མཁའ་འགྲོའི་གཡང་འགུགས་བསེ་རགས་རྫོང་ཐབས།
༂ མཁའ་འགྲོའི་གཡང་འགུགས་བསེ་རགས་རྫོང་ཐབས་བཞུགསཿ ནོར་སྒྲུབ་སྒབ་འདྲེ་མ་ནོན་ནཿ ཞབས་རྡོལ་སྣོད་དུ་བཅུད་བླུགས་འདྲཿདེ་ཕྱིར་ཐེའུ་བྲང་སྲིས་རྐུན་གཟུགསཿ གཅེར་བུ་ཐལ་མོ་བཟེད་པའི་མདུནཿ འབྲུ་སྣ་ཟས་སྣ་ཆངས་བུ་དངཿ སྦང་མ་ལ་ཕུག་ཐལ་ཟན་དངཿ ཆང་ཆུ་གོས་དུམ་སྔོ་ངད་སོགསཿ ངན་ངོན་ཟས་དང་ཏིང་ལོ་བསགཿ ཨ་ཀཱ་རོས་བརླབ་འདི་ལྟར་གྱེརཿ ཀྱཻ་སྲིད་གསུམ་འདི་ན་སུ་ཡང་རུངཿ མ་རིག་འཛིན་པའི་ཉེར་ལེན་ལསཿ དུག་ལྔའི་རང་གཟུགས་ཅན་དུ་འཁོརཿ བརྐུ་དང་སེར་སྣའི་རྒྱུ་མཐུན་ལསཿ ཐེའུ་བྲང་ཡི་དྭགས་བསེ་རགས་ནིཿ ནོར་ལ་གང་སྟོངས་བདག་པོ་སྟེཿཁྱོད་ལ་དེ་རིང་བརྔན་བྱིན་གྱིསཿ མི་ཡི་དཔལ་དང་ཕྱུགས་ཀྱི་གཡངཿ ནོར་གྱི་ཕྱྭ་དང་འབྲུ་ཡི་བཅུདཿ བཟའ་བཏུང་སྲིས་ལ་མ་བརྐུ་བརཿ རི་རབ་ཆེན་པོའི་བྱང་གི་ཕྱོགསཿ སྒྲ་མི་སྙན་པའི་གྲོང་ཁྱེར་ནཿ ཟས་ནོར་ལོངས་སྤྱོད་བསམ་མི་ཁྱབཿ ཕོངས་དང་མུ་གེའི་སྡུག་བསྔལ་མེདཿ དེ་རུ་ཁྱོད་ལ་ལམ་བསྟན་གྱིསཿ ཏིང་ལོས་ལམ་སྒྲོན་གྱིས་ལ་སོངཿ ཆངས་བུས་ལམ་རྒྱགས་གྱིས་ལ་སོངཿ འདི་རུ་སྡོད་པའི་གནས་མེད་ཀྱིསཿ ཡི་དམ་ལྷ་ཡི་མཐུ་བྱིན་དངཿ ཁྲོ་བོ་ཁྲོ་མོའི་ཚྭ་ཚྭ་ཡིསཿ ཁྱོད་ཀྱི་མིང་གཟུགས་བརླག་འགྱུར་ནཿ ད་ལྟ་ཉིད་དུ་ཕྱིར་
དེངས་ཤིགཿ གཙྪཿཞེས་རོལ་མོ་བཟློས་དང་ཐུན་གྱིས་བསྐྲད། སྲུང་འཁོར་བསྒོམ། འདི་ནི་ཤིན་ཏུ་གལ་ཆེ་བར་འདུག་གོ། འདི་གཡང་འགུགས་པ་ཚར་རྗེས། མ་མགོན་དང་ཚེ་རིང་མའི་བསྐང་གསོའི་མཇུག །གཡང་འགུགས་དངོས་གཞིའི་མགོར་གཏང་ངོ༌།། །།