ་དང་ཤླཽཀ་གྲངས་ཡན་ཆད་འབྲི་བར་དམ་བཅའ་བྱས་པས་མིའི་ལུས་རྟེན་ལ་ཉིང་ལག་ཡོད་པ་དོན་ལྡན་དུ་འགྱུར་ཏེ་འདི་ལྟར་གླེགས་བམ་ཆུང་ངུ་ཞིག་བྲིས་ཀྱང་གནས་སྐབས་སུ་རང་ཉིད་ལ་ཕན་ཞིང༌། བརྒྱུད་ནས་དེ་དཀར་ཕྱོགས་པ་རྣམས་ཀྱིས་བསྲུང་བས་ལས་འཕྲོ་ཅན་གྱི་ལག་ཏུ་དོང་ནས་དོན་ཆེན་པོར་འགྱུར་བའང་མཐོང་ཆོས་སུ་གྱུར་པའི་ཕྱིར་རོ། །སྤྱིར་དགེ་བའི་བྱ་བ་ཐམས་ཅད་ལ་སྦྱོར་བ་སེམས་བསྐྱེད། དངོས་གཞི་ལ་བདེན་ཞེན་མེད་པ། རྗེས་བསྔོ་བ་སྨོན་ལམ་གྱིས་ཟིན་ན་ཐར་པ་ཆ་མཐུན་ཞེས་བྱ་བ་ངེས་ལེགས་ཀྱི་རྒྱུར་འགྱུར་ལ། དེས་མ་ཟིན་ན་བསོད་ནམས་ཆ་མཐུན་
ཞེས་བྱ་སྟེ་མངོན་མཐོའི་འབྲས་བུ་ལན་ཅིག་ཙམ་ཡིན་པས་དམ་པ་གསུམ་གྱིས་ཟིན་པ་ནི་འོག་མ་རྣམས་ལའང་འགྲེའོ།། །།གཉིས་པ་མཆོད་པ་ནི། ཕལ་པོ་ཆེ་ལས། འདས་པའི་སངས་རྒྱས་རྣམས་དང་ཕྱོགས་བཅུ་ཡི། །འཇིག་རྟེན་དག་ན་གང་བཞུགས་མཆོད་པར་འགྱུར། །ཞེས་པས། ཐུགས་ཟབ་ཞི་སྤྲོས་བྲལ་ཞི་བ་ཆེན་པོའི་དབྱིངས་སུ་མྱ་ངན་ལས་འདས་ཏེ་སྤྲོས་པ་དབྱིངས་སུ་ནུབ་པ་སངས་རྒྱས་ཆོས་ཀྱི་སྐུ་དང༌། དེའི་ས་བཅུ་དང༌། ལམ་ལྔ་འཕགས་པའི་སྤངས་རྟོགས་ཁྱད་པར་ཅན་བྱང་ཆུབ་ཕྱོགས་ཀྱི་ཆོས་རྣམས་ཀྱི་གཟུགས་བརྙན་དུ་འཕོས་པ་རྣམ་པ་ཐམས་ཅད་རྫོགས་པའི་མཆོད་སྡོང་དང་མཚན་དཔེའི་སྣང་བརྙན། འགོག་ལམ་གྱི་བདེན་པའི་སྣོད་གསུང་རབ་ཡན་ལག་བཅུ་གཉིས་ལ་སོགས་པའི་གླེགས་བམ། འཇིག་རྟེན་གྱི་ཁམས་མཐའ་ཀླས་མུ་མེད་པ་ན་ད་ལྟར་འཚོ་ཞིང་གཞེས་པའི་སངས་རྒྱས་རྣམས་དང༌། དེའི་སྲས་རིག་གྲོལ་གྱི་སྤོབས་པ་ཉིས་ལྡན་འཕགས་པའི་དགེ་འདུན་རྣམས་ནི་མཆོད་པའི་ཡུལ་རྨད་དུ་བྱུང་བ་ཉིད་དོ། །ཇི་ལྟར་མཆོད་ན་ཞི་བ་ལྷས། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར། །རྒྱུན་མི་འཆད་པར་འབབ་པར་ཤོག །ཅེས་སྨོན་པའི་ཡུལ་དུ་བྱས་པའང་ཕན་ཡོན་ཚད་མེད་ན་དངོས་སུ་གྲུབ་ན་ལྟ་ཅི་སྨོས། སྔོན་རྒྱལ་པོ་
མྱ་ངན་མེད་ཀྱིས་དེད་དཔོན་རྒྱ་མཚོར་བགྲོད་པའི་དོན་དུ་ཀླུ་རྣམས་ལ་ཐུབ་ཆོད་ཀྱི་སྤྲིང་ཡིག་བྱས་པས་དེ་རྣམས་ཁྲོས་ཏེ་དེད་དཔོན་རྣམས་ཤིན་ཏུ་ཉམ་ཐག་པར་བཅོས། སླར་དགེ་བའི་བཤེས་གཉེན་གྱི་ངག་ལ་མཉན་ཏེ་བསོད་ནམས་འཕེལ་བའི་ཕྱིར་དཀོན་མཆོག་ལ་མཆོད་པ་རྒྱ་ཆེན་པོ་ཡང་ཡང་བྱས། རྒྱུ་དེ་ལས་བསོད་ནམས་བརྟག་པའི་ཕྱིར་རང་གཟུགས་ནི་ཁྲི་ཁར་འགྱིང་ཞིང་ཀླུ་གཟུགས་ཐལ་མོ་སྦྱར་བ་བཟོས་ནས་ས་འོག་ཏུ་བཞག་པ་ན་གོ་ལྡོག་པ། ཁོ་ནར་གྱུར་ཅིང་མཐར་དཀོན་མཆོག་མཆོད་པའི་ལས་སྔར་བས་ཀྱང་རྒྱ་ཆེན་པོ་ལ་འབད་པས་འདོད་པ་བཞིན་དུ་གྱུར་པའི་ཚེ། ཀླུ་ལ་སྤྲིང་ཡིག་བྱས་པས་བསོད་ནམས་ལ་ལྷག་པར་ཡིད་ཆེས་པས། བསོད་ནམས་མེ་ཡིས་མི་འཚིག་ལ། །བསོད་ནམས་ཆུ་ཡིས་འཁྱེར་མི་འགྱུར། །ཞེས་པ་ལ་སོགས་པའི་ཚིགས་གཅད་བརྗོད་པས་མཚོན་ལ། དེ་བཞིན་དུ་བདག་ཅག་གིས་འབྱོར་པ་ཉུང་ངུའི་ཚེ་བཟའ་བཏུང་ལས་ཕྲི་སྟེ་བསམ་ཡས་ལ་སྟོང་མཆོད་བཤམས་པ་ནས་བཟུང་སླར་ཁྲི་མཆོད་ཐལ་བའི་ཚེ་མི་འདོད་བཞིན་དུ་འདུ་བ་རྒྱ་ཆེར་འཕེལ་བས་སྐུ་གསུང་ཐུགས་རྟེན་བཞེངས་པ་སོགས་བསྟན་པའི་བྱ་བ་རླབས་ཆེན་པོ་འགྲུབ་པ་ཡིན་ནོ། །ཇི་ལྟར་མཆོད་ཚུལ་ནི། ཐེག་པ་འོག་མའི་མཎྜལ་དང༌། ཡན་ལག་བདུན་པ་དང༌། རྣམ་
ལྔའི་པཱུ་ཛ་དང༌། ཙཱ་རུའི་ཞལ་ཟས་དང༌། རོལ་མོའི་བྱེ་བྲག་དང༌། གོས་ཟུང་དང༌། རྒྱན་དང༌། ཉེར་སྤྱོད་དང༌། ལུས་སྟན་དུ་དབུལ་བ་ལ་སོགས་པ་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་པའི་སྤྲིན་ཕུང་མཐའ་ཀླས་པའོ། །ཐེག་པ་གོང་མའི་ལུགས་མཆོད་པ་ཆེན་པོའི་ཡང་ཆེན་པོ་དབང་བསྐུར་བ་དང༌། སྦྱིན་སྲེག་དང༌། ཀུ་སུ་ལུ་དང་བཅས་པའི་ཕྱི་ནང་གི་ཚོགས་འཁོར་རྣམ་པ་གཉིས་དང༌། འོད་ཟེར་སྤྲོ་བསྡུ་དང༌། བདེ་སྟོང་གི་ཡེ་ཤེས་སྐྱེད་པར་བྱེད་པ་དང༌། མཆོད་པའི་ཕྱག་རྒྱ་ཆེན་པོ་ལ་སོགས་པས་བསྐལ་པ་མང་པོའི་ཚོགས་སྐད་ཅིག་ལ་བཟླུམས་པར་བྱེད་པའོ། །གསུམ་པ་སྦྱིན་པ་ལ་གཉིས་ཏེ་གཟུགས་ཅན་ལ་དམིགས་པ་དང༌། གཟུགས་ཅན་མ་ཡིན་པ་ལ་དམིགས་པའོ། །དང་པོ་ལ་གསུམ་ཏེ། ཆོས་དང༌། མི་འཇིགས་པ་དང༌། ཟང་ཟིང་གི་སྦྱིན་པའོ། །དང་པོ་ནི། སྐལ་པ་རབ་ཏུ་གྱུར་པ་རྣམས་ཀྱི་བགོ་སྐལ་ཏེ། གནས་སྐབས་ཀྱི་ཕན་བདེ་བསྒྲུབ་པ་ཙམ་མ་ཡིན་པར་མཐར་ཐུག་བྱང་གྲོལ་གྱི་གོ་འཕང་ལ་སྦྱོར་བའི་ཕྱིར་གདུལ་བྱའི་སྐལ་པ་དང་འཚམ་པའི་ཆོས་ཀྱི་སྦྱིན་པས་མངོན་མཐོ་དང་ངེས་ལེགས་ཀྱི་ལམ་ལ་བཀྲི་བ་སྟེ། རིགས་ལྔའི་དམ་ཚིག་ལས་ཀྱང༌། པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་རྣམས་བཤད་ཅེས་པ་ལྟར་
རོ། །གཉིས་པ་ནི། སྲོག་ལ་བབས་པས་མཚོན་འཇིགས་པ་རྣམ་པ་དུ་མས་སྐྲག་པ་རྣམས་ལ་བྱམས་པ་དང༌། སྙིང་རྗེ་དང༌། གཏོང་ཕོད་གསུམ་གྱིས་མི་འཇིགས་པའི་སྐྱབས་སྦྱིན་པའོ།། །།གསུམ་པ་ཟང་ཟིང་གི་སྦྱིན་པ་ལ་གསུམ་སྟེ། གཏོང་བ་དང༌། གཏོང་བ་ཆེན་པོ་དང༌། ཤིན་ཏུ་གཏོང་བའོ། །དང་པོ་ནི། དབུལ་ཕོངས་ཀྱིས་གདུང་བས་ཉེན་པ་རྣམས་ལ་སྦྱིན་པའི་ཚོགས་ཇེ་ཆེར་སྤེལ་བ་ལ་བརྩོན་པར་བྱ་སྟེ། སྔོན་རྒྱལ་པོ་གསེར་མདོག་ཅན་གྱི་ཡུལ་ཁམས་སུ་མུ་གེ་བྱུང་བའི་ཚེ་བང་མཛོད་ན་འབྲུ་བྲེ་གང་ལས་མེད་པ་རང་སངས་རྒྱས་ལ་ཕུལ་བས་དེའི་ཕན་ཡོན་གྱིས་ཡུལ་ལྗོངས་ཀྱི་མུ་གེ་ཞི་བ་དང༌། གཞན་ཡང་སྟོན་པའི་ཞལ་ནས། གང་དག་གཞན་ལ་བྱིན་པ་ནི་རང་གིའོ། །རང་ཉིད་ཀྱིས་བཟུང་བ་ནི་གཞན་གྱིའོ། །ཞེས་གསུངས་སོ། །གཉིས་པ་ནི། འདོད་པས་གདུང་བ་དག་ལ་བུ་དང༌། ཆུང་མ་དང༌། ཡུལ་ཁམས་གཏོང་བ་ལ་བསླབ་བོ། །གསུམ་པ་ནི། འཕགས་པ་རྣམས་ཀྱི་སྤྱོད་ཡུལ་ཏེ་མགོ་དང༌། མིག་དང༌། ཡན་ལག་གཏོང་བ་སྟེ་དངོས་སུ་མ་ནུས་ཀྱང་དམིགས་པས་ལུས་སྦྱིན་བྱ་བ་ལྟར་སྨོན་པའི་ཡུལ་དུ་བྱེད་པ་ནི་སྨོན་པ་སེམས་བསྐྱེད་དང་ཚུལ་མཐུན་ནོ། །གཉིས་པ་ནི། གདོན་དང་འབྱུང་པོ་ལ་ཆ་གསུམ་དང་
གླུད་རྫོངས། ཡི་དྭགས་ལ་ཆབ་གཏོར་ཏེ། །དེ་ལའང་གཟུགས་ལེགས་ཞེས་བྱ་བའི་གཟུངས་དང༌། ཡེ་ཤེས་སྐར་མདའི་སྙིང་པོ་དང༌། ཡི་དྭགས་མོ་ཁ་འབར་མ་དབུགས་ཕྱུང་བའི་གཏོར་ཆོག་དང༌། ཁ་ལས་མེ་འབར་མ་ལ་སྐྱབས་སྦྱིན་པའི་གཟུངས་དང༌། འཇུར་གེགས་ཞེས་བྱ་བའི་གཟུངས་རྣམས་ལས། ཁ་ལས་མེ་འབར་བའི་གཟུངས་ལས་མཚན་བཞི་བཤད་ཅིང༌། འགའ་ཞིག་སྤྱི་བོ་ལ་སོགས་པར་དེ་བཞིན་གཤེགས་པ་བཞི་པོ་སྒོམ་ཟེར་ཡང་བཀའ་དངོས་བསྟན་ལ་ནི་མཚན་བརྗོད་པའི་བྱིན་རླབས་དང་ཕན་ཡོན་ཙམ་ལས་མངོན་རྟོགས་དང་སྒོམ་ཡུལ་ཡང་མ་བཤད། དེ་བཞིན་དུ་མགྲོན་བཞིའི་ཐ་སྙད་ཀྱང་མ་གསུངས་པས་འདི་སྤྱིན་པ་རྐྱང་པ་ཡིན་ལ། དེའི་ཕྱིར་སོ་སོའི་འདོད་པས་སྦྱར་བའི་རིང་ལུགས་ཀྱི་གཏོར་མའི་ཆོ་ག་མི་ཤེས་པ་དག་གིས་ཀྱང༌། སམ་བྷ་ར་རྐྱང་པའམ། སུ་རུ་པ། རྒྱ་ཆེན་ཤུགས་ལྡན་དང༌། འཇུར་གེགས་ལ་སོགས་པའི་གཟུངས་དང་མཚན་བཞི་གཏོན་པའི་ཆུ་སྤྱིན་ཀྱང་བྱེད་རུང༌། དེ་བཞིན་དུ་ཟག་པ་ལུས་སྦྱིན་དང༌། འཕྲོག་མ་མ་བུ་ལ་ཆངས་བུ། དྲི་ཟ་ལ་གསུར་བསྔོ་སོགས་དང༌། བསྟན་བཅོས་ལ་གྲགས་པའི་ལྷ་བསངས། རྒྱགས་བརྔན། ཆབ་གཏོར༌། བརྒྱ་བཞི་ལ་སོགས་པ་མཆོད་སྦྱིན་གཉིས་ཀའི་མགྲོན་བསྡུས་
པ་རྣམས་ལའང་འབད་པས་བསོད་ནམས་དང་དགེ་བའི་ཆོས་སྡུད་ཅིང༌། སྐྱེ་བ་འདི་མ་བླངས་བྱ་བ་དང༌། ཕ་མར་མ་གྱུར་པའི་སེམས་ཅན་གཅིག་ཀྱང་མེད་པས། དེ་དག་གི་ཚེ་མཐོ་བས་བསྐྱབས་པ་དང༌། བར་པས་མཛའ་བ་དང༌། དམའ་བས་བཀུར་བ་དང༌། བཀོལ་བྱེད་བྱས་པ་དང༌། བུ་ལོན་འབྲེལ་ཆགས་པ་དང༌། ཤ་འཁོན་ལ་སོགས་ཡོད་པ་བྱང་ནས་ནང་དང་གནོད་པ་ལ་སོགས་པ་ཞི་ཞིང་བསམ་དོན་ཡིད་བཞིན་དུ་འགྲུབ་པས་ཕྱོགས་འདི་དག་ལ་སྒོ་ཀུན་ནས་འབད་པར་བྱ་ཞིང༌། དེ་བཞིན་དུ་ཆོས་ཀྱི་སྦྱིན་པ་སོ་སོ་ཐར་པའི་དངོས་བསྟན་སྡིག་པ་ཅི་ཡང་མི་བྱ་ཞིང་སོགས་སྦྱར་ལ། མི་འཇིགས་པའི་སྤྱིན་པའང་མི་རུང་བ་མ་ཡིན་ཏེ། ཞི་བ་ལྷས། མེ་ཏོག་ཆར་པ་སྤོས་ཆུ་དང་འདྲེས་འབབ་པ་ཡིས། །དམྱལ་བའི་མེ་མདག་ཆིལ་ཆིལ་གསོད་པ་མཐོང་གྱུར་ནས། །གློ་བུར་བདེ་བས་ཚིམ་པ་འདི་ཅི་སྙམ་པ་དང༌། སེམས་དམྱལ་རྣམས་ཀྱིས་ཕྱག་ན་པདྨོ་མཐོང་བར་ཤོག །ཅེས་པ་ལྟར། བྱང་ཆུབ་སེམས་དཔའ་བློ་ཆེན་རྣམས་ནི་དགེ་བའི་ཆོས་སྡུད་པ་ལ་མཁས་པས་འདུན་པའི་ཁྱད་པར་གྱིས་དེ་དེ་བཞིན་དུ་འགྲུབ་པའི་ཕྱིར་རོ། དེ་སྐད་དུ། རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་དུས་ནི་རྟག་ཏུ་གཏང༌། །
ཞེས་སོ། །དེ་ལྟར་མཆོད་པའི་རང་བཞིན་ཡང་ཕྱིན་དྲུག་གི་ལམ་དུ་བསྡུ་ན་སྤྱིན་པའི་ཕ་རོལ་ཏུ་ཕྱིན་པ་ཉིད་ཡིན་ཏེ། དཀོན་མཆོག་རྗེས་དྲན་ལས་ཀུན་ཏུ་ཡང་སྤྱིན་པའི་གནས་སུ་གྱུར་པ་ཆེན་པོའི་ཞེས་པས་གསལ་ལོ། །ཡང་བར་སྲིད་ལ་ཟས་གསུར་མི་ཐོབ་ཟེར་བའང་རང་གཞན་གྱི་དགེ་བའི་གེགས་ཡིན་ཏེ། སྔོན་བྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་ལྡན། །རིགས་མཐུན་ལྷ་མིག་དག་པས་མཐོང༌། །མི་ལྡོག་དེ་ནི་དྲི་ཟའོ། །ཞེས་པས་གསལ་ལ་མི་འདོད་ན་དྲི་ཟ་ཉེ་བར་འཁོར་ཞེས་པའི་མིང་དོན་ཡང་བརྫུན་པར་འགྱུར་ལ། ལར་དཀོན་བརྩེགས་ལས། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་པ་ལ་དྲན་པ་ཉེ་བར་མ་གཞག་ན་ཡི་དྭགས་མ་གཏོགས་རིགས་དྲུག་སྙིང་རྗེའི་མགྲོན་ལ་བསྔོ་བའང་ངོ་མཚར་གྱི་གནས་སོ།། །།བཞི་པ་ཉན་པ་ནི། རང་སངས་རྒྱས་ལྟར་ལམ་ལ་རང་དགར་འཇུག་ཅིང་དེའི་རྟེན་འབྲེལ་ལས་གཞན་ལ་ཕན་པ་དང་བྲལ་བ་མ་ཡིན་པར་དགེ་བའི་བཤེས་བཉེན་ལ་བརྟེན་ནས་ཆོས་ཉན་ཞིང་རང་གིས་ཐོས་པ་གཞན་ལ་སྒྲོགས་པས་འཁོར་ལོ་དང་པོའི་གདུལ་བྱ་ལ་ཐོས་སྒྲོག་གམ་ཉན་ཐོས་ཞེས་གྲགས་པ་ལྟར། ཐེག་པ་ཆེ་ཆུང་གི་ཆོས་ཐམས་ཅད་དགེ་བའི་བཤེས་གཉེན་ལ་བརྟེན་ནས་ཉན་
དགོས་པ་ཡིན་ཏེ་སྡུད་པ་ལས། སློབ་མ་བཟང་པོ་བླ་མར་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ཞེས་སོ། །དེ་ལ་ཇི་ལྟར་ཉན་ན། སྣོད་ཀྱི་སྐྱོན། ཁ་བུབ། ཞབས་རྡོལ། དུག་ཅན་ལྟ་བུ་གསུམ་དང༌། དེ་བཞིན་དུ། དྲི་མ་དྲུག་བསལ་བར་བྱ་སྟེ། རྣམ་བཤད་རིག་པ་ལས། ང་རྒྱལ་དང་ནི་མ་དད་དང༌། །དོན་དུ་གཉེར་བ་མེད་ཉིད་དང༌། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བ་ཉན་པའི་དྲི་མ་ཡིན། །ཞེས་རིགས་གཟུགས་དང་དཔལ་འབྱོར་གྱིས་ཁེངས་པའི་ང་རྒྱལ་དང༌། བླ་མ་མཉམ་འགྲོགས་ཀྱིས་མ་དད་པ། ཆོས་ཀྱི་ཚིག་དོན་ལ་དོན་གཉེར་མེད་པ། དབང་ཤེས་ཕྱི་རོལ་དུ་གཡེང་བ། ལམ་བདེན་ལ་ཁྱད་གསོད་ཀྱི་ཡིད་ནང་དུ་སྡུད་པ་རྣམས་ཀྱི་གཉེན་པོར་སྡུད་པ་ལས། དགའ་དང་གུས་དང་དད་པའི་མཆོག་ནི་ཉེར་གཞག་སྟེ། །སྒྲིབ་པ་ཉོན་མོངས་བསལ་ནས་དྲི་མ་ལས་འདས་པ། །འགྲོ་དོན་མངོན་ཞུགས་དེས་པའི་ཤེས་རབ་ཕ་རོལ་ཕྱིན། །གང་ལ་དཔའ་རྣམས་སྤྱོད་པ་དེ་ནི་མཉན་པར་གྱིས། །ཞེས་པ་ལ་དྲན་པ་ཉེ་བར་གཞག་ཅིང༌། སྡོང་པོ་བཀོད་པ་ལས་གསུངས་པ་ལྟར་བླ་མ་ལ་སྨན་པ། ཆོས་ལ་སྨན། རང་ཉིད་ལ་ནད་པ། ནན་ཏན་ལ་ནད་ཉེ་བར་འཚོ་བ་སྟེ་འདུ་ཤེས་
བཞི་བསྐྱེད་ནས་ཉན་པར་བྱ་སྟེ། དེ་ཡང་སློབ་དཔོན་གྱིས་གསུངས་པའི་ཆོས་རྣམས་ཨཱ་ལི་ཀཱ་ལིའི་རྣམ་པས་རང་ཉིད་འཕགས་པ་འཇམ་དཔལ་དང་རྡོ་རྗེ་རྣོན་པོ་སྒྲོལ་མ་ལ་སོགས་པར་གསལ་བའི་སྙིང་ནང་དུ་ཐིམ་པར་བསམ་པར་གནད་ཡིན་ལ། དེ་ལྟར་ཉན་པས་ཆོས་ཐོས་པའི་ཕན་ཡོན་ནི་ཚད་དང་མུ་མེད་དེ། རྒྱལ་བ་ཀློང་གིས། ཆོས་རྔ་སྒྲོགས་པའི་སྒྲ་ཐོས་སེམས་ཅན་ཡང༌། །ངན་སོང་རྣམ་གྲོལ་ཉན་རྣམས་སྨོས་ཅི་དགོས། །ཞེས་གསུངས་པ་ལྟར་རང་གི་ཤེས་རྒྱུད་ཀྱི་སྒྲིབ་པ་བསྲབས་པ་དང༌། བླང་དོར་ནོར་བ་ལ་འགྱོད་པ་སྐྱེ་བ་དང༌། སྐྱོ་ཤས་དང་ངེས་འབྱུང་འདུ་བྱེད་པ་དང། བདེན་པ་གཉིས་ཀྱི་ལམ་ཤེས་པ་དང༌། རང་རྒྱུད་ལ་ཐར་པ་དང་རྣམ་མཁྱེན་གྱི་ས་བོན་ཐེབས་པ་དང༌། བར་དོར་ཡང་དེ་དག་བློ་ལ་འཆར་བ་སྟེ། འདི་ལྟར་གནོད་སྦྱིན་འབྲོག་གནས་དང༌། བ་སྤུ་ཁབ་དུག་ལ་སོགས་པའི་གདོན་གྱི་སྡེ་ཚན་དང༌། རྒྱལ་བོ་མྱ་ངན་མེད་དང༌། མ་སྐྱེས་དགྲ་དང༌། སོར་མོའི་ཕྲེང་བ་ཅན་ལྟ་བུ་གཏུམ་པོ་གཟུ་ལུམས་ཅན་ཡང་དམ་པའི་ཆོས་ཐོས་པ་ལ་བརྟེན་ནས་ཉེས་སྤྱོད་རླབས་པོ་ཆེ་ལས་ལྡོག་ཅིང༌། ཐར་བའི་ལམ་སྲོལ་ལ་ཕྱོགས་པ་ཡིན་ལ། ཡང་ལ་ལ་ནི་ཕུན་སུམ་ཚོགས་པ་ལྔའི་གནས་སྐབས་རང་གི་མདུན་སར་ཚོགས་བཞིན་དུ། ངས་ནི་ཆོས་དེ་སྔར་ལན་ཅིག་ཐོས་
ཀྱི་ད་ནི་མི་དགོས་སོ་ཞེས་སྨྲ་བ་གཞན་ལ་བཙོང་སྒོ་དྲིན་ན་ནི་སྔོན་ཆད་ཐོས་པ་དེས་ཆོག་གོ་སྙམ་པའི་བལྟ་བ་ཡིད་ལ་བཞག་པ་ཙམ་ལས་ཆོས་དེའི་ཚིག་དོན་གྱི་ཆ་རང་གི་བློ་ལ་ཆུབ་མ་ཆུབ་ཀྱི་བསམ་ཤེས་མེད་ཅིག་ཐོས་པའི་ཕན་ཡོན་ལའང་རྒྱུ་འབྲས་ཆད་པར་བལྟ་བའི་མངོན་རྟོགས་ཅན་ནོ། །འདི་ལྟར་སྒྲ་དང༌། ཚད་མ་དང༌། བཟོ་གནས་ལ་སོགས་པ་ཕྱི་ནང་ཐུན་མོང་གི་བསླབ་པའི་ཡོན་ཏན་གྱི་རྣམ་པ་རྒྱ་ཆེན་པོ་ཤེས་པ་ལས་ཆོས་ཐོས་པ་དགའ་ཞིང་ཁེ་ཆེ་བ་ཡིན་ཏེ་སྐྱེས་རབས་ལས། རྒྱལ་བུ་གཞོན་ནུ་ཆོས་འཆོལ་ཆོས་ཉན་པ་འབའ་ཞིག་ཡིད་ལ་དུང་བས་ཆོས་ཀྱི་ཡོན་དུ་གོས་རྒྱན་རིན་ཐང་བྲལ་བ་ཉིད་སྟེར་བའི་གཏམ་ཐོས་པས་སོ་སོའི་སྐྱེ་བོ་འཆིང་བ་མཐའ་དག་གིས་བཅིངས་པ་ཞིག་རྙེད་པ་ལ་བརྐམ་ཆགས་ཆེན་པོ་སྐྱེས་ནས་ཅི་ཡང་མི་ཤེས་བཞིན་དུ་དཀོན་མཆོག་གི་མཚན་སྒྲ་ཡོད་པའི་ཚིགས་སུ་བཅད་པ་ཤློ་ཀ་གཅིག་གཞན་ལས་བསླབས་ཏེ་རྒྱལ་བུ་ལ་བདག་ཀྱང་ཆོས་སྟོན་པའི་སློབ་དཔོན་ནོ་ཞེས་བསྙད་པས། དེས་ཅི་ཡང་མི་ཤེས་པའི་མཚན་ཉིད་རིག་ཀྱང༌། ཚིགས་སུ་བཅད་པ་དེའི་ཁོང་ན་དཀོན་མཆོག་གི་མཚན་སྒྲ་ཡོད་པ་ལ་དད་པ་བླ་ལྷག་ཏུ་སྐྱེས་ནས་བླུན་པོ་དེ་ལ་ཤླཽ་ཀ་གཅིག་ཉན་ཞིང་དེའི་ཆོས་ཡོན་དུ་རང་གི་ལུས་ཀྱང་གཡང་ས་ཆེན་པོར་བཏང་བ་ཡིན་ན་དགེ་
བའི་བཤེས་གཉེན་དང་དགེ་བའི་གྲོགས་པོ་ལ་བརྟེན་ནས་རྣམ་པ་ཐམས་ཅད་དུ་ཆོས་ཉན་ཞིང༌། ཐ་ན་རང་ཉིད་ལས་བློ་གྲོས་ཅུང་ཟད་ལྷག་པ་ཡང་བཤེས་གཉེན་དུ་བཟུང་ནས་ཆོས་ཉན་པ་ལ་འབད་པར་བྱ་སྟེ་སྐྱེས་རབས་ལས། མེ་ཚོགས་སྤུ་གྲིའི་སོ་ཡང་བརྒལ་ནས་ནི། །འཆི་མཐར་ཐུག་གི་བར་དུ་དམ་ཆོས་བཙལ། །ཞེས་སོ།། །།ལྔ་པ་ཀློག་པ་ནི། དམ་ཆོས་དཀོན་མཆོག་གི་རང་བཞིན་འགོག་ལམ་གྱི་བདེན་པའི་ངོ་བོ་ནི་ལུང་དང་རྟོགས་པའི་བསྟན་པ་རྣམ་གཉིས་ཡིན་ལ། དེའི་གཟུགས་བརྙན་ནི་ཡི་གེའི་རྣམ་པར་གནས་པས་དེ་འདུས་པའི་གླེགས་བམ་ནི་ལུང་གི་ཆོས་གསུང་རབ་ཡན་ལག་བཅུ་གཉིས་ཀྱི་མཛོད་ཁང་ཡིན་པས་དེའི་སྒྲ་དང་ཚིག་གིས་བསླངས་པར་བྱས་པས་བདག་ཅག་གི་སྟོན་པ་འཚོ་ཞིང་མ་གཞེས་ཀྱང་གསུང་དངོས་བསྟན་ད་ལྟ་ཐོས་སུ་བྱར་ཡོད་ལ་དེའི་བདག་པོའི་རྐྱེན་ནི་སྐྱེས་བུའི་རྣམ་རིག་དང་དབང་ཤེས་ཚོགས་པ་ལས་བྱུང་བའི་ཚུལ། འཇམ་དཔལ་སྒྱུ་འཕྲུལ་ལས། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཅེས་པ་ལྟར་རླུང་སེམས་གཉིས་འདུས་ཀྱི་ཁོང་ནས་སྐྱེ་བའི་
ཡི་གེའི་ཕྱི་མོ་ཨ་དེ་ཉིད་ལྕེ་རྩེ་སོ་རྐན་མཆུ་དང་བཅས་པའི་གནས་ཐ་དད་པར་ཚོགས་པ་ལས་དབྱངས་དང་གསལ་བྱེད་ཀྱི་སྒྲར་སྐྱེ་ཞིང༌། དེ་ཡང་ཡི་གེ་འདུས་པ་ལས་མིང༌། མིང་འདུས་པ་ལས་ཚིག །ཚིག་འདུས་པ་ལས་དོན་འབྱུང་བས་ལམ་བདེན་འདུས་བྱས་པ་ཐམས་ཅད་ཀྱང་ཡི་གེའི་རྐྱེན་ལས་ཤེས་ཤིང༌། དེའི་བྱིན་རླབས་ལས་གསུང་སྒྲ་ཚིག་རང་ཚན་པ་ལས་འདས་པའི་རྟོགས་པའི་དམ་ཆོས་སྐྱེས་བུའི་རྣམ་རིག་ལ་འཕོས་ནས་ཕུང་པོ་ལྔ་དང་ཚོགས་བརྒྱད་ཀྱི་དྲི་མ་དག་པའི་སངས་རྒྱས་སུ་འགྲུབ་པའི་དགོས་པའི་ནང་ནས་ཀྱང་ཉིང་དགོས་ཡིན་ལ། དེ་ཙམ་གྱི་དོན་བློ་ལ་མ་ཆུད་ཀྱང་གླེགས་བམ་དེ་ཉིད་དམ་ཆོས་དཀོན་མཆོག་ཐམས་ཅད་འདུས་པའི་ངོ་བོར་མོས་པ་དང༌། བསྟི་སྟང་བླ་ལྷག་ཏུ་བསྐྱེད་ནས་ཁྲིའི་ཁར་དར་རས་གཙང་མའི་སྟན་དང་བཅས་བཞུགས་སུ་གསོལ་བ་ལ་ཉེར་སྤྱོད་བཤམ། རང་ཉིད་ཁྲུས་དང་གཙང་སྦྲ་ལ་གནས་པས་སྐྱབས་སེམས་དང་དཀོན་མཆོག་རྗེས་དྲན། ཡན་ལག་བདུན་པ་སོགས་སྔོན་དུ་འགྲོ་བས། ན་མོ་ལྷ་ཡི་སྐད་དང་ཀླུ་དང་གནོད་སྦྱིན་སྐད། །ཅེས་སོགས་པས་མཚམས་སྦྱར་ཞིང་དེ་དག་ཀྱང་ཆོས་ཉན་པར་བསམས་ལ། ཚིག་མ་ཟློས་ཤིང་མ་ཆད་པ། མགྱོགས་
བུལ་འཚམས་པ། སྒྲ་དག་པ། ངག་སྙན་པར་བཀླགས་པའི་ཕན་ཡོན་ནི་ཚད་མེད་དེ་ཤེར་ཕྱིན་ལས། གང་གིས་ཆོས་ཀྱི་རྣམ་གྲངས་འདི་ཐོས་ནས་མི་སྤང་ན་དེ་ཉིད་གཞི་དེ་ལས་བསོད་ནམས་ཆེས་དཔག་ཏུ་མེད་པ་བསྐྱེད་ན། གང་གིས་ཡི་གེར་བྲིས་ནས་ལེན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། གཞན་དག་ལ་རྒྱ་ཆེར་ཡང་དག་པར་རབ་ཏུ་སྟོན་པ་ལྟ་ཅི་སྨོས། ཡང་རབ་འབྱོར་ཆོས་ཀྱི་རྣམ་གྲངས་འདི་ནི་བསམ་གྱིས་མི་ཁྱབ་ཅིང་མཚུངས་པ་མེད་དེ། འདིའི་རྣམ་པར་སྨིན་པ་ཡང་བསམ་གྱིས་མི་ཁྱབ་པ་ཉིད་དུ་རིག་པར་བྱའོ། །ཞེས་དང་གང་ལ་ལ་ཞིག་གིས་ཆོས་ཀྱི་རྣམ་གྲངས་འདི་ཡི་གེར་འབྲི་འམ། འབྲིར་འཇུག་གམ། ཀློག་གམ། ཉན་ནམ། འཛིན་ནམ། ཞེས་པས་གཞན་རྣམས་ཀྱི་ཕན་ཡོན་ཀྱང་རིག་པར་འགྱུར་ལ། དེ་ལྟར་མོད་ཀྱི་ཀློག་པ་པོའི་ཀུན་སློང་བཟང་ངན་ལས་ཀྱང་གྲུབ་འབྲས་ཐ་དད་དུ་འཆར་ཏེ། སྔོན་ཡུལ་མཐའ་ཁོབ་པའི་ཁྱིམ་པ་ཅིག་གིས་ཐོག་སྟེངས་སུ་མཆོད་གནས་བཞག །ཁོ་རང་རི་ལ་སོང་ཙ་ན་མཆོད་གནས་པའི་སྔུན་ན་ཉན་ཐོས་དགྲ་བཅོམ་པའི་ཆ་བྱད་ཅན་མང་པོ་འདུས་པར་མཐོང༌། ཡིད་མ་ཆེས་ནས་
ཁྱིམ་དུ་ལོག་ཙ་ན་དེ་དག་གཅིག་ཀྱང་མི་སྣང༌། ཁོ་ཆོས་ལ་ཡིད་ཆེས་ཀྱི་དད་པ་ཐོབ་སྟེ་ཆོས་ཡོན་ཏུ་རྟ་གཅིག་བྱིན། སླར་མཆོད་གནས་པ་གཞན་ཅིག་བོས་པ་ཁོའི་བསམས་པ་ལང་ལ་ཡང་རྟ་གཅིག་འོང་ཐང་སྙམ་པ་ཡིད་ལ་རྒྱུན་ཆགས་སུ་སྐྱེས་པས་ཡོན་བདག་གིས་རི་ནས་བལྟས་ཙ་ན་ཁོའི་སྔུན་ན་རྟ་ཆེན་པོ་གཅིག་འདུག་པ་མཐོང་བ་ཡིན་པས་བསམ་པ་རྣམ་པར་དག་པ་ནི་ཤིན་ཏུ་གལ་ཆེ་ལ། བསམ་པ་དག་པས་གསུང་རབ་བཀླགས་ན་རང་གཞན་གཉིས་ཀའི་རྒྱུད་ལ་ཕན། སྡིག་པ་འདག་སྟོབས་ཆེ། རྐྱེན་ངན་དག་བར་ཆད་ཞི། དཀར་ཕྱོགས་ཀྱི་ལྷས་སྐྱོབ། མི་མ་ཡིན་རྣམས་ཀྱིས་ཐོས་པས་དེའི་རྒྱུད་ཀྱང་གྲོལ། རང་གི་བློ་ལའང་ཐོས་པ་མང་པོ་འཛིན། འཁོར་བ་ལ་ངེས་འབྱུང་སྐྱེ། དཀོན་མཆོག་ལ་དད་པ་སྐྱེ། དགེ་བའི་བཤེས་གཉེན་བསྟེན་པ་དང་ཆོས་ལམ་ལ་འཇུག་པའི་རྒྱུ་བྱེད། ནང་གདོན་དང་མེ་ཆུ་གཅན་གཟན་གནོད་པ་ཞི་བ་ལ་སོགས་པའི་ཕན་ཡོན་ཟད་མི་ཤེས་པ་ཡོད་དོ།། །།དྲུག་པ་འཛིན་པ་ནི་མི་བརྗེད་པའི་གཟུངས་ཀྱི་ངོ་བོ་ཉིད་ཡིན་ཏེ། གླེགས་བམ་བསྡུ་རྩོལ་དང༌། དབང་པོའི་གཞན་དབང༌། ཉིན་ནུབ་དང༌། འགྲོ་འདུག་གཞིས་བྱེས་ཀྱི་ཁྱད་པར་ལ་མི་ལྟོས་པར། རིག་
པའི་རྩལ་གྱིས་བརྗོད་བྱའི་རླུངས་སྐྱོད་པ་ལས་ཆགས་ཐོགས་མེད་པར་གདོན་ནུས་པས་གླེགས་བམ་དང་བྲལ་བའི་ཚེ་དགེ་རྩ་ཟད་པར་ཡང་མི་འགྱུར་ལ། ཁྱད་པར་རྗོད་བྱེད་ཀྱི་ཚིག་ནང་གི་རླུང་སེམས་ལ་འདྲེས་པས་བྱིན་རླབས་འཇུག་ཅིང༌། བརྗོད་བྱ་དོན་གྱི་གོ་བ་ཡང་སྐྱེད་སླ་ལ། ཀུན་ཆུབ་པར་བྱས་པས་མི་བརྗེད་པའི་གཟུངས་ཐོབ་པའི་ཚུལ། བཀའ་བསྡུ་དང་པོའི་ཚེ་གསུང་རབ་རྣམས་ཡི་གེའི་ཕྱི་མོར་མ་འཁོད་ཀྱང༌། དགྲ་བཅོམ་པ་རྣམས་ཀྱིས་སྡེ་སྣོད་གསུམ་བསྡུ་བ་ན། འདི་སྐད་བདག་གིས་ཐོས་པའི་དུས་གཅིག་ན་ཞེས་ཤར་གྱིས་བཤད་ཆོག་པ་བྱུང་བ་ཡིན། དེ་ཡང་ཚིག་དོན་གཉིས་ཀའི་ཆ་བློ་ལ་འཛུལ་བ་ནི། འཕགས་པའི་སྤངས་རྟོགས་ཁྱད་པར་ཅན་བརྙེས་པ་རྣམས་ཀྱིས་སྤྱོད་ཡུལ་ཡིན་ཡང༌། ཚིག་གི་ཆ་རྣམས་བློ་ལ་ཞུགས་པས་ཀྱང༌། དེའི་རྒྱུད་ལ་གོ་མྱོང་ཁྱད་པར་ཅན་འབྱོར་པས། ཉིན་མཚན་ཐུན་མཚམས་ཀུན་ཏུ་ཤར་གྱིས་བཏོན་ཆོག་པ་འཛིན་པའམ། བློ་ལ་ཆུབ་པར་བྱེད་པ་འདི་ཕན་ཡོན་དཔག་ཏུ་མེད་པ་ཡིན་ནོ།། །།བདུན་པ་འཆད་པ་ནི། གཞན་རྒྱུད་ལ་དགེ་བའི་ལས་ལམ་དང་ཐར་པའི་ས་བོན་འདུ་བྱེད་ཅིང༌། རང་ཉིད་ལའང་ཁ་ན་མ་ཐོ་བས་འཕོག་པའི་གསོ་སྦྱོང་དུ་
འགྱུར་ལ། དེ་ཡང་སྡེ་སྣོད་ཤེས་པའི་བློ་མཆོག་རྣམས་ཀྱིས་ནི་རྣམ་བཤད་རིག་པ་ལས། མདོ་དོན་སྨྲ་བར་འདོད་རྣམས་ལ། །མན་ངག་ཅུང་ཞིག་སྦྱིན་པར་བྱ། །དེ་ལ་མན་ངག་འདི་ཡིན་ཏེ། །དགོས་པ་བསྡུས་པའི་དོན་བཅས་དང༌། །བརྒལ་ལན་བཅས་དང་མཚམས་སྦྱོར་བཅས། །ཚིག་དོན་བཅས་ཏེ་བསྙད་པར་བྱ། །ཞེས་པ་ལྟར་བཤད་བྱའི་ཆོས་དེའི་གཞུང་ལུས་སུ་བཀྲམ། དགོས་པ་དོན་དུ་བསྡུ། བརྒལ་ལན་བཅས་དང་མཚམས་སྦྱོར་བཅས། ཚིག་དོན་བཅས་ཏེ་བསྙད་པར་བྱ། ཞེས་པ་ལྟར་བཤད་བྱའི་ཆོས་དེའི་གཞུང་ལུས་བཀྲམ། དགོས་པ་དོན་དུ་བསྡུ། བརྒལ་ལན་གྱིས་ལོག་རྟོག་བསལ། མཚམས་སྦྱོར་གྱིས་འབྲེལ་སྦྱར། ཚིག་དོན་དཔྱད་པ་གསུམ་གྱིས་བསྒྲུབ་ཅིང་དེ་ཡང་དྲང་དོན་དང་ངེས་དོན། དགོངས་པ་ཅན་དང་དགོངས་མིན་ཏེ་མདོའི་ཚུལ་བཞི་དང༌། སྔགས་ལ་དེའི་སྟེང་དུ་སྒྲ་ཇི་བཞིན་དང༌། ཇི་བཞིན་མ་ཡིན་པ་བསྣན་པའི་མཐའ་དྲུག་གིས་ལེགས་པར་གཞལ་ནས་བཤད་ཅིང༌། དེ་ལྟར་བཤད་པའང་ཐེག་པ་ཆེ་ཆུང་ངམ། མདོ་སྔགས་སོ་སོའི་ཕྱོགས་ཀྱི་ཁ་འཛིན་པ་དང༌། རང་རང་གི་འདོད་ཞེན་གྱི་ལྟ་བ་དང་གྲུབ་མཐའ་ཡིད་ལ་བཞག་སྟེ་ཆོས་ཀྱི་ཚིག་དོན་རླབས་པོ་ཆེ་ལ་སྐྲག་པ་སྐྱེས་ནས་དགག་བསྒྲུབ་འདོད་རྒྱལ་དུ་སྨྲ་བ་ནི་ཆོས་ལ་སྡང་བའི་ཉེས་དམིགས་མི་བཟད་པ་ཡིན་ཏེ། ཕ་མ་དགྲ་
བཅོམ་གསོད་གང་མཆོག་ཚོགས་འབྱེད་པའི་མི། དེ་ཡང་ཆོས་ཉིད་ངེས་པར་སེམས་པས་ཐར་འགྱུར་ཏེ། །གང་ཞིག་ཆོས་ལ་སྡང་བ་དེ་ལ་ཐར་པ་ག་ལ་ཡོད། །ཅེས་གསུངས་པ་ལ་ལེགས་པར་བསམ་ཞིང༌། རྩ་ལྟུང་དྲུག་པའི་ཉེས་དམིགས་ཀྱང་དྲན་པར་བྱས་ལ། ཅིའི་ཕྱིར་ན། ཆོས་རབ་ཏུ་རྣམ་འབྱེད་ཀྱི་བློ་གྲོས་སྲིད་ཞིའི་ཕ་རོལ་ཏུ་སོན་པས་དགུ་པ་ལེགས་པའི་བློ་གྲོས་ཀྱི་སྤྱོད་ཡུལ་ཡིན་ན། རྟོག་གེའི་དཔྱད་བཟོད་ནི་ཤེས་བྱ་ཤེས་བྱེད་ཀྱི་རྗེས་སུ་འགྲོ་བའི་ཕྱིར་རོ། །དེ་བས་ན་བྱང་ཆུབ་ཀྱི་སེམས་གཉིས་ནི་ཀུན་སློང་གྱི་ན་དང་རྫས་འགལ་བ་ཡིན་པས་དེ་ལྟ་བུ་དང་ལྡན་པའི་སྐྱེས་བུ་ཆེན་པོ་རྣམས་ཀྱིས་ནི་དངོས་སུ་འདོམས་པའི་ཡི་གེའི་ཕྱི་མོར་སྤེལ་བའི་བསྟན་བཅོས་རྣམས་ནི་འདོད་ཞེན་གྱིས་མ་བསླད་ཅིང་འཆོས་སྐྱོབ་གཉིས་ཀྱི་ཡོན་ཏན་དང་ལྡན་པས། ཐར་པ་ཐོབ་པའི་ལམ་དང་རྗེས་འབྲེལ་བ། །དེ་ཡང་དྲང་སྲོང་བཀའ་བཞིན་སྤྱི་བོས་བླང༌། །ཞེས་པ་ལྟར་བསྟན་པའི་སྲོག་ཤིང་ཉིད་དུ་བཟུང་ངོ༌། །གདམས་ཕྲན་འཆད་པ་དག་གིས་ཀྱང༌། །གང་ཞིག་བཤད་བྱའི་ཆོས་དེ་རང་ཉིད་ཀྱིས་ཐོས་ཤིང་བློ་ལ་ལེགས་པར་བྱང་བ་དང༌། ཐ་ནའང་བསམ་བྱུང་གི་ཤེས་རབ་རྣམ་པར་དག་པས་གཞན་ལ་ཚིག་
དོན་མི་འཛོལ་ཙམ་འདོམས་པ་ཞིག་དགོས་པ་ནི་ངེས་པར་གཅེས་ལ་དེ་ལྟར་འདོམས་པའི་ནུས་པ་མེད་བཞིན་དུ། རྫིང་ན་མ་མཆིས་པ་ཝ་ནང་དུ་འདྲེན་པའི་རྣམ་ཐར་དང༌། ཁྱད་པར་དུ་བཤད་བྱའི་ཆོས་དེ་གཞན་རྒྱུད་ལ་སྦྱར་བའི་དོན་གཉེར་བཏང་སྙོམས་སུ་བོར་ནས། རང་གི་གནས་ཁང་དང་གདན་ཁྲི་ལ་བྱི་དོར། རྒྱན་གོས་ལ་བསྟི་སྟང་གཟབ་ཅིང་ཆོས་དེ་ལུང་ཀློག་པ་ལྟ་བུའམ། གཞན་ལ་འཕྲིན་བརྒྱུད་དུ་བྱས་ནས་སློབ་མའི་རྒྱུད་ལ་ཚིག་དོན་གཉིས་པའི་ཆ་ནས་གོ་བ་ཅུང་ཟད་ཀྱང་མེད་པ་ནི་དམ་པའི་རྣམ་ཐར་མ་ཡིན་ཏེ། ཤེར་ཕྱིན་ལས། ཆོས་ཉན་པ་ནི་ཟང་ཟིང་ཅུང་ཟད་ཀྱི་ཕྱིར། དྲི་བར་འདོད། ཀློག་པར་འདོད༌། ལུང་དབོག་པར་འདོད། ཁ་ཏོན་བྱ་བར་འདོད། སྒོམ་པ་དང་ཉན་པར་འདོད། ཆོས་སྨྲ་བ་ནི་ཟང་ཟིང་ཅུང་ཟད་ཀྱི་ཕྱིར་དེ་ལྟར་མི་འདོད་པ་ནི་བདུད་ཀྱི་ལས་སུ་རིག་པར་བྱའོ་ཞེས་པས་རྙེད་པ་འབའ་ཞིག་ལ་བསམ་པ་ཡང་བཟང་པོ་མ་ཡིན་ནོ། །གང་ཟག་དང་པོའི་ལས་ཅན་དང༌། རྣམ་པར་ཤེས་པ། ལྐོག་གྱུར་ཅན། གདུལ་བར་དཀའ་ཞིང་སྦྱོང་བར་དཀའ། དེ་ལ་སྐྱོ་དང་སུན་མི་བྱ། །ཡང་ཡང་བཤད་ཅིང་ཡང་ཡང་དྲིས། །དཔེ་ལ་བརྟེན་ནས་དོན་ལ་སྦྱོར། །ཆོས་འབྱུང་དེབ་ཐེར་
རྣམ་ཐར་དང༌། །ཐ་ན་སྒྲུང་རྒྱུད་ཡན་ཆད་ཀྱིས། །གོ་བ་བསྐྱེད་པའི་ཐབས་ལ་འབད། །དེ་ལྟར་བློ་གྲོས་མཆོག་དམན་ཇི་ལྟ་བུས་ཆོས་འཆད་པའི་ཚེ་ཡང་ཐོག་མར་བློ་གྲོས་རྒྱ་མཚོས་ཞུས་པའི་མདོ་ལས་གསུངས་པའི་བདུད་ཚར་གཅོད་པའི་རིག་སྔགས་ལན་བདུན་འདོན་ཞིང༌། འཆད་བྱའི་ཆོས་མདོ་རྒྱུད་གང་ཡིན་ཡང་རང་ཉིད་དེ་དང་དེའི་སྟོན་པའམ། སྡུད་པ་པོར་གསལ་བཏབ་ནས་བྱང་ཆུབ་ཀྱི་སེམས་དང་ལྡན་པས་བཤད་ཅིང༌། ཁྱད་པར་སྔགས་ཀྱི་དབང་བསྐུར་བ་སོགས་པའི་ཚེ་བགེགས་བསྐྲད་དང་བསྐྱེད་རིམ་ལ་ནན་ཏན་མ་བྱས་ན་སྔོན་སློབ་དཔོན་ཞིག་གིས་དབང་བསྐུར་བའི་སར་སྐྱེར་སྒང་པས་རྨི་ལམ་བཟུང་སྟེ་བྱོན་པས་གདོན་ཆེན་པོ་གཅིག་གིས་སློབ་དཔོན་ཁྲི་ཁ་ནས་ཕོག །ཁོ་རང་ཤུལ་དུ་བསྡོད་པ་མཐོང་བས་རིང་པོར་མ་ལོན་པར་དེ་ཉིད་ཚེའི་དུས་བྱས་པའི་ལོ་རྒྱུས་ལྟར་ན། དེང་སང་གཞན་དོན་བྱེད་པར་གྲགས་པ་རྣམས་ཡུན་དུ་མི་བརྟན་པའི་རྒྱུའང་ཤེས་པར་བྱས་ནས་སྔོན་ལ་རང་ཉིད་སྨིན་ནས་གདོད་གཞན་སྒྲོལ་བའི་ཐབས་ལ་མཁས་པར་བྱའོ།། །།བརྒྱད་པ་ཁ་ཏོན་ནི། མི་བརྗེད་པའི་གཟུངས་ཀྱི་འབྲས་བུ་ཡིན་ཏེ། ཅིའི་ཕྱིར་ན་སྔོན་ཆད་བློ་ལ་བཟུང་ཀྱང་ཕྱི་ནས་བརྗེད་པ་རྣམས་ཀྱིས་གདོན་དུ་མི་བཏུབ་པས། བཟུང་ནས་མ་བརྗེད་པ་ནི་ཤིན་ཏུ་གཅེས་ཏེ། ཁ་
ཏོན་བྱས་པའི་བསོད་ནམས་ཚད་མེད་པའི་ཚུལ་བཟང་སྤྱོད་ལས་ཀྱང༌། གང་ཡང་བཟང་པོ་སྤྱོད་པའི་སྨོན་ལམ་ནི། །འཆང་བ་དང་ནི་བཏོན་ཏམ་ཀློག་ན་ཡང༌། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །ཅེས་པས་མཚོན་དམ་པའི་ཆོས་སྟོན་པའི་ཕན་ཡོན་ནི་བསམ་གྱིས་མི་ཁྱབ་པས་མདོ་དང་གཟུངས་ཕྲན་མཐའ་དག་ལ་ཟད་མི་ཤེས་པ་ཡོད་དོ། །དེ་ཡང་ཀློག་འདོན་གཉིས་བསོད་ནམས་ཀྱི་ཆ་ལ་མཉམ་ཡང༌། མྱུར་བུལ་གྱི་ཁྱད་པར་ཤིང་རྟ་དང་ཉི་ཟླའི་བགྲོད་པ་ལྟ་བུར་ཡོད་པས་ཁ་ཏོན་ནི་ཤིན་ཏུ་མྱུར་བའི་ཕྱིར་བསོད་ནམས་གསོག་སྟོབས་ཆེ་བ་སྟེ་སློབ་དཔོན་དབྱིག་གཉེན་གྱིས་ལོ་རེ་ལ་གསུང་རབ་ཡན་ལག་བཅུ་གཉིས་ལན་རེ་གདོན་པར་མཛད་པ་ཤེར་ཕྱིན་བརྒྱད་སྟོང་པ་ཆུ་ཚོད་གཅིག་གམ་གཉིས་ཀྱི་ཡུན་ལ་བཏོན་ཚར་བས་བུལ་མགྱོགས་ཀྱི་མཐའ་གཞལ་ཏེ། ཟངས་ཆེན་ཏིལ་མར་གྱིས་བཀང་བའི་ནང་དུ་བཞུགས་ནས་ཉིན་མཚན་སྤྲེལ་མ་བཅོ་ལྔས་བཏོན་ཚར་བས་ཕྱོགས་ཙམ་མཚོན་ལ། དེ་གདུང་ཕྲག་གི་ཕུག་རོན་གྱིས་ཐོས་ས་ལས་སྒྲིབ་བསྲབས་ཏེ་དེ་མ་ཐག་པའི་སྐྱེ་བ་སློབ་དཔོན་བློ་གྲོས་བརྟན་པར་གྱུར་པས་སྒྲ་ཐོས་པའི་ཆའི་གཞན་ཕན་ཡང་དེས་མཚོན་ལ། འདི་གཞན་གྱིས་མི་ནུས་སྙམ་དུ་ཡང་དོགས་པར་མི་བྱ་སྟེ་རྨི་ལམ་ཟིན་
པའི་གང་ཟག་རྣམས་ཀྱིས་ཆུ་ཚོད་གཅིག་གི་ཡུན་ལ་མཚན་བརྗོད་ལན་གྲངས་མང་པོ་བཏོན་ཟིན་པའི་འཐད་པ་ཡོད་དེ་རླུང་སེམས་རགས་པའི་རྐྱེན་གྱིས་ཁ་ཏོན་ལས་འདས་པའི་ཕྱིར་རོ། །རང་ངོ་ནས་རྟག་པར་ཁ་ཏོན་བགྱིད་པའི་སྐྱེས་བུ་དེ་ནི་ཇི་ཙམ་འཚོ་བ་དེ་སྲིད་དུ་བསོད་ནམས་ཀྱི་ཚོགས་འཕེལ་བ་ཡིན་ཏེ། སློབ་དཔོན་ངག་གི་དབང་ཕྱུག་གིས། །ཆོས་སྤྱོད་དབང་པོ་ཐུལ་བ་ནི། །འཁོར་བ་དུ་ནི་ཇི་སྲིད་འཚོ། །དེ་སྲིད་བསོད་ནམས་ལ་སོགས་ཚོགས། །བྱང་ཆུབ་སྒྲུབ་བྱེད་རབ་ཏུ་སྐྱེ། །ཞེས་པ་ལྟར་རོ། །དེའི་ཕྱིར་ཆོས་ལམ་ལ་ཞུགས་པའི་གང་ཟག་འདྲ་མཉམ་ཡིན་ཡང་བསག་སྦྱང་ལ་བརྩོན་པ་དང་མི་བརྩོན་པའི་ཁྱད་པར་ནི་དེད་དཔོན་ནོར་བུ་ལོངས་པ་དང་རུས་སྦལ་གཉིད་ལ་གཡུར་བའི་ཁྱད་པར་ལྟ་བུ་སྟེ། ཕྱི་མ་ནི། ནམ་མཁའ་དང་ནི་ས་གཞིའི་བར་ཡང་རིང༌། །རྒྱ་མཚོའི་ཕ་རོལ་ཆུ་བོ་འགྲམ་ཡང་རིང༌། །ཤར་ནུབ་གཉིས་ཀྱི་རི་བར་དེ་བས་རིང༌། །ཕལ་དང་དམ་པའི་ཆོས་ཀྱང་དེ་བས་རིང༌། །ཞེས་པས་སྣང་བ་ནས་མུན་པར་འགྲོ་བའི་མཚན་ཉིད་ཅན་དུ་ཤེས་པར་བྱའོ།། །།དགུ་པ་སེམས་པ་ནི། །བཤད་མ་ཐག་པ་ཉན་པ་ལ་སོགས་པའི་ཆོས་ལྔ་པོ་དེ་དག་ལ་བསམ་བྱུང་གི་ཤེས་རབ་རྣམ་པར་དག་པས་དཔྱད་དགོས་པ་ཡིན་ཏེ། ཚིག་དོན་ལ་རྟོགས་
དཔྱོད་གང་ཡང་མེད་པའི་ཉན་ཀློག་ལ་སོགས་པ་ནི་འདབ་ཆགས་སྨྲ་མཁན་གྱི་སྒྲ་ཚིག་བཞིན་ཏེ། དེ་ཡང་སེམས་གཞན་དུ་ཡེངས་ཤིང་དྲན་པ་ཉེ་བར་མ་གཞག་པའི་ཆོས་སྤྱོད་ལ་འབྲས་བུ་མེད་པའི་ཚུལ་སྤྱོད་འཇུག་ལས། ལུས་ངག་བཅས་པའི་འབྲས་བུ་ཡང༌། །སྤྱོད་པ་ཞན་པས་དེ་ལྟ་མིན། །བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྦྱད་བྱས་ཀྱང༌། །སེམས་གཞན་གཡེངས་པས་བྱས་པ་ནི། །དེ་ཉིད་རིག་པས་དོན་མེད་གསུངས། །གང་གིས་ཆོས་ཀྱི་གཙོ་བོ་མཆོག །སེམས་ཀྱི་མཚང་འདི་མ་ཤེས་ན། །བདེ་ཐོབ་སྡུག་བསྔལ་གཞོམ་འདོད་ཀྱང༌། །དེ་དག་དོན་མེད་གྱི་ནར་འཁྱམ། །དེ་ལྟར་བདག་གི་སེམས་འདི་ནི། །ལེགས་བཟུང་ལེགས་པར་བསྲུང་བར་བྱ། །སེམས་བསྲུང་བརྟུལ་ཞུགས་མ་རྟོགས་པ། །བརྟུལ་ཞུགས་མང་པོས་ཅི་ཞིག་བྱ། །ཞེས་པས་གསལ་ལ་འདི་ལྟར་ཚིག་དོན་ལ་རྣམ་པར་དཔྱོད་པའི་ཤེས་རབ་ཟབ་མོས་ནི་དགེ་བའི་ཆོས་རྒྱ་མཚོ་ལྟ་བུ་སྡུད་ཅིང༌། བླང་དོར་གྱི་གནས་འཛོལ་བར་མི་འགྱུར་ལ། །ཁྱད་པར་མདོ་དང་བསྟན་བཅོས་ལ་སོགས་པ་གང་དག་ཞིག་ཉན་པའམ། ཀློག་པའམ། འཛིན་པའམ། འཆད་པའམ། ཁ་ཏོན་བྱེད་པའི་ཚིག་དོན་
ལ་བསམ་བྱུང་གི་དཔྱད་པ་ཞུགས་པས་གོ་བ་ཁྱད་པར་ཅན་སྐྱེ་ཞིང༌། གལ་ཏེ་རང་སྟོབས་ཀྱི་བློས་དཔྱད་མི་བཟོད་པ་རྣམས་དགེ་བའི་བཤེས་གཉེན་དང༌། རང་ལས་བློ་གྲོས་ལྷག་པ་ལ་དྲིས་པས་རང་ཉིད་ཀྱི་བློ་གྲོས་ཀྱང་ཡར་ངོའི་གང་པ་བཞིན་འཕེལ་བར་འགྱུར་ལ། དཔེར་ན་འཁོར་ལོ་དང་པོའི་སྡེ་སྣོད་ལྟ་བུ་ཞིག་ལ་མཚོན་ན། དགེ་སློང་དག་སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པར་མངོན་དུ་བྱའོ། །ལམ་རྒྱུད་ལ་བརྟེན་པར་བྱའོ། །ཞེས་པའི་དོན་ལ་བསམས་པས། སྡུག་བསྔལ་དེ་འཁོར་བའི་ཉེས་དམིགས་ཡིན་པར་གོ་ལ། དེ་འབྱུང་བའི་རྒྱུ་ཀུན་འབྱུང་སྟེ་མ་རིག་པའི་རང་བཞིན་ཅན། རྐྱེན་སེམས་དང་སེམས་བྱུང་ལས་སྐྱེས་པའི་ཉོན་མོངས་པའི་ཚོགས་ཀྱིས་བསྡུ་བ་བྱས་པའི་ལས་དེ་སྤང་བར་བྱས་ན་འབྲས་བུ་སྡུག་བསྔལ་འགོག་པར་འགྱུར་ཏེ། དེ་ལྟར་སྤོང་བ་ནི་ལམ་གྱི་བདེན་པ་ལ་ལྟོས་དགོས་པས་ལམ་རྒྱུད་ལ་བརྟེན་པར་བྱའོ་ཞེས་གསུངས་ལ་ཇི་ལྟར་བརྟེན་ན། སུམ་བརྒྱ་པ་ལས། གང་ཞིག་སྲོག་གཅོད་གཞན་གྱི་ནོར་འཕྲོག་དང༌། །མི་ཚངས་སྤྱོད་རྫུན་བཅོས་པའི་ཆང་ལ་སོགས། །གར་སོགས་ཕྲེང་སོགས་མལ་ཆེས་མཐོ་བ་དང༌། །ཕྱི་དྲོའི་ཁ་ཟས་གསེར་དངུལ་ལེན་པ་
སྤོངས། །ཉོན་མོངས་དགྲ་གཡུལ་རྒྱལ་བྱེད་ཚུལ་ཁྲིམས་ཏེ། །སོ་ཐར་བརྟུལ་ཞུགས་ཆུ་ལོན་ལྟ་བུ་ཡིས། །འཆི་བའི་འཚེ་བ་འཇོམས་པར་བྱེད་པའི་ཐབས། །རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། །ཞེས་པས་མཚོན་ཏེ་ལྷག་པ་ཚུལ་ཁྲིམས་ཀྱི་བསླབ་པའི་གནས་རྒྱ་ཆེར་བསྟན་པའི་ཕྱིར་རོ། །དེ་བཞིན་འཁོར་ལོ་བར་མཐའ་གཉིས་ལ་ཡང་ཤེས་པར་བྱའོ། །དེ་སྐད་དུ་མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་ཇི་ལྟར་ཐོས་པའི་ཆོས་ཐམས་ཅད་ལ་བསམ་བྱུང་གི་ཤེས་རབ་བསྐྱེད་པ་ནི་སྒོམ་པའི་ཡང་སྔོན་དུ་ངེས་པར་འགྲོ་དགོས་པའི་ཆོས་ཡིན་ལ། ཁྱད་པར་ཀློག་པ་ཐོས་བསམ་པ་རྣམས་ཀྱི་རང་ལུགས་ནི་རྩོད་བཟློག་ལས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་ཐ་སྙད་ལ་བརྟེན་ནས་ཞི་བ་ཉམས་སུ་མྱོང་བར་འདོད་པས་མཚན་མཚོན་དང༌། མངོན་སུམ་དང༌། རྗེས་དཔག་དང༌། རྫས་ལྡོག་དང༌། འགལ་གྲུབ་དང༌། བརྒལ་བརྟག་ལ་སོགས་པའི་ཚད་མས་གཞལ་ཞིང༌། རྣམ་གྲངས་དང་མདོ་ལ་བསླབ་པའི་བསམ་བྱུང་གི་ཤེས་རབ་ལ་བརྟེན་ནས་དོན་དམ་བདེན་པ་སྒྲ་རྟོག་གི་
ཡུལ་དུ་ཞེན་པར་འདོད་པ་སློབ་དཔོན་ཕྱྭ་པ་བཞིན་ནོ། །འོན་ཀྱང་དེས་ནི་ཆོས་རབ་རྣམ་འབྱེད་ཀྱི་ཤེས་རབ་བསྐྱེད་པའི་རྒྱུ་ཡིན་པས་ཀློག་པ་ཐོས་བསམ་གྱི་རང་ངོ་ནས་མི་འགོག་ཀྱང༌། འབྲས་བུ་ལམ་དུ་བྱེད་ཅིང་རྡོ་རྗེ་ཐེག་པའི་གནས་སྐབས་སུ་ནི། རླུང་སེམས་འགོག་པའི་ཐབས་ཁྱད་པར་ཅན་གྱི་གེགས་སུ་འགྱུར་ཞིང་དེའི་མི་མཐུན་ཕྱོགས་འབའ་ཞིག་ཡིན་པས་ཆོས་ལ་འཇུག་པའི་རྒྱུ་དལ་འབྱོར་རྙེད་དཀའ། ཚེ་མི་རྟག་པ། ལས་འབྲས་ཀྱི་རྣམ་གཞག །འཁོར་བའི་ཉེས་དམིགས། ཐར་པའི་ཕན་ཡོན་བསམ་པ་དང། དེ་ཡང་ས་གཞི་མེད་ན་ལོ་ཐོག་མི་འབྱུང་བ་བཞིན་དགེ་བའི་བཤེས་གཉེན་ལ་མ་བསྟེན་ན་ལམ་དང་ལམ་མིན་མི་ཤེས་པས་དེ་ཉིད་བསམ་སྦྱོར་སོ་སོའི་ཆ་ནས་བསྟེན་པའི་ཚུལ་གྱིས་མཚོན་ཆོས་ཀྱི་ཚིག་དོན་མཐའ་དག་ལ་བསམ་བྱུང་གི་བློས་དཔག་པར་བྱའོ།། །།བཅུ་པ་སྒོམ་པ་ནི། ཆོས་ཀྱི་རྣམ་གྲངས། འབྲས་བུ་དང༌། བྱ་བའི་རང་བཞིན་གང་དང་གང་ལ་ཐོས་བསམ་བྱས་པ་ཡིན་ཡང༌། དེ་དང་དེའི་དོན་ཤེས་རྒྱུད་ལ་གོམས་འདྲིས་བརྟེན་པར་བྱ་བའི་ཕྱིར། དབུ་ནས་ཞབས་སུ་བསྡུས་པའི་དོན་ཐམས་ཅད་བསྒོམ་པར་བྱ་བ་ནི་སྤྱི་དོན་ཡིན་ཏེ། སྤྱོད་འཇུག་ལས། རང་གི་ཡིད་ལ་སྒོམ་ཕྱིར་ངས་འདི་བརྩམས། །
ཞེས་པས་མཚོན་ལ། དམིགས་བསལ་ནི། མངོན་མཐོའི་གོ་འཕང་དོན་དུ་གཉེར་བ་སྐྱེས་བུ་ཆུང་ངུའི་ལམ་ནི་ལས་དང་ལས་ཀྱི་འབྲས་བུ་བསླུ་བ་མེད་པ་ལ་ངེས་པ་བརྟན་ཞིང་དེ་དང་དེའི་བླང་དོར་གྱི་གནས་མི་འཆོལ་བར་ཡིད་ལ་བྱེད་པ་དང༌། དེ་དང་རྗེས་སུ་འབྲེལ་པས་མངོན་པར་མཐོ་བའི་རྒྱུར་ཡང་རུང་ལ། །ཁྱད་པར་ཐར་བའི་ལམ་སྟེགས་སྤོང་བའི་ཁྲིམས་ཉིས་བརྒྱ་ལྔ་བཅུ་དང༌། བླང་བྱ་འཇུག་པའི་ཁྲིམས་བཅུ་བདུན་ལས་སྔ་མ་ལ་ལྟུང་བ་ལས་ལྡང་བའི་ཐབས་དང༌། ངེས་འབྱུང་གི་ཐབས་སོར་བཤགས་སོགས་ལྷག་པ་ཚུལ་ཁྲིམས་ཀྱི་བསླབ་པ་གཞི་རྟེན་དུ་བྱས་ནས་བདེན་པ་བཞིའི་ལམ་བསྒོམས་པས་ཐར་པའི་གོ་འཕང་ལ་བཀྲི་བའི་སྐྱེས་བུ་འབྲིང་གི་ལམ་དང༌། བྱིང་རྒོད་ཀྱི་རྙོག་མ་དྭངས་པའི་སེམས་ལ་རྣམ་པར་ཐར་བའི་སྒོ་གསུམ། གཞི་ལམ་འབྲས་བུ་གསུམ་དུ་བཀོད་པ་ལྷག་པ་སེམས་ཀྱི་བསླབ་པ་མདོ་སྡེའི་སྡེ་སྣོད་དང༌། ཀུན་རྟགས་གཞན་དབང་ཡོངས་གྲུབ་གསུམ་གྱི་རྣམ་འགྱེད་རྒྱ་ཆེ་ལ་གཏིང་ཟབ་པས་བདག་འཛིན་དང་མཐར་ལྟའི་གཡང་ས་ལས་ལྡོག་ཅིང༌། བདེ་གཤེགས་སྙིང་པོའི་ཆོས་ཉིད་ལྐོག་ཏུ་མ་གྱུར་པར་སྟོན་པ་དམ་པའི་ཆོས་མངོན་པའི་སྡེ་
སྣོད་དེ་སྐྱེས་བུ་ཆེན་པོའི་ལམ་གཉིས་ལ་བརྟེན་ནས་རྣམ་པ་ཐམས་ཅད་མཁྱེན་པའི་གོ་འཕང་ལ་བཀྲི་བའི་དོན་སྒོམ་པ་སྟེ། དེ་ལྟར་ཐེག་པ་ཆེ་ཆུང་གཉིས་ཀྱིས་རྒྱུད་སྦྱངས་ནས་འབྲས་བུའི་ཐེག་ཆེན་རྡོ་རྗེ་ཐེག་པའི་ལམ་ལ་ལུས་དང་རྩ་དག་པར་བྱེད་པ་བུམ་དབང༌། ངག་དང་རླུང་དག་པར་བྱེད་པ་གསང་དབང༌། ཡིད་དང་ཐིག་ལེ་དག་པར་བྱེད་པ་ཤེར་དབང༌། ཀུན་གཞི་དང་ཤེས་སྒྲིབ་དག་པར་བྱེད་པ་བཞི་པ་སྟེ་སྨིན་བྱེད་ཀྱི་དབང་དང་སོ་སོའི་དམ་ཚིག་ལ་བརྟེན་ནས་ས་ལམ་བགྲོད་པའི་རིམ་པ་སྒོམ་པ་དང༌། དེ་བཞིན་དུ་བུམ་དབང་གིས་ལམ་ཕྱི་ནང་སྣོད་བཅུད་ཀྱི་ཞེན་རྟོག་སྦྱོང་བའི་བསྐྱེད་རིམ། དེ་བཞིན་དུ་དབང་གོང་མ་གསུམ་ལས་དང་པོ་གཉིས་ལ་དམིགས་བཅས་ཀྱི་རྫོགས་རིམ་དང༌། ཕྱི་མ་ལ་དམིགས་པ་མེད་པའི་རྫོགས་རིམ་ལ་བརྟེན་ནས་རང་རང་གི་དག་བྱ་དག་པར་བྱེད་པའི་ཟབ་ལམ་བསྒོམས་པས་རྡོ་རྗེ་འཆང་གི་སར་སྐད་ཅིག་གིས་བགྲོད་པར་བྱེད་པ་ཡིན་ཏེ། དེ་ཙམ་གྱི་སྤྱི་དོན་དང་སྦས་དོན་ལ་རྣམ་རིག་ལྐོག་ཏུ་གྱུར་པ་དག་གིས་ནི། དཀོན་མཆོག་གསུམ་གྱི་ཡོན་ཏན་རྗེས་སུ་དྲན་པར་བྱས་ནས་ཚོགས་ཞིང་བསྒོམས་ཏེ་སྐྱབས་སུ་འགྲོ་བ་དང༌། ཐེག་པ་ཆེན་པོའི་ལམ་གྱི་གཙོ་བོ་ཚད་མེད་བཞི་དང༌། སྨོན་འཇུག་
གཉིས་དང༌། བདེ་སྡུག་གཏོང་ལེན་དང༌། བདག་གཞན་བརྗེ་བ་དང༌། ཕར་ཕྱིན་དྲུག་དང༌། ཞི་ལྷག་གཉིས་དང༌། བྱང་ཕྱོགས་སོ་བདུན་ལ་སོགས་པ་དང༌། མདོར་ན་ཐོས་བསམ་མཐའ་དག་གི་སྙིང་པོར་བསྡུ་བ་སྒོམ་པའི་ཤེས་རབ་ཀྱི་ངོ་བོ་ནི་སྔོན་འགྲོར་རྟོག་དཔྱོད་དང་བཅས་ཤིང༌། དངོས་གཞིར་རྟོག་མེད་ལ་འཇུག་པས་བསམ་གཏན་བཞི་དང་གཟུགས་མེད་བཞིའི་སེམས་ནི་ལམ་ལ་མ་ཞུགས་པའི་རྒྱུད་ལའང་ཡོད་པས་བྱིས་པ་ཉེར་སྤྱོད་ཀྱི་བསམ་གཏན་ཞེས་བྱ་ལ། དེ་ཉིད་ལམ་སྟེགས་སུ་བྱས་ནས་ཚོགས་སྦྱོར་གྱི་ལམ་ལ་དོན་རབ་འབྱེད་པའི་བསམ་གཏན་གྱི་ཐར་ལམ་མངོན་དུ་བྱེད་ཅིང་འཕགས་པའི་ལམ་ས་དང་པོ་ནས་དེ་བཞིན་གཤེགས་དགེའི་བསམ་གཏན་ལ་འཇུག་པས་སྒོམ་པའི་ལམ་དུ་ས་བཅུ་བགྲོད་པ་ནི་སློབ་ལམ་བཞིའི་མཐར་ཐུག་ཡིན་ནོ། །དེ་བཞིན་དུ་སྔགས་ཀྱི་ལམ་ལ་རྡོ་རྗེ་གསུམ་དང༌། མངོན་བྱང་ལྔ་དང༌། ཕྱག་རྒྱ་བཞི་དང༌། འོད་ཟེར་སྤྲོ་བསྡུ་དང༌། རྫོགས་རིམ་སྒོམ་པ་ལ་སོགས་ཏེ་མདོར་ན་དམིགས་པ་དང་བཅས་པའམ། དམིགས་པ་ལས་འདས་ཀྱང་སྒོམ་པའི་ཐ་སྙད་བཞག་པའི་ཕྱོགས་ཏེ། དེ་ཐམས་ཅད་ཀྱང་བསྡུ་ན་བདེན་པ་གཉིས་སུ་འདུ་
སྟེ། བདེན་གཉིས་ལས། ལམ་བདེན་ཐམས་ཅད་ནི་འདུས་བྱས། །འདུས་བྱས་ཐམས་ཅད་ཀུན་རྫོབ་སྟེ། །སྐྱེ་མེད་སྤྲོས་ཀུན་ཞི་བ་ལས། །དོན་དམ་ཞེས་པའི་བརྡ་མཛད་དོ། །ཞེས་པ་ལྟར་རོ། །ཆོས་སྤྱོད་བཅུ་ཞེས་གྲགས་པ་བརྟན་པ་ལ། །སྔོན་ཆད་ཊཱི་ཀ་ཡོད་མེད་མཐའ་མི་འཚལ། །འདི་ནི་དལ་འགྲོའི་ཀློང་ལས་ཆུ་བུར་བཞིན། །གཞན་ཕན་སེམས་ཀྱི་འོད་དཀར་ཀློང་ནས་བརྡོལ། །བགྲང་བྱ་བརྩེགས་པས་རྣམ་རིག་དེངས་གྱུར་ལ། །དབང་པོ་ལྡོངས་པས་ཡི་གེའི་གཟུགས་ཀྱིས་སྤངས། །དེ་ཕྱིར་བློ་ཡི་རི་མོ་ཐོལ་བྱུང་དུ། །སྤེལ་འདིར་ནོངས་ན་ཐམས་ཅད་མཁྱེན་ལ་བཤགས། །མཁས་སམ་གྲགས་པའི་ཕྱོགས་ལ་བསྙེན་པ་ཡི། །བལྟ་བ་ཡིད་ལ་མ་བཞག་དེའི་དགེ་བས། །འགྲོ་ཀུན་ཀུན་མཁྱེན་གོ་འཕང་ལ་རེག་ཤོག །མ་ཧཱ་ས་ནྡྷི་པ་ཨ་བྷ་ཡས་སོ། །གཏམ་ཚོགས་ལེའུ་ང་ལྔ་པའོ།། །།
གཏམ་ཚོགས་ལེའུ་ང་དྲུག་པ། དྲན་པའི་གཏམ་ཡོན་ཏན་རྒྱ་མཚོ།
དྲན་པའི་གཏམ་ཡོན་ཏན་རྒྱ་མཚོ་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །རྫོགས་ཆེན་པ་རང་བྱུང་རྡོ་རྗེ་དཀོན་ཅོག་དང་ངེས་འབྱུང་ལ་གུས་པ་དཔལ་འཆི་བ་མེད་པའི་ལྗོངས་ཀྱི་རི་ཁྲོད་དམ་པ་ན་བལྟར་མི་མངོན་པའི་སྤོང་བ་བསམ་གཏན་པ་རྣམས་དང་
ཐབས་ཅིག་གོ །དེའི་ཚེ་ལྷོ་བརྒྱུད་མོན་ལྗོངས་མཁར་ཞེས་བྱ་བ་རིའི་བ་གམ་ནགས་ཚལ་གྱིས་བསྟེན་པའི་གནས་ནས་ལྷགས་པའི་དགེ་སློང་བླ་མས་ཞུས་པ། བདག་ལོ་བཅུ་གསུམ་ལོན་ནས་དམ་པའི་ཆོས་སྒོར་ཞུགས། དབུས་གཙང་གི་ཕྱོགས་སུ་རིག་གནས་ཀྱི་ཡན་ལག་དང་དགེ་ཚུལ་སློང༌། བཀའ་གཏེར་བཀའ་བརྒྱད་ལ་སོགས་པའི་ཆོ་ག་ལག་ལེན། སྙིང་པོའི་རྒྱུད་བཤད། མདོ་སྒྱུ་ལ་སོགས་པའི་དཀྱིལ་འཁོར་བྲི་ཐིག་ལས་རབ་འབྱམས་ལའང་ཅུང་ཟད་སྦྱངས། དེ་ནས་ངེས་འབྱུང་གི་བསམ་པ་ཁོ་ནས་རི་ཁྲོད་དབེན་པར་དཀའ་སྤྱད་དྲག་པོ་ལ་བརྟེན་ནས་ལོ་འགའ་དང་འགའ་བསྒོམས། རྫོགས་རིམ་སྒོམ་ཐལ་བ་གནད་དུ་མ་སོང་བས་ཚངས་བུག་བྱེ་ནས་འཕོ་ཚད་ཚད་པ་དང༌། འཇུར་དྲན་དྲགས་ཐལ་བས་སྲོག་རླུང་གི་གེགས་ཀྱང་བྱུང༌། བོགས་འདོན་གྱི་ཆེད། བླ་མ་བཟུང་དགུ། སྒོམ་ཆེན། རང་མཉམ། མཆེད་གྲོགས་ཡོད་ཚད་ལ་དྲི་གཏུགས་མང་དུ་བྱས་ཏེ། རང་བཞིན་ཤེས་པའི་དྲན་པ་སྐད་ཅིག་མ་བསྒོམ་བྱའི་ངོ་བོར་སྟོན་པ་བླ་མ་དམ་པ་ཁྱེད་ལས་མ་བྱུང༌། སྔ་མོ་གཅིག་ཐེག་མཆོག་མཛོད་ལ་བལྟས་པས། རྒྱལ་བ་ཀློང་ཆེན་པ་ལ་དད་དུང་དེ་ལས་
ཆེ་བ་མེད་པ་སྐྱེས། ལོ་བརྒྱ་བརྒྱ་ན་བི་མ་ལའི་སྤྲུལ་པ་རེས་རྫོགས་པ་ཆེན་པོའི་ལྟ་བ་ཐུན་མོང་མ་ཡིན་པ་སྟོན་པར་འགྱུར་བའི་ལུང་བསྟན་མཐོང་བས་རྣམ་པ་ཀུན་ཏུ་སྨོན་ལམ་བཏབ། སྔོན་ཆད་ཀྱི་སྙིང་རུས་སྡུག་བཙིར་དུ་འདུག །ད་བརྗོད་བྲལ་ལྷན་ཅིག་སྐྱེས་པའི་ལྟ་བ་ངོ་འཕྲོད་ནས་དེ་གཤིས་ཐོག་ཏུ་བསྐྱང་བ་ལ་དྲན་པ་གཅིག་པོས་ཆོག་པ་ལགས་སམ་ཞུས་པས། དགེ་སློང༌། ཆོས་ཐམས་ཅད་ཀྱི་རྩ་བ་དྲན་པ་ལ་ཐུག་པ་ཤེས་པར་གྱིས་ཤིག་དང༌། མགོན་པོ་ཀླུས། དབང་ཕྱུག་ལུས་རྟོག་ལུང་རྟོགས་ཞེས་བྲིས་པ་ཁོ་ན་སྣང་བ་བཤེས་སྦྲིང་གི་འགྲེལ་པས་འདི་ལྟར་བསྟན་དྲན་པ་བདེ་གཤེགས་ཀྱི། །བགྲོད་པ་གཅིག་པའི་ལམ་འདི་ཉེ་བར་བསྟན༌། །དེ་ལ་བསྒྲིམ་ནས་མངོན་པར་བསྲུང་བགྱི་སྟེ། །དྲན་པ་ཉམས་ན་ཆོས་ཀུན་འཇིག་པར་འགྱུར། །ཞེས་དྲན་པ་མེད་ན་ཐོས་བསམ་སྒོམ་པའི་བྱ་བ་ལྟ་ཅི། འཇིག་རྟེན་ཡང་མི་འགྲུབ། འཁོར་བ་ཀུན་བརྟགས་པའི་ལས་ལ་ཡང་བརྗེད་ནས་དོན་ཉམས། བརྗེད་ནས་དངོས་པོ་བརླག །བརྗེད་ནས་ཕྱི་ཐལ་བྱུང༌། སྨྱོ་ཞུགས། འདུ་ཤེས་འཁྲུལ། འདྲེས་ཁྱེར། ཚིག་དོན་མ་ཟིན་ཟེར་བ་མཐའ་དག་དྲན་པ་ཉམས་པས་ལན། མྱང་འདས་ཀྱིས་ལམ་སྤྱོད་ཕྱོགས་ལ་ལྟོས་ན། དང་པོ་དལ་འབྱོར་རྙེད་དཀའ་མ་དྲན་པ་རྣམས་ཆོས་དང་མཇལ་བའི་རྟེན་འབྲེལ་མི་འགྲིག །གལ་ཏེ་སྟེས་
དབང་གིས་ཆོས་ལམ་ཞུགས་ཀྱང་ལས་མཐའ་འཕྲལ་དུ་ལོག་འགྲོ་བ་དེ་སྟོན་པས་བཅས་པའི་བསླབ་པ་ལ་དྲན་དང་ཤེས་བཞིན་ཡང་མ་བྱུང༌། འཆི་བ་ཡང་སྙིང་ནས་མ་དྲན་པས་ལན། འཆི་བ་བརྗེད་ཙ་ན་ཅི་བྱེད་ཐམས་ཅད་ཚེ་འདི་པར་འཆོར། དེ་ཙ་ན་ལུང་མ་བསྟན་གྱི་སེམས་དེས་སྤང་བྱ་མི་དགེ་བ་བཅུ་དང་བསྒྲུབ་བྱ་དགེ་བ་བཅུ་ལ་སོགས་པའི་རྒྱུ་འབྲས་རང་སར་བརྗེད་ནས་འཁོར་བའི་ཉེས་དམིགས་ལ་འཇིགས་པ་དང༌། ཐར་བའི་ཕན་ཡོན་ལ་བྲོད་པ་གཉིས་ཀ་ཡིད་ལ་མི་དྲན། འདུ་འཛི་དང་ཁྱིམ་གྱི་བྱ་བ་རྣམ་པར་གཡེངས། དེས་ང་རྒྱལ་སྐྱེས་ནས་ཚེ་ཕྱི་མ་ཕན་ཆད་ཀྱི་དོན་ཉམས་ཤིང་བརྗེད་པ་སྐྱེས་བུ་བླུན་པོ་ཆང་གིས་ར་རོ་བ་བཞིན་ནོ། །དེ་ཇི་ལྟར་ན། མདོ་སྡེ་ཡོན་ཏན་བཀོད་པ་ལས། དཔེར་ན་མི་ཞིག་ཆང་གིས་ར་རོ་ཞིང་གཏུམ་པར་གྱུར་ན། མི་དེའི་སེམས་ཀྱིས་ཁྱིམ་ཡང་འཚོལ་མི་ནུས། ལམ་ཡང་མི་འཚོལ། ཕ་མ་དང༌། ཆུང་མ་དང༌། བུ་དང་བུ་མོའི་འདུ་ཤེས་ཀྱང་མེད། སངས་རྒྱས་དང༌། ཆོས་དང༌། དགེ་འདུན་ཡང་མི་དྲན་ཏེ། དེ་ཆང་གིས་མྱོས་པའི་མཐུས་དུར་ཁྲོད་ན་འདུག་ཀྱང་འཇིགས་པ་མེད་ལ། འདི་སྙམ་དུ་སེམས་ཏེ་ལྷའམ་
ཀླུའམ། གནོད་སྤྱིན་ང་སྐྲག་པར་བྱེད་པ་སུ་ཞིག་ཡོད་སྙམ་མོ། །དེ་བཞིན་དུ་འདོད་པའི་རྒྱགས་པས་མྱོས་ཤིང་ཁྱིམ་ན་གནས་པས་རྣམ་པར་འཁྲུལ་བ། རྣམ་གཡེང་གིས་སེམས་མྱོས་པ་རྣམས་ནི་སངས་རྒྱས་དང༌། ཆོས་དང༌། དགེ་འདུན་ཡང་ཡོངས་སུ་འཚོལ་བར་མི་བྱེད། སྦྱིན་པའང་མི་དྲན། མཐོ་རིས་སུ་སྐྱེ་བ་དང༌། རྒྱལ་པོར་འགྱུར་བ་དང༌། སངས་རྒྱས་ཀྱི་ཞིང་དུ་སྐྱེ་བའང་ཡོངས་སུ་འཚོལ་བར་མི་བྱེད་དེ། འཁོར་བ་དེ་ཉིད་ན་འཁོར་ཞིང་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་རྣམས་ན་སྡུག་བསྔལ་མྱལ་བར་འགྱུར་རོ། །ཞེས་གསུངས་པ་ལྟར་ཚེ་ཕྱི་མ་བརྗེད་པས་སྦྱིན་པ་གཏོང་བའང་མི་དྲན། འབྱོར་པ་དཔག་ཏུ་མེད་པ་ཡོད་ཀྱང་དེ་བསོད་ནམས་སུ་བསྒྱུར་མ་དྲན་པས་འཆི་ཙ་ན་ལག་པ་སྟོང་པར་འགྲོ། སྟོན་པ་བཅོམ་ལྡན་འདས་ལྟ་བུའི་ཞིང་ས་ཡོད་བཞིན་དུའང་ཆུ་སྨད་ཀྱི་མ་སེར་སྣའི་ལས་ཀྱིས་ཡི་དྭགས་སུ་སྐྱེས། དེའི་ཕྱིར་ཐོས་པའི་ཡོན་ཏན་ལ་དྲན་པ་མངོན་དུ་གཞག་པ་ཞིག་ཡིན་ཕྱིན་ཆད་ཟང་ཟིང་གི་སྦྱིན་པ་ལ་ཡང་གཏོང་བ་དང༌། གཏོང་བ་ཆེན་པོ་དང༌། ཡོངས་སུ་གཏོང་བའི་བར་བློ་མཐུ་ཇེ་ཆེར་འགྲོ་ཞིང༌། བྱང་ས་དང་སྔགས་ཀྱི་སྡོམ་པ་
བྱེ་བྲག་པ་རྣམས་ཀྱི་དོན་དྲན་པས་གཞན་ཆོས་ལམ་དུ་འགོད་པའི་སྐྱོ་དུབ་ཀྱང་ཟིལ་གྱིས་གནོན་ནུས། འཇིགས་པས་སྐྲག་པའི་གནས་མཐོང་ཞིང་ཐོས་ནའང་ང་ནི་ངེས་པར་ཐེག་པ་ཆེན་པོའི་གང་ཟག་ཡིན་ནོ་སྙམ་པ་དྲན་ན་དེ་ལ་ཐབས་དུ་མས་མི་འཇིགས་པའི་སྐྱབས་སྦྱིན་པའམ། གལ་ཏེ་རང་སྟོབས་ཀྱིས་མ་ནུས་ཀྱང་སྙིང་རྗེ་དང་སྡུག་བསྔལ་དཔག་ཏུ་མེད་པའི་ཁུར་ཁྱེར་བ་ཞིག་ཡོང་བ་ཡིན། དྲན་པ་ཉམས་ན་ཐེག་པ་ཆེན་པོའི་གང་ཟག་ཏུ་ཁས་འཆེ་བཞིན་དུ་སྙིང་རྗེ་དང་རྟོགས་པ་གཉིས་ཀ་མེད་པ་དེ་ཡོང༌། ལ་ལ་རྟོགས་པ་ཡོད་དེ་སྙིང་རྗེ་སྐྱེར་མ་བཏུབ་ཟེར་ཏེ། དེ་ལ་གོ་བ་ཡོད་ཀྱང་རྟོགས་པ་མ་སྐྱེས་པའི་རྟགས་ཡིན། ཕ་དམ་པས། སྙིང་རྗེ་མ་སྐྱེས་ན་རྟོགས་པ་མི་་སྐྱེ། ཉ་ཆུ་ལ་ཡོང་བ་ཡིན། སྐོམ་ལ་མི་ཡོང་གསུང་བ་དེ་ཤིན་ཏུ་མད་པ་ཡིན་ནོ། །དེ་བཞིན་དུ་ཚུལ་ཁྲིམས་ཉམས་པའང་ངོ་ཚ་དང་ཤེས་བཞིན་མ་དྲན་པ་ལ་འབྱུང༌། དེ་དྲན་ན་སྐྱེ་བོའི་ཡ་ག་དང༌། མཁན་སློབ་བསླུས་ཀྱིས་དོགས་པའི་ངོ་ཚས་སྒོ་གསུམ་གྱི་སྤང་བྱ་མི་མཐུན་ཕྱོགས་བསྡམ་པའམ་མཐུན་པའི་ཕྱོགས་དགེ་བའི་ཆོས་སྡུད་པ་དང༌། སེམས་ཅན་དོན་བྱེད་པའི་ཟག་བཅས་ཀྱི་སྡོམ་པ་གང་ཡང་མི་འཇིགས་པ་ཡིན། དྲན་པ་ཉམས་པས་དགེ་སློང་དྲི་མེད་འོད་ལྟ་
ལྟ་བུའང་སྨད་འཚོང་མས་རྫས་དང་སྔགས་ཀྱིས་རྨོངས་པར་བྱས་ནས་ཚུལ་ཁྲིམས་ཉམས། དེ་སླར་དྲན་པ་སོར་ཆུད་པས་འགྱོད་པ་དྲག་པོ་སྐྱེས་ནས་ངུ་བཞིན་དུ་དགེ་སློང་རྣམས་ལ་བསྙད་པས། དེ་དག་གིས་ཀྱང་འཇམ་དཔལ་གྱིས་ཉེས་པ་བསལ་བར་བསྐུལ་བ་བཞིན། འཇམ་དཔལ་གྱི་དྲུང་དུ་ཕྱིན། དེས་ཀྱང་སྟོན་པའི་དྲུང་དུ་ཁྲིད་པ་ན། སྟོན་པས་དེ་ལ་དོན་དམ་བདེད་མའི་མཚན་ཉིད་བསྟན་པས་བདེན་པ་མཐོང་བ་ཡིན། འདི་དང་སོར་ཕྲེང་གི་མདོ་སོགས་ལ་དྲང་ངེས་ཀྱི་དགོས་དབང་དུ་མ་གནས་ཀྱང༌། མཐར་བསྟན་པ་ཡོངས་སུ་རྫོགས་ན་སྤང་གཉེན་གནས་སུ་དག་པའི་ཤེས་རབ་ཀྱིས་སྡོམ་གསུམ་ངོ་བོ་གནས་འགྱུར་གྱི་མཚང་ཡང་ཤེས་པ་ཡིན། འདི་ལྟར་ཐེག་པ་གསུམ་ཀའི་རྟེན་གཞི་སྡོམ་པ། སྡོམ་པའི་རྟེན་གཞི་སེམས། སེམས་ལ་སྤང་གཉེན་ཐ་དད་པའི་ཆོ་ག་བཀོད་པ་ལས་རིགས་ཅན་གསུམ་གྱི་སྡོམ་པ་གྲུབ། དེ་ཐབས་ཁྱད་པར་ཅན་དང་རྣམ་པར་གྲོལ་བའི་ཤེས་རབ་ཀྱིས་ཟིན་པའི་ཚེ། ཀུན་རྫོབ་སྣང་ཞེན་དང་བཅས་པའི་སྡོམ་པ་ལ་འགྲོ་བ་དང༌། འོང་བ་དང༌། གནས་པ་དང༌། འཕེལ་བ་དང༌། འགྲིབ་པའི་ཆོས་གང་ཡང་སྲིད་པའི་མ་ཡིན་པས་བདེན་པ་མཐོང་བའི་གེགས་མ་བྱས་པའི་ཕྱིར་ངོ་བོ་གནས་འགྱུར་གྲུབ་ལ། བློ་གྲོས་རབ་གསལ་
གྱིས་ཞུས་པའི་མདོར། དགེ་སློང་རྣལ་འབྱོར་སྤྱོད་པས། ཚུལ་ཁྲིམས་དང༌། ཚུལ་ཁྲིམས་འཆལ་བ་དང༌། ཚུལ་ཁྲིམས་བསྲུང་བ་ལ་སོགས་པའི་འདུ་ཤེས་སྣ་ཚོགས་དང་ལྡན་པ་ནི་ལྷའི་བདེ་བ་ཉམས་སུ་མྱོང་ནས་སླར་ངན་སོང་དུ་འཁོར་བར་གྱུར་རོ། །གང་ལ་སྡོམ་པ་དང་སྡོམ་པ་མ་ཡིན་རློམ་སེམས་མེད་ཅིང་རྟོག་པ་མེད་པ་དེ་ནི་མྱ་ངན་འདས་པའི་ཚུལ་ཁྲིམས་རྣམ་པར་དག་པ་ཡིན་ནོ། །ཞེས་གསུངས་སོ། །དེ་ལྟ་ནའང་སྦྱངས་པའི་ཡོན་ཏན་བཅུ་གཉིས་དང་ལྡན་པས་སྡེ་སྣོད་གསུམ་སྟོན་པའི་བཀའ་དང་མཐུན་པར་འཛིན་པ་ཁ་ཆེའི་བསོད་སྙོམས་པ་ཆེན་པོའི་བཞེད་པ་དང༌། ཇོ་བོ་རྗེས་གནས་དུས་ལ་དགོངས་ཚངས་པར་སྤྱོད་པ་ལ་དབང་གོང་མ་བཀག་པ་སོགས་ནི་གནང་བཀག་རང་དབང་དུ་མི་སྤྱོད་པའི་དགོངས་གཞི་དང་དགོས་པ་ཁྱད་པར་ཅན་ཡིན་པས། སྔགས་ཀྱི་བརྟུལ་ཞུགས་ལ་མོས་པས་སྤྱོད་པ་རྣམས་ཀྱིས་ངེས་དོན་དུ་ཁས་བླང་བྱའང་ཡིན། ཚིག་ལ་གྲིམས་པའི་རྟོག་གེའི་གཞན་དབང་གིས་ཕ་རོལ་གྱི་གྲུབ་པའི་མཐའ་དམའ་དབབ་པ་ལ་རིངས་པའམ། མི་ཚངས་སྤྱོད་ལ་དངོས་པོ་གཙོ་བས་པགས་རིམ་དང་པོ་འདས་པའི་ཕམ་པ་བསྲུང་བ་ཙམ་གྱིས་མཚོན། ཉེས་སྤྱོད་སྣ་གཅིག་སྡོམ་པའི་ཚུལ་ཁྲིམས་མཆོག་འཛིན་གྱི་བློས་བསྟན་པ་ཡོངས་རྫོགས་
ཀྱི་ལམ་སྟོན་ཆེན་པོ་ཆོས་ཉིད་ཀྱི་བདེན་པ་ཇི་བཞིན་གཟིགས་པ་དག་གིས་རང་ངོ་ལ་དངོས་པོའི་གནས་ཚུལ་ཇི་ལྟར་ཉམས་སུ་མྱོང་བ་ལྟར་བཀྲལ་བའི་ངོ་བོ་གནས་འགྱུར་ལས་གཞན་དུ་འཕངས་པའི་ཚིག་ཙམ་གློ་བ་ལ་བྱང་པས་མགོན་པོ་རྡོ་རྗེ་འཆང་གི་ཐུན་མོང་མ་ཡིན་པའི་བཞེད་པ་དྲང་དོན་དུ་གནས་བསྒྱུར། རྟོག་གེའི་རིག་པས་ནི་ངོ་བོའི་གནས་ཚུལ་དེ་ཙམ་ལས་དཔོགས་པར་ཡང་མི་ནུས་པས་སྤངས་རྟོགས་ཀྱང་ཡོན་ཏན་དང༌། ཕྲིན་ལས་ཀྱི་བྱེད་པ། བརྟུལ་ཞུགས་དང་རྫུ་འཕྲུལ་ཅན་རྫོགས་པའི་སངས་རྒྱས་དང་གཉིས་སུ་མེད་པས་གཟུ་བོར་གནས་པའི་སྐྱེས་བུ་ཐམས་ཅད་དང༌། གངས་རིའི་ཁྲོད་སྤྱི་མཐུན་གྱི་སྣང་ངོར་ཡང་སངས་རྒྱས་གཉིས་པར་བསྙོན་དུ་མེད་པ་ལྷུན་གྲུབ་རིག་འཛིན་པདྨའི་ཞབས་དང༌། རྒྱ་གར་ཆུ་བོ་གངྒ་ཕན་ཆད་ན་དོ་ཟླ་སྤངས་པ་གྲུབ་ཐོབ་ཆེན་པོ་ས་ར་ཧ་པས་ཀྱང༌། ཁ་སང་ཕན་ཆད་དགེ་སློང་མིན། །དེ་རིང་ཚུན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །ཅེས་པའི་དངོས་བསྟན་གྱི་ངོ་བོ་གནས་འགྱུར་ཞལ་གྱིས་བཞེས་པའང་མ་དྲན་ན། རྡོ་རྗེ་འཆང་ལས་དགེ་སློང་སྡེ་སྣོད་གསུམ་པ་གཅིག་ཚུལ་ཁྲིམས་གསུམ་གྱིས་འཕགས་སོ་ཞེས་སྔན་ཆད་མ་གྲགས་པའི་གཏན་ཚིགས་གསར་པས་གསང་
སྔགས་བླ་མེད་ཀྱི་འབྲས་བུའི་གོ་འཕང་སྨད་ཅིང༌། རང་གི་རིག་པ་བརྟུལ་ཞུགས་ཀྱི་སྤྱོད་པ་དེའང་འཆལ་བའི་གནས་ལ་སྦྱར་བ་ནི་རིགས་པ་མ་ཡིན་པས་ཆོས་ཉིད་བསམ་གྱིས་མི་ཁྱབ་པའི་བདེན་པ་དྲན་པར་བྱས་ནས་ཐབས་ཀྱིས་ཟིན་པའི་མཚན་ཉིད་ཁྱད་པར་ཅན་གྱི་དགོངས་པ་ལ་རྔོ་ཐོགས་ཤིག །དེ་ཅིའི་ཕྱིར་ཞེ་ན། སྔགས་ཀྱི་བརྟུལ་ཞུགས་མཐར་ཕྱིན་པས་ཉན་ཐོས་ཀྱི་རིག་པ་མི་འཛིན་ཏེ། མདོ་ལས། འཇམ་དཔལ་འདི་ལྟ་སྟེ། དཔེར་ན་བྱའི་རྒྱལ་པོ་ཀ་ལ་པིངྐའི་ཕྲུག་གུ་སྒོ་ངའི་སྦུབས་ན་འདུག་པ་སྒོ་ང་ཆག་ཅིང་སྦུབས་ནས་མ་བྱུང་ཡང་འདི་ལྟ་སྟེ། སྒྲ་ཡིད་དུ་འོང་བ་ཀ་ལ་པིངྐའི་སྒྲ་ཉིད་སྒྲོགས་སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་མ་རིག་པའི་སྒོ་ངའི་སྦུབས་སུ་ཞུགས་པ། འཇིག་ཚོགས་ལ་ལྟ་བ་མ་བཅོམ་པ། ཁམས་གསུམ་ནས་མངོན་པར་མ་བྱུང་ཡང་འདི་ལྟ་སྟེ། སྒྲ་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་བྱ་བ་མེད་པ་དང༌། སངས་རྒྱས་ཀྱི་ཆོས་ཀྱི་སྒྲ་ཉིད་སྒྲོགས་སོ། །འཇམ་དཔལ་འདི་ལྟ་སྟེ། ཀ་ལ་པིངྐ་རྨ་བྱའི་ནང་དུ་སོང་ན་ཀ་ལ་པངྐིའི་སྒྲ་མི་སྒྲོག་གོ །ཀ་ལ་པིངྐའི་ནང་དུ་སོང་ན་ཀ་ལ་པིངྐའི་སྒྲ་སྒྲོགས་སོ། །
འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཉན་ཐོས་དང་རང་སངས་རྒྱས་ཀྱི་ནང་དུ་ཆོས་བསམ་གྱིས་མི་ཁྱབ་པའི་སྒྲ་མི་སྒྲོག་གོ །བྱང་ཆུབ་སེམས་དཔའི་ནང་དུ་སོང་ན་སངས་རྒྱས་ཀྱི་ཆོས་བསམ་གྱིས་མི་ཁྱབ་པའི་སྒྲ་སྒྲོགས་སོ། །ཞེས་གསུངས་པ་ལྟར་བྱང་ཆུབ་སེམས་དཔའ་བློ་ཆེན་རྣམས་ནི་ཐེག་པའི་ངོ་བོ་གང་གིས་གཙོ་བོར་འདུལ་བ་དང་མཐུན་པར་དགོངས་པ་འགྲེལ་བ་ཡིན་པས་མཐའ་དྲུག་དང་ཚུལ་བཞིའི་གནས་རྟོགས་པར་བྱ་ལ། ལམ་ཞུགས་སྡོམ་པ་སུམ་ལྡན་གྱི་དགེ་སློང་དུ་ཁས་འཆེ་བ་ཙམ་ལ་ནི་གནས་ན་བྱེ་བྲག་ཏུ་གནས། བསྲུང་ན་རང་ལྡོག་མ་འདྲེས་པར་བསྲུང༌། ལྡན་ན་ཡར་ལྡན། འཆོས་ན་གྲུབ་མཐའ་གསུམ་པོའི་རང་ལུགས་ཀྱིས་འཆོས་པའང་དོན་ལ་གནས་ཏེ། དེ་ཀུན་ཀྱང་དྲན་དང་ཤེས་བཞིན་གྱི་ཆོ་ག་ལ་མ་བརྟེན་ན་ནི་ཡང་དག་པར་མི་འགྲུབ་པའི་ཚུལ་སྤྱོད་འཇུག་ལས། བསླབ་པ་བསྲུང་བར་འདོད་པ་ཡིས། །རབ་ཏུ་བསྒྲིམས་ནས་སེམས་བསྲུང་སྟེ། སེམས་འདི་བསྲུང་བར་མ་བྱས་ན། །བསླབ་པ་བསྲུང་བ་ཡོང་མི་ནུས། །ཞེས་དང༌། སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དག །ཐམས་ཅད་འབད་པས་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཞེས་
བཤད་པས་སོ། །དེ་བཞིན་དྲན་པ་ཉམས་ན་བཟོད་པའི་གོ་ཆའང་འཆོར་ཏེ། གནོད་པའི་ཡུལ་ལ་བསྲན་ཚུགས་པའི་ནུས་པ་ཡོད་ཀྱང་རྐྱེན་དང་ཕྲང་ཐོག་དེར་མ་དྲན་ན་ཐལ་ཟིན་ལྡོག་ཏུ་མེད་པར་འགྱུར། གང་དྲན་པར་བྱ་ན་སེམས་ཅན་འདི་དག་ནི་ཉོན་མོངས་པའི་གཞན་དབང་ཅན་ཡིན། བདག་ཉིད་མེད་ན་ཁོང་ལ་གནོད་པའི་རྒྱུ་མེད། གནོད་བྱ་མེད་ན་གནོད་བྱེད་ག་ལ་འབྱུང༌། རང་གི་ཕུང་པོ་དང༌། ཁམས་དང༌། སྐྱེ་མཆེད་ཚོགས་པ་འདིས་རྒྱུ་བྱས། ཕུན་སུམ་ཚོགས་པའམ། ཁས་ཉེན་པའམ། ལུས་ངག་གི་སྤྱོད་པ་མི་གཟོ་བ་ཞིག་གིས་རྐྱེན་བྱས་ཁོང་ལ་གནོད་པའི་ཡུལ་གྱི་འབེམ་ལྟ་བུར་བྱུང་གདའ། འདིའི་ལེ་ལན་ཁོང་ལ་མེད། རང་ཉིད་ཀྱིས་ལུས་འདི་བླངས། གནས་འདི་ལྟ་བུར་སྐྱེས། ཕ་མ་འདི་ལས་བྱུང༌། མིང་འདི་སྐད་བཏགས། སྡོད་ས་འདིར་བྱས་སྙམ་པའི་ང་དང་ང་ཡིར་འཛིན་པ་ལས་བྱུང་བ་དེ་དྲན་པ་ལས། ཕ་རོལ་གྱི་སྐྱོན་དང་སྤྱོད་པ་ལ་མི་བསམ་པ་གནད་ཟབ་པ་འདུག །འདི་ལ་བྱང་ཆུབ་སེམས་དཔའི་སྡེ་སྣོད་ལས། ཉམས་སུ་ལེན་པའི་བཟོད་པ་དང༌། ཆོས་ཁོང་དུ་ཆུད་པའི་བཟོད་པ་དྲན་པར་བྱ་བའི་གནས་གཉིས་གསུངས། དང་པོ་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་དྲུང་དུ།
གལ་ཏེ་སེམས་ཅན་ཐམས་ཅད་ཡང་དང་ཡང་ཡོང་ཞིང་གཤེ་བའམ། མི་སྙན་པར་བརྗོད་ཅིང༌། མ་སླས་པའི་ཚིག་བརླང་བ་ཟེར་བར་གྱུར་ཏམ། རྡོ་དབྱིག་དང་མཚོན་ཆས་བརྡེག་གམ་བཏབ་ཀྱང་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འདོད་པས། སེམས་བསྐྱེད་པ་འགའ་ཙམ་ཡང་འཁྲུག་པར་ལྡན་པའམ། གནོད་སེམས་དང་ལྡན་པ་བསྐྱེད་པར་མི་བྱ་སྟེ། སྤྱིར་སེམས་ཅན་དེ་དག་ལ་ཀྱེ་མ་སེམས་ཅན་འདི་དག་ནི་ཉོན་མོངས་པའི་ལས་ཀྱིས་མནར་བ་སྟེ། འདི་དག་ལ་བདག་གིས་སྡིག་ཏོའི་སེམས་མི་བསྐྱེད་ཀྱིས། འདི་ནི་བདག་གི་ཕུང་པོ་དགྲར་གྱུར་པ་འདི་རྣམས་བླངས་པས་ལན་ཏོ། །ཞེས་དེ་དག་ལ་སྙིང་རྗེ་བསྐྱེད་པར་བྱའོ་ཞེས་གསུངས། གཉིས་པ་ནི། རང་ཉིད་ཀྱི་དྲན་པ་ཡེངས་པས་འཁྲུལ་པའི་དབང་དུ་སོང་སྟེ་སྣང་བ་ཡུལ་དང་འདྲེས། གནོད་བྱེད་ལ་གནོད་བྱེད་དུ་བཟུང་བས་ཕན་ཚུན་རྟེན་དང་བརྟེན་པ་ནུས་པ་ཇེ་ཆེར་སོང་བ་ཡིན། དེའི་གཉེན་པོར་འདི་སྐད་དུ། སེམས་ཅན་དེ་དག་ཀྱང་དོན་དམ་པར་དམིགས་སུ་མེད་ན། བདག་ལ་གཤེ་བའམ། མི་སྙན་པར་བརྗོད་ཅིང༌། མ་སླས་པའི་ཚིག་བརླང་བ་ཟེར་བའམ། རྡོ་དབྱིག་དང་མཚོན་གྱིས་འདེབ་
པ་ལྟ་བུ་སུ་ཞིག་ཡོད་དེ། འདུ་བྱེད་ཐམས་ཅད་སྒྱུ་མ་ལྟ་བུ། གསོག །གསོ་བ། རག་ལས་པ་ནམ་མཁའ་ལྟ་བུ། བདག་དང༌། སེམས་ཅན་དང༌། སྲོག་དང༌། འགྲོ་བ་དང༌། གསོ་བ་དང༌། ཞེས་སོགས་གསུངས་པ་ལྟར་འདུ་བྱེད་དང་སྒྱུ་མའི་མཚན་ཉིད་དུ་བལྟ། རང་བཞིན་དུ་སྐྱེ་བོ་མ་རིག་པ་རྣམས་ཀྱིས་བསྟོད་སྨད་ནི་ཡོན་ཏན་མཐོང་ནས་བསྟོད་ཤེས་པའང་མིན། སྐྱོན་རྟོགས་ནས་སྨད་པའི་ངེས་པའང་མེད་པའི་ཁ་སྒྲ་མི་སྙན་འདོད་རྒྱལ་བར་སྣང༌། ཕལ་ཆེར་གཞན་འབྱོར་ཕུན་ཚོགས་ལ་མི་བཟོད་པའི་ཁོང་འཁྲུགས། ལ་ལ་བྱང་ཆུབ་སེམས་དཔའ་འཇུག་པའི་སྤྱོད་པ་ལ་ཞུགས་པའི་ཚེ། བྲན་གཡོག་དང་མཛའ་གཅུགས་སུ་རེ་བ་ཆོས་སྒོར་བཅུག་པའམ། ཐེག་པ་ཆེན་པོ་དང༌། སྔགས་ཀྱི་ཆོ་ག་ཟབ་མོས་རྗེས་སུ་བཟུང་ཙ་ན། ཕ་རོལ་པོའི་འདོད་པ་གཞན་དབང་དུ་གྱུར་པས་འཕྱར་ཀ་སྣ་ཚོགས་གཏོང་བ་དྲང་སྲོང་བཟོད་པར་སྨྲ་བའི་གཏམ་རྒྱུད་དང༌། ཁྱད་པར་བདག་ཅག་གི་སྟོན་པས་གང་ཟག་གཅིག་རྗེས་ཆགས་ཀྱི་སླད་དུ་ནོར་གྱིས་མ་བྲིད། སྔགས་ཀྱིས་རྨོངས་པར་མ་མཛད་མོད། གདུལ་བྱ་དུས་ལ་བབ། སྣང་བ་དབང་དུ་འདུས་ཙ་ན་ཐབས་ལ་མཁས་པའི་མདོར། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། གང་བུད་མེད་
གཞོན་ནུ་དག་ཡོངས་སུ་སྨིན་པར་བྱ་བའི་ཕྱིར་བྱང་ཆུབ་སེམས་དཔའ་གཡོག་ལེན་ཏེ། དེ་ལ་བྱང་ཆུབ་སེམས་དཔའ་སླས་ཀྱི་ནང་ན་གནས་ནས་བུད་མེད་བཞི་ཁྲི་ཉིས་སྟོང་སྨིན་པར་བྱེད་དོ། །ཞེས་ཀྱང་གསུངས། གདོལ་པའི་བུ་མོ་གཟུགས་བཟང་མོ་ཀུན་དགའ་བོ་ལ་ཆགས་པ་སྟོན་པས་དགེ་སློང་མར་བཅོས་པས་མཉན་ཡོད་པ་རྣམས་ཀྱིས་འཕྱར་ཀ་བཏང་བ་བཞིན་དོན་ལ་མི་གནས་པའམ། ཡང་ཐབས་ལ་མཁས་པས་འདུལ་བ་ལི་ཙ་བྱི་དྲི་མེད་གྲགས་པ་ཁྱིམ་པའི་ངང་ཚུལ་ཅན་སྤོབས་པ་བསམ་གྱིས་མི་ཁྱབ་ཅིང༌། རྣམ་ཐར་གཞལ་དུ་མེད་པས་མཆོག་ཟུང་གིས་ཀྱང་དོ་ཟླར་མ་གྱུར་པ་དེ་ལྟ་བུའི་གདུལ་བ་ཚད་མེད་པའི་ཕྲིན་ལས་སོ་སོ་སྐྱེ་བོས་མི་ཤེས་པའི་ཕྱིར་བྱང་ཆུབ་སེམས་དཔའ་རྣམས་ཀྱིས་སྐུར་པའི་གནས་འདི་ལྷག་པར་བཟོད་པའི་སྙིང་སྟོབས་མ་བསྐྱེད་ན་སེམས་ཅན་ཕོངས་པའམ། མགོན་མེད་པ་རྣམས་ལ་སྐྱབས་དང་བྲལ་བའི་གནས་སྐབས་ཐོབ་ལ། ཡང་ལ་ལ་རང་ཉིད་ཆེན་པོའམ། དམ་པར་རློམ་ནས་དཔེ་ཆོས་རིན་ཆེན་སྤུངས་པར། མོན་མོ་མ་མཐོང་བྱི་རུ་མཐོང༌། །ཞེས་པའི་དཔེ་དྲངས་པ་ལྟར། དད་གུས་མེད་པར་ཁ་ཅང་གི་ཆོས་ཐོབ་ཚད་བྱེད་ཅིང༌། གང་ལས་སྤངས་རྟོགས་ཀྱི་ཡོན་ཏན་བརྙེས་པའི་བླ་མ་རིགས་ངན་ལྟར་སྦེད་ལ་མོ་གཏོད་ཅིང་འགྲོ་སྟེ། ཁོང་གི་དངོས་གྲུབ་ཀྱི་གེགས་ཆེན་པོར་གྱུར་པ་ལ་སྙིང་རྗེ་ལྷག་
པར་དུ་བསྐྱེད་ནས་བྱས་པ་དྲིན་དུ་མི་གཟོ་བ་བཟོད་པའི་དམ་བཅའ་བརྟན་པ་དང༌། དེ་བཞིན་དུ་ཆོས་ལ་སེམས་པའི་བཟོད་པ་ནི་དཀོན་མཆོག་གསུམ་རྗེས་སུ་དྲན་པ་ལས་འབྱུང་ཞིང༌། དཀའ་བ་དང་དུ་བླང་བའི་བཟོད་པ་ནི་སྐྱེས་པ་རབས་ཀྱི་རྒྱུད་དང་སྐྱེས་བུ་དམ་པའི་རྣམ་ཐར་དྲན་པ་ལས་འབྱུང་བས་ན་དྲན་པ་བསྲུང་བ་ལ་ཡི་དམ་བྱ་བའོ། །དེ་བཞིན་དུ་བརྩོན་འགྲུས་ཀྱི་ངོ་བོ་ཡང་འཇུག་བྱའི་ལས་ལ་མངོན་པར་སྤྲོ་བའི་དྲན་པའམ་འདུན་པ་ཡིན་ཏེ། སྟོན་པ་འདའ་ཁར་ཀུན་དགའ་བོའི་ལག་པ་ནས་བཟུང་སྟེ། ངའི་ཆོས་དཀོན་མཆོག་གི་མཛོད་འདུན་པ་དང༌། བརྩོན་འགྲུས། བག་ཡོད་པ་གསུམ་གྱིས་སྲུངས་ཤིག །གསུངས་པའི་འདུན་པ་ནི་ལས་ཀྱི་མཐའ་གང་ཡིན་པ་དེ་ཡིད་ལ་ཡང་ཡང་དྲན་པ་ཡིན། བརྩོན་འགྲུས་དེ་སྤྱོར་བ་ཡིན། བག་ཡོད་པ་དེ་བྱེད་ལས་ཡིན། གང་ཞེ་ན། སྟོན་པས་བཅས་པའི་བསླབ་པའི་གནས་མཐའ་དག་ངེས་འབྱུང་གི་བློའི་གྲོགས་སུ་འགྲོ་དགོས་ཏེ། དྲན་པ་ཉེར་གཞག་ལས། དགེ་སློང་དག །རིའི་ཁྲོད་དང༌། །རིའི་ཕུག་དང༌། དུར་ཁྲོད་དང༌། བླ་གབ་མེད་པ་རྣམས་སུ་རྩྭ་སོགས་ཀྱི་ཕུང་པོ་ལ་བསམ་གཏན་གྱིས་ཤིག བག་མེད་པས་གནས་པར་མ་བྱེད་ཅིག ཕྱི་ནས་འཆི་བའི་དུས་ན་འགྱོད་པར་མ་བྱེད་དང༌། འདི་ནི་ཁྱེད་རྣམས་ལ་རྗེས་སུ་གདམས་པ་ཡིན་ནོ། །ཞེས་ཚིག་ཐ་མར་བསྟན་པས་སོ། །དྲན་
པ་མེད་ན་བརྩོན་འགྲུས་དང་བག་ཡོད་གཉིས་ཀ་ལ་བྱེད་པ་པོ་མེད། གོ་ཆའི་བརྩོན་འགྲུས་རྒྱལ་པོ་མྱ་ངན་མེད་དམ། མེས་དབོན་རྣམ་གསུམ་ལྟ་བུའི་སྙིང་སྟོབས་གནམ་གྱིས་ས་བཀབ་པ་ལྟ་བུ་ཡོད་ཀྱང༌། དེ་སྦྱོར་བའི་ལམ་དུ་འཇུག་པ་ལ་མ་ཞུམ་པ་དང༌། མི་འཁྲུག་པ་དང༌། ཆོག་མི་ཤེས་པའི་བསམ་པས་སྒྱིད་ལུག་གི་གཉེན་པོ་བྱས་ཏེ་བསྐུལ་དགོས་བསམ་པ་དེ་དྲན་པ་ཡིན། དྲན་པ་མེད་ན་ལས་མཐའ་རིང་པོར་འགྱུར་ཞིང༌། གཅིག་ཏུ་ན་དགྲའམ། གདོན་ནམ། ཆོམ་རྐུན་ནམ། སྲོག་གི་རྒྱུ་བས་ཕན་མ་བཏགས་པར་ལས་དེ་མཐར་མི་ཕྱིན། དེའི་ཕྱིར་དྲན་པ་ཉམས་པ་ཐམས་ཅད་ལེ་ལོའི་གཡང་སར་ལྷུང་བ་ཡིན། ཁྱད་པར་དགེ་སྦྱོང་གི་ཆོས་ནི་སྤྱོད་ལམ་རྣམ་པ་བཞི་ཐམས་ཅད་ལ་དྲན་པ་དང་ཤེས་བཞིན་དགོས་པའི་ཚུལ་སྟོན་པ་མྱ་ངན་ལས་འདའ་ཁར་འཁོར་རྣམས་ཀྱིས་ཞུ་བ་རྣམ་པ་བཞི་ཞུས་ཏེ། བཅོམ་ལྡན་འདས་མྱ་ངན་ལས་འདས་པའི་འོག་ཏུ། བདག་ཅག་གི་སྟོན་པའི་སུ་ལ་བགྱི། བསྟན་པ་ནི་གང་ལ་བགྱི། དྲུག་སྡེ་ཇི་ལྟར་འདུལ། བཀའ་བསྡུ་བའི་དུས་སུ་བཀའ་རྣམས་ཇི་ལྟར་གཞག་ཅེས་ཞུས་པས། བཅོམ་ལྡན་འདས་ཀྱི་ཞལ་ནས། ང་ཡོངས་སུ་མྱ་ངན་ལས་འདས་པའི་འོག་ཏུ། ཁྱེད་རྣམས་པའི་འོག་ཏུ། ཁྱེད་རྣམས་ཀྱིས་སྟོན་པ་ནི་དྲན་དང་ཤེས་བཞིན་ལ་གྱིས་ཤིག །བསྟན་པ་ཚུལ་ཁྲིམས་
རྣམ་པར་དག་པ་ལ་གྱིས་ཤིག །དྲུག་སྡེ་འདུལ་མི་དགོས་རང་གྲོལ་དུ་འགྲོ་ཡིས། ངའི་བཀའ་རྣམས་སྡུད་པའི་དུས་སུ་སྟོད་དུ་འདི་སྐད་བདག་གིས་ཐོས་པའི་དུས་གཅིག་ན། ཞེས་གླེང་གཞིའི་ཚིག་ཆུག་ཅིག །མཐར་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་བྱ་བ་རྗེས་སུ་ཡི་རང་བའི་ཚིག་ཆུག་ཅིག །ཅེས་གསུངས། དེ་ལ་འདི་སྐད་བདག་གིས་ཐོས་པའི་དུས་ཞེས་གླེང་གཞི་སྨོས་ནས་རྒྱལ་བའི་བཀའ་ཟུར་མ་ཆག་པ་བསྐྱར་རྒྱུ་ཡོང་བ་དེ་ཡང་འཁོར་རྣམས་ཀྱིས་ཉན་པའི་ཚེ་སྤྱིར་སྣོད་ཀྱི་སྐྱོན་གསུམ་དང༌། དྲི་མ་དྲུག་དང༌། མི་འཛིན་པའི་སྐྱོན་ལྔ་སྤངས་ཤིང༌། བྱེ་བྲག་ཏུ་མི་བརྗེད་པའི་གཟུངས་ཐོབ་པའི་ཡོན་ཏན་ལ་བརྟེན་ནས་བྱུང༌། གཟུངས་ཀྱི་ངོ་བོ་ནི་དྲན་པ་ཡིན་ཏེ། འཕགས་པ་འཇམ་དཔལ་གྱིས། གཟུངས་ཞེས་བྱ་བ་ནི་དྲན་པ་མ་ཉམས་པ། རྟོག་པ་མ་ཡེངས་པ། བློ་གྲོས་མ་རྨོངས་པ། ཤེས་རབ་མངོན་དུ་བྱེད་པ། ཆོས་ཐམས་ཅད་ཀྱི་ཚིག་རབ་ཏུ་ཐ་དད་པ་ཤེས་པ། ཞེས་སོགས་གསུངས་པ་ཡིན། ཐ་ན་བསོད་སྙོམས་ཙམ་ལ་རྒྱུན་ཡང་དྲན་དང་ཤེས་བཞིན་མེད་པ་དང༌། ཁྱི་ཟ་བ་ལ་སོགས་པའི་གནས་སུ་ཕྱིན་ན་རང་གཞན་གྱི་སེམས་བསྲེག་པའི་ཁ་ན་མ་ཐོ་བ་ཆེན་པོ་ཐོབ་པ་རྣམས་སྤང་བའི་ཚུལ་མདོ་སྡེ་རྣམས་ལས་རྒྱ་ཆེར་བཤད་ཅིང་དེ་སྐད་དུ་དཀོན་མཆོག་
སྤྲིན་ལས། རིགས་ཀྱི་བུ་བྱང་ཆུབ་སེམས་དཔའ་དགེ་བའི་རྩ་བ་ཆུང་བ་དང༌། དགེ་བའི་རྩ་བ་ཆུང་ངུ་དང་ལྡན་པ་སྡུག་བསྔལ་བདག་མཐོང་ན། སེམས་ཅན་དེ་དག་ལ་ཕན་པའི་ཕྱིར་བསོད་སྙོམས་ལེན་པའི་ཡི་དམ་འཛིན་ཏེ། དེ་ནི་གྲོང་ངམ། གྲོང་ཁྱེར་རམ། གྲོང་འདབས་སུ་བསོད་སྙོམས་ཀྱི་ཕྱིར་འགྲོ་བ་དེའི་ཚེ་དྲན་པ་ཤིན་ཏུ་ཉེ་བར་གཞག་པ་དང༌། སྤྱོད་ལམ་མཛེས་པས་དབང་པོ་མི་གཡོ་བ་དང༌། དབང་པོ་མི་རྒོད་པ་དང༌། དབང་པོ་དུལ་བ་དང༌། གཉའ་ཤིང་གང་ཙམ་དུ་བལྟ་བ་དང༌། དགེ་བའི་ཆོས་རྣམས་ལ་དྲན་པ་ཉེ་བར་བཞག་ཅིང་བསོད་སྙོམས་ཀྱི་ཕྱིར་འགྲོའོ། །དེ་བསོད་སྙོམས་ཀྱི་ཕྱིར་འགྲོ་ ན་དེ་བསོད་སྙོམས་མཐར་གྱིས་ལེན་པ་ཡིན་ཏེ། མགོ་གཏོད་ཅིང་བྲམ་ཟེའི་རིགས་ཤིང་སཱ་ལ་ལྟར་ཆེ་ཞིང་མཐོ་བའི་གྲོང་ངམ། རྒྱལ་རིགས་ཤིང་སཱ་ལ་ལྟར་ཆེ་ཞིང་མཐོ་བའི་གྲོང་ངམ། ཁྱིམ་བདག་ཤིང་སཱ་ལ་ལྟར་ཆེ་ཞིང་མཐོ་བའི་གྲོང་ངམ། གྲོང་འབྱོར་པ་འབྱོར་པ་དག་ཏུ་མི་འཇུག་ཅིང་མཐའ་གཅིག་ནས་བཟུང་སྟེ་ནམ་དེའི་དོན་གྲུབ་པར་མ་གྱུར་གྱི་བར་དུ་བསོད་སྙོམས་ལ་སྤྱོད་དོ། །ཞེས་དང༌། བསོད་སྙོམས་དེ་ལས་ཆ་གཅིག་ནི་ཚངས་པ་མཚུངས་པར་སྤྱོད་པ་རྣམས་ཀྱི་ཕྱིར་བཞག་གོ །གཉིས་པ་ནི་སྡུག་བསྔལ་བ་རྣམས་ཀྱི་ཕྱིར་བཞག་གོ །གསུམ་པ་ནི་སེམས་ཅན་ལོག་པར་ལྟུང་བ་རྣམས་ཀྱི་
ཕྱིར་བཞག་གོ །ཆ་བཞི་པ་བདག་ཟ་སྟེ་ཞེས་སོགས་ནས་རན་པར་བཟའ་ཞིང་སྲིན་བུ་གསོ་བའི་འདུ་ཤེས་དྲན་པ་ལ་སོགས་དང༌། དེ་བཞིན་དུ་བསོད་སྙོམས་པ་ནི་ཆོམ་རྐུན་དང༌། ཆོམ་པོ་ལྟ་བུའི་བློས་མ་ཡིན། གནང་བའི་དགོས་པའང༌། འོད་སྲུངས་ལ་སེམས་ཅན་ཐམས་ཅད་ལ་བསམས་ཏེ་བསོད་སྙོམས་བཙལ་བར་བྱའོ། །ཟས་མེད་པར་ཟས་བཙལ་བར་བྱའོ། །གཞན་གྱི་རིལ་པོར་འཛིན་པ་བསལ་བའི་ཕྱིར་བསོད་སྙོམས་ལ་འགྲོ་བར་བྱའོ། །གྲོང་སྟོང་པར་བྱིན་གྱིས་བརླབས་ཏེ་ཁྱོད་གྲོང་དུ་འཇུག་པར་བྱའོ། །ཞེས་གསུངས་པའི་དགོས་པ་དང་མཚན་གཞིའང་དྲན་པར་བྱ་ལ། སྤྱིར་ལུས་ངག་གི་བྱ་བ་ནི་སེམས་ཀྱིས་གང་བསྒྱུར་ཡིན། ཉོན་མོངས་པའི་གཞན་དབང་ཅན་གྱི་སེམས་ནི་གླང་པོ་ཆེ་ཆང་གིས་མྱོས་པ་དང་འདྲ། དེ་དུས་ལ་སྐབས་བཙལ་བ་ཙམ་མ་ཡིན་པར་དྲན་པ་ཤེས་བཞིན་གྱི་འདུལ་སྦྱོང་མཁན་གྱིས་སྤྱི་བོར་ལྕགས་ཀྱུས་བཏབ། སྣ་ཐག་བཟང་པོས་བཏགས་ན་སྡེ་སྣོད་གསུམ་ནས་རྒྱུད་སྡེ་རྒྱ་མཚོའི་བར་གྱི་བསླབ་པའི་གནས་དང་དམ་ཚིག་གི་ཀུན་ཏུ་སྤྱོད་པའི་ཁུར་ཁྱེར་ཏེ་བར་ཆད་མེད་པའི་ལམ་ལ་ཞུགས་ནས་ཐར་པ་དང་ཐམས་ཅད་མཁྱེན་པའི་གོ་འཕང་ལ་རེག་པར་འགྱུར་ཏེ། དེ་སྐད་དུ། སྤྱོད་
པའི་ས་ལས། སེམས་ཀྱི་གླང་པོ་ཡན་བཏང་ན། །མནར་མེད་གནོད་པ་བྱེད་པར་ཟད། །ཀུ་ནས་དྲན་པའི་ཐག་པ་ཡིས། །སེམས་ཀྱི་གླང་པོ་དམ་བཏགས་ན། །འཇིགས་པ་ཐམས་ཅད་མེད་འགྱུར་ཞིང༌། །དགེ་བ་ཐམས་ཅད་ལག་ཏུ་འོང༌། །ཞེས་བཤད་པས་སོ། །ཁྱད་པར་བསམ་གཏན་གྱི་ངོ་བོ་ནི་དྲན་པ་ལས་ལོགས་སུ་གྱུར་པ་མ་ཡིན་ཏེ། འདི་ལྟར་བྱང་ཆུབ་སེམས་དཔའ་རྣམས་ཀྱི་འཇིག་རྟེན་ལས་འདས་པའི་ཞི་གནས་ཀྱི་ལམ་སྟེགས་འཇིག་རྟེན་པའི་བསམ་གཏན་བཞི་དང༌། གཟུགས་མེད་པའི་སྙོམས་འཇུག་བཞི། འགོག་པའི་གཅིག་སྟེ་དགུ་པོའང་ལྷག་མཐོང་ཁྱད་པར་ཅན་གྱི་བསྟི་གནས་ངོ་བོ་ལུང་མ་བསྟན་གྱི་གཉེན་པོ་གཅིག་ཏུ་གྱུར་པའི་ཕྱིར་ཏིང་ངེ་འཛིན་ནམ་བསམ་གཏན་ཞེས་བྱ་སྟེ། དཀོན་ཅོག་སྤྲིན་ལས། ཏིང་ངེ་འཛིན་རང་གི་ངོ་བོ་ནི་སེམས་རྩེ་གཅིག་ཏུ་གནས་པའོ། །ཞེས་གསུངས། དེའི་མཚན་ཉིད་ནི། དཔེར་ན་དཔའ་བོས་གཞུ་བདུངས་པའམ། པི་ཝང་གི་གཅུས་ཕུར་བསྒྲིམས་ན་རྒྱུད་སོ་ཚུགས་ཏེ་ཐང་ངེ་སྤྲིད་དེ་གནས་པ་བཞིན་བྱང་ཆུབ་ཀྱི་སེམས་དང་བསྐྱེད་རིམ་ལ་སོགས་དམིགས་བཅས་ཀྱི་སྒོམ་པའམ། དེ་བཞིན་ཉིད་དམིགས་ལ་སོགས་རྫོགས་པའི་
