འཁོར་ལོ་འབར་བའི་དམིགས་རིམ་གྱི་དོགས་པ་ཀུན་གསལ་མེ་ལོང་།
འཁོར་ལོ་འབར་བའི་དམིགས་རིམ་གྱི་དོགས་པ་ཀུན་གསལ་མེ་ལོང་ཞེས་བྱ་བ་བཞུགས། །
ཐམས་ཅད་མཁྱེན་པ་ལ་ཕྱག་འཚལ་ལོ། །འཁོར་ལོ་འབར་བའི་དམིགས་གནད་སྐོར་ལ་དྲི་བ་ཕེབས་པ། ངེད་རི་སུལ་གྱི་རྫོགས་ཆེན་པ་རྒན་པོ་བྱིས་པའི་སྣང་ཤེས་ཅན་སྲུང་བཟློག་བསད་པའི་ཕྲིན་ལས་ལ་བསྙེམས་པ་བཏང་བས་རྗེས་ལ་ཐོབ་པའི་ཡེ་ཤེས་ལ་རྟོག་པའི་དྲྭ་བ་འཐག་པར་རྔོ་མ་ཐོགས་ཀྱང༌། དྲག་པོ་སྟོབས་ཀྱི་འཁོར་ལོས་སྒྱུར་བ་དཔལ་བཀྲ་ཤིས་སྟོབས་རྒྱལ་དབང་པོའི་སྡེ་སྙིང་དབུས་དྭངས་མའི་ཐིག་ལེར་སྤྱན་དྲངས་ནས་རྟོག་དཔྱོད་ཀྱི་འདུ་ཤེས་ལ་ཞུགས་པ་ན་འདི་སྐད་ ཐོས་སོ། །སྤྱིར་འོད་གསལ་སྤྲོས་བྲལ་ཆེན་པོའི་ངང་ནས་སྣོད་བཅུད་ཀྱི་འཛིན་ཞེན་སྦྱོང་བའི་གསལ་སྣང་འཕྲོ་འདུའི་བྱེད་པོས་རྟེན་དང་བརྟེན་པའི་ཆོ་འཕྲུལ་བཀོད་པའི་གནས་ཚུལ་ལ་རང་བྱན་ཆུད་པ་གཞིར་བཞག་ནས། སྒོམ་
དོན་དངོས་ཀྱི་དོགས་སེལ་ལ། འོག་གཞི་སྣ་ཚོགས་རྡོ་རྗེ་དབང་ཆེན་གྱི་གཞི་དང་རྒྱ་ཁྱོན་མཉམ་པའི་བར་མཚམས་སུ་གྱུར་པ་ཐམས་ཅད་རྡུལ་ཕྲ་རབ་ཀྱི་རྡོ་རྗེ་ཆུང་ངུས་གཏམས་པའི་མཐའ་སྐོར་ནས་གྱེན་དུ་རིམ་གྱིས་ཟླུམ་པའི་རྡོ་རྗེའི་གུར་ཁང་ཕྱི་དབྱིབས་ལྕགས་རྨོག་ཁ་སྦུབ་པ་ལྟ་བུའི་སྤྱི་བོར་ཡང་རྡོ་རྗེ་རྒྱ་གྲམ་གྱི་ལྟེ་བ་ཡོད་པ་ལ། དོན་རྡོ་རྗེ་རྒྱ་གྲམ་གྱི་དྲྭ་བར་སྦྲེལ་བའི་བར་སེང་ཐམས་ཅད་རྡོ་རྗེ་ཆུང་ངུས་ཞ་ལའི་མིག་ཚག་བཀབ་པ་ལྟར་ཤིན་ཏུ་འཐས་པར་གྱུར་པའི་མཐུས། བསིར་བུའི་རླུང་ཡང་རྒྱུ་བའི་གོ་སྐབས་གཅོད་པའི་སྲུང་འཁོར་གྱི་ནང་རྡོ་རྗེ་རྐྱང་བའི་དྲྭ་ཕྱེད་བླ་བྲེ་ལ་སོགས་དང༌། ཕྱི་ཡི་རྩེ་མོར། རྡོ་རྗེ་རཱ་གདེངས་ཕྱེད་པའི་ཏོག་གིས་མཚན་པ། ཀུན་ནས་ཀུན་ཏུ་ཡེ་ཤེས་ལྔ་ཡི་མེ་དཔུང་ཤིན་ཏུ་འབར་ཞིང་འཁྲུག་པ། དེ་ནས་རྩིབས་ལོགས་རྩ་རྩེ་
