གཏམ་ཚོགས་ལེའུ་སོ་དགུ་པ། དཔལ་རི་ཐེག་པ་ཆེན་པོའི་གླིང་གི་གཏམ་རྡོ་རྗེ་སྒྲ་མའི་རྒྱུད་མངས།
དཔལ་རི་ཐེག་པ་ཆེན་པོའི་གླིང་གི་གཏམ། རྡོ་རྗེ་སྒྲ་མའི་རྒྱུད་མངས་ཞེས་བྱ་བ། བཅོམ་ལྡན་འདས་དཔལ་སྣང་བ་མཐའ་ཡས་ལ་ཕྱག་འཚལ་ལོ། །འཆི་མེད་འོད་མཚན་སྟོང་དུ་འབར་བའི་བྱིན། །མཚོ་དབུས་པདྨའི་གེ་སར་
ལས་གྲོལ་བས། །སྣང་སྲིད་ཟིལ་གྱིས་གནོན་པ་སྤྲུལ་པའི་སྐུ། །བྱང་ཆུབ་སྙིང་པོའི་བར་དུ་གཙུག་ན་མཛེས། །ཡང་སྲིད་མང་པོར་བྱང་ཆུབ་མཆོག་གི་སྤྱོད་པར་གོམས་པའི་ལུས་མེད་ལམ། །མཐའ་ཡས་ཐེག་པའི་ཁྱད་ནོར་གྱིས་བསྲུངས་རིན་ཆེན་བདུན་གྱི་ཤིང་རྟ་ཅན། །ལུང་རྟོགས་ཡོན་ཏན་དྲི་མེད་འོད་ཟེར་སྟོང་དུ་འབར་བའི་གཟི་བྱིན་གྱིས། །འཛམ་གླིང་མཛེས་པའི་རྒྱན་དྲུག་མཆོག་ཀྱང་བསྙེམས་པ་མེད་པའི་གནས་ལ་སྦྱར། །ཚོགས་གཉིས་རླུང་གི་ཤིང་རྟས་རབ་དྲངས་སྟོབས་བཅུའི་དཔུང་ཚོགས་ཡན་ལག་བཞི་ཡིས་འདོད་ལྷ་སྡེར་བཅས་གཡུལ་ལས་རྒྱལ། །མི་འཇིགས་རྣམ་བཞིའི་མཆེ་སྡེར་རྣོན་པོས་རྟག་ཆད་སྨྲ་བའི་རྒོལ་ངན་གླང་པོའི་གླང་པ་འཐུང་དང་ཆབ་གཅིག་པར། །ཇི་ལྟ་བ་དང་ཇི་སྙེད་མཁྱེན་པའི་གངས་རིར་གནས་བཅས་སྒྲིབ་གཉིས་མུན་པ་དྲུངས་ནས་འབྱིན་པའི་བརྟུལ་ཞུགས་གཟིས། །བརྒྱ་ཕྲག་བཅུ་ཡི་འཁོར་ལོའི་དབུས་ན་མངོན་པར་མཐོ་བ་མི་ཡི་སེང་གེ་དོན་ཀུན་གྲུབ་པས་ཤིས་པ་སྩོལ། །རྗོད་བྱེད་གསུང་རབ་ཡན་ལག་བཅུ་གཉིས་དཔལ་གྱི་མགུར་ནས་སྐྱུགས་པ་ལ། །བརྗོད་བྱའི་དོན་གྱི་དྲི་བསུང་དངར་པོས་མཐའ་མེད་སྲིད་ལས་ངེས་པར་འབྱིན། །འཁོར་ལོ་གསམ་གྱི་བང་རིམ་རྨད་བྱུང་འགོག་ལམ་བདེན་པའི་རང་གཟུགས་ཅན། །དམ་པའི་ཆོས་ཀྱིས་སེམས་ཅན་ཡོངས་ཀྱི་སྙིང་ལ་འཁྱུད་
པའི་དགའ་སྟོན་སྩོལ། །ངེས་འབྱུང་བློ་ཡི་དག་བྱེད་ཕུང་པོར་ཐེག་གསུམ་ཆོས་ཀྱི་ལང་ཚོ་རྔོམ། །ལྡན་དང་གྲོལ་བའི་ཁྱད་པར་ལྷུར་བྱེད་ལུང་རྟོགས་སྙན་པའི་མགྲིན་རྔ་འཁྲོལ། །རྣམ་བྱང་མཁའ་ལ་རིག་གྲོལ་བདེན་པས་ཡོངས་སུ་འཕུར་བའི་ཚོགས་ཀྱི་མཆོག །པད་རག་བྱེ་བའི་མདངས་ལ་ཅོ་འདྲི་འཕགས་པའི་དགེ་འདུན་ཕྱག་གི་གནས། །རིམ་གསུམ་རྒྱུད་སྡེའི་ནོར་གྱིས་ཡོངས་ཕྱུག་ཅིང༌། །སྔ་འགྱུར་བསྟན་པའི་རྩ་ལག་གཅིག་པུ་ལས། །གཉིས་སུ་མ་ཡིན་ཤནྟ་པུ་རི་བར། །ངེས་པ་རྙེད་འདི་རྒྱལ་དབང་པདྨའི་མཐུ། །བསྟན་འགྲོར་སྨན་པའི་ཐུགས་བསྐྱེད་སྨོན་ལམ་གཞར་ཡང་ཉམས་པ་མེད་པ་དེའི། །སྙིང་སྟོབས་བཙན་པོས་གངས་རིའི་ལྗོངས་འདིར་རྒྱལ་བའི་བསྟན་པ་དྲངས་པའི་ཁུར། །འདེགས་ལ་དབང་ཆེན་གསེར་གྱི་ས་གཞི་དོགས་པས་སྐྲག་ནས་འདར་བའི་ཚུལ། །མེས་དབོན་གསུམ་གྱི་བཀའ་དྲིན་ཉིད་དོ་དྲན་པའི་མོད་ལ་བ་སྤུ་ཟིང༌། །སྟོང་ཉིད་སྙིང་རྗེར་ཁྲོས་པའི་འཇོ་སྒེག་གིས། །མེ་ཏོག་གཞུ་ཅན་བསྙེམས་པ་བཅག་པའི་མོད། །གར་དགུའི་ཉམས་ཀྱིས་དཔའ་བའི་ཧེ་རུ་ཀ །ཡི་དམ་ཆོས་སྲུང་རྒྱ་མཚོས་ཡོངས་སུ་སྲུངས། །འཛམ་བུ་ཆུ་བོའི་ཀླུང་གིས་སུ་ཝརྞ། །བཞུ་བའི་རྡུལ་གྱིས་ལན་བརྒྱར་བྱུགས་པའི་གཟི། །དབང་པོའི་མཚོན་ཆས་བཀྲ་བའི་ལང་ཚོ་ཅན། །
ངལ་བསོས་བུ་ཡིས་དགོས་འདོད་ཆར་དུ་སྙིལ། །ཞེས་ཤིས་པ་བརྗོད་པའི་དབྱངས་གནྡྷ་རྦའི་གླིང་བུའི་གདངས་སུ་ཉེ་བར་བསྒྱུར་བས་ལམ་ཡངས་པར་བྱས་ཏེ་གླེང་བར་བྱ་བ་ནི། བློ་གྲོས་དང་དབང་པོ་གསལ་ཞིང་མོས་པས་དགེ་བ་རྣམས་ཀྱི་སྙན་དུ་རྟེན་དང་བརྟེན་པ་འདི་དག་གི་གཏམ་གྱི་སྦྱོར་བ་ཉུང་ཟད་གསོལ་ན། བདག་ཅག་གི་སྟོན་པས་ཐེག་དམན་དང་རྗེས་སུ་མཐུན་པར་འཛམ་བུའི་གླིང་དུ་མཛད་པ་བཅུ་གཉིས་བསྟན་ཏེ་སངས་རྒྱས་ནས་བསྟན་པའི་སྣང་བ་རྒྱ་མཚོ་ལྟ་བུས་འཇིག་རྟེན་གྱི་མུན་པ་བསལ་བར་མཛད་པ་ཡང་ལྔ་བརྒྱའི་ཐ་མ་ལ་བྱང་ཕྱོགས་ནས་བྱང་ཕྱོགས་སུ་དར་བར་ལུང་བསྟན་པ་བཞིན། རྒྱ་གར་འཕགས་པའི་ཕྱོགས་ལས་ལྷོ་དབུས་ཟ་ཧོར་གྱི་ཡུལ་དུ་ཆོས་རྒྱལ་ལུང་བསྟན་རྡོ་རྗེའི་ཕོ་བྲང་ཆེན་པོར་ཏནྟྲ་སྡེ་བཅོ་བརྒྱད་ཀྱི་གླེགས་བམ་ཆར་དུ་བབ་པ་དང་དུས་མཚུངས་པར་ལྷ་ཐོ་ཐོ་རི་གཉན་བཙན་གྱི་སྐུ་རིང་ལ་ཟ་མ་ཏོག་བཀོད་པའི་མདོ་ལ་སོགས་པ་ཕོ་བྲང་ཡུམ་བུ་གླ་སྒང་དུ་བྱུང་སྟེ་བསྟན་པའི་དབུ་བརྙེས། རྒྱལ་སྲས་ཕྱག་ན་པདྨས་བོད་བླུན་པོ་རྒྱལ་པོས་གདུལ་བ་ལ་སྤྲུལ་པའི་རྒྱལ་པོ་སྲོང་བཙན་སྒམ་པོར་བསྟན་ནས་དམ་པ་ཆོས་ཀྱི་སྲོལ་བཏོད། བརྟན་པའི་འཁོར་ལོའི་ཟུར་ཕུད་ལ་ཐོད་ཀྱིས་བསྒྲིབས་པ་ལྷ་བཙན་པོ་ཁྲི་སྲོང་ལྡེའུ་བཙན་གྱིས་བཤད་སྒྲུབ་ཀྱི་བསྟན་པ་རྒྱས་པར་མཛད་པས་མཐའ་འཁོབ་མུན་པའི་གླིང་ཆོས་ཚིགས་ཀྱི་ཡུལ་དབུས་