རིམ་པ་ལ་དྲན་པ་ཉེ་བར་འཇོག་པའི་བསམ་པ་གཏན་ཡུལ་དུ་ཆགས་པ་གང་གི་ཚེའང་དྲན་པ་རྒྱུན་ཆགས་སུ་སོ་ཚུགས་པར་བྱེད་པས་ན་ཏིང་ངེ་འཛིན་ཞེས་བྱ་བའི་ཐ་སྙད་ཀྱང་ཐོབ་ལ། དེ་ལ་གེགས་སེལ་སྤང་གཉེན་སྦྱོར་ཚུལ་ཡང༌། ལེ་ལོའི་གཉེན་པོར་དད་པ་དང༌། འདུན་པ་དང༌། རྩོལ་བ་དང༌། ཤིན་ཏུ་སྦྱངས་པ་བཞི། བརྗེད་པའི་གཉེན་པོར་དྲན་པ། བྱིང་རྒོད་ཀྱི་གཉེན་པོར་ཤེས་བཞིན། རྩོལ་བའི་གཉེན་པོར་གློད་པ། མི་རྩོལ་བའི་གཉེན་པོར་སེམས་པ་སྟེ་རྣམ་པ་དྲུག་ཏུ་བཞག་ཀྱང་སྐབས་ཐམས་ཅད་ཐུ་བ་ལྷན་ཅིག་སྐྱེས་པའི་མ་རིག་པའི་ངོ་བོ་བརྗེད་འབྱམས་ཡིན་པས་དྲན་པ་ཡོད་ན་གཞན་ལྔ་པོ་ལའང་རང་རང་གི་མཚན་ཉིད་འཛིན་པའི་ནུས་པ་ཧ་ཅང་མེད་པའི་ཕྱིར་རོ། །འདིར་མ་རིག་འཛིན་པའི་ཡིད་ཀྱིས་དྲན་པ་དང་ཤེས་བཞིན་ཉམས་པའི་མོད་ལ་དགེ་བའི་ཆོས་ཐམས་ཅད་དང༌། ལས་ཀྱི་མཐའ་ཐམས་ཅད་འཇིག་པའི་དཔེ་གང་གིས་བསྟན་ན། སྔོན་གྱད་སྟོབས་པོ་ཆེ་ཞིག་དང་སྒྱུ་རྩལ་མཁན་གཅིག་འཛིངས་པ་ལས། གྱད་ཀྱིས་ཤེད་སྟོབས་གང་ཡོད་ཀྱིས་སྒྱུ་རྩལ་པའི་གཉའ་བ་ནས་བཟུང་སྟེ་ས་ལ་བརྡབས་པས། སྒྱུ་རྩལ་བས་ཡན་ལག་བཞི་པ་དང༌། གསུམ་པ་དང༌། གཉིས་པ་དང༌། གཅིག་པའི་བར་ཚུགས་
པའི་འཁྲུལ་འཁོར་ལ་བསྒྲིམས་པས་ཤེད་སྟོབས་ལྷག་པར་བྲི་ཡང་ཅང་མ་གནོད། མཐར་ཁོ་ནོངས་བཞིན་པར་ཁྱིམ་དུ་བྲོས་ནས་ངུའོ། །ཆུང་མས་ཅི་ཉེས་དྲིས་པ་དེ་རིང་གྱད་དང་འཛིངས་པས་སྨ་བབས། ད་སང་འཛིངས་ན་ཤི་བ་ལས་འོས་མེད་ཟེར། མོ་ན་རེ། ཁྱོད་མ་ངུ་ཡི་ང་ལ་ཐབས་ཡོད་ཀྱི་བྱས་ནས་སང་མོ་ཡང་ཕྱི་བཞིན་དུ་འབྲངས་སོ། །དེར་ཁོང་གཉིས་འཛིངས་བ་དོ་ཙ་ན་མོ་ན་རེ། གྱད་པ་ཤེད་སྟོབས་ཆེ་མོད་ཀྱི། །དཔྲལ་བའི་ནོར་བུ་འདྲུལ་ལ་ཁད། །ཅེས་གླུ་བླངས་པས་གྱད་ལ་རྣམ་རྟོག་མི་འདྲ་བ་གསུམ་ནོར་བུ་ཡིད་ལ་བྱེད་པ་འདོད་ཆགས་ཀྱི་སེམས། དེ་དགྲ་ལ་ཤོར་དོགས་ཞེ་སྡངས་གི་སེམས། རང་ནོར་རང་གིས་མ་མཐོང་ཞིང་ཡིད་ཁོང་དུ་ཆུད་པ་གཏི་མུག་གི་སེམས་སོ། །ཤར་ནས་ཡེངས་ཐབས་སུ་སོང་བས་སྒྱུ་རྩལ་མཁན་གྱིས་ཁོའི་འདོམས་ལ་འཇུས་ནས་གསོད་དུ་ཆ་བ་དང༌། གྱད་ན་རེ། དྲན་དང་ཤེས་བཞིན་ཉམས་པའི་གྱད། །བསྒྲིམས་པའི་ཉམ་ཆུང་སྐྱེས་བུས་བསད། །སེམས་ཡེངས་འདི་ལས་དགྲར་གྱུར་དང༌། །བསླུ་བ་མཁས་པ་ངས་མ་མཐོང༌། །ཟེར་ནས་ཤི་སྐད། དཔེ་དེ་བཞིན་དུ་བསམ་གཏན་སྒོམ་པའི་དབང་པོ་ཡུལ་ལ་ཡེངས་ཙ་ན་དྲན་པའི་ཐག་པ་ཆད་ནས་རིག་པའི་གནས་ལྔ་ལ་མཁས་པ་གཅིག་ཡིན་
ཡང་ནང་རིག་པ་འོག་འགྱུའི་རྐུན་པོ་མ་ཚོར་པར་འཁྲུལ་པའི་གྲོང་ཁྱེར་དུ་ཁྲིད་དེ་མཆི། རྔོག་ལོ་ཆེན་པོ་ཧས་པོ་རིའི་མདུན་དུ་གཤེགས་ཁར། དབུ་བ་རབ་བརྩེགས་རྡོས་པའི་ཕུང་པོ་འདིས། །རི་མཆོག་འདྲ་བའི་རང་བཞིན་ཉིད་དུ་བསྟན་ནས་བསླུས། །ཞེས་སྒོམ་པའི་ཤེས་རབ་ཀྱིས་སོར་མ་ཆུད་པའི་ཐོས་བསམ་གྱིས་ས་ལམ་མི་ཆོད་པར་བསྟན། ཁོང་འཇམ་དཔལ་རྩ་རྒྱུད་ཀྱིས་ལུང་བསྟན་པའི་སྐྱེས་བུ་དམ་པ་ལ་རྣམ་རྟོག་རང་རྒྱུད་པ་མེད་དེ། གཞན་ལ་ཐུགས་ལྷག་པར་བརྩེ་བས་རྗེས་སུ་གདམས་པ་ཡིན། དྲན་པའི་ཆོས་རབ་ཏུ་འདུ་བྱེད་པས་ཉོན་མོངས་པའི་མགོ་ནོན་ཞིང་མཐོང་ཆོས་སུའང་དགའ་བདེའི་ཡོན་ཏན་རྒྱ་ཆེན་པོ་དང༌། ཚོགས་ལམ་དང་པོར་དྲན་པ་ཉེ་བར་གཞག་པ་ནས་བཟུང་སྦྱོར་ལམ་དུ་དྲན་པའི་སྟོབས། མཐོང་ལམ་དུ་བྱང་ཆུབ་ཡན་ལག་བདུན་གྱི་དང་པོ་དང༌། སྒོམ་ལམ་དུ་འཕགས་པའི་ལམ་གྱི་བདུན་པར་ཡང་དྲན་པ་ཉིད་སྨོས་ནས་ལམ་ལྔའི་ཡོན་ཏན་མཐའ་དག་མངོན་དུ་བྱེད་པའི་ཕྱིར་རོ། །ཁྱད་པར་དྲན་པའི་ངོ་བོ་བསམ་གཏན་གྱི་ཆོས་ལ་ངང་གིས་མཉམ་པར་གནས་ཤིང་བྱིང་རྒོད་ཀྱི་དབང་དུ་མ་གྱུར་པ་ལ་ཞི་ལྷག་ཟུང་འབྲེལ་གྱི་ཏིང་ངེ་འཛིན་ཞེས་བྱའོ། །དེ་ཡང་ཧ་ཅང་རྩོལ་ན་ནི་སེམས་རྣམ་པར་གཡེངས་
ལ། དྲན་འདུན་གྱི་གཉེན་པོ་དང་བྲལ་ན་ལྷག་མཐོང་ཉམས་པར་འགྱུར་བས་སོ། །མདོར་ན་འདི་མན་ཆད་ཀྱི་ཚོགས་སྦྱོར་གྱི་ལམ་ན་ཡོད་པའི་དགེ་ཆོས་ཐམས་ཅད་ཀྱང་འདུ་བྱེད་ཅིང༌། རང་ངོ་ཡང་རྩོལ་བ་དང་བཅས་པས་འདུ་བྱེད་ཀྱི་དྲན་པ་ཞེས་བྱ་སྟེ་སོ་སྐྱེའི་ལམ་དུ་བཞག་ནས་རིམ་པར་ཕྱེ་བའི་དོན་མན་ངག་རིན་པོ་ཆེའི་མཛོད་ལས། དང་པོའི་ལས་ཅན་འདུ་བྱེད་མ་ཡེངས་བྱ། །མཉམ་རྗེས་སློབ་རྣམས་ཆོས་ཉིད་མ་ཡེངས་བྱ། །གོམས་པས་དྲན་སྣང་ཡེ་ཤེས་མ་ཡེངས་བྱ། །ཀློང་གྱུར་དུས་སུ་ཡེངས་མེད་ཡེངས་མཁན་མེད། །བརྟན་པ་མཐར་ཕྱིན་ཡེངས་ཡུལ་ཆོས་ཉིད་ངེས། །ཆོས་ཟད་དུས་ན་མཚོན་བརྗོད་ཡུལ་ལས་འདས། །དེ་འདྲའི་ཚད་དུ་བསྐྱོལ་བ་མཛད་པར་ཞུ། །ཞེས་གསུངས་རྒྱུ་དེས་ལམ་གྱི་ཆོས་སྐད་ཚོན་པོ་མཐའ་དག་སྤང་བ་བསམ་གཏན་པས་དྲན་པའི་མཚན་ཉིད་དུ་གཏན་ལ་ཕབ་ན། འདི་ལྟར་མཉམ་པར་གཞག་པ་པོ་བློ་མཆོག་ཏུ་གྱུར་པ་ཅིག་ཆར་བའི་རིགས་ལ་རང་བཞིན་རྫོགས་པ་ཆེན་པོའི་ཁྱད་ཆོས་མཉམ་གཞག་གི་སྟེང་དུ་དྲན་པ་མི་གཞག་པར། དྲན་པ་རང་མཉམ་གཞག་གི་ངོ་བོར་རྫོགས་པ་དེ་ས་ཆོད་ལྷག་པར་དུ་ཆེ་བ་ཡིན་ལ། དེ་ལྟ་ནའང་ལྟ་བ་བཟང་པོ་ལས་འཕྲོ་དང་བསོད་ནམས་ཀྱིས་འཆུན་པར་དཀའ་བ་མང་ཕྱིར། དེ་ཙམ་བློར་མི་ཆུད་པའི་རིགས་ལ་
མཉམ་གཞག་དྲན་པས་སྐྱོང་བ་གཞན་དང་མཐུན་པར་མ་ཁྲིད་ན་འཐོར་ཡས་སྲང་དུ་མི་ཆུད་པ་དེ་འོང་བས་སྐྱོང་ཚུལ་གྱི་རིམ་པ་གཉིས་ལས་དང་པོའི་དབང་དུ་བྱས་ན་དྲན་པ་རང་མཉམ་གཞག་གི་ངོ་བོར་རྫོགས་པས་བལྟ་བའི་ཡུལ་དང་ལྟ་མཁན་ཐ་དད་མེད་ལ། ཡེངས་པའི་ཚེ་ཡང་རྣམ་རྟོག་ཁོ་རང་དྲན་པར་སོང་བས་མེ་དང་ཚ་བ་རོ་གཅིག་པ་ལྟར། དྲན་པ་དང་རྣམ་རྟོག་རོ་གཅིག་ཏུ་འགྲོ་བ་ཅིག་ཆར་བའི་སྐྱེ་ཚུལ་ལ་ས་ཆོད་ངེས་པ་མེད་དོ། །གཉིས་པ་ལྟར་ན་མཉམ་གཞག་གི་ཚེ་ན་དྲན་པས་འཇུན། ཡེངས་པའི་ཚེ་དྲན་པ་རང་རྟོག་པར་སོང་བས་འཁྲུལ་པའི་གཞན་དབང་ཅན་ནོ། །ཡང་དྲན་པ་སླེབ་པ་དང་མཉམ་གཞག་ཏུ་ཞུགས། དེ་ལྟར་རྩེ་སྤྲོད་དུ་འཐབ་པ་བཞིན་ལ་སྙིང་རུས་ཀྱིས་འཆུན་ན་ནམ་ཞིག་དྲན་པ་སྟོབས་ཆེ་བར་སོར་བའི་ཚེ། རྣམ་རྟོག་དེ་གློ་བུར་བའི་དྲི་མ་ཡིན་པས་དྲན་པའི་གདོང་མི་བཟོད་པ་དཔེར་ན་མེ་དང་བསྲེག་བྱ་ཕྲད་པའམ། མུན་ཁུང་དུ་སྒྲོན་མེ་བཏེག་པ་ལྟར་རྣམ་རྟོག་ཅི་ཙམ་ཤར་ཡང་དེས་མཉམ་གཞག་ལ་ཅི་ཡང་མི་སྟོབ་རྣམ་རྟོག་རང་གི་ངོ་བོ་དྲན་པར་སོང་བ་དེ་ལ་སྤང་བྱ་གཉེན་པོར་ལྷོངས་པ་ཞེས་བྱ་སྟེ་འདུ་བྱེད་ཀྱི་དྲན་པའི་ནུས་པ་ཡིན་ནོ། །གལ་ཏེ་སྙིང་རུས་ཀྱིས་མ་འཆུན་ན་དྲན་པའི་སྟོབས་ཇེ་ཆུང་དུ་བྲི་བ་དེ་ཙམ་དུ་མ་རིག་པ་དང་རྟོག་པའི་
ཚོགས་རྒྱས་ནས་བསྒོམས་པས་དྲེད་པ། རྫི་བོ་བརྐམ་ཆགས་ཅན་གྱི་དཔེས་བསྟན་ནོ། །དེ་ཇི་ལྟར་ན་སྔོན་རྫི་བོ་བརྐམ་ཆགས་ཤིན་ཏུ་ཆེ་བ་ཞིག་གིས་འབྲོག་དགོན་པ་ནས་གསེར་སྦྲམ་ཆེན་པོ་གཅིག་རྙེད་པ་ལས་ཁོ་དགའ་ཆེས་ནས་ཕྱུགས་ཀྱི་འཚོ་སྐྱོང་ཡང་ལྷོད། ཟས་བྱེད་པ་ཡང་མ་དྲན་པར་གསེར་སྦྲམ་ལག་པ་གཡས་གཡོན་སྤོ་བཞིན་པར་བཟུང༌། དྲ་བ་དང་བྱི་བ་མཐོང་ཡང་ཁོའི་གསེར་སྦྲམ་འཕྲོག་པར་དོགས་ནས། དབུལ་པོའི་ལག་ཏུ་ཟན་གོང་མེད། །མར་དུ་འཁྲུལ་པའི་མཁར་གོང་གིས། །སྐྱེས་བུའི་སོ་ལ་ལྟས་ངན་བྱས། །ཞེས་པའི་གླུ་ལེན་སྐད། དེར་ཞག་འགའ་ནས་ཁོའི་སེམས་ཅན་ལ་རྦབ་ཏུ་ཤོར། ལ་ལ་གཅན་གཟན་གྱིས་ཕྲོགས་པ་ཆེས་ཆེར་ཟད་པ་ལ་ཐུག་པ་དང༌། ཕྱུགས་བདག་གིས་བརྩད་པས་ཁོ་བརྐམ་ཆགས་ཆེ་དྲགས་པས་གཏམ་དེ་ཤོད་དུའང་ཕངས་ཏེ་ན་བ་ལྟར་བྱས་ནས་ར་ངའི་ཚང་ཚིང་ཁྲོད་དུ་ཉལ་ལོ། །དེར་ནུབ་མོ་བྱི་ལས་བྱི་བ་ལ་འཇབ་ཏུ་འོངས་པས་ཀྱང་གསེར་སྦྲམ་འཕྲོག་པ་ཅིག་སླེབས་སྙམ་ནས་ཐབས་བསམས་པས། འདི་སྙམ་དུ། གསེར་སྦྲམ་ཡུལ་གྱི་རྒྱལ་པོ་ལ་བྱིན་ན། དེ་ལས་ཁྱིམ་བདག་ཆེན་པོ་ཞིག་ཐོབ། དེའི་ཚེ་བདག་གི་ཆུང་མ་ལ་པུ་གཅིག་ནི་བཙའ། དེ་རིག་པ་དང་སྒྱུ་རྩལ་གྱི་གནས་ལ་མཁས་པར་བྱས་ན། གདོན་མི་ཟ་བར་
རྒྱལ་པོའི་བློན་པོར་འགྱུར། རྒྱུ་དེས་གསེར་སྦྲམ་སླར་ཡང་བདག་ཉིད་ཀྱི་ལག་པ་ན་མཆི་བ་ལ་ནི་ཐེ་ཚོམ་མེད་དོ་སྙམ་དུ་དེ་བས་ཀྱང་དགའ་ཆེས་ནས་བྲོ་འཁྲབ་པས་སེམས་ཡེངས་ཏེ་གསེར་སྦྲམ་ལག་པ་ནས་ཤོར་ཏེ་ཚང་ཚིང་ཁྲོད་དུ་སོང༌། དེར་ཁོ་ན་རེ། གསེར་སྦྲམ་ལས་ཀྱང་དྲན་པ་ཨང༌། །དྲན་པའི་ཡིད་བཞིན་ནོར་བརླག་པས། །གསེར་སྦྲམ་དགྲ་བོའི་ལག་ཏུ་ཤོར། །དྲན་པ་མེད་པའི་རྣམ་ཤེས་འདིས། །འཇིག་རྟེན་ཐམས་ཅད་མ་རུངས་བྱས། །ཞེས་ཟེར་སྐད། དཔེ་དེས་དྲན་པ་ཉམས་པ་ལས་སྒོམ་དྲེད་ཁྱེར་བའི་ཕྱི་དང་ནང་གི་རྣམ་པར་ཐར་པ་དང་མཚན་ཉིད་ཐམས་ཅད་གཏན་ལ་ཕེབས་པ་ཡིན་ནོ། །དེ་ལྟ་ནའང་དྲན་པའི་ཡོན་ཏན་གོང་ནས་གོང་དུ་ན་འཕར་བ་ལས་མཐར་དྲན་གཞི་རང་ཟད་ཆོས་ཟད་བློ་འདས་ཆེན་པོའི་ས་ལ་སྐྱོལ་བའི་དཔེ་ནི། ལྡེར་བཟོ་བགྱིད་པའི་ཚེ་ཐོག་མར་རླན་འདམ་མེད་ན་བཟོ་གནས་ཀྱི་དཔྱད་མི་འགྲུབ་ལ། མཐར་རླན་གཤེར་མིང་མེད་དུ་མ་སངས་ན་བཟོ་གནས་ཀྱི་དོན་མི་འགྲུབ་པས། རྡོ་རྗེ་ཡང་ཏོག་གི་རྒྱུད་ལས་ཀྱང༌། འགྱུ་བའི་རྟ་ལ་དྲན་པའི་སྲབ། །གླང་ཆེན་ལྕགས་ཀྱུས་བསྒྱུར་བ་འདྲ། །རྟ་རྒོད་སྲབ་ཀྱིས་བཏུལ་བ་བཞིན། །འགྱུ་བ་དྲན་པས་བཏུལ་བ་ཡིན། །དྲན་པ་སངས་པ་ཡེ་ཤེས་ཡིན། །ཞེས་དང༌།
མཆོག་གཟིགས་རྣལ་འབྱོར་དམ་པ་ལ། སངས་རྒྱས་པའི་དུས་སུ་རིག་པ་འདི་ཇི་ལྟར་འགྱུར་ཞུས་པས། སེམས་ཀྱི་དྲན་རྟོག་སངས་པའི་ཡེ་ཤེས་ཡིན་གསུངས། ཡེ་ཤེས་ལ་དྲན་པ་བདོག་གམ་མི་བདོག་ཞུས་པས། འདི་ཅི་ཟེར་ན་དྲན་པ་སེམས་ཅན་གྱི་བློ་ཡིན། ཡེ་ཤེས་བློ་བྲལ་ཡིན་གསུངས། དེའི་ཕྱིར་སྤྲོས་པ་ཐམས་ཅད་དང་བྲལ་བ་ཤེས་རབ་ཀྱི་ཕ་རོལ་ཏུ་ཕྱིན་པ་ལྟ་བ་བསམ་གྱིས་མི་ཁྱབ་པའི་ཡེ་ཤེས་དེས་གཟུགས་བདག་ཡིན་པར་ལྟ་བ་དང༌། བདག་གཟུགས་དང་ངོ་བོ་ཉིད་ཀྱི་ལྷག་པར་ལྟ་བ་དང༌། གཟུགས་ལ་བདག་ངོ་བོ་ཉིད་ཀྱི་ཡོད་པར་ལྟ་བ་དང༌། བདག་ལ་གཟུགས་ངོ་བོ་ཉིད་ཀྱི་ཡོད་པར་ལྟ་བ་དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རྣམས་ལའང་བཞི་བཞིར་དབྱེ་བའི་འཇིག་ཚོགས་ཀྱི་ལྟ་བ་ཉི་ཤུ་པོ་རྣམ་རིག་པ་གང་གིས་བཅོམ་ན་གཟུགས་བདག་མ་ཡིན་ཏེ། དེ་དང་འདྲ་བ་ཁོ་ནར་མི་རྟག་པ་ཉིད་དུ་ཐལ་བར་འགྱུར་བའི་ཕྱིར་རོ། །ཕྱོགས་གཉིས་པའང་མ་ཡིན་ཏེ། བདག་གཟུགས་ལ་སོགས་པ་ལ་ཅི་ཞིག་དབང༌། དེ་དག་ལ་འདོར་ལེན་མི་བཏུབ་ཅིང་མི་འདོད་བཞིན་དུའང་འཇིག་པ་
མཐོང་བའི་ཕྱིར་རོ། །དེ་བཞིན་དུ་གཟུགས་ལ་བདག་ངོ་བོ་ཉིད་ཀྱི་ཡོད་པ་སྐྱེས་བུ་རེ་ལྡེ་ལ་འདུག་པའི་བླ་འོག་ལྟར་གནས་པའང་མི་རུང་སྟེ། བདག་གི་འདོད་པས་གཟུགས་ལ་འཇུག་ལྡོག་ཅུང་ཟད་ཀྱང་མི་ནུས་པའི་ཕྱིར་རོ། །བདག་ལ་གཟུགས་ངོ་བོ་ཉིད་ཀྱི་ཡོད་ན་བདག་མེད་བཞིན་དུའང་ཕྱིའི་གཟུགས་ལ་སོགས་པ་མཐོང་བའི་འགལ་བ་ཇི་ལྟར་སྤོང༌། འདིའི་མཚན་ཉིད་ཞིབ་ཏུ་ཤེས་པར་འདོད་ན་བཤེས་སྤྲིང་རྒྱ་འགྲེལ་ལས་ཤེས་པར་བྱའོ། །པར་བཅོམ་ནས་ཆོས་ཐམས་ཅད་རང་གི་ངོ་བོས་སྟོང་པའི་ཁས་ལེན་ཡིད་བྱེད་ལས་འདས་པ་ནམ་མཁའི་དཀྱིལ་ལྟར་མཐོང་བ་ནི། འཇིག་རྟེན་ལས་འདས་པའི་མཉམ་གཞག་ཡིན་ཏེ་ཕུང་པོ་ལྔ་དང་བྲལ་བའི་ཕྱིར་རོ། །དེའི་མྱོང་བ་སོ་སོར་རྟོག་པའི་ཤེས་རབ་རྗེས་ཐོབ་ཐམས་ཅད་དུ་བསྲེ་བ་ལ་བསླབ་པ་ནི་ཆོས་ཉིད་ཀྱི་དྲན་པ་ཞེས་བྱ་སྟེ་ཉོན་མོངས་པ་ས་བོན་དང་བཅས་པ་དྲུངས་ནས་འབྱིན་པའི་གཉེན་པོ་ཡིན། དེ་ལྟར་གོམས་པ་ལས་སོ་སོར་རྟོག་པའི་ཤེས་རབ་དེའི་མྱོང་ཞེན་ནམ་ཚོགས་བརྒྱད་ཀྱི་དྲི་མ་ཕྲ་བ་དང༌། རགས་པ་རྟོགས་པའི་ཆོས་འདི་དག་ནི་དྲན་པར་ཡང་མི་བྱའོ། །ཡིད་ལ་ཡང་མི་བྱའོ་སྙམ་དུ་དྲན་པས་ཤིན་ཏུ་དྲན་པ་དང༌། ཤིན་ཏུ་ཡིད་ལ་བྱས་པར་འགྱུར་བའི་སྒྲིབ་པ་གང་ཡིན་པ་རྡུལ་དང་ལྟ་བ་ཐམས་ཅད་དང་བྲལ་བ་འཕགས་པའི་ཡེ་ཤེས་མཐོང་ལམ་རྣམ་པར་མི་རྟོག་པས་སྤོང་བར་འགྱུར་བས་ན་ཡུམ་ལས། གང་དྲན་པ་མེད་ཅིང་ཡིད་ལ་བྱར་མེད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་པའི་དོན་དངོས་བསྟན་ལ་འབྱོར་ཞིང་རང་ལམ་དུ་བྱང་ཆུབ་ཡན་ལག་གི་དྲན་པའི་ཐ་སྙད་ཐོབ་པས་དྲན་སྣང་ཡེ་ཤེས་སུ་བཞག་ལ། མན་
ངག་རྫོགས་པ་ཆེན་པོའི་རང་ངོ་ནས་བརྗོད་ན། སྤང་གཉེན་ལྷན་ཅིག་ཏུ་མི་གནས་པས་རྟོག་བཅས་ཀྱི་དྲན་པ་མི་འཇུག །རང་བཞིན་དུ་ཤེས་པས་དྲན་པས་ཕན་མ་བཏགས། རང་གྲོལ་དུ་འདུག་པས་དྲན་པས་སླར་མི་འཆིང༌། གཞི་དང་རྩ་བ་མེད་པས་གཉེན་པོའི་དྲན་པ་རག་མ་ལུས། ངོ་བོ་ལ་དཔྱད་པ་མེད་པས་དྲན་བྱེད་རང་དག །ཆོས་ཉིད་ཀྱི་རྩིས་ཐེབས་པས་དྲན་པ་རང་ཡན། ཡེ་ཤེས་ལ་འཁྲུལ་པ་མེད་པས་དྲན་པའི་བློ་སོ་མི་ཚུགས་པའི་ཕྱིར་རོ། །འདིར་སྒོམ་རིམ་ལས། ཡང་དྲན་པ་མེད་པ་དང་ཡིད་ལ་བྱེད་པ་མེད་པར་གྱུར་དུ་ཟིན་ཡང་ཡང་དག་པར་སོ་སོར་རྟོག་པ་མེད་ན་ཆོས་རྣམས་ཀྱི་ངོ་བོ་ཉིད་མེད་པ་ལ་ཇི་ལྟར་འཇུག །ཆོས་རྣམས་ངོ་བོ་ཉིད་ཀྱིས་སྟོང་པར་གནས་པ་ཁོ་ན་ཡིན་དུ་ཟིན་ཀྱང་སོ་སོར་རྟོག་པ་མེད་ན་དེ་དག་གི་སྟོང་པ་ཉིད་རྟོགས་་པར་མི་འགྱུར་རོ། །ཞེས་པ་ལ་སོགས་པའི་མཚན་ཉིད་ཤིན་ཏུ་ཐ་དད་པས་དྲན་པ་ཉིད་སོ་སོར་རྟོག་པའི་དངོས་པོར་བསྒྲུབས་པ་དང༌། དེའི་ཕྱོགས་བཟུང་ནས་གངས་རིའི་ཁྲོད་དུ་ཤིན་ཏུ་གྲགས་པ་བརྟན་ཞིང༌། ལམ་དེ་དང་དེ་ལས་དངོས་གྲུབ་བརྙེས་པའི་ལྟ་བ་ཐམས་ཅད་ཡང་དག་པ་མ་ཡིན་ནོ། །ཞེས་ཟེར་བ་ཇི་སྙེད་ཅིག་མཆིས་སོ། །དངོས་པོ་ལ་གནས་ཚོད་ཀྱི་དབུ་མ་ནི་བཅོམ་ལྡན་འདས་ཁོ་ནས་མཁྱེན་གྱི་དེའི་གོ་འཕང་མཐར་ཐུག་པའང་ཆོས་སྐུ་
ཡིན་པས་དེའི་མཚན་ཉིད་རྟོག་དཔྱོད་ཀྱི་ཤེས་བྱ་དང་འགལ་ན། འདིར་བསྒྲུབ་གཤག་གི་གྲུབ་མཐས་རང་ལྟ་མཆོག་འཛིན་དང༌། གཞན་སྐུར་པའི་གནས་ལ་སྤྲོ་བ་མ་ཡིན་ཡང་མཐའ་གཅིག་ཏུ་ཞེན་པ་དང་རྨོངས་པ་རྣམས་ཐེ་ཚོམ་མི་ཟ་བའི་ཕྱིར་ངེས་པའི་གནས་ཅུང་ཟད་བཤད་ན། རང་ངོའི་ལམ་དང་བཞུགས་ཚུལ་གང་ཡིན་པ་སྒོམ་བྱུང་གི་ཤེས་རབ་རྣམ་པར་དག་པས་མཐོང་བ་ནི་གོང་དུ་བཤད་མ་ཐག་པས་ཁྱབ་ཅིང་ད་དུང་འཆད་པར་འགྱུར་ལ། དམིགས་པས་ལ་ལ་དབུ་མ་རང་རྒྱུད་པའི་འདོད་པ་དེ་ཐལ་འགྱུར་བས་གཞར་ཟིན་ཏེ། ཇོ་བོའི་ཅིག་ཅར་འཇུག་པ་ན། དེ་ལ་གཟུགས་ཅན་རྣམས་ནི་རྡུལ་ཕྲ་རབ་འདུས་པ་ཡིན་ལ། དེ་ཡང་ཕྱོགས་ཆའི་དབྱེ་བས་ཕྱི་ཞིང་གཞིག་ན། ཤིན་ཏུ་ཕྲ་བའང་ལུས་པ་མེད་ཅིང༌། ཤིན་ཏུ་སྣང་བའང་མེད་དོ། །གཟུགས་ཅན་མ་ཡིན་པ་ནི་སེམས་ཡིན་ལ། དེ་ཡང་འདི་ལྟར་འདས་པའི་སེམས་ནི་འགགས་ཤིང་ཞིག །མ་འོངས་པའི་སེམས་ནི་མ་སྐྱེས་ཤིང་མ་བྱུང༌། ད་ལྟར་གྱི་སེམས་ནི་འདི་ལྟར་ཡང་ཤིན་ཏུ་བརྟག་དཀའ་སྟེ། ཁ་དོག་མེད་ཅིང་དབྱིབས་དང་བྲལ་བ། ནམ་མཁའ་དང་འདྲ་བས་མ་གྲུབ་པའམ། ཡང་ན་གཅིག་དང་དུ་མ་དང་བྲལ་བས་སམ། ཡང་ན་མ་སྐྱེས་པའམ། ཡང་ན་དེ་རང་བཞིན་གྱིས་འོད་གསལ་བ་ལ་སོགས་པ་རིག་པའི་མཚོན་གྱིས་དཔྱད་ཅིང་གཞིག་ན་མ་
གྲུབ་པར་རྟོགས་སོ། །དེ་ལྟར་གཉིས་པོ་ཅིའི་ངོ་བོར་ཡང་མ་གྲུབ་ཅིང་མེད་ཙམ་ན། སོ་སོར་རྟོག་པའི་ཤེས་རབ་དེ་ཉིད་ཀྱང་མ་གྲུབ་སྟེ། དཔེར་ན་ཤིང་གཉིས་ཕན་ཚུན་བསྲུབས་པས་མེ་བྱུང་བའི་རྐྱེན་གྱིས་ཤིང་གཉིས་པོ་ཚིག་ཅིང་མེད་པའི་རྗེས་ལ་གང་གིས་བསྲེག་པར་བྱེད་པའི་མེ་དེ་ཉིད་ཀྱང་རང་ཞི་བ་དེ་བཞིན་དུ། རང་དང་སྤྱིའི་མཚན་ཉིད་ཀྱི་ཆོས་ཐམས་ཅད་མེད་པར་གྲུབ་ཙམ་ན་ཤེས་རབ་ཉིད་སྣང་བ་མེད་ཅིང་འོད་གསལ་བ་ཅིའི་ངོ་བོར་ཡང་མ་གྲུབ་པའི་བྱིང་བ་དང་རྒོད་པ་ལ་སོགས་པའི་སྐྱོན་དུ་གྱུར་པ་ཐམས་ཅད་བསལ་ཏེ། བར་སྐབས་དེར་ཤེས་པ་ཅིར་ཡང་མི་རྟོག །ཅིར་ཡང་མི་འཛིན། དྲན་པ་དང་ཡིད་ལ་བྱེད་པ་ཐམས་ཅད་སྤངས་ཏེ་ཇི་སྲིད་དུ་མཚན་མའམ། རྣམ་པར་རྟོག་པའི་དགྲ་འམ། ཆོམ་རྐུན་མ་ལངས་ཀྱི་བར་དུ་དེ་ལྟ་བུ་ལ་ཤེས་པ་གནས་པར་བྱའོ། །ཞེས་གསུངས་པས་སོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་ཟབ་མོ་འདིས་ནི་དྲན་པ་ཡིན་ཕྱིན་ཆད་སོ་སོར་རྟོག་པ། སོ་སོར་རྟོག་པ་ཡིན་ཕྱིན་ཆད་འཛིན་སྟངས་དང་མི་འགལ་བ་མཐར་ཐུག་གི་གནས་སྐབས་སུའང་འདོད་པའི་ཤ་ཟའི་གདོན་ཆེན་པོ་བཟློག་པར་འགྱུར་རོ། །དེ་ལྟ་ན་དྲན་པའི་ཆོས་རབ་ཏུ་ཉམས་པས་གཉིད་འཐུག་བ་དང་རྒྱལ་བ་སོགས་དབུས་མཐའ་
ལས་སེམས་མེད་པའི་གནས་སྐབས་ལྔར་བཤད་པའི་ལུང་མ་བསྟན་དང་མི་མཚུངས་སམ་ཞེ་ན། དེ་དག་ཀྱང་ཐབས་ཀྱིས་ཟིན་ན་ལུང་མ་བསྟན་དུ་ཅིས་འགྲུབ། ཐུན་མོང་གི་དབང་དུ་བྱས་ནའང་མཚུངས་པའི་སྐབས་མེད་དེ། དྲན་པ་དང་ཡིད་བྱེད་དེ་སྤང་བྱ་སྤང་བའི་གཉེན་པོའི་སྒོ་ནས་བཞག་པའི་ཕྱིར་སྐབས་འདིར་རྟོག་དཔྱོད་ཀྱི་ཤེས་རབ་ཏུ་ཤར་ནས། བློ་དང༌། ཚིག་དང༌། སྙམ་བྱེད་དང༌། ཡིད་དཔྱོད་དང༌། སྐྱེ་བ་དང༌། མཚན་ཉིད་ལ་སོགས་པའི་ཉེ་བར་ལེན་པ་པོ་ཡིན་ལ། འདིར་ནི་བློ་དང་བྲལ་བའི་ཤེས་རབ་ཀྱིས་དྲན་པ་མེད་པའི་ཆོས་ཉིད་མཐོང༌། ཚིག་དང་བྲལ་བའི་ཤེས་རབ་ཀྱིས་སྡེ་སྣོད་ཀྱི་དོན་ཤེས། སྙམ་བྱེད་དང་བྲལ་བའི་ཤེས་རབ་ཀྱིས་ངོ་བོའི་བཞུགས་ཚུལ་ལ་མ་རྨོངས། ཡིད་དཔྱོད་ལས་འདས་པའི་ཤེས་རབ་ཀྱིས་དྲན་གཞི་ཟད་པའི་ལྷག་མཐོང་དུ་ཤར། སྐྱེ་བ་གཅོད་པའི་ཤེས་རབ་ཀྱིས་ཉོན་མོངས་པ་ལས་རྣམ་པར་གྲོལ། མཚན་ཉིད་དང་བྲལ་བའི་ཤེས་རབ་ཀྱིས་རྣམ་པར་མི་རྟོག་པའི་ཁྱད་པར་ཤེས་ལ། གོ་ཕྱེ་བའི་ཆ་ནས་རང་བཞིན་གྱི་འོད་གསལ་བའི་རིག་པ་ཤིན་ཏུ་རྣམ་པར་དག་པ་ལ་སྤྱན་དང་མངོན་ཤེས། གཟུངས་དང་ཟད་པར། སྨོན་མཁྱེན་དང་དབང་བཅུ་ལ་སོགས་པའི་ཡོན་ཏན་ཐམས་ཅད་ཀྱི་འཆར་གཞིར་ནམ་ཡང་འགག་པ་མེད་པའི་ཕྱིར་རོ། །འདིར་ཕར་ཕྱིན་རང་
ལམ་གྱི་གནས་སྐབས་ན་སངས་རྒྱས་དང་བྱང་ཆུབ་སེམས་དཔའི་ཁྱད་པར་ལ། སྟོང་ཕྲག་བརྒྱ་པར། རབ་འབྱོར་འདི་ལྟ་སྟེ། ཞུགས་པའང་གཞན་ལ། འབྲས་བུ་ལ་གནས་པའང་གཞན་ཏེ། དེ་གཉིས་ཀ་འཕགས་པའི་གང་ཟག་མ་ཡིན་ཞེས་མི་བྱའོ། །རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བར་ཆད་མེད་པའི་ལམ་དུ་ཞུགས་པ་ཡིན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་རྒྱས་ནི་ཆོས་ཐམས་ཅད་ལ་བསྒྲིབ་པ་མེད་པའི་ཡེ་ཤེས་བརྙེས་པ་སྟེ། རབ་འབྱོར་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཁྱད་པར་རོ་ཞེས་དང༌། བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་དྲུག་དང་སྟོང་ཉིད་བཅུ་དྲུག་ལ་སྤྱད་ཅིང་མཉམ་པར་བཞག་ན་གདོད་འཚང་རྒྱ། དེ་བཞིན་གཤེགས་པ་ནི་ཆོས་ཐམས་ཅད་སྐད་ཅིག་དང་ལྡན་པའི་ཤེས་རབ་ཀྱིས་མངོན་པར་རྫོགས་པར་སངས་རྒྱས་པས་དེ་བཞིན་གཤེགས་པ་ཞེས་པའི་གྲངས་སུ་འགྲོ་བར་བཤད། རྒྱུ་དེས་ལམ་གྱི་རིམ་པ་དང་གྲོལ་ཚུལ། སློབ་པ་ལམ་གྱི་གནས་སྐབས་བཞི་དང༌། མི་སློབ་པའི་དུས་ཀྱི་ས་དང་ཡོན་ཏན་གྱི་འཐོབ་ཚུལ། བྱང་ཆུབ་སེམས་དཔའ་ས་བཅུ་པས་རྗེས་ཐོབ་ཏུ་སངས་རྒྱས་རྣམས་ཀྱི་འོད་ཟེར་ཆེན་པོའི་དབང་བསྐུར་
ཐོབ་ནས་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་གྱི་བྱེ་བྲག་ཐོབ་ཚུལ་རྣམས་རང་ལམ་ལ་དེ་ལྟར་ཡིན་གྱིས་ཐེག་པར་རང་ས་ན་བདེན་པས་ཆོས་ཀྱི་ཁ་མི་འཛིན་ཏོ། །སྐབས་འདིར་རྡོ་རྗེ་སྙིང་པོ་གསང་བ་ཆེན་པོའི་ལམ་ལ་རེ་ཞིག་དེ་དག་དྲང་དོན་དུ་བཞག་ནས། ཇི་སྐད་དུ། སངས་རྒྱས་སེམས་ཡིན་ཅི་སྨོས་ཏེ། །སེམས་ཅན་ཀུན་ཀྱང་རང་གི་སེམས། །སྟོན་པས་བསྟན་པ་རང་གི་སེམས། །དེ་ཕྱིར་ངོ་བོ་ཉིད་མཉམ་པས། །འཕགས་ལམ་ངེས་དོན་འདི་ལས་མེད། །ཅེས་པ་ལྟར། གཤིས་ཀྱི་བཞུགས་ཚུལ་ཆེན་པོའི་ཆོས་ཉིད་དེ་ཀློང་དུ་གྱུར་པའི་ཚེ་ལྟ་སྒོམ་གྱི་ཆོས་ནུབ། ས་ལམ་གྱི་གྲུབ་མཐའ་འགྱེལ། ཡོངས་གྲུབ་ཆེན་པོའི་ཡེ་ཤེས་སུ་ལ་བཟླ་བ་སྟེ། སྤྱིར་རྫོགས་པ་ཆེན་པོ་ལ་རྒྱ་འགྱུར་སེམས་སེམས་ཕྱོགས་པ་རྣམས་གསལ་བ་ལས་ཟབ་མོའི་ཕྱོགས་ཤས་ཆེ། ཀློང་ཀློང་སྐོར་རྣམས་ཟབ་གསལ་ཆ་མཉམ་མན་ངག་གི་སྡེའི་རྒྱུད་མན་ངག་པ་རྣམས་ཟབ་མོའི་ཕྱོགས་ལས་གསལ་བ་ཤས་ཆེ་བ་གྲུབ་མཐའི་ངོས་འཛིན་གྱི་སྙིང་པོའོ། །ཀྱི་རང་གཞུང་བཻ་རོ་ཙ་ན་དང༌། གཉགས་ལ་བི་མ་ལའི་སློབ་བརྒྱུད་སོགས་པ་ན་བརྒྱུད་པའི་གྲུབ་པའི་མཐའ་ཇི་སྙེད་ཅིག་བཞུགས་པའང༌། བོད་དུ་སྔ་རབས་ལ་དར་ཆེ་ཞིང་དངོས་གྲུབ་བརྙེས་པའི་གྲགས་པ་ཐོབ་པ་ལ་ཉང་ཀློང་ཡེ་ཤེས་གསང་བའི་རྒྱུད་ལ་བརྟེན་པ་རྡོ་རྗེ་ཟམ་པའི་མན་ངག བཻ་རོས་
སྟོད་ལུང་རོང་གི་བྲག་དམར་རྫོང་གི་དགོན་པར་ཐ་མར་སྤང་མི་ཕམ་མགོན་པོ་ལ་གདམས་ནས་འཇའ་ལུས་གྲུབ་པ་ཤ་སྟག་བྱུང༌། སྤང་གིས་ངན་ལམ་བྱང་ཆུབ་རྒྱལ་མཚན། དེས་ཟ་དམ་རིན་ཆེན་དཔྱིག དེས་འཕྱོས་ཀྱི་ཁུ་འགྱུར་གསལ། དེས་ཉང་བྱང་ཆུབ་གྲགས་དེས་དབུ་རུ་ཞའི་ཉང་ཤེས་རབ་འབྱུང་གནས་རྟེན་དགེ་སློང་མིན་པ་ཕུག་པོ་ཆེའི་ལྟ་རིའི་ཤུག་པ་རྐང་གཅིག་ལ་ན་བཟའ་དང་འཕྲེང་བ་བཀལ་ནས་འཇའ་ལུས་སུ་གཤེགས་པ་དེའོ། །ཤེས་རབ་འབྱུང་གནས་ནས་བརྒྱུད་པའི་སྒོམ་ཡོད་ཀྱི་ལུགས་དང༌། སྐོར་ཡེ་ཤེས་བླ་མ་གཉིས་པར་ཚ་རོང་སྟག་རྩེ་མཁན་གྱི་དགོན་པར་བཻ་རོས་འདི་ལ་བཤད་ནས་བརྒྱུད་པའི་སྒོམ་མེད་ཀྱི་ལུགས་གཉིས་ཀ་ཟུར་ཆུང་ཤེས་རབ་གྲགས་ཀྱི་སློབ་བརྒྱུད་ལ་ཤིན་ཏུ་དར། ཁམས་ལུགས་སུ་གྲགས་པ་ཨ་ཁམས་ལྡན་ཀློང་ཐང་སྒྲོན་མར་ཨ་རོ་ཡེ་ཤེས་འབྱུང་གནས་ཞེས་བྱ་བའི་སྤྲུལ་བའི་སྐུ་ཞིག་བྱོན། འདིས་ཐེག་ཆེན་རྣལ་འབྱོར་ཞེས་བྱ་བ་ཞིག་མཛད་པ་ལ་ཇོ་བོ་རྗེ་ཡང་ཤིན་ཏུ་མཉེས། དེ་ནས་བརྒྱུད་པ་ལྔ་པ་ཁ་རག་སྒོམ་ཆུང་ཡིན། ཨ་རོའི་རྒྱ་དཀར་ནག་གི་བདུན་བརྒྱུད་གཉིས་གཅོག་རོ་དང་ཡ་ཟིལ་རོང་ཟོམ་ཆེན་པོ་ལ་བཤད་དོ། །རོ་ཡེ་ཤེས་འབྱུང་གནས་ནས་བརྒྱུད་པའམ། བླ་མ་ཟུར་དགོངས་པ་བེ་རོས་ཐོག་མར་རྒྱལ་རོང་བྲག་ལ་མགོན་པོའི་དགོན་པར་གཡུ་སྒྲ་སྙིང་པོ་ལ་གསུངས་པའི་དངོས་སློབ་ཡིན་གསལ་ནས་བརྒྱུད་པ་སྒོམ་ཡོད་སྒོམ་མེད་གཉིས་ཀའི་ལུགས་གསུམ་དུ་གྲགས་པ་ལས། གངས་རིའི་ཁྲོད་ན་ཀུན་ཏུ་བཟང་པོ་མངོན་སུམ་དུ་བྱོན་ནས་དཔེ་དང་གཏན་ཚིགས་ལ་མ་ལྟོས་པར་རང་བཞིན་རྫོགས་པ་ཆེན་པོ་སྡེ་
གསུམ་ཀའི་མན་ངག་ཕྱོགས་གཅིག་ཏུ་གཏན་ལ་ཕབ་ནས་ཆོས་ཀྱི་འཁོར་ལོ་བསྐོར་བ་ནི་ངེས་པར་རྒྱལ་བའི་མཚན་གྱིས་བསྔགས་པར་འོས་པ་རྒྱལ་བ་ཇི་སྐད་དུ། སྡིག་པའི་ཆོས་ལས་ང་རྒྱལ་བས། །དེ་བས་ཉེར་འགྲོ་ང་རྒྱལ་བའོ། །ཞེས་གསུངས་པའི་དོན་ཏོ། །ཀློང་ཆེན་རབ་འབྱམས་ཀྱི་གྲུབ་མཐའ་ཡིན་ལ། དེ་ལ་སྒོམ་ཡོད་ཀྱི་ཕྱོགས་ནས་ཐོད་རྒལ་ཁྱད་པར་འཕགས་པ་དང༌། སྒོམ་མེད་ཀྱི་ཕྱོགས་ནས་ཀ་དག་ཁྱད་པར་འཕགས་པར་བཞེད་ལ། གྲུབ་པའི་མཐའ་སོ་སོའི་ངོ་བོའི་མཚན་ཉིད་ཤེས་པ་ཤིན་ཏུ་ཉུང་བས་ཕལ་མོ་ཆེ་ནི་ཐོད་རྒལ་གྱི་འཕགས་ཆོས་མཐོང་བས་རྒྱུ་བྱས། དེ་ཁོ་ན་ལ་བསྔགས་པ་བརྗོད་ཅིང་སེམས་པ་མང་མོད། སྤྱིར་ཀ་དག་གཏན་ལ་མ་ཕེབས་ན་ལྷུན་གྲུབ་ཀྱི་གྲུབ་མཐས་ས་མི་ཆོད། ས་གཞི་མེད་པ་ལ་ཞིང་བཟོས་ནས་སྟོན་ཐོག་རེ་བ་བཞིན་ནོ། །ཅིའི་ཕྱིར་ཞེ་ན། སེམས་ཉིད་ཆོས་སྐུའི་དབྱིངས་ན་བཞུགས་ཚུལ་མ་ནོར་ཞིང་མ་འཁྲུལ་བ་ཁྲོགས་ཆོད་ཀྱིས་གཏན་ལ་དབབ་དགོས་པ་ཡིན། དེ་ལ་གནས་པ་དང༌། བརྟན་པ་དང༌། གྲོལ་བ་གསུམ་གྱི་གདེང་ཐོབ་ནས་ལྷུན་གྲུབ་ཀྱི་གྲུབ་པའི་མཐའ་ལ་ཞུགས་ན་རིག་པ་ལ་སྐུ་གསུམ་རང་ཆས་སུ་ཡོད་པས་ལོངས་སྤྱོད་རྫོགས་པའི་སྐུ་དང་ཞིང་ཁམས་གདོད་འཆར་མི་དགོས་པར་ད་ལྟར་ལམ་སྣང་དུ་གཏན་ལ་ཕེབས་ནས་རགས་པ་ཟད་དེ་འོད་སྐུར་དེངས་པ་ཡིན་པའི་ཕྱིར་རོ། །
འདི་ལྟར་མ་རིག་པའི་སྐྱེས་བུ་བླུན་པོ་རྣམས་ཀྱིས་གཤིས་ཀྱི་བཞུགས་ཚུལ་ཡང་མ་ཤེས། ཐོད་རྒལ་ལ་བྱ་བ་དགུ་ཕྲུགས་སུ་བཏང་ནས་རླུང་རིག་རང་དེངས་སུ་བྱེད་པའི་གནད་ཀྱང་མ་གོ །ཕོ་ཚུགས་དང་སྙིང་རུས་ཀྱིས་ཇི་སྲིད་འཚོའི་བར་དུ་འཆུན་པའི་རེ་བ་བརྐམ་བཞིན་དུ་གནས་སྐབས་ཀྱི་མཐོང་སྣང་དང༌། ཕུང་པོ་འཇའ་འོད་དུ་དེངས་སུ་རེ་བས་རྒྱུ་མཚན་མེད་པའི་ཧམ་རྒྱུགས་བྱེད་པ་ནི་དེང་སང་གངས་རིའི་ཁྲོད་འདིར་མང་ཡང༌། རང་རང་གི་སྙིང་རུས་དང་སྦྱར་བའི་ལམ་ལ་འབད་རྩོལ་བྱེད་པའི་ཉིད་ས་ཆོད་ཆེ་བ་ཡིན་ནོ། །དེ་ལ་ལ་བཟླའི་གྲུབ་མཐའ་གཞི་དངོས་པོའི་གནས་ལུགས་འཁོར་འདས་སྣང་སྲིད་ཡོད་མེད་རྟག་ཆད་ཀྱི་མཐའ་ལ་མི་གནས། དེ་རྒྱུ་རྐྱེན་གང་གིས་ཀྱང་མ་བསྐྱེད་པས་རྣམ་པར་ཐར་པའི་སྒོ་གསུམ་དུ་རང་ཤར། ཤེས་བྱའི་གཤིས་གྲུབ་མཐར་བཟང་གོས་མ་བསླབ། ལྟ་བ་ངན་པས་མ་བསྒྲིབས་པར་རང་བཞིན་གྱི་གཉུགས་མར་དག་པའི་ངང་སྒོམ་དུ་ལ་བཟློས་པས། ཡེངས་པ་དང་ཡེངས་མཁན་མིད་དོ། །དེ་ལ་རང་གྲོལ་གྱི་འཐད་པ་གསུམ་གཞག་པར་བྱ་སྟེ། གདོད་ནས་གྲོལ་བ་ཐེག་པ་འོག་མའི་ལྟ་སྒོམ་སྤྱོད་འབྲས་ཀྱི་ཉེར་ལེན་ལ་ལྟོས་ནས་ནམ་ཞིག་གྲོལ་བའི་ཡིད་སྨོན་ལ་རག་མ་ལུས། རང་གིས་གྲོལ་བ་སེམས་ཅན་གྱི་ཁམས་བདེ་གཤེགས་
སྙིང་པོའི་རང་བཞིན་གློ་བུར་གྱི་དྲི་མ་ཅན། བླ་མའི་གདམས་ངག་གིས་མ་ཟིན་པས་ཉོན་མོངས་པ་དང་འདྲེས་ཤིང༌། འཁྲུལ་པ་ཆོས་ཉིད་དུ་གནས་མ་འགྱུར་བའི་མུ་ལའང་མ་ཐུག །ངོ་བོས་གྲོལ་བ་རང་ངོ་གདོད་ནས་འཁོར་བར་འཁྱམས་མ་མྱོང་བའི་བཞུགས་ཚུལ་གཤིས་ཐོག་ཏུ་ཕེབས་པ་བྱ་བྲལ་ཀློང་ཆེན་གྱི་ངང་དུ་གྲོལ་བ་ནི་ཁྱུང་སྒོ་ངའི་ནང་ནས་གཤོག་རུ་རྒྱས་པ་དང་འདྲ་སྟེ། རྩལ་གསུམ་ལུས་ལ་རྫོགས་པས་སྒོང་ཤུན་ས་ལ་ལྷུང་བ་ནམ་འཕང་གཅོད་པ་དུས་མཉམ་པ་འདབ་ཆགས་གཞན་ལ་མི་རིགས་ཁྱུང་ལ་རིགས་པའི་དཔེས་རིག་པ་གཞན་ལ་མི་རིགས་རྫོགས་ཆེན་ལ་རིགས་པས་ས་ལམ་གྱི་དྲོད་རྟགས་ལ་མ་ལྟོས་པའོ། །དེ་སྐད་དུ་རྩལ་ཆེན་ལས། སེམས་ཅན་སངས་རྒྱས་གཉིས་མེད་དེ། །ལམ་གྱིས་བཅོས་སུ་ག་ལ་ཡོད༌། །ཅེས་སོ། གྲུབ་པའི་མཐའ་འདི་ནི་རྫོགས་པ་ཆེན་པོའི་ཁྱད་པར་གྱི་གསང་བ་སྟེ། ཡིད་དཔྱོད་འཛིན་པའི་བློར་ཆུད་པའང་དཀའ་ལ། ལམ་འདི་ལ་ཞུགས་པར་རློམ་པ་རྣམས་ཀྱིས་ཀྱང་རྟོགས་པར་དཀའ་བའི་གནས་སོ། །རྒྱུ་གང་གིས་ན་དངོས་བསྟན་མཚུངས་པ་དེ་བཞིན་གཤེགས་པའི་སྙིང་པོ་དང༌། རྒྱན་སྟུག་པོ་བཀོད་པ་དང༌། མྱང་འདས་ལ་སོགས་འཁོར་ལོ་ཐ་མ། སམྦྷུ་ཊི་དང༌། ཧེ་བཛྲ། སྡོམ་འབྱུང༌། བཤད་རྒྱུད་རྡོར་
ཕྲེང་ལ་སོགས་པའི་རྒྱུད་སྡེའི་དོན་རྣམས་ལང་ཀར་གཤེགས་པ་ལ་གོ་བ་གཞན་དུ་བླངས་ནས་དེ་དག་དགོངས་ཏེ་གསུངས་པ་ཡིན་ནོ་ཟེར་ཞིང༌། སེམས་ཅན་གྱི་རྒྱུད་ལ་གློ་བུར་གྱི་དྲི་མ་དང་ལྷན་ཅིག་པའི་ཁམས་བདེ་གཤེགས་སྙིང་པོ་དང༌། རྟོགས་བྱ་སྙིང་པོའི་ཡེ་ཤེས་སུ་བསྟན་པ་ཆ་མ་ཕྱེད་དོ། །རང་གཞུང་འཛིན་པར་ཁས་འཆེ་བ་ཙམ་པ་འདི་དག་ནི། ལྟ་བ་ལུང་རིག་དང་འབྲེལ་བའི་འཐད་པ་སྤངས་ནས་བླུན་སྒོམ་ལ་ཡིད་བརྟན་བྱེད་ཅིང་རྒྱལ་བའི་དབང་པོ་ཀུན་མཁྱེན་པའི་གྲུབ་མཐའ་ལ་རྨོངས་པ་དེས་སོ། །འདིར་ཀློང་དུ་གྱུར་པའི་ཚེ་ཡེངས་ཡུལ་ཆོས་ཉིད་དུ་ངེས་པའི་འཐད་པ་ལ། རིག་པའི་ཆོས་ཉིད་ལ་འཐད་པ་དང༌། སྣང་བ་ཆོས་ཉིད་ལ་འཐད་པ་གཉིས་ལས་འདིར་དང་པོ་ཡིན་ཏེ། ཆོས་ཅན་འཁྲུལ་ངོ་ལ་མི་གནས་པས་ཡེངས་ཡུལ་ཆོས་ཉིད་དུ་སོང༌། ཆོས་ཉིད་ཆད་ལྟ་ལ་མི་གནས་པས་ཡེངས་ཡུལ་ཆོས་ཉིད་དུ་སོང༌། ཡོད་མེད་གཉིས་ལ་མི་གནས་པས་ཡེངས་ཡུལ་ཆོས་ཉིད་དུ་སོང༌། གཅིག་དང་དུ་མ་ལ་མི་གནས་པས་ཡེངས་ཡུལ་ཆོས་ཉིད་དུ་སོང། གྲུབ་མཐའི་ལྟོས་གཞི་ཟད་པས་ཡེངས་ཡུལ་ཆོས་ཉིད་དུ་སོང༌། ལྟ་སྒོམ་གྱི་ཕྱོགས་རིས་དག་པས་ཡེངས་ཡུལ་ཆོས་ཉིད་དུ་སོང། འཁྲུལ་གཞི་ཐམས་ཅད་དང་བྲལ་བས་ཡེངས་ཡུལ་ཆོས་ཉིད་དུ་སོང༌། རྒྱུན་ཆགས་
ཆེན་པོའི་རིག་པ་ལ་ཡེངས་ཡུལ་ཆོས་ཉིད་དུ་སོང༌། སྙམ་བྱེད་ཀྱི་ཤེས་པ་དག་པས་ཡེངས་ཡུལ་ཆོས་ཉིད་དུ་སོང༌། ཡེངས་པའི་གཞི་རྩ་མེད་པས་ཡེངས་ཡུལ་ཆོས་ཉིད་དུ་སོང༌། མཁའ་ལྟར་ཕྱལ་བར་ཡས་པས་ཡེངས་ཡུལ་ཆོས་ཉིད་དུ་སོང༌། ཉིན་དང་མཚན་མོ་མེད་པས་ཡེངས་ཡུལ་ཆོས་ཉིད་དུ་སོང༌། སྒོམ་དང་མི་སྒོམ་དག་པས་ཡེངས་ཡུལ་ཆོས་ཉིད་དུ་སོང༌། ཤེས་བྱ་རང་རྒྱུད་པ་མེད་པས་ཡེངས་ཡུལ་ཆོས་ཉིད་དུ་སོང༌། དེ་ལྟར་ཆོས་ཉིད་ཟད་པའི་ཡེ་ཤེས་ནི་མཚོན་བརྗོད་ལས་འདས་པས་སངས་ལ་རྒྱ་ས་མེད་པས་སངས་རྒྱས་ལ་རེ་བ་མེད། འཁོར་བར་འཁྱམ་ས་མེད་པས་སེམས་ཅན་ལ་དོགས་པ་སྤངས། བལྟས་པས་ཕྱོགས་རེ་ལས་མ་མཐོང་ལྟ་སྒོམ་ལས་སུ་ཆེ། གོ་བས་ཡིད་དཔྱོད་དུ་ཚུད་པས་སྙམ་བྱེད་ས་ལམ་དུ་མ་སོང༌། རྟོགས་པས་བོགས་མ་ཐོན་ཏེ་རིག་པ་ཡེ་ཡིན་ལ་འཁྱོལ། རྒྱུ་ལ་འབྲས་བུ་རྫོགས་པས་སྐྱོན་དང་ཡོན་ཏན་མེད། རྒྱུ་འབྲས་མཐོ་དམན་མཉམ་པས་བདེ་སྡུག་ཆོས་ཉིད་དུ་རྫོགས། སྐྱེ་འགག་གཉིས་སུ་མེད་པས་ཐིག་ལེ་ཆེན་པོའོ། །ཞེས་གསུངས་པས་དགེ་སློང་མོན་པ་དང༌། ལ་སྟོད་ཆོས་རྗེ་དང༌། ངྷམ་ཀཱིརྟི་དང༌། སྤ་གྲོང་ཀུན་གྲོལ་དང༌། ཁམས་པ་དགེ་སློང་ལ་སོགས་པ་ལམ་སྣ་ཟིན་
པའི་འཁོར་ཐམས་ཅད་ཡི་རངས་ཏེ་རྫོགས་པ་ཆེན་པོས་གསུངས་པ་ལ་མངོན་པར་བསྟོད་དོ། །དྲན་པའི་གཏམ་ཡོན་ཏན་རྒྱ་མཚོ་ཞེས་བྱ་བ་རེ་ཞིག་རྫོགས་སོ། །གཏམ་ཚོགས་ལེའུ་ང་དྲུག་པའོ།། །།
གཏམ་ཚོགས་ལེའུ་ང་བདུན་པ། དྲན་དང་ཤེས་བཞིན་ལས་འཕྲོས་པའི་གཏམ་དོན་རབ་འབྱེད་པའི་ཐུར་མ།
དྲན་དང་ཤེས་བཞིན་ལས་འཕྲོས་པའི་གཏམ་དོན་རབ་འབྱེད་པའི་ཐུར་མ་ཞེས་བྱ་བ། ༈ རྟག་པའི་རྡོ་རྗེ་ལ་ཕྱག་འཚལ་ལོ། །དགོན་རྩེ་སྤྲུལ་རིན་པོ་ཆེ་ནས་སྒོམ་ཕྱོགས་གཙོ་བོར་གྱུར་བའི་དྲི་བ་ཐ་དད་པའི་ལན་གཅིག་ཏུ་བསྡོམས་པ་ནི། དྲན་པ་འཇུར་དྲན་གྱི་སྐོར། ང་མ་ཡེངས་པ་བྱེད་དགོས་སྙམ་པའི་རྒྱུན་ལ་བལྟ་བ་དང༌། དེ་བཞིན་དུ་ད་ལྟ་ནི་དྲན་རྒྱུན་འདུག་གོ །མ་ཡེངས་པ་ཉིད་དོ་སྙམ་བྱེད་ཀྱི་ཤེས་པ་ལ་སྒོམ་གྱི་ངོ་བོ་བྱ་དགོས་པ་ལ་ཟེར། ཅིག་ཆར་བའི་རིགས་ཅན་ཡིན་ན་མ་གཏོགས། གཞན་ཐོག་མར་ཞི་གནས་འཚོ་ལ་ཐབས་འདི་ཀ་བྱེད་དགོས་པ་མང༌། དེའི་སྐྱོན་སེལ་ལ། མ་ཡེངས་ཙམ་པའི་ངང་ནས་གྲིམ་ཆ་དེ་གློད་གང་ཐུབ་རང་བྱེད་དགོས་པས། ཧྲིག་གིས་བསྒྲིམས་ལ་ལྷོད་ཀྱིས་གློད་ཟེར་བ་ལྟར་ཡིན་ཞིང༌། འདི་རྫོགས་ཆེན་པའི་དྲན་པ་སྒོམ་གྱི་ངོ་བོར་སོང་བ་དང་ནི་མི་གཅིག་གོ །ཡང་ཆགས་སྡང་ཤུགས་དྲག་པོ་སྐྱེ་དུས་དེའི་ངོ་བོ་ལ་བལྟས་པས་དེ་མ་ཐག་ཡལ་དཀའ་བ་ནི། སྤང་བྱའི་ཆགས་སྡང་ལ་ཚེ་རབས་སུ་གོམས་ཆེས། གཉེན་པོའི་དྲན་པ་ནི་ད་ལྟ་རེས་འགའ་
ཙམ་མ་ཟད་འདུ་བྱེད་ཀྱི་དྲན་པ་ལ་སོང་གཤིས། སྤང་གཉེན་ཤེད་མ་སྙོམས་པས་རེ་ཞིག་དེ་ཀ་ལས་མི་འོང་ཞིང༌། དེས་རྣམ་རྟོག་ཆེད་དུ་བཀག་པའི་སྐྱོན་དུ་ཡང་མི་འགྱུར་ལ་དེ་ལ་དགོས་པ་མེད་པ་ཡང་མ་ཡིན་ཏེ། ཡི་གེ་དང་བྲིས་འབུར་ལ་སོགས་པ་བཟོ་གནས་སློབ་དུས་དང་པོར་གྱ་དོད་ཚད་ལས་མི་དོད་ཀྱང༌། དེ་ཀ་ལ་ནན་ཏུར་བསྐྱེད་ན་རིམ་པས་བཟོ་དོད་པ་དང་འདྲ་བས། སྒོམ་པ་མ་ཡིན་གོམས་པ་ཡིན། །གོམས་པ་ཀློང་དུ་གྱུར་པ་ཡིན། །ཟེར་བ་འདི་བདེན། རྣམ་རྟོག་རང་ཤར་རང་གྲོལ་དུ་སོང་དུས་སྤང་གཉེན་རོ་གཅིག་ཏུ་འགྲོ་བས། ཆགས་སྡང་གི་རྣམ་རྟོག་ཀྱང་གདོད་ནས་རང་བཞིན་མེད་པར་འཆར་བ་ཡིན་ཏེ། དེ་འདྲ་ལས་དང་པོའི་རིང་མི་འབྱུང༌། དེས་ན་འགྱུ་བ་ཚོར་དུས་རྣམ་རྟོག་དེས་དྲན་པའི་གདོང་མ་བཟོད་ཅིང༌། ཕྱལ་ལེ། སང་ངེར་དེངས་འགྲོ་བ་དེ་དྲན་རྒྱུན་བརྟེན་ལུགས་ཀྱི་གནད་མ་འཁྲུལ་བ་ཡིན། ཆགས་སྡང་རང་ངོ་མ་ནུབ་ཀྱང༌། །དེ་ལ་ཐ་མལ་སྐྱེ་བོ་ལྟར། །གཟུང་འཛིན་འབའ་ཞིག་མ་ཡིན་པར། །བདག་མེད་སྟོང་པ་གསོག་ཉིད་དུ། །སོང་ན་རེ་ཞིག་དེ་ཀས་ཆོག །རྫོགས་ཆེན་གྱིས་ཁྱད་ཆོས་དྲན་པ་དང་རང་སྒོམ་གྱི་ངོ་བོར་རྫོགས་ཟེར་བ་དེ་དྲན་པ་སྐད་ཅིག་མའི་རྒྱུན་ལ་གྲིམ་ལྷོད་དང་བཅོས་བསླད་སྤང་གཉེན་གང་ཡང་མི་
དགོས་པས་རང་བབས་ཀྱི་རྒྱུན་སྐྱོང་བ་ལ་ཟེར་བ་ཡིན། ཡང་དྲན་པ་དང་ཤེས་བཞིན་ཟེར་བ་རྒྱུ་འབྲས་ལྟར་འབྱུང་བ་ཇི་ལྟར་དབྱེ་ནི། སྤྱིར་དྲན་པ་དང་ཤེས་བཞིན་ཟེར་བ་འདི་སྒོམ་ཡིག་ཐམས་ཅད་དུ་གླེང་བ་མང་སྟེ། འདིའི་དྲན་པ་ནི་འདུ་བྱེད་ཀྱི་དྲན་པ་ལ་འཇུག་པ་ཁོ་བོས་གོ་སྟེ། འདི་ལྟར་སོ་བྱང་སྔགས་གསུམ་གྱི་བསླབ་སྡོམ་དང༌། བསྐྱེད་རིམ་གྱི་དག་དྲན་སོགས་དྲན་གཞིར་བྱས་ནས། དེའི་ངང་མ་ཉམས་པ་ཤེས་བཞིན་དུ་གདགས་པའི་ཕྱིར་དང༌། དེ་བཞིན་དུ་ཡིད་དཔྱོད་ཀྱི་ལྟ་བ་སྤྲོས་བྲལ་གྱི་གོ་ཡུལ་དྲན་པར་བྱས་ནས། དེའི་རྒྱུན་ཤེས་བཞིན་གྱིས་བསྐྱང་བ་ནི་རྒྱུ་འབྲས་སྔ་ཕྱི་ལྟ་བུར་ཡོད་ལ། དེ་སྐད་དུ་སྤྱོད་འཇུག་ལས། གང་ཚེ་དྲན་པ་ཡིད་སྒོ་ནས། །བསྲུང་བའི་དོན་དུ་གནས་གྱུར་པ། །དེ་ཚེ་ཤེས་བཞིན་འོང་འགྱུར་ཞིང༌། །སོང་བ་དག་ཀྱང་འོང་བར་འགྱུར། །ཞེས་པ་ལྟར་རོ། །རྫོགས་པ་ཆེན་པོ་ནི་ལྟ་སྒོམ་རོ་གཅིག་པས། ལྟ་བའི་དྲན་པ་དང༌། སྒོམ་པའི་ཤེས་བཞིན་ཆ་གཉིས་སུ་མི་སྐྱོང་བར་དྲན་པ་དེ་ཀ་མཉམ་གཞག་གི་ངོ་བོར་རྫོགས་པས་ཤེས་བཞིན་དེ་ཤེས་བྱའི་སྒྲིབ་པར་མཐོང་བས་རྒྱུ་འབྲས་སྔ་ཕྱི་མེད་པར་སྣང་ངོ༌། །དེའི་རྒྱུ་མཚན། དྲན་པ་ཡོད་ན་དེ་ལས་ལྷག་པའི་ཤེས་བཞིན་བློའི་དྲི་མ། དྲན་པ་མེད་ན་ཤེས་བྱ་མེད་པའི་ཤེས་བྱེད་དེ་ཡ་ཆ། དེ་སྐད་དུ་སྔ་མ་ལས། ཤེས་བཞིན་མེད་པའི་ཆོམ་རྐུན་དག །དྲན་པ་ཉམས་པའི་རྗེས་འབྲང་བས། །ཞེས་པས་གསལ་ལོ། །དེ་ལྟ་མོད་ཀྱི་
གནས་ལུགས་ཇི་བཞིན་མ་རྟོགས་ཀྱི་རིང་ལ་སྟོང་འཛིན་གྱི་དྲན་པ་དང༌། དེ་ཀ་རྒྱུན་མ་ཉམས་པར་ཡོད་དོ་སྙམ་པ་ཤེས་བཞིན་དུ་འདོགས་པ་ཡིད་དཔྱོད་ཀྱི་ལྟ་སྒོམ་སྟེ། ཀུན་ཏུ་འགྲོ་བའི་བཞི་དང༌། གཞན་འགྱུར་གྱི་གཉིས་ཏེ་སེམས་བྱུང་གི་བློ་དང་མ་བྲལ་བའི་ཕྱིར་རོ། །གལ་ཏེ་ཤེས་བཞིན་དྲན་པའི་འབྲས་བུར་འདོད་ན། ངེས་དོན་ལ་མཉམ་པར་འཇོག་པའི་ཚེ་དྲན་པ་དེ་ཤེས་བྱ་དང་ཤེས་བཞིན་དེ་ཤེས་བྱེད་དུ་འགྲོ་བའི་ཉམས་ལེན་ཆ་གཉིས་ཀྱི་སྒྲིབ་པ་སྤོང་མི་ནུས། འོན་ཀྱང་ངེས་དོན་གྱི་གཟུགས་བརྙན་འདུ་བྱེད་ཀྱི་དྲན་པ་ཅན་ལ་ནི་དེ་ལྟར་རུང་སྟེ། བལྟ་བྱའི་དྲན་པ་དང༌། ལྟ་བྱེད་ཀྱི་ཤེས་བཞིན་བློ་རྫས་གཉིས་པར་སྣང་བའི་ཕྱིར་རོ། །དེ་སྐད་དུ་སྔ་མ་ལས་ཤེས་བཞིན་མེད་པའི་སེམས་ལྡན་པའི། །ཐོས་དང་བསམ་དང་སྒོམ་པ་ཡང༌། །གློ་རྡོལ་བུམ་པའི་ཆུ་བཞིན་དུ། །དྲན་པ་ལ་ནི་དེ་མི་གནས། །ཞེས་ཐོས་བསམ་སྒོམ་གསུམ་པོ་དྲན་གཞིར་བཞག་པའི་ཕྱིར་རོ། །ཡང་དྲན་པའི་རྒྱུན་ཡོད་ཀྱང༌། དེ་ཉིད་གནས་འགྱུའི་ཆ་གཉིས་སུ་ཤར་དུས་དེ་ལའང་སྤུ་རིས་དབྱེ་རྒྱུ་དང་བཟང་ངན་གྱི་དབྱེ་བསལ་ལ་འདུག་ཚུལ་ནི། རང་བབས་ཆོས་ཉིད་ཀྱི་དྲན་པ་ལ་རྟོག་གེའི་དཔྱད་བཟོད་ཀྱི་བློ་ཞུགས་པས་སྤུ་རིས་དང་བཟང་ངན་གྱི་དབྱེ་བསལ་དོད་པ་སྟེ། ཆོས་ཉིད་རང་བཞིན་གྱི་དྲན་པས་གོ་མ་ཆོད་པར་ཡེངས་མ་ཡེངས་རྣམ་རྟོག་ཤར་མ་ཤར་ལ་ངོས་གཟུང་བར་འདུག །
རྣམ་རྟོག་ཤར་ཚད་ཡེངས་པ་ཡིན་ན། ཡེངས་པ་ཞེས་བྱ་བ་ནི་ལྷན་ཅིག་སྐྱེས་པའི་མ་རིག་པ་ཡིན་པས། དེའི་ཚེ་རྗེས་སུ་མི་འབྲང་བའི་རང་དབང་ག་ལ་ཡོད། དེའི་ཕྱིར་མ་ཡེངས་ཙམ་པ་ནི་དྲན་པའི་ངོ་བོ། དྲན་པ་དེ་ཀའི་ངང་ནས་རྣམ་རྟོག་ཤར་ན། རྣམ་རྟོག་དེ་རྩལ་སྣང་གློ་བུར་བ་ཡིན་པས་དྲན་པའི་གདོང་མི་བཟོད་པར་རང་ཤུགས་ཀྱིས་དེངས་འགྲོ། དེ་ལྟར་དེངས་པ་དེ་དྲན་པ་གསར་པ་ཞིག་གི་ནུས་པ་མིན་པས་དྲན་པ་གཅིག་ལ་བཟང་ངན་གཉིས་མི་ཡོང༌། འོན་ཀྱང་རྣམ་གྲངས་པའི་དོན་དམ་ཅན་ལ་མ་ཡེངས་ཙམ་པའི་རྟོག་མེད་དེ་ཞི་གནས། དེ་ལས་བློའི་དཔྱད་བཟོད་ཀྱིས་སྒོམ་པ་ལྷག་མཐོང༌། རྟོག་པ་ཤར་ཚད་ཡེངས་པར་ངོས་འཛིན་པས་སྒོམ་གྱི་མུ་གེ་ལྡང༌། ཞི་གནས་མི་གཡོ་ལྷག་མཐོང་ཉ་ལྟར་འཁྱུག །སེམས་གནས་ལྟེམས་པོ་སྤྲོས་བྲལ་དངོས་སུ་འདོད། །ཟེར་བ་དེ་ལགས། བོད་འདིར་མཉམ་གཞག་ལ་སེམས་བྱུང་བསྲེས་པའི་རྣམ་གཡེང་གིས་བསམ་གཏན་དཀྲོགས་པ་དག་དེ་འདྲ་དབུ་མ་ཆེན་པོའི་དགོངས་པ་བླ་ན་མེད་དུ་འདོད་ཀྱང་རྟོགས་པའི་རང་ངོ་ནས་གཞལ་ན་མཉམ་གཞག་བྱ་བའི་ལས་སུ་སོང༌། ལྷག་མཐོང་ཡིད་བྱེད་ཀྱི་ཆོས་སུ་སོང་བའི་བྱ་བྱེད་གཉིས་ཆོས་དེས་སྒྲིབ་གཉིས་སྤོང་མི་ནུས་ཏེ། བཤགས་རྒྱུད་ལས། བྱ་བ་བྱེད་དང་ཡིད་ཆོས་
རྣམ་པར་དག །ཅེས་པའི་དོན་དང་འགལ་བའི་ཕྱིར་རོ། །འོན་ཀྱང་དོན་རབ་འབྱེད་པའི་བསམ་གཏན་གྱི་ངོ་བོ་ཡིན་པས། ཚོགས་ལམ་གྱི་དྲན་པ་ཉེར་གཞག་དང༌། སྦྱོར་ལམ་གྱི་དྲན་པའི་དབང་པོ་ཐོབ་པའི་རྒྱུ་ནི་བྱེད་པས་མཐོང་ལམ་གྱི་ལམ་སྟེགས་ཙམ་མོ། །འདིར་རང་བཞིན་རྫོགས་པ་ཆེན་པོ་ནི་འཕགས་པའི་ལམ་དེ་བཞིན་གཤེགས་དགེ་བའི་བསམ་གཏན་ཡིད་པས། ཆོས་ཉིད་ཀྱི་དྲན་པ་བློ་འདས་ཆེན་པོ་ལ་རྟོག་དཔྱོད་ཀྱི་ཤེས་བྱའི་བསླད་མི་འཇུག །ཡེ་གྲོལ་ལ་ཡང་གྲོལ་མི་སྒོམ། སོ་མ། ངང་གཞག །རང་བངས། མ་བཅོས། མ་བསླད་པ་ལ་ཐ་མལ་གྱི་ཤེས་པ་ཟེར། འོན་ཀྱང་དེ་མིང་ལོད་གྲགས་པས་དེ་བཞིན་ཉིད་དང༌། སྤྲོས་བྲལ་དང༌། ངོ་བོ་ཉིད་མེད་པ་དང༌། ཆོས་ཀྱི་དབྱིངས་ལ་སོགས་པའི་ཆོས་སྐད་གྱ་ནོམ་པ་འདམས་ནས། བདེན་པ་གཉིས་ཤ་བའི་རྭ་ཅོ་ལྟར་བཅོས། གོ་མྱོང་རྟོགས་པར་འཁྲུལ་ནས་ལམ་བདེན་སྤངས་པའི་རྒྱུད་ལུང་ཟབ་མོ་རྣམས་དང༌། དོ་ཧ་མཛོད་ལ་སོགས་པའི་གསང་ཚིག་ལ་ཧྭ་ཤང་གི་ལྟ་བ་ཞེས་སྒྲོག་པ་དེ་ཡ་ཆ། ད་དྲན་པ་ཞེས་པའི་ཆོས་སྐད་གླེན་སྒོམ་གཏི་མུག་ཅན་ཡན་ཆད་ཀྱི་ཁ་ནས་དོན་ཀྱང༌། རང་ངོ་ཤེས་པའི་དྲན་པ། དེ་ལས་མི་འདའ་བའི་དྲན་པ། རང་བཞིན་མེད་པའི་དྲན་པ་
གསུམ་ལས། དང་པོ་གཉིས་ནི་དེ་ལ་དེར་འཛིན་གྱི་ཤེས་སྒྲིབ་ཅན་ཡིན་པ་དེ་སྤང་བའི་ཐབས་སུ། མོས་གུས་དང་སྙིང་རྗེ་ལ་སོགས་རྒྱུ་བསོད་ནམས་ཀྱི་ཚོགས་ལ་འབད། ཕྱི་མ་ནི་ཡེ་ཤེས་ཀྱི་ཚོགས་ཡིན་པས་དེ་རྫོགས་པའི་ཐབས་སུ་མི་སྒོམ། མི་འཁྲུལ་བའི་ངང་དངས་བྱང་ཆུབ་སྙིང་པོར་འགྲོགས་དགོས་ཏེ། རྒྱུད་ལས། ཇི་སྲིད་ས་བརྒྱད་མ་ནོན་པར། །དེ་སྲིད་ཐེག་པ་དམན་པས་འཇིགས། །གསུངས་ན། སྔགས་ཀྱི་ལམ་ནི་འབྲས་བུ་ལྷུར་བྱེད་པས་དོན་ཟབ་ཀྱང་གནས་སྐབསཀྱི་ཐབས་ལམ་བྱུང་བའི་ཡེ་ཤེས་ཅིག་ཅར་བ་ཡིན་པས་འཕེལ་འགྲིབ་ཆེ་ཞིང༌། དྲོད་མི་བརྟན་པའི་ཚུལ། དབང་གསུམ་པའི་དཔེའི་ཡེ་ཤེས་ཀྱིས་མཚོན་ལ། ཁྱད་པར་རླུང་སེམས་ཀྱི་རིག་པ་སྤུར་བས་ཉམས་རྟོགས་གཉིས་ཀའི་ཆར་འཕེལ་འགྲིབ་རེས་འཇོག་ཅན་ཇི་ལྟ་བུ་ཤར་ཡང༌། སྟོང་འཛིན་དང༌། བློའི་དཔྱད་བཟོད་ཡིད་ལ་མི་བྱེད་པའི་ཡང་དག་གི་དྲན་པ་ཀློང་ཡངས། དཀྱིལ་ཆེ། རང་བཞིན་གྱིས་མ་གྲུབ་པའི་ངང་དུ་འགྱུར་དྲན་དང༌། ཆགས་སྡང་གི་རྣམ་རྟོག་ཆུ་ལ་རལ་གྲི་བསྣུན་པ་ལྟར་དེངས་པ་ཞིག་བྱུང་བའི་ཚེ་བློའི་སྤྲོས་པ་ཞིག་པ་ཡིན་ཏེ་སྤྱོད་འཇུག་ལས། དོན་དམ་བློ་ཡིས་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། དེ་ལྟར་ཞིག་པ་ལ་སྒོམ་ཡུན་
བསྲིང་དགོས། ལར་ཕར་ཕྱིན་ཐེག་པ་ནས། སྒོ་ལྔའི་རྣམ་ཤེས་ཡེ་ཤེས་སུ་གནས་འགྱུར་པས་ལམ་མཐོན་པོའི་གནས་སྐབས་སུ་གསུང་ན། ལམ་རེས་འཇོག་ཏུ་སྒོམ་པའི་གང་ཟག་རྣམས་ནི། ཕུང་པོ་ལྔ་དང་རྣམ་ཤེས་ཚོགས་བརྒྱད་ཀྱི་གཞན་དབང་ཅན་ཡིན་པས་སྔགས་ཀྱི་ཐབས་ལམ་ལས་བྱུང་བའི་ལྟ་སྒོམ་ཟབ་མོའི་གནད་ཀྱི་རེས་འགའ་ཉམས་རྟོགས་ཅིག་ཅར་དུ་སྐྱེས་ནས་ལམ་བདེན་ཀུན་རྫོབ་ཏུ་ཤར་བའི་ཚེ་སོ་སོར་རང་རིག་པའི་ཤེས་རབ་ཀྱི་སྣང་བ་ཁྱད་པར་ཅན་དང༌། རེས་འགའ་ཡུལ་རྐྱེན་དང་རླུང་སེམས་ཀྱིས་བསླབ་པས་རྟོགས་པའི་དེ་ཉིད་ལ་བསྒྲིབས་ཏེ་ཆགས་སྡང་རྨོངས་གསུམ་གྱི་སྣང་ཤར་དགག་མི་བཟོད་པ་འཆར་ཞིང༌། དེའི་ཚེ་བླ་མ་དམ་པས་མ་ཟིན་ཅིང་སོ་བྱང་སྔགས་གསུམ་གྱི་བླང་འདས་དང་ཆོས་ཉིད་མི་ཤེས་བཞིན་དུ་སེམས་ངོ་འཕྲོད་དོ་སྙམ་ནས་གཟུང་དྲན་ཧད་པོ་ནག་ཡོར་བ་ཞིག་ལ་སྒོམ་དུ་བཟུང་ནས་ཉོན་མོངས་པ་བྱུང་རྒྱལ་དུ་སྤྱོད་པའི་བླུན་སྒོམ་ཕལ་མོ་ཆེ་ནི་ངན་སོང་དུ་འགྲོ། ཡང་ཐོས་པ་མང་པོ་དང་ལྡན་ཡང་རྒྱུ་འབྲས་དག་གྲོལ་ལ་ཞེན་པའི་གང་ཟག་ལ་ལ་ནི་སྟོང་ཉིད་གཉེན་པོའི་དབང་དུ་ཤོར་ནས་སྔགས་དང་ཕ་རོལ་ཏུ་ཕྱིན་པའི་ལྟ་སྤྱོད་ལ་འགལ་བ་འདུ་བའི་རྟོག་དཔྱོད་རྣོན་པོས་རང་བྱུང་ཡེ་ཤེས་ལ་བསྒྲིབས་པ་
ཡོད་དེ། འདི་ལྟར་རྩ་བ་བཞིས་མཚོན་པའི་ཕམ་ལྟུང་དང་བསླབ་བྱའི་གནས་ལ་ཉེས་སྤྱོད་འདི་ལྟ་བུས་གོས་སོ་སྙམ་པ་ནི། སྔགས་ཀྱི་ཐབས་ལམ་ཡིད་མ་ཆེས་སྟོང་ཉིད་ལྟ་བས་ཀུན་རྫོབ་ཟིལ་གྱིས་མ་ནོན་པ་ཡིན་ནོ། །འོན་ཀྱང་རྗེས་ཐོབ་ཀྱི་ཆ་ལ་གཞག་གནོད་གཞི་བཅས་པའང་ཅང་མི་སེམས་པ་ནི་བྱང་ཆུབ་སེམས་དཔའི་སྡོམ་པ་འཇིག་པའི་རྒྱུར་འདུག་ལ་བླང་འདས་གཞན་རྣམས་ལ་ཉེས་བྱས་སུ་དོགས་ན་དགེ་སྡིག་རྣམ་རྟོག་གི་གཟུགས་བརྙན་དུ་འདུག་པས་རྣམ་རྟོག་མ་ཟད་པར་དུ་ལས་ཀྱང་དེ་རྗེས་སུ་འབྲང་བས་ཀུན་རྫོབ་བདེན་པ་མི་འགོག་ཕྱིར་སྐད་ཅིག་མ་དང་པོར་ལ་འཆབ་སེམས་མེད་པའི་བཤགས་སྡོམ་ནི་བྱར་རུང་སྟེ། བླ་མ་ལྷ་རྗེ་རིན་པོ་ཆེའི་དུས། སྒོམ་ཉམས་ཅན་ཞིག་གིས་གསུང་རབ་ཀྱི་བསླུས་ཟོས་པས་འགྱོད་པ་ཆེན་པོ་སྐྱེས་ཤིང༌། རྟོགས་པ་ཡང་འགྲིབ་པ་བླ་མ་ལ་ཞུས་པས་གསུང་རབ་དེ་ཀ་བཞེངས་ཤིག་གསུངས། བཞེང་བའི་རྣམ་གཡེང་ལ་སུན་ཞིང་བསམ་གཏན་གྱི་གེགས་སུ་གྱུར་ནས་སེམས་ཉིད་རྟོགས་པ་ལས་ལྷག་པའི་སྒྲིབ་སྦྱོང་མེད་པ་འདྲ་ཞུས་པས། འོ་ཁྱོད་ཀྱིས་གོ་འདུག་པ་ཡིན་པ་རང་དེ་ཀ་ཡིན་གསུངས་པས་བཞེང་འཕྲོ་བཞག་པ་ཡིན། སྐད་ཅིག་མ་གཉིས་པར་སྔ་མའི་རྒྱུན་ལ་མི་འཇུག་པར་ཤེས་པ་སོ་མའི་སྟེང་དུ་བཞག་པས་འདི་ལྟར་ཉན་
ཐོས་ཀྱི་སྡོམ་པ་ནི་ལུས་ངག་ལས་སྐྱེས་པའི་སྡོམ་པ་གཟུགས་ཅན་ཡིན་པས་སྟོང་པ་ཉིད་ཀྱི་ངང་དུ་དེའི་གཟུགས་མེད། ཉམས་སོ་སྙམ་བྱེད་ནི་ཚོར་བའི་ཕུང་པོ་ཡིན་ན་ཆོས་ཉིད་ཀྱི་གཤིས་ལ་དེ་མ་གྲུབ། སྲུང་ཉམས་ལ་བདེན་པར་ཞེན་པ་འདུ་ཤེས་ཀྱི་ཕུང་པོ་ཉིད་ན་སོ་སོ་རང་རིག་དང་རྫས་འགལ། དེས་ཕྱིན་ཆད་ཀྱི་ལས་ཉེ་བར་ལེན་པའི་འདུ་བྱེད་འགག །སོ་སོ་རང་རིག་གི་ཡེ་ཤེས་ལ་རྣམ་པར་ཤེས་པ་མི་གནས་པས། སྲུང་ཉམས་བློའི་རི་མོ་ཡིན་པའི་ཚུལ་སྡུད་པ་ལས། སེམས་ཅན་འདི་དག་ཁྲིམས་ལྡན་འདི་དག་ཁྲིམས་འཆལ་ཞེས། །སྣ་ཚོགས་འདུ་ཤེས་ཞུགས་པ་ཤིན་ཏུ་ཚུལ་ཁྲིམས་འཚལ། །ཚུལ་ཁྲིམས་ཉམས་ཞིང་དེ་ལ་ཡོངས་དག་ཚུལ་ཁྲིམས་མེད། །གང་ལ་བདག་གི་འདུ་ཤེས་སེམས་ཅན་འདུ་ཤེས་མེད། །འདུ་ཤེས་འདོད་ཆགས་བྲལ་ལ་སྡོམ་མིན་ག་ལ་ཡོད། །ཅེས་པའི་དོན་ལ་མཉམ་པར་འཇོག །དེས་ནི་སྔོན་ཆད་ཆོས་ཉིད་ཀྱི་བདེན་པ་མ་མཐོང༌། སྔགས་ཀྱི་ཐབས་ལམ་ཟབ་མོ་ལྷོངས་སུ་མ་གྱུར། མདོ་སྔགས་ཀྱི་དགོངས་པ་ནང་མི་འགལ་བ་མ་རྟོགས་པའི་དུས་ཀྱི་ཉེས་བྱས་ཐམས་ཅད་ཟིལ་གྱིས་ནོན་པར་འགྱུར་ཏེ། ཉིན་བཞིན་བྲམ་ཟེ་གསོད་པ་དང༌། །མཚམས་མེད་ལྔ་ནི་བྱེད་པ་སོགས། ཞེས་པའི་
མཇུག སྡིག་པས་གོས་པར་མི་འགྱུར་ཏེ། །ཞེས་པའི་དོན་ལ་འབྱོར་རོ། །འདི་མྱོང་ཐོག་ནས་བཏོན་པའི་གཏམ་ཡིན། བསྟན་བཅོས་མཁན་པོ་རྣམས་ཚིག་ལ་དགག་བསྒྲུབ་བྱེད་པས་དེ་ལྟར་དུ་བཤད་པ་སྔགས་འགྲེལ་རྣམ་མཁྱེན་ཤིང་རྟ་ལ་གསལ། ཡང་ལུང་མ་བསྟན་ནི། དྲན་པ་མེད་པའི་གནས་སྐབས་ཐམས་ཅད་དེ། བཤེས་སྤྲིང་དུ། དྲན་པ་ཉམས་པས་ཆོས་ཀུན་འཇིག་པར་འགྱུར། ཅེས་པ་ལྟར་ཆགས་སྡང་རྨོངས་གསུམ་གྱི་རྣམ་རྟོག་ཁ་རྒྱལ་དུ་སོང༌། སྦྱིན་པ་ལ་སོགས་པའི་བསོད་ནམས་ཀྱི་ཚོགས་ལྔ་དང༌། ཕྱི་མ་ཡེ་ཤེས་ཀྱི་ཚོགས་གཉིས་ཀས་སྤོང༌། སེམས་དང་སེམས་བྱུང་ལས་སྐྱེས་པའི་རྣམ་པར་རྟོག་པའི་མཐའ་མི་ཆོད༌། དེ་ཐམས་ཅད་ཀྱི་རྩ་བ་མ་རིག་པ་ཡིན་པས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྷུང་བྱེད་ཡིན། །ཞེས་སོ། །དེ་ལ་སྤང་བསྒྱུར་ལམ་དུ་བྱེད་པའི་གཉེན་པོ་མང་ཡང༌། ནད་བརྒྱ་སྨན་གཅིག་ལྟ་བུ་ནི་དྲན་པའམ་རིག་པ་ཡིན། དེ་གཉིས་ལའང་ངོས་འཛིན་ལུགས་ཐ་དད་པ་ཡོད། འདིའི་དྲན་པ་ནི་ཆོས་ཉིད་ཀྱི་དྲན་པ་ཕུང་པོ་ལྔ་དང་བྲལ་བ་ཡིན། རིག་པ་ནི་རྣམ་ཤེས་མ་ཚོགས་པའི་འདུས་མ་བྱས་སོ་སོ་རང་རིག་གི་ཡེ་ཤེས་ཡིན། སྡུད་པ་ལས། གཟུགས་རྣམས་མི་མཐོང་ཚོར་བ་
དག་ཀྱང་མི་མཐོང་ཞིང༌། འདུ་ཤེས་མཐོང་བ་མེད་ལ་སེམས་པ་མི་མཐོང་ཞིང། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །འདི་ནི་ཆོས་མཐོང་ཡིན་ཞེས་དེ་བཞིན་གཤེགས་པས་གསུངས། །ཞེས་པ་ལ་སོགས་པས་བསྟན། དེའི་ཕྱིར་དྲན་རིག་གཉིས་སུ་མེད་པའི་སོ་སོར་རྟོག་པའི་ཤེས་རབ་ངོས་ཟིན་པ་ཙམ་ནས་ལུང་མ་བསྟན་རང་སངས་ལ་འགྲོགས་གཉིད་ལ་སོགས་པའི་ཉོན་མོངས་པ་ལ་བརྟེན་གཞི་མེད། དེའི་ཕྱིར་དྲན་པ་སྟོབས་སུ་གྱུར་པ་ལས་གཏི་མུག་འོད་གསལ་ཆོས་དབྱིངས་ཡེ་ཤེས་སུ་འཆར་བ་སོགས་སྒོམ་ཡུན་བསྲིངས་པ་ལས་འབྱུང་བའོ། །མདོར་ན་སྟོང་པ་ཉིད་ཀྱི་ཕྱོགས་འདིར་གོ་བ་ཕྱོགས་ཙམ་སྐྱེས་པས་ཀྱང་དངོས་འཛིན་འཇིག་པ་ལ་ལྷག་པར་ཕན་ན་མྱོང་བ་སྐྱེས་པ་རྣམས་ལ་ནི་སྨོས་ཅི་དགོས། རྒྱུ་མཚན་དེས་སྔོན་ཆད་རྒྱུ་འབྲས་དག་གྲོལ་དུ་ཞེན་པའི་གྲུབ་མཐའ་ཐམས་ཅད་ལ་ཨ་འཐས་དང་མངོན་ཞེན་ཆུང་ངུ་སོང་ནས་བློ་གུ་ཡངས་ཕྱལ་འགྲོ་བ་ནི་ཆོས་ཉིད་ཡིན་ན། དཀྱིལ་འཁོར་ལ་སོགས་པའི་ཕྲིན་ལས་རབ་འབྱམས་སོགས་ལམ་བདེན་འདུས་བྱས་ལ་གཙོ་བོར་བརྟེན་པའི་ཕྱོགས་ཐམས་ཅད་ལ་མངོན་ཞེན་ཆུང་དུ་འགྲོ་བ་ལ་དོགས་ངན་མི་དགོས། ནག་པོ་ཁ་འབྱམས་ནི། རང་རྒྱུད་ལ་གོ་མྱོང་ཅུང་ཟད་
ཀྱང་མ་སྐྱེས་བཞིན་དུ་གྲུབ་ཐོབ་ཀྱི་ལད་མོ་བྱེད་པ་དང༌། དེ་དག་གི་ཚིག་རིགས་ཡིད་ལ་བཞག་ནས་ཕོ་ཚོད་ཀྱི་རྒལ་རལ་བྱེད་པ་ལགས་མོད། ལར་ཨོ་རྒྱན་ཆེན་པོས་ངའི་གསང་སྔགས་འདི་ལྟ་བ་གཙོ་ཆེ། ལྟ་བའི་ཕྱོགས་སུ་སྤྱོད་པ་མ་ཤོར་བ་མཛོད། ལྟ་བའི་ཕྱོགས་སུ་སྤྱོད་པ་ཤོར་ན་དགེ་སྟོང་སྡིག་སྟོང་ནག་པོ་ཁ་འབྱམས་ཀྱི་ལྟ་བར་འགྲོ། སྤྱོད་པའི་ཕྱོགས་སུ་ལྟ་བ་མ་ཤོར་བར་མཛོད། སྤྱོད་པའི་ཕྱོགས་སུ་ལྟ་བ་ཤོར་ན་དངོས་པོ་དང་མཚན་མས་བཅིངས་ཏེ་གྲོལ་བའི་དུས་མ་མཆིས་གསུངས་པ་འདི་གནང་ཤིན་ཏུ་ཟབ་པས་ད་ལྟ་རྐྱེན་མི་ཐུབ་ཅིང༌། རྟོགས་པ་ལ་རེས་འཇོག་ཡོད་དུས་དོན་དམ་གྱི་ཆ་ནས་དེ་དག་ལ་མི་ཞེན། ཀུན་རྫོབ་ཀྱི་ཆ་ནས་འགེགས་ཀྱང་མི་འགེགས་པ་ཡིན། ཡང་ཚོགས་གཉིས་རྫོགས་པའི་འབྲས་བུ་ནི་སྤངས་རྟོགས་མཐར་ཕྱིན་པའི་སངས་རྒྱས་ཡིན། ཡེ་ཤེས་ཀྱི་ཚོགས་མ་རྫོགས་པར་བསོད་ནམས་ཀྱི་ཚོགས་ག་ལ་རྫོགས། སྤྱོད་འཇུག་ལས་ཀྱང༌། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་པས་གསལ་ལོ། །ཡང་གཟུངས་དྲིལ་ལུགས་སྐོར། དབུ་ནས་མར་དང༌། གཤམ་ནས་ཡར་དྲིལ་གྱི་འདོད་ཕྱོགས་གཉིས་ཀ་ལ་ལུང་གིས་རྒྱབ་བརྟེན་ནི་མ་བྱུང་ལ། སློབ་དཔོན་ཀླུ་སྒྲུབ་ཀྱིས་མཛད་པའི་གཟུངས་འབུལ་དཀར་ཆག་བི་མ་ལ་
དང་ཅོག་རོའི་འགྱུར་དང༌། ཛེ་ཏྭཱ་རིའི་རྒྱ་གཞུང་ཇོ་བོ་རྗེས་རང་འགྱུར་མཛད་པ་ཤིན་ཏུ་སྒྲོམ་ཆེ་པ་གཉིས་ལ་ནི་གསལ་ཁ་མེད་དེ་སྔ་མ་ལས། དེ་ལྟར་གཟུངས་རྣམས་དྲིལ་ནས་ནི། །དར་དཀར་དག་གམ་རྣམ་ལྔས་གྲིལ། །དར་སྐུད་དག་གིས་སྐེད་པ་བཅིངས། །དབུ་ཞབས་ཀུན་ཏུ་དབུལ་བར་བྱ། །ཞེས་པ་ཙམ་ལས་མ་གསུངས། རིག་པས་བརྟགས་ན་ཡི་དམ་གྱི་ཐུགས་ཀའི་སྔགས་ཕྲེང་ལྟར་ཞལ་ཕྱིར་བསྟན་གྱི་དབུ་ནས་དྲིལ་བ་དེ་དཔྱད་བཟོད། དེ་ཡང་ཕྲེང་རེ་རེ་ནས་སྔགས་མཇུག་རྫོགས་པ་དང་འཐུད་མཚམས་འགྲིག་པ་སོགས་ལག་ལེན་གཙང་མར་སྣང་ཡང་གླེགས་བམ་བཅུག་ཆོག་པ་འདིས་ནི་དེ་དག་ཀྱང་བླང་དོར་མེད་པའི་གནས་སུ་སོང་མོད། མཆོད་རྟེན་ལ་སྲོག་ཤིང་གཅེས་པ་དང༌། དེ་ལའང་དྲི་མེད་རྣམ་གཉིས་ལ་བརྟེན་ནས་སྲོག་ཤིང་བརྟེན་པའི་ཆོ་ག་སློབ་དཔོན་ཞི་བ་འཚོའི་གཞུང་ལྟར་གྲུབ་ན་ལེགས་མོད། དེ་ཡང་དབུ་མ་ནི་ཆོས་ཉིད་རྣམ་པར་མི་རྟོག་པའི་རྩ་ཡིན་པས་ཡེ་ཤེས་དམ་པའི་བཞུགས་གནས་ཀྱི་རྟེན་འབྲེལ་དུའང་སྲོག་ཤིང་འདི་གཅེས་ལ། སྐུ་ལའང་དངོས་བསྟན་མ་བཤད་ཀྱང་དེའི་རིགས་པ་བསྒྲེས་པ་ལ་འགལ་བ་ཅི་ཡོད། ལམ་བདེན་སྤངས་པའི་སངས་རྒྱས་རྣམས་ལ་རོ་རྐྱང་ནི་དགོས་པ་མེད་པ་འདྲའོ། །ཡང་སྔ་འགྱུར་ཕྱོགས་ལ་ཚོགས་ཀྱི་
མཆོད་པ་དང༌། གསར་མའི་ཕྱོགས་ཀྱི་གཏོར་འབུལ་དོན་གཅིག་གམ་གསུང་པ། གཏོར་མའི་མཆོད་པ་ནི་སྔ་འགྱུར་ལའང་ཡོད་ཀྱང༌། དེས་ཚོགས་ཀྱི་གོ་མི་གཅོད། གསར་མའི་ཕྱོགས་ལ་རྒྱ་གར་དུ་བཟའ་བཅའ་བཏུང་བའི་རྫས་ཀྱང་གསེར་སྲང་མང་པོའི་རིན་ཐང་ཅན་ཚོགས་པར་བྱས་ནས་དྲོད་ཐོབ་པའི་རྣལ་འབྱོར་ཕོ་མོ་ལྷ་གྲངས་དང་མཉམ་པ་འདུས་པ་ལ་ཚོགས་ཀྱི་འཁོར་ལོ་གྲགས་པ་ཡིན་ནོ་ཟེར་ཡང༌། ཌོཾ་བི་ཧེ་རུ་ཀའི་ཚོགས་འཁོར་གྱི་ཆོ་ག་ཟེར་བ་ཞིག་མཐོང་བ་ལ་ནི་དེ་འདྲའི་ཐ་སྙད་མི་འདུག །སྔ་འགྱུར་ལ་གཙོ་བོར་གཏེར་མའི་ཕྱོགས་ལ་གྲགས་ཆེ་བའི་ཁུངས་ནི་གཏེར་ཁ་གོང་འོག་ལ་ཐུག་པས་འདི་ཕན་ཡོན་ཆེན་པོ་དང་ལྡན། དེ་ཡང་བྱེད་པ་ཕོ་རྣམས་བརྟུལ་ཞུགས་ཆུང་བས་ཤ་ལྔ་བདུད་རྩི་ལྔ་ལ་སོགས་པ་རྫས་སུ་བསྡུ་ནུས་པ་དཀའ་ཡང༌། བཱ་ལ་གཙོ་བོར་གྱུར་པའི་བཟའ་བ་རྣམས་ཐབས་ཀྱི་ཆ་དང༌། མ་དཱ་ན་གཙོ་བོར་གྱུར་པའི་བཏུང་བ་རྣམས་ཤེས་རབ་ཀྱི་ཆར་བསྡུས་ནས་ཚོགས་པར་བྱེད་པ་ལ་ཚོགས་ཞེས་བྱ་སྟེ། དེ་ལའང་འཁོར་ལོ་དང་མཆོད་པའི་མིང་གི་ཁྱད་པར་ནི་བྱེད་པ་པོ་ལྟ་སྤྱོད་ཕུན་སུམ་ཚོགས་མིན་དང༌། དངོས་འབྱོར་གྱི་ཡོ་བྱད་རླབས་ཆེ་ཆུང་ལ་བརྟགས་སོ་ཟེར་བ་ལའང་འགལ་བ་མེད་དེ། སངས་རྒྱས་ཀྱི་ཆོས་རྣམ་པ་ཐམས་ཅད་དུ་གསུངས་ཀྱང་སྡེ་སྣོད་ཀྱི་
རྣམ་པར་དབྱེ་བ་དང༌། འདུས་པའི་ཁྱད་པར་ལས་འཁོར་ལོ་གསུམ་ཞེས་གྲགས་པས་མཚོན་ནོ། །དེང་སང་སྔ་འགྱུར་གྱི་ཚོགས་ལ་སྤྱོ་བ་བྱེད་པ་དག་ཀྱང་ཟ་འདོད་ལ་མཐུན་པས་རང་གཞུང་ལ་མེད་བཞིན་ཆོག་སྒྲིག་གསར་པ་བྱེད་པར་སྣང་ལ་དོན་དུ་ནི་སྦོམ་པོ་བརྒྱད་ཀྱི་རྣམ་གྲངས་བདེན་ན་ཚོགས་ཀྱི་འཁོར་ལོ་ནི་འདོད་རྒྱལ་དུ་བྱས་པ་མ་ཡིན་པས་སྔགས་ཀྱི་སྦྱོར་སྒྲོལ་གྱི་མཚོད་པ་གཉིས་ཀའི་རྣམ་གཞག་ཚང་ཕྱིར་ཐོག་མཐའ་བར་གསུམ་གྱི་རྣམ་དབྱེས་བསྟན་པ་འདི་ལེགས་པ་ཡིན་ནོ། །དེ་ཙམ་ནི་ཕྱིའི་ཚོགས་ཀྱི་འཁོར་ལོ་ཐུན་མོང་བ་སྟེ། ཐུན་མོང་མ་ཡིན་པ་འདུ་བ་དང་ཉེ་བའི་འདུ་བ་ལ་བརྟེན་ནས། ཡུལ་ཉེར་བཞིའི་དཔའ་བོ་དང་རྣལ་འབྱོར་མའི་ཚོགས་མཉེས་པར་བྱེད་པའི་ནང་དང་གསང་བའི་ཚོགས་ཀྱི་འཁོར་ལོས་བསོད་ནམས་དང་ཡེ་ཤེས་ཀྱི་ཚོགས་བཙན་ཐབས་སུ་རྫོགས་པར་བྱེད་པ་ནི་དབང་པོ་རྣོན་པོ་རྒྱུའི་སྟོབས་ཅན་གྱིས་སྤྱོད་ཡུལ་ལོ། །ཡང་ལྷ་བསངས་འདི་ལ་ལྷོ་གཏེར་བྱང་གཏེར་གཉིས་སུ་གྲགས་པའི་ལྷོ་གཏེར་ཀུན་མཁྱེན་ཆེན་པོས་མཆོག་བསྒྲིགས་མཛད་པ་དེ་ངེད་རང་གི་བློ་ལ་ལེགས་པར་མཐོང་ཞིང་དེའང་བཟོ་བཅོས་རེ་མང་སོང་བའི་ཆོག་བསྒྲིགས་གསར་མ་རེ་གཉིས་འདུག་པ་དེ་ལ་དགོས་པ་གང་ཡོད་གསུང་པ་ལྷ་བསངས་རང་
ངོའི་དམིགས་པ་དང༌། མགྲོན་བསྡུ་ལུགས་སོགས་ནི་ཀུན་མཁྱེན་པའི་བདེ་ལེགས་ཀུན་འབྱུང་ལས་ལེགས་པ་འོང་མི་ཤེས་པ་དེ་ཀ་ནས་ཀྱང་དགོངས་འདུག་པ་དང༌། ཆོ་ག་བསྒྲིགས་བསྐྱར་མ་ལ་བདག་བསྐྱེད་བཅུག་པ་དགོས་པའི་ལུགས་སུ་བྱས་འདུག་ཀྱང༌། སྤྱིར་ལྷ་བསངས་ནི་མཆོད་སྦྱིན་ལ་གཙོ་བོར་དམིགས་པ་ཡིན་པས་བདག་བསྐྱེད་དགོས་པའི་ངེས་ཏིག་ཀྱང་མ་མཐོང་ཞིང༌། གལ་ཏེ་འདོད་ནའང་ཀུན་མཁྱེན་རང་གི་གསུང་ཐོར་བུ་ན་བཅུག་ཆོག་མ་ཡོད་པ་དེས་འཐུས་ལ་རྒྱུ་མཚན་དེས་སངས་རྒྱས་གཉིས་པ་ལྟ་བུའི་གཞུང་ལ་བསྒྱུར་བཀོད་བྱེད་པ་ནི་བྱིན་རླབས་ཉམས་པའི་རྒྱུར་འདུག་པས་ད་ལམ་ཀུན་མཁྱེན་ཆེན་པོའི་ཕུད་སྐོང་ལ་བསྡུ་བ་གྱིས་གསུང་ཡང་མཁས་པའི་གཞུང་མ་བཤིག་པར་འདོན་ཚིགས་ཉུང་ངུ་འགྲོ་རྩིས་ཀྱིས་ཕུད་རབས་བརྔན་སྦྱིན་རྒྱ་མཚོ་གསར་བརྩམས་བགྱིས་ཡོད། གཏམ་ཚོགས་ལེའུ་ང་བདུན་པའོ།། །།
གཏམ་ཚོགས་ལེའུ་ང་བརྒྱད་པ། འཕགས་པ་སྟོང་ཕྲག་བརྒྱ་པ་ལས་འཕྲོས་པའི་གཏམ་དེ་ཁོ་ན་ཉིད་ཀྱི་མེ་ལོང་།
འཕགས་པ་སྟོང་ཕྲག་བརྒྱ་པ་ལས་འཕྲོས་པའི་གཏམ། དེ་ཁོ་ན་ཉིད་ཀྱི་མེ་ལོང་ཞེས་བྱ་བ། འཕགས་པ་སྟོང་ཕྲག་བརྒྱ་པའི་སྙིང་པོ་ལས་འཕྲོས་པའི་གཏམ། དེ་ཁོ་ན་ཉིད་ཀྱི་མེ་ལོང་ཞེས་བྱ་བ། རྫོགས་པའི་སངས་རྒྱས་ལ་ཕྱག་འཚལ་ལོ། །འཕགས་པ་བརྒྱད་སྟོང་པ་ལས། ཅི་ལྟར་སོ་སོར་རྟོག་པ་ན། ཆོས་ཉིད་དེ་ལ་ཆོས་
ཉིད་ཀྱི་རང་བཞིན་ཡོད་པ་ཡིན་ནོ་ཞེས་ཡང་དག་པར་རྗེས་སུ་མི་མཐོང་བར་དེ་ལྟར་མི་གཡེངས་པའི་སེམས་ཀྱི་རྒྱུད་ཀྱི་སོ་སོར་རྟོག་པར་བྱ་སྟེ། ཞེས་པའི་དོན་ནི། སྤྱིར་གྲུབ་མཐའ་འོག་མ་དག་ཏུ་འདུ་ཤེས་དང་བཅས་པའི་འདུས་བྱས་ཀྱི་རིག་པ་དང་དཔྱད་བཟོད་པ་དག་ལ་ཡང་སོ་སོར་རྟོག་པའི་སྒྲ་ཙམ་འཇུག་ཀྱང༌། རྣམ་པར་ཐར་པའི་སྒོ་གསུམ་སྟོན་པའི་སྐབས་འདིར་ནི། ཚིག་ལ་རྟོན་ཀྱང་དོན་ལ་མི་རྟོན་པ་རྣམ་པར་རིག་བྱེད་ཀྱི་ཤེས་པའམ། རྟོག་དཔྱོད་དང་བྲལ་བའི་ཡེ་ཤེས་ལ་སོ་སོར་རྟོག་པའི་སྒྲས་བསྟན་པ་སྟེ་དོན་ཏུ་སྦྱོར་ན་སྒོམ་པའི་ཤེས་རབ་ཀྱི་མིང་ཡིན་ལ། ཅིའི་ཕྱིར་ན། ཆོས་ཉིད་དེ་ལ་ཞེས་པས་ཆོས་ཉིད་ནི་དོན་དམ་བདེན་པའི་ཚིག་བླ་དྭངས་དང༌། ཆོས་ཉིད་ཀྱི་རང་བཞིན་ཡོད་པ་ཡིན་ནོ་ཞེས་ཡང་དག་པར་རྗེས་སུ་མི་མཐོང་བ་ཞེས་པས། རང་བཞིན་ཞེས་པ་ནི་ངོ་བོ་ཉིད་ཀྱི་མིང་དུ་གྲུབ་པས། དེ་ལ་དེ་ལྟར་ཡོད་པའི་གཏན་ཚིགས་དང་བློའི་དྲི་མ་སྤོང་བའི་ཐ་ཚིག་ཏུ་ཡང་དག་པར་རྗེས་སུ་མི་མཐོང་ཞེས་བསྟན་ལ། དེ་ལྟར་མི་མཐོང་བ་དེ་ནི་ཆོས་ཀྱི་མིག་རྡུལ་བྲལ་དུ་མཐོང་བའི་ཆོས་ཉིད་དམ་པ་ཡིན་པས། དེའི་རྒྱུན་ལ་མི་གཡེངས་པའི་དྲན་པ་འམ། སེམས་ཀྱི་རྒྱུད་རྒྱུན་ཆགས་པ་ནི་འཕགས་པའི་བདེན་པ་དངོས་ཡིན་པས་དོན་དེ་ལ་སོ་སོར་རྟོག་པ་སྟེ་རང་བཞིན་ཡོངས་ཤེས་ཀྱིས་བསྒོམས་པའི་
དོན་ཏེ། དེ་སྐད་དུ་མགོན་པོ་བྱམས་པས་ཀྱང༌། རྣམ་རིག་མ་མཆིས་དངོས་མ་མཆིས། །སྟོང་པའི་ཆོས་ནི་རྟོགས་པར་ཤོག །ཅེས་པས་གསལ་ལོ། །དེ་བཞིན་དུ་སྔ་མའི་འཕྲོ་ལས། ཆོས་ཉིད་དེའང་ཡང་དག་པར་རྗེས་སུ་མི་མཐོང་བས། ཡང་དག་པའི་མཐའ་མངོན་སུམ་མི་བྱེད་དོ། །ཞེས་པའི་དོན་ནི་ཉན་ཐོས་ཀྱི་ལམ་དུ་རྒྱུུ་ཀུན་འབྱུང་དང་འབྲས་བུ་སྡུག་བསྔལ་གཉིས། ལམ་གང་ཟག་དང་ཆོས་ཀྱི་བདག་མེད་གཉིས་ཀྱིས་འགོག་པའི་ཞི་བ་ཕྱོགས་གཅིག་པ་ནི་ཡང་དག་པའི་མཐའ་ཡིན་ལ་རང་ངོ་ལ་འབྲས་བུའི་མཐར་ཐུག་པ་ཉིད་ཀྱང་བྱང་ཆུབ་སེམས་དཔའི་ལམ་གྱིས་གཞལ་ན་དཔྱད་མི་བཟོད་པའི་ཤེས་སྒྲིབ་དང་བཅས་པའི་འབྲས་བུ་ཉི་ཚེ་བ་ཡིན་པས་ན། འཇུག་པ་ལས་ཀྱང༌། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །ཞེས་ཉན་རང་གི་བྱང་ཆུབ་ལ་སངས་རྒྱས་འབྲིང་གི་ཐ་སྙད་བཞག་ལ། དེའི་ཡང་དག་པའི་མཐའ་མངོན་སུམ་དུ་མི་བྱེད་པ་ནི་ཉན་རང་ལྟར་ཞི་བ་ཕྱོགས་གཅིག་ཏུ་མྱ་ངན་ལས་མི་འདའ་བར། ཡིད་ལ་བྱེད་པ་དང་བྲལ་བའི་རྣམ་པ་ཀུན་གྱི་མཆོག་ལྡན་ཞེས་བྱ་བ་ཚིག་དང་དཔེས་མཚོན་མི་ནུས་པས་ལམ་གྱི་བདེན་པ་སྤངས་པ། ཡིད་དང་ཆོས་ལས་སྐྱེས་པའི་ཤེས་བྱ་དཔྱད་མི་བཟོད་པ། སངས་རྒྱས་སྐུ་གསུམ་གྱི་འཆར་གཞིར་གྱུར་པའི་ཡེ་ཤེས་དེ་ནི། དབུ་
ཕྱག་རྫོགས་པ་ཆེན་པོའི་གྲུབ་མཐའི་ཁ་འཛིན་ཞིང༌། གཏན་ཚིགས་འགོད་པ་རྣམས་ཐོབ་མར་གཏོང་བ་ཞིག་སྣང་བ་དེ་དགའ་རབ་རྡོ་རྗེ་དང༌། ས་ར་ཧ་དང༌། ཀླུ་སྒྲུབ་ཀྱི་བྱིན་རླབས་ཞུགས་པ་འགའ་ཙམ་གྱིས་རྟོགས་པའི་དམ་ཆོས་ཡང་དག་པའོ། །དེ་ལྟ་བས་ན་སྔ་མའི་འཕྲོ་ལས་ནན་ཏན་གྱི་ཚུལ་དུ། དེའི་ཕྱིར་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་འཇོག་ཅིང༌། ཡང་དག་པའི་མཐའ་མངོན་སུམ་དུ་མི་ཕྱེད་དོ། །ཞེས་པས། རྣམ་པར་ཐར་པའི་སྒོ་སྟོང་པ་ཉིད་ནི། ཕུང་པོ་ལྔ་དང་ཚོགས་བརྒྱད་ཀྱི་དྲི་མས་མ་གོས་པའི་མཐའ་བརྒྱད་སྤྲོས་བྲལ་གྱི་ཆོས་ཉིད་བསམ་གྱིས་མི་ཁྱབ་པ་ཡིན་པས། ཤེར་ཕྱོགས་ཐམས་ཅད་དུ་སྟོང་པ་ཉིད་ལ་གཟུགས་མེད་ཅེས་པ་ནས། ཐོབ་པ་མེད། མ་ཐོབ་པ་ཡང་མེད་དོ་ཞེས་པའི་བར་གསུངས་ལ། དེ་ལྟར་རྣམ་པར་ཐར་པའི་སྒོ་དང་པོ་དེ་ཡང་རང་བཞིན་ཡོངས་ཤེས་ཀྱི་བདེན་པས་མ་ཟིན་ན། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཞེས་པ་ལྟར། སྟོང་པར་བལྟ་བའི་གོལ་སྒྲིབ་སྤང་བའི་ཕྱིར་མཚན་མ་མེད་པ་དང༌། ཐོབ་བྱའི་ཡིད་སྨོན་ལྡོག་པའི་ཕྱིར་སྨོན་པ་མེད་པ་ཞེས་ངོ་བོ་གཅིག་ལ་ལྡོག་ཆ་གསུམ་དུ་ཕྱེ་ལ། ཡང་དག་པའི་མཐའ་
མངོན་དུ་མི་བྱེད་པ་ནི། སངས་རྒྱས་ཀྱི་ལམ་ལྔ་མངོན་དུ་མཛད་པ་དང་སྦྱར་ན། གྲངས་མེད་དང་པོར་ཚོགས་སྦྱོར། གཉིས་པར་མཐོང་ལམ་ནས་བཟུང་མ་དག་ས་བདུན། གསུམ་པར་དག་ས་གསུམ་རྫོགས་ཀྱང༌། ཞི་བ་ཕྱོགས་གཅིག་པའི་ཡང་དག་མཐའ་མངོན་དུ་བྱས་ན་སྨོན་ལམ་མི་རྫོགས། དེ་མ་རྫོགས་ན་སེམས་ཅན་གྱི་ཁམས་སྨིན་པར་མི་ནུས། དེ་མ་ནུས་ན་ཞིང་ཁམས་སྦྱོང་བར་མི་ནུས་པས་རྫོགས་སྨིན་སྦྱངས་གསུམ་མཐར་མི་ཕྱིན་པའི་ཕྱིར་རོ། །ཡང་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་ཞེས་བྱ་བ་ནི། ཕ་རོལ་ཏུ་ཕྱིན་པ་ལྔ་དང༌། ཀུན་རྫོབ་བྱང་ཆུབ་ཀྱི་སེམས་ཁོ་ན་ལ་བྱ་བས་ན་ཞི་བའི་ལྷས་ཀྱང༌། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་པས་གསལ་ལོ། །སེང་གེ་བཟང་པོའི་འགྲེལ་ཆེན་ལ། བརྟག་དཔྱད་མ་བགྱིས་དེས་འཁྲུལ་སྲིད། །རྟག་ཏུ་མཉམ་པར་བཞག་པ་ཡི། །རང་བཞིན་མཐོང་བས་མ་འཁྲུལ་སྲིད། །འཁྲུལ་ན་རྫོགས་སངས་རྒྱས་ལ་བཤགས། །མ་འཁྲུལ་དགེ་རྩ་ཡོངས་ལ་བསྔོ། །འདི་ཡང་དགོན་རྩེ་སྤྲུལ་པའི་སྐུས། །གསུང་ངོར་འཇིགས་མེད་གླིང་པས་སོ། །གཏམ་ཚོགས་ལེའུ་ང་བརྒྱད་པའོ།། །།
གཏམ་ཚོགས་ལེའུ་ང་དགུ་པ། གྲུབ་པའི་མཐའ་རབ་ཏུ་འབྱེད་པའི་གཏམ་རྟོག་གེའི་གཉེན་པོ། གྲུབ་པའི་མཐའ་རབ་ཏུ་འབྱེད་པའི་གཏམ་རྟོག་གེའི་གཉེན་པོ་ཞེས་བྱ་བ། བླ་མ་ལ་ཕྱག་འཚལ་ལོ། །པད་
དཀར་ལྟར་བསྔགས་ཤཱཀྱའི་རྒྱལ། །ཚེ་དབང་རིགས་འཛིན་པདྨ་འབྱུང༌། །ཐུགས་རྗེའི་མངའ་བདག་སྤྱན་རས་གཟིགས། །རྗེ་བཙུན་འཇམ་པའི་དབྱངས་ལ་འདུད། །གང་ཞིག་ཕར་ཕྱིན་ཐེག་པ་ལ། །ལམ་ཁྱད་མྱུར་བུལ་རྣམ་པ་ལྔ། །ཕྱུགས་གླང་ཤིང་རྟ་ཤིང་རྟ་ཉི་ཟླའི་འགྲོས། །ཉན་རང་སངས་རྒྱས་་བྱང་སེམས་ཀྱི། །རྫུ་འཕྲུལ་འགྲོས་དང་ལྔར་འདོད་པ། །དབང་པོ་རྣོ་རྟུལ་ཁྱད་པར་ལས། །ཐེག་པ་ཐ་དད་མི་དབྱེ་མོད། །ངེས་དོན་གཏིང་ལ་དཔོགས་སམ་མིན། །དང་པོ་མཆོག་གི་གདུལ་བྱ་དང༌། །ཕྱི་མ་ཕལ་བའི་གདུལ་བྱར་ངེས། རྡོ་རྗཻ་ཐེག་པའི་ཐབས་ལམ་ནི། །ངེས་པར་དབང་རྣོན་ལམ་ཡིན་ཡང༌། །དེ་ཡི་འཇུག་པར་མ་ཁྱབ་པས། །ཕུང་ཁམས་སྐྱེ་མཆེད་རྟེན་འབྲེལ་འབྱུང༌། །ཐོས་དང་བསོད་ནམས་ཡེ་ཤེས་ཚོགས། །ཟག་བཅས་སམ་ནི་ཟག་པ་མེད། །བསྐྱེད་རྫོགས་གཉིས་ལས་ལམ་བགྲོད་ཚུལ། །གནམ་ས་ལྟ་བུའི་ཁྱད་ཞུགས་པས། །རིམ་དང་ཅིག་ཆར་ཐོད་རྒལ་གསུམ། །བདེན་པ་མཐོང་བ་སྔ་ཕྱི་ཡོད། །དབང་པོ་ཡང་རབ་ལས་སད་ཀྱིས། །སྤྲོས་བྲལ་གཞི་མེད་རྩ་བྲལ་རྟོགས། །དབང་འབྲིང་སྣང་རིག་ཟུང་དུ་འཇུག །ཐ་མས་སྣང་བ་སེམས་སུ་རྟོགས། །དམ་པའི་མགོན་གྱིས་མ་ཟིན་ཅིང༌། །དད་པས་ཆོས་ཉིད་མ་
མཐོང་བ། །ཕལ་ནི་སེམས་རིག་མ་ཕྱེད་བཞི་ན། །རྟོག་པ་སྣ་སྐྱིལ་འདུ་བྱེད་ཀྱི། །གཟུང་དྲན་ཐེག་པའི་ཡང་རྩེར་སྒོམ། །བློ་ཡུལ་རྟོག་པར་འཁྲུལ་པ་མང༌། །དེ་ལ་སྟོན་བའི་བསྟན་པ་དང༌། །ལོག་པར་ལྟ་བའི་གྲུབ་མཐའ་གཉིས། །ལྟར་སྣང་ཙམ་ལ་སྐྱབས་འགྲོས་བྱེད། །དངོས་ནི་ཐར་ལམ་ཡོད་མེད་ཡིན། །དཀོན་མཆོག་གསུམ་ལ་སྐྱབས་སོང་བ། །ནང་པའི་གང་ཟག་གཞན་དུ་ཕྱི། །དེ་ལའང་མཐོ་རིས་ལམ་ཡོད་མེད། །གཉིས་ལས་དང་པོ་གྲུབ་མཐའ་བཟང༌། །རྟོག་པས་བརྟགས་པའི་ལྟ་ལོག་ནི། །སུམ་བརྒྱ་དྲུག་ཅུ་ཡོད་སྲིད་ཀྱང༌། བསྡུ་ན་རྟག་ཆད་གཉིས་སུ་འདུ། །ལྟ་སྤྱོད་ཀར་རྟགས་རྣམ་པ་བརྒྱད། །ཁས་ལེན་ནང་པ་མི་ལེན་ཕྱི། །དེ་ལ་ལྟ་བ་དཀར་རྟགས་ནི། །འདུས་བྱས་འཇིག་དང་ཆོས་རྣམས་སྟོང༌། སྡུག་བསྔལ་ཟག་པ་མྱང་འདས་ཞི། །དེ་བཞིན་ལྟ་བ་དཀར་རྟགས་ཡིན། །སྤྱོད་པ་དཀར་རྟགས་རྣམ་བཞི་ནི། །ས་ཚྭ་གདབ་དང་ཆུ་སྦྱིན་བྱ། །ཁ་འབར་མ་ལ་སུ་རཱུ་པ། །འཕྲོག་མར་ཆངས་བུ་སྤྱིན་པའོ། །ཐུབ་པས་ཆོསཀྱི་སྒོ་མོ་ནི། །བརྒྱད་ཁྲི་བཞི་སྟོང་གསུངས་པ་ལ། །ཐེག་པ་མཆོག་དམན་ཁྱད་པར་དང༌། །ཆོས་ཀྱི་ཕུང་པོའི་ངོས་འཛིན་སོགས། །ལྡོག་པ་ཐ་དད་ཡོད་མེད་ཀྱི། །ཡོངས་
གྲགས་ཆོས་འཁོར་གསུམ་དུ་རང་ལུགས་གྲུབ་མཐའ་མཛོད་དུ་བལྟའོ། །བསྡུ། །དང་པོ་བདེན་བཞིའི་ཆོས་འཁོར་ནི། །སྡུག་བསྔལ་ཤེས་བྱ་ཀུན་འབྱུང་སྤང༌། །འགོག་པ་མངོན་བྱ་ལམ་རྒྱུད་བསྟེན། །བདེན་བཞི་ལན་གསུམ་བཟློས་པ་ཡིས། །རྣམ་པ་ཡན་ལག་བཅུ་གཉིས་བྱུང༌། །བར་པ་མཚན་ཉིད་མེད་པ་ནི། །རྣམ་ཐར་སྒོ་གསུམ་ལས་བརྩམས་གསུངས། །དེ་ལ་རྒྱས་འབྲིང་བསྡུས་གསུམ་སྟེ། །ཡུམ་དང་ཉི་ཁྲི་བརྒྱད་སྟོང་པ། །སྡུད་པ་ཤེར་སྙིང་ཡིག་གེ་གཅིག །ཐ་མ་ལེགས་ཕྱེའི་་ཆོས་འཁོར་ནི། །ཀུན་བརྟགས་གཞན་དབང་ཡོངས་གྲུབ་གསུམ། །ཀུན་བརྟགས་རྟོག་པས་སྒྲོ་བཏགས་ལ། །གཞན་དབང་དེ་ཡི་ལས་བསགས་མྱོང༌། །ཡོངས་གྲུབ་ཆོས་དབྱིངས་འདུས་མ་བྱས། །དེ་ལ་གཉིས་ཡོད་གཞན་དུ་གསལ། །འཁོར་ལོ་གསུམ་པོ་རིམ་པ་བཞིན། །དང་པོ་འདུལ་བའི་སྡེ་སྣོད་སྟེ། །བར་བས་མདོ་སྡེའི་སྡེ་སྣོད་སྟོན། །ཐམས་ཅད་མངོན་པའི་སྡེ་སྣོད་སྟོན། །གསུམ་པོའང་དྲང་ངེས་གཉིས་སུ་འདུ། །གཉིས་པོའི་གྲུབ་མཐའ་གང་བཟུང་ཡང༌། །རང་ལམ་སོ་སོའི་བསམ་སྦྱོར་དངོས། །རྒྱུད་ལ་སྐྱེས་པའི་གང་ཟག་ལ། །ཐེག་ཆེན་པའམ་དམན་པར་བཏགས། །དབྱེ་བའི་སྒོ་ནས་དམན་མཆོག་གི །གྲུབ་མཐའ་སྨྲ་བ་རྣམ་བཞི་
ལས། །དང་པོ་དྲང་དོན་ཐེག་དམན་ལམ། །ཉན་ཐོས་ལ་ནི་མདོ་སྡེ་པ། །བྱེ་བྲག་སྨྲ་བ་རྣམ་གཉིས་ཡོད། །སྔ་མས་ལྡན་མིན་འདུ་བྱེད་དང༌། །འདས་དང་མ་འོངས་འདུས་མ་བྱས། །བཏགས་ཡོད་ཙམ་དང་ད་ལྟར་བའི། །རྡུལ་ཕྲན་ཤེས་པ་སྐད་ཅིག་གཉིས། །ཆ་མེད་བདེན་གྲུབ་ཡིན་ནོ་ཟེར། །ཕྱི་མས་སྣང་བ་དོན་དམ་སྨྲ། །ཡུལ་དང་དབང་པོ་བདེན་གྲུབ་ལས། །རྣམ་པར་ཤེས་པ་སྐྱེའོ་ཟེར། །ཐེག་ཆེན་པ་ལ་སེམས་ཙམ་དང༌། །དབུ་མ་གཉིས་ལས་སྔ་མར་ཡང༌། །སེམས་ཙམ་རྣམ་བདེན་རྣམ་རྫུན་གཉིས། །བློ་ལ་ཆེ་ཆུང་ཁྱད་ཞུགས་པས། །གོང་མའི་གྲུབ་མཐས་འོག་མ་དགག །རྣམ་བདེན་པ་ཡི་མདོ་སྡེ་པར། །ཕྲ་རབ་རྡུལ་ལས་གྲུབ་མི་འཐད། །རྡུལ་ཕྲན་ཆ་མེད་དེ་ལ་ཡང༌། །ཕྱོགས་བཅུའི་བར་དུ་ཆ་ཕྱེ་བས། །དེ་ཡང་གྲུབ་པ་མེད་པར་རྟོགས། །སྣང་བ་སེམས་སུ་བདེན་པར་འདོད། །ཕྱི་རོལ་མ་གྲུབ་རྨི་ལམ་བཞིན། །དཔེར་ན་མིག་ཤེས་ཀྱིས་ནི་གཟུགས། །མཐོང་ཡང་རང་གིས་རང་མཐོང་སྟེ། །གཟུགས་ཀྱི་རྣམ་པར་འཆར་བའི་རྒྱུ། །ཤིས་པ་ལས་གཞན་རང་ཚན་པའི། །གཟུགས་ཀྱི་རྣམ་པར་གཏོར་བྱེད་མེད། །ཟེར་རོ་སེམས་ཙམ་རྣམ་རྫུན་པས། །ཕྱི་རོལ་ཡུལ་མེད་འཛིན་ཤེས་མེད། །གཟུང་འཛིན་གཉིས་མེད་རང་གསལ་འདི། །
བདེན་ལ་ཀུན་གཞིའི་རྣམ་ཤེས་སུ། །འདོད་ནས་ལས་འབྲས་འདི་རུ་འཇོག །ཉམས་རྟོགས་བྱེ་བྲག་མ་ཕྱེད་བཞིན། །དབེན་པར་ན་ཚོད་ཐལ་བ་དང༌། །ཐེག་པ་ཆེ་ཆུང་གཉིས་ཀ་རུ། །ལུང་མ་བསྟན་པའི་ཀུན་འབྱུང་ཁམས། །རྡོ་རྗེ་ཐེག་པའི་ལམ་མཆོག་ཏུ། །མངོན་ལམ་ཆོས་ཀྱི་མིག་བྲལ་རྣམས། །གནས་ལུགས་འདི་ལས་དཔགས་པ་མེད། །དེ་འདྲ་མཐོང་ནས་འགའ་དང་འགའ། །རྫོགས་ཆེན་ཀ་དག་དགོངས་པ་ལ། །སེམས་ཙམ་ཉིད་དུ་བསྙད་པ་དང༌། །གཟུང་འཛིན་རྫས་གཞན་མེད་ཙམ་ལ། །དེ་ཉིད་བཀག་པར་རློམ་པ་ཡི། །ཕྱི་དོན་རྣམ་རིག་བདེན་གྲུབ་ཀྱི། །སྟོང་ཉིད་བློ་ཡིས་བསྒྲུབས་པ་ཡིས། །རྟོག་གེའི་མཛུབ་མོའང་ནང་དུ་ཁུག །དབུ་མ་ཐལ་རང་རྣམ་གཉིས་ལས། །རང་རྒྱུད་པའི་ནི་ཆོས་རྣམས་ཀུན། །བདག་མེད་བདེན་པ་མེད་པ་དང༌། །རང་བཞིན་མེད་ལ་མ་གྲུབ་པའི༌། །དམ་བཅའ་འཛིན་པ་ཁྱད་པར་རོ། །ཐལ་འགྱུར་བ་ནི་སྒྲ་རྟོག་གི །ཞེན་ཡུལ་བརྗོད་མིན་ལྷན་སྐྱེས་དང༌། །ཤིན་ཏུ་འགལ་ཕྱིར་བདེན་པ་གཉིས། །ཅིག་ཆར་སྟོན་པའང་ཁས་མི་ལེན། །ང་ལ་ཁ་ལེན་མེད་པས་ན། ང་ནི་སྐྱོན་མེད་ཁོ་ན་ཡིན། །ཞེས་པས་ཆོས་ཀུན་ངོ་བོས་སྟོང༌། །ཡུལ་གྱི་རང་ངོས་མ་གྲུབ་ཅིང༌། །
