གཏམ་ཚོགས་ལེའུ་རེ་དྲུག་པ། ཡེ་གྲོལ་ཀ་དག་གི་གཏམ་དག་པ་གཉིས་ལྡན་གྱི་མཛོད་ཁང་།
ཡེ་གྲོལ་ཀ་དག་གི་གཏམ། དག་པ་གཉིས་ལྡན་གྱི་མཛོད་ཁང་ཞེས་བྱ་བ། དང་པོའི་སངས་རྒྱས་ལ་ཕྱག་འཚལ་ལོ། །སྲིད་པའི་ཟུག་རྔུ་འབྱིན་ལ་ཉན་ཐོས་ཀྱི། །སྡེ་སྣོད་དག་ཀྱང་ཐར་པའི་གྲུ་ཆེན་ཏེ། །རྣམ་པ་ཐམས་ཅད་མཁྱེན་པའི་གོ་འཕང་ནི། །གང་ལས་སྐྱེ་ཕྱིར་བྱང་ཆུབ་སེམས་ལ་འདུད། །དེ་ལ་མན་ངག་རྫོགས་པ་ཆེན་པོ་ནི། འབྲས་བུ་ལམ་དུ་བྱེད་པས་དང་པོའི་བདེན་པ་ཡིན་ཏེ། རྒྱུ་འབྲས་རིམ་ཅན་ནམ། སྤང་གཉེན་གྱི་ཚུལ་ལས་འདས་པས་ཡང་དག་པའམ། རྣམ་པར་དག་པའམ། གདོད་ནས་དག་པའི་སྒྲ་ཀ་དག་ཏུ་བསྒྱུར་ནས་བསྟན་པ་སྟེ། དེ་ལ་དག་བྱ་ནི་རྒྱ་ཆེར་རོལ་པ་ལས། ཀ་ཞེས་བརྗོད་པ་དང་ལས་ཀྱི་རྣམ་པ་སྨིན་པ་ལ་འཇུག་པ་ཞེས་བྱ་བའི་སྒྲ་བྱུང་ངོ༌། །ཞེས་པ་ལྟར་རྣམ་སྨིན་དང་འབྲེལ་བའི་ལམ་བདེན་ཀུན་རྫོབ་པ་ཉིད་
ཀ་ནས་དག་པའི་དོན་ཡིན་ཏེ། དེ་ཡང་རྣམ་གྲངས་ཀྱི་སྒོ་ནས་བསྟན་ན། ཡང་ནི་ནན་ཏན་གྱིས་དག་པ་དང༌། རྣམ་པར་ནི་རང་གི་ངོ་བོས་དག་པ་དང༌། གདོད་དང་གཟོད་ནི་སྔ་ཕྱི་གང་རུང་ལ་འཇུག་པས་དུས་གསུམ་གྱི་སྤྲོས་པ་ལས་འདས་པའི་དོན། མཚན་བརྗོད་ལས་ཀྱང༌། དུས་གསུམ་དུས་མེད་རྟོགས་པ་པོ། །ཞེས་སོ། །དེའི་ཕྱིར་ཀ་དག་གི་སྒྲ་དོན་ལོག་པ་ཡིན་ན། ཡང་དག་དང་རྣམ་དག་དང༌། གཟོད་ནས་དག་པ་ཡང་ལོག་པ་ཡིན་ཏེ། སྡུད་པ་ལས། གཟོད་ནས་དག་པས་སེམས་ཅན་སྐྱེ་བར་ག་ལ་འགྱུར། ཞེས་པའི་དགོངས་པ་ལེན་མི་ཤེས་པར་ཟད་དོ། །དེ་བས་ན་སྒྲ་དོན་ལ་འཇུག་པའི་ཚེ་ཡང་ཀ་ནི་སྔོན་རོལ་པ་སྟེ། བརྗོད་པ་འབྱུང་བའི་རྒྱུའི་དང་པོ་དབྱངས་དང་གསལ་བྱེད་ཀྱི་སྤྱི་བོ་ན་ཡང་ཨ་དང་ཀ་ཡོད་ཅིང༌། དེ་གཉིས་ངོ་བོ་གཅིག་ལས་ལྡོག་པ་ཐ་དད་པས་སྐྱེ་འགག་གཉིས་མེད་ཀྱི་དོན་ལ་འཇུག་པའི་ཚུལ་སྔ་མ་ལས། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་སྟེ། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཅེས་པས་དབྱངས་ཀྱི་དང་པོ་ནི་སྐྱེ་བ་མེད་པའི་དོན་དང༌། གསལ་བྱེད་ཀྱི་དང་པོ་ནི་བརྗོད་པའི་རྒྱུ་འགག་པ་མེད་པའི་དོན་ལ་གནས་པས་
སྐྱེ་འགག་གཉིས་མེད་ཀྱི་བདེན་པ་ཀ་དག་གི་སྒྲས་དག་པ་གཉིས་ལྡན་གྱི་གོ་དོན་ཡང་ལྷོངས་ཤིང༌། ལམ་བདེན་འདུས་བྱས་པ་ལས་འདས་པའི་བརྗོད་གཞིར་བསྟན་པ་ཡིན་ནོ། །ཐ་ན་འཇིག་རྟེན་གྱི་ཁ་སྐད་ཙམ་ལའང་ཞིང་རང་སར་ཆུ་འདྲེན་པའི་མགོ་ལ་ཆུའི་ཀ་ཞེས་སྒྲོག་ཅིང༌། དེ་བཞིན་དུ་མིང་གི་ལུང་མ་བསྟན་པའི་ངོ་བོ་ཉིད་སྨྲ་བའི་ཚིག་བསླད་ལའང་། ཀ་ཅ་དང༌། ཀ་བ་དང༌། ཀ་བློ་མི་བདེ་བ་སོགས་བརྗོད་པའི་ཕྱིར་རོ། །དེ་ནང་པའི་གྲུབ་མཐའ་སྨྲ་བ་བཞིའི་ཆོས་སྐད་ལས་ལོགས་སུ་གྱུར་པའི་སྙམ་པའི་ལོག་ཤེས་ཅན་ལ་བཀའ་འཁོར་ལོ་གསུམ་གྱི་འཆད་གཞི་དང་སྦྱར་ནས་ཚིག་གི་མེ་ཏོག་དོན་གྱི་འབྲས་བུ་ལ་རྟོན་པའི་ཚུལ་རྡོ་རྗེ་གཟེགས་མའི་མཚོན་ཆར་འདོམས་ཟིན་ལ། དེ་བས་ན་དབང་པོ་རབ་ཀྱིས་གཞུང་གི་མཚན་ལ་དཔྱད་པས་དོན་དཔྱིས་ཕྱིན་པར་རྟོགས་པ་ནི་ཐོས་བསམ་དང་འབྲེལ་བའི་དཔྱད་སྒོམ་ཡིན་ལ། དེ་སྒོམ་པའི་ཤེས་རབ་ཀྱི་ཉམས་སུ་མྱོང་བའི་ཕྱིར་འཇོག་སྒོམ་གྱི་གནད་བཤད་པར་བྱའོ། །རྫོགས་པ་ཆེན་པོའི་རིག་པ་ནི། སེམས་མིན་སེམས་ལས་བྱུང་བའང་མིན། །ཕུང་པོ་ལྔ་དང་མ་འདྲེས་ཤིང༌། །རྣམ་ཤེས་ཚོགས་བརྒྱད་ལས་འདས་པས། །གྲུབ་མཐའ་རྗེས་སུ་འཛིན་རྣམས་ཀྱི། །བློ་ཡིས་
བརྟགས་པའི་མེད་དགག་དང༌། །མ་ཡིན་དགག་དང་མཐའ་བརྒྱད་ཀྱི། །སྤྲོས་པ་བཤིག་པའི་རྗེས་ཐོབ་ཀྱི། །རིག་པ་འདུས་བྱས་ལས་འདས་པས། །ཡེ་གྲོལ་འདུས་མ་བྱས་པའོ། །དེ་སྐད་དུ་ནི་སྤྱོད་འཇུག་ལས། །བདེན་པ་མཐོང་བས་གྲོལ་འགྱུར་གྱི། །སྟོང་ཉིད་མཐོང་བས་ཅི་བྱ་གསུངས། །དེ་ལྟ་མོད་ཀྱི་དབང་རྣོན་དང༌། །སྦྱངས་པ་སྔོན་སོང་མ་ལགས་པས། །དོན་འདི་རྟོགས་པ་མ་ཡིན་ཏེ། །སྒོམ་མོ་སྙམ་པ་སེམས་ཡིན་ལ། །རྣམ་རྟོག་ལྔ་བཅུ་སེམས་བྱུང་ངོ༌། །བློ་ཡིས་བགྲོད་ཡུལ་གཟུགས་ཕུང་སྟེ། །དེ་ཡི་རོ་མྱོང་ཚོར་བའོ། །རྟོག་དཔྱོད་དབུ་མར་འཁྲུལ་པ་ཡི། །སྤུ་རིས་འབྱེད་པ་འདུ་ཤེས་ལ། །བག་ཆགས་བརྟས་པ་འདུ་བྱེད་རྒྱུ། །ཀུན་གྱི་བདག་ཉིད་རྣམ་ཤེས་ཏེ། །དེ་དག་ཡུལ་དང་ཡུལ་ཅན་དུ། །འབྲེལ་ལས་ཚོགས་དྲུག་སྐྱེ་བའི་ཕྱིར། །གོ་བས་དཔྱད་པའི་རྣམ་གཡེང་གིས། །བསམ་གཏན་དཀྲོག་པའི་རྟོག་གེ་དང༌། །མྱོང་བས་བསླུས་པའི་དཔྱད་སྒོམ་གྱིས། །བྱིས་པ་ཉེར་སྤྱོད་སྒོམ་པ་རྣམས། །བསམ་གཏན་དང་པོའི་ཉེར་བསྡོགས་དང༌། །དངོས་གཞི་ཉིད་ལས་འཕགས་པ་མེད། །ཆོས་ཉིད་གཟིགས་པ་ཞི་བ་ལྷས། །རྣམ་དཔྱོད་ཀྱིས་ནི་དཔྱོད་བྱེད་ན། །དེ་ཚེ་རྣམ་དཔྱོད་དེ་ཡང་ནི། །རྣམ་དཔྱོད་ཕྱིར་ན་ཐུག་པ་མེད། །དཔྱད་བྱ་རྣམ་པར་དཔྱད་བྱས་ནས། །རྣམ་དཔྱོད་ལ་ནི་རྟེན་ཡོད་མིན། །རྟེན་
མེད་ཕྱིར་ན་མི་སྐྱེ་སྟེ། །དེ་ཡང་མྱ་ངན་འདས་པར་བརྗོད། །ཞེས་གསུངས་ཐ་སྙད་ལ་བརྟེན་ནས། །སྟོང་ཉིད་གཏན་ལ་འབེབས་པ་དེ། །བདག་ཉིད་ཆེན་པོ་ཀླུ་སྒྲུབ་དང༌། །ཟླ་བ་གྲགས་པའི་ལུགས་ཡིན་ཡང༌། །དེ་ནི་ཐོས་དང་བསམ་པ་ཡིན། །གཤིས་ཀྱི་བཞུགས་ཚུལ་དཔྱད་པའི་སྐབས། །ཡིན་གྱི་སྒོམ་པའི་དངོས་གཞི་ལ། །སྔགས་ཀྱི་ཐབས་ལམ་གཙོར་བྱས་ནས། །ལས་རླུང་ཟད་