སུ་རང་དབང་ཉིད་དུ་བྱས་པ་ལས། རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་ཕྲིན་ལས་ཀྱི་དབང་གིས་རྣམ་པ་ཐ་དད་དུ་ཤར་བ་ནམ་མཁའི་སྐར་ཚོགས་ལྟ་བུ་ལས་ལྷོ་རྒྱུད་གཡོར་པོའི་གཞུང་འདིར་ངེས་གསང་རྡོ་རྗེ་ཐེག་པའི་རིང་ལུགས་འཛིན་པའི་དགེ་འདུན་གྱི་སྡེ་ཆགས་པ་ལ་སྔ་བར་དཔལ་རི་ཐེག་ཆེན་གླིང་ངེས་དོན་དགའ་བའི་ཚལ་གྱི་གཙུག་ལག་ཁང་ཆེན་པོ་འདི་ཉིད་དུས་གསུམ་མཁྱེན་པ་སློབ་དཔོན་ཆེན་པོས། འཕྱོང་རྒྱས་ནང་དུ་ང་སྤྲུལ་དོན་བྱེད་འོང་༔ སུ་ཡིན་མི་ཤེས་ཅིག་ཅར་སྨྲ་བ་འབྱུང་༔ འཕྱི་བ་མདོའམ་བང་སོ་མར་པོའི་ལྷོར༔ ལྷ་བབས་མཆོད་རྟེན་སྡེ་དགོན་འཆའ་ཡང་སྲིད༔ རྟེན་འབྲེལ་གཅིག་ཏུ་པདྨ་ང་ཉིད་ཀྱི༔ སྐུ་རྟེན་གཙུག་ལག་གསོལ་བ་ཐེབས་པ་ན༔ རྒྱལ་བརྒྱུད་བསྟན་པ་ལྷོ་ནས་ལྷོ་རུ་དརཿ ཞེས་དང༌། ལྷ་ཁང་རྟེན་གཙོར་པདྨ་ང་ཡི་སྐུ། །རྒྱུ་རྐྱེན་ཕུན་སུམ་ཚོགས་པ་བཞེང་པ་གཅེས། །ཞེས་འཕུར་འགྲོའི་ཡུལ་གྱི་ཐེག་པ་འཆང་བའི་དགེ་འདུན་གྱི་སྡེ་འདི་ཉིད་ཆགས་པའི་རྟེན་འབྲེལ་གྱི་ཕོ་ཉར་ལྷ་བབས་མཆོད་རྟེན་སྔོན་དུ་ཆགས་ཤིང༌། མ་སྦྱངས་ཅིག་ཅར་སྨྲ་བའི་གང་ཟག་ཐོད་རྒལ་པའང་སྔ་ཕྱིར་འགའ་ཙམ་བྱུང་ལ། དེ་ནས་ཇི་ཞིག་ན་འདི་སྐད་དུ་དཀོན་མཆོག་ཏ་ལའི་ཞུ་ལན་ལས། བང་སོ་དམར་པོའི་ཤར་མ་ལྷོ་ཡི་ཕྱོགས། །པདྨའི་སྐུ་ཚབ་བདུད་འདུལ་ཆ་ལུགས་དང༌། །
ལྷ་ལས་བབས་པའི་མཆོད་རྟེན་ཞིག་ཀྱང་འབྱུང༌། །དགེ་འདུན་སྡེ་ཚུགས་རྟེན་འབྲེལ་ལེགས་འགྲིག་ན། །རྒྱལ་བརྒྱུད་བསྟན་པ་ལྷོ་ནས་ལྷོ་རུ་རྒྱས། །ཞེས་པའི་ལུང་བསྟན་གྱི་བདེན་པའི་རྔ་བོ་ཆེ་བརྡུང་བ་ལ་བསོད་ནམས་ཀྱི་དཔུང་བ་བླ་ན་མཐོ་བའི་བདག་པོའི་རྐྱེན་དུ་གྱུར་པ་ནི་ལུང་བསྟན་གབ་རྒྱ་ཅན་ལས། ད་ལྟའི་ལྷ་སྲས་དཔལ་གྱི་འབྱུང་གནས་ནི། །ཟ་ཧོར་དབོན་བརྒྱུད་བང་སོའི་ཕོ་བྲང་དུ། །བསོད་ནམས་མིང་ལྡན་དད་པའི་བློ་གྲོས་ཅན། །པདྨ་ང་དང་སྨོན་ལམ་དུ་མར་འབྲེལ། །རྩེ་གཅིག་གུས་པས་ང་ཡི་ཟབ་གཏེར་ལ། །རྒྱུན་དུ་སྤྱོད་པས་ལས་ལྡན་སྐལ་བ་བཟང༌། །ཞེས་ལྷ་སྲས་དཔལ་གྱི་མཆོད་གནས་ཟ་ཧོར་གྱི་རྒྱལ་རིགས་ཤིང་སཱའ་ལ་པ་ཆེན་པོ་ལྟ་བུའི་རིགས་སུ་བལྟམས་པ་ཧོར་བསོད་ནམས་དར་རྒྱས་ཀྱི་ཐུགས་བསྐྱེད་དང་སྨོན་པའི་རི་མོ་དགྲ་སྟའི་དུམ་བུས་ཀྱང་གཅད་དུ་མེད་པའི་འཕྲུལ་གྱི་ཤིང་རྟས་རྣམ་པར་སྣང་མཛད་གང་ཆེན་མཚོ་རིག་གྲོལ་གྱི་སྤྲུལ་པའི་སྒྱུ་འཕྲུལ་ལ་ཆགས་པ་ལོ་ཆེན་བཻ་རོ་ཙ་ན། རྔོག་ལོ་ཆེན་པོ་བློ་ལྡན་ཤེས་རབ་གཡུ་བྲག་པ་བདེ་བའི་རྡོ་རྗེ། པཎྜི་ཏ་འབུམ་ཕྲག་གསུམ་པ་ལ་སོགས་སྐྱེས་རབས་ཀྱི་ཕྲེང་བ་ཚར་དུ་དངར་བའི་མཐར་དཔལ་ཨོ་རྒྱན་ཆོས་ཀྱི་རྒྱལ་པོའི་ངེས་པ་དོན་གྱི་རྒྱལ་ཚབ་ཏུ་བཞེངས་པ་ཀུན་མཁྱེན་འགྲོ་འདུལ་གླིང་པ་པྲཛྙཱ་ར་སྨི་གཙུག་གི་ནོར་བུར་བཀུར་ནས་རང་གི་སྲས་ལ་ཀུན་ཏུ་དོན་ཡོད་པའི་བྱ་བ་ལས་ཀྱི་འཁོར་ལོ་ཅོད་པན་བཅིངས་