རང་གི་མཚན་ཉིད་མ་གྲུབ་དང༌། །ཆོས་ཀུན་ཅིར་ཡང་མ་གྲུབ་པས། །རྟག་ཆད་འགྲོ་འོང་ཡོད་མེད་དང༌། །སྒྱེ་འགག་གཉིས་མེད་ལ་སོགས་ཀྱིས། །སྤྲོས་པའི་མཐའ་དང་བྲལ་བ་ནི། །རྩ་ཤེའི་དགོངས་པ་ཉིད་ཡིན་ནོ། །དེ་ཡི་གནས་ལུགས་བསམ་མི་ཁྱབ། །གཞན་རྣམས་དགག་གཞག་ཚིག་ལ་རྩོད། །མཐའ་བཀག་མཐུན་འཇུག་གྲུབ་མཐའ་འཛིན། །དེ་ནི་སྐྱེ་བའི་བདག་ཉིད་ཅན། །ཐབས་ཀྱི་སྒོམ་པ་ཉིད་ཡྀན་པས། །སེམས་དང་སེམས་བྱུང་འཇིག་མི་ཤེས། །འདིར་ནི་ཟད་པའི་བདག་ཉིད་ཅན། །སྲིད་པ་མཐའ་བྱེད་ཤེས་རབ་ཀྱིས། །མཚན་མ་དང་ནི་རྣམ་རྟོག་ཀུན། །རང་བཞིན་ཉིད་དུ་ཟད་པའི་ཕྱིར། །ཟད་དང་མི་སྐྱེ་ཤེས་པའི་དོན། །གཉུག་མའི་དེ་ཉིད་དངོས་ཡིན་ནོ། །ཡོད་མེད་བློ་ཡི་མཐའ་བྲལ་དུ། །བསྒྲུབས་ལ་གཉུག་མའི་དེ་ཉིད་མེད། །མཉམ་གཞག་ནམ་མཁའ་ལྟ་བུ་ཞེས། །སྟོང་པའི་འཛིན་སྟངས་སྒོམ་ལ་ཡང༌། །གཉུག་མའི་དེ་ཉིད་ཡོད་མ་ཡིན། །ལྷག་མཐོང་སོར་རྟོག་ཡེ་ཤེས་ཞེས། །ཤེས་བྱ་རྣམ་པར་དཔྱོད་ལ་ཡང༌། །གཉུག་མའི་དེ་ཉིད་ཡོད་མ་ཡིན། །རྗེས་ཐོབ་སྒྱུ་མ་ལྟ་བུ་ཞེས། །རྟོག་པ་ཉིང་འཁྲུལ་ཅན་ལ་ཡང༌། །གཉུག་མའི་དེ་ཉིད་ཡོད་མ་ཡིན། །སྒོམ་གྱི་རྩ་བ་དྲན་པ་ཞེས། །ཆེད་འཛིན་བྱས་
པའི་ཀུན་འབྱུང་ལའང༌། །གཉུག་མའི་དེ་ཉིད་ཡོད་མ་ཡིན། །མཐོང་སྤངས་སྒོམ་སྤངས་གོ་ཡུལ་གྱི། །ངེས་ཤེས་ཉམས་ཀྱིས་བསྒྲིབས་ལ་ཡང༌། །གཉུག་མའི་དེ་ཉིད་ཡོད་མ་ཡིན། །ཆོས་ཉིད་ཡེ་གྲོལ་ཉག་གཅིག་ཡིན། །དེ་བཞིན་ཉིད་ནི་རང་སོར་ཞོག །བཞག་གོ་སྙམ་པའི་འཛིན་སྟངས་སྤངས། །སྤངས་སོ་སྙམ་པའི་ངེས་ཤེས་གློད། །རིག་པའི་གསལ་མདངས་ཀུན་ལ་བརྡལ། །སྟོང་པའི་ཡེ་ཤེས་མཁའ་ལྟར་དག །རིག་སྟོང་གཉིས་མེད་ཆོས་ཀྱི་སྐུ། །ཡིད་བྱེད་བྲལ་བའི་སྤྲོས་བྲལ་འདི། །གཉུག་མའམ་བདེ་གཤེགས་སྙིང་པོ་དངོས། །དེ་སྐད་དུ་ནི་ཀླུ་སྒྲུབ་ཀྱིས། །མྱ་ངན་འདས་པ་དངོས་མེད་པའང༌། །མིན་ན་དེ་དངོས་ག་ལ་ཡིན། །ཞེས་གསུངས་འདི་ཉིད་མ་རིག་ན། །དྲན་པས་བཅུར་པའི་གཤིས་ཤོར་ལ། །ཕྱག་རྒྱ་ཆེན་པོར་འདོད་པ་དང༌། །བཅོས་ནས་བཞག་པའི་ཡེ་ཡིན་ལ། །དོ་ཧའི་དགོངས་པར་འདོད་པ་དང༌། །དཔྱད་སྒོམ་རྣོན་པོའི་འཛིན་སྟངས་ལ། །ཞི་ལྷག་ཟུང་འབྲེལ་འདོད་པ་སོགས། །ཤེས་བྱའི་སྒྲིབ་པས་ཚར་བཅད་པས། །བསམ་བྱུང་ཡིན་ཡང་སྒོམ་པ་མིན། །རིག་པ་ཀློང་ནས་མ་གྲོལ་བར། །ཡིན་སྙམ་བཤད་པ་གོ་
ཡུལ་ཙམ། །མཐའ་བརྒྱད་སྤྲོས་བྲལ་མ་རྟོགས་པར། །འཕགས་ལམ་རྫོགས་ཆེན་དོན་མི་མཐོང༌། །སྤྲོས་བྲལ་དེ་ཉིད་རྟོགས་པ་ལ། །ལས་རླུང་དབུ་མར་འདུ་དགོས་པས། །ཆོས་ཉིད་དྲན་པའི་རྩིས་བཟུང་ནས། །རྟོག་པ་རྒྱ་ཡན་མ་ཤོར་ན། །རླུང་སེམས་འཇུ་དྲན་རང་དེངས་ཡིན། །ནམ་མཁའ་བྱ་ལྟར་འཕུར་བ་དང༌། །ས་ལ་བྱི་ལྟར་འཛུལ་བ་ཡི། །གྲུབ་རྟགས་སོ་སྐྱེའི་ལམ་ལའང་ཡོད། །ཆོས་ཉིད་བདེན་པ་མཐོང་བ་ནི། །སྒོ་ངའི་ནང་གི་ཁྱུང་ཕྲུག་འདྲ། །བརྗོད་བྱས་གཏན་ལ་དབབ་རུང་བའི། །ལམ་བདེན་ཐམས་ཅད་འདུས་བྱས་ཡིན། །དེ་ལ་ཆོས་ཉིད་རེ་བ་ཡི། །རྟོག་གེ་ཐམས་ཅད་རྣམ་པར་འཁྱམ། །མཆོད་དོ་སྒྲུབ་བརྒྱུད་བླ་མ་མཆོད། །ཐ་མལ་ཤེས་པ་སྒྲ་མི་སྙན། །མཁས་པའི་ཚོགས་ནི་དེ་ལ་བསྲིང༌། །རྣམ་པར་གྲོལ་བའི་ཤུལ་ལམ་ཡིན། །རིག་པ་དེ་ལ་ཕྱག་བཙལ་ནས། །ཕངས་པའི་གདམས་ངག་གླུ་རུ་ལེན། །རྫོགས་པ་ཆེན་པོའི་ཁྲིད་ཚུལ་ལ། །བསྟན་པ་གཞན་གྱི་འཇུག་སྒོ་ཚང༌། །ཐུན་མོང་སྔོན་འགྲོ་གནད་སོང་ན། །སྡུག་བསྔལ་བདེན་པ་ཤེས་པ་ཡིན། །ཐུན་མིན་སྔོན་འགྲོ་ཀུན་འབྱུང་གི །རྒྱུ་འབྲས་སྤོང་བའི་གཉེན་པོར་འཆར། །ཁྱད་པར་ཅན་གྱི་སྔོན་འགྲོ་ཡིས། །ལུས་སེམས་ཤིན་ཏུ་སྦྱངས་བྱས་ནས། །
འཁོར་འདས་རུ་ཤན་ལེགས་ཕྱེད་ན། །འགོག་པ་མངོན་དུ་བྱ་བར་ནུས། །ཉག་གཅིག་རྩད་ནས་གཅོད་པའི་ཚེ། །དངོས་པོའི་གཤིས་ལ་མཚང་བཙལ་བས། །འཁོར་འདས་སེམས་ཀྱི་རྩལ་དུ་རིག །དེ་ཚེ་ལམ་མཆོག་རྒྱུད་ལ་བརྟེན། །སྣང་བའི་ཡུལ་ལ་ཕར་དཔྱད་པས། །རང་བཞིན་མ་གྲུབ་སེམས་ཀྱིས་སྤྲུལ། །འཛིན་པའི་བློ་ལ་ཚུར་དཔྱད་པས། །རྣམ་ཤེས་རང་ངོའི་མཚན་ཉིད་ནི། །རང་རིག་རང་གསལ་ཙམ་དུ་མཐོང༌། །སེམས་ཙམ་པའི་ལྟ་བ་དེ་རུ་རྫོགས། །དེ་ལ་བྱུང་གནས་འགྲོ་གསུམ་བརྟགས། །རྟག་ཆད་ཡོད་མེད་སྤྲོས་པས་དབེན། །འདུས་བྱས་དང་ནི་གློ་བུར་བས། །བཞག་པ་ཐམས་ཅད་བདེན་མེད་དུ། །རིག་པས་དཔྱད་བཟོད་དཔྱད་སྒོམ་སྟེ། །དཔྱད་འབྲས་མུ་བཞིའི་སྤྲོས་དང་བྲལ། །དབུ་མ་པའི་ལྟ་བ་དེ་རུ་རྫོགས། །འཁྲུལ་ལུགས་ཆོས་ཅན་རྣམ་རྟོག་ལ། །ཆོས་ཉིད་དོན་དམ་རྒྱ་ཡིས་ཐེབས། །ཆོས་ཅན་སྟེང་ན་ཆོས་ཉིད་འཕྱོ། །ཕྱག་ཆེན་པའི་ལྟ་བ་དེ་རུ་རྫོགས། །ཀ་ནས་དག་པའི་ཆོས་སྐུ་ནི། །བཅིང་གྲོལ་ངོ་བོ་ཉིད་མེད་ཡིན། །འཁོར་འདས་རིག་པའི་ཀློང་ཡངས་སུ། །ཤེས་བྱ་གཤིས་ལ་ཕེབས་པ་ཡི། །གནས་ལུགས་ལ་རྫོགས་པ་ཆེན་པོར་གྲགས། །ལར་མཐའ་བརྒྱད་སྤྲོས་བྲལ་ཆེན་པོའི་དོན། །ཤེས་བྱས་
གཞལ་ན་སྔགས་ལམ་མིན། །ཡེ་ཡིན་དུ་རིག་པས་ཁྲེགས་ཆོད་དང༌། །ངང་ཡིན་ལ་རྫོགས་པས་རྫོགས་པ་ཆེ། །ངོ་བོ་ཉིད་མེད་ཀ་དག་ལ། །རྣམ་ཀུན་མཆོག་ལྡན་ལྷུན་གྲུབ་ཆེ། །གདོད་ནས་ཟུང་འཇུག་ཆོས་ཀྱི་སྐུ། །གཉིས་སུ་མེད་པས་ཉག་གཅིག་ཟེར། །ཡུལ་ལ་རྒྱས་འདེབས་སྤང་གཉེན་ཆོས། །ཡུལ་ཅན་རིག་སྟོང་རྟོགས་པ་ལ། །རྫོགས་པ་ཆེན་པོ་སེམས་སྡེར་གྲགས། །ཕྱག་ཆེན་འདྲ་ཡང་ཁྱད་གཞི་ལ། །རྟོན་དང་མི་རྟོན་ཕྱེད་པ་གཅེས། །ཆོས་ཉིད་གདོད་ནས་སྐྱེ་མེད་ངང༌། །རིལ་འཛིན་རྗེས་གཞིག་མ་ལགས་པར། །འགག་མེད་འོད་གསལ་དངས་སུ་གཞུག །དེ་ལ་རྫོགས་ཆེན་ཀློང་སྡེར་གྲགས། །རིམ་ལྔ་འདྲ་ཡང་ཁྱད་གཞི་ལ། །རྟོན་དང་མི་རྟོན་ཕྱེད་པ་གཅེས། །དབྱིངས་ལ་ལྷུན་གྲུབ་ལོངས་སྐུའི་གདངས། །ཤེས་ཉམས་ཡིད་དཔྱོད་ཙམ་མིན་པར། །དབང་ཤེས་འབྲེལ་པའི་མངོན་སུམ་ལམ། །སྐུ་ལྔར་སྨིན་པ་མན་ངག་སྡེ། །སྦྱོར་དྲུག་འདྲ་ཡང་ཁྱད་གཞི་ལ། །རྟོན་དང་མི་རྟོན་ཕྱེད་པ་གཅེས། །ཁྱད་གཞིའི་དེ་ཉིད་མ་རིག་ན། །ཁྱད་ཆོས་མུན་པའི་མདའ་ལྟར་འཁྱམ། །དེ་ཕྱིར་བསམ་གྱིས་མི་ཁྱབ་པའི། །གནས་ལུགས་མངོན་སུམ་བྱས་པ་ནི། །ཆོས་སྐུའི་དངོས་རྒྱུ་ངེས་པའི་དོན། །མཚན་གཞི་བརྗོད་ན་རྫོགས་ཆེན་ནམ། །རྡོ་རྗེ་སེམས་
དཔའ་ནམ་མཁའ་ཆེ། །གཞན་དུ་དངོས་རྒྱུས་སྟོངས་པའི་ཕྱིར། །བརྒྱུད་ནས་ཐོབ་པ་རྗེས་དཔག་ལམ། །ཅི་ཕྱིར་བསམ་མི་ཁྱབ་པའི་དོན། །མངོན་དུ་མ་བྱས་དྲང་དོན་ཏེ། །བདེ་བར་གཤེགས་སམ་སངས་རྒྱས་རྒྱུར། །ཡང་དག་སྦྱོར་བའི་ལུང་གིས་བཤད། །འདི་སྐད་དུ། གང་དག་བསམ་གྱིས་མི་ཁྱབ་པའི་གནས་མངོན་དུ་མ་བྱས་པ་དེ་དག་ནི་བདེ་བར་གཤེགས་པ་སྟེ། སངས་རྒྱས་ཉིད་ཡིན་ལ། མཚན་གཞི་ཡང་དག་པར་མཚོན་པ་ནི། རྡོ་རྗེ་སེམས་དཔའ་ཡང་དག་པའོ། །ཞེས་པས་གསལ་ལོ། །རྫོགས་པ་ཆེན་པོའི་ཆོས་ཉིད་འདི། །གླེང་བ་མང་སྟེ་རྟོགས་པ་ཉུང༌། །རྟག་ཆད་ཡོད་ན་ལྟ་བ་ཉམས། །ལམ་གྱི་སྒྲིབ་པ་སྤང་བའི་ཕྱིར། །སྒོམ་བློ་མེད་པའི་རིག་ཆ་དགོས། །སྤང་བླང་ཡོད་ན་སྒོམ་པ་འདྲལ། །འགྱུར་མེད་ཡོངས་གྲུབ་ཆེན་པོ་ལ། །བྱ་རྩོལ་བྱས་པས་དེ་ཉིད་ཉམས། །ཡིད་དཔྱོད་ཡོད་ན་ཀ་དག་འཇིག །བདེ་གཤེགས་སྙིང་པོའི་ཆོས་ཉིད་ལ། །བསྐྱར་གྲོལ་བསྒོམས་པས་ཁྲེགས་ཆོད་ཤོར། །སྣང་བཞི་མེད་ན་ཐོད་རྒལ་འཇིག །སྐུ་གསུམ་དང་རང་རྫོགས་མ་རིག་པར། །གཟུགས་སྣང་དངོས་པོར་ཞེན་པས་བསླུ། །གྲུབ་མཐའི་དེ་ཉིད་མ་རིག་བཞིན། །ཕྱོགས་ལྷུང་སྨྲ་ན་སྨྱོན་པའི་ངག །ལྟ་སྒོམ་བསྲེ་ན་མཁས་པ་ཉམས། །རྒྱལ་བའི་བསྟན་པ་
ཀུན་ཁྱབ་ལ། །སྡེ་རིགས་ཕྱེ་ནས་བསུན་འབྱིན་པ། །ཁ་ན་མ་ཐོའི་ནང་ན་ཐུ། །ཤེས་བྱ་ཟད་མཐའ་མེད་པའི་ཕྱིར། །ཆོས་ནི་བློ་ཡི་རྗེས་འགྲོ་བས། །བདེན་གཉིས་མོས་པའི་རྗེས་སུ་འབྲང༌། །དེ་ཕྱིར་གྲུབ་མཐའ་ཀུན་ཤེས་མཛོད། །དགག་བསྒྲུབ་མུ་མཐའ་མེད་སྲིད་ཀྱང༌། །རང་སེམས་བཏུལ་ན་མཐའ་གྲོལ་ཡིན། །སྒྲུབ་པ་བྱེད་ན་ལྷོད་གྲོལ་འབྱུང༌། །བག་ཆགས་སད་ན་ཀློང་གྲོལ་ཡིན། །ཡིན་མིན་བློ་ཡིས་མ་གོས་པའི། །གནས་ལུགས་ཀུན་གྱིས་རྟོགས་པར་ཤོག །གཏམ་ཚོགས་ལེའུ་ང་དགུ་པའོ།། །།
གཏམ་ཚོགས་ལེའུ་དྲུག་ཅུ་པ། མི་དགེ་བཅུ་སྤོང་གི་གནང་བཀག་ལ་དཔྱད་པའི་གཏམ་ཚུལ་ཁྲིམས་རིན་པོ་ཆེའི་རྒྱན།
མི་དགེ་བཅུ་སྤོང་གི་གནང་བཀག་ལ་དཔྱད་པའི་གཏམ་ཚུལ་ཁྲིམས་རིན་པོ་ཆེའི་རྒྱན་ཅེས་བྱ་བ། བྱང་ཆུབ་སེམས་ལ་ཕྱག་འཚལ་ལོ། །ཐེག་པ་ཆེན་པོའི་སྡེ་སྣོད་ལ། །གནང་བཀག་དམིགས་བསལ་འཆད་པའི་སྐབས། །སེམས་དཔའ་མཆོག་ལ་གཞན་དོན་དུ། །འགྱུར་ན་གཟུགས་ཅན་ལས་གྱུར་པའི། །ལུས་ངག་གཉིས་ཀྱི་མི་དགེ་བདུན། །གནང་པ་འདི་ལ་རྩོད་པ་མེད། །ཡིད་ཀྱི་གསུམ་ལ་དཔྱད་ཀྱིས་ཉོན། །འདི་ལྟར་གཞན་གནོད་གཞིར་བཅས་ཀྱི། །གཞི་སྒྲ་འཇུག་པའི་དོན་ལྔ་སྟེ། །རྒྱུ་རྐྱེན་གནས་དང་ཀུན་སྦྱོར་དང༌། །ཡོངས་བཟུང་བ་ལ་གཞི་སྒྲ་འཇུག །ཅེས་པའི་རྒྱུ་ནི་ཡིད་ཤེས་ལ། །སྐབས་འདིར་འཇུག་པའི་གཞི་བཅས་སྒྲ། །ཡིད་ནི་ལས་ཀྱི་སྔཽན་འགྲོ་བས། །ཉན་ཐོས་སྡོམ་
པ་གཟུགས་ཅན་རྣམས། །བྱང་ཆུབ་སེམས་པའི་རྣམ་རིག་གི །ཐབས་ཀྱིས་ཟིན་ན་དགེ་བ་རུ། །སོན་པའི་ཕྱིར་ན་གནང་མོད་ཀྱང༌། །དམིགས་པ་དུག་ཅན་ལས་གྱུར་པའི། །ཡིད་ཀྱི་ཁ་ན་མ་ཐོ་གསུམ། །རང་བཞིན་ཉོན་མོངས་ཅན་ཡིན་བཞིན། །གནང་འདོད་གཟུགས་བརྙན་གཟུགས་སུ་འཁྲུལ། །ཅི་ཕྱིར་བྱང་སེམས་ཀུན་སྤངས་པས། །དབུལ་པོའི་སླད་དུ་གཞན་གྱི་ནོར། །བླང་འདོད་བརྣབ་སེམས་མ་ཡིན་ཏེ། །ཀུན་སློང་ཤིན་ཏུ་དགེ་བའི་ཕྱིར། །མ་བྱིན་བླང་བའི་གཞིར་བསྡུ་ཡི། །འདི་ལྟར་བརྣབ་སེསམ་ཞེས་བྱའི་སྒྲ། །ཞུགས་པ་ཙམ་ནས་སྡིག་ཏོ་སྟེ། །ཆོས་ལྔ་ལྡན་པའི་བརྐམ་སེམས་ཀྱིས། །གཞན་རྫས་ཐོབ་བློ་སྐྱེས་པ་ནི། །ཡིད་ཀྱི་ཉེས་པའི་ངོ་བོ་ཉིད། །དེ་བཞིན་དཀོན་མཆོག་སུན་འབྱིན་པ། །དར་མ་འུ་དུམ་བཙན་སོགས་དང༌། །མི་ནག་མདུང་ཐུང་ཅན་ལྟ་བུའི། །ལས་དང་སྡིག་ཏོའི་ཁུར་འབེབས་ཕྱིར། །གསོད་པའང་ལུས་ཀྱི་ལས་ཉིད་དེ། །བསམ་སྦྱོར་གཉིས་པོ་ཆེས་འགལ་བས། །གནོད་སེམས་མིན་པར་ཁ་ཚོན་ཆོད། །ལས་གནག་རྣམ་སྨིན་དཀར་བ་དེ། །ཕན་པའི་སེམས་ཀྱི་རྒྱུ་འབྲས་ཡིན། །བྱམས་པ་འཇུག་པའི་མདོ་ལུང་སོགས། །དུས་དང་དོན་གཞན་ལ་དགོངས་པ། །དྲང་དོན་ཉིད་དེ་ངེས་དོན་དུ། །ཇི་ལྟར་རྒྱ་མཚོ་ཆེན་པོ་ནི། །གང་ལྟར་ནང་གྲང་
ཕྱི་རོལ་ཚ། །དེ་བཞིན་ཁྲོ་བོའི་སྐུར་བསྟན་པ། །ཐུགས་ནི་ཞི་བར་ཤེས་པར་བྱ། །དེ་སྐད་རྒྱུད་ལས་གསུངས་པ་དེས། །ནང་གྲང་གནོད་སེམས་མེད་པར་ཞི། །ཕྱི་ཚ་སྤྱོད་པ་བརླང་པོས་གནོད། །མདོར་ན་ལུས་ངག་གཉིས་ཀྱི་ལས། །ལུང་མ་བསྟན་ཕྱིར་སེམས་ཀྱིས་བསྒྱུར། །དེ་ཕྱིར་ཟབ་མོའི་མདོ་སྡེ་ལས། །དགེ་འམ་ཡང་ན་མི་དགེ་བར། །ལས་ནི་སེམས་ཀྱིས་སྤྲུལ་པ་ཡིན། །གསུངས་ན་ཡིད་ཀྱི་གསུམ་པོ་ནི། །རྣམ་པར་གྱུར་པའི་ཀུན་སློང་ལ། །བརྣབ་སེམས་གནོད་སེམས་ལོག་ལྟའི་སྒྲ། །ཞུགས་པས་སྡིག་ཏོའི་རྣམ་རིག་ཡིན། །ཁྱད་པར་ལོག་པར་ལྟ་བ་ནི། །ཡང་དག་ལྟ་བའི་འགལ་ཟླ་སྟེ། །ཀུན་སློང་དཀར་དང་གནག་པ་གཉིས། །ཅིག་ཆར་ཚོགས་པ་ཤེས་བྱ་ལ། །སྲིད་པ་མིན་པའི་ཆོས་ཅན་ནོ། །རིག་པ་འདི་ལ་སུན་འབྱིན་པའི། །ཐལ་འགྱུར་རྣམ་དག་ཡོད་ཟེར་ན། །དཔལ་ལྡན་མ་ཁོལ་དཔའ་བོ་ཡི། །ལུང་གི་གོ་སྐབས་ཁྱེད་ལ་དབྱེ། །ཞེས་པའང་དཔལ་ས་སྐྱའི་གཙུག་ལག་ཁང་དུ་ཐེག་པ་ཆེ་ཆུང་གི་སྡེ་སྣོད་ལ་སྤྱན་དཀྱུས་ཡངས་པའི་དགེ་བའི་བཤེས་གཉེན་ཆེན་པོ་དག་དང་ཆོས་ཀྱི་འབེལ་གཏམ་ལས་འཕྲོས་ཏེ་སྒོམ་བྱུང་གི་ཤེས་རབ་ལས་སྤོབས་པའི་གཏེར་མཛོད་གྲོལ་བ་རྫོགས་ཆེན་པ་རང་བྱུང་རྡོ་རྗེ་འཇིགས་མེད་གླིང་པའམ། །མཁྱེན་བརྩེའི་འོད་ཟེར་གྱིས་སོ། །གཏམ་ཚོགས་ལེའུ་དྲུག་ཅུ་པའོ།། །།
གཏམ་ཚོགས་ལེའུ་རེ་གཅིག་པ། ཕྱག་རྫོགས་ཀྱི་དེ་ཁོ་ན་ཉིད་རབ་ཏུ་དབྱེ་བའི་གཏམ་ཀེ་ཏ་ཀའི་རྣ་རྒྱན།
ཕྱག་རྫོགས་ཀྱི་དེ་ཁོ་ན་ཉིད་རབ་ཏུ་དབྱེ་བའི་གཏམ་ཀེ་ཏ་ཀའི་རྣ་རྒྱན་ཅེས་བྱ་བ། རང་བཞིན་ཆོས་ཉིད་བདེན་པ་ལ། །ཀུན་ཏུ་བཟང་པོའི་ཡེ་ཤེས་ཞལ། །རྒྱལ་བ་གཉིས་པ་ངག་གི་དབང༌། །དེ་ལ་སླར་ཡང་བསམས་བཞིན་འདུད། །བརྒལ་བརྟག་བསྟན་པའི་ག་དར་ཡང༌། །རྣལ་མའི་སེམས་ལས་ཕྱིར་ཕྱོགས་ན། །ཕྱོགས་སྔའི་ཀུན་འབྱུང་མི་ལྡོག་པས། །ཀླུ་སྒྲུབ་ཞབས་ཀྱང་འདིར་མི་སྨོན། །འོན་ཏང་ཁྱོད་གསུང་བྲག་ཆ་ལྟར། །གྱུར་ནས་རངས་མིན་ཐོབ་དོགས་ནས། །ཡིན་ལུགས་སྲོང་པོར་བརྗོད་པ་ལ། །མཉམ་པར་གཞག་པའི་སེམས་ཀྱིས་ལྟོས། །བདེན་པ་མཐོང་བའི་འཕགས་པ་ལ། །ཕྱག་རྫོགས་དབུ་གསུམ་རོ་གཅིག་ཀྱང༌། །ཆོས་རབ་འབྱེད་པའི་བློ་གྲོས་ཀྱིས། །ལམ་བདེན་མངོན་དུ་བྱེད་པའི་ཚེ། །རྟ་དང་གླང་པོ་ཤིང་རྟ་དང༌། །ཉི་ཟླའི་འགྲོས་བཞིན་ལམ་ལ་ཁྱད། །ཆེ་བས་ཀུན་བཟང་རྡོར་འཆང་གི །ཐེག་པ་རིམ་དགུར་ཕྱེ་མིན་ནམ། །རིམ་དགུའི་ཁྱད་པར་མི་འདོད་ན། །ཤིན་ཏུ་རྣལ་འབྱོར་ཚིག་ཙམ་དུ། །ཟད་པ་སོ་སོའི་ལོག་ཤེས་ཕྱིར། །ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཚིག་ལམ་དུ། །སྒྲུབ་པར་ནུས་མིན་དེ་ལྟ་ན། །ཕྱག་རྫོགས་དབུ་མ་ཞེས་བྱ་བའི། །ཐ་སྙད་སྤོངས་ལ་མཉམ་པར་ཞོག །འདི་
ལྟར་བློ་ཡིས་སྤྱོད་ཡུལ་ལམ། །སྤྱོད་ཡུལ་ལས་འདས་ཤེས་བྱའི་གཤིས། །དཔྱོད་དང་མི་དཔྱོད་ས་ནས་སར། །འཕར་བའི་ཐོས་བསམ་སྒོམ་གསུམ་དང༌། །སོ་སོར་རྟོག་པའི་ཤེས་རབ་ལ། །གོང་ནས་གོང་དུ་ཁྱད་ཞུགས་པས། །རང་བཞིན་ཤེས་ན་མཁས་པ་ཡིན། །དེ་ལ་དང་པོ་གཞི་ཡི་སྐབས། །སེམས་ཅན་སངས་རྒྱས་དངོས་ཡིན་ན། །ལམ་ལ་དགོས་པ་མ་མཆིས་པས། །འབྲས་བུའང་ནི་དེ་རྗེས་འབྲང༌། །དེ་ཕྱིར་འཁོར་འདས་གཉིས་ཀ་རུ། །ལུང་མ་བསྟན་ལ་གཞི་ཞེས་བཏགས། །ལམ་དུས་ཕྱག་རྫོགས་གཅིག་ཐ་དད། །བརྗོད་པའི་ལམ་དུ་མཚན་གཞིས་དབྱེ། །རྒྱུད་སྡེ་ལས་གསུངས་ཕྱག་ཆེན་ནི། །སྐྱེ་འགག་སྟོང་པར་རྒྱས་འདེབས་པའི། །སྟོང་ཉིད་སྒོམ་པ་ཙམ་མ་ཡིན། །གསུམ་པའི་དཔེ་ཡིས་ཡེ་ཤེས་དོན། །ཚོར་བ་བདེ་བ་ཙམ་མིན་པའི༌། །རྟོག་བྲལ་རང་བྱུང་ཡེ་ཤེས་ཡིན། །དེ་ཉིད་མངོན་དུ་གྱུར་ཙ་ན། །ཐེག་པ་ཆེན་པོའི་མཐོང་ལམ་ཐོབ། །ཕྱག་ནི་འཁོར་བ་ལ་སོགས་པའི། །ཡི་གེའི་འབྲུ་བསྣོན་ལ་འཇུག་ན། །གལ་ཏེ་མི་སྟོང་ཅུང་ཟད་ཡོད། །སྟོང་པའང་ཅུང་ཟད་ཡོད་པར་འགྱུར། །མི་སྟོང་ཅུང་ཟད་མེད་པས་ན། །སྟོང་པའང་ཡོད་པར་ག་ལ་འགྱུར། །དེ་སྐད་དབུ་མ་ལས་གསུངས་ལྟར། །འཁྲུལ་ལུགས་གནས་ལུགས་
རྣམ་རྟོག་ནི། །ཆོས་སྐུའི་ཕྱག་རྒྱ་ཆེན་པོ་སོགས། །ཆོས་ཅན་དོན་ལ་ཆོས་ཉིད་ཀྱི། །ཤེས་བྱས་རྒྱས་འདེབས་གང་ཞིག་དང༌། །ཆོས་གང་རབ་ཏུ་རྣམ་དབྱེ་འབྱེད་ཀྱི། །བློ་གྲོས་སྲིད་ཞིའི་ཕ་རོལ་ཏུ། །སོན་པའི་ཡེ་ཤེས་རྫོགས་པ་ཆེ། །གཅིག་གམ་ཐ་དད་ད་དུང་གཟིགས། །དེ་སྐད་དུ་ནི་ཕྱོགས་གླང་གིས། །ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱ་དེ་དོན་སྦྱོར་བ་ཡིས། །གཞུང་དང་ལམ་ཡང་དེ་སྒྲ་ཡིན། །ཞེས་པས་གསལ་བར་གོ་ནུས་སོ། །དེ་བཞིན་ཀུན་གཞི་མྱང་འདས་སུ། །དངོས་སྟོབས་རིག་པས་ཁས་ལེན་ན། །ཆོས་སྐུའང་ལུང་མ་བསྟན་དུ་འགྱུར། །ཅི་ཕྱིར་ཀུན་གཞི་ལས་འཁྲུལ་ཕྱིར། །གདོད་ནས་འཁྲུལ་གཞི་ཅན་དུ་འགྱུར། །འདི་ན་ཁ་ཅིག་བྱིས་པ་རྣམས། །རེ་ཞིག་ཆོས་དབྱིངས་དྲི་མེད་ལ། །ཡིད་མི་ཆེས་པ་དྲང་བའི་ཕྱིར། །ཀུན་གཞི་ཀུན་གྱི་གཞི་ཡིན་ཏེ། །མྱ་ངན་འདས་པའི་གཞི་མའང་ཡིན། །ཞེས་པའི་ལྡེམ་དགོངས་ཅན་གྱི་ལུང༌། །ཇི་བཞིན་པ་རུ་འཁྲུལ་པར་ཟད། །ཁྱད་པར་ལམ་དང་འབྲས་བུ་གཉིས། །གཤིས་སུ་གཅིག་པར་ཉམས་ལེན་པར། །འབྲས་བུ་ལམ་བྱེད་རྡོ་རྗེའི་ཐེག །གང་གིས་ཁྱད་ཆོས་ཉིད་ཡིན་ཡང༌། །རླུང་སེམས་ཆ་ཡིས་བསླད་མ་བསླད། །ཁྱད་
པར་ཤིན་ཏུ་ཆེ་བས་ན། །གྲོལ་གཞི་དང་ནི་གྲོལ་ས་ཡིན། །ཀ་དག་གཉིས་ཀྱི་ཆར་དབྱེ་བ། །སྔོན་ཆད་གཞན་གྱིས་མ་རྟོགས་པའི། །གསང་ཚིག་ཀུན་མཁྱེན་ཉིད་ཀྱིས་བསྒྲགས། །དེ་སྐད་དུ་ནི་རྫོགས་ཆེན་ལས། །ཀུན་གཞི་ཆོས་སྐུར་འདོད་པ་ནི། །ང་ལས་གོལ་བ་ཡིན་ཞེས་བཤད། །གཞི་གཅིག་ལམ་གཉིས་ཞེས་བྱ་བའི། །ལུང་ནི་རགས་པའི་རྣམ་གཞག་སྟེ། །གཞི་བདུན་རྣམ་དབྱེ་མ་ཤེས་ན། །ཆོ་ག་ཞིབ་མོ་ག་ལ་ཤེས། །རགས་པ་དེ་ཡང་དོན་གཅིག་ན། །འགལ་ཞེས་བརྗོད་པ་རང་དགར་ཟད། །བརྒྱ་ལ་འགལ་ཡང་མདོ་རྒྱུད་ནི། །ལུང་གི་དབང་པོ་ཡིན་པས་སོ། །སྐབས་འདིར་འཁོར་ལོ་ཐ་མ་དར། །རྒྱུད་སྡེའི་ལུང་འདྲེན་བྱུང་རྒྱལ་དུ། །དྲངས་ཀྱང་དྲང་ངེས་ལྡེམ་དགོངས་དང༌། །དགོངས་མིན་སྒྲ་ཇི་བཞིན་པའམ། །མ་ཡིན་ཁྱད་པར་མ་ཕྱེད་ན། །ཚུལ་འདིར་རྒྱ་བོད་མཁས་རྣམས་ཀྱང༌། །བཞེད་པ་ཤིན་ཏུ་འགལ་གྱུར་པས། །བོད་འདིར་སྒྲོམ་བྱུང་ཤེས་རབ་ཀྱིས། །ཐུགས་རྒྱུད་གྲོལ་ཀྱང་ཐ་སྙད་དང༌། །རྣམ་དབྱེ་མ་འདྲེས་འདོད་རྒྱལ་དུ། །བརྗོད་པའི་ལུང་ལ་རྒྱབ་བརྟེན་དང༌། །དགག་བསྒྲུབ་གཉིས་ཀ་ཉེས་དམིགས་ཀྱིས། །རྒྱུ་རུ་མཐོང་ནས་བཏད་སྙོམས་བཞག །འོན་ཏང་སེམས་ལ་སངས་རྒྱས་སུ། །གསུངས་ལ་དགོངས་གཞི་དགོས་པ་གཉིས། །
ཡོད་པའི་མཚན་ཉིད་མ་རྟོགས་བཞིན། །ཐ་མལ་ཤེས་པ་རང་རྒྱུད་ཅན། །དྲན་པའི་འཚིར་དཔྱད་ཀྱིས་བཟུང་ཡང༌། །དེ་ལ་ཕྱག་རྒྱ་ཆེ་མི་རུང༌། །སེམས་ནི་འདུས་བྱས་ཡིན་ཇི་ལྟར་འདུས་ན་རྣམ་ཤེས་ཀྱི། །ཚོགས་པ་བརྒྱད་དང་བཅས་པ་ཡང༌། །སངས་རྒྱས་ཡིན་ན་གདན་གསུམ་ལྷའི། །སྦྱངས་གཞི་སྦྱོང་བྱེད་སྦྱངས་འབྲས་ཀྱང༌། །དགོས་པ་མེད་པའི་གནས་སུ་ལྷུང༌། །དེས་ན་སེམས་ལ་སངས་རྒྱས་ཀྱི། །སྙིང་པོ་གནས་པ་སྒོམ་སྟོབས་ཀྱིས། །མངོན་དུ་བྱས་པ་ལ་དགོངས་ནས། །སེམས་ལ་སངས་རྒྱས་ཡིན་ཞེས་གསུངས། །དགོས་པ་སྐྱོན་ལྔ་སྤང་ཕྱིར་ཏེ། །སེམས་ཞུམ་སེམས་ཅན་དམན་ལ་བརྙས། །སོགས་ཀྱི་རྒྱུ་མཚན་རིག་པར་བྱ། །རྣལ་དབབ་དང་ནི་ཞི་གནས་གཉིས། །གཅིག་པ་འདི་ཡང་ཐེ་ཚོམ་གནས། །རྣལ་མ་མ་བཅོས་དོན་ཡིན་ལ། །དབབ་པ་ངང་ལ་བཞག་པའི་དོན། །ཞི་གནས་བྱིས་པ་ཉེར་སྤྱོད་ཀྱི། །བསམ་གཏན་ལ་ཡང་ཡོད་པའི་ཕྱིར། །དང་པོར་བཅོས་མའི་སྒོམ་བྱས་ནས། །ཕྱི་ནས་དོན་རབ་འབྱེད་པ་ཡི། །ཏིང་ངེ་འཛིན་ལ་འཇུག་པས་སོ། །སོར་གཞུག་ལྷག་མཐོང་ཉེར་བསྡོགས་ཏེ། །རྣལ་དུ་དབབ་པའི་གེགས་སེལ་ལམ། །རྩལ་སྦྱོང་ཉིད་དེ་རྣམ་རྟོག་གི །རང་བཞིན་ཞེས་ལ་རང་
གྲོལ་གྱི། །ཐ་སྙད་བཞག་རུང་རྣམ་རྟོག་དངོས། །ཆོས་སྐུ་ཁས་ལེན་རྟོག་བཟོ་སྟེ། །རྣམ་རྟོག་ཅེས་བྱ་རླུང་སེམས་ཀྱིས། །ཆས་ཁུར་འཁྲུལ་པའི་རང་གཟུགས་ཡིན། །དེ་ཡང་སྒོམ་དུ་མ་ཤར་བར། །ཀུན་ཏུ་བརྟགས་པའི་གཞན་དབང་ཅན། །ཤར་ནས་ལམ་དུ་སོང་བ་ལ། །རྗེས་ལ་ཐོབ་པའི་ཐ་སྙད་རུང༌། རྣམ་རྟོག་ཆོས་སྐུ་དངོས་ཡིན་ན། །སངས་རྒྱས་སློབ་པའི་ལམ་པར་འགྱུར། །དེ་ཡི་རྒྱུ་མཚན་ཕྱོགས་གླང་གིས། །རྣམ་པར་རྟོག་པ་མ་གཏོགས་པ། །འཁོར་བ་ཞེས་བྱ་ཅི་ཡང་མེད། །རྣམ་རྟོག་དེ་དང་བྲལ་བས་ན། །ཁྱོད་ནི་རྟག་ཏུ་མྱ་ངན་འདའ། །ཞེས་པ་ཁོང་དུ་ཆུད་པར་གྱིས། །ཡང་ཅིག་སྣང་བ་སེམས་འདོད་པ། །སེམས་ཙམ་པ་ཡི་གྲུབ་མཐའ་ཡིན། །ངེས་པའི་དོན་དུ་དེ་ཡིན་ན། །རང་ཉིད་ཡོད་མེད་བྱེད་པ་ལྟར། །སྣང་བ་ཉིད་ཀྱང་དེ་རྗེས་འབྲང༌། །འོན་ཀྱང་ཁྱོད་ནི་སྣང་བ་ཡང༌། །སེམས་སུ་འདོད་པའི་ཤེས་བྱེད་དུ། །མངོན་སྤྱོད་དུས་ཀྱི་གསལ་གསུམ་ལས། །ཕྱིར་སྣང་དགྲ་ལ་རྟགས་ཐོན་དཔེ། །འདྲེན་པའི་རྟོག་པ་དེ་ཆོས་ཅན། །སྣང་བ་སེམས་ཀྱིས་བརྟགས་པའི་ཕྱིར། །བཏགས་པ་དེ་ཀ་སེམས་ཡིན་ན། །རྣམ་ཤེས་དངོས་པོར་འདོད་དགོས་ཏེ། །མིག་ཤེས་ལ་སོགས་ཁ་ཕྱིར་བལྟའི། །ཡུལ་འཛིན་གཉིས་སྣང་གློ་བུར་བ། །གཟུང་ཡུལ་དངོས་དང་འཁྲུལ་པས་ལེན། །
སེམས་ནི་ཀུན་གཞིའི་རྣམ་པར་ཤེས། །ངར་འཛིན་པ་ནི་ཡིད་ཡིན་ནོ། །ཞེས་པས་སེམས་དང་སེམས་བྱུང་རྣམས། །གཟུང་འཛིན་རིས་སུ་མ་ཆད་པར། །སྣང་སེམས་འདྲེས་པའི་དུས་ཉིད་ལ། །བེམ་པོ་འགུལ་དང་སྒྲ་འབྱིན་སོགས། །ཀུན་རྫོབ་རྟེན་འབྲེལ་བསླུ་མེད་དང༌། །ལམ་བདེན་འདུས་བྱས་བདེན་པ་ལས། །སྣང་བ་སེམས་སུ་གཅིག་ནས་མིན། །ངོ་སྤྲོད་སྤྲས་པའི་དགོངས་པ་ནི། །ཉན་ཐོས་བྱེ་བྲག་སྨྲ་བ་ནས། །དབུ་མ་རབ་ཏུ་མི་གནས་པར། །རིམ་གྱིས་ཁྲིད་པའི་ཐབས་མཁས་ཀྱི། །ཡན་ལག་ཡིན་གྱི་ཐ་དད་མིན། །རྒྱལ་བ་ཀློང་ཆེན་རབ་འབྱམས་ནི། །ཅིག་ཅར་ཁྲིད་པ་གཙོར་བཏོན་ནས། །འཕགས་ལམ་རྫོགས་པ་ཆེན་པོ་ཡིས། །ཤེས་རབ་ཅན་རྣམས་དམན་ལམ་དུ། །ཆུད་མི་ཟ་བར་མཛད་པ་ཡིན། །རིག་པ་ཞེས་བྱ་འདོད་རྒྱལ་དུ། །སྨྲ་ལ་རྒྱུ་མཚན་ཡོད་མ་ཡིན། །འཇིག་རྟེན་སྐྱེ་བོའི་ངག་བགྲོས་ལའང༌། །མི་འདི་རིག་པ་ལེགས་ཞེས་ཟེར། །གྲུབ་མཐའ་སྨྲ་ལ་ཞུགས་པ་རྣམས། །བཞེད་ལུགས་མང་ཡང་གཉིས་སུ་འདུ། །ཆོས་རྗེ་ས་སྐྱཔཎྚི་ཏ། །དབུ་མ་རང་རྒྱུད་ཁས་ལེན་ཞིང༌། །རིག་པ་འདུས་བྱས་ཡིན་པར་བསྒྲུབས། །རྫོགས་པ་ཆེན་པོའི་རྒྱུད་སྡེ་ནས། །གསུངས་པའི་རིག་པ་རྣམ་རིག་མིན། །
ཐོད་རྒལ་དུས་ན་ལུག་རྒྱུད་ལ། །མིང་དུ་བཏགས་ཀྱང་དོན་ལ་གཞན། །ཅི་ཕྱིར་ལུག་རྒྱུད་དབང་པོའི་སྒོར། །མངོན་སུམ་ཕྱིར་ན་རྫས་ཡོད་ཡིན། །ཐོད་རྒལ་ལམ་ལ་དད་གྱུར་ཀྱང༌། །ཁྲེགས་ཆོད་གདེང་དུ་མ་གྱུར་རྣམས། །སྣང་ཉམས་ལ་ཞེན་ཕུང་བར་འགྱུར། །དེ་ཕྱིར་ཀུན་མཁྱེན་ཆེན་པོ་ཡིས། །རྩལ་དང་གདངས་དང་ངོ་བོ་དང༌། །གསུམ་གྱི་ལྡོག་པ་ཕྱེ་བའི་ཁྱད། །རྫོགས་པ་ཆེན་པོར་ཁས་འཆེ་བ། །ཀུན་གྱིས་རིག་པ་མ་ཡིན་ནོ། །ཁྱད་པར་ཀ་དག་སྤྲོས་བྲལ་ལམ། །ཁྲེགས་ཆོད་དུས་ན་སེམས་རིག་གི །དབྱེ་བ་ཆུ་དང་སྦུ་བའི་དཔེས། །ཤིན་ཏུ་གསལ་བ་རྫོགས་ཆེན་གྱི། །རྒྱུད་ལས་གསུངས་པ་ཐེག་མཆོག་ཏུ། །རྒྱས་པར་བཀྲལ་བ་མ་གཟིགས་སམ། །གཟིགས་ན་རྫོགས་ཆེན་པོ་དང༌། །ཡིད་དཔྱོད་གྲུབ་མཐའ་གཞན་པའི་ཁྱད། །གཏིང་དུ་ཕྱིན་པར་དགོངས་མཆི་ལ། །གལ་ཏེ་ད་དུང་ཁས་ལེན་གཞན། །ཕྱོགས་སྔའི་དབང་གིས་མི་འདོར་ན། །རྫོགས་ཆེན་ལམ་ལ་བསྔགས་བྱས་ཀྱང༌། །ཆགས་སྡང་ཙམ་གྱིས་རྒྱུ་རུ་ཟད། །ཐོད་རྒལ་རྫོགས་པ་ཆེན་པོ་ཡི། །ཐབས་ཀྱི་ལམ་མཆོག་ཆེ་ཤོས་སུ། །རིག་ཅིངབསྐྱེད་རིམ་སྒྱུ་ལུས་དང༌། །འོད་གསལ་ཟུང་འཇུག་ཀུན་གྱི་གནད། །ཚང་བར་འདུག་ཚུལ་ཕལ་ཆེར་དགོངས། །ད་དུང་ཐོད་རྒལ་ཁྲེགས་
ཆོད་ལས། །ཁྱད་པར་བདུན་གྱིས་འཕགས་པའི་ཚུལ། །ལེགས་པར་དཔྱད་ནས་གཞན་ལའང་འདོམས། །ཕྱག་རྒྱ་ཆེན་པོའི་སྦོམ་ཆེན་གྱི། །འབྲོག་འབྲང་ཀུན་ཏུ་རྟོག་པ་སྟེ། །ཤར་གྲོལ་ཡེ་ཤེས་བྱིན་ཟར་ཕུལ། །འབྲང་འབྲང་གཤེད་སྐོར་ལས་མ་མཐོང༌། །གཏེར་གྱི་སྒྲ་ནི་འཛད་མེད་དོན། །ཡིན་ན་ས་གཏེར་ཞེས་བྱའི་སྒྲ། །དོན་གཞན་ལ་དགོངས་རྒྱུ་མཚན་མང༌། །འོན་ཀྱང་གཏེར་ཀ་གོང་འོག་སོགས། །བླ་དཔེ་ཤོག་སེར་དངོས་ཀྱང་ཡོད། །དག་སྣང་ཉམས་ཀྱི་ཆོས་ཡིན་ཡང༌། །རིག་པས་བཏགས་པའི་བློ་འཐོར་ནི། །བྱིན་རླབས་འབྱུང་བ་ག་ལ་སྲིད། །ཐུགས་གཏེར་རམ་ནི་དགོངས་གཏེར་ནི། །གཏེར་གྱི་ངོ་བོ་ཉིད་ཡིན་ཏེ། །དེ་ལ་མཁས་འགྲོའི་བརྡ་ཡིག་ཀྱང༌། །རྣམ་པ་ཀུན་གྱི་མཆོག་ལྡན་དང༌། །མཚུངས་དཔེར་འོས་པ་ཡོད་མོད་དེ། །གཞོན་ནུ་མ་ཡི་པྲ་བཞིན་དུ། །ཀུན་དང་ཐུན་མོང་ཡིན་པ་འགལ། །ཚིག་དོན་གཉིས་ཀ་ནོར་གྱུར་ཅིང༌། །དངོས་གྲུབ་གནས་ལ་བསླུ་བ་ལ། །པདྨའི་གསུང་དུ་སྒྲོ་བཏགས་པས། །སྔ་འགྱུར་ཆོས་ལ་ཐེ་ཚོམ་དུ། །འགྱུར་བ་འདི་ནི་བདུད་ཀྱི་ལས། །གནམ་ཆོས་ཁམས་ན་ཡོད་ཅེས་ཐོས། །དེ་ཕྱིར་གང་ལ་ཁྱོད་ཅིག་བཟོ། །རྒྱལ་བའི་ཕྲིན་ལས་བསམ་མི་ཁྱབ༌། །དེ་
བཞིན་ལྷ་མ་ཡིན་གྱིས་ནི། །འཇུག་པ་ཉིད་ཀྱང་ཆེས་མང་ན། །དེ་དག་དགག་དང་བསྒྲུབ་པ་ཡི། །བསམ་སྦྱོར་གཉིས་ཀར་སྤྲོ་བ་མེད། །བཏང་སྙོམས་ཀྱིས་ནི་སྡིག་བསྲུངས་ཀྱང༌། །ཁྱེད་ཀྱིས་དྲིས་པའི་ལན་མ་བཟློག །གཏེར་རྒྱ་འཛད་པ་མེད་པའི་དོན། །སྦས་རྒྱ་རྒྱུ་རྐྱེན་རྟེན་འབྲེལ་ནི། །མ་ཚོགས་ཐུགས་ལ་གབ་པའི་དོན། །གསང་རྒྱ་སྐལ་མེད་ཐེ་ཚོམ་དང༌། །ལོག་ལྟ་ཅན་ལ་གསང་བའི་དོན། །ཟབ་རྒྱ་དངོས་གྲུབ་སྒྲུབ་པ་ལ། །བསླུ་བ་མེད་པའི་ཐ་ཚིག་ཡིན། །གཏད་རྒྱ་ཆོས་ཀྱི་བདག་པོ་དང༌། །ལས་འཕྲོ་ཅན་ལ་སྤྲོད་པའི་དོན། །ཤེས་བཞིན་ཅོ་འདྲི་བྱེད་པ་དང༌། །ཡིད་གཉིས་གྱུར་ནས་གདོན་ཟ་བར། །གཉིས་ཀ་མཉམ་པ་ཉིད་ཀྱི་ཕྱིར། །རེ་དོགས་མེད་པའི་སེམས་ཀྱིས་སྨྲས། །སངས་རྒྱས་ལས་གཞན་སྤོབས་པའི་རྒྱུན། །གཅོད་པར་མི་ནུས་ལི་ཙ་གི །དམ་པའི་རིགས་ཅན་དྲི་མེད་གྲགས། །གངས་རིའི་ཁྲོད་ན་མངོན་སུམ་པའི། །ཀུན་མཁྱེན་གཞུང་ལ་ཅོ་འདྲི་བ། །རང་གིས་རང་ཉིད་བརྡེག་དང་མཚུངས། །ཅི་ཕྱིར་སྔ་འགྱུར་ཆོས་མིན་དུ། བསྒྲུབ་པར་འདོད་པའི་ལོག་རྟོག་ཅན། །སྔ་རབས་བྱུང་དང་ད་ལྟ་བར། །ཀུན་ཀྱང་འདི་ཡི་གཞུང་མཐོང་ནས། །རོག་སྟེ་འདུག་ལ་ཕྱོགས་པའི་ཕྱིར། །བཀའ་དྲིན་བསམ་ཞིང་བྱས་པ་བཟོ། །དེ་བས་འདི་ཉིད་དོན་ཆེ་
སྟེ། །སྒམ་པོའི་རིང་ལུགས་བྱིན་རླབས་ཅན། །ཚིག་གི་ཆ་ལ་མ་ངེས་ཀྱང༌། །དོན་ལ་རྟོན་པ་རྒྱུད་བཅས་དང༌། །ཁྱད་པར་འབྲི་གུང་དགོངས་གཅིག་གཞུང༌། །རྩ་འགྲེལ་ཆུད་གསོན་བྱེད་པ་ཡི། རབ་དབྱེ་འགྲེལ་བྱེད་མང་དག་ལ། །ལུང་རིག་གཏན་ཚིགས་ཀྱིས་བསྒྲུབས་པའི། །དཔྱད་པ་རྣོན་པོས་འཁྲུལ་སྤོང་ཞིག །བསྐྲུན་ན་ངེས་པར་སྒྲུབ་བརྒྱུད་ཀྱི། །བསྟན་པའི་བྱི་དོར་ཉིད་འགྱུར་བས། །བསྐུལ་ལོ་ངེས་པར་སྐབས་དབྱེ་ཞིག །སྔ་འགྱུར་གཞུང་ལ་ཟུར་ཟ་བ། །རྣམས་ལ་དངོས་དང་བརྒྱུད་མ་ནས། །སྔར་ཡང་མང་དུ་བྱས་ཟིན་གྱིས། །སླར་ཡང་བགྱིད་པར་དམ་བཅའ་འོ། །དགེ་བ་དེ་ཡིས་བདག་གཞན་ཀུན། །ཆོས་ཉིད་བསམ་གྱིས་མི་ཁྱབ་པའི། །གདོད་མའི་མགོན་དང་རོ་གཅིག་ཤོག །ཅེས་པའང་འབྲི་གུང་བླ་མ་ཆན་དོན་གྲུབ་སྐལ་བཟང་གིས་དྲི་བའི་འཕྲིན་ཡིག་རིང་མོ་བསྲིངས་པའི་ལན་དུ་མཁྱེན་བརྩེའི་འོད་ཟེར་གྱིས་དཔལ་ས་སྐྱའི་གཙུག་ལག་ཁང་དུ་བྲིས་པ་དགེ་ཞིང་བཀྲ་ཤིས་པར་གྱུར་ཅིག །གཏམ་ཚོགས་ལེའུ་རེ་གཅིག་པའོ།། །།
གཏམ་ཚོགས་ལེའུ་རེ་གཉིས་པ། ཆོས་ཉིད་རྣམ་པར་མ་གྱུར་པའི་གཏམ་ནམ་མཁའ་ལྡིང་གི་རྣ་རྒྱན།
ཆོས་ཉིད་རྣམ་པར་མ་གྱུར་པའི་གཏམ་ནམ་མཁའ་ལྡིང་གི་རྣ་རྒྱན་ཅེས་བྱ་བ། སངས་རྒྱས་ལ་ཕྱག་འཚལ་ལོ། །ཤེས་བྱ་ཀུན་གྱི་ཕ་རོལ་ཕྱིན་པ་དེས། །ལམ་བདེན་སྤང་ན་ཚིག་ཏུ་བརྗོད་པའི་མཐའ། །བཟང་པོར་
བཏགས་ཀྱང་གྲུབ་མཐའ་ལྟར་སྣང་བ། །ཡིན་པར་ངེས་ན་འདུས་མ་བྱས་དབྱིངས་དྲན། །འདི་ལ་གསུམ། གྲུབ་མཐའི་རྣམ་གཞག་སྤྱིར་བསྟན་པ་དང༌། རང་སྡེའི་གྲུབ་མཐའི་ཁྱད་པར་བཤད་པ། ཆོས་ཉིད་ཟབ་མོ་ལ་རྩོད་པ་སྤང་བའོ། །དང་པོ་ནི། རྒྱལ་བའི་བསྟན་པ་ལས་སྔ་རོལ་པ་དང༌། ཕྱི་རོལ་གཉིས་ཀར་གྱུར་པ་དྲང་སྲོང་ཕུར་བུ་དང༌། འུག་ཕྲུག་པ། གྲོག་མཁར་བ་ལ་སོགས་པའི་སྡེ་ཚན་གྱིས་ཀུན་འབྱུང་གི་བློས་གཏགས་ཤིང་བཟུང་བའི་གྲུབ་པའི་མཐའ་མུ་སྟེགས་བྱེད་ཀྱི་གཞུང་ལ་ཐར་བའི་ལམ་མེད་ཀྱང༌། རྣམ་པར་རིག་བྱེད་ཀྱི་དཔྱད་པས་མཐོ་རིས་ཐོབ་པའི་ལམ་ཡོད་མེད་གཉིས་ལས་དང་པོའི་ཕྱོགས་ལ་སྡིག་སྤོང་དགེ་སྒྲུབ་དང༌། སྙོམས་འཇུག་གི་བསམ་གཏན་བཞི་ཚན་གཉིས་ལ་བརྟེན་ནས་མཐོ་རིས་ཀྱི་ལམ་ཡོད་པ་ལ་དགོངས་ནས་མུ་སྟེགས་ཅན་གྱིས་ལེགས་པར་དཔྱད་པའི་གཞུང་ལའང་དམོད་པ་བཀག་པ་ཡིན་ལ། ཕྱོགས་གཉིས་པ་རྒྱང་འཕེན་ལ་སོགས་ནི་ལས་འབྲས་ལ་སྐུར་ཞིང༌། འཚེ་བ་ཆོས་སུ་སྨྲ་བ་སོགས་གྲུབ་མཐའ་ཆད་པ་ཡིན་ནོ། །དེ་གཉིས་ཀས་ཀྱང་འཁོར་བའི་རྩ་བ་བདག་ཏུ་འཛིན་པ་ལ་ཐོག་མ་མེད་པ་ནས་གོམས་ཤིང་འདྲིས་པར་བྱས་པའི་སྟེང་དུ། ད་དུང་ཡང་རྣམ་རིག་ཕྱིན་ཅི་ལོག་གི་རྟགས་ཁྱབ་མང་པོས་བཞག་པའི་གྲུབ་མཐའ་ངན་པས་སྤང་གཉེན་གོ་ལྡོག་ཏུ་སྦྱར་བས་ཉོན་མོངས་པའི་འབྱུང་ཁུངས་རྩ་བ་མི་ཆོད་པས་དེ་དག་ལ་
ཐར་པའི་ལམ་ནི་མེད་པ་ཡིན་ནོ། །དེ་སྐད་དུ་ལངྐར་གཤེགས་པ་ལས། མུ་སྟེགས་ལྟ་བས་དྲི་མར་བྱས། །ཡིད་ཀྱི་རྣམ་པར་ཤེས་པས་གཡོགས། །བརྗོད་དུ་མེད་པ་སྨྲ་བར་བྱེད། །ཅེས་སོ། །ནང་པ་སངས་རྒྱས་པའི་གྲུབ་མཐའ་ནི་ཐོག་མཐའ་བར་གསུམ་དུ་དགེ་ཞིང་ཇི་ལྟར་བསྟན་པའི་ལམ་ཡང་བགྲོད་པ་མྱུར་བུལ་ཙམ་ལས་མཐར་གྱིས་འཁོར་བའི་རྩ་བ་གང་ཟག་གི་བདག་དང༌། དེའི་གཉེན་པོ་ལ་ཞེན་པའི་ཆོས་ཀྱི་བདག་ཆ་ཕྲ་མོ་ནས་སྤང་བ་ལ་ཞུགས་པས་མྱ་ངན་ལས་འདས་པའི་ལམ་རྣལ་མ་ཡོད་པའི་ཕྱིར་རང་སྡེའི་བསྟན་བཅོས་ཀྱི་མཚན་ཉིད་ཀྱི་ལའང༌། ཐར་པ་ཐོབ་པའི་ལམ་དང་རྗེས་འབྲེལ་བས། །དེ་ཡང་དྲང་སྲོང་བཀའ་བཞིན་སྤྱི་བོས་བླང༌། །ཞེས་སོ། །གཉིས་པའི་དོན་ལ་གྲུབ་མཐའ་སྨྲ་བ་བཞི་ཡོད་པ་ལས། བྱེ་བྲག་ཏུ་སྨྲ་བ་དང༌། །མདོ་སྡེ་པ་གཉིས་ནི་ཐེག་དམན་ཉན་ཐོས་ཀྱི་གཞུང་ལུགས་འཛིན། སེམས་ཙམ་པ་དང༌། དབུ་མ་པ་གཉིས་ནི་ཐེག་ཆེན་བྱང་ཆུབ་སེམས་དཔའི་སྡེ་སྣོད་འཛིན་པའོ། །གྲུབ་མཐའ་བཞི་པོ་གང་བཟུང་ཡང་རུང་སྟེ་དང་པོ་གཉིས་བཀའི་མཐར་ཐུག་ཏུ་འདོད་ཅིང༌། དེའི་གཞུང་ནས་བཤད་པའི་བསམ་སྦྱོར་ལྷུར་བྱེད་པ་ནི་ཐེག་དམན་པ་ཡིན་ལ། ཕྱི་མ་གཉིས་བཀའི་མཐར་ཐུག་ཏུ་འདོད་ཅིང༌། དེ་ལས་བཤད་པའི་བསམ་སྦྱོར་ལྷུར་བྱེད་པ་ནི་ཐེག་ཆེན་པར་འཇོག་པ་ལས། གྲུབ་
མཐའ་དེ་དང་དེའི་གཞུང་བཟུང་བ་ཙམ་ལ་ཐེག་པ་ཆེ་ཆུང་གི་གང་ཟག་ཏུ་བཞག་ཏུ་མི་རུང་ངོ༌། །གཞག་གསུམ་པོ་གང་ཡང་མ་རིག་ཅིང༌། ལམ་གྱི་ཡོན་ཏན་སྣ་གཅིག་ཀྱང་རྒྱུད་ལ་མ་སྐྱེས་ན་ཆོས་ལུགས་དང་གྲུབ་མཐའ་གང་ཡིན་ཟེར་ཡང་གང་ཟག་དེ་ཐེག་ཆེན་པའམ། ཐེག་དམན་པ་ལྟ་ཅི་སྨོས། མུ་སྟེགས་བྱེད་དུའང་མི་རུང་སྟེ། མངོན་པར་མཐོ་བ་དང་ངེས་པར་ལེགས་པའི་རྒྱུ་འབྲས་གཉིས་ཀ་ལ་རྟོག་དཔྱོད་དང་བྲལ་བའི་ཕྱིར་རོ། །དེ་བས་ན་ལམ་དུ་ཞུགས་པའི་གང་ཟག་ཡིན་ཕྱིན་ཆད་ཐ་ནའང་ཐེག་པ་ཆེ་ཆུང་གི་རྣམ་དབྱེ་ཤེས་དགོས་ཏེ། དེ་མ་ཤེས་ན་ཆོས་ལུགས་ཙམ་ལ་ཡིད་རྟོན་དུ་རུང་བའི་རྒྱུ་མཚན་གང་ཡང་མེད་པའི་ཕྱིར་རོ། །དེ་སྐད་དུ་རབ་དབྱེར། ད་ལྟའི་ཆོས་པ་ཕལ་ཆེ་བ། །བསླབ་པ་གསུམ་པོ་མི་སྤྱོད་པས། །ཕ་རོལ་ཕྱིན་པའི་ཆོས་ལུགས་མིན། །དབང་དང་རིམ་གཉིས་མི་ལྡན་པས། །རྡོ་རྗེ་ཐེག་པའི་བསྟན་པ་མིན། །འདུལ་བའི་སྡེ་སྣོད་མི་ཤེས་པས། །ཉན་ཐོས་ཀྱི་ཡང་ཆོས་ལུགས་མིན། །འོན་ཀྱང་ཆོས་པར་ཁས་འཆེ་བ། །ཀྱེ་མ་གང་གི་བསྟན་པར་འགྱུར། །ཞེས་བཤད་པ་ལྟར་རོ། །དེ་ལ་བདག་ཅག་གི་སྟོན་པ་ནི་ཐབས་ལ་མཁས་པས་ཐོག་མ་ཉིད་ནས་རང་གི་གྲུབ་མཐའ་འདོད་རྒྱལ་དུ་མི་སྟོན་པར་མུ་སྟེགས་བྱེད་རྣམ་པར་ཤེས་པ་ལྐོག་ཏུ་མ་གྱུར་པའི་རིགས་ཅན་དག་དང་མཐུན་པའི་དཀའ་ཐུབ་དང༌། བསམ་གཏན་བསྟེན་ནས་གཞན་གྱི་གྲུབ་པའི་མཐའ་
ཉམས་འོག་ཏུ་ཆུད་པར་མཛད་ཀྱང་རང་ཉིད་ཀྱིས་ཐོག་མ་མེད་པ་ནས་བསྟེན་གོམས་མཛད་པའི་ཡེ་ཤེས་དྲི་བྲལ་མངོན་སུམ་པར་བྱས་ནས་སངས་རྒྱས་པའི་ཚུལ་བསྟན་ནོ། །དེ་ལྟ་བུའི་གོ་འཕང་ལ་གདུལ་བྱ་མཐའ་དག་བཀྲི་བར་བཞེད་ཀྱང༌། གང་ཟག་རྣམས་ནི་ཚོགས་ལ་བལྟ་བ་ཅན་ཡིན་པས་ལམ་ལ་རིམ་གྱིས་བཀྲི་བའི་ཕྱིར། སེམས་དང༌། སེམས་བྱུང་དང་། སེམས་བྱུང་དང་། ཡུལ་དང༌། གཟུགས་སོགས་བཏགས་ཡོད་ཙམ་དུ་བསྟན་པས་ཡུལ་དང་དབང་པོ་བདེན་གྲུབ་ལས་རྣམ་ཤེས་སྐྱེ་བའི་ཚུལ་གྱིས་བྱེ་བྲག་སྨྲ་བའི་གྲུབ་མཐའ་ཤིན་ཏུ་རགས་པ་བྱུང་ཡང༌། མུ་སྟེགས་པ་རྣམས་ཀྱིས་བཏགས་པའི་ང་བདག་གཅིག་པུ་རང་དབང་ཅན་གྱིས་རྟག་པ་ལས་ཁྱད་པར་ཕྱེ་ནས་བསྟན་པས་རིམ་གྱིས་ཐར་པ་ཐོབ་པའི་སྐལ་བ་ཅན་ཡིན་ནོ། །དེ་ཡང་ཁ་ཆེ་བྱེ་བྲག་ཏུ་སྨྲ་བ་སོགས་ནི། འདུས་བྱས་རྣམས་ཀྱང་སྐད་ཅིག་གིས་འཇིག་པའི་མི་རྟག་པ་དང༌། གང་ཟག་གི་བདག་ཀྱང་བློས་བཏགས་པ་ཙམ་ལས་རྫས་སུ་མེད་པར་འདོད་པས་སྔ་མ་ལས་གྲུབ་མཐའ་བཟང་ངོ༌། །མདོ་སྡེ་པ་ནི། གཟུགས་སོགས་རགས་རྒྱུན་ཡང༌། ཤེས་པའི་རྒྱུན་བདེན་མེད་ཡིན། འདས་མ་འོངས་ཀྱི་ཆོས་དང༌། འདུས་མ་བྱས་དང༌། ལྡན་མིན་འདུ་བྱེད་བཏགས་ཡོད་ཙམ་དུ་འདོད་ཅིང༌། ད་ལྟར་པའི་རྡུལ་ཕྲན་དང༌། ཤེས་པ་