པར་བྱེད་པའི་དོན། །ཉམས་སུ་གཞེས་པ་ཤེས་པར་གྱིས། །དེ་ལ་མཚན་བཅས་མཚན་མེད་ཀྱི། །རྫོགས་རིམ་གཉིས་ལས་ཕྱི་མ་ནི། །མན་ངག་རྫོགས་པ་ཆེན་པོ་སྟེ། །འདུས་མ་བྱས་པའི་རིག་པ་ལ། །ཀ་ནས་དག་པ་ཞེས་བྱ་སྟེ། །བསྒོམ་པར་བྱ་བའི་ལྟ་བ་དང༌། །སྒོམ་པར་བྱེད་པའི་ཤེས་པ་མེད། །མེད་དོ་སྙམ་ན་ཆད་ལྟ་དང༌། །ཡོད་དོ་སྙམ་ན་རྟག་ལྟ་དང༌། །གཉིས་ཀྱི་བར་ནི་བློ་ཡིན་པས། །དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཉིད་དུ་གསུངས། །བློ་དང་བྲལ་བ་རྟོགས་པ་ལ། །ཚོགས་རྫོགས་སྒྲིབ་པ་དག་པ་དང༌། །བླ་མའི་བྱིན་རླབས་ཞུགས་པ་དགོས། །དེ་སྐད་དུ་ནི་སྟོན་པའི་བཀས། །དོན་དམ་པ་ནི་དད་པ་ཡིས། །རྟོགས་པར་བྱ་བ་ཡིན་ནོ་གསུངས། །དེ་ཕྱིར་ཚོགས་གསོག་སྒྲིབ་སྦྱོང་དང༌། །དད་པས་རང་རྒྱུད་བརླན་
བྱས་ནས། །གྲུབ་མཐའི་ཞེན་པས་མ་བཅིངས་པའི། །རིག་པ་རང་བཞིན་མེད་པ་འདི། །གདོད་ནས་དག་པའི་ལྟ་བ་ཡིན། །ཡིན་ནོ་སྙམ་ན་ངེས་ཤེས་ཀྱང༌། །ཤེས་བྱའི་སྒྲིབ་པ་རྔམ་ཆེན་ཏེ། །དངོས་དང་དངོས་མེད་བློ་ཡི་བདག །འདུས་མ་བྱས་དབྱིངས་མ་ཞི་བར། །རྟོག་དཔྱོད་ཚེར་མས་སྒོམ་པའི་མིག །ཕུག་སྟེ་སྨྲ་བསམ་བརྗོད་མེད་ལ། །སྐྲག་པ་སྐྱེས་ནས་བཅོས་ཤིང་བཅོས། །བསྒྲིམས་ཤིང་བསྒྲིམས་པ་མཐོང་ལམ་གྱི། །དམ་པའི་དེ་ཉིད་ཡིན་ཟེར་ན། །མུ་སྟེགས་ཚངས་པའི་རྗེས་འབྲང་གི །ཕྱོགས་སུ་དེངས་ཤིག་གཞན་དུ་ན། །ཐེག་པ་ཆེན་པོའི་རྒྱུད་བླ་མར། །འདི་ལ་བསལ་བྱ་ཅི་ཡང་མེད། །ཞེས་པའི་དོན་དང་ཅིས་མི་འགལ། །ལྟ་བའི་ངོ་བོ་དྲན་པ་དང༌། །དབྱེར་མེད་རོ་གཅིག་བསྲེ་བ་ལ། །སྒོམ་པ་ཞེས་བྱའི་ཐ་སྙད་གྲགས། །དེ་གཉིས་ཐ་དད་བཟུང་བྱས་ཏེ། །ལྟ་བ་མ་ཧེ་ལྟ་བུ་ལ། །སྒོམ་པ་སྐྱོང་བྱེད་ལྟར་བྱས་ནས། །ཡིད་དང་ཆོས་སུ་འབྲེལ་བ་ཡི། །རྟོག་དཔྱོད་ཚེར་མ་ལྟ་བུའམ། །འགྱུར་དྲན་ངང་དུ་འཇོག་བྱེད་ཀྱང༌། །གཞག་པར་བྱ་བ་ཅུང་ཟད་མེད། །ཅེས་དང་འགལ་བ་ལྟག་སྤྲོད་ཡིན། །ལྟ་སྒོམ་རྗེས་སུ་སློབ་པ་དེ། །དོན་གྱི་དཔྱོད་པ་བླ་ན་མེད། །
བླང་དོར་དགག་སྒྲུབ་བློ་བྲལ་བས། །ཡང་དག་ཉིད་ལ་ཡང་དག་བལྟ། །གསུངས་འདི་རྒྱལ་བའི་གསང་ཚིག་ཡིན། །གཞི་དང་ལམ་དང་འབྲས་བུའི་ཆོས། །ཀ་ནས་དག་པའི་ཆོས་ཉིད་ལ། །བསྒོམ་བྱ་སྒོམ་བྱེད་ཅུང་ཟད་མེད། །ཀ་དག་དོན་ནི་ཡང་དག་ཕྱིར། །ཡང་དག་མཐོང་ན་རྣམ་པར་གྲོལ། །ཅེས་པའི་དོན་ལ་སུ་ཡིས་བསྙོན། །འདི་ཉིད་མ་རིག་རྟོག་ཅན་རྣམས། །འཁོར་ལོ་བར་མཐའི་དྲང་ངེས་དང༌། །ཐ་སྙད་ཚིག་ལ་ལྟ་བར་འཛིན། །མཚན་ཉིད་མེད་ལ་བློས་སྒྲོ་འདོགས། །ཕུང་པོ་ལྔ་པོ་རང་བཞིན་གྱིས། །སྟོང་པར་ཡང་དག་རྗེས་བལྟ་བ། །བཅོས་པའི་སྟོང་པས་བསླད་པ་ཡི། །གཟུགས་སོགས་སྟོང་ཡུལ་རང་ངོ་ནས། །གྲུབ་པ་མེད་པའི་དོན་ལས་རིང༌། །གྲིབ་མའི་གཟུགས་བརྙན་ཤ་ཟ་རུ། །ཡོད་པ་ཡུལ་མིན་འཁྲུལ་ཤེས་དེ། །གཟུང་བའི་ཡུལ་དང་རྟོག་དཔྱོད་ཀྱི། །ཤེས་པ་འཛིན་པའི་སེམས་ཡིན་ན། །ཆོས་ཅན་སྣང་བར་འདོད་པ་ཡི། །གྲུབ་མཐའ་མུ་སྟེགས་བྱེད་དང་མཚུངས། །དེ་ཕྱིར་ཀུན་རྫོབ་ཙམ་དུ་ཡང༌། །འཁྲུལ་གཞི་ཞལ་གྱིས་མི་བཞེས་པ། །བདག་ཉིད་ཆེན་པོ་ཀླུ་སྒྲུབ་དང༌། །ལྷ་གཅིག་དཱི་པཾ་ཀ་རའི་ལུགས། །འདི་ན་མངོན་པའི་ང་རྒྱལ་ཅན། །
