ཀློང་ཆེན་སྙིང་གི་ཐིག་ལེ་ལསཿ ཡུམ་ཀ་མཁའ་འགྲོའི་ནང་སྒྲུབ་བདེ་ཆེན་སྙིང་པོའི་གཏེར་བུམ།
༃ ཀློང་ཆེན་སྙིང་གི་ཐིག་ལེ་ལསཿ ཡུམ་ཀ་མཁའ་འགྲོའི་ནང་སྒྲུབ་བདེ་ཆེན་སྙིང་པོའི་གཏེར་བུམ་བཞུགསཿ
བདག་ཉིད་ཆེན་པོ་པདྨ་ནིཿ དབྱིངས་ཀྱི་ཡུམ་ལ་དབང་བསྒྱུར་བསཿ མཁའ་འགྲོ་ཡོངས་ཀྱི་མིང་པོ་ཡིནཿ ཆུ་སྐྱེས་ཞལ་གྱི་གེ་སར་ལསཿ བྱུང་བའི་ལྷ་མོ་མྱུར་དཔའ་སྒྲོལཿ གངས་རིའི་ཁྲོད་ན་མི་མོའི་ཚུལཿ ཕྱི་ལྟར་དབྱངས་ཅན་མཚོ་རྒྱལ་མཿ ནང་ལྟར་རྗེ་བཙུན་སྒྲོལ་མ་དངོསཿ གསང་བ་རྡོ་རྗེ་ཕག་མོ་ཡིནཿ བསྙེན་པ་དབྱིངས་ཀྱི་ཡུམ་ལ་བྱཿདོན་གྱི་ཕག་མོས་ཞལ་མཐོང་འགྱུརཿ ཕྲིན་ལས་ཐུགས་རྗེས་རྩལ་ཤུགས་ནིཿ བྱེ་བ་ཕྲག་བརྒྱའི་སངས་རྒྱས་དངཿ སེམས་དཔའ་མཆོག་རྣམས་བསྙེན་བཀུར་ཞིངཿ འགྲོ་སྒྲོལ་ཐུགས་བསྐྱེད་དམ་བཅའ་ལཿ དཔལ་ཞིང་ཐུགས་རྗེ་མྱུར་བས་ནཿ བཅོམ་ལྡན་སྣང་བ་མཐའ་ཡས་དངཿ བསྐལ་བཟང་སངས་རྒྱས་སྟོང་རྩ་ཡིསཿ བསྟོད་བསྔགས་རྒྱལ་སྲས་རྣམས་ཀྱིས་བསྟེནཿ ས་དང་ཕ་རོལ་ཕྱིན་པ་ལཿ དབང་བསྒྱུར་སྒྲོལ་མ་རྣལ་འབྱོར་
མའིཿ རྣམ་པར་སྒྲུབ་པས་བྱིན་རླབས་འགྱུརཿ ས་མ་ཡཿདེ་ལ་ལུས་ཚོགས་ཉེར་གཅིག་གིཿ དང་པོ་ཚད་མེད་བཞི་བསྒོམས་ནསཿ གཞན་ཕན་རྟེན་འབྲེལ་བསྒྲིགས་པ་གཅེསཿ སྙན་གྲགས་རྩ་བ་བྱང་ཆུབ་སེམསཿ རང་སྣང་འགྱུར་ཚེ་གཞན་སྣང་འགྱུརཿ རྩ་བའི་སྒྲུབ་པས་ཁོག་ཕུབས་ལཿ ཡེ་ཤེས་སེམས་དཔའ་གནས་བསྒྱུར་ནིཿ མཁའ་འགྲོའི་ཐུགས་ཀར་པད་ཟླའི་སྟེངཿ མྱུར་མ་དཔའ་བའི་རྗེ་བཙུན་མཿ དམར་མོ་ཁྲོ་འཛུམ་ཆགས་པའི་ཉམསཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ གཡས་འཁྱིལ་དུང་མཚན་ཨུཏྤལ་འཛིནཿ གློག་ལྟར་མྱུར་བའི་སྤྱན་གཡོས་པསཿ ལྷ་དང་བཅས་པའི་འཇིག་
རྟེན་ནཿ བདག་གི་སྙན་གྲགས་གསལ་བར་བསམཿ ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་བོ་དྷི་ཙིཏྟཱ་སྭཱ་ཧཱཿཐུགས་ཀར་ཟླ་གདན་ལ་ཏཱཾ་ཡིག་བཀོད་པའི་མཐའ་བསྐོར་སྔགས་ཕྲེང་ལས་མཐུན་གྱི་འོད་ཟེར་འཕྲོ་བར་བསམ་མོཿ མཆན། ཐུན་མཚམས་མཆོད་ཅིང་ཡིག་བརྒྱས་བཤགསཿ མྱུར་མ་དཔའ་མོ་བརྒྱ་ཚར་བརྗོདཿ སྨོན་སེམས་བསྐྱེད་ཅིང་དགེ་བ་བསྔོཿཀུན་ལ་ཐུན་མཐར་ཚོགས་འཁོར་བསྐོརཿ ལས་མཐའ་མེ་མཆོད་ཉིད་ལ་གཏདཿ རྣོ་ལ་ངར་གྱི་གདགས་པ་བཞིནཿ ས་མ་ཡཿ༈གཉིས་པ་བློ་དང་ཤེས་རབ་སྒྲུབཿ མཁའ་འགྲོའི་ཐུགས་ཀར་པད་ཟླའི་སྟེངཿ དབྱངས་ཅན་མ་ནི་སྟོན་ཟླའི་ཞལཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ མེ་ལོང་ཧྲཱིཾཿམཚན་ཨུཏྤལ་འཛིནཿ འོད་ཟེར་འཕྲོས་པས་རྒྱལ་རྣམས་ཀྱིཿམཁྱེན་རབ་སོ་སོ་ཡང་དག་རིགཿ སྐར་མ་སྟོང་ཕྲག་ཚོགས་པ་ལྟའིཿབློ་གྲོས་གཏེར་ཁ་ཕྱེ་བར་བསམཿ ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་པྲ་ཛྙཱ་ཧྲིཾ་ཧྲིཾ་སྭཱ་ཧཱཿརྨོངས་པའི་རྒྱུན་ནི་མ་རིག་པཿནད་དང་གདོན་ཡང་དེ་ལ་བརྟེནཿ རིག་པ་འདི་བསྒྲུབས་སྐྱེས་བུ་ནིཿ ཤེས་རབ་ལྷ་ཡིས་རྗེས་སུ་འཛིནཿ ཐུན་མཚམས་གོང་འདྲཿ ཕྱག་འཚལ་ནིཿ སྟོན་ཀའི་ཟླ་བ་ཀུན་ཏུ་བརྗོདཿ ས་མ་ཡཿགསུམ་པ་བསོད་ནམས་སྟོབས་བསྐྱེད་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ སེར་མོ་བསོད་ནམས་མཆོག་སྟེར་མཿ ཞབས་
གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཆུ་སྐྱེས་སྟེང་ན་རིན་ཆེན་འཛིནཿ སྐུ་ལས་ཉི་གཞོན་འཆར་ཀའི་འོདཿ འཕྲོས་པས་བྱང་ཆུབ་སེམས་དཔའ་ཡིཿའཇུག་པའི་སྤྱོད་པ་བདག་དབང་གྱུརཿ ཀུན་ཀྱིས་བརྫི་བར་མི་ནུས་པའིཿདབང་བཅུའི་ཡོན་ཏན་ཐོབ་པར་བསམཿ རྩ་སྔགས་ཤམ་བུརཿ མ་ཧཱ་པུཎྱེ་སྭཱ་ཧཱཿབསོད་ནམས་མེད་ན་ལོངས་སྤྱོད་དངཿ ཚེ་ཡང་རྟག་པར་མི་ནུས་ནཿ ཆོས་དོན་གཉེར་ལ་སྨོས་ཅི་དགོསཿ དེ་ཕྱིར་འདི་ལ་བརྩོན་པར་གྱིསཿ ཐུན་མཚམས་གོང་འདྲ། ཕྱག་འཚལ་ནིཿ སེར་སྔོན་ཆུ་ནས་སྐྱེས་ཀྱི་བརྗོདཿ ས་མ་ཡཿ༈བཞི་པ་འཆི་མེད་ཚེ་སྒྲུབ་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ གཙུག་ཏོར་རྣམ་རྒྱལ་གསེར་མདོག་ཅནཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་ཚེ་བུམ་མཛིནཿ འོད་ཟེར་སྤྲོ་བསྡུས་འཁོར་འདས་ཀྱིཿདྭངས་བཅུད་བདག་ལ་ཐིམ་པར་བསམཿ རྩ་སྔགས་ཤམ་བུརཿ ཨཱ་ཡུར་ད་ཏེ་བྷྲཱུཾ་སྭཱ་ཧཱཿསྤྲོས་པ་ཅན་ལ་ཚེ་རྫས་བཤམཿ ཚེ་དབང་བདུད་རྩི་བུམ་བཅུད་ཀྱིཿ སྔགས་ལ་ཚིག་ཕྲད་བསྒྱུར་བས་འགྲུབཿ ཕྱག་མཚལ་དེ་བཞིན་གཤེགས་པའི་བརྗོདཿ ས་མ་ཡཿ༈ ལྔ་པ་དམིགས་བྱ་དབང་སྡུད་ནཿ མཁའ་འགྲོའི་ཐུགས་ཀར་
པད་ཟླའི་སྟེངཿ རིག་བྱེད་སྒྲོལ་མ་ལེ་བརྒན་མདོགཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་མདའ་གཞུ་འཛིནཿ འབར་ཞིང་རྣོ་བའི་འོད་ཟེར་གྱིསཿ དམིགས་བྱའི་སྙིང་ལ་གཟིར་བ་ཡིསཿ བརྟན་པ་འབྲལ་ཏེ་འདུད་པར་བསམཿ རྩ་སྔགས་ཤམ་བུརཿ ཀུ་རུ་ཀུལླེ་ནྲི་ཛཿསྭཱ་ཧཱཿམཁན་སློབ་དགེ་འདུན་རྒྱལ་བློན་དངཿ ཁྱིམ་བདག་དྲ་མའི་མིང་སྤེལ་བཅུགཿ ཕྱག་འཚལ་ཏུཏྟཱ་ར་སོགས་བརྗོདཿ ས་མ་ཡཿ༈དྲུག་པ་སྨྱོ་བརྗེད་ཤ་ཟ་དངཿ གནོད་སྦྱིན་གདོན་གྱི་སྟོབས་གཞོམ་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ འཇིགས་བྱེད་ཆེན་མོ་དམར་ནག་ཞལཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་ཕུར་བུ་འཛིནཿ ཧཱུྃ་གི་ཚྭ་ཚྭ་འཕྲོས་པ་ཡིསཿ གདོན་གྱི་མགོ་བོ་རབ་བཀས་ནསཿ ཆོས་ཉིད་ངང་དུ་བརྒྱལ་བར་བསམཿ རྩ་སྔགས་ཤམ་བུརཿ སརྦ་བིག་ནན་བཾ་ཧཱུྃ་ཕཊ་སྭཱ་ཧཱཿརྨོངས་བྱེད་གདོན་དང་སྨྱོ་འདྲེ་ཀུནཿ འདི་ཡིས་གསོས་པར་ཐེ་ཚོམ་མེདཿ ཕྱག་འཚལ་བརྒྱ་བྱིན་མེ་ལྷ་བརྗོདཿ ས་མ་ཡཿ༈བདུན་པ་གཡུལ་གྱི་འཁྲུལ་འཁོར་དངཿ ཐོག་སེར་དྲག་པོ་འཇོམས་འདོད་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ
གཏུམ་མོ་གཞན་གྱིས་མི་ཐུབ་མཿ ནག་མོ་མེ་འབར་ཁྲོ་གཉེར་ཅནཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་རལ་གྲི་འཛིནཿ ཐོག་སེར་སྡེ་བརྒྱད་འཁྲུལ་འཁོར་དངཿ སྒྱོགས་སོགས་གཡུལ་གྱི་འཁྲུལ་འཁོར་གྱིཿ དགྲ་གཤེད་ཐལ་བར་གྱུར་པར་བསམཿ རྩ་སྔགས་ཤམ་བུརཿ བཛྲ་ཏ་ཀ་ཧ་ན་ལི་ཙ་ཕཊཿཕྱག་འཚལ་ཏྲད་ཅེས་བྱ་དང་བརྗོདཿ ས་མ་ཡཿ༈བརྒྱད་པ་གཞན་རྒོལ་མཚང་འབྲུ་གཞོམཿ མཁའ་འགྲོའི་ཐུགས་ཀར་པད་ཟླའི་སྟེངཿ གཞན་མི་རྒྱལ་བའི་དཔའ་མོ་ནིཿ དམར་ནག་ཁྲོ་གཉེར་ལྡན་པའི་ཞལཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་རྡོ་རྗེ་འཛིནཿ ཚ་ཞིང་རྩུབ་པའི་འོད་ཟེར་གྱིསཿ ཉོན་མོངས་བདུད་དགྲ་གསོད་པར་བསམཿ རྩ་སྔགས་ཤམ་བུརཿ ད་ཧ་པ་ཙ་ཧཱུྃ་ཕཊ་སྭཱ་ཧཱཿཕྱག་འཚལ་ཏུ་རེའི་འཇིགས་པ་བརྗོདཿ ས་མ་ཡཿ༈དགུ་པ་འཇིགས་པའི་ཚོགས་སྐྱོབ་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ སེང་ལྡེང་ནགས་ཀྱི་སྒྲོལ་མ་ནིཿ མར་གད་མདོག་ཅན་འོད་རབ་འཁྲུགསཿ ཞབས་གཉིས་རྟ་བབས་སྐྱིལ་མོ་ཀྲུངཿ
ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་འཁོར་ལོ་འཛིནཿ མེ་སྤྲུལ་ཤ་ཟ་གླང་ཆེན་བཙོནཿ ཆོམ་རྐུན་སེང་གེ་རྒྱ་མཚོའི་རླབསཿ རྒྱལ་པོའི་ཆད་པ་དགྲ་གདོན་མཛེཿབཤེས་བྲལ་དབུལ་ཕོངས་གནམ་ལྕགས་ཐོགཿ དོན་ཉམས་ལ་སོགས་འཇིགས་པ་ནིཿ བརྒྱད་ཚན་གཉིས་ལས་སྐྱོབས་པར་བསམཿ རྩ་སྔགས་ཤམ་བུར། དཱ་ན་ཏྲ་ཡ་སྭཱ་ཧཱཿཕྱག་འཚལ་དཀོན་མཆོག་གསུམ་མཚོན་བརྗོདཿ ས་མ་ཡཿ༈བཅུ་པ་འཇིག་རྟེན་དབང་བྱེད་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ སྒྲོལ་མ་འཇིག་རྟེན་གསུམ་རྒྱལ་དམརཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་རྒྱལ་མཚན་འཛིནཿ འདོད་ལྷ་དབང་བྱེད་འོད་ཟེར་དངཿ བཞད་པ་བརྒྱད་ལྡན་སྔགས་ཀྱི་སྒྲསཿ གཞན་འཕྲུལ་དབང་བྱེད་སྡེ་དང་བཅསཿ རྨོངས་ཤིང་བདག་གི་དབང་གྱུར་ནསཿ འཇིག་རྟེན་ཀུན་ཀྱིས་འདུད་པར་དམིགསཿ རྩ་སྔགས་ཤམ་བུརཿ ལོ་ཀ་པཱ་ཤཾ་ཀུ་རུ་སྭཱ་ཧཱཿརྗེ་དཔོན་དབང་གྱུར་གཞན་སྨོས་ཅིཿརྒྱལ་བློན་རབ་བྱུང་ཁྱིམ་བདག་དངཿ ཡུལ་གྱི་གཙོ་བོ་རིག་གནས་མཁནཿ དཔལ་ཆེན་བུད་མེད་རིགས་བཟང་མོཿ ལྷ་ཀླུ་གནོད་སྦྱིན་ནོར་གྱི་ལྷཿ སྐྱེད་མོས་ཚལ་དང་ཡུལ་མཁར་ཞིངཿ རྐང་ཕྲན་