པ་བཞིན། ཧོར་མི་དབང་བསོད་ནམས་སྟོབས་ཀྱི་རྒྱལ་པོས་འཁོར་ལོ་གསུམ་ལ་ལྷུར་བྱེད་པའི་དགེ་འདུན་གྱི་སྡེ་འདི་ཉིད་བཙུགས། རྟེན་གཙོར་སངས་རྒྱས་གཉིས་པ་སློབ་དཔོན་ཆེན་པོའི་སྐུ་ཚབ་བདྨ་བདུད་འདུལ་དུ་གྲགས་པ་དང༌། རྒྱ་གར་གྱི་ཤིང་རྟ་ཆེན་པོ་པ་རྣམས་ཀྱི་དགོངས་འགྲེལ་གྱི་གཞུང་བསྲངས་ནས་ཆོས་ཐམས་ཅད་མན་ངག་རྫོགས་པ་ཆེན་པོའི་འབྲས་བུར་སྟོན་པའི་གཞུང་ལུགས་ཤིང་རྟ་ཆེན་མོ་རྩ་འགྲེལ་ཆོས་སྦྱིན་མི་ཟད་པའི་ཕྱི་མོར་བསྒྲུབས་པས་མཚོན་སྐུ་གསུང་ཐུགས་རྟེན་བསམ་གྱིས་མི་ཁྱབ་པ་ཞིག་གསར་དུ་བསྒྲུབས་པ་ལ་མཁས་པ་ཆེན་པོ་ཀརྨ་པ་མི་བསྐྱོད་རྡོ་རྗེ་དང༌། བྱེ་བྲག་ཏུ་ཆོས་ཀྱི་རྒྱལ་པོ་འགྲོ་འདུལ་གླིང་བ་ཐམས་ཅད་མཁྱེན་པ་པྲཛྙཱའི་ཞབས་ཀྱིས་ས་གཞི་ལྷག་པར་གནས་ཤིང་མངའ་གསོལ་བསྟན་པའི་ངོ་བོ་ལུང་གི་ཆོས་གསུང་རབ་ཡན་ལག་བཅུ་གཉིས་ཀྱི་གཞི་མ་དམ་པའི་ཆོས་འདུལ་བ་ལ་ལེགས་པར་བསླབ་པའི་ཚུལ་དཔལ་མགོན་འཕགས་པ་དབྱིག་གཉེན་གྱི་མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམས་པ་ནི་རབ་ཏུ་སྦྱོར། །ཞེས་གསུངས་པ་ལྟར་ཚུལ་ཁྲིམས་རྣམ་པ་གསུམ་གྱི་གོ་ཆས་བག་ཡོད་པར་བསྲུངས་ཤིང༌། སྤྱངས་པའི་ཡོན་ཏན་བཅུ་གཉིས་རྒྱུད་ལ་བརྟེན་པ་དངཆབ་གཅིག་པར་གཞི་གསུམ་གྱི་ཆོ་གའི་ལག་ལེན་ལ་བརྩོན་པ་དང་བརྟན་མཁས་ཀྱི་ཡོན་ཏན་ལ་བྱང་ཆུབ་པར་བསླབས་
ཤིང་སྤྱོད་ཡུལ་རྣམ་པར་དག་པའི་ངོས་ནང་དུ་གསང་སྔགས་རྡོ་རྗེ་ཐེག་པའི་རིམ་པ་གཉིས་ཀྱི་རྣལ་འབྱོར་ལ་ལམ་དུ་བྱེད་པས་རྟོགས་པའི་ཆོས་ཤེས་རྒྱུད་ལ་ལྐོག་ཏུ་མ་གྱུར་པར་མངོན་དུ་བསྒྲུབ་པའི་དགེ་འདུན་གྱི་སྡེ་ཇེ་འཕེལ་དུ་གྱུར་པའི་སྐབས་ཤིག །འདོད་པའི་ལྷས་སྙིང་ལ་ཤིན་ཏུ་གནས་མལ་བཅས་པའི་ནག་པོའི་རྩ་ལག་ཇུན་གར་པས་རང་དང་རང་འདྲའི་བསྟན་པ་དེ་འཛིན་དང་བཅས་པ་ཉམས་དམས་པར་བྱས་པས་སྔོན་གྱི་དུས་ཇི་ལྟར་བསྒྲུབས་པའི་རྟེན་དང་བརྟེན་པའི་དངོས་པོ་མིང་གི་ལྷག་མ་ཙམ་དུ་ཕམ་པར་བྱས་ནའང༌། དེང་གི་གནས་སྐབས་ན་མཐོང་བའི་ཆོས་སུ་གྱུར་པ་ནི། རྒྱལ་བ་སྲས་བཅས་རྣམས་ཀྱིས་དབྱིངས་ནས་དགོངས་པའི་ཐུགས་རྗེ་དང༌། རྡོ་རྗེ་གདན་གྱི་དཔག་ཚད་ལྔ་བརྒྱ་ལ་སོགས་པའི་ནམ་མཁའ་ལ་འཕྱང་བའི་བསྟན་པའི་བཙས་གསུམ་གྱི་བྱིན་རླབས། ཁྱད་པར་དུ་སློབ་དཔོན་ཆེན་པོ་པདྨ་འབྱུང་གནས་ཀྱི་ཐུགས་རྗེ་དང་ནུས་པའི་རྩལ་ཤུགས་ཤིང་རྟའི་འཕང་ལོ་ལས་ཀྱང་དང་དྲགས་པས་དུས་ཀྱི་རྒུད་པ་བཅིལ་ཏེ་ཡུལ་ཁམས་བདེ་འབྱམས་སུ་གྱུར་པ་ལས། ཚ་ཟེར་གྱིས་གདུངས་པའི་པདྨོ་སླར་ཡང་དག་བྱེད་ཀྱི་སིམ་པས་སོར་ཆུད་དེ་བལྟ་ན་སྡུག་པའི་ལང་ཚོ་མཆོག་ཏུ་བརྟས་པ་ལྟར། གཙུག་ལག་ཁང་རྟེན་དང་བརྟེན་པར་བཅས་པ་འགྲོ་བའི་བསོད་ནམས་ཀྱི་ཞིང་ས་དམ་པར་སོར་ཆུད། དེའང་ཆོ་འཕྲུལ་རྣམ་
པར་བསྟན་པ་ལས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་ཐབས་ལ་མཁས་པ་དང༌། སེམས་ཅན་ཡོངས་སུ་སྨིན་པར་བྱ་བ་ནི་མང་ངོ། །སེམས་ཅན་རྣམས་ཀྱི་བསམ་པ་ཇི་ལྟ་བུ། ཇི་ལྟར་འདུལ་བ་དང༌། དགེ་བའི་རྩ་བ་ཇི་ལྟ་བུ་དང༌། སེམས་ཅན་རྣམས་ཀྱིས་མོས་པ་སྣ་ཚོགས་ཀྱི་སྤྱོད་པ་མཁྱེན་ནས་ཆོས་སྟོན་ཏེ། སེམས་ཅན་ཁ་ཅིག་ནི་བྱང་ཆུབ་སེམས་དཔའ་འདུལ། ཁ་ཆིག་ནི་ཉན་ཐོས་ཀྱིས་འདུལ། ཁ་ཅིག་ནི་རང་སངས་རྒྱས་ཀྱིས་འདུལ། ཁ་ཅིག་ནི་ལྷས་འདུལ། ཁ་ཅིག་ནི་བརྒྱ་བྱིན་གྱིས་འདུལ། ཁ་ཅིག་ནི་ཚངས་པས་འདུལ། ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་ཉན་པས་འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་ངན་ལས་འདས་པས་འདུལ། ཁ་ཅིག་ནི་རིང་བསྲེལ་གྱིས་འདུལ། ཁ་ཅིག་ནི་མཆོད་རྟེན་བྱེད་དུ་འཇུག །གཙུག་ལག་ཁང་དང༌། སྐྱེད་མོས་ཚལ་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་སྐུ་གཟུགས་བྱེད་དུ་གཞུག་པ་དང༌། རི་མོ་དང༌།
གསེར་དང༌། དངུལ་དང༌། ར་གན་གྱིས་སྐུ་གཟུགས་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་དགེ་སློང་གི་དགེ་འདུན་ལ་མཆོད་པ་དང་བཀུར་སྟི་བྱ་བའི་དགེ་བའི་རྩ་བར་སྤྲོ་བ་བསྐྱེད་པས་འདུལ། ཁ་ཅིག་ནི་མདོ་སྡེ་འདྲི་བ་དང༌། འདྲིར་གཞུག་པ་དང༌། བཀླག་པ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་མར་མེ་དང༌། སྤོས་དང༌། མེ་ཏོག་དང༌། དྲི་དང༌། ཕྲེང་བ་དང༌། དོ་ཤལ་ལ་སོགས་པས་བརྒྱན་པ་ལ་སྤྲོ་བ་བསྐྱེད་པས་འདུལ་བ་ཡིན་ཏེ་དོན་དམ་པ་མཁས་པའི་ཆོས་དང་ལྡན་པ་དང༌། མྱ་ངན་ལས་འདས་པའི་ཆོས་དང་ལྡན་པ་ནི་