ཡུམ་ཀའི་གསང་སྒྲུབ་སེང་གེའི་གདོང་ཅན་ལསཿ གཏོར་ཟློག་བྱད་གདོན་གཡུལ་འཇོམས།
ཡུམ་ཀའི་གསང་སྒྲུབ་སེང་གེའི་གདོང་ཅན་ལསཿ གཏོར་ཟློག་བྱད་གདོན་གཡུལ་འཇོམས་བཞུགསཿ
བདུད་འདུལ་སེང་གེའི་ཞལ་ལ་བདུདཿ ལྔ་བརྒྱ་ཕྲག་བཅུའི་མཐར་ཉེ་ཚེཿདམ་ཆོས་རྣམ་གཉིས་མི་ཤེས་པརཿ དམ་པར་ཁས་འཆེ་སྟོབས་འབྱོར་འགྲནཿ རྟགས་ཙམ་འཛིན་ལ་དགེ་འདུན་རེཿཁྲིམས་རྐུན་བྱེད་ཅིང་ཁྱིམ་སུན་འབྱིནཿ བསྐྱེད་རྫོགས་གདིང་མེད་སྔགས་པར་རློམཿ དཀོན་མཆོག་ལས་ཀྱང་འབྱུང་པོར་དདཿ དེ་ཚེ་མུ་སྟེགས་ཧིན་དུ་ཡིསཿ ཀླ་ཀློ་ལོ་གཡོབ་ཅིང་བསྟན་ཞབས་སྡུདཿ ང་སྤྲུལ་བྱང་ཆུབ་སེམས་ལྡན་རྣམསཿ མཐའ་དམག་བྱད་ཕུར་ཟློག་ལ་བརྩོནཿ ས་མ་ཡཿའདི་ལ་སྦྱོར་དངོས་རྗེས་གསུམ་ལསཿ སྦྱོར་བ་བཅའ་གཞི་བཤམ་པ་ནིཿ སྟེགས་བུའི་སྟེང་དུ་སེང་གདོང་མའིཿརྡུལ་མཚོན་དཀྱིལ་འཁོར་འདུ་བྱས་ལཿ མཉྫིའི་སྟེང་དུ་ཟོར་གཏོར་བཀོདཿ སྨན་གཏོར་རཀྟ་ཉེར་སྤྱོད་བཤམཿ འོག་ཏུ་བྱེ་སྟེགས་ཟུར་གསུམ་ལསཿ བསད་དཀྱིལ་དཔེའུ་ཆུང་ལྟར་བྱཿདབུས་སུ་ཧོམ་ཁུང་རཱུ་པ་བཀོདཿ གཟུགས་ནི་ཡིད་ཀྱི་རྟེན་ཡིན་པསཿ སྐྱེ་མཆེད་དབང་པོ་
དོད་པ་དངཿ ཡིད་ལ་བླ་འཁོར་དེ་གསོད་པསཿ བླ་དྭགས་གནད་ཡིག་ལྡན་པར་བྲིཿརྟེན་འབྲེལ་ནུས་པ་རྫས་ཡིན་པསཿ ཟག་རྫས་དང་ནི་གནད་རྫས་བྱུགཿ མཐའ་བསྐོར་ཟོར་རྫས་ཐུན་རྫས་བཤམཿ བསྒྲལ་ལས་ཆས་རྣམས་འདུ་བྱས་ཤིངཿ ཁྱད་པར་དམག་ཟློག་དམིགས་གསལ་ལཿ མ་མགོན་གཡུལ་མདོས་གཞུང་བཞིན་བཀོདཿ གཉིས་པ་དངོས་གཞིའི་རིམ་པ་ལཿ བདག་མདུན་ལས་ལ་སྦྱོར་བ་གསུམཿ དེ་ལ་དང་པོ་བདག་བསྐྱེད་ནིཿ དཔལ་ཆེན་འདུས་པའི་སྒོས་སྒྲུབ་གཞུངཿ སྐབས་སུ་གང་བབ་རིག་པས་འཕྲུལཿ གཉིས་པ་མདུན་བསྐྱེད་སྒྲུབ་རིམ་ལཿ དང་པོ་མདུན་རྟེན་བསྐྱེད་པ་ནིཿ སྭ་བྷཱ་ཝས་སྦྱངས། མདུན་རྟེན་མི་དམིགས་སྟོང་པའི་དངཿ བྷྲཱུྃ་ཡིག་འོད་དུ་ཞུ་བ་ལསཿ རྡོ་རྗེ་རྭ་བའི་གུར་གྱི་དབུསཿ ཕ་ལམ་རྡོ་རྗེའི་མཆོད་རྟེན་ནིཿ རྣམ་པ་ཉི་ཤུས་བྱང་ཆུབ་པཿ རྒྱ་ཁྱོན་ཆོས་ཀྱི་དབྱིངས་
དང་མཉམཿ བུམ་ནད་མཁའ་འགྲོའི་དཀྱིལ་འཁོར་ནིཿ ཧཱུྃཿརྣམ་ཐར་ཡོངས་རྫོགས་རྡོ་རྗེ་བཙུན་མོའི་མཁའཿསོགས་གཞུང་ལྟརཿ མ་བསྐྱེད་རང་བྱུང་ཡོངས་གྲུབ་ཆེན་པོར་གསལཿ ཧཱུྃཿཏོག་ལ་གཙུག་ཏོར་གདུགས་དཀར་མོཿ ཉིད་ཀྱིལ་ལྷ་མོ་འོད་ཟེར་ཅནཿ ཟླ་ཕྱེད་ཁྲོ་གཉེར་ཅན་གསུམ་ལཿ རིགས་སྔགས་ལྷ་མོ་འབུམ་སྡེས་བསྐོརཿ ཆོས་འཁོར་བསྐལ་བཟང་སངས་རྒྱས་སྟོངཿ བྲེ་ནང་སྒྲུབ་སྡེ་ཆེན་པོ་བརྒྱདཿ བང་རིམ་དབུས་སུ་པད་ཉིའི་སྟེངཿ ཡེ་ཤེས་མེ་དཔུང་འབར་བའི་ཀློངཿ དྲང་སྲོང་དྲི་མེད་ཁྲོ་བོའི་སྐུཿ སྔགས་རྒོད་ལོཀྟྲི་པཱ་ལ་ནིཿ མཐིང་ནག་དབུ་སྟོང་ཕྱག་སྟོང་རྔམསཿ རྩ་ཕྱག་ཐུགས་ཀར་ཐལ་མོའི་རྡེབཿ ལོག་འདྲེན་གནོད་བྱེད་རྡུལ་དུ་བྱེདཿ ལྷག་མ་གཡས་རྣམས་རལ་གྲི་དངཿ གཡོན་རྣམས་རྡོ་རྗེའི་ཐོ་བ་འཛིནཿ དགྲ་བགེགས་གདན་ལ་དོར་སྟབས་བགྲདཿ རིགས་སྔགས་དམོད་པ་གྲུབ་པ་ཡིཿདྲང་སྲོང་བྱེ་བ་འབུམ་སྡེས་བསྐོརཿ སེང་ཁྲིའི་ནང་དུ་ཐོད་མཁར་ཀློངཿ ཁྲག་ཞག་རྒྱ་མཚོ་འཁྱིལ་བའི་དབུསཿ མི་རོ་རྟ་རོ་གཅལ་དུ་བཀྲམཿ བདུད་དང་གཤིན་རྗེ་སྲིན་པོའི་སྡེཿགནོད་སྦྱིན་ཤ་ཟ་རོ་ལངས་དངཿ ཀེང་རུས་བྱ་གཅན་འཁྲིགས་པའི་ཀློངཿ དཔལ་ལྡན་མ་མགོན་ལྕམ་དྲལ་དངཿ བདུད་མགོན་ཚོགས་བདག་མཆེད་
