གཏམ་ཚོགས་ལེའུ་སོ་བཞི་པ། གཞུ་སྟོད་གཏེར་སྒྲོམ་གྱི་གཏམ་མཁའ་འགྲོའི་གླུ་གར།
གཞུ་སྟོད་གཏེར་སྒྲོམ་གྱི་གཏམ་མཁའ་འགྲོའི་གླུ་གར་ཞེས་བྱ་བ། རང་བཞིན་རྣམ་པར་དག་པ་ཆོས་ཀྱི་དབྱིངས། །ཁ་སྦྱོར་ཡན་ལག་བདུན་ལྡན་ལོངས་སྤྱོད་རྫོགས། །མཛད་པ་བཅུ་གཉིས་སྟོན་པ་མཆོག་སྤྲུལ་ཡིན། །དེ་ལས་སྐྱེ་དང་བཟོ་དང་རང་བྱོན་དང༌། །གྲུ་གཟིངས་ཟམ་པ་རྡོས་བཅས་སྤྲུལ་པ་སྟེ། །འཛམ་བུའི་གླིང་འདིར་མཁའ་འགྲོ་འདུ་ངེས་པའི། །ཉེར་བཞིའི་ཡུལ་དང་གནས་ཆེན་སོ་གཉིས་སོགས། །གངས་བྲག་མཚོ་གླིང་ལྗོན་ཤིང་རྣམ་པ་ཅན། །རྡོས་བཅས་གཟུགས་ཀྱིས་ཡེ་ཤེས་བརྟེན་པ་ལས། །སངས་རྒྱས་གཉིས་པ་པདྨས་བྱིན་བརླབས་ཤིང༌། །མཁའ་འགྲོའི་གཙོ་མོ་ཡེ་ཤེས་འཚོ་རྒྱལ་ལ། །མན་ངག་མཁའ་འགྲོའི་སྙིང་ཏིག་
གསུངས་བའི་གནས། །གཞུ་སྟོད་གཏེར་སྒྲོམ་མཁའ་འགྲོའི་ཚོགས་ཁང་ནི། །ཕྱི་ལྟར་བྲག་རི་རྡོ་རྗེ་གནམ་སློང་དབྱིབས། །དངུལ་དཀར་མདངས་ཅན་རང་བྱོན་བསམ་མི་ཁྱབ། །ནང་ལྟར་ཡུལ་ཆེན་ཉེར་བཞིའི་བཀོད་པ་ཚང༌། །དཔའ་བོ་མཁའ་འགྲོའི་འདུ་བ་རྒྱུན་མི་འཆད། །ཆུ་བུར་མིག་གིས་སྤྱོད་ཡུལ་མ་ཡིན་ཡང༌། །ཀུན་བརྟགས་བྲག་རིའི་ཁང་བཟངས་ཡངས་པའི་ནང༌། །དག་པ་རབ་འབྱམས་གཞན་དབང་གཞལ་མེད་ཁང༌། །ཡོངས་གྲུབ་དཔའ་བོ་མཁའ་འགྲོའི་ཕྱག་རྒྱས་མཛེས། །དེ་དག་རྣམས་ཀྱིས་རྡོ་རྗེའི་གླུ་གར་ནི། །རང་སྣང་དག་པའི་རྩལ་ལ་འདི་ལྟར་ཤར། །ཨེ་མ་ཧོ། གང་ཟག་གིས་བློ་དང་གཏེར་སྒྲོམ་གྱི་བྲག །རང་རྒྱུད་ཅན་དུ་མཚུངས་དེ་སྲིད། །དད་པས་ཕྱག་དང་བསྐོར་བ་གྱིས། །ཚོགས་དག་མེ་མཆོད་ཀྱིས་ཐུགས་དམ་བསྐངས། །གསོལ་བ་བཏབ་ན་བྱིན་རླབས་འབྱུང༌། །དབང་བཞི་བླངས་ན་ཉམས་རྟོགས་སྐྱེ། །སྒྲུབ་པ་བྱས་ན་དངོས་གྲུབ་ཐོབ། །མ་མོ་དང་ཞིང་སྐྱོང་གནས་ངེས་པའི། །དུར་ཁྲོད་དུ་ཕུང་པོ་ཚོགས་སུ་ཕུལ། །བྱ་རྒོད་རྣམས་མཁའ་འགྲོའི་སྤྲུལ་པ་ཡིན། །ཚོགས་དཔོན་དུ་དུར་བྱ་ཀང་ཀའང་འབྱོན། །པདྨའི་བྱིན་རླབས་དང་རྫུ་འཕྲུལ་གྱི། །རྡོ་རྗེས་བདུད་སྡེའི་སྙིང་ཕུག་ཅིང༌། །རྣམ་པར་སྤྲུལ་པའི་ཆུ་ཚན་ལ། །ཁྲུས་ཚོག་བྱས་ན་སྡིག་སྒྲིབ་འདག །འདུ་བ་རྣམ་བཞིའི་ནད་རྣམས་བྱང༌། །དེ་ཀུན་རྫོབ་བདེན་པ་