མ་ཡིན་ནོ། །ཞེས་གསུངས་པ་ལྟར། མདུན་གཙོར་བཞུགས་པའི་བཅོམ་ལྡན་འདས་གཟུགས་ཀྱི་རྒྱལ་པོ་རྣམ་པར་སྣང་མཛད་སྐུ་རྒྱུ་ཆོས་རྒྱལ་ལི་མ་ལས་གྲུབ་པ་འདི་སྔོན་གྱི་ཚེའུ་ཤང་རྡོའི་ལྷ་ཁང་གི་རྟེན་གཙོ་ལས་གྱུར་པ་བར་སྐབས་སུ་གཙང་རོང་ཚ་མིག་གི་གཙུག་ལག་ཁང་དུ་བཞུགས་པའི་བྱིན་རླབས་ཤིན་ཏུ་ཆེ་བར་གྲགས་པ་ལས། འཇིག་རྟེན་གྱི་འབྱོར་རྒུད་སྲང་མདའི་མཐོ་དམན་ལྟ་བུར་རྟག་ཏུ་མི་བཟོད་པ་དང༌། བསྟན་པའི་གནས་ཚུལ་ཡང་ལ་ལན་འགྲིབ་པ། ལ་ལན་འཕེལ་བའི་ཆོས་ཉིད་ཅན་དུ་ངེས་ཕྱིང་ཡུལ་དབུས་ཀྱི་སའི་ཆར་རིམ་པར་སྤྱན་དྲངས་ཏེ་བཞུགས་སུ་གསོལ་ནས་བདག་ཏུ་ལྟ་བ་ལ་གོམས་ཤུགས་ཤིན་ཏུ་བརྟས་པའི་བྱིས་པ་སོ་སོ་སྐྱེ་བོའི་སྡེ་ཚན་རྒྱ་དམན་ལྡན་མ་པ། གྱིས་རང་
དབང་དུ་བྱེད་པའི་གཉེར་ཀ་དང༌། དེ་བཞིན་དུ་ཙཱ་རིའི་ཞིང་སྐྱོང་ཀུན་དགའ་གཞོན་ནུ་དང་རྒྱུད་གཅིག་པར་གྲགས་པའི་འཇིག་རྟེན་གྱི་དྲེགས་པ་ནག་པོ་ཁྲག་རལ། མཐུ་བོ་ཆེས་མེལ་ཚེ་བྱེད་བཞིན་པར་བཞུགས་པའི་གནས་སྐབས་ཤིག་ན་ཁོ་བོའི་འགྲོ་དོན་དཔལ་གྱི་རི་བོར་ཆེ། ཞེས་པའི་གསུང་ལན་མང་དུ་བྱོན་པ་ལ་རྟེན་གནས་གཞི་འདིར་གདན་དྲངས་པ་ནི་དཔྱོད་ལྡན་རྣམས་ཀྱིས་འདི་ལྟར་རྟོགས་པར་གྱིས་ཤིག །གནས་དགོན་འདི་གང་ལ་བརྟེན་ནས་ཆགས་ན་སྤྲུལ་པའི་གཏེར་སྟོན་ཆེན་པོ་ཐམས་ཅད་མཁྱེན་པ་འགྲོ་འདུལ་གླིང་པ་ཞེས་གྲགས་པ་དོན་དང་ལྡན་པའི་སྐྱེས་བུ་དེ་ཉིད་ཀྱི་ཐུགས་བསྐྱེད་དང་སྨོན་པའི་མཐུ་གཅིག་པུ་ཉིད་ལས་གཞན་དུ་མ་ཡིན་ལ། བདག་ཉིད་ཆེན་པོ་འདི་ནི་ལོ་ཙཱ་བ་ཆེན་པོ་བཻ་རོ་ཙ་ནའི་སྤྲུལ་པར་བསྙོན་དུ་མེད་པས་ན། བཻ་རོའི་སྦྲུལ་གཞི་རྣམ་སྣང་གང་ཆེན་མཚོ་ར་ངེས་པའི་ཕྱིར་གང་ལ་བརྟེན་ནས་དེའི་བསྟན་པ་དང་འབྲེལ་བའི་རྟེན་འབྲེལ་གྱི་སྒོ་བླ་ན་མེད་པ་ཉིད་ཀྱིས་སྟོན་པ་ཕུན་སུམ་ཚོགས་པའི་ངོ་བོར་བྱོན་པ་ཡིན་ལ། རྒྱུ་མཚན་དེས་ནག་པོའི་རྩ་ལག་ཇུན་གར་བས་གནས་གཞི་འདི་མ་རུངས་པར་བྱས་པའི་ཚེ་འཕྱིང་དབར་ལྟག་རྩེར་གདན་དྲངས་པ་ནའང་སྤྱན་ལས་མཆི་མ་ཐོན་ཞིང་ཁྱོགས་ལ་ཤིན་ཏུ་འདེགས་དཀའ་བ་སོགས་བྱུང༌། ཕྱིན་ཆད་དགོན་སྡེ་ཚུགས་ནས་གཙང་ཁང་འདིར་སྤྱན་
པའི་ཚེ་ཤ་ཐང་པའི་ངལ་བ་ལ་མ་ལྟོས་པར་བདེ་བླག་དུ་བྱོན་བདེ་བ་སོགས་མདོར་ན་རྒྱུ་དངོས་ཡེ་ཤེས་ཀྱི་གཟི་བྱིན་མཐའ་ཡས་པའི་སྒོ་ནས་ཁྱད་དུ་འཕགས་པས་གཙུག་ལག་ཁང་འདིའི་ཡིད་བཞིན་ནོར་བུ་གཅིག་ཏུ་བཞུགས་པའི་གཡས་གཡོན་དུ་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་ལྷས་སྔ་འགྱུར་བསྟན་པའི་རྩ་ལག་ཏུ་བསྐྲུན་པ་རྒྱུད་འབུམ་རིན་པོ་ཆེ་པོད་ཉི་ཤུ་རྩ་ལྔ་དང༌། རྟེན་གཙོ་རྣམ་སྣང་ལ་དངུལ་སྲང་བརྒྱ་ཕྲག་གི་རྒྱུ་ཚོགས་ལས་གསེར་ཟངས་ཀྱི་པྲོག་ཞུ་ཕྲ་ཕུལ་ལེགས་པ། རྒྱལ་བའི་བཀའ་འགྱུར་རོ་ཅོག་དབུ་ཤོག་གསེར་བྲིས་བཟང་གོས་ཀྱི་ཞལ་ཁེབས་དང་བཅས་པ། སྐུ་རྟེན་ཕྱོགས་བཅུའི་སངས་རྒྱས་ལྡེམ་སྐུ་འདུས་པ་མདོའི་དཀྱིལ་འཁོར་ཆེན་པོར་རབ་ཏུ་གནས་པ་བྱིན་རླབས་ཅན། བསྐལ་པ་བཟང་པོའི་སྒྲོན་མེ་བཞི་པ། ཨོ་རྒྱན་སངས་རྒྱས་གཉིས་པའི་སྣང་བརྙན། ཀུན་མཁྱེན་པྲ་ཛྙཱའི་ཞབས་ཀྱི་ཟངས་སྐུ་བྱིན་ཅན་འདི་གསུམ་དགོན་སྡེ་དང་པོར་ཆགས་པའི་རྟེན་སྐལ་གྱི་ཚུལ་འཕྱོང་རྒྱས་ཞབས་དྲུང་ནས་བཞེངས་པས་མཚོན་རིང་མོ་ཉིད་ནས་ནང་རྟེན་དུ་བཞུགས་པའི་སངས་རྒྱས་བྱང་སེམས་ཡི་དམ་ཞི་ཁྲོའི་སྣང་བསྙན་ལི་མ་དང་གསེར་ཟངས་ཀྱི་གྲལ་རིམ། སྤྱིར་དོན་གྱི་སླད་དུ་མཚན་ནས་སྨོས་པ་རྗེ་བཙུན་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གླིང་བའི་བསྟན་པ་ལ་རབ་ཏུ་བྱུང་ཞིང་གསུང་གི་རྒྱུད་ལས་སྐྱེས་པ་སྔ་ཕྱིར་བྱོན་པ་རྣམས་ཀྱི་ཐུགས་