ལྔ་ལཿ ལྷ་དམགས་བྱེ་བ་འབུམ་སྡེ་དངཿ དཔལ་མགོན་བདུན་ཅུ་རྩ་ལྔས་བསྐོརཿ སྤྲུལ་པ་ཡང་སྤྲུལ་བསམ་མི་ཁྱབཿ འཇིགས་སུ་རུང་དང་དཔའ་བྱད་ཅནཿ བྱད་ཕུར་གཡུལ་ངོ་ཟློག་ལ་རྔམསཿ རྡོ་རྗེའི་རྭ་གུར་ཕྱི་རོལ་ཏུཿགནམ་ལྕགས་འབར་བའི་རྩིབས་འཁོར་ནིཿ སྟེང་འོག་ཕྱོགས་མཚམས་བཅུར་ལྡན་པའིཿཡར་རྩེ་ཆོས་ཀྱི་དབྱིངས་དང་ནིཿ མར་རྩེ་དམིགས་བྱའི་སྙིང་ལ་ཟུགཿ སོ་སོའི་ནང་ཁོངས་ཉི་གདན་སྟེངཿ ཕྱོགས་སྐྱོང་གདན་ལ་ཁྲོ་བོ་བཅུཿརང་རང་སྤྲུལ་པའི་དམག་དཔུང་བཅསཿ མེ་སྟག་འཕྲོ་ཞིང་ཀུན་ནས་འབརཿ དེའི་ཕྱི་སྤུ་གྲི་རེག་གཅོད་རླུངཿ ཡེ་ཤེས་མེ་ལྕེས་བསྐྱེད་པ་ལསཿ གཡོན་བསྐོར་མགལ་མེའི་འཁོར་ལོ་ལྟརཿ བསྐོར་ནས་དགྲ་བགེགས་ཉལ་ཉལ་གཏུབསཿ དེ་ལྟར་གསལ་བའི་ལྷ་ཚོགས་ཀྱིཿགནས་གསུམ་ཡི་གེ་འབྲུ་གསུམ་ལསཿ རང་འདྲའི་ཡེ་ཤེས་སྤྱན་དྲངས་བསྟིམཿ གཉིས་པ་སྤྱན་འདྲེན་པ་ནིཿ ཧཱུྃཿམགོན་པོ་ཀུན་གཟིགས་ཐུགས་རྗེ་ཅནཿ བདུད་ཀྱི་བདུད་ཆེན་ལྷ་ཡི་ལྷཿབཅོམ་ལྡན་རྒྱལ་བ་སྲས་བཅས་རྣམསཿ དེང་འདིར་གདུང་བས་སྤྱན་འདྲེན་ནཿ ཐུགས་ལ་ཁྲོ་བ་མི་མངའ་ཡངཿ སྙིགས་མ་ལྔ་ཡི་མཐར་སྐྱེས་པའིཿ ལོག་འདྲེན་འདུལ་ཕྱིར་དྲག་ཤུལ་དངཿ རོལ་པའི་སྟབས་ཀྱིས་གཤེགས་སུ་གསོལཿ ཨེ་
ཧྱེ་ཧི་མ་ཧཱ་ཀཱ་རུ་ཎི་ཀ་དྲྀ་ཤ་ཧོཿགསུམ་པ་བཞུགས་སུ་གསོལ་བ་ནིཿ ཧཱུྃཿདྲན་པ་ཉེ་བར་གཞག་པ་ནསཿ ཀུན་ཏུ་འོད་མཆོག་མན་ཆད་ཀྱིཿརྣལ་འབྱོར་རྫོགས་པའི་གཞལ་ཡས་སུཿ དམ་ཡེ་གཉིས་མེད་ངང་དུ་བཞུགསཿ བཛྲ་ས་མ་ཡ་ཏིཥྛཿབཞི་པ་ཕྱག་འཚལ་ནིཿ ཧཱུྃཿལྷ་དང་རང་རིག་གཉིས་མེད་དུཿ ཤེས་ལ་སྲི་ཞུ་མི་མངའ་ཡངཿ སེམས་ཅན་དོན་ལ་བསྐུལ་བྱའི་ཕྱིརཿ བརྡ་དོན་དྲན་པའི་ཕྱག་གིས་མཆོདཿ ཨ་ཏི་པཱུ་ཧོཿཔྲ་ཏཱིཙྪ་ཧོཿལྔ་པ་ཉེར་མཆོད་ནིཿ ཧཱུྃཿཡུལ་ལ་དབང་པོས་སྤྱོད་པ་ཡིཿམཆོད་དང་མཆོད་བྱར་མི་དམིགས་ཀྱངཿ སྐྱེ་མཆེད་ཡབ་དང་སྦྱོར་བའི་ཕྱིརཿ ཡུལ་དྲུག་འདོད་ཡོན་ལྷ་མོར་རོལཿ བཛྲ་ཨརྒྷཾ་ནས་ནཻ་ཝི་དྱ་རཱུ་པ་ཤབྟ་སོགསཿ དྲུག་པ་སྨན་གཏོར་རཀྟའི་མཆོད་པ་ནིཿ ཧཱུྃཿགཏི་མུག་ཤ་ཆེན་བྷ་ལིང་ཏཿཞེ་སྡང་རུས་པ་འདོད་ཆགས་ཁྲགཿ ཐབས་ཤེས་བྱང་ཆུབ་སེམས་སྨིན་པའིཿདམ་རྫས་སྨན་གཏོར་རཀྟས་མཆོདཿ སརྦ་པཉྩ་རཀྟ་བྷ་ལིང་ཏ་ཧོཿབདུན་པ་སྦྱོར་སྒྲོལ་གྱི་མཆོད་པ་ནིཿ ཧཱུྃཿབདག་མེད་རྡོ་རྗེ་ཡུམ་ལྔའི་ཀློངཿ བདག་ལྟའི་རུ་ཏྲ་ཚར་བཅད་པསཿ འཁོར་ལོ་བཞི་དབྱིངས་ལྡོག་ཁྱབ་ཀྱིཿསྦྱོར་སྒྲོལ་མཆོད་པ་བླ་ན་མེདཿ མ་ཧཱ་སུ་ཁ་པཱུ་ཛ་ཧོཿབརྒྱད་པ་ཕྱག་རྒྱ་བཞི་མཆོད་ནིཿ ཨཱཿལྷར་སྣང་དམ་ཚིག་ཕྱག་རྒྱ་ཡངཿ སྣང་སྟོང་ཟུང་འཇུག་ལས་ཀྱི་ངངཿ གྲགས་སྟོང་ཆོས་ཀྱི་
ཕྱག་རྒྱའི་སྤྲིནཿ སྟོང་ཉིད་ཕྱག་རྒྱ་ཆེན་པོར་རོལཿ དྷརྨ་དྷཱརྟུ་པཱུ་ཛ་ཧོཿདགུ་པ་བསྟོད་པ་ནིཿ ཧཱུྃཿམི་གནས་མི་དམིགས་ཆོས་ཀྱི་དབྱིངསཿ འགགས་མེད་ངང་ལས་ལོངས་སྐུར་རྫོགསཿ སྣ་ཚོགས་ཐབས་ལས་སྤྲུལ་པའི་སྐུཿ གཞན་དོན་རྒྱུན་ཆད་མེད་ལ་འདུདཿ སྒྲ་ཚིག་བརྗོད་པར་མི་དམིགས་ཀྱངཿ རླུང་དང་ཡི་གེར་འབྲེལ་པ་ལསཿ གསང་སྔགས་རིགས་སྔགས་དངོས་གྲུབ་ཀུནཿ གྲགས་སྟོང་རྡོ་རྗེའི་དབྱངས་ལ་འདུདཿ ཟབ་ཞི་སྤྲོས་བྲལ་ནམ་མཁའི་དབྱིངསཿ སྟོང་དང་མི་སྟོང་བློ་ལས་འདསཿ སྐྱེ་བ་མེད་ལས་སྣ་ཚོགས་སྐྱེཿརྡོ་རྗེའི་ཐུགས་ལ་ཕྱག་འཚལ་བསྟོདཿ རྒྱལ་བའི་སྐུ་གསུང་ཐུགས་མཆོག་ལསཿ སེམས་ཅན་འདུལ་ཕྱིར་ཡོན་ཏན་གཟུགསཿ འབར་དང་འཇམ་རྒྱས་ཆགས་པའི་ཉམསཿ དམ་ཅན་རྒྱ་མཚོའི་ཚོགས་རྣམས་དངཿ དེ་དག་འཁོར་ན་གནས་པ་ཡིཿའཇིག་རྟེན་འདས་དང་འཁོར་བའི་ཚུལཿ ཡེ་ཤེས་གྲུབ་ཀྱང་ཕྲིན་ལས་བཞིའིཿབདག་ཉིད་ཆེན་པོ་ཀུན་ལ་བསྟོདཿ བཅུ་པ་བཟླས་པ་ནིཿ བདུད་འདུལ་དྲག་མོའི་ཐུགས་ཀ་རུཿཉི་སྟེང་ཐུགས་སྲོག་ཧཱུྃ་གི་མཐརཿ ལས་སྔགས་མེ་སྟག་འཕྲོ་བས་བསྐོརཿ དེ་ལས་བྱུང་བའི་འོད་ཟེར་གྱིསཿ ལྷ་ཚོགས་ཀུན་གྱི་ཐུགས་རྒྱུད་བསྐུལཿ ཀུན་ཀྱང་རང་རང་གསང་སྔགས་དངཿ རིགས་སྔགས་དམོད་པ་
འབྲུག་ལྟར་ལྡིརཿ སྒྲ་ལས་འོད་བྱུང་སྟོང་ཁམས་ཁེངསཿ ཕ་རོལ་བྱད་ཕུར་དམག་ཚོགས་དངཿ སྡེ་བརྒྱད་ལོག་འདྲེན་ཐལ་བར་བརླགཿ འཁོར་འདས་བྱང་ཆུབ་བ་སེམས་ཀྱི་ཀློངཿ གཉིས་སྣང་དགྲ་འདྲེ་དབྱིངས་སུ་ཡལཿ ཞེས་གསལ་ལཿ རྩ་སྔགས་ཤམ་བུརཿ ནྲྀ་ཏྲི་ཤ་ཏཱུྃ་ཨ་མུ་ཀཱ་སརྦ་ཙིཏྟ་རཱུ་པ་ད་ཧ་པ་ཙ་ཚིནྡྷ་ཧཱུྃ་ཕཊཿབྷྱོ་བཟློགཿ ཅེས་དྲག་སྔགས་གནམ་ཐོག་བབས་པ་བཞིན་བཟླ་བར་བྱ་ཞིང་ཐུན་རྫས་ལ་ཡང་སྔགསཿ དམ་ཚིག་དག་དང་བསྐྱེད་རིམ་གསལཿ བཟླས་བརྗོད་ནུས་པ་རྫོགས་པ་ལཿ སྔགས་ཀྱི་དངོས་གྲུབ་འབྱུང་བས་སྒྲིམཿ གསུམ་པ་ལས་ལ་སྦྱོར་བ་ལཿ སྲུང་བཟློག་གཉིས་ལས་དང་པོ་ནིཿ རང་སྲུང་བཙན་པོའི་མཁར་མེད་ནཿ གོ་མེད་གཡུལ་ངོར་ཞུགས་འདྲ་བསཿ སྲུང་འཁོར་གུད་དུ་བྱུང་ལྟར་བྱཿགཉིས་པ་གསད་བཟློག་རྣམ་གཉིས་ལསཿ དང་པོ་བསད་པའི་རིམ་པ་ལཿ དྲུག་ལས་དང་པོ་དམིགས་བྱ་བསྐྱེད་པ་ནིཿ ཧཱུྃཿརྟེན་དང་བརྟེན་པ་ཡོངས་རྫོགས་ཀྱིཿའོག་གཞི་རླུང་གི་དཀྱིལ་འཁོར་ལཿ འབྱུང་བ་དགྲ་གཤེད་འཐབས་པའི་ཀློངཿ གཤིན་རྗེའི་ལྕགས་མཁར་བཅུ་དྲུག་གིསཿ བསྐོར་བའི་བྲུབ་ཁུང་ཁ་རུབ་ལཿ གཏིང་ཟབ་གཏི་མུན་མུན་ནག་ཀློངཿ ནྲྀ་དང་ཏྲི་ལས་དམིགས་བྱའི་གཟུགསཿ ཤིན་ཏུ་རིད་ཅིང་ཉམ་ཐག་པའིཿཡན་ལག་ལྕགས་སྒྲོག་དྲྭ་བས་བཅིངསཿ སྙིང་ཁར་རྩིབས་བཅུའི་མར་སྣ་ཟུགཿ སྟེང་ན་བྱ་རོག་འུག་པ་འཐབསཿ དྲི་ངན་འཐུལ་བས་སྐྱོབ་པའི་ལྷཿ རང་
དབང་མེད་པར་བྱེར་བྱེད་པའིཿཁ་ཁྱེར་གཤིན་རྗེའི་ཀིང་ཀང་དཔུངཿ འགུགས་འཆིང་སྡོམ་མྱོས་ལས་ལ་བརྩོནཿ གཉིས་པ་དགུག་པ་ནིཿ ཛཿདཀོན་མཆོག་གསུམ་གྱི་བདེན་པ་དངཿ ཡི་དམ་ལྷ་ཡི་ཏིང་འཛིན་དངཿ སྔགས་རྒོད་རྫས་ཀྱི་ནུས་པ་ཡིསཿ སངས་རྒྱས་བསྟན་པ་བཤིག་པ་དངཿ བླ་མ་དཀོན་མཆོག་དབུ་འཕང་སྨདཿ སེམས་ཅན་ཡོངས་ཀྱི་བདེ་སྐྱིད་འཇོམསཿ ཆོས་ལྡན་རྒྱལ་པོའི་རྒྱལ་སྲིད་འཕྲོགཿ སྒོས་སུ་རྣལ་འབྱོར་ཉེས་མེད་ལཿ སྔ་དགྲ་ལག་བརྡར་ཕྱི་དགྲ་སེམསཿ ད་དགྲ་དོ་བརྡོ་ཕོད་འཛུགས་ཞིངཿ ལེགས་བསུབས་ཉེས་སྒྲོགས་དུག་སྦྱོར་གཤོམཿ ཁ་དཀར་ཞེ་ནག་ལོག་འདྲེན་དམོདཿ ལས་འབྲས་ཁྱད་གསོད་སྲུང་མར་གཤེཿདམིགས་ཡུལ་རཱུ་པ་བཅས་པ་འདིའིཿརྣམ་ཤེས་བླ་སྲོག་ཚེ་དང་བཅསཿ ཁམས་གསུམ་ས་དགུ་གར་གནས་ཀྱངཿ ཀིང་ཀང་མོན་པའི་དམག་ཚོགས་རྣམསཿ ག་ཏེ་ག་ཏེ་བླ་ལ་ཁྱེཿལྕགས་ཀྱུ་ཅན་གྱིས་སྙིང་ནས་ཟུངཿ ཞགས་པ་ཅན་གྱིས་རྐེ་ནས་ཆིངསཿ ལྕགས་སྒྲོག་ཅན་གྱིས་ཡན་ལག་སྡོམསཿ དྲིལ་བུས་བརྟན་པ་བྲལ་བར་གྱིསཿ ལྷ་དང་ཕྲོལ་ཅིག་པྲ་ཝེ་ཤཿཞེས་འགུགས་འདྲེན་བྱས་ལཿ ཡ་མ་རཱ་ཛ་ག་ཏེ་ག་ཏེ་ནྲྀ་ཏྲི་ཤ་ཏྲུཾ་བླ་ཤ་ཐུམ་རིལ་ཛཿཧཱུྃ་བཾ་ཧོཿ ཞེས་བླ་རྟགས་མ་མཐོང་བར་དུ་བཟླ་ཞིང་སྐབས་མཚམས་སུ་བདེན་སྟོབས་
