གཏམ་ཚོགས་ལེའུ་དྲུག་པ། རྒྱལ་པོ་དང་དམངས་ལ་སྤྲིང་བའི་གཏམ་རབ་ཏུ་བྱེད་པའི་འཇིག་རྟེན་གསོ་བའི་སྨན།
རྒྱལ་པོ་དང་དམངས་ལ་སྤྲིང་བའི་གཏམ། རབ་ཏུ་བྱེད་པའི་འཇིག་རྟེན་གསོ་བའི་སྨན་ཞེས་བྱ་བ། ལྷ་མོ་དབྱངས་ཅན་མ་ལ་ཕྱག་འཚལ་ལོ། །
མདོ་ལས་ཆོས་ལྡན་རྒྱལ་པོ་ལ། །ཡན་ལག་རྣམ་པ་བཅུ་བཤད་དེ། །མང་པོའི་དབུས་ནས་བཀྲབས་པ་དང༌། །བློན་དང་བློ་གྲོས་གཡོན་ཅན་གྱིས། །དེ་ཡི་བརྟུལ་ཞུགས་མི་བརྫི་ཞིང༌། །འབངས་ལ་གནོད་པ་མེད་པ་དེར། །གནམ་གྱིས་བསྐོས་པ་ཞེས་སུ་གྲགས། །བྱ་བ་ཀུན་ལ་བརྟགས་མཁས་ཤིང༌། །རིགས་པའམ་མ་ཡིན་རྣམ་པར་ཕྱེད། །གཟུ་ལུམས་འཁོར་དུ་མི་ལྡན་ན། །འབངས་དང་གློ་བ་ཉེ་བར་འགྱུར། །བསམ་པ་མཆོག་ཏུ་དགེ་ན་ཡང༌། །ཐབས་མཁས་ཤེས་རབ་མཐུ་མེད་ན། །སྐྱེ་དགུ་བདེ་བར་སྐྱོང་མི་ནུས། །དེ་ཕྱིར་ལུགས་ཀྱི་བསྟན་བཅོས་བསླབ། །བྱ་བ་དང་ནི་མ་ཡིན་པའི། །གནས་ལ་དེ་མ་ཐག་མི་ཁྲོ། །ཐེག་པ་ཆེ་ན་དགྲ་ཟླ་ཉུང༌། །བདེ་བར་གནས་ན་བང་མཛོད་སྤེལ། །རྟག་ཏུ་བསོད་ནམས་འཕེལ་བའི་ཕྱིར། །རྒྱལ་སྲིད་ཆོས་ཀྱི་ལུགས་སུ་བསྐྱང༌། །ཧ་ཅང་མི་བསྲུན་ཚེར་མ་ལྟའི། །སྐྱེས་བུ་འཕེལ་ན་ཁྲིམས་ཀྱིས་གཞར། །དེ་ལྟ་མོད་ཀྱི་ཁྱུ་མཆོག་དང༌། །གླ་བ་སྲོག་དང་བྲལ་གྱུར་ཀྱང༌། །གི་ཝང་གླ་རྩི་ཡོད་པའི་དཔེས། །ངུར་སྨིག་གཟུགས་གནས་ཁྲིམས་འཆལ་ཡང༌། །ལྕགས་དང་དབྱུག་པས་གཞུས་པ་དང༌། །བཙོན་རར་འཆིང་དང་ཡན་ལག་གཏུབ། །སྟོན་པ་ཉིད་ཀྱིས་མ་གནང་ན། །ཚུལ་ཁྲིམས་ལྡན་ལ་སྨོས་ཅི་དགོས། །
བྱ་བ་རྩོམ་ལ་དཀྱིལ་ཆེ་ཡང༌། །ལས་མཐའ་རིང་ན་དེ་དང་དེ། །འགྲུབ་བམ་ཅིག་ཤོས་ཐེ་ཚོམ་ཕྱིར། །མྱུར་དུ་རྫོགས་ན་མཁས་པ་ཡིན། །སྤྱོད་པ་བརླང་པོས་ཡུལ་འཁོར་འབྲོས། །འཇིག་རྟེན་ན་ནི་ངེས་པ་དང༌། །བྱམས་པར་གྱུར་པ་ཆོས་རྒྱལ་ཞེས། །གུས་པ་ཁྱོད་ཀྱིས་མ་ཐོས་སམ། །སྐྱེ་དགུ་བདེ་བར་སྐྱོང་བ་ལ། །དེ་ཡི་ཀུན་སྤྱོད་རིག་པ་དགོས། །གནས་དང་གནས་མིན་མི་ཤེས་ན། །ཆོ་རིགས་བཙུན་ཡང་ལྐུགས་པ་ཡིན། །བྱ་བ་བདག་གིས་ལེགས་ཤེས་ཀྱང༌། །འགྱོད་པ་སྤངས་ཕྱིར་གྲོས་ཀྱིས་བསྒྲུབ། །དེ་ལྟར་བསྒྲུབས་ནས་སྡུག་བསྔལ་ཡང༌། །མི་འཇིགས་པ་དེ་བློ་ཆེན་ཡིན། །ཇི་ཙམ་རྒུད་པའི་མཐར་ལྷུང་ཡང༌། །དཀོན་མཆོག་རྣམ་གསུམ་མི་སྤང་ཞིང༌། །བཤེས་གཉེན་དམ་པའི་ངག་མཉན་པ། །དེ་ལ་ཆོས་ལྡན་རྒྱལ་པོར་གྲགས། །གལ་ཏེ་དེ་ལས་དགྲས་གཙེས་ཀྱང༌། །ཐབས་ལ་མཁས་པའི་ནན་ཏན་གསུམ། །ཐོག་མཐའ་བར་དུ་ཉམས་བསྟར་ལ། །འཐབ་མོ་ཞི་བའི་བརྟུལ་ཞུགས་བླང༌། །ཕྱི་དུས་འདི་ན་རྒྱལ་པོའམ། །བློན་པོ་དང་ནི་གཙོ་བོ་དག །མི་མཁས་གཏི་མུག་རང་བཞིན་ཕྱིར། །མཛའ་བའི་ཐབས་ལ་ནན་ཏན་བྱ། །དྲེགས་ལྡན་ཉིད་ཀྱང་ནོར་ལ་སྲེད། །གཡུལ་གྱི་ཕྱིར་ན་དེ་བཏང་སྟེ། །གྲོང་
ཁྱེར་ཕྱིར་དུ་གྲོང་ཡང་བཏང༌། །ནན་ཏན་བྱ་བ་གཉིས་པ་ཡིན། །སྐྱེས་རབས་ལས་ཀྱང་དེ་སྐད་དུ། །ཁྱིམ་གྱི་ཕྱིར་ན་གཅིག་བཏང་སྟེ། །སྲོག་གི་ཕྱིར་ན་ཁྱིམ་བཏང་ངོ༌། །ལྗོངས་ཀྱི་ཕྱིར་ན་གྲོང་ཁྱེར་ཏེ། །བདག་གི་དོན་ལ་མ་བཏང་བཤད། །དེས་ཀྱང་ཉེ་བར་མ་ཞི་ན། །དཔུང་གི་གཟི་བྱིན་མཐུ་བསྐྱེད་དེ། །ཕྱོགས་ནི་མང་པོ་ཉེ་བར་བཟུང༌། །དགྲ་ཟླ་འཇིགས་པའི་བརྟུལ་ཞུགས་རྔོམ། །ནན་ཏན་གསུམ་གྱིས་མ་ལྡོག་ན། །བདག་ནི་གཡུལ་ལ་སྤྲོ་བའང་མེད། །སྐྱེ་དགུ་ཕུང་བར་མི་འགྱུར་གྲང༌། །གྱུར་པ་ལས་ཀྱང་སླར་ལྡོག་གོ །སྡིག་པའི་ཕྱོགས་ལས་མ་རྒྱལ་ན། །སྲོག་ཀྱང་གཟུང་བར་ཡོང་མི་ནུས། །བསྟན་པ་ཉིད་ཀྱང་ཉམ་ཉེས་འགྱུར། །སྙམ་དུ་དྲན་པ་ཉེ་བར་གཞག །གཡུལ་གྱི་ཕྲུ་མ་ལ་གནས་པའི། །དཔའ་བོ་རབ་འབྲིང་ཐ་གསུམ་ལས། །ཐ་མ་ཉིད་ནི་ཐོག་མར་བཤམ། །རྟ་པའི་ཚོགས་ནི་རྒྱབ་ནས་སོ། །དེ་དག་བདེ་བར་བརྒལ་བ་དང༌། །བརྟུལ་ཞུགས་བརྟན་པར་འགྱུར་བ་དང༌། །བྱས་པ་གཟོ་བའི་གནས་སྟོན་ཕྱིར། །མི་དབང་ཉིད་ནི་ཕྱི་བཞིན་འབྲང༌། །དེ་ལྟར་ཐབས་ལ་མཁས་པ་ཡིས། །ཕ་རོལ་གྱི་ནི་དཔུང་བཀུམ་མམ། །རྨ་བྱུང་ན་ཡང་རྒྱལ་པོ་ལ། །ཁ་ན་མ་ཐོ་ཉུང་བར་འགྱུར། །