ནོར་དབྱིག་ཕྱུགས་ལ་སོགསཿ གང་འདོད་དམིགས་པའི་ལྡེ་ཁ་སྒྱུརཿ ཕྱག་འཚལ་རབ་ཏུ་དགའ་བ་བརྗོདཿ ས་མ་ཡཿ༈བཅུ་གཅིག་དབུལ་བ་སེལ་འདོད་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ ནོར་གཏེར་དམར་སེར་ཁྲོ་གཉེར་ཅནཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་གཏེར་བུམ་འཛིནཿ འོད་ཟེར་འཕྲོས་པས་ཕྱོགས་སྐྱོང་སོགསཿ ས་གཞི་སྐྱོང་བའི་ཕོ་ཉ་བསྐུལཿ ལྷ་ཀླུ་མི་ཡི་དཔལ་འབྱོར་དངཿ ལོངས་སྤྱོད་ཆར་དུ་ཕབ་པ་ཡིསཿ ཡུལ་ལྗོངས་དང་ནི་ཁྱིམ་གང་བསམཿ རྩ་སྔགས་ཤམ་བུརཿ མ་མ་བ་སུ་པུཥྟིཾ་ཀུ་རུ་སྭཱ་ཧཱཿཕྱག་འཚལ་ས་གཞི་སྐྱོང་བ་བརྗོདཿ གཏེར་བུམ་བསྒྲུབ་དང་གཡང་འགུགས་སོགསཿ ཕྲིན་ལས་ཁ་ཚར་གདགས་སུ་རུངཿ ས་མ་ཡཿ༈བཅུ་གཉིས་ཆར་ཆུ་བུ་དཔལ་སྤེལཿ ཡུལ་གྲུ་བཀྲ་ཤིས་བྱེད་འདོད་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ བཀྲ་ཤིས་དོན་བྱེད་སྒྲོལ་མ་སེརཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་དཔལ་བེའུ་འཛིནཿ ལྷ་མོའི་དཔྲལ་བའི་ཟླ་བའི་ཟེར་ལས་བདུད་རྩིའི་ཆརཿ ཕབ་པས་རྩི་སྨན་ལོ་ཏོག་རྒྱསཿ རིགས་བདག་ཉིད་ལས་འོད་འཕྲོས་
པསཿ བཀྲ་ཤིས་རྫས་རྟགས་ཆར་དུ་བབཿ བརྟན་གཡོའི་རྟེན་འབྲེལ་ལོག་པའི་དུགཿ གཞིལ་ཏེ་ཕུན་སུམ་ཚོགས་པར་བསམཿ རྩ་སྔགས་ཤམ་བུརཿ མངྒ་ལ་ཤྲཱི་མ་ཧཱ་པཱ་ཎི་སྭཱ་ཧཱཿཕྱག་འཚལ་ཟླ་བའི་དུམ་སོགས་བརྗོདཿ ས་མ་ཡཿ༈བཅུ་གསུམ་གཡུལ་ལས་རྒྱལ་བྱེད་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ མེ་འབར་དབུས་གནས་རྗེ་བཙུན་མཿ དམར་མོ་སྤྱན་གསུམ་ཁྲོས་པའི་གདོངཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་རྡོ་རྗེ་གདེངསཿ འོད་ཟེར་རྡོ་རྗེའི་ཚྭ་ཚྭ་ཡིསཿ གཞན་སྡེ་བཅོམ་ནས་ཚུར་འདུས་པསཿ རྡོ་རྗེའི་རྭ་བའི་གུར་གྱུར་པའིཿནང་དུ་རང་སྲིད་སྲུང་བར་བསམཿ རྩ་སྔགས་ཤམ་བུརཿ བཛྲ་ཛྭ་ལ་ཕཊ་ཕཊཿརཀྴ་རཀྵ་སྭཱ་ཧཱཿཕྱག་འཚལ་བསྐལ་པའི་ཐ་མ་བརྗོདཿ ས་མ་ཡཿ༈བཅུ་བཞི་འགོང་པོ་སྤུན་དགུ་དངཿ སྡེ་བརྒྱད་གནོད་བྱེད་ཚོགས་གཞོམ་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ ཁྲོ་གཉེར་ཅན་མཛད་སྐུ་མདོག་ནགཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་གཏུན་ཤིང་འཛིནཿ ཧཱུྃ་སྒྲ་སྒྲོགས་པའི་འོད་ཟེར་དངཿ ཕྱག་ཞབས་ས་ལ་བསྣུན་