བརྗོདཿ དེ་ཡང་ཕ་རོལ་དམག་དཔུང་བཟློག་པ་གཙོ་བོར་ཡིན་ན་ཐུན་མཚམས་ཐམས་ཅད་དུ་སངས་རྒྱས་སྟོང་དང་དྲང་སྲོང་གི་དམོད་པ་ལ་བརྟེན་ནསཿ བསོད་ནམས་དང་ཀླུང་རྟ་སྡུབ་པའི་སྔགས་དང་ཏིང་ངེ་འཛིན་ཟབ་གནད་ཅན་བླ་མའི་ཞལ་ལས་ཤེས་པར་བྱའོཿགསུམ་པ་བླ་རྟགས་བྱུང་ནས་ཚེ་ཁྲུས་ཀྱི་དགོངས་པས་གནས་སྦར་བ་ནིཿ ཕུར་བུ་སྙིང་གར་གཟུགས་ཅིངཿ ཧཱུྃཿསྙིང་རྗེས་བསྒྲལ་བའི་དམ་ཚིག་ནིཿ གསད་ཅིང་མནན་པ་མ་ཡིན་ཏེཿཕུང་པོ་རྡོ་རྗེས་གཏམས་བྱས་ནསཿ རྣམ་པར་ཤེས་པ་རྡོ་རྗེར་སྒོམཿ བཛྲ་ཀཱི་ལི་ཀཱི་ལི་ཡ་དང་རུ་ལུ་རུ་ལུ་བརྗོད་ཅིང་ཚེ་ལུང་ཁྲུས་ལུང་གི་དགོངས་པ་དང་ལྡན་པས་རྣམ་པར་ཤེས་པ་གཙོ་བོའི་ཐུགས་ཀར་སྦརཿ བཞི་པ་ཚོགས་དྲུག་གི་གནད་གཅོད་པ་ནིཿ ཧཱུྃཿདབྱིངས་ན་བཞུགས་པའི་རྒྱལ་བ་ཞི་ཁྲོ་དངཿ ཁྱད་པར་བདུད་འདུལ་སེང་གེའི་གདོངས་པ་ཅནཿ དྲང་སྲོང་ཁྲོས་པ་དམ་ཅན་རྒྱ་མཚོའི་ཚོགསཿ ཐུགས་དམ་བསྐུལ་ལོ་དྲག་པོའི་ཕྲིན་ལས་མཛོདཿ ཞིང་བཅུ་ཚང་བའི་དམ་ཉམས་དགྲ་བོ་འདིའིཿཕུང་པོ་ཁམས་དང་སྐྱེ་མཆེད་འབྲེལ་བ་ཡིཿརྟེན་དང་བརྟེན་པ་ཆོས་ཀྱི་དབྱིངས་སུ་སྒྲོལཿ རྩ་སྔགས་དང་ལོག་ཏྲིའི་སྔགས་ནོད་བཟླ་ཞིངཿ ཕུར་པ་ཚོགས་དྲུག་གི་རྟེན་སོ་སོར་བཏབཿ ལྔ་པ་བསད་གྲིས་གཏུབ་ཅིང་ཐོ་ཐུན་དབབ་པ་ནིཿ ཧཱུྃཿདྲང་སྲོང་ཁྲོས་པའི་མཚོན་ཆ་ནིཿ རལ་གྲིས་ཚལ་པ་སྟོང་དུ་བཀསཿ ཐོ་བས་རྡུལ་ཕྲན་ཕྱེ་
མར་འཐགཿ ཐུན་རྫས་མེ་སྟག་འཕྲོ་བ་ཡིསཿ བསམ་སྦྱོར་ངན་པ་རང་གཤེད་དུཿ འཁོར་ནས་རང་མཚོན་རང་ལ་ཟུགཿ རང་སྡེ་རང་གིས་བརླག་བྱས་ནསཿ དམིགས་པ་མེད་པའི་ཀློང་དུ་ཕཊཿཅེས་སྔགས་གོང་མ་བཟླ་བཞིན་པར་གཟུགས་ཕུང་རྡུལ་དུ་བརླག་པར་བྱའོཿདྲུག་པ་བསྟབ་པ་ནིཿ ཧཱུྃཿདགྲ་བགེགས་བསྒྲལ་བའི་ཤ་ཁྲག་རུསཿ ཕུང་པོ་ཁམས་དང་སྐྱེ་མཆེད་དངཿ ཡུལ་མཁར་གནས་རིས་སྡེ་དང་བཅསཿ ཁྲོ་རྒྱལ་འབར་བའི་ཞལ་དུ་སྟོབཿ དགྱེས་པར་རོལ་ཅིག་ཁ་རཾ་ཁཱ་ཧིཿརྣམ་ཤེས་ཆོས་ཀྱི་དབྱིངས་སུ་དྲོངསཿ གཉིས་པ་བཟློག་པའི་རིམ་པ་ལཿ དང་པོ་སྤྱིར་བསྐུལ་བ་ནིཿ ཧཱུྃཿཞི་བ་ཆོས་ཀྱི་དབྱིབས་ལས་མ་གཡོས་ཀྱངཿ འགྲོ་བ་འདུལ་ཕྱིར་ཞི་དང་ཁྲོ་བོའི་སྐུཿ དུས་གསུམ་ཕྱོགས་བཅུའི་རྒྱལ་བ་སྲས་བཅས་དངཿ དཔལ་མགོན་བདུན་ཅུ་སྲུང་མ་དབྱིངས་ནས་བཞེངསཿ བདེ་གཤེགས་སྙིང་པོར་རང་བཞིན་མེད་པ་ལསཿ རང་རང་གློ་བུར་རྟོག་པས་འཁྲུལ་བའི་འགྲོཿདུག་ལྔ་རང་རྒྱུད་ཞེན་པའི་འཁྲུལ་འཁོར་གྱིསཿ འགྲོ་བ་རྒྱུད་ལྔའི་གནས་སུ་འཁོར་བྱས་ནསཿ ལས་ངན་སྦྱོང་བའི་རྣམ་སྨིན་རྒྱུ་འབྲས་ལསཿ བྱུང་བའི་ནད་མཚོད་དམག་འཁྲུགས་མུ་གེ་གདོནཿ ལྟ་བ་ངན་དང་བདུད་ཀྱི་བློ་བསྒྱུར་ནསཿ རང་གཞན་སྡུག་ལ་
