རྡོ་རྗེ་སེམས་དཔལ་ལ་བརྟེན་པའི་བླ་མའི་རྣལ་འབྱོར་མངོན་དགའི་ཞིང་སྦྱོང་།
རྡོ་རྗེ་སེམས་དཔལ་ལ་བརྟེན་པའི་བླ་མའི་རྣལ་འབྱོར་མངོན་དགའི་ཞིང་སྦྱོང་བཞུགས། །
མངོན་པར་དགའ་བ་རང་བཞིན་སྤྲུལ་པའི་ཞིང༌། །བལྟ་ན་སྡུག་པའི་གཞལ་མེད་ཁང་ཆེན་དབུས། །རང་གི་སྤྱི་བོར་གླང་པོས་མཚན་པའི་ཁྲིར། །རྩ་བའི་བླ་མ་རྡོ་རྗེ་མི་བསྐྱོད་པ། །སྐུ་མདོག་དཀར་གསལ་རྡོར་དྲིལ་ཡུམ་དང་འཁྲིལ། །ཞི་ཚུལ་དགུ་དང་རྒྱན་ཆ་བཅུ་གསུམ་མཛེས། །རིགས་ཀུན་འདུས་པའི་བདག་ཉིད་ཆེན་པོ་ལ། །ཕྱག་འཚལ་སྐྱབས་མཆི་ལུས་དང་ལོངས་སྤྱོད་འབུལ། །སྡོམ་གསུམ་དམ་ཚིག་ཉམས་པ་མཐོལ་ལོ་བཤགས། །བྱང་ཆུབ་བསོད་ནམས་མཆོག་ལ་རྗེས་ཡི་རང༌། །ཐེག་པ་རྒྱ་མཚོའི་ཆོས་འཁོར་བསྐོར་དུ་གསོལ། །རྟག་པ་རྒྱུན་གྱི་འཁོར་ལོར་བཞུགས་གསོལ་འདེབས། །དགེ་ཚོགས་འཁོར་གསུམ་ཡོངས་དག་ཆེན་པོར་བསྔོ། །ཁྱེད་ཤེས་མོས་གུས་
གདུངས་པས་གསོལ་བ་འདེབས། །སྐུ་མཆོག་རྡོ་རྗེ་མཛོད་སྤུའི་དཀྱིལ་འཁོར་ནས། །གདན་གསུམ་ཚང་བའི་དཀྱིལ་འཁོར་མངོན་སྤྲུལ་ཏེ། །བུམ་དབང་བསྐུར་ནས་ཕུང་ཁམས་སྐྱེ་མཆེད་ཚོགས། །ཡོངས་སྒྲུབ་གདན་གསུམ་འཁོར་ལོར་སྨིན་བྱིན་རློབས། །ཨེ་ཝྃ་ཟུང་འཇུག་རོལ་པའི་དཀྱིལ་འཁོར་ནས། །ཞུ་བ་སྐུ་དང་བདེ་བ་གསུང་རྡོ་རྗེ། །མི་རྟོག་ཐུགས་ཀྱི་རྡོ་རྗེའི་རང་བཞིན་ནི། །བྱང་ཆུབ་སེམས་དང་རྣམ་ཐར་གསུམ་ལྡན་གྱི། །ཆོ་གས་མཆོག་དབང་རྣམ་གསུམ་མངོན་བྱས་ཏེ། །རླུང་ཡིད་ཤེས་བྱའི་སྒྲིབ་པ་དྷྲུ་ཏིའི་དབྱིངས། །ཅིག་ཅར་བཅོམ་ནས་དགའ་མཆོག་ཁྱད་པར་གྱི། །དཔེ་དོན་ལྷན་སྐྱེས་ཡེ་ཤེས་མཐོང་སྒོམ་ལམ། །སློབ་པ་མིན་པ་ཡེ་ཤེས་བླ་
མའི་དབྱིངས། །བདེ་ཤེགས་ཁམས་ཀྱི་ཡོན་ཏན་མཐར་ཕྱིན་སྩོལ། །ཨོཾ་ཨཱཿགུ་རུ་བཛྲ་སཏྭ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེས་མོས་གུས་གདུང་བའི་ངང་ནས་བཟླས་པ་བྱ་བ་དང་ལྷན་ཅིག་དབང་བཞིའི་དོན་སྒྲ་ཇི་བཞིན་པའི་དམིགས་པ་ལ་བསྟེན་གོམས་བྱ་བ་ནི་བླ་མའི་ཞལ་ལས་ཤེས་ཤིང༌། ཤིན་ཏུའང་ཐུན་མོང་མ་ཡིན་པའི་མན་ངག་ཏུ་རིག་པར་བྱའོ། །དཔོན་པོ་འོད་ཟེར་ཕྲིན་ལས་ཀྱི་ངོར་རྒྱལ་བའི་དགོངས་བརྒྱུད་མངོན་དུ་ཕྱུང་བ་རིག་འཛིན་འཇིགས་བྲལ་གླིང་པས་སོ།། །།
སངས་རྒྱས་སྣང་བ་མཐའ་ཡས་ལ་བརྟེན་པའི་སྐུ་གསུམ་བླ་མའི་རྣལ་འབྱོར།
སངས་རྒྱས་སྣང་བ་མཐའ་ཡས་ལ་བརྟེན་པའི་སྐུ་གསུམ་བླ་མའི་རྣལ་འབྱོར་བཞུགས། །སྣང་སྲིད་ཐམས་ཅད་བདེ་བ་ཅན་གྱི་ཞིང༌། །ཕྲ་རབ་རྡུལ་སྙེད་གསེར་གྱི་ས་གཞི་ལ། །རིན་ཆེན་སྣ་ཚོགས་ལྗོན་བའི་ཡ་ལད་ཅན། །འབབ་སྟེགས་བདེ་བའི་ཀླུང་དང་བྱ་སྐད་སྙན། །ཀུན་ཀྱང་འཕགས་པའི་བདེན་པ་འབའ་ཞིག་སྒྲོག །སྡུག་བསྔལ་བདེན་པས་སྤངས་པའི་ཞིང་ཁམས་ན། །ཐ་གྲུ་མི་མངོན་གཞལ་མེད་ཕོ་བྲང་དབུས། །རང་གི་སྤྱི་བོར་རྨ་བྱས་བཏེགས་པའི་ཁྲིར། །པད་ཟླའི་གདན་ལ་རྩ་བའི་བླ་མ་ནི། །འོད་སྣང་མཐའ་ཡས་བྱེ་རུའི་ལྷུན་པོ་ལ། །ཆོས་གོས་གསུམ་གྱི་དབང་གཞུས་དཀྲིས་པའི་མདངས། །མཚན་དཔེ་ཡོངས་རྫོགས་མཉམ་གཞག་ལྷུང་བཟེད་ཅན། །གཡས་གཡོན་སྤྱན་རས་གཟིགས་དང་མཐུ་ཆེན་ཐོབ། །མདུན་ན་དཔལ་ལྡན་
སངས་རྒྱས་པདྨ་སྐྱེས། །རྒྱབ་དང་བྱང་སེམས་དགྲ་བཅོམ་ཚོགས་ཀྱིས་བསྐོར། །རྒྱལ་ཀུན་འདུས་པའི་བདག་ཉིད་ཅན་རྣམས་ལ། །སྙིང་ནས་སྐྱབས་མཆི་བྱང་ཆུབ་སེམས་མཆོག་བསྐྱེད། །ཕྱག་འཚལ་ལུས་དང་ལོངས་སྤྱོད་ལྟོས་མེད་འབུལ། །བཅས་དང་རང་བཞིན་ཉམས་པའི་སྡིག་ལྟུང་བཤགས། །དགེ་ལ་ཡི་རང་ཆོས་འཁོར་བསྐོར་བཞིན་དུ། །མྱ་ངན་འདའ་བ་མེད་པར་བརྟན་བཞུགས་ནས། །བདག་དང་མ་གྱུར་སེམས་ཅན་ཐམས་ཅད་ལ། །འདི་ཕྱི་བར་དོ་ཀུན་ཏུ་ཐུགས་རྗེས་གཟིགས། །དུས་གསུམ་བསགས་པའི་དགེ་རྩ་བྱང་ཆུབ་བསྔོ། །ཚེ་འདིའི་འདུ་བྱེད་སྟོངས་པར་གྱུར་མ་ཐག །བདེ་བ་ཅན་གྱི་ཞིང་དེར་སྐྱེ་བར་ཤོག །ཨོཾ་ཨ་མཱ་ར་ཎི་ཛི་ཝནྟི་ཡེ་སྭཱ་ཧཱ༔ ཞེས་བཟླ་བཞིན་དུ་དབང་བཞི་བླང་བར་བྱའོ། །འདི་ནི་བྱིན་རླབས་ཤིན་ཏུ་མྱུར་ཞིང༌། དགོངས་གཏེར་དུ་བབས་ནས་རིང་ཞིག་ལོན་ཡང་ཡི་གེར་མ་འཁོད་པ་འཇིགས་མེད་ཤེས་རབ་ཀྱི་ངོར་བཀོད་པའོ།། །།