བསྐྱེད་དང་སྨོན་ལམ། སྔོན་གོམས་ཀྱི་ལས་འཕྲོ་བཟང་པོས་སྡེ་འདི་ཉིད་སོར་ཆུད་པར་མཛད་པ་ལས། རིག་འཛིན་ཐུགས་མཆོད་རྡོ་རྗེ་ཞེས་དགེ་སློང་ནམ་མཁའི་སྙིང་པོ་དང༌། ལྡན་མ་རྩེ་མང་ཟུང་འཇུག་གི་སྤྲུལ་པའི་ཟློས་གར་དུ་ལུང་གིས་ཟིན་ཅིང༌། དཔལ་ཨོ་རྒྱན་རྡོ་རྗེ་འཆང་གི་ཟབ་རྒྱའི་གསང་མཛོད་འཛིན་པའི་སྐྱེས་བུ་དེས་ཡོན་སྦྱར་ཏེ་རྟེན་གྱི་གཙོ་བོ་སྐུ་ཚབ་རིན་པོ་ཆེ་ངོ་བོ་སྐུ་གསུམ་རིགས་ཀུན་འདུས་པའི་བདག་ཉིད་པདྨ་གུ་རུ་ལ་གནས་དུས་ཀྱི་དབང་ལས་ཨོ་རྒྱན་ནོར་ལྷ་ཁྲོ་འཛུམ་སྒེག་པའི་རྣམ་པར་བརྗིད་པས་འཇིག་རྟེན་ཐམས་ཅད་ཀྱི་རྒུད་པ་སེལ་བའི་ཡོན་ཏན་གྱིས་བྱུག་ཅིང་མཐོང་ན་མི་མཐུན་པ་མེད་པ་བཟོ་སྒྲོས་སུ་བྱོན་པ་ལ་རིག་འཛིན་བླ་མ་གྲུབ་པའི་ཁྱུ་མཆོག་ཆེན་པོ་དེ་ཉིད་ཀྱི་སྲོག་ཤིང་ལ་སོགས་པའི་གཟུངས་ཀྱི་བྱ་བ་ཐམས་ཅད་ཁ་ན་མཐོ་བའི་རྐྱེན་གྱིས་བརྫི་བ་མེད་པར་ཕྱག་བསྟར་མཛད། ཐུབ་པའི་དབང་པོ་དང༌། གསེར་ཐུབ་ཀྱི་འཕེལ་གདུང་བཅུ་ཕྲག་རེ་རེ། སྔ་ཕྱིར་བྱོན་པའི་གཏེར་བྱོན་གྱི་དམ་རྫས་བགྲངབར་དཀའ་བ་ངང༌། ཁྱད་པར་དུ་གུ་རུ་རིན་པོ་ཆེའི་ཟབ་ཕོད། དབུ་ལོ། བྱང་སེམས་དཀར་དམར་གྱི་ཆ་ཤས་བདེ་སྟོང་ཡེ་ཤེས་ཀྱི་རིལ་བུ་ཨ་ཐམ་མ་དང༌། ཧྲཱིཿརྒྱ། རྒྱ་བོད་ཀྱི་པཎ་གྲུབ་སྐྱེས་ཆེན་དམ་པ་རིས་སུ་མ་ཆད་པའི་གདུང་དང་སྐུ་བལ་གྱི་རིང་བསྲེལ་ཤིན་ཏུ་
མང་བ་དང་ཆབ་གཅིག་པར། ཐེག་པ་གསུམ་དང་རྒྱུད་སྡེ་དྲུག་གི་ཆོས་སྐུའི་རིང་བསྲེལ་བསམ་གྱིས་མི་ཁྱབ་པས་ཕྱུར་བུར་གཏམས་ཤིང༌། གཡས་གཡོན་གྱི་གྱང་ལ་ལོགས་ལ་འཇའ་སྤྲིན་འོད་ཀྱི་འཁོར་ལོའི་ནང་ཁོངས་སུ་དེ་བཞིན་གཤེགས་པ་སུམ་ཅུ་སོ་ལྔས་མཚོན་པའི། བསྟན་གཙོའི་སྣང་བརྙན་སོ་སོར་སངས་རྒྱས་གསེར་ཐུབ་ཀྱི་འཕེལ་གདུང་རེའི་ནང་གཟུངས་དང་བཅས་པ་བཞུགས་སུ་གསོལ་བ་ལ། ཡེ་ཤེས་གཟིགས་པའི་སྐྱེས་བུ་དམ་པ་རྣམས་ཀྱིས་བྱ་བ་ལས་ཀྱི་འཁོར་ལོས་བསྐྱེས་བསྲིངས་པའི་རྟེན་ལ་རབ་གནས་རང་བཞིན་གྱིས་ཆགས་པ་ཆོས་ཉིད་ཡིན་པའི་སྟེང༌། བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མི་བསྐྱོད་པ་དང༌། རྟག་པ་ཧེ་རུ་ཀ་ལ་སོགས་པ་རིགས་ཀྱི་རྒྱལ་པོ་ཡོངས་རྫོགས་འདུས་པ་རྒྱལ་བ་ཞི་ཁྲོའི་དཀྱིལ་འཁོར་ཆེན་པོར་རབ་ཏུ་གནས་པས་བལྟར་མི་བཟོད་པའི་གཟི་བྱིན་གྱི་དཔལ་དུ་འབར་ཞིང་འགྲོ་བ་ལྷ་དང་བཅས་པའི་ཉེར་འཚོ་དམ་པར་ལྷུན་ཆགས་པའོ། །དེ་ནས་རིང་པོ་མ་ལོན་པའི་གནས་སྐབས་ན་དམ་པ་དེ་ཉིད་ཞི་བ་ཆེན་པོའི་གྲོང་ཁྱེར་དུ་གཟིམས་པའི་དགོངས་རྫོགས་སུ་དངོས་ཅག་དང་སློབ་མར་གྱུར་པ་རྣམས་ནས་སྒོ་གསུམ་གྱིས་བརྩོན་པ་ཆེན་པོའི་སྲི་ཞུ་མི་ལྷོད་པས་ཀུན་ནས་བླངས་ཤིང༌། ཁྱད་པར་དུ་སྐུ་གསུམ་ཐུགས་ཀྱི་རྟེན་བཞེངས་ཀུན་གྱི་མདོ་དོན་གཟུངས་འབུལ་
དང་རབ་གནས་ཀྱི་བྱ་བ་ཁོ་ན་ལ་རག་ལུས་པ་ཉིད་དུ་ངེས་ན། དེའི་གནས་ལ་བློ་གྲོས་ཀྱི་སྣང་བ་མུན་པའི་གཟེབ་ལས་གྲོལ་བའི་རྫོགས་ཆེན་པ་རང་བྱུང་རྡོ་རྗེ་འཇིགས་མེད་གླིང་པས་སྲོག་ཤིང་གིས་མཚོན་གཟུངས་ཀྱི་བྱ་བ་དང་བྱེད་པ་ཐམས་ཅད་སློབ་དཔོན་ཆེན་པོ་ཀླུ་སྒྲུབ་ཞབས་དང༌། ཛེ་ཏ་རོའི་རྒྱ་གཞུང་ལ་བརྟེན་ནས་ཁུར་དུ་བཟོད་པར་མཛད་ཅིང་དེའི་ཡན་ལག་ཏུ་དགེ་འདུན་འདུ་བ་དང༌། སྔགས་སྡེ་སྤེལ་བའི་བཅའ་གཡང་ཉམས་སུ་བསྟར་བའི་རྟེན་འབྲེལ་མངོན་དུ་གྱུར་པའི་གཟུགས་སྐུའི་སྣང་བ་ཇི་ལྟར་བྱོན་པ་ནི། གཡས་ཕྱོགས་ན་གངས་རིའི་ཁྲོད་དུ་དམ་པའི་ཆོས་འདུལ་བའི་བསྟན་པ་རིན་པོ་ཆེ་འབྱུང་བའི་རྩ་ལག་དམ་པར་གྱུར་ཅིང་དབུ་མ་རང་རྒྱུད་པའི་མཎྜི་ཏ་ཆེན་པོ་མཁན་ཆེན་ཞི་བ་འཚོ། གཡོན་ཕྱོགས་ན་ལྗོངས་འདིར་རྒྱལ་བའི་བསྟན་པ་རིན་པོ་ཆེ་མགྲོན་པོར་འབོད་པ་ལ་ཆོས་རྒྱལ་མྱ་ངན་མེད་ཀྱི་བརྟུལ་ཞུགས་འཛིན་པ་ལྷ་བཙན་པོ་ཁྲི་སྲོང་ལྡེའུ་བཙན། གཡས་གཡོན་དུ་དབང་པོ་བཞི་གནས་སུ་དག་པའི་ངོ་བོ་བྱང་ཆུབ་སེམས་དཔལ་བྱམས་པ། སྒྲིབ་པ་རྣམ་སེལ་འཇམ་དཔལ། ཕྱག་ན་རྡོ་རྗེ་སྟེ་ཕྱིའི་སེམས་དཔའ་བཞི། རྣམ་པར་ཤེས་པ་བཞི་གནས་སུ་དག་པའི་ངོ་བོ་ནམ་མཁའི་སྙིང་པོ། ས་སྙིང༌། སྤྱན་རས་གཟིགས། ཀུན་ཏུ་བཟང་པོ་སྟེ་ནང་གི་སེམས་དཔའ་བཞི་རྣམས་ལས་ཉེ་བའི་སྲས་བརྒྱད། གང་གིས་བྱང་ཆུབ་ཆེན་པོར་ཐུགས་
