གཏམ་ཚོགས་ལེའུ་བཅོ་བརྒྱད་པ། ལྷོ་བྲག་གསུང་སྤྲུལ་ལ་སྤྲིང་པའི་གཏམ་ཚངས་པའི་རྣ་རྒྱན།
ལྷོ་བྲག་གསུང་སྤྲུལ་ལ་སྤྲིང་པའི་གཏམ་ཚངས་པའི་རྣ་རྒྱན་ཅེས་བྱ་བ། གསུང་གི་རྡོ་རྗེ་ལ་ཕྱག་འཚལ་ལོ། །སྲིད་ཞིར་མི་གནས་པདྨའི་
ཀེ་ས་རར། །འོད་མཚན་ཉིད་བྱེད་འབར་བའི་ཐུགས་གསུང་སྐུར། །མངོན་བྱང་ལྔས་ཆུབ་སངས་རྒྱས་པདྨ་སྐྱེས། །ལྷུན་གྲུབ་རིགས་འཛིན་མཆོག་དེས་ཁྱོད་ལ་སྲུངས། ༡ །འབྱུང་ཆེན་རྒྱུ་ལས་སྲིད་པའི་རྟེན་འབྲེལ་དང༌། །མ་རིག་ཞགས་པས་འདུ་བྱེད་དབང་བྱས་ཏེ། །རྒ་ཤིའི་བར་དུ་འབྲེལ་བའི་རྟེན་འབྱུང་འདིས། །བདག་ཅག་འཁོར་བར་བཅིངས་པ་མཁྱེན་ལགས་སམ། ༢ །དེ་ཉིད་ལྡོག་བྱེད་ལམ་དང་འབྲས་བུའི་ཆོས། །སྡུག་བསྔལ་ཤེས་བྱས་ཀུན་འབྱུང་སྤོང་བ་དང༌། །འགོག་པ་མངོན་གྱུར་ལམ་མཆོག་མཐོང་བའི་ཕྱིར། །སྡེ་སྣོད་རྒྱ་མཚོའི་གནས་ལ་འཇུག་པར་འཚལ། ༣ །དེ་ཡང་འཁོར་ལོ་དང་པོའི་མཛོད་ཁང་གིས། །སྡུག་བསྔལ་བདེན་པའི་ཆོས་ཉིད་ཤེས་བྱས་ནས། །འཁོར་བ་འདི་ལ་སྙིང་ནས་སྐྱོ་བ་ཡི། །ངེས་འབྱུང་ལྷག་པའི་ཚུལ་ཁྲིམས་གོམས་འཚལ་ལོ། ༤ །ངེས་འབྱུང་སྤངས་པའི་ལྟར་སྣང་བསླབ་གཞི་ནི། །མངོན་པར་མཐོ་ལས་ཐར་པའི་ལམ་མིན་པར། །དགའ་བོའི་མདོ་ལས་འདོམས་དེ་ཤེས་བྱས་ནས། །རྟག་ཏུ་སྲིད་པའི་ཁམས་ལ་སྐྱོ་བར་མཛོད༌། ༥ །དེ་ལྟར་སྐྱོ་ན་འདུས་པ་འབྲལ་བ་དང༌། །སྣང་ནས་མུན་པ་མུན་ལས་སྣང་སོགས་བཞིར། །ཉིང་མཚམས་སྦྱོར་བ་ལས་དང་འབྲས་བུ་ཡི། །རྣམ་སྨིན་བསླུུ་བ་མེད་ལ་ངེས་ཤེས་སྐྱེ། ༦ །ཇི་སྲིད་རྣམ་པར་
རྟོག་པ་མ་ཟད་བར། །དེ་སྲིད་དེ་ཡི་ལས་འབྲས་རྗེས་འབྲང་ན། །དབྱིངས་ལ་གོ་བས་དཔྱད་པའི་སྙམ་བྱེད་དང༌། །སྡིག་པས་བསྒྲུབས་པའི་དགེ་རྩ་ཀླ་ཀློའི་ཆོས། ༧ །དེ་ཕྱིར་མཐོང་བས་སྤང་བྱའི་ཉོན་མོངས་ནི། །ཀུན་འབྱུང་རྒྱ་མཚོའི་བདག་ཉིད་ཡིན་པས་ན། །རྟག་ཏུ་རྣམ་པར་རྟོག་པ་བརྟགས་བྱས་ཏེ། །ཀུན་སློང་ཆོས་དང་འདྲིས་ན་དམ་པ་ཡིན། ༨ །དགའ་བར་བགྱིད་པའི་ཡུལ་ལ་ཆགས་པ་དང༌། །རྒྱགས་པར་བགྱིད་པའི་སྡེ་ལ་སྲེད་པ་ཡང༌། །བལྟར་མི་མངོན་པའི་ཕུང་དཀྲོལ་ཆེན་པོའི་གནས། །ཡིན་གྱི་རྟག་མི་ཐུབ་པ་མཁྱེན་ཡང་འཚལ། ༩ །ཟླ་བ་སྒྲོན་མའི་མདོ་སྡེ་ལ་སོགས་ནས། །ནགས་ཀྱི་ཡོན་ཏན་མངོན་པར་བཤད་པའི་ཚེ། །ལྗོན་ཤིང་མེ་ཏོག་བྲག་རིའི་ཁང་བཟང་དང༌། །བྱ་དང་རི་དྭགས་རྣམ་ཐར་བཤད་པ་ཡང༌། ༡༠ །བདུད་ཀྱི་བཙོན་ར་ཁྱིམ་དང་འདུ་འཛི་ལ། །མངོན་པར་ཞེན་རྣམས་ཐབས་ཀྱིས་འབྲིད་ཕྱིར་ལས། །གཞན་དུ་ཆགས་སེམས་སྐྱེ་ན་ཡུལ་གང་ཡང༌། །གསེར་དང་ཐག་སྒྲོག་འཆིང་བར་མཉམ་ལ་ལྟོས། ༡༡ །མདོར་ན་སེམས་ལས་སེམས་བྱུང་སྐྱེ་བའི་ཕྱིར། །འཁོར་དང་མྱ་ངན་འདས་པའི་ལམ་བདེན་ཀུན། །རྒྱལ་བའི་གཞུང་ལམ་ཐེག་པ་ཆེན་པོའི་སྒོར། །བྱང་ཆུབ་སེམས་གཉིས་དོན་ལ་བསྡུ་བར་བྱ། ༡༢ །གྲངས་མེད་གསུམ་གྱི་ཚོགས་གཉིས་བདག་པོ་དེས། །
གྲངས་མེད་གསུམ་དུ་དགོངས་ཤིང་དཔྱད་པས་ཀྱང༌། །བྱང་ཆུབ་སེམས་ལས་གཞན་དུ་མ་གཟིགས་པས། །བྱང་ཆུབ་སེམས་ཀྱི་དེ་ཉིད་མངོན་དུ་མཛད། ༡༣ །སྡིག་པའི་གྲོགས་ཀྱིས་སྤངས་པ་མཐུན་པའི་ཡུལ། །དགེ་བའི་བཤེས་དང་དགེ་བའི་གྲོགས་པོ་བསྙེན། །སློབ་པར་གུས་ཤིང་ཚོགས་གཉིས་ལ་བརྩོན་པའི། །འཁོར་ལོ་ཆེན་པོ་བཞི་ཡི་ཤིང་རྟར་འཇོགས། ༡༤ །དམ་ཆོས་སྣང་བའི་སྒོ་ནི་དད་པ་སྟེ། །གང་དང་བྲལ་ལ་དམ་པའི་རྩི་མི་འགོ །སྡེ་སྣོད་ཀློག་དང་ཆགས་སྡང་ལས་བརྒལ་བའི། །བྱང་ཆུང་སེམས་དཔའ་རྣམས་ཀྱི་རྣམ་ཐར་གཟིགས། ༡༥ །ཁྱིམ་ཆུང་ནང་ནས་བསྟན་པའི་སྒོར་ཞུགས་ཀྱང༌། །ཁྱིམ་ཆེན་གཟུང་ནས་བྱ་བ་མཐའ་ཡས་ཤིང༌། །གསོག་དང་སྲུང་དང་སྤེལ་བས་འཁྲུགས་པ་ཡང༌། །སྣང་ནས་མུན་པའི་སྒོ་རུ་མཁྱེན་འཚལ་ལོ། ༡༦ །དེ་ལྟར་མཁྱེན་ནས་སྣང་ནས་སྣང་བའི་སྒོ། །གསུམ་ལ་སྐྱབས་ཀྱི་དམ་པར་འཛིན་པ་དང༌། །རིགས་ལས་ཉམས་ཤིང་ལུང་མ་བསྟན་པ་ཡི། །སེམས་འདི་ཐེག་པ་ཆེན་པོར་སད་པར་བྱ། ༡༧ །དེ་ཡི་ས་མཁན་ཚད་མེད་བཞི་ཡིན་ཏེ། །བྱམས་པའི་སེམས་དང་སྙིང་རྗེའི་གཞན་དབང་ཅན། །ཀུན་ལ་ལེགས་སྨོན་བྱམས་སྡང་འབྲལ་བ་རྣམས། །བསྡུ་བའི་དངོས་པོ་རྣམ་བཞིའི་ཁུར་གྱིས་བརྟེན། ༡༨ །ཞི་
བདེའི་ལྟ་བ་ངན་པ་ཉམས་བྱེད་པའི། །རླབས་ཆེན་བྱང་ཆུབ་སེམས་ཀྱི་རིན་ཐང་ལ། །བདག་གི་སྲོག་ཀྱང་ལྟོས་མེད་གཏོང་བྱས་ནས། །ཕྱིན་དྲུག་ལམ་དུ་དགེ་བའི་ཆོས་རྣམ་སྡུད། ༡༩ །བདག་ལ་བདོག་པ་གཞན་གྱི་རྫས་ཡིན་ཏེ། །དགྲ་དང་ཆོས་རྐུན་རྒྱལ་པོས་ཕྲོགས་ལ་ལྟོས། །ལུས་དང་སྲོག་ལའང་གཏོང་སེམས་གོམས་པའི་ཚེ། །ཆོས་མིག་རྡུལ་བྲལ་ཐོབ་ལའང་ཐག་མི་རིང༌། ༢༠། མངོན་མཐོའི་རྟེན་གྱུར་ཡན་ལག་བརྒྱད་པ་ནས། །ཡོན་ཏན་སྣོད་མཆོག་བསྙེན་པར་རྫོགས་པའི་བར། །བདེན་པ་བཞི་ཡི་ལམ་དང་འབྲེལ་གྱུར་ན། །དགྲ་བཅོམ་གོ་འཕང་མཐོང་བའི་་ཆོས་ལ་གནས། ༢༡ །ཞེ་སྡང་ལས་ནི་དམྱལ་བའི་རྒྱུ་འབྲས་གྲུབ། །བཟོད་པ་ལྟ་བུའི་དཀའ་ཐུབ་ཡོད་མིན་ན། །ལྟར་སྣང་བསླབ་པས་བཅིངས་པའི་ཚུལ་འཆོས་ལས། །མི་མཇེད་བཟོད་པའི་རྩ་བ་བརྟན་པ་མཆོག ༢༢ །གཉིད་རྨུགས་ལ་སོགས་སྒྲིབ་པ་ལྔ་ཡི་རྒྱར། །དགེ་བའི་རི་དྭགས་འཛུད་པའི་སྐྱེས་བུ་དེ། །སྙོམ་ལས་གནས་སམ་རྣམ་པར་གཡེང་ཡང་རུང༌། །བརྩོན་འགྲུས་སྙོག་པའི་ལམ་མིན་རྒྱུན་ལྡན་ཡིན། ༢༣ །ཕུང་པོ་ལྔ་ལ་ཉེ་བར་ལེན་པའི་སེམས། །མིག་གི་འདུས་ཏེ་རེག་པ་ལ་སོགས་པ། །ཚོགས་དྲུག་དག་པའི་བསམ་གཏན་མ་སྐྱེས་ན། །ཞི་བར་གནས་ཙམ་དུད་འགྲོ་ལ་ཡང་ཡོད། ༢༤ །