སྔ་འགྱུར་བསྟན་པའི་སྲོལ་འབྱེད་ཆེན་པོ་རྣམས་ལ་གསོལ་བ་འདེབས།
སྔ་འགྱུར་བསྟན་པའི་སྲོལ་འབྱེད་ཆེན་པོ་རྣམས་ལ་གསོལ་བ་འདེབས་པ་ནི། ཨེ་མ་ཧོ། རང་སྣང་རིག་པ་དོན་གྱི་བླ་མའི་སྐུ། །མཚོན་བྱེད་དཔེ་ཡིས་བདེན་པ་སྟོན་པའི་སླད། །གནས་ལུགས་གྲུབ་པ་མེད་བཞིན་མཚན་དཔེའི་གར། །སྔ་འགྱུར་ལོ་པཎ་རྣམས་ལ་གསོལ་བ་
འདེབས། །རྩོད་དུས་ཤཱཀྱའི་བསྟན་པ་གཟུགས་བརྙན་གྱིས། །འཛིན་པའི་ལུང་བསྟན་བདེན་པ་མངོན་གྱུར་ཚེ། །བསམས་བཞིན་རྒྱན་དྲུག་མཆོག་གཉིས་གངས་རིའི་ཐོད། །དྲི་མེད་འོད་ཟེར་འགྱེད་ལ་གསོལ་བ་འདེབས། །ཆོས་ཀུན་དེ་ཉིད་འདུས་པ་མདོ་སྒྱུ་སེམས། །དར་བའི་མོད་ལ་གངས་ཅན་རི་ཡི་ལྗོངས། །ཨོ་རྒྱན་ཡུལ་བཞིན་བསྐལ་པ་དགེ་མཛད་པ། །ཟུར་པ་མེས་དབོན་གསུམ་ལ་གསོལ་བ་འདེབས། །སྒྲ་ཚད་རྟོག་གེའི་རིག་པས་མ་བསྙེམས་ཤིང༌། །ཐེག་དམན་ལམ་གྱི་འཆིང་བ་ཀུན་གྲོལ་བས། །ངེས་དོན་རྒྱུན་སྡེའི་རྒྱངས་གླུ་ལེན་མཁས་པ། །རོང་ཟོམ་པཎྜི་ཏ་ལ་གསོལ་བ་འདེབས། །བསླབ་གསུམ་རྣམ་དག་ཁྲིམས་ཀྱི་ཞིང་ས་ལ། །བསྟེན་མཁས་ཡོན་ཏན་རྫོགས་པའི་དཔལ་གྱི་མགུར། །སྒྲ་དབྱངས་ལྷ་མོས་འཁྱུད་པའི་མངའ་རིས་པ། །པདྨ་དབང་རྒྱལ་ཞབས་ལ་གསོལ་བ་འདེབས། །རིམ་དགུའི་བསྟན་པ་རྒྱ་མཚོའི་གཙུག་ཏོར་རྩེར། །རྣམ་པར་རིག་བྱེད་མིན་གཟུགས་ཤེས་རབ་ཀྱིས། །འོད་ཟེར་སྣང་བས་ཤྭནྟ་པུ་རིའི་གྲོང༌། །བསྙེན་མཁས་འགྲོ་འདུལ་གླིང་པར་གསོལ་བ་འདེབས། །འདི་ནས་བཟུང་སྟེ་བྱང་ཆུབ་སྙིང་པོའི་བར། །དཔལ་མགོན་བླ་མ་རྣམས་ཀྱི་ཐུགས་རྗེ་ཡིས། །རྡོ་རྗེ་ཐེག་པའི་རིང་ལུགས་མ་ནོར་བའི། །ཆོས་དང་བླ་མ་དམ་པ་མཇལ་བར་ཤོག །ཅེས་པའང་རྡོ་རྗེ་
ཐེག་པ་སྔ་འགྱུར་གྱི་བསྟན་པའི་སྲོལ་འབྱེད་ཆེན་པོ་འདི་དག་ཡིན་ནོ་ཞེས་སྟོན་པའི་སླད་དུ་རྫོགས་ཆེན་པ་རང་བྱུང་རྡོ་རྗེས་སྨྲས་པའོ།། །།
ཇོ་བོ་རིན་པོ་ཆེར་གསོལ་འདེབས་སྨོན་ལམ་དང་འབྲེལ་བར་དབང་བཞི་ལེན་ཚུལ།
ཇོ་བོ་རིན་པོ་ཆེར་གསོལ་འདེབས་སྨོན་ལམ་དང་འབྲེལ་བར་དབང་བཞི་ལེན་ཚུལ་བཞུགས། །རྒྱལ་བ་ཐུབ་དབང་ཉིན་བྱེད་ནི། །མི་མཇེད་ཞིང་གི་སྒྲོན་མ་སྟེ། །སྤྲུལ་པས་འཛམ་བུའི་གླིང་འདུལ་བ། །གང་ལ་སྙིང་ནས་སྐྱབས་སུ་མཆི། །ཁྱོད་སྐུ་རིག་གྲོལ་ཉིས་ལྡན་ཏེ། །གསུང་ནི་འགོག་ལམ་བདེན་གཉིས་ཆོས། །ཐུགས་ནི་བླ་མ་ཆོས་སྐུའི་ཞལ། །དཀྱིལ་འཁོར་རྒྱ་མཚོའི་བདག་ཉིད་ལ། །རྣམ་དག་བདུན་དང་ཆབ་གཅིག་ཏུ། །ལུས་དང་ལོངས་སྤྱོད་ལྟོས་མེད་འབུལ། །ལས་ཀྱིས་གཞན་དབང་ཅི་མཐོང་ཡང༌། །ཁྱེད་ཤེས་དམ་བཅའ་བརྟན་པོ་འཛིན། །ཁྱོད་ཞལ་མཐོང་བའི་མོད་ཉིད་ལ། །མོས་གུས་བཟོད་བླག་མེད་པ་དེ། །བུམ་པའི་དབང་གི་ངོ་བོ་ཉིད། །ལུས་སྒྲིབ་དག་ནས་སྐུ་རྡོ་རྗེ། །ད་ལྟ་ཉིད་དུ་ཐོབ་བྱིན་རློབས། །ཁྱོད་གསུང་སྒྲ་ཚིག་རང་ཚན་ལས། །འདས་པ་གསང་བ་དམ་པའི་དབང༌། །བདག་གི་ངག་ལ་ཞུགས་པའི་མོད། །གསུང་གི་རྡོ་རྗེའི་དངོས་སྒྲུབ་སྩོལ། །ཐུགས་ནི་ཟབ་ཞི་སྤྲོས་དང་བྲལ། །བདེ་ཆེན་བྱང་ཆུབ་ཤེས་རབ་དབང༌། །བདག་གི་རྣམ་ཤེས་ཚོགས་བརྒྱད་ལ། །འདྲེས་ནས་ཐུགས་ཀྱི་རྡོ་རྗེར་སྩོལ། །རྒྱལ་བའི་
མཛོད་སྤུ་ལས་སྐྱེས་པའི། །འོད་ཟེར་ཆེན་པོའི་དབང་མཆོག་གིས། །ཤེས་བྱའི་སྒྲིབ་པར་རབ་སྤངས་ནས། །ཀུན་ཏུ་འོད་ཀྱི་ས་ནོན་ཤོག །བདག་ལ་སྨོད་དམ་གཤེ་ཡང་རུང༌། །སེམས་ཅན་ཕ་མའི་རང་བཞིན་ལ། །བྱས་པ་གཟོ་བའི་སྙིང་རྗེ་ཡིས། །འཁོར་བ་དོང་ནས་སྤྲུགས་པར་ཤོག །ཅེས་པའང་དད་ལྡན་གྱི་སློབ་མ་ཆོས་ཀྱི་གྲགས་པ་ཇོ་བོ་ཤཱཀྱ་མུ་ནེའི་སྐུ་མདུན་དུ་སྨོན་ལམ་གསོག་པའི་ཚེ་བསྐུལ་བ་བཞིན། རྒྱལ་བའི་མྱུ་གུ་མཁྱེན་བརྩེའི་ལྷས་སོ།། །།
མཛད་བཅུ་དབང་བཞི་དང་སྦྱར་བ།
མཛད་བཅུ་དབང་བཞི་དང་སྦྱར་བ་བཞུགས། །དབང་ཕྱུག་ལུས་དཀྱིལ་དགའ་བ་བརྒྱ་ལྡན་ནས། །གདན་གསུམ་གཉིས་འཐུང་འཕོས་ཏེ་རིག་པའི་དབང༌། །ལྷུམས་ཞུགས་མངོན་བྱང་ལྔ་ཡིས་སྤྲུལ་པའི་སྐུར། །བཟོ་སྦྱང་རྣམ་སྨིན་རིག་འཛིན་ཐོབ་བྱིན་རློབས། །གསང་བའི་དབང་གིས་བདག་ཉིད་གྲགས་འཛིན་མ། །ཡིད་ཀྱི་ཆོ་གར་བཀོད་པས་རླུང་ཁམས་དག །ཤེས་རབ་ཡེ་ཤེས་བཙུན་མོའི་སྒྱུ་མ་ལས། །ཚེ་དབང་ཕྱག་རྒྱའི་རིག་འཛིན་ཐོབ་བྱིན་རློབས། །སྲིད་པ་བཤིག་པའི་ངེས་འབྱུང་དཀའ་སྤྱད་ཀྱིས། །སྙོམས་འཇུག་བསམ་གཏན་ལ་གོམས་ལས་རླུང་བདུད། །དྷཱུ་ཏིར་བཅོམ་ནས་བྱང་ཆུབ་ཞི་བ་ཆེ། །ལྷུན་གྲུབ་རིགས་འཛིན་ཐོབ་པར་བྱིན་གྱིས་རློབས། །རིམ་དང་ཅིག་ཅར་སྒྲ་ཚིག་རང་ཚན་ལས། །འདས་པའི་ཆོས་
འཁོར་རིག་པའི་རྩལ་དབང་མཐར། །ཆོ་འཕྲུལ་ཆེ་བསྟན་ཉེ་བར་ཞི་བ་ལྟར། །རྫོགས་སྨིན་སྦྱངས་པའི་ཡོན་ཏན་ཐོབ་པར་ཤོག །ཅེས་པའང་ལྷོ་རྒྱུད་ནགས་མའི་ལྗོངས་ཀྱི་བུ་སློབ་རྣམ་པའི་སྣང་ངོ་དང་བསྟུན་ནས་རྫོགས་ཆེན་པ་རང་བྱུང་རྡོ་རྗེས་སོ།། །།
རྫོགས་སྨིན་སྦྱོང་བའི་སྨོན་ལམ།
རྫོགས་སྨིན་སྦྱོང་བའི་སྨོན་ལམ། །དུས་གསུམ་སངས་རྒྱས་ཐམས་ཅད་དང༌། །རྒྱལ་ཡུམ་ཤེས་རབ་ཕ་རོལ་ཕྱིན། །འཕགས་པ་ཐུགས་རྗེ་ཅན་རྣམས་ཀྱིས། །བདག་རྒྱུད་བྱིན་གྱིས་བརླབ་ཏུ་གསོལ། །དལ་འབྱོར་མི་ལུས་ཐོབ་སྙམ་ཡང༌། །ལོག་ལྟས་མི་ཁོམ་གནས་སུ་བསྐྱལ། །ཁ་ལྟས་རྒྱུ་འབྲས་ཁྱད་དུ་གསད། །ལས་མཐའ་ལོག་པས་རང་འབྱོར་ཉམས། །དམ་པས་མ་ཟིན་གཞན་འབྱོར་སྤངས། །འཇིགས་སྐྱོབ་ལེགས་སྨོན་ཆོས་སུ་འཁྲུལ། །དཀོར་དང་ལོག་འཚོར་བག་མེད་སྤྱད། །ཆོས་པའི་གཟུགས་ལ་ཆོས་མིན་སེམས། །ཤི་མ་ཐག་ཏུ་ངན་སོང་ལས། །འགྲོ་ས་མེད་པ་བདག་གི་བློ། །སྙིང་ནས་ཆོས་ལ་འགྱུར་བར་ཤོག །དེ་ཡང་བླ་མ་དམ་པས་ཟིན། །ངེས་འབྱུང་སྐྱོ་ཤས་མོས་གུས་དང༌། །སྙིང་རྗེ་བྱང་ཆུབ་དམ་པའི་སེམས། །རྒྱུད་ལ་ངམ་ངམ་ཤུགས་ཀྱིས་སྐྱེ། །སེམས་ཅན་ཀུན་ལ་ཕན་སེམས་དང༌། །ཕ་རོལ་ཕྱིན་དྲུག་སྤྱོད་པ་ལ། །བདུད་ཀྱི་བར་གཅོད་མི་འབྱུང་ཞིང༌། །ཚེ་དང་བསྒྲུབ་པ་མཉམ་པ་
ཡིས། །གྲངས་མེད་དང་པོའི་ཚོགས་སྦྱོར་ལམ། །ཐབས་ལ་མཁས་པས་འདུམ་པར་ཤོག །རྡོ་རྗེའི་ལམ་ལ་རྣལ་འབྱོར་པའི། །མཐོང་ལམ་བདེན་པས་མ་དག་ས། །བདུན་གྱིས་གྲངས་མེད་གཉིས་རྫོགས་ཤིང༌། །དག་ས་གསུམ་གྱིས་གྲངས་མེད་མཐའ། །མཆོག་དབང་ལྷན་སྐྱེས་ཡེ་ཤེས་དབྱིངས། །མངོན་སུམ་རྫོགས་ཀྱང་ཡང་དག་མཐའ། །མངོན་དུ་མི་བྱེད་སྨོན་ལམ་རྫོགས། །སེམས་ཅན་ཡོངས་སུ་སྨིན་བྱེད་ཅིང༌། །སྣོད་དང་བཅུད་ཀྱིས་བསྡུས་པ་ཡིས། །སངས་རྒྱས་ཞིང་ཁམས་སྦྱོང་བ་སྟེ། །རྫོགས་སྨིན་སྦྱངས་གསུམ་མཐར་ཕྱིན་ཤོག །ཅེས་པའང་དགེ་འདུན་དོན་གྲུབ་ཀྱི་ངོར། རྫོགས་ཆེན་པ་རང་བྱུང་རྡོ་རྗེས་སོ།། །།
གསོལ་འདེབས་མཚང་འདོན་མ།
གསོལ་འདེབས་མཚང་འདོན་མ་བཞུགས། །རྒྱལ་ཀུན་འདུས་པའི་སྤྱི་གཟུགས་ནི། །མཚན་ཉིད་ཀུན་ལྡན་བླ་མ་སྟེ། །རང་སེམས་ཆོས་སྐུར་ངོ་སྤྲོད་པ། །བདག་ལ་སངས་རྒྱས་ཀུན་ལས་ལྷག །རེ་ས་ཁྱོད་ལས་མེད་པ་ལ། །ཐུགས་རྗེ་ཀློང་ནས་འདོར་ཕོད་དམ། །བྱིས་དང་སྡིག་གྲོགས་འདུ་འཛིའི་ཁྲོད། །ཆོས་མིན་ཆོས་ལྟར་བཅོས་པ་ཡི། །སྐལ་བ་ངན་པ་བདག་ཅག་གི །རྒྱུད་ལ་ངེས་འབྱུང་སྐྱོ་ཤས་དང༌། །བྱང་ཆུབ་སེམས་གཉིས་བསྐྱེད་བྱིན་རློབས། །སྔོན་ཆད་ཚུལ་ཁྲིམས་གོས་ལ་རེ། །དཀོན་མཆོག་དཀོར་ལ་བག་མེད་སྤྱད། །
ལྟར་སྣང་ཆོས་བརྒྱད་ཆོས་དང་འཁྲུལ། །ད་ནི་འཆི་བ་སྙིང་དྲན་གྱི། །རི་ཁྲོད་ནགས་ཁྲོད་དབེན་པ་རུ། །གཏན་གྱི་མདུན་མ་སྒྲུབ་བྱིན་རློབས། །ཆོས་ཀྱི་གེགས་ནི་ཅིར་ཡང་བརྫུ། །གཉེན་བཤེས་འདུ་ལོང་ཟང་ཟིང་དང༌། །རང་དོན་ཤོར་བའི་གཞན་དོན་དང༌། །འགྲན་སེམས་ཕྲག་དོག་སྙན་གྲག་བསྒྲུབ། །དབེན་པ་བརྟེན་ཀྱང་ཞི་བདེར་གཞོལ། །སྒོ་གསུམ་ཐ་མར་ཤོར་བའི་ཚེ༑ །རང་སྐྱོན་རང་གིས་རིགས་གྱུར་ནས། །བླ་མའི་ཞལ་གདམས་དྲན་པར་ཤོག །དྲན་ཤེས་མེད་པའི་དགེ་སྦྱོར་དང༌། །ལྟ་བས་མ་ཟིན་བསྐྱེད་རིམ་དང༌། །གོ་ཡུལ་ཤོར་བའི་སྟོང་ལྟ་སོགས། །སངས་རྒྱས་ལམ་ལ་ཐག་རིང་བས། །བླ་མ་མཆོག་ལ་མོས་གུས་དང༌། །ཟོལ་འགྲོགས་མེད་པའི་དད་པ་དང༌། །སེམས་ཅན་ཕ་མར་ཤེས་པ་ཡི། །སྙིང་རྗེ་རྒྱུན་ཆད་མེད་པ་ཤོག །ཆོས་ཕུང་བརྒྱད་ཁྲི་བཞི་ སྟོང་གི །རྩ་བ་བྱང་ཆུབ་སེམས་ལ་འདུ། །དེ་ཕྱིར་གཞན་ལ་ཕན་སྲིད་ན། །སྲོག་ཀྱང་གཏང་བའི་སྙིང་སྟོབས་དང༌། །དེ་ལའང་བྱས་ཡུས་མི་སྐྱེ་བར། །རང་བཞིན་མེད་པའི་སྟོང་ཉིད་ཀྱི། །དྲན་པའི་རྩི་དང་མི་འབྲལ་ཤོག །སེམས་ཅན་ཀུན་ལ་བུ་གཅིག་ལྟར། །བརྩེ་ཞིང་མཛད་པ་ཕྲིན་ལས་ཀུན། །འགྲོ་ལ་ཕན་པ་ལྷུར་མཛད་པའི། །སྐྱེས་བུ་དམ་པ་ཐམས་ཅད་དང༌། །བདག་ཉིད་