བསྐྱེད་པའི་ཚེ་རང་གི་མཚན་ཙམ་ཐོས་པས་ཀྱང་ལས་དང་སྒྲིབ་པ་ཟད་པར་སྨོན་ལམ་བཏབ་པའི་བཅོམ་ལྡན་འདས་དཔའ་རྡོ་རྗེ་སེམས་དཔའ་རྣམས་ཏེ་འདི་རྣམས་ཀྱི་ནང་བཞུགས་ཀྱི་གཙོ་བོར་རིང་བསྲེལ་རྣམ་པ་བཞི་ལས་ཆོས་སྐུའི་རིང་བསྲེལ་རྣམས་སྲོག་ཤིང་གི་ངོས་ལ་ཐེག་པ་དང་རྒྱུད་སྡེའི་གོ་རིམ་མ་འཆོལ་བར་བཞུགས་སུ་གསོལ། ཀུན་ལ་དེ་བཞིན་གཤེགས་པའི་འཕེལ་གདུང་དང་ཐབས་ཤེས་བདེ་སྟོང་གི་རིལ་བུ་ཨ་རྒྱ་ཅན་རེ་རེ། གཞན་རྒྱ་བོད་ཀྱི་སྐྱེས་ཆེན་པཎ་གྲུབ་མང་པོའི་གདུད་དང་སྐུ་བལ་གྱི་རིང་བསྲེལ་ཟློས་ཀྱིས་མི་ལང་བས་ཕྱུར་བུར་གཏམས། ཁྱད་པར་བརྟེན་པའི་རང་བཞིན་འདི་དག་གང་གིས་ཐུགས་བསྐྱེད་ལས་གྲུབ་པའི་བདག་པོའི་རྐྱེན་དུ་གྱུར་པ་གྲུབ་དབང་བླ་མ་མཆོག་གི་སྣང་བརྙན་འདིའི་ཐུགས་ཀ་ན་སློབ་དཔོན་ཆེན་པོའི་སྐུ་ཚབ་སྲིན་ཐོད་མ་ཁྱད་པར་ཅན་ཞིག་བཞུགས་ཡོད་པས་བྱིན་རླབས་མཆོག་ཏུ་ཆེ་བ་ཡིན་ནོ། །རྟེན་བཞེངས་གྲུབ་པའི་དེ་མ་ཐག་པར་ཕྱི་ནང་གཞན་གསུམ་རྟེན་འབྲེལ་གནད་གཅིག་པའི་ཉེ་རྒྱུ་ལས། སྣང་བ་དང་སྲིད་པའི་ཆོས་སུ་གྱུར་ཏོ་ཅོག་གཟུང་འཛིན་ཟ་བྱེད་དབུ་མའི་གྲོང་ཁྱེར་གཅིག་ཏུ་ཤར་བའི་ལྟོ་བར་བྱང་ཆུབ་ཀྱི་སེམས་རིན་པོ་ཆེ་རྣམ་པར་དག་པ་ནི་རྡོ་རྗེ་ཐེག་པའི་ཉེ་ལམ་རྣམས་ཀྱིའང་བསྒྲུབ་བྱའི་མཐར་ཐུག་པ་ཡིན་ལ། དེའི་ངང་ཚུལ་བླ་ན་མེད་པ་ནི་འདིའོ་ཞེས་འཇིག་རྟེན་ཡོངས་ལ་མཚོན་པར་བྱ་བའི་བྱེད་པ་པོ་ཟླ་བ་ལ་དུས་མེ་འཇུག་པའི་སྦྱོར་བ་རྩོམ་པ་དང་ཆབ་
གཅིག་པར་ལྷག་པ་ཡེ་ཤེས་ཀྱི་འཁོར་ལོ་དམ་ཚིག་སེམས་དཔའི་ཐུགས་ཀར་བཅུག་པས་རབ་གནས་རང་བཞིན་གྱིས་ཆགས་པའི་རྟེན་འབྲེལ་དུ་གྱུར་ཏོ། །གཞན་ཡང་ལྷ་བཙུན་ནམ་མཁའ་འཇིགས་མེད་ཉེ་རྒྱུའི་སྤྱོད་པ་ལ་གཤེགས་སྐབས་ཀྱི་དམ་ཚིག་གི་ཁ་ཊྭཱཾ་ཀ །གནས་བརྟན་འདུལ་བ་འཛིན་པ་ཀུན་བཟང་འོད་ཟེར་གྱི་གཤེགས་རྟེན་ལ་བཞེངས་པའི་དུས་གསུམ་སངས་རྒྱས་རྣམས་དང༌། གཙུག་ལག་ཁང་ལྟེ་བར་གྱང་རིས་ཀྱི་ཚུལ་དུ་བཞུགས་པ་ནི། དགོན་སྡེ་འདི་ཉིད་ཀྱི་མེ་ཏོག་ཕོག་པའི་ལྷ་སྐལ་དུ་གྱུར་པ་གྲོལ་ཐིག་རིག་འཛིན་གྱི་ལྷ་ཚོགས་དང༌། གཏེར་ཁ་གོང་འོག་གཉིས་སུ་མེད་པའི་ཁྱད་གཏེར་ཆེན་པོ་བླ་མ་གསང་བ་འདུས་པ་གཙོར་གྱུར་ལ་འདོད་ལྷ་སྣ་ཚོགས་མགྲོན་ཐབས་སུ་བཀོད་པ་གུང་གི་ཆ་ལ་བཞུགས་ཤིང༌། མགོན་ཁང་སྒོ་གདོང་ན་རྡོ་རྗེ་གཤོག་རྒོད་མའི་སྣང་བརྙན། གཡས་ཕྱོགས་ལ་བསྒྲུབ་ཆེན་བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་གྱི་འཁོར་ལོ་ཆོས་སྐྱོང་སྲུང་མའི་མགྲོན་ཐབས་དང་བཅས་པ། གཡོན་ཕྱོགས་ན་བླ་མ་དགོང་པ་འདུས་པ་ཞི་ཁྲོ་ཡོངས་རྫོགས་ཀྱི་སྣང་བརྙན། ཡས་གཟིགས་རྣམས་ལ་འཇམ་དཔལ་དུས་དགྲའི་དབང་པོ་ནག་པོ་སུམ་སྒྲིལ་གྱི་ལྷ་ཚོགས་དང༌། བཅོམ་ལྡན་འདས་དཔལ་རྡོ་རྗེ་ཕུར་པའི་དཀྱིལ་འཁོར་རྣམ་པ་གསུམ་གྱི་འཆར་གཞི་དང་བཅས་པ་རྣམས་རང་བཞིན་སྤྲུལ་པའི་ཞིང་དང༌། ཁྱད་པར་དབུས་ཕྱོགས་མེ་རི་འབར་བའི་
ངོ་མཚར་གྱི་བཀོད་པ་ཆུ་བུར་དང་བཅས་པའི་མིག་གི་གྲོང་ཁྱེར་ག་ལ་བར་བདེ་བླག་ཏུ་འཇུག་པའི་བྱེད་པ་པོར་གྲུབ་བོ། །སྒོ་གདོང་ན་དགེ་བསྙེན་ཆེན་པོ་རྡོ་རྗེ་ལེགས་པ་ཞེས་མཐུ་སྟོབས་ཀྱི་རུ་མཚོན་དུས་ཀྱི་མེ་ལྕེ་ལས་ཀྱང་ཤུགས་དྲག་པ་དེ་ཉིད་དགོན་གནས་སྡེ་དང་བཅས་པའི་མེལ་ཚེ་ལ་རིངས་པའི་ཚུལ་གྱིས་བཞུགས་ཤིང༌། སྒོ་ཁང་གཡས་གཡོན་འཇིག་རྟེན་སྐྱོང་བ་སྡེ་དང་བཅས་པས་ལེགས་པར་བསྲུང་བའི་ནང་ཁོངས་སུ་གནས་བརྟན་འདུལ་བ་འཛིན་པ་ས་མནྟ་བྷ་དྲ་རྣམ་གཉིས་ཀྱི་དད་བརྩོན་དང་སྙིང་སྟོབས་རྨད་དུ་བྱུང་བས་བསྒྲུབས་པའི་ཆོས་དཀོན་མཆོག་ཡི་གེའི་རྣམ་ཆར་ཤར་བ་སྟོན་པ་བདེ་བར་གཤེགས་པའི་ལུང་གི་ཆོས་འཁོར་ལོ་གསུམ་དང་རྒྱུད་སྡེ་བཞིའི་ངེས་འབྱེད་འགོག་ལམ་གྱི་བདེན་པའི་ངོ་བོར་རྣམ་པ་ཉི་ཤུས་བྱང་ཆུབ་པའི་བདག་ཉིད་ཅན་བཀའ་འགྱུར་རིན་པོ་ཆེ་ཚལ་པ་མའི་རྗེས་སུ་འབྲངས་པ་དང༌། དེའི་གནས། ཟབ་པ། བརླིང་བ། དཀྱིལ་ཆེ་བ། གཅིག་ལས་དུམ་དང༌། དུ་མ་ལས་གཅིག་ཏུ་འཆར་བཟོད་པའི་དཀའ་བའི་གནས་རྣམས་སེམས་ཅན་གྱི་མོས་པ་དང་འཚམས་པར་འཛམ་བུའི་གླིང་མཛེས་པར་བྱེད་པའི་རྒྱན་དྲུག་གམ་མཆོག་བརྒྱད་ལ་སོགས་པའི་པཎ་གྲུབ་རྣམས་ཀྱིས་དོན་བཟང་པོ། ཚིག་འབྲུ་བཟང་པོ། མ་འདྲེས་པ་ལ་སོགས་མདོར་ན་འཆོས་སྐྱོབ་གཉིས་ཀྱི་ཡོན་ཏན་དང་ལྡན་པར་བཀྲལ་བའི་བསྟན་འགྱུར་རིན་པོ་ཆེ། དགེ་འདུན་འདུས་པའི་དབུས་ན་ལྷམ་མེར་མཛེས་པ་ཡིན་ལ། སེང་ག་ཡབས་