དེ་ཕྱིར་ཐོས་བསམ་སྒོམ་པའི་ཤེས་རབ་མཐའ། །ཤེས་བྱའི་ཚུ་རོལ་མ་ལུས་རྫོགས་པ་ཆེ། །རང་བཞིན་མེད་པའི་དེ་ཉིད་རྟོགས་གྱུར་ན། །ཀློང་ཆེན་རབ་འབྱམས་ནམ་མཁའི་རྣལ་འབྱོར་ལགས། ༢༥ །དེང་སང་འདི་ན་ཐུན་མོང་ལམ་གྱི་གནད། །སྤངས་ཏེ་སྔགས་ཀྱི་ལྟ་སྤྱོད་ལ་སྙེགས་ཏེ། །འཁྲུལ་སྣང་བསྐྱེད་པའི་རིམ་པར་འདོད་པ་དང༌། །གཏི་མུག་རྫོགས་པའི་རིམ་པར་འཁྲུལ་པ་རྣམས། ༢༦ །སྐྱེ་གནས་བཞི་ཡི་བག་ཆགས་སྦྱོང་ཚུལ་དང༌། །མངོན་བྱང་ལྔ་དང་རྡོ་རྗེའི་ཆོ་ག་གསུམ། །ཕྱག་རྒྱ་བཞི་ཡི་ཆིངས་ཀྱིས་བཅིངས་པའི་མཐར། །ཡོངས་གྲུབ་ལམ་ནས་མྱ་ངན་འདའ་བར་མཛོད། ༢༧ །གང་ཡང་ཕ་རོལ་ཕྱིན་པའི་ལམ་ལྔ་ཡི། །བརྟག་པ་དང་སྦྱར་སྔ་འགྱུར་རྒྱུད་སྡེའི་སྲོལ། །རྣམ་སྨིན་ཚེ་དབང་ཕྱག་རྒྱ་ལྷུན་གྲུབ་ཆེའི། །གྲུབ་མཐའ་མ་འདྲེས་ཡོངས་རྫོགས་བསྐྱེད་རིམ་ལམ། ༢༨ །དེ་བཞིན་རྫོགས་པའི་རིམ་པ་ཉིད་ལ་ཡང༌། །སྲིད་པའི་བདག་པོ་གཟུང་འཛིན་རོ་རྐྱང་གི །ལས་རླུང་དབུ་མར་ཞུགས་གནས་ཐིམ་གསུམ་ལས། །རྩ་མདུད་གྲོལ་ཞིང་དུལ་སྦྱོར་རླུང་དག་པས། ༢༩ །འདུན་པ་སེམས་དང་རིགས་ཆེན་འབྱེད་པ་དང༌། །དབུགས་ཆེན་འབྱིན་དང་ལུང་ཆེན་ཐོབ་པ་དང༌། །རྩལ་ཆེན་རྫོགས་པའི་གོ་འཕང་ལ་སོན་ན། །དང་པོའི་སངས་རྒྱས་མངོན་སུམ་
ཉིད་དུ་མཐོང༌། ༣༠ །བདག་ཏུ་མི་འཛིན་གཞན་ལ་དམིགས་པ་བྲལ། །བདག་གཞན་གཉིས་ཀར་མི་དམིགས་རྫོགས་པ་ཆེ། །འཁོར་གསུམ་ཡོངས་དག་རང་བྱུང་རྡོ་རྗེའི་ཞལ། །འདི་ཉིད་ཡིན་ནོ་ཐུགས་ཀྱི་ཐིགས་ལེར་བསྟིམ། ༣༡ །གཏམ་ཚོགས་ལེའུ་བཅོ་བརྒྱད་པའོ།། །།