སྐད་ཅིག་མ་ཙམ་ཆ་མེད་བདེན་གྲུབ་ཏུ་སྨྲ། མིག་ལས་མིག་ཤེས་ཀྱིས་ཀྱང་གཟུགས་དངོས་སུ་མི་མཐོང་སྟེ། མཐོང་བ་ལྟར་སྣང་བ་ནི་མིག་ཤེས་ལ་གཟུགས་སྣང་ཤར་བ་དེ་གཟུགས་རྣམ་དུ་གྲགས་པ་ཤེས་པར་གྱུར་པ་ཡིན་ལ། དེའང་རྣམ་པ་འཆར་བ་དེ་ལ་རྣམ་པ་གཏོད་བྱེད་གཟུགས་སོགས་ཕྱི་དོན་དུ་ཡོད་པར་འདོད་དོ། །སེམས་ཙམ་པ་ནི། གཟུགས་ལ་སོགས་པའི་ཡུལ་ཕྱི་རོལ་ན་ཡོད་པ་ལྟར་སྣང་ཡང༌། ནང་གི་འཛིན་ཆའི་ཤེས་པ་ཉིད་དེར་སྣང་བ་ཙམ་ལས་ཕྱི་རོལ་ན་མེད་དེ་རྨི་ལམ་གྱི་གཟུགས་སོགས་དང་མཚུངས་པར་བལྟ་བས་ན་ཕྱི་རོལ་ན་མེད་ཀྱང་ཡོད་པ་ལྟར་སྣང་བའི་གཟུང་ཆ་ལ། གཟུགས་ཀྱི་རྣམ་པར་འཆར་བའི་རྒྱུ་འཛིན་ཆའི་ཤེས་པ་དེས་རང་གིས་རང་ཉིད་མཐོང་བས། ཕྱི་དོན་དུ་སྣང་བའི་རྣམ་རིག་བདེན་གྲུབ་དེའི་རྣམ་ཤེས་ཀྱི་ངོ་ལྡོག་ཙམ་གཟུང་འཛིན་གཉིས་མེད་ཀྱི་ཡེ་ཤེས་སུ་འདོད་པས་རང་ལུགས་སུ་གཟུང་འཛིན་བཀག་པར་རློམ་ཡང༌། འཛིན་པའི་ངོ་བོ་རྣམ་ཤེས་ལས་གཞན་པ་ཡུལ་དུ་སྣང་བའི་རྣམ་རིག་གི་ཆ་ལ་ཕྱེ་བས་གཟུང་འཛིན་རྫས་གཞན་མེད་པར་ཁས་བླངས་པ་ཙམ་ཞིག་གོ །གྲུབ་མཐའ་སྨྲ་བ་བཞི་པོའི་ཡང་རྩེར་སོན་པ་དབུ་མ་ཆེན་པོ་ནི་གཟུགས་ལ་སོགས་པའི་ཕུང་པོ་ལྔ་དང༌། སེམས་ཀྱི་རང་བཞིན་རྣམ་ཤེས་ཚོགས་བརྒྱད་དང༌། ལྡན་མིན་འདུ་བྱེད་འདུས་བྱས་ཀྱི་དངོས་
པོ་དང༌། ནམ་མཁའ་སོགས་འདུས་མ་བྱས་དང༌། དངོས་མེད་དུ་བཏགས་པའི་ཆོས་ཐམས་ཅད་ཀུན་རྫོབ་དང༌། དེ་དག་གི་རང་བཞིན་བདེན་མེད་ནི་དོན་དམ་དུ་འདོད་ཅིང༌། དེ་གཉིས་ཀྱང་རྣམ་གཞག་ཙམ་དུ་ཐ་དད་ཀྱང༌། ངོ་བོའི་ཆ་ནས་གཅིག་ཐ་དད་གང་དུའང་བརྗོད་དུ་མེད་ཅིང༌། ཡོད་མེད་ཡིན་མིན་སྤྲོས་པ་ཐམས་ཅད་ལས་འདས་པར་སྟོན་པའི་ཚུལ་དབུས་མཐའ་རྣམ་འབྱེད་ལས། །ཡང་དག་མ་ཡིན་ཀུན་རྟོག་ཡོད། །དེ་ལ་གཉིས་པོ་ཡོད་མ་ཡིན། །སྟོང་པ་ཉིད་ནི་འདི་ལ་ཡོད། །དེ་ལ་ཡང་ནི་དེ་མེད་དོ། །སྟོང་པ་མ་ཡིན་མི་སྟོང་མིན། །དེ་ལྟ་བས་ན་ཐམས་ཅད་བཤད། །ཡོད་པས་མེད་པས་ཡོད་པས་ན། །དེ་ནི་དབུ་མའི་ལམ་ཡིན་ནོ། །ཞེས་སྣང་བ་སྣ་ཚོགས་སུ་འཆར་བའི་ཤེས་པ་ཡང་དག་པ་མ་ཡིན་པའི་རྟོག་པ་ཙམ་ནི་ཀུན་རྫོབ་ཏུ་ཡོད་ལ། དེ་ལ་སྣང་བའི་གཟུང་འཛིན་གྱི་ཆ་ནི་བློས་བཏགས་པ་ཙམ་གྱི་ཕྱིར། ཀུན་རྫོབ་ཙམ་དུའང་ཡོད་པ་མ་ཡིན་པས་མཐའ་གཉིས་ལས་གྲོལ་བ་ཡིན་ཏེ། འདི་ལྟར་ཀུན་རྟོག་ཀུན་རྫོབ་པ་ཙམ་ཡོད་པས་མེད་ཆད་གཉིས་ཀྱི་མཐའ་ལས་གྲོལ་ལ། གཟུང་འཛིན་དང་ལྟོས་ཆོས་ཀྱི་སྒྲོ་བཏགས་ལས་འདས་པས་རྟག་ཡོད་གཉིས་ཀྱི་མཐའ་ལས་གྲོལ་བ་སྟེ། དེའི་ངང་ལ་སྟོང་པ་ཉིད་ཀྱི་རང་བཞིན་དེ་ཆོས་ཉིད་ཀྱི་ཚུལ་དུ་ཡོད་ཀྱང༌། བདེན་པ་གཉིས་ཀྱི་ཟླས་ཕྱེ་བའི་ངོ་བོ་ཉིད་ཀྱི་གྲུབ་ཆོས་ནི་ཤེས་བྱ་ལ་མི་སྲིད་པ་ཡིན་ཏེ། དེའི་ཚུལ་མདོ་སྡེ་རྒྱན་ལས། དེ་བཞིན་ཉིད་ནི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། དེ་བཞིན་
ཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་སོ། །དེ་ཡང་སེམས་ཅན་ལ་སྙིང་པོའི་ཚུལ་གྱི་བཞུགས་པས་ལམ་བདེན་གྱི་མཐུས་སྒྲིབ་གཉིས་སྤང་དགོས་ལ། སངས་རྒྱས་ལ་མངོན་སུམ་པའི་ཚུལ་གྱི་བཞུགས་པས་ཆོས་ཀྱི་དབྱིངས་ལ་སྒྲིབ་གཉིས་སྤང་དུ་མིད་དོ། །དེས་ན་གང་ཟག་གི་བློའི་ངོས་ནས་སྒྲིབ་པ་སྤང་བའི་དོན་དུ་ཀུན་བརྟགས་ཀུན་རྫོབ་ཏུ་ཡང་མེད་པ་དང༌། གཞན་དབང་ཀུན་རྫོབ་ཙམ་དུ་ཡོད་པ་དང༌། ཡོངས་གྲུབ་སྤྲོས་པ་ཐམས་ཅད་དང་བྲལ་བར་གཏན་ལ་འབེབས་པའི་ཕྱིར་རང་སྟོང་དང༌། གཞན་སྟོང་ལ་སོགས་པའི་གྲུབ་མཐའི་འཆའ་ལུགས་དང༌། རྣམ་གཞག་མི་མཚུངས་པ་ཐ་དད་པར་སྣང་བ་དེའང་གྲུབ་མཐའ་འཇོག་བྱེད་ཀྱི་བློ་ཟད་པ་དང་ལྷན་ཅིག་རང་བཞིན་གྱིས་རྣམ་པར་དག་པའི་ཚུལ་གཟུངས་ཀྱི་དབང་ཕྱུག་རྒྱལ་པོས་ཞུས་པ་ལས། གདོད་ནས་ཟད་པས་དེ་ཕྱིར་ཟད་ཅེས་བྱ། །ཞེས་སོ། །གསུམ་པ་ནི་གངས་རིའི་ཁྲོད་འདིར་རྒྱལ་བའི་ཕྲིན་ལས་ཀྱི་དབང་ལས་སྒྲུབ་བརྒྱུད་ཀྱི་བསྟན་པའི་ལམ་སྲོལ་དང་བཀའ་བབས་ཐ་དད་པ་རྣམ་པ་བརྒྱད་ཡོད་པ་ལས། རྣལ་འབྱོར་དབང་པོ་ཀཱ་རུ་ཎ་ཞེས་པ་ལ་རྒྱ་གར་མཁའ་འགྲོའི་གདམས་པ་བཅོ་ལྔ་ཡོད་པའི་རྫོགས་རིམ་གྱི་ཆོས་སྐད་ལ། ཕན་གནོད་སྤངས་རྟོགས་མ་གྲུབ་པ། །འདི་ནི་དོན་དམ་མཚན་ཉིད་དོ། །ཞེས་པའི་གཞུང་ལ་སྒྲོ་སྐུར་གྱི་མཐའ་སྤོང་བ་ལ་ཆོས་ཉིད་
རྣམ་པར་མ་གྱུར་པའི་གཏམ་ཞེས་བཏགས་པ་སྟེ། ཇི་ལྟར་སྤོང་ན། དེ་བཞིན་གཤེགས་པ་ནི་གཉིས་སུ་གསུང་བ་མ་ཡིན་ཡང༌། ཐུགས་རྗེ་ཆེན་པོ་དང་ཐབས་ལ་མཁས་པ་ཡིན་པས་སེམས་ཅན་གྱི་དབང་པོ་དང༌། བློ་དང༌། སྐལ་པ་དང་རྗེས་སུ་མཐུན་པར་ཐེག་པ་དང་གྲུབ་མཐའི་རྣམ་གཞག་སྣ་ཚོགས་པས་འདུལ་ཞིང༌། མཐར་གྱི་དེ་དག་ཀྱང་ངེས་པའི་དེ་ཁོ་ན་ཉིད་འབའ་ཞིག་ལ་འབབ་ཅིང་གཞོལ་བས། ཆུ་བོ་ཆེན་པོ་རྒྱ་མཚོར་བབ། འབབ། གཞོལ་ཞེས་གསུངས་པ་ལྟར་རོ། །དེ་ལ་རྣམ་པར་ཤེས་པ་ལྐོག་ཏུ་མ་གྱུར་པའི་གདུལ་བྱ་གདུལ་སླ་བ། སྦྱང་སླ་བ། བསོད་ནམས་ཀྱི་ཚོགས་ཆེན་པོ་དང་ལྡན་པ་དག་ལ་ནི་འབྲས་བུ་ལམ་དུ་བྱེད་པའི་མན་ངག་བསྟན་ནས་ཆོས་ཉིད་རྗེས་དཔག་ཏུ་མ་ཡིན་པར་གཤིས་ཐོག་ཏུ་ཅིག་ཅར་དུ་འདོམས་པར་མཛད་པ་ལ་ཐ་སྙད་ཀྱི་འགལ་འགྲེལ་བསམ་པ་དག་གྱི་ན་པ་ཡིན་ནོ། །དེ་ལ་ཕན་གནོད་དང་སྤངས་རྟོགས་མ་གྲུབ་པ་ནི་དོན་དམ་པའི་མཚན་ཉིད་ཡིན་ཏེ། འདི་ལྟར་ཕན་པ་ནི་དགེ་བའི་ཆོས་རྣམ་པ་ཐམས་ཅད་པ་དང༌། གནོད་པ་ནི་སྡིག་པའི་ཆོས་རྣམ་པ་ཐམས་ཅད་པ་སྟེ། གཉིས་ཀའང་བདེན་པ་བཞི་དང་དྲང་ངེས་ཀྱིས་ཕྱེ་བའི་ལམ་བདེན་འདུས་
བྱས་པ་ཡིན་ན། ཆོས་ཀྱི་དབྱིངས་ལ་དེ་དག་གི་ཕན་གནོད་གཉིས་ཀ་མི་རུང་བའི་ཚུལ་ཡང་དག་སྦྱོར་བའི་རྒྱུད་ལས། དེ་ཡི་སྡིག་དང་བསོད་ནམས་ཀྱི། །ཆ་གཉིས་རྣམ་པར་བཏགས་པ་སྟེ། །མཁས་པས་འདི་ཉིད་རྣམ་པར་སྤང༌། །ཞེས་དང༌། གཏམ་བྱ་རིན་ཆེན་ཕྲེང་བ་ལས། སྡིག་དང་བསོད་ནམས་བྱ་བ་འདས། །ཟབ་མོ་བཀོལ་བའི་དོན་དང་ལྡན། །ཞེས་སོ། །འོ་ན་སྤང་བྱ་སྡིག་པས་གནོད་མ་བསྐྱལ། བླང་བྱ་དགེ་བས་ཕན་མ་བཏགས་ན་སེམས་ཅན་ཐམས་ཅད་འབད་མེད་དུ་མི་གྲོལ་བའི་རྒྱུ་ཅིས་ལན་ཞེ་ན། ཆོས་ཀྱི་དབྱིངས་ནི་སྤྲོས་པ་ཐམས་ཅད་དང་བྲལ་བ་ཡིན་ལ། དེ་སོ་སོ་སྐྱེ་བོའི་ཤེས་མཐོང་གི་ཡུལ་ཡིན་པས་ལྟ་ཞོག །ཉན་ཐོས་དང་རང་སངས་རྒྱས་ལ་སོགས་འགོག་བདེན་ཕྱོགས་གཅིག་གཟིགས་པ་དང༌། འཕགས་པ་རྣམས་ལའང་མངོན་སུམ་དུ་མ་གྱུར་པས་ཟབ་མོ་བཀོལ་བའི་དོན་ཞེས་གསུངས་པ་ཡིན་ནོ། །ཡང་དབྱིབས་ཀྱི་བཞུགས་ཚུལ་ལ་དགེ་སྡིག་དང་ལེགས་ཉེས་ཀྱི་ཕན་གནོད་མ་གྲུབ་པ་ཡིན་དུ་ཆུག་ཀྱང༌། གོ་འཕང་དེ་ལ་སྦྱོར་བའི་ཆ་ནས་སྤངས་རྟོགས་ཀྱི་ཡོན་ཏན་ངེས་པར་ཡོད་དགོས་པར་གྲུབ་སྟེ། ལམ་བདེན་ལ་བརྟེན་ནས་སྒྲིབ་གཉིས་སྤང་དགོས་པར་རང་ཉིད་ཀྱང་འདོད་
པའི་ཕྱིར་རོ་ཟེར་ན་བདེན་ཏེ། ཤེས་བྱ་ནི་བློའི་རྗེས་སུ་འགྲོ་བས་དོན་ལ་མི་རྟོན་ཚིག་ལ་རྟོན་པ་ཡིན་པས་གྲུབ་མཐའ་བཞི་པོའང་བློས་གཞལ་བ་ཡིན་པའི་ཕྱིར་རོ། །དོན་དམ་པ་ནི་ཆོས་ཉིད་ཀྱི་རྗེས་སུ་འགྲོ་ཞིང་རྣམ་ཤེས་ལ་མི་རྟོན་ཡེ་ཤེས་ལ་རྟོན་པས་སྒྲ་རྟོག་དང་ཞེན་པའི་ཡུལ་ལས་འདས་པ་ཡིན་ནོ། །དེ་བས་དམིགས་པ་དང་ཀུན་སློང་མཚུངས་ལྡན་གྱིས་རྣམ་པར་གཞག་པའི་ལྟ་གྲུབ་ནི་བློའི་གཞན་དབང་ཅན་ཡིན་པས་དོན་དམ་པའི་ཕྱོགས་དང་འགལ་བའི་ཚུལ། །སམྦུ་ཊི་ལས། སྟོང་དང་མི་སྟོང་གཟུང་བ་ལས། །རྟོག་པ་ཉུང་མིན་སྐྱེ་བར་འགྱུར། །ཡོངས་སུ་སྤངས་པས་ཀུན་རྟོག་སྟེ། །དེ་ཕྱིར་གཉིས་པོ་འདི་དག་སྤང༌། །ཞེས་པས་གསལ་ལོ། །འོན་དན་དམ་པ་དེ་སུ་ཡི་སྤྱོད་ཡུལ་ཡིན་སྙམ་ན། སངས་རྒྱས་ཁོ་ནའི་སྤྱོད་ཡུལ་ཡིན་པས་རང་བཞིན་རྫོགས་པ་ཆེན་པོ་ལ་སོགས་པའི་མན་ངག་གི་རྒྱུད་སྡེ་ཆེན་པོ་རྣམས་ནས་ཀྱང་གཤིས་ཀྱི་བཞུགས་ཚུལ་ཇི་ལྟ་བའི་ཚིག་རླབས་པོ་ཆེ་འབའ་ཞིག་བཤད་པ་ལ་སྐྲག་པ་སྐྱེས་ནས་ཆོས་སྤོང་གི་ལས་བསྒྲུབས་པ་མང་དུ་གྱུར་ནའང༌། དེ་དག་གིས་ནི་ཤེས་རབ་སྙིང་པོ་ཙམ་ལའང་ཁ་ཏོན་དུ་བགྱིད་པ་ཙམ་ལས་གོ་བའི་ཕྱོགས་མ་བསླངས་པར་སྣང་ངོ༌། །སྟོང་པ་ཉིད་ལ་གཟུགས་མེད་ཚོར་བ་མེད་ཅེས་པ་ནས། དེ་བཞིན་
དུ་སྡུག་བསྔལ་བ་དང༌། ཀུན་འབྱུང་བ་དང༌། འགོག་པ་དང༌། ལམ་མེད༌། ཡེ་ཤེས་མེད། མ་ཐོབ་པ་ཡང་མེད་དོ། །ཞེས་པས་ཕུང་པོ་ལྔ་བྲལ་གྱི་སྟོང་ཉིད་དམ། ཚོགས་བརྒྱད་ལས་འདས་པའི་རིག་པ་ལ་མཐོང་སྤངས་སྒོམ་སྤངས་ཀྱི་སྒྲིབ་བྱེད་མེད་པ་ནམ་མཁའི་རྡོ་རྗེའི་ཆོས་ཉིད་གཅིག་ཏུ་རྟོགས་ན། དེ་ལ་སྡུག་བསྔལ་དང་ཀུན་འབྱུང་གིས་བསྐྱེད་པའི་སྤང་བྱ་དང༌། འགོག་བདེན་དང་ལམ་བདེན་གྱིས་བསྐྱེད་པའི་རྟོགས་བྱ་གང་ཡང་མ་མཆིས་པས་ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་ཅེས་བསྟན་པས་སོ། །དེ་སྐད་དུ་ཕྱག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། ཆོས་ཉིད་གང་ཡིན་པ་དེ་ལ་ནི་གདགས་པའམ། རྣམ་པར་རིག་པ་མེད་ཅིང་མ་དམིགས་ཏེ། ཞེས་དང༌། ཡོད་ཅེས་བྱ་བའམ། མེད་ཅེས་བྱ་བའམ། བསོད་ནམས་ཞེས་བྱའམ། བསོད་ནམས་མ་ཡིན་པས་ཞེས་བྱ་བའམ། མྱ་ངན་ལས་འདས་པ་ཞེས་བྱ་བའམ། ཐར་པ་ཞེས་བྱ་བ་མེད་དོ་ཞེས་སོ། །དེ་བས་ན་སྟོང་པ་ཉིད་ཀྱྀ་དོན་ཐོས་བསམ་གྱིས་གཏན་ལ་འབེབས་པ་ལ་ཐལ་འགྱུར་ལས་གྲུབ་མཐའ་བཟང་བ་མེད་ཀྱང༌། གང་ཡང་ཁས་མི་ལེན་པའི་གྲུབ་མཐའ་རྣམ་པར་རིག་བྱེད་ཀྱི་བློམ་བཞག་བ་དེའི་ངོ་བོ་སྤྲོས་བྲལ་ཆེན་པོར་འདོད་ན་ནི་ཆོས་ཉིད་ཟབ་མོ་ལ་རྗེས་སུ་དཔགས་པ་ཙམ་ཞིག་སྟེ། དེའི་དོན་མངོན་
སུམ་དུ་མཐོང་བ་ནི་དད་པའི་ཉེར་ལེན་དང༌། བླ་མའི་བྱིན་རླབས་དང༌། སྔགས་ཀྱི་ཐབས་ལམ་གསུམ་ལས་བསླུ་བ་མེད་པར་རྟོགས་པའི་ཚུལ་ཁོང་དུ་མ་ཆུད་ན་གཅིག་གིས་གཅིག་སྟོང་པར་བསྒྲུབས་པའི་རྟོག་གེའི་སྟོང་ཉིད་ནི་ལྟར་སྣང་ཐ་ཤལ་བ་ཡིན་པའི་ཚུལ་དགོངས་འགྲེལ་ལས། རྟོག་གེ་ནི་རྩོད་པའི་ཡུལ་དུ་གྱུར་པ་ཡིན་ལ། རྟོག་གེ་ཐམས་ཅད་ལས་ཡང་དག་པ་འདས་པ་ནི་དམ་པའི་མཚན་ཉིད་དུ་ཤེས་པར་བྱའོ། །ཞེས་སོ། །འོ་ན་མགོན་པོ་ཀླུ་སྒྲུབ་ཀྱིས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་སྲིད། །ཅེས་གསུངས་པས། །ཐོས་པ་མང་པོ་དང༌། བསམ་བྱུང་གི་ཤེས་རབ་ལ་མ་བརྟེན་པར་ཟབ་མོའི་དེ་ཁོ་ན་ཉིད་དང་མཇལ་བར་མི་འགྱུར་རོ་སྙམ་ན། བདེན་ཏེ། གངས་ཅན་འདི་ན་ཐོས་པ་དང་བྲལ་བའི་སྒོམ་ཆེན་རྣམ་པར་ཤེས་པའི་ཚོགས་བརྒྱད་ཀྱི་རང་བཞིན་ལས་འཁོར་བའི་རྣམ་པར་ཤར་བའི་རྟེན་ཅིང་འབྲེལ་བར་འབྱུང་བ་ཙམ་ཡང་མ་རིག་ཅིང༌། མ་བསྒྲིབས་ལུང་མ་བསྟན་གྱི་ཀུན་གཞིའི་རྣམ་ཤེས་དེས་རྣམ་སྨིན་དང༌། ས་བོན་དང༌། རྣམ་ཤེས་ཀྱི་ཆ་གསུམ་བཟུང་བ་ཉིད་དྲན་འཛིན་གྱི་ཐག་པས་བཅིངས་པ་ལ་ཞི་གནས་སུ་འཁྲུལ་བ་དང༌། བལྟར་མི་མངོན་པའི་ཉོན་མོངས་པ་ཅན་གྱི་ཡིད་བདག་ཏུ་བལྟ་བ་དང༌། བདག་ལ་ཆགས་པ་དང༌། བདག་ཏུ་ང་རྒྱལ་
ཅན་གྱིས་བདག་མེད་པའི་དོན་ལ་རྨོངས་སུ་བཅུག་ནས་སྟོང་ཉིད་ཡིན་སྙམ་གྱི་ཤེས་པ་ལ་ལྷག་མཐོང་དུ་འཁྲུལ་པའི་རྟོག་གེ་བ་དང༌། ཡུད་ཙམ་ལ་སྐྱེ་འགག་སྣ་ཚོགས་བྱེད་ཅིང་རྒྱུན་མི་བརྟེན་པའི་འཇུག་ཤེས་དྲུག་གི་རང་བཞིན་ལ་རྗེས་ཐོབ་ཏུ་བཏགས་ནས་རང་ལྟ་མཆོག་འཛིན་གྱི་གད་རྒྱངས་སྒྲོག་པ་དག་ཚར་གཅོད་པའི་དོན་དུ་ཐ་སྙད་ལ་བརྟེན་ནས་དམ་པའི་དོན་འཚོལ་བ་དང༌། བསམ་བྱུང་གི་ཤེས་རབ་ལ་བརྟེན་ནས་གཤིས་ཀྱི་གནས་ལུགས་སྟོང་རྐྱང་དང༌། རྟག་རྐྱང་དུ་འཁྲུལ་པའི་མུ་སྟེགས་བྱེད་དང༌། རྣམ་གྲངས་པའི་དོན་དམ་ཅན་ཉན་ཐོས་སོགས་འཁོར་ལོ་གསུམ་ཅར་གྱི་དྲང་ངེས་ལེགས་པར་ཕྱེད་པའི་གྲུབ་མཐའ་རྣམས་ཤེས་ཤིང༌། ཟབ་མོའི་དོན་ལ་གང་ཉེ་བའི་ཆོས་ཉིད་རྟོགས་པར་བྱ་བའི་སླད་དུ་སོ་སོར་རྟོག་པའི་ཤེས་རབ་ལ་བརྟེན་ནས་མི་སྐྱེ་བའི་ཆོས་ལ་བཟོད་པ་ཐོབ་པར་བྱེད་པའི་ཚུལ་གསེར་འོད་དམ་པར། འཁོར་བའི་ཉེས་དམིགས་དང་མྱ་ངན་ལས་འདས་པའི་ཕན་ཡོན་ཡང་དག་པར་རིག་ཅིང༌། ཡང་དག་པར་སོ་སོར་རྟོགས་པ་འདི་ནི་ཕ་རོལ་ཏུ་ཕྱིན་པའི་དོན་ཏོ། །མི་སྐྱེ་བའི་ཆོས་ལ་བཟོད་པ་ཡོངས་སུ་རྫོགས་པར་བྱེད་པ་འདི་ནི་ཕ་རོལ་ཏུ་ཕྱིན་པའི་དོན་ཏོ། །ཞེས་པའི་གནས་ཤེས་ནས་བདག་ཅག་ཐོས་བསམ་གྱི་ཕྱོགས་ལ་གུས་པ་ལྷོད་པ་ཡང་མ་
ཡིན་ནོ། །དེ་ལྟ་ནའང་སྒོམ་བྱུང་གི་ཤེས་རབ་ཀྱིས་རྟོགས་པའི་དོན་ལ་ཚིག་དང༌། ཡི་གེ་དང༌། ཐ་སྙད་ཀྱི་སྤྲོས་པ་མི་འཇུག་པས་ལྟ་བ་ལ་ཁས་ལེན་མེད་པ། སྒོམ་པ་ལ་ཡིད་བྱེད་སྤངས་པ། སྤྱོད་པ་ལ་བླང་དོར་བྲལ་བ། འབྲས་བུ་ལ་རེ་དོགས་མེད་པར་སྟོན་པའི་གཞུང་ཐམས་ཅད་ངེས་དོན་ཟབ་མོའི་མཐར་ཐུག་ཏུ་རྗེས་ལ་ཐོབ་པའི་ཤེས་བྱའི་ངོ་ལྡོག་ཙམ་དུ་འདོད་པ་སྟེ། མཉམ་གཞག་གི་ངོ་ན་ལྟ་སྒོམ་སྤྱོད་འབྲས་བཞི་པོའང་སྒྲོ་བཏགས་འབའ་ཞིག་ཡིན་པའི་ཚུལ། མདོ་ལས། ཡི་གེ་མེད་པའི་ཆོས་རྣམས་ལ། །ཉན་པ་གང་དང་སྟོན་པ་གང༌། །འགྱུར་བ་མེད་ལ་སྒྲོ་བཏགས་ནས། །ཉན་ཅིང་སྟོན་པར་བྱེད་པ་ཡིན། །ཞེས་པས་གསལ་ལོ། །ཉེས་པའི་གཟུགས་བརྙན་ཆོས་ལ་སྡང་བ་ཆེ། །དེ་ལྟར་བཟློག་ལ་ཕན་ཡོན་ཚད་མེད་པ། །དེ་ཡང་ཀུན་སློང་ཉིད་ཀྱི་རྗེས་འགྲོ་ན། །འདི་ནི་སྒྲུབ་བརྒྱུད་བསྟན་པ་གསལ་བའི་རྒྱན། །མཁྱེན་རབ་ཀྱི་དབང་ཕྱུག་ལྕགས་ཟམ་སྤྲུལ་པའི་སྐུ་བསྟན་འཛིན་ལྷུན་གྲུབ་དཔལ་བཟང་པོའི་ཞལ་སྔ་ནས་ཤངས་པ་བཀའ་བརྒྱུད་པའི་གདམས་ངག་གི་ངེས་དོན་སྟོན་པའི་ཚིག་རྐང་གཉིས་ལ་སྔ་རབས་ཀྱི་མཁས་པ་རྣམས་ཀྱིས་སྒྲོ་སྐུར་བྱས་པ་སེལ་བར་བསྐུལ་བ་ལས། རྫོགས་ཆེན་པ་རང་བྱུང་རྡོ་རྗེས་དཔལ་ལྡན་པདྨ་འོད་གླིང་དུ་བཀོད་པའོ། །གཏམ་ཚོགས་ལེའུ་རེ་གཉིས་པའོ།། །།
གཏམ་ཚོགས་ལེའུ་རེ་གསུམ་པ། གནས་མིན་གྱི་བརྒལ་བརྟག་ལ་སྐྱོ་བའི་གཏམ།
གནས་མིན་གྱི་བརྒལ་བརྟག་ལ་སྐྱོ་བའི་གཏམ། ཀུན་མཁྱེན་རྒྱལ་བ་ལ་ཕྱག་འཚལ། །དཔང་གྱུར་སྐྱེས་བུ་ཁྱོད་ཅིག་ལ། །འདོད་ཞེན་ལུང་དུ་འདྲེན་པ་དེ། །ལྡིང་ཀའི་ནང་གི་ལག་འགྲོར་དྲན། །ད་ནི་སྙིགས་མ་རྩོད་པར་ལྡན། །རྒྱལ་པོ་མངའ་རིས་དོན་དུ་རྩོད། །བློན་པོ་ང་ཆེའི་ཡུལ་ལ་རྩོད། །ཞིང་པ་ས་གཞིའི་དོན་དུ་རྩོད། །སྡེ་དགོན་དཀོར་དང་ཟས་ལ་རྩོད། །དགེ་བཤེས་སྡེ་སྣོད་གསུམ་ལ་རྩོད། །དེ་དག་འཇིག་རྟེན་ཀུན་རྫོབ་ལ། །གཙོ་བོར་བྱེད་པ་བདེན་མོད་དེ། །ངག་བཅད་བསམ་གཏན་ཁང་བུ་ནས། །སེམས་གནས་རྒས་པ་རྟོག་དཔྱོད་དུ། །སོང་བ་མངོན་པའི་ང་རྒྱལ་གྱིས། །གཞན་མཚང་འདྲུ་བ་ཕྲག་དོག་ཡིན། །གནས་དང་གནས་མིན་མི་ཕྱེད་བཞིན། །གསང་སྔགས་ངེས་དོན་ལ་རྩོད་ཅིང༌། །སངས་རྒྱས་གཉིས་པ་ལྟ་བུ་ཡི། །སྐྱེས་མཆོག་རྣམས་ཀྱི་དགོངས་པ་ལ། །བླུན་པོའི་རང་ཉམས་ཚིག་འཁྲི་ཡིས། །དབེན་པར་བསམ་གཏན་གཡེལ་བྱེད་པ། །སྔོན་བྱུང་ལྷ་མིན་འཇུག་པ་ཅན། །སྡེ་བཞིའི་དང་པོ་སྲོག་ཞུགས་བཞིན། །གྲུབ་མཐའ་བཞི་ལ་རྩོད་པ་ནི། །ཤིང་རྟ་ཆེན་པོའི་ལམ་སྲོལ་ཏེ། །ཡང་དག་དོན་ལ་གང་ཉེ་བའི། །རིག་པའི་འཐད་པ་བསྒྲུབ་པའི་ཕྱིར། །དེ་བཞིན་
ལོག་རྟོག་བསལ་བ་ལ། །ཆོས་ཀྱི་གྲགས་པས་ཆུ་སྟེགས་ཀྱི། །རྒོལ་ངན་ཕྱེ་མར་བཏགས་པ་དེ། །བསྟན་པའི་བྱ་བ་རླབས་ཆེན་ཡིན། །དེ་དག་རྣམས་ཀྱི་རྩོད་རིག་ཀྱང༌། །ཚད་མ་སྡེ་བདུན་ཀུན་ལས་བཏུས། །ཆོས་མངོན་མཛོད་ཀྱི་གནས་བརྒྱད་ཀྱིས། །ཕྲ་རྒྱས་སྲིད་པའི་རྩ་བ་དང༌། །ཆོས་རབ་འབྱེད་པའི་བློ་གྲོས་མཆོག །སྲིད་ཞིའི་ཕ་རོལ་སོན་བྱས་ནས། །སྒྲུབ་དང་སུན་འབྱིན་མཛད་པ་ལས། །ཐོས་བྲལ་སྒོམ་ཆེན་བླུན་པོའི་ཁྲོད། །སྤྲེལ་རྒན་ངོ་མཚར་ཆེ་ནས་མིན། །ད་དུང་ཉོན་དང་གངས་ཅན་འདིར། །ཚད་མར་གྱུར་པའི་སྐྱེས་བུས་ཀྱང༌། །རང་རང་ཕྱོགས་སྔའི་འདོད་ཞེན་གྱིས། །དགག་བསྒྲུབ་འབྱམ་ཡིག་མཛད་དོ་ཅོག །བསྟན་སེལ་སྡེ་འཁྲུགས་རླབས་ཆེན་དུ། །གྱུར་པ་ཁྱོད་ཀྱིས་མ་རིག་གམ། །ཁྱད་པར་ད་ལྟའི་ཕྱག་རྫོགས་གཉིས། །ཟབ་ཁྱད་རང་སར་འབྱེད་པ་ལས། །དགོངས་པ་སྣོད་གཅིག་དཀར་དུས་འདིར། །ཊཱི་ཀ་ངན་པའི་མཚམས་སྦྱོར་གྱི། །ལྟ་བ་ཡིད་ལ་བཞག་བྱས་ནས། །ཚིག་དང་ཡི་གེའི་བརྡ་ཆད་ཀྱང༌། །ཀྱི་ནར་འཕྱན་པའི་སྤྱི་བརྟོལ་ལ། །སྒྲུབ་དང་སུན་འབྱིན་ཐལ་འགྱུར་གྱི། །སྤོབས་པའི་ཉི་མ་འབུམ་ཤར་ཡང༌། །ཉེས་པ་ཟད་དང་རྫུན་ཚིག་སྤངས། །
ཡིད་ཆེས་སུམ་ལྡན་རྒྱལ་བའི་བཀའ། །གང་ལས་ཕྱིར་ཕྱོགས་བླུན་དད་ཀྱིས། །རང་ཕྱོགས་འཕྱར་དང་རྨོངས་པས་དཀྲུགས། །དེ་ལ་བདག་ཡིད་མི་རྟོན་ན། །དང་པོར་ཚར་བཅད་འབབ་པའི་ཡུལ། །ལུང་གི་བདག་པོ་ཁོ་ནའི་ཕྱིར། །སྣང་བ་དག་པ་རབ་འབྱམས་ཀྱི། །དམ་ཚིག་གཞན་དུ་ལ་བཟླ་ཞིང༌། །གང་ལ་བརྟེན་པའི་ཆགས་སྡང་གི །ཉེས་དམིགས་མཐོང་ནས་དྲི་བའི་ལན། །ཐལ་བ་ལས་ཀྱང་སླར་ལྡོག་གོ །ཨེ་མ་སྒྲུབ་བརྒྱུད་བསྟན་པ་ནི། །རྟོག་གེའི་གཟུགས་བརྙན་མི་བསྒྲུབ་ཅིང༌། །ངེས་འབྱུང་མོས་གུས་དག་སྣང་གསུམ། །ལྷུར་བྱེད་ལས་ཉོན་རྣམ་སྨིན་སྒྲིབ། །རྣམ་པར་མི་རྟོག་པས་སྦྱོང་ན། །ངེས་པ་ཁོ་ནར་ཕན་འདོགས་ཡུལ། །ལས་དང་པོ་པ་ཡི་སེམས་ཅན་ལ། །ཞི་བདེའི་སེམས་ཀྱིས་དག་གཅོད་ཅིང༌། །ཕྱོགས་སུ་རིང་ལ་གྲགས་འདོད་ཀྱིས། །རི་མོའི་ལམ་ནས་སེམས་གཡེངས་པ། །འདི་ནི་ལམ་རྟགས་མ་ཡིན་ཏེ། །འདོད་ཁམས་བདག་པོས་བརླབས་པའི་ཕྱིར། །དེ་ལ་སྐྱོ་བ་ལྷག་པར་འཕེལ། །དངོས་ནི་བསམ་གཏན་ཚེར་མ་ལ། །འཇིགས་ནས་དབེན་པ་འབའ་ཞིག་བསྙེན། །ལས་རླུང་བག་ལ་ཞར་གྱུར་པས། །གཞན་མཚང་འདྲུ་དང་ངག་འཁྱལ་གྱི། །གནས་ལ་ཤིན་ཏུ་སྐྱོ་ཞིང་བསུན། །
དེ་ལྟས་མཁྱེན་དང་མི་མཁྱེན་སོགས། །ཆོས་བརྒྱད་མྱ་ངན་འདས་གྱུར་ཀྱང༌། །ཁྱོད་ཅིག་རྣལ་དུ་མི་ཐེབས་ན། །གང་གི་མདུན་སད་སླར་ཕྱོགས་ཤིག །གཏམ་ཚོགས་ལེའུ་རེ་གསུམ་པའོ།། །།
གཏམ་ཚོགས་ལེའུ་རེ་བཞི་པ། རྣམ་གྲངས་པའི་དོན་དམ་ལ་དཔྱད་པའི་གཏམ་ལྷའི་རྒྱལ་རྔ།
རྣམ་གྲངས་པའི་དོན་དམ་ལ་དཔྱད་པའི་གཏམ། ལྷའི་རྒྱལ་རྔ་ཞེས་བྱ་བ། དཔལ་རྡོ་རྗེ་རྣོན་པོ་ལ་ཕྱག་འཚལ་ལོ། །འདི་ལ་གཉིས། ཤེས་བྱ་ཤེས་བྱེད་སྤྱིར་སྨོས་པ་དང༌། །ཐད་ཀའི་དོགས་པ་བསམ་བའོ། །དང་པོ་ནི་རྟེན་ཁྱད་པར་ཅན་གྱི་གང་ཟག་ཅིག་རྣམ་པ་ཐམས་ཅད་མཁྱེན་པའི་གོ་འཕང་ཐོབ་པར་བྱེད་པ་ལ་སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་ཞིག་རྟོགས་དགོས། དེ་མིན་ན་སྦྱིན་པ་ལ་སོགས་པའི་ལམ་གཞན་ལྔ་ཡང་མིག་ལྡོངས་པ་དང་འདྲ་བའི་ཚུལ་སྡུད་པ་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་དུ་འཇུག་པར་ག་ལ་འགྱུར། །དེ་བཞིན་ཤེས་རབ་མིག་མེད་ཕ་རོལ་ཕྱིན་ལྔ་འདིས། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །ཞེས་སོ། །དེ་ལྟ་ནའང་བདག་ཉིད་གཟེངས་བསྟོད་པ་དང༌། །གཞན་ཚར་གཅད་པའི་ཀུན་སློང་ཕྱིན་ཅི་ལོག་གིས་མ་ཡིན་པར་ཡང་དག་པའི་དོན་ལ་གང་ཉེའི་རིག་པ་བརྟག་པའི་ཕྱིར་བརྒལ་བ་དང་ལན་ལྡོན་པའི་སྤོབས་པ་ཐོབ་ན་གཉིས་ཀའང་རྒྱལ་བའི་
ཕྲིན་ལས་ཡིན་པས་མཉམ་པར་གཞག་པའི་སེམས་ཀྱིས་བལྟ་བར་བྱའོ། །དེ་ལ་སློབ་དཔོན་ཀླུའི་དབང་པོས། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །དཔེར་ན་སྦྲུལ་ལ་བཟུང་ཉེས་དང༌། །རིག་སྔགས་ལོགས་པར་བསྒྲུབས་པ་བཞིན། །ཞེས་པ་འདི་དེ་ཁོ་ན་ཉིད་ལ་རྨོངས་པའི་མ་རིག་པ་ཟློག་བྱེད་ཀྱི་ངེས་བརྗོད་དུ་འདྲེན་ནའང༌། ཀུན་སློང་གིས་གསར་དུ་བསྐྱེད་པའི་མ་རིག་པ་འདིས་སོ་སོ་སྐྱེ་བོ་ཐམས་ཅད་མ་རུངས་པར་བྱེད་ཅིང༌། རྣམ་གྲངས་མ་ཡིན་པའི་དོན་དམ་ཤེས་བྱའི་ཡུལ་དུ་ལུས་ནས་སླར་ལ་ང་རྒྱལ་དང་རློམ་སེམས་འཕེལ་པས་ཡུལ་ཅན་ཤེས་བྱེད་ཀྱི་གནས་ལུགས་ལ་སྒྲོ་སྐུར་བྱེད་པ་ནི་མཁས་པ་རྣམས་ཀྱིས་ཀྱང་སྤང་བར་བྱ་སྟེ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་བསྟན་པའི་མདོ་ལས། ཐོབ་པ་ཞེས་བྱ་བ་དེ་ནི་གཡོ་བ་ཉིད་དོ། །མངོན་པར་རྟོགས་པ་ཞེས་བྱ་བ་དེ་ནི་རློམ་སེམས་ཉིད་དོ། །གཡོ་བ་དང་རློམ་སེམས་གང་ཡིན་པ་དེ་ནི་བདུད་ཀྱི་ལས་སོ། །ལྷག་པའི་ང་རྒྱལ་ཅན་དག་ནི་བདག་གིས་ཐོབ་བོ། །བདག་གིས་མངོན་པར་རྟོགས་སོ་ཞེས་རྣམ་པར་རྟོག་པར་འགྱུར་རོ། །ཞེས་གསུངས་པས་སོ། །དེ་ལ་ནང་པ་སངས་རྒྱས་པའི་གྲུབ་མཐའ་སྨྲ་བ་བཞི་ལས། ངེས་པའི་དེ་ཁོ་ན་ཉིད་དབུ་མ་ཆེན་པོའི་ལྟ་བ་ནི་རྟོགས་བྱའི་
མཐར་ཐུག་ཏུ་མཐུན་མོད། དེ་ལ་རྒྱུའི་ཐེག་པར་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། སྔགས་ལམ་སྤྱིར་ཕྱག་རྒྱ་ཆེན་པོ་མཆོག་གི་དངོས་གྲུབ། ཐབས་ཀྱི་ལམ་ལ་ལྷན་ཅིག་སྐྱེས་པའི་ཡེ་ཤེས། ཞེས་གྲགས་པ་བརྟན་པ་དེ་དག་གྲུབ་མཐའ་མཐོ་ས་ནས་གཞལ་ཡང་གཞལ་བྱེད་ཀྱི་བློ་དེ་ཉིད་ཕུང་པོའི་ཟག་པ་དང༌། རྣམ་པར་ཤེས་པའི་ཚོགས་བརྒྱད་དང་འདྲེས་ཤིང་ཕྱོགས་བསླད་པའི་རྟོག་གེའི་རིག་པ་ཉིད་ཀྱིས་ཤེས་བྱ་གཤིས་ཐོག་ལས་གཞན་དུ་འཕེན་པའི་ཕྱིར། གྲུབ་མཐའ་འོག་མ་དང་བསྟུན་ནས་ཐོག་མར་ཕུང་པོ་ལྔ་ལ་ཉེ་བར་ལེན་པའི་སེམས་དང་བྲལ་བར་བྱེད་པའི་ཚུལ་བཅོམ་ལྡན་འདས་ཀྱིས། དགེ་སློང་དག་གཟུགས་བདག་མ་ཡིན་ནོ། །གཟུགས་བདག་ཡིན་ན་གཟུགས་གནོད་པ་དང་སྡུག་བསྔལ་བར་འགྱུར་མི་རིགས་ལ། གཟུགས་ལ་བདག་གི་གཟུགས་འདི་ལྟ་བུར་གྱུར་ཅིག །འདི་ལྟ་བུར་མ་གྱུར་ཅིག་ཅེས་བྱ་བའང་འགྱུར་རིགས་ན། གཟུགས་བདག་མ་ཡིན་པ་དེའི་ཕྱིར་གཟུགས་གནོད་པ་དང་སྡུག་བསྔལ་བར་ཡང་འགྱུར་ལ། གཟུགས་ལ་བདག་འདི་ལྟ་བུར་གྱུར་ཅིག འདི་ལྟ་བུར་མ་གྱུར་ཅིག་བྱ་བའི་དབང་ཡང་མེད་དོ། །ཞེས་ཕུང་པོ་གཞན་བཞི་ལའང་བསྒྲེས་ཏེ་གསུངས་པའི་ཉེར་ལེན་གྱི་བདག་ཉིད་ཅན་
འཇིག་ཚོགས་ལ་བལྟ་བ་མཐའ་དག་ཉེ་བར་ཞི་བར་བྱས་ན། ཡུལ་དང་ཡུལ་ཅན་སྐྱེ་མཆེད་ལྟར་བྱེད་པ་རྣམ་པར་ཤེས་པའི་ཚོགས་ཀྱང་རང་དེངས་ནས་འཕགས་པའི་བདེན་པ་མངོན་དུ་མཐོང་ཞིང༌། དེའི་ཚེ་བདེན་པ་དབྱེར་མེད་སྤྲོས་བྲལ་རང་བྱུང་གི་ཡེ་ཤེས་སམ། ས་དང་པོའི་མཉམ་གཞག་དོན་རང་གི་མཚན་ཉིད་ཅན་མངོན་སུམ་དུ་རྟོགས་པའོ། །གཞན་དུ་ཆོས་ཉིད་ཟབ་མོ་སྤྲོས་པའི་མཐའ་ཐམས་ཅད་དང་བྲལ་བའི་དོན་ལ་ཐོས་པ་དང་བསམ་པའི་ཤེས་རབ་ཀྱིས་རྣམ་པར་གཞིག་ཅིང་དཔྱད་ནས་ངེས་པ་ཆེན་པོ་འདྲོངས་ཤིང༌། ཡོད་མེད་མཐའ་བྲལ་དུ་བློ་ཐག་ཆོད་པའི་ངང་ལ་བཅར་གྱིས་བཞག་པ་དེ་ནི་བློ་འམ་ཤེས་པའི་རྫས་ཀུན་རྫོབ་པ་ཡིན་པའི་ཚུལ་མདོ་ལས་ལམ་ཇི་ལྟར་བསྒོམ་པར་བགྱི། བཀའ་སྩལ་པ། ཆོས་དང་ཆོས་མ་ཡིན་པ་རྣམ་པར་མི་རྟོག །མཚན་ཉིད་དང་བྲལ་བའི་ལམ་སྒོམ་པའོ། །ཞེས་དང༌། ཞི་བའི་ལྷས། དོན་དམ་བློ་ཡིས་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཅེས་སོ། །ཁ་ཅིག་ལུང་འདིའི་གདོང་མ་བཟོད་པར། བློ་བྱེ་བྲག་པ་གཅིག་ཡིན་ནོ་ཟེར་བ་ནི། ཀུན་རྫོབ་ཀྱི་ངེས་ཚིག་ཙམ་ལའང་རྨོངས་པ་སྟེ། འདི་ལྟར་ཀུན་ཞེས་པ་ནི་འཁྲུལ་པའི་བློ་སྣང་མ་ལུས་པའོ། །རྫོབ་ཞེས་པ་ནི་དེ་ཐམས་ཅད་བརྫུན་པ། བསླུ་བ། གསོག །
གསོབ། ཡ་མ་བརླ་བ། སྙིང་པོ་མེད་ཅིང་ཡང་དག་པའི་དོན་ལ་བསྒྲིབས་པས་ན་རྫོབ་ཅེས་བྱའོ། །བདེན་པ་ནི་འཁྲུལ་པའི་བློ་ངོར་བདེན་པས་ན་བདེན་པའོ། །དེ་ཡང་སོ་སོའི་སྐྱེ་བོའི་ཤེས་པ་ནི་རྟག་ཆད་ལ་རག་ལུས་པས་ཀུན་རྫོབ་ཡིན་ལ། འཕགས་པ་ནི་དེ་ལས་ལྡོག་པས་མངོན་སུམ་པའོ། །དེའི་ཕྱིར་ཐོས་བསམ་ལ་སྒྲོ་འདོགས་ཆོད་པའི་མཁས་སུ་རེ་བས་ཀུན་རྫོབ་ཡོད་ཡོད་པོ་དང། དོན་དམ་མེད་མེད་པོས་བདེན་གཉིས་ཤ་བའི་རྭ་ལྟར་བརྟགས་ནས་ཕུང་པོ་རྣམ་དཔྱད་ཀྱི་སྟོང་པར་བལྟ་བ་ནི་རྗེས་དཔག་ཡིན་པའི་ཚུལ་མྱང་འདས་ལས། ངས་སྔོན་ཕ་རོལ་ཏུ་ཕྱིན་པའི་མདོ་བརྗོད་པ་དག་ལས་སྟོང་པ་ཉིད་དུ་བསྟན་པ་ཡང་རང་བཞིན་མེད་པ་ཙམ་ལ་དགོངས་ཏེ་གསུངས་པར་རིག་པར་གྱིས་ཤིག །གཞན་དུ་ན་ཅི་ཡང་མེད་པའི་སྟོང་པ་ཉིད་བསྒོམས་པས་སངས་རྒྱས་ཀྱི་སྐུ་དང་ཡེ་ཤེས་འབྱུང་བར་མི་འགྱུར་ཏེ། འབྲས་བུ་ནི་རྒྱུའི་རྗེས་སུ་བྱེད་པའི་ཕྱིར་རོ། །ཞེས་སོ། །དེ་བས་ན་རང་བཞིན་ཡོངས་གྲུབ་ཀྱི་སྤྲོས་བྲལ་ནི་བློ་དང་ཡིད་བྱེད་ལས་གྲོལ་བ་ཡིན་ན། དེ་ལས་ལྡོག་པའི་ཡུལ་ཅན་ལ་རྣམ་པར་རིག་པ་ཅན་དེས་རྒྱལ་བའི་ཡུམ་གྱི་དགོངས་པ་བསམ་གྱིས་མི་ཁྱབ་པའི་ཡེ་ཤེས་ལ་རེག་པ་མ་ཡིན་ཏེ། ཅིའི་
ཕྱིར་ན་བློའི་རྟོག་དཔྱོད་རྣོན་པོ་དེ་སོ་སོར་རྟག་པའི་ཤེས་རབ་དངོས་བསྟན་དུ་ལྷོངས་སྲིད་ནའང་འཕགས་པའི་ཤེས་རབ་ཀྱི་དབང་པོ་སྐྱེ་བའི་རྒྱུ་ཙམ་ལས། གདོད་སོ་སོར་རྟོག་པའི་ཤེས་རབ་དེ་ཉིད་ཀྱང་མ་གྲུབ་པར་རྟོགས་དགོས་པའི་ཚུལ་འོད་སྲུངས་ཀྱི་ལེའུ་ལས། འོད་སྲུངས་འདི་ལྟ་སྟེ། དཔེར་ན་ཤིང་གཉིས་རླུང་གིས་དྲུད་པ་དེ་ལས་མེ་འབྱུང་སྟེ། བྱུང་ནས་ཤིང་གཉིས་བསྲེག་པ་དེ་བཞིན་དུ། འོད་སྲུངས་ཡང་དག་པར་སོ་སོར་རྟོག་པ་ཡོད་ན་འཕགས་པའི་ཤེས་རབ་ཀྱི་དབང་པོ་སྐྱེ་སྟེ། དེ་སྐྱེས་པས་ཡང་དག་པར་སོ་སོར་རྟོག་པ་དེ་ཉིད་ཀྱང་སྲེག་པར་བྱེད་དོ། །ཞེས་སོ། །དེ་བས་ན་སྔོན་འབྲས་བུའི་བསྟན་པ་རྫོགས་ནས་ལུང་གི་བསྟན་པ་ཆེས་དར་བའི་ཚེ་རྡོ་རྗེ་གཟེགས་མ་ལ་སོགས་པ་དབུ་མའི་གཏན་ཚིགས་ཆེན་པོ་བཞིས་བློ་མཆོག་རྣམས་སྒོམ་པའི་ཤེས་རབ་ལ་མ་ལྟོས་པར་ཐོས་བསམ་ཁོ་ནས་གྲོལ་བ་ཆེས་མང་བ་བྱུང་ཡང༌། ད་ནི་སྒྲུབ་པའི་དུས་ཀྱང་ཆེར་ཐལ་བས་བཅོམ་ལྡན་འདས་ཀྱིས། དོན་དམ་པ་ནི་དད་པས་རྟོགས་པར་བྱ་བ་ཁོ་ན་ཡིན་ནོ། །ཞེས་དང༌། ཁྱད་པར་ཐབས་ཀྱི་ལམ་ནི་ས་ར་ཧས། མདའ་བསྣུན་ན་རེ་ནམ་མཁའི་ཡིད་ཅན་ལ། ཐར་པ་ནམ་ཡང་ཡོད་པ་མ་ཡིན་ཟེར། །བདེ་བའི་བདག་ཉིད་དང་ནི་བྲལ་གྱུར་ཅིང༌། །ལུས་ཀྱི་དཀའ་ཐུབ་འབའ་
ཞིག་ཙམ་ལྡན་པ། །དགེ་ཚུལ་དགེ་སློང་གནས་བརྟན་ཞེས་བྱ་བའི། །བནྡེ་རྣམས་ནི་དེ་ལྟར་རབ་བྱུང་ནས། །ཁ་ཅིག་མདོ་སྡེ་འཆད་པར་བྱེད་ཅིང་འདུག །ལ་ལ་རོ་གཅིག་སེམས་ཀྱི་ཚུལ་འཛིན་མཐོང༌། །གཞན་དག་ཐེག་ཆེན་དེ་ལ་རྒྱུ་བྱེད་དེ། །དེ་ནི་གཞུང་ལུགས་ཚད་མའི་བསྟན་བཅོས་ཏེ། །གཞན་ཡང་དཀྱིལ་འཁོར་འཁོར་ལོ་མ་ལུས་སྒོམ། །ཁ་ཅིག་བཞི་པའི་དོན་འཆད་པ་ལ་ཞུགས། །ལ་ལ་ནམ་མཁའི་ཁམས་ལ་རྟོག་པར་བྱེད། །གཞན་དག་སྟོང་ཉིད་ལྟ་བར་བྱེད་པ་སྟེ། །ཕལ་ཆེར་མི་མཐུན་ཕྱོགས་ལ་ཞུགས་པ་སྟེ། །ལྷན་ཅིག་སྐྱེས་བྲལ་གཞན་གང་གིས། །མྱ་ངན་འདས་གང་སྒོམ་བྱེད་པ། །དེ་དག་འགས་ཀྱང་དོན་དམ་ནི། །ཅིག་ཤོས་འགྲུབ་པར་མི་འགྱུར་རོ། །ཞེས་པ་ལྟར་ཆོས་ཉིད་ཟབ་མོའི་གནས་ལུགས་མོས་གུས་དང་ཐབས་ཀྱི་ལམ་ལ་བརྟེན་ནས་རྟོགས་བྱ་རྟོགས་པའི་ཚུལ་གྱིས་བཤད་པ་གང་ཞིག །ཚིག་ཟིན་གྱི་ན་བར་སྣང་ཡང་ཚིག་ནི་བློའི་རྗེས་སུ་འགྲོ་ལ། དོན་ནི་ཐ་སྙད་དང་འགལ་བ་ཅན་ཡིན་པས་མན་ངག་ལྟར་བཤད་པའི་རྒྱུད་དང༌། གྲུབ་ཆེན་རྣམས་ཀྱིས་རྟོགས་ཚུལ་ལ་ཉམས་སད་པར་བྱེད་པ་གང་ཞིག་ལ་རང་ལྟ་མཆོག་འཛིན་གྱི་གོལ་ས་བལྟར་མི་མངོན་པར་འཇུག་པ་ཆོས་ཅན། དེའི་རྒྱུ་
མཚན་སྙིང་པོ་ལས། སྟོང་པ་ཉིད་ལ་གཟུགས་མེད། ཚོར་བ་མེད་ཅེས་པ་ནས། ཐོབ་པ་མེད། མ་ཐོབ་པ་ཡང་མེད་དོ། །ཞེས་པའི་བར་གྱི་རྣམ་པར་མི་རྟོག་པའི་ཡེ་ཤེས་མཚན་མའི་ཆོས་ཀྱིས་མི་འགྱུར་བ་གང་ཞིག །པདྨའི་ངང་ཚུལ་གྱིས་འགོག་པའང་དཔྱད་དགོས་ཏེ། རང་ཉིད་ཀྱང་དྲན་པ་དང་ཡིད་བྱེད་མེད་པ་མཐར་ཐུག་ཏུ་འདོད་པའི་ཚུལ་སྒོམ་རིམ་ཐ་མ་ལས། དེ་ལྟ་བས་ན་དམ་པའི་ཆོས་ལ་ཡང་དྲན་པ་མེད་པ་དང་ཡིད་ལ་བྱེད་པ་མེད་པ་དེ་ཡང༌། ཡང་དག་པར་སོ་སོར་རྟོག་པ་སྔོན་དུ་འགྲོ་བ་ཡིན་པར་བལྟ་བར་བྱ་སྟེ། གང་གི་ཕྱིར་ཡང་དག་པར་སོ་སོར་རྟོག་པ་ཉིད་ཀྱིས་དྲན་པ་མེད་པ་དང་ཡིད་ལ་བྱེད་པ་མེད་པར་བྱེད་ནུས་ཀྱིས། གཞན་དུ་མ་ཡིན་ནོ། །ཞེས་པས་དཔྱད་སྒོམ་ནི་ལྟ་བའི་གནས་ལུགས་ཉམས་འོག་ཏུ་མ་ཆུད་བར་གྱི་སྔོན་འགྲོ་ལས། དངོས་གཞི་ལ་ཡིད་བྱེད་མེད་པར་འདོད་པ་འོད་སྲུངས་ཀྱིས་ཞུས་པ་དང་མཐུན་པའི་ཕྱིར་རོ། །དེས་ན་རྟོག་གེའི་དཔྱད་པས། སྟོང་པར་རྟོགས་སོ་སྙམ་བྱེད་དང༌། ཡང་དག་པར་ངེས་ཤེས་འདྲོངས་པའི་བློ་དང་ཡིད་བྱེད། སྒོམ་པའི་དངོས་གཞིར་བྱེད་པ་དེ་ནི་དོན་དམ་པ་དང་ཤིན་ཏུ་འགལ་ཞིང་སྲེད་ལེན་གྱི་བདག་ཉིད་ཅན་ཡིན་པས་ཆོས་རབ་ཏུ་རྣམ་འབྱེད་ཀྱི་བློ་གྲོས་སྲིད་ཞིའི་ཕ་རོལ་ཏུ་སོན་པའི་དོན་གྱི་དབུ་
མ་ཆེན་པོའི་མི་མཐུན་ཕྱོགས་ཁོ་ན་ཡིན་པའི་ཚུལ་བདེན་གཉིས་ལས། སྐྱེ་ལ་སོགས་པ་བཀག་པ་ཡང༌། །ཡང་དག་པ་དང་མཐུན་ཉིད་བཞེད། །སྐྱེ་མེད་སྤྲོས་ཀུན་ཞི་བ་ལ། །དོན་དམ་ཞེས་པའི་བརྡ་མཛད་དོ། །ཞེས་པས། འབྲས་བུ་མངོན་དུ་བྱེད་པའི་ཚེ་ན་ལམ་བདེན་ཐམས་ཅད་ནི་སྤང་བྱ་ཡིན་པའི་དོན་ཁོང་དུ་ཆུད་པར་བྱས་ན་འཆད་པར་འགྱུར་བ་དག་ལའང་བདེན་བྲལ་ལེགས་ལྡན་གྱི་ལྷའི་སེམས་ལྡོག་པར་འགྱུར་རོ། །གཉིས་པ་ནི། སེམས་ཀྱིས་སེམས་ནི་མི་ཤེས་ལ། །སེམས་ཀྱིས་སེམས་ཀྱང་མི་མཐོང་དེ། །སྐྱེ་འགག་མཉམ་པར་བྱེད་པ་ལ། །སྟོན་པ་རྫོགས་པའི་སངས་རྒྱས་ཀྱིས། །ལྟ་བ་ཞེས་པའི་བླ་དྭགས་བཏགས། །བུ་མོ་མྱ་ངན་མེད་ཞུས་མདོར། །རྟོགས་པའི་ཚུལ་གྱིས་རྟོགས་པ་ལ། །ཆོས་མཐོང་མེད་ཅེས་བྱ་བ་ནི། །མཐོང་བའི་ཚིག་གི་བླ་དྭགས་སོ། །དེ་བཞིན་དཀོན་མཆོག་བརྩེགས་པ་ལས། །ཞི་བ་ཕྲ་སྟེ་བལྟ་དཀའ་བ། །འདུ་ཤེས་ཐམས་ཅད་བཅོམ་པས་ན། །དེ་ཕྱིར་ཏིང་ངེ་འཛིན་ཞེས་བྱ། །ཞེས་པའི་ཞི་གནས་དེ་ཉིད་ཀྱིས། །རེ་ཞིག་ཉོན་མོངས་འགོ་གནོན་ཡང༌། །དེ་ཡི་སྒྲིབ་པ་བག་ལ་ཉལ། །སོ་སོར་རྟོག་པའི་ཤེས་རབ་ཀྱིས། །འཇོམས་ལ་ལྷག་མཐོང་ཞེས་སུ་གྲགས། །དེ་ལྟའི་ཞི་ལྷག་ཟུང་འབྲེལ་ལ། །འཇོག་ཚུལ་དགུ་དང་གཉེན་པོར་ནི། །
ཉེས་པ་ལྔ་སྤོང་འདུ་བྱེད་བརྒྱད། །བྱིང་བ་དམིགས་པ་མི་གསལ་བའི། །ཆ་ལ་དྭངས་ཆ་ཡོད་ཙམ་དང༌། །ཡོད་མིན་མེད་མིན་ནུབ་པ་སོགས། །ཕྲ་རགས་དབྱེ་བ་ཕྱེད་པ་ཉིད། །རྒོད་པ་འདོད་ཆགས་ཆར་གཏོགས་པ། །ཀུན་ལས་བཏུས་སུ་བཤད་པ་ཡིན། །དྲན་པའི་ངོ་བོ་གཟུངས་ཉིད་དེ། །དེ་ཡི་རྣམ་འབྱེད་གཏིང་ཟབ་ཀྱང༌། །བརྗེད་མེད་རྣམ་པར་མི་གཡེང་ཙམ། །རྟོག་གེ་པ་ལ་འཐད་དུ་རུང༌། །ཤེས་བཞིན་རྒྱུན་ལ་གནས་པ་སྟེ། །དོན་ལ་བསྲུང་བའི་མཚན་ཉིད་ཅན། །བདེ་གསལ་མི་རྟོག་སྒོམ་པ་ཡི། །ཡང་རྩེ་དང་ནི་གོལ་སའི་ཆ། །གཉིས་སུ་འདོད་པ་མི་ལའི་ལུགས། །དེ་ཉིད་ལུང་མ་བསྟན་དོགས་ན། །སྒོམ་པའི་དུས་ན་ཡང་རྩེ་དང༌། །ལྟ་བའི་གོལ་སར་སྨྲས་ན་རུང༌། །གསལ་བ་གོ་འབྱེད་ཆ་ལ་བཏགས། །ཤིན་སྦྱངས་ཐོབ་པའི་ཡན་ལག་ཡིན། །མི་རྟོག་བཀོལ་དུ་མི་རུང་བའི། །གནས་ངན་ལེན་གྱི་རྣམ་གྲངས་ཅན། །དེ་ཕྱིར་ཉམས་གསུམ་ལ་ཞེན་ན། །ཁམས་གསུམ་དག་ཏུ་གོལ་བའི་ཕྱིར། །བདེ་ཉམས་ལ་ཡང་ཤེས་པར་བྱ། །དམིགས་རྟེན་གྱིས་ནི་བཟུང་བའི་སེམས། །སལ་ལེ་ཧྲིག་གེ་ཞེས་པའི་སྒྲ། །རྨོངས་པ་དམིགས་གཏད་ལ་བརྟེན་ནས། །ཐབས་ལ་མཁས་པའི་ཁྲིད་ཚུལ་ཏེ། །སྟོན་པས་དངོས་པོར་བལྟ་བ་ཅན། །འཁྲིད་ཕྱིར་བདག་ཡོད་གསུངས་དང་མཚུངས། །
