གཏམ་ཚོགས་ལེའུ་རེ་ལྔ་པ། ཤིན་ཏུ་རྣལ་འབྱོར་གྲུབ་མཐའ་བཞི་ལ་རྟོན་པའི་གཏམ་རྡོ་རྗེ་གཟེགས་མའི་མཚོན་ཆ།
ཤིན་ཏུ་རྣལ་འབྱོར་གྲུབ་མཐའ་བཞི་ལ་རྟོན་པའི་གཏམ། རྡོ་རྗེ་གཟེགས་མའི་མཚོན་ཆ་ཞེས་བྱ་བ། མཁྱེན་རབ་རལ་གྲི་ཅན་ལ་འདུད། །འདི་ན་མཉམ་པར་མ་བཞག་ཅིང༌། །རྟོག་གེས་དྲེགས་པའི་ཅེ་སྤྱང་འགའ། །
མུན་པས་སྤྲུལ་པའི་ཆོ་ངེ་འདོན། །འཁོར་ལོ་ཐ་མའི་སྦས་དོན་གང༌། །སྔགས་སུ་མངོན་སུམ་ཕྱུང་བ་ནི། །ཀུན་ཏུ་བཟང་པོ་རྡོ་རྗེ་འཆང༌། །རྗེ་བཙུན་རྡོ་རྗེ་རྣལ་འབྱོར་མས། །ས་ར་ཧ་དང་ཀླུ་སྒྲུབ་ཞབས། །མ་ཕམ་མགོན་པོ་དགའ་རབ་རྗེ། །པདྨ་དྲི་མེད་བཤེས་གཉེན་སོགས། །མཆོག་གཟིགས་རྣམས་ལ་འདོམས་མཛད་ཅིང༌། །ལམ་དེ་ལས་ནི་དངོས་གྲུབ་བརྙེས། །སྲོལ་ཕྱེ་སྙན་ནས་སྙན་བརྒྱུད་དུ། །དར་བའི་ཟབ་མོའི་ཆོས་རྣམས་ལ། །མ་རྟོགས་ལོག་རྟོགས་ཕྱོགས་རྟོགས་ཅན། །དྲང་ངེས་ལྡེམ་དགོངས་མི་ཕྱེད་བཞིན། །ཆོས་དོན་ཚིག་ལ་རྟོན་པས་འཇལ། །གྲུབ་མཐའ་སྨྲ་བ་རྣམ་བཞི་ཡི། །ཆོས་སྐད་ལས་གཞན་རྫུན་ནོ་ཞེས། །རྩ་ལྟུང་དྲུག་པ་རིན་གྱིས་ཉོ། །གྲུབ་མཐའ་བཞི་པོའི་མིང་ཙམ་དང༌། །འགལ་ཚད་ལོག་པའི་ཆོས་ཡིན་ན། །སྔགས་སུ་ཕྱག་རྒྱ་ཆེན་པོ་དང༌། །བདེ་སྟོང་ལྷན་ཅིག་སྐྱེས་པའི་སྒྲས། །ལྟ་བའི་དངོས་མིང་སྨོས་པ་དང༌། །དོ་ཧ་མཛོད་དང་སོར་སྡུད་སོགས། །པཎ་གྲུབ་རྣམས་ཀྱིས་ཉམས་བླངས་ཤིང༌། །དངོས་གྲུབ་ཐོབ་པ་དེ་དག་ཀྱང༌། །ནང་པའི་གཞུང་དང་འགལ་ཏ་རེ། །ཁྱད་པར་ངེས་དོན་དབུ་མ་ཆེའི། །སྦས་དོན་གཤིས་ཀྱི་ཐོག་འབེབས་པ། །ཀ་དག་རྫོགས་པ་ཆེན་པོ་ནི། །
གྲུབ་མཐའ་བཞི་ནང་མ་འདུས་ན། །ཤེས་རབ་ཕ་རོལ་ཕྱིན་པ་ཡང༌། །དེ་ཡི་ནང་དུ་མི་འདུ་སྟེ། །ཅིའི་ཕྱིར་གཟོད་ནས་དག་པའི་སྒྲ། །ཁྱོད་ཀྱི་དགག་གཞི་ཡིན་པའི་ཕྱིར། །དེ་སྐད་དུ་ནི་སྡུད་པ་ལས། །གཟོད་ནས་དག་པས་སེམས་ཅན་སྐྱེ་བར་ག་ལ་འགྱུར། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་དེ་བཞིན་མདོ་རྒྱུད་ལས། །ཡེ་ཤེས་ཞེས་བྱའི་དོན་བསྟན་པའི། །ཡེ་ནི་དང་པོའི་ཐོག་མའི་སྒྲ། །ཤེས་ནི་སྒྲིབ་བྱེད་སྤངས་པ་སྟེ། །ཡུལ་དང་འབྲེལ་པ་མེད་ལ་བརྗོད། །དེ་བཞིན་ཀ་དག་སྒྲ་དོན་ཡང༌། །བརྗོད་པའི་རྣམ་དབྱེ་གསལ་བྱེད་སྤྱི། །ཀ་ནི་དང་པོ་འམ་གཞི་ཡི་དོན། །ཡེ་དང་གཟོད་དང་དངོས་གཅིག་ལ། །དག་ནི་ཀུན་གཞི་ཚོགས་བརྒྱད་ཀྱི། །འདུས་མ་བྱས་པའི་དོན་ཉིད་དེ། །གསུམ་ཀས་འཁོར་ལོ་ཐ་མ་ཡི། །སྦས་དོན་གདོད་ནས་དག་པ་བསྟན། །དེ་དག་རྣམས་ཀྱི་དགོངས་པ་ནི། །འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །གསུངས་ལ་གནས་ཀྱང་རྟོག་གེའི་བློས། །བརྟག་ཏུ་མི་བཟོད་རྒྱལ་བའི་བཀའ། །ལ་ལ་བཟང་དང་ལ་ལ་ནི། །ཅིག་ཤོས་ཉིད་དུ་འདུ་ཤེས་ནས། །བསྟན་པ་དཀྲུགས་པ་བདུད་ཀྱི་ལས། །འདི་ན་ཆོས་རབ་རྣམ་
འབྱེད་ཀྱི། །བློ་གྲོས་སྲིད་ཞིའི་ཕ་རོལ་ཏུ། །སོན་པ་སངས་རྒྱས་ཉིད་ལས་གཞན། །མེད་ཕྱིར་ཆོས་དང་གང་ཟག་ལ། །སྐུར་པའི་ཕྱོགས་ལྷུང་འདོད་ཞེན་ནི། །མནར་མེད་བསྒྲུབ་པའི་རྒྱུ་ལས་གང༌། །དེ་བཞིན་གཤེགས་པའི་བསྟན་པ་ནི། །རྟོན་པ་བཞི་ཡི་བདག་ཉིད་ཅན། །འདུལ་བ་ལ་སྣང་མདོ་སྡེར་འཇུག །ཆོས་ཉིད་དོན་དང་མི་འགལ་བ། །བཀའ་ཡི་ཚད་དུ་གནང་བའི་ཕྱིར། །འཁོར་ལོ་དང་པོ་དང་བསྟུན་ཏེ། །དགག་པའི་ཕྱོགས་ནས་བཤད་ཀྱིས་ཉོན། །མིང་ཚིག་བརྗོད་པའི་རྒྱུའི་དང་པོ། །ཨའམ་ཀ་ནི་གཞི་ཡིན་ཏེ། །གཞི་སྒྲ་འཇུག་པའི་དོན་ལྔ་ལ། །རྣམ་རིག་ལྐོག་ཏུ་མ་གྱུར་ན། །དམ་པའི་དེ་ཉིད་མཐོང་བར་འགྱུར། །དེ་ཕྱིར་ཀ་ཞེས་བྱ་བ་ནི། །སྡུག་བསྔལ་བདེན་པའི་མངོན་བརྗོད་དེ། །རྒྱུ་རྐྱེན་ལས་བྱུང་ཀུན་འབྱུང་གི །ཟག་པ་ཟད་པས་དག་ཅེས་བྱ། །ཀ་ནི་ལམ་བདེན་བྲལ་བྱ་སྟེ། །ཀུན་ཏུ་སྦྱོར་བའི་ཆོས་ཅན་ཀུན། །དག་པས་འགོག་བདེན་བྲལ་འབྲས་སོ། །འཁོར་ལོ་བར་པ་དང་བསྟུན་ཏེ། །བསྒྲུབ་པའི་ཕྱོགས་ནས་བཤད་ཀྱིས་ཉོན། །ཀ་ནི་ཐོག་མཐའ་མེད་པའི་དབྱིངས། །རྣམ་པར་ཐར་པའི་སྒོ་དང་པོ། །དག་ནི་འདུས་མ་བྱས་པ་སྟེ། །མཚན་མེད་སྨོན་པ་མེད་པའོ། །འཁོར་ལོ་ཐ་མ་དང་བསྟུན་ཏེ། །གཉིས་གའི་ཕྱོགས་ནས་གཞལ་གྱིས་