སྦྱོར་བའི་རྒྱུ་འབྲས་རྣམསཿ མངོན་སྤྱོད་དྲག་པོའི་རོལ་པས་ཚར་གཅོད་དེཿསྐྱེ་མེད་དབྱིངས་ལ་སྦྱོར་བའི་ཕྲིན་ལས་མཛོདཿ གཉིས་པ་སྒོས་སུ་བསྐུལ་བ་ནིཿ ཧཱུྃཿརྣམ་ཐར་སྒོ་གསུམ་རྡོ་རྗེ་བཙུན་མོའི་དབྱིངསཿ གཞི་ལམ་འབྲས་བུ་རྫོགས་པའི་ཕོ་བྲང་ནསཿ དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམཿ ཡེ་ཤེས་མཁའ་འགྲོ་སེང་གེའི་གདོང་པ་ཅནཿ བདུད་བཞིའི་སྟེང་ན་འགྱིང་བས་སྒེག་སྒེག་འདྲཿམགོ་ཕྲེང་རྒྱན་དུ་འཆང་བས་དཔའ་དཔའ་འདྲཿསེང་ཞལ་ནམ་མཁར་གདངས་པས་འཇིགས་འཇིགས་འདྲཿམཆེ་བ་ཟངས་ཡག་འབར་བས་དགོད་དགོད་འདྲཿལྗགས་དམར་གློག་ལྟར་འཁྱུག་པས་གཤེ་གཤེ་འདྲཿཨ་ཀའི་གད་རྒྱངས་སྒྲོགས་པས་དྲག་ཤུལ་གསུངཿ འགྲོ་བ་མགོན་མེད་རྣམས་ལ་ཐུགས་བརྩེ་ཞིངཿ ལོག་འདྲེན་གཡུལ་ངོ་བཟློག་ལ་ཤིན་ཏུ་རྔམསཿ ཀུན་ཀྱང་རྟོག་བྲལ་བདེ་བ་ཆེན་པོར་ཞིཿགར་དགུའི་རོལ་པས་ས་དགུ་དབྱིངས་སུ་སྒྲོལཿ ཧཱུྃཿཁམས་དང་སྐྱེ་མཆེད་གནས་སུ་དག་པ་ལསཿ ཡེ་ཤེས་ལུས་ཅན་རྡོ་རྗེ་བཙུན་མོའི་སྐུསཿ གཏི་མུག་ལས་གྱུར་གླང་པོའི་འཇིགས་པ་དངཿ རྨོངས་པས་ལས་འབྲས་ཁྱད་གསོད་བྱད་ཕུར་གདོནཿ དཔག་དཔུང་གཡུལ་གཤོམ་རང་གཤེད་རང་ལ་བཟློགཿ སྐུ་
ལ་ཡེ་ཤེས་མེ་དཔུང་འབར་བ་ཡིསཿ ཞེ་སྡང་ལས་གྱུར་མེ་ཡི་འཇིགས་པ་དངཿ ཕན་ཚུན་འཐབ་རྩོད་གཡུལ་ངོར་འཇུག་པའི་སེམསཿ བྱད་ཕུར་སྲི་སྐེག་ཐན་ལྟས་ངན་པ་ཟློགཿ སྐུ་ལ་སེང་གེའི་སློག་པ་གསོལ་བ་ཡིསཿ ང་རྒྱལ་ལས་གྱུར་སེང་གེའི་འཇིགས་པ་དངཿ བཅོམ་དང་དྲེགས་པས་རྒྱགས་པའི་གཡུལ་ངོ་ཡིསཿ འགྲོ་བའི་བདེ་སྐྱིད་འཕྲོག་པ་ཐམས་ཅད་ཟློགཿ ཕྱག་གཡས་གྲི་གུག་ནམ་མཁར་འཕྱར་བ་ཡིསཿ ཀླ་ཀློའི་ལྟ་བ་ངན་པ་ལས་གྱུར་བའིཿདམག་དང་ཆོམ་པོས་འཚེ་བའི་འཇིགས་པ་དངཿ བྱད་ཕུར་ངན་སྔགས་བཀྲ་མི་ཤིས་པ་བཟློགཿ ཕྱག་གཡོན་ཐོད་པ་ཁྲག་གིས་བཀང་བ་ཡིསཿ འདོད་པ་ལས་བྱུང་ཆུ་བོའི་འཇིགས་པ་དངཿ གཞན་འབྱོར་དཔལ་ལ་རྔམས་པའི་ལྟ་བ་ཡིསཿ འགྱེད་དང་རྩོད་པའི་བསམ་སྦྱོར་ངན་པ་བཟློགཿ རྡོ་རྗེ་ཁ་ཊྭཱྃ་མཆན་དུ་བརྟེན་པ་ཡིསཿ ཕྲག་དོག་ལས་གྱུར་དུག་སྦྲུལ་འཇིགས་པ་དངཿ གཞན་འབྱོར་དཔལ་ལ་མི་བཟོད་འཁུ་བ་ཡིསཿ རང་གཞན་སྡུག་ལ་སྦྱོར་བའི་གཡུལ་ངོར་ཟློགཿ ཕྱག་རྒྱ་ལྔ་ཡིས་སྐུ་ལ་བརྒྱན་པ་ཡིསཿ སེར་སྣ་ལས་གྱུར་ལྕགས་སྒྲོགས་འཇིགས་པ་དངཿ རང་དབང་བསྡམས་ཤིང་གཞན་དབང་འཕྲོག་པའི་སེམསཿ ཆོམ་པོས་འཚེ་དང་བཀྲ་
མི་ཤིས་པ་ཟློགཿ སྐུ་ལ་རུས་པའི་རྒྱན་དྲུག་གསོལ་བ་ཡིསཿ ཐེ་ཚོམ་ལས་གྱུར་ཤ་ཟའི་འཇིགས་པ་དངཿ འབྱུང་པོས་རྒྱུད་བརླམས་བརླང་པོར་སྤྱོད་པ་ཡིསཿ བསྟན་འགྲོའི་ཕན་བདེ་བཤིག་པ་ཐམས་ཅད་ཟློགཿ ཧཱུྃཿཡུལ་དང་དབང་ཤེས་འབྲེལ་བ་ཚར་གཅོད་ཅིངཿ ཚོགས་དྲུག་གནས་སུ་དག་པའི་ཕྲ་མེན་དྲུགཿ ཉོན་མོངས་ཉེ་བའི་ཉོན་མོངས་ལས་སྐྱེས་པའིཿསེམས་བྱུང་རྒྱུ་འབྲས་གཅོད་ལ་དཔའ་བས་ནཿ ཕུང་པོ་ཁམས་དང་ཚོགས་བརྒྱད་ལས་གྱུར་བའིཿསྲིད་པ་གསུམ་གྱི་རྒུད་པ་ཐམས་ཅད་དངཿ ཆག་ཆེ་ཉམ་ང་ནད་མཚོན་མུ་གེ་གདོནཿ ལོ་ཉེས་སད་སེར་བཙའ་ཐན་ཤྭ་ལོག་དངཿ ཐན་ལྟས་རྟགས་དང་རྨི་ལམ་མཚན་མ་ངནཿ ཕན་ཚུན་འཐབ་རྩོད་བན་བོན་སྔགས་པའི་བྱདཿ མུ་སྟེགས་ཕྲ་མེན་ངན་སྔགས་སྦྱོར་བ་དངཿ དུས་མིན་འཆི་དང་རྨི་ལམ་ངན་པ་སོགསཿ བཀྲ་མི་ཤིས་པའི་དངོས་པོ་ཐམས་ཅད་ཀུནཿ གཅིག་ཏུ་བསྡུས་ནས་ཞིང་བཅུ་ཚང་བ་ཡིསཿ དམ་ཉམས་དགྲ་དང་གནོད་པའི་བགེགས་ལ་བསྒྱུརཿ ཟློག་སྒྱུར་བཅོལ་བའི་ཕྲིན་ལས་དུས་ལ་བབཿ ཧཱུྃཿཕྱི་རིམ་པད་འདབ་སོ་གཉིས་ནསཿ རྒྱ་མཚོའི་འགྲམ་ལ་སོགས་པ་ཡིཿགནས་ལ་དབང་བྱེད་མཁའ་འགྲོ་མཿ སུམ་ཅུ་རྩ་གཉིས་སྐུ་བཞེངས་ཤིགཿ དགའ་བྱེད་མ་དང་འདྲེན་བྱེད་མཿ
