གཏམ་ཚོགས་ལེའུ་རེ་བདུན་པ། ཡེ་ཤེས་ཀྱི་ཕ་རོལ་ཏུ་ཕྱིན་པའི་གཏམ་རྫོགས་པ་ཆེན་པོའི་དོ་ཧ་མཛོད།
ཡེ་ཤེས་ཀྱི་ཕ་རོལ་ཏུ་ཕྱིན་པའི་གཏམ་རྫོགས་པ་ཆེན་པོའི་དོ་ཧ་མཛོད་ཅེས་བྱ་བ། རྒྱ་གར་སྐད་དུ། མ་ཧཱ་སནྡྷི་ཛྙཱ་ན་ས་མུ་དྲ་པ་ར་མི་ཏ་པ་ར་མི་ཏ་དྭ་ཧ་ཀོ་ཤ་བཛྲ་གིརྟི་ནཱ་མ། བོད་སྐད་དུ། རྫོགས་པ་ཆེན་པོ་ཡེ་ཤེས་རྒྱ་མཚོའི་ཕ་རོལ་ལས་ཀྱང་ཕ་རོལ་ཏུ་ཕྱིན་པའི་གཏམ་དྭ་
ཧ་མཛོད་ཀྱི་རྡོ་རྗེའི་གླུ་ཞེས་བྱ་བ། ཆོས་ཉིད་མ་བཅོས་པའི་ཀློང་ལ་ཕྱག་འཚལ་ལོ། །རྣམ་པར་ཐར་པའི་སྒོ་ནི་འདི་ཡིན་ཏེ། །སྟོང་པ་ཉིད་དང་མཚན་མ་མེད་པ་དང༌། །སྨོན་པ་མེད་ཅེས་རྒྱལ་བས་རབ་བསྔགས་ཀྱང༌། །ཚིག་གིས་དོན་བསྒྲིབས་སྟོང་ཉིད་དངོས་པོར་གོལ། །ཀུན་ཏུ་བརྟགས་པའི་མཐའ་བརྒྱད་སྤྲོས་བྲལ་ཡང༌། །མཚན་མའི་གཞན་དབང་གྱུར་ནས་གོ་འཕང་ལ། །སྨོན་པས་འཇུག་པ་ལྟ་བའི་སྙིགས་མ་ཡིན། །གང་ཞིག་སྟོང་པ་ཉིད་ཀྱི་དོན་འཚོལ་ཕྱིར། །མཐའ་གཉིས་སྤངས་ནས་དབུ་མར་གནས་པའི་བློས། །ཐལ་འགྱུར་མཚོན་ཆ་རྣོན་པོ་བརྡར་བྱས་ཀྱང༌། །ངོ་བོ་ཉིད་མེད་ཞི་བའི་དབྱིངས་ལས་དཀྲོགས། །སྟོང་པ་རང་གི་ངོ་བོས་མ་གྲུབ་བཞིན། །སྣང་བ་རྫུན་པར་མྱོང་བའི་ཀུན་རྫོབ་དང༌། །བསྲེས་ནས་བདེན་གཉིས་དབྱེར་མེད་འཚོལ་བ་ཡང༌། །རྣམ་པར་རིག་པ་ཅན་གྱི་ཞགས་པས་འཆིང༌། །ཕུང་སོགས་སྟོང་པར་རྟོག་པའི་ངོ་བོ་ཉིད། །ཉེ་བར་ལེན་པའི་ཆོས་དང་མ་བྲལ་ན། །ཤེས་རབ་ཕ་རོལ་ཕྱིན་ལ་རྩོད་བྱེད་ཀྱང༌། །ཞི་བའི་དོན་ལ་མི་རེག་སྲིད་པས་འཛིན། །རང་བཞིན་ཡོངས་ཤེས་བདེན་པས་འཚང་རྒྱ་ན། །མཉམ་པར་བཞག་དང་མ་བཞག་རྫུན་པའི་ཆོས། །བཞག་པས་རྒྱ་ན་བསམ་གཏན་གཟུགས་མེད་དང༌། །མ་གཞག་རྒྱ་ན་སེམས་ཅན་ཅི་ལ་འཁོར། །འདོད་དང་གཟུགས་ཁམས་གཟུགས་