ཉོན། །ཀ་ནི་ཀུན་བརྟགས་གཞན་དབང་ཆོས། །གཟོད་ནས་དག་པས་ཡོངས་གྲུབ་སྟེ། །དོན་ལ་རྟོན་པ་འདི་ཤེས་ན། །ཚིག་ལ་ཕུར་ཁུང་ཐུག་མི་འགྱུར། །བླ་ན་མེད་པའི་སྟོན་པ་དེས། །ངའམ་ང་འདྲའི་གང་ཟག་གིས། །ཆོས་དང་གང་ཟག་ཚད་གཟུང་གིས། །གཞན་དུ་ནོངས་པར་གྱུར་ཏ་རེ། །གསུངས་ལ་གཟུ་བོར་མ་བཞག་ན། །ཉན་ཐོས་སནྡེ་པ་རྣམས་ཀྱིས། །ཐེག་ཆེན་དར་པའི་འགོ་རྩོམ་ཚེ། །ཀླུ་སྒྲུབ་ཅེས་བྱའི་གང་ཟག་གིས། །ཐེག་པ་ཆེན་པོ་ཞེས་བྱ་བའི། །ཆོས་ལོག་སྟོན་ནོ་ཞེས་སྐུར་ཞིང༌། །ཧེ་རུ་ཀ་ཡི་སྐུ་བཤིག་ནས། །འདི་ནི་བདུད་ཀྱིས་བྱས་སོ་བསྒྲགས། །དེ་བཞིན་ཕྱོགས་ཀྱི་གླང་པོ་ལ། །མུན་པའི་གླང་པོ་ཞེས་པ་དང༌། །རྒྱལ་སྲས་ཞི་བ་ལྷ་ལྟ་བུར། །འདུ་ཤེས་གསུམ་པར་སྨྲ་བ་སོགས། །རྒྱ་བོད་ཀུན་ཏུ་ལྷ་ཆེན་པོའི། །འཇུག་པས་བསྟན་པ་དཀྲུགས་པ་ནི། །སྔོན་བྱུང་ད་ལྟའང་ཡོད་སྲིད་ན། །དེ་ཡི་རྒྱུད་ལ་བྱང་ཆུབ་སེམས། །སྐྱེས་ནས་འཆལ་ཚུལ་མི་དགེའི་གཟུགས། །གཞན་གནོད་གཞི་བཅས་སྤོང་བ་ཡིས། །ཚུལ་ཁྲིམས་མཆོག་ལ་གནས་པར་ཤོག །འོན་ཏེ་བསྲེགས་བཅད་བརྡར་བ་ཡི། །གསེར་བཞིན་བསྟན་ལ་བྱི་དོར་གྱི། །སྤོབས་པ་ཐོབ་པ་ཡོད་སྲིད་ན། །གནོད་མིན་གདོན་དུ་འཛིན་པ་ལས། །རང་སའི་ཆོས་ལུགས་ལས་གཞན་པ། །དྲི་བཅས་ཉིད་དུ་
དམ་བཅའ་ལ། །འགལ་བྲེང་ཐལ་འགྱུར་འགོད་བྱེད་པ། །འཇིགས་བྲལ་ཨཀྵོ་བཛྲ་ཡེ། །གཞུང་ལ་དཔྱད་གསུམ་དག་པ་ཡིས། །ཐལ་འགྱུར་རྣམ་དག་སྒྲུབས་ཤིག་ཀྱེ། །བདག་ཅག་རྒྱལ་བའི་བསྟན་པ་དང༌། །དེ་ལས་གྱེས་པའི་ཆོས་ལུགས་ལ། །སྡེ་པ་བཅོ་བརྒྱད་བཀར་བསྡུས་བཞིན། །ཆོས་སྤོང་ལམ་ལ་མི་འཇུག་པས། །མཉམ་པ་ཉིད་དུ་གནས་གྱུར་ཅིག །རྫོགས་ཆེན་པ་རང་བྱུང་རྡོ་རྗེས་སོ། །གཏམ་ཚོགས་ལེའུ་རེ་ལྔ་པའོ།། །།