པ་ཡིསཿ དམ་འགོང་རྒྱ་འདྲེའི་མགོ་བོ་བཀསཿ ཆོས་ཉིད་ངང་དུ་བརྒྱལ་བར་བསམཿ རྩ་སྔགས་ཤམ་བུརཿ ཧཱུྃ་ཧཱུྃ་ཧཾ་ཤཾ་ཏྲིག་ནན་ཕཊཿཕྱག་འཚལ་ས་གཞིའི་ངོས་སོགས་བརྗོདཿ ས་མ་ཡཿ༈བཅོ་ལྔ་སྡིག་པ་ཞི་འདོད་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ རབ་ཏུ་ཞི་བ་སྐུ་མདོག་དཀརཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་སྤྱི་བླུགས་འཛིནཿ ཐུགས་ལས་དག་བྱེད་ལྷ་མོ་ནིཿ བུམ་པ་ཐོགས་པ་དཔག་མེད་སྤྲོསཿ ཟླ་གདན་ལ་གནས་དམིགས་བྱ་ཡིཿངན་སོང་སྡིག་སྒྲིབ་བཀྲུས་པར་བསམཿ རྩ་སྔགས་ཤམ་བུརཿ སརྦ་པཱ་པཾ་ག་ཏེ་ག་ཏེ་སྭཱ་ཧཱཿཕྱག་འཚལ་བདེ་མ་དགེ་མ་བརྗོདཿ གནས་ལུང་དག་ཀྱང་སྦྱར་དུ་རུངཿ ས་མ་ཡཿ༈བཅུ་དྲུག་དགྲ་ཡི་མཐུ་སད་ཅིངཿ བྱད་མའི་རིགས་སྔགས་སྟོབས་གཞོམ་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ འབར་བའི་འོད་ཅན་སྐུ་མདོག་དམརཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་རྒྱ་གྲམ་འཛིནཿ འོད་ཟེར་འཕྲོས་པས་དགྲ་བོ་དངཿ བྱད་མའི་མཐུ་སྟོབས་ངག་ནུས་བཤིགཿ དྲང་སྲོང་
ངག་ལ་དབང་ཐོབ་དམིགསཿ རྩ་སྔགས་ཤམ་བུརཿ ཏྲཾ་དུ་ཏྲི་ན་ཏྲཾ་དུ་ཕཊཿསྭཱ་ཧཱཿཕྱག་འཚལ་ཀུན་ནས་བསྐོར་རབ་བརྗོདཿ ས་མ་ཡཿ༈བཅུ་བདུན་དགྲ་ཇག་ཆོམ་རྐུན་དངཿ རྔོན་པ་ཅན་གྱི་ཁ་འཆིང་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ དཔག་མེད་གནོན་མ་གུར་གུམ་མདོགཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་མཆོད་རྟེན་འཛིནཿ ཐུགས་ཀའི་ཧཱུྃ་ལས་འོད་འཕྲོས་ཧཱུྃཿཞབས་མཐིལ་ས་ལ་བརྡབས་པ་ཡིསཿ སྟོང་གསུམ་ཕ་རོལ་གནས་པའི་རིཿམནྡ་ར་དང་འབིགས་བྱེད་དངཿ འདོད་དང་གཟུགས་ཁམས་གཟུགས་མེད་ལྡེགཿ དྲག་ཤུལ་སྟོབས་ཀྱིས་དམིགས་བྱའི་གཟུགསཿ ཞབས་ཀྱི་འོག་ཏུ་མནན་པར་བསམཿ རྩ་སྔགས་ཤམ་བུརཿ ཧཱུྃ་ཧཱུྃ་བཾ་ཧོཿསྭཱ་ཧཱཿཕྱག་འཚལ་ཏུ་རེའི་ཞབས་བརྡབས་བརྗོདཿ ས་མ་ཡཿ༈བཅོ་བརྒྱད་སྦྱར་དང་དབྱིག་གི་དུགཿ གཟའ་ཀླུ་གནོད་སྦྱིན་སྡེ་ཚོགས་ཀྱིཿམཐོང་རེག་ཁ་རླངས་དུག་བསྲུང་ནཿ མཁའ་འགྲོའི་ཐུགས་ཀར་པད་ཟླའི་སྟེངཿ སྒྲོལ་མ་རྨ་བྱ་ཆེན་མོ་དཀརཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ རི་དྭགས་རྟགས་ཅན་ཟླ་བ་ཉ་གང༌། ཨུཏྤལ་འཛིནཿ འོད་ཟེར་འཕྲོས་པས་