ལུང་གི་དམ་ཆོས་ལ་ཞེན་ནས། །མཉམ་པར་གཞག་དང་རྫས་འགལ་བའི། །བདག་མེད་གཉིས་ཀྱི་ཚིག་ལ་ཞེན། །མཐའ་བརྒྱད་སྤྲོས་བྲལ་བློས་བཅོས་ནས། །རབ་ཏུ་མི་གནས་དབུ་མའི་དོན། །ང་ལས་གཞན་གྱིས་མ་རྟོགས་ལོ། །དེ་ཀ་རང་ལྟ་མཆོག་འཛིན་གྱི། །རྟག་ཆད་མུ་བཞིའི་ཕྲང་ཡིན་ཏེ། །བཅོམ་ལྡན་བདག་ཉིད་ཆེན་པོ་དེས། །དགེ་སློང་གང་ཞིག་འདི་སྙམ་དུ། །ང་ནི་ངེས་པར་དགྲ་བཅོམ་པའི། །གོ་འཕང་ཐོབ་པོ་སྙམ་བྱེད་ན། །དེ་ནི་དགྲ་བཅོམ་མ་ཡིན་གསུངས། །གང་ཕྱིར་རྟོག་པའི་དམ་ཆོས་ནི། །བསྒོམས་ནས་ལས་རླུང་ཟད་པའི་རྗེས། །འགྲོ་བས་སྒྲ་རྟོག་ལ་ཞེན་པའི། །ཁ་ཕྱིར་ཕྱོགས་ལས་ལྡོག་བྱས་ན། །དབུ་མར་ཞུགས་གནས་ཐིམ་གསུམ་གྱི། །ངེས་པས་རིམ་མམ་ཅིག་ཅར་དུ། །རྫོགས་ནས་ཐལ་རང་རྣམ་གཉིས་དང༌། །གྲུབ་མཐའ་བཞི་པོའི་ཞེན་པ་འཇིག །ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་པའི་དོན་ལ་རྗེས་དཔག་ཙམ། །མ་ཡིན་མངོན་སུམ་ཉིད་ལ་འབྱོར། །དངོས་ལ་ངོ་བོ་ཉིད་མེད་པས། །ལྟ་བ་ལོང་བ་ལྟ་བུ་ཡིན། །དངོས་ཀུན་ཡང་དག་རྫུན་པ་རུ། །མཐོང་བའི་སོ་སོར་རང་རིག་མིག །སྒོམ་པའི་ཐུར་མས་བྱེ་བར་འགྱུར། །དེ་ཕྱིར་རྫོགས་པ་ཆེན་པོ་ལ། །ལྟ་བ་མེད་དེ་ནམ་མཁའ་འདྲ། །
ནམ་མཁའ་ལ་ནི་མཐོ་དམན་མེད། །སྒོམ་པ་མེད་དེ་ཉི་ཟླ་འདྲ། །ཉི་ཟླ་ལ་ནི་གསལ་འགྲིབ་མེད། །སྤྱོད་པ་མེད་དེ་རྒྱ་མཚོ་འདྲ། །རྒྱ་མཚོ་ལ་ནི་ཡངས་དོག་མེད། །འབྲས་བུ་མེད་དེ་ཡེ་སངས་རྒྱས། །དེ་ལ་ཡང་སངས་རྒྱ་རྒྱུ་མེད། །དྲན་པ་མེད་དེ་ཡེ་ཤེས་ཡིན། །ཡེ་ཤེས་བློ་དང་ལྷན་ཅིག་མིན། །བདེན་པ་མེད་དེ་མི་བརྫུན་པས། །དོན་དམ་བདེན་པའི་ཐ་སྙད་གྲགས། །བདེ་བ་མེད་དེ་སྡུག་བསྔལ་དང༌། །བྲལ་བས་སངས་རྒྱས་ཉིད་དུ་རྟོགས། །ངས་ནི་གཞུང་ལུགས་མ་སྦྱངས་ཏེ། །རྒྱལ་བ་ཀློང་ཆེན་རབ་འབྱམས་ཀྱི། །ཡེ་ཤེས་སྐུ་དང་འགག་མེད་གསུང༌། །མཇལ་བས་སྐད་ཅིག་ཡུད་ལ་གྲོལ། །གྲོལ་ལོ་སྙམ་པའི་ང་རྒྱལ་དང༌། །མ་གྲོལ་སྙམ་པའི་ཞུམ་པ་མེད། །གྲུབ་མཐའ་ཀུན་གྱི་དེ་ཉིད་རིག །རིག་པ་ཐམས་ཅད་རང་ཉིད་ཀྱིས། །རྟོགས་པའི་དོན་དང་འགལ་མེད་མཐོང༌། །མཐོང་ཡང་ཆོས་ཉིད་བདེན་པ་ནི། །རྣམ་ཐར་སྒོ་གསུམ་ལ་གནས་པས། །མཛུབ་མོས་མཚོན་པའི་ཡུལ་མིན་ཕྱིར། །གྲུབ་མཐའི་ཞེན་པ་ཐམས་ཅད་ཞིག །བསྒོམ་བྱ་སྒོམ་བྱེད་མེད་པའི་ངང༌། །བྱ་བྱ་ཆོས་སྤྱོད་མེད་པའི་ངང༌། །ཆོ་ག་བཟླས་བརྗོད་མེད་པའི་ངང༌། །དྲན་པ་ཉེ་བར་གཞག་པའི་ངང༌། །རང་གར་བཞག་པས་ཟག་བཅས་ཀྱི། །ལུས་ལ་གདུང་དང་སྐུ་བལ་གྱི། །རིང་བསྲེལ་
དག་ཀྱང་མང་དུ་བྱོན། །སྒོམ་པ་དཔལ་གྱི་མཆིམས་ཕུར་བྱས། །ཉམས་དང་རྟོགས་པའི་མཛོད་ཀློང་བརྡོལ། །སྣང་བ་བརྡ་དང་དཔེ་ཆར་ཤར། །འགྲོ་དོན་གཙང་དང་མོན་ལ་བྱས། །འབྲེལ་ཚད་དོན་ལྡན་སྨོན་ལམ་བཏབ། །སྡོད་ས་དད་མེད་ལུང་པར་བྱས། །དཀོར་དང་རྣམ་གཡེང་ངང་གིས་ཞི། །གདུལ་བྱ་དབུས་གཙང་ཁམས་ནས་འདུས། །སྦྱིན་པ་རྣམ་བཞིས་ལེགས་པར་བསྐྱངས། །གསེར་དངུལ་རྫས་དང་དབྱིག་ལ་སོགས། །མི་འདོད་བཞིན་དུ་སུན་སུན་བྱུང༌། །ཆོས་འཁོར་གསུམ་ལ་བསྟི་སྟང་དང༌། །རྟེན་བཞེངས་ཁྲི་མཆོད་སྟོང་མཆོད་ཕུལ། །སེམས་ཅན་མང་པོའི་སྲོག་སྐྱོབ་པས། །ཚེ་ཡང་མཐར་ཕྱིན་ལུང་བསྟན་ཐོབ། །རྣམ་རྟོག་རང་ཤར་རང་གྲོལ་ལ། །ཕྲག་དོག་ངན་སེམས་ཕྱོགས་ལྷུང་དང༌། །གྲུབ་མཐའི་ཁ་འཛིན་ཡོད་མིན་ཏེ། །ཆོས་ལ་སྡང་བའི་ཉེས་པ་དེས། །ཐར་པའི་སྲོག་རྩ་གཅོད་པའི་ཕྱིར། །གཟུ་པོར་གནས་པའི་བཤེས་གཉེན་ཆེ། །འབྲས་སྤུངས་བདེ་ཡངས་བླ་མ་ནི། །ཀལ་པ་མ་ཏིའི་གསུང་ནན་ལ། །བརྟེན་ནས་རང་བཞིན་བརྗོད་པ་འདི། །འགྲོ་འདིའི་རྒྱུད་ལ་བྱང་ཆུབ་སེམས། །སྐྱེས་ནས་བྱང་གྲོལ་ལ་རེག་ཤོག །གཏམ་ཚོགས་ལེའུ་རེ་དྲུག་པའོ།། །།