དེ་བཞིན་འདུ་ཤེས་བརྒྱད་ལ་བསླབ། །ཡུལ་འཁོར་ལ་ནི་བུ་བཞིན་དེ། །བྱམས་པའི་སེམས་ཀྱིས་མཐུན་པར་བལྟ། །སྤྱོད་པ་ཡུལ་ལ་ཁྲོ་བ་སྤང༌། །འཕྲལ་དུ་ཟས་དང་དབྱིག་གིས་བརྔན། །ཡུན་དུ་ཕན་དང་བདེ་བའི་ཕྱིར། །ཡན་ལག་བརྒྱད་དང་དགེ་བཅུའི་ཁྲིམས། །འཆའ་ཞིང་རི་རྒྱ་ཀླུང་རྒྱ་བསྡམ། །དཔྱ་ཁྲལ་རིགས་པར་བསྡུ་མོད་ཀྱི། །ལོ་ཏོག་ལ་ནི་སེར་བའམ། །དུས་ཀྱི་ཆད་པས་ཉམས་པའི་ཚེ། །འབངས་ལ་སྣུམ་ལྟར་འཚིར་བ་སྤང༌། །གལ་ཏེ་མི་བསྲུན་ཚར་གཅོད་ཀྱང༌། །དེ་ལ་ཁྲོ་བ་འགོད་པ་མིན། །སྨན་པས་ནད་ལ་གཏར་བསྲེགས་བཞིན། །སྐྱོན་བསལ་ཆོ་ག་ཡང་དག་བསམ། །འབངས་ལས་ཕྲོགས་པའི་ལོངས་སྤྱོད་ནི། །ཆེན་པོའི་རྒྱན་དུ་མཛེས་མ་ཡིན། །མཚོན་ཆའི་ཐབས་ལ་མཁས་གྱུར་ཀྱང༌། །རྔོན་པ་དཔའ་བོར་སུ་ཞིག་སྒོམ། །འཇིག་རྟེན་ན་ནི་དགྲ་འབྱུང་བའི། །ལེ་ལན་འཁོན་སེམས་ཉིད་ལ་གནས། །འཁོན་དང་ཁྲོ་བ་ཚར་བཅད་ན། །དགྲ་ཡང་མཛའ་བཤེས་འགྱུར་བ་སླ། །ཉེ་བ་ལྔ་ཡི་ཆར་གཏོགས་པས། །ཁྲིམས་ལྡན་མ་ལ་གཡེམ་མི་བགྱིད། །མེ་ལོང་གདོང་གི་གཏམ་རྒྱུད་བཞིན། །ཞལ་ལྕེ་ཉེ་འཁོན་མེད་པར་བཅད། །བདག་ཉིད་བསྲུང་བ་ཡིན་པའི་ཕྱིར། །
འཛའ་བཤེས་རྣམས་ལ་ཕྱི་ཕྱིར་བལྟ། །ཀུན་དང་བཤེས་པའི་རྟེན་འབྲེལ་འདིས། །དགྲ་བོ་མོད་ལ་མེད་པར་འགྱུར། །འཇིག་རྟེན་ཕ་རོལ་འགྲོ་བའི་ཚེ། །རྒྱལ་སྲིད་ལོངས་སྤྱོད་རྗེས་མི་འབྲང༌། །ནན་ཏན་ཆོས་ལ་བགྱི་བ་འདི། །བརྟུལ་ཞུགས་ཀུན་གྱི་ནང་ན་མཆོག །རྒྱལ་པོ་ལ་གདམས་པའི་རབ་ཏུ་བྱེད་པ་སྟེ་དང་པོའོ། །གཉིད་དང་རྨུགས་ལ་བརྐམ་པ་ཡི། །སྐྱེས་བུས་ལེགས་ཚོགས་ཐོབ་པ་མེད། །གལ་ཏེ་ཐོབ་ན་ལེ་ལོ་ཡི། །ཉེས་པ་བཤད་པ་བརྫུན་དུ་འགྱུར། །གང་ཞིག་སེར་སྣ་ལ་གནས་པས། །ལོངས་སྤྱོད་ཕུན་ཚོགས་ཐོབ་གྱུར་ཀྱང༌། །འཆི་ཚེ་ངན་འགྲོའི་གྲོང་ཁྱེར་དུ། །ལག་པ་སྟོང་པར་སོང་ཞེས་ཐོས། །འགྲོ་བ་གཞན་གྱི་སྲོག་གཅོད་པ། །དེ་ནི་བདག་ཉིད་གསོད་པ་ཡིན། །ཕ་རོལ་ཉམས་པ་སྨོས་ཅི་དགོས། །འཇིག་རྟེན་འདིར་ཡང་ཚེ་ཐུང་འགྱུར། །ཆང་ལ་དགའ་བའི་སྐྱེས་བུ་་ཡིས། །རིགས་དང་ཡོན་ཏན་བསྲུང་བ་མེད། །ཆེན་པོའི་གནས་དང་འབྱོར་པའི་དཔལ། །མཁས་པའི་སྨད་དང་ལྷན་ཅིག་ཉམས། །ལེ་ལོས་དོན་རྣམས་ཉམས་འགྱུར་ན། །གསར་པ་ཐོབ་པ་ག་ལ་ཞིག །སྙིང་སྟོབས་ཕུན་སུམ་ཚོགས་པའང༌། །བསྒྲིམ་པ་མེད་པས་མ་རུངས་བྱས། །གཞན་གྱི་ནོར་དང་ལོངས་སྤྱོད་ལ། །བརྣབ་སེམས་ཕྲག་དོག་
བསྐྱེད་པ་ནི། །མཛའ་བཤེས་འབྲོས་ཤིང་ཁྱིམ་ཐབས་ལ། །འདུ་བ་གཅོད་པའི་སྒོ་ཡིན་སྤང༌། །ཤིན་ཏུ་གཟུ་ལུམས་གཏུམ་པའི་མིར། །ཕ་མ་དག་ཀྱང་འབྲོས་བྱེད་ན། །སྐྱེ་བོ་གཞན་ལྟ་སྨོས་ཅི་དགོས། །ཁྲོ་བ་ཐུལ་ལ་འཁོར་འདབ་མང༌། །མང་དུ་ཟ་བ་མཁས་པ་མིན། །ཟས་ཀྱི་བུ་ལོན་ལྟ་ཞོག་གི །ལུས་ལྕི་དགེ་བ་ཉམས་འགྱུར་ལ། །མ་འཇུས་སྲོག་ལ་རྒོལ་བའང་ཡོད། །རྒོད་ཅིང་ཅ་ཅོ་ལ་དགའ་བ། །འགྱོད་པ་མང་པོའི་སྣོད་ཡིན་ཏེ། །དེ་ནི་ཆོས་ཀྱི་ལམ་གནས་ཀྱང༌། །བདེན་པ་གཉིས་ལ་རིང་དུ་གནས། །ཁ་ནི་སྡིག་པའི་སྒོ་ཡིན་པས། །མང་པོའི་གསེག་ཏུ་བསྒྲིམས་ཏེ་སྨྲ། །ཚིག་ངན་རྦབ་ཏུ་ལྷུང་བ་འདི། །གནོད་པ་མང་ལ་ལྡོག་པར་དཀའ། །ངེས་པར་བདེན་པའི་ཚིག་ཉིད་ཀྱང༌། །སྨྲའམ་ཅིག་ཤོས་མཁས་པས་བསྒྲིམ། །བདེན་སྨྲས་རང་ལ་གནོད་པའི་ཚུལ། །གཏུམ་པོ་རབ་སྣང་གཏམ་རྒྱུད་བཞིན། །མ་བསྡམས་སྐྱེ་བོ་བྱི་ལ་དགའ། །དེ་ལ་དེ་ཡི་ཁྱིམ་བདག་དང༌། །རང་གི་ཆུང་མའང་དགྲར་གྱུར་ནས། །འདི་ཕྱིར་སྡུག་བསྔལ་མང་པོ་མྱོང༌། །ཕྱུག་པོ་འདོད་ནས་མ་བྱིན་ལེན། །དབུལ་པོ་རིན་གྱིས་ཉོ་བ་སྟེ། །གྲགས་པ་ཤིན་ཏུ་ཉམས་པའི་མཐར། །ལུས་དང་ལོངས་སྤྱོད་གཞན་གྱིས་འཕྲོག །རྫུན་