དེ་ལ་ཞི་ལྷག་ཟུང་འབྲེལ་ནི། །སེམས་དང་སེམས་བྱུང་ཉེར་ཞི་བའི། །ངང་དྭངས་རང་བཞིན་འོད་གསལ་ལ། །འབྱོན་འགྱུར་བྱམས་པ་མགོན་པོ་བཞེད། །རྒྱལ་བའི་བསྟན་པ་གངས་ཅན་ལས། །ཙི་ནའི་ཡུལ་དུ་ཆེས་སྔོན་དར། །དེ་ཕྱིར་སྟོན་པ་མཉམ་མེད་ནས། །རབས་སུ་བརྒྱུད་ཅིང་རྒྱལ་བའི་ཡུམ། །ལྟ་བའི་ཁུངས་སུ་བྱེད་པ་ཡང༌། །སངས་རྒྱས་ཕལ་པོ་ཆེ་ལ་སོགས། །བློ་ལ་བཞུགས་པའི་ཁྱད་གཞི་ཅན། །ཅིག་ཅར་སྨྲ་བའི་པཎྜི་ཏའི། །ལྟ་བ་རྫོགས་པའི་སངས་རྒྱས་ལས། །གཞན་དུ་སུ་ཡིས་ཁ་ཚོན་ཆོད། །ཅི་ཕྱིར་ཡིད་ལ་མི་བྱེད་པ། །དེ་ཉིད་དགག་བྱ་ཡིན་ཟེར་ན། །མདོ་སྡེ་ལས་ཀྱང་དེ་སྐད་དུ། །བསམ་དུ་མེད་པའི་ཆོས་ཉིད་ལ། །བསམ་དུ་མེད་པའི་བློ་བཞག་ན། །བསམ་དུ་མེད་པའི་ཉམས་མྱོང་འབྱུང༌། །ཞེས་དང་འཇམ་དཔལ་གནས་པའི་མདོར། །རྟོག་པ་རྣམས་ནི་གཡོ་བར་འགྱུར། །རྟོག་པ་མེད་ན་མྱ་ངན་འདའ། །གང་གིས་རང་བཞིན་དེ་ཤེས་པ། །དེ་ནི་ཡེ་ཤེས་ལྡན་ཞེས་བྱ། །ཞེས་དང་སྒྲ་གཅན་འཛིན་བཟང་པོས། །སྨྲ་བསམ་བརྗོད་མེད་སོགས་ཀྱི་སྒྲས། །ཡུམ་ལ་བསྟོད་པའི་ཐ་ཚིག་ཏུ། །སྐྱེ་འགག་གཉིས་མེད་ནམ་མཁའ་ཡི། །ངོ་བོར་སོ་སོ་རང་རིག་ཏུ། །བཞག་དེ་ཡིད་བྱེད་ཡིན་ནམ་ཅི། །ཡིན་ན་ཟབ་མོའི་མདོ་སྡེ་
ལས། །རྟོག་གེས་བརྟག་ཏུ་མི་བཟོད་པས། །སོ་སོ་རང་གིས་རིག་པར་བྱ། །ཞེས་པའི་དོན་འདི་གང་དུ་རྟོན། །ཁྱད་པར་དེ་ལ་འཁོར་བའི་རྒྱུ། །ཕྱག་ཤིང་བསྐོར་བས་དྲིས་པའི་ཚེ། །བེར་ཐུལ་སྤྲུགས་ནས་གཟུང་འཛིན་དུ། །བརྡ་ལན་སྟོན་པའི་མངོན་ཤེས་ཅན། །ཡིན་པར་མ་ཟད་སྒོམ་རིམ་གསུམ། །ཐལ་འགྱུར་དོན་ལ་རེག་གམ་མིན། །རང་རྒྱུད་འགེགས་པ་རྣམས་ལ་འདྲི། །ཁྱད་པར་ཇོ་བོའི་ཅིག་ཅར་དུ། །འཇུག་པས་ཁ་ཚོན་གསལ་བར་ཆོད། །དུས་དེང་དགག་པ་བྱུང་ཟེར་བས། །ཡང་དག་ཉིད་དུ་མི་འགྲུབ་ན། །འཕགས་པའི་ཡུལ་དུའང་ཐེག་ཆེན་ལ། །ཆོས་ལོག་ཡིན་པར་སྨྲ་བ་དང༌། །སྔགས་སྐུ་བཤིག་པའི་ཉན་ཐོས་ལ། །རྒྱལ་པོའི་ཆད་པ་བྱུང་བ་སོགས། །གཟུ་བོའི་བློ་ཡིས་སོམས་དང་ཀྱེ། །གཤིས་ལ་དགེ་སྡིག་ཡོད་ཟེར་བའི། །གྲུབ་མཐའ་བཟང་པོ་ཉིད་ཡིན་ན། །གྲངས་ཅན་ལུགས་དེ་ཁྱད་པར་འཕགས། །རྒྱུ་མཚན་ཡང་དག་སྦྱོང་རྒྱུད་ལས། །དེ་ཡི་སྡིག་དང་བསོད་ནམས་ཀྱི། །ཆ་གཉིས་རྣམ་པར་བཏགས་པ་སྟེ། །མཁས་པས་འདི་གཉིས་རྣམ་པར་སྤང༌། །ཞེས་དང་རིན་ཆེན་ཕྲེང་བ་ལས། །སྡིག་དང་བསོད་ནམས་བྱ་བ་འདས། །ཟབ་མོ་བཀོལ་བའི་དོན་དང་ལྡན། །མུ་སྟེགས་གཞན་
དང་རང་ཉིད་ཀྱིས། །གནས་མིན་སྐྲག་པས་མ་མྱངས་ལ། །ཞེས་པའི་ཆོས་ཉིད་གང་ལ་རེག །དེས་ན་ལྟ་བ་ཟབ་མོ་ལ། །ཤིན་ཏུ་མཉམ་པར་འཇོག་པའི་དོན། །སྤྱོད་པའི་ལུགས་སུ་སྨྲ་དགོས་ན། །དོན་དམ་ཡང་ནི་ཀུན་རྫོབ་འགྱུར། །ཆོས་ཉིད་གཟིགས་པ་སྐུའི་དབང་པོས། །གལ་ཏེ་མྱ་ངན་འདས་དངོས་ན། །མྱ་ངན་འདས་པའང་འདུས་བྱས་འགྱུར། །དངོས་པོ་འདུས་བྱས་མ་ཡིན་པ། །འགའ་ཡང་གང་ན་ཡོད་མ་ཡིན། །ཞེས་གསུང་འོན་ཏེ་རྗེས་ཐོབ་ལའང༌། །རིག་པ་བསྒྲེ་བའི་བླུན་པོ་འགས། །ཐབས་ལ་སྐུར་པ་བཏབ་ཟེར་ན། །བདོན་གྱིས་རང་སྡེ་ལེགས་པར་སྲུངས། །སྤྱོད་པ་ཉམས་དང་ལྟ་བ་འཁྲུལ། །ཤིན་ཏུ་མོད་པ་སེམས་ཅན་གྱི། །ལས་ལ་སུ་ཡིས་འཇུག་ལྡོག་ནུས། །དཔྱད་དང་འཇུག་སྒོམ་གཉིས་ཀའི་ལུགས། །གདོད་ནས་སྤངས་པ་ག་ལ་སྲིད། །སྔོན་འགྲོའི་དུས་ན་དཔྱད་སྒོམ་དང༌། །དངོས་གཞི་འཇོག་སྒོམ་གཙོར་བྱེད་པས། །རྟག་དང་མི་རྟོག་མཚམས་སྦྱོར་བ། །སྒྲུབ་བརྒྱུད་བསྟན་པ་ཀུན་ལ་གྲགས། །དེ་ལྟ་ན་ཡང་དབང་རྣོན་དང༌། །བརྟུལ་པོའི་ཁྱད་པར་བླ་འོག་ལྟར། །ཆེ་ཡང་བསྒྲིབ་ལ་ལུང་མ་བསྟན། །ཉོན་སྒྲིབ་ཀུན་བརྟགས་མཐོང་སྤངས་རྣམས། །
ལམ་གསུམ་ལ་ལྟོས་སྤང་བ་དང༌། །འཁོར་གསུམ་བདེན་ཞེན་དང་བཅས་པ། །མ་བསྒྲིབས་ལུང་མ་བསྟན་པ་ཡི། །ཤེས་སྒྲིབ་ལྷན་སྐྱེས་སྒོམ་སྤངས་ཀྱིས། །རང་སའི་སྤོང་ཚུལ་ཐ་དད་པ། །དེ་བཞིན་ཉིད་ལ་གནས་པས་སྦྱོང༌། །ཐ་སྙད་ལ་ནི་མ་བརྟེན་པར། །དམ་པའི་དེ་ཉིད་མི་རྟོགས་པ། །པཎྜི་ཏ་ཡི་རང་ལུགས་ཡིན། །གཞན་དུ་གཤིན་རྗེ་དགྲ་ནག་ལས། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་བ། །དེ་ལ་དངོས་གྲུབ་རིང་དུ་བསྐལ། །གསུངས་ན་མཐའ་གཅིག་ལ་ཞེན་པ། །འདི་གར་ལྟོས་པའི་རྟག་ཆད་ཡིན། །དངོས་གཞིའི་དུས་ན་དཔྱད་སྒོམ་ནི། །ལྷག་མཐོང་ཡིན་པའི་ངེས་པ་མེད། །བྱམས་པ་མགོན་དང་ཀླུའི་དགོངས་པ། །འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་པའི་དོན་དང་འགལ་ཏ་རེ། །འཕྲོ་བས་སྒོམ་གེགས་བྱེད་མི་བྱེད། །གང་ཟག་རང་སའི་རྒྱུད་ཚོད་གཙོ། །དཔྱད་སྒོམ་རང་དབང་ཅན་ཡིན་ལ། །འཕྲོ་བ་རྟོག་པའི་གཞན་དབང་ཅན། །རྒོད་དང་འཕྲོ་བ་གཅིག་གྱུར་ན། །མིང་འདོགས་གཉིས་སུ་ག་ལ་འོང༌། །འོན་ཀྱང་འཕྲོ་བར་མ་ལྟོས་པའི། །རྒོད་པ་ཤེས་བྱ་ལ་སྲིད་དམ། །
ཞི་གནས་སྒོམ་དང་གཅིག་མི་གཅིག །བསམ་གཏན་བཞི་པའི་ལྷ་ལ་དྲིས། །འོན་ཏེ་བྱིས་པ་ཉེར་སྤྱོད་ལས། །འཕགས་པའི་དོན་རབ་འབྱེད་པ་ལ། །དམིགས་པ་ཡིན་ན་རིམ་ལྔ་ལས། །ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་པ། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པ་ཤེས་བཤད་དོ། །དེ་ནི་གཉིས་མེད་ཡེ་ཤེས་ཏེ། །མི་གནས་མྱ་ངན་འདས་པའོ། །ཞེས་པས་སོ་སོར་སྡུད་པ་ལ། །གོམས་པ་དག་གི་རྒྱུད་ལ་གསལ། །འཇོག་སྒོམ་བྱེད་ཚུལ་དེ་དང་དེར། །རྒྱུན་དང་རླན་དང་ཉེ་བར་འདུལ། །ཞི་དང་རྣམ་ཞི་རྩེ་གཅིག་མཉམ། །དགུ་ཡི་སེམས་ལ་བཏང་སྙོམས་ཐོབ། །ཡིད་ནི་གཟུགས་ཅན་མ་ཡིན་ཡང༌། །ཕུང་པོའི་ཟག་པ་ཀུན་གྱི་རྒྱུ། །ཡིན་པའི་ཕྱིར་ན་ལང་གཤེགས་ལས། །ཕུང་པོ་སྐྱེ་མཆེད་ཚོགས་རྣམས་ཀྱི། །རྒྱུ་ནི་ཡིད་ལ་སོགས་པ་སྟེ། །བདག་མེད་རབ་ཏུ་འདྲོན་མང་ཞིང༌། །སེམས་དང་བཅས་ཏེ་རབ་ཏུ་འཇུག །འདི་གཉིས་རྟག་ཏུ་འོད་གསལ་བ། །རྒྱུ་དང་འབྲས་བུ་སྤངས་པའོ། །ཞེས་པས་སྲིད་རྩའི་ཉེས་དམིགས་རྒྱུར། །རྒྱལ་བས་ལེགས་པར་གསུངས་ན་ཡང༌། །ཡུམ་གྱི་དགོངས་པ་འགོགས་པ་ལ། །སྲོང་པོར་བརྗོད་པའི་སྐབས་མི་རྙེད། །དེ་ལྟ་ན་ཡང་
ས་ར་ཧར། །ཡིད་བརྟན་བྱེད་ན་དེ་ཉིད་ཀྱིས། །ཡིད་ཀྱི་དེ་ཉིད་དམིགས་དང་བཅས། །དམིགས་མེད་སྟོང་པ་ཉིད་ཡིན་ལ། །གཉིས་ལ་སྐྱོན་ནི་ཡོད་པ་སྟེ། །རྣལ་འབྱོར་གང་ཞིག་སྒོམ་པ་མིན། །ཞེས་པའི་དོན་ལ་ད་དུང་ལྟོས། །ཡིད་ལ་བྱེད་པ་ལྟ་བའི་མཆོག །ཡིན་ན་གསང་བའི་མདོ་སྡེ་ལས། །དཔེར་ན་མེ་ནི་རྒྱུ་ལས་འབར། །རྒྱུ་མེད་པ་ན་ཞི་བར་འགྱུར། །དེ་བཞིན་དམིགས་པར་སེམས་འབར་གྱིས། །དམིགས་པ་མེད་ན་ཞི་བར་འགྱུར། །གསུངས་ན་རྫོགས་པའི་སངས་རྒྱས་ཀྱང༌། །ཧྭ་ཤང་གི་ནི་ཕྱོགས་སུ་སླན། །ཡོད་པ་ཉིད་ནས་མི་རྟག་པས། །ཁྱབ་པར་ཆོས་ཀྱི་གྲགས་པ་བཞེད། །དེ་ཕྱིར་གནས་ལུགས་གང་དུ་ཡང༌། །གྲུབ་པ་མེད་པའི་འབྲས་བུ་ནི། །ཆོས་ཀྱི་སྐུ་རུ་འགྲུབ་པའི་ཚུལ། །དེ་མཐའ་དེ་ཡི་རྣམ་སྨིན་ནི། །ཞེས་སོགས་རྒྱན་ལས་གསུངས་དེས་ཆོག །སྟོང་ཉིད་གང་དུའང་མི་དམིགས་པའི། །དོན་དེ་རྣམ་པར་རིག་མེད་ཡིན། །དེ་ཡི་དབང་པོ་ཀླུ་སྒྲུབ་ཀྱིས། །ང་ལ་རྣམ་རིག་ཅུང་ཟད་མེད། །དེ་བཞིན་ཆོས་འདི་རྣམ་ཤེས་པ། །ཅུང་ཟད་ཤེས་པ་ཡོད་མ་ཡིན། །འབྱུང་བ་དང་ནི་ཤེས་པ་ཉིད། །བྱིས་པ་རྨོངས་པ་རྣམས་ལ་སྣང༌། །གསུངས་སོ་དོན་དེས་གནས་མིན་ལ། །བསྔོ་བ་འགྲུབ་པའང་མི་འདོད་ཀྱང༌། །གནས་ཀྱི་བསྔོ་བ་འགྲུབ་པའི་རྒྱུ། །རྐྱེན་དང་འདུན་པའི་རྩེ་ལ་གནས། །
དེ་ཡི་རྒྱུ་མཚན་ཡང་དག་གི །ཀུན་རྫོབ་ལ་བརྟེན་དོན་བྱེད་པ། །སོ་སོ་སྐྱེ་བོས་མི་ཤེས་པས། །བསྔོ་བ་མཁྱེན་དེ་དམ་པ་ཡིན། །ཆོས་རྣམས་བདེན་པར་མེད་པའི་དོན། །གཟུགས་ཅན་དང་ནི་མ་ཡིན་པའི། །བརྟག་ཚུལ་གཉིས་ལས་དང་པོ་ནི། །ཉན་ཐོས་སྡེ་པའི་ལུགས་ཡིན་པས། །གང་ཟག་བདག་དེ་རི་བོང་གི །རྭ་དང་མོ་གཤམ་བུ་ཡིས་མཚོན། །ཕྱི་མ་གཟུགས་ཅན་མ་ཡིན་པས། །བཅོམ་ལྡན་དངོས་དང་དངོས་མེད་པ། །མཁྱེན་ནས་ཀཱ་ཏྱཱ་ཡཱ་ན་ཡི། །གདམས་པ་ལས་ནི་ཡོད་པ་དང༌། །མེད་པ་གཉིས་ཀ་བཀག་པར་མཛད། །གང་དུ་ཡང་ནི་མ་གྲུབ་པ། །འཇིག་རྟེན་ཆོས་མཆོག་མན་ཆད་ཀྱི། །བདེན་མེད་ལྟར་སྣང་ཙམ་པ་སྟེ། །ཆོས་མིག་རྡུལ་བྲལ་ཐོབ་པ་ཡི། །འཕགས་པ་རྣམས་ལ་མངོན་སུམ་མོ། །བདེན་མེད་འཛིན་དང་བདེན་མི་འཛིན། །འདི་ནི་བརྗོད་པ་རྒྱ་ཆེ་ལ། །དོན་ཟབ་པ་ཡི་རང་བཞིན་ཡང༌། །བློ་ཡིས་འཇལ་ན་མེད་དགག་དང༌། །མ་ཡིན་དགག་པའི་གཏན་ཚིགས་ཀྱིས། །གཅིག་དང་དུ་བྲལ་གྱིས་ཁྱབ་པ། །མཚན་ཉིད་ངེས་ཚུལ་གྱིས་གྲུབ་དང༌། །རྐྱེན་ལས་སྐྱེས་པའི་རྟེན་འབྲེལ་གྱི། །རང་ངོ་དཔྱད་ནས་འགོག་དང་མཚུངས། །དང་པོ་སྤྲོས་པ་བཀག་པ་ཙམ། །ཡིན་ཕྱིར་ད་དུང་སྤྲོས་དང་བཅས། །གཉིས་པ་ཆོས་ཅན་གང་ཞིག་ནི། །དཔྱད་
རིག་རྣོན་པོས་མཚང་བྲུས་ནས། །སོ་སོར་རྟོག་པའི་ཤེས་རབ་ཀྱིས། །སྣང་ལ་རང་བཞིན་མ་གྲུབ་པ། །སྒྱུ་མ་ལྟ་བུར་འཛིན་པ་གང༌། །ཡོད་མེད་ཅིར་ཡང་མ་གྲུབ་པ། །ནམ་མཁའ་ལྟ་བུར་འཛིན་པ་ཡིན། །གཉིས་པོའང་བཏགས་པ་ཙམ་ཞིག་ལས། །ཆོས་ཀྱི་དབྱིངས་ལ་སེམས་མེད་པས། །བདེན་པ་གཉིས་ཀྱི་གདགས་གཞི་ཡང༌། །གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་ཏེ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་པས་དོན་གྱི་དབུ་མར་སྦྱོར། །དེ་ལས་འགལ་བའི་ཐ་སྙད་ཀྱིས། །གྲིབ་མ་ཤ་ཟར་འདོགས་པ་བཞིན། །དཔེ་དོན་ལོག་པར་བསྒྲུབས་པ་དེ། །བརྗོད་དུ་མེད་པའི་བདག་འཚོལ་འདྲ། །དེ་བཞིན་ང་དང་ང་ཡི་བར། །འཛིན་པའི་སེམས་ལ་དཔྱད་པའི་ཚེ། །དབྱིབས་དང་རྣམ་པ་ཕྱི་ནང་སོགས། །གང་དུ་ཡང་ནི་མ་མཐོང་བའི། །ཤུགས་ལ་མཐའ་བཞིའམ་བརྒྱད་སྤངས་པའི། །སྤྲོས་བྲལ་ངོ་སྤྲོད་མིའཐད་ན། །བྱམས་པས་ཞུས་པའི་མདོ་སྡེ་ལས། །སེམས་ལ་དབྱིབས་མེད་ཁ་དོག་མེད། །གནས་མེད་ནམ་མཁའ་ལྟ་བུའོ། །ཞེས་དང་འོད་སྲུངས་ཀྱིས་ཞུས་པར། །འོད་སྲུངས་སེམས་ནི་ནང་ནའང་མེད། །ཕྱི་རོལ་ན་མེད་གཉིས་ཀར་མེད། །གསུངས་པའི་དགོངས་པ་ཇོ་བོ་རྗེས། །ཀུན་རྫོབ་ཇི་ལྟར་
སྣང་བ་འདི། །རིག་པས་བརྟགས་ན་འགའ་མི་རྙེད། །མ་རྙེད་པ་དེ་དོན་དམ་ཡིན། །ཡེ་ནས་གནས་པའི་ཆོས་ཉིད་དོ། །ཞེས་པའི་དོན་འདི་གང་དུ་དྲང༌། །འོན་ཏེ་གང་དུའང་མ་མཐོང་བས། །མེད་དོ་སྙམ་དུ་འཛིན་པ་དང༌། །མེད་རྐྱང་ཉིད་དུ་ངོ་སྤྲོད་པ། །འདུག་ན་རིག་པས་སུན་ཕྱུང་ཞིག །དེ་ལས་གཞན་དུ་སོ་སྐྱེས་ནི། །མངོན་སུམ་མཐོང་བ་མ་ཡིན་བཞིན། །འཕགས་པའི་རྟོགས་པས་གཞལ་བྱེད་པའི། །ཀུན་སློང་བཟང་པོ་ཡིན་ན་རུང༌། །དེ་བཞིན་མོས་པས་དཔྱོད་པ་དང༌། །རྨོངས་དང་ཐོས་པ་ཉུང་བ་དག །སྟོང་པ་ཉིད་ལ་བཀྲི་བའི་སླད། །རང་གི་རང་བཞིན་དུ་དྲན་རིག་གིས། །སྐྱོང་ཚུལ་དེ་ལ་ནོར་བ་དང༌། །མ་ནོར་གཉིས་སུ་དབྱེར་ཡོད་ཅིང༌། །དེ་བཞིན་རྣམ་རྟོག་ལམ་འཁྱེར་ལ། །ཤེས་བྱའི་ཁྱད་པར་ཤེས་བྱེད་ཀྱི། །ཡུལ་ལ་ཞུགས་དང་མ་ཞུགས་ལས། །རྣམ་རྟོག་རང་རྒྱུད་ལྡན་མི་ལྡན། །ཤིན་སྦྱངས་ཐོབ་དང་མ་ཐོབ་སོགས། །རྨོངས་དང་དང་པོའི་ལས་ཅན་ལ། །འདོམས་པ་མིན་ཕྱིར་རང་ངོ་ལ། །ཅེར་གྱིས་ལྟ་དང་དག་ཚུལ་གྱི། །ཆ་ལ་ཆོས་སྐུར་བཏགས་པ་ཙམ། །འགལ་ན་དྲི་མེད་འོད་ལས་ཀྱང༌། །ཡུལ་གྱི་སྐད་ཀྱིས་ཆོས་གོ་ཕྱིར། །བསྟན་བཅོས་སྐད་ཀྱིས་ཅི་ཞིག་བྱ། །ཞེས་པའི་དོན་འདི་གང་དུ་དྲང༌། །ཕུང་
ཁམས་སྐྱེ་མཆེད་ཚོགས་བརྒྱད་ཀྱི། །ཉེར་ལེན་དབྱིངས་སུ་མ་དག་པར། །སེམས་ཀྱི་དེ་ཉིད་ཆོས་མཚུངས་པས། །རང་གི་རང་བཞིན་མཐོང་བ་ལ། །སོ་སོར་རྟོག་པའི་ཤེས་རབ་ཀྱིས། །བསྟན་བཅོས་བྱེད་པོས་སྨྲ་ན་ཡང༌། །རང་ངོ་ཅེར་མཐོང་རེག་ཤེས་ཀྱི། །དྲན་པའི་རྒྱུན་དང་རྫས་འགལ་བར། །དཔྱོད་ན་སྟོང་འཛིན་རྟོགས་པའམ། །གསལ་ཆ་དོར་བ་མཐར་ལྟའི་གཡང༌། །དཔྱད་ནས་སྟོང་པར་བལྟ་བ་ཡང༌། །ཚུ་རོལ་མཛེས་དང་གཙོ་བོ་ལ། །རྣམ་འགྱུར་ཐིམ་པའི་གྲངས་ཅན་ལུགས། །སྒྱུ་མ་ལྟ་བུ་ཡིན་ཟེར་ན། །དེ་ཡང་མུ་སྟེགས་བྱེད་ལ་ཡོད། །དེ་བཞིན་རྟོག་པས་བརྟགས་པ་ཡི། །སྤྲོས་བྲལ་ཚངས་པ་བ་ཡང་འདོད། །མདོར་ན་ཞང་ཞུང་བོན་ལ་སོགས། །སངས་རྒྱས་བསྟན་དང་འདྲ་མཚུངས་སུ། །བཅོས་པ་རྣམས་ལ་སུ་ཡིད་གཏོད། །འོན་ཏང་བོད་ཡུལ་གངས་ཁྲོད་འདིར། །ཐོས་བྲལ་རྟོགས་པས་མ་ངོམས་པའི། །སྒོམ་ཆེན་བླུན་པོ་རང་ཉམས་ཅན། །ཡིད་ཆོས་མྱོང་བ་དང་བྲལ་ཞིང༌། །དགེ་བའི་བཤེས་ཀྱིས་མ་ཟིན་པས། །རྟེན་འབྲེལ་ཚོགས་པའི་མཐོང་སྣང་དང༌། །གཏི་མུག་སྒོམ་དུ་འཁྲུལ་པ་དག །རྣམ་རྟོག་གང་ཤར་ལ་བལྟས་ནས། །འགེགས་པ་འགོག་པའི་སྙོམས་འཇུག་ཡིན། །སྟོང་པ་ཉིད་དང་
ཆོས་སྐུ་གཉིས། །རྒྱུ་འབྲས་ལྟ་བུར་ཡོད་པའི་ཚུལ། །གོང་དུ་རྒྱན་གྱི་དགོངས་པས་བཤད། །འོན་ཀྱང་ལམ་གྱི་གནས་སྐབས་ན། །ཡིད་ཀྱི་རྣམ་པར་རིག་པ་ཅན། །མ་བསྒྲིབས་ལུང་མ་བསྟན་པ་དེ། །དམིགས་པའི་ཆ་ནས་ཀུན་གཞི་དང༌། །རྣམ་པའི་ཆ་ནས་རང་སེམས་པ། །འཁོར་གསུམ་རྣམ་པར་རྟོག་པ་ཡི། །སྤང་བྱ་སྤངས་པའི་སྟོང་ཉིད་ནི། །མཐོང་སྤངས་དྲི་བྲལ་ཆོས་ཀྱི་སྐུར། །བཏགས་ལ་འགལ་བ་ཡོད་མིན་ཏེ། །སྔགས་ཀྱི་དུས་ན་མདོ་ལམ་གྱི། །སངས་རྒྱས་བཏགས་པར་བཤད་དང་མཚུངས། །རྣམ་རྟོག་དགག་དང་སྒྲིབ་པ་གཉིས། །ཀུན་ནས་འགལ་བ་ལྟག་སྤྲོད་མིན། །དང་པོའི་ལས་ཅན་རྣམས་ལ་ནི། །ངོ་བོ་ཉིད་སྒྲིབ་མ་རིག་ཡིན། །གོམས་པ་སྟོབས་སུ་གྱུར་པའི་ཚེ། །རྟོག་དང་མི་རྟོག་རོ་མཉམ་ཞིང༌། །སོ་སོར་རྟོག་པའི་ཤེས་རབ་ནི། །ཁྱད་པར་ཅན་གྱིས་མཐོང་སྤངས་དང༌། །སྒོམ་སྤངས་སྒྲིབ་པ་སྤང་པའི་ཕྱིར། །ཆོས་སྐུའི་རབ་བཏགས་བརྗོད་པར་ཟད། །ཆོས་ཉིད་ཅིག་ཅར་ཟད་པ་ལ། །འཁོར་འདས་ལག་པའི་ལྟོ་རྒྱབ་ལས། །མེད་པ་ངེས་པར་བདེན་པ་སྲིད། །འཕྲོ་ག་ནས་བསྐོས་སུ་འདེབས་པ་ཡི། །བླུན་པོའི་ཆོས་སྐད་གཞལ་དེས་ཅི། །ངེས་པར་བདེན་པ་གཟིགས་པ་དང༌། །
མཁས་མཆོག་རྣམས་ལ་གྲགས་པ་ཡི། །དུས་ཀྱི་འཁོར་ལོའི་སྦྱོར་དྲུག་དང༌། །ཁྱད་པར་མ་ཧཱ་སནྡྷི་པའི། །སྐུ་གསུམ་ལམ་སྣང་གྲུབ་པའི་མཐའ། །ཟབ་ལ་དབྱིངས་ཆེ་དེར་བཏགས་པ། །ཕལ་གྱིས་ཤེས་པ་མ་ཡིན་ལ། །དེ་ལས་གཞན་པ་གདམས་ཕྲན་གྱིས། །དབང་པོ་བསླད་པའི་སྟོང་གཟུགས་ལ། །རྣམ་པ་ཀུན་གྱི་མཆོག་ལྡན་དུ། །འདོགས་པ་སྙིང་རྗེའི་གནས་ཡིན་པས། །དེ་ཀ་སྡེ་ཚན་གཅིག་པར་ཞོག །དེ་བཞིན་རང་སྟོང་གཞན་སྟོང་གི །གདགས་གཞི་རྒྱལ་བས་གསུངས་མོད་ཀྱང༌། །དེ་ཡི་ཕྱོགས་འཛིན་ལ་བརྟེན་ནས། །བསྟན་པ་དཀྲུག་པ་ལྷ་ཆེན་པོའི། །རྣམ་ཐར་ཁོ་ནར་མཐོང་བའི་ཕྱིར། །མཆོག་དམན་སྐྱེ་དགུ་ཐམས་ཅད་ཀྱི། །རྒྱུད་ལ་བྱང་ཆུབ་སེམས་སྐྱེས་ནས། །བསྟན་པའི་ལྷག་ཞབས་ཅུང་ཟད་འདི། །ཆུད་མི་ཟ་བའི་བཀྲ་ཤིས་ཤོག །ནན་དུ་བསྐུལ་ན་བྲག་ཅ་ཡང༌། །སྐྱེས་བུ་བཞིན་དུ་སྒྲོག་པའི་ཕྱིར། །སྡེ་སྣོད་འཛིན་པ་ས་ར་པ། །ཆོས་ཉིད་གཟིགས་པའི་སླད་དུ་བསྔོ། །གཏམ་ཚོགས་ལེའུ་རེ་བཞི་པའོ།། །།
གཏམ་ཚོགས་ལེའུ་རེ་ལྔ་པ། ཤིན་ཏུ་རྣལ་འབྱོར་གྲུབ་མཐའ་བཞི་ལ་རྟོན་པའི་གཏམ་རྡོ་རྗེ་གཟེགས་མའི་མཚོན་ཆ།
ཤིན་ཏུ་རྣལ་འབྱོར་གྲུབ་མཐའ་བཞི་ལ་རྟོན་པའི་གཏམ། རྡོ་རྗེ་གཟེགས་མའི་མཚོན་ཆ་ཞེས་བྱ་བ། མཁྱེན་རབ་རལ་གྲི་ཅན་ལ་འདུད། །འདི་ན་མཉམ་པར་མ་བཞག་ཅིང༌། །རྟོག་གེས་དྲེགས་པའི་ཅེ་སྤྱང་འགའ། །
མུན་པས་སྤྲུལ་པའི་ཆོ་ངེ་འདོན། །འཁོར་ལོ་ཐ་མའི་སྦས་དོན་གང༌། །སྔགས་སུ་མངོན་སུམ་ཕྱུང་བ་ནི། །ཀུན་ཏུ་བཟང་པོ་རྡོ་རྗེ་འཆང༌། །རྗེ་བཙུན་རྡོ་རྗེ་རྣལ་འབྱོར་མས། །ས་ར་ཧ་དང་ཀླུ་སྒྲུབ་ཞབས། །མ་ཕམ་མགོན་པོ་དགའ་རབ་རྗེ། །པདྨ་དྲི་མེད་བཤེས་གཉེན་སོགས། །མཆོག་གཟིགས་རྣམས་ལ་འདོམས་མཛད་ཅིང༌། །ལམ་དེ་ལས་ནི་དངོས་གྲུབ་བརྙེས། །སྲོལ་ཕྱེ་སྙན་ནས་སྙན་བརྒྱུད་དུ། །དར་བའི་ཟབ་མོའི་ཆོས་རྣམས་ལ། །མ་རྟོགས་ལོག་རྟོགས་ཕྱོགས་རྟོགས་ཅན། །དྲང་ངེས་ལྡེམ་དགོངས་མི་ཕྱེད་བཞིན། །ཆོས་དོན་ཚིག་ལ་རྟོན་པས་འཇལ། །གྲུབ་མཐའ་སྨྲ་བ་རྣམ་བཞི་ཡི། །ཆོས་སྐད་ལས་གཞན་རྫུན་ནོ་ཞེས། །རྩ་ལྟུང་དྲུག་པ་རིན་གྱིས་ཉོ། །གྲུབ་མཐའ་བཞི་པོའི་མིང་ཙམ་དང༌། །འགལ་ཚད་ལོག་པའི་ཆོས་ཡིན་ན། །སྔགས་སུ་ཕྱག་རྒྱ་ཆེན་པོ་དང༌། །བདེ་སྟོང་ལྷན་ཅིག་སྐྱེས་པའི་སྒྲས། །ལྟ་བའི་དངོས་མིང་སྨོས་པ་དང༌། །དོ་ཧ་མཛོད་དང་སོར་སྡུད་སོགས། །པཎ་གྲུབ་རྣམས་ཀྱིས་ཉམས་བླངས་ཤིང༌། །དངོས་གྲུབ་ཐོབ་པ་དེ་དག་ཀྱང༌། །ནང་པའི་གཞུང་དང་འགལ་ཏ་རེ། །ཁྱད་པར་ངེས་དོན་དབུ་མ་ཆེའི། །སྦས་དོན་གཤིས་ཀྱི་ཐོག་འབེབས་པ། །ཀ་དག་རྫོགས་པ་ཆེན་པོ་ནི། །
གྲུབ་མཐའ་བཞི་ནང་མ་འདུས་ན། །ཤེས་རབ་ཕ་རོལ་ཕྱིན་པ་ཡང༌། །དེ་ཡི་ནང་དུ་མི་འདུ་སྟེ། །ཅིའི་ཕྱིར་གཟོད་ནས་དག་པའི་སྒྲ། །ཁྱོད་ཀྱི་དགག་གཞི་ཡིན་པའི་ཕྱིར། །དེ་སྐད་དུ་ནི་སྡུད་པ་ལས། །གཟོད་ནས་དག་པས་སེམས་ཅན་སྐྱེ་བར་ག་ལ་འགྱུར། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་དེ་བཞིན་མདོ་རྒྱུད་ལས། །ཡེ་ཤེས་ཞེས་བྱའི་དོན་བསྟན་པའི། །ཡེ་ནི་དང་པོའི་ཐོག་མའི་སྒྲ། །ཤེས་ནི་སྒྲིབ་བྱེད་སྤངས་པ་སྟེ། །ཡུལ་དང་འབྲེལ་པ་མེད་ལ་བརྗོད། །དེ་བཞིན་ཀ་དག་སྒྲ་དོན་ཡང༌། །བརྗོད་པའི་རྣམ་དབྱེ་གསལ་བྱེད་སྤྱི། །ཀ་ནི་དང་པོ་འམ་གཞི་ཡི་དོན། །ཡེ་དང་གཟོད་དང་དངོས་གཅིག་ལ། །དག་ནི་ཀུན་གཞི་ཚོགས་བརྒྱད་ཀྱི། །འདུས་མ་བྱས་པའི་དོན་ཉིད་དེ། །གསུམ་ཀས་འཁོར་ལོ་ཐ་མ་ཡི། །སྦས་དོན་གདོད་ནས་དག་པ་བསྟན། །དེ་དག་རྣམས་ཀྱི་དགོངས་པ་ནི། །འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །གསུངས་ལ་གནས་ཀྱང་རྟོག་གེའི་བློས། །བརྟག་ཏུ་མི་བཟོད་རྒྱལ་བའི་བཀའ། །ལ་ལ་བཟང་དང་ལ་ལ་ནི། །ཅིག་ཤོས་ཉིད་དུ་འདུ་ཤེས་ནས། །བསྟན་པ་དཀྲུགས་པ་བདུད་ཀྱི་ལས། །འདི་ན་ཆོས་རབ་རྣམ་
འབྱེད་ཀྱི། །བློ་གྲོས་སྲིད་ཞིའི་ཕ་རོལ་ཏུ། །སོན་པ་སངས་རྒྱས་ཉིད་ལས་གཞན། །མེད་ཕྱིར་ཆོས་དང་གང་ཟག་ལ། །སྐུར་པའི་ཕྱོགས་ལྷུང་འདོད་ཞེན་ནི། །མནར་མེད་བསྒྲུབ་པའི་རྒྱུ་ལས་གང༌། །དེ་བཞིན་གཤེགས་པའི་བསྟན་པ་ནི། །རྟོན་པ་བཞི་ཡི་བདག་ཉིད་ཅན། །འདུལ་བ་ལ་སྣང་མདོ་སྡེར་འཇུག །ཆོས་ཉིད་དོན་དང་མི་འགལ་བ། །བཀའ་ཡི་ཚད་དུ་གནང་བའི་ཕྱིར། །འཁོར་ལོ་དང་པོ་དང་བསྟུན་ཏེ། །དགག་པའི་ཕྱོགས་ནས་བཤད་ཀྱིས་ཉོན། །མིང་ཚིག་བརྗོད་པའི་རྒྱུའི་དང་པོ། །ཨའམ་ཀ་ནི་གཞི་ཡིན་ཏེ། །གཞི་སྒྲ་འཇུག་པའི་དོན་ལྔ་ལ། །རྣམ་རིག་ལྐོག་ཏུ་མ་གྱུར་ན། །དམ་པའི་དེ་ཉིད་མཐོང་བར་འགྱུར། །དེ་ཕྱིར་ཀ་ཞེས་བྱ་བ་ནི། །སྡུག་བསྔལ་བདེན་པའི་མངོན་བརྗོད་དེ། །རྒྱུ་རྐྱེན་ལས་བྱུང་ཀུན་འབྱུང་གི །ཟག་པ་ཟད་པས་དག་ཅེས་བྱ། །ཀ་ནི་ལམ་བདེན་བྲལ་བྱ་སྟེ། །ཀུན་ཏུ་སྦྱོར་བའི་ཆོས་ཅན་ཀུན། །དག་པས་འགོག་བདེན་བྲལ་འབྲས་སོ། །འཁོར་ལོ་བར་པ་དང་བསྟུན་ཏེ། །བསྒྲུབ་པའི་ཕྱོགས་ནས་བཤད་ཀྱིས་ཉོན། །ཀ་ནི་ཐོག་མཐའ་མེད་པའི་དབྱིངས། །རྣམ་པར་ཐར་པའི་སྒོ་དང་པོ། །དག་ནི་འདུས་མ་བྱས་པ་སྟེ། །མཚན་མེད་སྨོན་པ་མེད་པའོ། །འཁོར་ལོ་ཐ་མ་དང་བསྟུན་ཏེ། །གཉིས་གའི་ཕྱོགས་ནས་གཞལ་གྱིས་
ཉོན། །ཀ་ནི་ཀུན་བརྟགས་གཞན་དབང་ཆོས། །གཟོད་ནས་དག་པས་ཡོངས་གྲུབ་སྟེ། །དོན་ལ་རྟོན་པ་འདི་ཤེས་ན། །ཚིག་ལ་ཕུར་ཁུང་ཐུག་མི་འགྱུར། །བླ་ན་མེད་པའི་སྟོན་པ་དེས། །ངའམ་ང་འདྲའི་གང་ཟག་གིས། །ཆོས་དང་གང་ཟག་ཚད་གཟུང་གིས། །གཞན་དུ་ནོངས་པར་གྱུར་ཏ་རེ། །གསུངས་ལ་གཟུ་བོར་མ་བཞག་ན། །ཉན་ཐོས་སནྡེ་པ་རྣམས་ཀྱིས། །ཐེག་ཆེན་དར་པའི་འགོ་རྩོམ་ཚེ། །ཀླུ་སྒྲུབ་ཅེས་བྱའི་གང་ཟག་གིས། །ཐེག་པ་ཆེན་པོ་ཞེས་བྱ་བའི། །ཆོས་ལོག་སྟོན་ནོ་ཞེས་སྐུར་ཞིང༌། །ཧེ་རུ་ཀ་ཡི་སྐུ་བཤིག་ནས། །འདི་ནི་བདུད་ཀྱིས་བྱས་སོ་བསྒྲགས། །དེ་བཞིན་ཕྱོགས་ཀྱི་གླང་པོ་ལ། །མུན་པའི་གླང་པོ་ཞེས་པ་དང༌། །རྒྱལ་སྲས་ཞི་བ་ལྷ་ལྟ་བུར། །འདུ་ཤེས་གསུམ་པར་སྨྲ་བ་སོགས། །རྒྱ་བོད་ཀུན་ཏུ་ལྷ་ཆེན་པོའི། །འཇུག་པས་བསྟན་པ་དཀྲུགས་པ་ནི། །སྔོན་བྱུང་ད་ལྟའང་ཡོད་སྲིད་ན། །དེ་ཡི་རྒྱུད་ལ་བྱང་ཆུབ་སེམས། །སྐྱེས་ནས་འཆལ་ཚུལ་མི་དགེའི་གཟུགས། །གཞན་གནོད་གཞི་བཅས་སྤོང་བ་ཡིས། །ཚུལ་ཁྲིམས་མཆོག་ལ་གནས་པར་ཤོག །འོན་ཏེ་བསྲེགས་བཅད་བརྡར་བ་ཡི། །གསེར་བཞིན་བསྟན་ལ་བྱི་དོར་གྱི། །སྤོབས་པ་ཐོབ་པ་ཡོད་སྲིད་ན། །གནོད་མིན་གདོན་དུ་འཛིན་པ་ལས། །རང་སའི་ཆོས་ལུགས་ལས་གཞན་པ། །དྲི་བཅས་ཉིད་དུ་
དམ་བཅའ་ལ། །འགལ་བྲེང་ཐལ་འགྱུར་འགོད་བྱེད་པ། །འཇིགས་བྲལ་ཨཀྵོ་བཛྲ་ཡེ། །གཞུང་ལ་དཔྱད་གསུམ་དག་པ་ཡིས། །ཐལ་འགྱུར་རྣམ་དག་སྒྲུབས་ཤིག་ཀྱེ། །བདག་ཅག་རྒྱལ་བའི་བསྟན་པ་དང༌། །དེ་ལས་གྱེས་པའི་ཆོས་ལུགས་ལ། །སྡེ་པ་བཅོ་བརྒྱད་བཀར་བསྡུས་བཞིན། །ཆོས་སྤོང་ལམ་ལ་མི་འཇུག་པས། །མཉམ་པ་ཉིད་དུ་གནས་གྱུར་ཅིག །རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་རེ་ལྔ་པའོ།། །།
གཏམ་ཚོགས་ལེའུ་རེ་དྲུག་པ། ཡེ་གྲོལ་ཀ་དག་གི་གཏམ་དག་པ་གཉིས་ལྡན་གྱི་མཛོད་ཁང་།
ཡེ་གྲོལ་ཀ་དག་གི་གཏམ། དག་པ་གཉིས་ལྡན་གྱི་མཛོད་ཁང་ཞེས་བྱ་བ། དང་པོའི་སངས་རྒྱས་ལ་ཕྱག་འཚལ་ལོ། །སྲིད་པའི་ཟུག་རྔུ་འབྱིན་ལ་ཉན་ཐོས་ཀྱི། །སྡེ་སྣོད་དག་ཀྱང་ཐར་པའི་གྲུ་ཆེན་ཏེ། །རྣམ་པ་ཐམས་ཅད་མཁྱེན་པའི་གོ་འཕང་ནི། །གང་ལས་སྐྱེ་ཕྱིར་བྱང་ཆུབ་སེམས་ལ་འདུད། །དེ་ལ་མན་ངག་རྫོགས་པ་ཆེན་པོ་ནི། འབྲས་བུ་ལམ་དུ་བྱེད་པས་དང་པོའི་བདེན་པ་ཡིན་ཏེ། རྒྱུ་འབྲས་རིམ་ཅན་ནམ། སྤང་གཉེན་གྱི་ཚུལ་ལས་འདས་པས་ཡང་དག་པའམ། རྣམ་པར་དག་པའམ། གདོད་ནས་དག་པའི་སྒྲ་ཀ་དག་ཏུ་བསྒྱུར་ནས་བསྟན་པ་སྟེ། དེ་ལ་དག་བྱ་ནི་རྒྱ་ཆེར་རོལ་པ་ལས། ཀ་ཞེས་བརྗོད་པ་དང་ལས་ཀྱི་རྣམ་པ་སྨིན་པ་ལ་འཇུག་པ་ཞེས་བྱ་བའི་སྒྲ་བྱུང་ངོ༌། །ཞེས་པ་ལྟར་རྣམ་སྨིན་དང་འབྲེལ་བའི་ལམ་བདེན་ཀུན་རྫོབ་པ་ཉིད་
ཀ་ནས་དག་པའི་དོན་ཡིན་ཏེ། དེ་ཡང་རྣམ་གྲངས་ཀྱི་སྒོ་ནས་བསྟན་ན། ཡང་ནི་ནན་ཏན་གྱིས་དག་པ་དང༌། རྣམ་པར་ནི་རང་གི་ངོ་བོས་དག་པ་དང༌། གདོད་དང་གཟོད་ནི་སྔ་ཕྱི་གང་རུང་ལ་འཇུག་པས་དུས་གསུམ་གྱི་སྤྲོས་པ་ལས་འདས་པའི་དོན། མཚན་བརྗོད་ལས་ཀྱང༌། དུས་གསུམ་དུས་མེད་རྟོགས་པ་པོ། །ཞེས་སོ། །དེའི་ཕྱིར་ཀ་དག་གི་སྒྲ་དོན་ལོག་པ་ཡིན་ན། ཡང་དག་དང་རྣམ་དག་དང༌། གཟོད་ནས་དག་པ་ཡང་ལོག་པ་ཡིན་ཏེ། སྡུད་པ་ལས། གཟོད་ནས་དག་པས་སེམས་ཅན་སྐྱེ་བར་ག་ལ་འགྱུར། ཞེས་པའི་དགོངས་པ་ལེན་མི་ཤེས་པར་ཟད་དོ། །དེ་བས་ན་སྒྲ་དོན་ལ་འཇུག་པའི་ཚེ་ཡང་ཀ་ནི་སྔོན་རོལ་པ་སྟེ། བརྗོད་པ་འབྱུང་བའི་རྒྱུའི་དང་པོ་དབྱངས་དང་གསལ་བྱེད་ཀྱི་སྤྱི་བོ་ན་ཡང་ཨ་དང་ཀ་ཡོད་ཅིང༌། དེ་གཉིས་ངོ་བོ་གཅིག་ལས་ལྡོག་པ་ཐ་དད་པས་སྐྱེ་འགག་གཉིས་མེད་ཀྱི་དོན་ལ་འཇུག་པའི་ཚུལ་སྔ་མ་ལས། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་སྟེ། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཅེས་པས་དབྱངས་ཀྱི་དང་པོ་ནི་སྐྱེ་བ་མེད་པའི་དོན་དང༌། གསལ་བྱེད་ཀྱི་དང་པོ་ནི་བརྗོད་པའི་རྒྱུ་འགག་པ་མེད་པའི་དོན་ལ་གནས་པས་
སྐྱེ་འགག་གཉིས་མེད་ཀྱི་བདེན་པ་ཀ་དག་གི་སྒྲས་དག་པ་གཉིས་ལྡན་གྱི་གོ་དོན་ཡང་ལྷོངས་ཤིང༌། ལམ་བདེན་འདུས་བྱས་པ་ལས་འདས་པའི་བརྗོད་གཞིར་བསྟན་པ་ཡིན་ནོ། །ཐ་ན་འཇིག་རྟེན་གྱི་ཁ་སྐད་ཙམ་ལའང་ཞིང་རང་སར་ཆུ་འདྲེན་པའི་མགོ་ལ་ཆུའི་ཀ་ཞེས་སྒྲོག་ཅིང༌། དེ་བཞིན་དུ་མིང་གི་ལུང་མ་བསྟན་པའི་ངོ་བོ་ཉིད་སྨྲ་བའི་ཚིག་བསླད་ལའང་། ཀ་ཅ་དང༌། ཀ་བ་དང༌། ཀ་བློ་མི་བདེ་བ་སོགས་བརྗོད་པའི་ཕྱིར་རོ། །དེ་ནང་པའི་གྲུབ་མཐའ་སྨྲ་བ་བཞིའི་ཆོས་སྐད་ལས་ལོགས་སུ་གྱུར་པའི་སྙམ་པའི་ལོག་ཤེས་ཅན་ལ་བཀའ་འཁོར་ལོ་གསུམ་གྱི་འཆད་གཞི་དང་སྦྱར་ནས་ཚིག་གི་མེ་ཏོག་དོན་གྱི་འབྲས་བུ་ལ་རྟོན་པའི་ཚུལ་རྡོ་རྗེ་གཟེགས་མའི་མཚོན་ཆར་འདོམས་ཟིན་ལ། དེ་བས་ན་དབང་པོ་རབ་ཀྱིས་གཞུང་གི་མཚན་ལ་དཔྱད་པས་དོན་དཔྱིས་ཕྱིན་པར་རྟོགས་པ་ནི་ཐོས་བསམ་དང་འབྲེལ་བའི་དཔྱད་སྒོམ་ཡིན་ལ། དེ་སྒོམ་པའི་ཤེས་རབ་ཀྱི་ཉམས་སུ་མྱོང་བའི་ཕྱིར་འཇོག་སྒོམ་གྱི་གནད་བཤད་པར་བྱའོ། །རྫོགས་པ་ཆེན་པོའི་རིག་པ་ནི། སེམས་མིན་སེམས་ལས་བྱུང་བའང་མིན། །ཕུང་པོ་ལྔ་དང་མ་འདྲེས་ཤིང༌། །རྣམ་ཤེས་ཚོགས་བརྒྱད་ལས་འདས་པས། །གྲུབ་མཐའ་རྗེས་སུ་འཛིན་རྣམས་ཀྱི། །བློ་ཡིས་
བརྟགས་པའི་མེད་དགག་དང༌། །མ་ཡིན་དགག་དང་མཐའ་བརྒྱད་ཀྱི། །སྤྲོས་པ་བཤིག་པའི་རྗེས་ཐོབ་ཀྱི། །རིག་པ་འདུས་བྱས་ལས་འདས་པས། །ཡེ་གྲོལ་འདུས་མ་བྱས་པའོ། །དེ་སྐད་དུ་ནི་སྤྱོད་འཇུག་ལས། །བདེན་པ་མཐོང་བས་གྲོལ་འགྱུར་གྱི། །སྟོང་ཉིད་མཐོང་བས་ཅི་བྱ་གསུངས། །དེ་ལྟ་མོད་ཀྱི་དབང་རྣོན་དང༌། །སྦྱངས་པ་སྔོན་སོང་མ་ལགས་པས། །དོན་འདི་རྟོགས་པ་མ་ཡིན་ཏེ། །སྒོམ་མོ་སྙམ་པ་སེམས་ཡིན་ལ། །རྣམ་རྟོག་ལྔ་བཅུ་སེམས་བྱུང་ངོ༌། །བློ་ཡིས་བགྲོད་ཡུལ་གཟུགས་ཕུང་སྟེ། །དེ་ཡི་རོ་མྱོང་ཚོར་བའོ། །རྟོག་དཔྱོད་དབུ་མར་འཁྲུལ་པ་ཡི། །སྤུ་རིས་འབྱེད་པ་འདུ་ཤེས་ལ། །བག་ཆགས་བརྟས་པ་འདུ་བྱེད་རྒྱུ། །ཀུན་གྱི་བདག་ཉིད་རྣམ་ཤེས་ཏེ། །དེ་དག་ཡུལ་དང་ཡུལ་ཅན་དུ། །འབྲེལ་ལས་ཚོགས་དྲུག་སྐྱེ་བའི་ཕྱིར། །གོ་བས་དཔྱད་པའི་རྣམ་གཡེང་གིས། །བསམ་གཏན་དཀྲོག་པའི་རྟོག་གེ་དང༌། །མྱོང་བས་བསླུས་པའི་དཔྱད་སྒོམ་གྱིས། །བྱིས་པ་ཉེར་སྤྱོད་སྒོམ་པ་རྣམས། །བསམ་གཏན་དང་པོའི་ཉེར་བསྡོགས་དང༌། །དངོས་གཞི་ཉིད་ལས་འཕགས་པ་མེད། །ཆོས་ཉིད་གཟིགས་པ་ཞི་བ་ལྷས། །རྣམ་དཔྱོད་ཀྱིས་ནི་དཔྱོད་བྱེད་ན། །དེ་ཚེ་རྣམ་དཔྱོད་དེ་ཡང་ནི། །རྣམ་དཔྱོད་ཕྱིར་ན་ཐུག་པ་མེད། །དཔྱད་བྱ་རྣམ་པར་དཔྱད་བྱས་ནས། །རྣམ་དཔྱོད་ལ་ནི་རྟེན་ཡོད་མིན། །རྟེན་
མེད་ཕྱིར་ན་མི་སྐྱེ་སྟེ། །དེ་ཡང་མྱ་ངན་འདས་པར་བརྗོད། །ཞེས་གསུངས་ཐ་སྙད་ལ་བརྟེན་ནས། །སྟོང་ཉིད་གཏན་ལ་འབེབས་པ་དེ། །བདག་ཉིད་ཆེན་པོ་ཀླུ་སྒྲུབ་དང༌། །ཟླ་བ་གྲགས་པའི་ལུགས་ཡིན་ཡང༌། །དེ་ནི་ཐོས་དང་བསམ་པ་ཡིན། །གཤིས་ཀྱི་བཞུགས་ཚུལ་དཔྱད་པའི་སྐབས། །ཡིན་གྱི་སྒོམ་པའི་དངོས་གཞི་ལ། །སྔགས་ཀྱི་ཐབས་ལམ་གཙོར་བྱས་ནས། །ལས་རླུང་ཟད་པར་བྱེད་པའི་དོན། །ཉམས་སུ་གཞེས་པ་ཤེས་པར་གྱིས། །དེ་ལ་མཚན་བཅས་མཚན་མེད་ཀྱི། །རྫོགས་རིམ་གཉིས་ལས་ཕྱི་མ་ནི། །མན་ངག་རྫོགས་པ་ཆེན་པོ་སྟེ། །འདུས་མ་བྱས་པའི་རིག་པ་ལ། །ཀ་ནས་དག་པ་ཞེས་བྱ་སྟེ། །བསྒོམ་པར་བྱ་བའི་ལྟ་བ་དང༌། །སྒོམ་པར་བྱེད་པའི་ཤེས་པ་མེད། །མེད་དོ་སྙམ་ན་ཆད་ལྟ་དང༌། །ཡོད་དོ་སྙམ་ན་རྟག་ལྟ་དང༌། །གཉིས་ཀྱི་བར་ནི་བློ་ཡིན་པས། །དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཉིད་དུ་གསུངས། །བློ་དང་བྲལ་བ་རྟོགས་པ་ལ། །ཚོགས་རྫོགས་སྒྲིབ་པ་དག་པ་དང༌། །བླ་མའི་བྱིན་རླབས་ཞུགས་པ་དགོས། །དེ་སྐད་དུ་ནི་སྟོན་པའི་བཀས། །དོན་དམ་པ་ནི་དད་པ་ཡིས། །རྟོགས་པར་བྱ་བ་ཡིན་ནོ་གསུངས། །དེ་ཕྱིར་ཚོགས་གསོག་སྒྲིབ་སྦྱོང་དང༌། །དད་པས་རང་རྒྱུད་བརླན་
བྱས་ནས། །གྲུབ་མཐའི་ཞེན་པས་མ་བཅིངས་པའི། །རིག་པ་རང་བཞིན་མེད་པ་འདི། །གདོད་ནས་དག་པའི་ལྟ་བ་ཡིན། །ཡིན་ནོ་སྙམ་ན་ངེས་ཤེས་ཀྱང༌། །ཤེས་བྱའི་སྒྲིབ་པ་རྔམ་ཆེན་ཏེ། །དངོས་དང་དངོས་མེད་བློ་ཡི་བདག །འདུས་མ་བྱས་དབྱིངས་མ་ཞི་བར། །རྟོག་དཔྱོད་ཚེར་མས་སྒོམ་པའི་མིག །ཕུག་སྟེ་སྨྲ་བསམ་བརྗོད་མེད་ལ། །སྐྲག་པ་སྐྱེས་ནས་བཅོས་ཤིང་བཅོས། །བསྒྲིམས་ཤིང་བསྒྲིམས་པ་མཐོང་ལམ་གྱི། །དམ་པའི་དེ་ཉིད་ཡིན་ཟེར་ན། །མུ་སྟེགས་ཚངས་པའི་རྗེས་འབྲང་གི །ཕྱོགས་སུ་དེངས་ཤིག་གཞན་དུ་ན། །ཐེག་པ་ཆེན་པོའི་རྒྱུད་བླ་མར། །འདི་ལ་བསལ་བྱ་ཅི་ཡང་མེད། །ཞེས་པའི་དོན་དང་ཅིས་མི་འགལ། །ལྟ་བའི་ངོ་བོ་དྲན་པ་དང༌། །དབྱེར་མེད་རོ་གཅིག་བསྲེ་བ་ལ། །སྒོམ་པ་ཞེས་བྱའི་ཐ་སྙད་གྲགས། །དེ་གཉིས་ཐ་དད་བཟུང་བྱས་ཏེ། །ལྟ་བ་མ་ཧེ་ལྟ་བུ་ལ། །སྒོམ་པ་སྐྱོང་བྱེད་ལྟར་བྱས་ནས། །ཡིད་དང་ཆོས་སུ་འབྲེལ་བ་ཡི། །རྟོག་དཔྱོད་ཚེར་མ་ལྟ་བུའམ། །འགྱུར་དྲན་ངང་དུ་འཇོག་བྱེད་ཀྱང༌། །གཞག་པར་བྱ་བ་ཅུང་ཟད་མེད། །ཅེས་དང་འགལ་བ་ལྟག་སྤྲོད་ཡིན། །ལྟ་སྒོམ་རྗེས་སུ་སློབ་པ་དེ། །དོན་གྱི་དཔྱོད་པ་བླ་ན་མེད། །
བླང་དོར་དགག་སྒྲུབ་བློ་བྲལ་བས། །ཡང་དག་ཉིད་ལ་ཡང་དག་བལྟ། །གསུངས་འདི་རྒྱལ་བའི་གསང་ཚིག་ཡིན། །གཞི་དང་ལམ་དང་འབྲས་བུའི་ཆོས། །ཀ་ནས་དག་པའི་ཆོས་ཉིད་ལ། །བསྒོམ་བྱ་སྒོམ་བྱེད་ཅུང་ཟད་མེད། །ཀ་དག་དོན་ནི་ཡང་དག་ཕྱིར། །ཡང་དག་མཐོང་ན་རྣམ་པར་གྲོལ། །ཅེས་པའི་དོན་ལ་སུ་ཡིས་བསྙོན། །འདི་ཉིད་མ་རིག་རྟོག་ཅན་རྣམས། །འཁོར་ལོ་བར་མཐའི་དྲང་ངེས་དང༌། །ཐ་སྙད་ཚིག་ལ་ལྟ་བར་འཛིན། །མཚན་ཉིད་མེད་ལ་བློས་སྒྲོ་འདོགས། །ཕུང་པོ་ལྔ་པོ་རང་བཞིན་གྱིས། །སྟོང་པར་ཡང་དག་རྗེས་བལྟ་བ། །བཅོས་པའི་སྟོང་པས་བསླད་པ་ཡི། །གཟུགས་སོགས་སྟོང་ཡུལ་རང་ངོ་ནས། །གྲུབ་པ་མེད་པའི་དོན་ལས་རིང༌། །གྲིབ་མའི་གཟུགས་བརྙན་ཤ་ཟ་རུ། །ཡོད་པ་ཡུལ་མིན་འཁྲུལ་ཤེས་དེ། །གཟུང་བའི་ཡུལ་དང་རྟོག་དཔྱོད་ཀྱི། །ཤེས་པ་འཛིན་པའི་སེམས་ཡིན་ན། །ཆོས་ཅན་སྣང་བར་འདོད་པ་ཡི། །གྲུབ་མཐའ་མུ་སྟེགས་བྱེད་དང་མཚུངས། །དེ་ཕྱིར་ཀུན་རྫོབ་ཙམ་དུ་ཡང༌། །འཁྲུལ་གཞི་ཞལ་གྱིས་མི་བཞེས་པ། །བདག་ཉིད་ཆེན་པོ་ཀླུ་སྒྲུབ་དང༌། །ལྷ་གཅིག་དཱི་པཾ་ཀ་རའི་ལུགས། །འདི་ན་མངོན་པའི་ང་རྒྱལ་ཅན། །
ལུང་གི་དམ་ཆོས་ལ་ཞེན་ནས། །མཉམ་པར་གཞག་དང་རྫས་འགལ་བའི། །བདག་མེད་གཉིས་ཀྱི་ཚིག་ལ་ཞེན། །མཐའ་བརྒྱད་སྤྲོས་བྲལ་བློས་བཅོས་ནས། །རབ་ཏུ་མི་གནས་དབུ་མའི་དོན། །ང་ལས་གཞན་གྱིས་མ་རྟོགས་ལོ། །དེ་ཀ་རང་ལྟ་མཆོག་འཛིན་གྱི། །རྟག་ཆད་མུ་བཞིའི་ཕྲང་ཡིན་ཏེ། །བཅོམ་ལྡན་བདག་ཉིད་ཆེན་པོ་དེས། །དགེ་སློང་གང་ཞིག་འདི་སྙམ་དུ། །ང་ནི་ངེས་པར་དགྲ་བཅོམ་པའི། །གོ་འཕང་ཐོབ་པོ་སྙམ་བྱེད་ན། །དེ་ནི་དགྲ་བཅོམ་མ་ཡིན་གསུངས། །གང་ཕྱིར་རྟོག་པའི་དམ་ཆོས་ནི། །བསྒོམས་ནས་ལས་རླུང་ཟད་པའི་རྗེས། །འགྲོ་བས་སྒྲ་རྟོག་ལ་ཞེན་པའི། །ཁ་ཕྱིར་ཕྱོགས་ལས་ལྡོག་བྱས་ན། །དབུ་མར་ཞུགས་གནས་ཐིམ་གསུམ་གྱི། །ངེས་པས་རིམ་མམ་ཅིག་ཅར་དུ། །རྫོགས་ནས་ཐལ་རང་རྣམ་གཉིས་དང༌། །གྲུབ་མཐའ་བཞི་པོའི་ཞེན་པ་འཇིག །ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་པའི་དོན་ལ་རྗེས་དཔག་ཙམ། །མ་ཡིན་མངོན་སུམ་ཉིད་ལ་འབྱོར། །དངོས་ལ་ངོ་བོ་ཉིད་མེད་པས། །ལྟ་བ་ལོང་བ་ལྟ་བུ་ཡིན། །དངོས་ཀུན་ཡང་དག་རྫུན་པ་རུ། །མཐོང་བའི་སོ་སོར་རང་རིག་མིག །སྒོམ་པའི་ཐུར་མས་བྱེ་བར་འགྱུར། །དེ་ཕྱིར་རྫོགས་པ་ཆེན་པོ་ལ། །ལྟ་བ་མེད་དེ་ནམ་མཁའ་འདྲ། །
ནམ་མཁའ་ལ་ནི་མཐོ་དམན་མེད། །སྒོམ་པ་མེད་དེ་ཉི་ཟླ་འདྲ། །ཉི་ཟླ་ལ་ནི་གསལ་འགྲིབ་མེད། །སྤྱོད་པ་མེད་དེ་རྒྱ་མཚོ་འདྲ། །རྒྱ་མཚོ་ལ་ནི་ཡངས་དོག་མེད། །འབྲས་བུ་མེད་དེ་ཡེ་སངས་རྒྱས། །དེ་ལ་ཡང་སངས་རྒྱ་རྒྱུ་མེད། །དྲན་པ་མེད་དེ་ཡེ་ཤེས་ཡིན། །ཡེ་ཤེས་བློ་དང་ལྷན་ཅིག་མིན། །བདེན་པ་མེད་དེ་མི་བརྫུན་པས། །དོན་དམ་བདེན་པའི་ཐ་སྙད་གྲགས། །བདེ་བ་མེད་དེ་སྡུག་བསྔལ་དང༌། །བྲལ་བས་སངས་རྒྱས་ཉིད་དུ་རྟོགས། །ངས་ནི་གཞུང་ལུགས་མ་སྦྱངས་ཏེ། །རྒྱལ་བ་ཀློང་ཆེན་རབ་འབྱམས་ཀྱི། །ཡེ་ཤེས་སྐུ་དང་འགག་མེད་གསུང༌། །མཇལ་བས་སྐད་ཅིག་ཡུད་ལ་གྲོལ། །གྲོལ་ལོ་སྙམ་པའི་ང་རྒྱལ་དང༌། །མ་གྲོལ་སྙམ་པའི་ཞུམ་པ་མེད། །གྲུབ་མཐའ་ཀུན་གྱི་དེ་ཉིད་རིག །རིག་པ་ཐམས་ཅད་རང་ཉིད་ཀྱིས། །རྟོགས་པའི་དོན་དང་འགལ་མེད་མཐོང༌། །མཐོང་ཡང་ཆོས་ཉིད་བདེན་པ་ནི། །རྣམ་ཐར་སྒོ་གསུམ་ལ་གནས་པས། །མཛུབ་མོས་མཚོན་པའི་ཡུལ་མིན་ཕྱིར། །གྲུབ་མཐའི་ཞེན་པ་ཐམས་ཅད་ཞིག །བསྒོམ་བྱ་སྒོམ་བྱེད་མེད་པའི་ངང༌། །བྱ་བྱ་ཆོས་སྤྱོད་མེད་པའི་ངང༌། །ཆོ་ག་བཟླས་བརྗོད་མེད་པའི་ངང༌། །དྲན་པ་ཉེ་བར་གཞག་པའི་ངང༌། །རང་གར་བཞག་པས་ཟག་བཅས་ཀྱི། །ལུས་ལ་གདུང་དང་སྐུ་བལ་གྱི། །རིང་བསྲེལ་