བརྟན་གཡོའི་དུགཿ ལྷག་མ་མེད་པར་གཞིལ་བར་བསམཿ རྩ་སྔགས་ཤམ་བུརཿ སརྦ་བི་ཥ་ཏཱ་ར་ཕཊཿཕྱག་འཚལ་ལྷ་ཡི་མཚོ་རྣམས་བརྗོདཿ དུག་དབྱུང་བྱེད་ན་བུམ་སྒྲུབ་དངཿ འབྲེལ་བར་ཆུས་བཀྲུ་རྨ་བྱས་བྱབཿ ཧོཿའགལ་རྐྱེན་ཐམས་ཅད་དུག་ལ་བརྟེནཿ དུག་གི་རྒྱུ་ནི་ཉོན་མོངས་པཿརིག་པ་མཆོག་གིས་སྨན་ཆེན་འདིསཿ སེམས་ཅན་ཁམས་ནི་དུག་མེད་ཤོགཿ ཕྱག་འཚལ་སྔགས་སྦྲེལ་བརྒྱ་ཚར་བརྗོདཿ ས་མ་ཡཿ༈བཅུ་དགུ་བས་ནི་རྩོད་པ་དངཿ རྨི་ལམ་ངན་པ་ཐམས་ཅད་སེལཿ མཁའ་འགྲོའི་ཐུགས་ཀར་པད་ཟླའི་སྟེངཿ རྗེ་བཙུན་མི་ཕམ་རྒྱལ་མོ་དཀརཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་གདུགས་དཀར་འཛིནཿ སྣ་ཚོགས་རྡོ་རྗེའི་ཚྭ་ཚྭ་ཡིསཿ ཕ་རོལ་ངག་གི་ནུས་པ་བཅོམཿ དབུ་རྒྱན་ལ་སོགས་རྒྱན་བརྒྱད་སྙན་ཆ་དཔུང་རྒྱན་གཉིས་ཕྱག་ཞབས་གདུ་བུ་གཉིས་མགུལ་ཆུན་སྐ་རགས་བ་ཏིའི་སྨད་དཀྲིས་རྣམས་སོཿཀྱིསཿ གོ་ཆ་བརྗིད་པ་ལྟར་བསྲུངས་པསཿ རྩ་རླུང་ཐིག་ལེ་འཁྲུགས་པ་ཡིཿརྨི་ལམ་ངན་པ་བསལ་བར་བསམཿ རྩ་སྔགས་ཤམ་བུརཿ ཧཱུྃ་ཧཱུྃ་ཕཊ་ཕཊ་རཀྞ་རཀྵ་མཱཾ་སྭཱ་ཧཱཿ ཕྱག་འཚལ་ལྷ་ཡི་ཚོགས་རྣམས་བརྗོདཿ ས་མ་ཡཿ༈ ཉི་ཤུ་པ་ཡིས་རིམས་ནད་སེལཿ མཁའ་འགྲོའི་ཐུགས་ཀར་པད་
ཟླའི་སྟེངཿ དམར་སེར་ལྷ་མོ་རི་ཁྲོད་མཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་ཟ་མ་ཏོགཿ ཉི་མ་ཟླ་བའི་སྤྱན་རྒྱས་པསཿ ནད་བདག་ཚར་བཅད་ཉི་མ་ལས་འབར་བའི་འོད་ཀྱིས་རིམས་གསོས་ཟླ་བ་ལས་བདུད་རྩིའི་རྒྱུན་བྱུང་བས་བསམཿ རྩ་སྔགས་ཤམ་བུརཿ ན་ལ་ཏཱ་རེ་མ་ནོ་ཧ་ར་ཧཱུྃ་ཧ་ར་སྭཱ་ཧཱཿཕྱག་འཚལ་ཉི་མ་ཟླ་བ་བརྗོདཿ ས་མ་ཡཿ༈ཉེར་གཅིག་ནད་པའི་བླ་ཚེ་བསླུཿམཁའ་འགྲོའི་ཐུགས་ཀར་པད་ཟླའི་སྟེངཿ འོད་ཟེར་ཅན་མ་སྐུ་མདོག་དཀརཿ སྐུ་གསུང་ཐུགས་ལས་ཨོཾ་ཨཱཿཧཱུྃཿཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤ་ལར་གནས་གསེར་ཉ་འཛིནཿ ཡི་གེ་གསུམ་ལས་འོད་འཕྲོས་པསཿ གདོན་དང་རོ་ལངས་གནོད་སྦྱིན་གྱིསཿ ནད་པའི་བླ་དང་ཚེ་བརྐུས་པཿསླར་ལ་གནང་བཞིན་སྤྲད་པར་དམིགསཿ ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་མ་རི་ཙྱེ་ཚེ་བྷྲཱུྃ་ནྲི་ཛཿསྭཱ་ཧཱཿཚེ་མདའ་དང་བླ་ལ་གཡུཿཁམས་ཀྱི་རྟེན་དུ་དར་ཚོན་དབྱངསཿ རྟེན་འབྲེལ་བླ་ལུག་ཉིད་ལ་བརྟགཿ མ་གྲུབ་བར་དུ་བསྐྱར་ཞིང་འབདཿ ཐུན་མཚམས་བླ་གླུད་བཟང་པོ་ལཿ གླུད་ཕྲན་ཟན་འབྲུལ་ཆང་བུ་བརྒྱཿའབྲུ་གསུམ་བྱིན་བརླབས་སཾ་བྷ་རཿ བརྒྱ་རྩ་བརྒྱད་བསྔོ་ལན་རེ་བཞིནཿ ཧཱུྃཿ
ཁྱེར་ཅིག་ཁྱེར་ཅིག་སྟོབས་ལྡན་རྣམསཿ སྲེད་དང་ཆགས་དང་ཞེན་པ་དངཿ དྲན་དང་བཟུང་དང་བསམ་དང་རེགཿ གློད་དང་ཞི་དང་གྲོལ་བར་མཛོདཿ ཅེས་དང་སྒྲོལ་མ་ཡིད་ལ་བྱསཿ ཐལ་སྦྱར་དེ་ཉིད་གསུམ་བཀོད་མཐརཿ ཐལ་མོ་རྡེབ་ཅིང་འབབ་ཆུར་དོརཿ སྲོག་བསླུ་བྱ་ཞིང་ཉེའུ་འདོནཿ དུས་མིན་འཆི་བ་ངེས་པ་བཟློགཿ ས་མ་ཡཿརྒྱ་རྒྱ་རྒྱཿ ༈བཅངས་པས་མི་མཐུན་ཕྱོགས་བསྲུང་ཞིངཿ མཐོང་བས་སྡིག་པ་ལས་གྲོལ་བའིཿཡུམ་འཁོར་དཔལ་གྱི་གདུ་བུ་ལཿ མཐོང་གྲོལ་ཙཀྲ་ཞེས་སུའང་གྲགསཿ མཁའ་འགྲོ་འདུ་བའི་དུས་གཉན་ལཿ མུ་ཁྱུད་རིམ་པ་བདུན་གྱི་དབུསཿ པདྨ་འདས་བཞི་དབུས་དང་ལྔའིཿཁོང་དུ་འོང་ལྔའི་ཐིག་ལེའི་ཀློངཿ གཤེགས་མ་ལྔ་ཡི་ས་བོན་ནིཿ ཏཱཾ་ཡིག་དབུས་སུ་གནས་པ་བྲིཿ དེའི་ཕྱི་མུ་ཁྱུད་དང་པོ་ལཿ ཨོཾ་པདྨོ་ཡོ་གི་ནི་ཛྙཱ་ན་ཝཱ་རྭ་ཧཱི་ཧཱུྃཿན་མོ་ཨཱརྱ་ཏཱ་རེཿཨོཾ་ཏཱ་རེ་ཏཱཾ་སྭཱ་ཧཱཿན་མོ་རཏྣ་ཏྲ་ཡཱ་ཡཿནམཿ ཨརྱ་ཨ་ཝ་ལོ་ཀི་ཏེཿཤྭ་ར་ཡཿབྷོ་དྷི་ས་ཏྭ་ཡཿམ་ཧཱ་ས་ཏྭ་ཡཿམཱ་ཧཱ་ཀ་རུ་ནི་ཀཱ་ཡཿཨོཾ་ཏཱ་རེ་ཏུཏྟཱ་རེ་ཏུ་རེ་མཱཾཿཀྲྀ་ཏེ་སརྦ་དུཥྟ་ནཾཿཛཾ་བྷ་ཡཿསྟྭཾ་བྷ་ཡཿམོ་ཧ་ཡཿབྷན་དྷ་ཡཿཧཱུྃ་ཧཱུྃ་ཕཊ་ཕཊཿསརྦ་དུཥྟཾ་སྟྭཾ་བྷ་ནི་ཏཱ་རེ་སྭཱ་ཧཱཿཞེས་བྲི་དེའི་ཕྱི་པད་འདབ་བརྒྱདཿ མདུན་ནས་བརྩམས་པའི་གཡས་བསྐོར་དུཿ དང་པོཿཨོཾ་པདྨོ་ཡོ་གི་ཏཱ་རེ་ཏུཏྟཱ་རེ་ཏུ་རེ་པྲ་ཛྙཱ་ཧྲིཾ་ཧྲིཾ་སྭཱ་ཧཱཿགཏི་མུག་གླང་པོའི་འཇིགས་པ་ལས་སྐྱོབས་ཤིག་རཀྵཿ གཉིས་པར་ཐོག་མཐའ་འདྲ་བ་ལཿ མ་ཧཱ་པུཎྱེ་སེར་སྣ་ལྕགས་སྒྲོག་གི་འཇིགས་
པ༴ གསུམ་པརཿ ཨཱ་ཡུརྡ་ཏེ་བྷཱུྃ་སྭཱ་ཧཱཿཐེ་ཚོམ་ཤ་ཟའི་འཇིགས༴ བཞི་པརཿ མངྒལ་ཤྲཱི་མ་ཧཱ་པཱ་ནི་སྭཱ་ཧཱཿའདོད་པ་ཆུ་བོའི་དབའ་རླབས་ཀྱི༴ ལྔ་པརཿ སརྦ་པཱ་པཾ་ག་ཏེ་ག་ཏེ་སྭཱ་ཧཱཿཞེ་སྡང་མེའི༴ དྲུག་པརཿ ཧཱུྃ་ཧཱུྃ་བཾ་ཧོཿསྭཱ་ཧཱཿལྟ་ངན་ཆོམ་རྐུན་གྱི༴ བདུན་པརཿ སརྦ་བིཥ་ཏཱ་ར་ཕཊ་སྭཱ་ཧཱཿཕྲག་དོག་དུག་སྤྲུལ་གྱི༴ བརྒྱད་པརཿ ཧཱུྃ་ཧཱུྃ་ཕཊ་ཕཊཿརཀྵ་རཀྵ་མཱཾ་སྭཱ་ཧཱཿང་རྒྱལ་སེང་གེའི་འཇིགས༴ སྤྲོ་ན་བསྒྲུབ་བྱའི་དངོས་གྲུབ་ཀྱིཿའདོད་གསོལ་རེ་རེ་བཞིན་དུ་སྦྱརཿ དེའི་ཕྱི་རྩིབས་ནི་བཅུ་གསུམ་ལཿ རྩ་སྔགས་ནི་ཐོག་མཐའ་འདྲ་སྟེ་རྩིབས་དང་པོརཿ ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་བྷོ་དྷི་ཙིཏྟ་སྭཱ་ཧཱཿཕ་རོལ་གྱི་ལྕེ་འབབ་པའི་འཇིགས་པ་ལས་སྲུངས་ཤིགཿ གཉིས་པརཿ མུ་ཏྲ་ནྲི་ཛ་སྭཱ་ཧཱཿམིང་སྤེལ་དམིགས་གསལ་འཇུགཿ ས་གཡོ་བའི་འཇིགས༴ གསུམ་པརཿ སརྦ་བིག་ནན་བཾ་ཧཱུྃ་ཕཊཿསྨྱོ་བརྗེད་ཀྱི་གདོན་ལས༴ བཞི་བརཿ བཛྲ་ཏ་ཀ་ཧ་ན་ལི་ཙ་ཕཊཿགནམ་ལྕགས་དང་འཁྲུལ་འཁོར་གྱི་འཇིགས༴ ལྔ་པརཿ ད་ཧ་པ་ཙ་ཧཱུཾ་ཕཊ་སྭཱ་ཧཱཿརྒྱལ་པོའི་ཆད་པའི༴ དྲུག་པརཿ དཱ་ན་ཏྲ་ཡ་སྭཱ་ཧཱཿདུས་མ་ཡིན་པར་འཆི་བའི༴ བདུན་པརཿ ལོ་ཀ་པཱ་ཤཾ་ཀུ་རུ་སྭཱ་ཧཱཿམཛའ་བཤེས་དང་བྲལ་བའི༴ བརྒྱད་པརཿ མ་མ་བཱ་སུ་པུཥྟིཾ་ཀུ་རུ་སྭཱ་ཧཱཿམུ་གེ་དང་ཕོངས་པའི༴ དགུ་པརཿ བཛྲ་ཛྭ་ལ་རཀྵ་སྭཱ་ཧཱཿཕ་རོལ་གྱི་དམག་ཚོགས་ཀྱི༴ བཅུ་པ་ལ་ཧཱུཾ་ཧཱུཾ་སྭཱ་ཧཱཿ མཛེ་ནད་དང་ཁྱབ་འཇུག་གི༴ བཅུ་གཅིག་པརཿ ཏྲཾ་དུ་ཏྲི་ན་ཏྲཾ་དུ་ཕཊ་སྭཱ་ཧཱཿབྱད་ཕུར་དང་རིག་སྔགས་ཀྱི༴ བཅུ་གཉིས་པ་ལཿ མ་ནོ་ཧ་ར་ཧཱུྃ་ཧ་ར་སྭཱ་ཧཱཿགྲིབ་དང་རིམས་ནད་ཀྱི༴
