གཏམ་ཚོགས་ལེའུ་བརྒྱད་པ། རྒྱལ་བུ་ལ་སྤྲིང་བའི་གཏམ་ཆར་སྤྲིན་གྱི་རོལ་མོ།
རྒྱལ་བུ་ལ་སྤྲིང་བའི་གཏམ་ཆར་སྤྲིན་གྱི་རོལ་མོ་ཞེས་བྱ་བ། བཅོམ་ལྡན་འདས་ཤིན་ཏུ་རྣམ་པར་ངེས་པ་གཟི་བརྗིད་ཀྱི་རྒྱལ་བོ་ལ་ཕྱག་འཚལ་ལོ། །ཤིན་ཏུ་ཞི་བ་དམ་པའི་དམ་པ་ཆོས་ཀྱི་དབྱིངས། །ཁ་སྦྱོར་བདུན་གྱི་ལོངས་སྤྱོད་མཐའ་ཡས་འཇིག་རྟེན་གྱི། །བཀོད་
པར་བཀྲམ་ཡང་སྡུག་བསྔལ་བདེན་པའི་མཚན་ཉིད་དང༌། །མཛའ་བ་མ་ཡིན་བདེ་ལྡན་ཞིང་གི་མགོན་དེས་སྲུངས། ༡ །དཀར་པོའི་ཆོས་རབ་ནོར་བུའི་གླིང་ནས་མཐོ་རིས་ཀྱི། །ཡོན་ཏན་བདུན་པའི་ཙིནྟ་མ་ཎི་བོད་ཆེན་པོའི། །མདོ་སྡེ་རྒྱལ་ཁབ་དགེ་བཅུས་སྐྱོང་པའི་ཕོ་བྲང་ཆེར། །སྲོང་བཙན་ཡུལ་བཟུང་མྱུ་གུ་གསར་པའི་འཁྲི་ཤིང་རྒྱལ། ༢ །མངའ་རིས་འཛིན་གྱི་སྐྱེད་ཚལ་ན། །སྡིག་ལྟའི་ཚང་ཚིང་ལ་ཆགས་པའི། །རྒྱལ་ཕྲན་གེལ་པ་མང་མོད་ཀྱི། །འཇིག་རྟེན་ཡང་དག་བལྟ་ལ་རིང༌། ༣ །ཐུབ་བསྟན་ས་ཟླའི་མུ་ཁྱུད་རྩིབས་སྟོང་གི །རྗེས་སུ་དཔུང་ཚོགས་ཡན་ལག་བཞི་འགྲོ་བའི། །མྱུ་གུ་གསར་པའི་གསར་པ་དེའི་རྣ་ལུང༌། །ཕུལ་བྱུང་གཏམ་གྱི་རོལ་མོས་སྙན་པར་བྱེད། ༤ །ཚུ་རོལ་མཛེས་པས་མ་བཀབ་མཐུན་པའི་ཡུལ། །དམ་པའི་མགོན་དང་བཤེས་པ་ལེགས་སྨོན་གཟུགས། །ལེགས་སྤྱད་བསོད་ནམས་རྣམ་འཕྲུལ་རྒྱལ་ཐབས་ཏེ། །འཁོར་ལོ་ཆེན་པོ་བཞི་ཡི་བདག་ཉིད་ཁྱོད། ༥ །སྐྱེ་མཆེད་ཟླ་བ་ཉ་བའི་དེ་མ་ཐག །རིན་ཆེན་གསུམ་ལ་འདུས་ཏེ་རེག་པའི་སྤྱན། །ཆོས་རབ་སྣང་བའི་སྒོ་བརྒྱ་དད་པ་ཡི། །འདུ་ཤེས་རོལ་རྩེད་གཟུགས་ལ་རྔོམ་དེ་མཚར། ༦ །ཉམ་ཆུང་ཞོ་ཤས་བརྟེན་པའི་སྲོག་ཅན་ལ། །སྙིང་རྗེ་གཞན་དབང་བཙའ་བའི་