དག་ཀྱང་མང་དུ་བྱོན། །སྒོམ་པ་དཔལ་གྱི་མཆིམས་ཕུར་བྱས། །ཉམས་དང་རྟོགས་པའི་མཛོད་ཀློང་བརྡོལ། །སྣང་བ་བརྡ་དང་དཔེ་ཆར་ཤར། །འགྲོ་དོན་གཙང་དང་མོན་ལ་བྱས། །འབྲེལ་ཚད་དོན་ལྡན་སྨོན་ལམ་བཏབ། །སྡོད་ས་དད་མེད་ལུང་པར་བྱས། །དཀོར་དང་རྣམ་གཡེང་ངང་གིས་ཞི། །གདུལ་བྱ་དབུས་གཙང་ཁམས་ནས་འདུས། །སྦྱིན་པ་རྣམ་བཞིས་ལེགས་པར་བསྐྱངས། །གསེར་དངུལ་རྫས་དང་དབྱིག་ལ་སོགས། །མི་འདོད་བཞིན་དུ་སུན་སུན་བྱུང༌། །ཆོས་འཁོར་གསུམ་ལ་བསྟི་སྟང་དང༌། །རྟེན་བཞེངས་ཁྲི་མཆོད་སྟོང་མཆོད་ཕུལ། །སེམས་ཅན་མང་པོའི་སྲོག་སྐྱོབ་པས། །ཚེ་ཡང་མཐར་ཕྱིན་ལུང་བསྟན་ཐོབ། །རྣམ་རྟོག་རང་ཤར་རང་གྲོལ་ལ། །ཕྲག་དོག་ངན་སེམས་ཕྱོགས་ལྷུང་དང༌། །གྲུབ་མཐའི་ཁ་འཛིན་ཡོད་མིན་ཏེ། །ཆོས་ལ་སྡང་བའི་ཉེས་པ་དེས། །ཐར་པའི་སྲོག་རྩ་གཅོད་པའི་ཕྱིར། །གཟུ་པོར་གནས་པའི་བཤེས་གཉེན་ཆེ། །འབྲས་སྤུངས་བདེ་ཡངས་བླ་མ་ནི། །ཀལ་པ་མ་ཏིའི་གསུང་ནན་ལ། །བརྟེན་ནས་རང་བཞིན་བརྗོད་པ་འདི། །འགྲོ་འདིའི་རྒྱུད་ལ་བྱང་ཆུབ་སེམས། །སྐྱེས་ནས་བྱང་གྲོལ་ལ་རེག་ཤོག །གཏམ་ཚོགས་ལེའུ་རེ་དྲུག་པའོ།། །།
གཏམ་ཚོགས་ལེའུ་རེ་བདུན་པ། ཡེ་ཤེས་ཀྱི་ཕ་རོལ་ཏུ་ཕྱིན་པའི་གཏམ་རྫོགས་པ་ཆེན་པོའི་དོ་ཧ་མཛོད།
ཡེ་ཤེས་ཀྱི་ཕ་རོལ་ཏུ་ཕྱིན་པའི་གཏམ་རྫོགས་པ་ཆེན་པོའི་དོ་ཧ་མཛོད་ཅེས་བྱ་བ། རྒྱ་གར་སྐད་དུ། མ་ཧཱ་སནྡྷི་ཛྙཱ་ན་ས་མུ་དྲ་པ་ར་མི་ཏ་པ་ར་མི་ཏ་དྭ་ཧ་ཀོ་ཤ་བཛྲ་གིརྟི་ནཱ་མ། བོད་སྐད་དུ། རྫོགས་པ་ཆེན་པོ་ཡེ་ཤེས་རྒྱ་མཚོའི་ཕ་རོལ་ལས་ཀྱང་ཕ་རོལ་ཏུ་ཕྱིན་པའི་གཏམ་དྭ་
ཧ་མཛོད་ཀྱི་རྡོ་རྗེའི་གླུ་ཞེས་བྱ་བ། ཆོས་ཉིད་མ་བཅོས་པའི་ཀློང་ལ་ཕྱག་འཚལ་ལོ། །རྣམ་པར་ཐར་པའི་སྒོ་ནི་འདི་ཡིན་ཏེ། །སྟོང་པ་ཉིད་དང་མཚན་མ་མེད་པ་དང༌། །སྨོན་པ་མེད་ཅེས་རྒྱལ་བས་རབ་བསྔགས་ཀྱང༌། །ཚིག་གིས་དོན་བསྒྲིབས་སྟོང་ཉིད་དངོས་པོར་གོལ། །ཀུན་ཏུ་བརྟགས་པའི་མཐའ་བརྒྱད་སྤྲོས་བྲལ་ཡང༌། །མཚན་མའི་གཞན་དབང་གྱུར་ནས་གོ་འཕང་ལ། །སྨོན་པས་འཇུག་པ་ལྟ་བའི་སྙིགས་མ་ཡིན། །གང་ཞིག་སྟོང་པ་ཉིད་ཀྱི་དོན་འཚོལ་ཕྱིར། །མཐའ་གཉིས་སྤངས་ནས་དབུ་མར་གནས་པའི་བློས། །ཐལ་འགྱུར་མཚོན་ཆ་རྣོན་པོ་བརྡར་བྱས་ཀྱང༌། །ངོ་བོ་ཉིད་མེད་ཞི་བའི་དབྱིངས་ལས་དཀྲོགས། །སྟོང་པ་རང་གི་ངོ་བོས་མ་གྲུབ་བཞིན། །སྣང་བ་རྫུན་པར་མྱོང་བའི་ཀུན་རྫོབ་དང༌། །བསྲེས་ནས་བདེན་གཉིས་དབྱེར་མེད་འཚོལ་བ་ཡང༌། །རྣམ་པར་རིག་པ་ཅན་གྱི་ཞགས་པས་འཆིང༌། །ཕུང་སོགས་སྟོང་པར་རྟོག་པའི་ངོ་བོ་ཉིད། །ཉེ་བར་ལེན་པའི་ཆོས་དང་མ་བྲལ་ན། །ཤེས་རབ་ཕ་རོལ་ཕྱིན་ལ་རྩོད་བྱེད་ཀྱང༌། །ཞི་བའི་དོན་ལ་མི་རེག་སྲིད་པས་འཛིན། །རང་བཞིན་ཡོངས་ཤེས་བདེན་པས་འཚང་རྒྱ་ན། །མཉམ་པར་བཞག་དང་མ་བཞག་རྫུན་པའི་ཆོས། །བཞག་པས་རྒྱ་ན་བསམ་གཏན་གཟུགས་མེད་དང༌། །མ་གཞག་རྒྱ་ན་སེམས་ཅན་ཅི་ལ་འཁོར། །འདོད་དང་གཟུགས་ཁམས་གཟུགས་
མེད་ཁམས་གསུམ་གྱི། །གནས་རིགས་ཁམས་ལ་དམིགས་པའི་འདུ་ཤེས་དང༌། །བྲལ་བའི་དམིགས་མེད་སྙིང་རྗེ་ཆེན་པོ་ནི། །བདེན་པ་མཐོང་བའི་བྱང་ཆུབ་སེམས་དཔར་ཡོད། །གང་ཕྱིར་སྟོང་ཉིད་ལྡན་ལ་སྙིང་རྗེས་འབྲེལ། །སྙིང་རྗེ་དང་བྲལ་སྟོང་པ་ཉིད་རློམ་པ། །སངས་རྒྱས་མུ་སྟེགས་བྱེད་དེ་སྲིན་འབུ་ཡིས། །ཉུངས་འབྲུ་ཕུག་པའི་སྟོང་པར་བལྟ་དང་མཚུངས། །སྡུག་བསྔལ་ཤེས་ནས་ཀུན་འབྱུང་སྤོང་བའི་ལམ། །རྒྱུད་ལ་བརྟེན་བྱས་འགོག་པ་མངོན་བྱེད་པ། །འདི་ནི་ཞི་བདེར་དམིགས་པ་ཙམ་ཞིག་ཏེ། །རྣམ་པ་ཐམས་ཅད་མཁྱེན་པའི་དོན་ལ་རིང༌། །ཀློག་དང་འཛིན་དང་ཉན་དང་བསྟན་བཅོས་འཆད། །ཐོས་དང་བསམ་དང་བསྒོམ་པས་གདུང་བྱེད་པ། །དང་པོའི་ལས་ཅན་རྣམས་ལ་མ་བཀག་སྟེ། །ཆོས་རྣམས་རང་བཞིན་མེད་པར་རྟོགས་ཚེ་འཁྲུལ། །ལྟ་བར་གོ་བར་བྱ་བའི་དུས་ཀྱི་ཚེ། །ལུང་དང་རིག་པ་ལྟ་བའི་མིག་བུ་ཡིན། །ལྟ་བ་མྱོང་བར་བྱ་བའི་དུས་དག་ན། །སེམས་དང་རིག་པའི་ལ་ཤན་ཕྱེད་པར་བྱ། །ལྟ་བ་རྟོགས་པར་གྱུར་པའི་དུས་དག་ན། །སློབ་པས་བཅིངས་པའི་བྱ་བཏང་ཉམས་རེ་མཚར། །གྲུབ་མཐས་བཅོས་པའི་ལྟ་སྒོམ་ཡི་རེ་མུག །འདུས་མ་བྱས་དང་འགལ་བའི་ལམ་བདེན་བརྫུན། །གཟུགས་ཚོར་འདུ་ཤེས་
ལ་སོགས་ཕུང་ཁམས་ཀྱི། །ཆོས་ལ་མི་གནས་ཆོས་ཉིད་ལ་གནས་པ། །སྔགས་སུ་གདན་གསུམ་ཚང་བའི་ལྟར་བསྟན་ཡང༌། །རྫོགས་པ་ཆེན་པོའི་དོན་ལ་མ་རེག་གོ །ལྟ་བའི་རང་བཞིན་ཀ་ནས་དག་པ་ལ། །བལྟ་བར་བྱ་བ་ཅུང་ཟད་ཡོད་མིན་ཏེ། །ངང་དང་རང་བཞིན་མ་ཉམས་བདེན་པ་ཡིས། །འཁྲུལ་པའི་རྫུན་ཕུགས་གཏིང་ནས་སུན་འབྱིན་ཏོ། །རིག་པ་གདོད་ནས་མངོན་སངས་རྒྱས་པ་འདི། །སྤངས་ནས་སེམས་ལ་སངས་རྒྱས་འདོད་པ་རྣམས། །སེམས་བྱུང་ཇག་པས་བསྐོར་བ་མ་མཐོང་ནས། །རྟོག་དཔྱོད་ལྷག་མཐོང་ཡིན་ཞེས་འོ་དོད་འབོད། །གཟུགས་ནི་ཕ་རོལ་ཡིན་ལ་འདུ་ཤེས་ཚུ་རོལ་ཡིན། །ཚོར་བ་བར་ན་གནས་པས་འདུ་བྱེད་མཚམས་སྦྱར་ཏེ། །རྣམ་པར་ཤེས་པ་འཁོར་བའི་གཏིང་རྡོར་བསྐྱུར་བྱས་པས། །སེམས་ཅན་འདི་དག་ཐར་པའི་སྐབས་མེད་སྙིང་རེ་རྗེ། །རང་ངོ་གདོད་ནས་དག་པའི་ཆོས་ཉིད་ལ། །ཡོད་དང་མེད་པའི་ཕྱོགས་འཛིན་ཞིག་གྱུར་ཀྱང༌། །བྱིས་པ་རྣམས་ཀྱིས་གཉིས་སུ་སྒྲོ་བཏགས་ཤིང༌། །མཁས་པ་རྣམས་ཀྱིས་གཅིག་ཏུ་བཟུང་བས་འཁྲུལ། །ཇི་ལྟར་བཟུང་ན་བདེན་པ་རྣམ་པ་གཉིས། །སྣང་སྟོང་ཚིག་གིས་ཤ་བའི་རྭ་ལྟར་བཅོས། །འདོད་
ཁའི་བློ་ཡི་བསེ་རུ་ལྟ་བུར་བཟུང༌། །ལྷན་ཅིག་སྐྱེས་པའི་དེ་ཉིད་མ་རིག་གོ །མ་རིག་ལས་ནི་རྟེན་ཅིང་འབྲེལ་པར་འབྱུང༌། །བཅུ་གཉིས་རྒྱུན་ལ་འཁོར་འདི་ནང་རིག་པས། །ལྡོག་སྟེ་གཉུག་མའི་དེ་ཉིད་མ་མཐོང་ན། །སྒྲ་ཚད་བཟོ་དང་གསོ་བས་རྣམ་པར་འཁྱམ། །དེ་ཕྱིར་འཁོར་དང་མྱ་ངན་འདས་པའི་ཆོས། །ཐམས་ཅད་བདེན་པ་མ་ཡིན་བརྫུན་པའང་མིན། །གཉིས་ཀར་མི་གནས་རྫོགས་པ་ཆེན་པོའི་དོན། །ནམ་མཁའི་རང་བཞིན་གཞལ་མེད་ཁང་ཆེན་པོ། །རྟོགས་པར་འདོད་ནས་ཤེས་རབ་ཕ་རོལ་ཕྱིན། །བསྟེན་གོམས་བྱས་པས་ཤེས་བྱའི་ཚུ་རོལ་ལུས། །རང་སར་བཞག་པས་བསམ་གཏན་རྒྱ་རལ་ནས། །བདེ་བར་གཤེགས་པའི་དེ་ཉིད་མངོན་སུམ་མཐོང༌། །བྱ་རྩོལ་མེད་ལ་བརྩོན་པའི་ཁུར་བཀལ་བས། །ལམ་བདེན་འདུས་བྱས་མྱ་ངན་འདའ་མ་ནུས། །ད་ནི་མི་བསྒོམ་སྒོམ་ཆེན་བསླུ་བ་ལ། །སྒོམ་ལས་གཞན་པའི་ཆོམ་རྐུན་ངས་མ་མཐོང༌། །སྐྱེ་མེད་ཆོས་ལ་བཟོད་པ་མ་ཐོབ་ན། །ཟབ་མོའི་དོན་ལ་སྐྲག་པའི་དཀའ་ཐུབ་དང༌། །བསྲུང་ཉམས་འདུ་ཤེས་དམ་པོས་དཀྲིས་པ་ཡི། །རློམ་སེམས་དེ་ཡང་ཁྲིམས་ཀྱི་སྣོད་ལས་རིང༌། །བདག་འཛིན་བདག་གིར་འཛིན་པ་ལ་དམིགས་ན། །གཏོང་སེམས་གོམས་ཀྱང་སྦྱིན་པའི་ཚུ་རོལ་ཏེ། །ཟག་པ་མེད་པའི་
ཕ་རོལ་ཕྱིན་དྲུག་ནི། །ལྷན་ཅིག་སྐྱེས་པའི་དེ་ཉིད་མཐོང་ལ་ཡོད། །བདེན་པས་མ་སྨིན་ཆུ་ཡི་དབང་བསྐུར་དང༌། །ཐར་པ་མ་བསྟེན་རིམ་པར་ཕྱེ་བ་ཡིས། །ལྷན་ཅིག་སྐྱེས་པའི་དེ་ཉིད་མཚོན་མི་ནུས། །གཟུང་འཛིན་རྡོ་རྗེ་བཙུན་མོའི་དབྱིངས་སུ་འགགས། །དེ་ཕྱིར་བྱིན་རླབས་བྲལ་བའི་དབང་བསྐུར་ལས། །ཡེ་ཤེས་ལྡན་ལ་མོས་གུས་གནད་དུ་བསྣུན། །རྡོ་རྗེ་སེམས་དཔའི་དེ་ཉིད་མ་ནོར་བ། །མཐོང་བའི་མོད་ལ་མཐོང་བྱེད་འགག་པར་འགྱུར། །སྣང་ཞེན་ཕ་རོལ་སྒྲོལ་ལ་ལྡན་མིན་གྱི། །འདུ་བྱེད་ལྷ་ཡི་ཕྱག་རྒྱར་བསྒྲུབ་དེས་ཅི། །ཡོངས་གྲུབ་གདན་གསུམ་འཁོར་ལོའང་ཀུན་རྫོབ་ཕྱིར། །ཆོས་ཀྱི་སྐུ་ལ་ཞལ་ཕྱག་ངས་མ་མཐོང༌། །དེ་ཕྱིར་ང་ནི་ཅི་ཡང་མི་བསྒོམ་སྟེ། །རང་སར་བཞག་པས་དམ་པའི་དེ་ཉིད་མཐོང༌། །མཐོང་ཞེས་བྱ་བའང་བླ་དྭགས་ཙམ་དུ་ཟད། །རི་བོང་རྭ་ཡི་རྣོ་བརྟུལ་བརྗོད་པ་བཞིན། །གཟུང་འཛིན་བཞོན་པ་དྷུ་ཏིར་བཅོམ་འདོད་ནས། །ལས་ཀྱི་རླུང་ལ་ཞབས་ཏོག་བྱེད་པ་ཡང༌། །རྦུང་པའི་སྒོང་སྟོངས་བཞིན་ཏེ་སྙིང་པོ་མེད། །ཡེ་ཤེས་རླུང་ལ་འགྲོ་དང་འོང་བ་བྲལ། །འགྲོ་འོང་བྲལ་བའི་བདེ་ཆེན་རྟོགས་འདོད་ན། །དག་བྱེད་རྒྱུན་གྱི་མ་སྙོགས་དྭངས་པ་བཞིན། །རིག་པའི་ཆོས་ཉིད་གདོད་ནས་
དག་པ་ལ། །སེམས་ཀྱིས་བསླད་པའི་ཞབས་ཏོག་མི་འཚལ་ལོ། །ཡིན་པ་མིན་པས་ངོ་བོ་ཀ་ནས་དག །མིན་པ་མིན་པས་རང་བཞིན་ལྷུན་གྱིས་གྲུབ། །ཡེ་ནས་གྲོལ་བས་གདོད་ཀྱི་གྲོལ་གཞི་མེད། །ཅེར་གྱིས་གྲོལ་བས་བདེན་པ་གཉིས་ཀྱིས་སྟོང༌། །ལྟ་སྒོམ་སྤྱོད་དང་ཟུང་འཇུག་མི་དམིགས་པས། །བསམ་མི་ཁྱབ་ལ་བསམ་པ་ཡ་རེ་ཆ། །ཡིན་པར་གྲུབ་པ་མེད་པའི་ཆོས་ཉིད་ལ། །ས་ལམ་དྲོད་རྟགས་རེ་བ་ལམ་ཐག་རེད། །མིན་པར་གྲུབ་པ་མེད་པའི་ངང་གདངས་ལ། །མ་ཡིན་དགག་གིས་འབད་རྩོལ་ཐང་རེ་ཆད། །གཞལ་དུ་མེད་ལ་གཞལ་བྱས་སྒྲོ་བཏགས་ནས། །བཅོས་ཤིང་བཅོས་པས་མཐོང་ལམ་དོན་ལ་བསྒྲིབས། །བདེ་གཤེགས་སྙིང་པོ་རང་བཞིན་མེད་པ་ལ། གློ་བུར་བློ་ཡིས་དྲང་ངེས་གཉིས་སུ་བཟུང༌། །འདུ་ཤེས་གཞུང་ནས་བསྟན་བཅོས་འཆད་པའི་རིང༌། །དག་པ་ཉིས་ལྡན་རྟོག་པའི་ཆོམ་པས་བཅོམ། །སྐྱེ་བ་མེད་པའི་སྟོང་པ་བཙོན་འཛིན་ལས། །འགག་པ་མེད་པའི་ལྷག་མཐོང་གསལ་བ་མཆོག །ཆེད་འཛིན་ཞིག་པའི་དྲན་པ་རང་གྲོལ་ལ། །ལམ་བདེན་རྫོགས་ན་རྫོགས་པ་ཆེན་པོ་ཡིན། །མཚན་གཞིའི་ངོ་ན་རྫོགས་པའི་བྱང་ཆུབ་དང༌། །ལོངས་སྤྱོད་རྫོགས་པ་རྫོགས་པའི་སངས་རྒྱས་སོགས། །
འགོག་བདེན་མཐར་ཐུག་སློབ་པ་མིན་པ་ལ། །ཆེན་པོའི་སྒྲས་བཏགས་རང་བཞིན་རྫོགས་པ་ཆེ། །སྤྲོས་བྲལ་དྭ་ཧའི་རྒྱང་གླུར་བླངས་པ་འདིའི། །ལྟ་བ་ངོས་གཟུང་མེད་པས་རྟག་ལྟའི་གཡང་ལས་གྲོལ། །སྒོམ་པ་གསལ་འགྲིབ་མེད་པས་ཆད་ལྟའི་ཕྲང་ལས་ཐར། །སྤྱོད་པ་བླང་དོར་བྲལ་ཡང་བག་ཆགས་རྗེས་མི་སོན། །རྒྱུ་འབྲས་དག་གྲོལ་ལས་འདས་དོན་འདི་མ་རྟོགས་ན། །སྣ་ཅིག་བསྲུངས་ནས་ཡོངས་རྫོགས་བཏང་བའི་བསླབ་པ་དང༌། །བྱང་ཆུབ་སེམས་གཉིས་མ་འབྲེལ་ཉི་ཚེའི་སྟོང་པ་ཉིད། །སྐྱེ་བ་བཞི་སྦྱང་རྣམ་དག་མི་ཤེས་ལྷའི་ཕྱག་རྒྱ། །བགྲང་འཕྲེང་བསྐོར་ཞིང་སྤྲོ་བསྡུས་སུན་པའི་བཟླས་བརྗོད་ཀྱིས། །ཡི་དྭགས་ཆེན་པོའི་གོ་འཕང་བསྙེན་རྣམས་དང༌། །བྱིས་པ་ཉེར་སྤྱོད་གནས་ལས་དཔག་པའི་ཕྱིར། །རིག་འཛིན་འཇིགས་བྲལ་གླིང་པས་བསྟན་ནས་སོང༌། །ཀློང་ཆེན་ནམ་མཁའི་རྡོ་རྗེའི་རྟོགས་ཆོས་ཡིན། །མཁྱེན་བརྩེའི་འོད་ཟེར་སྟོང་ལྡན་དེ་སྐད་ལོ། །དགེ་བས་གདོད་མའི་ས་ལ་བྱང་ཆུབ་ཤོག །གཏམ་ཚོགས་ལེའུ་རེ་བདུན་པའོ།། །།
གཏམ་ཚོགས་ལེའུ་རེ་བརྒྱད་པ། ཏནྟྲའི་ཕྱོགས་འཛིན་བཟློག་པའི་གཏམ་ཚིག་དོན་གྱི་མདོ་འགག
ཏནྟྲའི་ཕྱོགས་འཛིན་བཟློག་པའི་གཏམ། ཚིག་དོན་གྱི་མདོ་འགག་ཅེས་བྱ་བ། རྡོ་རྗེ་ཆོས་ལ་ཕྱག་འཚལ་ལོ། །སྒྲ་ཚིག་རང་ཚན་ལས་འདས་པས། །འཕགས་
པའི་བདེན་པ་གསུང་བ་ལ། །དྲི་ཡི་བཞོན་པ་མི་དམིགས་པ། །གསུང་གི་རྡོ་རྗེའི་བདག་ཉིད་དོ། །དུས་སྦྱོར་བཅུ་གཉིས་ལས་ཀྱི་རླུང༌། །རྟོག་པའི་བཞོན་པར་གྱུར་པ་ལས། །ངག་ཚིག་བརླང་པོའི་ལས་ལམ་བཞིས། །བསྟན་པ་དཀྲུགས་པ་བསྟན་བཅོས་མིན། །གང་ཞིག་མཉམ་པར་མ་གཞག་ཅིང༌། །ཕྲ་མ་སྔ་བཙན་རྗེས་སོན་པའི། །ཚིག་ངན་རྦབ་ཏུ་ལྟུང་བ་དེ། །སླར་ལ་ལོག་བསྐྱོད་གསེར་སོགས་ཀྱི་ཀྱང་རྨ་རྨན་བཞིན། །སྔ་འགྱུར་ཕལ་དང་གསར་མ་ཡང༌། །མང་དག་བོད་ཀྱིས་བྱས་སོ་ཞེས། །སྨྲས་པས་རྨོངས་ལས་རྨོངས་ཆེན་ཀྱང༌། །ཆོས་སྤོང་དམ་ཚིག་བཞིན་དུ་བསྲུང༌། །དེ་ལ་བོད་མར་སྒྲོ་བཏགས་པ། །ཕལ་ཆེར་རྒྱ་གཞུང་ལུང་དང་ནི། །རྒྱ་དཔེས་ཁ་ཚོན་བཅད་པའི་ཚུལ། །གཟུ་བོར་གནས་ལ་ཡོངས་སུ་གྲགས། །ལར་ནི་ཁྱོད་ཀྱིས་འདོད་པའི་ལུགས། །རྒྱ་ནས་བྱུང་ཚད་ངོ་མཚར་ལ། །བོད་དུ་བྱུང་ཚད་ངན་ངོན་ན། །དེང་སང་བཤད་སྒྲུབ་བྱེད་པ་ཀུན། །རྒྱ་གཞུང་ཁུངས་སུ་འདྲེན་པ་ལས། །བོད་ཀྱི་སྟན་བཅོས་འབའ་ཞིག་ཡིན། །རང་གིས་མ་མཐོང་མ་ཐོས་པ། །ཙམ་ཞིག་ཚད་མའི་དཔང་ཡིན་ན། །ལུང་གི་དམ་ཆོས་ཐམས་ཅད་ནི། །འདུས་བྱས་ཉིད་ཕྱིར་རིམ་པས་ནུབ། །ད་ནི་ཀླ་ཀློ་འབའ་ཞིག་གིས། །བཀབ་
པས་རྒྱ་གར་ཡུལ་ཀུན་ན། །རྒྱལ་བསྟན་གྲགས་པ་མེད་པའི་ཕྱིར། །སྡེ་སྣོད་གསུམ་དང་རྒྱུད་སྡེ་ཀུན། །སྒྱུར་བྱེད་ལོཙཱ་དེ་དག་གིས། །བརྩམས་ཞེས་རྒོལ་ན་ཅི་ཞིག་སྨྲ། །ཁྱད་པར་རྡོར་སེམས་སྒྱུ་དྲྭ་དང༌། །ཕུར་པ་ཡེ་ཤེས་རྩེ་མོ་སོགས། །རྒྱུད་ཀྱི་དངོས་པོ་བཅུ་ཚང་ཞིང༌། །ཚིག་དོན་ཕུན་སུམ་ཚོགས་པ་རྣམས། །སྒྱུར་བྱེད་ལོ་ཙཱས་བྱས་ཟེར་ན། །བྱས་པ་དེ་ཀས་ཆོས་གོ་ཆོད། །སྤངས་རྟོགས་ཐུགས་རྗེ་རྫུ་འཕྲུལ་ཀུན། །སངས་རྒྱས་ཉིད་ཀྱི་ཕྲིན་ལས་ཕྱིར། །གྲུབ་འབྲས་བསླུ་བ་མེད་པའི་ཚུལ། །སྡུད་པ་ཚིགས་སུ་བཅད་པ་ལས། །རྒྱལ་བའི་ཉན་ཐོས་གང་ཞིག་སོགས། །གསུངས་དང་དེ་བཞིན་རིགས་པ་གཞན། །རྡོ་རྗེ་སྙིང་པོའི་སྤྱི་བོ་རུ། །ཕྱག་བཞག་སྐུས་བྱིན་བརླབས་པ་ལས། །མདོ་སྡེ་ས་བཅུ་པ་བཤད་དང༌། །འཇམ་དཔལ་དབྱངས་ལ་མ་སྐྱེས་དགྲའི། །འགྱོད་བ་སེལ་བར་རྗེས་གནང་དང༌། །སྤྱན་རས་གཟིགས་དང་ཤཱ་རའི་བུར། །ཐུགས་ཀྱིས་བྱིན་བརླབས་བཀའ་བྱུང་སོགས། །བཅོས་མ་ཡིན་པར་སྨྲའམ་ཅི། །དེ་བཞིན་རྨི་ལམ་དག་སྣང་ཡང༌། །མཆོག་གཟིགས་རྣམས་ལ་འགལ་ཟེར་ན། །སྟོན་པ་འདི་ཡིན་བྱིན་རླབས་ཀྱིས། །བྱའམ་ཤིང་བུ་རྡེའུ་དང༌། །པདྨོ་དག་དང་དཔག་བསམ་ཤིང༌། །རྔ་བོ་ཆེ་ལས་བྱུང་བ་ཡང༌། །རྒྱལ་བས་བྱིན་གྱིས་
བརླབས་པའི་ཕྱིར། །དེ་དག་བཀའ་ཞེས་བྱ་བར་འདོད། །བཤད་བྱར་ལས་བཤད་ཇི་ལྟར་དགག །ཁྱད་པར་རྡོ་རྗེ་འཆང་ཆེན་དང༌། །རྡོ་རྗེ་རྣལ་འབྱོར་མ་སོགས་ལས། །སྔགས་ཀྱི་རྒྱུད་ཚུལ་འདྲེན་པ་དེ། །བསྟན་པའི་ཆུ་འགོར་བསྙོན་དུ་མེད། །དེ་དག་ད་ལྟའི་བླ་མ་ལྟར། །རྣམ་སྨིན་ལུས་ཅན་ཡིན་ནམ་མིན། །ཡིན་ན་གཤེགས་བཞུགས་བལྟམས་པའི་གནས། །གང་ཡིན་གསལ་བར་སྨྲ་བའི་རིགས། །ཡེ་ཤེས་སྐུ་ཅན་ཡིན་ཟེར་ན། །དེ་ཡིས་སྒྲ་ཚིག་རང་ཚན་པའི། །རྒྱུད་སྡེ་འདི་ཙམ་གསུངས་པའི་གནས། །གང་ཡིན་ཐོས་པའི་དཔང་པོ་སུ། །གལ་ཏེ་གྲུབ་པ་མཆོག་རྣམས་ཀྱི། །རྣམ་པར་རིག་ལས་བྱུང་ཟེར་ན། །དེ་ཡང་དེ་ཡི་རྩོམ་ཆོས་ཕྱིར། །ཐོགས་མེད་ཞབས་ཀྱི་བྱམས་ཆོས་དང༌། །དུས་འཁོར་བསྡུས་རྒྱུད་སོགས་ཀྱང་མཚུངས། །རྒྱུ་མཚན་མེད་པའི་གཏན་ཚིགས་ཕལ། །རྟོག་གེས་དགོངས་བརྡ་སྙན་གསུམ་གྱི། །བརྒྱུད་ཚུལ་དབྱིངས་འཇལ་ལ་རྨོངས་ནས། །བདག་ཅག་གླང་པོ་ཆེ་རྣམས་ནི། །གཉིས་འཐུང་གཉིས་བཟའ་ཡིན་པའི་ཕྱིར། །མི་དང་ལྷ་དང་བྱོལ་སོང་ཡང༌། །སྣ་ཞགས་སྐྱོང་པ་ཅན་ནོ་ཞེས། །སྨྲ་དང་ཁྱད་པར་ཡོད་མ་ཡིན། །སྡེ་སྣོད་གསུམ་དང་དུས་འཁོར་སོགས། །སྟོན་པས་དངོས་སུ་གསུངས་པར་ཡང༌། །རྒྱ་བོད་ཀུན་ཏུ་སྒྲོ་
འདོགས་ན། །རྒྱུད་ནི་ཕུན་སུམ་ཚོགས་པ་ལྔའི། །གླེང་བཞིས་སྟོན་པ་ཤས་ཆེ་ཡང༌། །དེ་དག་གྲུབ་པ་མཆོག་རྣམས་ཀྱི། །སྤྱོད་ཡུལ་ཉིད་ལས་ཡོངས་གྲགས་སུ། །མཐོང་ཐོས་ངེས་པ་མེད་པའི་ཕྱིར། །རྒོད་འགྱོད་ཐེ་ཚོམ་ལ་སོགས་པ། །སྒྲིབ་པ་ལྔ་ཡི་རྗེས་འཇུག་ལས། །མཉམ་པར་གཞག་ན་བསོད་ནམས་འཕེལ། །དགེ་བས་ཆོས་སྤོང་ཉེས་པ་ཀུན། །རང་བཞིན་མེད་པར་དག་གྱུར་ཅིག །མ་ཧཱ་སནྡྷི་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་རེ་བརྒྱད་པའོ།། །།
གཏམ་ཚོགས་ལེའུ་རེ་དགུ་པ། བརྟོན་པ་བཞི་ལྡན་གྱི་གཏམ་ལོག་རྟོག་གི་གཉེན་པོ།
བརྟོན་པ་བཞི་ལྡན་གྱི་གཏམ་ལོག་རྟོག་གི་གཉེན་པོ་ཞེས་བྱ་བ། རྡོ་རྗོ་སྙིང་པོ་ལ་ཕྱག་འཚལ་ལོ། །རིག་པ་རང་ཤར་ལས། །གནས་ལུགས་ཡིད་དཔྱོད་ལས་འདས་པར་སྟོན་པའི་རྡོ་རྗེའི་གད་མོ་ཆེན་མོ་བཅུ་གཉིས་དང༌། །རྒྱུ་འབྲས་ལ་ཟློ་བའི་ཚིག་ཆེན་པོ་བརྒྱད་བསྟན་པར་དྲང་ངེས་ཤན་མ་ཕྱེད་པ་དང༌། །རྒྱུ་འབྲས་ངེས་དོན་དུ་སེམས་པ་དག་རང་བཞིན་དག་པའི་ཆོས་ལ་ཡིད་གཉིས་ཟ་བའི་ལོག་རྟོག་བསལ་བར་བྱའོ། །དེ་ལ་དང་པོ་རྡོ་རྗེའི་གད་མོ་ཆེན་པོ་བཅུ་གཉིས་ནི། ཆོས་ཉིད་ཡིད་དཔྱོད་ལས་འདས་པའི་དོན། སྟོན་པ་སྡུད་པ་པོ་ལ་ཅིག་ཅར་དུ་ངོ་སྤྲད་པའི་ཚུལ་གྱིས་སྟོན་ཅིང༌། དེ་ལྟར་སྟོན་པའི་དུས་ཙམ་ནས་སྟོན་བྱ་སྟོན་བྱེད་ཉིད་ལའང་རང་བཞིན་མ་གྲུབ་པའི་ཆོས་ཉིད་ཀྱི་ཀློང་དུ་རྒྱལ་བའི་ཚུལ་གྱི་རྡོ་རྗེའི་
གད་མོ་སྟེ། མཚན་བརྗོད་ལས་ཀྱང་གད་རྒྱངས་ཧ་ཧ་ངེས་པར་སྒྲོག །ཧི་ཧི་ཞེས་སྒྲོགས་འཇིགས་པར་བྱེད། །གད་མོ་ཆེན་པོ་གད་རྒྱངས་ཆེ། །རྡོ་རྗེའི་གད་མོ་ཆེར་སྒྲོག་པ། །ཞེས་པ་ལྟར་རོ། །གཉིས་པ་ཚིག་ཆེན་པོ་བརྒྱད་ཀྱི་དོན་ནི། ཆོས་ཉིད་རྟོགས་པའི་ཚེ་གཤིས་ལ་དགེ་སྡིག་མ་གྲུབ་པའི་གཏན་ཚིགས་དཔེས་མཚོན་ནས་བཤད་པ་སྟེ། འདི་ལྟར་རྣམ་པར་ཤེས་པའི་ཚོགས་བརྒྱད་དང་བཅས་པའི་གང་ཟག་རང་རྒྱུད་ལྡན་གྱིས་ཁམས་གསུམ་གྱི་སེམས་ཅན་ཐམས་ཅད་དུས་གཅིག་ལ་བསད་པ་དང༌། དེ་ལས་ལྡོག་པའི་དགེ་བ་བསྒྲུབས་པ་གཉིས་ལ་ཁྱད་པར་མེད་ཅེས་རྒྱུ་འབྲས་ཆད་པར་སྟོན་པའི་དོན་མ་ཡིན་ཏེ། དགེ་སྡིག་རྣམ་རྟོག་གིས་བཟོས་པ་ཡིན་པས་ཆོས་ཅན་རྒྱུ་འབྲས་ཀྱི་རྗེས་སུ་འབྲང་ཞིང༌། དེའི་ལས་འདག་ཚུལ་ལའང༌། མྱོང་བས་འདག་པ། གཉེན་པོས་འདག་པ། བཤགས་པས་འདག་པའི་ཚུལ་གསུམ་ཡོད་པའི་ཕྱིར་རོ། །ཆོས་ཉིད་དོན་དམ་གྱི་རྗེས་སུ་སོན་པའི་ཚེ་སྔོན་བྱས་ཀྱི་ལས་ཐམས་ཅད་རྟོགས་པས་འདག་པའི་ཚུལ་སྐབས་འདིའི་བརྗོད་དོན་ཏེ། ཕུང་པོ་ལྔ་དང་ཚོགས་བརྒྱད་དག་ན་ཀུན་གཞིའི་སྟེང་དུ་ལས་སྔ་མས་བཞག་པའི་བག་ཆགས་ཟད་པས་དགེ་སྡིག་ལ་རྟེན་གཞི་མེད་དེ། དབུས་མ་ལས། དེ་ཡིས་སྡིག་དང་བསོད་ནམས་ཀྱི། །ཆ་གཉིས་རྣམ་པར་རྟོག་པ་སྟེ། །
ཞེས་པ་ལྟར། ཆོས་ཉིད་ཀྱི་གཤིས་ལ་དེ་ལྟར་མ་གྲུབ་པའི་ཚུལ་འཕགས་པ་སྲིད་པ་འཕོ་བ་ཞེས་བྱ་བའི་མདོ་ལས་ཀྱང༌། མིག་གིས་གཟུགས་རྣམས་མི་མཐོང་ཞིང༌། །ཡིད་ཀྱིས་ཆོས་རྣམས་མི་རིག་པ། །དེ་ནི་བདེན་པ་མཆོག་ཡིན་ཏེ། །དེ་ལ་འཇིག་རྟེན་མི་དཔོགས་སོ། །ཞེས་སོ། །དེ་ལྟར་མ་རྟོགས་པའི་དུས། སྲོག་གཅོད་པ་ལ་མཚོན་ན། གསད་བྱ་ནི་མིང་གཟུགས་ཀྱི་ཕུང་པོ་ཡིན་ལ། གསོད་བྱེད་ནི་འདུ་ཤེས་ཀྱི་ཕུང་པོ། དེའི་ལས་རྒྱུན་ལས་འབྲེལ་ཆགས་སུ་རྟོགས་པ་ནི་ཚོར་བའི་ཕུང་པོ། དེ་ཐམས་ཅད་ལ་ཁྱབ་བྱེད་རྣམ་པར་ཤེས་པའི་ཕུང་པོ་ནི་ཀུན་འབྱུང་བ་ཅན། དེ་དག་ལ་བརྟེན་ནས་ཕྱིས་སྡུག་བསྔལ་འདུ་བྱེད་པ་སྟེ། དེ་ལྟ་བུའི་ཕུང་པོ་ལྔ་པོ་རྣམས་ནི་ཆོས་ཉིད་དང་ནམ་ཡང་ལྷན་ཅིག་གནས་པ་མིན་པས་སྟོང་ཉིད་རྟོགས་པའི་ཚེ་སྔོན་བྱས་ཀྱི་སྡིག་པས་གནོད་པ་བསྐྱལ་བ་མེད་ལ། ཕྱི་མ་ཉེ་བར་ལེན་པའི་ས་བོན་ཀྱང་ཟད་པའི་ཕྱིར་ན། ཇོ་བོ་ལ་སྟོང་ཉིད་རྟོགས་པས་སྡིག་པ་བྱས་ན་གནོད་དམ་མི་གནོད་ཞུས་པས། སྟོང་ཉིད་རྟོགས་ན་སྡིག་པ་བྱ་དོན་མེད་ཅེས་གསུངས་པས་མཚོན་ནོ། །དེ་བཞིན་དུ་ཆོས་ཉིད་རྟོགས་པའི་དུས་ན་ལམ་བདེན་སྤངས་པའི་ཕྱིར་རྣམ་པར་ཤེས་པའི་ཚོགས་བརྒྱད་ལ་བརྟེན་པའི་དགེ་བ་དང་དགེ་བའི་འབྲས་བུ་བདེ་བ་གཉིས་ཀའང་མེད་པས་སེམས་
ཅན་གྱི་ཁམས་རྒྱ་མཚོ་ལ་ཕན་བཏགས་པའི་དགེ་བའང་མེད་ཅེས་བསྟན་པ་ཡིན་ནོ། །འདི་ལྟར་མ་རྟོགས་བཞིན་དུ་རྒྱུད་སྡེ་ཟབ་མོའི་དོན་ལ་སྒྲོ་སྐུར་བྱེད་པའི་གཉིས་འཐུང་གཏི་མུག་གི་ལུས་སྟོབས་རྒྱགས་པ་གང་དག་ལ་འདི་སྐད་ཅེས་འདོམས་ཏེ་ཁྱོད་ཀྱིས་འདོད་པ་ལྟར་ན། སྟོན་པས་འཁོར་ལོ་དང་པོར་དགེ་སློང་དག་སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པ་མངོན་དུ་བྱའོ། །ལམ་རྒྱུད་ལ་བསྟེན་པར་བྱའོ། །ཞེས་རྒྱུ་ཀུན་འབྱུང་ལ་བརྟེན་ནས་འབྲས་བུ་སྡུག་བསྔལ་འབྱུང་བའི་གཉེན་པོར་འགོག་ལམ་གྱི་བདེན་པ་དྲང་དོན་དུ་བསྟན་བཞིན་དུ། ཡང་འཁོར་ལོ་བར་པའི་ཚེ། སྡུག་བསྔལ་བ་དང༌། ཀུན་འབྱུང་བ་དང༌། འགོག་པ་དང། ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ་ཞེས་ངེས་དོན་གྱི་བདེན་པ་གཉིས་བཤད་པའི་འགལ་བ་ལྟག་སྤྲོད་གང་གིས་སྤོང༌། ལར་ཡང་ཆོས་ནི་ཚིག་ལ་མི་རྟོན་དོན་ལ་རྟོན། ཀུན་རྫོབ་ལ་མི་རྟོན་དོན་དམ་ལ་རྟོན། དྲང་དོན་ལ་མི་རྟོན་ངེས་དོན་ལ་རྟོན། རྣམ་ཤེས་ལ་མི་རྟོན་ཡེ་ཤེས་ལ་རྟོན་པའི་རྣམ་འབྱེད་འཕགས་པ་དྲི་མ་མེད་པར་གྲགས་པས་བསྟན་པ་དང༌། མདོ་དང་རྒྱུད་སྡེའི་གསང་ཚིག་རྣམས་མཐའ་དྲུག་དང་ཚུལ་བཞིའི་མན་ངག་ལ་བརྟེན་ནས་གསུང་རབ་བལྟ་བའི་ལྡེ་མིག་མེད་
བཞིན་གྱ་ཚོམ་དུ་བརྒལ་ནས་དགག་བསྒྲུབ་དང་ཐེ་ཚོམ་སྤོང་ལེན་ལ་སོགས་པའི་ཀུན་དཀྲིས་དམ་པོས་རང་ཉིད་འཆིང་བ་ལས། གསུང་རབ་འཆིང་བ་མ་ཡིན་པས། ཆོས་མིག་རྡུལ་དང་བྲལ་བ་མ་ཐོབ་བར་དུ་ཕོ་ཚོད་ཀྱི་ཚད་མས་ངེས་དོན་གྱི་གསང་ཚིག་ཆེན་པོ་རྣམས་ལ་གཞལ་ན་རྩ་ལྟུང་དགུ་པའི་ལམ་ནས་ངན་སོང་དུ་འདྲེན་པའི་ཚུལ་འཕགས་པ་རྣམ་པར་འཐག་པ་བསྡུས་པ་ལས། འདི་ལ་མི་བླུན་པོ་ཁ་ཅིག་དེ་བཞིན་གཤེགས་པའི་ཐབས་ལ་མཁས་པ་མི་ཤེས་ཤིང་ཁོང་དུ་མ་ཆུད་པར་ངའི་ལྡེམ་པོ་དག་ལ་འདི་སྐད་དུ། འདི་ནི་རུང་ངོ༌། །འདི་ནི་མི་རུང་ངོ་ཞེས་ཟེར་ཏེ། དེ་ལྟ་བུ་དེ་དག་ནི་དམ་པའི་ཆོས་སྤོང་བ་ཡིན། དེ་དག་ནི་དེ་བཞིན་གཤེགས་པ་ལ་སྐུར་བ་འདེབས་པ་ཡིན་ཏེ། རྒྱུ་དེས་ན་དེ་དག་ནི་སེམས་ཅན་དམྱལ་བ་པ་ཞེས་པ་འཆད་དོ། །མི་ཕམ་པ་མ་འོངས་པའི་དུས་ཕྱི་མའི་ཚེ། ཕྱི་མའི་དུས་ལྔ་བརྒྱ་པ་ཐ་མ་ལ་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་བྱང་ཆུབ་སེམས་དཔར་ཁས་འཆེ་བར། སྔོན་མུ་སྟེགས་ཅན་དུ་གྱུར་པ། སྨོན་ལམ་གྱི་དབང་གིས་དེ་བཞིན་གཤེགས་པའི་བསྟན་པ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་ཕྱོགས་གཅིག་ལ་སྤྱོད་པ། གཉེན་ལ་གདུང་བ།
རྙེད་པ་དང༌། བཀུར་སྟི་ལ་ཆགས་པ། ཁྱིམ་ལ་སེར་སྣ་བྱེད་པ། ཁྱིམ་སུན་འབྱིན་པར་བྱེད་པ། མདོག་ངན་པ། དམན་པ་ལ་མོས་པ། ཀ་བློ་མི་བདེ་བ། མ་གྲག་པ། རིགས་དམའ་བ། ཡོ་བྱད་ལ་ཡོངས་སུ་ཆགས་པ། ཆོས་ལ་བདེ་བར་གནས་པའི་ཟས་ཐམས་ཅད་དང་བྲལ་བ། ཏིང་ངེ་འཛིན་གྱི་ཟས་ལ་ཤིན་ཏུ་རིང་ཞིང་རྣམ་པར་རིང་བ། སྒྱུ་དང་གཡོ་ལ་གནས་པ་དག་གཞན་དུ་སྨྲ་ཞིང་གཞན་དུ་བྱེད་དེ། དེ་དག་མི་ཤེས་བཞིན་དུ་ངེད་ནི་ཤེས་པ་དང་ལྡན་ནོ་ཞེས་ཟེར། མི་མཁས་བཞིན་དུ་ངེད་ནི་མཁས་སོ་ཞེས་ཟེར་ཏེ། ཞེས་དང༌། མི་ཕམ་པ་ང་ནི་སེམས་ཅན་རྣམས་ཀྱི་དོན་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་གངྒའི་ཀླུང་གི་བྱེ་མ་སྙེད་དུ་འགྲོ་ཞིང་དེར་ཡང་མོས་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་སྟོན་ན། དེ་ནི་བྱང་ཆུབ་སེམས་དཔར་ཁས་འཆེ་བ། བྱང་ཆུབ་སེམས་དཔའ་དམུ་རྒོད། བྱང་ཆུབ་སེམས་དཔའ་ལ་སྐུར་པ་འདེབས་པ། བརྫུན་དུ་སྨྲ་བ། ཐོས་པ་ཉུང་བ་དེ་དག་ངའི་བྱང་ཆུབ་གཉིས་ཀྱིས་རབ་ཏུ་ཕྱེ་བ་མ་ཡིན་པ་འདི་ལ་གཉིས་སུ་སྨྲ་སྟེ། འདི་ལ་ནི་བྱང་ཆུབ་སེམས་དཔས་བསླབ་པར་བྱ། འདི་ལ་ནི་བྱང་ཆུབ་སེམས་དཔས་བསླབ་པར་མི་བྱའོ་ཞེས་ཟེར་ཏེ། སེམས་དེས་དེ་བཞིན་གཤེགས་པ་ལ་སྐུར་པ་འདེབས་སོ། །ཆོས་སྤོང་
ངོ༌། །དགེ་འདུན་ལ་སྨོད་དོ། །དེ་དག་ལུས་ཞིག་སྟེ་ཤི་ནས་སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཏེ། དེ་དག་དེར་བསྐལ་པ་མང་པོ་དང༌། བསྐལ་པ་བརྒྱ་ཕྲག་མང་པོ་འདས་ནས་ཐར་པ་འཐོབ་སྟེ། ཡང་དེ་དག་དབུལ་པོའི་རིགས་སུ་སྐྱེ་བར་འགྱུར་རོ། །ཞེས་པ་ལྟར་རོ། །འདི་ལྟར་ཐོས་པ་ཉུང་ཞིང་བློ་གྲོས་བླུན་པོ་དག་གིས་དྲང་ངེས་ལྡེམ་དགོངས་ཤན་མི་ཕྱེད་པས་དགེ་སྡིག་རྣམ་སྨིན་མཉམ་པར་སྟོན་པའི་ལུང་ལ་སྐྲག་པ་སྐྱེ་བ་བདེན་དུ་ཆུག་ཀྱང༌། ལུང་དེ་དག་བསྟན་པ་ཡོངས་རྫོགས་ཀྱི་བསྟན་བཅོས་ཆེན་པོའི་ཁོང་ན་གནས་ཤིང༌། བསྟན་བཅོས་རྩོམ་པ་པོའི་གང་ཟག་དོན་འཕགས་པ་འཇམ་དཔལ་གྱི་སྤོབས་པའི་རྒྱུན་ཡང་གཅོད་པ་ལི་ཙཱ་བྱི་དྲི་མེད་གྲགས་པ་དང་གཉིས་སུ་མེད་པས་ཚིག་དོན་དེ་དག་ལ་སྐྱོན་ཆགས་ན་ལུང་དེ་འདྲེན་པར་མི་སྲིད་ལ། དེ་དག་གི་དོན་ཅི་འདྲ་ཞིག་སྟོན་པར་འགྱུར་སྙམ་དུའང་སེམས་མི་ཤེས་པ་དེ་ནི་རང་ཉིད་བསྟན་བཅོས་ཀྱི་བདག་པོ་ཉིད་ལས་ལྷག་པ་ཙམ་དུ་ང་རྒྱལ་བས་རྫོགས་པའི་སངས་རྒྱས་ལ་གོའུ་ཏ་མ་ཁྱོད་ཀྱིས་སུ་ལ་ཚངས་པར་སྤྱད་ཟེར་བ་དང་མཚུངས་ཤིང༌། རང་ཉིད་ཀྱི་རྟོག་དཔྱོད་རྣོན་པོར་རློམ་པ་དེ་ཉིད་སྐྱོང་བྱེད་རྒན་པོའི་མཚན་ཉིད་དུ་བསྟན་པ་ཤེས་པར་བྱས་ནས་ཆོས་སྣང་བའི་སྒོ་དད་པ་དང་དག་སྣང་གི་ཕྱོགས་
ལ་བསྙེན་པར་བྱའོ། །ཞེས་པའང་རྒྱུད་ལུང་ཟབ་མོ་ལ་བསྟིང་ཚིག་སྨྲ་བ་དག་ལ་སྙིང་རྗེའི་བསམ་པས་ཨ་བྷ་ཡ་དྭཱི་པས་སོ། །གཏམ་ཚོགས་ལེའུ་རེ་དགུ་པའོ།། །།
གཏམ་ཚོགས་ལེའུ་བདུན་ཅུ་པ། ཤེས་རབ་ཀྱི་གཏམ་ཟབ་མོ་སྣང་བ།
ཤེས་རབ་ཀྱི་གཏམ་ཟབ་མོ་སྣང་བ་ཞེས་བྱ་བ། ཡུམ་ཆེན་མོ་ལ་ཕྱག་འཚལ་ལོ། །སྒྲ་ལ་བརྟེན་ནས་ཚིག་འབྱུང་སྟེ། ཚིག་ལ་བརྟེན་ནས་དོན་ངོ་ཤེས། །དོན་གྱི་དམ་པ་ཆོས་ཉིད་ཕྱིར། །ཀ་དག་སྒྲ་དོན་མཁྱེན་ལགས་སམ། །ཀ་ནི་མགོ་འམ་ཐོག་མའི་མིང༌། །ཡི་གེའི་ཕྱི་མོ་གཉིས་ཀྱིའང་སྤྱི། །དེ་བཞིན་ཞིང་གི་ཆུ་མགོ་ལའང༌། །ཀ་ཞེས་འཇིག་རྟེན་ངེས་པར་སྒྲོག །གང་ཕྱིར་བདེ་གཤེགས་སྙིང་པོ་ནི། །སེམས་ཅན་རྣམས་ཀྱི་ཤེས་རྒྱུད་ལ། །ཉི་མ་སྤྲིན་སྤུབས་གཏུམས་པ་ལྟར། །གློ་བུར་དྲི་མའི་དག་བྱ་ཡིས། །བསྒྲིབས་པ་ཙམ་ལས་སེམས་ཅན་གྱི། །དུས་ན་ངན་དུ་སོང་བ་དང༌། །སངས་རྒྱས་དུས་ན་བཟང་དུ་མེད། །ཚོགས་བརྒྱད་སྒྲིབ་གཡོགས་བསལ་ཙམ་ནས། །རང་བཞིན་རྣམ་དག་ཡིན་པའི་ཕྱིར། །གདོད་ནས་དག་པའི་གཏན་ཚིགས་སུ། །ཀ་དག་ཅེས་སུ་སྒྲ་དོན་འབྲེལ། །དེ་ཕྱིར་སེམས་ཉིད་ཐོག་མ་ནས། །གྲུབ་མཐའི་ཞེན་པས་མ་བསླད་ཅིང༌། །ཚོགས་བརྒྱད་རྗེས་སུ་མ་སོན་པ། །བླ་མའི་དྲིན་གྱིས་ཅར་མཐོང་དུ། །རང་ངོ་སྤྲད་པའི་དོན་པོ་ནི། །མ་བཅོས་མ་བསླད་
དེ་བཞིན་གཤེགས། །སྨྲ་བསམ་བརྗོད་བྲལ་ལྷན་ཅིག་སྐྱེས། །ཡུལ་དང་ཡུལ་ཅན་རྣམ་ཤེས་ཚོགས། །ཀ་ནས་དག་པས་སྤྲོས་བྲལ་ཡིན། །དེ་ལ་ལུང་གི་དཔང་པོ་ནི། །འདི་ལ་བསལ་བྱ་ཅི་ཡང་མེད། །ཅེས་པ་ཀ་ནས་དག་པ་ལས། །སྒྲིབ་བྱེད་བསལ་དུ་མེད་པར་བསྟན། །གཞག་པར་བྱ་བ་ཅུང་ཟད་མེད། །ཅེས་པས་རང་ངོ་མཐོང་བ་ལས། །ལྷག་པའི་མཉམ་བཞག་བཅོས་མར་གསུངས། །ཡང་དག་ཉིད་ལ་ཡང་དག་བལྟ། །ཞེས་པས་བལྟ་བྱ་ལྟ་བྱེད་ལས། །འདས་པ་ཆོས་ཉིད་དྲན་པར་བསྟན། །ཡང་དག་མཐོང་ན་རྣམ་པར་གྲོལ། །ཅེས་པས་ངོ་བོ་ཉིད་མེད་དོན། །ཀ་དག་རྟོགས་ཚེ་གྲོལ་ཅེས་བཤད། །དེ་ཕྱིར་ཕུང་པོ་ལྔ་པོ་དང༌། །བྲལ་བ་བསམ་གཏན་ཕ་རོལ་ཕྱིན། །ཚོགས་བརྒྱད་དག་པ་ཤེར་ཕྱིན་དུ། །རྟོགས་ན་གང་ཟག་རྫོགས་པ་ཆེ། །དབུ་མའི་དོན་དང་མི་འགལ་ཞིང༌། །ཕྱག་རྒྱ་ཆེན་པོའི་འདྲ་འབག་ཅེས། །རང་བྱུང་རྡོ་རྗེའི་གསང་ཚིག་གོ །གཏམ་ཚོགས་ལེའུ་བདུན་ཅུ་པའོ།། །།
གཏམ་ཚོགས་ལེའུ་དོན་གཅིག་པ། ཤེས་རབ་སྙིང་པོའི་གཏམ་བསྟོད་ཕྱག་གིས་གསལ་བ།
ཤེས་རབ་སྙིང་པོའི་གཏམ་བསྟོད་ཕྱག་གིས་གསལ་བ། ཡུམ་ཆེན་མོ་སྤྲོས་པ་དང་བྲལ་བ་ལ་ཕྱག་འཚལ་ལོ། །སྨྲ་བ༵སམ༵་བརྗོད༵་མེད༵་ཤེས༵་ར༵བ་ཕ༵་རོལ༵་ཕྱིན༵། །སྨྲ་བ་ངག་ཡིན་ངག་གི་ངོ་བོ་རླུང༌། །བསམ་པ་སེམས་ཡིན་དེ་
ཡི་བྱེད་པོ་ཡིད། །ཡིད་ནི་ལས་ཀྱི་རླུང་སྟེ་རླུངས་སེམས་ལ། །བརྟེན་ནས་ཚོགས་དྲུག་སྐྱེ་བ་མཁྱེན་པར་མཛོད། །ཡུལ་དྲུག་བེམ་པོ་ཡུལ་ཅན་རིག་པ་སྟེ། །ཡུལ་དང་ཡུལ་ཅན་སྐྱེ་མཆེད་མ་འབྲེལ་ན། །བརྗོད་མེད་བློ་འདས་འཕགས་པའི་དབང་པོ་སྐྱེ། །ཐོས་དང་བསམ་པའི་ཤེས་རབ་རྣམ་གཉིས་ཀྱིས། །ཕ་རོལ་ཕྱིན་པའི་ལམ་བདེན་སྤངས་པའོ། །མ༵་སྐྱེས༵་མི༵་འག༵ག་ནམ༵་མཁའི༵་ངོ༵་བོ༵་ཉིད༵། མ་སྐྱེས་པ་ནི་སྟོང་པའི་ཆོས་ཉིད་དེ། །མོ་གཤམ་བུ་བཞིན་གདོད་ནས་ཡོད་མ་མྱོང༌། །མི་འགག་པ་ནི་སྣང་བའི་མཚན་ཉིད་དེ། །ཡོད་མ་མྱོང་བཞིན་རང་གསལ་འགག་པ་མེད། །སྟོང་པས་རྟག་མཐའ་གསལ་བས་ཆད་མཐའ་སྤངས། །དབུ་མར་མི་གནས་ནམ་མཁའི་ངོ་བོ་ཉིད། །སོ༵་སོར༵་རང༵་རིག༵་ཡེ༵་ཤེས༵་སྤྱོད༵་ཡུ༵ལ་བ༵། སོ་སོ་ཞེས་པ་ཐ་དད་རང་རང་དོན། །འཆིང་གྲོལ་གང་ཡང་གཞན་དང་ལྷན་ཅིག་མིན། །རང་གི་རང་རིག་ལྷན་སྐྱེས་ཡེ་ཤེས་ཀྱིས། །སྤྱོད་ཡུལ་བ་ལས་རྟོག་གེའི་བློ་ཡིས་མིན། །དུ༵ས་གསུ༵མ་རྒྱ༵ལ་བ༵འི་ཡུ༵མ་ལ༵་ཕྱ༵ག་འཚ༵ལ་ལོ༵། །འདས་པའི་དུས་མེད་གང་ནས་ཀྱང་མ་བྱུང༌། །མ་འོངས་དུས་མེད་གང་དུ་ཡང་མི་འགྲོ། །ད་ལྟའི་དུས་མེད་ཕུང་པོ་སྐྱེ་མཆེད་བྲལ། །དུས་གསུམ་དེ་ལྟར་རྟོགས་ན་རྒྱལ་བའི་ཡུམ། །གང་ལ་ལྟ་བ་མཇལ་བའི་ཕྱག་འཚལ་ལོ། །རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་དོན་གཅིག་པའོ།། །།
གཏམ་ཚོགས་ལེའུ་དོན་གཉིས་པ། ཡང་དེའི་དོན་བསྡུས་ཀྱི་གཏམ།
ཡང་དེའི་དོན་བསྡུས་ཀྱི་གཏམ་ནི། སྒྲ་རུ་མི་བཏུབ་བསམ་བརྗོད་མེད། །ཐོས་དང་བསམ་པའི་ཤེས་རབ་ཀྱིས། །ལམ་བདེན་སྤངས་པའི་ཕ་རོལ་ཕྱིན། །སྟོང་པ་ཉིད་ཕྱིར་མ་སྐྱེས་ལ། །རང་གསལ་མི་འགག་ཆོས་ཉིད་དོན། །ཡེ་གྲོལ་ནམ་མཁའི་ངོ་བོ་ཉིད། །དྲན་ཉམས་མི་མངའ་དོན་རབ་འབྱེད། །སོ་སོ་རང་གི་རིག་པ་དེས། །རྣམ་ཤེས་ལས་འདས་ཡེ་ཤེས་ཀྱིས། །སྤྱོད་ཡུལ་རྫོགས་པ་ཆེན་པོའི་ཞལ། །འདི་ནི་དུས་གསུམ་རྒྱལ་བའི་ཡུམ། །ཞེས་པའང་རིག་འཛིན་འཇིགས་བྲལ་གླིང་པས་སོ། །གཏམ་ཚོགས་ལེའུ་དོན་གཉིས་པའོ།། །།
གཏམ་ཚོགས་ལེའུ་དོན་གསུམ་པ། ན་ཚ་ལམ་འཁྱེར་གྱི་གཏམ།
ན་ཚ་ལམ་འཁྱེར་གྱི་གཏམ་ཞེས་བྱ་བ། བེམ་པོའི་ལུས་འདི་འབྱུང་བའི་བདག་ཉིད་ཅན། །འབྱུང་བ་དེས་བསྐྱེད་འདུ་བ་རྣམ་བཞི་ནི། །ལས་དང་རྐྱེན་གྱིས་རྣམ་པར་གྱུར་པ་ལ། །བྲོ་འཚལ་ཞེས་གྲགས་རྣམ་པར་མ་གྱུར་ཅིག །རྣམ་པར་གྱུར་ལ་བདག་གིར་འཛིན་པ་ནི། །སེམས་དང་སེམས་བྱུང་མ་རིག་གཞན་དབང་སྟེ། །གཟུགས་ལ་ན་ཟུག་དེ་ལ་དེར་འཛིན་ནི། །ཚོར་བའི་ཕུང་པོ་རྒྱུན་ཆགས་འདུ་ཤེས་ཏེ། །ཕན་ཚུན་ཉེ་བར་ལེན་ལས་འདུ་བྱེད་དེ། ཀུན་གྱི་རང་བཞིན་རྟོགས་པ་རྣམ་ཤེས་ཕྱིར། །རྣ་ཤེས་སེམས་ཡིན་སེམས་ནི་ཡོད་མེད་དུ། །དཔྱད་ན་གང་དུའང་མ་གྲུབ་རྟོགས་པའི་ཕྱིར། །ཕུང་པོ་ལྔ་པོ་
འདི་དག་རང་བཞིན་གྱི། །སྟོང་པར་ཡང་དག་རྗེས་སུ་ལྟ་བའི་ཕྱིར། །སེམས་ཀྱི་ཐོག་ཏུ་ནད་ཀྱི་ཁུར་མི་ལེན། །ནད་ཀྱི་ཐོག་ཏུ་རིག་པ་རྗེན་པར་ཞོག །རྗེས་ཐོབ་ཆ་ལ་བདེ་སྡུག་གཏོང་ལེན་དང། །ལས་ངན་ཟད་པ་ཡིན་སྙམ་དགའ་བ་སྒོམ། །ཚུ་རོལ་མཐོང་ཞིང་ཕ་རོལ་མི་མཐོང་བའི། །སྐྱེ་བོ་ཕལ་ཆེར་ཚེ་འདིའི་འཚོ་རྩིས་ལ། །སྡང་རྨོངས་ཆགས་པ་གསུམ་གྱི་རྒྱ་བྲེས་ནས། །དགེ་བའི་རི་དྭགས་གསོད་པ་གཟིགས་ལགས་སམ། །སེམས་རྒྱུད་ངེས་པ་འབྱུང་བའི་ཆུས་བརླན་ཞིང། །གཞན་གནོད་གཞི་བཅས་སྤོང་དང་ཆབ་གཅིག་པར། །དགེ་ལ་འདུན་དང་བསྙེན་དང་རྫོགས་པ་དེ། །དགེ་སྦྱོང་ཡིན་གྱི་མཚམས་སྤྲིན་རྒྱལ་མཚན་མིན། །མདོར་ན་ཆོས་ཀྱི་རྩ་བ་བྱང་ཆུབ་སེམས། །དེ་ཡི་ངོ་བོ་སྨོན་འཇུག་རྣམ་གཉིས་ཡིན། །མཐར་གྱི་དེའང་དོན་དམ་བྱང་སེམས་སུ། །རྟོགས་ན་ཚངས་གནས་བཞི་ལས་ཡང་དག་གོལ། །སངས་རྒྱས་འབྱུང་ལ་མཉེས་པར་མི་བགྱིད་པ། །སེམས་ཅན་ལས་ཡིན་དེ་ལ་ཆོས་བསྟན་པའི། །སྣོད་ཀྱིས་བསྐལ་ཡང་རིང་དུ་འདྲིས་བཞིན་པའི། །མོས་པ་བརྟན་པའི་གཟུར་གནས་ཁྱོད་གཅིག་ལ། །སྙུན་ལ་གདམས་ངག་འབོགས་པའི་ཚུལ་དུ་གདམས། །ཀུན་མཁྱེན་རྗེ་དང་རོང་པ་ཆོས་ཀྱི་བཟང། །དཀར་པོ་གསུམ་
དང་ཆོས་ཀྱི་བློ་གྲོས་སྡེ། །དངོས་དང་བཅས་པའི་ས་མཆོག་མ་ཎི་ཀཿ། །རང་གི་ཡུལ་དུ་མི་མཐོང་གཞན་དུ་མཐོང༌། །ཁྱོད་ལ་མཐོང་བ་ལེགས་པའི་བཀྲ་ཤིས་ཤོག །ཅེས་པའང་གཡོ་རུ་རྫོགས་ཆེན་པ་རང་བྱུང་རྡོ་རྗེས་སོ། །དེ་ལྟར་རིག་པ་དང་གཙུག་ལག་སྣ་ཚོགས་ཀྱི་དོན་འདོད་རྒྱལ་དུ་སྟོན་པ་གཏམ་གྱི་ཚོགས་ལེའུ་དོན་གསུམ་པའི་བདག་ཉིད་ཅན་གྱིས་ཡོངས་སུ་རྫོགས་པའོ།། །།དགེའོ།། །།དགེའོ།། །།དགེའོ།། །