ལ་སོགས་པའི་རྣམ་གཞག་ནི། སྤྱིར་རྩིབས་ལ་གདན་ཐབས། སྤུ་གྲི་མཚོན་འཁོར། སྲུང་འཁོར་སྦུབས་སྟོངས་སོགས་འདོད་ལུགས་ཐ་དད་པ་ཡོད་ཀྱང་སྒྲ་ཇི་བཞིན་པའི་གོ་བ་ལྷོངས་པ་གལ་ཆེར་མ་མཐོང་ལ། སྤྱིར་བཏང་གསར་རྙིང་མཐུན་པར་བརྟེན་པ་གཞལ་ཡས་ཁང་གི་བསྲུང་བྱ་འཁོར་ལོའི་རྩིབས་ནི་སྦུབས་སྟོང་ཁོ་ན་ཡིན་ཏེ། ཚར་པ་ཆོས་རྗེས། ཀྱེ་རྡོ་རྗེའི་ལམ་འབྲས་སུའང་གསལ་བར་བཀོད་སྣང་ངོ༌། །འགག་དོན་ད་ལམ་སྐབས་འདིའི་ཁྱད་པར་གྱི་ཆོས་ལ།དཔེས་མཚོན་པར་བྱེད་ན། སིལ་སྙན་ཁ་སྦྱར་བའི་ལོ་མ་ལ་རྩིབས་ཀྱི་དབལ་ཁ་བཏོན་པ་ལྟ་བུའི་ནང་ཁོངས་སེང་ཅན་ཕྱོགས་འཁོར་བཅུ་གསུམ་དང༌། དེ་ལས་སྟེང་འོག་གམ་རྩ་རྩེའི་རྩིབས་གཉིས་པོ་སིལ་སྙན་གྱི་ཐོད་པ་ཡས་མས་གཉིས་མདུང་སོ་ལྟ་བུའི་ཁོངས་སེང་ཅན་གྱིས་དཔེས་མཚོན་པར་བྱས་པའི་རིག་པས་འོག་རྩིབས་སམ་རྩ་བ་འོག་གཞིའི་རྡོ་རྗེ་རྒྱ་གྲམ་གྱི་ལྟེ་བར་མ་ཎི་ཁྲི་སྐོར་གྱི་རྟིང་ལྕགས་ལྟར་ཟུག་པ། རྩེ་མོའི་སྟེང་རྩིབས་རྭ་གུར་ཡང་ཐོག་གི་རྒྱ་གྲམ་དབུས་མའི་ལྟེ་བར་ཟུག་པ། ཆུ་འཁོར་ལྟ་བུའི་འཕྲུལ་དང་ལྡན་པ་ལ། སྐེད་ལ་ཕྱོགས་སུ་འཁོར་བའི་རྩིབས་བཅུ་གསུམ་པོ་ཁུག་མ་གྲུ་བཞིའི་ཟུར་ནང་དུ་སློག་པ་ལྟར་རྩིབས་ཀྱི་དབལ་ཁ་ནང་དུ་ལོག་ཅིང༌། རང་རང་གི་སྦུབས་རྣམས་ཕྱི་ལ་ཧུ་རེ་མངོན་པ་ནི། རྩིབས་ལོགས་རྩ་རྩེ་རྒྱ་གྲམ་ལྟེ་བར་ཟུག །ཅེས་པའི་དོན་ཡིན་ནོ། །དེང་སང་འཁོར་ལོ་འབར་བ་རླུང་འུར་བ་ལྟར་
འདོན་པ་རྣམས་ལ་དམིགས་པའི་དོགས་པ་ཙམ་ཡང་མི་འདུག་ཅིང༌། རྟོག་དཔྱོད་དང་ལྡན་པ་འགའ་ཙམ་གྱིས་རྩིབས་ལོགས་འདིའི་བར་ཉག་རྒྱ་གྲམ་ལ་བརྟེན་པར་འདོད་པའི་ཡིག་ཆ་བཀོད་པ་ནི་ཕྱོགས་མ་རྙེད་པར་སྣང་ངོ༌། །དེ་ནས་ནང་རྩིབས་ནི། དེ་ནང་བཅུ་གསུམ་རྩིབས་རྩེ་ཕྱིར་བསྟན་པ། །ཞེས་པ་ལས་སྟེང་འོག་གི་རྣམ་གཞག་མ་བྱུང་བས་སྤུ་གྲི་མཚོན་འཁོར་ཏེ། ཨོ་རྒྱན་ཆེན་པོས། ལྟེ་བ་སྟོང་པ་ཆོས་ཀྱི་དབྱིངས། །རྩེ་མོ་རྣོ་དབལ་དུག་གསུམ་གཅོད། །ཅེས་གསུངས་པ་ལྟར། རྩིབ་ལོགས་སྦུབས་སྟོང་ཅན་དེའི་ནང་ལོགས་སུ་གསེར་གྱི་ཙཀྲ་རྩིབས་བཅུ་གསུམ་པ་རྩེ་མོ་ཕྱིར་བསྟན་ཕྱི་ནང་གི་རྩིབས་གཉིས་རེག་ལ་མ་འབྱར་བར་སྣང་པ་རྟོགས་མེད་དུ་གནས་པའི་དབལ་རྩེར་མཚོན་ཆའི་རང་བཞིན་རྩུབ་ཅིང་ངར་བའི་ཁོངས་སེང་དུ་ཙཀྲ་བཅུ་གསུམ་གྱི་ཡི་གེ་འཕྲེང་སྟབས་སུ་ཧྲམ་མེ་འཁོད་ཅིང་རང་སྒྲ་འབྲུག་སྟོང་ལྟར་འུར་བ། ནང་དབྱིངས་བདེ་སྟོང་གི་རང་བཞིན་འོད་དུ་གསལ་ལ་ཀློང་ཡངས་ཤིང་རྒྱ་ཆེ་བ་ཆོས་ཀྱི་དབྱིངས་དང་མཉམ་པའི་དབུས་སུ་བྷྲཱུྃ་ཡིག་ཡོངས་སུ་གྱུར་པ་ལས་ངོ་བོ་གཞལ་ཡས་ཁང་ལ་རྣམ་པ་བྱང་ཆུབ་ཕྱོགས་ཀྱི་ཆོས་སོ་བདུན་མཚོན་པའི་བྱང་ཆེན་མཆོད་རྟེན་གསེར་སྦྱངས་ལས་གྲུབ་པའི་བུམ་པའི་ནང་ཁོངས་སུ་མངལ་སྐྱེས་སྦྱོང་བའི་བསྐྱེད་རིམ་དང་རྗེས་མཐུན་པར་རང་ཉིད་ཤཱཀྱའི་རྒྱལ་པོར་གསལ་བའི་ལྷུང་བཟེད་ནང་དུ་བསྲུང་བྱ། སྐུའི་གཡས་གཡོན་དུ་ཤཱ་རིའི་
བུ་དང་མཽངྒལ་གྱི་བུ་ལ་སོགས་དགྲ་བཅོམ་པ་ལྔ་སྟོང༌། སྐྱེ་དགུའི་བདག་མོ་ལ་སོགས་པ་དགེ་སློང་མ་ལྔ་བརྒྱ་ཙམ། ཁྱིམ་བདག་མགོན་མེད་ཟས་སྦྱིན་དང་དགེ་བསྙེན་མ་ས་ག་སོགས་དགེ་བསྙེན་དང་དགེ་བསྙེན་མའི་ཚོགས་དང༌། ལྷ་དང་ཀླུ་དང་ལྷ་མ་ཡིན་དང་དྲི་ཟ་ལ་སོགས་པ་རབ་ཏུ་མང་པོ་སྟེ་ཐུན་མོང་གི་འཁོར་རྣམ་པ་བཞི། ཐུན་མོང་མ་ཡིན་བའི་འཁོར་ས་ཐོབ་པའི་བྱང་ཆུབ་སེམས་དཔའ་བཟང་སྐྱོང་དང༌། རིན་ཆེན་འབྱུང་ལྡན་དང་། དྲྭ་བ་སྦྱིན་ལ་སོགས་པས་བསྐོར་ཞིང༌། མཆོད་རྟེན་གྱི་རྩེ་མོར་རྒྱ་གར་གྱི་རིག་འཛིན་བརྒྱད་སོགས་གཙོ་མཆོག་རྡོ་རྗེ་ཆོས་ལ་བསྐོར་ཏེ་དམོད་པ་ལས་ཀྱི་ཆོས་དང་ལྡན་པར་བཞུགས་པ་ལས། གཙོ་བོའི་ཐུགས་ཀ་ནས་ལག་ན་རྡོ་རྗེ་ལ་སོགས་པའི་ཕོ་ཉ་སྤྲོས་པས། རྩིབས་དབར་ལ་སྲི་རྐང་བཅུ་གསུམ་གཙོ་བོར་གྱུར་པའི་གནོད་བྱེད་འབྱུང་པོའི་གཟུགས་བརྙན་བསྒོམས་པ་ལ་རྣམ་ཤེས་དགུག་བསྟིམ་མཐར། ཕྱི་རྩིབས་གཡོན་དང༌། ནང་རྩིབས་གཡས་སུ་འཁོར་བའི་སྤུ་གྲི་སོ་འཐབས་ཀྱི་བར་དུ་རྗེས་མེད་ཐར་ཐར་རྡུལ་དུ་བརླག་ཅིང༌། སྔགས་ཕྲེང་ལས་བྱུང་བའི་མེ་ལྕེས་གཞོབ་ཏུ་བསྲེགས་པས་བག་ཆགས་ཀྱིས་བསྐྱེད་པའི་རྣམ་རྟོག་གི་རང་གཟུགས་བཏགས་པ་མིང་གི་དགྲ་འདྲེ་འོད་གསལ་སྟོང་ཆེན་ཀ་དག་གི་ཀློང་དུ་དག་པར་བསྒོམ་ལ་སྔགས་བཟླ་ཞིང༌། མཐར་བདེན་བརྗོད་ཐལ་བརྡེབ་ཀྱི་དམིགས་པ་ནི་གོ་སླའོ། །མང་པོར་དྲིས་པས་བཤད་རྒྱུ་གདོད་ནས་དག །དཔེ་ལ་བལྟས་པས་ཐེ་ཚོམ་མང་དུ་
སོང༌། །སྣང་བ་དཔེ་ཆར་ཤར་བའི་རྟེན་འབྲེལ་ལས། །ཟབ་མོའི་མན་ངག་མ་སྦས་ལྷུག་པར་བཀྲོལ། །ཀུན་དང་འདྲ་ན་ཁྱད་ཆོས་གང་ལ་ཟེར། །ཀུན་དང་འགལ་ན་མི་བདེན་བརྫུན་པའི་ཆོས། །དེ་ཕྱིར་རྡོ་རྗེའི་ཚིག་གི་རྒྱ་མདུད་དེ། །ཀློང་ཆེན་ནམ་མཁའི་རྣལ་འབྱོར་དེས་བཀྲོལ་ལོ། །ཙཀྲ་བཅུ་གསུམ་མ་གྲངས་གསོག་ལྟ་བུའི་ཚེ། སྐབས་ཅི་རིགས་པར་བདེན་བརྗོད་དང་ཐལ་བརྡེབ་བྱ། དུས་མ་ཡིན་པར་ཇ་སོགས་ཀྱིས་འཕྲོ་གཞག་ན། སྔགས་འདི་བཟླས་པ་ཙམ་གྱིས་སོགས་ནས་མངོན་པར་བསྟོད་དོ། །ཞེས་ཆེ་བ་བསྐྱེད་ནས་མཚམས་བཅད་ན་མངོན་སྤྱོད་ཀྱི་གོ་དོན་ལྷོངས་པར་འགྲོ་བ་ཡིན།། །།