སྨིན་གྲོལ་ལམ་བཀོད་པའི། །བཀའ་དྲིན་ཅན་གྱི་བླ་མ་མཆོག །ཞབས་པད་བསྐལ་བརྒྱར་བརྟན་པ་དང༌། །བདག་གི་མོས་གུས་ལྕགས་ཀྱུ་ཡིས། །བླ་མ་དམ་པའི་ལུང་རྟོགས་ཀྱི། །དགོངས་སྤྱོད་སྙིང་དབུས་སྤྱན་འདྲོངས་ནས། །ཐུགས་ཡིད་གཅིག་ཏུ་འདྲེས་གྱུར་ཏེ། །ཁམས་གསུམ་འཁོར་བའི་རྒྱ་མཚོ་འདི། །ཅིག་ཅར་དོང་ནས་སྤྲུགས་ནུས་ཤོག །དགེ་འདུན་དོན་གྲུབ་ཀྱི་ངོར་གང་བོ་རིའི་ཉེ་འདབས་སུ། །རིག་འཛིན་འཇིགས་མེད་གླིང་པས་སོ།། །།
རིག་འཛིན་འཇིགས་མེད་གླིང་པའི་འཁྲུངས་རབས་གསོལ་འདེབས།
རིག་འཛིན་འཇིགས་མེད་གླིང་པའི་འཁྲུངས་རབས་གསོལ་འདེབས་བཞུགས། །མགོན་པོ་སྲིད་ཞིའི་ཁྱབ་བདག་ཀུན་ཏུ་བཟང༌། །གཞི་རྒྱུད་བདེ་ཤེགས་སྙིང་པོའི་ངོ་བོ་ཉིད། །སྟོང་ཉིད་སྙིང་རྗེར་ཤར་བ་སྤྱན་རས་གཟིགས། །དགའ་རབ་རྡོ་རྗེའི་ཞབས་ལ་གསོལ་བ་འདེབས། །བཅོམ་ལྡན་འོད་སྲུངས་དྲུང་ན་ཀྲྀ་ཀིའི་སྲས། །ཉི་མའི་གཉེན་གྱི་མཆེད་གྱུར་གཅུང་མཛེས་དགའ། །སྲོང་བཙན་སྒམ་པོའི་རྣམ་སྤྲུལ་ཨ་ཀར་མ། །ཁྲི་སྲོང་ལྡེའུ་བཙན་ཞབས་ལ་གསོལ་བ་འདེབས། །བིར་ཝ་པ་དང་ལྷ་ལྕམ་པདྨ་གསལ། །གཙུག་ལག་འཛིན་དངོས་རྒྱལ་སྲས་ལྷ་རྗེའི་ཞབས། །དྲི་མེད་ཀུན་ལྡན་ཡར་རྗེ་ཨོ་རྒྱན་གླིང༌། །ཟླ་འོད་གཞོན་ནུ་གྲགས་རྒྱལ་ལ་གསོལ་བ་འདེབས། །པཎ་ཆེན་
བི་མའི་དངོས་སྤྲུལ་བསམ་ཡས་པ། །མངའ་རིས་པཎ་ཆེན་ཆོས་རྒྱལ་ཕུན་ཚོགས་ཞབས། །བཀྲ་ཤིས་སྟོབས་རྒྱལ་འཛམ་གླིང་རྡོ་རྗེའི་གར། །འཇིགས་མེད་གླིང་པར་བསྒྱུར་ལ་གསོལ་བ་འདེབས། །འདི་འོག་ཡེ་ཤེས་རྡོ་རྗེའི་རོལ་པ་ཡིས། །རྡོ་རྗེ་སྙིང་པོའི་རིང་ལུགས་བསླངས་ནས་སླར། །གཤེ་ཞིང་སྐུར་པ་འདེབས་པ་རྣམས་ཀྱི་དོན། །སྤྲུལ་པ་སྣ་ཚོགས་སྟོན་ལ་གསོལ་བ་འདེབས། །མདོར་ན་འོད་སྲུངས་དྲུང་དུ་སེམས་བསྐྱེད་ནས། །བྱང་ཆུབ་སྤྱོད་པ་རླབས་ཆེན་རྫོགས་པའི་མཐར། །རྣམ་པར་རྒྱལ་བ་ཅན་དུ་འཚང་རྒྱ་བའི། །འདུས་པ་དང་པོའི་འཁོར་དུ་སྐྱེ་བར་ཤོག །ཅི་མཛད་ལེགས་པར་མཐོང་བའི་དད་གུས་ཀྱིས། །ཁྱོད་ཞལ་ཡིད་ལ་བྱེད་པ་ལ་གོམས་པས། །བླ་མ་མཆོག་དང་ནམ་ཡང་མི་འབྲལ་ཞིང༌། །ཚོམ་བུ་གཅིག་ཏུ་མངོན་པར་སངས་རྒྱས་ཤོག །ཅེས་པའང་རྗེ་བཙུན་ཛྙཱ་ནའི་མིང་ཅན་སོགས་དད་ལྡན་འགས་བསྐུལ་བ་ལས་འཁྲུལ་སྣང་ལ་ཤར་ཚོད་ཙམ་སོར་བཞག་ནས་མཁྱེན་བརྩེའི་ལྷས་སོ།། །།
རྫོགས་ཆེན་པ་རང་བྱུང་རྡོ་རྗེའི་རྣམ་ཐར་གསོལ་འདེབས།
རྫོགས་ཆེན་པ་རང་བྱུང་རྡོ་རྗེའི་རྣམ་ཐར་གསོལ་འདེབས་བཞུགས། །སྲིད་ཞི་ཀུན་གྱི་མགོན་པོ་སྤྱན་རས་གཟིགས། །བཅོམ་ལྡན་འོད་སྲུངས་དྲུང་ན་ཀྲྀ་ཀིའི་སྲས། །ཤཱཀྱ་ཐུབ་པའི་མཆེད་ཟླ་གཅུང་དགའ་བོ། །
དགྲ་བཅོམ་མཚན་བཟང་ལྡན་ལ་གསོལ་བ་འདེབས། །ཐེག་མཆོག་སྟོན་པ་དགའ་རབ་ཤྲཱི་སེང༌། །དྲི་མེད་བཤེས་གཉེན་སྲོང་བཙན་ཨ་ཀར་མ། །རྗེ་འབངས་གྲོགས་གསུམ་རྒྱལ་སྲས་ལྷ་རྗེའི་རྒྱུད། །རྣམ་འཕྲུལ་དུ་མར་ཤར་ལ་གསོལ་བ་འདེབས། །གཞོན་ནུ་རོལ་རྩེད་དུས་ནས་སྙིང་རྗེ་དང༌། །ངེས་འབྱུང་སྐྱོ་ཤས་དྲག་པོས་རྒྱུད་བརླན་ཏེ། །དབེན་པ་ཁོ་ནར་མོས་པའི་ཞེན་ལོག་གིས། །འདུ་འཛིའི་གཡུལ་ལས་རྒྱལ་ལ་གསོལ་བ་འདེབས། །ཉི་ཤུ་རྩ་ལྔའི་ལོ་ནས་ཚོགས་སྦྱོར་ལམ། །མོས་གུས་སྙིང་རྗེ་བསྐྱེད་རྫོགས་ཐབས་ལམ་ལ། །སྒྲུབ་པའི་དཀའ་ཐུབ་བསྟེན་པས་ཆོས་ཉིད་དོན། །མ་ནོར་མངོན་སུམ་མཐོང་ལ་གསོལ་བ་འདེབས། །དཔལ་གྱི་བསམ་ཡས་མཆིམས་ཕུའི་དགེའུ་རུ། །ཀུན་མཁྱེན་ཞལ་གཟིགས་ལུང་བསྟན་ཐོབ་པའི་མོད། །ཇི་ལྟ་ཇི་སྙེད་སྤོབས་པའི་གཏེར་གྲོལ་ཏེ། །མངོན་པའི་ང་རྒྱལ་ཟད་ལ་གསོལ་བ་འདེབས། །རྙིང་བསྟན་རི་མོའི་མར་མེ་ལྟར་གྱུར་དུས། །རྒྱུད་འབུམ་གླེགས་བམ་རྫོགས་དང་ཆོས་འབྱུང་བསྐྲུན། །མདོ་སྒྱུ་སེམས་གསུམ་སྙིང་ཏིག་བཀའ་གཏེར་གྱི། །བསྟན་པ་མ་ནོར་འཛིན་ལ་གསོལ་བ་འདེབས། །སྔ་འགྱུར་གྲུབ་མཐའ་ཆོས་ལུགས་སྣ་ཚོགས་ཀྱིས། །རྙོག་མར་གྱུར་ལ་གཞན་སྡེས་གཤུང་བའི་ཚེ། །ཡོན་ཏན་རིན་ཆེན་མཛོད་ཀྱི་
