མ་སངས་ཀྱི་གསོལ་ཀ་ཉུང་བསྡུས།

མ་སངས་ཀྱི་གསོལ་ཀ་ཉུང་བསྡུས་བཞུགས། ཀློང་ལྔ་མི་ཤིགས་འོད་གསལ་རྡོ་རྗེའི་ཁམས། །སྣང་ཆའི་རང་གཟུགས་དྲེགས་པར་ཤར་བའི་དཔྱིད། །ཀུན་རྟོགས་སྲིད་པའི་ལྷ་རབས་མ་སངས་མཆེད། །ཡུམ་སྲས་བློན་འཁོར་བཅས་པ་ད་ཚུར་སྦྱོན། །ཀུན་བརྟགས་སྒྱུ་འཕྲུལ་རོལ་པའི་ཁང་མཛེས་འདིར། །དངོས་བཤམས་ཡིད་སྤྲུལ་འདོད་ཡོན་མཆོད་པའི་སྤྲིན། །ནམ་མཁའ་མཛོད་ཀྱི་འཁོར་ལོར་འཆར་བའི་རྫས། །དགྱེས་དགུར་རོལ་ལ་འགལ་འཁྲུལ་དབྱིངས་སུ་བསྐང༌། །ལྷང་ལྷང་གདུང་ཤུགས་དྲག་པའི་བརྡས་བསྐུལ་ཏེ། །ཡང་ཡང་ཐུགས་དམ་གཉེན་པོ་སྐོང་བྱེད་ན། །འཛུམ་འཛུམ་ཞལ་གྱིས་མི་ནོར་ཕྱུགས་གསུམ་སྐྱོངས། །བཟང་བཟང་རྣམ་བཞིའི་ཕྲིན་ལས་ཐོགས་མེད་སྒྲུབས། །ཞེས་པའང་རང་བྱུང་རྡོ་རྗེས་སོ།། །།