གསོད་བྱེད་མ་དང་སྤོར་བྱེད་མཿ འབར་བྱེད་མ་དང་གཟི་བརྗིད་མཿ ཁྲོ་གཉེར་མ་དང་འཇོམས་བྱེད་མཿ ཆགས་བྱེད་མ་དང་ཆགས་བྲལ་མཿ འཁོར་ལོ་མ་དང་རྒྱས་འདེབས་མཿ སྣ་ཚོགས་ལུས་འཆང་སྲུང་བ་མོཿ གནོད་སྦྱིན་མ་དང་ཡང་དག་འཕྲོགཿ བྱ་རོག་གདོང་དང་འཇིགས་བྱེད་མཿ བཞད་གདོང་མ་དང་འུག་གདོང་མཿ ཁྱི་གདོང་མ་དང་ཕག་གདོང་མཿ རྔ་མོའི་གདོང་དང་བོང་བུའི་གདོངཿ འཇོམས་བྱེད་མ་དང་རུས་འཆའ་མཿ སེང་གདོང་མ་དང་རུས་ཕྲེང་ཅནཿ བུམ་སྣ་མ་དང་རྣམ་འཇོམས་མཿ དྷ་ཤ་གྷྲི་ཝ་འབོད་སྒྲོགས་མཿ ཀུན་ཀྱང་ཤིན་ཏུ་ཁྲོས་པའི་གཟུགསཿ ཕྱག་མཚན་རྣམ་པ་སྣ་ཚོགས་འཛིནཿ གསོད་ལ་རྒྱུག་ཅིང་གཅོད་ལ་རྔམསཿ མཐུ་རྩལ་ནམ་མཁའི་གློག་ལས་མྱུརཿ བསྟན་པ་བཤིག་པའི་དགྲ་བོ་ལཿ མཐུ་རྩལ་རྔམ་པའི་དུས་ལ་བབཿ གཡུལ་གཤོམ་བྱེད་པའི་དམག་དཔོན་དངཿ དམག་དཔུང་འཇོམས་པའི་དུས་ལ་བབཿ ངན་སྔགས་བྱེད་པའི་མུ་སྟེགས་དངཿ བན་བོན་འཇོམས་པའི་དུས་ལ་བབཿ བསྐུལ་ལོ་སེམས་ཅན་དོན་ལ་བསྐུལཿ མཛོད་ཅིག་དྲག་པོའི་ཕྲིན་ལས་མཛོདཿ ཧཱུྃཿསྒྲོལ་གིང་བཅོ་བརྒྱད་ཐུགས་དམ་བསྐུལཿ ཀིང་ཀང་རྡོ་རྗེ་འབྱུང་པོ་དངཿ རྡོ་རྗེ་གནོད་སྦྱིན་སྤྱང་ཀི་དངཿ རྡོ་རྗེ་གཤིན་
རྗེ་རོལ་པ་དངཿ རྡོ་རྗེ་འཆི་བདག་དུས་མཚམས་དངཿ རྡོ་རྗེ་རོལ་པ་འཆི་བདག་དངཿ རྡོ་རྗེ་དུས་མཚམས་རོ་ལངས་དངཿ རྡོ་རྗེ་འཇོམས་པ་གིང་ལྕམ་དངཿ རྡོ་རྗེ་དབང་བསྐུར་འཕྲུལ་མོ་ཆེཿརྡོ་རྗེ་གློག་འགྱུ་མཐུ་མོ་ཆེཿརྡོ་རྗེ་རྣ་ཉན་སྒྲོལ་བྱེད་མཿ རྡོ་རྗེ་ཟ་བྱེད་མྱོང་བྱེད་ཏེཿབཀའ་སྡོད་གཉིས་བཅས་ལྕམ་དྲལ་དངཿ གིང་ལང་དབང་ཕྱུག་བསྟན་མའི་ཚོགསཿ ཀུན་ཀྱང་ཤིན་ཏུ་ཁྲོས་པའི་གཟུགསཿ ཕྱག་མཚན་རྣམ་པ་སྣ་ཚོགས་འཛིནཿ གསོད་ལ་རྒྱུག་ཅིང་གཅོད་ལ་རྔམསཿ མཐུ་རྩལ་ནམ་མཁའི་གློག་ལས་མྱུརཿ བསྟན་པ་བཤིག་པའི་དགྲ་བོ་ལཿ མཐུ་རྩལ་རྔམ་པའི་དུས་ལ་བབཿ གཡུལ་གཤོམ་བྱེད་པའི་དམག་དཔོན་དངཿ དམག་དཔུང་འཇོམས་པའི་དུས་ལ་བབཿ ངན་སྔགས་བྱེད་པའི་མུ་སྟེགས་དངཿ བན་བོན་འཇོམས་པའི་དུས་ལ་བབཿ བསྐུལ་ལོ་སེམས་ཅན་དོན་ལ་བསྐུལཿ མཛོད་ཅིག་དྲག་པོའི་ཕྲིན་ལས་མཛོདཿ ཧཱུྃཿདྲན་པ་ཉེ་བར་བཞག་པ་ནས་བཟུང་སྟེཿ རྣམ་པ་ཐམས་ཅད་རྫོགས་པའི་ཆོས་སྤྲིན་ཏོགཿ བལྟར་མི་མངོན་པ་འོད་ཀྱི་ཕོ་བྲང་ནསཿ བདེ་གཤེགས་ཀུན་ཀྱི་མཐུ་སྟོབས་གཅིག་བསྡུས་པཿ རིགས་སྔགས་བདག་མོ་གཙུག་ཏོར་གདུགས་དཀར་དངཿ རྡོ་རྗེ་ཉི་མ་སྣང་བའི་གཞལ་ཡས་ནསཿ
གཞན་གྱིས་མི་ཐུབ་ལྷ་མོ་འོད་ཟེར་ཅནཿ ཡེ་ཤེས་ཟླ་བ་གསལ་བའི་དཀྱིལ་འཁོར་ནསཿ བཞད་པ་བརྒྱད་ལྡན་ཁྲོ་གཉེར་ཅན་མ་སྟེཿརིགས་སྔགས་བདག་མོ་འབུམ་སྡེའི་ལྷ་ཚོགས་རྣམསཿ འགྲོ་ཀུན་སྡུག་བསྔལ་ཚོར་བས་ཉམ་ཐག་ཚེཿཐུགས་དམ་བསྐུལ་ལོ་སེམས་ཅན་དོན་ལ་བཞེངསཿ འཇིགས་པ་ཆེན་པོ་བརྒྱད་དང་བཅུ་དྲུག་དངཿ བྱད་གདོན་གཡུལ་ངོ་ཟློག་པའི་དུས་ལ་བབཿ ཧཱུྃཿས་བཅུ་ཡོངས་རྫོགས་ཆོས་གྱི་འཁོར་ལོ་ནསཿ བསྐལ་བཟང་འདི་ལ་སྤང་རྟོགས་མཐར་ཕྱིན་པའིཿསྟོབས་བཅུ་མི་འཇིགས་རྣམ་བཞིའི་མཐུ་སྟོབས་ཅནཿ བསྐལ་བཟང་སངས་རྒྱས་སྟོང་དང་རྒྱལ་སྲས་ཚོགསཿ རྣམ་པ་བཞི་ཡི་འཁོར་དང་བཅས་པ་རྣམསཿ འགྲོ་ཀུན་སྡུག་བསྔལ་ཚོར་བས་ཉམ་ཐག་ཚེཿཐུགས་དམ་བསྐུལ་ལོ་སེམས་ཅན་དོན་ལ་བཞེངསཿ འཇིགས་པ་ཆེན་པོ་བརྒྱད་དང་བཅུ་དྲུག་དངཿ བྱད་གདོན་གཡུལ་ངོ་ཟློག་པའི་དུས་ལ་བབཿ ཧཱུྃཿཞལ་དང་གཉིས་མེད་བྲེ་ཡི་ཕོ་བྲང་ནསཿ བདེ་གཤེགས་ཡོངས་རྫོགས་གར་དགུའི་རོལ་པ་ཅནཿ འཁོར་འདས་ཀུན་ཀྱི་རྗེ་བཙུན་ཆེ་མཆོག་ནིཿ རྩ་ཞལ་ཉེར་གཅིག་ཕྱག་ནི་ཞེ་གཉིས་ནཿ ཞི་བ་རྡོ་རྗེ་དབྱིངས་ཀྱི་ལྷ་ཚོགས་བསྣམསཿ རང་རང་རིགས་ཀྱི་སྤྲུལ་པ་བསམ་མི་ཁྱབཿ སྐུ་མཆོག་འཇམ་