ཤིང་རྟ་ཆེས། །རང་སྡེའི་གྲུབ་མཐའ་སློང་ལ་གསོལ་བ་འདེབས། །ཐོས་པ་ཉུང་དང་བློ་གྲོས་བླུན་པོ་རྣམས། །ཁྲོན་པའི་ལག་འགྲོ་རྨོངས་པའི་ཕྱོགས་འཛིན་ཡང༌། །མཁས་དང་དམ་པའི་རྒྱུ་སྐར་ཆེན་པོའི་དབུས། །བསྟན་པའི་ཉིན་བྱེད་འབར་ལ་གསོལ་བ་འདེབས། །གང་ཞིག་འཕགས་པའི་སྤངས་རྟོགས་བརྙེས་པ་རྣམས། །རྣམ་རྟོག་རང་རྒྱུད་ལས་འདས་ཆོས་ཉིད་ཕྱིར། །སྒོམ་བྱུང་ཤེས་རབ་ཟླ་བ་ཉ་གང་ནས། །ཆོས་ཀྱི་གཏེར་མཛོད་རྙེད་ལ་གསོལ་བ་འདེབས། །དབེན་པ་ཁོ་ནར་སྦས་ཀྱང་ལས་ཅན་རྣམས། །མཚོ་ལ་ངང་པ་ཇི་བཞིན་རིང་ནས་འདུ། །སྐལ་མེད་རྟག་ཏུ་བསྙེན་ཀྱང་མི་ཐུལ་ན། །མང་པོའི་ཚོགས་དཔོན་སྤངས་ལ་གསོལ་བ་འདེབས། །མནོག་ཆུང་ཚེ་འདིའི་ཕུན་ཚོགས་ལ་དམིགས་ནས། །འཇིག་རྟེན་ཆོས་དང་མཐུན་པར་མི་འཇིག་ཀྱང༌། །རྣམ་ཐར་ངོ་ལྐོག་སྤངས་པའི་བརྟུལ་ཞུགས་ལ། །ས་ར་ཧ་པ་དགྱེས་ལ་གསོལ་བ་འདེབས། །བློ་སྣ་ཐུང་ཡང་བསྟན་འགྲོའི་དོན་ལ་བརྩོན། །ཡང་དག་ལམ་འཇུག་ཆོས་ཚུལ་ཙམ་མི་དམོད། །བསྟོད་བསྔགས་བཀུར་སྟིས་མི་ཁེངས་སྒྲོ་སྐུར་གྱིས། །འཇིགས་བྲལ་དཔའ་བོ་ཁྱེད་ལ་གསོལ་བ་འདེབས། །དད་གཤིན་རྫས་ལ་གཟི་བྱིན་མི་བསྒྲུབ་ཅིང༌། །བཀའ་འགྱུར་ལ་སོགས་སྐུ་གསུང་ཐུགས་རྟེན་བསྐྲུན། །མེས་དབོན་
གནས་ལ་ཁྲི་མཆོད་སྲོག་བསླུ་སོགས། །འབྲེལ་ཚད་དོན་ལྡན་སྦྱོར་ལ་གསོལ་བ་འདེབས། །མཉམ་རྗེས་ཀུན་ཏུ་ཆགས་སྡང་རེ་དོགས་ཀྱི། །ཁྱོད་སེམས་འཁྲུགས་པ་མ་ཡིན་དཔང་པོ་ལ། །སྤྱན་རས་གཟིགས་མགོན་བཞུགས་པའི་བྱིན་རླབས་ཀྱིས། །འགྲོ་དོན་འཁོར་བ་དོང་སྤྲུགས་ལ་གསོལ་བ་འདེབས། །ད་དུང་སེམས་ཅན་ཁམས་ནི་མ་རྫོགས་པར། །གཞན་དོན་འབྱུང་བ་བྱང་ཆུབ་སེམས་གཉིས་ཀྱི། །ཁྱད་ཆོས་བསླུ་བ་མེད་པ་ཡིན་པའི་ཕྱིར། །གདུལ་བྱར་མ་གྱུར་སེམས་ཅན་ཡོད་མིན་ཡང༌། །སློབ་མར་གྱུར་ནས་དམ་ཚིག་དག་པ་དང༌། །བཀའ་བཞིན་བསྒྲུབས་ནས་ཐུགས་ཡིད་འདྲེས་པ་རྣམས། །ཚེ་རབས་ཀུན་ཏུ་འབྲལ་མེད་རྟེན་འབྲེལ་འགྲིག །རྣམ་པར་རྒྱལ་བ་ཅན་དང་དབྱེར་མེད་ཤོག །ཅེས་པའང་ལས་ཅན་གྱི་སློབ་མ་མདོ་སྨད་པ་འཇིགས་མེད་ཕྲིན་ལས་འོད་ཟེར་གྱི་ནན་ཏན་ཆེན་པོའི་ངོ་མ་ཟློག་པར་ལེགས་བྱས་ཀྱི་ཕྱོགས་ནས་བསྙད་པའོ།། །།
གཅིག་ཆོག་ནོར་བུའི་ལུགས་ཀྱི་གསོལ་འདེབས།
གཅིག་ཆོག་ནོར་བུའི་ལུགས་ཀྱི་གསོལ་འདེབས་བཞུགས། །མཚན་ཉིད་ཀུན་ལྡན་བླ་མ་ནི། །དུས་གསུམ་སངས་རྒྱས་འདུས་པའི་དཔལ། །རང་སེམས་ཆོས་སྐུར་ངོ་སྤྲོད་པ། །གང་ལ་གསོལ་བ་སྙིང་ནས་འདེབས། །ས་ལམ་འབྲས་བུའི་ཡོན་ཏན་ཀུན། །བླ་མའི་བྱིན་རླབས་ཁོ་ན་ལས། །འབྱུང་བའི་མཚན་ཉིད་མ་རྟོགས་པར། །བསྐྱེད་རྫོགས་
བཟླས་བརྗོད་མྱུར་ལམ་དུ། །རེ་བའི་རྨོངས་པ་ལམ་ནོར་རྣམས། །བླ་མ་མི་རུ་མཐོང་བས་དྲེད། །འདི་དང་ཕྱི་མ་བར་དོ་རུ། །བསླུ་བ་མེད་པ་མོས་གུས་གནད། །དེ་ཕྱིར་བླ་མ་སངས་རྒྱས་སུ། །མཐོང་ནས་བྱིན་རླབས་འཇུག་པར་ཤོག །འཆི་བའི་དུས་ལ་བབ་ཀྱང་སླ། །སྲིད་པ་རུ་ལོག་གྱུར་ཀྱང་སླ། །སྤྱོད་པ་ཐང་ལྷོད་གྱུར་ཀྱང་སླ། །ཅི་མཛད་ལེགས་པར་མཐོང་བ་ཡི། །མོས་གུས་དཀར་པོ་གཅིག་ཐུབ་འདི། །ཐབས་ཀྱི་ནང་ནས་ཐབས་མཆོག་ཡིན། །རྟོགས་པ་མཆོག་ལྡན་གྱི་བླ་མ་དང༌། །ཐུགས་ཡིད་གཅིག་ཏུ་འདྲེས་པ་ལས། །ས་ལམ་ཡོན་ཏན་མཐར་ཕྱིན་ནས། །འཁོར་བ་དོང་ནས་སྤྲུག་པར་ཤོག །ཅེས་པའང་དཔལ་ལྡིངས་རྗེ་བཙུན་དྲུང་གི་གསུང་ངོར་གསང་སྔགས་ཀྱི་ཉེ་ལམ་དང་བསྟུན་ནས་རང་བྱུང་རྡོ་རྗེས་སོ།། །།རང་སེམས་བདེ་གཤེགས་སྙིང་པོ་ཡི། །ངོ་བོ་སྒྲིབ་བྲལ་དུ་སྟོན་མཛད་པའི། །གནས་ལུགས་རྫོགས་པ་ཆེན་པོའི་ཞལ། །རང་བྱུང་རྡོ་རྗེར་གསོལ་བ་འདེབས། །གཟུགས་སྐུའི་ཉིན་བྱེད་འཇིག་རྟེན་འདིའི། །སྒྲོན་མེ་གཅིག་པོ་ལོ་བརྒྱའི་བར། །འཚོ་ཞིང་གཞེས་ནས་བདག་སོགས་ཀུན། །འདི་ཕྱི་བར་དོ་ཐམས་ཅད་དུ། །འབྲལ་མེད་རྗེས་སུ་འཛིན་པར་ཤོག །ཅེས་པའང་དགེ་སློང་དཔལ་འབྱོར་གྱི་ངོར་རྫོགས་ཆེན་པ་རང་བྱུང་རྡོ་རྗེའམ་འཇིགས་མེད་གླིང་པས་སྨྲས་པའོ།། །།
རྒྱལ་བ་འོད་མཚན་སྟོང་འབར།