གུང་གི་ཆའི་ལྡེབས་བྲིས་ལ་བཅོམ་ལྡན་ཐུབ་པའི་དབང་པོ་ལ་གཡས་གཡོན་དུ་སངས་རྒྱས་སུམ་ཅུ་སོ་ལྔ་པ་མཛེས་པ། ཕན་ཚུན་གཉིས་ལ་ཤཱཀྱ་ཐུབ་པའི་བསྟན་པ་ལ་བསྐལ་པའི་བར་དུ་བྱ་བ་ལྷག་པར་བྱས་པ་འཕགས་པའི་གནས་བརྟན་ཆེན་པོ་བཅུ་དྲུག །ལྷ་མགྲོན་དུ་དགོན་སྡེ་འདི་ཉིད་རིགས་ཀྱི་ཅོད་པན་སྤྲུལ་པའི་གཏེར་སྟོན་ཆེན་པོ་པྲཛྙཱའི་ཞབས་གདུང་རབས་བརྒྱུད་མར་བཀའ་དྲིན་གཞལ་གྱིས་མི་ལང་བའི་བསྟན་པའི་སྦྱིན་བདག་ཆེན་པོ་ཟ་ཧོར་རིགས་ཀྱི་མྱུ་གུ་གསར་པ་རྒྱལ་དབང་ལྔ་པ་ཆེན་པོ་དང༌། གང་གི་ཡབ་མེས་འཕྱོང་རྒྱས་ཞབས་དྲུང་ཧོར་བསོད་ནམས་དར་ཞིང་རྒྱས་པའི་ཉིན་བྱེད། སྔགས་རྒོད་ལོག་ཧྲི་པཱ་ལ། རྟ་མགྲིན་དྲེགས་པ་ཟིལ་གནོན། དེ་དག་དང་ཤིན་ཏུ་ཉེ་བར་གྲུབ་བརྒྱ་ལྷ་ཁང་གྱང་རིས་རྣམ་འགྱུར་བདེ་བ་དང་བཅས་པས་མཛེས་པར་བྱས་སོ། །གཙུག་ལག་ཁང་གི་སྟེང་ན་སྤྲུལ་པའི་སྐུ་ངག་དབང་བློ་བཟང་པདྨའི་དགོངས་རྫོགས་སུ་བཞེངས་པའི་བླ་མ་ལྷ་ཁང་གི་རྟེན་གཙོར་དཔལ་ཨོ་རྒྱན་ཆོས་ཀྱི་རྒྱལ་པོའི་སྣང་བརྙན། གཡས་གཡོན་དུ་རྒྱུད་ལུང་མན་ངག་གསུམ་གྱི་བསྟན་པའི་འབྱུང་ཁུངས་རྒྱ་གར་གྱི་རིག་འཛིན་བརྒྱད། སྤྲུལ་སྐུ་རིན་པོ་དེ་ཉིད་ཀྱི་སྣང་བརྙན་དང་བཅས་པ་རིང་བསྲེལ་རྣམ་པ་བཞིས་ཕྱུར་བུར་གཏམས་ཤིང༌། བྱེ་བྲག་ཏུ་རྟེན་གཙོའི་ནང་གཟུངས་ཀྱི་གཙོ་བོར་རྒྱུད་སྡེ་རབ་འབྱམས་ཀྱི་གསང་བ་འཛིན་པ་ཆེན་པོ་བྱང་ཆུབ་
སེམས་དཔའ་རྡོ་རྗེ་ཆོས་ཀྱི་སྣང་བརྙན་རྡོ་རྗེའི་འདག་པ་ཀླུ་འཇིམ་ལས་གྲུབ་པ་ཁྱད་པར་ཅན་བཞུགས་པས་བྱིན་རླབས་མཆོག་ཏུ་ཆེ་བ་ཡིན་ལ། གྱང་རིས་གུང་གི་ཆ་ལ་རྒྱལ་བ་རིགས་ལྔ། གཡས་ཕྱོགས་སུ་གུང་ཐང་ལ་ཁར་ལྷ་སྲས་རྗེ་འབངས་ལ་སྩལ་བའི་བསམ་པ་ལྷུན་གྲུབ་མ་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་དང༌། གཡོན་ཕྱོགས་ན་དཔལ་ཨོ་རྒྱན་ཆེན་པོའི་རྣམ་པར་བསྡུས་པ་སིནྡྷུ་རྒྱ་མཚོ་མའི་ཞིང་བཀོད། སྒོ་གདོང་གཡས་གཡོན་ན་སངས་རྒྱས་སུམ་ཅུ་སོ་ལྔ་མཚན་དང་དཔེ་བྱད་རྒྱ་མཚོའི་དཔལ་དུ་འབར་ཞིང༌། དེ་ལྟ་བུའི་རྟེན་དང་བརྟེན་པའི་རང་བཞིན་སྡེ་རིས་དཀོར་ཆ་དང་བཅས་པ་བསྲུང་ཤིང་ཚར་གཅོད་རྗེས་འཛིན་གྱི་ཕྲིན་ལས་ལ་མངའ་བརྙེས་པའི་དམ་ཅན་ཆོས་སྐྱོང་རྣམས་ཀྱི་ཕོ་བྲང་རབ་ཏུ་བརྔམས་པས་རླུང་ལྷའི་ཕྱོགས་མཛེས་པར་བྱས་པའི་དབུས་སུ་དྲེགས་པའི་སྟོང་སྲོག་རྣལ་དུ་དབབ་པ་དང༌། འབོད་རྦད་གསད་པའི་བརྟུལ་ཞུགས་ལ་རང་བྱན་ཆུད་པའི་སྔགས་འཆང་ཆེན་པོ་ཧཱུྃ་ཆེན་ཀཱ་ལས་བླ་རྡོ་སྲོག་འཁོར་དང་བཅས་པ་ཕྱག་བལྟར་གྱིས་བསྐྲུན་ཞིང༌། དགའ་ཆགས་པ་དཔྱོད་ལྡན་དྲན་པའི་དབང་པོས་ཡོན་སྦྱར་ཏེ་གྱ་ཚོམ་གྱི་སྦྱོར་བ་ལ་གོམ་པ་འདོར་བའི་སྐབས་བཅད་ནས་དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་རྟེན་མདོས་སྒྲོས་གཙང་བ་དང༌། ཤ་རུ་དར་འཕྱར་ལ་བརྟེན་པའི་བཙན་རྒོད་འབར་བའི་བླ་རྡོ་མན་ངག་གི་གནད་དང་ལྡན་པ། གཞན་