དང་ཕྲ་མས་བྱ་བ་འགའ། །རེ་ཞིག་གྲུབ་ཀྱང་ཐ་མར་མིན། །སྲིན་བྱའི་རྫུན་གྱིས་བདག་ཉིད་ནི། །ལྟས་ངན་གནས་སུ་གྱུར་པ་བཞིན། །བསམ་ངན་བསྐྱེད་པའི་གང་ཟག་ལ། །བསོད་ནམས་རི་ཙམ་ཡོད་གྱུར་ཀྱང༌། །དེ་མ་ཐག་ཏུ་ཉམས་འགྱུར་ཏེ། །རྒྱལ་པོ་ང་ལས་ནུ་ལ་ལྟོས། །ལོག་ལྟས་རང་གི་དཔལ་ཉམས་པ། །འདི་ནི་གཞན་གྱིས་མི་ཤེས་ཏེ། །མ་སྐྱེས་དགྲ་ལ་རྒྱལ་ཕྲན་གྱིས། །གཡུལ་གྱི་ཕྲུ་མ་བཏབ་པ་བཞིན། །སྐྱེ་བོ་ཆོས་ལ་མི་གནས་ཀྱང༌། །ཕ་མ་ལ་ནི་བསྙེན་བཀུར་བྱ། །མཐོ་རིས་བགྲོད་པའི་ཐེམ་སྐས་གཅིག །དེ་ཉིད་ཡིན་པར་ཐུབ་པས་གསུངས། །སློང་བ་སྐྱེང་དུ་མི་འཇུག་གོ །བཅུག་ན་གཏན་གྱི་མཛོད་ཆུད་གསན། །སྤྱིན་པས་ཕྱི་མར་ཕན་པ་ཙམ། །གཏེར་དུ་སྦས་ཀྱང་འབྱུང་བ་མིན། །གལ་ཏེ་སློང་བའི་རེས་བབ་ན། །ངང་ཐུང་བསམ་སྤོབས་པའི་བློ་གྲོས་ཀྱིས་སངས་རྒྱས་ལ་བསྙེན་བཀུར་བའི་ཚེ་དབུལ་པོའི་རེ་བ་མ་ཐོབ་པས་སྟོན་པ་ལ་ཁོང་འཁྲུགས་ཤིང་བདག་རྒྱལ་པོར་གྱུར་ན་འདི་དག་གི་མགོ་བཅད་དོ་སྙམ་པ་སྐྱེས་པས་རང་ཉིད་ཀྱི་མགོ་ཤིང་རྟའི་འཁོར་ལོས་ཆད་པ་བཞིན་ངན་མི་བགྱི་སྟེ། །ཡིད་ནི་དུག་ཅན་ཉིད་ཀྱི་ཕྱིར། །གནོད་སེམས་རང་གི་ཐོག་ཏུ་འབྱུང༌། །ངེས་པར་འབབས་པོའི་དཔྱ་དང་ཁྲལ། །སྟོབ་པར་ནུས་བཞིན་མ་བསྟབས་ན། །
རྒྱལ་པོའི་བང་མཛོད་ཉམས་པའི་ཕྱིར། །ལ་ཡོགས་རྣམ་སྨིན་ཉིད་ལ་འཛེམ། །མི་ཡིས་འབད་ཀྱང་མི་ཐོབ་པའི། །ལོངས་སྤྱོད་ལྷ་ཡུལ་བསམས་པས་འབྱུང༌། །དེ་ནི་བསོད་ནམས་མཐུ་ཡིན་ཏེ། །རིགས་ངན་རྒྱལ་པོར་གྱུར་ལ་ལྟོས། །དེ་ཕྱིར་བསམ་པ་དགེ་བ་ལས། །བསོད་ནམས་ཐམས་ཅད་འདུ་བྱེད་དེ། །ལོ་བརྒྱར་འབད་ནས་ངལ་བྱེད་ལས། །ཉིན་གཅིག་བསོད་ནམས་བསགས་པ་མཆོག །དམངས་ལ་གདམས་པའི་རབ་ཏུ་བྱེད་པ་སྟེ་ལེའུ་གཉིས་པའི་བདག་ཉིད་ཅན་རྒྱལ་བའི་མྱུ་གུ་མཁྱེན་བརྩེའི་ལྷས་དཔལ་ལྡན་པདྨ་འོད་གླིང་དུ་སྦྱར་བའོ། །གཏམ་ཚོགས་ལེའུ་དྲུག་པའོ།། །།