རྒྱལ་བ་འོད་མཚན་སྟོང་འབར་ནི། །སིན་དྷུའི་དྭངས་མཚོར་སྤྲུལ་པའི་སྐུ། །ཨོ་རྒྱན་སངས་རྒྱས་གཉིས་པ་དང༌། །དབྱེར་མེད་དྲིན་ཅན་བླ་མ་མཁྱེན། །དལ་བ་བརྒྱད་ཀྱི་རྟེན་ཐོབ་ཀྱང༌། །འབྱོར་པ་བཅུ་ཡིས་འདུ་འབྲལ་བྱས། །འཆི་བ་ནམ་ཡོང་མེད་བཞིན་དུ། །འདི་སྣང་ཞེན་པས་བཅིངས་ལ་གཟིགས། །ཆོས་བཞིན་བསྒྲུབ་པའི་རྒྱུ་ཚོགས་ཀྱང༌། །རྣམ་གཡེང་འདུ་འཛིའི་ཞགས་པས་བཅིངས། །ཆོས་བརྒྱད་ཆོས་སུ་སྒོམ་པ་བདག །དབེན་པའི་གནས་སུ་ཆོས་སྤྱོད་འཕེལ། །རྟག་ཏུ་ངེས་འབྱུང་གིས་བསྐུལ་ནས། །དལ་རྟེན་དོན་ཡོད་བྱེད་པར་ཤོག །བདག་ཉིད་འཆི་བར་གྱུར་པའི་ཚེ། །དགོན་གནས་ཉེ་འབྲེལ་ལྟ་ཅི་སྨོས། །གཅེས་པར་བཟུང་བའི་ལུས་འདི་ཡང༌། །དུར་ཁྲོད་འཇིགས་པར་འདོར་དགོས་ན། །ད་ལྟ་ཉིད་ནས་ཞེན་ཆགས་ཀྱི། །འཁྲི་བ་བཙན་ཐབས་ཆོད་གྱུར་ཏེ། །རི་ཁྲོད་ནགས་ཁྲོད་བས་མཐའ་རུ། །རང་སེམས་བཙན་ས་ཟིན་པར་ཤོག །སེམས་ཀྱི་གནས་ལུགས་རྟོགས་པ་ལ། །བླ་མའི་བྱིན་རླབས་ཞུགས་པ་དགོས། །རྟག་ཏུ་འགྲོ་ལ་སྙིང་རྗེ་དང༌། །མོས་གུས་རྒྱུན་ཆད་མེད་པར་ཤོག །ལམ་བདེན་རྒྱ་མཚོའི་སྙིང་པོ་ནི། །རྣམ་ཀུན་རྒྱུད་ལ་གོམས་བྱས་པས། །འགྲོ་འོང་རྟག་ཆད་ཡོད་མེད་ལས། །འདས་པའི་བདེན་པ་མཐོང་བར་
ཤོག །མདོར་ན་འདི་ཕྱི་བར་དོ་ཀུན། །སྐྱིད་སྡུག་ལེགས་ཉེས་ཅི་བྱུང་ཡང༌། །རེ་ས་བླ་མ་ལས་མེད་པས། །དོན་གཉིས་ལྷུན་གྱིས་གྲུབ་པར་ཤོག །རབ་བྱུང་དབུ་མཛད་བསམ་གཏན་པའི་ངོར། །རིག་འཛིན་འཇིགས་མེད་གླིང་པས་སོ།། །།
བདེ་གཤེགས་སྙིང་པོའི་ཆོས་ཉིད།
བདེ་གཤེགས་སྙིང་པོའི་ཆོས་ཉིད་ནི། རང་བཞིན་རྫོགས་པ་ཆེན་པོའི་ཞལ། །ཚོགས་བརྒྱད་གློ་བུར་དྲི་མའི་དངོས། །བསལ་མཛད་རིག་འཛིན་འཇིགས་མེད་གླིང༌། །དེ་ཕྱིར་སྙིང་གི་ཟེའུ་འབྲུ་རུ། །དྲན་པའི་ངོ་བོར་བླ་མ་ཞུགས། །ཉིན་མཚན་སྐད་ཅིག་ཐང་ཅིག་ཀྱང༌། །བརྗེད་པ་མེད་པར་གསོལ་བ་འདེབས། །བསྐལ་པ་རྒྱ་མཚོར་ཞབས་བརྟན་ཅིང༌། །མོས་གུས་གོམས་པའི་རྒྱུ་འབྲས་ཀྱིས། །འདི་ཕྱི་བར་དོ་ཐམས་ཅད་དུ། །བླ་མའི་སྣང་བ་མི་འབྲལ་བ། །བར་གཅོད་རྐྱེན་གྱིས་མི་བརྫི་ཞིང༌། །བློ་འདས་དྲན་པའི་ངོ་བོ་རུ། །ས་ལམ་ཡོན་ཏན་ཡོངས་རྫོགས་ནས། །ཐུགས་ཡིད་གཅིག་ཏུ་འདྲེས་པར་ཤོག །ཅེས་པའང་བསམ་གླིང་སློབ་དཔོན་དཔོན་སློབ་གསུམ་གྱི་ངོར་སྨྲས་པའོ།། །།
ཞབས་བརྟན།
རང་སེམས་ཆོས་སྐུར་ངོ་སྤྲོད་པའི། །དྲིན་ཆེན་གྱི་བླ་མ་འཇིགས་མེད་གླིང༌། །བསྟན་པ་རྒྱ་མཚོའི་རྩ་ལག་ཏུ། །ཞབས་པད་བརྟན་པར་གསོལ་བ་འདེབས། །འདི་ཕྱི་བར་དོ་ཐམས་ཅད་དུ། །བླ་མའི་ཐུགས་རྗེས་སྐྱོང་བ་དང༌། །སྡིག་
སྒྲིབ་ནད་གདོན་ཉེར་འཚེ་ཀུན། །ཞི་ནས་དབེན་པའི་རི་ངོགས་སུ། །ཆོས་བཞིན་སྤྱོད་པའི་རང་དབང་ནི། །མྱུར་དུ་ཐོབ་པར་བྱིན་གྱིས་རློབས། །ཞེས་པའང་རང་བྱུང་རྡོ་རྗེས་སོ།། །།
རིག་འཛིན་འཇིགས་མེད་གླིང་པའི་ཞབས་བརྟན།
རིག་འཛིན་འཇིགས་མེད་གླིང་པའི་ཞབས་བརྟན་བཞུགས། །གཞི་དབྱིངས་ནམ་མཁའི་རྡོ་རྗེ་ཀུན་ཏུ་བཟང༌། །གཞི་སྣང་ཡེ་ཤེས་སྙིང་པོ་དགའ་རབ་རྗེ། །རྣམ་འཕྲུལ་དུ་མར་ཤར་བའི་ངོ་བོ་ཉིད། །རིག་འཛིན་འཇིགས་མེད་གླིང་པའི་ཞབས་བརྟན་ཤོག །སྙིགས་ལས་ཆེར་སྙིགས་ལྟ་བའི་སྙིགས་མ་ཡིས། །བྱང་ཆུབ་སེམས་གཉིས་གཞན་ཕན་ཉམས་པའི་ཚེ། །བསྡུ་བ་བཞི་དང་རིགས་ལྔའི་དམ་ ཚིག་ལས། །རང་དོན་སེམས་པ་མེད་ཁྱོད་ཞབས་བརྟན་ཤོག །བདེན་པ་གཉིས་ཀྱི་བང་རིམ་ཐེག་དགུའི་རྩེ། །ཤིན་ཏུ་རྣལ་འབྱོར་འཆི་མེད་ཞི་བའི་གྲོང༌། །རང་ཉིད་ཞུགས་ནས་གཞན་དག་སྨིན་གྲོལ་ལ། །འགོད་མཛད་རང་བྱུང་རྡོ་རྗེ་ཞབས་བརྟན་ཤོག །ལུང་གི་དཀྱིལ་འཁོར་རྟོགས་པའི་འོད་ཟེར་གྱི། །ཉིན་མོར་བྱེད་པ་རྒྱལ་བའི་བསྟན་ཡིན་ན། །ཀུན་འབྱུང་སྡུག་བསྔལ་མུན་འཐོར་འཁྱམས་པ་རྣམས། །ངེས་དོན་ལམ་ལ་བཀྲི་ཁྱོད་ཞབས་བརྟན་ཤོག །བཅོམ་ལྡན་འོད་སྲུངས་དྲུང་དུ་ཐུགས་བསྐྱེད་ནས། །ཤཱཀྱ་ཐུབ་པའི་སྤྱན་སྔར་འདུལ་བ་འཛིན། །
གངས་རིའི་ཁྲོད་དུ་རྡོ་རྗེ་ཐེག་པའི་ལམ། །རྣམ་འཕྲུལ་དུ་མས་གསལ་ཁྱེད་ཞབས་བརྟན་ཤོག །དབང་བཅུའི་ཐོག་མ་དཔེ་བྱད་རིགས་ལྔའི་རྩེར། །མ་ཆགས་པདྨ་ཅན་གྱིས་དབུགས་དབྱུངས་པའི། །རྟེན་འབྲེལ་དུས་ལས་ཡོལ་མེད་འཚོ་གཞེས་ནས། །རྣམ་པ་རྒྱལ་བ་ཅན་དུ་འཚང་རྒྱ་བའི། །འདུས་པ་དང་པོའི་ལུང་བསྟན་ཐོབ་པར་ཤོག །ཅེས་པའང་གསང་སྔགས་ཐེག་མཆོག་གླིང་མཁན་རིན་པོ་ཆེས་དབུས་འདུས་ཚོགས་སྤྱི་ནས་དད་གུས་ཆེན་པོས་གསོལ་བ་བཏབ་པའི་ངོར་གནས་དེ་ཉིད་དུ་སྦྱར་བའོ།། །།