རྣམ་རིག་ཅན། །གདུལ་དུ་རུང་བ་སྐྱེས་བུའི་མཚན་ཉིད་ཕྱིར། །བདེན་པར་སྨྲ་བ་འདི་ནི་ཆོས་ཀྱི་གཏམ། ༧ །མཐའ་ཡས་ཤེས་དང་ཤེས་བྱའི་མི་བརྗེད་གཟུང༌། །ཡི་གེའི་མིང་གཟུགས་ཕུང་པོ་གང་ཞིག་ནི། །རིག་བྱེད་ཚོར་དང་ཚིག་དོན་ཉིང་མཚམས་སྦྱོར། །འདུ་ཤེས་དེར་གཞུངས་བླང་དོར་ལས་འདུ་བྱེད། །སྐྱེ་བས་རྣམ་པར་རིག་བྱེད་འདྲི་ཀློག་བརྩོན། ༨ །མངོན་པར་མཐོ་དང་ངེས་ལེགས་དམ་པའི་སྒོ། །ཤེས་བྱ་ཤེས་བྱེད་རྒྱུ་རྐྱེན་ལས་འབྱུང་ན། །དགེ་བའི་བཤེས་དང་དགེ་བའི་གྲོགས་པོ་ཡི། །ཡོན་ཏན་རྫོགས་པ་ཉེ་བའི་འདུ་བར་བརྟེན། ༩ །ཆོས་ལྟར་བཅོས་ཀྱང་རྣམ་རིག་སྡིག་ཏོས་བཀབ། །ཚུ་རོལ་ལས་གཞན་ཕ་རོལ་ཆད་པར་བལྟ། །སྐྱེས་བུ་གསུམ་ཀའི་གདུལ་བྱ་མ་ཡིན་པ། །ཁྱིམ་པའམ་དྲང་སྲོང་རྒྱལ་མཚན་བཟུང་ཡང་སྲིངས། ༡༠ །ཁྱིམ་བདག་རིན་ཆེན་ལྟ་བུའི་མདུན་ན་འདོན། །རྩོད་པའི་དུས་ཀྱི་སྤོངས་པ་ལྟར་གྱུར་ཀྱང༌། །དྲང་ལ་དཀྱིལ་ཆེ་ཡིད་གཞུངས་བློ་གྲོས་ཅན། །དེ་ལྟ་བུ་ལ་བློན་པོའི་གནང་བ་བྱིན། ༡༡ །དུས་དང་དུས་ཀྱི་རོལ་རྩེད་མ་བཀག་ཀྱང༌། །བྱིས་དང་སྡིག་གྲོགས་སྙོམ་ལས་གསུམ་གྱིས་དུས། །གྲོན་པ་མེད་པར་ཕྱི་ནང་གཙུག་ལག་ལ། །རྣམ་རིག་གསལ་བའི་སྤོབས་པ་ཐོབ་ཀྱང་འཚལ། ༡༢ །
དགེ་བ་མ་ཡིན་བཅུ་དང་མྱོས་བྱེད་ཆང༌། །མུན་ནས་མུན་པའི་སྒོ་ལ་རྒྱབ་ཕྱོགས་ཏེ། །འཚོ་བ་བཟང་དང་རྣམ་སྨིན་ཚེ་སྦྱིན་སོགས། །མི་ཆོས་བཅུ་དྲུག་སྣང་ནས་སྣང་བའི་སྒོ། ༡༣ །མི་ཡི་ཆོས་ལུགས་ལེགས་པར་སྤྱད་པ་ནི། །སྟོན་པ་འཇིག་རྟེན་མཁྱེན་དང་བློ་གྲོས་་ཀྱི། །དབང་ཕྱུག་དྲང་སྲོང་རྣམས་ལ་གྲགས་པའི་ཕྱིར། །ལུགས་ཀྱི་བསྟན་བཅོས་རྣམས་ལ་འདྲིས་པར་སློབས། ༡༤ །རྒྱལ་རྣམས་ཆོས་ཁམས་རྒྱ་མཚོའི་རྡུལ་སྙེད་ལས། །དམ་བཅའ་སྙིང་པོ་བྱང་ཆུབ་སེམས་ཀྱི་དངོས། །གང་ལ་ཁྱིམ་གྱིས་བར་དུ་མི་གཅོད་པར། །དྲི་མ་མེད་པ་གྲགས་པའི་རྣམ་ཐར་སྐྱོངས། ༡༥ །དེ་ཡི་བློ་གྲོས་འཇམ་དཔལ་གཞོན་ནུས་ཀྱང༌། །དགབ་པར་མི་ནུས་སྨོན་དང་འཇུག་པའི་སེམས། །སྐྱེས་པ་རབས་དང་ཐེག་པ་ཆེན་པོ་ཡི། །སྡེ་སྣོད་དག་ལས་རང་སྟོབས་མཐུས་ཀྱང་བསྐྱེད། ༡༦ །ཐོག་མར་ཚངས་གནས་བཞི་ཡི་བློ་བཅོས་ནས། །ཀུན་ལ་སེམས་སྙོམས་ཕ་མའི་འདུ་ཤེས་ཀྱིས། །ཕན་པར་སྟོན་དང་བྱང་ཆུབ་འཇུག་པ་ནི། །ཐེག་པ་ཆེན་པོར་འཇུག་པའི་ལམ་གྱི་སྒོ། ༡༧ །ཁབ་ཀྱི་འབྱོར་པ་མངའ་རིས་ལས་གྱུར་ན། །དྲུག་ཆའི་དཔྱ་ཐང་ཅུང་ཟད་རྨ་བབ་ཀྱང༌། །བཟོད་པར་མཛོད་དང་སྦྱིན་ལས་གཞན་པའི་གཉེན། །མ་མཆིས་དེ་ནི་ཐུབ་པ་ཆེན་པོའི་བཀའ། ༡༨ །འཆལ་བའི་ཚུལ་ཁྲིམས་
མི་དགེའི་གཟུགས་ཉིད་ཀྱང༌། །རྒྱལ་སྲས་རྣམས་ཀྱི་ཐབས་ལ་མཁས་པ་ནི། །སྟོང་ཉིད་སྙིང་རྗེའི་མཐུས་ཡིན་དེ་ལྟ་ནའང༌། །དུས་ཁྲིམས་ཡན་ལག་བརྒྱད་ལ་གུས་པར་མཛོད། ༡༩ །ལེགས་ཉེས་སྟངས་འཛིན་ཁྲིམས་ཀྱི་རྗེས་འགྲོ་བ། །རྒྱལ་པོ་རང་སའི་ཆོས་ལུགས་ཡིན་མཆི་ཡང༌། །རྨོངས་དང་འདོད་པས་གཟིར་བའི་ནག་ཅན་གྱི། །སྲོག་ལ་ཆད་པ་མ་སྦྱིན་བཟོད་ཀྱང་འཚལ། ༢༠ །དེ་ལྟར་གསུམ་གྱི་བྱང་ཆུབ་འཇུག་པའི་ཆོས། །སྡོམ་མིན་རྒྱུན་ལྡན་ཉིད་དུ་མི་འཁྱམས་ཤིང༌། །རྒྱལ་པོའི་སྲིད་ཀྱང་ཉམས་པར་མི་འགྱུར་ཞེས། །གསལ་རྒྱལ་ཉིད་ལ་གདམས་པའི་མདོ་ལས་བཤད། ༢༡ །ཡིད་དང་ཆོས་སུ་རྟོགས་པའི་བྱ་བྱེད་ནི། །རྒྱལ་པོའི་སྲིད་ལ་མུ་ཁྱུད་ལྟར་བསྐོར་ཡང༌། །བརྩོན་དང་བསམ་ཤེས་དབང་རྣོན་མ་བསྲིངས་ཏེ། །རྒྱལ་པོ་ཛཿདང་དགེ་དབང་ཡབ་སྲས་བཞིན། ༢༢ །དེ་ཕྱིར་ཆོས་སྤྱོད་བཅུ་ལ་སྐབས་བཙལ་ཞིང༌། །ནང་ནུབ་རྡོ་རྗེའི་ལམ་ལ་རྣལ་འབྱོར་པའི། །བརྩོན་འགྲུས་མཆོག་དང་བསམ་གཏན་ལ་བརྟེན་པས། །ཤེས་རབ་ཕ་རོལ་ཕྱིན་ལ་རེག་པར་འགྱུར། ༢༣ །དེ་ཡི་འགལ་ཟླ་ལྟུང་བྱེད་ཆེན་པོའི་གཡང༌། །མཆོད་རྟེན་རྫས་དང་དགེ་འདུན་འདུ་སྒོ་འཕྲོག །ལུང་དང་རྟོགས་པའི་དམ་ཆོས་སྤོང་བ་དང༌། །ཁྲིམས་
