ཡུམ་ཀ་བདེ་ཆེན་རྒྱལ་མོ་ལསཿ དཔའ་བོ་དཔའ་མོའི་བསུན་བཟློག
༂ ཡུམ་ཀ་བདེ་ཆེན་རྒྱལ་མོ་ལསཿ དཔའ་བོ་དཔའ་མོའི་བསུན་བཟློག་བཞུགསཿ ཡེ་ཤེས་མཁའ་འགྲོའི་སྐུ་ལ་འདུདཿ ལས་ཅན་དཔའ་བོ་དཔའ་མོ་ལཿ མཁའ་འགྲོའི་བསུན་བཟློག་བྱ་འདོད་ནཿ གཏོར་ཚོགས་འདུ་བྱ་གཞུང་བསྲང་ལཿ བཟླས་མཆོད་ཚོགས་སྐོང་བགྱིས་བའི་མཐརཿ དར་ལམ་མཁའ་འགྲོའི་མཆོད་གཏོར་བཤམཿ དབྱིངས་རང་སྣང་རྣམ་དག་འོག་མིན་དངཿ ཞིང་དག་པ་མཁའ་སྤྱོད་སྤྲུལ་པའི་གནསཿ ཡུལ་ཉེར་བཞིའི་དཔའ་པོ་མཁའ་འགྲོ་རྣམསཿ དེང་ཚོགས་ཀྱི་འདུ་བར་གཤེགས་སུ་གསོལཿ ཡོངས་སྣང་སྲིད་མཆོད་སྤྲིན་རྒྱ་མཚོ་དངཿ ཚོགས་བདེ་སྟོང་དངོས་བཤམས་ཡིད་སྤྲུལ་རྫསཿ དབྱིངས་དག་མཉམ་ནམ་མཁའི་མཛོད་དུ་འབུལཿ མ་མཁའ་འགྲོའི་དམ་ཚིག་ཉམས་ཆག་བསྐངཿ བདག་སྒྲུབ་མཆོག་བུ་ལ་དངོས་གྲུབ་སྩོལཿ དབྱིངས་སྲ་བའི་རང་བཞིན་སངས་རྒྱས་སྤྱནཿ ཤར་རྡོ་རྗེ་རིགས་ཀྱི་མཁའ་འགྲོ་འབུམཿ ཡོངས་ཞི་བའི་མཆོད་གཏོར་འདི་བཞེས་ལཿ ཤར་དར་ལམ་དཀར་པོའི་བསུན་མ་ཟློགཿ མེ་ལོངས་ཡེ་ཤེས་ངང་དུ་བཞུགསཿ དབྱིངས་མཉེན་པའི་རང་བཞིན་མཱ་མ་ཀཱིཿལྷོ་རིན་ཆེན་རིགས་གྱི་མཁའ་འགྲོ་འབུམཿ ཡོངས་རྒྱས་པའི་མཆོད་གཏོར་འདི་བཞེས་ལཿ ལྷོ་དར་ལམ་སེར་པོའི་བསུན་མ་ཟློགཿ མཉམ་ཉིད་ཡེ་ཤེས་ངང་དུ་བཞུགསཿ དབྱིངས་དྲོ་བའི་རང་བཞིན་གོས་དཀར་མོཿ ནུབ་པདྨ་རིགས་ཀྱི་མཁའ་འགྲོ་འབུམཿ ཡོངས་
དབང་གི་མཆོད་གཏོར་འདི་བཞེས་ལཿ ནུབ་དར་ལམ་དམར་པོའི་བསུན་མ་ཟློགཿ སོར་རྟོགས་ཡེ་ཤེས་ངང་དུ་བཞུགསཿ དབྱིངས་གཡོ་བའི་རང་བཞིན་དམ་ཚིག་སྒྲོལཿ བྱང་ལས་ཀྱི་རིགས་ཀྱི་མཁའ་འགྲོ་འབུམཿ ཡོངས་དྲག་པོའི་མཆོད་གཏོར་འདི་བཞེས་ལཿ བྱང་དར་ལམ་ལྗང་གུའི་བསུན་མ་ཟློགཿ བྱ་གྲུབ་ཡེ་ཤེས་ངང་དུ་བཞུགསཿ དབྱིངས་ནམ་མཁའི་རང་བཞིན་དབྱིངས་ཕྱུག་མཿ དབུས་སངས་རྒྱས་རིགས་ཀྱི་མཁའ་འགྲོ་འབུམཿ ཡོངས་མཆོག་གི་མཆོད་གཏོར་འདི་བཞེས་ལཿ དབུས་དར་ལམ་མཐིང་ཀའི་བསུན་མ་ཟློགཿ ཆོས་དབྱིངས་ཡེ་ཤེས་ངང་དུ་བཞུགསཿ ཉི་ཤུ་རྩ་བཞིའི་གནས་མཆོག་དངཿ འབུམ་ཕྲག་ཡངས་པའི་མཁའ་འགྲོའི་ཚོགསཿ གླུད་གཏོར་བཟང་པོ་འདི་བཞེས་ལཿ འདིར་བཞུགས་དམ་པའི་སྐྱེས་བུ་ཡིཿཚེ་འཕྲང་བར་གཅོད་དབྱིངས་སུ་སོལཿ བླ་དང་སྲོག་གི་ཀ་བ་ཚུགསཿ རྩ་ཐིག་རླུང་གི་རྒུད་པ་སོལཿ ཚེ་འགྱུར་བ་མེད་པ་རྡོ་རྗེའི་ཁྲིརཿ སྲོག་གཞོམ་གཞིག་བྲལ་བ་གཡུང་དྲུང་ལུསཿ བླ་གཟི་འོད་འབར་བ་ཉི་ཟླ་བཞིནཿ དུས་འཕོ་འགྱུར་མེད་པར་རྟག་བརྟན་གསོལཿ ཅེས་བརྗོད་གཏོར་གླུད་ཕྱོགས་ཕྱོགས་གཤེགསཿ མཁའ་འགྲོའི་བསུན་མ་བཟློག་པར་འགྱུརཿ ས་མ་ཡཿརྒྱ་རྒྱ་རྒྱཿ