ཞབས་བརྟན་རྩ་གསུམ་ཀུན་འདུས
རྩ་གསུམ་ཀུན་འདུས་པདྨ་འབྱུང་གནས་དང༌། །བདེ་སྐྱོང་མཁའ་འགྲོའི་གསང་མཛོད་མཁར་ཆེན་བཟའ། །སྤྲུལ་པའི་རྗེ་འབངས་ཉེར་ལྔས་མཐུ་བྱིན་བསྐྱེད། །ཚེ་དབང་རིག་འཛིན་འཇའ་ལུས་དངོས་གྲུབ་སྩོལ། །ཐ་མལ་ལུས་ལ་ཡེ་ཤེས་སྙིང་པོ་ཅན། །ཀློང་ལྔ་མི་ཤིགས་དགོངས་པའི་གསང་མཛོད་བདག །པདྨས་རྗེས་བཟུང་སྦས་པའི་རྣལ་འབྱོར་པ། །མཁྱེན་བརྩེའི་འོད་ཟེར་བསྐལ་བརྒྱར་ཞབས་བརྟན་ཤོག །མཁའ་འགྲོའི་སུན་མ་ཡེ་ཤེས་དབྱིངས་སུ་བྱོལ། །བར་གཅོད་ཚེ་འཕྲང་ཀ་དག་ངང་དུ་བཟློག །རིག་པའི་རང་བཞིན་སྐྱེ་འཆི་བགྲེས་རྒུད་བྲལ། །གཞི་སྣང་ཡེ་ཤེས་ཆེན་པོར་རྟག་བརྟན་གསོལ། །རྨད་
བྱུང་དད་པའི་དྲི་བཞོན་གྱིས་དྲངས་པའི། །གསོལ་འདེབས་ཉི་ཟླའི་སྣང་བྱེད་བསྐུལ་བ་ལས། །གང་སྐུ་ལྷུན་པོའི་སྤོ་མཆོག་ཆེས་གསལ་ཞིང༌། །མི་ཤིགས་རྡོ་རྗེའི་ཁམས་སུ་བརྟན་པར་ཤོག །སོ་སྐྱེའི་སྤྱོད་ཡུལ་ལས་འདས་རྫོགས་པ་ཆེའི། །མངོན་སུམ་རིག་པའི་ཆོས་འཁོར་བསྐོར་ནས་ཀྱང༌། །ཡིད་དཔྱོད་བརྟག་དཔྱད་སྒོམ་ལ་མི་རེ་བར། །སྣང་བཞིའི་སྦུབས་ནས་འགྲོ་ཀུན་འདྲེན་པར་ཤོག །ཅེས་རིང་འཚོའི་ཐབས་ཚུལ་དོན་དུ་གཉེར་བའི་གྲོང་ཚིག་དུམ་བཅད་འདི་ནི་དད་ལྡན་འགས་ནན་ཏན་ཆེན་པོས་བསྐུལ་བའི་ངོར་དཔལ་གྱི་བསམ་ཡས་མཆིམས་ཕུར་རིག་པ་འཛིན་པ་མཁྱེན་བརྩེའི་ལྷ་རང་ཉིད་ཀྱིས་སོ།། །།
ཞབས་བརྟན་གཞོམ་བྲལ་རྡོ་རྗེའི་ངོ་བོ།
གཞོམ་བྲལ་རྡོ་རྗེའི་ངོ་བོ་རང་གི་སེམས། །སྐྱེ་འཆི་མིང་འདོགས་ཟད་པ་ཆོས་ཀྱི་དབྱིངས། །འཇའ་ལུས་འཕོ་འཇིག་བྲལ་བ་རྡོ་རྗེའི་སྐུ། །ཚེ་དབང་རིག་འཛིན་པདྨས་བྱིན་ཕོབ་ཅིག །བདེ་གཤེགས་སྙིང་པོའི་རང་བཞིན་བྱང་ཆུབ་སེམས། །གློ་བུར་སྒྲིབ་པས་ཀུན་ནས་དཀྲིས་བྱས་ཏེ། །སྲིད་མཚོར་བྱིང་བའི་འགྲོ་ཀུན་ཞི་བའི་གླིང༌། །འཁྲིད་མཛད་རིག་འཛིན་བླ་མ་ཞབས་བརྟན་ཤོག །མཁྱེན་གཉིས་ནོར་བུའི་གླིང་དུ་གནས་བཅས་ནས། །བརྩེ་ཆེན་ཞགས་པས་འགྲོ་ལ་དམ་འཁྱུད་པའི། །འོད་ཟེར་ཕ་མཐའ་མི་མངོན་འཕྲོ་བའི་ཞལ། །
ཉིན་མོའི་སྤུན་ཟླ་ཇི་བཞིན་རྟག་བརྟན་ཤོག །འགྲོ་ལ་ཕན་བདེའི་འབྱུང་གནས་རྒྱལ་བའི་བསྟན། །ལྔ་བརྒྱ་ཕྲག་བཅུའི་མུ་ཁྱུད་ལ་ཐུག་ཚེ། །ཐེག་པ་ཆེན་པོའི་སྡེ་སྣོད་གངས་རིའི་ཁྲོད། །འདྲེན་པའི་ཤིང་རྟ་ཆེན་པོ་ཞབས་བརྟན་ཤོག །ཁྱོད་ཐུགས་བྱམས་དང་སྙིང་རྗེའི་ནོར་བུའི་ཏོག །ཀུན་ལ་ཉེ་འཁོན་མེད་དུ་གསལ་ན་ཡང༌། །གང་འདུལ་ཕྲིན་ལས་འཇུག་པ་ཉི་འོག་གི །རྒྱལ་ཁམས་བསྟན་འགྲོའི་དཔྱིད་དུ་གསལ་བར་ཤོག །འཚོ་གཞེས་རྡོ་རྗེ་ལུས་ཀྱི་གཞལ་མེད་ཁང༌། །གདན་གསུམ་ཡོངས་རྫོགས་དམ་པ་རིགས་བརྒྱའི་ལྷ། །དེ་སྙེད་བགྲང་བྱ་ལས་ཀྱང་ཆེས་ལྷག་པའི། །དགའ་སྟོན་མངོན་སུམ་མཐོང་བའི་བཀྲ་ཤིས་ཤོག །འཇིག་ཚོགས་ལྟ་བའི་རི་དང་ཆོས་ཉིད་དོན། །རྟོག་དཔྱོད་ཡུལ་ལ་རྣམ་པར་རིག་པ་ཅན། །ཀུན་འབྱུང་དབུ་མར་འཁྲུལ་པའི་རྟག་ཆད་དགྲ། །དོན་དམ་རྫོགས་པ་ཆེན་པོར་ཞབས་བརྟན་གསོལ། །ཡོངས་གྲུབ་རང་བཞིན་ཤེས་པའི་མོས་གུས་ནི། །སྙིང་དབུས་དྲན་པ་ཉེར་གཞག་ལ་གོམས་པས། །ཕུང་པོ་ལྔ་དང་ཚོགས་བརྒྱད་ཉེར་ལེན་སེམས། །རྣམ་བྱང་མངོན་སུམ་རིག་པའི་དོན་རྟོགས་ཤོག །རྣམ་གྲངས་པའི་དོན་དམ་དང༌། དེ་ལས་འགལ་བའི་ཤླཽ་ཀ་གཉིས་བསྣན་ཏེ། རིག་འཛིན་འཇིགས་མེད་གླིང་པས་སྡེ་སྣོད་མཁྱེན་པའི་
དབང་པོ་མཚོ་སྣ་སྤྲུལ་སྐུ་རིན་པོ་ཆེའི་ཐུགས་རྒྱུད་དོན་གྱི་དབུ་མ་ཆེན་པོ་ལ་སྦྱར་བའི་ཚེ་དཔལ་ལྡན་པདྨ་འོད་གླིང་དུ་སྦྱར་བའོ།། །།
རཏྣ་ཤྲཱིའི་ཞབས་བརྟན།
རྒྱལ་བའི་བསྟན་ལ་སྟོན་པ་གཉིས་པ་བཞིན། །འཛམ་གླིང་མཛེས་པའི་རྒྱན་གྱི་དམ་པ་མཆོག །དཔལ་ལྡན་ནཱ་གཱ་རྫུ་ན་གངས་རིའི་ལྗོངས། །སླར་བྱོན་རཏྣ་ཤྲཱི་རྒྱལ་གྱུར་ཅིག །གང་གི་ཆོས་སྲིད་གདུགས་དཀར་ས་བླའི་དབྱིངས། །འདེགས་པའི་ཐུགས་བསྐྱེད་དམ་བཅའ་མི་ལྷོད་པ། །སྤྲུལ་པའི་སྐུ་མཆོག་ཡབ་སྲས་རྣམ་པ་ཟུང༌། །གཞོམ་མེད་རྡོ་རྗེའི་ཁྲི་ལ་རྟག་བརྟན་གསོལ། །མཐུན་པའི་ཡུལ་དང་དམ་པའི་མཛའ་བཤེས་གཉེན། །ལེགས་པར་སྨོན་དང་བསོད་ནམས་དམ་པའི་བྱིན། །འཁོར་ལོ་ཆེན་པོ་བཞི་ཡི་ཤིང་རྟའི་སྟེགས། །རྣམ་འདྲེན་ཡབ་སྲས་བསྐལ་བརྒྱར་ཞབས་བརྟན་ཤོག །འཇིག་རྟེན་མགོན་པོའི་བསྟན་སྲིད་འཛིན་པ་ལ། །པདྨ་དཀར་པོའི་གེ་སར་བཞད་པ་ཡི། །རྒྱལ་མཚན་འཇིགས་མེད་ཕྲིན་ལས་རྣམ་རྒྱལ་སྡེ། །བསྐལ་པ་རྒྱ་མཚོའི་བར་དུ་ཞབས་བརྟན་ཤོག །མཁྱེན་རབ་ནམ་མཁའི་རྡོ་རྗེ་འཇམ་པའི་དབྱངས། །ཆོས་ཀྱི་རྒྱལ་མཚན་ཕྲིན་ལས་རྣམ་པར་རྒྱལ། །རིག་འཛིན་བཞི་ཡི་མཐུ་སྟོབས་གྲུབ་པའི་སྡེས། །རྒྱལ་བསྟན་ཉིན་མོར་བྱེད་པའི་འོད་ཟེར་བརྒྱར། །འབར་བཞིན་བསྐལ་པ་རྒྱ་མཚོར་འཚོ་གཞེས་ཤོག །རང་བཞིན་བསམ་མི་ཁྱབ་པ་ཆོས་ཀྱི་དབྱིངས། །
དཀོན་མཆོག་གསུམ་གྱི་བདེན་པའི་བྱིན་རླབས་དང༌། །སྨོན་པ་འགྲུབ་པའི་དྲང་སྲོང་བདེན་མཐུ་ཡི། །རྗེས་སུ་ཕྱོགས་པའི་བཀྲ་ཤིས་དགའ་སྟོན་སྩོལ། །ཞེས་པའང་བླ་དཔོན་གྱིས་ཞབས་འདེགས་ལ་ལེགས་སྨོན་གྲུབ་པ་མགྲོན་གཉེར་དཀོན་མཆོག་བློ་ལྡན་གྱིས་བསྐུལ་ངོར། རིག་འཛིན་འཇིགས་མེད་གླིང་པས་སོ།། །།
རྒྱལ་སྲས་ཉིན་བྱེད་འོད་ཟེར་གྱི་ཞབས་བརྟན། །
རྒྱལ་སྲས་ཉིན་བྱེད་འོད་ཟེར་གྱི་ཞབས་བརྟན། །རྒྱལ་བའི་རྣམ་སྤྲུལ་སྐྱེ་མེད་ཀློང་པས་ཤར། །དམ་པའི་དེ་ཉིད་ཆོས་ཀྱི་བརྒྱུད་འཛིན་པ། །རྒྱལ་སྲས་ཉིན་བྱེད་འོད་ཟེར་སྤྲུལ་པའི་སྐུ། །བསྐལ་བརྒྱར་འཚོ་གཞེས་བསྟན་པ་དར་གྱུར་ཅིག །ཅེས་པའང་སློབ་བུ་འཇིགས་མེད་བློ་གསལ་འོད་ཟེར་གྱི་ངོར་མཚན་ཐོག་མར་གསོལ་བ་དང་ཆབ་གཅིག་རང་བྱུང་རྡོ་རྗེས་སོ།། །།
མདོ་ཁམས་རྫོགས་ཆེན་པའི་སྐྱེ་ཕྲེང་གསོལ་འདེབས།
མདོ་ཁམས་རྫོགས་ཆེན་པའི་སྐྱེ་ཕྲེང་གསོལ་འདེབས་བཞུགས། །དུས་གསུམ་སྐྱེ་འགག་མེད་པའི་ཆོས་ཉིད་ཀྱང༌། །སེམས་ཅན་ཁམས་ལ་གཟུགས་སྐུ་རྣམ་གཉིས་སུ། །སྣང་བའི་ངོ་མཚར་བདེ་གཤེགས་གཙུག་ཏོར་ཅན། །མཚན་གྱིས་ངན་སོང་གྲོལ་ལ་གསོལ་བ་འདེབས། །རྒྱུད་སྡེ་རྒྱ་མཚོའི་མངའ་བདག་ཀུ་ཀུ་རི། །འཕོ་ཆེན་རྡོ་རྗེའི་ས་བརྙེས་བི་མ་ལ། །སྤྲོས་བྲལ་ཕྱག་རྒྱ་ཆེན་པོ་ས་ར་ཧ། །བསྟན་པའི་ཆུ་འགོ་གསུམ་ལ་གསོལ་བ་འདེབས། །ལྷ་སྲིན་
བྲན་ཁོལ་རླངས་པ་ཤྲི་སིང༌། །འཁྲུལ་སྣང་བྲག་རི་བསྙིལ་བ་དཀོན་མཆོག་འབྱུང༌། །རྒྱལ་བསྟན་ཉིན་མོར་བྱེད་པ་ཁྲི་རལ་ཞབས། །བསྟན་པའི་རྩ་ལག་གསུམ་ལ་གསོལ་བ་འདེབས། །གཏི་མུག་ལམ་སློང་གྲུབ་མཆོག་ཕག་ཚོང་བ། །མི་ལ་བཞད་པའི་སྲས་གྱུར་བྱང་ཆུབ་རྒྱལ། །དྲུག་པ་སེང་གེའི་སྒྱུ་འཕྲུལ་དུས་གསུམ་མཁྱེན། །གྲུབ་པ་མཆོག་བརྙེས་གསུམ་ལ་གསོལ་བ་འདེབས། །རྟོགས་པས་བདག་རྒྱུད་གྲོལ་བར་གླིང་རས་རྗེ། །བླ་མར་མོས་གུས་མཐར་ཕྱིན་སྟག་ལུང་བ། །བརྟུལ་ཞུགས་གྲུབ་པ་ཨོ་རྒྱན་རང་བྱུང་བ། །སྒྲུབ་བརྒྱུད་བསྟན་འཛིན་གསུམ་ལ་གསོལ་བ་འདེབས། །གཞི་གསུམ་རྩ་བ་བརྟན་པ་བློ་གྲོས་བཟང༌། །རྙིང་བསྟན་མདོ་སྨད་སྤེལ་ལ་སྨོན་ལམ་གྱི། །མཐུ་གྲུབ་པདྨའི་རིག་པ་འཛིན་པ་དང༌། །འགྱུར་མེད་ཐེག་མཆོག་ཅེས་ལ་གསོལ་བ་འདེབས། །སྔ་འགྱུར་བསྟན་པའི་རྩ་བ་མདོ་སྒྱུ་སེམས། །ཡང་ཕུར་སངས་རྒྱས་མཉམ་པར་སྦྱོར་ལ་སོགས། །བཀའ་མའི་སྒྲུབ་ཆེན་ཕྲིན་ལས་སྲོལ་བཏོད་པའི། །ངེས་དོན་བསྟན་འཛིན་བཟང་པོར་གསོལ་བ་འདེབས། །ངེས་འབྱུང་རྒྱུད་བརླན་བྱང་ཆུབ་སེམས་གཉིས་ཀྱི། །ཤིང་རྟས་དྲངས་པའི་སྨིན་གྲོལ་ལམ་མཆོག་ལ། །རྟག་ཏུ་བསྟེན་གོམས་བགྱིས་པའི་དངོས་གྲུབ་ཀུན། །ཚེ་འདི་ཉིད་ལ་མཐོང་བར་བྱིན་གྱི་
རློབས། །ཞེས་པའང་དགེ་རྩེ་བླ་མ་འཇིགས་མེད་ངོ་མཚར་གྱི་ངོར་རིག་པ་འཛིན་པ་མཁྱེན་བརྩེའི་ལྷས་སོ།། །།
ཇ་མཆོད་ནི།
ཇ་མཆོད་ནི། སངས་རྒྱས་མཉམ་སྦྱོར་ཚོགས་ཆེན་འདུས་པའི་སྡེ། །སྒྱུ་འཕྲུལ་ཞི་ཁྲོ་ཧེ་རུ་ཀ་གལ་པོ། །ཟླ་གསང་ཐིག་ལེ་རྟ་མཆོག་རོལ་པ་དང༌། །རྡོ་རྗེ་ཕུར་པའི་དཀྱིལ་འཁོར་རྒྱ་མཚོ་ལ། །མཆོད་པ་འབུལ་ལོ་མཆོག་ཐུན་དངོས་གྲུབ་སྩོལ། །མཆོག་གསུམ་ངོ་བོ་དཔལ་མགོན་བླ་མ་དང༌། །རྒྱུད་སྡེ་རྒྱ་མཚོ་གནས་སྲུང་མཁའ་འགྲོ་ལྷ། །མ་མགོན་གཟའ་རྡོར་ཚེ་རིང་མཆེད་ལྔ་ལ། །མཆོད་གསོལ་བསྟོད་དོ་བསམ་དོན་ལྷུན་གྲུབ་མཛོད།། །།