བཅུ་གསུམ་པ་ལཿ མ་རི་ཙྱེ་ཚེ་བྷྲཱུྃ་ནྲི་ཛ་སྭཱ་ཧཱཿརོ་ལངས་དང་གནོད་སྦྱིན་གྱི་འཇིགས༴ རྩིབས་མཆན་བཅུ་གསུམ་དག་ལ་ནིཿ ཨོཾ་ཨ་ན་ལེ་ཨ་ན་ལེཿ༡ཁ་ས་མེད་ཁ་ས་མེདཿ ༢བཻ་རེ་བཻ་རེཿ༣སཽ་མེ་སཽ་མེཿ༤ཤཱནྟེ་ཤཱནྟེཿ༥དཱནྟེ་དནྟེཿ༦བི་ཥ་དེ་བི་ཥ་དེཿ༧བཱི་རེ་བཱི་རེཿ༨དེ་བི་བཛྲ་དྷཱ་རིཿ༩བྷནྡྷ་བྷནྡྷ་ནིཿ ༡༠བཛྲ་པཱ་ཎི་ཕཊཿ༡༡ཨོཾ་ཧཱུྃ་ཧཱུྃ་དྲུཾ་ཧྲི་ཥྚོཾ་ཕཊ་སྭཱ་ཧཱཿ༡༢ཧཱུྃ་དྲུཾ་བྷནྡྷ་ཕཊཿ༡༣དེའི་ཕྱི་མུ་ཁྱུད་བཞི་བ་ལཿ མཐོང་གྲོལ་ཡབ་ཀྱི་དགོངས་པ་བྲིཿལྔ་པར་རེག་གྲོལ་ཡུམ་སྙིང་པོཿདྲུག་པར་ཐིག་ལེ་ཉེར་ལྔའི་དབུསཿ ཡེ་ཤེས་ཆེན་པོའི་སྙིང་པོ་ནིཿ སྡེ་ཚན་ཉི་ཤུ་རྩ་ལྔ་དངཿ བར་མཚམས་ཀློང་གྲོལ་ཡིག་དྲུག་བཀོདཿ བདུན་པར་ཕྱག་མཚན་ཉེར་གཅིག་དངཿ བརྒྱད་པར་དབྱངས་གསལ་རྟེན་སྙིང་བྲིཿདགུ་པར་རྡོ་རྗེའི་ཕྲེང་བ་དངཿ བཅུ་པ་ཉིད་ནི་པ་ཏྲ་འོཿབསྲུང་བ་རྐྱང་པར་ལྟོ་བ་དངཿ བརྟགས་གྲོལ་མུ་ཁྱུད་གསུམ་དོར་རོཿཀུན་ཀྱང་ཚོན་གྱིས་རྣམ་པར་དབྱེཿཨ་མྲྀ་ཏ་དང་དྲི་བཟང་ཕྱུགཿ མགུལ་དུ་བཏགས་ན་རང་རྒྱུད་ལཿ གནས་པའི་ཉོན་མོངས་དུག་རྣམས་སྦྱོངཿ ཕྱི་ལ་གཡེངས་ན་རྫི་ཕྱོགས་ཀྱིསཿ ཕོག་པའི་སེམས་ཅན་དོན་བྱེད་འགྱུརཿ གྲོང་ཁྱེར་དག་དང་ཕྱུགས་ཀྱི་ལྷསཿ གཡུལ་གྱི་ཕྲུ་མ་ལ་བཙུགས་ནཿ འཇིགས་པ་མེད་པའི་གནས་ཐོབ་འགྱུརཿ རིག་སྔགས་དང་ནི་མཁྱུད་དཔྱད་ཀྱིཿརྟེན་འབྲེལ་བདེན་པ་བསམ་མི་ཁྱབཿ རྒྱལ་བའི་ཕྲིན་ལས་ཚད་མེད་ཕྱིརཿ དོན་འབྲས་གྲུབ་ལ་བསླུ་བ་མེདཿ སྒྲིབ་པའི་ནང་ན་ཐེ་ཚོམ་ཆེཿདངོས་གྲུབ་དད་པ་ཅན་ལ་འབྱུངཿ ཤིན་ཏུ་ཟབ་པའི་སྔགས་རྒྱུད་
འདིའིཿ བརྡ་རིས་འཚོ་རྒྱལ་བླ་མཚོར་རྒྱཿབརྡ་འགྲོལ་སེང་གེ་རོང་དུ་འབྱུངཿ གྲུ་གཟིངས་ཆུ་བོའི་གཞུང་ལ་འབབསཿ རྟེན་འབྲེལ་སྣ་ཁ་མ་ལོག་ནཿ འགྲོ་དོན་ཉི་འོག་གཉིད་ལ་སྤྱོདཿ སྙིང་གི་བུ་དང་འཕྲད་ནས་ཀྱངཿ འགྲོ་དོན་ནམ་མཁའི་མཐར་ཐུག་ཤོགཿ ས་མ་ཡཿརྒྱ་རྒྱ་རྒྱཿགཏེར་རྒྱཿདགོངས་རྒྱཿབརྡ་རྒྱཿ ལས་ཚོགས་འདི་གཞན་བསྐུལ་ཡང་ཡང་བྱུང་ཡང་རིང་ཞིག་གཏེར་རྒྱ་མ་ཁྲོལཿ དེ་རྗེས་ནོར་སྐྱོང་གི་ལོ་སྒྲོལ་མ་འབུམ་ཐེར་བསགས་པའི་རྐྱེན་གྱིས་རྗེ་བཙུན་མའི་བྱིན་རླབས་ཁོ་ནས་ཀློང་གི་བརྡ་རིས་གྲོལཿ དེ་ལོ་ཆར་ཞོད་ཤིན་ཏུ་དཀོན་པ་ལ་བཀྲ་ཤིས་སྲོང་བཙན་བང་སོར་ཡུམ་ཀའི་ཚོགས་སྐོང་དང་བཅས་འདུན་པ་སྒྱུར་བས་རིགས་བདག་གི་ལས་ཚོགས་བཅུ་གཉིས་པ་ལ་ངེས་པ་རྙེད་པའོཿ