མེད་ཁམས་གསུམ་གྱི། །གནས་རིགས་ཁམས་ལ་དམིགས་པའི་འདུ་ཤེས་དང༌། །བྲལ་བའི་དམིགས་མེད་སྙིང་རྗེ་ཆེན་པོ་ནི། །བདེན་པ་མཐོང་བའི་བྱང་ཆུབ་སེམས་དཔར་ཡོད། །གང་ཕྱིར་སྟོང་ཉིད་ལྡན་ལ་སྙིང་རྗེས་འབྲེལ། །སྙིང་རྗེ་དང་བྲལ་སྟོང་པ་ཉིད་རློམ་པ། །སངས་རྒྱས་མུ་སྟེགས་བྱེད་དེ་སྲིན་འབུ་ཡིས། །ཉུངས་འབྲུ་ཕུག་པའི་སྟོང་པར་བལྟ་དང་མཚུངས། །སྡུག་བསྔལ་ཤེས་ནས་ཀུན་འབྱུང་སྤོང་བའི་ལམ། །རྒྱུད་ལ་བརྟེན་བྱས་འགོག་པ་མངོན་བྱེད་པ། །འདི་ནི་ཞི་བདེར་དམིགས་པ་ཙམ་ཞིག་ཏེ། །རྣམ་པ་ཐམས་ཅད་མཁྱེན་པའི་དོན་ལ་རིང༌། །ཀློག་དང་འཛིན་དང་ཉན་དང་བསྟན་བཅོས་འཆད། །ཐོས་དང་བསམ་དང་བསྒོམ་པས་གདུང་བྱེད་པ། །དང་པོའི་ལས་ཅན་རྣམས་ལ་མ་བཀག་སྟེ། །ཆོས་རྣམས་རང་བཞིན་མེད་པར་རྟོགས་ཚེ་འཁྲུལ། །ལྟ་བར་གོ་བར་བྱ་བའི་དུས་ཀྱི་ཚེ། །ལུང་དང་རིག་པ་ལྟ་བའི་མིག་བུ་ཡིན། །ལྟ་བ་མྱོང་བར་བྱ་བའི་དུས་དག་ན། །སེམས་དང་རིག་པའི་ལ་ཤན་ཕྱེད་པར་བྱ། །ལྟ་བ་རྟོགས་པར་གྱུར་པའི་དུས་དག་ན། །སློབ་པས་བཅིངས་པའི་བྱ་བཏང་ཉམས་རེ་མཚར། །གྲུབ་མཐས་བཅོས་པའི་ལྟ་སྒོམ་ཡི་རེ་མུག །འདུས་མ་བྱས་དང་འགལ་བའི་ལམ་བདེན་བརྫུན། །གཟུགས་ཚོར་འདུ་ཤེས་
ལ་སོགས་ཕུང་ཁམས་ཀྱི། །ཆོས་ལ་མི་གནས་ཆོས་ཉིད་ལ་གནས་པ། །སྔགས་སུ་གདན་གསུམ་ཚང་བའི་ལྟར་བསྟན་ཡང༌། །རྫོགས་པ་ཆེན་པོའི་དོན་ལ་མ་རེག་གོ །ལྟ་བའི་རང་བཞིན་ཀ་ནས་དག་པ་ལ། །བལྟ་བར་བྱ་བ་ཅུང་ཟད་ཡོད་མིན་ཏེ། །ངང་དང་རང་བཞིན་མ་ཉམས་བདེན་པ་ཡིས། །འཁྲུལ་པའི་རྫུན་ཕུགས་གཏིང་ནས་སུན་འབྱིན་ཏོ། །རིག་པ་གདོད་ནས་མངོན་སངས་རྒྱས་པ་འདི། །སྤངས་ནས་སེམས་ལ་སངས་རྒྱས་འདོད་པ་རྣམས། །སེམས་བྱུང་ཇག་པས་བསྐོར་བ་མ་མཐོང་ནས། །རྟོག་དཔྱོད་ལྷག་མཐོང་ཡིན་ཞེས་འོ་དོད་འབོད། །གཟུགས་ནི་ཕ་རོལ་ཡིན་ལ་འདུ་ཤེས་ཚུ་རོལ་ཡིན། །ཚོར་བ་བར་ན་གནས་པས་འདུ་བྱེད་མཚམས་སྦྱར་ཏེ། །རྣམ་པར་ཤེས་པ་འཁོར་བའི་གཏིང་རྡོར་བསྐྱུར་བྱས་པས། །སེམས་ཅན་འདི་དག་ཐར་པའི་སྐབས་མེད་སྙིང་རེ་རྗེ། །རང་ངོ་གདོད་ནས་དག་པའི་ཆོས་ཉིད་ལ། །ཡོད་དང་མེད་པའི་ཕྱོགས་འཛིན་ཞིག་གྱུར་ཀྱང༌། །བྱིས་པ་རྣམས་ཀྱིས་གཉིས་སུ་སྒྲོ་བཏགས་ཤིང༌། །མཁས་པ་རྣམས་ཀྱིས་གཅིག་ཏུ་བཟུང་བས་འཁྲུལ། །ཇི་ལྟར་བཟུང་ན་བདེན་པ་རྣམ་པ་གཉིས། །སྣང་སྟོང་ཚིག་གིས་ཤ་བའི་རྭ་ལྟར་བཅོས། །འདོད་
ཁའི་བློ་ཡི་བསེ་རུ་ལྟ་བུར་བཟུང༌། །ལྷན་ཅིག་སྐྱེས་པའི་དེ་ཉིད་མ་རིག་གོ །མ་རིག་ལས་ནི་རྟེན་ཅིང་འབྲེལ་པར་འབྱུང༌། །བཅུ་གཉིས་རྒྱུན་ལ་འཁོར་འདི་ནང་རིག་པས། །ལྡོག་སྟེ་གཉུག་མའི་དེ་ཉིད་མ་མཐོང་ན། །སྒྲ་ཚད་བཟོ་དང་གསོ་བས་རྣམ་པར་འཁྱམ། །དེ་ཕྱིར་འཁོར་དང་མྱ་ངན་འདས་པའི་ཆོས། །ཐམས་ཅད་བདེན་པ་མ་ཡིན་བརྫུན་པའང་མིན། །གཉིས་ཀར་མི་གནས་རྫོགས་པ་ཆེན་པོའི་དོན། །ནམ་མཁའི་རང་བཞིན་གཞལ་མེད་ཁང་ཆེན་པོ། །རྟོགས་པར་འདོད་ནས་ཤེས་རབ་ཕ་རོལ་ཕྱིན། །བསྟེན་གོམས་བྱས་པས་ཤེས་བྱའི་ཚུ་རོལ་ལུས། །རང་སར་བཞག་པས་བསམ་གཏན་རྒྱ་རལ་ནས། །བདེ་བར་གཤེགས་པའི་དེ་ཉིད་མངོན་སུམ་མཐོང༌། །བྱ་རྩོལ་མེད་ལ་བརྩོན་པའི་ཁུར་བཀལ་བས། །ལམ་བདེན་འདུས་བྱས་མྱ་ངན་འདའ་མ་ནུས། །ད་ནི་མི་བསྒོམ་སྒོམ་ཆེན་བསླུ་བ་ལ། །སྒོམ་ལས་གཞན་པའི་ཆོམ་རྐུན་ངས་མ་མཐོང༌། །སྐྱེ་མེད་ཆོས་ལ་བཟོད་པ་མ་ཐོབ་ན། །ཟབ་མོའི་དོན་ལ་སྐྲག་པའི་དཀའ་ཐུབ་དང༌། །བསྲུང་ཉམས་འདུ་ཤེས་དམ་པོས་དཀྲིས་པ་ཡི། །རློམ་སེམས་དེ་ཡང་ཁྲིམས་ཀྱི་སྣོད་ལས་རིང༌། །བདག་འཛིན་བདག་གིར་འཛིན་པ་ལ་དམིགས་ན། །གཏོང་སེམས་གོམས་ཀྱང་སྦྱིན་པའི་ཚུ་རོལ་ཏེ། །ཟག་པ་མེད་པའི་
