ཀློང་ཆེན་སྙིང་གི་ཐིག་ལེ་ལསཿ གནད་བྱང་ཐུགས་ཀྱི་སྒྲོམ་བུ།
༂ ཀློང་ཆེན་སྙིང་གི་ཐིག་ལེ་ལསཿ གནད་བྱང་ཐུགས་ཀྱི་སྒྲོམ་བུ་བཞུགསཿ
བརྡ་ཡིག །ཀུན་བཟང་ཡངས་པའི་ཀློང་ལ་བདུདཿ འོག་མིན་སྤྲུལ་པའི་གནྡྷོ་ལཿ བར་ཁང་གཡུ་ཞལ་འབར་བ་རུཿ ཐུགས་སྲས་རྗེ་འབངས་གྲོགས་གསུམ་ལཿ ཟབ་དོན་སྙིང་གི་ཐིག་ལེའི་སྐོརཿ དམར་ཁྲིད་ལྐོག་བྱང་གནད་ཡིག་སྒྲོམཿ སྐུ་གསུམ་རང་བྱུང་མཁའ་འགྲོའི་བརྡསཿ བསྟན་ཚེ་གསེར་གཡུའི་མཎྜལ་དངཿ ཁྱད་པར་སྒོ་གསུམ་ལྟོས་མེད་ཕུལཿ དུས་གསུམ་མཁྱེན་པའི་གུ་རུ་རྗེཿ ད་ལྟ་དུས་བཟང་སྐལ་བ་ལྡནཿ མ་འོངས་ལྔ་བརྒྱའི་ཐ་མ་དེརཿ སེམས་ཅན་སྡུག་བསྔལ་དཔའ་ལ་གཡེངཿ དེ་ཚེ་བདག་ཅག་རྗེ་འབངས་གྲོགསཿ རྗེ་བཙུན་ཁྱེད་ཀྱི་ཐུགས་རྗེ་ཡིསཿ གྲོལ་བ་ཐོབ་ཀྱང་གདུལ་བྱའི་དོནཿ སྲིད་པར་ཉིང་མཚམས་ཡང་ནས་ཡངཿ སྦྱོར་ཞིང་དག་པའི་གདུལ་བྱ་ཡིཿ ཁ་ལོ་གྱེན་ལ་བསྒྱུར་འཚལ་ནཿ དེ་དུས་ད་ལྟའི་འདུས་པ་རྣམསཿ ས་ཕྱོགས་གང་དང་གང་དུ་འབྱུངཿ ས་རྟགས་བསྟན་པའི་གནས་ཚུལ་སོགསཿ ཀུན་མཁྱེན་གུ་རུས་གསུང་དུ་གསོལཿ ཞེས་ཞུས་མོས་གུས་གདུངས་བ་ལསཿ ཕྱག་གཡས་བཻ་རོ་ཙཱ་ན་དངཿ གཡོན་པ་ཇོ་མོའི་སྤྱི་བོར་བཞགཿ ཆོས་རྒྱལ་ཉིད་ལ་དབུ་གཏུགས་ནསཿ ཉོན་ཅིག་ལས་ཅན་རྗེ་འབངས་གྲོགསཿ མ་འོངས་ལྔ་བརྒྱའི་མཐའ་
མ་དེརཿ སེམས་ཅན་བསོད་ནམས་ཉམས་པའི་རྒྱུརཿ རྟེན་གསུམ་འཇིག་ཅིང་རབ་གནས་ཡལཿ ཆོས་བྱེད་དམོད་ཅིང་སྡིག་བྱེད་བསྟོདཿ ཁྱད་པར་འདྲེ་རྒོད་སྤུན་དགུ་ཡིཿ ལས་མཐའ་སྙིང་ཞུགས་ཆེ་ཚུལ་འགསཿ བླ་མར་བརྫུས་ནས་སློབ་བུ་བསླུཿ རྗེ་བོར་ཏ།ཤ་ནས་བདེ་སྐྱིད་འཕྲོགཿ བན་དེར་བརྫུས་ནས་ཆོས་བྱེད་བཅོམཿ དེ་ཚེ་གནམ་ཐིལ་སྤྲུལ་པ་ཞིགཿ ཤར་ནས་འབྱུང་སྟེ་ནུབ་ཏུ་འགྲོཿ དབུས་གཙང་གཞུང་ལ་ཆོས་སྡེ་དརཿ བསོད་ནམས་དམན་པའི་སྐྱེ་འགྲོ་ཀུནཿ དེ་ལ་འདུན་ཅིང་ཡིད་སྨོན་བྱེདཿ སྤྲེའུས་མེ་ཁྱེར་སྲིས་ལ་རྐུཿ བྱ་ཡི་མགོ་སྤུ་གནམ་ལ་བསྲེགཿ ཁྱི་ཡིས་མ་མོའི་ནད་རྐྱལ་ཁུརཿ ཕག་གིས་ས་རྐོ་རྡོ་སློག་བརྩོནཿ བྱི་བས་བློ་གཏད་སྙིང་ལ་རྐུཿ གླང་གི་རྭ་རྩེ་རྡོ་ལ་བརྡརཿ སྟག་གི་ལོ་ལ་དུག་མཚོ་ཁོལཿ གཟིག་སློག་གྱོན་པའི་གསུམ་གྱིསཿ ཊརྑ་མོ། སློང་ཞིང་ཊཅ། ཉ་རྩ་བ་འགྱེདཿ དེ་ཚེ་ང་སྤྲུལ་སྐྱེས་བུ་ལཿ ཐུགས་རྗེར་ཕྱོགས་རིས་མ་མཆིས་པསཿ ལྐོག་ཡིག་གསང་བའི་ལུང་བྱང་བཞིནཿ བསྟན་འགྲོའི་བདེ་ཐབས་ལྷུར་ལེན་གཅེསཿ དེ་དུས་ད་ལྟའི་རྗེ་འབངས་གྲོགསཿ བི་མ་རྒྱལ་སྲས་ལྷ་རྗེ་རྣམསཿ སྨོན་ལམ་ཐུགས་རྗེས་སྤྲུལ་པའི་སྲསཿ རང་བྱུང་རྡོ་རྗེ་པདྨ་དབངཿ གསང་མཚན་གར་
དབང་འཇིགས་མེད་གླིངཿ རྟོགས་གྲོལ་དུས་མཉམ་ཐུགས་གཏེར་བདགཿ འཕགས་པས་རྗེས་སུ་བཟུང་བའི་རྟགསཿ ལག་གཡས་མཐིལ་ན་པདྨའི་སྤྱནཿ དབང་ཆེན་གསུང་གི་རིག་འཛིན་ཕྱིརཿ མཐེ་བོང་ཐུགས་སྲོག་ཧྱ་ཡིས་མཚནཿ རྟོགས་པ་ཀློང་དུ་གྱུར་པའི་རྟགསཿ ཚེམས་ལ་སྐྱེ་མེད་ཡི་གེ་ཨཿ སྙིང་རྗེ་ཆེ་ལ་རིག་པ་ཧུརཿ ཤེས་རབ་ཆེ་ཞིང་འཛིན་ཆགས་ཆུངཿ ཐུགས་སྒམ་ཚིག་བཙན་བློ་གྲོས་ཟབཿ ངེས་མེད་སྤྱོད་པ་ཅིར་ཡང་སྟོནཿ འཇིགས་པ་མེད་པའི་བརྟུལ་བཞུགས་ཅནཿ ཞུམ་མེད་སྣང་བ་ཟིལ་གྱིས་གནོནཿ དེ་ལ་ཐུགས་རྒྱུད་དངོས་གཏེར་རམཿ ཡང་ན་དགོངས་གཏེར་ཚུལ་དུ་འབེབསཿ དངོས་ཉམས་རྨི་ལམ་མ་ངེས་པརཿ ང་དང་ཞལ་མཇལ་དོན་དབང་བསྐུརཿ ཐུགས་རྒྱུད་དགོངས་པའི་བྱིན་རླབས་འཕོཿ པད་འབྱུང་ང་དང་རིག་འཛིན་ཉིདཿ དགོངས་པ་གཅིག་དང་དབྱངས་གཅིག་འགྱུརཿ ཐེག་ཀུན་དགོངས་པའི་ཀློང་ལ་ཤརཿ རིག་འཛིན་དཔའ་བོ་མཁའ་འགྲོ་ཡིསཿ བསྐུལ་མ་ཐེངས་གསུམ་དག་ཏུ་འོངཿ དེ་ཚེ་མི་བརྗེད་དྲན་པའི་གཟུངསཿ གཟེར་དྲུག་གནད་ཀྱི་ལྡེ་མིག་གིསཿ ཀློང་གསལ་དགོངས་པའི་གཏེར་ཁ་འབྱེདཿ བརྡ་རྟགས་སྙིང་མཛོད་སྒྲོམ་བུར་བསྐྱིལཿ པདྨ་ང་ཉིད་སྤྱི་བོར་སྒོམཿ འཛད་
མེད་ནམ་མཁའ་མཛོད་ཀྱི་བརྡཿ ཌཱཀྐི་གསང་བའི་བརྡ་གྲོལ་བཞིནཿ བཅས་བཅོས་ཕྲི་བསྣན་མེད་པར་བསྒྱུརཿ ལོ་བདུན་སྤིར་གྱི་ཁ་བཞིན་སྡོམསཿ སྤྲེལ་ལོ་སྤྲེལ་ཟླའི་ཚེས་བཅུ་ལཿ པདྨ་ང་དང་དངོས་ཞལ་མཇལཿ བར་ཆད་སེལ་ཞིང་བྱིན་གྱིས་རློབཿ དེ་ཚེ་ལས་ཅན་དག་པའི་འཁོརཿ ད་ལྟའི་འདུས་པར་བཅས་པ་རྣམསཿ རྒྱ་བོད་དབུས་གཙང་མ་ངེས་པརཿ ལ་ལ་ཆེ་ཚུལ་བླ་དཔོན་གཟུགསཿ ལ་ལ་འཁྲུལ་ཞིག་བྱ་བྲལ་དངཿ ཁ་ཅིག་དམངས་དང་ཐ་ཤལ་ཚུལཿ མ་འགགས་སྤྱོད་པ་ཅིར་ཡང་སྟོནཿ ཀུན་ཀྱང་ལྟེ་སྨེ་སྙིང་མཚན་སྤྲསཿ ལས་ཀྱི་དབང་གིས་འདུད་པ་འབྱུངཿ ཁྱད་པར་ད་ལྟའི་སྨོན་ལམ་མཐུསཿ ནམ་སྙིང་ཉང་བན་མཆོག་དབྱངས་དངཿ ལྷ་སྲས་སྤྲུལ་པས་ཆོས་སྒོ་འབྱེདཿ དེ་ཚེ་གདམས་པ་གསང་ཞིང་སྤེལཿ འོན་ཀྱང་ད་དུས་ཡབ་སྲས་རྣམསཿ ཐུགས་རྒྱུད་མཁའ་ལྟར་དག་ན་ཡངཿ བཙུན་མོའི་བསླུ་བྲིད་གཡོ་རྒྱུ་ཆེཿ སྡིག་བློན་སྣང་བ་འབྲིད་མཁས་པསཿ བདག་ཉིད་ཆེན་པོ་པདྨ་སོགསཿ སྤྲུལ་པའི་ལོ་པན་སྐྱེས་མཆོག་དངཿ ཟབ་མོའི་རྟེན་འབྲེལ་མང་འཕྱུགས་པསཿ ཕྱི་དུས་འགྲོ་དོན་དུས་བབ་ཚེཿ འགལ་རྐྱེན་རྣམ་པ་སྣ་ཚོགས་དངཿ ཁྱད་པར་