དཔལ་ཁྲོ་བོའི་དཀྱིལ་འཁོར་དངཿ གར་གྱི་དབང་ཕྱུག་པད་མ་གསུང་གི་ཚོགསཿ ཐུགས་ཀྱི་བདག་ཉིད་ཡང་དག་ཧེ་རུ་ཀཿཕྲིན་ལས་རྡོ་རྗེ་གཞོན་ནུ་གཙོ་དང་འཁོརཿ མ་མོ་རྦོད་གཏོང་རིག་འཛིན་སྡེ་བཞི་དངཿ འཇིག་རྟེན་མཆོད་བསྟོད་དམོད་པ་དྲག་སྔགས་ཚོགསཿ བདུན་བརྒྱ་ཉེར་ལྔ་བཀའ་སྡོད་དམ་ཅན་རྣམསཿ འགྲོ་ཀུན་སྡུག་བསྔལ་ཚོར་བས་ཉམ་ཐག་ཚེཿཐུགས་དམ་བསྐུལ་ལོ་སེམས་ཅན་དོན་ལ་བཞེངསཿ འཇིགས་པ་ཆེན་པོ་བརྒྱད་དང་བཅུ་དྲུག་དངཿ བྱད་གདོན་གཡུལ་ངོ་ཟློག་པའི་དུས་ལ་བབཿ ཧཱུྃཿརྫུ་འཕྲུལ་རྐང་བའི་བང་རིམ་གཞལ་མེད་ནསཿ དྲང་སྲོང་ཁྲོས་པ་རྡོ་རྗེ་གཙུག་ཏོར་ཅནཿ དབུ་སྟོང་ཕྱག་སྟོང་ལོག་ཏྲི་པཱ་ལའི་སྒྲཿའུར་འུར་ཆེམ་ཆེམ་འབྲུག་སྟོང་ལྡིར་བ་བཞིནཿ བདེན་ཚིག་དམོད་པས་ལོག་འདྲེན་ཚར་གཅོད་པའིཿདྲང་སྲོང་བྱེ་བ་འབུམ་སྡེའི་འཁོར་དང་བཅསཿ གནམ་ས་ཁ་རྡེབ་ལྟ་བུའི་ཐལ་མོའི་བརཿ དགྲ་བགེགས་འཐག་ཅིང་རལ་གྲི་ཐོ་བ་དངཿ འཁོར་ལོ་གཏུན་ཤིང་དགྲ་སྟ་ཀླད་ལ་བསྐོརཿ ཐ་ནག་སྐུ་གདུང་ནག་པོའི་མེ་སྟག་གིསཿ ལོག་འདྲེན་རྣམ་ཤེས་ཚོགས་བརྒྱད་གནོད་ཅིང་གཟིརཿ འགྲོ་ཀུན་སྡུག་བསྔལ་ཚོར་བས་ཉམ་ཐག་ཚེཿ ཐུགས་དམ་བསྐུལ་ལོ་སེམས་ཅན་དོན་ལ་བཞེངསཿ
འཇིག་པ་ཆེན་པོ་བརྒྱད་དང་བཅུ་དྲུག་དངཿ བྱད་གདོན་གཡུལ་ངོ་ཟློག་པའི་དུས་ལ་བབཿ གསུམ་པ་ཐུན་གཏོར་འཕངས་པ་ནིཿ ཧཱུྃཿརྣམ་པ་ཉི་ཤུ་བྱང་ཆུབ་པའིཿབདེ་གཤེགས་ཐུགས་ཀྱི་དཀྱིལ་འཁོར་ནསཿ ཡི་དམ་རྒྱལ་བ་ཞི་ཁྲོ་དངཿ བདུད་བཞི་བསྣོལ་བའི་གདན་སྟེང་ནསཿ བདུད་ཀྱི་བདུད་ཆེན་སེང་གེའི་གདོངཿ ཕྲ་མེན་མཁའ་འགྲོའི་ལྷ་ཚོགས་དངཿ དཔལ་ལྡན་མ་མགོན་ལྕམ་དྲལ་སྟེཿམགོན་པོ་བདུན་ཅུ་རྩ་ལྔའི་ཚོགསཿ ཐུགས་དམ་བསྐུལ་ལོ་དབྱིངས་ནས་བཞེངསཿ བདེན་པའི་མཐུ་དང་དཔུང་སྐྱེད་ལཿ སངས་རྒྱས་བསྟན་པ་བཤིག་པ་དངཿ བླ་མ་དཀོན་མཆོག་དབུ་འཕང་སྨདཿ འགྲོ་བའི་བདེ་སྐྱིད་འཕྲོག་པ་སོགསཿ ཞིང་བཅུ་ཚང་བའི་དམ་ཉམས་དངཿ ཡོངས་ལ་འཚེ་བའི་དགྲ་དང་བགེགསཿ དམར་གཏོར་ཁྲག་ཞག་འཁྱིལ་པའི་ཀློངཿ ཁུག་ཅིག་ཤ་ཁྲག་དྲོད་དབུགས་རོལཿ ཛཿབདེ་གཤེགས་འདུས་པའི་གཏོར་ཟོར་འདིཿབསྟན་པ་བཤིག་པའི་དགྲ་བགེགས་ལཿ དམིགས་ཀྱི་ལྷ་སྲིན་གཉན་པོ་རྣམསཿ ཀོ་ལོང་མ་སྡོམ་ཟོར་ལམ་ཕྱེསཿ ཟོར་ཆེན་རླུང་གིས་བསྐྱོད་ཙ་ནཿ འབྲོང་ཆེན་ངར་མའི་ཆོ་འདྲ་སྟེཿམཚོན་ཆ་སྣ་ཚོགས་རྭ་ལྟར་ཟིངཿ ཁྱུང་ཆེན་ངར་མའི་སྡེར་འདྲ་སྟེཿ
གང་ལ་དམིགས་པའི་སྟེང་དུ་འབེབསཿ དམིགས་ལས་གཞན་དུ་མ་ལྡོག་ཅིགཿ ཇི་ལྟར་དམིགས་ན་ཕ་རོལ་ཐུསཿ མེ་ལ་ཧོམ་དང་ཆུ་ལ་གཏདཿ ས་ལ་གཤོར་དང་རླུང་ལ་ཟོརཿ དྲང་སྲོང་ཁྲོས་པའི་དམོད་པ་དངཿ བན་དྷེའི་མདོ་དང་བོན་པོའི་བཙོཿ གྱིམ་ཤང་གཤེད་སྡེབས་དགྲ་གཤེད་བསྐོརཿ དབྱེ་བསྐྲད་རྨོངས་རེངས་བསད་དང་བཅིངསཿ མུ་སྟེགས་ཕྲ་མེན་ངན་སྔགས་དངཿ བུད་མེད་དམོད་ངན་སྡེ་བརྒྱད་བྱདཿ གཤིན་རྗེའི་འཁོར་ལོ་མ་མོའི་རིམསཿ གཟའ་ཀླུའི་དུག་དང་བདུད་བཙན་ཁྲམཿ རྒྱལ་པོའི་སྨྱོ་འབོགས་དམུའི་གནམ་རྡོཿགྲིབ་གནོན་སྨྱོ་བྱེད་བརྗེ་བྱེད་གདོནཿ སྐེམ་བྱེད་རོགས་ལངས་ལ་སོགས་པཿགདོན་རིགས་སུམ་བརྒྱ་དྲུག་ཅུ་སོགསཿ དེ་ལས་བྱུང་བའི་སད་སེར་དངཿ རི་རུད་ཤྭ་ལོག་ས་གཡོས་དངཿ ཐན་ལྟས་རྟགས་མཚན་རྨི་ལམ་ངནཿ འཇིག་པ་བརྒྱད་དང་བཅུ་དྲུག་སོགསཿ བཀྲ་མི་ཤིས་པའི་དངོས་པོ་ཀུནཿ གཏོར་ཟོར་འདི་ལ་བསྟིམས་བྱས་ནསཿ སླར་ལ་རང་གཤེད་རང་ལ་ཕོབཿ བྷྱོ་བྷྱོ་སྡང་བའི་དགྲ་ལ་བྷྱོཿབྷྱོ་བྷྱོ་གནོད་པའི་བགེགས་ལ་བྷྱོཿབསམ་སྦྱོར་ངན་པའི་སྟེང་དུ་བྷྱོཿབདག་སྲུང་མི་མཐུན་དགྲ་ལ་སྒྱུརཿ ཞེས་དགྲ་ཕྱོགས་སུ་འཕངསཿ གལ་ཏེ་དམག་བཟློག་གལ་ཆེན་དང་འབྲེལ་ན་སྐབས་འདིར་མ་མགོན་
གཡུལ་མདོས་སྦྲེལ་བ་མན་ངག་ཡིན་ནོཿ གསུམ་པ་རྗེས་ཀྱི་རིམ་པ་ལཿ ཆོས་སྲུང་གི་སྐོང་བ་རྒྱས་པར་བྱཿདེ་ནས་ཚོགས་མཆོད་ནས་བཟུང་རྗེས་ཆོག་རྣམས་དཀྱུས་བཞིན་བྱཿདེ་ལྟ་བུས་བདུན་ཕྲག་ལ་སོགས་བསྒྲུབས་རྗེས་ཉིན་ཐ་མའི་ཚེ་ལྷག་མའི་རྗེས་སུ་སྒོ་དབྱེ་བྱ་བ་ནིཿ བླ་གབ་མེད་པའི་སར་ཕྱིན་ལ་ལམ་གཏོར་ལ་ཆབ་བྲནཿ གསེར་སྐྱེམས་བཤམ་ལཿ ཧཱུྃཿདབང་བོ་རྡོ་རྗེ་ཅན་ལ་སོགསཿ ཕྱོགས་སྐྱོང་ཆེན་པོ་བཅུ་རྣམས་དངཿ རྒྱལ་ཆེན་བཞི་སོགས་གདོན་གྱི་བདགཿ རང་རང་འཁོར་དང་བཅས་པ་དངཿ གནམ་སའི་སྒྲ་གཅན་སའི་ལྷ་མོཿ དུས་མཚན་ཐུན་ཕྱེད་རཱ་ཧུ་དངཿ བིཥྟི་དུས་ལ་དབང་བའི་ལྷཿརྟག་ཆགས་ཡུལ་ལྷ་གཉན་པོ་རྣམསཿ གསེར་སྐྱེམས་བརྔན་སྦྱིན་འདི་བཞེས་ལཿ སྒོ་ཕྱེ་འཕྲང་སོལ་ཟོར་ལམ་ཕྱེཿསེམས་མེད་འབྱུང་བ་ཆེན་པོ་བཞིའིཿཀློང་དུ་དགྲ་བགེགས་དམིགས་བྱས་ནསཿ ཟོར་སྣ་དགྲ་ལ་གཏོད་བྱེད་ནཿ སེམས་ལྡན་ཀོ་ལོང་མི་འཚལ་ཏེཿདབུ་ཆུམ་ཞབས་བསྡུས་སྐུ་གཟུར་ལཿ རང་བཞིན་མེད་པའི་དབྱིངས་ལ་བཞུགསཿ དཀར་ཕྱོགས་སྲུང་བའི་གྲོགས་དན་མཛོདཿ ཅེས་གསེར་སྐྱེམས་ཕྱོགས་བཅུར་གཏོརཿ དེ་ནས་ཐུགས་དམ་བསྐུལཿ ཆད་མདོ་གྱེརཿ འཕངས་སར་སླེབས་པ་དངཿ སྡེ་བརྒྱད་སྤྱི་ལ་དམིགས་པའི་གསེར་སྐྱེམས་དང་གཏོར་མ་བཏངཿ ཤོག་ལིང་ཡོན་ན་ཧོམ་ཁུང་ནང་དུ་མགོ་འཇུག་ལྡོག་ལ་བཅུགཿ
དེའི་འོག་ཏུ་མེ་ཆུའི་སྣོད་ཀྱང་གཞགཿ བདེན་བརྗོད་སྔོན་དུ་འགྲོ་བས་འགུགས་འདྲེན་དྲག་པོ་བྱཿདགྲ་བོའི་ཡུལ་མཁར་ས་ཞིང་མི་ནོར་ཁ་རྗེ་དབང་ཐང་དང་བཅས་པ་ཧོམ་ཁུང་ནང་དུ་གསལ་བར་དམིགས་ལ་བྱ་གཅན་གཟན་ལ་རྦད་པ་བཞིན་དུ་ཟོར་རྫས་རྣམས་དམག་དཔུང་དང་དུག་རླངསཿ མཚོན་ཆའི་རང་བཞིན་དུ་དམིགས་ནས་ཐོག་མར་ཆོས་སྲུང་གི་གཏོར་ཟོར་དངཿ རྗེས་ལ་གོང་གི་ཐུན་གཏོར་འཕེན་ཚིག་གིསཿ གཏོར་ཟོར་མེ་ཧོམ་དུ་སྒྲུབ་པ་ནི་འབྱུང་བ་བཞིའི་ཀློང་དུ་ལས་མཐའ་སྡུད་པའི་གནད་ཟབ་མོའོཿ དེ་ནས་བསྟན་མ་སྐྱོངཿ སྲུང་འཁོར་བསྒོམཿ སྒོ་དྲུང་དུ་གཏོར་མནན་བྱཿནང་དུ་ལོག་ནས་ཚེ་གཟུངས་བཟླཿགཏང་རག་དང་དངོས་གྲུབ་ལེན་པ་སོགས་དཀྱུས་ལྟར་བྱའོཿགསང་སྔགས་ཐབས་དང་རྟེན་འབྲེལ་གྱིཿ ཆེ་བས་བསྐྱེད་རྫོགས་གཏིང་ལྡན་གྱིསཿ ཏིང་འཛིན་ལྡེ་ཁ་བསྒྱུར་ཤེས་ནཿ ལས་གང་འགྲུབ་པར་གདོན་མི་ཟཿས་མ་ཡཿརྒྱ་རྒྱ་རྒྱཿདགོངས་རྒྱཿགཏེར་རྒྱཿགསང་རྒྱཿ