ཕ་རོལ་ཕྱིན་དྲུག་ནི། །ལྷན་ཅིག་སྐྱེས་པའི་དེ་ཉིད་མཐོང་ལ་ཡོད། །བདེན་པས་མ་སྨིན་ཆུ་ཡི་དབང་བསྐུར་དང༌། །ཐར་པ་མ་བསྟེན་རིམ་པར་ཕྱེ་བ་ཡིས། །ལྷན་ཅིག་སྐྱེས་པའི་དེ་ཉིད་མཚོན་མི་ནུས། །གཟུང་འཛིན་རྡོ་རྗེ་བཙུན་མོའི་དབྱིངས་སུ་འགགས། །དེ་ཕྱིར་བྱིན་རླབས་བྲལ་བའི་དབང་བསྐུར་ལས། །ཡེ་ཤེས་ལྡན་ལ་མོས་གུས་གནད་དུ་བསྣུན། །རྡོ་རྗེ་སེམས་དཔའི་དེ་ཉིད་མ་ནོར་བ། །མཐོང་བའི་མོད་ལ་མཐོང་བྱེད་འགག་པར་འགྱུར། །སྣང་ཞེན་ཕ་རོལ་སྒྲོལ་ལ་ལྡན་མིན་གྱི། །འདུ་བྱེད་ལྷ་ཡི་ཕྱག་རྒྱར་བསྒྲུབ་དེས་ཅི། །ཡོངས་གྲུབ་གདན་གསུམ་འཁོར་ལོའང་ཀུན་རྫོབ་ཕྱིར། །ཆོས་ཀྱི་སྐུ་ལ་ཞལ་ཕྱག་ངས་མ་མཐོང༌། །དེ་ཕྱིར་ང་ནི་ཅི་ཡང་མི་བསྒོམ་སྟེ། །རང་སར་བཞག་པས་དམ་པའི་དེ་ཉིད་མཐོང༌། །མཐོང་ཞེས་བྱ་བའང་བླ་དྭགས་ཙམ་དུ་ཟད། །རི་བོང་རྭ་ཡི་རྣོ་བརྟུལ་བརྗོད་པ་བཞིན། །གཟུང་འཛིན་བཞོན་པ་དྷུ་ཏིར་བཅོམ་འདོད་ནས། །ལས་ཀྱི་རླུང་ལ་ཞབས་ཏོག་བྱེད་པ་ཡང༌། །རྦུང་པའི་སྒོང་སྟོངས་བཞིན་ཏེ་སྙིང་པོ་མེད། །ཡེ་ཤེས་རླུང་ལ་འགྲོ་དང་འོང་བ་བྲལ། །འགྲོ་འོང་བྲལ་བའི་བདེ་ཆེན་རྟོགས་འདོད་ན། །དག་བྱེད་རྒྱུན་གྱི་མ་སྙོགས་དྭངས་པ་བཞིན། །རིག་པའི་ཆོས་ཉིད་གདོད་ནས་
དག་པ་ལ། །སེམས་ཀྱིས་བསླད་པའི་ཞབས་ཏོག་མི་འཚལ་ལོ། །ཡིན་པ་མིན་པས་ངོ་བོ་ཀ་ནས་དག །མིན་པ་མིན་པས་རང་བཞིན་ལྷུན་གྱིས་གྲུབ། །ཡེ་ནས་གྲོལ་བས་གདོད་ཀྱི་གྲོལ་གཞི་མེད། །ཅེར་གྱིས་གྲོལ་བས་བདེན་པ་གཉིས་ཀྱིས་སྟོང༌། །ལྟ་སྒོམ་སྤྱོད་དང་ཟུང་འཇུག་མི་དམིགས་པས། །བསམ་མི་ཁྱབ་ལ་བསམ་པ་ཡ་རེ་ཆ། །ཡིན་པར་གྲུབ་པ་མེད་པའི་ཆོས་ཉིད་ལ། །ས་ལམ་དྲོད་རྟགས་རེ་བ་ལམ་ཐག་རེད། །མིན་པར་གྲུབ་པ་མེད་པའི་ངང་གདངས་ལ། །མ་ཡིན་དགག་གིས་འབད་རྩོལ་ཐང་རེ་ཆད། །གཞལ་དུ་མེད་ལ་གཞལ་བྱས་སྒྲོ་བཏགས་ནས། །བཅོས་ཤིང་བཅོས་པས་མཐོང་ལམ་དོན་ལ་བསྒྲིབས། །བདེ་གཤེགས་སྙིང་པོ་རང་བཞིན་མེད་པ་ལ། གློ་བུར་བློ་ཡིས་དྲང་ངེས་གཉིས་སུ་བཟུང༌། །འདུ་ཤེས་གཞུང་ནས་བསྟན་བཅོས་འཆད་པའི་རིང༌། །དག་པ་ཉིས་ལྡན་རྟོག་པའི་ཆོམ་པས་བཅོམ། །སྐྱེ་བ་མེད་པའི་སྟོང་པ་བཙོན་འཛིན་ལས། །འགག་པ་མེད་པའི་ལྷག་མཐོང་གསལ་བ་མཆོག །ཆེད་འཛིན་ཞིག་པའི་དྲན་པ་རང་གྲོལ་ལ། །ལམ་བདེན་རྫོགས་ན་རྫོགས་པ་ཆེན་པོ་ཡིན། །མཚན་གཞིའི་ངོ་ན་རྫོགས་པའི་བྱང་ཆུབ་དང༌། །ལོངས་སྤྱོད་རྫོགས་པ་རྫོགས་པའི་སངས་རྒྱས་སོགས། །
འགོག་བདེན་མཐར་ཐུག་སློབ་པ་མིན་པ་ལ། །ཆེན་པོའི་སྒྲས་བཏགས་རང་བཞིན་རྫོགས་པ་ཆེ། །སྤྲོས་བྲལ་དྭ་ཧའི་རྒྱང་གླུར་བླངས་པ་འདིའི། །ལྟ་བ་ངོས་གཟུང་མེད་པས་རྟག་ལྟའི་གཡང་ལས་གྲོལ། །སྒོམ་པ་གསལ་འགྲིབ་མེད་པས་ཆད་ལྟའི་ཕྲང་ལས་ཐར། །སྤྱོད་པ་བླང་དོར་བྲལ་ཡང་བག་ཆགས་རྗེས་མི་སོན། །རྒྱུ་འབྲས་དག་གྲོལ་ལས་འདས་དོན་འདི་མ་རྟོགས་ན། །སྣ་ཅིག་བསྲུངས་ནས་ཡོངས་རྫོགས་བཏང་བའི་བསླབ་པ་དང༌། །བྱང་ཆུབ་སེམས་གཉིས་མ་འབྲེལ་ཉི་ཚེའི་སྟོང་པ་ཉིད། །སྐྱེ་བ་བཞི་སྦྱང་རྣམ་དག་མི་ཤེས་ལྷའི་ཕྱག་རྒྱ། །བགྲང་འཕྲེང་བསྐོར་ཞིང་སྤྲོ་བསྡུས་སུན་པའི་བཟླས་བརྗོད་ཀྱིས། །ཡི་དྭགས་ཆེན་པོའི་གོ་འཕང་བསྙེན་རྣམས་དང༌། །བྱིས་པ་ཉེར་སྤྱོད་གནས་ལས་དཔག་པའི་ཕྱིར། །རིག་འཛིན་འཇིགས་བྲལ་གླིང་པས་བསྟན་ནས་སོང༌། །ཀློང་ཆེན་ནམ་མཁའི་རྡོ་རྗེའི་རྟོགས་ཆོས་ཡིན། །མཁྱེན་བརྩེའི་འོད་ཟེར་སྟོང་ལྡན་དེ་སྐད་ལོ། །དགེ་བས་གདོད་མའི་ས་ལ་བྱང་ཆུབ་ཤོག །གཏམ་ཚོགས་ལེའུ་རེ་བདུན་པའོ།། །།