བདུད་བློན་དམ་སྲིའི་རིགསཿ རྗེས་འབྲང་རྣམ་འགྱུར་ཅིར་ཡང་རྫུཿ བཀའ་དྲིན་དམ་ཚིག་ཁྱད་དུ་གསོདཿ ཕྲ་མེན་དམར་རྒྱུན་སྤྲེལ་གདོད་མསཿ དང་པོར་གྲགས་སུ་རེ་ནས་འདུདཿ བར་དུ་དམ་ཚིག་ཆུ་ལ་འཕོཿ ཐ་མར་གྱོད་དང་མི་ཁ་གཡོཿ སྔགས་ཀྱི་སྲུང་མས་མ་སྐྱོབ་ནཿ ལོ་བརྒྱའི་ཚེ་ཡང་ཞག་པོར་བསྟུངསཿ ད་ལྟའི་ལས་ཅན་རྣམ་ལྔ་དངཿ ངང་ཚུལ་ཕོ་གྱོང་རྒྱལ་མོ་བཙུནཿ དབྱིངས་ཕྱུག་མཁའ་འགྲོ་ཨེ་ཀ་ཛསཿ ཆོས་སྲིད་རྟེན་འབྲེལ་ལེགས་ཚོགས་སྤེལཿ བཛྲ་རཏྣ་དྷརྨ་དབངཿ ཤྲཱི་ཨཱའ་ཡུར་ཛྙཱ་ནའི་མིངཿ དད་གུས་སྙིང་རྗེ་གཏོང་ཕོད་ཆེཿ རིགས་ལྔའི་གནས་སུ་སྨེ་བ་ཅནཿ དབུས་གཙང་ལྷོ་བྱང་སྟོད་སྨད་ནསཿ ཕོ་མོར་མ་ངེས་རིམ་བཞིན་འབྱུངཿ ཆོས་འདི་ཉམས་ལོངས་བརྒྱུད་པ་འཛིནཿ སོ་བདུན་ཀེག་ལ་གློ་བུར་འཚུབསཿ བཞི་བཅུ་ལོངས་པའི་ལྔ་གསུམ་མཚམསཿ ཕལ་ཆེར་དག་པའི་ཞིང་དུ་འགྲོཿ གཙུག་ལག་གསུམ་ལ་མཆོད་འབུལ་དངཿ སྒྲུབ་གནས་རྣམས་སུ་མེ་ཚོགས་སྐོངཿ རིགས་ལྔ་ཡེ་ཤེས་ཌཱཀྐི་ནིའིཿ བདེ་སྟོང་བཅུད་ལེན་དག་ལ་འབདཿ དམ་འཁོན་གྲིབ་ལ་ཤིན་ཏུ་གཟབསཿ དེ་ཚོ་བཟང་ངན་ཅི་བྱུང་ཡངཿ སུ་དང་ལྟ་སྤྱོད་མ་བསྟུན་པརཿ བློ་གཏད་པདྨ་ང་ལ་གྱིསཿ ཆོས་ཀུན་རྨི་ལམ་སྒྱུ་མར་སྦྱོངསཿ འོད་གསལ་དགོངས་པའི་
བརྟུལ་ཞུགས་བསྐྱེདཿ སྙེམས་འཕྲིགས་སེམས་ལ་ཐོག་བརྫིས་ཐོངཿ གཉན་ས་འགྲིམ་ཞིང་མེ་ཚོགས་དངཿ བསྐང་བཤགས་ཐུགས་དམ་གནད་ལ་གཟིརཿ བར་ཆད་བཟློག་འགྱུར་ཐ་ཚིག་ཡོདཿ རྟེན་འབྲེལ་དམ་ཚིག་མཐུན་གྱུར་ནཿ ལྔ་བཅུའི་བར་དུ་འཚོ་ཡང་སྲིདཿ དེ་བས་རིང་མིན་གདུལ་བྱ་ཡིཿ ཁ་རྗེ་བསོད་ནམས་དག་ལ་རགཿ དམ་ཉམས་ལོག་ལྟ་ཆེ་ན་ཡངཿ སྙན་པས་རྒྱལ་ཁམས་ཕལ་ལ་ཁྱབཿ ཉི་ཤར་སྦར་མོས་མི་ཁེབས་བཞིནཿ དུས་མཐར་རང་འོད་ལྷག་པར་གསལཿ བསྟན་པ་མཐའ་ནས་རྒྱས་པ་འབྱུངཿ གལ་ཏེ་ལུང་བསྟན་སྐྱེས་བུ་ཡངཿ མ་དག་བདུད་ཀྱིས་བློ་བསྒྱུར་ནསཿ ཟས་ནོར་ཆེད་དུ་དམ་ཚིག་གཏོངཿ མདུན་ནས་བཅོས་མའི་མོས་གུས་འབརཿ རྒྱབ་ནས་ལོག་ལྟའི་རྔ་བརྡུང་ནཿ གྱོ་མོའི་ཁྲོད་ན་ནོར་བུ་བཞིནཿ མ་ཚོགས་མཁའ་འགྲོ་ཡིད་ཕམ་ནསཿ འཇའ་ཚོན་དར་གྱི་ལམ་པོ་ལཿ ཁྱོད་ཉིད་དྲངས་ཏེ་བཞགས་ཐབས་མེདཿ སྐྱེ་འཆི་རྨི་ལམ་སྒྱུ་མ་ཙམཿ ཐེ་ཚོམ་ཡིད་གཉིས་མེད་པ་རུཿ རྔ་ཡབ་དཔལ་གྱི་རི་བོར་ཤོགཿ ཕ་བུ་འཕྲད་པའི་དགའ་སྟོན་སྐྱོངཿ ས་མ་ཡཿ ཞེས་གསུངས་ཡེ་ཤེས་མཚོ་རྒྱལ་མསཿ ཆོས་སྐུ་བྱང་ཆུབ་སེམས་ཀྱི་རྟེནཿ རང་བྱུང་ཤོག་སེར་ལྔ་ལྡན་ནངཿ མི་བརྗེད་
གཟུངས་ཀྱི་བརྡ་རིས་བཀོདཿ འོད་གསལ་སྙིང་མཛོད་སྒྲོམ་དུ་སྩལཿ སྨོན་ལམ་དབང་བསྐུར་རྒྱ་ཡིས་བཏབཿ ནམ་ཞིག་སྨོན་ལམ་དུས་བབ་ཚེཿ ཡེ་ཤེས་དབྱིངས་ཀྱི་མཁའ་འགྲོ་མསཿ བག་ཆགས་སད་པའི་ཆ་རྐྱེན་དུཿ ཀློང་བྱང་བརྡ་རིས་ལག་ཏུ་སྤྲོདཿ རྒྱུ་རྐྱེན་རྟེན་འབྲེལ་མ་འཛོམ་པརཿ གཏན་ལ་ཕབ་ཀྱང་བར་ཆད་རྒྱུཿ བརྡ་འགྲོལ་ལུང་གིས་བསྐུལ་བའི་ཚེཿ མཁའ་འགྲོ་ཚོགས་ཀྱིས་མཉེས་བྱས་ནསཿ གཞོམ་མེད་རྡོ་རྗེའི་དབྱངས་སུ་བསྒྱུརཿ ས་མ་ཡཿ རྒྱ་རྒྱ་རྒྱཿ གསང་རྒྱཿ གར་དབང་འཇིགས་མེད་གླིང་པས་མཁའ་འགྲོ་གསང་བའི་བརྡ་རིས་ནས་ཞལ་བཤུས་པ་བསྟན་དུ་མེད་པའི་སྙིང་བྱང་ཡིད་བཞིན་ནོར་བུའོ།། །།