ལྡན་ལྟ་ཅི་རྟགས་ཙམ་འཛིན་ལ་ཡང༌། ༢༤ །ངུར་སྨྲིག་འཕྲོག་དང་ཁྱིམ་ན་གནས་སུ་འཇུག །བརྡེག་ཅིང་ནོར་འཕྲོག་བརྩོན་རར་གཞུག་དང་གསོད། །ཕ་མ་དགྲ་བཅོམ་གསོད་དང་དགེ་འདུན་དབྱེ། །མཚམས་མེད་ལྔ་ལས་གང་རུང་བྱེད་པ་དང༌། ༢༥ །ཕ་རོལ་མེད་པར་ལྟ་བའི་ལོག་ལྟ་ཡིས། །དགེ་བ་མ་ཡིན་ལས་ལམ་བཅུ་པོ་ལ། །བདག་ཉིད་འཇུག་དང་གཞན་དག་འཛུད་པ་ནི། །རྒྱལ་པོར་གདམས་པའི་རྩ་ལྟུང་ལྔ་ཡིན་པས། ༢༦། སྲོག་འདི་གཏོང་ཡང་སླ་ཡིས་དེ་སྤོང་ཞིང༌། །དེ་བཞིན་གྲོང་དང་གྲོང་ཁྱེར་ཡུལ་འཁོར་གཞོམ། །ལ་སོགས་བློན་པོར་ངེས་པའི་རྩ་ལྟུང་ལྔ། །གཞོམ་སྟེ་བསྒོ་བའི་ཕྱོགས་ལ་ཉེ་བས་སྤོངས། ༢༧ །ཁ་ན་མ་ཐོའི་ལམ་དང་ཀུན་དཀྲིས་སྒོ། །མཐའ་དག་སེམས་དང་སེམས་བྱུང་ལས་སྐྱེ་ན། །འཇིག་རྟེན་ཡང་དག་བལྟ་དང་དྲན་ཤེས་ལ། །གུས་པས་དཀར་པོའི་ཆོས་རབ་འཕེལ་བར་འགྱུར། ༢༨ །མཐོང་ཆོས་སུ་ཡང་མངོན་པར་མཐོ་བ་ཡི། །རྒྱལ་སྲིད་འབྱོར་དང་རྒྱས་ཤིང་ལོ་ལེགས་ལ། །ཕས་ཀྱི་རྒོལ་བས་མི་བརྫི་བསོད་ནམས་སྟོབས། །མང་པོས་བཏུད་པའི་རྒྱལ་སར་བཞག་པ་བཞིན། ༢༩ །ལེགས་སྨོན་ལམ་དེའི་རྟེན་ཅིང་འབྲེལ་འབྱུང་ལས། །མཐར་ཐུག་ངེས་པར་ལེགས་པའི་
ཆོས་ཁམས་ཀྱང༌། །བདེ་ལྡན་ཞིང་ཁམས་བཀོད་པའི་ཐེམ་སྐས་རྩེར། །གངས་ཆེན་མཚོ་ཡི་རྒྱལ་སྲིད་ལ་གནས་ཤོག ༣༠ །རྒྱལ་བུ་ལ་སྤྲིང་བའི་གཏམ་ཆར་སྤྲིན་གྱི་རོལ་མོ་ཞེས་བྱ་བ། རིག་འཛིན་འཇིགས་མེད་གླིང་པས་གདམས་པ་རྫོགས། །གཏམ་ཚོགས་ལེའུ་བརྒྱད་པའོ།། །།