བསླུ་མེད་ཡིན། །ད་དོན་དམ་བདེན་པ་བཤད་ཀྱིས་ཉོན། །ཕྱི་རོལ་ས་རྡོ་རི་བྲག་དང༌། །ཆུ་ཀླུང་ནགས་ཚལ་གནས་དང་ལྗོངས། །འགྲོ་བ་རིགས་དྲུག་དགྲ་དང་གཉེན། །ཕར་བལྟས་ཡུལ་དུ་སྣང་བ་ཀུན། །མིང་དང་གཟུགས་ཀྱི་ཕུང་པོ་ཡིན། །དེ་བཞིན་རྣ་བས་སྒྲ་ཐོས་ཤིང༌། །སྣ་ཡིས་དྲི་མྱོང་ལྕེ་ཡིས་རོ། །ལུས་ཀྱིས་རེག་བྱ་ལ་སོགས་པ། །དབང་ཤེས་ཡུལ་དང་ཡུལ་ཅན་གཉིས། །འདུས་ཏེ་རེག་པའི་རྐྱེན་དག་ལས། །དགའ་སྡུག་ཆགས་སྡང་བར་མ་ཡི། །ཚོར་བའི་ཕུང་པོ་སྐྱེ་བ་འདི། །སྒོམ་ཆེན་རྣམས་ཀྱིས་མཁྱེན་པར་མཛོད། །དེ་ལ་བརྟག་དཔྱད་བསམ་གཞིགས་དང༌། །སྤོང་ལེན་དགག་བསྒྲུབ་བློ་སྐྱེས་ལ། །འདུ་ཤེས་ཕུང་པོ་ཞེས་སུ་གྲགས། །དེ་ལ་དགེ་དང་མི་དགེ་ཡི། །ལས་ལམ་བག་ཆགས་འདུ་བྱེད་པས། །འདུ་བྱེད་ཕུང་པོ་ཞེས་སུ་གྲགས། །དེ་དག་ཀུན་གྱི་བདག་པོ་ནི། །རྣམ་པར་ཤེས་པ་ཉིད་ཡིན་པས། །རྣམ་ཤེས་ལས་འདས་ཡེ་ཤེས་ཀྱི། །མཉམ་གཞག་ཕུང་པོ་ལྔ་བྲལ་འདི། །ལྟ་བ་ཡིན་པ་མཁྱེན་པར་མཛོད། །དེ་ཉིད་ངང་དུ་ཚོགས་དྲུག་གི །རང་མདངས་མི་འགག་རྟོག་དཔྱོད་བྲལ། །སྤྱན་དང་མངོན་པར་ཤེས་པའི་རྒྱུ། །ཡང་དག་དྲན་པ་ཉེར་གཞག་ནི། །རྣམ་བྱང་སྐྱེ་བ་འཕགས་པའི་ལམ། །སྒོམ་པ་ཡིན་པ་མཁྱེན་པར་མཛོད། །མཉམ་གཞག་རྗེས་ཐོབ་གང་ལ་ཡང༌། །
གྲུབ་མཐའི་ཞེན་པས་མ་བཅིངས་པར། །བླང་དོར་མེད་པའི་རྒྱས་ཐེབས་ན། །ཚུལ་འཆོས་བྲལ་བའི་སྤྱོད་པ་ཡིན། །ཁྱད་པར་རྡོ་རྗེ་ཐེག་པའི་དོན། །དབང་བཞིའི་ལམ་དང་མ་འབྲེལ་ན། །མཐོང་ལམ་སྐྱེ་བ་མི་སྲིད་པས། །བདེན་པ་གཟིགས་པའི་བླ་མ་ཡིས། །མོས་གུས་ལྡན་པའི་སློབ་མ་དེ། །སྨིན་པའི་མཚན་ཉིད་འདི་ཡིན་ནོ། །དང་པོ་བུམ་པའི་དབང་བསྐུར་གྱིས། །རྣམ་ཤེས་རྡོ་རྗེ་མི་བསྐྱོད་པར། །སྨིན་ན་སེམས་རིག་ལ་ཤན་ཕྱེད། །གཉིས་པ་དབུ་རྒྱན་དབང་བསྐུར་གྱིས། །ཚོར་བ་རིན་ཆེན་འབྱུང་ལྡན་དུ། །སྨིན་ན་སྲེད་ལེན་རིག་པ་སྦྱོང༌། །གསུམ་པ་རྡོ་རྗེའི་དབང་བསྐུར་གྱིས། །འདུ་ཤེས་སྣང་བ་མཐའ་ཡས་སུ། །སྨིན་ན་ཀུན་འབྱུང་མ་རིག་གཅོད། །བཞི་པ་དྲིལ་བུའི་དབངབསྐུར་གྱིས། །འདུ་བྱེད་དོན་ཡོད་གྲུབ་པ་རུ། །སྨིན་ན་སྐྱེ་དང་སྲིད་པ་དག །ལྔ་པ་རྡོ་རྗེ་མིང་དབང་གིས། །མིང་གཟུགས་རྣམ་པར་སྣང་མཛད་དུ། །སྨིན་ན་རྒ་ཤིའི་འཁྲུལ་འཁོར་འཇོམས། །དེ་ལྟར་རིག་པའི་དབང་བསྐུར་ལྔ། །བསྐུར་ནས་ཐོབ་པར་གྱུར་པའི་ཚེ། །ཕུང་པོ་ལྔ་བྲལ་ཉམ་བཞག་དེ། །རྒྱུད་ལ་སྐྱེ་བར་མཁྱེན་པར་མཛོད། །དེ་བཞིན་ཁམས་ལྔ་ཡུམ་ལྔར་དག །སྐྱེ་མཆེད་སེམས་དཔའ་སེམས་མར་སྦྱོང་། །ཚངས་པའི་གནས་པ་བཞི་པོ་ནི། །ལས་དབང་ཁྲོ་བོ་ཁྲོ་མོར་སྨིན། །འདི་ལྟར་
གདན་གསུམ་ཚང་བའི་ལྷ། །ཁམས་དྲུག་ལྡན་པ་རྡོ་རྗེའི་ལུས། །ཀུན་ལ་ཡོངས་གྲུབ་ཆེན་པོ་རུ། །གནས་པ་རྡོ་རྗེའི་སློབ་དཔོན་གྱི། །བདག་པོའི་རྐྱེན་ཇོ་བོས། བོད་ན་སློབ་མ་སྣོད་ལྡན་རེ་ཙམ་འདུག་སྟེ། དབང་བསྐུར་ནུས་པའི་བླ་མ་མི་འདུག་གསུང་བ་དེ་དོན་འདིར་དགོངས། གྱིས་སད་དགོས་པས། །ངེས་པར་མཐོང་ལས་ཐོབ་པ་ཡི། །བླ་མ་བསྙེན་ཅིག་རིགས་ཀྱི་བུ། །དེ་ལས་མཆོག་དབང་གོང་མ་ནི། །ཤེས་སྒྲིབ་སྦྱོང་ཐབས་གཙོར་བྱེད་པས། །ཐབས་ལས་ཐབས་གྱུར་ཕོ་ཉའི་ལམ། །རྒྱལ་བ་རྡོ་རྗེ་འཆང་གིས་ཀྱང༌། །གསང་སྔགས་ཕྱི་པ་མན་ཆད་དུ། །སྦས་ཏེ་མངོན་དུ་མ་གསུངས་ན། །འདིར་ནི་བརྗོད་པའི་གནས་ཅི་ཞིག །ཁྱོད་ལ་མཁའ་འགྲོ་སྡེ་ལྔ་ཡི། །གཙོ་མོས་རྣམ་ཐར་སུམ་ལྡན་གྱི། །དཀྱིལ་འཁོར་ཟབ་མོར་ལྐོག་གྱུར་དུ། །དབང་བསྐུར་ཚེ་ན་གཟུང་འཛིན་གྱི། །མགོ་བོ་བཅད་དེ་རྦབ་ལ་སྒྲིལ། །མཁའ་འགྲོའི་བརྡ་ཡིག་དངོས་སུ་ཐོབ། །མངོན་སུམ་ཉིད་དུ་ས་གཡོས་དེ། །བྱང་ཆུབ་སེམས་དཔའ་ས་ནས་སར། །འཕར་པའི་མངོན་རྟོགས་ཡིན་སྲིད་ཀྱང༌། །འཇིག་རྟེན་རྨོངས་པས་ག་ལ་རིག །གཞུ་སྟོད་གཏེར་སྒྲོམ་ཕོ་བྲང་དུ། །དཔའ་བོ་དང་ནི་མཁའ་འགྲོའི་ཚོགས། །མེ་ཚོགས་སྟོང་རྩས་མཉེས་བྱས་པའི། །གདབ་ལན་རྡོ་རྗེའི་གླུ་གར་འདི། །རང་ལས་བྱུང་ཞིང་རང་ལ་ཤར། །སྣང་བ་དཔེ་ཆར་ཤར་བའི་གཏམ། །རྒྱལ་
སྲས་པདྨའི་བུ་བརྒྱུད་ཀྱི། །ཁྱད་ཆོས་ཡིན་ནོ་ཨེ་མ་ཧོ། །དད་ལྡན་གྱི་སློབ་བུ་དགེ་དོན་འཇིགས་མེད་འབངས་ཀྱི་ངོར་དགོངས་བརྒྱུད་ལས་ཡི་གེར་སྤེལ་ཞིང༌། རིགས་ཀྱི་བུ་རྒྱལ་སྲས་ཉིན་བྱེད་འོད་ཟེར་རིག་འཛིན་མཐུ་སྟོབས་གྲུབ་པའི་སྡེའི་ཆོས་སྐལ་དུ་རིག་འཛིན་འཇིགས་མེད་གླིང་པས་སོ། །གཏམ་ཚོགས་ལེའུ་སོ་བཞི་པའོ།། །།