ཡང་དྲེགས་པ་རང་བཞིན་གྱིས་ཆགས་པའི་དམ་ཚིག་གིས་བྲིས་སྐུ་དང༌། ཞལ་བརྙན། ཕྱག་མཚན་ལ་སོགས་པའི་སྐུ་གསུང་ཐུགས་ཀྱི་དབྱིག་ཏུ་རྡོ་རྗེའི་ཆོས་སྐྱོང་རྣམས་འདུ་འབྲལ་མེད་པར་བཞུགས་ནས་ཕྲིན་ལས་རྣམ་པ་བཞི་བདེ་བླག་ཏུ་འགྲུབ་པ་ཡིན་ནོ། །དེ་ལྟར་ཐེག་མཆོག་དཔལ་གྱི་རི་བོའི་གཙུག་ལག་ཁང་རྟེན་དང་བརྟེན་པར་བཅས་པ་འདི་དག་རྒྱལ་བའི་བསྟན་པ་རིན་པོ་ཆེ་སྤྱི་དང་བྱེ་བྲག་ཐེག་མཆོག་འོད་གསལ་སྙིང་པོའི་སྒྲུབ་བརྒྱུད་ཀྱི་རིང་ལུགས་བླ་ན་མེད་པ་ཉམས་པ་མེད་ཅིང་འགྲོ་བ་ལྷ་དང་བཅས་པའི་ཕན་པ་དང་བདེ་བའི་འཇུག་ངོགས་གཅིག་ཏུ་ལྷན་ནེ་ལྷམ་མེར་གསལ་བ་ལ། ཁྱད་གཞི་དུ་མའི་སྒོ་ནས་ཁྱད་ཆོས་ཉིད་དུ་བསྔགས་པར་འོས་པའི་ཚུལ་ཡང་ལྷ་བཙུན་སྒྱུ་མའི་རྣལ་འབྱོར་གྱིས། རྒྱལ་བ་ཀུན་འདུས་པདྨས་ལུང་བསྟན་པའི། །བསིལ་ལྗོངས་འཁོར་ལོ་ལྔ་ལྡན་པདྨོའི་ཞིང༌། །ཟ་ཧོར་རིགས་ཀྱི་རྒྱལ་ཁབ་མངོན་མཐོའི་དཔལ། །ཚངས་དང་བརྒྱ་བྱིན་འབྱོར་བས་མངོན་ཕྱུག་པའི། །མཆོད་པའི་ཞིང་མཆོག་དམ་པ་པདྨ་རི། །ཞེས་དང༌། ངོ་མཚར་རྣམ་བཀྲའི་འོད་ཟེར་བརྒྱ་ཕྲག་གིས། །བཻ་ཌྷཱུར་ཁང་བཟངས་མོག་པོར་སྐྱེངས་བྱེད་པའི། །གཙུག་ལག་དེ་ན་གཞུང་ལུགས་རྒྱ་མཚོའི་གཏེར། །དམར་སེར་རལ་གྲི་འཛིན་དངོས་མཁས་པའི་དབང༌། །བརྒྱ་ཕྲག་བྱེ་བ་འདུ་བའི་ཁང་བཟང་འདི། །རྒྱ་བོད་སྐད་གཉིས་སྨྲ་བའི་དབང་
པོ་མཆོག །རྣམ་པར་སྣང་མཛད་མཆོག་སྤྲུལ་པྲཛྙཱའི་མཚན། །གྲུབ་བརྙེས་པདྨ་དངོས་དེས་བྱིན་བརླབས་ཤིང༌། །རྣམ་མང་ཐེག་པའི་རྩེ་ན་འོད་གསལ་བ། །རྡོ་རྗེ་སྙིང་པོ་མཆོག་གསང་སྙིང་པོའི་བསྟན། །བླ་མེད་སྙིང་པོ་དོན་གྱི་ཆོས་དབྱིངས་མཛོད། །འཆད་ཉན་སྒོམ་དང་སྨིན་གྲོལ་གྲུབ་ཐོབ་གླིང༌། །ཉི་འོག་འཇིག་རྟེན་འདི་ན་འགྲན་བྲལ་བའི། །དྲི་མེད་འོད་ཟེར་བཟང་པོའི་ལེགས་བཤད་བསྟན། །ཚིག་གཅིག་ལན་བརྒྱར་ཐོས་ཀྱང་མི་ངོམས་པའི། །གཞུང་ལུགས་བརྒྱ་ཕྲག་འཛིན་པའི་པཎ་ཆེན་གླིང༌། །ལྷ་ཡི་དྲང་སྲོང་མཆོག་ལ་ཅོ་འདྲི་བ། །གྲུབ་རི་འདི་ནི་རབ་འབྱམས་མཁས་པའི་གླིང༌། །རྒྱུ་ཆོས་རྒྱུ་འབྲས་ཐེག་པར་ལུས་ངག་སྦྱངས། །འབྲས་བུ་གསང་ཆེན་སྒོར་ཞུགས་བསྐྱེད་རྫོགས་སྒོམ། །རང་རིག་གདོད་མའི་གཞིར་གཟིམས་ཆོས་ཉིད་ཟད། །ཕོ་བྲང་འདི་ནི་ཆོས་ཟད་བློ་འདས་གླིང༌། །རྩ་དག་དབུ་མའི་དབྱིངས་ནས་སྣང་བཞི་རྫོགས། །རླུང་དག་ཆོས་དབྱིངས་ངང་ནས་སྨྲ་བརྗོད་དག །ཐིག་ལེ་གདོད་མའི་གཞི་ལ་འཕོ་འགྱུར་བྲལ། །གྲུབ་རི་འདི་ནི་འཇའ་ལུས་འོད་གསལ་གླིང༌། །གར་དབྱངས་ཐིག་དང་རིག་པའི་གནས་ལྔ་སོགས། །མི་ཟད་ཤེས་བྱའི་དཀྱིལ་འཁོར་ཉ་རྒྱས་ཤིང༌། །དྲག་སྔགས་མཐུ་སྟོབས་ཟེར་གྱིས་རྒོལ་ངན་འཇོམས། །གྲུབ་རི་འདི་ནི་སྔགས་ནག་མཐུ་རྩལ་གླིང༌། །འདི་ན་དྲི་བཟང་སྤོས་སྤྲིན་འཁྱིལ་བའི་
དབུས། །འཇའ་ཟེར་མདངས་ནང་དཔའ་བོ་མཁའ་འགྲོ་དང༌། །རིག་འཛིན་པདྨའི་དག་སྣང་རྒྱུན་མི་འཆད། །གྲུབ་རི་འདི་ནི་དག་པ་མཁའ་སྤྱོད་གླིང༌། །ཞེས་རྡོ་རྗེའི་གླུས་ཆེད་དུ་བརྗོད་པའི་གནས་ལ་སྤྲོ་བ་དང༌། མོས་གུས་ཀྱི་ལང་ཚོ་མ་རྙིངས་ཤིང༌། བསྟི་སྟང་དང་རི་མོར་བྱ་བའི་གེ་སར་མཆོག་ཏུ་འཛུམ་པས་དགེ་ཚོགས་རིན་པོ་ཆེའི་གྲོང་ཁྱེར་དམ་པ་རྨད་དུ་བྱུང་བར་འཇུག་པ་དང་ཆབ་གཅིག །ཚོགས་གཉིས་སྤྲིན་གྱི་དུམ་བུ་བསྔོ་བ་དམ་པའི་ཞགས་པས་འཆིང་བ་ལ་སུ་ཞིག་སྤྲོ་བ་བརྟས་པ་དེ་ནི་བཤེས་གཉེན་དམ་པས་ཟིན་པའི་ཁྱད་པར་གྱི་ཆོས་བླ་ན་མེད་པ་ལགས། ཞེས་པ་འདི་ནི་ཆོས་ཁྲིམས་པ་བློ་གསལ་དབང་པོ་པདྨ་ཀུན་གསལ་དང༌། དཀོན་གཉེར་ཕྲིན་ལས་དཔལ་འབྱོར་ཟུང་གིས་ལྷ་རྫས་ཀྱི་མེ་ཏོག་དང་བཅས་ཏེ་འབད་པ་ཆེན་པོས་བསྐུལ་བའི་ངོར། དཔལ་གྱི་རི་བོའི་ས་འཛིན་གྱི་སྤོ་ལ་འདུས་པའི་ཚོམ་བུ་འདི་ཉིད་ཆགས་ནས་ཟླ་བའི་ཕུང་པོ་དྲང་སྲོང་བཀྲ་ཤིས་འོད་དཀར་ཅན་དུ་སླེབ་པའི་རོ་དྷའི་ལོ་ལེགས་བྲིས་ཀྱི་བདེན་ཚིག་གྲུབ་པའི་དྲང་སྲོང་ཆེན་པོ་རྀ་ཥི་ས་མཱ་མ་ཀཱིའི་ཀླུང་ཐམས་ཅད་ལ་ཡན་ལག་བརྒྱད་ལྡན་གྱི་ནུས་པ་སྟེར་བ་ལ་མངོན་དུ་ཕྱོགས་པའི་ཚེ། དཔལ་ཨོ་རྒྱན་ཆོས་ཀྱི་རྒྱལ་པོ་ཡབ་ཡུམ་གྱིས་རྗེས་སུ་བཟུང་བའི་རྫོགས་ཆེན་པ་མཁྱེན་བརྩེའི་འོད་ཟེར་གྱིས་ཀུན་མཁྱེན་ཤནྟ་པུ་རི་པ་ལ་མི་བསླུ་བར་ངེས་པའི་
དད་པ་བརྟན་པོས་ཀུན་ནས་བསླངས་ཏེ་པདྨ་འོད་གསལ་ཐེག་མཆོག་གླིང་དུ་སྦྱར་བའི་ཡི་གེ་པ་ནི་འཇིགས་སྐྱོབ་དང་ལེགས་སྨོན་ཙམ་མ་ཡིན་པར་ངེས་པར་འབྱུང་བའི་བློས་ཤཱཀྱའི་བསྟན་པ་ལ་རབ་ཏུ་བྱུང་བའི་སྐལ་པ་ཅན་ཟུར་རྡོ་རྗེ་སྙིང་པོས་སོ། །གཏམ་ཚོགས་ལེའུ་སོ་དགུ་པའོ།། །།